LinVB - Romans

Chapter 1

1:1  Ngáí Pólo, mosáleli wa Krístu Yézu, natíndélí bínó, bato ba bolingo ba Nzámbe o Róma, losáko. Nzámbe abéngí ngáí názala apóstolo, aponí ngáí násangela Nsango Elámu ya yě,

1:2  eye alakéláká kala na maloba ma baproféta o Minkandá Misántu.

1:3  Nsango Elámu eye etálí Mwána wa yě, Yézu Krístu, Mokonzi wa bísó. O maye matálí bomoto, abótámákí o libótá lya Davídi ;

1:4  o maye matálí Elímo Sántu, akómí na ngúyá ya Mwána wa Nzámbe, áwa Tatá asékwísí yě.

1:5  Yě moto apésí ngáí ngrásya názala apóstolo mpô ’te nátéya bato ba bikólo bínso, báyamba mpé bátósa yě, mpô ya lokúmu la nkómbó ya yě.

1:6  Nátéya mpé bínó lo­kóla, zambí Yézu Krístu abyángí bínó.

1:7  Bínó bato ba bolingo ba Nzámbe o Róma, Nzámbe abyángí bínó bózala basántu. Nzámbe Tatá wa bísó ná Mokonzi wa bísó Yézu Krístu bákabela bínó ngrásya na bobóto.

1:8  Libosó, elongó na Yézu Krístu, natóndí Nzámbe mpô ya bínó bánso, mpô o mokili mobimba ba­kokúmisaka boyambi bwa bínó.

1:9  Nakosálelaka Nzámbe óyo na mo­téma mǒkó, áwa nakosangelaka Nsango Elámu ya Mwána wa yě. Yěméí ayébí ’te nakotíkaka té kokanisa bínó.

1:10  O losámbo la ngáí nakoséngeke Nzámbe ’te álingisa ngáí názwa nzelá ya kokóma epái ya bínó.

1:11  Nazalí na mpósá mpenzá ya komóno bínó, nákabela bínó mwâ likabo lya Elímo mpô ya koléndisa bínó.

1:12  Nalingí koloba : tóléndisana bísó na bínó na eyamba sé yǒ kó, eyamba ya bísó bánso.

1:13  Bandeko ba ngáí, malámu bóyéba ’te mbala míngi nakánákí koyâ epái ya bínó, kasi téé leló nazwí nzelá té ; nalingákí ’te mosálá mwa ngáí móbóta mwâ mbuma epái ya bínó, lokóla o bikólo bisúsu bya bapagáno.

1:14  Nazalí lokóla moto akómí na nyongo epái ya ba-Gréki, epái ya basénzi, epái ya baye bayékólá mpé epái ya baye bayékólá té.

1:15  Yangó wâná motéma mwa ngáí motíndí ngáí náyâ kosangela Nsango Elámu epái ya bínó lokóla, bínó bato ba Róma.

1:16  Sôló, Nsango Elámu ekoyókisaka ngáí nsóni té : ezalí ngúyá ya Nzámbe mpô ya kobíkisa bato bánso bayambí yangó na motéma, libosó ba-Yúda, na nsima bato ba bikólo bisúsu.

1:17  Na Nsango Elámu Nzámbe alakísí bosémbo bwa yě, zambí akokómisa moto wa bosémbo bobélé óyo ayambí yě téé nsúka. Ekomámí bôngó o Minkandá Misántu : Oyo ayambí akozala moto wa bosémbo o míso ma Nzámbe, akozala na bomoi.

1:18  Kasi út’o likoló Nzámbe akolakisaka nkándá epái ya bato bánso bakobóyaka Yě mpé bakosálaka mabé, mpámba té, misálá mya bangó miye mizángí bosémbo mikopekisa bangó koyéba bosôló.

1:19  Mambí ma Nzámbe maye bato bakokí koyéba, mazalí polélé o míso ma bangó, zambí Nzámbeméí alakísákí bangó mangó.

1:20  Sôló, ngúyá ya Nzámbe nsúka té ná mpé bonzá­mbe bwa Yě bokomónonoko na míso té. Kasi bandá Nzámbe akelí mokili, bato bakokí koyéba yangó na mayéle ma bangó mpô ya bikelá bya Yě. Bakokí kowángana yangó té.

1:21  Atâ bayébí Nzámbe, bakúmísí mpé batóndí yě té bǒ ebongí. Babúngámí, zambí makanisi ma bangó mazángí ntína ; mitéma mya bangó mikómí mpé molílí mpô bazángí mayéle :

1:22  bakanísí ’te bazalí na bwányá, nzókandé bakómí bazóba.

1:23  Batíkí kokúmisa Nzámbe wa nkémbo mpé wa lobíko, bakómí kokúmisa bikeko bya bato bakokúfaka, bya ndeke, bya nyama ikotámbolaka mpé iye ikolandaka o mabelé.

1:24  Yangó wâná Nzámbe atíkí bangó bálanda mpósá ya mitéma mpé básála makambo ma bosóni ; bábébisa bôngó nzóto ya bangó mǒkó.

1:25  Babóyákí nzelá ya sôló ya Nzámbe mpé ba­ndimákí lokutá, bakú­mbámélákí mpé basálélákí bikeko biye balingáki, kasi babóyí Mozalisi wa bilóko bínso, óyo basengélí kokúmisa sékô ! Amen.

1:26  Yangó wâná Nzámbe atíkí bangó, mpósá ya mabé ébébisa bangó : básí ba bangó batíkí (kofánda o) libála, bakómí kosála bosóni bangó na bangó ;

1:27  babáli sé bôngó : babóyí kosangana na básí ba bangó, bakómí kolúlana, bakómí kosála bosóni bangó na bangó ; bazwákí bôngó etúmbu ya masúmu o nzóto ya bangó.

1:28  Awa bakanísí ’te koyéba Nzámbe ezalí mpámba, Nzámbe akómísí bangó baómbo ba makanisi mabé, atíkí bangó básála maye mabongí té.

1:29  Bazángí bosémbo mpé batóndí na mabé ndéngé na ndéngé : lokósó, mayéle mabé na zúwa. Mosálá mwa bangó : mpósá ya koboma, koswâna, kokósa, kobébisa bat­o mpé lokúmu la bání­ngá.

1:30  Bakotóngonoko, bazalí bangúná ba Nzámbe, bakofíngaka báníngá, bavímbí na loléndo mpé na lofúndo. Bakolukaka kosála mabé, bakotósaka babóti té,

1:31  bazángí mayéle. Mitéma mya bangó, mái ma bwáto, mizalí na bolingi té, na mawa mpé té.

1:32  Nzókandé bayébí mobéko mwa Nzámbe malámu : bato bakosálaka makambo mâná bakokí na liwá. Nzókandé bakosálaka makambo mangó, kútu bakokúmisaka baye bakosálaka makambo mâná.

Chapter 2

2:1  Yǒ moto olingí kokitisa báníngá, atâ ozalí náni, okokí komílóngisa té. Awa olingí kokitisa móníngá, ozalí komíkitisa, zambí yǒ moto ofúndí móníngá, okosálaka mabé lokóla yě.

2:2  Toyébí ’te Nzámbe akokitisaka na bosémbo bato bakosálaka bôngó.

2:3  Yǒ moto ofú­ndí bato bakosálaka mabé, okosálaka mabé lokóla bangó, okanísí ’te okokíma Nzámbe ntángo akokáta likambo lya yǒ ?

2:4  Yǒ ozalí ndé kokínola Nzámbe mpô azalí bobóto míngi, akokangaka motéma mpé akopésaka bato etúmbu nokí té ? Oyébí té ’te na bobóto bwa yě azalí kobyánga yǒ óbóngola motéma ?

2:5  Yó, motéma libángá, obóyí kobó­ngola motéma, okongalisa nkándá ya Nzámbe. Ekomónono o mokolo mwa nkándá, mokolo Nzámbe akoyâ kokáta makambo ma bato bánso na bosémbo.

2:6  Akofúta moto na moto lifúta likokí na mosálá asálí :

2:7  akopésa bomoi bwa sékô na baye bakolukaka na moléndé nkémbo na lokúmu eye ekosíla té.

2:8  Kasi nkándá mpé nkele ikokwêla bato bakotósaka Nzámbe té, baye babóyí kolanda matéya ma sôló mpé balandí makambo mazángí bosémbo.

2:9  Minyóko mpé malózí makokwêla bato bánso bakosálaka mabé : libosó ba-Yúda, nsima bapagáno.

2:10  Kasi bato bánso bakosálaka malámu, Nzámbe akopésa bangó nkémbo, lokúmu na bobóto : libosó ba-Yúda, na nsima bapagáno,

2:11  mpô Nzámbe akotálaka bilongi bya bato té.

2:12  Ya sôló, baye bayébí Mobéko té, sókó basálí masúmu, bakobú­nga, atâ bayébí Mobéko té. Kasi baye bayébí Mobéko, sókó basálí masúmu, Nzámbe akosámbisa bangó engébéné na Mobéko.

2:13  Mpá­mba té, baye bayókí Mobéko bobélé na matói, balongóbání o míso ma Nzámbe té ; sé bato bakotósaka Mobéko bakobíka.

2:14  Sókó bapagáno bayébí Mobéko té, kasi basálí malámu lokóla Mobéko motíndí, zambí motéma molakísí bangó bôngó, bangó mǒkó bakómí komípésa mibéko, atâ bayébí Mobéko mwa Móze té.

2:15  Na maye bakosálaka balakísí ’te Mobéko mozalí o mitéma mya bangó ; mokoyébisaka bangó sókó basálí malámu tǒ mabé.

2:16  Mokolo Nzámbe akosámbisa bato na monoko mwa Krístu Yézu, akotála makambo bato basáláká na bonkútú, mokolo môná makambo mâná makobima. Nakoyébisaka bínó bôngó o Nsango Elámu nakotéyaka.

2:17  Kasi yǒ moto olobí ’te ozalí mo-Yúda, otíí motéma na Mobéko ; omíkúmísí ’te ozalí moto wa Nzámbe ;

2:18  oyébí níni Nzámbe alingí, níni elekí malámu, lokóla Mobéko moyébísí yǒ.

2:19  Okanísí ’te okokí kozala mokambi wa bato bakúfá míso, tǒ mwínda mwa bato bakotámbolaka o molílí ;

2:20  yǒ mobókoli wa bato bazángí mayéle mpé motéyi wa bato bayékólá té, okanísí ’te ozalí na mayéle mánso mpé okolobaka bobélé makambo ma sôló mpô oyébí Mobéko…

2:21  Tálá, yǒ motéyi wa bato basúsu, mpô níni okomítéyaka té ? Okotéyaka ’te báyíba té, kasi yǒ mǒkó okoyíbaka !

2:22  Okopekisaka bokáli, kasi yǒ mǒ­kó okosálaka bwangó ! Okotálaka bikeko lokóla bilóko mpámba, kasi okoyíbaka o bisíká bakokúmisaka bikeko.

2:23  Okomíkúmisaka ’te oyébí Mobéko, kasi áwa otósí mwangó té, ozalí kobébisa lokúmu la Nzámbe.

2:24  Ekomámí bôngó o Minkandá Misántu : « Mpô ya bínó ba­pagáno bakotúkaka nkómbó ya Nzámbe. »

2:25  Sókó okotósaka Mobéko, kokátisa nzóto ezalí na ntína ; kasi sókó otósí Mobéko té, atâ bakátí yǒ nzóto, ozalí sé lokóla mopagáno.

2:26  Sé bôngó, sókó mopagáno atósí mití­ndo mya Mobéko, atâ bakátí yě nzóto té, o míso ma Nzámbe azalí lokóla moto bakátí yě nzóto.

2:27  Mpé moto óyo akotósaka Mobéko, atâ bakátí yě nzóto té, akosámbisa yǒ mo-Yúda okotósaka Mobéko té, atâ bakátí yǒ nzóto mpé oyébí Minkandá mya Mobéko.

2:28  Moto azalí bobélé mo-Yúda o míso ma bato, azalí mo-Yúda wa sôló té, mpô elembo ya mo-Yúda wa sôló ezalí bobélé o nzóto ya yě té.

2:29  Moto azalí mo-Yúda wa sôló o motéma mwa yě, mpô azalí na elembo o motéma, akotósaka bobélé Minkandá mya Mobéko té, akotósaka mpé Elímo Sántu : yě moto akozwa lokúmu epái ya bato té, kasi epái ya Nzámbe.

Chapter 3

3:1  Bôngó ba-Yúda balekí basúsu na níni ? Kokátisa nzóto ezalí ndé na litómba níni ?

3:2  Ezalí na litómba linéne o makambo míngi. Ya libosó : Nzámbe atíkélí bangó maloba ma yě.

3:3  Tóloba níni ? Awa basúsu o káti ya bangó babóyákí kotósa, Nzámbe akobóya ndé kokokisa elakó ya yě ?

3:4  Sókí moké té ! Nzámbe akokósaka té, kasi bato bánso bakobúkaka lokutá. O Minkandá Misántu ekomámí boye : « Bámóno na maloba ma yǒ ’te yǒ Nzámbe ozalí sémba ; sókó bakosá­mbisa yǒ, ntángo ínso okolónga. »

3:5  Lokóla masúmu ma bísó mamónísí bosémbo bwa Nzámbe polélé, tóloba níni ? Awa Nzámbe abétí bísó na nkándá, azángí ndé bosémbo ? Natúní bôngó lokóla bato basúsu bakotúnaka.

3:6  Atâ moké té. Sókó ezalákí bôngó, bóníbóní Nzámbe akokákí kosámbisa bato ba nsé ?

3:7  Kasi sókó lokutá la ngáí lokomónisaka bosôló bwa Nzámbe polélé mpé lokopésaka yě lokúmu, mpô níni akokitisa ngáí lokóla mosúmuki ?

3:8  Bôngó, tósála mabé mpô ’te mabé ma bísó málakisa bolámu bwa Nzámbe ? Basúsu bakopanzaka nsango ’te ngáí moto nakolobaka bôngó. Ebongí bákitisa bangó o likambo.

3:9  Bôngó tóloba ’te bísó ba-Yúda tolekí ndé bapagáno ? Sókí moké té ! Tosílí tolakísí ’te ná ba-Yúda ná bapagáno, bánso bazalí baómbo ba lisúmu,

3:10  lokóla ekomámí : « Moto wa bosémbo azalí té, atâ mǒkó té.

3:11  Moto wa mayéle azalí té, atâ moto mǒkó akolukaka Nzámbe té.

3:12  Bato bánso babúngí nzelá, babébí, bakosálaka mabé, moto akosálaka malámu azalí té, atâ mǒkó té.

3:13  Monoko mwa bangó mozalí lokóla lilíta lifungwámí, bakobúngisaka bato na lolému la bangó ; maloba ma bangó mazalí lokóla ngenge ya nyóka.

3:14  Minoko mya bangó mitóndí na maloba ma botómbeli bato mabé mpé ma bololo.

3:15  Bakokendeke mbángu mpô ya koboma bato.

3:16  Bakobébisaka bato mpé bakoyókisaka bangó mpási.

3:17  Bayébí nzelá ya bobóto té.

3:18  Bakobángaka Nzámbe atâ moké té. »

3:19  Toyébí ’te mánso matálí baye basengélí kotósa Mobéko makomámí o Mobéko, mpô ’te mǒkó mǒ­kó ámílóngisa té, kasi bánso báyéba ’te bazalí basúmuki o míso ma Nzámbe.

3:20  Zambí atâ moto mǒkó té akozala moto wa bosémbo o míso ma Nzámbe mpô ya botósi Mobéko. Ntína ya Mobéko ezalí sé kolakisa níni ezalí lisúmu.

3:21  Sikáwa Nzámbe asílí alakísí nzelá ya kokóma na bosémbo o míso ma yě. Ekomámí o Mobéko mpé o Minkandá mya baproféta : ezalí mpô ya Mobéko té,

3:22  kasi mpô ya boyambi Yézu Krístu : baye bánso bakoyamba Nzámbe bakokóma bato ba bosémbo o míso ma yě. Bato bakeséní lisúsu té :

3:23  bánso basálí masúmu, bánso bazángí lokúmu loye lokoútaka na Nzámbe.

3:24  Bakozala bato ba bosémbo bobélé mpô ya ngrásya ya Nzámbe, zambí Krístu Yézu asikólí bangó.

3:25  Nzámbe alingákí ’te Krístu, na makilá ma yě, ázwela bato bánso bakoyamba bolímbisi masúmu. Ala­kísí bangó bôngó bosémbo bwa yě. Kala apésáká bato etúmbu mpô ya masúmu té,

3:26  mpé akangáká motéma. Kasi o mikolo miye alingákí kolakisa bosémbo bwa yě, mpô ’te ákokisa bilakó bya yě mpé ákómisa baye bánso bayambí Yézu bato ba bosémbo.

3:27  Bôngó tokokí ndé komíkúmisa ? Elóko té. Ntína níni epekísámí ? Tokokí ndé komíkúmisa mpô ya misálá tokosálaka ? Elóko té. Tosengélí sé koyamba.

3:28  Bísó toyébí ’te moto akokóma moto wa bosémbo mpô ya botósi Mobéko té, kasi mpô ya boyambi.

3:29  Tǒ Nzámbe azalí bobélé Nzámbe wa ba-Yúda ? Azalí mpé Nzámbe wa bapagáno té ? Sôló, azalí Nzámbe wa bapagáno lokóla.

3:30  Zambí Nzámbe azalí sé mǒkó : akokómisa ba-Yúda bato ba bosémbo mpô ya boyambi, akokómisa mpé bapagáno bato ba bosémbo mpô ya boyambi bwa bangó.

3:31  Bôngó tóloba ’te boyambi bolo­ngólí ntína ya Mobéko ? Sókí moké té ! Bobélé boyambi bopésí Mobéko ntína.

Chapter 4

4:1  Bôngó, tóloba níni mpô ya Abaráma, nkóko óyo abótí bísó ? Azwákí níni ?

4:2  Sókó Abaráma akómákí moto wa bosémbo mpô ya misálá mya yě, mbele akokákí komíkúmisa, kasi o míso ma Nzámbe té !

4:3  O Minkandá bakomí níni ? Abaráma ayambákí Nzámbe, yangó wâná Nzámbe akómísí yě moto wa bosémbo.

4:4  Bakokabelaka moto wa mosálá likabo té, bakofútaka yě lifúta.

4:5  Kasi sókó moto atíí motéma na Oyo akokómisa mosúmuki moto wa bosémbo, atâ asálí mosálá té, Nzámbe akotála yě lokóla moto wa bosémbo mpô ya boyambi bwa yě.

4:6  Sé bôngó Davídi atángákí moto wa esengo moto óyo akómí moto wa bosémbo o míso ma Nzámbe, atâ atálí misálá mya yě té :

4:7  Esengo na baye Nzámbe alímbísí bangó mabé basálákí, mpé na baye akundí masúmu ma bangó.

4:8  Esengo na moto óyo Nzámbe atálí yě lokóla moto wa masúmu té.

4:9  Bôngó, bobélé bato bakátísí nzóto bakozala na esengo, tǒ mpé baye bakátísí nzóto té ? Tolobákí mpô ya Abaráma : Nzámbe akómísí yě moto wa bosémbo mpô ya boyambi bwa yě.

4:10  O ntángo níni yangó esálémákí ? Ntángo basílákí kokáta yě nzóto, tǒ naíno bakátákí yě nzóto té ? Ezalákí libosó ’te bákáta yě nzóto, nsima té.

4:11  Na nsima bakátí yě nzóto lokóla elembo ’te akómí moto wa bosémbo mpô ya boyambi bozalákí na yě ntángo bakátákí yě naíno nzóto té. Bôngó akómí tatá wa bato bánso bayambí Nzámbe, atâ bakátí bangó nzóto té : Nzámbe akómísí bangó bato ba bosémbo.

4:12  Akómí mpé tatá wa baye bánso bakátísá nzóto, baye bakotálaka bobélé elembo êná ya nzóto té, kasi bakolandaka nzelá ya boyambi bwa tatá wa bísó Abaráma ntángo naíno bakátákí yě nzóto té.

4:13  Nzámbe alakélákí Abaráma na libótá lya yě ’te bakokóma bankóló ba mokili. Apésákí Abaráma elakó êná mpô ya Mobéko té, kasi mpô ya boyambi bwa yě.

4:14  Sókó bobélé bato bakotósaka Mobéko bakozwa bolámu boye Nzámbe alakélákí, boyambi bokómí mpámbá ; elakó Nzámbe alakélákí ekómí mpámba lokóla.

4:15  Etúmbu ekokí kozala bobélé sókó Mobéko mozalí ; kasi sókó Mobéko mozalí té, moto akokí kobúka bwangó té.

4:16  Bôngó, Nzámbe alakélákí bokonzi bwa mokili mpô ya boyambi, sé lokóla likabo. Yangó wâná elakó êná ekokí na bána bánso ba Abaráma : bobélé na baye té bakotósaka Mobéko, kasi mpé na baye bazalí na boyambi lokóla Abaráma, tatá wa bísó bánso.

4:17  Ekomámí mpé boye : « Nakómísí yǒ tatá wa bikólo biíké. » Azalí tatá wa bísó o míso ma Nzámbe, lokóla ayambákí ’te Nzámbe akokí kosé­kwisa bato mpé kozalisa bilóko biye bizalákí té.

4:18  Abaráma atíákí motéma na Nzámbe : atâ amóní nzelá sókí té, ayambí sé boyambi ; bôngó akómí tatá wa bato ebelé, lokóla Nzámbe alobákí : Libótá lya yǒ likozala libótá linéne.

4:19  Abaráma ayambí, abétí ntembe té, atâ amóní ’te akómí penepene na kokúfa, alingákí ákokisa mibú monkámá, mpé Sára akokákí kobóta lisúsu té.

4:20  Abaráma andimí elakó ya Nzámbe, abétí ntembe té, ayambí sé boyambi, mpé boyambi bwa yě bopésí yě ngúyá ya kokúmisa Nzámbe.

4:21  Andimí sôló ’te Nzámbe azalí na ngúyá ya kokokisa maye alakélákí.

4:22  Yangó wâná Nzámbe akómísí yě moto wa bosémbo o míso ma yě.

4:23  Awa bakomí o Minkandá ’te Nzámbe andimí yě mpô ya boyambi bwa yě, bakomí bôngó bobélé mpô ya yě mǒkó té,

4:24  kasi mpô ya bísó lokóla ; tokokóma bato ba bosé­mbo sókó toyambí Nzámbe, Oyo asékwísí Mokonzi wa bísó Yézu Krístu.

4:25  Bakabákí Yézu mpô ya masúmu ma bísó mpé asékwí mpô tókóma bato ba bosémbo.

Chapter 5

5:1  Awa tokómí bato ba bosémbo mpô ya boyambi, tokómí na bo­bóto bísó na Nzámbe mpô ya Mokonzi wa bísó Yézu Krístu.

5:2  Mpô ya boyambi akótísí bísó o bondeko bwa Nzámbe. Tofándí bô­ngó o bolingi bwa yě ; tozalí mpé na elíkyá ya sôló ’te akoyíngisa bísó o nkémbo ya yě.

5:3  Nabakísí boye : tokomíkúmisaka mpô ya malózí, mpô toyébí ’te malózí makozwela bísó moléndé ;

5:4  moléndé mokobótaka ezalela elámu, ezalela elámu ekobótaka elíkyá.

5:5  Moto azalí na elíkyá êná akobúngama té, mpô Nzámbe apésí bísó Elímo Sántu, óyo atóndísí mitéma mya bísó na bolingi bwa Nzámbe.

5:6  O elaká Nzámbe alakákí, Krístu awéí mpô ya bísó basúmuki, mpô tozalákí na ngúyá ya komíbíkisa té.

5:7  Kondima kokúfa mpô ya moto sémba ezalí mpási, mbele bakokí kondima kokúfa mpô ya moto malámu.

5:8  Yangó wâná Nzámbe amónísí bísó bolingi bwa yě, zambí Krístu awákí mpô ya bísó ntángo tozalákí naíno ba­súmuki.

5:9  Awa tokómí bato ba bosémbo mpô ya makilá ma Krístu, ntembe té, Krístu akobíkisa bísó mokolo Nzámbe akolakisa nkándá ya yě.

5:10  Tozalákí bangúná ba Nzá­mbe, kasi Nzámbe alímbísí bísó mabé mánso mpô ya liwá lya Mwána wa yě. Bôngó, áwa tozóngí o bondeko bwa yě, toyébí malámu ’te tokobíka mpô ya bomoi bwa yě.

5:11  Tóbakisa : tozwí lokúmu epái ya Nzámbe mpô ya Mokonzi wa bísó Yézu Krístu, óyo azóngísí bísó o bondeko bwa Nzámbe.

5:12  Lisúmu liyákí o mokili mpô ya mabé ma moto sé mǒkó, mpé lisúmu libótí liwá. Bôngó, bato bánso basengélí kowá, mpámba té, bánso basálí lisúmu.

5:13  Ntángo Mobéko mwa Móze mobimákí naíno té, bato bazalákí kosála masúmu ; kasi bazalákí kozwa etúmbu mpô ya masúmu té, zambí Mobéko mozalákí naíno té.

5:14  Nzókandé, bandá Adámu téé Móze bato bazalákí kowá, atâ baye basálákí lisúmu té lokóla Adámu, óyo abúkákí mobéko ; yě moto azalákí lokóla ndakisa ya Krístu, moto óyo asengélákí koyâ nsima.

5:15  Kasi mabé ma Adámu makokání na likabo lya Nzámbe té. Sôló, mpô ya mabé ma moto mǒkó, bato bánso basengélákí kowâ. Kasi bolámu bwa Nzámbe bolekí bonéne, mpé makabo ma yě maye mazwǎmí mpô ya moto mǒkó, Yézu Krístu, matóndí epái ya bato bánso.

5:16  Lisúsu : likabo liye lya Nzámbe lilekí na bonéne nyongo ya lisúmu eye to­zwákí mpô ya moto mǒkó. Mpô ya lisúmu lya moto mǒkó bato bánso bakitákí o likambo ; nzókandé mpô ya makabo ma Nzámbe bato bánso bakokóma bato ba bosémbo, atâ basálákí mabé míngi.

5:17  Ya sôló, mpô ya mabé ma moto mǒkó bato bánso basengélákí kowâ ; kasi mpô ya moto mǒkó, Yézu Krístu, bato bánso bazwí ngrásya enéne ya Nzá­mbe, bakómí bato ba bosémbo o míso ma yě, bakozwa mpé bomoi na bokonzi.

5:18  Tokokí koloba ’te mpô ya mabé ma moto mǒkó bato bánso bakitákí o likambo ; sé bôngó, mpô ya bosémbo bwa moto mǒkó bato bánso bakómí na bosémbo o míso ma Nzámbe, mpé bosémbo bôná bokozwela bangó bomoi.

5:19  Sé ndéngé yǒ kó : Mpô moto mǒkó abóyákí kotósa Nzámbe, bato bánso bakómákí basúmuki ; kasi mpô ya botósi bwa moto mǒkó, bato bánso bakokóma bato ba bosémbo o míso ma Nzámbe.

5:20  Ntángo Mobéko mobimí, mabé makómí míngi ; kasi áwa masúmu makómí ebelé, ngrásya ya Nzámbe ekómí koleka naíno.

5:21  Bôngó, lokóla masúmu mazalákí na ngúyá ya koboma bato, ngrásya ya Nzámbe bokoyêlaka bato bosémbo, bozalí na ngúyá ya kopésa bomoi bwa sékô mpô ya Mokonzi wa bísó Yézu Krístu.

Chapter 6

6:1  Bôngó, tóloba ’te tótíkala na masúmu mpô ’te Nzámbe ábakisela bísó ngrásya ? Sókí moké té !

6:2  Mpó ya maye matálí masúmu, tosílí tokúfí. Ndéngé níni tokokí kolanda mangó lisúsu ?

6:3  Bínó mǒkó boyébí malámu ’te mokolo tokúlákí batísimo ya Yézu Krístu, tokúlákí yangó mpô tókúfa na yě elo­ngó.

6:4  Bôngó, sókó na batísimo tokúfákí na yě elongó, tokundámákí mpé na yě elongó. Kasi áwa Tatá asékwísí Krístu na ngúyá ya yě, tosengélí kokóma na ezalela ya bomoi bwa sika.

6:5  Zambí lokóla tosangání na Krístu, áwa tokúfí lokóla yě akúfákí, tokosangana mpé na yě o nsékwa ya yě.

6:6  Tóyéba malámu : babomákí bomoto bwa bísó bwa kala o kurúse na yě elongó, mpô ’te nzóto ya bísó ya masúmu ékúfa mpé tózala baómbo ba lisúmu lisúsu té.

6:7  Ya sôló, moto akúfí azalí moómbo wa lisúmu lisúsu té.

6:8  Lokóla tokúfí na Krístu elongó, toyambí ’te tozalí na bomoi elongó na yě.

6:9  Toyébí ’te Krístu óyo asílí asékwí akokúfa lisúsu té, liwá likokí kosála yě lisúsu elóko té.

6:10  Na liwá lya yě asúkísí bokási bwa masúmu na mbala yǒ kó sékô. Bomoi bozalí na yě sikáwa bozalí bomoi sôló o míso ma Nzámbe.

6:11  Bínó bobélé bôngó : bóyéba ’te bosílí bokúfí o maye matálí masúmu. Kasi o míso ma Nzámbe bozalí na bomoi, mpô bozalí lisangá na Yézu Krístu.

6:12  Nzóto ya bínó, eye esengélí kokúfa, ékóma lisúsu moómbo wa lisú­mu té, bôngó bótósa lisúsu mpósá ebé ya nzóto té.

6:13  Bóndima lisúsu té ’te nzóto ya bínó ésálela mabé na lisúmu, kasi bómíbonzela Nzámbe lokóla bato babíkí o liwá ; bósála ’te nzóto ya bínó ésálela bosémbo mpô ya Nzámbe.

6:14  Lisúmu likokí kozala mokonzi wa bínó té, mpô bozalí baómbo ba Mobéko té, kasi bána ba bolingo ba Nzámbe.

6:15  Bôngó áwa tozalí lisúsu baó­mbo ba Mobéko té, kasi bána ba bolingo ba Nzámbe, tóloba ’te tokokí kosála masúmu ? Sókí moké té !

6:16  Boyébí ’te sókó bomípésí na moto mpô ya kosálela yě, bokómí baómbo ba moto óyo bozalí kotósa : sókó botósí lisúmu, bokosúka o liwá ; sókó botósí Nzámbe, bokokóma bato ba bosémbo o míso ma Yě.

6:17  Tótóndo Nzámbe, mpô bozalí lisúsu baómbo ba lisúmu té, kasi sikáwa bokómí kotósa na motéma mǒkó matéya ma sôló maye batéyákí bínó.

6:18  Bolongwí o boómbo bwa masúmu, sikáwa bokómí kosálela bosémbo.

6:19  Awa nazalí koloba na bato bataú, nakotángela bínó ndakisa ya bísó bato. Libosó bozalákí kokaba nzóto ya bínó bǒ baó­mbo na makambo ma bosóni ; maka­mbo ma bínó mazángákí bosémbo, koleka ndelo. Bómípésa sikáwa na bosémbo, mpô ’te bókóma basántu.

6:20  Ntángo bozalákí baómbo ba lisúmu, bozalákí na lotómo la kolanda nzelá ya bosémbo té.

6:21  Bozalákí kosála makambo mazalí koyókisa bínó nsóni sikáwa. Bôngó bozwákí níni ? Nsúka ya mangó, sé liwá.

6:22  Kasi sikáwa bolongwí o boómbo bwa lisúmu mpé bokómí basáleli ba Nzámbe, bozwí bôngó likabo lya bosántu ; mpé na nsúka bokozwa bomoi bwa lobíko.

6:23  Sôló, lifúta lya lisúmu, sé liwá ; kasi likabo Nzámbe akopésaka : bomoi bwa sékô mpô ya Krístu Yézu Mokonzi wa bísó.

Chapter 7

7:1  Bandeko, nalobí na bínó bato boyébí ntína ya mibéko : boyébí ’te moto asengélí kotósa mibéko bobélé ntángo azalí na bomoi.

7:2  Ndakisa : mwásí wa libála asengélí kotósa mibéko mya libála mikolo mínso mobáli wa yě azalí na bomoi. Kasi sókó mobáli awéí, akangémí na mibéko mya libála lisúsu té.

7:3  Sókó akómí na mobáli mosúsu ntángo mobáli wa yě azalí naíno na bomoi, bakobénga yě mwásí wa bo­káli. Kasi sókó mobáli akúfí, mwásí asengélí kotósa mibéko mya libála lisúsu té ; sókó babálí yě na mobáli mosúsu, bakobénga yě mwá­sí wa bokáli té.

7:4  Bandeko, bínó sé bôngó, bokangémí lisúsu na Mobéko té, mpô nzóto ya Krístu ekúfákí. Bozwí mokonzi mosúsu óyo asékwákí o bawá mpô ’te bísó tóbótela Nzámbe mbuma.

7:5  Ntángo tozalákí naíno baómbo ba nzóto, mpósá ya mabé ezalákí o nzóto ya bísó ; Mobéko mozalákí koyébisa bísó bôngó. Mpósá eye etíndákí bísó tósála mabé mpô tóbóta mbuma iye ikosúkisa bísó o liwá.

7:6  Kasi sikáwa tolongwí o boómbo bwa Mobéko, zambí tokúfí o maye matálí nzóto, eye ezalákí kokanga bísó o boómbo. Totíkí kosálela Nzámbe na ndéngé ya kala lokóla ekomámí o Mobéko, tozalí kosálela yě na ndéngé ya sika lokóla Elímo akolakisaka bísó.

7:7  Bôngó, tóloba ’te Mobéko mwa Móze mokómí ndé lisúmu ? Sókí moké té ! Sé mpô ya Mobéko nayébákí níni ezalí lisúmu. Mobéko motíndí ’Olúla té’ ; sókó Mobéko molobákí bôngó té, mbele nayébákí té ’te kolúla ezalí mabé.

7:8  Bôngó mpô ya Mobéko lisúmu lizwákí nzelá ya kotínda ngáí nálúla mabé ndéngé na ndéngé. Sókó Mobéko mozalákí té, mbele lisúmu lizalákí na ngúyá té.

7:9  Kala, ntángo Mobéko mozaláká té, ngáí nazalákí na bomoi. Kasi ntá­ngo Mobéko mobimí, lisúmu likómí na ngúyá,

7:10  mpé nakómí lokóla moto akúfí. Mobéko batíndákí mpô ya kopésa bomoi, moyélí ngáí liwá.

7:11  Mpámba té, mpô ya Mobéko lisúmu lizwí ngúyá ya kosénginya ngáí, mpé ya koboma ngáí.

7:12  Sôló, Mobéko mozalí mosántu mpé mokotíndaka sé mitíndo misá-ntu mpé milámu.

7:13  Mobéko, elóko elámu, ekómélí ngáí ndé ntína ya liwá ? Sókí moké té ! Mobéko mozalí malámu, kasi na elóko elámu, yangó ndé Mobéko, lisúmu liyélí ngáí liwá, mpé lilakísí bôngó ’te lizalí lisúmu sôló. Masúmu mazwí ngúyá ya ko­ngala makási sé mpô ya Mobéko.

7:14  Toyébí ’te Mobéko moútí na Nzámbe, kasi ngáí nazalí moto motaú, moómbo wa lisúmu.

7:15  Ya sôló, maye nakosálaka, nayébí ntína ya mangó té : maye nalingí kosála, nakosálaka mangó té, nzókandé nakosálaka maye nakobóyaka.

7:16  Bôngó, sókó nasálí maye nalingí té, nandimí ’te Mobéko mozalí molámu.

7:17  Yangó wâná emónóní ’te ngáí moto nakosálaka bôngó té, bobélé lisúmu lizalí o motéma mwa ngáí likosálaka yangó.

7:18  Sôló, nayébí ’te bosémbo bozalí na ngáí sókí té, nazalí koloba sé mpô ya nzóto. Atâ nayókí mpósá ya kosála malámu, nakokí kosála mangó té.

7:19  Yangó wâná, malámu maye nalingí kosála, nakosálaka mangó té, mpé mabé maye nalingí kosála té, nakosálaka mangó.

7:20  Bôngó, sókó nasálí likambo nalingí té, elakísí ’te ezalí ngáí té moto nasálí lyangó, kasi lisúmu liye lifándí o nzóto ya ngáí.

7:21  Yangó wâná, namóní ’te ntángo nalingí kosála malámu, mpósá ya kosála mabé eyélí ngáí.

7:22  Na motéma mwa ngáí nakosepelaka mobéko mwa Nzámbe míngi.

7:23  Kasi nayókí mpósá o nzóto ya ngáí ezalí kobunda etumba na mobéko moye nandimí na mayéle ma ngáí ; mpósá êná ekokómisaka ngáí moómbo wa lisúmu lifándí o nzóto ya ngáí.

7:24  Aá, ngáí moto wa mawa ! Náni akobíkisa ngáí o boómbo bwa nzóto eye ezalí koyêla ngáí liwá ?

7:25  Tótóndo Nzámbe mpô ya Yézu Krístu Mokonzi wa bísó ! Mayéle ma ngáí makotíndaka ngáí nátósa mobéko mwa Nzámbe, kasi nzóto ya ngáí ekotíndaka ngáí nátósa mobéko mwa lisúmu.

Chapter 8

8:1  Yangó wâná, baye basangání na Krístu Yézu bakokita o likambo lisúsu té.

8:2  Tozwí ngúyá ya Elímo Sántu, óyo apésí bísó bomoi o Yézu Krístu. Ngúyá eye ebíkísí bísó o boómbo bwa mobéko moye mokwêísákí bísó o lisúmu mpé o liwá.

8:3  Eye Mobéko mokokákí kosála té, mpô ya botaú bwa bato, Nzámbe moto asálí yangó : atíndákí Mwána wa Yě ábótama na nzóto, lokóla nzóto ya basúmuki. Asúkísí bôngó makási ma lisúmu o nzóto ya bísó

8:4  mpô tókokisa maye Mobéko motíndí, zambí tokolandaka lisúsu makambo ma nzóto té, kasi ma Elímo Sántu.

8:5  Bato bakolandaka nzóto, balingí makambo maye nzóto ekolukaka ; baye bakolandaka nzelá ya Elímo, bakokanisaka maye Elímo Sántu akolingaka.

8:6  Nsúka ya maye nzóto elingí, sé liwá ; nsúka ya maye Elímo alingí, bomoi mpé bobóto.

8:7  Baye bakokanisaka sé maye makosepelisa nzóto bakolingaka Nzámbe té, babóyí kotósa mobéko mwa Nzámbe, bakokí kotósa yě té.

8:8  Bato bakolandaka makambo ma nzóto bakokí kosepelisa Nzámbe té.

8:9  Kasi bínó bozalí baómbo ba nzóto té, bozalí bato ba Elímo, zambí Elímo wa Nzámbe afándí o mitéma mya bínó. Moto azalí na Elímo wa Krístu té, azalí moto wa yě té.

8:10  Sôló, nzóto esengélí kokúfa mpô ya masúmu, kasi sókó Krístu afándí o mitéma mya bínó, Elímo akopésa bínó bomoi, zambí bosílí bokómí bato ba bosémbo o míso ma Nzámbe.

8:11  Ya sôló, sókó Elímo wa Nzámbe óyo asékwísí Yézu o bawá azalí na bínó, bobélé Nzámbe óyo asékwísí Krístu Yézu akosé­kwisa mpé nzóto ya bínó nsima ya liwá. Akosála bôngó na ngúyá ya Elímo wa yě, óyo afándí o mitéma mya bínó.

8:12  Bôngó, bandeko ba ngáí, tozalí na nyongo, kasi ya nzóto té, mpô tóla­nda makambo ma nzóto.

8:13  Mpô, sókó bolandí makambo ma nzóto, bokokúfa ; kasi sókó na ngúyá ya Elímo Sántu botíkí makambo ma nzóto, bokozala na bomoi.

8:14  Baye bánso bandimí ’te Elímo wa Nzámbe ákamba bangó, bazalí bána ba Nzámbe.

8:15  Elímo óyo bo­zwí akómísí bínó baómbo té mpô ’te bóbá­nga lisúsu. Akómísí bínó bána ba Nzá­mbe, yangó wâná tokokí kobénga yě ‘Aba ! Tatá !’

8:16  Elímo yě mǒkó apésí bísó mayéle, ayébísí bísó ’te tozalí bána ba Nzámbe.

8:17  Mpé sókó tozalí bána, tokozwa mpé makabo ma Nzá­mbe, tokozwa mangó lisangá na Krístu, zambí áwa tozalí koyóka mpási elongó na yě, tokozwa mpé nkémbo elongó na yě.

8:18  Namóní ’te malózí mánso tokoyókaka sikáwa makokání atâ moké té na nké­mbo eye Nzámbe akolakisa bísó nsima.

8:19  Zambí, na mpósá enéne bikelámo bínso bizalí kozila mokolo bána ba Nzámbe bakomónono.

8:20  Sôló, bikelámo bínso sókó bikómí lokóla bilóko mpámba, bya­ngó mǒkó bilingákí bôngó té, Nzámbe moto akánákí bôngó. Kasi bikelámo bizángí elíkyá té :

8:21  bikobíka o boómbo bwa liwá, biko­zwa mpé bonsómí na lokúmu la bána ba Nzámbe.

8:22  Ya sôló, toyébí ’te téé sikáwa bikelámo bínso bizalí kokímela mpé koyóka mpási lokóla mwásí alingí ábóta.

8:23  Bobélé bya­ngó bizalí kokímela té, ná mpé bísó lokóla, atâ tozwí Elímo lokóla likabo lya libosó lya Nzámbe, tozalí kolela o mitéma, áwa tozalí kozila naíno mokolo Nzámbe akokómisa bísó bána ba yě mpenzá mpé akobíkisa nzóto ya bísó o boómbo.

8:24  Tosílí tobíkí ! Ezalí ntína ya elíkyá ya bísó. Moto asílí kozwa elóko azalí lisúsu na elí­kyá té ’te akozwa yangó : náni akokí ndé kolíkya elóko eye asílí azwí ?

8:25  Lokóla tozalí kolíkya maye tomóní naíno té, tozalí kozila mangó na moléndé.

8:26  Sé bôngó, Elímo Sántu akoyáka kosálisa bísó bato tozángí makási, mpô bísó mǒkó toyébí kosámbela malámu té. Elímo yě méí azalí kosámbelela bísó na bobóndeli mpenzá na maloba maye moto mǒkó akokí koloba té.

8:27  Mpé Nzámbe óyo akomónoko mitéma mya bato, ayébí maye Elímo alingí ; Elímo akobó­ndelaka Nzámbe mpô ya bísó basántu, lokóla Nzámbe yě mǒkó alingí.

8:28  Toyébí ’te Nzámbe akosálisaka baye balingí yě, bázwa bolámu o makambo mánso ; yě mǒkó aponí bangó lokóla akánákí út’o kala.

8:29  Ya sôló, áwa ayébáká bangó út’o kala, aponókí bangó bázala loléngé la Mwána wa yě, mpô ’te Krístu ázala Mwána wa libosó o ntéi ya bandeko ebelé.

8:30  Awa aponókí bangó libosó, abyángákí bangó ; mpé áwa abyángákí bangó, akómísákí bangó bato ba bosémbo o míso ma yě ; mpé baye bakómí bato ba bosémbo, akémbísí bangó.

8:31  Tóloba lisúsu níni ? Lokóla Nzá­mbe alingí bísó, náni akokí kosála bísó mabé ?

8:32  Nzámbe ayókélákí atâ Mwána wa yě mǒkó mawa té, kasi akabákí yě mpô ya bísó bánso. Bô­ngó, áwa akabí Mwána wa yě, akopésa bísó malámu mánso té, sôló ?

8:33  Náni akofúnda baye Nzámbe aponí ? Moto mǒkó te, mpô Nzámbe akómísí bangó bato ba bosémbo.

8:34  Náni akokí kokitisa bangó o likambo ? Moto mǒkó té, mpô Yézu Krístu, óyo akúfákí mpé asé­kwí, afándí o lobóko la mobáli la Nzámbe mpé azalí molobeli wa bísó.

8:35  Elóko níni ekokabola bísó na bolingi bwa Krístu ? Malózí ? Nsómo ? Minyóko ? Nzala ? Bobóla ? Likáma tǒ liwá ?

8:36  Lokóla ekomámí o Minkandá Misántu : « Mpô ya yǒ liwá likokánelaka bísó mikolo mínso, bakosálaka na bísó lokóla na mpatá ya koboma. »

8:37  Kasi tokolónga maye mánso mpô ya Nzámbe óyo akolingaka bísó.

8:38  Ya sôló, nayébí malámu ’te elóko atâ níni, ézala liwá tǒ bomoi, ézala bǎnzelú tǒ bilímo bibé, ézala makambo ma leló tǒ maye makoyâ nsima,

8:39  ézala ngúyá ya likoló tǒ ya nsé, ézala atâ ekelámo níni ekokoka kokabola bísó na bolingi bwa Nzámbe té, zambí Nzámbe alakísákí bolingi bwa yě, boye bomónóní o Mokonzi wa bísó Yézu Krístu.

Chapter 9

9:1  Maye nakoyébisa bínó mazalí ma sôló. Krístu ayébí ’te nazalí kokósa té, Elímo ayébísí ngáí mangó o motéma.

9:2  Nazalí na mawa míngi, nakoyókaka motéma mpási ntángo ínso.

9:3  Mbele epusí malámu Nzámbe ápésa ngáí mǒkó etúmbu, nákabwana mosíká na Krístu mpô ya bandeko ba ngáí, baye bazalí na ngáí ekólo yǒ kó.

9:4  Bazalí bato ba Israél, Nzámbe akómísákí bangó bána ba yě, alakísákí bangó nkémbo ya yě. Akátákí na bangó bondeko mpé apésákí bangó mibéko. Alakísákí bangó milúlú mya losámbo la sôló, apésákí bangó elakó ya libíkí.

9:5  Bazali bána ba bankóko ba bísó ba kala. Na nsima Krístu, óyo alekí bínso, abótámí o libótá lya bangó. Bákúmisa yě Nzámbe o bileko bínso sékô ! Amen.

9:6  Nzókandé liloba lya Nzámbe likeí mpámba té : bána ba Israél baponómí bánso na Nzámbe té.

9:7  Mpé atâ baye bánso babótámí o libótá lya Abaráma bazalí bána ba yě té, zambí ekomámí : Bobélé baye bazalí bána ba Izáka, bangó bato bazalí bána ba yǒ.

9:8  Elakísí ’te bána bánso ba Abaráma bazalí bána ba Nzámbe té, bobélé bána baponómí mpô ya elakó bazalí bána ba Nzámbe.

9:9  Nzámbe alakélákí Abaráma na maloba maye : Nakoyâ o ntángo ekokí, mpé Sára akobóta mwána mobáli.

9:10  Mpé esílí naíno té : Bána babáli bábalé baye Rebéka abótákí, bazalákí bána ba tatá mǒkó Izáka, óyo azalí nkóko wa bísó.

9:11  Atâ bána babótámákí naíno té, atâ basálákí naíno malámu tǒ mabé té, Nzámbe alobákí na Rebéka : Mwána wa libosó akosálela mozimi wa yě.

9:12  Nzámbe alakísí bôngó ’te akoponoko bobélé lokóla yě mǒkó alingí. Akolukaka bobélé baye yě mǒkó abyángí, akotálaka misálá mya bangó té.

9:13  Ekomámí bôngó o Minkandá Misántu : Nali­ngákí Yakób leká Ezáu.

9:14  Bôngó tóloba ’te Nzámbe azá­ngí bosémbo ? Sókí moké té !

9:15  Mpô alobákí na Móze : Oyo nalingí koyókela yě mawa, nakoyókela yě mawa ; sókó nalingí kosála moto malámu, nakosála yě malámu.

9:16  Yangó elekí maye moto akokí kolinga tǒ kosála, etálí sé Nzámbe óyo akoyókelaka bato mawa.

9:17  Eko­mámí o Minkandá Misántu ’te Nzámbe alobákí na Fárao boye : Natíákí yǒ mokonzi bobélé mpô ’te názwa nzelá ya kolakisa bokási bwa ngáí ; bôngó bato bákúmisa nkómbó ya ngáí o nsé mobimba.

9:18  Yangó wâná, sókó Nzámbe alingí, ayókélí moto mawa ; sókó alingí, akómísí yě motó makási.

9:19  Mbele okotúna ngáí : Sókó ezalí bôngó, ntína níni Nzámbe akosilikaka ? Náni akokí kobóya maye Nzá­mbe alingí ?

9:20  Moto, yǒ ndé náni ’te ótía ntembe na Nzámbe ? Elóko yǒ osálí ekokí ndé kotúna yǒ : Mpô níni osálí ngáí bôngó ?

9:21  Kanísá mosáli mbéki : akosálaka mbéki ya monzele tǒ mbéki ya mpá­mba, bôngó akokí kokémbisa yangó té lokóla yě mǒkó alingí ?

9:22  Nzámbe alingákí kolakisa nkándá mpé ngúyá ya yě : mikolo míngi mpenzá akangákí motéma na botáli mbéki iye ikómí ya kobwáka.

9:23  Asálákí bôngó mpô ya kolakisa nkémbo ya yě ndelo té na mbéki iye abongísákí út’o kala mpô ya koké­mbisa yangó.

9:24  Mbéki iye izalí bísó bato tobyángámí o ntéi ya ba-Yúda, kasi o ntéi ya bikólo bisúsu lokóla.

9:25  Elobámí bôngó o búku ya Ozéa : Ekólo eye ezalákí ya ngáí té, na­kotá­nga yangó ekólo ya ngáí, mpé baye na­zalákí kolinga té, nakolinga bangó.

9:26  Mpé o esíká bayébísákí bangó : « Bozalí bato ba ngáí té », bakotánga bangó bána ba Nzámbe wa bomoi.

9:27  Mpé Izáya asakólí mpô ya Israél : Atâ bána ba Israél bazalákí míngi lokóla zélo lya libóngo lya mbú, sé mwâ ndámbo ya bangó bakobíka ;

9:28  zambí Mokonzi akokokisa liloba lya yě o mo­kili, mobimba mpé nokí.

9:29  Mpé lokóla Izáya alobákí libosó : Sókó Mokonzi wa bokási bónso atíkéláká bísó mwâ ndámbo ya bána té, mbele tokómáká lokóla bato ba Sódoma, mbele tozaláká lokóla bato ba Gómora.

9:30  Bôngó, tóloba níni ? Bato ba bikólo bisúsu baye bazalákí koluka ’te bákóma bato ba bosémbo o míso ma Nzámbe, basílí bakómí bato ba bosémbo mpô ya boyambi.

9:31  Kasi ba-Israél bazalákí koluka Mobéko mokokí kokómisa bangó bato ba bosémbo, bakokísí ntína ya Mobéko môná té.

9:32  Ntína níni ? Mpô bazalákí kolanda nzelá ya bosémbo té ; bakanísákí ’te bakokóma bato ba bosémbo na botósi Mobéko. Batútákí libakú na libángá liye likokwêisaka bato,

9:33  lokóla ekomámí : Nakotía libángá o Síon, libá­ngá linéne likokwêisaka bato. Kasi moto akotía motéma na lyangó, akoyóka nsóni té.

Chapter 10

10:1  Bandeko, nakolíkya na motéma mobimba mpé nabó­ndélí Nzámbe mpô ’te ba-Yúda bábí­ka.

10:2  Nandimí sôló ’te bakosá­lelaka Nzá­mbe na moléndé, kasi bayébí té ndé­ngé níni basengélí kosá­la yangó.

10:3  Awa babóyákí kondima ’te bobélé Nzá­mbe akokómisaka bato bato ba bosémbo, bamekákí kokóma bato ba bosémbo na makási ma bangó mǒkó, mpé babóyákí komípésa na bosémbo bwa Nzámbe,

10:4  zambí Krístu asúkísákí Mobéko : baye bánso bakoyamba yě bakokóma bato ba bosémbo.

10:5  Mpô ya bosémbo bokozwama na botósi Mobéko, Móze akomáká : Moto akotósa Mobéko, akobíka na mwangó.

10:6  Kasi mpô ya bosémbo bokokí kozwama o nzelá ya boyambi, bakomákí boye : Tíká komítúna : Náni akobuta o likoló ? Bôngó Krístu akití naíno áwa o nsé té ?

10:7  Omítúna mpé té : Náni akokita o límfelo ? lokóla ’te : Krístu asengélí naíno kotómbwama út’o mbóka ya bawá.

10:8  O Minkandá Misántu bali­ngí kolakisa níni na maloba maye ? Liloba lya Nzámbe lizalí penepene na yǒ, o monoko mwa yǒ mpé o motéma mwa yǒ. Ezalí sé Liloba liye tozalí koyamba mpé kosakola.

10:9  Sókó osakólí ’te Yézu azalí Mokonzi, mpé sókó oyambí o motéma ’te Nzámbe asékwísí yě o bawá, okobíka.

10:10  Ya sôló, sókó oyambí Liloba o motéma, Nzámbe akokómisa yǒ moto wa bosémbo ; sókó osakólí lyangó, akobíkisa yǒ.

10:11  Ekomámí o Minkandá : Moto akoyamba Nzámbe, akoyóka nsóni té.

10:12  Yangó wâná ba-Yúda ná bato ba bikólo bi­súsu bakeséní té : bánso bazalí na Mokonzi sé mǒkó, óyo akokabaka makabo ma yě na moto nyónso akobóndela yě,

10:13  zambí moto nyó­nso akobóndela nkómbó ya Mokonzi akobíka.

10:14  Kasi ndéngé níni bábóndela Mokonzi, sókó bayambí yě té ? Ndéngé níni báyamba yě, sókó bayókí naíno nsango ya yě té ? Ndéngé níni báyóka nsango ya yě, sókó mosakoli azalí té ?

10:15  Mpé ndéngé níni moto ásakola, sókó batíndí yě té ? Yangó wâná ekomámí o Minkandá Misántu : Esengo mpenzá ya komóno bantóma bayéí kosangela Nsango Elámu !

10:16  Kasi bánso batósí Nsango Elámu té, lokóla Izáya alobákí : Mokonzi, náni andimákí matéya ma bísó ?

10:17  Ya sôló, bobélé óyo ayókí Nsango, akokí koyamba yangó, mpé Nsango êná azwí yangó mpô ya liloba lya Krístu.

10:18  Tíká nátúna : Ba-Israél bayókákí nsango êná té ? Ntembe té, bayókákí yangó, zambí bayókákí mingóngó mya basakoli o nsé mobimba, maloba ma bangó mayókánákí kín’o nsúka ya mokili.

10:19  Nátúna naíno : Mbele ba-Israél batongólókí ntína ya nsango êná té ? Móze asílí alobákí : Nakosála ’te bóyókela bato bazángí ekólo zúwa, nakoyókisa bínó nkándá mpô ya ekólo ya bato bazángí mayéle.

10:20  Mpé Izáya abá­ngákí té kobakisa boye : Bato balukákí ngáí té, bamóní ngáí. Bato batúnákí ngáí elóko té, namílakísí na bangó.

10:21  Kasi mpô ya ba-Israél alobí boye : Mói mobimba natandákí mabóko mpô ya koyamba bato babóyákí koyamba mpé kotósa.

Chapter 11

11:1  Natúní lisúsu : Bôngó Nzámbe abóyí ndé ekólo ya yě ? Sókí moké té ! Ngáí mǒkó nazalí mo-Israél, nkóko wa Abaráma, wa libótá lya Benyamin !

11:2  Nzámbe aponókí bato ba yě út’o ebandela, abóyí bangó té. Bókanisa maloba ma Minkandá Misántu esíká Elía afúndí ba-Israél epái ya Nzámbe :

11:3  « Mokonzi, babomí baproféta ba yǒ, babúkíbúkí altáre ya yǒ. Tálá, natíkálí ngáí mǒkó, mpé balingí koboma ngáí. »

11:4  Bôngó Nzámbe ayanólákí yě níni ? Nabátélí bato nkóto nsambo bázala ba ngáí mpenzá, baye bakúmbámélákí Baal té.

11:5  Bôngó téé leló mwâ ndámbo ya bato etíkálí. Nzámbe aponí bangó mpô ya bolámu bwa yě.

11:6  Aponí bangó mpô ya bolámu bwa yě, mpô ya misálá mya bangó té. Sókó aponókí bangó mpô ya misálá mya bangó, bolámu bwa Nzámbe bolingákí kozala bolámu bwa sôló té.

11:7  Bôngó, tóloba níni ? Elóko bazalákí koluka, ba-Israél bánso bazwí yangó té. Bobélé baye Nzámbe aponí, bazwí yangó. Basúsu bánso bakómákí mitó makási,

11:8  lokóla ekomámí o Minkandá Misántu : Nzámbe alembísákí mayéle ma bangó. Téé leló bazalí komóno na míso té, mpé bazalí koyóka na matói té.

11:9  Davídi mpé alobákí : Bilóko bya bangó bya kolía bíkóma kotíela bangó motámbo mpé monyámá, bí­kwêisa bangó mpô ’te bázwa etú­mbu.

11:10  Míso ma bangó mákúfa, bámó­no lisúsu té ; mpé sálá ’te bázalaka baómbo ntángo ínso.

11:11  Natúní mpé boye : Awa batútákí libakú, bakwéí ndé libélá ? Sókí moké té ! Kasi áwa bakwéí, bato ba bikólo bisúsu bazwí nzelá ya kobíka mpô ’te ba-Israél báyókela bangó zúwa.

11:12  Lokóla bato ba nsé mobimba bazwí bolámu mpô ya masúmu ma ba-Israél, mpé lokóla basúsu babíkí mpô ba-Israél bakití, esengo ekoleka mpenzá mokolo ba-Yúda bánso bakoyamba libíkí !

11:13  Nayébísí bínó bato bozalákí libosó bapagáno : ya sôló, nazalí apóstolo epái ya bapagáno, mpé nakosálaka mosálá mwangó na motéma mǒkó.

11:14  Nalingí ’te bato ba ekólo ya ngáí báyókela bínó zúwa, bôngó, na mosálá mwa ngáí, Nzámbe ábíkisa basúsu ba bangó.

11:15  Awa Nzá­mbe atíákí ba-Yúda mpembéni, azóngísí bondeko na bikólo bisú­su, yangó wâná o eleko akoyamba ba-Yúda lisúsu, bato baye bakúfákí bakozwa bomoi.

11:16  Sókó límpa lya libosó babonzélí Nzámbe likómí lisántu, mámpa masúsu mánso makómí mámpa masántu. Sókó ntína ya nzeté ezalí esántu, bitápi bya yangó bizalí mpé bisántu.

11:17  Awa bakátí bitápi bisúsu bya nzeté mpé bapikí yǒ, etápi ya nzeté ya olíva ya zámba, o mobí­mbí mpô ’te ntína ya nzeté éléisa yǒ,

11:18  ómíkúmisa té o míso ma bitápi biye bikátémí. Okokí komíkúmisa té, zambí yǒ ozalí koléisa ntína ya nzeté té, ntína moto ezalí koleísa yǒ.

11:19  Mbele okoloba : ‘Bakátí bitápi mpô ’te bátía ngáí o esíká êná’.

11:20  Olobí malámu. Bakátákí byangó zambí bizángákí boyambi, mpé yǒ otíkálí mpô ya boyambi bwa yǒ ; kasi tíká komíkúmisa, ózala sé na bobángi.

11:21  Lokóla Nzámbe akátákí bitápi bya libosó, kébá ’te ákáta yǒ mpé té.

11:22  Yangó wâná ókanisa bolámu bwa Nzámbe, ókanisa mpé nkándá ya yě : nkándá ya yě ôná baye bakwéí, bolámu bwa yě ôná yǒ sókó otíkálí o bondeko bwa yě. Sókí bôngó té, akolongola yǒ lokóla.

11:23  Mpé bangó, sókó babóngólí mitéma mpé bayambí, Nzámbe akozó­ngisa bangó o nzeté ; azalí na ngúyá ya kosála yangó.

11:24  Kanísá : Yǒ etápi ya nzeté ya olíva ya zámba, balo­ngólákí yǒ o nzeté eye ebimísákí yǒ, mpé bapikí yǒ o mobímbí mwa nzeté elámu ya olíva eye ebimísákí yǒ té. Bôngó mpô ’te bázóngisa bitápi biye bibimákí o nzeté êná o mobímbí mobimísákí byangó, ekozala mpási té ?

11:25  Bandeko, nalingí ’te bóyéba mobómbamo mǒkó mpô ’te bómíkúmisa té na mayéle ma bínó : ndámbo ya ekólo ya Israél ekolakisa motó makási téé mokolo bato ba bikólo bisúsu bakoyíngela (o Eklé­zya).

11:26  Bôngó ba-Israél bánso bakobíka, lokóla ekomámí : Mobíkisi akoúta o Síon, akolongola masúmu o libótá lya Yakób.

11:27  Tálá, nakokáta na bangó bondeko mokolo nakolongola masúmu ma bangó.

11:28  Ya sôló, áwa bínó boyambí Nsango Elamú, ba-Yúda bakómí bangúná ba Nzámbe. Kasi lokóla Nzámbe aponókí bangó, bazalí sé bána ba yě ba bolingo mpô ya elaká alakélákí bankóko ba bangó.

11:29  Makabo Nzá­mbe apésí, akobótola mangó té ; moto yě abyángí, akobóya yě té.

11:30  Kala bínó bato ba bikólo bisúsu bozalákí kotósa Nzámbe té, kasi sikáwa Nzámbe ayókélí bínó mawa, zambí ba-Yúda bazalí kotósa yě té.

11:31  Sé bôngó : sikáwa ba-Yúda bazalí kotósa Nzámbe té, mpô Nzámbe ayókélí bínó mawa. Na nsima akoyókela mpé bangó mawa.

11:32  Ya sôló, áwa bato bánso babóyí kotósa yě, Nzámbe andimákí ’te bákóma lokóla bato ba bolóko, mpô ’te bangó bánso bábíka bobélé mpô ya ngolu ya yě.

11:33  Bókanisa naíno bonéne bwa bwányá mpé boyébi bwa Nzámbe ! Ndéngé yě akobongisaka makambo tǒ ndéngé yě akosálaka : moto mǒkó akokí koyéba yangó té !

11:34  Náni ayébí makanisi ma Mokonzi Nzámbe ? Náni apésákí yě malako ?

11:35  Náni akabélákí yě atâ mwâ elóko, mpô ásénge Nzámbe ’te áfúta yě ?

11:36  Zambí bínso biútí na yě, bikelámí na yě, mpé bizalí bya yě. Nkémbo na yě o bileko bínso sékô ! Amen.

Chapter 12

12:1  Bandeko, nabóndélí bínó mpô ya ngolu ya Nzámbe : bómíbonza na Nzámbe bǒ libonza lya sôló, libonza lisántu likosepelisaka Nzámbe. Bókúmisa yě bôngó na losámbo bǒ ebongí.

12:2  Bólanda ezalela ya bato ba nsé eye té, kasi bókóma bato ba mayéle ma sika, na mitéma mya sika. Bôngó bokoyéba níni Nzámbe alingí bósála, níni ezalí malámu mpé ekosepelisa yě, mpé níni ebongí nyé mpenzá.

12:3  Mpô ya ngrásya Nzámbe apésí ngáí, nayébísí mǒkó mǒkó wa bínó bánso : Bótíka loléndo ! Moto mǒkó ámítómbola té ! Moto na moto ámíyéba sé lokóla Nzámbe akabélí yě makabo ma boyambi.

12:4  Nzóto ezalí na binama biíké, mpé enama yǒ kó yǒ kó ezalí na mosálá mwa yangó ;

12:5  na bísó sé bôngó : tozalí bato baíké, kasi tozalí nzóto sé yǒ kó o Krístu ; bísó bánso tozalí biténi bya nzóto, moto na moto na loléngé la yě.

12:6  Tozwí mpé makabo ndéngé na ndéngé, sé lokóla Nzámbe akabélí bísó mangó. Sókó ozwí likabo lya kosakola, sakólá sé lokóla eyamba etíndí.

12:7  Sókó ozwí likabo lya kosálisa báníngá, sálísá bangó malámu ; sókó ozwí likabo lya kotéya, téyá malámu ;

12:8  sókó ozwí likabo lya koléndisa bato, léndísá bangó. Moto alingí kokabela móníngá elóko, ákaba yangó na motéma mǒkó. Moto azalí na bokonzi, áyángela bato na mpíkó ; óyo akosálisaka bato ba mawa, ásála yangó na esengo.

12:9  Bólinga báníngá na mitéma míbalé té, bóbóya makambo mabé, bólanda mambí malámu na moléndé.

12:10  Bólingana na motéma mǒkó ; moto na moto átála móníngá lokóla moto alekí yě na bolámu.

12:11  Bótía moléndé, bólembe té, bósálela Mokonzi na motéma mobimba.

12:12  Na esengo bótía elí­kyá na Nzámbe, bókanga mitéma o ntángo ya mi­nyóko, bólembe kosá­mbela té.

12:13  Bó­sálisa bandeko bakrístu bazalí kokélela, mpé bóyamba bampaya malámu o ndáko ya bínó.

12:14  Bósénge Nzámbe ’te ábenisa bato bakonyókoloko bínó ; bótó­mbela bangó sé mambí malámu, mabé té.

12:15  Bósepela elongó na bato bazalí koyóka esengo, bólela elo­ngó na baye bazalí koyóka mawa.

12:16  Bóyókana malámu bínó na bínó, bózala na loléndo té. Bósepela libosó maye mánso mazángí lokúmu. Bómímóno té lokóla bato ba mayéle.

12:17  Moto asálí bínó mabé, bózó­ngisela yě mabé té, kasi bóluka kosála maye makobongela bato bánso.

12:18  Bózala na bobóto na bato bánso ; bínó mǒkó bóbóya tǒ bó­bébisa bobóto té.

12:19  Bandeko ba bolingo, sókó basálí bínó mabé, bózóngisa mabé té, bótíka yangó o mabóko ma Nzámbe, mpô ekomámí o Minkandá : « Mokonzi alobí : Ngáí moto nakokáta makambo ma bato basálí mabé, ngáí mǒkó nakopésa etúmbu. »

12:20  Kasi sókó mongúná ayókí nzala, pésá yě bilóko álía. Sókó ayókí mpósá ya mái, pésá yě mái ámele. Sókó osálí bôngó, okoyókisa yě nsóni mpenzá.

12:21  Kébá ’te mabé málónga yǒ té, kasi ólónga mambí mabé na bosáli mambí malámu.

Chapter 13

13:1  Bínó bánso bótósa bato bakoyángelaka bínó, zambí bokonzi bónso boútí na Nzámbe : Nzámbe moto apésí bayángeli bokonzi.

13:2  Yangó wâná, moto abóyí kotósa bakonzi, abóyí mobéko mwa Nzámbe. Bato bakosálaka bôngó, bakomíkitisaka o likambo.

13:3  Bato bakosálaka malámu bakokí kobánga bakonzi té, bobélé bato bakosálaka mabé bakobánga bangó. Osála níni mpô ’te óbánga bakonzi té ? Sáláká sé malámu, mpé bakonzi bakokúmisa yǒ,

13:4  zambí Nzámbe atíí bangó mpô ya kolé­ndisa yǒ ’te ósála malámu. Kasi sókó osálí mabé, bángá sé bobángi, zambí bakonzi bakolátaka mompánga mpámba té. Nzámbe apésí bangó likokí lya kopésa bato babé etúmbu eye ekokí na bangó.

13:5  Bótósa bangó bobélé mpô ya bobángi etúmbu té, kasi bótósa bangó mpô mitéma mya bínó mizalí kotínda bôngó.

13:6  Bokofútaka mpáko na ntína êná té ? Zambí bato bakofútisaka mpáko bakosálelaka Nzámbe ntángo bazalí kokokisa misálá mya bangó.

13:7  Bópésa moto na moto elóko asengélí na yangó : moto akofútisaka mpáko, bófúta yě mpáko ; óyo ayéí kozwa mpáko ya bilóko, bofúta yě mpáko ya bilóko ; óyo azalí na bokonzi, bómemya yě ; óyo azalí na lokúmu, bókúmisa yě.

13:8  Bózala na nyongo na moto mǒ­kó té. Bozalí na nyongo sé yǒ kó : kolinga báníngá ! Moto alingí báníngá, atósí Mobéko mobimba,

13:9  zambí ekomámí o mibéko mya Móze : Osála bokáli té, óboma moto té, óyíba té, ólúla elóko ya móní­ngá té ; mpé mibéko misúsu mí­nso mitángémí na bokúsé o mobéko mǒkó : Olinga móníngá lokóla okomílingaka.

13:10  Moto alingí móní­ngá, akosála yě mabé té. Yangó wâná moto alingí báníngá ba yě sôló, azalí kotósa Mibéko mí­nso.

13:11  Bandeko, boyébí mpé ndéngé níni tokómí sikáwa ; ngonga ya kolongwa o mpongí ekokí. Sikáwa libíkí lya bísó likómí penepene, leká mokolo tobandákí koyamba.

13:12  Butú bolingí bósíla, ntóngó elingí étána. Yangó wâná tótíka mambí ma molílí, tósála misálá mikokí na mói.

13:13  Tózala na ezalela elámu lokóla bato bakosálaka na mói : tólía na lokósó té, tólángwa masanga té, tótíka mambí ma bosóni mpé ma mobúlú, tóswâna té, tóyókelana zúwa té.

13:14  Bólanda ezalela ya Mokonzi Yézu Krístu ; bópangana té na malúli ma motéma mpé na maye nzóto ekoyókaka mpósá.

Chapter 14

14:1  Moto azalí na boyambi bokási té, bóyamba yě malámu ; bówéla ntembe na yě té.

14:2  Mosúsu akanísí ’te akokí kolía bilóko bínso, mosúsu óyo azángí boyambi bokási, akolíaka bobélé ndúnda.

14:3  Bôngó moto akolíaka bilóko bínso ákínola mosúsu té óyo akomípímaka bilóko ; mpé óyo akomípímaka bilóko ásámbisa mosúsu té, óyo akolíaka bínso. Nzámbe alingí bangó bánso.

14:4  Yǒ ndé náni ’te ósá­mbisa mosáli wa moto mosúsu ? Atéleme tǒ ákwéya, etálí sé nkóló wa yě. Ntembe té, Mokonzi óyo azalí na ngúyá ya kosálisa yě, akotélemisa yě.

14:5  Mosúsu akokanisaka ’te mokolo mǒkó mokobongela yě leká mikolo misúsu ; mosúsu akokanisaka ’te mikolo mínso mizalí sé ndéngé yǒ kó. Moto na moto álanda makanisi ma motéma mwa yě.

14:6  Moto akokanisaka ’te mokolo mǒ­kó mokobongela yě leká mikolo misúsu, akosálaka bôngó mpô ya kokúmisa Mokonzi. Moto akolíaka bilóko bínso, akosálaka bôngó mpô ya Mokonzi, mpô akotóndoko Nzámbe. Mpé moto akolíaka bilóko bínso té, yě mpé akosálaka bôngó mpô ya Mokonzi ; yě mpé akotóndoko Nzámbe.

14:7  Ya sôló, mǒ­kó té azalí na bomoi mpô ya yě mǒkó, mpé mǒkó té akokúfa mpô ya yě mǒkó.

14:8  Kasi tozalí na bomoi mpô ya Mokonzi, tokokúfa mpé mpô ya Mokonzi : atâ tozalí na bomoi, atâ towéí, tozalí bato ba Mokonzi ;

14:9  zambí Krístu awéí mpé asékwí mpô ’te ázala Mokonzi wa baye bazalí na bomoi mpé wa baye bawá.

14:10  Kasi yǒ, ntína níni okosá­mbisaka móníngá ? Mpô níni okokínolaka móníngá ? Nzámbe akosá­mbisa bísó bánso,

14:11  mpô ekomámí boye : « Mokonzi alobí : Sôló, ngáí nazalí ! Bato bánso bakofukamela ngáí, bato bánso bakosakola nkémbo ya Nzámbe. »

14:12  Yangó wâná moto na moto akosámba epái ya Nzámbe mpô ya makambo ma yě mǒkó.

14:13  Bôngó tótíka kosámbisana ; kasi bókána kotíela móníngá libakú lyǒ­kó té, liye likokí kokwêisa yě tǒ kobénda yě o nzelá ya masúmu.

14:14  E­ngébéné na makanisi ma Mokonzi Yézu, nayébí sôló ’te elóko yangó mǒkó ezalí ekila té. Kasi sókó moto akanísí ’te elóko ezalí ekila, ekómélí yě ekila.

14:15  Sókó oléí elóko eye móníngá atálí lokóla ekila, mpé oyókísí yě bôngó mpási o motéma, olandí mobéko mwa bolingani té. Obébisa motéma mwa móní­ngá na bilóko bya kolía té, kanísá ’te Krístu akúfákí mpô ya yě !

14:16  Bókéba ’te báníngá bákóma kotóngo bínó té mpô ya biye bokolía,

14:17  zambí moto wa bokonzi bwa Nzá­mbe akopanganaka té na biye akolíaka tǒ akomeleke, kasi akopa-nganaka na bosémbo, na bobóto mpé na esengo, makabo ma Elímo Sántu.

14:18  Bobélé moto akosálelaka Krístu bôngó, akosepelisaka Nzámbe, mpé bato bakondima yě.

14:19  Yangó wâná, tólanda bobélé maye makopésa bato bobóto mpé makoléndisa boyókani.

14:20  Obébisa mosálá mwa Nzámbe té mpô ya bilóko bya kolía. Ya sôló, bilóko bínso bizalí péto, kasi moto apésí móníngá esímbisi sókó aléi byangó, asálí mabé.

14:21  Malámu ólía nyama té, ómele masanga té, ókila bilóko bínso bikokí koyókisa ndeko wa yǒ motéma mpási, tǒ bikokí kokwêisa tǒ kolembisa yě.

14:22  Maye ondimí mpô ya bilóko bya kolía, matálí sé bínó na Nzámbe. Esengo na moto óyo azalí kobánga o motéma té, ntángo azalí kosála maye yě mǒkó andimí.

14:23  Kasi moto aléí bilóko na ntembe o motéma, amíkitísí o likambo ; mpá­mba té, aléí na ntembe ; mánso asálí na ntembe mazalí masúmu.

Chapter 15

15:1  Bísó bato tozalí na boyambi bokási tosengélí kosálisa baye bazalí naíno na boyambi botaú ; tósála bobélé té maye makosepelisa bísó.

15:2  Moto na moto áluka malámu maye makosepelisa móní­ngá mpé makokólisa yě o boyambi.

15:3  Krístu mpé alukákí bolámu bwa yě mǒkó té, lokóla ekomámí o Minkandá Misántu : Mafínga ma baye bafíngí yǒ makwélí ngáí.

15:4  Mánso makomámáká kala, makomámí mpô ya kotéya bísó mpô tózala na elíkyá, zambí tokozwa moléndé mpé libóndí o maloba ma Minkandá Misántu.

15:5  Nzámbe óyo akoléndisaka mpé akobóndoko bísó ásálisa bínó mpô ’te bóyókana malámu, lokóla Krístu Yézu alakísákí bínó.

15:6  Bôngó motéma sé mǒkó, monoko sé mǒkó bókúmisa Nzámbe, Tatá wa Mokonzi wa bísó Yézu Krístu.

15:7  Mpô ya lokúmu la Nzámbe bóyambana malámu, lokóla Krístu ayambákí bínó.

15:8  Nayébísí bínó ya sôló, Krístu amíkómísákí mosáleli wa ba-Yúda mpô ya kolakisa ’te Nzámbe alingákí kokokisa bilakó biye alakélákí bankóko.

15:9  Bato ba bikólo bisúsu bákúmisa Nzámbe mpô ayókélí bangó mawa. Ekomámí bôngó o Minkandá : Yangó wâná nakokúmisa yǒ o bikólo bínso, mpé nakoyémbela nkómbó ya yǒ nzémbo.

15:10  Mpé lisúsu : Bato ba bikólo bínso, bósepela elongó na bato ba yě,

15:11  mpé lisúsu naíno : Bikólo bínso bíkúmisa Mokonzi, mpé bato bánso ba mokili bákémbisa yě.

15:12  Izáya mpé alobí : Moto akobótama o libótá lya Yése : akotéleme mpô ’te áyángela bikólo bínso. Bato ba bikólo bínso bakotía elíkyá na yě.

15:13  Nzámbe óyo apésákí bínó elíkyá, átóndisa bínó na esengo mpé na bobóto mpô ya boyambi bwa bínó, ákólisa mpé elíkyá êná na ngúyá ya Elímo Sántu.

15:14  Bandeko ba ngáí, nayébí malámu ’te bokokí kopésana malako, mpô bolingí kosála sé malámu, mpé boyébí maye Nzámbe alingí.

15:15  Nzó­kandé nakomí maloba masúsu ma monkandá moye makási mpô ’te bókundola maye batéyákí bínó. Nakomákí mangó zambí Nzámbe apésí ngáí ngrásya,

15:16  názala mosáleli wa Krístu epái ya bapagáno mpé mosakoli wa Nsango Elámu ya Nzámbe mpô ’te bato ba bikólo bisúsu mpé bamípésa na Nzámbe lokóla ekosepelisa yě, mpé bákóma basántu na ngúyá ya Elímo Sántu.

15:17  Yangó wâná nakokí komíkúmisa o Krístu Yézu o míso ma Nzámbe.

15:18  Kasi nakokí kotánga sé eye Krístu asálákí na mabóko ma ngáí mpô ’te bato ba bikólo bisúsu bákóma kotósa Nzámbe ; asálákí yangó na maloba mpé na misálá mya ngáí.

15:19  Alakísákí bilembo mpé asálákí makamwísi na ngúyá ya Elímo wa Nzámbe : bandá Yerúzalem kín’o Ilíria nasangélákí Nsango Elámu ya Krístu bipái bínso.

15:20  Nalingákí kokende sé o bisíká biye bayókí nkómbó ya Krístu naíno té. Bôngó nátó­nga ndáko té o esíká moto mosúsu abandákí kotónga.

15:21  Na yangó nalandí maloba ma Minkandá Misántu : O bisíká basangélí naíno nsango ya yě té, bato bakomóno yě ; baye bayókí yangó naíno té, bakoyéba yangó.

15:22  Yangó ndé epekísákí ngáí mbala na mbala koyâ epái ya bínó.

15:23  Ut’o kala nalingí koyâ kotála bínó, mpé lokóla nasílísí mosálá mwa ngáí áwa,

15:24  nazalí na elíkyá ya kokútana na bínó ntángo nakokende o Espá­nya. Mpé sókó tosepélí mwâ moké bísó bánso elongó, bokokí kosálisa ngáí nákóma o mokili môná.

15:25  Kasi libosó nakokende o Yerú­zalem, násálisa bandeko ba bísó kun­á.

15:26  Zambí bandeko ba Masedónia mpé ba Akáya bandimí ko­ko­ngolo mosolo mpô ya kosálisa bandeko bakrístu ba Yerúzalem, baye bakélélí.

15:27  Bandimákí kosála bôngó, zambí bazalí na nyongo epái ya bangó : lokóla bapagáno ba-zwákí bolámu bwa Nzámbe epái ya ba-Yúda, basengélí mpé sikáwa kosálisa bangó na bilóko bisengélí na bangó.

15:28  Sókó nasílísí mosálá môná, mpé sókó natíkélí bangó mosolo bakongólókí áwa, nakoke­nde o Espánya, kasi libosó nakoleka epái ya bínó.

15:29  Mpé nayébí ’te nakoyâ epái ya bínó na bobenisi bónso bwa Krístu.

15:30  Bandeko, naséngí bínó mpô ya Mokonzi wa bísó Yézu Krístu mpé mpô ya bolingi bwa Elímo Sántu, bósálisa ngáí o etumba eye : bósá­mbelaka Nzámbe mpô ya ngáí

15:31  mpô ’te bato ba Yudéa baye babóyí Krístu básála ngáí mabé té, mpé mpô ’te bakrístu ba Yerúzalem bándima na bolámu lisálisi nakoke­nde kopésa bangó.

15:32  Bôngó, áwa nakokóma epái ya bínó na esengo, Nzámbe ápémisa ngáí mwâ moké o ntéi ya bínó.

15:33  Nzámbe wa bobóto ázala na bínó bánso ! Amen.

Chapter 16

16:1  Naséngí bínó mpô ya ndeko mwásí wa bísó Fébe, diáko­no-mwásí wa Eklézya ya Ken­kréa :

16:2  bóyamba yě mpô ya Mokonzi, lokóla bato ba Nzámbe bakosálaka ; bósálisa yě mpé o makambo mánso akokí kosénge bínó. Yě mǒkó asálísákí bakrístu baíké, asálísákí ngáí mpé.

16:3  Bópésa losáko na Príska mpé na Akwíla, baye basálísákí ngáí o mosálá mwa Krístu Yézu :

16:4  bangó babángákí liwá té mpô ya kobíkisa ngáí. Bobélé ngáí mǒkó té nasengélí kotóndo bangó, bandeko bánso ba Biklézya bya bikólo bisúsu basengélí kosála bôngó.

16:5  Bópésa mpé losáko na bandeko bánso bakosa­nganaka o ndáko ya bangó. Losáko na Epenéto, wa ngáí wa bolingo, yě moto wa libosó o Azía óyo ayambákí Krístu.

16:6  Losáko na María moto amílembísákí míngi mpô ya bínó.

16:7  Losáko na Androníko mpé na Yúniasi, bandeko ba ngáí tozalákí na bangó o bolóko : bazalí batéyi ba sôló, mpé bakómákí bakrístu libosó lya ngáí.

16:8  Losáko na Ampliáto, óyo nakolingaka mí­ngi mpô ya Mokonzi.

16:9  Losáko na Urbáno, móníngá wa ngáí o mosálá mwa Krístu, mpé na Stákis, móníngá wa ngáí wa bolingo.

16:10  Losáko na Apélo, óyo alakísákí ’te azalí moto wa Krístu sôló. Losáko na bato bánso ba libótá lya Aristóbulo.

16:11  Losáko na Eródíon, ndeko wa ngáí. Losáko na bakrístu ba libótá lya Narsísi.

16:12  Losáko na Triféna mpé na Trifóza, bato ba mpíkó o mosálá mwa Mokonzi. Losáko na ndeko mwásí Pérsis, óyo amílembísákí míngi mpô ya Mokonzi.

16:13  Losáko na Rúfo óyo Nzámbe aponí, mpé na mamá wa yě, óyo azalí mamá wa ngáí lokóla.

16:14  Losáko na Asinekríto, Flégon, Ermes, Patróba, Ermas mpé na bandeko bazalí epái ya bangó.

16:15  Losáko na Filólogo, na Yúlia, na Nério mpé na ndeko mwásí wa yě, na Olímpas mpé na bakrístu bánso bazalí epái ya bangó.

16:16  Bópésana losáko na ekópi esántu. Bandeko bakrístu bánso batíndélí bínó losáko.

16:17  Nabóndélí bínó, bandeko, bókéba na bato babóyí matéya batéyákí bínó mpé balingí kokabola bato. Bókíma bangó.

16:18  Bakosálelaka Mokonzi wa bísó Krístu té, bakokanisaka sé bilóko bya kolía ; na maloba ma sukáli mpé ma boléti bakokósaka bato bayékólá té.

16:19  Bato bánso bayébí bóníbóní bokotósaka Nzámbe, yangó wâná nakosepelaka na bínó míngi, kasi nalingí kokébisa bínó : bóyéba níni ezalí malámu, bóyéba mpé kobóya makambo mabé.

16:20  Nzámbe wa bobóto ásálisa bínó bónyata Sátana nokí. Ngrásya ya Mokonzi wa bísó Yézu Krístu ézala na bínó !

16:21  Timotéo, móníngá wa ngáí wa mosálá, atíndélí bínó losáko, ná mpé bandeko ba ngáí Lúsio, Yazon na Sosípater.

16:22  Ngáí mpé Térsio, ngáí moto nakomí monkandá moye, napésí bínó losáko la Mokonzi.

16:23  Gáyo mpé atíndélí bínó lo­sáko, yě moto ayambákí ngáí o ndáko ya yě ; akoya­mbaka mpé bato bánso ba Eklézya. Lisúsu Erásto, moto akobómbaka mosolo mwa mbóka, ná mpé ndeko wa bísó Kwárto batíndélí bínó losáko. (

16:24  Ngrásya ya Mokonzi wa bísó Yézu Krístu ézala na bínó bánso ! Amen.)

16:25  Nkémbo na Nzámbe, óyo azalí na ngúyá ya koléndisa bínó engébéné na Nsango Elámu ya Yézu Krístu eye nakosangelaka. Yangó ndé mobómbamo mwa Nzámbe moyébání sikáwa : út’o bileko na bileko bato bayébákí mwangó té,

16:26  kasi sikáwa Nzámbe alakísí mwa­ngó. Lokóla ekomámí o Minkandá mya baproféta, Nzámbe atíndí ’te báyébisa mwangó na bato ba bikólo bínso, bándima mpé bátósa mwangó.

16:27  Bobélé yě mǒkó Nzámbe apusí bwányá. Nkémbo na yě, mpô ya Yézu Krístu, o bileko bínso sékô !