CSlElizabeth - I Esdras

Chapter 1

1:1  И сотвори Иосиа пасху во Иерусалиме Господу своему, и пожре пасху четвертагонадесять дне перваго месяца,

1:2  поставляя священники по чредам в ризы одеянны в церкви Господни:

1:3  и рече левитом священнослужителем Израилевым, да освятят себе Господеви на поставление святаго кивота Господня в дому, егоже созда Соломон сын Давидов царь:

1:4  не будет вам взяти его на раменах и ныне служите Господу Богу вашему и пецытеся о языцех Его Израили, и уготовайтеся по отечеством и племеном вашым по писанию Давида царя Израилева и по величеству Соломона сына его:

1:5  и станите в церкви по участию началства отеческаго вашего левитскаго, иже пред братиею вашею сынми Израилевыми,

1:6  по чину пожрите пасху, и жертвы уготовайте братиям вашым, и сотворите пасху по заповеди Господни данней Моисею.

1:7  И даде Иосиа людем обретшымся (тамо) агнцев и овнов тридесять тысящ, телцев три тысящы: сия от царских дана суть по обещанию людем и священником и левитом..

1:8  И даде Хелкиа и Захариа и Сиил приставницы святилища жерцем на пасху овец две тысящы шесть сот, телцев триста.

1:9  И Иехониа, и Самеа, и Нафанаил брат, и Асавиа, и Охиил, и Иорам тысященачалницы даша левитом на пасху овец пять тысящ, телцев седмь сот.

1:10  И сим бывшым, благолепно сташа священницы и левити, имеюще опресноки, по племеном

1:11  и по частеначалством отцев, пред людьми приносити Господу по писанным в книзе Моисеове, и тако во утрие.

1:12  И испекоша пасху огнем, якоже подобаше, и жертвы свариша в сосудех медяных и в конобех со благовонием, и принесоша всем, иже от народа.

1:13  И по сих уготоваша себе и священником братиям своим сыновом Аароним.

1:14  Иерее бо возношаху тучная до конца часа, а левити уготоваша себе и жерцем братии своей, сыном Аароним.

1:15  Священнопевцы же сынове Асафовы бяху в чину своем по заповеди Давидове: и Асаф, и Захариа, и Еддинус иже бяше от царя.

1:16  И вратари при киихждо дверех: да не преступает кийждо своея чреды, братия бо их левити уготоваша им.

1:17  И совершишася жертвы Господни в той день сотворити пасху

1:18  и принести жертвы на жертвенник Божий по повелению царя Иосии.

1:19  И обретшиися во время то пасху и праздник опресночный дний седмь.

1:20  И не принесеся пасха такова во Израили от времене Самуила пророка,

1:21  и вси царие Израилевы не праздноваша таковыя пасхи, какову сотвори Иосиа, и священницы и левити, и Иудее и весь израиль обретшийся во обитании своем во Иерусалиме.

1:22  Во осмоенадесять лето царствующу Иосии празднована бысть пасха сия.

1:23  И управлена быша дела Иосиева пред Господем его сердцем полным благочестия:

1:24  и яже о нем, писана суть в прежних временех, о согрешивших и нечествовавших противу Господа паче всякаго языка и царства и имиже оскорбиша Его в разуме: и словеса Господня восташа на Израиля.

1:25  И по всему деянию сему Иосиину, случися фараону царю Египетскому идущу брань воздвигнути в Харкамисе при Евфрате: и изыде сопротиву ему Иосиа.

1:26  И посла царь Египетский к нему, глаголя: что мне и тебе есть, царю Иудин?

1:27  Несмь на тя послан от Господа Бога, на Евфрат бо брань моя есть: и ныне Господь со мною есть, и Господь поспешаяй ми есть, отступи от мене и не сопротивляйся Господеви.

1:28  И не возвратися Иосиа на колесницу свою, но ратовати его усиловашеся, не внемля словесем Иеремии пророка от уст Господних:

1:29  но постави противу его брань на поли Магеддонстем. И снидоша началницы ко царю Иосии.

1:30  И рече царь отроком своим: изведите мя от брани, изнемогох бо зело. И абие изведоша его отроцы его из ополчения.

1:31  И взыде на колесницу вторую свою, и пришед во Иерусалим жизнь свою премени, и погребен во отчем гробе.

1:32  И во всей Иудеи плакаша о Иосии: и рыдаше Иеремиа пророк о Иосии, и председящии со женами плакаху его даже до сего дне. И издадеся сие быти всегда на весь род Израилев.

1:33  Сия же вписана суть в книзе повестей о царех Иудиных, и коеждо сотвореное деяния Иосиина, и славы его, и разума его в законе Господни: яже прежде сотвореная от него, и яже ныне, писана суть в книзе царей Израилевых и Иудиных.

1:34  И вземше сущии от языка Иоахаза сына Иосиина, поставиша царем вместо Иосии отца его, суша двадесяти триех лет.

1:35  И царствова над Иудою и над Иерусалимом месяцы три: и отстави его царь Египетский, да не царствует во Иерусалиме.

1:36  И наложи на народ (Иудин) сребра талант сто и злата един талант.

1:37  И постави царь Египетский Иоакима брата его царем Иудеи и Иерусалиму.

1:38  И связа Иоаким вельможы, Заракина же брата своего емь изведе из Египта.

1:39  Лет же бяше двадесяти пяти Иоаким, егда царствовати нача в земли Иудине и Иерусалиме: и сотвори лукавое пред Господем.

1:40  На негоже изыде Навуходоносор царь Вавилонский, и связа его медяными узами, и приведе в Вавилон:

1:41  и священныя сосуды Господни взем Навуходоносор и принес положи в Вавилоне во храме своем.

1:42  А яже о нем глаголанная, и о нечистоте его и о злочестии, писана суть в книзе времен царских.

1:43  И воцарися Иоаким сын его вместо его: егда же поставлен бысть, бяше лет осминадесяти:

1:44  царствова же месяцы три и дний десять во Иерусалиме, и сотвори лукавое пред Господем.

1:45  И по лете послав Навуходоносор, пресели его в Вавилон вкупе со священными сосуды Господними,

1:46  и постави Седекию царя Иудеи и Иерусалиму, суща лет двадесяти единаго: царствова же лет единонадесять,

1:47  и сотвори лукавое пред Господем и не устыдеся от словес реченных Иеремиею пророком от уст Господних.

1:48  И заклят бысть от царя Навуходоносора именем Господним, и клявся отступи, и ожесточив свою выю и сердце свое, преступи законная Господа Бога Израилева.

1:49  И князие людий и священников многая беззакония сотвориша, и преступиша паче всех нечистот всех языков, и оскверниша дом Господень освященный во Иерусалиме.

1:50  И посла Бог отец их чрез ангела Своего призвати их, яко щадяше и и жилище Свое:

1:51  тии же поругашася посланным Его: и в оньже день глагола Господь, бяху ругающеся пророком Его,

1:52  дондеже прогневан Той на язык Свой за злочестия, повеле изыти на них царем Халдейским:

1:53  тии убиша юнош их мечем окрест святаго дому их: и не пощадеша юноши и девы, и старца и младенца,

1:54  но всех предаде в руки их: и вся священныя сосуды Господни малыя и великия, и сосуды кивота Господня, и царския ковчеги вземше принесоша в Вавилон:

1:55  и сожгоша дом Господень, и разориша стены Иерусалима, и столпы его сожгоша огнем,

1:56  и скончаша вся честнейшая его в ничтоже, и оставшихся от меча отведоша и Вавилон:

1:57  и беша раби ему и сыном его даже до царства Персскаго, во исполнение словес Господних от уст Иеремииных:

1:58  дондеже благоизволит земля субботы своя, во все время опустения своего субботствовати будет во исполнение лет седмидесяти.

Chapter 2

2:1  Царствующу Киру Персскому перваго лета, во исполнение слова Господня усты Иеремииными,

2:2  воздвиже Господь дух Кира царя Персскаго, и проповеда во всем царстве своем, и купно писаньми, глаголя:

2:3  сия глаголет Кир царь Персский: (Господь) мене постави царя вселенней, Господь Израилев, Господь Вышний,

2:4  и назнамена мне создати Ему дом во Иерусалиме, иже во Иудеи:

2:5  аще убо кто есть в вас от языка Его, да будет Господь его с ним: и возшед во Иерусалим, иже во Иудеи, да созиждет дом Господа Израилева: Сей Господь, иже вселися во Иерусалиме:

2:6  елицы убо окрест мест обитают, да помогут ему, иже суть на месте том, и златом и сребром,

2:7  даянием с конми и скоты и иными по обещанию предлагаемыми во святилище Господне, еже во Иерусалиме.

2:8  И стоящии началницы коленом отечеств Иудиных и колена Вениаминова, и священницы и левити, и вси, ихже дух воздвиже Господь взыти, создати дом Господень, иже во Иерусалиме,

2:9  и иже окрест их, помогоша во всем златом и сребром, конми и скоты и обетами многими зело, ихже чувство воздвижено бысть.

2:10  И Кир царь изнесе священныя сосуды Господни, ихже пренесе Навуходоносор (царь Вавилонский) из Иерусалима и постави их во идолнице своей:

2:11  и изнесе тыя Кир царь Персский и предаде я Мифридату сокровищехранителю своему,

2:12  той же предаде Сасавассару властителю Иудейскому.

2:13  Ихже сие число бе: возливалниц златых тысяща, и возливалниц сребряных тысяща, кадилниц сребряных двадесять девять, фиал златых тридесять, сребряных две тысящы четыре ста и десять, и иных сосудов тысяща:

2:14  всех же сосудов пренесеных златых и сребряных пять тысящ четыре ста шестьдесят девять.

2:15  Принесени же Сасавассаром вкупе с теми, иже от пленения из Вавилона во Иерусалим.

2:16  Во временех же Артаксеркса царя Персскаго, восписаша ему на обитающих во Иудеи и Иерусалиме Вилемос и Мифридат, и Тавеллий и Рафим, и Веелтефм и Самеллий писец, и прочии соучиненнии, обитающии в Самарии и во иных местех, нижеписанное послание:

2:17  царю Артаксерксу господину отроцы твои, Рафим писец случаев и Самеллий писец, и прочии от совета их и судии, иже в Килисирии и Финикии:

2:18  и ныне знаемо да будет господину царю, яко Иудее, иже взыдоша от вас, к нам пришедшии во Иерусалим град отметный и строптивый, созидают торжища его, и составляют стены его, и храм воздвизают:

2:19  аще убо град той созиждется и стены совершены будут, не токмо дани не потерпят даяти, но и царем воспротивятся:

2:20  а понеже действуются яже о храме, право быти разсуждаем не презрети сего,

2:21  но знаемо сотворити господину нашему царю, да аще возмнится тебе, да взыщется в книгах отец твоих,

2:22  и обрящеши в летописцех писано о тех, и познаеши, яко град той бяше отметник и царей и грады смущающь,

2:23  и Иудее отступницы, и ополчение сотворяюще в нем от века, еяже ради вины и град той опустошен бысть:

2:24  ныне убо знаемо ти творим, господине царю яко аще град сей создан будет и стены его возставлены будут, исходу тебе ктому не будет в Килисирию и Финикию.

2:25  Тогда восписа царь Рафиму пишущему случаемая и Веелтефму и Самеллию писцу и прочым, соучиненым и обитающым в Самарии и Сирии и Финикии, сия писаная:

2:26  чтох послание, еже посласте ко мне: повелех убо взыскати, и обретено есть, яко град той есть от начала царем противляющься,

2:27  и человецы отступления и ополчение в нем сотворяюще, и царие крепцы и жестоцы быша во Иерусалиме, обладающе и дани налагающе на Килисирию и Финикию:

2:28  ныне убо повелех возбранити человеком оным созидати град и предусмотряти, да ничтоже боле сих сотворят,

2:29  ни да происходят бо множайшая лукавства, во еже царем труд творити.

2:30  Тогда прочетше от царя Артаксеркса написанная Рафим и Самеллий писец и с ними соучиненнии, впрягше потщанно приидоша во Иерусалим с конники и народным ополчением,

2:31  и начаша созидающих удержавати: и упразднися созидание храма, иже во Иерусалиме, даже до втораго лета царства Дариа царя Персскаго.

Chapter 3

3:1  И воцарився Дарий сотвори вечерю велику всем, иже под ним, и всем, иже от дому рода его, и всем вельможам Мидским и Персским,

3:2  и всем сатрапом, и наместником, и воеводам, иже под ним от Индии даже до Ефиопии на сто двадесять седмь воеводств.

3:3  И егда ядоша и пиша, и насытившеся возвратишася, тогда Дарий царь вниде в ложницу свою, и поспа и возбудися.

3:4  Тогда трие юноши телеснии стражы, иже стрежаху тело царево, рекоша друг ко другу:

3:5  рцем кийждо от нас едино слово: и иже превозможет, и егоже явится слово мудрейше другаго, даст ему царь Дарий дары великия и почести великия,

3:6  и порфирою одеян будет, и во злате пити и на злате спати, и колесницу златоуздну, и кидар виссонный, и гривну окрест выи,

3:7  и вторый сядет по Дарии ради премудрости своея, и сродник Дариев наречется.

3:8  И тогда написавше кийждо свое слово запечаташа и подложиша под возглавие Дариа царя,

3:9  и рекоша: егда востанет царь, дадут ему писание, и егоже разсудит царь и три вельможи Персстии, яко слово его мудрейше есть, тому да дастся победа, якоже писано есть,

3:10  един написа: сильнее есть вино,

3:11  другий написа: сильнее есть царь.

3:12  Третий написа: сильнее суть жены, паче же всех побеждает истина.

3:13  Егда же воста царь, вземше писания даша ему, и прочте.

3:14  И послав созва всех вельможей Персских и Мидских и сатрапов, и воевод и наместников и ипатов,

3:15  и седе в советней палате, и прочтено бысть писание пред ними.

3:16  И рече: призовите юнош, и тии известят словеса своя. И призвани быша и внидоша.

3:17  И рече им: возвестите нам о тех, яже писана суть. И нача первый, иже глагола о крепости вина,

3:18  и рече сице: о, мужие, коль премогает вино! Всех человек пиющих его прельщает:

3:19  ум царев и сираго творит ум един, и раба и свободнаго, и убогаго и богатаго,

3:20  и всяк ум превращает в безстрашие и веселие, и не памятует всякия печали и всякаго долга:

3:21  и вся сердца сотворяет богата, и не памятует царя, ниже вельможи, и вся по талантом глаголати творит:

3:22  и не памятуют, егда пиют, угождати другом и братии, и не много потом извлачат мечы:

3:23  и егда от вина востанут, не помнят, яже сотвориша:

3:24  о, мужие не премогает ли вино, еже тако понуждает творити? И умолча глаголавый сице.

Chapter 4

4:1  И нача вторый глаголати, рекий о крепости царстей:

4:2  о, мужие! Не премогают ли человецы, землю и море обдержаще, и вся, яже в них?

4:3  Царь же премогает и господствует всеми и владычествует ими, и все, еже речет им, творят:

4:4  аще речет им творити брань ко друг другу, творят: и аще послет их на супостаты, идут и истрывают горы и стены и столпы,

4:5  убивают и убиваеми бывают, и царева словесе не преступают: аще же победят, царю приносят вся, и елика аще пленят, и ина вся:

4:6  и елицы не воюют, ниже ополчаются, но делают землю, паки, егда сеют, зажинающе приносят цареви,

4:7  и един другаго понуждающе, приносят дань царю:

4:8  и той сам един есть: аще речет убити, убивают: аще речет отпустити, отпускают: речет поразити, поразят:

4:9  речет разорити разорят: речет созидати, созидают: речет, посецыте, посецают: речет насадити, насаждают:

4:10  и вси людие его и силы его слушают единаго: и к сим той возлежит, яст и пиет и спит:

4:11  тии же стрегут окрест его и не могут отити, кийждо творити дел своих, ниже преслушают его:

4:12  о, мужие! Како не превозмогает царь, егоже тако слушают? И умолча.

4:13  Третий же, иже рече о женах и о истине, той есть Зоровавель, нача глаголати:

4:14  о, мужие! Не велик ли есть царь и мнози человецы, и вино не премогает ли? Кто же есть властвуяй ими или кто господствуяй ими? Не жены ли?

4:15  Жены родиша царей и всех людий, иже господствуют над морем и землею:

4:16  и от тех рождени суть, и тыя воздоиша тех, иже насадиша винограды, от которых вино творится:

4:17  и тыя творят ризы (красны) человеком, и тыя творят славу человеком, и не могут человецы быти без жен:

4:18  и аще соберут злато и сребро и всяку вещь красну, и увидят жену едину добру зраком и красотою,

4:19  и вся сия оставльше, на ню внемлют, и отверстыми усты зрят ю, и вси оныя желают паче злата и сребра и всякия вещи предрагия:

4:20  человек отца своего оставляет, иже воспита его и свою страну, и ко своей жене прилепляется,

4:21  и с женою оставляет душу, и ниже отца памятует, ни матере, ниже страны:

4:22  и отсюду подобает вам разумети яко жены властвуют вами: не болезнуете ли, и труждаетеся, и вся женам даете и приносите?

4:23  И вземлет человек оружие свое, и исходит на путь творити разбой, (убийства,) и татьбу и на море плавати и на реки,

4:24  и льва видит, и во мрак входит: и егда украдет и похитит и корысть обрящет, ко возлюбленней своей приносит:

4:25  и паче любит человек жену свою, нежели отца и матерь:

4:26  и мнози обезумишася от лиц женских и раби быша ради тех,

4:27  и мнози погибоша и прельстишася и согрешиша ради жен:

4:28  и ныне не веруете ли мне? Не велик ли есть царь во власти своей? Не вся ли страны не смеют прикоснутися ему?

4:29  Видех его и Апаминю, дщерь Вартака дивнаго, наложницу цареву, седящую одесную царя

4:30  и отемлющую диадиму со главы царевы и возлагающу на себе, и по ланите бияше царя левою рукою:

4:31  и кроме сих царь отверстыми усты зряше на ню: и аще посмеется пред ним, смеется и он: аще же разгневана будет нань, ласкает ю, дондеже примирится ему:

4:32  о, мужие, не сильны ли жены, яко сице творят?

4:33  И тогда царь и вельможи смотряху друг на друга. И нача глаголати о истине:

4:34  о, мужие, не сильны ли жены? Велика земля, и высоко небо, и быстро течением солнце, яко обращается на крузе небеснем и паки притекает на место свое во един день:

4:35  не велик ли, иже сия творит? И истина велика и крепчае паче всех:

4:36  вся земля истину призывает, и небо оную благословляет, и вся дела трясутся и трепещут (ея), и несть с нею обиды ни единыя:

4:37  обидит вино, обидит царь, обидит жены, неправедни вси сынове человечестии, и неправедна вся дела их сицевая, и несть в них истины, и во своей неправости погибают:

4:38  истина же пребывает и возмогает во век, и живет и обладает во век века,

4:39  и несть у нея приятия лица, ниже различия, но правая творит и от всех неправедных и лукавых огребается, и вси благоволят в делех ея,

4:40  и несть в суде ея ничтоже неправедно: и сия крепость и царство, и власть и величество всех веков: благословен Бог истины.

4:41  И преста глаголати. И вси людие тогда возопиша и рекоша: велика есть истина и премогает.

4:42  Тогда царь рече ему: проси еже хощеши, множае писаных, и дам тебе, понеже обретен еси мудрейший, и близ мене да сядеши, и сродник мой наречешися.

4:43  Тогда рече царю: помяни обещание твое, имже обещал еси создати Иерусалим в день, в оньже царство твое приял еси,

4:44  и вся сосуды взятыя из Иерусалима отпустити, ихже отлучи Кир, егда заклятся изсещи Вавилон, и обеща послати тамо:

4:45  ты же обещал еси создати храм, егоже сожгоша Идумее, егда опустошена бысть Иудеа от Халдеи:

4:46  и ныне сие есть, еже прошу от тебе, господи царю и о том молю тя, и сие есть величество, еже от тебе: молю убо, да сотвориши обещание, еже обещал еси Царю Небесному сотворити из уст твоих.

4:47  Тогда востав царь Дарий, облобыза его и написа о нем послание ко всем правителем и воеводам, и наместником и вельможам, да проводят его и всех сущих с ним восходящих созидати Иерусалим:

4:48  и всем наместником, иже бяху в Килисирии и Финикии и иже в Ливане, написа послание, да привозят древа кедрова от Ливана во Иерусалим и да созидают с ним град:

4:49  писа же и всем Иудеом восходящым от царства во Иудею о свободе, да всяк сильный и вельможа, и наместник и правитель не приходит ко вратом их,

4:50  и всю страну, юже обдержат, безданну быти им: и Идумее да оставят села Иудейская, имиже обладают:

4:51  и на созидание храма даяти по всякое лето талант двадесять, дондеже созиждется:

4:52  и на жертвенник всесожжения приносити на всяк день, якоже имеют заповедь, иных талант седмьнадесять, да приносят десять на коеждо лето:

4:53  и всем приходящым от Вавилона созидати град, да будет свобода им и сыном их, и всем священником приходящым.

4:54  Написа же и подаяние, и священническую ризу (повеле дати), в нейже служат.

4:55  И левитом писа даяти оброк даже до дне, в оньже совершится дом и Иерусалим созиждется.

4:56  И всем стрегущым града писа, даяти им жребии и оброки.

4:57  И отпусти вся сосуды, яже отлучи Кир от Вавилона, и вся елика рече Кир сотворити, и он повеле творити и послати во Иерусалим.

4:58  И егда изыде юноша (сей), воздвиг лице на небо прямо Иерусалиму, благослови Царя Небеснаго, глаголя:

4:59  от Тебе победа и от Тебе премудрость, и Твоя слава, и аз раб Твой:

4:60  благословен еси, иже дал еси мне премудрость, и Тебе исповемся, Господи Боже отец наших.

4:61  И прия послания, и изыде, и прииде в Вавилон, и возвести братии своей всем.

4:62  И благословиша Бога отец своих, яко даде им ослабу и отпущение,

4:63  да взыдут и созиждут Иерусалим и храм, идеже именовано есть имя Его в нем. И радовахуся с мусикиею и веселием дний седмь.

Chapter 5

5:1  По сих же избрани суть изыти началницы домов отечеств по племеном их, и жены их, и сынове их, и дщери их, и раби их, и рабыни их, и скоти их:

5:2  и Дарий царь посла с ними конники тысящу, дондеже возведут их во Иерусалим с миром и с мусикиею, с тимпаны и трубами:

5:3  и вся братия их бяху играюще, и сотвори их взыти вкупе с ними.

5:4  И сия суть имена мужей, иже взыдоша по отечеством своим и по коленом в части началств своих:

5:5  священницы сынове Финееса, сына Аароня, Иисус сын Иоседека Сареова и Иоаким сын Зоровавеля сына Салафиилева, от дому Давидова, от рода Фаресова, колена же Иудина,

5:6  иже глаголаше при Дарии цари Персстем словеса премудра, во второе лето царства его, месяца Нисана, перваго месяца.

5:7  Суть же сии от Иудеи изшедшии от плена преселения, ихже пресели Навуходоносор царь Вавилонский в Вавилон,

5:8  и возвратишася во Иерусалим и во прочую Иудею, кийждо во свой град, иже приидоша с Зоровавелем и Иисусом, Неемиею, Захариею, Рисеем, Енинием, Мардохеем, Веелсаром, со Асфарасом, с Реелием, с Роимом с Вааном, началники их.

5:9  Число сущих от языка и началницы их: сынове Форосовы две тысящы и сто седмьдесят два, сынове Сафатовы четыреста седмьдесят два,

5:10  сынове Аресовы седмь сот пятьдесят шесть,

5:11  сынове Фааф-Моавли две тысящы осмь сот и дванадесять,

5:12  сынове Иламовы тысяща двести пятьдесят четыре, сынове Зафуины девять сот четыредесять пять, сынове Корвеовы седмь сот пять, сынове Ваниины шесть сот четыредесять осмь,

5:13  сынове Виваины шесть сот двадесять три, сынове Садасовы три тысящы двести двадесять два,

5:14  сынове Адоникамовы шесть сот шестьдесят седмь, сынове Вагоины две тысящы шестьдесят шесть, сынове Адинуевы четыре ста пятьдесят четыре,

5:15  сынове Атирезекиевы девятьдесят два, сынове Килановы и Азитасовы шестьдесят седмь, сынове Азурановы четыре ста тридесять два,

5:16  сынове Ананиевы сто един, сынове Аромовы тридесять два, сынове Вассаевы триста дванадесять три, сынове Арсифурифовы сто два,

5:17  сынове Метировы три тысящи пять, сынове от Вефломонов сто двадесять три,

5:18  иже от Нетофаи пятьдесят пять, иже от Анафофа сто пятьдесят осмь, иже от Вефсамоса четыредесять два,

5:19  иже от Кариафиарима двадесять пять, иже из Кафиры и Вирофа седмь сот четыредесять три, иже из пиры седмь сот,

5:20  иже Хадиасовы и Амидиевы четыре ста двадесять два, иже от Кирама и Гаввиса шесть сот двадесять един,

5:21  иже от Макалона сто двадесять два, иже от Витолиа пятьдесят два, сынове Нифисовы сто пятьдесят шесть,

5:22  сынове Каламолалуевы и Онусовы седмь сот дванадесять пять, сынове Иереховы триста четыредесять пять,

5:23  сынове Анаасовы три тысящы триста тридесять.

5:24  Жерцы: сынове Иеддуа, сына Иисуева, с сыны Санасивовыми девять сот седмьдесят два, сынове от Мируфа тысяща пятьдесят два,

5:25  сынове Фасарони тысяща четыредесять седмь, сынове Хармиевы тысяща седмьнадесять.

5:26  Левити же: сынове Иесуевы и Кадмииловы, и Ваннуевы и Судиевы, седмьдесят четыре.

5:27  Священнопевцы: сынове Асафовы сто четыредесять осмь.

5:28  Дверницы же: сынове Салумовы, сынове Аттаровы, сынове Толмановы, сынове Дакувиевы, сынове Титаевы, сынове Самиевы, всех сто тридесять девять.

5:29  Священнослужителие: сынове Исавовы, сынове Асифаевы, сынове Таваофовы, сынове Кирасовы, сынове Судовы, сынове Фалеевы, сынове Лаванаевы, сынове Аграваевы,

5:30  сынове Акуаевы, сынове Утаевы, сынове Китавовы, сынове Агаваевы, сынове Сиваиевы, сынове Анани, сынове Кафуаевы, сынове Геддуровы,

5:31  сынове Иаировы, сынове Десановы, сынове Ноиваевы, сынове Хасеваевы, сынове Газираевы, сынове Озиевы, сынове Финоевы, сынове Асараевы, сынове Васфаиевы, сынове Асанаевы, сынове Меаниевы, сынове Нафисиевы, сынове Акувовы, сынове Акифаевы, сынове Асуровы, сынове Фаракимовы, сынове Васалофовы,

5:32  сынове Меедаевы, сынове Куфаевы, сынове Хареевы, сынове Харкусовы, сынове Асирари, сынове Фомиевы, сынове Насифовы, сынове Атифаевы.

5:33  Сынове отрок Соломоновых: сынове Асапфионовы, сынове Фарираевы, сынове Иеилевы, сынове Лозони, сынове Издаилевы, сынове Сафифовы,

5:34  сынове Агиаевы, сынове Фахарефовы, сынове Савиины, сынове Сарофиевы, сынове Масиасовы, сынове Гаровы, сынове Аддусовы, сынове Сувасовы, сынове Афераевы, сынове Варадисовы, сынове Сафатовы, сынове Алломовы.

5:35  Всех священнослужителей и сынов отрок Соломоновых триста седмьдесят два.

5:36  Сии возшедшии от Фермелефа и Фелерсаса, вождь их Хараафаларь и Ааларь,

5:37  и не могоша возвестити отечеств своих и родов, яко от Израиля ли суть: сынове Ладана сына Ванова, сынове Некодановы, шесть сот пятьдесят два:

5:38  и от жерцев творящии жречество, и не обретошася: сынове Авдиины, сынове Аккосовы, сынове Аддуса, поемшаго Авгию жену от дщерей Верзеллеевых, и прозван бысть во имя его:

5:39  и сих взыскану бывшу родословному писанию и не обретену, отлучени суть от священства.

5:40  И рече им Неемиа и Атфариа, да не причащаются святынь, дондеже востанет архиерей облечен во изявление и истину.

5:41  Вси же бяху от Израиля, от двунадесяти лет и выше, кроме рабов и рабынь, четыредесять две тысящы триста шестьдесят: раби сих и рабыни седмь тысящ триста четыредесять седмь, певцы и певицы двести четыредесять пять:

5:42  велблюд четыре ста тридесять пять, коней седмь тысящ тридесять шесть, мсков двести четыредесять пять, подяремник пять тысящ пять сот двадесять пять.

5:43  И от настоятелей по отечеством, егда приидоша во храм Божий, иже во Иерусалиме, обещаша воздвигнути храм на месте его по силе своей

5:44  и даяти во святое сокровище на дела злата мнас тысящу и сребра мнас пять тысящ и риз священнических сто.

5:45  И вселишася священницы и левити, и иже (изыдоша) от народа во Иерусалим и во страну, и священнопевцы, и дверницы, и весь Израиль в селех своих.

5:46  Настоящу же седмому месяцу и сущым сыном Израилевым коемуждо во своих, собрашася единодушно во двор первых врат восточных.

5:47  И востав Иисус сын Иоседеков и братия его священницы и Зоровавель сын Салафиилев и братия его, уготоваша олтарь Богу Израилеву,

5:48  да возносят на нем всесожжения по чину, якоже в книзе Моисеа человека Божия писана суть,

5:49  и собрашася к ним от иных народов земли, и воздвигнуша жертвенник на месте своем, яко во вражде бяху с ними, и премогоша их вси языцы земстии: и приношаху жертвы по времени и всесожжения Господеви, утреннее и вечернее.

5:50  И сотвориша кущей потчения праздник, якоже повелено в законе, и жертвы на всяк день, якоже подобаше,

5:51  и по сих приношения непрестанная, и жертвы субботния и новомесячныя и праздников всех освященных.

5:52  И елицы обещаша обет Богу от новомесячия седмаго месяца, начаша приносити жертвы Богу, храм же Господень не бысть еще создан.

5:53  И даша сребро каменосечцем и делателем пищу и питие с радостию, и даша карры Сидоняном и Тиряном, да привозят им от Ливана древа кедрова, да приведут судна во Иоппийское пристанище, по повелению, еже писано бысть им от Кира царя Персскаго.

5:54  И во второе лето пришед во храм Божии во Иерусалим, месяца втораго, нача Зоровавель сын Салафиилев и Иисус сын Иоседеков и братия их, и священницы, левити и вси, иже приидоша от пленения во Иерусалим,

5:55  и основаша храм Божий в новомесячии втораго месяца втораго лета, егда приидоша во Иудею и во Иерусалим,

5:56  и поставиша левиты от двадесяти лет на дела Господня: и ста Иисус и сынове его и братия и Кадмиил брат, и сынове Мадиавуни, и сынове Иодаа Илиадуева с сынми и братиями, вси левити единодушно дела призирателие, творяще дела в дому Господни, и создаша делателие дом Господень.

5:57  И сташа священницы облечени в ризы с мусикиею и трубами, и левити сынове Асафовы имеюще кимвалы, восхваляюще Господа и благословяще, по Давиду царю Израилеву,

5:58  и пояху песньми благословяще Господа, яко благость Его и слава во веки во всем Израили.

5:59  И вси людие вострубиша и возгласиша гласом великим, восхваляюще Господа о воздвижении дому Господня.

5:60  И приидоша от священников, левитов и предстоятелей по отечеством своим старейшины, иже видеша прежний дом, к сему созиданию с плачем и воплем великим,

5:61  и мнози со трубами и радостию гласа велия,

5:62  яко людем не слышати труб плача ради людскаго, народ бо бысть трубящь зело, яко далече слышатися.

5:63  И услышавше врази колена Иудина и Вениаминова, приидоша познати, кий глас трубный?

5:64  И познаша, яко сущии от пленения созидают храм Господу Богу Израилеву.

5:65  И приступльше к Зоровавелю и Иисусу и к началником отечеств, рекоша им: да созидаем вкупе с вами:

5:66  тако бо, якоже вы, слушаем Господа вашего и Ему жрем от дний Асвасарефа царя Ассирийскаго, иже пресели нас зде.

5:67  И рече им Зоровавель и Иисус и началницы отечеств Израилевых: несть вам и нам созидати дом Господу Богу нашему:

5:68  мы бо сами созиждем Господу Богу Израилеву по чину, якоже повеле нам Кир царь Персский.

5:69  Языцы же земстии стужающе сущым во Иудеи и пакости творяще, не попущаху созидати,

5:70  и козни и людий наводяще и крамолы творяще возбраниша совершити дело созидания во все время жизни Кира царя, и препятие сотвориша созиданию лета два, даже до Дариева царства.

Chapter 6

6:1  Во второе же лето царства Дариева пророчества Аггей и Захариа сын Аддов, пророцы, ко Иудеем, иже во Иудеи и во Иерусалиме, именем Господа Бога Израилева к ним.

6:2  Тогда став Зоровавель сын Салафиилев и Иисус сын Иоседеков, начаста созидати дом Господень, иже во Иерусалиме, сущым с ними пророком Господним помагающым им.

6:3  В то время прииде к ним Сисинний воевода Сирийский и Финикийский и Сафравузан и друзие его, и рекоша им:

6:4  чиим повелением вы дом сей созидаете, и кров сей, и ина вся совершаете? И кто суть строителие, иже сия созидают,

6:5  и имеша благодать посещения бывшаго на пленение от Господа старейшины Иудейстии:

6:6  и не возбраниша им созидати, дондеже возвестится Дарию о сих и отвещано будет.

6:7  Образ же послания, еже писаша Дарию и послаша: Сисинний воевода Сирийский и Финикийский и Сафравузан и друзие, иже в Сирии и Финикии воеводы, царю Дарию радоватися:

6:8  вся знаема да будут господину нашему царю, яко пришедше во страну Иудейску и вшедше во Иерусалим град, обретохом от пленения старейшин Иудейских во Иерусалиме граде

6:9  созидающих дом Господу велик, нов от каменей тесаных драгих, полагающе древа в стенах,

6:10  и дела та с прилежанием творятся, и преспевает дело в руках их и во всей славе и прилежании совершается:

6:11  тогда вопросихом старейшин оных, глаголюще: чиим повелением вы созидаете дом сей и дела та основаете?

6:12  Вопросихом убо их, да ведомо сотворим тебе и напишем ти человек предстателей, и имен писания испросихом от оных предстателей:

6:13  тии же отвещаша нам, глаголюще: мы есмы раби Господа, иже сотвори небо и землю,

6:14  и созидашеся сей дом прежде лет многих от царя Израилева великаго и крепкаго, и совершися,

6:15  и понеже отцы наши прогневавше согрешиша к Богу Израилеву небесному, предаде их в руки Навуходоносора царя Вавилонскаго, царя Халдейска,

6:16  дом же той разоривше сожгоша и людий плениша в Вавилон:

6:17  в первое же лето царствующу Киру царю над страною Вавилонскою, писа царь Кир дом той созидати,

6:18  и священныя сосуды златыя и сребряныя, ихже изнесе Навуходоносор из дому, иже во Иерусалиме, и постави я во своем капищи, паки изнесе та Кир царь от храма, иже в Вавилоне и предаде их Зоровавелю и Санавассару воеводе,

6:19  и повелено бысть ему отнести вся сия сосуды и возложити во храм, иже во Иерусалиме, и храм Господень сей созидати на месте его:

6:20  тогда Санавассар оный пришед, положи основания дому Господня, иже во Иерусалиме, и от онаго даже доныне зиждемый не прия совершения:

6:21  ныне убо, аще угодно тебе, о, царю, да поищется в царских книгохранилницах Кировых (яже в Вавилоне),

6:22  и аще обретено будет с повелением Кира царя бывшее строение дому Господня, иже во Иерусалиме, и судится от господина царя нашего, да возвестится о тех нам.

6:23  Тогда царь Дарий повеле искати в царских книгохранилницах сущих в Вавилоне, и обретено бысть во Екватанех, во граде сущем во стране Мидийстей, место едино (в летописце), в немже написана бяху сия:

6:24  в лето первое царствующу Киру, царь Кир повеле дом Господень, иже во Иерусалиме, созидати, идеже жряху огнем непрестанным,

6:25  егоже высота лакот шестьдесят, широта лакот шестьдесят, с домами каменей тесаных треми и с домом древяным того места новым единым, и расходы даяти из дому Кира царя:

6:26  и священныя сосуды дому Господня златыя же и сребряны, ихже взя Навуходоносор из дому (Господня), иже во Иерусалиме, и отнесе в Вавилон, возвратити в дом, иже во Иерусалиме, идеже бяху прежде, да поставятся тамо.

6:27  Повеле же (царь) прилежати Сисиннию воеводе Сирийску и Финикийску и Сафравузану и клевретом его и учиненным в Сирии и Финикии началником, да не приступают к месту, оставят же отроку Господню Зоровавелю, началнику же Иудейскому, и старейшинам Иудейским дом Господень оный созидати на месте его.

6:28  И аз повелех всячески созидати и прилежати, да помогают сущым от пленения Иудеом, дондеже совершится храм Господень:

6:29  и от дани Килисирийския и Финикийския прилежно собрание даяти сим человеком на жертву Господню, Зоровавелю епарху, на юнцы и овны и агнцы,

6:30  такожде и пшеницу и соль, и вино и елей, всегда на всяко лето, якоже священницы, иже во Иерусалиме, рекут иждивати на всяк день, без сомнения:

6:31  да приносятся возлияния Вышнему Богу за царя и отроки его, и да молят за их живот:

6:32  и да возвестится, елицы аще преступят что от предписанных или презрят, да возмется древо от своих ему, и на том да обесится, имения же его царю припишутся:

6:33  сих ради и Господь, Егоже имя призывается тамо, да истребит всякаго царя и язык, иже руку свою прострет возбранити, или озлобити дом Господень оный, иже во Иерусалиме:

6:34  аз царь Дарий повелех прилежно.

Chapter 7

7:1  Тогда Сисинний епарх Килисирийский и Финикийский, и Сафравузан, и друзие, последующе от Дариа царя повелением,

7:2  настояху священным делом, прилежнее содействующе старейшинам Иудеев и священноначалником:

7:3  и благопоспешна бяху священная дела, прорицающым Аггею и Захарии пророком.

7:4  И совершиша сия по заповеди Господа Бога Израилева и с повелением Кира и Дариа и Артаксеркса царей Персских:

7:5  и совершен бысть дом святый даже до третияго и двадесятаго дне месяца Адара, шестаго лета Дариа царя.

7:6  И сотвориша сынове Израилевы и священницы и левити и прочии, иже бяху от пленения, приставленнии, по написанным в книзе Моисеове,

7:7  и принесоша во обновление святилища Господня юнцев сто овнов двести, агнцев четыре ста,

7:8  козлов за грехи всего Израиля дванадесять по числу, от племеноначалников Израилевых дванадесяти.

7:9  И сташа священницы и левити по племеном одеяни в ризы, над делы Господа Бога Израилева, по книзе Моисеове, и вратари над киимиждо дверми,

7:10  и содеяша сынове Израилевы с сущими от пленения пасху в четвертыйнадесять день перваго месяца, егда освятишася священницы и левити.

7:11  Вси же сынове пленения не вкупе очистишася, понеже левити вси вкупе очистишася

7:12  и пожроша пасху всем сыновом пленения и братиям их священником и себе сами.

7:13  И ядоша сынове Израилевы, иже от пленения, вси отлучившиися от мерзостей языков земли, ищуще Господа,

7:14  и праздноваша праздник опресноков седмь дний, веселящеся пред Господем,

7:15  понеже обрати совет царя Ассирийскаго к ним, еже укрепити руки их на дела Господа Бога Израилева.

Chapter 8

8:1  И по сих, царствующу Артаксерксу царю Персскому, приступи Ездра сын Сариин, Езериев, Хелкиев, Салумов,

8:2  Садуков, Ахитов, Амариев, Езиев, Мемерофов, Зареев Сауиев, Воккаев, Ависумов, Финеесов, Елеазаров, Аарона перваго священника:

8:3  той Ездра взыде от Вавилона, яко книгочий благоразумен сый в законе Моисеове, даннем от Господа Бога Израилева,

8:4  и даде ему царь славу, обретшему благодать пред ним, над всеми достоинствы его.

8:5  И взыдоша вкупе с ним от сынов Израилевых, и священников и левитов, и священнопевцев и вратарей и рабов церковных во Иерусалим,

8:6  лета седмаго царствующу Артаксерксу в пятый месяц: то лето седмое царю: изшедше бо из Вавилона в новомесячии перваго месяца, приидоша во Иерусалим по данному им поспеху в путь от Господа:

8:7  ибо Ездра многое сведение обдержаше, дабы ничто оставити сущих от закона Господня и от заповеди, еже научити всего Израиля всем оправданием и судбам.

8:8  Прииде же написанное повеление от Артаксеркса царя ко Ездре священнику и чтецу закона Господня, егоже есть списание подлежащее:

8:9  царь Артаксеркс Ездре священнику и чтецу закона Господня радоватися:

8:10  человеколюбно аз судив, повелех хотящым от языка Иудейскаго с волею благою, и от священник и левит, и иже суть в царствии нашем, ити с тобою во Иерусалим:

8:11  елицы убо вожделеют, да соберутся и пойдут с тобою, якоже угодно мне и седми другом моим советником:

8:12  да увидят деемая во Иудеи и Иерусалиме, якоже есть в законе Господни,

8:13  и да вносят дары Господу Израилеву, ихже обещах аз и друзи во Иерусалим, и все злато и сребро, еже обретено будет во стране Вавилонстей, Господу во Иерусалим, с дарованным от языка во святилище Господа Бога их, еже во Иерусалим:

8:14  да соберется злато и сребро на юнцы и овны и агнцы, и яже тем последуют,

8:15  да приносят жертвы Господу на олтарь Господа Бога их, иже во Иерусалиме:

8:16  и вся елика хощеши с братиею твоею сотворити златом и сребром, соверши по воли Бога твоего,

8:17  и священныя сосуды Господни, иже даны суть тебе, к делу дому Господа Бога твоего, иже во Иерусалиме, да положиши пред Господем Богом твоим, иже во Иерусалиме:

8:18  и прочая, елика аще тебе потребна будут к делом храму Бога твоего, да даси от царскаго сокровища:

8:19  и аз царь Артаксеркс повелех стражем сокровища Сирийскаго и Финикийскаго, да, елико напишет Ездра священник и чтец закона Господа Бога Вышняго, прилежно дают ему, даже до сребра талант ста,

8:20  такожде и до пшеницы спудов ста и вина до мер ста:

8:21  и ина премнога вся по закону Божию да совершатся с поспешением Богу Вышнему, да не востанет гнев на царство царево и сынов его:

8:22  вам же глаголю, да всем священником и левитом, и священнопевцем и вратником, и рабом церковным и писцем церкве тоя, ни едина дань, ниже ина тягота будет, и ни едину власть имети налагати что на них:

8:23  ты же, Ездро, по премудрости Божией, постави судии и началники, да судят во всей Сирии и Финикии всех ведущих закон Бога твоего, а неведущих учи:

8:24  и вси елицы преступят закон Бога твоего и царский тщателно да накажутся, или смертию, или казнию, или сребра лишением, или изгнанием.

8:25  И рече Ездра книгочий: благословен един Господь Бог отец моих, иже даде сия в сердце царево прославити дом Его, иже во Иерусалиме,

8:26  и мене почте пред царем и советниками и всеми други и вельможи его:

8:27  и аз благодерзостен бых по помощи Господа Бога моего, и собрах от Израиля мужы, да вкупе взыдут со мною.

8:28  И сии предводителие по своим отечеством и началством, иже изыдоша со мною из Вавилона в царство Артаксеркса царя:

8:29  от сынов Финеесовых Гирсон, от сынов Ифамаровых Гамалиил, от сынов Давидовых Латтус, сын Сехениев,

8:30  от сынов Форосовых Захариа и с ним описанных мужей сто пятьдесят,

8:31  от сынов Фааф-Моавлих Елиаониа Зареов и с ним мужей двести,

8:32  от сынов Зафоевых Сехениа Езеилев и с ним мужей триста, от сынов Адиних Овиф Ионафуев и с ним мужей двести пятьдесят,

8:33  от сынов Иламовых Иесиа Гофолиев и с ним мужей седмьдесят,

8:34  от сынов Сафатиевых Зараиа Михаилов и с ним мужей седмьдесят,

8:35  от сынов Иоавлих Авадиа Иезилов и с ним мужей двести дванадесять,

8:36  от сынов Ваниевых Ассалимоф сын Иосафиев и с ним мужей сто шестьдесят,

8:37  от сынов Вавиевых Захариа Виваиев и с ним мужей двадесять осмь,

8:38  от сынов Астафовых Иоанн Акатань и с ним мужей сто десять,

8:39  от сынов Адоникамовых последнии, и сия суть имена их: Елифала сын Иеуилев и Самеа и с нима мужей седмьдесят,

8:40  от сынов Вагоевых Уфий Истакуров и с ним мужей седмьдесят.

8:41  И собрах их к реце яже нарицается Феран, и ополчихомся три дни зде, и пресмотрих их.

8:42  И от сынов священничих и от левитских не обрет тамо,

8:43  послах ко Елеазару и Идуилу, и Маазману и Алнафану, и Мамею и Самею и Иориву, Нафану, Еннатану, Захарии и Месулламу, предводителем и ученым,

8:44  и рекох им, да приидут к Доддею вожду, иже на месте сокровищехранилницы,

8:45  заповедав им рещи Доддею и братии его и сущым на месте сокровищехранителем, да послют к нам священствовати имущих в дому (Господа) Бога нашего.

8:46  И приведоша к нам державною рукою Господа Бога нашего мужы учены от сынов Моолиа сына Левиина, сына Израилева, Асевевию и сынов его и братию осмьнадесять,

8:47  и Асевию и Аннуа и Осеа брата от сынов Ханунеевых, и сынов их мужей двадесять:

8:48  и от церковных служителей, ихже даде Давид и началницы к деланию левитом, церковных служителей двести двадесять: всех же имена знаменованна суть в писании.

8:49  И обещах ту пост юношам пред Господем Богом нашим,

8:50  да взыщем от Него благ путь нам и сущым с нами чадом нашым и скотом.

8:51  Усрамихбося просити от царя пеших и конников и проводников ради охранения нам от супостат,

8:52  рекохом бо царю, яко сила Господа нашего будет со ищущими Его на всякое управление.

8:53  И паки помолихомся Господу Богу нашему о сих и милостива получихом.

8:54  И отлучих от племеноначалников и священников мужей дванадесять Есеврию и Ассамию и с ними от братии их мужей десять,

8:55  и извесих им сребро, злато и сосуды священныя дому Бога нашего, яже дарова царь и советницы его и вельможи и весь Израиль:

8:56  и извесив предах им сребра талант шесть сот пятьдесят, и сосуд сребряных талант сто, и злата талант сто, и сосудов позлащенных двадесять, и сосудов медяных от избранныя меди блещащихся златовидных, сосудов дванадесять,

8:57  и рекох им: и вы святи есте Господу, и сосуди святи, и злато и сребро обещанное Господу Богу отец наших:

8:58  бдите и храните, дондеже воздадите вы вся племеноначалником священников и левитов и началником отечеств Израилевых во Иерусалиме в сосудохранителнице дому Бога нашего.

8:59  И приемше священницы и левити сребро и злато и сосуды во Иерусалим, внесоша во храм Господень.

8:60  И воздвигшеся от реки Феры в дванадесятый день перваго месяца, внидохом во Иерусалим с крепкою рукою Господа нашего, яже с нами: и избави нас Господь от исхода пути от всех враг, и приидохом во Иерусалим.

8:61  И егда бысть тамо третий день, в четвертый день измереное злато и сребро предано в дом Господа Бога нашего Мармофе сыну Уриину священнику,

8:62  и с ним (бе) Елеазар сын Финеесов, и быста с нима Иосавад сын Иисусов и Моиф Саванниев сын, левитяне: вся по числу и весу, и написан бысть весь вес их в той час.

8:63  Пришедшии же от пленения принесоша жертвы Богу Израилеву юнец дванадесять за весь Израиль, овен девятьдесят шесть, агнец седмьдесят два, козлов за спасение дванадесять вся в жертву Господню.

8:64  И отдаша повеления царева царевым строителем и епархом Килисирии и Финикии, и почтоша язык и храм Господень.

8:65  И совершившымся сим, приступиша ко мне предводителие, глаголюще:

8:66  не отлучися род Израилев и началницы, и священницы и левити от иноплеменных языков земли и от нечистот их, от язык Хананеов и Хеттеов, и Ферезеов и Иевусеов, и Моавитов и Египтян и Идумеов:

8:67  сопрягошася бо со дщерьми их, и тии и сынове их, и смесися семя святое со иноплеменными языки земскими, и причастницы быша предводителие и вельможи беззакония сего от начала вещи.

8:68  И абие, егда услышах сия, раздрах одеяния и священную ризу, и терзах власы главы и брады, и седех скорбен и печален,

8:69  и собрашася ко мне, елицы тогда подвизахуся во слове Господа Бога Израилева, мне плачущу о беззаконии, и седех скорбен даже до вечерния жертвы:

8:70  и востах от поста, раздрана имеющь одеяния и священную ризу, преклонив колена и простер руце ко Господу, рекох:

8:71  Господи, постыдехся и усрамихся пред лицем Твоим,

8:72  греси бо наши умножишася выше глав наших, и безумия наша воздвигошася даже до небесе,

8:73  еще от времен отец наших, и есмы в велице гресе даже до дне сего:

8:74  и ради грех наших и отец наших предани есмы со братиями нашими и с царьми нашими и со священники нашими царем земным в мечь и пленение и в грабление со стыдением даже до днешняго дне:

8:75  и ныне колико бысть нам милосердие от Тебе, Господи Боже, еже оставити нам корень и имя на месте святыни Твоея

8:76  и еже открыти светилник нам в дому Господа Бога нашего, дати нам пищу во время работы нашея: и егда служихом, не быхом оставлени от Господа Бога нашего,

8:77  но постави нас во благодати пред цари Персскими дати нам пищу,

8:78  и прославити храм Господа нашего, и воздвигнути опустошенный Сион, дати нам твердыню во Иудеи и Иерусалиме:

8:79  и ныне что речем, Господи, имеюще сия? Преступихом бо повеления Твоя, яже дал еси рукою отроков Твоих пророков, глаголя:

8:80  яко земля, в нюже ходите наследити, земля осквернена есть скверною иноплеменных земли, и нечистотою своею наполниша ю,

8:81  и ныне дщерей ваших не сопрязите сыном их, и дщерей их не приемлите сыновом вашым,

8:82  и не взыщите мира имети с ними во все время, да укрепившеся ядите благая земли и достояние разделяете сыновом вашым даже до века:

8:83  и яже случаются нам, вся бывают ради дел наших лукавых и великих грех наших: Ты бо, Господи, облегчил еси грехи нашя

8:84  и дал еси нам сицевый корень, и паки обратихомся преступити закон Твой, еже смеситися с нечистотою язык земских:

8:85  не прогневался ли еси на ны погубити нас, дондеже не останется корень и семя и имя наше?

8:86  Господи Боже Израилев, истинен еси, остахомся бо корень до днешняго дне:

8:87  се, ныне есмы пред Тобою во беззакониих наших, несть бо стати еще пред Тобою в сих.

8:88  И егда моляся Ездра исповедашеся, плачущь на земли ниц простерт пред храмом, собрашася к нему от Иерусалима народ мног зело, мужие и жены, и юноши и юноты: плачь бо бысть велик в том множестве.

8:89  И возопив Иехониа Иеилев от сынов Израилевых, рече: Ездро, мы согрешихом ко Господу Богу, пояхом жены иноплеменничи от язык земли: и ныне есть пред тобою весь Израиль:

8:90  в том да будет нам клятва пред Господем, еже изгнати всех жен наших, яже от иноплеменных, со чады их, якоже судися тебе, и елицы повинуются закону Господню:

8:91  востав совершай, к тебе пристоит дело, и мы с тобою мужественно сотворим.

8:92  И востав Ездра, закля племеноначалников священнических и левитских всего Израиля сотворити по сим. И кляшася.

Chapter 9

9:1  И востав Ездра от притвора храма, иде в сосудохранилницу Иоанана сына Елиасивова,

9:2  и водворився тамо не вкушаше хлеба, ниже воды пияше, рыдая о беззакониих великих народа.

9:3  И бысть проповедание во всей Иудеи и Иерусалиме всем, иже бяху от пленения, еже собратися во Иерусалим:

9:4  и елицы не приидут в два или три дни, по суду председящих старейшин возмется имение их, и той чуждь будет от множества бывшаго в пленении.

9:5  И собрашася вси, иже бяху от колена Иудина и Вениаминова, в три дни во Иерусалим, сей месяц девятый, в двадесятый день месяца,

9:6  и седоша все множество на пространствии церковнем, дрожаще ради зимы настоящия.

9:7  И востав Ездра рече им: вы беззаконно сотворили есте, и поясте себе жены иноплеменничи, да приложите грехи ко Израилю:

9:8  и ныне дадите исповедание и славу Господу Богу отец наших

9:9  и сотворите волю Его, и отлучитеся от язык земных и от жен иноплеменных.

9:10  И возопи все множество и рекоша гласом великим: тако, якоже рекл еси, сотворим:

9:11  но множество велико есть, и время зимно, и не можем стояти без покрова, а дело несть нам единаго дне, ни дву, много бо в сих согрешихом:

9:12  да предстанут же и предводителие народа, и вси, иже с нами обитают, елицы имеют жен иноплеменных, да приидут обретше время,

9:13  и от всякаго места старейшины и судии, дондеже разрешится гнев Господень от нас, дела сего.

9:14  Ионафас сын Азаилев и Езекиа Фокануев сын Прияста по сему, и Месуллам и Левис и Савватий вкупе содействоваша има:

9:15  и сотвориша по всему сему бывшии от пленения.

9:16  И избра себе Ездра священник мужы началники отечеств их всех по имени, и седоша вкупе в новомесячии десятаго месяца испытати дело то.

9:17  И приведено бысть ко окончанию о мужех, иже имяху жены иноплеменничи, даже до новомесячия перваго месяца.

9:18  И обретошася от иереев собравшиися имуще жен иноплеменничих:

9:19  от сынов Иисуса сына Иоседекова и братии его Мафила и Елеазар, и Иорив и Иоадан,

9:20  и возложиша руки, да изгонят жены своя, и во умилостивление овны за неведение свое:

9:21  и от сынов Еммировых Ананиа и Завдей, и Ианин и Самиа, и Иереил и Азариа,

9:22  и от сынов Фесуровых Елионас, Масиа, Исмаил и Нафанаил, и Окидил и Салоа:

9:23  и от левит Иозавад и Семей, и Колий (сей есть Калита) и Фафей, и Иуда и Иона:

9:24  от священнопевцев Елиаксур, Вакхур:

9:25  от дверник Саллум и Толван:

9:26  от Израиля, от сынов Форосовых Иерма, Иеддиа и Мелхиа, и Маил и Елеазар, и Асивиа и Ваанеа,

9:27  от сынов Илаевых Матфаниа, Захариа и Иереил, и Иеримоф и Аидиа,

9:28  и от сынов Замофовых Елиада, Елисим, Офониа, Иаримоф, Сават и Сардей,

9:29  и от сынов Виваевых Иоанн и Ананиа, и Иозавад и Емафий,

9:30  от сынов Маниевых Олам, Мамух, Иеддей, Иасув и Иасаил и Иеримоф,

9:31  и от сынов Аддиевых Наафий и Моосиа, Лакун и Наид, и Матфаниа и Сесфил, и Валнуй и Манассиа,

9:32  и от сынов Ананих Елиона и Иасей, и Мелхиа и Саввей и Симон Хосамей,

9:33  и от сынов Асомовых Алтаней и Матфий, и Ванеа и Елифалат, и Манассиа и Семей,

9:34  и от сынов Ваанииных Иеремиа, Момдий, Исмаир, Иуил, Мавдай и Педиа и Анос, Равасион и Иенасив и Мамнитанаим, Елиасий, Вануй, Елиалий, Самий, Селемиа, Нафаниа, и от сынов Озораевых Сесий, Езрил, Азаил, Самат, Замврий, Иосиф,

9:35  и от сынов Ефмы Мазитиа, Завадаиа, Идаий, Иуил, Ванеа:

9:36  вси сии пояша себе жены иноплеменничи и отпустиша их со чады.

9:37  И вселишася священницы и левити, и иже (бяху) от Израиля во Иерусалиме и во стране, в новомесячии седмаго месяца, и сынове Израилевы во обителех своих.

9:38  И собрася все множество единодушно на пространство, еже ко востоку врат священных,

9:39  и рекоша Ездре архиерею и чтецу, да принесет закон Моисеов, преданный от Господа Бога Израилева.

9:40  И принесе Ездра архиерей закон всему множеству, от мужа даже до жены, и всем священником слышати закон в новомесячии седмаго месяца,

9:41  и чтяше на пространстве, еже пред священными враты церковными, от утра даже до полудне пред мужми же и женами: и даша все множество чувства в закон.

9:42  И ста Ездра священник и чтец закона на древянем амвоне, иже соделан бысть:

9:43  и сташа при нем Маттафиа, Самуй, Ананиа, Азариа, Уриа, Езекиа, Валасам одесную,

9:44  ошуюю же Фалдей и Мисаил, Мелхиа, Аофасув, Навариа, Захариа.

9:45  И взем Ездра книгу закона пред всем множеством, председяше бо во славе пред всеми,

9:46  и егда толковаше закон, вси прямо стояху. И благослови Ездра Господа Бога Вышняго, Бога Саваофа Вседержителя.

9:47  И возгласи весь народ: аминь. И воздвигше горе руки и припадше на землю, поклонишася Господу.

9:48  Иисус и Ануй, и Саравиа и Иадин и Иакув, Саватиа, Автей, Меаней и Калита, Азариа и Иозавд, и Ананиа и Виата, левити, учаху закону Господню и ко множеству чтяху закон Господень, внушающе купно чтение.

9:49  И рече Атфарат Ездре архиерею и чтецу, и левитом, иже учаху множество, глаголя:

9:50  день сей свят есть Господу, и вси плакаху, егда слышаху закон. (и рече Ездра:)

9:51  шедше убо ядите тучная и пийте сладкая и послите неимущым:

9:52  свят бо день Господень, и не скорбите, Господь бо прославит вас.

9:53  И левити повелеша всему сонму, глаголюще: день сей свят Господеви, не скорбите.

9:54  И идоша вси ясти и пити и веселитися и дати неимущым, да радуются (зело) много:

9:55  еще бо содержаша словеса, имже научишася, и собрашася.