Kekchi - I Corinthians

Chapter 1

1:1  La̱in laj Pablo. Sicˈbil chak cuu xban li Dios re nak tincˈanjelak chokˈ x-apóstol li Jesucristo xban nak joˈcan quiraj li Dios. Cuochben laj Sóstenes li cuech aj pa̱banelil.

1:2  Yo̱quin chixtzˈi̱banquil li hu aˈin e̱riqˈuin la̱ex aj pa̱banel li cuanquex saˈ li tenamit Corinto. Santobresinbilex saˈ xcˈabaˈ li Jesucristo ut sicˈbil e̱ru xban li Dios chokˈ ralal xcˈajol. Ut sicˈbil ajcuiˈ ruheb chixjunileb li cuanqueb yalak bar li nequeˈxya̱ba xcˈabaˈ li Jesucristo. Aˈan li kaDios chikajunilo la̱o li nocopa̱ban re.

1:3  Chicua̱nk taxak e̱riqˈuin li usilal ut li tuktu̱quilal li nachal riqˈuin li Dios li kaYucuaˈ ut riqˈuin li Ka̱cuaˈ Jesucristo.

1:4  Junelic ninbantioxi chiru li Dios nak nintijoc che̱rix la̱ex ut ninbantioxi ajcuiˈ chiru li Dios nak xema̱tani li rusilal li Dios saˈ xcˈabaˈ li Jesucristo.

1:5  Xban nak junajex chic riqˈuin li Cristo, xema̱tani li rusilal li Dios. Cha̱bil chic nequex-a̱tinac ut cha̱bil chic le̱ naˈleb xban nak nequenau chic li xya̱lal.

1:6  Ac xema̱tani li rusilal li Dios ut nacˈutun nak ya̱l li quinye e̱re chirix li Cristo.

1:7  Ac xema̱tani li usilal li naxqˈue li Santil Musikˈej ut ma̱cˈaˈ chic nequeroybeni. Caˈaj chic lix cˈulunic li Ka̱cuaˈ Jesucristo nequeroybeni.

1:8  Li Dios yo̱k chixqˈuebal xcacuub le̱ chˈo̱l chalen toj saˈ rosoˈjic li cutan re nak ma̱cˈaˈak e̱ma̱c saˈ li cutan nak tol-e̱lk li Ka̱cuaˈ Jesucristo.

1:9  Li Dios junelic naxqˈue li naxyechiˈi ut aˈan ajcuiˈ li quisicˈoc e̱ru re nak texcua̱nk chi sum a̱tin riqˈuin li Ralal, aˈ li Ka̱cuaˈ Jesucristo.

1:10  Ex inherma̱n, saˈ xcˈabaˈ li Ka̱cuaˈ Jesucristo nintzˈa̱ma che̱ru nak junajak le̱ naˈleb. Ma̱cˈaˈak li jachoc ib saˈ e̱ya̱nk. Junajak ban le̱ cˈaˈux ut junajak le̱ chˈo̱l.

1:11  Ninye e̱re chi joˈcaˈin xban nak lix comoneb lix Cloé xeˈyehoc resil cue nak cuan cuechˈi̱nc ib saˈ e̱ya̱nk.

1:12  ¿Cˈaˈut nak jalan jala̱nk nequecˈoxla che̱ju̱nkal? Cuan nequeˈxye: La̱o xtzolom laj Pablo. Ut cuan nequeˈxye: La̱o xtzolom laj Apolos. Ut cuan ajcuiˈ li nequeˈxye: La̱o xtzolom laj Pedro ut cuan cuiˈchic nequeˈxye: La̱o xtzolom li Cristo.

1:13  Abanan la̱in tinpatzˈ e̱re, ¿ma nabal ta biˈ li Cristo? Incˈaˈ. Jun ajcuiˈ. ¿Ma quinqˈueheˈ ta biˈ la̱in chiru cruz saˈ e̱cˈabaˈ la̱ex? ¿Ma saˈ incˈabaˈ ta biˈ la̱in quecˈul li cubi haˈ?

1:14  Ninbantioxi chiru li Dios nak ma̱cuaˈ la̱in quincubsin e̱haˈ. Caˈaj cuiˈ laj Crispo ut laj Gayo quincubsi xhaˈeb.

1:15  Cui ta la̱in quincubsin e̱haˈ, ma̱re raj quecˈoxla nak quinba̱nu saˈ incˈabaˈ la̱in.

1:16  Ut quincubsi ajcuiˈ xhaˈeb li cuanqueb saˈ rochoch laj Estéfanas. Incˈaˈ chic jultic cue ma cuan chic quincubsiheb xhaˈ.

1:17  Li Cristo incˈaˈ quinixtakla chak chi cubsi̱nc haˈ. Quinixtakla ban chak chixjulticanquil resil li colba-ib. Abanan ma̱cuaˈ riqˈuin a̱tin chˈaˈaj xtaubal ru xya̱lal quina̱tinac. Cui ta riqˈuin a̱tin chˈaˈaj xtaubal ru quina̱tinac, cuan raj incˈaˈ queˈtaˈoc ru ut ta̱cana̱k raj chi ma̱cˈaˈ rajbal xcamic li Cristo chiruheb.

1:18  Nak nequeˈrabi resil lix camic li Cristo chiru li cruz, ma̱cˈaˈ na-oc cuiˈ chiruheb li teˈxic saˈ xbalba. To̱ntil naˈleb aˈan chanqueb. Aban chiku la̱o li ac xocoleˈ kˈaxal lokˈ aˈan xban nak aˈan xcuanquil li Dios.

1:19  Joˈcaˈin tzˈi̱banbil retalil saˈ li Santil Hu: Tinsacheb xcuanquil li cuanqueb xnaˈleb xjuneseb rib. Tintzˈekta̱na xcˈaˈuxeb li nequeˈrecˈa rib nak cuanqueb xnaˈleb.

1:20  Chiru li Dios ma̱cˈaˈ nequeˈoc cuiˈ li cuanqueb xnaˈleb xjuneseb. Ma̱cˈaˈ nequeˈoc cuiˈ laj tzolonel. Ut ma̱cˈaˈ nequeˈoc cuiˈ li nequeˈxnau a̱tinac chirix lix naˈleb li ruchichˈochˈ. Lix naˈleb li ruchichˈochˈ to̱ntil naˈleb ut ma̱cˈaˈ na-oc cuiˈ chiru li Dios.

1:21  Li Dios naxnau chixjunil. Ac cuan saˈ xchˈo̱l li Dios nak li cuanqueb saˈ ruchichˈochˈ ma̱ jaruj teˈxtau ru xnaˈleb li Dios yal xjuneseb rib. Joˈcan nak quiraj xcolbaleb li teˈpa̱ba̱nk re li resil li colba-ib usta cuan li nequeˈyehoc re nak to̱ntil naˈleb li yo̱co chixjulticanquil che̱ru chirix li Cristo.

1:22  Aˈin to̱ntil naˈleb chiruheb laj judío xban nak teˈraj nak ta̱cˈutekˈ junak milagro chiruheb. To̱ntil naˈleb chiruheb li ma̱cuaˈeb aj judío xban nak caˈaj cuiˈ xnaˈleb li ruchichˈochˈ nequeˈxqˈue xcuanquil.

1:23  Aban la̱o nakachˈolob xya̱lal nak li Cristo quicam chiru li cruz re kacolbal. Abanan li ca̱mc chiru cruz xuta̱nal chiruheb laj judío ut incˈaˈ nequeˈraj xtaubal xya̱lal lix camic li Cristo. Joˈcan nak chiruheb laj judío li xya̱lal lix camic li Cristo chanchan jun li pec nequeˈxtich rokeb chiru. Joˈcan ajcuiˈ chiruheb li ma̱cuaˈeb aj judío, li xya̱lal lix camic li Cristo to̱ntil naˈleb chiruheb.

1:24  Abanan chiku la̱o li sicˈbil ku xban li Dios, usta la̱o aj judío usta ma̱cuaˈo aj judío, riqˈuin xcamic li Cristo chiru cruz nakil xcuanquil li Dios nak coxcol ut nakanau chic chanru xnaˈleb li Dios.

1:25  Kˈaxal cuiˈchic cuan xnaˈleb li Dios chiruheb li cui̱nk usta yal to̱ntil naˈleb chiruheb li incˈaˈ nequeˈpa̱ban. Usta nequeˈxye nak ma̱cˈaˈ xcuanquil li Dios, kˈaxal cuiˈchic nim xcuanquil chiru xcuanquileb li cui̱nk.

1:26  Ex herma̱n, cheqˈue retal chanru cuanquex nak quisiqˈueˈ e̱ru xban li Dios. Moco nabalex ta cuan e̱naˈleb joˈ xnaˈleb li ruchichˈochˈ. Moco nabalex ta li cuan e̱lokˈal ut incˈaˈ nabaleb saˈ e̱ya̱nk cuanqueb xcuanquil saˈ xcˈabaˈeb lix naˈ xyucuaˈ.

1:27  Li ma̱cˈaˈeb xnaˈleb chiruheb li cui̱nk, li Dios quixsiqˈueb ru re nak teˈcˈutekˈ xxuta̱neb li cuanqueb xnaˈleb saˈ ruchichˈochˈ. Ut li ma̱cˈaˈeb xcuanquil saˈ ruchichˈochˈ li Dios quixsiqˈueb ru re nak teˈcˈutekˈ xxuta̱neb li cuanqueb xcuanquil saˈ ruchichˈochˈ.

1:28  Li Dios quixsiqˈueb ru li tzˈekta̱nanbileb li ma̱cˈaˈeb xlokˈal ut li incˈaˈ nequeˈqˈueheˈ xcuanquil xbaneb li cuanqueb saˈ li ruchichˈochˈ. Quixsiqˈueb ban ru re xcubsinquil xcuanquileb li cuanqueb xnaˈleb saˈ ruchichˈochˈ.

1:29  Quixba̱nu chi joˈcaˈin re nak ma̱ ani tixnimobresi rib chiru li Ka̱cuaˈ.

1:30  Yal xban rusilal li Dios nak junajex chic riqˈuin li Jesucristo. Li Jesucristo quixakaba̱c xban li Dios re xqˈuebal kanaˈleb. Quixakaba̱c chixti̱cobresinquil li kachˈo̱l chiru li Dios ut chikasantobresinquil. Ut saˈ xcˈabaˈ li Cristo cuybil sachbil li kama̱c.

1:31  Joˈcan nak caˈaj cuiˈ li Ka̱cuaˈ takanimobresi. Joˈcaˈin tzˈi̱banbil retalil saˈ li Santil Hu: Mikanimobresi kib. Chikanimobresihak ban xcuanquil li Ka̱cuaˈ.

Chapter 2

2:1  Joˈcan ut ex herma̱n, nak xincuulac e̱riqˈuin chixchˈolobanquil xya̱lal li ra̱tin li Dios, incˈaˈ xina̱tinac riqˈuin a̱tin chˈaˈaj xtaubal ru ut incˈaˈ xina̱tinac re xcˈutbal nak cuan innaˈleb.

2:2  Xban nak incˈaˈ xcuaj xcˈutbal nak cuan innaˈleb, joˈcan nak caˈaj cuiˈ chirix lix camic li Cristo chiru li cruz xina̱tinac.

2:3  Nak cuanquin e̱riqˈuin ninsicsot xban inxiu nak yo̱quin chi a̱tinac e̱riqˈuin xban nak incˈaˈ cau inchˈo̱l.

2:4  Nak xinchˈolob xya̱lal che̱ru incˈaˈ xina̱tinac riqˈuin a̱tin joˈ nequeˈxba̱nu li cuanqueb xnaˈleb saˈ ruchichˈochˈ. Xinchˈolob ban xya̱lal che̱ru joˈ quixcˈut chicuu li Santil Musikˈej, ut li Santil Musikˈej quiqˈuehoc xcuanquil li cua̱tin.

2:5  La̱in incˈaˈ xina̱tinac e̱riqˈuin joˈ nequeˈxba̱nu li cuanqueb xnaˈleb xban nak incˈaˈ nacuaj nak ta̱cua̱nk e̱pa̱ba̱l saˈ xcˈabaˈ xnaˈlebeb li cui̱nk; saˈ xcˈabaˈ ban xcuanquil li Dios xexpa̱ban.

2:6  Li ac cauheb xchˈo̱l saˈ lix pa̱ba̱leb, nequeˈka̱tina riqˈuin a̱tin moco yalak ani ta ta̱taˈok ru. Aˈin ma̱cuaˈ xnaˈleb li ruchichˈochˈ chi moco xnaˈlebeb li nequeˈtaklan saˈ ruchichˈochˈ. Lix naˈlebeb na-osoˈ joˈ nak nequeˈosoˈ eb aˈan.

2:7  Abanan la̱in ninchˈolob xya̱lal li naˈleb li quixqˈue li Dios. Li naˈleb aˈan mukmu nak quicuan chak junxil. Incˈaˈ natauman ru nak quicuan. Abanan chalen chak najter kˈe cutan nak toj ma̱jiˈ quixyi̱b li ruchichˈochˈ ac cuan chak saˈ xchˈo̱l li Dios nak tixqˈue li kalokˈal ut li kalokˈal, aˈan li kacolbal.

2:8  Ma̱ jun li nequeˈtaklan saˈ ruchichˈochˈ queˈxtau ru li naˈleb aˈin. Cui ta queˈxtau ru, incˈaˈ raj queˈxcamsi chiru cruz li Ka̱cuaˈ Jesucristo, laj e̱chal re li lokˈal.

2:9  Joˈcaˈin tzˈi̱banbil saˈ li Santil Hu chirix li kalokˈal: Li incˈaˈ na-ilman ru chi moco na-abi̱c chi moco nacˈoxla̱c xbaneb li cui̱nk, aˈan li quixcˈu̱b li Dios chokˈ reheb li nequeˈrahoc re. (Is. 64:4; 65:17)

2:10  Aban li Dios quixcˈutbesi chiku li naˈleb aˈin xban li Santil Musikˈej. Li Santil Musikˈej naxnau chixjunil lix naˈleb li Dios li kˈaxal chˈaˈaj xtaubal ru.

2:11  Ma̱ ani nanaˈoc re cˈaˈru cuan saˈ xchˈo̱l li junju̱nk. Caˈaj cuiˈ li junju̱nk nanaˈoc re. Joˈcan ajcuiˈ lix cˈaˈux li Dios. Ma̱ ani nanaˈoc re. Caˈaj cuiˈ li Santil Musikˈej nanaˈoc re.

2:12  Li Dios quixqˈue ke jun li Musikˈej. Ma̱cuaˈ yal xmusikˈ cui̱nk li cuan kiqˈuin. Aˈ lix Santil Musikˈ li Dios, aˈan li cuan kiqˈuin. Li Dios quixqˈue ke li Santil Musikˈej re nak takatau ru li cˈaˈru naxqˈue ke riqˈuin xnimal rusilal.

2:13  Incˈaˈ yo̱co chi a̱tinac chirix li naˈleb aˈin riqˈuin a̱tin xkacˈoxla kajunes. Yo̱co ban chi a̱tinac riqˈuin a̱tin quicˈutbesi̱c chiku xban li Santil Musikˈej. Li xya̱lal li naxcˈut chiku li Santil Musikˈej la̱o nakachˈolob chiruheb li cuan li Santil Musikˈej riqˈuineb.

2:14  Li ani ma̱cˈaˈ li Santil Musikˈej riqˈuin incˈaˈ naxcˈu̱luban li xya̱lal li naxcˈut li Santil Musikˈej. Aˈan to̱ntil naˈleb chiru xban nak incˈaˈ naxtau ru. Caˈaj cuiˈ li ani cuan li Santil Musikˈej riqˈuin naru tixtau ru xban nak li Santil Musikˈej aˈan li nacˈutuc re li xya̱lal chiru.

2:15  Li ani cuan li Santil Musikˈej riqˈuin naxnau bar cuan li ya̱l ut naxnau ajcuiˈ bar cuan li incˈaˈ ya̱l. Ut li ani ma̱cˈaˈ li Santil Musikˈej riqˈuin incˈaˈ naxtau ru lix naˈleb li cuan li Santil Musikˈej riqˈuin.

2:16  Joˈcaˈin tzˈi̱banbil saˈ li Santil Hu: Ma̱ ani nanaˈoc re lix cˈaˈux li Ka̱cuaˈ. Ma̱ ani naru naqˈuehoc xnaˈleb. Ma̱ ani naxnau lix cˈaˈux li Dios yal xjunes. Abanan xban nak la̱o cuan li Santil Musikˈej kiqˈuin, cuan ajcuiˈ lix cˈaˈux li Cristo kiqˈuin.

Chapter 3

3:1  Ex inherma̱n, nak cuanquin e̱riqˈuin incˈaˈ quiru quina̱tinac e̱riqˈuin joˈ nina̱tinac riqˈuineb li ac cauheb xchˈo̱l saˈ lix pa̱ba̱leb. La̱ex chanchan ma̱cˈaˈ li Santil Musikˈej e̱riqˈuin. Joˈcan nak nina̱tinac e̱riqˈuin joˈ nak nina̱tinac riqˈuineb li toj kˈun xchˈo̱leb saˈ lix pa̱ba̱leb.

3:2  Li xya̱lal xinchˈolob che̱ru chanchan nak leche xinqˈue cherucˈ. Moco cacuil tzacae̱mk ta xinqˈue e̱re xban nak la̱ex toj ma̱jiˈ nequexqˈui. Naraj naxye nak toj ma̱jiˈ ninchˈolob che̱ru li naˈleb li chˈaˈaj xtaubal ru xban nak toj ma̱jiˈ nequexqˈui saˈ le̱ pa̱ba̱l ut ma̱min te̱tau ru.

3:3  Incˈaˈ texru̱k xtaubal ru anakcuan xban nak toj nequeba̱nu li cˈaˈru naxrahi ru le̱ chˈo̱l. Nak toj cuan li cakali̱nc ib ut li cuechˈi̱nc ib saˈ e̱ya̱nk, ¿ma incˈaˈ ta biˈ yo̱quex chi xba̱nunquil li cˈaˈru naxrahi ru le̱ chˈo̱l? Ut la̱ex nequejuntakˈe̱ta e̱rib riqˈuineb li toj ma̱cˈaˈ li Santil Musikˈej riqˈuineb.

3:4  La̱ex toj ma̱jiˈ junaj le̱ chˈo̱l. Cuan li nequeˈxye, “la̱in ninta̱ke laj Pablo”. Ut cuan cuiˈchic li nequeˈxye, “la̱in ninta̱ke laj Apolos”. Cui joˈcan yo̱quex chixyebal, ¿ma incˈaˈ ta biˈ toj yo̱quex chixjuntakˈe̱tanquil e̱rib riqˈuineb li toj ma̱jiˈ nequeˈpa̱ban?

3:5  ¿Ani ta biˈ laj Apolos? Ut, ¿anihin ta biˈ la̱in? La̱o yal aj cˈanjelo chiru li Ka̱cuaˈ. Xkachˈolob xya̱lal che̱ru nak xepa̱b li Ka̱cuaˈ. Ut chi kacabichalo nococˈanjelac joˈ taklanbilo cuiˈ xban li Ka̱cuaˈ.

3:6  Chanchano aj acuinel nak nococˈanjelac chiru li Dios. Chanchan a̱uc xinba̱nu nak xinye resil li colba-ib e̱re. Ut chanchan tˈakresi̱nc quixba̱nu laj Apolos nak quixchˈolob lix ya̱lal che̱ru. Abanan aˈ li Dios quiqˈuehoc lix mokic.

3:7  Joˈcan nak chi moco laj acuinel chi moco laj tˈakresinel cuan xcuanquil. Caˈaj cuiˈ li Dios li naqˈuehoc xmokic cuan xcuanquil.

3:8  Laj acuinel ut laj tˈakresinel juntakˈe̱teb xcuanquil chiru li Dios ut chi xju̱nkaleb teˈxcˈul xkˈajca̱munquil aˈ ya̱l chanru lix cˈanjeleb.

3:9  La̱o kech aj cˈanjelil kib chiru li Dios. Ut la̱ex chanchanex li chˈochˈ li nakacˈanjela ru. Ut li Dios aˈan laj e̱chal re li chˈochˈ. Ut chanchanex ajcuiˈ jun li cab yo̱co chixyi̱banquil ut li Dios, aˈan laj e̱chal re li cab aˈan.

3:10  Xban nak sicˈbil cuu xban li Dios chi cˈanjelac chiru joˈ jun aj tzˈac cha̱bil, joˈcan nak xinnau xjolominquil li cˈanjel. Chanchan nak xinyi̱b xcimiento li cab nak xinye resil li colba-ib ut jalan chic teˈcablak saˈ xbe̱n nak teˈxchˈolob li xya̱lal che̱ru. Ut li junju̱nk chixqˈuehak retal nak tzˈakal re ru lix cˈanjel tixba̱nu.

3:11  Tixqˈue retal chanru lix cˈanjel xban nak ac qˈuebil lix cimiento li cab. Ut ma̱ ani naru tixqˈue junak chic li cimiento chiru li ac qˈuebil. Ut aˈan li Ka̱cuaˈ Jesucristo.

3:12  Cuan li teˈcablak saˈ xbe̱n li cimiento aˈan riqˈuin li cˈaˈak re ru najt naxcuy joˈ li oro, li plata ut li terto̱quil pec. Ut cuan li teˈcablak saˈ xbe̱n riqˈuin li incˈaˈ naxcuy joˈ li cheˈ, li cu̱c ut li qˈuim. Lix ya̱lal aˈan, aˈin: nak cuan li teˈcˈanjelak chi cha̱bil chiru li Dios ut cuan incˈaˈ.

3:13  Lix cˈanjel li junju̱nk ta̱cˈutu̱nk nak tol-e̱lk cuiˈchic li Ka̱cuaˈ Jesucristo chi rakoc a̱tin. Chanchan nak ta̱numsi̱k saˈ xam lix cˈanjel naxba̱nu re rilbal ma ta̱osokˈ malaj incˈaˈ.

3:14  Cui lix cˈanjel incˈaˈ ta̱sachekˈ, nacˈutun nak us lix cˈanjel ut li jun aˈan tixcˈul lix kˈajca̱munquil.

3:15  Cui ut lix cˈanjel junak incˈaˈ tzˈakal re ru, lix cˈanjel ta̱sachk chanchan cˈatbil nak ta̱osokˈ. Ut li jun aˈan ta̱colekˈ, abanan chanchan ta̱numekˈ saˈ xam nak ta̱colekˈ.

3:16  ¿Ma incˈaˈ ta biˈ nequenau nak la̱ex rochochex li Dios? ¿Ma incˈaˈ ta biˈ nequenau nak li Santil Musikˈej cuan e̱riqˈuin?

3:17  Li rochoch li Dios aˈan santo. Cui ani naxtiquib li jachoc ib saˈ e̱ya̱nk, li jun aˈan yo̱ chixjucˈbal rochoch li Dios xban nak la̱ex aj pa̱banel rochochex chic li Dios. Ut li Dios tixsach li ani naxtiquib xjachbal ruheb laj pa̱banel.

3:18  Ma̱ ani taxak tixbalakˈi rib xjunes. Cui cuan junak saˈ e̱ya̱nk narecˈa nak cuan xnaˈleb saˈ li ruchichˈochˈ aˈin, chixcubsihak rib ut tixba̱nu joˈ li ma̱cˈaˈ naxnau re nak tixtau xnaˈleb chi tzˈakal.

3:19  Lix naˈleb li ruchichˈochˈ, aˈan to̱ntil naˈleb chiru li Dios. Joˈcaˈin tzˈi̱banbil saˈ li Santil Hu: Li Dios naxcanabeb chixsachbaleb rib xban lix se̱baleb xchˈo̱l li ani nequeˈrecˈa nak cuanqueb xnaˈleb xjuneseb rib. (Job 5:13)

3:20  Ut tzˈi̱banbil ajcuiˈ saˈ li Santil Hu li naxye: Li Dios naxnau nak ma̱cˈaˈ na-oc cuiˈ lix cˈaˈuxeb li nequeˈxye nak cuanqueb xnaˈleb xjuneseb rib. (Sal. 94:11)

3:21  Joˈcan nak ma̱ ani tixnimobresi ru junak cui̱nk riqˈuin li cˈaˈru naxba̱nu xban nak chixjunil li cˈaˈak re ru qˈuebil e̱re xban li Dios re nak ta̱cˈanjelak che̱ru.

3:22  Usta laj Apolos, usta la̱in, usta laj Pedro, la̱o yal aj cˈanjelo che̱ru. Usta li ruchichˈochˈ, usta li yuˈam, usta li ca̱mc, e̱re ajcuiˈ re nak teˈcˈanjelak che̱ru. Chixjunil li cuan anakcuan e̱re la̱ex ut e̱re ajcuiˈ li toj cha̱lel chiku.

3:23  Chixjunil li cˈaˈak re ru, e̱re la̱ex. Abanan la̱ex rehex li Cristo ut li Cristo, aˈan re li Dios.

Chapter 4

4:1  Joˈcan nak chenauhak nak la̱o yal aj cˈanjelo chiru li Cristo ut qˈuebil saˈ kabe̱n xchˈolobanquil lix ya̱lal li colba-ib li quiqˈueheˈ ke xban li Dios. Li xya̱lal aˈin mukmu nak quicuan chak junxil.

4:2  Li ani sicˈbil ru chixchˈolobanquil li xya̱lal tento nak ti̱cak xchˈo̱l.

4:3  La̱in ma̱cˈaˈ nacuaj re cui yo̱quex chixsicˈbal a̱tin chicuix ut ma̱cˈaˈ nacuaj re cui junak aj rakol a̱tin ta̱tzˈilok a̱tin chicuix. Chi moco la̱in naru tincuechˈ rix lin cˈanjel.

4:4  La̱in nacuecˈa nak ma̱cˈaˈ inma̱c. Abanan moco xban ta aˈan nak tinye nak ti̱c inchˈo̱l. Aˈ li ta̱rakok a̱tin saˈ inbe̱n aˈan li Ka̱cuaˈ, ut aˈan ta̱yehok re ma us xinba̱nu malaj incˈaˈ.

4:5  Joˈcan nak mexrakoc a̱tin chirix le̱ ras e̱ri̱tzˈin. Cheroybeni toj ta̱cuulak xkˈehil nak tol-e̱lk cuiˈchic li Ka̱cuaˈ Jesucristo ut aˈan tixcˈutbesi li incˈaˈ nanauman anakcuan. Tixcˈutbesi li cˈaˈru nanumeˈ saˈ xchˈo̱l li junju̱nk. Ut li Dios tixqˈue xlokˈal li junju̱nk aˈ yal chanru lix yehom xba̱nuhom.

4:6  Ex herma̱n, chixjunil li xinye chirix laj Apolos ut chicuix re e̱tenkˈanquil nak xinye. Nacuaj nak te̱tau ru li cˈaˈru xinye. Chetzol e̱rib kiqˈuin re nak te̱ba̱nu joˈ tzˈi̱banbil saˈ li Santil Hu. Incˈaˈ naru te̱nimobresi e̱rib xban nak nequeta̱ke li jun ut nequetzˈekta̱na li jun chic.

4:7  ¿Ma jalanex ta biˈ la̱ex chiruheb li jun chˈo̱l chic nak nequerecˈa e̱rib? ¿Ma ma̱cuaˈ ta biˈ li Dios quiqˈuehoc e̱re li cˈaˈru cuan e̱re? ¿Cˈaˈut nak nequenimobresi e̱rib chixyebal nak cuan cˈaˈru e̱re? Incˈaˈ naru te̱nimobresi e̱rib xban nak yal xema̱tani li cˈaˈru cuan e̱re riqˈuin li Dios.

4:8  Ac xcˈojla e̱chˈo̱l xban nak saˈ e̱chˈo̱l la̱ex nak ac xetau e̱naˈleb. Chanchanex li biom saˈ le̱ pa̱ba̱l nak nequecˈoxla. ¿Ma la̱ex chic rey nak nequecˈoxla? Saˈ e̱chˈo̱l la̱ex nak ma̱cˈaˈ kacuanquil. Us raj ac ta cuan xetau e̱naˈaj chokˈ rey, re nak tocua̱nk ajcuiˈ raj la̱o chi takla̱nc e̱rochben.

4:9  Nak nincˈoxla la̱in li Dios xoxqˈue la̱o li apóstol chi ma̱cˈaˈ kacuanquil. Chanchano junak aj ma̱c li ac xteneba̱c ca̱mc saˈ xbe̱n ut qˈuebilo chiruheb li ángel ut chiruheb li cui̱nk re toeˈril.

4:10  La̱ex nequecˈoxla nak ma̱cˈaˈ kanaˈleb xban nak nakachˈolob resil li Cristo ut la̱ex cuan e̱naˈleb xban nak nequenau nabal chirix li Cristo nak nequecˈoxla. La̱o ma̱cˈaˈ kacuanquil ut la̱ex cuan e̱cuanquil nak nequecˈoxla. Saˈ e̱chˈo̱l la̱ex nak la̱ex nequex-oxlokˈi̱c ut la̱o tzˈekta̱nanbilo.

4:11  Toj chalen anakcuan yo̱co chixcuybal kasaˈ ut ta̱chakik ke. Ma̱cˈaˈ chic kakˈ. Sacˈbilo ut ma̱cˈaˈ kochoch.

4:12  Cau nocotrabajic re xnumsinquil li cutan junju̱nk. Nak nequeˈxba̱nu ma̱usilal ke, la̱o nakaba̱nu usilal reheb. Ra nequeˈxba̱nu ke li xicˈ nequeˈiloc ke ut nakacuy xnumsinquil li raylal li nequeˈxba̱nu ke.

4:13  Nak nocohobeˈ incˈaˈ nakasume ru. Nequeˈka̱tina ban saˈ usilal. Chalen anakcuan tzˈekta̱nanbilo xbaneb chixjunileb. Ma̱cˈaˈ noco-oc cuiˈ nak nocoeˈril. Chanchano li mul chiruheb.

4:14  Ma̱cuaˈ re xcˈutbal e̱xuta̱n nak yo̱quin chixyebal e̱re chi joˈcaˈin. Re ban xqˈuebal e̱naˈleb xban nak chanchanex li cualal incˈajol chicuu ut raro̱quex inban.

4:15  Usta cuan laje̱bak mil li nequeˈchˈoloban xya̱lal li Cristo che̱ru, abanan la̱in li xinyehoc e̱re resil li colba-ib junxil nak xexpa̱ban. Joˈcan nak la̱in le̱ yucuaˈ saˈ xcˈabaˈ li Jesucristo.

4:16  Joˈcan ut nak nintzˈa̱ma che̱ru nak te̱tzol e̱rib cuiqˈuin ut te̱ba̱nu joˈ ninba̱nu la̱in.

4:17  Aˈan aj e nak xintakla e̱riqˈuin laj Timoteo. Aˈan tixjultica e̱re nak li cˈaˈru yo̱quin chixchˈolobanquil chirix li Cristo, aˈan ajcuiˈ li yo̱quin chixba̱nunquil. Ninchˈolob chi tzˈakal lix ya̱lal yalak bar chiruheb chixjunileb laj pa̱banel. Laj Timoteo chanchan li cualal ut raro inban. Tzˈakal re ru lix pa̱ba̱l saˈ xcˈabaˈ li Jesucristo.

4:18  Cuan li xeˈkˈetkˈetoˈ saˈ e̱ya̱nk. Eb aˈan nequeˈxye nak ninxucuac. Joˈcan nak incˈaˈ chic ninxic e̱riqˈuin.

4:19  Aˈan moco ya̱l ta. Cui li Dios naxqˈue cue, chi se̱b tincuulak e̱riqˈuin. Aran toxintau xya̱lal. Tincuil ma caˈaj cuiˈ a̱tinac nequeˈxnau li kˈetkˈeteb. Toj aran tincuil ma ya̱l na nak cuan xcuanquil li Dios riqˈuineb.

4:20  Lix nimajcual cuanquilal li Dios, tento ta̱cˈutu̱nk saˈ li kayuˈam. Moco caˈaj cuiˈ ta riqˈuin ka̱tin ta̱cˈutu̱nk xcuanquil li Dios.

4:21  La̱in ninpatzˈ e̱re cˈaˈru te̱raj. ¿Ma te̱raj nak texinkˈus chi cau nak tincuulak e̱riqˈuin? ¿Malaj ut te̱yi̱b le̱ yuˈam re nak tincuulak riqˈuin rahoc ut tu̱lanil?

Chapter 5

5:1  Yalak bar x-abiman resil nak cuan li joˈ ma̱joˈil naˈleb saˈ e̱ya̱nk xban nak jun li cui̱nk quixmakˈ rixakil lix yucuaˈ. Cˈajoˈ xyibal ru li yo̱queb chixba̱nunquil saˈ e̱ya̱nk. Eb li ma̱cuaˈeb aj pa̱banel incˈaˈ nequeˈxba̱nu chi joˈcan. ¿Ma tojaˈ ta chic la̱ex texba̱nu̱nk re chi joˈcan?

5:2  La̱ex nequekˈetkˈeti e̱rib ut toj cuan li ma̱c saˈ e̱ya̱nk. Narahoˈ raj e̱chˈo̱l ut nayotˈeˈ raj e̱chˈo̱l xban xyibal ru li ma̱c li yo̱ xba̱nunquil saˈ e̱ya̱nk. Li ani xma̱cob chi joˈcan xerisi raj saˈ e̱ya̱nk.

5:3  Usta najt cuanquin e̱riqˈuin junelic yo̱quin che̱cˈoxlanquil. La̱in ninnau nak li cui̱nk aˈan cuan xma̱c. Usta ma̱ anihin chak e̱riqˈuin, abanan li Cristo quixcˈut chicuu nak li jun aˈan cuan xma̱c ut tento nak tixtoj rix lix ma̱c.

5:4  Kˈaxal us raj nak te̱chˈutub e̱rib saˈ xcˈabaˈ li Jesucristo ut te̱cˈu̱b cˈaˈru te̱ba̱nu chirix aˈan. Chanchan nak cua̱nkin e̱riqˈuin xban nak yo̱quin chi tijoc che̱rix. Ut lix nimal xcuanquil li Jesucristo chicua̱nk e̱riqˈuin ut chextenkˈa.

5:5  Isihomak li cui̱nk aˈan saˈ e̱ya̱nk. Nak cua̱nk chic saˈ rukˈ laj tza tixcˈul li raylal ut riqˈuin li raylal tixcˈul, tixcanab taxak xba̱nunquil li ma̱usilal re nak naru ta̱colekˈ nak tol-e̱lk cuiˈchic li Jesucristo.

5:6  Me̱nimobresi e̱rib riqˈuin xcˈoxlanquil nak us yo̱quex chixba̱nunquil. La̱ex nequexinjuntakˈe̱ta riqˈuin xkˈemal li caxlan cua. La̱ex nequenau nak usta caˈchˈin ajcuiˈ lix chˈamal naqˈueman, naxchˈamobresi chixjunil li kˈem. Naraj naxye nak incˈaˈ naru nacuan li ma̱c saˈ xya̱nkeb laj pa̱banel re nak incˈaˈ teˈxcˈam xbeheb li jun chˈo̱l chic chi ma̱cobc.

5:7  Canabomak chi junaj cua li najteril naˈleb re nak ma̱cˈaˈak chic li ma̱c e̱riqˈuin. Chanchanakex chic lix kˈemal li caxlan cua ma̱cˈaˈ xchˈamal xban nak li Jesucristo quirisi le̱ ma̱c. Eb laj judío queˈxmayeja li carner re xjulticanquil li pascua ut joˈcan ajcuiˈ li Jesucristo aˈan lix carner li Dios li quixmayeja rib re risinquil li kama̱c.

5:8  Joˈcan nak chikacanabak li najter naˈleb li naqˈuehoc ke chi ma̱cobc. Li najter naˈleb aˈan chanchan lix chˈamal li caxlan cua. Ut la̱o chanchanako li xkˈemal li caxlan cua ma̱cˈaˈ xchˈamal. Naraj naxye nak ti̱cak chic li kachˈo̱l ut tzˈakal re ru li kayuˈam.

5:9  Saˈ li hu li quintzˈi̱ba e̱riqˈuin junxil, la̱in xinye e̱re nak incˈaˈ te̱junaji e̱rib riqˈuineb laj coˈbe̱t ut laj yumbe̱t.

5:10  Nak xinye e̱re chi joˈcan moco yo̱quin ta chi a̱tinac chirixeb laj coˈbe̱t ut laj yumbe̱t li toj ma̱jiˈ nequeˈpa̱ban. Yo̱quin ban chi a̱tinac chirixeb li nequeˈxye rib nak aj pa̱baneleb ut toj nequeˈxra ru biomal ut nequeˈelkˈac ut toj nequeˈlokˈonin jalanil dios. Cui ta xinye e̱re nak incˈaˈ texcua̱nk saˈ xya̱nkeb li toj ma̱jiˈ nequeˈpa̱ban, incˈaˈ raj naru texcua̱nk saˈ ruchichˈochˈ.

5:11  Li cˈaˈru xinye, aˈan chirixeb li nequeˈxye rib nak aj pa̱baneleb ut yo̱queb chixba̱nunquil li moco uxc ta naraj. Ma̱re naxye rib nak aj pa̱banel ut aˈan aj yumbe̱t ut aj coˈbe̱t malaj aj rahol ru biomal. Ma̱re nalokˈonin jalanil dios, malaj aj hobonel. Ma̱re aj calajenak malaj aj e̱lkˈ. Incˈaˈ texcua̱nk saˈ xya̱nkeb aˈan chi moco texcuaˈak rochbeneb.

5:12  Ma̱cuaˈ la̱in tinrakok a̱tin saˈ xbe̱neb li toj ma̱jiˈ nequeˈpa̱ban. Aˈ li Dios, aˈan li ta̱rakok a̱tin saˈ xbe̱neb.

5:13  Abanan la̱o torakok a̱tin saˈ xbe̱neb li kech aj pa̱banelil li yo̱queb chi ma̱cobc saˈ kaya̱nk. Joˈcan nak tento te̱risi saˈ e̱ya̱nk li cui̱nk aˈan li yo̱ chi ma̱cobc.

Chapter 6

6:1  Cui cuan junak saˈ e̱ya̱nk cuan xchˈaˈajquilal riqˈuin junak xherma̱n, ¿ma ta̱ru̱k ta biˈ ta̱xic chiruheb laj rakol a̱tin re li ruchichˈochˈ? ¿Ma incˈaˈ raj us nak riqˈuineb laj pa̱banel ta̱xic?

6:2  ¿Ma incˈaˈ nequenau nak saˈ jun cutan la̱o aj pa̱banel torakok a̱tin saˈ xbe̱neb chixjunileb li cuanqueb saˈ ruchichˈochˈ? Ut cui la̱o torakok a̱tin saˈ xbe̱neb li cuanqueb saˈ ruchichˈochˈ, ¿cˈaˈut nak incˈaˈ ta̱ru̱k takayi̱b ru li kachˈaˈajquilal saˈ xya̱lal chi kibil kib?

6:3  ¿Ma incˈaˈ nequenau nak saˈ jun cutan torakok a̱tin saˈ xbe̱neb li ángel? Ut cui torakok a̱tin saˈ xbe̱neb li ángel, ¿cˈaˈut nak incˈaˈ ta̱ru̱k torakok a̱tin saˈ xbe̱n li kachˈaˈajquilal arin saˈ ruchichˈochˈ?

6:4  Cui cuan li ple̱t saˈ e̱ya̱nk, ¿cˈaˈut nak nequeqˈue chi rakoc a̱tin saˈ e̱be̱n li ma̱cuaˈeb aj pa̱banel?

6:5  Nequecˈut e̱xuta̱n nak nequeqˈue chi rakoc a̱tin saˈ e̱be̱n li ma̱cuaˈeb aj pa̱banel. ¿Ma ma̱cˈaˈ ta biˈ junak saˈ e̱ya̱nk cuan xnaˈleb re ta̱rakok a̱tin saˈ e̱be̱n la̱ex aj pa̱banel?

6:6  Abanan la̱ex nequecˈam le̱ rech aj pa̱banelil chiru junak aj rakol a̱tin ma̱cuaˈ aj pa̱banel.

6:7  Nak nequecˈam le̱ rech aj pa̱banelil saˈ rakleb a̱tin nacˈutun nak toj ma̱jiˈ nequetau xya̱lal. Kˈaxal us raj nak te̱cuy li rahobtesi̱c ut li elkˈa̱c ut incˈaˈ texxic riqˈuin aj rakol a̱tin.

6:8  Abanan la̱ex incˈaˈ nequecuy. La̱ex ban chic li nequex-elkˈac ut nequeba̱nu li ma̱usilal reheb le̱ rech aj pa̱banelil.

6:9  ¿Ma incˈaˈ nequenau nak eb li incˈaˈ ti̱queb xchˈo̱l incˈaˈ teˈre̱chani lix nimajcual cuanquilal li Dios? Me̱balakˈi e̱rib. Eb laj coˈbe̱t ut eb laj yumbe̱t incˈaˈ teˈre̱chani lix nimajcual cuanquilal li Dios, chi moco li nequeˈlokˈonin re li jalanil dios, chi moco eb laj muxul caxa̱r. Ut eb li cui̱nk li nequeˈma̱cob riqˈuineb li rech cui̱nkilal incˈaˈ ajcuiˈ teˈre̱chani lix nimajcual cuanquilal li Dios. Joˈcan nak me̱balakˈi e̱rib chi xcˈoxlanquil nak us yo̱quex cui toj yo̱quex chixba̱nunquil li ma̱usilal aˈin.

6:10  Eb laj e̱lkˈ ut eb li nequeˈxrahi ru li biomal incˈaˈ teˈre̱chani lix nimajcual cuanquilal li Dios, chi moco laj calajenak, chi moco laj majecuanel, chi moco laj balakˈ teˈre̱chani lix nimajcual cuanquilal li Dios.

6:11  Usta cuanqueb junju̱nk saˈ e̱ya̱nk joˈcan queˈxba̱nu chak, abanan anakcuan cuybil sachbil chic lix ma̱queb. Santobresinbileb chic ut ti̱cobresinbileb chic lix chˈo̱l saˈ xcˈabaˈ li Ka̱cuaˈ Jesucristo ut xban li Santil Musikˈej.

6:12  Cuan li nequeˈyehoc: La̱in naru tinba̱nu chixjunil li cˈaˈru tincuaj xba̱nunquil. Ya̱l nak naru xba̱nunquil chixjunil abanan moco chixjunil ta us xba̱nunquil. La̱in naru ninba̱nu chixjunil li nacuaj, abanan incˈaˈ tinba̱nu cui nacuecˈa nak junes aˈan ta̱xic inchˈo̱l chirix.

6:13  Li Dios quixyi̱b li tzacae̱mk re li kasaˈ ut quixyi̱b li kasaˈ re li tzacae̱mk. Ya̱l ajcuiˈ, aban ta̱cuulak xkˈehil nak li Dios tixsach li tzacae̱mk joˈ ajcuiˈ li katibel. Li Dios incˈaˈ coxyoˈobtesi re li coˈbe̱tac yumbe̱tac. Coxyoˈobtesi ban re nak tocˈanjelak chiru li Ka̱cuaˈ. Ut li Ka̱cuaˈ aˈan li na-iloc ke.

6:14  Li Dios li quicuaclesin re li Ka̱cuaˈ Jesucristo chi yoˈyo saˈ xya̱nkeb li camenak, aˈan ajcuiˈ ta̱cuaclesi̱nk ke chi yoˈyo riqˈuin lix cuanquil.

6:15  ¿Ma incˈaˈ nequenau nak la̱o aj pa̱banel joˈ li rok rukˈ li Ka̱cuaˈ Jesucristo? ¿Ma ta̱ru̱k ta biˈ takajunaji kib riqˈuineb li ixk li nequeˈxcˈayi rib? Ma̱ jokˈe naru xban nak la̱o rok rukˈ li Cristo ut junajo chic riqˈuin nak cuanco.

6:16  ¿Ma incˈaˈ nequenau nak li ani nama̱cob riqˈuin junak ixk aj ma̱c junajeb chi tzˈejcualej nequeˈcana? Tzˈi̱banbil saˈ li Santil Hu nak junajakeb chi tzˈejcualej chi xcabichaleb.

6:17  Ut ani naxjunaji rib riqˈuin li Ka̱cuaˈ, aˈan junaj chic riqˈuin saˈ musikˈej.

6:18  Me̱ba̱nu chic li ma̱usilal. Chixjunil li cˈaˈak re ru chi ma̱quil kˈaxal yibru. Abanan li coˈbe̱tac yumbe̱tac kˈaxal cuiˈchic yibru xban nak li ani nama̱cob chi toj ma̱jiˈ sumsu, li jun aˈan naxmux rib xjunes rib.

6:19  ¿Ma incˈaˈ nequenau nak la̱ex rochochex li Santil Musikˈej xban nak li Santil Musikˈej li quixqˈue e̱re li Dios cuan e̱riqˈuin? Joˈcan nak moco la̱ex ta nequetakla e̱rib e̱junes. La̱ex rehex chic li Dios.

6:20  Lokˈbilex chic chi terto e̱tzˈak. Joˈcan nak ti̱cak le̱ yuˈam ut chelokˈoni li Dios xban nak rehex chic.

Chapter 7

7:1  Xetakla chak xpatzˈbal cue chirix li sumla̱c ut anakcuan tinsume le̱ hu. Us raj chokˈ re li cui̱nk nak ma̱cˈaˈak rixakil.

7:2  Abanan us cui ta̱sumla̱k re nak incˈaˈ ta̱ma̱cobk. Teˈsumla̱k re nak li cui̱nk teˈcua̱nk rixakil chi xju̱nkaleb ut li ixk teˈcua̱nk xbe̱lom chi xju̱nkaleb.

7:3  Tento nak li cui̱nk ta̱cua̱nk riqˈuin li rixakil ut li ixk ta̱cua̱nk riqˈuin lix be̱lom joˈ nequeˈraj chi ribileb rib.

7:4  Li ixakilbej moco aˈan ta yal re saˈ xbe̱n xjunes rib; aban chic lix be̱lom yal re saˈ xbe̱n. Joˈcan ajcuiˈ li be̱lomej. Moco aˈan ta yal re saˈ xbe̱n xjunes rib; aˈ ban chic li rixakil yal re saˈ xbe̱n.

7:5  Cui li be̱lomej naraj cua̱nc riqˈuin li rixakil, li ixakilbej incˈaˈ naru tixye incˈaˈ. Ut cui li ixakilbej naraj cua̱nc riqˈuin lix be̱lom, li be̱lomej incˈaˈ naru tixye incˈaˈ. Naru teˈxcˈu̱b chi ribileb rib nak teˈx-oxlokˈi rib chi ribileb rib jarubak cutan re nak teˈxqˈue xchˈo̱leb chi tijoc. Abanan teˈcua̱nk cuiˈchic mokon chi ribileb rib re nak incˈaˈ teˈa̱le̱k xban laj tza xban nak incˈaˈ teˈxcuy cua̱nc xjuneseb.

7:6  La̱in yal e̱naˈleb yo̱quin chixqˈuebal. Moco yo̱quin ta chixyebal e̱re nak tento te̱ba̱nu. La̱ex yal e̱re chanru te̱raj te̱ba̱nu.

7:7  La̱in nacuaj raj nak ma̱cˈaˈak e̱rixakil joˈ la̱in ma̱cˈaˈ cuixakil. Abanan moco juntakˈe̱to ta chikajunilo. Li junju̱nk cuan xma̱tan qˈuebil re xban li Dios. Joˈcan nak cuan li nequeˈsumla xban nak joˈcan naraj li Dios ut cuan li incˈaˈ nequeˈsumla ut saheb saˈ xchˈo̱l xjuneseb xban nak joˈcan naraj li Dios.

7:8  Ut ninye reheb li incˈaˈ sumsu̱queb ut reheb li xma̱lcaˈan nak us raj chokˈ reheb nak teˈcana̱k xjuneseb joˈ la̱in.

7:9  Ut cui incˈaˈ naru nequeˈxcuy rib, sumla̱keb. Kˈaxal us nak ta̱sumla̱k junak chiru nak yo̱k chixrabal ru junak re nak ta̱cua̱nk riqˈuin chi incˈaˈ sumsu̱queb.

7:10  Anakcuan tinye reheb li ac sumsu̱queb nak li ixakilbej incˈaˈ naru tixjach rib riqˈuin lix be̱lom. Li chakˈrab aˈin ma̱cuaˈ la̱in xinyehoc re injunes. Qˈuebil ban xban li Ka̱cuaˈ.

7:11  Ut cui li ixakilbej tixjach rib riqˈuin lix be̱lom, li ixk aˈan ta̱cua̱nk xjunes ut incˈaˈ chic tixsicˈ jalan cui̱nk. Abanan us raj cui tixcˈam cuiˈchic rib saˈ usilal riqˈuin lix be̱lom. Ut joˈcan ajcuiˈ li be̱lomej, incˈaˈ ajcuiˈ naru tixjach rib riqˈuin li rixakil.

7:12  La̱in nacuaj xqˈuebal caˈchˈinak chic le̱ naˈleb. Aˈin ma̱cuaˈ xyehom li Ka̱cuaˈ, aban la̱in ninnau nak us xba̱nunquil. Cui junak cui̱nk naxpa̱b li Dios ut li rixakil toj ma̱jiˈ napa̱ban ut naxcˈul xchˈo̱l li ixk cua̱nc riqˈuin, li cui̱nk aˈan incˈaˈ naru tixcanab chi moco tixjach rib riqˈuin li rixakil.

7:13  Ut cui junak ixk naxpa̱b li Dios ut lix be̱lom toj ma̱jiˈ napa̱ban, ut naxcˈul xchˈo̱l li cui̱nk cua̱nc riqˈuin, li ixk aˈan incˈaˈ naru tixcanab chi moco tixjach rib riqˈuin lix be̱lom.

7:14  Us cui incˈaˈ teˈxjach rib. Li be̱lomej li toj ma̱jiˈ napa̱ban, aˈan lokˈ chiru li Dios saˈ xcˈabaˈ li rixakil. Ut li ixakilbej li toj ma̱jiˈ napa̱ban, aˈan lokˈ chiru li Dios saˈ xcˈabaˈ lix be̱lom li napa̱ban. Cui ta incˈaˈ joˈcan, lix cocˈal eb aˈan chanchaneb raj lix cocˈaleb li ma̱cuaˈeb ralal xcˈajol li Dios. Abanan cui incˈaˈ teˈxjach rib, lix cocˈaleb lokˈ chiru li Dios saˈ xcˈabaˈ li jun li napa̱ban.

7:15  Cui li be̱lomej ma̱cuaˈ aj pa̱banel ut incˈaˈ chic naraj cua̱nc riqˈuin li rixakil xban nak aj pa̱banel chic li ixk, naru teˈxjach rib. Ut cui li ixakilbej ma̱cuaˈ aj pa̱banel ut incˈaˈ chic naraj cua̱nc riqˈuin lix be̱lom xban nak li cui̱nk aj pa̱banel chic, naru ajcuiˈ teˈxjach rib. Chi joˈcan ta̱cana̱k laj pa̱banel chi ma̱cˈaˈ chic ta̱chˈiˈchˈiˈi̱nk re xban nak li Dios naraj nak tocua̱nk saˈ xya̱lal.

7:16  At ixakilbej, la̱at incˈaˈ nacanau ma ta̱pa̱ba̱nk la̱ be̱lom a̱ban. Joˈcan ajcuiˈ la̱at, be̱lomej, incˈaˈ nacanau ma ta̱pa̱ba̱nk la̱ cuixakil a̱ban.

7:17  Li junju̱nk chicua̱nk joˈ naraj li Dios. Us cui cuan a̱cuixakil nak xapa̱b li Cristo. Cui ma̱cˈaˈ a̱cuixakil, us ajcuiˈ. Tatcana̱k joˈ nak cuancat nak xatpa̱ban. Aˈan aˈin li nequebinchakˈrabi cuiˈ chixjunileb laj pa̱banel yalak bar.

7:18  Cui junak ac xcˈul li circuncisión nak ta̱pa̱ba̱nk, li jun aˈan incˈaˈ tixcˈoxla xjalbal li retalil li circuncisión. Ut cui junak ta̱pa̱ba̱nk ut toj ma̱jiˈ naxcˈul li circuncisión, li jun aˈan incˈaˈ ajcuiˈ tento nak tixcˈul li circuncisión.

7:19  Li ani naxcˈul li circuncisión juntakˈe̱t riqˈuin li ani incˈaˈ naxcˈul xban nak li circuncisión ma̱cˈaˈ xcuanquil. Li kˈaxal us xba̱nunquil, aˈan xpa̱banquil lix chakˈrab li Dios.

7:20  Joˈ nak cuan junak nak quisiqˈueˈ ru xban li Dios, joˈcan ajcuiˈ ta̱cana̱k.

7:21  Cui cuancat rubel xcuanquil la̱ patrón nak li Dios quixsicˈ a̱cuu, matcˈoxlac chirix aˈan. Abanan cui naxqˈue rib nak tat-e̱lk rubel xcuanquil la̱ patrón, naru nacat-el saˈ xya̱lal.

7:22  Li ani cuan rubel xcuanquil lix patrón nak quisiqˈueˈ ru xban li Ka̱cuaˈ, li jun aˈan libre chic cuan chiru li Dios. Ut li jun li incˈaˈ cuan rubel xcuanquil lix patrón nak quisiqˈueˈ ru, lokˈbil chic xban li Cristo chi cˈanjelac chiru.

7:23  Joˈcan ajcuiˈ la̱ex. Lokˈbilex chic xban li Cristo chi terto e̱tzˈak. Joˈcan nak me̱qˈue chic e̱rib rubel xcuanquil li incˈaˈ useb xnaˈleb. Me̱qˈue e̱rib chi takla̱c re xba̱nunquil li incˈaˈ naraj li Dios.

7:24  Ex herma̱n, joˈ nak cuanquex nak quisiqˈueˈ e̱ru xban li Dios, joˈcan ajcuiˈ texcana̱k.

7:25  La̱in tinye e̱re li nincˈoxla chirixeb li sa̱j ixk ut li sa̱j cui̱nk. Usta ma̱cuaˈ ra̱tin li Ka̱cuaˈ, us cui tex-abi̱nk chicuu xban nak riqˈuin xnimal ruxta̱n li Ka̱cuaˈ naxqˈue innaˈleb chixyebal e̱re lix ya̱lal.

7:26  Xban li rahobtesi̱c cuan saˈ kabe̱n, nincˈoxla nak us cui incˈaˈ teˈsumla̱k li toj ma̱jiˈ sumsu̱queb.

7:27  Abanan cui sumsu̱quex, me̱canab le̱ rixakil. Ut cui incˈaˈ sumsu̱quex, us ajcuiˈ cui incˈaˈ te̱sicˈ e̱rixakil.

7:28  Abanan cui texsumla̱k moco ma̱c ta aˈan. Ut joˈcaneb ajcuiˈ li sa̱j ixk. Moco ma̱c ta cui teˈsumla̱k. Abanan kˈaxal cuiˈchic nabal li raylal saˈ xbe̱neb li sumsu̱queb. La̱in incˈaˈ raj nacuaj nak te̱cˈul li raylal.

7:29  Ex inherma̱n, li bar cuan nacuaj xyebal, aˈan aˈin: Yo̱queb chi numecˈ li cutan saˈ junpa̱t. Joˈcan nak la̱ex li cuan e̱rixakil ma̱cuaˈ caˈaj cuiˈ le̱ rixakil te̱cˈoxla. Cheqˈuehak ban e̱chˈo̱l chi cˈanjelac chiru li Ka̱cuaˈ.

7:30  Usta sa saˈ kachˈo̱l, usta ra saˈ kachˈo̱l, usta cuan kabiomal usta ma̱cˈaˈ, chikaqˈuehak ban kachˈo̱l chi cˈanjelac chiru li Ka̱cuaˈ Dios.

7:31  Me̱qˈue e̱chˈo̱l chirix li cˈaˈru cuan e̱re saˈ li ruchichˈochˈ aˈin, xban nak chixjunil li cˈaˈru cuan saˈ ruchichˈochˈ ta̱osokˈ.

7:32  Nacuaj raj nak ma̱cˈaˈ cˈaˈru ta̱xic cuiˈ e̱chˈo̱l. Li cui̱nk li ma̱cˈaˈ rixakil naxqˈue xchˈo̱l chi cˈanjelac chiru li Ka̱cuaˈ Dios ut chixba̱nunquil li bar cuan naraj li Ka̱cuaˈ Dios.

7:33  Ut li cui̱nk cuan rixakil tento nak tixqˈue xchˈo̱l chi cˈanjelac re nak ta̱cua̱nk cˈaˈru reheb ut tixqˈue xchˈo̱l chixba̱nunquil li naraj li rixakil re nak sahak saˈ xchˈo̱l. Joˈcan nak cuib ru lix cˈaˈux xban nak naxcˈoxla li Ka̱cuaˈ Dios ut naxcˈoxla li rixakil.

7:34  Joˈcan ajcuiˈ li ixk li cuan xbe̱lom. Cuib ru lix cˈaˈux xban nak naxcˈoxla li Ka̱cuaˈ Dios ut tento ajcuiˈ nak tixcˈoxla lix cˈanjel saˈ rochoch ut naxba̱nu cˈaˈru naraj lix be̱lom. Ut li ixk li ma̱cˈaˈ xbe̱lom naxqˈue xchˈo̱l chi cˈanjelac chiru li Ka̱cuaˈ Dios ut naxba̱nu joˈ naraj li Dios.

7:35  Moco re ta nak incˈaˈ texsumla̱k nak ninye e̱re chi joˈcaˈin. Re ban e̱tenkˈanquil. La̱in nacuaj nak te̱ba̱nu li us. Nacuaj nak te̱kˈaxtesi e̱rib chi cˈanjelac chiru li Ka̱cuaˈ chi anchal e̱chˈo̱l.

7:36  Cui junak yucuaˈbej naxcˈoxla nak us ta̱sumla̱k lix rabin xban nak ac cuan xchihab, us nak tixba̱nu li naxcˈoxla xba̱nunquil. Tixsumub lix rabin. Moco ma̱c ta cui ta̱sumla̱k.

7:37  Li yucuaˈbej ma̱ ani naminoc ru. Naru tixba̱nu li naxcˈoxla nak us xba̱nunquil. Ut cui na-ala saˈ xchˈo̱l nak incˈaˈ tixsumub lix rabin, cha̱bil ajcuiˈ naxba̱nu nak incˈaˈ tixsumub.

7:38  Joˈcan nak li ani naxsumub lix rabin, cha̱bil naxba̱nu. Ut li incˈaˈ naxsumub lix rabin, kˈaxal cuiˈchic us naxba̱nu.

7:39  Li ixk li sumsu tento nak ta̱cua̱nk riqˈuin lix be̱lom aˈ yal joˈ najtil yoˈyo̱k lix be̱lom. Ut cui nacam lix be̱lom aˈan chic yal re ani aj iqˈuin ta̱sumla̱k. Abanan cui naraj sumla̱c, tento nak riqˈuin junak aj pa̱banel ta̱sumla̱k.

7:40  Abanan nincˈoxla la̱in nak kˈaxal us raj nak li xma̱lcaˈan ta̱cana̱k xjunes ut incˈaˈ chic ta̱sumla̱k. Li naˈleb aˈin li xinye e̱re, aˈan qˈuebil cue xban li Santil Musikˈej.

Chapter 8

8:1  Cuan cuib oxib cua̱tin tinye e̱re chirix li tzacae̱mk mayejanbil chiruheb li yi̱banbil dios. Nakanau nak chikajunilo ac xkatzol kib chirix aˈin. Abanan toj cuan saˈ e̱ya̱nk nequeˈxcˈoxla nak nequeˈxnau chixjunil ut riqˈuin aˈan nequeˈxkˈetkˈeti rib. Aban li ani narahoc, aˈan naxtenkˈa li rech aj pa̱banelil chi qˈui̱c saˈ lix pa̱ba̱l.

8:2  Li ani narecˈa nak cuan xnaˈleb, li jun aˈan toj ma̱jiˈ naxtau li xya̱lal chi tzˈakal.

8:3  Abanan li ani narahoc re li Dios, li Dios naxnau nak aˈan li ralal xcˈajol.

8:4  Anakcuan tina̱tinak chirix li tzacae̱mk mayejanbil chiruheb li yi̱banbil dios. La̱o nakanau nak li yi̱banbil dios ma̱cˈaˈ nequeˈoc cuiˈ xban nak moco dioseb ta. Nakanau nak jun ajcuiˈ li Dios cuan.

8:5  Cuan nequeˈyehoc re nak cuan nabal li dios joˈ saˈ choxa joˈ saˈ ruchichˈochˈ. Dios ut Ka̱cuaˈ nequeˈxye reheb. Ut ya̱l nak cuan nabaleb li yi̱banbil dios.

8:6  Abanan la̱o aj pa̱banel nakanau nak jun ajcuiˈ li Dios cuan. Ut li Dios Acuabej aˈan li quiyi̱ban re chixjunil li cˈaˈru cuan. Coxyoˈobtesi la̱o re nak takalokˈoni aˈan. Ut jun ajcuiˈ li Ka̱cuaˈ cuan, aˈ li Jesucristo. Ut saˈ xcˈabaˈ aˈan cuan chixjunil ut saˈ xcˈabaˈ aˈan nak cuan li colba-ib.

8:7  Abanan moco chixjunileb ta nequeˈxtau ru li xya̱lal aˈin chirix li mayejanbil tzacae̱mk. Cˈaynakeb chalen chak najter chixpa̱banquil li yi̱banbil dios, ut anakcuan nak nequeˈxtzaca li tzacae̱mk mayejanbil chiru li yi̱banbil dios nequeˈxcˈoxla nak yo̱queb chixqˈuebal xlokˈal li yi̱banbil dios. Ut xban nak toj kˈuneb xchˈo̱l saˈ lix pa̱ba̱l, nequeˈxcˈoxla nak nequeˈxmux ru lix pa̱ba̱leb.

8:8  Moco xban ta li katzacae̱mk nak tocua̱nk chi sum a̱tin riqˈuin li Dios. Li tzacae̱mk incˈaˈ naxnimobresi xcuanquil li kapa̱ba̱l chi moco naxpoˈ li kapa̱ba̱l.

8:9  Naru te̱tzaca li mayejanbil tzacae̱mk. Abanan cheqˈuehak retal nak incˈaˈ te̱luctasi xchˈo̱l li toj kˈuneb xchˈo̱l saˈ lix pa̱ba̱leb xban nak nequetzaca aˈan. Cheqˈuehak retal nak incˈaˈ ta̱oc cuiˈchic chi ma̱cobc e̱ban la̱ex.

8:10  La̱ex nequenau li xya̱lal aˈin. Nequenau nak moco ma̱c ta xtzacanquil li tzacae̱mk mayejanbil. Abanan cui junak aj pa̱banel toj kˈun xchˈo̱l saˈ xpa̱ba̱l ta̱ilok e̱re nak cˈojcˈo̱quex saˈ me̱x chi cuaˈac cuan cuiˈ li yi̱banbil dios, ma̱re aˈan tixtzaca li mayejanbil chiruheb li yi̱banbil dios ut tixcˈoxla nak xmux ru lix pa̱ba̱l.

8:11  La̱ex nequenau nak naru te̱tzaca li mayejanbil tzacae̱mk. Abanan, ma̱re yal e̱ma̱c la̱ex nak ta̱oc cuiˈchic chi ma̱cobc li toj ma̱jiˈ nacacuu saˈ xpa̱ba̱l. La̱ex nequenau nak li Cristo quicam ajcuiˈ saˈ xcˈabaˈ eb aˈan.

8:12  Cui e̱ban la̱ex nak yo̱queb chi lucta̱c xchˈo̱leb le̱ rech aj pa̱banelil li toj kˈuneb xchˈo̱l saˈ lix pa̱ba̱l, yo̱quex chi ma̱cobc chiruheb aˈan. Ut yo̱quex ajcuiˈ chi ma̱cobc chiru li Cristo.

8:13  Joˈcan nak cui li nintzaca naxqˈue chi ma̱cobc li cuech aj pa̱banelil, ma̱ jokˈe chic tintiu li mayejanbil tib xban nak incˈaˈ nacuaj nak teˈma̱cobk inban la̱in.

Chapter 9

9:1  ¿Ma incˈaˈ ta biˈ naru tinba̱nu li cˈaˈru nacuaj la̱in? ¿Ma incˈaˈ ta biˈ la̱in apóstol? La̱in quicuil ru li Ka̱cuaˈ Jesucristo. Ut saˈ incˈabaˈ la̱in nak xexpa̱ban xban nak la̱in xinyehoc e̱re resil li colba-ib.

9:2  Ma̱re cuan li incˈaˈ nequeˈqˈuehoc incuanquil nak la̱in apóstol. Abanan relic chi ya̱l nak la̱in apóstol xban nak la̱in xinyehoc e̱re resil li colba-ib. Joˈcan nak xepa̱b li Cristo.

9:3  Riqˈuin li a̱tin aˈin nequebinsume li nequeˈyehoc re nak ma̱cuaˈin apóstol.

9:4  ¿Ma incˈaˈ ta biˈ raj tento ajcuiˈ nak tine̱tenkˈa la̱in riqˈuin lin tzacae̱mk?

9:5  Eb li ri̱tzˈin li Ka̱cuaˈ Jesucristo cuanqueb rixakil ut nequeˈxcˈam chirixeb bar nequeˈxic. Ut joˈcan ajcuiˈ naxba̱nu li apóstol Pedro. ¿Ma incˈaˈ ta biˈ raj ta̱ru̱k tinsumla̱k riqˈuin junak ixk aj pa̱banel la̱in ut tincˈam chicuix bar tinxic joˈ nequeˈxba̱nu eb li apóstol jun chˈo̱l chic?

9:6  Malaj ut nequecˈoxla nak caˈaj cuiˈ la̱in ut laj Bernabé cau totrabajik re nak takasicˈ katzacae̱mk.

9:7  Junak soldado, ¿ma incˈaˈ ta biˈ tixcˈul lix tojbal? Ut junak aj acuinel, ¿ma incˈaˈ ta biˈ tixtzaca li ru li racui̱mk? Ut junak aj qˈuirisinel cuacax, ¿ma incˈaˈ ta biˈ ta̱rucˈ re lix leche lix cuacax?

9:8  Li cˈaˈru yo̱quin chixyebal ma̱cuaˈ yal xcˈaˈux cui̱nk. Aˈan tzˈi̱banbil saˈ li chakˈrab li quiqˈueheˈ re laj Moisés.

9:9  Tzˈi̱banbil saˈ lix chakˈrab laj Moisés chi joˈcaˈin: Ma̱bacˈ xtzˈu̱mal re li bo̱yx nak yo̱ chi cˈanjelac re risinquil rix li trigo. Li Dios ma̱cuaˈ caˈaj cuiˈ chirix li bo̱yx naa̱tinac.

9:10  ¿Ma ma̱cuaˈ ta biˈ chikix la̱o aj cˈanjel chiru li Dios yo̱ chi a̱tinac? ¿Ma incˈaˈ ta biˈ ta̱ru̱k takacˈul katojbal la̱o aj cˈanjel chiru li Dios? Li ani na-au naroybeni ru li racui̱mk ut joˈcan ajcuiˈ laj kˈolonel naroybeni ajcuiˈ nak ta̱tzˈak ru li acui̱mk.

9:11  La̱o xoyehoc resil li colba-ib e̱re. ¿Ma incˈaˈ ta biˈ naru nocoe̱tenkˈaˈ la̱ex riqˈuin li cˈaˈru takaj la̱o re xnumsinquil li cutan junju̱nk?

9:12  Cui la̱ex nequetenkˈa li jun chˈol chic li kech aj cˈanjelil, ¿ma tojaˈ ta chic la̱o incˈaˈ toe̱tenkˈa? La̱o incˈaˈ xkatzˈa̱ma e̱re nak toe̱tenkˈa. Xkacuy ban xnumsinquileb li cutan yal chi joˈcan xban nak la̱o incˈaˈ xkaj nak ta̱chˈina̱nk e̱chˈo̱l chirabinquil li resil li Cristo.

9:13  ¿Ma incˈaˈ ta biˈ nequenau nak eb laj judío li nequeˈcˈanjelac saˈ rochoch li Dios, tento ajcuiˈ nak nequeˈtzˈak li cˈaˈru namayeja̱c saˈ rochoch li Dios? Aˈan naraj naxye nak eb li nequeˈcˈanjelac saˈ li artal nequeˈtzˈak ajcuiˈ lix tibel li mayejanbil xul.

9:14  Joˈ nak nequeˈtenkˈa̱c eb laj judío li nequeˈcˈanjelac saˈ rochoch li Dios, joˈcan ajcuiˈ nak teˈxcˈul lix tenkˈanquileb li yo̱queb chi cˈanjelac chiru li Dios anakcuan xban nak joˈcan quixye li Ka̱cuaˈ.

9:15  Abanan la̱in incˈaˈ xintzˈa̱ma e̱re nak tine̱tenkˈa, chi moco yo̱quin ta chixyebal aˈin re nak tine̱tenkˈa. Incˈaˈ nacuaj tintojekˈ xban nak nasahoˈ saˈ inchˈo̱l nak ninye resil li colba-ib chi ma̱cˈaˈ intojbal. Us raj nak tinca̱mk xban tzˈoca̱c chiru nak tine̱toj ut tinsach li sahil chˈo̱lejil li nincˈul xban xyebal resil li colba-ib chi ma̱cˈaˈ intojbal.

9:16  La̱in incˈaˈ ninnimobresi cuib xban nak ninchˈolob xya̱lal li colba-ib. Taklanbilin chi cˈanjelac xban li Dios. Kˈaxal ra raj chokˈ cue cui ta incˈaˈ ninjultica resil.

9:17  Cui ta yo̱quin chixba̱nunquil yal xban nak nacuaj la̱in, tinyoˈoni raj intojbal. Abanan yo̱quin chixba̱nunquil lin cˈanjel xban nak tenebanbil saˈ inbe̱n xban li Dios xyebal resil li colba-ib.

9:18  ¿Cˈaˈru inkˈajca̱munquil yo̱quin chixcˈulbal? Caˈaj cuiˈ li sahil chˈo̱lejil naxqˈue cue li Dios xban nak ninjultica resil li colba-ib chi ma̱cˈaˈ intojbal. La̱in ta̱ru̱k raj tincˈul intojbal e̱riqˈuin abanan incˈaˈ nacuaj.

9:19  La̱in moco taklanbilin ta xban cui̱nk, abanan ninqˈue cuib chi cˈanjelac chiruheb chixjunileb re nak teˈxpa̱b li Cristo inban la̱in.

9:20  Nak cuanquin saˈ xya̱nkeb laj judío la̱in ninba̱nu joˈ nequeˈxba̱nu laj judío re nak teˈxpa̱b li Cristo. Cuan li toj nequeˈxqˈue xcuanquil lix chakˈrab laj Moisés. Nak cuanquin saˈ xya̱nkeb aˈan, ninba̱nu li naxye lix chakˈrab laj Moisés re nak teˈxpa̱b li Cristo inban la̱in.

9:21  Eb li ma̱cuaˈeb aj judío moco cuanqueb ta rubel xcuanquil lix chakˈrab laj Moisés. Nak cuanquin saˈ xya̱nkeb aˈan, ninba̱nu joˈ nequeˈxba̱nu eb aˈan re nak teˈxpa̱b li Cristo inban la̱in. Abanan aˈan incˈaˈ naraj naxye nak incˈaˈ ninba̱nu li naxye li Dios. Incˈaˈ ninba̱nu li incˈaˈ us. La̱in ninba̱nu li naxye li Cristo.

9:22  Nak cuanquin saˈ xya̱nkeb li toj kˈuneb xchˈo̱l saˈ lix pa̱ba̱l, nincubsi cuib chiruheb re nak teˈcacuu̱k xchˈo̱l saˈ xpa̱ba̱leb inban la̱in. Naraj naxye nak ninjuntakˈe̱ta cuib riqˈuin chixjunileb re nak naru tinchˈolob xya̱lal chiruheb. Ninba̱nu chi joˈcan re nak teˈcolekˈ.

9:23  Chixjunil aˈin nalajinba̱nu re nak naru tinchˈolob xya̱lal li colba-ib chiruheb li cuas cui̱tzˈin ut re nak tintzˈako̱nk ajcuiˈ la̱in riqˈuin li naxyechiˈi li Dios.

9:24  Nequexinjuntakˈe̱ta riqˈuineb li nequeˈxyal xkˈe chi a̱linac. ¿Ma incˈaˈ ta biˈ nequenau nak eb li nequeˈa̱linac chixjunileb nequeˈxyal xkˈe chi a̱linac? Abanan jun ajcuiˈ naxcˈul xma̱tan. Joˈcan ut la̱ex cheqˈuehak e̱chˈo̱l chi pa̱ba̱nc re nak te̱cˈul e̱ma̱tan riqˈuin li Dios.

9:25  Li ani naxyal xkˈe chi a̱linac naxcuy li raylal re nak ta̱cacuu̱k xmetzˈe̱u. Nequeˈxba̱nu aˈan re xcˈulbal junak ma̱tan na-osoˈ. Joˈcan ajcuiˈ la̱o aj pa̱banel nakacuy li raylal ut nakacˈul ajcuiˈ kama̱tan. Abanan li ma̱tan nakacˈul la̱o incˈaˈ na-osoˈ. Aˈan cuan chi junelic.

9:26  Li ani naa̱linac naxyal xkˈe re nak tixcˈul lix ma̱tan. Joˈcan ajcuiˈ la̱in. Ninqˈue inchˈo̱l chi cˈanjelac chiru li Dios re nak tincˈul inma̱tan. Moco yo̱quin ta chixyalbal inmetzˈe̱u joˈ li nasacˈoc saˈ ikˈ chi ma̱cˈaˈ rajbal. Ninqˈue ban inchˈo̱l chi cˈanjelac saˈ xya̱lal chiru li Dios.

9:27  Nintacuasi cuib ut ninqˈue inchˈo̱l chi cˈanjelac. Incˈaˈ ninba̱nu li nacuaj la̱in. Ninba̱nu ban li naraj li Dios. Incˈaˈ nacuaj nak la̱in chic incˈaˈ tincˈul lin ma̱tan mokon nak acak xinye resil li colba-ib reheb li cuas cui̱tzˈin.

Chapter 10

10:1  Ex inherma̱n, la̱in nacuaj nak texcˈoxlak caˈchˈinak chirix li cˈaˈru queˈxcˈul li kaxeˈto̱nil yucuaˈ nak queˈel saˈ li tenamit Egipto. Li Dios quixtakla li chok chi cˈamoc be chiruheb ut chixjunileb queˈnumeˈ jun pacˈal li Caki Palau nak quixjach rib re teˈnumekˈ.

10:2  Chanchan nak queˈcube xhaˈeb saˈ li chok ut saˈ li Caki Palau ut riqˈuin aˈan queˈxcˈul xchˈo̱leb nak laj Moisés ta̱cˈamok be chiruheb.

10:3  Ut chixjunileb queˈxcuaˈ li maná li choxahil cua li quixtakla chak li Dios.

10:4  Chixjunileb queˈrucˈ li haˈ li quiqˈueheˈ reheb xban li Dios. Li haˈ aˈan qui-el chak saˈ li sako̱nac. Ut li sako̱nac aˈan, aˈan retalil li Cristo li qui-ochbenin reheb nak yo̱queb chi numecˈ saˈ li chaki chˈochˈ.

10:5  Abanan moco chixjunileb ta queˈxba̱nu joˈ naraj li Dios. Lix qˈuialeb queˈxkˈet ra̱tin li Dios ut xban nak incˈaˈ queˈxba̱nu joˈ naraj li Dios, joˈcan nak queˈcam saˈ li chaki chˈochˈ ut incˈaˈ queˈoc saˈ li tenamit Canaán.

10:6  Chixjunil aˈan nacˈutuc chiku nak incˈaˈ takarahi ru li incˈaˈ us joˈ queˈxba̱nu eb aˈan.

10:7  Aˈan naxcˈut chiku nak incˈaˈ takalokˈoni li yi̱banbil dios joˈ queˈxba̱nu eb aˈan. Joˈcaˈin tzˈi̱banbil saˈ li Santil Hu chirixeb: Eb li tenamit queˈcuaˈac ut queˈucˈac ut queˈxajoc re xlokˈoninquil li cuacax oro. (Ex. 32:6)

10:8  Ut naxcˈut ajcuiˈ chiku nak incˈaˈ us li coˈbe̱tac yumbe̱tac joˈ queˈxba̱nu eb aˈan ut chiru jun cutan quilajeˈcam oxib xcaˈcˈa̱l mil (23,000) chi tenamit xban li ma̱usilal queˈxba̱nu.

10:9  Mikaqˈue xjoskˈil li Ka̱cuaˈ Dios joˈ queˈxba̱nu eb aˈan nak queˈxba̱nu li ma̱usilal ut queˈtiˈeˈ xbaneb li cˈantiˈ li quixtakla li Ka̱cuaˈ Dios ut queˈcam.

10:10  Chi moco tocuechˈok, joˈ queˈxba̱nu eb aˈan. Ut xbaneb lix ma̱usilal queˈcamsi̱c xban li ángel li quixtakla chak li Dios.

10:11  Li cˈaˈru queˈxcˈul li kaxeˈto̱nil yucuaˈ aˈan tzˈi̱banbil retalil saˈ li Santil Hu re nak la̱o takaqˈue retal ut incˈaˈ takaba̱nu joˈ queˈxba̱nu eb aˈan xban nak cuulac re li rosoˈjic li cutan.

10:12  Joˈcan nak li ani narecˈa nak cau xchˈo̱l saˈ lix pa̱ba̱l chixqˈuehak retal lix yuˈam re nak incˈaˈ ta̱oc chi ma̱cobc.

10:13  Moco jalan ta chic li a̱le̱c nequecˈul la̱ex chiru li nequeˈxcˈul chixjunileb. Abanan li Dios ti̱c xchˈo̱l. Aˈan incˈaˈ nocoxcanab chi a̱le̱c cui incˈaˈ takacuy xnumsinquil. Aˈan ban natenkˈan ke chixcuybal xnumsinquil.

10:14  Joˈcan ut ex inherma̱n, raro̱quex inban, me̱lokˈoni chic li jalanil dios.

10:15  La̱in ninchˈolob xya̱lal che̱ru xban nak cuan e̱naˈleb. Ut la̱ex naru te̱ye ma us li ninye malaj incˈaˈ.

10:16  Nak nakaba̱nu li lokˈoni̱nc re xjulticanquil lix camic li Cristo, nocotioxin chiru li Dios. Nak nakucˈ li xyaˈal li uva, ¿ma incˈaˈ ta biˈ junajo riqˈuin li Cristo xban nak quihoyeˈ xquiqˈuel chiru li cruz saˈ kacˈabaˈ? Ut nak nakatzaca li caxlan cua li najachiman, ¿ma incˈaˈ ta biˈ junajo riqˈuin li Cristo xban nak quicam chiru li cruz saˈ kacˈabaˈ?

10:17  Usta nabalo, jun ajcuiˈ li caxlan cua najachiman ut nakacuotzi. Aˈan retalil nak la̱o junajo chic riqˈuin li Cristo.

10:18  Cheqˈue retal laj Israel. Eb aˈan queˈxtzaca li tib li queˈxmayeja chiru li Dios. Aˈan retalil nak cuanqueb chi sum a̱tin riqˈuin li Dios.

10:19  ¿Cˈaˈru xya̱lal li yo̱quin chixyebal? ¿Ma yoˈyo ta biˈ li yi̱banbil dios? Incˈaˈ. Ut, ¿ma cuan ta biˈ xcuanquil li tib li namayeja̱c chiruheb? Ma̱cˈaˈ xban nak ma̱cˈaˈ xcuanquil li yi̱banbil dios.

10:20  La̱in incˈaˈ ninye nak cuan xcuanquil li yi̱banbil dios, chi moco ninye nak li mayejanbil tib cuan xcuanquil. Li yo̱quin chixyebal, aˈan aˈin: eb li incˈaˈ nequeˈxpa̱b li tzˈakal Dios nequeˈmayejac, aban ma̱cuaˈ chiru li Dios nequeˈmayejac. Chiru ban li ma̱us aj musikˈej. Ut la̱in incˈaˈ nacuaj nak yo̱kex chi oque̱nc saˈ lix naˈlebeb li ma̱us aj musikˈej.

10:21  Incˈaˈ naru te̱rucˈ xsaˈ li secˈ re xjulticanquil xcamic li Ka̱cuaˈ Jesús, ut te̱rucˈ ajcuiˈ xsaˈ li secˈ re xqˈuebal xlokˈal li ma̱us aj musikˈej. Chi moco naru te̱cuaˈ li caxlan cua re xjulticanquil xcamic li Ka̱cuaˈ Jesucristo ut te̱cuaˈ ajcuiˈ li cua mayejanbil chiruheb li ma̱us aj musikˈej.

10:22  Incˈaˈ us cui takaqˈue xjoskˈil li Ka̱cuaˈ riqˈuin xlokˈoninquil li yi̱banbil dios. ¿Ma la̱o ta biˈ nim kacuanquil chiru li Ka̱cuaˈ? Ma̱ jokˈe xban nak la̱o ma̱cˈaˈ kacuanquil.

10:23  Cuan li nequeˈyehoc re nak naru nakaba̱nu chixjunil li nakaj. Ya̱l nak naru nakaba̱nu, abanan moco chixjunil ta us xba̱nunquil. Ya̱l nak naru xba̱nunquil chixjunil, abanan moco chixjunil ta li cˈaˈru nakaba̱nu nocoxtenkˈa chi qˈui̱c saˈ li kapa̱ba̱l.

10:24  Me̱sicˈ li us caˈaj cuiˈ chokˈ e̱re la̱ex. Chesicˈ aj ban cuiˈ li us chokˈ reheb le̱ ras e̱ri̱tzˈin.

10:25  Naru te̱tzaca chixjunil li tib nacˈayiman saˈ li cˈayiba̱l, ut me̱patzˈ ma mayejanbil chiru li yi̱banbil dios re nak ma̱cˈaˈak e̱cˈaˈux nak te̱tzaca.

10:26  Naru te̱tzaca xban nak li Ka̱cuaˈ Dios aˈan laj e̱chal re li ruchichˈochˈ ut aˈan ajcuiˈ laj e̱chal re chixjunil li cuan saˈ ruchichˈochˈ.

10:27  Cui junak ma̱cuaˈ aj pa̱banel tatxbok chi cuaˈac riqˈuin ut cui naxcˈul a̱chˈo̱l xic riqˈuin, li cˈaˈru tixqˈue chatzaca, chacˈul. Abanan incˈaˈ ta̱patzˈ ma mayejanbil li tzacae̱mk aˈan re nak ma̱cˈaˈak a̱cˈaˈux nak ta̱tzaca.

10:28  Aˈut cui junak naxye a̱cue nak li tzacae̱mk aˈan mayejanbil chiru li yi̱banbil dios, incˈaˈ ta̱tzaca aˈan re nak incˈaˈ ta̱chˈina̱k xchˈo̱l li xyehoc a̱cue nak mayejanbil tzacae̱mk ut re ajcuiˈ nak incˈaˈ ta̱oc xcˈaˈux.

10:29  Incˈaˈ yo̱quin chixyebal aˈin chirix la̱ cˈaˈux la̱at. Yo̱quin chi a̱tinac re nak incˈaˈ ta̱chˈina̱nk xchˈo̱l li jun chic a̱ban la̱at. Ma̱re junak e̱re ta̱chakˈok ut tixye cue, ¿cˈaˈut nak incˈaˈ tinba̱nu li naru tinba̱nu yal xban nak jalan chic naxye nak incˈaˈ us xba̱nunquil?

10:30  Ut cui la̱in nintioxin chirix li cˈaˈru nintzaca, ¿cˈaˈut nak ta̱cuechˈi̱k rix li cˈaˈru tintzaca? chaˈak.

10:31  La̱in tinye e̱re li xya̱lal. Chixjunil li cˈaˈru te̱tzaca ut chixjunil li cˈaˈru te̱ba̱nu, cheba̱nuhak re xqˈuebal xlokˈal li Ka̱cuaˈ Dios.

10:32  Me̱ba̱nu li cˈaˈak re ru napoˈoc xchˈo̱leb le̱ ras e̱ri̱tzˈin usta aj judío, usta ma̱cuaˈeb aj judío. Chi moco te̱ba̱nu li cˈaˈru ta̱poˈok xchˈo̱l le̱ rech aj pa̱banelil.

10:33  Joˈcan nak la̱in ninyal inkˈe chixba̱nunquil li us re xtenkˈanquil chixjunileb. La̱in incˈaˈ yo̱quin chixsicˈbal li us chokˈ cue la̱in injunes. Yo̱quin ban chixsicˈbal li us chokˈ reheb chixjunileb re nak ta̱ru̱k teˈcolekˈ.

Chapter 11

11:1  Joˈcan ut nak la̱ex chetzolak e̱rib cuiqˈuin xban nak la̱in xintzol cuib riqˈuin li Cristo.

11:2  Ex inherma̱n, cˈajoˈ nasahoˈ saˈ inchˈo̱l nak ninjulticoˈ e̱re ut yo̱quex chixba̱nunquil li tijleb xexintzol cuiˈ.

11:3  Abanan cuan chic cˈaˈ re ru nacuaj xyebal e̱re. Aˈan aˈin: li be̱lomej, aˈan najolomin re li rixakil ut li Cristo, aˈan najolomin re li cui̱nk ut li Dios, aˈan najolomin re li Cristo.

11:4  Cui junak cui̱nk incˈaˈ narisi lix punit nak na-oc chi tijoc ut nak na-oc chixyebal ra̱tin li Dios, li jun aˈan incˈaˈ naxqˈue xlokˈal li Cristo.

11:5  Ut cui junak ixk incˈaˈ naxtzˈap lix jolom nak ta̱tijok ut nak tixye ra̱tin li Dios, li ixk aˈan naxcˈut xxuta̱n lix be̱lom. Chanchaneb li ixk li besbileb chixjunil li rismal xjolom.

11:6  Joˈcan nak cui li ixk incˈaˈ naxtzˈap xjolom, chixbesak chixjunil li rismal xjolom. Ut cui incˈaˈ naraj xbesbal li rismal xjolom xban nak naxcˈoxla nak xuta̱nal chokˈ re, kˈaxal us chokˈ re li ixk aˈan cui tixtzˈap lix jolom.

11:7  Incˈaˈ us nak tixtzˈap xjolom li cui̱nk xban nak li cui̱nk yi̱banbil joˈ li riloba̱l li Dios ut naxcˈut xlokˈal li Dios. Aˈut li ixk naxcˈut xlokˈal lix be̱lom.

11:8  Li cui̱nk incˈaˈ quiyoˈobtesi̱c chak xban li Dios riqˈuin li ixk; aban li ixk quiyoˈobtesi̱c chak riqˈuin li cui̱nk.

11:9  Ut li cui̱nk incˈaˈ quiyoˈobtesi̱c saˈ xcˈabaˈ li ixk. Li ixk ban quiyoˈobtesi̱c saˈ xcˈabaˈ li cui̱nk.

11:10  Joˈcan nak li ixk tixtzˈap lix jolom ut aˈan retalil chiruheb li ángel nak li cui̱nk cuan xcuanquil saˈ xbe̱n.

11:11  Chiru li Ka̱cuaˈ ma̱ jun cuan xcuanquil chi moco li cui̱nk chi moco li ixk xban nak juntakˈe̱teb chiru li Dios.

11:12  Ut joˈ nak li ixk quiyoˈobtesi̱c riqˈuin li cui̱nk, joˈcan ajcuiˈ li cui̱nk nayoˈla riqˈuin li ixk. Li cui̱nk joˈ ajcuiˈ li ixk yoˈobtesinbileb xban li Dios joˈ ajcuiˈ chixjunil li cˈaˈak re ru cuan.

11:13  ¿Cˈaˈru nequecˈoxla la̱ex? ¿Ma us nak li ixk ta̱tijok chiru li Dios cui incˈaˈ tixtzˈap lix jolom?

11:14  Ac nequenau nak ac re li cui̱nk nak incˈaˈ tixcanab chi chamocˈ li rismal xjolom. Xuta̱nal chokˈ re li cui̱nk cui naxcanab chi chamocˈ li rismal xjolom.

11:15  Abanan li ixk aˈan xlokˈal nak cham li rismal xjolom xban nak qˈuebil re xban li Dios re xtzˈapbal lix jolom.

11:16  Ut cui cuan junak e̱re naraj cuechˈi̱nc chirix aˈin, la̱in tinye re aˈan nak la̱o li apóstol joˈ ajcuiˈ eb laj pa̱banel cˈaynako chixba̱nunquil chi joˈcan yalak bar.

11:17  Nacuaj ajcuiˈ xyebal e̱re nak cuan li incˈaˈ us yo̱quex chixba̱nunquil. Nak nequechˈutub e̱rib chixlokˈoninquil li Dios ma̱cuaˈ li us nequeba̱nu. Aˈ chic li incˈaˈ us nequeba̱nu.

11:18  Li xbe̱n tinye e̱re, aˈan aˈin: xcuabi resil nak incˈaˈ junaj le̱ chˈo̱l ut junes xcuechˈinquil e̱rib nequeba̱nu nak nequechˈutub e̱rib chi lokˈoni̱nc re xjulticanquil lix camic li Jesucristo. Ut la̱in nincˈoxla nak ma̱re ya̱l ajcuiˈ li cˈaˈru xcuabi.

11:19  Nak nacuan li cuechˈi̱nc ib saˈ e̱ya̱nk, riqˈuin aˈan nacˈutun ani li tzˈakal aj pa̱banel ut ani incˈaˈ.

11:20  La̱ex nequechˈutub e̱rib chi tzaca̱nc ut nequeye nak yo̱quex chixba̱nunquil li lokˈoni̱nc. Abanan ma̱cuaˈ chic xjulticanquil lix camic li Ka̱cuaˈ nequeba̱nu. Aˈ ban chic le̱ re nequeba̱nu.

11:21  Cuan li nequeˈxse̱ba rib chixcˈulbal lix cua ut incˈaˈ nequeˈxcˈoxla li jun chˈol chic. Xban aˈan cuan li nabal nequeˈtzˈak ut cuan li nequeˈcala ut cuan li nequeˈcana chi teˈtzˈoca̱k xban nak incˈaˈ nequeˈtzˈak.

11:22  ¿Ma ma̱cˈaˈ ta biˈ e̱rochoch bar textzaca̱nk cuiˈ nak nequeba̱nu chi joˈcan? Yo̱quex chixtzˈekta̱nanquileb le̱ rech aj pa̱banelil ut yo̱quex chixcˈutbal xxuta̱neb li ma̱cˈaˈ cuanqueb re. ¿Cˈaˈru tinye e̱re? ¿Ma tinye e̱re nak us yo̱quex chixba̱nunquil? Ma̱ jokˈe tinye nak us yo̱quex.

11:23  Ac xincˈut che̱ru li xya̱lal li cuaˈac re xjulticanquil lix camic li Jesucristo. Aˈan ajcuiˈ li quixcˈut chicuu li Ka̱cuaˈ. Saˈ ajcuiˈ li kˈojyi̱n nak toj ma̱jiˈ quikˈaxtesi̱c li Ka̱cuaˈ Jesucristo quixchap li caxlan cua.

11:24  Ut nak quixbantioxi chiru li Dios, quixjachi li caxlan cua ut quixye reheb: Tzacahomak. Aˈan aˈin lin tibel rahobtesinbil saˈ e̱cˈabaˈ la̱ex. Cheba̱nuhak li caxlan cua aˈin re xjulticanquil li usilal xinba̱nu e̱re, chan.

11:25  Ut nak queˈrakeˈ chi cuaˈac quixchap ajcuiˈ li secˈ ut quixye: Li ucˈa aˈin, aˈan retalil li Acˈ Contrato riqˈuin li Dios. Ta̱xakaba̱nk re xcuanquil xban lin quiqˈuel ta̱hoyekˈ. Rajlal nak te̱rucˈ xsaˈ li secˈ aˈin, cheba̱nuhak re xjulticanquil lin camic saˈ e̱cˈabaˈ la̱ex, chan li Jesús.

11:26  Joˈcan nak ninye e̱re rajlal nak te̱tzaca a caxlan cua aˈin ut te̱rucˈ xsaˈ li secˈ aˈin, te̱jultica xcamic li Cristo. Cheba̱nuhak aˈan toj ta̱cˈulu̱nk cuiˈchic li Ka̱cuaˈ Jesucristo.

11:27  Joˈcan ut li ani tixcuaˈ li caxlan cua ut ta̱rucˈ li ucˈa re xjulticanquil lix camic li Ka̱cuaˈ Jesucristo ut incˈaˈ naxqˈue xlokˈal li Cristo, li jun aˈan yo̱ chi ma̱cobc chiru li Ka̱cuaˈ ut yo̱ chixtzˈekta̱nanquil xcuanquil lix camic li Ka̱cuaˈ Jesucristo.

11:28  Joˈcan ut li junju̱nk tento tixqˈue retal ma ti̱c lix yuˈam saˈ lix pa̱ba̱l nak toj ma̱jiˈ naxcˈul li caxlan cua ut li ucˈa.

11:29  Li ani naxcˈul li caxlan cua ut li ucˈa chi incˈaˈ naxqˈue xcuanquil lix camic li Ka̱cuaˈ Jesucristo, tojba ma̱c naxbok saˈ xbe̱n.

11:30  Aˈin ut xya̱lal nak nabal yajeb ut ma̱cˈaˈeb xmetzˈe̱u saˈ e̱ya̱nk ut cuanqueb ajcuiˈ ac xeˈcam.

11:31  Abanan cui nakecˈa kib nak ti̱c li kayuˈam nak nakatzaca incˈaˈ tento nak li Ka̱cuaˈ tixrak a̱tin saˈ kabe̱n.

11:32  Ut nak narakman a̱tin saˈ kabe̱n xban li Ka̱cuaˈ nocokˈuseˈ re nak incˈaˈ tzˈekta̱nanbilako kochbeneb li incˈaˈ nequeˈpa̱ban.

11:33  Joˈcan ut ex inherma̱n, nak te̱chˈutub e̱rib chixba̱nunquil li lokˈoni̱nc re xjulticanquil lix camic li Ka̱cuaˈ Jesucristo, cheroybeni e̱rib chi ribil e̱rib re nak saˈ comonil te̱ba̱nu.

11:34  Cui cuan junak saˈ e̱ya̱nk ta̱tzˈoca̱k, chicuaˈak chak saˈ rochoch re nak incˈaˈ te̱bok raylal saˈ e̱be̱n nak te̱chˈutub e̱rib. Toj cuan chic cˈaˈak re ru incˈaˈ xinye e̱re. Nak tincuulak che̱rilbal tinchˈolob xya̱lal che̱ru li toj ma̱jiˈ xinye e̱re.

Chapter 12

12:1  Ex inherma̱n, la̱in nacuaj nak te̱tau ru li xya̱lal li ma̱tan li naxqˈue li Santil Musikˈej re li junju̱nk re nak ta̱cˈanjelak chiru li Dios.

12:2  Nak toj ma̱jiˈ nequexpa̱ban chak queqˈue chak xcuanquil li yi̱banbil dios li incˈaˈ nequeˈa̱tinac ut queqˈue e̱rib chi balakˈi̱c riqˈuin xpa̱banquileb.

12:3  Joˈcan nak nacuaj te̱nau nak li ani cuan li Santil Musikˈej riqˈuin, ma̱ jokˈe tixmajecua li Jesús. Ut ma̱ ani ta̱ru̱k tixye chi anchal xchˈo̱l nak li Jesús aˈan li Ka̱cuaˈ cui ma̱cˈaˈ li Santil Musikˈej riqˈuin.

12:4  Jalan jala̱nk li kama̱tan naxqˈue ke li Santil Musikˈej re nak tocˈanjelak chiru li Ka̱cuaˈ. Abanan li Santil Musikˈej jun ajcuiˈ ut aˈan naqˈuehoc re chixjunil.

12:5  Jalan jala̱nk li kacˈanjel chiru li Ka̱cuaˈ abanan jun ajcuiˈ li Ka̱cuaˈ cuan saˈ kabe̱n ut caˈaj cuiˈ chiru aˈan nococˈanjelac.

12:6  Jalan jala̱nk li cˈanjel nocoxqˈue cuiˈ li Dios. Abanan jun ajcuiˈ li Dios ut aˈan li natenkˈan ke chi xba̱nunquil li cˈanjel li naxqˈue ke.

12:7  Riqˈuin li ma̱tan qˈuebil re li junju̱nk nacˈutun nak cuan li Santil Musikˈej riqˈuin, ut li ma̱tan aˈan qˈuebil re, re xtenkˈanquileb chixjunileb laj pa̱banel.

12:8  Cuan li qˈuebileb xma̱tan xban li Santil Musikˈej re qˈuehoc cha̱bil naˈleb ut cuan li qˈuebileb xma̱tan xban li Santil Musikˈej re xchˈolobanquil li ya̱l. Abanan jun ajcuiˈ li Santil Musikˈej li naqˈuehoc re xma̱tan li junju̱nk.

12:9  Cuan li qˈuebileb xma̱tan xban li Santil Musikˈej chi xpa̱banquil nak teˈxcˈul li cˈaˈru nequeˈxtzˈa̱ma chiru li Dios. Ut cuan ajcuiˈ qˈuebileb xma̱tan xban li Santil Musikˈej re xqˈuirtesinquileb li yaj. Abanan jun ajcuiˈ li Santil Musikˈej li naqˈuehoc xma̱tan li junju̱nk.

12:10  Cuan qˈuebileb xma̱tan chi ba̱nu̱nc milagro ut cuan qˈuebileb xma̱tan chi xchˈolobanquil resil li cˈaˈru quicˈutbesi̱c chiru xban li Dios. Ut cuan qˈuebileb xma̱tan re xtaubal ru cui li Santil Musikˈej cuan riqˈuin junak malaj ut cuan li ma̱us aj musikˈej riqˈuin. Ut cuan qˈuebileb xma̱tan chi a̱tinac saˈ jalan a̱tin incˈaˈ natauman ru ut cuan ajcuiˈ qˈuebileb xma̱tan chi jaloc ru li jalanil a̱tin.

12:11  Abanan chixjunil li ma̱tan aˈin qˈuebil ke xban li jun chi Santil Musikˈej. Aˈan naqˈuehoc xma̱taneb li junju̱nk joˈ naraj aˈan.

12:12  Li jun chi tzˈejcualej tzˈakal re ru. Cuan rok rukˈ. Cuan chixjunil. Usta jalan jala̱nk lix chaˈal cuan, abanan jun ajcuiˈ chi tzˈejcualej nak cuan. Joˈcan ajcuiˈ la̱o aj pa̱banel. Nabalo, abanan junajo chi tzˈejcualej riqˈuin li Cristo.

12:13  Chikajunilo junajo riqˈuin li Cristo usta aj judío, usta ma̱cuaˈ aj judío, usta lokˈbil mo̱s, usta incˈaˈ. Xkacˈul li cubi haˈ saˈ xcˈabaˈ li jun chi Santil Musikˈej ut chikajunilo cuan li Santil Musikˈej kiqˈuin. Joˈcan nak junajo riqˈuin li Cristo.

12:14  Li jun chi tzˈejcualej moco jun ta ajcuiˈ lix chaˈal cuan. Nabal pa̱y ru lix chaˈal cuan re ut jalan jala̱nk xcˈanjel li junju̱nk.

12:15  Cui naru raj ta̱a̱tinak li rok junak li tzˈejcualej, ¿ma naru tixye ma̱cuaˈin xcomon li tzˈejcualej xban nak ma̱cuaˈin li rukˈ? ¿Ma yal xban ta biˈ nak ma̱cuaˈ ukˈej nak ma̱cuaˈak xcomon li tzˈejcualej?

12:16  Cui lix xic junak li tzˈejcualej tixye: ma̱cuaˈin xcomon li tzˈejcualej xban nak ma̱cuaˈin li xnakˈ ru, ¿ma yal ta biˈ xban nak ma̱cuaˈ xnakˈ u nak ma̱cuaˈak xcomon li tzˈejcualej?

12:17  Cui ta chixjunil li tzˈejcualej xnakˈ u, ¿chan raj ru nak to-abi̱nk? Ut cui ta chixjunil li tzˈejcualej xic, ¿chan raj ru nak takutzˈ li cˈaˈak re ru?

12:18  Abanan li Dios quixqˈue saˈ xnaˈaj chi tzˈakal re ru lix chaˈal li katzˈejcual joˈ quiraj aˈan.

12:19  Cui ta jun pa̱y ajcuiˈ ru lix chaˈal li tzˈejcualej, li tzˈejcualej aˈan incˈaˈ raj tzˈakal re ru nak cuan.

12:20  Abanan nabal pa̱y xchaˈal li tzˈejcualej cuan, ut li tzˈejcualej jun ajcuiˈ.

12:21  Cui naru raj ta̱a̱tinak li xnakˈ u incˈaˈ naru tixye re li ukˈej: la̱at incˈaˈ nacatcˈanjelac chicuu. Chi moco naru tixye li jolomej re li okej: la̱ex incˈaˈ nequexcˈanjelac chicuu.

12:22  Kˈaxal ban chic nabal xcˈanjeleb lix chaˈal li katzˈejcual li chanchan ma̱cˈaˈeb xcˈanjel.

12:23  Cuan xchaˈal li katzˈejcual naka-oxlokˈi ut cuan ajcuiˈ xchaˈal li katzˈejcual nocoxuta̱na̱c xban ut nakatzˈap re xqˈuebal xlokˈal.

12:24  Ut lix chaˈal li katzˈejcual li incˈaˈ nocoxuta̱na̱c xban, aˈan incˈaˈ nakatzˈap. Abanan li Dios quixqˈue chixjunil lix chaˈal li katzˈejcual ut quixqˈue xlokˈal li junju̱nk.

12:25  Quixqˈue xlokˈal chixjunil xchaˈal li tzˈejcualej re nak ma̱cˈaˈak xchˈaˈajquilal li tzˈejcualej. Chixjunil ban lix chaˈal li tzˈejcualej teˈxtenkˈa rib chi ribileb rib.

12:26  Cui junak xchaˈal li tzˈejcualej ra naxcˈul, narahoˈ ajcuiˈ chixjunil li tzˈejcualej. Ut cui junak xchaˈal li tzˈejcualej naqˈueheˈ xlokˈal, chixjunil li tzˈejcualej naqˈueman ajcuiˈ xlokˈal.

12:27  Joˈcan ajcuiˈ la̱o aj pa̱banel. Junajo chi tzˈejcualej riqˈuin li Cristo. Chikaju̱nkalo la̱o rok rukˈ li Cristo ut li junju̱nk cuan xcˈanjel chiru li Dios.

12:28  Li xchalal li tzˈejcualej jalan jala̱nk xcˈanjel li junju̱nk. Joˈcan ajcuiˈ nak jalan jala̱nk xma̱taneb laj pa̱banel qˈuebileb re xban li Dios re nak teˈcˈanjelak chiru. Xbe̱n, cuanqueb li qˈuebileb xma̱tan chi cˈanjelac chokˈ apóstol. Xcab, cuanqueb li qˈuebileb xma̱tan chi cˈanjelac chokˈ profeta. Rox, cuanqueb li qˈuebileb xma̱tan chi cˈanjelac chokˈ aj tzolonel. Ut cuanqueb li qˈuebileb xma̱tan chixba̱nunquileb li milagro. Cuanqueb li qˈuebileb xma̱tan chixqˈuirtesinquileb li yaj; cuanqueb li qˈuebileb xma̱tan chixtenkˈanquileb li ras ri̱tzˈin. Cuanqueb li qˈuebileb xma̱tan chi takla̱nc; ut cuanqueb ajcuiˈ qˈuebileb xma̱tan chi a̱tinac saˈ jalanil a̱tin incˈaˈ natauman ru.

12:29  ¿Ma chixjunileb ta biˈ apostoleb? ¿Ma chixjunileb ta biˈ profeteb? ¿Ma chixjunileb ta biˈ nequeˈxchˈolob xya̱lal li ra̱tin li Dios? ¿Ma chixjunileb ta biˈ nequeˈba̱nun milagro?

12:30  ¿Ma chixjunileb ta biˈ nequeˈqˈuirtesin yaj? ¿Ma chixjunileb ta biˈ nequeˈa̱tinac saˈ jalanil a̱tin? ¿Ma chixjunileb ta biˈ nequeˈjaloc ru li jalanil a̱tin?

12:31  Moco juntakˈe̱t ta xma̱taneb li junju̱nk. Jalan jala̱nk ban xma̱taneb. Chesicˈak le̱ ma̱tan li kˈaxal cha̱bil re xtenkˈanquileb le̱ rech aj pa̱banelil. Anakcuan tinye e̱re jun li naˈleb kˈaxal cuiˈchic tento xba̱nunquil. Ut aˈan aˈin: nak te̱ra e̱rib chi ribil e̱rib.

Chapter 13

13:1  Cui ta la̱in qˈuebil inma̱tan xban li Dios chi a̱tinac saˈ ra̱tinoba̱leb li cui̱nk ut cui ta cuan inma̱tan chi a̱tinac saˈ ra̱tinoba̱leb li ángel, abanan cui incˈaˈ ninraheb li cuas cui̱tzˈin, la̱in chanchanin li chˈi̱chˈ natamba̱c xya̱b ut chanchanin li campana natzintzot xya̱b chi ma̱cˈaˈ rajbal.

13:2  Ut cui ta qˈuebil inma̱tan xban li Dios chixyebal li naxcˈut chicuu, ut cui ta ninnau chixjunil li cˈaˈak re ru ut cui ta nintau ru li xya̱lal, abanan cui incˈaˈ ninraheb li cuas cui̱tzˈin ma̱cˈaˈ nin-oc cuiˈ. Ut cui ta cuan tzˈakal inpa̱ba̱l re nak ta̱jalekˈ xnaˈaj junak li tzu̱l, abanan cui incˈaˈ ninraheb li cuas cui̱tzˈin, ma̱cˈaˈ nin-oc cuiˈ.

13:3  Cui ta tinsi chixjunil li cˈaˈru cuan cue re tinqˈueheb chi cuaˈac li nebaˈ ut cui ta tinkˈaxtesi cuib chi cˈatecˈ xban lin pa̱ba̱l, ut cui incˈaˈ ninraheb li cuas cui̱tzˈin, ma̱cˈaˈ na-oc cuiˈ li ninba̱nu.

13:4  Li ani narahoc, naxcuy li raylal ut kˈaxal cha̱bil. Li ani narahoc incˈaˈ nacakalin, incˈaˈ naxnimobresi rib ut incˈaˈ naxkˈetkˈeti rib.

13:5  Li ani narahoc incˈaˈ nahoboc. Incˈaˈ naxsicˈ xcha̱bilal xjunes rib. Li ani narahoc incˈaˈ najoskˈoˈ ut incˈaˈ naxqˈue saˈ xchˈo̱l li cˈaˈru naxcˈul.

13:6  Li ani narahoc incˈaˈ nasahoˈ xchˈo̱l nak eb li ras ri̱tzˈin nequeˈxba̱nu li incˈaˈ us. Nasahoˈ ban xchˈo̱l nak cuanqueb saˈ xya̱lal.

13:7  Li ani narahoc incˈaˈ narahoˈ xchˈo̱l xban li cˈaˈru na-ux re xbaneb li ras ri̱tzˈin. Junelic ban cau xchˈo̱l chirixeb. Li ani narahoc incˈaˈ nachˈinan xchˈo̱l. Naxcuy ban xnumsinquil chixjunil li raylal.

13:8  Li rahoc ta̱cua̱nk chi junelic. Ta̱cuulak xkˈehil nak incˈaˈ chic ta̱cˈanjelak li ma̱tan re cua̱nc chi profetil ut ta̱cuulak xkˈehil nak incˈaˈ chic ta̱cˈanjelak li ma̱tan re a̱tinac saˈ jalanil a̱tin. Ut ta̱cuulak xkˈehil nak incˈaˈ chic ta̱cˈanjelak li ma̱tan re xtaubal ru chixjunil. Abanan li rahoc incˈaˈ nalaj, incˈaˈ na-osoˈ. Cua̱nk ban chi junelic.

13:9  Usta cuanqueb li cuan xma̱taneb anakcuan re xnaubal li cˈaˈak re ru, abanan caˈchˈin ajcuiˈ nequeˈxnau. Usta cuanqueb li cuan xma̱taneb chixyebal li cˈaˈru nacˈutbesi̱c chiruheb xban li Dios, abanan caˈchˈin ajcuiˈ li nacˈuteˈ chiruheb.

13:10  Ut nak ta̱tzˈaklok ru chixjunil li naraj xba̱nunquil li Dios, incˈaˈ chic teˈcˈanjelak eb li ma̱tan aˈin li incˈaˈ tzˈakal re ru.

13:11  Nak toj caˈchˈinin chak quina̱tinac joˈ nequeˈa̱tinac li cocˈal. Quincˈoxlac joˈ nequeˈcˈoxlac li cocˈal. Ut quinba̱nu joˈ nequeˈxba̱nu li cocˈal. Abanan nak quincui̱nkiloˈ quincanab xba̱nunquil lix naˈlebeb li cocˈal.

13:12  Anakcuan caˈchˈin ajcuiˈ nakanau. Chanchan nak noco-iloc saˈ junak lem moymoy ru. Abanan saˈ jun cutan takil ru li Dios ut takanau chic chixjunil chi tzˈakal joˈ nak li Dios naxnau ku la̱o.

13:13  Joˈcan nak li pa̱ba̱l, li yoˈoni̱nc ut li rahoc cua̱nk chi junelic. Abanan li kˈaxal nim xcuanquil saˈ xya̱nkeb li oxib aˈin, aˈan li rahoc.

Chapter 14

14:1  Joˈcan nak ninye e̱re, cheqˈuehak e̱chˈo̱l chi rahoc ut chesicˈak le̱ ma̱tan li naxqˈue li Santil Musikˈej. Li ma̱tan li kˈaxal lokˈ, aˈan xyebal resil li cˈaˈru yo̱ chi xcˈutbal che̱ru li Dios.

14:2  Li ani naa̱tinac saˈ jalanil a̱tin incˈaˈ naa̱tinac riqˈuin li rech cristianil. Riqˈuin ban li Dios naa̱tinac. Ut ma̱ ani nataˈoc ru li cˈaˈru naxye. Riqˈuin xcuanquil li Santil Musikˈej naxye li xya̱lal li incˈaˈ natauman ru.

14:3  Ut li ani naxye resil li nacˈuteˈ chiru xban li Dios, li jun aˈan naxtenkˈaheb li rech aj pa̱banelil saˈ lix pa̱ba̱leb. Naxchˈolob xya̱lal chiruheb ut naxcˈojobeb xchˈo̱l.

14:4  Li ani naa̱tinac saˈ jalanil a̱tin naxtenkˈa rib xjunes rib. Abanan li ani naxchˈolob xya̱lal li ra̱tin li Dios, li jun aˈan naxtenkˈaheb li rech aj pa̱banelil saˈ lix pa̱ba̱leb.

14:5  Nacuaj raj nak che̱junilex tex-a̱tinak ta saˈ jalanil a̱tin li incˈaˈ natauman ru. Abanan kˈaxal cuiˈchic nacuaj raj nak che̱junilex te̱ye resil reheb le̱ ras e̱ri̱tzˈin saˈ le̱ ra̱tinoba̱l cˈaˈru quicˈuteˈ che̱ru xban li Dios. Kˈaxal us nak te̱ye li ra̱tin li Dios saˈ le̱ ra̱tinoba̱l chiru li a̱tinac saˈ jalanil a̱tin li incˈaˈ natauman ru. Abanan cui junak naa̱tinac saˈ jalanil a̱tin, tento nak ta̱jalma̱nk ru li ra̱tin re nak eb laj pa̱banel teˈxtau ru li cˈaˈru tixye ut teˈtenkˈa̱k xban.

14:6  Ex inherma̱n, ¿cˈaˈru ta̱oc cuiˈ e̱re nak tincuulak e̱riqˈuin ut tina̱tinak e̱riqˈuin saˈ jalanil a̱tin li incˈaˈ natauman ru? Ma̱cˈaˈ aj e. Abanan cui tina̱tinak e̱riqˈuin saˈ le̱ ra̱tinoba̱l, texintenkˈa nak tinchˈolob xya̱lal che̱ru joˈ quicˈuteˈ chicuu xban li Dios. Ut ta̱cˈanjelak che̱ru cui tinye e̱re li ra̱tin li Dios ut tinye e̱re cˈaˈru ta̱cˈulma̱nk joˈ tzˈi̱banbil saˈ li Santil Hu.

14:7  Ut joˈcan ajcuiˈ li cˈaˈak re ru incˈaˈ yoˈyo joˈ li xo̱lb ut li arpa. Cui incˈaˈ nachˈeˈman chi tzˈakal incˈaˈ nacˈutun li cˈaˈru yo̱ chixya̱basinquil ut ma̱cˈaˈ rajbal nak nachˈeˈman.

14:8  Ut nak ta̱ya̱basi̱k li trompeta re xbokbaleb li soldado, cui incˈaˈ chˈolchˈo ru lix ya̱b, ¿ma teˈxcauresi ta biˈ rib chi xic chi pletic?

14:9  Ut joˈcan ajcuiˈ la̱ex cui incˈaˈ nequex-a̱tinac chi tzˈakal re ru, ¿chanru nak ta̱tauma̱nk ru li cˈaˈru yo̱quex chixyebal? Yal na-osoˈ saˈ ikˈ ut ma̱cˈaˈ rajbal li te̱ye.

14:10  Ya̱l nak qˈuila pa̱y chi a̱tinoba̱l cuan saˈ ruchichˈochˈ ut chixjunil cuan xya̱lal ut natauman ru.

14:11  Abanan cui la̱in incˈaˈ nintau ru li ra̱tinoba̱l junak, li jun aˈan ma̱cˈaˈ rajbal nak yo̱k chi a̱tinac cuiqˈuin ut ma̱cˈaˈ ajcuiˈ rajbal nak yo̱kin chi a̱tinac riqˈuin.

14:12  La̱ex nequeraj xcˈulbal li ma̱tan naxqˈue li Santil Musikˈej. Abanan la̱in ninye e̱re chesicˈak li ma̱tan li natenkˈan reheb chixjunileb laj pa̱banel.

14:13  Ut li ani cuan xma̱tan chi a̱tinac saˈ jalanil a̱tin, li incˈaˈ natauman ru, chixtzˈa̱mahak chiru li Dios re nak ta̱ru̱k tixye xya̱lal li cˈaˈru quixye saˈ li jalanil a̱tin re nak ta̱ru̱k tixchˈolob xya̱lal chiruheb li rech aj pa̱banelil.

14:14  Cui la̱in tintijok saˈ jalanil a̱tin lin musikˈ ta̱tijok ut la̱in incˈaˈ nintau ru li cˈaˈru tinye chi moco tixtenkˈaheb li cuech aj pa̱banelil.

14:15  ¿Cˈaˈru tinba̱nu chi joˈcanan? Tintijok riqˈuin lin musikˈ chi incˈaˈ tintau ru li tinye ut tento ajcuiˈ nak tintijok riqˈuin lin cˈaˈux re nak ta̱tauma̱nk ru li cˈaˈru tinye. Ut tinbicha̱nk riqˈuin lin musikˈ chi incˈaˈ tintau ru li tinye ut tinbicha̱nk ajcuiˈ riqˈuin lin cˈaˈux re nak ta̱tauma̱nk ru li cˈaˈru tinye.

14:16  Cuan li incˈaˈ nequeˈxtau ru li xya̱lal chirix li jalanil a̱tin. Cui yo̱cat chixlokˈoninquil li Dios caˈaj cuiˈ riqˈuin la̱ musikˈ, eb aˈan incˈaˈ teˈxtau ru li ta̱ye xban nak yo̱cat chi a̱tinac saˈ jalanil a̱tin. ¿Chan put ru nak teˈxye “joˈcan taxak” cui incˈaˈ nequeˈxtau ru li yo̱cat chixyebal?

14:17  Ya̱l nak yo̱cat chixlokˈoninquil li Dios, abanan li jun chic incˈaˈ ta̱tenkˈa̱k xban la̱ tij xban nak incˈaˈ naxtau ru li cˈaˈru yo̱cat chixyebal.

14:18  Ninbantioxi chiru li Dios nak nabal sut nina̱tinac saˈ jalanil a̱tin. La̱ex incˈaˈ quex-a̱tinac nabal sut saˈ jalanil a̱tin joˈ la̱in.

14:19  Aban la̱in ninye nak saˈ xya̱nkeb laj pa̱banel kˈaxal us raj nak tinye cuib oxibak chi a̱tin li teˈxtau ru re nak tebintzol chi tzˈakal chiru nak tinye laje̱bak mil chi a̱tin saˈ jalanil a̱tin ut incˈaˈ teˈxtau ru li tinye.

14:20  Ex inherma̱n, chanchanakex li cˈulaˈal xban nak eb li cˈulaˈal incˈaˈ nequeˈxba̱nu li ma̱usilal. Abanan mexcˈoxlac joˈ nequeˈcˈoxlac li cocˈal. Tzˈakalak ban re ru le̱ cˈaˈux xban nak moco cocˈalex ta chic.

14:21  Joˈcaˈin tzˈi̱banbil saˈ li Santil Hu li quixye li Dios najter chirixeb laj Israel: Eb lin tenamit incˈaˈ nequeˈraj rabinquil li cua̱tin. Joˈcan nak saˈ jalan a̱tinoba̱l tincua̱tinaheb. Tintakla jalan xtenamit chixyebal li cua̱tin reheb. Abanan chi moco chi joˈcan tineˈrabi, chan li Ka̱cuaˈ. (Is. 28:11-12)

14:22  Riqˈuin a a̱tin aˈin nakanau nak li ma̱tan re a̱tinac saˈ jalan a̱tinoba̱l, aˈan qˈuebil joˈ retalil lix cuanquilal li Dios chiruheb li ma̱cuaˈeb aj pa̱banel. Ut li ma̱tan re xyebal li cˈaˈru naxcˈutbesi li Dios, aˈan qˈuebil re xtenkˈanquileb laj pa̱banel.

14:23  Nak eb laj pa̱banel teˈxchˈutub ribeb ut cui chixjunileb teˈoc chi a̱tinac saˈ jalan a̱tin incˈaˈ natauman ru, cui teˈoc aran li ma̱cuaˈeb aj pa̱banel malaj teˈoc aran li incˈaˈ nequeˈxtau ru li naˈleb aˈin, teˈxye nak lo̱queb ru.

14:24  Abanan cui eb laj pa̱banel teˈxchˈolob xya̱lal li cˈaˈru quiyeheˈ reheb xban li Dios, nak tox-oc saˈ xya̱nkeb junak ma̱cuaˈ aj pa̱banel malaj li toj ma̱jiˈ naxtau ru li xya̱lal aˈan, li jun aˈan tixqˈue retal nak aˈan aj ma̱c ut tixqˈue ajcuiˈ retal li cˈaˈru yo̱ chirabinquil.

14:25  Li Dios tixcˈut chiru chi tzˈakal cˈaˈru cuan saˈ xchˈo̱l. Ut li jun aˈan tixcuikˈib rib ut tixlokˈoni li Dios ut tixye nak relic chi ya̱l li Dios cuan saˈ xya̱nkeb laj pa̱banel.

14:26  Ex herma̱n, aˈan aˈin li nacuaj xyebal e̱re. Nak te̱chˈutub e̱rib chixlokˈoninquil li Dios, jalan jala̱nk te̱ba̱nu che̱ju̱nkalex. Cuan tixcˈam chak junak bich; cuan li ta̱qˈuehok naˈleb; cuan li ta̱yehok re li quicˈuteˈ chiru xban li Dios; cuan li ta̱yehok junak naˈleb riqˈuin jalanil a̱tin ut cuan ajcuiˈ li ta̱jalok ru li ta̱yema̱nk saˈ li jalanil a̱tin. Abanan chixjunil li te̱ba̱nu, cheba̱nuhak re xtenkˈanquileb laj pa̱banel chi qˈui̱c saˈ lix pa̱ba̱leb.

14:27  Cui cuanqueb li teˈraj a̱tinac saˈ jalanil a̱tin, naru nequeˈa̱tinac cuibak malaj oxibak ut chixju̱nkaleb teˈa̱tinak. Ut cua̱nk ajcuiˈ junak chic li ta̱jalok ru li teˈxye.

14:28  Abanan cui ma̱ ani naru ta̱jalok ru li jalanil a̱tin, incˈaˈ teˈa̱tinak saˈ jalanil a̱tin saˈ li chˈutubaj ib. Yal saˈ xchˈo̱leb ban teˈa̱tinak chiru li Dios.

14:29  Cheqˈueheb chi a̱tinac cuibak malaj oxibak li profeta li nequeˈyehoc resil li cˈaˈru quicˈuteˈ chiruheb xban li Dios, ut li jun chˈol chic teˈtzˈilok a̱tin chirix re xnaubal ma riqˈuin na li Dios xchal chak li xeˈxye.

14:30  Ut cui cuan cˈaˈru ta̱cˈutekˈ xban li Dios chiru li ani cˈojcˈo aran saˈ li chˈutubaj ib, li jun aˈan tixtzˈa̱ma chiru li yo̱ chi a̱tinac nak tixye li cˈaˈru xcˈuteˈ chiru xban li Dios. Ut li ani yo̱ chi a̱tinac chixqˈuehak xnaˈaj re ta̱a̱tinak.

14:31  Che̱junju̱nkalex ta̱ru̱k te̱ye li cˈaˈru xcˈuteˈ che̱ru xban li Dios re nak chixjunileb laj pa̱banel teˈxtzol rib ut ta̱cacuu̱k xchˈo̱leb saˈ lix pa̱ba̱leb.

14:32  Cui ya̱l nak li Dios xcˈutuc che̱ru li cˈaˈru te̱ye, li Dios textenkˈa chiroybeninquil jokˈe tex-oc chi a̱tinac re nak chi joˈcan che̱junju̱nkalex tex-a̱tinak.

14:33  Li Dios incˈaˈ naraj nak ta̱cua̱nk li poˈoj ib saˈ xya̱nkeb laj pa̱banel. Naraj ban nak cua̱nk li tuktu̱quil usilal saˈ xya̱nkeb.

14:34  Eb li ixk incˈaˈ teˈa̱tinak saˈ li chˈutubaj ib re xlokˈoninquil li Dios. Teˈxpa̱b aˈin xban nak joˈcan tzˈi̱banbil saˈ lix chakˈrabeb laj judío. Joˈcaˈin na-uxman saˈ xya̱nkeb chixjunileb laj pa̱banel yalak bar.

14:35  Cui cuan cˈaˈ re ru teˈraj xnaubal cheˈxpatzˈak reheb lix be̱lom nak teˈcuulak saˈ rochocheb ut aˈan tixchˈolob xya̱lal. Xuta̱nal chokˈ reheb cui ta̱a̱tinak junak ixk saˈ xya̱nkeb nak chˈutchˈu̱queb chixlokˈoninquil li Dios.

14:36  Chijulticokˈ e̱re nak ma̱cuaˈex la̱ex quextiquiban chak re li ra̱tin li Dios. Ac cuan ajcuiˈ chalen chak junxil. Ut moco caˈaj cuiˈ ta la̱ex quex-abin re.

14:37  Ma̱re cuan saˈ e̱ya̱nk li naxcˈoxla nak aˈan profeta malaj naxcˈoxla nak cuan jun chic xma̱tan qˈuebil re xban li Santil Musikˈej. Cui joˈcan naxcˈoxla, chixnauhak nak li yo̱quin chixtzˈi̱banquil saˈ li hu aˈin, aˈan ajcuiˈ li chakˈrab qˈuebil cue xban li Dios.

14:38  Ut cui cuan junak incˈaˈ naxpa̱b li yo̱quin chixtzˈi̱banquil, la̱ex incˈaˈ ajcuiˈ te̱pa̱b li cˈaˈru tixye aˈan.

14:39  Joˈcan ut ex inherma̱n, cheqˈuehak e̱chˈo̱l chixchˈolobanquil xya̱lal li cˈaˈru quicˈuteˈ che̱ru xban li Dios ut me̱ram chiru li ani naraj a̱tinac saˈ jalanil a̱tin.

14:40  Abanan li cˈaˈru te̱ba̱nu nak te̱chˈutub e̱rib, cheba̱nuhak chixjunil chi tzˈakal re ru ut saˈ xya̱lal.

Chapter 15

15:1  Anakcuan ex inherma̱n, tinchˈolob cuiˈchic che̱ru li resil li colba-ib. Li resil aˈan, aˈan li ac xinye e̱re ut xecˈu̱luban saˈ e̱chˈo̱l ut riqˈuin aˈan cau chic e̱chˈo̱l saˈ le̱ pa̱ba̱l.

15:2  Aˈan aˈin li xya̱lal li xinchˈolob che̱ru, li xexcoleˈ cuiˈ. La̱ex colbilex chic cui nequexpa̱ban chi tzˈakal ut incˈaˈ nequecanab xpa̱banquil. Abanan cui incˈaˈ nequepa̱b chi anchal e̱chˈo̱l, ma̱cˈaˈ rajbal nak xexpa̱ban.

15:3  Li cˈaˈru quixcˈut li Ka̱cuaˈ chicuu, aˈan ajcuiˈ li xinchˈolob che̱ru. Lix ya̱lal aˈan kˈaxal nim xcuanquil ut aˈan aˈin: nak li Ka̱cuaˈ Jesucristo quicam re xtojbal rix li kama̱c joˈ tzˈi̱banbil najter saˈ li Santil Hu xbaneb li profeta.

15:4  Joˈ nak queˈxtzˈi̱ba chak li profeta najter, joˈcan quicˈulman. Li Ka̱cuaˈ Jesucristo quimukeˈ ut quicuacli cuiˈchic chi yoˈyo saˈ rox li cutan.

15:5  Chirix aˈan li Ka̱cuaˈ Jesucristo quixcˈut rib chiru li apóstol Pedro ut quixcˈut ajcuiˈ rib chiruheb chixjunileb li apóstol.

15:6  Ut chirix chic aˈan quixcˈut rib chiruheb numenak o̱b ciento chi aj pa̱banel nak chˈutchˈu̱queb. Saˈ xya̱nkeb aˈan cuanqueb nabaleb toj yoˈyo̱queb anakcuan ut cuanqueb ajcuiˈ li ac camenakeb.

15:7  Ut mokon li Ka̱cuaˈ Jesucristo quixcˈut rib chiru laj Jacobo ut quixcˈut ajcuiˈ rib chiruheb chixjunileb li apóstol.

15:8  Ut chirix chixjunil aˈan, quixcˈut ajcuiˈ rib chicuu la̱in, usta la̱in chanchanin jun cˈulaˈal toj ma̱jiˈ naxtau xkˈehil xyoˈlajic xban nak la̱in toj ma̱jiˈ ninyoˈla saˈ lin pa̱ba̱l nak quixcˈut rib chicuu.

15:9  La̱in cubenak incuanquil chiruheb chixjunileb li apóstol ut ma̱cuaˈ raj incˈulub nak la̱inak apóstol xban nak la̱in xinrahobtesiheb chak laj pa̱banel.

15:10  Abanan xban rusilal li Dios nak la̱in apóstol. Ut li rusilal li Dios incˈaˈ quicana chi ma̱cˈaˈ rajbal xban nak kˈaxal cau cuiˈchic nincˈanjelac chiru chixjunileb li apóstol. Aban ma̱cuaˈ injunes nincˈanjelac. Li Dios natenkˈan cue xban xnimal rusilal li xinma̱tani.

15:11  Ma̱cˈaˈ naxye cui xerabi resil li colba-ib riqˈuineb li apóstol jun chˈol malaj cuiqˈuin la̱in. Juntakˈe̱t li resil li colba-ib li nakajultica chikajunilo ut aˈan li xepa̱b la̱ex.

15:12  Ac xkachˈolob xya̱lal che̱ru nak li Cristo quicuacli cuiˈchic chi yoˈyo saˈ xya̱nkeb li camenak. Abanan toj cuan saˈ e̱ya̱nk li nequeˈyehoc re nak incˈaˈ teˈcuacli̱k cuiˈchic chi yoˈyo li camenak.

15:13  Cui incˈaˈ teˈcuacli̱k cuiˈchic chi yoˈyo eb li camenak, incˈaˈ raj ya̱l nak quicuacli cuiˈchic chi yoˈyo li Jesucristo sa xya̱nkeb li camenak.

15:14  Cui ta incˈaˈ quicuacli cuiˈchic chi yoˈyo li Jesucristo, ma̱cˈaˈ raj xya̱lal li nakajultica resil, ut ma̱cˈaˈ raj rajbal li xepa̱b.

15:15  Ut cui ta incˈaˈ quicuacli chi yoˈyo li Cristo saˈ xya̱nkeb li camenak, xocana raj la̱o chokˈ aj balakˈ riqˈuin li xkaye chirix li Dios xban nak xkachˈolob xya̱lal nak li Dios quixcuaclesi cuiˈchic chi yoˈyo li Cristo. Abanan incˈaˈ raj quixcuaclesi chi yoˈyo cui ya̱l nak incˈaˈ teˈcuacli̱k cuiˈchic chi yoˈyo li camenak.

15:16  Cui ta incˈaˈ ya̱l nak teˈcuacli̱k cuiˈchic chi yoˈyo li camenak, incˈaˈ raj ya̱l nak quicuacli cuiˈchic chi yoˈyo li Cristo.

15:17  Cui ta li Cristo incˈaˈ quicuacli cuiˈchic chi yoˈyo, ma̱cˈaˈ raj rajbal le̱ pa̱ba̱l. Toj cua̱nkex raj ajcuiˈ saˈ le̱ ma̱c.

15:18  Cui ta joˈcan, eb li queˈxpa̱b li Cristo li queˈcam sachenakeb raj ajcuiˈ xban lix ma̱queb.

15:19  Cui ta caˈaj cuiˈ re li kayuˈam arin saˈ ruchichˈochˈ nak xkapa̱b li Cristo, xkabalakˈi raj kib ut kˈaxal tokˈoba̱l raj ku tocana̱k chiruheb chixjunileb li kas ki̱tzˈin.

15:20  Abanan relic chi ya̱l nak li Cristo quicuaclesi̱c cuiˈchic chi yoˈyo saˈ xya̱nkeb li camenak. Aˈan li xbe̱n li quicuacli chi yoˈyo chiruheb chixjunileb li teˈcuaclesi̱k cuiˈchic chi yoˈyo.

15:21  Xban nak quima̱cob laj Adán, joˈcan nak chikajunilo nococam. Abanan xban nak quicuacli cuiˈchic chi yoˈyo li Jesucristo, cuan ajcuiˈ xcuaclijiqueb li camenak chi yoˈyo.

15:22  Joˈcan nak saˈ xcˈabaˈ laj Adán li kaxeˈto̱nil yucuaˈ nak chikajunilo nococam. Ut saˈ xcˈabaˈ li Jesucristo, chixjunileb li nequeˈpa̱ban re teˈcuacli̱k cuiˈchic chi yoˈyo ut teˈqˈuehekˈ xyuˈam chi junelic.

15:23  Ut nak teˈcuacli̱k cuiˈchic chi yoˈyo eb li camenak, moco jun cuaclijiqueb ta nak teˈcuacli̱k chak. Li xbe̱n li quicuacli chak chi yoˈyo, aˈan li Jesucristo. Ut mokon nak tol-e̱lk cuiˈchic li Jesucristo, teˈcuacli̱k chak eb li queˈpa̱ban re.

15:24  Ut chirix chic aˈan acaˈ chic li rosoˈjic li ruchichˈochˈ ut li Cristo tixsacheb xcuanquil chixjunileb li nequeˈtaklan saˈ ruchichˈochˈ ut tixsach ajcuiˈ xcuanquileb li Musikˈej. Ut chirix aˈan li Cristo tixkˈaxtesi lix cuanquil saˈ rukˈ li Dios Acuabej.

15:25  Li Cristo cua̱nk xcuanquil chi takla̱nc toj retal tixqˈueheb rubel rok chixjunileb li xicˈ nequeˈiloc re.

15:26  Ut li ta̱sachekˈ xcuanquil toj saˈ rosoˈjic, aˈan li ca̱mc.

15:27  Tzˈi̱banbil retalil saˈ li Santil Hu nak li Acuabej Dios quixqˈue chixjunil li cˈaˈak re ru rubel xcuanquil li Cristo. Abanan li Cristo incˈaˈ nataklan saˈ xbe̱n li Acuabej Dios xban nak li Dios, aˈan li quiqˈuehoc re lix cuanquilal.

15:28  Ut nak acak xcanaba̱c xban li Dios chixjunil li cˈaˈak re ru rubel xcuanquil li Cristo li Alalbej, tojoˈnak li Cristo tixkˈaxtesi ajcuiˈ rib rubel xcuanquil li Acuabej Dios, li quiqˈuehoc xcuanquil li Cristo saˈ xbe̱n chixjunil, ut li Dios aˈanak chic yal re saˈ xbe̱n chixjunil.

15:29  Cuan caˈchˈin chic tinye chirix lix cuaclijiqueb chi yoˈyo li camenak. Cuanqueb saˈ e̱ya̱nk li nequeˈcubsi̱c xhaˈeb chokˈ ru̱chil xcubi haˈ li camenak. Cui incˈaˈ nequeˈxpa̱b nak teˈcuacli̱k li camenak, ¿cˈaˈut nak nequeˈxba̱nu chi joˈcan?

15:30  Ut cui incˈaˈ teˈcuacli̱k chi yoˈyo li camenak, ¿cˈaˈut nak la̱o aj yehol resil li colba-ib nakaqˈue kib chi rahobtesi̱c cui ma̱cˈaˈ xya̱lal li yo̱co chixba̱nunquil?

15:31  Ex inherma̱n, relic chi ya̱l ninye e̱re nak rajlal cutan cuan li nequeˈraj incamsinquil xban nak ninye resil li colba-ib. Abanan nasahoˈ saˈ inchˈo̱l xban nak xepa̱b li Cristo.

15:32  Ut cui incˈaˈ teˈcuacli̱k chi yoˈyo li camenak, ¿cˈaˈ raj ru tinra nak tincˈul li raylal arin Efeso? Chanchan nak yo̱quin chi pletic riqˈuineb li joskˈ aj xul nak cuanquin arin saˈ xya̱nkeb li tenamit. Ma̱cˈaˈ raj rajbal aˈan cui incˈaˈ takacˈul kakˈajca̱munquil chirix li kacamic. Kˈaxal us raj cui takaba̱nu joˈ li incˈaˈ nequeˈxpa̱b nak teˈcuacli̱k chi yoˈyo li camenak li nequeˈxye cuaˈako, ucˈako xban nak cuulaj caˈbej nococam.

15:33  Me̱qˈue e̱rib chi balakˈi̱c xbaneb li nequeˈa̱tinac chi joˈcan. Me̱junaji e̱rib riqˈuineb li incˈaˈ useb xnaˈleb xban nak li incˈaˈ useb xnaˈleb nequeˈxpoˈ xchˈo̱leb li cha̱bileb xnaˈleb.

15:34  Checˈoxla chi us li yo̱quex chixba̱nunquil ut mexma̱cob chic. Cuanqueb saˈ e̱ya̱nk li toj ma̱jiˈ nequeˈxpa̱b li Dios. Re xcˈutbal e̱xuta̱n nak ninye e̱re chi joˈcaˈin.

15:35  Ma̱re cuan li nequeˈyehoc, ¿chanru nak teˈcuacli̱k cuiˈchic chi yoˈyo li camenak? ¿Chanru teˈcˈutu̱nk nak teˈcuacli̱k? ¿Ma teˈcuacli̱k cuiˈchic chi tzˈakal re ruheb? chanqueb.

15:36  Ma̱cˈaˈ e̱naˈleb. Cˈoxlankex caˈchˈinak chirix li a̱uc. Li iyaj na-auman incˈaˈ namok cui incˈaˈ nakˈa li rix xbe̱n cua.

15:37  Ma̱cuaˈ li ratzˈum li acui̱mk na-auman. Aˈ li riyajil ban na-auman usta trigo malaj cˈaˈ chic ru chi iyajil.

15:38  Ut li Dios naxqˈue li ratzˈum chi chˈinaˈus joˈ naraj aˈan. Aˈ yal cˈaˈru li iyaj ta̱rau junak, aˈan ajcuiˈ li ratzˈum tixqˈue.

15:39  Nabal pa̱y ru li iyaj ut nabal pa̱y ajcuiˈ ru li ratzˈum na-el. Ut joˈcan ajcuiˈ nabal pa̱y ru li tibelej. Jalan xtibel li cristian chiru xtibel li xul. Ut jalan xtibel li car chiru xtibel li xul li nequeˈrupupic.

15:40  Ut jalaneb ajcuiˈ li ángel saˈ choxa chiku la̱o ut jalaneb lix lokˈal chiru li kalokˈal la̱o arin saˈ ruchichˈochˈ.

15:41  Jalan cuiˈ xlokˈal li sakˈe ut jalan cuiˈ xlokˈal li po ut jalan ajcuiˈ xlokˈal li chahim ut jalan jala̱nk lix lokˈal li junju̱nk chi chahim.

15:42  Joˈcan ajcuiˈ la̱o. Jalan chic li kalokˈal nak tocuacli̱k cuiˈchic chi yoˈyo chirix li kacamic. Nak nococam, nocomukeˈ ut nakˈa li katibel, abanan nak tocuacli̱k cuiˈchic chi yoˈyo jalanako chic ut incˈaˈ chic toca̱mk.

15:43  Nak namukeˈ junak camenak ma̱cˈaˈ xcacuilal chi moco xlokˈal. Abanan nak ta̱cuacli̱k cuiˈchic chi yoˈyo, kˈaxal nimak xlokˈal ut cua̱nk chic xcuanquil.

15:44  Nak nococam namukeˈ li katibel xban nak yal chˈochˈ oquenak. Abanan nak tocuacli̱k cuiˈchic chi yoˈyo, musikˈejo chic. Nak cuanco saˈ ruchichˈochˈ cuan li katibel nakˈa na-osoˈ. Abanan saˈ choxa jalanako chic ut ta̱cua̱nk li kayuˈam chi junelic.

15:45  Tzˈi̱banbil saˈ li Santil Hu chi joˈcaˈin: Laj Adán li xbe̱n cui̱nk quiqˈueheˈ xmusikˈ nak quiyoˈobtesi̱c xban li Dios. Abanan li xcab Adán, aˈ li Ka̱cuaˈ Jesucristo, aˈan musikˈej ut aˈan li naqˈuehoc kayuˈam chi junelic.

15:46  Joˈcan nak li katibel arin saˈ ruchichˈochˈ, aˈan na-osoˈ. Abanan li kamusikˈ li naxqˈue ke li Dios, aˈan incˈaˈ na-osoˈ. Cuan ban chi junelic.

15:47  Nak quiyoˈobtesi̱c laj Adán xban li Dios, chˈochˈ qui-oc. Abanan li Jesucristo moco yoˈobtesinbil ta. Aˈan musikˈej ut saˈ choxa quichal chak.

15:48  Joˈcan nak chikajunilo arin saˈ ruchichˈochˈ yal tibelo joˈ laj Adán. Ut nak tocuacli̱k cuiˈchic chi yoˈyo, la̱ako chic musikˈej joˈ li Cristo li quichal chak saˈ choxa.

15:49  Anakcuan cuan katibel joˈ li re laj Adán. Li tibelej aˈan chˈochˈ oquenak. Abanan saˈ jun cutan la̱ako chic joˈ li Cristo li quichal chak saˈ choxa.

15:50  Ex inherma̱n, li nacuaj xyebal e̱re, aˈan aˈin: li katibel ut li kaquiqˈuel incˈaˈ ta̱oc saˈ lix nimajcual cuanquilal li Dios xban nak aˈan nakˈa. Li bar cuan nakˈa incˈaˈ naru ta̱re̱chani lix nimajcual cuanquilal li Dios xban nak aˈan incˈaˈ nakˈa.

15:51  Nacuaj ajcuiˈ nak te̱nau lix ya̱lal li mukmu nak quicuan chak junxil. Aˈan aˈin: moco chikajunilo ta la̱o aj pa̱banel toca̱mk, abanan chikajunilo tojalanokˈ.

15:52  Saˈ rosoˈjic li cutan nak ta̱ecˈa̱nk chak li trompeta, tojalanokˈ saˈ junpa̱t saˈ jun mutzˈil u. Nak ta̱ecˈa̱nk chak li trompeta eb laj pa̱banel li ac camenakeb teˈcuacli̱k cuiˈchic chi yoˈyo ut incˈaˈ chic teˈca̱mk. Ut eb laj pa̱banel li toj yoˈyo̱queb teˈjalanokˈ.

15:53  Li katibel arin saˈ ruchichˈochˈ nakˈa. Tento nak ta̱jala̱k re nak incˈaˈ chic ta̱kˈa̱k. Ut li kayuˈam li na-osoˈ saˈ ruchichˈochˈ ta̱jala̱k riqˈuin jun acˈ yuˈam incˈaˈ chic ta̱osokˈ.

15:54  Nak acak xjalanoˈ li katibel li nakˈa, ut nak acak xjalanoˈ li kayuˈam li na-osoˈ, aran ta̱tzˈaklok ru li quitzˈi̱ba̱c chak najter xbaneb li profeta nak queˈxye chak chi joˈcaˈin: Sachbil xcuanquil li ca̱mc chi junaj cua xban nak xnumta xcuanquil li Cristo saˈ xbe̱n. (Is. 25:8)

15:55  Li ca̱mc ma̱cˈaˈak chic xcuanquil saˈ kabe̱n. Ma̱cˈaˈ chic li raylal takacˈul xban li ca̱mc. (Os. 13:14)

15:56  Xban nak cuan li ma̱c, joˈcan nak cuan li ca̱mc. Nak ma̱cˈaˈak chic li ma̱c, ma̱cˈaˈak chic li ca̱mc. Ut li chakˈrab ma̱cˈaˈak chic xcuanquil saˈ kabe̱n.

15:57  Joˈcan ut chikabantioxi re li Dios nak ma̱cˈaˈ chic xcuanquil li ca̱mc saˈ kabe̱n saˈ xcˈabaˈ li Ka̱cuaˈ Jesucristo.

15:58  Joˈcan ut ex inherma̱n, raro̱quex inban, cauhak taxak e̱chˈo̱l saˈ le̱ pa̱ba̱l. Michˈinan le̱ chˈo̱l. Cheqˈuehak ban e̱chˈo̱l chi cˈanjelac chiru li Ka̱cuaˈ. Ut chenauhak nak li joˈ qˈuial te̱ba̱nu saˈ xcˈabaˈ li Ka̱cuaˈ cuan rajbal.

Chapter 16

16:1  Anakcuan nacuaj xyebal e̱re chanru te̱ba̱nu riqˈuin li tumin li yo̱quex chixxocbal re xtenkˈanquileb le̱ rech aj pa̱banelil li cuanqueb aran Jerusalén. Joˈ xinye reheb laj pa̱banel aran Galacia, joˈcan ajcuiˈ tinye e̱re la̱ex.

16:2  Rajlal xama̱n, saˈ li xbe̱n cutan re li xama̱n, che̱junju̱nkalex te̱qˈue li joˈ qˈuial texru̱k aˈ yal joˈ nimal le̱ tojbal te̱cˈul. Ut li tumin aˈin ac xocbilak e̱ban nak tincuulak e̱riqˈuin re nak incˈaˈ yo̱kex chi xococ tumin nak tincuulak la̱in.

16:3  Ut te̱sicˈ ruheb li ani teˈxic Jerusalén chixcanabanquil li tumin. Ut nak tincuulak e̱riqˈuin, tintzˈi̱ba li hu teˈxcˈam nak teˈxic Jerusalén chixkˈaxtesinquil li tumin reheb laj pa̱banel.

16:4  Cui naxqˈue rib nak tinxic la̱in, cuochbeneb nak toxic.

16:5  Nak tinxic e̱riqˈuin, xbe̱n cua toxinnumekˈ Macedonia.

16:6  Ma̱re tinba̱yk caˈchˈinak e̱riqˈuin. Ma̱re toj tinnumsi li habalkˈe e̱riqˈuin re nak cua̱nk saˈ e̱chˈo̱l nak tine̱tenkˈa chi xic tojaˈ yal na bar tinxic.

16:7  Incˈaˈ nacuaj nak yal numecˈ cue nak tincuulak e̱riqˈuin. Nacuaj ban tincua̱nk jarubak cutan e̱riqˈuin cui joˈcan naraj li Ka̱cuaˈ Dios.

16:8  Abanan toj tinnumsi li ninkˈe Pentecostés arin Efeso tojoˈnak tinxic e̱riqˈuin.

16:9  Yo̱ chi e̱lc chi us lin cˈanjel arin xban nak nabaleb nequeˈraj rabinquil resil li colba-ib. Abanan cuan ajcuiˈ li xicˈ nequeˈrabi resil li colba-ib.

16:10  Cui ta̱cuulak laj Timoteo e̱riqˈuin, checˈulak chi sa saˈ e̱chˈo̱l re nak sahak saˈ xchˈo̱l aˈan ut ma̱cˈaˈak xcˈaˈux nak cua̱nk saˈ e̱ya̱nk. Aˈan yo̱ chi cˈanjelac chiru li Ka̱cuaˈ joˈ nak nincˈanjelac la̱in.

16:11  Joˈcan ut ma̱ ani chitzˈekta̱na̱nk re. Chetenkˈa riqˈuin li cˈaˈru re, re nak ta̱cha̱lk cuiˈchic cuiqˈuin saˈ xya̱lal. La̱in yo̱quin chiroybeninquil nak ta̱cha̱lk cuiˈchic cuiqˈuin rochbeneb li herma̱n.

16:12  Nabal sut xintzˈa̱ma chiru li hermano Apolos nak ta̱xic e̱riqˈuin rochbeneb li herma̱n. Abanan aˈan quirecˈa saˈ xchˈo̱l nak toj ma̱jiˈ ta̱ru̱k chi xic. Nak tixqˈue rib ta̱cuulak aran che̱rilbal.

16:13  Michˈinan e̱chˈo̱l saˈ le̱ pa̱ba̱l. Cauhak taxak e̱chˈo̱l chi pa̱ba̱nc ut me̱qˈue e̱rib chi a̱le̱c. Yoˈon cua̱nkex ut chepa̱bak li Ka̱cuaˈ chi anchal e̱chˈo̱l, usta nachal raylal saˈ e̱be̱n.

16:14  Ut chixjunil li cˈaˈru te̱ba̱nu, cheba̱nuhak chi anchal e̱chˈo̱l xban nak nequera le̱ ras e̱ri̱tzˈin.

16:15  Ex inherma̱n, la̱ex ac nequenau nak laj Estéfanas ut li rixakil joˈqueb ajcuiˈ li ralal xcˈajol, aˈaneb li xbe̱n queˈpa̱ban aran Acaya. Eb aˈan queˈxqˈue xchˈo̱l chi cˈanjelac chiruheb li rech aj pa̱banelil.

16:16  Joˈcan nak tintzˈa̱ma che̱ru nak tex-abi̱nk chiru laj Estéfanas joˈqueb ajcuiˈ chixjunileb li nequeˈtenkˈan ut nequeˈcˈanjelac saˈ e̱ya̱nk.

16:17  Nasahoˈ saˈ inchˈo̱l nak xeˈcˈulun cuiqˈuin laj Estéfanas ut laj Fortunato ut laj Acaico. Eb aˈan xeˈtenkˈan cue chokˈ e̱ruchil la̱ex nak ma̱ anihex cuiqˈuin.

16:18  Queˈxqˈue xcacuil inchˈo̱l. Chanru nak xextenkˈa̱c la̱ex xbaneb, joˈcan ajcuiˈ nak xineˈxtenkˈa la̱in. Joˈcan nak che-oxlokˈiheb li herma̱n aˈan.

16:19  Chixjunileb laj pa̱banel li cuanqueb Asia nequeˈxtakla xsahil e̱chˈo̱l saˈ xcˈabaˈ li Ka̱cuaˈ. Nequeˈxtakla ajcuiˈ nabal xsahil e̱chˈo̱l eb li herma̱n laj Aquila ut lix Priscila. Ut nequeˈxtakla ajcuiˈ nabal xsahil e̱chˈo̱l chixjunileb laj pa̱banel li nequeˈxchˈutub rib saˈ rochoch laj Aquila.

16:20  Chixjunileb laj pa̱banel li cuanqueb arin nequeˈxtakla xsahil e̱chˈo̱l. Ut joˈcan ajcuiˈ la̱ex, cheqˈuehak xsahil e̱chˈo̱l che̱ribil e̱rib riqˈuin santil utzˈuc u.

16:21  La̱in laj Pablo. Riqˈuin cuukˈ yo̱quin chixtzˈi̱banquil li a̱tin aˈin re xqˈuebal xsahil e̱chˈo̱l.

16:22  Li Ka̱cuaˈ Jesucristo chi se̱b ta̱cha̱lk. Cui cuan junak saˈ e̱ya̱nk incˈaˈ naxra li Jesucristo, chi cha̱lc ta raylal saˈ xbe̱n.

16:23  Aˈ taxak li rusilal li Ka̱cuaˈ chicua̱nk e̱riqˈuin.

16:24  Kˈaxal nequexinra che̱junilex xban nak junajo chic saˈ xcˈabaˈ li Ka̱cuaˈ Jesucristo. Joˈcan taxak.