CSlElizabeth - Ecclesiastes

Chapter 1

1:1  Глаголы Екклесиаста, сына Давидова, царя Израилева во Иерусалиме.

1:2  Суета суетствий, рече Екклесиаст, суета суетствий, всяческая суета.

1:3  Кое изюбилие человеку во всем труде его, имже трудится под солнцем?

1:4  Род преходит и род приходит, а земля во век стоит.

1:5  И восходит солнце и заходит солнце и в место свое влечется, сие возсиявая тамо.

1:6  Идет к югу и обходит к северу, обходит окрест, идет дух и на круги своя обращается дух.

1:7  Вси потоцы идут в море, и море несть насыщаемо: на место, аможе потоцы идут, тамо тии возвращаются ити.

1:8  Вся словеса трудна, не возможет муж глаголати: и не насытится око зрети, ни исполнится ухо слышания.

1:9  Что было, тожде есть, еже будет: и что было сотвореное, тожде имать сотворитися:

1:10  и ничтоже ново под солнцем. Иже возглаголет и речет: се, сие ново есть: уже бысть в вецех бывших прежде нас.

1:11  Несть память первых, и последним бывшым не будет их память с будущими на последок.

1:12  Аз Екклесиаст бых царь над Израилем во Иерусалиме

1:13  и вдах сердце мое, еже взыскати и разсмотрити в мудрости о всех бывающих под небесем: яко попечение лукаво даде Бог сыном человеческим, еже упражднятися в нем.

1:14  Видех всяческая сотворения сотворенная под солнцем: и се, вся суетство и произволение духа.

1:15  Развращенное не может исправитися, и лишение не может изчислитися.

1:16  Глаголах аз в сердцы моем, еже рещи: се, аз возвеличихся и умножих мудрость паче всех, иже быша прежде мене во Иерусалиме,

1:17  и сердце мое вдах, еже ведети премудрость и разум: и сердце мое виде многая, премудрость и разум, притчи и хитрость: уразумех аз, яко и сие есть произволение духа:

1:18  яко во множестве мудрости множество разума, и приложивый разум приложит болезнь.

Chapter 2

2:1  Рекох аз в сердцы моем: прииди убо, да тя искушу в веселии, и виждь во блазе: и се, такожде сие суетство.

2:2  Смеху рекох: погрешение, и веселию: что сие твориши?

2:3  И разсмотрих, аще сердце мое повлечет аки вино плоть мою: и сердце мое настави мя в мудрости, и еже удержати веселие, дондеже увижду, кое благо сыном человеческим, еже творят под солнцем в число дний живота своего.

2:4  Возвеличих творение мое: создах ми домы, насадих ми винограды,

2:5  сотворих ми вертограды и сады и насадих в них древес всякаго плода,

2:6  сотворих ми купели водныя, еже напаяти от них прозябение древес:

2:7  притяжах рабы и рабыни, и домочадцы быша ми: и стяжание скота, и стад много ми бысть, паче всех бывших прежде мене во Иерусалиме:

2:8  собрах ми злато и сребро и имения царей и стран, сотворих ми поющих и поющыя, и услаждения сынов человеческих, виночерпцы и виночерпицы.

2:9  И возвеличихся, и приложихся мудрости паче всех бывших прежде мене во Иерусалиме: и мудрость моя пребысть со мною.

2:10  И все, егоже просиста очи мои, не отях от них и не возбраних сердцу моему от всякаго веселия моего, яко сердце мое возвеселися во всяцем труде моем. И сие бысть часть моя от всего труда моего.

2:11  И призрех аз на вся творения моя, яже сотвористе руце мои, и на труд, имже трудихся творити. И се, вся суета и произволение духа, и несть изюбилие под солнцем.

2:12  И призрех аз видети мудрость, лесть и безумие: яко кто человек, иже пойдет вслед совета, елика сотвори в нем?

2:13  И видех аз, яко есть изюбилие мудрости паче безумия, якоже изюбилие света паче тмы:

2:14  мудраго очи его во главе его, а безумный во тме ходит: и уведех и аз, яко случай един случится всем им.

2:15  И рех аз в сердцы моем: якоже случай безумнаго, и мне случится: и вскую умудрихся? Аз тогда излишше глаголах в сердцы моем, яко и сие суета, понеже безумный от избытка глаголет:

2:16  яко несть памяти мудраго с безумным во век, зане уже во днех грядущих вся забвена быша: и како умрет мудрый с безумным?

2:17  И возненавидех живот, яко лукавно мне сотворение сотворенное под солнцем: понеже всяческая суета и произволение духа.

2:18  И возненавидех аз всяческая мира и труд мой, имже аз труждаюся под солнцем, яко оставляю его человеку будущему по мне.

2:19  И кто весть, мудр ли будет или безумен? И обладати ли имать всем трудом моим, имже трудихся и имже мудрствовах под солнцем? И сие же суета.

2:20  И обратихся аз отрещися сердцу моему о всем труде, имже трудихся под солнцем:

2:21  яко есть человек, егоже труд в мудрости и в разуме и в мужестве: и человек, иже не потрудися о нем, даст ему часть свою. И сие суета и лукавство велие.

2:22  Яко бывает человеку во всем труде его и в произволении сердца его, имже той труждается под солнцем,

2:23  яко вси дние его болезней и ярости попечение ему, ибо в нощи не спит сердце его. И сие же суета есть.

2:24  Несть благо человеку, но (разве) еже яст и пиет и еже покажет души своей благо в труде своем: и сие видех аз, яко от руки Божия есть:

2:25  яко кто яст и пиет кроме Его?

2:26  Яко человеку благу пред лицем Его даде мудрость и разум и веселие, согрешающему же даде попечение, еже прилагати и собирати, во еже дати благому пред лицем Божиим: яко и сие суета и произволение духа.

Chapter 3

3:1  Всем время и время всяцей вещи под небесем:

3:2  время раждати и время умирати, время садити и время исторгати сажденое,

3:3  время убивати и время целити, время разрушати и время созидати,

3:4  время плакати и время смеятися, время рыдати и время ликовати,

3:5  время разметати камение и время собирати камение, время обымати и время удалятися от обымания,

3:6  время искати и время погубляти, время хранити и время отреяти,

3:7  время раздрати и время сшити, время молчати и время глаголати,

3:8  время любити и время ненавидети, время брани и время мира.

3:9  Кое изюбилие творящаго, в нихже сам трудится?

3:10  Видех попечение всяческое, еже даде Бог сыном человеческим, еже пещися в нем.

3:11  Всяческая, яже сотвори, добра (суть) во время свое, ибо всякий век дал есть в сердце их, яко да не обрящет человек сотворения, еже сотвори Бог от начала и даже до конца.

3:12  Уразумех, яко несть благо в них, но токмо еже веселитися и еже творити благо в животе своем:

3:13  ибо всяк человек, иже яст и пиет и видит благое во всем труде своем, сие даяние Божие есть.

3:14  Разумех, яко вся, елика сотвори Бог, сия будут во век: к тем несть приложити и от тех несть отяти, и Бог сотвори, да убоятся от лица Его:

3:15  бывшее уже есть, и елика имут быти, уже быша, и Бог взыщет гонимаго.

3:16  И еще видех под солнцем место суда, тамо нечестивый, и место праведнаго, тамо благочестивый.

3:17  И рех аз в сердцы моем: праведнаго и нечестиваго судит Бог: яко время всяцей вещи и на всяцем сотворении тамо.

3:18  Рех аз в сердцы моем о глаголании сынов человеческих, яко разсудит их Бог: и еже показати, яко сии скоти суть:

3:19  ибо и тем якоже случай сынов человеческих и случай скотский, случай един им: якоже смерть того, тако и смерть сего, и дух един во всех: и что излишше имать человек паче скота? Ничтоже: яко всяческая суета.

3:20  Вся идут во едино место: вся быша от персти и вся в персть возвращаются.

3:21  И кто весть дух сынов человеческих, аще той восходит горе? И дух скотский, аще низходит той долу в землю?

3:22  И видех, яко несть благо, но токмо еже возвеселится человек в творениих своих, яко сия часть его: понеже кто приведет его видети то, еже будет по нем?

Chapter 4

4:1  И обратихся аз и видех вся оклеветания бывающая под солнцем: и се, слезы оклеветанных, и несть им утешающаго, и от руки клевещущих на ня крепость, и несть им утешающаго.

4:2  И похвалих аз всех умерших, иже умроша уже, паче живых, елицы живи суть доселе:

4:3  и благ паче обоих сих, иже еще не бысть, иже не виде всякаго сотворения лукаваго сотвореннаго под солнцем.

4:4  И видех аз весь труд и всяко мужество сотворения, яко сие ревность мужа от подруга своего. И сие суета и произволение духа.

4:5  Безумный объят руце свои и снеде плоти своя.

4:6  Благо есть исполнение горсти покоя, паче исполнения двою горстию труда и произволения духа.

4:7  И обратихся аз и видех суетство под солнцем:

4:8  есть един, и несть втораго, ни сына, ниже брата несть ему, и несть конца всему труду его, ниже око его насыщается богатства. И кому аз труждаюся и лишаю душу мою от благостыни? И сие суета и попечение лукавно есть.

4:9  Блази два паче единаго, имже есть мзда блага в труде их:

4:10  яко аще падется един от них, воздвигнет другий причастника своего: и горе тому единому, егда падет и не будет втораго воздвигнути его.

4:11  И аще уснета два, тепло има будет, а един како согреется?

4:12  И аще укрепится един, два станета противу ему: и вервь треплетена не скоро расторгнется.

4:13  Благ отрок нищь и мудр, паче стара царя и безумна, иже не разуме внимати еще:

4:14  яко из дому юзников изыдет царствовати, понеже и в царстве своем родися нищь.

4:15  Видех всех живущих, ходящих под солнцем, с юным вторым, иже востанет вместо его.

4:16  Несть конца всем людем, всем, иже пред ними быша, ибо последнии не возвеселятся о нем: яко и сие суета и произволение духа.

4:17  Сохрани ногу твою, егда аще идеши в дом Божий, и близ (буди) еже слушати: паче даяния безумных жертва твоя, понеже не ведят, яко творят зло.

Chapter 5

5:1  Не скор буди усты твоими, и сердце твое да не ускоряет износити слово пред лицем Божиим, яко Бог на небеси горе, ты же на земли долу: сего ради да будут словеса твоя мала:

5:2  яко приходит соние во множестве попечения, тако и глас безумнаго во множестве словес.

5:3  Аще обещаеши обет Богу, не умедли отдати его, яко несть хотения в безумных: ты убо, елика аще обещаеши, отдаждь.

5:4  Благо тебе еже не обещаватися, нежели обещавшуся тебе, не отдати.

5:5  Не даждь устнам твоим еже во грех ввести плоть твою, и да не речеши пред лицем Божиим, яко неведение есть: да не прогневается Бог о гласе твоем и растлит творения рук твоих:

5:6  яко во множестве соний и суетствия, (тако) и словеса многа, темже Бога бойся.

5:7  Аще обиду нищаго и расхищение суда и правды увидиши во стране, не дивися о вещи: яко высокий над высоким надзиратель, и высоцыи над ними,

5:8  и изюбилие земли над всем есть царь села возделанна.

5:9  Любяй сребро не насытится сребра: и кто насладится во множестве его плода? И сие суета.

5:10  Во множестве блага умножишася ядущии е: и кое мужество имущему е? Яко начало еже видети очима своима.

5:11  Сон сладок работающему, аще мало или много снесть: а насытившагося богатство не оставляет уснути.

5:12  Есть недуг, егоже видех под солнцем, богатство хранимо от стяжателя во зло ему:

5:13  и погибнет богатство оно в попечении лукавне: и роди сына, и несть в руце его ничтоже:

5:14  якоже изыде из чрева матере своея наг, возвратится ити, якоже и прииде, и ничтоже возмет от труда своего, да понесет в руце своей.

5:15  И сие зол недуг: якоже бо прииде, тако и отидет, и кая польза ему, яко трудится на ветр?

5:16  Ибо вси дние его во тме и плачи и в ярости мнозе, и в недузе и во гневе.

5:17  Се, видех аз благое, еже есть изрядно, еже ясти и пити и видети благостыню во всем труде своем, имже трудился бы под солнцем, в число дний живота своего, яже дал есть ему Бог, яко сие часть его:

5:18  ибо всякому человеку, емуже дал есть Бог богатство и имения, и власть даде ему ясти от того и прияти часть свою и возвеселитися о труде своем, сие дар Божий есть:

5:19  яко не много памятствовати имать дни живота своего, понеже Бог облагает его попеченьми в веселии сердца его.

Chapter 6

6:1  Есть лукавствие, еже видех под солнцем, и много есть над человеком:

6:2  муж, емуже даст Бог богатство и имение и славу, и несть лишаяй души своей от всех, ихже вожделеет, и не даст ему Бог власти от него ясти, яко чуждь муж ясти имать от него. И сие суета и недуг зол есть.

6:3  Аще родит муж сто (чад) и лета многа поживет, и мнози будут дние лет его, и душа его не насытится от благостыни, и погребения не бысть ему, рех: благ паче его изверг,

6:4  яко в суете прииде и во тму идет, и во тме имя его покрыется:

6:5  и солнца не виде, ниже разуме, покой сему паче того:

6:6  и поживе тысящу лет сугубо, и благостыни не виде: еда не во едино место вся идут?

6:7  Весь труд человечь во уста его, и душа его не исполнится.

6:8  Яко кое изюбилие (человеку) мудрому паче безумнаго? Понеже нищь позна ходити противу живота.

6:9  Благо видение очию паче ходящаго душею. И се суетствие и произволение духа.

6:10  Аще что бысть, уже именовася имя его, и познася, еже есть человек и не возможет судитися с крепчайшим паче себе:

6:11  яко суть словеса многа умножающая суету.

Chapter 7

7:1  Что излишше человеку, яко кто весть, что благо человеку в животе (его) число дний живота суетства его? И сотвори я в сени: яко кто возвестит человеку, что будет по нем под солнцем?

7:2  Благо имя паче елеа блага, и день смертный паче дня рождения его.

7:3  Благо ходити в дом плача, нежели ходити в дом пира, понеже сие конец всякому человеку, и живый даст благо в сердцы его.

7:4  Блага ярость паче смеха, яко во злобе лица ублажится сердце.

7:5  Сердце мудрых в дому плача, а сердце безумных в дому веселия.

7:6  Благо еже слышати прещение премудра, паче мужа слышащаго песнь безумных:

7:7  якоже глас терния под котлом, тако смех безумных. И сие суета.

7:8  Яко клевета льстит мудраго и погубляет сердце благородствия его.

7:9  Блага последняя словес паче начала его: благ терпеливый паче высокаго духом.

7:10  Не тщися в дусе своем яритися, яко ярость в недре безумных почиет.

7:11  Да не речеши: что бысть, яко дние прежднии беша блази паче сих? Яко не в мудрости вопросил еси о сем.

7:12  Блага мудрость с наследием, паче же видящым солнце:

7:13  яко в сени его мудрость, якоже сень сребра, и изюбилие разума премудрости оживляет, иже от нея.

7:14  Виждь творения Божия: яко кто может украсити, егоже аще Бог превратит?

7:15  В день благостыни (Его) живи во блазе и виждь в день зла: виждь, и с ним согласно сие сотвори Бог, о глаголании, да не обрящет человек за Ним ничтоже.

7:16  Всяческая видех во днех суетствия моего: есть праведный погибаяй во своей правде, и есть нечестивый пребываяй во своей злобе.

7:17  Не буди правдив вельми, ни мудрися излишше, да не когда изумишися.

7:18  Не нечествуй много и не буди жесток, да не умреши не во время свое.

7:19  Благо ти есть держатися сего, и от сего не оскверни руки твоея, яко боящымся Бога поспешатся вся.

7:20  Премудрость поможет мудрому паче десяти обладающих во граде:

7:21  яко несть человек праведен на земли, иже сотворит благое и не согрешит.

7:22  И во вся словеса, яже возглаголют нечестивии, не вложи сердца своего, да не услышиши раба своего кленуща тебе:

7:23  яко многажды возлукавнует на тя, и обхождении многими озлобит сердце твое, якоже и ты клял еси иныя (многия).

7:24  Вся сия искусих в мудрости: рех, умудрюся: и сия удалися от мене

7:25  далече паче неже бех, и бездны глубина, кто обрящет ю?

7:26  Обыдох аз, и сердце мое, еже разумети, еже разсмотрити, и еже взыскати мудрость и разум, и еже разумети нечестиваго безумие и ожесточение и лесть:

7:27  и обретох аз ю, и реку горчайшу паче смерти жену, яже есть ловитва, и сети сердце ея, узы в руку ея: благий пред лицем Божиим изимется от нея, а согрешаяй ят будет от нея.

7:28  Се, сие обретох, рече Екклесиаст: едину единою еже обрести помысл, еже взыска душа моя, и не обретох:

7:29  и человека единаго от тысящ обретох, а жены во всех сих не обретох: обаче се, сие обретох, еже сотвори Бог человека праваго, и сии взыскаша помыслов многих. Кто уведе мудрость? И кто весть разрешение глагола?

Chapter 8

8:1  Мудрость человека просветит лице его, а безстудный возненавиден будет лицем своим.

8:2  Уста царева сохрани, и о словеси клятвы Божия не скор буди.

8:3  От лица его пойдеши, не стани во словеси лукавне, яко все, еже (аще) восхощет, сотворит,

8:4  якоже царь обладаяй, и кто речет ему: что твориши?

8:5  Храняй заповедь не увесть глагола лукавна: и время суда весть сердце мудраго,

8:6  яко всяцей вещи есть время и суд: яко разум человека мног (есть) на нем,

8:7  яко несть ведящаго, что будущее: зане якоже будет, кто возвестит ему?

8:8  Несть человека владущаго духом, еже возбранити духу: и несть владущаго в день смерти, и несть посла в день брани: и не спасет нечестие сущаго в нем.

8:9  И все сие видех, и вдах сердце мое во все сотворение, еже сотворено есть под солнцем, вся, во еликих обладан есть человек над человеком, еже озлобити его.

8:10  И тогда видех нечестивыя во гробы внесены, и от святаго: и идоша и похвалени быша во граде, яко сице сотвориша. И сие суета.

8:11  Яко несть пререкания бывающаго творящым лукавое вскоре: сего ради уверися сердце сынов человеческих в них, еже сотворити лукавое.

8:12  Иже согреши, сотворил есть лукавое, оттоле, и от долготы их: ибо и вем аз, яко есть благо боящымся Бога, да боятся от лица Его,

8:13  и не будет благо нечестивому, и не продолжит дний в сени, иже несть бояйся от лица Божия.

8:14  Есть суета, яже сотворена есть на земли: яко суть праведнии, на нихже постизает яко творение нечестивых, и суть нечестивии, на нихже постизает яко творение праведных. Рех, яко и сие суета.

8:15  И похвалих аз веселие, яко несть благо человеку под солнцем, но токмо еже ясти и пити и еже веселитися: и то прибыток ему в труде его во днех живота его, ихже дал есть ему Бог под солнцем.

8:16  В нихже дах сердце мое, еже разумети мудрость и еже ведети попечение сотвореное на земли: яко и во дни и в нощи сна во очию своею несть видяй.

8:17  И видех вся творения Божия, яко не может человек изобрести творение сотвореное под солнцем: елика аще потрудится человек обрести, и не обрящет: и елика аще речет мудрый уразумети, не возможет обрести. Темже все сие вдах в сердце мое, и сердце мое все сие виде.

Chapter 9

9:1  Яко праведнии и мудрии и делания их в руце Божией, и любве же и ненависти несть ведяй человек: вся пред лицем их, суета во всех.

9:2  Случай един праведному и нечестивому, благому и злому, и чистому и нечистому, и жрущему и не жрущему: якоже благий, тако согрешаяй, якоже кленыйся, тако бояйся клятвы.

9:3  Сие лукаво во всяцем сотворенем под солнцем, яко случай един всем: и сердце сынов человеческих исполнися лукавствия, и прелесть в сердцах их и в животе их, и по сих к мертвым.

9:4  Понеже кто есть, иже приобщается ко всем живым? Есть надежда, яко пес живый, той благ паче льва мертва.

9:5  Понеже живии разумеют, яко умрут, мертвии же не суть ведущии ничтоже: и ктому несть им мзды, яко забвена есть память их,

9:6  и любовь их и ненависть их и рвение их уже погибе, и части несть им ктому во веки во всяцем творении под солнцем.

9:7  Прииди, яждь в веселии хлеб твой и пий во блазе сердцы вино твое, яко уже угодна Богу творения твоя.

9:8  Во всяко время да будут ризы твоя белы, и елей на главе твоей да не оскудеет.

9:9  И виждь житие с женою, юже возлюбил еси, во вся дни живота юности твоея, данныя ти под солнцем, вся дни суетствия твоего: яко сие часть твоя в животе твоем и в труде твоем, имже ты трудишися под солнцем.

9:10  Вся, елика аще обрящет рука твоя сотворити, якоже сила твоя, сотвори: зане несть сотворение и помышление и разум и мудрость во аде, аможе ты идеши тамо.

9:11  Обратихся и видех под солнцем, яко ни легким течение, ниже сильным брань, ниже самому мудрому хлеб, ниже разумным богатство, ниже ведущым благодать: яко время и случай случится всем сим.

9:12  Яко убо не разуме человек времене своего: якоже рыбы уловляемы во мрежи зле, и аки птицы уловляемы в сети: якоже сия, уловляются сынове человечестии во время лукаво, егда нападет на ня внезапу.

9:13  И сие видех, мудрость под солнцем, и велика есть во мне:

9:14  град мал, и мужей в нем мало, и приидет нань царь велик и окрест обляжет его, и соделает на него остроги велия,

9:15  и обрящет в нем мужа нищаго мудра, и сей спасет град мудростию своею, и человек не воспомяну мужа нищаго онаго.

9:16  И рех аз: блага мудрость паче силы, и мудрость нищаго уничижена, и словеса его не суть послушаема.

9:17  Словеса мудрых в покои слышатся, паче клича обладающих в безумии.

9:18  Блага мудрость паче орудий ратных: и согрешаяй един погубит благостыню многу.

Chapter 10

10:1  Мухи умершыя згнояют елеа сладость: честно малое мудрости паче славы велики безумия.

10:2  Сердце мудраго одесную его, сердце же безумнаго ошуюю его:

10:3  и в путь егда безумный идет, сердце его лишается, и яже помышляет, вся безумие суть.

10:4  Аще дух владеющаго взыдет на тя, места твоего не остави: яко изцеление утолит грехи велики.

10:5  Есть лукавство, еже видех под солнцем, аки невольно изыде от лица владеющаго:

10:6  вдан безумный в высоты велики, а богатии во смиренных сядут:

10:7  видех рабов на конех, и князей идущих яко рабов на земли.

10:8  Копаяй яму впадет в ню, и разоряющаго ограду угрызнет его змий.

10:9  Иземляй камение поболит от них, разсецаяй дрова беду приимет в них:

10:10  аще спадет сечиво, и сам лицем смятется: и силы укрепит, и изюбилие мужу мудрость.

10:11  Аще угрызнет змий не в шепте, и несть излишества обавающему.

10:12  Словеса уст премудраго благодать, устне же безумнаго потопят его:

10:13  начало словес уст его безумие, и последняя уст его прелесть лукава.

10:14  Безумный умножает словеса: не разуме человек, что бывшее и что будущее, что созади его, (и) кто возвестит ему?

10:15  Труд безумных озлобит их, иже не разуме ити во град.

10:16  Горе тебе, граде, в немже царь твой юн, и князи твои рано ядят.

10:17  Блаженна ты, земле, еяже царь твой сын свободных, и князи твои во время ядят в силе и не постыдятся.

10:18  В леностех смирится строп, и в празднестве рук прокаплет храмина.

10:19  Во смех творят хлеб и вино и елей, еже веселитися живущым: и сребра со смирением послушают всяческая.

10:20  И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое.

Chapter 11

11:1  Посли хлеб твой на лице воды, яко во множестве дний обрящеши его.

11:2  Даждь часть седмим и осмим, яко не веси, что будет лукаво на земли.

11:3  Аще исполнятся облацы дождя, на землю изливают: и аще падет древо на юг, и аще на север, на месте, идеже падет древо, тамо будет.

11:4  Блюдый ветра не сеет, и сматряяй во облацех не пожнет.

11:5  В нихже несть ведый, кии путь духа, якоже кости во чреве раждающия: тако не уразумееши дел Божиих, елика сотворит всяческая.

11:6  В заутрии сей семя твое, и в вечер да не оставляет рука твоя: яко не веси, кое произыдет сие или оно, и аще обоя вкупе благая.

11:7  И сладко свет, и благо очима зрети солнце:

11:8  яко аще и многа лета поживет человек, и о всех сих возвеселится, и помянет дни тмы, яко мнози будут: все грядущее суета.

11:9  Веселися, юноше, во юности твоей, и да ублажит тя сердце твое во днех юности твоея, и ходи в путех сердца твоего непорочен и не в видении очию твоею: и разумей, яко о всех сих приведет тя Бог на суд:

11:10  и отстави ярость от сердца твоего, и отрини лукавство от плоти твоея: яко юность и безумие суета.

Chapter 12

12:1  И помяни Сотворшаго тя во днех юности твоея, дондеже не приидут дние злобы твоея, и приспеют лета, в нихже речеши: несть ми в них хотения:

12:2  дондеже не померкнет солнце и свет, и луна и звезды, и обратятся облацы созади дождя:

12:3  в день, в оньже подвигнутся стражие дому, и развратятся мужие силы, и упразднятся мелющии, яко умалишася, и помрачатся зрящии во скважнех:

12:4  и затворят двери на торжищи, в немощи гласа мелющия, и востанет на глас птицы, и смирятся вся дщери песни:

12:5  и на высоту узрят, и ужас на пути, и процветет амигдал, и отолстеют прузие, и разрушится каппарис: яко отиде человек в дом века своего, и обыдоша на торжищи плачущии:

12:6  дондеже не превратится уже сребряное, и не сокрушится повязка златая, и сокрушится водонос у источника, и сломится колесо в колии.

12:7  И возвратится персть в землю, якоже бе, и дух возвратится к Богу, иже даде его.

12:8  Суета суетствий, рече Екклесиаст, всяческая суета.

12:9  И лишшее, яко бысть Екклесиаст мудр, и яко научи разуму человека: и ухо изследит красоту притчей.

12:10  Много взыска Екклесиаст, еже обрести словеса хотения, и написаное правости, словеса истины.

12:11  Словеса мудрых якоже остны воловии и якоже гвоздие вонзено, иже от сложений дани быша от пастыря единаго.

12:12  И множае от них, сыне мой, хранися: творити книги многи несть конца, и учение многое труд плоти.

12:13  Конец слова, все слушай: Бога бойся и заповеди Его храни, яко сие всяк человек:

12:14  яко все творение приведет Бог на суд о всяцем погрешении, аще благо и аще лукаво.