CopSahBible2 - Tobit

Chapter 1

Chapter 2

Chapter 3

Chapter 4

4:16  [lost text] ⲛⲁⲣϩⲟⲩⲟ ⲉⲣⲟⲕ ⲧⲏⲣϥ ⲁⲣⲓϥ ⲙⲙⲛⲧⲛⲁ ⲁⲩⲱ ⲙⲡⲣⲧⲣⲉ ⲡⲉⲕⲃⲁⲗ ⲫⲑⲟⲛⲉⲓ ⲉⲣⲟⲕ ⲉⲉⲓⲣⲉ ⲛⲟⲩⲙⲛⲧⲛⲁ

4:17  [lost text] ⲛⲅⲧⲙⲧⲁⲁⲩ ⲛⲛⲣⲉϥⲣⲛⲟⲃⲉ

4:18  ϫⲓϣⲟϫⲛⲉ ⲙⲛ ⲥⲁⲃⲉ ⲛⲓⲙ ⲁⲩⲱ ⲙⲡⲣⲕⲁⲧⲁⲫⲣⲟⲛⲉⲓ ⲛⲥⲃⲱ ⲛⲓⲙ ⲉⲧⲛⲁⲡⲟⲩⲟⲩ

4:19  ⲛⲅⲥⲙⲟⲩ ⲉⲡϫⲟⲉⲓⲥ ⲡⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ⲛⲅⲁⲓⲧⲉⲓ ⲙⲙⲟϥ ϫⲉⲕⲁⲥ ⲉⲣⲉ ⲛⲉⲕϩⲓⲟⲟⲩⲉ ⲥⲟⲟⲩⲧⲛ ⲁⲩⲱ ⲛⲉⲕⲙⲟⲉⲓⲧ ⲧⲏⲣⲟⲩ ⲙⲛ ⲛⲉⲕϣⲟϫⲛⲉ ⲛⲥⲉⲥⲟⲟⲩⲧⲛ ⲉⲃⲟⲗ ϫⲉ ϩⲉⲑⲛⲟⲥ ⲛⲓⲙ ⲙⲛ ⲧϥϣⲟϫⲛⲉ ⲙⲙⲁⲩ ⲁⲗⲗⲁ ⲛⲧⲟϥ ⲡϫⲟⲉⲓⲥ ⲡⲉⲧϯ ⲛⲁⲅⲁⲑⲟⲛ ⲛⲓⲙ ⲁⲩⲱ ⲡⲉⲧⲉϥⲟⲩⲁϣϥ ϥⲛⲁⲑⲃⲃⲓⲟϥ ⲕⲁⲧⲁ ⲡⲉⲧⲉϩⲛⲁϥ ⲧⲉⲛⲟⲩ ϭⲉ ⲡⲁϣⲏⲣⲉ ⲁⲣⲓⲡⲙⲉⲉⲩⲉ ⲛⲛⲉⲛⲧⲟⲗⲏ ⲁⲩⲱ ⲙⲡⲉⲣⲧⲣⲉⲩϥⲱⲧⲉ ⲉⲃⲟⲗ ϩⲙ ⲡⲉⲕϩⲏⲧ

4:20  ⲧⲉⲛⲟⲩ ϭⲉ ϯⲧⲁⲙⲟ ⲙⲙⲟⲕ ⲉⲡⲙⲏⲧ ⲛϭⲓⲛϭⲱⲣ ⲛϩⲁⲧ ⲛⲧⲁⲓϭⲁⲗⲱⲟⲩ ⲉⲅⲁⲃⲁⲏⲗ ⲡϣⲏⲣⲉ ⲛⲅⲁⲃⲣⲓⲁ ϩⲛ ϩⲣⲁⲅⲟⲥ ⲛⲧⲉ ⲧⲙⲏⲇⲓⲁ

4:21  ⲁⲩⲱ ⲙⲡⲣⲣϩⲟⲧⲉ ⲡⲁϣⲏⲣⲉ ϫⲉ ⲁⲓⲣϩⲏⲕⲉ ⲟⲩⲛ ϩⲁϩ ⲅⲁⲣ ϣⲟⲟⲡ ⲛⲁⲕ ⲉⲕϣⲁⲛⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲁⲩⲱ ⲛⲅⲥⲁϩⲱⲱⲕ ⲉⲃⲟⲗ ⲛⲛⲟⲃⲉ ⲛⲓⲙ ⲉⲕⲉⲓⲣⲉ ⲙⲡⲉⲧⲣⲁⲛⲁϥ ⲙⲡⲉϥⲙⲧⲟ ⲉⲃⲟⲗ

Chapter 5

5:1  ⲁϥⲟⲩⲱϣⲃ ⲇⲉ ⲛϭⲓ ⲧⲱⲃⲓⲁⲥ ⲉϥϫⲱ ⲙⲙⲟⲥ ϫⲉ ⲡⲁⲉⲓⲱⲧ ϩⲱⲃ ⲛⲓⲙ ⲛⲧⲁⲕϩⲟⲛⲟⲩ ⲉⲧⲟⲟⲧ ϯⲛⲁⲁⲁⲩ

5:2  ⲁⲗⲗⲁ ⲉⲓⲛⲁϫⲓ ⲡⲙⲏⲧ ⲛϭⲓⲛϭⲱⲣ ⲛⲁϣⲛϩⲉ ⲛϯⲥⲟⲟⲩⲛ ⲁⲛ ⲙⲡⲣⲱⲙⲉ

5:3  ⲁϥϯ ⲇⲉ ⲛⲁϥ ⲙⲡⲭⲓⲗⲟⲅⲣⲁⲫⲟⲛ ⲁⲩⲱ ⲡⲉϫⲁϥ ⲛⲁϥ ϫⲉ ⲕⲱⲧⲉ ⲛⲥⲁ ⲟⲩⲣⲱⲙⲉ ⲉⲧⲣⲉϥⲉⲓ ⲛⲙⲙⲁⲕ ⲁⲩⲱ ϯⲛⲁϯ ⲡⲁϥ ⲙⲡⲉϥⲃⲉⲕⲉ ϩⲟⲥ ⲟⲛ ϯⲟⲛϩ ⲛⲅⲃⲱⲕ ⲛⲅϫⲓ ⲛⲛϩⲟⲙⲛⲧ

5:4  ⲁⲩⲱ ⲁϥⲃⲱⲕ ⲛϭⲓ ⲇⲱⲃⲓⲁⲥ ⲉⲕⲱⲧⲉ ⲛⲥⲁ ⲟⲩⲣⲱⲙⲉ ⲁⲩⲱ ⲁϥϩⲉ ⲉϩⲣⲁⲫⲁⲏⲗ ⲟⲩⲁⲅⲅⲉⲗⲟⲥ ⲡⲉ ⲛϥⲥⲟⲟⲩⲛ ⲁⲛ

5:5  ⲡⲉϫⲁϥ ⲛⲁϥ ϫⲉ ⲉⲛⲉ ϯⲛⲁⲉϣⲉⲓ ⲛⲙⲙⲁⲕ ⲉϩⲣⲁⲅⲟⲥ ⲛⲧⲉ ⲧⲙⲏⲇⲓⲁ ⲁⲩⲱ ⲉⲛⲉ ⲕⲥⲟⲟⲩⲛ ⲙⲡⲙⲁ ⲉⲧⲙⲙⲁⲩ

5:6  ⲡⲉϫⲉ ⲡⲁⲅⲅⲉⲗⲟⲥ ϫⲉ ϯⲛⲏⲩ ⲛⲙⲙⲁⲕ ⲁⲩⲱ ϯⲥⲟⲟⲩⲛ ⲛⲧⲉϩⲓⲏ ⲁⲩⲱ ⲅⲁⲃⲁⲏⲗ ⲡⲉⲧⲛⲥⲟⲛ ⲁⲓϭⲟⲓⲗⲉ ⲉⲣⲟϥ

5:7  ⲡⲉϫⲉ ⲧⲱⲃⲓⲁⲥ ⲛⲁϥ ϫⲉ ⲁϩⲉ ⲉⲣⲟⲓ ⲧⲁϫⲓⲡⲟⲩⲱ ⲙⲡⲁⲉⲓⲱⲧ

5:8  ⲡⲉϫⲁϥ ⲛⲁϥ ϫⲉ ⲃⲱⲕ ⲙⲡⲣⲱⲥⲕ

5:9  ⲁⲩⲱ ⲛⲧⲉⲣⲉ ⲧⲱⲃⲓⲁⲥ ⲃⲱⲕ ⲉϩⲟⲩⲛ ⲁϥϫⲟⲟⲥ ⲙⲡⲉϥⲉⲓⲱⲧ ϫⲉ ⲁⲓϩⲉ ⲉⲡⲉⲧⲛⲏⲩ ⲛⲙⲙⲁⲓ ⲡⲉϥⲉⲓⲱⲧ [lost text]

5:16  ⲁⲩⲱ ⲇⲱⲃⲓⲧ ⲁϥⲉⲓ ⲉⲃⲟⲗ ϩⲏⲧⲥ ⲛⲧⲉϥϣⲉⲗⲉⲉⲧ ⲉϥⲣⲁϣⲉ ⲁⲩⲱ ⲉϥⲥⲙⲟⲩ ⲉⲡⲛⲟⲩⲧⲉ ϩⲁϩⲧⲛ ⲧⲡⲩⲗⲏ ⲛⲛⲓⲛⲉⲩⲏ ⲁⲩⲱ ⲛⲉⲛⲧⲁⲩⲛⲁⲩ ⲉⲣⲟϥ ⲛⲉⲩⲟ ⲛϣⲡⲏⲣⲉ ⲙⲙⲟϥ ϫⲉ ⲁϥⲛⲁⲩ ⲉⲃⲟⲗ

5:17  ⲧⲱⲃⲓⲧ ⲇⲉ ⲛⲉϥⲉⲝⲟⲙⲟⲗⲟⲅⲉⲓ ⲙⲡⲉⲩⲙⲧⲟ ⲉⲃⲟⲗ ϫⲉ ⲁ ⲡⲛⲟⲩⲧⲉ ⲛⲁ ⲛⲁϥ ⲁⲩⲱ ⲛⲧⲉⲣⲉ ⲇⲱⲃⲓⲧ ⲡⲱϩ ⲉⲥⲁⲣⲣⲁ ⲧⲉϥϣⲉⲗⲉⲉⲧ ⲁϥⲥⲙⲟⲩ ⲉⲣⲟⲥ ⲉϥϫⲱ ⲙⲙⲟⲥ ϫⲉ ⲁⲣⲉⲓ ⲉⲣⲟⲩⲟϫ ⲧⲁϣⲉⲉⲣⲉ ϥⲥⲙⲁⲙⲁⲁⲧ ⲛϭⲓ ⲡⲛⲟⲩⲧⲉ ⲛⲧⲁϥⲛⲧⲉ ⲛⲁⲛ ⲁⲩⲱ ⲡⲟⲩⲉⲓⲱⲧ ⲙⲛ ⲧⲟⲩⲙⲁⲁⲩ ⲥⲉⲥⲙⲁⲙⲁⲁⲧ ⲁⲩⲱ ⲁⲩⲣⲁϣⲉ ⲛϭⲓ ⲛⲉϥⲥⲛⲏⲩ ⲧⲏⲣⲟⲩ ⲉⲧϩⲛ ⲛⲓⲛⲉⲩⲏ

5:18  ⲁϥⲉⲓ ⲇⲉ ⲛϭⲓ ⲁⲭⲓⲁⲭⲁⲣⲟⲥ ⲁⲩⲱ ⲁⲥⲃⲁⲥ ⲡϣⲉⲛⲡⲉϥⲥⲟⲛ

5:19  ⲁⲩⲉⲓⲣⲉ ⲛⲧϣⲉⲗⲉⲉⲧ ⲛⲧⲱⲃⲓⲁⲥ ϩⲛ ⲟⲩⲟⲩⲛⲟϥ ⲛⲥⲁϣϥ ⲛϩⲟⲟⲩ

Chapter 6

Chapter 7

Chapter 8

Chapter 9

Chapter 10

Chapter 11

11:15  [lost text] ⲛⲧⲁⲩϣⲱⲡⲉ ⲙⲙⲟϥ ϩⲛ ⲧⲙⲏⲇⲓⲁ

Chapter 12

12:1  ⲁⲩⲱ ⲧⲱⲃⲓⲇ ⲁϥⲙⲟⲩⲧⲉ ⲉⲇⲱⲃⲓⲁⲥ ⲡⲉϥϣⲏⲣⲉ ⲡⲉϫⲁϥ ⲛⲁϥ ϫⲉ ⲁⲛⲁⲩ ⲡⲁϣⲏⲣⲉ ⲉⲧⲃⲉ ⲡⲃⲉⲕⲉ ⲉⲧⲁⲁϥ ⲙⲡⲣⲱⲙⲉ ⲛⲧⲁϥⲉⲓ ⲛⲙⲙⲁⲕ ⲁⲩⲱ ϣϣⲉ ⲟⲛ ⲉⲟⲩⲱϩ ⲉϫⲱϥ

12:2  ⲡⲉϫⲁϥ ⲛⲁϥ ϫⲉ ⲡⲁⲉⲓⲱⲧ ϯⲡⲓⲑⲉ ⲉⲧⲣⲉⲕϯ ⲛⲁϥ ⲛⲧⲡⲁϣⲉ ⲛⲛⲉⲛⲧⲁⲓⲛⲧⲟⲩ

12:3  ⲁⲩⲱ ⲁϥⲛⲧ ⲛⲁⲕ ⲉⲓⲟⲩⲟϫ ⲁⲩⲱ ⲧⲁⲥϩⲓⲙⲉ ⲁϥⲧⲁⲗϭⲟⲥ ⲁⲩⲱ ⲡϩⲟⲙⲛⲧ ⲁϥⲛⲧϥ ⲛⲁⲓ ⲛⲧⲟⲕ ϩⲟⲙⲁⲓⲱⲥ ⲁϥⲑⲉⲣⲁⲡⲉⲩⲉ ⲙⲙⲟⲕ

12:4  ⲡⲉϫⲉ ⲡⲉϥⲉⲓⲱⲧ ⲛⲁϥ ϫⲉ ⲥⲉⲣⲱϣⲉ ⲙⲙⲟϥ

12:5  ⲁⲩⲱ ⲁϥⲙⲟⲩⲧⲉ ⲉⲡⲁⲅⲅⲉⲗⲟⲥ ⲡⲉϫⲁϥ ⲛⲁϥ ϫⲉ ϫⲓ ⲛⲧⲡⲁϣⲉ ⲛⲛⲉⲛⲧⲁⲓⲛⲧⲟⲩ ⲧⲏⲣⲟⲩ ⲛⲧⲟⲕ ⲛⲅⲃⲱⲕ ϩⲛ ⲟⲩⲟⲩϫⲁⲓ

12:6  ⲧⲟⲧⲉ ⲁϥⲙⲟⲩⲧⲉ ⲉⲣⲟⲟⲩ ⲛϭⲓ ⲡⲁⲅⲅⲉⲗⲟⲥ ϩⲛ ⲟⲩϩⲱⲡ ⲡⲉϫⲁϥ ⲛⲁⲩ ϫⲉ ⲥⲙⲟⲩ ⲉⲡⲛⲟⲩⲧⲉ ⲛⲧⲉⲧⲛⲉⲝⲟⲙⲟⲗⲟⲅⲉⲓ ⲡⲁϥ ⲛⲧⲉⲧⲛϫⲓⲥⲉ ⲙⲙⲟϥ ⲙⲡⲙⲧⲟ ⲉⲃⲟⲗ ⲛⲛⲉⲧⲟⲛϩ ⲧⲏⲣⲟⲩ ⲉⲧⲃⲉ ⲛⲉⲛⲧⲁϥⲁⲁⲩ ⲛⲏⲧⲛ ⲟⲩⲁⲅⲁⲑⲟⲛ ⲡⲉ ⲥⲙⲟⲩ ⲉⲡⲛⲟⲩⲧⲉ ⲁⲩⲱ ⲉϫⲓⲥⲉ ⲙⲡⲉϥⲣⲁⲛ ⲛϣⲁϫⲉ ⲙⲡⲛⲟⲩⲧⲉ ⲙⲛ ⲛⲉϥϩⲃⲏⲩⲉ ⲉⲧⲉⲧⲛⲟⲩⲱⲛϩ ⲙⲙⲟⲟⲩ ⲉⲃⲟⲗ ϩⲛ ⲟⲩⲙⲡϣⲁ ⲁⲩⲱ ⲙⲡⲣϫⲛⲁⲁⲩ ⲉⲉⲝⲟⲙⲟⲗⲟⲅⲉⲓ ⲛⲁϥ

12:7  ⲡⲙⲩⲥⲧⲏⲣⲓⲟⲛ ⲙⲡⲣⲣⲟ ⲛⲁⲛⲟⲩ ϩⲟⲡϥ ⲛⲉϩⲃⲏⲩⲉ ⲙⲡⲛⲟⲩⲧⲉ ⲛⲁⲛⲟⲩ ⲟⲩⲟⲛϩⲟⲩ ⲉⲃⲟⲗ ϩⲛ ⲟⲩⲉⲟⲟⲩ ⲁⲣⲓ ⲡⲡⲉⲧⲛⲁⲛⲟⲩϥ ⲁⲩⲱ ⲙⲛ ⲡⲉⲑⲟⲟⲩ ⲛⲁⲧⲁϩⲱⲧⲛ

12:8  ⲟⲩⲁⲅⲁⲑⲟⲛ ⲡⲉ ⲟⲩϣⲗⲏⲗ ⲙⲛ ⲟⲩⲛⲏⲥⲧⲓⲁ ⲙⲛ ⲟⲩⲙⲛⲧⲛⲁ ⲙⲛ ⲟⲩⲇⲓⲕⲁⲓⲟⲥⲩⲛⲏ ⲛⲁⲛⲟⲩ ⲡⲕⲟⲩⲓ ⲉⲧⲁⲁϥ ϩⲛ ⲟⲩⲇⲓⲕⲉⲟⲥⲩⲛⲏ ⲉϩⲟⲩⲉ ⲡⲛⲟϭ ⲉⲧⲁⲁϥ ϩⲛ ⲟⲩϫⲓⲛϭⲟⲛⲥ ⲛⲁⲛⲟⲩ ⲥⲉⲣ ⲙⲛⲧⲛⲁ ⲛϩⲟⲩⲟ ⲉⲥⲉⲩϩ ⲛⲟⲩⲃ ⲉϩⲟⲩⲛ

12:9  ⲧⲙⲛⲧⲛⲁ ⲅⲁⲣ ϣⲁⲥⲛⲉϩⲙ ⲡⲣⲱⲙⲉ ⲉⲃⲟⲗ ϩⲙ ⲡⲙⲟⲩ ⲁⲩⲱ ⲛⲧⲟⲥ ϣⲁⲥⲧⲃⲃⲉ ⲛⲟⲃⲉ ⲛⲓⲙ ⲛⲧⲉⲓⲣⲉ ⲛⲧⲙⲛⲧⲛⲁ ⲙⲛ ⲧⲇⲓⲕⲁⲓⲟⲥⲩⲛⲏ ⲥⲉⲛⲁⲥⲉⲓ ⲙⲡⲱⲛϩ

12:10  ⲛⲉⲧⲣⲛⲟⲃⲉ ⲇⲉ ⲉⲩⲙⲓϣⲉ ⲙⲛ ⲡⲉⲩⲱⲛϩ

12:11  ⲛϯⲛⲁϩⲉⲡ ⲗⲁⲁⲩ ⲁⲛ ⲛϣⲁϫⲉ ⲉⲣⲱⲧⲛ ⲁⲓϫⲟⲟⲥ ⲇⲉ ϫⲉ ⲡⲙⲩⲥⲧⲏⲣⲓⲟⲛ ⲙⲡⲣⲣⲟ ⲛⲁⲛⲟⲩ ϩⲟⲡϥ ⲛⲉϩⲃⲏⲩⲉ ⲇⲉ ⲙⲡⲛⲟⲩⲧⲉ ⲉϭⲟⲗⲡⲟⲩ ⲉⲃⲟⲗ ϩⲛ ⲟⲩⲙⲡϣⲁ

12:12  ⲧⲉⲛⲟⲩ ⲇⲉ ⲛⲧⲉⲣⲉⲕϣⲗⲏⲗ ⲛⲧⲟⲕ ⲙⲛ ⲧⲉⲕϣⲉⲗⲉⲉⲧ ⲥⲁⲣⲣⲁ ⲁⲛⲟⲕ ⲡⲉⲛⲧⲁⲓϫⲓ ⲉϩⲣⲁⲓ ⲙⲡⲣⲡⲙⲉⲉⲩⲉ ⲙⲡⲉⲧⲛϣⲗⲗ ⲙⲡⲙⲧⲟ ⲉⲃⲟⲗ ⲙⲡⲉⲧⲟⲩⲁⲁⲃ ⲁⲩⲱ ⲛⲉϩⲟⲟⲩ ⲉⲕⲧⲱⲙⲥ ⲛⲛⲉⲧⲙⲟⲟⲩⲧ ⲛⲉⲓ ⲛⲙⲙⲁⲕ ⲟⲛ ⲡⲉ

12:13  ⲁⲩⲱ ⲛⲧⲉⲣⲉⲕⲧⲙϫⲛⲁⲁⲩ ⲉⲧⲱⲟⲩⲛ ⲉⲁⲕⲕⲁ ⲡⲉⲕⲁⲣⲓⲥⲧⲟⲛ ⲛⲥⲱⲕ ϫⲉ ⲉⲕⲉⲃⲱⲕ ⲛⲅⲱⲗ ⲙⲡⲥⲱⲙⲁ ⲛⲛⲉⲧⲙⲟⲟⲩⲧ ⲙⲡⲉⲕϩⲱⲡ ⲉⲣⲟⲓ ⲉⲕⲉⲓⲣⲉ ⲙⲙⲉⲧⲛⲁⲛⲟⲩϥ ⲁⲗⲗⲁ ⲛⲉⲓ ⲡⲙⲙⲁⲕ ϩⲛ ϩⲱⲃ ⲛⲓⲙ ⲉⲧⲉⲕⲉⲓⲣⲉ ⲙⲙⲟⲟⲩ

12:14  ⲁⲩⲱ ⲧⲉⲛⲟⲩ ⲁϥⲧⲛⲡⲟⲟⲩⲧ ⲛϭⲓ ⲡⲛⲟⲩⲧⲉ ⲉⲑⲉⲣⲁⲡⲉⲩⲉ ⲙⲙⲟⲕ ⲙⲛ ⲧⲉⲕϣⲉⲗⲉⲉⲧ ⲥⲁⲣⲣⲁ

12:15  ⲁⲛⲟⲕ ⲡⲉ ϩⲣⲁⲫⲁⲏⲗ ⲟⲩⲁ ⲉⲃⲟⲗ ϩⲙ ⲡⲥⲁϣϥ ⲛⲁⲅⲅⲉⲗⲟⲥ ⲉⲧϥⲓ ⲉϩⲣⲁⲓ ⲁⲩⲱ ⲉⲧⲃⲏⲕ ⲉϩⲟⲩⲛ ⲙⲡⲙⲧⲟ ⲉⲃⲟⲗ ⲙⲡⲉⲟⲟⲩ ⲙⲡⲉⲧⲟⲩⲁⲁⲃ

12:16  ⲁⲩϣⲧⲟⲣⲧⲣ ⲇⲉ ⲙⲡⲉⲥⲛⲁⲩ ⲁⲩϩⲉ ⲉϩⲣⲁⲓ ⲉϫⲙ ⲡⲉⲩϩⲟ ⲉⲃⲟⲗ ϫⲉ ⲁⲩⲣϩⲟⲧⲉ

12:17  ⲡⲉϫⲉ ⲡⲁⲅⲅⲉⲗⲟⲥ ⲇⲉ ⲛⲁⲩ ϫⲉ ⲙⲡⲣⲣϩⲟⲧⲉ ϯⲣⲏⲛⲏ ⲉⲥⲉϣⲱⲡⲉ ⲛⲏⲧⲛ ⲡⲛⲟⲩⲧⲉ ⲇⲉ ⲥⲙⲟⲩ ⲉⲣⲟϥ ⲛⲛⲉϩⲟⲟⲩ ⲧⲏⲣⲟⲩ ϣⲁ ⲉⲛⲉϩ

12:18  ϫⲉ ϩⲛ ⲧⲁⲭⲁⲣⲓⲥ ⲁⲡⲟⲕ ⲁⲛ ⲉⲓ ⲛⲙⲙⲏⲧⲛ ⲁⲗⲗⲁ ϩⲙ ⲡⲟⲩⲱϣ ⲙⲡⲛⲟⲩⲧⲉ ⲉⲧⲃⲉ ⲡⲁⲓ ⲥⲙⲟⲩ ⲉⲣⲟϥ ϣⲁ ⲉⲛⲉϩ ⲛⲛⲓⲉⲛⲉϩ

12:19  ⲛⲛⲉϩⲟⲟⲩ ⲧⲏⲣⲟⲩ ⲉⲓⲟⲩⲟⲛϩ ⲉⲣⲱⲧⲛ ⲙⲡⲉⲓⲟⲩⲉⲙ ⲗⲁⲁⲩ ⲟⲩⲧⲉ ⲙⲡⲉⲓⲥⲉ ⲗⲁⲁⲩ ⲁⲗⲗⲁ ⲛⲧⲱⲧⲛ ⲉⲧⲉⲧⲛⲛⲁⲩ ⲉⲩⲥⲙⲟⲧ

12:20  ⲧⲉⲛⲟⲩ ϭⲉ ⲛⲧⲱⲧⲛ ⲉⲝⲟⲙⲟⲗⲟⲅⲉⲓ ⲙⲡⲛⲟⲩⲧⲉ ϫⲉ ⲉⲓⲛⲁⲃⲱⲕ ⲉϩⲣⲁⲓ ϣⲁ ⲡⲉⲛⲧⲁϥⲧⲛⲛⲟⲟⲩⲧ ⲁⲩⲱ ⲛⲧⲉⲧⲛⲥϩⲁⲓ ⲛⲛⲉϩⲃⲏⲩⲉ ⲧⲏⲣⲟⲩ ⲛⲧⲁⲩϣⲱⲡⲉ ⲉⲩϫⲱⲱⲙⲉ

12:21  ⲁⲩϥⲓⲁⲧⲟⲩ ⲇⲉ ⲉϩⲣⲁⲓ ⲁⲩⲱ ⲙⲡⲟⲩⲕⲟⲧⲟⲩ ⲉⲛⲁⲩ ⲉⲣⲟϥ

12:22  ⲛⲉⲩⲉⲝⲟⲙⲟⲗⲟⲅⲉⲓ ⲇⲉ ⲛⲛⲉϥⲛⲟϭ ⲛϩⲃⲏⲩⲉ ⲁⲩⲱ ⲛϣⲡⲏⲣⲉ ⲛⲑⲉ ⲛⲧⲁ ⲡⲁⲅⲅⲉⲗⲟⲥ ⲙⲡⲛⲟⲩⲧⲉ ⲟⲩⲱⲛϩ ⲉⲣⲟⲟⲩ

Chapter 13

13:1  ⲁⲩⲱ ⲧⲱⲃⲓⲇ ⲁϥⲥϩⲁⲓ ⲛⲟⲩⲡⲣⲟⲥⲉⲩⲭⲏ ⲉϥⲧⲉⲗⲏⲗ ⲉϥϫⲱ ⲙⲙⲟⲥ ϫⲉ ϥⲥⲙⲁⲙⲁⲁⲧ ⲛϭⲓ ⲡⲛⲟⲩⲧⲉ ⲉⲧⲟⲛϩ ϣⲁ ⲛⲓⲉⲛⲉϩ ⲁⲩⲱ ⲧⲉϥⲙⲛⲧⲉⲣⲟ ⲥⲥⲙⲁⲙⲁⲁⲧ

13:2  ϫⲉ ⲛⲧⲟϥ ⲡⲉⲧⲙⲁⲥⲧⲓⲅⲟⲩ ⲁⲩⲱ ⲉⲧⲛⲁ ⲁⲩⲱ ϥϫⲓ ⲉⲡⲉⲥⲏⲧ ⲉⲁⲙⲛⲧⲉ ⲁⲩⲱ ϥⲉⲓⲛⲉ ⲉϩⲣⲁⲓ ⲙⲙⲛ ⲡⲉⲧⲛⲁⲣⲃⲟⲗ ⲉⲛⲉϥϭⲓϫ

13:3  ⲟⲩⲱⲛϩ ⲛⲁϥ ⲉⲃⲟⲗ ⲛϣⲏⲣⲉ ⲙⲡ ⲙⲡⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲧⲏⲣⲟⲩ ϫⲉ ⲛⲧⲟϥ ⲡⲉⲛⲧⲁϥϫⲟⲟⲣⲉⲛ ⲉⲃⲟⲗ ϩⲁϩⲧⲏⲩ

13:4  ⲟⲩⲱⲛϩ ⲉⲃⲟⲗ ⲛⲧⲉϥⲙⲛⲧⲛⲟϭ ⲛⲧⲉⲧⲛϫⲓⲥⲉ ⲙⲙⲟϥ ⲙⲡⲙⲧⲟ ⲉⲃⲟⲗ ⲛⲛⲉⲧⲟⲛϩ ⲧⲏⲣⲟⲩ ϫⲉ ⲛⲧⲟϥ ⲡⲉ ⲡⲉⲛϫⲟⲉⲓⲥ ⲁⲩⲱ ⲡⲉⲛⲛⲟⲩⲧⲉ ⲛⲧⲟϥ ⲡⲉ ⲡⲉⲓⲱⲧ ⲛⲛⲁⲓⲱⲛ ⲧⲏⲣⲟⲩ

13:5  ϥⲛⲁⲙⲁⲥⲧⲓⲅⲟⲩ ⲙⲙⲟⲛ ϩⲛ ϩⲉⲛϫⲓⲛϭⲟⲛⲥ ⲁⲛ ⲁⲩⲱ ⲟⲛ ϥⲛⲁⲛⲁⲛ ϥⲥⲟⲟⲩϩⲛ ⲉϩⲟⲩⲛ ⲉⲃⲟⲗ ϩⲛ ⲛϩⲉⲑⲛⲟⲥ ⲧⲏⲣⲟⲩ ⲡⲙⲁ ⲉⲧⲟⲩⲛⲁϫⲉⲉⲣⲉ ⲧⲏⲩⲧⲛ ⲉⲃⲟⲗ ⲛϩⲏⲧϥ

13:6  ⲉⲧⲉⲧⲛϣⲁⲛⲕⲉⲧⲧⲏⲩⲧⲛ ⲉⲣⲟϥ ϩⲙ ⲡⲉⲧⲛϩⲏⲧ ⲧⲏⲣϥ ⲁⲩⲱ ϩⲛ ⲧⲉⲧⲛⲯⲩⲭⲏ ⲧⲏⲣⲥ ⲉⲉⲓⲣⲉ ⲛⲧⲙⲛⲧⲙⲉ ⲙⲡⲉϥⲙⲧⲟ ⲉⲃⲟⲗ ⲛⲧⲟϥ ϩⲱⲱϥ ϥⲛⲁⲕⲟⲧϥ ⲉⲣⲱⲧⲛ ⲁⲩⲱ ⲧⲉⲧⲛⲁⲛⲁⲩ ⲉⲛⲉⲧⲉϥⲛⲁⲁⲁⲩ ⲛⲙⲙⲏⲧⲛ ⲛⲧⲉⲧⲛⲉⲝⲟⲙⲟⲗⲟⲅⲉⲓ ⲛⲁϥ ϩⲛ ⲧⲉⲧⲛⲧⲁⲡⲣⲟ ⲧⲏⲣⲥ ⲛⲧⲉⲧⲛⲥⲙⲟⲩ ⲉⲡϫⲟⲉⲓⲥ ⲛⲧⲇⲓⲕⲁⲓⲟⲥⲩⲛⲏ ⲛⲧⲉⲧⲛϫⲓⲥⲉ ⲙⲡⲣⲣⲟ ⲛⲛⲁⲓⲱⲛ ⲁⲛⲟⲕ ϩⲱ ϩⲙ ⲡⲕⲁϩ ⲛⲧⲁⲁⲓⲭⲙⲁⲗⲱⲥⲓⲁ ϯⲛⲁⲉⲝⲟⲙⲟⲗⲟⲅⲉⲓ ⲛⲁϥ ⲧⲁⲟⲩⲱⲛϩ ⲉⲃⲟⲗ ⲛⲧⲉϥϭⲟⲙ ⲙⲛ ⲧⲉϥⲙⲛⲧⲛⲟϭ ⲛϩⲉⲑⲛⲟⲥ ⲛⲣⲉϥⲣⲛⲟⲃⲉ ⲕⲧⲉⲧⲏⲩⲧⲛ ⲕⲧⲉⲧⲏⲩⲧⲛ ⲛⲣⲉϥⲣⲛⲟⲃⲉ ⲛⲧⲉⲧⲛⲉⲓⲣⲉ ⲛⲧⲇⲓⲕⲁⲓⲟⲥⲩⲛⲏ ⲙⲡⲉϥⲙⲧⲟ ⲉⲃⲟⲗ ⲛⲓⲙ ⲡⲉⲧⲥⲟⲟⲩⲛ ϫⲉ ϥⲛⲁϣⲉⲡ ⲧⲏⲩⲧⲛ ⲛϥⲉⲓⲣⲉ ⲛⲟⲩⲛⲁ ⲛⲙⲙⲏⲧⲛ

13:7  ⲡⲁⲛⲟⲩⲧⲉ ϯⲛⲁϫⲓⲥⲉ ⲙⲙⲟϥ ⲁⲩⲱ ⲧⲁⲯⲩⲭⲏ ⲛⲁⲥⲙⲟⲩ ⲉⲡⲣⲣⲟ ⲛⲧⲡⲉ ⲛⲧⲉⲧⲛⲧⲉⲗⲏⲗ ϩⲛ ⲧⲉϥⲙⲛⲧⲛⲟϭ

13:8  ⲙⲁⲣⲟⲩϫⲟⲟⲥ ⲧⲏⲣⲟⲩ ⲛⲥⲉⲉⲝⲟⲙⲟⲗⲟⲅⲉⲓ ⲛⲁϥ ϩⲛ ⲑⲓⲉⲣⲟⲩⲥⲟⲗⲩⲙⲁ

13:9  ⲑⲓⲉⲣⲟⲩⲥⲟⲗⲩⲙⲁ ⲧⲡⲟⲗⲓⲥ ⲛⲛⲉⲧⲟⲩⲁⲁⲃ ϥⲛⲁⲙⲁⲥⲧⲓⲅⲟⲩ ⲛⲛⲉⲩϣⲏⲣⲉ ⲉⲧⲃⲉ ⲛⲉⲩϩⲃⲏⲩⲉ ⲁⲩⲱ ⲟⲛ ϥⲛⲁⲛⲁ ⲛⲛϣⲏⲣⲉ ⲛⲛⲇⲓⲕⲁⲓⲟⲥ

13:10  ⲉⲝⲟⲙⲟⲗⲟⲅⲉⲓ ⲙⲡϫⲟⲉⲓⲥ ϩⲛ ⲟⲩⲙⲛⲧⲁⲅⲁⲑⲟⲥ ⲛⲧⲉⲧⲛⲥⲙⲟⲩ ⲉⲡⲣⲣⲟ ⲛⲛⲁⲓⲱⲛ ϫⲉⲕⲁⲥ ⲧⲉϥⲥⲕⲩⲛⲏ ⲉⲩⲉⲕⲟⲧⲥ ⲛⲉ ϩⲛ ⲟⲩⲣⲁϣⲉ ⲛϥⲉⲩⲫⲣⲁⲛⲉ ⲛⲟⲩⲁⲓⲭⲙⲁⲗⲱⲧⲟⲥ ⲁⲩⲱ ⲛⲉⲛⲧⲁⲩⲧⲁⲗⲁⲓⲡⲱⲣⲉⲓ ⲛϥⲙⲉⲣⲓⲧⲟⲩ ϩⲣⲁⲓ ⲛϩⲏⲧⲉ ⲉⲛⲅⲉⲛⲉⲁ ⲧⲏⲣⲟⲩ ⲙⲡⲁⲓⲱⲛ

13:11  ⲟⲛ ⲟⲩⲙⲏⲏϣⲉ ⲛϩⲉⲑⲛⲟⲥ ⲛⲁⲉⲓ ⲙⲡⲟⲩⲉ ⲉⲣⲁⲧϥ ⲙⲡⲣⲁⲛ ⲙⲡϣⲏⲣⲉ ⲙⲡⲛⲟⲩⲧⲉ ⲉⲣⲉ ϩⲉⲛⲇⲱⲣⲟⲛ ϩⲛ ⲛⲉⲩϭⲓϫ ⲉⲧⲣⲉⲩⲧⲁⲁⲩ ⲛⲇⲱⲣⲟⲛ ⲙⲡⲣⲣⲟ ⲛⲧⲡⲉ ⲉⲛϫⲱⲙ ⲙⲛ ⲛϫⲱⲙ ⲥⲉⲛⲁⲥⲙⲟⲩ ⲉⲣⲟϥ ϩⲛ ⲟⲩⲧⲉⲗⲏⲗ ⲛϩⲏⲧⲉ

13:12  ⲥⲉⲛⲁϣⲱⲡⲉ ⲉⲩⲥϩⲟⲩⲟⲣⲧ ⲛϭⲓ ⲟⲩⲟⲛ ⲛⲓⲙ ⲉⲧⲙⲟⲥⲧⲉ ⲙⲙⲟ ⲁⲩⲱ ⲥⲉⲛⲁϣⲱⲡⲉ ⲉⲩⲥⲙⲁⲙⲁⲁⲧ ⲛϭⲓ ⲟⲩⲟⲛ ⲛⲓⲙ ⲉⲧⲙⲉ ⲙⲙⲟ ϣⲁ ⲉⲛⲉϩ

13:13  ⲣⲁϣⲉ ⲛⲧⲉⲧⲛⲧⲉⲗⲏⲗ ⲉϫⲛ ⲛϣⲏⲣⲉ ⲛⲛⲇⲓⲕⲁⲓⲟⲥ

13:14  ⲛⲁⲓⲁⲧⲟⲩ ⲛⲛⲉⲧⲙⲉ ⲙⲙⲟ ⲥⲉⲛⲁⲣⲁϣⲉ ⲉϫⲛ ⲧⲟⲩⲉⲓⲣⲏⲛⲏ ⲛⲁⲓⲁⲧⲟⲩ ⲛⲛⲉⲛⲧⲁⲩⲙⲕⲁϩ ⲛϩⲏⲧ ⲉϫⲛ ⲛⲟⲩⲙⲁⲥⲧⲓⲅⲝ ⲧⲏⲣⲟⲩ ϫⲉ ⲥⲉⲛⲁⲣⲁϣⲉ ⲉϩⲣⲁⲓ ⲉϫⲱ ⲉⲁⲩⲛⲁⲩ ⲉⲡⲟⲩⲉⲟⲟⲩ ⲧⲏⲣϥ ⲁⲩⲱ ⲥⲉⲛⲁⲉⲩⲫⲣⲁⲛⲉ ϣⲁ ⲉⲛⲉϩ

13:15  ⲧⲁⲯⲩⲭⲏ ⲥⲙⲟⲩ ⲉⲡⲁⲛⲟⲩⲧⲉ ⲡⲛⲟϭ ⲛⲣⲣⲟ ⲛⲧⲡⲉ ⲙⲛ ⲡⲕⲁϩ

13:16  ϫⲉ ⲥⲉⲛⲁⲕⲱⲧ ⲛⲑ ϩⲛ ⲟⲩⲱⲛⲉ ⲛⲥⲁⲡⲡⲓⲣⲟⲛ ⲁⲩⲱ ⲛⲟⲩⲥⲟⲃⲧ ϩⲛ ⲟⲩⲱⲛⲉ ⲉϥⲧⲁⲉⲓⲏⲩ ⲁⲩⲱ ⲛⲟⲩⲡⲩⲣⲅⲟⲥ ⲙⲛ ⲛⲟⲩⲡⲣⲟⲙⲁⲭⲟⲛ ϩⲛ ⲟⲩⲛⲟⲩⲃ ⲉϥⲥⲟⲧⲡ

13:17  ⲁⲩⲱ ⲛⲟⲩⲡⲩⲗⲏ ⲙⲛ ⲛⲟⲩⲡⲗⲁⲧⲓⲁ ⲥⲉⲛⲁⲧⲟϭⲥⲟⲩ ⲛⲱⲛⲉ ⲃⲩⲣⲓⲗⲗⲟⲥ ϩⲓ ⲁⲛⲑⲣⲁⲝ ϩⲓ ⲱⲛⲉ ⲛⲓⲙ ⲉⲃⲟⲗ ϩⲛ ⲥⲟⲩⲫⲓⲣ

13:18  ⲁⲩⲱ ⲛⲉⲥϩⲓⲣ ⲧⲏⲣⲟⲩ ⲥⲉⲛⲁϫⲟⲟⲥ ϫⲉ ⲁⲗⲗⲏⲗⲟⲩⲓⲁ ⲉⲩϫⲱ ⲙⲙⲟⲥ ϫⲉ ϥⲥⲙⲁⲙⲁⲁⲧ ⲛϭⲓ ⲡⲛⲟⲩⲧⲉ ⲡⲉⲛⲧⲁϥϫⲓⲥⲉ ⲉⲛⲁⲓⲱⲛ ⲧⲏⲣⲟⲩ

Chapter 14

14:1  ⲁⲩⲱ ⲁϥⲟⲩⲱ ⲉϥⲉⲝⲟⲙⲟⲗⲟⲅⲉⲓ ⲛϭⲓ ⲇⲱⲃⲓⲧ

14:2  ⲛⲉϥ ϩⲛ ⲧⲁⲓⲟⲩϣⲙⲏⲛⲉ ⲛⲣⲟⲙⲡⲉ ⲛⲧⲉⲣⲉϥⲗⲟ ⲉϥⲛⲁⲩ ⲉⲃⲟⲗ ⲁⲩⲱ ⲙⲛⲛⲥⲁ ϣⲙⲟⲩⲛⲉ ⲛⲣⲟⲙⲡⲉ ⲁϥⲛⲁⲩ ⲉⲃⲟⲗ ⲁⲩⲱ ⲛⲉϥⲣ ⲙⲛⲧⲛⲁ ⲉϥⲟⲩⲱϩ ⲉⲧⲟⲟⲧϥ ⲉⲣⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲁⲩⲱ ⲉϥⲉⲝⲟⲙⲟⲗⲟⲅⲉⲓ ⲛⲁϥ

14:3  ⲁϥⲣϩⲗⲗⲟ ⲉⲙⲁⲧⲉ ⲁⲩⲱ ⲁϥⲙⲟⲩⲧⲉ ⲉⲡⲉϥϣⲏⲣⲉ ⲙⲛ ⲡⲉϥⲥⲟⲟⲩ ⲛϣⲏⲣⲉ ⲡⲉϫⲁϥ ⲛⲁϥ ϫⲉ ⲡⲁϣⲏⲣⲉ ϫⲓ ⲛⲛⲉⲕϣⲏⲣⲉ ⲉⲓⲥ ϩⲏⲏⲧⲉ ⲅⲁⲣ ⲁⲓⲣϩⲗⲗⲟ ⲁⲩⲱ ⲁⲓϩⲱⲛ ⲉⲥⲱⲕ ⲉⲃⲟⲗ

14:4  ⲛⲅⲃⲱⲕ ⲡⲁϣⲏⲣⲉ ⲉⲧⲙⲏⲇⲓⲁ ϫⲉ ⲁⲓⲡⲓⲑⲉ ⲉϫⲛ ⲛⲉⲛⲧⲁ ⲡⲉⲡⲣⲟⲫⲏⲧⲏⲥ ⲓⲱⲛⲁⲥ ϫⲟⲟⲩ ⲉⲧⲃⲉ ⲛⲓⲛⲉⲩⲏ ϫⲉ ⲥⲉⲛⲁⲧⲁⲕⲟⲥ ⲟⲩⲛ ⲟⲩⲉⲓⲣⲏⲛⲏ ⲇⲉ ⲛⲁϣⲱⲡⲉ ⲛϩⲟⲩⲟ ϩⲛ ⲧⲙⲏⲇⲓⲁ ϣⲁ ⲟⲩⲟⲩⲟⲉⲓϣ ⲉⲃⲟⲗ ϫⲉ ⲛⲉⲛⲥⲛⲏⲩ ⲥⲉⲛⲁϫⲟⲟⲣⲟⲩ ⲉⲃⲟⲗ ϩⲙ ⲡⲕⲁϩ ⲉⲧⲛⲁⲛⲟⲩϥ ⲁⲩⲱ ⲑ ⲛⲁϣⲱϥ ⲁⲩⲱ ⲡⲏⲓ ⲙⲡⲛⲟⲩⲧⲉ ⲥⲉⲛⲁⲣⲟⲕϩϥ ϩⲣⲁⲓ ⲛϩⲏⲧⲥ ⲛⲥⲣϫⲁⲓⲉ ϣⲁ ⲟⲩⲟⲩⲟⲉⲓϣ

14:5  ⲁⲩⲱ ⲟⲛ ⲡⲛⲟⲩⲧⲉ ⲛⲁⲛⲁ ⲛⲁⲥ ⲛϥⲕⲟⲧⲟⲩ ⲉϩⲟⲩⲛ ⲉⲣⲟⲥ ⲛϥⲕⲟⲧⲟⲩ ⲉϩⲟⲩⲛ ⲉⲣⲟⲥ ⲛϥⲕⲱⲧ ⲙⲡⲏⲓ ⲛⲑⲉ ⲟⲛ ⲛϣⲟⲣⲡ ϣⲁⲛⲧⲉ ⲡⲟⲩⲟⲉⲓϣ ⲙⲡⲁⲓⲱⲛ ϫⲱⲕ ⲉⲃⲟⲗ ⲁⲩⲱ ⲟⲛ ⲙⲛⲛⲥⲁ ⲛⲁⲓ ⲥⲉⲛⲁⲕⲟⲧⲟⲩ ⲉⲃⲟⲗ ϩⲛ ⲛⲉⲭⲙⲁⲗⲱⲥⲓⲁ ⲛⲥⲉⲕⲱⲧ ⲛⲑ ϩⲛ ⲟⲩⲉⲟⲟⲩ ⲁⲩⲱ ⲡⲏⲓ ⲙⲡⲛⲟⲩⲧⲉ ⲥⲉⲛⲁⲕⲟⲧϥ ϩⲣⲁⲓ ⲛϩⲏⲧⲥ ⲉⲛⲅⲉⲛⲉⲁ ⲧⲏⲣⲟⲩ ⲙⲡⲁⲓⲱⲛ ⲛⲟⲩⲕⲱⲧ ⲉϥⲧⲙⲁⲉⲓⲏⲩ ⲕⲁⲧⲁ ⲑⲉ ⲛⲧⲁⲩϣⲁϫⲉ ⲛϩⲏⲧⲥ ⲛϭⲓ ⲛⲉⲡⲣⲟⲫⲏⲧⲏⲥ

14:6  ⲁⲩⲱ ⲛϩⲉⲑⲛⲟⲥ ⲧⲏⲣⲟⲩ ⲥⲉⲛⲁⲕⲟⲧⲟⲩ ϩⲛ ⲟⲩⲙⲉ ⲉⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲡⲛⲟⲩⲧⲉ ⲥⲉⲛⲁⲧⲱⲙⲥ ⲇⲉ ⲛⲛⲉⲩⲉⲓⲇⲱⲗⲟⲛ

14:7  ⲛⲥⲉⲥⲙⲟⲩ ⲉⲡϫⲟⲉⲓⲥ ⲛϭⲓ ⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲡⲉϥⲗⲁⲟⲥ ϥⲛⲁⲉⲝⲟⲙⲟⲗⲟⲅⲉⲓ ⲙⲡⲛⲟⲩⲧⲉ ⲁⲩⲱ ⲡⲉϥⲗⲁⲟⲥ ⲛⲁⲥⲙⲟⲩ ⲉⲡϫⲟⲉⲓⲥ ⲡϫⲟⲉⲓⲥ ⲇⲉ ⲛⲁϫⲓⲥⲉ ⲙⲡⲉϥⲗⲁⲟⲥ ⲛⲥⲉⲣⲁϣⲉ ⲛϭⲓ ⲟⲩⲟⲛ ⲛⲓⲙ ⲛⲧⲁⲩⲙⲉⲣⲉ ⲡϫⲟⲉⲓⲥ ⲡⲛⲟⲩⲧⲉ ϩⲛ ⲟⲩⲙⲉ ⲙⲛ ⲟⲩⲇⲓⲕⲁⲓⲟⲥⲩⲛⲏ ⲉⲩⲉⲓⲣⲉ ⲙⲡⲛⲁ ⲙⲛ ⲛⲉⲩⲥⲛⲏⲩ

14:8  ⲧⲉⲛⲟⲩ ϭⲉ ⲡⲁϣⲏⲣⲉ ⲡⲱⲧ ⲉⲃⲟⲗ ⲛⲛⲓⲛⲉⲩⲏ ϫⲉ ⲡⲁⲛⲧⲱⲥ ⲥⲉⲛⲁϫⲡⲓ ϣⲱⲡⲉ ⲛϭⲓ ⲛⲉⲛⲧⲁ ⲛⲉⲡⲣⲟⲫⲏⲧⲏⲥ ϫⲟⲟⲩ ⲧⲏⲣⲟⲩ

14:9  ⲛⲧⲟⲕ ⲇⲉ ⲡⲁϣⲏⲣⲉ ϩⲁⲣⲉϩ ⲉⲡⲛⲟⲙⲟⲥ ⲙⲡⲛⲟⲩⲧⲉ ⲙⲛ ⲛⲉϥⲟⲩⲉϩⲥⲁϩⲛⲉ ⲛⲅϣⲱⲡⲉ ⲛⲛⲁⲏⲧ ⲁⲩⲱ ⲛⲇⲓⲕⲁⲓⲟⲥ ϫⲉⲕⲁⲥ ⲉⲣⲉ ⲡⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲕ

14:10  ⲛⲅⲧⲟⲙⲥⲧ ⲕⲁⲗⲱⲥ ⲁⲩⲱ ⲧⲉⲕⲙⲁⲁⲩ ⲛⲅⲧⲟⲙⲥⲥ ⲛⲙⲙⲁⲓ ⲛⲧⲉⲧⲛⲧⲙⲟⲩⲱϩ ⲉⲧⲟⲟⲧⲧⲏⲩⲧⲛ ⲉϭⲱ ϩⲛ ⲛⲓⲛⲉⲩⲏ ⲡⲁϣⲏⲣⲉ ⲁⲛⲁⲩ ϫⲉ ⲛⲧⲁ ⲁⲇⲁⲣ ⲣ ⲟⲩ ⲛⲁⲭⲓⲁⲭⲁⲣⲟⲥ ⲡⲉⲛⲧⲁϥⲥⲁⲛⲟⲩϣϥ ⲛⲑⲉ ⲛⲧⲁϥⲛⲧϥ ⲉⲃⲟⲗ ϩⲙ ⲡⲟⲩⲟⲉⲓⲛ ⲉϩⲟⲩⲛ ⲉⲡⲕⲁⲕⲉ ⲁⲩⲱ ⲡⲛⲟⲩⲧⲉ ⲁϥⲧⲟⲩϫⲟ ⲛⲁⲭⲓⲁⲭⲁⲣⲟⲥ ⲡⲏ ⲇⲉ ⲁϥⲧⲱⲱⲃⲉ ⲛⲁϥ ⲛⲟⲩⲧⲱⲱⲃⲉ ⲁⲩⲱ ⲛⲧⲟϥ ⲡⲉⲛⲧⲁϥⲃⲱⲕ ⲉⲡⲉⲥⲏⲧ ⲉⲡⲕⲁⲕⲉ ⲙⲁⲛⲁⲥⲥⲏ ⲁϥⲉⲓⲣⲉ ⲛⲟⲩⲙⲛⲧⲛⲁ ⲁϥⲟⲩϫⲁⲓ ⲉⲧϭⲟⲣϭⲥ ⲙⲡⲙⲟⲩ ⲧⲁⲓ ⲛⲧⲁ ⲁⲇⲁ ⲥⲙⲛⲧⲥ ⲛⲁϥ ⲁⲇⲁⲥ ⲇⲉ ⲛⲧⲟϥ ⲁϥⲥⲱϩⲡ ⲉϩⲣⲁⲓ ⲉⲧϭⲟⲣϭⲥ ⲁⲩⲱ ⲁϥⲙⲟⲩ

14:11  ⲧⲉⲛⲟⲩ ϭⲉ ⲛⲁϣⲏⲣⲉ ϯϩⲧⲏⲧⲛ ϫⲉ ϣⲁⲣⲉ ⲧⲙⲛⲧⲛⲁ ⲣ ⲟⲩ ⲁⲩⲱ ⲧⲇⲓⲕⲁⲓⲟⲥⲩⲛⲏ ϫⲉ ϣⲁⲥⲛⲉϩⲙ ⲛⲓⲙ ⲛⲉⲓϣⲁϫⲉ ⲇⲉ ⲉϥϫⲱ ⲙⲙⲟⲟⲩ ⲁϥϯ ⲙⲡⲉ ϩⲓϫⲙ ⲡⲉϥⲙⲁⲛⲛⲕⲟⲧⲕ ⲛⲉϥ ϩⲛ ϣⲉ ⲧⲁⲓⲟⲩϣⲙⲏⲛⲉ ⲛⲣⲟⲙⲡⲉ ⲁⲩⲱ ⲁⲩⲧⲟⲙⲥϥ ϩⲛ ⲟⲩⲧⲙⲁⲓⲟ

14:12  ⲛⲧⲉⲣⲉⲥⲙⲟⲩ ⲇⲉ ϩⲱⲱⲥ ⲛϭⲓ ⲁⲛⲛⲁ ⲁϥⲧⲟⲙⲥⲥ ϩⲁϩⲧⲙ ⲡⲉϥⲉⲓⲱⲧ ⲁϥⲃⲱⲕ ⲇⲉ ⲛϭⲓ ⲧⲱⲃⲓⲁⲥ ⲙⲛ ⲧⲉϥⲥϩⲓⲙⲉ ⲙⲛ ⲛⲉϥϣⲏⲣⲉ ⲉϩⲣⲁⲓ ⲉⲉⲕⲃⲁⲧⲁⲛⲟⲥ ⲉⲣⲁⲧϥ ⲛϩⲣⲁⲅⲟⲩⲏⲗ ⲡⲉϥϣⲟⲙ

14:13  ⲁϥⲁⲗⲉ ⲉϩⲣⲁⲓ ϩⲛ ⲛⲉϥϩⲟⲟⲩ ϩⲛ ⲟⲩⲙⲛⲧϩⲗⲗⲟ ⲉⲛⲁⲛⲟⲩⲥ ⲛⲉϥϣⲙⲟⲩⲓ ⲇⲉ ⲁⲩⲧⲟⲙⲥⲟⲩ ϩⲛ ⲟⲩϯⲙⲏ ⲁⲩⲱ ⲁϥⲕⲗⲏⲣⲟⲛⲟⲙⲉⲓ ⲛⲧⲉⲩⲟⲩⲥⲓⲁ ⲙⲛ ⲧⲁⲧⲱⲃⲓⲇ ⲡⲉϥⲉⲓⲱⲧ

14:14  ⲁⲩⲱ ⲁϥⲙⲟⲩ ϩⲱⲱϥ ⲛϭⲓ ⲧⲱⲃⲓⲁⲥ ⲉϥ ϩⲛ ϣⲉ ⲥⲁϣϥⲉ ⲛⲣⲟⲙⲡⲉ ϩⲛ ⲉⲕⲃⲁⲧⲁⲛⲟⲥ ⲛⲧⲉ ⲧⲙⲏⲧⲓⲁ

14:15  ⲁϥⲥⲱⲧⲙ ⲇⲉ ⲙⲡⲁⲧⲉϥⲙⲟⲩ ⲉⲡⲧⲁⲕⲟ ⲛⲛⲓⲛⲉⲩⲏ ⲧⲁⲓ ⲛⲧⲁϥⲁⲓⲭⲙⲁⲗⲱⲧⲓⲍⲉ ⲙⲙⲟⲥ ⲛϭⲓ ⲛⲁⲃⲟⲩⲭⲟⲇⲟⲛⲟⲥⲟⲣ ⲙⲛ ⲁⲥⲩⲏⲣⲟⲥ ⲁⲩⲃⲱⲕ ⲉⲣⲱⲥ ⲛⲛⲓⲛⲉⲩⲏ