LinVB - Nehemiah

Chapter 1

1:1  Maloba ma Neemia, mwana wa Akalia : O sanza Kisleu, o mobu mwa ntuku ibale mwa bokonzi bwa Artaksasta, nazalaki o engumba enene ya Suza.

1:2  Kanani, moko wa bandeko ba ngai, na bato basusu ba-Yuda bayei epai ya ngai. Natuni bango nsango ya ba-Yuda, baye babikaki mpe bazo-ngaki o mboka, natuni mpe nsango ya Yeruzalem.

1:3  Bayanoli ngai : « Baye bautaki o boombo mpe bazongi o mokili mwa Yuda, bazali na mpasi enene mpe na nsoni ; mpamba te, lopango lonene la Yeruzalem lobebi mpe batumbaki bizibeli bya mboka. »

1:4  Eyoki ngai maloba mana, naleli, nafandi na mawa mwa mikolo, nalali nzala mpe nasambeli Nzambe wa likolo.

1:5  Nalobi : « E Yawe Nzambe wa likolo, yo Nzambe monene mpe wa nsomo ; okomemyaka bondeko mpe okopesaka bolamu na baye balingi yo mpe batosi mibeko mya yo.

1:6  Zibola matoi mpe fungola miso mpo ’te o­ndima losambo la ngai, mosaleli wa yo. Sikawa nabondeli yo butu moi mpo ya bana ba Israel, basaleli ba yo, mpe nasakoli masumu biso, bana ba Israel, tosalaki o miso ma yo ; ngai moko na bandeko ba ngai tosali masumu !

1:7  Tosalaki yo mabe mingi, totosaki mibeko mpe mitindo mya yo te, miye opesaki Moze, mosaleli wa yo.

1:8  Okundola naino liloba olobaki na Moze, mosaleli wa yo : “Soko boboyi ngai, nakopanza bino o kati ya bikolo bisusu.

1:9  Kasi soko bozongeli ngai mpe bolandi mibeko mya ngai, bato ba bino bakendeki o boombo, ata bazali kuna mosika o nsuka ya mokili, ngai nakosangisa bango lisusu mpe nakozongisa bango o esika eye naponoki mpo ya kotia Nkombo ya ngai.”

1:10  Bango bazali basaleli ba yo, bato ba ekolo ya yo ; yo moto osikolaki bango na nguya enene mpe na bokasi bwa loboko la yo.

1:11  E moko­nzi, tia matoi na losambo la ngai, mosaleli wa yo, mpe na mabondeli ma basaleli ba yo banso baye bakokumisaka Nkombo ya yo na esengo. Nabondeli yo, longisa ngai, mosaleli wa yo, mpe salisa ngai mpo ’te nazwa lilonga o miso ma moto oyo. » O ntango ena nazalaki na mosala mwa kobongela mokonzi vino.

Chapter 2

2:1  O sanza Nisan, o mobu mwa ntuku ibale Artaksasta azalaki mokonzi, ngai Neemia nazalaki na mosala mwa kobongela mokonzi vino ; nakamati vino mpe napesi mokonzi. Mokolo moko te mokonzi amonoki ngai na elongi ya mawa.

2:2  Ya­ngo wana atuni ngai : « Mpo nini ozali na elongi ya mawa ? Ozali kobele ? Nakanisi ’te ozali na likambo o motema. » Ngai nakamwi mingi,

2:3  mpe nalobi na ye : « Mokonzi azala seko ! Nazala na elongi ya mawa te boni ! Mboka esika bakundi bankoko ba ngai ekufi, batumbi mpe bizibeli bya mboka. »

2:4  Mokonzi alobi na ngai : « Bongo olingi nini ? » Nasambeli Nzambe wa likolo,

2:5  mpe nazongiseli mokonzi : « Soko okoki kondimela ngai, mpe soko ya solo nazwi bolamu o miso ma yo, tika ngai nakende o mokili mwa Yuda, esika bakundi bankoko ba ngai, bongo natonga engumba lisusu. »

2:6  Mwasi wa mokonzi afandi penepene na ye, mpe na nsima mokonzi atuni ngai : « Mobembo mwa yo mokoumela mikolo boni ? Okozonga mokolo nini ? » Nalakeli ye mokolo mwa bozongi, mpe mokonzi andimi, alingisi ngai nakende.

2:7  Nalobi na ye lisusu : « Soko olingi, opesa ngai minkanda nalakisa bayangeli ba mokili o ngambo ya Ebale, bongo balekisa ngai o mokili mwa bango mpo nakoma o Yuda.

2:8  Opesa ngai mpe monkanda mpo ya Asaf, mokengeli wa zamba ya mokonzi, mpo ’te akatela ngai mabaya mpo ya bizibeli bya ndako Nzambe, mpo ya kotonga lopango la engumba na mpe ndako esika nalingi kofanda. » Mokonzi andimeli ngai, mpo loboko la Nzambe lobateli ngai.

2:9  Yango wana nakei epai ya baya-ngeli ba ngambo ya Efrate, napesi ba­ngo minkanda mya mokonzi. Mokonzi apesaki ngai bakonzi ba basoda na batambwisi farasa.

2:10  Ntango bayebisi yango na Sa­mbalat, moto wa Koron, na Tobia, moto wa Amon, zuzi wa leta, basiliki zambi moto mosusu ayei kobongisa bolamu bwa ba-Israel.

2:11  Ekomi ngai o Yeruzalem, natikali wana mikolo misato.

2:12  Na nsima natelemi na butu mpe nakei elongo na mwa bato basusu, kasi nayebisaki mo­to moko makanisi te maye Nza­mbe apesaki ngai mpo ya kobongisa Yeruzalem. Nazalaki na farasa esusu te, se farasa ya ngai moko.

2:13  Nalongwi o engumba na butu, nabimi epai ya ‘Ezibeli ya Lobwaku’, nalandi nzela eye bakotangaka ‘Liziba lya Bilima’, na nsima nakomi o esika bakotangaka ‘Ezibeli ya Bipoli’ ; natali lopango lonene la Yeruzalem o esika lobebi mpe bizibeli bya mboka biziki.

2:14  Nabengi nzela ya ngai epai ya ‘Ezibeli ya Liziba’ mpe epai ya ‘Etima ya Mokonzi’, kasi farasa eye nabuteli ekoki koleka wana te.

2:15  Bongo nazongi bobele na butu bona, naleki o nzela ya lobwaku ; nazalaki se kotala lopango mpe nayingeli lisusu o engu­mba epai ya ‘Ezibeli ya Lobwaku’.

2:16  Bayangeli bamonoki te esika nakei to nini nalingi kosala. O mokolo mona nayebisaki eloko te : banga­nga Nzambe, bankumu, bazuzi na ba­kolo bayebaki yango te.

2:17  Na nsima nayebisi bango : « Bozali komono mpasi ya biso : Yeruzalem ekomi mopotu, bizibeli bya mboka biziki. Tokende kobongisa lisusu lopango lonene la Yeruzalem mpo ’te banguna baseke biso lisusu te ! »

2:18  Nayebisi ba­ngo boniboni Nzambe wa ngai asalisaki ngai, nayebisi bango mpe maye mokonzi alobaki na ngai. Bango balobi : « Tokende kotonga ! » Bongo ba­ndimi kosalisa ngai o mosala mona monzenga.

2:19  Awa Sanbalat, moto wa Koron, na mo-Amon Tobia, zuzi wa leta, na mo-Arabu Gesem, bayoki yango, baseki biso, batioli biso, balobi : « Boli­ngi kosala nini kuna ? Bolingi nde kotombokela mokonzi ? »

2:20  Kasi ngai nazongiseli bango maloba maye : « Nzambe wa likolo, yemei akosalisa biso ; biso basaleli ba ye tokobanda kotonga. Kasi bino bokozwa eloko te o Yeruzalem, bokozala na esika te ; ata nkombo ya bino ekotikala lisusu o Yeruzalem te. »

Chapter 3

3:1  Eliasib, nganga Nzambe mokonzi na bandeko ba ye banganga Nzambe babandi kotonga ‘Ezibeli ya Mpata’ : batelemisi makonzi manene mpe babaki bizibeli. Na nsima babo­ngisi ‘Linongi lya Nkama’ na mpe ‘Linongi lya Kananel’.

3:2  Bato ba Yeriko batongi eteni esusu ; nsima ya ba­ngo bato ba Zakur, mwana wa Imri, eteni esusu.

3:3  Bato ba Sena batongi ‘Ezibeli ya Mbisi’ : batelemisi mako-nzi manene, babaki bizibeli mpe batii bikangeli.

3:4  Penepene na bango bato basusu mpe bapesi maboko : Meremot, mwana wa Uria, nkoko wa Akos, na Mesulam, mwana wa Berekia, nkoko wa Mesezabel, na Sadok, mwana wa Baana.

3:5  Bato ba Tekoa mpe basali mosala, kasi bankumu ba bango baboyi kosalisa Neemia.

3:6  Yoyada, mwana wa Pasea, na Mesulam, mwana wa Besodia, babongisi ezibeli ya ‘Mboka ya kala’ ; batelemisi makonzi, babaki bizibeli mpe batii bikangeli.

3:7  Melatia, moto wa Gabaon, na Yadon, moto wa Meronot, basali mpe mosala ; se bongo bato ba Gabaon mpe ba Mispa basali mosala o nkombo ya moyangeli wa ngambo ya Efrate.

3:8  Uziel, mwana wa Karaya, motuli wa wolo, na Kanania, mosali wa malasi, basali mpe mosala ; babongisi Yeruzalem kin’o Efelo Enene.

3:9  Refaya, mwana wa Kur, oyo azalaki moyangeli wa eteni yoko ya Yeruzalem, asali mpe mosala.

3:10  Yedaya, mwana wa Karumaf, abongisi lopa­ngo penepene na ndako ya ye moko, elongo na Katus, mwana wa Kasabneya.

3:11  Malkia, mwana wa Karim, na Kasub, mwana wa Moab, babongisi eteni esusu kin’o ‘Linongi lya Fulu’.

3:12  Nsima ya bango, Salum, mwa­na wa Alokes, moyangeli wa eteni ya bibale ya Yeruzalem, abongisi mpe lopango elongo na bana basi ba ye.

3:13  Kanun na bato ba Zanoa babongisi ‘Ezibeli ya Lobwaku’. Bato­ngi yango lisusu, batelemisi makonzi, babaki bizibeli mpe batii bikangeli ; babongisi mpe efelo, bolai maboko nkoto yoko kin’o ‘Ezibeli ya Bipoli’.

3:14  Malkia, mwana wa Rekab, moya­ngeli wa Bet-Akerem, ye na bana ba ye, abongisi ‘Ezibeli ya Bipoli’ : abaki bizibeli mpe atii bikangeli.

3:15  Salum, mwana wa Kolkoze, moyangeli wa Mispa, abongisi ‘Ezibeli ya Liziba’, azipi yango, abaki bizibeli mpe atii bikangeli ; abongisi mpe efelo ya ‘Etima ya Silowe’, eye ekatisi lopango la mokonzi mpe elandi nzela ya Engumba ya Davidi.

3:16  Neemia, mwana wa Azbuk, moyangeli wa eteni ya Bet-Sur, abongisi lopango o esika ya malita ma Davidi mpe libulu lya mai kin’o ‘Ndako ya Bilo­mbe’.

3:17  Penepene na bango ba-Levi basali mpe mosala : Rekum, mwana wa Bani, na Kasabia, moyangeli wa eteni ya Keila.

3:18  Bandeko ba bango basali mpe mosala : Binui, mwana wa Kenadad, moyangeli wa eteni esusu ya Keila,

3:19  na mpe Ezer, mwana wa Yesua, moyangeli wa Mispa, babo­ngisi eteni esusu penepene na ndako ya bibuneli o litumu lya lopango.

3:20  Baruk, mwana wa Zabai, abo­ngisi mpe eteni esusu, banda litumu lya lopango tee ezibeli ya ndako ya nganga Nzambe mokonzi Eliasib.

3:21  Nsima ya ye Meremot, mwana wa Uria, nkoko wa Akos, abongisi eteni esusu banda ndako ya nganga Nza­mbe mokonzi Eliasib tee nsuka ya yango.

3:22  Banganga Nzambe, baye bafandi o lobwaku la Yordane, babongisi eteni esusu.

3:23  Na nsima Bi­nyamin na Kasub babongisi penepene na ndako ya bango moko. Azaria, mwana wa Maseya, nkoko wa Anania, abongisi mpembeni na ndako ya ye.

3:24  Binui, mwana wa Kenadad, abongisi eteni esusu, banda ndako ya Azaria tee litumu lya lopango.

3:25  Na nsima Palal, mwana wa Uzal, abongisi esika etalani na litumu lya lopango mpe na linongi lizali o ndako ya mokonzi penepene na lopango la boloko. Na nsima Pedaya, mwana wa Paros, na basali ba Tempelo, baye bafandi o Ofel,

3:26  babongisi tee ‘Ezibeli ya Mai’, epai ya Esti kin’o linongi linene.

3:27  Na nsima bato ba Tekoa babongisi eteni esusu, banda esika etalani na linongi linene tee efelo ya Ofel.

3:28  Banda ‘Ezibeli ya Farasa’, banga­nga Nzambe babongisi, moto na mo­to liboso lya ndako ya ye.

3:29  Sadok, mwana wa Imer, abongisi penepene na ndako ya ye ; na mpe Semaya, mwana wa Sekania, mokengeli wa ezibeli ya Esti.

3:30  Kanania, mwana wa Selemia, na Kanun, mwana wa motoba wa Salaf, babongisi mpe eteni esusu. Na nsima Mesulam, mwana wa Berekia, asali mosala penepene na ndako ya ye.

3:31  Malkia, motuli wa wolo, asali mosala tee ndako ya basali ba Teempelo mpe ya bato ba mo-mbongo, penepene na ‘Ezibeli ya Bokengeli’ kin’o ndako etongami o litumu lya lopango.

3:32  Batuli ba wolo na bato ba mombongo babongisi eteni kati ya ndako ena na ‘Ezibeli ya Mpata’.

3:33  Eyoki Sanbalat ’te tokomi koto-nga lopango lisusu, ayoki nkanda, asi­liki mingi. Atioli ba-Yuda,

3:34  aga­ngi o miso ma bandeko ba ye mpe ma basoda ba Samaria : « Ba-Yuda bato mpamba bazali kosala nini kuna ? Totika bango ? Balingi nde kobonza miboma ? Balingi nde kosukisa mosala bobele lelo ? Mabanga ma kala maziki, bakoki nde kokomisa mango mabanga ma sika ? »

3:35  Tobia, moto wa Amon, azalaki penepene na ye, alobi : « Na ndenge batongi yango, ata ga-mbala eye ekobuta lopango ekoki ko­buka lango ! »

3:36  E Nzambe wa biso, yoka lolenge bato bazali kotiola biso. Zongisela ba­ngo matumoli ma bango mpe yokisa bango nsoni ya kokangema o boombo o mokili mosusu.

3:37  Olimbisa mabe ma bango te, olimbisa lisumu lya bango te, mpamba te, batumolaki bato batongi lopango.

3:38  Bongo totongi lopango lisusu, to­bongisi efelo bipai binso ; tosilisi ndambo eye ya nse, etikali ndambo ya likolo. Bato bakobi mosala na mpiko.

Chapter 4

4:1  Awa Sanbalat, Tobia na ba-Arabu, bato ba Amon na bato ba Asdod bayoki nsango ’te mosala mwa bobongisi lopango la Yeruzalem mozalaki kotambola noki mpe tosili kokangisa malusu ma efelo, bayoki nkele mingi.

4:2  Bayokani ’te bakobundisa Yeruzalem mpe bakobebisa yango.

4:3  Tobondeli Nzambe wa biso mpe totii bakengeli butu moi babatela mboka.

4:4  Kasi ba-Yuda balobi : « Ba-ngamba babandi kolembe, mabanga mingi makwei epai na epai, tokosilisa mosala mwa botongi lopango soki moke te. »

4:5  Mpe banguna ba biso balobi : « Bakoyeba te, bakomono eloko te : tokokoto o mboka mpe tokokoma o kati ya bango ; bobele o ntango ena tokoboma bango mpe tokobebisa mosala mwa bango. »

4:6  Ba-Yuda basusu bafandi o kati ya bango bayei koyebisa biso ata mbala zomi : « Ba­nguna bazali kouta o mboka inso kobundisa biso. »

4:7  Yango wana natindi bato o bisika bya nse, nsima ya lopango ; natii wana bato ba mabota manso, napesi ba­ngo mimpanga, makongo na mati­mbo.

4:8  Awa namoni ’te bazalaki kobanga, natelemi mpe nasakoli o miso ma ba­nkumu, ma bazuzi mpe ma bato batikali naino wana, maloba maye : « Bobanga bango te ! Bokanisa Mokonzi nta bonene mpe wa nsomo ; bobunela bandeko, bana babali na bana basi, basi mpe ndako ya bino ! »

4:9  Eyoki ba­nguna ’te tosili koyeba mayele ma bango, mpe ’te Nzambe abebisi mokano mwa bango, bamibendi ; biso tozongi epai ya lopango, moto na moto o mosala mwa ye.

4:10  Banda mokolo mona se ndambo ya bato ba ngai bazalaki kosala mosala : bato basusu bazalaki kokengele na makongo, nguba na matimbo, balati bilamba bya bibende ; bayangeli bazalaki kolendisa bato ba bango ba-Yuda.

4:11  Baye bazalaki kotonga lopa­ngo na bangamba bazalaki komeme biloko bazalaki kosala mosala na loboko loko, na loboko losusu bamemi likongo.

4:12  Baye banso bazalaki koto-nga bakangi mopanga o loketo nta­ngo ya mosala. Mobeti wa mondule atelemi pene na ngai.

4:13  Nalobi na ba­nkumu, na bazuzi mpe na bato basusu : « Mosala mozali monene mpe totandani mosika. Tokabwani bipai binso o efelo ya lopango, mosika na baninga.

4:14  Soko boyoki ’te babeti mo­ndule, boya kosangana pene na ngai, mpe Nzambe wa biso akobunela biso. »

4:15  Bongo tozalaki kosala mosala ut’o nta ntongo tee ntango mi­nzoto mibandi kongenge.

4:16  O mikolo mina nalobi mpe na bato : « Moto na moto asengeli kotikala o Yeruzalem na butu, elongo na moto wa ye wa mosala. Bongo tokokengele na butu, mpe na moi tokosala mosala. »

4:17  Ná ngai, ná bandeko ba ngai, ná bato ba ngai, ata moto moko te atiki bilamba bya ye. Moto nyonso azalaki na likongo o loboko la mobali.

Chapter 5

5:1  O mikolo mina bato ba mboka na basi ba bango bazalaki komilela mingi mpo ya bandeko ba ba­ngo ba-Yuda.

5:2  Basusu bazalaki koloba : « Bana babali na bana basi ba biso, na mpe biso moko tozali ebele. Tolingi kozwa mbuma ya mampa mpo tolia mpe tobika. »

5:3  Basusu balobi : « Tosengeli kotekele bango bilanga bya mbuma ya mampa, na vino na mpe ndako ya biso mpo tozwa ma­mpa o ntango ya nzala. »

5:4  Basusu balobi : « Mpo tokoka kofuta mpako ya leta tosengeli kodefa mosolo mouti o bilanga mpe o nzete ya vino.

5:5  Nzokande biso na bango tozali makila moko ; bana ba biso bakokani na bana ba bango. Ata bongo tokotekelaka bango bana babali na bana basi ba biso ; bana basi basusu basili bakomi baombo ; mpe tokoki kosala eloko te, mpo bilanga bya mbuma ya mampa mpe bya vino bisili bikomi o maboko ma bango. »

5:6  Eyoki ngai boleli bwa bango na maloba manso balobaki, nasiliki mi­ngi mpenza.

5:7  Namituni mpe napaleli bankumu na bazuzi, nalobi na ba­ngo : « Bozali kotiela bandeko ba bino mokumba monene ! » Bongo nabengi ba­ngo banso o likita linene.

5:8  Nalobi na bango : « Biso moko tosikolaki bandeko ba biso ba-Yuda o boombo lokola tokokaki. Nzokande sikawa bino bozali koteke bandeko ba bino, bongo tokosengela kosikola bango lisusu ! » Bafandi nye mpe ba­zwi liloba lyoko lya kozongisa te.

5:9  Nalobi lisusu : « Makambo bozali ko­sala mazali malamu te. Malamu bobanga Nzambe mpe bolanda mibeko mya ye mpo ’te bato ba bikolo bisusu, banguna ba biso, bafinga biso te.

5:10  Ngai mpe, ná bandeko ná basalisi ba ngai, todefisi bango mosolo na mbuma ya mampa. Sikawa tolimbisa bango nyongo ena.

5:11  Bozongisela bango noki bilanga bya mbuma ya mampa, bya vino, bya oliva, na ndako ya bango ; bolimbisa bango nyo­ngo ya mosolo, mbuma ya mampa, mbuma ya vino na mpe mafuta maye bodefisaki bango. »

5:12  Bayanoli : « Tokozongisa yango, tokosenge bango lisusu eloko te, tokosala lokola olobi. » Na nsima nabengi banganga Nza­mbe mpe nalayisi bango ndai ’te basala lokola balakelaki.

5:13  Napupoli monkoto mpe nalobi : « Bobele bongo Nzambe apupola ndako ya moto nyonso abuki ndai ya ye. Abengana ye mpe abotolo ye biloko binso. Bo­ngo akotikala na eloko yoko te ! » Bato banso bayanoli « Amen », mpe baku­misi Yawe. Bato banso basali lokola balakelaki.

5:14  Kutu banda mokolo mokonzi atii ngai moyangeli wa Yuda, ut’o mobu mwa ntuku isato na mibale mwa bokonzi bwa Artaksasta, mibu zomi na mibale mobimba, biso na bandeko ba ngai tofutisi bato mpako te.

5:15  Nzokande bayangeli ba kala, baye bazalaki liboso lya ngai, bazalaki konyokolo bato na bosengi bango mpako ya mampa na vino, na mpe mitako mya palata ntuku inei. Basaleli ba bango bazalaki mpe konyokolo bato. Kasi ngai nasalaki bongo ata mokolo moko te, mpo nakobangaka Nzambe.

5:16  Nasalisi mpe o mosala mwa botongi lopango, ata nazalaki nkolo wa mabelé te. Bato ba ngai banso bazalaki kosalisa ngai o mosala moye.

5:17  Ba-Yuda na bazuzi, baye bazalaki kolia o meza ya ngai, bazalaki mo­nkama na ntuku itano ; bakisa bampaya bautaki o bikolo bisusu.

5:18  Mokolo na mokolo nabomeli bango ngombe yoko, mpata kitoko motoba na mpe ndeke ; napesi binso se na mosolo mwa ngai moko. Nsima ya mikolo zomi zomi, nakabeli bango vino ebele. Ata bongo nasengeki mpako mpo ya ngai moko te, mpo bato ba ekolo eye bazalaki na mpasi mpenza.

5:19  E Nzambe wa ngai, makambo manso nasali mpo ya bato ba ekolo eye, obosana mango te !

Chapter 6

6:1  Sanbalat, Tobia, mo-Arabu Gesem na banguna ba biso basusu bayoki ’te nasilisi kotonga lopango lisusu, lilusu lyoko lizalaki lisusu te. Kasi o ntango ena natii naino bizibeli bya mboka te.

6:2  Sanbalat na Gesem batindeli ngai maloba maye : « Yaka, tokutana o Kefirim o lobwaku la Ono. » Nzokande bakani kosala ngai mabe.

6:3  Yango wana natindi bantoma bakende koyebisa bango : « Nazali na mosala moko monene, nakoki koya te ; soko natiki mosala mpe nayei epai ya bino, mosala mokosalema te ! »

6:4  Mbala inei batindeli ngai maloba mango, ngai mpe nazongiseli bango eyano se lolenge loko.

6:5  Na nsima, mbala ya itano, Sanbalat atindi mosaleli wa ye epai ya ngai na monkanda mokangemi te.

6:6  Mokomami boye : « Awa o mboka ya biso toyoki, mpe Gesem alobi ’te ezali ya solo, ’te bino na ba-Yuda bozali na makanisi ma botomboki ; bozali kotonga lopango la mboka se na ntina ena, mpe yo olingi kokoma mokonzi wa bango.

6:7  Sikawa otii mpe baprofeta mpo ’te basakola o Yeruzalem : Tozwi mokonzi moko o Yuda ! Mokonzi akoyoka makambo mana ma­nso. Yango wana malamu oya, toyokana liboso. »

6:8  Kasi ngai nayanoli ye : « Manso olobi mazali lokuta, yo moko obimisi mango ! »,

6:9  mpo bango ba­nso balingi kobangisa biso na elikya ’te totika mosala mwa botongi, bo­ngo tosilisa mosala mona mokolo moko te. Nzokande sikawa nakoki kozanga mpiko te.

6:10  Mokolo moko nakei epai ya Semaya, mwana wa Delaya, nkoko wa Metabel, mpo ye moko akokaki koya te. Asakoli : « Tokende o Tempelo ya Nzambe, o kati ya ndako esantu, tokanga bizibeli bya ndako esantu malamu, zambi bakoya koboma yo ; bakoya koboma yo na butu boye. »

6:11  Kasi nayanoli : « Moto lokola ngai akoki nde kokima ? Moto lokola ngai akoki nde koyingela o ndako esantu mpo ’te abika ? Te, nakokende te ! »

6:12  Namoni ’te Nzambe atindaki ye te ; asakolaki maloba mana mpo ya ngai, zambi Tobia na Sanbalat bafutaki ye.

6:13  Bafutaki ye mpo ya kobangisa ngai ; bongo soko nasali lisumu bakokoka kobebisa lokumu la ngai mpe koyokisa ngai nsoni.

6:14  E Nzambe wa ngai, kanisa makambo Tobia na Sanbalat basalaki ngai, kanisa mpe Noadia, profeta mwasi, na baprofeta basusu balingaki kobangisa ngai !

6:15  Basilisi mosala mwa botongi lopango o mokolo mwa ntuku ibale na mitano mwa sanza Elul ; basalaki mosala mikolo ntuku itano na mibale.

6:16  Awa banguna ba biso banso bayoki yango, mpe awa bato ba bikolo bya penepene bamoni bongo, bakamwi mingi mpe bandimi ’te mosala mona mosalemi na lisalisi lya Nzambe wa biso.

6:17  O eleko ena bankumu ba Yuda batindeli Tobia minkanda ebele, mpe Tobia azongiseli bango eyano,

6:18  mpo o ekolo Yuda bato baike bandimi ye, mpo azalaki bokilo wa Sekani, mwana wa Ara ; mpe mwana wa ye Yokanan abalaki mwana mwasi wa Mesulam, mwana wa Berekia.

6:19  Bazalaki mpe kokumisa ye o miso ma ngai mpo ya misala asalaki ; bayebisaki ye mpe maloba manso nalobaki. Tobia atindeli ngai minkanda bobele mpo ya kobangisa ngai.

Chapter 7

7:1  Esili mosala mwa botongi lopango, natelemisi bizibeli bya mbo­ka ; na nsima natii bakengeli ba bizibeli, bayembi na ba-Levi.

7:2  Napesi mosala mwa koyangela Yeruzalem na ndeko wa ngai Kanani mpe na Kanania, komanda wa ebombamelo, za­mbi ye azalaki moto wa botosi mingi mpe aleki bato basusu na bobangi Nzambe.

7:3  Nalobi na bango : « Bokoki kofungola bizibeli bya mboka bobele ntango moi mokomi makasi, mpe bo­kokanga byango awa moi mokiti naino te. Bopono bakengeli o kati ya bato ba Yeruzalem, mpe botinda ba­ngo bakengele lopango, moto na moto penepene na ndako ya ye. »

7:4  Engumba ezalaki enene mpe elai, kasi bato bazalaki mingi te. Babongisi naino ndako mingi te.

7:5  Nzambe wa ngai apesi ngai mayele ma kosa­ngisa bankumu na bazuzi na bato basusu mpo tokomisa nkombo ya bato basusu. Nazwi buku ezali na nko­mbo ya bato bazongaki liboso. O buku eye nazwi bato baye :

7:6  Tala nkombo ya bato bautaki o bo­ombo, baye bakangemaki na Nabukodonozor, mokonzi wa Babilon, mpe bazongi o Yeruzalem mpe o Yuda, moto na moto o mboka ya ye.

7:7  Bayaki elongo na Zorobabel, Yozue, Neemia, Azaria, Ramia, Nakamani, Mordokai, Bilsan, Misperet, Bigvai, Nekum na Baana. Motango mwa bato ba Israel :

7:8  bana ba Paros : 2 172 ;

7:9  bana ba Sefatia : 372 ;

7:10  bana ba Ara : 652 ;

7:11  bana ba Paka­t-Moab, ba Yozue mpe ba Yoab : 2 818 ;

7:12  bana ba Elam : 1 254 ;

7:13  bana ba Zatu : 845 ;

7:14  bana ba Zakai : 760 ;

7:15  bana ba Binui : 648 ;

7:16  bana ba Bebai : 628 ;

7:17  bana ba Azgad : 2 322 ;

7:18  bana ba Adonikam : 667 ;

7:19  bana ba Bigvai : 2 067 ;

7:20  bana ba Adin : 655 ;

7:21  bana ba Ater, wa libota lya Kizkia : 98 ;

7:22  bana ba Asum : 328 ;

7:23  bana ba Besai : 324 ;

7:24  bana ba Karif : 112 ;

7:25  bana ba Gabaon : 95 ;

7:26  bato ba Beteleme na Netofa : 188 ;

7:27  bato ba Anatot : 128 ;

7:28  bato ba Bet-Azmavet : 42 ;

7:29  bato ba Kiriat-Yearim, Kefira na Beerot : 743 ;

7:30  bato ba Rama na Geba : 621 ;

7:31  bato ba Mikmas : 122 ;

7:32  bato ba Betel na Ayi : 123 ;

7:33  bato ba Nebo mosusu : 52 ;

7:34  ba­to ba Elam mosusu : 1254 ;

7:35  bana ba Karim : 320 ;

7:36  bato ba Yeriko : 345 ;

7:37  bato ba Lod, Kadid na Ono : 721 ;

7:38  bato ba Sena : 3 930.

7:39  Banganga Nzambe : bana ba Yedaya, wa libota lya Yozue : 937 ;

7:40  bana ba Imer : 1 052 ;

7:41  bana ba Pasekur : 1 247 ;

7:42  bana ba Karim : 1 017.

7:43  Ba-Levi : bana ba Yozue : Kadmiel na Odewa : 74.

7:44  Bayembi : bana ba Asaf : 148.

7:45  Bakengeli ba bizibeli bya ndako Nzambe : bana ba Salum, bana ba Ater, bana ba Talmon, bana ba Akub, bana ba Katita, na bana ba Sobai : 138.

7:46  Basalisi : bana ba Sika, bana ba Kasufa, bana ba Tabaot,

7:47  bana ba Keros, bana ba Sia, bana ba Padon,

7:48  bana ba Lebana, bana ba Kagaba, bana ba Salmai,

7:49  bana ba Kanan, bana ba Gidel, bana ba Gakar,

7:50  bana ba Reaya, bana ba Resin, bana ba Nekoda,

7:51  bana ba Gazam, bana ba Uza, bana ba Pasea,

7:52  bana ba Besai, bana ba Meunim, bana ba Nefusim,

7:53  bana ba Bakbuk, bana ba Kakufa, bana ba Karkur,

7:54  bana ba Baslit, bana ba Mekida, bana ba Karsa,

7:55  bana ba Kos, bana ba Sisra, bana ba Tema,

7:56  bana ba Nesiak na bana ba Katifa.

7:57  Bana ba basali ba Salomo : bana ba Sotai, bana ba Soferet, bana ba Perida,

7:58  bana ba Yala, bana ba Darkon, bana ba Gidel,

7:59  bana ba Sefatia, bana ba Katil, bana ba Pokeret-Asebaim, bana ba Amon,

7:60  Basalisi na basali ba Salomo bazalaki 392.

7:61  Bato bautaki o Tel-Melak, Tel-Karsa, Kerub, Adon na Imer bakoki kolakisa mpenza te ’te bazali bankoko ba Israel.

7:62  Bazali bana ba Delaya, ba Tobia mpe ba Nekoda ; bazalaki 642.

7:63  Mpe epai ya banganga Nza­mbe : bana ba Kobaya, ba Akos na ba­na ba Barzilai, (oyo abalaki mwasi wa libota lya Barzilai), moto wa Galaad, mpe akamataki nkombo ya ye.

7:64  Bango baluki buku ezali na nkombo ya bato ba libota lya bango, kasi ba­zwi yango te ; balongoli bango o mosala mwa bonganga, mpo batali ba­ngo lokola bato mbindo.

7:65  Moyangeli ape­kisi bango kolia biloko bisantu tee mokolo nganga Nzambe moko akobima, oyo akoki kotuna Urim na Tumim.

7:66  Banso elongo bazalaki : 42 360.

7:67  Bakisa baombo ba bango babali na basi : bazalaki 7 337. Bayembi babali na basi bazalaki 245.

7:68  Bazalaki mpe na kamela 435 mpe na mpunda 6 720.

7:69  O kati ya bankumu ba mabota basusu bapesi makabo mpo ya mosala mwa botongi. Moyangeli atii o ebo­mbelo ya mosolo dragma ya wolo nkoto yoko, sani ya mabonza ntuku itano mpe milato mya nganga Nza­mbe nkama itano na ntuku isato.

7:70  Bankumu basusu ba mabota bapesi dragma ya wolo 20 000 na mina mya palata 2 200.

7:71  Bato basusu bapesi dragma ya wolo 20 000, mina mya palata 2 000 na milato mya nganga Nzambe ntuku motoba na nsambo.

7:72  Banganga Nzambe, ba-Levi, bakengeli, bayembi, bato basusu na basali bakei kofanda o Yeruzalem, ba-Israel basusu bakei kofanda o mboka ya bango. (

7:73  )

Chapter 8

8:1  Ekomi sanza ya nsambo, ba-Israel banso basangani o boso bwa ‘Ezibeli ya Mai’. Basengi Esdra, moteyi wa Mobeko aya na buku ya Mobeko mwa Moze, mibeko Yawe apesaki Israel.

8:2  Moteyi wa Mobeko Esdra ayei na buku ya Mobeko o lisanga. Ezalaki wana bakolo banso : babali na basi, na bilenge basili bayebi kotanga. Ezalaki o mokolo mwa yambo mwa sanza ya nsambo.

8:3  O esika ena penepene na ‘Ezibeli ya Mai’, atangi buku ut’o ntongo tee midi, o miso ma babali, basi na bile­nge baye bayebi kotanga. Banso bazalaki kotia matoi na maloba ma buku ya Mobeko.

8:4  Esdra, moteyi wa Mobeko, atelemi o libaya linene batielaki ye. O loboko la ye la mobali Matitia, Sema, Anaya, Uria, Kilkia na Maseya batelemi wana ; mpe o loboko la ye la mwasi Pedaya, Misael, Malkia, Kaskum, Kasbadana, Zekaria na Mesulam.

8:5  Esdra afungoli buku o miso ma bato banso ; banso bazalaki komono ye malamu ; efungoli ye buku bato ba­nso batelemi.

8:6  Na nsima Esdra akumisi Yawe, Nzambe monene ; bato banso batomboli maboko mpe ba­lo­bi : « Amen, Amen ! » Na nsima ba­sunami mpe bakumbameli Yawe, bilo­ngi o nse.

8:7  Ba-Levi Yozue, Bani, Serebia, Yamin, Akub, Sabtai, Odia, Maseya, Kelita, Azaria, Yozabad, Kanan, Pelaya balimboleli bato Mobeko ; banso bazalaki se koteleme.

8:8  Esdra atangi eteni ya buku ya Nzambe, ba-Levi babongoli yango o lokota la bango mpe balimboli maloba mana ; bongo bato banso bayoki ntina ya mango.

8:9  Na nsima moya-ngeli Neemia na Esdra, nganga Nza­mbe mpe moteyi wa Mobeko, na ba-Levi balimboleli bato, balobi : « Lelo ezali mokolo mosantu mwa Yawe Nzambe wa bino ; boyoka mawa te, bolela mpe te ! », mpo banso babandaki kolela awa bayokaki maloba ma Mobeko.

8:10  Esdra alobi na bango : « Bokende kolia malamu, bomele vino sukali, bokabela mpe bato baye balambi te, mpo mokolo mwa lelo mozali mosantu, mokolo mwa Nzambe. Boyoka mawa te, kasi bosepela ; esengo ya Yawe ekolendisa bino. »

8:11  Ba-Levi ba­kitisi mitema mya bato, balobi : « Bofanda nye, mokolo moye mozali mosantu. Boyoka mawa te ! »

8:12  Mpe bato banso balei, bameli, bakabelani biloko mpe basepeli, mpo bayoki ntina ya maloba bayebisaki bango.

8:13  Mokolo mwa nsima bankumu ba mabota manso ma Israel na banganga Nzambe na ba-Levi bakei kosangana epai ya Esdra, moteyi wa Mobeko, mpo ’te bayekola maloba ma Mobeko lisusu.

8:14  Batangi makambo makomami o buku ya Mobeko, maye Yawe apesaki na monoko mwa Moze, ’te bana ba Israel bafanda o bisasa o ntango ya eyenga ya sanza ya nsa­mbo.

8:15  Basengeli mpe kosakola mpe koyebisa o mboka inso mpe o Yeruzalem maloba maye : « Bokende o ngo­mba mpe boya awa na bitapi bya nzete ya oliva, ya sédere, ya mirte, mpe na nkele ya mbila to na bitapi bisusu bizali na nkasa ibesu ; botonga na byango bisasa lokola etindami. »

8:16  Bato banso bakei mpe bazongi na bitapi, batongi ndako na nkasa ya nzete bipai binso : o motondo mwa ndako, o lopango la bango, o libanda lya Tempelo ya Nzambe, penepene na ‘Ezibeli ya Mai’ mpe na ‘Ezibeli ya Efraim.’

8:17  Bato banso bautaki o boombo, batongi bisasa mpo ’te bafanda o kati. Ba-Israel basalaki bongo lisusu te ut’o mikolo mya Yozue, mwana wa Nun, tee mokolo mona. Bongo bayoki esengo enene.

8:18  Esdra atangi buku ya Mobeko mwa Nzambe mokolo na mokolo, banda mokolo mwa yambo tee mokolo mwa nsuka. Basepeli eyenga mikolo nsambo mobimba ; mokolo mwa mwambe basangani likita linene, lokola mobeko motindi.

Chapter 9

9:1  Mokolo mwa ntuku ibale na minei mwa sanza ena, ba-Israel basangani mpo ’te balala nzala ; balati ngoto mpe bapakoli mputulu o mitó.

9:2  Bato ba Israel bakabwani na bampaya. Batelemi mpe basakoli masumu ma bango na mabe ma bankoko ba bango.

9:3  Batelemi wana ngonga isato mobimba mpo ’te bayoka maloba ma buku ya Mobeko mwa Yawe Nza­mbe wa bango. Ngonga isato lisusu basakoli masumu ma bango mpe bakumbameli Yawe Nzambe wa bango.

9:4  Yozue, Binui, Kadmiel, Sebania, Buni, Serebia, Bani na Kenani bakei koteleme o libaya linene lya ba-Levi, babeleli Yawe Nzambe wa bango na mongongo makasi.

9:5  Mpe ba-Levi Yozue, Kadmiel, Bani, Kasabnea, Serebia, Odia, Sebania na Petania basakoli : « Boteleme mpe bokumisa Yawe Nzambe wa bino ! » bakumisa yo, Yawe Nzambe wa biso o bileko binso seko ! Bakumisa nkombo ya yo ya nkembo, nkombo ekoki na lokumu nsuka te !

9:6  Yo ozali Yawe, bobele yo moko ! Okeli likolo na minzoto minso, okeli mokili na biloko binso bizali wana, mpe mai na binso bibombami wana. Yo moto okopesaka mpema na bikelamo bina binso, mpe bilimo binso bya likolo bikokumisa yo.

9:7  Yo Yawe Nzambe oponoki Abram, obimisaki ye o Ur ya Kaldea, mpe opesaki ye nkombo Abarama.

9:8  Omonoki ye moto wa botosi mpe okataki na ye bondeko mpo ’te opesa ye mokili mwa ba-Kanana, ba-Iti, ba-Amor, ba-Perizi, ba-Yebus na ba-Girgas ; mpo ’te ye na bankoko ba ye bazala bankolo ba mwa­ngo. Okokisaki bilako bya yo, za­mbi ozali na bosembo.

9:9  Omonoki mpasi ya bankoko ba biso o Ezipeti, oyokaki boleli bwa bango penepene na Mbu Etane.

9:10  Obimisaki bilembo na makamwisi mpo ya kokitisa Farao, basaleli ba ye na bato banso ba ekolo ya ye, mpo oyebaki boniboni banyokoloki bango na lolendo ; ozwaki bongo nkombo ya lokumu ezali naino tee lelo.

9:11  Okabolaki mai ma mbu liboso lya bango. Bakatisaki mai na makolo. Ozindisaki baye balandaki bango o mai, se lokola libanga likozindaka o mai.

9:12  Na moi otambwisaki limpata liboso lya bango, mpe na butu móto mozalaki kopela mpo ya kopesa mwinda o nzela esika bazalaki koleka.

9:13  Okitaki o ngomba Sinai, mpe ut’o likolo olobaki na bango ; opesaki bango maloba ma bosembo, mibeko mya solo, mitindo na bitinda bileki bolamu.

9:14  Oteyaki bango bosantu bwa Sabato ya yo ; opesaki bango bitinda, mitindo na Mobeko na monoko mwa mosaleli wa yo Moze.

9:15  Ut’o likolo okabelaki bango ma­mpa mpo bakufa na nzala te, obimisaki mai o libanga mpo ’te basilisa mposa ya mai. Otindaki bango bakende kobotolo mokili, moye olayaki ’te okopesa mwango.

9:16  Kasi bankoko ba biso basalaki lolendo, bakomaki motó makasi, bayokaki maloba ma yo te.

9:17  Baboyaki kotosa mpe babosanaki makamwisi osalelaki bango. Balakisaki motó makasi mpe bakanaki kozonga o Ezipeti, esika bazalaki baombo. Kasi yo ozali Nzambe wa bolimbisi, ozali motema ngolu, nta bolamu, okosilikaka noki te mpe okolukaka se bolamu bwa bato ; yango wana otikaki bango te.

9:18  Ata batulaki ekeko ya mwana ngo­mbe, ata basakolaki : Tala, Nzambe oyo abimisaki bino o Ezipeti. (Batumolaki yo mingi mpenza).

9:19  Yo na bolamu bwa yo nsuka te, otikaki bango te o ntango bazalaki o eliki ; na moi limpata lilongwaki o miso ma bango te, na butu móto molongwaki te o nzela bazalaki kokende.

9:20  Okabelaki bango elimo ya yo mpo ’te bazala na bwanya, opimaki ba­ngo manu te, opesaki bango mai mpo ’te basilisa mposa ya komele.

9:21  Obatelaki bango o eliki mibu ntuku inei ; mokolo moko te bakelelaki elo­ko, bilamba bibebaki te, makolo ma bango mavimbaki te.

9:22  Okabaki bikolo bisusu o maboko ma bango, mpe ofandisaki bango o ndelo ya mokili mwa bango. Babotoloki mokili mwa Sikon, mokonzi wa Kesbon, na mokili mwa Og, mo­konzi wa Basan.

9:23  Okomisaki bango ekolo ya bato bai­ke, ebele lokola minzoto mya likolo, okotisaki bango o mokili olakelaki bankoko ba bango ’te bakozala bankolo ba mwango.

9:24  Bana ba bango bayingelaki o mokili mpe bazwaki mwango, mpe olo-ngaki ba-Kanana, bato ba mokili mona, okabaki bakonzi banene o maboko ma bango mpo ’te basala bango lokola balingi.

9:25  Babotoloki bingumba bizingami na mapango na mpe mabelé makobotaka malamu. Bakomaki bankolo ba ndako itondi na biloko, bazwaki mabulu ma mai bato basusu batimolaka, bilanga bya nzete ya vino mpe ya oliva, na nzete isusu ya mbuma ndenge na ndenge. Baliaki, batondaki mpe bakomaki mafuta, bayokaki esengo enene mpo ya malamu manso osalaki bango.

9:26  Nzokande baboyaki lisusu kotosa mpe batombokeli yo, batiaki Mobeko mwa yo mpembeni ; babomaki baprofeta baye bakebisaki bango mpo ’te bazongela yo ; mpe batumolaki yo mabe mpenza.

9:27  Bongo okabaki bango o maboko ma banguna baye banyataki bango. O ntango ya minyoko babelelaki yo, mpe yo ut’o likolo oyokaki ba­ngo ; na ngolu ya yo enene opesaki bango babikisi, baye basikolaki ba­ngo o maboko ma banyokoli.

9:28  Kasi awa babikaki, bakobaki lisusu kosala yo mabe. Okabaki bango lisusu o maboko ma banguna, baye banyokoloki bango lisusu. Yango wana bakomaki lisusu kobelela yo, mpe yo ut’o likolo oyokaki bango, mpe na bolingi bwa yo bonene obikisaki bango mbala mingi.

9:29  Okebisaki bango ’te bazongela Mobeko mwa yo, kasi bazalaki motó makasi, bayokaki maloba ma yo te, baboyaki kotosa mibeko mya yo, miye bato basengeli kondima mpo ’te babika. Bamilakisaki bato ba lolendo ; bakomaki motó makasi mpe baboyaki kotosa mibeko mya yo.

9:30  Mibu mingi okangaki motema, okebisaki bango na Elimo ya yo, otindaki baprofeta, kasi baboyaki kotosa bango. Bongo okabaki ba­ngo o maboko ma bato ba bikolo bya penepene.

9:31  Kasi na ngolu ya yo enene obomaki bango te, otikaki bango mpe te, mpo ozali Nzambe nta ngolu, nta bolamu.

9:32  Mpe sikawa, e Nzambe wa biso, yo Nzambe monene, wa bokasi mpe wa nsomo, okomemyaka bondeko mpe okolakisaka bolingi ; otala mpa­si ya biso lokola likambo like te, mpasi ekwelaki biso, ná bakonzi ná bankumu, ná banganga Nzambe ná baprofeta, ná batata ba biso ná bandeko ba biso banso, banda mikolo mya bakonzi ba Asur tee lelo.

9:33  Yo ozalaki na bosembo o makambo makwelaki biso, mpo olakisaki bo­ndeko ata tosalaki mabe.

9:34  Solo, bakonzi na bankumu na ba­nganga Nzambe, na bakonzi ba biso balandaki Mobeko mwa yo te, batalaki bitinda na mibeko mya yo se mpamba.

9:35  O eleko opesaki bango bokonzi bwa ekolo, na bomengo bonso okabelaki bango, mpe o mokili monene mpe mabelé malamu opesaki bango, basalelaki yo te, mpe batikaki masumu ma bango te.

9:36  Yango wana lelo tokomi se bao­mbo, o mokili opesaki bankoko ba biso, mpo ’te basepela mbuma na biloko bya ekolo.

9:37  Mbuma ina inso ikomi se ya bako­nzi, baye otindeli biso zambi tosalaki masumu ; bango bakosala na biso mpe na bibwele lokola balingi. Biso tokomi na mpasi mpenza !

Chapter 10

10:1  Mpo ya makambo mana manso, biso tokani mokano mwa solo mpe tokomi mwango o mo­nkanda. Bakambi, ba-Levi na banga­nga Nzambe ba biso batiaki nkombo ya bango o monkanda mona.

10:2  O monkanda mona bakomi nko­mbo ya moyangeli Neemia, mwana wa Kalkia, na Sidkia,

10:3  Seraya, Azaria, Yirmeya,

10:4  Pasekur, Amaria, Malkia,

10:5  Atus, Sebania, Maluk,

10:6  Karim, Meremot, Obadia,

10:7  Daniel, Gineton, Baru­k,

10:8  Mesulam, Abia, Miyamin,

10:9  Mazia, Bilgai, Semaya : bango banso banganga Nzambe.

10:10  Na nsima ba-Levi : Yozue, mwana wa Azania, Binui, mwana wa libota lya Kenadad, Kadmiel,

10:11  na bandeko ba bango Sekania, Odavia, Kelita, Pelaya, Kanan,

10:12  Mika, Rekob, Kasabia,

10:13  Zakor, Serebia, Sebania,

10:14  Odia, Bani na Kenani.

10:15  Bankumu ba ekolo : Paros, Pakat-Moab, Elam, Zatu, Bani,

10:16  Buni, Azgad, Bebai,

10:17  Adonia, Bigvai, Adin,

10:18  Ater, Kizkia, Azur,

10:19  Odia, Kasum, Besai,

10:20  Karif, Anatot, Nobai,

10:21  Magpia, Mesulam, Kezir,

10:22  Mesezabel, Sadok, Yadua,

10:23  Pelatia, Kanan, Anaya,

10:24  Osea, Kanania, Asub,

10:25  Alokes, Pilka, Sobek,

10:26  Rekum, Kasabna, Maseya,

10:27  Akia, Kanan, Anan,

10:28  Maluk, Karim, Baana.

10:29  Na mpe bato basusu banso, ba­nganga Nzambe, ba-Levi, bakengeli ba bizibeli bya Tempelo, bayembi, ba­salisi, baye banso bakabwani na bato bautaki o bikolo bisusu mpe balingi kolanda Mobeko mwa Nzambe, na mpe basi, bana babali na bana basi ba bango baye banso bakokisi mibu mya mayele,

10:30  bandimi kosala lokola bandeko ba bango, bankumu ba mboka : balayi ndai ’te bakomemya Mobeko mwa Nzambe, moye apesaki Moze, mosaleli wa Nzambe ; bo­ngo bakotosa mpe bakolanda bitinda, mimeseno na mibeko minso mya Yawe, Nzambe wa biso.

10:31  Yango wana tokobalisa bana basi ba biso na bato ba bikolo bisusu te ; mpe bana babali ba biso bakobala bana ba bampaya te.

10:32  Soko bato ba bikolo bisusu bakoya na biloko to ata nini mpo ya koteke byango o mokolo mwa Sabato to o mokolo mwa eyenga, tokosomba byango te. O mobu mwa nsambo tokotikela bato mbuma ya bilanga mpe tokolimbisa nyongo inso.

10:33  Tobimisi mpe mibeko miye : Mobu na mobu tokopesa ndambo ya mitako mpo ya misala mya Tempelo ya Nzambe wa biso,

10:34  mpo ya mampa ma libonza, mpo ya libonza lya mokolo na mokolo, mpo ya moboma mwa mokolo na mokolo, mpo ya mikolo mya Sabato na mikolo sanza ya sika ekobimaka, na mikolo mya eye­nga, mpo ya bilei bisantu, mpo ya miboma mya bofuti nyongo ya masumu ma bato ba Israel, mpe mpo ya milulu minso o Tempelo ya Nzambe wa biso.

10:35  Biso banganga Nzambe, ba-Levi na bato basusu, tobeti zeke mpo toyeba banani bakopesa nkoni mpo ya Tempelo ya Nzambe wa biso. Bongo mobu na mobu o mabota manso bato baya na nkoni mpo ya kopelisa móto mwa altare ya Yawe Nzambe wa biso, o elaka etindami mpe lokola ekomami o Mobeko.

10:36  Se bongo mobu na mobu baya na mbuma ya yambo ya bilanga bya biso, mbuma ya ya­mbo ya nzete inso mpo ya Tempelo ya Yawe.

10:37  Baya na bana babali ba ya­mbo ba mabota ma bango, bana ba yambo ba bibwele bya bango, lokola ekomami o Mobeko, na mpe bana ba yambo ba nyama inso inene na ike, baya na yango o Tempelo ya Yawe, bapesa yango na banganga Nzambe bakosalaka mosala o Ndako ya Nza­mbe wa biso.

10:38  Baya mpe na falini eleki malamu, na mbuma ya nzete inso, na vino ya sika mpe na mafuta ; bapesa yango na banganga Nzambe mpo batia yango o bibombelo bya Tempelo ya Nza­mbe wa biso ; bapesa mpe eteni ya zomi ya bilanga mpo ya ba-Levi. Bo­bele ba-Levi bakokamata biteni bya zomi o mboka inso izali na bilanga.

10:39  Nganga Nzambe moko, mwana wa Arone, akende na ba-Levi elongo, nta­ngo bakokamataka biteni bya zomi ; ba-Levi bakamata mpe eteni ya zomi ya biteni bya zomi binso mpo ya Tempelo ya Nzambe wa biso, mpe batia byango o bibombelo bya Te­mpelo.

10:40  Ba-Israel na ba-Levi bakobomba mbuma ya mampa, vino ya sika mpe mafuta o bibombelo bina, o esikamei bakobombaka biloko bya ndako esantu ; banganga Nzambe, bakengeli na bayembi bakozala mpe wana. Soko tosali bongo tokobosana Tempelo ya Nzambe wa biso te.

Chapter 11

11:1  Awa bayangeli ba ekolo bakei kofanda o Yeruzalem, bato basusu babeti zeke mpo ’te bapono moto moko o kati ya bato zomi afanda o Yeruzalem, engumba esantu ; basusu libwa bakoki kofanda o mboka isusu.

11:2  Bato babenisi baye ba­nso bandimi kofanda o Yeruzalem na motema mwa bango moko.

11:3  Tala nkombo ya bayangeli ba ekolo, bafandi o Yeruzalem. O mboka isusu ya Yuda bato basusu ba Israel bafandi : banganga Nzambe, ba-Levi, basalisi, na bana ba basali ba Salomo, bafandi, moto na moto o mabelé mpe o mboka ya ye moko.

11:4  O Yeruzalem efandi ndambo ya bato ba libota lya Yuda mpe ba libota lya Benyamin. O libota lya Yuda ezalaki : Ataya, mwana wa Uzia, mwana wa Zekaria, mwana wa Amaria, mwana wa Sefatia, mwana wa Malalel wa libota lya Peres ;

11:5  na Maseya, mwana wa Baruk, mwana wa Kolkoze, mwana wa Kazaya, mwana wa Adaya, mwana wa Yoyarib, mwana wa Zekaria, wa libota lya Sela.

11:6  Bankoko ba Peres, baye bafandi o Yeruzalem bazalaki bato 468, banso bato ba mpiko.

11:7  O libota lya Benyamin ezalaki : Salu, mwana wa Mesulam, mwana wa Yoed, mwana wa Pedaya, mwana wa Kolaya, mwana wa Maseya, mwana wa Itiel, mwana wa Yesaya,

11:8  na ba­ndeko ba ye Gabai na Salai : bato 928 ;

11:9  Yoel, mwana wa Zikri, azalaki moyangeli wa bango ; Yeyuda, mwana wa Asenua, azalaki moto wa babale mpo ya koyangela mboka.

11:10  O libota lya banganga Nzambe, Yedaya, mwana wa Yoyarib, Yakin,

11:11  Seraya, mwana wa Kilkia, mwana wa Mesulam, mwana wa Sadok, mwa­na wa Merayot, mwana wa Akitub, nkumu wa Tempelo ya Nzambe ;

11:12  na mpe bandeko ba bango bakosalaka mosala o Tempelo : bato 822 ; Adya, mwana wa Yerokam, mwana wa Pelalia, mwana wa Amsi, mwana wa Zakaria, mwana wa Pasekur, mwana wa Malkia,

11:13  na bandeko ba ye, ba­nkumu ba mabota : bato 242 ; na Amasai, mwana wa Azarel, mwana wa Aksai, mwana wa Mesilemot, mwana wa Imer,

11:14  na bandeko ba ye, bato ba mpiko : 128. Zabdiel, mwana wa Agadol, azalaki moyangeli wa ba­ngo.

11:15  O libota lya ba-Levi ezalaki : Semaya, mwana wa Asub, mwana wa Asrikam, mwana wa Kasabia, mwana wa Buni ;

11:16  Sabtai na Yozabad, baya-ngeli ba ba-Levi bazalaki kotala misala mya libanda lya Tempelo ya Nza­mbe ;

11:17  Matania, mwana wa Mika, mwana wa Zabdi, mwana wa Asaf, oyo azalaki koyembisa bato nzembo mpe kosambela na bango bisambo bya kotondo Nzambe ; Bakbukia, mo­to wa babale o kati ya bandeko ba ye ; Obadia, mwana wa Samua, mwana wa Galal, mwana wa Yedutun.

11:18  Ba-Levi ba engumba esantu bazalaki 284.

11:19  Bakengeli ba bizibeli bya Ndako ya Nzambe : Akub, Talmon na ba­nde­ko ba bango : bazalaki 172.

11:20  Bato basusu ba Israel, banganga Nzambe na ba-Levi bafandi o mboka inso ya Yuda, moto na moto o mabelé ma ye moko.

11:21  Basalisi bafandi o Ofel ; Sika na Gispa bazalaki koyangela bango.

11:22  Moya-ngeli wa ba-Levi ba Yeruzalem : Uzi, mwana wa Bani, mwana wa Kasabia, mwana wa Matania, mwana wa Mika, wa libota lya Asaf ; bazalaki bayembi o Tempelo ya Nzambe ;

11:23  mpo mokonzi apesaki bango mobeko, alakisaki boniboni bayembi basala mosala mwa bango mokolo na mokolo.

11:24  Petakia, mwana wa Mesazebel, wa libota lya Zera, mwana wa Yuda, azalaki penepene na mokonzi mpo ’te atala makambo manso ma bato.

11:25  O mboka inso ya esobe, bana ba Yuda bafandi o Kiriat-Arba, o Dibon, o Yekabsel mpe o bituka bya penepene,

11:26  o Yesua, o Molada, o Bet-Pelet,

11:27  o Kasar-Sual, o Berseba mpe o bituka bya penepene,

11:28  o Siklag, o Mekona mpe o bituka bya penepene,

11:29  o En-Rimon, o Sorea, o Yarmut,

11:30  o Zanoa, o Adulam, o Lakis, o Azeka mpe o bituka bya penepene ; bango bakei kofanda ut’o Berseba tee lo­bwaku la Inom.

11:31  Bana ba Benyamin bafandi o Geba, Mikmas, Aya, Betel mpe o bituka bya penepene,

11:32  Anatot, Nob, Anania,

11:33  Asor, Rama, Bitayim,

11:34  Kadid, Seboyim, Nebalat,

11:35  Lod na Ono, o ‘Lobwaku la basali’.

11:36  Ba-Levi basusu bafandi o Yuda mpe o mokili mwa Benyamin.

Chapter 12

12:1  Tala awa nkombo ya banganga Nzambe na ba-Levi bauti o boombo elongo na Zorobabel, mwana wa Sealtiel, na Yozue : Seraya, Yirmeya, Esdra,

12:2  Amaria, Maluk, Atus,

12:3  Sekania, Rekum, Meremot,

12:4  Ido, Gineton, Abia,

12:5  Miyamin, Madia, Bilga,

12:6  Semaya na Yoyarib, Yedaya,

12:7  Salu, Amok, Kilkia, Yedaya ; ba­ngo bazalaki bakonzi ba banganga Nzambe na bandeko ba bango o eleko ya Yozue.

12:8  Ba-Levi : Yozue, Binui, Kadmiel, Serbia, Yeyuda, Matania, na bandeko ba ye bazalaki koyembisa nzembo ya kotondo Nzambe.

12:9  Bandeko ba ba­ngo Bakbukia na Uni bazalaki kosalisa bango o mosala mwa kokengele bizibeli.

12:10  Yozue aboti Yoyakim ; Yoyakim aboti Eliasib ; Eliasib aboti Yoyada ;

12:11  Yoyada aboti Yokanan mpe Yokanan aboti Yadua.

12:12  O eleko ya Yoyakim, bakonzi ba mabota ma banganga Nzambe bazalaki : Meraya o libota lya Seraya ; Kanania o libota lya Yirmeya ;

12:13  Mesulam o libota lya Esdra ; Yokanan o libo­ta lya Amaria ;

12:14  Yonatan o libota lya Maluk ; Yozefu o libota lya Sebania ;

12:15  Adna o libota lya Karim ; Kelkai o libota lya Merayot ;

12:16  Zekaria o libota lya Ido ; Mesulam o libota lya Gineton ;

12:17  Zikri o libota lya Abia ; o mabota ma Minyamin na Moadia : Piltai ;

12:18  Samua o libota lya Bilga ; Yonatan o libota lya Semaya ;

12:19  Matenai o libota lya Yoyarib ; Uzi o libota lya Yedaya ;

12:20  Kalai o libota lya Salai ; Eber o libota lya Amok ;

12:21  Kasabia o libota lya Kilkia ; Netanel o libota lya Yedaya.

12:22  O eleko ya Eliasib, Yoyada, Yokanan na Yadua, bakomi nkombo ya bakonzi ba ba-Levi na banganga Nza­mbe o buku tee o eleko ya Dario, mokonzi wa Persi.

12:23  Nkombo ya bakonzi ba ba-Levi ikomami o buku ya Bikela tee o eleko ya Yokanan, nkoko wa Eliasib.

12:24  Bakonzi ba ba-Levi bazalaki : Kasabia, Serabia, Yozue, Binui, Kadmiel, na bandeko ba bango bazalaki penepene mpo ya koyemba lingomba na lingomba, lokola Davidi, moto wa Nzambe, atindaki.

12:25  Ba­ngo baye : Matania, Bakbukia na Oba­dia ; kasi Mesulam, Talmon na Akub bazalaki bakengeli ba bizibeli bya Tempelo.

12:26  Bango banso bazalaki kosala mosala o eleko ya Yoyakim, mwana wa Yozue, nkoko wa Yosadak, mpe o eleko ya moyangeli Neemia na nganga Nzambe mpe moteyi Esdra.

12:27  Mpo ya eyenga ya bobenisi lopango la Yeruzalem bakei koluka ba-Levi o bisika binso bazalaki kofanda, babengi bango o Yeruzalem mpo ’te bakoka kosepela eyenga ya bobenisi lopango na esengo, bayemba nzembo ya botondi Nzambe na miziki mya migbala, lokombe na nzenze.

12:28  Bayembi basangani wana, bautaki o ekolo penepene na Yeruzalem mpe o mboka ya bato ba Netofa,

12:29  ut’o Bet-Agilgal, bilanga bya Geba mpe bya Azmavet, bayembi batongaki mboka ya bango penepene na Yeruzalem.

12:30  Banganga Nzambe na ba-Levi bamipetoli, na nsima bapetoli bato ba­nso, bizibeli bya mboka na mpe lopango lonene.

12:31  Natindi bakonzi ba Yuda babuta lopango mpe nasali mangomba mabale ma bayembi. Bato ba lingomba lya yambo batamboli o lopango, bakei o loboko la mobali tee ‘Ezibeli ya Bipoli’.

12:32  Baye batamboli nsima ya bango : Osaya na bakonzi basusu ba Yuda ;

12:33  bakisa Azaria, Esdra, Mesulam,

12:34  Yeyuda, Benyamin, Semaya na Yirmeya,

12:35  baye baponomi o kati ya banganga Nzambe mpe bapesaki ba­ngo mindule ; na nsima Zekaria, mwana wa Yonatan, mwana wa Semaya, mwana wa Matania, mwana wa Mika, mwana wa Zakur, mwana wa Asaf,

12:36  elongo na bandeko ba ye Semaya, Azarel, Milalai, Gilalai, Mayi, Netanel, Yeyuda, Kanani ; bango banso bamemi biyembeli bya Davidi, moto wa Nzambe. Moteyi Esdra azalaki kokamba bango.

12:37  O ‘Ezibeli ya Liziba’ basimbi nzela ekokende o Engu­mba ya Davidi, bakei o efelo ya lopango tee o ndako inene ya Davidi mpe o ‘Ezibeli ya Mai’, epai ya Esti.

12:38  Bato ba lingomba lya mabale bata­mboli o loboko la mwasi. Ngai nalandi bango elongo na bakonzi basusu ba ekolo ; toleki penepene na lopango tee tolandi ‘Linongi lya Fulu’ mpe ‘Efelo enene’ ;

12:39  na nsima toleki likolo lya ‘Ezibeli ya Efraim’, ‘Ezibeli ya Yesana’, ‘Ezibeli ya Mbisi’, ‘Linongi lya Kananel’, ‘Linongi lya Nkama’ tee ‘Ezibeli ya Mpata’. Totelemi o ‘Ezibeli ya Bakengeli’.

12:40  Mangomba mana mabale bakei ko­teleme o Tempelo ya Nzambe. Nazalaki wana na ndambo ya bazuzi,

12:41  na banganga Nzambe Eliakim, Maseya, Minyamin, Mika, Elioenai, Zekaria, Kanania : bazalaki na mindule.

12:42  Bakisa Maseya, Semaya, Eleazar, Uzi, Yokanan, Malkia, Elam na Ezer. Bayembi babandi koyemba ; Yizraya ayangeli bango.

12:43  O mokolo mona babonzeli Nza­mbe miboma ebele, mpe bato basepeli mingi, mpo Nzambe ayokisi bango esengo enene. Basi na bana bazalaki kosepela ; mpe esengo o Yeruzalem ezalaki koyokana mosika.

12:44  O mokolo mona batii bato bakengele bibombelo bya biloko, biye bazwaki ntango bato bayaki kofuta mbuma ya yambo na biteni bya zomi bya biloko. Bango basengeli koya-mba biloko biuti o bilanga penepene na mboka, mpe basengeli kopesa bya­ngo na banganga Nzambe mpe na ba-Levi, se lokola mobeko motindi. Mosala mwa banganga Nzambe na ba-Levi mozalaki kosepelisa ba-Yuda.

12:45  Bazalaki kotosa makambo ma­nso matali mosala mwa Nzambe wa bango, na mpe mosala mwa bopetoli. Bayembi na bakengeli ba bizibeli bya Tempelo balandi mobeko mwa Davidi na Salomo, mwana wa ye.

12:46  Ut’o eleko ya Davidi na Asaf, bayangeli ba bayembi bazalaki, na mpe nzembo ya bokumisi mpe ya boto­ndi Nzambe.

12:47  Bongo o eleko ya Zorobabel mpe ya Neemia, ba-Israel banso bazalaki kopesa bayembi na bakengeli likabo lya biloko mokolo na mokolo. Bapesaki ba-Levi biloko bisantu, mpe ba-Levi bazalaki kopesa bana ba Arone byango.

Chapter 13

13:1  O ntango ena bazalaki kotanga o buku ya Moze o miso ma bato banso esika ekomami ’te bakoki : « kondima ba-Amon mpe ba-Moab o lisanga lya Nzambe mokolo moko te.

13:2  Mpamba te, o ntango bakutanaki na ba-Israel, bapesaki ba­ngo mampa na mai te ; bafutaki mpe Balaam mosolo mpo ’te akanela ba­ngo ; kasi Nzambe wa biso abongoli maloba mabe makoma bobenisi. »

13:3  Eyoki bango maloba ma Mobeko, balongoli bampaya banso o lisanga lya ba-Israel.

13:4  Kasi mwa liboso nganga Nzambe Eliasib azalaki na mosala mwa kokengele bibombelo bya Tempelo ya Nzambe wa biso ; ye azalaki ndeko wa Tobia.

13:5  Abongiselaki Tobia oyo ndako enene bobele o esika bazalaka kotia mabonza, mpaka ya malasi, bisaleli, biteni bya zomi bya mbuma ya mampa, vino na mafuta, na biloko binso basengelaki kopesa ba-Levi, ba­yembi na bakengeli, na mpe makabo mpo ya banganga Nzambe.

13:6  O mikolo mina ngai nazalaki o Yeruzalem te, mpo o mobu mwa ntuku isato na mibale mwa Artaksasta, mokonzi wa Babilon, nazongaki epai ya mokonzi. Kasi nsima ya mwa mikolo nasengi mokonzi nzela ya kozonga o mboka ;

13:7  bongo nazongi o Yeruzalem. Namoni mabe Eliasib asalaki awa apesaki Tobia ndako enene o lopango la Tempelo ya Nzambe.

13:8  Nayoki mabe mpenza mpe nabimisi biloko binso bya ndako ya Tobia.

13:9  Na nsima natindi ’te bapetola ndako mpe bazongisa wana lisusu bisaleli bya Tempelo ya Nzambe, na mabo­nza na mpaka ya malasi.

13:10  Nayoki mpe ’te bapesaki ba-Levi likabo lya bango te ; bongo ba-Levi na bayembi baye bazalaki kosala mosala bakimaki, moto na moto o mboka ya ye.

13:11  Napaleli bazuzi, natuni bango : « Mpo nini batiki Tempelo ya Nzambe mpamba boye ? » Ya­ngo wana nasangisi bango banso mpe nazongisi bango o misala mya bango.

13:12  Bongo ba-Yuda banso bayei na biteni bya zomi bya mbuma ya mampa, vino ya sika mpe mafuta mpo ya kobomba byango o bibombelo.

13:13  Natii bato bakengele bibombelo : nganga Nzambe Selemia, moteyi wa Mobeko Sadok na mo-Levi Pedaya ; napesi bango moto asalisa bango : Kanan, mwana wa Zakur, nkoko wa Matania, mpo bango banso bazalaki bato ba bosembo : basengelaki kokabela ba­ndeko ba bango biloko.

13:14  Mpo ya makambo mana manso, kanisa ngai, e Nzambe wa ngai, obosana te misala nasalaki na limemya mpo ya kobo-ngisa Tempelo ya Nzambe wa ngai mpe misala misusu.

13:15  O mikolo mina namoni o mokili mwa Yuda ’te bato bazalaki kokamola mbuma ya vino o o mokolo mwa Sabato ; basusu bazalaki koya na maboke ma mbuma ya mampa, maye bazalaki komemisa mpunda : mbuma ya vino, mbuma ya figi na mikumba misusu ndenge na ndenge mpo ’te baya na byango o Yeruzalem o mokolo mwa Sabato. Napaleli bango ntango bakei koteke biloko bya bango.

13:16  Bato ba Tiro, baye bafandi o Yeruzalem bayaki na mbisi mpe na biloko nde­nge na ndenge, bateki byango na bato ba Yuda mpe o Yeruzalem o mikolo mya Sabato.

13:17  Yango wana napaleli bankumu ba Yuda, natuni bango : « Bomoni te ’te bozali kosala mabe na bosantoli mokolo mwa Sabato ?

13:18  Ba­nkoko ba bino basalaki bobele bongo te ? Yango wana Nzambe wa biso ati­ndelaki biso mpe engumba eye mpasi iye inso. Awa bozali kosantola mokolo mwa Sabato, bozali kokolisa Nka­nda ya Nzambe o Israel. »

13:19  Bongo ntango bizibeli bya Yeruzalem bikomi na molili, na mpo­kwa liboso lya Sabato, natindi ’te baka­nga bizibeli bya mboka mpe bafungola byango bobele nsima ya Sabato. Natii basaleli ba ngai penepene na bizibeli mpo ’te moto moko te akoto na mikumba o mokolo mwa Sabato.

13:20  Bato ba mombongo na baye bayaki kotekisa biloko ndenge na ndenge ba­lali o libanda lya Yeruzalem, mbala yoko to ibale.

13:21  Nagangeli bango mpe nalobi : « Mpo nini bolali awa na butu penepene na lopango la mboka ? Soko bosali yango lisusu, nakokanga bino ! » Uta mokolo mona bayei lisusu o mokolo mwa Sabato te.

13:22  Na nsima nalobi na ba-Levi bakende komipetola mpo ’te bakengele bizibeli bya mboka mpo ’te basantisa mokolo mwa Sabato. Mpo ya makambo mana manso, okanisa ngai, e Nzambe wa ngai, mpe na ngolu ya yo enene oyokela ngai mawa.

13:23  O mikolo mina namoni ba-Yuda basusu babalaki basi ba Asdod, ba Amon mpe ba Moab.

13:24  O kati ya bana ba bango, basusu bazalaki koloba lokota la ba-Asdod to la bikolo bisusu, bayebaki lokota la ba-Yuda lisusu te.

13:25  Napaleli bango mpe nakaneli bango ; nabeti babali basusu mpe nabili bango nsuki ; na nsima nalayisi bango ndai na Nkombo ya Nzambe boye : « Bobalisa bana ba bino na bana ba bango te, mpe bokamata bana basi ba bango te mpo ’te babala bana ba bino !

13:26  Na likambo lyango Salomo, mokonzi wa Israel, asalaki mabe te ? O kati ya bikolo binso, mokonzi ata moko akokanaki na ye te ; Nzambe alingaki ye mpe alubolaki ye moko­nzi wa Israel mobimba. Nzokande basi bauta bakweisaki ata ye o nzela ya masumu.

13:27  Bongo bolingi ’te toyoka lisusu ’te bino mpe bokosalaka mabe mana : boboyi Nzambe wa biso na bobali basi bauta ? »

13:28  Mwana moko wa Yoyada, mwana wa Eliasib, nga­nga Nzambe mokonzi, azalaki bo­kilo wa Sanbalat, moto wa Koron. Nabengani ye mosika na ngai.

13:29  E Nza­mbe wa ngai, okanisa mabe ma ba­ngo, awa babebisi mosala mwa bo­nganga mpe babomi bondeko okataki na banganga Nzambe mpe na ba-Levi.

13:30  Napetoli bango na bauta banso, nabongisi mibeko mitali banganga Nza­mbe na ba-Levi, mpe nazongisi bango moto na moto o mosala mwa ye.

13:31  Napesi mpe mobeko mpo ya koya na nkoni o elaka etindami, na mpe mbuma ya yambo. E Nzambe wa ngai, okanisa mana manso, mabongela ngai !