Kapingamarangi - II Corinthians

Chapter 1

1:1  Mai baahi o Paul, tangada agoago-hagau a Jesus Christ i-di hiihai o God, mo mai tadau duaahina go Timothy, ang-gi di nohongo-dabu a God i Corinth, mo ang-gi nia dama a God huogodoo ala i Achaia.

1:2  God tadau Damana mo tadau Dagi go Jesus Christ gi-gowadu gi goodou tumaalia mo-di noho i-di aumaalia.

1:3  Hagaamuina a God, Tamana o tadau Dagi go Jesus Christ, go Tamana dela e-honu tumaalia, go di God dela e-lloomoi-ai nia hagamaamaa huogodoo.

1:4  Go Mee e-hagamaamaa gidaadou i tadau haingadaa huogodoo, bolo gidaadou gii-mee di-hagamaamaa labelaa ginaadou ala guu-noho i-lodo nia haingadaa huogodoo, e-hai-hegau gi-nia hagamaamaa huogodoo ala ne-kae go gidaadou mai baahi o God.

1:5  Gadoo be tadau dau ang-gi nia hagaduadua o Christ, gei gidaadou e-dau labelaa gi-di hagamaamaa a God mai i Christ.

1:6  Maa gimaua e-hagaduadua, le-duadua gii-noho goodou manawa lamalia, gi-mouli goodou; maa gimaua e-kae di hagamaamaa, goodou e-kae di hagamaamaa labelaa, guu-kae nia mahi e-tuu goodou maaloo i-lodo tuadua dela e-kae go gimaua gei gimaua e-tuu maaloo.

1:7  Gei di-mau hagadagadagagee-adu gi goodou la-koia e-maaloo-dangihi, idimaa, gimaua e-iloo bolo goodou e-hai-mee dalia gimaua gi-nia hagaduadua aalaa, gei goodou e-hai-mee dalia gimaua labelaa gi-di hagamaamaa dela e-kae go gimaua.

1:8  Au e-haga-langahia adu gi goodou, ogu duaahina-nei, i-nia haingadaa ala ne-tale-mai gi gimaua i Asia. Nnagadilinga haingadaa kono gu-hagahuaidu huoloo gimaua, gu-deai di-mau hagadagadagagee ai bolo gimaua ga-mouli.

1:9  Gimaua guu-hai-hua bolo gimaua gaa-mmade, gei nia mee aanei ne-hai-mai gi gimaua bolo gimaua gi-hudee bida hagadagadagagee i-gimaua, gei gi-hagadagadagagee-hua gi God dela e-haga-mouli-aga digau mmade.

1:10  Go Mee dela ne-haga-dagaloaha gimaua gi-daha mo nia haingadaa o-di made beenei, gei gimaua e-hagadagadagagee bolo Mee ga-haga-dagaloaha labelaa gimaua,

1:11  i-di godou hagamaamaa gimaua i godou hai-dalodalo. Nia dalodalo o digau dogologo le e-kila humalia, gei God ga-hila-mai gi gimaua, gei digau dogologo ga-haga-hagaamu a God i dana hai dela ne-haga-dagaloaha gimaua.

1:12  Gimaua e-tenetene, idimaa, mau hagamaanadu gu-haga-modongoohia-aga bolo gimaua e-heehee-hua i-mua nia hadumada o God i henuailala-nei, gei e-donu go mau hegau adu gi goodou, hagalee mai i-nia kabemee o henuailala, gei mai i tumaalia o God.

1:13  Gimaua e-hihi-hua adu gi goodou nia mee ala e-mee di-godou dau ge donu ginai, gei au e-hagadagadagagee bolo goodou gaa-donu humalia ginai.

1:14  Ma e-aha maa goodou digi modongoohia humalia gimaua dolomeenei, au e-hagadagadagagee bolo maalia gei goodou ga-modongoohia humalia gimaua, bolo goodou gaa-mee di-godou tenetene i gimaua, gadoo be di-mau tene adu gi goodou i-di Laangi o tadau Dagi go Jesus.

1:15  Di hagadagadagagee deenei, gei au gu-hagababa bolo au e-hanadu gi godou baahi, bolo goodou gii-kae di-godou haga-maluagina haga-lua.

1:16  Au gu-hagababa bolo au e-hanadu gi godou baahi i-mua dogu hana gi Macedonia, mo dogu hanimoi labelaa i Macedonia, e-kae dogu hagamaamaa mai i godou baahi i dogu ala dela belee hana gi Judea.

1:17  I dagu hagataele deenei, gei au guu-hai be tangada e-logo-manawa? Dogu madagoaa ma-gaa-hai agu hagataele, e-donu au e-hai nia maa mai dogu hiihai oogu, gu-togomaalia di helekai bolo “Uaa, Uaa” mo “Deeai, Deeai” i-tolongo hua e-dahi?

1:18  Gadoo be God dela e-helekai donu, dagu hagababa adu gi goodou la-hagalee go di “Uaa” mo-di “Deeai”.

1:19  Idimaa, Jesus Christ go Tama-daane a God dela gu-agoago-ai a Timothy, Silas mo au, adu gi goodou, la-hagalee go di “Uaa” mo-di “Deeai,” gei go Mee dela go di “Uaa” donu a God.

1:20  Idimaa, go Mee dela go di “Uaa” i-nia hagababa huogodoo a God. Deenei-laa tadinga o tadau helekai i-di ingoo o tadau Dagi go Jesus Christ, e-hai bolo “Amen”, e-haga-madamada a God.

1:21  Ma go God donu hua dela ne-hai gidaadou ngaadahi gi-modongoohia di mouli buni-anga gi Christ. Gei go God la-hua dela ne-dugu gidaadou dagidahi,

1:22  gei gu-maaga gidaadou gii-hai nia dama ni-aana, ge gu-haga-ulu di Hagataalunga-Dabu gi tadau lodo, e-hai-ai di hagadootonu o-nia mee huogodoo ala gu-hagatogomaalia-mai gi gidaadou.

1:23  Au gu-gahigahi a God e-hai dogu hagadootonu, idimaa, Mee e-iloo-Ia bolo au hagalee hanadu gi godou baahi i Corinth bolo gi-de-haga-lodo-huaidu-hua goodou.

1:24  Gimaua hagalee dagi goodou gi-nia mee ala e-hai-loo gi hagadonu go goodou; gimaua e-iloo bolo goodou e-maaloo i-lodo godou hagadonu. Gei gimaua e-ngalua madalia goodou gi-tenetene goodou.

Chapter 2

2:1  Au gu-hagamaanadu bolo au e-hagalee gila-adu gi godou baahi labelaa, gi-de-manawa-gee goodou.

2:2  Maa au ga-haga-lodo-huaidu goodou, malaa, koai gaa-mee di haga-tenetene au? Go ginaadou-hua ala ne-hagalodo huaidu ko-au!

2:3  Deenei di-mee ne-hihi-adu gi goodou dagu lede deelaa. Au nogo hagalee hiihai e-hanadu gi goodou, bolo au ga-lodo-huaidu gi-di mee i godou baahi, idimaa go goodou ala go agu gau e-maanadu bolo e-haga-tenetene au. Au e-iloo bolo au ma-ga-manawa lamalia, gei goodou hogi e-manawa lamalia.

2:4  Deenei-laa, au gu-hihi-adu gi goodou dagu lede i-lodo dogu manawa-gee, gei e-dangi ogu lodo, hagalee bolo au e-hagahuaidu goodou, gei bolo goodou gi-hagalongoia i-godou lodo dogu aloho i goodou.

2:5  Malaa, maa iai tangada gu-haga-manawa-gee dahi dangada i goodou, mee hagalee ne-haga-manawa-gee au, gei ne-haga-manawa-gee goodou huogodoo, malaa e-maamaa hagalee daamaha. (Au e-helekai beenei, idimaa au e-de hiihai e-hai a-mee gi-daamaha.)

2:6  Gei dono hagaduadua dela ne-kae mai godou baahi dogologo, la-guu-dohu-hua gi mee.

2:7  Deenei-laa, goodou gi-dumaalia gi-hagamaamaa-ina a-mee, gi-de-damana hua ono lodo huaidu, gaa-lodo bagege.

2:8  Au e-dangidangi hagamahi adu gi goodou bolo goodou gi-heia a-mee gi-iloo bolo goodou e-aloho i-deia.

2:9  Idimaa, deenei tadinga dela ne-hihi-ai dagu lede, ga-hagau-adu gi goodou, bolo gi-iloo-eau be goodou guu-tuu maaloo ge daudali agu agoago i-nia madagoaa huogodoo.

2:10  Maa goodou ga-dumaalia gi tangada i dana mee ne-hai, gei au e-dumaalia labelaa gi mee. Maa au ga-dumaalia, be di-maa di mee i-golo belee dumaalia-ai, au e-hai di-maa i-mua o Christ idimaa go goodou,

2:11  bolo gi-de-maaloo-hua Setan i gidaadou, idimaa, gidaadou e-iloo-hua ana hagamaanadu huaidu.

2:12  I dogu dau-adu gi Troas belee hana e-agoago di Longo-Humalia o Christ, gei au gu-gidee bolo Tagi gu-huge-mai di ala humalia belee hai agu hegau i-golo.

2:13  Gei-au e-de-nnoomaalia, i-di-au e-de-gidee tadau duaahina go Titus i-di gowaa deelaa, gei au ne-hagaaloho hua gi digaula gaa-hana gi Macedonia.

2:14  Gidaadou gi-danggee ang-gi God, go Mee dela e-dagidagi gidaadou i tadau aali i-baahi o Christ, gaa-hai gidaadou gi-iloo dono maalama, gi-hagadele-ina ang-gi nia daangada huogodoo di modongoohia iloo o-Mee dela e-manongi gadoo be di lolo-kala, dela e-modoho gi-nia gowaa huogodoo.

2:15  Idimaa, gidaadou gu-manongi ang-gi God i-di manongi o Christ. Di kala deenei ga-modoho ang-gi digau ala ga-dagaloaha, mo ang-gi digau ala gaa-kili gi-daha.

2:16  Gidaadou e-hai gadoo be-di bilau o tangada made ang-gi digau ala gaa-kili gi-daha, gei gidaadou e-hai gadoo be-di lolo-kala o-di mouli ang-gi digau ala ga-dagaloaha. Malaa, koai dela e-mee di hai tegau deenei?!

2:17  Gimaua hagalee hai be digau dogologo ala e-hai-hegau gi nnelekai a God be nia balumee. Gei gimaua e-agoago gii-donu i-mua o God dela ne-hagau-mai gimaua, gadoo be nia hege ni Christ.

Chapter 3

3:1  Malaa e-hai behee, gimaua guu-hai be nia daangada e-bida hagaamu gimaua? Be gimaua guu-hai be digau ala i-golo ala e-hiihai gi-di lede haga-modongoohia adu gi goodou, be-di lede mai godou baahi?

3:2  Ma go goodou ala go mau lede haga-modongoohia, ala guu-hihi gi-lodo mau manawa, gu-iloo ge guu-mee di-dau go nia daangada huogodoo.

3:3  Ma-gu-modongoohia-hua bolo ma go Christ dela ne-hihi di lede deenei, ga-gowadu go gimaua. Di lede deenei hagalee ne-hihi gi-nia ink, gei ne-hihi go-di Hagataalunga o God Mouli. Hagalee ne-hihi gi-hongo nia baahi-hadu, gei ne-hihi gi-lodo nia hadu-manawa o-nia daangada.

3:4  Gimaua e-helehelekai beenei, i mau hagadagadagagee huoloo gi God mai i Christ.

3:5  Gimaua di-mau mee ai bolo e-hai gimaua gi-helekai bolo gimaua e-mee di-hai di moomee deenei. Gei di-mau iloo di hai di moomee deenei, la-ne-gaamai go God.

3:6  Go Mee dela ne-hai gimaua gii-mee di-hagadele di hagababa hoou, dela ne-hai gi-di Hagataalunga, gei hagalee ne-hai gi nnaganoho ala ne-hihi. Nnaganoho ne-hihi le-e gaamai di made, gei di Hagataalunga e-wanga di mouli.

3:7  Nnaganoho ne-hihi gi-hongo nia baahi hadu e-lua, gei di madagoaa nnaganoho ne-wanga gi digau Israel, di madamada o God gu-gila-aga dalia nnaganoho. Ma e-aha maa di madamada o-nia golomada o Moses ne-ngudu-mai, gei e-maaloo dangihi hua igolo, gei nia daangada o Israel gu-dee-mee di-mmada gi-nia golomada o Moses. Maa nnaganoho ma-ga-hai-hegau le e-gaamai di made, ne-hanimoi i-di madamada beelaa,

3:8  malaa e-maaloo behee go nia madamada o nnegau o-di Hagataalunga?

3:9  Maa nnegau o-di hagi-aga le e-madamada, di madamada o nnegau ala e-gaamai di mouli, la-koia e-madamada huoloo gi-nonua.

3:10  Idimaa, di madamada o lodo di madagoaa i-mua, la-hagalee tau ang-gi di madamada o-di madagoaa dolomeenei.

3:11  Maa nia mee ala ne-ngudu gi-daha ne-gila-mai dalia nia madamada, malaa di madamada o-nia mee ala hagalee e-odi gi-daha, la-hagalee koia ga-madamada huoloo gi-nonua!

3:12  Idimaa gimaua e-hai-mee gi-di hagadagadagagee, gimaua e-maaloo.

3:13  Gimaua hagalee hai be Moses dela ne-gahu dono libogo gi-di gahu-libogo, bolo gi-dee mmada nia dama o Israel gi-di madamada deelaa, dela e-odi gi-daha, ga-hagalee.

3:14  Nadau lodo gu-haga-hamaaloo dangihi, gaa-dae-mai-loo gi dangi-nei. Di gahu-libogo deelaa, le e-duuli hua igolo nadau maanadu i-di madagoaa ma-gaa-dau di hagababa namua. Go Christ hua dela e-mee di-daa gi-daha di gahu libogo deelaa.

3:15  Dangi-nei, gei di gahu-libogo la-i-golo-hua, dela e-duuli nadau maanadu i-di nadau madagoaa ma-gaa-dau Nnaganoho Moses.

3:16  Gei di gahu e-mee di-daa gi-daha, be di hai o-di beebaa dela e-helekai i Moses, “Dono gahu hii-libogo e-daa gi-daha i-di madagoaa mee gaa-huli ang-gi Dimaadua.”

3:17  Dimaadua deenei la-go di Hagataalunga-Dabu. Di gowaa dela iai di Hagataalunga o Dimaadua, deelaa di gowaa iai di aumaalia.

3:18  Malaa, gidaadou huogodoo gu-haga-maahina gi-di madamada o Dimaadua i tadau dee-gahu tadau hadumada, gei di madamada lahua deelaa e-hanimoi i-baahi o Dimaadua, deelaa go di Hagataalunga e-huli gidaadou gii-hai be Dimaadua i-di madamada dela e-damana gi-nonua.

Chapter 4

4:1  I-lodo tumaalia o God, Mee gu-dugu-mai gi gimaua di moomee deenei, malaa, gimaua hagalee paagege.

4:2  Gimaua guu-kili gi-daha mau mee hagammuni mono mee haga-langaadia huogodoo. Gimaua hagalee hai-hegau hogi gi-di hai-kai-tilikai, ge hagalee huli-gee nnelekai a God. Gei gimaua e-noho i-lodo di maalama o-di tonu i-mua nia hadumada o God, e-hagamahi e-hai gimaua gi-humalia gi-nia maanadu o-nia daangada huogodoo.

4:3  Maa e-donu bolo di Longo-Humalia dela e-agoago go gimaua le e-de modongoohia, malaa, e-de modongoohia hua ang-gi digau ala guu-nngala.

4:4  Digaula hagalee hagadonu, idimaa, di god huaidu o henuailala la-gu-daahi nadau hagabaubau gi-lodo di bouli. Mee e-hai digaula gi-deemee di-gidee di maalama dela e-inaina ginaadou, di maalama o di Longo-Humalia o-di madamada o Christ dela e-hai gadoo be God.

4:5  Gimaua hagalee bida haga-modongoohia-aga gimaua, gei e-haga-modongoohia-hua Jesus Christ, dela go Tagi, gei gimaua la nia hege ni goodou mai di ingoo o Jesus.

4:6  God ne-helekai, “Mai i-lodo di bouli, di maalama gi-maahina.” Ma go God-nei la-hua dela ne-haga-maalama tadau lodo, bolo gi-iloo gidaadou di madamada o God dela e-maahina i-di gili nia hadumada o Christ.

4:7  Gimaua e-dadaahi di maluagina hagataalunga deenei i-lodo di loaabi-hadu dee-mau, belee haga-modongoohia-ai bolo di mogobuna aamua la-di mee hua ni God, hagalee ni gimaua.

4:8  Nnagadilinga haingadaa e-logowaahee e-dau i gimaua, gei deai dono lauwa i gimaua ai. Gimaua gu-manawa-logo i hunu madagoaa, gei gimaua iei di-mau hagadagadagagee i-golo.

4:9  Mau hagadaumee e-logowaahee i-golo, gei gimaua hagalee bolo gu-mada-gimaua hua. Hunu madagoaa gei gimaua e-lauwa, gei digi lauwa kono.

4:10  Nia madagoaa huogodoo gei gimaua e-dagidagi di hagaduadua o Christ mo dono made i-lodo gimaua, bolo dono mouli hogi gi-gila-aga i mau baahi.

4:11  I-lodo mau mouli, gei gimaua e-noho i-lodo di haga-lliga o-di made i-nia madagoaa huogodoo i nnegau a Jesus, bolo dono mouli gi-gila-aga i mau baahi.

4:12  Malaa, deenei le e-hai bolo di made la-dela e-ngalua i mau baahi, ge di mouli la-dela e-ngalua i godou baahi.

4:13  Di Beebaa-Dabu e-helekai boloo, “Au gu-hagadonu, dela dagu mee e-helekai-iei au.” Go di hagadonu deelaa, dela e-helehelekai-iei gimaua, idimaa, mau hagadonu i-golo.

4:14  Gimaua e-iloo bolo God dela ne-haga-mouli-aga tadau Dagi go Jesus, Mee ga-haga-mouli-aga labelaa gimaua madalia Jesus, gaa-hai gidaadou gii-tuu i ono mua.

4:15  Nia mee huogodoo ala ne-hai i mau baahi la-ne-hai i godou baahi, bolo tumaalia o God la-gi-damanaiee gii-dae ang-gi digau dogologo, e-haga-gila-ai di hagaamu tumaalia e-hai-ai di madamada mo tanggee gi God.

4:16  Deenei di-mau mee digi paagege ai. Mau huaidina la-ga-paagege, gei mau hagataalunga le e-haga-hoou i-nia laangi huogodoo.

4:17  Nia haingadaa hagalligi ala e-duadua-ai gimaua ga-gaamai nia madamada llauehe ge noho-hua beelaa, e-koia e-humalia huoloo i-nia haingadaa.

4:18  Gimaua hagalee daumada nia mee ala e-gidee, gei gimaua e-daumada nia mee ala e-de gidee. Idimaa, nia mee ala e-gidee, e-noho-hua i-di madagoaa bodobodo, gei nia mee ala e-de gidee e-noho-hua-beelaa, hagalee e-odi.

Chapter 5

5:1  Gidaadou gu-iloo bolo di hale henuailala dela e-noho-ai gidaadou no-lodo le e-mooho, God e-gaamai gi gidaadou di hale i-di langi e-noho-ai gidaadou, di hale ni Mee ne-hau dela e-noho hua beelaa.

5:2  I-hongo henuailala-nei gidaadou e-hiihai huoloo bolo gidaadou e-ulu gi tadau hale dela i-di langi,

5:3  idimaa, ma e-aha maa gidaadou gaa-gahu gi-di maa, gidaadou gu-hagalee noho tadau goloo ai.

5:4  Tadau madagoaa e-mouli i-lodo di hale laa henuailala, gidaadou e-nguunguu gei e-longono tuadua, gei di-maa hagalee go tadau hiihai bolo e-kili gi-daha tadau huaidina henuailala, gei gidaadou e-hiihai e-gahu gi nnuaidina di langi, bolo nia mee ala e-mmade gaa-huli go di mouli.

5:5  Go God dela ne-hagatogomaalia gidaadou gi-di huli deenei, go Mee dela ne-gaamai gi gidaadou dono Hagataalunga belee hai-ai di hagadagadagagee o-nia mee huogodoo ala ne-benebene go Mee mai gi gidaadou.

5:6  Deenei di mee e-maaloo-ai tadau lodo i-nia madagoaa huogodoo. Gidaadou e-iloo bolo maa gidaadou ma-gaa-noho-hua i-lodo tuaidina o henuailala, gidaadou la i-daha hua mo-di hale Dimaadua.

5:7  Idimaa, gidaadou le e-mouli i-di hagadonu, gei hagalee i-nia mee ala e-gidee-gidaadou.

5:8  Tadau lodo e-maaloo-hua, gei gu-hiihai bolo gidaadou e-ulu gi-daha mo tuaidina-nei, gii-hula gidaadou e-noho i tadau lohongo dela i-baahi o Tagi.

5:9  Tadau mee dela e-waluwalu le e-haga-tenetene di manawa o Tagi, ma e-aha maa gidaadou e-noho i-lodo tadau hale i henuailala-nei, be e-noho i tei gowaa.

5:10  Idimaa, gidaadou huogodoo e-hai gii-hula gi-di hagi-aga i-mua o Christ, tangada-nei mo tangada-nei e-kae dono hui gii-tau gi ana hangaahai humalia be huaidu ala nogo hai i dono madagoaa nogo mouli i henuailala.

5:11  Gimaua e-iloo tadinga o-di madagu i Tagi, gei gimaua e-hagamahi e-helekai gi-nia daangada gi-hiihai gi-di hai deenei. God e-iloo-Ia gimaua, gei au e-hagadagadagagee bolo goodou hogi e-iloo gimaua i-lodo godou manawa.

5:12  Gimaua hagalee hai bolo e-hagi-adu gimaua gi goodou labelaa, gei e-gowadu gi goodou di madagoaa humalia e-hagaamu gimaua, gii-mee goodou di-helekai gi ginaadou ala e-hagaamu nia mee ala e-gidee, gei hagalee go nia hangahaihai.

5:13  Maa nei bolo gimaua guu-hai nia daangada dadaulia, go God dela ne-dadaulia ginai gimaua. Maa gimaua gu-kabemee, go goodou ala ne-kabemee ginai gimaua.

5:14  Ma go di aloho o Christ dela e-haga-ngalungalua gimaua, i-di mau modongoohia di agoago deenei: Tangada e-dahi ne-made ang-gi digau huogodoo, deenei dono hadinga bolo nia daangada huogodoo le e-hai-mee gi dono made.

5:15  Mee ne-made gi-nia daangada huogodoo, bolo nia daangada huogodoo ala e-mouli gi-hudee bida mouli-hua ang-gi ginaadou, gei gi-mouli ang-gi Tangada dela ne-made ga-mouli bolo gii-mee ginaadou di mouli.

5:16  Geinga dolomeenei gaa-hana, gei gidaadou ga-hagalee hagi-aga tangada be go nia hagamaanadu o tangada. Ma e-aha maa i-mua gidaadou gu-hagi-aga a Christ gi-nia hagamaanadu o tangada, gei dolomeenei gidaadou e-hagalee hagi-aga a-Mee.

5:17  Tangada dela guu-hai di tama ni Christ, geia guu-hai tangada hoou. Nia mee namua gu-hagalee i dono baahi, gei nia mee hoou gu-kila-aga.

5:18  God ne-hai nia mee aanei huogodoo, ne-huli gidaadou ala nogo hai nia hagadaumee, gii-hai ono ehoo hagaaloho mai i Christ, gei gu-dugu-mai labelaa tadau duhongo-hegau e-hai nia daangada ala i-golo gii-hai labelaa nia hoo hagaaloho ni-oono.

5:19  Mau agoago le e-hai bolo God ne-hai nia daangada huogodoo gii-hai nia hoo hagaaloho ni-oono mai i Christ. Gei Mee hagalee hagailongo nadau huaidu ne-hai. Mee gu-dugu-mai gi gimaua nnelekai ala e-haga-modongoohia dana hai ne-hai digaula gii-hai ono ehoo hagaaloho.

5:20  Deenei-laa, aanei gimaua e-agoago mai i Christ, e-hai be-di mee bolo God e-hagi-adu dono hiihai gi goodou mai mau agoago. Gimaua e-tangi hagamahi i-di ingoo o Christ adu gi goodou bolo goodou gii-huli gii-hai nia hoo hagaaloho ni God.

5:21  Christ la ono huaidu ai, gei God guu-hai a-Mee gii-hai-mee gi tadau huaidu, bolo gii-mee-ai gidaadou di hai-mee gi-di tonu o God i tadau buni-anga gi Christ.

Chapter 6

6:1  Gidaadou nogo hai-hegau madalia a God, deenei-laa, gimaua e-dangidangi-adu bolo goodou gi-hudee haga-balumee-ina dono dumaalia, dela guu-lawa di-godou kae.

6:2  Hagalongo gi-nia helekai a God, “Dogu madagoaa dela belee dumaalia-adu gi-di-goe, gei Au gu-longono-e-Au goe. Dogu laangi dela belee hagamouli goe, gei Au gu-hagamaamaa goe.” Hagalongo-mai: deenei la di madagoaa belee kae tumaalia o God, dangi-nei la di laangi belee haga-mouli goe!

6:3  Gimaua hagalee hiihai gi tangada gii-gida dana mee hala i mau moomee, gimaua e-hagalee haga-deaadee di ala o dahi dangada.

6:4  Gei gimaua gu-haga-modongoohia-aga bolo gimaua nia daangada hai-hegau ni God i-nia mee huogodoo aanei: e-manawa hagakono i mau hagaduadua, mo mau haingadaa, mo e-boo mau lodo.

6:5  Gimaua gu-haga-mamaawa, gu-galabudi, gu-dadaaligi go digau dogologo, gu-ngalua-kono, gu-haga-aala i-di boo, ge guu-noho mau meegai ai.

6:6  Gimaua gu-haga-modongoohia-aga gimaua, bolo gimaua nia daangada hai-hegau ni God mai i mau mouli madammaa, iloo nia mee, hagakono, humalia, mai di Hagataalunga-Dabu, mai mau aloho-donu,

6:7  mai i-di mau hagadele nnelekai ala e-donu, mo mai baahi nia mogobuna o God. Gimaua e-hai-mee gi-di tonu dela go mau goloo heebagi, e-heebagi ge duuli gimaua.

6:8  Gimaua e-kae di hagalabagau, gei e-kae di haga-langaadia, e-kae nnelekai huaidu mo-di hagaamu labelaa. Nia daangada e-hai bolo gimaua e-hagadele tilikai, gei gimaua e-helekai donu.

6:9  Digaula e-hai bolo gimaua nia balu-daangada, gei gimaua e-dahidamee i-baahi nia daangada huogodoo. Gimaua e-hai gadoo be nia daangada guu-mmade, gei deeai, gimaua e-mouli-hua. Ma e-aha maa gimaua guu-kae di hagaduadua, gei gimaua digi mmade.

6:10  Ma e-aha maa gimaua e-lodo huaidu, gei gimaua e-tenetene-hua i-nia madagoaa huogodoo. Gimaua e-hai be digau hagaloale, gei gimaua e-haga-maluagina digau dogologowaahee. Gimaua e-hai be digau nadau goloo ai, gei gimaua e-hai-mee gi-nia mee huogodoo.

6:11  Goodou go digau Corinth, gimaua e-helekai-donu-adu gi goodou i-di tonu, gimaua gu-haga-mahuge-adu gi goodou nia haga-honu o mau manawa.

6:12  Ma hagalee go gimaua ala guu-tai mau manawa i goodou, go goodou-hua ala ne-tai godou manawa i gimaua.

6:13  Au e-helekai-adu gi goodou be nia dama ni-aagu. Goodou labelaa gi-heia be di-mau hai-adu gi goodou gi-haga-mahuge-ina gi-daha godou manawa!

6:14  Goodou hudee haga-puni ang-gi digau ala hagalee hagadonu, idimaa, e-deemee di hai beenei. Di tonu e-deemee di haga-puni ang-gi di haihai-hala. Di maalama e-deemee di haga-puni ang-gi di bouli.

6:15  Christ mo Setan e-deemee di-donu gi dahi mee. Tangada hagadonu mo tangada de-hagadonu e-deemee di hai-mee gi-di mee e-dahi.

6:16  Di Hale Daumaha o God mo nia balu-god e-deemee di-haga-puni. Idimaa, aanei go gidaadou di hale-daumaha a God Mouli, be-di hai a God dela ne-helekai boloo, “Au gaa-hai dogu hale i nadau baahi, gei Au gaa-noho i-baahi digaula. Au gaa-hai di God ni digaula, gei digaula gaa-hai nia daangada ni-aagu.”

6:17  Dimaadua gu-helekai boloo, “Goodou gii-huli gi-daha mo digaula, gei gi-maewae gi-daha mo digaula. Goodou hudee tale gi-nia mee gulugulua i-baahi digaula, gei Au ga-hai-mee gi goodou.

6:18  Au gaa-hai di-godou Damana, gei goodou gaa-hai nia dama-daane mo nia dama-ahina ni-aagu, be-di hai o Dimaadua-Aamua-Huoloo ne-helehelekai-ai.”

Chapter 7

7:1  Ogu ihoo hagaaloho, nia hagababa huogodoo aanei ne-hai-mai gi gidaadou. Deenei-laa, gidaadou la-gi-haga-madammaa-ina gidaadou gi-daha mo nia mee huogodoo ala e-haga-milimilia tadau huaidina mo tadau hagataalunga. Gidaadou la-gii-noho dabu mo-di hagalaamua-ina a God.

7:2  Goodou gi-mamaanadu-ina gimaua. Gimaua digi hai di-mau mee huaidu, haga-hala be halahalau dahi dangada.

7:3  Au hagalee ne-helekai beenei belee hagahuaidu goodou. Idimaa, i-mua au gu-helekai bolo goodou e-i-lodo dogu manawa, deelaa-laa e-buni-ai gidaadou i-lodo tadau mouli be i-lodo tadau mmade.

7:4  Dogu hagadagadagagee adu gi goodou, la-koia e-damanaiee, gei au e-hagaamu goodou. I-lodo mau hagaduadua huogodoo, gei au nogo duu maaloo, gei au gu-tenetene huoloo.

7:5  Di-mau dau-adu gi Macedonia, gimaua digi hagamolooloo. Nia madagoaa huogodoo e-haingadaa, e-lagalagamaaloo gimaadou mo nia daangada, gei di madagu i mau lodo.

7:6  Go God dela e-hagamaaloo-aga digau huogodoo ala e-daamaha nadau lodo, geia gu-haga-tenetene labelaa gimaua i-di dau-mai Titus gi mau baahi.

7:7  Gei hagalee go dono dau-mai la-hua dela ne-haga-tenetene gimaua, mo dono haga-iloo hogi di-godou hai ne-hagamaaloo-aga ia. Mee gu-hagi-mai gi gimaua di-godou hidihidi huoloo i-di-au, mo di-godou manawa-gee, mo di-godou hiihai e-haga-dagaloaha au. Aanei nia mee ne-haga-damana dogu tene.

7:8  Maa dagu lede dela ne-hagau-adu gi goodou la-gu-haga-manawa-gee goodou, gei au hagalee tilikai hualaa i dagu hai di lede deenei. Au nogo tilikai hualaa i-matagidagi idimaa dagu lede la-gu-haga-mmaemmae goodou i tama madagoaa dulii.

7:9  Dolomeenei gei au gu-tenetene, hagalee bolo e-tene gi dagu hai goodou gi-manawa-gee, au e-tene gi di-godou manawa-gee, dela ga-hidi-mai-ai goodou gaa-oongo godou lodo, gaa-huli hoou. God dela ne-hai-hegau gi di-godou manawa-gee deelaa, deelaa-laa, gimaua di-mau mee huaidu ne-hai-adu gi goodou ai.

7:10  Di manawa-gee mai baahi o God, le e-hidi-ai di huli-hoou o tangada, gaa-hidi-ai di haga-mouli, gei deai tilikai hualaa i-lodo di manawa-gee beenei ai. Gei di manawa-gee o henuailala le e-hidi-ai di made.

7:11  Goodou mmada gi God i dana haga-manawa-gee godou lodo. Dana haga-manawa-gee goodou, guu-hai goodou gi-manawa maaloo, manawa hagamahi bolo goodou gi-madammaa. Goodou gu-lodo-huaidu gi-di mee huaidu, goodou gu-haga-lligalliga, goodou gu-hidihidi, goodou gu-maanadu-mai au, gei goodou gu-togomaalia e-hagaduadua digau ala e-hai di huaidu. Goodou gu-haga-modongoohia-aga bolo goodou guu-hai nia mee huogodoo ala e-hai nia mee gii-donu.

7:12  Gei-au ne-hihi-adu di lede deelaa gi goodou, hagalee ne-hidi-mai tangada dela guu-hai dana mee hala, be tangada dela gu-ihala. Au ne-hihi di lede deelaa bolo gi-gidee-ai goodou di-godou haa-manawa i gimaua, i-mua nia hadumada o God.

7:13  Deelaa di mee ne-maaloo dangihi-ai mau lodo. Mau lodo gu-maaloo-aga, gei gimaua hogi gu-tenetene huoloo gi di-godou hai dela ne-haga-tenetene a Titus i dono madagoaa nogo i godou baahi.

7:14  Au gu-hagaamu goodou ang-gi Titus, gei au hagalee langaadia dogu hagaamu goodou. Gimaua nogo helehelekai-adu gi goodou i-nia mee ala e-donu i-nia madagoaa huogodoo, dela gadoo di-mau hagaamu goodou ang-gi Titus gu-modongoohia-aga bolo e-donu.

7:15  Malaa, dono aloho i goodou gu-damana-aga i dono mamaanadu godou manawa hagalongo, mo di-godou benebene ia hagalabagau huoloo.

7:16  Deelaa-laa, au e-tenetene huoloo, idimaa, au e-mee di-hagadagadagagee adu gi goodou i-nia mee huogodoo.

Chapter 8

8:1  Mau duaahina-nei, gimaua e-hiihai bolo goodou gi-iloo di hai o tumaalia o God, dela ne-hai gi-nia nohongo-dabu ala i Macedonia.

8:2  Digaula guu-noho i-lodo nia hagamada haingadaa llauehe, gei digaula gu-tenetene huoloo, dela gaa-hai di-nadau wanga-dehuia, mai i-lodo nadau hagaloale.

8:3  Au e-hagi-adu bolo digaula ne-dahi-aga nadau mee ala ne-mee ge guu-logo gi-nonua. Mai nadau hiihai,

8:4  digaula e-tangi-mai gi gimaua bolo gi-kae-ina nadau hagamaamaa, e-hagamaamaa nia dama a God ala i Judea.

8:5  Digaula ne-hai nia mee aanei guu-hidi laa-hongo mau mee ala ne-hagamaanadu bolo aalaa nadau mee e-mee di-hai. Matagidagi, gei digaula ne-dugu-anga ginaadou gi Tagi, nomuli, ga-dugu-mai ginaadou gi gimaua labelaa mai di manawa o God.

8:6  Deenei di-mau mee e-hagamaaloo-ai Titus dela ne-daamada-aga tegau deenei, bolo ia gi-hagamaamaa-ina goodou e-haga-lawa-ai tegau o-di aloho deelaa.

8:7  Goodou gu-maluagina huoloo i-nia mee huogodoo ala i godou baahi: di hagadonu, nia helekai, di kabemee, di hagamadabouli, di hagamaamaa, mo di-godou aaloho i gimaua. Goodou gi-heia-hua beelaa tegau o-di aloho deelaa.

8:8  Ma hagalee taganoho dela e-gowadu ko-au gi goodou. Go dogu hiihai-hua belee haga-modongoohia-adu nia hagamadabouli o digau ala i-golo i-di hagamaamaa, deenei dagu mee dela e-halahala be di-godou aloho le e-donu.

8:9  Goodou e-iloo tumaalia o tadau Dagi go Jesus Christ: i dono maluagina huoloo, ge-Ia guu-hai Ia gii-hai be tangada hagaloale i goodou, bolo gi-maluagina goodou mai dono hagaloale.

8:10  Dagu maanadu hagamaamaa e-hai bolo ma e-humalia maa goodou ga-haga-lawa di-godou mee dela ne-daamada i-di ngadau ne-hana. I-di ngadau ne-hana, goodou ne-daamada ne-hiihai di wanga, go goodou ala ne-daamada di-maa.

8:11  Deelaa-laa, goodou gi-heia gei gi-haga-lawa-ina, goodou hagamahi heia gii-lawa di-godou mee dela guu-lawa di haganoho i-mua, mai i godou mee ala e-mee di-hai mai i-lodo godou maluagina.

8:12  Maa goodou gaa-tene gi-di wanga gi-daha, gei God e-tene gi godou mee ala e-mee di-godou wanga gi-daha, gei hagalee i godou mee ala e-deemee di-wanga gi-daha.

8:13  Au hagalee hai digau ala i-golo gi-maamaa i dagu dugu nia mee daamaha gi godou nua, ma e-humalia bolo goodou e-hagamaamaa digau ala e-dee-dohu nadau mee, idimaa goodou e-logo godou mee dolomeenei. Gei digaula ga-hagamaamaa goodou i-di godou madagoaa ma-ga-dee-dohu godou mee, gei digaula e-logo nadau mee. Deenei di hai e-hagatongaadahi goodou mo digaula.

8:14  Au hagalee hai digau ala i-golo gi-maamaa i dagu dugu nia mee daamaha gi godou nua, ma e-humalia bolo goodou e-hagamaamaa digau ala e-dee-dohu nadau mee, idimaa goodou e-logo godou mee dolomeenei. Gei digaula ga-hagamaamaa goodou i-di godou madagoaa ma-ga-dee-dohu godou mee, gei digaula e-logo nadau mee. Deenei di hai e-hagatongaadahi goodou mo digaula.

8:15  Be di Beebaa-Dabu e-helekai boloo, “Tangada dela ne-hagabudu ana mee e-logo, la-hagalee logowaahee, gei tangada dela ne-hagabudu ana mee hogoohi, la-hagalee hogoohi-loo.”

8:16  Gimaua e-danggee ang-gi God i dana haga-honu Titus gi-di manawa hiihai huoloo e-hagamaamaa goodou, gadoo be gimaua.

8:17  Gei hagalee bolo go di-mau dangidangi ang-gi mee dela ne-hai a-mee gii-hai nia mee aanei, gei go dono hiihai-hua bolo ia e-hagamaamaa goodou, gei dela ne-hanadu-iei mee gi godou baahi, go mee-hua bolo ia e-hanadu.

8:18  Gei gimaua e-hagau-adu di-mau duaahina dela e-hagalabagau go nia nohongo-dabu huogodoo i dana agoago di Longo-Humalia.

8:19  Gei hagalee bolo deenei hua, gei nia nohongo-dabu gu-hilihili-aga a-mee, bolo gii-hana madalia gimaua e-dagidagi nnegau o-di aloho deenei dela e-haga-madamada-ai Tagi, gei e-haga-modongoohia-ai di-mau hiihai e-hagamaamaa.

8:20  Gimaua e-hagamahi e-hai-hegau gii-donu, bolo gi-de-leelee-logo nia daangada i-di gili di hagamaamaa dumaalia, dela e-benebene i mau baahi.

8:21  Deenei di-mau hagamaanadu bolo e-hai gii-donu nia mee huogodoo, hagalee bolo i-mua-hua nia golomada o Dimaadua, gei i-mua labelaa nia golomada o-nia daangada.

8:22  Gimaua e-hagau-adu labelaa di-mau duaahina dalia meemaa. Gimaua gu-hagadina haga-logowaahee dono modo-gologolo mo dono hagamadabouli gi nnegau e-logo, gei gimaua gu-iloo bolo mee e-hiihai huoloo e-hagamaamaa. Dolomeenei gei mee e-hiihai huoloo e-hagamaamaa goodou, i dono hagadagadagagee huoloo adu gi goodou.

8:23  Gei Titus, go dogu ihoo mo dogu hagamaamaa dela nogo madalia au nogo ngalua e-hagamaamaa goodou. Meemaa ala i-golo, ga-lloo-adu labelaa, aalaa meemaa e-hagau go nia nohongo-dabu belee haga-madamada a Christ.

8:24  Deenei-laa, goodou gi-haga-modongoohia-aga-ina godou aaloho gi digaula bolo gi-modongoohia-ai nia nohongo-dabu huogodoo, gei gi-iloo bolo di-mau hagaamu goodou le e-donu.

Chapter 9

9:1  Ma e-hagalee bolo au e-hai-loo gi-hagi-adu gi goodou di hagamaamaa dela ne-hagau gi nia dama a God ala i Judea.

9:2  Au e-iloo bolo goodou e-hiihai e-hagamaamaa, gei au gu-hagaamu goodou gi digau Macedonia, i dagu helekai gi digaula boloo, “Tadau duaahina ala i Achaia gu-hagatogomaalia mai di ngadau ne-hana e-hai di-nadau hagamaamaa.” Malaa, di ala-mee deenei gu-haga-ngalua-aga digau dogologo i-lodo digaula.

9:3  Au e-hagau-adu tadau duaahina aanei bolo gi-iloo goodou bolo mau hagaamu i-goodou i-nia mee aanei, la-gi-de-dilikai, i dagu helekai dela ne-hai bolo goodou gu-hagatogomaalia di-godou hagamaamaa.

9:4  Maa nei bolo digau o Macedonia ga-lloo-adu madalia au, la-ga-gidee bolo goodou digi hagatogomaalia godou mee, malaa, gei gimaua la-ga-langaadia huoloo, idimaa, di-mau hagadagadagagee la-gu-damanaiee huoloo adu gi goodou, gei goodou hogi ga-langaadia labelaa.

9:5  Deenei-laa au ne-hagamaanadu bolo e-humalia e-hai dagu dangidangi ang-gi tadau duaahina aanei bolo digaula gi-lloo-adu gi goodou i ogu mua e-hagatogomaalia di-godou hagamaamaa dela guu-lawa di-godou hagababa, gei nia mee huogodoo ga-togomaalia i dogu madagoaa dela ma-gaa-dau-adu gi godou baahi. Deelaa di madagoaa e-kila-aga-ai godou mee ala ne-dahi-aga, ala ne-hai mai i-lodo godou manawa humalia, hagalee ne-hai hagakono.

9:6  Goodou gi-langahia tangada dela e-dogi ana lii-laagau hogoohi, ia e-hadi ana huwa-laagau hogoohi. Gei tangada dela e-dogi ana lii-laagau e-logo, ia e-hadi ana huwa-laagau e-logo.

9:7  Tangada-nei mo tangada-nei gi-dahi-aga-ina ana mee ala guu-lawa di hagababa mai i ono lodo, hagalee bolo e-hai-hua tegau bolo gi-heia, gei God le e-aloho i tangada dela e-tene di-wanga ana mee gi-daha.

9:8  God e-mee di-gowadu gi goodou ana mee gii-logo i godou mee ala e-hiihai ginai, bolo goodou la-gii-dohu i-nia madagoaa huogodoo, mo anga labelaa gi-nia hegau humalia ala i-golo,

9:9  be-di mee dela guu-lawa-ai di hihi i-lodo di Beebaa-Dabu boloo, “Mee e-wanga dehuia gi digau ala hagaloale, gei dono dumaalia e-hana-hua beelaa.”

9:10  God e-wanga gi digau hai-hadagee nadau lii-laagau e-dogi mo nadau palaawaa e-gai, gei go Mee hogi dela e-gowadu gi goodou nia lii-laagau huogodoo ala e-hiihai ginai goodou, ga-haga-tomo-aga nia maa, bolo gii-hai nia huwa-laagau e-logowaahee mai i godou dumaalia.

9:11  Gei Mee gaa-hai goodou gi-maluagina huoloo i-nia madagoaa huogodoo, bolo goodou gii-mee di-wanga gi-daha i-nia madagoaa huogodoo ga-hidi-mai digau dogologo ga-danggee gi God i godou wanga-dehuia ala gaa-kae go digaula mai tadau baahi.

9:12  Idimaa, tegau o-di hagamaamaa deenei dela e-hai go goodou, hagalee bolo e-hagamaamaa-hua nia dama a God, gei e-hidi-mai di hai-danggee ang-gi God mai i digau dogologo.

9:13  I di-nadau gidee-donu tegau o-di hagamaamaa deenei, digau dogologowaahee ga-haga-hagaamu a God i-di godou hagamahi gi-di Longo-Humalia o Christ dela gu-haga-modongoohia go goodou, mo godou dumaalia i-di godou wanga-dehuia ang-gi digaula mo digau ala i-golo.

9:14  Gei digaula ga-dalodalo i goodou mai i-lodo nadau manawa-aloho, i tumaalia damanaiee dela ne-gowadu dehuia go God gi goodou.

9:15  Gidaadou gi-hagaamuina a God i dana wanga-dehuia kisakis deenei.

Chapter 10

10:1  Au go Paul, e-hiihai e-hai dagu dangidangi-adu gi goodou. Hunu daangada e-hai bolo au tangada e-balabala dogu manawa ge e-hila-gi-lala i dogu noho i godou baahi, gei e-hagamuamua i dogu madagoaa ma-ga-mogowaa i goodou. Au e-dangi hagamahi-adu gi goodou i-di manawa-aloho mo tumaalia o Christ,

10:2  bolo gi-hudee heia au gii-daamaha adu gi goodou i dogu madagoaa ma-gaa-dau i godou baahi. E-donu, au e-daamaha ang-gi digau ala e-haihai bolo mau hangahaihai la-go nnangaahai o henuailala.

10:3  E-donu bolo gimaua e-noho i henuailala, gei gimaua hagalee e-heebagi be nia hangaahai o henuailala.

10:4  Nia goloo-heebagi ala e-heebagi-ai gimaua, la-hagalee nia goloo ni henuailala, go nia goloo mogobuna o God ala e-oho-ai nia duuli mau-dangihi, gei aalaa hogi e-oho-ai nia helehelekai lagalagamaaloo hala.

10:5  Gimaua e-dugudugu-ia gi-lala nia hagamuamua huogodoo ala e-hai-baahi gi-di kabemee a God. Gimaua e-lawalawa nia hagamaanadu huogodoo gii-mee di-hagalongo ang-gi Christ.

10:6  Goodou ga-dogomaalia di-godou hagalongo, gei gimaua ga-hagaduadua digau huogodoo ala hagalee hagalongo.

10:7  Goodou e-mmada-hua gi-nia mee ala e-kila-mai i-mua godou golomada. Maa tangada gaa-hai bolo ia di tama ni Christ, geia gi-maanadu-ina labelaa bolo gimaua nia dama ni Christ labelaa gadoo be ia.

10:8  Au hagalee langaadia, ma e-aha maa au gu-iehe dagu hagaamu nia mogobuna o Tagi ala ne-dugu-mai gi gimaua, go nia mogobuna ala e-hagahumalia-ai goodou, hagalee go nia mogobuna ala e-hagahuaidu goodou.

10:9  Au hagalee hiihai bolo goodou gi-hagamaanadu bolo au e-hagamadagudagu goodou gi agu lede.

10:10  Holongo tangada ga-helekai-aga boloo, “Nia lede a Paul la-gu-maaloo dangihi balua, gei mee ma-ga i tadau baahi, mee tangada hua bagege, ana helekai le e-paagege.”

10:11  Tangada dela e-hai beenei la-gi-iloo-ia bolo ma hagalee hai geegee i-mehanga mau mee ala e-hihi-adu gi goodou i-di mau mogowaa-loo i goodou, mo mau mee ala e-hai-adu gi goodou i mau madagoaa ma-gaa-noho i godou baahi.

10:12  E-donu bolo gimaua hagalee hagatautau gimaua gi digau ala e-bida hagaamu ginaadou. Digau hua dadaulia ala e-bida hagatautau ginaadou mo di hagadau hagi-aga ginaadou gi nadau haganoho.

10:13  Gei gimaua hagalee bida hagaamu gimaua laa-hongo di-mau duhongo-hegau dela gu-dugu-mai go God, mo mau hegau i godou baahi.

10:14  Di-mau madagoaa ne-lloo-adu gi godou baahi, goodou e-noho i-lodo tegau deenei dela guu-lawa di-haga-noho, gei gimaua hagalee ne-hula laa-hongo tegau deenei, dela bolo e-gowadu di Longo-Humalia i-di hai o Christ.

10:15  Gimaua hagalee hagaamu nia hegau ala ne-hai go digau ala i-golo, i-tua nia hegau a God ala ne-haga-noho ga-gaamai gi gimaua. Gei gimaua e-hagadagadagagee bolo godou hagadonu le e-maaloo-aga mo mau hegau ala e-hai i godou baahi ga-tomo-aga labelaa, be-di hai o nnegau a God ala gu-dugu-mai gi gimaua.

10:16  Gei gimaua gaa-mee di-hula e-agoago di Longo-Humalia gi-lodo nia henua ala i-golo i-daha mo goodou, gei gimaua hagalee hagaamu tegau o tuai dangada dela ne-hai i-lodo nia henua aalaa.

10:17  Di Beebaa-Dabu e-helekai boloo, “Maa tangada bolo ia e-hagaamu i dahi mee, geia gi-hagaamuina di mee a Tagi dela ne-hai.”

10:18  Hagalee go tangada dela e-bida hagaamu ia dela e-hagahumalia i-baahi o Tagi, gei go tangada hua dela gu-hagaamu go Tagi.

Chapter 11

11:1  Au e-hiihai bolo goodou gi-dumaalia-mai gi-di-au, maa au e-leelee be tangada dadaulia.

11:2  Au e-dubua-adu gi goodou e-hai gadoo be God dela e-dubua-adu gi goodou. Goodou e-hai gadoo be tama-ahina madammaa dela ne-hagababa ang-gi taane hai-lodo hua-e-dahi, deelaa go Christ.

11:3  Au e-lliga bolo godou hagamaanadu gi-dee hai-hala-hua, gaa-kili gi-daha godou haa-manawa madammaa i Christ, gadoo be Eve dela ne-halahalau go di kabemee tilikai o-di gihaa.

11:4  Idimaa, goodou e-dumaalia-hua ang-gi tei dangada dela ma-ga-hanadu gi godou baahi, e-agoago-adu tuai Jesus i-daha mo di-mau mee dela guu-lawa di-agoago-adu gi goodou. Goodou guu-kae tuai hagataalunga mo tuai longo-humalia ala e-hai-gee huoloo mo-di Hagataalunga mo-di Longo-Humalia ala ne-kae go goodou i mau baahi!

11:5  Au digi maanadu-loo bolo au i-bahi-i-lala digau ala e-hai bolo ginaadou digau agoago-hagau aamua.

11:6  Holongo au tangada e-dee-dohu i-di helekai, gei hagalee bolo au e-de-kabemee. Gimaua gu-haga-modongoohia-adu gi goodou nia mee aanei, i-lodo nia madagoaa huogodoo i-nia ala huogodoo.

11:7  Au gu-agoago-adu de-huia gi goodou di Longo-Humalia a God. Au guu-dugu au gi-lala belee hagalaamua goodou. Ma e-hala go dagu hai beenei?

11:8  I dogu ngalua i godou baahi, gei nia nohongo-dabu ala i-golo e-hui au. E-ala be au e-gaiaa-mai nia bahihadu digaula, e-hagamaamaa goodou.

11:9  Gei dogu noho i godou baahi, gei au digi haga-daadaamee-ina goodou i-nia teenedi belee hai-ai dagu hagamaamaa. Aalaa-hua go tadau duaahina ala ne-loomoi i Macedonia ne-gaamai nia mee huogodoo ala e-manawa ginai au. I-lodo-hua nia madagoaa ala guu-too gi-daha, gei au digi hai goodou gi-lodo-daamaha. Dangi-nei gaa-hana, au hagalee hai goodou gii-lodo daamaha!

11:10  Mai i-di tonu o Christ dela i ogu lodo, au e-hagababa-adu gi goodou bolo deai tangada i-lodo tenua go Achaia e-mee di-dugu dogu hagaamu deenei ai.

11:11  E-hai behee? Au e-helekai beenei, idimaa au hagalee e-aloho i goodou? God e-iloo bolo au e-aloho i goodou!

11:12  Agu hegau aanei e-hai, aalaa go agu mee e-hai gi-muli bolo “digau-agoago-hagau” ala i-golo gi-deemee di hagaamu ginaadou ge e-hai-hua bolo nadau hegau le e-hai gadoo be mau hegau.

11:13  Digau aanei la-hagalee digau agoago-hagau e-donu, digau agoago-hagau hua dilikai e-bida haga-kila-aga ginaadou gii-hai be digau agoago-hagau ni Christ.

11:14  Gei hagalee di mee e-haga-goboina deenei, idimaa, Setan e-mee-hua di-bida haga-gila-aga ia gii-hai be tangada di-langi o-di maalama.

11:15  Deenei-laa, e-hagalee haga-goboina maa ana gau hai-hegau gaa-bida haga-kila-aga ginaadou gii-hai be digau ala e-hai-hegau gi-di tonu. Gei di hagaodi ginaadou e-kae nadau hui gii-tau ang-gi nadau hegau.

11:16  Au e-helekai-adu labelaa gi goodou bolo goodou hudee hai bolo au e-dadaulia. Maa goodou gaa-dugu au bolo au e-dadaulia gei goodou gi-benebene-ina hua au gi godou baahi be di-godou benebene tangada dadaulia, gii-iai dagu mee dulii e-haga-hagaamu ko-au.

11:17  Agu helekai aanei e-helehelekai-iei au, la-hagalee go nnelekai a God bolo gi-helekai-ai. I-dogu helekai hagaamu, au e-leelee be tangada dadaulia.

11:18  Idimaa e-dogologo ala e-bida haga-hagaamu ginaadou i-nia ala o henuailala, gei au hogi e-hagaamu be digaula.

11:19  Goodou e-iloo nia mee, gei goodou e-dugu-anga goodou gi digau dadaulia!

11:20  Goodou e-manawa hagakono labelaa gi digau ala e-hai goodou be nia hege, gei e-hiihai e-hai nadau huaidu adu gi goodou, e-kae godou goloo, be e-haga-balumee goodou, be e-paapaa godou gauwae.

11:21  Au e-langaadia di hai bolo gimaua ne-deemee di-hai nia maa! Maa iai tangada e-bida hagaamu ia i-di mee, gei au e-hagaamu au labelaa! Au e-helekai gadoo be tangada dadaulia.

11:22  Malaa e-hai behee? Digaula la digau Hebrew? Gei-au hogi tangada Hebrew. Digaula la digau Israel? Gei-au hogi tangada Israel. Digaula la digau ni-di madawaawa Abraham? Au hogi tangada ni-di madawaawa Abraham.

11:23  Digaula la nia hege ni Christ? Au e-helekai be tangada hagawelewele, gei au di hege koia e-humalia i digaula, idimaa, au gu-ngalua damana i digaula. Au gu-lawalawa haga-logo i digaula, guu-logo ogu holongo ne-hagamamaawa, guu-logo dogu dadaaligi hagahuaidu i-digaula, hoohoo bolo gaa-made.

11:24  Nnolongo e-lima gei digau o Jew ne-haga-mamaawa au haga-motolu maa-hiwa.

11:25  Nnolongo e-dolu, gei digau o Rome ne-haga-mamaawa au, tolongo e-dahi gei au ne-dilidili gi-nia hadu. Nnolongo e-dolu, gei au gu-abulu i-hongo nia wagabaalii. Tolongo e-dahi, gei au nogo wanuwanu i-di moana i-di boo e-dahi ge dahi aa.

11:26  Au guu-tale gi-nia haingadaa e-logo i-lodo dogu heehee i-lodo nia monowai, i-baahi digau gaiaa, i-baahi ogu gau o Jew, mo i-baahi digau tuadimee. Au guu-tale gi-nia haingadaa i-lodo nia gowaa huogodoo i-lodo nia waahale, lodo-henua, lodo di moana, mo i-baahi ogu ihoo hai-gee.

11:27  Ogu ngalua llauehe ge haingadaa i-golo, nnolongo e-logo gei au ne-haga-aala i-di boo, gu-hiigai, gu-hieinu, agu meegai ai, dogu gowaa e-moe-iei au ai, ge ogu goloo ai.

11:28  Gei i-daha mo nia mee aanei ala e-tale-mai gi-di-au, i-nia laangi huogodoo gei au guu-lodo daamaha i-dogu mamaanadu i-nia nohongo-dabu huogodoo.

11:29  Maa iai tangada e-bagege, gei au hogi e-lodo bagege. Maa iai tangada e-doo gi-lodo di hala, gei au e-manawa-gee gi mee.

11:30  Maa au belee hagaamu au gi dahi mee, gei au ga-hagaamu-hua au i-nia mee ala e-haga-modongoohia-aga dogu bagege.

11:31  God, Tamana o tadau Dagi go Jesus Christ, gi-hagaamu-ina dono ingoo gaa-hana-hua beelaa, go Mee dela e-iloo-Ia bolo au hagalee kai-tilikai.

11:32  Dogu noho i Damascus, gei di gobinaa o-di king go Aretas gu-hagaloohi nia bontai huogodoo o-di waahale deelaa belee kumi au.

11:33  Gei-au gu-haga-hege-ia i-lodo di gada laa-lodo di bongoo di abaaba, guu-lele hagammuni i-di king.

Chapter 12

12:1  Au e-hai gi-hagaamu au, ma e-aha maa deai ono humalia ai, gei au e-haga-modongoohia-aga agu moe mo nia mee ala ne-haga-modongoohia-mai go Tagi.

12:2  Au e-iloo taane hagadonu a Christ ne-lahi gi-nua, gi-di langi mugi-nua-loo i-nia ngadau e-madangaholu maa-haa ne-too gi-daha. (Au e-de-iloo be di-maa di mee guu-hai, be di-maa di moe, ma go God hua dela e-iloo-Ia.)

12:3  Au ga-helekai labelaa. Au e-iloo bolo tangada deenei la-ne-hana gi-nua gi Paradais. (Gei-au e-de-iloo be di-maa di mee ne-hai, be di-maa di moe-hua, ma go God hua dela e-iloo-Ia.) I-di gowaa deelaa, mee ne-longono nia mee ala e-deemee di-helekai-ai, go nia mee ala e-deemee di-helekai go nia malau-ngudu o tangada.

12:4  Au ga-helekai labelaa. Au e-iloo bolo tangada deenei la-ne-hana gi-nua gi Paradais. (Gei-au e-de-iloo be di-maa di mee ne-hai, be di-maa di moe-hua, ma go God hua dela e-iloo-Ia.) I-di gowaa deelaa, mee ne-longono nia mee ala e-deemee di-helekai-ai, go nia mee ala e-deemee di-helekai go nia malau-ngudu o tangada.

12:5  Gei-au e-hagaamu tangada deenei, hagalee hagaamu au, go nia mee hua ala e-haga-modongoohia-aga dogu bagege.

12:6  Maa au ga-hiihai di-hagaamu au, gei au ga-hagalee hai tangada boiboi, idimaa, agu helekai le e-donu. Malaa, au hagalee hagaamu au idimaa au hagalee hiihai gi dahi dangada gi-hagamaanadu au laa-hongo dana iloo i ana mee ala ne-gidee nogo hai koau, be ne-longono i agu helekai.

12:7  Au guu kae di hagammaemmae o tuduia o ogu goneiga, e-hai gadoo be tangada kae hegau a Setan dela e-dadaaligi au mo e-duuli dogu hagaamu au, bolo au gi-hudee hagaamuina au i-nia mee haga-goboina ala ne-mmada ginai au.

12:8  Nnolongo e-dolu, gei au ne-dangidangi ang-gi Tagi bolo gi-daawa gi-daha di ngudu-mee duduia dela e-daalo au.

12:9  Gei Mee ga-helekai-mai, “Dogu dumaalia la-guu-dohu adu gi-di-goe, idimaa, ogu mogobuna gu-kila-aga i-baahi digau paagege.” Deenei dagu mee gu-tenetene huoloo ginai au i dogu hagaamu dogu bagege, bolo au gi-hagalongoia i ogu lodo nia mogobuna o Christ i dogu baahi.

12:10  Deenei di mee e-tenetene huoloo-iei au, i-lodo dogu madagoaa bagege, ogu hagahuaidu, ogu haingadaa, dadaaligi, mo ogu hagaduadua i-di gili o Christ. Dogu madagoaa ma-ga-bagege-iei au, deelaa di madagoaa e-maaloo-iei au.

12:11  Au guu-hai gadoo be tangada dadaulia. Go goodou dela ne-hidi-ei au beenei. Ma go goodou ala digau ne-belee haga-modongoohia-aga di-godou hiihai-mai gi-di-au, idimaa, ma e-aha maa au hagalee di mee, gei au hagalee i-bahi-i-lala godou “gau agoago-hagau”.

12:12  Nnagadilinga mogobuna mono mee haga-goboina huoloo la-guu-lawa di-hai ko-au i godou baahi i-di manawa-hagakono, bolo gi-modongoohia-ai goodou bolo au tangada agoago-hagau donu.

12:13  Goodou gu-haingadaa i-baahi nia nohongo-dabu ala i-golo, gei au digi hagadaadaamee-ina goodou gi-nia bahihadu e-hagamaamaa au! Goodou dumaalia-mai gi-dagu hai hagalee hai-donu!

12:14  Deenei tolu holongo belee hanadu-iei au gi godou baahi, gei au hagalee hanadu belee haga-daamaha goodou. Hagalee go godou bahihadu ala e-hiihai ginai au, gei go goodou. Hagalee go nia dama ala e-hagahumalia nadau maadua, gei go nia maadua ala e-hagahumalia nadau dama.

12:15  Au e-tenetene bolo au e-gowadu ogu goloo huogodoo mo dogu huaidina bolo au e-hagamaamaa goodou. Malaa, e-hai behee? Godou aloho i-di-au la-ga-dulii-mai, i-di-au dela e-damana dogu aloho i goodou?

12:16  Malaa, goodou e-baba-hua bolo au hagalee ne-haga-daamaha goodou. Holongo iai tangada gaa-hai bolo au tangada huaidu, e-halahalau goodou.

12:17  E-hai behee? Au guu-kae dagu mee i goodou mai i agu gau kae-hegau ala ne-hagau-adu gi godou baahi?

12:18  Au ne-dangi-anga hagamahi gi Titus bolo gi-hanadu, ga-dangi-anga labelaa gi tadau duaahina dela i-golo gi-hanadu dalia a-mee. Malaa, goodou e-hai bolo-aha, ma go Titus dela ne-kae ana mee i goodou? Gimaua mo Titus la-hagalee e-ala be-di hagataalunga e-dahi, be nnangaahai-hua e-dahi?

12:19  Holongo goodou e-hagamaanadu bolo gimaua e-abaaba gimaua i godou mua. Deeai, gimaua e-helehelekai-hua i-mua nia golomada o God, be-di hiihai o Christ i-nia mee huogodoo ala nogo helekai-ai gimaua adu gi goodou. Ogu ihoo hagaaloho, nia mee huogodoo ala e-hai go gimaua, e-hai belee hagamaamaa goodou.

12:20  Au e-lliga i dogu hanadu gi goodou gi-dee mmada-adu gi goodou e-hai-gee godou mouli be dagu hai e-hagamaanadu-ai, gei goodou ga-gidee bolo au e-hagalee hai be di-godou hagamaanadu. Au e-lliga bolo au ga-gidee goodou e-lagamaaloo, manawa dubua, hagawelewele ngoohia, tumaanga, hagahuaidu, tamu dangada, hagapuu mo tee-hagalongo.

12:21  Au e-lliga bolo dogu madagoaa ga-hanadu labelaa gi godou baahi, God gi-de-haga-langaadia-ina au i godou mua, gei au e-manawa-gee i digau ala guu-hai di huaidu i-mua, gei digi huli nadau lodo i nadau hai di huaidu, manawa-manu, mo-di mouli hai be-di manu.

Chapter 13

13:1  Deenei tolu holongo ga-hanadu-iei au gi godou baahi. Di Beebaa-Dabu e-helekai boloo, “Nia mee huogodoo e-hai gi haga-modongoohia gii-donu mai i-baahi nia daangada dogolua be dogodolu.”

13:2  Au guu-hai-adu gi goodou nia mee aanei i-mua dogu lua holongo ne-hanadu-iei au gi godou baahi. Gei-au e-haga-langahia labelaa adu gi goodou i dogu madagoaa dela e-de-igolo i godou baahi, bolo dogu madagoaa dela ma-ga-hanadu labelaa gi godou baahi, deai tangada i digau ala ne-hai nadau ihala i-mua e-mee di-tanga gi-daha mo-di hagaduadua ai.

13:3  Goodou ga-iloo bolo Christ le e-helekai-mai ogu lodo, ge-Ia hagalee bagege dono hai-hegau i godou baahi, ge-Ia e-hagi-aga ono mahi adu gi goodou.

13:4  Mee ne-daudau i-di loobuu i dono bagege, gei Mee gu-mouli i-nia mogobuna o God. Gimaua hogi e-paagege madalia a-Mee, gei gimaua hogi e-mouli madalia a-Mee i-nia mogobuna o God i-di mau hai-hegau adu gi goodou.

13:5  Hagadina-ina goodou be goodou digau e-noho i-di mouli hagadonu. Goodou gu-iloo bolo Christ le e-noho i godou lodo? Maa goodou ga-de-iloo-goodou, e-hai be di-mee goodou gu-magedaa di hagadina goodou.

13:6  Gei-au e-hagadagadagagee huoloo bolo goodou e-iloo-hua bolo gimaua hagalee kili gi-daha mau hagadonu.

13:7  Gimaua e-dangi ang-gi God bolo goodou gi-hudee heia nia mee huaidu, gei hagalee bolo gi-humalia gimaua i-mua nia daangada, gei bolo goodou gi-heia nia mee ala e-donu, ma e-aha maa gimaua e-hai be digau hai-gee.

13:8  Idimaa, gimaua e-deemee di-hai mau mee ala e-hai-baahi gi-di tonu, e-hai hua mau mee ang-gi di tonu.

13:9  Gimaua e-tenetene huoloo i-di mau paagege, gei goodou e-maaloo! Gei deenei di-mau mee e-tangi-ai gi God bolo gi-heia goodou gii-dohu-anga.

13:10  Au e-hihi-adu nia mee aanei i dogu madagoaa dela e-mogowaa i goodou, bolo di madagoaa au gaa-dau-adu gi godou baahi, gei au gi-de-leelee daamaha adu gi goodou i dogu hai-hegau gi-nia mogobuna o Tagi ala ne-dugu-mai gi-di-au belee hagamaaloo-aga goodou gei hagalee oho gi-daha.

13:11  Ogu duaahina-nei, au e-hai dagu hagaaloho adu gi goodou. Goodou gi-hagamahi huoloo. Goodou hagalongo gi agu mee aanei ala ne-hagi-adu gi goodou. Goodou gii-buni di manawa e-dahi, noho i-di aumaalia, gei di aloho mo-di noho i-di aumaalia o God gaa-noho i godou baahi.

13:12  Goodou gi-hagadau hagaaloho i godou mehanga gi-di hagaaloho o-nia dama a Christ. Nia dama a God huogodoo e-hai di-nadau hagaaloho adu gi goodou.

13:13  Tumaalia o tadau Dagi go Jesus Christ, mo-di aloho o God, mo-di hagadaubuni o-di Hagataalunga-Dabu gi-madalia goodou huogodoo.