Kapingamarangi - Romans

Chapter 1

1:1  Mai baahi o Paul, tangada hai-hegau a Jesus Christ, tangada agoago-hagau ne-hilihili go God belee hagadele dono Longo-Humalia.

1:2  Di Longo-Humalia la-ne-hagababa i-mua-loo go God mai i ana soukohp i-lodo di Beebaa-Dabu.

1:3  Deenei go di Longo-Humalia o dana Dama-daane go tadau Dagi Jesus Christ: I dono huaidina, Mee tangada di madawaawa o David.

1:4  I dono mogobuna dabuaahia, dono mouli-aga i-di made gu-haga-modongoohia-aga bolo Mee go Tama donu a God, e-mahi aamua.

1:5  Mai i Mee, gei God gu-dugu-mai tumaalia gii-hai au tangada agoago-hagau ni Mee, bolo gi-laha-mai nia daangada o-nia henua huogodoo gi-lodo di mouli hagadonu mo-di daudali.

1:6  Goodou ala e-noho i Rome, goodou e-dau gi digaula, idimaa, God guu-gahi goodou belee hai nia daangada ni Jesus Christ.

1:7  Malaa, gei au e-hihi-adu gi goodou huogodoo ala i Rome, God e-aloho i goodou ge ne-haga-gahi goodou belee hai ana daangada donu. Tadau Damana go God, tadau Dagi go Jesus Christ, gi-dugu-adu tumaalia mo-di noho di aumaalia.

1:8  Matagidagi, gei au e-danggee gi dogu God mai i Jesus Christ, i goodou huogodoo, i-di godou hagadonu gu-longono humalia i-nia madagowaa huogodoo i henuailala.

1:9  God la di-haga-modongoohia bolo agu helekai ala e-helekai iei au le e-donu, di God dela e-hai-hegau ginai au aga i-lodo dogu manawa hagatau i dagu hagadele di Longo-Humalia o dana Dama-daane. God e-iloo bolo au e-langahia goodou

1:10  i-lodo agu dalodalo i-nia madagoaa huogodoo. Au e-dangi gi God gi-manawa-dumaalia, gi-haga-haingoohia-ina au gii-mee dagu heetugi-adu gi goodou dolomeenei.

1:11  Idimaa, au e-hiihai huoloo bolo au e-hanadu gi godou baahi, gii-mee au di-gowadu gi goodou di maluagina mai baahi di Hagataalunga, e-hagamaaloo-aga goodou.

1:12  Malaa, e-hai bolo gidaadou ga-hagadau-hagamaamaa i tolongo e-dahi, dogu hagadonu ga-hagamaamaa goodou, ge godou hagadonu ga-hagamaamaa au.

1:13  Ogu duaahina-nei, au e-hiihai bolo goodou gi-iloo bolo i-nia madagoaa e-logo, gei au ne-haga-togotogomaalia belee hanadu e-heetugi-adu, gei di-maa di-mee i-golo e-haga-deaadee dogu hanadu. Au e-hiihai e-haga-huli hoou nia daangada i godou lodo be dagu hai ne-hai gi digau tuadimee ala i-golo.

1:14  Idimaa, dogu waawa i-golo ang-gi nia daangada huogodoo, digau ala gu-maalama, mo digau ala e-noho i-lodo di bouli, digau kabemee, mo digau e-de-kabemee.

1:15  Deelaa ne-hidi-iei au ga-hiihai mahimahi di hagadele di Longo-Humalia adu gi goodou ala e-noho i Rome.

1:16  Au e-hagadagadagagee huoloo gi-di Longo-Humalia, idimaa, ma go di mogobuna o God, dela e-haga-mouli digau huogodoo ala e-hagadonu, digau o Jew i-mua, mo digau tuadimee labelaa.

1:17  Idimaa, di Longo-Humalia le e-haga-modongoohia-aga di hai a God e-dugu nia daangada gii-donu i dono baahi mai i nadau hagadonu, mai taamada gaa-tugi gi-di hagaodi. Gii-hai be-di Beebaa-Dabu dela e-helekai, “Tangada dela e-donu i-baahi o God, le e-mouli mai i dono hagadonu!”

1:18  Di hagawelewele o God e-modongoohia-mai i-di langi, e-hai-baahi ang-gi di hala mo-di huaidu o-nia daangada. Nia hangahaihai huaidu digaula, la-gu-duuli di tonu gi-deemee di modongoohia-aga.

1:19  God e-hagaduadua digaula, idimaa, digaula gu-iloo nia mee belee hai ginaadou gi-iloo a God, idimaa, God guu-lawa di haga-modongoohia madammaa gi digaula.

1:20  Mai taamada di madagoaa God ne-hai henuailala, gei nia daangada gu-gidee madammaa ono mogobuna mo dono dabuaahia e-dee odi. Nia mee aanei le e-modongoohia humalia mai i-di gili ana mee ala ne-hai, malaa, gu-deai tumaalia ang-gi digaula ai.

1:21  Digaula e-iloo a God, gei digaula hagalee hagalaamua a Mee gii-tau gi dono aamua, ge hagalee danggee gi Mee. Digaula guu-honu i-nia hagabaubau balumee, guu-honu i-di bouli dongoeho.

1:22  Digaula e-helekai bolo ginaadou e-kabemee, gei digaula e-dadaulia.

1:23  Digaula hagalee daumaha ang-gi di God mouli, gei e-daumaha ang-gi nia ada-balu-god ono mouli ai, be gi nia ada manu-mamaangi, be gi nia ada manu dolodolo, be gi nia manu mouli hongo henua mo lodo tai.

1:24  Malaa, God gu-diiagi nia daangada dadaulia beenei gii-bida heia go nadau haihai gulugulua ala e-hiihai ginai, mo nia mee haga-langaadia-dangada i nadau huaidina.

1:25  Digaula e-huli nia donu a God gii-hai nia tilikai. Gei digaula e-daumaha mo-di hai-hegau gi-nia mee ne-hai go God, ge hagalee daumaha ang-gi di God dela ne-hai ana mee huogodoo, go Mee dela belee haga-hagaamu go nia daangada gaa-hana-hua beelaa. Amen!

1:26  Mai i nadau haihai beelaa, God gu-diiagi digaula gi-heia go nadau haihai haga-langaadia. Nia ahina gu-hagalee hiihai e-hai-hoo gi-nia daane, e-haihai-hua di huaidu i nadau mehanga aahina.

1:27  Nia daane dela gadoo, digaula gu-hagalee hiihai gi-nia ahina, e-hiihai e-hai-hoo gi-nia daane. Digaula guu-hai di huaidu haga-langaadia i nadau mehanga daane. Di hagaodi gi-muli, digaula e-kae di hagaduadua dela e-tau ang-gi nadau haihai-hala.

1:28  Idimaa nia daangada gu-hagalee hiihai e-hagamamaanadu di tonu a God, gei God gu-dugu ang-gi ginaadou nia hagabaubau ihala, ga-hidi-mai digaula gaa-hai nia mee hagalee belee hai.

1:29  Digaula guu-honu i-nia haihai huaidu huogodoo, hagagailaa, tee-aloho, dubua, maanga dangada, daaligi-tangada gii-made, heheebagi, hagahuaidu digau ala i-golo, tamu-dangada,

1:30  mo helekai tilikai e-hagahuaidu digau ala i-golo. Digaula e-de-hiihai gi God, e-buhi, e-hagamuamua, e-bida hagalaamua ginaadou, nadau hagabaubau e-haga-damana-aga nadau haihai huaidu. Digaula hagalee hagalongo ang-gi nadau damana mo nadau dinana.

1:31  Digaula nadau modongoohia ai, hagalee daahi nadau hagababa. Digaula hagalee e-aloho be e-dumaalia gi digau ala i-golo.

1:32  Ma e-aha maa digaula gu-iloo nia haganoho a God ala e-hai boloo, “Nia daangada ala e-momouli i-lodo di mouli beenei, le e-mmade,” digaula e-haihai-hua nia mee huaidu aanei, gei e-donu ginai digau ala i-golo ma-gaa-hai nia mee aanei.

Chapter 2

2:1  Dogu ihoo hagaaloho, goe e-hagi-aga digau ala i-golo? Malaa, e-de-hilihili be goe koai, tumaalia adu gi-di-goe ai. Goe e-bida haga-huaidu goe maa goe ga-hagi-aga digaula, gei e-hai nia mee ala e-hai go digaula.

2:2  Gidaadou gu-iloo bolo God e-donu i dana hagi-aga nia daangada ala e-hai beenei.

2:3  Gei goe, dogu ihoo hagaaloho, goe e-hai nia mee aanei, e-hagi-aga digau ala i-golo! Goe e-hagamamaanadu bolo goe gaa-tanga-laa gi-daha mo-di hagi-aga a God?

2:4  Holongo goe e-hagabalumee dono dumaalia damanaiee, mo dono aloho mo dono manawa-hagakono? Goe e-modongoohia dono manawa-dumaalia, i Mee dela e-dagi goe gi-huli-hoou.

2:5  Gei do manawa hamaaloo gaa-bida haga-damanaiee do hagaduadua i-di laangi ma-ga-gila-aga di hagawelewele a God mo dana hagi-aga dela e-donu.

2:6  Idimaa, God gaa-wanga gi tangada-nei mo tangada-nei di hui dela e-tau ang-gi ana hegau nogo hai.

2:7  Hunu daangada e-hai nia mee ala e-humalia, ge e-halahala di madamada, di aamua, mo-di mouli hagalee odi, gei God gaa-wanga gi digaula di mouli e-dee-odi.

2:8  Hunu daangada e-hagagailaa ge e-haga-balumee di mee dela e-donu, bolo gii-mee di-daudali di mee dela hagalee donu, gei God gaa-dugu gi-hongo digaula dono manawa daamaha mo dono hagawelewele.

2:9  Di hagaduadua mo-di haga-mmaemmae gaa-noho i-baahi digau huogodoo ala e-haihai di huaidu, digau o Jew i-mua mo digau tuadimee labelaa.

2:10  God gaa-wanga di madamada, di aamua, mo-di aumaalia, gi digau huogodoo ala e-haihai di humalia, digau o Jew i-mua mo digau tuadimee labelaa.

2:11  Idimaa, God e-hagi-aga nia daangada huogodoo gi-di hagatau hua e-dahi.

2:12  Digau tuadimee hagalee hai-mee gi Nnaganoho a Moses. Digaula gu-ihala, guu-nngala, gu-hagalee hagi-aga go nnaganoho. Digau o Jew e-hai-mee gi nnaganoho, malaa, digaula gaa-hai di huaidu, e-hagi-aga go nnaganoho.

2:13  Ma hagalee go di hagalongo-hua gi nnaganoho dela e-hai nia daangada gii-donu i-baahi o God, gei mai di nadau hai-hegau gi nnaganoho aalaa.

2:14  Digau tuadimee nadau haganoho ai, gei di-nadau haga-gila-aga nnaganoho mai nadau modongoohia iloo, digaula la-go nadau haganoho, ma e-aha maa digaula le e-hagalee hai-mee gi Nnaganoho a Moses.

2:15  Nia hangaahai digaula e-haga-modongoohia-aga di hagahonu o nnaganoho la-guu-hihi gi-lodo nadau manawa. Di-nadau iloo di humalia mo-di huaidu e-haga-modongoohia bolo di mee deenei le e-donu, idimaa nadau hagamaanadu e-haga-huaidu ginaadou hunu madagoaa, gei hunu madagoaa e-duuli digaula.

2:16  Malaa, di Longo-Humalia dela e-hagadele ko-au e-hai bolo deenei di hai gaa-hai i-di laangi deelaa, i-di madagoaa a God mai Jesus Christ ga-hagi-aga nia hagamaanadu hagammuni o digau huogodoo.

2:17  Gei goe? Goe e-hai bolo goe tangada o Jew, gei goe e-hagadagadagagee gi nnaganoho, gei e-bida hagaamu goe i do buni-anga gi God.

2:18  Goe gu-iloo di mee a God e-hiihai bolo goe gi-heia, gei guu-kabe mai nnaganoho di hilihili di-mee dela e-donu.

2:19  Goe guu-donu bolo goe tangada e-dagi digau deegida, ge di maalama ni digau ala e-noho i-lodo di bouli,

2:20  tangada e-aago digau ala e-dadaulia, mo tangada-agoago ni digau e-de-kabemee. Goe guu-donu bolo i-lodo nnaganoho, goe gu-hagahonu go di kabemee mo-di tonu.

2:21  Goe e-aago digau ala i-golo, gei goe e-aha dela hagalee aago goe? Goe e-agoago boloo, “Hudee gaiaa,” gei goe e-gaiaa!

2:22  Gei goe e-helekai boloo, “Hudee hai be-di manu,” gei goe e-hai be-di manu! Goe e-de-hiihai gi-nia balu-god, gei goe e-gaiaa nia mee i-lodo nia hale-daumaha!

2:23  Goe e-bida hagaamu goe i nnaganoho a God, gei goe e-haga-langaadia a God i dau oho ana haganoho.

2:24  Di Beebaa-Dabu e-helekai, “Idimaa go digau o Jew, digau tuadimee e-helekai huaidu i God.”

2:25  Maa goe ga-haga-gila-aga nnaganoho, gei do sirkumsais ga dono hadinga i-golo. Maa goe ga-hagalee haga-gila-aga nnaganoho, goe e-hai gadoo be tangada digi sirkumsais.

2:26  Maa tangada tuadimee dela digi sirkumsais, ga-haga-gila-aga nnaganoho, malaa, God hagalee gaa-dugu tangada deenei be tangada dela gu-sirkumsais?!

2:27  Goodou digau o Jew gaa-hai digau e-hagahuaidu go digau tuadimee, idimaa, goodou e-dagadagahi nnaganoho, ma e-aha maa ne-hihi adu gi goodou ala gu-sirkumsais. Gei digau tuadimee le e-haga-gila-aga nnaganoho, ma e-aha maa digaula digi sirkumsais nadau huaidina.

2:28  Koai tangada donu o Jew gu-sirkumsais gii-donu? Hagalee go tangada Jew dela ne-sirkumsais gi-di sirkumsais tuaidina modongoohia.

2:29  Tangada donu o Jew la tangada o Jew i ono lodo, dono manawa la-gu-sirkumsais, deenei tegau ni-di Hagataalunga o God, hagalee tegau ni nnaganoho. Gei tangada beenei, e-kae dono hagaamu mai baahi o God, hagalee mai baahi nia daangada.

Chapter 3

3:1  Malaa digau o Jew le e-humalia ang-gi ginaadou laa hongo digau tuadimee? Be dono dahidamee i-golo go nadau sirkumsais?

3:2  Uaa, i-nia mee huogodoo. Kaedahi, God gu-hagadagadagagee gi digau o Jew bolo gi-daahia ana helekai.

3:3  E-hai behee, maa hunu gau i digaula ga-hagalee manawa-dahi, deenei le e-hai bolo God ga-hagalee manawa-dahi?

3:4  Gei deeai! God le e-donu, ma e-aha maa digau dogologo e-helekai-tilikai. Di Beebaa-Dabu e-helekai boloo, “Oo donu gi-modongoohia-mai i au helekai. Goe gi-aali i dau gabunga.”

3:5  Malaa e-hai behee? Maa tadau haihai-hala le e-haga-modongoohia-aga di tonu o God, gidaadou le e-mee di-helekai boloo, “God le e-hai-gee i dana hagaduadua gidaadou”? (Deenei di heeu belee heeu.)

3:6  Gei deeai! Maa God le e-hala, Mee e-deemee di-hagi-aga henuailala!

3:7  Maa dogu hai-kai-tilikai le e-haga-maaloo-aga di-madamada o God gi-gidee humalia, malaa au e-aha dela e-hagahuaidu be tangada huaidu?

3:8  Malaa, gidaadou de-ga-helekai boloo, “Gidaadou gi-heia di huaidu, gei di humalia ga-gila-aga”? Malaa e-donu, hunu gau i-golo e-hagahuaidu dogu ingoo i nadau helekai bolo au e-agoago beelaa. Digaula ga-hagahalaua, gii-tau-anga.

3:9  E-hai behee go gidaadou digau o Jew, gidaadou e-mada-humalia i digau tuadimee? Hagalee hai beelaa! Au gu-haga-modongoohia bolo digau o Jew mo digau tuadimee le e-hai hua be-di mee e-dahi i-lala di mogobuna o-di huaidu.

3:10  Di Beebaa-Dabu e-helekai, “Tangada e-donu ai,

3:11  Hagalee tangada e-iloo ai, be e-daumaha gi God ai.

3:12  Nia daangada huogodoo guu-huli gi-daha mo God. Digau huogodoo gu-ihala. Deai tangada e-hai nia mee donu ai.

3:13  Nia ngudu digaula e-hai be nia daalunga ala gu-maahuge. Nia helekai tilikai e-lloomoi i-nia holole digaula, nia lee lagalagamaaloo e-hai be nia poisin o-nia gihaa, e-lloomoi i nadau malau-ngudu.

3:14  Gei nadau ngudu le e-honu i-di haga-halauwa mmala.

3:15  Digaula e-limalima di-haga-mmaemmae mo-di dadaaligi nia daangada gii-mmade.

3:16  Digaula e-oho mo-di hagahuaidu nia gowaa huogodoo ala e-hula ginai.

3:17  Digaula e-de-iloo di ala o-di aumaalia.

3:18  Digaula e-de-iloo di haga-madagudia a God.”

3:19  Malaa, gidaadou gu-iloo bolo di haga-honu o nnaganoho la-anga-hua gi digau ala e-noho i-lala nnaganoho bolo gi-deemee nia daangada di-helekai hagaanga, ge gi-gaamai henuailala hagatau gi-lala di hagi-aga a God.

3:20  Idimaa, tangada e-mee di-donu i-baahi o God ai, mai i dana haga-gila-aga nnaganoho. Nnaganoho le-hai gidaadou gi-iloo bolo gidaadou digau gu-ihala.

3:21  Gei dolomeenei God gu-haga-modongoohia dana ala e-hai nia daangada gii-donu i dono baahi, ge hagalee mai nnaganoho. Nnaganoho Moses mo nia Beebaa o-nia Soukohp le e-haga-modongoohia-hua di-maa.

3:22  God e-hai nia daangada gii-donu i dono baahi mai i-di nadau hagadonu a Jesus Christ. God e-hai di mee deenei ang-gi digau huogodoo ala e-hagadonu a Christ, idimaa, nia hai-geegee dangada ai.

3:23  Nia daangada huogodoo la-guu-hai di huaidu, gei digaula huogodoo gu-mogowaa-loo, gu-hagalee tau-anga gi-di hagamouli a God.

3:24  Mai tumaalia dehuia o God, digaula huogodoo guu-donu i-baahi o God mai i Jesus Christ ne-hagamehede digaula.

3:25  God guu-wanga a-Mee bolo mai dono made-kisakis, Mee guu-hai di ala e-wwede-ai nia hala o-nia daangada mai i nadau hagadonu a-Mee. God ne-hai di mee deenei belee haga-modongoohia bolo ma ko-Ia dela e-donu. I-mua, gei Mee nogo hagakono, nogo haga-de-iloo nia huaidu o-nia daangada, gei dolomeenei, Mee e-haga-dina-loo nia huaidu o-nia daangada belee haga-gila ono donu. Mai i-di mee deenei, God e-haga-modongoohia bolo ma ko-Ia dela e-donu, gei e-hai nia daangada huogodoo ala e-hagadonu a Jesus gii-donu i dono baahi.

3:26  God guu-wanga a-Mee bolo mai dono made-kisakis, Mee guu-hai di ala e-wwede-ai nia hala o-nia daangada mai i nadau hagadonu a-Mee. God ne-hai di mee deenei belee haga-modongoohia bolo ma ko-Ia dela e-donu. I-mua, gei Mee nogo hagakono, nogo haga-de-iloo nia huaidu o-nia daangada, gei dolomeenei, Mee e-haga-dina-loo nia huaidu o-nia daangada belee haga-gila ono donu. Mai i-di mee deenei, God e-haga-modongoohia bolo ma ko-Ia dela e-donu, gei e-hai nia daangada huogodoo ala e-hagadonu a Jesus gii-donu i dono baahi.

3:27  Malaa, ma di-aha dela e-mee di-hagaamu go gidaadou? Di mee ai! Ge tadinga di-maa le e-hai bolo-aha? Go tadau haga-gila-aga nnaganoho? Deeai, ma go tadau hagadonu!

3:28  Idimaa, gidaadou gu-iloo bolo tangada la-ne-donu i-baahi o God mai i-di hagadonu la-hua, ge hagalee mai i dono haga-gila-aga nnaganoho.

3:29  God la di God hua ni digau o Jew? Mee hagalee di God ni digau tuadimee labelaa? Uaa, Mee di God ni digau tuadimee labelaa.

3:30  God le e-dahi-hua. Mee e-hai digau o Jew mo digau tuadimee gii-donu i dono baahi mai i nadau hagadonu.

3:31  Malaa, deenei le-hai bolo mai di hagadonu deenei, gidaadou gi-kilia gi-daha nia haganoho? Deeai, gidaadou hagalee kili gi-daha nnaganoho, gidaadou e-daahi nia maa.

Chapter 4

4:1  Gei gidaadou ga-helekai bolo-aha i Abraham, tamana o tadau hagadili? Ma di-aha ne-iloo a mee?

4:2  Maa mee ne-donu i-baahi o God i ana mee ala ne-hai, gei mee gu-hagaamu eia i ana mee ala ne-hai, malaa hagalee i-mua o God.

4:3  Di Beebaa-Dabu e-helekai, “Abraham ne-hagadonu a God, gei God guu-hai a-mee gii-donu i dono baahi mai i dono hagadonu.”

4:4  Tangada ngalua e-kae dono hui, gei di hui o-maa la-hagalee di wanga-dehuia, di hui ne-ngalua ginai.

4:5  Tangada dela hagalee hagadagadagagee gi dono ngalua, gei e-hagadagadagagee-hua gi dono hagadonu a God dela e-haga-donu nia daangada ala gu-hai-hala, deelaa tangada gaa-hila ginai a God, gaa-donu i dono baahi.

4:6  Deenei tadinga di haga-modongoohia nnelekai a David ne-helekai i-di maluagina o tangada a God dela e-hai bolo e-donu i dono baahi, i-daha mo dono ngalua,

4:7  “E-maluagina go digau ala guu-kae tumaalia o nadau ihala i-baahi o God, go digau ala gu-maahede nadau huaidu!

4:8  E-maluagina go tangada dela hagalee daahi ono hala go Dimaadua!”

4:9  Malaa, di maluagina deenei dela e-helekai-ai David, la-anga-hua gi digau ala gu-sirkumsais? Deeai, anga labelaa gi digau digi sirkumsais. Idimaa, gimaadou guu-dau nia helekai di Beebaa-Dabu e-helekai, “Abraham ne-hagadonu a God, gei God guu-hai a-mee gii-donu i dono baahi mai i dono hagadonu.”

4:10  Ana-hee ne-hai-ai di mee deenei? I-mua Abraham ne-sirkumsais, be i-muli? I-mua, hagalee i-muli!

4:11  Mee ne-sirkumsais nomuli, gei dono sirkumsais ne-hai dahi ada haga-modongoohia bolo idimaa go dono hagadonu, God guu-hai a-mee gii-donu, i-mua dono kae di sirkumsais. Deelaa-laa, Abraham guu-hai tamana ni digau huogodoo ala e-hagadonu a God, mo digau ala guu-hai go Mee gii-donu, ma e-aha maa digaula digi sirkumsais.

4:12  Gei mee guu-hai labelaa tamana ni digau ala gu-sirkumsais, ana dama gu-mouli i-di mouli hagadonu dela nogo mouli-ai tadau damana Abraham i-mua dono sirkumsais.

4:13  God ne-hagababa gi Abraham mo dono hagadili bolo Abraham ga-hai-mee gi henuailala. Dana hagababa ne-hai idimaa Abraham dela ne-hagadonu, ge guu-donu i-baahi o God. Mee hagalee ne-hai dana hagababa idimaa Abraham ne-haga-gila nnaganoho.

4:14  Maa di hagababa a God la-anga-hua gi digau ala e-haga-gila-aga nnaganoho, malaa di hagadonu o tangada la dono hadinga ai, gei di hagababa a God le e-balumee-hua.

4:15  Nnaganoho e-gaamai di hagawelewele o God, gei di gowaa ono haganoho ai, tee-hagalongo gi nnaganoho le-hagalee.

4:16  Di hagababa ne-hagamau-mai i-di hagadonu, belee hai di hagababa gii-hai di wanga-dehuia a God dela e-hagadagadagagee ginai nia hagadili huogodoo o Abraham, hagalee anga-hua gi digau ala e-haga-gila-aga nnaganoho, ge anga labelaa gi digau ala e-hagadonu be Abraham. Idimaa, Abraham la tamana ni gidaadou huogodoo.

4:17  Di Beebaa-Dabu gu-helekai, “Au ne-dugu goe e-hai tamana o-nia henua e-logo.” Malaa, di hagababa le-humalia i-mua nnadumada o God dela e-hagadonu go Abraham, di God e-haga-mouli digau mmade, e-helekai-hua gei nia mee ala nogo hagalee, ga-i-golo.

4:18  Abraham tangada hagadonu gei dono hagadagadagagee i-golo, ma e-aha dono hagadagadagagee la-ono hadinga ai, gei mee guu-hai tamana o-nia henua e-logo. Di Beebaa-Dabu e-helekai, “Do hagadili ga-dogologowaahee be nia heduu.”

4:19  Ono ngadau gu-hoohoo gaa-lau, gei di hagadonu o-maa e-maaloo hua igolo i-lodo dono hagamamaanadu i dono huaidina dela gu-bagege, mo-di hagamamaanadu Sarah dela hagalee huwa.

4:20  Di hagadonu o-maa digi diagia a-mee, gei mee digi manawa-lua gi-di hagababa a God. Di hagadonu o-maa e-haga-honu a-mee gii-mahi, gei mee e-haga-hagaamu a God.

4:21  Gei mee e-donu ang-gi deia bolo God e-hai-loo gi-haga-gila-aga dana hagababa dela ne-hai.

4:22  Deelaa di mee a God ne-helekai-ai bolo Abraham ne-donu mai i dono hagadonu.

4:23  Telekai bolo mee guu-hai tangada e-donu, la-hagalee ne-hihi-hua ang-gi mee modogoia,

4:24  ne-hihi labelaa mai gi gidaadou ala guu-hai digau e-donu, go digau ala e-hagadonu a-Mee dela ne-haga-mouli-aga a Jesus tadau Dagi mai i dono made.

4:25  God gu-dugu ang-gi Jesus gii-made mai i tadau huaidu, gaa-lawa ga-haga-mouli-aga a-Mee belee hai gidaadou gii-donu i dono baahi.

Chapter 5

5:1  Gidaadou ala guu-donu i-baahi o God mai i tadau hagadonu, gidaadou guu-noho i-di aumaalia i-baahi o God mai i tadau Dagi go Jesus Christ.

5:2  Mee ne-laha-mai gidaadou i tadau hagadonu gi-lodo tumaalia o God dela e-mouli-ai gidaadou. Malaa, gidaadou gi-tenetene i-lodo tadau hagadagadagagee idimaa gidaadou ga-hai-mee gi-di madamada o God!

5:3  Gidaadou gi-tenetene labelaa i-lodo tadau madagoaa haingadaa, idimaa, gidaadou e-iloo bolo di haingadaa e-hai gidaadou gii-tuu maaloo,

5:4  gei di tuu maaloo la di mee a God dela e-hila-mai-ai gi gidaadou, gei dono hila-mai le e-hidi-ai tadau hagadagadagagee.

5:5  Gei di hagadagadagagee deenei hagalee hai gidaadou gi-manawa-gee, idimaa, God ne-hagahonu dono aloho gi-lodo tadau manawa mai i-di Hagataalunga-Dabu dela ne-gaamai gi gidaadou.

5:6  Idimaa, i-lodo tadau madagoaa nogo tadau hagamaamaa ai, Christ guu-made gi digau huaidu, i-di madagoaa ne-haga-noho go God.

5:7  Di mee e-haingadaa dono hai, maa tangada gaa-made gi tangada dela e-donu. Holongo, tangada i-golo e-hiihai e-made gi tangada humalia.

5:8  Gei God gu-haga-modongoohia dono aloho damanaiee i gidaadou, idimaa, i-di madagoaa gidaadou nogo noho i-lodo di huaidu, gei Christ guu-made i tadau lohongo!

5:9  Malaa, gidaadou la-guu-hai digau e-donu i-baahi o God dolomeenei mai i-nia dodo o Christ, deenei-laa, Mee ga-haga-dagaloaha gidaadou labelaa gi-daha mo-di hagawelewele o God!

5:10  Gidaadou nogo hai nia hagadaumee ni God i-mua, gei dolomeenei gei gidaadou guu-hai nia hoo hagaaloho ni-Mee mai i-di made o dana Dama-daane. Dolomeenei gidaadou guu-hai nia hoo hagaaloho ni God, ga-hagamouli hogi i-di mouli o Jesus Christ!

5:11  Gei hagalee bolo deenei-hua: gidaadou gu-tenetene gi-nia mee a God ne-hai mai i-tadau Dagi go Jesus Christ, i Mee dela ne-hai gidaadou gii-hai nia hoo hagaaloho ni God!

5:12  Di huaidu ne-hanimoi gi henuailala mai i tangada e-dahi, ono hala gu-gaamai di made. Di hagaodi gi-muli, di made guu-tale ang-gi digau huogodoo, idimaa, nia daangada huogodoo la-gu-ihala.

5:13  Di huaidu nogo i henuailala i-mua nnaganoho ne-gaamai. I-nia gowaa ono haganoho ai, di huaidu digi tale gi tangada.

5:14  Mai di madagoaa Adam gaa-tugi gi-di madagoaa Moses, di made nogo dagi nia daangada huogodoo, dalia digau ala digi hai di huaidu a Adam ne-hai i dono de-hagalongo gi nnelekai a God. Adam la di haga-modongoohia o tangada dela ga-hanimoi maalia.

5:15  Gei meemaa dogolua la-hagalee hai be-di mee e-dahi, idimaa, tumaalia o God la-hagalee hai be-di huaidu o Adam. Gei e-donu bolo digau dogologo guu-mmade mai i-di huaidu o tangada e-dahi. Gei tumaalia dehuia o God le-koia damanaiee huoloo, dono wanga dehuia e-damanaiee gi-nia daangada dogologo mai i tumaalia o tangada e-dahi, go Jesus Christ.

5:16  E-hai geegee huoloo i-mehanga tumaalia o God mo-di huaidu a tangada e-dahi ne-hai. I-muli di huaidu e-dahi ne-hai, gei di hagi-aga gu-gila-aga, dela e-helekai boloo, “Gu-ihala.” Gei i-muli nia hala ne-logowaahee, gei tumaalia dehuia ga-gila-aga labelaa, e-helekai boloo, “Hagalee e-hala!”

5:17  E-donu bolo di huaidu o tangada e-dahi ne-hidi-ai di made ga-daamada gaa-dagi. Gei e-damanaiee go di hai o tangada dela i-golo ne-hai, deenei go Jesus Christ: Nia daangada huogodoo ala ne-kae tumaalia damanaiee, guu-donu i dono baahi, gaa-dagi i-lodo di mouli mai i-baahi o Christ.

5:18  Malaa, di huaidu e-dahi dela ne-hagahuaidu nia daangada huogodoo, i-di ala la-hua, di haihai donu e-dahi ga-haga-mehede nia daangada huogodoo, gaa-wanga gi digaula di mouli.

5:19  Tee-hagalongo o tangada e-dahi ne-hai nia daangada huogodoo gii-hala, gadoo be-di hagalongo o tangada e-dahi gaa-hai nia daangada dogologo gii-donu i-baahi o God.

5:20  Nnaganoho ne-hai belee haga-damana nia haihai huaidu. Di madagoaa di huaidu ga-damana-mai, gei tumaalia o God la-koia ga-damana gi-nonua.

5:21  Di huaidu e-dagi nia daangada gi-di made, dela gadoo be tumaalia dehuia o God dela e-dagi nia daangada mai i-di tonu, e-dagi gi-lodo di mouli dee-odi mai i Jesus Christ, go tadau Dagi.

Chapter 6

6:1  Malaa, gidaadou la-ga-helekai bolo-aha? Gidaadou gii-noho-hua i-lodo tadau huaidu, gei tumaalia o God la-ga-damana-mai?

6:2  Deeai! Gidaadou ne-mmade gi-daha mo-di huaidu, malaa gidaadou e-noho i-lodo di huaidu behee?

6:3  E-donu goodou gu-iloo bolo di madagoaa gidaadou ne-babdais buni-anga gi Jesus Christ, gidaadou ne-babdais buni-anga gi-lodo dono made.

6:4  Malaa, mai i tadau babdais, gei gidaadou gu-buni-anga gi dono made mo dono danu. Christ ne-mouli-aga mai i dono made i-di madamada mo nia mahi o dono Damana, bolo gii-noho gidaadou labelaa i-lodo di mouli hoou.

6:5  Idimaa gidaadou ala gu-buni-anga gi Mee i dono made, gidaadou guu-buni labelaa gi Mee i dono mouli-aga.

6:6  Gidaadou gu-modongoohia bolo tadau mouli namua la-guu-mmade dalia a Jesus Christ i dono made i-di loobuu belee daaligi gi-daha di mogobuna huaidu i tadau baahi, gei gidaadou gu-hagalee hai nia hege ni-di huaidu.

6:7  Idimaa, di madagoaa tangada ma-gaa-made, geia gu-dagaloaha gi-daha mo-di mogobuna o-di huaidu.

6:8  Maa gidaadou ne-madalia a Christ i dono made, gidaadou e-hagadonu bolo gidaadou ga-mouli-aga labelaa dalia a-Mee.

6:9  Gidaadou gu-modongoohia bolo Christ gu-haga-mouli-aga mai i-di made, gei Mee hagalee made labelaa. Mee hagalee noho i-lala nia mogobuna o-di made.

6:10  Idimaa Mee ne-made, di huaidu gu ono mogobuna i-hongo o Mee ai, gei dolomeenei Mee e-mouli dono mouli buni-anga gi God.

6:11  Malaa dela di-godou hagamaanadu bolo goodou digau e-mmade i-baahi di mouli huaidu, gei e-mouli i-baahi di mouli o God mai i Jesus Christ.

6:12  Gei goodou hudee dugu-anga di huaidu gi-dagia godou huaidina, gi-de-daudali nia hiihai huaidu o godou huaidina.

6:13  Goodou hudee dugu-anga gi nia manga o godou huaidina gii-hai di huaidu. Goodou wanga-ina goodou gi God, be nia daangada ala ne-mouli-aga i-di made ang-gi di mouli, gei wanga-ina godou huaidina hagatau gi-hai-hegau gi-di tonu o God.

6:14  Di huaidu gi-hudee dagi-ina goodou, idimaa goodou hagalee e-mouli i-lala nnaganoho, goodou e-mouli i-lala tumaalia o God.

6:15  Gei gidaadou la-ga-helekai bolo-aha? Gidaadou gaa-hai nia huaidu, idimaa, gidaadou hagalee noho i-lala nnaganoho, gei e-noho i-lala tumaalia o God? Deeai!

6:16  Goodou gu-iloo bolo maa goodou ga-hai-hege ge hagalongo gi dahi dangada, goodou guu-hai nia hege ni tangada dela e-hagalongo ginai goodou. Goodou ma-gaa-hai nia hege ni-di huaidu, goodou gaa-hai digau e-mmade. Gei goodou ma-gaa-hai nia hege ni-di tonu, goodou gaa-donu i-baahi o God.

6:17  Gi-danggee gi God, idimaa, i-mua gei goodou nogo hai nia hege ni-di huaidu, gei dolomeenei goodou guu-hai digau e-hagalongo i-lodo godou manawa hagatau ang-gi di tonu dela gu-gidee-goodou i-lodo nia agoago ala ne-kae go goodou.

6:18  Goodou gu-haga-maahede gi-daha mo-di huaidu, guu-hai nia hege ni-di tonu.

6:19  (Au e-hai-hegau gi-nia bida-helekai haingoohia, idimaa, goodou e-paagege godou huaidina.) I-mua, gei goodou ne-wanga goodou gii-hai nia hege ni di mouli gulugulua mo di huaidu, mo-di haga-gila-aga di manawa huaidu. Gei dolomeenei goodou wanga-ina goodou gii-hai nia hege ni-di tonu gii-gila di mouli dabuaahia.

6:20  I-lodo di-godou madagoaa nogo hai-hege gi-di huaidu, goodou nogo maahede gi-daha mo-di tonu.

6:21  Ma di humalia-aha dela ne-gila-adu gi goodou i-di godou haihai nia mee ala e-langaadia-ai goodou dolomeenei? Di hagaodi gi-muli o-nia mee aanei, la-go di made!

6:22  Gei dolomeenei, gei goodou gu-haga-maahede gi-daha mo-di huaidu, guu-hai nia hege ni God, gei di mee dela e-kae go goodou la di mouli dela e-hagadabu ang-gi God, mo-di hagaodi gi-muli la di mouli dee-odi.

6:23  Idimaa, di hui o-di huaidu la-go di made, gei di wanga-dehuia a God la-go di mouli e-dee-odi, dela i-baahi o Jesus Christ, go tadau Dagi.

Chapter 7

7:1  Ogu duaahina-nei, goodou gu-iloo agu mee ala ga-helekai-ai, idimaa, goodou gu-iloo di hai o-nia haganoho. Nnaganoho le e-dagi-hua nia daangada i-di madagoaa dela e-mouli-ai digaula.

7:2  Deenei dono ala: Di ahina hai-lodo e-noho i-lala taganoho hagamau gi dono lodo i-di waalooloo o dono lodo e-mouli-ai. Maa dono lodo gaa-made, gei mee gu-mehede gi-daha mo taganoho hagamau deelaa.

7:3  Malaa, mee gaa-lodo gi tuai daane, gei di lodo o-maa le e-mouli hua igolo, gei mee e-haga-ingoo bolo di ahina mouli hai be-di manu. Maa di lodo o-maa la-guu-made, gei mee gu-mehede, hagalee haga-ingoo bolo di ahina mouli be-di manu maa mee ga-hai-lodo gi tuai daane labelaa.

7:4  Ogu duaahina-nei, deelaa di hai i godou baahi: I-di hai o Nnaganoho Moses, goodou guu-mmade labelaa, idimaa, goodou gu-hagadaubuni ang-gi tuaidina o Christ. Gei dolomeenei, goodou guu-hai nia dama ni Mee dela ne-haga-mouli-aga i-di made, dela e-hai gidaadou gii-hai nnegau a God.

7:5  Tadau madagoaa nogo mouli i tadau manawa, gei nia hiihai huaidu ala nogo hagangalungalua go nnaganoho i-lodo tadau huaidina, la ne-hai gidaadou gii-hai nnegau o-di made.

7:6  Gei dolomeenei, gidaadou gu-maahede gi-daha mo nnaganoho, idimaa, gidaadou guu-mmade gi nnaganoho dela nogo daahi gidaadou be digau galabudi, gei gidaadou gu-hagalee hai-hegau gi nnaganoho namua ala ne-hihi, gei gu-hai-hegau-hua gi-di ala hoou o-di Hagataalunga-Dabu.

7:7  Gidaadou ga-helekai bolo-aha, ma go nnaganoho ala e-huaidu? Deeai! Nnaganoho ala ne-hai au gi-iloo di hai o-di huaidu. Maa taganoho digi helekai boloo, “Hudee hagagailaa,” gei au e-de-iloo di hagagailaa.

7:8  Malaa, di huaidu dela ne-hagangalua-aga nia hagadilinga maanadu dumaanga i ogu lodo mai i taganoho. Gei di-maa bolo nnaganoho ai, di huaidu la dono hadinga ai.

7:9  Au nogo mouli gi-di mouli i-daha mo nnaganoho. Di madagoaa taganoho ne-gila-aga, gei di huaidu gu-gila-aga labelaa,

7:10  gei au guu-hai tangada e-made. Malaa, taganoho dela belee hai au gi-mouli, la-ne-hai au gii-made.

7:11  Di huaidu ne-gidee dono madagoaa humalia mai i taganoho, gu-halahalau au, gu-daaligi au gii-made.

7:12  Malaa, nnaganoho le e-dabu, nia helekai o nnaganoho le e-dabu, e-donu ge e-humalia.

7:13  E-hai behee? Di mee deenei le e-haga-modongoohia bolo di mee humalia la-guu-hai au gii-made? Deeai! Di huaidu dela ne-hidi-ai di-maa. Di huaidu ne-hai au gii-hai tangada e-made, i dana haga-hai-hegau di mee humalia bolo gi-modongoohia-aga di huaidu. Idimaa, nia helekai o nnaganoho gu-haga-modongoohia bolo di huaidu la-di huaidu damanaiee.

7:14  Gidaadou gu-iloo bolo nnaganoho la mai baahi o God, gei au tangada dangada, guu-hui be-di hege ang-gi di huaidu.

7:15  Au e-de-iloo agu mee ala e-hai, idimaa, au hagalee hai nia mee ala e-hiihai ginai au, gei au e-hai-hua go nia mee ala e-de-hiihai ginai au.

7:16  Idimaa au e-hai di mee dela e-de-hiihai ginai au, le e-haga-modongoohia bolo au e-donu-hua bolo nnaganoho le e-donu.

7:17  Hagalee ko-au deenei dela e-hai di-maa, go di huaidu dela i ogu lodo.

7:18  Au e-iloo bolo di haihai humalia la-hagalee i lodo dogu huaidina dangada. Idimaa, dogu hiihai e-hai di mee humalia la i ogu lodo, gei di-maa e-deemee di hai ko-au.

7:19  Au hagalee hai di mee humalia belee hai, gei au e-hai di mee huaidu, go di mee dela e-de-hiihai ginai au le e-hai koau.

7:20  Maa au gaa-hai di mee dela e-de-hiihai ginai au belee hai, malaa, hagalee ko-au dela ne-hai di-maa, di huaidu dela i ogu lodo ne-hai di-maa.

7:21  Malaa, au gu-gidee bolo taga-noho deenei le e-ngalua: Dogu madagoaa dela e-hiihai belee hai di humalia, gei di-maa go di huaidu hua dela ne-hilihili-aga ko-au.

7:22  Ogu lodo e-tenetene gi nnaganoho a God,

7:23  gei-au gu-gidee tuai haganoho dela e-ngalua i-lodo dogu huaidina, go taganoho dela e-hai-baahi gi taganoho dela e-donu ginai agu hagamamaanadu, gei au gu-galabudi go taganoho o-di huaidu dela e-ngalua i dogu huaidina.

7:24  Au tangada hua e-lodo huaidu! Ma koai dela ga-haga-dagaloaha au gi-daha mo tuaidina deenei, dela e-dagi au gi-lodo di made?

7:25  Di-mee-bolo mee ang-gi God dela e-haga-gila-aga di mee deenei, mai baahi tadau Dagi go Jesus Christ! Malaa deenei dagu hai: Au e-hai-hegau gi nnaganoho God i-lodo agu hagamamaanadu, gei dogu huaidina-dangada e-hai-hegau gi taganoho o-di huaidu.

Chapter 8

8:1  Digau ala e-mouli buni-anga gi Jesus Christ la-hagalee halauwa,

8:2  idimaa, taganoho o-di Hagataalunga-Dabu dela e-haga-mouli gidaadou i tadau buni-anga gi Jesus Christ, gu-hagamehede au gi-daha mo taganoho o-di huaidu mo-di made.

8:3  Di-mee Nnaganoho Moses ne-deemee di-hai idimaa tuaidina dangada le e-bagege, gei God guu-hai di-maa. Mee gu-hunahuna di huaidu i-baahi tuaidina dangada i dana hagau-mai dana Dama-donu gii-hai tuaidina dangada huaidu belee hagamadammaa di huaidu.

8:4  God ne-hai di mee deenei belee haga-gila-aga nia helekai-donu o nnaganoho i tadau baahi ala e-mouli i-di Hagataalunga, hagalee mouli i-di hiihai dangada.

8:5  Digau ala e-mouli i nadau hiihai, nadau hagamamaanadu e-dagi go nadau hiihai o-naadou. Digau ala e-mouli i-di Hagataalunga, digaula e-dagi go di hiihai o-di Hagataalunga Dabu.

8:6  Di hagaodi gi-muli o digau ala e-dagi go nadau manawa hiihai, la-go di made. Di hagaodi gi-muli o digau ala e-dagi go di Hagataalunga, la-go di mouli mo-di aumaalia.

8:7  Tangada dela e-dagi go dono manawa hiihai oono, guu-hai di hagadaumee ni God, idimaa, mee hagalee haga-gila-aga nnaganoho a God, gei e-donu, mee e-deemee di-haga-gila-aga nia maa.

8:8  Digau ala e-dagi go nadau manawa hiihai o-naadou, le e-deemee di-haga-tenetene a God.

8:9  Goodou hagalee dagi go godou manawa hiihai, gei goodou e-dagi go di Hagataalunga, maa e-donu bolo di Hagataalunga o God le e-noho i godou lodo. Maa di Hagataalunga o Christ ga-hagalee i-baahi tangada, gei mee hagalee di tama ni Christ.

8:10  Maa Christ e-noho i godou lodo, gei di Hagataalunga Dabu la-guu-hai di-godou mouli, idimaa, goodou guu-donu i-baahi o God, ma e-aha maa godou huaidina le e-mmade i-di huaidu.

8:11  Idimaa, maa di Hagataalunga o God dela ne-haga-mouli-aga a Christ mai i dono made, le e-noho i godou lodo, malaa Mee dela ne-haga-mouli-aga a Christ mai i dono made, la-ga-gowadu labelaa di mouli gi godou huaidina dangada dangada, mai i dono Hagataalunga dela i godou lodo.

8:12  Gei deelaa-laa, ogu duaahina-nei, tadau hegau i-golo belee hai, hagalee belee mouli i-di mouli o tadau hiihai.

8:13  Maa goodou e-mouli i godou manawa hiihai, gei goodou gaa-mmade. Maa goodou ga-mouli i-di Hagataalunga-Dabu, goodou e-haga-mmade gi-daha godou haihai hala, gaa-hai digau e-mouli.

8:14  Idimaa, digau ala e-dagi go di Hagataalunga o God, la nia dama ni God.

8:15  Di Hagataalunga dela ne-gowadu go God gi goodou, e-hagalee haga-hai-hege goodou, gei hagalee hai goodou gi-mmaadagu, gei e-hai goodou gii-hai nia dama ni God mai di mahi o-di Hagataalunga dela e-hai gidaadou gi-tangi ang-gi God, boloo, “Tamana, dogu Damana!”

8:16  Di Hagataalunga o God e-haga-puni-anga gi tadau hagataalunga e-haga-modongoohia bolo gidaadou nia dama ni God.

8:17  Idimaa gidaadou guu-hai nia dama ni Mee, gei gidaadou ga-hai-mee gi-nia mee a-Maa nogo benebene ang-gi ana dama, gei gidaadou ga-madalia a Christ e-hai-mee labelaa gi-di maluagina a God dela ne-benebene ang-gi Christ. Idimaa, maa gidaadou ga-madalia a Christ e-hagaduadua, gei gidaadou ga-hai-mee labelaa gi dono madamada.

8:18  Au e-hagamaanadu bolo di hagaduadua dela e-tale-mai gi gidaadou dolomeenei, la-hagalee tau gi-di madamada dela ga-gila-mai gi gidaadou.

8:19  Nia mee huogodoo ala ne-hai go God le e-talitali nia dama a God gi-kila-aga.

8:20  Nia mee huogodoo ala ne-hai go God guu-mee hua di-maa gi-daha, gu deai ono hadinga ai, hagalee mai nadau hiihai, gei mai di hiihai o God bolo ma e-hai beelaa, i-di hagadagadagagee

8:21  bolo dahi laangi-hua, nia mee ne-hai go God ga-dagaloaha gi-daha mo-di mouli hege ang-gi di made, ga-madalia nia dama a God i-lodo nadau dagaloaha madamada.

8:22  Gidaadou gu-iloo bolo nia mee ne-hai go God le e-mmaemmae gaa-dae-mai gi dangi-nei gadoo be-di mmae o-di ahina ma-ga-haanau.

8:23  Ma hagalee go nia mee ala ne-hai e-mmaemmae hua, gei gidaadou labelaa ala ne-kae di Hagataalunga-Dabu matagidagi i tumaalia i-baahi o God, e-mmaemmae labelaa tadau lodo i tadau talitali di madagoaa a God ma-gaa-hai gidaadou nia dama ni-aana ge e-haga-dagaloaha tadau huaidina hagatau.

8:24  Ma go tadau hagadagadagagee dela ne-haga-mouli-ai gidaadou. Maa gidaadou e-gidee tadau mee ala e-hagadagadagagee ginai, gei tadau hagadagadagagee la-hagalee di hagadagadagagee e-donu. Idimaa, deai tangada e-hagadagadagagee gi-di mee dela e-gidee-ia ai!

8:25  Maa gidaadou ga-hagadagadagagee gi-nia mee ala e-de-gidee, gei gidaadou e-talitali ge hagakono di manawa.

8:26  I-di ala la-hua, di Hagataalunga-Dabu e-hanimoi e-hagamaamaa gidaadou i-lodo tadau paagege. Idimaa, gidaadou e-de-iloo di hai dalodalo, gei di Hagataalunga e-dalodalo i gidaadou ang-gi God i-nia lee ala e-deemee di-haga-modongoohia go nnelekai.

8:27  Gei God dela e-gidee i-lodo di manawa-tangada, le e-iloo di hagamaanadu o-di Hagataalunga, idimaa, di Hagataalunga-Dabu e-dalodalo ang-gi God i gidaadou i dono hiihai.

8:28  Gidaadou gu-iloo bolo God gaa-hai nia mee huogodoo gii-kila humalia ang-gi digau ala e-aloho i-de-Ia, go digau ala ne-gahi go Mee gii-hai be dono manawa.

8:29  Digau ala ne-hilihili go God, guu-hili gi-daha go Mee gii-hai be dana Dama go Christ, bolo gii-hai dana Dama di ulumadua o-nia duaahina dogologo.

8:30  Gei God gaa-gahi digau ala ne-hili gi-daha, gaa-hai digaula gii-donu i dono baahi, gaa-hai digaula gi-hai-mee gi dono madamada.

8:31  Gidaadou ga-helekai bolo-aha gi-nia mee aanei? Maa God e-madalia gidaadou, koai e-mee di-hai-baahi mai gi gidaadou?

8:32  God digi duulia dana Dama go Jesus Christ gi-daha, Mee ne-dumaalia mai a-Mee gi gidaadou huogodoo belee hai-ai tigidaumaha! Malaa e-hai behee, Mee hagalee ga-gaamai-dehuia gi gidaadou nia mee huogodoo labelaa?

8:33  Koai dela e-haga-hala nia daangada a God ne-hilihili? God guu-lawa di-helekai bolo digaula gu-hagalee hala!

8:34  Malaa, koai dela ga-hagahuaidu digaula? Hagalee go Jesus Christ dela ne-made gei e-donu ga-mouli-aga, gaa-noho i-di baahi gau-donu o God, e-dalodalo ang-gi God i gidaadou.

8:35  Gei di-maa koai dela e-mee di-wwae gidaadou gi-daha mo-di aloho o Christ? Hagalee go di hagamada, di haingadaa, tadaaligi, di hiigai, di hagaloale, di mee haga-lliga, be go di made!

8:36  Idimaa, di Beebaa-Dabu e-helekai, “Idimaa Kooe, dela gaa-noho-ai gimaadou i-lodo di haingadaa o-di made i-lodo nia madagoaa huogodoo. Gimaadou e-hai gadoo be nia siibi ala ga-daaligi gii-mmade.”

8:37  Gei deeai, i-lodo nia mee huogodoo aanei, gidaadou guu-dohu i-di aali, mai dono aloho i gidaadou!

8:38  Au e-hagadagadagagee bolo ma deai di mee e-mee di-wwae gidaadou gi-daha mo-di aloho o God ai: Hagalee go di made be go di mouli, hagalee go digau di-langi be go nia dagi o di-langi be go nia mogobuna o di-langi, hagalee go di madagoaa dolomeenei be go di madagoaa maalia,

8:39  hagalee go bahi-i-nua henuailala be go bahi-i-lala o henuailala. Deai di mee i-lodo ana mee ala ne-hai e-mee di-wwae gidaadou gi-daha mo-di aloho o God ai, go di aloho dela ne-hai-mee ginai gidaadou mai tadau Dagi go Jesus Christ.

Chapter 9

9:1  Au e-helekai i-di tonu, au di tama ni Christ, au hagalee helekai tilikai. Dogu modongoohia di tonu dela e-dagi go di Hagataalunga-Dabu e-haga-modongoohia-mai labelaa bolo au hagalee helekai-tilikai,

9:2  i dogu helekai bolo dogu manawa-gee la-gu-damanaiee, gei di mmae o dogu manawa e-dee-odi

9:3  ang-gi agu daangada-donu, gi ogu goneiga donu, mo ogu dodo. Dogu hiihai bolo God ne belee haga-halauwa hua au, gi-daawa au gi-daha mo Christ e-haga-humalia ogu duaahina ala go ogu gau donu.

9:4  Digaula la nia daangada ni God. Mee ne-hai digaula gii-hai ana dama, ga-hagi-anga gi digaula dono madamada, gaa-hai dana boloagi gi digaula, gaa-wanga gi digaula nnaganoho. Digaula gu-daumaha donu, ge digaula guu-kae nia hagababa a God.

9:5  Digaula la nia hagadili ni madau maadua-mmaadua. Christ dono huaidina-dangada e-dau ang-gi nadau hagadili. Gi-haga-hagaamuina a God go Tagi o-nia mee huogodoo, gaa-hana-hua beelaa. Amen.

9:6  Au hagalee helekai bolo di hagababa a God la-digi gila, idimaa, hagalee go digau Israel huogodoo la nia daangada ni God.

9:7  Ge hagalee nia daangada huogodoo o-di hagadili o Abraham la nia dama ni God. God ne-helekai gi Abraham, “Ma go di hagadili-hua o Isaac aalaa go digau e-dau.”

9:8  Gei nia dama ala e-haanau mai i-daha mo-di hagababa, la-hagalee nia dama ni God. Ma go nia dama ala ne-haanau i-lodo di hagababa a God, aalaa go nia dama o-di hagadili e-dau.

9:9  Idimaa, di hagababa a God la-ne-hai gi-nia helekai aanei, “Dahi madagoaa e-tau-anga, gei Au ga-hanimoi, gei Sarah ga-haanau dana dama-daane.”

9:10  Ge hagalee deenei hua. Nia dama-daane Rebecca le e-dogolua, di-nau damana e-dahi dela go di-madau damana-madua go Isaac.

9:11  God ne-helekai gi Rebecca bolo gi-gila-ai dono manawa i dana hilihili dana dama-daane e-dahi i meemaa, boloo, “Tangada madua la-ga-hai-hegau gi tangada dulii.” Nia helekai aanei ne-hai i-mua di-haanau meemaa, ge i-mua di-nau hai di huaidu be-di humalia, gei God ne-hai dana hilihili mai dono hiihai gahigahi meemaa, hagalee mai i nau mee ala ne-hai.

9:12  God ne-helekai gi Rebecca bolo gi-gila-ai dono manawa i dana hilihili dana dama-daane e-dahi i meemaa, boloo, “Tangada madua la-ga-hai-hegau gi tangada dulii.” Nia helekai aanei ne-hai i-mua di-haanau meemaa, ge i-mua di-nau hai di huaidu be-di humalia, gei God ne-hai dana hilihili mai dono hiihai gahigahi meemaa, hagalee mai i nau mee ala ne-hai.

9:13  Idimaa, di Beebaa-Dabu e-helekai, “Au ne-aloho i Jacob, gei Au ne-de-hiihai gi Esau.”

9:14  Malaa, gidaadou la-ga-helekai bolo-aha, God le e-hai-gee? Deeai, hagalee hai-gee.

9:15  Idimaa, Mee gu-helekai ang-gi Moses, “Au e-dumaalia gi di-ingoo-hua tangada dela e-hiihai ginai Au, gei Au e-aloho i di-ingoo-hua tangada dela e-hiihai ginai Au.”

9:16  Deenei-laa, nia mee huogodoo hagalee hai mai i-di hiihai be go di hai mee o tangada, gei mai tumaalia o God.

9:17  Di Beebaa-Dabu e-helekai bolo God ne-helekai gi-di king o Egypt boloo, “Au ne-hai goe gii king belee haga-modongoohia ogu mogobuna, ge hagadele dogu ingoo gi-modongoohia i-hongo henuailala hagatau.”

9:18  Deelaa-laa, God e-dumaalia ang-gi tangada dela e-hiihai ginai Ia, gei e-haga-hamaaloo tangada dela e-hiihai ginai Ia e-haga-hamaaloo.

9:19  Tangada i goodou ga-helekai-mai gi-di-au, “Ma-gaa-hai beenei, dehee di hai a God e-gidee di hala o tangada? Gei di-maa koai dela e-mee di-hai-baahi gi-di manawa o God?”

9:20  Dogu ihoo hagaaloho-nei, goe koai dela e-helekai hai-baahi ang-gi God? Di boolo-hadu e-deemee di-heeu gi tangada dela ne-hai eia boloo, “Goe e-aha dela ne-hai au beenei?”

9:21  Taane hai-boolo ono donu e-hai-hegau gi-nia hagadilinga gelegele, e-hai ana boolo e-lua mai di hagamunga gelegele e-dahi. E-dahi ang-gi di madagoaa hagalabagau, ge dahi e-nnoo-mau e-hai-hegau-ai.

9:22  Malaa e-hai be-di hai a God. Mee ne-hiihai e-haga-modongoohia-aga dono hagawelewele mo e-hai nia daangada gi-iloo ono mogobuna. Gei Mee nogo hagakono dono manawa ang-gi digau ala i-lala dono hagawelewele, guu-hai digau ala belee kili gi-daha.

9:23  Gei Mee ne-hiihai e-haga-modongoohia-aga labelaa dono madamada aamua dela ne-dugu-mai gi gidaadou i-lala dono dumaalia, go gidaadou ala gu-hagatogomaalia go Mee e-wanga ginai dono madamada.

9:24  Go gidaadou ala gu-haga-gahi go Mee, digau o Jew mo digau tuadimee labelaa.

9:25  Dela gu-helekai-iei Mee i-lodo di Beebaa Hosea, “Nia daangada la-hagalee nia daangada ni-aagu, gei Au ga-haga-ingoo digaula boloo, ‘Agu daangada’. Tenua dela digi aloho-iei-Au, gei Au ga-haga-ingoo digaula boloo, ‘Ogu ihoo hagaaloho.’

9:26  Gei i-lodo hua di gowaa dela ne-hai telekai gi digaula boloo, ‘Goodou hagalee nia daangada ni-aagu,’ deelaa di gowaa digaula ga-haga-ingoo boloo, ‘Nia dama ni-di God Mouli.’ ”

9:27  Gei Isaiah e-haga-modongoohia digau Israel, boloo, “Ma e-aha maa digau Israel ga-dogologowaahee be nia gelegele tongotai, gei digau hua dulii ga-hagamouli,

9:28  idimaa, Dimaadua ga-limalima-hua dana hagi-aga digau ala i-hongo henuailala.”

9:29  Malaa, e-hai be nnelekai Isaiah i-mua, boloo, “Maa nei bolo Dimaadua-Aamua-Huoloo digi dugu-mai tadau hagadili, gei gidaadou guu-hai gadoo be Sodom mo Gomorrah.”

9:30  Malaa, gidaadou la-ga-helekai bolo-aha? Gidaadou ga-helekai bolo digau tuadimee hagalee hagamahi gii-donu i-baahi o God, gei guu-donu mai i nadau hagadonu a God.

9:31  Gei digau Israel nogo halahala nadau haganoho bolo gii-donu ginaadou i-baahi o God, gei digi gidee-ginaadou.

9:32  Malaa dehee tadinga di mee deenei? Idimaa, digaula e-hagamaanadu bolo ginaadou e-mee-hua di-donu mai i nadau hangaahai, hagalee go di hagadonu. Digaula gu-tingatinga i-di hadu haga-hinga-dangada,

9:33  dela e-helekai-ai di Beebaa-Dabu, “Goodou mmada! Au gaa-dugu dagu hadu gi-lodo Zion, e-hai di hadu haga-hingahinga-dangada. Be koai-hua dela e-hagadonu a-Mee, geia e-hagalee manawa-gee.”

Chapter 10

10:1  Ogu duaahina-nei, au e-hiihai huoloo aga i-lodo dogu manawa hagatau bolo agu daangada donu huogodoo gi-hagamouli. Au e-hagamahi e-dalodalo gi God i digaula!

10:2  Au e-mee di-haga-modongoohia adu gi goodou bolo digaula gu-dogi ang-gi God. Gei nadau dogi-anga la-hagalee daudali di kabemee dela e-donu.

10:3  Idimaa, digaula digi iloo di ala dela e-hai ginaadou gii-donu i-baahi o God, e-haihai-hua nadau huai ala i ginaadou, malaa, digaula digi daudalia di ala a God dela e-hai ginaadou gii-donu i dono baahi.

10:4  Idimaa, Christ gu-haga-modongoohia di hagalawa o nnaganoho, gei digau huogodoo ala gu-hagadonu la-guu-hai digau e-donu i-baahi o God.

10:5  Deenei di mee Moses ne-hihi bolo gii-hai nia daangada gii-donu i-baahi o God i-di nadau hagalongo ang-gi nnaganoho, “Be koai-hua dela e-hagalongo ge e-daudali nnaganoho, geia ga-mouli.”

10:6  Di mee di Beebaa-Dabu e-haga-modongoohia tangada dela e-donu i-baahi o God mai i dono hagadonu la-deenei, “Goe hudee heeu adu boloo, ‘Ma koai dela gaa-hana gi-di langi?’ ” (belee laha-ia a Christ).

10:7  “Hudee heeu labelaa boloo, ‘Ma koai dela gaa-hana gi-bahi-i-lala henuailala?’ ” (belee laha-aga a Christ mai di made).

10:8  Deenei di mee e-helekai-ai boloo, “Nia helekai a God le e-hoohoo-adu gi-di-goe, i-lodo doo ngudu, i-lodo do manawa.” Aalaa go nia helekai o-di hagadonu ala e-agoago go gimaadou.

10:9  Maa goe ga-haga-modongoohia gi doo ngudu bolo Jesus la-go Tagi, ga-hagadonu i-lodo do manawa bolo God ne-haga-mouli-aga a-Mee mai di made, gei goe ga-hagamouli.

10:10  Idimaa, ma go tadau hagadonu dela e-hai gidaadou gii-donu i-baahi o God, gei tadau haga-modongoohia a-Mee gi tadau ngudu dela e-hai gidaadou gi-mouli.

10:11  Di Beebaa-Dabu e-helekai boloo, “Be koai-hua dela ga-hagadonu a-Mee, geia hagalee haga-langaadia.”

10:12  Nnelekai aanei la ang-gi digau huogodoo, idimaa, di hai geegee i-mehanga digau o Jew mo digau tuadimee ai. God e-dahi-hua, di Tagi ni digaula huogodoo, gei e-haga-maluagina digau huogodoo ala e-tangi ang-gi de-Ia.

10:13  Di Beebaa-Dabu e-helekai, “Digau ala ma-ga-tangi-anga i-di ingoo o Dimaadua i-di hagamaamaa, le e-hagamouli.”

10:14  Malaa, digaula e-tangi ang-gi Mee behee maa ginaadou digi hagadonu? Gei digaula e-hagadonu behee maa ginaadou digi longono nia helekai? Gei digaula e-longono behee, maa nia helekai la-digi agoago-ina gi digaula?

10:15  Gei nnelekai le e-agoago behee maa digau agoago la-digi hagau-ina gi-daha? Di Beebaa-Dabu e-helekai, “E-madamada huoloo go di lloomoi o digau ala e-gaamai di Longo-Humalia!”

10:16  Hagalee go digaula huogodoo ne-kae di Longo-Humalia. Isaiah gu-helekai, “Meenei Dimaadua, ma koai e-hagadonu madau helekai?”

10:17  Malaa, di hagadonu le e-hidi-mai i-di longono nia helekai, gei nia helekai ne-lloomoi i-nia agoago o Christ.

10:18  Gei-au ga-heeu be di-maa e-donu digau Israel digi longono nia helekai agoago? Deeai, digaula gu-longono, i-di Beebaa-Dabu e-helekai: “Di lee o nadau helekai gu-modoho gi-hongo henuailala hagatau, gei nadau helekai guu-dau i-nia mada o henuailala.”

10:19  Malaa, au ga-heeu labelaa be di-maa e-donu digau Israel digi modongoohia di mee deenei? Ma go Moses modogoia dela ne-helekai gi di-maa matagidagi, “Au ga-haga-hai-hegau tenua damana balumee gi-heia agu daangada gi-dubua; Au gaa-hai tenua de-kabemee gi-heia agu daangada gi hagawelewele.”

10:20  Gei Isaiah e-helekai haga-madammaa, “Au ne-gida go digau ala hagalee nogo halahala Au. Au ne-haga-gida Au gi digau ala hagalee nogo heheeu Au.”

10:21  Mee gu-helekai i-di hai o Israel, “Di laangi hagatau Au nogo holo gi-daha ogu lima belee hagagahi-mai digau de-hagalongo ge e-hai-baahi mai gi di-Au.”

Chapter 11

11:1  Gei-au ga-heeu, God la-gu-de-hiihai gi ana daangada-donu? Deeai! Au tangada o Israel-donu, di hagadili o Abraham, di madawaawa o Benjamin.

11:2  God digi de-hiihai gi ana daangada ne-hilihili matagidagi. Goodou gu-iloo di Beebaa-Dabu e-haga-modongoohia bolo Elijah ne-dangi ang-gi God e-hai-baahi ang-gi digau Israel, boloo,

11:3  “Meenei Dimaadua, digaula gu-dadaaligi gii-mmade au soukohp, gu-oho gi-daha au gowaa hai-tigidaumaha, ko-au hua ne-dubu i-golo, gei digaula belee daaligi au gii-made.”

11:4  God ne-helekai bolo-aha gi mee? Ne-helekai boloo, “Au ne-benebene agu daangada e-hidu-mana-(7,000) ala digi daumaha ang-gi di balu-god go Baal.”

11:5  Gei dolomeenei le e-hai beelaa: Digau hogoohi-loo e-dubu i digau ala ne-hilihili go God i dono dumaalia.

11:6  Di hilihili a-Maa la-ne-hai i dono dumaalia dehuia, hagalee mai i nadau mee ala ne-hai. Maa di hilihili a God la-ne-hai mai i nadau mee ala ne-hai, gei tumaalia o-Maa la-hagalee tumaalia e-donu.

11:7  Malaa e-hai behee? Digau Israel la-digi gidee nadau mee nogo halahala. Digau hua hogoohi ala ne-hilihili go God ne-gidee. Gei digau ala i-golo la-gu-haga-longoduli gi-di gahigahi a God.

11:8  Di Beebaa-Dabu e-helekai, “God gu-haga-bagege digaula. Nadau golomada gu-de-gidee, nadau dalinga gu-de-longono, gaa-dae-mai-loo gi dangi-nei.”

11:9  Gei David gu-helekai, “Nadau hagamiami gii-hai di mee e-hele ge kumi digaula. Digaula gii-too gi-lala ge gii-kae nadau hagaduadua!

11:10  Nadau golomada gi-dee-gida, gei digaula gii-piga i-lodo nadau haingadaa i-nia madagoaa huogodoo.”

11:11  Au ga-heeu: Di madagoaa digau o Jew ne-tingatinga, digaula guu-too gu-hagalee? Deeai! Idimaa digaula guu-hai di huaidu, gei di haga-mouli guu-hana gi digau tuadimee belee hai digau o Jew gi-dubua.

11:12  Di hala o digau o Jew la-gu-haga-maluagina henuailala. Di hagaloale o digau o Jew i-baahi di Hagataalunga, la-guu-hai digau tuadimee gi-maluagina huoloo. Malaa, di maluagina la-koia ga-damana i-di madagoaa di hulu o digau o Jew ma-ga-dogomaalia!

11:13  Dolomeenei gei au e-helekai-adu gi goodou digau tuadimee. I-lodo-hua dogu madagoaa e-hai tangada agoago-hagau ang-gi digau tuadimee, gei au e-hagaamu i dogu ngalua.

11:14  Holongo au e-mee di hai agu daangada-donu o Jew gi-dubua gii-mee di-mouli hunu ginaadou.

11:15  Idimaa, di madagoaa dela ne-kili digaula gi-daha, nia hagadaumee a God la-guu-huli guu-hai nia hoo hagaaloho ni Mee. Malaa, gaa-hai behee go di madagoaa dela ga-haga-heaga-ai digaula? Gaa-hai be-di mouli ang-gi digau mmade!

11:16  Maa di baahi palaawaa matagidagi la-gaa-wanga gi God, gei di palaawaa hagatau la-ni Mee. Maa nia aga-laagau la-ga-tigidaumaha ang-gi God, gei nia manga-laagau labelaa ni Mee.

11:17  Hunu manga o-di laagau-olib hagalabagau la-gu-hadihadi gi-daha, gei nia manga laagau-olib lodo-geinga gu-hagapuni ang-gi tuaidina o-di laagau hagalabagau deelaa. Goodou digau tuadimee e-hai be nia manga o-di laagau lodo-geinga, ge dolomeenei, goodou gu-buni-anga gi digau o Jew, gu-hai-mee gi-di mouli hagataalunga maaloo o digau o Jew.

11:18  Deelaa-laa, goodou hudee haga-balumee-ina nia daangada ne-hadihadi gi-daha be nia manga laagau. Goodou e-deemee di hagaamu goodou. Goodou e-hai be-di manga-laagau, deenei-laa, goodou e-deemee di-haga-mouli nia aga o-di laagau. Nia aga-laagau ala e-haga-mouli ana manga, aalaa go goodou.

11:19  Malaa, goodou ga-helekai boloo, “Uaa, nia manga la-ne-hadihadi belee haga-aadee au.”

11:20  Di mee deenei le e-donu, digaula ne-hadihadi gi-daha, idimaa, digaula e-de-hagadonu, gei goodou e-noho hua igolo i-di godou hagadonu. Malaa, goodou hudee hagaamuina goodou, goodou gi-mmaadagu.

11:21  God digi dumaalia ang-gi digau o Jew ala e-hai be nia manga-laagau donu. Gei goodou e-hagamaanadu bolo God ga-dumaalia-adu gi goodou?

11:22  Mmada gi-di aloho mo-di hagawelewele o God. Mee e-hagawelewele gi digau ala gu-ihala, gei e-aloho i goodou, maa goodou ga-mouli gi-muli i-lodo dono manawa-dumaalia. Maa goodou ga-hagalee mouli beenei, gei goodou gaa-hadi gi-daha labelaa.

11:23  Maa digau o Jew gaa-kili gi-daha nadau de-hagadonu, digaula gaa-dugu labelaa gi nadau lohongo i-mua, idimaa, God e-mee di hai di mee deelaa.

11:24  Goodou digau tuadimee e-hai be-di manga laagau-olib lodo-geinga dela ne-hadi gi-daha, ga-hai-baahi ang-gi di haganohonoho a God dela e-hagatomo ana mee, ga-haga-puni ang-gi di laagau-olib hagalabagau ne-hagatomo. Digau o Jew e-hai be-di laagau-olib hagalabagau, e-haingoohia huoloo gi God di-haga-puni labelaa digaula gi nadau lohongo ala ne-hadihadi-ai.

11:25  Ogu duaahina-nei, di tonu e-de-iloo tangada i-golo, au e-hiihai bolo goodou gi-iloo, gi-de-maanadu goodou bolo goodou e-kabemee. Di manawa hamaaloo digau Israel la-hagalee noho waalooloo, e-noho-hua haga-balua gaa-dae-loo gi-di hulu digau tuadimee ga-dogomaalia, gaa-hai nia dama ni God.

11:26  Deenei di hai o digau Israel ga-mouli-ai, be di Beebaa-Dabu e-helekai, “Tangada Haga-mouli ga-hanimoi i Zion, ga-daa gi-daha nia hagadilinga huaidu huogodoo i-baahi nia hagadili o Jacob.

11:27  Au gaa-hai dagu hagababa gi digaula i dogu madagoaa ma-ga-wwede nadau huaidu.”

11:28  Idimaa digau o Jew e-de-hiihai gi-di Longo-Humalia, digaula guu-hai nia hagadaumee ni God, mai i goodou go digau tuadimee. Idimaa digaula ne-hilihili go God, digaula guu-hai nia hoo hagaaloho ni Mee, mai i nadau maadua-mmaadua.

11:29  Idimaa, God hagalee huli dono manawa i ana daangada ne-hilihili mo ne-haga-maluagina.

11:30  Gei goodou digau tuadimee, goodou nogo de-hagalongo gi God i-mua, gei dolomeenei goodou guu-kae tumaalia o God, i tee-hagalongo o digau o Jew.

11:31  Gei dela gadoo, idimaa mai tumaalia dehuia dela ne-kae go goodou, digau o Jew gu-de-hagalongo gi God dolomeenei, bolo gii-mee ginaadou di kae labelaa tumaalia dehuia o God.

11:32  God gu-lawalawa nia daangada huogodoo mai i nadau de-hagalongo, bolo gii-mee di-haga-maahede digaula huogodoo i dono dumaalia.

11:33  Nia maluagina llauehe huoloo go nia maluagina a God! E-llala huoloo go dono kabemee mo dono iloo! Ma koai e-mee di haga-modongoohia ana maanadu hilihili, ma koai e-modongoohia ono ala?

11:34  Di Beebaa-Dabu e-helekai, “Ma koai e-iloo di hagamaanadu Dimaadua? Ma koai e-mee di-wanga ana helekai hagamaamaa gi Mee?

11:35  Ma koai ne-wanga gi God dahi mee belee hai a God gii-hui gi-muli gi de-Ia?”

11:36  Idimaa, nia mee huogodoo la-ne-hai go Mee, ge ne-hai mai i Mee, ge ne-hai ang-gi Mee. Di madamada ang-gi God gii-hana-hua beelaa. Amen.

Chapter 12

12:1  Deenei-laa, ogu duaahina-nei, idimaa tumaalia o God e-damanaiee mai gi gidaadou, gei au e-dangidangi-adu gi goodou gi-wanga-ina godou huaidina e-hai tigidaumaha mouli, ge dabu, ge e-haga-tenetene di manawa o God, deenei di hai daumaha e-donu belee hai go goodou.

12:2  Goodou hudee kawee nia haihai henuailala, gei goodou dugu ang-gi God gi huluhia godou lodo hagatau, gei goodou gaa-mee di-iloo di hiihai o God, di mee dela e-humalia, gei e-tene ginai Mee, gei e-donu huoloo.

12:3  Idimaa, mai i tumaalia dehuia o God dela ne-gaamai gi-di-au, au e-helekai-adu gi goodou huogodoo gi hudee hagabaubau bolo goodou e-aamua. Goodou hagabaubau gii-donu, tangada-nei mo tangada-nei, gii-bida hagadina eia gii-tau-anga gi-di hagadonu dela ne-wanga go God gi-deia.

12:4  Tuaidina e-dahi e-logo ono dudaginga, gei nia dudaginga aanei le e-hai nadau hegau geegee.

12:5  E-hai gadoo be gidaadou: gidaadou e-dogologo, gei gidaadou la tuaidina e-dahi i tadau buni-anga gi Christ, gei gidaadou huogodoo e-haga-puni, e-hai be nia dudaginga dagidahi o tuaidina e-dahi.

12:6  Gidaadou gi-haga-gila-ina-aga tadau duhongo-hegau dagidahi ala e-tau-anga gi tumaalia dehuia o God mai gi gidaadou. Maa goe dau duhongo-hegau e-helekai nnelekai a God, gei goe gi-heia gi-tau-anga gi-di hagadonu dela e-hai-mee ginai goe.

12:7  Maa goe dau duhongo-hegau e-hagamaamaa, goe e-hai gi-hagamaamaa. Maa goe tangada agoago, goe e-hai gi-agoago.

12:8  Maa goe dau duhongo-hegau e-hagamaaloo-aga lodo nia daangada, gei goe gi-heia. Maa goe e-wanga au mee donu gi-nia daangada, gei goe gi-heia gii-logo. Maa goe o mogobuna dagi, gei goe gi-ngalua giibeni. Maa goe e-hai di humalia gi digau ala i-golo, gei goe gi-heia i-di tenetene.

12:9  Di aloho le e-hai gi-hai-donu hagatau. Ginagina i-di huaidu. Haga-mau ang-gi di humalia.

12:10  Goodou gi-hagadau-aaloho be nia dama a Christ, gei gi-hagamahi e-hagadau hagalaamua i godou mehanga.

12:11  Ngaalua hagamahi, gei hudee hagatoo. Hai-hegau manawa-dahi ang-gi Tagi.

12:12  Heia godou hagadagadagagee gi-haga-tenetene goodou. Noho i-di aumaalia i-lodo godou haingadaa, gei gi-dalodalo i-nia madagoaa huogodoo.

12:13  Wanga-ina godou mee gi godou duaahina dama a Christ ala e-hagaloale, gei gi-benebene-ina nia daangada-gee gi godou hale.

12:14  Dangi gi God gi-hagahumalia-ina digau ala e-hagahuaidu goodou. Uaa, dangi gi Mee gi-hagahumalia-ina, hagalee hagahuaidu.

12:15  Tenetene dalia digau ala e-tenetene, dangidangi dalia digau ala e-tangitangi.

12:16  Haga-dahidaamee-ina nia daangada huogodoo be-di mee e-dahi. Hudee duguina goodou laa-hongo nia daangada. Heia nnegau o-di hila-gi-lala. Hudee hagabaubau bolo goodou digau kabemee.

12:17  Maa tangada gu-hai-adu gi goodou di huaidu, hudee huia gi-di huaidu. Heia go di mee dela e-hai go nia daangada huogodoo bolo e-humalia.

12:18  Heia nia mee huogodoo ala e-mee di-godou hai, gii-noho goodou i-di aumaalia i-baahi nia daangada huogodoo.

12:19  Ogu ihoo hagaaloho, goodou hudee tala di hui gi-di huaidu, duguina gaa-hai-laa go di hagawelewele o God. Idimaa, di Beebaa-Dabu e-helekai, “Dimaadua e-helekai boloo, ‘Ko-au dela e-hui di huaidu, Au gaa-hui laa gi-muli gi tangada.’ ”

12:20  Heia di hai dela e-helekai di Beebaa-Dabu boloo, “Maa do hagadaumee le e-hiigai, haangai-ina a-mee. Maa mee e-hieinu, haga-inumia a-mee, idimaa, ma-gaa-hai kooe beenei, gei goe ne-hai a-mee gi-langaadia huoloo.”

12:21  Hudee duguina gi-di huaidu gi-haga-magedaa-ina goe. Haga-magedaa-ina di huaidu gi-di humalia.

Chapter 13

13:1  Nia daangada huogodoo e-hai gi-daudali nia dagi-tenua, idimaa, nia mogobuna-dagi laa-daha mo tumaalia o God ai. Gei nia dagi dolomeenei, la nia dagi ni God ne-dugu gi-golo.

13:2  Be koai e-hai-baahi gi tagi-tenua, geia e-hai-baahi gi-di mee a God ne-haga-noho. Gei digau ala e-hai-baahi gi tagi-tenua, e-bida hagi-aga nadau ihala.

13:3  Digau ala e-hai di humalia, la-hagalee mmaadagu i tagi, gei digau ala e-hai di huaidu le e-mmaadagu. Maa goe e-hiihai bolo gi-de-madagu i-di tagi, heia nia mee ala e-humalia, gei mee ga-hagaamu goe,

13:4  idimaa, mee tangada hai-hegau ni God belee hagahumalia goe. Malaa, maa goe gaa-hai di huaidu, goe gi-madagu i mee, idimaa, ono mogobuna hagaduadua-dangada le e-donu. Mee tangada hai-hegau ni God, gei ono mogobuna i-golo e-hagaduadua digau ala e-hai di huaidu.

13:5  Deenei tadinga goodou e-hai-loo gi-hagalongo gi tagi-tenua, idimaa hagalee mai di hagaduadua a God, gei mai i godou manawa madammaa.

13:6  Deenei tadinga labelaa di godou hui nia dagitedi, idimaa, nia waawa o-nia dagi le e-ngalua gi God.

13:7  Huia-laa godou boibana gi digaula. Huia gi digaula godou dagitedi donu mono dagitedi-goloo, hagalabagau-ina mo-di hagalaamua digaula huogodoo.

13:8  Hudee hai boibana ang-gi dahi dangada, di boibana-hua e-dahi dela gi-heia, gi-hagadau-aaloho i godou mehanga. Be koai e-hai beenei, la-gu-daudali nnaganoho.

13:9  Nia haganoho e-helekai boloo, “Hudee mouli hai be-di manu, hudee daaligi-tangada gii-made, hudee gaiaa, hudee hagagailaa.” Nnaganoho huogodoo aanei mono haganoho ala i-golo, le e-daabui-mai go taganoho e-dahi: “Aloho i tangada dela i do baahi, gii-hai be do aloho i-di-goe.”

13:10  Maa goe e-aloho i tangada, dau hala e-hai gi mee ai. Tangada ma-ga-aloho, la-gu-daudali nnaganoho hagatau.

13:11  Goodou e-hai gii-hai di mee deenei, idimaa, goodou e-iloo bolo di madagoaa belee aala-aga-iei goodou, la-deenei gu-dau-mai. Idimaa, dolomeenei tadau haga-mouli la-gu-mada-hoohoo-mai i-tadau hagadonu matagidagi.

13:12  Di boo gu-hoohoo gaa-lawa, di aa la-gu-hoohoo-mai. Gidaadou gaa-dugu nia mee o-di bouli, ga-dahi-aga nia goloo e-heebagi-ai gidaadou i-lodo di maalama.

13:13  Heia gidaadou gi-ngalungalua humalia, gadoo be nia daangada e-noho i-lodo di maalama o-di aa, hagalee gai tagaao, hagalee mouli huaidu be-di mouli hai be-di manu, hagalee heheebagi, be e-dubua.

13:14  Gei goodou dahi-aga-ina nia goloo-heebagi o tadau Dagi go Jesus Christ, dugu-ina godou manawa huaidu i-di godou daudali di hiihai o tuaidina.

Chapter 14

14:1  Benebene-ina tangada dela e-bagege dono hagadonu. Hudee hai-baahi gi-nia maanadu a-maa.

14:2  Di hagadonu o tangada e-hai a-mee gi-miami-noo, gei tangada dela e-bagege dono hagadonu, le e-gai-hua nia huwa-laagau.

14:3  Tangada dela e-miami-noo, hudee de-hiihai gi tangada dela e-hilihili ana mee-gai. Tangada dela e-gai-hua nia huwa-laagau, hudee hagi-aga-ina tangada dela e-miami-hua noo idimaa, God e-donu-hua gi mee.

14:4  Goe koai dela bolo goe e-hagi-aga di hege o tuai dangada? Di tagi donu o-maa dela e-iloo be mee e-gila be hagalee gila. Gei mee ga-gila-laa, idimaa, Tagi le e-mee di hai a-mee gii-gila.

14:5  Dahi dangada e-hagamaanadu bolo di laangi i-golo e-mada-hagalabagau i-hunu laangi. Tuai dangada i-golo e-hagamaanadu bolo nia laangi huogodoo le e-hai be-di mee e-dahi. Tangada-nei mo tangada-nei gii-bida hagamaanadu-ina di mee dela e-humalia, ga-daudali.

14:6  Tangada dela e-hagalabagau di laangi e-dahi laa-hongo nia laangi ala i-golo, le e-hagalaamua Tagi. Tangada dela e-miami hua-noo, le e-hagalaamua Tagi, idimaa, mee e-danggee ang-gi God i-nia meegai. Tangada dela e-hilihili meegai, le e-hagalaamua Tagi, mee e-danggee ang-gi God.

14:7  Deai tangada i gidaadou e-bida mouli i-deia ai, ge deai tangada i gidaadou e-bida made-hua ang-gi deia ai.

14:8  Maa gidaadou e-mouli, go Tagi dela e-mouli ginai gidaadou. Maa gidaadou e-mmade, go Tagi dela e-mmade ginai gidaadou. Maa gidaadou e-mouli be e-mmade, gidaadou nia daangada ni Tagi.

14:9  Idimaa, Christ ne-made, ga-mouli-aga belee hai di Tagi ni digau mouli mo digau mmade.

14:10  Goodou ala e-gai-hua nia huwa-laagau, goodou e-aha ala e-hagi-aga godou duaahina? Gei goodou ala e-gai nia mee huogodoo, goodou e-aha ala e-hagahuaidu godou duaahina? Gidaadou huogodoo la-gaa-tuu i-mua o God e-hagi-aga go Mee.

14:11  Idimaa, di Beebaa-Dabu e-helekai, “Dimaadua e-helekai boloo: ‘Au go di God Mouli, nia daangada huogodoo ga-dogoduli i ogu mua, ga-haga-modongoohia-aga bolo Au go God.’ ”

14:12  Deenei-laa, tangada-nei mo tangada-nei i gidaadou le e-hai gi-hagi-aga gi God di hai o dono mouli.

14:13  Malaa gidaadou gaa-dugu tadau hagadau hagi-aga gidaadou. Goodou hilihilia di-mee dela e-hagalee hai godou duaahina gii-tinga, be gii-too gi-lodo di huaidu.

14:14  Dogu buni-anga gi tadau Dagi go Jesus Christ, le e-hai au gi-iloo bolo nia meegai e-gulugulua ai, gei maa iai tangada i-golo e-hai bolo nia meegai aanei e-gulugulua, nia meegai aanei le e-gulugulua hua ang-gi tangada deelaa.

14:15  Maa goe ga-haga-manawa-gee do duaahina i au mee ala e-gai, malaa, goe guu-hai be tangada do aloho ai. Goe hudee dumaalia gi au mee ala e-gai gi-hagahuaidu-ina tangada dela ne-made ginai a Christ.

14:16  Goodou hudee haga-ingoo-ina di humalia gi-di huaidu.

14:17  Idimaa, Teenua King o God la-hagalee go nia mee e-gai mono mee ala e-inu, gei go di tonu, di aumaalia mo-di tenetene mai di Hagataalunga-Dabu.

14:18  Maa tangada e-hai-hegau gi Christ i-di ala beenei, geia e-haga-tenetene di manawa o God, gei e-donu ginai nia daangada ala i-golo.

14:19  Malaa, gidaadou gi-hagamahi i-nia madagoaa huogodoo gi-nia mee ala e-hai gidaadou gii-noho i-di aumaalia, gei e-hagadau hagamaaloo-aga gidaadou.

14:20  Goodou hudee oho-ina nia mee a God ne-hai i-di gili nia meegai. Gidaadou e-humalia e-gai nia mee huogodoo, malaa e-huaidu go tangada dela ma-gaa-gai nia mee ala e-hai ono ehoo gii-too gi-lodo di hala.

14:21  Di-mee dela e-donu di hai le hagalee gai nia goneiga, hagalee inu nia waini, hagalee hai di-ingoo-hua di mee dela e-hai godou duaahina gii-too gi-lodo di huaidu.

14:22  Daahia-hua au mee ala ne-hagadonu i-di gili nia mee aanei i-gulu mehanga mo God. E-maluagina go tangada dela hagalee hagahuaidu ia gi ana mee ala e-hai bolo e-donu.

14:23  Maa tangada e-manawa-lua i ana mee e-gai, God ga-hagi-aga a-mee, idimaa, di haihai o tangada deelaa la-hagalee ne-mau mai i-di hagadonu. Nia mee huogodoo ala hagalee mau mai i-di hagadonu, la di huaidu.

Chapter 15

15:1  Gidaadou ala e-maaloo tadau hagadonu, gidaadou e-hai-loo gi-hagamaamaa digau ala e-paagege e-aamo nadau mee daamaha. Gidaadou hudee haga-tenetene-ina-hua gidaadou.

15:2  Gei gidaadou huogodoo gi-heia nia mee humalia ang-gi tadau duaahina, e-haga-tomo-aga digaula i-lodo nadau hagadonu.

15:3  Idimaa, Christ hagalee ne-haga-tenetene Ia. Di Beebaa-Dabu e-helekai, “Ma ko-Au dela ne-hagahuaidu go nia daangada ala ne-hagahuaidu goe.”

15:4  Idimaa, nia mee huogodoo ala guu-lawa di-hihi gi-lodo di Beebaa-Dabu, la-ne-hihi belee aago gidaadou gi-hai-mee gi-di hagadagadagagee mai i tadau hagakono mo-di hagamaaloo-aga tadau lodo mai i-di Beebaa-Dabu.

15:5  God go taamada o-di manawa hagakono, mo-di hagamaaloo di manawa, gi-gowadu gi goodou di manawa buni i godou daudali a Jesus Christ,

15:6  gei goodou gii-dahi i-di hagaamu a God Tamana o tadau Dagi go Jesus Christ mai i-di lee e-dahi.

15:7  Goodou hagadau hila-anga i-goodou bolo gi-gila-ai di madamada o God, gadoo be Christ dela ne-hila-adu gi goodou.

15:8  Idimaa, au e-hagi-adu gi goodou bolo Christ guu-hai di hege ni digau o Jew belee haga-modongoohia di tonu o God, gei e-haga-gila-aga nia hagababa a God ala ne-hai gi nadau maadua-mmaadua,

15:9  gei e-hai digau tuadimee gii-mee di-hagaamu tumaalia o God labelaa. Be di Beebaa-Dabu dela e-helekai, “Au ga-haga-hagaamu Goe i-lodo digau tuadimee, au ga-dadaahili mo-di hagaamu do ingoo.”

15:10  Di Beebaa-Dabu e-helekai labelaa, “Goodou digau tuadimee, goodou madalia nia dama a God, tenetene haga-hagaamuina.”

15:11  Gei e-helekai labelaa, “Goodou go digau tuadimee huogodoo, goodou hagaamuina Dimaadua. Goodou huogodoo, hagaamuina a-Mee.”

15:12  Isaiah gu-helekai, “Tangada i-di hagadili o Jesse ga-gila-aga, e-dagi digau tuadimee, gei digaula ga-hagadagadagagee gi Mee.”

15:13  Malaa, God dela go taamada o-nia hagadagadagagee huogodoo, gi-haga-honu-ina goodou gi-nia hagadilinga tenetene huogodoo mo-di aumaalia mai i-di godou hagadonu a-Mee, bolo gi-tomo-aga di-godou hagadagadagagee i-nia mahi o-di Hagataalunga-Dabu.

15:14  Ogu duaahina-nei, au gu-iloo bolo goodou gu-haga-honu gi-nia hagadilinga humalia huogodoo, gu-hai-mee gi-nia kabemee huogodoo, gei guu-mee di-hagadau-aago i-goodou.

15:15  Gei i-lodo di lede deenei, au gu-hagamahi e-haga-madammaa nia mee ala ne-haga-langahia-adu gi goodou. Au e-hagamahi-adu gi goodou i tumaalia o God dela ne-gaamai gi-di-au,

15:16  gaa-hai-iei au tangada hai-hegau ni Jesus Christ e-hai ana hegau i-baahi digau tuadimee. Au e-hai-hegau gi Mee be tangada hai-mee-dabu, i dagu hai-agoago i-di Longo-Humalia mai baahi o God bolo gii-mee-ai digau tuadimee di hai tigidaumaha dela e-tene ginai di manawa a God, go digau ala ne-hagadabu go di Hagataalunga-Dabu gi Mee.

15:17  I dogu buni-anga gi Jesus Christ, au e-helekai hagaamu au bolo au tangada hai-hegau ni God.

15:18  Au e-hagamahi, e-helekai-hua nia mee a Christ ne-hagagila-aga i-dogu baahi belee dagi-mai digau tuadimee gii-hai digau e-hagalongo gi God, mai i agu agoago mo di hai-hegau gi-nia maa,

15:19  mai baahi nia mogobuna mono mee haga-goboina, mo mai baahi di mogobuna o-di Hagataalunga o God. Daamada-mai i dogu heehee-mai i Jerusalem, gaa-tugi i Illyricum, au gu-hagadele di Longo-Humalia a Jesus Christ gi-nia gowaa huogodoo.

15:20  Au gu-hagamahi i-nia madagoaa huogodoo bolo gii-mee au di-hagadele di Longo-Humalia gi-nia gowaa huogodoo ala digi longono-ginaadou a Christ, bolo gi-de-haga-duu-aga-hua di Longo-Humalia i-hongo di hagamau dela ne-hai go tuai dangada.

15:21  Di Beebaa-Dabu e-helekai, “Digau ala digi hagi-anga ginai di hai o-Maa ga-gidee, digau ala digi longono, ga-modongoohia.”

15:22  Di mee deenei dela e-haga-deaadee au i-nia madagoaa e-logo belee heetugi adu gi goodou,

15:23  gei dolomeenei dagu moomee i-nia gowaa aanei la-guu-lawa. I-lodo nia ngadau e-logo, au nogo hiihai bolo e-hanadu gi godou baahi.

15:24  Gei-au e-hagadagadagagee bolo au ga-hanadu gi godou baahi dolomeenei, i dogu hana gi Spain. Au e-hiihai e-heetugi-adu gi goodou, gei i-muli dogu noho i godou baahi, gei au e-hiihai bolo goodou gi-hagamaamaa-ina au i dogu hagatanga i godou baahi e-hana gi Spain.

15:25  Dolomeenei, gei au e-hana gi Jerusalem, e-hagamaamaa nia daangada a God ala i-golo.

15:26  Idimaa, nia nohongo-dabu ala i Macedonia mo Achaia guu-bida hiihai bolo e-hai tigidaumaha, e-hagamaamaa digau hagaloale ala i-lodo nia daangada a God i Jerusalem.

15:27  Digaula-hua ne-hiihai gi tigidaumaha deenei, gei nadau hegau la-ne-belee hagamaamaa digaula. Idimaa digau o Jew gu-hagamaamaa digau tuadimee gi-nia maluagina mai i-baahi di Hagataalunga, deelaa-laa, digau tuadimee gi-hagamaamaa-ina digau o Jew mai i nadau maluagina o henuailala.

15:28  I dogu madagoaa ga-haga-lawa dagu moomee gaa-wanga gi digaula nia bahihadu huogodoo ala ne-hagabudu, gei au ga-hagatanga, gaa-hana gi Spain, ga-heetugi-adu gi goodou i dogu hana.

15:29  Malaa, i dogu madagoaa ma-ga-hanadu gi godou baahi, gei au e-iloo bolo au e-hanadu mo nia haga-maluagina logowaahee a Christ.

15:30  Ogu duaahina-nei, au e-dangi adu gi goodou, hagamahi i-di ingoo o Jesus Christ, tadau Dagi, mo mai i-di aloho dela mai baahi o-di Hagataalunga, bolo goodou gi-hagamahi hai-dalodalo gi God i-di-au.

15:31  Goodou dalodalo i-di-au gi-benebene-ina au gi-daha mo digau de-hagadonu ala i Judea, gii-hai dagu moomee dela i Jerusalem di mee e-haga-tenetene nia dama a God.

15:32  Maa God ga-dumaalia-mai gi gidaadou, gei au ga-hanadu gi godou baahi i-lodo di tenetene, ga-hagamolooloo i godou baahi i-di madagoaa dulii.

15:33  God dela go taamada o-di aumaalia gii-noho i godou baahi huogodoo. Amen.

Chapter 16

16:1  Au e-haga-modongoohia-adu gi goodou tadau duaahina-ahina go Phoebe dela e-hai-hegau i-di nohongo-dabu i Cenchreae.

16:2  Benebene-ina a-mee i-di ingoo o Tagi, be-di hai o-nia dama a God, gei gi-hagamaamaa-ina a-mee i ana mee ala e-hiihai ginai, idimaa, mee tangada e-humalia ang-gi ono ehoo dogologo dalia au.

16:3  Heia-laa dagu hagaaloho gi Priscilla mo Aquila, go ogu ihoo hai-hegau gi Jesus Christ,

16:4  ala gu-de-hagahuodia nau mouli i-di-au. Au e-danggee gi meemaa, hagalee ko-au hua, gei nia nohongo-dabu digau tuadimee huogodoo ala i-golo labelaa.

16:5  Dagu hagaaloho labelaa ang-gi nia gau daumaha ala e-dagadagabuli i-di nau hale. Dagu hagaaloho ang-gi dogu ihoo hagaaloho go Epaenetus, tangada ne-daamada ne-hagadonu a Christ i Asia.

16:6  Dagu hagaaloho ang-gi Mary dela nogo ngalua hagamahi adu gi goodou.

16:7  Dagu hagaaloho labelaa ang-gi Andronicus mo Junias, nia daangada o Jew ala nogo i gimaadou i-lodo di hale-galabudi. Meemaa guu-hai nia daangada e-modongoohia-ai digau agoago-hagau, gei meemaa guu-hai nia dama a Christ mai hua i ogu mua.

16:8  Dagu hagaaloho ang-gi Ampliatus, dogu ihoo i mau hagadaubuni ang-gi Tagi.

16:9  Dagu hagaaloho ang-gi Urbanus, tadau ihoo hai-hegau gi Christ, mo Stachys, go dogu ihoo hagaaloho.

16:10  Dagu hagaaloho ang-gi Appeles dela guu-donu dono hai-hegau gi Christ. Dagu hagaaloho ang-gi digau di hale o Aristobulus.

16:11  Dagu hagaaloho ang-gi Herodion, tangada o Jew labelaa mo nia dama a Christ i-di hale o Narcissus.

16:12  Dagu hagaaloho ang-gi Tryphaena mo Tryphosa nia ahina ala nogo hai-hegau i-nia hegau a Tagi, mo ang-gi dogu ihoo hagaaloho go Persis dela gu-ngalua hagamahi i nau buni-anga gi Tagi.

16:13  Dagu hagaaloho ang-gi Rufus, tangada hai-hegau humalia huoloo ang-gi Tagi, mo dono dinana dela nogo benebene au be tama-daane donu ni-aana.

16:14  Dagu hagaaloho ang-gi Asyncritus, Phlegon, Hermes, Patrobas, Hermas mo tadau duaahina huogodoo ala i nadau baahi.

16:15  Dagu hagaaloho ang-gi Philologus mo Julia, mo ang-gi Nereus mo dono duaahina-ahina, mo ang-gi Olympas mo nia dama huogodoo a God ala i nadau baahi.

16:16  Goodou gi-hagadau hagaaloho i godou mehanga gi-di hagaaloho o-nia dama a Christ. Nia nohongo-dabu huogodoo a Christ e-hagau-adu nadau hagaaloho.

16:17  Ogu duaahina-nei, au e-hagamaaloo-aga goodou bolo gii-pula i digau ala e-hai goodou gi-waewae, e-hagahuaidu nia hagadonu o nia daangada, ge e-hai-baahi gi godou mee ala gu-agoago-ai. Haga-ligaliga i-daha mo digaula!

16:18  Digau ala e-hai-hegau beenei, la-hagalee hai-hegau donu gi Jesus Christ tadau Dagi, e-hai-hua go nadau hiihai. Digaula e-halahalau nia hagamaanadu o digau ala e-hai di tonu gi nadau helekai humalia mo nadau helekai tilikai.

16:19  Digau huogodoo gu-longono di-godou maaloo di haga-gila-aga di Longo-Humalia, dela gaa-hidi-ai iei au ga-tenetene adu gi goodou. Au e-hiihai bolo goodou gi-kabemee gi-nia mee humalia, ge hudee kabemee gi-nia mee huaidu.

16:20  Gei God dela go taamada o-di aumaalia, ga-limalima di-dugu-eia Setan gi-lala godou babaawae gi-dagadagahia. Tumaalia o tadau Dagi go Jesus gi-madalia goodou.

16:21  Timothy go dogu ihoo hai-hegau, mo Lucius, Jason, mo Sosipater aalaa go digau o Jew, e-hagau-adu nadau hagaaloho.

16:22  Au, go Tertius, tangada dela ne-hihi di lede deenei, e-hagau-adu gi goodou dagu hagaaloho dama a Christ.

16:23  Dogu ihoo go Gaius, dela e-noho-iei au i dono baahi, dono hale dela e-dagadagabuli-ai gimaadou, e-hai labelaa dana hagaaloho adu gi goodou. Erastus, go tangada benebene-mee di guongo deenei, mo tadau ihoo hagaaloho go Quartus, meemaa e-hai nau hagaaloho adu gi goodou.

16:24  [Tumaalia o tadau Dagi go Jesus Christ gi-madalia goodou huogodoo gaa-hana-hua beelaa. Amen]

16:25  Gidaadou huogodoo gi-hagaamuina a God. Ma go Mee hua dela e-mogobuna i dana haga-mau goodou i-lodo godou hagadonu, e-haga-modongoohia go di Longo-Humalia dela e-agoago ko-au i-di hai o Jesus Christ, mo-di haga-modongoohia di tonu de-iloo dela nogo ngala waalooloo mai mua.

16:26  Gei dolomeenei di tonu deelaa la-gu-dugu-mai gi-di maalama mai nia beebaa o-nia soukohp, ge mai nia helekai a God. Di tonu deenei la-gu-haga-modongoohia gi-nia henua llauehe huogodoo, bolo huogodoo gi-hagadonu gi-daudalia.

16:27  Gidaadou gi-hagaamuina a God, go Mee hua modogoia e-kabemee, ono madamada mai i Jesus Christ gii-hana-hua beelaa. Amen.