Kapingamarangi - Hebrews

Chapter 1

1:1  I-mua-loo gei God ne-helekai gi tadau maadua-mmaadua mai baahi nia soukohp i-nia hagadilinga ala i-nia holongo e-logo.

1:2  Gei i-lodo nia laangi muliagi aanei, God ne-helekai-mai gi gidaadou mai baahi dana Dama. God ne-hai di langi mo henuailala mai i dana Dama, gei God gu-hilihili a-Mee e-hai-mee gi-nia mee huogodoo i-di hagaodi.

1:3  Mee e-maahina be-di madamada o God, e-hai gadoo be God. Mee e-daahi di langi mo henuailala gi ana helekai mogobuna. I-muli dono haga-madammaa nia huaidu o-nia daangada huogodoo, Mee guu-noho i-di baahi gau-donu o God, go di Mogobuna Muginua.

1:4  Tama a God la-ne-hai gi-mada-aamua i-digau di-langi, gadoo be dono ingoo dela ne-wanga gi-de-Ia le e-mada-aamua i nadau ingoo.

1:5  Idimaa, God la-digi helekai gi tei ana gau di-langi boloo, “Goe go dagu Dama-daane, dangi-nei gei Au guu-hai Tamana ni-oou.” Gei God digi helekai labelaa i tei ana gau di-langi boloo, “Au gaa-hai Tamana ni mee, gei Mee gaa-hai Tama-daane ni-aagu.”

1:6  I-mua di madagoaa God ne-hagau-mai dana Dama gi henuailala, Mee gu-helekai boloo, “Digau di-langi a God huogodoo e-hai-loo gi-daumaha gi Mee.”

1:7  Deenei di mee a God ne-helekai-ai i digau di-langi boloo, “God e-hagau ana gau di-langi be nia madangi, ga-hagau ana gau hai-hegau be nia ulaula o-di ahi.”

1:8  Gei God gu-helekai i-di Tama boloo, “Meenei God, do lohongo-king gaa-noho-hua beelaa! Goe e-dagi au daangada gi-di tonu.

1:9  Goe e-aloho i-nia mee ala e-donu, ge e-de-hiihai gi-nia mee hai-gee. Delaa-laa, doo God guu-dugu Goe gi-baahi nua o ehoo i dana hagatulu Goe gi-di lolo o-di tenetene.”

1:10  Mee gu-helekai labelaa, “Goe go Tagi, ne-hai henuailala i taamada, oo lima ne-hai nia haga-honu nia langi i-nua.

1:11  Nia mee huogodoo aanei ga-hagalee, gei Goe e-noho-hua-beelaa. Nia mee huogodoo ga-hagalee, gadoo be nia gahu ala e-ngudu.

1:12  Goe gaa-wini nia maa be-di gahu ulu laa-daha, ga-waahei be nia gahu uluulu, gei Goe e-noho-hua be Goe, e-mouli gaa-hana-hua beelaa.”

1:13  God digi helekai gi tangada i ana gau di-langi boloo, “Noho i dogu baahi gau-donu, gaa-dae-loo gi dogu madagoaa gaa-dugu o hagadaumee gi-lala o babaawae.”

1:14  Digau di-langi la-nia-aha? Digaula la nia hagataalunga e-hai-hegau gi God, ge ne-hagau-mai belee hagamaamaa digau ala ga-hai-mee gi-di hagamouli.

Chapter 2

2:1  Deenei tadinga gidaadou e-hai-loo gi-daahi gii-mau di tonu dela gu-longono-gidaadou, gi-deemee di-lahi gidaadou gi-daha.

2:2  Nnelekai ala ne-hagadele go digau di-langi ang-gi tadau maadua-mmaadua, la nia helekai e-donu. Gei digau ala digi daudali be hagalongo gi-nia maa, e-kae di hagaduadua dela e-tau-anga.

2:3  Malaa e-hai behee? Gidaadou e-mee di-tanga gi-daha mo-di hagaduadua deenei, maa gidaadou ga-haga-balumee di haga-mouli aamua deenei? Matagidagi, Tagi ne-hagailoo di haga-mouli deenei, ga-nomuli, go digau ala ne-longono mai i Mee ala ne-haga-modongoohia-mai gi gidaadou bolo ma e-donu.

2:4  I-di madagoaa la-hua, God gu-haga-puni-anga ana haga-modongoohia gi-nia haga-modongoohia digaula bolo ma e-donu i dana hai nnagadilinga haga-goboina, mo dana dugu-mai gi gidaadou nia wanga-dehuia o-di Hagataalunga-Dabu, gii-hai be dono manawa.

2:5  God la-digi dugu ang-gi digau di-langi gi-dagia henuailala hoou dela e-hanimoi, henuailala hoou deenei dela e-helehelekai-ai gidaadou.

2:6  Tama-madagoaa dulii i-lodo di Beebaa-Dabu e-haga-modongoohia boloo, “Meenei God, tangada la-di-aha, dela e-haa-manawa-iei Goe? Tangada le e-balumee-hua, dela e-benebene Kooe?

2:7  Goe guu-kae a-mee laa-lala digau di-langi i-lodo tama madagoaa dulii, gei Goe gu-haga-uda gi Mee di madamada mo-di aamua.

2:8  ge gu-haga-menege-aga a-Mee e-dagi nia mee huogodoo.” E-helekai boloo, “God gu-haga-menege-aga a-Mee e-dagi nia mee huogodoo,” e-hai dono hadinga, bolo deai dahi mee i-golo digi dagia go Mee. Gei gidaadou digi mmada gi tangada e-dagi ana mee huogodoo dolomeenei.

2:9  Gei tadau mee dela e-gidee-gidaadou la-go Jesus! Di madagoaa bodobodo, gei Mee gu-haga-menege gi-lala o digau di-langi, gei dolomeenei, Mee gu-haga-uda ginai di madamada mo-di aamua, idimaa, Mee guu-kae di hagaduadua, guu-made. Deenei go tumaalia o God mai dana Dama go Jesus, dela ne-made gi digau huogodoo.

2:10  God dela ne-hai ana mee huogodoo, gei e-haga-mouli ana mee huogodoo, e-donu-hua go dana hai a Jesus gii-dohu dogomaalia mai dono hagaduadua, belee laha-mai nia dama dogologo gi dono madamada. Idimaa, go Jesus dela e-dagi digaula gi-di haga-mouli.

2:11  Mee e-haga-madammaa gi-daha nia huaidu o-nia daangada, gei digau ala gu-madammaa nadau huaidu, gu-madalia Jesus guu-hai damana gi Tamana hua-e-dahi. Jesus hagalee langaadia i dana haga-ingoo digaula bolo nia duaahina ni-oono.

2:12  Mee ga-helekai, “Meenei God, Au ga-hagi-anga gi ogu duaahina au mee ala ne-hai, ga-hagaamu Goe i-lodo nadau dagadagabuli!”

2:13  Mee e-helekai labelaa, “Au ga-hagadagadagagee gi God.” Mee e-helekai labelaa, “Deenei au, e-noho madalia nia dama ala ne-dugu-mai go God gi-di-Au.”

2:14  Nia daangada aanei le e-haga-ingoo go Mee bolo nia dama, aalaa go nia daangada nadau dodo mo nadau goneiga; Jesus guu-bida hai e-Ia gii-hai be digaula guu-hai tangada. Mee ne-hai di-mee deenei bolo Ia gaa-made, ga-hunahuna gi-daha a Setan, dela e-dagi di made.

2:15  Mee ne-haga-dagaloaha digau ala nogo hai nia hege i-di waalooloo o nadau mouli, idimaa, digaula nogo mmaadagu i-di made.

2:16  Di mee deenei guu-donu bolo ma hagalee go digau di-langi ala e-hagamaamaa go Mee, gei go di hagadili Abraham.

2:17  Malaa, di mee deenei guu-donu bolo Mee guu-hai be ono duaahina i-nia hagadilinga ala huogodoo, gei mee guu-hai di-nadau Dangada Aamua Hai-mee-dabu dela e-dumaalia ge manawa-dahi i dana hai-hegau gi God, belee dumaalia gi nia huaidu o-nia daangada.

2:18  Malaa, Mee e-mee di-hagamaamaa digau ala e-tale gi di hagamada, idimaa, Mee guu-kae labelaa di hagamada mo-di hagaduadua.

Chapter 3

3:1  Ogu duaahina dama Christ ala ne-hilihili go God, mmada gi-humalia gi-di hai o Jesus dela ne-hagau-mai go God gi gidaadou, belee hai tadau Dagi Aamua Hai-mee-dabu o-di hagadonu dela e-hagadele go gidaadou.

3:2  Mee nogo manawa-dahi ang-gi God dela ne-hilihili Ia belee hai tegau deenei, gadoo be Moses dela nogo manawa-dahi ang-gi dana hegau dela ne-hai ang-gi di madawaawa a God.

3:3  Tangada dela e-hau dono hale, koia e-kae dono hagalabagau laa-hongo di hale dela ne-hau go mee. E-hai gadoo be Jesus, dela koia e-tau-anga di-kae nia madamada laa-hongo Moses.

3:4  Nia daangada le e-hau nia hale, gei God e-hau nia mee huogodoo.

3:5  Moses e-manawa-dahi i-lodo di madawaawa a God, gei mee tangada hai-hegau ni God, e-haga-iloo nia mee ala ma-ga-kila-aga maalia.

3:6  Gei Christ go Tama a God e-manawa-dahi, idimaa, go Mee dela e-dagi di madawaawa a God, aalaa go gidaadou, maa gidaadou gaa-lodo hagamahi mo-di hagadagadagagee, gaa-dae-loo gi-di hagaodi.

3:7  Di Hagataalunga-Dabu e-helekai, “Maa goodou gu-longono di lee o God dangi-nei,

3:8  gei hudee haga-hamaaloo-ina godou lodo hai-baahi gi God, be godou maadua-mmaadua i-di madagoaa dela nogo hai-baahi gi God i-lodo di anggowaa i dahi laangi ne-hagamada a-Mee.

3:9  God gu-helekai boloo, ‘Ma e-aha maa godou maadua-mmaadua guu-mmada gi agu mee ala nogo hai i-lodo nia ngadau e-madahaa, gei digaula e-hagamada-hua Au.’

3:10  Gei Au gu-hagawelewele gi digaula, ga-helekai, ‘Digaula e-huli gi-daha mo Au i-nia madagoaa huogodoo, gei e-hagalee hagalongo gi agu haganoho.’

3:11  Au gu-hagawelewele, guu-hai dagu hagababa mau-dangihi boloo, ‘Digaula hagalee-loo e-ulu gi-lodo tenua dela ne-hagababa ko-Au belee hagamolooloo-ai ginaadou.’ ”

3:12  Ogu duaahina-nei, gii-pula i goodou gi-de-hai-gee-hua dahi dangada, ga-hagalee hagadonu, gaa-hidi-iei mee gaa-huli gi-daha mo-di God Mouli.

3:13  Goodou gi-hagadau-hagamaamaa i-nia laangi huogodoo, i-di waalooloo telekai bolo go “dangi-nei” i-lodo di Beebaa Dabu e-hai mai gi gidaadou, gi-de-halahalau-hua goodou go nia huaidu gaa-hidi-ai goodou ga-hamaaloo godou manawa.

3:14  Maa gidaadou ga-haga-mau dangihi tadau hagadagadagagee dela ne-hai-mee ginai gidaadou mai-loo i-taamada, gaa-dae-loo gi-di hagaodi, malaa, gidaadou gaa-dau madalia a Christ.

3:15  Di Beebaa-Dabu gu-helekai, “Maa goodou gu-longono di lee o God dangi-nei, hudee haga-hamaaloo-ina godou lodo, be godou maadua-mmaadua i-di madagoaa dela nogo hai-baahi gi God.”

3:16  Ma koai ne-longono di lee o God, gei e-hai-baahi gi Mee? Go nia daangada huogodoo ala ne-dagi-mai go Moses gi-daha mo Egypt.

3:17  Ma koai ne-hagawelewele ginai a God i-lodo nia ngadau e-madahaa? Mee ne-hagawelewele gi-nia daangada ne-hai di huaidu, ala ne-mmade i-lodo di anggowaa.

3:18  God guu-hai dana hagababa mau-dangihi, “Digaula hagalee-loo e-ulu gi-lodo tenua dela ne-hagababa ko-Au belee hagamolooloo-ai digaula!” Ma koai ala e-helehelekai-iei Mee? Go digau de-hagalongo.

3:19  Gidaadou e-mmada gi digaula ala gu-deemee di ulu i tenua deelaa, idimaa, digaula hagalee hagadonu.

Chapter 4

4:1  God la-gu-hagababa bolo gidaadou e-mee di-kae di hagamolooloo dela ne-helekai-iei Mee. Gidaadou la-gi-hagamahi gii-pula i gidaadou, gi-dee doo tangada i goodou ga-deemee di-kae di hagamolooloo.

4:2  Idimaa gidaadou gu-longono di Longo-Humalia be digaula. Gei di-maa dono dahidamee gi digaula ai, idimaa digaula ne-longono-hua, gei digi hagadonu.

4:3  Gei gidaadou ala gu-hagadonu, e-kae di hagamolooloo be-di hai o dana hagababa mai gi gidaadou, dela gu-helekai, “Au gu-hagawelewele guu-hai dagu hagamodu bolo digaula hagalee-loo e-ulu gi-lodo tenua dela ne-hagababa ko-Au belee hagamolooloo-ai digaula!” Mee ne-helekai beenei, ma e-aha maa dana hegau la-guu-lawa di-hai i-di madagoaa ne-hai henuailala.

4:4  Idimaa, di gowaa dulii i-lodo di Beebaa-Dabu e-helekai i-di hidu-laangi, “Di hidu-laangi, gei God ne-hagamolooloo i ana hegau huogodoo ala ne-hai.”

4:5  Nia helehelekai aanei e-helekai labelaa i-di gowaa i-golo, boloo, “Digaula hagalee-loo e-ulu gi-lodo tenua dela ne-hagababa ko-Au belee hagamolooloo-ai digaula.”

4:6  Digau ala ne-longono di Longo-Humalia matagidagi, digi kae di hagamolooloo, idimaa, digaula digi hagadonu. Malaa, gei hunu gau i-golo gu-dumaalia-anga gii-kae di hagamolooloo.

4:7  Di mee deenei la-gu-haga-modongoohia-aga go-di haganohonoho a God bolo di laangi labelaa e-dahi i-golo e-haga-ingoo bolo “dangi-nei”. I-muli-hua nia ngadau e-logowaahee, gei God la-gu-helekai di-maa gi David, i-lodo nia helekai agoago guu-lawa di-hihi boloo, “Maa goodou gu-longono di lee o God dangi-nei, hudee haga-hamaaloo-ina godou lodo.”

4:8  Maa nei bolo Joshua la-guu-wanga gi-nia daangada di hagamolooloo gii-hai be-di hagababa a God, gei God la-hagalee helekai labelaa i tuai laangi.

4:9  God la-dana laangi hua igolo e-hagamolooloo ana dama, be di laangi a God e-hagamolooloo i-di hidu-laangi.

4:10  Tangada dela ma-gaa-kae di hagamolooloo ne-hagababa go God, geia e-hagamolooloo i dana moomee, be God dela ne-hagamolooloo i ana moomee.

4:11  Gidaadou hagamahi gii-kae di hagamolooloo deelaa, gi-dee-doo-hua dahi dangada be digau de-hagadonu.

4:12  Idimaa nnelekai a God le e-mouli ge mogobuna, ge koia e-gaa i tulumanu-dauwa baahi-lua, e-tuu gi-lodo-loo gi-di gowaa dela e-heetugi-ai di mouli mo-di hagataalunga, gi-di gowaa dela e-duudagi ai nia dudaginga mo nia uga, ge e-hagi-aga di hiihai o-di manawa tangada.

4:13  Dahi mee e-ngala i-mua o God ai. Nia mee huogodoo ala i-di langi i-nua mo henuailala, le e-modongoohia i-mua o God, go Mee dela belee hagianga ginai tadau hangahaihai.

4:14  Gidaadou gi-daahia gii-mau-dangihi tadau hagadonu, dela e-haga-modongoohia-aga go gidaadou, idimaa, tadau Dagi Aamua Hai-mee-dabu go Jesus Tama a God dela guu-hana gi-mua o God.

4:15  Tadau Dagi Aamua Hai-mee-dabu, hagalee dau gi tadau paagege, deeai, gidaadou tadau Dangada Hai-mee-dabu i-golo, gu-hagamada i-nia ala huogodoo, gadoo be gidaadou, gei Mee ono huaidu ai.

4:16  Malaa, gidaadou gi-hagadagadagagee, gi-mmaanege gi-di lohongo-king o God, di gowaa iai tumaalia, e-kae di aloho mo tumaalia e-hagamaamaa gidaadou i-di madagoaa ma-ga-manawa hiihai ai.

Chapter 5

5:1  Nia dagi aamua hai-mee-dabu le e-hilihili-mai i-baahi nia daangada, gaa-wanga nadau hegau e-pono nia daangada ang-gi God, e-hai nadau wanga-dehuia mono tigidaumaha e-wwede nia hala digaula i-baahi o God.

5:2  Mee e-bagege, e-de-loaa i-nia ala e-logo, deenei-laa mee e-manawa balabala i-baahi digau manawa hamaaloo mo digau hai-hala.

5:3  Idimaa mee e-bagege, mee e-hai-loo gi-tigidaumaha, hagalee anga-hua gi nia huaidu o-nia daangada, gei gi ono huaidu labelaa.

5:4  Deai tangada e-bida hilihili ia gi-di aamua dela e-hai-mee ginai tagi aamua hai-mee-dabu ai, ma go God hua dela e-hilihili tangada e-hai tagi aamua hai-mee-dabu, gadoo be Aaron.

5:5  E-hai gadoo be Christ: Christ digi bida hilihili-aga Ia, bolo Ia e-hagadabu e-hai tangada aamua hai-mee-dabu. Go God dela ne-hilihili-aga a-Mee, ga-helekai, “Goe go dagu Dama-daane, dangi-nei gei Au guu-hai Tamana ni-oou.”

5:6  Gei mee gu-helekai labelaa i-lodo nia gowaa i-golo boloo, “Goe gaa-hai tangada hai-mee-dabu, gaa-hana-hua beelaa, gadoo be di ala o Melchizedek.”

5:7  I-lodo di mouli o Jesus nogo i henuailala, gei Mee nogo dalodalo gi-nua mo ono halidangi gi God, dela e-mee di-daa Ia gi-daha mo-di made. Idimaa Mee e-manawa hila-gi-lala ge e-donu, God gu-longono nia dangidangi a-Maa.

5:8  Ma e-aha maa Mee Tama ni God, gei Mee guu-kabe di daudali mai dono hagaduadua.

5:9  Dono madagoaa ne-aali, gei Mee guu-hai taamada o-di haga-mouli dee-odi ang-gi digau huogodoo ala e-daudali a-Mee.

5:10  God gu-haga-menege-aga a-Mee belee hai tagi aamua hai-mee-dabu, i-di ala hai-mee-dabu o Melchizedek.

5:11  Gimaadou belee helekai nia hagadilinga mee e-logo i-di mee deenei, gei di-maa e-haingadaa di haga-donu-adu, idimaa, goodou e-buna di-donu ginai.

5:12  Di madagoaa gu-waalooloo belee hai goodou digau agoago, gei deeai, goodou e-hiihai hua igolo gi tangada e-aago goodou gi-nia agoago matagidagi o-nia helekai a God. Goodou belee gai nia meegai hamaaloo, gei goodou e-gai-hua nia meegai balabala.

5:13  Tangada dela e-miami i-nia meegai balabala, la di tama hua igolo, e-de-iloo di tonu mo-di hala.

5:14  Nia meegai hamaaloo le e-humalia e-gai go digau mmaadua, ala gu-wouwou ge gu-iloo di-dugu geegee di huaidu mo-di humalia.

Chapter 6

6:1  Gidaadou gi-dugua nia agoago matagidagi o-di Longo-Humalia, gi-kae-ina nia agoago mmaadua. Gidaadou hagalee belee hagaduu labelaa di hagamau o di huli gi-daha o nnegau balumee mo di hagadonu a God,

6:2  di hagamau o-di agoago di babdais, mo-di dugu o nia lima, di hagamau o-di haga-mouli-aga digau mmade, mo di hagi-aga a God dela e-hana-hua beelaa.

6:3  Gidaadou gii-hula gi-mua. Deenei tadau mee gaa-hai, maa God ga-dumaalia.

6:4  Dehee di hai o digau ala ne-kili gi-daha nadau hagadonu, e-loomoi labelaa e-huli-hoou? Digaula nogo i-lodo di maalama o God, guu-momi di wanga-dehuia di-langi, guu-kae ngaadahi di Hagataalunga-Dabu.

6:5  Digaula gu-iloo mai nadau modongoohia humalia bolo nia helekai a God le e-humalia, ge gu-longoneia ginaadou nia mogobuna o-di madagoaa dela ma-ga-hanimoi.

6:6  Malaa, digaula guu-kili gi-daha nadau hagadonu! E-deemee-loo di-laha-mai digaula e-hagahuli hoou, idimaa, digaula guu-ala be digau ne-daudau haga-lua di Tama a God, gu-hagateetee i-mua teenua.

6:7  God e-hagahumalia nia gelegele ala e-noho mau e-doodoo ginai di uwa, ge e-haga-tomo-aga nia huwa-laagau, e-hagahumalia digau ala ne-ngalua gi-nia maa.

6:8  Maa di gelegele ga-haga-tomo-aga nia laagau duduia mo nia geinga huaidu, di gelegele le e-balumee-hua, gei God e-haga-halauwa di-maa, di hagaodi gi-muli gei di-maa gaa-dudu.

6:9  Madau ihoo hagaaloho, gimaadou e-helehelekai beenei i madau hagadagadagagee-hua adu gi goodou. Gimaadou gu-iloo bolo goodou guu-kae di maluagina koia humalia, dalia godou haga-mouli.

6:10  God le e-hai-donu huoloo, Mee hagalee de-langahia godou hegau humalia mo godou aloho i Mee, i-lodo godou hagamaamaa ne-wanga gi Mee, gei e-wanga hua igolo gi godou duaahina dama Christ.

6:11  Deenei di-madau hiihai, bolo tangada-nei mo tangada-nei gi-hagamahi, gaa-dae-loo gi-di hagaodi, gei godou mee ala e-hagadagadagagee ginai gaa-mee di-gila.

6:12  Goodou hudee hagatoo, kawe i digau ala e-hagadonu ge hagakono nadau manawa, gii-kae di mee a God dela ne-hagababa ang-gi digaula.

6:13  Di madagoaa God ne-hai dana hagababa gi Abraham, Mee gu-hagamodu bolo Ia ga-haga-gila-aga dana hagababa dela ne-hai. Di hagababa deenei ne-hai i dono ingoo donu, idimaa, go Mee hua dela e-aamua i-hongo nia mee huogodoo.

6:14  Mee ne-helekai, “Au e-hagababa-adu gi-di-goe, bolo Au ga-haga-maluagina goe, ga-haga-dogologowaahee do madawaawa.”

6:15  Abraham gu-hagakono dono manawa, guu-kae di hagababa a God dela ne-hai.

6:16  Tangada ma-gaa-hai dana hagamodu, le e-hagamodu i-di ingoo dela e-aamua i-deia, gei di hagamodu deenei la-gaa-mee di-dugu nia lagalagamaaloo huogodoo.

6:17  Idimaa God gu-hiihai e-haga-modongoohia-aga gii-donu humalia ang-gi digau ala ga-hai-mee gi-nia maluagina o dana hagababa bolo Ia hagalee huli dono manawa, malaa, Mee ne-haga-puni-anga dana hagamodu gi dana hagababa.

6:18  Di hagababa mo-di hagamodu le e-deemee di-huli, gei God e-deemee di helekai tilikai i-nia mee e-lua aanei. Gidaadou ala guu-noho baba i-baahi o Mee, gidaadou gi-maaloo, gi-daahia-hua di hagadagadagagee dela i tadau mua.

6:19  Di hagadagadagagee deenei la-go taula o tadau mouli. Taula deenei le e-duuli ge hagadagadagagee ginai, e-hana laa-lodo di gahu duuli o-di Hale Daumaha dela i-di langi, gi-lodo di gowaa dabuaahia dela e-noho-ai a God.

6:20  Jesus guu-hana gi-golo i tadau mua, guu-hai tagi aamua hai-mee-dabu gaa-hana-hua beelaa, i-di ala hai-mee-dabu o Melchizedek.

Chapter 7

7:1  Melchizedek la go di king o Salem, tangada hai-mee-dabu ni God-Aamua-Huoloo. Mee ne-heetugi gi Abraham, ga-hagahumalia a mee i-di madagoaa Abraham ne-hanimoi i tauwa, dela ne-daaligi gii-mmade nia king dogohaa.

7:2  Abraham ne-wanga gi Melchizedek dahi baahi e-madangaholu o-ana goloo ala ne-kae i tauwa. (Di ingoo o Melchizedek dono hadinga e-dahi e-hai bolo “Di King o-di Tonu”. Idimaa mee dela di king o Salem, malaa, dono ingoo e-hai dono hadinga labelaa bolo “Di King o-di Aumaalia”).

7:3  Nia maadua o-maa digi modongoohia be koai, dono hagadili e-hagalee modongoohia labelaa, gei dono laangi haanau e-de-iloo labelaa ngaadahi mo dono laangi dela ne-made-ai. Mee guu-hai-hua be tama ni God, guu-hai tangada hai-mee-dabu, gaa-hana-hua beelaa.

7:4  Goodou gu-gidee di aamua o-maa. Tadau damana-madua go Abraham guu-wanga gi mee dahi baahi e-madangaholu o-ana goloo ala ne-kae i tauwa.

7:5  Di hagadili o Levi, aalaa go digau hai-mee-dabu, gu-helekai ginai nnaganoho bolo gi-hagabudulia-mai dahi baahi madangaholu o-nia goloo digau Israel, ma e-aha maa digaula nia duaahina ni digau Israel, di hagadili o Abraham labelaa.

7:6  Gei Melchizedek hagalee di hagadili ni Levi, gei mee guu-kae dahi baahi madangaholu o-nia goloo ne-gaamai go Abraham, gu-hagamaluagina Abraham, tangada dela ne-kae di hagababa a God.

7:7  E-donu bolo tangada dela e-hagamaluagina dana dangada, la-koia e-aamua i tangada dela ne-kae di hagamaluagina.

7:8  Gei i-baahi digau o Levi, digau ala e-mmademmade e-hagabudu dahi baahi madangaholu. Gei i-baahi o Melchizedek, dahi baahi madangaholu le e-hagabudu go tangada dela e-mouli, be nnelekai di Beebaa-Dabu.

7:9  Abraham ne-dahi-aga dahi baahi madangaholu gaa-wanga gi Melchizedek, gei gidaadou e-mee di-helekai bolo Levi dela belee kae dahi baahi madangaholu, la-gu-dahi-aga labelaa ana mee,

7:10  idimaa, Levi digi haanau i-di madagoaa deelaa, dela-hua nogo i-lodo tuaidina dono damana-madua go Abraham i-di madagoaa o-mee ne-heetugi gi Melchizedek.

7:11  Nnaganoho digau Israel ne-hagamau mai i nnegau dabu o digau hai-mee-dabu o Levi. Maa nei-boloo nnegau digau hai-mee-dabu ne-donu ge dohu, gei tangada hai-mee-dabu e-gila-aga labelaa ai, mai di ala o Melchizedek hagalee mai di ala o Aaron.

7:12  Maa nnegau o digau hai-mee-dabu la-guu-huli, gei nnaganoho le e-hai gii-huli labelaa.

7:13  Tadau Dagi dela e-haga-modongoohia go nnelekai aanei, la ni tuai madawaawa, deai tangada mai di madawaawaa o-maa ne-hai tangada hai-mee-dabu ai.

7:14  Gu-modongoohia hagahumalia bolo Mee ne-haanau-mai i-di madawaawa o Judah, gei Moses digi helekai i-di madawaawa deenei i dono madagoaa ne-helekai i digau hai-mee-dabu.

7:15  Di mee deenei la-gu-modongoohia hagahumalia, tuai dangada hai-mee-dabu gu-gila-aga, e-hai gadoo be Melchizedek.

7:16  Mee hagalee ne-hai tangada hai-mee-dabu mai nnaganoho dangada, gei ne-hai go-di mogobuna o-di mouli dela e-noho-hua beelaa.

7:17  Idimaa di Beebaa-Dabu e-helekai, “Goe gaa-hai tangada hai-mee-dabu, gaa-hana-hua beelaa, i-di ala hai-mee-dabu o Melchizedek.”

7:18  Taganoho namua guu-hudu gi-daha, idimaa gu-bagege, dono hadinga ai.

7:19  Idimaa Nnaganoho Moses gu-deemee di-hai nia mee gii-donu hagatau. Gei dolomeenei di hagadagadagagee koia e-humalia la-gu-gaamai, e-laha-mai gidaadou gi-hoohoo gi God.

7:20  Di hagadagadagagee deenei, gu-haga-puni ang-gi ana hagamodu. Di hagamodu beenei ai i-di madagoaa digau i-golo ne-hai digau hai-mee-dabu.

7:21  Jesus ne-hai tangada hai-mee-dabu mai di hagamodu a God dela ne-helekai gi mee, “Dimaadua guu-hai dana hagamodu, ge hagalee huli-loo dono manawa. Goe gaa-hai tangada hai-mee-dabu gaa-hana-hua beelaa.”

7:22  Di hagamodu deenei guu-hai labelaa Jesus di hagamau o-di hagababa dela koia e-humalia.

7:23  Di hai-geegee labelaa i-golo: digau hai-mee-dabu i-golo la digau dogologo, idimaa, digaula guu-mmade, e-deemee di-duudagi-adu nadau hegau.

7:24  Gei Jesus le e-mouli gaa-hana-hua beelaa, hagalee made. Ana hegau hai-mee-dabu le e-hagalee higi gi tuai dangada.

7:25  Dolomeenei mo nia madagoaa huogodoo, gei Mee e-mee di-haga-mouli digau ala e-loomoi gi God mai i-de-Ia, idimaa Mee e-mouli gaa-hana-hua beelaa, e-dalodalo gi God i digaula.

7:26  Malaa, Jesus go tagi aamua hai-mee-dabu, dela e-mee dana haga-dohu tadau mee ala e-manawa-ai. Mee e-dabuaahia huoloo, gei ono hala be ono huaidu ai. Mee guu-dugu gi-daha mo nia daangada huaidu, gu-haga-menege-aga gi-baahi i-nua nia langi.

7:27  Mee hagalee hai be digau aamua hai-mee-dabu ala i-golo, mee hagalee hai dana tigidaumaha i-nia laangi huogodoo e-wwede ono huaidu i-mua, ga-nomuli go nia huaidu o-nia dangada. Tigidaumaha a-Maa ne-hai, la-ne-hai-hua haga-dahi ang-gi nia daangada huogodoo i dono madagoaa ne-tigidaumaha Ia ang-gi God.

7:28  Nnaganoho Moses ne-hilihili-aga nia daangada dee-dohu e-hai digau aamua hai-mee-dabu, gei di hagababa a God ne-hai i-di hagamodu la-ne-gila-aga i-muli nnaganoho, ne-hilihili Tama belee hai gi-aali gaa-hana-hua beelaa.

Chapter 8

8:1  Deenei di maanadu dogomaalia i-nia mee ala nogo helehelekai-iei gidaadou, bolo gidaadou guu-hai tadau dagi aamua hai-mee-dabu dela e-noho i-di baahi gau-donu i-di lohongo-king i-di langi,

8:2  e-hai-hegau i-lodo di Gowaa Dabuaahia Huoloo, i-lodo di hale laa-donu dela ne-hai go God, gei hagalee ne-hai go nia daangada.

8:3  Nia dagi aamua hai-mee-dabu huogodoo la-ne-dongo belee hai nadau wanga-dehuia mono tigidaumaha manu ang-gi God. Malaa, tadau Dagi Aamua Hai-mee-dabu, e-hai gii-hai dana tigidaumaha labelaa.

8:4  Maa nei bolo Mee e-noho i henuailala, gei Mee e-deemee di-hai tangada hai-mee-dabu, idimaa, ma digau hai-mee-dabu i-golo ala e-hai nia wanga-dehuia ge e-haihai nadau tigidaumaha gii-hai be nnaganoho digau o Jew.

8:5  Nnegau ala e-hai go digaula, la nia ada hua o-nia mee ala e-hai i-di langi. E-hai gadoo be Moses dela ne-haga-duu dana Hale-laa-Daumaha. God ne-helekai gi mee, “Mmada gi-humalia, heia nia mee huogodoo gii-hai be-di ada dela ne-haga-modongoohia-adu gi-di-goe i-tomo di gonduu.”

8:6  Gei dolomeenei, Jesus guu-kae di waawa-hegau o tagi aamua hai-mee-dabu, dela koia e-humalia i-nia hegau digaula, gadoo be-di hagababa dela ne-hai go Mee i-mehanga God mo ana daangada. Di hagababa deenei koia e-humalia i-di hagababa namua, idimaa, ne-hai-mai i-nia hagababa o-nia mee koia-humalia.

8:7  Maa nei bolo di hagababa matagidagi la-digi hala, di lua hagababa la-digi heia,

8:8  idimaa, God gu-gidee bolo ana dama la-gu-ihala, ga-helekai, “Di madagoaa e-dau-mai, gei Au gaa-hai dagu hagababa hoou ang-gi digau Israel mo digau Judah. Aanei nnelekai Dimaadua ne-hai.

8:9  Di hagababa deenei la-hagalee hai be-di hagababa dela ne-hai ko-Au gi nadau maadua-mmaadua i-di laangi ne-kumi nia lima digaula, ga-dagi-mai gi-daha mo Egypt, gei digaula digi daudalia di hagababa dela ne-hai gi digaula, dela dagu mee ne-de-hiihai-iei Au gi digaula.

8:10  Dolomeenei, deenei di hagababa dela gaa-hai ko-Au gi digau Israel i-nia laangi ala ga-lloomoi: Au ga-haga-honu digaula gi agu haganoho, gaa-hihi nia maa gi-lodo nia manawa digaula. Digaula gaa-hai nia dama ni-aagu, gei Au gaa-hai di God ni digaula. Aanei nnelekai Dimaadua ne-hai

8:11  Deai tangada e-aago dono ihoo ai, be e-hagi-anga gi tangada dono henua boloo, ‘Iloo Dimaadua.’ Nia daangada huogodoo, digau lligi mo digau aamua, ga-iloo-ginaadou Au.

8:12  Gei Au ga-dumaalia gi-nia huaidu digaula, ga-haga-de-langahia nia hai-hala digaula.”

8:13  Dono madagoaa ne-helehelekai i-di hagababa hoou, gei God gaa-hai di hagababa namua gii-bobo, gei nia mee ala gaa-pobo gaa-ngudu, e-limalima-hua di-hagalee.

Chapter 9

9:1  Di hagababa matagidagi la-iai nia haganoho daumaha, mo-di gowaa hai-daumaha henuailala.

9:2  Di Hale-laa ne-haga-duu-aga, di ruum mugi-daha la-di Gowaa Dabu e-dugu-ai teebele mo-di palaawaa tigidaumaha, mo-di lohongo-malama.

9:3  Di ruum mugi-lodo dela i taalinga di ruum mugi-daha, le e-haga-ingoo bolo di Gowaa Dabuaahia Huoloo.

9:4  I-lodo di gowaa dabuaahia deenei, la-iai di gowaa goolo dudu-tigidaumaha hagakala, mo Tebedebe o-di Hagababa ne-hai labelaa gi-nia goolo. I-lodo Tebedebe deenei la-iai di ulu mee-goolo dela e-dugu-ai nia ‘manna’ no-lodo, mo togodogo Aaron dela e-matilitili nia lau-laagau, mo nia baahi hadu e-lua ala ne-hihi ginai nnaganoho i dono gili.

9:5  I-hongo Tebedebe la-iai nia ada manu nau bakau, di haga-modongoohia bolo God le e-noho i-golo. Nau bakau le e-gahu di gowaa dela e-wwede-ai nia huaidu. Malaa, dolomeenei la hagalee di madagoaa e-haga-donu nia mee hagalligi huogodoo.

9:6  Deenei di hai o-di haganohonoho nia mee digau hai-mee-dabu ala e-ulu gi-lodo di ruum mugi-daha i-nia laangi huogodoo, e-hai nadau hegau.

9:7  Tagi aamua hai-mee-dabu la-hua dela e-mee di-ulu gi-lodo di ruum mugi-lodo. Mee e-hana haga-dahi i-lodo di ngadau e-dahi. Mee gaa-hana le e-kae ana dodo, e-hai dana tigidaumaha ang-gi God i ono hala, mo nia huaidu o-nia daangada ala ne-hai gei e-de-iloo-ginaadou.

9:8  Di Hagataalunga-Dabu e-agoago modongoohia-mai nia haganohonoho aanei bolo di ala dela e-hana gi-di Gowaa Dabuaahia Huoloo le e-hagalee mahuge maa di hale-laa mugi-daha le e-duu hua igolo.

9:9  Deenei di ala-mee dela e-haga-modongoohia-aga di madagoaa dolomeenei. E-haga-modongoohia bolo nia wanga-dehuia mo nia tigidaumaha manu ala e-hai gi God, e-deemee di-haga-madammaa lodo digau ala e-daumaha beenei,

9:10  idimaa, nia tigidaumaha aanei e-hai gi-nia meegai mono mee-inu, mo nia haihai haga-madammaa. Malaa, nia mee aanei huogodoo e-haga-modongoohia nia ada haganoho e-hai-hegau-ai gaa-dae-loo gi-di madagoaa a God ga-haga-duu-aga dana hagatau hoou.

9:11  Malaa, Christ gu-hanimoi, e-hai Tagi Aamua Hai-mee-dabu, ge haga-maluagina nia mee huogodoo ala gu-i tadau baahi. Di hale-laa dela ne-ulu-iei Mee, hagalee hagatau ang-gi dahi mee, e-aamua, ge madamada huoloo i-nia hale-laa o henuailala huogodoo, ge hagalee ne-hai go tangada, ge hagalee ni henuailala.

9:12  Christ ne-ulu hagadahi di hale-laa deenei gi-lodo di Gowaa Dabuaahia Huoloo belee hai dana tigidaumaha. Digi kae ana dodo-kuudi, be nia dodo-kau, go ono dodo donu hua ne-kae go Mee, belee hui gidaadou gi-di mouli dee-odi.

9:13  Nia dodo-kuudi mono dodo-kau, mono lehu damaa-kau ne-dudu, ga-haga-nonnono gi-hongo nia daangada ala gu-milimilia nadau mouli, e-haga-madammaa digaula.

9:14  Malaa, nia dodo o Christ koia e-mogobuna. Christ ne-tigidaumaha dono huaidina madammaa ang-gi God, mai di Hagataalunga-Dabu dee-odi. Nia dodo o Christ ga-haga-madammaa tadau lodo i nia daumaha balumee, gii-mee-ai gidaadou di-hai-hegau gi-di God Mouli.

9:15  Malaa, deenei-laa Christ guu-hai-mee gi tegau dela e-hagahumalia di hagababa hoou. Digau huogodoo ala ne-gahigahi-mai go God, e-kae di maluagina dee-odi dela gu-hagababa ang-gi digaula. Di mee deenei guu-mee-hua di hai, idimaa, Christ guu-made, guu-wwede nia huaidu ala ne-hai go digaula i-di madagoaa di hagababa namua nogo hai-hegau.

9:16  Maa di boloagi ga i-golo, e-hai gi-hagamodongoohia bolo e-donu bolo tangada dana boloagi la-guu-made.

9:17  Maa tangada dana boloagi le e-mouli hua igolo, di boloagi e-hagalee mogobuna. Di boloagi le e-mogobuna-hua i-muli tangada dana boloagi la-guu-made.

9:18  Dela tadinga di gila o-di hagababa matagidagi, le e-mogobuna-hua mai nia dodo.

9:19  Matagidagi, gei Moses ne-dau gi digaula nia haganoho huogodoo ala i-lodo di Beebaa-Haganoho, ga-nomuli, gei mee ga-hai-hegau gi-di lau-laagau-hisop mo nia huluhulu-siibi ala e-mmee, ga-daalo gi-lodo nia dodo kau mo kuudi, ga-unugi gi-nia wai, ga-dahi-aga, ga-hagatulutulu di Beebaa-Haganoho mo nia daangada huogodoo.

9:20  Gei mee ga-helekai, “Aanei nia dodo ala e-hagamodongoohia di hagababa dela ne-helekai-ai God bolo goodou gi-daudalia le e-donu.”

9:21  Mee ne-hagatulu labelaa di Hale-laa Daumaha mono goloo huogodoo ala e-hai-hegau no-lodo gi-nia dodo aanei.

9:22  Nnaganoho e-haga-modongoohia bolo nia mee huogodoo le e-haga-madammaa gi-nia dodo, gei di huaidu le e-wwede gi-daha gi-nia dodo.

9:23  Nia mee aanei la nia ada-mee o-nia mee donu ala i-di langi, la-ne-hai gi-haga-madammaa beelaa. Gei nia mee donu o-di langi e-haga-madammaa gi-nia tigidaumaha koia e-donu ge humalia.

9:24  Idimaa, Christ la-digi ulu gi-lodo di Gowaa Dabu dela ne-hai go tangada, di mee deenei la di ada-mee-hua ni-di mee dela e-donu. Mee ne-ulu i-di langi i-di gowaa dela e-noho-iei Mee dolomeenei i-baahi o God, e-hagamaamaa gidaadou.

9:25  Tagi aamua hai-mee-dabu o Jew e-ulu gi-lodo di Gowaa Dabuaahia Huoloo i-nia ngadau huogodoo, e-kae nia dodo manu, gei Christ digi ulu nnolongo e-logo belee tigidaumaha Ia.

9:26  Maa nei bolo ne-hai beenei, gei Mee ne-belee hagaduadua i-nia holongo e-logo mai taamada henuailala. Gei deeai, Mee ne-hanimoi-hua haga-dahi, hoohoo gi-di hagaodi gi-muli o-nia hagadili o-nia madawaawa ala nogo hagadau mai i-mua. Mee ne-hanimoi belee tigidaumaha Ia, e-daa gi-daha nia huaidu.

9:27  Ma-guu-lawa di-haga-noho bolo tangada le e-made-hua haga-dahi, ga-nomuli, gaa-kae di hagi-aga i-baahi o God.

9:28  E-hai gadoo be Christ dela ne-tigidaumaha-hua Ia haga-dahi belee wwede-ai nia huaidu o-nia daangada dogologowaahee. Gaa-lawa, ga-hanimoi labelaa haga-lua, hagalee wwede labelaa nia huaidu, e-haga-mouli digau ala e-talitali a-Mee.

Chapter 10

10:1  Nia haganoho digau o Jew la nia ada-mee-hua, hagalee go nia mee donu. Ma go nia ada-mee hua ala e-haga-modongoohia nia mee humalia ala ga-lloomoi maalia. Gei nia tigidaumaha le e-tataanga i-nia ngadau huogodoo gaa-hana-hua beelaa. Malaa, nia haganoho mai nia tigidaumaha le e-dohu dogomaalia behee nia daangada ala e-loomoi gi God?

10:2  Maa nei bolo e-donu bolo di hai-daumaha o-nia daangada ang-gi God le e-hagamadammaa nadau ihala, digaula gu-nadau ihala ai, gei nia tigidaumaha la-gu-hagalee hai.

10:3  Gei deeai, tigidaumaha dela e-haihai i-lodo nia ngadau huogodoo, di mee e-haga-langahia nadau huaidu ala ne-haihai.

10:4  Idimaa, nia dodo-kau mo nia dodo-kuudi, e-deemee di-daa gi-daha nia huaidu o-nia daangada.

10:5  Malaa, deenei tadinga a Christ i-mua dono madagoaa ne-hanimoi gi henuailala, Mee ne-helekai gi God boloo: “Goe hagalee hiihai gi tigidaumaha mo-di wanga-dehuia dela e-hai gi-nia manu, gei Goe ne-hagatogomaalia tuaidina mai gi-di-Au.

10:6  Goe e-hagalee tene gi-nia wanga-dehuia manu ala e-dudu haga-dogomaalia i-hongo di gowaa dudu-tigidaumaha, belee wwede nia huaidu.

10:7  Gei-Au ga-helekai gi Mee: ‘Deenei Au, Meenei God, Au belee hai do manawa, gii-hai be nnelekai ala guu-lawa di hihi gi-lodo di Beebaa-Haganoho.’ ”

10:8  Matagidagi, gei Mee ne-helekai boloo, “Goe hagalee hiihai be e-manawa-tene gi tigidaumaha mo-di wanga-dehuia dela ne-hai gi-nia manu ala e-dutudu i-hongo di gowaa dudu tigidaumaha belee wwede nia huaidu.” Mee ne-helekai nia mee beenei, ma e-aha maa nia tigidaumaha huogodoo le e-hai gii-hai be nnaganoho.

10:9  Mee ne-helekai nomuli, “Deenei Au, Meenei God, Au belee hai do manawa.” Malaa, God guu-kili gi-daha nia tigidaumaha namua, gu-haga-noho-aga tigidaumaha hoou a Christ gi nadau lohongo.

10:10  Idimaa Jesus Christ gu-haga-gila-aga di manawa o God, gei gidaadou huogodoo gu-madammaa gi-daha mo tadau huaidu, idimaa, Mee gu-tigidaumaha dono huaidina hagadahi mai gi gidaadou huogodoo.

10:11  Digau hai-mee-dabu o Jew huogodoo e-hai-hegau i-nia laangi huogodoo, e-hai nadau tigidaumaha lahua i-nia holongo e-logo, malaa, nia tigidaumaha digaula e-deemee-loo di-wwede nia huaidu.

10:12  Christ ne-tigidaumaha haga-dahi hua, tigidaumaha deenei le e-mogobuna di wwede nia huaidu, nomuli gei Mee guu-noho i-di baahi gau-donu o God.

10:13  Deelaa di gowaa a-Mee e-talitali dolomeenei, gaa-dae-loo gi-di madagoaa God gaa-dugu ono hagadaumee gi-lala gadoo be di llanga ono babaawae.

10:14  Tigidaumaha deenei ne-hai-hua haga-dahi, dela ne-hai digaula gii-dohu dogomaalia gaa-hana-hua beelaa, go digau ala e-haga-madammaa gi-daha nadau huaidu.

10:15  Di Hagataalunga-Dabu gu-haga-modongoohia-mai gi gidaadou nia mee aanei, Mee ne-helekai matagidagi boloo,

10:16  “Di Maadua e-helekai, ‘Deenei di hagababa dela gaa-hai ko-Au gi digaula i-nia laangi ala ga-loomoi, gei Au ga-haga-honu digaula gi agu haganoho, gaa-dugu nia maa gi-lodo nia manawa digaula, gaa-hihi nia maa gi-lodo nadau maanadu.’ ”

10:17  Mee ne-helekai labelaa boloo, “Au ga-haga-de-langahia nia hagadilinga huaidu ala nogo hai go digaula.”

10:18  Di madagoaa nia huaidu aanei gu-maahede, gei tigidaumaha dela belee wwede nia huaidu la-hagalee hai labelaa.

10:19  Ogu ihoo hagaaloho, gidaadou gu-dagaloaha di-ulu gi-lodo di Gowaa Dabuaahia Huoloo mai di made o Jesus.

10:20  Christ gu-huge-mai gi gidaadou dahi ala hoou ge mouli, e-moe-adu, gu-ihaa i-baahi i-golo di gahu duuli di gowaa deelaa, guu-dau-adu gi-di Gowaa Dabuaahia Huoloo, di ala deenei la-go dono huaidina.

10:21  Malaa gidaadou gu-iai tadau Dangada hai-mee-dabu aamua, e-dagi di hale o God.

10:22  Deenei-laa, gidaadou gi-mmaanege-adu gi God i-di manawa madammaa mo-di hagadonu e-donu. Tadau manawa daamaha mo tadau huaidina huaidu guu-lawa di-gaugau gi-nia wai madammaa.

10:23  Gidaadou gi-daahia gii-mau tadau hagadagadagagee dela nogo haga-modongoohia go gidaadou, idimaa, gidaadou e-mee di hagadagadagagee gi God, e-dadaahi dana hagababa.

10:24  Gidaadou gi-hagadau hagamaamaa i-di haga-modongoohia-aga tadau aloho, mo tadau hangaahai humalia huogodoo.

10:25  Gidaadou gi-hudee dugua tadau hai dagadagabuli, be-di hai o hunu daangada. Gei gidaadou gi-hagamahi hagamaaloo-ina-aga tangada-nei mo tangada-nei, idimaa, goodou gu-iloo bolo di Laangi o Tagi la-gu-hoohoo-mai.

10:26  Maa gidaadou gaa-unu-hua i-lodo nia huaidu i-muli tadau maalama gi-nia agoago ala e-donu, gu-deai dahi tigidaumaha labelaa e-mee di-haga-madammaa gidaadou gi-daha mo nia huaidu ai,

10:27  di-mee i-golo, go gidaadou e-talitali mmaadagu di hagi-aga mo nia mahi o-di ahi dela gaa-dudu digau ala e-hai-baahi ang-gi God.

10:28  Maa tangada ga-de-hagalongo gi Nnaganoho Moses, ia e-daaligi gii-made maa ia gu-hagi-aga i-nia hagadootonu o-nia daangada dogolua be dogodolu bolo mee gu-ihala, geia e-deemee di-dumaalia ginai.

10:29  Malaa goodou e-hagamaanadu bolo-aha gi tangada dela e-haga-balumee Tama a God? Tangada deelaa, e-hagahuaidu nia dodo o-di hagababa hoou, ala ne-haga-madammaa ia, ge e-haganneennee di Hagataalunga mo dono dumaalia. Tangada beenei le e-hagaduadua damanaiee!

10:30  Gidaadou gu-iloo be di-maa ko-ai ne-helekai, “Au ga-hai-baahi gi-tongaadahi gaa-hui gi-muli,” gei Mee gu-helekai labelaa, “Dimaadua ga-hagi-aga ana daangada.”

10:31  E-hagamadagudagu-dangada huoloo maa tangada gaa-doo gi-lodo nia lima o-di God Mouli!

10:32  Goodou gi-langahia godou hangaahai i-lodo nia laangi ne-too gi-daha. I-lodo nia laangi aalaa, i-muli di maalama a God ne-haga-maalama goodou, gei nia haingadaa e-logo gu-tale-adu gi goodou, gei goodou gu-mau-dangihi i-lodo di madagoaa haingadaa, digi magedaa.

10:33  Hunu madagoaa nia daangada e-haga-balumee goodou i-mua teenua, gei e-haga-huaidu goodou. Hunu madagoaa gei goodou gu-hiihai e-buni-anga gi digau ala guu-kae nia hagadilinga hagaduadua beenei.

10:34  Goodou guu-kae di hagaduadua o digau lawalawa. Di madagoaa godou maluagina ne-daa gi-daha mo goodou, gei goodou gu-hagakono i-di manawa tene, i goodou gu-iloo bolo goodou gu-hai-mee gi-nia mee koia e-humalia gaa-hana-hua beelaa.

10:35  Hudee diagia godou manawa maaloo, idimaa, godou manawa-maaloo la-iai dono hui damana.

10:36  Goodou e-hai-loo gi-hagakono godou manawa, gei goodou gaa-mee di-haga-gila-aga di manawa o God, ga-hai-mee gi ana mee ala guu-lawa dana hagababa adu gi goodou.

10:37  Di Beebaa-Dabu e-helekai boloo, “Di madagoaa-hua dulii i-golo, gei Mee dela e-hanimoi, la-ga-dau-mai, Mee hagalee duai.

10:38  Agu daangada ala e-donu ga-hagadonu ga-mouli. Maa tangada i digaula gaa-huli gi-daha mo dono hagadonu, Au hagalee-loo e-tene ginai.”

10:39  Gidaadou hudee huli gi-daha mo tadau hagadonu, gi-dee-nngala. Gidaadou gu-iai tadau hagadonu, gei gu-hagamouli.

Chapter 11

11:1  Di hagadonu le e-iloo modongoohia nia mee ala e-hagadagadagagee ginai, ge e-modongoohia nia mee e-de-gidee.

11:2  Di hagadonu dela nogo daudali go tadau maadua-mmaadua guu-hai digaula gii-kila humalia i-baahi o God.

11:3  Di hagadonu dela ga-iloo-gidaadou bolo di langi mo henuailala la-ne-hai gi-nia helekai a God. Malaa, nia mee ala e-gidee gidaadou, la-ne-hai-mai i-nia mee ala e-de-gidee.

11:4  Di hagadonu dela ne-hai Abel gi-tigidaumaha humalia i tigidaumaha a Cain. Abel ne-hagadonu, gei mee guu-gila humalia, guu-donu idimaa God gu-hila-anga gi dana tigidaumaha. Mai i-di hagadonu o-maa, Abel e-helehelekai hua igolo, ma e-aha maa mee guu-made.

11:5  Di hagadonu dela ne-hai Enoch gi-hagalee made, gei guu-lahi mouli gi-baahi o God, gei tangada ne-gidee a-mee ai, idimaa, go God dela ne-lahi a-mee. Di Beebaa-Dabu e-helekai bolo i-mua dono lahi gi-di langi, Enoch nogo haga-tenetene a God.

11:6  Tangada dono hagadonu ai, le e-deemee di-haga-tenetene a God. Tangada dela e-hana gi God, geia gi-hagadonu bolo God la-i-golo, e-haga-humalia digau ala e-halahala Ia.

11:7  Di hagadonu dela ne-hai Noah gi-hagalongo gi nnelekai a God i-nia mee ala ga-lloomoi, gei digi mmada ginai. Mee ne-hagalongo gi God, gaa-hau dana waga belee haga-dagaloaha ia mo dono beneinei. Deenei la-go toloo o henuailala, gei Noah guu-donu i-mua o God mai i dono hagadonu.

11:8  Di hagadonu dela ne-hai Abraham gi-daudali nnelekai a God bolo gii-hana gi tenua dela gu-hagababa gi mee. Mee ga-hagatanga i dono henua-donu, gei mee e-de-iloo tenua dela e-hana ginai eia.

11:9  Di hagadonu o-maa dela gaa-noho-iei mee be tangada hua-gee i-lodo tenua God dela ne-hagababa ang-gi mee, i-lodo nia hale-laa, gadoo be Isaac mo Jacob ala ne-kae di hagababa la-hua mai baahi o God.

11:10  Idimaa, Abraham e-noho ge talitali di waahale dela ga-haga-duu go God, dono hagamau le e-noho-hua beelaa, dono hagaodi ai.

11:11  Di hagadonu dela ne-hai Abraham gii-hai tamana, gei mee gu-madumadua huoloo, gei dono lodo go Sarah e-dee-huwa. Abraham gu-hagadonu bolo God e-haga-gila dana hagababa.

11:12  Ma e-aha maa Abraham gu-hoohoo gaa-made, gei di hagadili o-maa le e-daamada mai tangada hua-e-dahi, ga-haga-dili ga-dogologowaahee, gadoo be nia heduu ala i-di gili di langi, mo nia gelegele ala i tongotai e-deemee di-dau.

11:13  Nia daangada huogodoo ala ne-hagadonu beenei, la-guu-mmade, gei digi kae nia mee a God ala ne-hagababa ang-gi digaula. Digaula gu-gidee mai haga-mogowaa, gu-tenetene-hua gi-nia mee ala ne-hagababa. Gei gu-haga-modongoohia bolo ginaadou digau hua mai i-daha, hagalee digau ni henuailala.

11:14  Nia hagadilinga daangada ala e-helehelekai beenei, e-haga-modongoohia bolo digaula e-halahala di-nadau henua-donu.

11:15  Digaula digi maanadua tenua dela ne-hagatanga-ai ginaadou. Maa nei bolo digaula ne-maanadu beenei, gei digaula guu-hula gi-muli.

11:16  Gei deeai! Digaula e-halahala-hua tenua dela e-kaedahi e-humalia, dela i-di langi. Gei God e-hagalee langaadia i-digau ala gaa-dugu eia bolo di God ni ginaadou, idimaa, God gu-hagatogomaalia di waahale e-noho-ai digaula.

11:17  Di hagadonu dela ne-hai Abraham gi-tigidaumaha dana dama-daane go Isaac i-di madagoaa God ne-hagamada a-mee. Abraham dela ne-hai ginai di hagababa a God, gei mee gu-togomaalia ga-tigidaumaha dana dama-daane hua e-dahi.

11:18  God gu-helekai gi mee, “O hagadili ala ne-hagababa ko-Au adu gi-di-goe le e-daamada-mai i Isaac.”

11:19  Abraham gu-iloo-ia, bolo God le e-mee-hua di-haga-mouli-aga Isaac mai i-di made. Gei gidaadou e-mee-hua di-helekai bolo Abraham guu-daa a Isaac mai i-di made.

11:20  Di hagadonu dela ne-hai Isaac gii-hai dana hagababa gi Jacob mo Esau i-di maluagina dela ga-dau-mai.

11:21  Di hagadonu dela ne-hai Jacob gi-haga-maluagina nia dama-daane Joseph i-mua dono made. Mee ne-togo gi-hongo dono dogodogo, gaa-bala gi-mua ga-daumaha.

11:22  Di hagadonu dela ne-hai Joseph gi-haga-modongoohia-aga i-mua dono made di hagatanga digau Israel gi-daha mo Egypt. Gei mee ne-haga-modongoohia labelaa di-nadau benebene dono huaidina i-muli dono made.

11:23  Di hagadonu dela ne-hai tamana mo tinana Moses gii-dugu hagammuni a Moses i-nia malama e-dolu i-muli dono haanau. Meemaa ne-mmada gi-di tama dela e-madamada, gei meemaa gu-hagalee mmaadagu nia haganoho di king.

11:24  Di hagadonu dela ne-hai Moses gi-de-hiihai i dono madagoaa ne-madua, bolo digaula gi-hudee haga-waalanga ia bolo di tama ni tama-ahina di king o Egypt.

11:25  Mee hagalee hiihai e-tene gi-di huaidu dela e-hai i-di madagoaa bodobodo, gei mee e-hiihai e-hagaduadua madalia nia dama a God.

11:26  Mee e-daumada-hua di hui dela e-hanimoi i ono mua, idimaa mee e-iloo bolo di hagaduadua kono ang-gi di Mesaia le-koia e-maluagina mogowaa i-nia maluagina hagalabagau huogodoo o Egypt.

11:27  Di hagadonu dela ne-hai Moses gi-hagatanga Egypt, gei mee hagalee madagu i-di hagawelewele o-di king. Gu-hai be mee e-gidee di God dela e-deemee di mmada ginai, gei mee digi hana gi-muli.

11:28  Di hagadonu dela ne-hidi iei mee ga-haganoho di Pasoobaa, ga-helekai bolo nia dodo gi-hunua gi-hongo nia bontai nia hale o digau Israel, bolo tangada di-langi o-di made ga-gidee-ia, ga-hagalee daaligi nia ulu-mmaadua digau Israel.

11:29  Di hagadonu dela ne-hai digau Israel gii-mee di-hula laa-lodo Tai-Mmee, gei di-maa guu-bagu be hongo-henua. Digau o Egypt ga-hagamada belee hula, gei digaula gu-mmaalemu.

11:30  Di hagadonu dela ne-hidi-ai nia abaaba di waahale Jericho ga-mooho, i-muli digau Israel ne-haganiga di waahale deenei i-nia laangi e-hidu.

11:31  Di hagadonu dela ne-hidi-ai di ahina mouli huaidu go Rahab ga-dagaloaha, idimaa, mee ne-benebene digau hagadina hagammuni, gei mee digi dau madalia digau de-hagalongo ala ne-daaligi.

11:32  Au belee helekai hua igolo? Dogu madagoaa ai, e-helekai i Gideon, Barak, Samson, Jephthah, David, Samuel, mo nia soukohp.

11:33  Mai di hagadonu dela ne-hidi-ai digaula ga-heebagi gi-nia henua huogodoo ala i-golo, ga-maaloo. Digaula guu-hai nia mee ala e-donu, guu-kae nia hagababa a God ang-gi digaula. Digaula guu-pono nia ngudu nia laion.

11:34  Digaula gu-diinai nia ahi maaloo, gu-hagalee tale gi taaligi hulumanu-dauwa. Digaula guu-lodo paagege, gei gu-maaloo. Digaula e-maaloo i-lodo tauwa, gu-daaligi digau-dauwa tuadimee.

11:35  Mai i-di hagadonu, nia ahina guu-lahi nadau gau mmade ne-mouli-aga labelaa gi-daha mo-di made. Hunu daangada hagalee hiihai e-haga-dagaloaha, digaula guu-mmade i-di hagaduadua, bolo gi-mouli-aga ginaadou i-di mouli mada-humalia.

11:36  Hunu ginaadou ne-haga-mmaemmae ga-haga-mamaawa, ge hunu gau ne-lawalawa, ne-kili gi-lodo di hale-galabudi.

11:37  Hunu gau ne-dilidili, hunu gau ne-duuduu gi-nia dowaa, hunu gau ne-daaligi gi nnulumanu-dauwa, hunu gau ne-haga-ulu gi-nia gili manu-siibi mono gili manu-kuudi. Hunu gau ne-hai gi-hagaloale, ge e-hagaduadua hagahuaidu, ge hagalee benebene haga-humalia.

11:38  Henuailala la hagalee humalia gi digaula. Digaula guu-hula, gu-heehee-hua i-lodo nia anggowaa mo i-hongo nia gonduu, ge noho i-lodo nia bongoo hadugalaa mono bongoo i-lodo di gelegele.

11:39  Malaa, nia daangada aanei huogodoo gu-modongoohia bolo ginaadou digau humalia mai i nadau hagadonu. Gei digaula la-digi kae di mee a God dela ne-hagababa-anga,

11:40  idimaa God guu-hai dana hagatau dela koia e-humalia mai gi gidaadou, bolo digaula la-gi-madalia gidaadou, gei digaula gaa-dohu dogomaalia.

Chapter 12

12:1  Mai gi gidaadou, iai digau hagadootonu dogologo deenei i tadau baahi, malaa, gidaadou gi-kilia gi-daha nia haga-deaadee mo nia huaidu ala e-lawalawa gidaadou. Gidaadou gii-hai digau e-llele hagamahi i-di hoiaa i tadau mua.

12:2  Gidaadou gi-daumada-ina-hua a Jesus, go Mee dela go taamada mo-di hagaodi o tadau hagadonu. Mee e-de-hei-eia dono hagaduadua i-di loobuu. Idimaa di tene dela e-talitali a-Mee, gei Mee e-de-hei-eia dono haga-langaadia i dono made i-di loobuu. Dolomeenei gei Mee guu-noho i-di baahi dau-donu di lohongo-king o God.

12:3  Goodou gi-hagamamaanadu-ina dono hai ne-hagaduadua-ai, mo dono hagakono dono manawa i-nia haganneennee digau huaidu! Malaa, hudee manawa paagege ge hudee kilia gi-daha godou hagadonu.

12:4  I-di godou hai-baahi gi-di huaidu, gei goodou digi tale gi-di made.

12:5  Goodou gu-de-langahia nnelekai hagamaaloo a God ne-hai-adu gi goodou, be tangada e-helekai gi ana dama? Mee ne-helekai boloo, “Dagu dama-daane, hagalongo ang-gi Dimaadua ma-gaa-hai goe gii-donu, hudee manawa bagege gi ana aago goe.

12:6  Idimaa, Dimaadua e-haga-donu digau huogodoo ala e-aloho-ai, gei e-hagaduadua nia daangada huogodoo ala guu-hai ana dama.”

12:7  Goodou hagakono i-di hagaduadua be di-godou hagaduadua mai godou damana. Di-godou hagaduadua e-haga-modongoohia bolo God guu-hai goodou nia dama ni-aana. Ma di tama i-golo e-hagalee daaligi go dono damana?

12:8  Maa goodou digi kae di hagaduadua be ana dama huogodoo, malaa, goodou hagalee nia dama donu ni Mee.

12:9  Di hai o tadau damana henuailala e-hagaduadua gidaadou, gei gidaadou e-hagalabagau digaula. E-hai behee? Ma hagalee koia e-humalia maa gidaadou gaa-dugu gidaadou gi Tamana hagataalunga, ga-mouli?

12:10  Tadau damana henuailala e-hagaduadua gidaadou i-di madagoaa bodobodo, di-mee e-donu ginai digaula e-hai. Gei God e-hagaduadua gidaadou belee hagahumalia gidaadou, bolo gii-dabu gidaadou be Ia dela e-dabu.

12:11  Di madagoaa gidaadou ma-ga-hagaduadua, gei gidaadou e-hai bolo ma di-mee e-hai gidaadou gi manawa-gee, hagalee tenetene. Di madagoaa maalia, ginaadou ala nogo aago gi-di hagaduadua beelaa, gaa-hagi di hui di aumaalia o-di mouli e-donu.

12:12  Malaa, dahi-aga-ina godou lima ala gu-maanu, haga-maaloo-ina-aga godou duli ala e-bolebole.

12:13  Taele i-hongo nia-ala huudonu, gii-hili nia wae ala e-deemee di-heehee gi-haele.

12:14  Hagamada gii-noho i-di aumaalia i-baahi nia daangada huogodoo, gi-mouli i-di mouli dela e-dabu, idimaa, tangada e-mee di-mmada gi Tagi ai maa ia hagalee dabu i-lodo dono mouli.

12:15  Gii-pula i goodou, gi-dee huli gi-daha mo tumaalia o God. Hudee hai be di laagau mmala, dela e-tomo-aga, e-hai nia haingadaa e-logo i dono poisin.

12:16  Goodou hudee mouli milimilia, ge hudee de-hiihai gi God be di hai o Esau, dela ne-hui gi-daha ono mogobuna dagi ulu-madua gi-di pileedi meegai.

12:17  Goodou gu-iloo di mee dela ne-hai nomuli, mee gu-hiihai e-kae ono maluagina mai baahi dono damana, gei gu-deemee, idimaa mee digi gidee di ala dela e-huli dana mee dela ne-hai, ma e-aha mee nogo halidangi i dana halahala.

12:18  Goodou digi lloomoi be digau Israel gi-di Gonduu Sinai, gi-longono-goodou di ulaula, mo-di bouli dongoeho mo dono madangi maaloo,

12:19  mo-di lee damana o-di ‘trumpet’ mo-di longono di lee gu-gila-aga. Di madagoaa nia daangada ne-longono di lee deelaa, gei digaula gu-tangitangi hagamahi, bolo gi-de-longono labelaa di lee deenei,

12:20  idimaa, digaula e-deemee di-kae nia helekai ala e-hai boloo, “Di manu ma-gaa-tale gi-di gonduu deenei, le e-dilidili gii-made.”

12:21  Di ada deenei koia e-hagamadagudagu-dangada, ne-hidi-ai Moses ga-helekai, “Au gu-madagu huoloo, ge gu-bolebole!”

12:22  Malaa, goodou ne-loomoi gi-di Gonduu Zion, di waahale o di God Mouli, go Jerusalem dela i-di langi, e-honu digau di-langi dogologowaahee.

12:23  Goodou gu-lloomoi gi-di hagabuni hagatenetene o-nia ulu-mmaadua dama-daane a God, ala guu-lawa di-hihi nadau ingoo i-di langi. Goodou gu-lloomoi gi-baahi o God, tangada gabunga o-nia daangada huogodoo, gi-baahi labelaa nia hagataalunga daangada humalia ne-hai gii-dohu hagatau.

12:24  Goodou gu-lloomoi gi Jesus dela ne-haga-noho di hagababa hoou, gu-lloomoi labelaa gi-nia dodo ala ne-llingi-anga, ala e-hagababa nia mee koia e-humalia i-nia dodo o Abel.

12:25  Deenei-laa, goodou-nei gi-de-haga-balumee-hua Tangada dela e-helehelekai-adu gi goodou. Idimaa, digau ala nogo haga-balumee tangada dela nogo hagadonudonu nnelekai a God i henuailala, digaula digi dagaloaha. Malaa, gei gidaadou ga-dagaloaha behee maa gidaadou ga-haga-balumee Tangada dela e-helehelekai mai i-di langi?

12:26  Dono lee gu-haga-ngalua henuailala i-di madagoaa deelaa. Dolomeenei ge-Ia guu-hai dana hagababa boloo, “Au gaa-hai labelaa di haga-ngalua deenei, hagalee go henuailala la-hua, mo-di langi i-nua labelaa.”

12:27  Nnelekai bolo “Au gaa-hai labelaa” e-haga-modongoohia madammaa bolo nia mee ala ne-hai ga-ngalungalua ga-hagalee, gei nia mee ala e-deemee di-ngalungalua gaa-dugu hua igolo.

12:28  Gidaadou gi-danggee i gidaadou guu-kae tenua dela e-deemee di-ngalungalua. Gidaadou gi-hagaamuina God, mo-di daumaha i-di ala dela e-hiihai ginai Mee i-di hagamadagudia,

12:29  idimaa, tadau God lago di ahi dela e-dudu gii-wele.

Chapter 13

13:1  Gi-daahia-hua di-godou hagadau-aaloho be nia dama a Christ.

13:2  Gi-langahia gi-benebene-ina digau mai i-daha gi godou hale, hunu daangada ne-hai beelaa, gei digaula ne-benebene digau di-langi, gei digi iloo bolo ma digau di-langi.

13:3  Gi-langahia digau ala i-lodo nia hale galabudi. Gi-maanadua bolo goodou e-madalia digaula. Gi-langahia labelaa digau ala e-hagaduadua kono. Gi-maanadua bolo goodou e-duadua be digaula.

13:4  Goodou huogodoo e-hai-loo gi-hagalabagau tabuaahia o taga-hai-lodo. Nia daane mo nia ahina hai-lodo gi-hagadaubuni, hagadau hagalaamua. God le e-hagi-aga tangada mouli be-di manu ge huaidu.

13:5  Goodou gi-hudee aloho i-nia bahihadu, gii-dohu-hua gi godou mee ala gu-i-golo, idimaa, God gu-helekai, “Au hagalee diiagi goe, be e-hudu goe gi-daha.”

13:6  Gidaadou la-gi-maaloo i tadau helekai, “Dimaadua la-go dogu hagamaamaa, au hagalee madagu. Ma di-aha dela e-mee di-hai go tangada mai gi-di-au?”

13:7  Gi-langahia digau agoago namua ala nogo hagi-ngudu-adu gi goodou nnelekai a God. Gi-hagabaubau-ina nia hanga-mouli digaula, mo nadau mmade, goodou gi-daudalia nadau hagadonu.

13:8  Jesus Christ e-hai hua be di mee e-dahi anaahi, dangi-nei, gaa-hana-hua beelaa.

13:9  Hudee dumaalia-anga gi-nia agoago hua-gee tilikai gi-dagi-ina goodou gi-daha mo-di ala dela e-donu. Di mee dela e-humalia adu gi godou hagataalunga, daudalia-hua tumaalia o God, hagalee go nia haganoho o-nia meegai. Idimaa, tangada dela ma-ga-hagalongo gi-nia haganoho aanei, deai dono humalia e-kae ai.

13:10  Digau hai-mee-dabu o Jew ala e-ngalua i-lodo di Hale Daumaha, nadau donu ai di-gai tigidaumaha dela e-hai i-hongo tadau gowaa dudu-tigidaumaha.

13:11  Tagi aamua hai-mee-dabu o Jew e-kae nia dodo-manu gi-lodo di Gowaa Dabuaahia Huoloo belee hai tigidaumaha, e-wwede nia huaidu, gei nia huaidina o-nia manu le e-dudu i-tua di waahale.

13:12  Deelaa tadinga Jesus ne-made labelaa i-tua di waahale, belee haga-madammaa nia huaidu o-nia daangada gi ono dodo-donu.

13:13  Gidaadou gii-hula gi mee dela i-tua di waahale, e-madalia a-Mee i dono haga-langaadia.

13:14  Idimaa, gidaadou tadau waahale e-noho-hua-beelaa i henuailala ai, gidaadou e-halahala di waahale dela ga-hanimoi.

13:15  Gidaadou hagaamu-ina a God i-nia madagoaa huogodoo, e-hai-ai tadau tigidaumaha mai i Jesus, deelaa tigidaumaha e-hagalaamua di ingoo Jesus i tadau helekai.

13:16  Goodou hudee de-langahia gi-heia godou haihai humalia, hagadau-maamaa i godou mehanga, idimaa, aalaa nia hai-tigidaumaha humalia e-hiihai ginai a God.

13:17  Hagalongo gi godou dagi, gi-daudalia nia haganoho digaula, idimaa, digaula hagalee dugu di-nadau madamada humalia i godou hagataalunga, gei digaula e-hai-loo gi-haga-kila-aga nadau hegau ang-gi God. Goodou ma-ga-hagalongo gi digaula, gei digaula koia ga-tenetene i di-nadau hai nadau hegau. Goodou ma-ga-de-hagalongo, gei digaula ga-manawa-gee, ga-deemee di-hagamaamaa goodou.

13:18  Goodou gi-mua-hua di hai dalodalo i gimaadou. E-hagalongo-ia i gimaadou, bolo madau maanadu le e-madammaa-hua, idimaa, gimaadou e-hiihai e-hai nia mee ala e-donu i-nia madagoaa huogodoo.

13:19  Au e-dangi hagamahi adu gi goodou, bolo gii-hai dalodalo ang-gi God gi-limalima dana hagau-adu au gi goodou labelaa.

13:20  God dela ne-haga-mouli-aga tadau Dagi go Jesus mai i-baahi digau ala guu-mmade, go Mee dela go di hagaloohi-siibi aamua. Mai i-nia dodo o dono made, Mee ne-haga-modongoohia bolo di hagababa damana e-de-ngudu le e-donu. Di God di aumaalia gi-haga-honu-ina goodou gi-nia hagahumalia huogodoo ala e-tau-adu gi goodou e-hai dono manawa. Gei Mee gi-haga-gila-aga ina di hiihai o dono manawa i tadau baahi, mai baahi o Jesus Christ, e-haga-tenetene a-Mee. Di madamada ang-gi Christ gii-hana-hua beelaa. Amen.

13:21  God dela ne-haga-mouli-aga tadau Dagi go Jesus mai i-baahi digau ala guu-mmade, go Mee dela go di hagaloohi-siibi aamua. Mai i-nia dodo o dono made, Mee ne-haga-modongoohia bolo di hagababa damana e-de-ngudu le e-donu. Di God di aumaalia gi-haga-honu-ina goodou gi-nia hagahumalia huogodoo ala e-tau-adu gi goodou e-hai dono manawa. Gei Mee gi-haga-gila-aga ina di hiihai o dono manawa i tadau baahi, mai baahi o Jesus Christ, e-haga-tenetene a-Mee. Di madamada ang-gi Christ gii-hana-hua beelaa. Amen.

13:22  Ogu duaahina-nei, au e-dangi-adu gi goodou gi-hagakono, gi-hagalongo gi agu agoago hagamaaloo-aga goodou, idimaa, dagu lede ne-hihi la-hagalee looloo.

13:23  Au e-hiihai bolo goodou gi-iloo bolo tadau duaahina go Timothy la-gu-ulu gi-daha mo-di hale-galabudi. Maa mee ga-limalima-mai gi-di-au, gei gimaua ga-lloo-adu gi godou baahi.

13:24  Hagadae-ina di-madau hagaaloho gi godou dagi huogodoo, mo nia dama a God huogodoo. Nia dama a Christ ala i Italy e-hagau-adu nadau hagaaloho gi goodou.

13:25  Tumaalia o God gii-noho madalia goodou huogodoo.