Kekchi - Ecclesiastes

Chapter 1

1:1  Aˈan aˈin ra̱tin jun li cui̱nk naxnau a̱tinac chi us. Li cui̱nk aˈan, aˈan li ralal laj David, li quicuan chokˈ rey aran Jerusalén.

1:2  Aˈin li quixye chirix li cˈaˈru cuan saˈ ruchichˈochˈ: Chixjunil li cˈaˈak re ru cuan saˈ ruchichˈochˈ, ma̱cˈaˈ na-oc cuiˈ. Chixjunil li cˈaˈru nakacˈoxla xba̱nunquil, ma̱cˈaˈ rajbal.

1:3  ¿Cˈaˈru tixra li cui̱nk nak tixcamsi rib chi trabajic rajlal cutan?

1:4  Cuan li toj yo̱queb chi yoˈla̱c ut cuan yo̱queb chi ca̱mc. Abanan li ruchichˈochˈ incˈaˈ najala.

1:5  Rajlal ekˈela na-el li sakˈe ut rajlal ecuu na-oc cuiˈchic re nak naru ta̱e̱lk cuiˈchic cuulaj. Junelic joˈcan naxba̱nu.

1:6  Joˈcan ajcuiˈ li ikˈ. Nanumeˈ saˈ li sur ut nanumeˈ ajcuiˈ saˈ li norte. Li bar ac xnumeˈ cuiˈ, nanumeˈ cuiˈchic. Ut joˈcan rajlal naxba̱nu.

1:7  Ut eb li nimaˈ nequeˈbe̱c rok ut nequeˈxic saˈ li palau. Abanan li palau incˈaˈ nanujac xbaneb. Li bar nequeˈnumeˈ cuiˈ rajlal, aran cuiˈchic nequeˈnumeˈ li haˈ.

1:8  Nocolub riqˈuin chixjunil li cˈaˈak re ru aˈin, ut ma̱ ani nequeˈru xyebal chanru nak nequeˈtitzˈ xban. Usta nabal nequeˈrabi ut usta nabal nequeˈril, abanan incˈaˈ nequeˈcˈojla xchˈo̱leb.

1:9  ¿Ma cuan ta biˈ cˈaˈak re ru toj acˈ saˈ ruchichˈochˈ anakcuan? Ma̱cˈaˈ. Chixjunil li cˈaˈru cuan anakcuan, ac cuan ajcuiˈ chak junxil. Ma̱cˈaˈ cˈaˈru toj xyi̱baman anakcuan xban nak ac yi̱banbil chak junxil.

1:10  ¿Ma cuan ta biˈ junak naru tixye, “Aˈin toj acˈ?” Incˈaˈ naru naxye chi joˈcan xban nak chixjunil li cˈaˈru cuan anakcuan, ac cuan ajcuiˈ chak junxil chiku la̱o.

1:11  Chixjunil li cˈaˈak re ru ac xnumeˈ, ac xsach saˈ xchˈo̱leb. Joˈcan ajcuiˈ chixjunil li cˈaˈru talajcha̱lk mokon, ta̱sachk ajcuiˈ saˈ xchˈo̱leb.

1:12  La̱in li ninnau a̱tinac chi cha̱bil. La̱in quincuan chokˈ xreyeb laj Israel aran Jerusalén.

1:13  Xban nak cuan innaˈleb la̱in, quinqˈue inchˈo̱l chixtzolbal ut chixsiqˈuinquil xya̱lal chixjunil li cˈaˈru nacˈulman saˈ ruchichˈochˈ. Kˈaxal cau li i̱k quixqˈue li Dios saˈ xbe̱neb li cui̱nk re teˈxba̱nu.

1:14  Riqˈuin aˈin quinqˈue retal nak chixjunil li na-uxman saˈ ruchichˈochˈ, ma̱cˈaˈ na-oc cuiˈ. Junes rahil chˈo̱lej naxqˈue.

1:15  Chanchan junak li cˈaˈru yocos rix incˈaˈ naru xti̱cobresinquil rix. Malaj ut joˈ junak li cˈaˈak re ru incˈaˈ tzˈakal re ru incˈaˈ naru xqˈuebal saˈ ajl.

1:16  La̱in quinye saˈ inchˈo̱l nak kˈaxal nim incuanquil ut kˈaxal cuan innaˈleb chiruheb li queˈcuan chokˈ rey aran Jerusalén xbe̱n cua chicuu la̱in. Ut quinqˈue inchˈo̱l chixtaubal nabal chic innaˈleb.

1:17  Quinkˈaxtesi cuib chixtaubal nabal chic li naˈleb li cha̱bil. Ut quinqˈue ajcuiˈ inchˈo̱l chixtaubal li naˈleb li incˈaˈ us li ma̱cˈaˈ na-oc cuiˈ. Abanan quinqˈue retal nak chixjunil aˈan ma̱cˈaˈ na-oc cuiˈ. Junes rahil chˈo̱lej naxqˈue.

1:18  Li ani naxsicˈ nabal lix naˈleb nacuan nabal lix chˈaˈajquilal, xban nak li ani cuan nabal xnaˈleb, nabal ajcuiˈ li raylal naxcˈul.

Chapter 2

2:1  Ut quinye cuiˈchic saˈ inchˈo̱l: —Tinyal xba̱nunquil li cˈaˈak re ru re ta̱sahokˈ saˈ inchˈo̱l ut tincua̱nk chi ma̱cˈaˈ tincˈoxla, chanquin. Abanan xinqˈue ajcuiˈ retal nak aˈan ma̱cˈaˈ na-oc cuiˈ.

2:2  Joˈcan nak quinqˈue retal nak li seˈec, aˈan yal to̱ntil naˈleb. Ut li sahil chˈo̱lej saˈ ruchichˈochˈ ma̱cˈaˈ na-oc cuiˈ.

2:3  Xban nak junes xsicˈbal innaˈleb yo̱quin, quincˈoxla nak tintau xsahil inchˈo̱l riqˈuin li cala̱c. Joˈcan nak quin-oc chi ucˈac re rilbal ma aˈan li us tixba̱nu li cui̱nk joˈ najtil ta̱cua̱nk saˈ ruchichˈochˈ.

2:4  Nabal li cˈanjel quinba̱nu. Nabaleb li cab quinyi̱b chokˈ cue. Ut quicuau ajcuiˈ li uvas.

2:5  Ut quinyi̱b ajcuiˈ xnaˈajeb li cuacui̱mk ut quicuau nabal pa̱y ru li cheˈ li nau̱chin. Ut quinyi̱b ajcuiˈ xnaˈaj li cuutzˈuˈuj ut quicuau li utzˈuˈuj aran.

2:6  Ut quinyi̱b ajcuiˈ nabal xnaˈajeb li haˈ re xtˈakresinquil li acui̱mk li quicuau.

2:7  Nabaleb inlokˈbil mo̱s joˈ cui̱nk joˈ ixk, ut cuanqueb ajcuiˈ inmo̱s queˈyoˈla saˈ li cuochoch. Queˈcuan nabal incuacax ut nabaleb lin carner. La̱in li nabal cˈaˈru cue chiruheb li rey li queˈcuan Jerusalén xbe̱n cua chicuu la̱in.

2:8  Quinchˈutub li plata ut li oro li queˈxqˈue cue li rey ut li jalan xtenamiteb. Nabaleb laj bichanel li nequeˈqˈuehoc xsahil inchˈo̱l, joˈ cui̱nk joˈ ixk. Ut nabal pa̱y ru li cuajb li nequeˈxchˈeˈ re xqˈuebal xsahil inchˈo̱l. Ut nabaleb ajcuiˈ li ixk queˈcuan cuiqˈuin re xqˈuebal xsahil inchˈo̱l.

2:9  La̱in li rey li kˈaxal nim incuanquil chiruheb chixjunileb li rey li queˈcuan Jerusalén. Usta kˈaxal nim incuanquil, abanan incˈaˈ quintzˈekta̱na lin naˈleb.

2:10  Chixjunil li sahil chˈo̱lej li quicuaj, quinba̱nu. Ma̱ jun sut incˈaˈ ta quinba̱nu li cˈaˈru quinrahi ru. Ut quisahoˈ saˈ inchˈo̱l riqˈuin lin cˈanjel li quinba̱nu. Li sahil chˈo̱lej quincˈul, aˈan re̱kaj li cˈanjel quinba̱nu.

2:11  Nak quin-oc chi cˈoxlac chirix li cˈanjel li quinba̱nu, quinqˈue retal nak ma̱cˈaˈ na-oc cuiˈ li cˈanjel li quinba̱nu. Caˈaj cuiˈ raylal naxqˈue. Riqˈuin aˈin nacˈutun nak ma̱cˈaˈ xinra chirix li cˈanjel li xinba̱nu saˈ ruchichˈochˈ.

2:12  Chirix aˈin quin-oc chi cˈoxlac chirix li naˈleb li cha̱bil ut chirix li naˈleb li incˈaˈ us, li ma̱cˈaˈ na-oc cuiˈ. ¿Cˈaˈru tixba̱nu li rey li ta̱oc nak ma̱ anihakin chic la̱in? Ma̱cˈaˈ. Tixba̱nu joˈ xinba̱nu la̱in.

2:13  La̱in xinqˈue retal nak kˈaxal us li cha̱bil naˈleb chiru li naˈleb ma̱cˈaˈ na-oc cuiˈ, joˈ li cutan kˈaxal us chiru li kˈojyi̱n.

2:14  Li ani cuan xnaˈleb naxnau cˈaˈru ta̱cha̱lk saˈ xbe̱n. Ut li ma̱cˈaˈ xnaˈleb incˈaˈ naxnau cˈaˈru ta̱cha̱lk saˈ xbe̱n. Abanan juntakˈe̱t tixcˈul li cuan xnaˈleb riqˈuin li ma̱cˈaˈ xnaˈleb.

2:15  Ut quinye saˈ inchˈo̱l: —Cui la̱in li cuan innaˈleb tincˈul joˈ tixcˈul li ma̱cˈaˈ xnaˈleb, ¿cˈaˈ ta cuiˈ ru aj e nak cuan innaˈleb?— Joˈcan nak quinye nak chixjunil li cˈaˈru nakaba̱nu ma̱cˈaˈ na-oc cuiˈ.

2:16  Nak telajeˈnumekˈ li cutan ma̱ ani chic ta̱cˈoxla̱nk re li cuan xnaˈleb joˈ ajcuiˈ li ma̱cˈaˈ xnaˈleb. Ta̱sachk ban saˈ xchˈo̱leb chi junaj cua. Ta̱ca̱mk li cuan xnaˈleb ut ta̱ca̱mk ajcuiˈ li ma̱cˈaˈ xnaˈleb.

2:17  Joˈcan nak xicˈ chic nacuil lin yuˈam arin saˈ ruchichˈochˈ xban nak chixjunil li na-uxman arin saˈ ruchichˈochˈ junes chˈaˈajquilal naxqˈue saˈ inbe̱n. Chixjunil li na-uxman, ma̱cˈaˈ na-oc cuiˈ. Junes raylal naxqˈue.

2:18  Ut xicˈ ajcuiˈ quicuil li cˈanjel li quinba̱nu saˈ ruchichˈochˈ xban nak quinnau nak ta̱cana̱k chokˈ re li ta̱oc chokˈ cue̱kaj.

2:19  Ma̱ ani nanaˈoc re ma cuan xnaˈleb malaj ut ma̱cˈaˈ li ta̱oc chokˈ cue̱kaj. Incˈaˈ ninnau ma cuan xnaˈleb li ta̱e̱chani̱nk re li cˈaˈru cue li xinqˈue inchˈo̱l xcˈanjelanquil riqˈuin lin naˈleb. Joˈcan nak chixjunil li cˈaˈru xinba̱nu, ma̱cˈaˈ na-oc cuiˈ.

2:20  Ra raj chic quicuecˈa nak quinqˈue retal nak cau quincˈanjelac saˈ ruchichˈochˈ chi ma̱cˈaˈ rajbal.

2:21  Joˈcaˈin li cˈanjelac saˈ ruchichˈochˈ. Li cui̱nk nacˈanjelac chi cau ut cuan xnaˈleb chixcˈoxlanquil chanru tixba̱nu. Abanan, nak nacam naxcanab chixjunil li quixba̱nu chokˈ re jalan li moco xcˈulub ta xcˈulbal xban nak incˈaˈ xcˈanjela rix. Joˈcan nak li cˈanjel li naxba̱nu nacana chi ma̱cˈaˈ rajbal.

2:22  Riqˈuin aˈin nacˈutun nak li cui̱nk ma̱cˈaˈ naxra nak naxcamsi rib chi cˈanjelac saˈ ruchichˈochˈ.

2:23  Nak li cui̱nk cuan saˈ ruchichˈochˈ junes raylal naxcˈul ut junes chˈaˈajquilal. Incˈaˈ nahilan chiru kˈojyi̱n xban li cˈoxlac. Chixjunil aˈin ma̱cˈaˈ na-oc cuiˈ.

2:24  Li cˈaˈru us tixba̱nu li cui̱nk, aˈan cuaˈac ut ucˈac ut xyalbal xsahil li cˈaˈru tixcˈanjela. Ut la̱in xinqˈue retal nak chixjunil li cˈaˈru cuan ke li Dios naqˈuehoc re.

2:25  ¿Ani ta biˈ ta̱ru̱k ta̱cuaˈak ut ta̱sahokˈ saˈ xchˈo̱l cui ta li Dios incˈaˈ tixqˈue li cˈaˈru re?

2:26  Li Dios naxqˈue xnaˈleb li ani nacuan saˈ ti̱quilal ut naxqˈue xsahil xchˈo̱l ut naxtenkˈa re nak tixtau ru li xya̱lal. Abanan laj ma̱c naxcanab chi cˈanjelac chi cau re nak tixxoc nabal li cˈaˈru re, ut ta̱qˈuehekˈ re jalan li cuan saˈ ti̱quilal chiru li Dios. Joˈcan ajcuiˈ aˈin, ma̱cˈaˈ na-oc cuiˈ. Junes raylal naxqˈue.

Chapter 3

3:1  Cuan li ho̱nal nak nacˈulman chixjunil li cˈaˈak re ru saˈ li ruchichˈochˈ aˈin.

3:2  Cuan li ho̱nal re li yoˈla̱c ut cuan li ho̱nal re li ca̱mc. Cuan xkˈehil li a̱uc, ut cuan ajcuiˈ xcutanquil lix michˈbal li a̱ubil.

3:3  Cuan li ho̱nal re camsi̱nc ut cuan li ho̱nal re banoc. Cuan xcutanquil li sachoc, ut cuan ajcuiˈ xcutanquil xcuaclesinquil cuiˈchic li ac tˈanenak.

3:4  Cuan li ho̱nal re ya̱bac, ut cuan li ho̱nal re seˈec. Cuan li ho̱nal re rahil chˈo̱lej, ut cuan xcutanquil li ninkˈei̱c.

3:5  Cuan xcutanquil li paji̱nc pec, ut cuan xcutanquil re xchˈutubanquil li pec. Cuan li ho̱nal nak naru tixkˈalu rib li junju̱nk, ut cuan ajcuiˈ li ho̱nal nak incˈaˈ naru naxkˈalu rib li junju̱nk.

3:6  Cuan xcutanquil li sicˈoc, ut cuan li ho̱nal re sachoc. Cuan li ho̱nal re xococ, ut cuan li ho̱nal re tzˈekoc.

3:7  Cuan li ho̱nal re pejoc tˈicr, ut cuan li ho̱nal re xiti̱nc. Cuan li ho̱nal re a̱tinac, ut cuan li ho̱nal nak incˈaˈ naru a̱tinac.

3:8  Cuan li ho̱nal re rahoc, ut cuan li ho̱nal re tzˈekta̱na̱nc. Cuan xcutanquil li pletic riqˈuin junak tenamit, ut cuan xcutanquil li cua̱nc saˈ usilal riqˈuin junak tenamit.

3:9  ¿Ma cuan ta biˈ cˈaˈru naxra li cui̱nk nak naxcamsi rib chi cˈanjelac?

3:10  La̱in xinqˈue retal nak kˈaxal cau li cˈanjel li quixqˈue li Dios saˈ xbe̱neb li cui̱nk re teˈxba̱nu.

3:11  Li Dios naxyi̱b chixjunil chi cha̱bil saˈ xkˈehil joˈ naraj aˈan. Xqˈue saˈ li kachˈo̱l xra̱bal ru xnaubal li cˈaˈru ta̱cˈulma̱nk. Abanan incˈaˈ nakatau ru chixjunil li cˈaˈru quixba̱nu chak li Dios saˈ xticlajic toj chalen saˈ rosoˈjic.

3:12  La̱in ninnau nak li cˈaˈru us tixba̱nu li cui̱nk, aˈan nak ta̱sahokˈ saˈ xchˈo̱l ut tixba̱nu li us nak toj cua̱nk saˈ ruchichˈochˈ.

3:13  Ut ninnau ajcuiˈ nak yal kama̱tan xban li Dios nak nococuaˈac ut noco-ucˈac ut nakayal xsahil li cˈaˈru nakacˈanjela.

3:14  Ut ninqˈue ajcuiˈ retal nak chixjunil li naxba̱nu li Dios ta̱cua̱nk chi junelic. Chixjunil li cˈaˈru quixba̱nu incˈaˈ naru xqˈuebal xtzˈakob chi moco naru xjepbal. Li Dios quixba̱nu chi joˈcaˈin re nak chixjunileb teˈxxucua ru.

3:15  Ma̱cˈaˈ ta̱cˈulma̱nk chi incˈaˈ ta ac xcˈulman junxil. Ma̱cˈaˈ cˈaˈru cuan chi incˈaˈ ta ac cuan ajcuiˈ chak junxil. Li Dios naba̱nun re, nak nacˈulman chi joˈcaˈin.

3:16  La̱in ninqˈue retal nak saˈ ruchichˈochˈ junes raylal ut ma̱usilal nequeˈxba̱nu saˈ eb li naˈajej li nequeˈrakoc cuiˈ a̱tin. Aran raj nequeˈrakoc a̱tin saˈ ti̱quilal.

3:17  Joˈcan nak quinye saˈ inchˈo̱l: —Li ani ti̱c xchˈo̱l ta̱rakekˈ a̱tin saˈ xbe̱n xban li Dios, ut ta̱rakekˈ ajcuiˈ a̱tin saˈ xbe̱n li naxba̱nu ma̱usilal xban nak ac xakabanbil li ho̱nal aˈan xban li Dios nak ta̱rakekˈ a̱tin saˈ kabe̱n riqˈuin li cˈaˈru nakaba̱nu ut riqˈuin li cˈaˈru nakacˈul.—

3:18  Quinye ajcuiˈ saˈ inchˈo̱l: —Li Dios yo̱ chixba̱nunquil reheb chi joˈcan yal re xyalbal rixeb ut re ajcuiˈ xcˈutbal chiruheb nak chanchaneb li xul.—

3:19  Relic chi ya̱l nak eb li cui̱nk ut eb li xul juntakˈe̱t nequeˈxcˈul. Li xul nacam. Joˈcaneb ajcuiˈ eb li cristian nequeˈcam. Junaj ajcuiˈ li ikˈ naxmusikˈa li xul riqˈuineb li cristian. Moco kˈaxal ta us li cui̱nk chiru li xul xban nak chixjunil li cuan saˈ ruchichˈochˈ ma̱cˈaˈ na-oc cuiˈ.

3:20  Nak nequeˈcam li xul nequeˈsukˈi chˈochˈ. Joˈcan ajcuiˈ li cristian. Nak nequeˈcam nequeˈsukˈi chˈochˈ. Chˈochˈ oquenakeb ut nak teˈca̱mk, nequeˈsukˈi cuiˈchic chˈochˈ.

3:21  ¿Ma cuan ta biˈ junak nanaˈoc re chi tzˈakal nak lix musikˈeb li cristian nequeˈxic saˈ choxa ut lix musikˈ li xul nequeˈosoˈ rubel chˈochˈ?

3:22  Riqˈuin aˈin ninqˈue retal nak li us tixba̱nu li cui̱nk, aˈan nak ta̱sahokˈ saˈ xchˈo̱l riqˈuin lix cˈanjel xban nak aˈan li tento tixba̱nu. Ut ma̱ ani ta̱ru̱k ta̱cˈamok chak re chi rilbal li cˈaˈru ta̱cˈulma̱nk mokon xban nak ac camenak chic.

Chapter 4

4:1  Ut quinqˈue ajcuiˈ retal chixjunil li ra xi̱cˈ li nequeˈxba̱nu saˈ ruchichˈochˈ. Eb li rahobtesinbileb yo̱queb chi ya̱bac xban li raylal nequeˈxcˈul. Ut ma̱ ani nacˈojoban xchˈo̱leb. Eb li nequeˈrahobtesin reheb cuanqueb xcuanquil saˈ xbe̱neb. Ut ma̱ ani natenkˈan reheb li yo̱queb chi cˈuluc raylal.

4:2  Joˈcan nak quinye: —Us xak reheb li ac camenakeb. Eb aˈan saheb saˈ xchˈo̱leb chiruheb li toj yoˈyo̱queb saˈ ruchichˈochˈ.—

4:3  Abanan kˈaxal cuiˈchic us chokˈ reheb li toj ma̱jiˈ nequeˈyoˈla, xban nak toj ma̱jiˈ nequeˈril li ma̱usilal li na-uxman saˈ ruchichˈochˈ.

4:4  Ut quinqˈue ajcuiˈ retal nak li ani nacˈanjelac chi cha̱bil ut chi cau, aˈan nacakali̱c. Ut chixjunil aˈin ma̱cˈaˈ na-oc cuiˈ. Junes raylal naxqˈue.

4:5  Li cui̱nk li ma̱cˈaˈ xnaˈleb naxkˈalu li rukˈ saˈ rochoch. Ma̱cˈaˈ cuan re xban nak incˈaˈ nacˈanjelac.

4:6  Us nak naxba̱nu chi joˈcan. Us nak kˈalkˈo rukˈ saˈ rochoch chiru nak tixcamsi rib chi cˈanjelac chi ma̱cˈaˈ rajbal xban nak aˈan junes raylal naxqˈue.

4:7  Ut quinqˈue ajcuiˈ retal nak cuan cuiˈchic cˈaˈak re ru na-uxman saˈ ruchichˈochˈ li ma̱cˈaˈ na-oc cuiˈ.

4:8  Junak cui̱nk ma̱ ani cuan re, ma̱cˈaˈ rami̱g, chi moco ralal xcˈajol, chi moco cuan ras ut ri̱tzˈin. Li cui̱nk aˈan incˈaˈ nahilan chi cˈanjelac chi moco nahilan chixcˈoxlanquil lix biomal. Incˈaˈ naxcˈoxla cˈaˈut nak naxcamsi rib chi cˈanjelac chi moco naxcˈoxla cˈaˈut nak incˈaˈ naxyal xsahil li cˈaˈru naxcˈanjela. Joˈcan nak ma̱cˈaˈ rajbal nak tixcamsi rib junak chi cˈanjelac.

4:9  Kˈaxal us nak teˈcˈanjelak cuib, chiru nak ta̱cˈanjelak junak xjunes xban nak cui teˈcˈanjelak saˈ cuibal us ta̱e̱lk lix cˈanjeleb chiruheb.

4:10  Cui li jun ta̱tˈanekˈ, li jun chic tixtenkˈa chi cuacli̱c. Ra chokˈ re li nacuan xjunes xban nak cui ta̱tˈanekˈ, ma̱ ani ta̱tenkˈa̱nk re chi cuacli̱c.

4:11  Joˈcan ajcuiˈ cui cuanqueb cuib teˈoc chi cua̱rc chi lakˈlo, teˈxkˈixna rib saˈ cuibal. Aban cui jun ajcuiˈ ta̱oc chi cua̱rc xjunes, ¿chan ta cuiˈ ru nak tixkˈixna rib xjunes?

4:12  Cui jun ajcuiˈ ta̱pletik, naru teˈnumta̱k saˈ xbe̱n. Abanan cui cuibeb, naru teˈxcuy xsumenquil. Joˈcan ajcuiˈ li cˈam li oxib ru naxcuy. Incˈaˈ natˈupeˈ saˈ junpa̱t.

4:13  Kˈaxal us junak al toj sa̱j cuan xnaˈleb, usta nebaˈ, chiru junak rey ac che̱c, ma̱cˈaˈ xnaˈleb ut incˈaˈ naraj naqˈueheˈ xnaˈleb.

4:14  Junak sa̱j al naru ta̱oc chokˈ rey, usta saˈ tzˈalam ta̱e̱lk chak malaj ut saˈ nebaˈil.

4:15  Chixjunileb li tenamit teˈoque̱nk chirix li sa̱j al li ta̱oc chokˈ re̱kaj li rey.

4:16  Kˈaxal cuiˈchic nabaleb li tenamit li queˈoquen chirix nak qui-oc chokˈ rey. Abanan li tenamit li teˈcua̱nk mokon incˈaˈ chic sahakeb xchˈo̱l riqˈuin. Joˈcan ajcuiˈ aˈin ma̱cˈaˈ na-oc cuiˈ. Junes raylal naxqˈue.

Chapter 5

5:1  Nak texxic saˈ lix templo li Dios cheqˈuehak retal chi us chanru le̱ naˈleb. Incˈaˈ te̱qˈue e̱chˈo̱l xqˈuebal li cˈatbil mayej joˈ nequeˈxba̱nu li ma̱cˈaˈeb xnaˈleb. Eb aˈan incˈaˈ nequeˈxqˈue retal nak incˈaˈ us yo̱queb xban nak incˈaˈ nequeˈxtau ru li xya̱lal li yo̱queb chixba̱nunquil. Cheqˈuehak ban e̱chˈo̱l chixtzolbal li xya̱lal.

5:2  Moco yalak cˈaˈru ta te̱ye chi incˈaˈ te̱cˈoxla chi us. Incˈaˈ tex-oc xyechiˈinquil re li Dios li cˈaˈru incˈaˈ naru te̱qˈue xban nak li Dios saˈ choxa cuan ut la̱ex saˈ ruchichˈochˈ cuanquex. Cheba̱nuhak cue̱nt re nak incˈaˈ tex-a̱tinak nabal.

5:3  Incˈaˈ us nak yo̱kex chi cˈoxlac chirix li cˈaˈak re ru, xban nak cui yo̱kex chi cˈoxlac, yalak cˈaˈru tixcˈut rib che̱ru saˈ le̱ matcˈ. Ut cui junes a̱tinac nequeba̱nu, yo̱quex chixba̱nunquil joˈ nequeˈxba̱nu li ma̱cˈaˈeb xnaˈleb.

5:4  Cui cˈaˈru te̱raj xyechiˈinquil re li Dios, cheba̱nuhak chi junpa̱t xban nak li Dios incˈaˈ nacuulac chiru nak incˈaˈ nequeba̱nu li cˈaˈru nequeyechiˈi re.

5:5  Kˈaxal us nak ma̱cˈaˈ te̱yechiˈi cui nequecˈoxla nak incˈaˈ naru te̱ba̱nu.

5:6  Cheqˈuehak retal li cˈaˈru te̱ba̱nu re nak incˈaˈ texma̱cobk xban li cˈaˈru te̱yechiˈi. Ma̱re mokon te̱ye re laj cˈanjel chiru li Dios nak xma̱cˈaˈil e̱naˈleb xeba̱nu cuiˈ. Li Dios naru nasach ru li ac xeba̱nu. ¿Cˈaˈut nak te̱chikˈ xjoskˈil li Dios riqˈuin li cˈaˈru nequeye?

5:7  Joˈcan nak cui la̱ex junes matqˈuec nequeba̱nu ut junes a̱tinac nequeba̱nu, aˈan ma̱cˈaˈ na-oc cuiˈ. Li cˈaˈru tento xba̱nunquil, aˈan xxucuanquil ru li Ka̱cuaˈ Dios.

5:8  Misach e̱chˈo̱l chirilbal nak saˈ junak tenamit yo̱k xba̱nunquil raylal reheb li nebaˈ. Nabal raylal nequeˈxba̱nu ut incˈaˈ nequeˈrakoc a̱tin saˈ ti̱quilal xban nak li cuan saˈ xcuanquil taklanbil xban li nim xcuanquil chiru aˈan. Ut li jun, li nim xcuanquil, taklanbil ajcuiˈ xban jun chic kˈaxal nim xcuanquil.

5:9  ¿Ma incˈaˈ ta biˈ nacˈanjelac re chixjunileb chixjunil li acui̱mk li na-el saˈ li chˈochˈ? Li acui̱mk li na-el saˈ li chˈochˈ nacˈanjelac ajcuiˈ re li rey.

5:10  Li ani cuan xtumin, toj naraj nabal xtzˈakob. Ut li ani cuan nabal lix biomal, incˈaˈ natzˈakloc re. Toj ta̱raj cuiˈchic xtzˈakob. Chixjunil aˈin ma̱cˈaˈ na-oc cuiˈ.

5:11  Li ani cuan nabal cˈaˈru re, nabal ajcuiˈ naxsach. ¿Cˈaˈru naxra nak cuan nabal cˈaˈru re? Ma̱cˈaˈ, xban nak yal naril nak na-osoˈ chiru.

5:12  Li ani nacˈanjelac, sa nacuar, usta natzacan chi us usta incˈaˈ. Abanan li biom incˈaˈ nacuar chixcˈoxlanquil li cˈaˈru cuan re.

5:13  Cuan jun chic li chˈaˈajquilal ninqˈue retal arin saˈ ruchichˈochˈ kˈaxal ra rilbal. Aˈan li xxocbal nabal li biomal yal re nak tixcˈul chˈaˈajquilal mokon.

5:14  Cui incˈaˈ teˈxnau rilbal lix biomal, ma̱re tixsach chixjunil chi ma̱cˈaˈ rajbal ut ma̱cˈaˈ chic ta̱cana̱k reheb li ralal xcˈajol.

5:15  Nak nayoˈla li cristian, tˈustˈu. Ma̱cˈaˈ cuan re. Joˈcan ajcuiˈ nak ta̱ca̱mk. Ma̱cˈaˈ naru tixcˈam chirix. Incˈaˈ naru naxcˈam li cˈaˈru re li ac xcˈanjela.

5:16  Aˈin chˈaˈaj xcˈoxlanquil nak nayoˈla li cristian ma̱cˈaˈ cuan re. Joˈcan ajcuiˈ nak nacam. Ma̱cˈaˈ naxcˈam chirix. Riqˈuin aˈin nakaqˈue retal nak ma̱cˈaˈ aj e nak naxcamsi rib chi cˈanjelac.

5:17  Li ani naxnumsi lix yuˈam chi ma̱cˈaˈ rajbal chanchan saˈ kˈojyi̱n cuan. Nabal li raylal xcˈul ut nabal li chˈaˈajquilal ut yajel.

5:18  Riqˈuin chixjunil aˈin la̱in xinqˈue retal nak li cˈaˈru us tixba̱nu li cui̱nk, aˈan cuaˈac ut ucˈac ut xyalbal xsahil li quixcˈanjela ru nak cuan arin saˈ ruchichˈochˈ. Lix yuˈam quiqˈueheˈ re xban li Dios. Tento ta̱cˈanjelak xban nak ac tenebanbil saˈ xbe̱n.

5:19  Cui li Dios naxqˈue xbiomal li junju̱nk, naxqˈue re nak ta̱ru̱k ta̱cuaˈak ut ta̱ucˈak ut tixyal xsahil lix cˈanjel ut ta̱sahokˈ saˈ xchˈo̱l nak yo̱ chi cˈanjelac. Aˈin aˈan jun ma̱tan naxqˈue li Dios.

5:20  Li Dios naxqˈue li sahil chˈo̱lej re. Joˈcan nak incˈaˈ nacˈoxlac chirix li cˈaˈru naxcˈul saˈ lix yuˈam saˈ ruchichˈochˈ.

Chapter 6

6:1  Ut cuan cuiˈchic jun li chˈaˈajquilal ninqˈue retal nacˈulman rajlal saˈ ruchichˈochˈ.

6:2  Cuanqueb li nequeˈqˈueheˈ xbiomal ut xlokˈal xban li Dios. Chixjunil cuan reheb. Ma̱cˈaˈ napaltoˈ chiruheb. Abanan li Dios incˈaˈ naxqˈueheb chixyalbal xsahil lix biomaleb. Jalan ban chic aj e nacana cuiˈ. Aˈin ma̱cˈaˈ na-oc cuiˈ. Aˈan jun raylal ut chˈaˈajquilal chokˈ reheb li cristian.

6:3  Junak cui̱nk naru nacuan jun cientak li ralal xcˈajol. Ut naru ajcuiˈ nacuan nabalak chihab saˈ ruchichˈochˈ. Usta kˈaxal najt rok lix yuˈam saˈ ruchichˈochˈ, ma̱cˈaˈ na-oc cuiˈ cui incˈaˈ naxyal xsahil li cˈaˈru cuan re chi moco namukeˈ saˈ xya̱lal. La̱in nincˈoxla nak kˈaxal us junak li cˈulaˈal yal nanumeˈ chiru li cui̱nk aˈan.

6:4  Usta li cˈulaˈal aˈin li yal quinumeˈ incˈaˈ quiyoˈla saˈ xya̱lal, quicana yal chi joˈcan. Chanchan quicana saˈ kˈojyi̱n chi ma̱cˈaˈ xcˈabaˈ.

6:5  Li cˈulaˈal aˈan incˈaˈ qui-iloc cutan chi moco quixnau ru li cua̱nc saˈ ruchichˈochˈ. Abanan kˈaxal us quixcˈul li cˈulaˈal aˈan chiru li quixcˈul li cui̱nk xban nak co̱ chi hila̱nc.

6:6  Li cui̱nk aˈin xru raj xcuan cuibak mil chihab saˈ ruchichˈochˈ. Abanan cui incˈaˈ xyal xsahil li cˈaˈru cuan re, ma̱cˈaˈ na-oc cuiˈ. ¿Ma incˈaˈ ta biˈ ta̱ca̱mk li cui̱nk joˈ nak quicam li cˈulaˈal?

6:7  Li cui̱nk naxcamsi rib chi cˈanjelac yal re tixtzaca. Abanan incˈaˈ nacˈojla xchˈo̱l riqˈuin chixjunil li naxsicˈ.

6:8  ¿Ma kˈaxal us ta biˈ cuanqueb li cristian li cuanqueb xnaˈleb chiruheb li ma̱cˈaˈeb xnaˈleb? Ut, ¿ma kˈaxal us ta biˈ cuanqueb li nebaˈ xban nak xeˈxnau cua̱nc saˈ xya̱nkeb li cuanqueb saˈ ruchichˈochˈ?

6:9  Kˈaxal us nak tixcˈojob xchˈo̱l riqˈuin li joˈ qˈuial cuan re chiru nak yo̱k chi cˈoxlac chirix nabal xtzˈakob li cˈaˈru re xban nak aˈan ma̱cˈaˈ na-oc cuiˈ. Junes raylal naxqˈue.

6:10  Li cˈaˈru nacˈulman anakcuan ac chˈolchˈo nak joˈcan ta̱cˈulma̱nk. Joˈcan nak incˈaˈ naru xcuechˈinquil rix li cˈaˈru naxba̱nu li Dios.

6:11  Li ani nacuulac chiru cuechˈi̱nc, ma̱cˈaˈ na-oc cuiˈ li naxba̱nu. Usta nabal li a̱tin naxye, ma̱cˈaˈ naxra nak naa̱tinac nabal.

6:12  ¿Ma cuan ta biˈ junak nanaˈoc re cˈaˈru li us chokˈ re li cui̱nk nak cuan arin saˈ ruchichˈochˈ? Lix yuˈam nanumeˈ saˈ junpa̱t chi ma̱cˈaˈ rajbal. Ut, ¿ma cuan ta biˈ junak ta̱yehok re cˈaˈru ta̱cˈulma̱nk nak acak xcam?

Chapter 7

7:1  Kˈaxal us nak cha̱bil ta̱yehekˈ chirix li junju̱nk xban nak cha̱bil lix naˈleb. Aˈan kˈaxal us chiru li sununquil ban. Ut kˈaxal us li ca̱mc chiru li yoˈla̱c.

7:2  Kˈaxal us nak toxic chi yoˈlecˈ camenak chiru nak toxic chi ninkˈei̱c. Li ani toj yoˈyo, tento nak cua̱nk saˈ xchˈo̱l lix camic xban nak aˈan li rosoˈjic li junju̱nk.

7:3  Kˈaxal us li ya̱bac chiru li seˈec xban nak li raylal naxtenkˈa junak chixtaubal xnaˈleb.

7:4  Li ani cuan xnaˈleb nacˈoxlac chirix li ca̱mc. Ut li ani ma̱cˈaˈ xnaˈleb caˈaj cuiˈ li ninkˈei̱c naxcˈoxla.

7:5  Kˈaxal us nak tokˈusekˈ xbaneb li cuanqueb xnaˈleb chiru nak ta̱qˈuehekˈ kalokˈal xbaneb li ma̱cˈaˈeb xnaˈleb.

7:6  Lix sahil xchˈo̱leb li ma̱cˈaˈeb xnaˈleb yal nanumeˈ. Ma̱cˈaˈ na-oc cuiˈ. Chanchan li chaj li yal naxhum rib.

7:7  Cui cuan junak cuan xnaˈleb tixrahobtesi li ras ri̱tzˈin, li jun aˈan yo̱ chixba̱nunquil joˈ naxba̱nu li ma̱cˈaˈ xnaˈleb. Ut cui cuan junak naxqˈue rib chi tumina̱c ru, li jun aˈan naxpoˈ lix naˈleb.

7:8  Kˈaxal us nak ta̱choy li cˈanjel li ac xatiquib xba̱nunquil chiru nak ta̱tiquib xba̱nunquil jun chic cˈanjel ut incˈaˈ ta̱choy xba̱nunquil. Ut kˈaxal us li cuyuc ib chiru li nimobresi̱nc ib.

7:9  Ut incˈaˈ tatjoskˈok saˈ junpa̱t joˈ nequeˈxba̱nu li ma̱cˈaˈeb xnaˈleb. Eb aˈan nequeˈjoskˈoˈ saˈ junpa̱t.

7:10  Incˈaˈ ta̱ye: —¿Cˈaˈut nak eb li cutan li ac xeˈnumeˈ kˈaxal useb chiruheb li cutan anakcuan?— Incˈaˈ ta̱ye chi joˈcan xban nak caˈaj cuiˈ li ma̱cˈaˈeb xnaˈleb nequeˈxye chi joˈcan.

7:11  Li cha̱bil naˈleb kˈaxal us chokˈ reheb chixjunileb li cuanqueb saˈ ruchichˈochˈ. Aˈan joˈ jun li ma̱tan qˈuebil reheb.

7:12  Li naˈleb naxtenkˈa li junju̱nk. Joˈcan ajcuiˈ li tumin naxtenkˈa li junju̱nk. Abanan li ani cuan xnaˈleb naxnau xcolbal rix lix yuˈam.

7:13  Cheqˈuehak retal li cˈaˈru naxba̱nu li Dios. ¿Ma cuan ta biˈ junak naru tixti̱cobresi rix junak li cˈaˈak re ru li ac xyi̱b li Dios chi yocos rix?

7:14  Chisahokˈ saˈ e̱chˈo̱l nak nequex-el chi us riqˈuin li cˈaˈru nequeba̱nu. Ut cui nachal li raylal saˈ e̱be̱n, cheqˈuehak retal nak li Dios naqˈuehoc sahil chˈo̱lej ut naxqˈue ajcuiˈ li rahil chˈo̱lej. Ma̱ ani naxnau cˈaˈru ta̱cha̱lk chiru mokon.

7:15  Usta ma̱cˈaˈ na-oc cuiˈ lin yuˈam, abanan xinqˈue retal li cuib chi naˈleb aˈin: Cuan nak eb li ti̱queb xchˈo̱l nequeˈcam nak toj sa̱jeb. Ut cuan nak eb li incˈaˈ useb xnaˈleb najt nequeˈcuan saˈ ruchichˈochˈ.

7:16  Cha̱bilakex, abanan incˈaˈ chinumta̱k le̱ cha̱bilal. Chicua̱nk e̱naˈleb, abanan incˈaˈ chinumta̱k le̱ naˈleb. ¿Cˈaˈru aj e nak te̱sach e̱rib e̱junes?

7:17  Cheqˈuehak retal cˈaˈru te̱ba̱nu re nak incˈaˈ ta̱numta̱k le̱ ma̱usilal saˈ e̱be̱n. Ut me̱ba̱nu to̱ntil naˈleb. ¿Cˈaˈru aj e nak texca̱mk chi toj ma̱jiˈ nacuulac xkˈehil?

7:18  Us nak te̱ba̱nu li cˈaˈru nequecˈoxla xba̱nunquil, abanan incˈaˈ chinumta̱k li cˈaˈru te̱ba̱nu xban nak li ani naxxucua ru li Dios, us na-el riqˈuin li cˈaˈru li naxba̱nu.

7:19  Li ani cuan xnaˈleb naqˈueheˈ xcacuilal xban lix naˈleb ut cau rib chiru laje̱b chi cui̱nk li cuanqueb xcuanquil.

7:20  Relic chi ya̱l ma̱ jun cuan saˈ ruchichˈochˈ li kˈaxal ta ti̱c xchˈo̱l chi incˈaˈ ta ta̱ma̱cobk.

7:21  Ma̱pa̱b chixjunil li cˈaˈru nequeˈxye li cristian re nak incˈaˈ ta̱cuabi nak yo̱k chi a̱tinac cha̱cuix la̱ mo̱s.

7:22  Xban nak la̱at nacanau nak nabal sut ajcuiˈ xat-a̱tinac chirixeb jalan.

7:23  Quin-oc xtzˈilbal rix li cˈaˈak re ru aˈin xban nak cuan innaˈleb. Abanan quicuecˈa nak incˈaˈ tzˈakal lin naˈleb chixba̱nunquil.

7:24  Incˈaˈ quinru xtzˈilbal rix li cˈaˈak re ru aˈin xban nak kˈaxal chˈaˈaj xtaubal ru. Ma̱ ani naru xtaubal ru li cˈaˈak re ru aˈin.

7:25  Joˈcan nak quin-oc xsicˈbal xya̱lal chanru nak tintau xtzˈakob lin naˈleb re nak tintau ru chixjunil li cˈaˈak re ru aˈin. Quicuaj xtaubal ru cˈaˈut nak na-uxman li ma̱usilal ut li to̱ntil naˈleb saˈ ruchichˈochˈ.

7:26  Nak yo̱quin chixtzˈilbal rix chixjunil li cˈaˈak re ru aˈin, quintau jun li chˈaˈajquilal kˈaxal ra chiru li ca̱mc. Aˈan li ixk li incˈaˈ us xnaˈleb. Naxkˈunbesi li cui̱nk toj retal natˈaneˈ saˈ rukˈ. Caˈaj cuiˈ li cui̱nk li naxqˈue xlokˈal li Dios naru naxcol rib chiru li ixk aˈan. Abanan, laj ma̱c tzˈakal natˈaneˈ saˈ rukˈ aˈan.

7:27  Nak yo̱quin xtzˈilbal rix li cˈaˈak re ru aˈin, quintau li naˈleb aˈin, la̱in li ninnau a̱tinac chi cha̱bil.

7:28  Nak toj ma̱jiˈ nintau li yo̱quin chixsicˈbal, quintau jun li cui̱nk cha̱bil xnaˈleb saˈ xya̱nkeb li jun mil chic. Abanan ma̱ jun li ixk quintau cha̱bil ta xnaˈleb saˈ xya̱nkeb chixjunileb li ixk.

7:29  Nak yo̱quin xtzˈilinquil rix li cˈaˈak re ru aˈin, quinqˈue retal nak li Dios quixyi̱b li cui̱nk chi cha̱bil ut chi tzˈakal re ru. Abanan, eb aˈan aˈ chic li ma̱usilal queˈraj xba̱nunquil.

Chapter 8

8:1  Ma̱ ani ta̱ru̱k tixjuntakˈe̱ta rib riqˈuin li cuan xnaˈleb. Li ani cuan xnaˈleb naxnau cˈaˈut nak nacˈulman li cˈaˈak re ru saˈ ruchichˈochˈ. Lix naˈleb naxqˈue chi sahocˈ lix chˈo̱l ut najala li riloba̱l xban nak sa chic saˈ xchˈo̱l.

8:2  Cheba̱nuhak li cˈaˈru tixye e̱re li rey joˈ queye nak queba̱nu li juramento chiru li Dios.

8:3  Nak tex-e̱lk chiru li rey, ba̱nuhomak saˈ xya̱lal. Incˈaˈ tex-e̱lk saˈ junpa̱t. Ut mex-oquen saˈ xya̱nkeb li nequeˈxba̱nu li incˈaˈ us xban nak aˈan naru naxba̱nu e̱re li cˈaˈru naraj.

8:4  Li ra̱tin li rey, aˈan cuan xcuanquil. Ut ma̱ ani naru ta̱yehok re nak incˈaˈ us naxba̱nu.

8:5  Li ani naxba̱nu li natakla̱c cuiˈ xban li rey, ma̱cˈaˈ tixcˈul. Ut li ani cuan xnaˈleb naxnau jokˈe ut chanru nak tixba̱nu li natakla̱c cuiˈ.

8:6  Cuan jun li ho̱nal re xba̱nunquil chixjunil li cˈaˈak re ru ut cuan ajcuiˈ li naˈleb re xcˈoxlanquil chanru xba̱nunquil. Abanan cuan jun li chˈaˈajquilal saˈ xbe̱n li junju̱nk,

8:7  xban nak ma̱ ani naxnau cˈaˈru tixcˈul, chi moco cuan ta junak naru tixye cˈaˈru ta̱cˈulma̱nk mokon.

8:8  Ma̱ ani junak nacuan xcuanquil saˈ xbe̱n lix musikˈ li junju̱nk. Moco ta̱ru̱k ta tixye nak toj ta̱cua̱nk lix yuˈam xban nak ma̱cuaˈ aˈan yal re saˈ xbe̱n lix yuˈam. Chi moco cuan junak cuan xcuanquil saˈ xbe̱n li ca̱mc xban nak ma̱ ani naru nacoleˈ chiru li ca̱mc. Li incˈaˈ us xnaˈleb incˈaˈ ta̱colekˈ xban li ma̱usilal naxba̱nu.

8:9  Chixjunil aˈin quinqˈue retal nak quin-oc chixtzˈilbal rix li cˈaˈru nacˈulman saˈ ruchichˈochˈ. Quinqˈue retal nak cuanqueb li cui̱nk cuanqueb xcuanquil saˈ xbe̱neb li ras ri̱tzˈin ut nequeˈxba̱nu raylal reheb.

8:10  Ut ninqˈue ajcuiˈ retal nak eb li incˈaˈ useb xnaˈleb nequeˈqˈueheˈ xlokˈal nak nequeˈmukeˈ. Abanan li nequeˈxic rajlal saˈ li templo, ma̱ ani nacˈoxlan re li ti̱quilal li queˈxba̱nu saˈ li tenamit. Chixjunil aˈin ma̱cˈaˈ na-oc cuiˈ.

8:11  Ut xban nak incˈaˈ nequeˈxcˈul chi ticto xtojbal rix li ma̱usilal li nequeˈxba̱nu, joˈcan nak kˈaxal cuiˈchic nequeˈraj xba̱nunquil li ma̱usilal li jun chˈol chic.

8:12  Usta nanumta li ma̱usilal li nequeˈxba̱nu laj ma̱c ut usta najt rok lix yuˈameb arin saˈ ruchichˈochˈ, la̱in ninnau nak eb li nequeˈxucuan ru li Dios us teˈxcˈul chiruheb aˈan.

8:13  Ac chˈolchˈo nak eb li nequeˈxba̱nu li ma̱usilal incˈaˈ us teˈxcˈul xban nak yal nequeˈxnumsi lix yuˈameb chi ma̱cˈaˈ rajbal. Incˈaˈ nequeˈxqˈue xlokˈal li Dios ut incˈaˈ nequeˈxxucua ru.

8:14  Cuan jun chic li naˈleb na-uxman saˈ ruchichˈochˈ incˈaˈ nintau ru. Aˈan nak eb li cha̱bileb xnaˈleb nequeˈxcˈul raylal. Ut li raylal nequeˈxcˈul eb aˈan, reheb raj li incˈaˈ useb xnaˈleb. Ut eb li incˈaˈ useb xnaˈleb, usilal nequeˈxcˈul. Ut li usilal li nequeˈxcˈul, aˈan reheb raj li cha̱bileb xnaˈleb. La̱in ninye nak aˈin ma̱cˈaˈ na-oc cuiˈ.

8:15  Joˈcan nak la̱in ninye nak li cui̱nk tixsicˈ li sahil chˈo̱lej arin saˈ ruchichˈochˈ. Ta̱cuaˈak ta̱ucˈak ut ta̱sahokˈ saˈ xchˈo̱l xban nak caˈaj cuiˈ aˈan naru tixba̱nu re nak tixyal xsahil li cˈanjel li naxba̱nu nak toj cuan lix yuˈam saˈ ruchichˈochˈ li naqˈueheˈ re xban li Dios.

8:16  Nak quinkˈaxtesi cuib chixtzolbal ut chixtzˈilbal rix li cˈaˈak re ru nacˈulman saˈ ruchichˈochˈ, chi kˈek chi cutan incˈaˈ nachal incuara.

8:17  Ut quinqˈue retal nak ma̱ ani nataˈoc ru li cˈaˈru naxba̱nu li Dios. Li cui̱nk ma̱ jokˈe tixtau ru li cˈaˈru naxba̱nu li Dios saˈ ruchichˈochˈ, usta tixtacuasi rib chixsicˈbal. Li cuan xnaˈleb naru naxye nak naxnau, abanan ma̱ jokˈe tixtau ru.

Chapter 9

9:1  Relic chi ya̱l la̱in quinqˈue inchˈo̱l chixtzolbal rix chixjunil li cˈaˈak re ru aˈin. Ut quinqˈue retal nak li ti̱queb xchˈo̱l ut li cuanqueb xnaˈleb cuanqueb saˈ rukˈ li Dios, joˈ ajcuiˈ li cˈaˈru nequeˈxba̱nu. Ma̱ ani naxnau ma nequeˈraheˈ malaj ut xicˈ nequeˈileˈ. Ut incˈaˈ nequeˈxnau cˈaˈru teˈxcˈul mokon.

9:2  Chixjunileb juntakˈe̱t teˈxcˈul. Juntakˈe̱t teˈxcˈul li ti̱queb xchˈo̱l riqˈuineb li incˈaˈ ti̱queb xchˈo̱l. Juntakˈe̱t teˈxcˈul li cha̱bileb xnaˈleb riqˈuineb li incˈaˈ useb xnaˈleb. Juntakˈe̱t teˈxcˈul li nequeˈxba̱nu li us riqˈuineb li nequeˈxba̱nu ma̱usilal. Juntakˈe̱t teˈxcˈul li nequeˈxqˈue lix cˈatbil mayej riqˈuineb li incˈaˈ nequeˈxqˈue lix cˈatbil mayej. Juntakˈe̱t teˈxcˈul li ma̱cˈaˈeb xma̱c riqˈuineb li cuanqueb xma̱c. Juntakˈe̱t teˈxcˈul li nequeˈyechiˈin cˈaˈak re ru riqˈuin juramento riqˈuineb li incˈaˈ nequeˈxba̱nu li juramento.

9:3  Li cˈaˈru incˈaˈ us ninqˈue retal, aˈan nak juntakˈe̱t nequeˈxcˈul chixjunileb li cuanqueb saˈ ruchichˈochˈ. Junes ma̱usilal ut to̱ntil naˈleb nequeˈxcˈoxla xba̱nunquil joˈ najtil nequeˈcuan saˈ ruchichˈochˈ. Ut chirix aˈan nequeˈcam.

9:4  Li ani toj yoˈyo cuan cˈaˈru naroybeni. Abanan li camenak chic ma̱cˈaˈ cˈaˈru naroybeni. Jun li tzˈiˈ yoˈyo nacˈanjelac, abanan li cakcoj camenak chic, aˈan ma̱cˈaˈ na-oc cuiˈ. Naraj naxye nak kˈaxal us chokˈ re li yoˈyo chiru li ac camenak chic.

9:5  Li toj yoˈyo̱queb nequeˈxnau nak teˈca̱mk. Ut eb li ac camenakeb chic ma̱cˈaˈ nequeˈxnau, chi moco cuan ta cˈaˈru teˈroybeni. Ut ma̱ ani chic ta̱jultica̱nk reheb.

9:6  Li ac camenakeb chic incˈaˈ chic nequeˈrahoc, chi moco xicˈ chic nequeˈiloc ut incˈaˈ chic nequeˈcakalin, chi moco teˈoque̱nk chic riqˈuin li cˈaˈru na-uxman saˈ ruchichˈochˈ.

9:7  Joˈcan nak anakcuan chatcuaˈak chi sa saˈ a̱chˈo̱l ut chacuucˈak li vino riqˈuin sahil chˈo̱lej xban nak li Dios ma̱cˈaˈ naxye riqˈuin li cˈaˈru nacaba̱nu.

9:8  Ta̱qˈue saki akˈ cha̱bil cha̱cuix ut ta̱qˈue rajlal li sununquil ban saˈ a̱jolom.

9:9  Chanumsi la̱ yuˈam chi sa saˈ a̱chˈo̱l riqˈuin li ixk li nacara. Chanumsihak chi us la̱ yuˈam li ma̱cˈaˈ na-oc cuiˈ li quiqˈueheˈ a̱cue saˈ ruchichˈochˈ, xban nak caˈaj cuiˈ aˈan li naru ta̱ba̱nu re xyalbal xsahil la̱ cˈanjel.

9:10  Chixjunil li naru ta̱ba̱nu saˈ ruchichˈochˈ, chaba̱nuhak, aˈ yal joˈ qˈuial ta̱cuy xba̱nunquil. Nak tatca̱mk, ma̱cˈaˈ chic ta̱ru̱k ta̱ba̱nu. Nak ac cua̱nkat chic saˈ li jul, incˈaˈ chic tatcˈanjelak. Ma̱cˈaˈak chic a̱cˈaˈux ut ma̱cˈaˈak chic a̱naˈleb.

9:11  Cuan jun chic xinqˈue retal saˈ ruchichˈochˈ nak ma̱cuaˈeb li kˈaxal se̱beb li nequeˈe̱chanin re li ma̱tan saˈ li a̱linac, chi moco eb li cauheb rib li nequeˈnumta saˈ li ple̱t. Ut eb li cuanqueb xnaˈleb incˈaˈ nequeˈxtau xtzacae̱mkeb yal xban nak cuanqueb xnaˈleb. Ut eb li se̱beb xchˈo̱l incˈaˈ nequeˈbiomoˈ yal xban nak se̱beb xchˈo̱l. Ut eb li tzolbileb moco rajlal ta nequeˈcˈuleˈ saˈ usilal. Chixjunil aˈin moco nequeˈxnau ta jokˈe teˈxcˈul li chˈaˈajquilal.

9:12  Li cui̱nk incˈaˈ naxnau jokˈe tixcˈul junak chˈaˈajquilal. Chanchaneb li car li nequeˈchapeˈ riqˈuin yoy. Ut chanchaneb li xul li nequeˈchapeˈ riqˈuin raˈal. Joˈcan ajcuiˈ nequeˈxcˈul li cui̱nk. Eb aˈan nequeˈxcˈul li chˈaˈajquilal chi ma̱cˈaˈeb saˈ xchˈo̱l nak nacuulac xkˈehil.

9:13  Ut quinqˈue ajcuiˈ retal jun li naˈleb li na-uxman saˈ ruchichˈochˈ, li na-oc incˈaˈux xban.

9:14  Cuan jun li tenamit caˈchˈin. Incˈaˈ qˈuiheb li cristian cuanqueb aran. Ut nachal jun li rey kˈaxal cau rib chi pletic riqˈuineb. Naxsut rix li tenamit ut na-oc chi pletic.

9:15  Ut saˈ li tenamit aˈan, cuan jun li cui̱nk cuan xnaˈleb usta nebaˈ. Li cui̱nk aˈan xru raj xcolbal li tenamit xban nak cuan xnaˈleb. Abanan ma̱ ani quixcˈoxla nak aˈan cuan xnaˈleb xban nak nebaˈ.

9:16  Nak ninqˈue retal aˈin la̱in ninye nak kˈaxal us nak cua̱nk kanaˈleb chiru nak cauhak kib. Abanan eb aˈan queˈxtzˈekta̱na lix naˈleb li cui̱nk aˈan yal xban nak nebaˈ ut incˈaˈ queˈrabi li cˈaˈru quixye.

9:17  Kˈaxal us rabinquil li xya̱lal li naxye li cuan xnaˈleb, usta timil naxye, chiru rabinquil li cˈaˈru naxye li nacˈamoc be saˈ xya̱nkeb li ma̱cˈaˈeb xnaˈleb usta tixjap re chixyebal.

9:18  Kˈaxal us nak cua̱nk kanaˈleb chiru nak cua̱nk kacˈanjeleba̱l re pletic. Li ani incˈaˈ us xnaˈleb naxpoˈ ru li us.

Chapter 10

10:1  Li camenak raxya̱t naxpoˈ li sununquil ban ut nachuhoˈ. Joˈcan ajcuiˈ li to̱ntil naˈleb naru tixpoˈ ru li naˈleb li kˈaxal lokˈ.

10:2  Li ani cuan xnaˈleb junelic nacuulac chiru xba̱nunquil li us. Abanan li ani ma̱cˈaˈ xnaˈleb caˈaj cuiˈ li incˈaˈ us nacuulac chiru xba̱nunquil.

10:3  Li ani ma̱cˈaˈ xnaˈleb riqˈuin li cˈaˈru naxba̱nu nacˈutun nak ma̱cˈaˈ xnaˈleb usta yo̱k chixyebal nak eb li jun chˈo̱l chic ma̱cˈaˈeb xnaˈleb.

10:4  Cui li cuan xcuanquil ta̱joskˈok cha̱cuu, incˈaˈ ta̱sume ru, xban nak naru nequeyi̱b ru li chˈaˈajquilal saˈ xya̱lal.

10:5  Cuan jun li chˈaˈajquilal ninqˈue retal saˈ ruchichˈochˈ li nequeˈxba̱nu li cuanqueb saˈ xcuanquil.

10:6  Li ma̱cˈaˈeb xnaˈleb nequeˈqˈueheˈ xcˈanjel cha̱bil ut li cuanqueb xnaˈleb incˈaˈ cha̱bil li cˈanjel nequeˈqˈueheˈ reheb.

10:7  Ut quinqˈue ajcuiˈ retal nak aˈ chic li lokˈbil mo̱s nequeˈbe̱c chirix cacua̱y ut eb li cuanqueb xcuanquil nequeˈbe̱c chi rok. Chanchaneb chic li lokˈbil mo̱s.

10:8  Li ani naxbec junak jul re ta̱tˈanekˈ jalan, aˈan ajcuiˈ li ta̱tˈanekˈ chi saˈ. Li ani tixjor li tzˈac li sutsu cuiˈ li tenamit ta̱tiˈekˈ xban cˈantiˈ.

10:9  Li ani najoroc pec naru naxtochˈ rib riqˈuin li pec. Ut li ani najoroc siˈ naru naxyocˈ rib.

10:10  Cui li ma̱l na-el li xkˈesnal re, ut cui incˈaˈ ta̱qˈue xkˈesnal, tento nak tatyocˈok chi cau. Joˈcan nak kˈaxal us nak cua̱nk a̱naˈleb chixcˈoxlanquil chanru ta̱ba̱nu re nak ta̱ba̱nu chi us li cˈaˈak re ru.

10:11  ¿Cˈaˈ ta cuiˈ ru aj e nak junak tixnau xtu̱lanobresinquil li cˈantiˈ cui ta̱tiˈekˈ xban, nak toj ma̱jiˈ naxtu̱lanobresi?

10:12  Li a̱tin li naxye li cuan xnaˈleb nasukˈi usilal chokˈ re. Abanan li cˈaˈru naxye li ma̱cˈaˈ xnaˈleb, aˈan ajcuiˈ nasachoc re.

10:13  Li cui̱nk li ma̱cˈaˈ xnaˈleb naxtiquib a̱tinac riqˈuin to̱ntil naˈleb. Ut nak narakeˈ chi a̱tinac, kˈaxal cuiˈchic yibru li naxye.

10:14  Li ma̱cˈaˈ xnaˈleb cˈajoˈ nacuulac chiru a̱tinac. Abanan ¿ma ta̱ru̱k ta biˈ tixye cˈaˈru ta̱cˈulma̱nk? Incˈaˈ, xban nak ma̱ ani nanaˈoc re cˈaˈru ta̱cˈulma̱nk mokon nak ma̱ anihak chic aˈan.

10:15  Li ani ma̱cˈaˈ xnaˈleb naxcamsi rib chi cˈanjelac chi ma̱cˈaˈ aj e ut incˈaˈ naxnau bar ta̱xic mokon.

10:16  Tokˈob ru li tenamit li cuan xrey toj sa̱j, xban nak toj ma̱cˈaˈ xnaˈleb. Ut li nequeˈtenkˈan re li rey junes ninkˈei̱c nequeˈxcˈoxla.

10:17  Abanan us xak re li tenamit li cuan jun xrey cuan xnaˈleb ut cha̱bil. Ut eb li nequeˈtenkˈan re nequeˈcuaˈac saˈ x-o̱ril re xqˈuebal re̱kaj lix metzˈe̱uheb. Ut ma̱cuaˈ cala̱c nequeˈxcˈoxla.

10:18  Li ani incˈaˈ nacuulac chiru cˈanjelac, natˈaneˈ li rochoch saˈ xbe̱n. Ut xban nak incˈaˈ naraj cˈanjelac, na-oquesin li rochoch.

10:19  Li ninkˈe naqˈuehoc sahil chˈo̱lej. Ut li vino naxqˈue ajcuiˈ xsahil xchˈo̱leb li cuanqueb saˈ ruchichˈochˈ. Abanan li tumin, aˈan li naxba̱nu chixjunil aˈin.

10:20  Ma̱cuechˈ rix li rey chi moco riqˈuin la̱ cˈaˈux. Ut incˈaˈ tat-a̱tinak chirix li biom usta a̱junes cua̱nkat saˈ la̱ cuochoch, xban nak cuanqueb cocˈ xul nequeˈrupupic. Ma̱re teˈxye chak re li cˈaˈru ta̱ye.

Chapter 11

11:1  Ma̱ra li cˈaˈru a̱cue. Chatsihi̱nk ban. Ut saˈ jun cutan ta̱cˈul re̱kaj.

11:2  Ta̱jecˈ li cˈaˈru cuan a̱cue reheb li ma̱cˈaˈ cuan reheb, xban nak incˈaˈ nacanau jokˈe ta̱cha̱lk raylal saˈ a̱be̱n la̱at nak cuancat saˈ ruchichˈochˈ.

11:3  La̱o incˈaˈ nakanau cˈaˈru ta̱cˈulma̱nk. Cui nachal li chok rochben li hab saˈ ruchichˈochˈ, naru nachal. Cui li cheˈ ta̱tˈanekˈ saˈ li norte, naru natˈaneˈ aran. Ut cui natˈaneˈ saˈ li sur, tˈanekˈ aran. Li naˈajej li ta̱tˈanekˈ cuiˈ, aran ta̱cana̱k.

11:4  Li ani yo̱k xcˈaˈux chirix li ikˈ incˈaˈ ta̱a̱uk. Ut li ani yo̱k xcˈaˈux chirix li chok incˈaˈ ta̱kˈolok.

11:5  La̱at incˈaˈ nacanau bar naxic li ikˈ. Ut incˈaˈ ajcuiˈ nacanau chanru nak naqˈui li cˈulaˈal li toj ma̱jiˈ nayoˈla. Joˈcan ajcuiˈ nak incˈaˈ nacanau cˈaˈru naxba̱nu li Dios li quiyi̱ban re chixjunil li cˈaˈak re ru.

11:6  Nak tat-a̱uk, ta̱cuau la̱ cuiyaj ekˈela ut ta̱cuau cuiˈchic ecuu xban nak incˈaˈ nacanau bar cuan li ta̱e̱lk chi us, ma li ta̱cuau xbe̱n cua, malaj ut li ta̱cuau mokon, malaj ut juntakˈe̱t ta̱e̱lk.

11:7  Relic chi ya̱l nak kˈaxal us nak yoˈyo̱ko saˈ ruchichˈochˈ ut yo̱ko chirilbal li cutan.

11:8  Abanan, usta nabal chihab tocua̱nk saˈ ruchichˈochˈ ut yo̱ko xyalbal xsahil li cˈaˈru ke, tento nak takaqˈue retal nak ta̱cuulak xkˈehil nak toca̱mk chi junaj cua ut incˈaˈ chic tocua̱nk saˈ ruchichˈochˈ. Chixjunil li ta̱cha̱lk chiku mokon, ma̱cˈaˈ na-oc cuiˈ.

11:9  La̱ex, li toj sa̱jex, cheyalak xsahil le̱ sa̱jilal. Cheba̱nuhak li cˈaˈru te̱ra ru ut li cˈaˈru nacuulac che̱ru. Abanan, tento nak te̱qˈue retal nak saˈ jun cutan ta̱rakok a̱tin li Dios saˈ e̱be̱n.

11:10  Checanabak xcˈoxlanquil li cˈaˈak re ru nachˈiˈchˈiˈin e̱re joˈ ajcuiˈ li chˈaˈajquilal. Chenauhak nak incˈaˈ najt texcua̱nk saˈ le̱ sa̱jilal. Joˈcan nak ma̱cˈaˈ na-oc cuiˈ li cˈaˈru te̱ba̱nu.

Chapter 12

12:1  Nak toj cuancat saˈ la̱ sa̱jilal, chijulticokˈ a̱cue li Dios li quiyoˈobtesin a̱cue. Chijulticokˈ a̱cue li Dios nak toj ma̱jiˈ nacuulac li cutan nak cuan nabal li chˈaˈajquilal ut nak ma̱jiˈ nacuulac li chihab nak ta̱ye: —Ma̱cˈaˈ chic nasahoˈ cuiˈ inchˈo̱l.—

12:2  Chaba̱nuhak anakcuan nak toj nacˈutun li sakˈe chi cutan, li po ut li chahim chiru kˈojyi̱n, ut nak toj ma̱jiˈ namoy ru li cutan xban li chok.

12:3  Ta̱cuulak xkˈehil nak chixjunileb sicso̱tkeb xbaneb xti̱xil, ut eb li cui̱nk li cauheb rib, cˈutzcˈu̱keb aj chic rixeb. Ut ma̱cˈaˈak chic ruch reheb xban nak ac ti̱xeb chic. Ut eb li nequeˈiloc saˈ ventana incˈaˈ chic teˈru̱k teˈilok xban nak ac xmoy li xnakˈ ruheb.

12:4  Nak ac ti̱xakat chic, incˈaˈ chic tat-abi̱nk ut incˈaˈ chic tatru̱k chi cuaˈac xban nak ma̱cˈaˈak chic ruch a̱cue. Ut incˈaˈ chic sa tatcua̱rk. Toj ekˈela tatcuacli̱k nak ta̱ya̱bak laj tzoˈ xul. Ut incˈaˈ chic tatru̱k chi bicha̱nc.

12:5  Tatxucuak chi cubec saˈ junak naˈajej najt xteram. Yo̱k a̱xiu nak tatbe̱k ut sakak chic la̱ cuismal, chanchanak xsakal li ratzˈum li almendro. Incˈaˈ chic ta̱cuy xban nak ti̱xakat chic chi us. Incˈaˈ chic tatcuaˈak ut ma̱cˈaˈ chic ta̱ra ru. Chi se̱b tatca̱mk ut tatxic chi hila̱nc saˈ la̱ naˈaj chi junaj cua. Ut nak eb laj mukunel yo̱keb chi xic cha̱mukbal, yo̱keb chi ya̱bac xban nak ac xatcam.

12:6  Nak toj yoˈyo̱cat saˈ ruchichˈochˈ, chijulticokˈ a̱cue li Dios li quiyoˈobtesin a̱cue xban nak ta̱cuulak xkˈehil nak tatca̱mk joˈ nak natˈupeˈ junak cadena plata. Nak tatca̱mk chanchan nak najoreˈ li ucˈal oro. Ut chanchan nak najoreˈ li cuc chire li yuˈam haˈ ut chanchan nak natokeˈ li sursu̱quil cheˈ li naquelon chak re li haˈ chi saˈ li becbil jul.

12:7  Nak tatca̱mk, tatsukˈi̱k cuiˈchic chˈochˈ xban nak chˈochˈ oquenakat. Ut la̱ musikˈ ta̱xic cuiˈchic riqˈuin li Dios xban nak aˈan quiqˈuehoc la̱ musikˈ.

12:8  La̱in, li ninnau a̱tinac chi cha̱bil, ninye nak lix naˈleb li ruchichˈochˈ ma̱cˈaˈ na-oc cuiˈ. Chixjunil ma̱cˈaˈ na-oc cuiˈ.

12:9  La̱in ninnau a̱tinac chi cha̱bil ut cuan innaˈleb. Quintzol cuib chi us ut quintzˈil rix li naˈleb. Ut quinqˈueheb ajcuiˈ xnaˈleb li tenamit ut quinye saˈ xxiqueb re nak teˈxtau xya̱lal. Ut nabal li proverbios quintzˈi̱ba.

12:10  Quinqˈue inchˈo̱l chixsicˈbal ruheb li a̱tin re nak tintzˈi̱ba li naˈleb aˈin chi tzˈakal re ru riqˈuin cha̱bil a̱tin.

12:11  Li naˈleb li nequeˈxye li cuanqueb xnaˈleb nacˈanjelac chiku joˈ nak nacˈanjelac li kˈes ruˈuj cheˈ re xberesinquil li bo̱yx. Li cha̱bil naˈleb qˈuebil ke xban li tzˈakal Pastor li na-iloc ke. Nacana saˈ kachˈo̱l. Chanchan li claux li natˈojeˈ saˈ li cheˈ.

12:12  Qˈuehomak retal. Nabal li naˈleb cuan saˈ ruchichˈochˈ. Moco narakeˈ ta xtzˈi̱banquil. Abanan ma̱cˈaˈ rajbal xtzolbal chixjunil li cˈaˈak re ru aˈan. Li tzoloc chi nabal, aˈan nalubtesin.

12:13  Riqˈuin li a̱tin aˈin tinrak li a̱tinac saˈ li hu aˈin: nak chexucua̱k ru li Dios ut cheba̱nuhak li cˈaˈru naxye saˈ lix chakˈrab xban nak aˈin li kˈaxal tento xba̱nunquil.

12:14  Li Dios ta̱rakok a̱tin saˈ kabe̱n riqˈuin chixjunil li cˈaˈru nakaba̱nu, usta chi mukmu nakaba̱nu. Ta̱rakok a̱tin saˈ kabe̱n riqˈuin chixjunil li nakaba̱nu, usta us, usta incˈaˈ us.