CopSahBible2 - Judith

Chapter 1

1:1  ϩⲣⲁⲓ ϩⲛ ⲧⲙⲉϩⲙⲛⲧⲥⲛⲟⲟⲩⲥ ⲛⲣⲟⲙⲡⲉ ⲛⲧⲙⲛⲧⲉⲣⲟ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲁⲓ ⲉⲛⲧⲁϥⲣⲣⲣⲟ ⲉϫⲛ ⲛⲁⲥⲥⲩⲣⲓⲟⲥ ϩⲛ ⲛⲓⲛⲉⲩⲏ ⲧⲛⲟϭ ⲙⲡⲟⲗⲓⲥ ϩⲛ ⲛⲉϩⲟⲟⲩ ⲛⲁⲣⲫⲁⲝⲁⲇ ⲉⲛⲧⲁϥⲣⲣⲣⲟ ⲉϫⲛ ⲙⲙⲏⲇⲟⲥ ϩⲛ ⲛⲉⲕⲃⲁⲇⲁⲛⲟⲥ

1:2  ⲁϥⲕⲱⲧ ⲛⲧⲉⲕⲃⲁⲇⲁⲛⲟⲥ ⲛϩⲉⲛⲥⲟⲃⲧ ⲉⲩⲕⲱⲧⲉ ⲛϩⲉⲛⲱⲛⲉ ⲉⲩⲕⲉϩⲕⲱϩ ⲉⲩⲉⲓⲣⲉ ⲛϣⲟⲙⲛⲧ ⲙⲙⲁϩⲉ ⲛⲟⲩⲱⲥϣⲥ ⲁⲩⲱ ⲥⲟⲟⲩ ⲙⲙⲁϩⲉ ⲛϣⲓⲏ ⲁϥϫⲉⲥⲧⲡⲥⲟⲃⲧ ⲛϣⲃⲉ ⲙⲙⲁϩⲉ ⲁⲩⲱ ⲡⲉϥⲟⲩⲱϣⲥ ⲛⲧⲁⲓⲟⲩ ⲙⲙⲁϩⲉ

1:3  ⲁϥⲕⲁⲛⲉⲥⲡⲩⲣⲅⲟⲥ ⲉϫⲛ ⲛⲉⲥⲡⲩⲗⲏ ⲉⲩⲉⲓⲣⲉ ⲛϣⲉ ⲙⲙⲁϩⲉ ⲧⲥⲛⲧⲉ ⲙⲡⲉⲥⲟⲩⲱϣⲥ ⲡⲉ ⲥⲉ ⲙⲙⲁϩⲉ

1:4  ⲁϥⲕⲱⲧ ⲛⲛⲉⲥⲡⲩⲗⲏ ⲉⲩϫⲟⲥⲉ ⲛϣⲃⲉ ⲙⲙⲁϩⲉ ⲁⲩⲱ ⲡⲉⲥⲟⲩⲱϣⲥ ⲛϩⲙⲉ ⲙⲙⲁϩⲉ ⲉⲡⲉⲓ ⲉⲃⲟⲗ ⲛⲧⲉϥϭⲟⲙ ⲙⲛ ⲧⲉϥⲧⲓⲁⲥⲧⲁⲥⲓⲥ ⲙⲛ ⲛⲉϥⲧⲣⲓⲥⲧⲁⲧⲏⲥ ⲙⲛ ⲛⲉϥⲧⲱϣ ⲛⲛⲉϥⲣⲙⲣⲁⲧⲟⲩ

1:5  ⲁϥⲉⲓⲣⲉ ⲛⲟⲩⲛⲟϭ ⲙⲡⲟⲗⲉⲙⲟⲥ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲛϭⲓ ⲡⲣⲣⲟ ⲛⲁⲃⲟⲩⲭⲟⲇⲟⲛⲟⲥⲟⲣ ⲛⲛⲁϩⲣⲛ ⲁⲣⲫⲁⲝⲁⲇ ⲡⲣⲣⲟ ϩⲛ ⲧⲛⲟϭ ⲛⲥⲱϣⲉ ⲉⲧⲉⲡⲁⲓ ⲡⲉ ϩⲛ ⲛⲧⲟϣ ⲛϩⲣⲁⲅⲁⲩ:

1:6  ⲁⲩⲧⲱⲙⲛⲧ ⲉⲣⲟϥ ⲛϭⲓ ⲛⲉⲧⲟⲩⲏϩ ⲧⲏⲣⲟⲩ ϩⲛ ⲧⲟⲣⲓⲛⲏ ⲙⲛ ⲛⲉⲧⲟⲩⲏϩ ϩⲙ ⲡⲉⲩⲫⲣⲁⲇⲏⲥ ⲙⲛ ⲧⲓⲅⲣⲓⲥ ⲁⲩⲱ ϩⲩⲇⲁⲥⲡⲏⲥ ⲙⲛ ⲛⲥⲱϣⲉ ⲛⲁⲣⲓⲱⲭ ⲡⲣⲣⲟ ⲛⲉⲗⲉⲙⲉⲱⲛ ⲁⲩⲉⲓ ⲛϭⲓ ⲛϩⲉⲑⲛⲟⲥ ⲉⲩⲛⲟϭ ⲙⲡⲁⲣⲁⲇⲁⲝⲓⲥ ⲉⲛⲁϣⲱⲥ ⲉϫⲛ ⲛϣⲏⲣⲉ ⲛⲭⲉⲗⲉⲟⲩⲗ:

1:7  ⲁϥϫⲟⲟⲩ ⲛϭⲓ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲛⲥⲁ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲙ ⲡⲉⲩⲫⲣⲁⲧⲏⲥ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲛ ⲙⲡⲉⲣⲥⲏⲥ ⲙⲛⲟⲩⲟⲛ ⲛⲓⲙ ⲉⲧϣⲟⲟⲡ ϩⲙ ⲡⲉⲙⲛⲧ ⲙⲛ ⲛⲉⲧϣⲟⲟⲡ ϩⲛ ⲧⲕⲓⲗⲓⲕⲓⲁ ⲙⲛ ⲇⲁⲙⲁⲥⲕⲟⲥ ⲙⲛ ⲡⲗⲓⲃⲁⲛⲟⲥ ⲙⲛ ⲡⲁⲛⲧⲓⲗⲓⲃⲁⲛⲟⲥ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ⲙⲡⲉⲙⲧⲟ ⲉⲃⲟⲗ ⲛⲧⲡⲁⲣϩⲁⲗⲓⲁ

1:8  ⲙⲛ ⲛⲛϩⲉⲑⲛⲟⲥ ⲉⲧϩⲙ ⲡⲕⲁⲣⲙⲏⲗⲟⲥ ⲙⲛ ⲧⲅⲁⲗⲁⲁⲇ ⲙⲛ ⲧⲅⲁⲗⲓⲗⲁⲓⲁ ⲉⲧϩⲛ ⲧⲡⲉ ⲙⲛ ⲧⲛⲟϭ ⲛⲥⲱϣⲉ ⲛⲛⲉⲥⲣⲏⲙ

1:9  ⲙⲛ ⲟⲩⲟⲛ ⲛⲓⲙ ⲉⲧϩⲛ ⲧⲥⲁⲙⲁⲣⲓⲁ ⲙⲛ ⲛⲉⲥⲡⲟⲗⲓⲥ ⲁⲩⲱ ⲡⲓⲕⲣⲟ ⲙⲡⲓⲟⲣⲇⲁⲛⲏⲥ ϣⲁ ⲑⲓⲉⲣⲟⲩⲥⲁⲗⲏⲙ ⲙⲛ ⲃⲉⲇⲁⲛⲏ ⲙⲛ ⲭⲉⲗⲗⲟⲩⲥ ⲙⲛ ⲕⲁⲇⲏⲥ ⲁⲩⲱ ⲡⲣⲣⲟ ⲛⲕⲏⲙⲉ ⲧⲁⲫⲛⲁⲥ ⲙⲛ ϩⲣⲁⲙⲉⲥⲥⲏ ⲁⲩⲱ ⲅⲉⲥⲥⲉⲙ ⲧⲏⲣϥ

1:10  ϣⲁⲛⲧϥⲉⲓ ⲉϩⲣⲁⲓ ⲉⲧϫⲁⲁⲛⲉ ⲙⲛ ⲙⲛϥⲉ ⲁⲩⲱ ⲟⲩⲟⲛ ⲛⲓⲙ ⲉⲧϣⲟⲟⲡ ϩⲛ ⲕⲏⲙⲉ ϣⲁⲛⲧϥⲉⲓ ⲉϩⲣⲁⲓ ⲉϫⲛ ⲛⲧⲟϣ ⲛⲛⲉϭⲟⲟϣ

1:11  ⲁⲩⲱ ⲛⲉⲧⲟⲩⲏϩ ϩⲙ ⲡⲕⲁϩ ⲧⲏⲣϥ ⲁⲩⲥⲱϣϥ ⲙⲡϣⲁϫⲉ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲁⲥⲥⲩⲣⲓⲟⲥ ⲙⲡⲟⲩⲉⲓⲛ ⲛⲙⲙⲁϥ ⲉⲡⲡⲟⲗⲉⲙⲟⲥ ⲉⲃⲟⲗ ϫⲉ ⲙⲡⲟⲩⲣϩⲟⲧⲉ ϩⲏⲧϥ ⲁⲗⲗⲁ ⲛⲉϥϣⲟⲟⲡ ⲙⲡⲉⲩⲙⲧⲟ ⲉⲃⲟⲗ ⲛⲑⲉ ⲛⲟⲩⲣⲱⲙⲉ ⲛⲟⲩⲱⲧ ⲁⲩⲧⲥⲧⲟ ⲉⲃⲟⲗ ⲛⲛⲉϥϥⲁⲓϣⲓⲛⲉ ϩⲛ ⲟⲩⲥⲱϣϥ ⲙⲡⲉⲩⲙⲧⲟ ⲉⲃⲟⲗ

1:12  ⲛⲁⲃⲟⲩⲭⲟⲇⲟⲛⲟⲥⲟⲣ ⲁϥϭⲱⲛⲧ ⲉϫⲙ ⲡⲉⲓⲕⲁϩ ⲧⲏⲣϥ ⲁϥⲱⲣⲕ ⲙⲡⲉⲑⲣⲟⲛⲟⲥ ⲛⲧⲉϥⲙⲛⲧⲉⲣⲟ ⲉϥϫⲱ ⲙⲙⲟⲥ ϫⲉ ϯⲛⲁⲉⲓⲣⲉ ⲙⲡⲁⲕⲃⲁ ϩⲙ ⲡⲧⲟϣ ⲛⲧⲗⲓⲗⲓⲕⲓⲁ ⲙⲛ ⲇⲁⲙⲁⲥⲕⲟⲥ ⲙⲛ ⲧⲥⲩⲣⲓⲁ ⲉⲧⲣⲉⲧⲁⲥⲏϥⲉ ⲧⲁⲕⲟⲟⲩ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲙ ⲙⲱⲁⲃ ⲙⲛ ⲛϣⲏⲣⲉ ⲛⲁⲙⲙⲱⲛ ⲙⲛ ⲇⲓⲓⲟⲩⲇⲁⲓⲁ ⲧⲏⲣⲥ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲛ ⲕⲏⲙⲉ ϣⲁⲛⲧϥⲉⲓ ⲉϩⲣⲁⲓ ⲉϫⲛ ⲛⲧⲟϣ ⲛⲑⲁⲗⲁⲥⲥⲁ ⲥⲛⲧⲉ

1:13  ⲁϥⲥⲣⲙⲙⲗⲁϩ ⲉⲃⲟⲗ ⲛⲛⲁϩⲣⲛ ⲁⲣⲫⲁⲝⲁⲇ ⲡⲣⲣⲟ ϩⲣⲁⲓ ϩⲛ ⲧⲙⲉϩⲙⲛⲧⲥⲁϣϥⲉ ⲛⲣⲟⲙⲡⲉ ⲁϥⲁⲙⲁϩⲧⲉ ϩⲙ ⲡⲉϥⲡⲟⲗⲉⲙⲟⲥ ⲁϥⲕⲧⲟ ⲛⲧϭⲟⲙ ⲧⲏⲣⲥ ⲛⲁⲣⲫⲁⲝⲁⲇ ⲙⲛ ⲛⲉϥϩⲧⲱⲱⲣ ⲙⲛ ⲛⲉϥϩⲁⲣⲙⲁ ⲧⲏⲣⲟⲩ

1:14  ⲁϥⲣϫⲟⲉⲓⲥ ⲉϫⲛ ⲛⲉϥⲡⲟⲗⲓⲥ ⲁϥⲧⲁϩⲟϥ ϣⲁ ⲛⲉⲕⲃⲁⲇⲁⲛⲟⲥ ⲁϥⲁⲙⲁϩⲧⲉ ⲙⲡⲉⲥⲡⲩⲣⲅⲟⲥ ⲁϥϣⲱⲗ ⲛⲛⲉⲥⲡⲗⲁⲧⲓⲁ ⲡⲉⲥⲕⲟⲥⲙⲟⲥ ⲁϥⲕⲁⲁϥ ⲛⲁⲥ ⲉⲩⲛⲟϭⲛⲉϭ

1:15  ⲁϥϫⲓ ⲛⲁⲣⲫⲁⲝⲁⲇ ϩⲙ ⲡⲧⲟⲟⲩ ⲛϩⲣⲁⲅⲁⲩ ⲁϥⲕⲟⲛⲥϥ ϩⲣⲁⲓ ϩⲛ ⲛⲉϥϫⲉⲃⲏⲗ ⲁⲩⲱ ⲁϥⲃⲟⲧϥ ⲉⲃⲟⲗ ϣⲁϩⲣⲁⲓ ⲉⲡⲉϩⲟⲟⲩ ⲉⲧⲙⲙⲁⲩ

1:16  ⲁϥⲕⲧⲟϥ ⲛⲙⲙⲁⲩ ⲛⲧⲟϥ ⲙⲛ ⲧⲉϥⲁϥϣⲏ ⲛⲛⲣⲱⲙⲉ ⲛⲛⲣⲉϥⲙⲓϣⲉ ⲉⲧⲛⲁϣⲱⲟⲩ ⲉⲙⲁⲧⲉ ⲁⲩⲱ ⲛⲉϥϩⲙ ⲡⲙⲁ ⲉⲧⲙⲙⲁⲩ ⲉϥϯ ⲙⲙⲟϥ ⲛⲧⲙⲛⲧϣⲛⲁ ⲙⲛ ⲡⲟⲩⲛⲟϥ ϩⲙ ⲡⲥⲱ ⲙⲡⲏⲣⲡ ⲙⲛ ⲡⲉϥⲙⲏⲏϣⲉ ⲛⲁⲁϣⲉϫⲟⲩⲱⲧ ⲛϩⲟⲟⲩ

Chapter 2

2:1  ϩⲛ ⲧⲙⲉϩⲙⲛⲧϣⲙⲏⲛⲉ ⲛⲣⲟⲙⲡⲉ ⲛⲥⲟⲩϫⲟⲩⲧⲥⲛⲟⲟⲩⲥ ⲙⲡϣⲟⲣⲡ ⲛⲉⲃⲟⲧ ⲡϣⲁϫⲉ ⲁϥϣⲱⲡⲉ ϩⲙ ⲡⲏⲓ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲉⲣⲡⲉϥⲕⲃⲁ ⲙⲛ ⲡⲕⲁϩ ⲧⲏⲣϥ ⲕⲁⲧⲁ ⲑⲉ ⲉⲛⲧⲁϥϫⲟⲟⲥ

2:2  ⲁϥⲙⲟⲩⲧⲉ ⲉⲛⲉϥϩⲙϩⲁⲗ ⲧⲏⲣⲟⲩ ⲙⲛ ⲛⲉϥⲙⲉⲅⲓⲥⲧⲁⲛⲟⲥ ⲧⲏⲣⲟⲩ ⲁϥϫⲱ ⲛⲙⲙⲁⲩ ⲙⲡⲙⲩⲥⲧⲏⲣⲓⲟⲛ ⲙⲡⲉϥϣⲟϫⲛⲉ ⲁϥϫⲱⲕ ⲉⲃⲟⲗ ⲛⲧⲕⲁⲕⲓⲁ ⲧⲏⲣⲥ ⲙⲡⲕⲁϩ ⲉⲃⲟⲗ ϩⲛⲣⲱϥ

2:3  ⲁⲩⲕⲣⲓⲛⲉ ϩⲱⲟⲩ ⲉⲧⲁⲕⲉⲥⲁⲣⲝ ⲛⲓⲙ ⲛⲁⲓ ⲉⲧⲉⲙⲡⲟⲩⲟⲩⲁϩⲟⲩ ⲛⲥⲁ ⲡϣⲁϫⲉ ⲛⲣⲱϥ ⲛⲁⲃⲟⲩⲭⲟⲇⲟⲛⲟⲥⲟⲣ

2:4  ⲁⲥϣⲱⲡⲉ ⲇⲉ ⲛⲧⲉⲣⲉⲥⲟⲩⲱ ⲙⲡⲉϥϣⲟϫⲛⲉ ⲁⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲛⲁⲥⲥⲩⲣⲓⲟⲥ ⲙⲟⲩⲧⲉ ⲉⲟⲗⲟⲫⲉⲣⲛⲏⲥ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲧⲉϥϭⲟⲙ ⲉⲡⲙⲉϩⲥⲛⲁⲩ ⲡⲉ ⲙⲛⲛⲥⲱϥ ⲡⲉϫⲁϥ ⲛⲁϥ ϫⲉ

2:5  ⲛⲁⲓ ⲛⲉⲧⲉⲣⲉⲡⲛⲟϭ ⲛⲣⲣⲟ ϫⲱ ⲙⲙⲟⲟⲩ ⲡϫⲟⲉⲓⲥ ⲙⲡⲕⲁϩ ⲧⲏⲣϥ ⲉⲓⲥ ϩⲏⲏⲧⲉ ⲛⲧⲟⲕ ⲁⲙⲟⲩ ⲙⲡⲁⲙⲧⲟ ⲉⲃⲟⲗ ⲛⲅϫⲓ ⲛⲙⲙⲁⲕ ⲛϩⲉⲛⲣⲱⲙⲉ ⲉⲩⲧⲏⲕ ⲛϩⲏⲧ

Chapter 3

Chapter 4

4:6  ⲙⲡϩⲟⲧ ⲉⲃⲟⲗ ⲛⲧⲥⲱϣⲉ ⲉⲧϩⲏⲛ ⲉⲇⲱⲑⲁⲉⲓⲙ

4:7  ⲉϥϫⲱ ⲙⲙⲟⲥ ⲛⲁⲩ ⲉⲧⲣⲉⲩⲁⲙⲁϩⲧⲉ ⲛⲙⲙⲁ ⲛⲉⲓ ⲉϩⲣⲁⲓ ⲛⲧⲟⲣⲓⲛⲏ ϫⲉ ⲛⲉⲣⲉⲧⲉϩⲓⲏ ⲛⲉⲓ ⲉϩⲟⲩⲛ ⲉϯⲓⲟⲩⲇⲁⲓⲁ ϣⲟⲟⲡ ϩⲓⲧⲟⲟⲧⲟⲩ ⲁⲩⲱ ⲛⲉⲣⲉⲡϩⲱⲃ ⲛⲟⲧⲙ ⲉⲕⲱⲗⲩ ⲙⲙⲟⲟⲩ ⲉⲃⲱⲕ ⲛⲁⲩ ⲉⲣⲉⲧⲉϩⲓⲏ ⲙⲡⲱⲣϣ ⲉϩⲟⲩⲛ ϭⲏⲩ ⲉⲣⲱⲙⲉ ⲥⲛⲁⲩ

4:8  ⲁⲩⲱ ⲁⲩⲉⲓⲣⲉ ⲛϭⲓ ⲛϣⲏⲣⲉ ⲙⲡⲓⲥⲣⲁⲏⲗ ⲕⲁⲧⲁ ⲑⲉ ⲉⲛⲧⲁϥϩⲱⲛ ⲉⲧⲟⲟⲧⲟⲩ ⲛϭⲓ ⲓⲱⲁⲕⲓⲙ ⲡⲛⲟϭ ⲛⲟⲩⲏⲏⲃ ⲁⲩⲱ ⲛⲛϩⲗⲗⲟⲓ ⲙⲡⲇⲏⲙⲟⲥ ⲧⲏⲣϥ ⲙⲡⲓⲥⲣⲁⲏⲗ ⲛⲁⲓ ⲉⲛⲉⲩϩⲙⲟⲟⲥ ϩⲛ ⲑⲓⲉⲣⲟⲩⲥⲁⲗⲏⲙ

4:9  ⲁⲩϫⲓϣⲕⲁⲕ ⲇⲉ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲛϭⲓ ⲣⲱⲙⲉ ⲛⲓⲙ ⲛⲧⲉⲡⲓⲥⲣⲁⲏⲗ ϩⲛ ⲟⲩⲛⲟϭ ⲛⲥⲟⲡⲥ ⲁⲩⲱ ⲁⲩⲑⲃⲃⲓⲟ ⲛⲛⲉⲩⲯⲩⲭⲏ ⲉⲙⲁⲧⲉ ⲉⲙⲁⲧⲉ

4:10  ⲛⲧⲟⲟⲩ ⲙⲛ ⲛⲉⲩϩⲓⲟⲙⲉ ⲙⲛ ⲛⲉⲩϣⲏⲣⲉ ⲕⲟⲩⲓ ⲙⲛ ⲛⲉⲩⲧⲃⲛⲟⲟⲩⲉ ⲁⲩⲱ ⲣⲙⲛϭⲟⲓⲗⲉ ⲛⲓⲙ ⲙⲛ ⲛⲉⲩϫⲁⲓⲃⲉⲕⲉ ⲙⲛ ⲛⲉⲩϣⲱⲡ ϩⲁ ϩⲟⲙⲛⲧ ⲁⲩⲕⲱ ⲛϩⲉⲛϭⲟⲟⲩⲛⲉ ϩⲓϫⲛ ⲛⲉⲩϯⲡⲉ

4:11  ⲁⲩⲱ ⲣⲱⲙⲉ ⲛⲓⲙ ϩⲓ ⲥϩⲓⲙⲉ ϩⲓ ϣⲏⲣⲉ ⲕⲟⲩⲓ ⲛⲉⲧⲟⲩⲏϩ ϩⲛ ⲑⲓⲉⲣⲟⲩⲥⲁⲗⲏⲙ ⲁⲩⲡⲁϩⲧⲟⲩ ⲙⲡⲉⲙⲧⲟ ⲉⲃⲟⲗ ⲙⲡⲉⲣⲡⲉ ⲁⲩϣⲉϣⲕⲣⲙⲥ ⲉϫⲛ ⲛⲉⲩⲁⲡⲏⲩⲉ ⲁⲩⲡⲱⲣϣ ⲛⲛⲉⲩϭⲟⲟⲩⲛⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

4:12  ⲁⲩⲱ ⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩϭⲟⲟⲗⲉϥ ⲛⲟⲩϭⲟⲟⲩⲛⲉ ⲁⲩϫⲓϣⲕⲁⲕ ⲉⲃⲟⲗ ⲉϩⲣⲁⲓ ⲉⲡⲛⲟⲩⲧⲉ ⲙⲡⲓⲥⲣⲁⲏⲗ ϩⲓ ⲟⲩⲥⲟⲡ ⲉⲧⲙϯ ⲛⲛⲉⲩϣⲏⲣⲉ ⲕⲟⲩⲓ ⲉⲩⲧⲱⲣⲡ ⲁⲩⲱ ⲛⲉⲩϩⲓⲟⲙⲉ ⲉⲩϣⲱⲗ ⲁⲩⲱ ⲙⲡⲟⲗⲓⲥ ⲛⲧⲉⲩⲕⲗⲓⲣⲟⲛⲟⲙⲓⲁ ⲉⲩⲧⲁⲕⲟ ⲁⲩⲱ ⲛⲉⲩⲙⲁ ⲉⲧⲟⲩⲁⲁⲃ ⲉⲩϫⲱϩⲙ ⲙⲛ ⲟⲩⲛⲟϭⲛⲉϭ ⲉⲧⲣⲉⲛϩⲉⲑⲛⲟⲥ ⲣⲁϣⲉ ⲙⲙⲟⲟⲩ

4:13  ⲁⲡϫⲟⲉⲓⲥ ⲥⲱⲧⲙ ⲉⲡⲉⲩϩⲣⲟⲟⲩ ⲁⲩⲱ ⲁϥⲛⲁⲩ ⲉⲧⲉⲩⲑⲗⲩⲯⲓⲥ ⲛⲉⲣⲉⲡⲗⲁⲟⲥ ⲇⲉ ⲧⲏⲣϥ ⲡⲉ ⲛⲏⲥⲧⲉⲩⲉ ⲛϩⲉⲛϩⲣⲟⲟⲩ ⲉⲛⲁϣⲱⲟⲩ ϩⲛ ϯⲓⲟⲩⲇⲁⲓⲁ ⲧⲏⲣⲥ ⲙⲛ ⲑⲓⲉⲣⲟⲩⲥⲁⲗⲏⲙ ⲙⲡⲉⲙⲧⲟ ⲉⲃⲟⲗ ⲙⲡⲡⲉⲧⲟⲩⲁⲁⲃ ⲡϫⲟⲉⲓⲥ ⲡⲡⲁⲛⲇⲟⲕⲣⲁⲧⲱⲣ

4:14  ⲁⲩⲱ ⲓⲱⲁⲕⲓⲙ ⲡⲛⲟϭ ⲛⲟⲩⲏⲏⲃ ⲙⲛ ⲟⲩⲏⲏⲃ ⲛⲓⲙ ⲉⲧⲁϩⲉⲣⲁⲧⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲛ ⲛⲉⲧϣⲙϣⲉ ⲙⲡϫⲟⲉⲓⲥ ⲉⲩϭⲟⲟⲗⲉ ⲛϩⲉⲛϭⲟⲟⲩⲛⲉ ⲉϫⲛ ⲛⲉⲩϯⲡⲉ ⲛⲉⲩⲧⲁⲗⲟⲟⲩ ⲡⲉ ⲉϩⲣⲁⲓ ⲙⲡⲉϭⲗⲓⲗ ⲙⲡⲙⲟⲩⲛ ⲉⲃⲟⲗ ⲁⲩⲱ ⲛⲉⲣⲏⲧ ⲙⲛ ⲛⲉⲧⲉϣⲁⲣⲉⲡⲗⲁⲟⲥ ⲧⲁⲁⲩ ϩⲁⲣⲟϥ

4:15  ⲁⲩⲱ ⲛⲉⲣⲉⲟⲩⲕⲣⲙⲥ ϩⲓϫⲛ ⲛⲉⲩϭⲓⲇⲁⲣⲓⲥ ⲁⲩϫⲓϣⲕⲁⲕ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ϩⲛ ⲧⲉⲩϭⲟⲙ ⲧⲏⲣⲥ ⲉϭⲙⲡϣⲓⲛⲉ ⲙⲡⲏⲓ ⲙⲡⲓⲥⲣⲁⲏⲗ ⲉⲩⲡⲉⲧⲛⲁⲛⲟⲩϥ

Chapter 5

5:1  ⲁⲩⲧⲁⲙⲉⲟⲗⲟⲫⲉⲣⲛⲏⲥ ⲡⲁⲣⲭⲓⲥⲧⲣⲁⲧⲓⲅⲟⲥ ⲛⲧϭⲟⲙ ⲛⲁⲥⲥⲟⲩⲣ ϫⲉ ⲛϣⲏⲣⲉ ⲙⲡⲓⲥⲣⲁⲏⲗ ⲥⲃⲧⲱⲧⲟⲩ ⲉⲡⲡⲟⲗⲉⲙⲟⲥ ⲁⲩⲱ ϫⲉ ⲁⲩϣⲱⲧⲙ ⲛⲛⲉϩⲓⲟⲟⲩⲉ ⲛⲧⲟⲣⲓⲛⲏ ⲁⲩⲱ ⲁⲩⲱⲣϫ ⲛⲛⲕⲟⲟϩ ⲧⲏⲣⲟⲩ ⲙⲡⲧⲟⲟⲩ ⲉⲧϫⲟⲥⲉ ⲁⲩⲱ ⲁⲩⲕⲱ ⲛϩⲉⲛⲥⲕⲁⲛⲇⲁⲗⲟⲛ ϩⲛ ⲛⲥⲱϣⲉ

5:2  ⲁϥϭⲱⲛⲧ ⲉⲙⲁⲧⲉ ϩⲛ ⲟⲩϭⲱⲛⲧ ⲁⲩⲱ ⲁϥⲙⲟⲩⲧⲉ ⲉⲛⲁⲣⲭⲱⲛ ⲧⲏⲣⲟⲩ ⲙⲙⲱⲁⲃ ⲙⲛ ⲛⲉⲥⲧⲣⲁⲧⲏⲅⲟⲥ ⲛⲁⲙⲙⲱⲛ ⲙⲛ ⲛⲉⲥⲁⲧⲣⲁⲡⲏⲥ ⲛⲧⲡⲁⲣϩⲁⲗⲓⲁ

5:3  ⲡⲉϫⲁϥ ⲛⲁⲩ ϫⲉ ⲁϫⲓⲥ ⲉⲣⲟⲓ ⲛϣⲏⲣⲉ ⲛⲭⲁⲛⲁⲁⲛ ϫⲉ ⲛⲓⲙ ⲡⲉ ⲡⲉⲓⲗⲁⲟⲥ ⲡⲁⲓ ⲉⲧϩⲙⲟⲟⲥ ϩⲛ ⲧⲟⲣⲓⲛⲏ ⲁⲩⲱ ⲁϣ ⲛⲉ ⲙⲡⲟⲗⲓⲥ ⲉⲧⲟⲩⲟⲩⲏϩ ⲛϩⲏⲧⲟⲩ ⲁⲩⲱ ⲡⲙⲏⲏϣⲉ ⲛⲧⲉⲩϭⲟⲙ ⲉⲣⲉⲡⲉⲩⲁⲙⲁϩⲧⲉ ϣⲟⲟⲡ ϩⲛ ⲟⲩ ⲙⲛ ⲧⲉⲩϭⲟⲙ ⲁⲩⲱ ⲛⲓⲙ ⲡⲉⲛⲧⲁϥⲧⲱⲟⲩⲛ ⲉϩⲣⲁⲓ ⲉϫⲱⲟⲩ ⲛⲛⲣⲣⲟ ⲉϥϫⲓⲙⲟⲉⲓⲧ ϩⲏⲧϥ ⲙⲡⲉⲩⲙⲗⲁϩ

5:4  ⲁⲩⲱ ⲉⲧⲃⲉ ⲟⲩ ⲁⲩⲣⲁⲧⲥⲱⲧⲙ ⲉⲧⲙⲉⲓ ⲉⲧⲱⲙⲛⲧ ⲉⲣⲟⲓ ⲡⲁⲣⲁⲛⲉⲧⲟⲩⲏϩ ⲧⲏⲣⲟⲩ ϩⲛ ⲙⲙⲁ ⲛϩⲱⲧⲡ

5:5  ⲡⲉϫⲁϥ ⲇⲉ ⲛⲁϥ ⲛϭⲓ ⲁⲭⲓⲱⲣ ⲡϩⲩⲅⲟⲩⲙⲉⲛⲟⲥ ⲛⲛϣⲏⲣⲉ ⲧⲏⲣⲟⲩ ⲛⲁⲙⲙⲱⲛ ϫⲉ ⲙⲁⲣⲉⲡⲁϫⲟⲉⲓⲥ ⲥⲱⲧⲙ ⲉⲩϣⲁϫⲉ ⲉⲃⲟⲗ ϩⲓⲧⲛ ⲧⲧⲁⲡⲣⲟ ⲙⲡⲉⲕϩⲙϩⲁⲗ ⲁⲩⲱ ϯⲛⲁϫⲱ ⲉⲣⲟⲕ ⲛⲧⲙⲉ ⲉⲧⲃⲉ ⲡⲉⲓⲗⲁⲟⲥ ⲛⲁⲓ ⲉⲧⲟⲩⲏϩ ϩⲛ ⲧⲟⲣⲓⲛⲏ ⲉⲩⲟⲩⲏϩ …

5:6  […]

5:7  […]

5:8  […]

5:9  […]

5:10  […]

5:11  […]

5:12  […]

5:13  […]

5:14  […]

5:15  … ⲡⲕⲁϩ ⲛⲛⲁⲙⲟⲣⲣⲁⲓⲟⲥ ⲁⲩⲱ ⲛⲁⲉⲥⲉⲃⲱⲛ ⲧⲏⲣⲟⲩ ⲁⲩⲃⲟⲧⲟⲩ ⲉⲃⲟⲗ ϩⲣⲁⲓ ϩⲛ ⲧⲉⲩϭⲟⲙ ⲁⲩϫⲓⲓⲟⲣ ⲇⲉ ⲙⲡⲓⲟⲣⲇⲁⲛⲏⲥ ⲁⲩⲕⲗⲓⲣⲟⲛⲟⲙⲉⲓ ⲛⲧⲟⲣⲓⲛⲏ ⲧⲏⲣⲥ

5:16  ⲁⲩⲱ ⲁⲩⲛⲟⲩϫⲉ ⲉⲃⲟⲗ ϩⲁ ⲧⲉⲩϩⲏ ⲙⲡⲉⲭⲁⲛⲁⲛⲁⲓⲟⲥ ⲙⲛ ⲡⲓⲉⲫⲉⲣⲉⲍⲁⲓⲟⲥ ⲙⲛ ⲡⲓⲉⲃⲟⲩⲍⲁⲓⲟⲥ ⲙⲛ ⲥⲩⲭⲉⲙ ⲙⲛ ⲛⲅⲉⲣⲅⲉⲥⲁⲓⲟⲥ ⲧⲏⲣⲟⲩ ⲁⲩⲟⲩⲱϩ ⲛϩⲏⲧⲥ ⲛϩⲉⲛϩⲟⲟⲩ ⲉⲛⲁϣⲱⲟⲩ

5:17  ⲁⲩⲱ ⲉⲙⲡⲟⲩⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲩⲛⲟⲩⲧⲉ ⲛⲉⲣⲉⲛⲁⲅⲁⲑⲟⲛ ϣⲟⲟⲡ ⲛⲙⲙⲁⲩ ⲡⲉ ⲉⲧⲃⲉ ϫⲉ ⲡⲛⲟⲩⲧⲉ ⲉⲧⲙⲟⲥⲧⲉ ⲙⲡϫⲓ ⲛϭⲟⲛⲥ ⲛⲛⲉϥϣⲟⲟⲡ ⲛⲙⲙⲁⲩ ⲡⲉ

5:18  ⲛⲧⲉⲣⲟⲩⲥⲁϩⲱⲟⲩ ⲇⲉ ⲉⲃⲟⲗ ⲛⲧⲉϩⲓⲏ ⲉⲛⲧⲁϥⲥⲙⲛⲧⲥ ⲛⲙⲙⲁⲩ ⲁϥϥⲟⲧⲟⲩ ⲉⲃⲟⲗ ϩⲛ ϩⲁϩ ⲙⲡⲟⲗⲉⲙⲟⲥ ⲉⲙⲁⲧⲉ ⲉⲙⲁⲧⲉ ⲁⲩⲱ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲉⲩⲕⲁϩ ⲉⲙⲡⲱⲟⲩ ⲁⲛ ⲡⲉ ⲁⲩⲱ ⲡⲉⲣⲡⲉ ⲙⲡⲉⲩⲛⲟⲩⲧⲉ ⲁϥϣⲱⲡⲉ ⲉⲩⲕⲁϩ ⲁⲩⲱ ⲛⲉⲩⲡⲟⲗⲓⲥ ⲁⲩⲁⲙⲁϩⲧⲉ ⲙⲙⲟⲟⲩ ϩⲓⲧⲛ ⲛⲉⲩϫⲓⲥⲉⲉⲩ

5:19  ⲧⲉⲛⲟⲩ ⲧⲉ ⲉⲧⲁⲩⲕⲟⲧⲟⲩ ⲉⲡⲉⲩⲛⲟⲩⲧⲉ ⲁⲩⲉⲓ ⲉϩⲣⲁⲓ ⲉⲃⲟⲗ ϩⲙ ⲡϫⲱⲱⲣⲉ ⲉⲃⲟⲗ ⲉⲛⲧⲁⲩϫⲟⲟⲣⲟⲩ ⲉⲃⲟⲗ ⲛϩⲏⲧϥ ⲁⲩⲁⲙⲁϩⲧⲉ ⲉⲑⲓⲉⲣⲟⲩⲥⲁⲗⲏⲙ ⲡⲙⲁ ⲙⲡⲉⲩⲧⲃⲃⲟ ⲁⲩⲱ ⲁⲩⲟⲩⲱϩ ϩⲛ ⲧⲟⲣⲓⲛⲏ ϫⲉ ⲛⲉⲥⲟ ⲛϫⲁⲓⲉ ⲡⲉ

5:20  ⲧⲉⲛⲟⲩ ϭⲉ ⲡϫⲟⲉⲓⲥ ⲡⲁϫⲟⲉⲓⲥ ⲉϣⲱⲡⲉ ⲟⲩⲛⲙⲛⲧⲁⲧⲥⲟⲟⲩⲛ ϩⲙ ⲡⲉⲓⲗⲁⲟⲥ ⲁⲩⲱ ⲥⲉⲣⲛⲟⲃⲉ ⲉⲡⲉⲩⲛⲟⲩⲧⲉ ⲧⲛⲛⲁϭⲙⲡⲉⲩϣⲓⲛⲉ ⲡⲉ ϫⲉ ⲡⲁⲓ ⲛⲁϣⲱⲡⲉ ⲛϩⲏⲧⲟⲩ ⲉⲩϫⲣⲟⲡ ⲁⲩⲱ ⲧⲛⲁⲃⲱⲕ ⲉϩⲣⲁⲓ ⲛⲧⲛⲙⲓϣⲉ ⲛⲙⲙⲁⲩ

5:21  ⲉϣⲱⲡⲉ ⲇⲉ ⲙⲛⲁⲛⲟⲙⲓⲁ ϩⲙ ⲡⲉⲩϩⲉⲑⲛⲟⲥ ⲙⲁⲣⲉⲡϫⲟⲉⲓⲥ ⲥⲁⲁⲧⲟⲩ ⲙⲏⲡⲟⲧⲉ ⲛⲧⲉⲡⲉⲩϫⲟⲉⲓⲥ ⲙⲓϣⲉ ⲉϩⲣⲁⲓ ⲉϫⲱⲟⲩ ⲁⲩⲱ ⲛⲧⲉⲡⲉⲩⲛⲟⲩⲧⲉ ϯ ⲉϫⲱⲟⲩ ⲛⲧⲛϣⲱⲡⲉ ⲉⲩⲛⲟϭⲛⲉϭ ⲙⲡϩⲟⲧ ⲉⲃⲟⲗ ⲙⲡⲕⲁϩ ⲧⲏⲣϥ

5:22  ⲁⲥϣⲱⲡⲉ ⲇⲉ ⲛⲧⲉⲣⲉϥⲟⲩⲱ ⲉϥϣⲁϫⲉ ⲛϭⲓ ⲁⲭⲓⲱⲣ ⲛⲛⲉⲓϣⲁϫⲉ ⲁϥ

Chapter 6

6:4  ⲅⲁⲣ ⲛⲛⲉⲛⲉϥϣⲁϫⲉ ϣⲱⲡⲉ ⲉⲩϣⲟⲩⲉⲓⲧ

6:5  ⲛⲧⲟⲕ ⲇⲉ ⲁⲭⲓⲱⲣ ⲡϫⲁⲓⲃⲉⲕⲉ ⲛⲁⲙⲙⲱⲛ ⲡⲉⲛⲧⲁϥϫⲱ ⲛⲛⲉⲓϣⲁϫⲉ ϩⲙ ⲡⲉϩⲟⲟⲩ ⲙⲡⲉⲕϫⲓ ⲛϭⲟⲛⲥ ⲛⲛⲉⲕⲟⲩⲱϩ ⲉⲧⲟⲟⲧⲕ ⲉⲛⲁⲩ ⲉⲡⲁϩⲟ ϫⲓⲛ ⲙⲡⲟⲟⲩ ⲛϩⲟⲟⲩ ϣⲁⲛϯϫⲕⲃⲁ ⲙⲡⲅⲉⲛⲟⲥ ⲛⲛⲉⲛⲧⲁⲩⲉⲓ ⲉⲃⲟⲗ ϩⲛ ⲕⲏⲙⲉ

6:6  ⲁⲩⲱ ⲧⲟⲧⲉ ⲉⲣⲉⲧⲥⲏϥⲉ ⲙⲡⲁⲙⲗⲁϩ ⲙⲛ ⲛⲁϩⲙϩⲁⲗ ⲉⲓ ⲉⲃⲟⲗ ϩⲓⲧⲛ ⲛⲉⲕⲥⲡⲓⲣⲟⲟⲩⲉ ⲛⲅϩⲉ ϩⲛ ⲛⲉⲩϩⲁⲧⲃⲉⲥ ⲉⲓϣⲁⲛⲕⲧⲟⲓ

6:7  ⲉⲣⲉⲛⲁϩⲙϩⲁⲗ ⲇⲉ ⲁⲡⲟⲕⲁⲑⲓⲥⲧⲁ ⲙⲙⲟⲕ ⲉⲧⲟⲣⲓⲛⲏ ⲛⲥⲉⲑⲙⲥⲟⲕ ϩⲛ ⲟⲩⲏⲓ ⲛⲙⲡⲟⲗⲓⲥ ⲛⲙⲙⲁ ⲛⲃⲱⲕ ⲉϩⲣⲁⲓ

6:8  ⲁⲩⲱ ⲛⲛⲉⲕⲧⲁⲕⲟ ϣⲁⲛⲧⲟⲩϥⲟⲧⲕ ⲉⲃⲟⲗ ⲛⲙⲙⲁⲩ

6:9  ⲉϣϫⲉ ⲕϩⲉⲗⲡⲓⲍⲉ ⲇⲉ ϩⲣⲁⲓ ϩⲙ ⲡⲉⲕϩⲏⲧ ϫⲉ ⲛⲥⲉⲛⲁϫⲓⲧⲟⲩ ⲁⲛ ⲙⲡⲣⲧⲣⲉϥⲱⲕⲙ ⲛϭⲓ ⲡⲉⲕϩⲟ ⲁⲓϣⲁϫⲉ ⲁⲩⲱ ⲛⲛⲉⲗⲁⲁⲩ ϩⲉ ⲉⲃⲟⲗ ϩⲛ ⲛⲁϣⲁϫⲉ

6:10  ⲁϥⲟⲩⲉϩⲥⲁϩⲛⲉ ⲇⲉ ⲛϭⲓ ⲟⲗⲟⲫⲉⲣⲛⲏⲥ ⲛⲛⲉϥϩⲙϩⲁⲗ ⲛⲁⲓ ⲉⲧⲁϩⲉⲣⲁⲧⲟⲩ ϩⲛ ⲧⲉϥⲥⲕⲏⲛⲏ ⲉⲧⲣⲉⲩϭⲱⲡⲉ ⲛⲁⲭⲓⲱⲣ ⲁⲩⲱ ⲉⲁⲡⲟⲕⲁⲑⲓⲥⲧⲁ ⲙⲙⲟϥ ⲉⲃⲁⲓⲧⲩⲗⲟⲩⲁ ⲉⲧⲁⲁϥ ⲉϩⲣⲁⲓ ⲉⲧⲟⲟⲧⲟⲩ ⲛⲛϣⲏⲣⲉ ⲙⲡⲓⲥⲣⲁⲏⲗ

6:11  ⲁⲩϭⲟⲡϥ ⲇⲉ ⲛϭⲓ ⲛⲉϥϩⲙϩⲁⲗ ⲁⲩⲛⲧϥ ⲉⲃⲟⲗ ϩⲛ ⲧⲡⲁⲣⲉⲙⲃⲟⲗⲏ ⲉⲧⲥⲱϣⲉ ⲁⲩⲧⲱⲟⲩⲛ ⲉⲃⲟⲗ ϩⲛ ⲧⲙⲏⲧⲉ ⲛⲧⲡⲉⲇⲓⲛⲏ ⲉϩⲣⲁⲓ ⲉⲧⲟⲣⲓⲛⲏ ⲁⲩⲉⲓ ⲉϩⲣⲁⲓ ⲉϫⲛ ⲙⲡⲏⲅⲏ ⲛⲁⲓ ⲉⲧϩⲁ ⲡⲉⲥⲏⲧ ⲛⲃⲁⲓⲧⲩⲗⲟⲩⲁ

6:12  ⲛⲧⲉⲣⲟⲩⲛⲁⲩ ⲇⲉ ⲉⲣⲟⲟⲩ ⲛϭⲓ ⲛⲣⲱⲙⲉ ⲛⲧⲡⲟⲗⲓⲥ ⲛⲉⲧϩⲓϫⲙ ⲡⲕⲟⲟϩ ⲙⲡⲧⲟⲟⲩ ⲁⲩϫⲓ ⲛⲛⲉⲩϩⲟⲡⲗⲟⲛ ⲙⲙⲓϣⲉ ⲁⲩⲉⲓ ⲉⲃⲟⲗ ⲡⲃⲟⲗ ⲛⲧⲡⲟⲗⲓⲥ ⲉϫⲙ ⲡⲕⲟⲟϩ ⲙⲡⲧⲟⲟⲩ ⲁⲩⲱ ⲣⲱⲙⲉ ⲛⲓⲙ ⲛⲛⲣⲉϥⲛⲉϫⲥⲫⲉⲛⲇⲟⲛⲏ ⲁⲩⲁⲙⲁϩⲧⲉ ⲙⲡⲉⲩⲙⲁ ⲛⲉⲓ ⲉϩⲣⲁⲓ ⲁⲩⲛⲟⲩϫⲉ ⲉⲃⲟⲗ ⲉϫⲱⲟⲩ ⲛϩⲉⲛⲱⲛⲉ

6:13  ⲁⲩⲃⲱⲕ ⲉϩⲟⲩⲛ ϩⲁ ⲡⲉⲥⲏⲧ ⲙⲡⲧⲟⲟⲩ ⲁⲩⲙⲟⲩⲣ ⲛⲁⲭⲓⲱⲣ ⲁⲩⲕⲁⲁϥ ⲉϥⲙⲏⲣ ϩⲁⲣⲁⲧϥ ⲙⲡⲧⲟⲟⲩ ⲁⲩⲃⲱⲕ ⲉⲣⲁⲧϥ ⲙⲡⲉⲩϫⲟⲉⲓⲥ ⲟⲗⲟⲫⲉⲣⲛⲏⲥ

6:14  ⲛϣⲏⲣⲉ ⲇⲉ ⲙⲡⲓⲥⲣⲁⲏⲗ ⲁⲩⲉⲓ ⲉⲡⲉⲥⲏⲧ ⲉⲃⲟⲗ ϩⲛ ⲧⲉⲩⲡⲟⲗⲓⲥ ⲁⲩⲁϩⲉⲣⲁⲧⲟⲩ ϩⲓϫⲱϥ ⲁⲩⲱ ⲁⲩⲃⲟⲗϥ ⲉⲃⲟⲗ ⲁⲩϫⲓⲧϥ ⲉϩⲣⲁⲓ ⲉⲃⲁⲓⲧⲩⲗⲟⲩⲁ ⲁⲩⲧⲁϩⲟϥ ⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲛⲛⲁⲣⲭⲱⲛ ⲛⲧⲉⲩⲡⲟⲗⲓⲥ

6:15  ⲛⲁⲓ ⲉⲧϣⲟⲟⲡ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲟⲍⲓⲁⲥ ⲡϣⲏⲣⲉ ⲙⲙⲓⲭⲁ ⲉⲃⲟⲗ ϩⲛ ⲧⲉⲫⲩⲗⲏ ⲛⲥⲩⲙⲉⲱⲛ ⲙⲛ ⲭⲁⲃⲣⲓ ⲡϣⲏⲣⲉ ⲛⲅⲟⲑⲟⲛⲓⲏⲗ ⲙⲛ ⲭⲁⲣⲙⲓ ⲡϣⲏⲣⲉ ⲙⲙⲉⲗⲭⲓⲏⲗ

6:16  ⲁⲩⲱ ⲁⲩⲙⲟⲩⲧⲉ ⲉⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲛⲧⲡⲟⲗⲓⲥ ⲁⲩⲱ ⲛⲉⲩϩⲣϣⲓⲣⲉ ⲧⲏⲣⲟⲩ ⲙⲛ ⲛⲉⲩϩⲓⲟⲙⲉ ⲁⲩⲡⲱⲧ ϩⲓ ⲟⲩⲥⲟⲡ ⲁⲩⲉⲓ ⲉⲧⲥⲟⲟⲩϩⲥ ⲁⲩⲧⲁϩⲟ ⲉⲣⲁⲧϥ ⲛⲁⲭⲓⲱⲣ ϩⲛ ⲧⲙⲏⲧⲉ ⲙⲡⲉⲩⲗⲁⲟⲥ ⲧⲏⲣϥ ⲁϥⲛⲟϫϥ ⲇⲉ ⲛϭⲓ ⲟⲍⲉⲓⲁⲥ ⲉⲡⲉⲛⲧⲁϥϣⲱⲡⲉ

6:17  ⲁϥⲟⲩⲱϣⲃ ⲁϥϫⲱ ⲉⲣⲟⲟⲩ ⲛⲛϣⲁϫⲉ ⲛⲧⲥⲟⲟⲩϩⲥ ⲛⲟⲗⲟⲫⲉⲣⲛⲏⲥ ⲁⲩⲱ ⲛϣⲁϫⲉ ⲧⲏⲣⲟⲩ ⲛⲧⲁϥϫⲟⲟⲩ ⲛⲧⲙⲏⲧⲉ ⲛⲛⲁⲣⲭⲱⲛ ⲛⲛⲁⲥⲥⲟⲩⲣ ⲁⲩⲱ ⲛⲛⲟϭ ⲛϣⲁϫⲉ ⲉⲛⲧⲁⲟⲗⲟⲫⲉⲣⲛⲏⲥ ϫⲟⲟⲩ ⲉϫⲙ ⲡⲏⲓ ⲙⲡⲓⲥⲣⲁⲏⲗ

6:18  ⲁⲩⲱ ⲁϥⲡⲁϩⲧϥ ⲛϭⲓ ⲡⲗⲁⲟⲥ ⲁϥⲟⲩⲱϣⲧ ⲙⲡϫⲟⲉⲓⲥ ⲁⲩⲱ ⲁⲩϫⲓϣⲕⲁⲕ ⲉⲃⲟⲗ ⲉⲩϫⲱ ⲙⲙⲟⲥ

6:19  ϫⲉ ⲡϫⲟⲉⲓⲥ ⲡⲛⲟⲩⲧⲉ ⲛⲧⲡⲉ ϭⲱϣⲧ ⲉϩⲣⲁⲓ ⲉϫⲛ ⲛⲉⲩⲙⲛⲧϫⲁⲥⲓϩⲏⲧ ⲁⲩⲱ ⲛⲅⲛⲁ ⲙⲡⲉⲑⲃⲃⲓⲟ ⲙⲡⲉⲛⲅⲉⲛⲟⲥ ⲛⲅϭⲱϣⲧ ⲉϫⲙ ⲡϩⲟ ⲛⲛⲉⲛⲧⲁⲩⲑⲃⲃⲓⲟⲟⲩ ⲛⲁⲕ ϩⲙ ⲡⲟⲟⲩ ⲛϩⲟⲟⲩ

6:20  ⲁⲩⲥⲟⲗⲥⲗ ⲇⲉ ⲛⲁⲭⲓⲱⲣ ⲁⲩⲱ ⲁⲩⲧⲁⲓⲟϥ ⲉⲙⲁⲧⲉ

6:21  ⲁⲩⲱ ⲁϥϫⲓⲧϥ ⲛϭⲓ ⲟⲍⲉⲓⲁⲥ ⲉⲃⲟⲗ ϩⲛ ⲧⲥⲟⲟⲩϩⲥ ⲉⲡⲉϥⲏⲓ ⲁϥⲉⲓⲣⲉ ⲛⲟⲩⲛⲟϭ ⲛϩⲟⲟⲡ ⲉⲛⲉⲡⲣⲉⲥⲃⲩⲧⲉⲣⲟⲥ ⲁⲩⲱ ⲁⲩⲉⲡⲓⲕⲁⲗⲓ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲩⲃⲟⲏⲑⲓⲁ ⲛⲧⲉⲩϣⲏ ⲧⲏⲣⲥ ⲉⲧⲙⲙⲁⲩ

Chapter 7

7:1  ⲙⲡⲉϥⲣⲁⲥⲧⲉ ⲇⲉ ⲁϥⲡⲁⲣⲁⲅⲅⲉⲓⲗⲉ ⲛϭⲓ ⲟⲗⲟⲫⲉⲣⲛⲏⲥ ⲙⲡⲉϥⲙⲗⲁϩ ⲧⲏⲣϥ ⲙⲛ ⲛⲉϥⲗⲁⲟⲥ ⲧⲏⲣϥ ⲛⲁⲓ ⲉⲛⲧⲁⲩⲉⲓ ⲛⲙⲙⲁϥ ⲉⲡⲡⲟⲗⲉⲙⲟⲥ ⲉⲥⲣⲙⲗⲁϩ …

7:2  […]

7:3  […]

7:4  […]

7:5  […]

7:6  […]

7:7  […]

7:8  … ⲙⲛ ⲛϩⲉⲅⲟⲩⲙⲉⲛⲟⲥ ⲧⲏⲣⲟⲩ ⲙⲡⲗⲁⲟⲥ ⲙⲙⲱⲁⲃ ⲙⲛ ⲛⲉⲥⲧⲣⲁⲧⲏⲅⲟⲥ ⲛⲧⲡⲁⲣϩⲁⲗⲓⲁ ⲡⲉϫⲁⲩ

7:9  ϫⲉ ⲙⲁⲣⲉⲡⲉⲛϫⲟⲉⲓⲥ ⲥⲱⲧⲙ ⲉⲩϣⲁϫⲉ ϫⲉⲕⲁⲥ ⲛⲛⲉⲩⲟⲩⲱϣⲃ ϣⲱⲡⲉ ϩⲛ ⲧⲉⲕϭⲟⲙ

7:10  ⲡⲉⲓⲗⲁⲟⲥ ⲅⲁⲣ ⲛϣⲏⲣⲉ ⲙⲡⲓⲥⲣⲁⲏⲗ ⲙⲉⲩⲕⲱ ⲛϩⲧⲏⲩ ⲁⲛ ⲉϫⲛ ⲛⲉⲩⲙⲉⲣⲉϩ ⲁⲗⲗⲁ ⲉϫⲙ ⲡϫⲓⲥⲉ ⲛⲛⲧⲟⲟⲩ ⲛⲁⲓ ⲛⲧⲟⲟⲩ ⲉⲧⲟⲩⲟⲩⲏϩ ϩⲣⲁⲓ ϩⲓϫⲱⲟⲩ ⲙⲡϩⲱⲃ ⲅⲁⲣ ⲙⲟⲧⲛ ⲁⲛ ⲉⲃⲱⲕ ⲉϩⲣⲁⲓ ⲉϫⲛ ⲛⲕⲟⲟϩ ⲛⲛⲧⲟⲩⲉⲓⲏ

7:11  ⲧⲉⲛⲟⲩ ϭⲉ ⲡϫⲟⲉⲓⲥ ⲙⲡⲣⲣⲡⲟⲗⲉⲙⲟⲥ ⲛⲙⲙⲁⲩ ⲕⲁⲧⲁ ⲑⲉ ⲉϣⲁϥϣⲱⲡⲉ ⲛϭⲓ ⲟⲩⲡⲟⲗⲉⲙⲟⲥ ⲛⲙⲗⲁϩ ⲁⲩⲱ ⲙⲛⲟⲩⲣⲱⲙⲉ ⲛⲟⲩⲱⲧ ⲡⲉ ⲛⲁϩⲉ ⲉⲃⲟⲗ ϩⲙ ⲡⲉⲕⲗⲁⲟⲥ

7:12  ϭⲱ ⲉϩⲣⲁⲓ ⲉϫⲛ ⲧⲉⲕⲡⲁⲣⲧⲉⲙⲃⲟⲗⲏ ⲉⲕϩⲁⲣⲉϩ ⲉⲣⲱⲙⲉ ⲛⲓⲙ ⲉⲃⲟⲗ ϩⲛ ⲧⲉⲕϭⲟⲙ ⲁⲩⲱ ⲙⲁⲣⲉⲛⲉⲕϩⲙϩⲁⲗ ⲁⲙⲁϩⲧⲉ ⲉϫⲛ ⲧⲡⲏⲅⲏ ⲙⲡⲙⲟⲟⲩ ⲧⲁⲓ ⲉⲧⲛⲏⲩ ⲉⲃⲟⲗ ϩⲁⲣⲁⲧϥ ⲙⲡⲧⲟⲟⲩ

7:13  ⲉⲧⲃⲉ ϫⲉ ⲉⲩⲙⲉϩⲙⲟⲟⲩ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛϭⲓ ⲡⲉⲧⲟⲩⲏϩ ⲧⲏⲣⲟⲩ ϩⲛ ⲃⲁⲓⲧⲩⲗⲟⲩⲁ ⲁⲩⲱ ⲥⲉⲛⲁⲙⲟⲩ ⲡⲉ ϩⲁ ⲡⲓⲃⲉ ⲛⲥⲉϯ ⲛⲁⲛ ⲛⲧⲉⲩⲡⲟⲗⲓⲥ ⲁⲛⲟⲛ ⲇⲉ ⲙⲛ ⲡⲉⲛⲗⲁⲟⲥ ⲧⲛⲛⲁⲃⲱⲕ ⲉϩⲣⲁⲓ ⲉϫⲛ ⲛⲕⲟⲟϩ ⲛⲛⲧⲟⲩⲉⲓⲏ ⲉⲧϩⲏⲛ ⲉⲣⲟⲟⲩ ⲛⲧⲛϭⲱ ϩⲣⲁⲓ ϩⲓϫⲱⲟⲩ ⲉⲛⲣⲟⲉⲓⲥ ⲉⲧⲙⲧⲣⲉⲟⲩⲣⲱⲙⲉ ⲛⲟⲩⲱⲧ ⲉⲓ ⲉⲃⲟⲗ ϩⲛ ⲧⲡⲟⲗⲓⲥ

7:14  ⲁⲩⲱ ⲥⲉⲛⲁⲃⲱⲗ ⲉⲃⲟⲗ ⲡⲉ ϩⲁ ⲡⲉⲕϩⲟ ⲛⲧⲟⲟⲩ ⲙⲛ ⲛⲉⲩϩⲓⲟⲙⲉ ⲙⲛ ⲛⲉⲩϣⲏⲣⲉ ⲁⲩⲱ ⲉⲙⲡⲁⲧⲉⲧⲥⲏϥⲉ ⲉⲓ ⲉϩⲣⲁⲓ ⲉϫⲱⲟⲩ ⲥⲉⲛⲁⲡⲟⲣϣⲟⲩ ϩⲛ ⲛⲉⲡⲗⲁⲧⲓⲁ ⲛⲛⲉⲩⲙⲁ ⲛϣⲱⲡⲉ

7:15  ⲛⲅⲧⲱⲱⲃⲉ ⲛⲁⲩ ⲛⲟⲩⲧⲱⲱⲃⲉ ⲉϥϩⲟⲟⲩ ⲉⲧⲃⲉ ϫⲉ ⲁϥⲃⲱϭⲉ ⲉⲣⲟⲕ ⲁⲩⲱ ⲙⲡⲟⲩⲉⲓ ⲉⲃⲟⲗ ⲉⲧⲱⲙⲛⲧ ⲉⲣⲟⲕ ϩⲛ ⲟⲩⲉⲓⲣⲏⲛⲏ

7:16  ⲁⲛⲉⲩϣⲁϫⲉ ⲇⲉ ⲣⲁⲛⲁϥ ⲙⲡⲉⲙⲧⲟ ⲉⲃⲟⲗ ⲛⲟⲗⲟⲫⲉⲣⲛⲏⲥ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉϥϩⲙϩⲁⲗ ⲁϥⲟⲩⲉϩⲥⲁϩⲛⲉ ⲉⲉⲓⲣⲉ ⲕⲁⲧⲁ ⲑⲉ ⲉⲛⲧⲁⲩϣⲁϫⲉ

7:17  ⲁⲩⲧⲱ

7:22  ϩⲛ ⲛⲉϩⲓⲏ ⲙⲙⲟⲟϣⲉ ⲛⲛⲉⲩⲡⲩⲗⲏ ⲁⲩⲱ ⲛⲉⲙⲛϭⲟⲙ ϭⲉ ϣⲟⲡ ⲡⲉ ϩⲣⲁⲓ ⲛϩⲏⲧⲟⲩ

7:23  ⲁⲡⲗⲁⲟⲥ ⲇⲉ ⲧⲏⲣϥ ⲥⲟⲩⲱϩ ⲉϫⲛ ⲟⲍⲉⲓⲁⲥ ⲙⲛ ⲛⲁⲣⲭⲱⲛ ⲛⲧⲡⲟⲗⲓⲥ ⲛⲉⲩϩⲣϣⲓⲣⲉ ⲙⲛ ⲛⲱⲉⲩϣⲏⲣⲉ ⲕⲟⲩⲓ ⲁⲩϫⲓϣⲕⲁⲕ ⲇⲉ ⲉⲃⲟⲗ ⲡⲉϫⲁⲩ ⲙⲡⲉⲙⲧⲟ ⲉⲃⲟⲗ ⲛⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ

7:24  ϫⲉ ⲉⲣⲉⲡⲛⲟⲩⲧⲉ ⲕⲣⲓⲛⲉ ϩⲛ ⲧⲉⲛⲙⲏⲧⲉ ϩⲓ ⲟⲩⲥⲟⲡ ϫⲉ ⲁⲧⲉⲧⲛⲉⲓⲣⲉ ⲛⲁⲛ ⲛϩⲉⲛⲛⲟϭ ⲛϫⲓ ⲛϭⲟⲛⲥ ⲉⲙⲡⲉⲧⲛϣⲁϫⲉ ϩⲛ ⲟⲩⲉⲓⲣⲏⲛⲏ ⲙⲛ ⲛϣⲏⲣⲉ ⲛⲛⲁⲥⲥⲟⲩⲣ

7:25  ⲧⲉⲛⲟⲩ ϭⲉ ⲙⲛ ⲃⲟⲏⲑⲟⲥ ϣⲟⲟⲡ ⲛⲁⲛ ⲁⲗⲗⲁ ⲁⲡⲉⲛⲛⲟⲩⲧⲉ ⲧⲁⲁⲛ ⲉⲃⲟⲗ ⲉϩⲣⲁⲓ ⲉⲛⲉⲩϭⲓϫ ⲉⲧⲣⲉⲛⲣⲱϩⲧ ⲙⲡⲉⲩⲙⲧⲟ ⲉⲃⲟⲗ ϩⲛ ⲟⲩⲉⲓⲃⲉ ⲙⲛ ⲟⲩⲛⲟϭ ⲛϩⲕⲟ

7:26  ⲧⲉⲛⲟⲩ ϭⲉ ⲙⲟⲩⲧⲉ ⲉⲣⲟⲟⲩ ⲛⲧⲉⲧⲛϯ ⲛⲧⲡⲟⲗⲓⲥ ⲧⲏⲣⲥ ⲉⲩϣⲱⲗ ⲙⲡⲗⲁⲟⲥ ⲛⲟⲗⲟⲫⲉⲣⲛⲏⲥ ⲙⲛⲧⲉϥϭⲟⲙ ⲧⲏⲣⲥ

7:27  ⲥⲥⲟⲧⲡ ⲅⲁⲣ ⲛⲁⲛ ⲉⲧⲣⲉⲛϣⲱⲡⲉ ⲛⲁⲩ ⲉⲩⲧⲱⲣⲡ ⲧⲛⲁϣⲱⲡⲉ ⲛⲁⲩ ⲉϩⲉⲛϩⲙϩⲁⲗ ⲛⲥⲱⲛϩ ⲛϭⲓ ⲧⲉⲛⲯⲩⲭⲏ ⲛⲧⲉⲧⲙⲛⲁⲩ ⲉⲡⲙⲟⲩ ⲛⲛⲉⲛϣⲏⲣⲉ ⲕⲟⲩⲓ ϩⲛ ⲛⲉⲛⲃⲁⲗ ⲁⲩⲱ ⲛⲉⲛϩⲓⲟⲙⲉ ⲙⲛ ⲛⲉⲛϣⲏⲣⲉ ⲉⲩϣⲟⲥⲙ ϩⲛ ⲛⲉⲩⲯⲩⲭⲏ

7:28  ⲧⲛⲣⲙⲛⲧⲣⲉ ⲛⲏⲧⲛ ⲛⲧⲡⲉ ⲙⲛ ⲡⲕⲁϩ ⲙⲛ ⲡⲉⲛⲛⲟⲩⲧⲉ ⲁⲩⲱ ⲡϫⲟⲉⲓⲥ ⲛⲛⲉⲛⲉⲓⲟⲧⲉ ⲡⲁⲓ ⲉⲧϫⲓⲕⲃⲁ ⲛϩⲏⲧⲛ ⲕⲁⲧⲁ ⲛⲉⲛⲛⲟⲃⲉ ⲁⲩⲱ ⲕⲁⲧⲁ ⲛⲛⲟⲃⲉ ⲛⲛⲉⲛⲉⲓⲟⲧⲉ ⲉⲧⲣⲉⲧⲙⲉⲓⲣⲉ ⲛⲛⲉⲓϣⲁϫⲉ ϩⲙ ⲡⲟⲟⲩ ⲛϩⲟⲟⲩ

7:29  ⲁϥϣⲱⲡⲉ ⲇⲉ ⲛϭⲓ ⲟⲩⲛⲟϭⲟⲩⲟⲩ ⲛⲣⲓⲙⲉ ϩⲛ ⲧⲙⲏⲧⲉ ⲛⲧⲥⲥⲟⲟⲩϩⲥ ⲧⲏⲣⲥ ϩⲓ ⲟⲩⲥⲟⲡ ⲁⲩⲱ ⲁⲩϫⲓϣⲕⲁⲕ ⲉϩⲣⲁⲓ ⲉⲡϫⲟⲉⲓⲥ ⲡⲉⲩⲛⲟⲩⲧⲉ ϩⲛ ⲟⲩⲛⲟϭ ⲛⲥⲙⲏ

7:30  ⲁⲩⲱ ⲡⲉϫⲁϥ ⲛⲁⲩ ⲛϭⲓ ⲟⲍⲉⲓⲁⲥ ϫⲉ ⲧⲱⲕ ⲛϩⲏⲧ ⲛⲁⲥⲛⲏⲩ ⲙⲁⲣⲉⲛϭⲱϣⲧ ⲉⲃⲟⲗ ⲛⲕⲉϯⲟⲩ ⲛϩⲟⲟⲩ ϣⲁⲛⲧⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲧⲟ ⲉϩⲣⲁⲓ ⲉϫⲱⲛ ⲙⲡⲉϥⲛⲁ ⲛϥⲛⲁⲕⲁⲁⲛ ⲅⲁⲣ ⲁⲛ ⲛⲥⲱϥ ϣⲁⲃⲟⲗ

7:31  ⲉⲣϣⲁⲛⲛⲁⲓ ⲇⲉ ⲟⲩⲉⲓⲛⲉ ⲛⲧⲉⲧⲙⲃⲟⲏⲑⲓⲁ ⲧⲁϩⲟⲛ ⲧⲛⲛⲁⲉⲓⲣⲉ ⲕⲁⲧⲁ ⲛⲉⲧⲛϣⲁϫⲉ

7:32  ⲁⲩⲱ ⲁϥϫⲉⲉⲣⲉ ⲡⲗⲁⲟⲥ ⲉⲃⲟⲗ ⲉϩⲣⲁⲓ ⲉⲧⲉϥⲡⲁⲣⲁⲙⲃⲟⲗⲏ ⲁⲩⲱ ⲁⲩⲃⲱⲕ ⲉϩⲣⲁⲓ ⲉϫⲛⲛⲥⲟⲃⲧ ⲛⲙⲡⲩⲣⲅⲟⲥ ⲛⲧⲉⲩⲡⲟⲗⲓⲥ ⲁⲩⲱ ⲛⲉⲩϩⲓⲟⲙⲉ ⲙⲛⲛⲉⲩϣⲏⲣⲉ ⲁⲩϫⲟⲟⲩⲥⲟⲩ ⲉⲛⲉⲩⲏⲓ ⲁⲩⲱ ⲛⲛⲉⲩϣⲟⲟⲡ ⲡⲉ ϩⲛⲟⲩⲛⲟϭ ⲛⲑⲃⲃⲓⲟ ϩⲣⲁⲓ ϩⲛⲧⲡⲟⲗⲓⲥ

Chapter 8

8:1  ⲁⲥⲥⲱⲧⲙ ⲇⲉ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲛϭⲓ ⲓⲟⲩⲇⲓⲑ ⲧϣⲉⲉⲣⲉ ⲛⲙⲉⲣⲁⲣⲓ ⲡϣⲏⲣⲉ ⲛⲱⲝ ⲡϣⲏⲣⲉ ⲛⲓⲱⲥⲏⲫ ⲡϣⲏⲣⲉ ⲛⲟⲍⲉⲓⲏⲗ ⲡϣⲏⲣⲉ ⲛⲉⲗⲕⲓⲁ ⲡϣⲏⲣⲉ ⲛⲁⲛⲁⲛⲁⲓⲟⲩ ⲡϣⲏⲣⲉ ⲛⲅⲉⲇⲉⲱⲛ ⲡϣⲏⲣⲉ ⲛϩⲣⲁⲫⲁⲉⲓⲛ ⲡϣⲏⲣⲉ ⲛⲁⲭⲓⲧⲱⲃ ⲡϣⲏⲣⲉ ⲛϩⲏⲗⲓⲁⲥ ⲡϣⲏⲣⲉ ⲛⲭⲉⲗⲕⲓⲁⲥ ⲡϣⲏⲣⲉ ⲛⲉⲛⲁⲃ ⲡϣⲏⲣⲉ ⲛⲁⲑⲁⲛⲁⲏⲗ ⲡϣⲏⲣⲉ ⲛⲥⲁⲙⲁⲏⲗ ⲡϣⲏⲣⲉ ⲛⲥⲁⲣⲁⲥⲁⲇⲁⲓ ⲡϣⲏⲣⲉ ⲛⲓⲉⲥⲣⲁⲏⲗ

8:2  ⲁⲩⲱ ⲡⲉⲥϩⲁⲓ ⲡⲉ ⲙⲁⲛⲁⲥⲥⲏ ⲉⲃⲟⲗ ϩⲛ ⲧⲉⲥⲫⲩⲗⲏ ⲁⲩⲱ ⲧⲉⲥⲡⲁⲧⲣⲓⲁ ⲡⲁⲓ ⲉⲛⲧⲁϥⲙⲟⲩ ϩⲛ ⲛⲉϩⲟⲟⲩ ⲙⲡⲱϩⲥ ⲛⲉⲓⲱⲧ

8:3  ⲛⲛⲉϥⲁϩⲉ ⲅⲁⲣ ⲉⲣⲁⲧϥ ϩⲓϫⲛ ⲛⲉⲧⲙⲟⲩⲣ ⲛⲛⲉⲕⲛⲁⲁⲩ ϩⲛ ⲧⲥⲱϣⲉ ⲁⲩϣⲁⲣⲃⲁ ⲣⲉϩⲧⲧⲉϥⲁⲡⲉ ⲁϥⲛⲕⲟⲧⲕ ⲉϩⲣⲁⲓ ⲉϫⲙ ⲡⲉϥϭⲗⲟϭ ⲁϥⲙⲟⲩ ⲉϩⲣⲁⲓ ϩⲛ ⲃⲁⲓⲧⲩⲗⲟⲩⲁ ⲧⲉϥⲡⲟⲗⲓⲥ ⲁⲩⲧⲟⲙⲥϥ ⲙⲛ ⲛⲉϥⲉⲓⲟⲧⲉ ϩⲛ ⲧⲥⲱϣⲉ ⲉⲧϩⲛ ⲧⲙⲏⲧⲉ ⲛⲇⲱⲑⲁⲉⲓⲙ ⲙⲛ ⲃⲁⲗⲁⲙⲱⲛ

8:4  ⲁⲩⲱ ⲛⲉⲣⲉⲓⲟⲩⲇⲉⲓⲑ ϩⲙⲟⲟⲥ ϩⲙ ⲡⲉⲥⲏⲓ ⲉⲥⲟ ⲛⲭⲏⲣⲓⲁ ⲛϣⲟⲙⲧⲉ ⲛⲣⲟⲙⲡⲉ ⲙⲛ ϥⲧⲟⲟⲩ ⲛⲉⲃⲟⲧ

8:5  ⲉⲁⲥⲧⲁⲙⲓⲟ ⲛⲁⲥ ⲛⲟⲩϩⲃⲱ ϩⲓϫⲛ ⲧϫⲉⲛⲉⲡⲱⲣ ⲙⲡⲉⲥⲏⲓ ⲁⲩⲱ ⲁⲥⲕⲱ ⲛⲟⲩϭⲟⲟⲩⲛⲉ ϩⲓϫⲛ ⲧⲉⲥϯⲡⲉ ⲁⲩⲱ ⲛⲉⲣⲉⲛϩⲟⲉⲓⲧⲉ ⲛⲧⲉⲥⲙⲛⲧⲭⲏⲣⲁ ⲧⲟ ϩⲓⲱⲱⲥ

8:6  ⲛⲛⲉⲥⲛⲏⲥⲧⲉⲩⲉ ⲇⲉ ⲡⲉ ⲛⲛⲉϩⲟⲟⲩ ⲧⲏⲣⲟⲩ ⲛⲧⲉⲥⲙⲛⲧⲭⲏⲣⲁ ϣⲁⲧⲛ ⲛϩⲁⲑⲏ ⲛⲛⲥⲁⲃⲃⲁⲧⲟⲛ ⲁⲩⲱ ϩⲁⲑⲏ ⲛⲛⲥⲟⲩⲁ ⲙⲛ ⲛⲥⲟⲩⲁ ⲙⲛ ⲛϣⲁ ⲙⲛ ⲛⲉϩⲟⲟⲟⲩ ⲛⲟⲩⲛⲟϥ ⲙⲡⲏⲓ ⲙⲡⲓⲥⲣⲁⲏⲗ

8:7  ⲛⲛⲉⲛⲁⲛⲟⲩⲥ ⲇⲉ ⲡⲉ ϩⲙ ⲡⲉⲥϩⲟ ⲉⲙⲁⲧⲉ ⲁⲩⲱ ⲉⲛⲉⲛⲉⲥⲱⲥ ϩⲙ ⲡⲉⲥⲉⲓⲛⲉ ⲉⲙⲁⲧⲉ ⲁⲩⲱ ⲁⲙⲁⲛⲁⲥⲥⲏ ⲡⲉⲥϩⲁⲓ ϣⲱϫⲡ ⲛⲁⲥ ⲛⲟⲩⲛⲟⲩⲃ ⲙⲛ ⲟⲩϩⲁⲧ ⲁⲩⲱ ϩⲉⲛϩⲙϩⲁⲗ ⲛϩⲟⲟⲩⲧ ⲙⲛ ϩⲉⲛϩⲙϩⲁⲗ ⲛⲥϩⲓⲙⲉ ⲁⲩⲱ ϩⲉⲛⲧⲃⲛⲟⲟⲩⲉ ⲙⲛ ϩⲉⲛⲥⲱϣⲉ ⲁⲩⲱ ⲁⲥϭⲱ ⲉϩⲣⲁⲓ ⲉϫⲱⲟⲩ

8:8  ⲙⲡⲉⲗⲁⲁⲩ ⲧⲁⲩⲟ ⲉϩⲣⲁⲓ ⲉϫⲱⲥ ⲛⲟⲩϣⲁϫⲉ ⲙⲡⲟⲛⲏⲣⲟⲛ ⲉⲧⲉⲃⲉϫⲉ ⲛⲛⲉⲥⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲉⲙⲁⲧⲉ

8:9  ⲁⲩⲱ ⲁⲥⲥⲱⲧⲙ ⲉⲛϣⲁϫⲉ ⲉⲧϩⲟⲟⲩ ⲛⲧⲉⲡⲗⲁⲟⲥ ⲉⲛⲧⲁⲩϫⲟⲟⲩ ⲉϫⲙ ⲡⲁⲣⲭⲱⲛ ⲉⲧⲃⲉ ϫⲉ ⲁⲩⲣⲕⲟⲩⲓ ⲛϩⲏⲧ ϩⲙ ⲡⲧⲣⲉⲛⲉⲩⲙⲟⲟⲩ ⲥⲃⲏⲕ ⲁⲩⲱ ⲁⲥⲥⲱⲧⲙ ⲛϭⲓ ⲓⲟⲩⲇⲉⲓⲑ ⲉϣⲁϫⲉ ⲛⲓⲙ ⲉⲛⲧⲁϥϫⲟⲟⲩ ⲛⲁⲩ ⲛϭⲓ ⲟⲍⲉⲓⲁⲥ ⲛⲑⲉ ⲉⲛⲧⲁϥⲱⲣⲕ ⲛⲁⲩ ⲉϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲥⲥⲩⲣⲓⲟⲥ ⲙⲛⲛⲥⲁ ϯⲟⲩ ⲛϩⲟⲟⲩ

8:10  ⲁⲥϫⲟⲟⲩ ⲛⲧⲉⲥϩⲙϩⲁⲗ ⲧⲁⲓ ⲉⲧϩⲓϫⲛ ⲛⲉⲥϩⲩⲡⲁⲣⲭⲟⲛⲧⲁ ⲁⲥⲙⲟⲩⲧⲉ ⲉⲭⲁⲃⲣⲉⲓ ⲙⲛ ⲭⲁⲣⲙⲉⲓ ⲛⲉⲡⲣⲉⲥⲃⲩⲧⲉⲣⲟⲥ ⲛⲧⲉⲥⲡⲟⲗⲓⲥ

8:11  ⲁⲩⲉⲓ ϣⲁⲣⲟⲥ ⲡⲉϫⲁⲥ ⲛⲁⲩ ϫⲉ ⲥⲱⲧⲙ ⲉⲣⲟⲓ ⲛⲁⲣⲭⲱⲛ ⲛⲉⲧⲟⲩⲏϩ ϩⲛ ⲃⲁⲓⲧⲩⲗⲟⲩⲁ ⲉⲧⲃⲉ ϫⲉ ⲛϥⲥⲟⲩⲧⲱⲛ ⲁⲛ ⲛϭⲓ ⲡⲉⲧⲛϣⲁϫⲉ ⲉⲛⲧⲁⲧⲉⲧⲛⲧⲁⲩⲟϥ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ ϩⲙ ⲡⲟⲟⲩ ⲛϩⲟⲟⲩ ⲁⲩⲱ ⲁⲧⲉⲧⲛⲧⲁϩⲟ ⲉⲣⲁⲧϥ ⲙⲡⲁⲛⲁϣ ⲉⲛⲧⲁⲧⲉⲧⲛⲧⲁⲩⲟϥ ϩⲛ ⲧⲉⲧⲛⲙⲏⲧⲉ ⲙⲛ ⲡⲛⲟⲩⲧⲉ ⲁⲩⲱ ⲁⲧⲉⲧⲛϫⲟⲟⲥ ⲉϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛϫⲓⲥⲉⲩ ⲉⲣϣⲁⲛⲧⲙⲡϫⲟⲉⲓⲥ ⲕⲱ ⲛⲟⲩⲃⲟⲏⲑⲓⲁ ⲛⲏⲧⲛ ϩⲣⲁⲓ ϩⲙ ⲡⲉⲓϩⲟⲟⲩ

8:12  ⲧⲉⲛⲟⲩ ϭⲉ ⲛⲧⲉⲧⲛⲛⲓⲙ ⲛⲧⲱⲧⲛ ⲉⲁⲧⲉⲧⲛⲡⲓⲣⲁⲍⲉ ⲙⲡⲛⲟⲩⲧⲉ ϩⲙ ⲡⲟⲟⲩ ⲛϩⲟⲟⲩ ⲁⲩⲱ ⲁⲧⲉⲧⲛⲁϩⲉⲣⲁⲧⲧⲏⲩⲧⲛ ϩⲁ ⲡⲛⲟⲩⲧⲉ ⲛⲧⲙⲏⲧⲉ ⲛⲛϣⲏⲣⲉ ⲛⲛⲣⲱⲙⲉ

8:13  ⲉⲁⲧⲉⲧⲛϩⲟⲧϩⲧ ⲙⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲉⲛⲧⲉⲧⲛⲁⲉⲓⲙⲉ ⲁⲛ ⲉⲗⲁⲁⲩ ϣⲁ ⲉⲛⲉϩ

8:14  ⲉⲧⲃⲉ ϫⲉ ⲡϣⲓⲕ ⲙⲡϩⲏⲧ ⲙⲡⲣⲱⲙⲉ ⲛⲧⲉⲧⲛⲁϩⲉ ⲉⲣⲟϥ ⲁⲛ ⲁⲩⲱ ⲛϣⲁϫⲉ ⲙⲡⲉϥϩⲏⲧ ⲛⲧⲉⲧⲛⲁⲧϫⲟⲟⲩ ⲁⲛ ⲁⲩⲱ ⲛⲁϣ ⲛϩⲉ ⲧⲉⲧⲛⲁϣϩⲉⲧϩⲧⲡⲛⲟⲩⲧⲉ ⲡⲉⲛⲧⲁϥⲧⲁⲙⲓⲉⲛⲁⲓ ⲧⲏⲣⲟⲩ ⲁⲩⲱ ⲧⲉⲧⲛⲁⲥⲟⲩⲛⲡⲉϥϩⲏⲧ ⲛⲧⲉⲧⲛⲉⲓⲙⲉ ⲉⲡⲉϥⲙⲟⲕⲙⲉⲕ ⲙⲡⲱⲣ ⲛⲁⲥⲛⲏⲩ ⲙⲡⲣϯⲛⲟⲩϭⲉ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

8:15  ϫⲉ ⲉϥϣⲁⲛⲧⲙⲟⲩⲱϣ ⲉⲃⲟⲏⲑⲉⲓ ⲉⲣⲟⲛ ϩⲣⲁⲓ ϩⲙ ⲡϯⲟⲩ ⲛϩⲟⲟⲩ ⲛⲧⲟϥ ⲡⲉⲧⲉⲛⲟⲩⲧϥⲧⲉⲝⲟⲩⲥⲓⲁ ⲙⲙⲁⲩ ⲉⲃⲟⲏⲑⲉⲓ ⲉⲣⲟⲛ ϩⲛ ⲛⲉϩⲟⲟⲩ ⲉⲧⲉϩⲛⲁϥ ⲏ ⲉϥⲟⲧⲛ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲛⲛⲉⲛϫⲓⲥⲉⲉⲩ

8:16  ⲛⲧⲱⲧⲛ ⲇⲉ ⲙⲡⲣⲥⲱϣⲧ ⲛⲛϣⲟϫⲛⲉ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉ ⲙⲉⲣⲉⲡⲛⲟⲩⲧⲉ ⲟ ⲛⲑⲉ ⲁⲛ ⲛⲟⲩⲣⲱⲙⲉ ⲉⲧⲣⲉⲩϭⲱⲛⲧ ⲉⲣⲟϥ ⲟⲩⲇⲉ ⲛⲑⲉ ⲁⲛ ⲛⲟⲩϣⲏⲣⲉ ⲛⲣⲱⲙⲉ ⲉⲧⲣⲉⲩϯϩⲁⲡ ⲉⲣⲟϥ

8:17  ⲉⲧⲃⲉ ϫⲉ ⲧⲛⲁⲉⲡⲓⲕⲁⲗⲉⲓ ⲙⲙⲟϥ ⲉⲩⲃⲟⲏⲑⲓⲁ ⲛⲁⲛ ⲉⲛϭⲉⲉⲧ ⲉⲡⲟⲩϫⲁⲓ ⲡⲉⲃⲟⲗϩⲓⲧⲟⲟⲧϥ ⲁⲩⲱ ϥⲛⲁⲥⲱⲧⲙ ⲡⲉ ⲉⲡⲉⲛϩⲣⲟⲟⲩ ⲉϣⲱⲡⲉ ⲉϩⲛⲁϥ

8:18  ⲉⲧⲃⲉ ϫⲉ ⲙⲡⲉⲟⲩⲟⲛ ⲧⲱⲟⲩⲛ ϩⲛ ⲧⲉⲛⲅⲉⲛⲉⲁ ⲟⲩⲇⲉ ⲛⲥⲉϣⲟⲟⲡ ⲁⲛ ϩⲙ ⲡⲟⲟⲩ ⲛϩⲟⲟⲩ ⲛϭⲓ ⲟⲩⲫⲩⲗⲏ ⲟⲩⲇⲉ ⲟⲩⲡⲁⲧⲣⲓⲁ ⲟⲩⲇⲉ ⲟⲩⲇⲏⲙⲟⲥ ⲟⲩⲇⲉ ⲟⲩⲡⲟⲗⲓⲥ ⲉⲃⲟⲗ ⲛϩⲏⲧⲛ ⲛⲁⲓ ⲉⲧϣⲙϣⲉ ⲛϩⲉⲛⲛⲟⲩⲧⲉ ⲛⲧⲁⲙⲓⲟ ⲛϭⲓϫ ⲕⲁⲧⲁ ⲑⲉ ⲉⲛⲧⲁⲥϣⲱⲡⲉ ϩⲛ ⲛⲉϩⲟⲟⲩ ⲛϣⲟⲣⲡ

8:19  ⲉⲧⲃⲉ ⲡⲁⲓ ⲁⲩϯ ⲛⲛⲉⲛⲉⲓⲟⲧⲉ ⲉϩⲣⲁⲓ ⲉⲧⲟⲟⲧⲥ ⲛⲧⲥⲏϥⲉ ⲁⲩⲱ ⲉⲩⲧⲱⲣⲡ ⲁⲩⲱ ⲁⲩϩⲉ ϩⲛ ⲟⲩⲛⲟϭ ⲛϩⲧⲟⲡ ⲙⲡⲉⲙⲧⲟ ⲉⲃⲟⲗ ⲛⲛⲉⲩϫⲓϫⲉⲉⲩ

8:20  ⲁⲛⲟⲛ ⲇⲉ ⲙⲡⲛⲥⲟⲩⲛⲕⲉⲛⲟⲩⲧⲉ ⲛⲃⲗⲗⲁϥ ⲉⲧⲃⲉ ⲡⲁⲓ ⲧⲛϩⲉⲗⲡⲓⲍⲉ ϫⲉ ⲛϥⲛⲁⲟⲃϣϥ ⲁⲛ ⲉⲣⲟⲛ ⲟⲩⲇⲉ ⲉⲡⲉⲛⲅⲉⲛⲟⲥ

8:21  ⲉⲧⲃⲉ ϫⲉ ⲉⲩϣⲁⲛϫⲓⲧⲛ ⲡⲉ ϩⲓ ⲛⲁⲓ ⲥⲉⲛⲁⲡⲱⲣⲕ ⲡⲉ ⲛϯⲟⲩⲇⲁⲓⲁ ⲧⲏⲣⲥ ⲁⲩⲱ ⲥⲉⲛⲁϣⲱⲗ ⲡⲉ ⲙⲡⲉⲛⲙⲁ ⲉⲧⲟⲩⲁⲁⲃ ⲛϥϣⲓⲛⲉ ⲛⲥⲁⲡⲉⲩϫⲱϩⲙ ⲉⲃⲟⲗ ϩⲙ ⲡⲉⲛⲥⲛⲟϥ

8:22  ⲁⲩⲱ ⲡϩⲱⲃⲧ ⲛⲛⲉⲛⲥⲛⲏⲩ ⲙⲛⲧⲁⲓⲭⲙⲁⲗⲱⲥⲓⲁ ⲙⲡⲕⲁϩ ⲙⲛⲡϣⲱϥ ⲛⲧⲉⲛⲕⲗⲏⲣⲟⲛⲟⲙⲓⲁ ϥⲛⲁⲕⲧⲟϥ ⲉϩⲣⲁⲓ ⲉϫⲛ ⲧⲉⲛⲁⲡⲉ ϩⲛ ⲛϩⲉⲑⲛⲟⲥ ⲉⲧⲛⲁⲣϩⲙϩⲁⲗ ϩⲣⲁⲓ ⲛϩⲏⲧⲟⲩ ⲁⲩⲱ ⲧⲛⲛⲁϣⲱⲡⲉ ⲉⲩϫⲣⲟⲡ ⲙⲛ ⲟⲩⲛⲟϭⲛⲉϭ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲁϫⲡⲟⲛ ⲛⲁⲩ

8:23  ϫⲉ ⲛⲧⲉⲛⲙⲛⲧϩⲙϩⲁⲗ ⲛⲁⲥⲟⲟⲩⲧⲛ ⲁⲛ ⲡⲉ ⲉⲩϩⲙⲟⲧ ⲁⲗⲗⲁ ⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲁⲕⲁⲁⲥ ⲡⲉ ⲉⲩⲥⲱϣ

8:24  ⲧⲉⲛⲟⲩ ϭⲉ ⲛⲉⲥⲛⲏⲩ ⲙⲁⲣⲉⲛⲧⲁⲙⲉ ⲛⲉⲛⲥⲛⲏⲩ ⲉⲧⲃⲉ ϫⲉ ⲉⲣⲉⲧⲉⲩⲯⲩⲭⲏ ⲁϣⲉ ⲛϩⲏⲧⲛ ⲁⲩⲱ ⲙⲡⲉⲧⲟⲩⲁⲁⲃ ⲙⲛ ⲡⲏⲓ ⲙⲡⲉⲩⲑⲩⲥⲓⲁⲥⲧⲏⲣⲓⲟⲛ ⲉⲩⲧⲁϫⲣⲏⲩ ⲉϩⲣⲁⲓ ⲉϫⲱⲛ

8:25  ⲛⲃⲗⲗⲛⲁⲓ ⲧⲏⲣⲟⲩ ⲙⲁⲣⲉⲛϣⲡϩⲙⲟⲧ ⲛⲧⲛⲡϫⲟⲉⲓⲥ ⲡⲉⲛⲛⲟⲩⲧⲉ ⲡⲁⲓ ⲉⲧⲡⲓⲣⲁⲍⲉ ⲙⲙⲟⲛ ⲕⲁⲧⲁ ⲛⲉⲛⲉⲓⲟⲧⲉ

8:26  ⲁⲣⲓⲡⲙⲉⲉⲩⲉ ⲛⲛⲉⲛⲧⲁϥⲁⲁⲩ ⲛⲁⲃⲣⲁϩⲁⲙ ⲁⲩⲱ ⲛⲉⲛⲧⲁϥⲡⲓⲣⲁⲍⲉ ⲛⲓⲥⲁⲁⲕ ⲛϩⲏⲧⲟⲩ ⲙⲛ ⲛⲉⲛⲧⲁⲩϣⲱⲡⲉ ⲛⲓⲁⲕⲱⲃ ϩⲛ ⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲉϥⲙⲟⲟⲛⲉ ⲛⲛⲉⲥⲟⲟⲩ ⲛⲗⲁⲃⲁⲛ ⲡⲥⲟⲛ ⲛⲧⲉϥⲙⲁⲁⲩ

8:27  ϫⲉ ⲕⲁⲧⲁ ⲑⲉ ⲉⲛⲧⲁϥⲡⲓⲣⲁⲍⲉ ⲛⲛⲏ ⲉⲩϩⲟⲧϩⲧ ⲙⲡⲉⲩϩⲏⲧ ⲁⲛⲟⲛ ϩⲱⲱⲛ ⲉϥϫⲓⲕⲃⲁ ⲙⲙⲟⲛ ⲁⲛ ⲁⲗⲗⲁ ⲉⲣⲉⲡϫⲟⲉⲓⲥ ⲙⲁⲍⲧⲓⲅⲟⲩ ⲛⲛⲉⲧϩⲏⲛ ⲉⲣⲟϥ ⲉⲩⲥⲃⲱ

8:28  ⲡⲉϫⲁϥ ⲇⲉ ⲛⲁⲥ ⲛϭⲓ ⲟⲍⲉⲓⲁⲥ ϫⲉ ⲛⲉⲛⲧⲁϫⲟⲟⲩ ⲧⲏⲣⲟⲩ ⲉⲛⲧⲁϫⲟⲟⲩ ϩⲛⲟⲩϩⲏⲧ ⲉⲛⲁⲛⲟⲩϥ ⲁⲩⲱ ⲙⲛⲡⲉⲧⲛⲁϯⲟⲩⲃⲉ ⲛⲟⲩϣⲁϫⲉ

8:29  ϫⲉ ⲉⲣⲉⲧⲟⲩⲥⲟⲫⲓⲁ ⲟⲩⲏⲛϩ ⲉⲃⲟⲗ ⲁⲛ ϩⲙ ⲡⲟⲟⲩ ⲛϩⲟⲟⲩ ⲁⲗⲗⲁ ⲉϫⲓⲛ ⲛⲉϩⲟⲟⲩ ⲛϣⲟⲣⲡ ⲁϥⲉⲓⲙⲉ ⲛϭⲓ ⲡⲗⲁⲟⲥ ⲧⲏⲣϥ ⲉⲧⲟⲩⲙⲛⲧⲣⲙⲛϩⲏⲧ ⲕⲁⲧⲁ ⲑⲉ ϫⲉ ⲟⲩⲁⲅⲁⲑⲟⲛ ⲡⲉ ⲡⲉⲡⲗⲁⲥⲙⲁ ⲙⲡⲟⲩϩⲏⲧ

8:30  ⲁⲗⲗⲁ ⲁⲡⲗⲁⲟⲥ ⲉⲓⲃⲉ ⲉⲙⲁⲧⲉ ⲁⲩⲁⲛⲁⲅⲕⲁⲍⲉ ⲙⲙⲟⲛ ⲉⲉⲓⲣⲉ ⲕⲁⲧⲁ ⲑⲉ ⲉⲛⲧⲁⲛϣⲁϫⲉ ⲛⲙⲙⲁⲩ ⲁⲩⲱ ⲁⲩⲉⲓⲛⲉ ⲉϩⲣⲁⲓ ⲉϫⲱⲛ ⲛⲟⲩⲁⲛⲁϣ ⲡⲁⲓ ⲉⲧⲛⲁϣⲡⲁⲣⲁⲃⲁ ⲙⲙⲟϥ ⲁⲛ

8:31  ⲧⲉⲛⲟⲩ ϭⲉ ⲥⲟⲡⲥ ϩⲁⲣⲟⲛ ϫⲉ ⲛⲧⲉⲟⲩⲥϩⲓⲙⲉ ⲛⲣⲉϥϣⲙϣⲉⲛⲟⲩⲧⲉ ⲁⲩⲱ ⲡϫⲟⲉⲓⲥ ⲛⲁⲧⲛⲛⲟⲟⲩ ⲙⲡϩⲟⲩⲙⲡⲉ ⲛϥⲧⲣⲉⲛⲉⲛϣⲏⲓ ⲙⲟⲩϩ ⲛⲧⲉⲧⲙⲱϫⲛ ϭⲉ

8:32  ⲡⲉϫⲁⲥ ⲇⲉ ⲛⲁⲩ ⲛϭⲓ ⲓⲟⲩⲇⲉⲓⲑ ϫⲉ ⲥⲱⲧⲙ ⲉⲣⲟⲓ ⲁⲩⲱ ϯⲛⲁⲉⲓⲣⲉ ⲛⲟⲩϩⲱⲃ ⲡⲁⲓ ⲉⲧⲛⲁⲣⲥⲟⲉⲓⲧ ⲉϩⲉⲛϫⲱⲙ ⲛⲛϣⲏⲣⲉ ⲙⲡⲉⲛⲅⲉⲛⲟⲥ

8:33  ⲛⲧⲉⲧⲛⲛⲁⲁϩⲉⲣⲁⲧⲧⲏⲩⲧⲛ ϩⲓϫⲛ ⲧⲡⲩⲗⲏ ⲛⲧⲉⲓⲟⲩϣⲏ ⲁⲩⲱ ⲁⲛⲟⲕ ϯⲛⲁⲃⲱⲕ ⲉⲃⲟⲗ ⲙⲛⲧⲁϩⲙϩⲁⲗ ⲁⲩⲱ ϩⲣⲁⲓ ϩⲛ ⲛⲉϩⲟⲟⲩ ⲛⲁⲓ ⲉⲛⲧⲁⲧⲉⲧⲛϫⲟⲟⲩ ϫⲉ ⲙⲛⲛⲥⲱⲟⲩ ⲧⲛⲛⲁϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛϫⲓϫⲉⲉⲩ ⲡϫⲟⲉⲓⲥ ⲛⲁϭⲙⲡϣⲓⲛⲉ ⲙⲡⲓⲥⲣⲁⲏⲗ ϩⲣⲁⲓ ϩⲛ ⲧⲁϭⲓϫ

8:34  ⲛⲧⲱⲧⲛ ⲇⲉ ⲛⲛⲉⲧⲛϩⲟⲧϩⲧ ⲙⲡⲁϩⲱⲃ ⲛϯⲛⲁϫⲟⲟϥ ⲅⲁⲣ ⲁⲛ ⲉⲣⲱⲧⲛ ϣⲁⲛϯϫⲱⲕ ⲉⲃⲟⲗ ⲛⲛⲉϯⲛⲁⲁⲁⲩ

8:35  ⲡⲉϫⲁϥ ⲇⲉ ⲛⲁⲥ ⲛϭⲓ ⲟⲍⲉⲓⲁⲥ ⲙⲛ ⲛⲁⲣⲭⲱⲛ ϫⲉ ⲃⲁⲕ ϩⲛ ⲟⲩⲉⲓⲣⲏⲛⲏ ⲁⲩⲱ ⲡϫⲟⲉⲓⲥ ⲡⲉⲛⲛⲟⲩⲧⲉ ϩⲓϩⲏ ⲙⲙⲟ ⲉⲩϫⲓⲕⲃⲁ ⲛⲛⲉⲛϫⲁϫⲉ

8:36  ⲁⲩⲕⲧⲟⲟⲩ ⲇⲉ ⲉⲃⲟⲗ ϩⲛ ⲧⲉⲥⲕⲏⲛⲏ ⲁⲩⲃⲱⲕ ⲉⲃⲟⲗ ⲉⲛⲉⲩⲙⲁ ⲉⲧⲧⲏϣ ⲛⲁⲩ

Chapter 9

9:1  ⲓⲟⲩⲇⲉⲓⲑ ⲇⲉ ⲁⲥⲡⲁϩⲧⲥ ⲉϫⲙ ⲡⲉⲥϩⲟ ⲁⲥⲛⲉϫⲕⲣⲙⲥ ⲉϫⲛ ⲧⲉⲥⲁⲡⲉ ⲁⲥϭⲱⲗⲡ ⲉⲃⲟⲗ ⲛⲧϭⲟⲟⲩⲛⲉ ⲉⲧϩⲓⲱⲱⲥ ⲁⲩⲱ ϣⲁϩⲣⲁⲓ ⲉⲧⲉⲛⲟⲩ ⲛⲛⲉϣⲁⲩⲧⲁⲗⲟ ⲉϩⲣⲁⲓ ⲡⲉ ⲛⲡϣⲟⲩϩⲏⲛⲉ ⲙⲡⲉⲣⲟⲩϩⲉ ⲉⲧⲙⲙⲁⲩ ϩⲛ ⲑⲓⲉⲣⲟⲩⲥⲁⲗⲏⲙ ϩⲙ ⲡⲏⲓ ⲙⲡⲛⲟⲩⲧⲉ ⲁⲥϫⲓϣⲕⲁⲕ ⲇⲉ ⲉⲃⲟⲗ ⲛϭⲓ ⲓⲟⲩⲇⲉⲓⲑ ⲉϩⲣⲁⲓ ⲉⲡϫⲟⲉⲓⲥ ⲡⲉϫⲁⲥ ϩⲛ ⲟⲩⲛⲟϭ ⲛⲥⲙⲏ ϫⲉ

9:2  ⲡϫⲟⲉⲓⲥ ⲡⲛⲟⲩⲧⲉ ⲙⲡⲁⲉⲓⲱⲧ ⲥⲩⲙⲉⲱⲛ ⲡⲁⲓ ⲉⲛⲧⲁⲕϯ ⲉϩⲣⲁⲓ ⲉⲧⲉϥϭⲓϫ ⲛⲟⲩⲥⲏϥⲉ ⲉϫⲓⲕⲃⲁ ⲛⲛⲁⲗⲟⲅⲉⲛⲏⲥ ⲛⲁⲓ ⲉⲛⲧⲁⲩⲃⲱⲗ ⲉⲃⲟⲗ ⲛⲧⲟⲟⲧⲉ ⲛⲟⲩⲡⲁⲣⲑⲉⲛⲟⲥ ⲉⲩⲥⲱϣϥ ⲁⲩⲱ ⲁⲩϭⲱⲗⲡ ⲉⲃⲟⲗ ⲛⲟⲩⲙⲉⲣⲟⲥ ⲉⲩϣⲓⲡⲉ ⲁⲩⲱ ⲁⲩϫⲱϩⲙ ⲛⲟⲩⲟⲟⲧⲉ ⲉⲩⲛⲟϭⲛⲉϭ ⲁⲕϫⲟⲟⲥ ⲅⲁⲣ ϫⲉ ⲛⲛⲉⲥϣⲱⲡⲉ ϩⲓ ⲛⲁⲓ ⲁⲩⲱ ⲁⲩⲁⲁⲥ

9:3  ⲉⲧⲃⲉ ⲡⲁⲓ ⲁⲕϯⲛⲉⲩⲁⲣⲭⲱⲛ ⲉⲩϩⲱⲧⲃ ⲁⲩⲱ ⲡⲉⲩⲡⲣⲏϣ ⲡⲁⲓ ⲉⲛⲧⲁϥϯϣⲓⲡⲉ ⲛⲧⲓⲁⲡⲁⲧⲏ ⲉⲩⲁⲡⲁⲧⲁ ⲙⲙⲟⲥ ⲉⲩⲥⲛⲟϥ ⲁⲩⲱ ⲁⲕⲣⲱϩⲧ ⲛϩⲉⲛϩⲙϩⲁⲗ ⲉϫⲛ ϩⲉⲛⲇⲩⲛⲁⲥⲧⲏⲥ ⲁⲩⲱ ϩⲉⲛⲇⲩⲛⲁⲥⲧⲏⲥ ⲉϫⲛ ⲛⲉⲩⲑⲣⲟⲛⲟⲥ

9:4  ⲁⲩⲱ ⲁⲕϯ ⲛⲛⲉⲩϩⲓⲟⲙⲉ ⲉⲩϣⲱⲗ ⲁⲩⲱ ⲛⲉⲩϣⲉⲉⲣⲉ ⲉⲩⲁⲓⲭⲙⲁⲗⲱⲥⲓⲁ ⲁⲩⲱ ⲛⲉⲩϣⲱⲗ ⲉⲧⲣⲉⲩⲡⲟϣⲟⲩ ⲉϫⲱⲟⲩ ⲛϭⲓ ⲛϣⲏⲣⲉ ⲛⲛⲉⲛⲧⲁⲕⲙⲉⲣⲓⲧⲟⲩ ⲛⲛⲉⲛⲧⲁⲩⲕⲱϩ ϩⲙ ⲡⲉⲕⲕⲱϩ ⲁⲩⲱ ⲁⲩⲃⲱⲧⲉ ⲙⲡϫⲱϩⲙ ⲙⲡⲉⲩⲥⲛⲟϥ ⲉⲩⲉⲡⲓⲕⲁⲗⲓ ⲙⲙⲟⲕ ⲉⲩⲃⲟⲏⲑⲟⲥ ⲡⲛⲟⲩⲧⲉ ⲡⲁⲛⲟⲩⲧⲉ ⲥⲱⲧⲙ ⲉⲣⲟⲓ ⲧⲉⲭⲏⲣⲁ

9:5  ⲛⲧⲟⲕ ⲅⲁⲣ ⲁⲕⲧⲁⲙⲓⲟ ⲛⲛⲉⲧϩⲁⲑⲏ ⲛⲛⲏ ⲁⲩⲱ ⲛⲏ ⲙⲛ ⲛⲉⲧⲙⲛⲛⲥⲱⲟⲩ ⲁⲩⲱ ⲛⲁⲧⲉⲛⲟⲩ ⲙⲛ ⲛⲉⲧⲛⲏⲩ ⲁⲕⲙⲉⲉⲩⲉ ⲉⲣⲟⲟⲩ ⲁⲩⲱ ⲁⲩϣⲱⲡⲉ ⲛϭⲓ ⲛⲉⲛⲧⲁⲕⲙⲉⲕⲙⲟⲩⲕⲟⲩ

9:6  ⲁⲩⲱ ⲁⲩⲁϩⲉⲣⲁⲧⲟⲩ ⲛϭⲓ ⲛⲉⲛⲧⲁⲕϣⲟϫⲛⲉ ⲉⲣⲟⲟⲩ ⲡⲉϫⲁⲩ ϫⲉ ⲉⲓⲥ ϩⲏⲏⲧⲉ ⲧⲛϩⲙ ⲡⲉⲓⲙⲁ ⲛⲉⲕϩⲓⲟⲟⲩⲉ ⲅⲁⲣ ⲧⲏⲣⲟⲩ ⲥⲉⲥⲃⲧⲱⲧ ⲁⲩⲱ ⲡⲉⲕϩⲁⲡ ⲉϥϣⲟⲟⲡ ϩⲛ ⲟⲩϣⲣⲡⲥⲟⲟⲩⲛ

9:7  ⲉⲓⲥ ϩⲏⲏⲧⲉ ⲅⲁⲣ ⲛⲁⲥⲥⲩⲣⲓⲟⲥ ⲁⲩⲁϣⲁⲓ ϩⲛ ⲧⲉⲩϭⲟⲙ ⲁⲩⲱ ⲁⲩϫⲓⲥⲉ ⲉϩⲣⲁⲓ ⲉϫⲛ ⲟⲩϩⲧⲟ ⲙⲛ ⲟⲩⲁⲛⲁⲃⲁⲧⲏⲥ ⲁⲩⲱ ⲁⲩϣⲟⲩϣⲟⲩ ⲙⲙⲱⲟⲩ ϩⲙ ⲡⲉⲕⲃⲟⲓ ⲛⲛⲉⲩⲣⲙⲣⲁⲧⲟⲩ ⲁⲩⲱ ⲁⲩⲕⲁϩⲧⲏⲩ ⲉⲩϩⲟⲡⲗⲟⲛ ⲙⲛ ⲟⲩϭⲗ ⲙⲛ ⲟⲩⲡⲓⲧⲉ ⲙⲛ ⲟⲩⲥⲫⲉⲛⲇⲱⲛⲏ ⲁⲩⲱ ⲙⲡⲟⲩⲉⲓⲙⲉ ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲉⲧⲟⲩⲱϣϥ ⲛⲙⲡⲟⲗⲉⲙⲟⲥ

9:8  ϫⲟⲉⲓⲥ ⲡⲉ ⲡⲉϥⲣⲁⲛ ⲛⲧⲟⲕ ⲟⲩⲱϣϥ ⲛⲧⲉⲩϭⲟⲙ ⲁⲩⲱ ⲛⲅⲧⲁⲩⲟ ⲉⲡⲉⲥⲏⲧ ⲙⲡⲉⲩⲁⲙⲁϩⲧⲉ ϩⲣⲁⲓ ϩⲙ ⲡⲉⲕϭⲱⲛⲧ ⲁⲩϣⲟϫⲛⲉ ⲅⲁⲣ ⲉϥⲱⲧⲉ ⲛⲛⲉⲕⲙⲁ ⲉⲧⲟⲩⲁⲁⲃ ⲁⲩⲱ ⲉϫⲱϩⲙ ⲡⲙⲁ ⲛⲙⲧⲟⲛ ⲙⲡⲙⲁ ⲛϣⲱⲡⲉ ⲙⲡⲣⲁⲛ ⲙⲡⲕⲉϩⲟⲟⲩ ⲉⲧⲁⲩⲟ ⲉⲡⲉⲥⲏⲧ ϩⲛ ⲟⲩⲡⲉⲛⲓⲡⲉ ⲙⲡⲧⲁⲡ ⲙⲡⲉⲕⲑⲩⲥⲓⲁⲥⲧⲏⲣⲓⲟⲛ

9:9  ϭⲱϣⲧ ⲉϩⲣⲁⲓ ⲉϫⲛ ⲧⲉⲩⲙⲛⲧϫⲁⲥⲓϩⲏⲧ ⲛⲅⲧⲛⲛⲟⲟⲩ ⲛⲧⲉⲕⲟⲣⲅⲏ ⲉϩⲣⲁⲓ ⲉϫⲛ ⲛⲉⲩⲁⲡⲏⲩⲉ ϯ ⲉϩⲣⲁⲓ ⲉⲧⲁϭⲓϫ ⲧⲉⲭⲏⲣⲁ ⲙⲡⲁⲙⲁϩⲧⲱⲉ ⲉⲛⲧⲁⲓⲙⲉⲉⲩⲉ ⲉⲣⲟϥ

9:10  ⲣⲱϩⲧ ⲛⲟⲩϩⲙϩⲁⲗ ⲉϫⲛ ⲟⲩⲁⲣⲭⲱⲛ ⲉⲃⲟⲗ ϩⲛ ⲛⲉⲥⲡⲟⲧⲟⲩ ⲛⲧⲁⲁⲡⲁⲧⲏ ⲁⲩⲱ ⲟⲩⲁⲣⲭⲱⲛ ⲉϫⲙ ⲡⲉϥϩⲙϩⲁⲗ ⲟⲩⲱϣϥ ⲙⲡⲉⲩϫⲓⲥⲉ ϩⲛ ⲧϭⲓϫ ⲛⲟⲩⲥϩⲓⲙⲉ

9:11  ⲛⲉⲣⲉⲡⲉⲕⲁⲙⲁϩⲧⲉ ⲅⲁⲣ ϣⲟⲟⲡ ⲁⲛ ⲉⲃⲟⲗ ϩⲛ ⲟⲩⲁϣⲏ ⲟⲩⲇⲉ ⲛⲉⲣⲉⲧⲉⲕϭⲟⲙ ⲁⲛ ϩⲛ ϩⲉⲛϫⲱⲱⲣⲉ ⲁⲗⲗⲁ ⲛⲧⲕⲡⲛⲟⲩⲧⲉ ⲛⲛⲉⲑⲃⲃⲓⲏⲩ ⲡⲃⲟⲏⲑⲟⲥ ⲛⲛⲉⲧϭⲟϫⲃ ⲡⲣⲉϥϣⲱⲡ ⲉⲣⲟϥ ⲛⲛϭⲱⲃ ⲡⲉⲥⲕⲉⲡⲁⲥⲧⲏⲥ ⲛⲛⲉⲛⲧⲁⲩⲣⲡⲉⲩⲱⲃϣ ⲡⲥⲱⲧⲏⲣ ⲛⲛⲉⲧⲉⲙⲛⲧⲁⲩϩⲉⲗⲡⲓⲥ ⲙⲙⲁⲩ

9:12  ϩⲁⲓⲟ ϩⲁⲓⲟ ⲡⲛⲟⲩⲧⲉ ⲙⲡⲁⲉⲓⲱⲧ ⲁⲩⲱ ⲡⲛⲟⲩⲧⲉ ⲛⲧⲉⲕⲗⲏⲣⲟⲛⲟⲙⲓⲁ ⲙⲡⲓⲥⲣⲁⲏⲗ ⲡϫⲟⲉⲓⲥ ⲛⲙⲡⲏⲩⲉ ⲙⲛⲡⲕⲁϩ ⲡⲣⲉϥⲥⲱⲛⲧ ⲛⲙⲙⲟⲟⲩ ⲛⲉⲓⲟⲟⲩⲉ ⲡⲣⲣⲟ ⲙⲡⲉϥⲥⲱⲛⲧ ⲧⲏⲣϥ ⲥⲱⲧⲙ ⲉⲡⲁⲥⲟⲡⲥ

9:13  ⲁⲩⲱ ⲛⲅϯ ⲙⲡⲁϣⲁϫⲉ ⲙⲛ ⲧⲁⲁⲡⲁⲧⲏ ⲉⲩϣⲱϭⲉ ⲛⲁⲩ ⲙⲛ ⲟⲩⲥⲁϣ ⲛⲁⲓ ⲉⲛⲧⲁⲩϣⲟϫⲛⲉ ⲉϫⲛ ϩⲉⲛϩⲃⲏⲩⲉ ⲉⲩⲛⲁϣⲧ ⲉϩⲟⲩⲛ ⲉⲧⲉⲕⲇⲓⲁⲑⲏⲕⲏ ⲁⲩⲱ ⲉⲡⲉⲕⲏⲓ ⲉⲧⲟⲩⲁⲁⲃ ⲁⲩⲱ ⲉⲡⲧⲟⲟⲩ ⲛⲥⲓⲱⲛ ⲡⲏⲓ ⲛⲙⲙⲁ ⲛⲁⲙⲁϩⲧⲉ ⲛⲛⲉⲕϣⲏⲣⲉ

9:14  ⲁⲩⲱ ⲉⲕⲉⲉⲓⲣⲉ ⲛⲟⲩⲥⲟⲟⲩⲛ ⲉϩⲣⲁⲓ ⲉϫⲙ ⲡⲉⲕϩⲉⲑⲛⲟⲥ ⲧⲏⲣϥ ⲁⲩⲱ ⲉϫⲛ ⲧⲉⲕⲫⲩⲗⲏ ⲧⲏⲣⲥ ⲉⲧⲣⲉⲩⲥⲟⲩⲛⲅ ϫⲉ ⲛⲧⲟⲕ ⲡⲉ ⲡⲛⲟⲩⲧⲉ ⲡⲛⲟⲩⲧⲉ ⲛⲧϭⲟⲙ ⲧⲏⲣⲥ ⲙⲛ ⲡⲁⲙⲁϩⲧⲉ ⲁⲩⲱ ⲙⲛ ⲕⲉⲟⲩⲁ ⲛⲃⲗⲗⲁⲕ ⲉϥⲣⲛⲁϣⲧⲉ ⲉⲡⲅⲉⲛⲟⲥ ⲙⲡⲓⲥⲣⲁⲏⲗ

Chapter 10

10:1  ⲁⲩⲱ ⲁⲥϣⲱⲡⲉ ⲛⲧⲉⲣⲉⲥⲟⲩⲱ ⲉⲥϫⲓϣⲕⲁⲕ ⲉϩⲣⲁⲓ ⲉⲡⲛⲟⲩⲧⲉ ⲙⲡⲓⲥⲣⲁⲏⲗ ⲁⲩⲱ ⲁⲥϫⲱⲕ ⲉⲃⲟⲗ ⲛⲛⲉⲓϣⲁϫⲉ ⲧⲏⲣⲟⲩ

10:2  ⲁⲥⲧⲱⲟⲩⲛ ϩⲓ ⲡⲉⲥⲏⲧ ⲁⲥⲙⲟⲩⲧⲉ ⲉⲧⲉⲥϩⲙϩⲁⲗ ⲁⲥⲉⲓ ⲉⲡⲉⲥⲏⲧ ⲉⲡⲙⲁ ⲉϣⲁⲥϣⲱⲡⲉ ⲛϩⲏⲧϥ ϩⲛ ⲛⲉϩⲟⲟⲩ ⲛⲛⲥⲁⲃⲃⲁⲧⲟⲛ ⲁⲩⲱ ϩⲛ ⲛⲉⲥϣⲁ

10:3  ⲁⲥϥⲓ ⲉⲃⲟⲗ ϩⲓϫⲱⲥ ⲛⲧϭⲟⲟⲩⲛⲉ ⲉⲛⲉⲥϩⲓⲱⲱⲥ ⲁⲥⲕⲁⲁⲥ ⲕⲁϩⲏⲩ ⲛⲛϩⲟⲉⲓⲧⲉ ⲛⲧⲉⲥⲙⲛⲧⲭⲏⲣⲁ ⲁⲥϫⲱⲕⲙ ⲙⲡⲉⲥⲥⲱⲙⲁ ϩⲛ ⲟⲩⲙⲟⲟⲩ ⲁⲥⲧⲁϩⲥⲥ ⲛⲟⲩⲥⲟϭⲛ ⲉⲛⲁⲛⲟⲩϥ ⲁⲥϣⲱϣ ⲙⲡϥⲱ ⲛⲧⲉⲥⲁⲡⲉ ⲁⲥⲧⲁⲗⲟ ⲉϩⲣⲁⲓ ⲉϫⲱⲥ ⲛⲟⲩⲙⲓⲧⲣⲁ ⲁⲥϯ ϩⲓⲱⲱⲥ ⲛⲛⲉⲥϩⲟⲓⲧⲉ ⲙⲡⲉⲥⲟⲩⲛⲟϥ ⲛⲁⲓ ⲉϣⲁⲥϭⲟⲟⲗⲉⲥ ⲙⲙⲟⲟⲩ ⲛⲛⲉϩⲟⲟⲩ ⲙⲡⲱⲛϩ ⲙⲡⲉⲥϩⲁⲓ ⲙⲁⲛⲁⲥⲥⲏ

10:4  ⲁⲩⲱ ⲁⲥϯ ⲛⲛⲉⲥⲥⲁⲛⲇⲁⲗⲓⲟⲛ ⲉⲛⲉⲥⲟⲩⲉⲣⲏⲧⲉ ⲁⲥϯ ⲉⲣⲟⲥ ⲛⲛⲉⲥⲕⲗⲁⲗ ⲙⲛ ⲛⲉⲥⲯⲉⲗⲓⲟⲛ ⲙⲛ ⲛⲉⲥⲝⲟⲩⲣ ⲙⲛ ⲛⲉⲥϭⲁϫⲉ ⲙⲛ ⲡⲉⲥⲕⲟⲥⲙⲟⲥ ⲧⲏⲣϥ ⲁⲩⲱ ⲁⲥⲧⲁⲙⲓⲟⲥ ⲉⲙⲁⲧⲉ ⲉⲉⲓ ⲉϩⲟⲩⲛ ϩⲛ ⲛⲃⲁⲗ ⲛⲛⲣⲱⲙⲉ ⲛⲓⲙ ⲉⲧⲛⲁⲛⲁⲩ ⲉⲣⲟⲥ

10:5  ⲁⲥϯ ⲇⲉ ⲛⲧⲉⲥϩⲙϩⲁⲗ ⲛⲟⲩⲁⲥⲕⲟⲥ ⲛⲏⲣⲡ ⲙⲛⲟⲩⲕⲁⲡⲯⲁⲅⲏⲥ ⲛⲛⲉϩ ⲁⲩⲱ ⲁⲥⲙⲟⲩϩ ⲛⲟⲩⲡⲏⲣⲁ ⲛⲟⲉⲓⲧ ϩⲓ ⲧⲁϭ ⲛⲛⲕⲁ ⲛⲟⲩⲱⲙ ϩⲓ ⲟⲉⲓⲕ ⲉⲧⲃⲃⲏⲩ ⲁⲥⲧⲱϣ ⲇⲉ ⲛⲛⲉⲥϩⲛⲁⲁⲩ ⲧⲏⲣⲟⲩ ⲁⲥⲧⲁⲗⲟⲟⲩ ⲉϩⲣⲁⲓ ⲉϫⲱⲥ

10:6  ⲁⲩⲉⲓ ⲉϫⲛ ⲧⲡⲩⲗⲏ ⲛⲧⲡⲟⲗⲓⲥ ⲃⲁⲓⲧⲩⲗⲟⲩⲁ ⲁⲩϩⲉ ⲉⲟⲍⲉⲓⲁⲥ ⲉϥⲁϩⲉⲣⲁⲧϥ ϩⲓϫⲱⲥ ⲙⲛ ⲛⲉⲡⲣⲉⲥⲃⲩⲧⲉⲣⲟⲥ ⲛⲧⲡⲟⲗⲓⲥ ⲭⲁⲃⲣⲓ ⲙⲛ ⲭⲁⲣⲙⲉⲓ

10:7  ⲛⲧⲉⲣⲟⲩⲛⲁⲩ ⲇⲉ ⲉⲣⲟⲥ ⲉⲁϥϣⲓⲃⲉ ⲛϭⲓ ⲡⲉⲥϩⲟ ⲁⲩⲱ ⲧⲉⲥϩⲃⲥⲱ ⲉⲁⲥⲣⲕⲉⲟⲩⲉⲓ ⲁⲩⲣϣⲡⲏⲣⲉ ⲉϩⲣⲁⲓ ⲉϫⲙ ⲡⲉⲥⲥⲁ ⲉⲙⲁⲧⲉ ⲉⲙⲁⲧⲉ ⲁⲩⲱ ⲡⲉϫⲁⲩ ⲛⲁⲥ

10:8  ϫⲉ ⲉⲣⲉⲡⲛⲟⲩⲧⲉ ⲛⲛⲉⲛⲉⲓⲟⲧⲉ ⲉϥⲉⲧⲁⲁⲧⲉ ⲉⲩϩⲙⲟⲧ ⲁⲩⲱ ⲉϥⲉϫⲱⲕ ⲉⲃⲟⲗ ⲛⲛⲉⲛⲧⲁϩⲓⲧⲟⲟⲧⲉ ⲉⲣⲟⲟⲩ ⲉⲩϣⲟⲩϣⲟⲩ ⲛⲛϣⲏⲣⲉ ⲙⲡⲓⲥⲣⲁⲏⲗ ⲙⲛ ⲟⲩϫⲓⲥⲉ ⲛⲑⲓⲉⲣⲟⲩⲥⲁⲗⲏⲙ ⲁⲥⲟⲩⲱϣⲧ ⲇⲉ ⲙⲡⲛⲟⲩⲧⲉ

10:9  ⲡⲉϫⲁⲥ ⲛⲁⲩ ϫⲉ ⲟⲩⲉϩⲥⲁϩⲛⲉ ⲛⲥⲉⲟⲩⲱⲛ ⲛⲁⲓ ⲛⲧⲡⲩⲗⲏ ⲛⲧⲡⲟⲗⲓⲥ ⲛⲧⲁⲃⲱⲕ ⲉϫⲱⲕ ⲉⲃⲟⲗ ⲛⲛϣⲁϫⲉ ⲉⲛⲧⲁⲧⲉⲧⲛϣⲁϫⲉ ⲛⲙⲙⲁⲓ ⲛϩⲏⲧⲟⲩ ⲁⲩⲟⲩⲉϩⲥⲁϩⲛⲉ ⲇⲉ ⲛⲛϩⲣϣⲓⲣⲉ ⲉⲟⲩⲱⲛ ⲛⲁⲥ

10:10  ⲁⲩⲉⲓⲣⲉ ϩⲓ ⲛⲁⲓ ⲕⲁⲧⲁ ⲑⲉ ⲉⲛⲧⲁⲩϫⲟⲟⲥ ⲁⲩⲱ ⲁⲥⲉⲓ ⲉⲃⲟⲗ ⲛϭⲓ ⲓⲟⲩⲇⲉⲓⲑ ⲛⲧⲟⲥ ⲙⲛ ⲧⲉⲥϩⲙϩⲁⲗ ⲛⲙⲙⲁⲥ ⲛⲛⲉⲩϭⲱϣⲧ ⲇⲉ ⲛⲥⲱⲥ ⲛϭⲓ ⲛⲣⲱⲙⲉ ⲛⲧⲡⲟⲗⲓⲥ ϣⲁⲛⲧⲥⲉⲓ ⲉⲡⲉⲥⲏⲧ ϩⲙ ⲡⲧⲟⲟⲩ ϣⲁⲛⲧⲥⲉⲓ ⲉϫⲙ ⲡⲁⲩⲗⲱⲛ ⲛⲥⲉⲗⲟ ⲉⲩⲛⲁⲩ ⲉⲣⲟⲥ

10:11  ⲁⲥⲙⲟⲟϣⲉ ⲇⲉ ϩⲙⲁⲩⲗⲱⲛ ⲉⲩⲥⲟⲟⲩⲧⲛ ⲁⲩⲧⲱⲙⲛⲧ ⲉⲣⲟⲥ ⲛϭⲓ ⲡϣⲟⲣⲡ ⲙⲙⲁ ⲛⲣⲟⲓⲥ ⲛⲧⲉⲛⲁⲥⲥⲩⲣⲓⲟⲥ

10:12  ⲁⲩϭⲟⲡⲥ ⲁⲩϫⲛⲟⲩⲥ ϫⲉ ⲉⲣⲉⲏⲡ ⲉⲛⲓⲙ ⲁⲩⲱ ⲉⲛⲧⲁⲣⲉⲉⲓ ⲧⲱⲛ ⲡⲉϫⲁⲥ ϫⲉ ⲁⲛⲅⲟⲩϣⲉⲉⲣⲉ ⲛⲧⲉⲛϩⲉⲃⲣⲁⲓⲟⲥ ⲛⲧⲁⲓⲡⲱⲧ ⲙⲡⲉⲩⲙⲧⲟ ⲉⲃⲟⲗ ⲉⲧⲃⲉ ϫⲉ ⲥⲉⲛⲁⲧⲁⲁⲩ ⲛⲏⲧⲛ ⲉⲩϩⲣⲉ

10:13  ⲁⲛⲟⲕ ⲇⲉ ⲉⲛⲧⲁⲓⲉⲓ ⲉⲧⲱⲙⲛⲧ ⲉⲟⲗⲟⲫⲉⲣⲛⲏⲥ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲧⲉⲧⲛϭⲟⲙ ⲉⲧⲣⲁϫⲱ ⲉⲣⲟϥ ⲛϩⲉⲛϣⲁϫⲉ ⲙⲙⲉ ⲧⲁⲧⲥⲁⲃⲟϥ ⲉⲩϩⲓⲏ ⲧⲁⲓ ⲉⲧϥⲛⲁⲃⲱⲕ ϩⲣⲁⲓ ⲛϩⲏⲧⲥ ⲛϥⲣϫⲟⲉⲓⲥ ⲉⲧⲟⲣⲓⲛⲏ ⲧⲏⲣⲥ ⲛⲧⲉⲧⲙⲟⲩⲥⲁⲣⲝ ⲛⲟⲩⲱⲧ ϯ ⲙⲡⲉⲥϩⲣⲟⲟⲩ ⲉⲃⲟⲗ ϩⲛ ⲛⲉϥⲣⲱⲙⲉ ⲟⲩⲇⲉ ⲟⲩⲡⲛⲁ ⲛⲱⲛϩ

10:14  ⲛⲧⲉⲣⲟⲩⲥⲱⲧⲙ ⲇⲉ ⲛϭⲓ ⲛⲣⲱⲙⲉ ⲉⲛⲉⲥϣⲁϫⲉ ⲁⲩⲛⲁⲩ ⲉⲡⲉⲥϩⲟ ⲁϥϣⲱⲡⲉ ⲉⲩⲛⲟϭ ⲛϣⲡⲏⲣⲉ ⲙⲡⲉⲩⲙⲧⲟ ⲉⲃⲟⲗ ⲛϭⲓ ⲡⲉⲥⲥⲁ ⲡⲉϫⲁⲩ ⲛⲁⲥ

10:15  ϫⲉ ⲁⲛⲟⲩϩⲙ ⲛⲧⲟⲩⲯⲩⲭⲏ ⲉⲁⲣⲉϭⲉⲡⲏ ⲉⲉⲓ ⲉⲡⲉⲥⲏⲧ ⲉⲧⲱⲙⲛⲧ ⲉⲡⲉⲛϫⲟⲉⲓⲥ ⲧⲉⲛⲟⲩ ϭⲉ ⲃⲱⲕ ⲛⲁϥ ⲉⲧⲉⲥⲕⲩⲛⲏ ⲁⲩⲱ ⲟⲩⲛ ϩⲟⲉⲓⲛⲉ ⲉⲃⲟⲗ ⲛϩⲏⲧⲛ ⲛⲁⲑⲡⲟ ϣⲁⲛⲧⲟⲩⲧⲁⲁⲧⲉ ⲉⲧⲟⲟⲧϥ

10:16  ⲉⲣϣⲁⲛⲁϩⲉ ⲇⲉ ⲉⲣⲁⲧⲉ ⲙⲡⲉϥⲙⲧⲟ ⲉⲃⲟⲗ ⲙⲡⲣⲣϩⲟⲧⲉ ϩⲣⲁⲓ ϩⲙ ⲡⲟⲩϩⲏⲧ ⲁⲗⲗⲁ ⲧⲁⲩⲟ ⲉⲣⲟϥ ⲛⲟⲩϣⲁϫⲉ ⲁⲩⲱ ϥⲛⲁⲣⲡⲉⲧⲛⲁⲛⲟⲩϥ ⲛⲉ

10:17  ⲁⲩⲛⲟⲩϩⲉ ⲇⲉ ⲉⲃⲟⲗ ⲛϩⲏⲧⲟⲩ ⲛϣⲉ ⲛⲣⲱⲙⲉ ⲁⲩⲗⲟϫⲧⲟⲩ ⲉⲣⲟⲥ ⲙⲛ ⲧⲉⲥϩⲙϩⲁⲗ ⲁⲩⲛⲧⲟⲩ ⲉⲧⲉⲥⲕⲏⲛⲏ ⲛⲟⲗⲟⲫⲉⲣⲛⲏⲥ

10:18  ⲁⲩⲱ ⲁⲩⲡⲱⲧ ⲛⲥⲁ ⲛⲉⲩⲉⲣⲏⲩ ϩⲣⲁⲓ ϩⲛ ⲧⲡⲁⲣⲉⲙⲃⲟⲗⲏ ⲧⲏⲣⲥ ⲁⲥⲣⲥⲟⲓⲧ ⲅⲁⲣ ϩⲛ ⲛⲉⲩⲙⲁⲛϣⲱⲡⲉ ⲧⲏⲣⲟⲩ ⲛϭⲓ ⲧⲉⲥⲡⲁⲣⲣⲏⲥⲓⲁ ⲁⲩⲱ ⲁⲩⲕⲱⲧⲉ ⲉⲣⲟⲥ ⲉⲥⲁϩⲉⲣⲁⲧⲥ ⲡⲃⲟⲗ ⲛⲧⲉⲥⲕⲏⲛⲏ ⲛⲟⲗⲟⲫⲉⲣⲛⲏⲥ ϣⲁⲛⲧⲟⲩϫⲓⲡⲟⲩⲱ ⲛⲁϥ ⲉⲧⲃⲏⲏⲧⲥ

10:19  ⲁⲩⲱ ⲁⲩⲣϣⲡⲏⲣⲉ ⲉϩⲣⲁⲓ ⲉϫⲙ ⲡⲉⲥⲥⲁ ⲉⲩⲣⲙⲟⲓϩⲉ ⲛⲛϣⲉⲉⲣⲉ ⲙⲡⲓⲥⲣⲁⲏⲗ ⲉⲃⲟⲗ ⲙⲙⲟⲥ ⲡⲉϫⲉⲡⲟⲩⲁ ⲡⲟⲩⲁ ⲛⲛⲁϩⲣⲙⲡⲉⲧϩⲓⲧⲱϥ ϫⲉ ⲛⲓⲙ ⲡⲉⲧⲛⲁⲕⲁⲧⲁⲫⲣⲟⲛⲓ ⲙⲡⲉⲓⲗⲁⲟⲥ ⲡⲁⲓ ⲉⲟⲩⲛⲧⲁϥ ϩⲣⲁⲓ ⲛϩⲏⲧϥ ⲛϩⲉⲛϩⲓⲟⲙⲉ ⲛⲧⲉⲓⲙⲓⲛⲉ ϫⲉ ⲛⲁⲛⲟⲩⲥ ⲁⲛ ⲉϣⲱϫⲡ ⲉⲃⲟⲗ ⲛϩⲏⲧⲟⲩ ⲛⲟⲩⲣⲱⲙⲉ ⲛⲟⲩⲱⲧ ⲛⲁⲓ ⲉⲩϣⲁⲛⲕⲁⲁⲩ ⲉⲩⲛϭⲟⲙ ⲙⲙⲟⲟⲩ ⲉⲑⲙⲕⲟ ⲙⲡⲕⲁϩ ⲧⲏⲣϥ

10:20  ⲁⲩⲉⲓ ⲇⲉ ⲉⲃⲟⲗ ⲛϭⲓ ⲛⲉⲧⲛⲕⲟⲧⲕ ϩⲁⲧⲛ ⲟⲗⲟⲫⲉⲣⲛⲏⲥ ⲙⲛ ⲛⲉϥϩⲙϩⲁⲗ ⲧⲏⲣⲟⲩ ⲁⲩϫⲓⲧⲥ ⲉϩⲟⲩⲛ ⲉⲧⲉⲥⲕⲏⲛⲏ

10:21  ⲁⲩⲱ ⲛⲉⲣⲉⲟⲗⲟⲫⲉⲣⲛⲏⲥ ⲛⲏϫ ⲉϫⲙ ⲡⲉϥϭⲗⲟϭ ϩⲙ ⲡⲉϥⲕⲱⲛⲱⲡⲓⲟⲛ ⲡⲁⲓ ⲉⲧⲧⲁⲗⲏⲩ ⲉⲃⲟⲗ ϩⲛ ⲟⲩⲛⲟⲩⲃ ⲙⲛ ⲟⲩϫⲏϭⲉ ⲙⲛ ⲟⲩⲥⲙⲁⲣⲁⲅⲇⲟⲥ ⲙⲛ ϩⲉⲛⲱⲛⲉ ⲉⲛⲁϣⲉⲥⲟⲩⲛⲧⲟⲩ

10:22  ⲁⲩⲧⲁⲙⲟϥ ⲇⲉ ⲉⲧⲃⲏⲏⲧⲥ ⲁϥⲉⲓ ⲉⲃⲟⲗ ⲉⲧⲉⲥⲕⲏⲛⲏ ⲉⲧϩⲓⲃⲟⲗ ⲉⲩϥⲓ ⲛϩⲉⲛⲗⲁⲙⲡⲁⲥ ⲛϩⲁⲧ ϩⲓϩⲏ ⲙⲙⲟϥ

10:23  ⲛⲧⲉⲣⲉⲓⲟⲩⲇⲉⲓⲑ ⲇⲉ ⲉⲓ ⲙⲡⲉϥⲙⲧⲟ ⲉⲃⲟⲗ ⲙⲛ ⲛⲉϥϩⲙϩⲁⲗ ⲁⲩⲣϣⲡⲏⲣⲉ ⲧⲏⲣⲟⲩ ⲉϫⲙ ⲡⲥⲁ ⲙⲡⲉⲥϩⲟ ⲁⲩⲱ ⲁⲥⲡⲁϩⲧⲥ ⲉϫⲙ ⲡⲉⲥϩⲟ ⲁⲥⲟⲩⲱϣⲧ ⲛⲁϥ ⲁⲩⲧⲟⲩⲛⲟⲥⲥ ⲛϭⲓ ⲛⲉϥϩⲙϩⲁⲗ

Chapter 11

11:1  ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲧⲱⲕ ⲛϩⲏⲧ ⲧⲉⲥϩⲓⲙⲉ ⲙⲡⲣⲣϩⲟⲧⲉ ϩⲣⲁⲓ ϩⲙ ⲡⲟⲩϩⲏⲧ ϫⲉ ⲁⲛⲟⲕ ⲙⲡⲓⲑⲙⲕⲉⲣⲱⲙⲉ ⲉⲁϥⲣϩⲛⲁϥ ⲛⲣϩⲙϩⲁⲗ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲙⲡⲕⲁϩ ⲧⲏⲣϥ ⲛⲥⲁⲃⲏⲗ ⲅⲁⲣ

11:2  ϫⲉ ⲁϥⲥⲟϣϥⲧ ⲛϭⲓ ⲡⲟⲩⲗⲁⲟⲥ ⲡⲁⲓ ⲉⲧⲟⲩⲏϩ ϩⲛ ⲧⲟⲣⲓⲛⲏ ⲛⲉⲓⲛⲁϥⲓ ⲁⲛ ⲡⲉ ⲙⲡⲁⲙⲉⲣⲉϩ ⲉϩⲣⲁⲓ ⲉϫⲱⲟⲩ ⲁⲗⲗⲁ ⲛⲧⲟⲟⲩ ⲁⲩⲉⲓⲣⲉ ⲛⲁⲩ ⲛⲛⲁⲓ

11:3  ⲧⲉⲛⲟⲩ ϭⲉ ⲁϫⲓⲥ ⲉⲣⲟⲓ ϫⲉ ⲉⲧⲃⲉ ⲟⲩ ⲛϩⲱⲃ ⲁⲣⲉⲡⲱⲧ ⲛⲧⲟⲟⲧⲟⲩ ⲁⲣⲉⲉⲓ ϣⲁⲣⲟⲛ ⲛⲧⲁⲉⲓ ⲅⲁⲣ ⲉⲩⲟⲩϫⲁⲓ ⲧⲱⲕ ⲛϩⲏⲧ ⲧⲉⲛⲁⲱⲛϩ ϩⲣⲁⲓ ϩⲛ ⲧⲉⲓⲟⲩϣⲏ ⲁⲩⲱ ⲙⲛⲛⲥⲱⲥ

11:4  ⲙⲛ ⲡⲉⲧⲛⲁϫⲓⲧⲉ ⲅⲁⲣ ⲛϭⲟⲛⲥ ⲁⲗⲗⲁ ⲥⲉⲛⲁⲣⲡⲉⲧⲛⲁⲛⲟⲩϥ ⲛⲉ ⲕⲁⲧⲁ ⲑⲉ ⲉϣⲁⲥϣⲱⲡⲉ ⲛⲛϩⲙϩⲁⲗ ⲙⲡⲁϫⲟⲉⲓⲥ ⲡⲣⲣⲟ ⲛⲁⲃⲟⲩⲭⲟⲇⲟⲛⲟⲥⲟⲣ

11:5  ⲡⲉϫⲁⲥ ⲛⲁϥ ⲛϭⲓ ⲓⲟⲩⲇⲉⲓⲑ ϫⲉ ϫⲓ ⲛⲛϣⲁϫⲉ ⲛⲧⲉⲕϩⲙϩⲁⲗ ⲁⲩⲱ ⲙⲁⲣⲉⲧⲉⲕϩⲙϩⲁⲗ ϫⲱ ⲛⲟⲩϣⲁϫⲉ ⲙⲡⲉⲕⲙⲧⲟ ⲉⲃⲟⲗ ⲛϯⲛⲁϫⲓϭⲟⲗ ⲅⲁⲣ ⲁⲛ ⲙⲡⲁϫⲟⲉⲓⲥ ϩⲣⲁⲓ ϩⲛ ⲧⲉⲓⲟⲩϣⲏ

11:6  ⲁⲩⲱ ⲉⲕϣⲁⲛⲟⲩⲁϩⲕ ⲛⲥⲁ ⲛϣⲁϫⲉ ⲛⲧⲉⲕϩⲙϩⲁⲗ ϩⲛ ⲟⲩϫⲱⲕ ⲡⲛⲟⲩⲧⲉ ⲡⲉ ⲛⲁⲉⲓⲣⲉ ⲛⲁⲕ ⲛⲟⲩϩⲱⲃ ⲁⲩⲱ ⲛⲛⲉⲡⲁϫⲟⲉⲓⲥ ϩⲉ ⲉⲃⲟⲗ ϩⲛ ⲛⲉϥϩⲃⲏⲩⲉ

11:7  ϥⲟⲛϩ ⲅⲁⲣ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲙⲡⲕⲁϩ ⲧⲏⲣϥ ⲁⲩⲱ ϥⲟⲛϩ ⲛϭⲓ ⲡⲉϥⲁⲙⲁϩⲧⲉ ⲡⲁⲓ ⲉⲛⲧⲁϥⲧⲛⲛⲟⲟⲩⲕ ⲉⲩⲧⲁϩⲟ ⲉⲣⲁⲧϥ ⲙⲯⲩⲭⲏ ⲛⲓⲙ ϫⲉ ⲛⲣⲱⲙⲉ ⲁⲛ ⲙⲙⲁⲧⲉ ⲛⲉⲧⲟ ⲛϩⲙϩⲁⲗ ⲛⲁϥ ⲉⲧⲃⲏⲏⲧⲕ ⲁⲗⲗⲁ ⲛⲕⲉⲑⲏⲣⲓⲟⲛ ⲛⲧⲥⲱϣⲉ ⲙⲛ ⲛⲧⲃⲛⲟⲟⲩⲉ ⲙⲛ ⲛϩⲁⲗⲁⲧⲉ ⲛⲧⲡⲉ ⲉⲃⲟⲗ ϩⲓⲧⲛ ⲧⲉⲕϭⲟⲙ ⲥⲉⲛⲁⲱⲛϩ ⲛⲁⲃⲟⲩⲭⲟⲇⲟⲛⲟⲥⲟⲣ ⲁⲩⲱ ⲡⲉϥⲏⲓ ⲧⲏⲣϥ

11:8  ⲁⲛⲥⲱⲧⲙ ⲅⲁⲣ ⲉⲧⲉⲕⲥⲟⲫⲓⲁ ⲙⲛ ⲧⲙⲛⲧⲥⲁ ⲛⲕⲟⲧⲥ ⲛⲧⲉⲕⲯⲩⲭⲏ ⲛⲁⲓ ⲉⲛⲧⲁⲩϫⲟⲟⲩ ⲉⲡⲕⲁϩ ⲧⲏⲣϥ ϫⲉ ⲛⲧⲟⲕ ⲙⲁⲩⲁⲁⲕ ⲡⲉⲧⲛⲁⲛⲟⲩⲕ ϩⲙ ⲙⲛⲧⲉⲣⲟ ⲛⲓⲙ ⲉⲕϭⲙϭⲟⲙ ϩⲉⲛⲧⲉⲕⲥⲃⲱ ⲉⲕⲟ ⲛⲇⲩⲛⲁⲧⲟⲥ ϩⲛ ⲛⲉⲧϩⲏⲕ ⲉⲡⲡⲟⲗⲉⲙⲟⲥ

11:9  ⲧⲉⲛⲟⲩ ϭⲉ ⲡϣⲁϫⲉ ⲉⲛⲧⲁⲁⲭⲓⲱⲣ ϫⲟⲟϥ ϩⲛ ⲧⲉⲕⲥⲟⲟⲩϩⲥ ⲁⲛⲥⲱⲧⲙ ⲉⲛⲉϥϣⲁϫⲉ ⲉⲧⲃⲉ ϫⲉ ⲁⲩⲧⲁϩϥ ⲛϭⲓ ⲛⲣⲱⲙⲉ ⲛⲃⲁⲓⲩⲗⲟⲩⲁ ⲁϥϫⲱ ⲉⲣⲟⲟⲩ ⲛϣⲁϫⲉ ⲛⲓⲙ ⲉⲛⲧⲁϥϫⲟⲟϥ ϩⲁⲧⲏⲕ

11:10  ⲉⲧⲃⲉ ⲡⲁⲓ ϭⲉ ⲡϫⲟⲉⲓⲥ ⲡⲁϫⲟⲉⲓⲥ ⲙⲡⲣⲕⲱ ⲛⲥⲱⲕ ⲙⲡⲉϥϣⲁϫⲉ ⲁⲗⲗⲁ ⲕⲁⲁϥ ϩⲣⲁⲓ ϩⲙ ⲡⲉⲕϩⲏⲧ ⲉⲧⲃⲉ ϫⲉ ⲟⲩⲙⲉⲉ ⲡⲉ ⲙⲉⲩϫⲓⲕⲃⲁ ⲅⲁⲣ ⲙⲡⲉⲛⲅⲉⲛⲟⲥ ⲟⲩⲇⲉ ⲙⲉⲣⲉⲥⲏϥⲉ ϭⲙϭⲟⲙ ⲉⲣⲟⲟⲩ ⲉⲩⲧⲙⲣⲛⲟⲃⲉ ⲉⲡⲉⲩⲛⲟⲩⲧⲉ

11:11  ϫⲉⲕⲁⲥ ϭⲉ ⲉⲛⲛⲉⲡⲁϫⲟⲉⲓⲥ ϣⲱⲡⲉ ⲉϥⲧⲥⲧⲏⲩ ⲉⲃⲟⲗ ϩⲛ ⲛⲉϥϩⲃⲏⲩⲉ ⲁⲩⲱ ⲙⲡⲣⲣⲗⲁⲁⲩ ⲛϩⲱⲃ ⲟⲩⲛ ⲟⲩⲙⲟⲩ ⲛⲁⲉⲓ ⲉϩⲣⲁⲓ ⲉϫⲱⲟⲩ ⲁⲩⲱ ⲁⲩⲛⲟⲃⲉ ⲧⲁϩⲟⲟⲩ ⲡⲁⲓ ⲉⲧⲟⲩⲛⲁϯⲛⲟⲩϭⲥ ⲙⲡⲉⲩⲛⲟⲩⲧⲉ ⲛϩⲏⲧϥ ϩⲙ ⲡⲧⲣⲉⲩⲉⲓⲣⲉ ⲛⲛⲉⲧⲉⲙⲉϣϣⲉ

11:12  ⲉⲧⲃⲉ ϫⲉ ⲁⲩⲱϫⲛ ⲅⲁⲣ ⲛⲧⲟⲟⲧⲟⲩ ⲛϭⲓ ⲉⲩϩⲣⲏⲩⲉ ⲁⲩⲱ ⲁⲩⲥⲃⲟⲕ ⲛϭⲓ ⲛⲉⲩⲙⲟⲩⲛⲉⲓⲟⲟⲩⲉ ⲁⲩϫⲓϣⲟϫⲛⲉ ⲉⲛⲧⲟⲟⲧⲟⲩ ⲉϫⲛ ⲛⲉⲩⲧⲃⲛⲟⲟⲩⲉ ⲁⲩⲱ ⲛⲕⲁ ⲛⲓⲙ ⲉⲛⲧⲁⲡⲛⲟⲩⲧⲉ ⲡⲟⲣϫⲟⲩ ⲛⲁⲩ ⲉⲃⲟⲗ ϩⲛ ⲛⲉϥⲛⲟⲙⲟⲥ ⲉⲧⲙⲟⲩⲟⲙⲟⲩ ⲁⲩⲙⲉⲉⲩⲉ ⲉⲟϫⲛⲟⲩ

11:13  ⲁⲩⲱ ⲛⲁⲡⲁⲣⲭⲏ ⲙⲡⲉⲥⲟⲩⲟ ⲙⲛ ⲛⲣⲉⲙⲏⲧ ⲙⲡⲏⲣⲡ ⲙⲛ ⲡⲛⲉϩ ⲛⲁⲓ ⲉⲛⲧⲁⲩϩⲁⲣⲉϩ ⲉⲣⲟⲟⲩ ⲉⲁⲩⲧⲃⲃⲟⲟⲩ ⲛⲟⲩⲏⲏⲃ ⲉⲧⲁϩⲉⲣⲁⲧⲟⲩ ϩⲛ ⲑⲓⲉⲣⲟⲩⲥⲁⲗⲏⲙ ⲙⲡⲉⲙⲧⲟ ⲉⲃⲟⲗ ⲙⲡⲉⲛⲛⲟⲩⲧⲉ ⲁⲩⲕⲣⲓⲛⲉ ⲙⲙⲟⲟⲩ ⲉⲟϫⲛⲟⲩ ⲛⲁⲓ ⲉⲧⲉⲙⲉϣϣⲉ ⲉⲗⲁⲁⲩ ϩⲙⲡⲗⲁⲟⲥ ⲉϫⲱϩ ⲣⲱ ⲉⲣⲟⲟⲩ ϩⲛ ⲛⲉⲩϭⲓϫ

11:14  ⲁⲩϫⲛⲟⲟⲩ ⲇⲉ ⲟⲛ ⲉⲑⲓⲉⲣⲟⲩⲥⲁⲗⲏⲙ ⲉⲧⲃⲉ ϫⲉ ⲛⲕⲟⲟⲩⲉ ⲉⲧⲟⲩⲏϩ ⲙⲙⲁⲩ ⲁⲩⲉⲓⲣⲉ ϩⲓ ⲛⲁⲓ ⲉⲧⲣⲉⲩϯϩⲉ ⲛⲁⲩ ⲉⲃⲟⲗ ϩⲓⲧⲛ ⲛⲉϩⲉⲗⲗⲟⲓ

11:15  ⲁⲩⲱ ⲥⲛⲁϣⲱⲡⲉ ⲉⲩϣⲁⲛⲙⲡⲟⲩⲟ ⲛⲁⲩ ⲛⲥⲉⲉⲓⲣⲉ ϩⲓ ⲛⲁⲓ ⲥⲉⲛⲁⲧⲁⲁⲩ ⲡⲉ ⲉϩⲣⲁⲓ ⲉⲧⲟⲟⲧⲕ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲉⲩⲧⲁⲕⲟ

11:16  ⲉⲧⲃⲉ ⲡⲁⲓ ⲁⲛⲟⲕ ⲧⲉⲕϩⲙϩⲁⲗ ⲁⲓⲉⲓⲙⲉ ⲉⲛⲁⲓ ⲧⲏⲣⲟⲩ ⲁⲓⲡⲱⲧ ⲙⲡⲉⲩⲙⲧⲟ ⲉⲃⲟⲗ ⲁⲩⲱ ⲡⲛⲟⲩⲧⲉ ⲧⲛⲛⲟⲟⲩⲧ ⲉⲉⲓⲣⲉ ⲛⲙⲙⲁⲕ ⲛϩⲉⲛϩⲃⲏⲩⲉ ⲛⲁⲓ ⲉⲧⲉⲣⲉⲡⲕⲁϩ ⲧⲏⲣϥ ⲛⲁⲡⲱϣⲥ ⲉϩⲣⲁⲓ ⲉϫⲱⲟⲩ ⲛⲉⲧⲛⲁⲥⲱⲧⲙ ⲉⲣⲟⲟⲩ

11:17  ⲉⲧⲃⲉ ϫⲉ ⲧⲉⲕϩⲙϩⲁⲗ ⲟⲩⲣⲉϥϣⲙϣⲉ ⲛⲟⲩⲧⲉ ⲧⲉ ⲉⲥϣⲙϣⲉ ⲙⲡⲉϩⲟⲟⲩ ⲙⲛ ⲧⲉⲩϣⲏ ⲙⲡⲛⲟⲩⲧⲉ ⲛⲧⲡⲉ ϯⲛⲁϭⲱ ϭⲉ ϩⲁⲧⲏⲕ ⲡⲁϫⲟⲉⲓⲥ ⲁⲩⲱ ⲧⲉⲕϩⲙϩⲁⲗ ⲥⲛⲁⲉⲓ ⲉⲃⲟⲗ ⲉⲡⲓⲁ ⲕⲁⲧⲁⲟⲩϣⲏ ⲧⲁϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲛⲧⲡⲉ ⲛϥⲧⲁⲙⲟⲓ ϫⲉ ⲛⲧⲁⲩⲣⲛⲟⲃⲉ ⲛⲧⲛⲁⲩ

11:18  ⲧⲁⲉⲓ ⲧⲁⲙⲡⲟⲩⲱ ⲛⲁⲕ ⲛⲅⲉⲓ ⲉⲃⲟⲗ ⲙⲛ ⲧⲉⲕϭⲟⲙ ⲧⲏⲣⲥ ⲛⲧⲉⲧⲙⲗⲁⲁⲩ ⲁϩⲉⲣⲁⲧϥ ⲉⲣⲟⲕ ⲉⲃⲟⲗ ⲛϩⲏⲧⲟⲩ

11:19  ⲁⲩⲱ ϯⲛⲁⲛⲧⲕ ⲉⲃⲟⲗ ϩⲛ ⲧⲙⲏⲧⲉ ⲛϯⲓⲟⲩⲇⲁⲓⲁ ϣⲁⲛⲧⲕⲉⲓ ⲉϫⲛ ⲑⲓⲉⲣⲟⲩⲥⲁⲗⲏⲙ ⲧⲁⲕⲱ ⲙⲡⲉⲕⲧⲟϭⲥ ϩⲛ ⲧⲉⲥⲙⲏⲧⲉ ⲛⲅⲛⲧⲟⲩ ⲛⲑⲉ ⲛϩⲉⲛⲉⲥⲟⲟⲩ ⲉⲙⲛⲧⲟⲩϣⲱⲥ ⲙⲙⲁⲩ ⲁⲩⲱ ⲙⲛ ⲟⲩⲟⲩϩⲟⲣ ⲛⲁϯϩⲣⲟⲟⲩ ϩⲙ ⲡⲉϥⲗⲁⲥ ⲙⲡⲉⲕⲙⲧⲟ ⲉⲃⲟⲗ ϫⲉ ⲛⲁⲓ ⲁⲩϫⲟⲟⲩ ⲉⲣⲟⲓ ⲁⲩⲱ ⲁⲩⲧⲁⲙⲟⲓ ⲉⲣⲟⲟⲩ ⲕⲁⲧⲁ ⲡⲁϣⲣⲡⲥⲟⲟⲩⲛ ⲁⲩⲧⲛⲛⲟⲟⲩⲧ ⲉϫⲟⲟⲩ ⲉⲣⲟⲕ

11:20  ⲁⲛⲉⲥϣⲁϫⲉ ⲇⲉ ⲣⲁⲛⲁϥ ⲙⲡⲉⲙⲧⲟ ⲉⲃⲟⲗ ⲛⲟⲗⲟⲫⲉⲣⲛⲏⲥ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉϥϩⲙϩⲁⲗ ⲧⲏⲣⲟⲩ ⲁⲩⲣϣⲡⲏⲣⲉ ⲉϩⲣⲁⲓ ⲉϫⲛ ⲧⲉⲥⲥⲟⲫⲓⲁ ⲡⲉϫⲁⲩ ϫⲉ

11:21  ⲙⲛ ⲥϩⲓⲙⲉ ⲛⲧⲉⲓⲙⲓⲛⲉ ϫⲓⲛ ⲛϫⲱϥ ⲙⲡⲕⲁϩ ϣⲁϫⲱϥ ⲙⲡⲕⲁϩ ϩⲣⲁⲓ ϩⲙ ⲡⲥⲁ ⲙⲡⲉⲥϩⲟ ⲁⲩⲱ ϩⲛ ⲧⲙⲛⲧⲣⲙⲛϩⲏⲧ ⲛⲛⲉⲥϣⲁϫⲉ

11:22  ⲁⲩⲱ ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲁⲡⲛⲟⲩⲧⲉ ⲣⲟⲩⲡⲉⲧⲛⲁⲛⲟⲩϥ ⲉⲁϥⲧⲛⲛⲟⲟⲩⲧⲉ ϩⲓϩⲏ ⲙⲡⲗⲁⲟⲥ ⲉⲧⲣⲉϣⲱⲡⲉ ϩⲣⲁⲓ ϩⲛ ⲛⲉⲛϭⲓϫ ⲉⲩⲁⲙⲁϩⲧⲉ ϩⲣⲁⲓ ⲇⲉ ϩⲛ ⲛⲉⲛⲧⲁⲩⲥⲱϣϥ ⲙⲡⲁϫⲟⲉⲓⲥ ⲉⲩⲧⲁⲕⲟ

11:23  ⲧⲉⲛⲟⲩ ϭⲉ ⲛⲧⲟ ⲛⲉⲥⲱ ϩⲣⲁⲓ ϩⲙ ⲡⲟⲩⲉⲓⲛⲉ ⲁⲩⲱ ⲛⲁⲛⲟⲩ ϩⲣⲁⲓ ϩⲛ ⲟⲩϣⲁϫⲉ ϫⲉ ⲉⲣϣⲁⲛⲉⲓⲣⲉ ⲕⲁⲧⲁ ⲑⲉ ⲉⲛⲧⲁϣⲁϫⲉ ⲡⲟⲩⲛⲟⲩⲧⲉ ⲡⲉⲧⲛⲁϣⲱⲡⲉ ⲛⲁⲓ ⲛⲛⲟⲩⲧⲉ ⲁⲩⲱ ⲛⲧⲟ ⲧⲉⲛⲁϩⲙⲟⲟⲥ ϩⲙ ⲡⲏⲓ ⲙⲡⲣⲣⲟ ⲛⲁⲃⲟⲩⲭⲟⲇⲟⲛⲟⲥⲟⲣ ⲛⲧⲉϣⲱⲡⲉ ⲉⲣⲟ ⲡⲥⲟⲉⲓⲧ ⲡⲁⲣⲁⲡⲕⲁϩ ⲧⲏⲣϥ

Chapter 12

12:1  ⲁϥⲟⲩⲉϩⲥⲁϩⲛⲉ ⲇⲉ ⲉⲧⲣⲉⲩϫⲓⲧⲥ ⲉϩⲟⲩⲛ ⲉⲡⲙⲁ ⲉϣⲁⲩⲕⲱ ⲛϩⲏⲧϥ ⲛⲛⲉϥϩⲛⲟⲩ ⲛϩⲁⲧ ⲁⲩⲱ ⲁϥϫⲟⲟⲥ ⲉⲕⲱ ϩⲁⲣⲱⲥ ⲉⲃⲟⲗ ϩⲛ ⲛϭⲓ ⲛⲟⲩⲟⲟⲙ ⲉϣⲁⲩⲧⲁⲙⲓⲟⲟⲩ ⲛⲁϥ ⲁⲩⲱ ⲉⲥⲱ ⲉⲃⲟⲗ ϩⲙ ⲡⲉϥⲏⲣⲡ

12:2  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ϫⲉ ⲛϯⲛⲁⲟⲩⲱⲙ ⲁⲛ ⲉⲃⲟⲗ ⲛϩⲏⲧⲟⲩ ϫⲉⲕⲁⲥ ⲛⲛⲉϥϣⲱⲡⲉ ⲉⲩϫⲣⲟⲡ ⲁⲗⲗⲁ ⲉⲩⲛⲁⲥⲁϩⲛⲉ ⲛⲁⲓ ⲉⲃⲟⲗ ϩⲛ ⲛⲉⲧⲟⲩⲏϩ ⲛⲥⲱⲓ

12:3  ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲉϣⲱⲡⲉ ϭⲉ ⲉⲩϣⲁⲛⲱϫⲛ ⲛϭⲓ ⲛⲉⲧⲛⲙⲙⲉ ⲉⲛⲛⲁⲉⲓⲛⲉ ⲧⲱⲛ ⲉϥⲉⲓⲛⲉ ⲙⲙⲟⲟⲩ ⲉϯ ⲛⲁ ⲙⲛⲟⲩⲟⲛ ⲅⲁⲣ ⲙⲙⲟⲛ ⲉⲃⲟⲗ ϩⲙ ⲡⲟⲩⲅⲉⲛⲟⲥ

12:4  ⲡⲉϫⲁⲥ ⲛⲁϥ ⲛϭⲓ ⲓⲟⲩⲇⲉⲓⲑ ϫⲉ ⲥⲟⲛϩ ⲛϭⲓ ⲧⲉⲕⲯⲩⲭⲏ ⲡⲁϫⲟⲉⲓⲥ ϫⲉ ⲛⲧⲉⲕϩⲙϩⲁⲗ ⲛⲁϫⲟ ⲉⲃⲟⲗ ⲁⲛ ⲛⲛⲉⲧⲛⲙⲙⲁⲓ ϣⲁⲛϯⲉⲓⲣⲉ ϩⲛ ⲧⲁϭⲓϫ ⲛⲛⲉⲛⲧⲁⲓϣⲟϫⲛⲉ ⲉⲣⲟⲟⲩ

12:5  ⲁⲩⲛⲧⲥ ⲇⲉ ⲛϭⲓ ⲛϩⲙϩⲁⲗ ⲛⲟⲗⲟⲫⲉⲣⲛⲏⲥ ⲉⲧⲉⲥⲕⲏⲛⲏ ⲁⲥⲱⲃϣ ϣⲁⲧⲡⲁϣⲉ ⲛⲧⲉⲩϣⲏ ⲁⲥⲧⲱⲟⲩⲛ ⲇⲉ ⲉϩⲟⲩⲛ ϩⲛⲧⲟⲩⲣϣⲉ ⲛϩⲧⲟⲟⲩⲉ

12:6  ⲁⲥϫⲟⲟⲩ ϣⲁ ⲟⲗⲟⲫⲉⲣⲛⲏⲥ ⲉⲥϫⲱ ⲙⲙⲟⲥ ϫⲉ ⲙⲁⲣⲉⲡⲁϫⲟⲉⲓⲥ ⲟⲩⲉϩⲥⲁϩⲛⲉ ⲉⲧⲣⲉⲩⲕⲱ ⲛⲧⲉⲕϩⲙϩⲁⲗ ⲉⲃⲱⲕ ⲉⲃⲟⲗ ⲉϣⲗⲏⲗ

12:7  ⲁⲩⲱ ⲁϥⲟⲩⲉϩⲥⲁϩⲛⲉ ⲛϭⲓ ⲟⲗⲟⲫⲉⲣⲛⲏⲥ ⲛⲉϥⲣⲉϥⲣⲟⲓⲥ ⲉⲧⲙⲕⲱⲗⲩ ⲙⲙⲟⲥ ⲁⲩⲱ ⲁⲥϭⲱ ϩⲛ ⲧⲡⲁⲣⲉⲙⲃⲟⲗⲏ ⲛϣⲟⲙⲛⲧ ⲛϩⲟⲟⲩ ⲉϣⲁⲥⲉⲓ ⲉⲃⲟⲗ ⲕⲁⲧⲁ ⲟⲩϣⲏ ⲉⲡⲓⲁ ⲛⲃⲁⲓⲧⲩⲗⲟⲩⲁ ⲛⲥϫⲟⲕⲙⲉⲥ ϩⲛ ⲧⲡⲁⲣⲁⲉⲙⲃⲟⲗⲏ ϩⲓϫⲛ ⲧⲡⲏⲅⲏ ⲙⲡⲙⲟⲟⲩ

12:8  ⲉⲥϣⲁⲛⲉⲓ ⲇⲉ ⲉϩⲣⲁⲓ ϣⲁⲥⲥⲟⲡⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲥⲟⲟⲩⲧⲛ ⲛⲧⲉⲥϩⲓⲏ ⲉⲩϫⲓⲥⲉ ⲛⲛϣⲏⲣⲉ ⲙⲡⲉϥⲗⲁⲟⲥ

12:9  ⲉⲥϣⲁⲛⲃⲱⲕ ⲇⲉ ⲉϩⲟⲩⲛ ϣⲁⲥϭⲱ ⲉⲥⲧⲃⲃⲏⲩ ϩⲛ ⲧⲉⲥⲕⲏⲛⲏ ϣⲁⲛⲧⲟⲩϫⲓ ⲛⲁⲥ ⲉϩⲟⲩⲛ ⲛⲧⲉⲥⲧⲣⲟⲫⲏ ⲙⲡⲛⲁⲩ ⲛⲣⲟⲩϩⲉ

12:10  ⲁⲥϣⲱⲡⲉ ⲇⲉ ⲡⲙⲉϩϥⲧⲟⲟⲩ ⲛϩⲟⲟⲩ ⲁⲟⲗⲟⲫⲉⲣⲛⲏⲥ ⲉⲓⲣⲉ ⲛⲟⲩϩⲟⲟⲡ ⲉⲛⲉϥϩⲙϩⲁⲗ ⲙⲁⲩⲁⲁⲩ ⲁⲩⲱ ⲙⲡϥⲙⲟⲩⲧⲉ ⲉⲗⲁⲁⲩ ⲉⲧⲉⲭⲣⲓⲁ ⲛⲛⲉⲧϩⲓϫⲛ ⲛⲉⲭⲣⲓⲁ

12:11  ⲡⲉϫⲁϥ ⲇⲉ ⲛⲃⲁⲅⲱⲁⲥ ⲡⲉϥⲥⲓⲟⲩⲣ ⲡⲉⲧϩⲓϫⲛ ⲛⲉϥⲛⲛⲕⲁ ⲧⲏⲣⲟⲩ ϫⲉ ⲃⲱⲕ ⲛⲅⲡⲓⲑⲉ ⲛⲧⲉⲓⲥϩⲓⲙⲉ ⲛϩⲉⲃⲣⲁⲓⲁ ⲧⲁⲓ ⲉⲧϩⲁⲧⲏⲕ ⲉⲧⲣⲉⲥⲉⲓ ϣⲁⲣⲟⲛ ⲛⲥⲟⲩⲱⲙ ⲛⲥⲥⲱ ⲛⲙⲙⲁⲛ

12:12  ⲉⲓⲥ ϩⲏⲏⲧⲉ ⲅⲁⲣ ⲟⲩϣⲓⲡⲉ ⲙⲡⲉⲛϩⲟⲡⲉ ⲉⲛϣⲁⲛⲕⲱ ⲛⲥⲱⲛ ⲛⲟⲩⲥϩⲓⲙⲉ ⲛⲧⲉⲓⲙⲓⲛⲉ ⲉⲙⲉⲛϣⲁϫⲉ ⲛⲙⲙⲁⲥ ϫⲉ ⲉⲛϣⲁⲛⲧⲙⲥⲉⲕⲧⲁⲓ ⲛⲁⲛ ⲥⲉⲛⲁⲥⲱⲃⲉ ⲡⲉ ⲛⲥⲱⲛ

12:13  ⲁⲩⲱ ⲁϥⲉⲓ ⲉⲃⲟⲗ ⲛϭⲓ ⲃⲁⲅⲱⲁⲥ ⲛⲛⲁϩⲣⲙⲡϩⲟ ⲛⲟⲗⲟⲫⲉⲣⲛⲏⲥ ⲁϥⲉⲓ ⲉϩⲟⲩⲛ ϣⲁⲣⲟⲥ ⲡⲉϫⲁϥ ϫⲉ ⲙⲡⲣⲧⲣⲉⲥϫⲛⲁⲁⲩ ⲛϭⲓ ⲧⲉⲓϣⲉⲉⲣⲉ ϣⲏⲙ ⲉⲧⲛⲁⲛⲟⲩⲥ ⲉⲉⲓ ϣⲁ ⲡⲁϫⲟⲉⲓⲥ ⲉϫⲓⲉⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲉⲛⲟⲩϥ ⲛⲉ ⲁⲩⲱ ⲛⲧⲉⲥⲱ ⲛⲙⲙⲁⲛ ⲛⲟⲩⲏⲣⲡ ⲉⲩⲟⲩⲛⲟϥ ⲛⲧⲉϣⲱⲡⲉ ϩⲣⲁⲓ ϩⲙ ⲡⲟⲟⲩ ⲛϩⲟⲟⲩ ⲛⲑⲉ ⲛⲩⲟⲉⲓ ⲛⲛϣⲉⲉⲣⲉ ⲛⲛϣⲏⲣⲉ ⲛⲛⲁⲥⲥⲟⲩⲣ ⲛⲁⲓ ⲉⲧⲁϩⲉⲣⲁⲧⲟⲩ ϩⲙ ⲡⲏⲓ ⲛⲛⲁⲃⲟⲩⲭⲟⲇⲟⲛⲟⲥⲟⲣ

12:14  ⲡⲉϫⲁⲥ ⲛⲁϥ ⲛϭⲓ ⲓⲟⲩⲇⲉⲓⲑ ϫⲉ ⲁⲛⲅ ⲛⲓⲙ ⲁⲛⲟⲕ ϫⲉ ⲉⲓⲉⲟⲩⲱϩⲙ ⲙⲡⲁϫⲟⲉⲓⲥ ϫⲉ ϩⲱⲃ ⲛⲓⲙ ⲉⲧⲛⲁϣⲱⲡⲉ ⲉⲩⲣⲁⲛⲁⲩ ⲛⲛⲉϥⲃⲁⲗ ϯⲛⲁϭⲉⲡⲏ ⲛⲧⲁⲁⲩ ⲁⲩⲱ ⲡⲁⲓ ϥⲛⲁϣⲱⲡⲉ ⲛⲁⲓ ⲉⲩⲧⲉⲗⲏⲗ ϣⲁ ⲡⲉϩⲟⲟⲩ ⲙⲡⲁⲙⲟⲩ

12:15  ⲁⲥⲧⲱⲛⲥ ⲇⲉ ⲁⲥⲕⲟⲥⲙⲓ ⲙⲙⲟⲥ ϩⲛ ⲧⲉⲥϩⲃⲥⲱ ⲁⲩⲱ ϩⲙ ⲡⲕⲟⲥⲙⲟⲥ ⲧⲏⲣϥ ⲛⲧⲉⲥⲙⲛⲧⲥϩⲓⲙⲉ ⲁⲧⲉⲥϩⲙϩⲁⲗ ⲙⲟⲟϣⲉ ϩⲏⲧⲥ ⲁⲩⲡⲱⲣϣ ϩⲁⲣⲟⲥ ⲉϫⲙ ⲡⲕⲁϩ ⲙⲡⲉⲙⲧⲟ ⲉⲃⲟⲗ ⲛⲟⲗⲟⲫⲉⲣⲛⲏⲥ ⲛⲛⲉⲡⲣⲏϣ ⲛⲁⲓ ⲉⲛⲧⲁⲩϫⲓⲧⲟⲩ ⲛⲧⲛⲃⲁⲅⲱⲁⲥ ⲉⲡⲉⲥⲙⲁ ⲉϣⲁⲥϭⲱ ⲛϩⲏⲧϥ ⲙⲙⲏⲛⲉ ⲉⲧⲣⲉⲥⲛⲟϫⲥ ⲉϩⲣⲁⲓ ⲉϫⲱⲟⲩ ⲉⲛⲥⲟⲩⲱⲙ

12:16  ⲁⲥⲃⲱⲕ ⲇⲉ ⲉϩⲟⲩⲛ ⲛϭⲓ ⲓⲟⲩⲇⲉⲓⲑ ⲁⲥⲛⲟϫⲥ ⲁⲩⲱ ⲁⲡϩⲏⲧ ⲛⲟⲗⲟⲫⲉⲣⲛⲏⲥ ⲡⲱϣⲥ ⲉϩⲣⲁⲓ ⲉϫⲱⲥ ⲁⲩⲱ ⲁⲧⲉϥⲯⲩⲭⲏ ⲕⲓⲙ ⲁϥⲉⲡⲓⲑⲩⲙⲓ ⲅⲁⲣ ⲉⲙⲁⲧⲉ ⲉϣⲱⲡⲉ ⲛⲙⲙⲁⲥ ⲁⲩⲱ ⲛⲛⲉϥϭⲱⲣϭ ⲉⲩⲟⲩⲟⲉⲓϣ ⲉⲧⲣⲉϥⲣϩⲁⲗ ⲙⲙⲟⲥ ϫⲓⲛ ⲙⲡⲉϩⲟⲟⲩ ⲉⲛⲧⲁϥⲛⲁⲩ ⲉⲣⲟⲥ

12:17  ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲥⲱ ⲛⲧⲉϣⲱⲡⲉ ⲛⲙⲙⲁⲛ ⲉⲩⲟⲩⲛⲟϥ

12:18  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ϫⲉ ϯⲛⲁⲥⲱ ⲡⲁϫⲟⲉⲓⲥ ϫⲉ ⲁϥⲁⲓⲁⲓ ⲛϩⲏⲧ ⲙⲡⲟⲟⲩ ⲛϭⲓ ⲡⲁⲱⲛϩ ⲉϩⲟⲩⲉⲛⲉϩⲟⲟⲩ ⲧⲏⲣⲟⲩ ⲙⲡⲁϫⲡⲟ

12:19  ⲁⲥϫⲓ ⲇⲉ ⲁⲥⲟⲩⲱⲙ ⲁⲩⲱ ⲁⲥⲥⲱ ⲙⲡⲉϥⲙⲧⲟ ⲉⲃⲟⲗ ⲛⲛⲉⲧⲁⲧⲉⲥϩⲙϩⲁⲗ ⲥⲃⲧⲱⲟⲩ ⲛⲁⲥ

12:20  ⲁⲩⲱ ⲁϥⲟⲩⲛⲟϥ ⲛϭⲓ ⲟⲗⲟⲫⲉⲣⲛⲏⲥ ⲉⲃⲟⲗ ⲙⲙⲟⲥ ⲁⲩⲱ ⲁϥⲥⲱ ⲛⲟⲩⲏⲣⲡ ⲉⲛⲁϣⲱϥ ⲉⲙⲁⲧⲉ ⲡⲁⲓ ⲉⲧⲉⲙⲡϥⲥⲟⲟϥ ⲉⲛⲉϩ ⲛⲟⲩϩⲟⲟⲩ ⲛⲟⲩⲱⲧ ϫⲓⲛ ⲡⲉϩⲟⲟⲩ ⲉⲛⲧⲁⲩϫⲡⲟϥ

Chapter 13

13:1  ⲛⲧⲉⲣⲉⲣⲟⲩϩⲉ ⲇⲉ ϣⲱⲡⲉ ⲁⲩϭⲉⲡⲏ ⲛϭⲓ ⲛⲉϥϩⲙϩⲁⲗ ⲉⲙⲧⲟⲛ ⲙⲙⲟⲟⲩ ⲁⲩⲱ ⲃⲁⲅⲱⲁⲥ ⲁϥϣⲱⲧⲙ ⲛⲧⲉⲥⲕⲏⲛⲏ ϩⲓⲃⲟⲗ ⲁϥϣⲧⲁⲙ ⲉⲣⲛⲛⲉⲧⲁϩⲉⲣⲁⲧⲟⲩ ⲛⲛⲁϩⲣⲙ ⲡⲉϥϫⲟⲉⲓⲥ ⲁⲩⲃⲱⲕ ⲉⲛⲉⲩⲙⲁ ⲛⲛⲕⲟⲧⲕ ⲛⲛⲉⲁⲩϩⲓⲥⲉ ⲅⲁⲣ ⲧⲏⲣⲟⲩ ⲡⲉ ⲉⲧⲃⲉ ϫⲉ ⲁⲡϩⲟⲟⲡ ϣⲱⲡⲉ ⲉⲩⲛⲟϭ

13:2  ⲁⲥϣⲱϫⲡ ⲇⲉ ⲙⲁⲩⲁⲁⲥ ⲛϭⲓ ⲓⲟⲩⲇⲉⲓⲑ ϩⲛ ⲧⲉⲥⲕⲏⲛⲏ ⲁⲩⲱ ⲟⲗⲟⲫⲉⲣⲛⲏⲥ ⲁϥϣⲣⲡⲛⲟϫϥ ⲉϫⲙ ⲡⲉϥϭⲗⲟϭ ⲉⲛⲉⲁⲡⲏⲣⲡ ⲅⲁⲣ ⲡⲉ ϩⲣⲟϣ ⲉϩⲣⲁⲓ ⲉϫⲱϥ

13:3  ⲓⲟⲩⲇⲉⲓⲑ ⲇⲉ ⲁⲥϣⲁϫⲉ ⲙⲛ ⲧⲉⲥϩⲙϩⲁⲗ ⲉⲧⲣⲉⲥⲁϩⲉⲣⲁⲧⲥ ⲡⲃⲟⲗ ⲙⲡⲉⲥⲕⲟⲓⲇⲱⲛ ⲛⲥϯϩⲧⲏⲥ ⲉⲧⲉϩⲓⲏ ⲛⲉⲓ ⲉⲃⲟⲗ ⲕⲁⲧⲁ ⲑⲉ ⲙⲙⲏⲛⲉ ⲁⲥϫⲟⲟⲥ ⲅⲁⲣ ϫⲉ ⲉⲓⲛⲁⲃⲱⲕ ⲉⲃⲟⲗ ⲉϣⲗⲏⲗ ⲁⲩⲱ ⲁⲥϣⲁϫⲉ ⲙⲛ ⲃⲁⲅⲱⲁⲥ ⲕⲁⲧⲁ ⲛⲉⲓϣⲁϫⲉ

13:4  ⲁⲩⲃⲱⲕ ⲇⲉ ⲧⲏⲣⲟⲩ ⲙⲡⲉⲩⲙⲧⲟ ⲉⲃⲟⲗ ⲁⲩⲱ ⲙⲡⲉⲗⲁⲁⲩ ϣⲱϫⲡ ϩⲙ ⲡⲕⲟⲓⲇⲱⲛ ϫⲓⲛ ⲟⲩⲕⲟⲩⲓ ϣⲁϩⲣⲁⲓ ⲉⲩⲛⲟϭ ⲁⲥⲁϩⲉ ⲇⲉ ⲉⲣⲁⲧⲥ ⲛϭⲓ ⲓⲟⲩⲇⲉⲓⲑ ϩⲁⲧⲙ ⲡⲉϥⲙⲁⲛⲛⲕⲟⲧⲕ ⲡⲉϫⲁⲥ ϩⲣⲁⲓ ϩⲙ ⲡⲉⲥϩⲏⲧ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲛϭⲟⲙ ⲛⲓⲙ ϭⲱϣⲧ ⲉϩⲣⲁⲓ ⲉϫⲛ ⲛⲉϩⲃⲏⲩⲉ ⲛⲛⲁϭⲓϫ ϩⲣⲁⲓ ϩⲛ ⲧⲉⲓⲟⲩⲛⲟⲩ ⲉⲩϫⲓⲥⲉ ⲛⲑⲓⲉⲣⲟⲩⲥⲁⲗⲏⲙ

13:5  ϫⲉ ⲡⲉⲟⲩⲟⲉⲓϣ ⲡⲉ ⲡⲁⲓ ⲧⲉⲛⲟⲩ ⲉϯⲧⲟⲟⲧⲥ ⲛⲧⲉⲕⲕⲗⲏⲣⲟⲛⲟⲙⲓⲁ ⲉⲉⲓⲣⲉ ⲙⲡⲉⲛⲧⲁⲓϩⲓⲧⲟⲟⲧ ⲉⲣⲟϥ ⲉⲩⲟⲩⲱϣϥ ⲛⲛϫⲁϫⲉ ⲉⲛⲧⲁⲩⲧⲱⲟⲩⲛ ⲉϩⲣⲁⲓ ⲉϫⲱⲛ

13:6  ⲁⲥϯⲡⲉⲥⲟⲩⲟⲓ ⲇⲉ ⲉⲡⲕⲁⲛⲱⲛ ⲙⲡⲉϭⲗⲟϭ ⲡⲁⲓ ⲉⲧⲧⲣⲁϫⲱϥ ⲛⲟⲗⲟⲫⲉⲣⲛⲏⲥ ⲁⲥⲧⲱⲕ ⲙⲡⲉϥⲁⲕⲓⲛⲁⲕⲏⲥ ⲉⲧⲛⲙⲙⲁϥ

13:7  ⲁⲥϩⲱⲛ ⲉϩⲟⲩⲛ ⲉⲡⲉϥϭⲗⲟϭ ⲁⲥⲁⲙⲁϩⲧⲉ ⲙⲡϥⲱ ⲛⲧⲉϥⲁⲡⲉ ⲡⲉϫⲁⲥ ϫⲉ ϯϭⲟⲙ ⲛⲁⲓ ⲡⲛⲟⲩⲧⲉ ⲙⲡⲓⲥⲣⲁⲏⲗ ϩⲣⲁⲓ ϩⲙ ⲡⲟⲟⲩ ⲛϩⲟⲟⲩ

13:8  ⲁⲥⲣⲁϩⲧϥ ⲉⲡⲉϥⲙⲁⲕϩ ⲛⲥⲟⲡ ⲥⲛⲁⲩ ϩⲣⲁⲓ ϩⲛ ⲧⲉⲥϭⲟⲙ ⲁⲥϥⲓⲛⲧⲉϥⲁⲡⲉ

13:9  ⲁⲥⲥⲕⲟⲣⲕⲣ ⲙⲡⲉϥⲥⲱⲙⲁ ⲉⲃⲟⲗ ϩⲓϫⲙ ⲡⲉⲡⲣⲏϣ ⲁⲥϥⲓ ⲙⲡⲕⲱⲛⲱⲡⲓⲟⲛ ⲉⲃⲟⲗ ϩⲛ ⲛⲉⲥⲧⲩⲗⲟⲥ ⲁⲩⲱ ⲙⲛⲛⲥⲁ ⲟⲩⲕⲟⲩϫⲓ ⲁⲥⲉⲓ ⲉⲃⲟⲗ ⲁⲥϯ ⲛⲧⲉⲥϩⲙϩⲁⲗ ⲛⲧⲁⲡⲉ ⲛⲟⲗⲟⲫⲉⲣⲛⲏⲥ

13:10  ⲁⲥⲛⲟϫⲥ ⲉⲧⲡⲏⲣⲁ ⲛⲛⲉⲥϭⲓ ⲛⲟⲩⲟⲟⲙ ⲁⲩⲉⲓ ⲉⲃⲟⲗ ⲛⲧⲥⲛⲧⲉ ϩⲓ ⲟⲩⲥⲟⲡ ⲕⲁⲧⲁ ⲡⲉⲩⲥⲱⲛⲧ ⲉϣⲗⲏⲗ ⲁⲩⲱ ⲛⲧⲉⲣⲟⲩⲥⲁⲁⲧ ⲧⲡⲁⲣⲉⲙⲃⲟⲗⲏ ⲁⲩⲕⲱⲧⲉ ⲉⲡⲓⲁ ⲉⲧⲙⲙⲁⲩ ⲁⲩⲃⲱⲕ ⲉϩⲣⲁⲓ ⲉϫⲙ ⲡⲧⲟⲟⲩ ⲛⲃⲁⲓⲧⲩⲗⲟⲩⲁ ⲁⲩϩⲱⲛ ⲉϩⲟⲩⲛ ⲉⲛⲉⲥⲡⲩⲗⲏ

13:11  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ⲙⲡⲟⲩⲉ ⲛⲛⲉⲧⲣⲟⲓⲥ ϩⲓϫⲛ ⲧⲡⲩⲗⲏ ϫⲉ ⲁⲟⲩⲱⲛ ⲁⲟⲩⲱⲛ ⲛⲧⲡⲩⲗⲏ ⲡⲛⲟⲩⲧⲉ ⲛⲙⲙⲁⲛ ⲡⲉⲛⲛⲟⲩⲧⲉ ⲉϥⲉⲉⲓⲣⲉ ⲟⲛ ⲛⲟⲩϭⲟⲙ ϩⲙ ⲡⲓⲥⲣⲁⲏⲗ ⲙⲛ ⲟⲩⲁⲙⲁϩⲧⲉ ⲟⲩⲃⲉ ⲛⲉⲛϫⲁϫⲉ ⲕⲁⲧⲁ ⲑⲉ ⲉⲛⲧⲁϥⲉⲓⲣⲉ ϩⲙ ⲡⲟⲟⲩ ⲛϩⲟⲟⲩ

13:12  ⲁⲥϣⲱⲡⲉ ⲇⲉ ⲛⲧⲉⲣⲟⲩⲥⲱⲧⲙ ⲛϭⲓ ⲛⲣⲱⲙⲉ ⲛⲧⲉⲥⲡⲟⲗⲓⲥ ⲉⲧⲉⲥⲙⲏ ⲁⲩϭⲉⲡⲓ ⲉⲉⲓ ⲉⲡⲉⲥⲏⲧ ⲉⲧⲡⲩⲗⲏ ⲛⲧⲉⲩⲡⲟⲗⲓⲥ ⲉⲁⲩⲙⲟⲩⲧⲉ ⲉⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲛⲧⲡⲟⲗⲓⲥ

13:13  ⲁⲩⲉⲓ ⲧⲏⲣⲟⲩ ⲉⲩⲡⲏⲧ ϫⲓⲛ ⲡⲉⲩⲕⲟⲩϫⲓ ϣⲁ ⲡⲉⲩⲛⲟϭ ⲉⲧⲃⲉ ϫⲉ ⲛⲉⲣⲉⲡϩⲱⲃ ⲡⲉ ⲟ ⲛϣⲡⲏⲣⲉ ⲛⲛⲁϩⲣⲁⲩ ⲉⲧⲧⲣⲉⲥⲉⲓ ⲁⲩⲟⲩⲱⲛ ⲇⲉ ⲛⲧⲡⲩⲗⲏ ⲁⲩϣⲟⲡⲟⲩ ⲉⲣⲟⲟⲩ ⲉⲁⲩϫⲉⲣⲟ ⲛⲟⲩⲕⲱϩⲧ ⲉⲧⲣⲉⲡⲙⲁ ⲣⲟⲩⲟⲉⲓⲛ ⲁⲩⲕⲱⲧⲉ ⲉⲣⲟⲟⲩ

13:14  ⲛⲧⲟⲥ ⲇⲉ ⲡⲉϫⲁⲥ ⲛⲁⲩ ϩⲛ ⲟⲩⲛⲟϭ ⲛⲥⲙⲏ ϫⲉ ⲥⲙⲟⲩ ⲉⲡⲛⲟⲩⲧⲉ ⲥⲙⲟⲩ ⲥⲙⲟⲩ ⲉⲡⲛⲟⲩⲧⲉ ⲡⲁⲓ ⲉⲧⲉⲙⲡϥⲥⲁϩⲉⲡⲉϥⲛⲁ ⲉⲃⲟⲗ ⲙⲡⲏⲓ ⲙⲡⲓⲥⲣⲁⲏⲗ ⲁⲗⲗⲁ ⲁϥⲟⲩⲱϣϥ ⲙⲡⲉϫⲁϫⲉ ⲉⲃⲟⲗ ϩⲓⲧⲟⲟⲧ ϩⲣⲁⲓ ϩⲛ ⲧⲉⲓⲟⲩϣⲏ

13:15  ⲁⲩⲱ ⲁⲥⲉⲓⲛⲉ ⲉϩⲣⲁⲓ ⲛⲧⲁⲡⲉ ⲛⲟⲗⲟⲫⲉⲣⲛⲏⲥ ⲉⲃⲟⲗ ϩⲛ ⲧⲡⲏⲣⲁ ⲁⲥⲧⲥⲁⲃⲟⲥ ⲉⲣⲟⲟⲩ ⲡⲉϫⲁⲥ ϫⲉ ⲉⲓⲥ ⲧⲁⲡⲉ ⲛⲟⲗⲟⲫⲉⲣⲛⲏⲥ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲧϭⲟⲙ ⲛⲛⲁⲥⲥⲟⲩⲣ ⲁⲩⲱ ⲉⲓⲥ ⲡⲉϥⲕⲱⲛⲟⲡⲓⲟⲛ ⲉⲛⲉϥⲛⲏϫ ⲉϩⲣⲁⲓ ⲉϫⲱϥ ϩⲣⲁⲓ ϩⲙ ⲡⲉϥϯϩⲉ ⲁⲡϫⲟⲉⲓⲥ ⲡⲁⲧⲁⲥⲥⲉ ⲙⲙⲟϥ ϩⲛ ⲧϭⲓϫ ⲛⲟⲩⲥϩⲓⲙⲉ

13:16  ⲁⲩⲱ ϥⲟⲛϩ ⲛϭⲓ ⲡϫⲟⲉⲓⲥ ⲡⲁⲓ ⲉⲛⲧⲁϥϩⲁⲣⲉϩ ⲉⲣⲟⲓ ϩⲣⲁⲓ ϩⲛ ⲧⲉϩⲓⲏ ⲉⲛⲧⲁⲓⲃⲱⲕ ϩⲣⲁⲓ ⲛϩⲏⲧⲥ ϫⲉ ⲁϥⲁⲡⲁⲧⲁ ⲙⲙⲟϥ ⲛϭⲓ ⲡⲁϩⲟ ⲉⲡⲉϥⲧⲁⲕⲟ ⲁⲩⲱ ⲙⲡϥⲉⲓⲣⲉ ⲛⲙⲙⲁⲓ ⲛⲟⲩⲛⲟⲃⲉ ⲉⲩϫⲱϩⲙ ⲙⲛ ⲟⲩϣⲓⲡⲉ

13:17  ⲁⲩⲱ ⲁϥⲡⲱϣⲥ ⲛϭⲓ ⲡⲗⲁⲟⲥ ⲧⲏⲣϥ ⲉⲙⲁⲧⲉ ⲁⲩⲱ ⲁⲩⲡⲁϩⲧⲟⲩ ⲉϫⲙ ⲡⲉⲩϩⲟ ⲁⲩⲟⲩⲱϣⲧ ⲙⲡⲛⲟⲩⲧⲉ ⲡⲉϫⲁⲩ ϩⲓ ⲟⲩⲥⲟⲡ ϫⲉ ⲕⲥⲙⲁⲙⲁⲁⲧ ⲡⲉⲛⲛⲟⲩⲧⲉ ⲉⲁⲕⲟⲩⲱϣϥ ⲉϩⲣⲁⲓ ϩⲙ ⲡⲟⲟⲩ ⲛϩⲟⲟⲩ ⲛⲛⲉϫⲓϫⲉⲉⲩ ⲙⲡⲉⲕⲗⲁⲟⲥ

13:18  ⲁⲩⲱ ⲡⲉϫⲁϥ ⲛⲁⲥ ⲛϭⲓ ⲟⲍⲉⲓⲁⲥ ϫⲉ ⲧⲉⲥⲙⲁⲙⲁⲁⲧ ⲛⲧⲟ ⲙⲡⲛⲟⲩⲧⲉ ⲉⲧϫⲟⲥⲉ ⲧⲁϣⲉⲉⲣⲉ ⲡⲁⲣⲁⲛⲉϩⲓⲟⲙⲉ ⲧⲏⲣⲟⲩ ⲉⲧϩⲓϫⲙ ⲡⲕⲁϩ ⲁⲩⲱ ϥⲥⲙⲁⲙⲁⲁⲧ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ ⲡⲁⲓ ⲉⲛⲧⲁϥⲥⲱⲛⲧ ⲛⲙⲡⲏⲩⲉ ⲙⲛ ⲡⲕⲁϩ ⲡⲁⲓ ⲉⲛⲧⲁϥⲥⲟⲩⲧⲱⲛⲉ ⲉⲡϣⲱⲱϭⲉ ⲛⲧⲁⲡⲉ ⲙⲡⲁⲣⲭⲱⲛ ⲛⲛⲉⲛϫⲁϫⲉ

13:19  ⲉⲧⲃⲉ ϫⲉ ⲛⲧⲟⲩϩⲉⲗⲡⲓⲥ ⲛⲁⲱϫⲛ ⲁⲛ ϩⲙ ⲡϩⲏⲧ ⲛⲛⲣⲱⲙⲉ ⲉⲩⲉⲓⲣⲉ ⲙⲡⲙⲉⲉⲩⲉ ⲛⲛϭⲟⲙ ⲙⲡⲛⲟⲩⲧⲉ ϣⲁ ⲉⲛⲉϩ

13:20  ⲉϭⲙⲡⲟⲩϣⲓⲛⲉ ϩⲛ ϩⲉⲛⲁⲅⲁⲑⲟⲛ ⲉⲧⲃⲉ ϫⲉ ⲙⲡⲉϯⲥⲟ ⲉⲧⲟⲩⲯⲩⲭⲏ ⲉⲧⲃⲉ ⲡⲉⲑⲃⲃⲓⲟ ⲙⲡⲉⲛⲅⲉⲛⲟⲥ ⲁⲗⲗⲁ ⲁⲃⲱⲕ ⲉⲃⲟⲗ ϩⲣⲁⲓ ϩⲙ ⲡⲉⲛϩⲧⲟⲡ ⲉⲁⲙⲟⲟϣⲉ ϩⲛ ⲟⲩⲥⲟⲟⲩⲧⲛ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲁⲩⲱ ⲡⲉϫⲉⲡⲗⲁⲟⲥ ⲧⲏⲣϥ ϫⲉ ⲉϥⲉϣⲱⲡⲉ ⲉϥⲉϣⲱⲡⲉ

Chapter 14

14:1  ⲡⲉϫⲁⲥ ⲛⲁⲩ ⲛϭⲓ ⲓⲟⲩⲇⲉⲓⲑ ϫⲉ ⲥⲱⲧⲙ ⲉⲣⲟⲓ ⲛⲁⲥⲛⲏⲩ ⲛⲧⲉⲧⲛϫⲓ ⲛⲧⲉⲓⲁⲡⲉ ⲛⲧⲉⲧⲛⲁϣⲧⲥ ϩⲓϫⲙ ⲡⲙⲁ ⲛⲣⲟⲉⲓⲥ ⲙⲡⲉⲧⲛⲥⲟⲃⲧ

14:2  ⲁⲩⲱ ⲥⲛⲁϣⲱⲡⲉ ⲉⲣϣⲁⲛϩⲧⲟⲟⲩⲉ ϣⲱⲡⲉ ⲛⲧⲉⲡⲣⲏ ⲉⲓ ⲉⲃⲟⲗ ⲉϫⲙ ⲡⲕⲁϩ ⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ϫⲓ ⲛⲛⲉϥⲥⲟⲧⲃⲉϥ ⲙⲙⲓϣⲉ ⲛⲧⲉⲧⲛⲉⲓ ⲉⲃⲟⲗ ⲣⲱⲙⲉ ⲛⲓⲙ ⲉⲧϭⲙϭⲟⲙ ⲡⲃⲟⲗ ⲛⲧⲡⲟⲗⲓⲥ ⲛⲧⲉⲧⲛⲕⲁⲟⲩⲁ ϩⲓϩⲏ ⲙⲙⲱⲧⲛ ϩⲱⲥ ⲉⲧⲉⲧⲛⲁⲛⲁⲃⲱⲕ ⲉⲡⲉⲥⲏⲧ ⲉⲧⲥⲱϣⲉ ⲉⲣⲁⲧϥ ⲙⲡϣⲟⲣⲡ ⲙⲙⲁⲛⲣⲟⲉⲓⲥ ⲛⲛϣⲏⲣⲉ ⲛⲛⲁⲥⲥⲟⲩⲣ ⲁⲩⲱ ⲛⲉⲧⲛⲁⲃⲱⲕ

14:3  ⲁⲩⲱ ⲛⲁⲓ ⲥⲉⲛⲁϫⲓ ⲛⲛⲉⲩϩⲟⲡⲗⲟⲛ ⲛⲥⲉⲡⲱⲧ ⲉϩⲣⲁⲓ ⲉⲧⲉⲩⲡⲁⲣⲁⲉⲙⲃⲟⲗⲏ ⲛⲥⲉⲧⲟⲩⲛⲟⲥ ⲛⲛⲉⲥⲧⲣⲁⲧⲏⲅⲟⲥ ⲛⲧϭⲟⲙ ⲛⲛⲁⲥⲥⲟⲩⲣ ⲛⲥⲉⲡⲱⲧ ϩⲓ ⲟⲩⲥⲟⲡ ⲉⲧⲉⲥⲕⲏⲛⲏ ⲛⲟⲗⲟⲫⲉⲣⲛⲏⲥ ⲁⲩⲱ ⲛⲥⲉⲛⲁϩⲉ ⲉⲣⲟϥ ⲁⲛ ⲡⲉ ⲛⲧⲉⲟⲩϩⲟⲧⲉ ϩⲉ ⲉϩⲣⲁⲓ ⲉϫⲱⲟⲩ ⲛⲥⲉⲡⲱⲧ ⲙⲡⲉⲧⲛⲙⲧⲟ ⲉⲃⲟⲗ

14:4  ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲟⲩ ⲛⲧⲱⲧⲛ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲛ ⲛⲉⲧⲉϣⲉⲉⲩ ⲙⲡⲓⲥⲣⲁⲏⲗ ⲛⲧⲉⲧⲛⲣⲱϩⲧ ⲙⲙⲟⲟⲩ ϩⲣⲁⲓ ϩⲛ ⲛⲉⲩϩⲓⲟⲟⲩⲉ

14:5  ⲉⲙⲡⲁⲧⲉⲧⲛⲣⲛⲁⲓ ⲇⲉ ⲙⲟⲩⲧⲉ ⲛⲁⲓ ⲉⲁⲭⲓⲱⲣ ⲡⲁⲙⲁⲛⲓⲧⲏⲥ ϫⲉⲕⲁⲥ ⲉϥⲉⲛⲁⲩ ⲛϥⲥⲟⲩⲱⲛⲡⲉⲛⲧⲁϥⲥⲱϣϥ ⲙⲡⲏⲓ ⲙⲡⲓⲥⲣⲁⲏⲗ ⲁⲩⲱ ⲛⲧⲟϥ ⲉⲁϥⲧⲛⲛⲟⲟⲩϥ ⲛⲁⲛ ⲛⲑⲉ ⲉϩⲟⲩⲛ ⲉⲡⲙⲟⲩ

14:6  ⲁⲩⲱ ⲁⲩⲙⲟⲩⲧⲉ ⲉⲁⲭⲓⲱⲣ ⲉⲃⲟⲗ ϩⲙ ⲡⲏⲓ ⲛⲟⲍⲉⲓⲁⲥ ⲛⲧⲉⲣϥⲉⲓ ⲇⲉ ⲁϥⲛⲁⲩ ⲉⲧⲁⲡⲉ ⲛⲟⲗⲟⲫⲉⲣⲛⲏⲥ ϩⲛ ⲧϭⲓϫ ⲛⲟⲩⲣⲱⲙⲉ ⲛⲟⲩⲱⲧ ϩⲣⲁⲓ ϩⲛ ⲧⲥⲟⲟⲩϩⲥ ⲙⲡⲗⲁⲟⲥ ⲁϥϩⲉ ⲉϩⲣⲁⲓ ⲉϫⲙ ⲡⲉϥϩⲟ ⲁⲩⲱ ⲁϥⲃⲱⲗ ⲉⲃⲟⲗ ⲛϭⲓ ⲡⲉϥⲡⲛⲁ

14:7  ⲛⲧⲉⲣⲉϥⲣⲧⲉϥϩⲉ ⲇⲉ ⲁϥⲛⲟϫϥ ϩⲁ ⲟⲩⲉⲣⲏⲧⲉ ⲛⲓⲟⲩⲇⲉⲓⲑ ⲁϥⲟⲩⲱϣⲧ ⲙⲡⲉⲥϩⲟ ⲡⲉϫⲁϥ ⲛⲁⲥ ϫⲉ ⲧⲉⲥⲙⲁⲙⲁⲁⲧ ⲛⲧⲟ … … ϩⲙ ⲡⲙⲁ ⲛϣⲱⲡⲉ ⲧⲏⲣϥ ⲛⲓⲟⲩⲇⲁ ⲁⲩⲱ ϩⲛ ϩⲉⲑⲛⲟⲥ ⲛⲓⲙ ⲛⲁⲓ ⲉⲩϣⲁⲛⲥⲱⲧⲙ ⲉⲡⲟⲩⲣⲁⲛ ⲥⲉⲛⲁϣⲧⲟⲣⲧⲣ

14:8  ⲧⲉⲛⲟⲩ ϭⲉ ⲙⲁⲧⲁⲙⲟⲓ ⲉⲛⲉⲛⲧⲁⲁⲁⲩ ϩⲣⲁⲓ ϩⲛ ⲛⲉⲓϩⲟⲟⲩ ⲁⲥⲧⲁⲩⲟ ⲉⲣⲟϥ ⲛϭⲓ ⲓⲟⲩⲇⲉⲓⲑ ⲛⲧⲙⲏⲧⲉ ⲙⲡⲗⲁⲟⲥ ⲛϩⲱⲃ ⲛⲓⲙ ⲉⲛⲧⲁⲥⲁⲁⲩ ϫⲓⲛ ⲙⲡⲉϩⲟⲟⲩ ⲉⲛⲧⲁⲥⲃⲱⲕ ⲉⲃⲟⲗ ϣⲁϩⲣⲁⲓ ⲉⲧⲉⲩⲛⲟⲩ ⲉⲥϣⲁϫⲉ ⲛⲙⲙⲁⲩ

14:9  ⲛⲧⲉⲣⲥⲗⲟ ⲇⲉ ⲉⲥϣⲁϫⲉ ⲁⲡⲗⲁⲟⲥ ϯⲗⲟⲩⲗⲁⲓ ϩⲛ ⲟⲩⲛⲟϭ ⲛⲥⲙⲏ ⲁⲩⲱ ⲁⲩϯ ⲛⲟⲩϩⲣⲟⲟⲩ ⲛⲟⲩⲛⲟϥ ϩⲣⲁⲓ ϩⲛ ⲧⲉⲩⲡⲟⲗⲓⲥ

14:10  ⲛⲧⲉⲣⲉϥⲛⲁⲩ ⲇⲉ ⲛϭⲓ ⲁⲭⲓⲱⲣ ⲉϩⲱⲃ ⲛⲓⲙ ⲛⲁⲓ ⲉⲛⲧⲁϥⲁⲁⲩ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲁϥⲡⲓⲥⲧⲉⲩⲉ ⲉⲡⲛⲟⲩⲧⲉ ⲁⲩⲱ ⲁϥⲥⲃⲃⲉ ⲛⲧⲥⲁⲣⲝ ⲛⲧⲉϥⲁⲕⲣⲟⲃⲩⲥⲧⲓⲁ ⲁϥⲟⲩⲁϩϥ ⲉⲡⲏⲓ ⲙⲡⲓⲥⲣⲁⲏⲗ ϣⲁϩⲣⲁⲓ ⲉⲡⲟⲟⲩ ⲛϩⲟⲟⲩ

14:11  ⲛⲧⲉⲣⲉϩⲧⲟⲟⲩⲉ ⲇⲉ ϣⲱⲡⲉ ⲁⲩⲉϣⲧⲧⲁⲡⲉ ⲛⲟⲗⲟⲫⲉⲣⲛⲏⲥ ⲡⲃⲟⲗ ⲙⲡⲥⲟⲃⲧ ⲁⲣⲱⲙⲉ ⲛⲓⲙ ϫⲓ ⲛⲛⲉϥϩⲟⲡⲗⲟⲛ ⲙⲙⲓϣⲉ ⲁⲩⲉⲓ ⲉⲃⲟⲗ ⲕⲁⲧⲁ ⲥⲟⲟⲩϩⲥ ⲉϫⲛ ⲙⲙⲁ ⲛⲉⲓ ⲉϩⲣⲁⲓ ⲉⲡⲧⲟⲟⲩ

14:12  ⲛϣⲏⲣⲉ ⲇⲉ ⲛⲛⲁⲥⲥⲟⲩⲣ ⲛⲧⲉⲣⲟⲩⲛⲁⲩ ⲉⲣⲟⲟⲩ ⲁⲩⲧⲛⲛⲟⲟⲩ ⲛⲥⲁ ⲛⲉⲩⲁⲛϫⲱϫ ⲛⲧⲟⲟⲩ ⲇⲉ ⲁⲩⲉⲓ ⲉϫⲛ ⲛⲉⲩⲥⲧⲣⲁⲧⲏⲅⲟⲥ ⲙⲛ ⲛⲉⲩⲭⲓⲗⲓⲁⲣⲭⲟⲥ ⲁⲩⲱ ⲉϫⲛ ⲁⲣⲭⲱⲛ ⲛⲓⲙ ⲛⲧⲟⲟⲧⲟⲩ

14:13  ⲁⲩⲉⲓ ⲉⲧⲉⲥⲕⲏⲛⲏ ⲛⲟⲗⲟⲫⲉⲣⲛⲏⲥ ⲡⲉϫⲁⲩ ⲙⲡⲉⲧϣⲟⲟⲡ ⲉϩⲣⲁⲓ ⲉϫⲛ ⲛⲉϥⲉⲛⲕⲁ ⲧⲏⲣⲟⲩ ϫⲉ ⲛⲉϩⲥⲉ ⲙⲡⲉⲛϫⲟⲉⲓⲥ ⲉⲧⲃⲉ ϫⲉ ⲁⲩⲧⲟⲗⲙⲁ ⲛϭⲓ ⲛⲓⲟⲩⲇⲁⲓ ⲉⲉⲓ ⲉⲡⲉⲥⲏⲧ ⲉϫⲱⲛ ⲉⲩⲡⲟⲗⲉⲙⲟⲥ ϫⲉ ⲉⲩⲉϥⲟⲧⲛ ⲉⲃⲟⲗ ⲉⲡⲧⲏⲣϥ

14:14  ⲁϥⲃⲱⲕ ⲇⲉ ⲉϩⲟⲩⲛ ⲛϭⲓ ⲃⲁⲅⲱⲁⲥ ⲁϥⲕⲱⲗϩ ⲉⲡⲣⲟ ⲛⲧⲉⲥⲕⲏⲛⲏ ⲉϥⲙⲉⲉⲩⲉ ⲅⲁⲣ ⲡⲉ ϫⲉ ⲛⲛⲉϥⲛⲕⲟⲧⲕ ⲙⲛ ⲓⲟⲩⲇⲉⲓⲑ

14:15  ⲛⲧⲉⲣⲉⲧⲙⲗⲁⲁⲩ ⲇⲉ ⲥⲱⲧⲙ ⲁϥⲟⲩⲱⲛ ⲁϥⲃⲱⲕ ⲉϩⲟⲩⲛ ⲉⲡⲕⲟⲓⲇⲱⲛ ⲁϥϩⲉ ⲉⲣⲟϥ ⲉϥⲥⲕⲣⲕⲱⲣ ϩⲓϫⲛ ⲧⲉⲭⲗⲱⲛⲓⲥ ⲉϥⲙⲟⲟⲩⲧ ⲁⲩⲱ ⲉⲁⲩϥⲓ ⲛⲧⲉϥⲁⲡⲉ

14:16  ⲁϥϫⲓϣⲕⲁⲕ ⲉⲃⲟⲗ ϩⲛ ⲟⲩⲛⲟϭ ⲛϩⲣⲟⲟⲩ ⲙⲛ ⲟⲩⲣⲓⲙⲉ ⲙⲛ ⲟⲩⲁϣⲁϩⲟⲙ ⲙⲛ ⲟⲩⲥⲙⲏ ⲉⲥⲛⲁϣⲧ ⲁϥⲡⲱϩ ⲛⲛⲉϥϩⲟⲓⲧⲉ

14:17  ⲁϥⲃⲱⲕ ⲉϩⲟⲩⲛ ⲉⲧⲉⲥⲕⲏⲛⲏ ⲉⲛⲉⲣⲉⲓⲟⲩⲇⲉⲓⲑ ⲛϩⲏⲧⲥ ⲙⲡϥϩⲉ ⲉⲣⲟⲥ ⲁϥⲡⲱⲧ ⲁϥⲉⲓ ⲉⲃⲟⲗ ⲉⲡⲗⲁⲟⲥ ⲁϥϫⲓϣⲕⲁⲕ ⲉⲃⲟⲗ

14:18  ϫⲉ ⲁⲩⲁⲑⲉⲧⲓ ⲛϭⲓ ⲛϩⲙϩⲁⲗ ⲁⲥⲉⲓⲣⲉ ⲛϭⲓ ⲟⲩⲥϩⲓⲙⲉ ⲛⲟⲩϣⲓⲡⲉ ϩⲙ ⲡⲏⲓ ⲙⲡⲣⲣⲟ ⲛⲁⲃⲟⲩⲭⲟⲇⲟⲛⲟⲥⲟⲣ ⲉⲃⲟⲗ ϩⲛ ⲛⲉϩⲉⲃⲣⲁⲓⲟⲥ ϫⲉ ⲉⲓⲥ ⲟⲗⲟⲫⲉⲣⲛⲏⲥ ϩⲓ ⲡⲕⲁϩ ⲁⲩⲱ ⲛⲧⲉϥⲁⲡⲉ ϩⲓϫⲱϥ ⲁⲛ

14:19  ⲛⲧⲉⲣⲟⲩⲥⲱⲧⲙ ⲇⲉ ⲉⲛⲉⲓϣⲁϫⲉ ⲛϭⲓ ⲛⲁⲣⲭⲱⲛ ⲛⲧϭⲟⲙ ⲛⲛⲁⲥⲥⲟⲩⲣ ⲁⲩⲡⲱⲧ ϩⲛ ⲛⲉⲩϩⲟⲓⲧⲉ ⲁⲩⲱ ⲁⲧⲉⲩⲯⲩⲭⲏ ϣⲧⲟⲣⲧⲣ ⲉⲙⲁⲧⲉ ⲁⲩⲱ ⲁⲩϫⲓϣⲕⲁⲕ ⲉⲃⲟⲗ ϩⲛ ⲟⲩⲛⲟⲩϭ ⲛⲥⲙⲏ ⲉⲙⲁⲧⲉ ϩⲛ ⲧⲙⲏⲧⲉ ⲛⲧⲡⲁⲣⲉⲙⲃⲟⲗⲏ

Chapter 15

15:1  ⲛⲧⲉⲣⲟⲩⲥⲱⲧⲙ ⲇⲉ ⲛϭⲓ ⲛⲉⲧⲟⲩⲏϩ ϩⲛ ⲛⲉⲩⲙⲁ ⲛϣⲱⲡⲉ ⲁⲩⲡⲱϣⲥ ⲉϩⲣⲁⲓ ⲉϫⲙ ⲡⲉⲛⲧⲁϥϣⲱⲡⲉ

15:2  ⲁⲩⲥⲧⲱⲧ ⲉⲓ ⲉϩⲣⲁⲓ ⲉϫⲱⲟⲩ ⲙⲛ ⲟⲩϩⲟⲧⲉ ⲁⲩⲱ ⲉⲛⲉⲙⲛⲣⲱⲙⲉ ϭⲉⲉⲧ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲧϩⲓⲧⲟⲩⲱϥ ⲁⲗⲗⲁ ⲁⲩϣⲧⲟⲣⲧⲣ ϩⲓ ⲟⲩⲥⲟⲡ ⲁⲩⲡⲱⲧ ϩⲓϩⲓⲏ ⲛⲓⲙ ⲛⲧⲉⲧⲥⲱϣⲉ ⲙⲛ ⲧⲟⲣⲓⲛⲏ

15:3  ⲁⲩⲱ ⲛⲉⲧⲥⲙⲛⲡⲁⲣⲉⲙⲃⲟⲗⲏ ϩⲛ ⲧⲟⲣⲓⲛⲏ ⲙⲛⲡⲕⲱⲧⲉ ⲛⲃⲁⲓⲧⲩⲗⲟⲩⲁ ⲁⲩⲡⲱⲧ ⲉⲩϭⲟⲧⲡ ⲧⲟⲧⲉ ⲛϣⲏⲣⲉ ⲙⲡⲓⲥⲣⲁⲏⲗ ⲣⲱⲙⲉ ⲛⲓⲙ ⲛⲣⲉϥⲙⲓϣⲉ ⲉⲃⲟⲗ ⲛϩⲏⲧⲟⲩ ⲁⲩⲡⲱϩⲧ ⲉⲃⲟⲗ ⲉϫⲱⲟⲩ

15:4  ⲁⲩⲱ ⲁϥϫⲟⲟⲩ ⲛϭⲓ ⲟⲍⲉⲓⲁⲥ ⲉⲃⲁⲓⲇⲟⲙⲉⲥⲑⲉⲙ ⲙⲛ ⲭⲱⲃⲁ ⲙⲛ ⲥⲉⲗⲃⲉⲙ ⲙⲛ ⲕⲱⲗⲁ ⲁⲩⲱ ⲉⲧⲟϣ ⲛⲓⲙ ⲙⲡⲓⲥⲣⲁⲏⲗ ⲉϫⲱ ⲉⲣⲟⲟⲩ ⲛⲛⲉⲛⲧⲁⲩϣⲱⲡⲉ ⲁⲩⲱ ϫⲉⲕⲁⲥ ⲉⲩⲉⲡⲱϩⲧ ⲉⲃⲟⲗ ⲧⲏⲣⲟⲩ ⲉϫⲛ ⲛⲉⲧⲙⲓϣⲉ ⲛⲙⲙⲁⲩ ⲉϩⲱⲧⲃ ⲙⲙⲟⲟⲩ

15:5  ⲛⲧⲉⲣⲟⲩⲥⲱⲧⲙ ⲇⲉ ⲛϭⲓ ⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲉⲓ ⲧⲏⲣⲟⲩ ϩⲓ ⲟⲩⲥⲟⲡ ⲉϩⲣⲁⲓ ⲉϫⲱⲟⲩ ⲁⲩϭⲟϫϭϫ ⲙⲙⲟⲟⲩ ϣⲁϩⲣⲁⲓ ⲉⲭⲱⲃⲁ ⲁⲩⲉⲓ ⲇⲉ ⲟⲛ ⲛⲧⲉⲓϩⲉ ⲛϭⲓ ⲛⲉⲃⲟⲗ ϩⲛ ⲑⲓⲉⲣⲟⲩⲥⲁⲗⲏⲙ ⲁⲩⲱ ⲉⲃⲟⲗ ϩⲛ ⲧⲟⲣⲓⲛⲏ ⲧⲏⲣⲥ ⲁⲩϫⲱ ⲅⲁⲣ ⲉⲣⲟⲟⲩ ⲛⲛⲉⲛⲧⲁⲩϣⲱⲡⲉ ϩⲛ ⲧⲡⲁⲣⲉⲙⲃⲟⲗⲏ ⲛⲛⲉⲩϫⲁϫⲉ ⲁⲩⲱ ⲛⲉⲧϩⲛ ⲅⲁⲗⲁⲁⲇ ⲙⲛ ⲛⲉⲧϩⲛ ⲧⲅⲁⲗⲓⲗⲁⲓⲁ ⲁⲩϫⲟⲟⲣⲟⲩ ⲉⲃⲟⲗ ϩⲛ ⲟⲩⲛⲟϭ ⲙⲡⲗⲏⲅⲏ ϣⲁⲛⲧⲟⲩⲥⲓⲛⲉ ⲛⲇⲁⲙⲁⲥⲕⲟⲥ ⲙⲛ ⲛⲉⲥⲧⲉϣⲉⲉⲩ

15:6  ⲡⲕⲉⲥⲉⲉⲡⲉ ⲇⲉ ⲛⲛⲉⲧⲟⲩⲏϩ ϩⲛ ⲃⲁⲓⲧⲩⲗⲟⲩⲁ ⲁⲩⲡⲱϩⲧ ⲉϫⲛ ⲧⲡⲁⲣⲉⲙⲃⲟⲗⲏ ⲛⲛⲁⲥⲥⲟⲩⲣ ⲁⲩϣⲟⲗⲟⲩ ⲁⲩⲣⲣⲙⲙⲁⲟ ⲉⲙⲁⲧⲉ

15:7  ⲛϣⲏⲣⲉ ⲇⲉ ⲙⲡⲓⲥⲣⲁⲏⲗ ⲛⲧⲉⲣⲟⲩⲕⲟⲧⲟⲩ ⲉⲃⲟⲗ ϩⲙ ⲡϭⲟϫϭϫ ⲁⲩⲣϫⲟⲉⲓⲥ ⲉⲡⲕⲉⲥⲉⲉⲡⲉ ⲁⲩⲱ ⲛϯⲙⲉ ⲙⲛ ⲛⲣⲥⲟⲟⲩⲉ ⲉⲧϩⲛ ⲧⲟⲣⲓⲛⲏ ⲙⲛ ⲧⲡⲉⲇⲓⲛⲏ ⲁⲩⲁⲙⲁϩⲧⲉ ⲉϩⲁϩ ⲛϣⲱⲗ ⲛⲉⲩⲟ ⲅⲁⲣ ⲛⲟⲩⲛⲟϭ ⲛⲁϣⲏ ⲉⲙⲁⲧⲉ ⲡⲉ

15:8  ⲓⲱⲁⲕⲓⲙ ⲇⲉ ⲡⲛⲟϭ ⲛⲟⲩⲏⲏⲃ ⲙⲛ ⲛϩⲗⲗⲟⲓ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲛⲉⲧⲟⲩⲏϩ ϩⲛ ⲑⲓⲉⲣⲟⲩⲥⲁⲗⲏⲙ ⲁⲩⲉⲓ ⲉⲛⲁⲩ ⲉⲛⲁⲅⲁⲑⲟⲛ ⲉⲛⲧⲁⲡϫⲟⲉⲓⲥ ⲁⲁⲩ ⲙⲡⲓⲥⲣⲁⲏⲗ ⲁⲩⲱ ⲉⲛⲁⲩ ⲉⲓⲟⲩⲇⲉⲓⲑ ⲉϣⲁϫⲉ ⲛⲙⲙⲁⲥ ϩⲛ ⲟⲩⲉⲓⲣⲏⲛⲏ

15:9  ⲛⲧⲉⲣⲟⲩⲉⲓ ⲇⲉ ⲉⲃⲟⲗ ϣⲁⲣⲟⲥ ⲁⲩⲥⲙⲟⲩ ⲉⲣⲟⲥ ⲧⲏⲣⲟⲩ ϩⲓ ⲟⲩⲥⲟⲡ ⲡⲉϫⲁⲩ ⲛⲁⲥ ϫⲉ ⲛⲧⲟ ⲡⲉ ⲡϫⲓⲥⲉ ⲛⲑⲓⲉⲣⲟⲩⲥⲁⲗⲏⲙ ⲛⲧⲟ ⲡⲉ ⲡⲛⲟϭ ⲛϣⲟⲩϣⲟⲩ ⲙⲡⲓⲥⲣⲁⲏⲗ ⲛⲧⲟ ⲡⲉ ⲡⲛⲟϭ ⲛϣⲟⲩϣⲟⲩ ⲙⲡⲉⲛⲅⲉⲛⲟⲥ

15:10  ⲁⲣⲣⲛⲁⲓ ⲧⲏⲣⲟⲩ ϩⲣⲁⲓ ϩⲛ ⲧⲟⲩϭⲓϫ ⲁⲉⲓⲣⲉ ⲛϩⲉⲛⲡⲉⲧⲛⲁⲛⲟⲩϥ ⲙⲛ ⲡⲓⲥⲣⲁⲏⲗ ⲁⲩⲱ ⲁⲡⲛⲟⲩⲧⲉ ⲣϩⲛⲁϥ ⲛϩⲏⲧⲟⲩ ⲉⲣⲉϣⲱⲡⲉ ⲉⲣⲉⲥⲙⲁⲙⲁⲁⲧ ⲙⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϣⲁⲉⲛⲉϩ ⲛⲟⲩⲟⲉⲓϣ ⲁⲩⲱ ⲡⲉϫⲉⲡⲗⲁⲟⲥ ⲧⲏⲣϥ ϫⲉ ⲉⲥⲉϣⲱⲡⲉ ⲉⲥⲉϣⲱⲡⲉ

15:11  ⲁⲡⲗⲁⲟⲥ ⲇⲉ ϣⲱⲗ ⲛⲧⲡⲁⲣⲉⲙⲃⲟⲗⲏ ⲙⲙⲁⲁⲃ ⲛϩⲟⲟⲩ ⲁⲩⲱ ⲁⲩϯ ⲛⲓⲟⲩⲇⲉⲓⲑ ⲛⲧⲉⲥⲕⲏⲛⲏ ⲛⲟⲗⲟⲫⲉⲣⲛⲏⲥ ⲙⲛ ⲛⲉϥϩⲛⲟⲩ ⲛϩⲁⲧ ⲧⲏⲣⲟⲩ ⲙⲛ ⲛⲉϥϭⲗⲟϭ ⲙⲛ ⲛⲉⲧⲧⲁⲓⲏⲩ ⲧⲏⲣⲟⲩ ⲛⲧⲟⲟⲧϥ ⲙⲛ ⲛⲉϥϩⲛⲁⲁⲩ ⲧⲏⲣⲟⲩ ⲛⲧⲟⲥ ⲇⲉ ⲁⲥϫⲓⲧⲟⲩ ⲁⲥⲧⲁⲗⲟⲟⲩ ⲉϩⲣⲁⲓ ⲉϫⲙ ⲡⲉⲥϥⲁⲓⲛⲁϩϥ ⲁⲩⲱ ⲁⲥⲛⲟⲩϩⲃ ⲛⲛⲉⲥⲁϭⲟⲗⲧⲉ ⲁⲥⲧⲁⲗⲟⲟⲩ ⲉϫⲱⲟⲩ

15:12  ⲁⲩⲡⲱⲧ ⲇⲉ ⲧⲏⲣⲟⲩ ϩⲓ ⲟⲩⲥⲟⲡ ⲛϭⲓ ⲛⲉϩⲓⲟⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲛⲁⲩ ⲉⲣⲟⲥ ⲁⲥⲧⲁⲙⲓⲟ ⲛⲁⲥ ⲛⲟⲩⲭⲟⲣⲟⲥ ⲉⲃⲟⲗ ⲛϩⲏⲧⲟⲩ ⲁⲩϫⲓ ⲛϩⲉⲛϫⲓⲛϫⲓⲛ ⲉϩⲣⲁⲓ ⲉⲛⲉⲥϭⲓϫ ⲁⲩⲱ ⲁⲥϯ ⲛⲛⲉϩⲓⲟⲙⲉ ⲉⲧⲛⲙⲙⲁⲥ

15:13  ⲁⲩⲱ ⲥⲉⲥⲧⲉⲫⲁⲛⲟⲩ ϩⲛ ϩⲉⲛⲃⲱ ⲛϫⲟⲉⲓⲧ ⲛⲧⲟⲥ ⲙⲛⲛⲉⲧⲛⲙⲙⲁⲥ ⲁⲩⲱ ⲁⲥⲙⲟⲟϣⲉ ϩⲓϩⲏ ⲙⲡⲗⲁⲟⲥ ⲧⲏⲣϥ ⲉⲥⲥⲱⲕ ϩⲏⲧϥ ⲙⲡⲉⲭⲟⲣⲟⲥ ⲧⲏⲣϥ ⲛⲛⲉϩⲓⲟⲙⲉ ⲁⲩⲱ ⲛⲛⲉⲩⲟⲩⲏϩ ⲛⲥⲱⲥ ⲛϭⲓ ⲣⲱⲙⲉ ⲛⲓⲙ ⲛⲧⲉⲡⲓⲥⲣⲁⲏⲗ ⲉⲩϩⲏⲕ ⲙⲛ ϩⲉⲛⲕⲗⲟⲙ ⲉⲩⲥⲙⲟⲩ ϩⲛ ⲧⲉⲩⲧⲁⲡⲣⲟ

15:14  ⲓⲟⲩⲇⲉⲓⲑ ⲇⲉ ⲛⲉⲥⲧⲁⲩⲟ ⲛϣⲟⲣⲡ ⲡⲉ ⲛⲧⲉⲓⲉⲝⲟⲙⲟⲗⲟⲅⲓⲥⲓⲥ ⲙⲡⲓⲥⲣⲁⲏⲗ ⲧⲏⲣϥ ⲁⲩⲱ ⲛⲧⲉⲣⲉⲡⲗⲁⲟⲥ ⲧⲏⲣϥ ⲟⲩⲱϩⲙ ⲙⲡⲉⲓⲥⲙⲟⲩ

Chapter 16

16:1  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ϫⲉ ⲁⲙⲏⲓⲧⲛ ⲉⲃⲟⲗ ϩⲏⲧϥ ⲙⲡⲁⲛⲟⲩⲧⲉ ϩⲛ ϩⲉⲛⲧⲩⲙⲡⲁⲛⲟⲛ ϫⲱ ⲉⲡϫⲟⲉⲓⲥ ⲡⲁⲛⲟⲩⲧⲉ ϩⲛ ϩⲉⲛⲕⲩⲙⲃⲁⲗⲟⲛ ϣⲱⲛⲃ ⲛⲁϥ ⲛⲟⲩⲯⲁⲗⲙⲟⲥ ⲛⲧⲉⲧⲛϫⲓⲥⲉ ⲛⲟⲩⲥⲙⲟⲩ ⲛⲧⲉⲧⲛⲉⲡⲓⲕⲁⲗⲓ ⲙⲡⲉϥⲣⲁⲛ

16:2  ϫⲉ ⲡⲛⲟⲩⲧⲉ ⲉⲧⲟⲩⲱϣϥ ⲛⲙⲡⲟⲗⲉⲙⲟⲥ ⲡⲉ ⲡϫⲟⲉⲓⲥ ϫⲉ ⲁϥⲧⲛⲛⲟⲟⲩ ⲛⲛⲉϥⲡⲁⲣⲉⲙⲃⲟⲗⲏ ⲛⲧⲧⲙⲏⲧⲉ ⲙⲡⲗⲁⲟⲥ ⲉⲛⲁϩⲙⲛⲧ ⲉⲃⲟⲗ ϩⲛ ⲧϭⲓϫ ⲛⲉⲧⲡⲏⲧ ⲛⲥⲱⲓ

16:3  ⲁϥⲉⲓ ⲛϭⲓ ⲁⲥⲥⲟⲩⲣ ⲉⲃⲟⲗ ϩⲛ ⲛⲧⲟⲩϩⲓⲏ ⲙⲡⲉⲙϩⲓⲧ ⲁϥⲉⲓ ϩⲛ ⲛϣⲟ ⲛⲧⲉϥϭⲟⲙ ⲛⲁⲓ ⲉⲛⲧⲁⲧⲉⲩⲁϣⲏ ϩⲱⲥ ⲛⲛⲉⲭⲓⲙⲁⲣⲣⲟⲥ ⲁⲩⲱ ⲁⲛⲉⲩϩⲧⲱⲱⲣ ϩⲱⲃⲥ ⲛⲛⲃⲟⲩⲛⲟⲥ

16:4  ⲁϥϫⲟⲟⲥ ⲉⲣⲱⲕ ϩⲛ ⲛⲁⲧⲟϣ ⲁⲩⲱ ⲉⲙⲟⲩⲟⲩⲧ ⲛⲛⲁϩⲣϣⲓⲣⲉ ϩⲛ ⲟⲩⲥⲏϥⲉ ⲁⲩⲱ ⲛⲉⲧϫⲓⲉⲕⲓⲃⲉ ⲛⲧⲟⲟⲧ ⲉⲕⲁⲁⲩ ⲉⲩⲕⲁϩ ⲁⲩⲱ ⲛⲁϣⲉⲉⲣⲉ ⲕⲟⲩⲓ ⲉⲧⲁⲁⲩ ⲉⲩϣⲱⲗ ⲁⲩⲱ ⲉϣⲱⲗ ⲛⲛⲁⲡⲁⲣⲑⲉⲛⲟⲥ

16:5  ⲡϫⲟⲉⲓⲥ ⲡⲡⲁⲛⲧⲟⲕⲣⲁⲇⲱⲣ ⲁϥⲁⲑⲉⲧⲓ ⲙⲙⲟⲟⲩ ϩⲛ ⲧϭⲓϫ ⲛⲟⲩⲥϩⲓⲙⲉ

16:6  ⲛⲧⲁⲡⲉⲩⲇⲩⲛⲁⲧⲟⲥ ⲅⲁⲣ ϩⲉ ⲁⲛ ϩⲛ ⲛϩⲣϣⲓⲣⲉ ⲟⲩⲇⲉ ⲛⲛϣⲏⲣⲉ ⲁⲛ ⲛⲛⲉⲛⲧⲓⲇⲁⲛⲟⲥ ⲛⲉⲛⲧⲁⲩⲣⲁϩⲧϥ

16:17  ⲑⲛⲟⲥ ⲉⲧⲧⲱⲟⲩⲛ ⲉϩⲣⲁⲓ ⲉϫⲙ ⲡⲁⲅⲉⲛⲟⲥ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲇⲱⲣ ⲛⲁϫⲓⲕⲃⲁ ⲙⲙⲟⲟⲩ ϩⲙ ⲡⲉϩⲟⲟⲩ ⲙⲡϩⲁⲡ ⲉϯ ⲛⲟⲩⲕⲱϩⲧ ⲙⲛⲟⲩϥⲛⲧ ⲉϩⲣⲁⲓ ⲉϫⲛ ⲛⲉⲩⲥⲁⲣⲝ ⲁⲩⲱ ⲥⲉⲛⲁⲣⲓⲙⲉ ϩⲛ ⲟⲩⲉⲥⲑⲏⲥⲓⲥ ϣⲁ ⲉⲛⲉϩ

16:18  ⲛⲧⲉⲣⲟⲩⲉⲓ ⲇⲉ ⲉⲑⲓⲉⲣⲟⲩⲥⲁⲗⲏⲙ ⲁⲩⲟⲩⲱϣⲧ ⲙⲡⲛⲟⲩⲧⲉ ⲁⲩⲱ ⲛⲧⲉⲣⲉⲡⲗⲁⲟⲥ ⲧⲃⲃⲟ ⲁⲩⲧⲁⲗⲟ ⲉϩⲣⲁⲓ ⲛⲛⲉⲩϭⲗⲓⲗ ⲙⲛ ⲛⲉⲩⲉⲣⲏⲧ ⲙⲛ ⲛⲉϣⲁⲩⲧⲁⲁⲩ

16:19  ⲁⲓⲟⲩⲇⲉⲓⲑ ⲇⲉ ϯ ⲛⲛⲉⲥⲕⲉⲩⲏ ⲧⲏⲣⲟⲩ ⲛⲟⲗⲟⲫⲉⲣⲛⲏⲥ ⲡⲉⲛⲧⲁⲡⲗⲁⲟⲥ ⲧⲁⲁⲩ ⲛⲁⲥ ⲁⲩⲱ ⲡⲉϥⲕⲱⲛⲟⲡⲓⲟⲛ ⲉⲛⲧⲁⲥϫⲓⲧϥ ⲉⲃⲟⲗ ϩⲙ ⲡⲉϥⲕⲟⲓⲇⲱⲛ ⲛⲁⲛⲁⲑⲏⲙⲁ ⲙⲡϫⲟⲉⲓⲥ

16:20  ⲁⲩⲱ ⲛⲉⲣⲉⲡⲗⲁⲟⲥ ⲡⲉ ϩⲛ ⲑⲓⲉⲣⲟⲩⲥⲁⲗⲏⲙ ⲉϥⲟⲩⲛⲟϥ ⲙⲡⲉⲙⲧⲟ ⲉⲃⲟⲗ ⲛⲙⲡⲉⲧⲟⲩⲁⲁⲃ ⲛϣⲟⲙⲛⲧ ⲛⲉⲃⲟⲧ ⲁⲩⲱ ⲁⲓⲟⲩⲇⲉⲓⲑ ϭⲱ ⲙⲙⲁⲩ

16:21  ⲙⲛⲛⲥⲁ ⲛⲉⲓϩⲟⲟⲩ ⲇⲉ ⲁⲡⲟⲩⲁ ⲡⲟⲩⲁ ⲃⲱⲕ ⲉϩⲣⲁⲓ ⲉⲧⲉϥⲕⲗⲏⲣⲟⲛⲟⲙⲓⲁ ⲁⲩⲱ ⲁⲓⲟⲩⲇⲉⲓⲑ ⲃⲱⲕ ⲉϩⲣⲁⲓ ⲉⲧⲉϥⲕⲗⲏⲣⲟⲛⲟⲙⲓⲁ ⲁⲩⲱ ⲁⲓⲟⲩⲇⲉⲓⲑ ⲃⲱⲕ ⲉϩⲣⲁⲓ ⲉⲃⲁⲓⲧⲩⲗⲟⲩⲁ ⲁⲥϭⲱ ⲉϩⲣⲁⲓ ⲉϫⲙ ⲡⲉⲥⲛⲕⲁ ⲁⲥϣⲱⲡⲉ ⲇⲉ ⲉⲥϩⲁⲉⲟⲟⲩ ϩⲣⲁⲓ ϩⲙ ⲡⲕⲁϩ ⲧⲏⲣϥ

16:22  ⲁⲩⲱ ⲁϩⲁϩ ⲉⲡⲓⲑⲩⲙⲓ ⲉⲣⲟⲥ ⲙⲡⲉϩⲟⲟⲩⲧ ⲇⲉ ⲥⲟⲩⲱⲛⲥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉⲥⲱⲛϩ ϫⲓⲛ ⲙⲡⲉϩⲟⲟⲩ ⲉⲛⲧⲁϥⲙⲟⲩ ⲛϭⲓ ⲙⲁⲛⲁⲥⲥⲏ ⲡⲉⲥϩⲁⲓ ⲁⲩⲟⲩⲁϩϥ ⲛⲛⲁϩⲣⲙⲡⲉϥⲗⲁⲟⲥ

16:23  ⲁⲩⲱ ⲛⲉⲥⲁⲓⲁⲓ ⲡⲉ ⲉⲩⲙⲛⲧⲛⲟϭ ⲉⲙⲁⲧⲉ ⲁⲥⲣϩⲗⲗⲱ ϩⲙ ⲡⲏⲓ ⲙⲡⲉⲥϩⲁⲓ ⲉⲁⲥⲣϣⲉϯ ⲛⲣⲟⲙⲡⲉ ⲁⲥⲕⲱ ⲇⲉ ⲉⲃⲟⲗ ⲛⲧⲉⲥϩⲙϩⲁⲗ ⲛⲣⲉⲙϩⲏ ⲁⲩⲱ ⲁⲥⲙⲟⲩ ϩⲛ ⲃⲁⲓⲧⲩⲗⲟⲩⲁ ⲁⲩⲧⲟⲙⲥⲥ ϩⲙ ⲡⲉⲥⲡⲏⲗⲁⲓⲟⲛ ⲙⲡⲉⲥϩⲁⲓ ⲙⲁⲛⲁⲥⲥⲏ

16:24  ⲁⲩⲱ ⲁϥⲣϩⲏⲃⲉ ⲉⲣⲟⲥ ⲛϭⲓ ⲡⲏⲓ ⲙⲡⲓⲥⲣⲁⲏⲗ ⲛⲥⲁϣϥ ⲛϩⲟⲟⲩ ⲁⲩⲱ ⲉⲙⲡⲁⲧⲥⲙⲟⲩ ⲁⲥⲡⲱϣ ⲛⲛⲉⲥⲛⲕⲁ ⲉϫⲛ ⲛⲉⲧϩⲏⲛ ⲉϩⲟⲩⲛ ⲧⲏⲣⲟⲩ ⲙⲙⲁⲛⲁⲥⲥⲏ ⲡⲉⲥϩⲁⲓ ⲁⲩⲱ ⲉϫⲛ ⲛⲉⲧϩⲏⲛ ⲉϩⲟⲩⲛ ⲧⲏⲣⲟⲩ ⲉⲡⲉⲥⲅⲉⲛⲟⲥ

16:25  ⲛⲉⲙⲛⲡⲉⲧⲑⲣϣⲟ ⲇⲉ ⲡⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ϩⲛ ⲛⲉϩⲟⲟⲩ ⲧⲏⲣⲟⲩ ⲛⲓⲟⲩⲇⲉⲓⲑ ⲁⲩⲱ ⲙⲛⲛⲥⲁ ⲧⲣⲉⲥⲙⲟⲩ ⲛϩⲉⲛϩⲟⲟⲩ ⲉⲛⲁϣⲱⲟⲩ