TpiKJPB - Romans

Chapter 1

1:1  ¶ Pol, wokboi bilong Jisas Kraist, husat God i singautim long stap wanpela aposel, bruk i go long gutnius bilong God,

1:2  (Dispela em i bin promisim bipo long ol profet bilong em insait long rait holi bilong God,)

1:3  Long sait bilong Pikinini Man bilong em Jisas Kraist, Bikpela bilong yumi, husat i kamap long tumbuna pikinini bilong Devit bilong bihainim sait bilong bodi.

1:4  Na God i tokaut long em i stap Pikinini Man bilong God wantaim pawa, bilong bihainim spirit bilong pasin holi, long kirap bek long dai,

1:5  Long husat mipela i bin kisim marimari na wok aposel, long wanem, mipela i bihainim bilip tru namel long olgeta kantri, bilong tingim nem bilong em,

1:6  Namel long husat yupela tu Jisas Kraist i singautim.

1:7  Dispela pas i go long olgeta husat i stap long Rom, ol man i stap klostu tru long bel bilong God, husat em i singautim bilong stap ol seint. Marimari i go long yupela na bel isi i kam long God, Papa bilong yumi, na Bikpela Jisas Kraist.

1:8  ¶ Namba wan, mi tok tenkyu long God bilong mi long yupela olgeta long nem bilong Jisas Kraist, long olgeta hap bilong dispela graun ol man i toktok long bilip tru bilong yupela.

1:9  Long wanem, God em i witnes bilong mi, husat mi bihainim wantaim spirit bilong mi insait long gutnius bilong Pikinini Man bilong em, long mi no lusim pasin bilong kolim nem bilong yupela olgeta taim long ol prea bilong mi,

1:10  Taim mi wokim askim, sapos long wanpela rot long dispela taim nau long mi ken gat gutpela wokabaut, long laik bilong God, long kam long yupela.

1:11  Long wanem, mi gat laik tru long lukim yupela, inap long mi ken givim yupela wanpela presen long sait bilong spirit, long dispela as, yupela i ken stap strong.

1:12  Em i olsem, inap long mi ken kisim bel isi wantaim wantaim yupela long dispela wankain bilip tru bilong yupela na mi wantaim.

1:13  Nau mi no gat laik long yupela i no klia, ol brata, long planti taim mi wokim tingting long kam long yupela, (tasol rot i pas inap long nau,) inap long mi ken i gat sampela kaikai namel long yupela tu, yes, olsem namel long ol arapela man i no Ju.

1:14  Mi man i gat dinau long ol Grik, na ol wail man wantaim, long ol saveman, na long ol man i no gat save tru wantaim.

1:15  Olsem na, hamas samting olsem i stap insait long mi, mi redi long autim gutnius long yupela husat i stap long Rom tu.

1:16  ¶ Long wanem, mi no sem long gutnius bilong Kraist. Long wanem, em i pawa bilong God bilong kisim bek long olgeta wan wan husat i bilip, long Ju pastaim, na tu long Grik.

1:17  Long wanem, insait long en stretpela pasin bilong God i kamap ples klia long bilip tru i go long bilip tru, olsem rait i stap pinis, Stretpela man bai stap laip long bilip tru.

1:18  Long wanem, belhat tru bilong God i kamap ples klia i kam long heven i birua long olgeta pasin bilong ol man i no bihainim God na i no stretpela, husat i holim tok tru long pasin i no stretpela,

1:19  ¶ Bikos dispela samting ol i ken save long God i kamap ples klia insait long ol. Long wanem, God i bin soim dispela long ol.

1:20  Long wanem, ol samting man i no inap long lukim bilong em, i stat long taim God i kamapim olgeta samting bilong dispela graun long nating, ol man i lukim klia, taim ol i kisim save long ol samting em i wokim, yes, pawa na pasin bilong em bilong stap God Olgeta oltaim oltaim, inap long ol i no inap bekim tok,

1:21  Bikos, taim ol i save long God, ol i no givim glori long em olsem God, na tu ol i no tok tenkyu. Tasol ol i kamap samting nating insait long ol tingting nating bilong ol, na kranki bel bilong ol i kamap tudak.

1:22  Taim ol i tokaut long ol yet i saveman, ol i kamap ol krankiman,

1:23  Na senisim glori bilong God i no save bagarap i kamap wanpela piksa ol i wokim i wankain olsem man i save bagarap, na ol pisin, na ol animal i gat fopela lek, na ol samting i wokabaut long bel.

1:24  Olsem na God tu i givim ol i go long pasin i no klin long wok bilong ol aigris bilong ol bel bilong ol yet, long bagarapim ona bilong ol bodi bilong ol yet namel long ol yet,

1:25  Husat i bin senisim tok tru bilong God i kamap wanpela giaman, na lotuim na bihainim samting God i wokim moa long dispela Man i Kamapim Olgeta Samting Long Nating, husat i gat blesing oltaim oltaim. Amen.

1:26  Long dispela as God i givim ol i go long ol laik nogut tru bilong bel. Long wanem, yes, ol meri bilong ol i bin senisim pasin marit i stret i go long dispela pasin i birua long pasin i stret.

1:27  Na wankain olsem tu ol man, taim ol lusim pasin marit i stret wantaim meri, i kuk long aigris bilong ol wanpela i go long narapela, ol man wantaim ol man i wokim dispela samting i no stretpela, na ol i kisim insait long ol yet dispela samting bilong bekim pe bilong rong bilong ol, dispela i fit stret.

1:28  Na yes, olsem ol i no bin gat laik long holim yet God insait long save bilong ol, God i givim ol i go olgeta long wanpela tingting nogut, long mekim ol dispela samting, dispela i no fit,

1:29  Taim ol i pulap wantaim olgeta pasin i no stretpela, pamuk pasin, pasin nogut, pasin mangal, pasin bilong bel nogut long narapela, pulap long mangal tingting, pasin bilong kilim man, pasin bilong tok pait, pasin bilong giaman, pasin bilong bagarapim narapela, ol man bilong tok isi isi hait,

1:30  Ol man bilong tok baksait, ol man i hetim God, ol man i tingting nogut tru, ol man i hambak, ol man bilong litimapim ol yet nating, ol man bilong kamapim ol samting nogut, ol man i sakim tok bilong ol papamama,

1:31  Ol man i no gat save, ol man bilong brukim kontrak, ol man i no gat laik bilong bel i stret, ol man i no gat laik tru long stretim tok, ol man i no gat pasin sori,

1:32  Husat taim ol i save long kot bilong God, long ol husat i mekim ol kain samting olsem ol i inap long dai, ol i no mekim wankain samting tasol, tasol ol i gat amamas insait long ol husat i mekim.

Chapter 2

2:1  ¶ Olsem na yu no gat toktok bilong bekim tok, O man, husat man yu stap man husat i jasim narapela. Long wanem, we yu jasim narapela long en, yu soim klia rong bilong yu yet. Long wanem, yu husat i jasim narapela i wokim ol wankain samting.

2:2  Tasol yumi save tru long kot bilong God em i bilong bihainim tok i tru i birua long ol husat i mekim ol kain samting.

2:3  Na ating yu tingim dispela, O man husat i jasim ol husat i mekim ol kain samting, na yu mekim wankain samting, long yu bai ranawe long kot bilong God?

2:4  O yu tingim olsem ol samting i dia tru bilong gutpela pasin na pasin bilong stap isi na pasin bilong karim pen longpela taim bilong em i samting nating, taim yu no save long gutpela pasin bilong God i stiaim yu long tanim bel?

2:5  Tasol long bihainim bel bilong yu i hat tru na i no laik tanim bel, yu bungim long bakstua i go long yu yet belhat tru i redi long de bilong belhat tru na de stretpela kot bilong God i kamap ples klia,

2:6  Husat bai bekim long olgeta wan wan man bilong bihainim ol wok bilong em,

2:7  Long ol husat, long taim ol i stap yet long mekim gutpela wantaim pasin bilong sanap strong long traim, i painim glori na ona na pasin bilong i no ken dai, laip i stap gut oltaim oltaim,

2:8  Tasol long ol husat i lain bilong pait nating strong, na husat i no bihainim tok tru, tasol ol i bihainim pasin i no stretpela, em i givim bel nogut na belhat tru,

2:9  Bikpela hevi na taim hevi i krungutim, antap long tewel bilong olgeta wan wan man husat i mekim pasin nogut, bilong Ju pastaim, na tu bilong man i no Ju.

2:10  Tasol glori, ona, na bel isi, long olgeta wan wan man husat i wokim gutpela pasin, long Ju pastaim, na tu long man i no Ju.

2:11  Long wanem, pasin bilong tingim namba bilong ol man i no stap wantaim God.

2:12  Long wanem, hamas man i bin mekim sin ausait long lo bai dai olgeta tu ausait long lo. Na hamas man i bin mekim sin insait long lo, lo bai jasim.

2:13  (Long wanem, ol man i harim lo i no stretpela long ai bilong God, tasol ol man i bihainim lo bai kamap stretpela.

2:14  Long wanem, taim ol man i no Ju, husat i no gat lo, i mekim long pasin bilong ol yet ol samting i stap insait long lo, ol dispela, taim ol i no gat lo, i stap wanpela lo long ol yet,

2:15  Husat i soim wok bilong lo God i raitim insait long ol bel bilong ol, ol mausbel tu i stap witnes, na ol tingting bilong ol long dispela taim i sutim tok, o sapos nogat, i wokim toktok bilong bekim wanpela i go long narapela,)

2:16  Long dispela de, taim God bai jasim ol samting hait bilong ol man long Jisas Kraist bilong bihainim gutnius bilong mi.

2:17  ¶ Lukim, ol i kolim yu wanpela Ju, na yu malolo insait long lo, na litimapim yu yet nating insait long God,

2:18  Na yu save long laik bilong em, na yu soim orait long ol samting i gutpela olgeta moa, taim yu kisim skul i kam ausait long lo.

2:19  Na yu gat strongpela bilip long yu yu yet i wanpela man bilong stiaim ol aipas, wanpela lait bilong ol husat i stap long tudak,

2:20  Wanpela tisa bilong ol krankiman, wanpela tisa bilong ol bebi, husat i gat piksa tasol bilong save na bilong tok tru insait long lo.

2:21  Olsem na yu husat i skulim narapela, ating yu no skulim yu yet? Yu husat i autim tok long man i no ken stil, ating yu stil?

2:22  Yu husat i tok long wanpela man i no ken bagarapim marit long pamuk pasin, ating yu mekim pasin bilong bagarapim marit long pamuk pasin? Yu husat i ting olsem ol piksa bilong god giaman i sting olgeta, ating yu mekim pasin bilong bagarapim samting i holi?

2:23  Yu husat i litimapim yu yet nating long lo, long pasin bilong brukim lo ating yu bagarapim ona bilong God?

2:24  Long wanem, ol i tok bilas long nem bilong God namel long ol man i no Ju long wok bilong yu, olsem rait i stap pinis.

2:25  Long wanem, tru tumas, pasin bilong katim skin i gutpela bilong helpim, sapos yu bihainim lo. Tasol sapos yu stap man bilong brukim lo, pasin bilong katim skin bilong yu i kamap pasin bilong i no katim skin.

2:26  Olsem na sapos man i no katim skin i bihainim ol stretpela pasin bilong lo, ating bai pasin bilong i no katim skin bilong em God i no inap kaunim olsem pasin bilong katim skin?

2:27  Na ating pasin bilong i no katim skin, dispela i pasin bilong bodi yet, sapos em i inapim lo, jasim yu, husat long leta na pasin bilong katim skin i kalapim lo?

2:28  Long wanem, em i no wanpela Ju, husat em i wanpela long ausait. Na tu pasin bilong katim skin i no dispela, dispela i bilong ausait, long bodi.

2:29  Tasol em i wanpela Ju, husat i wanpela long insait. Na pasin bilong katim skin em dispela bilong bel, long spirit, na i no long leta, husat biknem bilong em i no kam long ol man, tasol long God.

Chapter 3

3:1  ¶ Ju nau i gat wanem helpim bilong winim? O pasin bilong katim skin i gat wanem helpim?

3:2  Planti long olgeta wan wan rot. Nambawan, bikos God i putim ol tok i kam long maus bilong God long han bilong ol.

3:3  Long wanem, olsem wanem sapos sampela i no bin bilip? Ating pasin bilong i no gat bilip bilong ol bai mekim bilip tru bilong God i no gat pawa?

3:4  I no ken tru. Yes, larim God i stap trupela, tasol olgeta wan wan man stap man bilong giaman, olsem rait i stap pinis, Inap long yu ken stap stretpela long ol toktok bilong yu, na yu ken winim ol taim ol i jasim yu.

3:5  Tasol sapos pasin i no stretpela bilong yumi i soim wok bilong stretpela pasin bilong God, yumi bai tok wanem? Ating God i no stretpela husat i bekim pe nogut? (Mi toktok olsem man)

3:6  I no ken tru. Long wanem, nau bai God i jasim dispela graun olsem wanem?

3:7  Long wanem, sapos tok tru bilong God i bin pulap tru moa long wok bilong giaman bilong mi i go long glori bilong em, bilong wanem yet em i jasim mi tu olsem wanpela sinman?

3:8  Na i no mobeta, (olsem ol i wokim ripot bilong giamanim nem bilong yumi, na olsem sampela i tok yes long yumi tok,) Larim yumi mekim pasin nogut, inap long gutpela samting i ken kamap? Husat pe nogut bilong kot bilong ol i stretpela.

3:9  Wanem nau? Ating yumi winim ol? Nogat, na nogat olgeta. Long wanem, yumi bin pruvim bipo long ol Ju na ol man i no Ju wantaim, long ol olgeta i stap aninit long sin.

3:10  Olsem rait i stap pinis, I no gat wanpela i stretpela, nogat, i no gat wanpela.

3:11  I no gat wanpela i gat save, i no gat wanpela i painim strong God.

3:12  Ol olgeta i go ausait long rot, ol wantaim i kamap samting i no gutpela bilong helpim. I no gat wanpela husat i mekim gutpela pasin, nogat, i no gat wanpela.

3:13  Nek bilong ol i wanpela matmat i op. Wantaim ol tang bilong ol ol i bin yusim pasin giaman. Marasin nogut bilong ol asp i stap aninit long ol lip bilong ol,

3:14  Husat maus bilong ol i pulap wantaim ol tok nogut na bel i pait tru.

3:15  Ol lek bilong ol i ran hariap long kapsaitim blut.

3:16  Bagarap olgeta na hevi nogut i stap long ol rot bilong ol.

3:17  Na rot bilong bel isi ol i no bin save.

3:18  I no gat pret long God i stap long ai bilong ol ai bilong ol.

3:19  ¶ Nau yumi save long wanem samting lo i tok, em i tok long ol husat i stap aninit long lo, inap long em i ken pasim olgeta wan wan maus, na olgeta man bilong dispela graun i ken kamap man i gat asua long ai bilong God.

3:20  Olsem na long ol wok bilong lo bai i no gat wanpela man i kamap stretpela long ai bilong em. Long wanem, long lo ol man i kisim save long sin.

3:21  Tasol nau stretpela pasin bilong God ausait long lo i kamap ples klia, taim lo na ol profet i witnes long dispela.

3:22  Yes, stretpela pasin bilong God, dispela i kam long bilip tru bilong Jisas Kraist i go long olgeta na antap long olgeta husat i bilip. Long wanem, i no gat wanpela i narakain.

3:23  Long wanem, olgeta i bin mekim sin, na kamap sot long glori bilong God,

3:24  Taim marimari bilong em i mekim ol i kamap stretpela na i no gat samting i pasim, long wok bilong baim bek i stap insait long Kraist Jisas,

3:25  Husat God i bin putim long stap samting bilong kolim belhat bilong God long wok bilong bilip tru long blut bilong em, long tokaut long stretpela pasin bilong em bilong pasin bilong lusim ol dispela sin i stap bipo, long wok bilong pasin bilong stap isi bilong God.

3:26  Long tokaut, mi tok, long dispela taim long stretpela pasin bilong em, inap long em i ken stap stretpela, na man bilong mekim stretpela em husat i putim bilip long Jisas.

3:27  Nau pasin bilong litimapim nem nating i stap we? Em i stap ausait. Long wanem lo? Bilong ol wok? Nogat, tasol long lo bilong bilip tru.

3:28  Olsem na mipela i pasim tok pinis long man i kamap stretpela long bilip tru i no gat ol wok bilong lo insait long en.

3:29  Ating em i God bilong ol Ju tasol? Ating i yes long em i God tu bilong ol man i no Ju? Yes, bilong ol man i no Ju tu,

3:30  Taim yumi luksave em i wanpela God, husat bai mekim ol man bilong katim skin kamap stretpela long bilip tru, na ol man i no katim skin long wok bilong bilip tru.

3:31  Ating nau yumi mekim lo i stap nating olgeta long wok bilong bilip tru? I no ken tru. Yes, yumi strongim lo.

Chapter 4

4:1  ¶ Yumi bai tok nau long tumbuna papa bilong yumi Ebraham, long sait bilong bodi, i bin painimaut pinis wanem samting?

4:2  Long wanem, sapos Ebraham i bin kamap stretpela long ol wok, em i gat rot bilong glori long en, tasol em i no inap long ai bilong God.

4:3  Long wanem, rait bilong God i tok wanem? Ebraham i bilipim God, na God i kaunim dispela long em long stretpela pasin.

4:4  Nau long em husat i wokim wok God i no kaunim dispela pe bilong marimari, tasol bilong dinau.

4:5  Tasol long em husat i no wokim wok, tasol em i bilip long em husat i mekim ol man nogut i kamap stretpela, bilip tru bilong em God i kaunim bilong stretpela pasin.

4:6  Yes, olsem Davit tu i kolim blesing bilong dispela man, long husat God i makim stretpela pasin ausait long ol wok bilong lo,

4:7  I spik, Blesing i stap long ol husat God i lusim ol sin nogut bilong ol, na husat ol sin bilong ol God i karamapim.

4:8  Blesing i stap long man husat Bikpela bai i no inap makim sin long em.

4:9  ¶ Ating dispela blesing i kam nau long ol man bilong katim skin tasol, o long ol man i no katim skin tu? Long wanem, yumi tok long bilip tru God i kaunim long Ebraham bilong stretpela pasin.

4:10  Nau em i kaunim olsem wanem? Taim em i katim skin, o taim em i no katim skin? I no taim em i katim skin, tasol taim em i no katim skin.

4:11  Na em i kisim mak bilong katim skin, wanpela mak bilong dispela stretpela pasin bilong bilip tru em i gat taim em i no katim skin yet, inap long em i ken stap tumbuna papa bilong ol olgeta husat i bilip, maski ol i no katim skin, inap long God i ken makim stretpela pasin i go long ol tu,

4:12  Na tumbuna papa bilong katim skin long ol husat i no bilong ol man bilong katim skin tasol, tasol husat tu i wokabaut long ol step bilong bilip tru bilong tumbuna papa bilong yumi Ebraham, dispela em i gat taim em i no katim skin yet.

4:13  Long wanem, dispela promis, long em i ken stap pikinini i kisim dispela graun long papa, i no go long Ebraham, o long tumbuna pikinini bilong em, long wok bilong lo, tasol long wok bilong stretpela pasin bilong bilip tru.

4:14  Long wanem, sapos ol husat i bilong lo i stap ol pikinini i kisim samting long papa, orait dispela i mekim bilip tru i stap nating olgeta, na em i mekim promis God i wokim olsem i no gat pawa.

4:15  Bilong wanem, lo i wokim belhat tru. Long wanem, we i no gat lo, i no gat pasin bilong kalapim lo.

4:16  Olsem na em i bilong bilip tru, inap long em i ken stap long marimari, long dispela as, promis i ken stap tru olgeta long olgeta tumbuna pikinini. I no long ol tasol husat i bilong lo, tasol long ol tu husat i bilong bilip tru bilong Ebraham, husat i tumbuna papa bilong yumi olgeta,

4:17  ¶ (Olsem rait i stap pinis, Mi bin mekim yu wanpela tumbuna papa long planti kantri,) long ai bilong em husat em i bilip,yes God, husat i givim laip gen long daiman, na kolim ol dispela samting i no stap olsem ol i stap.

4:18  Husat taim i no gat hop em i bilip long hop, inap long em i ken kamap tumbuna papa bilong planti kantri, bilong bihainim dispela samting God i toktok, Olsem tasol tumbuna pikinini bilong yu bai stap.

4:19  Na taim em i no man i no gat strong long bilip tru, em i no tingim na skelim bodi bilong em yet i stap daibodi nau, taim em i klostu olsem 100 krismas, na tu yet long bel bilong Sara i dai pinis.

4:20  Em i no gat tupela tingting long promis bilong God long wok bilong pasin bilong i no gat bilip. Tasol em i strong long bilip tru, na givim glori long God.

4:21  Na taim em i gat tingting i strong olgeta long, wanem samting em i bin promis, em i inap tu long mekim.

4:22  Na olsem na God i makim dispela long em bilong stretpela pasin.

4:23  ¶ Nau ol i no raitim dispela bilong tingim em wanpela tasol, long God i makim dispela long em,

4:24  Tasol bilong tingim yumi tu, long husat God bai makim dispela, sapos yumi bilip long em husat i kirapim Jisas, Bikpela bilong yumi, long dai.

4:25  Husat God i givim bilong baim ol pasin bilong bagarapim bel bilong yumi, na kirapim gen bilong mekim yumi kamap stretpela.

Chapter 5

5:1  ¶ Olsem na taim God i mekim yumi stretpela long bilip tru pinis, yumi gat bel isi wantaim God long wok bilong Bikpela bilong yumi Jisas Kraist.

5:2  Long husat tu yumi i gat tok orait, long bilip tru, long go insait long dispela marimari we yumi sanap long en, na wokim amamas tru long hop bilong glori bilong God.

5:3  Na i no olsem tasol, tasol yumi glori long ol bikpela hevi tu, taim yumi save long bikpela hevi i wokim pasin bilong sanap strong long traim.

5:4  Na pasin bilong sanap strong long traim i wokim skul bilong laip. Na skul bilong laip i wokim hop.

5:5  Na hop i no mekim man i sem. Bilong wanem, Holi Spirit, husat God i givim yumi, i kapsaitim ausait laikim tru bilong God insait long ol bel bilong yumi.

5:6  ¶ Long wanem, taim yumi i no gat strong yet, long taim em i stret Kraist i dai bilong helpim ol man nogut.

5:7  Long wanem, klostu i no gat wanpela man i laik dai bilong helpim stretpela man. Tasol sapos i gat sans, yes, long sampela i inap liklik long dai bilong helpim wanpela gutpela man.

5:8  Tasol God i soim wok bilong laikim tru bilong em i kam long yumi, long dispela, taim yumi stap ol sinman yet, Kraist i dai long helpim yumi.

5:9  Hamas moa nau, taim yumi stap stretpela nau long blut bilong em, long em bai kisim bek yumi long belhat tru long wok bilong em.

5:10  Long wanem, sapos, taim yumi stap ol birua, yumi kamap wanbel wantaim God long dai bilong Pikinini Man bilong em, hamas moa, taim yumi kamap wanbel pinis, em bai kisim bek yumi wantaim laip bilong em.

5:11  Na i no olsem tasol, tasol yumi tu i amamas tru long God long wok bilong Bikpela bilong yumi Jisas Kraist, long husat yumi nau i bin kisim karamapim bilong mekim i kamap wanbel.

5:12  Olsem na, olsem long wok bilong wanpela man sin i kam long dispela graun, na dai long wok bilong sin, na olsem tasol dai i bin kam antap long olgeta man, long wanem, olgeta i bin mekim sin,

5:13  (Long wanem, inap long taim lo i kam sin i stap long dispela graun, tasol God i no makim sin long man taim i no gat lo.

5:14  Tasol dai i bin bosim kingdom i stat long Adam i go long Moses, yes, em bosim ol husat i no bin sin i bihainim wankain olsem pasin bilong Adam bilong kalapim lo, husat em i piksa bilong em husat i mas kamap.

5:15  Tasol i no olsem dispela pasin bilong bagarapim bel, olsem tu em dispela fri presen. Long wanem, sapos long pasin bilong bagarapim bel bilong wanpela planti i dai pinis, hamas moa marimari bilong God, na presen long marimari, dispela i kam long wok bilong wanpela man, Jisas Kraist, i bin pulap tru i go long planti.

5:16  Na i no olsem em i long wok bilong wanpela husat i bin sin, olsem tasol presen i stap. Long wanem, kot i kam long wanpela i go long pe nogut bilong kot, tasol dispela fri presen em i bilong planti pasin bilong bagarapim bel i go long pasin bilong mekim i kamap stretpela.

5:17  Long wanem, sapos long wok bilong pasin bilong bagarapim bel bilong wanpela man dai i bosim kingdom long wok bilong wanpela, hamas moa ol husat i kisim marimari i planti moa yet na presen bilong stretpela pasin bai bosim kingdom long laip long wok bilong wanpela, Jisas Kraist.)

5:18  Olsem na olsem long wok bilong pasin bilong bagarapim bel bilong wanpela kot i kam antap long olgeta man i go long pe nogut bilong kot, yes, olsem tasol long stretpela pasin bilong wanpela dispela fri presen i kam antap long olgeta man i go long pasin bilong mekim i kamap stretpela bilong laip.

5:19  Long wanem, olsem long wok bilong wanpela man bilong sakim tok planti i kamap sinman, olsem tasol long wok bilong wanpela bilong bihainim tok planti bai kamap stretpela.

5:20  Na moa tu lo i kam insait, inap long dispela pasin bilong bagarapim bel i ken pulap tru. Tasol we sin i pulap tru, marimari i bin pulap tru planti moa.

5:21  Inap long olsem sin i bin bosim kingdom i go long dai, yes, olsem tasol marimari i ken bosim kingdom long wok bilong stretpela pasin i go inap long laip i stap gut oltaim oltaim long wok bilong Jisas Kraist, Bikpela bilong yumi.

Chapter 6

6:1  ¶ Yumi bai tok wanem nau? Ating yumi bai stap yet long sin, inap long marimari i ken pulap tru?

6:2  I no ken tru. Yumi, husat i dai pinis long sin, bai stap laip insait long en moa liklik olsem wanem?

6:3  Ating yupela i no save, long hamas bilong yumi i kisim baptais insait long Jisas Kraist i kisim baptais insait long dai bilong em?

6:4  Olsem na God i planim yumi wantaim em long baptais long dai, inap long wankain olsem God i kirapim Kraist long dai long glori bilong Papa, yes, olsem tasol yumi tu mas wokabaut long nupela laip.

6:5  Long wanem, sapos God i bin planim yumi wantaim insait long piksa bilong dai bilong em, yumi bai stap tu insait long piksa bilong kirap bek bilong em.

6:6  Yumi save long dispela, long God i nilim olpela man bilong yumi long diwai kros pinis wantaim em, inap long dispela bodi bilong sin i ken bagarap olgeta, inap long i stat long nau i go yumi no ken bihainim sin.

6:7  Long wanem, em husat i dai pinis i stap fri long pawa bilong sin.

6:8  Nau sapos yumi stap daiman wantaim Kraist, yumi bilip olsem long yumi bai stap laip wantaim em tu,

6:9  Taim yumi save long taim Kraist i kirap long dai em i no inap dai moa. Dai i no gat strong moa long bosim em.

6:10  Long wanem, long dispela, em i dai, em i dai long sin wanpela taim. Tasol long dispela, em i stap laip, em i stap laip i go long God.

6:11  Wankain olsem kaunim yupela yet tu olsem yupela i stap daiman tru long sin, tasol ol man i stap laip long God long wok bilong Jisas Kraist, Bikpela bilong yumi.

6:12  Olsem na no ken larim sin bosim kingdom insait long bodi bilong yupela i ken dai, inap long yupela i ken bihainim em long ol aigris bilong en.

6:13  Na tu yupela i no ken givim ol hap bilong bodi bilong yupela olsem ol samting bilong wokim pasin i no stretpela i go long sin. Tasol givim yupela yet i go long God, olsem ol dispela husat i stap laip long dai, na ol hap bilong bodi bilong yupela olsem ol samting bilong wokim stretpela pasin i go long God.

6:14  Long wanem, sin bai i no inap gat strong long bosim yupela. Long wanem, yupela i no stap aninit long lo, tasol aninit long marimari.

6:15  Wanem nau? Bai yumi sin, bikos yumi i no stap aninit long lo, tasol aninit long marimari? I no ken tru.

6:16  Ating i yes long yupela i save, long em husat yupela i givim yupela yet olsem wokboi bilong bihainim, yupela i stap ol wokboi bilong em husat yupela i bihainim, sapos long sin i go long dai, o long pasin bilong bihainim tok i go long stretpela pasin?

6:17  Tasol tok tenkyu i go long God, long yupela i bin stap ol wokboi bilong sin, tasol yupela i bin bihainim dispela kain skul wantaim bel, dispela mipela i givim long yupela.

6:18  Nau taim yupela i kamap fri long pawa bilong sin, yupela i kamap ol wokboi bilong stretpela pasin.

6:19  Mi toktok i bihainim pasin bilong ol man, bilong wanem, bodi bilong yupela i no gat strong. Long wanem, olsem yupela i bin givim ol hap bilong bodi bilong yupela olsem ol wokboi bilong pasin i no klin na long sin nogut i go long sin nogut, yes, olsem tasol nau givim ol hap bilong bodi bilong yupela olsem ol wokboi bilong stretpela pasin i go long pasin holi.

6:20  Long wanem, taim yupela i stap ol wokboi bilong sin, yupela i stap fri long stretpela pasin.

6:21  Yupela i bin gat wanem kaikai nau long ol dispela samting we yupela i sem nau long en? Long wanem, pinis bilong ol dispela samting em dai.

6:22  Tasol nau taim God i mekim yupela i kamap fri long pawa bilong sin, na kamap ol wokboi bilong God, yupela i gat kaikai bilong yupela i go long pasin holi, na pinis bilong en, laip i stap gut oltaim oltaim.

6:23  Long wanem, pe bilong sin em i dai. Tasol presen bilong God em i laip i stap gut oltaim oltaim long wok bilong Jisas Kraist, Bikpela bilong yumi.

Chapter 7

7:1  ¶ Ating i yes long yupela i save, ol brata, (long wanem, mi toktok long ol husat i save long lo,) olsem long lo i gat strong long bosim man inap long taim em i stap laip?

7:2  Long wanem, maritmeri husat i gat man i kalabus long lo long man bilong em inap long taim man i stap laip. Tasol sapos man i dai pinis, meri i lusim pinis kalabus bilong lo bilong man bilong em.

7:3  Orait nau sapos, taim man bilong em i stap laip, meri i maritim narapela man, ol bai kolim em meri bilong bagarapim marit long pamuk pasin. Tasol sapos man bilong em i dai pinis, em i fri long dispela lo, inap long em i no meri bilong bagarapim marit long pamuk pasin, maski em i marit long narapela man.

7:4  Olsem na, ol brata bilong mi, yupela tu i kamap ol daiman long lo long wok bilong bodi bilong Kraist, inap long yupela i ken marit long narapela, yes, long em husat God i kirapim long dai, inap long yumi ken karim kaikai i go long God.

7:5  Long wanem, taim yumi stap insait long olpela bel, ol muv bilong sin, dispela i kam long lo, i bin mekim wok insait long ol hap bilong bodi bilong yumi long karim kaikai i go long dai.

7:6  Tasol nau God i kisim bek yumi long lo, dispela i dai pinis we i holimpas yumi long en, inap long yumi ken bihainim God long nupela pasin bilong spirit, na i no long olpela pasin bilong leta.

7:7  ¶ Yumi bai tok wanem nau? Lo em i sin? I no ken tru. Nogat, mi no bin save long sin, sapos i no bin long wok bilong lo. Long wanem, mi no bin save long aigris, sapos lo i no bin tok, Yu no ken mangal.

7:8  Tasol sin, taim em i kisim sans long wok bilong tok strong, i wokim insait long mi olgeta kain mangal nogut. Long wanem, taim lo i no stap sin i stap daiman.

7:9  Long wanem, mi stap laip wanpela taim taim lo i no stap. Tasol taim tok strong i kam, sin i kirap gen, na mi dai pinis.

7:10  Na dispela tok strong, dispela God i makim long laip, mi painimaut pinis em i go long dai.

7:11  Long wanem sin, taim em i kisim sans long wok bilong tok strong, i giamanim mi, na long dispela em i kilim mi i dai.

7:12  Olsem na lo em i holi, na tok strong em i holi, na stretpela, na gutpela.

7:13  Ating nau dispela samting i gutpela i kamap dai long mi? I no ken tru. Tasol sin, inap long em i ken kamap ples klia olsem em i sin, taim em i wokim dai insait long mi long dispela samting i gutpela, inap long sin, long wok bilong tok strong, i ken kamap sin i pulap planti moa yet.

7:14  ¶ Long wanem, yumi save long lo em i bilong spirit sait. Tasol mi stap man bilong bodi sait, slevman aninit long sin.

7:15  Long wanem, dispela samting mi mekim mi no orait long en. Long wanem, samting mi laik mekim, dispela mi no mekim. Tasol wanem samting mi hetim, dispela mi mekim.

7:16  Nau sapos mi mekim dispela samting mi no laik mekim, mi tok yes i go long lo long dispela em i gutpela.

7:17  Orait nau em i no moa mi husat i mekim dispela, tasol dispela sin i stap insait long mi.

7:18  Long wanem, mi save long insait long mi (em i olsem, insait long bodi bilong mi,) i no gat wanpela gutpela samting i stap. Long wanem, pawa bilong laikim i stap wantaim mi. Tasol rot bilong mekim dispela samting i gutpela mi no painim pinis.

7:19  Long wanem, dispela gutpela samting mi laik mekim mi no mekim. Tasol dispela pasin nogut mi no laik mekim, dispela mi mekim.

7:20  Nau sapos mi mekim dispela mi no laik mekim, em i no moa mi husat i mekim dispela, tasol dispela sin i stap insait long mi.

7:21  Mi painim pinis nau wanpela lo, long, taim mi laik mekim gutpela pasin, pasin nogut i stap wantaim mi.

7:22  Long wanem, mi gat gutpela amamas long lo bilong God i bihainim dispela insait man.

7:23  Tasol mi lukim narapela lo insait long ol hap bilong bodi bilong mi, i wokim bikpela pait i birua long lo bilong tingting bilong mi, na i bringim mi i go kalabus long lo bilong sin, dispela i stap insait long ol hap bilong bodi bilong mi.

7:24  O man i bagarap tru olsem mi stap! Husat bai kisim bek mi long bodi bilong dispela dai?

7:25  Mi tok tenkyu long God long wok bilong Jisas Kraist, Bikpela bilong yumi. Olsem nau wantaim tingting mi mi yet i bihainim lo bilong God, tasol wantaim bodi lo bilong sin.

Chapter 8

8:1  ¶ Olsem na i no gat nau pe nogut bilong kot long ol husat i stap insait long Kraist Jisas, husat i no wokabaut i bihainim bodi, tasol i bihainim Spirit.

8:2  Long wanem, lo bilong Spirit bilong laip insait long Kraist Jisas i bin mekim mi fri long lo bilong sin na dai.

8:3  Long wanem, wanem samting lo i no inap long mekim, long dispela, long wok bilong bodi em i no gat strong, taim God i salim Pikinini Man bilong em yet long bodi i luk olsem bodi i pulap long sin, na bilong winim sin, em i mekim sin i lus long kot long dispela bodi,

8:4  Inap long em i ken inapim stretpela pasin bilong lo insait long yumi, husat i no wokabaut i bihainim bodi, tasol i bihainim Spirit.

8:5  Long wanem, ol husat i bihainim bodi i tingim ol samting bilong bodi, tasol ol husat i bihainim Spirit, ol samting bilong Spirit.

8:6  Long wanem, long stap man bilong tingting long bodi sait em dai, tasol long stap man bilong tingting long spirit sait em i laip na bel isi.

8:7  Bilong wanem, tingting bilong bodi sait em i pasin birua i birua long God. Long wanem, em i no stap aninit long lo bilong God, na tru tru em i no inap stap olsem.

8:8  Olsem nau ol husat i stap long sait bilong bodi i no inap amamasim bel bilong God.

8:9  Tasol yupela i no stap long sait bilong bodi, tasol long Spirit, sapos em i olsem long Spirit bilong God i stap insait long yupela. Nau sapos wanpela man i no gat Spirit bilong Kraist, em i no bilong em liklik.

8:10  ¶ Na sapos Kraist i stap insait long yupela, bodi i dai pinis, bilong wanem, sin i stap. Tasol Spirit em i laip, bilong wanem, stretpela pasin i stap.

8:11  Tasol sapos Spirit bilong em husat i kirapim Jisas long dai i stap insait long yupela, em husat i kirapim bek Kraist long dai bai givim laip gen tu long ol bodi i ken dai bilong yupela wantaim dispela Spirit bilong em i stap insait long yupela.

8:12  Olsem na, ol brata, yumi stap ol man i gat dinau, i no long bodi, long wokabaut i bihainim bodi.

8:13  Long wanem, sapos yupela wokabaut i bihainim bodi, yupela bai dai. Tasol sapos yupela, long wok bilong Spirit, i pasim sting bilong ol wok bilong dispela daibodi, yupela bai stap laip.

8:14  Long wanem, hamas man Spirit bilong God i stiaim, ol i stap ol pikinini man bilong God.

8:15  Long wanem, yupela i no bin kisim spirit bilong kalabus gen long pret. Tasol yupela i bin kisim Spirit bilong kisim nem pikinini, we long en yumi singaut, Aba, Papa.

8:16  Spirit em yet i stap witnes wantaim spirit bilong yumi, long yumi stap ol pikinini bilong God.

8:17  ¶ Na sapos ol pikinini, orait ol pikinini i kisim samting long papa, ol pikinini i kisim samting long God, na lain bilong kisim samting papa i givim pikinini wantaim Kraist, sapos em i olsem long yumi karim pen wantaim em, inap long yumi ken kisim glori tu wantaim.

8:18  Long wanem, mi kaunim olsem ol pasin bilong karim pen bilong dispela taim nau em i no gat namba inap long yumi ken skelim wantaim dispela glori em bai soim ples klia insait long yumi.

8:19  Long wanem, strongpela hop tru bilong samting God i wokim i wetim taim ol pikinini man bilong God i kamap ples klia.

8:20  Long wanem, samting God i wokim i stap aninit long pasin nating, i no long laik, tasol long tingting bilong em husat i bin putim ol stret aninit wantaim hop,

8:21  Bilong wanem, samting God i wokim em yet tu bai God i kisim bek long dispela kalabus bilong pasin bilong bagarap i go long pasin bilong stap fri i gat glori bilong ol pikinini bilong God.

8:22  Long wanem, yumi save long dispela olgeta samting God i kamapim long nating i krai wantaim pen na hatwok long karim pen wantaim inap long nau.

8:23  Na i no ol tasol, tasol yumi yet tu, husat i gat ol namba wan kaikai bilong Spirit, yes, yumi yet i krai wantaim pen insait long yumi yet, taim yumi wetim taim bilong kisim nem pikinini, em i olsem, taim God i baim bek bodi bilong yumi.

8:24  Long wanem, God i kisim bek yumi long hop. Tasol hop yumi lukim i no hop. Long wanem, samting man i lukim pinis, bilong wanem em bai hop yet long en?

8:25  Tasol sapos yumi hop long dispela yumi no lukim pinis, nau yumi wet long en wantaim pasin bilong sanap strong long traim.

8:26  ¶ Wankain olsem Spirit tu i helpim ol hap i no gat strong bilong yumi. Long wanem, yumi no save long yumi mas beten long wanem samting olsem yumi mas. Tasol Spirit em yet i mekim wok namelman bilong helpim yumi wantaim ol krai wantaim pen, dispela yumi i no inap long mekim.

8:27  Na em husat i painim tru long ol bel i save long tingting bilong Spirit em i wanem, bilong wanem, em i mekim wok namelman bilong helpim ol seint bilong bihainim laik bilong God.

8:28  Na yumi save long olgeta samting i wok wantaim bilong kamap gutpela long ol husat i laikim tru God, long ol husat God i singautim bilong bihainim tingting bilong em bilong mekim samting.

8:29  ¶ Long wanem, husat em i bin save pastaim, em i bin makim bipo yet tu long kamap wankain olsem piksa bilong Pikinini Man bilong em, inap long em i ken stap namba wan Pikinini namel long planti brata.

8:30  Na moa tu husat em i bin makim bipo yet, ol tu em i singautim. Na husat em i singautim, ol tu em i mekim stretpela. Na husat em i mekim stretpela, ol tu em i givim glori.

8:31  ¶ Yumi bai tok wanem nau long ol dispela samting? Sapos God i stap bilong helpim yumi, husat i ken birua long yumi?

8:32  Em husat i no bin soim sori long Pikinini Man bilong em yet, tasol em i givim em bilong helpim yumi olgeta, olsem wanem bai em i no inap, wantaim em tu, givim nating long yumi olgeta samting?

8:33  Husat bai putim asua bilong wanpela samting long ol man God i makim? em i God husat i mekim em i kamap stretpela.

8:34  Em i husat husat i mekim man i lus long kot? Em i Kraist husat i dai pinis, yes mobeta, husat i kirap bek gen, yes, husat i stap long han sut bilong God, husat tu i mekim wok namelman long helpim yumi.

8:35  Husat bai brukim yumi long laikim tru bilong Kraist? Bai bikpela hevi, o bikpela wari, o pasin bilong kisim hevi, o bikpela taim hangre, o pasin bilong stap skin nating, o samting i nogut, o bainat?

8:36  Olsem rait i stap pinis, Long wanem, bilong tingim yu ol i kilim mipela olgeta hap bilong de. Ol i kaunim mipela olsem ol sipsip bilong bikpela kilim i dai.

8:37  Nogat, long olgeta dispela samting yumi stap moa long ol man bilong winim pait olgeta long wok bilong em husat i laikim yumi tru.

8:38  Long wanem, mi tingting olsem, long dai, o laip, o ol ensel, o ol hetman bilong gavman, o ol pawa, o ol samting i stap nau, o ol samting long kamap bihain,

8:39  O ol samting antap, o ol samting daunbilo, o wanpela arapela samting God i wokim, bai i no inap long brukim yumi long laikim tru bilong God, dispela i stap insait long Kraist Jisas, Bikpela bilong yumi.

Chapter 9

9:1  ¶ Mi tok tru insait long Kraist, mi no giaman, mausbel bilong bilong mi tu i stap witnes bilong mi insait long Holi Spirit,

9:2  Long mi gat bikpela hevi na sori olgeta taim insait long bel bilong mi.

9:3  Long wanem, mi ken gat laik tru long mi yet i ken stap lus olgeta long Kraist bilong helpim ol brata bilong mi, ol kandre bilong mi bilong bihainim sait bilong bodi,

9:4  Husat em ol lain Isrel, long husat i bilong kisim nem pikinini, na glori, na ol kontrak, na wok bilong givim lo, na wok bilong God, na ol promis,

9:5  Husat i ol tumbuna papa, na bilong husat long sait bilong bodi Kraist i kam, husat i antap long olgeta, God i blesim oltaim oltaim. Amen.

9:6  ¶ I no olsem tok bilong God i no gat pawa. Long wanem, ol olgeta i no Isrel, husat i bilong Isrel.

9:7  Na tu, bikos ol i bilong tumbuna pikinini bilong Ebraham, ol olgeta i no ol pikinini. Tasol, Insait long Aisak bai mi singautim tumbuna pikinini bilong yu.

9:8  Em i olsem, Ol husat i ol pikinini bilong sait bilong bodi, ol dispela i no ol pikinini bilong God. Tasol ol pikinini bilong promis em i kaunim long tumbuna pikinini.

9:9  Long wanem, dispela em i dispela tok bilong promis, Long dispela taim bai mi kam, na Sara bai karim pikinini man.

9:10  Na i no dispela tasol, tasol taim Rebeka tu i bin kisim bel long wanpela, yes, long tumbuna papa bilong yumi Aisak,

9:11  (Long wanem, taim mama i no karim ol pikinini yet, na tu taim ol i no bin mekim wanpela gutpela pasin o pasin nogut, inap long tingting God i wokim bilong bihainim makim God i bin wokim i ken sanap, i no long ol wok, tasol long em husat i singautim,)

9:12  God i tokim em, Pikinini i bikpela moa bai stap wokboi bilong dispela i yangpela moa.

9:13  Olsem rait i stap pinis, Jekop mi bin laikim tru, na Iso mi bin hetim.

9:14  ¶ Yumi bai tok wanem nau? Ating i gat pasin i no stretpela wantaim God? I no ken tru.

9:15  Long wanem, em i tokim Moses, Mi bai gat sori long husat mi bai gat sori, na mi bai gat sori tru long husat mi bai gat sori tru.

9:16  Olsem nau em i no bilong em husat i gat laik, o long em husat i ran, tasol em i God husat i soim sori.

9:17  Long wanem, rait bilong God i tokim Fero, Yes, long dispela as tingting stret mi bin kirapim yu, inap long mi ken soim pawa bilong mi insait long yu, na long nem bilong mi ol i ken tokaut long en namel long olgeta hap bilong dispela graun.

9:18  Olsem na em i gat sori long husat em i laik sori, na husat em i laik em i mekim bel bilong ol i go strong.

9:19  Yu bai tokim mi nau, Bilong wanem em i painim asua yet? Long wanem, husat i bin sanap na birua long laik bilong em?

9:20  Nogat tasol, O man, yu husat long yu bekim tok i birua long God? Bai samting man i wokim tokim em husat i wokim em, Bilong wanem yu bin wokim mi olsem?

9:21  Ating i yes long man bilong wokim sospen graun i gat pawa long bosim dispela retpela graun, bilong wokim long dispela hap graun stret wanpela sospen graun i gat ona, na narapela i no gat ona?

9:22  Olsem wanem sapos God, taim em i gat laik long soim belhat tru bilong em, na long mekim ol man long save long pawa bilong em, i stap yet long hevi, wantaim planti pasin bilong karim pen longpela taim, long ol sospen samting bilong belhat tru em i wokim bilong bagarap olgeta,

9:23  Na long em i ken mekim ol man long save long ol samting i dia tru bilong glori bilong em long ol sospen samting bilong sori, dispela em i bin redim bipo bilong kisim glori,

9:24  Yes yumi, husat em i bin singautim, i no bilong ol Ju tasol, tasol tu bilong ol man i no Ju?

9:25  ¶ Olsem em i tok tu long Osi, Mi bai kolim ol ol manmeri bilong mi, husat i no bin stap ol manmeri bilong mi. Na em meri i stap klostu tru long bel bilong mi, husat i no bin stap klostu tru long bel bilong mi.

9:26  Na em bai kamap olsem, long dispela ples we em i tokim ol, Yupela i no lain manmeri bilong mi, long dispela hap bai em i kolim ol ol pikinini bilong God i stap laip.

9:27  Eseas tu i singaut long sait bilong Isrel, Maski namba bilong ol pikinini bilong Isrel i stap olsem wesan bilong biksi, God bai kisim bek wanpela hap lain i stap yet.

9:28  Long wanem, em bai pinisim dispela wok, na katim sot long stretpela pasin. Bilong wanem, Bikpela bai mekim wanpela sotpela wok long dispela graun.

9:29  Na olsem Eseas i tok bipo, Sapos Bikpela bilong Sabaot i no bin larim long yumi wanpela tumbuna pikinini, yumi i bin kamap wankain olsem Sodoma na Gomora.

9:30  ¶ Yumi bai tok wanem nau? Long ol man i no Ju, husat i no bihainim stretpela pasin, i bin kisim pinis stretpela pasin, yes, dispela stretpela pasin i bilong bilip tru.

9:31  Tasol Isrel, husat i bihainim lo bilong stretpela pasin, i no bin kisim pinis lo bilong stretpela pasin.

9:32  Bilong wanem? Bikos ol i no painim dispela long bilip tru, tasol samting olsem long ol wok bilong lo. Long wanem, ol i sutim lek long dispela ston bilong sutim lek.

9:33  Olsem rait i stap pinis, Lukim, mi slipim long Saion wanpela ston bilong sutim lek na ston bilong bagarapim bel. Na husat man i bilip long em bai i no inap sem.

Chapter 10

10:1  ¶ Ol brata, laik bilong bel bilong mi na prea i go long God bilong helpim Isrel em, long God i ken kisim bek ol.

10:2  Long wanem, mi stap witnes long ol i gat strongpela tingting long bihainim God, tasol i no bilong bihainim save.

10:3  Long wanem, taim ol i no klia long stretpela pasin bilong God, na taim ol i go nabaut long strongim stretpela pasin bilong ol yet, ol i no bin putim ol yet aninit long stretpela pasin bilong God.

10:4  Long wanem, Kraist em i pinis bilong lo bilong stretpela pasin long olgeta wan wan husat i bilip.

10:5  Long wanem, Moses i kolim dispela stretpela pasin i kam long lo, Long man husat i mekim ol dispela samting bai stap laip long ol.

10:6  Tasol dispela stretpela pasin bilong bilip tru i toktok long dispela pasin, No ken tok insait long bel bilong yu, Husat bai go antap long heven? (Em i olsem, bilong bringim Kraist i kam daun long antap.)

10:7  O, Husat bai go daun long ples dip? (Em i olsem, bilong bringim Kraist antap gen long dai.)

10:8  Tasol em i tok wanem? Dispela tok i stap klostu long yu, yes, insait long maus bilong yu, na insait long bel bilong yu. Em i olsem, dispela tok bilong bilip tru, dispela mipela i autim.

10:9  Long sapos yu tok yes wantaim maus bilong yu long Jisas em i Bikpela, na yu bai bilip long bel bilong yu long God i bin kirapim em long dai, orait God bai kisim bek yu.

10:10  Long wanem, wantaim bel man i bilip i go long stretpela pasin, na wantaim maus em i wokim tok yes i go long kisim bek.

10:11  Long wanem, rait bilong God i tok, Husat man i bilip long em bai i no inap sem.

10:12  ¶ Long wanem, i no gat samting i narakain namel long Ju na Grik. Long wanem, dispela Bikpela stret i bosim olgeta i mekim samting i dia tru long olgeta husat i singaut long em.

10:13  Long wanem, husat man bai singaut long nem bilong Bikpela, God bai kisim bek em.

10:14  Nau ol bai singaut long em husat ol i no bin bilip long em olsem wanem? Na ol bai bilip long em husat ol i no bin harim olsem wanem? Na ol bai harim olsem wanem sapos i no gat man bilong autim tok?

10:15  Na ol bai autim tok olsem wanem, sapos i no gat ol man i salim ol? Olsem rait i stap pinis, Ol lek bilong ol husat i autim gutnius bilong bel isi, na bringim ol gutpela nius bilong ol gutpela samting, i naispela tru moa!

10:16  Tasol olgeta i no bin bihainim gutnius. Long wanem, Eseas i tok, Bikpela, husat i bin bilipim ripot bilong mipela?

10:17  Olsem nau bilip tru i kam long harim, na harim long tok bilong God.

10:18  Tasol mi tok, Ating i yes long olgeta i bin harim? Yes, tru tumas, nois bilong ol i go long olgeta hap bilong dispela graun, na ol toktok i go inap long ol las hap bilong dispela graun.

10:19  Tasol mi tok, Ating i yes long Isrel i bin save? Pastaim Moses i tok, Mi bai skrapim bel bilong yupela wantaim pasin jeles long ol husat i no wanpela lain manmeri, na long wanpela kranki kantri mi bai mekim yupela kros.

10:20  Tasol Eseas i no pret tru, na em i tok, Ol lain husat i no painim mi i painim mi pinis. Ol i mekim mi kamap ples klia long ol husat i no askim long sait bilong mi.

10:21  Tasol long Isrel em i tok, Olgeta hap bilong de mi bin stretim tupela han bilong mi i go ausait i go long wanpela lain bilong sakim tok na bilong tok birua long tok bilong ol yet.

Chapter 11

11:1  ¶ Nau mi tok, Ating God i bin tromoi i go ol lain bilong em? I no ken tru. Long wanem, mi tu i stap man Isrel, bilong tumbuna pikinini bilong Ebraham, bilong lain bilong Benjamin.

11:2  God i no bin tromoi i go ol lain bilong em husat em i save pastaim. Ating i yes long yupela i save long rait i tok wanem long Ilaias? Long em i mekim wok namelman i go long God i birua long Isrel olsem wanem, i spik,

11:3  Bikpela, ol i bin kilim ol profet bilong yu, na digim i go daun ol alta bilong yu. Na mi stap wanpis, na ol i painim laip bilong mi.

11:4  Tasol bekim bilong God i tok wanem long em? Mi bin holim bek bilong mi yet 7,000 man, husat i no bin lindaunim skru long piksa bilong Beal

11:5  Yes, olsem nau long dispela taim nau tu i gat hap lain i stap yet bilong bihainim makim God i bin wokim bilong marimari.

11:6  Na sapos em i long marimari, orait em i no moa bilong ol wok. Sapos nogat, marimari i no marimari moa. Tasol sapos em i bilong ol wok, orait em i no moa long marimari. Sapos nogat, wok em i no wok moa.

11:7  Wanem nau? Israel i no bin kisim dispela samting em i painim. Tasol ol man God i bin makim i bin kisim dispela, na ol arapela i kamap aipas,

11:8  (Bilong bihainim olsem rait i stap pinis, God i bin givim long ol dispela spirit bilong hap slip, ol ai long ol i no ken lukluk, na ol ia long ol i no ken harim,) inap long tude.

11:9  Na Devit i tok, Larim tebol bilong ol i kamap wanpela trap bilong animal, na trap, na samting bilong sutim lek, na samting bilong bekim pe long ol.

11:10  Larim ol ai bilong ol i go tudak, inap long ol i no ken lukluk, na lindaunim baksait bilong ol olgeta taim.

11:11  Mi tok nau, Ating ol i bin sutim lek inap long ol i ken pundaun? I no ken tru. Tasol mobeta, long wok bilong pundaun bilong ol, pasin bilong kisim bek i kam long ol man i no Ju, bilong skrapim bel bilong ol long pasin jeles.

11:12  Nau sapos pundaun bilong ol i stap ol samting i dia tru bilong dispela graun, na taim ol i go daun em i ol samting i dia tru bilong ol man i no Ju, hamas moa taim ol i go pulap tru?

11:13  Long wanem, mi toktok long yupela ol man i no Ju, bikos mi stap aposel bilong ol man i no Ju, mi litimapim wok bilong mi.

11:14  Sapos long wanpela rot mi ken skrapim bel bilong ol bilong kamap wankain stret, husat i stap wan bodi bilong mi, na mi ken kisim bek sampela bilong ol.

11:15  Long wanem, sapos taim God i tromoi ol i go em i taim God i kamap wanbel long ol man bilong dispela graun, taim em i kisim ol bai stap wanem, laip i kam bek long dai tasol?

11:16  Long wanem, sapos namba wan kaikai i stap holi, dispela hap em i holi tu. Na sapos rop daunbilo i stap holi, ol han bilong diwai i stap olsem tu.

11:17  Na sapos sampela han bilong diwai i bruk i go, na yu, taim yu stap wail diwai oliv, em i pasim yu insait namel long ol, na wantaim ol yu kisim hap bilong rop daunbilo na gris bilong diwai oliv,

11:18  No ken litimapim nating yu yet i birua long ol han bilong diwai. Tasol sapos yu litimapim nating yu yet, yu no karim rop daunbilo, tasol rop daunbilo i karim yu.

11:19  Yu bai tok nau, Ol han bilong diwai i bruk i go, inap long God i ken pasim mi insait.

11:20  Gutpela. Bilong wanem, ol i no gat bilip na God i brukim ol i go, na yu sanap long bilip tru. No ken stap bikhet long tingting, tasol yu mas pret.

11:21  Long wanem, sapos God i no soim sori long ol han bilong diwai stret, was gut, nogut em i no soim sori long yu tu.

11:22  Olsem na, lukim gutpela pasin na pasin i hat tru bilong God. Long ol husat i pundaun, hat tru. Tasol i go long yu, gutpela, sapos yu stap yet long gutpela pasin bilong em. Sapos nogat, em bai katim yu tu i go olgeta.

11:23  Na ol tu, sapos ol i no stap yet long pasin bilong i no gat bilip, God bai pasim ol insait long diwai. Long wanem, God em inap long pasim ol insait long diwai gen.

11:24  Long wanem, sapos em katim yu ausait long dispela diwai oliv i wail long pasin bilong em yet, na em i pasim yu insait long dispela gutpela diwai oliv i birua long pasin bilong yu yet, hamas moa ol dispela, husat i stap ol han bilong diwai long pasin bilong ol yet, bai God i pasim insait long diwai oliv bilong ol yet?

11:25  Long wanem, mi no gat laik, ol brata, long yupela i no ken klia long dispela samting hait, nogut yupela i ken stap saveman insait long ol hambak tingting bilong yupela yet, long hap aipas i kamap long Isrel, inap long taim bilong ol man i no Ju i pulap tru i kam insait.

11:26  Na olsem tasol God bai kisim bek olgeta Isrel, olsem rait i stap pinis, Ausait long Saion bai i gat Man Bilong Kisim Bek i kam, na em bai tanim i go ol pasin nogut long Jekop.

11:27  Long wanem, dispela em i kontrak bilong mi i go long ol, taim mi bai tekewe ol sin bilong ol.

11:28  Long sait bilong gutnius, ol i stap ol birua bilong helpim yupela. Tasol long sait bilong ol man God i bin makim, ol i stap klostu tru long bel bilong yumi bilong tingim ol tumbuna papa.

11:29  Long wanem, God i no tanim bel long ol presen na singaut bilong em.

11:30  Long wanem, olsem long ol taim bipo yupela i no bin bilip long God, tasol nau yupela i bin kisim sori long wok bilong pasin bilong i no gat bilip bilong ol.

11:31  Yes, olsem ol dispela tu i no bin bilip nau, long wok bilong sori bilong yupela ol tu i ken kisim sori.

11:32  Long wanem, God i bin bungim ol olgeta insait long pasin bilong i no gat bilip, inap long em i ken gat sori long olgeta.

11:33  ¶ O dip bilong ol samting i dia tru bilong save tru na save bilong God wantaim! Ol kot bilong em i hat long painimaut tru moa, na ol rot bilong em i abrusim mak bilong man i ken painimaut!

11:34  Long wanem, husat i bin save long tingting bilong Bikpela? O husat i bin stap man bilong givim tok helpim long em?

11:35  O husat i bin givim long em pastaim, na dispela God bai bekim pe long em gen?

11:36  Long wanem, bilong em, na long wok bilong em, na i go long em, em olgeta samting, long husat glori i mas stap oltaim oltaim. Amen.

Chapter 12

12:1  ¶ Olsem na mi askim yupela strong plis, ol brata, long ol sori bilong God, long yupela i bringim ol bodi bilong yupela olsem wanpela sakrifais i stap laip, holi, samting God i orait long en, dispela em i wok bilong yupela stret.

12:2  Na no ken kamap ol man bilong bihainim pasin bilong dispela graun. Tasol yupela i mas tanim i kamap nupela taim tingting bilong yupela i kamap nupela, inap long yupela i ken pruvim wanem samting em i dispela gutpela, na orait, na inap tru, laik bilong God.

12:3  Long wanem, mi tok, long wok bilong marimari God i givim mi, long olgeta wan wan man husat i stap namel long yupela, em i no ken tingim em yet antap moa long em i mas tingting. Tasol em i mas tingting wantaim pasin bilong yusim tingting gut, bilong bihainim olsem God i bin givim long olgeta wan wan man hap skel bilong bilip tru.

12:4  Long wanem, olsem yumi i gat planti hap bilong bodi insait long wanpela bodi, na olgeta hap bilong bodi i no gat wankain wok,

12:5  Olsem tasol yumi, taim yumi stap planti, i stap wanpela bodi insait long Kraist, na olgeta wan wan i hap bilong bodi wanpela i bilong narapela.

12:6  Nau taim yumi i gat ol narakain presen bilong bihainim dispela marimari God i givim yumi, sapos em i pasin bilong autim tok profet, larim yumi autim tok profet bilong bihainim hap skel bilong bilip tru,

12:7  O sapos em i wok bilong helpim, larim yumi wet long wok bilong helpim bilong yumi, o em husat i man bilong skulim, long skulim bilong em,

12:8  O em husat i strongim bel, long wok bilong strongim bel bilong em, em husat i givim, larim em mekim wantaim pasin i no hat long save, em husat i bosim, wantaim strongpela wok, em husat i soim sori, wantaim amamas.

12:9  Larim laikim tru i no ken gat pasin bilong giaman. Tingim olsem dispela samting i nogut em i sting olgeta. Holimpas strong dispela samting i gutpela.

12:10  Yupela i mas gat gutpela laik bilong bel wanpela i go long narapela wantaim pasin olsem brata bilong laikim tru. Long ona, wanpela i mas laikim mobeta narapela.

12:11  No ken stap lesman long wok. Stap strongpela tru long spirit, taim yupela i bihainim Bikpela.

12:12  Wokim amamas tru insait long hop. Sanap strong long traim long taim bilong bikpela hevi. Stap yet redi wantu long prea.

12:13  Tilim bilong inapim nid bilong ol seint. Givim yuyet bilong lukautim man i kam long haus.

12:14  Blesim ol husat i givim hevi long yu. Blesim, na no ken toknogutim.

12:15  Wokim amamas tru wantaim ol husat i wokim amamas tru, na krai tru wantaim ol husat i krai tru.

12:16  Holim wankain tingting wanpela i go long narapela. No ken tingting long ol samting i antap, tasol daunim yu yet i go long ol man bilong sindaun i daunbilo. No ken stap saveman long hambak tingting bilong yu yet.

12:17  No ken bekim pe long wanpela man pasin nogut bilong bekim pasin nogut. Givim ol samting i no gat giaman long ai bilong olgeta man.

12:18  Sapos em i ken kamap, hamas samting olsem i stap insait long yupela, stap wantaim bel isi wantaim olgeta man.

12:19  Ol man i stap klostu tru long bel bilong mi tru, no ken bekim pe nogut bilong helpim yupela yet, tasol mobeta givim spes long belhat tru. Long wanem, rait i stap pinis, Bekim pe nogut em i bilong mi. Mi bai bekim pe, Bikpela i tok.

12:20  Olsem na sapos birua bilong yu i hangre, givim kaikai long em. Sapos em i nekdrai, givim em samting bilong dring. Long wanem, taim yu mekim olsem yu hipim ol sakol bilong paia antap long het bilong em.

12:21  No ken larim pasin nogut winim yu, tasol winim pasin nogut wantaim gutpela pasin.

Chapter 13

13:1  ¶ Larim olgeta wan wan tewel stap aninit long ol pawa i winim em. Long wanem, i no gat pawa i no kam long God tasol. Ol dispela pawa i stap God i makim.

13:2  Olsem na husat man i sanap na birua long dispela pawa, em i sanap na birua long lo God i makim. Na ol husat i sanap na birua bai kisim long ol yet pe nogut bilong kot.

13:3  Long wanem, ol hetman i no wanpela samting bilong pretim nogut tru long ol gutpela wok, tasol long ol pasin nogut. Ating i yes long nau yu bai pret long dispela pawa? Mekim dispela samting i gutpela, na dispela stret bai litimapim nem bilong yu.

13:4  Long wanem, em i wokman bilong God long yu bilong helpim yu stap gut. Tasol sapos yu mekim dispela samting i nogut, stap pret. Long wanem, em i no karim bainat nating. Long wanem, em i wokman bilong God, man bilong bekim pe nogut bilong mekim belhat tru kam antap long em husat i mekim pasin nogut.

13:5  Olsem na yupela i mas i gat nid long stap aninit, i no bilong tingim belhat tru tasol, tasol tu bilong tingim mausbel.

13:6  Long wanem, long dispela as yupela i mas baim takis tu. Long wanem, ol i stap ol wokman bilong God, bilong tingting olgeta taim long dispela samting stret.

13:7  ¶ Olsem na mekim long olgeta ol samting em i stret long ol, takis mani long ol husat takis mani i stret long ol, kastam mani long ol husat kastam mani i stret long ol, pret long ol husat pret i stret long ol, ona long ol husat ona i stret long ol.

13:8  No ken gat dinau long man long wanpela samting, dinau long laikim tru wanpela i go long narapela tasol. Long wanem, em husat i laikim tru narapela i bin inapim lo.

13:9  Long wanem dispela, Yu no ken bagarapim marit wantaim pamuk pasin, Yu no ken kilim man, Yu no ken stil, Yu no ken stap giaman witnes, Yu no ken mangal, na sapos i gat wanpela arapela tok strong, yupela i ken save long en tru long dispela liklik toktok, em i olsem, Yu bai laikim tru man i stap klostu long yu olsem yu laikim tru yu yet.

13:10  Pasin bilong laikim tru i no mekim nogut long man i stap klostu long em. Olsem na laikim tru em i samting i inapim lo.

13:11  ¶ Na dispela, taim yupela i save long taim, long nau em i taim stret bilong kirap na lusim slip. Long wanem, nau kisim bek bilong yumi i stap klostu moa long taim yumi i bin bilip.

13:12  Nait i klostu long pinis, san i stap klostu. Olsem na larim yumi tromoi ol wok bilong tudak, na larim yumi putim klos pait bilong lait.

13:13  Larim yumi wokabaut wantaim pasin i no gat giaman, olsem long san, i no long wail pasin na spak pasin, i no long pasin bilong aigris nogut na raun nating nogut, i no long ol strongpela pait na mangal tingting.

13:14  Tasol yupela i mas putim Bikpela Jisas Kraist olsem klos, na no ken givim spes long bodi, long inapim ol aigris bilong en.

Chapter 14

14:1  ¶ Em husat i no gat strong long bilip tru yupela i mas kisim, tasol i no bilong ol tok pait i pulap long tupela tingting.

14:2  Long wanem, wanpela i bilip olsem em i ken kaikai olgeta samting. Narapela, husat i no gat strong, i kaikai ol sayor.

14:3  No ken larim em husat i kaikai i ken tingim em husat i no kaikai olsem em i samting nating. Na no ken larim em husat i no kaikai jasim em husat i kaikai. Long wanem, God i bin kisim em.

14:4  Yu husat long yu jasim wokboi bilong narapela man? Long bosman bilong em yet em bai sanap o pundaun. Yes, God bai holim em antap. Long wanem, God em inap long mekim em sanap.

14:5  Wanpela man i tingim wanpela de i antap moa long narapela. Narapela man i tingim olgeta wan wan de i wankain. Larim olgeta wan wan man i ken gat tingting i strong olgeta insait long tingting bilong em yet.

14:6  Em husat i tingim gut de, em i tingim gut dispela i go long Bikpela. Na em husat i no tingim gut de, long Bikpela em i no tingim gut dispela. Em husat i kaikai, i kaikai i go long Bikpela, long wanem, em i givim tok tenkyu long God. Na em husat i no kaikai, long Bikpela em i no kaikai, na em i givim tok tenkyu long God.

14:7  Long wanem, i no gat wanpela bilong yumi i stap laip long em yet, na i no gat man i dai long em yet.

14:8  Long wanem, sapos yumi stap laip, yumi stap laip i go long Bikpela. Na sapos yumi dai, yumi dai i go long Bikpela. Olsem na sapos yumi stap laip, o dai, yumi bilong Bikpela.

14:9  Long wanem, long dispela as Kraist i dai pinis, na kirap bek, na kirap gen wantaim, inap long em i ken stap Bikpela bilong daiman na man i stap laip wantaim.

14:10  Tasol bilong wanem yu jasim brata bilong yu? O bilong wanem yu mekim brata bilong yu stap samting nating? Long wanem, yumi olgeta bai sanap long ai bilong sia kot bilong Kraist.

14:11  Long wanem, rait i stap pinis, Olsem mi stap laip, Bikpela i tok, olgeta wan wan skru bai lindaun long mi, na olgeta wan wan tang bai tok yes long God.

14:12  Olsem na nau olgeta wan wan bilong yumi bai givim stori gut long em yet i go long God.

14:13  Olsem na yumi no ken jasim wanpela i go long narapela moa liklik. Tasol mobeta yu jasim dispela, long man i no ken putim samting bilong sutim lek o sans bilong pundaun long rot bilong brata bilong em.

14:14  Mi save, na Bikpela Jisas i pulim tingting bilong mi, long i no gat wanpela samting i no klin long em yet. Tasol long em husat i tingim wanpela samting em i no klin, long em em i no klin.

14:15  Tasol sapos brata bilong yu i gat hevi wantaim kaikai bilong yu, nau yu no wokabaut wantaim pasin bilong laikim tru. No ken bagarapim em olgeta wantaim kaikai bilong yu, long husat Kraist i dai.

14:16  Nau no ken larim ol man toktok nogut long gutpela pasin bilong yu.

14:17  Long wanem, kingdom bilong God i no kaikai na dring, tasol stretpela pasin, na bel isi, na amamas tru insait long Holi Spirit.

14:18  Long wanem, em husat i bihainim Kraist long ol dispela samting em i kisim orait long ai bilong God, na kisim orait long ai bilong ol man.

14:19  Olsem na larim yumi bihainim ol dispela samting i mekim bel isi long kamap, na ol samting we yumi ken strongim bilip bilong narapela long en.

14:20  Long kaikai yu no ken bagarap wok bilong God olgeta. Em i tru, olgeta samting i klin. Tasol em i samting nogut long dispela man husat i kaikai wantaim bel i bagarap.

14:21  Em i no gutpela bilong kaikai abus, o dring wain, o wanpela samting we brata bilong yu bai sutim lek long en, o i bagarapim bel bilong em, o i mekim em long em i no gat strong.

14:22  Yu gat bilip tru? Holim dispela long yu yet long ai bilong God. Amamas i stap long em husat i no sutim tok long em yet long dispela samting em i orait long en.

14:23  Na em husat i gat tupela tingting i kisim pe nogut bilong kot sapos em i kaikai, bilong wanem, em i no kaikai wantaim bilip tru. Long wanem, wanem samting i no bilong bilip tru em i sin.

Chapter 15

15:1  ¶ Nau yumi husat i strong i mas karim ol hap i no gat strong bilong ol man i no gat strong, na yumi no ken amamasim yumi yet.

15:2  Larim olgeta wan wan bilong yumi amamasim man i stap klostu long em bilong strongim gut bilip bilong em.

15:3  Long wanem, yes, Kraist i no bin amamasim em yet. Tasol, olsem rait i stap pinis, Ol sem bilong ol husat i givim sem long yu i pundaun antap long mi.

15:4  Long wanem, wanem kain samting ol i raitim long taim bipo ol i raitim bilong helpim lainim yumi, inap long yumi, long wok bilong pasin bilong sanap strong long traim na pasin bilong kisim bel isi long rait bilong God, i ken gat hop.

15:5  ¶ Nau God bilong pasin bilong sanap strong long traim na bel isi i ken givim long yupela long yupela ken gat wankain tingting, wanpela i go long narapela, bilong bihainim Jisas Kraist.

15:6  Inap long yupela i ken, wantaim wanpela tingting na wanpela maus, givim glori long God, yes, Papa bilong Bikpela bilong yumi, Jisas Kraist.

15:7  ¶ Olsem na yupela i mas kisim yupela yet wan wan, olsem Kraist tu i kisim yumi long givim glori long God.

15:8  Nau mi tok long Jisas Kraist i bin stap wokman bilong ol man bilong katim skin bilong soim tok tru bilong God, long strongim ol promis God i wokim long ol tumbuna papa.

15:9  Na long ol man i no Ju i ken givim glori long God bilong tingim sori bilong em. Olsem rait i stap pinis, Long dispela as mi bai tok yes long yu namel long ol man i no Ju, na singim song i go long nem bilong yu.

15:10  Na gen em i tok, Wokim amamas tru, yupela ol man i no Ju, wantaim ol manmeri bilong em.

15:11  Na gen, Litimapim nem bilong Bikpela, olgeta yupela ol man i no Ju. Na litimapim em tru, olgeta yupela lain manmeri.

15:12  Na gen, Eseas i tok, Bai i gat wanpela rop daunbilo bilong Jesi, na em husat bai kirap long bosim kingdom long ol man i no Ju. Long em ol man i no Ju bai putim bilip.

15:13  ¶ Nau God bilong hop i ken pulimapim yupela wantaim olgeta amamas tru na bel isi taim yupela i bilip, inap long yupela i ken pulap tru long hop, long wok bilong pawa bilong Holi Spirit.

15:14  ¶ Na mi mi yet tu i gat strongpela tingting pinis long yupela, ol brata bilong mi, long yupela tu i pulap long gutpela pasin, pulap wantaim olgeta save, inap tu long givim strongpela skul wanpela i go long narapela.

15:15  Tasol, ol brata, mi no pret moa na bin rait long yupela long wanpela kain pasin, bilong mekim yupela long tingim, bilong wanem, God i givim dispela marimari i kam long mi,

15:16  Inap long mi ken stap wokman bilong Jisas Kraist long ol man i no Ju, taim mi wok long givim gutnius bilong God, inap long taim Kraist i ofaim ol man i no Ju i go antap, dispela i ken orait long ai bilong God, taim Holi Spirit i mekim ol i kamap holi.

15:17  ¶ Olsem na mi gat hap we mi ken glori long en long wok bilong Jisas Kraist long ol dispela samting i bilong God.

15:18  Long wanem, mi bai i no inap liklik long toktok long wanpela bilong ol dispela samting, dispela Kraist i no wokim long han bilong mi, long mekim ol man i no Ju bihainim tok, long toktok na long wok,

15:19  Long ol strongpela mak na ol samting bilong winim tingting, long pawa bilong Spirit bilong God, inap long i stat long Jerusalem, na raun nabaut i go long Ilirikam, mi bin autim gutnius bilong Kraist olgeta.

15:20  Yes, olsem tasol mi bin pait strong long autim gutnius, i no we ol i kolim nem bilong Kraist pinis, nogut mi ken wokim haus antap long as ston bilong narapela man.

15:21  Tasol olsem rait i stap pinis, Long husat ol i no bin toktok long em, ol bai lukim. Na ol husat i no bin harim bai kisim save.

15:22  ¶ Long dispela as tu rot bilong mi i bin pas planti long mi ken kam long yupela.

15:23  Tasol nau, taim mi no gat ples moa long ol dispela hap, na taim mi gat bikpela laik ol dispela planti yia long kam long yupela,

15:24  Wanem taim mi wokim wokabaut bilong mi i go long Spen, mi bai kam long yupela. Long wanem, mi gat bilip long mi bai lukim yupela long wokabaut bilong mi, na yupela i ken bringim mi long rot bilong mi i go long dispela hap, sapos pastaim mi pulap liklik wantaim poroman pasin bilong yupela.

15:25  Tasol nau mi go long Jerusalem long wokim wok long ol seint.

15:26  Long wanem, em i bin amamasim bel bilong ol bilong Masedonia na Akea long givim wanpela hap mani i go long ol tarangu seint husat i stap long Jerusalem.

15:27  Tru tumas, em i bin amamasim ol. Na ol i ol man i gat dinau long ol. Long wanem, sapos ol man i no Ju i bin kamap lain bilong kisim hap bilong ol spirit sait samting, em i wok stret bilong ol tu long wokim wok long ol long ol samting bilong bodi sait.

15:28  Olsem na taim mi bin wokim dispela pinis, na mi bin makim long ol ol dispela kaikai pinis, mi bai kam long yupela long taim mi go long Spen.

15:29  Na mi save tru long, taim mi kam long yupela, mi bai kam wantaim pulap tru bilong blesing bilong gutnius bilong Kraist.

15:30  ¶ Nau mi askim yupela strong plis, ol brata, bilong tingim Bikpela Jisas Kraist, na bilong laikim tru bilong Spirit, long yupela i ken pait strong wantaim wantaim mi insait long ol prea bilong yupela long God bilong helpim mi.

15:31  Inap long God i ken kisim bek mi long ol husat i no bilip insait long Judia. Na long dispela wok mi gat bilong helpim Jerusalem i ken stap orait long ai bilong ol seint.

15:32  Inap long mi ken kam long yupela wantaim amamas tru long laik bilong God, na mi ken kisim strong gen wantaim yupela.

15:33  Nau God bilong bel isi i ken stap wantaim yupela olgeta. Amen.

Chapter 16

16:1  ¶ Mi soim yupela gutpela nem bilong Fibi, susa bilong yumi, husat i wokmeri bilong dispela sios i stap long Senkria.

16:2  Inap long yupela i ken kisim em insait long Bikpela, olsem em i gutpela long ol seint, na inap long yupela i ken helpim em long wanem kain wok em i gat nid long yupela long helpim em. Long wanem, em i bin meri bilong helpim bilong planti, na bilong mi yet tu.

16:3  Tok gude long Prisila na Akwila, ol helpim bilong mi insait long Kraist Jisas,

16:4  Husat, bilong lukautim laip bilong mi, i bin putim ol nek bilong ol yet long ples bagarap, long husat mi no givim tok tenkyu tasol, tasol tu olgeta sios bilong ol man i no Ju i givim tok tenkyu.

16:5  Wankain olsem tok gude long dispela sios i stap long haus bilong ol. Tok gude long Epinitas, man i stap klostu tru long bel bilong mi tru, husat i ol namba wan kaikai bilong Akea i go long Kraist.

16:6  Tok gude long Maria, husat i wokim planti hatwok long mipela.

16:7  Tok gude long Andronikas na Junia, ol kandre bilong mi, na ol wan kalabus bilong mi, husat i gat nem namel long ol aposel, husat tu i stap insait long Kraist bipo long mi.

16:8  Tok gude long Amplias, man i stap klostu tru long bel bilong mi insait long Bikpela.

16:9  Tok gude long Urban, helpim bilong mipela insait long Kraist, na Stakis, man i stap klostu tru long bel bilong mi.

16:10  Tok gude long Apelis, man i kisim orait insait long Kraist. Tok gude long ol husat i stap long hauslain bilong Aristobulas.

16:11  Tok gude long Herodion, kandre bilong mi. Tok gude long ol husat i stap long hauslain bilong Narsisas, husat i stap insait long Bikpela.

16:12  Tok gude long Traifina na Traifosa, husat i hatwok insait long Bikpela. Tok gude long Persis, man i stap klostu tru long bel bilong mi, husat i hatwok planti insait long Bikpela.

16:13  Tok gude long Rufas, man God i makim insait long Bikpela, na mama bilong em na bilong mi.

16:14  Tok gude long Asinkritas, Fligon, Hermas, Patrobas, Hermes, na ol brata husat i stap wantaim ol.

16:15  Tok gude long Filologas, na Julia, Nerias, na susa bilong em, na Olimpas, na olgeta seint husat i stap wantaim ol.

16:16  Tok gude wanpela i go long narapela wantaim wanpela kis holi. Ol sios bilong Kraist i tok gude long yupela.

16:17  ¶ Nau mi askim yupela strong plis, ol brata, makim ol husat i mekim ol bruk na ol pasin bilong bagarapim bel i birua long dispela skul yupela i bin lainim pinis, na stap longwe long ol.

16:18  Long wanem, ol husat i kain man olsem i no bihainim Bikpela bilong yumi Jisas Kraist, tasol bel bilong ol yet. Na wantaim ol gutpela toktok na naispela toktok ol i giamanim ol bel bilong ol man i no saveman tumas.

16:19  Long wanem, pasin bilong yupela bilong bihainim tok i kam ausait i go long olgeta man. Olsem na mi amamas long sait bilong yupela. Tasol yet mi gat laik long yupela i ken gat save tru long dispela samting i gutpela, na i no hat long save, long sait bilong pasin nogut.

16:20  Na God bilong bel isi bai bagarapim Seten liklik aninit long ol fut bilong yupela klostu nau. Marimari bilong Bikpela bilong yumi Jisas Kraist i ken stap wantaim yupela. Amen.

16:21  ¶ Timotias, wanwok bilong mi, na Lusias, na Jeson, na Sosipatar, ol kandre bilong mi, i tok gude long yupela.

16:22  Mi Tertias, husat i raitim dispela pas, i tok gude long yupela insait long Bikpela.

16:23  Gaias, man bilong lukautim mi, na bilong sios olgeta, i tok gude long yupela. Erastas, man bilong lukautim ol rum bilong biktaun, i tok gude long yupela, na Kwartas, wanpela brata.

16:24  Marimari bilong Bikpela bilong yumi Jisas Kraist i ken stap wantaim yupela olgeta. Amen.

16:25  ¶ Nau long em husat i gat pawa long strongim yupela bilong bihainim gutnius bilong mi, na dispela autim tok bilong Jisas Kraist, bilong bihainim tok hait bilong kamapim tok hait, dispela God i holimpas hait i stat long taim dispela graun i stat i kam inap long nau,

16:26  Tasol nau em i mekim dispela i kamap ples klia, na wantaim rait bilong God bilong ol profet, bilong bihainim tok strong bilong God bilong oltaim oltaim, em i mekim olgeta kantri long save long dispela, long wanem, ol i bihanim tok bilong bilip tru.

16:27  Long God wanpela husat i gat save tru, glori i ken stap long wok bilong Jisas Kraist oltaim oltaim. Amen.