Kapingamarangi - Revelation of John

Chapter 1

1:1  I-lodo di beebaa deenei, la-go nia mee a Jesus Christ ala ne-hagagida. God ne-wanga di hagagida deenei gi Jesus Christ, belee hagi-anga gi ana gau hai-hegau nia mee ala gaa-hai hoohoo-mai. Christ ne-hagau-mai dana dangada di-langi belee haga-iloo nia mee aanei gi John, go dana dangada hai-hegau.

1:2  Gei John gu-helekai i-nia mee huogodoo ala ne-mmada ginai. Deenei la-go nnelekai hagamodongoohia o nnelekai a God, mo-di tonu ne-hagagida go Jesus Christ.

1:3  E-maluagina go tangada dela e-dau di beebaa deenei, gei e-maluagina hogi go digau ala e-hagalongo gi nnelekai kokohp aanei, mo-di daudali nia mee ala e-hihi i-lodo di beebaa deenei! Idimaa, di madagoaa dela ga-gila-aga nia mee huogodoo aanei, la-gu-hoohoo-mai.

1:4  Mai John, ang-gi nia nohongo-dabu e-hidu i Asia: Tumaalia, mo-di aumaalia adu gi goodou, mai baahi o God, dela i-golo dolomeenei, nogo i-golo mai-mua, dela ga-hanimoi, mo mai baahi nia hagataalunga e-hidu ala i-mua dono lohongo-king,

1:5  mo mai baahi o Jesus Christ, go Tangada hagi-aga-mee manawa-dahi ge donu, go taamada o-di mouli-aga i-di made, ge dela hogi go Tagi o-nia king o henuailala. Mee e-aloho i gidaadou, gei Mee guu-wwede tadau ihala gi-daha mai i ono dodo,

1:6  guu-hai gidaadou gii-hai di golohenua hai-mee-dabu, belee hai nnegau o dono God mo dono Damana. Di madamada mo-di mogobuna la-gii-noho i-baahi o Jesus Christ gaa-hana-hua beelaa! Amen.

1:7  Mmada, Christ e-hanimoi i-hongo nia gololangi! Nia daangada huogodoo mo digau ne-daudau a-Mee gi-nua, la-gaa-mmada gi Mee. Nia daangada huogodoo i henuailala ga-tangitangi i Mee. Di mee deenei le e-hai-loo gii-gila.

1:8  Dimaadua go di God-Aamua-Huoloo ga-helekai, “Au go Taamada mo-di Haga-odi, Au dela i-golo dolomeenei, nogo i-golo mai-mua, ga-hanimoi maalia.”

1:9  Au go John, di-godou duaahina, au tangada e-daudali a Jesus, au e-madalia labelaa goodou, ala e-hagakono di manawa i-nia hagaduadua ala e-lloomoi gi-nia daangada o Teenua King o Jesus Christ. Au ne-lahi gaa-dugu gi-hongo tenua go Patmos, i-di-au dela nogo hagadele nnelekai a God mo-di tonu dela ne-hagagida go Jesus.

1:10  I-di Laangi o Tagi, gei au gu-huwahuwa go di Hagataalunga, ga-longono di lee damana, e-hai be-di lee buu-‘trumpet’, e-helekai-mai i dogu dua,

1:11  “Hihia au mee ala e-mmada ginai goe gi-lodo di beebaa, hagau-ina gi-nia nohongo-dabu e-hidu aanei: Ephesus, Smyrna, Pergamum, Thyatira, Sardis, Philadelphia, mo Laodicea.”

1:12  Au gaa-huli belee mmada be di-maa koai dela e-leelee-mai gi-di-au, gei au gaa-mmada hua gi-nia lohongo-malama e-hidu ne-hai gi-nia goolo,

1:13  gei baahi nia lohongo-malama aanei, la-di Mee e-hai be tangada, e-ulu di gahu looloo e-tugi i-ono babaawae, mo dono duu-goolo e-daabui dono hadahada.

1:14  Dono libogo le e-kene madammaa giagia gadoo be nia ngaahulu siibi, be e-kene gadoo be nia ‘snow’, gei ono golomada le e-maahina be-di ahi.

1:15  Ono wae le e-maahina be-di baalanga-‘brass’ dela gu-haga-madammaa ga-haga-dingidingia, gei dono lee le e-hai be-di lee damana o-di monowai-doo.

1:16  Mee e-daahi ana heduu e-hidu i-lodo dono lima gau-donu, ge tulumanu-dauwa baahi-lua e-duu-mai i-lodo dono ngudu. Ono hadumada e-maahina gadoo be di laa dii i-di oodee.

1:17  Dogu mmada gi Mee, gei au gaa-hinga gi-lala i-baahi nia wae o-Maa, guu-hai gadoo be tangada ne-made. Mee gaa-dugu dono lima gau-donu gi ogu nua, ga-helekai, “Hudee madagu! Au go Taamada mo-di Haga-odi.

1:18  Ma ko-Au dela e-mouli! Au guu-made, gei dolomeenei Au e-mouli gaa-hana-hua beelaa. Ma ko-Au e-huwahuwa di ‘Made’ mo-di ‘Heidis’ dela go di gowaa digau mmade.

1:19  Hihia gi-lala au mee ala e-mmada ginai dolomeenei, mo nia mee ala gaa-hai nomuli.

1:20  Tadinga o-nia heduu e-hidu ala ne-mmada ginai goe i-lodo dogu lima gau-donu, mo nia lohongo-malama e-hidu ne-hai gi-nia goolo, la aanei: Nia heduu e-hidu, la-go digau di-langi o-nia nohongo-dabu e-hidu, gei nia lohongo-malama ne-hai gi-nia goolo, la-go nia nohongo-dabu e-hidu.

Chapter 2

2:1  “Hihia ang-gi tangada di-langi o-di nohongo-dabu i Ephesus: “Aanei la-go nnelekai mai baahi Tangada dela e-daahi nia heduu e-hidu i dono lima gau-donu, gei e-heehee i-mehanga nia lohongo-malama-goolo e-hidu.

2:2  Au e-iloo au mee ala ne-hai. Au e-iloo bolo goe gu-ngalua damana mo-di hagakono di manawa. Au e-iloo bolo goe hagalee donu gi digau huaidu, gei goe gu-halahala digau ala e-hai bolo ginaadou nia daangada agoago-hagau, gei digaula hagalee nia daangada agoago-hagau donu, gei goe guu-gida bolo digaula digau hai-kai-tilikai.

2:3  Goe gu-manawa hagakono, gu-hagaduadua mai i dogu ingoo, gei goe digi dugua au hegau humalia.

2:4  Malaa, deenei dagu mee e-hai-baahi adu gi-di-goe: Goe hagalee aloho i-di-Au dolomeenei, be do aloho matagidagi.

2:5  Haga-maanadu-ina di hai o do hana-gee i-di-Au! Huli gi-daha mo oo hala, heia go dau hai matagidagi. Maa goe ga-hagalee huli gi-daha mo oo hala, gei Au ga-hanimoi, ga-daa gi-daha do lohongo-malama gi-daha mo dono lohongo.

2:6  Malaa, deenei di mee e-humalia i do baahi: Goe e-de-hiihai gi-nia mee digau o Nikolaita ala e-hai, e-de-hiihai gadoo be Au.

2:7  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu! “Digau ala ma-gaa-kae di aali, gei Au gaa-wanga gi digaula di tonu o di gai nia huwa-laagau o-di laagau haga-mouli, dela e-tomo i-lodo di hadagee a God.

2:8  “Hihia ang-gi tangada di-langi o-di nohongo-dabu i Smyrna, “Aanei la-go nnelekai mai baahi Tangada dela go Taamada mo-di Haga-odi, dela ne-made, gei gu-mouli-aga labelaa.

2:9  Au e-iloo o haingadaa, Au e-iloo bolo goe e-hagaloale, gei deeai, goe e-maluagina! Au e-iloo nia mee huaidu ne-helekai hai-baahi-adu gi-di-goe mai digau bolo ginaadou digau o Jew, gei digaula hagalee digau o Jew, digaula nia daangada ni Setan!

2:10  Hudee madagu i dahi mee dela ga-hagaduadua goe. Hagalongo! Setan la-gaa-kili hunu gau i goodou gi-lodo di hale-galabudi, e-hagamada godou hagadonu, gei godou hagaduadua le e-hai i-lodo nia laangi e-madangaholu. Manawa-dahi mai gi-di-Au, ma e-aha maa goe gaa-made, gei Au ga-gowadu di mouli, di hui o doo aali.

2:11  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu! “Digau ala ma-gaa-kae di aali, la-hagalee hagahuaidu go di lua-made.

2:12  “Hihia ang-gi tangada di-langi o-di nohongo-dabu i Pergamum, “Aanei la-go nnelekai mai baahi Tangada dela dana hulumanu dauwa gaa baahi-lua.

2:13  Au e-iloo di gowaa e-noho-iei goe, go di gowaa dela e-iai di lohongo a Setan. Goe e-manawa-dahi mai gi-di-Au, gei goe digi dugua do hagadonu Au, i-di madagoaa hogi ne-daaligi-ai gii-made dagu dangada hagi-aga manawa-dahi go Antipas i-di gowaa e-noho-ai a Setan.

2:14  Malaa, nia mee dulii aanei e-hai-baahi-iei Au adu gi-di-goe: Hunu gau i godou lodo e-daudali di agoago a Balaam ne-aago Balak gi-di hai e-dagi digau Israel gi-lodo di hala, dela ne-hidi-ai digaula gaa-gai nia meegai ala ne-wanga gi-nia balu-god, mo-di hai be-di manu.

2:15  E-hai labelaa beenei, hunu daangada i godou lodo e-daudali nia agoago digau o Nikolaita.

2:16  Deenei-laa, huli gi-daha mo oo hala! Maa goe ga-hagalee huli gi-daha, hoohoo-mai-hua gei Au ga-hanimoi e-heebagi gi digau beelaa gi tulumanu-dauwa dela e-duu-mai i-lodo dogu ngudu.

2:17  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu! “Au gaa-wanga gi digau ala ga-aali nia meegai-‘manna’ nogo dugu hagammuni. Au gaa-wanga labelaa nadau hadu kene dagidahi ala e-hihi ginai di ingoo hoou, dela e-de-iloo tangada, go tangada hua dela gaa-kumi di hadu, e-iloo-ia.

2:18  “Hihia ang-gi tangada di-langi o-di nohongo-dabu i Thyatira, “Aanei la-go nnelekai mai baahi Tama a God, ono golomada e-maahina gadoo be-di ahi, ono wae e-maahina gadoo be-di baalanga-‘brass’ ma-ga-hagadingidingia.

2:19  Au e-iloo au mee ala e-hai. Au e-iloo do aloho, do manawa-dahi, au hegau, mo do manawa-hagakono. Au e-iloo au mee ala e-hai dolomeenei, ala e-mada-logo i au mee ala nogo hai matagidagi.

2:20  Malaa, deenei dagu mee e-hai-baahi adu gi-di-goe: Go dau dugu a Jezebel, bolo mee di ahina kae-hegau ni God. Di ahina deenei e-aago agu dama hai-hegau gii-hai nia huaidu hai be-di manu, mo-di gai nia meegai ala ne-wanga gi-nia balu-god.

2:21  Au guu-dugu-anga dono madagoaa e-huli-ai ono huaidu, gei di ahina deelaa e-de-hiihai di-huli gi-daha mo ono haihai be-di manu.

2:22  Malaa, gei Au gaa-hudu di ahina gi-hongo di moenge dela nogo hai ana huaidu, gaa-hai digau ala nogo hai gi mee di huaidu hai be-di manu gi-duadua kono, go di maa-hua digaula gaa-huli gi-daha mo-di huaidu ne-hai gi-di ahina deenei.

2:23  Au ga-daaligi nia hoo o-maa gii-mmade, gei nomuli, gei nia nohongo-dabu huogodoo ga-iloo bolo ma ko-Au dela e-iloo nia maanadu mo nia hiihai o-nia daangada huogodoo. Au gaa-hui tangada-nei mo tangada-nei gii-tau gi ana mee ala nogo hai.

2:24  “Gei goodou ala i-golo i Thyatira, la-digi daudalia di agoago huaidu deenei. Goodou digi kabee-ina nia agoago ala e-haga-ingoo go digau ala i-golo, bolo ‘Nia mee hagammuni a Setan’. Au e-helekai-adu gi goodou, bolo Au hagalee gowadu godou mee daamaha ala i-golo e-aamo.

2:25  Daahia gii-mau nia mee ala i godou baahi, gaa-dae-loo gi dogu hanimoi.

2:26  Digau ala ma-gaa-kae di aali, gaa-hai agu mee ala e-hiihai ginai gaa-dae-loo gi-di hagaodi, gei Au gaa-wanga gi digaula di mogobuna e-dagi nnenua llauehe.

2:27  Au gaa-wanga gi digaula di mogobuna dela e-hai be-di mogobuna dela ne-kae ko-Au mai dogu Damana: Mee gaa-dagi nia henua gi togodogo-baalanga, e-oho haga-ligiligi nia henua, gadoo be nia boolo ala ne-hai gi-nia gelegele-pigi.

2:28  “Au gaa-wanga gi digaula di heduu o-di luada.

2:29  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu!

Chapter 3

3:1  “Hihia ang-gi tangada di-langi o-di nohongo-dabu i Sardis, “Aanei la-go nnelekai mai baahi Tangada dela e-daahi nia hagataalunga e-hidu a God mo nia heduu e-hidu. Au e-iloo au mee ala e-hai. Au e-iloo bolo goe e-dau gi tangada e-mouli, gei deeai, goe guu-made!

3:2  Malaa, ala-aga! Haga-maaloo-ina-aga di mee i do baahi i-mua di-maa ma-gaa-made, ga-hagalee. Idimaa, Au e-gidee bolo au mee ala ne-hai, la-digi humalia i-mua nnadumada o dogu God.

3:3  Gi-langahia nia mee ala ne-aago-adu mo nia mee ne-longono-iei-goe. Daudalia nia maa, huli gi-daha mo o huaidu. Maa goe ga-hagalee e-ala-aga, gei Au ga-hanadu gi-di-goe, gadoo be tangada-gaiaa, gei goe e-de-iloo be dehee di madagoaa dela e-hanadu-iei Au.

3:4  Gei hunu goodou digau dulii o Sardis gu-benebene godou goloo gahu haga-madammaa. Goodou ga-ulu godou gahu-kene, ga-taele dalia Au, idimaa, goodou guu-tau bolo e-taele madalia Au.

3:5  Digau ma-ga-aali, le e-ulu nia gahu-kene beenei, gei Au hagalee daa nadau ingoo gi-daha mo-di beebaa hagamouli. Au ga-haga-modongoohia haga-madammaa i-mua dogu Damana mo ana gau di-langi bolo digaula la nia daangada ni-aagu.

3:6  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu.

3:7  “Hihia ang-gi tangada di-langi o-di nohongo-dabu i Philadelphia, “Aanei la-go nnelekai mai baahi Tangada dela e-dabu gei e-donu. Mee e-daahi di gii a David. Maa mee gaa-huge di bontai, tangada e-mee di tai di-maa ai. Maa Mee gaa-tai di bontai, tangada e-mee di-huge di-maa ai.

3:8  Au e-iloo au mee ala e-hai. Au e-iloo bolo do mogobuna le e-dulii, gei goe gu-daudali agu agoago, gei gu-manawa-dahi mai gi-di-Au. Au guu-huge di bontai i oo mua, dela e-deemee di-tai go tangada.

3:9  Hagalongo! Di buini dangada a Setan hai-kai-tilikai ala bolo ginaadou digau o Jew, gei hagalee digau o Jew. Au gaa-hai digaula gi-lloomoi, e-pala gi-lala i-mua o babaawae, gei digaula huogodoo ga-iloo bolo Au e-aloho i-di goe.

3:10  Idimaa goe gu-haga-gila agu agoago bolo gi-manawa-hagakono, gei Au ga-abaaba goe gi-daha mo-nia haingadaa ala e-lloomoi gi henuailala belee hagamada nia daangada huogodoo henuailala.

3:11  Hoohoo-mai, gei Au ga-hanimoi. Benabena-ina hagahumalia au mee i do baahi, gi-dee kae di hui doo aali go tuai dangada.

3:12  Au gaa-hai digau ala e-maaloo gii-hai nia duludulu o-di Hale Daumaha o dogu God, gei ginaadou hagalee-loo e-hagatanga gi-daha mo-di Hale Daumaha gaa-hana-hua beelaa. Au gaa-hihi gi nadau nua di ingoo o dogu God, mo-di ingoo o-di waahale o dogu God, go Jerusalem hoou, dela e-haneia i-di langi mai baahi o dogu God. Au gaa-hihi labelaa gi nadau nua dogu ingoo hoou.

3:13  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu.

3:14  “Hihia ang-gi tangada di-langi o-di nohongo-dabu i Laodicea, “Aanei la-go nnelekai mai baahi Tangada e-haga-ingoo bolo di ‘Amen’, go Tangada hagi-aga-mee manawa-dahi ge e-donu, dela go taamada o-nia mee huogodoo a God ne-hai.

3:15  Au e-iloo au mee ne-hai. Au e-iloo bolo goe hagalee e-mahana be e-magalillili! Au bolo goe gi-mahana be magalillili!

3:16  Gei goe dela hua e-mahana-dulii, hagalee mahana be e-magalillili, Au gaa-bui goe gi-daha mo dogu ngudu!

3:17  Goe e-helekai boloo, ‘Au e-maluagina, gei e-humalia mai gi-di-au, hagalee di mee i-golo e-hiihai ginai au ai.’ Gei goe e-de-iloo bolo goe e-huaidu huoloo adu gi-di-goe! Goe e-hagaloale, o goloo ai, gei e-dee-gida.

3:18  Au e-helekai hagamaamaa goe gi-huia au goolo mai i-di Au, nia goolo donu ala ne-haga-madammaa gi-di ahi, gei goe ga-maluagina. Huia labelaa o goloo kene e-gahu do langaadia goloo ai. Huia labelaa hunu wanii-lolo, e-wanga gi o golomada gi-gidee goe tangada.

3:19  Au e-bule ge hagaduadua digau huogodoo ala e-aloho-iei Au. Hagamahi gii-huli gi-daha mo oo hala.

3:20  Hagalongo! Au e-duu i-di ngudu di bontai e-dugidugi. Maa tangada ga-longono-ia dogu lee, gaa-huge di bontai, gei Au ga-ulu gi-lodo, ga-miami dalia a-mee, gei mee ga-miami dalia Au.

3:21  Gei-Au gaa-wanga di tonu gi digau ala ma-ga-aali, gii-noho i dogu baahi i-hongo dogu lohongo-king, gadoo be Au dela ne-aali, gaa-noho i-baahi dogu Damana i-hongo dono lohongo-king.

3:22  “Maa goe o dalinga i-golo, hagalongo gi nnelekai di Hagataalunga ang-gi nia nohongo-dabu.”

Chapter 4

4:1  I-muli-hua nia mee aanei, gei au guu-hai dagu moe, ne-mmada gi-di bontai e-mahuge i-di langi. Gei di lee e-hai be-di lee-‘trumpet’ dela ne-hagalongo ginai au i-mua, ga-helekai, “Hanaga gi-kinei, gei au ga-hagi-adu gi-di-goe nia mee ala gaa-hai nomuli.”

4:2  Di madagoaa-hua deelaa, gei au gu-huwahuwa go di Hagataalunga, ga-gidee-au di lohongo-king i-di langi e-noho Tangada i-ono-nua.

4:3  Ono golomada e-maahina gadoo be nia hadu hagalabagau ‘jasper’ mo ‘carnelian’, gei di umada e-gono gi-di hadu-‘emerald’, e-haganiga di gili di lohongo-king.

4:4  Nia lohongo-aamua e-madalua maa-haa e-haganiga di lohongo-king, e-noho-ai digau mmaadua-aamua e-madalua maa-haa, e-ulu nadau gahu-kene, e-ulu nia hau-goolo.

4:5  Nia ila e-dabadaba, nia lee-llauehe, mo nia lee-atili e-lloomoi i-di lohongo-king deelaa. Nia malama e-hidu e-ulaula i-mua di lohongo deelaa, go nia hagataalunga e-hidu a God.

4:6  Gei di mee dela e-hai gadoo be-di tai-kalaadi, e-maalama be-di kalaadi-‘crystal’, la-i-mua labelaa di lohongo deelaa. Gei nia baahi huogodoo o-di lohongo deelaa, le e-haganiga gi-nia manu-mouli e-haa, nadau golomada e-huli gi-mua mo gi-muli.

4:7  Tahi manu le e-hai be-di laion. Di-lua manu le e-hai be-di kau-daane. Di-tolu manu le e-hai ono hadumada be nia hadumada dangada, ge di-haa manu le e-hai be-di manu-‘eagle’ e-maangi.

4:8  Nia manu mouli e-haa le e-dagi-ono nadau bakau, nadau gili guu-buni golomada, i-lodo mo i-tua. Boo mo aa, gei digaula e-dee-noho di-nadau dadaahili boloo, “Dabuaahia, dabuaahia, dabuaahia, go Dimaadua go di God-Aamua-Huoloo, dela nogo i-golo, i-golo dolomeenei, mo dela ga-hanimoi.”

4:9  Nia manu-mouli e-haa le e-daahili nia daahili hagaamu, hagalaamua mo-di danggee ang-gi Tangada dela e-noho i-hongo di lohongo-king, dela e-mouli gaa-hana-hua beelaa. Digaula ma-ga-daahili,

4:10  gei digau madalua maa-haa mmaadua-aamua gaa-pala gi-lala i-mua Tangada dela e-noho i-hongo di lohongo-king, ga-daumaha ang-gi Mee dela e-mouli gaa-hana-hua beelaa. Digaula gaa-kili nadau hau-goolo gi-lala i-mua di lohongo-king, ga-helekai,

4:11  “Di-madau Dagi mo di-madau God! Goe e-tau-anga bolo e-wanga ginai di madamada, di hagalaamua, mo-di maaloo. Idimaa, ma Kooe hua dela ne-hai nia mee huogodoo, gaa-hai nia maa gi i-golo, gi-mouli mai i do hiihai!”

Chapter 5

5:1  Au gaa-mmada gi-di beebaa-wini i-lodo di lima gau-donu o tangada dela e-noho i-hongo di lohongo-king. Di beebaa-wini deenei la-guu-buni di hihi ginai nia mee i-nia baahi e-lua, gei guu-nnoo gi-nia noo e-hidu.

5:2  Gei au gaa-mmada gi tangada di-langi maaloo, e-hai dana haga-iloo gi-nua, “Ma koai dela e-tau di-wwede nia noo, gaa-huge di beebaa-wini?”

5:3  Deai tangada i-di langi, be i henuailala, be i-bahi-i-lala henuailala, e-mee di-huge di beebaa-wini, be e-mmada gi-lodo di-maa.

5:4  Gei-au guu-dangi huoloo giibeni, idimaa, tangada ne-gida bolo e-mee di-huge di beebaa-wini, be e-mmada gi-lodo ai.

5:5  Tangada e-dahi i digau mmaadua-aamua, ga-helekai-mai, “Hudee dangi. Mmada! Di Laion mai di madawaawa o Judah, go di hagadili aamua o David, go Mee gu-aali, e-mee di-wwede nia noo e-hidu, mo-di huge di beebaa-wini deelaa.”

5:6  Gei-au gaa-mmada gi Tama-siibi, e-duu i-tungaalodo di lohongo-king, e-haganiga go nia manu-mouli e-haa, mo digau mmaadua-aamua. Tama-siibi le e-hai be siibi ne-daaligi gii-made. Mee ono madaagoo e-hidu, ge e-hidu ono golomada, ala go nia hagataalunga e-hidu a God ala ne-hagau gi-lodo henuailala hagatau.

5:7  Tama-siibi gaa-hana, gaa-kae di beebaa-wini i-di lima gau-donu o Tangada dela e-noho i-hongo di lohongo-king.

5:8  Dono kae di beebaa deelaa, nia manu mouli e-haa, mo digau mmaadua-aamua e-madalua maa-haa gaa-pala gi-lala i-mua Tama-siibi. Digaula huogodoo e-dagidahi mee hai-daahili-‘harp’ mono boolo-goolo e-honu i-nia mee haga-kala-‘incense’, ala go nia dalodalo o-nia daangada a God.

5:9  Digaula gaa-huwa di-nadau daahili hoou, “Goe e-tau-anga bolo e-kae di beebaa-wini, gaa-wwede ono noo. Idimaa, Goe dela gu-daaligi, guu-made, gei mai i oo dodo Goe gu-hui gi God nnagadilinga daangada mai nia madawaawa huogodoo, hagadilinga helekai, nnenua-llauehe, mo nia hagadilinga daangada- henua huogodoo.

5:10  Goe guu-hai digaula gii-hai tenua hai-mee-dabu e-hai nnegau tadau God, gei digaula e-dagi i henuailala.”

5:11  Au gaa-mmada labelaa, ga-longono digau di-langi, digau e-dogologowaahee! Digaula e-tuu e-haganiga di lohongo-king, nia manu-mouli e-haa, mo digau mmaadua-aamua.

5:12  Digaula e-huwa di-nadau daahili boloo, “Tama-siibi ne-daaligi gii-made, le e-tau-anga bolo e-wanga ginai di mogobuna, maluagina, iloo-mee, mo nia mahi, aamua, madamada mo-di hagaamu!”

5:13  Gei-au ga-longono nia mee huogodoo i-di langi, henuailala, bahi-i-lala henuailala, mo i-lodo di moana, ala go nia mee mouli huogodoo i henuailala mo lala di langi. Digaula e-dadaahili boloo, “Di hagaamu, di hagalaamua, di madamada, mo-di maaloo gii-wanga-ina gi Mee dela e-noho i-hongo di lohongo-king mo ang-gi Tama-siibi, gaa-hana-hua beelaa!”

5:14  Nia manu mouli e-haa ga-helekai, “Amen!” Gei digau mmaadua-aamua gaa-pala gi-lala, ga-daumaha.

Chapter 6

6:1  Nomuli, gei au gaa-mmada gi Tama-siibi e-huge tahi noo i-nia noo e-hidu aalaa, gei au ga-longono di manu e-dahi i-nia manu-mouli e-haa, e-helekai be-di lee-atili, “Hanimoi!”

6:2  Au gaa-mmada, ga-gidee di hoodo kene. Tangada dela i-hongo di-maa le e-daahi dana maalei, gei mee gaa-wanga ginai di hau-king. Mee gaa-hana be taane maaloo hai-heebagi belee haga-magedaa ono hagadaumee.

6:3  Nomuli, gei Tama-siibi gaa-huge di lua noo, gei au ga-longono di lua manu-mouli e-helekai, “Hanimoi!”

6:4  Di hoodo labelaa ga-hanimoi, di hoodo mmee. Tangada dela i-hongo di hoodo deelaa, la-guu-wanga ginai di mogobuna e-daamada dana dauwa i henuailala, e-hai nia daangada gi-hagadau dadaaligi ginaadou. Mee guu-wanga labelaa ginai tulumanu-dauwa damana.

6:5  Nomuli, gei Tama-siibi gaa-huge di tolu noo, gei au ga-longono di tolu manu-mouli e-helekai, “Hanimoi!” Au gaa-mmada, ga-gidee di hoodo luuli. Tangada dela i-hongo di-maa, e-daahi di mee pauna-mee i-lodo dono lima.

6:6  Au ga-longono di mee e-hai be-di lee e-hanimoi i-mehanga nia manu-mouli e-haa, e-helekai, “Nia pauna palaawaa-‘wheat’ e-lua, dela di hui-ngalua di laangi e-dahi, gei nia pauna palaawaa-‘barley’ e-ono, dela di hui-ngalua di laangi e-dahi. Hudee hunahuna-ina nia laagau-olib mo nia hadagee-waini!”

6:7  Nomuli, gei Tama-siibi gaa-huge di haa noo, gei au ga-longono di haa manu-mouli e-helekai, “Hanimoi!”

6:8  Au gaa-mmada, ga-gidee di hoodo gono-kene. Tangada dela i-hongo di maa, le e-haga-ingoo bolo “Made”. Gei di “Heidis”, e-daudali a-mee. Meemaa guu-wanga ginai di mogobuna e-daaligi dahi baahi e-haa o henuailala, e-daaligi gi tauwa, tau-magamaga, nia magi, mo nia manu lodo-geinga.

6:9  Nomuli, gei Tama-siibi gaa-huge di lima noo, gei au gaa-mmada gi-lala di gowaa hai-tigidaumaha gi-nia hagataalunga o digau ala ne-daaligi. Digaula ne-daaligi, idimaa, digaula nogo hagadele nnelekai a God, gei nogo manawa-dahi ang-gi nadau haga-modongoohia nnelekai a God.

6:10  Digaula gaa-wwolo gi-nua, ga-heeu, “Tagi Maaloo-dangihi, e-haga-madagu gei e-donu! E-waalooloo behee i-mua dau hagi-aga nia daangada i henuailala, ga-hagaduadua digau ala ne-daaligi gimaadou?”

6:11  Digaula huogodoo gaa-wanga ginai nia gahu-lloo-kene dagidahi, ga-helekai ginai bolo gi-taalia maalia, gaa-dae-loo gi-di hulu dogologo o nadau ihoo hai-hegau mo nadau ihoo dama Christ guu-dohu gu-dogomaalia di daaligi be di-nadau hai nogo hai.

6:12  Gei-au gaa-mmada gi Tama-siibi e-huge di ono noo. Gei tenua gu-ngalungalua damana, gei di laa ga-bouli dongoeho gadoo be-di gahu-luuli, gei di malama gaa-mmee hagatau be nia dodo.

6:13  Nia heduu ga-too-ia gi henuailala, gadoo be nia golee-modo o-di laagau-‘fig’ ne-lulu go di madangi maaloo.

6:14  Di langi ga-hagalee gadoo be-di lau-beebaa ne-wini, gei nia gonduu mo nia henua huogodoo ga-haga-mmaanege gi-daha mo nadau lohongo.

6:15  Nia king o henuailala, nia dagi, nia dagi-dauwa aamua, digau maluagina, digau mogobuna ge aamua, mo nia daangada huogodoo ala i-golo, nia hege mo digau moholo ang-gi ginaadou, gaa-pala hagammuni i-lodo nia lua mo i-lala nia hadugalaa o-nia gonduu.

6:16  Digaula gaa-wwolo gi-nia gonduu mo nia hadugalaa, “Too-ia gi madau nua, e-hagammuni gimaadou i-nia golomada Tangada dela e-noho i-hongo di lohongo-king, mo i-di hagawelewele o Tama-siibi!

6:17  Di laangi hagamadagudagu-dangada o nau hagawelewele la-gu-dau-mai, koai dela e-mee di-duu-aga e-hai-baahi gi di-maa?”

Chapter 7

7:1  Nomuli, gei au gaa-mmada gi digau di-langi dogohaa, e-tuu i-nia madaaduge e-haa o henuailala, e-daahi nia madangi e-haa gi-dee gono mai gi henuailala be gi-di moana, be gi-nia laagau huogodoo.

7:2  Au gaa-mmada gi tangada di-langi labelaa e-gila-aga mai baahi i-dua e-gaamai di maaga o-di God Mouli. Mee gaa-wolo gi-nua gi digau di-langi dogohaa ala ne-haga-mogobuna go God belee oho henuailala mo-di moana,

7:3  “Hudee ohaa-ina henuailala, di moana, be go nia laagau, gaa-dae-loo gi di-madau maaga nia lae o-nia daangada hai-hegau a God.”

7:4  Au gu-haga-iloo ginai bolo di hulu-dangada dela ne-maaga gi-di hagailongo o God i-hongo nadau lae, le e-lau-madahaa maa-haa-mana-(144,000) mai nia madawaawa e-madangaholu maa-lua o Israel,

7:5  nia daangada e-madangaholu maa-lua-mana-(12,000) mai nia madawaawa dagidahi aanei: Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph mo Benjamin.

7:6  nia daangada e-madangaholu maa-lua-mana-(12,000) mai nia madawaawa dagidahi aanei: Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph mo Benjamin.

7:7  nia daangada e-madangaholu maa-lua-mana-(12,000) mai nia madawaawa dagidahi aanei: Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph mo Benjamin.

7:8  nia daangada e-madangaholu maa-lua-mana-(12,000) mai nia madawaawa dagidahi aanei: Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph mo Benjamin.

7:9  Nomuli, gei au gaa-mmada, ga-gidee nia daangada dogologowaahee e-deemee di-dau! Digaula nia hagadilinga daangada-henua, nia madawaawa, nnenua-llauehe, mo nnelekai huogodoo, e-tuu i-mua di lohongo-king mo Tama-siibi, e-ulu nia gahu-lloo-kene, e-daahi nadau louniu.

7:10  Digaula gaa-wwolo gi-nua, “Di haga-mouli la ni tadau God dela e-noho i-hongo di lohongo-king, mo ni Tama-siibi.”

7:11  Digau-di-langi huogodoo e-tuu, e-haganiga di lohongo-king, digau mmaadua-aamua, mo nia manu-mouli e-haa. Digaula gaa-pala gi-lala i-mua di lohongo-king, ga-daumaha ang-gi God,

7:12  ga-helekai, “Amen! Di hagaamu, madamada, iloo-mee, danggee, hagalaamua, mogobuna mo-di maaloo, la-gii-wanga-ina gi God gaa-hana-hua dono hagaodi ai! Amen!”

7:13  Tangada e-dahi i digau mmaadua-aamua ga-heeu-mai, “Digau aanei la koai ala e-ulu nia gahu lloo-kene? Digaula ne-lloomoi i-hee?”

7:14  Au ga-helekai, “Meenei, au e-de-iloo. Ma kooe dela e-iloo.” Mee ga-helekai-mai, “Aanei la-go nia daangada ne-loomoi laa-lodo nia hagaduadua llauehaa, gu-gaugau nadau gahu gii-kene gi-nia dodo o Tama-siibi.

7:15  Deelaa-laa gaa-tuu-iei digaula i-mua di lohongo-king o God mo-di hai-hegau gi Mee i-di boo mo-di aa i-lodo dono Hale Daumaha. Tangada dela e-noho i-hongo di lohongo-king e-madamada humalia i digaula mai dono noho i nadau baahi.

7:16  Digaula e-deemee di-hiigai be e-hieinu labelaa. Di laa be-di welengina e-deemee di-dudu digaula,

7:17  idimaa, Tama-siibi dela i-tungaalodo di lohongo-king la-gaa-hai di-nadau dangada hagaloohi-siibi, gei Mee gaa-lahi digaula gi-di monowai haga-mouli. Gei God ga-omo nia dangi huogodoo gi-daha mo nadau golomada.”

Chapter 8

8:1  Di madagoaa hua Tama-siibi ne-huge di hidu noo, gei di langi gu-kila-loo holongo di baahi-aawaa.

8:2  Gei-au gaa-mmada gi digau di-langi dogohidu, e-tuu i-mua o God. Digaula guu-wanga ginai nia buu-‘trumpet’ e-hidu.

8:3  Gei tuai dangada di-langi dela e-daahi dana boolo-goolo dudu-mee haga-kala, gaa-duu i-di gowaa dudu-tigidaumaha. Gei mee gaa-wanga ginai nia mee haga-kala-‘incense’ e-logo belee haga-puni ang-gi nia dalodalo o-nia daangada a God huogodoo, mo-di wanga nia ‘incense’ gi-hongo di gowaa dudu-tigidaumaha goolo, dela e-duu i-mua di lohongo-king.

8:4  Nia huiahi o-nia mee haga-kala ala e-dudu, la-gaa-hula gi-nua gi-daha mo nia lima o tangada di-langi dela e-duu i-mua o God, e-haga-puni-anga gi-nia dalodalo o-nia daangada a God.

8:5  Tangada di-langi gaa-kae di boolo dudu-mee haga-kala, gaa-haa ginai di ahi mai di gowaa dudu-tigidaumaha, gaa-hudu-ia gi-hongo henuailala. Di madagoaa hua deelaa, gei nia lee-llauehe, nia lee-atili, nia ila ga-dabadaba, mo-di ngalungalua-tenua gaa-hai.

8:6  Nomuli, gei digau di-langi dogohidu mo nadau buu-‘trumpet’ e-hidu ga-hagatogomaalia e-ili nia maa.

8:7  Togo-dahi dangada di-langi ga-ili dana buu-‘trumpet’. Gei di uwa-hadu-magalillili mo dono ahi, e-unugi gi-nia dodo gaa-doo-iha gi-hongo henuailala. Dahi baahi e-dolu o henuailala gaa-wwele, ge dahi baahi e-dolu o-nia laagau gaa-wwele, gei nia geinga ala i-golo la-gaa-wwele labelaa.

8:8  Togolua dangada di-langi ga-ili dana buu-‘trumpet’. Gei di mee dela e-hai gadoo be-di gonduu-wele damana la-gaa-hudu gi-lodo di moana. Dahi baahi e-dolu o-di moana la-guu-hai nia dodo,

8:9  ge dahi baahi e-dolu o-nia manu-mouli i-lodo di moana la-guu-mmade, ge dahi baahi e-dolu o-nia wagabaalii la-gu-mooho.

8:10  Togodolu dangada di-langi ga-ili dana buu-‘trumpet’. Gei di heduu-damana e-ula gadoo be-di lama-ulaula, ga-doo-iha i-di langi gi-hongo dahi baahi e-dolu o-nia monowai-mmidi mo i-hongo nia monowai uwa-aga.

8:11  (Di haga-ingoo o-di heduu deelaa la-go “Mmala”.) Dahi baahi e-dolu o-nia wai la-guu-mmala, gei nia daangada dogologo ala ne-inu nia wai mmala la-guu-mmade.

8:12  Togohaa dangada di-langi ga-ili dana buu-‘trumpet’. Gei dahi baahi e-dolu o-di laa, dahi baahi e-dolu o-di malama, dahi baahi e-dolu o-nia heduu la-gu-dugidugi gu-momooho, ga-hidi-mai-ai dahi baahi e-dolu o nadau maahina la-gu-bouli. Dahi baahi e-dolu o-di aa mo dahi baahi e-dolu o-di boo la-gu-deai nau maahina ai.

8:13  Nomuli, gei au gaa-mmada, ga-longono di manu-‘eagle’ e-maangi i-nua i-lodo di ahiaalangi, e-helekai dono lee gi-nua boloo, “E-hagamadagudagu-dangada, e-hagamadagudagu-dangada! E-hagamadagudagu-dangada huoloo ang-gi digau ala e-noho i-hongo henuailala i-di madagoaa o-nia lee-‘trumpet’ ala ma-ga-ili go digau di-langi dogodolu ala i-golo!”

Chapter 9

9:1  Togolima dangada di-langi ga-ili dana buu-‘trumpet’. Gei-au gaa-mmada gi-di heduu dela ne-doo-ia gi henuailala, gaa-wanga ginai di gii o-di luwa dono dua-ai.

9:2  Di heduu gaa-huge di lua deelaa, gei nia huiahi ga-buu-aga, e-hai gadoo be nia huiahi mai di gowaa dudu-mee damana. Di maalama o-di laa mo-di ahiaalangi la-gu-haga-bouli go nia huiahi mai di luwa deelaa.

9:3  Nia manu-‘locust’ ga-lloomoi gi-hongo henuailala mai i-lodo nia huiahi aalaa, gaa-wanga ginai nia mogobuna e-hai be nia mogobuna o-nia manu-‘scorpion’.

9:4  Nia manu-‘locust’ ga-helekai ginai bolo ginaadou gi-hudee hunahuna-ina nia geinga be go nia laagau, be go di-ingoo-hua nia laagau ala i-golo. Digaula e-mee-hua di-hunahuna nia daangada ala digi maaga ginai di hagailongo o God i-hongo nadau lae.

9:5  Nia manu-‘locust’ la-digi dumaalia ginai gi-daaligidia nia daangada aanei gii-mmade, e-dumaalia-hua gi-haga-mmaemmae-ina digaula i-lodo nia malama e-lima. Di mmae o-di haga-mmaemmae deenei, le e-hai be-di mmae ne-hai go di manu-‘scorpion’.

9:6  I-lodo nia malama e-lima aalaa, gei nia daangada ga-halahala di-nadau hai gii-mmade-ai ginaadou, gei e-deemee. Digaula ga-hiihai bolo ginaadou gii-mmade, gei di made la-gaa-hana gi-daha mo digaula.

9:7  Nia manu-‘locust’ le e-hai gadoo be nia hoodo ala gu-togomaalia ang-gi tauwa. I-hongo nia libogo digaula, la nia mee e-hai gadoo be nia hau-goolo, nia hadumada digaula e-dina gi nnadumada-dangada.

9:8  Nadau ngaahulu le e-dina gi-nia ngaahulu-libogo ahina, nia niha digaula le e-dina gi-nia niha-laion.

9:9  Nadau hadahada le e-duuli gi-nia mee haaligi-hadahada baalanga, gei di lee ne-hai go nadau bakau le e-hai gadoo be-di lee o-nia waga hongo-henua logowaahee e-llele hagalimalima gi tauwa.

9:10  Digaula nadau hugu mo nadau mee dadaalo-dangada, gadoo be-di hugu-manu-‘scorpion’, aanei go nadau hugu e-mogobuna di-haga-mmaemmae nia daangada i-lodo nia malama e-lima.

9:11  Digaula di-nadau king e-dagi ginaadou dela go tangada di-langi e-dagi di luwa-dono-dua-ai. Di ingoo o-maa i telekai Hebrew bolo “Abaddon”, i telekai Greek bolo “Apollyon”, dono hadinga e-hai boloo, “Tangada-Oho-Mee”.

9:12  Di hagamadagudagu-dangada matagidagi la-guu-lawa, i-muli nia mee aanei nia hagamadagudagu-dangada e-lua e-lloomoi i-golo.

9:13  Togo-ono dangada di-langi ga-ili dana buu-‘trumpet’. Gei-au ga-longono di lee e-hanimoi i-nia madaaduge e-haa o-di gowaa dudu-tigidaumaha ne-hai gi-nia goolo, dela e-duu i-mua o God.

9:14  Di lee deelaa ga-helekai gi togo-ono dangada di-langi, “Haga-maahede-ina digau di-langi dogohaa ala e-lawalawa i taalinga di monowai damana go Euphrates!”

9:15  Digau-di-langi dogohaa la-gu-haga-maahede. Digaula ne-hagatogomaalia ang-gi di aawaa deenei, di laangi deenei, di malama deenei, mo-di ngadau deenei, belee daaligi dahi baahi e-dolu o-nia daangada huogodoo gii-mmade.

9:16  Au ne-haga-iloo ginai bolo di hulu gau-dauwa llele-hoodo la digau e-lua-lau-guli-(200,000,000).

9:17  I-lodo dagu moe, au ne-mmada gi-nia hoodo mo digau e-llele-ai. Nia baalanga ala e-haaligi nia hadahada digaula la-gu-mmee gadoo be-di ahi, e-halatee be-di hadu hagalabagau ‘sapphire’, gei e-loubuge be nia ‘sulfur’. Nia libogo o-nia hoodo le e-dina gi-nia libogo laion, gei nia ulaula-ahi, nia huiahi mo nia ‘sulfur’ e-lloomoi i-lodo nadau ngudu.

9:18  Dahi baahi e-dolu o-nia daangada la-ne-daaligi gii-mmade go nia hagaduadua e-dolu aanei: di ahi, di huiahi mo nia ‘sulfur’, ala nogo lloomoi i-lodo nia ngudu o-nia hoodo.

9:19  Nadau mahi la-i-lodo nadau ngudu mo i-lodo nadau hugu. Nia hugu le e-hai be nia gihaa ala nadau libogo, gei digaula e-haga-mmaemmae nia daangada gi nadau hugu.

9:20  Nia daangada ala i-golo, ala digi daaligidia go nia hagaduadua aanei, digaula digi huli gi-daha mo nadau mee ala ne-bida hai go ginaadou. Digaula digi dugua nadau hai-daumaha ang-gi nia hagataalunga huaidu, be go nia ada-balu-god ala ne-hai gi-nia goolo, silber, baalanga-mmee, hadu mo laagau, ala e-deemee di-mmada, hagalongo be taele.

9:21  Digaula digi dugua labelaa nadau dadaaligi-dangada, nadau haihai buubuu, nadau haihai be-di manu, be go nadau haihai gaiaa.

Chapter 10

10:1  Gei-au gaa-mmada gi tuai dangada di-langi maaloo e-haneia i-di langi. Mee e-haneia e-gahu gi-di gololangi, gei di umada e-haganiga dono libogo. Nia hadumada o-maa e-dina gi-di laa, gei nia wae o-maa e-hai be nia duludulu ulaula.

10:2  Mee dana beebaa-wini dulii e-mahuge i-lodo dono lima. Mee gaa-dugu dono wae gau-donu gi-hongo di moana, ge dono wae gau-ihala gi-hongo tenua,

10:3  gei mee gaa-wolo dono lee gi-nua gadoo be nia lee maaloo o-nia laion. I-muli-hua dono wolowolo, gei nia atili e-hidu ga-helekai gi mee.

10:4  Nadau madagoaa hua ne-helekai-ai, gei au ne-belee hihi nnelekai digaula, gei au ga-longono di lee e-helekai mai di langi, “Haga-mmuni-ina nnelekai nia atili e-hidu, hudee hihia gi-lala!”

10:5  Tangada di-langi ne-mmada ginai au nogo duu i-hongo di tai mo tenua ga-dahi-aga dono lima gau-donu gi-di langi,

10:6  ga-hagamodu i-di ingoo o God, dela e-mouli gaa-hana-hua beelaa, dela ne-hai di langi mo henuailala, di moana mo nia mee huogodoo i nadau lodo. Tangada di-langi ga-helekai, “Ma hagalee haga-duai!

10:7  Di madagoaa togohidu dangada di-langi ma-ga-ili dana ‘trumpet’, deelaa di madagoaa a God ga-haga-gila-aga dana maanadu hagammuni, be dana haga-iloo ang-gi ana gau hai-hegau, go nia soukohp.”

10:8  Di lee dela ne-hagalongo ginai au nogo helekai mai i-di langi, ga-helekai mai labelaa gi-di-au boloo, “Hana, kae-ina di beebaa mahuge dela i-lodo di lima tangada di-langi dela e-duu i-hongo di tai mo tenua.”

10:9  Au gaa-hana gi tangada di-langi deelaa, ga-helekai gi mee bolo gi-gaamai gi-di-au di beebaa-wini dulii. Gei mee ga-helekai-mai, “Kae-ina geina, ma-gaa-mmala i-lodo do dinae, gei ga-maangala be nia mee-maangala i-lodo doo ngudu.”

10:10  Au gaa-kae di beebaa-wini dulii i-di lima o-maa, gaa-gai, gei di-maa e-maangala be nia mee-maangala i-lodo dogu ngudu. I-muli dagu holo di maa, gei di-maa guu-mmala i-lodo dogu dinae.

10:11  Mee ga-helekai, “Goe e-hai gi-haga-iloo labelaa nnelekai a God i-di hai o-nia henua-llauehe, nia hagadilinga daangada-henua, nia hagadilinga helekai, mo nia king.”

Chapter 11

11:1  Di laagau ne-gaamai gi-di-au e-hai be-di laagau hagatau-mee, gei mee ga-helekai-mai, “Hana hagataulia di Hale Daumaha a God mo dono gowaa dudu-tigidaumaha. Daulia digau ala e-daumaha i-lodo di Hale Daumaha.

11:2  Malaa, hudee hagatau-ina nia gowaa ala i-di baahi gi-tua, idimaa, ma-guu-wanga gi digau tuadimee, go digau ala ga-dagadagahi di waahale haga-madagu i-lodo nia malama e-madahaa maa-lua.

11:3  Au ga-hagau agu daangada hagadootonu dogolua ala e-ulu nia gahu lodo-huaidu, gei meemaa ga-haga-iloo nnelekai kokohp a God i-lodo nia laangi e-mana maa-lua-lau-modoono-(1,260).”

11:4  Nia daangada hagadootonu dogolua la-go nia laagau-olib e-lua mo nia lohongo malama e-lua ala e-tuu i-mua di Tagi o henuailala.

11:5  Maa tangada ma-ga-helekai bolo ia e-hagaduadua meemaa, di ahi ga-hanimoi i-lodo nau ngudu, ga-daaligi nau hagadaumee. Deenei di hai e-daaligi-ai gii-made tangada dela bolo ia e-hagaduadua meemaa.

11:6  Meemaa nau mogobuna e-tai di langi gi-dee doo di uwa i-lodo nau madagoaa ala e-haga-iloo nnelekai kokohp a God. Meemaa nau mogobuna labelaa i-nia wai, e-huli nia wai gii-hai nia dodo. Meemaa nau mogobuna labelaa e-hagaduadua henuailala i-nia holongo ala e-hiihai ginai ginaua.

11:7  Nau madagoaa ma-gaa-lawa di-haga-iloo nau helekai, di manu hagamadagudagu-dangada dela e-hanaga i-lodo di luwa dono dua-ai, la-ga-heebagi gi meemaa. Gei mee ga-haga-magedaa meemaa, ga-daaligi meemaa gii-mmade.

11:8  Gei nau huaidina la-ga-mmoemmoe-hua i-hongo di ala o-di waahale deelaa, di gowaa dela ne-daudau-ai di-nau Dagi. Di ingoo ada hagamodongoohia o-di waahale la-go Sodom, be go Egypt.

11:9  Nia daangada mai nia henua-llauehe, madawaawa, nia hagadilinga helekai, mo nia hagadilinga daangada-henua huogodoo, la-gaa-mmada gi nau huaidina i-lodo nia laangi e-dolu mo-di baahi, gei digaula hagalee dumaalia gi dahi dangada gi-danumia meemaa.

11:10  Nia daangada henuailala gu-tenetene gi-di nau mmade. Digaula gaa-budu mo-di hai nadau wanga-dehuia i nadau mehanga, idimaa, nia soukohp dogolua aalaa nogo hagaduadua digau henuailala.

11:11  I-muli nia laangi e-dolu mo-di baahi, gei di mouli mai i-baahi o God ga-ulu gi-lodo meemaa, gei meemaa gaa-tuu gi-nua, gei nia daangada huogodoo ala ne-mmada gi meemaa la-gu-mmaadagu huoloo.

11:12  Gei nia soukohp dogolua ga-longono di lee e-helekai mai di langi gi meemaa, “Lloo-aga gi kinei!” Meemaa gaa-hula gi-di langi i-lodo di gololangi, gei nau hagadaumee nogo daumada meemaa.

11:13  Di madagoaa-hua deelaa, gei tenua gu-ngalungalua, dahi baahi e-madangaholu o-di waahale gu-mooho, nia daangada e-hidu-mana-(7,000) la-guu-mmade. Nia daangada ala ne-dubu, la-gu-mmaadagu huoloo, ga-hagaamu nia mahi di God o-di langi.

11:14  Di lua hagamadagudagu-dangada la-guu-lawa, gei di tolu hagamadagudagu-dangada la-ga-limalima mai.

11:15  Togohidu dangada di-langi ga-ili dana buu-‘trumpet’. Gei nia lee-llauehe gu-i-lodo di langi, e-helekai, “Di mogobuna dela e-dagi henuailala la-guu-hai di mee ni Dimaadua mo dana Mesaia, gei Mee gaa-dagi gaa-hana-hua beelaa!”

11:16  Digau mmaadua-aamua e-madalua maa-haa ala e-noho i-hongo nadau lohongo-aamua i-mua o God, gaa-pala gi-lala ga-daumaha ang-gi God,

11:17  ga-helekai, “Dimaadua go di God-Aamua-Huoloo, dela i-golo, ge nogo i-golo! Gimaadou e-danggee-adu gi-di-Goe, bolo Goe dela guu-kae do mogobuna maaloo, gei gu-daamada guu-dagi!

11:18  Digau digi maalama la-gu-hagawelewele huoloo, idimaa, di madagoaa o do hagawelewele la-gu-dau-mai, go di madagoaa e-hagi-aga digau ala guu-mmade. Di madagoaa la-gu-dae-mai e-wanga nia hui gi au gau hai-hegau, nia soukohp, mo au daangada huogodoo ala e-hagalaamua do ingoo, digau lligi mo digau aamua. Di madagoaa la-gu-dae-mai e-hagahuaidu digau ala e-hagahuaidu henuailala!”

11:19  Di Hale Daumaha o God dela i-di langi la-gu-mahuge, gei Tebedebe o-di Hagababa la-gu-gidee bolo gu i-golo. Gei di ila gu-dabadaba, nia lee-atili gu-haluihalulu, henuailala gu-ngalungalua ge di uwa-hadu-kolii guu-doo.

Chapter 12

12:1  Di ada haga-gologolo-dangada ga-gila-aga i-di langi: Di ahina e-hai dono gahu gi-di laa, gei di malama la-i-lala ono babaawae. Gei e-hai dono hau gi-di hau madangaholu maa-lua ono heduu.

12:2  Mee hoohoo ga-haanau, di mmae mo-di duadua o-di haanau guu-hai a mee gi-dangidangi.

12:3  Di ada labelaa ga-gila-aga i-di langi: Di manu-‘dragon’ mmee damanaiee, ono libogo e-hidu, ge madangaholu madaagoo, mo ono hau-king dagidahi i-hongo ono libogo.

12:4  Dono hugu gaa-mmoli dahi baahi e-dolu o-nia heduu gi-daha mo-di langi, gaa-kili eia nia maa gi henuailala. Mee gaa-duu i-mua di ahina belee gai di tama a-maa ma-ga-haanau.

12:5  Di ahina deelaa ga-haanau dana dama-daane, dela gaa-dagi nia henua-llauehe huogodoo gi togodogo-baalanga. Gei di tama la-ga-daa gi-daha hagalimalima gaa-lahi gi God i-dono lohongo-king.

12:6  Di ahina deelaa gaa-lele gi-di anggowaa, gi-di gowaa a God ne-hagatogomaalia gi mee, e-madamada humalia-ai-ei mee i-lodo nia laangi e-mana maa-lua-lau modoono-(1,260).

12:7  Tauwa ga-daamada i-di langi. Michael mo ana gau di-langi ga-heebagi gi-di manu-‘dragon’, gei di manu-‘dragon’ mo ana gau di-langi ga-heebagi gi digaula.

12:8  Gei di manu-‘dragon’ la-gu-magedaa, gei mee mo ana gau di-langi la-gu-hagalee dumaalia ginai gii-noho i-di langi.

12:9  Di manu-‘dragon’ damanaiee la-guu-hudu gi-daha mo-di langi, deenei la-go di gihaa namua dela e-haga-ingoo bolo ‘Devil’ be go Setan, dela e-halahalau henuailala hagatau. Mee mo ana gau di-langi huogodoo la-ne-kili gi-lala gi henuailala.

12:10  Gei au ga-longono di lee damana i-di langi e-helekai, “Dolomeenei di hagamouli a God la-gu-hanimoi! Dolomeenei tadau God gu-hagi-aga dono mogobuna king! Dolomeenei dana Mesaia gu-hagi-aga dono mogobuna-dagi! Idimaa, Mee dela nogo duu i-mua tadau God, nogo haga-huaidu tadau duaahina hagadonu boo mo aa, la-guu-hudu gi-daha mo-di langi.

12:11  Tadau duaahina hagadonu gu-maaloo i mee, mai i-nia dodo o Tama-siibi mo mai i-di tonu dela e-hagadele go digaula. Digaula guu-baba-hua di-dugu-anga nadau mouli gii-mmade, i-di gili di tonu deelaa.

12:12  Goodou i-di langi gi-tenetene, go goodou huogodoo ala e-noho i-golo! Gei e-huaidu huoloo ang-gi henuailala mo-di moana! Idimaa, Setan la-gu-hanimoi gi goolua, gei mee e-hagawelewele huoloo, idimaa, mee e-iloo-ia bolo dono madagoaa dela e-dubu la-gu-bodobodo.”

12:13  Di madagoaa di manu-‘dragon’ ne-iloo-ia bolo ia guu-hudu gi henuailala, geia ga-daamada ga-halahala di ahina dela ne-haanau dana dama-daane.

12:14  Nia bakau llauehe e-lua o-di manu-‘eagle’ ne-wanga gi-di ahina deelaa belee maangi-iei mee gi dono lohongo i-lodo di anggowaa, go di gowaa dela ga-madamada humalia-iei mee i-nia ngadau e-dolu mo-di baahi, e-benebene gi-daha mo-di manu-‘dragon’.

12:15  Di manu-‘dragon’ gaa-bui ana wai mai i-lodo dono ngudu i-muli di ahina, bolo gi-dehee a-mee gi-daha.

12:16  Gei henuailala ga-hagamaamaa di ahina, ne-huge dono ngudu, gaa-holo nia wai ala ne-lloomoi i-di ngudu di manu-‘dragon’.

12:17  Di manu-‘dragon’ ga-hagawelewele gi-di ahina deelaa, gaa-hana belee heebagi gi-nia hagadili o-di ahina, ala e-daudali nnaganoho o God gei e-manawa-dahi gi-di tonu dela ne-hagagida go Jesus.

12:18  Gei di manu-‘dragon’ gaa-duu i tongotai.

Chapter 13

13:1  Gei-au gaa-mmada gi-di manu hagamadagudagu dangada e-hanaga gi-daha mo-di moana. Mee ono madaagoo e-madangaholu, ge hidu ono libogo. I-hongo nia madaagoo le e-dagidahi hau-king, gei i-hongo nia libogo dagidahi la-di ingoo dela e-haganneennee a God.

13:2  Di manu le e-dina gi-di manu-‘leopard’, ono wae e-hai be nia wae manu-‘bear’, ge dono ngudu e-hai be-di ngudu-laion. Di manu-‘dragon’ gaa-wanga gi-di manu deenei ono mahi-dagi, dono lohongo-dagi, mo ono mogobuna-dagi.

13:3  Di libogo e-dahi o-di manu deelaa e-hai be-di mee guu-tuu damana, gei di-maa guu-hili. Henuailala hagatau gu-homouli gi-di-maa, ga-daudali di manu deelaa.

13:4  Nia daangada huogodoo gu-daumaha gi-di manu-‘dragon’, i mee dela guu-wanga ono mogobuna gi-di manu hagamadagudagu-dangada. Digaula gu-daumaha labelaa gi-di manu deelaa, mo-di helekai, “Ma koai dela e-hai be-di manu hagamadagudagu dangada? Ma koai e-mee di-heebagi gi di-maa?”

13:5  Di manu hagamadagudagu-dangada la-gu-dumaalia ginai gi-heia ana helekai hagamuamua ala e-haganneennee a God, gei mee guu-wanga ginai di mogobuna-dagi i-lodo nia malama e-madahaa maa-lua.

13:6  Gei mee ga-daamada ga-helekai hagahuaidu i-God, dono ingoo, dono gowaa e-noho-ai, mo digau huogodoo ala e-noho i-di langi.

13:7  Gei mee gu-dumaalia ginai gi-heebagi gi-nia daangada a God mo-di haga-magedaa digaula, gei guu-wanga labelaa ginai ono mogobuna e-dagi nia madawaawa, nia henua-llauehe, nia hagadilinga helekai, mo nia hagadilinga daangada-henua huogodoo.

13:8  Nia daangada huogodoo ala e-noho i henuailala ga-daumaha gi-di-maa, gei hagalee go digau ala nadau ingoo ne-hihi i-mua di hai o henuailala gi-lodo di beebaa hagamouli a Tama-siibi dela ne-daaligi gii-made.

13:9  “Tangada ono dalinga i-golo, gei mee gi-hagalongo!

13:10  Tangada dela belee hai gii-kumi, e-mee-hua di-kumi. Tangada dela belee hai gi-daaligi gi tulumanu-dauwa gii-made, e-mee-hua di-daaligi gi tulumanu-dauwa gii-made. Deenei le e-hai bolo nia daangada a God, la-gii-tuu maaloo mo-di hagadonu manawa-dahi.”

13:11  Au gaa-mmada labelaa gi tuai manu hagamadagudagu dangada e-hanaga gi-daha mo tenua. Di manu ono madaagoo e-lua, e-dina gi-nia madaagoo tama-siibi-dulii, gei mee e-helekai be-di manu-‘dragon’.

13:12  Mee e-hai-hegau gi-nia mogobuna hagatau o-di manu matagidagi e-pono dono lohongo. Mee e-huuhuli henuailala mo ono daangada huogodoo ala e-noho i-golo bolo gi-daumaha ang-gi-di manu matagidagi dela guu-hili dono gowaa ne-tuu damana.

13:13  Di lua manu deenei la-gaa-hai ana mogobuna haga-goboina, e-hai di ahi gi-haneia i-di langi gi henuailala i-mua nia golomada o-nia daangada huogodoo.

13:14  Gei mee gu-halahalau nia daangada huogodoo ala e-noho i henuailala gi-nia mogobuna ala ne-dugu-anga bolo gi-heia i-mua nia golomada o-di manu matagidagi, gei mee ga-helekai gi digaula gi-heia di-nadau ada-balu-god e-hagalaamua di manu dela ne-tuu gi tulumanu-dauwa, gei mee e-mouli-hua.

13:15  Di lua manu la-gu-dumaalia ginai gi-ilihia di mouli gi-lodo di ada-balu-god o-di manu matagidagi, bolo gii-mee dana helekai, mo-di daaligi gii-mmade digau huogodoo ala hagalee daumaha ang-gi di ada-balu-god deelaa.

13:16  Di manu hagamadagudagu-dangada ga-huuhuli nia daangada huogodoo, digau lligi mo aamua, digau maluagina mo hagaloale, nia hege mo digau moholo, bolo gi-heia di hagailongo i-hongo nadau lima gau-donu be i-hongo nadau lae.

13:17  Deai tangada e-mee di-hui be e-hui ana mee gi-daha ai, maa ia dono hagailongo ai, be go di ingoo o-di manu hagamadagudagu dangada, be go di nambaa dela e-hagamodongoohia di ingoo deelaa.

13:18  Di mee deenei le e-humalia e-hai gi-iloo. Be koai-hua dela e-kabemee, geia e-mee di-gida tadinga di nambaa o-di manu deelaa, idimaa, di nambaa deenei le e-hagamodongoohia di ingoo dangada. Di nambaa di-maa le e-ono-lau-modoono maa-ono-(666).

Chapter 14

14:1  Gei-au gaa-mmada, ga-gidee Tama-siibi e-duu i-hongo di gonduu Zion, gei nia daangada dogo-lau-madahaa maa-haa-mana-(144,000) guu-hihi ginai di ingoo Tama-siibi mo-di ingoo o dono Damana i-hongo nadau lae, e-tuu i-baahi o Mee.

14:2  Gei-au ga-longono di lee mai di langi, e-hai be-di lee monowai-doo, ge-hai labelaa be-di lee-atili damana. Di lee le-hai be taahili ne-daahili gi-nia mee hai-daahili-‘harp’.

14:3  Nia daangada dogo-lau-madahaa maa-haa-mana-(144,000) nogo tuu i-mua di lohongo-king mo i-mua nia manu-mouli e-haa, mo i-mua nia daangada mmaadua-aamua. Digaula nogo dadaahili taahili hoou, deai tangada e-mee di-kabe di-maa ai, ala-hua go ginaadou. Aanei hua digau ala ne-haga-dagaloaha belee haga-mouli.

14:4  Digau aanei la-go nia daane ala digi hagapuni gi nia ahina, i ginaadou digi kii-loo i-baahi nia ahina. Digaula digi iloo di huaidu. Digaula e-daudali Tama-siibi gi-nia gowaa huogodoo ala e-hana ginai Mee. Aanei go ginaadou ala ne-haga-dagaloaha mai digau henuailala, ginaadou go tigidaumaha matagidagi-loo ang-gi God mo Tama-siibi.

14:5  Digaula digi hai-loo nadau kai-tilikai. Digaula digi hai-loo nadau hai-hala.

14:6  Nomuli, gei au gaa-mmada labelaa gi tuai dangada di-langi e-mamaangi i-lodo di ahiaalangi mo dana Longo-Humalia dee-odi belee haga-iloo ang-gi nia daangada henuailala, nia daangada-henua, nia madawaawa, nia helekai, mo nia henua-llauehe huogodoo.

14:7  Mee ga-helekai gi-nua, “Hagalaamua-ina God mo hagaamuina dono aamua! Idimaa, di madagoaa e-hagi-aga digau henuailala la-gu-dae-mai. Daumaha gi Mee dela ne-hai di langi mo henuailala, di moana mo nia monowai!”

14:8  Togolua dangada di-langi ga-daudali tangada di-langi matagidagi, ga-helekai, “Ma gu-mooho! Di waahale aamua Babylon gu-mooho! Mee guu-hai nia daangada huogodoo gi-inu ana waini, go nia waini maaloo o ana hiihai mouli hai be di manu dela e-hagahuaidu dangada.”

14:9  Togodolu dangada di-langi ga-daudali nia daangada di-langi dogolua aanei, ga-helekai gi-nua, “Be koai-hua ga-daumaha gi-di manu hagamadagudagu dangada mo dono ada, gaa-kae di hagailongo i-hongo dono lae be i-hongo dono lima,

14:10  geia ga-inu nia waini a God, go nia waini maaloo o dono hagawelewele, dela ne-dui go Mee gi-lodo di ibu o dono hagawelewele! Digau huogodoo ma-ga-inu nia waini aanei, le e-haga-mmaemmae i-lodo di ahi ‘sulfur’ wele ngongoaa i-mua digau di-langi haga-madagu mo Tama-siibi.

14:11  Nia huiahi o-di ahi dela e-haga-mmaemmae digaula, le e-buu gi-nua gaa-hana-hua beelaa. Di hagamolooloo boo mo aa ai, ang-gi digau ala e-daumaha ang-gi di manu mo dono ada, mo digau huogodoo ala guu-kae di hagailongo o dono ingoo.”

14:12  Di mee deenei le e-hai bolo nia daangada a God la-gii-tuu maaloo i-lodo nadau hagadonu, go digau ala e-daudali nnelekai a God, gei e-manawa-dahi ang-gi Jesus.

14:13  Nomuli, gei au ga-longono di lee mai di langi e-helekai, “Hihia di mee deenei: Danginei gaa-hana gi-muli, e-maluagina go digau ala e-mmade i-lodo nnegau o Tagi!” Di Hagataalunga ga-helekai, “Uaa, digaula ga-hagamolooloo mai i nadau hegau haingadaa, idimaa, nia huwa o nadau hegau le e-hula dalia ginaadou.”

14:14  Nomuli, gei au gaa-mmada, ga-gidee di baahi gololangi-kene e-noho-ai no-nua di mee e-dina be tangada, e-hai dono hau-goolo i-hongo dono libogo, mo dana kamaa-‘sickle’ gaa i-lodo dono lima.

14:15  Tuai dangada di-langi ga-ulu gi-daha mo di Hale Daumaha, geia gaa-wolo gi-nua ang-gi tangada dela e-noho i-hongo di gololangi, “Hai-hegau gi dau kamaa-‘sickle’, daamada haadia nia huwa-laagau, idimaa, di madagoaa la-gu-dae-mai, ge henuailala la-gu-mmaadua, gu-humalia di-hadi!”

14:16  Gei tangada dela nogo i-hongo di gololangi ga-haangi dana kamaa-‘sickle’ gi-hongo henuailala, gei henuailala guu-hadi ono huwa-laagau huogodoo.

14:17  Gei-au gaa-mmada labelaa gi tuai dangada di-langi e-ulu gi-daha mo di Hale Daumaha i-di langi, gei mee e-daahi labelaa dana kamaa-‘sickle’ gaa.

14:18  Gei tuai dangada di-langi labelaa, go tangada dela e-dagi di ahi, ga-hanimoi i-di gowaa dudu-tigidaumaha. Gei mee gaa-wolo gi-nua ang-gi tangada di-langi dela e-daahi dana kamaa-‘sickle’, “Hai-hegau gi dau kamaa-‘sickle’, haadia nia huwa laagau-‘grape’ mai di hadagee-waini o henuailala, idimaa, nia huwa laagau-‘grape’ la-gu-mmaadua!”

14:19  Gei tangada di-langi ga-haangi dana kamaa-‘sickle’ gi-hongo henuailala, gaa-hagi nia huwa laagau-‘grape’, gaa-kili nia maa gi-lodo di gowaa dagadagahi-waini o-di hagawelewele damanaiee a God.

14:20  Nia huwa laagau-‘grape’ aalaa ga-dagadagahi i-lodo di gowaa dagadagahi-waini i-tua di waahale, gei nia dodo ga-hali-mai gi-daha mo-di gowaa dagadagahi-waini deelaa, guu-hai di monowai-dodo nia maele e-lua-lau dono looloo, holongo nia piidi e-ono di llala.

Chapter 15

15:1  Nomuli, gei au gaa-mmada gi-di ada-mee i-di langi dela e-aamua gei e-haga-gologolo-dangada huoloo. Digau-di-langi dogohidu e-daahi nia hagaduadua haga-muliagina e-hidu, idimaa, nia hagaduadua aanei, la-go di hagi-aga haga-muliagina o-di hagawelewele o God.

15:2  Nomuli, gei au gaa-mmada gi-di mee e-hai be tai-kalaadi dela ne-unugi gi-di ahi. Au gaa-mmada labelaa gi digau ala ne-maaloo i-di manu hagamadagudagu-dangada mo dono ada, ge gu-maaloo labelaa i-di manu dela dono ingoo e-hagamodongoohia go di nambaa. Digaula e-tuu i-baahi di tai-kalaadi, e-daahi nadau mee hai-daahili-‘harp’ ala ne-wanga go God gi digaula.

15:3  Digaula e-daahili taahili a Moses, tangada hai-hegau a God, mo taahili Tama-siibi, “Dimaadua go di God-Aamua, au mee ala ne-hai le e-aamua gei e-humalia! Di King o-nia henua-llauehe, oo ala e-hai-donu, gei e-donu huoloo!

15:4  Meenei Dimaadua, ma koai dela hagalee hagalaamua Goe? Ma koai dela hagalee hagaamu do ingoo? Kooe hua dela e-dabuaahia. Nia henua-llauehe huogodoo ga-lloomoi e-daumaha-adu gi-di-Goe, idimaa, au hegau hai-donu gu-modongoohia i-mua nia daangada huogodoo.”

15:5  Nomuli, gei au gaa-mmada gi-di Hale Daumaha i-di langi e-mahuge, gei di Hale-laa Haga-madagu i ono lodo.

15:6  Digau-di-langi dogohidu nogo daahi nia hagaduadua e-hidu ga-ulu mai gi-daha mo-di Hale Daumaha, e-ulu nia gahu-lenge dingidingia, gei nia duu goolo e-daabui nadau hadahada.

15:7  Di manu e-dahi i-nia manu-mouli e-haa gaa-wanga gi digau di-langi dogohidu nia boolo goolo e-hidu guu-honu i-di hagawelewele o God, dela e-mouli gaa-hana-hua beelaa.

15:8  Di Hale Daumaha la-guu-honu huiahi mai di madamada mo nia mahi o God. Deai tangada e-mee di-ulu gi-lodo di Hale Daumaha deelaa ai, gaa-dae-loo gi-di lawa o-nia hagaduadua e-hidu ala ne-gaamai go digau di-langi dogohidu.

Chapter 16

16:1  Nomuli, gei au ga-longono di lee damana e-helekai mai i-di Hale Daumaha ang-gi digau di-langi dogohidu, “Hula, llingia nia boolo e-hidu ala e-honu i-di hagawelewele o God gi-hongo henuailala!”

16:2  Tangada di-langi matagidagi gaa-hana gaa-dui dana boolo gi-hongo henuailala. Gei nia magibala huaidu e-mmaemmae huoloo la-ga-kila-aga i-baahi digau ala gu-maaga gi-di hagailongo o-di manu hagamadagudagu-dangada, mo digau ala nogo daumaha gi-di ada o-di manu hagamadagudagu-dangada.

16:3  Togolua dangada di-langi gaa-dui dana boolo gi-hongo di moana. Gei nia wai guu-hai be nia dodo o tangada-made, gei nia manu-mouli huogodoo i-lodo di moana la-guu-mmade.

16:4  Togodolu dangada di-langi gaa-dui dana boolo gi-hongo nia monowai mo nia dama monowai, gei nia wai guu-hai nia dodo.

16:5  Gei-au ga-longono tangada di-langi dela e-dagi nia wai e-helekai, “Meenei, Tangada Dabu, Goe dela i-golo dolomeenei, ge nogo i-golo mai-mua. Au hagi-aga ala ne-hai, le e-hai-donu!

16:6  Idimaa, digaula la-gu-haga-hali nia dodo o au daangada mo au soukohp, gei goe guu-wanga nia dodo gi digaula bolo gi-inumia. Digaula e-kae nia mee ala e-tau ang-gi di hui o nadau hala ala ne-hai.”

16:7  Nomuli, gei au ga-longono di lee e-helekai mai i-di gowaa dudu-tigidaumaha, “Dimaadua go di God-Aamua-Huoloo! Dau hagi-aga le e-donu gei e-hai-donu!”

16:8  Togohaa dangada di-langi gaa-dui dana boolo gi-hongo di laa, gei di laa la-gu-dumaalia ginai gi-duungia nia daangada gi-di welengina maaloo dangihi.

16:9  Digaula guu-dudu go di welengina maaloo dangihi deelaa, gei digaula gu-hagahuaidu di ingoo o God, dela nogo dagi nia hagaduadua aanei. Malaa, digaula digi huli gi-daha mo nadau ihala, ge digi hagaamu-ina di aamua o God.

16:10  Togolima dangada di-langi gaa-dui dana boolo gi-hongo di lohongo aamua o-di manu hagamadagudagu-dangada. Gei di bouli gu-haga-bouli tenua o-di manu deelaa, gei nia daangada ga-gadigadi nadau holole, idimaa, digaula gu-mmaemmae huoloo.

16:11  Gei digaula gu-hagahuaidu di God o-di langi, idimaa, digaula guu-mmae ge gu-magibala. Malaa, digaula digi huli gi-daha mo nadau haihai huaidu.

16:12  Togo-ono dangada di-langi gaa-dui dana boolo gi-hongo di monowai damana go Euphrates. Di monowai gu-maangoo, belee hagatogomaalia di ala i-mua nia king ala ga-lloomoi i-bahi-i-dua.

16:13  Gei-au gaa-mmada gi-nia hagataalunga dogolia dogodolu e-hai gadoo be nia kailuu. Digaula ne-lloomoi i-lodo di ngudu o-di manu-‘dragon’, di ngudu di manu hagamadagudagu-dangada, mo-di ngudu soukohp dilikai.

16:14  Digaula la-go nia hagataalunga huaidu ala nogo hai nadau mogobuna. Nia hagataalunga dogodolu aanei, le e-hula gi-nia king henuailala huogodoo, e-gahigahi-mai digaula gi-di gowaa e-dahi, ang-gi tauwa dela gaa-hai i-di Laangi damana o-di God-Aamua-Huoloo.

16:15  “Goodou mmada! Au e-hanimoi gadoo be tangada-gaiaa! E-maluagina go tangada dela e-ala, gei e-madamada humalia i ono gahu, gi-de-heehee ono goloo ai, ga-langaadia i-mua nia daangada!”

16:16  Nia hagataalunga aalaa ga-haga-dagabuli nia king gi-di gowaa e-dahi, i-di gowaa dela e-haga-ingoo i telekai Hebrew bolo “Armageddon”.

16:17  Togohidu dangada di-langi gaa-dui dana boolo gi-lodo di ahiaalangi, gei di lee damana ga-hanimoi i-di lohongo-king i-lodo di Hale Daumaha, e-helekai boloo, “Ma-guu-lawa di hai!”

16:18  Nomuli-hua, gei nia ila ga-dabadaba, nia lee hamuhamumu, nia lee-atili, mo-di ngalungalua damanaiee o tenua gaa-hai. Deai di ngalungalua o tenua beenei ne-hai i-mua ai, mai di laangi ne-hai-ai nia daangada, deenei hua di ngalungalua o tenua dela e-kaedahi e-huaidu huoloo!

16:19  Di waahale aamua la-gu-mahaa-dolu, gei nia waahale o-nia henua huogodoo la-gu-mooho. God ne-langahia di waahale aamua go Babylon, gaa-hai a-mee gi-inu nia waini o dana ibu, go nia waini o dono hagawelewele damana.

16:20  Nia henua huogodoo gu-hagalee, nia gonduu huogodoo la-guu-nngala.

16:21  Nia uwa-hadu-magalillili llauehaa, taamaha di hadu e-dahi la nia pauna e-lau, ga-too-ia i-di langi gi-hongo nia daangada. Gei digaula ga-hagahuaidu a God i nadau hagaduadua go God gi-nia uwa-hadu-magalillili aanei, idimaa, ma di hagaduadua huaidu huoloo.

Chapter 17

17:1  Gei tangada e-dahi i-nia daangada di-langi dogohidu ala nogo daahi nadau boolo e-hidu, ga-hanimoi gi-di-au ga-helekai, “Hanimoi, gei au ga-hagi-adu di hai e-hagaduadua di ahina huihui dono huaidina, go mee dela go di waahale damana dela ne-hau hoohoo gi-nia monowai e-logo.

17:2  Nia king o henuailala la-guu-hai di hai be-di manu i-baahi di ahina deenei, gei nia daangada o henuailala gu-libaliba i-di nadau inuinu nia waini i-di mouli hai be-di manu i-baahi di ahina deelaa.”

17:3  Di Hagataalunga guu-dagi au, gei tangada di-langi gaa-lahi au gi-di anggowaa. Gei-au gaa-mmada gi-di ahina e-noho i-hongo di manu hagamadagudagu dangada mmee, ono libogo e-hidu ge madangaholu madaagoo. Dono gili guu-buni ingoo hagahuaidu a God.

17:4  Di ahina la-nogo ulu di gahu gono mmee-halatee, ge gono-mmee, e-laageia gi-nia mee humu-mee ne-hai gi-nia goolo, nia hadu hagalabagau, mo nia hadu-lodo-baehua. I-lodo dono lima, mee nogo daahi dana ibu-goolo e-honu nia mee gulugulua ge dogolia, go nia mee ne-hidi-mai i dono mouli hai be-di manu.

17:5  Di ingoo dela e-hihi i-hongo dono lae la-dono hadinga hagammuni deenei: “Babylon Aamua, go tinana o-nia ahina huihui nadau huaidina huogodoo, mo-di gowaa e-hidi-ai nia haihai gulugulua huogodoo i henuailala.”

17:6  Gei-au gaa-mmada bolo di ahina le e-libaliba i-nia dodo o-nia daangada a God mo nia dodo o digau ala ne-daaligi gii-mmade, idimaa, digaula nogo daudali a Jesus. Dogu madagoaa ne-mmada gi mee, gei au gu-goboina huoloo.

17:7  Tangada di-langi deelaa ga-heeu-mai gi-di-au, “Goe e-goboina di-aha? Au ga-hagi-adu gi-di-goe tadinga hagammuni o-di ahina mo-di manu hagamadagudagu dangada dela ne-lahi a-mee i ono nua, go di manu ono libogo e-hidu ge madangaholu ono madaagoo.

17:8  Di manu hagamadagudagu dangada nogo mouli, gei dolomeenei gu-hagalee mouli. Mee hoohoo ga-hanaga gi-daha mo lodo di luwa dono dua-ai, gaa-hana gi-daha, ga-hagahuaidu. Nia daangada e-noho i henuailala, ala digi hihia nadau ingoo gi-lodo di beebaa o digau hagamouli i-mua di hai o henuailala, la-ga-goboina i-di nadau mmada gi-di manu deelaa. Di manu la-nogo mouli, gei dolomeenei gu-hagalee mouli, malaa, mee e-gila-aga labelaa.

17:9  “Di mee deenei le e-humalia e-hai gi-iloo ge gi-modongoohia. Nia libogo e-hidu la-go nia gonduu e-hidu ala e-noho-ai di ahina i nonua. Nia libogo e-hidu la-go nia king e-hidu labelaa.

17:10  Nia king dogolima la-gu-hagalee, gei e-dahi e-dagi hua igolo, gei e-dahi digi hanimoi. Mee ga-hanimoi, le e-dagi-hua i-lodo di madagoaa bodobodo.

17:11  Gei di manu hagamadagudagu dangada dela nogo mouli i-mua ge dolomeenei la-gu-hagalee mouli, la-go togowalu king, tangada i-nia king dogohidu, gei mee e-hana gi-daha, e-hai gi-daaligi.

17:12  “Nia madaagoo e-madangaholu ala ne-gidee-e-goe la-go nia king dilongoholu ala digi daamada di-dagi, gei digaula ga-dugu-anga ginai nia mogobuna e-dagi be nia king i-lodo di aawaa hua e-dahi, dalia di manu hagamadagudagu dangada.

17:13  Digau dilongoholu aanei, le e-hai-mee gi tadinga hua e-dahi, gei digaula gaa-wanga nadau mogobuna mo nadau donu-dagi gi-di manu hagamadagudagu dangada.

17:14  Digaula ga-heebagi gi Tama-siibi, gei Tama-siibi mo ana gau ne-gahi, ana gau ne-hilihili, mo ana gau manawa-dahi, la-ga-haga-magedaa digaula, idimaa, Mee go Tagi o-nia dagi, di King o-nia king.”

17:15  Tangada di-langi ga-helekai-mai labelaa gi-di-au, “Nia monowai ne-mmada ginai goe e-noho di ahina huaidu nonua, la-go nnenua llauehe, nia daangada, nia hagadilinga daangada-henua, mo nia hagadilinga helekai.

17:16  Nia madaagoo e-madangaholu ne-mmada ginai goe mo-di manu hagamadagudagu dangada, la-ga-de-hiihai gi-di ahina huaidu deelaa. Digaula ga-daa gi-daha nia mee a-maa huogodoo, gaa-hai a-mee gii-noho ono goloo ai. Digaula gaa-gai nia goneiga o-maa, gaa-dudu a-mee gi-di ahi gi-hagalee.

17:17  Idimaa, God gu-haga-honu nadau maanadu e-haga-gila dono manawa, e-hai nadau maanadu be-di mee e-dahi, e-wanga nadau mogobuna-dagi gi-di manu hagamadagudagu dangada, gaa-dae-loo gi-di kila-aga nnelekai a God.

17:18  “Di ahina dela ne-mmada ginai goe, go di waahale aamua dela e-dagi nia king o henuailala.”

Chapter 18

18:1  I-muli nia mee aanei, gei au gaa-mmada gi tuai dangada di-langi e-haneia i-di langi. Mee dono mogobuna damana, gei di madamada o-maa gu-haga-maahina henuailala hagatau.

18:2  Mee gaa-wolo gi-nua, “Mee gu-mooho! Babylon damana lagu-mooho! Gei dolomeenei, mee guu-hai di gowaa e-noho-ai nia balu-god mo nia hagataalunga gulugulua, nia hagadilinga manu-mamaangi gulugulua ge haga-ginagina-dangada.

18:3  Nia henua huogodoo gu-inu nia waini o-maa, go nia waini maaloo o ana haihai huaidu. Nia king o henuailala guu-hai di hai be-di manu i baahi o mee, gei digau huihui-mee o henuailala gu-maluagina mai dono hagagailaa hiihai.”

18:4  Gei-au ga-longono tuai lee mai di langi, e-helekai, “Agu daangada, lloomoi gi-daha! Lloomoi gi-daha mo mee! Goodou hudee dau e-hai nia huaidu a-maa! Goodou hudee madalia nia hagaduadua o maa!

18:5  Idimaa, nia hala o-maa gu-logo- waahee, guu-tugi i-di langi i-nua, gei God e-langahia nia hangaahai huaidu o-maa.

18:6  Heia gi mee be dana hai nogo hai-adu gi goodou. Huia haga-lua gi mee ana mee huogodoo ala ne-hai-adu gi goodou. Haga-hau-lia dana ibu gi-nia dagaao maaloo holongo haga-lua i-ana dagaao ala ne-gowadu gi goodou.

18:7  Wanga-ina dono hagaduadua mo dono lodo-huaidu, gadoo be-di madamada mo-di haga-manawa lamalia dela ne-bida wanga go mee gi-deia. Idimaa, mee nogo bida helekai-hua i-deia boloo, ‘Deenei au di ahina-king e-noho i-ginei! Au hagalee di ahina guu-made dogu lodo, au hagalee tale ang-gi di lodo-huaidu!’

18:8  Ma dela guu-hai beenei, nia hagaduadua aanei gaa-tale gi-mee i-lodo di laangi e-dahi: di magi-pale, lodo-huaidu, mo tau-magamaga. Mee gaa-dudu gi-di ahi, idimaa, Dimaadua God dela e-mogobuna huoloo le e-hagi-aga a mee.”

18:9  Nia king o henuailala ala nogo dau gi ana haihai huaidu mo ana hiihai huaidu, la-ga-tangi wawwawe i-di-nadau gidee di huiahi o-di ulaula dela e-dudu a-mee.

18:10  Digaula e-tuu-mai hagamogowaa, idimaa, digaula e-mmaadagu di-dau ang-gi nia hagaduadua o-maa. Digaula ga-helekai, “E-hagamadagudagu-dangada! E-hagamadagudagu-dangada! Go Babylon di waahale aamua ge maaloo! Do hagaduadua la-ne-hai-hua i-lodo di aawaa hua e-dahi!”

18:11  Digau huihui-mee o henuailala le e-tangi-wawe labelaa mo-di lodo-huaidu i mee, idimaa, ma-gu-hagalee digau e-hui nadau goloo aanei ai:

18:12  nia goolo, silber, hadu-hagalabagau, hadu-lodo-baehua, nia gahu ne-hai gi-nia gahu lenge madammaa, gahu gono mmee-halatee, gahu ‘silk’, gahu gono mmee malama, nia hagadilinga laagau kida-ngadaa, nia hagadilinga mee ne-hai gi-nia madaagoo-manu, mono laagau hui-ngadaa, baalanga-mmee, baalanga ‘iron’, mono hadu hamaaloo,

18:13  mo nia mee haga-kala-meegai ‘cinnamon’, ‘spice’, nia mee haga-kala ‘incense’, ‘myrrh’ mo nia ‘frankincense’, nia waini, mono lolo-olib, palaawaa mo nia palaawaa-‘wheat’, kau mo nia siibi, hoodo mo nia kulumaa, nia hege mo nia mouli o-nia daangada.

18:14  Digau huihui-mee ga-helekai gi mee, “Nia goloo huogodoo ala nogo hiihai ginai goe bolo e-hai au mee la-gu-hagalee, o maluagina mo o goloo madamada huogodoo gu-hagalee, gei goe e-deemee di-gidee labelaa nia maa!”

18:15  Digau huihui-mee ne-maluagina i nadau huihui-mee i-lodo di waahale deelaa gaa-tuu hagamogowaa i-mee, idimaa, digaula e-mmaadagu di-dau gi-nia hagaduadua o-maa. Digaula ga-tangitangi mo lodo-huaidu,

18:16  ga-helekai, “E-hagamadagudagu-dangada! E-hagamadagudagu-dangada! Di waahale aamua nogo uluulu nia gahu lenge madammaa, nia gahu gono mmee-halatee gei e-mmee malama, gei e-laageia gi-nia mee humu-goolo, nia hadu hagalabagau mo nia hadu-lodo-baehua!

18:17  Gei i-lodo-hua di aawaa e-dahi, di maluagina hagatau deenei gu-hagalee i-baahi o mee!” Nia gaabinu wagabaalii huogodoo, nia basinsa, digau ngalua hongo-waga, mo digau huogodoo ala nogo mouli i-hongo di moana guu-tuu hagamogowaa i-mee,

18:18  gaa-tangi i-di nadau mmada gi-di huiahi mai di ulaula dela e-dudu a-mee, ga-helekai, “Deai di waahale be-di waahale damana beenei ai!”

18:19  Digaula gaa-kili nadau gelegele dogolia gi-hongo nadau libogo, gaa-tangi mo-di lodo-huaidu, ga-helekai, “E-hagamadagudagu-dangada! E-hagamadagudagu-dangada! Di waahale aamua deenei, la-di waahale ne-haga-maluagina digau huogodoo ala nogo deledele nia wagabaalii! Gei i-lodo-hua di aawaa hua e-dahi, gei mee gu-hagalee ana mee ai!”

18:20  Di langi la-gi-tenetene gi-di mooho o-maa. Goodou go nia daangada a God, mo digau agoago-hagau, mo nia soukohp, goodou la-gi-tenetene. Idimaa, God gu-hagahuaidu a-mee e-hui dana hai dela ne-hai-adu gi goodou!

18:21  Tangada di-langi maaloo ga-dahi-aga dana hadu damana gadoo be-di hadu olo-palaawaa, gaa-hudu gi-lodo di moana, ga-helekai, “Deenei di hai e-hudu gi-daha di waahale aamua go Babylon, ga-deemee di mmada ginai tangada labelaa.

18:22  Nia daahili ala e-huwa gi-di ‘harp’ mo nia lee dangada, digau ala e-hai-hegau gi-nia ‘flute’, mo nia buu-‘trumpet’ ga-dee-longono! Digau ngalua o-nia moomee huogodoo ga-hagalee, di lee o-di hadu olo-palaawaa ga-hagalee longono mai do baahi!

18:23  Di maahina o-di malama ga-hagalee. Nia lee o-nia daane mo nia ahina hai-lodo la-ga-hagalee longono mai i do baahi. Au gau huihui-mee la-nogo kaedahi e-maaloo nadau moomee i henuailala hagatau, gei goe gu-halahalau digau henuailala gi au buubuu dilikai!”

18:24  Babylon la-ne-hagaduadua, idimaa, nia dodo o-nia soukohp mo nia daangada a God la-guu-kida i-lodo di waahale deelaa, go nia dodo o digau huogodoo ala ne-daaligi gii-mmade i henuailala.

Chapter 19

19:1  I-muli-hua nia mee aanei, gei au ga-longono di lee damana e-hai be nia lee digau dogologo i-di langi, e-helekai, “Hagaamuina God! Di haga-mouli, di madamada mo-di maaloo la nia mee ni Mee go tadau God!

19:2  Ana hagi-aga le e-donu gei e-hai-donu! Mee gu-hagi-aga di ahina huihui dono huaidina dela ne-dagi henuailala gi-lodo ono hangaahai huaidu. God ne-hagaduadua a-mee, i mee dela ne-daaligi gii-mmade digau hai-hegau a God.”

19:3  Digaula ga-wwolo labelaa gi-nua, “Hagaamuina God! Di huiahi mai di ulaula dela e-dudu di waahale damana, le e-gohu gi-nua, gaa-hana-hua beelaa!”

19:4  Digau mmaadua-aamua e-madalua maa-haa mo nia manu-mouli e-haa gaa-pala gi-mua, ga-daumaha ang-gi God, dela e-noho i-hongo di lohongo-king. Digaula ga-helekai, “E-donu! Hagaamuina God!”

19:5  Di lee ga-hanimoi i-di lohongo-king, “Digau hai-hegau huogodoo a God mo nia daangada huogodoo, digau aamua mono gau lligi ala e-hagamadagudia a-Mee, la-gi-hagaamuina tadau God!”

19:6  Nomuli, gei au ga-longono di lee be nia lee digau dogologowaahee e-hai be-di lee o-di monowai-doo, e-ngoloolo be nia lee-atili llauehe. Gei-au ga-longono digaula e-helekai, “Hagaamuina God! Idimaa, Dimaadua dela go tadau God-Aamua-Huoloo, Mee go di King!

19:7  Gidaadou gi-tenetene gei gi-manawa lamalia! Gidaadou gi-hagaamuina ono mahi! Idimaa, di madagoaa tagamiami haga- hai-lodo a Tama-siibi la-gu-dau-mai, gei di ahina hai-lodo la-gu-togomaalia.

19:8  Di ahina la-guu-wanga ginai di gahu lenge madammaa e-ulu ai.” (Nia gahu-lenge la-go nia ngalungalua humalia o-nia daangada a God.)

19:9  Tangada di-langi ga-helekai mai gi-di-au, “Hihia di mee deenei: E-maluagina go digau ala gu-gahi-mai gi tagamiami haga-hai-lodo a Tama-siibi.” Tangada di-langi ga-helekai labelaa, “Aanei la-go nnelekai e-donu a God.”

19:10  Au gaa-bala gi-lala belee daumaha ang-gi mee, gei mee ga-helekai-mai gi-di-au, “Hudee heia di mee deenaa! Au di hoo hai-hegau ni-oou mo o duaahina, ala e-dogi ang-gi nia agoago hagamodongoohia o Jesus. Ma go God dela gi-daumaha ginai goe!” Idimaa, nia agoago hagamodongoohia o Jesus la-go di mouli o nnelekai kokohp.

19:11  Au gaa-mmada gi-di langi e-mahuge, gei di hoodo kene iai Tangada i ono nua, e-haga-ingoo bolo “Manawa-dahi” mo-di “Tonu”. Mee e-hai ana gabunga mo ana heebagi gi-di hai dela e-donu.

19:12  Nia golomada o-Maa e-dina gi-di ulaula o-di ahi, gei Mee ono hau-king e-logo i-hongo dono libogo. Mee dono ingoo e-hihi i ono nua dela e-de-iloo tangada, go Mee hua e-iloo-ia di-maa.

19:13  Mee e-ulu di gahu looloo buni-dodo. Di ingoo o-maa la-go “Nnelekai a God”.

19:14  Digau dauwa di langi e-daudali a-Mee, e-llele i-hongo nia hoodo kene, gei e-ulu nia gahu lenge kene ge madammaa.

19:15  Tulumanu-dauwa-gaa e-duu-mai i-lodo dono ngudu, dela e-haga-magedaa nnenua llauehe go Mee. Mee gaa-dagi gi-maaloo-dangihi digaula gi togodogo baalanga, gei Mee ga-dagadagahi nia waini i-lodo di gowaa dagadagahi-waini, go nia waini o-di hagawelewele o-di God-Aamua-Huoloo.

19:16  I-hongo dono gahu looloo mo i-hongo dono gada-wae, le e-hihi di ingoo boloo, “Di King o-nia king, mo-di Tagi o-nia dagi”.

19:17  Au gaa-mmada gi tangada di-langi e-duu i-hongo di laa. Mee gaa-wolo gi-nua ang-gi nia manu huogodoo ala e-mamaangi i-lodo di ahiaalangi, “Goodou lloomoi gi-di gowaa e-dahi gi tagamiami damana a God!

19:18  Lloomoi e-gai nia goneiga o-nia king, nia dagi-dauwa mo digau-dauwa, nia hoodo mo digau ala e-llele nia maa, nia daangada huogodoo, nia hege mo digau moholo, digau aamua mo digau lligi!”

19:19  Gei-au gaa-mmada gi-di manu hagamadagudagu-dangada mo nia king o henuailala mo nadau gau-dauwa ala ne-dagabuli belee heebagi gi Tangada dela i-hongo di hoodo mo ana gau-dauwa.

19:20  Di manu hagamadagudagu dangada la-guu-kumi, ginaua mo soukohp dilikai dela nogo hai nia mogobuna haga-goboina i-mua di manu hagamadagudagu dangada. Go nia mogobuna aalaa, ala ne-halahalau digau ala ne-kae di maaga mo e-daumaha gi-di ada manu hagamadagudagu dangada. Di manu hagamadagudagu dangada mo soukohp dilikai la-guu-kili mouli gi-lodo di ahi monowai ulaula ngongoaa i-nia ‘sulfur’.

19:21  Digau dauwa la-gu-daaligi gii-mmade go tulumanu-dauwa dela e-duu-mai i-lodo di ngudu o tangada dela i-hongo di hoodo, gei nia manu-mamaangi huogodoo la-guu-gai nia goneiga o digau-dauwa gu-maaluu.

Chapter 20

20:1  Gei-au gaa-mmada gi tangada di-langi e-haneia i-di langi, e-daahi di gii o-di luwa dono dua-ai mo dono tiini dueehe i-lodo dono lima.

20:2  Mee gaa-kumi di manu-‘dragon’, go di gihaa namua, dela go Setan, ga-lawalawa a-mee gi-tiini i-nia ngadau e-mana-(1,000).

20:3  Tangada di-langi gaa-hudu a-mee gi-lodo di luwa dono-dua-ai, gaa-tai di luwa, gaa-wanga ginai di haga-iloo bolo hagalee huge, bolo gi-deemee a-mee di-halahalau nia henua-llauehe, gaa-dae-loo gi-di hagaodi o-nia ngadau e-mana. I-muli nia ngadau e-mana, gei mee ga-hagamehede i-lodo di madagoaa bodobodo.

20:4  Gei-au gaa-mmada gi-nia lohongo-aamua, gei digau ala e-noho i-hongo nia maa la-guu-wanga ginai nia mogobuna hai-gabunga. Au gaa-mmada gi-nia hagataalunga o digau ala ne-daaligi gii-mmade, idimaa, digaula nogo hagadele di tonu dela ne-haga-gila-aga go Jesus, mo nia helekai a God. Digaula digi daumaha gi-di manu hagamadagudagu-dangada be go dono ada, digi kae di maaga o-di manu hagamadagudagu dangada i-hongo nadau lae be go nadau lima. Digaula ne-mouli-aga gaa-dagi be nia king dalia a Christ i-lodo nia ngadau e-mana.

20:5  Digau mmade ala i-golo la-digi mouli-aga gaa-dae-loo gi-di hagaodi o-nia ngadau e-mana. Deenei la-go tahi haga-mouli-aga o digau mmade.

20:6  E-maluagina huoloo go digau ala e-dau gi tahi mouli-aga o digau mmade. Di lua made la ono mogobuna ang-gi digaula ai. Digaula gaa-hai digau hai-mee-dabu ni God mo Christ, gei digaula gaa-dagi dalia a Christ i-nia ngadau e-mana.

20:7  I-muli di hagaodi o-nia ngadau e-mana, Setan la-ga-hagamehede gi-daha mo dono gowaa galabudi,

20:8  gei mee gaa-hana ga-halahalau nia henua-llauehe ala e-modoho i-hongo henuailala hagatau, ala go “Gog” mo “Magog”. Setan ga-haga-dagabuli nia henua aanei belee hai-tauwa, digaula la nia daangada dogologowaahee be nia gelegele ala i tongotai.

20:9  Digaula ga-modoho gi-daha i-hongo henuailala ga-haganiga i-di gili di gowaa e-noho-ai nia daangada a God mo-di waahale dela e-aloho-iei Mee. Gei di ahi ga-haneia i-di langi gaa-dudu digaula.

20:10  Gei Setan dela ne-halahalau digaula, gaa-hudu gi-lodo di monowai ulaula ‘sulfur’, di gowaa dela ne-kili ginai di manu hagamadagudagu-dangada mo soukohp dilikai. Digaula ga-haga-mmaemmae boo mo aa, gaa-hana-hua beelaa.

20:11  Gei-au gaa-mmada gi-di lohongo-king damana kene mo Tangada dela e-noho i-ono nua. Henuailala mo-di langi guu-llele gi-daha mo Mee gu-degidee.

20:12  Au gaa-mmada gi digau mmade, digau aamua mo digau lligi, e-tuu i-mua di lohongo-king. Gei nia beebaa gaa-huge, tuai beebaa gaa-huge labelaa, go di beebaa hagamouli. Digau mmade la-ga-hagi-aga e-hagatau gi nadau mee ala ne-hai, ala guu-hihi i-lodo nia beebaa.

20:13  Di moana gu-diiagi gi-daha ana gau mmade. Di “Made” mo-di “Heidis” gu-diiagi gi-daha nau gau-mmade ala nogo daahi go ginaua. Gei digaula ga-hagi-aga gii-tau gi nadau mee ala nogo hai.

20:14  Di “Made” mo-di “Heidis” la-ne-kili gi-lodo di monowai ulaula. (Di monowai ulaula deenei la-go di lua made.)

20:15  Be koai-hua dela dono ingoo digi hihia gi-lodo di beebaa hagamouli, le e-hudu gi-lodo di monowai ulaula.

Chapter 21

21:1  Gei-au gaa-mmada gi-di langi hoou mo henuailala hoou. Di langi matagidagi mo henuailala matagidagi la-gu-hagalee, di moana gu-hagalee labelaa.

21:2  Au gaa-mmada gi-di Waahale Haga-madagu, go Jerusalem hoou, e-haneia i-di langi i-baahi o God, gu-laageia be-di ahina ma-gaa-hai dono lodo, gu-ulu ono gahu e-heetugi ang-gi dono lodo.

21:3  Au ga-longono di lee damana e-helekai mai i-di lohongo-king, “Dolomeenei di hale o God la-gu-i-baahi nia daangada! Mee gaa-noho i-baahi digaula, gei digaula gaa-hai nia daangada ni Mee. God hua donu dela gaa-noho i-baahi digaula, gei Mee gaa-hai di God ni digaula.

21:4  Mee ga-omo gi-daha nia dangi huogodoo o nadau golomada. Nia daangada ga-hagalee mmade, hagalee manawa-gee, hagalee tangitangi, nia mmaemmae ga-hagalee. Nia mee namua gu-hagalee.”

21:5  Tangada dela e-noho i-hongo di lohongo-king ga-helekai, “Dolomeenei, gei Au ga-haga-hoou nia mee huogodoo!” Mee ga-helekai-mai labelaa gi-di-au, “Hihia nia mee aanei, idimaa, nia helekai aanei le e-donu, ge e-mee di hagadagadagagee ginai.”

21:6  Gei Mee ga-helekai-mai, “Ma-guu-lawa! Au go di matagidagi mo-di haga-muliagina, taamada mo-di hagaodi. Di-ingoo-hua tangada ma-ga-hieinu, gei Au gaa-hai a-mee gi-inu i-di monowai haga-mouli, hagalee hui.

21:7  Be koai-hua dela ga-haga-magedaa nia mee huaidu huogodoo, le e-kae di mee deenei i dogu baahi: Au gaa-hai di God ni-digaula, gei digaula gaa-hai nia dama ni-aagu.

21:8  Gei digau ala e-paagege ge hagalee manawa-dahi, e-haga-balumee nadau hagadonu, e-hai nia mee gulugulua, e-dadaaligi-dangada, e-hai be-di manu, e-hai nadau buubuu, e-daumaha gi-nia balu-god, digau hai-kai-tilikai huogodoo, di-nadau gowaa la-go di monowai dela e-wele i-di ahi ulaula i-nia ‘sulfur’, dela go di lua made.”

21:9  Tangada e-dahi i digau di-langi dogohidu ala nogo daahi nadau boolo e-hidu e-honu i-nia hagaduadua haga-muliagina e-hidu, ga-hanimoi gi-di-au, ga-helekai, “Hanimoi, gei au ga-hagi-adu di ahina hai-lodo, go di lodo o Tama-siibi.”

21:10  Di Hagataalunga-Dabu gu-huwahuwa au, gei tangada di-langi deelaa la-gaa-lahi au gi-di ulu di gonduu duuduu i-nua. Mee ga-hagi-mai Jerusalem hoou, go di Waahale Hagamadagu, e-haneia i-di langi i-baahi o God,

21:11  e-dingidingia i-di madamada o God. Di waahale le e-maahina be-di hadu hagalabagau-‘jasper’, e-maalama be-di kalaadi-‘crystal’.

21:12  Di waahale le e-hai dono abaaba damana, gei e-duuduu i-nua, ono bontai e-madangaholu maa-lua. Digau-di-langi e-madangaholu maa-lua e-dagi nia bontai aanei. I-hongo nia bontai le e-hihi nia ingoo o-nia madawaawa e-madangaholu maa-lua o digau Israel.

21:13  Nia bontai e-dolu i-di bahi-i-dua, e-dolu i-di bahi-i-ngeia, e-dolu i-di bahi-i-ngaaga, ge e-dolu i-di bahi-i-dai.

21:14  Di abaaba o-di waahale la-ne-hau i-hongo nia hadu hagamau e-madangaholu maa-lua, e-hihi nia ingoo o-nia gau agoago-hagau dilongoholu maa-lua o Tama-siibi.

21:15  Tangada di-langi dela ne-helekai-mai gi-di-au, la-nogo daahi dana laagau haga-tau-mee goolo belee hagatau di waahale mo ono bontai mo dono abaaba.

21:16  Nia baahi e-haa o-di waahale le e-hai be-di mee dahi ono hagatau. Tangada di-langi ga-hagatau di waahale gi dana laagau haga-tau-mee: e-mana maa-lima-lau-(1,500) maele di looloo, dono palaha le-palaha gadoo be di looloo gei dono duuduu e-hai labelaa beelaa.

21:17  Tangada di-langi ga-hagatau labelaa di abaaba, gei tuuduu di maa nia loho e-motolu maa-ono, ne-hagatau gi-di hai hagatau-mee dela nogo hai-hegau-ai nia daangada.

21:18  Di abaaba la-ne-hai gi-nia hadu-‘jasper’, gei di waahale la-ne-hai gi-nia goolo madammaa gadoo be-di kalaadi.

21:19  Nia hadu hagamau o-di abaaba la-ne-humu gi-nia hagadilinga hadu hagalabagau huogodoo. Tahi hadu hagamau la-ne-humu gi-di hadu-‘jasper’, di lua la di hadu-‘sapphire’, di tolu la di hadu-‘agate’, di haa la di hadu-‘emerald’,

21:20  di lima la di hadu-‘onyx’, di ono la di hadu-‘carnelian’, di hidu la di hadu-‘quartz’-loubuge, di walu la di hadu-‘beryl’, di hiwa la di hadu-‘topaz’, di madangaholu la di hadu-‘chalcedony’, di madangaholu maa-dahi la di hadu-‘turquoise’, di madangaholu maa-lua la di hadu-‘amethyst’.

21:21  Nia bontai e-madangaholu maa-lua la-ne-hai gi-nia hadu-lodo-baehua e-madangaholu maa-lua, di bontai e-dahi la-ne-hai gi-di hadu-lodo-baehua e-dahi. Di ala o-di waahale la-ne-hai gi-nia goolo madammaa, e-malamalama be-di kalaadi.

21:22  Au digi mmada gi-di hale-daumaha i-lodo di waahale, idimaa, di hale-daumaha o-di waahale deelaa, la-go Dimaadua, go di God-Aamua-Huoloo, mo Tama-siibi.

21:23  Di waahale la-hagalee hai-mee gi-di laa be di malama belee inaina di-maa, idimaa, di madamada o God le e-haga-maahina di-maa, gei Tama-siibi la-go dono malama.

21:24  Nia daangada o henuailala ga-heehee i-di maahina o-di waahale deenei, gei nia king o henuailala la-ga-gaamai nadau maluagina gi-lodo di waahale deenei.

21:25  Nia bontai o-di waahale le e-maahuge i-di laangi dogomaalia, hagalee-loo e-tai, idimaa, ma hagalee di boo ai.

21:26  Nia madamada mo nia maluagina o-nia henua-llauehe la-ga-gaamai gi-lodo di waahale deenei.

21:27  Malaa, di mee dogolia e-ulu gi-lodo di waahale deenei ai, be go tei dangada dela e-hai ana mee haga-langaadia-dangada be e-hai ana kai-tilikai. Go digau-hua ala guu-hihi nadau ingoo gi-lodo di beebaa hagamouli a Tama-siibi ga-ulu gi-lodo di waahale deenei.

Chapter 22

22:1  Tangada di-langi ga-hagi-mai di monowai o-nia wai haga-mouli, e-maahina be-di kalaadi-‘crystal’ e-hali-mai i-di lohongo-king o God mo Tama-siibi,

22:2  e-hali-mai tungaalodo di ala o-di waahale. Nia daalinga o di monowai le e-tomo-ai di laagau haga-mouli, e-huwa haga-madangaholu maa-lua i-lodo di ngadau e-dahi, gei ono lau le e-haga-hili nia henua-llauehe.

22:3  Nia mee huogodoo ala e-haga-halauwa go God ga-hagalee i-lodo di waahale deelaa. Di lohongo-king o God mo Tama-siibi, la-ga-i-lodo di waahale, gei ana gau hai-hegau la-ga-daumaha ang-gi Mee.

22:4  Digaula gaa-mmada gi-nia hadumada o-Maa, gei di ingoo o-Maa la-ga-maaga gi-hongo nadau lae.

22:5  Di boo la-ga-hagalee, gei digaula ga-hagalee hai-hegau gi-nia malama be-di maahina o-di laa, idimaa, Dimaadua go God la-gaa-hai di-nadau maalama, gei digaula gaa-dagi gadoo be nia king, gaa-hana-hua beelaa.

22:6  Gei tangada di-langi ga-helekai-mai, “Nia helekai aanei le e-donu gei e-mee di hagadagadagagee ginai. Tagi go God dela e-wanga dana Hagataalunga-Dabu gi-nia soukohp, la-gu-hagau dana dangada di-langi belee hagi-anga gi ana gau hai-hegau nia mee ala ga-kila-aga hoohoo-mai.”

22:7  Jesus ga-helekai, “Hagalongo! Hoohoo-mai gei Au ga-hanimoi! E-maluagina go digau ala e-hagalongo gi nnelekai kokohp ala i-lodo di beebaa deenei!”

22:8  Au go John la-gu-longono, gei au gu-gidee nia mee aanei huogodoo. Dogu madagoaa ne-longono ge ne-gidee-au nia mee aanei, gei au gaa-bala gi-lala gi-nia wae o tangada di-langi dela ne-hagi-mai nia mee aanei, belee daumaha gi mee.

22:9  Malaa, gei mee ga-helekai-mai, “Hudee heia di mee deenaa! Au tangada hai-hegau labelaa be goe mo o duaahina ala go nia soukohp, mo digau huogodoo ala e-daudali nnelekai i-lodo di beebaa deenei. Daumaha ang-gi God!”

22:10  Mee ga-helekai-mai, “Hudee hagammuni-ina nnelekai kokohp o-di beebaa deenei, idimaa, di madagoaa dela e-kila-aga-ai nia mee aanei huogodoo, la-gu-hoohoo-mai.

22:11  Be koai dela e-hai di huaidu, geia gi-unu-hua i-lodo di huaidu. Be koai dela e-gulugulua, geia gi-unu-hua i-lodo di gulugulua. Be koai dela e-humalia, geia gi-unu-hua i-lodo di humalia. Be koai dela e-dabu, geia gi-unu-hua i-lodo di mouli dabu.”

22:12  Jesus ga-helekai, “Hagalongo! Hoohoo-mai gei Au ga-hanimoi! Au e-gaamai agu hui hagahumalia-dangada dalia Au, e-wanga gi-nia daangada dagidahi, e-hagatau ang-gi dono hai-hegau.

22:13  Au go di ‘Alpha’ mo-di ‘Omega’, matagidagi mo-di haga-muliagina, taamada mo-di hagaodi.

22:14  “E-maluagina go digau ala e-haga-madammaa nadau gahu-lloo gii-mmaa, gu-hai-mee gi-di tonu dela e-gai nia huwa-laagau mai di laagau o-di mouli gei e-ulu i-nia bontai gi-lodo di waahale.

22:15  Gei i-tua di waahale la-go digau e-haihai nia mee milimilia ge huaidu, hai-buubuu, hai be-di manu, dadaaligi-dangada, daumaha gi-nia balu-god, hai-kai-tilikai i nadau helehelekai mo nadau ngalungalua.

22:16  “Au go Jesus ne-hagau dagu dangada di-langi belee haga-iloo nia mee aanei adu gi goodou ala i-lodo nia nohongo-dabu. Au tangada mai di hagadili o David. Au go di heduu maahina o-di luada.”

22:17  Di Hagataalunga-Dabu mo-di ahina hai-lodo ga-helekai, “Hanimoi!” Huogodoo ala ma-ga-longono telekai deenei, la-gi-helekai, “Hanimoi!” Tangada dela e-hieinu, la-gi-hanimoi. Tangada dela e-hiihai, gi-kae-ina dehuia nia wai o-di mouli.

22:18  Au go John e-haga-iloo gi-nia daangada huogodoo ala ga-longono nnelekai kokohp o-di beebaa deenei: tangada dela ma-ga-hagapuni dana mee gi-nia maa, gei God ga-hagauda gi mee nia hagaduadua ala e-hihi i-lodo di beebaa deenei.

22:19  Tangada dela ma-ga-daa gi-daha dana mee mo nia helekai kokohp o-di beebaa deenei, gei God ga-daa gi-daha dono duhongo mai nia huwa-laagau o-di laagau o-di mouli, mo mai di Waahale-Hagamadagu, ala e-haga-modongoohia i-lodo di beebaa deenei.

22:20  Tangada dela e-hai dana haga-modongoohia gi-nia mee aanei, le e-helekai boloo, “Uaa, e-donu! Hoohoo-mai gei Au ga-hanimoi!” Malaa, heia gii-gila. Tagi go Jesus, goe gi-hanimoi!

22:21  Tumaalia o tadau Dagi go Jesus gi-madalia nia daangada huogodoo a God. Amen.