LinVB - Revelation of John

Chapter 1

1:1  Yézu Krístu ayébísí mibómbamo, miye Nzámbeméi alakísákí yě mpô ’te áyébisa basáleli ba yě mambí masengélí koyâ nokí ; Yézu atíndí ǎnzelú wa yě áyébisa mangó na mosáleli wa yě Yoáne.

1:2  Yoáne óyo asakólí mambí mánso amónókí, mangó ndé : Liloba lya Nzámbe mpé maye Yézu Krístu asakólákí.

1:3  Esengo na moto atángí maloba maye mpé na baye bayókí mangó sókó bakondima maye makomámí áwa, zambí elaká ekómí penepene !

1:4  Yoáne ôná Biklézya nsambo o Azía : bózwa ngrásya na bobóto biútí na ‘Oyo Azalí, Azalákí mpé Akoyâ’, na Bilímo nsambo bitélémí o bosó bwa Ngwendé ya yě,

1:5  mpé na Yézu Krístu, nzénénéké wa sôló, Mwána wa Yambo, óyo asékwí o bawá, yě Nkúmú wa bakonzi ba nsé. Yě moto akolingaka bísó, mpé na makilá ma yě abíkísí bísó o masúmu,

1:6  akómísí bísó bato ba Bokonzi bwa banganga Nzámbe, mpô tósálela Tatá wa yě Nzámbe : na yě nkémbo mpé ngúyá o bileko na bileko. Amen.

1:7  Tálá, azalí koyâ o káti ya mampata ; bato bá­nso bakomóno yě, atâ baye batubólákí yě mopanzí. Bato ba bikólo bín­so áwa o nsé bakolela mpô ya yě. Ekozala sé bôngó. Amen !

1:8  Mokonzi Nzámbe alobí : « Ngáí nazalí Alfa na Oméga », « Oyo Azalí, Azalákí mpé Akoyâ », Mokonzi wa bokási bónso.

1:9  Ngáí, ndeko wa bínó Yoáne, bísó na bínó tozwí bokonzi, toyókí mi­nyóko mpé tokangí mitéma, na Yézu lisangá. Nazalákí o esanga Pátmos, mpô natéyákí Liloba lya Nzámbe mpé nasakólákí matéya ma Yézu.

1:10  O Mokolo mwa Mokonzi, Elímo akitélí ngáí mpé nsima ya ngáí nayókí, lokóla mondúle bazalákí kobéte, loláká lonéne

1:11  lolobí : « Maye okomóno, komá mangó o búku mpé tíndá yangó epái ya Biklézya nsambo : o Eféze, o Smírna, o Pérgamo, o Tiatíra, o Sárdes, o Filadélfia mpé o Laodiséa. »

1:12  Namíbóngólí mpô nátála náni moto alobí na ngáí. Tálá boye, namóní bitémiseli bya mwínda nsambo bya wólo.

1:13  O káti ya bitémiseli namóní lokóla Mwána wa Moto : alátí elambá elaí, akangí yangó na nká­mba ya wólo o lokéto.

1:14  Motó na nsúki ya yě izalákí mpémbé lokóla nsúki ya mpatá, mpémbé makási mpenzá ; míso ma yě mazalákí ko­ngenge lokóla mololi mwa móto mopelí makási ;

1:15  makolo ma yě lokóla mbengi ya motúya bapétólí na móto, mongóngó mwa yě moyókání lokóla lokitó la mái makási.

1:16  O lobóko la mobáli asímbí mi­nzóto nsambo ; mompánga mopótú mokokátaka bipái bíbalé mobimélí yě o monoko ; elongi ya yě ezalákí kongenge makási mpenzá lokóla mwésé.

1:17  Awa namóní yě, nakwéí o bosó bwa yě lokóla moto awéí, kasi atíélí ngáí lobóko la yě la mobáli, alobí : « Obánga té ! Ngáí Moto wa yambo mpé wa nsúka,

1:18  nazalí na bomoi ; nawâkí, kasi tálá, nazalí na bomoi o bileko na bileko, nazalí na mafu­ngóla ma liwá mpé ma mbóka ya bawá.

1:19  Bôngó, komá mambí omóní : mambí ma leló mpé maye mase­ngélí koyâ nsima.

1:20  Mobómbamo mwa minzóto nsambo omó­nókí o lobóko la ngáí la mobáli, mpé mwa bitémiseli nsambo bya mwínda bisálémí na wólo, mwangó moye : minzóto nsambo, ndé Bǎ­nzelú ba Biklézya nsambo ; bitémiseli nsambo, byangó ndé Biklé­zya nsambo.

Chapter 2

2:1  Komélá Anzelú wa Eklézya ya Eféze boye : Yóká maloba ma óyo asímbí minzóto nsambo o lobóko la mobáli mpé azalí kotámbola o káti ya bitémiseli bya mwínda nsambo bya wólo :

2:2  Nayébí misálá mya yŏ, mpási okoyókaka mpé ndé­ngé okokangaka motéma ; nayébí ’te okosepelaka na bato babé té. Osílí omekí baye bakokósaka ’te bazalí bapóstolo, nzókandé bazalí bapóstolo té ; mpé omóní ’te bazalí bato ba lokutá.

2:3  Okoka­ngaka motéma mpé oyókákí mpási mpô ya nkómbó ya ngáí, kasi ole­mbékí té.

2:4  Kasi nasepélí té na bomóni ’te ozalí na bolingi lokóla libosó lisúsu té.

2:5  Kanísá naíno ndéngé ozalákí libosó mpé ndéngé okómí sikáwa ; bóngólá motéma mpé zóngélá ezalela ya yŏ ya libosó. Sókí té, nakoyâ o mbóka yŏ mpé nakolongola etémiseli ya yŏ ya mwínda o esíká ezalí ; nakosála bôngó sókó obóngólí motéma té.

2:6  Kasi na likambo lyŏ kó nazalí kosepela : lokóla ngáí, okoyinaka bizalela bya bato ba Nikolá.

2:7  Moto azalí na matói, áyóka maye Elímo ayébísí bato ba Biklézya : moto akolónga etumba, nakoléisa yě mbuma ya nzeté ya bomoi eye ezalí o Paradízo ya Nzá­mbe.

2:8  Komélá Anzelú wa Eklézya ya Smírna boye : Oyo azalí Moto wa yambo mpé wa nsúka, óyo akúfákí mpé azwí bomoi lisúsu, alobí :

2:9  Nayébí ’te ozalí konyókwama mpé kokélela, kasi ozalí moto wa nkita. Nayébí ’te baye bakomíyébisaka lokóla ba-Yúda, nzókandé bazalí ba-Yúda té, bakotóngoko bínó : bazalí bato ba Sátana !

2:10  Obánga malózí té, maye makokwêla yŏ. Zábolo akokangisa bato ba bínó ba­súsu o bolóko mpô ya kosénginya bínó ; mikolo zómi bakonyókolo bínó. Sókó oyambí ngáí kín’o liwá, nakopésa yŏ enkoti ya bomoi.

2:11  Moto azalí na matói, áyóka maye Elímo ayébísí bato ba Biklézya : óyo aló­ngí etumba, liwá lya mábalé likokwêla yě té.

2:12  Komélá Anzelú wa Eklézya ya Pérgamo boye : Yóká maloba ma Oyo azalí na mompánga mopótú mokokátaka bipái bíbalé :

2:13  Nayébí esíká okofándaka : ngwendé ya Sátana ezalí kúná. Kasi okangání na nkómbó ya ngáí, owángání ngáí té, atâ o mikolo babomákí Antipás, yě nzénénéké wa ngáí wa sôló. Babomákí yě o mbóka bínó, esíká Sátana akofándaka.

2:14  Kasi na makambo ma yŏ masúsu nasepélí té : bato ba yŏ basúsu bakolandaka matéya ma Baláme ; yě moto alakísákí Balák kotíela bána ba Israél motámbo mpô ’te bálía mabonza babonzélákí bikeko mpé básála ekóbo.

2:15  Bato basúsu mpé epái ya yŏ bakolandaka matéya ma bato ba Nikolá.

2:16  Yangó wâná, bóngólá motéma : sókó obóyí, nakoyâ nokí epái ya yŏ kobu­ndisa bato na mompánga mokobima o monoko mwa ngáí.

2:17  Moto azalí na matói, áyóka maloba Elímo ayébísí bato ba Biklézya : moto alóngí etumba, nakopésa yě Manú ya sika ebómbámí ; nakopésa yě mpé mwâ libángá mpémbé, liye bakomí nkómbó ya sika ; eye eyébání na moto mŏ kó té ; bobélé moto óyo akozwa mwâ libá­ngá lyangó, akoyéba.

2:18  Komélá Anzelú wa Eklézya ya Tiatíra boye : Yóká maloba ma Mwána wa Nzámbe, óyo azalí na míso makongengeke lokóla mololi mwa móto mopelí makási, mpé na makolo lokóla mbengi ya motúya.

2:19  Nayébí misálá, bolingi mpé boyambi bwa yŏ, ndéngé okomípésaka mpé okotíaka moléndé ; nayébí ’te misálá mya yŏ mya sika milekí miye mya kala.

2:20  Kasi nasepélí té áwa olingísí Yezabél átéya ; akomíyébisaka lokóla proféta, kasi na matéya ma yě akokósaka basáleli ba ngáí mpô ’te básála ekóbo na boléi nyama iye babonzélí bikeko.

2:21  Natíkélákí yě mwâ ntángo mpô ábóngola motéma, kasi abóyí kotíka makambo ma yě ma ekóbo.

2:22  Yangó wâná nakobwáka yě o mbéto esíká akoyóka mpási, yě na báníngá ba yě bakosálaka ekóbo. Sókó babóngólí mitéma té mpé batíkí mabé ma bangó té, nakoyókisa bangó malózí ma nsómo.

2:23  Nakoboma bána ba yě, bôngó bato ba Biklézya bínso bakoyéba ’te ngáí moto nayébí makanisi mpé mitéma mya bato ; mpé nakofúta mŏ kó mŏ kó wa bínó engé­béné na misálá mya yě.

2:24  Kasi bínó, bato basúsu ba Tiatíra, bondimí matéya mâná té, mpé boyébí mibómbamo mya Sátana té, miye bangó bakotángaka bôngó, nakotíe­la bínó mókúmbá mosúsu té.

2:25  Bó­kangana téé nsúka na maye mazalí na bínó, kín’o mokolo nakoyâ.

2:26  Moto akolónga etumba, óyo akotósa mibéko mya ngáí téé nsúka, nakopésa yě likokí lya koyángela bikólo bínso :

2:27  akokamba bangó na língé­nda lya ebendé, mpé akobúka bangó lokóla mbéki ya libázi !

2:28  Ngáí na­zwí likokí lyangó o mabóko ma Tatá wa ngáí. Nakopésa yě Monzóto mwa ntó­ngó.

2:29  Moto azalí na matói, áyóka maye Elímo ayébísí bato ba Biklé­zya.

Chapter 3

3:1  Komélá Anzelú wa Eklézya ya Sárdes boye : Yóká maloba ma Oyo azalí na Bilímo nsambo bya Nzámbe mpé na minzóto nsambo. Nayébí misálá mya yŏ. Bakolobaka ’te ozalí na bomoi, kasi osílí owéí.

3:2  Olamuka mpé óléndísá mwâ bomoi botíkálí na yŏ, boye bolingí bókúfa. Namóní ’te misálá mya yŏ mibongí naíno té o míso ma Nzámbe wa ngáí.

3:3  Yangó wâná, óku­ndola o motéma ndéngé níni oya­mbákí Liloba liye oyókákí. Ndimá lyangó mpé bóngólá ezalela ya yŏ. Sókó okéngélí malámu té, nakoyâ lokóla moyíbi, okoyéba té na ngonga níni nakobimela yŏ.

3:4  Kasi bato ba yŏ basúsu o Sárdes babébísí bilambá bya bangó té. Bakotámbola na ngáí elongó na bilambá mpé­mbé, mpô balongóbání.

3:5  Moto aló­ngí etumba akoláta elambá mpé­mbé ; nakoboma nkómbó ya yě o búku ya bomoi té ; o míso ma Tatá wa ngáí mpé ma Bǎnzelú ba yě nakondima ’te azalí moto wa ngáí.

3:6  Oyo azalí na matói, áyóka maye Elímo ayébísí bato ba Biklézya.

3:7  Komélá Anzelú wa Eklézya ya Filadélfia boye : Yóká maloba ma Mosántu, yě Moto wa bosôló, óyo azalí na lifungóla lya Davídi. Sókó afungólí, moto mŏ kó akokanga té ; sókó akangí, moto mŏ kó akofungola té.

3:8  Nayébí misálá mya yŏ : oza­lákí makási míngi té, kasi obátélí lilo­ba lya ngáí mpé owángání nkómbó ya ngáí té. Yangó wâná nafu­ngólélí yŏ ezibeli, eye moto mŏ­kó akokí kokanga té.

3:9  Tálá, nakosála ’te bato ba sinagóga ya Sátana báyâ kokúmbama o bosó bwa makolo ma yŏ, bándima bôngó ’te nali­ngí yŏ. Bato baye ba lokutá bakomíyébisaka lokóla ba-Yúda, nzó­kandé bazalí ba-Yúda té.

3:10  Awa obátélí liloba lya ngáí mpé okangí motéma, ngáí mpé nakobátela yŏ o ntángo malózí makokwêla mokili mobimba mpô ya komeka bato ba nsé.

3:11  Nakozónga nokí. Okangana na maye mazalí na yŏ, moto mŏ kó té ábótolo yŏ enkoti ya lilónga.

3:12  Moto akolónga etumba, nakokómisa yě lokóla likonzí lya témpelo ya Nzámbe wa ngáí. Akolongwa wâná lisúsu té ; nakokoma o elongi ya yě nkómbó ya Nzámbe wa ngáí, nkómbó ya ngáí ya sika, mpé nkó­mbó ya Engumbá ya Nzámbe wa ngáí, Yerúzalem ya sika, eye ekoúta o likoló, epái ya Nzámbe wa ngáí.

3:13  Moto azalí na matói, áyóka maye Elímo ayébísí bato ba Biklézya.

3:14  Komélá Anzelú wa Eklézya ya Laodiséa boye : Yóká maloba ma Oyo azalí ‘Amen’, yě nzénénéké wa sôló óyo akokósaka té, óyo azalí Ntína ya bikelámo bínso bya Nzámbe.

3:15  Nayébí misálá mya yŏ : ozalí mpío té, móto mpé té ; malámu sókó ozalákí tŏ mpío tŏ móto.

3:16  Lokóla ozalí mpío té, móto mpé té, kasi sé mwâ molungé, nakosá­nza yŏ.

3:17  Okolobaka : Tálá, nazalí moto wa nkita, nakómí na mosolo míngi, nazángí elóko té ; nzókandé omóní té ’te ozalí sé moto wa mawa, óyo bakoyókelaka ngolu, mobóla, okúfá míso, ozalí bolúmbú.

3:18  Yangó wâná, yóká lilako lya ngáí : sómbá epái ya ngáí wólo bapétólí na móto ; bôngó okozala moto wa nkita. Sómbá bilambá mpémbé, látá byangó, zipá bolúmbú bwa yŏ mpô óyóka nsóni té. Sómbá mpé monô, tíá yangó o míso, bôngó ómóno lisúsu.

3:19  Nakopálela mpé nakotúmbola baye nakolingaka. Bôngó, tíá moléndé mpé bóngólá motéma !

3:20  Tálá, natélémí penepene na ezibeli ya ndáko ya yŏ, mpé nabétélí yangó : sókó moto ayókí loláká la ngáí mpé azibólí ndáko, nakoyâ o mbóka yě mpô tólía méza yŏ kó, bísó na yě.

3:21  Moto akoló­nga etumba, nakopésa yě esíká penepene na ngáí o ngwendé ya ngáí, sé lokóla ngáí, áwa nalóngí etumba, nayéí kofánda penepene na Tatá wa ngáí o ngwendé ya yě.

3:22  Moto azalí na matói, áyóka maye Elímo ayébísí bato ba Biklézya. »

Chapter 4

4:1  Nsima yangó namóní limóní liye : Ezibeli ya likoló efungwámí mpé loláká, loye nayókákí libosó lokóla mondúle babétí, lolobí na ngáí : « Butá áwa, bôngó nálakisa yŏ maye masengélí koyâ nsima. »

4:2  Sé o ntá­ngo êná Elímo akitélí ngáí. Namóní ngwendé batélémísí o likoló, mpé Moto mŏ kó afándélí yangó.

4:3  Oyo afándí amónóní lokóla libá­ngá lya yáspe tŏ kornalíne. Monama mozíngí ngwendé, mongengí lokóla emeróde.

4:4  Kíti ntúkú íbalé na ínei izíngí ngwendé ; Babangé ntúkú íbalé na bánei bafándélí kíti îná, balátí bilambá mpémbé, binkoti bya wólo o mitó.

4:5  Minkalali na lokitó la nkáké bibimí o ngwendé ; míínda nsambo mipelí o bosó bwa ngwendé, bangó ndé bilímo nsambo bya Nzámbe.

4:6  O bosó bwa ngwendé mbú emónóní lokóla talatálá, loléngé la mangéngéngé. O káti ya ngwendé mpé zóngazónga na yangó ba-Bomoi bánei batélémí, bazalákí na míso ebelé, epái ya libosó mpé epái ya nsima.

4:7  Oyo wa libosó azalákí lokóla nkósi, óyo wa bábalé lokóla mwána wa ngómbé mobáli, óyo wa básáto azalákí na elongi lokóla moto, óyo wa bánei lo­kóla engondó ezalákí kopimbwa.

4:8  Ba-Bomoi bánei bazalákí mŏ kó mŏ kó na mapapú motóbá ; bazalákí na míso zóngazónga na nzóto ya bangó mpé o káti. Butú mói bakolobaka : « Yě mosántu, mosántu, mosántu, Mokonzi Nzámbe wa ngúyá ínso, ‘Oyo Azalákí, Azalí mpé Ako­yâ’. »

4:9  Mbala ínso ba-Bomoi bapésí nké­mbo na lokúmu mpé batóndí Oyo afándí o ngwendé, Oyo azalí o bileko na bileko,

4:10  Babangé ntúkú íbalé na bánei bafukámí o bosó bwa Oyo afándí o ngwendé mpô ya kokúmbamela Oyo azalí o bileko bínso sékô. Babwákí binkoti bya bangó o bosó bwa ngwendé mpé balobí :

4:11  « E Mokonzi, Nzámbe wa bísó, olongóbání kozwa nkémbo, lokúmu na ngúyá, zambí yŏ moto ozalísí molóngó mobimba ; bínso bikelámí mpé bizwí bomoi mpô ya yŏ. »

Chapter 5

5:1  O lobóko la mobáli la Óyo afándí o ngwendé namóní Búku elí­ngámí ; bakomí o búku epái ya libándá mpé ya káti, bakangí yangó na bikangeli nsambo.

5:2  Mpé namóní Anzelú wa ngúyá, abandí kosakola na mongóngó makási : « Náni abongí kobúka bikangeli mpé kofungola búku ? »

5:3  Kasi moto mŏ kó té, o likoló, o nsé tŏ o nsé ya mabelé, akokí kofungola búku mpé kotánga yangó.

5:4  Nalelí míngi mpô moto mŏ kó té alongóbání kofu­ngola búku mpé kotánga yangó.

5:5  Bôngó mŏ kó wa Babangé alobí na ngáí : « Olela té. Nkósi wa libótá lya Yúda, Ebóto wa Davídi, alóngí etumba ; yě moto akobúka bikangeli nsambo mpé akofungola búku. »

5:6  Na nsima namóní káti ya ngwendé ya ba-Bomoi bánei mpé ya Baba­ngé, Mwâ-Mpatá atélémí, lokóla asílí abomámí. Azalákí na maséké nsambo mpé na míso nsambo, byangó ndé Bilímo nsambo bya Nzámbe, biye atíndákí o nsé mobimba.

5:7  Mwâ-Mpatá abelémí mpé akamátí búku ezalákí o lobóko la mobáli la Oyo afándí o ngwendé.

5:8  Awa akamátí búku, ba-Bomoi bánei na Babangé ntúkú íbalé na bánei bakúmbámélí Mwâ-Mpatá. Mŏ kó mŏ kó wa bangó azalákí na nzenze mpé na nkéni ya wólo etóndí na malási ; yangó ndé losámbo la basántu.

5:9  Bayémbí nzémbo ya sika. « Sôló, olongóbání kokamata búku mpé kobúka bikangeli bya yangó, mpô babomákí yŏ, mpé na makilá ma yŏ osikólí bato ba mabótá mánso, ba nkóta ínso, ba bikólo bínso mpé ba mikili mínso, opésí bangó na Nzámbe.

5:10  Mpô ya Nzámbe wa bísó okómísí bangó bakonzi mpé banganga Nzá­mbe baye bakoyá­ngela mokili. »

5:11  Nátála boye, nayókí mingó­ngó mya Bǎnzelú ebelé bazíngí ngwendé, ba-Bomoi mpé Baba­ngé ; bazalákí nkóto na nkóto, bifúku na bifúku !

5:12  Bagángí makási : « Mwâ-Mpatá babomákí alo­ngó­bání kozwa ngúyá, nkita, bwányá na bokási : bákúmisa, bákémbisa mpé báyémbela yě. »

5:13  Sikáwa nayókí bikelámo bínso o likoló, o mokili, o nsé ya mabelé, o káti ya mbú : bikelámo bínso bya molóngó mobimba bayémbí boye : « Oyo afándí o ngwendé na Mwâ-Mpatá lokóla bázwa makúmísí, lokúmu, nkémbo na ngúyá o bileko na bileko ! »

5:14  Ba-Bomoi bánei balobí : « Amen », mpé Babangé bakwéí bilongi o nsé mpô ya kokúmbamela.

Chapter 6

6:1  Awa namóní ’te abúkí ekangeli ya yambo, nayókí óyo wa libosó wa ba-Bomoi bánei agángí na loláká lokóla nkáké : « Yáká ! »

6:2  Namóní farása mpémbé eyéí, motámbwisi wa yangó azalákí na litimbó ; bapésí yě enkoti ya lilónga ; lokóla moto alóngí etumba akeí mpô ’te álónga lisúsu.

6:3  Ntángo Mwâ-Mpatá abúkí eka­ngeli ya bíbalé, nayókí wa-Bomoi wa bábalé agángí : « Yáká ! »

6:4  Sikáwa farása esúsu etáné ngwá eyéí ; batí­ndí motámbwisi wa yangó álongola bobóto o mokili, bôngó bato bábo­mana ; bapésí yě mompánga monéne.

6:5  Ntángo Mwâ-Mpatá abúkí eka­ngeli ya bísáto, nayókí wa-Bomoi wa básáto agángí : « Yáká ! » Nátála boye, namóní farása eíndo ebimí. Motá­mbwisi wa yangó azalákí na emekeli ya bozitó o mabóko.

6:6  Nayókí lokóla loláká loútí o ntéí ya ba-Bomoi bánei, lolobí : « Lítele yŏ­kó ya mbuma ya mámpa ekokí na denário yŏ kó ; lítele ísáto ya mbuma ya mámpa ma bololo ekokí na denário yŏ kó. Kasi óbébisa mafúta na víno té. »

6:7  Awa abúkí ekangeli ya bínei, nayókí wa-Bomoi wa bánei agángí : « Yáká ! »

6:8  Sikáwa farása ebimí ya lángi la mái ma mpondú ; nkómbó ya motámbwisi wa yangó : ‘Liwá’ ; mokonzi wa mbóka ya bawá alandí yě. Bapésí bangó likokí o yŏ kó ya bínei ya mokili : báboma bato na mompánga, na nzala, na bokono bobé mpé na nyama ya zámba.

6:9  Ntángo Mwâ-Mpatá abúkí eka­ngeli ya bítáno, namóní o nsé ya altáre milímo mya bato babomámí mpô ya Liloba lya Nzámbe, mpô basakólákí lyangó.

6:10  Bagángí na mongóngó makási : « Mokonzi mosántu mpé wa bosôló, okozila kín’o ntángo níni ? Sámbísá bato ba mokili baye basopí makilá mpé pésá bangó etúmbu. »

6:11  Na nsima bapésí bangó mŏ kó mŏ kó monkóto mpé­mbé ; bayébísí bangó ’te bázila naíno mwâ moké téé báníngá ba bangó ba mosálá mpé bandeko ba bangó bakokoka, baye bato ba mokili basengélí koboma lokóla bangó mŏ­kó.

6:12  Awa Mwâ-Mpatá abúkí eka­nge­li ya motóbá, namóní ’te mokili moningání makási, mwésé moíndí lokóla makála, sánzá mobimba etelí lokóla makilá,

6:13  minzóto mya etando mi­kwéí o nsé lokóla fígi ya nzeté eye eningání na mompepe makási.

6:14  Etando ya likoló elíngámí, lokóla bakolíngaka monkandá, ngómbá na bisanga bínso bilongwí o bisíká bizalákí.

6:15  Bankúmú ba mokili, bayá­ngeli ná bakonzi ba basodá, bato ba nkita ná bato banéne, bato bánso, baómbo ná bansómí, bánso bakeí kobómbama o mibé­ngá mpé o káti ya mabángá ma ngómbá,

6:16  babélélí ngómbá ná mabángá : « Bókwêla bísó mpé bóbó­mba bísó mosíká na Oyo akofándaka o ngwendé, mosíká mpé na nkándá ya Mwâ-Mpatá. »

6:17  Mpá­mba té, Mokolo monéne mwa nká­ndá ya bangó moyéí mpé náni akokí kopika mpéndé ?

Chapter 7

7:1  Na nsima namóní Bǎnzelú bánei batélémí o nsúka ínei ya mokili, bazalákí kokanga mimpepe mínei mya mokili mpô ’te mompepe mŏ kó té móbéte mokili, mbú té, nzeté yŏ kó mpé té.

7:2  Namóní Anzelú mosúsu aútí epái ya Esti, amemí elembo ya Nzámbe wa bomoi ; na mongóngó makási abélélí Bǎnzelú bánei baye bazwí likokí lya kobébisa mokili na mbú :

7:3  « Bóbéte mokili, mbú na nzeté té kín’o ntángo tokosílisa kotía ele­mbo o bilongi bya basáleli bánso ba Nzámbe wa bísó. »

7:4  Nayókí motángo mwa baye bazwí elembo : bato nkóto monkámá na ntúkú ínei na ínei, bánso bána ba mabótá mánso ma Israél :

7:5  o libótá lya Yúda bato nkóto zómi na íbalé bazwí elembo, o libótá lya Rúben bato nkóto zómi na íbalé, o libótá lya Gad bato nkóto zómi na íbalé,

7:6  o libótá lya Asér bato nkóto zómi na íbalé, o libótá lya Néftali bato nkóto zómi na íbalé, o libótá lya Manáse bato nkóto zómi na íbalé,

7:7  o libótá lya Símeon bato nkóto zómi na íbalé, o libótá lya Lévi bato nkóto zómi na íbalé, o libótá lya Izakar bato nkóto zómi na íbalé,

7:8  o libótá lya Zábulon bato nkóto zómi na íbalé, o libótá lya Yozéfu bato nkóto zómi na íbalé, o libótá lya Bényamin bato nkóto zómi na íbalé.

7:9  Na nsima namóní nkaká ya bato, moto mŏ kó té akokí kotánga bangó : bato ba bikólo bínso, ba mabótá mánso, ba mikili mínso, ba nkóta ínso. Batélémí o bosó bwa ngwendé mpé bwa Mwâ-Mpatá ; balátí bilambá mpémbé, bazalákí na mandalála o mabóko ;

7:10  bagángí makási : « Nzámbe wa bísó óyo afá­ndí o ngwendé mpé Mwâ-Mpatá babíkísí bísó ! »

7:11  Bǎnzelú bánso batélémí zóngazónga na ngwendé, ná Babangé mpé na ba-Bomoi bánei ; bakúmbámí o bosó bwa ngwendé, bilongi o nsé, mpé bakúmbámélí Nzámbe,

7:12  balobí : « Amen ! Lokúmu, nkémbo, bwá­nyá, botóndi, makúmísí, ngúyá mpé bokási na Nzámbe wa bísó o bileko na bileko ! Amen ! »

7:13  Na nsima mŏ kó wa Babangé alobí na ngáí : « Baye balátí bilambá mpé­mbé, bangó banáni, baútí wápi ? »

7:14  Nazóngísélí yě : « Mokonzi, yŏ mŏ kó oyébí. » Alobí lisúsu : « Ezalí baye babíkí o monyóko monéne ; basukólí bilambá, mpé bakómísí byangó mpémbé o makilá ma Mwâ-Mpatá.

7:15  Yangó wâná batélémí o bosó bwa ngwendé ya Nzámbe ; bakosálelaka yě butú mói o témpelo ya yě ; Oyo afándí o ngwendé akotandela bangó éma ya yě.

7:16  Bakoyóka nzala tŏ mpósá ya mái mokolo mŏ kó lisúsu té ; molu­ngé na móto mokolembisa bangó lisúsu té,

7:17  mpô Mwâ-Mpatá óyo afándí o káti ya ngwendé akozala mokéngeli wa bangó, akokamba bangó epái ya máziba ma mái ma bomoi. Nzámbe akolongola mpízolí o míso ma bangó. »

Chapter 8

8:1  Ntángo Mwâ-Mpatá abúkí ekangeli ya nsambo, likoló likómí nyê, sókí ndámbo ya ngo­nga.

8:2  Nsima namóní Bǎnzelú nsambo batélémí o bosó bwa Nzámbe ; bapésí bangó mindúle nsambo.

8:3  Anze­lú mosúsu ayéí kotéleme penepene na altáre, engwekúngwekú ya wólo o mabóko. Bapésí yě malási míngi mpô ’te ábonza mangó elongó ná losámbo la basántu bánso, o altáre ya wólo, o bosó bwa ngwendé.

8:4  Mílinga mya malási mibimí o lobóko la Anzelú, mibutí epái ya Nzámbe elongó na losámbo la basántu.

8:5  Na nsima Anzelú akamátí engwekúngwekú mpé ató­ndísí yangó na makála ma móto ma altáre mpé abwákí yangó o nsé. Ebimí nkáké, mingóngó, minkalali, mpé mokili moningání.

8:6  Bǎnzelú nsambo bazalákí na mi­ndúle nsambo, bamíléngélí mpô ya kobéte myangó.

8:7  Oyo wa libosó abétí mondúle : mbúla ya matándalá na móto, bisangání na makilá, ebétí o mokili, mpé eténi ya bísáto ya mokili ezíkí na móto, eténi ya bísáto ya nzeté ezíkí lokóla, matíti mabésu mánso mazíkí nyé.

8:8  Na nsima Anzelú wa bábalé abétí mo­ndúle : ezalákí lokóla ngómbá enéne eye ezíkí na móto ebwákémí o mbú, mpé eténi ya bísáto ya mbú ebóngwání makilá.

8:9  Eténi ya bísáto ya bikelámo bínso bikozalaka o mbú ekúfí, mpé ndámbo ya ísáto ya masúwa ezindí.

8:10  Anzelú wa básáto abétí mondúle : monzóto monéne mololí lokóla esúngi moútí o likoló mpé mokwêlí eténi ya bísáto ya bibale mpé ya máziba ma mái.

8:11  Nkó­mbó ya monzóto mwangó ‘Bololo’ : eténi ya bísáto ya mái ebóngwání mái bololo, mpé bato míngi bawéí mpô ya mái makómí bololo.

8:12  Anze­lú wa bánei abétí mondúle : eténi ya bísáto ya mwésé, ya sánzá mpé ya minzóto ebébí, mpé eténi ya bísáto ya bîná bínso ekómí molílí ; ndámbo ya ísáto ya mói mpé ya butú ekómí molílí.

8:13  Mpé namóní engondó ezalákí kopimbwa o likoló, ezalákí kogá­nga makási : « Mawa ! Mawa ! Mawa na bato bánso ba mokili ntángo Bǎnzelú basúsu básáto bakobéte mindúle. »

Chapter 9

9:1  Anzelú wa bátáno abétí mondúle : namóní monzóto mwa etando mokwéí o nsé. Bapésí mwangó lifungóla lya libúlú lya Bozindó ;

9:2  monzóto mofungólí libúlú lya Bozindó mpé út’o libúlú mólinga mobutí lokóla mólinga mobimí o etumbelo enéne : mói ná etando biíndí na mwangó.

9:3  Ut’o mólinga moye mápalela mapalángání o mokili ; bapésí mangó ngúyá lokóla ngúyá ya nkotó ya mokili.

9:4  Batíndí mangó mábébisa bilanga té, matíti té, nzeté mpé té, kasi mábéte bobélé bato bazángí elembo ya Nzámbe o elongi.

9:5  Balingísí mangó té koboma bato, kasi matíndámí ko­nyókolo bangó sánzá ítáno. Sókó lípalela liswí moto, likoyókisa yě mpási mpenzá lokóla nkotó eswí yě.

9:6  O mikolo mîná bato bakoluka liwá, kasi bakozwa lya­ngó té ; bakolíkya ’te bakokúfa nokí, kasi liwá likokíma bangó !

9:7  Mápalela mâná mazalákí lokóla farása izalí kokende etumba, bi­nkoti bya lokúmu bya wólo o mitó, na bilongi lokóla bilongi bya bato.

9:8  Nsúki ya mangó lokóla nsúki ya básí, míno lokóla míno ma nkósi.

9:9  Ntólo ya mangó lokóla miláto mya bibendé ; makeléle ma mapapú lokóla lokitó la makaló na farása ebelé izalí kokende etumba.

9:10  Mikíla mya mangó lokóla mikíla mya nkotó mizalákí na bitengú ; mikíla mya mangó mizwí ngúyá ya ko­nyókolo bato sánzá ítáno.

9:11  Mokonzi akambí mangó, Anzelú wa Bozindó, óyo bakotángaka o lokóta la ebréi ‘Abadon’, o lokóta la gréke ‘Apólion’.

9:12  Bolózí bwa yambo bolekí, kasi malózí mábalé makoyâ naíno.

9:13  Ntángo Anzelú wa motóbá abétí mondúle, nayókí mongóngó moútí o maséké mánei ma altáre ya wólo, o bosó bwa Nzámbe.

9:14  Mongóngó molobí na Anzelú wa motóbá óyo azalákí na mondúle : « Fu­ngólá minyolólo mya Bǎnzelú bánei bakangémí penepene na ebale enéne Efráte. »

9:15  Babimísí Bǎnzelú bánei bazalákí kozila elaká, mokolo, sánzá na mbúla ’te báboma ndámbo ya ísáto ya bato bánso.

9:16  Limpingá lya basodá bakotámbwisaka farása lizalákí na bifúku nkámá íbalé ; nayókí motángo mwa bangó.

9:17  O limóní namóní farása ná bato batá­mbwísí yangó : miláto mya bibendé mitelí lokóla móto, lokóla yasínte motáné ngwá mpé lokóla fofólo. Mitó mya farása lokóla mitó mya nkósi ; móto, mólinga na fofólo izalákí kobima o minoko mya bangó.

9:18  Eténi ya bísáto ya bato bawéí mpô ya malózí mâná másáto : móto, mólinga na fofólo izalákí kobima o minoko mya farása.

9:19  Mpámba té, makási ma farása mazalí sé o minoko mpé o mikíla ; sôló, mikíla mîná mizalí lokóla nyóka, nsóngé ya myangó izalí lokóla mitó mikokí kozokisa.

9:20  Nzókandé baye ba­bíkákí o malózí mâná babóngólí mitéma té, babóyí atâ misálá mya mabóko ma bangó té : batíkí kokúmbamela bazábolo té, na bikeko bya wólo, bya paláta, bya mbengi, bya mabángá mpé bya mabáyá, biye bikokí komóno té, koyóka té, mpé kotámbola té.

9:21  Batíkí koboma bato té, batíkí mpé makambo ma boloki, ma bosóni mpé ma boyíbi té.

Chapter 10

10:1  Nsima yangó namóní Anzelú mosúsu makási aútí o likoló, azíngámí na limpata, monama likoló lya motó ; elongi ya yě lokóla mwésé, makolo lokóla makonzí ma móto.

10:2  O lobóko asímbí mwâ búku efungwámí. Atíí lokolo la mobáli o mbú, lokolo la mwásí o mokili,

10:3  agángí makási lokóla nkósi ekongalaka. Awa agángí, nká­ké nsambo ibétí.

10:4  Esílí nkáké kobéte, nalingí kokoma maloba mâná ; kasi út’o likoló nayókí loláká loyébísí ngáí : « Bómbá maloba maye nkáké nsambo iútí koloba ; ókoma mangó té. »

10:5  Namóní ’te Anze­lú óyo atélémí o mbú mpé o mokili, atómbólí lobóko la mobáli epái ya likoló ;

10:6  alayí ndaí na nkómbó ya Oyo azalí o bileko bínso, Oyo azalísí likoló mpé bínso bizalí kúná, mokili mpé bínso bizalí wâná, ná mbú ná mpé bínso bizalí kúná, alobí : « Elaká ekokí !

10:7  Bobélé o ntángo bokoyóka ’te Anzelú wa nsambo akobéte mo­ndúle, Nzámbe akokokisa mokáno mwa yě, moye mobómbámí naíno, sé lokóla ayébísákí baproféta, basáleli ba yě. »

10:8  Nsima mongóngó moye nayókákí út’o likoló, molobí na ngáí lisúsu : « Kendé kokamata o lobóko la Anzelú, óyo atélémí o mbú mpé o mokili, búku eye efungwámí. »

10:9  Bôngó nabelémí na Anzelú mpé naséngí yě ápésa ngáí búku êná eké. Alobí na ngáí : « Kamátá, líá yangó ; bololo boko­swéisa yŏ libumu, kási o monoko okoyóka yangó elengi lokóla mafúta ma nzói. »

10:10  Nakamátí búku eké o lobóko la Anzelú mpé naléí yangó. O monoko nayókí yangó elengi lokóla mafúta ma nzói, áwa namelí yangó, bololo boswí ngáí makási o libumu.

10:11  Na nsima balobí na ngáí : « Osengélí lisúsu kosakola mabé ôná bato ba bikólo, ba mabótá, ba nkóta míngi mpé ma bakonzi baíké. »

Chapter 11

11:1  Na nsima bapésí ngáí nkékélé lokóla língénda lya bome­ki bolái, balobí na ngáí : « Télémé mpé kendé komeka bonéne, bolaí mpé bosándá bwa Témpelo ya Nzámbe mpé bwa altáre ; mpé tángá bato bakoyâka kokúmbamela Yě wâná.

11:2  Kasi tíká naíno lopángo la libándá la Témpelo, ómeka langó té, mpô bapésí langó na bapagáno ; bangó bakonyata Engumbá Esántu sánzá ntúkú ínei na íbalé.

11:3  Nakotínda banzénénéké ba ngáí bábalé, baye bakoláta ngóto, básakola mikolo nkóto na nkámá íbalé na ntúkú motóbá. »

11:4  Bangó ndé nzeté ya olíva íbalé mpé kandéla íbalé ízalí o bosó bwa Mokonzi wa mokili.

11:5  Sókó moto mŏ kó alingí kosála bangó mabé, móto mokobima o minoko mya bangó mpô ya kosílisa bangúná ba bangó. Moto amekí kosála bangó mabé, akowá bobélé liwá liye.

11:6  Ntá­ngo bazalí kosakola bazalí na likokí lya kokanga likoló mpô ’te mbúla énóka té, lya kobóngola mái mákóma makilá, mpé lya kopésa mokili bitúmbu ndéngé na ndéngé mbala ínso balingí.

11:7  Kasi ntángo bakosílisa kosakola, Nyama eye ekoúta o Bozi­ndó ekoyâ kobundisa, ekolónga mpé ekoboma bangó.

11:8  Bibembe bya bangó bikolála o libándá lya Engu­mbá Enéne, eye bameséní kotánga Sódoma tŏ Ezípeti, esíká babákákí Mokonzi wa bangó o kurúse.

11:9  Bibembe bya bangó bikotíkala kúná o míso ma bato ba bi­kólo, ba mabótá, ba nkóta mpé ba mikili mínso, mikolo mísáto na ndámbo ; bakolingisa moto té áku­nda bangó o malíta.

11:10  Bato ba nsé bakosepela na yangó, bakopésana longónya ná mpé makabo, mpô baproféta baye bábalé bayókísákí bangó mpási míngi.

11:11  Kasi nsima ya mikolo mîná mísáto na ndámbo, mpéma ya bomoi eye ekoúta epái ya Nzámbe ekokótela bangó ; bakotéleme o makolo ; nsómo ekokwêla bato bakotála bangó.

11:12  O ntángo êná nayókí loláká logángélí bangó makási út’o likoló : « Bóbuta áwa ! » O míso ma ba­ngúná ba bangó bayíngélí o limpata mpé babutí o likoló.

11:13  Sé o ntángo êná, mokili moningání makási : eténi ya zómi ya Engumbá êná ebúkání ; bato nkóto nsambo bawéí mpô ya boningani bwa mokili. Baye batíkálí na bomoi bayókí nsómo mpé bakúmísí Nzámbe wa likoló.

11:14  Bolózí bwa mábalé bosílí bolekí, boye bwa másáto bokoyâ nokí.

11:15  Anzelú wa nsambo abétí mo­ndúle ; mingóngó miyókání o likoló, migángí : « Bokonzi bwa mokili mobimba bokómí bwa Mokonzi wa bísó mpé bwa Krístu wa yě. Yě moto akoyángela o bileko na bileko. »

11:16  Babangé ntúkú íbalé na bánei baye bafándí o kíti ya bangó o bosó bwa Nzámbe, bakwéí o nsé mpé bakú­mbámélí Yě, balobí :

11:17  « Mokonzi Nzámbe wa bokási bónso, Oyo ‘Azalí mpé Azalákí’, totóndí yŏ botóndi, zambí olakísí ngúyá ya yŏ ndelo té, obandísí bokonzi bwa yŏ !

11:18  Bato ba bikólo bínso bayókákí nkándá ; kasi tálá, nkándá ya yŏ eyéí, mpé elaká ekokí ’te ósámbisa bawá ; okopésa mbano na baproféta, basáleli ba yŏ mpé na basántu, bato banéne ná bato baké, baye bakokúmisaka nkómbó ya yŏ ; okosílisa baye babébísí mokili. »

11:19  O ntángo êná Témpelo ya Nzá­mbe o likoló efungwámí : Sandúku ya Bondeko emónóní o Témpelo ; mo­nkalali mongengí, nkáké ebétí, mokili moningání, mbúla ya matá­ndalá enókí makási.

Chapter 12

12:1  Elembo enéne ebimí o likoló : Mwásí mŏ kó alátí Mwésé lokóla elambá, sánzá ezalákí o nsé ya makolo ma yě, mpé mi­nzóto zómi na míbalé mizalákí kokémbisa motó mwa yě ;

12:2  azalákí na zémi, alingí ábóta, alelí mpô ya mpási ya kobóta.

12:3  Elembo ya bíbalé ebimí o likoló : ebákátá ya nyama ya motáné ngwá, ekokání na Ngandó, na mitó nsambo mpé na maséké zómi : o motó mŏ kó mŏkó elátí enkoti ya bokonzi.

12:4  Mokíla mwa yangó mokómbí eténi ya bísáto ya minzóto mya likoló, mpé mobwákí myangó o nsé. Ekómí Ngandó o bosó bwa mwásí óyo alingí ábóta, elingí kolía mwána alingí ábótama.

12:5  Mwásí abótí mwána mobáli, óyo akokamba bato ba nsé bánso na língénda lya ebendé. Mwána wa yě atómbwámí o mbóka Nzámbe, penepene na ngwendé ya yě.

12:6  Mwásí akímí o elíkí ; kúná Nzámbe aléngélélí yě esíká ya kobómbama mpô ’te ázwa bilóko bya kolía mikolo nkóto yŏ kó na nkámá íbalé na ntúkú motóbá.

12:7  O ntángo êná etumba engálí o likoló : Míkael na Bǎnzelú ba yě babundísí Ngandó. Ngandó na Bǎ­nzelú ba yě babundí mpé,

12:8  kasi bako­kí kolónga té, mpé Míkael na Bǎ­nzelú ba yě babengání bangó o likoló.

12:9  Ba­bwákí ebákátá ya Nga­ndó, Nyóka ya kala, eye bako­byángaka Zábolo tŏ Sátana, mosé­nginyi wa bato bánso. Bakwêísí yě o nsé, yě na Bǎnzelú ba yě.

12:10  Sikáwa nayókí loláká logángí o likoló : « Ut’o sikáwa, lilónga, ngúyá na bokonzi bikómí bya Nzámbe wa bísó, mpé boyángeli bokómí bwa Krístu wa yě. Bakwêísí óyo afúndákí bandeko ba bísó, óyo azalákí kofú­nda bangó butú mói o bosó bwa Nzámbe wa bísó.

12:11  Bangó ndé baló­ngí yě mpô ya makilá ma Mwâ-Mpatá mpé na liloba liye basakólákí. Bali­ngákí kotíkala na bomoi té, bandimákí kokúfa.

12:12  Yangó wâná, bínó bánso bato ba likoló, bóyóka nsáí ! Kasi mawa na bínó, mokili na mbú ! Mpámba té, Zábolo akití epái ya bínó, aléngí na nkándá, ayébí ’te etíkálí moké mikolo mya yě mísíla. »

12:13  Emóní Ngandó ’te babwákí yě o nsé, akómí kolanda Mwásí óyo abótí Mwána mobáli.

12:14  Kasi bapésí Mwásí mapapú mábalé ma engo­ndó enéne mpô ’te ápimbwa kín’o ebómbelo ya yě o elíkí, mosíká na Nyóka. Kúná akozwa bilóko bya kolía mibú mísáto na ndámbo*.

12:15  Nsima ya Mwásí Nyóka asánzí mái maye mabimélí yě o monoko, míngi lokóla ebale, mpô ’te mbó­ngé ya mái íbénda yě.

12:16  Kasi mokili moyéí kosálisa Mwásí : mofungólí monoko mpé momelí ebale ya mái maye Ngandó asánzákí.

12:17  Ngandó ayókélí Mwásí nkándá, mpé akeí kobundisa bána basúsu ba Mwásí, baye bánso bakotósaka mitíndo mya Nzámbe, mpé bakobó­mbaka maloba ma Yézu o mitéma.

12:18  Nga­ndó akeí kotéleme o libóngo lya mbú.

Chapter 13

13:1  Namóní Nyama ebimí o mbú : ezalákí na mitó nsambo mpé na maséké zómi ; o lisé­ké lyŏ kó lyŏ kó enkoti ya bokonzi, mpé o motó mŏ kó mŏ kó maloba ma botúki Nzámbe makomámí.

13:2  Nyama eye namóní eúlání na nkoi, kasi ezalákí na makolo lokóla makolo ma lúrsu, mpé na monoko lokóla monoko mwa nkós­i. Ngandó apésí yě bokási, ngwendé mpé ngúyá ya yě enéne.

13:3  Namóní ’te motó mŏ kó mwa yě molingí mókúfa mpô ya mpótá enéne, kasi mpótá eye ekómí kobéla. Bato ba mokili mobimba baká­mwí, balandí Nyama.

13:4  Bakúmbámélí Ngandó, mpô apésí Nyama liko­kí la yě mŏ kó. Bakúmbámélí mpé Nyama, balobí : « Náni akokání na Nyama ? Náni akokí kobu­ndisa yě ? »

13:5  Balingísí Nyama áloba maloba ma loléndo, átúka Nzámbe, mpé ásála mosálá mwa yě sá­nzá ntúkú ínei na íbalé.

13:6  Bôngó afu­ngólí monoko mpé abandí kotúka Nzámbe, nkómbó ya yě, mbóka ya yě ná mpé baye bakofá­ndaka o likoló.

13:7  Balingísí Nyama ábu­ndisa mpé álónga basántu ; bapésí yě likokí ákonza bato ba mabótá, ba bikólo, ba nkóta, ba mikili mínso.

13:8  Bato ba nsé bánso bakokúmbamela yě, baye bá­nso nkómbó ya bangó ikomámí o búku ya bomoi té út’o libandela lya mokili, o búku ya Mwâ-Mpatá óyo babomáká.

13:9  Moto azalí na matói, áyóka !

13:10  Moto asengélí kokóto o bolóko, bakokanga yě ; óyo asengélí kokúfa na mompánga, akokúfa na mompánga ! Na ntína êná bato ba Nzámbe basengélí kokanga mitéma mpé kozala na boyambi.

13:11  Na nsima namóní nyama esú­su ebimí o mokili : ezalákí na maséké mábalé lokóla mwána wa mpatá, kasi ezalákí koloba lokóla ngandó.

13:12  Azwákí likokí mobimba lya Nyama ya libosó, mpé o míso ma yě asálí ’te bato bánso ba mokili bákúmbamela Nyama ya libosó eye ebíkí o mpótá elingákí koboma yě.

13:13  Asálí makamwísi manéne : o míso ma bato bánso ayébí kokitisa móto mwa likoló o nsé.

13:14  Na makamwísi balingísí yě kosála, mpô ya kosálela Nyama ya libosó, ákósa bato ba nsé : atíndí bangó ’te bátó­nga ekeko mpô ya kokúmisa Nyama eye ezokákí mpótá na mompánga, kasi ekúfákí té.

13:15  Nyama ya íbalé azwí mpé ngúyá ya koyí­ngisa mpéma o ekeko ya Nyama ; bôngó ekeko ebandí koloba. Azwí mpé ngúyá ya kosála ’te báboma baye bánso babóyí kokúmbamela ekeko ya Nyama.

13:16  Asálí mpé ’te bákoma elembo o lobóko la mobáli tŏ o elongi ya bato bánso, bato baké ná bato banéne, bato ba nkita ná babóla, bansómí ná baómbo.

13:17  Bôngó moto mŏ kó té akokí kosómba tŏ kotéke elóko, sókó azá­ngí elembo eye, nkómbó ya Nyama tŏ motángo moye molakísí nkó­mbó ya yě.

13:18  Bobélé moto wa bwányá akoyéba yangó ! Moto wa mayéle akokí koyéba ntína ya motángo mwa Nyama. Na motángo moye balakísí moto. Motángo mwa yě mozalí : nkámá motóbá na ntúkú motóbá na motóbá.

Chapter 14

14:1  Natálí lisúsu, namóní MwâMpatá atélémí o ngómbá Sío­n elongó na bato nkóto monkámá na ntúkú ínei na ínei : nkómbó ya yě na nkómbó ya Tatá wa yě ikomámí o bilongi bya bangó.

14:2  Nayókí loláká loútí o likoló, lokóla lokitó la mái makási tŏ ma nkáké ya nsómo. Loláká lôná nayókákí lozalákí mpé lokóla bazalákí kobéte nzenze.

14:3  Bayémbí nzémbo ya sika o bosó bwa ngwendé, bwa ba-Bomoi bánei mpé bwa Babangé. Moto mŏ­kó té akokí koyékola nzémbo êná, bobélé bato baye nkóto monkámá na ntúkú ínei na ínei bazwí libíkí o mokili.

14:4  Bangó bato babébí na básí té, batíkálí na bo­ngondo. Bakolandaka Mwâ-Mpatá bipái bínso azalí kokende ; basikwámí o káti ya bato, bangó ndé mabonza ma yambo mabonzámí na Nzámbe mpé na Mwâ-Mpatá.

14:5  Babúkí lokutá atâ mokolo mŏ kó té bazalí na mbindo té.

14:6  Na nsima namóní Anzelú mosúsu apimbwí o ntá likoló ; azalákí na nsango elámu ya sékô asengélí kosangela bato bazalí o mokili, bato ba bikólo, mabótá, nkóta mpé mikili mínso.

14:7  Agángí na mongóngó makási : « Bóbánga Nzámbe mpé bópésa yě nké­mbo, mpô elaká ya likambo lya nsúka ebelémí ; bôngó bókúmbamela Oyo akelákí likoló, nsé, mbú na máziba. »

14:8  Anzelú mosúsu, wa bábalé, alandí yě mpé agángí : « Babilóne enéne ekwéí, ekw­éí sôló mpenzá ! » Amelísí bato ba bikólo bínso víno makási ma ekóbo.

14:9  Anzelú mosúsu, wa básáto, alandí bangó mpé agángí na mongóngó makási : « Moto nyónso akúmbámélí Nyama mpé ekeko ya yě, mpé azalí na elembo ya yě o elo­ngi tŏ o lobóko,

14:10  yě mpé akomele víno ya nkándá ya Nzámbe ; basílí baléngélí víno eye, esangání na mái té, o nkéni ya nkándá ya Nzámbe. Ako­nyókwama na móto mpé na fofólo o míso ma Bǎnzelú basántu mpé ma Mwâ-Mpatá.

14:11  Baye bakúmbámélí Nyama ná ekeko ya yě, baye bazwí elembo ya nkómbó ya yě, mílinga mya minyóko mya bangó mikobuta o likoló o bileko na bileko ; bakopéma té, ézala na mói, ézala na butú. »

14:12  Ntína yangó basántu, baye bakotósaka mitíndo mya Nzámbe mpé bayambí Yézu, basengélí kokanga mitéma.

14:13  Na nsima nayókí loláká loútí o likoló, loyébísí ngáí : « Komá boye : Esengo na bato bakowâ o bondeko bwa Mokonzi. Elímo alobí : Ya sôló, út’o leló bápéma, mpô balembí na mosálá monéne ; misálá mya bangó mikolanda bangó o nsima. »

14:14  Natálí mpé namóní Limpata lya mpémbé ná mpé moto afándélí lyangó, azalákí lokóla Mwána wa Moto, alátí enkoti ya wólo ya bokonzi o motó mpé asímbí líkwa­ngola lipótú o lobóko.

14:15  Anzelú mosúsu abimí o Témpelo mpé na mongóngó makási agángélí moto óyo afándí o limpata : « Tíndá lí­kwangola lya yŏ mpé kátá. Elaká ya bobúki mbuma ekokí, o nsé milóna mikomélí. »

14:16  Bôngó moto afándí o limpata, abwákí líkwa­ngola o mokili mpé babúkí mbuma ya mwangó.

14:17  Anzelú mosúsu abimí o Témpelo ya likoló, yě mpé azalákí na lí­kwa­ngola lipótú o lobóko.

14:18  Anzelú mosúsu abimí, aútí epái ya altáre, yě moyángeli wa mosálá mwa móto, na mongóngó makási agángélí Anzelú óyo asímbí líkwangola : « Tíndá líkwangola lipótú lya yŏ mpé kátá bituka bya mbuma ya víno o nsé, mpô mbuma ya víno isílí itelí. »

14:19  Bôngó Anzelú abwákí lí­kwangola lya yě o nsé, akátí bituka bya mbuma ya víno mpé asopí yangó o eboka enéne ya nkándá ya Nzámbe !

14:20  O libándá lya engumbá banyatí yangó na makolo, makilá o eboka masopámí, matámbólí téé kilométele nkámá ísáto. Sókó farása etélémí o káti ya mangó ekozinda kín’o nkíngó.

Chapter 15

15:1  Nsima namóní o likoló elembo esúsu enéne mpé ya kokámwa : Bǎnzelú nsambo bamemí malózí nsambo, malózí mâná ma nsúka ; na mangó nkándá ya Nzámbe ekosíla.

15:2  Namóní mpé mbú lokóla talatálá, esangání na móto. Bato baló­ngí Nyama, ekeko ya yangó ná mpé motángo mwa nkómbó ya yě, batélémí o mbú êná emónóní lokóla talatálá, nzenze ya Nzámbe o mabóko.

15:3  Bayémbí nzémbo ya Móze, mosáleli wa Nzá­mbe, mpé nzémbo ya Mwâ-Mpatá, bangó ’te : « Bikelá bya yŏ bizalí binéne, bya kokámwa, Mokonzi, Nzámbe wa bokási bó­nso ! Nzelá ya yŏ, nzelá ya bosémbo mpé ya bosôló, é Nkúmú wa bikólo bínso.

15:4  Mokonzi, náni moto ábánga yŏ té mpé ákúmisa nkómbó ya yŏ té ? Zambí sé yŏ mŏ kó ozalí mosántu. Bato ba bikólo bínso bakoyâ kokúmbamela yŏ, mpô sikáwa olakísí sôló ’te mikáno mya yŏ mizalí mikáno mya bosémbo. »

15:5  Na nsima namóní ndéngé bafu­ngólí Témpelo o likoló, yangó ndé éma ya Bondeko.

15:6  Bǎnzelú nsambo, baye bamemí malózí nsambo, babimí o Témpelo ; balátí bilambá mpé­mbé, bizalákí kongenge, bikangémí na nkámba ya wólo o lokéto.

15:7  Mŏ­kó wa ba-Bomoi bánei apésí Bǎnzelú nsambo nkéni ya wólo nsambo, itóndí na nkándá ya Nzámbe, óyo azalí o bileko na bileko.

15:8  Témpelo etóndí na mílinga miútí na nkémbo mpé na ngúyá ya Nzámbe. Moto mŏ kó té akokí koyíngela wâná kín’o mokolo malózí nsambo ma Bǎnzelú nsambo makosíla.

Chapter 16

16:1  Nayókí loláká lonéne loútí o Témpelo, lolobí na Bǎnzelú nsambo : « Bókende mpé bósopa nkéni nsambo ya nkándá ya Nzámbe o mokili. »

16:2  Anzelú wa yambo akeí kosopa nkéni ya yě o mokili : mpótá na mayíná ibimélí bato bánso bazalákí na elembo ya Nyama mpé bakúmbámélákí ekeko ya yě ; bayókí mpási.

16:3  Anzelú wa bábalé asopí nkéni ya yě o mbú : mbú ebóngwání makilá. Bakokí kokanisa ’te bato babomámí wâná ; bínso bizalákí na bomoi o mbú bikúfí.

16:4  Anzelú wa básáto asopí nkéni ya yě o bibale mpé o máziba : mái makómí makilá.

16:5  Nayókí Anzelú wa mái alobí : « Ozalí na bosémbo, yŏ, Oyo Azalí mpé Azalákí, yŏ Mosántu, áwa opésí etúmbu boye.

16:6  Basopí makilá ma basántu mpé ma baproféta ; yangó wâná omelísí bangó makilá ; bazwí etúmbu ekokí na bangó ! »

16:7  Mpé nayókí loláká loútí epái ya altáre, lolobí : « Sôló, Mokonzi, Nzámbe wa bokási bónso, okátí makambo na bosémbo mpé na bosôló. »

16:8  Anzelú wa bánei asopí nkéni ya yě o mwésé ; mwésé mokómí na ngúyá ya kotumba bato :

16:9  bato bazíkí na molungé makási mpé batúkí nkómbó ya Nzámbe, óyo azalí na likokí lya kotínda malózí mâná. Kasi babóyí kobóngola mitéma mpé kopésa Nzámbe nkémbo.

16:10  Anzelú wa bátáno asopí nkéni ya yě o ngwendé ya Nyama. Bokonzi bwa yě bokómí na molílí. Bato bakómí komíswâ lolému mpô ya mpási bayókí.

16:11  Batúkí Nzámbe o likoló mpô ya mpási mpé mpô ya mpótá ibimí mayíná, kasi babóyí kobóngola bizalela bya bangó.

16:12  Anzelú wa motóbá asopí nkéni ya yě o ebale enéne Efráte. Mái ma yangó makaúkí, bô­ngó matíkélí bakonzi baútí o Esti nzelá.

16:13  Na nsima namóní bilímo bya mbindo bísáto, lokóla magbólóló, bibimí o monoko mwa Ngandó, o monoko mwa Nyama mpé o monoko mwa pro­féta wa lokutá.

16:14  Ya sôló, bilímo biye bya zábolo bikosálaka makamwísi, bikokende kosangisa bakonzi bánso ba mokili mobimba mpô ’te bábunda etumba o Mokolo monéne mwa Nzámbe, Mokonzi wa bokási bónso. (

16:15  « Tálá, nakoyâ lokóla moyíbi : esengo na moto akokéngeleke mpé alongólí bilambá bya yě té ; bô­ngó akotámbola bolúmbú té, mpé bakomóno nsóni ya yě té. »)

16:16  Basangísí bangó o esíká ba-Ebréi bakobéngaka ‘Armagédon’.

16:17  Anzelú wa nsambo asopí nkéni ya yě o etando ya likoló : út’o Témpelo nayókí loláká lonéne lolobí : « Esílí ! »

16:18  Ebimí minkalali, mingó­ngó na nkáké ; mokili moningání makási. Bandá mokolo bato bakómí o nsé, naíno mokili moningání makási boye té !

16:19  Engumbá enéne epaswání na biténi bísáto mpé bingumbá bya bikólo bí­nso bibúkání ; Nzámbe akundólí engumbá Babilóne o motéma, bôngó apésí yangó nkéni ya víno ya nkándá ya yě enéne.

16:20  Bisanga bínso bizindí mpé ngómbá ilímwí.

16:21  Mbúla ya matá­ndalá enókélí bato ; bozitó bwa libángá lyŏ kó lyŏ kó bokokí na kiló ntúkú ínei ! Mpé bato batúkí Nzá­mbe mpô ya mbúla enéne ya matá­ndalá ; ezalákí monyóko mwa nsómo mpenzá.

Chapter 17

17:1  O ntángo êná mŏ kó wa Banzelú nsambo baye bazalákí na nkéni nsambo ayéí koyébisa ngáí : « Yáká ! Nálakisa yŏ ndéngé bakokáta likambo lya Mwásí ndú­mbá monéne, óyo afándí o libóngo lya mái manéne.

17:2  Bakonzi banéne ba mokili batá­mbólákí na yě, balángwákí víno ya makambo ma yě ma bosóni. »

17:3  Anzelú akambí ngáí o elíkí, Elímo akitélí ngáí. Namóní mwásí mŏ kó abutélí Nyama etáné ngwá ; Nyama etóndí na nkómbó ya botúki Nzámbe, ezalákí na mitó nsambo mpé na maséké zómi.

17:4  Mwásí alátí elambá ya lángi la lo­ngóndo, engengí na wólo, na ma­bá­ngá ma motúya mpé na mayaka. Azalákí na nkéni ya wólo o lobóko, eye etóndí na makambo ma nsó­mo mpé na mbindo ya bosóni bwa yě.

17:5  Nkómbó eye ekomámí o elongi ya yě elakísí mobómbamo : ‘Babilóne Engumbá enéne, mamá wa bandú­mbá mpé wa makambo ma nsómo o mokili’.

17:6  Namóní ’te mwásí alángwí na makilá ma basántu mpé ma bamartíro ba Yézu. Awa namóní yě, nakámwí míngi.

17:7  Anzelú alobí na ngáí : « Ntína níni ozalí kokámwa ? Nakolimbolela yŏ mobómbamo mwa Mwásí óyo, mpé mwa Nyama eye abutélí, nyama na mitó nsambo mpé na maséké zómi.

17:8  Nyama êná, yambo ezalákí, kasi sikáwa ezalí lisúsu té. Mokolo mosúsu ekobima o Bozindó mpé ekokende kosúka o liwá. Bato ba nsé, baye nkómbó ya bangó ikomámí té o búku ya bomoi út’o libandela, bakokámwa ntángo bakomóno Nya­ma eye ezalákí libosó, nsima elímwí, kasi sikáwa ebimí lisúsu.

17:9  Mpô ’te óyóka ntína ya likambo liye, osengélí kozala na mayéle ma sôló ! Mitó nsambo, myangó ndé ngómbá nsambo mwásí afándélí. Elakísí mpé bakonzi nsambo :

17:10  bátáno ba bangó basílí bawéí, mŏkó azalí na bomoi, mosúsu ayéí naíno té ; kasi ntángo akoyâ akoúmela míngi té.

17:11  Nyama eye ezaláká mpé ezalí lisúsu té, yangó ndé mokonzi wa mwambe ; azalí molongó mŏ kó na bakonzi nsambo, yě mpé akosúka bobélé o liwá.

17:12  Maséké zómi omónókí, mangó ndé bankúmú zómi. Naíno bazwí bokonzi té, kasi bakozwa likokí lya bokonzi sé ngo­nga yŏ kó, elongó na Nyama.

17:13  Bangó bánso bayókání ’te bakopésa Nyama ngúyá mpé likokí lya bangó.

17:14  Bakokende kobundisa Mwâ-Mpatá, kasi Mwâ-Mpatá ako­lónga bangó, mpô azalí Mokonzi wa bakonzi mpé Nkúmú wa bankúmú. Akolónga bangó elongó na bato ba yě, baye abyángí mpé aponí, baye bayambí yě. »

17:15  Anzelú akóbí : « Mái mâná omónókí esíká Mwásí ndúmbá afándí, mangó ndé : bikólo, mabótá, mikili mpé nkóta ínso ya nsé.

17:16  Kasi maséké mâná zómi ná mpé Nyama omónókí bakoyina Mwásí ndú­mbá, bakolongola yě bilambá, bakotíka yě bolúmbú, bakolía nsuni ya yě, mpé bakotumba yě.

17:17  Nzámbe moto apésí bangó mayéle ma kosála maye yě mŏ kó akání : báyókana ’te bakopésa Nyama bokonzi bwa bangó kín’o ntángo Nzámbe akokokisa maloba ma yě.

17:18  Mwásí óyo omónókí, yě ndé Engumbá enéne, eye ezalí kokonza bankúmú bá­nso ba nsé. »

Chapter 18

18:1  Na nsima namóní Anzelú mosúsu aútí o likoló, azalí na ngúyá enéne, angengísí mokili na nkémbo ya yě.

18:2  Agángí na mongóngó makási : « Babilóne ekwéí, Engu­mbá enéne ekwéí ! Ekómí mbóka ya bazábolo, ebómbamelo ya bilímo bibé mpé ya ndeke ya bosoto ndéngé na ndéngé ibóyámí.

18:3  Mpámba té, bato ba bikólo bínso bamelí víno makási ya bosóni bwa bangó, bakonzi ba nsé batámbólí na yě, bato ba mombóngo bakómí na mosolo míngi mpô ya lipo­mbó lya yě ndelo té. »

18:4  Nayókí lisúsu loláká loútí o likoló, lolobí : « Bínó, bato ba ngáí, bólongwa o engumbá êná, mpô ’te bósála mabé elongó na yě té, mpé mpô ’te malózí ma yě mákwêla bínó té.

18:5  Mpámba té, masúmu ma yě malekí míngi, mabutí kín’o likoló, Nzámbe akundólí makambo ma yě mazángí bosémbo.

18:6  Bózóngisela yě mabé asálákí ! Bózó­ngisela yě mangó mbala íbalé ! Nkéni ya víno makási amelísí bato, bómelisa yě ya­ngó mbala íbalé !

18:7  Bóyókisa yě mpási mpé mawa, sé lokóla yě mŏ­kó azalákí kowéla nkita na lipo­mbó. Amílobélí : Nafándí o ngwendé lokó­la mokonzi mwásí, nakúfélí mobáli té, atâ mokolo mŏ kó té toko­láta mpíli.

18:8  Yangó wâná malózí mánso makokwêla yě sé o mokolo mŏ kó : bokono bwa liwá, liláká na nzala. Akozíka na móto, mpô Mokonzi Nzá­mbe, óyo akosámbisa yě, alekí bokási. »

18:9  Bakonzi ba mokili, baye batá­mbólákí na yě mpé basepélákí na nkita mpé na lipombó elongó na yě, bakolela mpé bakokímela mpô ya mawa mokolo bakomóno mílinga mya móto mokozíkisa engumbá ya yě.

18:10  Bakotéleme mosíká, mpô bakobánga mpási ekokwêla yě, bakoloba : « Mawa ! Mawa ! yŏ Babilone, engumbá enéne ntá bokási, ngonga yŏ kó ekokí mpô ya kokitisa yŏ o likambo ! »

18:11  Bato ba mombóngo ba mokili bakolela mpé bakokímela ; moto mŏ kó té akosómba lisúsu bilóko bya yě :

18:12  wólo na paláta, mabángá ma motúya na mayaka, bilambá bya monzele bya lángi la longóndo, bya silíki mpé bya motáné ngwá, mabáyá kitóko na bilóko bisálémí na mpémbé ya nzoku, na mabángá ma motúya, na mbengi, na bibendé mpé na mabángá mpémbé ;

18:13  bilóko bakosangisaka na biléi mpô ya koyéisa byangó elengi, míra, mpaka ya malási, víno, mafúta, mbuma ya mámpa ná fufú ya mangó, ngómbé na mpatá, farása na makaló, baó­mbo ná bato ba mosálá.

18:14  Mbuma ya bilanga isílí itelí, iye motéma mwa yŏ molukákí, ikómí mosíká na yŏ ; bilóko bínso bya nkita mpé bya lipombó bisílí nyé, okozwa byangó lisúsu té.

18:15  Bato ba mombóngo bazwákí mosolo míngi mpô ya yě, bakotíkala kotéleme mosíká, bakobánga mpási ekokwêla yě, bakolela mpé bakokímela, bangó ’te :

18:16  « Mawa ! Mawa ! Engumbá elekí bonéne, ezalákí koláta bilambá bya mo­nzele, bya longóndo mpé bya motáné ngwá, ezalákí komíkémbisa na wólo, na mabángá ma motúya mpé na mayaka.

18:17  Sé na ngonga yŏ kó bilóko ebelé boye bya nkita bibébí. » Bakapiténi na basálisi ba yě, bato bánso bakosálaka mombóngo o nzelá ya mái, batíkálí kotéleme mosíká.

18:18  Ntángo bamóní mílinga mya engu­mbá ezíkí, bagángí : « Engu­mbá níni ekokání na engu­mbá eye enéne ? »

18:19  Babwákí mputulú o mitó, bagángí na boleli mpé na bokímeli : « Mawa ! Mawa ! Engumbá elekí bonéne ! Baye batámbwísákí masúwa o mbú bazalákí kokóma bato ba nkita ! Na ngonga yŏ kó ebébí nyé ! »

18:20  Likoló, yóká nsáí mpô ya yangó ! Ná mpé bínó basántu, bapóstolo ná baproféta, bóyóka esengo, mpô Nzámbe akitísí engumbá êná mpô ya mabé mánso asálákí bínó.

18:21  Anzelú wa bokási atómbólí libá­ngá linéne mpenzá, abwákí lyangó o mbú, alobí : « Sé bôngó, bakobwáka Babilóne, Engumbá enéne, na mbálákáká ! Bakomóno yangó lisúsu té. »

18:22  Bato bakobéteke nzenze ná bayé­mbi, baye bakobéteke mpiólóló tŏ mo­ndúle, bakoyóka bangó o mbóka ya yŏ lisúsu té. Bato bayébí mosálá, atâ mosálá káni, bakomónono o mbóka yŏ lisúsu té. Lokitó la libángá lya koníka fufú lokoyókana o mbóka yŏ lisúsu té.

18:23  Mwínda mokopela o mbóka yŏ lisúsu té. Lisoló lya baye balóngání sika likoyókana o mbóka yŏ lisúsu té. Bato ba yŏ ba mombóngo bazalákí bankúmú ba mokili ; na makambo ma yŏ ma líkundú ozalákí kokósa bato ba bikólo bí­nso.

18:24  Epái ya yŏ makilá masopání ma baproféta, ma basántu, mpé ma baye bánso babomámí o mokili.

Chapter 19

19:1  Na nsima nayókí út’o likoló mingóngó mya bato ebelé, balobí : « Alelúya ! Lokúmu mpé ngúyá na Nzámbe Mobíkisi wa bísó !

19:2  Yě akokátaka makambo na bosôló mpé na bosémbo. Akitísí Ndúmbá monéne óyo abébísí mokili na bosóni bwa yě. Azóngísélí yě mabé ma yě, mpô asopákí makilá ma basáleli ba Nzá­mbe. »

19:3  Bayé­mbí lisúsu : « Alelúya ! Mílinga mya yě mikobuta o likoló o bileko na bileko ! »

19:4  Babangé ntúkú íbalé na bánei mpé ba-Bomoi bánei ba­kwéí bilongi o nsé mpô ya kokúmbamela Nzámbe, óyo afándí o ngwendé. Balobí : « Amen, Alelúya ! »

19:5  Na nsima loláká loútí epái ya ngwendé, lolobí : « Bókúmisa Nzá­mbe wa bísó, bínó bánso basáleli ba yě, ná mpé bínó bokobángaka yě, bato baké na bato banéne. »

19:6  Mpé nayókí mingóngó mya bato ebelé ; ezalákí lokóla makeléle ma mái makási, lokóla nkáké ya nsómo. Bayé­mbí : « Alelúya ! Mokonzi, Nzámbe wa bísó wa bokási bónso, akamátí bokonzi.

19:7  Tósepela, tóyémbela mpé tókúmisa Nzámbe, zambí eyenga ya libála ya Mwâ-Mpatá ebelémí, mpé bolóngani wa yě asílí amíbo­ngísí :

19:8  balátísí yě elambá mpémbé, péto mpenzá. » Elambá êná, ndé misálá mya bosémbo mya basántu.

19:9  Mpé ǎnzelú alobí na ngáí : « Komá : Esengo na bato ba­byángémí o li­mpáti lya libála lya Mwâ-Mpatá. » Mpé abakísí : « Maloba maye maútí na Nzámbe, mazalí ma sôló. »

19:10  Nakúmbámí o bosó bwa makolo ma yě mpô ya kokúmbamela yě, kasi alobí na ngáí : « Kébá, ósála bôngó té, ngáí nazalí sé mosáleli lokóla yŏ mpé lokóla bandeko ba yŏ, bato bandimí Liloba lya Yézu. Osengélí kokúmbamela sé Nzámbe. » Maloba Yézu asakólí, Elímo moto ayébísí mangó na baproféta.

19:11  Na nsima namóní likoló lifu­ngwání, mpé farása mpémbé emónóní. Nkómbó ya Motámbwisi wa ya­ngó ‘Moto wa lobokó’ mpé ‘Moto wa bosôló’. Akokátaka makambo mpé akobundaka bitumba sé na bosémbo.

19:12  Míso ma yě matelí lokóla móto, alátí binkoti bya bokonzi biíké o motó ; nkómbó ya yě ekomámí o nzóto ya yě, bobélé yě mŏ kó ayébí yangó.

19:13  Monkóto mozí­ngí yě, motíámí o makilá. Nkómbó ya yě ndé ‘Liloba lya Nzámbe’.

19:14  Mampingá ma likoló malandí yě, batámbwísí farása mpé­mbé mpé balátí bilambá bya mo­nzele, bilambá mpémbé, péto.

19:15  Mo­mpánga mopótú mobimélí yě o monoko mpô ya kobéte na mwangó bapagáno. Yě moto akokamba bangó na língénda lya ebe­ndé, mpé akotúta bangó lokóla mbuma ya víno o eboka ya nkándá enéne ya Nzámbe wa bokási bónso.

19:16  Nkómbó ekomámí o monkóto mpé o ebelo ya yě, yangó eye : ‘Nkú­mú wa bankúmú mpé Mokonzi wa bakonzi’.

19:17  Na nsima namóní ǎnzelú atélémí o mwésé, na mongóngó makási abélélí ndeke ínso izalákí kopi­mbwa o likoló : « Yákáni, bósangana bánso o limpáti linéne lya Nzámbe.

19:18  Kúná bokolía misuni mya bakonzi, mya bakapiténi banéne, mya bilombé, mya farása, mya batámbwisi farása, mya bato bánso, mya bansómí ná baómbo, mya bato baké ná bato banéne ! »

19:19  Namóní mpé Nyama, elongó na bankúmú ba nsé na mampingá ma bangó, basangání mpô ’te bábu­nda etumba na Motámbwisi farása na li­mpingá lya yě.

19:20  Kasi bakangí Nyama mpé proféta wa lokutá. Yě óyo asálákí makamwísi manéne mpô ya Nyama : akósákí bôngó bato bazwí ele­mbo ya Nyama mpé bay­e bakúmbámélí ekeko ya yě. Babomí bangó bábalé té, kasi ba­bwákí bangó o etíma ya móto mpé ya fofólo.

19:21  Basúsu bánso bawéí : Motámbwisi farása abomí bangó na mompánga mobimélí yě o monoko ; ndeke ínso iléí mpé itóndí na nsuni ya bangó.

Chapter 20

20:1  O ntángo êná namóní ǎnzelú akití út’o likoló, azalákí na lifungóla lya Mbóka Bozi­ndó mpé na monyolólo monéne o lobóko.

20:2  Aka­ngí Ngandó, Nyóka ya kala, yě Zábolo, Sátana ; akangí yě na minyolólo mibú nkóto yŏ kó.

20:3  Abwákí yě o Bozindó, akangí bwangó na bikangeli mpé atíí bilembo ; bôngó Ngandó ákósa bato lisúsu té kín’o nsúka ya mibú nkóto yŏ kó ; nsima yangó bakokangola yě lisúsu mwâ eleko.

20:4  Na nsima namóní ngwendé ; baye bafándélí yangó bazwí likokí lya kokáta makambo. Namóní mpé milímo mya bato baye bakátákí bangó nkíngó, mpô bayambákí Yézu mpé basangélákí Liloba lya Nzámbe. Namóní mpé bánso babóyákí kokúmbamela Nyama ná ekeko ya yě, baye bayambákí elembo o elo­ngi tŏ o lobóko té. Bangó bazwí bomoi lisúsu mpé bayángélí elongó na Krístu mibú nkóto yŏ kó. Eye ezalí nsékwa ya yambo.

20:5  Bawéi basúsu bazóngí na bomoi té, kín’o mibú nkóto yŏ kó mikokoka.

20:6  Esengo na bato bakosékwa o ntángo ya nsékwa ya yambo : bazalí basántu ! Liwá lya mábalé likokí kosála bangó elóko té ; bakozala banganga ba Nzámbe mpé ba Krístu, bakoyá­ngela elongó na yě mibú nkóto yŏ kó.

20:7  Nsima ya mibú mîná nkóto yŏ kó bakokangola Sátana o bolóko.

20:8  Akokende kosénginya bato ba bikólo o bisíká bínso bya mokili. Akosangisa Góg na Magóg mpô ’te bákende etumba : bakozala baíké lokóla zélo o libóngo lya mbú.

20:9  Na nsima bakota­ndana o mokili mobimba, bakozínga nganda ya basántu, Engumbá ya bolingo. Kasi móto moye mokokita út’o likoló mokozíkisa bangó.

20:10  Zábolo, óyo asé­ngí­nyí bangó, bakobwáka yě o etíma ya móto mpé ya fofólo. Bakonyó­kwama bôngó esíká yŏ kó na Nyama mpé na proféta wa lokutá butú mói o bileko bínso sékô.

20:11  Na nsima namóní ngwendé ya mpémbé enéne ná mpé Moto afá­ndélí yangó. Likoló na nsé bilímwí o bosó bwa yě, bimónóní lisúsu té.

20:12  Namóní bato bawá, bato banéne ná bato baké, batélémí o bosó bwa ngwendé ntángo bafungólí búku míngi ; nsima bafungólí mpé búku ya bomoi ; basámbísí bawá engébéné na misálá mya bangó, sé lokóla ekomámí o búku.

20:13  Bato bawákí, baye babómbámí o mbú, babimí kúná ; baye babó­mbámí o Liwá mpé o Ades babimí mpé o esíká ya bangó. Bakátí li­kambo lya moto mŏ kó mŏ kó engébéné na misálá mya yě.

20:14  Babwákí Liwá na Ades o etíma ya móto : etíma ya móto, yangó ndé liwá lya mábalé.

20:15  Babwákí o etíma ya móto baye bánso nkómbó ya bangó ikomámí o búku ya bomoi té.

Chapter 21

21:1  Na nsima namóní likoló lya sika na mokili mwa si­ka, mpô likoló lya libosó mpé mokili mwa libosó bisílí bilímwí, mpé mbú ezalákí lisúsu té.

21:2  Namóní mpé Engumbá esántu, Yerúzalem ya sika, eútí o likoló, o mbóka Nzámbe. Balátísí yangó kitóko lokóla elengé mwásí alingí ákútana na bolóngani wa yě.

21:3  Nayókí loláká logángí út’o ngwendé : « Tálá áwa éma ya Nzámbe o káti ya bato ; akozala na bangó ndáko yŏ­kó ; bangó bakozala bato ba yě ; mpé yě akozala na bangó, akozala Nzámbe wa bangó.

21:4  Akolongola mpízolí ínso o míso ma bangó : liwá likozala lisúsu té, boleli, bogángi na mpási bikozala lisúsu té, zambí mokili mwa kala mozalí lisúsu té. »

21:5  Na nsima Oyo afándí o ngwendé alobí : « Tálá, nakokómisa bínso bya sika. » Mpé abakísí : « Komá : Maloba maye mazalí maloba ma bosôló, mazalí na ntembe sókí té. »

21:6  Alobí na ngáí lisúsu : « Esílí ! Ngáí nazalí Alfa na Omega, Libandela mpé Nsúka. Moto ayókí mpósá ya mái, nakomelisa yě mái ma líziba lya bomoi, akofúta té.

21:7  Oyo alóngí etumba, akozwa bîná bínso bŏ lisangó : Ngáí nakozala Nzámbe wa yě mpé yě akozala mwána wa ngáí.

21:8  Kasi bato bakímí mpé bawángání ngáí, baye babébí, baye babomí bato, baye bazalí na mbindo, bato ba líkundú, baye bakú­mbámélí bikeko ná bato ba lokutá, bánso bakosúka o etíma ya móto mpé ya fofólo. Lyangó ndé liwá lya mábalé. »

21:9  Mŏ kó wa bǎnzelú nsambo, baye bazalákí na nkéni nsambo iye itó­ndí na malózí nsambo ma nsúka, ayéí koyébisa ngáí : « Yáká, nálakisa yŏ Mwásí óyo Mwâ-Mpatá akobála. »

21:10  Elímo akitélí ngáí mpé ǎnzelú atómbólí ngáí kín’o nsóngé ya ngómbá esándá ; alakísí ngáí Engu­mbá esántu, Yerúzalem, eútí o likoló, o mbóka Nzámbe.

21:11  Ezalí na nkémbo ya Nzámbe, engengí lokóla libángá lya motúya monéne, lokóla libángá lya yáspe ya ma­ngé­ngéngé.

21:12  Engumbá ezíngámí na ebákátá ya lopángo. Lopángo lozalákí na bizibeli zómi na bíbalé ; bǎnzelú zómi na bábalé bakéngélí bya­ngó. Nkómbó ikomámí wâná ya mabótá zómi na mábalé ma bána ba Israél.

21:13  Epái ya Esti, bizibeli bísáto ; epái ya Nórdi bizibeli bísáto ; epái ya Súdi, bizibeli bísáto ; epái ya Wésti, bizibeli bísáto.

21:14  Lopángo la engumbá lotóngámí o mabángá manéne zómi na mábalé ; libángá lyŏ kó lyŏ kó lizalákí na nkómbó yŏ­kó ya bapóstolo zómi na bábalé ba Mwâ-Mpatá.

21:15  Anzelú óyo azalákí koloba na ngáí azalákí na nkékélé ya wólo o lobóko mpô ya komeka bonéne bwa engu­mbá, bwa bizibeli mpé bwa lopángo.

21:16  Engumbá ezalákí na matúmu mánei : bolaí na bonéne bikokání. Bôngó amekí engumbá na métele : bonéne bokokí na bolaí bwa kilométele nkóto íbalé na nkámá íbalé ; bolaí, bonéne na bosándá bikokání.

21:17  Na nsima amekí bolaí bwa lopángo : mabóko monkámá na ntúkú ínei ; ǎnzelú amekí yangó sé lokóla bakosálaka yangó.

21:18  Lopángo loye lotóngámí na yáspe, engu­mbá sé wólo na wólo ezalákí kongenge lokóla mangéngéngé.

21:19  Mabángá manéne ma nsé ma lopángo makémbámí na mabángá ma motúya ndéngé na ndéngé : libángá lya libosó yáspe, lya mábalé safíro, lya másáto kalsedwáni, lya mánei smarágda,

21:20  lya mátáno sardoníki, lya motóbá kornalína, lya nsambo krizolíta, lya mwambe beríli, lya libwǎ topáze, lya zómi krizopáze, lya zómi na lyŏ kó yasínti, lya zómi na mábalé ametísto.

21:21  Bizibeli zómi na bíbalé bizalákí mayaka zómi na mábalé : ezibeli yŏ kó liyaka lyŏ kó, ezibeli yŏ kó liyaka lyŏ kó. Balabála ya engumbá sé wólo na wólo, ezalákí kongenge lokóla mangéngé­ngé ma péto.

21:22  O engumbá eye namóní Témpelo té, mpô témpelo ya yangó, sé yě mŏ kó Mokonzi Nzámbe wa bokási bónso, bangó na Mwâ-Mpatá.

21:23  Engumbá eye esengélí na bongengi bwa mwésé tŏ bwa sánzá té, zambí nkémbo ya Nzámbe ekotánelaka yangó, mwínda mwa yangó sé Mwâ-Mpatá.

21:24  Bato ba bi­kólo bínso bakolanda sé mwínda môná, bakonzi ba nsé bakoyâ ko­bo­nzela engumbá eye nkita ya bangó.

21:25  Bizibeli bya engu­mbá bikotíkala polélé mokolo mobimba, zambí kúná butú bozalí té.

21:26  Engu­mbá eye ekozwa nkita na lokúmu ya bikólo bínso.

21:27  Elóko mbindo atâ yŏ kó té ekoyíngela o engu­mbá eye ; sé bôngó bato bakosálaka makambo ma nsómo mpé bato ba lokutá. Bobélé bato baye nkómbó ya bangó ikomámí o búku ya bomoi bwa Mwâ-Mpatá bakokí koyíngela wâná.

Chapter 22

22:1  Na nsima Anzelú alakísí ngáí ebale ya Mái ma Bomoi, mái sángisángi lokóla mangé­ngéngé. Líziba lya yangó, sé ngwendé ya Nzámbe mpé ya Mwâ-Mpatá.

22:2  Ebale ezalákí kokátisa engu­mbá. O ngámbo ínso íbalé nzeté ya bomoi izalákí ; na mbúla yŏ kó ikobótaka mbuma mbala zómi na íbalé, mbala yŏ kó na sánzá yŏkó yŏ kó. Nkásá ya nzeté iye izalí na ngúyá ya kobíkisa bapagáno.

22:3  Kúná bakotómbela moto mŏ kó lisúsu mabé té. Ngwendé ya Nzámbe mpé ya Mwâ-Mpatá ekozala o engu­mbá, mpé basáleli ba Nzámbe bakokúmbamela yě.

22:4  Bakomóno elongi ya yě, mpé nkómbó ya yě ekokomama o bilongi bya bangó.

22:5  Kúná butú bokozala lisúsu té, bato bakosengela na mwínda tŏ na mwésé té, zambí Mokonzi Nzámbe akotánela bangó, bakoyángela o bileko na bileko.

22:6  Nsima Anzelú alobí na ngáí : « Maloba maye mazalí maloba ma bosôló, mazalí na ntembe sókí té. Mokonzi Nzámbe, óyo akolakisaka baproféta bóníbóní basengélí kosakola, atíndí Anzelú álakisa basáleli maye mase­ngélí kosálema nokí.

22:7  Tálá, etíkálí moké náyâ ! Esengo na moto akotósa maloba maye proféta akomí o búku eye. »

22:8  Ngáí Yoáne, namóní mpé nayókí mambí mâná mánso. Awa nayókí maloba lisúsu té mpé namóní mamóní lisúsu té, nakwéí o bosó bwa Anzelú mpô ’te nákúmbamela yě.

22:9  Kasi alobí na ngáí : « Té, ósála bôngó té ! Nazalí sé mosáleli lokóla yŏ, lokóla bandeko ba yŏ baproféta, mpé lokóla bato bakotósaka maloba ma búku eye. Okúmbamela bobélé Nzámbe. »

22:10  Alobí na ngáí lisúsu : « Maloba makomámí o búku eye, óbómba mangó té, zambí Elaká ekómí penepene.

22:11  Mosúmuki ákóba kosála masúmu ; moto mbindo ákóba komíkómisa mbindo. Moto malámu ákóba kosála malámu, mosántu álénda o bosántu bwa yě.

22:12  Tálá, etíkálí moké náyâ. Nakoyêla bínó lifúta, nakofúta moto na moto engé­béné na mosálá asálí.

22:13  Ngáí nazalí Alfa na Omega, wa-Libosó mpé wa-Nsúka, Libandela mpé Nsúka.

22:14  Esengo na bato bakosukola bilambá bya bangó, bangó bako­koka kobeleme na nzeté ya Bomoi, koleka o bizibeli mpé koyíngela o Engumbá.

22:15  Kasi basúsu bakotíkala o libándá : (bato bakómí lokóla) mbwá, bato ba líkundú, ba-bosóni, babomi, baye bakokúmisaka bikeko ná baye bánso bakosepelaka na maloba mpé na bikelá bya lokutá ! »

22:16  Ngáí, Yézu, natíndí Anzelú wa ngáí áyébisa bínó maloba ma mibó­mbamo mitálí bato ba Biklézya. Ngáí, Ebóto wa libótá lya Davídi, mpé monzóto moye mokongengeke na ntóngó.

22:17  Elímo ná mpé Bolóngani balobí : « Yáká ! » Moto ayókí yangó, áloba mpé : « Yáká ! » Moto ayókí mpósá ya mái, ábeleme ; moto alingí, ámele mái ma Bomoi, akofúta té.

22:18  Nayébísí moto nyónso ayókí maloba ma mibómbamo makomámí o búku eye : « Sókó moto mŏ kó abakísí maloba masúsu, Nzámbe akoyókisa yě malózí mánso makomámí o búku eye !

22:19  Sókó moto alongólí maloba masúsu o maloba ma mibómbamo makomámí o búku eye, Nzámbe akobótolo yě likabo lya yě lya nzeté ya Bomoi mpé lya Engumbá esántu, biye bilakísámí o búku eye ! »

22:20  Moto ayébísí bosôló bwa maye mánso, alobí : « Sôló, etíkálí moké náyâ ! » Amen, yáká Mokonzi Yézu !

22:21  Ngrásya ya Mokonzi Yézu ézala na bínó bánso ! Amen.