LinVB - Hebrews

Chapter 1

1:1  na ndéngé míngi mpé mbala na mbala, kala, Nzámbe alobáká na bankóko ba bísó na monoko mwa baproféta.

1:2  Kasi o mikolo miye mya nsúka tozali, ayéí koloba na monoko mwa Mwána wa yě oyo atié nkolo ya biloko binso mpé oyo akeli molóngó mobimba.

1:3  Yě azalí Mwínda mongengísí nkémbo ya Nzámbe, alakísí elongi ya yě mobimba ; yě akozalisaka bilóko bínso na liloba lya yě ntá bokási. Awa asúkísí bokonzi bwa masúmu, akeí kofánda o lobóko la mobáli la Mokonzi Nzámbe o likoló.

1:4  Alekí bǎ­nzelú na ngúyá, alekí nkómbó ya bangó na nkémbo !

1:5  Mokolo mǒkó té Nzámbe alobákí na ǎnzelú mǒkó ’te : Yǒ ozalí Mwána wa ngáí, nabótí yǒ leló, tǒ : Nakozala tatá wa yě, yě akozala mwána wa ngáí.

1:6  Kasi ntángo atíndí Mwána wa yě wa yambo o mokili, alobí boye : Bǎnzelú ba ngáí bánso basengélí kokúmbamela yě.

1:7  Mpô ya bǎnzelú Nzámbe alobí bo­ye : Akómísí bǎnzelú ba yě lokóla mompepe mwa ekumbaki, mpé basáleli ba yě lokóla móto mopelí makási.

1:8  Mpô ya Mwána wa yě Nzámbe alobí : E Nzámbe, ngwendé ya yǒ ekoúmela sékô ; montóngo mwa yǒ mwa bokonzi, montóngo mwa bosémbo.

1:9  Okolingaka sé bosémbo mpé okoyinaka bobé. Yangó wâná Mokonzi Nzámbe aponí yǒ, é Mokonzi, libosó lya báníngá ba yǒ, áwa apakólí yǒ mafúta ma nsáí.

1:10  Alobí mpé : E Mokonzi, o libandela okelákí mokili ; likoló lizalí mpé mosálá mwa mabóko ma yǒ.

1:11  Bîná bí­nso bikoleka sé boleki, kasi yǒ okoú­mela sékô ; bîná bínso biko­béba lokóla elambá ekobébaka.

1:12  Oko­kangisa byangó lokóla monkóto, okolongola byangó lokóla elambá ya kala. Kasi yǒ okobó­ngwana té, mibú mya yǒ mikosúka té.

1:13  Mokolo níni Nzámbe alobákí na ǎnzelú ‘te : Fándá o lobóko la ngáí la mobáli, kín’o mokolo nakokómisa bangúná ba yǒ lokóla ebó­ngá ya kotía makolo ma yǒ ?

1:14  Bôngó bǎ­nzelú bazalí banáni ? Bazalí bilímo bikosálelaka Nzámbe mpé bitíndámí kosálisa baye bakozwa libíkí.

Chapter 2

2:1  Yangó wâná tosengélí koyamba na motéma mǒkó maye basangélí bísó, sókí té tokobúngama.

2:2  Ya sôló, kala bato basengéláká kotósa Mobéko moye Nzámbe apésákí bangó na monoko mwa bǎ­nzelú ; moto abóyákí kotósa mwa­ngó, azwákí etúmbu ekokákí na yě.

2:3  Bôngó bóníbóní bísó tokokoka ko­kíma etúmbu sókó toyambí Nsa­ngo ya Libíkí té ? Krístu moto atéyákí yangó libosó. Baye bayókákí yangó na yě bayébísákí bísó ’te ezalí ya sôló.

2:4  Nzámbe apésí matéya ma bangó ngúyá na bilembo, na makamwísi mpé na bikelá ndéngé na ndéngé, mpé akabélákí bato makabo ma Elímo Sántu lokóla yě mǒ­kó alingákí.

2:5  Nzámbe atíákí bǎnzelú té lokóla bakonzi ba mokili mokoyâ nsima, moye tozalí kolobele áwa.

2:6  Moto mǒ­kó akomákí o Minkandá Misá­ntu : Moto ndé elóko níni ’te ókanisaka yě ? Mwána wa Adámu ndé náni ’te óbátelaka yě ?

2:7  Sé mwâ ntángo otíákí yě o nsé ya bǎnzelú, otóndísí yě na nkémbo mpé na lokúmu.

2:8  Otíí bí­nso o nsé ya makolo ma yě. Awa Nzámbe atíí yě Mokonzi wa bilóko bínso, elakísí ’te bilóko bínso bise­ngélí kotósa yě. Nzókandé sikáwa tomóní naíno té ’te bínso bikotósaka yě.

2:9  Kasi tomóní ’te Yézu, óyo Nzámbe atíákí mwâ mikolo o nsé ya bǎnzelú, azwí nkémbo mpé lokúmu, zambí andi­mákí koyóka mpási ya liwá, mpô ’te, na ngrásya ya Nzámbe, ákúfa mpô ya bato bánso.

2:10  Ya sôló, Nzámbe óyo azalí libandela mpé nsúka ya bilóko bínso, alingákí kokamba bána ba yě ebelé o mbóka ya nkémbo. Yangó wâná ebongakí ákómisa Yézu, mokambi wa bangó o nzelá ya libíkí, moto abongí nyê na mpási ayókákí.

2:11  Ná mosántisi ná baye bakokóma basántu babótámí na Tatá sé mǒkó. Yangó wâná abángákí té kotánga bangó bandeko ba yě,

2:12  áwa alobí : Nakoyébisa bandeko ba ngáí nkómbó ya yǒ, nakoyémbela nkómbó ya yǒ nzémbo ya lokúmu o ntéi ya lisangá.

2:13  Abakísí : Ngáí nakotía mo­téma na yě, mpé lisúsu : Nazalí áwa elongó na bána Nzámbe apé­sí ngáí.

2:14  Bôngó, áwa bána bazalí mosuni mǒkó mpé makilá mǒkó, yě mpé akómí moto lokóla bangó, mpô ’te na liwá lya yě ásílisa bokási bwa zábolo, óyo azalákí mokonzi wa liwá.

2:15  Abíkisa bôngó baye bánso bazalákí kokangema o boómbo, mpô bazalákí kobánga liwá bomoi bwa bangó mobimba.

2:16  Ya sôló, ayéí kobíkisa bǎ­nzelú té, kasi bána ba Abaráma.

2:17  Yangó wâná esengélákí ’te ákóma ndéngé yǒ kó mpe­nzá na bandeko ba yě, mpô ’te ákóma nganga Mokonzi wa motéma ngolu mpé wa lobokó, óyo akozala molobeli wa bangó o mbóka Nzámbe, mpé akofúta masúmu ma bangó.

2:18  Awa yě mǒkó ayókí mpási ya minyóko, akokí kosálisa baye bakoyókaka mpási.

Chapter 3

3:1  Bôngó, bandeko basantu, bínó bobyángamí na Nzámbe, bótó­mbola míso epái ya Yézu, yě apóstolo mpé nganga Nzámbe Mokonzi wa eyamba eye tozalí kosakola.

3:2  Atósí óyo atíndákí yě, lokóla Móze mpé akokísákí mánso matálí ndáko ya Nzámbe.

3:3  Yě alongóbání na lokúmu lolekí lokúmu loye Móze azwákí, lokóla moto óyo atóngí ndáko alekí ndáko eye na lokúmu.

3:4  Ndáko ínso ikotóngamaka na mabóko ma moto, kasi Nzámbe azalí Mozalisi wa bínso.

3:5  Móze aza­lákí sôló moto wa botósi o mánso matálí ndáko ya Nzámbe, kasi lokóla mosáleli, mpô ’te ásakola maloba maye Nzámbe alingákí koloba.

3:6  Kasi, Krístu atíámí moyángeli wa ndáko ya Nzámbe, lokola mwána wa botósi. Ndáko ya yě, ndé bísó, sókó tokobó­mba nkimia mpé litundú lya elíkyá, téé nsúka.

3:7  Yangó wâná, lokóla Elímo Sántu alobí : Sókó leló boyókí mongóngó mwa Nzámbe,

3:8  bózala mitó makási té lokóla bosáláká ntángo boto­mbókélákí yě o mokolo bomekákí yě motéma o elíkí.

3:9  Kúná bankóko ba bínó batúmólákí ngáí mpé bamekákí ngáí motéma, atâ bamónókí bikelá bya ngáí,

3:10  mibú ntúkú ínei. Yangó wâná nayókélákí bangó nkándá mpé nalobákí : Bakomíkósaka ntángo ínso kín’o mitéma, babóyákí koyéba nzelá ya ngáí.

3:11  Mpé na nkándá nalayákí ndaí : Mokolo mǒkó té bakoyíngela o esíká ya ngáí ya bopémi.

3:12  Bókéba, bandeko, o káti ya bínó moto mǒkó té álakisa motéma mabé mpô ábóya koyamba mpé átíka Nzámbe wa bomoi.

3:13  Kasi mokolo na mokolo bóléndisana mitéma, téé mikolo miye mikoúmela, mpô ’te mǒkó wa bínó té ándima lisénginyá lya lisúmu, liye lya kokóma motó makási.

3:14  Awa tokómí lisangá lyǒ kó na Krístu tosengélí kobómba elíkyá ya bísó na motéma mǒ­kó téé nsúka.

3:15  Ekomámí o Minkandá Misántu : Sókó leló boyókí mongóngó mwa Nzámbe, bózala mitó makási té lokóla bosálákí ntángo botombókélákí yě.

3:16  Baye bayókákí mpé batombóka­kí, bangó banáni ? Ezalákí baye Móze abimísákí o Ezípeti.

3:17  Mpé Nzámbe ayókélákí banáni nkándá mibú ntúkú ínei ? Ezalákí bobélé baye basumúkákí, baye bibembe bya bangó bilálákí o elíkí ?.

3:18  Alayélákí banáni ndaí ’te bakoyí­ngela o esíká ya yě ya bopémi té ? Ezalákí baye babóyákí kotósa.

3:19  Yangó wâná tomóní ’te bakokákí koyíngela o esíká ya bopémi té, mpô babóyákí koyamba.

Chapter 4

4:1  Awa elaká ya Nzámbe ya koyíngela o esíká ya yě ya bopémi ezalí naíno, tókéba ’te mǒkó wa bín­ó átíkala nsima.

4:2  Ya sôló, sé lokóla bangó, bísó mpé toyókí nsango elámu. Kasi liloba bangó bayókákí lizwě­lákí bangó litómba té, mpámba té, ntángo bayókákí lyangó, bazángákí boyambi.

4:3  Bísó bato tokoyambaka tokoyíngela o esíká ya bopémi eye Nzámbe alobákí : Na nkándá nalayákí ’te : Bakoyí­ngela o esíká ya ngáí ya bopémi té. Nzámbe asílísákí mosálá mwa yě út’o libandela lya mokili, za­mbí o esíká yǒ kó (ya Minkandá Misántu)

4:4  alobákí mpô ya mokolo mwa nsambo : Nzámbe apémí mokolo mwa nsambo, áwa asílísí misálá mya yě mínso.

4:5  O esíká esúsu totángí mpé : Bakoyíngela o esíká ya ngáí ya bopémi té.

4:6  Toyébí bôngó ’te basúsu bakoyíngela kúná, kasi baye bayókákí nsango elámu libosó bayíngélákí té, mpô babóyákí kotósa.

4:7  Yangó wâná nsima ya mbúla míngi Nzámbe aponí lisúsu mokolo mǒ­kó, mokolo mwa leló, mpé alobí na maloba maye Davídi alobáká kala, lokóla nasílí nakomí : Sókó boyókí leló mongóngó mwa yě, bókómisa mitéma mya bínó bǒ mabángá té.

4:8  Sókó Yózue ayíngísákí bangó sôló o esíká ya bopémi, mbele Nzámbe atángákí lisúsu likambo lya mokolo mosúsu nsima té.

4:9  Yangó wâná bato ba Nzámbe bakozala na mokolo mwa bopémi, mokolo mwa nsambo.

4:10  Moto ayíngélí o esíká ya bopémi, yě mpé akopéma áwa asílísí misálá mya yě, lokóla Nzámbe apémákí.

4:11  Bô­ngó tósála makási mpô tóyíngela o esíká eye ya bopémi. Moto mǒkó té ákwâ na bomekoli ndakisa ya baye babóyákí kotósa.

4:12  Liloba lya Nzámbe lizalí na bomoi mpé na ngúyá, likobéteke leká mompánga basebí bipái bíbalé ; likoyíngelaka kín’o ntá ntéi ya molímo mpé ya motéma, o minkúwa mpé o mafúta ma minkúwa. Liloba liye liyébí mpé mpósá mpé makanisi ma motéma.

4:13  Moto mǒkó té abómbámí o míso ma Oyo akosámbisa bísó ; o míso ma yě bínso bizalí polélé.

4:14  Awa tozalí na nganga Nzámbe mokonzi óyo ayíngélí o likoló, Yézu, Mwána wa Nzámbe, tosengélí kosakola eyamba ya bísó na mpíkó.

4:15  Tozalí na nganga Nzámbe mokonzi, moto ayébí botaú bwa bísó mpé akoyókelaka bísó ngolu. Bamekákí yě motéma na makambo ndéngé na ndéngé, sé lokóla bísó, kasi asálákí lisúmu té.

4:16  Yangó wâná tóbánga té kobeleme na ngwendé ya ngrásya ya Nzámbe mpô ’te áyókela bísó ngolu mpé ápésa bísó ngrásya ya yě mbala ínso tosengélí na yangó.

Chapter 5

5:1  Nganga Nzámbe nyónso aponómí o ntéi ya bato mpé atíámí lokóla molobeli wa bato o mbóka Nzámbe ; ábonzela yě makabo na mabonza mpô ya kozwa bolímbisi masúmu.

5:2  Akokí koyókela bato mawa, baye bazángí mayéle ná baye babú­ngámí, zambí yě mǒkó mpé azalí moto motaú.

5:3  Na ntína êná asengélí kokanisa masúmu ma yě mǒkó sé lokóla maye ma bato bánso, ntángo akobo­nza mabonza mpô ya kozwa bolímbisi masúmu.

5:4  Moto mǒkó té akokí komípésa mosálá moye mwa lokúmu, bobélé Nzámbe akobyánga yě lokóla abyá­ngákí Aróne.

5:5  Sé bôngó, Krístu amípésí lokúmu la bonganga Nzámbe té, sé Nzámbe apésákí yě langó ntángo alobákí : Ozalí mwána wa ngáí, nabótí yǒ leló.

5:6  Mpé epái esúsu alobákí : Ozalí nganga Nzámbe sékô, na loléngé la Melkísedek.

5:7  Ntángo azalákí o mokili moye, asá­mbé­lí na bogángi mpé na boleli na mái o míso, mpé abóndélí Nzámbe, óyo akokákí kobíkisa yě o liwá. Nzámbe andimélí yě mpô ya botósi bwa yě.

5:8  Nzókandé yě Mwána mpenzá akómí moto wa botósi na mpási ayókí.

5:9  Ntángo akokísí má­nso téé nsúka, akómí mobíkisi wa sékô wa baye bánso bakotósaka yě,

5:10  zambí Nzámbe apésí yě nkómbó ya nganga Nzámbe mokonzi na loléngé la Melkísedek.

5:11  Mpô ya likambo liye tokokí koloba míngi, kasi kolimbola mangó ezalí kwókósó, mpô bokómí koto­ngolo makambo sé malémbe.

5:12  Sôló, áwa boyékólí matéya kala, ebongókí ’te bínó mǒkó bózala batéyi. Kasi sikáwa bosengélí na moto átéya bínó matéya ma yambo ma mambí ma Nzámbe. Bokokí lisúsu na biléi makási té, bokokí sé na bomeli mabéle.

5:13  Oyo akomeleke mabéle akokí koyéba naíno matéya ma sôló té, azalí sé mwána moké.

5:14  Bobélé bakóló bakokí kolía biléi makási ; bangó bayébí kopono, mpô bakómí koyéba níni ezalí malámu mpé níni ezalí mabé.

Chapter 6

6:1  Yangó wâná tótíka naíno matéya ma yambo matálí Krístu ; tózó­ngela matéya ma ebandela lisúsu té : matéya ma bobóyi masúmu mpé ma boyambi Nzámbe,

6:2  matéya ma batísimo mpé ma botíeli bato mabóko, ma nsékwa ya bawá mpé ma mokolo Nzámbe akosá­mbisa bato sékô. Tókende libosó mpé tótála matéya makokí na bakóló.

6:3  Tala makambo tokosála sókó Nzámbe alingísí bísó.

6:4  Baye basílí bamóní mwínda mwa Nzámbe, baye bazwí makabo ma yě mpé mayéle ma Elímo Sántu,

6:5  basepélákí maloba ma Nzámbe mpé basílí bamóní ngúyá ya makambo ma eleko ya nsúka.

6:6  Sókó batíkí koyamba, bakokí kobéndama lisúsu té mpô ’te bábóngola mitéma. Mpámba té, bangó mǒkó babákí lisúsu Mwána wa Nzámbe o kurúse mpé bayókísí yě nsóni o míso ma bato bánso.

6:7  Ya sôló, sókó mabelé mamelí mái ma mbúla manókélí mangó mbala na mbala, mpé mabelé mâná mabótélí mosáli wa elanga mbuma ilámu, elakísí ’te Nzámbe abenísí mangó.

6:8  Kasi sókó mabelé maye mabótí nzúbe na nsé­ndé, bakotíka mangó nokí ; etíkálí moké bátómbela mangó bobé mpé na nsúka bátumba mangó.

6:9  Bandeko ba bolingo, atâ tolobí bôngó, toyébí ’te bozalí kolanda nzelá elekí bolámu, eye ekozwela bínó libíkí.

6:10  Zambí Nzámbe ntá bosémbo akobósana misálá mya bínó té, ná mpé bolingi bolakísí nkómbó ya yě na ndéngé bosálísí mpé bokosálisaka naíno báníngá bakrístu.

6:11  Kasi tolingí ’te mǒkó mǒkó wa bínó ázala na mpíla ndéngé yǒ kó téé nsúka mpô ’te ázwa bolámu boye tozalí kolíkya.

6:12  Bokokí kokóma goigói té, kasi bótála ndakisa ya baye bazwí bolámu bwa elakó mpô ya boyambi mpé moléndé mwa bangó.

6:13  Ntángo Nzámbe alakélákí Aba­ráma elakó, alayákí ndaí o nkómbó ya yě mǒkó, zambí moto mosúsu óyo alekí yě na bonéne azalí té.

6:14  Alobákí boye : Nalakélí yǒ ’te nakobenisa yǒ mpé nakopésa yǒ bána ebelé.

6:15  Abaráma akangákí motéma míngi mpe­nzá, bôngó azwí bolámu Nzámbe alakélákí yě.

6:16  Bato bameséní kolaya ndaí na nkómbó ya moto alekí bangó, na ndaí eye bakosílisaka ntembe o káti ya báníngá.

6:17  Nzámbe mpé aléndísákí elakó ya yě na ndaí, mpô alingákí kolakisa baye alakélákí ’te akobó­ngola mokáno mwa yě té.

6:18  Makambo maye mábalé, ná elakó ná ndaí, makokí kobóngwana té mpé malakísí ’te Nzámbe akokí kokósa bísó té. Yangó ekoléndisa bísó bato tokomíbómbaka epái ya yě mpô tóka­ngana makási na elíkyá ya libíkí.

6:19  Elíkyá eye ezalí lokóla lóngo la molímo mwa bísó, ezalí makási, ekobátela bísó mpé ekokótisa bísó o Esíká Esántusántu.

6:20  Yézu, óyo akótókí kúná libosó mpô ákamba bísó, akómí sékô nganga Nzámbe mokonzi na loléngé la Melkísedek.

Chapter 7

7:1  Zambi Melkísedek oyo, mokonzi wa Salém, nganga wa Nzámbe wa NtáLikoló, akeí kokútana na Abaráma mokolo alóngákí bakonzi basúsu o etumba, mpé abenísí yě.

7:2  Aba­ráma apésí yě eténi yǒ kó ya zómi ya bilóko bínso. Nkómbó Mel­kísedek elakísí ‘mokonzi wa bosémbo’. Aza­lí mpé mokonzi wa Salém lokóla ’te ‘mokonzi wa bobóto’.

7:3  Tatá, mamá na bankóko ba yě bayébání té. Toyébí mpé té ndéngé abótámákí mpé akúfákí. Melkísedek ôná aúlání na Mwána wa Nzámbe, azalí nganga Nzámbe sékô.

7:4  Táláni bonéne bwa moto óyo ! Abaráma, nkóko wa bísó, yě mpé apésí yě eténi ya zómi ya bilóko kitó­ko, biye abótólókí bangúná.

7:5  Mobéko motíndí ’te bána ba Lévi, baye bakómí banganga Nzámbe, basengélí kozwa eténi ya zómi ya bilóko bya bato bánso. Nzókandé bangó bazalí bandeko ba bangó, bána ba libótá lya Abaráma.

7:6  Kasi Melkísedek, atâ azalákí moto wa libótá lya Lévi té, azwákí eténi ya zómi ya bilóko bya Abaráma, mpé abenísákí óyo Nzámbe alakélákí bilakó.

7:7  Nzókandé, tose­ngélí kondima ’te moto óyo abenísákí móníngá alekí yě na bonéne.

7:8  Lisúsu : ba-Lévi bakozwaka eténi ya zómi ya bilóko bya bato, bazalí sé bato bakokúfa ; kasi ekomámí mpô ya Melkísedek ’te azalí naíno na bomoi.

7:9  Bakokí mpé koloba ’te áwa Abaráma apésákí Melkísedek eténi ya zómi ya bilóko bya yě, ezalí lokóla Lévi moto afútákí yě yangó, atâ ba-Lévi bangó mǒkó bakozwaka eténi ya zómi ya bilóko bya bato,

7:10  mpô Lévi abómbámákí naíno o nzóto ya nkóko wa yě ntángo Melkísedek akendékí kokútana na Abaráma.

7:11  Israél, ekólo ya Nzámbe, ezwákí bonganga Nzámbe bwa Lévi elongó na Mobéko. Bôngó, sókó bonganga Nzámbe bôná bozalákí nsúka ya bonganga Nzámbe, boye bobongísí mánso nyé, mpô níni Nzámbe atíí nganga Nzámbe mosúsu wa loléngé la Melkísedek, wa loléngé la Aróne té ?

7:12  Mpô sókó makambo ma bo­nganga Nzámbe mabóngwání, Mobéko mo­sengélí mpé kobóngwana.

7:13  Oyo batángí áwa azalí moto wa libótá lisúsu ; moto mǒkó té wa libótá lya yě azalákí kosála mosálá mwa altáre.

7:14  Bánso bayébí ’te Mokonzi wa bísó abótámákí o libótá lya Yúda. Ntángo Móze alobákí makambo matálí banganga Nzámbe, atángákí nkómbó ya libótá liye té.

7:15  Makambo mâná makómí polélé mpenzá, ntángo nganga Nzámbe mosúsu abimí, óyo aúlání na Melkísedek.

7:16  Akómákí nganga Nzámbe na lisálisi lya mibéko mya bato té, kasi na ngúyá ya bomoi boye bokosílaka té.

7:17  Mpô ya yě ekomámí boye : Ozalí nganga Nzámbe sékô na loléngé la Melkísedek.

7:18  Bô­ngó Mobéko mwa kala mosílí, mpô mokómí mpámba mpé mozalí lisúsu na litómba té.

7:19  Ya sôló, Mobéko mwangó mokokísákí elóko yǒ kó té. Kasi elíkyá ya sika eyéí kobima, eye epusí bolámu : mpô ya yangó tokokí kobeleme na Nzá­mbe !

7:20  Bato basúsu bakómí banganga Nzámbe mpô ya ndaí ya Nzámbe té, kasi Yézu akómí nganga Nzámbe mpô ya ndaí Nzámbe alayákí.

7:21  Ntángo aponí Yézu ázala nganga Nzámbe, Nzámbe alayí ndaí, alobí : Mokonzi alayí ndaí mpé akobóngola maloba ma yě té : Ozalí nganga Nzámbe sékô.

7:22  Yangó wâná Yézu azalí óyo akátí bondeko bwa sika bopusí bolámu.

7:23  Lisúsu : basúsu bakómákí banganga Nzámbe basengélákí kozala míngi, mpô bazalákí kokúfa, bakokákí koúmela o mosálá mwa bangó té.

7:24  Kasi bo­nganga Nzámbe bwa yě bokobóngwana té, zambí yě akoúmela na bomoi sékô.

7:25  Yangó wâná baye bakobeleme na Nzámbe na ngúyá ya yě, akokí kobíkisa bangó sékô, zambí akoúmela na bomoi sékô mpô ’te álobela bangó.

7:26  Tosengélákí na nganga Nzámbe mokonzi lokóla yě : nganga Nzá­mbe mosántu óyo azalí na likambo lyǒkó té, na mbindo mpé té ; óyo akabwání na basúmuki mpé ató­mbwámí o ntá likoló.

7:27  Yě asengélí kobonzela Nzámbe mabonza mokolo na mokolo té, lokóla banganga bakonzi basúsu bakosálaka, libosó mpô ya masúmu ma bangó mǒkó, nsima mpô ya masúmu ma bato bánso. Yézu asálá bôngó mbala yǒ kó sékô, áwa amíbonzí yě méí.

7:28  Mobéko mozalákí kolubola bato bataú o mosálá mwa nganga Nzámbe mokonzi. Kasi na ndaí eye alayákí nsima ya bopési Mobéko, Nzámbe aponí Mwána wa yě, óyo abongí nyé sékô.

Chapter 8

8:1  Ntína mpenzá ya maye tozalí koloba, yangó eye : Tozalí na nganga Nzámbe mokonzi óyo asílí afá­ndí o lobóko la mobáli la ngwendé ya Bokonzi o likoló.

8:2  Azalí mosáleli o esíká esántu, o Ema ya sôló, eye epikámí na Mokonzi yě méí, na bato té.

8:3  Nganga Nzámbe mokonzi mǒkó mǒkó apo­nómí mpô ’te ábonza makabo mpé mabonza. Yangó wâná Oyo wa bísó mpé asengélí kozala na elóko ya kobonza.

8:4  Sókó Yézu azalákí áwa o nsé, mbele azalákí atâ nganga Nzámbe té, mpô bato basúsu bazalí na mosálá mwa kobonza mabonza lokóla Mobéko motíndí.

8:5  Bangó bazalí banganga Nzámbe o esíká esántu, kasi esíká esántu êná ezalí sé elílíngí ya eye ezalí o likoló. Ntángo Móze alingákí ábongisa Ema, Nzá­mbe ayébísákí yě boye : Tálá, óbongisa bínso sé lokóla balakísákí yǒ ntángo ozalákí o ngó­mbá.

8:6  Kasi sikáwa Krístu azwí mosálá molekí lokúmu, mpô azalí mobé­mbisi wa bondeko bopusí bolámu ; bondeko boye bozalí mpé na bilakó bipusí bolámu.

8:7  Ya sôló, sókó bondeko bwa libosó bobongókí nyê, mbele basengélákí kokáta bondeko bosúsu té.

8:8  Kasi Nzámbe apálélí bato na maloba maye : Mokonzi alobí : Tálá, mikolo mikoyâ nakokáta bondeko bwa sika na libótá lya Israél mpé na libótá lya Yúda.

8:9  Bondeko bôná bokozala té lokóla bondeko nakátákí na bankóko ba bangó, mokolo nasímbákí bangó na lobóko mpé nabimísákí bangó o mokili mwa Ezípeti. Mokonzi alobí : Awa bangó mǒkó batósákí bondeko bwa ngáí té, ngáí mpé napangání na bangó lisúsu té.

8:10  Mokonzi alobí : Bondeko nakokáta na libótá lya Israél nsima ya mikolo mîná bokozala boye : Nakotía mibéko mya ngáí o makanisi ma bangó, nakokoma myangó o mitéma mya bangó, bôngó nakozala Nzámbe wa bangó, bangó bakozala ekólo ya ngáí.

8:11  O ntángo êná moto mǒkó té akotéya lisúsu móníngá wa yě, moto mǒkó té akoloba lisúsu na ndeko wa yě : « Yébá Mokonzi ! », mpô bánso bakoyéba ngáí, ná mwána moké ná moto mokóló.

8:12  Nakolímbisa mabé ma bangó, nakokanisa masúmu ma bangó lisúsu té.

8:13  Awa Nzámbe atángí ‘Bondeko bwa sika’, andimí ’te bondeko bwa libosó bokómí bwa kala. Mpé elóko ekómí ya kala, enuní, etíkálí moké élímwa.

Chapter 9

9:1  Nzókandé bondeko bwa libosó bozalákí na mibéko mpô ya milúlú mya losámbo, bozalákí mpé na esíká esántu, eye ezalí áwa o nsé.

9:2  Babongísákí éma ; o eténi eye bato bakoyíngelaka batíákí etémiseli ya mwínda, méza mpé mámpa ma mabonza ; bakotángaka esíká eye esíká esántu.

9:3  Eténi ya bíbalé, nsima ya elambá, batángí yangó ‘Esíká esántusántu’.

9:4  Kúná ezalákí altáre ya kotumba mpaka ya malási eye esálémí na wólo, ná mpé Sandúku ya Bondeko eye ezipámí mobimba na wólo. O káti ya sandúku batíákí nkéni ya wólo ezalí na manú, lí­ngénda lya Aróne liye libimísáká nkásá, ná mpé mabángá ma mibéko.

9:5  O likoló lya sandúku ya bondeko bikeko bya ba-kérubim ba nkémbo bizalákí ; mapapú ma bangó mazalákí kotandema likoló lya esíká bato bakobonzaka mabonza ma makilá mpô ya kosénge bolímbisi masúmu. Tokokí kolimbola mangó mánso áwa té.

9:6  Awa babongísákí mánso bôngó, banganga Nzámbe bazalákí koyí­ngela mikolo mínso o eténi ya libosó ya éma mpô ya kosála milúlú mya losámbo.

9:7  Kasi o eténí ya nsima bobélé nganga mokonzi azalákí koyíngela, sé mbala yǒ kó o mobú mobimba, na makilá maye asengélákí kobonzela Nzámbe mpô ’te álímbisa mabúngá ma yě mǒkó mpé ma bato basúsu.

9:8  Elímo Sántu alakísákí bôngó ’te nzelá ya esíká esántu o likoló efungwámí naíno té, tée ntángo éma ya kala ekozala lisúsu té.

9:9  Yangó ezalákí ele­mbo ya eleko eye : babonzákí makabo na mabonza maye makokí kobongisa motéma té mwa moto óyo azalákí kobonza mangó.

9:10  Makambo maye matálí bilóko bya kolía mpé bya komele, mpé milúlú mya bosukoli ndéngé na ndéngé, mazalí sé mibéko mitálí nzóto mpé mikosíla o eleko Nzámbe akobongisa molongó mwa sika.

9:11  Kasi Krístu ayéí, Yě Nganga Mokonzi wa mambí malámu makoyâ nsima. Ema ya yě ya bonga­nga Nzámbe elekí eye ya kala na bonéne, ebongí mpé nyê ; esálémí na mabóko ma bato té, lokóla ’te : ezalí eténi té ya mokili moye mokelámí.

9:12  Krístu ayíngélí o Esíká esántu sé mbala yǒ kó mpé sékô. Abo­nzí makilá ma ntaba babáli tǒ ma bána ba ngómbé té, kasi sé na makilá ma yě mǒkó azwě lí bísó libíkí lya sékô.

9:13  Kala bazalákí ko­nyakela bato ba mbindo makilá ma ntaba babáli mpé ma ngómbé, tǒ ko­bwákela bangó mputulú ya ngómbé eye batumbí. Bobélé bôngó bazalákí kosántisa mpé kopétola bangó engébéné na mibéko.

9:14  Sikáwa Krístu amíbonzí na Nzámbe bǒ libonza ntá bopéto na ngúyá ya Elímo óyo azalí sékô. Na makilá ma yě akolongola o mitéma mya bísó misálá miye mikokamba bísó o liwá mpô tókoka kokúmisa Nzámbe wa bomoi.

9:15  Yangó wâná Krístu azalí mobé­mbisi wa Bondeko bwa Sika : na liwá lya yě asikólí bato o maye basáláká o Bondeko bwa Kala, mpô ’te baye baponómí bázwa bolámu bwa sékô, boye Nzámbe alakélákí.

9:16  Sókó moto akomí monkandá mwa botíkeli bato bilóko bya yě, bakokí kozwa byangó bobélé sókó moto ôná awéí.

9:17  Ya sôló, bakondima monkandá mwa lisa­ngó bobélé nsima ya liwá lya moto akomí mwa­ngó. Ntángo azalí na bomoi bato bakokí kozwa bilóko bya yě naíno té.

9:18  Yangó wâná, bondeko bwa kala mpé bozwákí bobélé ngúyá mpô ya makilá masopámí.

9:19  Libosó Móze asakólákí mitíndo mínso mya Mobéko o míso ma bato bánso. Na nsima akamátí makilá ma bána ba ngómbé mpé ma mpatá babáli, asa­ngísí mangó na mái, na nsúki ya motá­né ngwá mpé na etápi ya izópo, mpé anyakélí búku ya Mobéko ná mpé bato bánso.

9:20  Bôngó alobí : Eye ezalí makilá ma bondeko Nzámbe akátí na bínó.

9:21  Na nsima a­nyakélí éma ná mpé bilóko bínso o esíká esántu sé makilá mâná.

9:22  Lokóla ekomámí o Mobéko, bilóko ebelé bikokóma péto na makilá : sókó makilá masopání té, bolímbisi masúmu bozwámí mpé té.

9:23  Bilóko biye bizalí lokóla bilembo bya biye bizalí o likoló bisengélákí kopé­twama bôngó. Yangó wâná bilóko bya likoló bisengélí na mabonza malekí maye ma mokili moye.

9:24  Ya sôló, Krístu ayíngélí o esíká esántu ya nsé eye té, eye etóngámí na mabóko ma bato, mpé ezalí sé ele­mbo ya esíká esántu ya sôló. Ayíngélí o likoló mpô ’te ázala molobeli wa bísó o mbóka Nzámbe.

9:25  Asengélí lisúsu komíbonza mbala na mbala té, lokóla nganga mokonzi óyo akoyíngelaka mbúla na mbúla o esíká esántu, mpô ya kobonza makilá maye mazalí ma yě mǒkó té.

9:26  Sókó ezalákí bôngó té, mbele Krístu asengélákí koyóka mpási mbala míngi út’o libandela lya mokili. Kasi ayákí sé mbala yǒ kó, o nsúka ya bileko, mpé amíbonzí mpô ’te ásílisa bokási bwa lisúmu.

9:27  Lokóla bato bánso bakokúfa sé mbala yǒ­kó, mpé na nsima bakokáta likambo lya bangó,

9:28  sé bôngó Krístu amíbo­nzí sé mbala yǒ kó mpô ya kolongola masúmu ma bato bánso. Ntángo akomónono mbala ya íbalé, ekozala mpô ya lisúmu té, kasi bobélé mpô ’te baye bazalí kozila yě bázwa libíkí.

Chapter 10

10:1  Mobéko mwa ba-Yúda molakísí sé ndámbo ya malámu maye makoyâ nsima, molakísí mangó mobimba té. Yangó wâná Mobéko mokokí kosántisa bato té, baye bakobonzelaka Nzámbe mbú­la na mbúla mabonza ma ndéngé yǒ­kó.

10:2  Sókó mabonza mâná makokákí kopétola bato sékô, mpé kosála ’te bámíyéba na lisúmu lisúsu té, mbele batíkáká kobonza mabonza.

10:3  Kasi na mabonza maye ma mbúla na mbúla bato bakokundolaka ’te bazalí basúmuki.

10:4  Ya sôló, makilá ma bána ba ngómbé mpé ma ntaba babáli makokí kolongola masúmu sókí té.

10:5  Yangó wâná ntángo ayéí o mokili, Krístu alobí na Tatá : Olingákí libonza tǒ mobómá té, kasi obongísélí ngáí nzóto.

10:6  Olingákí nyama té iye itumbámí ná mpé mabonza mpô ya kozwa bolímbisi masúmu.

10:7  Bôngó nalobákí : Ngáí óyo ! Nayéí mpô ’te násála lokóla yǒ, Nzámbe, olingí, lokóla ekomámí o Minkandá mpô ya ngáí.

10:8  Libosó alobí : Mabonza mpé mibómá, nyama iye itumbámí mpé mabonza mpô ya bolímbisi masúmu, olingákí mangó té, mazalákí mpé kosepelisa yǒ té. Nzókandé ba­kobo­nzaka mangó lokóla Mobéko motíndí.

10:9  Na nsima alobí : Ngáí óyo nayéí mpô ’te násála lokóla yǒ oli­ngí. Alongólí mabonza ma kala mpé abimísí libonza lya sika.

10:10  Lokóla Nzámbe alingákí, Yézu Krístu asán­tísí bísó, mpô abonzí nzóto ya yě sé mbala yǒ kó sékô.

10:11  Banganga Nzámbe bánso bakotélemeke mpô ya kosála mosálá mwa Nzámbe mokolo na mokolo mpé mpô ya kobonzela yě mabonza mbala na mbala, kasi mabonza mâná makokí kolongola masúmu sókí té.

10:12  Kasi Krístu abonzélí Nzá­mbe libonza sé lyǒ kó mpô ya kozwa bolímbisi masúmu, mpé sikáwa afándí sékô o lobóko la mobáli la Nzámbe.

10:13  Azalí sé kozila ’te bangúná ba yě bátíama o nsé ya makolo ma yě lokóla ebóngá.

10:14  Bô­ngó, na libonza sé lyǒkó abo­ngísí sékô baye azalí kosántisa.

10:15  Elímo Sántu ayébísí bísó bôngó. Libosó alobí :

10:16  Tálá bondeko nakokáta na bangó nsima ya mikolo mîná. Mokonzi alobí : Nakotía mibéko mya ngáí o mitéma mya bangó, mpé nakokoma myangó o makanisi ma bangó.

10:17  Mpé abakísí : Nakokanisa masúmu mpé matúmolí ma bangó lisúsu té.

10:18  Bôngó, esíká masúmu malí­mbá­mí, basengélí lisúsu kobonza libonza mpô ya bolímbisi masúmu té.

10:19  Bôngó, bandeko, toyébí sôló ’te, mpô ya makilá ma Yézu, tozwí nzelá ya koyíngela o esíká esántu.

10:20  Abongísélí bísó nzelá eye ya sika mpé ya bomoi ; na libonza lya nzóto ya yě, alongólí elambá eye ezalákí kokanga nzelá ya boyíngeli o esíká esántu.

10:21  Sikáwa tozalí na Nganga Mokonzi, yě Mokonzi wa libótá lya bána ba Nzámbe.

10:22  Bôngó, tóbeleme na Nzámbe na motéma sé­mba, na boyambi bokási mpenzá. Nzámbe ápétola mitéma mya bísó, álongola mbindo ínso ya mayéle mabé mpé ásukola bísó nzóto na mái péto.

10:23  Tókangana makási na boyambi, áwa tozalí kotía elíkyá na Oyo akokokisaka bilakó bya yě.

10:24  Tósálisana mpé tóléndisana, na bolingani mpé na misálá milámu.

10:25  Bókíma lisangá lya bínó té, lokóla basúsu bameséní kosála, kasi bólé­ndisana, áwa bomóní ’te Mokolo mwa Mokonzi mozalí kobeleme.

10:26  Sókó tozalí kosála masúmu na nkô, atâ toyébí bosôló, libonza lyǒ­kó té likokí kozwela bísó bolímbisi masúmu.

10:27  Tokokí bobélé kobánga likambo lya nsómo liye likokwêla bísó, lyangó ndé : mokolo Nzámbe akokáta makambo ma bato, móto makási mokosílisa baye batombókélí yě.

10:28  Moto abóyí kotósa Mobéko mwa Móze, basengélí koboma yě, sókó bato bábalé tǒ básáto bafúndákí yě ; báyókela yě mawa té.

10:29  Bôngó, moto akínólí Mwána wa Nzámbe, asántólí makilá ma Bondeko maye masántísí yě, mpé atúkí Elímo óyo azwě lí yě ngrásya ya Nzámbe, asengélí kozwa etú­mbu elekí makási !

10:30  Mpámba té, toyébí náni moto alobákí : Ngáí moto nakopésa etúmbu ; ngáí moto nakozó­ngisela moto mabé asálákí ; mpé lisúsu : Mokonzi akosámbisa bato ba yě.

10:31  Likambo lya nsómo mpenzá, sókí moto akwéí o mabóko ma Nzámbe wa bomoi !

10:32  Bókundola o mitéma mikolo mya libosó, ntángo Nzámbe afu­ngó­lákí bínó míso : bokangákí mité­ma o etumba enéne bozalákí kobu­nda.

10:33  Mbala isúsu bazalákí kotúmola mpé ko­nyókolo bínó o míso ma bato ; mbala isúsu bozalákí motéma mǒkó na baye banyókwámí bôngó.

10:34  Ya sôló, bozalákí koyóka mpási elongó na baye bakangémákí o bolóko, mpé ntángo babótólókí bínó bilóko, bondimákí yangó na nsáí, mpô boyébákí ’te bozalí na nkita elekí enéne, eye ekoúmela sékô.

10:35  Bôngó bóbwáka elíkyá té, mpô ekozwela bínó litómba lilekí linéne !

10:36  Bosengélí kotía moléndé mpô ’te bókokisa maye Nzámbe alingí, mpé bôngó bokozwa malámu maye alakélákí.

10:37  Ekomámí bôngó o Minkandá Misántu : Etíkálí moké, etíkálí bobélé mwâ moké, óyo asengélí koyâ, akoyâ, akoúmela té.

10:38  Moto akómí na bosémbo o míso ma Nzámbe mpô ya boyambi, akobíka ; kasi sókó na nsima ape­ngwí, akokí kosepelisa ngáí té.

10:39  Baye bakozóngaka nsima mpé bakobúngama, ezalí bísó té ; bísó tozalí bato ba boyambi. Mpô ya boyambi bwa bísó tokozwa bomoi.

Chapter 11

11:1  Koyamba ezalí koyéba sôló ’te tokozwa bolámu boye tozalí kolíkya, mpé koyéba ’te bolámu boye bozalí sôló, atâ tokokí komóno bwangó té.

11:2  Nzámbe andi­mákí ba­nkóko ba bísó mpô ya boyambi bwa bangó.

11:3  Mpô ya boyambi bwa bísó toyébí ’te likoló na nsé bikelámáká na Liloba lya Nzámbe ; na biye bikomónonoko té Nzámbe akelí biye bikomónonoko.

11:4  Mpô ya boyambi bwa yě, Abèle abonzéláká Nzámbe libonza lizalákí na litómba, leká libonza lya Kain : mpô ya boyambi akómí moto wa bosémbo, mpô Nzámbeméí ayambákí makabo ma yě. Atâ akú­fá kala, ndakisa ya boyambi bwa yě ezalí kotéya bísó.

11:5  Mpô ya boyambi balongólí Enók o nsé, bôngó akúfá té : bamóní yě lisúsu té, mpô Nzámbe akamátí yě. Libosó ’te bálongola yě o nsé, Enók azalákí kosepelisa Nzámbe ; ekomámí bôngó o Minkandá Misántu.

11:6  Moto azángí boyambi akokí kosepelisa Nzámbe té. Moto alingí kobeleme na Nzámbe, asengélí koyamba ’te Nzá­mbe azalí mpé akopésaka lifúta na baye bakolukaka yě.

11:7  Ntángo Nzámbe alakísí yě mambí amóní naíno na míso té, Nówe abá­ngí Nzámbe. Mpô ya boyambi bwa yě atóngí masúwa mpô ya kobíkisa libótá lya yě. Akitísí bôngó bato basúsu, mpé mpô ya boyambi bwa yě akómí moto wa bosémbo o míso ma Nzá­mbe.

11:8  Mpô ya boyambi Abaráma atósí Nzámbe. Nzámbe abyángí yě ákende o mokili moye alíngí kopésa yě ; áwa Abaráma akeí, ayébákí té esíká níni azalákí kokende.

11:9  Mpô ya boyambi afándí lokóla mompaya o mokili moye Nzámbe alakélakí yě. Kúná azalákí kofánda o biéma, Izáka na Yakób lokóla ; Nzámbe alakélákí bangó mpé elakó êná.

11:10  Azalákí kozila mbóka ekotóngama o mabángá, eye Nzámbe yě mǒkó akokanisa mpé akotónga.

11:11  Atâ ntángo ya kobóta esílákí koleka, Sára azwí ngúyá ya kobóta mpô ya boyambi : ayambí ’te Oyo alakélákí yě yangó, akokokisa yangó.

11:12  Yangó wâná bankóko ebelé babótámí na mobáli sé mǒkó, atâ asílí akómí mobangé : bankóko ebelé mpenzá lokóla minzóto mya likoló, míngi lokóla mbuma ya zélo ya libóngo lya mbú, iye moto mǒkó akokí kotánga té.

11:13  Bangó bánso bawéí na boyambi o mitéma. Malámu maye balakélákí bangó, bazwákí mangó té, kasi bamóní malámu mâná mosíká mpé bandimí mangó ; balobí ’te áwa o nsé bazalí lokóla bampaya, lokóla bato ba mobémbo.

11:14  Baye balobí bôngó balakísí polélé ’te bazalí koluka mokili mwa bangó mǒkó.

11:15  Sókó batíáká lisúsu mitéma na mokili moye batíkáká, mbele bakokákí kozónga kúná.

11:16  Nzókandé bazaláká koluka mokili molekí bolámu kúná o likoló. Yangó wâná Nzámbe ayókí nsóni té sókó babéngí yě Nzámbe wa bangó, mpô asílí abo­ngísélí bangó mbóka.

11:17  Mpô ya boyambi bwa yě, Abaráma andimákí kobonza Izáka, ntángo Nzámbe amekákí yě motéma. Moto wa elakó, alingákí kobonza mwána sé mǒkó wa yě,

11:18  óyo Nzá­mbe alobákí na yě : Izáka akobótela yǒ bána.

11:19  Abaráma aka­nísákí ’te Nzá­mbe azalí na ngúyá atâ ya kosékwisa bato bawéí. Yangó wâná tokokí koloba ’te Abaráma azwákí mwána wa yě lisúsu lokóla moto asékwí.

11:20  Mpô ya boyambi bwa yě, Izáka apésí Yakób na Ezaú bobenisi botálí makambo makoyâ nsima.

11:21  Mpô ya boyambi, Yakób, ntángo alingí ákúfa, abenísí bána ba Yozéfu mǒ­kó mǒkó, aékémí o nsóngé ya língé­nda lya yě mpé akúmísí Nzámbe.

11:22  Mpô ya boyambi bwa yě, Yozéfu, ntángo alingí ákúfa, alobí makambo matálí bobimi bwa bána ba Israél o Ezípeti, mpé atíndí bangó maye basengélí kosála na minkúwa mya yě.

11:23  Mpô ya boyambi bwa bangó, babóti ba Móze, ntángo babótákí yě sika, babómbákí yě sánzá ísáto, mpô bamónókí ’te azalí mwána kitóko, bazalákí kobánga etíndá ya Fárao té.

11:24  Mpô ya boyambi bwa yě, Móze ntángo akómí mokóló, abóyí ’te bábénga yě mwána wa mwána mwásí wa Fárao.

11:25  Andimí konyókwama elongó na bato ba Nzámbe bánso, abóyí kosepela na bisengo bya masúmu biye bikoúmelaka té.

11:26  O míso ma yě matúmolí bayókísí Mesíya malekí nkita ínso ya Ezípeti na motúya, mpô azalákí kotála sé lifúta liye akozwa.

11:27  Mpô ya boyambi bwa yě, Móze abimí o Ezípeti, abángí atâ nkándá ya Fárao té, mpô azalákí lokóla moto akomónoko Oyo akomónonoko na míso té, mpé atíí moléndé.

11:28  Mpô ya boyambi bwa yě atíndí ba-Yúda ’te bálía Pásiká mpé bá­nyakela makilá mpô ’te Mobomi áboma bána ba yambo ba Israél té.

11:29  Mpô ya boyambi bwa bangó, ba-Israél bakátísí Mbú Etáné lokóla ndé ezalákí mabelé makaúkí. Kasi ntángo ba-Ezípeti bamekí kokátisa, mái mamelí bangó.

11:30  Mpô ya boyambi bwa ba-Israél, bifelo bya Yériko bibúkání, ntángo ba-Yúda basílí kotámbola mikolo nsambo zóngazónga na engumbá.

11:31  Mpô ya boyambi bwa yě, Rakab, mwásí ndúmbá, akúfí té elongó na baye babóyákí kotósa Nzámbe, mpô ayambákí banóngi na bobóto.

11:32  Náloba níni lisúsu ? Ntángo eko­kí té mpô nátánga likambo lyǒ­kó lyǒ kó lya Gédeon, lya Barák, lya Sámson, lya Yéfte, lya Davídi, lya Samuél, mpé lya baproféta.

11:33  Mpô ya boyambi bwa bangó, bangó bato bakwêísí bakonzi, basálí misálá mya bosémbo, bazwí malámu maye balakélákí bangó, baka­ngí minoko mya nkósi,

11:34  bazímísí móto mopelí makási, babomákí bangó na mompánga té, botaú bwa bangó bobóngwání ngúyá, balakísí mpíkó o etumba, bakímísí bangúná bayákí kobundisa bangó.

11:35  Básí bamóní ’te bazóngísélí bangó bawéi ba bangó, áwa basékwí o bawá. Basúsu ba­nyókwámí míngi mpé ba­ndimí kokúfa, mpô batíí mitéma na nsékwa mpô ’te bázwa bomoi bolekí bolámu.

11:36  Basúsu, bato basekí bangó, babétí bangó fímbo, bakangí bangó na minyolólo mpé babwákí bangó o bolóko.

11:37  Babomí basúsu na ma­bá­ngá, bakátíkátí bangó, babomí bangó na mompánga ; bazalákí kotelengana, koláta mposo ya mpatá mpé ya ntaba ; bazalákí kokélela, konyókwama mpé koyóka mpási.

11:38  Mokili mobongókí té kozala na bato balámu lokóla bangó. Bakómí kozemazema o elíkí, o ngómbá, o mibéngá mpé o mabúlú o káti ya mabelé.

11:39  Bangó bánso ba­zwákí lokúmu mpô ya boyambi bwa bangó, kasi malámu maye balakélákí bangó, bazwákí mangó té.

11:40  Nzámbe abongísélí bísó bolámu bolekí naíno, alingákí ’te bázwa esengo ya sékô bobélé na bísó elongó.

Chapter 12

12:1  Tótála ndakisa ya baye bazalí kozínga bísó lokóla limpata : tóbóya mánso makokí komemisela bísó mókúmbá tǒ kotíela bísó libakú, libosó mpenzá lisúmu, mpô tópota mbángu mpé na moléndé o nzelá eye ya momekano tozalí kokóba.

12:2  Tótála bobélé Yézu : boyambi bwa bísó bobandí sé epái ya yě, yě mpé akokokisa bwangó. Etíkákí yě esengo eye akokákí kozwa, andimákí koyóka mpási o kurúse mpé abángákí nsóni ya kurúse té. Sikáwa afándí o lobóko la mobáli la ngwendé ya Nzámbe.

12:3  Bó­kanisa óyo basúmuki babóyákí na motéma mǒkó, mpô ’te bózónga nsima té mpé bólembe o mitéma mya bínó té.

12:4  Bobundi naíno etumba na lisúmu tina bosopí makilá té.

12:5  Bobósání ndé maloba maye Nzámbe ayébísí bínó lokóla bána ba yě mpô ya koléndisa bínó ? Mwána wa ngáí, ókínola etúmbu té eye Nzámbe apésí yǒ, ólembe mpé té sókó apálélí yǒ.

12:6  Mokonzi akotúmbolaka moto yě akolingaka, akobéteke moto nyónso óyo andimí lokóla mwána wa yě.

12:7  Sókó boyókí mpási, bóyéba ’te Nzámbe alingí kobongisa bínó. Nzámbe akosála na bínó lokóla tatá akosálaka na bána. Mwána náni óyo tatá akopésaka etúmbu té ?*

12:8  Bána bánso bako­zwaka etúmbu, bôngó sókó bínó bozwákí etúmbu té, mbele elakísí ’te bozalí bána ba sôló té, bozángí tatá.

12:9  Ntángo batatá ba bísó, baye babótákí bísó, bazalákí kotú­mbola bísó, tozalákí komemya bangó. Bôngó bísó, sókó tolingí kobíka, tosengélí kolakisa Tatá wa milímo botósi bonéne té ?

12:10  Batatá ba bísó áwa o nsé bazalákí kopésa bísó etú­mbu mwâ ntángo eké lokóla mitéma mya bangó mǒkó mili­ngákí ; kasi Nzámbe akopésaka bísó etúmbu mpô ya bolámu bwa bísó mpô tókóma basántu lokóla yě.

12:11  Sôló, etúmbu yǒ kó té ekoyókisa moto esengo, ekoyókisa yě bobélé mpási. Nzókandé na nsima baye ba­ndimí ’te etúmbu ébongisa bangó, bakozwa bobóto mpé bosémbo.

12:12  Yangó wâná bótómbola mabóko ma bínó malembí, mpé bóléndisa maboló­ngó ma bínó mazángí makási.

12:13  Bólanda sé nzelá sémba, mpô ’te moténgoli mǒkó ákwéya té, kasi ábíka.

12:14  Bóluka kozala bobóto na bato bánso, bózala basántu : moto azalí mosántu té, akomóno Nzámbe té.

12:15  Bókéba ’te atâ moto mǒkó té ábóya ngrásya ya Nzámbe ! Mǒ kó té ábima o ntéi ya bínó lokóla litíti lya bololo, óyo akokí kotía mobúlú mpé kobébisa lisangá lya bínó.

12:16  Moto mǒkó té ásála mpô bosóni tǒ ázánga limemyá ôná bilóko bisántu, lokóla Ezáu asáláká : atékí likokí lya mwána wa yambo mpô ’te álía biléi sé mbala yǒ­kó.

12:17  Boyébí yangó malámu : na nsima, áwa alingákí kozwa bobenisi bwa tatá, bazóngísí yě nsima. Akokákí kobó­ngola maloba ma tatá wa yě té, atâ abóndélákí yě na mái o míso.

12:18  Bínó bobelémékí lokóla ba-Israél na ngómbá Sinaí té, eye bakokákí komóno na míso : na molílí lokóla butú mpé na mompepe mwa ekumbaki ezalákí kobimisa móto mopelí makási.

12:19  Bayókákí ’te bazalákí kobéte mondúle mpé loláká la mongóngó monéne ; baye bánso bazalákí koyóka yangó babángákí mpé babóndélákí míngi ’te báloba na bangó lisúsu té.

12:20  Mpô bangó bakokákí kondima motíndo moye té : Atâ nyama eye ekosímba ngómbá, basengélí koboma yangó na mabángá.

12:21  Bamónókí makambo ma nsómo mpenzá. Atâ Móze alobákí : Nazalí koyóka nsómo mpé kolénge.

12:22  Kasi bínó bobelémí na ngómbá Síon mpé na engumbá ya Nzámbe wa bomoi, na Yerúzalem ya likoló, na bǎ­nzelú nkóto na nkóto.

12:23  Bobelémí na lisangá lya eyenga ya bána ba yambo, baye nkómbó ya bangó ikomámí o likoló. Bobelémí na Nzámbe óyo akokáta makambo ma bato bánso mpé na milímo mya basémba baye bakómí basántu.

12:24  Bokómí penepene na Yézu, Mobémbisi wa Bondeko bwa Sika, mpé na makilá ma yě maye mazalí kobélela Nzámbe mpô ya kopétola bísó ; makilá maye malekí makilá ma Abel.

12:25  Bókéba ’te bóyóka Nzá­mbe óyo akolobaka na bínó. Baye babóyákí koyóka maloba ma óyo alobákí o nkómbó ya yě áwa o nsé, bakokákí kokíma etúmbu té. Bôngó bóníbóní tókíma etúmbu, sókó tobóyí koyóka Oyo akolobaka na bísó út’o likoló ?

12:26  Oyo aningísákí mokili kala na loláká la yě lonéne alakélí bísó sikáwa boye : Mbala yǒ kó nakoningisa lisúsu bobélé mokili té, kasi ná likoló lokóla.

12:27  ‘Mbala yǒ kó lisúsu’ elakísí ’te maye make­lámí makoningana mpé makolímwa, kasi maye makokí koningana té, makotíkala.

12:28  Bapésí bísó bokonzi bokokí koningana té, yangó wâná tótóndo Nzámbe mpé tókúmisa yě na losámbo lokosepelisa yě, na limemyá mpé na bobá­ngi,

12:29  mpô Nzámbe wa bísó azalí lokóla móto mokozíkisaka bínso.

Chapter 13

13:1  Bótía moléndé na bolingani.

13:2  Bóbósana mpé té koyamba bampaya malámu ; bato basúsu basálákí bôngó, bayambákí bǎnzelú, nzókandé bayébákí té.

13:3  Bókanisaka bato bazalí o bolóko, lokóla ndé bozalákí na bangó o bolóko. Bókanisa mpé baye bazalí ko­nyókwama, zambí bínó mpé bozalí na nzóto.

13:4  Bómemya libála lya bato mpé bókósa móníngá wa libála té, zambí Nzámbe akotúmbola bato ba ekóbo mpé ba bokáli.

13:5  Bó­zala na boyími té, bósepela sé na maye bozalí na mangó, zambí Nzámbe yě mǒkó alobákí ’te : Nakotíka yǒ mokolo mǒkó té, nakokí kobósana yǒ té.

13:6  Yangó wâná tokokí koloba na motéma mobimba : Mokonzi akosálisaka ngáí ; nakokí kobánga elóko yǒ kó té ! Bato bakokí kosála ngáí níni ?

13:7  Bókanisa bayángeli ba bínó, baye balakísákí bínó Liloba lya Nzámbe ; bókanisa bizalela bya bangó mpé ndéngé basúkísí mosálá mwa bangó ; bôngó bómekola ndakisa ya boyambi bwa bangó.

13:8  Yézu Krístu azalí leló sé lokóla azalákí lóbí, akozala mpé bô­ngó sékô.

13:9  Bákósa bínó té na matéya ma lokutá ma ndéngé na ndéngé. Tólé­ndisa mitéma na lisálisi lya ngrásya ya Nzámbe, kasi na mibéko mitálí biléi té. Bato batíákí mítéma na mibéko mitálí biléi bazwákí litómba atâ lyǒ kó té.

13:10  Banganga Nzámbe baye bakosálaka o Ema bakokí kolía té o altáre eye ezalí na bísó.

13:11  Lokóla boyébí, nganga mokonzi akomemeke makilá ma nyama ya libonza o esíká esántu mpô ya kozwa bolímbisi masúmu, kasi nzóto ya nyama ekotumbamaka o libándá lya nganda.

13:12  Sé bôngó Yézu ayókí mpási o libándá lya engu­mbá mpô ’te ásántisa bato na makilá ma yě mǒkó.

13:13  Bôngó, tósangana na yě, o libándá lya nganda, tóndima matúmolí sé lokóla yě.

13:14  Sôló, tozalí na mbóka ya kofánda sékô áwa o nsé té, kasi tozalí koluka mbóka eye ekoyâ nsima.

13:15  Elongó na Krístu tóbonzela Nzámbe ntángo ínso libonza likokúmisa yě, yangó ndé losámbo la bato baye bakosakolaka nkómbó ya yě na monoko.

13:16  Bóbósana té kósálisana mpé kotía bilóko esíká yǒ kó, mpô mabonza mâná makosepelisaka Nzámbe.

13:17  Bótósa bayángeli ba bínó, mpé bóyóka bangó. Bangó bazalí baké­ngeli ba milímo mya bínó, mpô Nzá­mbe akotúna bangó maye matálí mosálá mwa bangó. Bósála ’te bákoka kosála mosálá mwa bangó na nsáí. Ekobongela bínó té sókó basálí mwangó na bokímeli.

13:18  Bósámbelela bísó. Toyébí sôló ’te tozalí na likambo lyǒ kó o motéma té, mpô tolingí kozala na ezalela elámu o makambo mánso.

13:19  Naséngí bínó bóbóndela Nzámbe míngi mpô ’te nákoka kozóngela bínó nokí mpe­nzá.

13:20  Nzámbe asékwísí Mokonzi wa bísó Yézu o bawá : óyo akómí Moké­ngeli monéne wa mpatá mpô ya makilá ma Bondeko bwa Sékô.

13:21  Nzá­mbe wa bobóto áléndisa bínó mpô ’te bókoka kosála malámu mánso lokóla yě alingí. Yě mǒkó ásála o mitéma mya bísó maye makosepelisa yě na ngúyá ya Yézu Krístu. Na yě nké­mbo o bileko na bileko ! Amen.

13:22  Nabóndélí bínó, bandeko, bóyamba maloba ma ngáí maye ma boléndisi malámu, atâ nakomélí bínó mangó sé na bokúsé.

13:23  Bóyéba ’te ndeko wa bísó Timotéo abimí o bolóko. Sókó akómí áwa nokí, nakoyâ kotála bínó elongó na yě.

13:24  Bópésa mbóte na bayángeli mpé na bandeko ba bínó bánso. Bandeko ba Itália batíndélí bínó mbóte.

13:25  Ngrásya ézala na bínó bánso !