Kapingamarangi - I Corinthians

Chapter 1

1:1  Mai baahi o Paul dela ne-gahi go God i dono hiihai, belee hai tangada agoago-hagau ni Jesus Christ, mo mai baahi tadau duaahina go Sosthenes.

1:2  Ang-gi di nohongo-dabu a God i Corinth, mo ang-gi digau huogodoo ala guu-gahi belee hai nia dama dabuaahia a God, ala guu-hai nia dama ni Mee i-di nadau buni-anga gi Jesus Christ, mo nia daangada huogodoo ala e-noho i-nia gowaa huogodoo, ala e-daumaha ang-gi Jesus Christ, go di-nadau Dagi mo tadau Dagi.

1:3  God tadau Damana mo Jesus Christ tadau Dagi gi-dugu-adu gi goodou tumaalia mo-di noho i-di aumaalia.

1:4  Au e-danggee ang-gi God i-nia madagoaa huogodoo i goodou, i Mee dela ne-dugu-adu gi goodou tumaalia mai i Jesus Christ.

1:5  I di-godou buni-anga gi Christ, goodou gu-maluagina i-nia mee huogodoo, dalia di hai-agoago mo-di kabemee.

1:6  Di haga-modongoohia i-di hai o Christ gu-mau-dangihi i godou baahi,

1:7  ga-hidi-mai goodou, gaa-kae nia hagahumalia huogodoo mai God, i di-godou noho talitali di gila-mai tadau Dagi go Jesus Christ.

1:8  Go Mee dela e-daahi-maaloo goodou gaa-dae-loo gi-di hagaodi, bolo gi-de-gila-aga-hua dahi huaidu i godou baahi i-di Laangi o tadau Dagi Jesus Christ.

1:9  Gi-hagadagadagagee gi God, go di God manawa-dahi dela ne-gahi goodou gi-buni-anga gi dana Dama go Jesus Christ, tadau Dagi.

1:10  I-di ingoo o tadau Dagi go Jesus Christ, au e-dangi-adu hagamahi gi goodou huogodoo, ogu duaahina-nei, bolo goodou huogodoo gi-buni-anga gi telekai e-dahi, gi-hudee dumaalia gi tee-buni gi-gila-aga i godou baahi, gei gi-hagadaubuni i godou mehanga i-di hagamaanadu hua e-dahi mo-di hagabaubau e-dahi.

1:11  Au gu-iloo-eau mai baahi hunu gau i-di hale o Chloe, bolo goodou e-lagalagamaaloo i godou mehanga.

1:12  Au ga-helekai-adu beenei: Goodou e-helekai geegee, tangada e-helekai, “Au e-daudali a Paul”, tangada e-helekai, “Au e-daudali a Apollos”, tangada e-helekai, “Au e-daudali a Peter”, gei tangada e-helekai bolo ia e-daudalia a Christ.

1:13  Christ la-gu-waewae i-nia hagabuulinga! Ma go Paul dela ne-daudau i-di loobuu belee haga-mouli goodou? Goodou ne-babdais gi-di ingoo o Paul?

1:14  Au e-danggee ang-gi God, au digi babdais dagu dangada i goodou, i-daha mo Crispus mo Gaius.

1:15  Tangada e-mee di-helekai ai bolo goodou ne-babdais gi dogu ingoo.

1:16  (E-donu, au gu-babdais labelaa Stephanas mo digau o dono hale, gei au digi langahia bolo au gu-babdais labelaa dagu dangada i-golo.)

1:17  Christ hagalee ne-hagau-mai au belee babdais agu daangada. Mee ne-hagau-mai au belee agoago di Longo-Humalia, hagalee belee agoago mai i-di kabemee o-nia daangada, gi-de-haga-balumee-hua di mogobuna di loobuu o Christ.

1:18  Idimaa, nnelekai o-di made o Christ i-hongo di loobuu la di mee balumee i-baahi digau ala bolo e-nngala. Gei i-baahi gidaadou ala bolo e-hagamouli, nnelekai aanei la nia mogobuna-hua ni God.

1:19  Di Beebaa-Dabu e-helekai boloo, “Au e-hagahuaidu di iloo-mee o digau kabemee, gei Au e-dugu gi-daha di kabemee o digau ala e-iloo nia mee.”

1:20  Malaa, aahee digau kabemee? Be go digau ala gu-maalama? Be go digau ala e-dohu di haga-modongoohia-aga di iloo di mogobuna o henuailala? God gu-haga-modongoohia-aga bolo di kabemee o henuailala la-di balumee-hua!

1:21  Idimaa, mai i-dono iloo, God guu-hai nia daangada gi-deemee di-modongoohia Ia mai i-nadau iloo donu. God guu-hai bolo Ia e-haga-mouli-hua digau ala e-hagadonu di Longo-Humalia dela e-haga-balumee go digau huaidu.

1:22  Digau o Jew e-hiihai e-mmada gi-nia mogobuna ga-hagadonu-laa, gei digau o Greece e-halahala di kabemee.

1:23  Gei gimaadou e-agoago-hua i-di hai o Christ dela ne-daudau i-di loobuu. Di longo deenei la dela di mee e-hagawelewele huoloo ginai digau o Jew, gei digau tuadimee hogi e-haga-balumee di-maa.

1:24  Gei i-baahi digau ala guu-gahi go God, digau o Jew mo digau tuadimee, nia helekai aanei i-di hai o Christ la-go di mogobuna o God mo-di iloo-mee a God.

1:25  Idimaa, te-kabemee a God le koia e-kabemee i-di iloo tangada, gei di bagege o God le koia e-maaloo i-nia mahi o tangada.

1:26  Ogu duaahina-nei, goodou gi-langahia godou mouli i-di madagoaa a God ne-gahi-mai goodou: digau hua dulii i godou lodo nogo kabemee, be nogo mogobuna, be nogo aamua i-di hai o henuailala.

1:27  God gu-hili-aga digau dee-kabemee i henuailala, belee hagatee digau kabemee, gei gu-hili-aga digau paagege i henuailala, belee hagatee digau ala e-maaloo.

1:28  Gei Mee gu-hili-aga labelaa digau ala e-balumee i-di hai o henuailala, mo digau huaidu, mo digau hagaloale, belee hagahuaidu-ai digau hagalabagau.

1:29  Malaa, di mee deenei gu-modongoohia bolo ma deai tangada e-hagapuu i-mua o God ai.

1:30  Deelaa di mee a God ne-hila-adu ai gi goodou, bolo goodou e-hai nia dama ni-aana mai i-di godou buni-anga gi Jesus Christ. Gei God guu-hai a Christ di iloo-mee ni gidaadou, gei gidaadou guu-donu i-mua o God mai i Christ, gei guu-hai digau dabu ni God, gei gu-dagaloaha.

1:31  Di Beebaa-Dabu e-helekai, “Maa iai tangada bolo ia e-hagapuu i dahi mee, gi-hagapuu i-nia mee a Dimaadua ne-hai.”

Chapter 2

2:1  Ogu ihoo duaahina-nei, dogu gila-adu gi goodou la-ne-belee agoago-adu nia mee donu a God ala e-de-iloo nia daangada. Au digi agoago i-nia helekai llauehe mo kabemee.

2:2  Gei dogu madagoaa nogo i godou baahi, au gu-hagamaanadu bolo au ga-haga-de-langahia nia mee huogodoo, ga-hagamamaanadu-hua di hai a Jesus Christ gei e-donu go di-daudau o-Maa i-hongo di loobuu.

2:3  Au ne-dau-adu gi godou baahi, gei au nogo bagege, nogo bolebole huoloo i dogu madagu,

2:4  gei agu agoago mono helekai la-hagalee ne-hai i-di kabemee mo nnelekai haamanawa, gei ne-hai-adu i-di tonu mai di mogobuna o-di Hagataalunga o God.

2:5  Godou hagadonu la-hagalee ne-hidi-mai i-di kabemee o tangada, gei mai di mahi o God.

2:6  Au e-agoago nnelekai o-di iloo-mee ang-gi digau ala gu-maaloo duai nadau hagataalunga. Di iloo-mee deenei la hagalee ni henuailala be nia mogobuna ala e-dagi henuailala ala ga-hagalee.

2:7  Di iloo-mee dela e-agoago iei au, la go di iloo-mee ngala a God dela gu-hilihili go Mee i-mua henuailala ne-hai belee haga-madamada-ai gidaadou.

2:8  Deai dahi dagi o henuailala ne-modongoohia di-maa ai. Maa nei bolo digaula ne-iloo di-maa, digaula digi daudaulia di Tagi o-di madamada.

2:9  Gei di Beebaa-Dabu e-helekai, “Nia mee ala e-de-gidee, be digi longono-ai, be digi hagamaanadu-ina bolo e-mee di-hai, aalaa nia mee a God ne-hagatogomaalia gi digau huogodoo ala e-aloho i-de-Ia.”

2:10  Mai di Hagataalunga Dabu, God gu-hagamodongoohia mai gi gidaadou ana mee huogodoo ala e-de-iloo gidaadou. Di Hagataalunga le e-halahala nia mee huogodoo, mo nia llala te-modongoohia o nnadinga a God.

2:11  Ma go di hagataalunga i tadau lodo dela e-iloo gidaadou hagatau. I-di ala la-hua, go di Hagataalunga hua o God, dela e-iloo nia mee huogodoo a God.

2:12  Gidaadou hagalee ne-hai-mee gi-di hagataalunga o henuailala, gei ne-hai-mee gi-di Hagataalunga o God, dela ne-hagau-mai belee hai gidaadou gi-iloo nia mee huogodoo a God ne-dugu-mai gi gidaadou.

2:13  Malaa, gimaadou hagalee helekai i nnelekai ne-aago go di iloo-mee dangada, gei e-helekai i nnelekai ne-aago go di Hagataalunga, e-haga-modongoohia nia donu Hagataalunga ala e-tau-anga gi nnelekai Hagataalunga.

2:14  Tangada dela dono Hagataalunga ai, e-deemee di-hai-mee gi-nia wanga dehuia mai i-di Hagataalunga o God, mee e-de-iloo nia mee aanei, e-balumee hua ang-gi deia, idimaa tahidamee o-nia maa le e-hagamodongoohia hua go di Hagataalunga.

2:15  Tangada dela dono Hagataalunga i-golo, le e-mee di-hagiaga nia dahidamee o-nia mee huogodoo, gei deai tangada e-mee di-hagiaga a-mee ai.

2:16  Di Beebaa-Dabu e-helekai, “Koai dela e-iloo di maanadu o Dimaadua? Koai e-mee di-aago a-Mee?” Gei gimaadou gu-iloo nia maanadu a Christ.

Chapter 3

3:1  Ogu ihoo duaahina-nei, au digi helekai adu gi goodou be tangada e-helekai gi digau gu-iai nadau Hagataalunga, gei au ne-helekai be tangada ne-helekai gi digau henuailala, ala e-hai be nia dama-lligi nadau hagadonu Christ.

3:2  Au ne-haangai goodou gi-nia milugu, hagalee nia meegai hamaaloo, idimaa goodou digi togomaalia gi nia maa, gei dolomeenei, goodou digi togomaalia hua igolo gi nia maa,

3:3  idimaa, goodou e-mouli hua igolo i-di mouli o henuailala. Ma-ga-gila-aga tubua i godou mehanga, ga-hai-baahi ang-gi tangada-nei mo tangada-nei, nia mee aanei la hagalee haga-modongoohia bolo goodou digau ni henuailala, e-daudali nia hai o henuailala?

3:4  Tangada i goodou ga-helekai boloo, “Au e-daudali a Paul,” gei tangada i-golo e-helekai boloo, “Au e-daudali a Apollos” malaa, godou hangaahai la-go nnangaahai o digau henuailala!

3:5  Apollos la koai? Paul la koai? Gimaua nia daangada hua hai-hegau ni God ala ne-laha-mai goodou gi-lodo di hagadonu. Gimaua tei gii-hai dana duhongo-hegau dela ne-gaamai go Tagi bolo gi-heia.

3:6  Au e-haga-nonnono agu lii-laagau, gei Apollos e-haga-magalillili nia maa gi-nia wai, ma go God dela e-haga-tomo-aga nia laagau.

3:7  Tangada dela e-haga-nonnono, be tangada dela e-haga-magalillili di laagau deelaa, la-hagalee hagalabagau. Tangada e-hagalabagau la-deelaa go God, idimaa, go Mee dela e-haga-tomo-aga di laagau.

3:8  Tangada dela e-haga-nonnono mo tangada dela e-haga-magalillili, la-hagalee hai-geegee. Gei God gaa-hui meemaa gi-di hui dela e-tau-anga gi nau ngalua ala nogo hai.

3:9  Idimaa, gimaua la tagadau-ihoo hai-hegau ni God, goodou go di gowaa dogi-mee ni God, di hale a God.

3:10  Au gu-hai-hegau gi dogu duhongo-hegau dela ne-dugu-mai go God, gu-ngalua-iei au gadoo be tangada e-iloo di hau-hale, ne-haga-noho di hagamau o di-maa. Gei tuai dangada ga-haga-duu-aga dono hale i-hongo di hagamau deelaa. Tangada-nei mo tangada-nei i goodou gii-mmada gi-humalia i dana hau di hale.

3:11  Idimaa God guu-lawa di-haganoho a Jesus Christ bolo go Mee hua dela go di hagamau, di hagamau e-hagaduu-aga i-golo ai.

3:12  Hunu gau ga-haga-duu-aga nadau hale i-hongo di hagamau deenei, e-hai-hegau gi-nia goolo, be nia silber, be nia hadu hagalabagau. Hunu gau e-hai-hegau gi-nia laagau, be nia geinga, be nia lau-laagau mae.

3:13  Malaa, tahidamee o nnegau digau hau-hale ga-haga-modongoohia-aga i-di Laangi o Christ, idimaa, i-di laangi deelaa, di ahi e-haga-modongoohia-aga tahidamee nia ngalua o digau hau-hale.

3:14  Maa nia moomee o digau hau-hale la-ne-hau i-hongo di hagamau deenei, la-ga-hagalee wwele i-di ahi deelaa, digaula e-kae nadau hui.

3:15  Maa nia moomee o tangada ma-gaa-wwele, geia gu-luudi nia mee huogodoo. Gei mee ga-mouli be tangada dela ma-ga-ulu mai gi-daha mo di ahi deelaa.

3:16  Goodou digi iloo bolo goodou la di hale-daumaha ni God, gei di Hagataalunga o God le e-noho i godou lodo?!

3:17  Tangada ma-ga-oho di hale daumaha o God, gei God ga-oho a-mee, idimaa, di hale o God le e-dabuaahia, malaa ma go goodou ala go di hale daumaha a God.

3:18  Hudee halahalau-ina goodou. Maa tangada i goodou bolo ia tangada kabemee i henuailala-nei, geia gii-hai tangada dadaulia, gei dono kabemee la-gaa-donu.

3:19  Idimaa, nia mee ala bolo nia kabemee o henuailala nei, le e-balumee i-mua o God. Di Beebaa-Dabu e-helekai, “God ga-daahi digau kabemee i-lodo nadau balu kabemee.”

3:20  Di Beebaa-Dabu gu-helekai labelaa, “Dimaadua e-iloo-Ia bolo nia hagamaanadu o digau kabemee la ono hadinga ai.”

3:21  Deenei-laa, hudee hagaamu-ina nia mee tangada ala e-mee di-hai! Nia mee aanei huogodoo la ni goodou:

3:22  Paul, Apollos mo Peter, henuailala-nei, di mouli mo-di made, di madagoaa dolomeenei mo-di madagoaa ga-dau-mai, nia mee aanei huogodoo ni goodou.

3:23  Gei goodou nia dama ni Christ, gei Christ ni God.

Chapter 4

4:1  Goodou duguina gimaadou be digau hai-hegau ni Christ, ala e-hai-mee gi-nia agoago nngala a God.

4:2  Deenei di mee humalia e-hai gii-hai go digau hai-hegau: digaula e-hai gi-manawa-dahi ang-gi nadau dagi.

4:3  Au e-de-hei-eau maa goodou be di gowaa hai gabunga ga-hagi-aga au, gei au hogi hagalee hagi-aga au.

4:4  Dagu maanadu le e-madammaa, gei di mee deenei hagalee hagamodongoohia bolo au ogu huaidu ai, go Dimaadua hua dela e-hagi-aga au.

4:5  Malaa, goodou hudee hagi-aga-ina tangada i-mua di madagoaa donu o-di hagi-aga. Di madagoaa o Tagi ma-ga-hanimoi, deelaa di madagoaa e-huge nia mee huogodoo ala e-nngala i-lodo di bouli, mo-di haga-modongoohia-aga nia hagamaanadu nngala ala i-lodo nia daangada. Deelaa hogi di madagoaa o tangada-nei mo tangada-nei e-kae dono hagaamu mai baahi o God.

4:6  Ogu duaahina-nei, gimaua mo Apollos gu-hai-hegau i-nia mee aanei bolo gi-iloo goodou tadinga nia helekai aanei: “Daudalia nnaganoho ala e-donu.” Goodou hudee hilihili dangada, bolo ga-hagahumalia tangada e-dahi, ge e-hagahuaidu tangada dela i-golo.

4:7  Ma koai ne-hai goe gi-aamua i digau ala i-golo? Ma hagalee go God dela ne-gowadu gi-di-goe nia mee huogodoo? Goe e-mee di-hagapuu gi-nia mee ala ne-gowadu dehuia behee?

4:8  Goodou gu-hai-mee gi godou mee ala nogo hiihai ginai? Goodou gu-maluagina? Goodou guu-hai nia king, ma e-aha maa gimaadou digi hai nia king? Au bolo goodou gii-hai nia king donu, gii-mee labelaa gimaadou di-hai nia king dalia goodou!

4:9  Au e-hagamaanadu bolo God guu-dugu gimaadou digau agoago-hagau gi-mugi-muli loo, gadoo be digau gu-hagahuaidu belee daaligi gii-mmade i-mua nia daangada, belee hai di mee haga-mmada i-mua digau di-langi mo henuailala huogodoo.

4:10  Nia daangada bolo gimaadou digau gu-dadaulia idimaa, go Christ, gei goodou digau kabemee i-baahi o Christ! Gimaadou digau paagege, gei goodou e-maaloo! Gimaadou nia balu-daangada hua, gei goodou digau hagalabagau!

4:11  Gaa-dae-mai gi dolomeenei, gei gimaadou e-hihiigai gei e-hieinu, e-gahu i-nia goloo mahaahaa, e-dadaaligi, madau gowaa e-noho gimaadou ai.

4:12  Gimaadou e-ngalua hagamahi gi madau lima ge e-duadua. Di madagoaa gimaadou ma-ga-hagahuaidu, gei gimaadou e-hagahumalia digaula. Digaula ma-ga-dadaaligi gimaadou, gei gimaadou e-hagakono madau manawa.

4:13  Gimaadou ma-ga-hagatee, gei gimaadou e-helekai humalia gi digaula. Dangi-nei gei gimaadou guu-hai gadoo be tagabae-geinga dela koia e-huaidu i-hongo henuailala, mo nia mee huogodoo o-nia daangada ala e-ginagina-ai.

4:14  Au e-hihi-adu nia mee aanei, hagalee bolo e-haga-langaadia goodou. Au e-hiihai-hua e-aago goodou be agu dama hagaaloho.

4:15  Ma e-aha maa goodou godou gau madangaholu mana-(10,000) e-madamada humalia godou mouli ang gi Christ, di-godou damana le e-dahi hua. Idimaa i-lodo godou mouli buni-anga gi Jesus Christ, au guu-hai di-godou damana i dagu dugu-adu di Longo-Humalia.

4:16  Deenei-laa, au e-dangi-adu gi goodou bolo goodou gi-kawe i-di-au.

4:17  I-di hadinga deenei, au e-hagau-adu a Timothy gi godou baahi. Mee go dagu dama hagaaloho, gei e-manawa-dahi gi Christ. Go mee dela ga-haga-langahia-adu gi goodou dogu ala mouli buni-anga gi Jesus Christ dela e-hai be agu agoago i-lodo nia nohongo-dabu huogodoo.

4:18  Hunu gau i godou baahi guu-hai digau hagamuamua, idimaa goodou gu-hagamaanadu bolo au e-hagalee gila-adu.

4:19  Maa Dimaadua ga-hiihai, gei au ga-limalima dogu hanadu, e-halahala be ma nia mogobuna-aha, ala e-hai-mee ginai digaula, mo nia helekai digaula ala e-helekai-ai.

4:20  Idimaa, Teenua King o God la-hagalee go nnelekai, gei go nia mogobuna maaloo.

4:21  Dehee di-godou mee dela e-hiihai ginai? Au ne-belee hanadu gi goodou mo dagu mee daaligi-dangada, be hanadu i-di hagataalunga o-di aloho mo-di hila-gi-lala?

Chapter 5

5:1  Di longo e-helekai bolo goodou e-mouli haihai noo i-di godou mouli hiihai mouli be-di manu, di hagadilinga mouli dela e-hagalee gila-aga i-baahi nia daangada, ma e-aha maa digaula le e-noho i-lodo di bouli: Taane e-kii i-baahi di lodo o dono damana!

5:2  Malaa e-hai behee, goodou e-mee di-hagapuu? Goodou hagalee ne-belee lodo huaidu, gei tangada dela e-mouli beenei la hagalee ne-belee hagabagi gi-daha mo goodou, gei hagalee buni ginai?

5:3  Ma e-aha maa dogu huaidina le e-mogowaa-loo i goodou, au i godou baahi i-di hagataalunga. Au nei bolo e-noho-hua i godou baahi, au gu-hagiaga tangada ne-hai di huaidu deelaa.

5:4  Godou madagoaa ala ma-ga-mmuimmui gi-di gowaa e-dahi i-di ingoo tadau Dagi go Jesus, gei au e-madalia goodou i dogu hagataalunga, mai di mogobuna o tadau Dagi go Jesus dela e-madalia gidaadou,

5:5  goodou wanga-ina tangada deenei gi Setan, dono huaidina ga-hunahuna gi-daha, gii-mee dono hagataalunga gi-mouli i-di Laangi o tadau Dagi.

5:6  E-hai-gee go di-godou hagamuamua. Goodou e-iloo telekai boloo, “Nia mee ‘yeast’ dulii-loo e-mee di hai di haga-munga palaawaa gi-haga-hula.”

5:7  Dawaa gi-daha nia ‘yeast’ pobo o-nia huaidu gi-madammaa goodou. Goodou gaa-hai be-di palaawaa hoou ono ‘yeast’ ai, be dagu iloo bolo goodou e-madammaa. Idimaa Tagamiami o-di Pasoobaa la-gu-togomaalia, idimaa Christ go tadau dama-siibi o-di Pasoobaa gu-tigidaumaha.

5:8  Deenei-laa, gidaadou gaa-budu tadau Hagamiami Pasoobaa, hagalee ne-hai gi-nia palaawaa ne-hagatanga gi-nia ‘yeast’ pobo, nia ‘yeast’ o-di huaidu mo nia haihai milimilia, gei ne-hai gi-nia palaawaa ala digi unugia gi-nia ‘yeast’, nia palaawaa ala e-madammaa gei e-donu.

5:9  I-lodo dagu lede dela ne-hihi-adu gi goodou, au ne-helekai bolo gi-hudee hai-hoo gi digau hai mee huaidu.

5:10  Au hagalee helekai i digau bouli ala e-haihai nia mee huaidu, hagagailaa, gaiaa, be daumaha ang-gi nia balu-god. Maa goodou e-hiihai e-hagapaa gi-daha mo digaula, goodou e-hai loo gi-tanga gi-daha mo henuailala.

5:11  Malaa, dolomeenei, au e-helekai i-di hai o tangada dela bolo ia tuaahina ni goodou, gei mee e-mouli huaidu be-di manu, hagagailaa, daumaha ang-gi nia balu-god, kai-tilikai, hiigeina tagaao, gaiaa. Goodou hudee buni-anga gi mee ge hudee miami i-baahi o mee.

5:12  Ogu donu ai e-hagi-aga digau ala i-tua di nohongo-dabu, go God hua dela e-hagi-aga digaula. Malaa goodou hagalee belee hagi-aga digau o di-godou nohongo-dabu? Be di hai o-di Beebaa-Dabu dela e-helekai boloo, “Goodou gi-hudua gi-daha tangada huaidu dela i godou baahi.”

5:13  Ogu donu ai e-hagi-aga digau ala i-tua di nohongo-dabu, go God hua dela e-hagi-aga digaula. Malaa goodou hagalee belee hagi-aga digau o di-godou nohongo-dabu? Be di hai o-di Beebaa-Dabu dela e-helekai boloo, “Goodou gi-hudua gi-daha tangada huaidu dela i godou baahi.”

Chapter 6

6:1  Maa tangada bolo ia e-halahala ono donu i-baahi dono duaahina dama a Christ, e-aha dela e-hana loo e-dau i-di gowaa hai-gabunga o digau bouli, de-ga-halahala-hua ono donu gi-baahi nia dama a God?

6:2  Goodou e-de-iloo bolo nia daangada a God ga-hagi-aga henuailala? Maa goodou ne belee hagi-aga henuailala, malaa goodou hagalee gaa-mee di-hagi-aga nia mee hagalligi?

6:3  Goodou e-de-iloo bolo gidaadou ga-hagi-aga digau di-langi? Ma e-hai beenei, gidaadou e-mee-hua di-hagi-aga nia mee o-di mouli-nei.

6:4  Maa nia mee beelaa ga-kila-aga, goodou e-mee di-wanga nia gabunga aanei e-hagamodu go digau ala hagalee dau i-lodo di nohongo-dabu?!

6:5  Haga-langaadia dangada! Ma tangada kabemee i godou lodo ai dela e-mee di-hagahumalia di lagamaaloo mehanga nia dama a Christ?

6:6  Gei dolomeenei, tama a Christ e-kae dono duaahina gi-di gowaa hai-gabunga, e-gabunga i-baahi digau hagalee hagadonu.

6:7  Maa goodou ga-halahala godou donu i godou mehanga, e-haga-modongoohia-aga bolo di hala i godou mehanga. Ma hagalee e-humalia adu gi goodou, maa goodou ga-diiagi-hua godou donu, ga-haga-balumee? Ma hagalee e-humalia-adu gi goodou maa tangada ma-ga-gaiaa goodou?

6:8  Gei deeai, goodou e-haihai-hua nia mee hala i godou mehanga, goodou e-gaiaa i godou mehanga, e-gaiaa labelaa nia dama a Christ!

6:9  Goodou e-de-iloo bolo digau huaidu le e-deemee di hai-mee gi Teenua King o God? Goodou hudee bida halahalau-ina goodou: digau ala e-hai be-di manu, be e-daumaha ang-gi nia balu-god, be e-manawa hai be-di manu, be e-hai di huaidu taane gi taane,

6:10  be e-gaiaa, be e-hagagailaa gi-nia goloo, be e-hiigeina tagaao, be e-hai kai-tilikai, be e-lobodi-mee, digau huogodoo aanei hagalee-loo e-hai-mee gi Teenua King o God.

6:11  Hunu gau i goodou nogo hai be digau aanei i-mua, gei dolomeenei, gei goodou gu-madammaa gi-daha mo godou huaidu, gu-hagadabu ang-gi God, gei guu-donu i-baahi o God i-di ingoo o tadau Dagi go Jesus Christ mo-di Hagataalunga o tadau God.

6:12  Tangada ga-helekai, “Gu-dumaalia-mai gi-heia di-ingoo-hua di-mee.” Uaa, malaa nia mee huogodoo la-hagalee humalia-adu gi-di-goe. Au e-mee di-helekai bolo au gu-dumaalia ginai gi-heia di-ingoo-hua di-mee, gei au hagalee dumaalia gi dahi mee gi-heia au di hege ni di-maa.

6:13  Gei tangada e-mee di helekai labelaa, “Nia meegai la anga-hua gi tinae, gei tinae la anga-hua gi nia meegai.” E-donu, malaa, God ga-hagalawa nia mee e-lua aanei. Tuaidina la hagalee belee hai-hegau gi-di mouli hai be-di manu, gei belee hai-hegau gi Tagi, gei Tagi e-madamada humalia i tuaidina.

6:14  God ne-haga-mouli-aga Tagi mai i-di made, gei go Mee ga-haga-mouli-aga gidaadou labelaa gi ono mogobuna.

6:15  Goodou e-iloo bolo godou huaidina la nia manga ni tuaidina o Christ? Malaa, au e-mee di-kae di baahi tuaidina o Christ ga-hagapuni gi tuaidina o-di ahina huihui dono huaidina! Deeai! E-deemee-loo!

6:16  Goodou e-de-iloo bolo taane ma-ga-hagabuni dono huaidina gi tuaidina o-di ahina huihui dono huaidina, la-gaa-hai tuaidina hua e-dahi? Di Beebaa-Dabu e-helekai madammaa, “Meemaa dogolua guu-hai tuaidina hua e-dahi.”

6:17  Gei tangada dela e-hagabuni ang-gi Tagi, geia gu-madalia a-Mee guu-hai di hagataalunga hua e-dahi.

6:18  Goodou haga-mogowaa-ina goodou gi-daha mo-di haihai be-di manu. Nia huaidu huogodoo ala e-hai go tangada, le e-hai-hua laa-daha mo tuaidina, gei tangada dela e-hai di huaidu mouli be-di manu, ia e-hai-hua di huaidu ang-gi dono huaidina.

6:19  Goe e-de-iloo bolo do huaidina la di hale-daumaha ni-di Hagataalunga-Dabu dela e-noho i oo lodo, ne-gowadu go God gi-di-goe? Goodou hagalee ni godou huaidina, goodou ni God.

6:20  Go Mee dela ne-hui goodou gi-di hui damanaiee. Deenei-laa, goodou gi-hai-hegau gi godou huaidina, e-haga-madamada-ai God.

Chapter 7

7:1  Aanei agu helekai gi godou lede: Ma e-humalia go taane ma-ga-hagalee hai dono lodo.

7:2  Idimaa nia hangaahai huaidu ala e-gila-aga dolomeenei, taane le e-humalia hua di hai dono lodo, di ahina gi-heia dono lodo labelaa.

7:3  Taane gi-haga-gila-aga-ina dono duhongo-hegau ang-gi dono lodo, gei di ahina gi-heia labelaa beelaa gi dono lodo.

7:4  Di ahina hai-lodo hagalee bida dagi dono huaidina, go dono lodo e-dagi. Dela gadoo taane hai-lodo hagalee bida dagi dono huaidina, go dono lodo e-dagi.

7:5  Taga-hai-lodo gi-hudee dagalili nau huaidina i-di hiihai o taga-hai-lodo, go di-maa hua be meemaa guu-buni ngaadahi e-hagamolooloo, e-dalodalo i tama-madagoaa, nomuli, gei meemaa guu-mee di-haga-gila-aga di hiihai o taga-hai-lodo, bolo gi-de-paagege-hua ginaua gaa-too gi-lodo di hagamada o Setan.

7:6  Deenei la-hagalee taganoho adu gi goodou, nia helekai hua aago.

7:7  Au bolo goodou huogodoo gii-hai be au, malaa God guu-wanga nnagadilinga kisakis gi nia daangada, tangada-nei dana kisakis duhongo hegau, tangada-nei dana kisakis duhongo hegau.

7:8  Ang-gi digau ala digi hai nadau lodo mo digau guu-mmade nadau lodo, au e-helekai boloo: Ma koia e-humalia di-noho-hua be au, dogu lodo ai.

7:9  Maa digaula e-deemee di hagakono, digaula gii-hai nadau lodo, idimaa, di hai-lodo la-koia e-humalia i-di noho i-lodo di hiihai wele.

7:10  Ang-gi digau ala guu-lawa di-hai nadau lodo, taganoho i-golo, hagalee taganoho ni-aagu, gei taganoho mai baahi o Tagi: Di ahina hai-lodo gi-hudee diagia dono lodo.

7:11  Maa di ahina gaa-hudu gi-daha dono lodo, geia e-deemee di hai labelaa dono huai lodo, e-hai eia gii-donu i-mua dono lodo. Taane hai-lodo e-hagalee hai loo gi-diagia dono lodo.

7:12  Gei ang-gi digau ala i-golo, deenei dagu haganoho, taganoho ni-aagu, hagalee ni Tagi: maa taane i-nia dama a Christ guu-lodo gi di ahina hagalee hagadonu, gei di ahina deelaa la-gu-hagababa bolo ia gaa-lodo gi taane i-di waalooloo o dono mouli, gei taane deelaa gi-hudee diagia a-mee.

7:13  Maa di ahina dama a Christ guu-lodo gi taane hagalee hagadonu, gei taane deelaa la-gu-hagababa bolo ia e-lodo gi di ahina deelaa i-di waalooloo o dono mouli, gei di ahina gi-hudee diagia taane deelaa.

7:14  Taane dono hagadonu ai, la-guu-dabu i dono hai-lodo ang-gi di ahina hagadonu, gei di ahina dela dono hagadonu ai, la-guu-dabu labelaa, i mee dela guu-hai lodo ang-gi taane hagadonu. Ma-ga-hai beelaa, nia dama meemaa e-dabu i-baahi o God. Gei di-maa ga-hagalee hai beelaa, nia dama meemaa e-hai be nia dama ni di bouli.

7:15  Maa tangada hagalee hagadonu ga-diiagi dono lodo, heia a-mee gii-hana. Taane be di ahina dela gu-hagadonu le hagalee dau gi-di mee beenei. God ne-gahi-mai gidaadou gi-mouli noho manawa lamalia.

7:16  Di ahina dama a Christ, goe e-iloo di-aha bolo goe hagalee haga-mouli doo lodo? Goe go taane dama a Christ, goe e-iloo di-aha bolo goe hagalee haga-mouli doo lodo?

7:17  Tangada-nei mo tangada-nei gi-mouli-hua be di kisakis dumaalia a God ang-gi deia, ge gi-mouli-hua be dono mouli i dono madagoaa dela ne-gahi go God. Deenei taganoho dela e-agoago ko-au i-lodo nia nohongo-dabu huogodoo.

7:18  Maa taane ne-sirkumsais guu-kae di gahigahi a God, geia gi hudee hagamada e-daa gi-daha nia maaka o-di sirkumsais; maa taane digi sirkumsais guu-kae di gahigahi a God, gei mee gi hudee sirkumsais-ina eia.

7:19  Maa taane gu-sirkumsais be digi sirkumsais la dono hadinga ai. Di mee dono hadinga la-go di haga-gila-aga nnaganoho a God.

7:20  Tangada-nei mo tangada-nei gii-noho-hua beelaa be dono mouli i dono madagoaa ne-gahi go God.

7:21  Goe nogo hai di hege i do madagoaa ne-gahi-mai go God? E-humalia, goe hudee manawa-gee. Maa goe gu iai do madagoaa humalia e-dagaloaha, e-humalia, hai hegau ginai.

7:22  Di hege ma-gaa-gahi go Tagi, la-gu-dagaloaha i-baahi o Tagi, dela gadoo tangada dagaloaha ma-ga-gahi-mai go Christ, mee guu-hai di hege ni Christ.

7:23  God guu-lawa di-hui goodou gi-di hui aamua, malaa goodou gi-hudee hege gi-nia daangada.

7:24  Ogu duaahina-nei, tangada-nei mo tangada-nei gii-noho-hua beelaa i-lodo dono mouli buni-anga gi God, gadoo be dono mouli i dono madagoaa ne-gahi go God.

7:25  Deenei di hai o digau digi hai nadau lodo, dagu haganoho mai i-baahi o Tagi ai, gei deenei la-di hagamaanadu-hua ni-aagu ang-gi digau beenei, idimaa, au tangada e-mee di-hagadonu go goodou mai i tumaalia o Tagi.

7:26  Deenei dagu hagamaanadu: idimaa di haingadaa o lodo di madagoaa dolomeenei, ma koia e-humalia maa goodou gaa-noho-hua be goodou e-noho dolomeenei.

7:27  Goe do lodo-ahina i-golo hudee hudua a-mee gi-daha. Goe digi hai doo lodo, hudee hai doo lodo.

7:28  Maa goe gaa-hai doo lodo, la dono huaidu ai. Maa di ahina gaa-hai dono lodo, la dono huaidu ai. Gei digau hai-lodo gaa-tale gi-nia haingadaa i-lodo di mouli deenei, gei au bolo nia hagadilinga haingadaa beenei, la-hagalee hai gii-tale-adu gi goodou.

7:29  Ogu ihoo duaahina-nei, deenei dagu mee e-hiihai e-helekai-iei au adu gi goodou: di madagoaa gu-bodobodo-loo, deenei di mee dela e-humalia bolo nia daane ala guu-hai nadau lodo, la-gi-mouli be digau nadau lodo ai.

7:30  Digau ala e-tangitangi, la-gii-hai be digau hagalee lodo-huaidu. Digau ala e-tenetene, la-gii-hai be digau nadau tene ai. Digau ala e-hui nadau goloo, la-gii-hai bolo nadau mee ai.

7:31  Digau ala e-hai-hegau gi-nia goloo o henuailala, la-hudee hai bolo ne-bau-hua mo nia maa, idimaa, nia mee o henuailala-nei le e-limalima hua dono hagalee.

7:32  Au e-hiihai bolo goodou gi-hudee hagamaanadu-ina nia haga-daadaamee. Tangada dela dono lodo ai, le e-hagabaubau-hua dana hai dela e-hai nnegau a Tagi, idimaa, mee e-hiihai e-haga-tenetene di manawa o Tagi.

7:33  Gei tangada dela guu-hai dono lodo, le e-hagabaubau nia mee o henuailala, be dehee dana hai dela e-mee di-haga-tenetene-ai dono lodo.

7:34  Deenei-laa, i-lodo-hua ana hagamaanadu la-gu-manga-lua. Di ahina be go tama-ahina madammaa le e-hagabaubau-hua nia mee o Tagi, idimaa, mee e-hiihai huoloo bolo dono huaidina mo dono hagataalunga le e-hagadabu ang-gi Tagi. Gei di ahina guu-hai dono lodo, le e-daadaamee gi-nia mee o henuailala, idimaa, mee e-hiihai e-haga-tenetene dono lodo.

7:35  Au e-helekai nia mee aanei, idimaa, au e-hiihai belee hagamaamaa goodou. Au hagalee bule goodou. Au e-hiihai bolo goodou gi-heia nia mee ala e-humalia mo nia mee ala e-donu, gei goodou gaa-hai hege ang-gi Tagi i-di manawa madammaa, gei e-odi-anga.

7:36  Maa taane mo-di ahina gu-hagababa bolo e-haga-hai-lodo, nomuli gei meemaa gu-hagamaanadu bolo ginaua hagalee noho, gei di ahina le e-mouli humalia i-lodo nia ngadau aalaa, gei taane gu-hiihai huoloo bolo e-lodo gi mee, taane le e-hai gi-hagagila dono hiihai. Deenei la hagalee di mee hala. Meemaa belee haga-hai-lodo.

7:37  Maa taane ga-hagamaanadu hai-donu, ga hagalee hono go dahi maanadu, e-hagamaanadu madammaa bolo ia e-hagalee hai-lodo gi-di tama-ahina deelaa, taane deenei la-guu-hai di mee hai-donu.

7:38  Deenei-laa, taane ma-gaa-hai dono lodo, le e-humalia-hua, gei taane dela bolo ia hagalee hai dono lodo, la-koia e-humalia.

7:39  Di ahina guu-hai dono lodo e-deemee di hai labelaa dono huai lodo maa dono lodo-donu le e-mouli hua igolo. Maa dono lodo la-guu-made, geia guu-mee-hua di-hai dono lodo gi taane dela e-hiihai gineia, malaa gii-hai di tama ni Christ.

7:40  Mee koia ga-tenetene ma-gaa-hai bolo ia e-noho-hua beelaa, hagalee hai dono lodo. Deenei di hai o dagu hagamaanadu, gei au e-hagadagadagagee bolo ma go di Hagataalunga o God dela ne-haga-honu au gi-nia mee aanei.

Chapter 8

8:1  Deenei di agoago i-nia meegai ala ne-tigidaumaha ang-gi nia balu-god: E-donu bolo gidaadou huogodoo e-iloo nia mee. Di iloo e-hai gidaadou gi-maanadu bolo gidaadou digau hagalabagau, gei di aloho e-haga-maaloo-aga.

8:2  Tangada dela bolo ia gu-iloo nia mee, ia digi iloo nia mee ala belee hai gi-iloo-ia.

8:3  Gei tangada dela e-aloho i God, deelaa tangada a God e-iloo-ai.

8:4  Malaa, di gai o-nia meegai ala e-tigidaumaha ang-gi nia balu-god, gidaadou gu-iloo bolo di balu-god la-di balu mee ni henuailala, gei gidaadou gu-iloo bolo ma di God hua-e-dahi.

8:5  Ma e-aha maa nia god e-logo i-di langi be i henuailala e-haga-ingoo bolo nia “god” mono dagi,

8:6  gei tadau God la-di God hua-e-dahi, go Tamana dela ne-hai nia mee huogodoo, gei dela hogi e-mouli ginai gidaadou. Gei Tagi hua e-dahi, go Jesus Christ. Nia mee huogodoo ne-hai mai i Mee, gei dela hogi gidaadou e-mouli mai i Mee.

8:7  Hagalee huogodoo e-iloo di tonu deenei. Hunu daangada gu-hoohoo gi nia balu-god, delaa-laa, di madagoaa digaula ma-gaa-gai nia meegai beenei, digaula e-maanadu bolo ginaadou ne-tigidaumaha gi-di balu-god, idimaa nadau hagamaanadu le e-paagege, digaula e-hai bolo ginaadou gu-hagamilimilia go nia meegai.

8:8  Nia meegai le hagalee hagamaaloo tadau buni-anga gi God. Gidaadou e-hagalee kili gi-daha tadau mee maa gidaadou ga hagalee miami, gei e-hagalee kae tadau mee maa gidaadou ga-miami.

8:9  Pula i godou hangaahai, godou hegau dagaloaha gi hudee heia digau paagege gii-too gi-lodo di huaidu.

8:10  Maa tangada dela e-bagege dono hagadonu i-nia mee aanei, ga-mmada-adu gi goodou ala gu-maalama e-miamiami i-lodo di hale daumaha balu-god, malaa, dono gidee di-mee deenei, la-hagalee gaa-hai a mee gi-hiihai di-gai nia meegai ala gu-tigidaumaha ang-gi nia balu-god?

8:11  Malaa, di-godou duaahina bagege dono hagadonu dela ne-made ginai a Christ, la-gaa-made, ne-hidi-mai i godou iloo mee.

8:12  Di hai deenei, goodou guu-hai di huaidu ang-gi Christ i-di godou hai di huaidu ang-gi godou duaahina, mo-di haga-huaidu nia manawa o digau paagege nadau hagadonu.

8:13  Malaa, maa e-donu bolo ma go agu meegai e-hidi dogu duaahina gaa-doo gi-lodo di huaidu, malaa, au ga-hagalee gai nia goneiga labelaa, gi-dee-doo dogu duaahina gi-lodo di huaidu.

Chapter 9

9:1  Au hagalee tangada moholo? Au hagalee tangada agoago-hagau? Au digi mmada gi Jesus tadau Dagi? Goodou hagalee go nia huwa o agu hegau ang-gi Tagi?

9:2  Ma e-aha maa nia daangada e-hagalee hai bolo au tangada agoago-hagau, gei goodou e-hai bolo au tangada agoago-hagau donu, idimaa, godou mouli buni-anga gi Tagi e-haga-modongoohia-aga agu hegau dangada agoago-hagau.

9:3  Deenei dagu hai e-duuli au gi-daha, i-di madagoaa nia daangada ma-ga-helekai hai-baahi mai.

9:4  Ma e-donu bolo ogu donu ai di-miami ge e-inu?

9:5  Ma e-hagalee ogu donu ai bolo au e-daudali di hai digau agoago hagau ala i-golo mo nia duaahina o Tagi mo Peter i dagu lahi di ahina hai-lodo dama a Christ dalia au i dogu hana e-hagadele di Longo-Humalia?

9:6  Be go gimaua mo Barnabas la hua ala e-hai-loo gi-ngalua gi mau mouli?

9:7  Tangada-dauwa koai dela gaa-bida hui-hua dono ngalua i tauwa? Tangada dogi-waini koai dela hagalee gai nia huwa o dana gowaa dogi-waini? Tangada hagaloohi-siibi koai dela hagalee e-inu nia weuu o ana siibi?

9:8  Ma hagalee bolo aanei hua nia-ala-mee ala belee hai-hegau-iei au. Nnaganoho le e-helekai labelaa i-nia maa.

9:9  Gidaadou guu-dau i Nnaganoho Moses: “Goe hudee noodia di ngudu o-di kau dela e-dagadagahi ana lii-‘wheat’.” Ma go di kau dela e-haamanawa-ai a God?

9:10  Ma hagalee go gidaadou ala ne-helekai-iei Mee? E-donu ma ne-hihi-mai gi gidaadou. Tangada dela e-dogi, mo tangada dela e-hadi, meemaa gi-ngalua i-di hagadagadagagee bolo ginaua e-hagahumalia ngaadahi mai nia huwa o-di gowaa.

9:11  Gimaadou guu-lawa di-dogi nia lii hagataalunga i godou baahi. Ma-gu-iehe maa gimaadou gaa-hagi nia hagahumalia mai goodou?

9:12  Maa digau ala i-golo ga-hai-donu gi-di hai-mee o-di hagamaamaa mai godou baahi, malaa gimaadou la hagalee ga-hai-mee gi nia mee mada gi-nonua? Gimaadou digi hai-hegau gi madau donu. Gimaadou e-hagakono i-nia haingadaa huogodoo bolo gi-de-hagahuaidu-hua di Longo-Humalia o Jesus Christ.

9:13  Goodou gu-iloo bolo digau ala e-hai nadau hegau i-lodo di Hale Daumaha, le e-miamiami mai di Hale Daumaha, gei digau ala e-hai nadau tigidaumaha i-hongo di gowaa hai tigidaumaha, digaula e-miami ngaadahi i-nia mee ne-tigidaumaha.

9:14  Dela gadoo di hai dela guu-lawa di-haganoho go Tagi, bolo digau ala e-hula e-hagadele di Longo-Humalia, digaula e-mouli-hua mai i-nia hegau o-di Longo-Humalia.

9:15  Gei-au digi hai-hegau gi-nia donu aanei, gei au hagalee hihi-adu gi goodou bolo gi-heia mai nia mee aanei. Au bolo gii-made-hua i-mua tangada ma-gaa-huli agu helekai donu gii-hai nia helekai ono hadinga ai.

9:16  Au ogu donu ai bolo e-hagaamu dagu hai-agoago i-di Longo-Humalia, au guu-lawa di-dugu bolo e-hai tegau deenei. E-huaidu mai gi-di-au, maa au digi agoago-ina di Longo-Humalia.

9:17  Maa au gaa-bida hiihai e-hai tegau deenei, gei au e-kae dogu hui. Tegau deenei la tegau ni God ne-dugu-mai gi-di-au bolo au gi-haga-gila-aga-ina.

9:18  Di hui aha dela e-kae ko-au? Dogu hui la go di madagoaa humalia o-di agoago di Longo-Humalia dono hui ai, hagalee halahala ogu donu gi-lodo di moomee di Longo-Humalia.

9:19  Au tangada moholo, hagalee di hege ni tangada. Au guu-hai au be-di hege ni digau huogodoo, gi-aali au di-laha-mai agu gau dogologo gi Christ.

9:20  Au guu-hai be tangada o Jew i dogu madagoaa e-ngalua i-baahi digaula, belee laha-mai digaula gi-di mouli. Ma e-aha maa au hagalee noho i-lala Nnaganoho Moses, gei au guu-hai-hua au be tangada e-noho i-lala nnaganoho aanei belee laha-mai gi-di mouli digau ala e-noho i-lala nnaganoho.

9:21  I-di ala la-hua, dogu madagoaa e-ngalua dalia digau tuadimee, au e-mouli be digau tuadimee i-daha mo nnaganoho digau o Jew belee laha-mai digau tuadimee gi-di mouli. Deenei la-hagalee hai bolo au hagalee haga-gila-aga nnaganoho a God, gei au e-noho i-lala nnaganoho a Christ.

9:22  I-baahi digau ala e-paagege nadau hagadonu, gei au guu-hai au gi-bagege gadoo be digaula, belee laha-mai digaula gi-di mouli. Deenei-laa, nia mee huogodoo guu-hai ko-au ang-gi digau huogodoo, belee laha-mai ai hunu gau i digaula gi-di mouli, be-di hai dela e-mee mai i dogu baahi.

9:23  Au e-haihai nia mee huogodoo aanei i-di gili di Longo-Humalia bolo gi-hai-mee au gi-nia hagahumalia o di-maa.

9:24  Goodou gu-iloo bolo digau dogologo le e-llele i-di hoiaa, malaa tangada hua-e-dahi dela e-kae dono hui. Goodou llele hagamahi gii-kae godou hui.

9:25  Digau hai dadaagala huogodoo e-haga-wouwou i-mua di-nadau dadaagala gii-mee di-kae nadau hui. Di hui deenei la-di mee hua e-odi gi-daha, gei gidaadou hagamahi gi-heia go di mee dono hagaodi ai.

9:26  Deenei di hai e-lele huudonu iei au bolo gii-tugi i-di laini, e-hai gadoo be tangada hai dongodongo dela hagalee dongodongo balumee.

9:27  Au e-hagamahi e-agoago dogu huaidina be tangada hai dadaagala, e-aago di-maa gi-heia go nia mee belee hai. Gi-dee hidi-mai hua au e-hagalee dau i-muli agu agoago gi digau ala i-golo gi-heia be agu mee e-haihai.

Chapter 10

10:1  Ogu duaahina-nei, au e-hiihai bolo goodou gi-maanadu-ina nia mee ala ne-hai ang-gi tadau maadua-mmaadua ala nogo daudali a Moses. Digaula huogodoo nogo hula i-lala di gololangi dela nogo duuli digaula. Digaula huogodoo gu-lloo-adu hagahumalia laa-lodo Tai-Mmee.

10:2  I-lala di gololangi mo i-lodo di tai, digaula gu-babdais guu-hai nia daangada a Moses.

10:3  Huogodoo nogo miami i tagadilinga meegai hua e-dahi mai i-di hagataalunga,

10:4  gei nogo inu i-nia wai o-di hagataalunga, idimaa, digaula nogo inu mai i-di hadugalaa o-di hagataalunga. Di hadugalaa la-go Christ dela nogo hana madalia digaula.

10:5  Malaa God ne-de-hiihai gi-di baahi dogologo digaula, gei nadau huaidina gu-mmoemmoe dagidahi i-lodo di anggowaa.

10:6  Deenei-laa, di mee deenei ne-hai belee aago gidaadou, bolo gi-hudee hiihai di hai nia mee huaidu digaula nogo hai,

10:7  be e-daumaha ang-gi nia balu-god, gadoo be hunu gau i digaula. Di Beebaa-Dabu e-helekai, “Digaula guu-hai nadau hagamiami, gu-libaliba, gu-gagaalege, guu-hai nia huaidu ala i-golo.”

10:8  Gidaadou hudee hai di huaidu o-di manawa-manu, gadoo be hunu gau i digaula, dela ne-hidi-ai nia daangada e-madalua maa-dolu-mana-(23,000) ne-mmade i-di laangi e-dahi.

10:9  Gidaadou hudee hagamada-ina Dimaadua, be hunu gau i digaula, ne-hidi-ai digaula ga-daaligi go nia gihaa lodo-henua.

10:10  Gidaadou hudee hai-tamu, be hunu gau i digaula ala ne-hai beenei, ga-hidi ai digaula gaa-mmade i taaligi a tangada di-langi.

10:11  Nia mee aanei huogodoo ne-hai ang-gi tadau maadua-mmaadua belee hai dahi ala-mee ang-gi digau ala i-golo, gei ne-hihi gi-lala belee hai di mee e-haga-langahia-mai gi gidaadou, idimaa, gidaadou e-noho i-nia laangi hoohoo gi-di hagaodi.

10:12  Maa goodou gu-hagamaanadu bolo goodou guu-mau di tuu, goodou gii-pula i goodou gi-dee tinga.

10:13  Nia hagamada huogodoo ala gu-tale-adu gi goodou, le e-tale-anga labelaa gi digau huogodoo. God le e-daahi dana hagababa, Mee e-hagalee dumaalia-adu gi goodou gi-nia hagamada ala e-deemee di-haga-magedaa go goodou. Di madagoaa di hagamada, gei Mee ga-gowadu gi goodou di mahi i-nia hagamada mo-di ala dela e-tanga goodou gi-daha.

10:14  Ogu ihoo hagaaloho, haga-mogowaa-ina goodou i-di hai-daumaha ang-gi nia balu-god.

10:15  Au e-helehelekai-adu gi goodou digau maalama, hagadina-ina be maa di-aha dela e-helekai-iei au.

10:16  Di ibu dela e-danggee-ai ge e-hai-hegau-ai gidaadou i-lodo Tagamiami-Dabu, e-inu gidaadou ngaadahi i-nia dodo o Christ. Di madagoaa ma-gaa-gai di palaawaa ginigini, gidaadou ne-miami ngaadahi i tuaidina o Christ.

10:17  Di palaawaa hua-e-dahi deenei, gei gidaadou e-dogologo, gidaadou guu-hai-hua tuaidina e-dahi, idimaa, gidaadou ne-miami-mai i-di palaawaa e-dahi.

10:18  Haga-maanadu-ina digau Israel: hunu gau e-miami i-nia meegai tigidaumaha, gei digaula e-buni-anga gi di hai daumaha o-di gowaa hai-tigidaumaha.

10:19  Dagu mee dela e-helekai-iei au, le e-hai dono hadinga bolo di hai-daumaha ang-gi nia balu-god mo nia meegai ala e-tigidaumaha ang-gi nia maa la-dono dahidamee i-golo?

10:20  Deeai! Nia tigidaumaha ala e-hai i-hongo di gowaa hai-tigidaumaha digau o-di bouli, la nia mee hua e-hai ang-gi nia hagataalunga huaidu, hagalee hai ang-gi God. Au hagalee hiihai bolo goodou gi-buni-anga gi-nia hagataalunga huaidu.

10:21  Goodou e-deemee di-inu i-di ibu a Tagi, mo di ibu o-nia hagataalunga huaidu. Goodou e-deemee di-miami i teebele o Tagi, mo teebele o-nia hagataalunga huaidu.

10:22  E-hai behee, gidaadou e-hiihai e-hai tadau Dagi gi-dubua? Gidaadou e-hai bolo gidaadou e-maaloo i Mee?

10:23  Hunu gau e-helekai boloo, “Gu-dugu-mai gi gimaadou gi-heia nia mee huogodoo.” E-donu, gei nia mee huogodoo la-hagalee humalia. “Gu-dugu-mai gi-heia nia mee huogodoo,” gei nia mee huogodoo la ono hagamaamaa humalia ai.

10:24  Goodou hudee halahala-ina nia mee ala e-bida hagahumalia goodou, tangada-nei mo tangada-nei gi-halahala-ina nia mee ala e-mee di-hagahumalia digau ala i-golo.

10:25  Goodou e-mee di-gai di-ingoo-hua di-mee ala e-huihui i-di gowaa huihui-goneiga, hudee heheeu e-logo, ma deai dono hala adu gi godou lodo ai.

10:26  Idimaa di Beebaa-Dabu e-helekai, “Dimaadua e-hai-mee gi henuailala hagatau mo ono haga-honu huogodoo.”

10:27  Maa tangada e-de-hagadonu, ga-hagagahi goodou e-miami i dono hale, goodou hula, miami nia meegai a-maa ala ga-gowadu gi goodou, gei goodou hudee heheeu-ina nia meegai aalaa, ma deai dono hala adu gi godou lodo ai.

10:28  Maa tangada ga-helekai-adu boloo, “Nia meegai aanei ne-tigidaumaha ang-gi nia balu-god,” malaa, goodou hudee geina nia meegai aalaa, e-hagagila di maanadu o tangada dela ne-hagi-adu gi goodou mo di hagagila di hagamaanadu dela e-donu.

10:29  E-hai boloo, ma hagalee go godou iloo, gei go di hagamaanadu o tangada dela ne-hagi-adu gi goodou. Tangada ga-heeu, “Malaa e-hai behee, ogu donu belee hai agu mee le e-aha ala e-mee di duuli go nia maanadu o tuai dangada?

10:30  Maa au ga-danggee ang-gi God i agu meegai, malaa tangada le e-aha dela e-leelee hagahuaidu i-agu meegai ala guu-lawa di hai dagu danggee?”

10:31  Malaa, di mee dela gaa-gai, be e-inu, be nia mee huogodoo ala ma-gaa-hai go goodou, heia huogodoo e-haga-madamada-ai a God.

10:32  I-lodo godou mouli, hudee hai dahi mee dela gaa-hidi-ai di huaidu i-baahi digau o Jew, be i-baahi digau tuadimee, be i-baahi digau o-di nohongo-dabu a God.

10:33  Kawe i-di-au. Au e-hagamahi e-haga-manawa lamalia nia daangada huogodoo i-nia mee huogodoo ala e-hai ko-au, hagalee hagamaanadu agu mee ala belee hagahumalia au, gei nia mee ala e-hagahumalia nia daangada huogodoo, bolo gi-mouli-ai digaula.

Chapter 11

11:1  Goodou gi-kawe i-di au, gadoo be au dela e-kawe i Christ.

11:2  Au e-hagaamu goodou i-di godou langahia au i-nia madagoaa huogodoo, mo-di daudali agu agoago-adu gi goodou.

11:3  Au bolo goodou gi-iloo: Christ laa i-mugi-nua nia daangada, taane hai-lodo laa i-mugi-nua dono lodo, gei God laa i-mugi-nua o Christ.

11:4  Taane dela ma-ga-dalodalo be agoago i nnelekai a God i taumaha, ge e-gahu i-di goobai, e-haga-balumee-hua a Christ.

11:5  Di ahina dela ma-ga-dalodalo be agoago nnelekai a God i-lodo digau dogologo, gei digi gahudia dono libogo, geia e-hagabalumee dono lodo. Mee e-hai hua be-di ahina ne-dahi dono libogo gi-di ngadihole.

11:6  Maa di ahina ga-hagalee gahu dono libogo, e-humalia hua di-dahi dono libogo. Idimaa ma e-haga-langaadia ang-gi di ahina di dahi dono libogo, gei mee gi-gahu-ina dono libogo.

11:7  Hagalee e-humalia bolo taane e-gahu dono libogo, idimaa, go mee go di ada hagamodongoohia madamada o God, gei di ahina la di ada hagamodongoohia madamada o taane.

11:8  Taane la-hagalee ne-hai-mai i-di ahina, di ahina ne-hai-mai i taane.

11:9  Gei taane la-hagalee ne-hai ang-gi di ahina, di ahina ne-hai ang-gi taane.

11:10  Mai tadinga deenei, idimaa go digau di-langi, di ahina e-hai-loo gii-gahu dono libogo gi-modongoohia bolo ia i-lala nia mogobuna o dono lodo.

11:11  I-lodo tadau mouli buni-anga gi Tagi, di ahina la-hagalee mouli hua i-daha mo taane, gei taane hagalee mouli labelaa i-daha mo-di ahina.

11:12  Idimaa, di ahina ne-hai-mai i taane, dela gadoo taane le e-haanau-mai go di ahina, gei nia mee huogodoo e-hai-mai i-baahi o God.

11:13  Goodou hagamaanadu-ina be di-maa e-humalia go di ahina ma-gaa-hai ana dalodalo i-lodo di hai daumaha digau dogologo gei digi gahu dono libogo.

11:14  I-lodo godou maanadu le e-aago-adu gi goodou bolo ma di mee haga-langaadia daane ma-gaa-lloo nadau libogo.

11:15  Gei nia ngaahulu i-hongo di libogo di ahina la-di hagamadamada, ne-haga-lloo belee gahu dono libogo.

11:16  Maa tangada ga-hai-baahi ang-gi di mee dela gu-haga-noho, geia gi-iloo bolo deenei di mee dela gu-haga-noho, e-hai-hegau-ai gimaadou mo nia nohongo-dabu a God e-daudali i-di madagoaa hai-daumaha.

11:17  I-lodo hua nia mee ala e-haga-noho dolomeenei, au hagalee hagaamu goodou, idimaa, godou dagabuli hai-daumaha la dono hadinga ai, gei ne-hagahuaidu-hua goodou.

11:18  Kaedahi, au gu-longono bolo goodou e-dugudugu-gee goodou, i-di godou dagabuli nohongo-dabu, malaa gei au e-hagadonu di mee deenei.

11:19  Gei e-donu, tee-buni e-hai gi i-golo i godou mehanga bolo gi-haga-modongoohia be koai i goodou dela e-donu.

11:20  Di-godou dagabuli-mai, goodou hagalee e-miami Tagamiami o Tagi.

11:21  Di-godou miami, tangada-nei mo tangada-nei guu-bida miami hua digi taalia digau huogodoo ala i-golo, gei hunu gau e-noho hiigai, hunu gau gu-libaliba.

11:22  Godou hale e-miami be e-inu goodou ai? Be goodou e-hagabalumee di nohongo-dabu a God ge haga-langaadia digau ala hagaloale? Ma di-aha dela belee helekai-iei au adu gi goodou? Au belee hagaamu goodou? Deeai loo!

11:23  Agu agoago-adu gi goodou ne-gaamai i-baahi o Tagi boloo: Tagi go Jesus, i-di boo ne-hagi-anga a-Mee, ne-dahi-aga dana palaawaa,

11:24  ga-danggee ang-gi God, ga-ginigini, ga-helekai, “Deenei la-go dogu huaidina, dela e-gowadu gi goodou. Heia di mee deenei, e-haga-langalangahia Au.”

11:25  Muli-hua di-nadau miami, Mee ga-dahi-aga dana ibu-waini, ga-helekai, “Di ibu-waini deenei la-di hagababa hoou a God dela ne-hai gii-donu gi ogu dodo. Goodou ga-inu di-maa, heia di-mee e-haga-langahia Au.”

11:26  Nia madagoaa huogodoo goodou ma-gaa-gai di palaawaa deenei, gei e-inu di ibu deenei, goodou ga-hagadele di made o Tagi, gaa-dae-loo gi dono hanimoi.

11:27  Maa tangada gaa-gai di palaawaa, mo-di inu i-di ibu o Tagi i-di ala dela hagalee hagalaamua a-Mee, geia gu-ihala i-di huaidu hai-baahi gi tuaidina o Tagi mo ono dodo.

11:28  Malaa, goodou tei gii-bida hagadina-ina ia i-mua, gaa-gai-laa di palaawaa mo-di inu i-di ibu.

11:29  Maa tangada gaa-gai di palaawaa mo-di inu di ibu gei e-hagalee modongoohia tadinga o tuaidina o Tagi, geia e-bida hagahuaidu ia i dono gai di palaawaa mo-di inu di ibu.

11:30  Deelaa ne-hidi-mai goodou dogologo e-magi mo e-paagege, gei hunu gau guu-mmade.

11:31  Maa gidaadou ga-haga-dina gidaadou i-mua, gidaadou hagalee hagi-aga go God.

11:32  Tadau hagi-aga mai baahi o Dimaadua le e-aago-mai gidaadou, gi-dee kili gidaadou gi-daha dalia digau henuailala.

11:33  Ogu duaahina-nei, di madagoaa goodou ma-ga-dagabuli-mai belee miami Tagamiami o Tagi, hagadau taalia godou ihoo.

11:34  Maa tangada gu-hiigai, geia gi-miami i dono hale, gi-dee dau-hua goodou gi-di hagi-aga a God i-di godou dagabuli gi-di gowaa e-dahi. Gei nia mee ala i-golo ga-haga-donu-laa ko-au i dogu madagoaa ma-gaa-dau i godou baahi.

Chapter 12

12:1  Ogu duaahina daane mo ahina, gidaadou e-helekai i-nia kisakis mai di Hagataalunga-Dabu ala ne-hihi-ai godou lede. Au e-hiihai bolo goodou gi-iloo di tonu o-nia maa.

12:2  Goodou e-iloo bolo i-di-godou madagoaa nogo noho i-lodo di bouli, goodou nogo dagi gee go nia hagadilinga ala daumaha ang-gi nia ada-god ono mouli ai.

12:3  Au e-hagi-adu gi-iloo goodou bolo maa tangada ma-gaa-dagi go di Hagataalunga-Dabu geia e-deemee di-helekai hagahuaidu a Jesus. Gei tangada e-deemee di-helekai bolo Jesus la go Tagi, maa ia le hagalee dagi go di Hagataalunga-Dabu.

12:4  Nia hagadilinga wanga-dehuia hagataalunga i-golo, gei di Hagataalunga lahua e-wanga nia maa.

12:5  Nia hagadilinga ala hai-hegau i-golo, gei Tagi hua-e-dahi dela e-ngalua ginai.

12:6  Nia hagadilinga iloo i-golo e-hai-nnegau, gei di God hua-e-dahi dela e-wanga di iloo gi-nia daangada huogodoo di-hai nadau hegau.

12:7  Tangada-nei mo tangada-nei e-kae di hagamodongoohia mai di Hagataalunga-Dabu, e-hagahumalia nia daangada huogodoo.

12:8  Di Hagataalunga e-wanga gi tangada-nei nia helekai kabemee, di Hagataalunga la-hua e-wanga gi tangada dela i-golo nia helekai iloo.

12:9  Di Hagataalunga la-hua e-wanga di hagadonu gi tangada e-dahi, gei ang-gi tuai dangada, Mee e-wanga di mogobuna hagahili magi.

12:10  Di Hagataalunga la-hua dela e-wanga gi tangada di mogobuna e-hai nia mee hagagoboina, ang-gi tangada dela i-golo di-agoago nia helekai a God, gei ang-gi tuai dangada di-modongoohia nnegau mai i-di Hagataalunga-Dabu mo nnegau ala hagalee mai i-di Hagataalunga-Dabu. Anga labelaa gi tangada i-golo di-iloo di-helekai nia helekai henua-gee, gei anga labelaa gi tangada i-golo di-iloo di haga-modongoohia nia mee ne-helekai-ai.

12:11  Malaa, di Hagataalunga hua e-dahi dela e-hai nia mee huogodoo aanei, e-wanga gi tangada-nei mo tangada-nei dono duhongo-hegau kisakis, gii-hai be dono hiihai.

12:12  Christ le e-hai be tuaidina e-dahi dela e-logo ono dudaginga. Tuaidina hua-e-dahi, ne-hai gi-nia dudaginga e-logo.

12:13  Gidaadou huogodoo gu-babdais i-di hagataalunga e-dahi gi-lodo tuaidina e-dahi. Gidaadou digau o Jew be digau tuadimee, hege be dagaloaha, gidaadou huogodoo gu-inu i-di Hagataalunga e-dahi.

12:14  Tuaidina la-hagalee tudaginga hua-e-dahi, nia dudaginga e-logo.

12:15  Maa di wae ga-helekai boloo, “Idimaa au hagalee di lima, gei au hagalee di mee ni tuaidina,” nnelekai aanei e-deemee di-daa di wae gi-daha mo tuaidina.

12:16  Maa talinga ga-helekai boloo, “Au hagalee di golomada, au hagalee di mee ni tuaidina,” nnelekai aanei e-deemee di-daa talinga gi-daha mo tuaidina.

12:17  Maa tuaidina hagatau la-gaa-hai di golomada, malaa gei mee e-hagalongo behee? Gei tuaidina hagatau la-gaa-hai talinga, gei mee e-hagadungu ana mee gi-di-aha?

12:18  Gei God ne-haganohonoho nia dudaginga huogodoo i-lodo tuaidina tangada, gii-hai be dana hiihai.

12:19  Ma e-deemee di-hai tuaidina, maa huogodoo gaa-hai tudaginga hua e-dahi!

12:20  Gei dolomeenei nia dudaginga la-guu-logo, gei tuaidina hua e-dahi.

12:21  Di golomada e-deemee di helekai ang-gi di babaalima, “Au hagalee e-angaanga gi do hagamaamaa.” E-hai labelaa be-di libogo ang-gi nia babaawae, “Au hagalee e-angaanga-adu gi goolua.”

12:22  Gei hunu dudaginga e-paagege, gei nia maa e-hagalabagau huoloo di hai-hegau.

12:23  Gei nia dudaginga ala e-dugu go gidaadou bolo hagalee dahidamee, aalaa tadau mee koia e-benebene. Gei nia dudaginga ala e-huaidu dono mmada ginai, le e-benebene hagalabagau,

12:24  ala hagalee hai-mee ginai nia dudaginga madamada. Gei God gu-haga-noho tadau huaidina, guu-wanga dono aamua damana gi-nia dudaginga ala nadau madamada ai,

12:25  bolo tee-buni gi-hudee heia gi i-golo i-lodo tadau huaidina, gei nia dudaginga huogodoo gi-buni-anga gi-di hagadau-maamaa.

12:26  Maa tudaginga e-dahi ma-ga-mmae, nia dudaginga huogodoo e-mmae dalia di-maa. Maa tudaginga e-dahi gaa-kae dono hagahumalia, nia dudaginga huogodoo e-tenetene labelaa.

12:27  Goodou huogodoo la tuaidina ni Christ, tangada-nei mo tangada-nei nia dudaginga ni tuaidina deenei.

12:28  God ne-haga-noho nia lohongo huogodoo o lodo di nohongo-dabu: di tahi go nia daangada agoago-hagau, di lua go nia soukohp, di tolu go nia daangada aago, nomuli go digau ala e-hai nadau mogobuna haga-goboina, nomuli go digau ala guu-wanga ginai di mogobuna hagahili magi, be e-hagamaamaa digau ala i-golo, be e-dagi digaula, be go digau ala e-mee di-helekai i nnelekai henua-gee.

12:29  Hagalee huogodoo e-hai digau agoago-hagau, be nia soukohp, be digau aago. Hagalee huogodoo nadau mogobuna e-hai nia mee hagagoboina,

12:30  be e-hagahili nia magi o digau magi, be e-helekai i-nia helekai henua-gee, be e-haga-modongoohia nia helekai aanei.

12:31  Gi-haa-manawa i-nia kisakis hagalabagau. Kaedahi go di ala deenei.

Chapter 13

13:1  Maa au ga-iloo nnelekai o-nia daangada, mo nnelekai o digau di-langi, gei di aloho la-hagalee i-dogu baahi, malaa, agu helekai le e-hai gadoo be-di lee baalanga balumee, be-di beele dela e-tangitangi balumee.

13:2  Maa au gaa-kae di wanga dehuia o-nia agoago hagamaaloo a God, gei gu-iloo mo-di modongoohia nia mee huogodoo ala e-nngala, gei au guu-honu i-di hagadonu maaloo dela e-mee di haga-menegenege nia gonduu, gei di aloho la-hagalee i-dogu baahi, malaa, au la-hagalee di mee.

13:3  Maa au gaa-wanga agu mee huogodoo gi-daha, gaa-dudu dogu huaidina gii-wele, gei di aloho la-hagalee i dogu baahi, malaa, nia mee aanei ono hadinga humalia mai gi-di-au ai.

13:4  Di aloho le e-manawa hila gi-lala, humalia, hagalee dubua, hagalee hagamuamua, ge hagalee hagapuu.

13:5  Di aloho la-hagalee hagagouwa, ge hagalee manawa hagagailaa, be limalima di hagawelewele, be daahi nia mee huaidu.

13:6  Di aloho la-hagalee tene gi-nia mee huaidu, gei e-tene-hua gi-nia mee ala e-donu.

13:7  Di aloho le e-benebene humalia i-nia madagoaa huogodoo, e-hagadonu i-nia madagoaa huogodoo, e-hagadagadagagee i-nia madagoaa huogodoo, e-hagakono i-nia madagoaa huogodoo.

13:8  Di aloho le e-hana-hua beelaa, dono hagaodi ai. Nia helekai kokohp la iai ono hagalawa i-golo. Nia hagadilinga helekai henua gee i-golo dela ga hagalee. Di kabemee la-ga-mmaa gi-daha.

13:9  Idimaa tadau kabemee le e-dee-dohu, mo tadau helekai kokohp le e-dee-dohu.

13:10  Di madagoaa humalia ga-dau-mai, gei nia mee ala e-dee-dohu la-ga-hagalee.

13:11  Dogu madagoaa nogo hai di tama, agu helekai, hagamaanadu mo agu hagabaubau la nia mee huogodoo dama. Gei dogu madagoaa ne-madua, gei au guu-dugu gi-daha nia hegau o tama dulii.

13:12  Dolomeenei gei gidaadou e-mmada gi-di ada-nehu i-lodo di kalaadi, ga-nomuli gaa-mmada haga-madammaa. Dolomeenei gei au gu-iloo dulii, gei nomuli ga-iloo hagatau, gadoo be God dela e-iloo-Ia au.

13:13  Nia hagadilinga mee e-dolu aanei e-noho-hua beelaa: di hagadonu, di hagadagadagagee, mo-di aloho, gei di mee dela koia e-aamua i-nia maa, la-go di aloho.

Chapter 14

14:1  Ma go di aloho dela belee hagamahi ginai goodou. Gi-haamanawa i-nia wanga-dehuia o-di Hagataalunga, kaedahi la-go di hagadele nnelekai kokohp a God.

14:2  Digau ala e-helekai i-nia helekai henua-gee, la-hagalee helekai gi-nia daangada, gei e-helekai hua ang-gi God, idimaa, ma tangada e-iloo-ia nia helekai digaula ai. Go di Hagataalunga dela ne-haga-helekai a-mee gi-nia mee ala e-de-iloo nia daangada.

14:3  Gei digau ala e-hagadele nnelekai kokohp a God, le e-hagi ang-gi nia daangada, belee hagahumalia ge e-haga-manawa-maaloo ge e-haga-tenetene digaula.

14:4  Digau ala e-leelee i-nia helekai henua-gee, le e-hagamaamaa-hua ginaadou. Gei digau ala e-hagadele nnelekai a God, le e-hagamaaloo di nohongo-dabu hagatau.

14:5  Au bolo goodou huogodoo gii-mee di-helehelekai i-nia helekai henua-gee, gei di mee dela koia e-humalia la-go goodou gi-hagadele nia helekai kokohp a God. Idimaa, tangada dela e-hagadele nnelekai a God, la-koia e-aamua i tangada dela e-leelee i-nia hagadilinga helekai henua-gee, go di-maa hua be tangada i-golo e-mee di-hagamodongoohia nia helekai tangada dela ne-helekai-ai, e-hagamaaloo di nohongo-dabu hagatau.

14:6  Ogu duaahina-nei, dogu hanadu gi godou baahi la dono hadinga-aha maa au ga-helehelekai hua i nnelekai henua-gee? Hagalee, be-di-maa koau hua ga-gowadu gi goodou nia hagamodongoohia mai baahi o God, be nia iloo helekai Beebaa Dabu, be nia helekai agoago.

14:7  E-hai gadoo be nia mee hai-daahili nadau mouli ai, be-di mee ngiingii mo-di ‘harp’. Maa nia lee o-nia maa ga-hagalee tongaadahi, dehee di hai o tangada ga-iloo-ia be di-maa di lee daahili behee dela e-hai go nia mee aanei?

14:8  Di labaa-dauwa ma-ga-ili de-modongoohia dono lee, malaa koai dela e-mee di-hagatogomaalia ia gi tauwa?

14:9  E-hai gadoo be goodou ma-ga-leelee i-nia helekai henua-gee, gei hagalee haga-donu gii-donu humalia, malaa koai dela ga-iloo-ia? Malaa godou helekai ala e-hai, le e-leelee-hua balumee.

14:10  Nia hagadilinga helekai e-logowaahee i henuailala, gei nia helekai huogodoo la ono hadinga i-golo.

14:11  Maa au ga-de-iloo nnelekai henua ala ne-helekai-ai, digau ala ne-helekai nia maa guu-hai digau henua-gee ni-aagu, gei au hogi guu-hai tangada henua-gee ni digaula.

14:12  Idimaa goodou e-hagamahi e-hai-mee gi-nia wanga-dehuia mai di Hagataalunga, goodou hagamahi laa-hongo nia mee huogodoo ala i-golo e-hai-hegau gi-nia wanga-dehuia ala e-hagamaaloo di nohongo-dabu.

14:13  Maa tangada e-helekai i-nia helekai henua-gee, geia gi-dalodalo i-di hagamaamaa bolo gii-mee di-hagamodongoohia ana helekai.

14:14  Maa au ga-dalodalo i-nia helekai henua-gee, go dogu hagataalunga la-hua ne-dalodalo, gei agu maanadu la hagalee i-golo.

14:15  Dehee-laa dagu mee gaa-hai? Au ga-dalodalo i dogu hagataalunga, gei au ga-dalodalo labelaa i agu maanadu. Au ga-daahili i dogu hagataalunga, gei au ga-daahili labelaa i agu maanadu.

14:16  Ma go do hagataalunga la-hua dela e-danggee ang-gi God, gei digau ala i-golo le e-hai bolo “Amen” behee gi dau dalodalo danggee? Idimaa, digaula e-de-iloo au helekai.

14:17  Ma e-aha maa dau dalodalo hagaamu a God le e-humalia, gei hagalee hagamaamaa digau ala i-golo.

14:18  Au e-danggee ang-gi God i dogu mada iloo-eau i-goodou huogodoo di-leelee i-nia helekai henua-gee.

14:19  I-lodo taumaha gei au gu-hiihai huoloo bolo au e-helekai-hua i-nia bida-helekai e-lima, ala koia e-donu ginai nia daangada i-lodo agu agoago, laa-hongo nia bida-helekai e-mana-(1,000) e-logo, i-nia helekai henua-gee.

14:20  Ogu duaahina-nei, godou hagamaanadu gi-hudee heia be nia maanadu dama. Goodou gi-heia-hua goodou be nia dama-lligi i-nia mee huaidu. Gei godou hagamaanadu gi-heia be nia hagamaanadu daangada gu-mmaadua.

14:21  I-lodo di Beebaa-Dabu la-guu-hihi boloo, “Dimaadua ga-helekai boloo, ‘Au ga-helekai gi agu daangada aanei i-nia helekai henua-gee. Gei-Au ga-helekai gi digaula mai i-lodo nia malau-ngudu o digau nnenua mai i-daha, gei agu daangada ga-hagalee hagalongo-mai gi-di-Au.’ ”

14:22  Di wanga-dehuia o di helehelekai henua-gee, lago di haga-modongoohia ang-gi digau de-hagadonu, hagalee digau hagadonu. Gei di hagadele nnelekai kokohp a God, la di haga-modongoohia ang-gi digau hagadonu, hagalee digau de-hagadonu.

14:23  Maa di nohongo-dabu ga-dagabuli gi-di gowaa e-dahi, ga-daamada ga-helehelekai i-nia helekai henua-gee, gei nia daangada ala digi longono di agoago be digau e-de-hagadonu ga-ulu-mai, digaula ga-hagalee helekai bolo goodou huogodoo e-boiboi?

14:24  Gei di-maa huogodoo ga-helekai i-nia helekai kokohp a God, gei tangada dela dono hagadonu ai, be tangada dela digi longono di agoago, ma-ga-ulu-mai ga-modongoohia ang-gi deia i ono huaidu, mai i ana mee huogodoo ala ne-longono. Geia ga-hagi-aga gi ana mee huogodoo ala ne-longono-ia,

14:25  gei ana hagamaanadu nngala ala i ono lodo, la-ga-modongoohia-aga, geia ga-dogoduli gi-lala, gaa-bala ga-daumaha gi God, ga-helekai boloo, “E-donu bolo God le e-noho i godou lodo.”

14:26  Ogu duaahina-nei, deenei di mee e-helekai-iei au, goodou ma-ga-dagabuli-mai belee hai-daumaha, tangada e-daahili, tangada e-agoago, tangada e-hagadele nnelekai kokohp mai baahi o God, gei tangada e-helekai i nnelekai henua-gee, gei tangada e-haga-modongoohia nia helekai ne-helekai-ai. Malaa, nia mee huogodoo aanei e-hai belee hagamaaloo di nohongo-dabu.

14:27  Maa tangada ga-helekai i-nia helekai henua-gee, dogolua be hagalee gi dogologo baahi nua dogodolu e-hagadau dagidahi e-helekai, gei tangada i-golo labelaa e-hai loo gi-hagamodongoohia nia helekai ala ne-helekai-ai.

14:28  Maa tangada e-haga-modongoohia nnelekai ai, malaa tangada dela e-helehelekai nia helekai henua-gee, la-gii-noho hua dee-muu, gii bida helekai-hua ang-gi deia mo ang-gi God.

14:29  Nia daangada dogolua be dogodolu i-digau ala ne-kae nadau helekai kokohp mai baahi o God, la-gii-hai nadau agoago, gei digau ala i-golo gi-hagadina-ina be digaula ne-helekai bolo-aha.

14:30  Maa tangada e-noho i-lodo di hale-daumaha, guu-kae nia helekai mai baahi o God, gei tangada dela e-agoago la-gii-lawa, gii-noho dee-muu.

14:31  Goodou huogodoo e-mee di-hagadele nia helekai a God, hagadau dagidahi, bolo huogodoo gii-donu ginai gii-kae nadau hagamaamaa.

14:32  Di wanga-dehuia o di hagadele nia helekai a God le e-huwahuwa go tangada dela e-agoago nia maa.

14:33  Idimaa, God la-hagalee hiihai gidaadou gii-noho i-lodo di hinihini, gei gii-noho hagadau-buni mo i-di aumaalia. I-lodo nia nohongo-dabu huogodoo o-nia dama a God,

14:34  nia ahina gii-noho deemuu i-lodo nia miiting dagabuli o-nia nohongo-dabu. Digaula hagalee dumaalia ginai gi-helekai, gii-hai be nnaganoho o digau o Jew bolo digaula hagalee dagi.

14:35  Maa digaula e-hiihai gi-iloo, gi-heeu-ina gi nadau lodo i-di hale, idimaa, e-haga-langaadia go di ahina ma-ga-helekai i-lodo tagabuli di nohongo-dabu.

14:36  Nia helekai a God la-ne-daamada-mai i godou baahi, be ne-gowadu-hua gi goodou?

14:37  Maa iai tangada gu-hagamaanadu bolo ia tangada kae-hegau ni God, be tangada guu-kae di wanga-dehuia o-di Hagataalunga-Dabu, mee gii-donu ginai bolo nia mee ala guu-lawa dagu hihi-adu gi goodou, la nia haganoho ni Tagi.

14:38  Maa mee ga-haga-de-iloo-ia nia helekai aanei, goodou haga-de-iloo-ina a-mee.

14:39  Ogu duaahina-nei, goodou gi-haga-dahidamee-ina, hagadele-ina nia helekai kokohp a God, gei goodou hudee bule-ina nia helehelekai henua-gee.

14:40  Nia mee huogodoo e-hai gii-lawa i-di ala e-tau-anga, gei e-haga-noho gi-humalia.

Chapter 15

15:1  Ogu duaahina-nei, au e-haga-langahia-adu di Longo-Humalia dela ne-agoago ko-au adu gi goodou, guu-kae go goodou, gu-hagamaaloo-aga godou hagadonu.

15:2  Di Longo-Humalia le e-haga-dagaloaha goodou maa goodou ga-daudali-hua agu agoago. Maa goodou ga-hagalee daudali, gei godou hagadonu le e-balumee.

15:3  Au ne-hagadae-adu gi goodou di mee hagalabagau dela guu-lawa dagu kae, bolo Christ ne-made i tadau huaidu gii-hai be nnelekai di Beebaa-Dabu.

15:4  Mee ne-danu, ga-hagamouli-aga i-nia laangi e-dolu nomuli gii-hai be nnelekai di Beebaa-Dabu.

15:5  Gei Mee ne-haga-gida gi Peter, nomuli gi ana dama agoago dilongoholu maa-lua,

15:6  nomuli, gi-ana dama ne-hagadonu eia e-lima-lau duumaa i tolongo hua-e-dahi, baahi dogologo e-mouli hua igolo, gei hunu gau guu-mmade.

15:7  Nomuli ga-haga-gida gi James, nomuli, gi digau agoago-hagau huogodoo.

15:8  Haga-odi gi-muli, Mee ne-haga-gida-mai gi-di-au, gei au guu-hai gadoo be-di tama ne-haanau i-di madagoaa hai-gee.

15:9  Idimaa, au go di mugi-lala loo o-nia daangada agoago-hagau huogodoo. Au e-dee-tau bolo au e-haga-ingoo bolo tangada agoago-hagau, idimaa, au nogo hagahuaidu di nohongo-dabu a God.

15:10  Go tumaalia o God dela ne-hai au gii-hai tangada agoago-hagau, gei dono dumaalia deenei la-hagalee balumee mai gi-di-au, idimaa, au gu-ngalua damanaiee laa-hongo digaula huogodoo, gei hagalee ne-hai ko-au, go tumaalia o God dela i dogu baahi.

15:11  Deelaa-laa, ma ko-au be go digaula, gei aanei madau agoago adu gi goodou ala guu-lawa di-godou hagadonu.

15:12  Di hai o Christ, dela ne-haga-mouli-aga mai i-di made, deenei di haga-honu o madau agoago, malaa e-aha hunu goodou e-helekai bolo digau mmade le hagalee haga-mouli-aga?

15:13  Maa nei bolo di mouli-aga mai i-di made ai, malaa Christ la-digi haga-mouli-aga!

15:14  Maa nei bolo Christ la-digi mouli-aga, gei madau agoago le e-balumee-hua, gei godou hagadonu la nia hagadonu hua balumee.

15:15  Nia daangada ga-gidee bolo gimaadou digau e-agoago tilikai i God, idimaa, gimaadou la-gu-hagadele bolo God gu-haga-mouli-aga a Christ. Maa nei bolo e-donu digau mmade le-deemee di-haga-mouli-aga, malaa, Mee digi haga-mouli-aga a Christ.

15:16  Maa digau mmade le e-deemee di-haga-mouli-aga, malaa Christ la-digi haga-mouli-aga.

15:17  Maa Christ la-digi haga-mouli-aga, malaa godou hagadonu le e-balumee-hua, gei goodou e-noho-hua i-lodo godou huaidu.

15:18  Digau hagadonu hogi ala ne-mmade i-lodo nadau hagadonu, la-gu-balumee-hua.

15:19  Maa nei bolo tadau hagadagadagagee gi Christ la anga-hua gi-di mouli henuailala, malaa, nia daangada huogodoo henuailala e-tau di-mmada hagaaloho mai gi gidaadou.

15:20  Gei di tonu, Christ la-gu-haga-mouli-aga i-di made, guu-hai di hagadagadagagee ni digau ala guu-mmade bolo ginaadou e-haga-mouli-aga labelaa.

15:21  Di made ne-hidi mai i-baahi tangada, i-di ala la-hua, di mouli-aga mai di made la-ne-hidi-mai i-baahi tangada.

15:22  Nia daangada huogodoo e-mmade i-di hai a Adam, go di ala la-hua nia daangada huogodoo e-hai gi-haga-mouli-aga i-di hai a Christ.

15:23  Gei nia daangada ga-haga-mouli-aga be-di hagatau dela guu-lawa di-haganoho: Christ matagidagi; nomuli go nia dama a-Maa i dono madagoaa ga-hanimoi-ai.

15:24  Nomuli go di hagaodi, i-di madagoaa a Christ gaa-wanga Teenua King gi God Tamana i-muli dana daaligi gi-daha nia dagi hagataalunga huogodoo, nia mogobuna dagi, mo nia mahi.

15:25  Gei Christ gaa-dagi gaa-dae-loo gi God gaa-dugu ono hagadaumee huogodoo gi-lala ono babaawae.

15:26  Di hagadaumee dela e-hagamagedaa muliagi-loo, la-go di made.

15:27  Di Beebaa-Dabu e-helekai, “God e-dugu nia mee huogodoo gi-lala ono babaawae.” Ma e-modongoohia bolo “nia mee huogodoo,” la hagalee helekai bolo God e-dau eia, dela ne-dugu nia mee huogodoo gi-lala nia babaawae o Christ.

15:28  Di madagoaa nia mee huogodoo ma-ga-dugu gi-lala di mogobuna o Christ, gei Tama gaa-dugu-eia gi-lala o God, dela ne-wanga gi dana Dama di mogobuna e-dagi nia mee huogodoo. Nomuli gei God gaa-dagi nia mee huogodoo hagatau.

15:29  Dehee di hai o digau ala e-babdais ang-gi digau ala guu-mmade? Ma di-aha dela ne-hagamaanadu go digaula belee hagagila? Maa gaa-donu bolo digau mmade la-hagalee haga-mouli-aga, malaa e-aha nia daangada e-babdais ang-gi digau mmade?

15:30  Gei gimaadou le e-aha ala e-wanga madau mouli gi-di haingadaa i-nia aawaa huogodoo?

15:31  Ogu duaahina-nei, au e-mmada gi-di made i-nia laangi huogodoo. Au e-helekai beenei i dogu hagalaamua goodou i tadau mouli hagadaubuni ang-gi Jesus Christ, tadau Dagi.

15:32  Maa au ne-heebagi i-nnadinga dangada gi nia manu hagamadagudagu dangada i-kinei i-lodo Ephesus, ma di wiini-aha ne-kae koau? Maa e-donu bolo digau mmade le-hagalee haga-mouli-aga, malaa gidaadou gii-hai-hua be di agoago dela e-hai boloo: “Gidaadou gi-miami hua mo-di inuinu. Idimaa, daiaa, gei gidaadou gaa-mmade.”

15:33  Gii-pula i digau halahalau dangada! Idimaa, di hai-hoo ang-gi digau huaidu, le e-hagahuaidu nia hangaahai humalia.

15:34  Goodou heia nia mee ala e-donu, gii-lawa gi-daha mo godou haihai-hala, idimaa, hunu goodou digi iloo a God. Au e-hagi-adu gi goodou nia mee aanei bolo gi-langaadia-ai goodou.

15:35  Tangada ga-heeu: Digau ala guu-mmade le e-hagamouli-aga behee? Nia huaidina behee ala ga-mouli-aga-ai digaula?

15:36  Goe tangada dadaulia! Goe e-de-iloo bolo dau lii dela gaa-dogi gi-lodo di gelegele, la-hagalee tomo-aga maa di lii deelaa la-digi made i-mua?

15:37  Di mee dela e-dogi kooe gi-lodo di gelegele, la-hagalee go tuaidina o-di laagau, go di lii la-hua dela gaa-tomo gaa-hai di laagau-‘wheat’, be tuai laagau.

15:38  Go God hua dela e-dugu-anga gi nia laagau gii-tomo gii-hai be dono hiihai. Gei e-dugu ang-gi di lii-nei mo-di lii-nei tuaidina donu di lii.

15:39  Nia goneiga o-nia huaidina huogodoo la-hagalee hai be-di mee e-dahi: nia daangada, nia manu, nia manu-mamaangi, mo nia iga e-hai geegee nadau goneiga.

15:40  Nia hagadilinga huaidina labelaa i-golo: Nia huaidina di langi mo nia huaidina henuailala. Nia madamada o-nia huaidina di langi le e-hai-gee mo nia madamada o-nia huaidina henuailala.

15:41  Di laa, di malama, mo nia heduu e-hai geegee nadau madamada. Gei mehanga nia heduu nadau madamada e-hai geegee.

15:42  Deenei di hai digau mmade ma-ga-haga-mouli-aga. Tuaidina tangada ma-gaa-danu, le e-mooho gi-daha. Ma-ga-hagamouli-aga, le-hagalee mooho.

15:43  Dono danu, geia gu-huaidu, gu-bagege. Dono mouli-aga, geia gu-madamada huoloo, gu-maaloo dangihi.

15:44  Dono danu, geia tuaidina dangada. Dono mouli-aga, geia guu-hai tuaidina hagataalunga. Maa tuaidina henuailala i-golo, malaa, tuaidina hagataalunga i-golo.

15:45  Di Beebaa-Dabu guu-lawa di hihi boloo, “Taane matagidagi la-go Adam guu-hai tangada mouli.” Gei Adam muliagi e-gaamai di hagataalunga hagamouli.

15:46  Hagalee go tuaidina hagataalunga ne-hai i-mua, go tuaidina gelegele, ga-nomuli la-go tuaidina hagataalunga.

15:47  Adam matagidagi la-ne-hai gi-nia gelegele o henuailala gei togolua Adam ne-haneia i-di langi.

15:48  Digau henuailala e-hai be tangada ne-hai gi-nia gelegele. Digau mai di langi e-hai be Mee dela ne-haneia i-di langi.

15:49  Maa gidaadou gaa-dina gi tangada dela ne-hai gi-nia gelegele, gei gidaadou hogi e-dina labelaa gi Mee dela mai i-di langi.

15:50  Ogu duaahina-nei, dagu mee dela e-helekai-iei au, bolo tuaidina goneiga mono dodo, le e-deemee di-hai-mee gi Teenua King o God. Nia mee hogi ala e-mmade, le e-deemee di hai-mee gi-di mouli dee-odi.

15:51  Au e-hagi-adu di mee dela e-donu, e-de-iloo nia daangada: Gidaadou huogodoo hagalee mmade, gidaadou huogodoo le e-huli tadau huaidina hagalimalima gadoo be-di gemu o-di golomada, i-di madagoaa di buu haga-muliagina ma-ga-iliili. Di madagoaa di buu ma-ga-ili, gei digau ala ne-mmade ga-haga-mouli-aga ga-deemee di-mmade labelaa, gei gidaadou huogodoo gaa-huli.

15:52  Au e-hagi-adu di mee dela e-donu, e-de-iloo nia daangada: Gidaadou huogodoo hagalee mmade, gidaadou huogodoo le e-huli tadau huaidina hagalimalima gadoo be-di gemu o-di golomada, i-di madagoaa di buu haga-muliagina ma-ga-iliili. Di madagoaa di buu ma-ga-ili, gei digau ala ne-mmade ga-haga-mouli-aga ga-deemee di-mmade labelaa, gei gidaadou huogodoo gaa-huli.

15:53  Idimaa, nia mee ala e-mooho, le e-hai gii-huli, gaa-hai nia mee hagalee mooho, gei nia mee ala e-mmade, le e-hai gii-huli, gaa-hai nia mee ala e-mouli hua beelaa.

15:54  Di madagoaa o-di hai deenei ga-gila-aga, gei nia mee ala e-mee di-mmade la-gaa-huli ga-deemee di-mmade, malaa, nnelekai di Beebaa-Dabu gaa-donu, “Di made gu-daaligi gi-daha, di aali guu-dohu dogomaalia!

15:55  Di made, dehee doo aali? Di made, dehee do mogobuna haga-mmae-dangada?”

15:56  Di mogobuna o-di made e-hidi-mai i-di huaidu, gei di mogobuna o-di huaidu e-hidi mai i nnaganoho.

15:57  Di-mee-bolo God i dana hai gidaadou gi-aali mai i tadau Dagi go Jesus Christ.

15:58  Deenei-laa, ogu duaahina hagaaloho-nei, tuu maaloo, hudee maliuliu. Dugu-anga goodou i-nia madagoaa huogodoo ang-gi nnegau a Tagi, i goodou e-iloo godou hegau ala e-hai ang-gi Tagi, la hagalee balumee.

Chapter 16

16:1  Dolomeenei gei au e-helekai i-di bahihadu dela ne-hagabudu belee hagamaamaa nia dama a God ala i Judea: Goodou e-hai gii-hai dagu mee ne-haganoho ang-gi nia nohongo-dabu ala i Galatia gi-heia.

16:2  Nia laangi-tabu huogodoo, tangada-nei mo tangada-nei i goodou gi-dugu gi-daha dana bahihadu, e-hagabau gi-di baahi o ana bahihadu ala e-kumi, benabena-ina, gi-de-haga-budu labelaa godou bahihadu i dogu madagoaa ma-gaa-dau-adu gi godou baahi.

16:3  I-muli-hua dogu dau-adu, gei au gaa-wanga nia lede haga-modongoohia gi godou gau ala ne-hagamogobuna belee kae di-godou wanga-dehuia gi digau o Jerusalem.

16:4  Maa ga-humalia go dogu hana, gei digaula gaa-hula madalia au.

16:5  Au ga-gila-adu i-muli dogu hana laa-lodo Macedonia, idimaa, au e-hai gii-hana laa-lodo Macedonia.

16:6  Holongo au gaa-noho i godou baahi, holongo di madagoaa magalillili dogomaalia. Gei goodou e-mee di-hagamaamaa au, gii-mee dagu hana gi-nia gowaa ala belee hana ginai au.

16:7  Au e-hiihai bolo dogu heetugi adu gi mada duai i-dogu madagoaa ma-ga-hanadu laalaa. Tagi gi-dumaalia mai gii-noho au duai i godou baahi.

16:8  Gei-au gaa-noho-hua i Ephesus gaa-dae-loo gi-di laangi Pentekos.

16:9  Au guu-gida dagu madagoaa humalia e-hai agu hegau i-ginei, gei e-humalia huoloo, ma e-aha maa digau hagadaumee le e-dogologo.

16:10  Maa Timothy gaa-dau-adu gi godou baahi, gei goodou gi-hagaahi-ange a-mee, gii-noho a-mee manawa lamalia i godou baahi, idimaa, mee tangada e-hai nia hegau a Tagi Jesus gadoo be au.

16:11  Goodou hudee haga-balumee, gi-hagamaamaa-ina a-mee, gi-hanimoi labelaa a-mee i-lodo di aumaalia, gii-dau i dogu baahi, idimaa, au e-noho ge e-talitali a-mee mo nia duaahina hagadonu labelaa ala i-golo.

16:12  Gei tadau duaahina go Apollos: Au gu-helehelekai hagamahi gi mee gi-hanadu madalia tadau duaahina hagadonu dama a Christ ala i-golo. Mee digi baba dolomeenei. Hila-hua mee gu-iai dono madagoaa i-golo, gei mee ga-hanadu.

16:13  Goodou gii-noho kanakana, tuu maaloo i-lodo godou hagadonu. Gi-haga-mataane gi-maaloo.

16:14  Godou hegau huogodoo gi-heia i-di aloho.

16:15  Goodou gu-iloo humalia a Stephanas mo dono beneinei. Digaula ne-huli nadau lodo i-di matagidagi i Achaia gaa-dugu anga ginaadou gi nnegau o-nia daangada a God. Au e-dangi-adu gi goodou, ogu ihoo hagaaloho,

16:16  bolo goodou gi-daudalia nia hangaahai dagi beenei, mo digau huogodoo ala guu-buni gi digau aanei ala e-hai nadau hegau ang-gi God.

16:17  Au e-tene gi Stephanas, Fortunatus mo Achaicus ala ne-lloomoi. Digaula e-pono goodou ala hagalee i-ginei.

16:18  Digaula gu-haga-manawa lamalia au, e-hai gadoo be di-nadau haga-manawa lamalia goodou. Hagalaamua-ina nia daane ala e-hai beenei.

16:19  Nia nohongo-dabu ala i Asia e-hai di-nadau hagaaloho adu gi goodou. Aquila, Priscilla mo digau ala e-dagadagabuli ge e-dadaumaha i-di hale meemaa, e-hai di-nadau hagaaloho gi goodou i-di ingoo o Tagi.

16:20  Tadau duaahina huogodoo ala e-noho i-ginei, e-hai di-nadau hagaaloho adu gi goodou. Goodou gi-hagadau hagaaloho i godou mehanga gi-di hagaaloho o-nia dama a Christ.

16:21  Au e-hihi di-mee deenei gi dogu lima donu: Nia hagaaloho mai Paul.

16:22  Tangada dela ma-ga-hagalee e-aloho i Tagi, le e-halauwa. Maranatha — Tadau Dagi gi-hanimoi!

16:23  Tumaalia o tadau Dagi go Jesus gi-madalia goodou.

16:24  Dogu aloho gi-madalia goodou huogodoo, i-di ingoo o Jesus Christ.