PohnOld - I Corinthians

Chapter 1

1:1  PAULUS me paeker, en wiala wanporon en Iesus Kristus amen pan kupur en Kot o ri atail Sostenes,

1:2  Ong momodisou en Kot me mi Korint, me saraui kila Kristus Iesus, me paeker en saraui o karos me kin likwir ong mar en atail Kaun Iesus Kristus ni deu arail o deu at.

1:3  Mak o popol sang ren Kot Sam atail o atail Kaun Iesus Kristus en mi re omail!

1:4  I kin danke ai Kot kaukaule pweki mak en Kot ong komail, me papanga dong komail sang ren Kristus Iesus,

1:5  Pwe komail me pai kidar i ni meakaros, ni masan karos o lolekong karos;

1:6  Duen kadede iran Kristus a tengiteng re omail;

1:7  Pwe sota pai en mak eu, me komail saik pai kidar; ni omail auiaui kasansal en atail Kaun Iesus Kristus.

1:8  Me pil pan kotin kasone komail di lao lel imwi, pwe en solar dip omail lao lel ni ran en atail Kaun Iesus Kristus.

1:9  Kot me melel, me komail paekerdo, pwen sau pena ren sapwilim a Ol Iesus Kristus atail Kaun.

1:10  Ri ai kan, i panaui komail ni mar en atail Kaun Iesus Kristus, komail en wiaki eu ni omail kasoi kan, pwe komail de wuki pasang nan pung omail, a komail en mi ni lamalam ta pot o kapung ta ieu.

1:11  Ri ai kan a kalok dong ia sang toun im en Kloe, me dene komail kin akamai pena nan pung omail.

1:12  A iet me i men inda, amen komail kin inda: Ngai nain Paulus amen; a ngai nain Apolos amen; a ngai nain Kepas amen; a ngai nain Kristus amen.

1:13  Iaduen, Kristus me lop pasang? Iaduen, Paulus me lopu kin komail er? De komail paptaisekier ni mar en Paulus?

1:14  Ngai me danke Kot, me sota meamen re omail, me i paptaisela, Krispus eta o Kaius;

1:15  Pwe amen de inda, me ngai wia paptaise ong ni pein ad ai.

1:16  A toun im en Stepanas i pil paptaisela; a solar me i asa, me i paptaisela.

1:17  Pwe kaidin en wia paptais, me Kristus poron kin ia la, a pwen padaki rongamau, kaidin ni tiak kadek lokaia, pwe lopun Kristus de mal la.

1:18  Pwe masan duen lopu me mal kot ren me lokidokilar akan, a manaman en Kot ong ir, me pan dorela.

1:19  Pwe a intingidier: I pan tiakedi lolekong en me lolekong kan, o karotongala marain en me marain akan.

1:20  Ia me lolekong o? O ia saunkawewe o? Ia me lolekong o en pali pa? Dadue, Kot sota wia lamponki me erpit en pali pa?

1:21  Aramas akan sota asa Kot pweki udan ar lolekong. Kot ap kupureda, en kamaur kida, me poson akan padak mongai.

1:22  Pwe Sus akan kin poeki kilel akan, a men Krik kin roporop lolekong.

1:23  A kit kin padaki Kristus me lopuedar, men kamakar ong Sus akan o ong men liki kan kasoi mal.

1:24  A ong me paeker akan, men Sus o pil men Krik, se kaweweda Kristus manaman en Kot o erpit en Kot.

1:25  Pwe soerpit en Kot me sikida sang en aramas akan ar lolekong, o luet en Kot me kelail sang en aramas akan ar kelail.

1:26  Ri ai kan, komail kilang duen omail paeker. Pwe kaidin me toto ren me lolekong en pali uduk kan. Pil kaidin me toto ren me poe kan, pil kaidin toto ren me masamas akan, me pilipildar.

1:27  A Kot kotin piladar me so lolekong nin sappa, pwen kapouiala me lolekong kan; o Kot me kotin piladar me luet nin sappa kan, pwen kapouiala me kelail akan.

1:28  O me mal nin sappa, o me so konekon, i me Kot kotin piladar, o me sota meakot, pwen kawela me lapalap.

1:29  Pwe uduk der aksuaiki mon Kot.

1:30  A komail tapi sang i ren Kristus Iesus, me wialar atail erpit sang ren Kot, o pung, o saraui, o maur patail.

1:31  Pwe duen a intingidier: Me men suaiki, i en suaiki Kaun o.

Chapter 2

2:1  RI ai kan, ni ai pwara wong komail er, kaidin ni kadek lokaia de lolekong en aramas, me i padaki ong komail er kadede en Kot.

2:2  Pwe i sota wia kin ia, en asa meakot nan pung omail, Iesus Kristus eta o a kalopuela.

2:3  O ngai mimi re omail ni ai luet, o masak, o rerer toto.

2:4  O ai kasoi o ai padak kaidin ni kadek lokaia en lolekong, a ni kadede en Ngen o manaman.

2:5  Pwe omail poson de pasoneki lolekong en aramas akan, a manaman en Kot.

2:6  Ari so, me kit kin padapadaki me lolekong ren me unsok kan, a kaidin lolekong en sappa et, o pil kaidin en saupeidi kan en sappa et, me pan sarodi,

2:7  A kit kin padaki duen erpit en Kot me rir, iei me so sansal, me Kot kotin kileledier ni en sappa saik mia, pwen kalinganada kitail,

2:8  Me sota saupeidi en sappa men asadar, pwe ma re asaer i, re sota pan kalopuela Kaun en lingan.

2:9  A duen a intingidier: Me sota mas eu udialer, o me sota salong eu rongadar, o me sota ko ong nan mongiong en aramas amen, iei me Kot kotin kaonop ong, me pok ong i.

2:10  A Kot kotin kadiarok ong kitail ki Ngen e, pwe Ngen kin kotin rapaki meakaros, pil duen kupur en Kot.

2:11  Pwe is aramas, me kin asa duen lol en aramas akan, pwe ngen en aramas eta me mi re a? Iduen Kot, sota me asa meakan me udan Kot, pwe Ngen en Kot eta.

2:12  A kaidin ngen en sappa, me kit aleer, a Ngen en Kot, pwe kit en asada meakan, me Kot kotiki ong kitail er.

2:13  I me kit pil kin padaki wei, kaidin ni lokaia o mangin pan lolekong en aramas, a ni masan akan, me Ngen kotin kaweweda, kareda dipisou ngenin akan.

2:14  A aramas ip pwel sota kin ale meakot ren Ngen en Kot, pwe me mal kot ong i, pwe a sota kak ong, pwe mepukat kin kasauiada ren Ngen.

2:15  A me ngenin kin kasauiada meakaros, ap sota amen me pan kak kasauiada i.

2:16  Pwe is me asa duen kupur en Kaun o, de is me pan kak padaki ong i meakot? A Ngen en Kristus kotikot lol atail.

Chapter 3

3:1  ARI ri ai kan i sota kak padaki ong komail dueta ong aramas ngenin, a ong me uduken o kisin seri en Kristus akan.

3:2  I kamanga kin komail pil en didi, a kaidin kisin manga, pwe komail saikenta kak ong, o komail pil sota kak ong ansau wet.

3:3  Pwe komail non uduken pwe iaduen, ma peirin o akamai, mi re omail, komail so uduken o weweid ni tiak en aramas akan?

3:4  Pwe amen kin inda: Ngai nain Paulus amen, a amen: Ngai nain Apolos amen. Komail so kin mi nin tiak en aramas?

3:5  Pwe is Apolos? O is Paulus, kaidin papa kai, me komail asa sanger lamalam duen Kaun o kotin pang ong amen amen?

3:6  Ngai me padukedier, a Apolos me kalamu ir adar, a Kot me kotin kaparadar.

3:7  Ari kaidin i meakot, me padukedi, pil kaidin i, me kalamu ir adar, a Kot eta, me kotikidar wa kan.

3:8  Ari, me kin padukedi o me kin kalamu ir adar, ira dupeneta, o amen pan katingki iran ara dodok.

3:9  Pwe kit me sauas pan dodok en Kot, a komail sapasap en Kot, o sapwilim en Kot a kakau im.

3:10  Ngai me wiadar pason ki mak en Kot me i aleer duen sause lolekong amen, a amen usewei kakau poa, a amen amen en kalaka duen a kakau pon pason wet!

3:11  Pwe sota me pan kak wia eu pason, me pan toror sang me wiauier, i eta: Iesus Kristus.

3:12  Ari, ma amen pan kauada pon pason wet kold, silper, takai, kasampwal, tuka, rä, pain kit akan,

3:13  Nan wiawia en amen amen pan sansaleda, pwe ran o pan kapareda due, pwe a pan kadiarok kida kisiniai. Pwe kisiniai pan kasaleda wiawia en amen amen.

3:14  Ma wiawia en amen, me a kauadar poa, pan mimieta, a pan kating.

3:15  A ma wiawia en amen pan rongala, a sota pan kating. A pein i pan dorela duen amen, me pitila sang nan kisiniai.

3:16  Komail sota asa, me komail tanpas en Kot, o Ngen en Kot kotikot lol omail?

3:17  A ma amen kawela tanpas en Kot, nan Kot pan kawela i, pwe tanpas en Kot me saraui, ari iei komail.

3:18  Sota amen en kotaue pein i! Ma amen nan pung omail lamelame ansau wet, me a lolekong, mak eta, en wiala ol pweipwei men, pwen wiala lolekong amen.

3:19  Pwe lolekong en sappa et me song en pweipwei ren Kot, pwe a intingidier: A kin kaloe kidi me aklolekong pein ar widiwiding.

3:20  Pil eu! Kaun o kotin mangi, lamalam en me aklolekong kan, me mal.

3:21  Ari, sota amen en akkeleki aramas akan, pwe omail meakaros;

3:22  Ma Paulus, de Apolos, de Kepas, de sappa, de memaur, de mela, de ma men met, de men mur, pwe karos me omail.

3:23  A komail sapwilim en Kristus, a Kristus sapwilim en Kot.

Chapter 4

4:1  ARAMAS akan en wia kin kit papa en Kristus o saunkoa pan me rir akan ren Kot.

4:2  A iaduen saunkoa kan? Amen amen en lelapok.

4:3  I sota insenoki, me komail de kapung en aramas kasaui ia da. Pein ngai pil sota kasaui ia da.

4:4  Pwe sota me i pein asa, a kaidin met, me i pung kila, a Kaun o me kin kasaui ia da.

4:5  Ari, komail depa kasaui okotme mon a ansau, a lao Kaun o pan kotido, me pan kasansale dang marain okiok en me rotorot akan o kadiarokada lamalam en nan mongioing akan, amen amen ap pan indandeki ren Kot.

4:6  Ri ai kan, mepukat i kin inda duen ngai o Apolos, pwe komail en ale sang kit, pwe amen ender lamelame, me a siki sang me intingidier, pwe komail ender aklapalapaki amen, ap palian me teio.

4:7  Pwe is me mone kin uk? A sota, me mi re om, me koe sota aleer. A ma koe aleer meakaros, menda koe kin suaiki, likamata koe sota aleer?

4:8  Komail medier o kapwapwalar, o komail kin kaunda, ap sota ale sang kit. I men, komail en kaunda, pwe kit ap pil pan iang komail kaunda.

4:9  Pwe i lamelame, me Kot kotin wiai ong kit wanporon akan, en tikitik melel, me mau ong mela, pwe kit wialar men kapuriamui eu ni sappa mon tounlang o aramas akan.

4:10  Kit me song en pweipwei pweki Kristus, a komail me lolekongki Kristus; kit me luet, a komail me kelail; komail me indand mau, a kit me indand sued.

4:11  Kokodo lel auer met kit men mangadar, o pil men nim piladar, o kiliso, o se kin kalokolok, o sota deu at.

4:12  O dodok ni pein pa at; kit me kalok sued, a se kin kapaiada, kit me kalokolok, a se kin nenenla; Ni at pakaraun mal, kit kin kapakap.

4:13  Kit wialar tatan kid o kopataun aramas karos.

4:14  I intingiedier mepukat kaidin pwen kanamenok komail, a pwen panaui komail nai seri kompok kan.

4:15  Pwe ma omail saunpadak pan Kristus me nen, nan sam omail akan me sota non toto, pwe ngai me kaipwi komail ren Kristus Iesus ki rongamau.

4:16  I ari poeki re omail komail en idauen ia do.

4:17  Pwe i me i kadarki wong komail Timoteus nai seri kompoke o lelapok pan Kaun o pwen kataman kin komail duen al ai kan pan Kristus, duen me i kawewedar ni momodisou karos.

4:18  Akai komail me aklapalap likomata i sota pan pwar wong komail.

4:19  A i pan pwar wong komail madang, ma Kaun o pan kotin kupura. I ap pan kilang kaidin padak en me aklapalap akan, a me manaman.

4:20  Pwe wein Kot sota mi ni kasoi a ni manaman.

4:21  Da me komail mauki? I en pwar wong komail wa sokon, de limpok o ngen en opampap?

Chapter 5

5:1  I PIL rongadar, me nenek kin wiaui nan pung omail. A eu song en nenek, me sota kin wiaui ren men liki kan; pwe dene amen paudeki en a papa a paud.

5:2  A komail me aklapalap, ap sota insen suedeki o kasapokela sang komail, me wiadar met.

5:3  A ni ai doo sang komail ni pali war, ap koren iong komail ni pali ngen i iet me i kapungadar, dueta amen, me mi re omail,

5:4  Ni mar en atail Kaun Iesus, ni atail pokon pena re omail ni pali ngen atail, ki manaman en atail Kaun Iesus.

5:5  Me wiadar met i pangalang Satan, pwen kawela uduk o, pwe ngen o en kamaurela ni ran en Kaun Iesus.

5:6  Kaidin me mau omail suaiki. Komail sota asa, me kalap kis kin kamutala dolepa karos?

5:7  Ari, kokowei sang kalap kitai, pwe komail en wiala plaua amas kap, pwe komail udan plaua amas kap, pwe atail pasa Kristus kamatalar.

5:8  Kitail ari en wiada atail pasa, kaidin ni kalap kitai, pil kaidin ni kalap lemai de me sued, a ni plaua amas kap ni pung o melel.

5:9  Ngai inting wong komail er nan kisin likau o, pwe komail ender waroki ong me nenek kan.

5:10  Ari mepukat i sota kin inda duen me nenek ren men liki kan, de me norok kapwa, de me lolap akan, de me wun ani, pwe ma idue, komail en katoror wei sang sappa.

5:11  A met i inting wong komail er ender waroki ong amen, me adaneki saulang, ap nenek, de me norok kapwa, de kati ani mal, de lalaue amen, de kamom soko, de me lolap; komail ender iang i manga.

5:12  Pwe menda re i men liki? Kaidin ai dodok en kadeik irail ada. Komail sota kin kadeikada nan pung omail?

5:13  A me mi liki ko, Kot pan kotin kasapoke wei sang re omail me sued o!

Chapter 6

6:1  A MA amen wia sapung ong amen, menda komail kapung pena mon men liki kan, a so mon me saraui kan?

6:2  De komail sota asa, me saraui kan pan kadeikada sappa? A ma sappa pan pakadeikeki komail, iaduen, komail sota itar ong kadeikada kisin dodok tikitik kan?

6:3  Komail sota asa, me kitail pan kadeikada tounlang kan? Nan melel kaualap pil kisin tiak tikitik en maur et.

6:4  A ma komail kin kadeikeki tiak en maur et iaduen, komail kin kapukapung iangaki me sota indant mau ren momodisou?

6:5  Mepukat i indai ong komail, pwen kanamenok komail. Pwe sota amen re omail, me lolekong? Sota amen me itar ong en wiada kapung nan pung en ri a kan?

6:6  A amen kin akamai ong amen ri a mon me soposon akan.

6:7  Ari, omail akamai nan pung omail pil udan sapung. Menda komail sota mueidala meakot? Menda komail sota kin nenenla?

6:8  A komail kin sapung o kotaue ong ri omail akan.

6:9  De komail sota asa, me sapung kan sota pan sosoki wein Kot? Kalaka pein komail! Pwe me nenek de me kati ani likam akan, de me kamal, de me dir en inong sued, de me madong saut ong ol oko.

6:10  De men pirap, de me norok kapwa, de kamom soko, de kinekine mal, de kuli kapwa kan sota pan sosoki wein Kot.

6:11  Iduen akai komail mas o, a met komail wideudier, o kasarauialar, o pung kilar mar en Kaun Iesus o Ngen en atail Kot.

6:12  A muei ong ia meakaros, a kaidin karos me kin kamau ia la; a muei ong ia meakaros, a sota, me pan poe ia di.

6:13  Melel, kisin manga me mau ong kaped o, o nan kapedi wasan kisin manga en ko ong ia. A Kot pan kotin kawe ira la karos. A pali war o wiaui ong Kaun o, a kaidin ong nenek, a Kaun kotin apapwali pali war o.

6:14  A Kot me kotin kaiasadar Kaun o, a pil pan kotin kaiasa kida kitail manaman.

6:15  Komail sota asa, me war omail kokon en Kristus? A iaduen, i en ale kokon en Kristus, wia kin ir kokon en li nenek amen? O so!

6:16  De komail sota asa, meamen me waroki ong li nenek amen, me ira pan wiala war ta ieu? Pwe a kotin masanier: Ira pan wiala uduk ta ieu.

6:17  A me waroki ong Kaun o nan a pan ngen ta ieu re a.

6:18  Komail tange wei sang nenek, pwe dip karos, me aramas kin wia, kin wiaui likin war a, a me kin nenek, kin wiada dip ong pein war a.

6:19  De komail so asa, me war omail tanpas en Ngen saraui me kotikot lol omail, me komail aleer sang ren Kot, a kaidin uta ’mail komail.

6:20  Pwe komail neti kidar pai eu, komail ari kalinganada Kot ki war omail.

Chapter 7

7:1  A IET duen me komail intingie dong ia, a mau ong aramas amen, a ender sair li amen.

7:2  Ari so, amen amen en ale pein a warok li, o amen amen en ale pein a warok ol, pwen der dender.

7:3  Ol o en wiai ong a warok li me inen, a pil dueta li ong a warok ol.

7:4  Li o sota kak poedi pein war a, a a warok. Pil dueta ol o sota kak poedi pein war a, a a warok.

7:5  Der so oke amen amen, ma so, pweki inau ansau kis, pwen mot isesol rer ekis o kapakap, ap pur pena, pwe Satan de kasongesong komail omail so oke pena.

7:6  Mepukat kaidin kusoned eu, pwe pein ai lamelam.

7:7  A i men aramas akan karos en dueta ngai. A amen amen aleer pein a pai en mak sang ren Kot duen amen amen.

7:8  A ngai indai ong me so papaud o li odi kan, me mau irail en dadaur dueta ngai.

7:9  A ma irail sota kak ong, irail en papaud; me mau papaud sang dender.

7:10  O ong me papaud akan ngai me ilaki wei, a kaidin ngai pwe Kaun o: Li papaud ender kamuei wei sang a warok!

7:11  A ma a muei wei sanger, i en dadaurata a kirip de kadeke a warok, o ol ender kasela a warok.

7:12  Kaidin Kaun o, pwe ngai men indang me tei kan: Ma ri atail ol amen mia, me a paud soposon amen, ap men mimieta re a, a ender kasela li o.

7:13  Pil dueta li amen, ma a warok soposon amen o a men mimieta re a, a ender kasela ol o,

7:14  Pwe ol soposon me kasaraui kilar li o, o li soposon kasaraui kilar ol o, pwe ma a so due met, noumail seri kan me samin, a met irail me saraui.

7:15  A ma me soposon o pan muei wei sang, ari i en muei wei sang; ri ol de ri li sota kin kaupindi ni mepukat. A Kot me kotin molipe kitail, pwen popol pena.

7:16  Pwe iaduen, koe li o, koe asa, me koe pan kak kamaurela ol o? De koe ol, koe pan kamaurela li o?

7:17  A duen Kaun o pang ong amen amen, duen Kot molipe ong amen amen, iduen dadaurata; nan iduen ngai ilakilang momodisou akan karos.

7:18  Ma amen me paeker ni sirkomsais, i en dadaurata a sirkomsais, a ma amen me paeker ni sosirkomsais, i ender iang sirkomsais.

7:19  Pwe kaidin meakot sirkomsais, o pil kaidin meakot sosirkomsais, a wiawia kusoned en Kot akan.

7:20  Amen amen en dadaurata udan a koa ni a paeker.

7:21  Ma koe paeker ni om ladu, koe der insensuedeki, a ma koe pan kak maioda sang, ari pil me mau.

7:22  Pwe ladu men, me paeker ong Kaun o, nan a maio ren Kaun o; o pil dueta me maio men paeker ap pan ladun Kristus men.

7:23  Komail me neti kidar pai eu, der wiala ladun aramas akan.

7:24  Ri ai kan, amen amen dadaurata ut arail ren Kot.

7:25  A duen peinekap akan, sota kusoned eu sang ren Kaun o; a pein ai lamelam mia, pwe i aleer mak en Kaun, pwen kak melel.

7:26  Iet me i lameda, me mau ong aramas sota papaud, pwe ni ansau apwal wet.

7:27  Ma koe kapapaud ong li amen, ender men muei sang, a ma so om paud mia, ender rapaki li amen.

7:28  A kaidin dip eu, ma koe pan papaud; o ma seripein amen pan papaud, kaidin dip. A a pan apwal ong mepukat ni pali uduk arail. A ngai sota men, me apwal kot en lel ong komail.

7:29  A ri ai kan, mepukat i indada, pweki ansau o me motomot. A pil eu: Me mau ong me ar warok mier, en wia dene sota ar warok;

7:30  O me kin sangesang, dene sota sangesang; o me kin pereperen, dene sota ar peren; o me kin netinet, dene sota ar kapwa.

7:31  O me dodokki sappa, ren kalaka, pwe eder wiaki me sued. Pwe mom en sappa et pan rosala.

7:32  A i men, komail ender lodi ong me apwal. Me sota papaud, kin apwali me sapwilim en Kaun o, duen a pan kaperenda Kaun o.

7:33  A me papaud, kin lamelame, me kon ong sappa, duen a pan kaperenda a paud.

7:34  A nan pung en li papaud o peinekap me wuk pasang: Me sota papaud, kin apwali me sapwilim en Kaun o, pwen saraui ni pali war o pil ni pali ngen; a me papaud, kin inong iong me kisan sappa, duen a pan kak kaperenda a warok.

7:35  Mepukat i inda wei, pwen kamaui komail, a kaidin pwen saliedi komail, a pwen sauasa komail, pwe karos en inen o pung re omail, o pwe komail en papa Kaun o.

7:36  A ma amen lamelame, me sapung, ma a sota pan mueid ong na seripein, me mau ong papaud, en papaud; ari, a pan wia duen me a mauki, pwe kaidin dip, ma a pan mueid ong i en papaud.

7:37  A ma amen me kelail ni mongiong i, pil kelail ong kaunda, pein insen a, ap inauki ong nan mongiong i en kolekol na seripein, i me mau.

7:38  Ari, ma amen pan papaud me mau, a ma amen sota pan papaud, me mau sang.

7:39  Li papaud amen me kaupina kidi pung en papaud arain a warok memaur; a ol o lao mela, nan a maio ong kapapaud, me a mauki, i eta; a en wiaui ren Kaun.

7:40  Meid pai, ma a pan dadaurata a kirip duen me i lameda, A ngai asa, me Ngen en Kot pil kotikot re i.

Chapter 8

8:1  A kitail asaer duen mairong ong ani mal, pwe kitail karos me lolekong. A lolekong eta kin kaaklapalapiela, a limpok kin kamauiela.

8:2  A ma amen aklapalapaki a lolekong, nan a sota non dedeki duen me itar ong en asa.

8:3  A ma amen pok ong Kot, nan Kot me mangi i.

8:4  A kitail dedekier duen manga uduk en mairong ong ani mal akan, pwe ani mal amen sota katepa nin sappa, o sota amen Kot, pwe i me ta men.

8:5  Pwe ma akai mia, me adaneki kot, me kin mimi nanlang de nin sappa, pwe kot toto o monsap toto mia;

8:6  A atail Kot me ta men, me Sam, me dipisou karos tapi sang re a, o me kitail wiaui ong. O atail Kaun me ta men: Iesus Kristus, me wiadar meakaros, o me kitail pil wiaui kidar i.

8:7  A kaidin karos me asa mepukat, pwe akai mia, me lamelame, me ani mal meakot, ap kangkang uduk en mairong ong ani mal, o iei insen luet arail kin samin kila.

8:8  A kisin manga sota kin sauasa kitail ren Kot. Ma kitail sota pan manga, kitail sota pan sued kila, a ma kitail pan manga, kitail sota pan mau kila.

8:9  A kalaka komail, pwe omail saladokalar ender kadipikelekel ong me luet akan!

8:10  Pwe ma koe, me asa tiak, ap mangamanga nan im en ani mal o, a me luet amen pan kilang om mangamanga, ap aima kida nan insen a, ap iang mangamanga mairong en ani mal akan,

8:11  Iduen ri atail luet amen, me Kristus mata kilar, pan mekila om saladok.

8:12  A ma iduen omail dip iong ri atail akan, me kin kawela insen luet arail, nan komail kin wia dip iong Kristus.

8:13  Ari ma kisin manga kamakar ri ai, i solar pan manga uduk kokolata, pwe i de kamakar ri ai.

Chapter 9

9:1  KAIDIN ngai maiodar? Kaidin wanporon amen ngai? I sota udialer Iesus atail Kaun? Kaidin ai wiawia pan Kaun o komail?

9:2  Ma i sota wanporon amen ong me tei ko, a ong komail; pwe komail kasale pan ai koa en wanporon pan Kaun o.

9:3  Iduen i kin sapengki, ma meamen kin kalelapok re i.

9:4  A sota muei ong kit er, en manga o nim?

9:5  A sota muei ong kit er, en paudeki li amen, me pan iang kit sailok sili, duen me wanporon tei kan, o ri en Kaun o, o Kepas kin wiada?

9:6  De ngai o Parnapas eta me a sota muei ong liki sang dodok en pa at?

9:7  Is me kin iang mauin ap pwain pein i? Is me wiada mat en wain eu, me sota kin kang kisan wa? Is me kin kamanga pwin man akan me sota kin kang pil en didi en man oko?

9:8  Mepukat i sota kin inda nin tiak en aramas akan, pwe kaidin kapung o me pil masanier due?

9:9  Pwe a intingidier nan kapung en Moses: Koe der pira pena au en kau ol amen, me kin tiaka pasang korn. Iaduen, Kot kin apapwali kau ol akan?

9:10  De kaidin pweki kit, me a kotin masaniekier mepukat? Pwe me kin sapasap, en kaporoporeki a dodok; o me kin dolung en kaporoporeki, me a pan iang ale kisan wa.

9:11  Pwe ma kit wiai ong komail sapasap ngenin, a kaidin me kasampwal kot, me komail pan apwali kit ni pali uduk.

9:12  A ma a muei ong me tei kan, ale sang omail dipisou kan, nan kit me so mau ong sang irail? Ari so, kit sota kol ong kit tiak wet, a se men mia ni at apwal akan, pwe sen de karompwa rongamau en Kristus.

9:13  Komail sota asa, me irail, me sopisokki saraui, pil mangamanga sang nan im en kaudok, o me irail, me kin papang pei saraui, pil aleki pwais ar sang pei saraui?

9:14  Iduen Kaun o kotin masani, me irail, me padaki rongamau, pil pan mangaki rongamau.

9:15  A ngai sota kin kol ong ia eu ren mepukat, o i sota inting wei mepukat, pwe komail en kapwai ong ia mepukat, pwe a mau ong ia en mela, mon amen pan kawela mar ai.

9:16  Pwe ma i padaki rongamau, sota me i en suaiki, pwe i en udan wiada; pwe sued ong ia, ma i sota padaki rongamau.

9:17  Pwe ma i peren kida dodok wet, i pan ale kating, a ma i kang wiada, nan kusoned mia, i en wiada.

9:18  Ari, ia kating pai ni ai padaki rongamau ap sota pwaipwai, pwe i ender akapwaipwaiki sang rongamau meakot.

9:19  Pwe ngai me udan maiodar sang amen amen, ari so, i wia kin ia ladun amen amen, pwe i en kamaurela me toto duen i kak ong.

9:20  I wia kin ia Sus amen ong Sus akan, pwen kamaurela Sus akan; o ong irail, me mi pan kapung, dueta pan kapung amen, pwen kamaur ir ala, me mi pan kapung; ari so, ngai solar mi pan kapung.

9:21  Ong irail me sota mi pan kapung, i wia kin ia me sota mi pan kapung amen; ari so, kaidin ngai me likin kapung mon Kot, pwe i kin mi pan kapung en Kristus, pwen kamaurela me sota mi pan kapung.

9:22  Ong me luet akan, i wia kin ia me luet amen, pwen kamaurela me luet akan. Ngai wiala song karos ong amen amen, pwen kamaurela akai wasa karos.

9:23  I me i kin wiawia pweki rongamau, pwe i en iang i pwaisaiski.

9:24  Komail sota asa, duen men weir en tang, irail karos kin tang, a amen ta, me pan ale pai? Komail ari en tang idipok, pwe komail en ale.

9:25  A amen amen me aktang idipok, kin isesol pokon. Irail kin wia me, pwen ale mar kamong a kitail, pwen ale me so kamong.

9:26  Ngai ari aktang sopuiok; ngai kin pepei, a kaidin dueta me woki nan wäwä;

9:27  Pwe i kin sok pon war ai, pwen katengedi, pwe i de padaki ong akai, ap pein lokidokila.

Chapter 10

10:1  PWE ri ai kan, i men, komail en asa duen sam atail akan, me mi pan palin dapok eu o kotela madau o.

10:2  Irail karos ap paptais ong Moses ni palin dapok o ni madau o.

10:3  O karos tungoler sak ngenin,

10:4  O karos nim sang pil ngenin; pwe irail nim sang paip ngenin, me kotikot re ’rail, iei paip o Kristus.

10:5  A me toto re ’rail, me Kot sota kak kupuramauki, pwe irail lokidokilar nan sap tan.

10:6  A mepukat wiauier, pwe kitail de kaalemongi, pwe kitail ender inong iong me sued akan duen irail inong iong.

10:7  Komail pil ender kati ani mal due irail, duen a intingidier: Aramas pukat mondi penang nam o nim ap uda madomadong.

10:8  Kitail pil der wia nenek, duen me akai irail wiadar, ap rianen silekid mekilar ni ran ta ieu.

10:9  Kitail pil der kasongesong Kristus, duen akai irail kasongesong i, ap mekilar serpent kai.

10:10  Komail pil der lipaned, duen akai ir lipanededar, ap kame kilar men kamekam men.

10:11  Mepukat karos wiaui ong irail men kaalemongi; ap intingidier, pwe men panaui kin kitail, pwe kitail leler imwin kaua.

10:12  Ari ma amen lamelame, me a kasinenda, en kalaka pein i, pwe a de pupedi.

10:13  Sota songesong eu lel ong komail, i eta, me aramas itar ong, pwe Kot me melel, me sota kin mueid ong komail songesong eu, me komail sota itar ong. A ni songesong a pan kotin kaimwisokela, duen me pan kak pa omail

10:14  Ari kompoke pai kan, komail tange sang kati ani mal!

10:15  Mepukat i indai ong komail, pwe komail me lolekong; a pein komail kasauiada, me i inda.

10:16  Dal en pai me kit kin kapaiada, kaidin i dal en atail saupena ren ntan Kristus? O prot me kit kin pilitiki pasang, kaidin i atail saupena en war en Kristus?

10:17  Pwe kitail me toto me lopon ta ieu, o war ta ieu, pwe kitail karos tungole sang lopon ta ieu.

10:18  Komail kilang Israel pali uduk. Irail me kin kang sang mairong, kaidin irail pil minimini ong pei saraui?

10:19  A da me i en inda? I en inda me mairong ong ani mal meakot? De dikedik en ani mal meakot?

10:20  A karos me men liki kan mairongki, re kin mairongki ong tewil akan a kaidin ong Kot. A i sota mauki, komail en minimin ong tewil akan.

10:21  Komail sota kak nima sang dal en Kaun o pil sang dal en tewil akan; komail sota kak iang tepel en Kaun o pil tepel en tewil akan.

10:22  De kitail en palian Kaun o? Kitail me kelail sang i?

10:23  A muei onger meakaros, a kaidin karos me kin kamaula; a muei onger meakaros, a kaidin karos me kin kapungla.

10:24  Sota amen me pan apwali pein a dipisou, a en amen.

10:25  Karos me kin netila nan wasan netikila uduk, komail kang, ap der kalelapok duen song ar, pwe komail der katoutouki insen omail.

10:26  Pwe sapwilim en Kaun sappa o audepa kan.

10:27  A ma amen, me soposon pan luke komail, en toun kapara kamadip, o ma komail men iang, ari, karos me pan nek ong komail, komail en kang, ap der kalelapok duen song a, pwe komail der katoutouki insen omail.

10:28  A ma amen pan indang komail: Met kisan mairong en ani mal, komail der kang pweki i, me kasaledar, pwe komail der kawela insen arail.

10:29  A met i solar inda duen pein insen om a duen insen en amen. Pwe menda insen en amen pan kasauiada ai saladokelar?

10:30  Pwe ma i iang kang ki danke, menda i en kalok sued, pwe i tungole ni ai danke?

10:31  Ari, ma komail kang de nim de wia meakot, komail en wia meakaros, pwen wauneki Kot.

10:32  Komail der kadipikelekel men Sus, de men Krik, de momodisou en Kot,

10:33  Duen i kin pok ong amen amen ni ai wiawia kan karos, o so moneki me pein ai, pwen sauasa me toto, pwe irail en dorela.

Chapter 11

11:1  KOMAIL idauen ia do duen i kin idauen Kristus.

11:2  I kin kapingaki komail omail tamataman ia ni meakan karos, o dadaurata pung kan, duen i kakalikidi ong komail er.

11:3  A i men, komail en asadar, me Kristus tapwin ol akan, a ol me tapwin li, a Kot me tapwin Kristus.

11:4  A ma amen amen ren ol akan wia kapakap de kokop ap lisoropedi, a kin kasuedeki pein mong a.

11:5  A ma li amen wia kapakap de kokop, ap sota lisoropedi, nan i kin kasuedeki pein mong a, pwe a rasong me pit en mong a seisei sang.

11:6  Pwe ma li amen sota lisoropedi, en koteda, a ma a kanamenok li en kotedar o kotokot, i en pwaindi mong a.

11:7  A ol o ender lisoropedi, pwe i me kasansal o lingan en Kot, a li o me lingan en ol o.

11:8  Pwe ol so tapi sang li, a li sang ol o.

11:9  Pwe ol sota wiaui ong li, a li wiaui ong ol o.

11:10  I me li o en kida manaman eu pon mong a pweki tounlang kan,

11:11  Ari so, li amen sota kak mia ma sota ol; o ol amen sota kak mia, ma sota li, a mepukat ren Kaun o.

11:12  Pwe duen li o a tapi sang ol, iduen ol o wiaui kida li, a karos wiauier ren Kot.

11:13  Komail en pein kasauiada, ma a sansal mau, ma li amen kapakap ong Kot, ap so lisoropedi.

11:14  De pein komail asa, me kanamenok pan ol, ma a pwilipeipei.

11:15  A lingan en li a pwilipeipei, pwe pid en mong a en ko ong i, en pwaindi i.

11:16  A ma amen re omail men akamai, a en asa, me kit sota kin wia due, momodisou en Kot akan pil so.

11:17  A ni ai kusonededa mepukat i sota kin kapinga omail pokon pena, me sota kin kamaui a kasuedeki komail,

11:18  Pwe ni omail pokon pena nan momodisou, i rongadar, me komail kin liak toror pasang, o i mur kamelele.

11:19  Pwe komail en liak toror pasang, pwe me pung kan en sansal kida re omail.

11:20  Komail lao pokon pena wasa kis, kaidin i sak kamadip en Kaun o.

11:21  Pwe ni kamadip toun kapar kin amatang mas, a amen men mangadar, a amen sokolar.

11:22  Sota im omail, wasa en manga o nim? De komail kin mamaleki momodisou en Kot o kanamenok ir ala, me sota ar tungol? Da me i en inda? I en kaping komail? Ni mepukat i sota pan kapinga.

11:23  Pwe i aleer sang ren Kaun o, me i pwiliki ong komail er, me Kaun Iesus pong ota en a pangala, a limada prot,

11:24  Murin a laolaoki, kamauieda, pilitiki pasang, masangi: Ale tungole war ai met et, me pilitiki ong komail, en wia, pwen katakataman kin ia.

11:25  A murin sak, a pil kotin limada dal masani: Dal wet iei inau kap, me wiaui kidar nt’ ai. Pan pak en omail nima sang, komail wiaki men kataman kin ia.

11:26  Pwe pan pak en omail kang prot wet o nima sang dal wet, komail kasansaleda en Kaun a matala, lao a kotido.

11:27  Ari me kang prot wet o nim sang dal en Kaun o ap so war ong iei me dip iong war o ntan Kaun o.

11:28  Amen amen en kasauiada pein i, ap kang sang prot o nima sang dal o.

11:29  Pwe me kang o nim sowar, kin kang o nim kadeik ong pein i, pwe a sota kasampwaleki war o.

11:30  Nan i me toto nan pung omail me luetalar o somaudar, o me toto mairedier.

11:31  Pwe ma kitail kasauiada pein kitail, kitail sota pan pakadeikada.

11:32  A ma kitail pan pakadeikada, kitail pan kalokolok ren Kaun o, pwe kitail de iang men liki lokidokila.

11:33  Ari ri ai ol akan, komail lao pokon pena pwen sak, en papasan pena amen amen.

11:34  A ma amen men mangadar, i en manga mas nan im a; pwe komail de pokon penang kadeik o. A me lua kan i pan kapungala ni ai pwara wong.

Chapter 12

12:1  RI ai kan, i sota men, komail en sasa duen pwais ngenin akan.

12:2  Komail asaer, me komail tikidar men liki, ap kakalua ren dikedik en ani loteng akan, duen komail kakaluaer.

12:3  I me i men kaasa kin komail, sota amen, me lokaiaki Ngen en Kot, kak kariala Iesus. O sota amen me pan kak inda: Maing Iesus, ma so ren a Ngen saraui.

12:4  A pai en mak akan me wuki pasang, a Ngen me ta men.

12:5  O song en dodok me toto, a kaun me ta men.

12:6  O akai song en manaman mia, a Kot me ta men, me kotin wiawia meakaros ren amen amen.

12:7  A pwais en Ngen saraui me pang ong amen amen, pwen men kamauiada.

12:8  Pwe amen ereki masan en erpit ren Ngen, a amen masan en kaparok ren Ngen ota.

12:9  O ong amen, en poson, a ren Ngen ota, o ong amen pai kan, men kakelada me somau kan, a ren Ngen ota.

12:10  O ong amen, en wiada manaman, o ong amen, en deideikop, o ong amen, en kasaui ngen akan, o ong amen, en lokaia ngil wuki pasang, o ong amen, en kawukila ngil akan.

12:11  A mepukat karos wiawian Ngen ota, nene ong amen amen duen kupur a.

12:12  Pwe duen war eu ta ap kokon toto mia, a kokon en war karos wiala war ta ta ieu, iduen Kristus.

12:13  Pwe Ngen ta ieu, me kitail paptaiseki ong war ta ieu, ma kitail men Sus de men Krik, ma ladu de me maioda, kitail karos me paptaiseki Ngen ta ieu.

12:14  Pwe war kaidin kokon ta ieu, pwe kokon toto.

12:15  A ma pat en nä pan inda: Ngai kaidin kumut eu, o i me ngai sota kisan war; a iaduen, i me a sota pan kak kisan war o?

12:16  A ma salong o pan inda: Kaidin ngai kisan war o, pwe kaidin por en mas eu ngai; a iaduen, i me a sota kisan war o?

12:17  Ma war pokon por en mas eu, da me pan salong o? A ma war pokon pan salong o, da me pan tuma?

12:18  Ari, Kot me kotin kokon penang war ta ieu kasong akan, duen a kotin kupureda.

12:19  A ma kokon karos wiala kokon ta ieu, ia pan war o?

12:20  Ari, kokon akan me toto, a war o me ta ieu.

12:21  Por en mas eu sota kak indang kumut: Kaidin meakot re i koe; de pil tapwi sota kak indai ong pat en nä kan: Kaidin meakot re i koma.

12:22  Pwe kokon en war kai likamata re me luet, a so, pwe re me kasampwal.

12:23  O kokon en war kai, me kitail kin lamelame, me re sota non mau, kitail kin apapwali sang me tei kan, o irail me sota non sansal mau, kitail kin kapwataki.

12:24  Pwe irail me sansal mau, sota kin mau ong en kapwataki. A Kot kotin kapad pena war o kapwataki me luet oko sang me tei kan,

12:25  Pwe war de saparok pasang, a kokon akan en apapwali pena.

12:26  O ma kasang ta ieu matakada, kasang karos ap iang matakada; o ma kasang ta ieu pan kalinganada, kokon karos pan iang polauleki.

12:27  A komail war en Kristus o kokon akan amen amen duen pwais a.

12:28  A iet akan, me Kot kotiki ong momodisou: Kaieu wanporon akan, ap saukop akan, a kasilu saunpadak kan, ap me wiada manaman akan, ap pai kan men kakelada me somau kan, ap men sauasa, o saumas akan, o song en lokaia.

12:29  Iaduen irail karos me wanporon akan? Karos me saukop akan? Karos me saunpadak kan? Karos me men wia manaman akan?

12:30  Karos ar pai en mak kan, men kakelada me somau kan mi ren karos? Karos kin lokaia ngil pasang? Karos kin kasiriwuk lokaia?

12:31  A komail inong iong pai en mak lapalap akan, i ap pan kasale ong komail al apot, me mau sang mepukat karos.

Chapter 13

13:1  MA i asa lokaia en aramas akan o tounlang kan, ap sota limpok, nan i rasong ngil en mata mal de ngil en simpel.

13:2  O ma i asa deideikop o ereki me rir akan karos, o tiak kan karos, o ngai dir en poson, me itar ong en kamokid wei nana kan, ap sota limpok nan sota meakot ngai.

13:3  O ma i pan kisakisa wei ai dipisou karos, pwen katungoleki me samama kan, o ma i kida war ai, pwen karongala, ap sota limpok, nan sota katepa ong ia.

13:4  Limpok kin kanongama o kadek, limpok sota kin peirin limpok sota kin akmomo o so keses.

13:5  A sota kin aklemai, a sota kin roporop ong pein i, a so serkailong, a sota kin depuk ong en amen a sued.

13:6  A sota kin peren me sapung, a a kin perenki me melel.

13:7  A kin kak pa meakaros, o kin poson karos, a kaporoporeki karos, o lolin ong meakaros.

13:8  Limpok sota pan tukedi, a deideikop akan pan tukedi, o lokaia kan pan sola, o lolekong pan kunla.

13:9  Pwe kitail me er pali ta, o kokop pali ta.

13:10  A lao kaunsokala, me pali ta pan momela.

13:11  Ni ai seri i kin lokaia dueta seri amen o i lamelame dueta seri amen, o kasaui dueta seri amen, a i lao wiala ol amen, i muei sang tau en seri.

13:12  Pwe ansau wet kitail kin irerong nan klas edied eu, a mur a pan sansal mau. Ansau wet i ekis lolekonglar, a mur i pan asa duen a asa ia.

13:13  Ari song silu pukat: Poson, kaporopor o limpok pan mimieta, a me lapalap re ’rail limpok.

Chapter 14

14:1  KOMAIL anane limpok, pil inong iong pai ngenin akan, a iet me kasampwal re ’rail, kokopada!

14:2  Pwe me kin lokaia kida ngil en wai, kaidin aramas akan, me a kin lokaia ong, a ong Kot, pwe sota amen kin dedeki; ari so, ni ngen o a kin lokaia kida me rir akan.

14:3  A me kin kokop, kin padaki ong aramas akan, pwen kamaui, o panau o kamait ir ala.

14:4  A me lokaiaki ngil en wai, kin kamaui pein i, a me kin kokop, kin kamaui momodisou.

14:5  I men, komail karos en asa lokaia ki ngil toror, a mak eta, komail en kokopada, pwe me kin kokopada, me lapa sang me kin kaparok ki ngil toror, ma a so kak kasiriwukila, pwe momodisou en kamau kila.

14:6  Ari ri ai kan, ma i pwara wong komail, ap lokaia ki ngil toror, da katepa ong komail, ma i sota kaweweda de kasansaleda, de kokopada, de padak?

14:7  Iduen meakan, me kin lokolokaia ap sota memaur, ma men kwai de arp sota pan ngor pasang, is me pan kak dedeki, da me ira kauleki?

14:8  O ma koronete pan popeuk ping, is me pan onopadang mauin?

14:9  A iduen komail, ma komail pan lokaia ki ngil toror, ap sota kaweweda, is me pan dedeki? Pwe omail lokaia pan me mal kot.

14:10  Song en lokaia toto nan sappa, a sota eu me so puloi.

14:11  A ma i sasa wewe en lokaia eu, i pan rasong men wai men ong me kin kaparok, o me kin kaparok, pan rasong men wai men ong ia.

14:12  A pil dueta komail, pwe komail kin anane pai ngenin akan, komail ari pil ngongki kakairida ni mepukat, pwen kamauie kila momodisou.

14:13  A ma amen lokaia kida ngil en wai, i en kapakap ap pil kasiriwukila.

14:14  Pwe ma i wia kapakap ki lokaia ngil en wai eu, ngen i kin kapakap ap sota katepa ong amen.

14:15  Ari, da me i pan wia? I pan kapakap ni ngen i ap pil pan kapakap ni ai lamelam; i pan kapinga ni ngen i ap pil kapinga ni ai lamelam.

14:16  A ma koe pan kapaiada ki ngen o, iaduen me sota dedeki pan kak inda amen murin om kapinga? Pwe a sasa me koe indinda.

14:17  Ei me mau melel om kapikapinga, a sota kadepa ong me teio.

14:18  I kin danke Kot, pweki i kin lokaiaki ngil toror sang komail.

14:19  Ari so nan momodisou i men kida lep in lokaia limau, me pwili sang ai lamelam sang lep in lokaia nen ni ngil toror, pwen padaki ong me tei kan.

14:20  Ri ai kan, komail der wiala seri ni omail lamelam, a ni me sued komail en rasong kisin seri, a ni omail lamelam komail en unsokela.

14:21  A intingidier nan kapung: Lokaia o kil en aua toror, me I pan lokaiaki ong kainok wet, a re pil sota pan duki ong ia, me Kaun o kotin masani.

14:22  Nan i me lokaia toror mia, pwen kileledi kaidin me poson akan, a me soposon akan; a deideikop kaidin ong me soposon akan, pwe ong me poson akan.

14:23  A ma momodisou pan pokon pena wasa kis, o ma karos pan lokaia ni ngil toror, a ma akai iang me sota dedeki, de akai me soposon, irail sota pan inda, me komail iakalar?

14:24  A ma karos kin kokop, o amen pan pwarado, me soposon, o me sota dedeki, karos pan kasansale ong i dip a, o a pan pakasaui ren karos.

14:25  Iduen a me rir akan nan mongiong i pan sansaleda, o a pan tairokedi ni mas a, kaudoki ong Kot, o pan inda, melel Kot kotikot re omail.

14:26  Ri ai kan, iaduen komail ni omail pokon pena, kaidin amen amen kin kida psalm eu? A amen kin kawewe, a amen ngil toror, a amen kasansal eu, a amen kin kasiriwukila; a karos en wiaui, en kamauiada.

14:27  A ma amen pan wia ngil en wai, me ta riamen, de ma me toto, re pan silimen, a irail pan irok wei a amen en kasirawukila.

14:28  A ma sota men kasiriwuk mia, i en nenenla nan momodisou; a en kasoi ong pein i o Kot.

14:29  A riamen de silimen ren saukop akan pan kak kaparok, a me tei kan en kasauiada.

14:30  A ma amen, ren me momod wasa o, pan diar kasansal eu, men mas ap pan nenenla.

14:31  A komail karos kak kokop, irok weida, pwe karos en padakki o kamaitala.

14:32  A ngen en saukop akan kin duki ong saukop akan.

14:33  Pwe kaidin komoan me ping men Kot, a en popol duen ni momodisou en saraui akan karos.

14:34  Omail li akan en nenenla nan momodisou kan, pwe a sota muei ong irail, en kaparok; a irail en papa, duen kapung me pil masani.

14:35  A ma irail men asa okotme, irail en kalelapok ren arail warok kan ni deu ’rail, pwe me kanamenok, li en kaparok nan momodisou.

14:36  De masan en Kot tapi sang komail? De a ko wong komail eta?

14:37  A ma amen lamelame, me a saukop amen, de me a ngenin, a en asa wewe en me i intingki wong komail, pwe mepukat kusoned en Kaun o.

14:38  A ma amen lolepon, i en lolepon.

14:39  Ari ri ai kan en inong iong kokop, o ender kainapwi lokaia ngil toror.

14:40  A meakaros en wiaui nin tiak mau o pung.

Chapter 15

15:1  RI ai kan i men kataman kin komail rongamau, me i padaki ong komail er, me komail pil aleer o pil tinain kidar.

15:2  O me komail pil dore kila, ma komail pan dadaurata masan o, me i padaki ong komail er, ma komail so poson mal.

15:3  Pwe i usaki ong komail er, me i pil aleer duen Kristus, me kamata kilar dip atail akan duen kisin likau kan.

15:4  O me a saredier o kaiasadar ni kasilu en ran duen kisin likau kan,

15:5  O me a pwara wong Kepas, ap ong irail me ekriamen ko,

15:6  Ap kotin pwara wong saulang limepuki sama ni ansau takis; kis arail me toto mimieta lel met, a akai mairedier.

15:7  Murin met a kotin pwara wong Iakopus, ap ong wanporon akan karos.

15:8  A ikmuri a kotin pwara dong ia mon ai ip sapal,

15:9  Pwe pokindidi ren wanporon akan ngai, me sota war ong kaindinda wanporon amen, pweki ai pei ong momodisou en Kot.

15:10  A mak en Kot, me i wanporon kilar. A kaidin mak mal eu ong ia, pwe i dodok laud sang irail karos, ari kaidik ngai, pwe mak en Kot, me mi re i.

15:11  Ari, ma ngai de irail, pwe iduen at padaki wei, o iduen komail posonlar.

15:12  A ma i aude pan at padak, me Kristus iasadar sang ren me melar akan, a da me akai re omail kin inda, dene me melar akan solar pan mauredar?

15:13  A ma me melar akan sota pan maureda, nan Kristus pil sota iasadar.

15:14  O ma Kristus sota iasadar, at padak me mal, o omail poson pil me mal.

15:15  O kitail pil pan diarokada, me se saunkadede likam ren Kot, aki at kadededar, me Kot kotin kaiasadar Kristus, me a so kaiasadar, ma me melar akan sota pan kamaureda.

15:16  Pwe ma me melar akan sota pan kamaureda, nan Kristus pil so kaiasadar.

15:17  A ma Kristus so kaiasadar, omail poson me mal, o komail mimieta ni dip omail.

15:18  Iduen pil irail, me melar ren Kristus akan, lokidokila.

15:19  A ma kitail kaporoporeki Kristus nan maur et eta, nan kitail me sued sang aramas akan karos.

15:20  A melel, Kristus kaiasadar sang ren me melar akan, ap wiala meseni nan pung en ir me mamair akan.

15:21  Pwe mela tapi sang aramas ta men, iduen maureda sang ren me melar akan tapi sang aramas ta men;

15:22  Pwe duen karos me mela ki Adam, nan iduen karos pan kamaurela ren Kristus,

15:23  A amen amen ni kakairokdo: Kristus mas ap me sapwilim en Kristus, ni a pan kotin pwarado;

15:24  A murin mepukat pan imwi, a lao kotiki ong Kot o Sam a wei, a lao kaloedier kaun akan karos, o me poe kan, o manaman akan.

15:25  Pwe a pan kotin kaunda, lao a imwintiti karos lodi ong pan aluwilu a kan.

15:26  A ikmurin imwintiti iei mela.

15:27  Pwe a kotin mueid ong meakaros pan aluwilu a. Ari ni a kotin masanier me karos lodier a sansaledar, me i sota iang me kotin kaloedi ong i meakaros.

15:28  A meakaros lao lodi ong i, Na ap pil pan upang i, me kotin kaloedi ong i meakaros, pwe Kot en kotin poedi meakan karusia.

15:29  A ma me melar akan solar pan kamaureda, da me irail en wia, me kin paptaiseki ong me melar akan? Menda re paptaiseki ong irail?

15:30  O menda kit kin kalokolok ansau karos?

15:31  Pwe ran karos i kin mela, pweki kaping pa i, me i aleer ren Kristus Iesui atail Kaun.

15:32  A ma i pei ong man laualo nan Episus, duen aramas akan kin wiada, da kadepa ong ia, ma me melar akan sota pan kamaureda? Kitail en manga o nim, pwe lakap kitail pan mela.

15:33  Der duki ong, me kasongesong komail! Kasoi sued kin kawela tiak mau.

15:34  Komail ari pungala, o pirida o der wiada dip! Pwe akai sasa duen Kot. Mepukat i indai ong komail, pwen kanamenokki komail.

15:35  A ele amen pan inda: Iaduen me melar akan ar pan kamaureda? O iaduen war ar, me re pan maur kida?

15:36  Pweipwei men koe! Pwe me koe kin kamoredi, sota pan maureda, ma a sota pan mela.

15:37  O me koe kamoredi, kaidin war ota me pan para, pwe wan korn eu ta, ele wan wit de eu wa toror.

15:38  A Kot pan kotiki ong war a, duen a kotin kupura, o eu eu en war akan pan ale udan mom a.

15:39  Uduk karos kaidin song ta ieu, pwe eu song uduk en aramas akan, a eu song uduk en man akan, a eu song en manpir akan, a eu song en mam akan.

15:40  A war lang o war pwel akan mia, a lingan en war lang eu song o lingan en war pwel eu song.

15:41  A eu song lingan en katipin, o eu lingan en maram, o eu lingan en usu kan, pwe nan usu kan me wuki pasang ki ar lingan eu eu.

15:42  Nan iduen en me melar akan ar pan maureda. A kin kamoremoredi ap mor pasang, o pan kamaureda so mor pasang.

15:43  A kin kamoremoredi ni so lingan, o pan maureda ni lingan; a kin kamoremoredi ni luet, o pan maureda ni manaman;

15:44  A pan kamoremoredi war pwel o pan kamaureda war ngenin; pwe ma war pwel mia, nan a pil pan war ngenin.

15:45  Duen a intingidier: Tapin aramas Adam wiauier, pwen ngen maur amen, a Adam tia mur, pwen ngen en kamaur.

15:46  A war ngenin kaidin i men mas pwe war pwel, a muri me ngenin.

15:47  Tapin aramas wiaui kida pwel, a aramas kariamen kotido sang nanlang.

15:48  A duen tapin aramas wiauiki pwel, iduen karos me wiauiki pwel o duen men nanlang o, iduen men nanlang kan.

15:49  O duen kitail wa mom en pwel, iduen kitail pil pan wa mom en lang.

15:50  Ri ai kan, iet me i men inda: Uduk o nta sota kak sosoki wein Kot; o me mor pasang kan sota pan sosoki me so mor pasang.

15:51  Kilang, ngai me kadiarok ong komail kaponepon eu: Kaidin kitail karos pan mela, a kitail karos pan nitwilida.

15:52  Madang ni marep ta ieu, koronete en muri lao popeuk. Pwe koronete pan popeuk, a me melar akan ap pan kamauredang somor pasang a kitail pan kawilikapada.

15:53  Pwe mor pasang wet pan kiawikilang so mor pasang; o mela wet kiawikilang somela.

15:54  A mor pasang wet lao kiawikilang so mor pasang o mela wet kiawikilang somela, masan o ap pan pwaida, me intingidier: Maur kadalala mela.

15:55  Mela koe, ia om tata? Mela ia om poedi?

15:56  Mana en mela dip, a manaman en dip kapung.

15:57  Danke ong Kot, pwe a kotiki ong kitail, en poediki atail Kaun Iesus Kristus.

15:58  Ari ri ai kompok kan, komail kelail kaukaule o der wukiwuk sili, a kakairida ni omail wiawia en Kaun o, pwe komail asa, me omail dodok ong Kaun o kaidin dodok mal.

Chapter 16

16:1  A DUEN kisakis ong saraui kan, me komail pan ki pena, i men, komail en wiada, duen i kakaliki ong momodisou en Kalesia kan.

16:2  Ni at en ran en wik kan amen amen re omail en nikidala ekis, o ki pena duen wan a kak ong pwe onop de wiaui, i lao pwara wong.

16:3  I lao pwara weilar, meakai, me komail pan kileledi, irail me i pan ilakewei, en walang Ierusalem omail kisakis iangaki kisin likau.

16:4  O ma a kon ong, i en pil sailok wei; irail ap pan iang ia sailokala.

16:5  A i pan pwara wong komail ni ai dauli Masetonien, pwe i pan weid nan Masetonien.

16:6  Ele i pan mimieta re omail, ansaun kapau lao nikier, pwe komail en kalua ia la wasa, me i pan sailokala ia.

16:7  Pwe ansau wet i sota pan sup re omail, pwe i kaporoporeki, me i pan mimieta re omail ansau kis, ma Kaun pan kotin mueid ong ia.

16:8  A i pan mimieta Episus lao pentikos.

16:9  Pwe wanim tälap ritida mo i, me kareda wa toto; a imwintiti me toto.

16:10  A Timoteus lao pwara wong komail, apwali i, pwen sondi mau re omail, pwe a kin iang ia wiawia dodok en Kaun o.

16:11  Sota amen en mamaleki i, a kalua i dong ia popol, pwe ngai o ri atail akan kin auiaui i.

16:12  A duen ri atail Apolos, ngai me poeki re a pan pak toto, en iang ri atail akan pwara wong komail, a a kang pwara wei ansau wet; a a pan pwara wei lao ansau mau.

16:13  Komail masamasan o dadaurata ni poson, komail wia duen ol melel, o komail en kelail.

16:14  Meakaros en wiaui ni limpok

16:15  I ari panaui komail, ri ai kan, pwe komail asa penainai en Stepanas, me ir tapida saulang en Akaia, o me pein irail inong iong dodok ong saraui kan,

16:16  Pwe komail en peiki ong irail, o ong irail karos me iang ni ar wiawia o dodok.

16:17  I peren kida en Stepanas, o Portunatus, o Akaius ar pwarador, pwe mekis, me komail so ki ong ia mepukat ki dong ia.

16:18  Irail kaperenda ngen i o pil ngen omail; komail ari wauneki me due met.

16:19  En momotisou en Asien akan ar ranamau wong komail. A Akwila o Prisila kin ranamau wong komail pan Kaun o momodisou nan im ara.

16:20  Ri atail ol akan karos kin ranamau wong komail. Komail ranamauki pena metik saraui.

16:21  Ngai Paulus me inting kilang komail ai ranamau ki pein pa i.

16:22  Ma amen sota kin pok ong Kaun Iesus Kristus, a pan anatema! Maranata! Iet wewe; A pan riala! Atail Kaun kotido.

16:23  Mak en Kaun Iesus Kristus en mimieta re omail!

16:24  Ai limpok ong komail pan Kristus Iesus pan mimieta re omail! Amen.