LinVB - Baruch

Chapter 1

1:1  Tala awa maloba ma buku eye Baruk akomaki o Babilon. Baruk azali mwana wa Neria, mpe nkoko wa Maseya. Maseya azali mwana wa Sedekia, Sedekia mwana wa Asadia mpe Asadia mwana wa Kelkia.

1:2  Baruk akomi buku eye o mobu mwa mitano, o mokolo mwa nsambo mwa sanza eye ba-Kaldea babotoloki Yeruzalem mpe batu­mbaki yango.

1:3  Baruk atangi maloba ma buku eye o matoi ma Yekonia, mwana wa Yoyakim, mokonzi wa Yuda, mpe ma baye banso bayei koyoka ye :

1:4  bankumu, bana ba mokonzi na bakolo ba mboka ; bato banso, bakolo na bana, baye bafandi o Babilon penepene na moluka Soud, bayei koyoka maloba ma ye.

1:5  Bato ba­zalaki kolela, kolala nzala mpe kosambela o miso ma Mokonzi.

1:6  Bakongoli mosolo, moto na moto apesi lokola ekoki na ye.

1:7  Batindi mwango o Yeruzalem epai ye nga­nga Nzambe Yowakim, mwana wa Kelkia, nkoko wa Salem, epai ya banganga Nzambe basusu mpe bato banso bazalaki na bango o Yeruzalem.

1:8  O mokolo mwa zomi mwa sanza Divan Baruk asili kokamata biloko bya ndako ya Mokonzi, biye balongolaki o Tempelo, mpo ’te azongisa byango o mokili mwa Yuda. Sedekia, mwana wa Yozia, mokonzi wa Yuda, asalisaki bya­ngonapalata.

1:9  Ezalaki o eleko Nabukodonozor, mokonzi wa Babilon, alongolaki Yekonia o Yeruzalem mpe atindaki ye o Babilon elongo na bankumu, batuli, bayangeli na bato basusu ba ekolo.

1:10  Bayebisi bango boye : Totindeli bino mosolo mwa kosomba mabo­nza ma kotumba, miboma mpe mpaka ya malasi ; bobonzela Yawe mabonza, botia miboma o altare ya Mokonzi Nzambe wa biso.

1:11  Bosa­mbelela Nabukodonozor, mokonzi wa Babilon, mpe mwana wa ye Baltazar, baumela mikolo mingi awa o nse, miulana na mikolo mya likolo.

1:12  Yawe alendisa biso, atanisa miso ma biso mpo tofanda kimia pene na Nabukodonozor, mokonzi wa Babilon, mpe na mwana wa ye Baltazar. Tosalela bango eleko elai mpe bango basala biso se malamu.

1:13  Bosambela mpe Yawe Nzambe wa biso mpo ya biso, zambi tosalaki Yawe Nzambe wa biso mabe. Tee lelo nkanda Yawe ayokeli biso esili te.

1:14  Na nsima botanga monkanda moye totindeli bino ntango bokosakola masumu ma bino o ndako ya Mokonzi, o eyenga ya Biema mpe o biyenga bisusu.

1:15  Bokoloba : Mokonzi Nzambe wa biso azali na bosembo, kasi toyoki nsoni lelo, biso bato ba Yuda mpe ba Yeruzalem,

1:16  bakonzi ba biso na bana ba bango, banganga Nzambe, baprofeta na batata ba biso.

1:17  Mpamba te, tosali mabe o miso ma Mokonzi.

1:18  Totosaki ye te, toyokaki Mokonzi Nzambe wa biso te, tolandaki mibeko te, miye apesaki biso.

1:19  Banda mokolo Mokonzi alongolaki biso o Ezipeti tee lelo totosaki Mokonzi Nzambe wa biso te, mpe totombokoki na ye, awa toboyaki koyoka ye.

1:20  Yango wana makambo ma mpasi mpe mabe makweli biso tee lelo, maye Mokonzi ayebisaki mosaleli wa ye Moze mokolo alongolaki bankoko ba biso o Ezipeti mpo ’te apesa biso mokili moko mozali na ngombe mpe na mafuta ma nzoi ebele.

1:21  Toyokaki maloba ma baprofeta te, baye Mokonzi Nzambe wa biso atindelaki biso.

1:22  Banso tolandaki se mposa ebe ya mitema mya biso : tokumisaki banzambe ba­susu, tosalaki maye masepelisi Mokonzi Nzambe wa biso te.

Chapter 2

2:1  Bongo Mokonzi akokisi liloba akanelaki biso, bazuzi bazalaki koyangela Israel, bakonzi, bankumu mpe bato banso ba Israel mpe ba Yuda.

2:2  Makambo asali o Yeruzalem, asali mango liboso naino te o mokili mobimba, lokola ekomami o Mobeko mwa Moze :

2:3  Moto na moto akomaki kolia nsuni ya bana ba ye, babali na basi.

2:4  Mokonzi aka­baki bato ba biso o maboko ma bikolo bisusu bizingi biso, mpo ’te bakoma eloko ya nsomo o miso ma baye bakoseke bango o bisika Mokonziapanzibango.

2:5  Bazalaki bakonzi lisusu te, bakomaki baombo, mpo totumolaki Mokonzi Nzambe wa biso, mpe toboyaki koyoka ye.

2:6  Mokonzi Nzambe wa biso azali na bosembo, kasi biso na bankoko ba biso tokomi koyoka nsoni lelo.

2:7  Makambo mana manso ma mpasi Mokonzi akanelaki biso, makweli biso.

2:8  Tobondelaki Yawe te mpo to­koka kotika makanisi mabe mazali o mitema mya biso.

2:9  Yango wana Yawe atalaki malozi maye ma­nso maye atindeli biso, mpo Yawe azali na bosembo o maye manso atindaki biso.

2:10  Kasi biso toboyaki kotosa ye. To­ndimaki mibeko mya Yawe Nzambe wa biso te, miye alakisaki biso.

2:11  E Yawe Nzambe wa Israel, yo moto obimisaki bato ba yo o mokili mwa Ezipeti na bokasi bwa yo. Olakisaki bilembo mpe osalaki maka­mwisi. Bokasi bwa loboko la yo bo­zweli nkombo ya yo lukumu tee lelo.

2:12  Tosali masumu, tosali mabe, tozangaki bosembo, mpo totosaki mibeko mya Yawe Nzambe wa biso te.

2:13  Longola nkanda ya yo o ntei ya biso, mpo totikali se ndambo ya bato o bikolo biye opanzaki biso.

2:14  E Yawe, yoka losambo mpe mabondeli ma biso. Bikisa biso mpo ya lokumu la yo, mpe sala ’te baye bakangi biso bandimela biso.

2:15  Bongo bato banso ba nse bayeba ’te yo ozali Yawe Nzambe wa biso, mpo Israel na bana ba ye bamipesi nkombo ya yo.

2:16  E Yawe, ut’o ndako ya yo esantu otala biso, okanisa biso ; otandela biso matoi mpe oyoka biso.

2:17  Fungola miso, Mokonzi, mpe tala : Bato bawei mpe bakiti o mboka ya bawa, baye bazali na mpema o nzoto lisusu te, bakoki kokumisa Mokonzi mpo ya bose­mbo bwa ye te.

2:18  Kasi moto ato­ndi na mawa, moto agumbami mpe azangi bokasi, miso malembi mpe motema motondi na mposa, ye ako­ki kokumisa yo Mokonzi mpo ya bosembo bwa yo !

2:19  Awa toyei kotika mabondeli ma biso o miso ma yo, Mokonzi Nza­mbe wa biso, tozali kotia elikya na matomba ma bankoko to ma bako­nzi ba biso te.

2:20  Solo, olakisi biso nkanda mpe nkele ya yo, lokola olobaki na monoko mwa baprofeta, basaleli ba yo, na maloba maye :

2:21  Boyoka maloba ma Yawe : « Bokitisa mitó mya bino, bosalela moko­nzi wa Babilon, bongo bokotikala o mokili moye napesaki bankoko ba bino.

2:22  Kasi soko boyoki Yawe te, mpe boboyi kosalela mokonzi wa Babilon,

2:23  nakopekisa o bi­ngu­mba bya Yuda mpe o Yeruzalem nzembo ya esengo mpe ya nsai, mpe nzembo ya mobali to ya mwasi abali sika. Mokili mobimba mokokoma mopotu, bato bakozala lisusu te. »

2:24  Kasi toyokaki yo te, mpe tosaleli mokonzi wa Babilon te. Ya­ngo wana okokisi maye olobaki na monoko mwa baprofeta, basaleli ba yo : Bato bayaki kolongola mi­nku­wa mya bakonzi mpe mi­nkuwa mya bankoko ba biso o malita.

2:25  Babwaki myango o libanda, sikawa balali o moi mokasi mpe mpio ya butu. Bakufaki na mpasi inene : na nzala, mopanga to bokono bobe.

2:26  Ndako eye batangi na nkombo ya yo, otiki yango ebeba, lokola ekomononoko lelo ; esalemi bongo mpo ya masumu ma bato ba Israel mpe ba Yuda.

2:27  Nzokande Mokonzi Nzambe wa biso, olakisaki biso ngolu enene ya yo mpe bolamu bonene bwa yo.

2:28  lokola mosaleli wa yo Moze asakolaki mokolo otindaki ’te akoma Mibeko o miso ma bana ba Israel, ntango olobaki :

2:29  « Soko boyoki ngai te, bato baye ebele bakotikala se ba­to bake o bikolo biye nakopanza bango.

2:30  Nayebi ’te bakoyoka ngai te, mpo bazali bato ba motó makasi. Kasi o mokili moye mwa boo­mbo bakobanda kokanisa,

2:31  mpe ba­kondima ’te ngai nazali Yawe Nzambe wa bango. Nakopesa ba­ngo motema mwa sika mpe matoi makoyoka.

2:32  O ekolo eye ya boo­mbo bakokumisa ngai mpe bakokanisa nkombo ya ngai.

2:33  Bakotika lolendo la bango mpe misala mibe mya bango. Bakokanisa masumu ba­nkoko ba bango basalaki o miso ma Mokonzi.

2:34  O ntango ena nakozongisa bango o mokili moye nalayelaki bankoko ba bango Abarama, Izaka na Yakob. Bakozala banko­lo ba mokili mona mpe bakokoma bato mingi, motango mwa bango moko­kita lisusu te.

2:35  Nakokata na ba­ngo bondeko bwa seko : ngai nakozala Nzambe wa bango, bango bakozala bato ba ngai ; mpe nakobengana bato ba ekolo ya ngai Israel lisusu te o mokili moye napesaki bango. »

Chapter 3

3:1  Mokonzi wa bokasi bonso, Nza mbe wa Israel, toyoki motema nsomo, mayele masileli biso. Yango wana tobeleli yo :

3:2  Yawe, ndi­mela biso mpe yokela biso mawa, zambi tosali mabe o miso ma yo.

3:3  Yo ozali Mokonzi seko, kasi biso tozali bato bakokufa.

3:4  Moko­nzi wa bokasi bonso, Nzambe wa Israel, oyoka mabondeli ma biso, bato ba Israel, tozali pene na liwa. Tozali libota lya bato baye basalaki yo mabe, bato baboyaki koyoka Mo­konzi Nzambe wa bango. Ya­ngo wana mpasi ekangani na biso.

3:5  Okanisa masumu ma bankoko ba biso te, kasi lelo okanisa nguya mpe nkombo ya yo.

3:6  Ozali solo Moko­nzi Nzambe wa biso, biso toli­ngi kokumisa yo, Mokonzi.

3:7  Otiaki bo­bangi o mitema mya biso mpo tobondela nkombo ya yo. Sikawa tolingi kokumisa yo awa o boombo bwa biso, zambi tosili tolongoli o mitema mya biso mayele mabe ma­nso bankoko ba biso basalaki masumu o miso ma yo.

3:8  Tee lelo toka­ngemi o boombo, esika opanzi biso mpe otombeli biso bobe. Tosambwi mingi mpo ya mabe manso ma ba­nkoko ba biso, baye batikaki Mokonzi Nzambe wa biso.

3:9  Israel, yoka mibeko mya bomoi, tia matoi mpo okoma na mayele.

3:10  Israel, mpo nini okomi o mokili mwa banguna, mpe ozali konuna o ekolo ya bauta ?

3:11  Mpo nini okomi na mbindo mpo ya bato bawei, mpe batangi yo o molongo mwa bato ba mboka ya liwa ?

3:12  Mpo otikaki Liziba lya Bwanya !

3:13  Soko otambolaki o nzela ya Nza­mbe, mbele ofandi na boboto seko.

3:14  Yekola esika nini bwanya, bokasi mpe mayele mazali mpo ’te oyeba mpe epai wapi okozwa bomoi bolai, mwinda mwa miso mpe boboto.

3:15  Nani moto asili azwa esika ya bwa­nya ? Nani moto akotela nkita ya bwa­ngo inso ?

3:16  Bakonzi ba bikolo bakei wapi ? Wapi baye bakokonzaka nyama ya zamba

3:17  mpe bakosakanaka na ndeke ya likolo, baye bakosangisaka palata na wolo, biloko biye bakotiaka mitema ? Wapi bato ba nkita ndelo te,

3:18  baye bakotulaka biloko kitoko na palata, biye bisili bilimwi ?

3:19  Bango banso balimwi, bakiti o mbo­ka ya bawa ! Bato basusu bakitani bango.

3:20  Basusu babotami nsima mpe bazalaki o mokili, kasi bango mpe bayebaki nzela ya bwanya te.

3:21  Bayebaki ezalela ya bwanya te, bana ba bango bayebaki mpe te, batiki nzela ya bwanya, leka bankoko ba bango.

3:22  O Kanana bayoki lisolo lya bwa­nya te, o Teman mpe bamoni bwanya te.

3:23  Bana ba Agar bazalaki koluka mayele na makambo ma nse, bato ba mombongo ba Madian mpe ba Teman, ata baye bameseneki kosapa masapo mpe koluka mayele, bayebaki bwanya te, nzela ya bwanya mpe te.

3:24  Bato ba Israel, botala bonene bwa molóngó mobimba ; mokili mwa ye mozali monene,

3:25  mozali na nsuka te, moleki bolai mpe bosanda !

3:26  Bilombe babotamaki kuna, bayebanaki mingi ut’o kala, bato balai bayebaki bitumba.

3:27  Nzambe aponoki bango te, alakisaki bango nzela ya bwanya te.

3:28  Bango banso bawaki, mpo bazangaki mayele, basili nye mpo ya bozoba bwa ba­ngo.

3:29  Nani abutaki o likolo mpo ’te a­zwa bwanya ? Nani akitisaki bwanya ut’o ma­mpata kin’awa o nse ?

3:30  Nani akatisaki mbu mpo ’te azwa bwango, to asomba bwango na wolo peto ?

3:31  Moto moko te ayebi nzela ya bwanya, moto moko te ayebi nzela ena tee nsuka.

3:32  Kasi Oyo ayebi makambo manso, ye moto ayebi yango. Na mayele ma ye amoni bwanya, abongisi mokili mobimba mozala seko, atondisi mwango na bibwele.

3:33  Soko ye atindi moi, moi mobimi ; soko abyangi moi, moi motosi na bolengi.

3:34  Minzoto minso mikongengeke na esengo o esika ya myango.

3:35  Soko abyangi minzoto, myango mikondima, mikongengeleke Mozalisi wa mya­ngo na nsai.

3:36  Ye azali Nzambe wa biso, mosusu akokani na ye azali te.

3:37  Ye akoteli nzela ya bwanya kin’o nsuka ; alakisaki yango na Yakob, mosaleli wa ye, mpe na Israel, mwana wa ye wa bolingo.

3:38  Na nsima bwanya bomononi o mo­kili, mpe boyei kozala o ntei ya bato.

Chapter 4

4:1  Bwanya bona bozali buku ya mibeko mya Nzambe, miye mizali mya seko. Oyo akomemya mibeko akozala na bomoi, oyo atosi mibeko te, akokufa.

4:2  Bana ba Yakob, bozonga, boka­ngana na mibeko ; botambola o nzela ya mwinda mwa mibeko.

4:3  Botikela bato basusu lokumu la bino te, bolekisa makabo ma bino na ekolo esusu te.

4:4  Esengo na biso, bato ba Israel, mpo bayebisi biso maye makosepelisa Nzambe ! Bandeko baombo bazala na mpiko

4:5  E bato ba ekolo ya ngai, bana ba Israel, bolendisa mitema !

4:6  Batekaki bino na bikolo bisusu, kasi basilisi bino te. Awa boyokisaki Nzambe nkanda, bakabaki bino o maboko ma ba­nguna.

4:7  Awa bopesaki bazabolo mabonza, boyokisaki Mozalisi nkanda enene o motema.

4:8  Bobosanaki Nzambe wa lobiko, oyo akoleisaka bino ! Boyokisaki Yeruzalem, mama wa bino, mawa ;

4:9  amoni nkanda ya Nzambe ekweli bino mpe aleli boye : Bino baninga ba Sion, boyoka : Nzambe ayokisi ngai mawa mi­ngi.

4:10  Namoni bana babali na bana basi ba ngai bakei o boombo, Nzambe wa lobiko atindaki ba­ngo.

4:11  Ngai nabokoloki bango na esengo enene ; bokei bwa bango boyokisi ngai mpasi na mawa.

4:12  Moko te asepela na mpasi ya ngai, mwasi bozenge azangi mosalisi. Natikali ngai moko mpo ya masumu ma bana ba ngai ; mpamba te, baboyaki kotosa mibeko mya Nzambe.

4:13  Bandimaki mitindo mya ye soki te, batambolaki nzela ya mitindo mya Nzambe te, balandaki nzela ya bosembo te.

4:14  Bino bato bofandi pene na Sion, boyaka ! Bokanisa bana ba ngai, babali na basi, baye Nzambe wa lobiko atindaki o boombo.

4:15  Atindelaki bango bato bautaki mosika, bato bakoyokaka nsoni te mpe ba­kolobaka lokota bango bayebi te, bato bakomemyaka bakolo te, bakoyokelaka ata bana bake mawa te.

4:16  Bakendeki na bana babali ba boli­ngo ba mwasi bozenge, batikaki ye moko mosika na bana basi ba ye.

4:17  Ngai násalisa bino ndenge nini ?

4:18  Oyo atindelaki bino makambo ma­na ma mpasi, ye moto akobikisa bino o maboko ma banguna.

4:19  E bana ba ngai, bokende, bokende nzela ya bino ! Nakotikala ngai moko, moninga te !

4:20  Nasili natiki elamba ya ngai ya ese­ngo, nalati ngoto ya bobondeli ; bomoi bwa ngai mobimba nakobelela Nzambe wa lobiko.

4:21  Bana ba ngai, bolendisa mitema, bobelela Nzambe : Akolongola bino o minyoko mpe o maboko ma banguna ba bino ;

4:22  zambi natii elikya libiki lya bino likouta na Nzambe wa lobiko, ye Mosantu akoyokisa ngai ese­ngo enene : mosika te Nzambe wa lobiko, Mobikisi wa bino, akolakisa bino ngolu ya ye.

4:23  Awa bokendeki, nalelaki mpe nayokaki mawa mingi, kasi mokolo Nzambe akozongisa bino epai ya ngai nakozala na ese­ngo enene mikolo minso.

4:24  Baninga ba Sion bazali komono bino o boombo sikawa, mosika te, bakomono ’te Nzambe akobikisa bino ; Nzambe wa lobiko akotinda libiki, likoyela bino na nkembo enene mpe na nguya ya Nzambe wa lobiko.

4:25  Bana ba ngai, boikikiza nkanda ya Nzambe. Monguna anyokoli bino mingi, kasi bokomono ’te akosuka ; bokotia makolo o nkingo ya ye.

4:26  Bana ba ngai ba bolingo bakendeki nzela ya mabaku, lokola etonga ya bibwele biye ba­nguna babotoloki.

4:27  Bana ba ngai, bolendisa mitema, bobelela Nzambe ; oyo ayokisi bino mpasi, akokanisa bino lisusu.

4:28  Liboso bozalaki na makanisi ma kokima Nzambe ; bozongela ye mpe bokangana na ye makasi,

4:29  zambi oyo atindeli bino mpasi ena enene akobikisa bino mpe akozo­ngisela bino esengo ya seko. Makambo manso makobongo

4:30  E Yeruzalem, lendisa motema : Oyo apesaki yo nkombo akobondo yo.

4:31  Mawa na baye banyokoloki yo mpe basepelaki na mpasi ya yo !

4:32  Mawa na bingumba biye esika bana ba yo bazalaki baombo ; mawa na engumba eye ekangaki bana ba yo !

4:33  Ata bango basepelaki mokolo okweyaki mpe obebaki, mokolo engumba ya bango ekobeba, bakoyoka mawa.

4:34  Nakobotolo bango elengi ya bozali na engumba enene, lofundo la bango lokosuka se na mawa.

4:35  Móto mwa Nzambe wa lobiko mo­kokwela bango, mikolo mingi ekokoma mboka ya bazabolo.

4:36  Yeruzalem, tala epai ya Esti, tala esengo enene Nzambe akoti-ndela yo.

4:37  Tala bana ba yo bakendeki ; Mosantu akopesa etinda mpe bakosangana, bakouta epai ya Esti mpe epai ya Westi, bakosepela mpo ya nkembo ya Nza­mbe.

Chapter 5

5:1  Yeruzalem, longola monko­to mwa mawa mpe mwa mpa­si, lata bilamba binzenga bikolakisa nkembo ya Nzambe.

5:2  Lata monkoto mwa bosembo bwa Nzambe, lata enkoti ya nkembo ya Nza­mbe wa lobiko ;

5:3  zambi Nzambe alingi ’te nkembo ya yo engenge o mikili minso mya nse.

5:4  Yoka nkombo Nzambe akopesa yo seko : ‘Boboto na bosembo mpe Lokumu na bomemyi Nzambe’.

5:5  Yeruzalem, tala ut’o ngomba, bwaka miso epai ya Esti bana ba yo bakosangana ut’o Westi kin’o Esti mpo ya etinda ya Mosantu wa yo ; bakosepela mingi zambi Nzambe akanisi bango.

5:6  Bakendeki na makolo, banguna bakambaki bango. Kasi Nzambe akozongisa bango epai ya yo, akomeme bango na nkembo lokola bakomemeke ngwende ya mokonzi.

5:7  Nzambe atindi ’te balalisa ngo­mba inene na ike inso, batondisa mabwaku manso mpo ’te nzela ekoma kitoko, mpo ’te bana ba Israel batambola malamu mpo ya nkembo ya Nza­mbe.

5:8  Akotinda ’te nzete ya zamba na nzete inso ikobimisaka nsolo mpimbo ipesa bana ba Israel mpio o nzela.

5:9  Nzambe akokamba ba-Israel, bakozala na esengo, nkembo ya ye ekolakisa bango nzela ; akobatela bango na ngolu mpe na bosembo bwa ye. Tala maloba ma monkanda moye Yeremia atindelaki bato bakambamaki o boombo o Babilon na mokonzi wa Babilon. Yeremia alingi koyebisa bango makambo maye Nzambe atindaki ye.

Chapter 6

6:1  Nabukodonozor, mokonzi wa Babilon, akokamba bino o Babilon mpo ya masumu bosalaki o miso ma Nzambe.

6:2  Ekomi bino o Babilon, bokoumela kuna mibu mingi, kin’o bokokisi mabota ma bankoko mbala nsambo. Kasi na nsima nakolongola bino kuna, bokobima na boboto.

6:3  O Babilon bokomono bikeko bya banzambe bya palata, bya wolo mpe bya nzete, biye bakomemeke o mapeke, mpe bikobangisakabapagano.

6:4  Bokeba ’te bosala lokola bauta baye te, mpe bobanga banzambe ba bango te.

6:5  Nta­ngo bokoteleme o boso to o nsima ya bango, bokomono bato baike bakokumbamela bikeko bya­ngo ; bongo bomilobela : « E Mokonzi, tosengeli kokumbamelabobeleyo ! »,

6:6  zambi anzelu wa ngai azali na bino, ye akotuna bino.

6:7  Mosali bikeko abongisi ndemu ya banzambe baye. Akembisi bya­ngo na palata to na wolo ; bikeko byango bizali se mpamba, bikolobaka te.

6:8  Lokola elenge mwasi akolingaka komibongisa, bakotulaka bi­koti bya wolo mpo ’te balatisa ba­nzambe ba bango o mitó.

6:9  Mbala esusu banganga Nzambe ba bango bakoyibela banzambe ba bango palata na wolo mpo ya makambo ma bango moko, ata mpo ya kopesa ba­ndumba o libanda lya tempelo.

6:10  Bakolatisaka bikeko bya wolo, bya palata to bya nzete, bilamba lokola bato mpenza, ata bikeko biye bikoki koguga mpe kobeba.

6:11  Ba­kolatisaka byango bilamba bya lo­ngondo, bakopupolaka bilongi bya bango mpo bakomi na mputulu ya tempelo.

6:12  Mosusu azali na monto­ngo lokola moyangeli wa ekolo, ka­si soko moto atumoli ye, akoki koboma ye te.

6:13  Mosusu azali na mo­panga mpe na nkongo o loboko la ye la mobali, nzokande akoki komibikisa o etumba te, o maboko ma bayibi mpe te.

6:14  Yango elakisi ’te bazali banzambe ba solo te ; bongo bobanga bango te !

6:15  Lokola mbeki ebolani ezali lisusu na mosala te, banzambe ba ba­ngo batii o tempelo bazali mpe biloko mpamba.

6:16  Miso ma bango ma­tondi na mputulu eye etombwami na makolo ma bato bakoyingelaka wana.

6:17  Lokola moto oyo atumoli mokonzi monene, bakokanga ye o boloko tee bakoboma ye, se bongo banganga Nzambe bakoka­ngaka bizibeli bya tempelo na bikangeli binene mpe na bibende mpo ’te bato baya koyiba banza­mbe te.

6:18  Bakopeliselaka banzambe baye mi­inda leka miye misengeli na ba­ngo moko, kasi banzambe baye bakoki komono ata mwinda moko te.

6:19  Bazali lokola mabaya ma te­mpelo maliami o kati ; nkusu ikouta o mabelé, lokola nsili ikoliaka bila­mba, ikosilisa minkoto mya ba­ngo, kasi bango bakoyoka eloko yoko te.

6:20  Bi­longi bya bango biyi­ndi mpo ya milinga mya tempelo.

6:21  Mange­mbo, nyampeke na ndeke isusu iko­pi­mbwaka likolo lya ba­ngo. Ata nyau izali wana.

6:22  Yango inso ila­kisi ’te bazali ba­nzambe te, bo­ngo boba­nga bango te.

6:23  Wolo eye batiaki o bikeko biye mpo ya kokembisa bango, soko bato basukoli yango te na bolongoli bosoto, bango moko bakoki ko­nge­ngisa yango te. O ntango batulaki bango, bayokaki eloko yoko te.

6:24  Bakosombaka byango ata na motuya nini, mpo bizali na mpema ya bomoi te.

6:25  Bi­zali na makolo te, yango wana bato bakomemeke byango o mapeke ; bikolakisaka bongo ’te bikoki kosala eloko te. Baye bakosalaka bikeko biye bakoyokaka nsoni, zambi basengeli kosalisa byango mpo ya kotelemisa byango soko bikwei.

6:26  Soko bitelemi, byango moko bikoki koningana te, mpe soko bitengemi, bikoki komifandisa te. Mabonza bakobo­nzelaka byango mazali lokola bilei bakopesaka bawei.

6:27  Biloko bato ba­bonzeli byango, banganga Nza­mbe bakotekeke byango mpo ’te bazwa mosolo ; basi ba bango bakotiaka byango o mai ma mongwa mpo ya kobomba byango ; bakokabolaka byango te na babola mpe na bato bakeleli. Basi bazali na mbi­ndo na basi baboti sika bakoki kosimba byango te.

6:28  Boyebi bongo ’te bizali banzambe te, bobanga bya­ngo te !

6:29  Boniboni batanga byango ba­nza­mbe ? Basi bakobonzelaka ba­nzambe baye ba palata, ba wolo mpe ba nzete mabonza !

6:30  Banganga Nzambe bakofandaka o tempelo na bilamba bipaswani, bakokoli nsuki mpe bakati mandefu, enkoti o motó te.

6:31  Bakogangaka mpe kokolobaka makasi o boso bwa banza­mbe ba bango lokola bato bazali na lilaka.

6:32  Balongolaka banzambe baye bilamba mpo balatisa basi na bana ba bango.

6:33  Basala bango malamu to mabe, banzambe baye bakoki kozongisa te. Bakoki kolubola moto moko mokonzi te, kolongola ye mpe o bokonzi te.

6:34  Bakoki kopesa moto nkita mpe mosolo te. Soko moto akokisi elako ya ye te, bakoki kotuna ye te.

6:35  Bakoki kobikisa moto moko o liwa te, kolongola mpe mobola o maboko ma moto monene te.

6:36  Bakoki kozongisela moto wa lolanda miso te, kolongola mpe moto o mpasi te.

6:37  Bakoyokelaka basi bazenge ngolu te, mpe bakopanganaka na bana bitike te.

6:38  Biloko biye bya nzete bakembisi na wolo mpe na palata, biulani na mabanga maye bakokataka o ngo­mba. Baye bakosalelaka byango, ba­kosuka na nsoni.

6:39  Ndenge nini bakoki kokanisa to koloba ’te bazali banzambe ?

6:40  Ata ba-Kaldea bakokumisaka bi­keko bya bango moko te. Soko bamoni ebubu, bakokamba ye epai ya Bel, mpe bakobondela Bel alobisa moto ona, lokola nde nzambe ona akoki koyoka bango ;

6:41  bayebi kokanisa te mpe bakotika banza­mbe ba mpamba te, zambi bazangi mayele !

6:42  Basi baye bakangi nsuki na nsinga bakofandaka mpembeni ya nzela mpo ya kotumba mposo ya mbuma ya mampa lokola mpaka ya malasi.

6:43  Soko mobali aleki wana mpe atuni mwasi moko mpo andima ye, mpe ayebani na ye, na nsima mwasi oyo akoseke moninga wa ye oyo batunaki te, mpo alati naino nsi­nga o nsuki ya ye.

6:44  Manso matali ba­nzambe baye mazali ma lokuta. Bongo ndenge nini bakoki ko­kanisa to koloba ’te bazali ba­nza­mbe ?

6:45  Basali ba mabaya mpe batuli babongisi bikeko biye, se lokola ba­ngo balingaki.

6:46  Baye basali byango bazali bato bakoumela te ; ndenge nini biloko bango basali biumela lokola banzambe ?

6:47  Bakotikela ba­nkoko ba bango se lokuta na nsoni.

6:48  Soko etumba to likambo lya mpasi enene ebimi, banganga nzambe bakotunana mpe bakoyokana epai wapi bakoki kobombama na bikeko biye.

6:49  Bongo ndenge nini bato bakomono te ’te bikeko biye bizali banzambe te, awa bikoki komibikisa te o ntango ya etumba to ya mpa­si ?

6:50  Nani akondima te ’te biloko biye bya nzete, bikembami na wolo mpe na palata, bizali bya lokuta ? Bato ba bikolo binso na bakonzi banso bakomono ’te bikeko bizali banzambe te, kasi bobele biloko bisalemi na maboko ma bato, bizangi nguya ya Nzambe.

6:51  Bongo nani akoboya kondima ’te bikeko biye bizali banzambe te ?

6:52  Bakobimiselaka ekolo mokonzi te, bakonokiselaka bato mbula te ;

6:53  bayebi kokata makambo ma ba­ngo moko te, to kobikisa moto anyo­kwami. Bazali na nguya yoko te, se lokola yanganga soko ipi­mbwiolikolo.

6:54  Soko móto mwa mi­nkalali mo­kweli tempelo ya bikeko biye bya nzete, bikembami na wolo mpe na palata, banganga nza­mbe ba bango bakokima mpe bakoluka komibikisa. Kasi bikeko bikozika nye lokola mabaya o móto monene.

6:55  Bikoki na bakonzi to na banguna te.

6:56  Bongo ndenge nini moto akoki kondima to kokanisa ’te bazali ba­nzambe ?

6:57  Bikeko bya nzete, bikembami na wolo mpe na palata, bikoki komibatela te na bayibi banene to bake ; bikoki mpe kopekisa bango te kobotolo byango wolo, palata na bi­lamba.

6:58  Malamu ozala mokonzi oyo akoki kolakisa bokasi bwa ye, to ozala mbeki ya litomba ya nkolo ya ndako, kasi ozala moko wa ba­nzambe baye ba lokuta te. Malamu ozala ata ezibeli ya ndako ekobatelaka biloko binso bizali wana, to likonzi lya ndako ya mokonzi, kasi ozala moko wa banzambe baye ba lokuta te.

6:59  Mwese, sanza na mi­nzo­to miye mikongengeke mpe mi­kosalelaka bato mizali na botosi.

6:60  Lokola monkalali mongengi mozali kitoko na botali, se bongo mo­mpepe mopepi o bikolo binso.

6:61  Ma­mpata makotosa Nzambe soko atindi mango matambola o mikili minso ; móto mwa minkalali mouti o likolo se bongo : ekotu­mba ngo­mba na zamba lokola etindami.

6:62  Bonzenga na nguya ya bikeko bikokani na byango binso te.

6:63  Yango wana bakoki kokanisa to koloba te ’te bikeko bizali banzambe, awa ba­zangi nguya ya kobikisa moto o likambo to kosalisa ye.

6:64  Boyeba ’te bazali banzambe te, bongo boba­nga bango te.

6:65  Solo, bakoki kobenisa to koto­mbela bakonzi bobe te.

6:66  Bakoki kolakisa bato elembo yoko te : bakoki kongenge te lokola mwese, to kopesa mwinda lokola sanza.

6:67  Nya­ma ya zamba ileki bango, zambi nyama ikoki kokima o mobenga mpe komisalisa.

6:68  Solo, tomoni eloko yoko te ekoki kolakisa biso ’te bazali banzambe, bongo bobanga bango te !

6:69  Bikeko bya bango bya nzete, bakembisi na wolo mpe na palata, bizali lokola edongolomiso o ela­nga ya ndunda, bikoki kobatela elo­ko te.

6:70  Bikeko byango, bike­mbi­sami na wolo mpe na palata, bizali lokola nzube o kati ya lopango : ndeke inso ikoya kopema wana. Bizali mpe lokola ebembe babwaki o kati ya molili.

6:71  Soko bomoni bilamba bya bango bya longondo mpe bya kitoko bibandi kobeba, bokondima ’te bazali banzambe te. Nsuka nsuka biloko bina bikoliama mpe bikoyokisa ekolo ya bango nsoni.

6:72  Esengo na moto wa bose­mbo, oyo akokumisaka bikeko te, akoyoka nsoni mokolo moko te !