CSlElizabeth - Revelation of John

Chapter 1

1:1  Апокалипсис Иисуса Христа, егоже даде Ему Бог, показати рабом Своим, имже подобает быти вскоре. И сказа, послав чрез Ангела Своего рабу Своему Иоанну,

1:2  иже свидетелствова слово Божие и свидетелство Иисус Христово, и елика виде.

1:3  Блажен чтый, и слышащии словеса пророчествия, и соблюдающии писаная в нем: время бо близ.

1:4  Иоанн седмим церквам, яже суть во Асии: благодать вам и мир от Сущаго, и Иже бе, и Грядущаго, и от седми духов, иже пред престолом Его суть,

1:5  и от Иисуса Христа, Иже есть свидетель верный, первенец из мертвых и князь царей земных: любящу ны и омывшу нас от грех наших Кровию Своею,

1:6  и сотворил есть нас цари и иереи Богу и Отцу Своему, Тому слава и держава во веки веков. Аминь.

1:7  Се, грядет со облаки, и узрит Его всяко око и иже Его прободоша, и плачь сотворят о Нем вся колена земная. Ей, аминь.

1:8  Аз есмь Алфа и Омега, начаток и конец, глаголет Господь, сый, и Иже бе, и грядый, Вседержитель.

1:9  Аз Иоанн, иже и брат ваш и общник в печали и во царствии и в терпении Иисус Христове, бых во острове нарицаемем Патмос за слово Божие и за свидетелство Иисус Христово.

1:10  Бых в дусе в день неделный, и слышах за собою глас велий яко трубы глаголющия: Аз есмь Алфа и Омега, Первый и Последний:

1:11  и: яже видиши, напиши в книгу, и посли церквам, яже суть во Асии: во Ефес и в Смирну, в Пергам и в Фиатир, и в Сардис и в Филаделфию и в Лаодикию.

1:12  И обратихся видети глас, иже глаголаше со мною: и обратився видех седмь светилник златых,

1:13  и посреде седми светилников подобна Сыну Человечу, облечена в подир и препоясана при сосцу поясом златым:

1:14  глава же Его и власи белы аки ярина белая, якоже снег: и очи Его яко пламень огнен:

1:15  и нозе Его подобне халколивану, якоже в пещи разжженне: и глас Его яко глас вод мног:

1:16  и держя в руце Своей десней седмь звезд: и из уст Его мечь обоюду остр изострен исходяй: и лице Его якоже солнце сияет в силе своей.

1:17  И егда видех Его, падох к ногама Его яко мертв. И положи десницу Свою на мне, глаголя ми: не бойся: Аз есмь Первый и Последний

1:18  и живый: и бых мертв, и се, жив есмь во веки веков, аминь: и имам ключи ада и смерти.

1:19  Напиши убо, яже видел еси, и яже суть, и имже подобает быти по сем.

1:20  Таинство седми звезд, яже видел еси на деснице Моей, и седмь светилник златых: седмь звезд Ангели седми церквей суть: и седмь светилников, яже видел еси, седмь церквей суть.

Chapter 2

2:1  Ангелу Ефесския церкве напиши: тако глаголет Держяй седмь звезд в деснице Своей, Ходяй посреде седми светилников златых:

2:2  вем твоя дела, и труд твой, и терпение твое, и яко не можеши носити злых, и искусил еси глаголющыяся быти апостолы, и не суть, и обрел еси их ложных:

2:3  и понесл еси, и терпение имаши, и за имя Мое трудился еси и не изнемогл еси.

2:4  Но имам на тя, яко любовь твою первую оставил еси.

2:5  Помяни убо, откуду спал еси, и покайся, и первая дела сотвори: аще же ни, гряду тебе скоро и двигну светилник твой от места своего, аще не покаешися.

2:6  Но се имаши, яко ненавидиши дел Николаитских, ихже и Аз ненавижду.

2:7  Имеяй ухо да слышит, что Дух глаголет церквам: побеждающему дам ясти от древа животнаго, еже есть посреде рая Божия.

2:8  И Ангелу церкве Смирнския напиши: тако глаголет Первый и Последний, Иже бысть мертв, и (се,) жив есть:

2:9  вем твоя дела и скорбь и нищету, но богат еси, и хулы глаголющихся быти Иудей, и не суть, но сонмище сатанино.

2:10  Не бойся ничесоже, яже имаши пострадати. Се, имать диавол всаждати от вас в темницы, да искуситеся: и имети будете скорбь до десяти дний. Буди верен даже до смерти, и дам ти венец живота.

2:11  Имеяй ухо слышати да слышит, что Дух глаголет церквам: побеждаяй не имать вредитися от смерти вторыя.

2:12  И Ангелу Пергамския церкве напиши: тако глаголет Имеяй мечь обоюду изощрен:

2:13  вем дела твоя, и где живеши, идеже престол сатанин: и держиши имя Мое, и не отверглся еси веры Моея и в (Моя) дни, в няже Антипас свидетель Мой верный, иже убиен бысть в вас, идеже живет сатана.

2:14  Но имам на тя мало, яко имаши ту держащих учение Валаамово, иже учаше Валака положити соблазн пред сынми Израилевыми, ясти жертвы идолския и любы творити.

2:15  Тако имаши и ты держащыя учение Николаитско, егоже ненавижду.

2:16  Покайся: аще ли ни, прииду тебе скоро и брань сотворю с ними мечем уст Моих.

2:17  Имеяй ухо слышати да слышит, что Дух глаголет церквам: побеждающему дам ясти от манны сокровенныя, и дам ему камень бел и на камени имя ново написано, егоже никтоже весть, токмо приемляй.

2:18  И Ангелу Фиатирския церкве напиши: тако глаголет Сын Божий, Имеяй очи свои яко пламень огнен, и нозе Его подобне халколивану:

2:19  вем твоя дела и любовь, и службу и веру, и терпение твое и дела твоя, и последняя болша первых.

2:20  Но имам на тя мало, яко оставляеши жене Иезавели, глаголющей себе быти пророчицу, учити и льстити Моя рабы, любодействовати и снести жертву идолскую.

2:21  И дах ей время, да покается от любодейства своего, и не покаяся.

2:22  Се, Аз полагаю ю на одре и любодеющыя с нею в скорбь велию, аще не покаются от дел своих:

2:23  и чада их умрут смертию: и уразумеют вся церкви, яко Аз есмь испытаяй сердца и утробы: и дам вам комуждо по делом вашым.

2:24  Вам же глаголю и прочым сущым в Фиатире, иже не имут учения сего и иже не разумеют глубин сатаниных, якоже глаголют: не возложу на вы тяготы иныя:

2:25  токмо, еже имате, держите, дондеже прииду.

2:26  И побеждающему и соблюдающему дела Моя до конца, дам ему власть на языцех,

2:27  и упасет я жезлом железным, яко сосуды скудельничи сокрушатся, якоже и Аз приях от Отца Моего:

2:28  и дам ему звезду утреннюю.

2:29  Имеяй ухо слышати да слышит, что Дух глаголет церквам.

Chapter 3

3:1  И Ангелу Сардийския церкве напиши: тако глаголет Имеяй седмь духов Божиих и седмь звезд: вем твоя дела, яко имя имаши яко жив, а мертв еси.

3:2  Буди бдя и утверждая прочая, имже умрети: не обретох бо дел твоих скончаных пред Богом (твоим).

3:3  Поминай убо, како приял еси и слышал еси, и соблюдай и покайся. Аще убо не бдиши, прииду на тя яко тать, и не имаши почути, в кий час прииду на тя.

3:4  Но имаши мало имен и в Сардии, иже не оскверниша риз своих, и ходити имут со Мною в белых, яко достойни суть.

3:5  Побеждаяй, той облечется в ризы белыя, и не имам отмыти имене его от книг животных, и исповем имя его пред Отцем Моим и пред Ангелы Его.

3:6  Имеяй ухо да слышит, что Дух глаголет церквам.

3:7  И Ангелу Филаделфийския церкве напиши: тако глаголет Святый Истинный, имеяй ключь Давидов, отверзаяй, и никтоже затворит, затворяяй, и никтоже отверзет:

3:8  вем твоя дела: се, дах пред тобою двери отверсты, и никтоже может затворити их: яко малу имаши силу, и соблюл еси Мое слово, и не отверглся еси имене Моего.

3:9  Се, даю от сонмища сатанина глаголющыяся быти Иудеи, и не суть, но лгут: се, сотворю их, да приидут и поклонятся пред ногама твоима, и уразумеют, яко Аз возлюбих тя.

3:10  Яко соблюл еси слово терпения Моего, и Аз тя соблюду от годины искушения, хотящия приити на всю вселенную искусити живущыя на земли.

3:11  Се, гряду скоро: держи, еже имаши, да никтоже приимет венца твоего.

3:12  Побеждающаго сотворю столпа в церкви Бога Моего, и боле не имать изыти ктому: и напишу на нем имя Бога Моего и имя града Бога Моего, новаго Иерусалима, сходящаго с небес от Бога Моего, и имя Мое новое.

3:13  Имеяй ухо да слышит, что Дух глаголет церквам.

3:14  И Ангелу Лаодикийския церкве напиши: тако глаголет Аминь, свидетель верный и истинный, начаток создания Божия:

3:15  вем твоя дела, яко ни студен еси ни тепл: не да студен бы был ни тепл.

3:16  Тако, яко обуморен еси, и ни тепл ни студен, изблевати тя от уст Моих имам.

3:17  Зане глаголеши, яко богат есмь и обогатихся и ничтоже требую: и не веси, яко ты еси окаянен и беден, и нищь и слеп и наг.

3:18  Совещаю тебе купити от Мене злато разжжено огнем, да обогатишися, и одеяние бело, да облечешися, и да не явится срамота наготы твоея: и коллурием помажи очи твои, да видиши.

3:19  Аз, ихже аще люблю, обличаю и наказую. Ревнуй убо и покайся.

3:20  Се, стою при дверех и толку: аще кто услышит глас Мой и отверзет двери, вниду к нему и вечеряю с ним, и той со Мною.

3:21  Побеждающему дам сести со Мною на престоле Моем, якоже и Аз победих и седох со Отцем Моим на престоле Его.

3:22  Имеяй ухо да слышит, что Дух глаголет церквам.

Chapter 4

4:1  По сих видех: и се, двери отверсты на небеси, и глас первый, егоже слышах яко трубу глаголющь со мною, глаголя: взыди семо, и покажу ти, емуже подобает быти по сих.

4:2  И абие бых в дусе: и се, престол стояше на небеси, и на престоле Седящь:

4:3  и Седяй бе подобен видением камени иаспису и сардинови: и (бе) дуга окрест престола подобна видением смарагдови.

4:4  И окрест престола престоли двадесять и четыри: и на престолех видех двадесять и четыри старцы седящыя, облечены в белыя ризы, и имяху венцы златы на главах своих.

4:5  И от престола исхождаху молния и громи и гласи: и седмь свещников огненных горящих пред престолом, иже суть седмь духов Божиих:

4:6  и пред престолом море сткляно, подобно кристаллу: и посреде престола и окрест престола четыри животна исполнена очес спреди и созади.

4:7  И животно первое подобно льву, и второе животно подобно телцу, и третие животно имущее лице яко человек, и четвертое животно подобно орлу летящу.

4:8  И животна четыри, едино коеждо их имеяху по шесть крил окрест, и внутрьуду исполнена очес: и покоя не имут день и нощь, глаголюще: свят, свят, свят Господь Бог Вседержитель, Иже бе и сый и грядый.

4:9  И егда даша животная славу и честь и благодарение Седящему на престоле, Живущему во веки веков,

4:10  падоша двадесять и четыри старцы пред Седящим на престоле, и поклонишася Живущему во веки веков, и положиша венцы своя пред престолом, глаголюще:

4:11  достоин еси, Господи, прияти славу и честь и силу, яко Ты еси создал всяческая, и волею Твоею суть, и сотворена.

Chapter 5

5:1  И видех в деснице Седящаго на престоле книгу написану внутрьуду и внеуду, запечатану седмию печатию.

5:2  И видех Ангела крепка проповедающа гласом великим: кто есть достоин разгнути книгу и разрешити печати ея?

5:3  И никтоже можаше ни на небеси, ни на земли, ниже под землею, разгнути книгу, ниже зрети ю.

5:4  И аз плакахся много, яко ни един обретеся достоин разгнути и прочести книгу, ниже зрети ю.

5:5  И един от старец глагола ми: не плачися: се, победил есть лев, иже сый от колена Иудова, корень Давидов, разгнути книгу и разрешити седмь печатей ея.

5:6  И видех, и се, посреде престола и четырех животных и посреде старец Агнец стоящь яко заколен, имущь рогов седмь и очес седмь, еже есть седмь духов Божиих, посланных во всю землю.

5:7  И прииде и прият книгу от десницы Седящаго на престоле.

5:8  И егда прият книгу, четыри животна и двадесять и четыри старцы падоша пред Агнцем, имуще кийждо гусли и фиалы златы полны фимиама, иже суть молитвы святых:

5:9  и поют песнь нову, глаголюще: достоин еси прияти книгу и отверзти печати ея, яко заклался и искупил еси Богови нас Кровию Своею от всякаго колена и языка и людий и племен,

5:10  и сотворил еси нас Богови нашему цари и иереи: и воцаримся на земли.

5:11  И видех, и слышах глас Ангелов многих окрест престола и животных и старец, и бе число их тысяща тысящами,

5:12  глаголюще гласом великим: достоин есть Агнец заколенный прияти силу и богатство, и премудрость и крепость, и честь и славу и благословение.

5:13  И всяко создание, еже есть на небеси и на земли, и под землею и на мори яже суть, и сущая в них, вся слышах глаголющыя: Седящему на престоле и Агнцу благословение и честь, и слава и держава во веки веков.

5:14  И четыри животна глаголаху: аминь. И двадесять и четыри старцы падоша и поклонишася Живущему во веки веков.

Chapter 6

6:1  И видех, егда отверзе Агнец едину от седми печатей, и слышах единаго от четырех животных глаголюща якоже глас громный: гряди и виждь.

6:2  И видех, и се, конь бел, и седяй на нем имеяше лук, и дан бысть ему венец: и изыде побеждаяй, и да победит.

6:3  И егда отверзе печать вторую, слышах второе животно глаголющее: гряди и виждь.

6:4  И изыде другий конь рыжь: и седящему на нем дано бысть взяти мир от земли, и да убиют друг друга: и дан бысть ему мечь великий.

6:5  И егда отверзе третию печать, слышах третие животно глаголющее: гряди и виждь. И видех, и се, конь ворон, и седяй на нем имеяше мерило в руце своей.

6:6  И слышах глас посреде четырех животных глаголющий: мера пшеницы за динарь и три меры ячменя за динарь: и елеа и вина не вреди.

6:7  И егда отверзе четвертую печать, слышах глас четвертаго животна глаголющий: гряди и виждь.

6:8  И видех, и се, конь блед, и седяй на нем, имя ему смерть: и ад идяше вслед его: и дана бысть ему область на четвертей части земли убити оружием и гладом, и смертию и зверьми земными.

6:9  И егда отверзе пятую печать, видех под олтарем душы избиенных за слово Божие и за свидетелство, еже имеяху.

6:10  И возопиша гласом великим, глаголюще: доколе, Владыко Святый и Истинный, не судиши и не мстиши крове нашея от живущих на земли?

6:11  И даны быша коемуждо их ризы белы, и речено бысть им, да почиют еще время мало, дондеже скончаются и клеврети их и братия их, имущии избиени быти, якоже и тии.

6:12  И видех, егда отверзе шестую печать, и се, бысть трус велий, и солнце мрачно бысть яко вретище власяно, и луна бысть яко кровь:

6:13  и звезды небесныя падоша на землю, якоже смоковница отметает пупы своя, от ветра велика движима:

6:14  и небо отлучися яко свиток свиваемо, и всяка гора и остров от мест своих двигнушася:

6:15  и царие земстии и вельможи, и богатии и тысящницы и сильнии, и всяк раб и всяк свободь скрышася в пещерах и камении горстем,

6:16  и глаголаша горам и камению: падите на ны и покрыйте ны от лица Седящаго на престоле и от гнева Агнча:

6:17  яко прииде день великий гнева Его, и кто может стати?

Chapter 7

7:1  И по сем видех четыри Ангелы стоящыя на четырех углех земли, держащыя четыри ветры земския, да не дышет ветр на землю, ни на море, ни на всяко древо.

7:2  И видех инаго Ангела восходяща от восхода солнца, имуща печать Бога живаго. И возопи гласом велиим к четырем Ангелом, имже дано бысть вредити землю и море, глаголя:

7:3  не вредите ни земли, ни моря, ни древес, дондеже запечатлеем рабы Бога нашего на челех их.

7:4  И слышах число запечатленных: сто четыредесять четыри тысящи запечатленных от всякаго колена сынов Израилевых.

7:5  От колена Иудова дванадесять тысящ запечатленных: от колена Рувимова дванадесять тысящ запечатленных: от колена Гадова дванадесять тысящ запечатленных:

7:6  от колена Асирова дванадесять тысящ запечатленных: от колена Неффалимля дванадесять тысящ запечатленных: от колена Манассиина дванадесять тысящ запечатленных:

7:7  от колена Симеонова дванадесять тысящ запечатленных: от колена Левиина дванадесять тысящ запечатленных: от колена Иссахарова дванадесять тысящ запечатленных:

7:8  от колена Завулоня дванадесять тысящ запечатленных: от колена Иосифова дванадесять тысящ запечатленных: от колена Вениаминова дванадесять тысящ запечатленных.

7:9  По сих видех, и се, народ мног, егоже изчести никтоже может, от всякаго языка и колена, и людий и племен, стояще пред престолом и пред Агнцем, облечены в ризы белы, и финицы в руках их.

7:10  И возопиша гласом велиим, глаголюще: спасение седящему на престоле Богу нашему и Агнцу.

7:11  И вси Ангели стояху окрест престола и старец и четырех животных: и падоша на лицы пред престолом и поклонишася Богу,

7:12  глаголюще: аминь: благословение и слава, и премудрость и хвала, и честь и сила и крепость Богу нашему во веки веков. Аминь.

7:13  И отвеща един от старец, глаголя ми: сии облеченнии в ризы белыя кто суть и откуду приидоша?

7:14  И рех ему: господи, ты веси. И рече ми: сии суть, иже приидоша от скорби великия, и испраша ризы своя, и убелиша ризы своя в Крови Агнчи:

7:15  сего ради суть пред престолом Божиим и служат Ему день и нощь в церкви Его, и Седяй на престоле вселится в них:

7:16  не взалчут ктому, ниже вжаждут, не имать же пасти на них солнце, ниже всяк зной:

7:17  яко Агнец, Иже посреде престола, упасет я и наставит их на животныя источники вод, и отимет Бог всяку слезу от очию их.

Chapter 8

8:1  И егда отверзе седмую печать, бысть безмолвие на небеси яко пол часа.

8:2  И видех седмь Ангелов, иже пред Богом стояху: и дано бысть им седмь труб.

8:3  И другий Ангел прииде и ста пред олтарем, имеяй кадилницу злату: и даны быша ему фимиами мнози, да даст молитвам святых всех на олтарь златый сущий пред престолом.

8:4  И изыде дым кадилный молитвами святых от руки Ангела пред Бога.

8:5  И взят Ангел кадилницу, и наполни ю от огня сущаго на олтари, и положи на земли: и быша гласи и громи и блистания и трус.

8:6  И седмь Ангел, иже имеяху седмь труб, уготовашася, да вострубят.

8:7  И первому Ангелу вострубившу, бысть град и огнь, смешены с кровию, и падоша на землю: и третия часть древа погоре, и всяка трава злачная погоре.

8:8  И вторый Ангел воструби, и яко гора велика огнем жегома ввержена бысть в море: и бысть третия часть моря кровь,

8:9  и умре третия часть созданий сущих в мори, имущих душы, и третия часть кораблей погибе.

8:10  И третий ангел воструби, и паде с небесе звезда велика, горящи яко свеща, и паде на третию часть рек и на источники водныя:

8:11  и имя звезде глаголется апсинфос: и бысть третия часть вод яко пелынь, и мнози от человек умроша от вод, яко горьки беша.

8:12  И четвертый Ангел воструби, и уязвена бысть третия часть солнца и третия часть луны и третия часть звезд, да затмится третия часть их, и дне третия часть да не светит, и нощь такожде.

8:13  И видех и слышах единаго Ангела паряща посреде небесе, глаголюща гласом великим: горе, горе, горе живущым на земли от прочих гласов трубных триех Ангел хотящих трубити.

Chapter 9

9:1  И пятый Ангел воструби, и видех звезду с небесе спадшу на землю: и дан бысть ей ключь студенца бездны:

9:2  и отверзе студенца бездны, и взыде дым от студенца яко дым пещи велики, и омерче солнце и воздух от дыма студеничнаго.

9:3  И от дыма изыдоша прузи на землю, и дана бысть им область, якоже имут область скорпии земныя.

9:4  И речено бысть им, да не вредят травы земныя, ни всякаго злака, ни всякаго древа, но человеки точию, иже не имут печати Божия на челех своих.

9:5  И дано бысть им, да не убиют их, но да муку приимут пять месяцей: и мучение их яко мучение скорпиево, егда усекнет человека.

9:6  И в тыя дни взыщут человецы смерти, и не обрящут ея: и вожделеют умрети, и убежит от них смерть.

9:7  И уподобления пругов подобна конем уготовленым на брань: и на главах их яко венцы уподоблени злату, и лица их яко лица человеческа:

9:8  и имеяху власы, яко власы женския, и зубы их, яко львов беша:

9:9  и имеяху броня, яко броня железны, и глас крил их, яко глас колесниц, егда кони мнози текут на брань:

9:10  и имеяху ошибы подобны скорпииным, и жала бяху во ошибех их: и дана бе область им вредити человеки пять месяц.

9:11  И имели над собою царя аггела бездны, емуже имя еврейски Аваддон, а еллински Аполлион.

9:12  Горе едино отиде: се, грядут еще два горя по сих.

9:13  И шестый Ангел воструби, и слышах глас един от четырех рогов олтаря златаго сущаго пред Богом,

9:14  глаголющий шестому Ангелу имеющу трубу: разреши четыри Ангелы связаны при реце велицей Евфрат.

9:15  И разрешени быша четыри Ангели уготовани на час и день, и месяц и лето, да избиют третию часть человек.

9:16  И число воинов конных две тме тем: и слышах число их.

9:17  И тако видех в видении кони, и седящыя на них имущыя броня огненны и иакинфовы и жупелны: и главы конем (их) яко главы львом, и из уст их исхождаше огнь и дым и жупел.

9:18  И от триех язв сих погибе третия часть человеков, от огня и от дыма и от жупела, исходящих из уст их:

9:19  область бо коней во устех их бе, и ошиби их подобни змием, имуще главы и теми пакости деюще.

9:20  И прочии от человек, иже не вреждени быша язвами сими, ниже покаяшася от дел рук своих, да не поклонятся демоном, ни идолом златым и сребряным, и медяным и каменным и древяным, иже ни видети могут, ни слышати, ни ходити:

9:21  и не покаяшася от убийств своих, ни от волхвований своих, ниже от блуда своего, ниже от татьб своих.

Chapter 10

10:1  И видех инаго Ангела крепка сходяща с небесе, оболчена во облак, и дуга над главою (его), и лице его яко солнце, и нозе его яко столпи огнени,

10:2  и имеяше в руце своей книгу разгибену: и постави ногу свою десную на мори, а шуюю на земли,

10:3  и возопи гласом великим, яко лев рыкая: и егда возгласи, глаголаша седмь громов гласы своя.

10:4  И егда возгласиша седмь громов гласы своя, хотех писати: и слышах глас с небесе глаголющь ми: запечатлей, яже глаголаша седмь громов, и сего не пиши.

10:5  И Ангел, егоже видех стояща на мори и на земли, воздвиже руку свою на небо

10:6  и клятся Живущим во веки веков, Иже созда небо и яже на нем, и землю и яже на ней, и море и яже в нем, яко лета уже не будет:

10:7  но во дни гласа седмаго Ангела, егда имать вострубити, тогда скончается тайна Божия, якоже благовести Своими рабы пророки.

10:8  И глас его слышах с небесе паки глаголющь со мною, и глагола: иди и приими книжицу разгнутую в руце Ангела стоящаго на мори и на земли.

10:9  И идох ко Ангелу, глаголя ему: даждь ми книжицу. И рече ми: приими и снеждь ю: и горька будет во чреве твоем, но во устех ти сладка будет яко мед.

10:10  И приях книгу от руки Ангела и снедох ю: и бе во устех моих яко мед сладка: и егда снедох ю, горька бяше во чреве моем.

10:11  И рече ми: подобает ти паки пророчествовати в людех и во племенех, и во языцех и в царех мнозех.

Chapter 11

11:1  И дана ми бысть трость подобна жезлу, глаголя: востани и измери церковь Божию и олтарь, и кланяющыяся в ней:

11:2  а двор сущий внутрь церкве изнеси внеуду, ниже измери его, зане дан бысть языком: и град святый поперут четыредесять и два месяцы.

11:3  И дам обема свидетелема Моима, и прорицати будут дний тысящу двесте и шестьдесят, оболчена во вретище.

11:4  Сии суть две маслицы и два свещника пред Богом земли стояща.

11:5  И иже им неправду сотворит, огнь исходит из уст их и пояст враги их: и иже восхощет обидети их, сему подобает убиену быти.

11:6  И сии имут область затворити небо, да не снидет дождь (на землю) во дни прорицания их, и область имут на водах, обращати я в кровь и поразити землю всякою язвою, елижды аще восхощут.

11:7  И егда скончают свидетелство свое, зверь, иже исходит от бездны, сотворит с ними брань и победит их и убиет я,

11:8  и трупы их оставит на стогнах града великаго, иже нарицается духовне Содом и Египет, идеже и Господь наш распят бысть.

11:9  И зрети имут от людий и племен, и от язык и колен, телеса их дни три и пол, и трупы их не оставят положити во гробех.

11:10  И живущии на земли возрадуются и возвеселятся о них, и дары послют друг ко другу, яко оба сия пророка мучиста живущыя на земли.

11:11  И по триех днех и пол, дух животен внидет в ня от Бога, и станут (оба) на ногах своих: и страх велий нападет на зрящих их.

11:12  И услышат глас велий с небесе, глаголющь им: взыдита семо. И взыдоста на небо на облацех, и видеша я врази их.

11:13  И в час той трус бысть велий, и десятая часть града паде, и погибе трусом имен человеческих седмь тысящ: и прочии пристрашни быша и даша славу Богу небесному.

11:14  Горе второе отиде: се, горе третие грядет скоро.

11:15  И седмый Ангел воструби, и быша гласи велицы на небесех, глаголюще: бысть царство мира Господа нашего и Христа Его, и воцарится во веки веков.

11:16  И двадесять и четыри старцы, пред Богом седящии на престолех своих, падоша на лица своя и поклонишася Богу,

11:17  глаголюще: хвалим Тя, Господи Боже Вседержителю, Иже сый и бе и грядый, яко приял еси силу Твою великую и воцарился еси:

11:18  и языцы прогневашася: и прииде гнев Твой, и время мертвым суд прияти, и дати мзду рабом Твоим пророком и святым и боящымся имене Твоего, малым и великим, и растлити посмраждшыя землю.

11:19  И отверзеся храм Божий на небеси, и явися кивот завета Его в храме Его: и быша блистания и гласи, и громи и трус, и град велик.

Chapter 12

12:1  И знамение велие явися на небеси: жена облечена в солнце, и луна под ногама ея, и на главе ея венец от звезд двоюнадесяте:

12:2  и во чреве имущи, вопиет болящи и страждущи родити.

12:3  И явися ино знамение на небеси: и се, змий велик чермен, имея глав седмь и рогов десять, и на главах его седмь венец:

12:4  и хобот его отторже третию часть звезд небесных и положи я в землю. И змий стояше пред женою хотящею родити, да, егда родит, снесть чадо ея.

12:5  И роди сына мужеска, иже имать упасти вся языки жезлом железным: и восхищено бысть чадо ея к Богу и престолу Его.

12:6  А жена бежа в пустыню, идеже име место уготовано от Бога, да тамо питается дний тысящу двесте шестьдесят.

12:7  И бысть брань на небеси: Михаил и Ангели его брань сотвориша со змием, и змий брася и аггели его,

12:8  и не возмогоша, и места не обретеся им ктому на небеси.

12:9  И вложен бысть змий великий, змий древний, нарицаемый диавол и сатана, льстяй вселенную всю, и вложен бысть на землю, и аггели его с ним низвержени быша.

12:10  И слышах глас велий на небеси, глаголющь: ныне бысть спасение и сила и царство Бога нашего и область Христа Его, яко низложен бысть клеветник братии нашея, оклевещая их пред Богом нашим день и нощь.

12:11  И тии победиша его кровию Агнчею и словом свидетелства своего, и не возлюбиша душ своих даже до смерти.

12:12  Сего ради веселитеся, небеса и живущии на них. Горе живущым на земли и мори, яко сниде диавол к вам, имея ярость великую, ведый, яко время мало имать.

12:13  И егда виде змий, яко низложен бысть на землю, гоняше жену, яже роди мужеска.

12:14  И дана быша жене два крила орла великаго, да парит в пустыню в место свое, идеже препитана бяше ту время и времен и пол времене, от лица змиина.

12:15  И испусти змий за женою из уст своих воду яко реку, да ю в реце потопит.

12:16  И поможе земля жене, и отверзе земля уста своя, и пожре реку, юже изведе змий от уст своих.

12:17  И разгневася змий на жену и иде сотворити брань со оставшим семенем ея, иже соблюдают заповеди Божия и имеют свидетелство Иисус Христово.

Chapter 13

13:1  И стах на песце морстем: и видех из моря зверя исходяща, имуща глав седмь и рогов десять, и на розех его венец десять, а на главах его имена хулна.

13:2  Зверь, егоже видех, бе подобен рыси, и нозе ему яко медведи, и уста его яко уста львова: и даде ему змий силу свою и престол свой и область великую.

13:3  И видех едину от глав его яко заколену в смерть, и язва смерти его изцеле. И чудися вся земля вслед зверя, и поклонишася змию, иже даде область зверю,

13:4  и поклонишася зверю, глаголюще: кто подобен зверю и кто может ратоватися с ним?

13:5  И дана быша ему уста глаголюща велика и хулна, и дана бысть ему область творити месяц четыредесять два.

13:6  И отверзе уста своя в хуление к Богу, хулити имя Его и селение Его и живущыя на небеси.

13:7  И дано бысть ему брань творити со святыми и победити я: и дана бысть ему область на всяцем колене (людий) и на языцех и племенех.

13:8  И поклонятся ему вси живущии на земли, имже не написана суть имена в книгах животных Агнца заколенаго от сложения мира.

13:9  Аще кто имать ухо, да слышит.

13:10  Иже аще в пленение ведет, в пленение пойдет: аще кто оружием убиет, подобает ему оружием убиену быти. Зде есть терпение и вера святых.

13:11  И видех инаго зверя восходящаго от земли, и имеяше рога два, подобна агнчым, и глаголаше яко змий.

13:12  И власть перваго зверя всю творяше пред ним: и творяше землю и вся живущыя на ней поклонитися первому зверю, емуже изцелена бысть язва смертная:

13:13  и сотвори чудеса велика, да и огнь сотворит сходити с небесе на землю пред человеки.

13:14  И льстит живущыя на земли, ради знамений, яже дана быша ему пред зверем творити, глаголя живущым на земли, сотворити образ зверю, иже имать язву оружную и жив бысть.

13:15  И дано бысть ему дати дух образу зверину, да проглаголет икона зверина и сотворит, да иже аще не поклонятся образу звериному, убиени будут.

13:16  И сотворит вся малыя и великия, богатыя и убогия, свободныя и работныя, да даст им начертание на десней руце их или на челех их,

13:17  да никтоже возможет ни купити, ни продати, токмо кто имать начертание, или имя зверя, или число имене его.

13:18  Зде мудрость есть. Иже имать ум, да почтет число зверино: число бо человеческо есть, и число его шесть сот шестьдесят шесть.

Chapter 14

14:1  И видех, и се, Агнец стояше на горе Сионстей, и с Ним сто и четыредесять и четыри тысящы, имуще имя Отца Его написано на челех своих.

14:2  И слышах глас с небесе, яко глас вод многих и яко глас грома велика: и глас слышах гудец гудущих в гусли своя

14:3  и поющих яко песнь нову пред престолом и пред четыри животными и старцы: и никтоже можаше навыкнути песни, токмо сии сто и четыредесять и четыри тысящы искуплени от земли.

14:4  Сии суть, иже с женами не осквернишася, зане девственницы суть: сии последуют Агнцу, аможе аще пойдет. Сии суть куплени от людий первенцы Богу и Агнцу,

14:5  и во устех их не обретеся лесть: без порока бо суть пред престолом Божиим.

14:6  И видех инаго Ангела паряща посреде небесе, имущаго Евангелие вечно благовестити живущым на земли и всякому племени и языку, и колену и людем,

14:7  глаголюща гласом великим: убойтеся Бога и дадите Ему славу, яко прииде час суда Его, и поклонитеся Сотворшему небо и землю, и море и источники водныя.

14:8  И ин Ангел вслед иде, глаголя: паде, паде Вавилон град великий, зане от вина ярости любодеяния своего напои вся языки.

14:9  И третий Ангел вслед его иде, глаголя гласом великим: иже аще кто покланяется зверю и иконе его и приемлет начертание на челе своем или на руце своей,

14:10  и той имать пити от вина ярости Божия, вина нерастворена в чаши гнева Его, и будет мучен огнем и жупелом пред Ангелы святыми и пред Агнцем:

14:11  и дым мучения их во веки веков восходит, и не имут покоя день и нощь покланяющиися зверю и образу его и приемлющии начертание имене его.

14:12  Зде есть терпение святых, иже соблюдают заповеди Божия и веру Иисусову.

14:13  И слышах глас с небесе, глаголющь ми: напиши: блажени мертвии, умирающии о Господе отныне. Ей, глаголет Дух, да почиют от трудов своих: дела бо их ходят вслед с ними.

14:14  И видех, и се, облак светел, и на облаце седяй подобен Сыну Человеческому, имея на главе своей венец злат, и в руце его серп остр.

14:15  И ин Ангел изыде из храма, вопия велиим гласом седящему на облаце: посли серп твой и жни, яко прииде час пожати, зане изсше трава земная.

14:16  И положи седяй на облаце серп свой на землю, и пожата бысть земля.

14:17  И ин Ангел изыде из церкве сущия на небеси, имый и той серп остр.

14:18  И ин Ангел изыде от олтаря, имый область на огни, и возопи кличем великим ко имущему серп острый, глаголя: посли серп твой острый и объемли грозды винограда земнаго, яко созреша уже гроздие ея.

14:19  И положи Ангел серп свой на земли, и обере виноград земский и вложи в точило великия ярости Божия.

14:20  И испрано бысть точило вне града, и изыде кровь от точила даже до узд конских, от стадий тысяща и шесть сот.

Chapter 15

15:1  И видех ино знамение на небеси велие и чудно, седмь Ангел имущих седмь язв последних, зане в тех скончается ярость Божия.

15:2  И видех яко море сткляно смешено со огнем, и победившыя зверя и образ его, и начертание его и число имене его, стоящыя на мори стклянем, имущыя гусли Божия:

15:3  и пояху песнь Моисеа раба Божия и песнь Агнчу, глаголюще: велия и дивна дела Твоя, Господи Боже Вседержителю: праведни и истинни путие Твои, Царю святых:

15:4  кто не убоится Тебе, Господи, и прославит имя Твое? Яко един преподобен еси, яко вси языцы приидут и поклонятся пред Тобою: яко оправдания Твоя явишася.

15:5  И по сих видех, и се, отверзеся храм скинии свидения на небеси:

15:6  и изыдоша седмь Ангел из храма, иже имеяху седмь язв, облечени в ризы льняны чисты и светлы, и препоясани на персех поясы златыми.

15:7  И едино от четырех животных даде седмим Ангелом седмь фиал златых, исполненых ярости Бога живущаго во веки веков.

15:8  И наполнися храм дыма от славы Божия и от силы Его, и никтоже можаше внити во храм, дондеже скончаются седмь язв седмих Ангел.

Chapter 16

16:1  И слышах глас велий от храма глаголющь седмим Ангелом: идите и излийте седмь фиал ярости Божия на землю.

16:2  И иде первый Ангел и излия фиал свой на землю: и бысть гной зол и лют на человецех имущих начертание зверино и кланяющихся иконе его.

16:3  И вторый Ангел излия фиал свой в море: и бысть кровь яко мертвеца, и всяка душа жива умре в мори.

16:4  И третий Ангел излия фиал свой на реки и на источники водныя: и бысть кровь.

16:5  И слышах Ангела воднаго глаголюща: праведен еси, Господи, сый и Иже бе, и преподобн, яко сия судил еси:

16:6  зане кровь святых и пророк излияша, и кровь им дал еси пити: достойни бо суть.

16:7  И слышах другаго от олтаря глаголюща: ей, Господи Боже Вседержителю, истинни и прави суди Твои.

16:8  И четвертый Ангел излия фиал свой на солнце: и дано бысть ему опаляти человеки огнем.

16:9  И опалишася человецы зноем великим, и хулиша имя Божие, иже имать область на язвах сих, и не покаяшася дати Ему славы.

16:10  И пятый Ангел излия фиал свой на престол зверин: и бысть царство его омрачено, и жваху языки своя от болезни,

16:11  и хулиша Бога небеснаго от болезни и от язв своих, и не покаяшася от дел своих.

16:12  И шестый Ангел излия фиал свой на реку велику Евфрат: и изсяче вода ея, да уготовится путь царем сущым от восток солнечных.

16:13  И видех из уст змия и из уст зверя и из уст лжаго пророка духи три нечистыя, яко жабы исходящыя:

16:14  суть бо дуси демонстии творяще знамения, иже исходят к царем всея вселенныя, собрати я на брань в день той великий Бога Вседержителя.

16:15  Се, гряду яко тать: блажен бдяй и блюдый ризы своя, да не наг ходит и узрят срамоту его.

16:16  И собра их на место нарицаемое еврейски Армагеддон.

16:17  И седмый Ангел излия фиал свой на воздух: и изыде глас велий от храма небесе от престола, глаголя: бысть.

16:18  И быша блистания и громи и гласи, и бысть трус велик, яков николиже бысть, отнележе быша человецы на земли, толик трус, тако велий.

16:19  И бысть град велик в три части, и гради язычестии падоша, и Вавилон великий помяновен бысть пред Богом, дати ему чашу вина ярости гнева Своего.

16:20  И всяк остров бежа, и горы не обретошася:

16:21  и град велик, яко талантес, сниде с небесе на человеки: и хулиша человецы Бога от язвы градныя, яко велия есть язва его зело.

Chapter 17

17:1  И прииде един от седми Ангел имущих седмь фиал, и глагола со мною, глаголя ми: прииди, да покажу ти суд любодейцы великия, седящия на водах многих:

17:2  с неюже любодеяша царие земстии, и упишася живущии на земли от вина любодеяния ея.

17:3  И веде мя в пусто место духом: и видех жену седящу на звери червлене, исполненем имен хулных, иже имеяше глав седмь и рогов десять.

17:4  И жена бе облечена в порфиру и червленицу, и позлащена златом и камением драгим и бисером, имущи чашу злату в руце своей полну мерзости и скверн любодеяния ея:

17:5  и на челе ея написано имя: тайна, Вавилон великий, мати любодейцам и мерзостем земским.

17:6  И видех жену пияну кровьми святых и кровьми свидетелей Иисусовых, и дивихся, видев ю, дивом великим.

17:7  И рече ми Ангел: что дивишися? Аз ти реку тайну жены (сея) и зверя носящаго ю, седмь глав имуща и рогов десять.

17:8  Зверь, егоже видел еси, бе, и несть, и имать взыти от бездны, и в пагубу пойдет: и удивятся живущии на земли, имже имена не написана суть в книгу животную от сложения мира, видяще, яко зверь бе, и несть, и преста.

17:9  Зде ум, иже имать мудрость. Седмь глав горы суть седмь, идеже жена седит на них,

17:10  и царие седмь суть: пять их пало, и един есть, (а) другий еще не прииде: и егда приидет, мало ему есть пребыти.

17:11  И зверь, иже бе и несть, и той осмый есть, и от седмих есть, и в пагубу идет.

17:12  И десять рогов, яже видел еси, десять царей суть, иже царства еще не прияша, но область яко царие на един час приимут со зверем.

17:13  Сии едину волю имут, и силу и область свою зверю дадут:

17:14  сии со Агнцем брань сотворят, и Агнец победит я, яко Господь господем есть и Царь царем: и сущии с Ним званнии и избраннии и верни.

17:15  И глагола ми: воды, яже еси видел, идеже любодейца седит, людие и народи суть, и племена и языцы.

17:16  И десять рогов, яже видел еси на звери, сии любодейцу возненавидят, и запустевшу сотворят ю и нагу, и плоть ея снедят, и сожгут ю огнем:

17:17  Бог бо дал есть в сердца их, сотворити волю Его, и сотворити едину волю, и дати царство свое зверю, дондеже скончаются глаголголы Божии.

17:18  И жена, юже видел еси, град есть великий, иже имать царство над цари земными.

Chapter 18

18:1  И по сих видех ина Ангела сходяща с небесе, имуща область велию: и земля просветися от славы его.

18:2  И возопи в крепости, гласом велиим глаголя: паде, паде Вавилон великий, и бысть жилище бесом и хранитель всякому духу нечисту, и хранилище всех птиц нечистых и ненавидимых: яко от вина ярости любодеяния своего напои вся языки,

18:3  и царие земстии с нею любы деяша, и купцы земстии от силы пищи ея разбогатеша.

18:4  И слышах глас ин с небесе, глаголющь: изыдите из нея, людие Мои, да не причаститеся грехом ея и от язв ея да не вредитеся:

18:5  яко прилепишася греси ея даже до небесе, и помяну Бог неправды ея.

18:6  Воздадите ей, яко и та воздаде вам, и усугубите ей сугубо по делом ея: чашею, еюже черпа (вам), черплите ей сугубо.

18:7  Елико прославися и разсвирепе, толико дадите ей мук и рыданий: яко в сердцы своем глаголет, (яко) сежу царицею, и вдова несмь, и рыдания не имам видети.

18:8  Сего ради во един день приидут язвы ей, смерть и плачь и глад, и огнем сожжена будет, яко крепок Господь Бог судяй ей.

18:9  И возрыдают и восплачутся ея царие земстии, любы деявшии с нею и разсвирепевшии, егда узрят дым запаления ея,

18:10  издалеча стояще за страх мук ея, глаголюще: горе, горе, град великий Вавилон, град крепкий, яко во един час прииде суд твой.

18:11  И купцы земстии возрыдают и восплачутся о нем, яко бремен их никтоже купует ктому,

18:12  бремен злата и сребра, и камения драгаго и бисера, и висса и порфиры, и шелка и червени, и всякаго древа фиинна, и всякаго сосуда из кости слоновыя, и всякаго сосуда от древа честнаго, и медяна и железна и мраморна,

18:13  и корицы и фимиама, и мира и ливана, и вина и елеа, и семидала и пшеницы, и скота и овец, и коней и колесниц, и телес и душ человеческих.

18:14  И овощи похотей души твоея отидоша от тебе, и вся тучная и светлая отидоша от тебе, и ктому не имаши обрести их.

18:15  Купцы сими обогащшеся от нея, издалеча станут за страх мучения ея, рыдающе и плачущеся,

18:16  и глаголюще: горе, горе, град великий, облеченный виссом и порфирою и червленицею, и позлащеный златом и камением драгим и бисером

18:17  яко во един час погибе толико богатство. И всяк кормчий, и всяк плаваяй в кораблех, и всяк елик в мори делаяй, издалеча сташа,

18:18  и вопияху, видяще дым раждежения его, глаголюще: кий подобен граду великому?

18:19  И положиша персть на главах своих, и возопиша плачущеся и рыдающе, глаголюще: горе, горе, град великий, в немже обогатишася вси имущии корабли в мори, от чести его: яко единем часом запусте.

18:20  Веселися о сем, небо, и святии Апостоли и пророцы, яко суди Бог суд ваш от него.

18:21  И взят един Ангел крепок камень велик яко жернов и верже в море, глаголя: тако стремлением ввержен будет Вавилон град великий, и не имать обрестися ктому:

18:22  и глас гудец и мусикий, и пискателей и труб не имать слышатися ктому в тебе: и всяк хитрец всякия хитрости не обрящется ктому в тебе, и шум жерновный не будет слышан в тебе:

18:23  и свет светилника не имать светити в тебе ктому, и глас жениха и невесты не имать слышан быти в тебе ктому: яко купцы твои беша вельможи земстии, яко волхвовании твоими прельщени быша вси языцы.

18:24  И в нем кровь пророческа и святых обретеся и всех избиенных на земли.

Chapter 19

19:1  И по сих слышах глас велий народа многа на небеси, глаголющаго: аллилуиа: спасение и слава, и честь и сила Господу нашему,

19:2  яко истинни и прави суди Его: яко судил есть любодейцу велику, яже посмради землю любодеянием своим, и отмстил кровь рабов Своих от руки ея.

19:3  И второе реша: аллилуиа. И дым ея восхождаше во веки веков.

19:4  И падоша двадесять и четыри старцы и четыри животна и поклонишася Богови седящему на престоле, глаголюще: аминь, аллилуиа.

19:5  И глас изыде от престола глаголющь: пойте Богу нашему, вси раби Его и боящиися Его, и малии и велицыи.

19:6  И слышах яко глас народа многа, и яко глас вод многих, и яко глас громов крепких, глаголющих: аллилуиа, яко воцарися Господь Бог Вседержитель:

19:7  радуимся и веселимся, и дадим славу Ему: яко прииде брак Агнчий, и жена Его уготовила есть себе.

19:8  И дано бысть ей облещися в виссон чист и светел: виссон бо оправдания святых есть.

19:9  И глагола ми: напиши: блажени званнии на вечерю брака Агнча. И глагола ми: сия словеса истинна Божия суть.

19:10  И пад пред ногама его, поклонихся ему: и глагола ми: виждь, ни: клеврет ти есмь и братий твоих имущих свидетелство Иисусово: Богу поклонися: свидетелство бо Иисусово есть дух пророчествия.

19:11  И видех небо отверсто, и се, конь бел, и седяй на нем Верен и Истинен, и Правосудный и Воинственный:

19:12  очи же Ему (еста) яко пламень огнен, и на главе Его венцы мнози: имый имя написано, еже никтоже весть, токмо Он Сам:

19:13  и облечен в ризу червлену кровию. И нарицается имя Его Слово Божие.

19:14  И воинства небесная идяху вслед Его на конех белых, облечени в виссон бел и чист.

19:15  И из уст Его изыде оружие остро, да тем избиет языки: и Той упасет я жезлом железным, и Той перет точило вина ярости и гнева Божия Вседержителева.

19:16  И имать на ризе и на стегне Своем имя написано: Царь царем и Господь господем.

19:17  И видех единаго Ангела стояща на солнце: и возопи гласом велиим, глаголя всем птицам парящым посреде небесе: приидите и соберитеся на вечерю великую Божию,

19:18  да снесте плоти царей и плоти крепких и плоти тысящников, и плоти коней и седящих на них, и плоти всех свободных и рабов, и малых и великих.

19:19  И видех зверя и цари земныя и вои их собраны сотворити брань с Седящим на кони и с воинствы Его.

19:20  И ят бысть зверь и с ним лживый пророк, сотворивый знамения пред ним, имиже прельсти приемшыя начертание зверино и покланяющыяся иконе его: жива ввержена быста оба в езеро огненное горящее жупелом:

19:21  а прочии убиени быша оружием Седящаго на кони, изшедшим из уст Его: и вся птицы насытишася от плотей их.

Chapter 20

20:1  И видех Ангела сходяща с небесе, имеюща ключь бездны и уже велико в руце своей:

20:2  и ят змия, змия древняго, иже есть диавол и сатана, и связа и на тысящу лет,

20:3  и в бездну затвори его, и заключи его, и запечатле над ним, да не прельстит ктому языки, дондеже скончается тысяща лет: и по сих подобает ему отрешену быти на мало время.

20:4  И видех престолы и седящыя на них, и суд дан бысть им: и душы растесаных за свидетелство Иисусово и за слово Божие, иже не поклонишася зверю, ни иконе его, и не прияша начертания на челех своих и на руце своей. И ожиша и воцаришася со Христом тысящу лет:

20:5  прочии же мертвецы не ожиша, дондеже скончается тысяща лет. Се воскресение первое.

20:6  Блажен и свят, иже имать часть в воскресении первем: на нихже смерть вторая не имать области, но будут иерее Богу и Христу и воцарятся с Ним тысящу лет.

20:7  И егда скончается тысяща лет, разрешен будет сатана от темницы своея и изыдет прельстити языки сущыя на четырех углех земли, Гога и Магога, собрати их на брань, ихже число яко песок морский.

20:8  И взыдоша на широту земли и обыдоша святых стан и град возлюбленный.

20:9  И сниде огнь от Бога с небесе и пояде я:

20:10  и диавол льстяй их ввержен будет в езеро огненно и жупелно, идеже зверь и лживый пророк: и мучени будут день и нощь во веки веков.

20:11  И видех престол велик бел и Седящаго на нем, Егоже от лица бежа небо и земля, и место не обретеся им.

20:12  И видех мертвецы малыя и великия стоящя пред Богом, и книги разгнушася: и ина книга отверзеся, яже есть животная: и суд прияша мертвецы от написаных в книгах, по делом их.

20:13  И даде море мертвецы своя, и смерть и ад даста своя мертвецы: и суд прияша по делом своим,

20:14  и смерть и ад ввержена быста в езеро огненное. И се есть вторая смерть.

20:15  И иже не обретеся в книзе животней написан, ввержен будет в езеро огненное.

Chapter 21

21:1  И видех небо ново и землю нову: первое бо небо и земля первая преидоста, и моря несть ктому.

21:2  И аз Иоанн видех град святый, Иерусалим нов сходящь от Бога с небесе, приготован яко невесту украшену мужу своему.

21:3  И слышах глас велий с небесе, глаголющь: се, скиния Божия с человеки, и вселится с ними: и тии людие Его будут, и Сам Бог будет с ними Бог их:

21:4  и отимет Бог всяку слезу от очию их, и смерти не будет ктому: ни плача, ни вопля, ни болезни не будет ктому, яко первая мимоидоша.

21:5  И рече Седяй на престоле: се, нова вся творю. И глагола ми: напиши, яко сия словеса истинна и верна суть.

21:6  И рече ми: совершишася. Аз есмь Алфа и Омега, начаток и конец: аз жаждущему дам от источника воды животныя туне.

21:7  Побеждаяй наследит вся, и буду ему Бог, и той будет Мне в сына.

21:8  Страшливым же и неверным, и скверным и убийцам, и блуд творящым и чары творящым, идоложерцем и всем лживым, часть им в езере горящем огнем и жупелом, еже есть смерть вторая.

21:9  И прииде ко мне един от седми Ангел, имущих седмь фиал исполненых седмих язв последних, и рече ко мне, глаголя: гряди, покажу ти невесту Агнчу жену.

21:10  И веде мя духом на гору велику и высоку и показа ми град великий, святый Иерусалим низходящь с небесе от Бога,

21:11  имущь славу Божию: и светило его подобно камени драгому, яко камени иаспису кристаловидну:

21:12  имущь стену велику и высоку, имущь врат дванадесять, и на вратех Ангелов дванадесять и имена написана, яже суть имена дванадесятим коленом сынов Израилевых:

21:13  от востока врата троя и от севера врата троя, от юга врата троя и от запада врата троя.

21:14  И стена града имеяше оснований дванадесять, и на них имен дванадесять Апостолов Агнчих.

21:15  И глаголяй со мною имеяше трость злату, да измерит град и врата его и стены его.

21:16  И град на четыри углы стоит, и долгота его толика есть, елика же и широта. И измери град тростию на стадий дванадесять тысящ: долгота и широта и высота его равна суть.

21:17  И размери стену его во сто и четыридесять и четыри лакти, в меру человеческу, яже есть Ангела.

21:18  И бе создание стены его иаспис: и град злато чисто, подобен стклу чисту.

21:19  И основания стены града всяким драгим камением украшена бяху: основание первое иаспис, второе сапфир, третие халкидон, четвертое смарагд,

21:20  пятое сардоникс, шестое сардий, седмое хрисолиф, осмое вирилл, девятое топазий, десятое хрисопрас, первоенадесять иакинф, второенадесять амефист.

21:21  И дванадесять врат дванадесять бисеров: едина каяждо врата беша от единаго бисера. И стогны града злато чисто, яко сткло пресветло.

21:22  И храма не видех в нем: Господь бо Бог Вседержитель храм ему есть, и Агнец.

21:23  И град не требуя солнца и луны, да светят в нем, слава бо Божия просвети его, и светилник его Агнец.

21:24  И языцы спасени во свете его пойдут, и царие земстии принесут славу и честь свою в него.

21:25  И врата его не имут затворитися во дни: нощи бо не будет ту.

21:26  И принесут славу и честь языков в него:

21:27  и не имать в него внити всяко скверно, и творяй мерзость и лжу, но токмо написаныя в книгах животных Агнца.

Chapter 22

22:1  И показа ми чисту реку воды животныя, светлу яко кристалл, исходящу от престола Божия и Агнча.

22:2  Посреде стогны его и по обаполы реки древо животное, еже творит плодов дванадесяте, на кийждо месяц воздая плод свой: и листвие древа во изцеление языком.

22:3  И всяка анафема не будет ктому: и престол Божий и Агнечь будет в нем, и раби Его послужат Ему,

22:4  и узрят лице Его, и имя Его на челех их.

22:5  И нощи не будет тамо, и не потребуют света от светилника, ни света солнечнаго, яко Господь Бог просвещает я: и воцарятся во веки веков.

22:6  И рече ми: сия словеса верна и истинна: и Господь Бог святых пророк посла Ангела Своего показати рабом Своим, имже подобает быти вскоре.

22:7  Се, гряду скоро: блажен соблюдаяй словеса пророчества книги сея.

22:8  И аз Иоанн видех сия и слышах. И егда слышах и видех, падох поклонитися на ногу Ангела показующаго ми сие:

22:9  и глагола ми: виждь, ни: клеврет бо твой есмь и братии твоея пророков и соблюдающих словеса книги сея: Богу поклонися.

22:10  И глагола ми: не запечатлей словес пророчествия книги сея: яко время близ есть.

22:11  Обидяй да обидит еще, и скверный да осквернится еще: и праведный правду да творит еще: и святый да святится еще.

22:12  И се, гряду скоро, и мзда Моя со Мною, воздати коемуждо по делом его.

22:13  Аз есмь Алфа и Омега, начаток и конец, Первый и Последний.

22:14  Блажени творящии заповеди Его, да будет область им на древо животное, и враты внидут во град.

22:15  Вне же пси и чародее, и любодее и убийцы, и идолослужителе и всяк любяй и творяй лжу.

22:16  Аз Иисус послах Ангела Моего засвидетелствовати вам сия в церквах. Аз есмь корень и род Давидов, и звезда утренняя и денница.

22:17  И Дух и невеста глаголют: прииди, и слышяй да глаголет: прииди. И жаждяй да приидет, и хотяй да приимет воду животную туне.

22:18  Сосвидетелствую бо всякому слышащему словеса пророчества книги сея: аще кто приложит к сим, наложит Бог на него язв написанных в книзе сей:

22:19  и аще кто отимет от словес книги пророчествия сего, отимет Бог часть его от книги животныя, и от града святаго, и написанных в книзе сей.

22:20  Глаголет свидетелствуяй сия: ей, гряду скоро: аминь. Ей, гряди Господи Иисусе.

22:21  Благодать Господа нашего Иисуса Христа со всеми вами. Аминь.