CSlElizabeth - Wisdom

Chapter 1

1:1  Возлюбите правду, судящии землю: мудрствуйте о Господе в благостыни и в простоте сердца взыщите Его:

1:2  яко обретается не искушающым Его, является же не неверующым Ему.

1:3  Строптивая бо помышления отлучают от Бога: искушаемая сила обличает безумных.

1:4  Яко в злохудожну душу не внидет премудрость, ниже обитает в телеси повиннем греху:

1:5  святый бо Дух наказания отбежит льстива и отимется от помышлений неразумных и обличится от находящия неправды.

1:6  Человеколюбив бо дух премудрости и не обезвинит хульника от устен его: яко внутренних его свидетель есть Бог и сердца его испытатель истинен и языка слышатель:

1:7  яко Дух Господень исполни вселенную, и содержай вся разум имать гласа.

1:8  Сего ради вещаяй неправедная никтоже утаится, и не мимо идет его обличающь суд.

1:9  В советех бо нечестиваго истязание будет, словес же его слышание ко Господу приидет во обличение беззаконий его:

1:10  яко ухо рвения слышит вся, и молва роптаний не крыется.

1:11  Хранитеся убо от роптания неполезна и от оболгания щадите язык: яко вещание тайное тще не прейдет, уста же лжущая убивают душу.

1:12  Не вожделейте смерти в заблуждении живота вашего, ниже привлекайте погибели делами рук ваших:

1:13  яко Бог смерти не сотвори, ни веселится о погибели живых.

1:14  Созда бо во еже быти всем, и спасителны бытия мира, ни бо есть в них врачевания губителнаго, ниже аду царствия на земли.

1:15  Правда бо безсмертна есть: (неправда же смерти снабдение:)

1:16  нечестивии же рукама и словесы призваша ю, другиню вмениша ю и истаяша, и завет положиша с нею, яко достойни суть оноя части быти.

Chapter 2

2:1  Рекоша бо в себе помышляющии неправо: мал есть и печален живот наш, и несть изцеления в кончине человечесте, и несть познан возвративыйся от ада.

2:2  Яко самослучайно рождени есмы, и по сем будем якоже не бывше: понеже дым дыхание в ноздрех наших, и слово искра в движении сердца нашего:

2:3  ейже угасшей пепел будет тело, и дух наш разлиется яко мягкий воздух,

2:4  и имя наше забвено будет во время, и никтоже воспомянет дел наших: и прейдет живот наш яко следы облака, и яко мгла разрушится, разгнаная от лучь солнечных и теплотою его отягчившися.

2:5  Стени бо преход житие наше, и несть возвращения кончины нашея: яко запечатана есть, и никто возвращается.

2:6  Приидите убо и насладимся настоящих благих, и употребим создания, яко в юности скоро:

2:7  вина дражайшаго и мира (благовонна) исполнимся, и да не прейдет нас цвет жития:

2:8  увенчаим нас шипковыми цветы, прежде неже увянут:

2:9  ни един от нас лишен да будет нашего наслаждения, везде оставим знамение веселия, яко сия часть наша и жребий сей.

2:10  Насилие сотворим убогу праведному, не пощадим вдовицы, ниже старца устыдимся седин многолетных.

2:11  Да будет же нам крепость закон правды: некрепкое бо неполезно обретается.

2:12  Уловим же (лестию) праведнаго, яко непотребен нам есть и противится делом нашым, и поносит нам грехи закона и злославит нам грехи учения нашего:

2:13  возвещает нам разум имети Божий, и отрока Господня себе именует:

2:14  бысть нам на обличение помышлений наших:

2:15  тяжек есть нам и к видению, яко неподобно (есть) иным житие его, и отменны (суть) стези его:

2:16  в поругание вменихомся ему, и удаляетеся от путий наших яко от нечистот: блажит последняя праведных и славится отца имети (себе) Бога.

2:17  Увидим, аще словеса его истинна, и искусим яже сбудутся ему.

2:18  Аще бо есть истинный сын Божий, защитит его и избавит его от руки противящихся.

2:19  Досаждением и мукою истяжим его, да увемы кротость его и искусим беззлобство его:

2:20  смертию поносною осудим его, будет бо ему разсмотрение от словес его.

2:21  Сия помыслиша и прельстишася: ослепи бо их злоба их,

2:22  и не уведеша таин Божиих, ниже мзды уповаша преподобия, ниже присудиша чести душам непорочным.

2:23  Яко Бог созда человека в неистление и во образ подобия Своего сотвори его:

2:24  завистию же диаволею смерть вниде в мир: вкушают же ю, иже от ея части суть.

Chapter 3

3:1  Праведных не души в руце Божией, и не прикоснется их мука.

3:2  Непщевани быша во очию безумных умрети, и вменися озлобление исход их,

3:3  и еже от нас шествие сокрушение: они же суть в мире.

3:4  Ибо пред лицем человеческим аще и муку приимут, упование их безсмертия исполнено:

3:5  и вмале наказани бывше, великими благодетелствовани будут, яко Бог искуси их и обрете их достойны Себе:

3:6  яко злато в горниле искуси их, и яко всеплодие жертвенное прият я.

3:7  И во время посещения их возсияют, и яко искры по стеблию потекут:

3:8  судят языком и обладают людьми, и воцарится в них Господь во веки.

3:9  Надеющиися Нань уразумеют истину, и вернии в любви пребудут Ему, яко благодать и милость в преподобных Его и посещение во избранных Его.

3:10  Нечестивии же, яко помыслиша, приимут запрещение, иже нерадившии о праведнем и от Господа отступивше.

3:11  Премудрость бо и наказание уничижаяй окаянен, и праздно упование их, и труды безплодны, и неключима дела их:

3:12  жены их безумны и лукава чада их, проклято рождение их.

3:13  Яко блажена есть неплоды неоскверненая, яже не позна ложа во гресе, имети будет плод в посещении душ:

3:14  и евнух, иже не содела в руку (своею) беззакония, ниже помысли на Господа лукавая, дастся бо ему веры благодать избранна и жребий во храме Господни угоднейший.

3:15  Благих бо трудов плод благославен, и не отпадающь корень разума.

3:16  Чада же прелюбодеев несовершена будут, и от законопреступнаго ложа семя изчезнет:

3:17  аще бо долгоживотни будут, ни во чтоже вменятся, и безчестна на последок старость их:

3:18  аще же скоро скончаются, не будут имети упования, ниже в день суда утешения:

3:19  рода бо неправеднаго лютая окончания.

Chapter 4

4:1  Лучше безчадство со добродетелию: безсмертие бо есть в памяти ея, яко и пред Богом познается и пред человеки:

4:2  присущую бо подражают ю и желают отшедшия, и в веце венценосно чтится нескверных подвигов брань одолевши.

4:3  Многоплодно же нечестивых множество неключимо будет, и прелюбодейная насаждения не дадут корения в глубину, ниже крепко стояние сотворят:

4:4  аще бо и ветви на время процветут, не крепко возшедше от ветра поколеблются и от зелных ветров искоренятся:

4:5  сокрушатся ветви несовершенны, и плод их неключимь, оскомен в снедь, и ни во что потребен.

4:6  От беззаконных бо снов чада раждаемая свидетелие суть лукавствия на родители во испытании их.

4:7  Праведник же аще постигнет скончатися, в покои будет:

4:8  старость бо честна не многолетна, ниже в числе лет изчитается:

4:9  седина же есть мудрость человеком, и возраст старости житие нескверно.

4:10  Благоугоден Богови быв, возлюблен бысть, и живый посреде грешных преставлен бысть:

4:11  восхищен бысть, да не злоба изменит разум его, или лесть прельстит душу его.

4:12  Рачение бо злобы помрачает добрая, и парение похоти пременяет ум незлобив.

4:13  Скончався вмале исполни лета долга:

4:14  угодна бо бе Господеви душа его, сего ради потщася от среды лукавствия:

4:15  людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

4:16  Осудит же праведник умираяй живых нечестивых, и юность скончавшаяся скоро долголетную старость неправеднаго.

4:17  Узрят бо кончину премудраго и не уразумеют, что усоветова о нем и во что утверди его Господь:

4:18  узрят и уничижат его, Господь же посмеется им:

4:19  и будут посем в падение безчестно и во укоризну в мертвых в век: яко расторгнет их безгласны ниц и поколеблет их от оснований, и даже до последних опустеют и будут в болезни, и память их погибнет:

4:20  приидут в помышление грехов своих боязливии, и обличат их противу беззакония их.

Chapter 5

5:1  Тогда станет во дерзновении мнозе праведник пред лицем оскорбивших его и отметающих труды его:

5:2  видящии смятутся страхом тяжким и ужаснутся о преславнем спасении его,

5:3  и рекут в себе кающеся и в тесноте духа воздыхающе: сей бе, егоже имехом некогда в посмех и в притчу поношения.

5:4  Безумнии, житие его вменихом неистово и кончину его безчестну:

5:5  како вменися в сынех Божиих, и во святых жребий его есть?

5:6  Убо заблудихом от пути истиннаго, и правды свет не облиста нам, и солнце не возсия нам:

5:7  беззаконных исполнихомся стезь и погибели и ходихом в пустыни непроходимыя, пути же Господня не уведехом.

5:8  Что пользова нам гордыня, и богатство с величанием что воздаде нам?

5:9  Преидоша вся она яко сень и яко весть претекающая.

5:10  Яко корабль преходяй волнующуюся воду, егоже проходу несть стопы обрести, ниже стези шествия его в волнах:

5:11  или яко птицы, прелетающия по аеру, ни едино обретается знамение пути, язвою же смущаяй биемый дух легкий, и разсецаемый силою шумящею движением крил прелете, и посем ни едино знамение обретеся проходу в нем:

5:12  или яко стрелою испущеною на намереное место разсеченный аер внезапу в себе самем заключен бысть, яко не познатися проходу ея:

5:13  тако и мы рождени оскудехом и добродетели убо ни единаго знамения можем показати, во злобе же нашей скончахомся.

5:14  Ибо упование нечестиваго, яко прах от ветра подемлемый и яко пена мягка от бури расторгнена, и яко дым от ветра разливается и яко память пришелца единаго дне прейде:

5:15  праведницы же во веки живут, и во где мзда их, и попечение их у Вышняго:

5:16  сего ради приимут царствие благолепия и венец доброты от руки Господни, яко десницею покрыет их и мышцею защитит их.

5:17  Приимет всеюружие рвение Свое и вооружит тварь в месть врагом,

5:18  облечется в броня правды и возложит шлем суд нелицемерен,

5:19  приимет щит непобедимый преподобие,

5:20  поострит же напрасный гнев во оружие: споборет же с Ним мир на безумныя.

5:21  Пойдут праволучныя стрелы молниины, и яко от благокругла лука облаков на намерение полетят:

5:22  и от каменометныя ярости исполнь падут грады: вознегодует на них вода морская, реки же потопят нагло:

5:23  сопротив станет им дух силы, и яко вихор развеет их:

5:24  и опустошит всю землю беззаконие, и злодейство превратит престолы сильных.

Chapter 6

6:1  Слышите убо, царие, и разумейте: научитеся, судии концев земли:

6:2  внушите, содержащии множества и гордящиися о народех языков:

6:3  яко дана есть от Господа держава вам и сила от Вышняго, иже истяжет дела ваша и помышления испытает:

6:4  яко слузи суще царства Его не судисте право, ни сохранисте закона, ниже по воли Божией ходисте.

6:5  Страшно и скоро явится вам: яко суд жесточайший преимущым бывает,

6:6  ибо малый достоин есть милости, сильнии же сильне истязани будут.

6:7  Не щадит бо лица всех Владыка, ниже усрамится вельможи, яко мала и велика Сей сотвори, подобне же проразумевает о всех:

6:8  державным же крепко настоит испытание.

6:9  К вам убо, о, царие, словеса моя, да научитеся премудрости и не падете:

6:10  ибо сохраняющии преподобне преподобная преподобни будут, и иже научившиися сим, обрящут ответ.

6:11  Возжелейте убо словес моих, возлюбите и накажитеся.

6:12  Светла и не увядаема есть премудрость, и удобно видится от любящих ю, и обрящется от ищущих ю:

6:13  предваряет желающым предуведетися.

6:14  Утреневавый к ней не утрудится: приседящую бо обрящет при вратех своих.

6:15  Еже бо мыслити о ней, разума (есть) совершенство, и бдяй ея ради вскоре без печали будет:

6:16  яко достойных ея сама обходит ищущи, и на стезях показуется им благоприятно, и во всем провидении сретает их.

6:17  Начало бо ея истиннейшее наказания возжеление,

6:18  попечение же наказания любы, любы же хранение законов ея,

6:19  хранение же законов утверждение нерастления (есть), нерастление же творит близ быти Бога:

6:20  возжеление убо премудрости возводит к царству (вечному).

6:21  Аще убо наслаждаетеся престолами и скиптры, о, царие людий, почтите премудрость, да во веки царствуете.

6:22  Что же есть премудрость, и како бысть, возвещу,

6:23  и не утаю от вас таин, но от начала рождения изслежду,

6:24  и положу на свет разум ея и не преминую истины,

6:25  ниже завистию тающему спутьствую, яко сей не будет причастник премудрости.

6:26  Множество же премудрых спасение миру, и царь премудр утверждение людем.

6:27  Сего ради приимите наказание по словесем моим, и полезно будет вам.

Chapter 7

7:1  Есмь бо и аз человек смертен, подобен всем и земнороднаго внук первозданнаго:

7:2  и во чреве матерни изобразихся плоть, в десятомесячнем времени согустився в крови от семене мужеска и услаждения сном сошедшагося.

7:3  И аз рожден восприях общаго аера и на подобострастную землю спадох, первый глас подобный всем испустих плача:

7:4  в пеленах воскормлен есмь, и с (великим) прилежанием:

7:5  ни един бо царь ино име рождения начало,

7:6  един бо вход всем есть в житие, подобен же и исход.

7:7  Сего ради помолихся, и дан бысть мне разум: призвах, и прииде на мя дух премудрости.

7:8  Предсудих ю паче скиптров и престолов, и богатство ничтоже вмених ко сравнению тоя,

7:9  ниже уподобих ея каменю драгоценному, яко все злато пред нею песок малый, и яко брение вменится пред нею сребро:

7:10  паче здравия и красоты возлюбих ю и предизбрах ю вместо света имети, яко неугасаемо есть блистание ея.

7:11  Приидоша же мне благая вся вкупе с нею и безчислено богатство рукама ея:

7:12  и возвеселихся о всех, яко ими обладает премудрость: не ведех же ю родителницу быти сих.

7:13  Нелестне научихся, без зависти преподаю и богатства ея не сокрываю:

7:14  неоскудно бо есть сокровище человеком, еже употребившии к Богу послашася в содружение, дарами от наказания представлени.

7:15  Мне же даде Бог глаголати по разумению и мнети достойне о подаваемых, яко Той и премудрости предводитель есть и премудрых исправитель:

7:16  в руку бо Его и мы и словеса наша, и всякий разум и дел художество.

7:17  Сей бо даде мне о сущих познание неложное, познати составление мира и действие стихий,

7:18  начало и конец и средину времен, возвратов премены и изменения времен,

7:19  лет круги и звезд расположения,

7:20  естество животных и гнев зверей, ветров усилие и помышления человеков, разнство летораслем и силы корений.

7:21  И елика суть скрыта и явна, познах: всех бо художница научи мя Премудрость.

7:22  Есть бо в той дух разума свят, единородный, многочастный, тонкий, благодвижный, светлый, нескверный, ясный, невредителный, благолюбивый, остр, невозбранен, благоделателен,

7:23  человеколюбив, известный, крепкий, безпечальный, всесильный, всевидяй, и сквозе вся проходяй духи разумичныя, чистыя, тончайшыя.

7:24  Всякаго бо движения подвижнейша есть премудрость: достизает же и проницает сквозе всяческая ради (своея) чистоты.

7:25  Пара бо есть силы Божия и излияние Вседержителя славы чистое: сего ради ничтоже осквернено на ню нападает.

7:26  Сияние бо есть света присносущнаго и зерцало непорочно Божия действия и образ благостыни Его.

7:27  Едина же сущи всяческая может, и пребывающи в себе вся обновляет, и по родом в душы преподобных преходящи, други Божия и пророки устрояет:

7:28  ни когоже бо любит Бог, токмо сего, иже со премудростию пребывает.

7:29  Есть бо сия благолепнее солнца и паче всякаго расположения звезд: свету соравняема обретается первая:

7:30  сего бо преемлет нощь, премудрости же не одолеет злоба.

Chapter 8

8:1  Досязает же от конца даже до конца крепко и управляет вся благо.

8:2  Сию возлюбих и поисках от юности моея, и взысках невесту привести себе, и любитель бых красоты ея.

8:3  Благородство славит сожитие Божие имущи, и всех Владыка возлюби ю:

8:4  таибница бо есть Божия хитрости и обретателница дел Его.

8:5  И аще богатство есть вожделенное притяжание в животе, что премудрости богатейше, еюже делаются вся?

8:6  Аще же разум делает, кто ея от сущих лучший художник есть?

8:7  И аще правду любит кто, труды ея суть добродетели: целомудрию бо и разуму учит, правде и мужеству, ихже потребнее ничтоже есть в житии человеком.

8:8  Аще же и многаго искусства желает кто, весть древняя и быти хотящая разсмотряет: свесть извития словес и разрешения гаданий, знамения и чудеса проразумевает и сбытия времен и лет.

8:9  Судих убо сию привести мне к сожитию, ведый, яко будет ми советница благих и утешение попечений и печали.

8:10  Имети буду ради ея славу в народех и честь пред старцы, юн сый:

8:11  остр обрящуся в суде, и лица сильных удивятся мне:

8:12  молчащу ми потерпят и вещающу ми имут внимати, и глаголющу ми о мнозе, руку положат на уста своя.

8:13  Сея ради прииму безсмертие и память вечную сущым по мне оставлю:

8:14  управлю люди, и языцы покорятся ми:

8:15  убоятся мене слышавшии мучителие страшнии: во множестве явлюся благ и в брани крепок.

8:16  Вшед в дом мой упокоюся с нею: не бо имать горести сообщение ея, ни болезни сожитие тоя, но веселие и радость.

8:17  Сия помыслив во мне, печахся в сердцы моем, яко безсмертие есть в сродстве премудрости,

8:18  и в содружении ея услаждение благо, и в трудех руку ея богатство без оскудения, и в сообучении беседы ея разум, и благославие в приобщении словес ея, обхождах ишущь, да восприиму ю в себе.

8:19  Отрок же бех остроумен, душу же получих благу:

8:20  паче же благ сый приидох в тело нескверно.

8:21  Познав же, яко не инако одержу, аще не Бог даст, и сие же бе разума, еже ведети, чия есть благодать, приидох ко Господу и молихся Ему, и рекох от всего сердца моего:

Chapter 9

9:1  Боже отцев и Господи милости Твоея, сотворивый вся словом Твоим

9:2  и премудростию Твоею устроивый человека, да владеет сотворенными от Тебе тварьми,

9:3  и да управляет мир в преподобии и правде, и в правоте души суд да судит:

9:4  даждь мне Твоим престолом приседящую премудрость и не отрини мене от отрок Твоих:

9:5  яко аз раб Твой и сын рабыни Твоея, человек немощен и маловременен и умален в разуме суда и законов.

9:6  Аще бо кто будет и совершен в сынех человеческих, отсутствующей Твоей премудрости, ни во чтоже вменится.

9:7  Ты избрал мя еси царя людем Твоим и судию сыном Твоим и дщерем,

9:8  и рекл ми еси создати храм в горе святей Твоей и во граде обитания Твоего олтарь, подобием скинии (Твоея) святыя, юже предуготовал еси от начала.

9:9  И с Тобою премудрость ведущая дела Твоя и присутствующая тогда, егда мир творил еси, и ведущая, что есть угодно пред очима Твоима и что право в заповедех Твоих:

9:10  посли ю с небес святых и от престола славы Твоея посли ю: да сущи со мною трудится, и увем, что благоугодно есть пред Тобою:

9:11  весть бо она вся и разумеет, и наставит мя в делех моих целомудренне и сохранит мя во славе своей:

9:12  и будут приятна дела моя, и разсужду люди Твоя праведне, и буду достоин престолов отца моего.

9:13  Кто бо от человек познает совет Божий? Или кто помыслит, что хощет Бог?

9:14  Помышления бо смертных боязлива, и погрешителна умышления наша:

9:15  тело бо тленное отягощает душу, и земное жилище обременяет ум многопопечителен.

9:16  И едва разумеваем, яже на земли, и яже в руках обретаем со трудом: а яже на небесех, кто изследи?

9:17  Волю же Твою кто позна, аще бы не Ты дал еси премудрость и послал еси Духа святаго Твоего от высоты?

9:18  И тако исправишася стези сущих на земли, и яже Тебе угодна, научишася человецы

9:19  и премудростию спасошася.

Chapter 10

10:1  Сия первозданнаго отца миру единаго созданнаго сохрани и изведе его от греха его,

10:2  даде же ему крепость содержати всяческая.

10:3  Отступив же от нея неправедный во гневе своем со братоубийственными погибе яростьми:

10:4  егоже ради потопляему землю паки спасе премудрость, малым древом праведника соблюдши.

10:5  Сия и во единомыслии лукавства смешеных языков обрете праведника и сохрани его непорочна Богу, и в поболении о чаде крепка соблюде.

10:6  Сия праведнаго, погибающым нечестивым, избави бежащаго от огня низходяща на пять градов:

10:7  ихже еще свидетелство лукавствия дымящаяся стоит земля пуста, и несовершенными времены плодоносящая древеса, и неверныя души память стоящь столп слан.

10:8  Премудрость бо мимоходящии не токмо повредишася, еже не ведети блага, но и безумия своего оставиша житию память, да в нихже согрешиша, ниже утаитися возмогут.

10:9  Премудрость же служащих ей от болезней избави.

10:10  Сия бежащаго от гнева братня праведника настави на стези правы и показа ему царствие Божие и даде ему разум святых, почте его в трудех и умножи труды его.

10:11  Во обиде обдержащих его предста ему и обогати его,

10:12  сохрани его от враг, и от наветующих защити его, и подвиг крепок на победу даде ему, да увесть, яко всех сильнее есть благочестие.

10:13  Сия проданаго праведника не остави, но от греха избави его: сниде с ним в ров,

10:14  и во узах не остави его, дондеже принесе ему скиптр царствия и власть на мучащих его: лживых же показа, порок сотворших нань, и даде ему славу вечную.

10:15  Сия людей преподобных и семя непорочное избави от язык оскорбляющих:

10:16  вниде в душу раба Господня и воста противу царей страшных в чудесех и знамениих.

10:17  Воздаде преподобным мзду трудов их, настави их в путь дивен и бысть им в покров днем и в пламень звезд в нощи.

10:18  Преведе их но морю Чермному и проведе их сквозе воду многу:

10:19  враги же их потопи и из глубины бездны изрину их.

10:20  Сего ради праведнии взяша корысти нечестивых и воспеша, Господи, имя святое Твое, и одолетелницу руку Твою похвалиша единодушне:

10:21  яко премудрость отверзе уста немых и языки младенцем сотвори ясны.

Chapter 11

11:1  Управи дела их рукою пророка святаго:

11:2  проидоша пустыню необитанную и в непроходимых водрузиша кущы,

11:3  сопротивишася супостатом и отмстиша врагом:

11:4  возжадаша и призваша Тебе, и дана бысть им вода от камене несекомаго и изцеление жажды от камене жестока.

11:5  Имиже бо наказани быша врази их,

11:6  сими сии во оскудении суще благодетелствовани быша:

11:7  за источник убо приснотекущия реки, кровию излиянною смятенныя,

11:8  во обличение младенцеубийственнаго повеления, дал еси им изюбилну воду безнадежно,

11:9  показав тогда жаждею, како противных умучил еси.

11:10  Егда бо искушени быша и в милости наказани, познаша, како во гневе судимии нечестивии мучишася:

11:11  сих бо яко отец учащь искусил еси, онех же яко жесток царь осуждая истязал еси.

11:12  Отстоящии же и присутствующии такожде мучишася:

11:13  сугуба бо их прият печаль и стенание с памятию минувших.

11:14  Егда бо слышаху своими мучении благодействуемых оных, познаваху Господа:

11:15  егоже бо древле во отложении отвержена отрекошася смеющеся, при концы события удивишася, неподобною праведным томими жаждею.

11:16  За помышления же безумная неправды их, в нихже заблудивше почитаху безсловесная пресмыкающаяся и зверей худых, послал еси им множество безсловесных животных во отмщение,

11:17  да познают, яко имиже кто согрешает, сими и мучится.

11:18  Не неможаше бо всесильная рука Твоя, яже сотвори мир от безобразнаго вещества, послати на них множество медведей, или лютых львов,

11:19  или новосозданных ярости исполненых зверей незнаемых, или огненным дышущих духом, или злосмрадный произносящих дым, или страшныя из очей искры испускающих:

11:20  ихже не токмо вред можаше истребити я, но и зрак устрашающь погубити.

11:21  И без тех, единым духом пасти могоша, от суда гоними и развеяни от духа силы Твоея: но вся мерою и числом и весом расположил еси.

11:22  Еже бо много мощи, присутствует Тебе всегда, и державе мышцы Твоея кто сопротивится?

11:23  Понеже, якоже стражик в превесех, (тако) весь мир пред Тобою, и яко капля росы утренния, сходящия на землю.

11:24  Милуеши же всех, яко вся можеши, и презираеши грехи человеком в покаяние.

11:25  Любиши же сущая вся, и ни чесогоже гнушаешися, яже сотворил еси: ниже бо ненавидя что устроил еси.

11:26  Како же пребыло бы что, аще бы Ты не изволил еси? Или, еже не наречено от Тебе, сохранилося бы?

11:27  Щадиши же вся, яко Твоя суть, Владыко душелюбче!

Chapter 12

12:1  Нетленный бо дух Твой есть во всех.

12:2  Темже заблуждающих помалу обличаеши, и в нихже согрешают, воспоминая учиши, да пременившеся от злобы веруют в Тя, Господи.

12:3  И древних бо обитателей земли святыя Твоея возненавидев,

12:4  ради деяний злых волшвений, яже творяху, и жертв непреподобных,

12:5  и чадоубийц немилостивых, и утробоядцев человеческих плотей, и кровопийцев от среды святыни Твоея,

12:6  и родителей убивших душы безпомощныя, восхотел еси погубити руками отец наших:

12:7  да достойное приимет преселение отроков Божиих, яже у Тебе всех дражайшая земля.

12:8  Но и сих яко человеков пощадил еси, послал же еси предтекущыя воинства Твоего осы, яко да тех помалу истребят.

12:9  Не несилен еси во брани покорити нечестивых праведным, или зверем свирепым, или словом жестоким до единаго потребити:

12:10  судящь же помалу давал еси место покаянию, не неведяй, яко лукав род их и естественная злоба их, и яко не пременится помышление их во век.

12:11  Семя бо бе проклято от начала: ниже бояйся кого, отпущение даял еси грехом их.

12:12  Кто бо речет (Тебе): что сотворил еси? Или кто станет противу суду Твоему? Кто же истяжет Тя о языцех погибших, ихже Ты сотворил еси? Или кто в предстателство Тебе приидет, отмститель на неправедныя человеки?

12:13  Несть бо ин Бог разве Тебе, иже радиши о всех, да покажеши, яко не неправо судил еси.

12:14  Ниже царь, или мучитель противу Тебе воззрети может, о ихже погубил еси.

12:15  Праведен же сый, праведно вся управляеши, недолжнаго же мучитися осудити чуждо мниши Твоея силы.

12:16  Крепость бо Твоя правды начало и еже над всеми Твое владычество, всех щадети творит.

12:17  Крепость бо показуеши неверующым о совершенстве силы, а в ведущих дерзость обличаеши.

12:18  Ты же владычествуяй силою в кротости судиши и с великим щадением разсмотряеши нас: с Тобою бо есть, егда хощеши, еже мощи.

12:19  Научил же еси люди Твоя сицевыми делы, яко подобает праведному быти человеколюбцу, и благонадежны сотворил еси сыны Твоя, яко даеши о гресех покаяние.

12:20  Аще бо враги отроков Твоих и должных смерти с толиким мучил еси внятием и щадением, даяй времена и место, имиже бы изменилися от злобы:

12:21  с коликим прилежанием судил еси сыны Твоя, ихже отцем клятвы и заветы дал еси благих обещаний.

12:22  Нас убо наказуя, враги нашя тмами биеши, да благостыню Твою помышляем судяще, судими же чаем милости.

12:23  Отюнудуже и неправедных, во безумии поживших живот, свойственными их мерзостьми мучил еси,

12:24  ибо в путех заблуждения должае заблудиша, боги мняще, яже и во животных вражиих безчестна, аки младенцы безумнии прельстившеся.

12:25  Сего ради яко отроком несмысленным суд в поругание послал еси:

12:26  иже поруганьми прещения не наказавшеся, достойна суда Божия искусят.

12:27  В нихже бо тии страждуще негодоваху, в сих, ихже мняху быти боги, в тех мучими, видяще Егоже прежде отметахуся знати,

12:28  Бога истиннаго познаша: темже и конец осуждения прииде на ня.

Chapter 13

13:1  Суетни убо вси человецы естественне, в нихже обретается неведение о Бозе, и от видимых благ не возмогоша уразумети Сущаго, ни делом внемлюще познаша Хитреца:

13:2  но или огнь, или дух, или скор воздух, или круг звездный, или зелную воду, или светила небесная, строители миру боги (быти) возмнеша.

13:3  Ихже аще убо красотою услаждающеся, сия боги возмнеша, да уведят, колико сих Владыка есть лучший: красоты бо Родоначалник созда я.

13:4  Аще же силе и действию удивишася, да уразумеют от них, колико сотворивый сия сильнейший есть:

13:5  от величества бо красоты созданий сравнително Рододелатель их познавается.

13:6  Но обаче на сих есть уничижение мало, ибо сами сии негли прельщаются, Бога ищуще и хотяще обрести:

13:7  в делех бо Его живуще изследуют и увещаваются зраком, яко блага видимая.

13:8  Паки ниже сии прощения достойни:

13:9  аще бо толико возмогоша ведети, да возмогут уразумети век, сих же Владыку како скорее не обретоша?

13:10  Окаянни же суть, и в мертвых упования их, иже назваша боги дела рук человеческих, злато и сребро, хитрости умышление, и подобия животных, или камение неключимо, дело руки древния.

13:11  Аще же кто дровосечец тектон, угодное древо отсек, отешет благохудожне всю кору его, и хитрствуя благолепне сотворит угоден сосуд во употребление жития,

13:12  останки же дела на уготование брашна изнурив насытися:

13:13  останок же иже от них ни во что благопотребен, древо криво и сучия полно, приим извая с прилежанием праздности своея и искусством разума изобрази его, и уподоби его образу человечу,

13:14  или некоему животному ничтожному уподоби его, помазав шарами различными и очервленив вид его, и всяк порок, иже на нем есть, измазав,

13:15  и сотворив ему достойное его обитание, на стене постави е, укрепив железом.

13:16  Да не убо падет, предумысли о нем, ведый, яко не может помощи себе: ибо идол есть и требует помощи.

13:17  О стяжаниих же и о брацех и чадех своих моляся, не стыдится к бездушному глаголя,

13:18  и о здравии убо немощное призывает, и о животе мертвое молит, и в помощь неключимое призывает,

13:19  и о путешествии (просит) ниже ходити могущаго, и о притяжании и деянии и о рук подтверждении некрепкаго руками, мужества просит от того, еже всех есть немощнейшее.

Chapter 14

14:1  Плыти паки кто помыслив и сверепыя волны преходити, носящаго его корабля тленнейшее древо призывает:

14:2  оное бо желание пристяжаний умысли, хитрец же мудростию содела:

14:3  Твой же, Отче, устрояет промысл: яко дал еси и в мори путь и в волнах стезю крепкую,

14:4  показуя, яко силен еси от всякаго спасти, аще и без художества кто взыдет.

14:5  Хощеши же, да не будут праздна дела премудрости Твоея: сего ради и малейшему древу вверяют человецы душы (своя), и преходяще волны кораблецем избавлени суть.

14:6  И от начала бо, егда погибаху гордии исполини, упование мира в кораблеце избежавшее, остави веку семя рождения, рукою Твоею устроено.

14:7  Благословено бо древо, имже бывает правда.

14:8  Рукотворенное же проклято есть, и сотворивый е: яко ов убо содела, сие же тленное богом именовася.

14:9  В равне бо ненавидима суть Богу и нечествуяй, и нечестие его:

14:10  ибо сотвореное с сотворшим мучимо будет.

14:11  Сего ради и во идолех языческих будет казнь, яко в создании Божии в мерзость сотворени суть и в соблазны душам человеческим и в сеть ногам буих.

14:12  Начало бо блужения умышление идолов: изобретение же их тление живота.

14:13  Ниже бо быша от начала, ниже будут во веки:

14:14  тщеславием бо человеческим внидоша в мир, и сего ради краток их конец вменися.

14:15  Горьким бо плачем сетуя отец скоро восхищенаго чада образ сотворив, егоже тогда человека мертва, ныне яко бога почте: и предаде подручным тайны и жертвы:

14:16  потом временем возмогший нечестивый обычай, аки закон хранимь бысть, и мучителей повелением почитаема бяху изваянная:

14:17  ихже в лице не могуще чествовати человецы дальнаго ради обитания, издалеча лице изобразивше, явный образ почитаемаго царя сотвориша, яко да отстоящаго аки близ сущаго ласкают со прилежанием.

14:18  В продолжение же злочестия и не разумеющих принуди художниково любочестие.

14:19  Сей бо хотя угодити державствующему, произведе хитростию (своею) подобие на лучшее:

14:20  множество же человек, привлечено благообразием дела, прежде вмале чествованаго человека ныне в бога вмениша.

14:21  И сие бысть житию в прельщение, яко или злоключению, или мучителству послуживше человецы, несообщно Имя камению и древам обложиша.

14:22  Посем не доволно бе прельщатися о Божии разуме, но и в велицей живуще безумия брани, толикая злая мир именуют.

14:23  Ибо или детоубийственныя жертвы, или сокровенныя тайны, или неистовныя от иных законов пиршества творяше,

14:24  ниже жития, ниже браков чистых еще хранят: един же другаго или наветом убивает, или блудя оскорбляет.

14:25  Вся же смешена суть, кровь и убийство, татьба и лесть, растление, неверство, смятение, заклинание, молва благих,

14:26  благодати забвение, душам осквернение, рождению пременение, браков безчиние, прелюбодеяние и студодеяние.

14:27  Недостойных бо имене идолов служение начало всякаго зла, и вина и конец есть:

14:28  ибо или веселящеся неистовствуют, или пророчествуют ложная, или живут неправедне, или кленутся скоро.

14:29  На бездушныя бо идолы надеющеся, зле кленущеся казними быти не чают.

14:30  За обоя же на них приидет суд: понеже зле мудрствоваша о Бозе, внемлюще идолом, и неправедно кляшася лестию, презревше преподобие.

14:31  Не бо сила кленущих, но согрешающым суд находит всегда на преступление неправедных.

Chapter 15

15:1  Ты же Бог наш благ и истинен, долготерпелив и в милости управляяй вся.

15:2  Ибо аще согрешим, Твои есмы, ведуще державу Твою: и аще не согрешим, вемы, яко Тебе вменихомся.

15:3  Еже бо знати Тебе, всесовершена (есть) правда, и ведети державу Твою, корень есть безсмертия.

15:4  Ниже бо прельсти нас человеческое злохитрое умышление, ниже сеннописаных труд безплодный, вид изваян различными шары,

15:5  ихже зрак безумным приходит в похотение, и любят мертваго образа вид бездушный.

15:6  Злых любителие достойнии таковых надежд и творящии, и любящии, и чествующии.

15:7  Ибо скудельник, мягкую землю мнущь со трудом, делает ко служению нашему коеждо: но от тогожде брения созда и яже чистых дел служебныя сосуды, и сопротивныя, вся подобне: сих же обоих коегождо есть употребление, судия есть бреноделатель.

15:8  И злотрудник бога суетна от тогожде творит брения, иже мало прежде от земли сотворен быв, по мале идет, из неяже взят бысть, истязан о душевнем долзе.

15:9  Но есть ему прилежание, не яко имать трудитися, ниже яко краткоконечно житие имать: но ревнует златоделателем и сребролиятелем, и меди делателем подражает, и славу мнит, яко скверная делает.

15:10  Пепел бо есть сердце его, и земли хуждше упование его, и брения безчестнее живот его:

15:11  яко не уведе Создавшаго его, и вдохнувшаго ему душу действительную, и вдунувшаго дух животный.

15:12  Но вмениша игралище быти живот наш, и житие все упражнено на приобретение: ибо глаголют, яко подобает откуду либо, аще и от зла, приобретати.

15:13  Сей бо паче всех весть, яко согрешает, от вещества земленаго удобныя к сокрушению сосуды и изваяния содеваяй.

15:14  Вси же пребезумнейшии и окаяннейшии, паче души младенческия, врази людий Твоих обладавшии ими:

15:15  яко вся идолы язычески вмениша в боги, имже ниже очес употребление ко зрению, ниже ноздри в привлечение аера, ниже уши слышати, ниже персты рук во осязание, и ноги их праздны ко хождению.

15:16  Человек бо сотвори их, и духа взаим взяв созда их: ни един бо человек может себе подобна бога создати:

15:17  смертен же сый мертва делает рукама беззаконныма: лучший бо есть идолов своих: (яко) сей убо поживе, онии же никогда.

15:18  И животных мерзких чтут: безумная бо сравняемая иных суть хуждша.

15:19  Ниже елико вожделети яко в лицы животных блага суть, отбегоша же и Божия хвалы и благословения Его.

Chapter 16

16:1  Сего ради от подобных пострадаша достойне, и множеством зверей казнени быша.

16:2  Вместо мучения благо сотворил еси людем Твоим, в похотение желания странное вкушение, пищу уготовал еси крастели,

16:3  да они убо вожделевшии пищи, показанием посланых, и от нужнаго хотения отвратятся, сии же вмале скудни бывше, и странна приобщатся вкушения.

16:4  Подобаше бо на оных убо неизбежней нищете наити мучителствующих, сим же токмо показати, како врази их мучишася.

16:5  Ибо егда тем найде жесток зверей гнев, и угрызеньми сверепых истребляхуся змиев,

16:6  но не до конца пребысть гнев Твой: в наказание же вмале смущени быша, знамение имеюще спасения, на воспоминание заповеди закона Твоего:

16:7  обративыйся бо не (вещию) зримою целяшеся, но Тобою всех Спасителем.

16:8  И в сем же показал еси врагом нашым, яко Ты еси избавляяй от всякаго зла:

16:9  тех бо акриды и мухи побиша угрызением, и не обретеся цельба душам их, яко достойни бяху от таковых мучитися.

16:10  Сынов же Твоих ниже ядовитых змиев зубы одолеша: милость бо Твоя прихождаше и изцеляше их.

16:11  В память бо словес Твоих бяху усечени и скоро изцеляхуся, да не во глубину впадше забвения отлучатся Твоего благодеяния:

16:12  ниже бо зелие, ниже обязание изцели их, но слово Твое, Господи, изцеляющее вся.

16:13  Ты бо живота и смерти власть имаши, и низводиши даже до врат ада, и возводиши.

16:14  Человек же убивает убо злобою своею: изшедшаго же духа не возвратит, ниже паки призывает душу взятую.

16:15  Твоея же руки избежати невозможно есть:

16:16  отметающиися бо Тебе ведети нечестивии, в крепости мышцы Твоея биени быша странными дождьми и градами, и бурями гоними неизбежно, и огнем растаеваеми.

16:17  Преславное бо, в воде вся угашающей множае действоваше огнь: споборник бо есть мир о праведных.

16:18  Овогда бо убо укрощашеся пламень, да не сожжет посланных животных на нечестивыя: но сии зряще да ведят, яко от Божия суда страждут гонение.

16:19  Овогда же и между водою выше силы огненныя паляше, да беззаконныя земли порождения растлит.

16:20  Вместо же сих ангелскою пищею питал еси люди Твоя, и уготован хлеб с небесе послал еси им без труда, всякое услаждение в себе имеющь и ко всякому сличный вкушению.

16:21  Существо бо Твое сладость Твою ко сыном показоваше, и угождая единаго коегождо воли, якоже кто хотяше, превращашеся.

16:22  Снег же и лед терпяху огнь и не растаяваху: да уведят, яко плоды врагов истребляше огнь горящь во граде и в дождех блистающь:

16:23  тойже паки, да питаются праведнии, (огнь) и свою забы силу.

16:24  Творение бо, Тебе Творцу всех служащее, распростирается на муку противу неправедных и легчае творится во благодеяние ради на Тя надеющихя.

16:25  Сего ради и тогда во вся преобразуемое всех кормителнице благодати Твоей служаше к воли требующих:

16:26  да научатся сынове Твои, ихже возлюбил еси, Господи, яко не рождения плодов питают человека, но слово Твое Тебе верующих соблюдает.

16:27  Еже бо огнем нерастлено скоро от малыя лучи солнечныя греемое растаявашеся:

16:28  да знаемо будет (всем), яко подобает предварити солнце на благодарение Тебе и к востоку света Тебе поклонитися.

16:29  Неблагодарнаго бо упование яко зимный иней растает, и излиется яко вода неключима.

Chapter 17

17:1  Велицы бо суть суди Твои, (Господи,) и неизглаголанни: сего ради ненаказанныя души заблудиша.

17:2  Возмневше бо насильствовати язык святый беззаконнии, узницы тмы и долгою нощию связани, заключени под кровы, беглецы вечнаго Проведения лежаша.

17:3  Утаитися бо мняще в сокровенных гресех, мрачным забвения покрывалом расточени быша, ужасающеся люте и страшилищами возмущени:

17:4  ниже бо содержай их вертеп без страха сохрани, шумы же сходяще возмущаху их, и привидения дряхлая печальными лицами являхуся.

17:5  И огненная убо ни едина сила можаше освещати, ниже звезд светлии пламение просветити можаху в ту нощь страшную.

17:6  Являшеся же им токмо внезапный огнь страха исполнь: устрашаеми же невидимым оным призраком, мняху горшая быти видимая.

17:7  Волшебнаго же художества предлежаху посмеяния, и о премудрости величания обличение укоризненно:

17:8  обещающиися бо изгнати страхи и смущения от души болящия, сии посмеятелным страхом боляху.

17:9  Ибо аще и ничтоже их мятежное устрашаше, зверей преходами и змиев звизданьми подвижени погибаху трепетни, и аера отнюд неизбежнаго отрицающеся видети.

17:10  Боязливая бо злоба, своим свидетелством осуждаема, выну приемлет во ум лютая, содержима совестию.

17:11  Ничтоже бо есть страх, токмо лишение помощей сущих от помышления.

17:12  Внутрь же менше сущее чаяние, болшее мнит неведение вины подающия муку.

17:13  А иже в немощную поистинне нощь, и от немощнаго ада вертепов нашедшую, сном темже спящии,

17:14  ово убо страшилищами мечтаний гоними бяху, ово же души изчезаху преданием: внезапный бо им и нечаянный страх найде.

17:15  Потом тако, кто либо когда бе онамо, низпадый храняшеся в темнице без железа заключен:

17:16  аще бо земледелатель кто бысть, или пастырь, или трудов пустынных делатель, предят быв, неизбежную терпяше нужду:

17:17  единым бо ужем тмы вси бяху связани. Аще дух звиздаяй, или между частых древесных ветвей птичий глас сладкопеснивый, или сила водная текущи зелне,

17:18  или шум зелный низпадающих камений, или играющих животных течение невидимое, или рыкающих лютых зверей глас, или отзывающься от дебрей горских глас, разслабляху оных устрашающе.

17:19  Вся бо вселенная светлым просвещашеся светом, и невозбранными делы содержашеся:

17:20  на единых же оных простирашеся тяжкая нощь, образ будущаго их восприятия тмы: сами же себе быша тмы тяжчайшии.

Chapter 18

18:1  Преподобным же Твоим превелик бе свет: ихже убо глас слышаше, образа же не видяще, занеже убо и они (тогожде) не страдаху, ублажаху.

18:2  А яко не пакоствуют предобидимии, благодаряху, и еже пронестися, благодати моляху.

18:3  Сих ради столп огнегорящь, вожда убо неведомаго путьшествия, солнце же невредителное любочестнаго странствования подал еси.

18:4  Достойни бо они лишитися света и блюстися во тме, иже заключеных стрежаху сынов Твоих, имиже имяше нетленный закона свет веку датися.

18:5  Советовавших же их убивати младенцы преподобных, и единому отложену чаду и спасену, во обличение их отял еси множество чад, и купно погубил еси в воде зелней.

18:6  Оная бо нощь предуведена бысть отцем нашым, да твердо ведуще, имже клятвам вероваша, возблагодушествуют.

18:7  Восприято же бысть от людий Твоих спасение убо праведных, врагов же истребление:

18:8  имже бо наказал еси супостаты нашя, сим нас призвав прославил еси.

18:9  Сокровенно бо жряху преподобнии отроцы благих, и закон божественный единомыслием завещаша, таяжде подобно, благая же и бедственная восприимати святым, отцем уже предвоспевающым хвалу.

18:10  Противогласяше же несогласный врагов вопль, и плачевный слышашеся глас плачущих младенцев.

18:11  Подобною же местию раб купно с господином казнен бысть, и простый человек с царем таяжде пострада:

18:12  единодушно же вси во единем имени смертнем мертвых имеяху безчисленных: ниже бо ко погребению живии бяху доволни, понеже во единем мгновении честнейший род их истреблен бысть.

18:13  О всех бо не верующе ради чародеяний, а ради первенцев истребления, исповедаша людий сынов Божиих быти.

18:14  Тихому бо молчанию содержащу вся, и нощи во своем течении преполовляющейся,

18:15  всемогущее слово Твое, (Господи,) с небес от престолов царских жесток ратник в средину погибельныя земли сниде.

18:16  Мечь остр нелицемерное повеление Твое носяй, и став исполни вся смерти: и небесе убо касашеся, стояше же на земли.

18:17  Тогда внезапу привидения убо снов люте смутиша их, страси же наидоша нечаянни,

18:18  и ин инамо вержен еле жив, еяже ради вины умираше, объявляше:

18:19  сония бо, смутивше их, сие предвозвестиша: да не ведяще, егоже ради зле страждут, погибнут.

18:20  Прикоснуся же некогда и праведных искушение смерти, поражение во пустыни бысть множества: но не долго пребысть гнев.

18:21  Потщався бо муж непорочен предпоборствова, своея службы оружие, молитву и фимиама умилостивление принес, сопротив ста гневу и конец положи бедствованию, показав, яко Твой есть раб.

18:22  Одоле же поражающаго не силою телесною, ниже оружия действием, но словом покори наказующаго, клятвы отцев и заветы воспомянув.

18:23  Громадами бо уже падшым друг на друга мертвым, посреде став, пресече гнев и раздели к живым путь.

18:24  На одежди бо подира бе весь мир, и отцев славы на изваянии четырерядоваго камения, и величество Твое на диадиме главы его.

18:25  Сим уступил искореняяй и сих устрашися: бе бо токмо искушение гнева доволно.

Chapter 19

19:1  Нечестивым же до конца без милости ярость найде: предведе бо их и будущая,

19:2  яко тии отпустившии, еже отити, и со тщанием предпославше их, поженут вслед раскаявшеся:

19:3  еще бо в руках имеюще рыдания и сетующе над гробами мертвых, ин себе взяша помысл безумия, и ихже моляще изгнаша, сих аки беглецев гоняху.

19:4  Влечаше бо их к сему концу достойная нужда, и приключшихся забытие вложи, да и прочую к мучением принаполнят казнь:

19:5  и людие убо Твои преславное путьшествие прейдут, они же странну обрящут смерть.

19:6  Все бо творение во своем ему роде паки свыше преобразовашеся, служащее свойственным Твоим повелением, да отроцы Твои сохранятся невреждени.

19:7  Облак осеняяй полк их, и из преждебывшия воды открытие сухия земли явися, и из моря Чермнаго путь невозбранен, и поле злачное от волнения зелнаго:

19:8  имже весь язык пройде, Твоею рукою покровени, видяще дивная чудеса.

19:9  Якоже бо кони насытишася, и яко агнцы взыграшася, хваляще Тя, Господи, избавльшаго их:

19:10  воспомянуша бо еще, яже во обитании их, како убо вместо рождения животных изведе земля скнипы, вместо же рыб изрыгну река множество жаб.

19:11  Последи же видеша и новое рождение птиц, егда похотением подвигшеся, просиша сладостныя пищи.

19:12  Во утешение бо взыдоша им от моря крастели: и мучения грешным наидоша, не без бывших знамений силою молний: праведне бо пострадаша за своя злобы,

19:13  ибо лютейшее ненавидение странных совершиша: инии убо незнаемых не приемляху пришелцев, сии же благодетелей странных порабощаху.

19:14  И не токмо, но аще кое разсмотрение будет их: зане враждебно приемляху чуждых.

19:15  Сии же с празднествами приемше приобщившихся уже их обычаем, жесточайшими озлобиша трудами.

19:16  Побиени же быша и ослеплением, якоже онии при дверех праведника, егда великою обложени тмою, кийждо своих дверий прохода искаше.

19:17  Сами бо собою стихии пременяемы, якоже в гуслех гласы сличия имя пременяют, всегда храняще звук: еже есть видети от зрака бывших известно.

19:18  Земная бо в водная прелагахуся, и плавающая прехождаху на землю.

19:19  Огнь возмогаше в воде вышше своея силы, и вода угашающую силу забы.

19:20  Пламень вопреки удоботленных животных не вреди плотей в нем ходящих, ниже таяше ледовидный удоботаяй род сладостныя пищи.

19:21  По всему бо, Господи, возвеличил еси люди Твоя и прославил еси, и не презрел еси, во всяцем времени и месте предстояй.