Azeri - Hebrews

Chapter 1

1:1  تاري کي، قدئم زامانلاردا دفه​لرله پيغمبرلر واسئطه​سئله و جوربه​جور يوللارلا آتالاريميزا دانيشدي،

1:2  بو آخيرکي گونلرده بئزه اوغلونون واسئطه​‌سئله دانيشيب کي، اونو هر شيئن وارئثي تعيئن اتدي و اونون واسئطه​‌سئله دونياني ياراتدي.

1:3  و او، تارينين شؤوکتئنئن شفقي و اونون ذاتينين تامام صورتي‌دئر و هر شيي اؤز قودرتئنئن کلامي ائله ساخلايير. او، گوناهلارين تمئزلمک ائشئني باشا چاتديراندان سونرا، اوجالاردا عظمتلي اولانين صاغيندا اوتوردو.

1:4  و ملکلردن داها اعلا بئر آدي مئراث آلديغي اوچون، اونلاردان داها دا افضل اولوبدور.

1:5  چونکي تاري ملکلرئن هانسي بئرئنه اولوب کي، دسئن: "سن منئم اوغلومسان، من سنه بو گون آتا اولدوم." و يا "من اونا بئر آتا اولاجاغام، او دا منه بئر اوغول اولاجاقدير؟"

1:6  آمّا ائلک دوغولاني گئنه بو دونيايا گتئردئيي زامان ديئر: "قوي تارينين بوتون ملکلري اونا سجده اتسئنلر.

1:7  و ملکلر باره​سئنده ديئر: او، اؤز ملکلرئني يله دؤنده‌رئر، اؤز خئدمتچئلرئني اود آلووسونا.

1:8  لاکئن اوغول حاقّيندا ديئر: سنئن تختئن، اي تاري، ابددن ابده کئمي‌دئر، و صالح عصا، سنئن پادشاهليغينين عصاسي‌دير.

1:9  سن صالحلئيي سِوئب شرئعتسئزلئکدن نئفرت اتدئن. بونا گؤره تاري، سنئن تارين، سني شادليق ياغي ​ائله يولداشلاريندان داها اوستون تعيئن اتدي.

1:10  و باشلانيشدا، سن يارب، يرئن بونؤوره​سئني قويدون، و گؤيلر سنئن اللرئنئن ائشي‌دئر.

1:11  اونلار محو اولاجاقلار، لاکئن سن قاليرسان. اونلارين هاميسي پالتار کئمي کؤهنه‌لنه​جکلر،

1:12  شئنل کئمي اونلاري بوکه​جکسن؛ پالتار کئمي اونلار دا ديئشئله​جکلر. لاکئن سن همئشه هَمَنسن، و سنئن ائللرئن باشا چاتماياجاق.

1:13  آمّا ملکلرئن هانسي بئرئنه اولوب کي، دسئن: منئم صاغيمدا اوتور، او زاماناجاق کي، من سنئن دوشمنلرئني آياقلارينا کتئل ادئم؟

1:14  مگر اونلارين هاميسي خئدمت ادن روحلار ديئللر کي، نئجاتي مئراث آلانلارين خاطئري اوچون، خئدمت اتمه‌يه گؤنده‌رئلئرلر؟!

Chapter 2

2:1  بو سببدن اشئتدئيئمئزه گرک داها چوخ دئقّت اِدَک، اِله کي، اوندان بئر يانا آزماياق.

2:2  چونکي اگر ملکلرئن واسئطه‌سئله ديئلمئش سؤز ثابئت اولدو کي، ديئشئلمزدئر و هر تقصئر و ائطاعتسئزلئک عادئل بئر جزا آلدي.

2:3  نجه قورتولا بئله‌رئک اگر بله بئر بؤيوک نئجاتا اعتئناسيزليق ادک؟! اونو اوّلجه رب بئزه ددي و سونرا اونو اشئدنلرئن واسئطه‌سئله تصدئق اولوندو.

2:4  تاري دا علامتلر و عجايئبلر، موختلئف مؤجوزه​لر و اؤز ائراده​سئنه موطابئق موقدّس روحون عطالاري ائله اونلارلا برابر شهادت وردي.

2:5  تاري ددئيئمئز گله​جک دونياني، ملکلره تابع اتمه‌دي،

2:6  لاکئن بئري بئر يرده بله شهادت ورئب ديئر: ائنسان کئمدئر کي، اونو خاطيرلاياسان؟! و يا ائنسان اوغلو کي، اونون قيدئنه قالاسان؟!

2:7  آز بئر مودّت اوچون سن اونو ملکلردن آشاغي ادئبسن، اونون باشينا شؤوکت و حؤرمت تاجي قويوبسان، و اونو اؤز اَللرئنئن ائشلري اوستونه تعيئن ادئبسن.

2:8  سن هر شيي اونون آياقلاري آلتينا تابع ادئبسن. چونکي هر شيي اونا تابع اِدَنده، تاري هچ بئر شيي اونا تابع اولماميش قويمادي. آمّا بئز ائندي حله گؤرموروک کي، هر شي اونا تابع اولسون.

2:9  لاکئن آز بئر مودّت اوچون ملکلردن آشاغي ادئلمئشي، يعني، عئساني گؤروروک کي، اؤلومون عذابيني چکدئيي اوچون، باشينا شؤوکت و حؤرمت تاجي قويولدو، اِله کي، تارينين فيضئنئن واسئطه​‌سئله هامينين يرئنه اؤلومو دادسين.

2:10  چونکي بو اونا کي، هر شي اونون اوچون و اونون واسئطه‌سئله ائدي، موناسئب گؤروندو کي، چوخ اوغوللاري شؤوکته گتئرمکده عذابلار واسئطه​سئله اونلارين نئجاتينين بانئسئني کامالا گتئرسئن.

2:11  چونکي هم او کي، تقدئس ادئر، هم ده اونلار کي، تقدئس اولونورلار، هاميسي بئر آتادانديرلار. بو سببدن اونلاري قارداش چاغيرماقدان اوتانماييب

2:12  ديئر: سنئن آديني قارداشلاريما اعلان اده​جه‌يم، سنئن جاماعاتين آراسيندا، سنئن حمدئني اوخوياجاغام.

2:13  و گئنه: اونا بل باغلاياجاغام. و گئنه: باخين، من و تارينين منه وردئيي اؤولادلار!

2:14  بونا گؤره، اؤولادلار نجه بدن و قانا شرئکدئرلر، او، اؤزو ده، اله‌جه همن شيلردن پاي آلدي کي، اؤلومون واسئطه​‌سئله اؤلومون اوستونه قوّت صاحئبي اولاني، يعني ائبلئسي، قووّتسئز اتسئن.

2:15  و عؤمورلري بويو اؤلوم قورخوسو ائله اسارته دوشموشلري آزاد اتسئن.

2:16  يقئن کي، او، ملکلره کؤمک اتمئر، آمّا ائبراهئم نسلئنه کؤمک ادئر.

2:17  بو سببدن لازيم ائدي کي، او، هر شيده قارداشلاري کئمي اولسون، اِله کي، تارييا مربوط اولان شيلرده مرحمتلي و وفالي بئر باش کاهئن اولوب، خالقين گوناهلارينين کفّاره​سئني تأمئن اتسئن.

2:18  چونکي اؤزو ده وسوسه اولونوب عذاب چکدئيي اوچون قادئردئر کي، وسوسه اولونانلارين ائمدادينا يتئشسئن.

Chapter 3

3:1  بونا گؤره، اي موقدّس قارداشلار، سماوي دعوته شرئک اولانلار، ائقراريميزين اِلچي و باش کاهئني اولان عئساني دوشونون؛

3:2  عئسا اونو تعيئن اده‌نه وفالي قالدي نجه کي، موسا دا تارينين بوتون اوئنه وفالي قالدي.

3:3  چونکي عئسا موسادان داها بؤيوک شؤوکته لايئق ساييليب، نه‌قدر کي، اِو تئکه‌نئن حؤرمتي، اودن آرتيقدير.

3:4  چونکي هر اِوئن بئر بنّاسي وار، لاکئن هر شيئن بنّاسي تاري‌دير.

3:5  موسا تارينين بوتون اِوئنده بئر خئدمتچي کئمي، سونرالار ديئله​جک شيلره شهادت ورمک اوچون امئن ائدي.

3:6  آمّا مسئح اوغول کئمي تارينين اوي اوستونده ائدي کي، اونون اوي بئزئک، اگر يقئن و اومئدئمئزئن فخرئني آخيرا کئمي مؤحکم ساخلاياق.

3:7  بونون اوچون نجه کي، موقدّس روح ديئر: بو گون اگر اونون سسئني اشئدئرسئنئز،

3:8  اورکلرئنئزي برک اتمه‌يئن، اونلار کئمي کي، چؤلده ائمتاحان گونونده مني قضبله‌ندئردئلر،

3:9  و آتالارينيز اورادا مني ائمتاحانا چکئب، يوخلاديلار و قيرخ ائل منئم عمل‌لرئمي گؤردولر.

3:10  بونا گؤره بو نسئله قضبله‌نئب ددئم: اونلار دائم اورکلرئنده آزيرلار، و منئم يوللاريمي بئلمه‌دئلر.

3:11  نجه کي، قضبئمده آند ائچدئم: اونلار من ورن راحاتليغا گئرمزلر.

3:12  قارداشلار، دئقّت ادئن کي، سئزلردن هچ بئرئنئزئن پئس و ائنانمايان بئر اوره‌يي اولماسين کي، دئري تاريدان اوزاقلاشسين.

3:13  آمّا بو گون ديئلدئکجه، گون​به​گون بئربئرئنئزي تشوئق ادئن، اِله کي، سئزلردن هچ بئرئنئز گوناهين حئيله​‌سي ائله برکئمه‌سئن.

3:14  چونکي اگر يقئنئمئزئن باشلانيشيني آخيرا کئمي مؤحکم ساخلاياق، مسئحئن شرئکلري اولموشوق.

3:15  ديئلئر ده کي، بو گون اگر اونون سسئني اشئدئرسئنئز، اورکلرئنئزي برک اتمه‌يئن، اونلار کئمي کي، مني قضبله‌ندئردئلر.

3:16  اشئتدئکلري زامان، کئم اونو قضبله‌ندئردي؟ دوغرودان دا مگر بوتون اونلار ديئلدئلر کي، موسا ائله مئصئردن چيخديلار؟

3:17  قيرخ ائل او، کئملره قضبلي ائدي؟ مگر اونلارا ديئلدي کي، گوناه اتدئلر، جسدلري ده چؤلده سرئلدي؟!

3:18  کئملرئن حاقّيندا آند ائچدي کي، او ورن راحاتليغا گئرمه‌يه​جکلر؟ مگر ناموطئعلرئن حاقّيندا ديئلدي؟!

3:19  بلجه گؤروروک کي، اونلار ائمانسيزليقلارينا گؤره گئره بئلمه‌دئلر.

Chapter 4

4:1  بونون اوچون گلئن قورخاق کي، اونون راحاتليغينا گئرمک وعده باقي ائکن، مبادا سئزلردن هچ بئرئنئز اوندان محروم اولموش گؤرونسون.

4:2  چونکي خوش خبر اونلارا وعظ اولوندوغو کئمي، بئزه ده وعظ اولونموشدو؛ آمّا اشئتدئکلري کلامين اونلارا بئر فايداسي اولمادي. چونکي او کلام اونو اشئدنلرده ائمان واسئطه‌سئله بئرلَشدئرئلمه‌دي.

4:3  بونا گؤره کي، بئز ائمان گتئرنلر راحاتليغا گئردئک، نجه کي، ديئب: قضبئمده آند ائچدئم کي، اونلار من ورن راحاتليغا گئرمزلر. گرچي اونون ائشلري دونيانين بئناسيندان بري باشا چاتميشدير.

4:4  چونکي يدّئنجي گون حاقّيندا بئر يرده ديئب: يدّئنجي گونده تاري بوتون ائشلرئندن راحات اولدو.

4:5  و گئنه بو يرده: اونلار من ورن راحاتليغا گئرمزلر.

4:6  بلجه، نه ائنکي بعضئلرئنئن او راحاتليغا گئرمه‌سي اوچون ائمکان قالير و خوش خبري قاباقجا اشئدنلر ائطاعتسئزلئکلري اوزوندن گئره بئلمه‌دئلر،

4:7  تاري گئنه، بو قدر زامان کچدئکدن سونرا، بئر گون تعيئن ادئر و داوودون دئلی ائله "بو گون" ديئر، نجه کي، قاباقجادان ديئلئب ده کي: بو گون اگر اونون سسئني اشئدئرسئنئز، اورکلرئنئزي برک اتمه‌يئن.

4:8  چونکي اگر اونلارا راحاتليق ورن يوشع اولسايدي، تاري بوندان سونرا آيري بئر گون حاقّيندا دانيشمازدي.

4:9  بلجه تارينين خالقي اوچون بئر سبّت راحاتليغي قالير.

4:10  چونکي تاري ورن راحاتليغا گئرن اؤزو ده، اؤز ائشلرئندن راحاتلادي، نجه کي، تاري اؤز ائشلرئندن اتمئشدي.

4:11  بلجه گلئن او راحاتليغا گئرمک اوچون جهد ادک، اِله کي، هچ کس همن ائطاعتسئزلئيئن نومونه​سئني گؤتوروب ييخيلماسين.

4:12  چونکي تارينين کلامي دئري، فعّال و ائکي‌​آغيزلي هر قيلينجدان داها ائتي‌دئر و جاني و روحو، هم ده مفصل​لري و ائلئکلري بئربئرئندن آييرانا قدر کسئر و اوره‌يئن فئکئرلر و نئيّتلرئني آييرلاماغا قادئردئر.

4:13  و هچ بئر مخلوق تارينين نظرئندن گئزلي ديئل، لاکئن هر شي اونون گؤزلري قاباغيندا کي، اونا جاواب ورمه‌لئيئک، لوت و آچيقدير.

4:14  بونا گؤره ائندي کي، گؤيلردن کچمئش بؤيوک بئر باش کاهئنئمئز وار، يعني تارينين اوغلو عئسا، گلئن اعتئرافيميزي مؤحکم ساخلاياق.

4:15  چونکي اِله بئر باش کاهئنئمئز يوخدور کي، ضعئفلئکلرئمئزده بئزئمله همدرد اولماسين. آمّا هر شيده بئزئم کئمي وسوسه اولونموش، لاکئن گوناهسيز چيخميش بئري واريميزدير.

4:16  بلجه، گلئن يقئنلئکله فيض تختئنه ياخينلاشاق، اِله کي، مرحمت تاپيب احتئياج واختيندا بئزه کؤمک ادن فيضه نايئل اولاق.

Chapter 5

5:1  چونکي ائنسانلار آراسيندان سِچئلن هر باش کاهئن، تارييا مربوط اولان ائشلرده ائنسانلار اوچون وکئل قويولور کي، گوناهلار اوچون هدئيه​لر و قوربانلار تقدئم اتسئن.

5:2  او، جاهئل​لر و آزانلارلا مولايئم رفتار اده بئلر، چونکي اؤزو ده ضعئفلئک ائچئنده​دئر.

5:3  بو سببدن ده، گوناهلار اوچون قوربان تقدئم اتمه‌لي‌دئر؛ هم خالقين گوناهلاري اوچون، هم ده اؤز گوناهلاري اوچون.

5:4  و هچ کس بو احتئراما اؤز-اؤزونه نايئل اولا بئلمز، تارينين طرفئندن دعوت اولوندوقدا نايئل اولا بئلر، نجه کي، حتّا هارون دا بله ائدي.

5:5  اله‌جه مسئح ده اؤز-اؤزونو عئزّتله‌ندئرئب باش کاهئن اولمادي، آمّا او تاري کي، اونا ددي: "سن منئم اوغلومسان. بو گون من سنه آتا اولدوم."

5:6  نجه کي، آيري بئر يرده ده ديئر: "سن ملکئصدق ترتئبئنه موطابئق، ابدي بئر کاهئنسن."

5:7  عئسا، جئسمئنده اولموش گونلرئنده، اوجا سس و گؤز ياشلاري ائله اونو اؤلومدن نئجات وره بئلن تارييا دوعالار و نئيازلار تقدئم اتدي و تقواسي سببئندن اشئدئلدي.

5:8  اوغول اولدوغو حالدا، چکدئيي عذابلارلا ائطاعتي اؤيره‌ندي.

5:9  و کامالا چاتيب، اوندان ائطاعت اِدَن هر کسه ابدي نئجاتين بولاغي اولدو.

5:10  و تاري طرفئندن ملکئصدق ترتئبئنه موطابئق، باش کاهئن تعيئن اولوندو.

5:11  اونون باره​سئنده دمک اوچون چوخ سؤزوموز وار و آچيقلاماسي دا چتئندئر، چونکي قولاقلارينيز آرتيق آغير اشئدئر.

5:12  گرچي سئز بو زامان عرضئنده موعلّئم اولمالي ائدئنئز، حله ده بونا مؤحتاجسينيز کي، کئمسه سئزه تارينين سؤزلرئنئن ائبتئدائي قايدالاريني اؤيره‌تسئن. و سئز قووّتلي يمه‌يه يوخ، سوده مؤحتاج اولوبسونوز.

5:13  چونکي هر کس کي، آنجاق سود ائچئر، کؤرپه اوشاقدير و صالحلئيئن کلامينا عادت اتمه‌يئب.

5:14  لاکئن قووّتلي يمک بؤيوموشلر اوچوندور کي، عمل اتمکله، حئسّلري ياخشي و پئسي بئربئرئندن آييرلاماغا تربئيه تاپيب.

Chapter 6

6:1  بونون اوچون مسئحئن ائبتئدائي تعلئمئني بوراخيب، کامالا طرف جهد اِدَک و اؤلو ائشلردن تؤوبه​يه تکرار بئر بونؤوره قويماياق، نه ده تارييا اولان ائمانا،

6:2  يوماقلار تعلئمئنه، اَللر قويماغينا، اؤلولرئن دئرئلمه‌سئنه و ابدي موحاکئمه​يه.

6:3  اگر تاري ائجازه ورسه، بئز بونو اده​جه‌يئک.

6:4  چونکي بئر زامان مونوّر اولموش و گؤيدن اولان عطاني دادميش و موقدّس روحدان پاي آلميش،

6:5  و تارينين ياخشي کلاميني و گله​جک عصرئن قودرتلرئني دادميش اولدوقلاري حالدا،

6:6  يولدان آزميش اولانلارا تزه​دن تؤوبه اتدئرمک مومکون ديئل. چونکي تارينين اوغلونو اؤزلري اوچون تزه​دن چارميخا چکئب، روسواي ادئرلر.

6:7  او ير کي، دفه​لر​له اوستونه تؤکولن ياغيشي ائچئر و اوندا ائشله‌ين کئمسه​لر اوچون فايدالي گؤيرتئلر حاصئل ورئر، تاريدان بئر برکت آلير.

6:8  آمّا اگر تئکان و خار-خاشاک حاصئل گتئرسه، دَيَرسئزدئر و لعنت اولونماغا ياخين، آخيري دا يانماقدير.

6:9  آمّا، سوگئلئلر، بله دانيشديغيميز حالدا، آرخايينيق کي، سئزئن وضعئيّتئنئز داها ياخشي و نئجاتا موناسئبدئر.

6:10  چونکي تاري حاقسيزليق اِدَن ديئل کي، سئزئن ائشئنئزي، و اونون آدي اوچون موقدّسلره اوّلدن و ائندي ده خئدمت اتمکله گؤرستدئيئنئز محبّتي ياددان چيخارتسين.

6:11  و بئزئم آرزوموز بودور کي، سئزلردن هر بئرئنئز اومئدئن کامئل يقئنئني آخيرا قدر گؤرسه‌دنه​جک همن جهدي اتسئن.

6:12  اِله کي، سئز تنبل يوخ، او کئمسه​لره اوخشايان اولاسينيز کي، ائمان و صبرئن واسئطه​‌سئله وعده​لري مئراث آليرلار.

6:13  چونکي تاري ائبراهئمه وعده وردئيي واخت، اؤزوندن داها بؤيوک بئرئنئن آدينا آند ائچه بئلمه‌دئيي اوچون، اؤز آدينا آند ائچئب،

6:14  ددي: "دوغرودان دا سنه برکت وره​جه‌يم و دوغرودان دا سني آرتيراجاغام."

6:15  و بلجه ائبراهئم صبر اتمکله وعده​يه نايئل اولدو.

6:16  چونکي ائنسانلار اؤزلرئندن داها بؤيوک اولانين آدينا آند ائچئرلر و اونلارين آراسيندا سؤزو تصدئق اِدَن آند، هر موباحئثه​نئن آخيري‌دير.

6:17  اِله‌جه ده تاري، وعده​نئن وارئثلرئنه اؤز ائراده​سئنئن ديئشئلمزلئيئني داها آچيق گؤرسدمک اوچون، وعده​ني آندلا تصدئق اتدي،

6:18  اِله کي، ائکي ديئشئلمز شيلرله کي، تارينين اونلاردا يالان دانيشماسي قيري‌مومکوندور، بئزلر کي، پناه توتماق اوچون قاچميشيق، داها چوخ تشوئق اولوب قاباغيميزا قويولان اومئدي مؤحکم توتاق.

6:19  بو اومئدئمئز جان لنگري کئمي‌دئر، هم آرخايين هم ده مؤحکم کي، پرده​نئن آرخا طرفئنه ده داخئل اولور،

6:20  او يره کي، ابده​جک ملکئصدق ترتئبئنه باش کاهئن اولان عئسا، بئزئم اوچون اورايا پئشرو کئمي گئرئب.

Chapter 7

7:1  چونکي سالئم پادشاهي اولان بو ملکئصدق، تاعالا تارينين کاهئني ائدي کي، پادشاهلاري اؤلدوروب قاييدان ائبراهئمه راست گلدي و اونا برکت وردي.

7:2  ائبراهئم ده هر شيئن اوندا بئر حئصّه​سئني اونا وردي کي، اونون آدي اوّل صالحلئک پادشاهي، سونراسي دا سالئم پادشاهي، يعني باريش پادشاهي‌دير.

7:3  او آتاسيز و آناسيزدير، نسئل‌نامه‌سي يوخدور. نه گونلرئنئن باشلانيشي وار نه ده عؤمرونون آخيري. لاکئن تارينين اوغلونا بنزه‌دئلمئش اولوب همئشه​لئک کاهئن قالير.

7:4  ائندي باخين بو آدام نه‌قدر بؤيوک ائدي کي، بؤيوک آتا ائبراهئم لاپ سچئلمئش قنئمتلرئن اوندا بئرئني اونا وردي.

7:5  لاوئنئن دوغرو اوغوللاريندان کاهئنلئک وظئفه​سئني آلانلار، شرئعتده حؤکملري وار کي، خالقدان يعني قارداشلاريندان، ائبراهئم نسلئندن اولدوقلاري حالدا اوندا-بئر حئصّه​ني آلسينلار.

7:6  آمّا اونلارين نسئل‌نامه‌سئندن اولمايان بئري ائبراهئمدن اوندا-بئر حئصّه​ني آلدي و وعده​لره مالئک اولانا برکت وردي.

7:7  بو دا شوبهه​سئزدئر کي، بؤيوک اؤزوندن کئچئيه برکت ورر.

7:8  بورادا اوندا بئر حئصّه​ني فاني ائنسانلار آليرلار، آمّا اورادا ياشاديغينا دائر شهادته مالئک اولان بئري آلير.

7:9  و دمک اولار کي، حتّا اوندا-بئر حئصّه​ني آلان لاوي ده، ائبراهئمئن واسئطه​‌سئله اوندا بئر حئصّه​ني ورمئشدئر.

7:10  چونکي ملکئصدق ائبراهئمه راست گلن واخت، لاوي حله آتاسينين بلئنده ائدي.

7:11  بلجه، اگر کامئللئک لاوئلي‌لرئن کاهئنلئيئله اولسايدي (چونکي اونون اساسينا گؤره خالق شرئعتي آلديلار)، بس داها نه احتئياج وار ائدي کي، آيري بئر کاهئن هارون ترتئبئنه گؤره تعيئن اولونماييب، ملکئصدق ترتئبئنه گؤره ظوهور اتسئن؟

7:12  چونکي کاهئنلئيئن ديئشئلمه‌‌سی ائله لازيمدير کي، شرئعت ده ديئشئلسئن.

7:13  اونا گؤره کي، حاقّيندا بو سؤزلر ديئلن، آيري بئر قبئله​يه عاييددئر کي، اوندان هچ کس قوربانگاهدا خئدمت اتمه‌يئب.

7:14  چونکي بلّي‌دئر کي، بئزئم ربّئمئز يهودا قبئله​سئندن گلدي کي، او قبئله​نئن حاقّيندا کاهئنلئک باره​ده موسا هچ بئر سؤز دمه‌دي.

7:15  و ملکئصِدِقه بنزر آيري بئر کاهئنئن ظوهور اتمه‌سي بونو داها دا آيدين گؤرسه‌دئر.

7:16  او، جئسماني شرطه باغلي بئر شرئعتئن اساسينا گؤره کاهئن اولمادي، آرادان گتمه‌ين حيات قودرتئنه گؤره کاهئن اولدو.

7:17  چونکي شهادت ورئلئب کي: سن ملکئصِدِق ترتئبئنه موطابئق ابدي بئر کاهئنسن.

7:18  چونکي بئر ياندان، اوّل گلن احکام، ضعئفلئيي و فايداسيزليغي اوزوندن لغو اولونور،

7:19  چونکي شرئعت هچ بئر شيي کامئل اتمه‌دي. و او بئري ياندان، داها ياخشي بئر اومئد ميدانا گلئر کي، اونون واسئطه‌سئله بئز تارييا ياخينلاشيريق.

7:20  و بو ائش آندسيز اولمادي.

7:21  چونکي اونلار دوغرودان دا آندسيز کاهئن اولدولار، لاکئن عئسا آند واسئطه‌سئله اونون طرفئندن اولدو کي، اونا ددي: ربّ آند ائچئب و فئکرئني ديئشدئرمه‌يه‌جکدئر. سن ابده کئمي کاهئنسن.

7:22  اِله بو قدر آرتيق دا عئسا داها ياخشي بئر عهدئن ضامئني اولوب.

7:23  بئر ياندا، او کاهئنلر ساييسي چوخ ائدي، چونکي اؤلوم اونلارين داوامينا مانع اولوردو.

7:24  آمّا او بئري ياندا، عئسا ابدي قالديغي اوچون دائمي کاهئنلئيه مالئکدئر.

7:25  بونا گؤره ده، قادئردئر کي، اونون واسئطه​‌سئله تارييا ياخينلاشانلارا ابده کئمي نئجات ورسئن. چونکي اونلارين حاقّيندا شفاعت اتمک اوچون همئشه دئري‌دئر.

7:26  دوغرودان دا بئزه موناسئب ائدي کي، بله بئر موقدّس، معصوم، قوصورسوز، گوناهکارلاردان آيريلميش و گؤيلردن يوخاري قالديريلميش باش کاهئنئمئز اولسون کي،

7:27  اؤزگه باش کاهئنلر کئمي مؤحتاج ديئل کي، اوّلجه اؤز گوناهلاري اوچون، سونرا دا خالقين گوناهلاري اوچون هر گون قوربانلار تقدئم اتسئن. چونکي او بونو اؤزونو قوربان تقدئم اتمکله بئردفه​لئک اتدي.

7:28  اوندان اؤتري کي، شرئعت ضعئف اولان ائنسانلاري باش کاهئن اولماغا تعيئن ادئر، لاکئن آندين کلامي کي، شرئعتدن سونرا گلدي، ابده کئمي کامئل اولموش اوغولو کاهئنلئيه تعيئن ادئر.

Chapter 8

8:1  بو سؤزلرئن اصلي مطلبي بودور: بئزئم بله بئر باش کاهئنئمئز وار کي، گؤيلرده او عظمت تختئنئن صاغيندا اوتوروب؛

8:2  موقدّس يرده و حقئقي چاديردا بئر خئدمت اِدَن. او چادير کي، اونو ائنسان يوخ، رب قوردو.

8:3  چونکي هر باش کاهئن تعيئن اولونور کي، هدئيّه​لر و قوربانلار تقدئم اتسئن. اِله‌جه بو باش کاهئنه ده لازيمدير کي، بئر شي تقدئم اتسئن.

8:4  ائندي اگر او، ير اوزونده اولسايدي، اصلا بئر کاهئن اولمازدي، چونکي شرئعت اساسينا هدئيّه تقدئم اِدَنلر واردير کي،

8:5  گؤيده‌کي شيلرئن بئر کوپئيه و کؤلگه​سئنه خئدمت ادئرلر. نجه کي، موسايا، عئبادت چاديريني قوران زامان، ائخطار ورئلدي؛ "چونکي تاري ديئر: دئقّت ات کي، هر شيي داغدا سنه گؤرسه‌دئلن نومونه​يه موطابئق دوزه‌لده​سن."

8:6  آمّا ائندي او، نه قدر کي، داها ياخشي وعده​لرئن اوستونه قويولان داها ياخشي بئر عهدئن واسئطه​چئسي‌دئر، اعلا بئر خئدمته نايئل اولوبدور.

8:7  چونکي اگر او بئرئنجي عهد قوصورسوز اولسايدي، ائکئنجئسئنه ير آختاريلمازدي.

8:8  چونکي تاري خالقدا قوصور تاپاراق ديئر: باخين، ربّ ديئر: اِله گونلر گلئر کي، ائسرايئل اِوی ائله، يهودا اِوي ائله تزه بئر عهد باغلاياجاغام.

8:9  او عهد کئمي يوخ کي، من اونلارين آتالاري ائله، اَللرئندن توتوب مئصئر دئياريندان چيخارتديغيم گون، باغلاديم. ربّ ديئر: چونکي اونلار منئم عهدئمه وفالي قالماديلار، من ده اونلارين قيدئنه قالماديم.

8:10  رب ديئر: بو او عهددئر کي، او گونلردن سونرا ائسرايئل اِوی ائله باغلاياجاغام: احکاملاريمي اونلارين ذهئنئنه قوياجاغام، اونلارين اورکلرئنده حکّ اده​جه‌يم. من اونلارين تاريسي اولاجاغام، و اونلار منئم خالقيم اولاجاقلار.

8:11  و هچ کس اؤز هموطنئنه، و هچ کس اؤز قارداشينا تعلئم ورمه‌يئب، دمه‌يه​جک: ربّي تاني! چونکي هامي، بؤيوکدن کئچئيه قدر، مني تانيياجاقلار.

8:12  چونکي اونلارين حاقسيزليقلارينا مرحمتلي اولاجاغام، و اونلارين گوناهلاريني بئر داها ياديما گتئرمه‌يه​جه‌يم.

8:13  "تزه بئرئني" دِمَکله، تاري اوّلکئني کؤهنه​لَنمئش ساييب. لاکئن کؤهنه​لَشَن و قوجالان شي يوخ اولماغا ياخيندير.

Chapter 9

9:1  حتّا بئرئنجي عهدئن ده ائلاهي پرستئشه قايدالاري، ير اوزونده ده موقدّس يري وار ائدي.

9:2  چونکي بئر چادير قورولموشدو. اشئک بؤلوم کي، ائچئنده چيراقدان، سوفره مئزي و موقدّس چؤرک وار ائدي. بونا موقدّس ير ديئلئر.

9:3  ائکئنجي پرده​نئن آرخاسيندا "موقدّس يرئن موقدّسي" چاغيريلان بئر چادير وار ائدي.

9:4  بورادا قيزيلدان بئر بوخور قوربانگاهي و عهد صانديغي وار ائدي کي، هر طرفدن قيزيللا بورونموشدو و ائچئنده مانّا قويولان قيزيل کوزه، هارونون چئچَکلنمئش اَل آغاجي و عهد لؤوحه​لري وار ائدي.

9:5  صانديغين اوستونده شؤوکت کرّوبلار وار ائدي کي، رحمت تختئنه کؤلگه ساليرديلار. لاکئن ائندي بونلارين حاقيندا جوزئيّاتلا دانيشا بئلمه‌رئک.

9:6  بو شيلر بله حاضيرلانديقدا، کاهئنلر همئشه اشئک چاديرا گئرئب، ائلاهي پرستئشي يرئنه يتئرئرلر.

9:7  لاکئن ائکئنجئسئنه آنجاق باش کاهئن ائلده بئر دفه گئرئر؛ قوربان قاني اولمادان دا يوخ کي، اونو اؤزو اوچون و خالقين بئلمه‌دن اتدئکلري گوناهلار اوچون تقدئم ادئر.

9:8  موقدّس روح بونا ائشاره ادئر کي، بئرئنجي چادير دوردوقجا، موقدّس يرئن موقدّسي يره گدن يول حله آشکار ديئل.

9:9  بو، ائندئکي زامان اوچون بئر مئثالدير کي، اونا موطابئق هم هدئيّه​لر، هم ده قوربانلار تقدئم اولونورلار کي، وئجداندا، پرستئش اده‌ني کامئل اده بئلمئرلر.

9:10  چونکي آنجاق يمک، ائچمک و موختلئف يويولمالارا مربوط اولان جئسماني قايدالارديرلار کي، ائصلاحات واختينا قدر تکلئف اولونوبلار.

9:11  لاکئن گله​جک ياخشي شيلرئن باش کاهئني اولان مسئح، ظوهور اتدئکده، اَل‌له قورولماميش، يعني بو خئلقتدن اولمايان بؤيوک و داها کامئل چاديرا گئردي؛

9:12  کچئلر و دانالار قاني واسئطه​‌سئله يوخ، اؤز قانينين واسئطه‌سئله بئر دفه​لئک موقدّس يرئن موقدّس يرئنه گئردي و ابدي قورتولوشو آلدي.

9:13  چونکي اگر کچئلرئن و اؤکوزلرئن قاني و ائنه‌يئن کولو نجئس اولانلارين اوستونه سَپئله‌نده، تقدئس اولونوب جئسملري تمئزلنسه،

9:14  بس نه قدر چوخ مسئحئن قاني کي، ابدي روحون واسئطه‌سئله لکه​سئز اؤزونو تارييا تقدئم اتدي، بئزئم وئجدانيميزي اؤلو ائشلردن تمئزله‌يه​جک کي، دئري تارييا خئدمت ادک؟

9:15  بو سببدن او، تزه عهدئن واسئطه​چئسي‌دئر کي، دعوت اولونانلار، وعده​سي ورئلمئش ابدي مئراثي آلسينلار. چونکي بئرئنجي عهدئن زامانيندا ائشله‌نن تقصئرلرئن فئدئيه‌سي اوچون بئر اؤلوم باش ورئب.

9:16  چونکي وصئيّت اولان يرده، لازيمدير کي، وصئيّت اِده‌نئن اؤلومو باش ورمئش اولسون.

9:17  اونا گؤره کي، وصئيّتنامه آنجاق ائنسانلارين اؤلوموندن سونرا مؤعتبر اولور. دوغرودان دا وصئيّت ادن صاغ ائکن، وصئيّت ائجرايا کچمز.

9:18  بلجه حتّا بئرئنجي عهد ده قانسيز ائجرايا کچمه‌دي.

9:19  چونکي موسا، شرئعته موطابئق هر امري بوتون خالقا دئيندن سونرا، دانالارين و کچئلرئن قانيني گؤتوردو، سو، قيرميزي يون و زوفا ائله هم کئتابين اؤزونه، هم ده بوتون خالقا سَپئب،

9:20  ددي: "تارينين سئزه امر اتدئيي عهدئن قاني بودور."

9:21  اِله‌جه قاني چاديرين و بوتون خئدمت قابلارينين اوستونه ده سپدي.

9:22  و شرئعته موطابئق تقرئبن هر شي قانلا تمئزله‌نئر و قان تؤکولمه‌يئنجه باغيشلانما اولمور.

9:23  بونا گؤره گرک ائدي کي، گؤيلرده‌کي شيلرئن کوپئيه​لري بونلارلا تمئزله‌نسئن، لاکئن گؤيده‌کي شيلرئن اؤزلري بونلاردان داها ياخشي قوربانلارلا.

9:24  چونکي مسئح اَل‌له تئکئلمئش موقدّس بئر يره کي، آنجاق حقئقي اولاندان بئر نومونه ائدي، گئرمه‌دي. او، گؤيون اؤزونه گئردي کي، ائندي بئزئم اوچون تارينين حوضوروندا ظاهئر اولسون.

9:25  نه ده کي، دفه​لرله اؤزونو قوربان تقدئم اتسئن، نجه کي، باش کاهئن ائلدن ائله اؤزونون اولمايان قانلا موقدّس يره گئرئر.

9:26  يوخسا، عئسايا گرک اولور ائدي کي، دونيانين يارانماسيندان بري دفه​لرله عذاب چکسئن. آمّا ائندي دؤورانلارين آخيريندا، بئر دفه ظوهور ادئب کي، اؤزونو قوربان اتمکله گوناهي آرادان قالديرسين.

9:27  و نه‌قدر ده کي، ائنسان اوچون بئر دفه اؤلمک، سونراسي دا موحاکئمه اولونماق تعيئن اولوب،

9:28  اِله‌جه ده مسئح کي، چوخلارينين گوناهلاريني داشيماق اوچون بئر دفه قوربان اولوب، ائکئنجي دفه، گوناهي داشيماق اوچون يوخ، نئجات اوچون اونا مونتظئر اولانلارا ظوهور اِده‌جکدئر.

Chapter 10

10:1  شرئعت، اوندان اؤتري کي، گله​جک ياخشي شيلرئن اصل شکئلي يوخ، اونلاردان آنجاق بئر کؤلگه​دئر، ائلدن ائله دائمي بئر شکئلده تقدئم اولونان همن قوربانلارلا ياخينلاشانلاري هچ واخت کامئل اده بئلمز.

10:2  يوخسا مگر قوربانلارين تقدئم اولونماسي بوراخيلمازدي؟ چونکي پرستئش اِدَنلر بئر دفه تمئزلشمئش اولاندان سونرا، اؤزلرئنده گوناه ائدراکي اولمازدي.

10:3  حال بو کي، بو قوربانلارلا گوناهلار ائلدن ائله يادا سالينير.

10:4  چونکي قيري‌​مومکوندور کي، اؤکوزلرئن و کچئلرئن قاني گوناهلاري آرادان گؤتورسون.

10:5  بونا گؤره مسئح، دونيايا گئرنده ديئر: قوربان و تقدئمه ائستمه‌يئبسن، لاکئن منه بئر بدن حاضيرلاييبسان؛

10:6  يانديريلان تقدئمه​لر و گوناه اوچون ادئلن قوربانلاردان سن راضي اولماييبسان.

10:7  او زامان ددئم: (کئتابين طوماريندا منئم باره​مده يازيليب) باخ، اي تاري، گلمئشم کي، سنئن ائراده​ني يرئنه يتئرئم.

10:8  يوخاريداکيني دئيندن سونرا کي، "قوربانلار و تقدئمه​لري، يانديريلان تقدئمه​لر و گوناه اوچون ادئلن قوربانلاري سن نه ائسته‌يئبسن، نه ده اونلاردان راضي اولوبسان" (کي، شرئعته موطابئق تقدئم اولونورلار.)

10:9  سونرا او، ددي: "باخ، گلمئشم کي، سنئن ائراده​ني يرئنه يتئرئم." و بئرئنجئني لغو ادئر کي، ائکئنجئني برقرار اتسئن.

10:10  بونون ائراده​‌سي ائله، عئسا مسئحئن بدنئنئن بئر دفه​لئک قوربان اولونماغي ائله بئز تقدئس اولونوروق.

10:11  هر کاهئن گوندن-گونه دايانيب خئدمت ادئر و گوناهلاري هچ واخت آرادان گؤتوره بئلمه‌ين همن قوربانلاري دفه​لر​له تقدئم ادئر.

10:12  لاکئن او، تک بئر قوربان تقدئم ادئب، همئشه​لئک تارينين صاغيندا اوتوردو.

10:13  و او زاماني گؤزله‌يئر کي، دوشمنلري اونون آياقلاري آلتيندا کتئل اولسونلار.

10:14  چونکي او، آنجاق بئر قوربان تقدئم اتمکله تقدئس اولونانلاري همئشه​لئک کامئلله‌شدئرئب.

10:15  موقدّس روح دا بئزه شهادت ورئر؛ چونکي ديئر:

10:16  رب ديئر کي: او گونلردن سونرا، اونلارلا باغلاياجاغيم عهد بودور: شرئعتلرئمي اونلارين اوره‌يئنده يرلشدئره​جه‌يم، اونلارين ذهئنلرئنده يازاجاغام. سونرا دا ديئر:

10:17  و اونلارين گوناهلار و حاقسيزليقلاريني بئر داها يادا سالماياجاغام.

10:18  ائندي بونلارين باغيشلانماسي اولان يرده، گوناهدان اؤتري داها قوربان تقدئم اولونماز.

10:19  بونا گؤره، قارداشلار، چونکي عئسانين قاني واسئطه​‌سئله لاپ موقدّس يره يقئنلئکله گئره بئله‌رئک؛

10:20  او تزه و جانلي يوللا کي، بئزئم اوچون پرده​نئن آراسيندان، يعني اؤز جئسمئنئن واسئطه​سئله حاضيرلاييب،

10:21  و تارينين اوي اوستونه بؤيوک بئر کاهئنئمئز اولدوغو اوچون،

10:22  گلئن ائمانين کامئل يقئنلئيئنده، اورکلرئمئز هر پئس بئر شوعوردان تمئزله‌نمئش، بدنلرئمئز ده تمئز سو ائله يويولموش، صادئق بئر اورکله تارييا ياخينلاشاق.

10:23  گلئن ائقرار اتدئيئمئز اومئدي تردّود اتمه‌دن برک توتاق، چونکي وعده​ني ورن وفالي‌دير.

10:24  گلئن بونون قيدئنه قالاق کي، بئربئرئمئزي نجه محبّت و ياخشي ائشلر اتمه‌يه تشوئق ادک.

10:25  و بعضئلرئن عادتي کئمي بئربئرئمئز​له بئر يره ييغيلماغي ترک اتمه‌يک و بئربئرئمئزي داها دا چوخ تشوئق ادک، علل​خوصوص گؤرورسونوز ده کي، او گون ياخينلاشير.

10:26  چونکي اگر حقئقتئن معرئفتئني آلاندان سونرا قصدن گوناه اِدَک، گوناهلار اوچون آرتيق قوربان قالمير.

10:27  لاکئن موحاکئمه​نئن دهشتلي بئر ائنتئظاري و ضئدّ دورانلاري يانديريب تؤکن بئر اودون قضبي قالير.

10:28  موسانين شرئعتئني هچ سايان آدام، ائکي و يا اوچ شاهئدئن شهادتي ائله رحم ادئلمه‌دن اؤلور،

10:29  فئکر ادئرسئنئز تارينين اوغلونو آياق آلتينا سالان، واسئطه‌سئله تقدئس اولوندوغو عهدئن قانيني ناپاک سايان، و فيضئن موقدّس روحونو تحقئر ادن بئر آدام نه قدر شئدّتلي بئر جزايا لايئق اولاجاق؟!

10:30  چونکي بونو دئيه‌ني تاني‌ييريق: "قئصاص منئمدئر، من عوضئني وره​جه‌يم." و گئنه "ربّ خالقيني موحاکئمه اده​جک."

10:31  ياشايان تارينين اَللرئنه دوشمک دهشتلي بئر شيدئر.

10:32  لاکئن اوّلکي گونلري يادا سالين کي، مونوّر اولوندوغونوزدان سونرا، عذاب دولو بؤيوک بئر موبارئزه​يه تاب گتئردئنئز.

10:33  گاه سؤيوشلر و عذابلارلا تاماشايا قويولدونوز، گاه دا بو جور رفتار ادئلنلر​له شرئک اولدونوز.

10:34  چونکي محبوسلارلا بئرلئکده عذاب چکدئنئز و اؤزونوز اوچون ياخشي و دائمي بئر مالين اولدوغونو بئلئب، اموالينيزين تاراج اولماسيني شادليقلا قبول اتدئنئز.

10:35  بونا گؤره، يقئنئزي اؤزونوزدن آتمايين کي، بؤيوک بئر اجري وار.

10:36  چونکي سئزئن تاب گتئرمه‌يه احتئياجينيز وار کي، تارينين ائراده​سئني يرئنه يتئرندن سونرا، ورئلمئش وعده​ني آلاسينيز.

10:37  "دوغرودان دا کي، عنقرئب «گلن اولان» گله​جک و يوبانماياجاقدير.

10:38  منئم صالح اولانيم، ائمانلا ياشاياجاق و اگر دالي چکئلسه، جانيم اوندان راضي اولماياجاق."

10:39  آمّا بئز دالي چکئلئب هلاک اولانلاردان ديئلئک، جانين حئفظ ادئلمه‌سئنه ائمان گتئرنلردنئک.

Chapter 11

11:1  ائمان اومئد اِدئلن شيلره اعتئماد اتمکدئر، گؤرونمه‌ين شيلر حاقّيندا خاطئرجملئکدئر.

11:2  چونکي اونون واسئطه‌سئله قدئمکئلر تصدئق اولوندولار.

11:3  ائمان واسئطه‌سئله بئز درک ادئرئک کي، دونيا تارينين کلامي ائله ياراندي، اِله کي، گؤرونن شيلر، او شيلردن قايريلمادي کي، گؤز قاباغيندادير.

11:4  ائمان واسئطه​‌سئله هابئل قايندن داها ياخشي بئر قوربان تارييا تقدئم اتدي کي، اونونلا دا صالح اولدوغونا شهادت ورئلدي. تاري اونون هدئيّه‌لري باره​ده شهادت ورئر و هابئل، اؤلموش اولدوغو حالدا، ائمان واسئطه​‌سئله حله ده دانيشير.

11:5  ائمان واسئطه​‌سئله خنوخ يوخاري آپاريلدي کي، اؤلومو گؤرمه‌سئن و تاپيلا بئلئنمه‌دي، چونکي تاري اونو يوخاري آپاردي. چونکي بو شهادته مالئک اؤلدو کي، يوخاري آپاريلماقدان قاباق تاريني راضي ادئردي.

11:6  ائمان اولماسا، تاريني راضي اتمک قيري‌​مومکوندور، چونکي تارييا ياخينلاشان گرک ائنانسين کي، او واردير و اونو آختارانلارا پاداش وره​جک.

11:7  ائمان واسئطه​‌سئله نوح، حله گؤزه گؤرونمه‌ين شيلر حاقّيندا خبردار اولونوب، تارييا اولان حؤرمتده اؤز عايئله​سئنئن نئجاتي اوچون گمي حاضيرلادي و بونونلا دا دونياني محکوم اتدي و ائمانا گؤره اولان صالحلئيي مئراث آلدي.

11:8  ائمان واسئطه‌سئله ائبراهئم، چاغيريلديغي زامان، ائطاعتئني گؤرسه‌دئب، مئراث آلاجاغي يره گتدي. او، هارايا گتدئيئني بئلمه‌يه‌رک يولا دوشدو.

11:9  ائمان واسئطه​‌سئله او، وعده ورئلمئش اؤلکه​ده قرئب بئر آدام کئمي ياشادي و همن وعده​نئن هموارئثلري اولان ائسحاق و يعقوبلا چاديرلاردا ساکئن اولدو.

11:10  چونکي ائبراهئم او شهري آختاريردي کي، بونؤوره​لري وار و معمار و بنّاسي تاري‌دير.

11:11  سونسوز سارا دا ائمان واسئطه‌سئله، ياشي کچمئش اولدوغو حالدا، بويلو اولماق قابئلئيّتئني آلدي، چونکي وعده وره‌ني وفالي سايدي.

11:12  بونا گؤره ده بئر کئشئدن، اوسته​لئک اؤلودن فرقي اولمايان بئرئندن، ساييجا گؤيون اولدوزلاري قدر، دهنزئن قيراغينداکي قوملار قدر ساييسيز-حسابسيز نسئل گتئردي.

11:13  بونلارين هاميسي وعده​لري آلماميش، ائماندا اؤلدولر، لاکئن اونلاري اوزاقدان گؤروب خوشلوقلا قبول اتدئلر و ائقرار اتدئلر کي، ير اوزونده ياد و قرئبدئرلر.

11:14  چونکي بله شيلري دئينلر بونو گؤرسه‌دئرلر کي، اؤزلري اوچون بئر وطن آختاريرلار.

11:15  و دوغرودان دا اگر اورادان چيخديقلاري وطنئن فئکئري باشلاريندا اولسايدي، اورايا قاييتماغا فورصتلري اولاردي.

11:16  لاکئن نجه کي، دئر، اونلار ياخشي بئر وطني، گؤيده اولان بئرئني آرزولاييرلار. اونا گؤره ده تاري اوتانمير کي، اونلارين تاريسي چاغيريلسين، چونکي اونلار اوچون بئر شهر حاضيرلاييب.

11:17  ائمان واسئطه‌سئله ائبراهئم، ائمتاحانا چکئلنده، ائسحاقي قوربان تقدئم اتدي؛ وعده​لره صاحئب اولان آدام بئرجه اوغلونو قوربان ادئردي.

11:18  حال بو کي، اونا ديئلمئشدي: "سنئن نسلئن ائسحاقدان آدلاناجاق."

11:19  او بله دوشوندو کي، تاري حتّا اؤلولردن دئرئلتمه‌يه قادئردئر. بونا گؤره ده بئر تمثئل اولاراق، اونو تزه​دن آلدي.

11:20  ائمان واسئطه‌سئله ائسحاق، يعقوب و عئسويو گله​جکلري حاقّيندا برکت وردي.

11:21  ائمان واسئطه‌سئله يعقوب، اؤلورکن، يوسئفئن هر بئر اوغلونا برکت وردي و اؤز اَل‌آغاجينا سؤيکه‌نئب، پرستئش اتدي.

11:22  ائمان واسئطه‌سئله يوسئف، اؤلورکن، ائسرايئل اوغوللارينين مئصئردن چيخيش اده​جکلرئندن سؤز ادئب، سوموکلري باره​ده امرلر وردي.

11:23  ائمان واسئطه‌سئله موسا، دوغولاندان سونرا، والئدينلري طرفئندن اوچ آي گئزلي ساخلاندي، چونکي اونلار اوشاغين گؤزل اولدوغونو گؤردولر و پادشاهين فرمانيندان قورخماديلار.

11:24  ائمان واسئطه​‌سئله موسا، بؤيويندن سونرا، فئرعون قيزينين اوغلو آدلانماقدان ائمتئناع اتدي

11:25  و تارينين خالقي​ ائله ياوا رفتارا دؤزمه‌يي، گوناهين کچئب-گدن لذّتلرئنه ترجئح وردي.

11:26  مسئح اوچون چکدئيي سئتمي مئصئرئن خزئنه​لرئندن داها بؤيوک ثروت سايدي، چونکي گؤزونو پاداشا دئکمئشدي.

11:27  ائمان واسئطه​‌سئله او، پادشاهين قضبئندن قورخماييب، مئصئري ترک اتدي. چونکي او، گؤرونمه‌يني گؤرموش کئمي، هر شيه تاب گتئردي.

11:28  ائمان واسئطه​‌سئله او، پاسخا و قانين سَپئلمه‌سئني رئعايت اتدي کي، ائلک دوغولانلاري هلاک ادن، اونلارا اَل وورماسين.

11:29  ائمان واسئطه‌سئله اونلار، قيرميزي دهنزدن قورولوقدان کچن کئمي کچدئلر و مئصئرلئلر ده بونو اتمه‌يه چاليشان واخت بوغولدولار.

11:30  ائمان واسئطه‌سئله اَرئحانين دووارلاري، يدّي گون اطرافيندا دولانماقدان سونرا ييخيلدي.

11:31  ائمان واسئطه‌سئله فاحئشه راحاب، جاسوسلاري سالاماتليقلا قبول اتدئيي اوچون ناموطئعلرله بئرلئکده محو اولمادي.

11:32  داها نه ديئم؟ چونکي اگر جدعون، باراق، سامسون، يفتاح، داوود، سمويئل و نبي‌لر حاقّيندا دانيشسام، واخت چاتماز.

11:33  او آداملار کي، ائمان واسئطه‌سئله اؤلکه​لر فتح اتدئلر، صالحلئک عمللرئني يرئنه يتئردئلر، وعده​لره نايئل اولدولار، آصلانلارين آغيزلاريني باغلاديلار،

11:34  اودون قووّتئني سؤندوردولر، قيلينج آغيزيندان قاچديلار، ضعئفلئکدن قووّتله‌ندئلر، دؤيوشده جنگاور اولدولار، يادلارين قوشونلاريني قاچيرتديلار.

11:35  آروادلار اؤلولرئني دئرئلئش واسئطه‌سئله تزه​دن آلديلار؛ آمّا قالانلار ائشکنجه چکئب آزاد اولماقلاريني قبول اتمه‌دئلر، اِله کي، داها ياخشي بئر دئرئلئشه نايئل اولسونلار.

11:36  اؤزگه​لر ائستهزا اولونوب دؤيولدولر، بلي، زنجئرلر و زئندانلارا دوشدولر.

11:37  داشا باسيلديلار، اره​ ائله ائکي شقّه اولدولار، وسوسه اولوندولار، قيلينجلا اولدورولدولر، قويون درئسئني، کچي درئسئني گيئنئب موحتاج اولدولار، آوارا اولدولار، ذلئل اولدولار، ياوا رفتارلار ادئلدئلر.

11:38  (دونيا اونلارا لايئق اولمايان آداملار) چؤللرده، داغلاردا، ماغارالاردا و يرئن چاتّاقلاريندا سرگردان اولدولار.

11:39  و بونلارين هاميسي، ائمان واسئطه‌سئله تصدئق اولونموش حالدا، وعده​يه نايئل اولماديلار.

11:40  چونکي تاري بئزئم اوچون داها ياخشي شيي حاضيرلاميشدي کي، اونلار بئزسئز کامئل اولماسينلار.

Chapter 12

12:1  بونا گؤره، اطرافيميزدا بله بؤيوک بئر شاهئدلر بولودو اولارکن، گلئن بئز ده بئزي بو قدر راحاتجا گئرئفتار ادن هر مانع و گوناهي ترک ادئب، قاباغيميزا قويولان ميداندا طاقتله قاچاق

12:2  و ائمانين پئشوا و کامئل اده‌ني عئسايا باخاق کي، قاباغينا قويولان شادليق اوچون چارميخا تاب گتئردي و روسوايچيليغي هچ ساييب، تارينين تختئنئن صاغيندا اوتوردو.

12:3  گوناهکارلار طرفئندن بله بئر دوشمنچئلئيه تاب گتئره‌ني نظرده ساخلايين، اِله کي، يورولماييب طاقتدن دوشمه‌يه​سئنئز.

12:4  گوناهين ضئدّئنه اولان ساواشينيزدا حله قان تؤکولنه قدر موقاوئمت اتمه‌يئبسئنئز.

12:5  و اوغوللارا ديئلن کئمي، سئزه ديئلن بو نصئحتي ياددان چيخارديبسينيز: اوغلوم، ربّئن تربئيه​سئنه حقارتله باخما، اونون طرفئندن مذمّت اولاندا دا روحدان دوشمه.

12:6  چونکي ربّ سودئکلرئني تربئيه ادر، و قبول اتدئيي هر اوغولو دؤير.

12:7  تربئيه اوچوندور کي، طاقت گتئرئرسئنئز؛ تاري سئزئنله اوغوللار کئمي رفتار ادئر. چونکي هانسي اوغول وار کي، آتاسي اونو تربئيه اتمه‌سئن؟!

12:8  اگر سئز هاميلارين شرئک اولدوغو تربئيه​دن محروم اولاسينيز، دمه‌لي سئز اوغوللار يوخ، حرامزاده اؤولادلارسينيز.

12:9  بوندان علاوه، بئزي تربئيه ادن جئسماني آتالار وار و بئز اونلارا حؤرمت گؤرسدمئشئک، آيا روحلارين آتاسينا داها آرتيق موطئع اولوب ياشاماياق؟!

12:10  چونکي اونلار قيسا بئر مودّت اوچون اؤز دوشونجه​لرئنده ياخشي اولانا موطابئق بئزي تربئيه اتدئلر. لاکئن او، بئزي اؤز خيئرئمئز اوچون تربئيه ادئر کي، اونون موقدّسلئيئنه شرئک اولاق.

12:11  بوتون تربئيه ائندئلئکده شادليق يوخ، قم سببي گؤرونور، لاکئن اونونلا تربئيه گؤتورنلرده، سونرادان باريش گتئرن صالحلئيئن ثمره​سئني حاصئل ادئر.

12:12  بونا گؤره ضعئف اَللري و اَسَن دئزلري قووّتله‌ندئرئن.

12:13  آياقلارينيز اوچون ده دوز يوللار دوزه‌لدئن، اله کي، آخساق عوضوونوز يرئندن چيخماسين، لاکئن شفا تاپسين.

12:14  هر کسله باريش ائچئنده ياشاماغا جهد ادئن و موقدّس اولونماق اوچون قيرت گؤرسه‌دئن کي، اونسوز هچ کس ربّي گؤرمه‌يه​جکدئر.

12:15  دئقّت ادئن کي، هچ کس تارينين فيضئندن محروم اولماسين؛ آرانيزدا آجيليق کؤکو بؤيويوب زحمت آچماسين و اونونلا بئر چوخو زهرلنمه‌سئن.

12:16  کئمسه اخلاقسيز و عئسو کئمي تاريدان اوزاق دوشن اولماسين کي، اؤز اوغوللوق حاقّيني بئر قاب خوره‌يه ساتدي.

12:17  چونکي بئلئرسئنئز کي، سونراسي حتّا برکتئن مئراث آلماغي آرزوسوندا اولاندا دا ردّ اولوندو. گرچي گؤزياشلاري ائله اونون دالينجا ائدي، لاکئن آرتيق تؤوبه​يه هچ بئر ير قالماميشدي.

12:18  چونکي سئز لمس اده​بئلمه‌لي بئر داغا، آلوولو اودا، قارانليغا، دومانا، فيرلانان يله،

12:19  شيپور گورلمه​سئنه و او سؤزلر نئداسينا ياخينلاشماييبسينيز کي، اشئدنلر يالوارديلار کي، اونلارا داها دانيشيلماسين.

12:20  چونکي بو امره تحمّول اده بئلمئردئلر: "اگر داغا بئر حيوان بله توخونسا، داشا باسيلاجاق."

12:21  و بو منظره اِله دهشتلي ائدي کي، موسا ددي: "چوخ قورخو و لرزه ائچئنده​يم."

12:22  لاکئن سئز صحيون داغينا و دئري تارينين شهرئنه ياخينلاشيبسينيز، سماوي اورشلئمه، ملکلرئن مئنلرئنه،

12:23  عومومي مجلئسه و آدلاري گؤيده قيد ادئلمئش ائلک دوغولانلارين کئلئساسينا و هامينين داوري اولان تارييا، کامالا چاتميش صالحلرئن روحلارينا،

12:24  و عئسايا، تزه عهدئن واسئطه​چئسي اولانا، سَپئلمئش قانا کي، هابئلئن قانيندان داها ياخشي دانيشير.

12:25  دئقّتلي اولون کي، بو دانيشاني ردّ اتمه‌يه​سئنئز. چونکي اگر ير اوزونده اونلارا ائخطار وره‌ني ردّ ادنده قاچا بئلمه‌دئلر، نه قدر آز بئز قاچا بئله​جه‌يئک، اگر گؤيدن بئزه ائخطار وِرَندن اوز دؤنده‌رک.

12:26  او واخت اونون سسي يري لرزه​يه سالدي، آمّا ائندي وعده ورئب ديئر: "من بئر داها آنجاق يري يوخ، گؤيو ده لرزه​يه سالاجاغام."

12:27  بو "بئر داها" سؤزو گؤرسه‌دئر کي، لرزه​يه گله بئلن، يعني ياراديلميش شيلر آرادان قالديريلاجاق کي، لرزه​يه دوشمه‌ينلر برقرار قالسينلار.

12:28  بونا گؤره لرزه​يه دوشه بئلمه‌ين پادشاهليغا نايئل اولدوغوموز اوچون، گلئن ممنونئيّت گؤرسه‌دک کي، اونون واسئطه​‌سئله حؤرمت و قورخو ائچئنده تارييا مقبول بئر خئدمت تقدئم ادک؛

12:29  چونکي بئزئم تاريميز يانديريب تؤکن بئر اوددور.

Chapter 13

13:1  قويون قارداش محبّتي داوام ورسئن.

13:2  قرئب آداملارا قوناقپرورلئک اتمه‌يي ياددان چيخارتمايين، چونکي بونونلا بعضئلر بئلمه‌دن ملکلره قوناقپرورلئک گؤرسه‌دئبلر.

13:3  محبوسلاري اونلارلا محبوس اولانلار کئمي، ياوا رفتار اِدئلَنلري اؤزونوز ده بدنده اولدوغونوزا گؤره يادا سالين.

13:4  نئکاح گرک هر کسئن طرفئندن حؤرمتلي توتولسون و دؤشه‌يي ده گرک لکه​سئز ساخلانسين. چونکي تاري فاسئقلر و زئناکارلاري موحاکئمه اده‌جک.

13:5  شخصئيّتئنئز پولپرستلئکدن آزاد اولسون، نه‌يئنئز وارسا، اونونلا کئفايتله‌نئن. چونکي تاري اؤزو ديئب: "سني هچ واخت بوراخمارام، سني هچ واخت ترک اتمه‌رم."

13:6  بونا گؤره يقئنلئکله ديئرئک: "رب منئم کؤمه‌يئمدئر، قورخمارام. ائنسان منه نه اده بئلر؟!"

13:7  سئزي هئدايت اتمئش اولانلاري کي، تارينين کلاميني سئزه ددئلر، خاطيرلايين. اونلارين رفتارينين نتئجه​سئني دئقّتله نظره آلين و اونلارين ائمانيندان نومونه گؤتورون.

13:8  عئسا مسئح، دونن، بو گون و ابده کئمي هَمَندئر.

13:9  فرقلي و قرئب تعلئملرله يولدان آزمايين. چونکي ياخشي‌دير کي، اورک فيضله قووّتله‌نسئن، يمکلرله يوخ کي، اونلارلا مشغول اولانلار بئر فايدا تاپماديلار.

13:10  بئزئم بئر قوربانگاهيميز وار کي، عئبادت خيمه​سئنده خئدمت ادنلرئن اوندان يمه‌يه حاقلاري يوخدور.

13:11  چونکي او حيوانلارين بدنلري کي، قانلاري باش کاهئن طرفئندن گوناه اوچون لاپ موقدّس يره گتئرئلئر، اوردوگاهين اشئيئنده يانديريلير.

13:12  بونا گؤره، عئسا دا، خالقي اؤز قانينين واسئطه‌سئله تقدئس اتمک اوچون دروازانين اشئيئنده عذاب چکدي.

13:13  بونون اوچون گلئن اونون سئتمئني داشي‌ييب، اوردوگاهدان اشئک اونون يانينا گدک.

13:14  چونکي بورادا بئزئم دائمي بئر شهرئمئز يوخدور، لاکئن گله​جک شهري آختاريريق.

13:15  اوندا گلئن اونون واسئطه​‌سئله دائمن تارييا حمد قورباني، يعني، اونون آديني اعلان ادن دوداقلارين ميوه​سئني تقدئم ادک.

13:16  ياخشيليق اتمه‌يي و اؤزگه​لرله پايلاشماغي ياددان چيخارتمايين، چونکي تاري بو جور قوربانلاردان خوشلانير.

13:17  سئزه رهبر اولانلاردان ائطاعت ادئن و اونلارا موطئع اولون. چونکي اونلار حساب وره​جک کئمسه​لر کئمي جانلارينيزين قيدئنه قاليرلار. قويون بونو شادليقلا اتسئنلر، قمله يوخ کي، سئزئن اوچون فايداسي اولماز.

13:18  بئزئم اوچون دوعا ادئن؛ چونکي آرخايينيق کي، وئجدانيميز تمئزدئر و جان آتيريق دا کي، هر شيده حؤرمتلي رفتار ادک.

13:19  سئزئن هامينيزا يالواريرام کي، بونو داها دا چوخ اده​سئنئز، اِله کي، من تزلئکله يانينيزا قايتاريليم.

13:20  ائندي باريش تاريسي کي، قويونلارين بؤيوک چوبانيني، ابدي عهدئن قاني واسئطه‌سئله ربّئمئز عئساني اؤلولردن دئرئلتدي،

13:21  سئزي هر ياخشي ائشده حاضيرلاسين کي، اونون ائراده​سئني يرئنه يتئره​سئنئز و عئسا مسئحئن واسئطه‌سئله اؤز نظرئنه خوش گله‌ني، بئزده عمله گتئرسئن کي، اونا ابددن ابده​جک شؤوکت اولسون. آمئن.

13:22  آمّا قارداشلار، سئزه يالواريرام کي، بو تشوئق سؤزونو تحمّول اده​سئنئز، چونکي سئزه قيساجا يازميشام.

13:23  خبرئنئز اولسون کي، قارداشيميز تئموتاعوس آزاد اولوب و اگر تزلئکله يانيما گلسه، اونونلا سئزي گؤره​جه‌يم.

13:24  بوتون رهبرلرئنئزه و بوتون موقدّسلره سالام يتئرئن. ائتاليادان اولانلار سئزه سالام گؤنده‌رئرلر.

13:25  فيض سئزئن هامينيزلا اولسون.