Azeri - I Corinthians

Chapter 1

1:1  تارينين ائراده​‌سي‌ ائله عئسا مسئحئن حوارئسي اولماغا دعوت اولونموش پولوس و قارداشيميز سوستِنِسدن،

1:2  قورئنتده اولان تارينين کئلئساسينا، يعني موقدّس اولماغا دعوت اولونموش، مسئح عئسادا تقدئس اولونموشلارا، و اونلارين ربّي و بئزئم ربّئمئز عئسا مسئحئن آديني هر يرده ذئکر اِدَنلرئن هاميسينا،

1:3  آتاميز تاريدان و ربّ عئسا مسئحدن سئزه فيض و باريش اولسون.

1:4  تارينين مسئح عئسادا سئزه باغيشلاديغي فيضدن اؤتري سئزئن اوچون همئشه تاريما شوکور ادئرم.

1:5  بو سببدن کي، مسئحده سئز هر شيده، هر سؤز و هر معرئفتده، دؤولتلي اولدونوز.

1:6  نجه کي، حتّا مسئحه اولان شهادت ده سئزده تصدئق اولوندو.

1:7  بله کي، هچ بئر عطادا اَسکئيئنئز اولماييب، ربّئمئز عئسا مسئحئن ظوهورونو ائشتئاقلا گؤزله​يئرسئنئز.

1:8  او کي، سئزي آخيراجاق تصدئق اده​جک. اله کي، ربّئمئز عئسا مسئحئن گونونده قوصورسوز اولاسينيز.

1:9  وفالي‌دير تاري کي، اونون اوغلو ربّئمئز عئسا مسئحله رفاقتئنئز اولماغا دعوت اولوندونوز.

1:10  ائندي اي قارداشلار، ربّئمئز عئسا مسئحئن آدي​ ائله سئزه يالواريرام کي، هامينيز بئر دوشونجه​ده اولون و آرانيزدا آيريليقلار اولماسين و سئز بئر فئکئرده و بئر رأيده موتّفئق اولون.

1:11  چونکي اي قارداشلاريم، خَلويئنئن اِو اهلئندن سئزئن باره​ده منه خبر ورئلئب کي، آرانيزدا داعوالار وار.

1:12  دمک ائسته‌دئيئم بودور کي، هر بئرئنئز ديئر: "من پولوسدان تَبَعئيّت ادئرم"، "من اَپولّوسدان تَبَعئيّت ادئرم"، "من کئفادان تَبَعئيّت ادئرم"، "من ده مسئحدن تَبَعئيّت ادئرم".

1:13  مگر مسئح بؤلونوب؟ مگر پولوس سئزئن اوچون چارميخا چکئلدي؟ يا کي، پولوس آدي ائله تعمئد اولوندونوز؟

1:14  تارييا شوکور ادئرم کي، کرئسپوس و قايوسدان باشقا، سئزلردن هچ کئمي من تعمئد ورمه‌دئم.

1:15  اِله کي، هچ کئم سئزي اؤز آديمدا تعمئد وردئيئمي دمه‌سئن.

1:16  استئفاناسين اِو اهلئني ده تعمئد وردئم. داها خاطيرلاميرام کي، کئمسه​ني تعمئد ورمئش اولوم.

1:17  چونکي مسئح، مني تعمئد ورمه‌يه يوخ، ائنجئلئن خوش خبرئني وعظ اتمه‌يه گؤنده‌ردي؛ هم ده سؤز حئکمتي ائله يوخ کي، مبادا مسئحئن چارميخي بوشا گتسئن.

1:18  چونکي چارميخ باره​ده اولان کلام، هلاک اولانلار اوچون آغيلسيزليقدير، لاکئن بئز نئجات تاپانلار اوچون تارينين قودرتي‌دئر.

1:19  اونا گؤره کي، يازيليب: "حئکمتلي‌لرئن حئکمتئني محو اده​جه‌يم، فهئملرئن ده فهمئني بوشا چيخارداجاغام."

1:20  هارادادير حئکمتلي؟ هارادادير دئن عالئمي؟ هارادادير بو عصرئن اَدئبلري؟ مگر تاري بو دونيانين حئکمتئني آغيلسيزليغا چوئرمه‌يئب؟!

1:21  دونيا اؤز حئکمتئنئن واسئطه​‌سئله تاريني تانيماديغينا گؤره، تارييا دا، اؤز حئکمتئنده بو، خوش گلدي کي، وعظ ادئلن کلامين آغيلسيزليغي ائله ائنانانلاري قورتارسين.

1:22  دوغرودان دا کي، يهودئلر علامتلر طلب ادئرلر و يونانلي‌لار حئکمت آختاريرلار؛

1:23  آمّا بئز چارميخا چکئلمئش مسئحي وعظ ادئرئک کي، يهودئلره بودره​مه داشي، قيري​‌يهودئلره ده عاغيلسيزليقدير.

1:24  لاکئن دعوت اولونانلارا، ائستر يهودي اولسون ائستر يونانلي، مسئح تارينين قودرتي و تارينين حئکمتي‌دئر.

1:25  چونکي تارينين عاغيلسيزليغي ائنسانلارين حئکمتئندن داها حئکمتلي‌دئر، تارينين ضعئفلئيي ده ائنسانلارين قودرتئندن داها قودرتلي‌دئر.

1:26  بونا گؤره قارداشلار، آلديغينيز دعوته باخين. ائنسان اؤلچوسونه گؤره، آرانيزدا حئکمتلي، قودرتلي و اصئلزاده چوخ يوخ ائدي.

1:27  آمّا تاري دونيانين عاغيلسيز ساييلانلاريني سچئب کي، حئکمتلي​لري اوتانديرسين و دونيانين ضعئف ساييلانلاريني سچئب کي، گوجلولري اوتانديرسين.

1:28  تاري دونيانين اصئلزاده اولمايانلاريني، حقئر گؤرولَنلرئني، حتّا هچ ساييلانلاريني سچئب کي، اهمئيّتلي ساييلانلاريني هچه اِندئرسئن.

1:29  اله کي، هچ بئر ائنسان اونون حوضوروندا فخر اتمه‌سئن.

1:30  لاکئن سئز اونون سايه​سئنده مسئح عئساداسينيز کي، تاريدان بئزه حئکمت، صالحلئک، قودسئيّت و فئدئيه اولوبدور.

1:31  بونون اوچون، يازيلميش اولدوغو کئمي "قوي فخر ادن، ربده فخر اتسئن."

Chapter 2

2:1  قارداشلار، او زامان کي، تارينين حاقّينداکي شهادتي سئزه اعلان اتمک اوچون يانينيزا گلدئم، کلام و يا حئکمت صاحئبي کئمي گلمه‌دئم.

2:2  چونکي آرانيزدا اولاندا نئيّتئم بو ائدي کي، هچ بئر شي بئلمه‌يئم، مگر عئسا مسئح و اونو دا چارميخا چکئلمئش.

2:3  و سئزئن يانينيزدا ضعئفلئک، قورخو و چوخ لرزه ائچئنده ائدئم.

2:4  سؤزوم و وعظئم ده حئکمتئن ائنانديريجي کلامي​ ائله ديئلدي، موقدّس روحون و قودرتئن ظوهورو ائله ائدي کي،

2:5  ائمانينيز ائنسانلارين حئکمتئنده يوخ، تارينين قودرتئنده اولسون.

2:6  لاکئن کامئللر آراسيندا حئکمت دانيشيريق؛ آمّا نه بو عصرئن، نه ده بو دؤورون کچئب گدن حاکئملرئنئن حئکمتئني.

2:7  بئز تارينين سئرّي حئکمتئندن، يعني گئزلي قالميش حئکمتئندن دانيشيريق. او حئکمت کي، تاري اونو ازلدن بئزئم عئزّتئمئز اوچون موقدّر ادئب.

2:8  او حئکمت کي، بو دونيانين حاکئملرئندن هچ بئري اونو درک اتمه‌يئب. چونکي درک اتسيدئلر، جلال ربّئني چارميخا چکمزدئلر.

2:9  آمّا نجه کي، يازيليب دا: "تارينين اونو سونلر اوچون حاضيرلاديغي شيلري نه گؤز گؤرموش، نه قولاق اشئتمئش، نه ده ائنسانين اوره‌يي دوشونموش!"

2:10  لاکئن تاري بونلاري بئزه موقدّس روحون واسئطه​‌سئله آشکار اتدي. اونا گؤره کي، موقدّس روح هر شيي، حتّا تارينين درئنلئيئني بله آراشديرير.

2:11  چونکي ائنسانين دوشونجه​لرئني، ائنسانين ائچئنده اولان روحوندان باشقا کئم بئلئر؟! بلجه ده تارينين دوشونجه​لرئني تارينين روحوندان باشقا هچ کئم بئلمئر.

2:12  ائندي بئز بو دونيانين روحونو يوخ، تاريدان گلن موقدّس روحو آلميشيق کي، تارينين بئزه نه باغيشلاديغيني بئلک.

2:13  دانيشديغيميز بو شيلر ده، ائنسان حئکمتئنئن اؤيرتدئيي سؤزلري ائله يوخ، روحاني فئکئرلري روحاني سؤزلرله ترکئب ادئب، موقدّس روحون اؤيرتدئکلري ائله بئلدئرئرئک.

2:14  آمّا نفساني آدام، تارينين روحوندان گلن شيلري قبول اتمئر، چونکي اونلار بونا عاغيلسيزليق گؤرونور و اونلاري آنلايا بئلمئر. چونکي بونلاري روحون واسئطه‌سئله تفتئش اتمک اولار.

2:15  لاکئن روحاني آدام هر شي حاقّيندا حؤکم اده بئلر، آمّا اونون باره​سئنده هچ کئم حؤکم اده بئلمز.

2:16  "چونکي ربّئن فئکرئني کئم بئلئب کي، اونا تعلئم ورسئن؟!" لاکئن بئزده مسئحئن فئکري وار.

Chapter 3

3:1  قارداشلار، من سئزئنله روحانئلرله دانيشان کئمي دانيشا بئلمه‌دئم، آنجاق جئسمانئلر کئمي، مسئحده کؤرپه​لر کئمي دانيشديم.

3:2  من سئزه آغير يمک يوخ، سود وردئم. چونکي اونو يمه‌يه گوجونوز چاتميردي، ائندي ده چاتمير.

3:3  چونکي سئز حله ده جئسمانئسئنئز. آرانيزدا پاخيلّيق و چکئشمه اولماسيندان آيا جئسماني ديئلسئنئز؟ آيا آيري ائنسانلار کئمي ياشاميرسينيز؟

3:4  چونکي اگر بئري "من پولوسدان تَبَعئيّت اِدئرم" او بئري ده "من اَپولّوسدان تَبَعئيّت اِدئرم" ديئر، آيا آيري ائنسانلار کئمي ديئلسئنئز؟

3:5  اَپولّوس کئمدئر؟ پولوس کئمدئر؟ آنجاق خئدمتکارديرلار کي، اونلارين واسئطه‌سئله، ربّئن هر کسه وردئيي فورصته گؤره ائمان گتئردئنئز.

3:6  من اَکدئم، اَپولّوس سوواردي، آمّا تاري بؤيوتدو.

3:7  بونا گؤره، موهوم اولان اَکن و يا سوواران ديئل، بؤيودن تاري‌دير.

3:8  اَکنله سووارانين دَيَري بئردئر، لاکئن هر بئري چکدئيي زحمتئنه گؤره اجر آلاجاق.

3:9  چونکي بئز تاري ائله ائشله‌ين ائشچئلرئک؛ لاکئن سئز تارينين زمئسي، تارينين عئمارتئسئنئز.

3:10  من، تارينين منه وردئيي فيضه گؤره، حئکمتلي بئر معمار کئمي بونؤوره قويدوم و آيري بئر آدام اونون اوستونده بئنا ادئر. آمّا هر کس نجه بئنا اتدئيئنه دئقّت اتسئن.

3:11  چونکي هچ کئم قويولان بونؤوره​دن، يعني عئسا مسئحدن باشقا بئر بونؤوره قويا بئلمز.

3:12  اگر بئري بو بونؤوره اوستونده قيزيلدان، گوموشدن، قئيمتلي داشلاردان، تاختادان، ساماندان، کولَشدن بئنا اتسه،

3:13  هر بئرئنئن ائشي بلّي اولاجاق؛ اونا گؤره کي، دئوان گونو اورتايا چيخاجاق، چونکي اودلا آچيغا چيخاجاق. و اود اؤزو هر کسئن ائشئنئن کيفئيّتئني ائمتاحان اده‌جکدئر.

3:14  کئمئن بئنا اتدئيي داوام گتئرسه، او، اجر آلاجاق.

3:15  کئمئن ائشي يانسا، او، ضرر چکه​جک، آمّا اؤزو اوددان چيخان کئمي نئجات تاپاجاقدير.

3:16  مگر بئلمئرسئنئز کي، سئز تارينين معبدئسئنئز و تارينين روحو سئزده ساکئندئر؟

3:17  کئم تارينين معبدئني محو اتسه، تاري اونو محو اده​جک. چونکي تارينين معبدي موقدّسدئر؛ بو معبد ده سئزسئنئز.

3:18  هچ کئم اؤزونو آلداتماسين. سئزلردن هر کس اگر اؤزونو بو عصرده حئکمت صاحئبي سايير، قوي عاغيلسيز اولسون کي، بلکه حئکمت آلسين.

3:19  چونکي بو دونيانين حئکمتي تارينين حوضوروندا عاغيلسيزليقدير. نجه کي، يازيليب دا: "تاري‌دير کي، حئکمت صاحئبلرئني اؤزلرئنئن حؤقّه​بازليقلاري ائله توتور."

3:20  گئنه ده يازيليب: "رب بئلئر کي، حئکمت صاحئبلرئنئن دوشونجه​لري فايداسيزدير."

3:21  بونا گؤره، هچ کئمئن فخري ائنسانلاردا اولماسين، چونکي هر شي سئزئندئر.

3:22  ائستر پولوس اولسون، ائستر اَپولّوس؛ ائستر کئفا اولسون، ائستر دونيا؛ ائستر حيات اولسون، ائستر اؤلوم، ائستر ائندئکي شِيلر اولسون، ائستر گله​جکده​کي؛ هاميسي سئزئندئر.

3:23  سئز ده مسئحئنسئنئز، مسئح ده تارينيندير.

Chapter 4

4:1  بلجه، هر کس بئزي، مسئحئن خئدمتچئلري و تارينين سئرّلرئنئن وکئل​لري کئمي سايسين.

4:2  بوندان علاوه، وکئل​لردن طلب اولونور کي، هر بئري امئن اولسون.

4:3  منه چوخ کئچئک بئر زاددير کي، سئزئن طرفئنئزدن و يا ائنسانلارين محکمه​سئنده موحاکئمه​يه چکئلئم. حتّا من اؤزوم بله، اؤزومو موحاکئمه​يه چکمئرم.

4:4  گرچي من اؤزومده بئر قوصور گؤرمورم، لاکئن بو مني تبرعه اتمز، مني موحاکئمه ادن ربدئر.

4:5  بونا گؤره ده تعيئن اولونموش واختدان ائره​لي، هچ بئر شي حاقّيندا حؤکم اتمه‌يئن. لاکئن ربّئن گلئشئنه قدر گؤزله​يئن کي، قارانليقدا گئزله‌نن شيلري ائشيقلانديراجاق و اورکلرئن نئيّتلرئني آشکار اده​جک و او زامان هر کسئن تحسئني تاريدان گله​جک.

4:6  قارداشلار، سئزه گؤره بو شيلري اؤزومون و اَپولّوسون حاقّيندا تمثئل کئمي بيان اتدئم کي، بئزدن اؤيره‌نئب، يازيلميش حدّئندن آرتيق اؤزونوزو گومان اتمه‌يه​سئنئز. بلجه ده هچ بئرئنئز او بئرئنئن قاباغيندا تکبّورلو اولماسين.

4:7  چونکي سئزي کئم اوستون توتور؟ نه‌يئنئز وار کي، آلماييبسينيز؟ و اگر آليبسينيز، نه اوچون بس آلماميش کئمي فخر ساتيرسينيز؟

4:8  سئز آرتيق توخسونوز؛ سئز آرتيق وارليسينيز؛ سئز بئزسئز پادشاهلار اولوبسونوز؛ کاش کي، سئز حقئقتن پادشاهلار اولايدينيز کي، بئزده سئزئنله بئر يرده پادشاهليق ادک.

4:9  چونکي من اله دوشونورم کي، تاري بئز حوارئلري اؤلومه محکوم اولانلار کئمي آخيردا صحنه​يه چيخارتدي؛ چونکي بئز دونيانين، ملکلرئن و ائنسانلارين تاماشاسي اولموشوق.

4:10  بئز مسئحئن خاطئري اوچون عاغيلسيزيق، آمّا سئز مسئحده عاغيلّيسينيز. بئز ضعئفئک، آمّا سئز گوجلوسونوز. سئز عئزّتلئسئنئز، آمّا بئز حؤرمتسئزئک.

4:11  بو ساعاتا کئمي هم آج هم ده سوسوزوق، لوتوک، دؤيولوروک، بي‌خانومانيق.

4:12  اَللرئمئزله ائشله‌يئب، زحمت چکئرئک. بئزي سؤيورلر، بئز خيئر-دوعا ورئرئک. بئزه عذاب ورئرلر، بئز تاب گتئرئرئک.

4:13  بئزه ائفتئرا آتيرلار، بئز يومشاق جاواب ورئرئک. حتّا ائندئيه کئمي ده دونيانين توفاله​سي و هر شيئن زئبئلي اولموشوق.

4:14  بونلاري يازميرام کي، سئزي اوتانديريم. من سئزه سوگئلي اوشاقلاريم کئمي نصئحت ورئرم.

4:15  چونکي اگر مسئحده مئنلرجه موعلّئمئنئز اولسا بله، آتالارينيز آزدير. عئسا مسئحده من ائنجئلئن واسئطه​‌سئله سئزه آتا اولدوم.

4:16  بونا گؤره يالواريرام سئزه: مندن نومونه گؤتورون.

4:17  بو سببدن ربده سوگئلي و امئن اولان اوغلوم تئموتاعوسو يانينيزا گؤنده‌رمئشم و او، مسئحده اولان يوللاريمي سئزه خاطيرلاداجاق، نجه کي، هر يرده و هر کئلئسادا تعلئم ورئرم.

4:18  ائندي بعضئلر مغرور اولوبلار، اله بئل کي، من سئزئن يانينيزا گلمه‌يه​جه‌يم.

4:19  لاکئن اگر رب ائسته‌سه، تزلئکله يانينيزا گله​جه‌يم و مغرور اولانلارين سؤزونو يوخ، گوجلرئني بئله​جه‌يم.

4:20  چونکي تارينين پادشاهليغي سؤزده يوخ، گوجده​دئر.

4:21  نه ائسته‌يئرسئنئز؟ يانينيزا دَيَنَکله گلئم، يوخسا محبّت و مولايئم بئر روحلا؟

Chapter 5

5:1  خبر ورئلئب کي، آرانيزدا جئنسي عئفّتسئزلئک وار، اله بئر عئفّتسئزلئک کي، قيري‌يهودئلر آراسيندا بله يوخدور. بو کي، بئري اؤز آتاسينين آروادي ائله ياشايير.

5:2  آمّا سئز شئشئب، فخر ادئرسئنئز. عوضئنه ياس توتماييرسينيز کي، بله بئر ائشي گؤرن آدام آرانيزدان گؤتورولسون.

5:3  لاکئن من، گرچي جئسمن يوخ روحن سئزئنله وارام، يانينيزدا ائمئش کئمي بو ائشي گؤرن آدامين حاقّيندا آرتيق حؤکم اتمئشم.

5:4  او زامان کي، ربّئمئز عئسا مسئحئن آديندا سئز، ربّئمئز عئسا مسئحئن قودرتي ائله بئر يره ييغيليرسينيز، و منئم روحوم دا سئزئنله،

5:5  بو آدامي، جئسمئنئن هلاک اولماسي اوچون شيطانا تسلئم ادئن کي، ربّئن گونونده روحو نئجات تاپسين.

5:6  سئزئن شئشئب فخر اتمه‌يئنئز ياخشي ديئل. مگر بئلمئرسئنئز کي، بئر آز مايا بوتون خمئري تورشلادير؟!

5:7  کؤهنه ماياني تمئز ادئب آتين کي، تزه خمئر اولاسينيز. نجه کي، حقئقتن ده ماياسيزسينيز. چونکي بئزئم پاسخا قوزوموز مسئح بئزئم اوچون قوربان اولوب.

5:8  بونا گؤره گلئن نه کؤهنه مايا ائله، نه ده کئن و پئسلئيئن ماياسي ائله، لاکئن صافليغين و حقئقتئن ماياسيز فطئري ائله بايرام توتاق.

5:9  مکتوبومدا سئزه يازديم کي، عئفّتسئز آداملارلا قاريشماياسينيز.

5:10  آمّا نه کي، اصلا بو دونيانين عئفّتسئزلري ائله، و يا طاماحکار و شيّادلاري​ ائله، يا دا بوتپرستلري ائله قاريشماياسينيز. چونکي او حالدا سئز بو دونيادان آرتيق چيخيب گتمه‌لئسئنئز.

5:11  سئزه بونو يازيرام کي، قارداش آدلانان لاکئن عئفّتسئز، طاماحکار، بوتپرست، سؤيوش ورن، کفلنن، و سويغونچو بئر آداملا اوتوروب​ ​دورمايين. بله آداملا حتّا يمک ده يمه‌يئن.

5:12  نه ائشئم وار کي، اشئکده​کئلره حؤکم ادئم؟! آيا سئز ائچه‌رئده اولانلارا حؤکم اتمزسئنئز؟!

5:13  آمّا اشئکده​کئلره تاري حؤکم اده​جک. او شرور آدامي آرانيزدان اشئيه آتين.

Chapter 6

6:1  سئزلردن بئرئنئن او بئرئسي ائله داعواسي اولاندا، نجه جسارت اده بئلر کي، مسله​ني موقدّسلرئن حوضورونا يوخ، ائمانسيزلارين محکمه​سئنه آپارسين؟

6:2  و يا مگر بئلمئرسئنئز کي، دونياني موقدّسلر موحاکئمه اده​جک؟ اگر دونياني سئز موحاکئمه اده​جکسئنئز، آيا قابئل ديئلسئنئز کي، لاپ کئچئک داعوالاردا حؤکم اده‌سئنئز؟

6:3  مگر بئلمئرسئنئز کي، بئز، ملکلري موحاکئمه اده​جه‌يئک، بس نه قدر چوخ، بو دونيانين مسله​لرئني؟!

6:4  بس اگر بو حياتين مسله​لري حاقّيندا داعوالارينيز وار، آيا او آداملاري قاضي تعيئن ادئرسئنئز کي، کئلئسادا لاپ اهمئيّتسئز ساييلير؟

6:5  بونلاري ديئرم کي، اوتاناسينيز. مگر آرانيزدا، بئر نفر ده اولسون، حئکمتلي آدام يوخدور کي، اؤز قارداشلاري آراسيندا قاضي اولسون؟

6:6  آمّا قارداش قارداشي محکمه​يه آپارير، اؤزو ده کي، ائمانسيزلارين حوضورونا!

6:7  اصلئنده آرانيزدا داعوالارين اولماسي، سئزئن اوچون بئر شئکستدئر. حاقسيزليغا دؤزه​سئنئز، داها ياخشي اولماز؟ مغبون اولاسينيز، داها ياخشي اولماز؟

6:8  عکسئنه، سئز اؤزونوز حاقسيزليق ادئب، مغبون ادئرسئنئز، اؤزو ده اؤز قارداشينيزي!

6:9  يوخسا بئلمئرسئنئز کي، صالح اولمايانلار تارينين پادشاهليغيني مئراث آلماياجاقلار. آلدانمايين؛ عئفّتسئزلر، بوتپرستلر، زئناکارلار، کئشئبازلار، اوشاقبازلار،

6:10  اوغرولار، طاماحکارلار، عرقخورلار، سؤينلر و شيّادلار تارينين پادشاهليغيني مئراث آلماياجاقلار.

6:11  سئزلردن بعضئلرئنئز ده بو جور ائدئنئز؛ لاکئن يويولدونوز، تقدئس اولوندونوز، ربّئمئز عئسا مسئحئن آديندا و تاريميزين موقدّس روحوندا صالح ساييلدينيز.

6:12  هر شي منه جائزدئر، لاکئن هر شي فايدالي ديئل. هر شي منه جائزدئر، لاکئن قويمارام کي، هچ بئر شي منه حؤکمرانليق اتسئن.

6:13  يمک قارين اوچوندور، قارين دا يمک اوچون. لاکئن تاري اونلارين هر ائکئسئني ده آرادان آپاراجاق. آمّا بدن عئفّتسئزلئک اوچون ديئل، رب اوچوندور و رب ده بدن اوچوندور.

6:14  تاري فقط ربّي دئرئلتمه‌دي، قودرتي ائله بئزي ده دئرئلده​جک.

6:15  مگر بئلمئرسئنئز کي، بدنلرئنئز مسئحئن عوضولري​دئر؟ ائندي مسئحئن عوضولرئني گؤتوروب، فاحئشه​نئن عوضولري ادئم؟ اصلا.

6:16  مگر بئلمئرسئنئز کي، فاحئشه بئر آروادلا ياتان، اونونلا بئر بدن اولور؟ چونکي تاري ديئر: "ائکئسي بئر بدن اولاجاقلار."

6:17  لاکئن ربّه قوشولان، اونونلا بئر روحدور.

6:18  جئنسي عئفّتسئزلئکدن قاچين. ائنسانين اتدئيي هر گوناه بدندن اشئکدئر. آمّا جئنسي عئفّتسئزلئک ادن بئر آدام اؤز بدنئنئن ضئدّئنه گوناه ادئر.

6:19  و يا مگر بئلمئرسئنئز کي، تاريدان آلديغينيز بدن، سئزده ياشايان موقدّس روحون معبدي​دئر و سئز اؤزونوزونکو ديئلسئنئز؟!

6:20  چونکي سئز چوخ باها بئر قئيمته آلينيبسينيز. اونا گؤره ده، تاريني بدنلرئنئزده عئزّتلندئرئن.

Chapter 7

7:1  ائندي يازديقلارينيزا گلئنجه: ياخشي‌دير کي، کئشي آروادا توخونماسين

7:2  لاکئن عئفّتسئزلئک سببئندن هر کئشئنئن اؤز آروادي اولسون، هر آروادين دا اؤز اَري اولسون.

7:3  اَر اؤز آروادينا اولان وظئفه​سئني يرئنه يتئرسئن، آرواد دا اَري ائله بله اتسئن.

7:4  آرواد اؤز بدنئنه ائختئيار صاحئبي ديئل، اونا ائختئيار صاحئبي اولان اَردئر. اِله‌جه ده ار اؤز بدنئنه ائختئيار صاحئبي ديئل، اونا ائختئيار صاحئبي اولان آرواددير.

7:5  بئربئرئنئزي محروم اتمه‌يئن، مگر راضيليقلا، او دا مووقّتي بئر مودّت اوچون کي، اؤزونوزو عئبادته وقف اده​سئنئز. سونرا گئنه ده بئرله‌شئن کي، نفسئنئزئن قاباغيني آلا بئلمه‌دئيئنئزدن، شيطان سئزي وسوسه‌يه سالماسين.

7:6  بونو اَمر کئمي يوخ، موساعئده کئمي ديئرم.

7:7  آمّا گئنه ده آرزو ادئرم کي، بوتون ائنسانلار منئم کئمي اولسونلار. لاکئن هر کسئن تاريدان اؤز عطاسي وار؛ بئرئنئنکي بله، او بئرئنئنکي اِله.

7:8  آمّا سوبايلارا و دوللارا ديئرم کي، منئم کئمي قالماق اونلار اوچون ياخشي‌دير.

7:9  لاکئن اگر نفسلرئنئن قاباغيني آلا بئلمئرلر، اِولنسئنلر. چونکي اولنمک، شهوت اودو ائله يانماقدان ياخشي‌دير.

7:10  آمّا اِوله‌نَنلره، من يوخ، ربّ امر ادئر کي، آرواد ارئندن آيريلماسين.

7:11  (لاکئن اگر آيريلسا، اَره گتمه​مئش قالسين، يا دا اؤز اَري​ ائله باريشسين.) اَر ده اؤز آرواديني بوشاماسين.

7:12  آمّا قالانلاراينا، ربّ يوخ، من ديئرم کي، اگر بئر قارداشين آروادي ائمانلي ديئل و آرواد اونونلا قالماغا راضيدير، اَري اونو بوشاماسين.

7:13  و اگر بئر آروادين اَري ائمانلي ديئل و اَري اونونلا قالماغا راضيدير، آروادي اوندان بوشانماسين.

7:14  چونکي ائمانسيز اَر، آروادينين واسئطه‌سئله تقدئس اولونور و ائمانسيز آرواد دا ائمانلي اَرئنئن واسئطه​‌سئله تقدئس اولونور. او بئري حالدا اوشاقلارينيز ناپاک اولارديرلار، لاکئن ائندي موقدّسدئرلر.

7:15  آمّا اگر ائمانلي اولمايان آيريلسا، قوي آيريلسين. بله وضعئيّتلرده قارداش و يا باجي آرتيق باغلي ديئل. لاکئن تاري بئزي باريشا دعوت ادئر.

7:16  چونکي اي آرواد، هارادان بئلئرسن کي، اَرئني نئجات ورمه‌يه​جکسن؟ يا دا اي اَر، هارادان بئلئرسن کي، آرواديني نئجات ورمه‌يه​جکسن؟

7:17  آنجاق هر کس ربّئن اونا تعيئن اتدئيي کئمي و تاريدان آلديغي دعوته گؤره رفتار اتسئن. بونو بوتون کئلئسالارا امر ادئرم.

7:18  اگر بئري ختنه​لي ائکن دعوت اولوندو، ختنه​سئز کئمي اولماغا چاليشماسين. اگر بئري ختنه​سئز ائکن دعوت اولوندو، ختنه اولونماسين.

7:19  نه ختنه​لي​لئک موهومدور، نه ده ختنه​سئزلئک. موهوم اودور کي، تارينين امرلرئنه عمل اده‌سئنئز.

7:20  هر کس نه وضعئيّتده دعوت اولونسا، او وضعئيّتده قالسين.

7:21  چاغيريلديغين زامان اگر نؤکر ائدئن، بو باره‌ده فئکئر چکمه. لاکئن اگر آزاد اولماغا ائمکانين وار، فورصتي الدن ورمه.

7:22  چونکي رب طرفئندن دعوت اولونان زامان، نؤکر آدام ربّئن آزاد آدامي‌دير. اِله‌جه ده دعوت اولوندوغو زامان، آزاد اولان آدام مسئحئن نؤکري‌دئر.

7:23  سئز چوخ باها بئر قئيمته آلينيبسينيز. ائنسانلارين قولو اولمايين.

7:24  قارداشلار، هر کس نه وضعئيّتده چاغيريليب، تارينين حوضوروندا اِله او جور قالسين.

7:25  باکئره‌لر حاقيندا ربدن بئر امرئم يوخدور. آمّا ربّئن مرحمتي ائله اعتئماد ادئله​بئلن بئري کئمي ديئرم.

7:26  بله دوشونورم کي، ائندئکي سيخينتيلار اوزوندن بو، ياخشي‌دير. يعني بو ياخشي‌دير کي، ائنسان، اولدوغو کئمي قالسين.

7:27  اگر بئر آروادا باغليسان، آيريلماق دالينجا اولما. اگر آرواددان آيريليبسان، آرتيق آرواد آلماق دالينجا اولما.

7:28  آمّا اِولنسن ده، گوناه اتمه‌يئبسن؛ اگر بئر قيز دا اَره گتسه، گوناه اتمه‌يئب. آمّا بله آداملار بو حياتدا اذئيّت چکه​جکلر و من چاليشيرام کي، سئزي بونلاردان حئفظ ادئم.

7:29  آمّا قارداشلار، بونو دمه‌لئيم کي، واخت قيسالانيب. اونا گؤره ده، بوندان سونرا آروادي اولانلار، اولمايانلار کئمي اولمالي‌ديرلار؛

7:30  آغلايانلار، آغلاماميشلار کئمي. شادليق ادنلر، شادليق اتمه​مئشلر کئمي. مال آلانلار هچ شيه مالئک اولماميشلار کئمي.

7:31  بو دونيادان ائستئفاده ادنلر، کامئل ائستئفاده اتمه​مئشلر کئمي اولمالي‌ديرلار. چونکي بو دونيانين ائندئکي حالي کچئب گدئر.

7:32  لاکئن ائسته‌يئرم کي، سئز بونلارين قيدئندن آزاد اولاسينيز. اِولي اولمايان کئشي ربّئن ائشلري قيدئنده‌دئر کي، اونو راضي اتسئن.

7:33  لاکئن اِولي کئشي، آرواديني راضي اتمک اوچون دونيه‌وي شيلرئن قيدئنده​دئر.

7:34  بلجه علاقه​سي ائکي يره بؤلونور. اَرسئز آرواد و باکئره قيز ربّئن ائشلري قيدئنده​دئر کي، نجه جئسمن و روحن موقدّس قالسين. لاکئن اَرلي آرواد دونيه‌وي شيلرئن قيدئنده‌دئر کي، نجه اَرئني راضي اتسئن.

7:35  بونو سئزئن اؤز خيئرئنئز اوچون ديئرم. آزادليغينيزي محدود اتمک اوچون دمئرم. ديئرم کي، دئقّتئنئزي داغيتمادان ربّه وقف اولونوب، اونا لايئق بئر حالدا ياشاياسينيز.

7:36  اگر بئري اله گومان ادئر کي، باکئره قيزينين حاقّيندا حاقسيزليق ادئر، اگر قيزين ياشي کچئر و اِوله‌نمه‌سي گرکدئر. او، نه ائسته‌يئر، اتسئن. گوناه اتمز. قوي اونلار اِوله‌نسئنلر.

7:37  آمّا هر کس کي، اؤز اوره‌يئنده قرارلي‌دير و احتئياج گؤرمه‌يئب، اؤز ائراده​سئنه حاکئمدئر و اوره‌يئنده بو قرارا گلئب کي، باکئره قيزيني ساخلاسين، ياخشي اِدَر.

7:38  بلجه، باکئره قيزيني اِوله‌ندئرن ياخشي ادئر، باکئره قيزيني اِوله‌ندئرمه‌ين داها ياخشي ادئر.

7:39  آرواد، اَري صاغ ائکن، اونا باغلي‌دير. لاکئن اگر اَري اؤلسه، آرواد آزاددير کي، ائسته‌دئيي هر کسه اَره گتسئن، آنجاق کي، او آدام ربده اولسون.

7:40  آمّا بله دوشونورم کي، اگر اولدوغو کئمي قالسا، داها بختور اولار. و گومان ادئرم کي، منده ده تارينين موقدّس روحو وار.

Chapter 8

8:1  بوتلره تقدئم اولونان قوربانلار حاقّيندا؛ بئلئرئک کي، هاميميز علم صاحئبي​يئک. علم تکبّور گتئرر، لاکئن محبّت بئنا ادر.

8:2  اگر کئمسه دوشونور کي، بئر شي بئلئر، او حله لازيم اولان قدر بئلمئر.

8:3  آمّا کئم تاريني سوئر، او آدام تارينين طرفئندن تانينير.

8:4  بلجه، بوتلره تقدئم اولونان شيلرئن يمه‌سي باره​ده؛ بئلئرئک کي، بوت اصلئنده دونيادا هچ بئر شيدئر و واحئد تاريدان باشقا تاري يوخدور.

8:5  حتّا اگر گؤيده و يا يرده «تاري» چاغيريلانلار اولسا دا، نجه کي، حقئقتن بئر چوخ تاريلار و ربلر وار-

8:6  بئزئم اوچون بئر تاري وار، يعني آتا کي، هر شي اونداندير و بئز اونون اوچون واريق. و بئر ربّئمئز وار يعني عئسا مسئح کي، هر شي اونون واسئطه​‌سئله‌دئر و بئز اونون واسئطه‌سئله واريق.

8:7  آمّا هاميدا بو علم يوخدور؛ بعضئلري ائندئيه​جک بوتلره اله آليشيبلار کي، يدئکلري زامان اونون بوته تقدئم اولوندوغونو دوشونورلر و وئجدانلاري ضعئف اولدوغوندان نجئس اولور.

8:8  يمک بئزي تارييا مقبول اتمز. يمه‌سَک، اَسکئيئمئز اولماز، يِسَک ده، بئر شي آرتيرماريق.

8:9  آمّا احتئياط ادئن کي، بو آزادليغينيز ضعئف اولانلاري يره ييخماسين.

8:10  چونکي اگر ضعئف وئجدانلي بئر آدام گؤرسه کي، سن بو علمه صاحئب اولان حالدا، بوتخانادا سوفره​يه اوتوروبسان، مگر جسارت آلماز کي، بوتلره تقدئم اولونان يمکلردن يسئن؟

8:11  و سنئن علمئنئن نتئجه​سئنده وئجداني ضعئف اولان هلاک اولور؛ او قارداش کي، مسئح اونون خاطئري اوچون اؤلدو.

8:12  بلجه، اؤز قارداشلارينيزين ضئدّئنه گوناه اِتمکله و اونلارين ضعئف وئجدانلاريني يارالاماقلا، سئز، مسئحئن ضئدّئنه گوناه اِدئرسئنئز.

8:13  بونا گؤره، اگر يمک قارداشيمين يره ييخيلماسينا سبب اولور، من داها ات اصلا يمه‌رم کي، قارداشيمي ييخماييم.

Chapter 9

9:1  مگر من آزاد ديئلم؟ مگر من حواري ديئلم؟ مگر ربّئمئز عئساني گؤرمه​مئشم؟ مگر سئز ربده منئم ائشئم ديئلسئنئز؟

9:2  اگر اؤزگه​لره حواري ديئلم ده، هچ اولماسا، سئزه حوارئيم. چونکي ربده حوارئلئيئمئن مؤهورو سئزلرسئنئز.

9:3  مني ائستئنطاق اِدَنلره مودافئعم بودور:

9:4  مگر حاقّيميز يوخدور کي، يِيئب ائچک؟

9:5  مگر حاقّيميز يوخدور کي، ائمانلي بئر آروادي يانيميزدا گؤتوروب گزدئرک. نجه کي، حتّا آيري حوارئلر، ربّئن قارداشلاري و کئفا دا ادئر؟

9:6  و يا ائشلَمه​مَيه آنجاق منئم و بارنابانين حاقّي يوخدور؟

9:7  کئم وار کي، هر زامان اؤز خرجي ائله عسگرلئک اتمئش اولسون؟ کئم وار کي، اوزوم باغي اکئب، اونون ميوه​سئندن يمه‌سئن؟ کئم وار کي، سورونو اوتاريب، اونون سودوندن ائچمه‌سئن؟

9:8  مگر بونلاري ائنسان گؤروشونه گؤره ديئرم؟ مگر شرئعت ده بو شيلري دمئر؟

9:9  چونکي موسانين شرئعتئنده بله يازيليب: "خرمني دؤين اؤکوزون آغزيني باغلاما." مگر تاري اؤکوزلرئن قيدئنه قالير؟

9:10  مگر بئزئم اوچون بو شيلري دمئر؟ بلي، بونلار بئزئم اوچون يازيليب، چونکي شوخوملايان اومئدله جوت سورملئدئر، و خرمن دؤين تاخيلا شرئک اولماق اومئدي ائله دؤيملي‌دئر.

9:11  اگر بئز سئزده روحاني توخوملار اکدئک، سئزدن مادّي شيلر بئچسک، بو سئزه چوخ گلئر؟

9:12  اگر سئزئن اوستونوزده اؤزگه​لرئن بله بئر حاقّي وار، مگر بئزئم بونا داها چوخ حاقّيميز يوخدور؟ آمّا بئز بو حاقدان ائستئفاده اتمه‌دئک، لاکئن هر شيه تاب گتئردئک کي، مسئحئن ائنجئلئنئن خوش خبرئنه هچ بئر مانع اولماياق.

9:13  مگر بئلمئرسئنئز کي، معبدده موقدّس خئدمتلري گؤرنلر معبدئن يمه‌يئندن ييئرلر و قوربانگاهين خئدمتچئلري اؤز پايلاريني قوربانگاهدان گؤتورورلر؟

9:14  بلجه ده رب امر ادئب کي، ائنجئلئن خوش خبرئني موژده ورنلر، روزئلرئني ائنجئلدن گؤتورسونلر.

9:15  لاکئن من بو حاقلارين هچ بئرئندن ائستئفاده اتمه​مئشم و بو سؤزلري يازميرام کي، منئم اوچون ده اله اولسون. چونکي اؤلوم منه بوندان داها ياخشي‌دير کي، بئري منئم ائفتئخاريمي بوشا چيخارتسين.

9:16  اگر ائنجئلئن خوش خبرئني وعظ ادئرم، فخر اتمه‌يه حاقّيم يوخدور، چونکي بو، منئم وظئفمدئر. لاکئن واي منه، اگر ائنجئلي وعظ اتمه‌يم!

9:17  اگر بونو اؤز ميلئمله اِتسم، اجرئم وار. آمّا اگر اؤز ميلئمله اِتمه‌سم، منه تاپشيريلان وظئفه​ني يرئنه يتئرئرم.

9:18  بس منئم اجرئم نه‌دئر؟ بودور کي، ائنجئلئن خوش خبرئني وعظ ادن واخت، اونو تمنّاسيز عرض ادم کي، ائنجئلده اولان حاقّيمدان تامامن ائستئفاده اتمه‌يئم.

9:19  چونکي هر کسدن آزاد ائکن، اؤزومو هامييا قول اتمئشم کي، داها چوخ آدام قازانيم.

9:20  يهودئلري قازانماق اوچون اونلارا يهودي کئمي اولدوم. اؤزوم شرئعتئن حاکئمئيّتي آلتيندا اولماديغيم حالدا، شرئعت آلتيندا اولانلارا شرئعت آلتينداکي کئمي اولدوم کي، اونلاري قازانيم.

9:21  شرئعتسئز آداملاري قازانماق اوچون، شرئعتسئزلره شرئعتسئز بئر آدام کئمي اولدوم، گرچي تارينين حوضوروندا شرئعتسئز اولماييب، مسئحئن شرئعتي آلتيندايام.

9:22  ضعئفلري قازانماق اوچون، اونلارا ضعئف کئمي اولدوم. هر کس اوچون هر شي اولدوم کي، هر نه جور اولور-اولسون، بعضئلرئنه نئجات ورئم.

9:23  بونلارين هاميسيني ائنجئلئن خاطئري اوچون ادئرم کي، اوندا پاييم اولسون.

9:24  مگر بئلمئرسئنئز کي، قاچيش ميدانيندا قاچانلارين هاميسي قاچار، آمّا تک بئر نفر جايئزه​ني آلار؟ اِله قاچين کي، جايئزه​ني قازاناسينيز.

9:25  موسابئقه​ده رقابت اِدن، هر شيده نفسئنئن قاباغيني آلار. اونلار بونو فاني بئر تاجي آلماق اوچون ادئرلر، لاکئن بئز فاني اولمايان اوچون ادئرئک.

9:26  بونا گؤره، من مقصدسئز قاچان بئري کئمي قاچميرام. يوموروغومو هاوايي ووران کئمي آتميرام.

9:27  آمّا بدنئمه اذئيّت چکدئرئب اونو قول ادئرم کي، مبادا اؤزگه​لره وعظ ادندن سونرا، اؤزوم مردود اولوم.

Chapter 10

10:1  قارداشلار، ائسته‌مئرم کي، سئزي بئخبر قويوم. آتالاريميزين هاميسي بولودون آلتيندا ائدئلر و هاميسي دهنزدن کچدئلر.

10:2  هاميسي بولوددا و دهنزده موسايا منسوب تعمئد اولوندولار.

10:3  هاميسي همن روحاني يمه‌يي يدئلر.

10:4  هاميسي دا همن روحاني ائچه​جه‌يي ائچدئلر. چونکي اونلارين دالينجا گلن روحاني قايادان ائچئردئلر. و او قايا مسئح ائدي.

10:5  آمّا تاري اونلارين چوخوندان راضي ديئلدي، چونکي چؤلده اؤلو بوراخيلديلار.

10:6  بو شيلر بئزئم عئبرتئمئز اوچون باش وردي کي، اونلار کئمي پئسلئيه موشتاق اولماياق،

10:7  و اونلارين بعضئلري کئمي بوتپرست اولماياق. نجه کي، يازيليب: "خالق ييئب ائچمه‌يه اوتوردو و اويناماغا قالخدي."

10:8  عئفّتسئزلئک اتمه‌يک؛ نجه کي، اونلارين بعضئلري اتدئلر و بئر گونده ائيئرمي اوچ مئن نفر اؤلدو.

10:9  ربّي ائمتاحانا چکمه‌يک؛ نجه کي، اونلارين بعضئلري اتدئلر و ائلانلارين واسئطه‌سئله هلاک اولدولار.

10:10  ديئنمه‌يک؛ نجه کي، اونلارين بعضئلري اتدئلر و هلاک اده​نئن اَلي‌ ائله محو اولدولار.

10:11  بو شيلر عئبرت اوچون اونلارين باشينا گلدي و بو آخير عصرلره چاتان بئزلره ده درس اوچون يازيليردي.

10:12  بونا گؤره ده، کئم گومان آپارير کي، آياق اوسته دورور، احتئياطلي اولسون کي، ييخيلماسين.

10:13  هچ بئر وسوسه سئزئن باشينيزا گلمه‌يئب کي، آيري ائنسانلارين باشينا گلمه‌مئش اولسون. تاري وفالي‌دير و قويماز کي، طاقتئنئزدن آرتيق وسوسه‌يه دوشه‌سئنئز. لاکئن وسوسه ائله بله سئزه قاچاجاق يولو دا تأمئن اِدَر کي، تاب گتئره بئله​سئنئز.

10:14  بلجه، سوگئلئلرئم، بوتپرستلئکدن قاچين.

10:15  عاغيلّي آداملارلا دانيشان کئمي دانيشيرام؛ ددئيئمه سئز حؤکم ادئن.

10:16  برکت پئياله​سي کي، بئز اونا برکت ورئرئک، مگر مسئحئن قانيندا شرئک اولماق ديئل؟! برکت وردئيئمئز چؤرک مگر مسئحئن بدنئنده شرئک اولماق ديئل؟!

10:17  مادام کي، چؤرک بئردئر، دمه‌لي چوخ اولان بئزلر ده بئرئک. چونکي هاميميز بئر چؤرکدن پاي آليريق.

10:18  ائسرايئل خالقينا باخين؛ مگر قوربانلاري يئينلر قوربانگاهدان پاي آلانلار ديئللر؟!

10:19  بس نه دمک ائسته‌يئرم؟ بو کي، بوتلره قوربان ادئلن بئر شي، موهوم بئر شيدئر؟ و يا بئر بوت موهوم بئر شيدئر؟

10:20  يوخ، لاکئن بونو ديئرم کي، قيري‌يهودئلر قوربانلاري تارييا يوخ، ائبلئسلره تقدئم ادئرلر. و ائسته‌مئرم کي، سئز ائبلئسلردن پاي آلاسينيز.

10:21  سئز، هم ربّئن، هم ده ائبلئسلرئن پئياله​سئندن ائچه بئلمزسئنئز. هم ربّئن سوفره​سئندن، هم ده ائبلئسلرئن سوفره​سئندن پاي آلا بئلمزسئنئز.

10:22  مگر ائسته‌يئرئک ربّي قيرته گتئرک؟ مگر بئز اوندان داها گوجلويوک؟

10:23  هر شي جائزدئر، لاکئن هر شي فايدالي ديئل. هر شي جائزدئر، لاکئن هر شي بئنا اتمز.

10:24  هر کس اؤزونون خيئرئني يوخ، اؤزگه​سئنئن خيئرئني آختارسين.

10:25  ات بازاريندا ساتيلان نه وارسا، ييئن و وئجدانين خاطئري اوچون هچ بئر شي سوروشمايين.

10:26  چونکي ير ربّئن، اوندا اولان هر شي ده ربّئندئر.

10:27  اگر ائمانلي اولمايانلاردان بئري سئزي دعوت اتسه، و گتمک ائسته‌يئرسئنئز ده، قاباغينيزا نه قويولسا ييئن، و وئجدانين خاطئري اوچون سوآللار اتمه‌يئن.

10:28  آمّا اگر بئري سئزه دسه: "بو، بوتلره تقدئم اولونموش قوربانليقدير"، بونو سئزه دئيه​نئن خاطئرئنه، وئجدانين دا خاطئرئنه اوندان يمه‌يئن.

10:29  مقصدئم سئزئن وئجدانينيز يوخ، اؤزگه آدامين وئجداني‌دير؛ چونکي منئم آزادليغيما نه اوچون اؤزگه آدامين وئجداني طرفئندن حؤکم اولونسون؟

10:30  اگر شوکور ادئب يِيئرم، نه اوچون شوکور اتدئيئم شيدن اؤتري ملامت اولونوم؟

10:31  بلجه، ائستر يئيه​سئنئز، ائستر ائچه​سئنئز، ائستر نه اده​سئنئز، هر شيي تارينين جلالي اوچون ادئن.

10:32  يهودئلرئن، يونانلي‌لارين و تارينين کئلئساسينين دا بودره​مه‌سئنه سبب اولمايين.

10:33  نجه کي، من ده هر شيده هر کسي راضي ادئرم و اؤز منفعتئمي يوخ، اؤزگه چوخ آداملارينکيني آختاريرام کي، اونلار نئجات تاپسينلار.

Chapter 11

11:1  مندن نومونه آلين، نجه کي، من ده مسئحدن آليرام.

11:2  مني هر شيده خاطيرلاديغينيز اوچون و سئزه تاپشيرديغيم تعلئملري برک توتدوغونوز اوچون سئزي تعرئفله‌يئرم.

11:3  ائسته‌يئرم بونو دا باشا دوشه​سئنئز کي، هر کئشئنئن باشي مسئحدئر، هر آروادين باشي کئشئدئر. مسئحئن باشي دا تاري‌دير.

11:4  هر کئشي کي، باشي اؤرتولو دوعا يا دا نبئلئک ادئر، اؤز باشينا خجالت گتئرئر.

11:5  هر آرواد دا کي، باشي اؤرتولمه​مئش دوعا يا دا نبئلئک ادئر، اؤز باشينا خجالت گتئرئر؛ چونکي بو جور آرواد، ساچلاري قيرخيلميش آروادلا بئر حسابدادير.

11:6  چونکي اگر بئر آرواد باشيني اؤرتمه‌سه، قوي ساچلاريني قيرخسين. لاکئن اگر آرواد اوچون عاييبدير کي، ساچلاري قيرخيلسين و يا باشينا اولگوج چکدئرسئن، قوي اوندا باشيني اؤرتسون.

11:7  کئشي باشيني اؤرتمه​ملئدئر، چونکي تارينين صورت و عئزّتئدئر. آمّا آرواد کئشئنئن عئزّتئدئر.

11:8  چونکي کئشي آرواددان يوخ، آرواد کئشئدن ياراندي.

11:9  دوغرودان دا کئشي آرواد اوچون يوخ، آرواد کئشي اوچون ياراندي.

11:10  بونا گؤره آرواد، ملکلرئن خاطئرئنه گرک اؤز باشي اوسته ائقتئدار نئشاني اولسون.

11:11  گرچي، ربده نه آرواد کئشئدن موستقئلدئر نه ده کئشي آرواددان.

11:12  چونکي نجه آرواد کئشئدن يارانير، کئشي ده آروادين واسئطه‌سئله. و هر شي تاريداندير.

11:13  سئز اؤزونوز قرار ورئن؛ آيا آروادا ياراشير کي، اؤرتوسوز تارييا دوعا اتسئن؟!

11:14  مگر طبئعتئن اؤزو سئزه اؤيرتمئر کي، اگر کئشي ساچلاريني اوزاتسا، بو اونون اوچون بي​آبيرليقدير؟!

11:15  آمّا اگر آرواد ساچلاريني اوزاتسا، بو اونون اوچون عئزّتدئر؟! چونکي ساچلاري اونا اؤرتوک اوچون ورئلئب.

11:16  لاکئن اگر کئمسه ائسته‌سه کي، بو باره​ده موباحئثه اتسئن، نه بئزئم، نه ده تارينين کئلئسالارينين بله بئر عادتي وار.

11:17  آمّا بو تعلئملري وِرَرکن سئزي تعرئفله‌مئرم، چونکي ييغيناجاغينيز خيئر اوچون يوخ، شر اوچوندور.

11:18  چونکي، اوّلن، اشئدئرم کي، کئلئسادا بئر يره گلدئيئنئز زامان، آرانيزدا دسته​بازليق اولور. بونا من، قئسمن ده اولسا، ائنانيرام.

11:19  چونکي آرانيزدا ائختئلافلار اولمالي‌دير کي، آرانيزدا تصدئق اولونموشلار بلّي اولسونلار.

11:20  بونا گؤره، بئر يره ييغيلديغينيز زامان، مقصدئنئز ربّئن سوفره​سئنده شئرکت اتمک ديئل.

11:21  چونکي يمکده هر کس قاباقجا اؤز شاميني ييئر؛ بئري آج قالير، او بئرئسي کفله‌نئر.

11:22  بو نه‌دئر؟ مگر يمک-ائچمک اوچون اِوئنئز يوخدور؟! يوخسا تارينين کئلئساسيني تحقئر ادئب، هچ بئر شيي اولمايانلاري اوتانديريرسينيز؟ سئزه نه ديئم؟ تعرئف ادئم؟ بو خوصوصدا سئزي تعرئف اتمه‌يه​جه‌يم. ربّئن سوفره​سي

11:23  چونکي من ربدن آلديغيمي، سئزه ده چاتديرديم. بو کي، رب عئسا تسلئم اِدئلدئيي گجه چؤرک گؤتوردو

11:24  و شوکور ادندن سونرا اونو بؤلوب ددي: "«بو سئزئن اوچون منئم بدنئمدئر. بونو مني خاطيرلاماق اوچون ادئن."

11:25  اِله‌جه ده شامدان سونرا پئياله​ني گؤتوروب ددي: "بو پئياله منئم قانيمدا تزه عهددئر. نه زامان بونو ائچئرسئنئز، مني خاطيرلاماق اوچون ائچئن."

11:26  چونکي بو چؤره‌يي يدئيئنئز و بو پئياله‌دن ائچدئيئنئز هر زامان، ربّئن گلئشئنه‌جک ربّئن اؤلومونو اعلان ادئرسئنئز.

11:27  اونا گؤره ده، کئم لايئق اولمايان طرزده ربّئن بو چؤره‌يئني ييئب يا دا پئياله​سئندن ائچسه، ربّئن بدنئنه و قانينا تقصئرلي اولور.

11:28  لاکئن هر کس گرک اؤزو‌-اؤزونو تفتئش اتسئن و بلجه بو چؤرکدن يِسئن و بو پئياله​دن ائچسئن.

11:29  چونکي يِيئب ائچن اؤزونون ضئدّئنه محکومئيّت ييئب ائچئر، اگر ربّئن بدنئني آييرد اتمئر.

11:30  بونا گؤره ده، سئزلردن چوخو ضعئف و ناخوشدور، بئر نچه​سي ده گؤزلرئني حياتا يوموب.

11:31  آمّا اگر بئز اؤز-اؤزوموزه صحئحجه حؤکم اتسَيدئک، بئزه حؤکم اولمازدي.

11:32  لاکئن بئزه حؤکم اولونان زامان، ربّئن طرفئندن تربئيه اولونوروق کي، دونيا​ ائله بئرلئکده محکوم اولماياق.

11:33  بونون اوچون، قارداشلاريم، يمه‌يه ييغيلاندا بئربئرئنئزي گؤزله​يئن.

11:34  آج اولان وارسا، قوي اِوئنده يسئن کي، ييغيشماغينيز موحاکئمه اولونماغينيزا سبب اولماسين. قالان مطلبلري اؤزوم گلنده نئظاما سالارام.

Chapter 12

12:1  قارداشلار، ائسته‌مئرم کي، روحاني عطالار حاقّيندا دا بئخبر اولاسينيز.

12:2  بئلئرسئنئز کي، بوتپرست ائکن، آزديريليب، دئلسئز بوتلرئن طرفئنه آپاريلدينيز.

12:3  بونا گؤره سئزه بئلدئرئرم کي، تارينين موقدّس روحو واسئطه‌سئله دانيشان هچ کئم دمز کي، "عئسا ملعوندور." هچ کئم ده دئيه بئلمز کي، "عئسا ربدئر"، مگر موقدّس روحون واسئطه‌سئله.

12:4  عطالار جوربه​جور، لاکئن روح همن‌دئر.

12:5  خئدمتلر جوربه​جور، لاکئن رب همن‌دئر.

12:6  خئدمتلري يرئنه يتئرمه​يئن طرزلري ده موختلئف، لاکئن تاري همن‌دير، هاميدا هر شيي يرئنه يتئرن ده اودور.

12:7  آمّا هر کسه روحون ظوهورو خيئر اوچون ورئلئر.

12:8  موقدّس روحون واسئطه​‌سئله بئرئنه حئکمت کلامي، و اؤزگه بئرئنه اِله همن روحون واسئطه​‌سئله معرئفت کلامي ورئلئر.

12:9  اؤزگه​سئنه همن روحون واسئطه​‌سئله ائمان ورئلئر، اؤزگه بئرئنه ده همن روحون واسئطه​‌سئله شفا عطالاري ورئلئر.

12:10  بئرئنه مؤجوزه​لر ياراتماسي، بئرئنه نبئلئک، بئرئنه روحلاري تشخئص ورئب آييرد اتمک، بئرئنه موختلئف دئللر، بئرئنه ده دئللرئن ترجومه​سي.

12:11  لاکئن بوتون بونلاري بئر و همن روح يرئنه يتئرئر و نجه کي، ائسته‌يئر، هر کسه فردن بؤلوشدوروب ورئر.

12:12  نجه کي، بدن بئر اولدوغو حالدا، چوخلو عوضولره مالئکدئر، بدنئن ده بوتون عوضولري، چوخ اولدوقلاري حالدا، گئنه بئر بدندئرلر. مسئح ده اِله​دئر.

12:13  چونکي بئر روحون واسئطه​‌سئله هاميميز بئر بدنه تعمئد اولونموشوق؛ ائستر يهودي اولاق، ائستر يونانلي؛ ائستر قول اولاق، ائستر آزاد. هاميميز دا بئر روحدان ائچدئرئلمئشئک.

12:14  چونکي بدن بئر عوضودن يوخ، چوخ عوضودن عئبارتدئر.

12:15  اگر آياق دسه: "چونکي اَل ديئلم، بدندن ده ديئلم"، مگر بو اونو بدندن آييرار؟

12:16  اگر قولاق دا دسه: "چونکي گؤز ديئلم، بدندن ده ديئلم"، مگر بو اونو بدندن آييرار؟

12:17  اگر بوتون بدن گؤز اولسايدي، نجه اشئده بئلردي؟ اگر بوتون بدن قولاق اولسايدي، نجه ائيي بئله‌ردي؟

12:18  آمّا تاري عوضولرئن هر بئرئسئني، اؤزو ائسته‌دئيي کئمي بدنده يرلشدئرئب.

12:19  و اگر هاميسي بئر عوضو اولسايدي، بدن نه اولاردي؟

12:20  لاکئن ائندي عوضولر چوخ، آمّا بدن بئردئر.

12:21  گؤز اَله دئيه بئلمز کي، "سن منه لازيم ديئلسن؟" و يا باش دا آياقلارا دئيه بئلمز کي، "سئز منه لازيم ديئلسئنئز."

12:22  عکسئنه، بدنئن داها ضعئف گؤرونن عوضولري چوخ دا لازيمديرلار.

12:23  بدنئن داها آز دَيَرلي سايديغيميز عوضولرئنه داها چوخ دَيَر ورئرئک و بلجه خوش گؤرونمه‌ين عوضولرئمئز داها چوخ خوش گؤرونور.

12:24  خوش گؤرونن عوضولرئمئز بونا مؤحتاج ديئللر. لاکئن تاري آز دَيَرلي عوضوه داها چوخ دَيَر گؤرسه‌دئب و بدني اِله ترتئب ورئب کي،

12:25  بدنده آيريليق اولماسين، لاکئن عوضولر بئر​بئرئنئن قيدئنه قالسينلار.

12:26  و اگر بئر عوضو عذاب چکئر، هامي عوضولر اونونلا عذاب چکرلر. و اگر بئر عوضو عئزّت قازانير، هامي عوضولر اونونلا شادليق ادرلر.

12:27  سئز ده ائندي مسئحئن بدنئسئنئز، هر بئرئنئز ده اونون عوضولرئسئنئز.

12:28  و تاري کئلئسادا بئرئنجي حوارئلري، ائکئنجي نبئلري، اوچونجو موعلّئملري، سونرا مؤجوزه ائشلرئني، سونرا شفا عطاسيني، سونرا کؤمک، ائداره، و موختلئف دئللري تعيئن ادئب.

12:29  مگر هامي حواري‌دئر؟ مگر هامي نبئدئر؟ مگر هامي موعلّئمدئر؟ مگر هامي مؤجوزه ياراداندير؟

12:30  مگر هاميدا شفا عطالاري وار؟ مگر هامي دئللرده دانيشير؟ مگر هامي ترجومه ادئر؟

12:31  لاکئن سئز داها افضل عطالاري قيرتله ائسته‌يئن. من ده سئزه داها افضل يولو گؤرسه‌دئم.

Chapter 13

13:1  اگر من ائنسانلار و ملکلر دئلي ائله دانيشام، آمّا محبّتئم اولمايا، دمه‌لي باغيران بئر مئس يا دا جئنگئلده‌ين بئر سئنجه دؤنموشم.

13:2  اگر نبئلئک عطام اولا و هامي سئرّلر، هامي علملري بئلم؛ اگر کامئل ائمانا مالئک اولام، اِله کي، داغلاري يرئندن ترپه‌دم، آمّا محبّتئم اولمايا، هچ زاد ديئلم.

13:3  اگر واريمين هاميسيني فاغيرلارا پايلاييب اونلاري دويورام، اگر بدنئمي يانديريلماغا وِرَم، آمّا محبّتئم اولمايا، منئم اوچون هچ بئر فايداسي يوخدور.

13:4  محبّت صبئرلئدئر، محبّت مهرئباندير، محبّت پاخيلّيق اتمز. محبّت کئبئرلَنمَز، مغرور اولماز،

13:5  بي​ادبلئک اتمز، اؤز منفعتئني آختارماز، تز حئرصلنمز، پئسلئکلرئن حسابيني ساخلاماز.

13:6  حاقسيزليقدان سوئنمز، لاکئن حقئقتدن شادلانار.

13:7  محبّت هر زادي اؤرتر، هر شيه ائنانار، هر شيه اومئد باغلار، هر زادا تاب گتئرر.

13:8  محبّت هچ واخت قورتارماز. لاکئن نبئلئک اولسا دا، قورتاراجاق؛ دئللر اولسا دا، ساکئت اولاجاق؛ علملر اولسا دا، آرادان گده​جک.

13:9  چونکي بئلدئيئمئز محدوددور، نبئلئيئمئز محدوددور.

13:10  آمّا کامئلئن گلدئيي زامان، محدود اولان آرتيق آرادان گده​جک.

13:11  اوشاق ائکن اوشاق کئمي دانيشيرديم، اوشاق کئمي آنلاييرديم، اوشاق کئمي دوشونوردوم. آمّا بويا-باشا چاتديغيم زامان اوشاقليغي ترک اتدئم.

13:12  چونکي ائندي بئز هر شيي اؤرتولو، آينادا گؤرن کئمي گؤروروک، لاکئن اوزبه​اوز گؤره​جه‌يئک. ائندي بئلدئيئم محدوددور، لاکئن او زامان درک ادئلدئيئم کئمي درک اده​جه‌يم.

13:13  ائندي اوچ شي باقئدئر: ائمان، اومئد، محبّت. آمّا محبّت بونلارين هاميسيندان بؤيوکدور.

Chapter 14

14:1  محبّتئن دالينجا قاچين، لاکئن روحاني عطالاري دا قيرتله ائسته‌يئن، خوصوصن نبئلئک عطاسيني.

14:2  چونکي کئم ياد بئر دئلده دانيشير، آداملارا يوخ، تارييا دانيشير. چونکي اونو هچ کئم باشا دوشمور. او، روحدا سئرّلر دانيشير.

14:3  آمّا نبئلئک ادن، آداملارا بئنا، تشوئق و تسلّي اوچون دانيشير.

14:4  ياد دئلده دانيشان آدام اؤزونو بئنا ادئر، آمّا نبئلئک ادن آدام کئلئساني بئنا ادئر.

14:5  آرزو ادئرم کي، سئز هامينيز دئللرده دانيشاسينيز، عللخوصوص بو کي، نبئلئک اِده​سئنئز. چونکي نبي، ياد دئللرده دانيشاندان افضلدئر، مگر ترجومه اتسئن کي، کئلئسا بئنا اولسون.

14:6  ائندي قارداشلار، اگر من سئزئن يانينيزا گلئب ياد دئللرده دانيشماغا باشلاسام، سئزه نه فايدا يتئره​رم، اگر وحي، معرئفت، نبئلئک، يا دا تعلئم واسئطه‌سئله دانيشماسام؟!

14:7  سَس ورن جانسيز شيلر، ائستر توتَک اولسون ائستر چنگ، اگر فرقلي سسلر چيخارتماسالار، توتَک و يا چنگله نه چالينديغيني کئم بئلر؟!

14:8  اگر شيپور قيري‌​موعيّن سَس چيخارتسا، دؤيوشه کئم حاضيرلاشار؟

14:9  الجه ده سئز اگر دئلئنئز​له باشا دوشولمه‌ين سؤزلر دانيشاسينيز، سئزئن نه ددئيئنئز نجه بئلئنر؟ اله بئل کي، هاوا ائله دانيشيبسينيز.

14:10  شوبهه​سئز کي، دونيادا بئر چوخ موختلئف دئللر وار و اونلاردان هچ بئري معناسيز ديئل.

14:11  بلجه اگر دئلئن معناسيني بئلمه‌سم، من دانيشان اوچون اجنبي اولورام، دانيشان دا منئم اوچون اجنبي اولور.

14:12  اله‌جه ده سئز، مادام کي، روحاني عطالاري قيرتله ائسته‌يئرسئنئز، کئلئساني بئنا ادن عطالاردا وارلي اولماغينيزي ائسته‌يئن.

14:13  بونا گؤره ده، ياد دئلده دانيشان آدام، ترجومه عطاسي اوچون دوعا اتسئن.

14:14  چونکي اگر من ياد بئر دئلده دوعا ادئرم، روحوم دوعا ادئر، لاکئن عاغليم بهره​سئز قالير.

14:15  بس نه اِتمه‌لي‌يم؟ هم روحلا دوعا اده​جه‌يم، هم ده عقلله. هم روحلا ائلاهي نغمه اوخوياجاغام، هم ده عقلله.

14:16  يوخسا اگر سن روحلا برکت ورئرسن، روحاني بئر عطاسي اولمايان آدام نجه سنئن شوکورلرئنه "آمئن" دئيه بئلر؟ چونکي سنئن ددئکلرئني باشا دوشمور.

14:17  البتّه سن ياخشي شوکور ادئرسن، آمّا بوندان، باشقا بئر آدام بئنا اولمور.

14:18  تارييا شوکور ادئرم کي، من سئزئن هامينيزدان چوخ دئللرده دانيشيرام.

14:19  آمّا کئلئسادا ياد بئر دئلده اون مئن سؤز دانيشماقدان، داها چوخ بونا جان آتيرام کي، عاغليملا بش سؤز دانيشيم و اؤزگه​لره تعلئم ورئم.

14:20  قارداشلار، عقلن اوشاق اولمايين. پئسلئکده اوشاق اولون، لاکئن عقلن بويو-باشلي!

14:21  شرئعتده يازيليب: رب ديئر: "اجنبئلرئن دئللري ائله، يادلارين دوداقلاري ائله بو خالقلا دانيشاجاغام، آمّا او زامان دا منه قولاق آسماياجاقلار."

14:22  بلجه دئللر ائمان گتئرنلر اوچون يوخ، ائمانسيزلار اوچون بئر علامتدئر. لاکئن نبئلئک ائمانسيزلار اوچون يوخ، ائمانلي​لار اوچوندور.

14:23  اگر بوتون کئلئسا بئر يره ييغيليب هامي ياد دئللرده دانيشسالار، و روحاني عطايا مالئک اولمايان يا دا ائمانسيز آداملار اورايا گئرسه​لر، دِمزلر کي، سئز دَلي‌سئنئز؟!

14:24  آمّا اگر هامي نبئلئک اتسه​لر، و اورايا ائمانسيز بئر آدام، يا دا روحاني عطايا مالئک اولمايان بئري گئرسه، هامينين طرفئندن ائلزام اولوب هامييا جاوابگو قالار؛

14:25  اوره​يئنين سئرّلري آشکار اولار و اوزو-اوسته دوشوب پرستئش اِدَر و اعلان اِدَر کي، تاري حقئقتن سئزئن آرانيزدادير.

14:26  بس ائندي نه، قارداشلار؟ بئر يره ييغيلديغينيز زامان هر بئرئنئزئن بئر مزمورو، بئر تعلئمي، بئر وحيي، بئر ياد دئلي، بئر ترجومه​سي وار، قويون هر شي بئنا اتمک اوچون اولسون.

14:27  اگر کئمسه ياد بئر دئلده دانيشير، ائکي يا دا لاپ چوخ اوچ آدام نؤوبه ائله دانيشسينلار، بئر نفر ده ترجومه اتسئن.

14:28  آمّا اگر ترجومه​چي يوخدور، قوي او آدام کئلئسادا ساکئت قالسين و آنجاق اؤزونه و تارييا دانيشسين.

14:29  قوي ائکي يا دا اوچ پيغمبر دانيشسين و اؤزگه​لر تفتئش اتسئنلر.

14:30  آمّا اگر اوتورانلاردان بئرئنه بئر وحي گلئر، قوي ائلک دانيشان آدام ساکئت قالسين.

14:31  چونکي سئز هامينيز، نؤوبه ائله نبئلئک اده​بئلرسئنئز کي، هامي تعلئم آلسين و هامي تشوئق اولونسون.

14:32  پيغمبرلرئن روحلاري دا پيغمبرلره تابع​دئرلر.

14:33  چونکي تاري قاريشيقليق تاريسي يوخ، آرامليق تاريسي‌دير، نجه کي، موقدّسلرئن بوتون کئلئساسيندا.

14:34  آروادلار کئلئسالاردا سوکوت اتسئنلر. چونکي صؤحبت اتمک اونلارا قدغن‌دير. اونلار شرئعتئن بويوردوغو کئمي تابع اولسونلار.

14:35  اگر بئر شي اؤيرنمک ائسته‌يئرلر، قوي اِوده اؤز اَرلرئندن سوروشسونلار. چونکي آروادا کئلئسادا صؤحبت اتمک عاييبدير.

14:36  مگر تارينين کلامي سئزدن چيخيب ياييلدي؟ و يا مگر آنجاق سئزه چاتدي؟!

14:37  اؤزونو پيغمبر و يا روحاني حساب ادن هر آدام آنلاسين کي، سئزه يازديقلاريم ربّئن امرلري‌دئر.

14:38  لاکئن کئم بونو نظره آلماسا، اؤزو ده نظره آلينماسين.

14:39  بلجه، قارداشلاريم، نبئلئک اتمه‌يي قيرتله ائسته‌يئن و ياد دئللرده دانيشانلارا دا مانع اولمايين.

14:40  لاکئن قويون هر شي موناسئب و ترتئبلي بئر شکئلده اولسون.

Chapter 15

15:1  قارداشلار، سئزه او ائنجئلي خاطيرلاديرام کي، موژده​سئني سئزه يتئردئم، سئز ده اونو قبول ادئب اوندا مؤحکم دايانيرسينيز

15:2  و اونون واسئطه‌سئله ده نئجات تاپيرسينيز، اگر سئزه وعظ اتدئيئم کلامي برک توتاسينيز. يوخسا بوش يره ائمان گتئرئبسئنئز.

15:3  چونکي هر شيدن اوّل آلديغيمي سئزه يتئردئم؛ يعني مسئح موقدّس يازيلارا گؤره بئزئم گوناهلاريميز اوچون اؤلدو،

15:4  باسديريلدي، و اوچونجو گونده موقدّس يازيلاردا اولان کئمي دئرئلدي.

15:5  و کئفايا، سونرا دا اون ائکئلره گؤروندو.

15:6  بوندان سونرا بش يوزدن آرتيق قارداشلارا بئر واختدا گؤروندو کي، اونلاردان چوخو ائندي ده ياشاييرلار. لاکئن بعضئلري گؤزلرئني حياتا يوموبلار.

15:7  سونراسي يعقوبا گؤروندو، سونرا دا بوتون حوارئلره.

15:8  هاميدان سونرا دا سقط دوغولان منه گؤروندو.

15:9  چونکي من حوارئلرئن لاپ کئچئيئيم و حواري چاغيريلماغا لايئق ديئلم. بو سببدن کي، تارينين کئلئساسينا عذاب ورئردئم.

15:10  لاکئن تارينين فيضي ائله هر نه‌يَم، اله اويام و اونون منه اولان فيضي عبث ديئلدي. آمّا من اونلارين هاميسيندان چوخ زحمت چکدئم. داها دوغروسو، من يوخ، تارينين منئمله اولان فيضي.

15:11  بلجه، ائستر من اولسايديم، ائستر اونلار، بئز بله وعظ ادئرئک، سئز ده بله ائمان گتئردئنئز.

15:12  ائندي اگر مسئح حاقّيندا وعظ اولونور کي، او، اؤلولردن دئرئلدي، نجه بس سئزلردن بعضئلري ديئر کي، اؤلولردن دئرئلمه يوخدور؟

15:13  آمّا اگر اؤلولردن دئرئلمه يوخدور، مسئح ده دئرئلمه‌يئب.

15:14  و اگر مسئح دئرئلمه‌يئب، اوندا بئزئم وعظئمئز بوشدور، سئزئن ائمانينيز دا بوشدور.

15:15  بوندان علاوه، بئز تاري حاقّيندا يالانچي شاهئد ده اولوروق، چونکي تارينين باره​سئنده شهادت وردئک کي، او، مسئحي اؤلولردن دئرئلتدي. حال بو کي، اگر اؤلولر دئرئلمئرلر، تاري اونو دا دئرئلتمه‌يئب.

15:16  چونکي اگر اؤلولر دئرئلمئرلر، مسئح ده دئرئلمه‌يئب.

15:17  و اگر مسئح دئرئلمه‌يئب، دمه‌لي ائمانينيز دَيَرسئزدئر؛ سئز حله ده اؤز گوناهلارينيزين ائچئنده​سئنئز.

15:18  اوندا مسئحده گؤزلرئني حياتا يومانلار دا هلاک اولوبلار.

15:19  اگر مسئحده اولان اومئدئمئز آنجاق بو حيات اوچوندور، بئز هامي آداملاردان داها چوخ يازيغيق.

15:20  آمّا ائندي مسئح اؤلولردن دئرئلئب و گؤزلرئني حياتا يومانلارين نؤوبري اولوب.

15:21  چونکي نجه اؤلوم بئر ائنسان واسئطه​‌سئله گلدي، اؤلولردن دئرئلمه ده بئر ائنسان واسئطه​‌سئله گلدي.

15:22  نجه کي، آدمده هامي اؤلور، مسئحده ده هامي دئرئلر.

15:23  لاکئن هر کس اؤز نؤوبه​سي ائله؛ اوّل مسئح، سونرا دا اونون گلئشئنده مسئحئنکي اولانلار.

15:24  اوندان سونرا دا آخير زامان اولور، او واخت مسئح پادشاهليغي آتا تارييا تسلئم ادئر و هر رياست، ائقتئدار و قودرتي آرادان آپارير.

15:25  چونکي او، گرک سلطنت اتسئن، او زاماناجاق کي، تاري اونون بوتون دوشمنلرئني اونون آياغي آلتينا قويوب.

15:26  يوخ اِدئله​جک آخيرينجي دوشمن ده اؤلومدور.

15:27  چونکي هر شيي اونون آياقلاري آلتيندا تابع اتدي. لاکئن او زامان کي، ديئر: "هر شي اونا تابع قويولوب"، آيديندير کي، هر شيي اونا تابع قويان موستثنادير.

15:28  هر شي اونا تابع قويولاندان سونرا، اوغولون اؤزو ده، هر شيي اونا تابع قويانا تابع اولاجاق کي، تاري هر شيده هر شي اولسون.

15:29  يوخسا اؤلولر اوچون تعمئد آلانلار نه اده​جکلر؟ اگر اؤلولر اصلا دئرئلمئرلر، اوندا اونلار اؤلولر اوچون نئيه تعمئد آليرلار؟

15:30  بئز نئيه هر ساعات خطرلره دوشوروک؟

15:31  قارداشلار، مسئح عئسادا سئزئن باره‌نئز​ده اولان فخرئمئن حاقّي اوچون هر گون اؤلورم.

15:32  اگر ائنساني نئيّتلر​له اِفِسوسدا وحشي حيوانلارلا ساواشديم، بونون منه نه خيئري وار؟ اگر اؤلولر دئرئلمئرلر، "گلئن يئيک و ائچک، چونکي صاباح اؤله​جه‌يئک."

15:33  آلدانمايين؛ "پئس يولداش ياخشي اخلاقي پوزار."

15:34  نجه لازيمدير، آييلين و گوناه اتمه​يئن. اوتانماغينيز اوچون ديئم کي، سئزلردن بعضئلري تاريني هچ تانيمير.

15:35  آمّا بئري دئير: "اؤلولر نجه دئرئلئرلر؟ و نه جور بدنله گلئرلر؟"

15:36  اي عاغيلسيز! سنئن سپدئيئن اؤلمه‌سه، دئرئلمز.

15:37  و سپنده، حاصئل اولاجاق بدني سپمئرسن، آنجاق لوت توخومو، ائستر بوغدا اولسون، ائستر اؤزگه بئر شي.

15:38  آمّا تاري او توخوما ائسته‌دئيي کئمي بدن ورئر؛ هر بئر توخوما اؤزونه مخصوص اولان بئر بدن ورئر.

15:39  بوتون جئسملر ده بئر جور ديئللر. ائنسانلارين جئسمي علاحئدّه، حيوانلارين جئسمي علاحئدّه، قوشلارين جئسمي علاحئدّه، باليقلارين جئسمي علاحئدّه.

15:40  سماوي بدنلر و دونيه‌وي بدنلر ده وار. آمّا سماوئلرئن شؤوکتي علاحئدّه، دونيه‌وئلرئنکي ده علاحئدّه.

15:41  گونون شؤوکتي علاحئدّه، آيين شؤوکتي علاحئدّه، اولدوزلارين شؤوکتي علاحئدّه​دئر؛ چونکي اولدوز دا اولدوزدان شؤوکتئنه گؤره فرقله‌نئر.

15:42  اؤلولرئن دئرئلمه‌سي ده بله​دئر؛ فانئلئکده اکئلئر، قيري​‌فانئلئکده دئرئلئر.

15:43  ذئلّتده اکئلئر، عئزّتده دئرئلئر. ضعئفلئکده اکئلئر، قودرتده دئرئلئر.

15:44  طبئعي بئر بدن اکئلئر، روحاني بئر بدن دئرئلئر. اگر طبئعي بئر بدن وار، روحاني بئر بدن ده وار.

15:45  بله ده يازيليب کي؛ "ائلک ائنسان اولان آدم ياشايان بئر جان اولدو." آخيرينجي آدم حيات ورن روح اولدو.

15:46  لاکئن روحاني اوّلئنجي ديئل، طبئعي اوّلئنجي​دئر، سونرا روحاني.

15:47  ائلک ائنسان يردن​دئر، تورپاقدان​دير. آمّا ائکئنجي ائنسان گؤيدندئر.

15:48  تورپاقدان اولان نجه​دئر، تورپاقدان اولانلار دا اِله​دئرلر. گؤيدن اولان نجه دئر، گؤيدن اولانلار دا اِله​دئرلر.

15:49  و بئز تورپاقدان حاصئل اولموش صورتي نجه گزدئرئرئک، گؤيدن اولانين دا صورتئني اِله گزدئره​جه‌يئک.

15:50  ائندي قارداشلار، سئزه بونو ديئم کي، جئسم و قان تارينين پادشاهليغيني مئراث آلا بئلمز؛ فاني اولان دا قيري‌فاني اولاني مئراث آلا بئلمز.

15:51  باخين، سئزه بئر سئرّ ديئرم، هاميميز گؤزلرئمئزي حياتا يومماياجاغيق، آمّا هاميميز ديئشئله​جه‌يئک؛

15:52  بئر آن ائچئنده، بئر گؤز قيرپيميندا، آخير شيپور چاليناندا. چونکي شيپور چاليناجاق و اؤلولر قيري​‌​فاني شکئلده دئرئله​جکلر و بئز ديئشئله‌جه‌يئک.

15:53  چونکي بو چوروين گرک چورولمه‌يني گيسئن و بو فاني گرک قيري​‌​فانئلئيي گيسئن.

15:54  بو چوروين چورولمه‌يئني گئيَن واختدا و بو فاني قيري‌​فانئلئيي گئيَن زاماندا او يازي يرئنه يتئشه​جک کي، "اؤلوم ظفرده اودولدو!

15:55  اي اؤلوم، هاني سنئن ظفرئن؟ اي اؤلوم، هاني سنئن سانجماغين؟"

15:56  اؤلومون سانجماغي گوناه و گوناهين قودرتي شرئعتدئر.

15:57  لاکئن تارييا شوکور اولسون کي، ربّئمئز عئسا مسئحئن واسئطه‌سئله بئزه ظفر ورئر

15:58  اونا گؤره سوگئلي قارداشلاريم، مؤحکم و ثابئت دورون و هر زامان ربّئن ائشئنده جوشون و بئلئن کي، ربّئن يولوندا چکدئيئنئز زحمت عبث ديئلدئر.

Chapter 16

16:1  موقدّسلر اوچون ائعانه ييغماق باره​ده، سئز ده قالاتئيا کئلئسالارينا سئفارئش اتدئيئم کئمي عمل ادئن.

16:2  هر هفته​نئن ائلک گونونده، هر بئرئنئز اؤز قازانجينا گؤره يانيندا بئر قدر پول ساخلاسين کي، من گلنده آرتيق پول ييغيلماسين.

16:3  اورايا يتئشدئيئمده سچدئيئنئز آداملاري مکتوبلار و هدئيه​لرئنئز​له اورشلئمه گؤنده‌ره​رم.

16:4  و اگر گتمک منه موناسئب اولسا، اونلار منئمله گدرلر.

16:5  سئزئن يانينيزا مقدونئيّه​دن کچنده گله​جه‌يم. چونکي مقدونئيّه​دن کچه​جه‌يم.

16:6  بلکه ده يانينيزدا بئر آز قالديم و يا قيشي اورادا کچئرتدئم کي، سئز مني گده​جه‌يئم يره يولا سالاسينيز.

16:7  چونکي ائندي ائسته‌مئرم سئزي اؤته​ري گؤروم. اگر رب ائجازه ورسه، بئر نچه مودّت يانينيزدا قالماق اومئدئنده​يم.

16:8  لاکئن اِفِسوسدا پنطئکاست بايرامينا قدر قالاجاغام.

16:9  چونکي منه تأثئرلي خئدمت اوچون گنئش بئر قاپي آچيليب و دوشمن چيخانلار دا چوخدورلار.

16:10  اگر تئموتاعوس يانينيزا گلسه، دئقّت ادئن کي، او، سئزئن آرانيزدا قورخوسوز اولسون. چونکي او دا منئم کئمي ربّئن ائشئني يرئنه يتئرئر.

16:11  بونا گؤره هچ کئم اونا حقارتله باخماسين. اونو سالاماتليقلا يولا سالين کي، منئم يانيما گلسئن. چونکي من قارداشلارلا برابر اونو گؤزله‌يئرم.

16:12  قارداشيميز اَپولّوسا گلئنجه، من اونو چوخ تشوئق اتدئم کي، قارداشلارلا برابر يانينيزا گلسئن. لاکئن او، اصلا ائسته‌مئردي کي، ائندي يانينيزا گلسئن. فورصت تاپاندا گله​جک.

16:13  آييق اولون، ائماندا ثابئت دورون، کئشي کئمي عمل ادئن و قووّتلي اولون.

16:14  قويون بوتون اتدئکلرئنئز محبّت ائچئنده اولسون.

16:15  ائندي قارداشلار، سئزه يالواريرام: سئز استئفاناسين عايئله​سئني تاني‌ييرسينيز کي، اونلار اَخايئه‌نئن ائلک ائمانلي​لاري‌ديرلار و اؤزلرئني موقدّسلرئن خئدمتئنه وقف ادئبلر.

16:16  سئز ده بله آداملارا و ائشده کؤمک ادن و زحمت چکن هر کسه تابع اولون.

16:17  استئفاناس، فورتوناتوس و اخئکوسون گلمه‌يئندن سوئنئرم. چونکي اونلار سئزئن يرئنئزي دولدورورلار.

16:18  اونلار منئم و سئزئن روحونوزو تزه​لندئرئبلر. بله آداملارا حؤرمت ادئن.

16:19  آسئيا ايالتئنئن کئلئسالاري سئزه سالام گؤنده‌رئرلر. اَکئلا و پرئسکا، اِولرئنده ييغيلان کئلئسا ائله برابر، سئزه ربده اورکدن سالام گؤنده‌رئرلر.

16:20  بوتون قارداشلار سئزه سالام گؤنده‌رئرلر. بئر​بئرئنئزي موقدّس اؤپوشله سالاملايين.

16:21  من پولوس بو سالامي اؤز اَلئمله يازيرام.

16:22  ربّي سِومه‌ين آداما لعنت اولسون. ربّئمئز، گل.

16:23  ربّ عئسانين فيضي سئزئنله اولسون.

16:24  مسئح عئسادا منئم محبّتئم سئزئن هامينيزلا اولسون. آمئن.