TpiKJPB - I Corinthians

Chapter 1

1:1  ¶ Pol, husat God i singautim long stap wanpela aposel bilong Jisas Kraist long laik bilong God, na Sostenis, brata bilong yumi,

1:2  I go long dispela sios bilong God i stap long Korin, long ol husat i kamap holi insait long Kraist Jisas, husat God i singautim long stap ol seint, wantaim olgeta husat, long olgeta wan wan ples, i singaut long nem bilong Jisas Kraist, Bikpela bilong yumi, bilong ol na bilong yumi wantaim.

1:3  Marimari i ken stap long yupela, na bel isi, i kam long God, Papa bilong yumi, na i kam long Bikpela Jisas Kraist.

1:4  Mi tok tenkyu long God bilong mi olgeta taim long sait bilong yupela, long dispela marimari bilong God Jisas Kraist i givim yupela,

1:5  Inap long insait long olgeta wan wan samting yupela i kamap dia long wok bilong em, long olgeta autim, na long olgeta save.

1:6  Yes, olsem em i bin strongim testimoni bilong Kraist insait long yupela.

1:7  Inap long yupela i no kam bihain long wanpela presen, taim yupela i wet long kam bek bilong Bikpela bilong yumi Jisas Kraist,

1:8  Husat tu bai strongim yupela inap long pinis, inap long yupela i no ken gat asua long de bilong Bikpela bilong yumi Jisas Kraist.

1:9  God em i man yu inap bilip long em, long husat yupela i kisim singaut insait long pasin poroman bilong Pikinini Man bilong em Jisas Kraist, Bikpela bilong yumi.

1:10  ¶ Nau mi askim yupela plis strong, ol brata, long nem bilong Bikpela bilong yumi Jisas Kraist, long yupela olgeta i toktok long wankain samting, na long i no ken gat ol bruk namel long yupela, tasol long yupela i ken pas wantaim inap tru long wankain tingting na long wankain pasin bilong skelim.

1:11  Long wanem, ol husat i stap bilong hauslain bilong Klowi i bin tokaut long mi long yupela, ol brata bilong mi, long i gat ol strongpela pait namel long yupela.

1:12  Nau dispela mi toktok, long olgeta wan wan bilong yupela i tok, Mi bilong Pol, na mi bilong Apolos, na mi bilong Sifas, na mi bilong Kraist.

1:13  Kraist i bruk? Ol i nilim Pol long diwai kros bilong helpim yupela? O yupela i kisim baptais long nem bilong Pol?

1:14  ¶ Mi tok tenkyu long God long mi no baptaisim wanpela bilong yupela, Krispas na Gaias tasol,

1:15  Nogut wanpela i ken tok long mi bin baptaisim long nem bilong mi yet.

1:16  Na mi baptaisim tu hauslain bilong Stefanas. Narapela long ol, mi no save long mi baptaisim wanpela arapela o nogat.

1:17  ¶ Long wanem, Kraist i no salim mi long givim baptais, tasol long autim gutnius. I no wantaim ol toktok bilong save tru, nogut dispela i ken mekim diwai kros bilong Kraist i no gat pawa.

1:18  Long wanem, pasin bilong autim tok long diwai kros em i kranki pasin long ol husat i lus olgeta. Tasol long yumi husat God i kisim bek pinis em i pawa bilong God.

1:19  Long wanem, rait i stap pinis, Mi bai bagarapim olgeta save tru bilong saveman, na mi bai mekim gutpela save bilong ol man bilong yusim save long kamap samting nating.

1:20  Saveman i stap we? Man bilong rait i stap we? Ol man bilong tok pait bilong dispela graun i stap we? Ating i yes long God i mekim save tru bilong dispela graun long kamap kranki?

1:21  Long wanem, bihain long, insait long save tru bilong God, dispela graun, long save tru, i no bin save long God, em i amamasim bel bilong God long wok bilong kranki pasin bilong pasin bilong autim tok em i ken kisim bek ol husat i bilip.

1:22  Long wanem, ol Ju i strong long askim long wanpela mak, na ol Grik i painim strong save tru.

1:23  Tasol yumi autim tok long ol i nilim Kraist long diwai kros, long ol Ju em i wanpela samting bilong sutim lek, na long ol Grik em i kranki pasin.

1:24  Tasol long ol husat God i singautim, ol Ju na ol Grik wantaim, Kraist em i pawa bilong God, na save tru bilong God.

1:25  Bilong wanem, kranki pasin bilong God i winim save tru bilong ol man. Na pasin bilong i no gat strong bilong God i winim strong bilong ol man.

1:26  Long wanem, yupela i luksave long singaut bilong yupela, ol brata, olsem wanem long i no gat planti saveman i bihainim bodi, i no gat planti strongpela man, i no gat planti bikman, husat God i singautim.

1:27  Tasol God i bin makim ol kranki samting bilong dispela graun long paulim tingting bilong ol saveman. Na God i bin makim ol samting i no gat strong bilong dispela graun long paulim tingting bilong ol dispela samting i strongpela.

1:28  Na ol samting nating bilong dispela graun, na ol dispela samting ol man i tingim olsem i samting nating, God i bin makim, yes, na ol dispela samting i no stap, long mekim i kamap samting nating ol samting i stap.

1:29  Inap long i no ken gat wanpela man i ken glori long pes bilong em.

1:30  Tasol long em yupela i stap insait long Kraist Jisas, husat long God i kamap long yumi save tru, na stretpela pasin, na pasin bilong stap holi, na pasin bilong baim bek.

1:31  Inap long, bilong bihainim olsem rait i stap pinis, Em husat i glori, larim em glori insait long Bikpela.

Chapter 2

2:1  ¶ Na mi, ol brata, taim mi kam long yupela, mi no kam wantaim ol pasin bilong toktok o bilong save tru i gutpela moa, taim mi tokaut long yupela long testimoni bilong God.

2:2  Long wanem, mi pasim tok wantaim mi yet long mi no inap save wanpela samting namel long yupela, Jisas Kraist tasol, na em ol i nilim long diwai kros.

2:3  Na mi bin stap wantaim yupela long pasin i no gat strong, na long pret, na long planti guria.

2:4  Na toktok bilong mi na autim tok bilong mi i no stap wantaim ol toktok bilong grisim bilong save tru bilong man, tasol long pasin bilong soim klia Spirit na bilong pawa.

2:5  Inap long bilip tru bilong yupela i no ken sanap long save tru bilong ol man, tasol long pawa bilong God.

2:6  ¶ Tasol mipela i toktok wantaim save tru namel long ol husat i inap tru. Tasol i no save tru bilong dispela graun, o bilong ol hetman bilong dispela graun, i kamap samting nating,

2:7  Tasol mipela i toktok long save tru bilong God insait long wanpela tok hait, yes, save tru i hait, dispela God i makim bipo dispela graun i kamap i go long glori bilong yumi.

2:8  Dispela i no gat wanpela bilong ol hetman bilong dispela graun i save. Long wanem, sapos ol i bin save long en, ol i no bin gat laik long nilim Bikpela bilong glori long diwai kros.

2:9  Tasol olsem rait i stap pinis, Ai i no bin lukim, o ia i harim, na tu i no bin go insait long bel bilong man, ol dispela samting God i bin redim bilong ol husat i laikim em tru.

2:10  Tasol God i bin soim ol ples klia long yumi long wok bilong Spirit bilong em. Long wanem, Spirit i painimaut tru olgeta samting, yes, ol samting i dip bilong God.

2:11  Long wanem, wanem man i save long ol samting bilong man, sapos i no dispela spirit bilong man i stap insait long em? Yes, olsem tasol ol samting bilong God i no gat man i save, Spirit bilong God tasol i save.

2:12  Nau yumi bin kisim, i no spirit bilong dispela graun, tasol dispela spirit i bilong God, inap long yumi ken save long ol dispela samting God i givim fri long yumi.

2:13  Ol dispela samting tu mipela i toktok, i no long ol dispela toktok save tru bilong man i skulim, tasol dispela Holi Spirit i skulim, taim yumi skelim ol samting bilong spirit sait wantaim ol samting bilong spirit sait.

2:14  Tasol man bilong dispela graun i no inap kisim ol samting bilong Spirit bilong God. Long wanem, ol i kranki samting long ai bilong em. Na tu em i no ken save long ol, bilong wanem, ol i kamap klia tru long spirit sait.

2:15  Tasol em husat i strong long sait bilong spirit i jasim olgeta samting, tasol em em yet i no gat wanpela man i jasim.

2:16  Long wanem, husat i bin save long tingting bilong Bikpela, inap long em i ken skulim em? Tasol yumi gat tingting bilong Kraist.

Chapter 3

3:1  ¶ Na mi, ol brata, mi no ken toktok long yupela olsem ol man i strong long spirit sait, tasol olsem ol man bilong olpela bel, yes, olsem long ol bebi insait long Kraist.

3:2  Mi bin givim kaikai long yupela wantaim susu, na i no wantaim abus. Long wanem, inap long nau yupela i no inap long karim dispela, na tu yet nau yupela i no inap.

3:3  Long wanem, yupela i stap yet ol man bilong olpela bel. Long wanem, we i gat namel long yupela mangal tingting olsem, na strongpela pait, na ol bruk, ating i yes long yupela i ol man bilong olpela bel, na wokabaut olsem ol man?

3:4  Long wanem, taim wanpela i tok, Mi bilong Pol, na narapela, Mi bilong Apolos, ating i yes long yupela i ol man bilong olpela bel?

3:5  ¶ Nau Pol em i husat, na Apolos em i husat, ol wokman tasol long wok bilong husat yupela i bin bilip, yes, olsem Bikpela i givim long olgeta wan wan man?

3:6  Mi bin planim, Apolos i putim wara, tasol God i mekim i kamap bikpela moa.

3:7  Olsem na nau em husat i planim i no wanpela samting, na tu em husat i putim wara, tasol God husat i mekim i kamap planti moa.

3:8  Nau em husat i planim na em husat i putim wara i wanpela. Na olgeta wan wan man bai kisim pe bilong em yet bilong bihainim hatwok bilong em yet.

3:9  Long wanem, mipela i stap ol wokman wantaim wantaim God. Yupela i stap wok gaden bilong God, yupela i stap haus bilong God.

3:10  Bilong bihainim dispela marimari bilong God em i givim mi, olsem wanpela saveman tru bilong wokim haus, mi bin slipim ol as ston, na narapela i wokim haus antap long en. Tasol larim olgeta wan wan man was gut long em i wokim haus olsem wanem antap long en.

3:11  ¶ Long wanem, i no gat arapela as ston man i ken slipim moa long dispela mi slipim pinis, dispela em Jisas Kraist.

3:12  Nau sapos wanpela man i wokim antap long dispela as ston gol, silva, ol ston i dia tumas, diwai, gras i drai, pipia bilong wit samting,

3:13  Wok bilong olgeta wan wan man bai kamap ples klia. Long wanem, dispela de bai tokaut long en, bilong wanem, em bai kamap ples klia long paia. Na paia bai traim wok bilong olgeta wan wan man bilong soim wok i stap wanem kain.

3:14  Sapos wok bilong wanpela man i stap yet, dispela em i bin wokim antap long en, em bai kisim wanpela pe.

3:15  Sapos wok bilong wanpela man bai kuk, em bai lusim pe. Tasol em yet God bai kisim bek, yet olsem tasol long paia.

3:16  ¶ Ating i yes long yupela i save long yupela i stap tempel bilong God, na long Spirit bilong God i stap insait long yupela?

3:17  Sapos wanpela man i mekim tempel bilong God doti, God bai bagarap em olgeta. Long wanem, tempel bilong God em holi, yupela i stap dispela tempel.

3:18  ¶ No ken larim wanpela man giamanim em yet. Sapos wanpela man namel long yupela i luk olsem em i saveman long dispela graun, larim em kamap wanpela krankiman, inap long em i ken stap saveman.

3:19  Long wanem, save tru bilong dispela graun em i kranki pasin long God. Long wanem, rait i stap pinis, Em i kisim ol saveman insait long ol trik pasin bilong ol yet.

3:20  Na gen, Bikpela i save long ol tingting bilong ol saveman, long ol i samting nating.

3:21  ¶ Olsem na no ken larim wanpela man glori insait long ol man. Long wanem, olgeta samting i bilong yupela.

3:22  Sapos i Pol, o Apolos, o Sifas, o dispela graun, o laip, o dai, o ol samting i stap nau, o ol samting long kamap bihain, olgeta i bilong yupela.

3:23  Na yupela i bilong Kraist. Na Kraist i bilong God.

Chapter 4

4:1  ¶ Larim man kaunim mipela olsem, olsem ol wokman bilong Kraist, na ol man bilong lukautim ol samting hait bilong God.

4:2  Na moa tu ol i strong long ol man bilong lukautim samting, long ol i mas lukim man olsem man yu inap bilip long em.

4:3  Tasol long mi em i wanpela liklik samting tru long yupela i ken jasim mi, o long pasim bilong jasim bilong man. Yes, mi no jasim mi yet.

4:4  Long wanem, mi no save long wanpela samting long mi yet. Tasol dispela hia i no mekim mi stretpela. Tasol em husat i jasim mi em Bikpela.

4:5  Olsem na no ken jasim wanpela samting bipo long taim bilong en, inap long taim Bikpela i kam, husat bai bringim long lait ol samting hait bilong tudak, na husat bai mekim i kamap ples klia ol tingting bel i givim wantaim. Na nau bai God i givim biknem long olgeta wan wan man.

4:6  Na ol dispela samting, ol brata, mi gat long wanpela piksa mi putim i go long mi yet na long Apolos long tingim yupela. Inap long yupela i ken lainim long mipela long yupela i no ken tingim long ol man antap long dispela samting i stap long rait pinis, inap long i no ken gat wanpela bilong yupela i bikhet bilong wanpela i birua long narapela.

4:7  ¶ Long wanem, husat i mekim yu narakain long narapela? Na yu gat wanem samting long yu no bin kisim? Nau sapos yu bin kisim dispela, bilong wanem yu glori, olsem yu no bin kisim dispela?

4:8  Nau yupela i pulap, nau yupela i maniman, yupela i bin bosim kingdom olsem ol king taim mipela i no stap. Na long mi, gutpela moa em i laik bilong God long yupela i bin bosim kingdom, inap long mipela tu i ken bosim kingdom wantaim yupela.

4:9  Long wanem, mi ting olsem long God i bin putim mipela ol aposel i go las, samting olsem em i makim mipela long dai. Long wanem, mipela i kamap wanpela samting bilong lukluk long en long dispela graun, na long ol ensel, na long ol man.

4:10  Mipela i stap ol krankiman long tingim Kraist, tasol yupela i gat save tru insait long Kraist. Mipela i no gat strong, tasol yupela i gat strong. Yupela i gat ona, tasol ol man i tingim olsem mipela i samting nating.

4:11  Yes, inap long dispela aua nau mipela i hangre, na nekdrai, na skin nating wantaim, na ol i paitim mipela, na mipela i no gat ples stret bilong sindaun long en.

4:12  Na mipela i hatwok, taim mipela i wok wantaim ol han bilong mipela yet. Taim ol i sutim tok nogut, mipela i blesim. Taim ol i givim hevi, mipela i karim dispela.

4:13  Taim ol i bagarapim nem bilong mipela, mipela i mekim strongpela askim. Mipela i kamap olsem doti tru bilong dispela graun, na stap ol pipia bilong tromoi bilong olgeta samting i kam inap long tude.

4:14  ¶ Mi no raitim ol dispela samting long givim sem long yupela, tasol olsem ol pikinini man i stap klostu tru long bel bilong mi, mi tok lukaut long yupela.

4:15  Long wanem, maski yupela i gat 10,000 tisa insait long Kraist, yet yupela i no gat planti papa. Long wanem, insait long Kraist Jisas mi bin kamapim yupela long wok bilong gutnius.

4:16  Olsem na mi askim yupela plis strong, yupela i mas stap ol man bilong bihainim mi.

4:17  ¶ Long dispela as mi bin salim Timoti long yupela, husat i pikinini man i stap klostu tru long bel bilong mi, na man insait long Bikpela yu inap bilip long em, husat bai mekim yupela long holim tingting long ol dispela pasin bilong mi i stap insait long Kraist, olsem mi skulim long olgeta wan wan hap insait long olgeta wan wan sios.

4:18  Nau sampela i bikhet, olsem ol i ting mi no gat laik long kam long yupela.

4:19  Tasol mi bai kam long yupela klostu nau, sapos Bikpela i laik, na mi bai save, i no toktok bilong ol husat i bikhet, tasol dispela pawa.

4:20  Long wanem, kingdom bilong God i no stap long toktok, tasol long pawa.

4:21  Yupela i laikim wanem? Bai mi kam long yupela wantaim stik, ol long laikim tru, na long spirit bilong pasin bilong stap isi?

Chapter 5

5:1  ¶ Em i gat ripot i kam long olgeta long i gat pamuk pasin i stap namel long yupela, na kain pamuk pasin ol i no kolim olsem liklik namel long ol man i no Ju, inap long wanpela i ken kisim meri bilong papa bilong em.

5:2  Na yupela i bikhet, na yupela i no bin soim sori olsem i mobeta, inap long yupela i ken tekewe em husat i bin mekim dispela pasin long namel bilong yupela.

5:3  Long wanem, tru tumas, olsem mi no stap wantaim yupela long bodi, tasol mi stap long spirit, mi bin jasim pinis, olsem mi stap wantaim yupela, long sait bilong em husat i bin mekim dispela pasin olsem,

5:4  Long nem bilong Bikpela bilong yumi Jisas Kraist, taim yupela i bung wantaim, na spirit bilong mi, wantaim pawa bilong Bikpela bilong yumi Jisas Kraist,

5:5  Long givim kain man olsem i go long Seten bilong bagarapim bodi olgeta, inap long God i ken kisim bek spirit bilong em long de bilong Bikpela Jisas.

5:6  Taim yupela i glori em i no gutpela. Ating i yes long yupela i save long liklik yis i mekim olgeta hap long i gat yis?

5:7  ¶ Olsem na klinim i go dispela olpela yis, inap long yupela i ken stap wanpela nupela hap bret, olsem yupela i no gat yis. Long wanem, yes, God i sakrifaisim Kraist, pasova bilong yumi, bilong helpim yumi.

5:8  Olsem na larim yumi holimpas dispela bikpela kaikai, i no wantaim olpela yis, o wantaim yis bilong bel nogut long narapela na pasin nogut, tasol wantaim bret i no gat yis bilong trupela bel na tok tru.

5:9  ¶ Mi bin rait long yupela long wanpela pas long yupela i no ken raun wantaim ol pamuk man,

5:10  Tasol i no olgeta wantaim ol pamuk man bilong dispela graun, o wantaim ol man bilong mangal, o ol man bilong pulim samting wantaim pasin nogut, o wantaim ol man bilong lotuim piksa bilong god giaman, long wanem, sapos i olsem, yupela i mas gat nid long go ausait long dispela graun olgeta.

5:11  Tasol nau mi bin rait i go long yupela long yupela i no ken raun wantaim, sapos wanpela man husat ol i kolim brata i stap wanpela pamuk man, o man bilong mangal, o man bilong lotuim piksa bilong god giaman, o man bilong daunim tru, o spakman, o man bilong pulim samting wantaim pasin nogut. Wantaim kain man olsem, nogat, no ken kaikai.

5:12  Long wanem, mi gat wanem wok long jasim ol tu husat i stap ausait? Ating i yes long yupela i jasim ol husat i stap insait?

5:13  Tasol ol husat i stap ausait God i jasim. Olsem na rausim i go long namel long yupela yet dispela man nogut.

Chapter 6

6:1  ¶ Wanpela bilong yupela i inap liklik, taim em i gat wanpela samting i birua long narapela, long go long lo long ai bilong ol man i no stretpela, na i no long ai bilong ol seint?

6:2  Ating i yes long yupela i save long ol seint bai jasim dispela graun? Na sapos yupela bai jasim dispela graun, ating i yes long yupela i inap long jasim ol liklik samting tru?

6:3  Ating i yes long yupela i save long yumi bai jasim ol ensel? Hamas moa ol dispela samting i bilong dispela laip?

6:4  Nau sapos yupela i gat ol kot bilong ol samting bilong dispela laip, putim ol long jasim husat i gat liklik ona olgeta insait long sios.

6:5  Mi toktok long givim sem long yupela. Em i olsem, long i no gat wanpela saveman namel long yupela? Nogat, i no gat wanpela husat bai stap inap long jasim namel long ol brata bilong em?

6:6  Tasol brata i go long lo wantaim brata, na dispela long ai bilong ol man i no gat bilip.

6:7  Olsem na nau i gat wanpela asua olgeta namel long yupela, bilong wanem, yupela i go long lo wanpela wantaim narapela. Bilong wanem yupela i no kisim rong olsem i mobeta? Bilong wanem yupela i no larim ol man stil long yupela yet wantaim giaman olsem i mobeta?

6:8  Nogat, yupela i mekim rong, na stil wantaim giaman, na dispela long ol brata bilong yupela.

6:9  ¶ Ating i yes long yupela i save long ol man i no stretpela bai i no inap kisim kingdom bilong God olsem samting papa i givim pikinini? No ken bilipim giaman. Na tu ol pamuk man, o ol man bilong lotuim piksa bilong god giaman, o ol man bilong bagarapim marit long pamuk pasin, o ol man i mekim pasin olsem meri, o ol man i bagarapim ol yet nogut wantaim ol man,

6:10  O ol stilman, o ol man bilong mangal, o ol spakman, o ol man bilong sutim tok nogut, o ol man bilong pulim samting wantaim pasin nogut, bai i no inap kisim kingdom bilong God olsem samting papa i givim pikinini.

6:11  Na sampela bilong yupela i bin stap kain man olsem. Tasol God i wasim yupela, tasol yupela i kamap holi pinis, tasol yupela i kamap stretpela long nem bilong Bikpela Jisas, na long wok bilong Spirit bilong God bilong yumi.

6:12  ¶ Olgeta samting i orait long mi aninit long lo, tasol olgeta samting i no gutpela bilong helpim. Olgeta samting i orait long mi aninit long lo, tasol mi bai no inap go aninit long pawa bilong wanpela.

6:13  Ol kaikai bilong bel, na bel bilong ol kaikai. Tasol God bai bagarapim olgeta em na ol wantaim. Nau dispela bodi i no bilong pamuk pasin, tasol em i bilong Bikpela. Na Bikpela i bilong dispela bodi.

6:14  Na God i bin kirapim Bikpela, na tu em bai kirapim yumi wantaim wantaim pawa bilong em yet.

6:15  Ating i yes long yupela i save long ol bodi bilong yupela em ol hap bilong bodi bilong Kraist? Nau bai mi kisim ol hap bilong bodi bilong Kraist, na mekim ol ol hap bilong bodi bilong wanpela pamuk meri? I no ken tru.

6:16  Wanem? Ating i yes long yupela i save long em husat i pas wantaim long wanpela pamuk meri em i wanpela bodi? Long wanem, tupela, em i tok, bai kamap wanpela bodi.

6:17  Tasol em husat i pas wantaim long Bikpela em i wanpela spirit.

6:18  Ranawe long pamuk pasin. Olgeta wan wan sin long man i mekim, em i ausait long bodi. Tasol em husat i mekim pamuk pasin i mekim sin i birua long bodi bilong em yet.

6:19  Wanem? Ating i yes long yupela i save long bodi bilong yupela em i tempel bilong Holi Spirit husat i stap insait long yupela, husat yupela i kisim long God, na yupela i no bilong yupela yet?

6:20  Long wanem, God i baim yupela wantaim wanpela pe. Olsem na givim glori long God insait long bodi bilong yupela, na insait long spirit bilong yupela, dispela tupela i bilong God.

Chapter 7

7:1  ¶ Nau long sait bilong ol samting we yupela i raitim mi long en. Em i gutpela long man i no tasim meri.

7:2  Tasol, long abrusim pamuk pasin, larim olgeta wan wan man i ken gat meri bilong em yet, na larim olgeta wan wan meri i ken gat man bilong em yet.

7:3  Larim maritman i ken mekim gutpela samting em i mas mekim i go long meri bilong em. Na wankain olsem tu maritmeri i mas mekim long man bilong em.

7:4  Maritmeri i no gat pawa long bodi bilong em yet, tasol man bilong em. Na wankain olsem tu maritman i no gat pawa long bodi bilong em yet, tasol meri bilong em.

7:5  Yupela i no ken pasim bodi wanpela i go long arapela, sapos yutupela i no tok yes long mekim long taim yupela i makim, inap long yupela i ken givim yupela yet long pasin bilong tambuim kaikai na prea. Na bihain kam pas wantaim gen, inap long Seten i no ken traim yupela taim yupela i no inap long bosim bodi gut.

7:6  Tasol mi toktok long dispela bikos God i larim mi, na i no bilong wanpela tok strong.

7:7  Long wanem, mi gat laik long olgeta man, yes, i ken stap olsem mi yet. Tasol olgeta wan wan man i gat presen bilong em i stret i kam long God, wanpela i bihainim dispela pasin, na narapela i bihainim dispela.

7:8  Olsem na mi tokim ol lain i no marit na ol meri man bilong ol i dai pinis, Em i gutpela long ol sapos ol i stap, yes, olsem mi.

7:9  Tasol sapos ol i no inap bosim gut bodi, larim ol i ken marit. Long wanem, em i gutpela moa long marit long bel i ken kuk.

7:10  ¶ Na long ol lain i marit mi tok strong, tasol i no mi, tasol Bikpela, Maritmeri i no ken lusim man bilong em.

7:11  Tasol na sapos em i lusim em, larim em stap yet meri i no marit, o em i mas kamap wanbel gen wantaim man bilong em. Na maritman i no ken rausim i go meri bilong em.

7:12  Tasol long ol arapela mi toktok, i no Bikpela. Sapos wanpela brata i gat meri husat i no bilip, na meri i amamas long stap wantaim em, em i no ken rausim em i go.

7:13  Na maritmeri husat i gat man bilong em husat i no bilip, na sapos man i amamas long stap wantaim em, em i no ken lusim em.

7:14  Long wanem, maritman i no gat bilip i kamap holi long meri bilong em, na maritmeri i no gat bilip i kamap holi long man bilong em. Sapos nogat, ol pikinini bilong yupela i no klin. Tasol nau ol i stap holi.

7:15  Tasol sapos em husat i no gat bilip i go, larim em i go. Wanpela brata o susa i no stap aninit long kalabus long ol dispela kain hevi. Tasol God i bin singautim yumi long bel isi.

7:16  Long wanem, yu save wanem, O maritmeri, long yu bai kisim bek man bilong yu o nogat? O yu save olsem wanem, O maritman, long yu bai kisim bek meri bilong yu o nogat?

7:17  ¶ Tasol olsem God i bin tilim long olgeta wan wan man, olsem Bikpela i bin singautim olgeta wan wan, olsem tasol larim em wokabaut. Na mi makim olsem insait long olgeta sios.

7:18  Ating God i singautim wanpela man taim em i katim skin pinis? No ken larim em i kamap man i no katim skin. Ating God i bin singautim wanpela man taim em i no katim skin pinis? No ken larim em katim skin.

7:19  Pasin bilong katim skin em i samting nating, na pasin bilong i no katim skin em i samting nating, em i pasin bilong bihainim ol tok strong bilong God tasol.

7:20  Larim olgeta wan wan man stap yet insait long dispela wankain singaut we em i stap taim God i singautim em.

7:21  Ating God i singautim yu taim yu stap wanpela wokboi? No ken wari long en. Tasol sapos yu ken kamap fri, mobeta yu yusim dispela.

7:22  Long wanem, em husat God i singautim insait long Bikpela, taim em i stap wokboi, em i friman bilong Bikpela. Wankain olsem tu em husat God i singautim, taim em i stap fri, em i wokboi bilong Kraist.

7:23  God i baim yupela wantaim wanpela pe. Yupela i no ken stap ol wokboi bilong ol man.

7:24  Ol brata, larim olgeta wan wan man, we God i singautim em long en, stap yet insait long en wantaim God.

7:25  ¶ Nau long sait bilong ol meri i no bin slip wantaim man mi no gat wanpela tok strong i kam long Bikpela. Tasol mi givim tingting bilong mi, olsem wanpela husat i bin kisim sori bilong Bikpela long stap man yu inap bilip long em.

7:26  Olsem na mi ting olsem long dispela em i gutpela long dispela bikpela wari bilong nau, mi tok, long em i gutpela bilong wanpela man long stap olsem.

7:27  Ating yu pas pinis long wanpela meri? No ken painim rot long lusim em. Ating meri bilong yu i lusim yu pinis? No ken painim wanpela meri.

7:28  Tasol na sapos yu marit gen, yu no bin mekim sin. Na sapos wanpela meri i no bin slip wantaim man i marit, em i no bin mekim sin. Tasol kain lain olsem bai gat trabel long sait bilong bodi. Tasol mi soim sori long yupela.

7:29  Tasol mi mekim dispela tok, ol brata, taim i sot. Em i stap yet, long ol husat i gat ol meri bai stap olsem ol i no gat wanpela,

7:30  Na ol husat i krai tru, olsem ol i no bin krai tru, na ol husat i wokim amamas tru, olsem ol no bin wokim amamas tru, na ol husat i baim samting, olsem ol i no holimpas samting,

7:31  Na ol husat i yusim dispela graun, olsem ol i no bagarapim dispela nogut. Long wanem, pasin bilong dispela graun i wok long pinis olgeta.

7:32  Tasol mi gat laik long yupela i no ken wari. Em husat i no marit i wari long ol dispela samting i bilong Bikpela, long em i ken amamasim bel bilong Bikpela olsem wanem.

7:33  Tasol em husat i marit i wari long ol dispela samting i bilong dispela graun, long em i ken amamasim bel bilong meri bilong em olsem wanem.

7:34  Maritmeri na meri i no bin slip wantaim man i narakain tu. Meri i no marit i wari long ol samting bilong Bikpela, inap long em i ken stap holi long bodi na long spirit wantaim. Tasol meri husat i marit i wari long ol samting bilong dispela graun, long em i ken amamasim bel bilong man bilong em olsem wanem.

7:35  Na dispela mi toktok bilong helpim yupela yet. I no long mi ken tromoi wanpela trap antap long yupela, tasol bilong dispela samting i fit tru, na long yupela i ken givim ia long Bikpela taim i no gat arapela samting i kisim tingting.

7:36  ¶ Tasol sapos wanpela man i ting long wokabaut bilong em yet i no fit tru long meri bilong em i no bin slip wantaim man, sapos meri i abrusim nambawan hap bilong ol krismas bilong em, na nid i strong long en olsem, larim em mekim wanem samting em i laik, em i no mekim sin. Larim ol i ken marit.

7:37  Tasol em husat i sanap strong insait long bel bilong em, taim em i no gat nid, tasol em i gat pawa long bosim laik bilong em yet, na em i bin tokaut strong olsem insait long bel bilong em long em bai lukautim meri bilong em i no bin slip wantaim man, em i mekim gutpela.

7:38  Olsem na nau em husat i givim meri long marit i mekim gutpela. Tasol em husat i no givim meri long marit i mekim pasin i gutpela moa.

7:39  ¶ Maritmeri i kalabus long lo taim man bilong em i stap laip. Tasol sapos man bilong em i dai pinis, em i fri long maritim husat em i laik, insait long Bikpela tasol.

7:40  Tasol em i amamas moa sapos em i stap olsem, i bihainim tingting bilong mi. Na mi ting tu long mi gat Spirit bilong God.

Chapter 8

8:1  ¶ Nau long sait bilong ol samting ol i ofaim i go long ol piksa bilong god giaman, yumi save long yumi olgeta i gat save. Save i kamapim bikhet, tasol pasin bilong laikim tru i strongim bilip.

8:2  Na sapos wanpela man i ting long em i save long wanpela samting, em i no save wanpela samting yet olsem em i mas save.

8:3  Tasol sapos wanpela man i laikim tru God, em i save long dispela man stret.

8:4  ¶ Olsem na long sait bilong man i kaikai ol dispela samting ol i ofaim long sakrifais i go long ol piksa bilong god giaman, mipela i save long piksa bilong god giaman em i samting nating long dispela graun, na long i no gat arapela God, wanpela tasol.

8:5  Long wanem, maski i gat i stap dispela ol i kolim ol god, sapos long heven o long dispela graun, (olsem i gat ol god planti na ol bikman planti,)

8:6  Tasol long yumi i gat wanpela God tasol i stap, Papa, long husat olgeta samting i stap, na yumi insait long em. Na wanpela Bikpela Jisas Kraist, long wok bilong husat olgeta samting i stap, na yumi long wok bilong em.

8:7  ¶ Tasol dispela save i no stap insait long olgeta wan wan man. Long wanem, sampela wantaim save bilong piksa bilong god giaman i go inap long dispela aua i kaikai dispela olsem samting ol i ofaim i go long piksa bilong god giaman. Na mausbel bilong ol, taim i no gat strong, i kamap doti.

8:8  Tasol abus i no soim wok bilong yumi long God. Long wanem, sapos yumi kaikai, yumi i no stap gutpela moa. Na tu, sapos yumi no kaikai, yumi i no stap nogut moa.

8:9  Tasol was gut, nogut long wanpela rot dispela pasin bilong stap fri bilong yupela i kamap wanpela samting bilong sutim lek long ol husat i no gat strong.

8:10  Long wanem, sapos wanpela man i lukim yu husat i gat save i sindaun long kaikai long tempel bilong piksa bilong god giaman, ating i yes long mausbel bilong em husat i no gat strong bai i inap kamap strong long kaikai ol dispela samting, dispela ol i ofaim long ol piksa bilong god giaman,

8:11  Na long save bilong yu brata i no gat strong bai dai olgeta, long husat Kraist i bin dai?

8:12  Tasol taim yupela i mekim sin olsem i birua long ol brata, na bagarapim mausbel bilong ol i no gat strong, yupela i mekim sin i birua long Kraist.

8:13  Olsem na, sapos abus bai mekim brata bilong mi long bagarapim bel, mi bai i no inap kaikai abus taim dispela graun i sanap, nogut mi mekim brata bilong mi long bagarapim bel.

Chapter 9

9:1  ¶ Ating i yes long mi wanpela aposel? Ating i yes long mi stap fri? Ating i yes long mi bin lukim Jisas Kraist, Bikpela bilong yumi? Ating i yes long yupela i wok bilong mi insait long Bikpela?

9:2  Sapos mi no wanpela aposel long ol arapela, tasol i mas tru olgeta mi stap wanpela long yupela. Long wanem, yupela i stap mak bilong wok aposel bilong mi insait long Bikpela.

9:3  ¶ Bekim bilong mi long ol husat i skelim mi gut em dispela,

9:4  Ating i yes long mipela i gat pawa long kaikai na dring?

9:5  Ating i yes long mipela i gat pawa long stiaim nabaut wanpela susa, wanpela meri bilong mipela, wankain olsem ol arapela aposel, na olsem ol brata bilong Bikpela, na Sifas?

9:6  O mi wanpela na Banabas, ating i yes long mipela i gat pawa long lusim wok?

9:7  Husat i givim wok long em yet na go long bikpela pait wanpela taim? Husat i planim gaden wain, na em i no kaikai long kaikai bilong en? O husat i givim kaikai long wanpela lain sipsip, na i no kaikai long susu bilong dispela lain sipsip?

9:8  Ating mi tokim ol dispela samting olsem wanpela man? O ating i yes long lo i toktok long wankain samting tu?

9:9  Long wanem, rait i stap pinis long lo bilong Moses, Yu no ken pasim maus bilong bulmakau man husat i krungutim wit samting. Ating God i wari long ol bulmakau man?

9:10  O em i tokim dispela olgeta long tingim yumi? Long tingim yumi, i mas tru olgeta, em i raitim dispela. Inap long em husat i brukim graun i ken brukim graun wantaim hop. Na inap long em husat i klinim wit samting wantaim hop i ken kisim hap bilong dispela hop bilong em.

9:11  Sapos mipela i bin planim long yupela ol spirit sait samting, ating em i bikpela samting sapos mipela bai kamautim bilong ol bodi sait samting bilong yupela?

9:12  Sapos ol arapela i kisim hap bilong dispela pawa long bosim yupela, ating i yes long i mobeta long mipela i ken? Tasol mipela i no bin yusim dispela pawa. Tasol mipela i larim olgeta samting, nogut mipela i ken pasim rot bilong gutnius bilong Kraist.

9:13  Ating i yes long yupela i save long ol husat i wokim wok long sait bilong ol samting holi i stap laip long ol samting bilong tempel, na ol husat i mekim wok long alta i ol man bilong kisim hap wantaim dispela alta?

9:14  Yes, olsem tasol Bikpela i bin makim inap long ol husat i autim gutnius i ken stap laip long gutnius.

9:15  ¶ Tasol mi no bin yusim wanpela bilong ol dispela samting. Na tu mi no bin raitim ol dispela samting, long yupela i mas mekim olsem long mi. Long wanem, em i gutpela moa long mi ken dai, moa long wanpela man i ken mekim taim mi glori i kamap samting nating.

9:16  Long wanem, maski mi autim gutnius, mi no gat wanpela samting long glori long en. Long wanem, God i putim nid tru antap long mi. Yes, tok lukaut i stap long mi, sapos mi no autim gutnius!

9:17  Long wanem, sapos mi mekim dispela samting wantaim laik, mi gat wanpela pe. Tasol sapos em i birua long laik bilong mi, wanpela wok bilong tilim gutnius God i putim long han bilong mi.

9:18  Pe bilong mi em wanem nau? Tru tumas long, taim mi autim gutnius, mi no ken makim pe long gutnius bilong Kraist, inap long mi no bagarapim nogut pawa bilong mi insait long gutnius.

9:19  ¶ Long wanem, maski mi stap fri long olgeta man, yet mi bin mekim mi yet wokboi bilong olgeta, inap long mi ken winim planti man moa.

9:20  Na long ol Ju mi kamap olsem wanpela Ju, inap long mi ken winim ol Ju. Long ol husat i stap aninit long lo, olsem mi stap aninit long lo, inap long mi ken winim ol husat i stap aninit long lo,

9:21  Long ol husat i no gat lo, olsem mi no gat lo, ( na mi no stap man i no gat long lo long God, tasol aninit long lo long Kraist,) inap long mi ken winim ol husat i no gat lo.

9:22  Long ol man i no gat strong mi kamap olsem mi no gat strong, inap long mi ken winim ol man i no gat strong. Mi kamap olgeta samting long olgeta man, inap long mi ken, long olgeta kain rot, kisim bek sampela.

9:23  Na dispela mi mekim long tingim gutnius, inap long mi ken kisim hap bilong en wantaim yupela.

9:24  ¶ Ating i yes long yupela i save long ol husat i ran long resis, olgeta i ran, tasol wanpela i kisim prais? Ran olsem, inap long yupela i ken kisim.

9:25  Na olgeta wan wan man husat i pait strong bilong winim tru i bosim bodi gut long olgeta samting. Nau ol i mekim dispela long kisim wanpela hat king i bagarap. Tasol yumi mekim bilong kisim wanpela i no inap bagarap.

9:26  Olsem na mi ran olsem, i no olsem mi no klia. Mi pait olsem, i no olsem wanpela husat i paitim paitim win nating.

9:27  Tasol mi mekim bodi bilong mi stap aninit, na bringim em aninit long laik bilong mi. Nogut long wanpela rot, taim mi bin autim tok long ol arapela, mi mi yet i ken kamap wanpela samting bilong tromoi.

Chapter 10

10:1  ¶ Na moa tu, ol brata, mi no gat laik long yupela i ken stap ol man i no klia, olsem long olgeta tumbuna papa bilong yumi i stap aninit long dispela klaut, na olgeta i bin wokabaut namel long biksi.

10:2  Na olgeta i kisim baptais long Moses insait long klaut na insait long biksi.

10:3  Na olgeta i bin kaikai dispela wankain kaikai bilong spirit sait.

10:4  Na olgeta i bin dringim dispela wankain dring bilong spirit sait. Long wanem, ol i dring long dispela Ston bilong spirit sait husat i bihainim ol. Na dispela Ston em Kraist.

10:5  Tasol wantaim planti bilong ol God i no amamas gut. Long wanem, ol i bagarap long ples i no gat man.

10:6  ¶ Nau ol dispela samting em i ol piksa bilong helpim yumi, long dispela as, long yumi no ken aigris i bihainim ol samting nogut, olsem ol tu i bin aigris.

10:7  Na tu yupela i no ken stap ol man bilong lotuim piksa bilong god giaman, olsem sampela bilong ol, olsem rait i stap pinis, Ol manmeri i sindaun long kaikai na dring, na kirap long pilai.

10:8  Na tu yumi no ken mekim pamuk pasin, olsem sampela bilong ol i mekim, na long wanpela de 23,000 i pundaun.

10:9  Na tu yumi no ken traim Kraist, olsem sampela bilong ol tu i traim em, na ol snek i bagarapim ol olgeta.

10:10  Na tu yupela i no ken tok baksait, olsem sampela bilong ol tu i tok baksait, na man bilong bagarapim ol olgeta i bagarapim ol olgeta.

10:11  Nau olgeta dispela samting i kamap long ol bilong givim ol piksa. Na ol i raitim ol bilong givim strongpela skul long yumi, antap long husat ol pinis bilong dispela graun i kam.

10:12  Olsem na larim em was gut husat i ting em i sanap, nogut em i pundaun.

10:13  I no gat wanpela traim i bin kisim yupela we em i no kain samting bilong olgeta man tasol. Tasol God em i man yu inap bilip long em, husat bai i no inap larim yupela kisim traim i antap moa long samting yupela i inap long en. Tasol wantaim traim tu em bai wokim wanpela rot long ranawe, inap long yupela i ken stap inap long karim dispela.

10:14  Olsem na, ol man i stap klostu tru long bel bilong mi, ranawe long pasin bilong lotuim ol piksa bilong god giaman.

10:15  ¶ Mi toktok olsem mi toktok long ol saveman. Yupela i mas jasim wanem samting mi tok.

10:16  Dispela kap bilong blesing yumi blesim, ating i yes long em i poroman pasin bilong blut bilong Kraist? Dispela bret yumi brukim, ating i yes long em i poroman pasin bilong bodi bilong Kraist?

10:17  Long wanem, taim yumi stap planti, yumi stap wanpela bret, na wanpela bodi. Long wanem, yumi olgeta i kisim hap bilong dispela wanpela bret.

10:18  Lukim Israel long sait bilong bodi. Ating i yes long ol husat i kaikai bilong ol sakrifais i kisim hap bilong alta?

10:19  Nau mi tok wanem? Long piksa bilong god giaman em i wanpela samting, o long dispela samting ol i ofaim long sakrifais long ol piksa bilong god giaman em i wanpela samting?

10:20  Tasol mi tok, long ol dispela samting ol man i no Ju i sakrifaisim, ol i sakrifaisim i go long ol spirit nogut, na i no long God. Na mi no gat laik long yupela i ken gat poroman pasin wantaim ol spirit nogut.

10:21  Yupela i no inap dringim kap bilong Bikpela, na kap bilong ol spirit nogut. Yupela i no inap kisim hap bilong tebol bilong Bikpela, na tebol bilong ol spirit nogut.

10:22  Ating yumi skrapim bel bilong Bikpela long pasin jeles? Ating yumi strong moa long em?

10:23  ¶ Olgeta samting i orait long mi aninit long lo, tasol olgeta samting i no gutpela bilong helpim. Olgeta samting i orait long mi aninit long lo, tasol olgeta samting i no strongim bilip.

10:24  Man i no ken painim samting bilong em yet, tasol olgeta wan wan man samting bilong helpim gut narapela.

10:25  Wanem samting ol i salim long abus maket, kaikai dispela, na long tingim mausbel, no ken askim ol askim.

10:26  Long wanem, dispela graun i bilong Bikpela, na olgeta samting i pulap tru long en.

10:27  Sapos wanpela bilong ol husat i no bilip i askim yupela long go long wanpela bikpela kaikai, na yupela i gat laik long go, wanem samting ol i putim long ai bilong yupela, kaikai, na long tingim mausbel, no ken askim ol askim.

10:28  Tasol sapos wanpela man i tokim yupela, Ol i ofaim dispela long sakrifais i go long ol piksa bilong god giaman, yu no ken kaikai, long tingim dispela man husat i soim yu dispela, na long tingim mausbel. Long wanem, dispela graun i bilong Bikpela, na olgeta samting i pulap tru long en.

10:29  Mausbel, mi tok, i no bilong yu yet, tasol bilong dispela arapela. Long wanem, bilong wanem mausbel bilong narapela man i ken jasim pasin bilong stap fri bilong mi?

10:30  Long wanem, sapos mi, long marimari, i stap man bilong kisim hap, bilong wanem ol i toktok nogut long sait bilong mi long dispela samting mi givim tok tenkyu long en?

10:31  Olsem na, sapos yupela i kaikai, o dring, o wanem samting yupela i mekim, mekim olgeta long givim glori long God.

10:32  No ken bagarapim wanpela bel, bilong ol Ju, o bilong ol man i no Ju, o bilong sios bilong God.

10:33  Yes, olsem mi amamasim bel bilong olgeta man long olgeta samting, taim mi no painim helpim bilong mi yet, tasol helpim bilong planti, inap long God i ken kisim bek ol.

Chapter 11

11:1  ¶ Yupela i mas bihainim mi, yes, olsem mi tu i bilong Kraist.

11:2  Nau mi givim biknem long yupela, ol brata, long yupela i holim tingting long mi long olgeta samting, na yupela bihainim ol lo God i makim, olsem mi bin givim ol long yupela.

11:3  Tasol mi gat laik long yupela i ken save, long het bilong olgeta wan wan man em Kraist. Na het bilong meri em man. Na het bilong Kraist em God.

11:4  Olgeta wan wan man taim em i beten o autim tok profet, taim em i karamapim het bilong em, i bagarapim ona bilong het bilong em.

11:5  Tasol olgeta wan wan meri husat i no karamapim het bilong em taim em i beten o autim tok profet i bagarapim ona bilong het bilong em. Long wanem, yes, dispela em i wankain olsem sapos em i bin sevim het bilong em.

11:6  Long wanem, sapos meri i no karamapim het bilong em, larim em tu katim gras olgeta. Tasol sapos em i stap samting bilong sem long meri long katim gras olgeta o sevim het, larim em karamapim het bilong em.

11:7  Long wanem, em i tru long em i gutpela long man i no karamapim het bilong em, bikos em i piksa na glori bilong God. Tasol meri em i glori bilong man.

11:8  Long wanem, man i no kam pastaim long meri, tasol meri i kam long man.

11:9  Na tu God i no kamapim man long nating bilong helpim meri, tasol em i kamapim meri bilong helpim man.

11:10  Long dispela as meri i mas gat pawa antap long het bilong em, bilong wanem, ol ensel i stap.

11:11  Tasol man tu i no stap wanpela ausait long meri, na tu meri i no stap wanpela ausait long man, insait long Bikpela.

11:12  Long wanem, olsem meri i kam long man, yes, olsem tasol man tu i kam long meri. Tasol olgeta samting i kam long God.

11:13  Jasim insait long yupela yet. Em i fit tru long wanpela meri i beten long God taim em i no karamapim het bilong em?

11:14  Yes, ating i yes long samting bilong bodi sait em yet i skulim yupela, long, sapos man i gat longpela gras, em i samting bilong sem long em?

11:15  Tasol sapos meri i gat longpela gras, dispela em i glori long em. Long wanem, God i givim em gras bilong em bilong samting bilong karamapim.

11:16  Tasol sapos wanpela man i luk olsem man i laik pait strong long dispela, yumi i no gat kain kastam olsem, na tu ol sios bilong God.

11:17  ¶ Nau long dispela samting mi tokaut i go long yupela mi no givim biknem long yupela, long yupela i no kam bung wantaim bilong kamap gutpela moa, tasol bilong kamap nogut moa.

11:18  Long wanem, namba wan bilong olgeta, taim yupela i kam bung wantaim insait long sios, mi harim long i gat ol bruk namel long yupela. Na mi bilipim hap bilong en.

11:19  Long wanem, i mas gat tu ol giaman bilip namel long yupela, inap long ol husat i orait long ai bilong God i ken kamap ples klia namel long yupela.

11:20  Olsem na taim yupela i kam bung wantaim long wanpela ples, dispela em i no long kaikai kaikai bilong Bikpela.

11:21  Long wanem, taim yupela i kaikai, olgeta wan wan i kisim kaikai bilong em yet bipo long ol arapela. Na wanpela i hangre, na narapela i pulap olgeta.

11:22  Wanem? Ating i yes long yupela i gat ol haus long kaikai na dring insait long ol? O yupela i tingim olsem sios bilong God i samting nating, na yupela i givim sem long ol husat i no gat kaikai? Bai mi tok wanem long yupela? Bai mi givim biknem long yupela long dispela? Mi no givim biknem long yupela.

11:23  ¶ Long wanem, mi bin kisim long Bikpela dispela samting tu mi bin givim long yupela, Long Bikpela Jisas, long dispela nait stret long Judas i putim em long han bilong birua, i kisim bret.

11:24  Na taim em i bin givim tok tenkyu, em i brukim, na tok, Kisim, kaikai. Dispela em i bodi bilong mi, dispela i bruk bilong helpim yupela. Mekim dispela long holim tingting long mi.

11:25  I bihainim dispela wankain pasin tu em i kisim dispela kap, taim em i bin kaikai pinis, i spik, Dispela kap em nupela testamen long blut bilong mi. Dispela yupela i mekim, hamas taim yupela i dringim dispela, long holim tingting long mi.

11:26  Long wanem, hamas taim yupela i kaikai dispela bret, na dring long dispela kap, yupela i soim dai bilong Bikpela inap long taim em i kam.

11:27  Olsem na husat man bai kaikai long dispela bret, na dring long dispela kap bilong Bikpela, taim em i no gat namba inap inap long en, bai gat asua long bodi na blut bilong Bikpela.

11:28  Tasol larim wanpela man skelim gut em yet, na olsem tasol larim em kaikai long dispela bret, na dring long dispela kap.

11:29  Long wanem, em husat i kaikai na dringim taim em i no inap, i kaikai na dringim pe nogut bilong kot long em yet, taim em i no klia tru long bodi bilong Bikpela.

11:30  Long dispela as planti i no gat strong na ol lain i sik i planti namel long yupela, na planti i slip pinis.

11:31  Long wanem, sapos yumi i ken jasim yumi yet, yumi no ken stap aninit long kot.

11:32  Tasol taim yumi stap aninit long kot, Bikpela i stikim yumi, inap long yumi i no ken lus long kot wantaim ol man bilong dispela graun.

11:33  Olsem na, ol brata bilong mi, taim yupela i kam bung wantaim long kaikai, stap yet wanpela bilong helpim narapela.

11:34  Na sapos wanpela man i hangre, larim em kaikai long haus bilong em, inap long yupela i no kam bung wantaim bilong soim klia rong. Na ol arapela samting mi bai stretim gut taim mi kam.

Chapter 12

12:1  ¶ Nau long sait bilong ol presen long spirit sait, ol brata, mi no gat laik long yupela i no klia.

12:2  Yupela i save long yupela i bin stap ol man i no Ju, na ol piksa bilong god giaman i mauspas i bin karim yupela i go, yes, olsem ol i stiaim yupela.

12:3  Olsem na mi givim long yupela long save, long i no gat man, taim em i toktok long Spirit bilong God, husat i kolim Jisas samting i lus olgeta. Na long i no gat man i ken tok long Jisas em i Bikpela, sapos i no long Holi Spirit tasol.

12:4  Nau i gat kain kain presen, tasol wanpela Spirit stret.

12:5  Na i gat ol narakain rot bilong lukautim samting, tasol wanpela Bikpela stret.

12:6  Na i gat kain kain wok, tasol em i dispela wanpela God stret husat i wokim olgeta insait long olgeta.

12:7  Tasol long olgeta wan wan man God i givim samting i mekim Spirit i kamap ples klia, long kisim helpim wantaim.

12:8  Long wanem, long wanpela, Spirit i givim tok bilong save tru, long narapela tok bilong save, long dispela Spirit stret,

12:9  Long narapela bilip tru, long dispela Spirit stret, long narapela ol presen bilong stretim sik, long dispela Spirit stret,

12:10  Long narapela pawa bilong wokim ol mirakel, long narapela wok bilong autim tok profet, long narapela bilong klia tru long ol spirit, long narapela ol kain kain tok ples, long narapela save bilong tanim ol tok ples.

12:11  Tasol olgeta dispela i kam long wok bilong dispela wanpela Spirit stret, taim em i brukim long olgeta wan wan man olsem em i gat laik.

12:12  ¶ Long wanem, olsem bodi em i wanpela, na i gat planti hap bilong bodi, na olgeta hap bilong bodi i bilong dispela wanpela bodi, taim ol i stap planti, ol i wanpela bodi, Kraist tu i olsem.

12:13  Long wanem, long wanpela Spirit yumi olgeta i kisim baptais insait long wanpela bodi, sapos yumi stap ol Ju o ol man i no Ju, sapos yumi stap slevman o friman. Na God i bin mekim yumi olgeta long dring insait long wanpela Spirit.

12:14  Long wanem, bodi i no wanpela hap bilong bodi, tasol planti.

12:15  Sapos fut bai tok, Bikos mi no stap han, mi no bilong bodi, ating i yes long olsem na em i bilong bodi?

12:16  Na sapos ia bai tok, Bikos mi no stap ai, mi no bilong bodi, ating i yes long olsem na em i bilong bodi?

12:17  Sapos bodi olgeta em i wanpela ai, pasin bilong harim em we? Sapos bodi olgeta em i pasin bilong harim, pasin bilong smelim i stap we?

12:18  Tasol nau God i bin putim ol hap bilong bodi, olgeta wan wan bilong ol, insait long bodi, olsem dispela i bin amamasim bel bilong em.

12:19  Na sapos ol olgeta i wanpela hap bilong bodi, bodi i stap we?

12:20  Tasol nau ol i planti hap bilong bodi, yet wanpela bodi tasol.

12:21  Na ai i no inap tokim han, mi no gat nid long yu, o gen het long tupela fut, mi no gat nid long yupela.

12:22  Nogat. Planti moa ol dispela hap bilong bodi, husat i luk olsem ol i no gat strong moa, bodi i gat nid long ol.

12:23  Na ol dispela hap bilong bodi bilong dispela bodi, dispela yumi ting i gat liklik ona moa, antap long ol dispela yumi givim planti ona moa yet. Na ol hap bilong bodi i no fit tru i fit tru i planti moa yet.

12:24  Long wanem, ol hap bilong bodi bilong yumi i fit tru i no gat nid. Tasol God i bin abusim bodi wantaim, taim em i givim ona i planti moa yet long dispela hap bilong bodi husat i sot,

12:25  Inap long i no ken gat bruk insait long bodi, tasol long olgeta hap bilong bodi i ken gat wankain helpim wanpela i go long narapela.

12:26  Na sapos wanpela hap bilong bodi i karim pen, olgeta hap bilong bodi i karim pen wantaim em. O sapos wanpela hap bilong bodi i kisim ona, olgeta hap bilong bodi i wokim amamas tru wantaim em.

12:27  ¶ Nau yupela i stap bodi bilong Kraist, na ol hap bilong bodi stret bilong em.

12:28  Na God i bin putim sampela insait long sios, namba wan ol aposel, namba tu ol profet, namba tri ol tisa, bihain long dispela ol mirakel, nau ol presen bilong stretim sik, ol helpim, ol gavman, ol kain kain tok ples.

12:29  Olgeta em i ol aposel? Olgeta em i ol profet? Olgeta em i ol tisa? Olgeta em i ol man bilong wokim ol mirakel?

12:30  Ating olgeta i gat ol presen bilong stretim sik? Ating olgeta i toktok wantaim ol tok ples? Ating olgeta i tanim tok?

12:31  Tasol mangalim strong ol nambawan presen. Na yet mi soim yupela wanpela rot i gutpela moa olgeta.

Chapter 13

13:1  ¶ Sapos mi toktok wantaim ol tok ples bilong ol man na bilong ol ensel, na mi no gat pasin bilong laikim tru, mi kamap olsem bras i pairap, o simbol i krai isi isi.

13:2  Na sapos mi gat presen bilong autim tok profet, na mi gat gutpela save long olgeta samting hait, na olgeta save, na sapos mi gat olgeta bilip tru, inap long mi ken rausim ol maunten i go, na mi no gat pasin bilong laikim tru, mi stap samting nating.

13:3  Na sapos mi givim olgeta kago bilong mi long givim kaikai long ol rabisman, na sapos mi givim bodi bilong mi long ol i ken kukim, na mi no gat pasin bilong laikim tru, em i no helpim mi liklik.

13:4  ¶ Pasin bilong laikim tru i karim hevi longpela taim, na em i gutpela. Pasin bilong laikim tru i no gat mangal tingting. Pasin bilong laikim tru i no litimapim em yet, em i no bikhet,

13:5  Em i no wokabaut em yet long pasin i no stretpela, em i no painim samting bilong em yet, i no isi long skrapim bel bilong em, em i no tingting nogut.

13:6  Em i no wokim amamas tru long sin nogut, tasol em i wokim amamas tru long pasin i tru.

13:7  Em i karim olgeta samting, bilipim olgeta samting, hop long olgeta samting, stap yet long olgeta samting.

13:8  ¶ Pasin bilong laikim tru i no inap fel. Tasol sapos i gat ol tok profet, ol bai fel. Sapos i gat ol tok ples, ol bai pinis. Sapos i gat save, em bai go pinis olgeta.

13:9  Long wanem, yumi save long hap, na yumi autim tok profet long hap.

13:10  Tasol taim dispela samting i inap tru i kam pinis, nau dispela samting i stap long hap hap bai pinis olgeta.

13:11  Taim mi stap pikinini, mi toktok olsem pikinini, mi save olsem pikinini, mi tingting olsem pikinini. Tasol taim mi kamap man, mi rausim i go ol samting bilong pikinini.

13:12  Long wanem, nau yumi lukluk namel long wanpela glas, i tudak liklik, tasol long dispela taim, pes i go long pes. Nau mi save long hap, tasol long dispela taim bai mi save, yes, olsem tu ol i save long mi.

13:13  Na nau dispela tripela i stap yet, bilip tru, hop, na pasin bilong laikim tru. Tasol nambawan bilong ol dispela em pasin bilong laikim tru.

Chapter 14

14:1  ¶ Bihainim pasin bilong laikim tru, na laikim bilong kisim ol presen long spirit sait, tasol mobeta long yupela i ken autim tok profet.

14:2  Long wanem, em husat i toktok long tok ples ol man i no save i no toktok long ol man, tasol long God. Long wanem, i no gat man i kisim save long toktok bilong em. Tasol insait long spirit em i toktok long ol samting hait.

14:3  Tasol em husat i autim tok profet i toktok long ol man long strongim bilip, na strongim bel, na givim bel isi.

14:4  Em husat i toktok long tok ples ol man i no save i strongim bilip bilong em yet. Tasol em husat i autim tok profet i strongim bilip bilong sios.

14:5  Mi gat laik long yupela olgeta i ken toktok wantaim ol tok ples, tasol mobeta long yupela i autim tok profet. Long wanem, em husat i autim tok profet i winim em husat i toktok wantaim ol tok ples, sapos em i no tanim tok, inap long em i ken strongim bilip bilong sios.

14:6  ¶ Nau, ol brata, sapos mi kam long yupela taim mi toktok wantaim ol tok ples, mi bai helpim yupela olsem wanem, sapos bai mi no toktok long yupela long pasin bilong kamapim tok hait, o long save, o long autim tok profet, o long skul?

14:7  Na yes, ol samting i no gat laip i givim nois, sapos em i paip o harp, sapos ol i no givim ol nois i gat mining, olsem wanem bai ol man i ken save long wanem samting ol i winim long paip o paitim long harp?

14:8  Long wanem, sapos biugel i givim wanpela nois i no klia, husat bai redim em yet long pait?

14:9  Wankain olsem yupela, sapos yupela i no toktok long tang ol toktok i isi long save, ol man bai save long wanem samting yu toktok long en olsem wanem? Long wanem, yupela bai toktok i go long win.

14:10  I gat i stap, em i ken olsem, planti kain ol nek olsem long dispela graun, na i no gat wanpela bilong ol i no gat mining liklik.

14:11  Olsem na sapos mi no save long mining bilong dispela nek, mi bai stap long em husat i toktok olsem wanpela wail man, na em husat i toktok bai stap wanpela wail man long mi.

14:12  Yes, olsem tasol yupela, bikos yupela i hatwok long bihainim ol presen long spirit sait, painim inap long yupela i ken kamap gutpela moa i go long strongim bilip bilong sios.

14:13  Olsem na larim em husat i toktok long tok ples ol man i no save beten long em i ken tanim tok.

14:14  Long wanem, sapos mi beten long tok ples ol man i no save, spirit bilong mi i beten, tasol gutpela save bilong mi i no karim kaikai.

14:15  ¶ Dispela em i wanem nau? Mi bai beten wantaim spirit, na mi bai beten wantaim gutpela save tu. Mi bai singim song wantaim spirit, na mi bai singim song wantaim gutpela save tu.

14:16  Sapos nogat, taim yu bai blesim wantaim spirit, em husat i stap long rum bilong ol man i no gat lainim bai tok Amen olsem wanem long taim bilong givim tok tenkyu bilong yu, taim yumi luksave long em i no gat gutpela save long yu tok wanem?

14:17  Long wanem, tru tumas, yu givim gutpela tok tenkyu, tasol em i no strongim bilip bilong dispela arapela.

14:18  Mi tok tenkyu long God bilong mi, mi toktok wantaim ol tok ples moa long yupela olgeta.

14:19  Tasol insait long sios em i bin mobeta long mi long mi toktok long faipela hap toktok wantaim gutpela save bilong mi, inap long wantaim nek bilong mi mi ken skulim ol arapela tu, long mi toktok long 10,000 hap toktok long tok ples ol man i no save.

14:20  Ol brata, no ken stap ol pikinini long gutpela save. Tasol long bel nogut long narapela yupela i mas stap ol pikinini, tasol long gutpela save stap ol man.

14:21  ¶ Insait long lo rait i stap pinis, Wantaim ol man bilong ol arapela tok ples na ol arapela lip bai mi toktok long dispela lain manmeri. Na yet bilong olgeta dispela ol bai i no inap harim mi, Bikpela i tok.

14:22  Olsem na ol tok ples em bilong wanpela mak, i no long ol husat i bilip, tasol long ol husat i no bilip. Tasol ol tok profet i no gat wok bilong helpim ol husat i no bilip, tasol bilong helpim ol husat i bilip.

14:23  Olsem na sapos sios olgeta i kam bung wantaim long wanpela ples, na olgeta i toktok wantaim ol tok ples, na i gat i kam insait ol dispela husat i no gat lainim, o ol man i no bilip, ating i yes long ol bai tok long yupela i longlong?

14:24  Tasol sapos olgeta i autim tok profet, na i gat i kam insait wanpela husat i no bilip, o wanpela husat i no gat lainim, olgeta bai soim em tru tru, olgeta bai jasim em.

14:25  Na olsem tasol ol samting hait bilong bel bilong em i kamap ples klia. Na olsem taim em i pundaun long pes bilong em, em bai lotuim God, na ripot long em i tru long God i stap insait long yupela.

14:26  ¶ Em i olsem wanem nau, ol brata? Taim yupela i kam bung wantaim, olgeta wan wan i gat wanpela sam, i gat wanpela skul, i gat wanpela tok ples, i gat wanpela kamapim tok hait, i gat wanpela tok em i bin tanim. Larim ol man mekim olgeta samting bilong strongim bilip.

14:27  Sapos wanpela man i toktok long wanpela tok ples ol man i no save, larim dispela stap long tupela, o i no moa long tripela, na dispela long taim bilong en, na larim wanpela i tanim tok.

14:28  Tasol sapos i no gat man bilong tanim tok, larim em pasim maus insait long sios. Na larim em toktok long em yet, na long God.

14:29  Larim ol profet i toktok long tupela o tripela, na larim olgeta arapela jasim.

14:30  Sapos wanpela samting i kamap ples klia long narapela husat i sindaun klostu, larim namba wan man pasim maus bilong em.

14:31  Long wanem, yupela olgeta i ken autim tok profet wanpela bihain long narapela, inap long olgeta i ken lainim, na olgeta i ken kisim bel isi.

14:32  Na ol spirit bilong ol profet i stap aninit long ol profet.

14:33  Long wanem, God i no man i kamapim pasin paul, tasol bel isi, olsem insait long olgeta sios bilong ol seint.

14:34  ¶ Larim ol meri bilong yupela i pasim maus insait long ol sios. Long wanem, em i no orait long ol i ken toktok. Tasol God i tok strong long ol long stap aninit long pasin bilong bihainim tok, olsem tu lo i tok.

14:35  Tasol sapos ol i laik lainim wanpela samting, larim ol askim ol man bilong ol long haus bilong ol. Long wanem, em i wanpela samting bilong sem long ol meri long toktok insait long sios.

14:36  ¶ Wanem? Tok bilong God i kam ausait long yu? O em i kam long yu tasol?

14:37  Sapos wanpela man i tingim em yet long em i stap wanpela profet, o em i strong long sait bilong spirit, larim em tok yes long ol dispela samting mi raitim long yupela em i ol tok strong bilong Bikpela.

14:38  Tasol sapos wanpela man i no klia, larim em stap man i no klia.

14:39  Olsem na, ol brata, mangalim long autim tok profet, na no ken tambuim man long toktok wantaim ol tok ples.

14:40  Larim ol man mekim olgeta samting long gutpela pasin na long pasin i stret.

Chapter 15

15:1  ¶ Na moa tu, ol brata, mi tokaut i go long yupela long dispela gutnius mi bin autim long yupela, dispela tu yupela i bin kisim, na we yupela i sanap long en.

15:2  Long dispela tu God i kisim bek yupela, sapos yupela i holimpas long tingting wanem samting mi autim long yupela, sapos yupela i no bin bilip nating.

15:3  Long wanem, mi givim long yupela pastaim bilong olgeta dispela samting mi tu i bin kisim, olsem long Kraist i bin dai long ol sin bilong yumi bilong bihainim ol rait bilong God.

15:4  Na long ol i planim em, na long em i kirap bek gen long namba tri de bilong bihainim ol rait bilong God,

15:5  Na long Sifas i lukim em, nau bihain dispela twelpela.

15:6  Bihain long dispela, antap long 500 brata i lukim em long wanpela taim, bilong husat bikpela hap moa bilong ol i stap yet inap long nau, tasol sampela i slip pinis.

15:7  Bihain long dispela, Jems i lukim em, nau olgeta bilong ol aposel.

15:8  Na las bilong olgeta mi tu mi lukim em, olsem wanpela husat i kamap nupela ausait long taim stret.

15:9  Long wanem, mi las man bilong ol aposel, inap long mi no fit long ol i ken kolim mi wanpela aposel, bilong wanem, mi bin givim hevi long sios bilong God.

15:10  Tasol long marimari bilong God mi stap wanem samting mi stap. Na dispela marimari bilong em em i givim long mi i no stap nating. Tasol mi hatwok planti moa yet long ol olgeta. Tasol i no mi, tasol dispela marimari bilong God i stap wantaim mi.

15:11  Olsem na sapos em i mi o ol, olsem tasol mipela i autim tok, na olsem tasol yupela i bin bilip.

15:12  ¶ Nau sapos yumi autim tok long Kraist long em i kirap bek pinis long dai, olsem wanem sampela i tok namel long yupela long i no gat kirap bek long dai?

15:13  Tasol sapos i no gat kirap bek long dai, orait Kraist i no kirap bek.

15:14  Na sapos Kraist i no kirap bek, orait autim tok bilong yumi em i samting nating, na bilip tru bilong yupela tu em i samting nating.

15:15  Yes, na ol bai lukim yumi tu olsem ol giaman witnes bilong God, bilong wanem, yumi bin tokaut long God long em i kirapim Kraist, husat em i no kirapim, sapos em i olsem long ol daiman i no kirap bek.

15:16  Long wanem, sapos ol daiman i no kirap bek, orait Kraist i no kirap bek.

15:17  Na sapos Kraist i no kirap bek, bilip tru bilong yupela em i samting nating. Yupela i stap yet long ol sin bilong yupela.

15:18  Nau ol tu husat i slip pinis insait long Kraist i bin dai olgeta.

15:19  Sapos long dispela laip tasol yumi gat hop long Kraist, yumi i winim olgeta man long pulap long ol hevi nogut.

15:20  ¶ Tasol nau Kraist i kirap bek pinis long dai, na em i kamap ol namba wan kaikai bilong ol husat i slip pinis.

15:21  Long wanem, bikos dai i kam long wok bilong man, long wok bilong man tu kirap bek long dai i kam.

15:22  Long wanem, olsem insait long Adam olgeta i dai, yes, olsem tasol insait long Kraist bai olgeta i ken kisim laip.

15:23  Tasol olgeta wan wan man long taim bilong em yet. Kraist em i ol namba wan kaikai. Bihain long en ol husat i bilong Kraist taim em i kam.

15:24  Nau pinis i kam, taim em i bin givim kingdom i go long God, yes, Papa, taim em i bin putim i go daun olgeta namba bilong bosim na olgeta namba na pawa.

15:25  Long wanem, em i mas bosim kingdom, inap long taim em i bin putim olgeta birua aninit long tupela fut bilong em.

15:26  Las birua husat em bai bagarapim olgeta em dai.

15:27  Long wanem, em i bin putim olgeta samting aninit long tupela fut bilong em. Tasol taim em i tok olgeta samting em i putim aninit long em, em i klia tru long em i no kaunim em, husat i bin putim olgeta samting aninit long em.

15:28  Na taim olgeta samting bai stap aninit long em, nau bai Pikinini Man tu em yet i stap aninit long em husat i putim olgeta samting aninit long em, inap long God i ken stap olgeta insait long olgeta.

15:29  Sapos nogat, ol man husat i kisim baptais bilong daiman bai mekim wanem samting, sapos daiman i no kirap bek liklik? Bilong wanem nau ol i kisim baptais bilong daiman?

15:30  Na bilong wanem mipela i sanap aninit long bikpela bagarap olgeta wan wan aua?

15:31  Mi mekim strongpela tok i birua long ol amamas tru yupela i wokim, dispela mi gat insait long Kraist Jisas, Bikpela bilong yumi, mi dai olgeta wan wan de.

15:32  Sapos long bihainim pasin bilong ol man mi bin pait wantaim ol animal long Efesas, em bai helpim mi olsem wanem, sapos daiman i no kirap bek? Larim yumi kaikai na dring, long wanem, tumora yumi bai dai.

15:33  No ken bilipim giaman. Toktok nogut i bagarapim ol gutpela pasin.

15:34  Kirap long stretpela pasin, na no ken mekim sin. Long wanem, sampela i no gat dispela save bilong God. Mi toktok long dispela long tingim sem bilong yupela.

15:35  ¶ Tasol sampela man bai tok, Daiman i kirap bek olsem wanem? Na ol i kam wantaim wanem kain bodi?

15:36  Yu krankiman, dispela samting yu planim i no kisim laip, sapos em i no dai pastaim.

15:37  Na dispela samting yu planim, yu no planim dispela kain bodi, dispela i bai kamap, tasol pikinini bilong en stret, em i ken bilong wit o bilong sampela arapela kain.

15:38  Tasol God i givim dispela wanpela bodi olsem em i bin amamasim bel bilong em, na long olgeta wan wan pikinini kaikai bodi bilong em yet.

15:39  Olgeta bodi i no wankain bodi. Tasol i gat wanpela kain bodi bilong ol man, narapela bodi bilong ol animal, narapela bilong ol pis, na narapela bilong ol pisin.

15:40  I gat tu ol bodi bilong skai, na ol bodi bilong graun. Tasol glori bilong ol bodi bilong skai em i wanpela, na glori bilong bodi bilong graun em i narapela.

15:41  I gat wanpela glori bilong san, na narapela glori bilong mun, na narapela glori bilong ol sta. Long wanem, wanpela sta i narakain long narapela sta long glori.

15:42  Olsem tu em kirap bek bilong daiman. Yumi planim dispela olsem bodi i bagarap. Em i kirap bek olsem bodi i no inap bagarap.

15:43  Yumi planim dispela long pasin i no gat ona. Em i kirap bek wantaim glori. Yumi planim dispela long pasin i no gat strong. Em i kirap bek wantaim pawa.

15:44  Yumi planim dispela wanpela bodi bilong bodi sait. Em i kirap bek wanpela bodi bilong spirit sait. I gat bodi bilong bodi sait, na i gat bodi bilong spirit sait.

15:45  Na rait i stap pinis olsem, Em i mekim namba wan man Adam wanpela tewel i stap laip. Em i mekim las Adam wanpela spirit bilong givim laip.

15:46  Tasol dispela i stap pastaim em i no dispela i bilong spirit sait, tasol dispela samting i stap long bodi sait. Na bihain long en dispela samting i stap long spirit sait.

15:47  Namba wan man em i bilong dispela graun, em i kam long graun. Namba tu man em i Bikpela i kam long heven.

15:48  Olsem samting i kam long graun i stap, ol i stap kain tu husat i kam long graun. Na olsem samting i kam long heven i stap, ol i stap kain tu husat i kam long heven.

15:49  Na olsem yumi bin stap piksa tru bilong samting i stap long dispela graun, yumi bai stap piksa tru tu bilong samting i kam long heven.

15:50  Nau mi tok dispela, ol brata, long bodi na blut i no inap kisim kingdom bilong God olsem samting papa i givim pikinini. Na tu samting i bagarap i no inap kisim samting i no inap bagarap olsem samting papa i givim pikinini.

15:51  ¶ Lukim, mi soim yupela wanpela samting hait. Yumi olgeta bai i no inap slip, tasol yumi olgeta bai senis,

15:52  Wantu tasol, long taim bilong ai i lait, long las biugel. Long wanem, biugel bai krai, na ol daiman bai kirap bek wantaim bodi i no inap bagarap, na yumi olgeta bai senis.

15:53  Long wanem, dispela bodi i bagarap i mas putim bodi i no inap bagarap, na dispela bodi i ken dai i mas kamap bodi i no ken dai.

15:54  Inap long taim dispela bodi i bagarap i bin kamap pinis bodi i no inap bagarap, na dispela bodi i ken dai i bin kamap bodi i no ken dai, nau bai dispela toktok i kamap pinis, dispela rait i stap pinis, Winim pait i bin daunim dai olgeta.

15:55  O dai, samting bilong givim pen bilong yu i stap we? O matmat, winim pait bilong yu i stap we?

15:56  Samting bilong givim pen bilong dai em sin. Na strong bilong sin em lo.

15:57  Tasol tok tenkyu i go long God, husat i mekim yumi winim pait long wok bilong Bikpela bilong yumi Jisas Kraist.

15:58  ¶ Olsem na, ol brata i stap klostu long bel bilong mi, yupela sanap strong, ol man i no inap muv, olgeta taim yupela i mas pulap tru insait long wok bilong Bikpela, bikos yupela i save long hatwok bilong yupela i no samting nating insait long Bikpela.

Chapter 16

16:1  ¶ Nau long sait bilong dispela bung bilong mani bilong helpim ol seint, olsem mi bin givim oda long ol sios i stap long Galesia, yes, yupela i mas mekim olsem.

16:2  Long namba wan de bilong wik larim olgeta wan wan bilong yupela putim klostu long em long bakstua, olsem God i bin helpim gutpela sindaun bilong em, inap long i no gat ol taim bilong bungim taim mi kam.

16:3  Na taim mi kam, husat man yupela bai orait long en long ol pas bilong yupela, ol bai mi salim long bringim samting yupela i givim wantaim laik bilong bel bilong yupela long Jerusalem.

16:4  Na sapos em i fit long mi ken go tu, ol bai go wantaim mi.

16:5  ¶ Nau mi bai kam long yupela, taim mi wokabaut namel long Masedonia. Long wanem, mi bai wokabaut namel long Masedonia.

16:6  Na em i ken stap olsem long mi bai stap yet, yes, na stap long taim kol wantaim yupela, inap long yupela i ken bringim mi long wokabaut bilong mi long wanem hap we mi go.

16:7  Long wanem, mi bai i no inap lukim yupela nau long rot. Tasol mi gat bilip long mi mas stap yet liklik taim wantaim yupela, sapos Bikpela i orait long en.

16:8  Tasol mi bai stap yet long Efesas inap long Pentikos.

16:9  Long wanem, wanpela bikpela dua na wanpela i gat pawa i op long mi, na i gat planti birua i stap.

16:10  ¶ Nau sapos Timotias i kam, lukluk gut long em i ken stap wantaim yupela, na i no wantaim pret. Long wanem, em i wokim wok bilong Bikpela, olsem mi tu i wokim.

16:11  Olsem na no ken larim wanpela man i ken tingim olsem em i samting nating. Tasol bringim em i kam wantaim bel isi, inap long em i ken kam long mi. Long wanem, mi painim em wantaim ol brata.

16:12  Long sait bilong brata bilong yumi Apolos, mi gat bikpela laik long em i ken kam long yupela wantaim ol brata. Tasol i no laik bilong em liklik long kam long dispela taim. Tasol em bai kam taim em bai gat taim i fit.

16:13  ¶ Yupela was, sanap strong insait long bilip tru, yupela i mas sanap olsem ol man, stap strong.

16:14  Mekim olgeta samting bilong yupela wantaim pasin bilong laikim tru.

16:15  Mi askim yupela plis strong, ol brata, (yupela save long hauslain bilong Stefanas, long dispela em i ol namba wan kaikai bilong Akea, na long ol i bin mekim ol yet strong tru long wokim ol wok long ol seint,)

16:16  Long yupela i ken putim yupela yet aninit long kain man olsem, na long olgeta wan wan husat i helpim wantaim mipela, na i hatwok.

16:17  Mi amamas long Stefanas na Fortunatas na Akaikas i kam. Long wanem, dispela samting i sot long hap skel bilong yupela ol i bin inapim.

16:18  Long wanem, ol i bin strongim gen spirit bilong mi na bilong yupela. Olsem na yupela i mas luksave na tokaut klia long ol husat i kain man olsem.

16:19  ¶ Ol sios bilong Esia i salim gude long yupela. Akwila na Prisila i salim gude long yupela planti insait long Bikpela, wantaim dispela sios i stap insait long haus bilong ol.

16:20  Olgeta brata i salim gude long yupela. Yupela i mas tok gude wanpela i go long narapela wantaim kis holi.

16:21  Gude bilong mi Pol wantaim han bilong mi yet.

16:22  Sapos wanpela man i no laikim tru Bikpela Jisas Kraist, larim em stap Anatema Maranata.

16:23  Marimari bilong Bikpela bilong yumi Jisas Kraist i ken stap wantaim yupela.

16:24  Laikim tru bilong mi i stap wantaim yupela olgeta insait long Kraist Jisas. Amen.