Kapingamarangi - Psalms - 119

119:1  E-maluagina go digau ala e-mouli madammaa, ge e-mouli gii-hai be nia haganoho a Dimaadua.

119:2  E-maluagina go digau ala e-daudali ana helekai, ge e-hagalongo gi Mee mai i-lodo nadau manawa hagatau.

119:3  Digaula hagalee hai nia mee hala, e-heehee-hua i-di ala Dimaadua.

119:4  Meenei Dimaadua, Goe ne-gaamai gi gimaadou au haganoho, ga-hai-mai gi gimaadou bolo gi-manawa-dahi di hagalongo gi-nia maa.

119:5  Au e-hagadagadagagee bolo au ga-manawa-dahi ga-dadaahi au helekai!

119:6  Maa au gaa-mmada gii-donu gi au haganoho huogodoo, gei au ga-hagalee langaadia.

119:7  Au ga-hagaamu Goe i-di manawa madammaa i dogu madagoaa ma-ga-iloo-eau di tonu o au haganoho.

119:8  Au ga-haga-gila-aga au haganoho, hudee hudu-ina au gi-daha!

119:9  Tama-daane e-mee di-benebene dono mouli gi-madammaa behee? Mai i-di daudali au haganoho.

119:10  Au e-hagamahi e-hai-hegau-adu gi-di-Goe mai i-lodo dogu manawa hagatau. Dugua au gi-dee-oho au haganoho.

119:11  Au e-dadaahi au haganoho i-lodo dogu manawa bolo gi-dee-hai dagu mee hala adu gi-di-goe.

119:12  Au e-hagaamu Goe, meenei Dimaadua. Aago-ina-mai gi-di-au oo ala.

119:13  Au ga-tataanga au haganoho huogodoo ala ne-goweia.

119:14  Au e-tenetene di-daudali au haganoho laa-hongo dogu hai-mee gi-nia maluagina e-logowaahee.

119:15  Au e-hagabaubau au haganoho, gei e-hagadinadina au agoago.

119:16  Au e-tenetene gi au haganoho, au hagalee e-de-langahia-eau au helekai.

119:17  Goe hila mai gi-di-au, go dau dangada hai-hegau, gi-mouli au e-haga-gila-aga au agoago.

119:18  Hugee ogu golomada, gi-gidee au nia hagadilinga mee hagagoboina ala i-lodo au haganoho.

119:19  Au e-noho-hua i henuailala i tama madagoaa haga-bodobodo. Goe hudee hagammuni-ina au haganoho i-di-au.

119:20  Dogu manawa e-mmae i dogu hidihidi, au e-hiihai gi-iloo-eau au hagi-aga i-nia madagoaa huogodoo.

119:21  Goe e-wou gi digau ala e-hagamuamua. Goe e-haga-halauwa digau ala e-hagalee daudali au helekai.

119:22  Hagamehede-ina au gi-daha mo nia haganneennee mo nia gadagada hagamuamua digaula, idimaa au gu-haga-gila-aga au haganoho.

119:23  Digau aamua e-dagabuli belee haganoho di-nadau hai-baahi mai, e-haga-huaidu au, gei au e-hagamaumau-hua au agoago.

119:24  Au aago e-hai au gi-tenetene, aalaa go ogu hagamaamaa.

119:25  Au gu-magedaa guu-moe i-lodo nia gelegele. Haga-maaloo-ina-aga au, gii-hai be dau hagababa dela ne-hai.

119:26  Au ne-haagi-adu agu mee huogodoo ala ne-hai, gei Goe gu-helekai-mai. Aago-ina-mai gi-di-au oo ala.

119:27  Hagamaamaa-ina au gi-iloo-eau au haganoho, gei au ga-hagamamaanadu di hai o au agoago hagagoboina.

119:28  Au e-noho ge manawa-gee. Hagamaaloo-ina-aga au gii-hai be au hagababa ala ne-hai.

119:29  Hudee heia au gii-hana i-di ala hai-gee, gei Goe manawa dumaalia mai gi-di-au, aago-ina au gi au haganoho!

119:30  Au gu-hilihili bolo au ga-hagalongo-adu. Au gu-daudali au haganoho gii-donu.

119:31  Meenei Dimaadua, au gu-daudali au mee ala ne-aago, Goe hudee heia au gi-langaadia.

119:32  Au ga-haga-limalima ga-daudali au helekai, idimaa Goe dela ga-haga-damana-aga dogu kabemee.

119:33  Meenei Dimaadua, aago-ina-mai gi-di-au tadinga o au haganoho, gei au ga-daudali nia maa i-nia madagoaa huogodoo.

119:34  Hagamodongoohia-ina-mai gi-di-au au haganoho, gei au ga-hagagila-aga nia maa mai i-lodo dogu manawa hagatau.

119:35  Dagia-hua au i-hongo nia ala o au haganoho, idimaa aalaa nia mee e-haga-manawa lamalia au.

119:36  Gaamai gi-di-au di hiihai dela e-hagagila-aga au haganoho, laa-hongo dogu hiihai gi-nia maluagina.

119:37  Heia au gi-de-hiihai gi-nia balu mee. Heia-mai di humalia be dau hagababa dela ne-hai.

119:38  Heia-mai gi-di-au au mee ala gu-hagababa bolo e-hai-mai gi-di-au, go dau dangada hai-hegau, go di hagababa dela ne-hai Kooe gi digau huogodoo ala e-hagalongo-adu gi-di-Goe.

119:39  Haga-dagaloaha-ina au gi-daha mo nia haganneennee ala e-madagu-iei au. Dau hagi-aga le e-hagagoboina huoloo!

119:40  Au e-hiihai e-daudali au helekai. Gaamai gi-di-au di mouli hoou, idimaa Goe dela e-donu.

119:41  Meenei Dimaadua, hagamodongoohia-ina-mai gi-di-au dau hai dela e-aloho i-di-au, mo-di haga-dagaloaha au gii-hai be dau hagababa dela ne-hai.

119:42  Gei au gaa-mee di-helekai gi digau ala e-haganneennee au, idimaa au e-hagadagadagagee gi au helekai.

119:43  Heia au gii-mee di-helekai donu i-nia madagoaa huogodoo, idimaa dogu hagadagadagagee la i-lodo au haganoho.

119:44  Au ga-hagagila-aga au haganoho i-nia madagoaa huogodoo, dolomeenei ga-hana-hua dono hagaodi ai.

119:45  Au ga-heehee moholo mai gi-di-au, idimaa au e-hagamahi e-daudali au agoago.

119:46  Au ga-hagadele au helekai gi-nia king, au hagalee langaadia.

119:47  Dogu madagoaa ma-ga-hagagila-aga au helekai, gei au e-tenetene, idimaa au e-haga-dahidaamee nia maa.

119:48  Au e-hagalaamua ge e-haga-dahidaamee au haganoho. Au ga-hagabaubau au helekai aago.

119:49  Gi-langahia-e-goe dau hagababa dela ne-hai mai gi-di-au, go dau dangada hai-hegau, ma guu-hai au gi-hagadagadagagee huoloo.

119:50  Dogu noho i-lodo ogu hagammaemmae, au gu-manawa lamalia hua, idimaa dau hagababa la-gu-benebene dogu mouli.

119:51  Digau hagamuamua le e-hagabalumee au, gei au digi huli gi-daha mo au haganoho.

119:52  Meenei Dimaadua, au e-langahia-eau au haganoho ala i-mua-loo. Malaa, aalaa nia mee e-haga-manawa lamalia au.

119:53  Au e-hagawelewele huoloo ma-gaa-mmada gi digau huaidu ma-gaa-oho au haganoho.

119:54  Au helekai la aalaa agu mee e-dadaahili i dogu mouli bodobodo i-hongo henuailala nei.

119:55  Meenei Dimaadua, ma-gaa-boo gei au e-langahia Goe, mo-di maanadu di hai o au haganoho.

119:56  Au e-gida dogu tenetene mai i dogu daudali au haganoho.

119:57  Meenei Dimaadua, ma deelaa-hua Kooe dela e-hiihai ginai au. Au gu-hagababa bolo au e-hagalongo gi au haganoho.

119:58  Au e-madau-adu gi-di-Goe mai i-lodo dogu manawa hagatau bolo Goe gi-dumaalia-mai gi-di-au, gii-hai be dau hagababa dela ne-hai.

119:59  Au gu-daamada gu-hagabaubau dagu hai dela e-mouli-iei au, gei au gu-hagababa bolo au ga-daudali au helekai aago.

119:60  Au hagalee hagaduai, au ga-hagalimalima ga-daudali au helekai.

119:61  Digau huaidu guu-dugu di-nadau hele belee hele au, gei au hagalee de-langahia au haganoho.

119:62  I-di madahidi-waelua di boo, gei au e-ala-aga e-hagaamu Goe, idimaa Goe dela e-gabunga au mee gii-donu.

119:63  Au di hoo ni digau huogodoo ala e-hai-hegau-adu gi-di-Goe, go digau huogodoo ala e-hagalongo ge e-daudali au haganoho.

119:64  Meenei Dimaadua, henuailala e-honu i do aloho dee-modu, aago-ina au gi au haganoho.

119:65  Meenei Dimaadua, Goe gu-hagagila-aga dau hagababa, gei Goe e-humalia-mai gi-di-au, go dau dangada hai-hegau.

119:66  Gaamai gi-di-au di iloo nia mee mo-di kabemee, idimaa au e-hagadonu au helekai.

119:67  I-mua dau hagaduadua au, gei au nogo hai agu mee hala, gei dolomeenei gei au gu-daudali au helekai.

119:68  Goe e-humalia, gei e-hai au mee humalia! Aago-ina au gi au helekai.

119:69  Digau hagamuamua guu-hai nadau helekai tilikai i-di-au, gei au e-daudali-hua au helekai mai i-lodo dogu manawa hagatau.

119:70  Digaula nadau iloo ai, gei au haganoho la aalaa nia mee e-haga-manawa lamalia au.

119:71  Ogu dadaaligi le e-humalia-mai gi-di-au, idimaa nia maa e-hai au gii-kabe au helekai.

119:72  Au haganoho ala ne-gaamai gi-di-au la-koia e-hagalabagau ko-au laa-hongo nia bahihadu huogodoo o henuailala.

119:73  Goe dela ne-hai au, gei Goe dela e-benebene au haga-humalia. Gaamai gi-di-au di kabemee, gi-iloo-eau au haganoho.

119:74  Digau ala e-hagalaamua Goe la-ga-manawa lamalia ma-ga-mmada-mai gi-di-au, idimaa au dela e-hagadonu au hagababa.

119:75  Meenei Dimaadua, au e-iloo bolo Goe e-hagi-aga au mee gi-di ala dela e-donu, gei Goe dela ne-daaligi au idimaa goe dela e-manawa-dahi.

119:76  Heia do aloho waalooloo gi-haga-manawa lamalia-ina au, gii-hai be dau hagababa dela ne-hai-mai gi-di-au, go dau dangada hai-hegau.

119:77  Goe gi-manawa-dumaalia mai gi-di-au, gei au ga-mouli, idimaa au haganoho la-aalaa nia mee e-haga-manawa lamalia au.

119:78  Heia digau ala e-hagamuamua la-gi-langaadia, idimaa digaula e-hai baahi mai gi-di-au, gei au, au ga-mamaanadu-hua au helekai aago.

119:79  Heia digau ala e-hagalaamua Goe la-gi-lloomoi gi-di-au, aalaa go digau huogodoo ala e-iloo-ginaadou au helekai.

119:80  Heia au gii-dohu di-daudali au haganoho gi-de-langaadia au i dogu magedaa.

119:81  Meenei Dimaadua, au gu-dogono huoloo dagu talitali Goe belee hagamouli au, gei au e-hagadonu huoloo au helekai.

119:82  Ogu golomada guu-pili di haga-daumada au mee ala ne-hagababa, gei au ga-heeu, “Goe e-hagamaamaa au ma-gaa-hee?”

119:83  Au gu-balumee gadoo be-di peege gili manu bobo ne-hudu gi-daha, malaa gei au hagalee de-langahia-eau au helekai.

119:84  Au belee hai-loo gii-tali waalooloo behee? Ma-gaa-hee gei Goe ga-daaligi digau ala e-haihai au haga-huaidu?

119:85  Digau hagamuamua ala hagalee hagagila-aga au haganoho la-guu-geli nadau luwa belee hele au.

119:86  Au haganoho huogodoo le e-donu. Hagamaamaa-ina au, idimaa nia daangada e-hagahuaidu au gi nadau helekai tilikai.

119:87  Digaula gu-hoohoo-hua bolo ga-daaligi au gii-made, gei au hagalee huli gi-daha mo au haganoho.

119:88  Idimaa go do aloho dee-modu, Goe hila-mai gi-di-au, gii-mee au di-daudali au haganoho.

119:89  Meenei Dimaadua, au helekai la-ga-waalooloo-hua beelaa, dono hagaodi ai. Nia maa e-tuu-mau i-di langi.

119:90  Do manawa-dahi le e-waalooloo-hua beelaa ang-gi nia madawaawaa huogodoo. Goe ne-dugu henuailala gi dono lohongo, gei di-maa gu-noho-hua beelaa.

119:91  Nia mee huogodoo e-noho-hua beelaa gi-dangi-nei idimaa go au helekai, idimaa nia mee huogodoo le e-hai-hegau adu gi-di-Goe.

119:92  Maa nei bolo au haganoho la-hagalee go nia mee ala e-hagatenetene au, malaa, au tangada hua guu-made i-lodo ogu hagammaemmae.

119:93  Au ga-hagalee de-langahia-eau au aago, idimaa Goe e-dadaahi-hua dogu mouli mai i-nia maa.

119:94  Haga-dagaloaha-ina au, idimaa au di mee ni-aau! Au gu-hagamahi bolo e-daudali au haganoho.

119:95  Digau huaidu e-talitali au belee daaligi gii-made, gei au gaa-haa au haganoho gi ogu lodo.

119:96  Au gu-iloo-eau bolo nia mee huogodoo la ono hagaodi gi-muli i-golo, gei au haganoho la ono hagaodi ai.

119:97  E-koia e-damanaiee go dogu aloho i au haganoho! Au e-mamaanadu nia maa mai luada gaa-dae-loo gi-di boo.

119:98  Au haganoho le e-madalia au i-nia madagoaa huogodoo, e-hai au gi-kabemee gi-hongo ogu hagadaumee.

119:99  Au gu-kabemee i-hongo ogu gau agoago huogodoo, idimaa, au dela e-hagamamaanadu au helekai aago.

119:100  Au e-iloo nia mee i-hongo digau ala mmaadua, idimaa, au dela e-haga-gila-aga au haganoho.

119:101  Au gu-haga-mogowaa au gi-daha mo nia hagadilinga hangaahai huaidu huogodoo, idimaa au dela e-hiihai e-hagalongo ang-gi au helekai.

119:102  Au hagalee huli gi-daha mo au haganoho, idimaa, ma Kooe hua dela e-aago-mai nia maa gi-di-au.

119:103  E-koia e-maangala go au helekai! Au helekai koia e-maangala i-hongo nia mee-maangala ala e-hai go nia lamu llauehe.

119:104  Au gu-kabemee mai i-di gili au haganoho, deelaa di mee e-hidi-iei au e-hagadugina huoloo gi-nia hagadilinga hangaahai huaidu huogodoo.

119:105  Au helekai la-go di malama dela e-dagi au, gei go di maalama dela e-ina dogu ala.

119:106  Au ga-hagagila-aga dagu hagababa dela bolo au ga-hagalongo gi au haganoho e-donu.

119:107  Meenei Dimaadua, ogu hagammaemmae la-gu-logowaahee! Goe dadaahia-hua beelaa dogu mouli, gii-hai be dau hagababa dela ne-hai.

119:108  Meenei Dimaadua, Goe hila-mai gi dagu dalodalo danggee, aago-ina-mai au gi au haganoho.

119:109  Au gu-dee-hagahuodia-eau dogu mouli, gei au digi de-langahia-eau au haganoho.

119:110  Digau huaidu guu-hai nadau hele belee hele au, gei au digi de-hagalongo gi au haganoho.

119:111  Au haganoho la-go dogu haga-maluagina ga-hana-hua dee-odi, ma go nia maa ala e-haga-tene dogu manawa.

119:112  Au gu-hagamaanadu i lodo dogu manawa bolo au ga-hagalongo gi au haganoho gaa-dae-loo gi dogu laangi dela e-made-iei au.

119:113  Au e-hagadugina i digau ala hagalee manawa-dahi-adu gi-di-Goe, gei au e-aloho i au haganoho.

119:114  Goe go dogu duuli mo dogu hagaloohi, au e-hagadagadagagee gi au hagababa.

119:115  Goodou go digau huaidu, goodou hula gi-daha mo au. Au ga-daudali nia haganoho a dogu God.

119:116  Hagamaaloo-ina-aga au, gii-hai be dau hagababa dela ne-hai, gei au ga-mouli. Goe hudee heia au gi-langaadia i-lodo dogu hagadagadagagee!

119:117  Daahia au, gei au ga-mouli humalia, gei au ga-daudali au haganoho i-nia madagoaa huogodoo.

119:118  Goe e-hagabalumee digau huogodoo ala hagalee e-daudali au haganoho. Nia hagamamaanadu tilikai digaula la ono hadinga ai.

119:119  Goe guu-dugu digau huaidu huogodoo bolo digau hua balumee, gei au e-haga-dahidamee au helekai.

119:120  Au gu-madagu i-di-Goe, au gu-madagu huoloo i dau gabunga.

119:121  Au guu-hai nia mee ala e-donu ge humalia. Goe hudee diagia au gi-lodo nia mogobuna o ogu hagadaumee!

119:122  Heia dau hagababa mai gi-di-au bolo Goe ga-hagamaamaa dau dangada hai-hegau. Goe hudee dugu-ina au gi digau hagamuamua gi-daaligidia.

119:123  Ogu golomada guu-pili di haga-daumada Goe dela belee hanimoi e-haga-dagaloaha au, di haga-dagaloaha dela ne-hagababa Kooe.

119:124  Heia-mai gi-di-au gii-hai be do aloho dee-modu, mo-di aago-ina-mai gi-di-au au haganoho.

119:125  Au go dau dangada hai-hegau, gaamai gi-di-au di kabemee, gi-iloo-eau au agoago.

119:126  Deenei la do madagoaa, meenei Dimaadua, belee daaligi digaula, idimaa nia daangada la-gu-de-hagalongo gi au haganoho.

119:127  Au e-haga-dahidamee au haganoho laa-hongo nia goolo, nia goolo ala e-kaedahi e-humalia.

119:128  Deelaa dagu mee e-daudali au aago huogodoo, gei e-hagadugina-eau nia ala huogodoo ala e-hala.

119:129  Au agoago le e-humalia huoloo. Au e-haga-kila-aga nia maa mai i-lodo dogu manawa hagatau.

119:130  Di haga-modongoohia o au agoago le e-hidi-mai-ai di maalama, ge e-hai digau ala de-kabemee gi-kabemee.

119:131  Au e-hanga dogu ngudu gi-daha mo-di dogidogi hagapodo i dogu hiihai huoloo gi au helekai.

119:132  Huli-mai gi-di-au mo-di manawa-dumaalia mai gi-di-au, be dau hai dela e-hai Kooe gi digau huogodoo ala e-aaloho i-di-Goe.

119:133  Goe gumidia au gi-dee-doo, gii-hai be dau hagababa dela ne-hai. Hudee heia au gii-kumi go di huaidu.

119:134  Haga-dagaloaha-ina au gi-daha mo digau ala e-hagahuaidu au, gii-mee au di-hagagila-aga au haganoho.

119:135  O hadumada la-gi-haga-maalama-ina au, go dau dangada hai-hegau, aago-ina au gi au haganoho.

119:136  Au e-dangi huoloo ogu lodo, idimaa nia daangada la-hagalee hagalongo gi au haganoho.

119:137  Meenei Dimaadua, Goe e-donu, gei au haganoho le e-donu.

119:138  Nia haganoho ala ne-gaamai Kooe le e-donu huoloo ge e-humalia.

119:139  Dogu hagawelewele guu-gaa i ogu lodo gadoo be-di ahi, idimaa go ogu hagadaumee ala e-haga-balumee au haganoho.

119:140  Au hagababa ala ne-hai-mai gi-di-au le e-donu huoloo! Au e-aloho huoloo i-nia maa!

119:141  Dogu huaidina la hagalee dahidamee, di balumee-hua, gei au hagalee de-langahia-eau au haganoho.

119:142  Oo donu le e-donu gaa-hana-hua beelaa, gei au haganoho le e-donu i-nia madagoaa huogodoo.

119:143  Au guu-honu i-nia haingadaa mo dee-baba, gei au haganoho e-hai au gi-tenetene.

119:144  Au aago-mai gi-di-au le e-donu i-nia madagoaa huogodoo. Gaamai gi-di-au di kabemee, gei au gaa-mee di-mouli.

119:145  Au e-gahigahi Goe mai i-lodo dogu manawa hagatau, meenei Dimaadua. Helekai-mai, gei au ga-hagalongo gi au helekai!

119:146  Au e-gahigahi Goe, haga-dagaloaha-ina au, gei au ga-hagagila-aga au haganoho.

119:147  I-mua di laa ma-gaa-hobo, gei au e-gahigahi Goe i-di hagamaamaa. Au e-hagadagadagagee huoloo gi au hagababa.

119:148  I-di waalooloo di boo, gei au e-moe hagaala-hia e-hagamamaanadu au aago.

119:149  Meenei Dimaadua, hagalongo mai gi-di-au, idimaa do aloho le e-waalooloo, hagamodongoohia-ina-mai gi-di-au do dumaalia, haga-mouli-ina au!

119:150  Ogu hagadaumee huaidu la-gu-lloomoi gu-hoohoo-mai, go digau ala hagalee-loo e-hagagila-aga au haganoho.

119:151  Gei goe e-hoohoo-mai gi dogu baahi, meenei Dimaadua, gei au helekai huogodoo le e-noho-hua beelaa.

119:152  Mai loo i-mua gei au gu-iloo-eau au aago. Goe ne-hai nia maa bolo gi-noho-hua waalooloo beelaa.

119:153  Mmada-mai gi dogu hagammaemmae, haga-dagaloaha-ina au, idimaa au digi huli gi-daha mo au haganoho.

119:154  Hagamaamaa-ina au i ogu donu, mo-di haga-dagaloaha-ina au. Benabena-ina dogu mouli gii-hai be dau hagababa dela ne-hai.

119:155  Digau huaidu la-hagalee mouli, i digaula ala hagalee daudali au haganoho.

119:156  Gei do aloho le e-aamua huoloo, meenei Dimaadua, hagamodongoohia-ina-mai do dumaalia mo-di hagamouli-ina au!

119:157  Ogu hagadaumee mo digau ala e-dadaaligi au le e-dogologowaahee, gei au hagalee huli gi-daha mo au haganoho.

119:158  Dogu madagoaa ma-gaa-mmada gi digau hagi-aga dangada aalaa, gei au e-hagawelewele huoloo, idimaa digaula hagalee hagagila-aga au haganoho.

119:159  Meenei Dimaadua, mmada-mai gi-di-au dela e-aloho i au aago. Do aloho la-hagalee huli, malaa goe haga-dagaloaha-ina au!

119:160  Di hagamau o au haganoho la-go di tonu, gei au gabunga huogodoo le e-donu ge dono hagaodi ai.

119:161  Digau aamua e-hai-baahi mai gi-di-au dono hadinga ai, gei au e-hagalaamua au haganoho.

119:162  Au e-tenetene huoloo gi au hagababa, e-tenetene gadoo be tangada ma-gaa-gida ana goloo hagalabagau.

119:163  Au e-hudi dogu wou ge e-hagadugina-eau i-nia helekai tilikai huogodoo, gei au e-haga-dahidamee au haganoho.

119:164  Au e-danggee-adu gi-di-goe haga-hidu i-lodo di laangi e-dahi, idimaa go au gabunga ala e-donu.

119:165  Digau ala e-haga-dahidamee au haganoho le e-noho i-di aumaalia, gei dei dahi mee e-mee di-hai digaula gii-tinga-ai.

119:166  Meenei Dimaadua, au e-talitali dau haga-dagaloaha, gei au e-haga-gila-aga au helekai ala ne-hai.

119:167  Au e-hagagila-aga au agoago, au e-aloho i-nia maa mai i-lodo dogu manawa hagatau.

119:168  Au e-hagalongo ang-gi au haganoho mo au helekai aago, Goe e-gidee agu mee huogodoo ala e-hai.

119:169  Meenei Dimaadua, dagu dangidangi madau di hagamaamaa la-heia gii-dau i-di-Goe! Gaamai gi-di-au di kabemee, gii-hai be dau hagababa dela ne-hai.

119:170  Hagalongo-mai gi dagu dalodalo, mo-di haga-dagaloaha-ina au gii-hai be dau hagababa dela ne-hai!

119:171  Au ga-hagahagaamu Goe i-nia madagoaa huogodoo, idimaa Goe dela e-aago au gi au haganoho.

119:172  Au ga-daahili i au haganoho, idimaa au haganoho le e-donu.

119:173  Goe e-hagatogomaalia i-nia madagoaa huogodoo belee hagamaamaa au, idimaa au dela e-daudali au haganoho.

119:174  Meenei Dimaadua, au e-hidihidi huoloo i dau hagamaamaa o-di haga-dagaloaha! Au haganoho la nia mee e-haga-manawa lamalia au.

119:175  Gaamai gi-di-au di mouli, gii-mee au di-hagaamu Goe. Au helekai aago gi-hagamaamaa-ina au.

119:176  Au e-heehee halaangaa gadoo be tama-siibi ne-ngala. Hanimoi halahala-ina au, go dau dangada hai-hegau, idimaa au digi huli gi-daha mo au haganoho.