Kekchi - Ezra

Chapter 1

1:1  Yo̱ xbe̱n chihab roquic chokˈ rey aran Persia laj Ciro nak quicˈulman li cˈaˈru quixye li profeta Jeremías joˈ quiyeheˈ re xban li Ka̱cuaˈ Dios. Li Ka̱cuaˈ quixtochˈ xchˈo̱l li rey Ciro nak tixtakla li resil aˈin saˈ chixjunil li tenamit li cuanqueb rubel xcuanquil. Ut quixtakla li resil riqˈuin a̱tin ut chi tzˈi̱banbil.

1:2  Aˈan aˈin li resil li quixtakla: —Joˈcaˈin naxye laj Ciro lix reyeb laj Persia: Li Ka̱cuaˈ Dios li cuan saˈ choxa xqˈue rubel incuanquil chixjunileb li tenamit li cuanqueb saˈ ruchichˈochˈ. Ut xqˈue ajcuiˈ saˈ inbe̱n xyi̱banquil li templo aran Jerusalén xcue̱nt Judá.

1:3  Joˈcan nak cui la̱ex xcomonex lix tenamit li Dios, ayukex saˈ li tenamit Jerusalén xcue̱nt Judá ut aran te̱yi̱b li rochoch li Ka̱cuaˈ, lix Dioseb laj Israel. Aˈan li tzˈakal Dios li nequeˈxlokˈoni aran Jerusalén. Ut aˈ taxak li Ka̱cuaˈ chicua̱nk e̱riqˈuin.

1:4  Ut li joˈ qˈuial chic teˈcana̱k cheˈxtenkˈaheb li xiqueb re chi cablac riqˈuin xqˈuebal li plata, li oro, ut li cˈaˈak re ru ta̱cˈanjelak chiruheb. Teˈxqˈue li queto̱mk ut teˈxqˈue lix mayejeb li joˈ qˈuial ta̱ala̱k saˈ xchˈo̱leb xqˈuebal re lix templo li Ka̱cuaˈ Dios aran Jerusalén.—

1:5  Ut li Ka̱cuaˈ Dios quixtochˈ lix chˈo̱leb li nequeˈcˈamoc be saˈ xya̱nkeb li ralal xcˈajol laj Judá ut laj Benjamín joˈqueb ajcuiˈ laj tij ut eb laj levita. Ut queˈxcauresi ribeb chi xic Jerusalén re xyi̱banquil lix templo li Ka̱cuaˈ.

1:6  Ut chixjunileb li cuanqueb chi nachˈ riqˈuineb queˈxtenkˈaheb. Queˈxqˈue li plata, queˈxqˈue li oro ut li cˈaˈak re ru li ta̱cˈanjelak chiruheb. Queˈxqˈue li xul li nequeˈi̱kan ut nabal li cˈaˈak re ru terto xtzˈak. Ut queˈxqˈue ajcuiˈ lix mayej aˈ yal joˈ nimal x-ala chak saˈ xchˈo̱l li junju̱nk.

1:7  Ut li rey Ciro quirisi chak li secˈ li nacˈanjelac saˈ li rochoch li Dios, li queˈelkˈa̱c ut queˈqˈueheˈ saˈ rochocheb lix dioseb laj Babilonia xban li rey Nabucodonosor.

1:8  Li rey Ciro quixye re laj Mitrídates laj xocol tumin nak ta̱rajlaheb li secˈ. Nak ac xrajlaheb, quixkˈaxtesiheb re laj Sesbasar li gobernador re Judá.

1:9  Aˈin xqˈuial li secˈ li quixkˈaxtesi li rey: laje̱b xcaˈcˈa̱l (30) li ni̱nki secˈ oro; jun mil (1,000) li ni̱nki secˈ plata; bele̱b xcaˈcˈa̱l (29) li chˈi̱chˈ;

1:10  laje̱b xcaˈcˈa̱l (30) li secˈ oro; ca̱hib ciento riqˈuin laje̱b (410) li secˈ plata ut jun mil (1,000) li yalak cˈaˈru chi secˈul.

1:11  Chixjunil li secˈ li quikˈaxtesi̱c re laj Sesbasar, aˈan o̱b mil riqˈuin ca̱hib ciento (5,400) li secˈ oro ut li secˈ plata. Ut queˈxcˈam li secˈ nak queˈel Babilonia li chapcho̱queb cuiˈ ut queˈsukˈi cuiˈchic Jerusalén.

Chapter 2

2:1  Aˈaneb aˈin li ralal xcˈajoleb laj Israel li yoˈlajenakeb aran Judá li queˈchapeˈ ut queˈcˈameˈ Babilonia. Queˈsukˈi cuiˈchic Jerusalén ut saˈ eb li naˈajej li cuanqueb Judá. Ac saˈ xnaˈajeb queˈcana li junju̱nk.

2:2  Ut li nequeˈcˈamoc be saˈ xya̱nkeb, aˈaneb laj Zorobabel, laj Jesúa, laj Nehemías, laj Seraías, laj Reelaías, laj Mardoqueo, laj Bilsán, laj Mispar, laj Bigvai, laj Rehum, ut laj Baana. Aˈaneb aˈin lix qˈuialeb li cui̱nk aj Israel.

2:3  Li ralal xcˈajol laj Paros, aˈan cuib mil riqˈuin jun ciento riqˈuin cablaju xca̱cˈa̱leb (2,172).

2:4  Li ralal xcˈajol laj Sefatías, aˈan oxib ciento riqˈuin cablaju xca̱cˈa̱l (372).

2:5  Li ralal xcˈajol laj Ara, aˈan cuukub ciento riqˈuin oˈlaju xca̱cˈa̱l (775).

2:6  Li ralal xcˈajol laj Pahat-moab, xcomoneb laj Jesúa ut laj Joab, aˈan cuib mil riqˈuin cuakxakib ciento riqˈuin cablaju (2,812).

2:7  Li ralal xcˈajol laj Elam, aˈan jun mil riqˈuin cuib ciento riqˈuin ca̱laju roxcˈa̱l. (1,254)

2:8  Li ralal xcˈajol laj Zatu, aˈan bele̱b ciento riqˈuin o̱b roxcˈa̱l (945).

2:9  Li ralal xcˈajol laj Zacai, aˈan cuukub ciento riqˈuin oxcˈa̱l (760).

2:10  Li ralal xcˈajol laj Bani, aˈan cuakib ciento riqˈuin cuib roxcˈa̱l (642).

2:11  Li ralal xcˈajol laj Bebai, aˈan cuakib ciento riqˈuin oxib xcaˈcˈa̱l (623).

2:12  Li ralal xcˈajol laj Azgad, aˈan jun mil riqˈuin cuib ciento riqˈuin cuib xcaˈcˈa̱l (1,222).

2:13  Li ralal xcˈajol laj Adonicam, aˈan cuakib ciento riqˈuin cuakib xca̱cˈa̱l (666).

2:14  Li ralal xcˈajol laj Bigvai, aˈan cuib mil riqˈuin cuaklaju roxcˈa̱l (2,056).

2:15  Li ralal xcˈajol laj Adín, aˈan ca̱hib ciento riqˈuin ca̱laju roxcˈa̱l (454).

2:16  Li ralal xcˈajol laj Ater, xcomon laj Ezequías, aˈan cuakxaklaju roˈcˈa̱l (98).

2:17  Li ralal xcˈajol laj Bezai, aˈan oxib ciento riqˈuin oxib xcaˈcˈa̱l (323).

2:18  Li ralal xcˈajol laj Jora, aˈan jun ciento riqˈuin cablaju (112).

2:19  Li ralal xcˈajol laj Hasum, aˈan cuib ciento riqˈuin oxib xcaˈcˈa̱l (223).

2:20  Li ralal xcˈajol laj Gibar, aˈan oˈlaju roˈcˈa̱l (95).

2:21  Li ralal xcˈajol laj Belén, aˈan jun ciento riqˈuin oxib xcaˈcˈa̱l (123).

2:22  Li ralal xcˈajol laj Netofa, aˈan cuaklaju roxcˈa̱l (56).

2:23  Li ralal xcˈajol laj Anatot, aˈan jun ciento riqˈuin cuakxakib xcaˈcˈa̱l (128).

2:24  Li ralal xcˈajol laj Azmavet, aˈan cuib roxcˈa̱l (42).

2:25  Li ralal xcˈajol laj Quiriat-jearim, laj Cafira ut laj Beerot, aˈan cuukub ciento riqˈuin oxib roxcˈa̱l (743).

2:26  Li ralal xcˈajol laj Ramá ut laj Geba, aˈan cuakib ciento riqˈuin jun xcaˈcˈa̱l (621).

2:27  Li ralal xcˈajol laj Micmas, aˈan jun ciento riqˈuin cuib xcaˈcˈa̱l (122).

2:28  Li ralal xcˈajol laj Bet-el ut laj Hai, aˈan cuib ciento riqˈuin oxib xcaˈcˈa̱l (223).

2:29  Li ralal xcˈajol laj Nebo, aˈan cablaju roxcˈa̱l (52).

2:30  Li ralal xcˈajol laj Magbis, aˈan jun ciento riqˈuin cuaklaju roxcˈa̱l (156).

2:31  Li ralal xcˈajol laj Elam jun chic, aˈan jun mil riqˈuin cuib ciento riqˈuin ca̱laju roxcˈa̱l (1,254).

2:32  Li ralal xcˈajol laj Harim, aˈan oxib ciento riqˈuin junmay (320).

2:33  Li ralal xcˈajol laj Lod, laj Hadid ut laj Ono, aˈan cuukub ciento riqˈuin o̱b xcaˈcˈa̱l (725).

2:34  Li ralal xcˈajol laj Jericó, aˈan oxib ciento riqˈuin o̱b roxcˈa̱l (345).

2:35  Li ralal xcˈajol laj Senaa, aˈan oxib mil riqˈuin cuakib ciento riqˈuin laje̱b xcaˈcˈa̱l (3,630).

2:36  Eb laj tij aˈaneb li ralal xcˈajol laj Jedaías xcomoneb laj Jesúa. Aˈan bele̱b ciento riqˈuin oxlaju xca̱cˈa̱leb (973).

2:37  Li ralal xcˈajol laj Imer, aˈan jun mil riqˈuin cablaju roxcˈa̱l (1,052).

2:38  Li ralal xcˈajol laj Pasur, aˈan jun mil riqˈuin cuib ciento riqˈuin cuukub roxcˈa̱l (1,247).

2:39  Li ralal xcˈajol laj Harim, aˈan jun mil riqˈuin cuuklaju (1,017).

2:40  Eb laj levita, aˈaneb li ralal xcˈajol laj Jesúa ut laj Cadmiel, xcomoneb laj Hodavías. Aˈan ca̱laju xca̱cˈa̱leb (74).

2:41  Eb laj bichanel, li ralal xcˈajol laj Asaf, aˈan jun ciento riqˈuin cuakxakib xcaˈcˈa̱l (128).

2:42  Eb li nequeˈcˈacˈalen saˈ li oqueba̱l re li templo, aˈaneb li ralal xcˈajol laj Salum, laj Ater, laj Talmón, laj Acub, laj Hatita, ut laj Sobai. Aˈan jun ciento riqˈuin bele̱laju xcaˈcˈa̱l (139).

2:43  Eb li nequeˈcˈanjelac saˈ li templo, aˈaneb li ralal xcˈajol laj Ziha, laj Hasufa, laj Tabaot,

2:44  laj Queros, laj Siaha, laj Padón,

2:45  laj Lebana, laj Hagaba, laj Acub,

2:46  laj Hagab, laj Salmai, laj Hanán,

2:47  laj Gidel, laj Gahar, laj Reaía,

2:48  li ralal xcˈajol laj Rezín, laj Necoda, ut laj Gazam,

2:49  li ralal xcˈajol laj Uza, laj Paseah, ut laj Besai,

2:50  li ralal xcˈajol laj Asena, laj Meunim, ut laj Nefusim,

2:51  li ralal xcˈajol laj Bacbuc, laj Hacufa, ut laj Harhur,

2:52  li ralal xcˈajol laj Bazlut, laj Mehída, ut laj Harsa,

2:53  li ralal xcˈajol laj Barcos, laj Sísara, ut laj Tema,

2:54  li ralal xcˈajol laj Nezía, ut laj Hatifa.

2:55  Eb li ralal xcˈajol li nequeˈcˈanjelac chiru laj Salomón, aˈaneb li ralal xcˈajol laj Sotai, laj Soferet, ut laj Peruda,

2:56  ut li ralal xcˈajoleb laj Jaala, laj Darcón ut laj Gidel,

2:57  ut li ralal xcˈajol laj Sefatías ut laj Hatil, ut laj Poqueret-hazebaim ut laj Amón.

2:58  Chixjunileb li nequeˈcˈanjelac saˈ li templo ut eb li ralal xcˈajol li nequeˈcˈanjelac chiru laj Salomón, aˈan oxib ciento riqˈuin cablaju roˈcˈa̱l (392).

2:59  Aˈaneb aˈin li queˈcuulac Tel-mela, Tel-harsa, Querub, Adón ut Imer. Abanan incˈaˈ chˈolchˈo ma xcomoneb li ralal xcˈajol laj Israel malaj ut incˈaˈ.

2:60  Eb li ralal xcˈajol laj Delaía ut li ralal xcˈajol laj Tobías ut li ralal xcˈajol laj Necoda, aˈan cuakib ciento riqˈuin cablaju roxcˈa̱l (652).

2:61  Eb li ralal xcˈajol laj tij, aˈaneb lix comoneb laj Habaía, laj Cos, laj Barzilai, li quisumla riqˈuin jun li ixk xcomoneb lix rabin laj Barzilai aj Galaad. Quiqˈueheˈ xcˈabaˈ joˈ li xcˈabaˈ eb aˈan.

2:62  Queˈxsicˈ xcˈabaˈeb lix xeˈto̱nil yucuaˈ saˈ li hu li tzˈi̱banbil cuiˈ lix cˈabaˈeb laj tij ut incˈaˈ queˈxtau. Joˈcan nak incˈaˈ chic queˈqˈueheˈ chokˈ aj tij.

2:63  Ut li gobernador quixye nak incˈaˈ naru teˈxtzaca li kˈaxtesinbil tzacae̱mk toj cua̱nk junak aj tij ta̱tzˈilok a̱tin chirixeb riqˈuin li Urim ut li Tumim.

2:64  Lix qˈuialeb chixjunileb lix comoneb rib, aˈan cuib roxcˈa̱l mil riqˈuin oxib ciento riqˈuin oxcˈa̱l (42,360).

2:65  Cuanqueb ajcuiˈ cuukub mil riqˈuin oxib ciento riqˈuin cuuklaju xcaˈcˈa̱l (7,337) xmo̱seb, ixk ut cui̱nk. Ut cuanqueb ajcuiˈ cuib ciento (200) aj bichanel, joˈ cui̱nk joˈ ixk.

2:66  Cuanqueb cuukub ciento riqˈuin cuaklaju xcaˈcˈa̱l (736) xcacua̱yeb. Ut eb lix mu̱l cuib ciento riqˈuin o̱b roxcˈa̱l (265).

2:67  Ut eb lix camello ca̱hib ciento riqˈuin oˈlaju xcaˈcˈa̱l (435). Ut cuanqueb ajcuiˈ cuakib mil riqˈuin cuukub ciento riqˈuin junmay (6,720) lix bu̱reb.

2:68  Ut li junju̱nk chi cui̱nk li nequeˈjolomin re li junju̱nk cabal, nak queˈcuulac Jerusalén queˈxkˈaxtesi lix mayejeb re xyi̱banquil cuiˈchic li templo saˈ ajcuiˈ lix naˈaj li quicuan cuiˈ junxil.

2:69  Queˈxqˈue aˈ yal joˈ qˈuial li queˈru xqˈuebal. Queˈxqˈue jun mil riqˈuin laje̱b xcaˈcˈa̱l libras (1,030) li oro ut o̱b mil (5,000) libra li plata. Ut jun ciento li rakˈeb laj tij queˈxqˈue.

2:70  Cuanqueb xcomoneb laj Israel queˈcana chi cua̱nc saˈ li tenamit Jerusalén. Queˈcana aran eb laj tij ut eb laj levita, eb laj bichanel, eb li queˈcˈacˈalen chire xpuertil li templo joˈqueb ajcuiˈ li nequeˈcˈanjelac saˈ li templo ut li joˈ qˈuial chic laj Israel queˈcana chi cua̱nc saˈ xtenamiteb. Ac re reheb li junju̱nk lix tenamiteb.

Chapter 3

3:1  Saˈ xcuuk li po, ac cuanqueb li ralal xcˈajol laj Israel saˈ eb li cocˈ tenamit li cuanqueb nachˈ riqˈuin Jerusalén. Queˈchˈutla chixjunileb li tenamit aran Jerusalén.

3:2  Ut laj Jesúa, li ralal laj Josadac, ut eb laj tij, lix comoneb, ut laj Zorobabel ralal laj Salatiel rochbeneb lix comoneb queˈoc chixyi̱banquil lix artal li Ka̱cuaˈ lix Dioseb laj Israel re teˈxmayeja cuiˈ li xul joˈ tzˈi̱banbil saˈ li chakˈrab li quiqˈueheˈ re laj Moisés laj cˈanjel chiru li Dios.

3:3  Usta yo̱ xxiuheb xbaneb li jalaneb xtenamit li cuanqueb Jerusalén, queˈxyi̱b li artal chi cha̱bil saˈ lix naˈaj ut queˈxmayeja li cˈatbil xul saˈ xbe̱n li artal rajlal ekˈela ut rajlal ecuu re xlokˈoninquil li Ka̱cuaˈ.

3:4  Tojoˈnak queˈxyi̱b li cocˈ muheba̱l re nak teˈxba̱nu li ninkˈe re xbantioxinquil chiru li Dios nak queˈcoleˈ, joˈ tzˈi̱banbil saˈ li chakˈrab li quiqˈueheˈ re laj Moisés. Rajlal cutan queˈxmayeja li cˈatbil xul joˈ cˈaynakeb xba̱nunquil ut saˈ xcutanquil quilajeˈxba̱nu joˈ quiyeheˈ reheb.

3:5  Ut queˈmayejac joˈ nequeˈxba̱nu junelic ut queˈmayejac saˈ xyoˈlajic li po ut saˈ eb li cutan joˈ yebil chak reheb xban li Ka̱cuaˈ ut cuanqueb ajcuiˈ li qui-ala saˈ xchˈo̱leb xqˈuebal xmayejeb.

3:6  Saˈ li xbe̱n cutan re li xcuuk li po queˈxtiquib xmayejanquil li cˈatbil xul re xlokˈoninquil li Ka̱cuaˈ, usta toj ma̱jiˈ nequeˈxyi̱b li cimiento re lix templo li Ka̱cuaˈ.

3:7  Queˈtojeˈ laj tzˈac ut eb laj pechˈ. Ut queˈqˈueheˈ ajcuiˈ xcua rucˈa ut x-aceite eb laj Tiro ut eb laj Sidón re nak teˈxcˈam chak li cha̱bil cheˈ chacalteˈ li cuan Líbano. Teˈxcˈam chak Jope chiru li palau joˈ quiyeheˈ reheb xban laj Ciro lix reyeb laj Persia.

3:8  Ac yo̱ chic xcab po xcab chihab xsukˈijiqueb Jerusalén laj Israel li queˈchapeˈ ut queˈcˈameˈ saˈ jalan tenamit, nak laj Zorobabel li ralal laj Salatiel ut laj Jesúa li ralal laj Josadac, queˈoc chixyi̱banquil lix templo li Ka̱cuaˈ Dios, rochbeneb laj tij ut eb laj levita. Eb laj levita li ac queˈxba̱nu junmay chihab, aˈaneb li queˈcˈamoc be chi cˈanjelac.

3:9  Eb li queˈcˈamoc be chixyi̱banquil li rochoch li Dios, aˈaneb aˈin: laj Jesúa rochbeneb li ralal xcˈajol ut li rechˈalal; ut laj Cadmiel, li ralal laj Hodavías, rochbeneb li ralal xcˈajol; joˈ ajcuiˈ laj Henadad rochbeneb li ralal xcˈajol ut li rechˈalal. Chixjunileb aˈan aj levita.

3:10  Ut nak eb laj tzˈac yo̱queb chixqˈuebal li cimiento re lix templo li Ka̱cuaˈ, eb laj tij queˈxqˈue chirixeb li rakˈ li nequeˈrocsi nak nequeˈcˈanjelac saˈ li templo ut cuanqueb xtrompeta saˈ rukˈeb. Ut eb li ralal xcˈajol laj Asaf laj levita cuanqueb saˈ rukˈ lix chˈi̱chˈeb címbalos xcˈabaˈ. Yo̱queb chixlokˈoninquil li Ka̱cuaˈ joˈ quixye laj David li quicuan chokˈ xreyeb laj Israel junxil.

3:11  Yo̱queb chi bicha̱nc ut yo̱queb chi lokˈoni̱nc. Yo̱queb chi bantioxi̱nc chiru li Ka̱cuaˈ ut yo̱queb chixyebal: —Kˈaxal cha̱bil li Ka̱cuaˈ. Junelic naruxta̱na ruheb laj Israel, chanqueb. Ut chixjunileb li tenamit yo̱queb chixjapbal reheb xban xsahil xchˈo̱leb ut yo̱queb chixlokˈoninquil li Ka̱cuaˈ xban nak queˈxqˈue li cimiento li ta̱cu̱tu̱nk re li rochoch li Dios.

3:12  Nabaleb laj levita xcomoneb laj tij, ut eb li ac ti̱xeb li nequeˈjolomin reheb li junju̱nk cabaleb, yo̱queb chi ya̱bac chi cau xya̱b xcuxeb nak queˈril nak yo̱ chi oc li cimiento re lix templo li Dios xban nak quinak saˈ xchˈo̱leb li templo li quicuan junxil. Ut nabaleb chic yo̱queb chixjapbal reheb xban xsahil xchˈo̱leb.

3:13  Chi najt qui-abi̱c chak lix ya̱beb, ut incˈaˈ quicˈutun chiruheb li tenamit aniheb li yo̱queb chixjapbal reheb xban xsahil xchˈo̱leb ut aniheb li yo̱queb chi ya̱bac.

Chapter 4

4:1  Eb li xicˈ nequeˈiloc reheb li ralal xcˈajol laj Judá ut eb li ralal xcˈajol laj Benjamín, queˈrabi resil nak eb aˈan, li queˈchapeˈ ut queˈcˈameˈ chi najt, queˈsukˈi cuiˈchic Jerusalén ut yo̱queb chixyi̱banquil lix templo li Ka̱cuaˈ lix Dioseb laj Israel.

4:2  Queˈcuulac riqˈuin laj Zorobabel ut riqˈuineb li nequeˈjolomin re li junju̱nk cabal ut queˈxye reheb: —Cheqˈue ta kalese̱ns re texkatenkˈa chi cablac xban nak la̱o nakaqˈue ajcuiˈ xlokˈal le̱ Dios ut nocomayejac chiru chalen saˈ eb li cutan nak laj Esar-hadón cuan chokˈ rey aran Asiria, li quitaklan chak ke arin, chanqueb.

4:3  Queˈchakˈoc laj Zorobabel ut laj Jesúa joˈqueb ajcuiˈ li nequeˈjolomin reheb li junju̱nk cabal ut queˈxye: —Incˈaˈ ta̱ru̱k toe̱tenkˈa chixyi̱banquil lix templo li kaDios. La̱o aj Israel takayi̱b kajunes lix templo li kaDios joˈ quixye ke laj Ciro, lix reyeb laj Persia, chanqueb.

4:4  Joˈcan nak eb li tenamit li cuanqueb saˈ li naˈajej aˈan queˈxseˈbesi laj Israel re nak ta̱oc xxiuheb ut teˈxcanab xyi̱banquil lix templo li Ka̱cuaˈ.

4:5  Eb li xicˈ nequeˈiloc reheb queˈxtacchiˈi ut queˈxtumina ruheb li cuanqueb xcuanquil saˈ li tenamit re nak eb li ralal xcˈajol laj Judá incˈaˈ teˈqˈuehekˈ xlese̱ns chixyi̱banquil lix templo li Ka̱cuaˈ chalen saˈ eb li cutan nak laj Ciro cuan chokˈ xreyeb laj Persia toj saˈ eb li cutan nak laj Darío qui-oc chokˈ rey aran Persia.

4:6  Saˈ eb li cutan nak laj Asuero qui-oc chokˈ rey, queˈtzˈi̱bac riqˈuin re xjitbaleb li cuanqueb Judá ut li cuanqueb Jerusalén.

4:7  Ut nak laj Artajerjes cuan chokˈ rey aran Persia, laj Bislam, laj Mitrídates, laj Tabeel joˈqueb ajcuiˈ li rochben queˈtzˈi̱bac riqˈuin li rey Artajerjes. Queˈxtzˈi̱ba li hu saˈ li ra̱tinoba̱leb laj arameo ut joˈ nequeˈtzˈi̱bac eb aˈan.

4:8  Laj Rehum li capitán ut laj Simsai laj tzˈi̱b queˈtzˈi̱bac riqˈuin li rey Artajerjes chixjitbaleb laj judío li cuanqueb Jerusalén.

4:9  Saˈ li cutan aˈan queˈtzˈi̱bac laj Rehum ut laj Simsai laj tzˈi̱b rochbeneb laj rakol a̱tin joˈqueb ajcuiˈ li nequeˈtaklan saˈ xbe̱neb laj Persia, eb laj Erec, eb laj Babilonia ut eb laj Susa, laj elamita.

4:10  Ut rochbeneb ajcuiˈ li jalan chic tenamit li queˈtakla̱c chi cua̱nc saˈ li tenamit Samaria xban laj Asnapar li nim xcuanquil ut rochbeneb ajcuiˈ li queˈtakla̱c saˈ eb li naˈajej li cuanqueb jun pacˈal li nimaˈ Eufrates.

4:11  Joˈcaˈin naxye li hu li queˈxtakla riqˈuin li rey: —At rey Artajerjes, la̱o laj cˈanjel cha̱cuu li cuanco jun pacˈal li nimaˈ Eufrates, nakatakla xsahil a̱chˈo̱l.

4:12  Chanauhak taxak at rey, nak eb laj judío li queˈel chak saˈ li tenamit cuancat cuiˈ, queˈcˈulun arin Jerusalén. Yo̱queb cuiˈchic chixyi̱banquil li tenamit aˈin laj kˈetol a̱tin li incˈaˈ useb xnaˈleb. Yo̱queb chixyi̱banquil li cimiento ut li tzˈac.

4:13  Chanauhak taxak at rey, cui teˈxyi̱b cuiˈchic li tenamit aˈan, ut cui teˈxyi̱b cuiˈchic li tzˈac, incˈaˈ chic teˈxqˈue lix tojeb chi moco teˈxtoj a̱cue li cˈaˈru tento teˈxtoj cha̱cuu, at rey, ut nabal li tumin ta̱sachk.

4:14  Xban nak la̱o aj cˈanjel cha̱cuu ut tojbilo a̱ban, incˈaˈ naru nak yal takil nak teˈxkˈet li chakˈrab li qˈuebil a̱ban. Joˈcan nak xkatzˈi̱ba li hu aˈin re xyebal a̱cue li cˈaˈru yo̱ chi cˈulma̱nc arin.

4:15  Naru ta̱sicˈ saˈ eb li hu li xocbil a̱ban, li tzˈi̱banbil cuiˈ retalil li cˈaˈru quicˈulman chiruheb la̱ xeˈto̱nil yucuaˈ. Ta̱cuil saˈ li hu aˈan nak li tenamit Jerusalén, aˈan jun tenamit aj kˈetol a̱tin ut incˈaˈ useb xnaˈleb. Chˈaˈaj chokˈ a̱cue la̱at ut chokˈ reheb li tenamit. Xban nak incˈaˈ useb xnaˈleb, joˈcan nak quisacheˈ ruheb junxil.

4:16  Nakaye a̱cue, at rey, cui li tenamit Jerusalén ta̱yi̱ba̱k cuiˈchic, ut cui li tzˈac li sutsu cuiˈ li tenamit ta̱yi̱ba̱k cuiˈchic, li tenamit aˈin li cuanqueb jun pacˈal li nimaˈ incˈaˈ chic teˈcana̱k rubel la̱ cuanquil, chanqueb.

4:17  Ut li rey quixsume lix huheb ut quixye reheb: —Yo̱quin chixtzˈi̱banquil li hu aˈin re laj Rehum li capitán ut re ajcuiˈ laj Simsai laj tzˈi̱b, ut reheb ajcuiˈ li rochbeneb li cuanqueb Samaria. Reheb ajcuiˈ chixjunileb li cuanqueb aran jun pacˈal li nimaˈ. Nintakla xsahil e̱chˈo̱l. Chicua̱nk taxak e̱riqˈuin li tuktu̱quil usilal.

4:18  Xeˈril xsaˈ li hu chi us chicuu li xetakla chak.

4:19  Ut xinqˈue li chakˈrab nak teˈxsicˈ saˈ li hu joˈ xeye. Xkatau nak najter li tenamit aˈan aj kˈetoleb a̱tin. Queˈxkˈet li ra̱tineb li rey ut queˈnumta saˈ xbe̱neb.

4:20  Eb li rey li queˈcuan aran Jerusalén kˈaxal ni̱nkeb xcuanquil. Queˈtaklan saˈ eb li naˈajej li cuanqueb jun pacˈal li nimaˈ. Ut queˈxqˈue xtojeb ut queˈxtoj rix li cˈaˈak re ru tento xtojbal.

4:21  Joˈcan ut anakcuan la̱ex te̱qˈue jun li chakˈrab re nak teˈxcanab cˈanjelac li cui̱nk aˈan ut incˈaˈ chic teˈxyi̱b li tenamit toj tinye reheb nak naru teˈxba̱nu.

4:22  Cheqˈuehak retal nak te̱ba̱nu chi us chixjunil. Incˈaˈ takacanabeb chi qˈui̱c li tenamit aˈan yal re teˈnumta̱k saˈ kabe̱n la̱o li cuanco saˈ kacuanquil, chan.

4:23  Nak queˈril xsaˈ li hu li quixtakla li rey Artajerjes, laj Rehum, ut laj Simsai laj tzˈi̱b, joˈqueb ajcuiˈ li rochben, saˈ junpa̱t queˈco̱eb Jerusalén. Queˈxye reheb laj judío chi pue̱rs ut chi yo̱ xjoskˈileb nak tento teˈxcanab li cˈanjel li queˈxtiquib xba̱nunquil.

4:24  Joˈcan nak queˈxcanab xyi̱banquil lix templo li Dios aran Jerusalén. Quicanaba̱c toj saˈ li xcab chihab roquic chokˈ rey laj Darío, lix reyeb laj Persia.

Chapter 5

5:1  Li profeta Hageo ut li profeta Zacarías li ralal laj Iddo queˈxye reheb laj judío li cuanqueb Judá joˈqueb ajcuiˈ li cuanqueb Jerusalén li cˈaˈru quiyeheˈ reheb xban li Ka̱cuaˈ, lix Dioseb laj Israel li natenkˈan reheb.

5:2  Ut laj Zorobabel li ralal laj Salatiel rochben laj Jesúa li ralal laj Josadac, queˈoc cuiˈchic chixyi̱banquil lix templo li Ka̱cuaˈ aran Jerusalén. Ut eb lix profeta li Ka̱cuaˈ Dios cuanqueb rochbeneb ut yo̱queb chixtenkˈanquileb.

5:3  Saˈ eb li cutan aˈan laj Tatnai li nataklan saˈ li tenamit li cuan jun pacˈal li nimaˈ Eufrates quicuulac riqˈuineb. Queˈcuulac ajcuiˈ riqˈuineb laj Setar-Boznai joˈqueb ajcuiˈ li rochben. Ut queˈxye reheb: —¿Ani xqˈuehoc e̱lese̱ns nak xex-oc cuiˈchic chixyi̱banquil li cab aˈin ut li tzˈac? chanqueb.

5:4  Ut queˈxpatzˈ ajcuiˈ: —¿Ani xcˈabaˈeb li yo̱queb chi yi̱ba̱nc re?—

5:5  Abanan li Ka̱cuaˈ Dios yo̱ chi iloc reheb li yo̱queb chi cˈamoc be chiruheb laj judío ut incˈaˈ quixakaba̱c li cˈanjel. Quitakla̱c jun li hu riqˈuin li rey Darío re nak tixsume chak ut tixye reheb ma teˈxcanab li cˈanjel malaj ut incˈaˈ.

5:6  Joˈcaˈin naxye li hu li queˈxtakla riqˈuin li rey Darío laj Tatnai ut laj Setar-boznai rochbeneb li nequeˈtaklan saˈ li naˈajej li cuan jun pacˈal li nimaˈ Eufrates saˈ li oeste li na-oc cuiˈ li sakˈe.

5:7  Aˈan aˈin li tzˈi̱banbil saˈ li hu: —At rey Darío, nakatakla xsahil a̱chˈo̱l.

5:8  Nakaj xyebal a̱cue nak xocuulac saˈ li naˈajej Judá chirilbal lix templo li nimajcual Dios li yo̱queb chixyi̱banquil. Yo̱queb chixyi̱banquil li templo riqˈuin ni̱nki pec. Li cheˈ ac qˈuebil saˈ xnaˈaj saˈ li tzˈac. Yo̱queb chixse̱banquil ribeb ut li cˈanjel us yo̱ chi e̱lc chiruheb.

5:9  Xkapatzˈ reheb laj cˈamol be li yo̱queb chi jolomi̱nc re li cˈanjel ani xqˈuehoc xlese̱nseb chixyi̱banquil li cab ut li tzˈac.

5:10  Xkapatzˈ ajcuiˈ ani xcˈabaˈeb re nak totzˈi̱bak a̱cuiqˈuin, at rey, ut takaye a̱cue aniheb li yo̱queb chi jolomi̱nc re li cˈanjel.

5:11  Eb aˈan queˈxye ke chi joˈcaˈin, “La̱o aj cˈanjel chiru li Dios li kˈaxal nim xcuanquil joˈ saˈ choxa joˈ saˈ ruchichˈochˈ. Yo̱co cuiˈchic chixyi̱banquil li templo li quixakaba̱c najter xban jun lix nimal ru rey li quicuan Israel.”

5:12  Ut queˈxye ajcuiˈ, “Eb li kaxeˈto̱nil yucuaˈ queˈxchikˈ xjoskˈil li Dios li cuan saˈ choxa. Joˈcan nak li Dios quixkˈaxtesiheb saˈ rukˈ laj Nabucodonosor laj caldeo lix reyeb laj Babilonia. Li rey aˈan quixjucˈ li templo ut quixchapeb ut quixcˈameb Babilonia li kaxeˈto̱nil yucuaˈ.

5:13  Abanan yo̱ chic xbe̱n chihab roquic chokˈ rey aran Babilonia laj Ciro nak quixqˈue cuiˈchic kalese̱ns chixyi̱banquil lix templo li Dios,” chanqueb.

5:14  Ut xeˈxye ajcuiˈ nak li rey Ciro quirisi saˈ xnaˈajeb lix dioseb laj Babilonia chixjunil li secˈ oro ut plata li quixxoc chak laj Nabucodonosor saˈ lix templo li Ka̱cuaˈ aran Jerusalén. Quixkˈaxtesiheb li secˈ re laj Sesbasar li nataklan saˈ xbe̱neb laj Judá.

5:15  Ut quixye re, “Cˈam li secˈ aˈin ut tatxic Jerusalén bar quicuan cuiˈ li templo. Ut te̱yi̱b cuiˈchic li templo saˈ lix naˈaj li quicuan cuiˈ,” chan laj Ciro.

5:16  Joˈcan nak quicˈulun laj Sesbasar ut quixqˈue li cimiento re lix templo li Dios li cuan Jerusalén ut queˈxtiquib xyi̱banquil li templo. Ut chalen anakcuan toj ma̱jiˈ ajcuiˈ nayaloˈ.

5:17  Joˈcan nak cui nacacuaj xba̱nunquil aˈin, at rey, nakatzˈa̱ma cha̱cuu nak ta̱sicˈ saˈ li hu li cuan saˈ li palacio aran Babilonia. Ta̱tzˈil a̱tin chirixeb re rilbal ma ya̱l nak li rey Ciro quiqˈuehoc xlese̱nseb chixyi̱banquil lix templo li Dios aran Jerusalén. Ut chaba̱nu usilal, chatakla resil li cˈaˈru ta̱cuaj takaba̱nu, chanqueb.

Chapter 6

6:1  Ut li rey Darío quixtakla xsicˈbal saˈ li hu li xocbil saˈ li palacio aran Babilonia.

6:2  Quitauman jun li botbil hu aran Acmeta saˈ li palacio li cuan Media. Aˈan aˈin li tzˈi̱banbil chiru li hu. Chijultica̱k aˈin:

6:3  —Yo̱ xbe̱n chihab roquic chokˈ rey laj Ciro nak quixqˈue li chakˈrab aˈin chirix lix templo li Ka̱cuaˈ Dios li quicuan Jerusalén: Teˈxqˈue li cimiento re lix templo li Dios, ut teˈxyi̱b cuiˈchic re nak teˈmayejak aran. Cuukub xcaˈcˈa̱l metro xteram li tzˈac teˈxqˈue nak teˈxyi̱b ut cuukub xcaˈcˈa̱l metro li ru. Teˈxyi̱b li tzˈac chi cha̱bil re nak cau ta̱cana̱k.

6:4  Nak teˈxyi̱b li tzˈac teˈxqˈue oxib tzol li ni̱nki pec ut jun tzol li cheˈ toj acˈ. Ut li rey, aˈan li ta̱tojok re chixjunil li ta̱sachma̱nk.

6:5  Ut li secˈ oro ut li secˈ plata li quirisi chak li rey Nabucodonosor saˈ lix templo li Ka̱cuaˈ aran Jerusalén li quixcˈam Babilonia, aˈan ta̱kˈaxtesi̱k reheb laj judío. Ta̱cˈamekˈ cuiˈchic Jerusalén ut ta̱qˈuehekˈ saˈ lix naˈajeb saˈ lix templo li Dios, chan saˈ li hu.

6:6  Ut anakcuan, at Tatnai, la̱at li nacattaklan saˈ xbe̱neb li tenamit li cuan jun pacˈal li nimaˈ Eufrates, joˈ ajcuiˈ laj Setar-Boznai ut eb le̱ rochben, la̱in tinye e̱re nak tex-e̱lk aran Jerusalén.

6:7  Canabomak li cui̱nk li nataklan saˈ xbe̱neb joˈqueb ajcuiˈ li nequeˈcˈamoc be saˈ xya̱nkeb riqˈuin li cˈanjel li yo̱queb chixba̱nunquil. Canabomakeb re nak teˈxyi̱b lix templo li Dios saˈ lix naˈaj li quicuan cuiˈ junxil.

6:8  La̱in xinqˈuehoc re li chakˈrab aˈin chanru te̱ba̱nu nak te̱tenkˈaheb li nequeˈcˈamoc be saˈ xya̱nkeb laj judío re xyi̱banquil lix templo li Dios. Li toj li nequeˈxqˈue chak aran jun pacˈal li nimaˈ chokˈ re li rey, aˈan li ta̱qˈuema̱nk rajlal reheb li cui̱nk aˈan re xtenkˈanquileb re nak incˈaˈ ta̱xakli̱k li cˈanjel.

6:9  Rajlal ta̱qˈuema̱nk reheb laj tij li cuanqueb Jerusalén li cˈaˈru ta̱cˈanjelak chiruheb joˈ li toro, li carner, ut li carner li toj sa̱jeb re xcˈatbal chokˈ xmayej chiru li Ka̱cuaˈ Dios li cuan saˈ choxa, joˈ ajcuiˈ li trigo, li atzˈam, li vino malaj li aceite. Ta̱qˈuehekˈ reheb chi cuulaj cuulaj chi incˈaˈ ta̱paltok.

6:10  Ta̱qˈuehekˈ reheb re nak ta̱ru̱k teˈxqˈue li mayej li ta̱cuulak chiru li Dios li cuan saˈ choxa ut teˈtijok chicuix la̱in li rey ut chirixeb ajcuiˈ li cualal incˈajol.

6:11  La̱in xinqˈue li chakˈrab aˈin: Li ani ta̱kˈetok re li chakˈrab li xinqˈue, ta̱isi̱k jun li tzˈamba re li rochoch ut chiru ajcuiˈ li cheˈ aˈan ta̱camsi̱k. Ut li rochoch ta̱cana̱k chi jun tu̱b chi mul.

6:12  Aˈ taxak li Dios, li quisicˈoc ru Jerusalén chokˈ xnaˈaj, aˈan taxak chisachok ruheb li rey malaj ut li tenamit li teˈraj chˈiˈchˈiˈi̱nc malaj ut teˈraj xsachbal ru lix templo li Dios. La̱in, li rey Darío, xinqˈue li chakˈrab aˈin. Ut chi-uxma̱nk chi junpa̱t joˈ xinye.—

6:13  Joˈcan nak laj Tatnai li nataklan saˈ eb li tenamit li cuanqueb jun pacˈal li nimaˈ Eufrates, ut laj Setar-boznai joˈqueb ajcuiˈ li rochben queˈxba̱nu chi tzˈakal joˈ quixye li rey Darío.

6:14  Ut eb laj cˈamol be saˈ xya̱nkeb laj judío yo̱queb chi cablac ut yo̱ chi e̱lc chi us lix cˈanjeleb joˈ quiyeheˈ reheb xbaneb li profeta Hageo ut li profeta Zacarías li ralal laj Iddo. Queˈcablac ut queˈxchoy lix cˈanjeleb joˈ quixye li Ka̱cuaˈ lix Dioseb laj Israel ut joˈ queˈxye lix reyeb laj Persia, laj Ciro, laj Darío ut laj Artajerjes.

6:15  Oxib xbe li po Adar nak queˈxchoy xyi̱banquil lix templo li Dios. Ac yo̱ chic xcuak chihab roquic chokˈ rey laj Darío aran Persia.

6:16  Chixjunileb laj Israel ut eb laj tij joˈ eb ajcuiˈ laj levita li queˈsukˈi cuiˈchic Jerusalén queˈxkˈaxtesi re li Dios li templo li queˈxyi̱b. Queˈxninkˈei chi cˈajoˈ xsahil xchˈo̱leb.

6:17  Nak queˈxninkˈei ru lix templo li Dios, queˈxmayeja jun ciento li toro, cuib ciento li carner, ut ca̱hib ciento li carner li toj sa̱jeb. Ut queˈxmayeja ajcuiˈ cablaju li te̱lom chiba̱t re xtzˈa̱manquil xcuybal xma̱queb chixjunileb laj Israel. Queˈxmayeja li cablaju chi chiba̱t xban nak cablaju xte̱paleb li ralal xcˈajol laj Israel.

6:18  Eb laj tij queˈqˈueheˈ saˈ xcˈanjeleb chi xjunju̱nkaleb. Joˈcan ajcuiˈ laj levita. Ac xcˈanjel xcˈanjel li junju̱nk queˈqˈueheˈ re teˈcˈanjelak chiru li Dios joˈ tzˈi̱banbil retalil saˈ li chakˈrab xban laj Moisés.

6:19  Chixjunileb laj Israel li queˈsukˈi cuiˈchic Jerusalén queˈxba̱nu ajcuiˈ li ninkˈe Pascua saˈ li ca̱laju xbe li xbe̱n po re li chihab.

6:20  Eb laj tij ut eb laj levita queˈxcauresi ribeb re xba̱nunquil li ninkˈe Pascua, joˈ cˈaynakeb xba̱nunquil. Eb laj levita queˈxmayeja li carner saˈ xcˈabaˈeb chixjunileb li queˈsukˈi cuiˈchic Jerusalén. Queˈxmayeja ajcuiˈ saˈ xcˈabaˈeb laj tij jun chˈol chic, ut saˈ xcˈabaˈeb ajcuiˈ eb aˈan.

6:21  Queˈcuaˈac chixjunileb laj Israel, eb li queˈchapeˈ ut queˈcˈameˈ saˈ jalan tenamit li queˈsukˈi cuiˈchic Jerusalén. Queˈcuaˈac ajcuiˈ chixjunileb li ma̱cuaˈeb aj judío li queˈxcanab xba̱nunquil li ma̱usilal ut queˈoc saˈ xya̱nkeb laj judío ut queˈxqˈue xlokˈal li Ka̱cuaˈ, lix Dioseb laj Israel.

6:22  Cuukub cutan queˈninkˈei̱c chi sa saˈ xchˈo̱leb ut queˈxcuaˈ li caxlan cua li ma̱cˈaˈ xchˈamal, joˈ nequeˈxcuaˈ saˈ li ninkˈe aˈan. Cˈajoˈ xsahil xchˈo̱leb xban nak li Ka̱cuaˈ quixjal xcˈaˈux lix reyeb laj Persia ut aˈan quixtenkˈaheb chixyi̱banquil lix templo li Ka̱cuaˈ, lix Dioseb laj Israel.

Chapter 7

7:1  Nak quicuan laj Artajerjes chokˈ xreyeb laj Persia, quicuan jun li cui̱nk aj Esdras xcˈabaˈ. Aˈan ralal laj Seraías. Ut laj Seraías, aˈan ralal laj Azarías. Ut laj Azarías, aˈan ralal laj Hilcías.

7:2  Laj Hilcías, aˈan ralal laj Salum. Laj Salum, aˈan ralal laj Sadoc. Ut laj Sadoc, aˈan ralal laj Ahitob.

7:3  Laj Ahitob, aˈan ralal laj Amarías. Laj Amarías, aˈan ralal laj Azarías. Ut laj Azarías, aˈan ralal laj Meraiot.

7:4  Laj Meraiot, aˈan ralal laj Zeraías. Laj Zeraías, aˈan ralal laj Uzi. Ut laj Uzi, aˈan ralal laj Buqui.

7:5  Laj Buqui, aˈan ralal laj Abisúa. Laj Abisúa, aˈan ralal laj Finees. Ut laj Finees, aˈan ralal laj Eleazar. Laj Eleazar, aˈan ralal laj Aarón, li xbe̱n aj tij.

7:6  Laj Esdras aˈan tzolbil chi us riqˈuin li chakˈrab li quiqˈueheˈ re laj Moisés xban li Ka̱cuaˈ lix Dioseb laj Israel. Ut xban nak li Ka̱cuaˈ quitenkˈan re laj Esdras, chixjunil li cˈaˈru quixtzˈa̱ma chiru li rey, quiqˈueheˈ re. Laj Esdras qui-el Babilonia ut co̱ Jerusalén.

7:7  Ut nabaleb laj Israel queˈco̱eb Jerusalén rochben nak ac yo̱ chic xcuuk chihab roquic chokˈ rey laj Artajerjes. Saˈ xya̱nkeb li queˈsukˈi cuanqueb laj tij, cuanqueb laj levita, cuanqueb laj bichanel, cuanqueb li nequeˈcˈacˈalen saˈ li oqueba̱l re li templo, ut cuanqueb ajcuiˈ li nequeˈcˈanjelac saˈ li templo.

7:8  O̱b po xcuuk chihab roquic chokˈ rey laj Artajerjes nak laj Esdras quicuulac Jerusalén.

7:9  Laj Esdras qui-el Babilonia saˈ li xbe̱n cutan re li xbe̱n po. Ut quicuulac Jerusalén saˈ li xbe̱n cutan re li roˈ po. Li Ka̱cuaˈ cuan riqˈuin ut aˈan yo̱ chi tenkˈa̱nc re.

7:10  Laj Esdras quixqˈue xchˈo̱l chixtzolbal ut chixba̱nunquil li naxye saˈ li chakˈrab li qˈuebil xban li Ka̱cuaˈ. Ut quixqˈue ajcuiˈ xchˈo̱l chixchˈolobanquil li xya̱lal li tzˈi̱banbil saˈ li chakˈrab reheb laj Israel.

7:11  Aˈan aj tij ut aj tzolonel ajcuiˈ. Quixtzol rib chi us riqˈuin li chakˈrab, li quiqˈueheˈ reheb laj Israel xban li Ka̱cuaˈ lix Dioseb. Joˈcaˈin tzˈi̱banbil saˈ li hu li quixtzˈi̱ba li rey Artajerjes re laj Esdras nak toj ma̱jiˈ naxic Jerusalén.

7:12  —La̱in li rey Artajerjes, li kˈaxal nim incuanquil chiruheb li jun chˈol chic rey. Li hu aˈin re laj Esdras laj tij, laj cˈutul re li chakˈrab li quiqˈueheˈ xban li Ka̱cuaˈ Dios li cuan saˈ choxa. Chicua̱nk taxak li tuktu̱quil usilal a̱cuiqˈuin.

7:13  La̱in xinqˈue jun li chakˈrab nak chixjunileb laj Israel li cuanqueb rubel incuanquil, joˈ eb laj tij ut eb laj levita, cui teˈraj xic Jerusalén, naru nequeˈxic cha̱cuix.

7:14  La̱in li rey, yo̱quin chi takla̱nc a̱cue joˈqueb ajcuiˈ li cuukub chi cui̱nk li nequeˈqˈuehoc naˈleb. Tatxic chirilbal chanru cuanqueb aran Judá ut Jerusalén, ma yo̱queb chixba̱nunquil li cˈaˈru naxye saˈ li chakˈrab li qˈuebil reheb xban li Ka̱cuaˈ la̱ Dios. La̱at nacanau chi tzˈakal cˈaˈru naxye saˈ li chakˈrab.

7:15  Ta̱cˈam li oro ut li plata ut ta̱qˈue re lix templo lix Dioseb laj Israel li cuan Jerusalén, li x-ala saˈ kachˈo̱l xqˈuebal, la̱in ut eb laj qˈuehol naˈleb.

7:16  Ta̱cˈam ajcuiˈ chixjunil li plata ut li oro li joˈ qˈuial teˈxchˈutub li cuanqueb Babilonia. Ut ta̱cˈam ajcuiˈ li mayej li x-ala saˈ xchˈo̱leb xqˈuebal eb laj tij ut eb laj Israel li cuanqueb saˈ li tenamit aˈan re xyi̱banquil lix templo li Dios aran Jerusalén.

7:17  Chiru li tumin aˈan ta̱lokˈ li toro, li carner ut li carner li toj sa̱jeb, joˈ ajcuiˈ li ru li acui̱mk ut li vino re teˈxmayeja chiru li artal li cuan saˈ lix templo li Ka̱cuaˈ le̱ Dios aran Jerusalén.

7:18  La̱at ut eb laj tij jun chˈol chic te̱ba̱nu li cˈaˈru te̱raj riqˈuin li plata ut li oro li ta̱elaˈa̱nk. Te̱ba̱nu joˈ naraj li Ka̱cuaˈ le̱ Dios.

7:19  Chixjunil li secˈ li quikˈaxtesi̱c a̱cue re xcˈanjel li Dios saˈ li templo aran Jerusalén, kˈaxtesi re li Dios la̱at.

7:20  Ut li cˈaˈak chic re ru li ta̱cˈanjelak che̱ru aran saˈ lix templo le̱ Dios, naru ta̱lokˈ riqˈuin lin tumin la̱in, chan li rey.

7:21  Anakcuan la̱in, li rey Artajerjes, yo̱quin xqˈuebal li chakˈrab reheb chixjunileb laj xocol tumin li cuanqueb jun pacˈal li nimaˈ Eufrates nak teˈxqˈue chi junpa̱t chixjunil li cˈaˈru ta̱patzˈ la̱at, Esdras. La̱at aj tij ut nacanau chi us li chakˈrab li qˈuebil e̱re xban li Dios cuan saˈ choxa.

7:22  Naru teˈxqˈue oxib mil riqˈuin oxib ciento (3,300) kilos li plata. Naru teˈxqˈue cuib xcaˈcˈa̱l mil (22,000) bisoc li trigo, ut cuib mil riqˈuin cuib ciento (2,200) botella li vino. Naru teˈxqˈue cuib mil riqˈuin cuib ciento (2,200) botella li aceite ut li atzˈam ta̱qˈuehekˈ chi incˈaˈ bisbil.

7:23  Chixjunil li ta̱raj li Dios, li cuan saˈ choxa re lix templo, tento xqˈuebal re nak incˈaˈ ta̱cha̱lk raylal saˈ xbe̱neb li cuanqueb rubel incuanquil chi moco saˈ xbe̱neb li cualal incˈajol.

7:24  Ut ninye ajcuiˈ a̱cue nak incˈaˈ ta̱patzˈ xtojeb laj tij chi moco eb laj levita, chi moco eb laj bichanel, chi moco eb li nequeˈcˈacˈalen saˈ li oqueba̱l re li templo, chi moco riqˈuineb li nequeˈcˈanjelac saˈ li templo. Incˈaˈ ta̱patzˈ xtojeb.

7:25  La̱at, Esdras, joˈ naxcˈut cha̱cuu li Ka̱cuaˈ la̱ Dios, ta̱xakab aj rakol a̱tin ut ta̱xakab aj cˈamol be re nak aˈaneb chic teˈtakla̱nk saˈ xbe̱neb chixjunileb li tenamit li cuanqueb jun pacˈal li nimaˈ Eufrates. Ta̱cua̱nk xcuanquileb saˈ xbe̱neb chixjunileb li nequeˈxnau li cˈaˈru naxye saˈ li chakˈrab li quiqˈueheˈ reheb xban li Ka̱cuaˈ la̱ Dios. Ut eb li incˈaˈ nequeˈxnau li chakˈrab, la̱at ta̱cˈut chiruheb.

7:26  Ut li ani incˈaˈ tixba̱nu chi tzˈakal li naxye saˈ lix chakˈrab li Ka̱cuaˈ la̱ Dios, ut li chakˈrab li xinqˈue la̱in, chirakekˈ a̱tin saˈ xbe̱n li jun aˈan chi junpa̱t. Ut chiqˈuehekˈ chixtojbal rix lix ma̱c. Ta̱camsi̱k, malaj ta̱isi̱k saˈ li naˈajej cuan cuiˈ, malaj tixtoj rix lix ma̱c riqˈuin tumin, malaj ut ta̱qˈuehekˈ saˈ tzˈalam, chan li rey.

7:27  Laj Esdras quitijoc ut quixye chi joˈcaˈin: —Lokˈoninbilak taxak li Ka̱cuaˈ lix Dioseb li kaxeˈto̱nil yucuaˈ, xban nak aˈan xcˈutuc chiru li rey nak tixqˈue xlokˈal li templo, li cuan Jerusalén, li nakalokˈoni cuiˈ li Ka̱cuaˈ li kaDios.

7:28  Nimanbil taxak ru li Ka̱cuaˈ li qui-osobtesin cue chiru li rey, joˈ ajcuiˈ chiruheb laj qˈuehol naˈleb ut chiruheb ajcuiˈ chixjunileb li nequeˈcˈanjelac chiru li rey. Xban nak li Ka̱cuaˈ cuan cuiqˈuin ut quixqˈue xcacuil inchˈo̱l, la̱in quinsicˈ ruheb li teˈcˈamok be chiruheb laj Israel re nak teˈxic Jerusalén cuochben, chan laj Esdras.

Chapter 8

8:1  Laj Esdras quixye: —Aˈan aˈin lix cˈabaˈeb li queˈjolomin reheb li junju̱nk cabal ut li tzˈi̱banbileb xcˈabaˈ. Aˈaneb li queˈel Babilonia cuochben la̱in saˈ eb li cutan nak laj Artajerjes cuan chokˈ rey.

8:2  Laj Gersón xcomoneb li ralal xcˈajol laj Finees; laj Daniel, xcomoneb li ralal xcˈajol laj Itamar; laj Hatús, xcomoneb li ralal xcˈajol laj David ut li ralal xcˈajol laj Secanías;

8:3  laj Zacarías xcomoneb li ralal xcˈajol laj Paros, aˈan cuanqueb jun ciento riqˈuin laje̱b roxcˈa̱l (150).

8:4  Laj Elioenai, li ralal laj Zeraías xcomoneb li ralal xcˈajol laj Pahat-moab, aˈan cuanqueb cuib ciento (200).

8:5  Li ralal laj Jahaziel, xcomoneb li ralal xcˈajol laj Secanías, aˈan cuanqueb oxib ciento (300).

8:6  Laj Ebed ralal laj Jonatán xcomoneb li ralal xcˈajol laj Adín, aˈan cuanqueb laje̱b roxcˈa̱l (50).

8:7  Laj Jesaías li ralal laj Atalías xcomoneb li ralal xcˈajol laj Elam, aˈan cuanqueb laje̱b xca̱cˈa̱l (70).

8:8  Laj Zebadías li ralal laj Micael xcomoneb li ralal xcˈajol laj Sefatías, aˈan cuanqueb ca̱cˈa̱l (80).

8:9  Laj Obadías li ralal laj Jehiel, xcomoneb li ralal xcˈajol laj Joab, aˈan cuanqueb cuib ciento riqˈuin cuakxaklaju (218).

8:10  Li ralal laj Josifías, xcomoneb li ralal xcˈajol laj Selomit, aˈan cuanqueb jun ciento riqˈuin oxcˈa̱l (160).

8:11  Laj Zacarías li ralal laj Bebai, xcomoneb li ralal xcˈajol laj Bebai aˈan cuanqueb cuakxakib xcaˈcˈa̱l (28).

8:12  Laj Johanán li ralal laj Hacatán, xcomoneb li ralal xcˈajol laj Azgad, aˈan cuanqueb jun ciento riqˈuin laje̱b (110).

8:13  Laj Elifelet, laj Jeiel ut laj Semaías, aˈaneb li ralal xcˈajol laj Adonicam, li queˈcuan mokon. Aˈan cuanqueb oxcˈa̱l (60).

8:14  Laj Utai ut laj Zabud xcomoneb li ralal xcˈajol laj Bigvai, aˈan cuanqueb oxcˈa̱l (60).

8:15  Aran kachˈutub kib chire li nimaˈ Ahava. Xocana aran oxib cutan cuochbeneb li xeˈchal chicuix. Quin-oc xsiqˈuinquil laj levita saˈ xya̱nkeb ut ma̱ jun quintau.

8:16  Joˈcan nak quinbokeb laj Eliezer, laj Ariel, laj Semaías, laj Elnatán, laj Jarib, laj Elnatán jun chic, laj Natán, laj Zacarías ut laj Mesulam. Eb li cui̱nk aˈin, aˈaneb laj cˈamol be. Ut quinbokeb ajcuiˈ laj Joiarib ut laj Elnatán. Aˈaneb laj tzolonel.

8:17  Quintaklaheb riqˈuin laj Iddo, li nataklan saˈ li naˈajej Casifia. Quinye reheb cˈaˈru teˈxye re laj Iddo ut reheb ajcuiˈ li rochben li nequeˈcˈanjelac saˈ li templo li cuan saˈ li naˈajej Casifia. Quintaklaheb aran re nak teˈxsicˈ ani teˈxic chi cˈanjelac saˈ lix templo li Ka̱cuaˈ.

8:18  Ut xban nak li Dios yo̱ chi tenkˈa̱nc ke, queˈxtau chak laj Serebías re ta̱xic chi cˈanjelac. Aˈan jun cui̱nk cha̱bil xnaˈleb xcomoneb li ralal xcˈajol laj Mahli laj levita. Queˈchal rochben li ralal ut li ras. Cuakxaklajuheb (18) chixjunileb.

8:19  Ut queˈchal ajcuiˈ laj Hasabías rochben laj Jesaías xcomoneb li ralal xcˈajol laj Merari. Queˈchal rochben li ralal ut li ras. Junmayeb (20) chixjunileb.

8:20  Queˈchal ajcuiˈ cuib ciento riqˈuin junmay (220) chi cˈanjelac saˈ li templo. Aˈaneb li ralal xcˈajol li queˈxakaba̱c junxil xban laj David ut xbaneb li nequeˈtaklan re nak eb aˈan teˈcˈanjelak saˈ li templo chixtenkˈanquileb laj levita. Ut quitzˈi̱ba̱c xcˈabaˈeb li junju̱nk.

8:21  Aran chire li nimaˈ Ahava, la̱in quinye reheb nak to-ayuni̱k ut takacubsi kib chiru li Ka̱cuaˈ. Takatzˈa̱ma chiru nak aˈan ta̱tenkˈa̱nk ke ut ta̱ilok ke re nak ma̱cˈaˈ takacˈul la̱o, chi moco li kacocˈal chi moco li cˈaˈru cuan ke nak yo̱ko chi xic.

8:22  Quinxuta̱nac xtzˈa̱manquil chiru li rey nak tixtaklaheb lix soldado ut lix carruaje chikacolbal chiruheb li xicˈ nequeˈiloc ke nak yo̱ko chi xic. Ac xinye re li rey chi joˈcaˈin: —Li Ka̱cuaˈ li kaDios cuan riqˈuineb li ani nequeˈqˈuehoc xlokˈal ut aˈan ta̱tenkˈa̱nk reheb. Abanan najoskˈoˈ saˈ xbe̱neb li ani natzˈekta̱nan re, chanquin.

8:23  Joˈcan nak co-ayunic ut katzˈa̱ma katenkˈanquil chiru li Dios. Ut li Dios quirabi li katij.

8:24  Ut quinsicˈ ruheb cablaju laj tij. Aˈaneb laj Serebías, ut laj Hasabías rochbeneb laje̱b chic laj tij.

8:25  Ut quinbis chiruheb li plata, li oro ut li secˈ li queˈxqˈue chokˈ xmayej re li Ka̱cuaˈ li kaDios li rey, ut eb laj qˈuehol naˈleb li rey, ut eb li nequeˈcˈanjelac chiru li rey, joˈqueb ajcuiˈ laj Israel li cuanqueb aran.

8:26  Aˈan aˈin xqˈuial li quinbis ut quinkˈaxtesi reheb: jun xcaˈcˈa̱l mil riqˈuin ca̱hib ciento riqˈuin laje̱b roxcˈa̱l (21,450) bis li plata, jun ciento li secˈ plata, ut oxib mil riqˈuin oxib ciento (3,300) bis li oro.

8:27  Ut quinkˈaxtesi ajcuiˈ reheb junmay li secˈ oro, cuaklaju libra ra̱lal, ut cuib li cha̱bil secˈ bronce jiˈbil chi us ut nalemtzˈun, kˈaxal terto xtzˈak joˈ li oro.

8:28  Ut quinye reheb: —La̱ex kˈaxtesinbilex saˈ rukˈ li Ka̱cuaˈ. Joˈcan ajcuiˈ li secˈ aˈin ut li plata ut li oro. Qui-ala saˈ xchˈo̱leb li kaxeˈto̱nil yucuaˈ xqˈuebal chokˈ xmayejeb re li Ka̱cuaˈ Dios.

8:29  Te̱ril ut te̱xoc chi us re nak ma̱cˈaˈ teˈxcˈul chalen toj te̱bis chiruheb li nequeˈtaklan saˈ xbe̱neb laj judío ut chiruheb laj tij. Ut te̱bis chiruheb laj levita ut chiruheb li nequeˈjolomin re li junju̱nk cabal li cuanqueb Jerusalén. Te̱bis aran saˈ lix templo li Ka̱cuaˈ, chanquin reheb.

8:30  Eb laj tij ut eb laj levita queˈxcˈul li plata ut li oro ut li secˈ li quibiseˈ chiruheb re teˈxcˈam Jerusalén saˈ lix templo li Ka̱cuaˈ li kaDios.

8:31  Cablaju xbe li xbe̱n po co-el aran cuan cuiˈ li nimaˈ Ahava ut co̱o Jerusalén. Li Ka̱cuaˈ cuan kiqˈuin ut aˈan quicoloc ke chiruheb li xicˈ nequeˈiloc ke joˈqueb ajcuiˈ chiruheb laj e̱lkˈ li cuanqueb saˈ li be li co̱o cuiˈ.

8:32  Cocuulac Jerusalén ut aran cohilan oxib cutan.

8:33  Ut saˈ xca̱ li cutan kabis li oro, li plata ut li secˈ li kacˈam saˈ rochoch li Dios ut kakˈaxtesi re laj Meremot laj tij li ralal laj Urías. Rochben aˈan cuan laj Eleazar ralal laj Finees, ut cuanqueb ajcuiˈ rochbeneb laj levita, laj Jozabad ralal laj Jesúa ut laj Noadías ralal laj Binúi.

8:34  Chiru ajcuiˈ li cutan aˈan quibiseˈ ut qui-ajla̱c ut quikˈaxtesi̱c ajcuiˈ li queˈxcˈam. Ut quitzˈi̱ba̱c retalil joˈ qˈuial qui-el chixjunil.

8:35  Chirix aˈan, chixjunileb li queˈsukˈi Jerusalén queˈxmayeja li cˈatbil xul chiru li Ka̱cuaˈ, lix Dioseb laj Israel. Queˈxmayeja cablaju li toro reheb li cablaju xte̱paleb laj Israel. Queˈxmayeja ajcuiˈ cuaklaju roˈcˈa̱l (96) li te̱lom carner ut cuuklaju xca̱cˈa̱l (77) li cocˈ carner ut queˈxmayeja ajcuiˈ cablaju li te̱lom chiba̱t re xpatzˈbal xcuybal xma̱queb. Chixjunil aˈin queˈxcˈat chiru li Ka̱cuaˈ chokˈ xmayejeb.

8:36  Ut queˈxkˈaxtesi li chakˈrab li quixqˈue li rey reheb li cuanqueb saˈ xcuanquil ut reheb ajcuiˈ li nequeˈtaklan saˈ eb li tenamit li cuanqueb jun pacˈal li nimaˈ Eufrates. Ut eb aˈan queˈxtenkˈaheb li tenamit ut queˈoquen ajcuiˈ chixyi̱banquil lix templo li Dios.

Chapter 9

9:1  Ut chirix chic aˈan, eb laj cˈamol be saˈ xya̱nkeb laj Israel queˈcuulac cuiqˈuin ut queˈxye cue: —Cuanqueb aj Israel yo̱queb chixjunajinquil ribeb riqˈuineb li jalaneb xtenamit. Saˈ xya̱nkeb aˈan cuanqueb laj tij ut laj levita. Yo̱queb chixjunajinquil ribeb riqˈuineb laj cananeo, eb laj heteo, eb laj ferezeo, eb laj jebuseo, eb laj amonita, eb laj moabita, eb laj Egipto ut eb laj amorreo ut yo̱queb chixba̱nunquil li ma̱usilal nequeˈxba̱nu eb aˈan.

9:2  Yo̱queb chi sumla̱c riqˈuineb ut yo̱queb ajcuiˈ chixsumubanquil eb li ralal riqˈuineb lix rabin li cuanqueb saˈ li tenamit aˈan. Lix tenamit li Dios, li ti̱queb raj xchˈo̱l, queˈxjunaji ribeb riqˈuineb li jalaneb xtenamit. Ut eb li queˈcˈamoc xbe chixba̱nunquil li ma̱c aˈan, aˈaneb ajcuiˈ li cuanqueb saˈ xcuanquil ut eb li nequeˈtaklan saˈ xbe̱neb li tenamit, chanqueb.

9:3  Nak quicuabi li a̱tin aˈan, quinpej li cuakˈ ut quinmichˈ li cuismal ut lin mach. Ut quincˈojla chi kˈaxal ra saˈ inchˈo̱l.

9:4  Ut queˈxchˈutub ribeb cuiqˈuin chixjunileb li queˈoc xxiu nak lix Dioseb laj Israel tixqˈue raylal saˈ xbe̱neb xban lix ma̱queb li rech tenamitil. Ut la̱in cˈajoˈ xrahil inchˈo̱l ut quincana aran toj quicuulac x-o̱ril li mayejac re li ecuu.

9:5  Saˈ x-o̱ril li mayejac re li ecuu, quincuacli saˈ li naˈajej bar quincˈojla cuiˈ chi ra saˈ inchˈo̱l. Ac xinpej li cuakˈ nak quincuikˈib cuib. Quintaksi li cuukˈ ut quin-oc chi tijoc chiru li Ka̱cuaˈ lin Dios.

9:6  Ut quinye: —At Ka̱cuaˈ, at inDios, sachso innaˈleb ut ninxuta̱nac chixtaksinquil li cuiloba̱l cha̱cuu xban nak kˈaxal numtajenak li kama̱usilal. At Ka̱cuaˈ, xban nak kˈaxal nabal li kama̱c chanchan nak ac xcuulac toj saˈ choxa.

9:7  Chalen nak toj cuanqueb li kaxeˈto̱nil yucuaˈ toj anakcuan yo̱co chi ma̱cobc cha̱cuu. Xban li kama̱usilal, ut xban ajcuiˈ lix ma̱usilaleb li karey ut eb laj tij, la̱o cokˈaxtesi̱c saˈ rukˈeb li rey li jalan xtenamiteb. Cochapeˈ ut cocˈameˈ chi najt saˈ jalan tenamit. Cuan queˈcamsi̱c riqˈuin chˈi̱chˈ. Queˈrelkˈa li cˈaˈru cuan ke ut quicˈuteˈ kaxuta̱n toj chalen anakcuan.

9:8  Abanan anakcuan, at Ka̱cuaˈ, at kaDios, la̱at xacuil xtokˈoba̱l ku ut xoa̱col la̱o la̱ cualal a̱cˈajol li joˈ qˈuial chic xocana. Xaqˈue kanaˈaj saˈ li santil naˈajej bar ma̱cˈaˈ na-oc ke. La̱at nacacutanobresi li kabe ut xoa̱qˈue chi hila̱nc junpa̱t.

9:9  La̱o cuanco rubel xtak lix reyeb laj Persia, abanan incˈaˈ xoa̱canab kajunes. Chiruheb li rey xacˈut chiku lix nimal la̱ cuusilal ut xaqˈue li kayuˈam re nak ta̱ru̱k takayi̱b cuiˈchic la̱ templo li quijuqˈueˈ. Ut la̱at xat-iloc ke arin Judá ut Jerusalén.

9:10  Abanan anakcuan, at Ka̱cuaˈ, at kaDios, ¿Cˈaˈru ta̱ru̱k takaye chirix chixjunil aˈin? La̱o xkakˈet la̱ chakˈrab,

9:11  li caqˈue reheb li profeta, li queˈcˈanjelac cha̱cuu. Eb aˈan queˈxye ke cˈaˈru caye saˈ la̱ chakˈrab. La̱at caye reheb li kaxeˈto̱nil yucuaˈ nak li naˈajej li xiqueb cuiˈ re chi cua̱nc, numtajenak chi ma̱usilal xban li incˈaˈ us li nequeˈxba̱nu li tenamit li cuanqueb aran.

9:12  La̱at caye nak incˈaˈ takasumubeb li karabin riqˈuineb li ralal eb aˈan chi moco li kalal teˈsumla̱k riqˈuineb lix rabin eb aˈan. Ut caye ajcuiˈ ke nak incˈaˈ tocua̱nk chi sum a̱tin riqˈuineb chi moco takatenkˈaheb re nak us teˈe̱lk. Incˈaˈ takatenkˈaheb re nak cauhako ut takatzaca li cha̱bil tzacae̱mk li ta̱e̱lk saˈ li chˈochˈ ut re ajcuiˈ nak li kalal kacˈajol teˈe̱chani̱nk re li naˈajej aˈin chi junaj cua.

9:13  Li raylal li xkacˈul, aˈan xban li kama̱usilal ut xban li kama̱c. Abanan la̱at incˈaˈ xoa̱qˈue chixtojbal rix li kama̱c joˈ kacˈulub raj xcˈulbal. Xacuy ban li kama̱c ut incˈaˈ xasach ku chi junaj cua.

9:14  ¿Ma toj yo̱ko ajcuiˈ chixkˈetbal la̱ chakˈrab? Ut, ¿ma toj yo̱ko ajcuiˈ chixjunajinquil kib riqˈuineb li tenamit aˈin li nequeˈxba̱nu ma̱usilal? ¿Ma incˈaˈ ta biˈ tatjoskˈok saˈ kabe̱n cui toj yo̱ko chixba̱nunquil li ma̱c? Ut, ¿ma incˈaˈ ta biˈ ta̱ru̱k raj ta̱sach ku chi junaj cua chikajunilo?

9:15  At Ka̱cuaˈ, at kaDios, la̱at li kaDios la̱o aj Israel. La̱at ti̱c la̱ chˈo̱l. Joˈcan nak toj yoˈyo̱co la̱o anakcuan, li joˈ qˈuial chic xocoleˈ. Ya̱l nak cuan li kama̱c cha̱cuu. Joˈcan nak incˈaˈ naru nococuan chi sum a̱tin a̱cuiqˈuin, chan laj Esdras nak quitijoc.

Chapter 10

10:1  Nak yo̱ chi tijoc laj Esdras, cuikˈcuo chiru lix templo li Dios. Yo̱ chi ya̱bac ut yo̱ chixpatzˈbal xcuybal xma̱queb li tenamit. Queˈcuulac riqˈuin jun chˈu̱taleb laj Israel, joˈ cui̱nk, joˈ ixk, joˈ cocˈal. Yo̱queb chi ya̱bac chi cˈajoˈ xrahil xchˈo̱leb.

10:2  Ut laj Secanías li ralal laj Jehiel xcomoneb laj Elam quia̱tinac ut quixye re laj Esdras: —La̱o xoma̱cob chiru li kaDios xban nak xosumla riqˈuineb li ixk li jalan xtenamiteb. Abanan toj naru teˈcolekˈ laj Israel.

10:3  Anakcuan la̱o takaba̱nu jun li contrato riqˈuin li Dios. Takacanabeb li ixk aˈan rochbeneb li kacocˈal li cuan riqˈuineb. Takaba̱nu joˈ ta̱cuaj la̱at joˈqueb ajcuiˈ li nequeˈxxucua ru li naxye li Dios. Chi-uxma̱nk taxak joˈ tzˈi̱banbil saˈ li chakˈrab.

10:4  Xaklin, at Esdras, xban nak saˈ a̱be̱n tenebanbil xba̱nunquil aˈin ut la̱o tatkatenkˈa. Cacuubresi a̱chˈo̱l ut ba̱nu li tento xba̱nunquil, chanqueb.

10:5  Joˈcan nak laj Esdras quixakli ut quixye reheb li xbe̱nil aj tij ut eb laj levita, joˈqueb ajcuiˈ chixjunileb laj Israel nak riqˈuin juramento teˈxye ma teˈxba̱nu joˈ queˈxye. Ut eb aˈan queˈxba̱nu li juramento ut queˈxsume xba̱nunquil li cˈaˈru queˈxye.

10:6  Laj Esdras qui-el chiru lix templo li Dios ut co̱ saˈ lix cuariba̱l laj Johanán li ralal laj Eliasib. Nak cuan aran incˈaˈ quicuaˈac chi moco qui-ucˈac xban nak cˈajoˈ xrahil xchˈo̱l xban li ma̱usilal li queˈxba̱nu laj Israel li queˈsukˈi cuiˈchic Jerusalén.

10:7  Quixtakla xchˈutubanquileb aran Jerusalén chixjunileb li cuanqueb Judá joˈqueb ajcuiˈ li cuanqueb Jerusalén.

10:8  Eb li cuanqueb saˈ xcuanquil ut eb li nequeˈcˈamoc be saˈ xya̱nkeb laj judío queˈxcˈu̱b ru nak li ani incˈaˈ ta̱cuulak chiru oxib cutan, ta̱isi̱k chiru chixjunil li cˈaˈru cuan re ut ta̱isi̱k ajcuiˈ aˈan saˈ xya̱nkeb laj Israel li queˈsukˈi Jerusalén.

10:9  Joˈcan nak chiru li oxib cutan chixjunileb li cui̱nk xcomoneb laj Judá ut laj Benjamín queˈxchˈutub ribeb aran Jerusalén saˈ li junmay xbe li xbele po re li chihab aˈan. Ut chixjunileb queˈcˈojla saˈ li neba̱l re lix templo li Dios. Nequeˈsicsot xbaneb xxiu riqˈuin li ta̱cˈulma̱nk ut xban ajcuiˈ li cacuil hab li quichal saˈ xbe̱neb.

10:10  Qui-oc chi a̱tinac laj Esdras laj tij ut quixye reheb: —La̱ex xexma̱cob xban nak xecˈam chokˈ e̱rixakil li ixk jalan xtenamiteb. Joˈcan nak xnumta le̱ ma̱c la̱ex aj Israel.

10:11  Anakcuan ut qˈuehomak xlokˈal li Ka̱cuaˈ lix Dioseb le̱ naˈ e̱yucuaˈ. Cheba̱nu joˈ naraj li Ka̱cuaˈ. Isihomak e̱rib saˈ xya̱nkeb li jalaneb xtenamit ut jachomak e̱rib riqˈuineb li ixk aˈan, chan.

10:12  Queˈchakˈoc chixjunileb li chˈutchˈu̱queb aran ut queˈxye chi cau xya̱b xcuxeb: —Takaba̱nu joˈ xaye la̱at.

10:13  Abanan kˈaxal nabal li tenamit ut cau li hab. Incˈaˈ naru cua̱nko chirix cab chiru li hab chi moco ta̱ru̱k takacˈu̱b ru chiru jun malaj cuib cutan xban nak nabalo li xoma̱cob riqˈuin xba̱nunquil li ma̱c aˈan.

10:14  Naru teˈcana̱k li nequeˈtaklan saˈ kabe̱n chi a̱tinac chikix la̱o li joˈ qˈuialo cuanco arin. Ut li ani queˈxcˈam chokˈ rixakileb li ixk li jalan xtenamiteb naru nequeˈchal jokˈe teˈyehekˈ reheb nak teˈcha̱lk. Teˈcha̱lk li cuanqueb saˈ li junju̱nk chi tenamit rochbeneb laj rakol a̱tin ut eb li nequeˈtaklan saˈ xbe̱neb. Takaba̱nu chi joˈcaˈin re nak ta̱e̱lk xjoskˈil li Dios saˈ kabe̱n, chanqueb.

10:15  Laj Jonatán li ralal laj Asael ut laj Jahazías li ralal laj Ticva, ut cuib reheb laj levita, laj Mesulam ut laj Sabetai, incˈaˈ queˈxcˈul xchˈo̱leb li cˈaˈru queˈxye li jun chˈol chic. Caˈaj cuiˈ eb aˈan li incˈaˈ queˈxcˈul xchˈo̱leb.

10:16  Qui-uxman joˈ queˈxye li tenamit. Laj Esdras, laj tij quixsiqˈueb ru li cui̱nk li teˈtenkˈa̱nk re. Aˈaneb li nequeˈjolomin re li junju̱nk cabal. Quixbokeb xcˈabaˈ chixjunju̱nkaleb. Saˈ li xbe̱n cutan re li xlaje po queˈxtiquib tzˈiloc a̱tin chirixeb li tenamit.

10:17  Ut saˈ li xbe̱n cutan re li xbe̱n po queˈrakeˈ chi tzˈiloc a̱tin chirixeb chixjunileb li queˈxcˈam rixakileb jalaneb xtenamit.

10:18  Aˈaneb aˈin li ralal xcˈajoleb laj tij li queˈxsicˈ rixakileb saˈ xya̱nkeb li jalaneb xtenamit: xcomoneb li ralal laj Jesúa, ralal laj Josadac, ut xcomoneb li ri̱tzˈin, aˈaneb laj Maasías, laj Eliezer, laj Jarib ut laj Gedalías.

10:19  Ut queˈxqˈue li rukˈ chi ribileb rib re xcˈutbal nak teˈxba̱nu li cˈaˈru queˈxye. Ut queˈxye chi tzˈakal nak teˈxcanab li rixakil ut teˈxmayeja jun li carner re xtzˈa̱manquil xcuybal xma̱queb.

10:20  Xcomoneb li ralal xcˈajol laj Imer, aˈaneb laj Hanani ut laj Zebadías.

10:21  Xcomoneb li ralal xcˈajol laj Harim, aˈaneb laj Maasías, laj Elías, laj Semaías, laj Jehiel, ut laj Uzías.

10:22  Xcomoneb li ralal xcˈajol laj Pasur, aˈaneb laj Elioenai, laj Maasías, laj Ismael, laj Natanael, laj Jozabad ut laj Elasa.

10:23  Xcomoneb li ralal xcˈajol laj levitas, aˈaneb laj Jozabad, laj Simei, laj Kelaía (aˈan laj Kelita), laj Petaías, laj Judá ut laj Eliezer.

10:24  Xcomoneb laj bichanel, aˈan laj Eliasib; xcomoneb li nequeˈcˈacˈalen saˈ li oqueba̱l re li templo, aˈaneb laj Salum, laj Telem ut laj Uri.

10:25  Eb laj Israel (li incˈaˈ queˈcˈanjelac saˈ li templo), aˈaneb aˈin: xcomoneb li ralal xcˈajol laj Paros, aˈaneb laj Ramía, laj Jezías, laj Malquías, laj Mijamín, laj Eleazar, laj Malquías ut laj Benaía.

10:26  Xcomoneb li ralal xcˈajol laj Elam, aˈaneb aˈin: laj Matanías, laj Zacarías, laj Jehiel, laj Abdi, laj Jeremot ut laj Elías.

10:27  Xcomoneb li ralal xcˈajol laj Zatu, aˈaneb aˈin: laj Elioenai, laj Eliasib, laj Matanías, laj Jeremot, laj Zabad, ut laj Aziza.

10:28  Xcomoneb li ralal xcˈajol laj Bebai, aˈaneb aˈin: laj Johanán, laj Hananías, laj Zabai ut laj Atlai.

10:29  Xcomoneb li ralal xcˈajol laj Bani, aˈaneb aˈin: laj Mesulam, laj Maluc, laj Adaía, laj Jasub, laj Seal ut laj Ramot.

10:30  Xcomoneb li ralal xcˈajol laj Pahat-moab, aˈaneb aˈin: laj Adna, laj Quelal, laj Benaía, laj Maasías, laj Matanías, laj Bezaleel, laj Binúi, ut laj Manasés.

10:31  Xcomoneb li ralal xcˈajol laj Harim, aˈaneb aˈin: laj Eliezer, laj Isías, laj Malquías, laj Semaías, laj Simeón,

10:32  laj Benjamín, laj Maluc, ut laj Semarías.

10:33  Xcomoneb li ralal xcˈajol laj Hasum, aˈaneb aˈin: laj Matenai, laj Matata, laj Zabad, laj Elifelet, laj Jeremai, laj Manasés ut laj Simei.

10:34  Xcomoneb li ralal xcˈajol laj Bani, aˈaneb aˈin: laj Madai, laj Amram, ut laj Uel,

10:35  laj Benaía, laj Bedías, laj Quelúhi,

10:36  laj Vanías, laj Meremot, laj Eliasib,

10:37  laj Matanías, laj Matenai, laj Jaasai,

10:38  laj Bani, laj Binúi, laj Simei,

10:39  laj Selemías, laj Natán, laj Adaía,

10:40  laj Macnadebai, laj Sasai, laj Sarai,

10:41  laj Azareel, laj Selemías, laj Semarías,

10:42  laj Salum, laj Amarías, ut laj José.

10:43  Ut xcomoneb li ralal xcˈajol laj Nebo, aˈaneb aˈin: laj Jeiel, laj Matatías, laj Zabad, laj Zebina, laj Jadau, laj Joel ut laj Benaía.

10:44  Chixjunileb aˈan queˈxcˈam rixakileb jalaneb xtenamit. Abanan queˈxcanab li rixakileb rochbeneb lix cocˈal.