CSlElizabeth - Psalms - 118

118:1  Блажени непорочнии в путь, ходящии в законе Господни.

118:2  Блажени испытающии свидения Его, всем сердцем взыщут Его.

118:3  Не делающии бо беззакония в путех Его ходиша.

118:4  Ты заповедал еси заповеди Твоя сохранити зело:

118:5  дабы исправилися путие мои, сохранити оправдания Твоя.

118:6  Тогда не постыжуся, внегда призрети ми на вся заповеди Твоя.

118:7  Исповемся Тебе в правости сердца, внегда научитимися судбам правды Твоея.

118:8  Оправдания Твоя сохраню: не остави мене до зела.

118:9  В чесом исправит юнейший путь свой? Внегда сохранити словеса Твоя.

118:10  Всем сердцем моим взысках Тебе: не отрини мене от заповедий Твоих.

118:11  В сердцы моем скрых словеса Твоя, яко да не согрешу Тебе.

118:12  Благословен еси, Господи: научи мя оправданием Твоим.

118:13  Устнама моима возвестих вся судбы уст Твоих.

118:14  На пути свидений Твоих насладихся, яко о всяком богатстве.

118:15  В заповедех Твоих поглумлюся, и уразумею пути Твоя.

118:16  Во оправданиих Твоих поучуся: не забуду словес Твоих.

118:17  Воздаждь рабу Твоему: живи мя, и сохраню словеса Твоя.

118:18  Открый очи мои, и уразумею чудеса от закона Твоего.

118:19  Пришлец аз есмь на земли: не скрый от мене заповеди Твоя.

118:20  Возлюби душа моя возжелати судбы Твоя на всякое время.

118:21  Запретил еси гордым: прокляти уклоняющиися от заповедий Твоих.

118:22  Отими от мене понос и уничижение, яко свидений Твоих взысках.

118:23  Ибо седоша князи и на мя клеветаху, раб же Твой глумляшеся во оправданиих Твоих:

118:24  ибо свидения Твоя поучение мое есть, и совети мои оправдания Твоя.

118:25  Прильпе земли душа моя: живи мя по словеси Твоему.

118:26  Пути моя возвестих, и услышал мя еси: научи мя оправданием Твоим.

118:27  Путь оправданий Твоих вразуми ми, и поглумлюся в чудесех Твоих.

118:28  Воздрема душа моя от уныния: утверди мя в словесех Твоих.

118:29  Путь неправды отстави от мене и законом Твоим помилуй мя.

118:30  Путь истины изволих и судбы Твоя не забых.

118:31  Прилепихся свидением Твоим, Господи, не посрами мене.

118:32  Путь заповедий Твоих текох, егда разширил еси сердце мое.

118:33  Законоположи мне, Господи, путь оправданий Твоих, и взыщу и выну:

118:34  вразуми мя, и испытаю закон Твой и сохраню и всем сердцем моим.

118:35  Настави мя на стезю заповедий Твоих, яко тую восхотех.

118:36  Приклони сердце мое во свидения Твоя, а не в лихоимство.

118:37  Отврати очи мои еже не видети суеты: в пути Твоем живи мя.

118:38  Постави рабу Твоему слово Твое в страх Твой.

118:39  Отими поношение мое, еже непщевах: яко судбы Твоя благи.

118:40  Се, возжелах заповеди Твоя: в правде Твоей живи мя.

118:41  И да приидет на мя милость Твоя, Господи, спасение Твое по словеси Твоему:

118:42  и отвещаю поношающым ми слово, яко уповах на словеса Твоя.

118:43  И не отими от уст моих словесе истинна до зела, яко на судбы Твоя уповах:

118:44  и сохраню закон Твой выну, в век и в век века.

118:45  И хождах в широте, яко заповеди Твоя взысках:

118:46  и глаголах о свидениих Твоих пред цари и не стыдяхся:

118:47  и поучахся в заповедех Твоих, яже возлюбих зело:

118:48  и воздвигох руце мои к заповедем Твоим, яже возлюбих, и глумляхся во оправданиих Твоих.

118:49  Помяни словеса Твоя рабу Твоему, ихже упование дал ми еси.

118:50  То мя утеши во смирении моем, яко слово Твое живи мя.

118:51  Гордии законопреступоваху до зела: от закона же Твоего не уклонихся.

118:52  Помянух судбы Твоя от века, Господи, и утешихся.

118:53  Печаль прият мя от грешник, оставляющих закон Твой.

118:54  Пета бяху мне оправдания Твоя на месте пришелствия моего.

118:55  Помянух в нощи имя Твое, Господи, и сохраних закон Твой.

118:56  Сей бысть мне, яко оправданий Твоих взысках.

118:57  Часть моя еси, Господи: рех сохранити закон Твой.

118:58  Помолихся лицу Твоему всем сердцем моим: помилуй мя по словеси Твоему.

118:59  Помыслих пути Твоя и возвратих нозе мои во свидения Твоя.

118:60  Уготовихся и не смутихся сохранити заповеди Твоя.

118:61  Ужя грешник обязашася мне, и закона Твоего не забых.

118:62  Полунощи востах исповедатися Тебе о судбах правды Твоея.

118:63  Причастник аз есмь всем боящымся Тебе и хранящым заповеди Твоя.

118:64  Милости Твоея, Господи, исполнь земля: оправданием Твоим научи мя.

118:65  Благость сотворил еси с рабом Твоим, Господи, по словеси Твоему:

118:66  благости и наказанию и разуму научи мя, яко заповедем Твоим веровах.

118:67  Прежде даже не смиритимися, аз прегреших: сего ради слово Твое сохраних.

118:68  Благ еси Ты, Господи: и благостию Твоею научи мя оправданием Твоим.

118:69  Умножися на мя неправда гордых: аз же всем сердцем моим испытаю заповеди Твоя.

118:70  Усырися яко млеко сердце их: аз же закону Твоему поучихся.

118:71  Благо мне, яко смирил мя еси, яко да научуся оправданием Твоим.

118:72  Благ мне закон уст Твоих паче тысящ злата и сребра.

118:73  Руце Твои сотвористе мя и создасте мя: вразуми мя, и научуся заповедем Твоим.

118:74  Боящиися Тебе узрят мя и возвеселятся, яко на словеса Твоя уповах.

118:75  Разумех, Господи, яко правда судбы Твоя, и воистинну смирил мя еси.

118:76  Буди же милость Твоя, да утешит мя, по словеси Твоему рабу Твоему:

118:77  да приидут мне щедроты Твоя, и жив буду, яко закон Твой поучение мое есть:

118:78  да постыдятся гордии, яко неправедно беззаконноваша на мя: аз же поглумлюся в заповедех Твоих.

118:79  Да обратят мя боящиися Тебе и ведящии свидения Твоя.

118:80  Буди сердце мое непорочно во оправданиих Твоих, яко да не постыжуся.

118:81  Изчезает во спасение Твое душа моя, на словеса Твоя уповах:

118:82  изчезоша очи мои в слово Твое, глаголюще: когда утешиши мя?

118:83  Зане бых яко мех на слане: оправданий Твоих не забых.

118:84  Колико есть дний раба Твоего? Когда сотвориши ми от гонящих мя суд?

118:85  Поведаша мне законопреступницы глумления, но не яко закон Твой, Господи.

118:86  Вся заповеди Твоя истина: неправедно погнаша мя, помози ми.

118:87  Вмале не скончаша мене на земли: аз же не оставих заповедий Твоих.

118:88  По милости Твоей живи мя, и сохраню свидения уст Твоих.

118:89  Во век, Господи, слово Твое пребывает на небеси.

118:90  В род и род истина Твоя: основал еси землю, и пребывает.

118:91  Учинением Твоим пребывает день: яко всяческая работна Тебе.

118:92  Яко аще бы не закон Твой поучение мое был, тогда убо погибл бых во смирении моем:

118:93  во век не забуду оправданий Твоих, яко в них оживил мя еси.

118:94  Твой есмь аз, спаси мя: яко оправданий Твоих взысках.

118:95  Мене ждаша грешницы погубити мя: свидения Твоя разумех.

118:96  Всякия кончины видех конец: широка заповедь Твоя зело.

118:97  Коль возлюбих закон Твой, Господи: весь день поучение мое есть.

118:98  Паче враг моих умудрил мя еси заповедию Твоею, яко в век моя есть.

118:99  Паче всех учащих мя разумех, яко свидения Твоя поучение мое есть.

118:100  Паче старец разумех, яко заповеди Твоя взысках.

118:101  От всякаго пути лукава возбраних ногам моим, яко да сохраню словеса Твоя:

118:102  от судеб Твоих не уклонихся, яко Ты законоположил ми еси.

118:103  Коль сладка гортани моему словеса Твоя: паче меда устом моим.

118:104  От заповедий Твоих разумех: сего ради возненавидех всяк путь неправды.

118:105  Светилник ногама моима закон Твой, и свет стезям моим.

118:106  Кляхся и поставих сохранити судбы правды Твоея.

118:107  Смирихся до зела: Господи, живи мя по словеси Твоему.

118:108  Вольная уст моих благоволи же, Господи, и судбам Твоим научи мя.

118:109  Душа моя в руку Твоею выну, и закона Твоего не забых.

118:110  Положиша грешницы сеть мне: и от заповедий Твоих не заблудих.

118:111  Наследовах свидения Твоя во век, яко радование сердца моего суть:

118:112  приклоних сердце мое сотворити оправдания Твоя в век за воздаяние.

118:113  Законопреступныя возненавидех, закон же Твой возлюбих.

118:114  Помощник мой и заступник мой еси Ты: на словеса Твоя уповах.

118:115  Уклонитеся от мене, лукавнующии, и испытаю заповеди Бога моего.

118:116  Заступи мя по словеси Твоему, и жив буду: и не посрами мене от чаяния моего:

118:117  помози ми, и спасуся, и поучуся во оправданиих Твоих выну.

118:118  Уничижил еси вся отступающыя от оправданий Твоих: яко неправедно помышление их.

118:119  Преступающыя непщевах вся грешныя земли: сего ради возлюбих свидения Твоя.

118:120  Пригвозди страху Твоему плоти моя: от судеб бо Твоих убояхся.

118:121  Сотворих суд и правду: не предаждь мене обидящым мя.

118:122  Восприими раба Твоего во благо, да не оклеветают мене гордии.

118:123  Очи мои изчезосте во спасение Твое и в слово правды Твоея:

118:124  сотвори с рабом Твоим по милости Твоей, и оправданием Твоим научи мя.

118:125  Раб Твой есмь аз: вразуми мя, и увем свидения Твоя.

118:126  Время сотворити Господеви: разориша закон Твой.

118:127  Сего ради возлюбих заповеди Твоя паче злата и топазиа.

118:128  Сего ради ко всем заповедем Твоим направляхся, всяк путь неправды возненавидех.

118:129  Дивна свидения Твоя: сего ради испыта я душа моя.

118:130  Явление словес Твоих просвещает и вразумляет младенцы.

118:131  Уста моя отверзох и привлекох дух, яко заповедий Твоих желах.

118:132  Призри на мя и помилуй мя, по суду любящих имя Твое.

118:133  Стопы моя направи по словеси Твоему, и да не обладает мною всякое беззаконие:

118:134  избави мя от клеветы человеческия, и сохраню заповеди Твоя.

118:135  Лице Твое просвети на раба Твоего и научи мя оправданием Твоим.

118:136  Исходища водная изведосте очи мои, понеже не сохраних закона Твоего.

118:137  Праведен еси, Господи, и прави суди Твои:

118:138  заповедал еси правду свидения Твоя, и истину зело.

118:139  Истаяла мя есть ревность Твоя: яко забыша словеса Твоя врази мои.

118:140  Разжжено слово Твое зело, и раб Твой возлюби е.

118:141  Юнейший аз есмь и уничижен: оправданий Твоих не забых.

118:142  Правда Твоя правда во век, и закон Твой истина.

118:143  Скорби и нужди обретоша мя: заповеди Твоя поучение мое.

118:144  Правда свидения Твоя в век: вразуми мя, и жив буду.

118:145  Воззвах всем сердцем моим, услыши мя, Господи: оправдания Твоя взыщу.

118:146  Воззвах Ти, спаси мя, и сохраню свидения Твоя.

118:147  Предварих в безгодии и воззвах: на словеса Твоя уповах.

118:148  Предваристе очи мои ко утру, поучитися словесем Твоим.

118:149  Глас мой услыши, Господи, по милости Твоей: по судбе Твоей живи мя.

118:150  Приближишася гонящии мя беззаконием: от закона же Твоего удалишася.

118:151  Близ еси Ты, Господи, и вси путие Твои истина.

118:152  Исперва познах от свидений Твоих, яко в век основал я еси.

118:153  Виждь смирение мое и изми мя: яко закона Твоего не забых.

118:154  Суди суд мой и избави мя: словесе ради Твоего живи мя.

118:155  Далече от грешник спасение, яко оправданий Твоих не взыскаша.

118:156  Щедроты Твоя многи, Господи: по судбе Твоей живи мя.

118:157  Мнози изгонящии мя и стужающии ми: от свидений Твоих не уклонихся.

118:158  Видех неразумевающыя и истаях: яко словес Твоих не сохраниша.

118:159  Виждь, яко заповеди Твоя возлюбих: Господи, по милости Твоей живи мя.

118:160  Начало словес Твоих истина, и во век вся судбы правды Твоея.

118:161  Князи погнаша мя туне: и от словес Твоих убояся сердце мое.

118:162  Возрадуюся аз о словесех Твоих, яко обретаяй корысть многу.

118:163  Неправду возненавидех и омерзих: закон же Твой возлюбих.

118:164  Седмерицею днем хвалих Тя о судбах правды Твоея.

118:165  Мир мног любящым закон Твой, и несть им соблазна.

118:166  Чаях спасения Твоего, Господи, и заповеди Твоя возлюбих.

118:167  Сохрани душа моя свидения Твоя и возлюби я зело.

118:168  Сохраних заповеди Твоя и свидения Твоя, яко вси путие мои пред Тобою, Господи.

118:169  Да приближится моление мое пред Тя, Господи: по словеси Твоему вразуми мя.

118:170  Да внидет прошение мое пред Тя: Господи, по словеси Твоему избави мя.

118:171  Отрыгнут устне мои пение, егда научиши мя оправданием Твоим.

118:172  Провещает язык мой словеса Твоя, яко вся заповеди Твоя правда.

118:173  Да будет рука Твоя еже спасти мя, яко заповеди Твоя изволих.

118:174  Возжелах спасение Твое, Господи, и закон Твой поучение мое есть.

118:175  Жива будет душа моя и восхвалит Тя: и судбы Твоя помогут мне.

118:176  Заблудих яко овча погибшее: взыщи раба Твоего, яко заповедий Твоих не забых.