Geez - Judges

Chapter 1

1:1  (ኦሪት ፡ ዘመሳፍንት ።)ወኮነ ፡ እምድኅረ ፡ ሞተ ፡ ኢየሱስ ፡ ወተስእሉ ፡ ደቂቀ ፡ እስራኤል ፡ [ኀበ ፡ እግዚአብሔር ፡] እንዘ ፡ ይብሉ ፡ መኑ ፡ የዐርግ ፡ ለነ ፡ ኀበ ፡ ከናኔዎን ፡ መልአክ ፡ ዘይትቃተሎሙ ፡ ለነ ።

1:2  ወይቤሎ[ሙ] ፡ እግዚአብሔር ፡ ይሁዳ ፡ የዐርግ ፡ ወናሁ ፡ አግባእክዋ ፡ ለምድር ፡ ውስተ ፡ እዴሁ ።

1:3  ወይቤሎ ፡ ይሁዳ ፡ ለስምዖን ፡ እኁሁ ፡ ዕረግ ፡ ምስሌየ ፡ በውስተ ፡ መክፈልትየ ፡ ወንትቃተሎሙ ፡ ለከናአን ፡ ወአሐውር ፡ አነኒ ፡ ምስሌከ ፡ በውስተ ፡ መክፈልትከ ፡ ወሖረ ፡ ስምዖን ፡ ምስሌሁ ።

1:4  ወዐርገ ፡ ይሁዳ ፡ ወአግብኦሙ ፡ እግዚአብሔር ፡ ለከናኔዎን ፡ ወለፌሬዜዎን ፡ ውስተ ፡ እዴሁ ፡ ወቀተሎሙ ፡ በቤዜቅ ፡ እልፈ ፡ ብእሴ ።

1:5  ወረከብዎ ፡ ለአዶኒቤዜቅ ፡ ወተቃተልዎ ፡ ወቀተልዎሙ ፡ ለከናኔዎን ፡ ወለፌሬዜዎን ።

1:6  ወጐየ ፡ አዶኒቤዜቅ ፡ ወዴገንዎ ፡ ወተለውዎ ፡ ወአኀዝዎ ፡ ወመተሩ ፡ አርእስተ ፡ እደዊሁ ፡ ወእገሪሁ ።

1:7  ወይቤሎሙ ፡ አዶኒቤዜቅ ፡ ዘ፸ነገሥት ፡ አርእስተ ፡ እደዊሆሙ ፡ ወእገሪሆሙ ፡ ምቱር ፡ ሀለወ ፡ አስተጋብኡ ፡ በታሕተ ፡ ማእድየ ፡ ወበከመ ፡ ገበርኩ ፡ ከማሁ ፡ ፈደየኒ ፡ እግዚአብሔር ፡ ወወሰድዎ ፡ ኢየሩሳሌም ፡ ወሞተ ፡ በህየ ።

1:8  ወተቃተሉ ፡ ደቂቀ ፡ ይሁዳ ፡ ምስለ ፡ ኢየሩሳሌም ፡ ወአስተግብእዋ ፡ ወቀተልዋ ፡ በአፈ ፡ ኀፂን ፡ ወአውዐዩ ፡ ሀገራ ፡ በእሳት ።

1:9  ወእምዝ ፡ ወረዱ ፡ ደቂቀ ፡ ይሁዳ ፡ ይትቃተልዎሙ ፡ ለከናኔዎን ፡ እለ ፡ ይነብሩ ፡ ውስተ ፡ አድባር ።

1:10  ወሖረ ፡ ይሁዳ ፡ ውስተ ፡ ከናኔዎን ፡ እለ ፡ ይነብሩ ፡ ውስተ ፡ ኬብሮን ፡ ወወፅኡ ፡ ሰብአ ፡ ኬብሮን ፡ ተቀበልዎሙ ፡ ወስማ ፡ ለኬብሮን ፡ ትካት ፡ ቀሪየርቦቀሴፌር ፡ ወቀተልዎሙ ፡ ለሴሲ ፡ ወለአኪመም ፡ ወለተሚ ፡ ትውልደ ፡ ኤነቅ ።

1:11  ወሖሩ ፡ እምህየ ፡ ኀበ ፡ እለ ፡ ይነብሩ ፡ ዳቢር ፡ ወስማ ፡ ለዳቢር ፡ ትካት ፡ ሀገረ ፡ መጽሐፍ ።

1:12  ወይቤ ፡ ካሌብ ፡ ዘቀተላ ፡ ለሀገረ ፡ መጽሐፍ ፡ ወአስተጋብኣ ፡ እሁቦ ፡ አስካ ፡ ወለትየ ፡ ትኩኖ ፡ ብእሲተ ።

1:13  ወአስተጋብኣ ፡ ጎቶኒየል ፡ ወልደ ፡ ቄኔዝ ፡ እኁሁ ፡ ለካሌብ ፡ ዘይንእስ ፡ ወወሀቦ ፡ አስካ ፡ ወለቶ ፡ ትኩኖ ፡ ብእሲቶ ።

1:14  ወሶበ ፡ ለሐዊራ ፡ አምከራ ፡ ጎቶኒየል ፡ ትስአሎ ፡ ለአቡሃ ፡ ይጸግዋ ፡ ዐጸደ ፡ ወፍር ፡ ወአንጐርጐረት ፡ በዲበ ፡ አድግ ፡ ወጸርሐት ፡ በላዕለ ፡ አድግ ፡ ወትቤ ፡ ውስተ ፡ ብሔረ ፡ አዜብ ፡ ፈኖከኒ ፡ ወይቤላ ፡ ካሌብ ፡ ምንተ ፡ ኮንኪ ።

1:15  ወትቤሎ ፡ አስካ ፡ ሀበኒ ፡ በረከተ ፡ እስመ ፡ ብሔረ ፡ አዜብ ፡ ፈኖከኒ ፡ ወሀበኒ ፡ ቤዛ ፡ ማይ ፡ ወወሀባ ፡ ካሌብ ፡ በከመ ፡ ትፈቱ ፡ በልባ ፡ ቤዛ ፡ ሕሙም ፡ ወቤዛ ፡ ትኩዝ ።

1:16  ወደቂቀ ፡ ዮባብ ፡ ቀኔያዊ ፡ ሐሙሁ ፡ ለሙሴ ፡ ዐርጉ ፡ እምነ ፡ ሀገረ ፡ ፊንቆን ፡ ኀበ ፡ ደቂቀ ፡ ይሁዳ ፡ ውስተ ፡ ሐቅለ ፡ ይሁዳ ፡ ዘመንገለ ፡ አዜብ ፡ ውስተ ፡ ሙራደ ፡ አረድ ፡ ወሖረ ፡ ወነበረ ፡ ምስለ ፡ ሕዝብ ።

1:17  ወሖረ ፡ ይሁዳ ፡ ምስለ ፡ ስምዖን ፡ [እኁሁ ፡] ወቀተልዎሙ ፡ ለከናኔዎን ፡ እለ ፡ ይነብሩ ፡ ውስተ ፡ ሴፍር ፡ ወአሕረምዋ ፡ ወአጥፍእዋ ።

1:18  ወኢተወርሳ ፡ ይሁዳ ፡ ለጋዛን ፡ ወለደወላ ፡ ወአስቃሎና ፡ ወደወላ ፡ ወአዛጦን ፡ ወደወላ ፡ ወጺኦታቲሃ ።

1:19  ወሀለወ ፡ እግዚአብሔር ፡ ምስለ ፡ ይሁዳ ፡ ወተወርሰ ፡ ደብረ ፡ ወስእነ ፡ ተወርሶቶሙ ፡ ለእለ ፡ ይነብሩ ፡ ውስተ ፡ ቈላት ፡ እስመ ፡ ሬከብ ፡ ፈለጣ ።

1:20  ወወሀብዎ ፡ ለካሌብ ፡ ኬብሮን ፡ በከመ ፡ ይቤ ፡ ሙሴ ፡ ወተወርሰ ፡ እምህየ ፡ አህጉረ ፡ ወአሰሰሎሙ ፡ እምህየ ፡ ለሠለስቱ ፡ ደቂቀ ፡ ኤናቅ ።

1:21  ወለኢየቡሴዎን ፡ እለ ፡ ይነብሩ ፡ ውስተ ፡ ኢየሩሳሌም ፡ ኢያሰሰልዎሙ ፡ ደቂቀ ፡ ብንያሚ ፡ ወነበሩ ፡ ኢየቡሴዎን ፡ ምስለ ፡ ደቂቀ ፡ ብንያሚ ፡ እስከ ፡ ዛቲ ፡ ዕለት ።

1:22  ወዐርጉ ፡ ደቂቀ ፡ ዮሴፍሰ ፡ እሙንቱኒ ፡ ውስተ ፡ ቤቴል ፤

1:23  ወስማ ፡ ለይእቲ ፡ ሀገር ፡ ትካት ፡ ሉዛ ።

1:24  ወርእዩ ፡ ሰብአ ፡ መዓቅብ ፡ ብእሴ ፡ እንዘ ፡ ይወፅእ ፡ እምነ ፡ ሀገር ፡ ወአኀዝዎ ፡ ወይቤልዎ ፡ አርእየነ ፡ ምብዋኣ ፡ ለህገር ፡ ወንገብር ፡ ምስሌከ ፡ ምሕረተ ።

1:25  ወአርአዮሙ ፡ እንተ ፡ ኀበ ፡ ይበውእዋ ፡ ለሀገር ፡ ወቀተልዋ ፡ ለይእቲ ፡ ሀገር ፡ በአፈ ፡ ኀፂን ፡ ወለዝክቱሰ ፡ ብእሲ ፡ ወለአዝማዲሁ ፡ አግዐዝዎሙ ።

1:26  ወአተወ ፡ ውእቱ ፡ ብእሲ ፡ ውስተ ፡ ምድረ ፡ ኬጤዎን ፡ ወነደቀ ፡ በህየ ፡ ሀገረ ፡ ወሰመየ ፡ ስማ ፡ ሉዛ ፡ ወውእቱ ፡ ኮነ ፡ ስማ ፡ እስከ ፡ ዮም ።

1:27  ወኢተወርሰ ፡ ምናሴ ፡ ቤተሳን ፡ እንተ ፡ ሀገረ ፡ ሶቂቶን ፡ ወኢአዋልዲሃ ፡ ወኢጺኦታቲሃ ፡ ወኢኤቅዳአድ ፡ ወኢአዋልዲሃ ፡ ወኢእለ ፡ ይነብሩ ፡ ውስተ ፡ ዶር ፡ ወኢአዋልዲሃ ፡ ወኢእለ ፡ ይነብሩ ፡ [ውስተ] ፡ በለዓም ፡ ወኢአዋልዲ[ሃ] ፡ ወኢእለ ፡ ይነብሩ ፡ ውስተ ፡ መጌዶን ፡ ወኢአዋልዲሃ ፡ ወኢእለ ፡ ይነብሩ ፡ [ውስተ ፡] የብለዓም ፡ ወኢአዋልዲሃ ፡ ወአኀዙ ፡ ከናአን ፡ ይንበሩ ፡ ውስተ ፡ ይእቲ ፡ ምድር ።

1:28  ወእምዝ ፡ ሶበ ፡ ጸንዑ ፡ እስራኤል ፡ መጸብሔ ፡ ረሰይዎሙ ፡ ለከናአን ፡ ወአጥፍኦሰ ፡ ኢያጥፍእዎሙ ።

1:29  ወኤፍሬምኒ ፡ ኢያጥፍእዎሙ ፡ ለከናኔዎን ፡ እለ ፡ ይነብሩ ፡ ውስተ ፡ ጋዜር ፡ ወነበሩ ፡ ከናኔዎን ፡ ማእከሎሙ ፡ ውስተ ፡ ጋዜር ፡ ወኮንዎሙ ፡ መጸብሔ ።

1:30  ወዛቡሎንሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ ቄድሮን ፡ ወለእለ ፡ ይነብሩ ፡ ውስተ ፡ ዐማን ፡ ወነበሩ ፡ ከናኔዎን ፡ ማእከሎሙ ፡ ወኮንዎሙ ፡ መጸብሔ ።

1:31  ወአሴርሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ አኮ ፡ ወኮንዎሙ ፡ መጸብሔ ፡ ወእለ ፡ ይነብሩ ፡ ውስተ ፡ ደር ፡ ወእለ ፡ ይነብሩ ፡ ውስተ ፡ ሲዶና ፡ ወእለ ፡ ይነብሩ ፡ ውስተ ፡ ዳላፍ ፡ ወአስኮድ ፡ ወኬድያ ፡ ወአፌቅ ፡ ወሮዖብ ።

1:32  ወነበረ ፡ አሴር ፡ ማእከለ ፡ ከናኔዎን ፡ እለ ፡ ይነብሩ ፡ ውስተ ፡ ይእቲ ፡ ምድር ፡ እስመ ፡ ስእኑ ፡ አጥፍኦቶሙ ።

1:33  ወንፍታሌምሂ ፡ ኢያጥፍእዎሙ ፡ ለእለ ፡ ይነብሩ ፡ ውስተ ፡ ቤ[ተ ፡] ሳሚስ ፡ ወኢእለ ፡ ይነብሩ ፡ ውስተ ፡ ቤቴኔት ፡ ወነበሩ ፡ እስራኤል ፡ ማእከሎሙ ፡ ለከናኔዎን ፡ እለ ፡ ሀለው ፡ ውስተ ፡ ይእቲ ፡ ምድር ፡ ወኮንዎሙ ፡ መጾብሔ ፡ እለ ፡ ይነብሩ ፡ ውስተ ፡ ቤተ ፡ ሳሚስ ፡ ወውስተ ፡ ቤቴኔክ ።

1:34  ወአጠቅዎሙ ፡ አሞሬዎን ፡ ለደቂቀ ፡ ዳን ፡ በውስተ ፡ ደብር ፡ እስመ ፡ ኢያበውሕዎሙ ፡ ይረዱ ፡ ውስተ ፡ ቈላት ፡ ወአኅዙ ፡ አሞሬዎን ፡ ይንበሩ ፡ ውስተ ፡ ደብረ ፡ መርስኖኖስ ፡ ዘቦ ፡ ውስቴቱ ፡ ድበ ፡ ወቈናጽለ ፡ ወጸንዐት ፡ እዴሁ ፡ ለቤተ ፡ ዮሴፍ ፡ ላዕለ ፡ አሞሬዎን ፡ ወኮንዎሙ ፡ መጸብሔ ።

1:35  ወደብረ ፡ አሞሬዎን ፡ (ለ)ኢዱሜዎን ፡ ላዕላይ ፡ ዘአቅራቢን ፡ እለ ፡ ውስተ ፡ [ላዕለ ፡] ኰኵሕ ።

Chapter 2

2:1  ወዐርገ ፡ መልአከ ፡ እግዚአብሔር ፡ እምነ ፡ ገልገል ፡ ላዕለ ፡ ቀለውትሞና ፡ ወላዕለ ፡ ቤቴል ፡ ወላዕለ ፡ ቤተ ፡ እስራኤል ፡ ወይቤሎሙ ፡ እግዚአብሔር ፡ አውፃእኩክሙአ ፡ እምነአ ፡ ግብጽአ ፡ ወአባእኩክሙአ ፡ ውስተ ፡ ምድር ፡ እንተ ፡ መሐልኩ ፡ ለአበዊክሙ ፡ ከመ ፡ አሀብክሙ ፡ ወእቤለክሙ ፡ ኢየኀድግ ፡ ኪዳንየ ፡ ዘምስሌክሙ ፡ ለዓለም ።

2:2  ወአንትሙኒ ፡ ኢትትካየዱ ፡ ኪዳነ ፡ ምስለ ፡ እለ ፡ ይነብሩ ፡ ውስተ ፡ ዛቲ ፡ ምድር ፡ ወኢለአማልክቲሆሙ ፡ ወኢትስግዱ ፡ ሎሙ ፡ ወግልፎሆሙኒ ፡ ቀጥቅጡ ፡ ወምሥዋዓቲሆሙኒ ፡ ንሥቱ ፡ ወኢሰማዕክሙ ፡ ቃልየ ፡ አመ ፡ ገበርክሙ ፡ ዘንተ ።

2:3  ወአነኒ ፡ እቤ ፡ ኢይደግም ፡ እንከ ፡ አሰስሎቶሙ ፡ ለሕዝብ ፡ እለ ፡ እቤ ፡ ከመ ፡ ኣውፅኦሙ ፡ እምነ ፡ ቅድሜክሙ ፡ ወይከውኑክሙአ ፡ ለሐዘንአ ፡ ወአማልክቲሆሙኒአ ፡ ይከውኑክሙአ ፡ ለዕቅፍትአ ።

2:4  ወእምዝ ፡ ሶበ ፡ ይቤሎሙ ፡ መልአከ ፡ እግዚአብሔር ፡ ለኵሉ ፡ እስራኤል ፡ ዘንተ ፡ ነገረ ፡ ጸርኀ ፡ ኵሉ ፡ ሕዝብ ፡ ወበከየ ።

2:5  ወበእንተ ፡ ዝንቱ ፡ ተሰምየ ፡ ስሙ ፡ ለውእቱ ፡ መካን ፡ ብካይ ፡ ወሦዑ ፡ በህየ ፡ ለእግዚአብሔር ።

2:6  ወፈነዎሙ ፡ ለሕዝብ ፡ ወአተው ፡ ደቂቀ ፡ እስራኤል ፡ ኵሎሙ ፡ ውስተ ፡ አብያቲሆሙ ፡ ወውስተ ፡ ርስቶሙ ፡ ከመ ፡ ይትዋረስዋ ፡ ለምድር ።

2:7  ወተቀንዩ ፡ ሕዝብ ፡ ለእግዚአብሔር ፡ በኵሉ ፡ መዋዕሊሁ ፡ ለኢየሱስ ፡ ወበኵሉ ፡ መዋዕሊሆሙ ፡ ለሊቃናት ፡ ኵሉ ፡ እለ ፡ ኖኀ ፡ መዋዕሊሆሙ ፡ እምድኅረ ፡ ኢየሱስ ፡ ኵሎሙ ፡ እለ ፡ አእመሩ ፡ ኵሎ ፡ ግብረ ፡ እግዚአብሔር ፡ ዐቢየ ፡ ዘገብረ ፡ ለእስራኤል ።

2:8  ወሞተ ፡ ኢየሱስ ፡ ወልደ ፡ ነዌ ፡ ገብረ ፡ እግዚአብሔር ፡ [እንዘ ፡] ወልደ ፡ ፻ወ፲ዓመት ።

2:9  ወቀበርዎ ፡ ውስተ ፡ ደብረ ፡ ርስቱ ፡ ውስተ ፡ ተምናታረክ ፡ ውስተ ፡ ደብረ ፡ ኤፍሬም ፡ እመንገለ ፡ መስዑ ፡ ለደብረ ፡ ጋአስ ።

2:10  ወኵላ ፡ ይእቲ ፡ ትውልድ ፡ አተው ፡ ኀበ ፡ አበዊሆሙ ፡ ወተንሥአት ፡ ካልእት ፡ ትውልድ ፡ እምድኅሬሆሙ ፡ ኵሉ ፡ እለ ፡ ኢያአምርዎ ፡ ለእግዚአብሔር ፡ ወግብረ ፡ ዘገብረ ፡ ለእስራኤል ።

2:11  ወገብሩ ፡ ደቂቀ ፡ እስራኤል ፡ እኪተ ፡ ቅድመ ፡ እግዚአብሔር ፡ ወአምለኩ ፡ በዓልም ።

2:12  ወኀደግዎ ፡ ለእግዚአብሔር ፡ አምላከ ፡ አበዊሆሙ ፡ ዘአውፅኦሙ ፡ እምነ ፡ ምድረ ፡ ግብጽ ፡ ወተለው ፡ ባእደ ፡ አማልክተ ፡ አማልክተ ፡ ሕዝብ ፡ እለ ፡ ዐውዶሙ ፡ ወሰገዱ ፡ ሎሙ ፡ ወአምዕዕዎ ፡ ለእግዚአብሔር ።

2:13  ወኀደግዎ ፡ ለእግዚአብሔር ፡ ወአምለክዎ ፡ ለበዓል ፡ ወአስጠርጤን ።

2:14  ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአግብኦሙ ፡ ውስተ ፡ እደ ፡ እለ ፡ ይፄውውዎሙ ፡ ወፄወውዎሙ ፡ ወአእተውዎሙ ፡ ውስተ ፡ ምድረ ፡ ፀሮሙ ፡ እለ ፡ ዐውዶሙ ፡ ወኢክህሉ ፡ ተቃውሞ ፡ ቅድመ ፡ ፀሮሙ ፡ በኵሉ ፡ ዘበርበርዎሙ ።

2:15  ወእደ ፡ እግዚአብሔር ፡ ላዕሌሆሙ ፡ በእኪት ፡ በከመ ፡ ይቤ ፡ እግዚአብሔር ፡ ወበከመ ፡ መሐለ ፡ እግዚአብሔር ፡ ወሣቀይዎሙ ፡ ጥቀ ።

2:16  ወአቀመ ፡ እግዚአብሔር ፡ መሳፍንተ ፡ ወአድኀኖሙ ፡ እግዚአብሔር ፡ እምእደ ፡ እለ ፡ ፄወውዎሙ ።

2:17  ወለመሳፍንቲሆሙኒ ፡ ኢሰም[ዕዎ]ሙ ፡ እስመ ፡ ዘመው ፡ ወተለው ፡ አማልክተ ፡ ባዕድ ፡ ወሰገዱ ፡ ሎሙ ፡ ወአምዕዕዎ ፡ ለእግዚአብሔር ፡ ወኀደግዋ ፡ ፍጡነ ፡ ለፍኖት ፡ እንተ ፡ ባቲ ፡ ሖሩ ፡ አበዊሆሙ ፡ ከመ ፡ ይስምዑ ፡ ቃለ ፡ እግዚአብሔር ፡ ወኢገብሩ ፡ ከማሁ ።

2:18  ወሶበ ፡ አቀመ ፡ ሎሙ ፡ እግዚአብሔር ፡ መሳፍንተ ፡ ወሀለወ ፡ እግዚአብሔር ፡ ምስለ ፡ ውእቱ ፡ መስፍን ፡ ወአድኀኖሙ ፡ እምእደ ፡ ፀሮሙ ፡ በኵሉ ፡ መዋዕሊሁ ፡ ለውእቱ ፡ መስፍን ፡ እስመ ፡ ተሣሀሎሙ ፡ እግዚአብሔር ፡ እምነ ፡ ሕማሞሙ ፡ ዘቦ ፡ ቅድመ ፡ እለ ፡ ይትቃተልዎሙ ።

2:19  ወእምዝ ፡ ሶበ ፡ ሞተ ፡ ውእቱ ፡ መስፍን ፡ ይገብኡ ፡ ካዕበ ፡ ወይኤብሱ ፡ ፈድፋደ ፡ እምነ ፡ አበዊሆሙ ፡ ወየሐውሩ ፡ ወይተልው ፡ አማልክተ ፡ ባዕድ ፡ ወያመልክዎሙ ፡ ወይሰግዱ ፡ ሎሙ ፡ ወኢየኀድጉ ፡ እከዮሙ ፡ ወኢይገብኡ ፡ እምነ ፡ ፍኖቶሙ ፡ እኪት ።

2:20  ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወይቤ ፡ እስመ ፡ ኀደገ ፡ ዝንቱ ፡ ሕዝብየ ፡ ኪዳንየ ፡ ዘአዘዝክዎሙ ፡ ለአበዊሆሙ ፡ ወኢሰምዑ ፡ ቃልየ ፤

2:21  ወአነኒ ፡ ኢይደግም ፡ እንከ ፡ አሰስሎ ፡ ብእሴ ፡ እምቅድሜሆሙ ፡ እምነ ፡ አሕዛብ ፡ እለ ፡ አትረፈ ፡ ኢየሱስ ፤

2:22  ወኀደ[ጎ]ሙ ፡ ከመ ፡ [ያመክ]ሮሙ ፡ ቦሙ ፡ ለእስራኤል ፡ እመ ፡ የዐቅቡ ፡ ፍኖተ ፡ እግዚአብሔር ፡ ወእመ ፡ የሐውሩ ፡ ባቲ ፡ በከመ ፡ ዐቄቡ ፡ አበዊሆሙ ፡ ወእመ ፡ አልቦ ።

2:23  ወኀደጎሙ ፡ እግዚአብሔር ፡ ለእሉ ፡ አሕዛብ ፡ ወኢያሰሰሎሙ ፡ ፍጡነ ፡ ወኢያግብኦሙ ፡ ውስተ ፡ እዴሁ ፡ ለኢየሱስ ።

Chapter 3

3:1  ወኀደጎሙ ፡ እግዚአብሔር ፡ ለእሉ ፡ አሕዛብ ፡ ከመ ፡ ያመክሮሙ ፡ ቦሙ ፡ ለእስራኤል ፡ ኵሎሙ ፡ እለ ፡ ኢያእመሩ ፡ ኵሎ ፡ ፀብኦሙ ፡ ለከናአን ።

3:2  ዳእሙ ፡ በእንተ ፡ ትውልዶሙ ፡ ለደቂቀ ፡ እስራኤል ፡ ከመ ፡ ይምሀርዎሙ ፡ ቀትለ ፡ ወባሕቱ ፡ እለ ፡ እምቅድሜሆሙኒ ፡ ኢያአመርዎሙ ።

3:3  ለእሉ ፡ ኀምስቱ ፡ አሕዛበ ፡ አሎፍሊ ፡ ወኵሉ ፡ ከናአን ፡ ወሲዶና ፡ ወኤዌዎን ፡ እለ ፡ ይነብሩ ፡ ውስተ ፡ ኢባኖስ ፡ እምነ ፡ ደብረ ፡ ባላሄርሞን ፡ እስከ ፡ ሎቤመት ።

3:4  ወተርፉ ፡ ከመ ፡ ያመክሮሙ ፡ ቦሙ ፡ ለእስራኤል ፡ ከመ ፡ ያእምር ፡ እመ ፡ ይሰምዑ ፡ ትእዛዘ ፡ እግዚአብሔር ፡ ዘአዘዞሙ ፡ ለአበዊሆሙ ፡ በእደ ፡ ሙሴ ።

3:5  ወነበሩ ፡ ደቂቀ ፡ እስራኤል ፡ ማእከለ ፡ ከናኔዎን ፡ ወኬጤዎን ፡ ወአሞሬዎን ፡ ወፌሬዜዎን ፡ ወኤዌዎን ፡ ወኢያቡሴዎን ።

3:6  ወነሥኡ ፡ አዋልዲሆሙ ፡ አውሰቡ ፡ ወአዋልዲሆሙ ፡ ወሀቡ ፡ ለደቂቆሙ ፡ ወአምለኩ ፡ ለአማልክቲሆሙ ።

3:7  ወገብሩ ፡ ደቂቀ ፡ እስራኤል ፡ እኩየ ፡ ቅድመ ፡ እግዚአብሔር ፡ ወረስዕዎ ፡ ለእግዚአብሔር ፡ አምላኮሙ ፡ ወአምለኩ ፡ በዓልም ፡ ወአምሳሊሆሙ ።

3:8  ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአግብኦሙ ፡ ውስተ ፡ እደ ፡ ኩሳ ፡ አርሳቴም ፡ ንጉሠ ፡ ሶርያ ፡ ዘሜሶጶጦምያ ፡ አፍላግ ፡ ወተቀንዩ ፡ ደቂቀ ፡ እስራኤል ፡ ለኩሳ ፡ አርሳቴም ፡ ሰማንተ ፡ ዓመተ ።

3:9  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወአቀመ ፡ ሎሙ ፡ እግዚአብሔር ፡ መድኀኒተ ፡ ለእስራኤል ፡ ወአድኀኖሙ ፡ ጎቶንየል ፡ ወልደ ፡ ቄኔዝ ፡ እኁሁ ፡ ለካሌብ ፡ ዘይንእስ ፡ ወተአዘዙ ፡ ሎቱ ።

3:10  ወኮነ ፡ ላዕሌሁ ፡ መንፈሰ ፡ እግዚአብሔር ፡ ወኰነኖሙ ፡ ለእስራኤል ፡ ወወፅአ ፡ ፀብአ ፡ ወአግብኦ ፡ እግዚአብሔር ፡ ውስተ ፡ እዴሁ ፡ ለኩሳ ፡ አርሳቴም ፡ ንጉሠ ፡ ሶርያ ።

3:11  ወአዕረፈት ፡ ምድር ፡ ኀምሳ ፡ ዓመተ ፡ ወሞተ ፡ ጎቶኒየል ፡ ወልደ ፡ ቄኔዝ ።

3:12  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአጽንዖ ፡ እግዚአብሔር ፡ ለኤግሎም ፡ ንጉሠ ፡ ሞአብ ፡ ላዕለ ፡ እስራኤል ፡ እስመ ፡ ገብሩ ፡ እኪተ ፡ ቅድመ ፡ እግዚአብሔር ።

3:13  ወኦስተጋብአ ፡ ላዕሌሆሙ ፡ ኵሎ ፡ ደቂቀ ፡ ዐሞን ፡ ወዐማሌቅ ፡ ወሖረ ፡ ወቀተሎሙ ፡ ለእስራኤል ፡ ወተወርሰ ፡ ሀገረ ፡ ፊኒቆን ።

3:14  ወተቀንዩ ፡ ደቂቀ ፡ እስራኤል ፡ ለኤግሎም ፡ ንጉሠ ፡ ሞአብ ፡ ዐሠርተ ፡ ወሰማንተ ፡ ዓመተ ።

3:15  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወአቀመ ፡ ሎሙ ፡ እግዚአብሔር ፡ መድኀኒተ ፡ ናኦድ ፡ ወልደ ፡ ጌራ ፡ ወልደ ፡ ኢያሜኒ ፡ ብእሲ ፡ ዘክልኤሆን ፡ እደዊሁ ፡ የማኑ ፡ ወፈነው ፡ ደቂቀ ፡ እስራኤል ፡ አምኃ ፡ ምስሌሁ ፡ ለዔግሎም ፡ ንጉሠ ፡ ሞአብ ።

3:16  ወገብረ ፡ ሎቱ ፡ ናኦድ ፡ መጥባሕተ ፡ እንተ ፡ ክልኤቱ ፡ አፈዊሃ ፡ እንተ ፡ ሥዝር ፡ ኑኃ ፡ ወቀነታ ፡ ታሕተ ፡ ቅናቱ ፡ ውስተ ፡ ሐቌሁ ፡ መንገለ ፡ የማኑ ።

3:17  ወአብአ ፡ ሎቱ ፡ አምኃሁ ፡ ለኤግሎም ፡ ንጉሠ ፡ ሞአብ ፡ ወኤግሎምሰ ፡ ቈጢጥ ፡ ብእሲ ፡ ውእቱ ፡ ጥቀ ።

3:18  ወእምዝ ፡ ሶበ ፡ ፈጸመ ፡ ናኦድ ፡ አብኦ ፡ ሎቱ ፡ አምኃሁ ፡ ፈነዎሙ ፡ ለእለ ፡ ጾሩ ፡ አምኃሁ ።

3:19  ወገብአ ፡ ኤግሎም ፡ እምነ ፡ ቤተ ፡ አማልክት ፡ ምስለ ፡ ገልገል ፡ ወይቤሎ ፡ [ናኦድ ፡] ብየ ፡ ነገረ ፡ ኀቤከ ፡ ንጉሥ ፡ እንተ ፡ ባሕቲትከ ፡ ወአዘዘ ፡ ዔግሎም ፡ ይፃእ ፡ ኵሉ ፡ እምኀቤሁ ፡ ወወፅኡ ፡ ኵሎሙ ፡ እለ ፡ ይቀውሙ ፡ ኀቤሁ ።

3:20  ወቦአ ፡ ናኦድ ፡ ኀቤሁ ፡ ወይነብር ፡ ውእቱ ፡ ባሕቲቱ ፡ ውስተ ፡ ጽርሑ ፡ ወሐጋይ ፡ ውእቱ ፡ ወይቤሎ ፡ ናኦድ ፡ ብየ ፡ ዘእነግረከ ፡ ንጉሥ ፡ ወተንሥአ ፡ ኤግሎም ፡ እምነ ፡ መንበሩ ፡ ወቀርቦ ።

3:21  ወሶበ ፡ ተንሥአ ፡ አልዐለ ፡ ናኦድ ፡ እዴሁ ፡ እንተ ፡ ፀጋም ፡ ወመልኀ ፡ መጥባሕቶ ፡ እምነ ፡ ገቦሁ ፡ ዘየማን ፡ ወረገዞ ፡ ውስተ ፡ ከርሡ ፡ ለኤግሎም ።

3:22  ወአብኣ ፡ ሎቱ ፡ እስከ ፡ ለዐታ ፡ ወበረሮ ፡ እስከ ፡ ዘባኑ ፡ ወመልኀ ፡ መጥባኅቶ ፡ እምነ ፡ ከርሡ ።

3:23  ወወፅአ ፡ ናዖድ ፡ ጸናፌ ፡ ወዐጸወ ፡ ኆኅተ ፡ ጽርሕ ፡ ላዕሌሁ ፡ ወቀተረ ።

3:24  ወወፂኦ ፡ ውእቱ ፡ ቦኡ ፡ ደቁ ፡ ወርእዩ ፡ ወረከቡ ፡ ኆኅተ ፡ ዘጽርሕ ፡ ዕጽወ ፡ ወይቤሉ ፡ ዮጊ ፡ ባሕቲቱ ፡ ይነብር ፡ ጽመ ፡ ውስተ ፡ ምግሓሠ ፡ ጽርሑ ፡ ቅስፈ ።

3:25  ወፀንሑ ፡ እስመ ፡ ኀፍሩ ፡ ወአልቦ ፡ ዘአርኀዎሙ ፡ ኆኅተ ፡ ጽርሕ ፡ ወነሥኡ ፡ መርኆ ፡ ወአርኀው ፡ ወረከብዎ ፡ ለእግዚኦሙ ፡ ውዱቀ ፡ ውስተ ፡ ምድር ፡ ምውተ ።

3:26  ወናኦድሰ ፡ አምሰጠ ፡ እስከ ፡ እሙንቱ ፡ ይትሀወኩ ፡ ወአልቦ ፡ ዘአእመሮ ፡ ወውእቱሰ ፡ ኀለፈ ፡ እምነ ፡ አማልክቲሆሙ ፡ ወአምሰጠ ፡ ውስተ ፡ ሴይሮታ ።

3:27  ወእምዝ ፡ ሶበ ፡ በጽሐ ፡ ውስተ ፡ ምድረ ፡ እስራኤል ፡ ወነፍኀ ፡ ቀርነ ፡ በውስተ ፡ ደብረ ፡ ኤፍሬም ፡ ወወረዱ ፡ ምስሌሁ ፡ እምነ ፡ ደብር ፡ ደቂቀ ፡ እስራኤል ፡ ወውእቱ ፡ ቅድሜሆሙ ።

3:28  ወይቤሎሙ ፡ ረዱ ፡ ትልውኒ ፡ እስመ ፡ አግብኦሙ ፡ እግዚአብሔር ፡ ለፀርነ ፡ ውስተ ፡ እዴነ ፡ ለሞአብ ፡ ወወረዱ ፡ ወተለውዎ ፡ ወበጽሑ ፡ ማዕዶተ ፡ ዮርዳንስ ፡ ዘሞአብ ፡ ወኢያብሑ ፡ ሰብእ ፡ ይዕዱ ።

3:29  ወቀተልዎሙ ፡ ለሞአብ ፡ በእማንቱ ፡ መዋዕል ፡ የአክል ፡ እልፈ ፡ ብእሴ ፡ ኵሎ ፡ መስተቃትላነ ፡ ወኵሎ ፡ ዕደወ ፡ ኀይሎሙ ፡ ወአልቦ ፡ ዘአምሰጠ ፡ እምኔሆሙ ፡ ወኢ፩ብእሲ ።

3:30  ወገብኡ ፡ ሞአብ ፡ በእማንቱ ፡ መዋዕል ፡ ውስተ ፡ እዴሆሙ ፡ ለእስራኤል ፡ ወአዕረፈት ፡ ምድር ፡ ሰማንያ ፡ ዓመተ ፡ ወኰነኖሙ ፡ ናኦድ ፡ እስከ ፡ ሞተ ።

3:31  ወእምድኅረ ፡ ዝንቱ ፡ ቆመ ፡ ሴሜገር ፡ ወልደ ፡ ሐነት ፡ ወቀተሎሙ ፡ ለአሎፊል ፡ ስድስተ ፡ ምእተ ፡ ብእሴ ፡ በኀበ ፡ ማሕረሰ ፡ ላህሙ ፤ ወውእቱኒ ፡ አድኀኖሙ ፡ [ለእስራኤል ፡]፡

Chapter 4

4:1  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወናኦድሰ ፡ ሞተ ።

4:2  ወአግብኦሙ ፡ እግዚአብሔር ፡ ውስተ ፡ እደ ፡ ኢያሚን ፡ ንጉሠ ፡ ከናአን ፡ ዘነግሠ ፡ በአሶር ፡ ወመልአከ ፡ ሰራዊቱ ፡ ሲሳራ ፡ ወውእቱሰ ፡ ይነብር ፡ ውስተ ፡ አሲሮት ፡ ዘአሕዛብ ።

4:3  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ እስመቦ ፡ ትስዐተ ፡ ምእተ ፡ ሰረገላተ ፡ ዘኀፂን ፡ ወውእቱ ፡ አሕመሞሙ ፡ ለእስራኤል ፡ እንዘ ፡ ይሣቅዮሙ ፡ ዕሥራ ፡ (ወኀምስተ ፡) ዓመተ ።

4:4  ወዴቦራ ፡ ብእሲት ፡ ነቢይት ፡ ብእሲተ ፡ ለፊዶት ፡ ይእቲ ፡ ትኴንኖሙ ፡ ለእስራኤል ፡ በእማንቱ ፡ መዋዕል ።

4:5  ወዴቦራሰ ፡ ትነብር ፡ ኀበ ፡ ፊኒቃ ፡ ማእከለ ፡ ኢያማ ፡ ወማእከለ ፡ ቤቴል ፡ ውስተ ፡ ደብረ ፡ ኤፍሬም ፡ ወዐርጉ ፡ ኀቤሃ ፡ ደቂቀ ፡ እስራኤል ፡ ከመ ፡ ይትኰነኑ ።

4:6  ወፈነወት ፡ ዴቦራ ፡ ወጸውዐቶ ፡ ለባረቅ ፡ ወልደ ፡ አቢኔሔም ፡ እምነ ፡ ቃዴስ ፡ [ዘ]ንፍታሌም ፡ ወትቤሎ ፡ አኮ[ኑ] ፡ ኪያከ ፡ ኦዘዘ ፡ እግዚአብሔር ፡ አምላከ ፡ እስራኤል ፡ ከመ ፡ ትሑር ፡ ውስተ ፡ ደብረ ፡ ታቦር ፡ ወንሣእ ፡ ምስሌከ ፡ ፻-፻ዕደወ ፡ እምነ ፡ ደቂቀ ፡ ንፍታሌም ፡ ወእምነ ፡ ደቂቀ ፡ ዛቡሎን ።

4:7  ወእወስደከ ፡ ኀበ ፡ ፈለገ ፡ ቂሶን ፡ ላዕለ ፡ ሲሳራ ፡ መልአከ ፡ ሰራዊቱ ፡ ለኢያሚን ፡ ወሰረገላቲሁ ፡ ወብዝኁ ፡ ወኣገብኦ ፡ ውስተ ፡ እዴከ ።

4:8  ወይቤላ ፡ ባረቅ ፡ እመ ፡ ተሐውሪ ፡ ምስሌየ ፡ አሐውር ፡ ወእመሰ ፡ ኢተሐውሪ ፡ ምስሌየ ፡ ኢየሐውር ፡ እስመ ፡ ኢያአምር ፡ ዕለተ ፡ እንተ ፡ ባቲ ፡ ይፈቅድ ፡ እግዚአብሔር ፡ ይፈኑ ፡ መልአኮ ፡ ምስሌየ ።

4:9  ወትቤሎ ፡ ዴቦራ ፡ አሐውር ፡ ምስሌከ ፡ ወባሕቱ ፡ አእምር ፡ ከመ ፡ ኢኮነ ፡ ከመ ፡ ዘቀዲሙ ፡ ቃልከ ፡ በፍኖት ፡ እንተ ፡ አንተ ፡ ሖርከ ፡ እስመ ፡ ውስተ ፡ እደ ፡ ብእሲት ፡ ያገብኦ ፡ እግዚአብሔር ፡ ለሲሳራ ፡ ወተንሥአት ፡ ዴቦራ ፡ ወሖረት ፡ ምስለ ፡ ባረቅ ፡ እምነ ፡ ቃዴስ ።

4:10  ወአዘዞሙ ፡ ባረቅ ፡ ለዛቡሎን ፡ ወለንፍታሌም ፡ በቃዴስ ፡ ወዐርጉ ፡ ምስሌሁ ፡ እልፍ ፡ ብእሲ ፡ ወዴቦራሂ ፡ ዐርገት ፡ ምስሌሁ ።

4:11  ወእለ ፡ ቀርቡ ፡ ለቄኔዝ ፡ ተፈልጡ ፡ እምነ ፡ ደቂቀ ፡ ኢዮባብ ፡ ሐሙሁ ፡ ለሙሴ ፡ ወኀደረ ፡ ትዕይንቱ ፡ ኀበ ፡ ዕፅ ፡ ለበይት ፡ ኀበ ፡ ቅሩበ ፡ ቃዴስ ።

4:12  ወዜነውዎ ፡ ለሲሳራ ፡ ከመ ፡ ዐርገ ፡ ባረቅ ፡ ወልደ ፡ አቢኔሔም ፡ ውስተ ፡ ደብረ ፡ ታቦር ።

4:13  ወአምጽአ ፡ ሲሳራ ፡ ኵሎ ፡ ሰረገላቲሁ ፡ እስመ ፡ ፱፻ሰረገላተ ፡ ዘኀፂን ፡ ቦ ፡ ወኵሎ ፡ አሕዛቢሁ ፡ እምነ ፡ አሪሶት ፡ ዘአሕዛብ ፡ ውስተ ፡ ፈለገ ፡ ቂሶን ።

4:14  ወትቤሎ ፡ ዴቦራ ፡ ለባረቅ ፡ ተንሥእ ፡ እስመ ፡ ዛቲ ፡ ዕለት ፡ እንተ ፡ ባቲ ፡ ያገብኦ ፡ እግዚአብሔር ፡ ለሲሳራ ፡ ውስተ ፡ እዴከ ፡ ወናሁ ፡ እግዚአብሔር ፡ የሐውር ፡ ቅድሜከ ፡ ወወረደ ፡ ባረቅ ፡ እምነ ፡ ደብረ ፡ ታቦር ፡ ወእልፍ ፡ ብእሲ ፡ ይተልዎ ።

4:15  ወአደንገፆ ፡ እግዚአብሔር ፡ ለሲሳራ ፡ ወለኵሉ ፡ ሰረገላቲሁ ፡ ወለኵሉ ፡ ትዕይንቱ ፡ አውደቆሙ ፡ ቅድመ ፡ ባረቅ ፡ በአፈ ፡ ኀፂን ፡ ወወረደ ፡ ሲሳራ ፡ እምነ ፡ ሰረገላቲሁ ፡ ወጐየ ፡ በእግሩ ።

4:16  ወዴገነ ፡ ባረቅ ፡ ወተለወ ፡ ሰረገላቲሁ ፡ ወዴገነ ፡ ትዕይንቶ ፡ እስከ ፡ ሐቅለ ፡ አሕዛብ ፡ ወሞተ ፡ ኵሉ ፡ ትዕይንተ ፡ ሲሳራ ፡ በአፈ ፡ ኀፂን ፡ ወኢተርፈ ፡ ወኢአሐዱ ።

4:17  ወሲሳራሰ ፡ ጐየ ፡ በእግሩ ፡ ውስተ ፡ ትዕይንተ ፡ ኢያኤል ፡ ብእሲተ ፡ ካቤር ፡ ካልኡ ፡ ለቄኔው ፡ እስመ ፡ ሰላም ፡ ውእቱ ፡ ማእከሎሙ ፡ ለኢየቢን ፡ ንጉሠ ፡ [አሶር ፡] ወማእከለ ፡ ቤተ ፡ ካቤር ፡ ቄንያዊ ።

4:18  ወወፅአት ፡ ኢያኤል ፡ ወተቀበለቶ ፡ ለሲሳራ ፡ ወትቤሎ ፡ ገሐሥ ፡ እግዚእየ ፡ ገሐሥ ፡ ኀቤየ ፡ ወኢትፍራህ ፡ ወግሕሠ ፡ ኀቤሃ ፡ ውስተ ፡ ደብተራ ፡ ወከደነቶ ፡ ሠቀ ።

4:19  ወይቤላ ፡ ሲሳራ ፡ አስትይኒ ፡ ንስቲተ ፡ ማየ ፡ እስመ ፡ ጸማእኩ ፡ ወፈትሐት ፡ ስእረ ፡ ሐሊብ ፡ ወአስተየቶ ፡ ወከደነቶ ፡ ገጾ ።

4:20  ወይቤላ ፡ ቁሚ ፡ ኀበ ፡ ኆኅተ ፡ ደብተራ ፡ ወእመቦ ፡ ዘመጽአ ፡ ኀቤኪ ፡ ወይቤለኪ ፡ ቦ ፡ ዘሀለወ ፡ ዝየ ፡ ብእሲ ፡ በሊ ፡ አልቦ ፡ ወከደነቶ ፡ ሠቀ ።

4:21  ወነሥአት ፡ ኢያኤል ፡ ብእሲተ ፡ ካቤር ፡ መትከለ ፡ ደብተራ ፡ ወእብነ ፡ በካልእት ፡ እዴሃ ፡ ወቦአት ፡ ኀቤሁ ፡ ወጸቀወቶ ፡ ወተከለት ፡ ውእተ ፡ መትከለ ፡ ውስተ ፡ መልታሕቱ ፡ ወጐድአቶ ፡ እስከ ፡ ፀመረቶ ፡ ምስለ ፡ ምድር ፡ ወተራገፀ ፡ ውእቱ ፡ ማእከለ ፡ እገሪሃ ፡ ወተሰጥሐ ፡ ወሞተ ።

4:22  ወበጽሐ ፡ ባረቅ ፡ እንዘ ፡ ይዴግኖ ፡ ለሲሳራ ፡ ወወፅአት ፡ ኢያኤል ፡ ወተቀበለቶ ፡ ለባረቅ ፡ ወትቤሎ ፡ ነዐ ፡ ወኣርእየከ ፡ ብእሴ ፡ ዘተኀሥሥ ፡ ወቦአ ፡ ኀቤሃ ፡ ወረከቦ ፡ ለሲሳራ ፡ ውዱቀ ፡ በድኖ ፡ ወመትከል ፡ ውስተ ፡ መልታሕቱ ።

4:23  ወአኅሰሮ ፡ እግዚአብሔር ፡ ለኢያቢን ፡ ንጉሠ ፡ ከናአን ፡ በይእቲ ፡ ዕለት ፡ በቅድሜሆሙ ፡ ለደቂቀ ፡ እስራኤል ።

4:24  ወሖረት ፡ እዴሁ ፡ ለእግዚአብሔር ፡ ምስለ ፡ ደቂቀ ፡ እስራኤል ፡ ወሖረት ፡ ወጸንዐት ፡ ላዕለ ፡ ኢያቢን ፡ ንጉሠ ፡ ከናአን ፡ እስከ ፡ አጥፍኦ ።

Chapter 5

5:1  ወኀለየት ፡ ዴቦራ ፡ ወባረቅ ፡ በይእቲ ፡ ዕለት ፡ ወትቤ ፡ እንዘ ፡ ተኀሊ ።

5:2  ሶበ ፡ አኀዙ ፡ መሳፍንተ ፡ እስራኤል ፡ በሕሊና ፡ ሕዝብ ፡ ይባርክዎ ፡ ለእግዚአብሔር ።

5:3  ስምዑ ፡ ነገሥት ፡ ወአጽምዑ ፡ መኳንንተ ፡ ጽኑዓን ፡ አንሰ ፡ አኀሊ ፡ ለእግዚአብሔር ፡ [አምላከ ፡] እስራኤል ።

5:4  እግዚኦ ፡ በፀአትከ ፡ እምነ ፡ ሴይር ፡ ሶበ ፡ ተንሣእከ ፡ እምነ ፡ ሐቅለ ፡ ኤዶም ፡ ምድር ፡ አድለቅለቀት ፡ ወሰማይ ፡ ደንገፀት ፡ ወደመናትኒ ፡ አንጠብጠ[ቡ] ፡ ማ[የ] ።

5:5  ወአድባር ፡ ተከውሱ ፡ እምነ ፡ ቅድመ ፡ እግዚአብሔር ፡ ዝንቱ ፡ ሲና ፡ እምቅድመ ፡ እግዚአብሔር ፡ አምላከ ፡ እስራኤል ።

5:6  በመዋዕለ ፡ ሴሜጌር ፡ ወልደ ፡ ቄነት ፡ ወበመዋዕለ ፡ ኢያኤል ፡ ኀልቁ ፡ ነገሥት ፡ ወሖሩ ፡ ፍናዌ ፡ መብእሰ ፡ ፍናዌ ፡ ግፍቱኣተ ።

5:7  ወኀልቁ ፡ መፈክራን ፡ እምነ ፡ እስራኤል ፡ ወኀልቁ ፡ [እስከ ፡] ተንሥአት ፡ ዴቦራ ፡ እስ[ከ] ፡ ቆመት ፡ እም ፡ ለእስራኤል ።

5:8  ወሠምሩ ፡ በአማልክተ ፡ ከንቱ ፡ ከመ ፡ ኅብስተ ፡ ስገም ፡ ሶበ ፡ ይከድንዎ ፡ ውዕዩ ፡ አርማሕ ፡ አርባዕቱ ፡ እልፍ ፡ አርማሕ ።

5:9  ልብየሰ ፡ ውስተ ፡ ዘትእዛዞ ፡ ለእስራኤል ፡ ኀያላኒሆሙ ፡ ለእስራኤል ፡ ባርክዎ ፡ ለእግዚአብሔር ።

5:10  እለ ፡ ትጼዐኑ ፡ ላዕለ ፡ አእዱግ ፡ [ፅዕድዋን ፡] ወትነብሩ ፡ በውስተ ፡ ብርሃን ፡ ንብቡ ፡ ቃለክሙ ።

5:11  ወሰንቅው ፡ ማእከለ ፡ ፍሡሓን ፡ ወበህየ ፡ ይሁቡ ፡ ጽድቀ ፡ ለእግዚአብሔር ፡ ወጽድቀ ፡ [አጽ]ንዐ ፡ በውስተ ፡ እስራኤል ፡ ወይእተ ፡ አሚረ ፡ ወረደ ፡ ውስተ ፡ አህጉሪሁ ፡ ሕዝበ ፡ እግዚአብሔር ።

5:12  ተንሥኢ ፡ ዴቦራ ፡ ወአንሥኢ ፡ አእላፈ ፡ ምስለ ፡ ሕዝብ ፡ ተንሥኢ ፡ ተንሥኢ ፡ ምስለ ፡ ማኅሌት ፡ ወበኀይል ፡ ተንሥእ ፡ ባረቅ ፡ ወጸንዒዮ ፡ ዴቦራ ፡ ለባረቅ ፡ ወፄውው ፡ ፄዋከ ፡ ባረቅ ፡ ወልደ ፡ አቢኔሔም ፡ ከመ ፡ አመ ፡ ዐብየ ፡ ኀይሉ ።

5:13  እግዚኦ ፡ አድክሞሙ ፡ ሊተ ፡ ለእለ ፡ ይጸንዑኒ ።

5:14  ሕዝበ ፡ ኤፍሬም ፡ (ወ)ቀሰፎሙ ፡ በውስተ ፡ ቈላት ፤ እኁከ ፡ ብንያሚ ፡ በሕዝብከ ፤ እምኔየ ፡ ማኪር ፡ ወረዱ ፡ ይፍትኑ ፡ ወእምነ ፡ ዛቡሎን ፡ እግዚአብሔር ፡ ይፀብእ ፡ ሊተ ፡ ወእምነ ፡ ኀያላን ፡ እምህየ ፡ [በበ]ትረ ፡ ኀይለ ፡ ነገር ።

5:15  ወእምውስተ ፡ ይሳኮር ፡ ምስለ ፡ ዴቦራ ፡ ፈነወ ፡ አጋርያኒሁ ፡ ውስተ ፡ ቈላት ፡ ከመ ፡ ትንበር ፡ አንተ ፡ ማእከለ ፡ ከናፍር ፡ ወሰፍሐ ፡ በእገሪሁ ፡ ናፍቆ ፡ ሮቤል ፤ ዐቢይ ፡ ጥይቅና ፡ ልቡ ።

5:16  ለምንት ፡ ሊተ ፡ ትነብር ፡ ማእከለ ፡ ሞሶጴተም ፡ ከመ ፡ ታጽምእ ፡ ከመ ፡ ይትፋጸዩ ፡ እለ ፡ ይትነሥኡ ፡ ከመ ፡ ይኅልፉ ፡ ውስተ ፡ ዘሮቤል ።

5:17  ዐቢይ ፡ አሰረ ፡ ልቡ ፡ ለገላአድ ፡ ውስተ ፡ ማዕዶተ ፡ ዮርዳንስ ፡ ኀደረ ፤ ወዳን ፡ ለምንት ፡ ይነብር ፡ ውስተ ፡ አሕማር ፤ ወአሴርሰ ፡ ነበረ ፡ ውስተ ፡ ሐይቀ ፡ ባሕር ፡ ወውስተ ፡ ወሰኑ ፡ ነበረ ።

5:18  ዛቡሎን ፡ ሕዝብ ፡ ዘዐየረ ፡ ነፍሶ ፡ ለሞት ፡ ወንፍታሌም ፡ ውስተ ፡ መልዕልተ ፡ ሐቅል ።

5:19  ወመጽኡ ፡ ነገሥት ፡ ወተቃተሉ ፡ ወይእተ ፡ አሚረ ፡ ተቃተሉ ፡ ነገሥተ ፡ ከናአን ፡ በተናኅ ፡ በኀበ ፡ ማየ ፡ መጌዶ ፡ ወኢነሥ[ኡ] ፡ በትእግልት ፡ ብሩረ ።

5:20  ወበሰማይ ፡ ተፃብኡ ፡ ከዋክብት ፡ እምነ ፡ ቀትሎሙ ፡ ወተቃተሉ ፡ ምስለ ፡ ሲሳራ ።

5:21  ወአውፅኦሙ ፡ ፈለገ ፡ ቂሶን ፡ ወፈለገ ፡ ቀዴሚን ፡ ወቀተሎ ፡ ፈለገ ፡ ቂሶን ፤ ነፍስየ ፡ ጽንዒ ።

5:22  ወይእተ ፡ አሚረ ፡ ተቀጥቀጠ ፡ ሰኰና ፡ አፍራሲሆሙ ፡ ለአማዳሮት ።

5:23  ወኀያላኒሁ ፡ ይረግም[ዋ] ፡ ለማዞር ፡ ወይቤ ፡ መልአከ ፡ እግዚአብሔር ፡ በመርገም ፡ ርግምዎሙ ፡ ለእለ ፡ ውስተ ፡ አብያቲሃ ፡ እስመ ፡ ኢመጽኡ ፡ ውስተ ፡ ረድኤተ ፡ እግዚአብሔር ፡ እምነ ፡ መስተቃትላን ፡ ጽኑዓን ።

5:24  ቡርክተ ፡ ትኩን ፡ እምነ ፡ አንስት ፡ ኢያኤል ፡ ብእሲተ ፡ [ካቤር ፡] ቄንያዊ ፡ እምነ ፡ አንስት ፡ ቡርክት ፡ በውስተ ፡ ደብተራ ።

5:25  ማየ ፡ ሰአለ ፡ ወሐሊበ ፡ ወሀበቶ ፡ ወበዐይገን ፡ ዐቢይ ፡ አቅረበት ፡ ሎቱ ፡ ዕቋነ ።

5:26  ወበእዴሃ ፡ እንተ ፡ ፀጋም ፡ ተመጠወት ፡ መትከለ ፡ ወበየማና ፡ ጐድአት ፡ ወቀተለቶ ፡ ለሲሳፌ ፡ ወቀጥቀጠቶ ፡ ርእሶ ፡ ወደመቀቶ ፡ መልታሕቶ ።

5:27  ወተራገፀ ፡ በማእከለ ፡ እገሪሃ ፡ ወበኀበ ፡ ተራገፀ ፡ በህየ ፡ ኀስረ ።

5:28  ወእንተ ፡ መስኮት ፡ ትኄውጽ ፡ እሙ ፡ ለሲሳራ ፡ እንተ ፡ ሠቅሠቅ ፡ ትሬኢ ፡ እመቦ ፡ ዘገብአ ፡ እምኀበ ፡ ሲሳራ ፡ ወበበይነ ፡ ምንት ፡ ተደኀረ ፡ ሰረገላሁ ፡ ለሲሳራ ፡ በጺሐ ፡ ወበበይነ ፡ ምንት ፡ ጐንደያ ፡ እግረ ፡ ሰረገላቲሁ ።

5:29  ጠቢባተ ፡ መልአካ ፡ ላቲ ፡ (ወ)አውሥኣሃ ፡ ወእማንቱሴ ፡ አውሥኣሃ ፡ በከመ ፡ ቃላ ።

5:30  አኮኑ ፡ ረከባሁ ፡ እንዘ ፡ ይከፍል ፡ ምህርካ ፡ ወይትዓረክ ፡ አዕርክቱ ፡ በላዕለ ፡ አርእስቲሆሙ ፡ ለኀያላን ፡ በርበረ ፡ ሕብር ፡ ውእቱ ፡ ሲሳራ ፡ በርበረ ፡ ሕብር ፡ ወዘዘዚአሁ ፡ ጥምዐተ ፡ ሕበሪሁ ፡ ወዐሥቅ ፡ ውስተ ፡ ክሣዱ ፡ ዘበርበረ ።

5:31  ከማሁ ፡ ለይትሐጐሉ ፡ ኵሎሙ ፡ ፀርከ ፡ እግዚኦ ፡ ወእለሰ ፡ ያፈቅሩከ ፡ ከመ ፡ ሠርቀ ፡ ፀሓይ ፡ በኀይሉ ። ወአዕረፈት ፡ ምድር ፡ ፵ዓመ ።

Chapter 6

6:1  ወገብሩ ፡ ደቂቀ ፡ እስራኤል ፡ እኩየ ፡ ቅድመ ፡ እግዚአብሔር ፡ ወአግብኦሙ ፡ እግዚአብሔር ፡ ውስተ ፡ እደ ፡ ምድያም ፡ ሰብዐተ ፡ ዓመተ ።

6:2  ወጸንዐት ፡ እዴሆሙ ፡ ለምድያም ፡ ላዕለ ፡ እስራኤል ፡ ወገብሩ ፡ ሎሙ ፡ [ደቂቀ ፡ እስራኤል ፡ ቅድመ ፡] ምድያም ፡ በዐታተ ፡ ወአጽዋናተ ፡ ውስተ ፡ አድባር ፡ ወውስተ ፡ አጽዳፍ ።

6:3  ወእምዝ ፡ ሶበ ፡ ይዘርኡ ፡ ሰብአ ፡ እስራኤል ፡ የዐርጉ ፡ ምድያም ፡ ወዐማሌቅ ፡ ወደቀ ፡ ጽባሕ ፡ የዐርጉ ፡ ላዕሌሆሙ ።

6:4  ወይትዐየኑ ፡ ዲቤሆሙ ፡ ወያመስኑ ፡ ሎሙ ፡ ፍሬ ፡ ገራውሂሆሙ ፡ እስከ ፡ ይበጽሑ ፡ ውስተ ፡ ጋዛን ፡ ወኢያተርፉ ፡ ሎሙ ፡ ምንተኒ ፡ በዘ ፡ የሐይው ፡ ለእስራኤል ፡ ወመራዕይሆሙኒ ፡ ወላህሞሙ ፡ ወአድጎሙ ።

6:5  እስመ ፡ የዐርጉ ፡ ላዕሌሆሙ ፡ እሙንቱ ፡ ወእንስሳሆሙ ፡ ወተዓይኒሆሙ ፡ ያመጽኡ ፡ ወይበጽሕዎሙ ፡ ከመ ፡ አንበጣ ፡ ብዝኆሙ ፡ ወአልቦሙ ፡ ኍልቈ ፡ ኢእሙንቱ ፡ ወኢአግማላቲሆሙ ፡ ወይመጽኡ ፡ ውስተ ፡ ምድረ ፡ እስራኤል ፡ ከመ ፡ ያማስንዋ ።

6:6  ወነድዩ ፡ [ጥቀ ፡] እስራኤል ፡ እምቅድመ ፡ ምድያም ፡ ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ።

6:7  ወሶበ ፡ ጸርሑ ፡ ደቂቀ ፡ እስራኤል ፡ ኀበ ፡ እግዚአብሔር ፡ በእንተ ፡ ምድያም ፤

6:8  ፈነወ ፡ ሎሙ ፡ እግዚአብሔር ፡ ብእሴ ፡ ነቢየ ፡ ለደቂቀ ፡ እስራኤል ፡ ወይቤሎሙ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ አነ ፡ ውእቱ ፡ ዘአውጻእኩክሙ ፡ እምነ ፡ ግብጽ ፡ እምነ ፡ ቤተ ፡ ቅኔት ።

6:9  ወአድኀንኩክሙ ፡ እምነ ፡ እዴሆሙ ፡ ለግብጽ ፡ ወእምነ ፡ ኵሉ ፡ [ዘ]ይሣቅዩክሙ ፡ ወአውፃእክዎሙ ፡ እምነ ፡ ቅድመ ፡ ገጽክሙ ፡ ወወሀብኩክሙ ፡ ምድሮሙ ።

6:10  ወእቤለክሙ ፡ አነ ፡ ውእቱ ፡ እግዚአብሔር ፡ (ወ)አምላክክሙ ፡ ወኢትፍርሁ ፡ እምነ ፡ አማልክተ ፡ አሞሬዎን ፡ እሉ ፡ እለ ፡ ትነብሩ ፡ ውስተ ፡ ምድሮሙ ፡ አንትሙ ፡ ወኢሰማዕክሙ ፡ ቃልየ ።

6:11  ወመጽአ ፡ መልአከ ፡ እግዚአብሔር ፡ ወነበረ ፡ ታሕተ ፡ ዕፅ ፡ እንተ ፡ ኤፍራታ(ስ) ፡ ዘኢዮአስ ፡ አቡሁ ፡ ለኢየዝሪ ፤ ወጌድዮን ፡ ወልዱ ፡ ይዘብጥ ፡ ስርናየ ፡ በውስተ ፡ ዐውዱ ፡ ከመ ፡ ያምስጥ ፡ እምነ ፡ ቅድሜሆሙ ፡ ለምድያም ።

6:12  ወአስተርአዮ ፡ መልአከ ፡ እግዚአብሔር ፡ ወይቤሎ ፡ እግዚአብሔር ፡ ምስሌከ ፡ ጽኑዐ ፡ ኀይል ።

6:13  ወይቤሎ ፡ ጌድዮን ፡ ኦሆ ፡ እግዚኦ ፡ እግዚእየ ፡ ወእመሰ ፡ ሀለወ ፡ እግዚአብሔር ፡ ምስሌነ ፡ ለምንት ፡ ረከበተነ ፡ ኵላ ፡ ዛቲ ፡ እኪት ፡ ወአይቴ ፡ ውእቱ ፡ ኵሉ ፡ ስብሐቲሁ ፡ ኵሉ ፡ ዘነገሩነ ፡ አበዊነ ፡ ወይቤሉነ ፡ እምነ ፡ ግብጽ ፡ አውጽኦሙ ፡ ለአበዊነ ፡ እግዚአብሔር ፡ ወይእዜሰ ፡ ኀደገነ ፡ እግዚአብሔር ፡ ወአግብአነ ፡ ውስተ ፡ እደ ፡ ምድያም ።

6:14  ወነጸሮ ፡ መልአከ ፡ እግዚአብሔር ፡ ወይቤሎ ፡ ሑር ፡ በኀይልከ ፡ ወታድኅኖሙ ፡ ለእስራኤል ፡ እምነ ፡ እደ ፡ ምድያም ፡ ወናሁ ፡ ፈኖኩከ ።

6:15  ወይቤሎ ፡ ጌድዮን ፡ ኦሆ ፡ እግዚኦ ፡ በምንት ፡ ኣድኅኖሙ ፡ ለእስራኤል ፡ ናሁ ፡ አእላፍየኒ ፡ ውሑዳን ፡ በውስተ ፡ መናሴ ፡ ወአነኒ ፡ ንዑስ ፡ በቤተ ፡ አቡየ ።

6:16  ወይቤሎ ፡ መልአከ ፡ እግዚአብሔር ፡ እስመ ፡ እግዚአብሔር ፡ ሀለወ ፡ ምስሌከ ፡ ወትቀትሎሙ ፡ ለምድያም ፡ ከመ ፡ አሐዱ ፡ ብእሲ ።

6:17  ወይቤሎ ፡ ጌድዮን ፡ እመ ፡ ረከብኩ ፡ ሞገሰ ፡ ቅድመ ፡ አዕይንቲከ ፡ ግበር ፡ ሊተ ፡ ተአምረ ፡ ከመ ፡ አንተ ፡ ውእቱ ፡ ዘትትናገር ፡ ምስሌየ ።

6:18  ኢትሑር ፡ እምዝየ ፡ እስከ ፡ እገብእ ፡ ኀቤከ ፡ ወኣመጽእ ፡ መሥዋዕትየ ፡ ወእሢም ፡ ቅድሜከ ፡ ወይቤሎ ፡ አነ ፡ ውእቱ ፡ ወእጸንሐከ ፡ እስከ ፡ ትገብእ ።

6:19  ወሖረ ፡ ጌድዮን ፡ ወገብረ ፡ ማሕሥአ ፡ ጠሊ ፡ ወዳፍንተ ፡ ናእት ፡ ወአንበረ ፡ ውእተ ፡ ሥጋ ፡ ውስተ ፡ ከፈር ፡ ወወደየ ፡ ዞሞ ፡ ውስተ ፡ መቅጹት ፡ ወወሰደ ፡ ሎቱ ፡ ኀበ ፡ ዕፅ ፡ ወሰገደ ፡ ሎቱ ።

6:20  ወይቤሎ ፡ መልአከ ፡ እግዚአብሔር ፡ ንሣእ ፡ ሥጋሁ ፡ ወኅብስተ ፡ ናእት ፡ ወሢም ፡ ላዕለ ፡ ኰኵሕ ፡ ወከዐው ፡ ዞሞ ፡ ወገብረ ፡ ከማሁ ።

6:21  ወአልዐለ ፡ መልአከ ፡ እግዚአብሔር ፡ በትሮ ፡ ወለከፎ ፡ ለውእቱ ፡ ሥጋ ፡ ወለውእቱ ፡ ናእት ፡ ወነደደት ፡ እሳት ፡ እምነ ፡ ይእቲ ፡ ኰኵሕ ፡ ወበልዐቶ ፡ ለውእቱ ፡ ሥጋ ፡ ወለውእቱ ፡ ናእት ፡ ወሖረ ፡ መልአከ ፡ እግዚአብሔር ፡ እምነ ፡ አዕይንቲሁ ።

6:22  ወአእመረ ፡ ጌድዮን ፡ ከመ ፡ መልአከ ፡ እግዚአብሔር ፡ ውእቱ ፡ ወይቤ ፡ ጌድዮን ፡ ኦሆ ፡ እግዚኦ ፡ እስመ ፡ ርኢኩ ፡ መልአከ ፡ እግዚአብሔር ፡ ገጸ ፡ ቦገጽ ።

6:23  ወይቤሎ ፡ እግዚአብሔር ፡ ሰላም ፡ ለከ ፡ ወኢትፍራህ ፡ ኢትመውት ።

6:24  ወነደቀ ፡ ጌድዮን ፡ በህየ ፡ ምሥዋዐ ፡ ለእግዚአብሔር ፡ ወሰመዮ ፡ ሰላመ ፡ እግዚአብሔር ፡ እስከ ፡ ዛቲ ፡ ዕለት ፡ ወእንዘ ፡ ዓዲሁ ፡ ሀለወ ፡ ውስተ ፡ ኤፍራታ ፡ አቡሁ ፡ ለኤዝሪ ።

6:25  ወእምዝ ፡ በይእቲ ፡ ሌሊት ፡ ወይቤሎ ፡ እግዚአብሔር ፡ ንሣእ ፡ ላህመ ፡ መግዝአ ፡ ዘአቡከ ፡ [ወ]ካልአ ፡ ላህመ ፡ ዘሰብዐቱ ፡ ዓመት ፡ ወንሥት ፡ ምሥዋዖ ፡ ለበዓል ፡ ዘአቡከ ፡ ወምስለ ፡ ዘላዕሌሁ ፡ ስብር ።

6:26  ወንድቅ ፡ ቦቱ ፡ ምሥዋዐ ፡ ለእግዚአብሔር ፡ አምላክከ ፡ ዘአስተርአየከ ፡ በውስተ ፡ ደብረ ፡ ማኦክ ፡ ዘበ ፡ ዝንቱ ፡ ደወል ፡ ወንሣእ ፡ ውእተ ፡ ካልአ ፡ ላህመ ፡ ወግበሮ ፡ መሥዋዕተ ፡ በውእቱ ፡ ዕፀው ፡ ዘሰበርከ ።

6:27  ወነሥአ ፡ ጌድዮን ፡ ዐሠርተ ፡ ወሠለስተ ፡ ዕደወ ፡ እምነ ፡ አግብርቲሁ ፡ ወገብረ ፡ በከመ ፡ ይቤሎ ፡ እግዚአብሔር ፡ ወእምዝ ፡ ሶበ ፡ ፈርሀ ፡ ቤተ ፡ አቡሁ ፡ [ወ]ሰብአ ፡ ሀገሩ ፡ በዊአ ፡ መዓልተ ፡ ወሌሊተ ፡ ይበውእ ።

6:28  ወጌሡ ፡ በጽባሕ ፡ ሰብአ ፡ ሀገር ፡ ወረከብዎ ፡ ንሡተ ፡ ለምሥዋዐ ፡ በዓል ፡ ወምስል ፡ ዘላዕሌሁ ፡ ስቡር ፡ ወላህም ፡ መግዝእ ፡ ግቡር ፡ ቦቱ ፡ መሥዋዕተ ፡ በውስተ ፡ ምሥዋዕ ፡ ዘነደቀ ።

6:29  ወተባሀሉ ፡ በበይናቲሆሙ ፡ መኑ ፡ ገብረ ፡ ዘንተ ፡ ግብረ ፡ ወሐሠሡ ፡ ወኀተቱ ፡ ወይቤሉ ፡ ጌድዮን ፡ ወልደ ፡ ዮአስ ፡ ገብረ ፡ ዘንተ ፡ ግብረ ።

6:30  ወይቤልዎ ፡ ሰብአ ፡ ሀገር ፡ ለዮአስ ፡ አምጽእ ፡ ወልደከ ፡ ይቅትልዎ ፡ እስመ ፡ ነሠተ ፡ ምሥዋዐ ፡ በዓል ፡ ወሰበረ ፡ ምስለ ፡ ዘላዕሌሁ ።

6:31  ወይቤሎሙ ፡ ዮአስ ፡ ለሰብእ ፡ እለ ፡ ቆሙ ፡ ላዕሌሁ ፡ አንትሙኑ ፡ ይእዜ ፡ ትትቤቀሉ ፡ ሎቱ ፡ ለበዓል ፡ አው ፡ አንትሙኑ ፡ ታድኅንዎ ፡ ከመ ፡ ትቅትሉ ፡ ዘገፍዖ ፡ ወእመሰ ፡ አምላክ ፡ ውእቱ ፡ እስከ ፡ ይጸብሕ ፡ ለይሙት ፡ ዘገፍዖ ፡ ወይትበቀል ፡ ለሊሁ ፡ ለዘ ፡ ነሠተ ፡ ምሥዋዒሁ ።

6:32  ወሰመዮ ፡ በይእቲ ፡ ዕለት ፡ ዐውደ ፡ በዓል ፡ እስመ ፡ ነሠቱ ፡ ምሥዋዖ ።

6:33  ወኵሉ ፡ ምድያም ፡ ወዐማሌቅ ፡ ወደቂቀ ፡ ጽባሕ ፡ ተጋብኡ ፡ ላዕሌሁ ፡ ወዐደው ፡ ወኀደሩ ፡ ውስተ ፡ ቈላተ ፡ ኢያዝራኤል ።

6:34  ወአጽንዖ ፡ መንፈሰ ፡ እግዚአብሔር ፡ ለጌድዮን ፡ ወነፍኀ ፡ ቀርነ ፡ ወወውዐ ፡ አቢየዜር ፡ በድኅሬሁ ።

6:35  ወፈነወ ፡ መ[ላ]እክተ ፡ ውስተ ፡ ኵሉ ፡ ምናሴ ፡ ወአውየወ ፡ ውእቱኒ ፡ እምድኅሬሁ ፡ ወፈነወ ፡ መ[ላ]እክተ ፡ ውስተ ፡ አሴር ፡ ወውስተ ፡ ዛቡሎን ፡ ወንፍታሌም ፡ ወዐርጉ ፡ ወተቀበልዎሙ ።

6:36  ወይቤሎ ፡ ጌድዮን ፡ ለእግዚአብሔር ፡ እመ ፡ ታድኅኖሙ ፡ ለእስራኤል ፡ በእዴየ ፡ በከመ ፡ ትቤ ፤

6:37  ናሁ ፡ አነ ፡ እሰፍሕ ፡ ፀምረ ፡ ብዙኀ ፡ ውስተ ፡ ዐውድ ፡ ወእመከመ ፡ ወረደ ፡ ጠል ፡ ውስተ ፡ ፀምር ፡ ባሕቲቱ ፡ ወኵሉ ፡ ምድር ፡ ይቡስ ፡ ኣአምር ፡ እንከ ፡ ከመ ፡ ታድኅኖሙ ፡ ለእስራኤል ፡ በእዴየ ፡ በከመ ፡ ትቤ ።

6:38  ወኮነ ፡ ከማሁ ፡ ወጌሠ ፡ ጌድዮን ፡ በሳኒታ ፡ ወዐጸሮ ፡ ለውእቱ ፡ ፀምር ፡ ወወፅአ ፡ ማይ ፡ እምነ ፡ ውእቱ ፡ ፀምር ፡ ወመልአ ፡ ዐይገን ።

6:39  ወይቤሎ ፡ ጌድዮን ፡ ለእግዚአብሔር ፡ ኢትትመዓዕ ፡ በመዐትከ ፡ ላዕሌየ ፡ ወእንግርከ ፡ ካዕበ ፡ አሐተ ፤ ፀምር ፡ ይኩን ፡ ይቡሰ ፡ እንተ ፡ ባሕቲቱ ፡ ወውስተ ፡ ኵሉ ፡ ምድር ፡ ይረድ ፡ ጠል ።

6:40  ወገብረ ፡ ከማሁ ፡ እግዚአብሔር ፡ በይእቲ ፡ ሌሊት ፡ ወኮነ ፡ ይቡሰ ፡ ፀምር ፡ ባሕቲቱ ፡ ወውስተ ፡ ኵሉ ፡ ምድር ፡ ወረደ ፡ ጠል ።

Chapter 7

7:1  ወጌሠ ፡ ሮበዓም ፡ እስመ ፡ ውእቱ ፡ ጌድዮን ፡ ወኵሉ ፡ ሕዝብ ፡ ዘምስሌሁ ፡ ወኀደሩ ፡ ውስተ ፡ ምድር ፡ አሮኤድ ፡ ወትዕይንቶሙ ፡ ለምድያም ፡ ወለዐማሌቅ ፡ እመንገለ ፡ መስዕ ፡ እምነ ፡ ምሥዋዕ ፡ ዘአንበሬ ፡ ውስተ ፡ ቈላ ።

7:2  ወይቤሎ ፡ እግዚአብሔር ፡ ለጌድዮን ፡ ብዙኅ ፡ ሕዝብ ፡ ዘምስሌከ ፡ ከመ ፡ ዘኢይክል ፡ አግብኦቶሙ ፡ ለምድያም ፡ ውስተ ፡ እዴሆሙ ፡ ከመ ፡ ኢይትመክሑ ፡ እስራኤል ፡ ላዕሌየ ፡ ወኢይበሉ ፡ እዴየ ፡ አድኀነተኒ ።

7:3  ወይቤሎ ፡ እግዚአብሔር ፡ ንግሮሙ ፡ ለሕዝብ ፡ ወበሎሙ ፡ ዘይፈርህ ፡ እምኔክሙ ፡ ወፈራህ ፡ ለይግባእ ፡ እምኀበ ፡ ሕዝብ ፡ ወተመይጡ ፡ እምነ ፡ ደብረ ፡ ገላአድ ፡ ወገብኡ ፡ እምነ ፡ ሕዝብ ፡ ክልኤ ፡ እልፍ ፡ ወዕሥራ ፡ ምእት ፡ ወተርፉ ፡ እልፍ ።

7:4  ወይቤሎ ፡ እግዚአብሔር ፡ ለጌድዮን ፡ ዓዲ ፡ ብዙኅ ፡ ሕዝብ ፡ አውርዶሙ ፡ ኀበ ፡ ማይ ፡ ወኣመክሮሙ ፡ ለከ ፡ በህየ ፡ ወእለ ፡ አነ ፡ እቤለከ ፡ እሙንቱ ፡ ይሑሩ ፡ ምስሌከ ።

7:5  ወአውረዶሙ ፡ ኀበ ፡ ማይ ፡ ለሕዝብ ፡ ወይቤሎ ፡ እግዚአብሔር ፡ ለጌድዮን ፡ ኵሉ ፡ ዘሰትየ ፡ በልሳኑ ፡ እምነ ፡ ማይ ፡ ከመ ፡ ይሰቲ ፡ ከልብ ፡ አቅሞ ፡ እንተ ፡ ባሕቲቱ ፡ ወኵሉ ፡ ዘአስተብረከ ፡ በብረኪሁ ፡ ከመ ፡ ይስተይ ፡ አቅሞሙ ፡ እንተ ፡ ባሕቲቶሙ ።

7:6  ወኮነ ፡ [ኍልቆሙ ፡] ለእለ ፡ ሰትዩ ፡ በልሳኖሙ ፡ ሠለስቱ ፡ ምእት ፡ ዕደው ፡ ወእለሰ ፡ ተርፉ ፡ ሕዝብ ፡ አስተብረኩ ፡ በብረኪሆሙ ፡ ከመ ፡ ይስተዩ ፡ ማየ ።

7:7  ወይቤሎ ፡ እግዚአብሔር ፡ ለጌድዮን ፡ በእሉ ፡ ሠለስቱ ፡ ምእት ፡ ብእሲ ፡ እለ ፡ ከመዝ ፡ ሰትዩ ፡ ኣድኅነክሙ ፡ ወኣገብኦሙ ፡ ለምድያም ፡ ውስተ ፡ እዴከ ፡ ወኵሉ ፡ ሕዝብ ፡ ይእትው ፡ ውስተ ፡ አብያቲሆሙ ።

7:8  ወነሥኡ ፡ ምስሌሆሙ ፡ ሥንቀ ፡ ሕዝብ ፡ ወአቅርንቲሆሙ ፡ ወለኵሉ ፡ ሰብአ ፡ እስራኤል ፡ ፈነዎሙ ፡ ውስተ ፡ አብያቲሆሙ ፡ ይእትው ፡ ወለእልክቱሰ ፡ ሠለስቱ ፡ ምእት ፡ ብእሲ ፡ አቀመ ፡ ወትዕይንተ ፡ ምድያም ፡ መትሕቶሙ ፡ ውስተ ፡ ቈላ ።

7:9  ወእምዝ ፡ በይእቲ ፡ ሌሊት ፡ ይቤሎ ፡ እግዚአብሔር ፡ ተንሥእ ፡ ወረድ ፡ ፍጡነ ፡ እምዝየ ፡ ውስተ ፡ ትዕይንት ፡ እስመ ፡ አግባእክዋ ፡ ውስተ ፡ እዴከ ።

7:10  ወእመሰ ፡ ትፈርህ ፡ ባሕቲትከ ፡ ወሪደ ፡ ረድ ፡ አንተ ፡ ወፈራ ፡ ቍልዔከ ፡ ውስተ ፡ ትዕይንት ።

7:11  ወአጽምኦሙ ፡ ዘይትናገሩ ፡ ወእምዝ ፡ እንከ ፡ ይጸንዓ ፡ እደዊከ ፡ ወረድ ፡ ውስተ ፡ ትዕይንት ፡ ወወረደ ፡ ውእቱ ፡ ወፋራ ፡ ቍልዔሁ ፡ ውስተ ፡ አሐዱ ፡ ሕብር ፡ ዘኀምሳ ፡ እምነ ፡ ትዕይንት ።

7:12  ወምደያም ፡ ወዐማሌቅ ፡ ወኵሎሙ ፡ ደቂቀ ፡ ጽባሕ ፡ ኅዱራን ፡ እሙንቱ ፡ ውስተ ፡ ቈላት ፡ ከመ ፡ አንበጣ ፡ ብዝኆሙ ፡ ወአግማሊሆሙ ፡ አልቦ ፡ ኍልቍ ፡ አላ ፡ ከመ ፡ ኆጻ ፡ ዘውስተ ፡ ከንፈረ ፡ ባሕር ፡ እሙንቱ ፡ ብዝኆሙ ።

7:13  ወቦአ ፡ ጌድዮን ፡ ወናሁ ፡ ብእሲ ፡ አሐዱ ፡ ይነግሮ ፡ ለካልኡ ፡ ሕልሞ ፡ ወይቤሎ ፡ ሐለምኩ ፡ ሕልመ ፡ ወእሬኢ ፡ ኅብስተ ፡ ስገም ፡ ታንኰረኵር ፡ ውስተ ፡ ትዕይንተ ፡ ምድያም ፡ ወቀተለታ ፡ ወወድቀት ፡ ወገፍትአታ ፡ እምላዕሉ ፡ ወወድቀት ፡ ትዕይንት ።

7:14  ወአውሥአ ፡ ካልኡ ፡ ወይቤሎ ፡ ኢኮነ ፡ ዝንቱ ፡ እንበለ ፡ ኵናተ ፡ ጌድዮን ፡ ወልደ ፡ ዮአስ ፡ ብእሴ ፡ እስራኤል ፤ አግብኦሙ ፡ እግዚአብሔር ፡ ውስተ ፡ እዴሁ ፡ ለምድያም ፡ ወለኵሉ ፡ ትዕይንቶሙ ።

7:15  ወእምዝ ፡ ሶበ ፡ ሰምዐ ፡ ጌድዮን ፡ ፍካሬ ፡ ሕልሙ ፡ ወዘከመ ፡ ነገሮ ፡ ሕልሞ ፡ ሰገደ ፡ ለእግዚአብሔር ፡ ወገብአ ፡ ውስተ ፡ ትዕይንተ ፡ እስራኤል ፡ ወይቤሎሙ ፡ ተንሥኡ ፡ እስመ ፡ አግብኦሙ ፡ እግዚአብሔር ፡ ውስተ ፡ እዴነ ፡ ለትዕይንተ ፡ ምድያም ።

7:16  ወከፈሎሙ ፡ ለሠለስቱ ፡ ምእት ፡ ብእሲ ፡ ለሠለስቱ ፡ ሰራዊት ፡ ወወሀቦሙ ፡ ቀርነ ፡ ለኵሎሙ ፡ ውስተ ፡ እደዊሆሙ ፡ ወመሳብክ[ተ] ፡ ሐደስ[ተ] ፡ ወመኃትው ፡ ውስተ ፡ ማእከለ ፡ ውእቱ ፡ መሳብክት ።

7:17  ወይቤሎሙ ፡ እምኔየ ፡ ርእዩ ፡ ወከማሁ ፡ ግበሩ ፡ ወናሁ ፡ አነ ፡ እበውእ ፡ ውስተ ፡ ማእከለ ፡ ትዕይንት ፡ ወዘከመ ፡ ገበርኩ ፡ ግበሩ ።

7:18  ወእነፍኅ ፡ በቀርን ፡ አነ ፡ ወኵሉ ፡ እለ ፡ ምስሌየ ፡ ወንፍኁ ፡ በቀርን ፡ አንትሙኒ ፡ በዐውደ ፡ ትዕይንት ፡ ወበሉ ፡ ለእግዚአብሔር ፡ ወለጌድዮን ።

7:19  ወቦአ ፡ ጌድዮን ፡ ወምእት ፡ ብእሲ ፡ ምስሌሁ ፡ ውስተ ፡ አሐዱ ፡ ሕብረ ፡ ትዕይንት ፡ በቀዳሚት ፡ ሰዓት ፡ ዘመንፈቀ ፡ ሌሊት ፡ እንበለ ፡ ይንቅኁ ፡ ሰብአ ፡ መዓቅብ ፡ ወነፍኁ ፡ በቀርን ፡ ወነፅኁ ፡ ዝክተ ፡ መሳብክተ ፡ ዘውስተ ፡ እደዊሆሙ ።

7:20  ወነፍኁ ፡ ቀርነ ፡ እልክቱ ፡ ሠለስቱ ፡ ሰራዊት ፡ ወነፅኁ ፡ መሳብክቲሆሙ ፡ ወአለዐሉ ፡ መኃትዊሆሙ ፡ ዘውስተ ፡ እደዊሆሙ ፡ ዘፀጋም ፡ ወውስተ ፡ እደዊሆሙ ፡ ዘየማን ፡ ቀርነ ፡ ዘቦቱ ፡ ይነፍኁ ፡ ወጸርኁ ፡ ወይቤሉ ፡ ኵናተ ፡ እግዚአብሔር ፡ ወዘጌድዮን ።

7:21  ወቆሙ ፡ ኵሎሙ ፡ በበ ፡ መካኖሙ ፡ በውስተ ፡ ዐውደ ፡ ትዕይንት ፡ ወጐየ ፡ ኵሉ ፡ ትዕይንት ፡ ወደንገፁ ።

7:22  ወነፍኁ ፡ በሠለስቱ ፡ ምእት ፡ አቅርንት ፡ ወአግብአ ፡ እግዚአብሔር ፡ መጥባሕተ ፡ ብእሲ ፡ ላዕለ ፡ ካልኡ ፡ በውስተ ፡ ኵሉ ፡ ትዕይንት ፡ ወጐዩ ፡ ትዕይንቶሙ ፡ እስከ ፡ በሴጣ ፡ ወተጋብኡ ፡ እስከ ፡ ዐሠርቱ ፡ ምእት ፡ ውስተ ፡ አቤልሜሑላ ፡ ወውስተ ፡ ገባኦት ።

7:23  ወአውየው ፡ ሰብአ ፡ እስራኤል ፡ እምነ ፡ ንፍታሌም ፡ ወእምነ ፡ አሴር ፡ ወእምነ ፡ ኵሉ ፡ መናሴ ፡ ወዴገንዎሙ ፡ ለምድያም ።

7:24  ወፈነወ ፡ መ[ላ]እክተ ፡ ጌድዮን ፡ ውስተ ፡ ኵሉ ፡ ደወለ ፡ ኤፍሬም ፡ እንዘ ፡ ይብል ፡ ረዱአ ፡ ተቀበልዎሙአ ፡ ለምድያምአ ፡ ወርከብዎሙአ ፡ በኀበአ ፡ ማይአ ፡ እስከ ፡ ቤቴራአ ፡ ወበዮርዳንስአ ፡ ወአውየው ፡ ኵሉ ፡ ሰብአ ፡ ኤፍሬም ፡ ወተቀደምዎሙ ፡ ኀበ ፡ ማይ ፡ እስከ ፡ ቤቴራ ፡ ወዮርዳንስ ።

7:25  ወአኀዝዎሙ ፡ ለክልኤቱ ፡ መላእክተ ፡ ምድያም ፡ ለሄሬብ ፡ ወለዜብ ፡ ወቀተልዎ ፡ ለሄሬብ ፡ በሱሪን ፡ ወለዜብ ፡ ቀተልዎ ፡ በኢያፌቅ ፡ ወዴገንዎሙ ፡ ለምድያም ፡ ወአምጽኡ ፡ አርእስቲሆሙ ፡ ለሄሬብ ፡ ወለዜብ ፡ ኀበ ፡ ጌድዮን ፡ እምነ ፡ ማዕዶተ ፡ ዮርዳንስ ።

Chapter 8

8:1  ወይቤልዎ ፡ ሰብአ ፡ ኤፍሬም ፡ ምንት ፡ ዝንቱ ፡ ነገር ፡ ዘገበርከ ፡ ላዕሌነ ፡ ከመ ፡ ኢትጸውዐነ ፡ አመ ፡ ሖርከ ፡ ትትቃተሎሙ ፡ ለምድያም ፡ ወተሳነኑ ፡ ምስሌሁ ፡ ዐቢየ ፡ ተስናነ ።

8:2  ወይቤሎሙ ፡ ምንተ ፡ ገበርኩ ፡ ይእዜ ፡ ከመ ፡ ዘአንትሙ ፡ [ኢ]ትኄይ[ስ]ኒ ፡ ቈጽለ ፡ ኤፍሬም ፡ [እም]ቀሥመ ፡ አቢየዜር ።

8:3  [አኮኑ ፡] ውስተ ፡ እዴክሙ ፡ አግብኦሙ ፡ እግዚአብሔር ፡ ለመላእክተ ፡ ምድያም ፡ ሄሬብ ፡ ወዜብ ፡ ወምንተ ፡ ክህልኩ ፡ ገቢረ ፡ ከማክሙ ፤ ወእምዝ ፡ ኀደግዎ ፡ እንከ ፡ ወአእረፈት ፡ ነፍሶሙ ፡ እምኔሁ ፡ ሶበ ፡ ይቤሎሙ ፡ ዘንተ ፡ ቃለ ።

8:4  ወመጽአ ፡ ጌድዮን ፡ ኀበ ፡ ዮርዳንስ ፡ ወዐደወ ፡ ውእቱ ፡ ወክልኤቱ ፡ ምእት ፡ ብእሲ ፡ እለ ፡ ምስሌሁ ፡ ወዐንበዙ ፡ ሶበ ፡ ርኅቡ ።

8:5  ወይቤሎሙ ፡ ለሰብአ ፡ ሶኮት ፡ ሀብዎሙ ፡ እክለ ፡ ለሕዝብ ፡ እለ ፡ ምስሌየ ፡ እስመ ፡ ርኅቡ ፡ ወአንሰ ፡ እተልዎሙ ፡ ለዜቤሔ ፡ ወለሴልማና ፡ ነገሥተ ፡ ምድያም ።

8:6  ወይቤልዎ ፡ መላእክተ ፡ ሶኮት ፡ ቦኑ ፡ እዴሆሙ ፡ ለዜቤሔ ፡ ወለሴልማና ፡ ይእዜ ፡ ውስተ ፡ እዴከ ፡ ከመ ፡ ነሀቦሙ ፡ እክለ ፡ ለሰራዊትከ ።

8:7  ወይቤሎሙ ፡ ጌድዮን ፡ አኮ ፡ ከመዝ ፡ እምከመ ፡ አግብኦሙ ፡ እግዚአብሔር ፡ ለዜቤሔ ፡ ወለሴልማና ፡ ውስተ ፡ እዴየ ፡ እሰቅል ፡ ሥጋክሙ ፡ ውስተ ፡ ዐቀባት ፡ ዘገዳም ፡ ወውስተ ፡ ክልኤ ፡ አርቆሚን ።

8:8  ወዐርገ ፡ እምህየ ፡ ውስተ ፡ ፋኑሔል ፡ [ወይቤሎሙ ፡ ከመዝ ፡ ወይቤልዎ ፡] በከመ ፡ ይቤልዎ ፡ ሰብአ ፡ ሶኮት ።

8:9  ወይቤሎሙ ፡ ለሰብአ ፡ ፋኑሔል ፡ ሶበ ፡ ገባእኩ ፡ በዳኅን ፡ እነሥቶ ፡ ለዝንቱ ፡ ማኅፈድ ።

8:10  ወዜቤሔሰ ፡ ወሴልማና ፡ ውስተ ፡ ቀርቀር ፡ ወትዕይንቶሙ ፡ ምስሌሆሙ ፡ ወየአክሉ ፡ እልፈ ፡ ወኀምሳ ፡ ምእተ ፡ ኵሎሙ ፡ እለ ፡ ተርፉ ፡ እምነ ፡ ኵሉ ፡ ተዓይኒሆሙ ፡ ለደቂቀ ፡ ጽባሕ ፡ ወእለሰ ፡ ወድቁ ፡ ዐሠርቱ ፡ እልፍ ፡ ወዕሥራ ፡ ምእት ፡ ብእሲ ፡ እለ ፡ ይጸውሩ ፡ ኵናተ ።

8:11  ወዐርገ ፡ ጌድዮን ፡ ፍኖተ ፡ እለ ፡ ይነብሩ ፡ ውስተ ፡ አዕጻዳት ፡ ጽባሓውያን ፡ እለ ፡ መንገለ ፡ ናቤት ፡ ላዕለ ፡ ዜቤሔ ፡ ወቀተለ ፡ ትዕይንቶሙ ፡ እንዘ ፡ ይትአመኑ ።

8:12  ወጐዩ ፡ ዜቤሔ ፡ ወሴልማና ፡ ወዴገኖሙ ፡ ወተለዎሙ ፡ ወአሐዞሙ ፡ ለክልኤሆሙ ፡ ነገሥተ ፡ ምድያም ፡ ለዜቤሔ ፡ ወለሴልማና ፡ ወለኵሉ ፡ ትዕይንቶሙ ፡ ቀጥቀጦሙ ፡ ጌድዮን ።

8:13  ወተመይጠ ፡ ጌድዮን ፡ ወልደ ፡ ዮአስ ፡ እምነ ፡ ፀብእ ፡ እምነ ፡ ዐቀበ ፡ አሬስ ።

8:14  ወአኀዙ ፡ አሐደ ፡ ወልደ ፡ እምነ ፡ ሰብአ ፡ ሶኮት ፡ ወሐተቶ ፡ ወአጽሐፎሙ ፡ [ለ]መላእክተ ፡ ሶከት ፡ ወሊቃናቲሃ ፡ ሰብዓ ፡ ወሰብዐቱ ፡ ብእሲ ።

8:15  ወበጽሐ ፡ [ኀበ ፡ መላእክተ ፡] ሶኮት ፡ ወይቤሎሙ ፡ ነዮሙ ፡ ዜቤሔ ፡ ወሴልማና ፡ በአለ ፡ ቦሙ ፡ ተዐየርክሙ ፡ ወትቤሉኒ ፡ ቦኑ ፡ እዴሆሙ ፡ ለዜቤሔ ፡ ወለሴልማና ፡ ይእዜ ፡ ውስተ ፡ እዴከ ፡ ከመ ፡ ነሀቦሙ ፡ እክለ ፡ ለእለ ፡ ርኅቡ ፡ ሰብእከ ።

8:16  ወነሥኦሙ ፡ ለሰብአ ፡ ሶኮት ፡ ለሊቃናቲሆሙ ፡ ወለመላእክቲሆሙ ፡ ወሰቀሎሙ ፡ ውስተ ፡ ዐቀባተ ፡ ገዳም ፡ ወውስተ ፡ በራቄኒም ፡ ወሰቀሎሙ ፡ ምስሌሆሙ ፡ ለሰብአ ፡ ሶኮት ።

8:17  ወነሠቶ ፡ ለማኅፈደ ፡ ፋኑሔል ፡ ወቀተሎሙ ፡ ለሰብአ ፡ ፋኑሔል ፡ ወለሀገሮሙ ።

8:18  ወይቤሎሙ ፡ ለዜቤሔ ፡ ወለሴልማና ፡ አይቴ ፡ ዕደው ፡ እለ ፡ ቀተልክሙ ፡ በታቦር ፡ ወይቤልዎ ፡ ከማከ ፡ እሙንቱ ፡ ወኪያከ ፡ ይመስሉ ፡ እሙንቱ ፡ ወከመ ፡ ርእየተ ፡ ገጸ ፡ ደቀ ፡ ነገሥት ።

8:19  ወይቤሎሙ ፡ ጌድዮን ፡ አኀዊየ ፡ እሙንቱ ፡ ወደቂቀ ፡ እምየ ፡ ወመሐለ ፡ ሎሙ ፡ ወይቤሎሙ ፡ ሕያው ፡ እግዚአብሔር ፡ ሶበ ፡ አሕየውክምዎሙ ፡ ከመ ፡ እምኢቀተልኩክሙ ።

8:20  ወይቤሎ ፡ ለዮቶር ፡ በኵሩ ፡ ተንሥእ ፡ ቅትሎሙ ፡ ወኢመልሐ ፡ መጥባሕቶ ፡ ውእቱ ፡ ሕፃን ፡ እስመ ፡ ንዑስ ፡ ውእቱ ፡ ወፈርሀ ።

8:21  ወይቤልዎ ፡ ዜቤሔ ፡ ወሴልማና ፡ ተንሥእ ፡ አንተ ፡ ወተራከበነ ፡ እስመ ፡ ከመ ፡ ብእሲ ፡ ውእቱ ፡ ኀይልከ ፡ ወተንሥአ ፡ ጌድዮን ፡ ወቀተሎሙ ፡ ለዜቤሔ ፡ ወለሴልማና ፡ ወነሥአ ፡ ባዝግናተ ፡ ዘውስተ ፡ ክሳዳተ ፡ አግማላቲሆሙ ።

8:22  ወይቤልዎ ፡ ሰብአ ፡ እስራኤል ፡ ለጌድዮን ፡ ተመልአክ ፡ ለነ ፡ አንተ ፡ ወደቂቅከ ፡ እስመ ፡ አድኀንከነ ፡ እምነ ፡ እደ ፡ ምድያም ።

8:23  ወይቤሎሙ ፡ ጌድዮን ፡ ኢይመልክ ፡ አንሰ ፡ ለክሙ ፡ ወወልድየኒ ፡ ኢይመልክ ፡ ለክሙ ፤ እግዚአብሔር ፡ ይመልክ ፡ ለክሙ ።

8:24  ወይቤሎሙ ፡ ጌድዮን ፡ እስእል ፡ እምኔክሙ ፡ ስእለተ ፡ ወሀቡኒ ፡ ብእሲ ፡ ብእሲ ፡ አዕኑገ ፡ [ዘወርቅ ፡] ዘሰለበ ፡ እስመ ፡ ብዙኀ ፡ አዕኑገ ፡ ቦሙ ፡ እስመ ፡ እስማዔላውያን ፡ እሙንቱ ።

8:25  ወይቤሉ ፡ ውሂበ ፡ ንሁብ ፡ ወሰፍሐ ፡ ልብሶ ፡ ወገደፉ ፡ ብእሲ ፡ ብእሲ ፡ አዕኑገ ፡ ዘሰለቡ ።

8:26  ወኮነ ፡ ድልወተ ፡ ወርቀ ፡ አዕኑጊሁ ፡ ዘሰአሎሙ ፡ ዐሠርተ ፡ ወትስዐተ ፡ ምእተ ፡ በሰቅል ፡ ወርቁ ፡ እንበለ ፡ አውጻባት ፡ ወባዝግናት ፡ ዘኤፎት ፡ ወመዋጥሕ ፡ ዘሜላት ፡ ዘላዕለ ፡ ነገሥተ ፡ ምድያም ፡ ወእንበለ ፡ ሐብላተ ፡ ወርቅ ፡ ዘውስተ ፡ ክሳዳተ ፡ አግማላቲሆሙ ።

8:27  ወገብረ ፡ ሎቱ ፡ ጌድዮን ፡ ምስለ ፡ ወአቀሞ ፡ ውስተ ፡ ሀገሩ ፡ ውስተ ፡ ኤፍሬም ፡ ወዘመው ፡ ቦቱ ፡ ኵሉ ፡ እስራኤል ፡ ወተለውዎ ፡ በህየ ፡ ወኮኖ ፡ ጌጋየ ፡ ለጌድዮን ፡ ወለቤቱ ።

8:28  ወተ[ትሕ]ቱ ፡ ምድያም ፡ ቅድሜሆሙ ፡ ለእስራኤል ፡ ወኢደገሙ ፡ እንከ ፡ አልዕሎ ፡ ርእሶሙ ፡ ወአእረፈት ፡ ምድር ፡ ፵ዓመ ፡ በመዋዕለ ፡ ጌድዮን ።

8:29  ወሖረ ፡ ኢየሮቦዓም ፡ ወልደ ፡ ዮአስ ፡ ወነበረ ፡ ውስተ ፡ ቤቱ ።

8:30  ወቦ ፡ ጌድዮን ፡ ሰብዓ ፡ ደቂቀ ፡ እለ ፡ የሐውሩ ፡ በገቦሁ ፡ እስመ ፡ ብዙኃት ፡ አንስትያሁ ።

8:31  ወዕቅብቱ ፡ በውስተ ፡ ሲቂምስ ፡ ወለደት ፡ ሎቱ ፡ ወልደ ፡ ወሰመዮ ፡ ስሞ ፡ አቢሜሌክ ።

8:32  ወሞተ ፡ ጌድዮን ፡ ወልደ ፡ ዮአስ ፡ በሀገር ፡ ሠኔት ፡ ወተቀብረ ፡ ውስተ ፡ መቃብረ ፡ አቡሁ ፡ ዮአስ ፡ በኤፍራታ ፡ አቢየዝሪ ።

8:33  ወእምዝ ፡ ሶበ ፡ ሞተ ፡ ጌድዮን ፡ ወተመይጡ ፡ ደቂቀ ፡ እስራኤል ፡ ወተለው ፡ በዓልም ፡ ወተካየዱ ፡ ምስሌሁ ፡ ለበዓል ፡ ከመ ፡ ይኩኖሙ ፡ አምላኮሙ ።

8:34  ወኢተዘከርዎ ፡ ደቂቀ ፡ እስራኤል ፡ ለእግዚአብሔር ፡ አምላኮሙ ፡ ዘአድኀኖሙ ፡ እምእደ ፡ ኵሉ ፡ ፀሮሙ ፡ እለ ፡ ዐውዶሙ ።

8:35  ወኢገብሩ ፡ ምሕረተ ፡ ምስለ ፡ ቤተ ፡ ኢየሮበዓም ፡ ዘውእቱ ፡ ጌድዮን ፡ በኵሉ ፡ ሠናይት ፡ እንተ ፡ ገብረ ፡ ምስለ ፡ እስራኤል ።

Chapter 9

9:1  ወሖረ ፡ አቢሜሌክ ፡ ወልደ ፡ ሮበዓም ፡ ውስተ ፡ ስቂማ ፡ ኀበ ፡ አኀወ ፡ እሙ ፡ ወተናገሮሙ ፡ ለኵሉ ፡ አዝማደ ፡ ቤተ ፡ እሙ ።

9:2  ወይቤሎሙ ፡ ተናገርዎሙ ፡ ሊተ ፡ ለሰብአ ፡ ስቂማ ፡ ወበልዎሙ ፡ ምንትአ ፡ ይኄይሰክሙአ ፡ ሰብዓኑ ፡ ብእሲአ ፡ ይኰንኑክሙአ ፡ ኵሎሙአ ፡ ደቂቀ ፡ ሮቦዓምአ ፡ አው ፡ አሐዱአ ፡ ብእሲአ ፡ ይኰንንክሙአ ፡ ወተዘከሩአ ፡ ከመአ ፡ ሥጋክሙአ ፡ ወዐጽምክሙአ ፡ አነአ ።

9:3  ወተናገሩ ፡ ሎቱ ፡ አኀወ ፡ እሙ ፡ ምስለ ፡ ኵሉ ፡ ሰብአ ፡ ሲቂማ ፡ ኵሎ ፡ ዘንተ ፡ ነገረ ፡ ወሜጥዎ ፡ ለልቦሙ ፡ ኀበ ፡ አቢሜሌክ ፡ ወይቤሉ ፡ እኁነ ፡ ውእቱ ።

9:4  ወወሀብዎ ፡ ፸ብሩረ ፡ እምነ ፡ ቤተ ፡ በዓል ፡ ወተዓሰበ ፡ ቦን ፡ አቢሜሌክ ፡ ዕደወ ፡ ሐቃልያነ ፡ ወመደንግፃነ ፡ ወሖሩ ፡ ወተለውዎ ።

9:5  ወቦአ ፡ ውስተ ፡ ቤተ ፡ አቡሁ ፡ ውስተ ፡ ኤፍሬም ፡ ወቀተሎሙ ፡ ለአኀዊሁ ፡ ለደቂቀ ፡ ሮቦዓም ፡ ፸ብእሴ ፡ በአሐቲ ፡ እብን ፡ ወተርፈ ፡ ኢ[ዮአ]ታም ፡ ወልደ ፡ ሮቦዓም ፡ ዘይንእስ ፡ እስመ ፡ ተኀብአ ።

9:6  ወተጋብኡ ፡ ኵሎሙ ፡ ሰብአ ፡ ሲቂማ ፡ ወኵሉ ፡ ቤተ ፡ መሐሎን ፡ ወሖሩ ፡ ወአንገሥዎ ፡ ለአቢሜሌክ ፡ ሎሙ ፡ ንጉሠ ፡ በኀበ ፡ ዕፀ ፡ በላኖ ፡ እንተ ፡ ውስተ ፡ ሲቂማ ።

9:7  ወዜነውዎ ፡ ለኢ[ዮአ]ታም ፡ ወሖረ ፡ ወቆመ ፡ ውስተ ፡ ርእሰ ፡ ደብረ ፡ ጋሪዝን ፡ ወጾርኀ ፡ ወበከየ ፡ ወይቤሎሙ ፡ ስምዑኒ ፡ ሰብአ ፡ ሲቂማ ፡ ወይስማዕክሙ ፡ እግዚአብሔር ።

9:8  ሖሩአ ፡ ዕፀውአ ፡ ያንግሡአ ፡ ሎሙአ ፡ ንጉሠ ፡ ወይቤልዋ ፡ ለዕፀ ፡ ዘይት ፡ ንግሢ ፡ ለነ ።

9:9  ወትቤሎሙ ፡ ዕፀ ፡ ዘይት ፡ እኅድግኑ ፡ ቅብዕየ ፡ ዘሰብሐ ፡ እግዚአብሔር ፡ በላዕሌየ ፡ ወእጓለ ፡ እመሕያው ፡ ወእሑር ፡ እንግሥ ፡ ላዕለ ፡ ዕፀው ።

9:10  ወይቤልዋ ፡ ኵሉ ፡ ዕፀው ፡ ለበለስ ፡ ንዒ ፡ ንግሢ ፡ ለነ ።

9:11  ወትቤሎሙ ፡ በለስ ፡ እኅድግኑ ፡ ምጥቀትየ ፡ ወፍሬ[የ] ፡ ቡሩከ ፡ ወእሑር ፡ እንግሥ ፡ ለዕፀው ።

9:12  ወይቤልዎ ፡ ኵሉ ፡ ዕፀው ፡ ለወይን ፡ ነዓ ፡ ንግሥ ፡ ለነ ።

9:13  ወይቤሎሙ ፡ ወይን ፡ እኅድግኑ ፡ ወይንየ ፡ ወትፍሥሕትየ ፡ ዘበኀበ ፡ እግዚአብሔር ፡ ወበኀበ ፡ እጓለ ፡ እመሕያው ፡ ወእሑር ፡ እንግሥ ፡ ለዕፀው ።

9:14  ወይቤልዋ ፡ ዕፀው ፡ ለዕፀ ፡ ራምኖን ፡ ንዒ ፡ አንቲ ፡ ንግሢ ፡ ለነ ።

9:15  ወትቤሎሙ ፡ ዕፀ ፡ ራምኖን ፡ እመ ፡ አማን ፡ ታነግሡኒ ፡ በጽድቅ ፡ ላዕሌክሙ ፡ ንዑ ፡ አጽልሉ ፡ ታሕተ ፡ ጽላሎትየ ፡ እመ ፡ ኢወፅአት ፡ እሳት ፡ እምነ ፡ ራምኖን ፡ ወትበልዖ ፡ ለአርዘ ፡ ሊባኖስ ።

9:16  ወይእዜኒ ፡ እመ ፡ አማን ፡ በጽድቅ ፡ ገበርክሙ ፡ ወአንገሥክምዎ ፡ ለአቢሜሌክ ፡ በከመ ፡ ገበርክሙ ፡ ምስለ ፡ ኢየሮበዓም ፡ ወምስለ ፡ ቤቱ ፡ ወእመ ፡ በከመ ፡ ዕሴተ ፡ እዴሁ ፡ ገበርክሙ ፡ ሎቱ ፤

9:17  በከመ ፡ ተቃተለ ፡ አቡየ ፡ ለክሙ ፡ ወገደፈ ፡ ነፍሶ ፡ ቅድሜክሙ ፡ ወአድኀነክሙ ፡ እምእደ ፡ ምድያም ፤

9:18  ወአንትሙ ፡ ተንሣእክሙ ፡ ላዕለ ፡ ቤተ ፡ አቡየ ፡ ወቀተልክሙ ፡ ደቂቆ ፡ ፸ብእሴ ፡ በአሐቲ ፡ እብን ፡ ወአንገሥክምዎ ፡ ለአቢሜሌክ ፡ ወልደ ፡ ዕቅብቱ ፡ ላዕለ ፡ [ሰብአ ፡] ሲቂሞን ፡ እስመ ፡ እኁክሙ ፡ ውእቱ ።

9:19  ወእመሰ ፡ በጽድቅ ፡ ወበርትዕ ፡ ገበርክሙ ፡ ምስለ ፡ ሮቦዓም ፡ ወቤቱ ፡ በዛቲ ፡ ዕለት ፡ ቡሩካነ ፡ አንትሙሂ ፡ ወተፈሥሑ ፡ በአቢሜሌክ ፡ ወውእቱኒ ፡ ይትፌሣሕ ፡ ብክሙ ።

9:20  ወእመ ፡ አኮሰ ፡ ትጻእ ፡ እሳት ፡ እምነ ፡ አቢሜሌክ ፡ ወትብልዖሙ ፡ ለሰብአ ፡ ሲቂሞን ፡ ወለቤተ ፡ መሐሎን ፡ ወትፃእ ፡ እሳት ፡ እምነ ፡ ሰብአ ፡ ሲቂሞን ፡ ወእምነ ፡ ቤተአ ፡ መሐሎንአ ፡ ወትብልዖአ ፡ ለአቢሜሌክአ ።

9:21  ወጐየ ፡ ኢዮአታም ፡ ወሮጸ ፡ ውስተ ፡ ፍኖት ፡ ወአምሠጠ ፡ ውስተ ፡ ራራ ፡ ወነበረ ፡ ህየ ፡ እምነ ፡ ገጸ ፡ አቢሜሌክ ፡ እኁሁ ።

9:22  ወ[ተ]መልአከ ፡ አቢሜሌክ ፡ ለቤተ ፡ እስራኤል ፡ ሠለስተ ፡ ዓመተ ።

9:23  ወፈነወ ፡ እግዚአብሔር ፡ ጋኔነ ፡ እኩየ ፡ ማእከለ ፡ አቢሜሌክ ፡ ወማእከለ ፡ ሰብአ ፡ ሲቂሞን ፡ ወክሕድዎ ፡ ሰብአ ፡ ሲቂሞን ፡ ለቤተ ፡ አቢሜሌክ ፤

9:24  ከመ ፡ ይግባእ ፡ ኀጢአቱ ፡ ዘ፸ደቂቀ ፡ ኢየሮቦዓም ፡ ወደሞሙ ፡ ወይትፈደዮ ፡ ለአቢሜሌክ ፡ እኁሆሙ ፡ ዘቀተሎሙ ፡ ወላዕለ ፡ ሰብአ ፡ ሲቂሞን ፡ እለ ፡ አጽንዕዋ ፡ ለእዴሁ ፡ ከመ ፡ ይቅትሎሙ ፡ ለአኀዊሁ ።

9:25  ወአንበሩ ፡ ሎቱ ፡ ሰብአ ፡ ሲቂሞን ፡ ማዕገተ ፡ ውስተ ፡ አርእስተ ፡ አድባር ፡ ወየሀይዱ ፡ ኵሎ ፡ ዘየኀልፍ ፡ ፍኖተ ፡ እንተ ፡ ላዕሌሆሙ ፡ ወዜነውዎ ፡ ለአቢሜሌክ ።

9:26  [ወመጽአ ፡] ጋአድ ፡ ወልደ ፡ አቤድ ፡ ወአኀዊሁ ፡ ውስተ ፡ ሲቂማ ፡ ወኀብሩ ፡ ምስሌሁ ፡ ሰብአ ፡ ሲቂማ ።

9:27  ወወፅኡ ፡ ሐቅለ ፡ ወቀሠሙ ፡ አዕጻዳተ ፡ ወይኖሙ ፡ ወአኬዱ ፡ ወገብሩ ፡ በዓለ ፡ ወቦኡ ፡ ቤተ ፡ አምላከሙ ፡ ወበልዑ ፡ ወሰትዩ ፡ ወረገምዎ ፡ ለአቢሜሌክ ።

9:28  ወይቤ ፡ ጋድ ፡ ወልደ ፡ አቤድ ፡ መኑ ፡ ውእቱ ፡ አቢሜሌክ ፡ ወመኑ ፡ ውእቱ ፡ ወልደ ፡ ሴኬም ፡ ከመ ፡ ንትቀነይ ፡ ሎቱ ፡ አኮኑ ፡ ውእቱ ፡ ወልደ ፡ ሮቦዓም ፡ ወዜቡል ፡ (ወ)ዐቃቢሁ ፡ ገብሩ ፡ ወሰብአ ፡ ኤሞር ፡ አቡሁ ፡ ለሴኬም ፡ ወለምንት ፡ ንትቀነይ ፡ ሎቱ ፡ ንሕነ ።

9:29  ወመኑ ፡ እመ ፡ አግብኦ ፡ ለዝክቱ ፡ ሕዝብ ፡ ውስተ ፡ እዴየ ፡ ወኣፍልሶ ፡ ለአቢሜሌክ ፡ ወእበሎ ፡ ለአቢሜሌክ ፡ አብዝኅ ፡ ኀይለከ ፡ ወፃእ ።

9:30  ወሰምዐ ፡ ዜቡል ፡ መልአከ ፡ ሀገር ፡ ዘይቤ ፡ ጋድ ፡ ወልደ ፡ አቤድ ፡ ወተምዕዐ ፡ መዐተ ።

9:31  ወፈነወ ፡ መ[ላ]እክተ ፡ ኀበ ፡ አቢሜሌክ ፡ ምስለ ፡ አምኃ ፡ እንዘ ፡ ይብል ፡ ናሁአ ፡ [ጋድ]አ ፡ ወልደ ፡ አቤድ ፡ ወአኀዊሁ ፡ መጽኡ ፡ ውስተ ፡ ሲቂማ ፡ ወናሁ ፡ ይትቃተልዋ ፡ ለሀገር ፡ በእንቲአከ ።

9:32  ወይእዜኒ ፡ ተንሥእ ፡ በሌሊት ፡ አንተ ፡ ወሕዝብ ፡ ዘምስሌከ ፡ ወዕግት ፡ ውስተ ፡ ሐቅል ።

9:33  ወበጽባሕ ፡ ጊዜ ፡ ይሠርቅ ፡ ፀሐይ ፡ ጊሥ ፡ ወሩዳአ ፡ ለሀገርአ ።

9:34  ወመጽአ ፡ ውእቱ ፡ ወሕዝብ ፡ ዘምስሌሁ ፡ በሌሊት ፡ ወዐገትዋ ፡ ለሲቂማ ፡ [በ]አርባዕቱ ፡ ሰራዊት ።

9:35  ወሶበ ፡ ጸብሐ ፡ ወፅአ ፡ [ጋድ ፡] ወልደ ፡ አቤድ ፡ ወቆመ ፡ ኀበ ፡ ኆኅተ ፡ አንቀጸ ፡ ሀገር ፡ ወተንሥአ ፡ አቢሜሌክ ፡ ወሕዝብ ፡ ዘምስሌሁ ፡ እምኀበ ፡ የዐግቱ ።

9:36  ወርእየ ፡ ጋድ ፡ ወልደ ፡ አቤድ ፡ ሕዝበ ፡ ወይቤሎ ፡ ለዜቡል ፡ ናሁ ፡ ሕዝብ ፡ ይወርድ ፡ እምነ ፡ ርእሰ ፡ ደብር ፡ ወይቤሎ ፡ ዜቡል ፡ ጽላሎተ ፡ አድባር ፡ ትሬኢ ፡ አንተሰ ፡ ከመ ፡ ሰብእ ።

9:37  ወደገመ ፡ ዓዲ ፡ ጋድ ፡ ብሂሎቶ ፡ ወይቤሎ ፡ ናሁ ፡ ሕዝብ ፡ ይወርድ ፡ መንገለ ፡ ባሕር ፡ እምነ ፡ ኀበ ፡ ሕንብርተ ፡ ምድር ፡ ወአሐዱ ፡ ሰርዌ ፡ ይመጽእ ፡ እምነ ፡ ፍኖተ ፡ ኦ [መ] ፡ አንጸሮ ።

9:38  ወይቤሎ ፡ ዜቡል ፡ አይቴ ፡ ውእቱ ፡ ይእዜ ፡ ዝክቱ ፡ አፉከ ፡ ዘትቤ ፡ መኑ ፡ ውእቱ ፡ አቢሜሌክ ፡ ከመ ፡ ንትቀነይ ፡ ሎቱ ፡ አኮኑ ፡ ዝንቱ ፡ ውእቱ ፡ ሕዝብ ፡ ዘተዐየርከ ፡ ፃእኬ ፡ ይእዜ ፡ ወተቃተሎሙ ።

9:39  ወወፅአ ፡ ጋድ ፡ እምነ ፡ ቅድሜሆሙ ፡ ለሰብአ ፡ ሲቂማ ፡ ወተቃተሎ ፡ ለአቢሜሌክ ።

9:40  ወዴገኖ ፡ አቤሜሌክ ፡ ወጐየ ፡ እምቅድመ ፡ ገጹ ፡ ወወድቁ ፡ ብዙኃን ፡ ወተቀትሉ ፡ እስከ ፡ አንቀጸ ፡ ሀገር ።

9:41  ወነበረ ፡ አቢሜሌክ ፡ ውስተ ፡ አሪማ ፡ ወአውፅኦሙ ፡ ዜቡል ፡ ለጋእድ ፡ ወለአኀዊሁ ፡ ወከልኦሙ ፡ ነቢረ ፡ ውስተ ፡ ሲቂማ ።

9:42  ወእምዝ ፡ በሳኒታ ፡ ወፅአ ፡ ሕዝብ ፡ ውስተ ፡ ገዳም ፡ ወዜነውዎ ፡ ለአቢሜሌክ ።

9:43  ወነሥአ ፡ ሕዝቦ ፡ ወከፈሎሙ ፡ ለሠለስቱ ፡ ሰራዊት ፡ ወዐገተ ፡ ቦሙ ፡ ወሶበ ፡ ይኔጽር ፡ ወናሁ ፡ ሕዝብ ፡ ይወፅእ ፡ እምነ ፡ ሀገር ፡ ወተንሥአ ፡ ላዕሌሆሙ ፡ ወቀተሎመ ።

9:44  ወአቢሜሌክሰ ፡ ወሰርዌ ፡ ዘምስሌሁ ፡ ቆሙ ፡ ዲፓ ፡ ኀበ ፡ ኆኅተ ፡ አንቀጸ ፡ ሀገር ፡ ወእልክቱሰ ፡ ክልኤቱ ፡ ሰራዊት ፡ ተዘርው ፡ ውስተ ፡ ኵሉ ፡ ገዳም ፡ ወቀተልዎሙ ።

9:45  ወአቢሜሌክሰ ፡ ይትቃተል ፡ ምስለ ፡ ሀገር ፡ ኵላ ፡ ይእተ ፡ ዕለተ ፡ ወአስተጋብእዋ ፡ ለሀገር ፡ ወሕዝበሰ ፡ ዘውስቴታ ፡ ቀተለ ፡ ወዘርአ ፡ ውስቴታ ፡ ፄወ ።

9:46  ወሰምዑ ፡ ኵሎሙ ፡ ሰብአ ፡ ማኅፈደ ፡ ሲቂሞን ፡ ወቦኡ ፡ ውስተ ፡ ጸወነ ፡ ቤተ ፡ በዓል ።

9:47  ወዜነውዎ ፡ ለአቢሜሌክ ፡ ከመ ፡ ተጋብኡ ፡ ኵሉ ፡ ሰብአ ፡ ማኅፈደ ፡ ሲቂማ ።

9:48  ወዐርገ ፡ አቢሜሌክ ፡ ውስተ ፡ ደብረ ፡ ሄርሞን ፡ ውእቱ ፡ ወሕዝብ ፡ ዘምስሌሁ ፡ ወነሥአ ፡ አቢሜሌክ ፡ ጕድበ ፡ ውስተ ፡ እዴሁ ፡ ወገመደ ፡ ጾረ ፡ ዕፀው ፡ ወነሥአ ፡ ወጾሮ ፡ ውስተ ፡ መታክፊሁ ፡ ወይቤሎሙ ፡ ለሕዝብ ፡ ለእለ ፡ ምስሌሁ ፡ ዘከመ ፡ ርኢክሙኒ ፡ እገብር ፡ ግበሩ ፡ አንትሙኒ ፡ ፍጡነ ፡ ከመ ፡ አነ ፡ ገበርኩ ።

9:49  ወገዘሙ ፡ እሙንቱኒ ፡ ኵሎሙ ፡ ጾሮሙ ፡ ወነሥኡ ፡ ወተለውዎ ፡ ለአቢሜሌክ ፡ ወአንበሩ ፡ ኀበ ፡ ጸወን ፡ ወአውዐዩ ፡ ላዕሌሆሙ ፡ ጸወኖሙ ፡ በእሳት ፡ ወሞቱ ፡ ኵሎሙ ፡ ሰብአ ፡ ሲቂማ ፡ ዘማኅፈዱ ፡ ወየአክሉ ፡ ዐሠርተ ፡ ምእተ ፡ ብእሲ ፡ ወአንስት ።

9:50  ወሖረ ፡ አቢሜሌክ ፡ ውስተ ፡ ቴቤስ ፡ ወነበሩ ፡ ላዕሌሃ ፡ ወአስተጋብእዋ ።

9:51  ወቦቱ ፡ ማኅፈደ ፡ ዐቢየ ፡ ውስተ ፡ ማእከለ ፡ ሀገር ፡ ወተጸወኑ ፡ ኵሎሙ ፡ ህየ ፡ ዕደዊሆሙ ፡ ወአንስቲያሆሙ ፡ ወኵሉ ፡ ዐበይተ ፡ ሀገር ፡ ወዐጸው ፡ ላዕሌሆሙ ፡ ወዐርጉ ፡ ውስተ ፡ ናሕሰ ፡ ማኅፈድ ።

9:52  ወሖረ ፡ አቢሜሌክ ፡ ኀበ ፡ ማኅፈድ ፡ ወተቃተልዎ ፡ ወቀርበ ፡ አቢሜሌክ ፡ ኀበ ፡ ኆኅተ ፡ ማኅፈድ ፡ ከመ ፡ ያውዕዮ ፡ በእሳት ።

9:53  ወወገረቶ ፡ አሐቲ ፡ ብእሲት ፡ በስባረ ፡ ማሕረጽ ፡ ውስተ ፡ ርእሱ ፡ ለአቢሜሌክ ፡ ወቀጥቀጠቶ ፡ መልታሕቶ ።

9:54  ወጸርኀ ፡ ፍጡነ ፡ ለቍልዔሁ ፡ ዘይጸውር ፡ ንዋዮ ፡ ወይቤሎ ፡ ምላኅ ፡ መጥባኅተ ፡ ወቅትለኒ ፡ ከመ ፡ ኢይበሉኒ ፡ ብእሲት ፡ ቀተለቶ ፡ ወወግኦ ፡ ቍልዔሁ ፡ ወሞተ ፡ አቢሜሌክ ።

9:55  ወርእዩ ፡ ሰብአ ፡ እስራኤል ፡ ከመ ፡ ሞተ ፡ አቢሜሌክ ፡ ወአተው ፡ ኵሎሙ ፡ በሓውርቲሆሙ ።

9:56  ወፈደዮ ፡ እግዚአብሔር ፡ ለአቢሜሌክ ፡ እኪተ ፡ እንተ ፡ ገብረ ፡ ላዕለ ፡ አቡሁ ፡ ዘቀተለ ፡ ፸አኀዊሁ ።

9:57  ወኵሎ ፡ እኪቶሙ ፡ ለሰብአ ፡ ሲቂማ ፡ ፈደዮሙ ፡ እግዚአብሔር ፡ ላዕለ ፡ ርእሶሙ ፡ ወበጽሖሙ ፡ መርገመ ፡ ኢዮአታም ፡ ወልደ ፡ ሮቦዓም ።

Chapter 10

10:1  ወቆመ ፡ እምድኅረ ፡ አቢሜሌክ ፡ ዘያድኅኖሙ ፡ ለእስራኤል ፡ ቶላ ፡ ወልደ ፡ ፉሐ ፡ ወልደ ፡ እኁሁ ፡ ለአቡሁ ፡ ብእሲ ፡ ዘእምነ ፡ ይስካር ፡ ወውእቱሰ ፡ ይነብር ፡ ውስተ ፡ ሰማርያ ፡ ውስተ ፡ ደብረ ፡ ኤፍሬም ።

10:2  ወኰነኖሙ ፡ ለእስራኤል ፡ ዕሥራ ፡ ወሠለስተ ፡ ዓመተ ፡ ወሞተ ፡ ወተቀብረ ፡ ውስተ ፡ ሰማርያ ።

10:3  ወቆመ ፡ እምድኅሬሁ ፡ ኢይእር ፡ ገላአዳዊ ፡ ወኰነኖሙ ፡ ለእስራኤል ፡ ዕሥራ ፡ ወክልኤተ ፡ ዓመተ ።

10:4  ወቦ ፡ ሠላሳ ፡ ወክልኤተ ፡ ደቂቀ ፡ ወይጼዐኑ ፡ ላዕለ ፡ ሠላሳ ፡ ወክልኤቱ ፡ አእዱግ ፡ ወቦሙ ፡ ሠላሳ ፡ ወክልኤቱ ፡ አህጉረ ፡ ወሰመዮን ፡ ዳብራተ ፡ ዘኢያኢር ፡ እስከ ፡ ዮም ፡ ወሀለዋ ፡ ውስተ ፡ ገላአድ ።

10:5  ወሞተ ፡ ኢያኢር ፡ ወተቀብረ ፡ ውስተ ፡ ረሞ ።

10:6  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአምለክዎ ፡ ለበዓልም ፡ ወለአስጠሮት ፡ ወአማልክተ ፡ ሶርያ ፡ ወአማልክተ ፡ ሲዶና ፡ ወአማልክተ ፡ ሞአብ ፡ ወአማልክተ ፡ ደቂቀ ፡ ዐሞን ፡ ወአማልክተ ፡ ኢሎፍሊ ፡ ወኀደግዎ ፡ ለእግዚአብሔር ፡ ወኢተቀንዩ ፡ ሎቱ ።

10:7  ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአግብኦሙ ፡ ውስተ ፡ እደ ፡ ኢሎፍሊ ፡ ወውስተ ፡ እዴሆሙ ፡ ለደቂቀ ፡ ዐሞን ።

10:8  ወሣቀይዎሙ ፡ ወአጠቅዎሙ ፡ ለደቂቀ ፡ እስራኤል ፡ በማዕዶተ ፡ ዮርዳንስ ፡ በምድረ ፡ አሞሬዎን ፡ በገላአድ ።

10:9  ወዐደው ፡ ደቂቀ ፡ ዐሞን ፡ ዮርዳንስ ፡ ይትቃተልዎሙ ፡ ለይሁዳ ፡ ወለብንያም ፡ ወለቤተ ፡ ኤፍሬም ፡ ወተሣቀዩ ፡ ደቂቀ ፡ እስራኤል ፡ ጥቀ ።

10:10  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወይቤሉ ፡ አበስነ ፡ ለከ ፡ እስመ ፡ ኀደግናከ ፡ አምላክነ ፡ ወአምለክናሆሙ ፡ ለበዓልም ።

10:11  ወይቤሎሙ ፡ እግዚአብሔር ፡ ለደቂቀ ፡ እስራኤል ፡ አኮኑ ፡ ግብጽ ፡ ወአሞሬዎን ፡ ወደቂቀ ፡ ዐሞን ፡ ወሞአብ ፡ ወኢሎፍሊ ፤

10:12  ወሲዶና ፡ ወምድያም ፡ ወዐማሌቅ ፡ ሣቀዩክሙ ፡ ወገዐርክሙ ፡ ኀቤየ ፡ ወአድኀንኩክሙ ፡ እምእዴሆሙ ።

10:13  ወአንትሙሰ ፡ ኀደግሙኒ ፡ ወአምለክሙ ፡ ባዕደ ፡ አማልክተ ፤ በበይነ ፡ ዝንቱ ፡ ኢያድኅነክሙ ።

10:14  ሑሩ ፡ ጽርሑ ፡ ኀበ ፡ አማልክት ፡ እለ ፡ ኀሬክሙ ፡ ለክሙ ፡ ወያድኅኑክሙ ፡ በመዋዕለ ፡ ምንዳቤክሙ ።

10:15  ወይቤልዎ ፡ ደቂቀ ፡ እስራኤል ፡ ለእግዚአብሔር ፡ አበስነ ፡ ረስየነ ፡ ዘከመ ፡ ትፈቅድ ፡ ቅድሜከ ፡ ወባሕቱ ፡ እግዚኦ ፡ አድኅነነ ፡ በዛቲ ፡ ዕለት ።

10:16  ወአሰሰሉ ፡ አማልክተ ፡ ባዕድ ፡ እምነ ፡ ማእከሎሙ ፡ ወአምለክዎ ፡ ለእግዚአብሔር ፡ ወአሥመርዎ ፡ ወዐንበዙ ፡ እምነ ፡ ሥቃይ ፡ እስራኤል ።

10:17  ወዐርጉ ፡ ደቂቀ ፡ ዐሞን ፡ ወኀደሩ ፡ ውስተ ፡ ገላአድ ፡ ወወፅኡ ፡ ደቂቀ ፡ እስራኤል ፡ ወኀደሩ ፡ ውስተ ፡ ምድረ ፡ መሴፋ ።

10:18  ወተባሀሉ ፡ መላእክተ ፡ ሕዝበ ፡ ገላአድ ፡ በበ ፡ በይናቲሆሙ ፡ መኑ ፡ ብእሲ ፡ ዘይእኅዝ ፡ ይትቃተሎሙ ፡ ለነ ፡ ለደቂቀ ፡ ዐሞን ፡ ወይኩን ፡ ርኡሰ ፡ ለኵሉ ፡ እለ ፡ ይነብሩ ፡ ውስተ ፡ ገላአድ ።

Chapter 11

11:1  ወይፍታሔ ፡ ገለአዳዊ ፡ ጽኑዕ ፡ ወኀያል ፡ ወወልደ ፡ ብእሲት ፡ ዘማ ፡ ውእቱ ፡ ወወለደቶ ፡ ለይፍታሔ ፡ ለገላአድ ።

11:2  ወወለደት ፡ ሎቱ ፡ ለገላአድ ፡ ደቂቀ ፡ [ብእሲቱ ፡ አግዓዚት ፡] ወልህቁ ፡ ደቂቃ ፡ ለይእቲ ፡ ብእሲት ፡ ወአውፅእዎ ፡ ለይፍታሔ ፡ ወይቤልዎ ፡ ኢትወርስ ፡ ውስተ ፡ ቤተ ፡ አቡነ ፡ እስመ ፡ ወልደ ፡ ካልእት ፡ ብእሲት ፡ አንተ ።

11:3  ወሖረ ፡ ይፍታሔ ፡ እምነ ፡ ገጸ ፡ አኀዊሁ ፡ ወነበረ ፡ ውስተ ፡ ምድረ ፡ ጦፍ ፡ ወይፀመድዎ ፡ ለይፍታሔ ፡ ሰብእ ፡ ነዳያን ፡ ወየሐውሩ ፡ ምስሌሁ ።

11:4  ወእምድኅረ ፡ መዋዕል ፡ ተቃተልዎሙ ፡ ደቂቀ ፡ ዐሞን ፡ ለእስራኤል ።

11:5  ወሖሩ ፡ ሊቃናተ ፡ ገላአድ ፡ ይንሥእዎ ፡ ለይፍታሔ ፡ እምድረ ፡ ጦፍ ።

11:6  ወይቤልዎ ፡ ለይፍታሔ ፡ ነዐ ፡ ወትኩነነ ፡ መስፍነ ፡ ወንትቃተሎሙ ፡ ለደቂቀ ፡ ዐሞን ።

11:7  ወይቤሎሙ ፡ ይፍታሔ ፡ ለሊቃናተ ፡ ገላአድ ፡ አኮኑ ፡ አንትሙ ፡ ጸላእክሙኒ ፡ ወአውፃእክሙኒ ፡ እምነ ፡ ቤተ ፡ አቡየ ፡ ወአውፃእክሙኒ ፡ እምኀቤክሙ ፡ ለምንት ፡ እንከ ፡ መጻእክሙ ፡ ኀቤየ ፡ ይእዜ ፡ ሶበ ፡ ተመንደብክሙ ።

11:8  ወይቤልዎ ፡ ሊቃናተ ፡ ገላአድ ፡ ለይፍታሔ ፡ አኮ ፡ ከመዝ ፤ መጻእነ ፡ ኀቤከ ፡ ከመ ፡ ትሑር ፡ ምስሌነ ፡ ወትትቃተል ፡ ለነ ፡ ምስለ ፡ ደቂቀ ፡ ዐሞን ፡ ወትኩነነ ፡ ርእሰ ፡ ለኵሉ ፡ እለ ፡ ይነብሩ ፡ ውስተ ፡ ገላአድ ።

11:9  ወይቤሎሙ ፡ ይፍታሔ ፡ ለሊቃናተ ፡ ገላአድ ፡ እመ ፡ ትነሥኡኒ ፡ አንትሙ ፡ ከመ ፡ እትቃተሎሙ ፡ ለደቂቀ ፡ ዐሞን ፡ እምከመ ፡ አግብኦሙ ፡ እግዚአብሔር ፡ ቅድሜየ ፡ አነ ፡ እከውነክሙ ፡ ርእሰ ።

11:10  ወይቤልዎ ፡ ሊቃናተ ፡ ገላአድ ፡ ለይፍታሔ ፡ እግዚአብሔር ፡ ስምዕነ ፡ በማእከሌነ ፡ ከመ ፡ በከመ ፡ ትቤ ፡ ከማሁ ፡ ንገብር ።

11:11  ወሖረ ፡ ይፍታሔ ፡ ምስለ ፡ ሊቃናተ ፡ ገላአድ ፡ ወሤምዎ ፡ ሕዝብ ፡ ሎሙ ፡ ርእሰ ፡ ከመ ፡ ይኩኖሙ ፡ መስፍነ ፡ ወነገረ ፡ ይፍታሔ ፡ ኵሎ ፡ ቃሎ ፡ ቅድመ ፡ እግዚአብሔር ፡ በመሴፋ ።

11:12  ወፈነወ ፡ ይፍታሔ ፡ መ[ላ]እክተ ፡ ኀበ ፡ ንጉሦሙ ፡ ለደቂቀ ፡ ዐሞን ፡ እንዘ ፡ ይብል ፡ ምንትአ ፡ ብከአ ፡ ምስሌየአ ፡ ከመአ ፡ ትምጻእአ ፡ ትትቃተለኒአ ፡ ውስተአ ፡ ብሔርየአ ።

11:13  ወይቤ ፡ ንጉሦሙ ፡ ለደቂቀ ፡ ዐሞን ፡ ለእለ ፡ ለአከ ፡ ይፍታሔ ፡ እስመአ ፡ ነሥኡአ ፡ እስራኤል ፡ ምድርየ ፡ አመ ፡ የዐርጉ ፡ እምነ ፡ ግብጽ ፡ እምነ ፡ ዐርኖን ፡ እስከ ፡ ኢያቦቅ ፡ ወእስከ ፡ ዮርዳንስ ፡ ወይእዜኒ ፡ አግብእአ ፡ ሊተአ ፡ በሰላምአ ፡ ወገብኡ ፡ እለ ፡ ለአከ ፡ ይፍታሔ ፡ ኀቤሁ ፡ ለይፍታሔ ።

11:14  ወፈነወ ፡ [ዓዲ ፡] ይፍታሔ ፡ ሐዋርያተ ፡ ኀበ ፡ ንጉሦሙ ፡ ለደቂቀ ፡ ዐሞን ።

11:15  ወይቤሎ ፡ ከመዝ ፡ ይፍታሔ ፡ ይቤ ፡ ኢነሥአአ ፡ እስራኤልአ ፡ ምድረከ ፡ ዘሞአብ ፡ ወምድረ ፡ ደቂቀ ፡ ዐሞን ፡ አመ ፡ ዐርጉ ፡ እምነ ፡ ግብጽ ።

11:16  አላ ፡ ሖሩ ፡ እስራኤል ፡ ውስተ ፡ ገዳም ፡ እስከ ፡ ባሕረ ፡ ኤርትራ ፡ ወበጽሑ ፡ እስከ ፡ ቃዴስ ።

11:17  ወፈነወ ፡ እስራኤል ፡ ሐዋርያተ ፡ ኀበ ፡ ንጉሠ ፡ ኤዶም ፡ እንዘ ፡ ይብል ፡ አኅልፈኒአ ፡ እንተአ ፡ ምድርከአ ፡ ወአበየ ፡ ንጉሠ ፡ ኤዶም ፡ ወኀበኒ ፡ ንጉሠ ፡ ሞአብ ፡ ለአከ ፡ ወአበየ ፡ ወነበረ ፡ እስራኤል ፡ ውስተ ፡ ቃዴስ ።

11:18  ወኀለፈ ፡ እንተ ፡ ገዳም ፡ ወዖዱ ፡ ምድረ ፡ ኤደም ፡ ወምድረ ፡ ሞአብ ፡ ወበጽሑ ፡ መንገለ ፡ ጽባሒሁ ፡ ለምድረ ፡ ሞአብ ፡ ወኀደሩ ፡ ውስተ ፡ ማዕዶተ ፡ አርኖን ፡ ወኢቦኡ ፡ ውስተ ፡ ደወለ ፡ ሞአብ ፡ እስመ ፡ አርኖን ፡ ይእቲ ፡ ደወሎሙ ፡ ለሞአብ ።

11:19  ወፈነወ ፡ እስራኤል ፡ ሐዋርያተ ፡ ኀበ ፡ ሴዎን ፡ ንጉሠ ፡ ሔሴቦን ፡ አሞራዊ ፡ ወይቤሎ ፡ እስራኤል ፡ አኅልፈኒአ ፡ እንተአ ፡ ምድርከአ ፡ እስከአ ፡ ብሔርየአ ።

11:20  ወአበየ ፡ ሴዎን ፡ አኅልፎቶሙ ፡ ለእስራኤል ፡ እንተ ፡ ደወሉ ፡ ወአስተጋብአ ፡ ሴዎን ፡ ሕዝቦ ፡ ወኀደረ ፡ ውስተ ፡ ኢያሴር ፡ ወተቃተሎሙ ፡ ለእስራኤል ።

11:21  ወአግብኦሙ ፡ እግዚአብሔር ፡ አምላከ ፡ እስራኤል ፡ ለሴዎን ፡ ወለኵሉ ፡ ሕዝቡ ፡ ውስተ ፡ እዴሆሙ ፡ ለእስራኤል ፡ ወቀተልዎሙ ፡ ወተወርስዎሙ ፡ እስራኤል ፡ ኵሎ ፡ ምድሮሙ ፡ ለአሞሬዎን ፡ እለ ፡ ይነብሩ ፡ ውስተ ፡ ይእቲ ፡ ምድር ።

11:22  ወተወርሱ ፡ ኵሎ ፡ ደወሎሙ ፡ ለአሞሬዎን ፡ እምነ ፡ አርኖን ፡ እስከ ፡ ኢያቦቅ ፡ ወእምነ ፡ ገዳም ፡ እስከ ፡ ዮርዳንስ ።

11:23  ወይእዜኒ ፡ እግዚአብሔር ፡ አምላከ ፡ እስራኤል ፡ አሰሰሎሙ ፡ ለአሞሬዎን ፡ እምነ ፡ ቅድመ ፡ ገጾሙ ፡ ለእስራኤል ፡ ወአንተኑ ፡ ትትወረስ ፡ በእብሬትከ ።

11:24  አኮኑ ፡ ዘአውረሰከ ፡ ከሞስ ፡ አምላክከ ፡ ኪያሁ ፡ ዳእሙ ፡ ትትወረስ ፡ ወኵሎ ፡ ዘአውረሰነ ፡ እግዚአብሔር ፡ አምላክነ ፡ ቅድሜነ ፡ ኪያሁ ፡ ንትዋረስ ።

11:25  ወይእዜኒ ፡ ቦኑ ፡ አንተ ፡ ትኄይስ ፡ ለበላቅ ፡ ወልደ ፡ ሴፓር ፡ ንጉሠ ፡ ሞአብ ፡ ቦኑ ፡ ባእሰ ፡ ተበአሰ ፡ ምስለ ፡ እስራኤል ፡ አው ፡ ፀብአ ፡ ተፃብኦሙ ፡ ለቤተ ፡ እስራኤል ፤

11:26  በሔሴቦን ፡ ወበአዋልዲሃ ፡ ወበኢያዜር ፡ ወበአዋልዲሃ ፡ ወበኵሉ ፡ አህጉር ፡ ዘኀበ ፡ ዮርዳንስ ፡ ፫፻ዓመተ ፤ ለምንት ፡ ኢያድኀንዎሙ ፡ በዝንቱ ፡ መዋዕል ።

11:27  ወአነኒ ፡ ኢአበስኩከ ፡ ለከ ፡ ወአንተሰ ፡ ትገብር ፡ እኪተ ፡ ምስሌየ ፡ ከመ ፡ ትትቃተለኒ ፡ ወይፍታሕ ፡ እግዚአብሔር ፡ ዘውእቱአ ፡ ይፈትሕአ ፡ ዮምአ ፡ ማእከለአ ፡ ደቂቀ ፡ እስራኤልአ ፡ ወማእከለ ፡ ደቂቀአ ፡ ዐሞንአ ።

11:28  ወአበዮሙ ፡ ንጉሠ ፡ ደቂቀ ፡ ዐሞን ፡ ወኢሰምዐ ፡ ቃለ ፡ ይፍታሔ ፡ ዘለአከ ፡ ሎቱ ።

11:29  ወመጽአ ፡ መንፈሰ ፡ እግዚአብሔር ፡ ላዕለ ፡ ይፍታሔ ፡ ወዐደወ ፡ እምነ ፡ ምድረ ፡ ገላአድ ፡ ወዘምናሴ ፡ ወዐደወ ፡ እምነ ፡ ደወለ ፡ ገላአድ ፡ ወእምነ ፡ ደወለ ፡ ገላአድ ፡ ውስተ ፡ ማዕዶቶሙ ፡ ለደቂቀ ፡ ዐሞን ።

11:30  ወበፅዐ ፡ ይፍታሔ ፡ ብፅዓተ ፡ ለእግዚአብሔር ፡ ወይቤ ፡ ለእመ ፡ አግብኦሙ ፡ ለደቂቀ ፡ ዐሞን ፡ ውስተ ፡ እዴየ ፤

11:31  ዘመጽአ ፡ ወወፅአ ፡ እምነ ፡ ኆኅተ ፡ ቤትየ ፡ ወተቀበለኒ ፡ ሶበ ፡ ገባእኩ ፡ በዳኅን ፡ እምነ ፡ ኀበ ፡ ደቂቅ ፡ ዐሞን ፡ ለእግዚአብሔር ፡ እሬስዮ ፡ መሥዋዕተ ።

11:32  ወዐደወ ፡ ይፍታሔ ፡ ኀበ ፡ ደቂቀ ፡ ዐሞን ፡ ከመ ፡ ይትቃተሎሙ ፡ ወአግብኦሙ ፡ እግዚአብሔር ፡ ውስተ ፡ እዴሁ ።

11:33  ወቀተሎሙ ፡ እምነ ፡ አሮኤር ፡ እስከ ፡ ይበጽሕ ፡ ውስተ ፡ ኤሞይት ፡ ፳አህጉረ ፡ እስከ ፡ አቤል ፡ አዕጻደ ፡ ወይን ፤ ዐቢይ ፡ ቀትል ፡ ጥቀ ፤ ወገረሩ ፡ ደቂቀ ፡ ዐሞን ፡ ቅድመ ፡ ደቂቀ ፡ እስራኤል ።

11:34  ወአተወ ፡ ይፍታሔ ፡ ውስተ ፡ መሴፋ ፡ ውስተ ፡ ቤቱ ፡ ወናሁ ፡ ወለቱ ፡ ወፅአት ፡ ወተቀበለቶ ፡ ምስለ ፡ ከበሮ ፡ ወመሰንቆ ፡ ወይእቲ ፡ ባሕቲታ ፡ ሎቱ ፡ እንተ ፡ ያፈቅር ፡ ወአልቦ ፡ ባዕደ ፡ ውሉደ ፡ እንበሌሃ ፡ ኢወልደ ፡ ወኢወለተ ።

11:35  ወሶበ ፡ ርእያ ፡ ሰጠጠ ፡ አልባሲሁ ፡ ወይቤ ፡ አሌ ፡ ሊተ ፡ ወለትየ ፡ ዐቀጽክኒ ፡ ወለዕጹብ ፡ ኮንክኒ ፡ ውስተ ፡ አዕይንትየ ፡ ወአንሰ ፡ ፈታሕኩ ፡ አፉየ ፡ ኀበ ፡ እግዚአብሔር ፡ በእንቲአኪ ።

11:36  ወኢይክል ፡ ዐሊዎቶ ።

11:37  ወትቤሎ ፡ አባ ፡ ለእመ ፡ በእንቲአየ ፡ ፈትሕከ ፡ አፉከ ፡ ኀበ ፡ እግዚአብሔር ፡ ረስየኒ ፡ ከመ ፡ ወፅአ ፡ እምነ ፡ አፉከ ፡ እስመ ፡ ገብረ ፡ ለከ ፡ እግዚአብሔር ፡ በቀለ ፡ እምነ ፡ ፀርከ ፡ እምነ ፡ ደቂቀ ፡ ዐሞን ።

11:38  ወትቤሎ ፡ ለአቡሃ ፡ ረሲ ፡ ሊተ ፡ ዛተ ፡ ቃለ ፡ አብሐኒ ፡ ክልኤተ ፡ አውራኅ ፡ እሑር ፡ ወእዕረግ ፡ ውስተ ፡ አድባር ፡ ወእብኪ ፡ ላዕለ ፡ ድንግልናየ ፡ ምስለ ፡ ካልኣትየ ።

11:39  ወይቤላ ፡ ሑሪ ፡ ወፈነዋ ፡ ክልኤተ ፡ አውራኀ ፡ ወሖረት ፡ ይእቲ ፡ ወካልኣቲሃ ፡ ወበከየት ፡ ላዕለ ፡ ድንግልናሃ ፡ ምስለ ፡ ካልኣቲሃ ፡ በውስተ ፡ አድባር ።

11:40  ወእምድኅረ ፡ ኀልቀ ፡ ክልኤቱ ፡ አውራኅ ፡ ገብአት ፡ ኀበ ፡ አቡሃ ፡ ወገብረ ፡ ይፍታሔ ፡ ብፅዓቲሁ ፡ ዘበፅዐ ፡ ወይእቲሰ ፡ ኢታአምር ፡ ብእሴ ፡ ወኮነ ፡ ሕግ ፡ ውስተ ፡ እስራኤል ። በበ ፡ መዋዕለ ፡ ዕለታ ፡ የሐውራ ፡ አዋልደ ፡ እስራኤል ፡ ይበክያሃ ፡ ለወለተ ፡ ይፍታሔ ፡ ገለአዳዊ ፡ ረቡዐ ፡ መዋዕለ ፡ ለለዓመት ።

Chapter 12

12:1  ወተጋብኡ ፡ ደቂቀ ፡ ኤፍሬም ፡ ወመጽኡ ፡ ውስተ ፡ ሴፊና ፡ ወይቤልዎ ፡ ለይፍታሔ ፡ ለምንት ፡ ሖርከ ፡ ትትቃተሎሙ ፡ ለደቂቀ ፡ ዐሞን ፡ ወኢጸዋዕከነ ፡ ከመ ፡ ንሑር ፡ ምስሌከ ፤ ናውዒ ፡ ቤተከ ፡ ላዕሌከ ፡ በእሳት ።

12:2  ወይቤሎሙ ፡ ይፍታሔ ፡ ብእሲ ፡ ግፉዕ ፡ አነ ፡ ወሕዝብየ ፡ ወደቂቀ ፡ ዐሞን ፡ ሣቀዩነ ፡ ጥቀ ፡ ወጸራኅነ ፡ ለክሙ ፡ ወኢያድኀንክሙነ ፡ እምነ ፡ እዴሆሙ ።

12:3  ወሶበ ፡ ርኢኩ ፡ ከመ ፡ አልቦ ፡ ዘያድኅን ፡ አግባእክዋ ፡ ለነፍስየ ፡ ውስተ ፡ እዴየ ፡ ወዐደውኩ ፡ ኀበ ፡ ደቂቀ ፡ ዐሞን ፡ ወአግብኦሙ ፡ እግዚአብሔር ፡ ቅድሜየ ፡ ወለምንት ፡ ዐረግሙ ፡ ኀቤየ ፡ ዮም ፡ ትትቃተሉኒ ።

12:4  ወአስተጋብኦሙ ፡ ይፍታሔ ፡ ለኵሉ ፡ ሰብአ ፡ ገላአድ ፡ ወተቃተሎሙ ፡ ለኤፍሬም ፡ ወቀተልዎሙ ፡ ሰብአ ፡ ገላአድ ፡ ለኤፍሬም ፤ እስመ ፡ ይቤልዎሙ ፡ ድኁናነ ፡ ኤፍሬም ።

12:5  ወበጽሕዎሙ ፡ በማእከለ ፡ መናሴ ፡ ሰብአ ፡ ገላአድ ፡ በውስተ ፡ ማዕዶተ ፡ ዮርዳንስ ፡ ዘኤፍሬም ፡ ወእምዝ ፡ ሶበ ፡ ይቤሉ ፡ ድኁናነ ፡ ኤፍሬም ፡ ንዕዱ ፡ ይቤልዎሙ ፡ ሰብአ ፡ ገላአድ ፡ አንትሙኒ ፡ ቦኑ ፡ እምነ ፡ ኤፍሬም ፡ አንትሙ ፡ ወይቤሉ ፡ ኢኮነ ።

12:6  ወይቤልዎሙ ፡ በሉ ፡ ማሕፀን ፡ ወአበዩ ፡ ብሂለ ፡ ወአኀዝዎሙ ፡ ወቀተልዎሙ ፡ በውስተ ፡ ማዕዶተ ፡ ዮርዳንስ ፡ ወወድቁ ፡ እምነ ፡ ኤፍሬም ፡ ይእተ ፡ አሚረ ፡ አርባዕቱ ፡ እልፍ ፡ ወዕሥራ ፡ ምእት ።

12:7  ወኰነኖሙ ፡ ለእስራኤል ፡ ይፍታሔ ፡ ስድስተ ፡ ዓመተ ፡ ወሞተ ፡ ይፍታሔ ፡ ገለአዳዊ ፡ ወተቀብረ ፡ ውስተ ፡ ህገሩ ፡ ገላአድ ።

12:8  ወኰነኖሙ ፡ ለእስራኤል ፡ እምድኅሬሁ ፡ ሔሴቦን ፡ ዘእምነ ፡ ቤተ ፡ ልሔም ።

12:9  ወወለደ ፡ ፴ደቂቀ ፡ ወ፴አዋልደ ፡ እለ ፡ አስተዋሰበ ፡ አፍአ ፡ ወ፴አንስተ ፡ ነሥአ ፡ ለደቂቁ ፡ እምነ ፡ አፍአ ፡ ወኰነኖሙ ፡ ለእስራኤል ፡ ፯ዓመተ ።

12:10  ወሞተ ፡ ሔሴቦን ፡ ወተቀብረ ፡ ውስተ ፡ ቤተ ፡ ልሔም ።

12:11  ወኰነኖሙ ፡ እምድኅሬሁ ፡ ለእስራኤል ፡ ኤሎም ፡ ዛቡሎናዊ ፡ ወኰነኖሙ ፡ ለእስራኤል ፡ ፲ዓመተ ።

12:12  ወሞተ ፡ ኤሎም ፡ ዛቡሎናዊ ፡ በኤሎም ፡ ወቀበርዎ ፡ ውስተ ፡ ምድረ ፡ ዛቡሎን ።

12:13  ወኰነኖሙ ፡ ለእስራኤል ፡ እምድኅሬሁ ፡ ለቦን ፡ ኤፍራታዊ ።

12:14  ወተወልዱ ፡ ሎቱ ፡ ፵ደቂቅ ፡ ወ፴ደቂቀ ፡ ደቂቁ ፡ ወይጼዐኑ ፡ ላዕለ ፡ ፸አዕዱግ ፡ ወኰነኖሙ ፡ ለእስራኤል ፡ ሰመንተ ፡ ዓመተ ።

12:15  ወሞተ ፡ ለቦን ፡ ወልደ ፡ ኤሎም ፡ ኤፍራቶናዊ ፡ ወቀበርዎ ፡ ውስተ ፡ ኤፍራት ፡ ውስተ ፡ ምድረ ፡ ኤፍሬም ፡ ውስተ ፡ ደብረ ፡ ለነቅ ።

Chapter 13

13:1  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአግብኦሙ ፡ ውስተ ፡ እደ ፡ አሎፍል ፡ ፵ዓመ ።

13:2  ወሀለወ ፡ ብእሲ ፡ ዘእምነ ፡ ሰራሕ ፡ ዘእምነ ፡ ነገደ ፡ ዳን ፡ ወስሙ ፡ መኖሔ ፡ ወብእሲቱሰ ፡ መካን ፡ ይእቲ ፡ ወኢትወልድ ።

13:3  ወአስተርአያ ፡ መልአከ ፡ እግዚአብሔር ፡ ለብእሲቱ ፡ ወይቤላ ፡ ናሁ ፡ መካን ፡ አንቲ ፡ ወኢወለድኪ ፡ ወትፀንሲ ፡ ወትወልዲ ፡ ወልደ ።

13:4  ወይእዜኒ ፡ ተዓቀቢ ፡ ወኢትስተዪ ፡ ወይነ ፡ ወሜሰ ፡ ወኢትብልዒ ፡ ኵሎ ፡ ዘርኩስ ።

13:5  እስመ ፡ ናሁ ፡ ትፀንሲ ፡ ወትወልዲ ፡ ወልደ ፡ ወኢይለክፎ ፡ ርእሶ ፡ ኀፂን ፡ እስመ ፡ ቅዱስ ፡ ውእቱ ፡ ናዝራዊ ፡ ለእግዚአብሔር ፡ ውእቱ ፡ ሕፃን ፡ እምነ ፡ ከርሠ ፡ እሙ ፡ ወውእቱ ፡ ይእኅዝ ፡ ያድኅኖሙ ፡ ለእስራኤል ፡ እምነ ፡ እደ ፡ አሎፍል ።

13:6  ወሖረት ፡ ይእቲ ፡ ብእሲት ፡ ወነገረቶ ፡ ለምታ ፡ ወትቤሎ ፡ ብእሴ ፡ እግዚአብሔር ፡ መጽአ ፡ ኀቤየ ፡ ወርእየቱ ፡ ከመ ፡ ርእየተ ፡ መልአከ ፡ እግዚአብሔር ፡ ወግሩም ፡ ውእቱ ፡ ጥቀ ፡ ወተስእልክዎ ፡ እምአይቴ ፡ ውእቱ ፡ ወኢያይድዐኒ ፡ ስሞ ።

13:7  ወይቤለኒ ፡ ናሁ ፡ ትፀንሲ ፡ ወትወልዲ ፡ ወልደ ፡ ወይእዜኒ ፡ ኢትስተዪ ፡ ወይነ ፡ ወሜሰ ፡ ወኢትብልዒ ፡ ኵሎ ፡ ዘርኩስ ፡ እስመ ፡ ናዝራዊ ፡ ውእቱ ፡ ሕፃን ፡ ለእግዚአብሔር ፡ እምነ ፡ ከርሠ ፡ እሙ ፡ እስከ ፡ አመ ፡ ይመውት ።

13:8  ወሰአለ ፡ መኖሔ ፡ ኀበ ፡ እግዚአብሔር ፡ ወይቤ ፡ እግዚኦ ፡ ብእሴ ፡ እግዚአብሔር ፡ ዘፈኖከ ፡ ኀቤነ ፡ ለይምጻእ ፡ ኀቤነ ፡ ወያለብወነ ፡ ምንተ ፡ ንገብር ፡ ለውእቱ ፡ ሕፃን ፡ ዘይትወለድ ።

13:9  ወሰምዖ ፡ እግዚአብሔር ፡ ቃሎ ፡ ለመኖሔ ፡ ወመጽአ ፡ መልአከ ፡ እግዚአብሔር ፡ ኀበ ፡ ብእሲቱ ፡ ዓዲ ፡ ደግመ ፡ እንዘ ፡ ትነብር ፡ ውስተ ፡ ገዳም ፡ ወኢሀለወ ፡ መኖሔ ፡ ምታ ፡ ምስሌሃ ።

13:10  ወሮጸት ፡ ብእሲቱ ፡ ወአፍጠነት ፡ ወነገረቶ ፡ ለምታ ፡ ወትቤሎ ፡ ናሁ ፡ ኦስተርአየኒ ፡ ዝክቱ ፡ ብእሲ ፡ ዘመጽአ ፡ ኀቤየ ፡ ቀዲሙ ።

13:11  ወተንሥአ ፡ መኖሔ ፡ ወሖረ ፡ ወተለዋ ፡ ለብእሲቱ ፡ ኀበ ፡ ውእቱ ፡ ብእሲ ፡ ወይቤሎ ፡ አንተኑ ፡ ውእቱ ፡ ዝክቱ ፡ ብእሲ ፡ ዘተናገርከ ፡ ምስለ ፡ ብእሲትየ ፡ ወይቤሎ ፡ ውእቱ ፡ መልአክ ፡ አነ ፡ ውእቱ ።

13:12  ወይቤሎ ፡ መኖሔ ፡ ይእዜ ፡ ሶበ ፡ በጽሐ ፡ ቃልከ ፡ ምንት ፡ ውእቱ ፡ ነገሩ ፡ ለውእቱ ፡ ሕፃን ፡ ወግብሩ ።

13:13  ወይቤሎ ፡ መልአከ ፡ እግዚአብሔር ፡ ለመኖሔ ፡ እምነ ፡ ኵሉ ፡ ዘእቤላ ፡ ለብእሲትከ ፡ ተዓቀቡ ።

13:14  እምነ ፡ ኵሉ ፡ ዘይወፅእ ፡ እምነ ፡ ወይን ፡ ኢይብላዕ ፡ ወወይነ ፡ ወሜሰ ፡ ኢይስተይ ፡ ወኵሎ ፡ ርኩሰ ፡ ኢይብላዕ ፡ ወኵሎ ፡ ዘአዘዝክዋ ፡ ተዓቀቡ ።

13:15  ወይቤሎ ፡ መኖሔ ፡ ለመልአከ ፡ እግዚአብሔር ፡ ናጌብረከ ፡ ወንግበር ፡ ለከ ፡ ማሕሥአ ፡ ጠሊ ፡ ቅድሜከ ።

13:16  ወይቤሎ ፡ መልአከ ፡ እግዚአብሔር ፡ ለመኖሔ ፡ እመሰ ፡ አገበርከኒ ፡ ኢይበልዕ ፡ እንከ ፡ እክለከ ፡ ወእመሰ ፡ ለእግዚአብሔር ፡ ገበርከ ፡ መሥዋዕተ ፡ ግበር ፡ ሎቱ ።

13:17  ወይቤሎ ፡ መኖሔ ፡ ለመልአከ ፡ እግዚአብሔር ፡ መኑ ፡ ስምከ ፡ ከመ ፡ አመ ፡ በጽሐ ፡ ቃልከ ፡ ንሰብሕከ ።

13:18  ወይቤሎ ፡ መልአከ ፡ እግዚአብሔር ፡ ለምንት ፡ ዝንቱ ፡ ዘትሴአል ፡ ስምየ ፡ ወመድምም ፡ ውእቱ ።

13:19  ወነሥአ ፡ መኖሔ ፡ ማሕሥአ ፡ ጠሊ ፡ ወመሥዋዕተ ፡ ወአዕረገ ፡ ውስተ ፡ ኰኵሕ ፡ ለእግዚአብሔር ፡ ዘይገብር ፡ መድምመ ፡ ለእግዚእ ፡ ወርእይዎ ፡ መኖሔ ፡ ወብእሲቱ ፡ ሶበ ፡ ዐርገ ፡ ነድ ፡ እመልዕልተ ፡ ምሥዋዕ ፡ ውስተ ፡ ሰማይ ።

13:20  ወዐርገ ፡ መልአከ ፡ እግዚአብሔር ፡ በነደ ፡ ምሥዋዕ ፡ ውስተ ፡ ሰማይ ፡ ወመኖሔሰ ፡ ወብእሲቱ ፡ ርእይዎ ፡ ወወድቁ ፡ በገጾሙ ፡ ውስተ ፡ ምድር ።

13:21  ወኢደገመ ፡ እንከ ፡ መልአከ ፡ እግዚአብሔር ፡ አስተርእዮቶ ፡ ለመኖሔ ፡ ወለብእሲቱ ፡ ወይእተ ፡ ጊዜ ፡ አእመረ ፡ መኖሔ ፡ ከመ ፡ መልአ[ከ ፡ እግዚአብሔር ፡] ውእቱ ።

13:22  ወይቤላ ፡ መኖሔ ፡ ለብእሲቱ ፡ ሞተ ፡ ንመውት ፡ እስመ ፡ ርኢናሁ ፡ ለእግዚአብሔር ።

13:23  ወትቤሎ ፡ ብእሲቱ ፡ ሶበ ፡ ፈቀደ ፡ ይቅትለነ ፡ እግዚአብሔር ፡ እምኢተመጠወ ፡ እምነ ፡ እዴነ ፡ መሥዋዕተነ ፡ ወቍርባነነ ፡ ወእምኢያለበወነ ፡ ኵሎ ፡ ዘንተ ፡ ወበከመሰ ፡ መዋዕሊሁ ፡ እምኢያስምዐነ ፡ ዘንተ ።

13:24  ወወለደት ፡ ወልደ ፡ ይእቲ ፡ ብእሲት ፡ ወሰመየት ፡ ስሞ ፡ ሶምሶን ፡ ወባረኮ ፡ እግዚአብሔር ፡ ወልህቀ ፡ ውእቱ ፡ ሕፃን ።

13:25  ወአሐዘ ፡ መንፈሰ ፡ እግዚአብሔር ፡ ይሑር ፡ ምስሌሁ ፡ ውስተ ፡ ትዕይንተ ፡ ዳን ፡ ማእከለ ፡ ሳራ ፡ ወማእከለ ፡ እስታሔል ።

Chapter 14

14:1  ወወረደ ፡ ሶምሶን ፡ ውስተ ፡ ተምናታ ፡ ወርእየ ፡ ብእሲተ ፡ በተምናታ ፡ እምነ ፡ አዋልደ ፡ አሎፍል ፡ ወአደመቶ ፡ ቅድሜሁ ።

14:2  ወዐርገ ፡ ወነገሮሙ ፡ ለአቡሁ ፡ ወለእሙ ፡ ወይቤሎሙ ፡ ርኢኩ ፡ ብእሲተ ፡ በተምናታ ፡ እምነ ፡ አዋልደ ፡ አሎፍል ፡ ወይእዜኒ ፡ ንሥእዋ ፡ ሊተ ፡ ብእሲተ ።

14:3  ወይቤልዎ ፡ አቡሁ ፡ ወእሙ ፡ ቦኑ ፡ አልቦ ፡ እምነ ፡ አዋልደ ፡ አኀዊከ ፡ ወበውስተ ፡ ኵሉ ፡ ሕዝብየ ፡ ብእሲተ ፡ ከመ ፡ ትሑር ፡ አንተ ፡ ወትንሣእ ፡ ብእሲተ ፡ እምነ ፡ አዋልደ ፡ አሎፍል ፡ ቈላፍያን ፡ ወይቤሎ ፡ ሶምሶን ፡ ለአቡሁ ፡ ኪያሃ ፡ ዳእሙ ፡ ንሥኡ ፡ ሊተ ፡ እስመ ፡ አደመተኒ ፡ ውስተ ፡ አዕይንትየ ።

14:4  ወኢያእመሩ ፡ አቡሁ ፡ ወእሙ ፡ ከመ ፡ እምኀበ ፡ እግዚአብሔር ፡ ውእቱ ፡ እስመ ፡ በቀለ ፡ ይፈቅድ ፡ ውእቱ ፡ እምነ ፡ አሎፍል ፡ ወበእማንቱ ፡ መዋዕል ፡ አሎፍል ፡ ይቀንይዎሙ ፡ ለእስራኤል ።

14:5  ወወረደ ፡ ሶምሶን ፡ ወአቡሁ ፡ ወእሙ ፡ ውስተ ፡ ተምናታ ፡ ወተግሕሠ ፡ ውስተ ፡ ዐጸደ ፡ ወይን ፡ ዘተምናታ ፡ ወናሁ ፡ አንበሳ ፡ ተቀበሎ ፡ እንዘ ፡ ይጥሕር ።

14:6  ወመጽአ ፡ ላዕሌሁ ፡ መንፈሰ ፡ እግዚአብሔር ፡ ወነፅኆ ፡ ከመ ፡ ዘይነፅኅ ፡ ማሕሥአ ፡ ጠሊ ፡ ወከመ ፡ ወኢምንተ ፡ ኮነ ፡ ውስተ ፡ እዴሁ ፡ ወኢያይድዐ ፡ ለአቡሁ ፡ ወለእሙ ፡ ዘገብረ ።

14:7  ወዐርጉ ፡ ወተናገሩ ፡ [በእንተ ፡ ብእሲት ፡] ወአደመቶ ፡ ቅድሜሁ ፡ ለሶምሶን ።

14:8  ወተመይጠ ፡ እምድኅረ ፡ መዋዕል ፡ ከመ ፡ ይንሥኣ ፡ ወተግሕሠ ፡ ከመ ፡ ይርአዮ ፡ ለዝክቱ ፡ በድነ ፡ አንበሳ ፡ ወናሁ ፡ ንህብ ፡ ውስተ ፡ አፉሁ ፡ ለውእቱ ፡ አንበሳ ፡ ኀደረ ፡ ወቦ ፡ መዓረ ።

14:9  ወነሥኦ ፡ ወበልዐ ፡ ወሖረ ፡ እንዘ ፡ ይበልዕ ፡ ወበጽሐ ፡ ኀበ ፡ አቡሁ ፡ ወእሙ ፡ ወወሀቦሙ ፡ ወበልዑ ፡ ወኢያይድዖሙ ፡ ከመ ፡ እምነ ፡ አፈ ፡ አንበሳ ፡ አውፅኦ ፡ ለውእቱ ፡ መዓር ።

14:10  ወወረደ ፡ አቡሁ ፡ ኀበ ፡ ይእቲ ፡ ብእሲት ፡ ወነበረ ፡ ህየ ፡ ሶምሶን ፡ ሰቡዐ ፡ መዋዕለ ፡ እስመ ፡ ከማሁ ፡ ይነብሩ ፡ ወራዙት ።

14:11  ወእምዝ ፡ ሶበ ፡ ፈርህዎ ፡ ሤሙ ፡ ላዕሌሁ ፡ ካልኣነ ፡ ሠላሳ ፡ ወነበሩ ፡ ምስሌሁ ።

14:12  ወይቤሎሙ ፡ ሶምሶን ፡ እሜስል ፡ ለክሙ ፡ አምሳለ ፡ ወእመ ፡ አይዳዕክሙኒ ፡ አምሳልየ ፡ በእላንቱ ፡ ሰቡዕ ፡ መዋዕል ፡ ዘበዓል ፡ ወረከብክሙ ፡ እሁበክሙ ፡ ፴ሰንዱናተ ፡ ወ፴አልባሰ ።

14:13  ወእመሰ ፡ ስእንክሙ ፡ አይድዖትየ ፡ ትሁቡኒ ፡ አንትሙ ፡ ሊተ ፡ ፴ሰንዱናተ ፡ ወ፴አልባሰ ፡ ወይቤልዎ ፡ ምስል ፡ አምሳሊከ ፡ ወንስማዕ ።

14:14  ወይቤሎሙ ፡ እምነ ፡ በላዒ ፡ ወፅአ ፡ መብልዕ ፡ ወእምነ ፡ ጽኑዕ ፡ ወጽአ ፡ ጥዑም ፡ ወስእኑ ፡ አይድዖቶ ፡ አምሳሊሁ ፡ እስከ ፡ ሠሉስ ፡ መዋዕል ።

14:15  ወእምዝ ፡ አመ ፡ ራብዕት ፡ ዕለት ፡ ይቤልዋ ፡ ለብእሲተ ፡ ሶምሶን ፡ አስፍጥዮ ፡ ለምትኪ ፡ ወይንግርኪ ፡ አምሳሊሁ ፡ ከመ ፡ ኢናውዒክሙ ፡ በእሳት ፡ ለኪ ፡ ወለቤተ ፡ አቡኪ ፡ አው ፡ ከመ ፡ ታንድዩነኑ ፡ ጸዋዕክሙነ ።

14:16  ወበከየት ፡ ላዕሌሁ ፡ ብእሲቱ ፡ ለሶምሶን ፡ ወትቤሎ ፡ ጸላእከኒ ፡ ወአታፈቅረኒ ፡ እስመ ፡ አምሳሊከ ፡ ዘመሰልከ ፡ ለደቂቀ ፡ ሕዝብየ ፡ ኢነገርከኒ ፡ ሊተ ፡ ወይቤላ ፡ ሶምሶን ፡ ናሁ ፡ ለአቡየ ፡ ወለእምየ ፡ ኢነገርክዎሙ ፡ ለኪኑ ፡ እንከ ፡ እንግርኪ ።

14:17  ወበከየት ፡ ላዕሌሁ ፡ ሰቡዐ ፡ መዋዕለ ፡ ዘበዓል ፡ ወእምዝ ፡ አመ ፡ ሳብዕት ፡ ዕለት ፡ ነገራ ፡ ሶበ ፡ አስርሐቶ ፡ ወአይድዐቶሙ ፡ ለደቂቀ ፡ ሕዝባ ።

14:18  ወይቤልዎ ፡ እሙንቱ ፡ ዕደው ፡ አመ ፡ ሳብዕት ፡ ዕለት ፡ እንበለ ፡ ትዕረብ ፡ ፀሐይ ፡ ምንት ፡ ይጥዕም ፡ እምነ ፡ መዓር ፡ ወምንት ፡ ይጸንዕ ፡ እምነ ፡ አንበሳ ፡ ወይቤሎሙ ፡ ሶምሶን ፡ ሶበ ፡ ኢያስራሕክምዋ ፡ ለእጐልትየ ፡ እምኢረከብክምዋ ፡ ለአምሳልየ ።

14:19  ወመጽአ ፡ መንፈሰ ፡ እግዚአብሔር ፡ [ላዕሌሁ ፡] ወወረደ ፡ ውስተ ፡ ኦስቀሎና ፡ ወቀተለ ፡ ፴ብእሴ ፡ ወሠለቦሙ ፡ አልባሲሆሙ ፡ ወወሀቦሙ ፡ ለእለ ፡ አይድዕዎ ፡ አምሳሊሁ ፡ ወተምዕዐ ፡ መዐተ ፡ ሶምሶን ፡ ወአተወ ፡ ቤተ ፡ አቡሁ ።

14:20  ወነበረት ፡ ብእሲተ ፡ ሶምሶን ፡ ምስለ ፡ መጋቤ ፡ መርዓሁ ፡ ካልኡ ።

Chapter 15

15:1  ወእምድኅረ ፡ መዋዕል ፡ አመ ፡ ማአረረ ፡ ስርናይ ፡ ኀወጻ ፡ ሶምሶን ፡ ለብእሲቱ ፡ ወአምጽኣ ፡ ላቲ ፡ ማሕሥአ ፡ ጠሊ ፡ ወይቤ ፡ እባእ ፡ ኀበ ፡ ብእሲትየ ፡ ውስተ ፡ ጽርሕ ፡ ወከልኦ ፡ አቡሃ ፡ በዊአ ፡ ኀቤሃ ።

15:2  ወይቤሎ ፡ አቡሃ ፡ እስመ ፡ ትቤ ፡ ጸላእክዋ ፡ ወሀብክዎ ፡ ለካልእከ ፡ ወባሕቱ ፡ [ነያ ፡] እኅታ ፡ እንተ ፡ ትንእሳ ፡ ወትሤንያ ፡ ወትኩንከ ፡ ህየንቴሃ ።

15:3  ወይቤ ፡ ሶምሶን ፡ ንጹሕ ፡ አነ ፡ ምዕረ ፡ እምነ ፡ አሎፍል ፡ እስመ ፡ አነ ፡ እገብር ፡ እኪተ ፡ ምስሌክሙ ።

15:4  ወሖረ ፡ ሶምሶን ፡ ወአኀዘ ፡ ሠለስተ ፡ ምእተ ፡ ቈናጽለ ፡ ወነሥአ ፡ መኃትወ ፡ ወአሰረ ፡ ውስተ ፡ አዝናቢሆሙ ፡ ወወደየ ፡ አሐተ ፡ ማኅቶተ ፡ ማእከለ ፡ ክልኤቱ ፡ አዝናቢሆሙ ።

15:5  ወአኅተወ ፡ እሳተ ፡ ውስተ ፡ ውእቱ ፡ መኃትው ፡ ወፈነዎሙ ፡ ውስተ ፡ ክልስስታት ፡ ዘአሎፍል ፡ ወአውዐዩ ፡ ሠዊተ ፡ ወክምረ ፡ ዘተዐፅደ ፡ ወዘይቀውም ፡ ወዘውጡሕ ፡ ወአዕጻዳተ ፡ ወይን ፡ ወዘዘይት ።

15:6  ወይቤሉ ፡ አሎፍል ፡ መኑ ፡ ገብረ ፡ ዘንተ ፡ ወይቤልዎሙ ፡ ሶምሶን ፡ ሐሙሁ ፡ ለተምናታዊ ፡ እስመ ፡ ሄድዎ ፡ ብእሲቶ ፡ ወወሀብዋ ፡ ለካልኡ ፡ ወዐርጉ ፡ አሎፍል ፡ ወአውዐዩ ፡ ቤተ ፡ አቡሃ ፡ ወኪያሃኒ ፡ ወአቡሃኒ ፡ በእሳት ።

15:7  ወይቤሎሙ ፡ ሶምሶን ፡ እመሰ ፡ ገበርክሙ ፡ [ዘንተ ፡] ኢይፈቅድ ፤ በቀልየሰ ፡ እምነ ፡ አሐዱ ፡ ወለኵልክሙ ፡ እምረሰይኩ ።

15:8  ወዘበጦሙ ፡ ሶምሶን ፡ ውስተ ፡ አቍያጸ ፡ እገሪሆሙ ፡ ወኮነ ፡ ዐቢይ ፡ ቀትል ፡ ወወረደ ፡ ሶምሶን ፡ ወነበረ ፡ ውስተ ፡ ፈለግ ፡ ውስተ ፡ በአተ ፡ ኤጣም ።

15:9  ወዐርጉ ፡ አሎፍል ፡ ወኀደሩ ፡ ላዕለ ፡ ይሁዳ ፡ ወተዐዝሩ ፡ ላዕለ ፡ ሌ[ሒ] ።

15:10  ወይቤልዎሙ ፡ ኵሉ ፡ ሰብአ ፡ ይሁዳ ፡ ለምንት ፡ ዐረግሙ ፡ ላዕሌነ ፡ ወይቤሉ ፡ አሎፍል ፡ ከመ ፡ ንእስሮ ፡ ለሶምሶን ፡ ዐረግነ ፡ ወንግበሮ ፡ በከመ ፡ ገብረነ ።

15:11  ወወረዱ ፡ ሠላሳ ፡ ምእት ፡ ብእሲ ፡ እምነ ፡ ይሁዳ ፡ ኀበ ፡ በአተ ፡ ኰኵሕ ፡ ዘኤጣም ፡ ወይቤልዎ ፡ ለሶምሶን ፡ ኢታአምርኑ ፡ ከመ ፡ አሎፍል ፡ ይኴንኑነ ፡ ለምንት ፡ ከመዝ ፡ ገበርከ ፡ ላዕሌነ ፡ ወይቤሎሙ ፡ ሶምሶን ፡ በከመ ፡ ገብሩ ፡ ላዕሌክሙ ፡ ከማሁ ፡ ገበርኩ ፡ ላዕሌሆሙ ።

15:12  ወይቤልዎ ፡ ከመ ፡ ንእስርከ ፡ ወረድነ ፡ ወናግብእከ ፡ ውስተ ፡ እዴሆሙ ፡ ለአሎፍል ፡ ወይቤሎሙ ፡ ሶምሶን ፡ መሐሉ ፡ ሊተ ፡ አንትሙ ፡ ከመ ፡ ኢትቅትሉኒ ፡ አንትሙ ፡ ወአግብኡኒ ፡ ሎሙ ፡ ወአንትሙሰ ፡ ኢትትራከቡ ፡ ምስሌየ ።

15:13  ወመሐሉ ፡ ሎቱ ፡ ወይቤልዎ ፡ አልቦ ፡ ዳእሙ ፡ ነአስረከ ፡ በማእስር ፡ ወናገብአከ ፡ ውስተ ፡ እዴሆሙ ፡ ወቀቲለሰ ፡ ኢንቀትለከ ፡ ወአሰርዎ ፡ በክልኤቱ ፡ መፃምድ ፡ ሐደስት ፡ ወአውፅአዎ ፡ እምነ ፡ ይእቲ ፡ ኰኵሕ ።

15:14  ወበጽሐ ፡ እስከነ ፡ ኀበ ፡ ዐጽመ ፡ መንከስ ፡ ወወውዑ ፡ አሎፍል ፡ ወተቀበልዎ ፡ ወሮጹ ፡ ላዕሌሁ ፡ ወመጽአ ፡ ላዕሌሁ ፡ መንፈሰ ፡ እግዚአብሔር ፡ ወኮኑ ፡ እልክቱ ፡ መፃምድ ፡ እለ ፡ ውስተ ፡ መዝራእቱ ፡ ከመ ፡ ሶበ ፡ ያጼኑ ፡ እሳተ ፡ ኀሠር ፡ ወተፈትሐ ፡ ማኅሜሁ ፡ እምነ ፡ መዝራእቱ ።

15:15  ወረከበ ፡ ዐጽመ ፡ መንከስ ፡ ዘአድግ ፡ ግዱፈ ፡ ውስተ ፡ ፍኖት ፡ ወአትሐተ ፡ እዴሁ ፡ ወተመጠዋ ፡ ወቀተለ ፡ ባቲ ፡ ዐሠርተ ፡ ምእተ ፡ ብእሴ ።

15:16  ወይቤ ፡ ሶምሶን ፡ በዐጽመ ፡ መንከሰ ፡ አድግ ፡ ደምስሶ ፡ ደምሰስክዎሙ ፡ እስመ ፡ በዐጽመ ፡ መንከሰ ፡ አድግ ፡ ቀተልኩ ፡ ዐሠርተ ፡ ምእተ ፡ ብእሴ ።

15:17  ወእምዝ ፡ ሶበ ፡ አኅለቀ ፡ ነቢበ ፡ ገደፋ ፡ ለይእቲ ፡ ዐጽመ ፡ መንከስ ፡ እምነ ፡ እዴሁ ፡ ወሰመዮ ፡ ለውእቱ ፡ መካን ፡ ቀትለ ፡ ዐጽመ ፡ መንከስ ።

15:18  ወጸምአ ፡ ጥቀ ፡ ወጸርኀ ፡ ኀበ ፡ እግዚአብሔር ፡ ወይቤ ፡ አንተ ፡ አግባእከ ፡ ውስተ ፡ እደ ፡ ገብርከ ፡ ዛተ ፡ ሕይወተ ፡ ዐባየ ፡ ወይእዜሰ ፡ እመውት ፡ በጽምእ ፡ ወእወድቅ ፡ ውስተ ፡ እዴሆሙ ፡ ለቈላፍያን ።

15:19  ወአርኀወ ፡ እግዚአብሔር ፡ ንቅዐታ ፡ ለይእቲ ፡ ዐጽመ ፡ መንከስ ፡ ወወፅአ ፡ እምኔሃ ፡ ማይ ፡ ወሰትየ ፡ ወገብአት ፡ ነፍሱ ፡ ወአዕረፈ ፡ በበይነ ፡ ዝንቱ ፡ ተሰምየ ፡ ስሙ ፡ ለውእቱ ፡ መካን ፡ ነቅዐ ፡ ዐጽመ ፡ መንከስ ፡ እስከ ፡ ዮም ።

15:20  ወኰነኖሙ ፡ ለእስራኤል ፡ በመዋዕለ ፡ አሎፍል ፡ ፳ዓመተ ።

Chapter 16

16:1  ወሖረ ፡ ሶምሰን ፡ ውስተ ፡ ጋዛን ፡ ወርእየ ፡ በህየ ፡ ብእሲተ ፡ ዘማ ፡ ወቦአ ፡ ኀቤሃ ።

16:2  ወነገርዎሙ ፡ ለሰብአ ፡ ጋዛን ፡ ወይቤልዎሙ ፡ መጽአ ፡ ሶምሶን ፡ ዝየ ፡ ወዖድዎ ፡ ወዐገትዎ ፡ ኵላ ፡ ሌሊተ ፡ ውስተ ፡ አንቀጸ ፡ ሀገር ፡ ወፀንሑ ፡ ኵላ ፡ ሌሊተ ፡ ወይቤሉ ፡ ንፀንሖ ፡ እስከ ፡ ይጸብሕ ፡ ወንቀትሎ ።

16:3  ወኖመ ፡ ሶምሶን ፡ እስከ ፡ መንፈቀ ፡ ሌሊት ፡ ወተንሥአ ፡ መንፈቀ ፡ ሌሊት ፡ ወአኀዛ ፡ ለኆኅተ ፡ ሀገር ፡ ዘአንቀጽ ፡ በክልኤሆን ፡ ራግዛቲሃ ፡ ወጾሮሙ ፡ ምስለ ፡ ኵሉ ፡ ሰብኡ ፡ ወተሰክመ ፡ ላዕለ ፡ መትካፍቱ ፡ ወአዕረጎሙ ፡ ውስተ ፡ ርእሰ ፡ ደብር ፡ ዘቅድመ ፡ ኬብሮን ፡ ወአንበሮሙ ፡ ህየ ።

16:4  ወእምድኅረ ፡ ዝንቱ ፡ አፍቀረ ፡ ብእሲተ ፡ በኀበ ፡ ፈለገ ፡ ሶሬኅ ፡ ወስማ ፡ ደሊላ ።

16:5  ወዐርጉ ፡ ኀቤሃ ፡ መሳፍንተ ፡ አሎፍል ፡ ወይቤልዋ ፡ አስፍጥዮ ፡ ወአእምሪ ፡ በምንት ፡ ውእቱ ፡ ኀይሉ ፡ ዐቢይ ፡ ወበምንት ፡ ንክሎ ፡ ወንእስሮ ፡ ከመ ፡ ናድክሞ ፡ ወንሁበኪ ፡ ንሕነ ፡ ዐሠርተ ፡ ምእተ ፡ ብእሲ ፡ ወምእተ ፡ ብሩረ ።

16:6  ወትቤሎ ፡ ደሊላ ፡ ለሶምሶን ፡ አይድዐኒ ፡ ምንት ፡ ውእቱ ፡ ኀይልከ ፡ ዐቢይ ፡ ወበምንት ፡ እመ ፡ አሰሩከ ፡ ትደክም ።

16:7  ወይቤላ ፡ ሶምሰን ፡ እመ ፡ አሰሩኒ ፡ በሰብዐቱ ፡ አውታር ፡ ሐደስት ፡ እለ ፡ አልቦሙ ፡ ብትከተ ፡ ወእደክም ፡ እንከ ፡ ወእከውን ፡ ከመ ፡ አሐዱ ፡ እምነ ፡ እጓለ ፡ እመሕያው ።

16:8  ወአምጽኡ ፡ ላቲ ፡ መሳፍንተ ፡ አሎፍል ፡ ሰብዐተ ፡ አውታረ ፡ ሐደስተ ፡ እለ ፡ አልቦሙ ፡ ብትከተ ፡ ወአሰረቶ ፡ ቦሙ ።

16:9  ወእለሰ ፡ ይፀንሕዎ ፡ ይነብሩ ፡ ውስተ ፡ ውሳጢት ፡ ወትቤሎ ፡ መጽኡከ ፡ አሎፍል ፡ ሶምሶን ፡ ወበተኮሙ ፡ ለእልክቱ ፡ አውታር ፡ ከመ ፡ ይትበተክ ፡ ፈትል ፡ ሶበ ፡ ያጼኑ ፡ እሳተ ፡ ወኢተዐውቀ ፡ ኀይሉ ።

16:10  ወትቤሎ ፡ ደሊላ ፡ ለሶምሶን ፡ ናሁ ፡ አስታሕቀርከኒ ፡ ወሐሰተ ፡ ተናገርከኒ ፡ ወይእዜኒ ፡ አይድዐኒ ፡ በምንት ፡ የአስሩከ ።

16:11  ወይቤላ ፡ እመ ፡ አሰሩኒ ፡ በሰብዐቱ ፡ መፃምድ ፡ እለ ፡ ኢገብሩ ፡ ቦሙ ፡ ግብረ ፡ እደክም ፡ እንከ ፡ ወእከውን ፡ ከመ ፡ አሐዱ ፡ እምነ ፡ እጓለ ፡ እመሕያው ።

16:12  ወነሥአት ፡ ደሊላ ፡ መፃምደ ፡ ሐደስተ ፡ ወአሰረቶ ፡ ቦቱ ፡ ወትቤሎ ፡ አሎፍል ፡ መጽኡከ ፡ ሶምሶን ፡ ወእለሰ ፡ ይፀንሕዎ ፡ ይነብሩ ፡ ውስተ ፡ ውሳጢት ፡ ወበተኮሙ ፡ እምነ ፡ መዝራዕቱ ፡ ከመ ፡ ፈትል ።

16:13  ወትቤሎ ፡ ደሊላ ፡ ለሶምሶን ፡ ወይእዜኒ ፡ አስታሕቀርከኒ ፡ ወሐሰተ ፡ ተናገርከኒ ፡ ወአይድዐኒ ፡ በምንት ፡ የአስሩከ ፡ ወይቤላ ፡ እመ ፡ ፀፈርክዮን ፡ ለሰብዑ ፡ ቈናዝዕየ ፡ ዘርእስየ ፡ ወተከልክዮን ፡ በመትከል ፡ ውስተ ፡ አረፍት ፡ ወእደክም ፡ እንከ ፡ ከመ ፡ አሐዱ ፡ እምነ ፡ እጓለ ፡ እመሕያው ።

16:14  ወአነመቶ ፡ ደሊላ ፡ ወፀፈረቶን ፡ ለሰብዑ ፡ ቈናዝዒሁ ፡ ዘርእሱ ፡ በኀይል ፡ ወተከለቶን ፡ በመታክል ፡ ውስተ ፡ አረፍት ፡ ወትቤሎ ፡ መጽኡከ ፡ አሎፍል ፡ ሶምሶን ፡ ወነቅሀ ፡ እምንዋሙ ፡ ወነዝዐ ፡ ውእተ ፡ መታክለ ፡ እምነ ፡ ዐረፍት ፡ ምስለ ፡ ቈናዝዒሁ ፡ ወኢተዐውቀ ፡ ኀይሉ ።

16:15  ወትቤሎ ፡ ደሊላ ፡ እፎ ፡ ትብል ፡ አፍቀርኩኪ ፡ ወልብየ ፡ ምስሌኪ ፡ ናሁ ፡ ሣልስ ፡ ዝንቱ ፡ እንዘ ፡ ታስተሐቅረኒ ፡ ወኢታየድዐኒ ፡ በምንት ፡ ውእቱ ፡ ኀይልከ ፡ ዐቢይ ።

16:16  ወእምዝ ፡ ሶበ ፡ አስርሐቶ ፡ በነቢብ ፡ ኵላ ፡ ሌሊተ ፡ ወአጽሐበቶ ፡ እስከ ፡ ተቈጥዐ ፡ ለሞት ፤

16:17  አይድዓ ፡ ኵሎ ፡ ዘውስተ ፡ ልቡ ፡ ወይቤላ ፡ መላፄ ፡ ኢይለክፈኒ ፡ ርእስየ ፡ እስመ ፡ ናዝራዊ ፡ አነ ፡ ለእግዚአብሔር ፡ እምነ ፡ ከርሠ ፡ እምየ ፡ ወእምከመ ፡ ተላጼኩ ፡ የኀድገኒ ፡ ኀይልየ ፡ ወእደክም ፡ ወእከውን ፡ ከመ ፡ ኵሉ ፡ እጓለ ፡ እመሕያው ።

16:18  ወአእመረት ፡ ደሊላ ፡ ከመ ፡ አይድዓ ፡ ኵሎ ፡ ዘውስተ ፡ ልቡ ፡ ወለአከት ፡ ወጸውዐቶሙ ፡ ለመላእክተ ፡ አሎፍል ፡ እንዘ ፡ ትብል ፡ ንዑአ ፡ አሐተአ ፡ ዕረጉአ ፡ እስመአ ፡ አይድዐኒአ ፡ ኵሎአ ፡ ዘውስተአ ፡ ልቡአ ፡ ወዐርጉ ፡ ኀቤሃ ፡ ኵሎሙ ፡ መሳፍንተ ፡ አሎፍል ፡ ወአምጽኡ ፡ ወርቀ ፡ ምስሌሆሙ ።

16:19  ወአነመቶ ፡ ማእከለ ፡ ብረኪሃ ፡ ወጸውዐት ፡ ቀራጼ ፡ ወቀረጸቶ ፡ ፯ቈናዝዐ ፡ ርእሱ ፡ ወአኀዘ ፡ ይድከም ፡ ወኀደጎ ፡ ኀይሉ ።

16:20  ወትቤሎ ፡ ደሊላ ፡ መጽኡከ ፡ አሎፍል ፡ ሶምሶን ፡ ወነቅሀ ፡ እምነ ፡ ንዋሙ ፡ ወይቤ ፡ እወፅእ ፡ ወእገብር ፡ ከመ ፡ ዘልፍ ፡ ወእነፅኆሙ ፡ ወውእቱሰ ፡ ኢያእመረ ፡ ከመ ፡ ኀደጎ ፡ እግዚአብሔር ።

16:21  ወአኀዝዎ ፡ አሎፍል ፡ ወአውፅእዎ ፡ አዕይንቲሁ ፡ ወአውረድዎ ፡ ውስተ ፡ ጋዛን ፡ ወሞቅሕዎ ፡ በመዋቅሕተ ፡ ኀፂን ፡ ወአንበርዎ ፡ ውስተ ፡ ቤተ ፡ ሞቅሕ ፡ የሐርጽ ።

16:22  ወአኀዘ ፡ ሥዕርቱ ፡ ይብቈል ፡ እምዘ ፡ ቀርፅዎ ።

16:23  ወተጋብኡ ፡ መላእክተ ፡ አሎፍል ፡ ከመ ፡ ይሡዑ ፡ መሥዋዕተ ፡ ለአምላኮሙ ፡ ወከመ ፡ ይትፈሥሑ ፡ ወይቤሉ ፡ አግብኦ ፡ አምላክነ ፡ ለሶምሶን ፡ ፀርነ ፡ ውስተ ፡ እዴነ ።

16:24  ወሶበ ፡ ርእይዎ ፡ ሕዝብ ፡ ወአእኰትዎ ፡ ለአምላኮሙ ፡ ወይቤሉ ፡ አግብኦ ፡ አምላክነ ፡ ለፀርነ ፡ ውስተ ፡ እዴነ ፡ ዘአማሰና ፡ ለምድርነ ፡ ዘአብዝኀ ፡ አብድንቲነ ።

16:25  ወእምዝ ፡ ሶበ ፡ ተፈሥሑ ፡ ይቤሉ ፡ ጸውዕዎ ፡ ለሶምሶን ፡ እምነ ፡ ቤተ ፡ ሞቅሕ ፡ ወይትወነይ ፡ በቅድሜነ ፡ ወጸውዕዎ ፡ ለሶምሶን ፡ እምነ ፡ ቤተ ፡ ሞቅሕ ፡ ወተሳለቁ ፡ ላዕሌሁ ፡ ወአቀምዎ ፡ ማእከለ ፡ ፪አዕማድ ።

16:26  ወይቤሎ ፡ ሶምሶን ፡ ለወልድ ፡ ዘይመርሖ ፡ አዕርፈኒ ፡ ወአግስሰኒ ፡ አዕማደ ፡ እለ ፡ ዲቤሆን ፡ ይቀውም ፡ ዝንቱ ፡ ቤት ፡ ወአስምከኒ ፡ ላዕሌሆን ፡ ወገብረ ፡ ሎቱ ፡ ከማሁ ፡ ውእቱ ፡ ወልድ ።

16:27  ወምሉእ ፡ ውእቱ ፡ ቤት ፡ ዕደወ ፡ ወአንስተ ፡ ወሀለው ፡ ህየ ፡ ኵሎሙ ፡ መሳፍንተ ፡ አሎፍል ፡ ውስተ ፡ ናሕስኒ ፡ የአክሉ ፡ ሠላሳ ፡ ምእተ ፡ ዕደው ፡ ወአንስት ፡ ይኔጽርዎ ፡ ለሶምሰን ፡ ከመ ፡ ይትዌነይ ።

16:28  ወጸርኀ ፡ ሶምሶን ፡ ኀበ ፡ እግዚአብሔር ፡ ወይቤ ፡ እግዚኦ ፡ እግዚኦ ፡ ተዘከረኒ ፡ ወአጽንዐኒ ፡ አሐተ ፡ እንከ ፡ ወእትበቀል ፡ በቀለ ፡ አሐተ ፡ ህየንተ ፡ ክልኤሆን ፡ አዕይንትየ ፡ እምነ ፡ አሎፍል ።

16:29  ወአኀዞን ፡ ሶምሶን ፡ ለእልክቱ ፡ ክልኤሆን ፡ አዕማድ ፡ እለ ፡ ማእከል ፡ እለ ፡ ዲቤሆን ፡ ይቀውም ፡ ውእቱ ፡ ቤት ፡ ወገፍዖን ፡ አሐተ ፡ በየማኑ ፡ ወአሐተ ፡ በፀጋሙ ።

16:30  ወይቤ ፡ ሶምሰን ፡ ለትሙት ፡ ነፍስየ ፡ ምስለ ፡ አሎፍል ፡ ወአጠቆን ፡ በኀይሉ ፡ ወወድቀ ፡ ውእቱ ፡ ቤት ፡ ላዕለ ፡ መሳፍንት ፡ ወላዕለ ፡ ኵሉ ፡ ሕዝብ ፡ ዘውስቴቱ ፡ ወኮኑ ፡ እለ ፡ ሞቱ ፡ እለ ፡ ቀተለ ፡ ሶምሶን ፡ በሞቱ ፡ ፈድፋደ ፡ እምእለ ፡ ቀተለ ፡ በሕይወቱ ።

16:31  ወወረዱ ፡ አኀዊሁ ፡ ወኵሉ ፡ ቤተ ፡ አቡሁ ፡ ወነሥእዎ ፡ ወዐርጉ ፡ ወቀበርዎ ፡ ማእከለ ፡ ሶራሕ ፡ ወማእከለ ፡ ኤስታዎ[ል] ፡ ውስተ ፡ መቃብረ ፡ መኖሔ ፡ አቡሁ ፡ ወኰነኖሙ ፡ ለእስራኤል ፡ ውእቱ ፡ ፳ዓመተ ።

Chapter 17

17:1  ወሀለወ ፡ ብእሲ ፡ ዘእምነ ፡ ደብረ ፡ ኤፍሬም ፡ ወስሙ ፡ ሚካ ።

17:2  ወይቤላ ፡ ለእሙ ፡ ዝክተ ፡ ወርቀ ፡ ዘትቤልኒ ፡ ተሰርቀኒ ፡ ወአምሐልኪ ፡ ናሁ ፡ ወርቁ ፡ ኀቤየ ፡ ውእቱ ፡ አነ ፡ ነሣእክዎ ፡ ወትቤ ፡ እሙ ፡ ቡሩክ ፡ ወልድየ ፡ ለእግዚአብሔር ።

17:3  ወአግብአ ፡ ውእተ ፡ ወርቀ ፡ ዐሠርተ ፡ ወአሐደ ፡ ምእተ ፡ ለእሙ ፡ ወትቤ ፡ እሙ ፡ ቀድሶ ፡ ቀደስክዎ ፡ ለዝንቱ ፡ ወርቅ ፡ ለእግዚአብሔር ፡ እምነ ፡ እዴየ ፡ ለባሕቲትየ ፡ ከመ ፡ ይትገበር ፡ ግልፎ ፡ ወስብኮ ።

17:4  ወይእዜኒ ፡ አ[ገ]ብኦ ፡ ለኪ ፡ ወእሁበኪዮ ፡ ወወሀበ ፡ ውእተ ፡ ወርቀ ፡ ለእሙ ፡ ወነሥአት ፡ እሙ ፡ ውእተ ፡ ወርቀ ፡ ወወሀበት ፡ እምኔሁ ፡ ክልኤ ፡ ምእተ ፡ ብሩረ ፡ ለዘ ፡ ይሰብኮ ፡ ወይገብሮ ፡ ግልፎ ፡ ወሰበኮ ፡ ወአንበርዎ ፡ ውስተ ፡ ቤተ ፡ ሚካ ።

17:5  ወብእሲሁሰ ፡ ሚካ ፡ ረሰዮ ፡ ሎቱ ፡ ቤተ ፡ እግዚአብሔር ፡ ወገብረ ፡ ምስለ ፡ ወቴራጲን ፡ ወመልአ ፡ እዴሁ ፡ ለአሐዱ ፡ እምነ ፡ ደቂቁ ፡ ወኮኖ ፡ ካህነ ።

17:6  ወበእማንቱ ፡ መዋዕል ፡ አልቦሙ ፡ ንጉሠ ፡ [ለደቂቀ ፡ እስራኤል ፡] ብእሲ ፡ ብእሲ ፡ ዘአደሞ ፡ ቅድመ ፡ አዕይንቲሁ ፡ ይገብር ።

17:7  ወሀለወ ፡ ወልድ ፡ ዘእምነ ፡ ቤተ ፡ ልሔም ፡ ዘእምነ ፡ ሕዝበ ፡ ይሁዳ ፡ ወእምነ ፡ ዘመደ ፡ ይሁዳ ፡ ወሌዋዊ ፡ ውእቱ ፡ ወይነብር ፡ ህየ ።

17:8  ወሖረ ፡ ውእቱ ፡ ብእሲ ፡ እምነ ፡ ሀገረ ፡ ይሁዳ ፡ ወእምነ ፡ ቤተ ፡ ልሔም ፡ ከመ ፡ ይኅድር ፡ ሶበ ፡ ረከበ ፡ ወበጽሐ ፡ ውስተ ፡ ደብረ ፡ ኤፍሬም ፡ ኀበ ፡ ቤተ ፡ ሚካ ፡ ከመ ፡ ይቢት ።

17:9  ወይቤሎ ፡ ሚካ ፡ እምአይቴ ፡ መጻእከ ፡ ወይቤሎ ፡ ሌዋዊ ፡ አነ ፡ እምነ ፡ ቤተ ፡ ልሔም ፡ ዘይሁዳ ፡ ወአሐውር ፡ እንበር ፡ ኀበ ፡ ረከብኩ ።

17:10  ወይቤሎ ፡ ሚካ ፡ ንበር ፡ ምስሌየ ፡ ወኩነኒ ፡ አበ ፡ ወካህነ ፡ ወአነ ፡ እሁበከ ፡ ዐሥሩ ፡ ኅብስተ ፡ ለለ ፡ ዕለትከ ፡ ወዘውገ ፡ አልባስ ፡ ወሲሳየከ ፡ ወሖረ ፡ ውእቱ ፡ ሌዋዊ ።

17:11  ወአኀዘ ፡ ይንበር ፡ ምስለ ፡ ውእቱ ፡ ብእሲ ፡ ወኮኖ ፡ ውእቱ ፡ ወልድ ፡ ከመ ፡ አሐዱ ፡ እምነ ፡ ደቂቁ ።

17:12  ወመልአ ፡ እዴሁ ፡ ሚካ ፡ ለውእቱ ፡ ሌዋዊ ፡ ወኮኖ ፡ ውእቱ ፡ ወልድ ፡ ካህነ ፡ ወነበረ ፡ ውስተ ፡ ቤተ ፡ ሚካ ።

17:13  ወይቤ ፡ ሚካ ፡ ይእዜ ፡ አእመርኩ ፡ ከመ ፡ አሠነየ ፡ ገቢረ ፡ ላዕሌየ ፡ እግዚአብሔር ፡ እስመ ፡ ኮነኒ ፡ ሌዋዊ ፡ ካህነ ።

Chapter 18

18:1  ወበእማንቱ ፡ መዋዕል ፡ አልቦሙ ፡ ንጉሠ ፡ እስራኤል ፡ ወበእማንቱ ፡ መዋዕል ፡ የኀሥሡ ፡ ሎሙ ፡ ሕዝበ ፡ ዳን ፡ ርስተ ፡ ኀበ ፡ ይነብሩ ፡ እስመ ፡ ኢረከቡ ፡ እስከ ፡ ይእቲ ፡ አሚር ፡ ርስተ ፡ በማእከለ ፡ ሕዝበ ፡ እስራኤል ።

18:2  ወፈነው ፡ ደቂቀ ፡ ዳን ፡ እምነ ፡ ሕዝቦሙ ፡ ኀምስተ ፡ ዕደወ ፡ እምነ ፡ መክፈልቶሙ ፡ ደቂቀ ፡ ኀይል ፡ እምነ ፡ ሰአራ ፡ ወአስታሖል ፡ ከመ ፡ ይርአይዋ ፡ ለምድር ፡ ወያእምርዋ ፡ ወይቤልዎሙ ፡ ሑሩ ፡ ርእዩ ፡ ለነ ፡ ምድረ ፡ ወበጽሑ ፡ ውስተ ፡ ደብረ ፡ ኤፍሬም ፡ ኀበ ፡ ቤተ ፡ ሚካ ፡ ወኀደሩ ፡ ህየ ፡ እሙንቱ ፡ ኀበ ፡ ቤተ ፡ ሚካ ።

18:3  ወአእመርዎ ፡ ቃሎ ፡ ለውእቱ ፡ ወልድ ፡ ወሬዛ ፡ ሌዋዊ ፡ ወቦኡ ፡ ህየ ፡ ወይቤልዎ ፡ መኑ ፡ አምጽአከ ፡ ዝየ ፡ ወምንተ ፡ ትገብር ፡ በዝየ ፡ ወምንተ ፡ ብከ ፡ በዝየ ።

18:4  ወይቤሎሙ ፡ ከመዝ ፡ ወከመዝ ፡ ረሰየኒ ፡ ሚካ ፡ ወዐሰበኒ ፡ ወኮንክዎ ፡ ካህነ ።

18:5  ወይቤልዎ ፡ ተሰአል ፡ ኀበ ፡ እግዚአብሔር ፡ እመ ፡ ይሴርሐነ ፡ ፍኖተነ ፡ እንተ ፡ ነሐውር ፡ ውስቴታ ፡ ንሕነ ።

18:6  ወይቤሎሙ ፡ ውእቱ ፡ ካህን ፡ ሑሩ ፡ በሰላም ፤ ይእቲ ፡ ፍኖትክሙ ፡ ቅድመ ፡ እግዚአብሔር ፡ እንተ ፡ ባቲ ፡ ተሐውሩ ።

18:7  ወሖሩ ፡ እሙንቱ ፡ ዕደው ፡ ወበጽሑ ፡ ውስተ ፡ ሌሳ ፡ ወርእዩ ፡ ሕዝበ ፡ እለ ፡ ይነብሩ ፡ ውስቴታ ፡ ተአሚኖሙ ፡ ይነብሩ ፡ በሕገ ፡ ሲዶና ፡ ህዱኣን ፡ ወዕሩፋን ፡ እንዘ ፡ ይትአመኑ ፡ ወኢክህሉ ፡ ነቢበ ፡ ቃ[ል] ፡ ውስተ ፡ ምድ[ር] ፡ ርስተ ፡ መዝገብ ፡ እስመ ፡ ርሑቃን ፡ እሙንቱ ፡ እምነ ፡ ሲዶና ፡ ወአልቦሙ ፡ ተልሓፈ ፡ ምስለ ፡ ሶርያ ።

18:8  ወገብኡ ፡ እልክቱ ፡ ኀምስቱ ፡ ዕደው ፡ ኀበ ፡ አኀዊሆሙ ፡ ውስተ ፡ ሶራሐ ፡ ወኤስታሖል ፡ ወይቤልዎሙ ፡ ምንት ፡ ያነብረክሙ ።

18:9  ተንሥኡ ፡ ወንሑር ፡ ላዕሌሃ ፡ እስመ ፡ ቦእናሃ ፡ ወአንሶሰውናሃ ፡ ለይእቲ ፡ ምድር ፡ እስከ ፡ አጽናፊሃ ፡ ወርኢነ ፡ ሕዝበ ፡ እለ ፡ ይነብሩ ፡ ውስቴታ ፡ በሕገ ፡ ሲዶና ፡ [ወርኁቃን ፡ እሙንቱ ፡ እምነ ፡ ሲዶና ፡] ወአልቦሙ ፡ ተልሓፈ ፡ ምስለ ፡ ሶርያ ፡ ወባሕቱ ፡ ተንሥኡ ፡ ወንዕረግ ፡ ላዕሌሆሙ ፡ እስመ ፡ ርኢናሃ ፡ ለይእቲ ፡ ምድር ፡ ሠናይት ፡ ጥቀ ፡ ወአንትሙሰ ፡ አርምሙ ፡ ወኢትትሀከዩ ፡ ሐዊረ ፡ ወበዊአ ፡ ከመ ፡ ትትዋረስዋ ፡ ለይእቲ ፡ ምድር ።

18:10  ወእምከመ ፡ ቦእክሙ ፡ ትበጽሑ ፡ ኀበ ፡ ሕዝብ ፡ እለ ፡ ተአሚኖሙ ፡ ይነብሩ ፡ ወምድርኒ ፡ ረኃብ ፡ እስመ ፡ አግብአ ፡ እግዚአብሔር ፡ ውስተ ፡ አዴክሙ ፡ ብሔረ ፡ ዘአልቦ ፡ ዘይትኀጣእ ፡ እምነ ፡ ኵሉ ፡ ቃል ፡ ዘተፈጥረ ፡ ውስተ ፡ ምድር ።

18:11  ወተንሥኡ ፡ እምነ ፡ ህየ ፡ አምነ ፡ ብሔረ ፡ ዳን ፡ እምነ ፡ ሰራሕ ፡ ወኤ[ስ]ታሖል ፡ ስድስቱ ፡ ምእት ፡ ብእሲ ፡ እ[ለ] ፡ ቅኑታኒሆሙ ፡ ይጸውሩ ፡ ንዋየ ፡ ሐቅሎሙ ።

18:12  ወዐርጉ ፡ ወኀደሩ ፡ ውስተ ፡ ቀርያት[ያ]ርም ፡ ውስተ ፡ ይሁዳ ፡ ወበእንተ ፡ ዝንቱ ፡ ተሰምየ ፡ ውእቱ ፡ መካን ፡ ትዕይንተ ፡ ዳን ፡ እስከ ፡ ዮም ፡ መንገለ ፡ ድኅሬሃ ፡ ለቀርያትያርም ።

18:13  ወኀሊፎሙ ፡ እምህየ ፡ በጽሑ ፡ ውስተ ፡ ደብረ ፡ ኤፍሬም ፡ ወመጽኡ ፡ እስከ ፡ ኀበ ፡ ቤተ ፡ ሚካ ።

18:14  ወይቤልዎሙ ፡ እልክቱ ፡ ኀምስቱ ፡ ዕደው ፡ እለ ፡ ሖሩ ፡ ከመ ፡ ይርአይዋ ፡ ለይእቲ ፡ ምድረ ፡ ሌሳ ፡ ወይቤልዎሙ ፡ ለአኀዊሆሙ ፡ ሶበ ፡ ታአምሩ ፡ ከመ ፡ ቦቱ ፡ ውስተ ፡ ዝንቱ ፡ አብያት ፡ ምስለ ፡ ወቴራፍን ፡ ወግልፎ ፡ ወስብኮ ፡ ወይእዜኒ ፡ አእምሩ ፡ ዘትገብሩ ።

18:15  ወገሐሡ ፡ ህየ ፡ ወቦኡ ፡ ውስተ ፡ ቤቱ ፡ ለውእቱ ፡ ወልድ ፡ ሌዋዊ ፡ ውስተ ፡ ቤተ ፡ ሚካ ።

18:16  ወተአምኅዎ ፡ እልክቱ ፡ ስድስቱ ፡ ምእት ፡ ብእሲ ፡ እንዘ ፡ ይጸውሩ ፡ ንዋየ ፡ ሐቅሎሙ ፡ ቅኑታኒሆሙ ፡ ወተጋብኡ ፡ ኀበ ፡ ኆኅተ ፡ አንቀጽ ፡ እለ ፡ እምነ ፡ ደቂቀ ፡ ዳን ።

18:17  ወዐርጉ ፡ እልክቱ ፡ ኀምስቱ ፡ ዕደው ፡ እለ ፡ ሖሩ ፡ ቀዲሙ ፡ ከመ ፡ ይርአዩ ፡ ምድረ ፡ ወቦኡ ፡ ህየ ፡ ወነሥኡ ፡ ዝክተ ፡ ምስለ ፡ ወግልፎ ፡ ወቴራፍን ፡ ወስብኮ ፡ ወዝክቱሰ ፡ ካህን ፡ ይቀውም ፡ ኀበ ፡ ኆኅተ ፡ አንቀጽ ፡ ወእልክቱኒ ፡ ፯፻ብእሲ ፡ ይጸውሩ ፡ ንዋየ ፡ ሐቅሎሙ ፡ ቅኑታኒሆሙ ።

18:18  ወቦኡ ፡ እሙንቱ ፡ ዕደው ፡ ውስተ ፡ ቤተ ፡ ሚካ ፡ ወነሥኡ ፡ ዝክተ ፡ ግልፎ ፡ ወምስለ ፡ ወቴራፍን ፡ ወስብኮ ፡ ወይቤሎሙ ፡ ዝክቱ ፡ ካህን ፡ ምንተ ፡ ትገብሩ ፡ አንትሙ ።

18:19  ወይቤልዎ ፡ አርምም ፡ ወደይ ፡ እዴከ ፡ ውስተ ፡ አፉከ ፡ ወነዓ ፡ ምስሌነ ፡ ወትከውነነ ፡ አቡነ ፡ ወካህነ ፡ ቦኑ ፡ ይኄይሰከ ፡ ትኩን ፡ ካህነ ፡ ለአሐዱ ፡ ብእሲ ፡ እምነ ፡ ትኩን ፡ ካህነ ፡ ለነገድ ፡ ወለሕዝበ ፡ እስራኤል ።

18:20  ወተፈሥሐ ፡ ልቡ ፡ ለውእቱ ፡ ካህን ፡ ወነሥአ ፡ ውእተ ፡ ምስለ ፡ ወቴራፍን ፡ ወግልፎ ፡ ወስብኮ ፡ ወቦአ ፡ ማእከለ ፡ ሕዝብ ።

18:21  ወተመይጡ ፡ ወሖሩ ፡ ወነሥኡ ፡ ኵሎ ፡ ቤቶ ፡ ወጥሪቶ ፡ ዘክብሩ ፡ ወነድኡ ፡ ቅድሜሆሙ ።

18:22  ወእንበለ ፡ ይርሐቁ ፡ እምነ ፡ ቤት ፡ መጽአ ፡ ሚካ ፡ ወዕደው ፡ ሕዝብ ፡ እለ ፡ ቅሩበ ፡ ቤቱ ፡ ለሚካ ፡ ወጸርኁ ፡ እምድኅሬሆሙ ፡ ለደቂቀ ፡ ዳን ፡ ወአውየው ፡ ሎሙ ፡ ለደቂቀ ፡ ዳን ።

18:23  ወተመይጡ ፡ ገጾሙ ፡ ደቂቀ ፡ ዳን ፡ ወይቤልዎ ፡ ለሚካ ፡ ምንተ ፡ ኮንከ ፡ ዘትጸርኅ ።

18:24  ወይቤሎሙ ፡ ሚካ ፡ ግልፎየ ፡ ዘገበርኩ ፡ ነሣእክሙኒ ፡ ወካህን[የ]ኒ ፡ ወሖርክሙ ፡ ወምንተ ፡ እንከ ፡ ኀደግሙ ፡ ሊተ ፡ ወትብሉኒ ፡ ምንተ ፡ ትጸርኅ ።

18:25  ወይቤልዎ ፡ ደቂቀ ፡ ዳን ፡ ኢይሰማዕ ፡ እንከ ፡ ቃልከ ፡ ምስሌነ ፡ ወእመአኮሰ ፡ ይትራከቡከ ፡ ዕደው ፡ መሪራነ ፡ ነፍስ ፡ ወተሐጕል ፡ ዓዲ ፡ ነፍስከ ፡ ወነፍሰ ፡ ቤትከ ።

18:26  ወሖሩ ፡ ደቂቀ ፡ ዳን ፡ ፍኖቶሙ ፡ ወርእየ ፡ [ሚካ ፡] ከመ ፡ ይጸንዕዎ ፡ ወተመይጠ ፡ ወአተወ ፡ ቤቶ ።

18:27  ወእሙንቱሰ ፡ ነሥኡ ፡ ኵሎ ፡ ዘገብረ ፡ ሚካ ፡ ወካህነኒ ፡ ወኵሎ ፡ ዘቦ ፡ ወሖሩ ፡ እስከ ፡ ሌሳ ፡ ላዕለ ፡ ሕዝብ ፡ ዕሩፍ ፡ ዘተአሚኖ ፡ ይነብር ፡ ወቀተልዎሙ ፡ በአፈ ፡ ኀፂን ፡ ወሀገሮሙኒ ፡ አውዐዩ ።

18:28  ወአልቦ ፡ ዘድኅነ ፡ እስመ ፡ ርኁቃን ፡ እሙንቱ ፡ እምነ ፡ ሲዶና ፡ ወአልቦሙ ፡ ተልሓፈ ፡ ምስለ ፡ ባዕድ ፡ ሰብእ ፡ ወይእቲሰ ፡ ውስተ ፡ ቈላት ፡ እንተ ፡ ቤተ ፡ ጦብ ፡ ወሐነጽዋ ፡ ለይእቲ ፡ ሀገር ፡ ወነበሩ ፡ ውስቴታ ።

18:29  ወሰመዩ ፡ ስማ ፡ ለይእቲ ፡ ሀገር ፡ ዳን ፡ በስመ ፡ አቡሆሙ ፡ ዳን ፡ ዘተወልደ ፡ ለእስራኤል ፡ ወስማሰ ፡ ለይእቲ ፡ ሀገር ፡ ቀዲሙ ፡ [ሌሳ] ።

18:30  ወአቀሙ ፡ ሎሙ ፡ ደቂቀ ፡ ዳን ፡ ግልፎ ፡ ዘሚካ ፡ ወዮናታን ፡ ወልደ ፡ ጌርሶም ፡ ወልደ ፡ ምናሴ ፡ ውእቱ ፡ ወደቂቁ ፡ ካህናት ፡ እሙንቱ ፡ ለሕዝቦ ፡ ዳን ፡ እስከ ፡ አመ ፡ ፈለሰት ፡ ምድሮሙ ።

18:31  ወአቀሙ ፡ ሎሙ ፡ ግልፎ ፡ ዘሚካ ፡ ዘገብረ ፡ በኵሉ ፡ መዋዕል ፡ አምጣነ ፡ ነበረ ፡ ቤተ ፡ እግዚአብሔር ፡ ውስተ ፡ ሴሎም ።

Chapter 19

19:1  ወበእማንቱ ፡ መዋዕል ፡ አልቦሙ ፡ ንጉሠ ፡ እስራኤል ፡ ወሀለወ ፡ ብእሲ ፡ ሌዋዊ ፡ ወይነብር ፡ ውስተ ፡ አሐዱ ፡ ሕብር ፡ ዘደብረ ፡ ኤፍሬም ፡ ወነሥአ ፡ ሎቱ ፡ ውእቱ ፡ ብእሲ ፡ ብእሲተ ፡ ዕቅብተ ፡ እምነ ፡ ቤተ ፡ ልሔም ፡ ዘይሁዳ ።

19:2  ወተምዕዐቶ ፡ ዕቅብቱ ፡ ወኀደገቶ ፡ ወአተወት ፡ ቤተ ፡ አቡሃ ፡ ቤተ ፡ ልሔም ፡ ዘይሁዳ ፡ ወነበረት ፡ ህየ ፡ መዋዕለ ፡ አርባዕተ ፡ አውራኀ ።

19:3  ወተንሥአ ፡ ምታ ፡ ወሖረ ፡ ወተለዋ ፡ ከመ ፡ ይትዓረቃ ፡ ወያግብኣ ፡ ኀቤሁ ፡ ወቍልዔሁ ፡ ምስሌሁ ፡ ወክልኤቱ ፡ አእዱግ ፡ ወሖረ ፡ ቤተ ፡ አቡሃ ፡ ወርእዮ ፡ አቡሃ ፡ ለይእቲ ፡ ወለት ፡ ወሖረ ፡ ወተቀበሎ ።

19:4  ወአብኦ ፡ ሐሙሁ ፡ አቡሃ ፡ ለብእሲቱ ፡ ወነበረ ፡ ምስሌሁ ፡ ሠሉሰ ፡ መዋዕለ ፡ ወበልዑ ፡ ወሰትዩ ፡ ወቤተ ፡ ህየ ።

19:5  ወእምዝ ፡ አመ ፡ ራብዕት ፡ ዕለት ፡ ነቅሁ ፡ በጽባሕ ፡ ወተንሥአ ፡ ይሑር ፡ ወይቤሎ ፡ አቡሃ ፡ ለይእቲ ፡ ወለት ፡ ለሐሙሁ ፡ አጽንዕ ፡ ልበከ ፡ ወብላዕ ፡ ፍተ ፡ ኅብስት ፡ ወእምዝ ፡ ተሐው[ሩ] ።

19:6  ወነበ[ሩ] ፡ ወበልዑ ፡ ክልኤሆሙ ፡ ኅቡረ ፡ ወሰትዩ ፡ ወይቤሎ ፡ አቡሃ ፡ ለይእቲ ፡ ወለት ፡ ለውእቱ ፡ ብእሲ ፡ ቢት ፡ ዮምኒ ፡ ወይትፌሠሐከ ፡ ልብከ ።

19:7  ወተንሥአ ፡ ውእቱ ፡ ብእሲ ፡ ይሑር ፡ ወአገበሮ ፡ ሐሙሁ ፡ ወካዕበ ፡ ቤተ ፡ ህየ ።

19:8  ወነቅሀ ፡ በጽባሕ ፡ አመ ፡ ኃምስት ፡ ዕለት ፡ ከመ ፡ ይሑር ፡ ወይቤሎ ፡ አቡሃ ፡ ለይእቲ ፡ ወለት ፡ ብላዕ ፡ እክለ ፡ ወእምዝ ፡ ተሐውር ፡ እስከ ፡ ተዐርብ ፡ ፀሐይ ፡ ወበልዑ ፡ ወሰትዩ ፡ ክልኤሆሙ ።

19:9  ወተንሥአ ፡ ውእቱ ፡ ብእሲ ፡ ከመ ፡ ይሑር ፡ ውእቱ ፡ ወዕቅብቱ ፡ ወቍልዔሁ ፡ ወይቤሎ ፡ ሐሙሁ ፡ አቡሃ ፡ ለይእቲ ፡ ወለት ፡ ናሁ ፡ መስየ ፡ ወተቈልቈለ ፡ ፀሐይ ፡ ኅድር ፡ ዝየ ፡ ዮምኒ ፡ ወንበር ፡ ዝየ ፡ ወይትፌሠሐከ ፡ ልብከ ፡ ወትገይሡ ፡ በጽባሕ ፡ ፍኖተክሙ ፡ ወተአቱ ፡ ቤተከ ።

19:10  ወአበየ ፡ ውእቱ ፡ ብእሲ ፡ በይተ ፡ ወተንሥአ ፡ ወሖረ ፡ ወበጽሑ ፡ እስከ ፡ ቅድመ ፡ ኢየቡስ ፡ እንተ ፡ ይእቲ ፡ ኢየሩሳሌም ፡ ወምስሌሁ ፡ ክልኤቱ ፡ አእዱግ ፡ ጽዑናን ፡ ወዕቅብቱኒ ፡ ምስሌሁ ፡ ይእቲ ።

19:11  ወእንዘ ፡ ዓዲሆሙ ፡ ሀለው ፡ አንጻረ ፡ ኢያቡስ ፡ ወፀሐይኒ ፡ ተቈልቈለት ፡ ጥቀ ፡ ወይቤሎ ፡ ቍልዔሁ ፡ ለእግዚኡ ፡ ነዓ ፡ ንግሐሥ ፡ ውስተ ፡ ሀገረ ፡ ኢያቡሴዎን ፡ ዛቲ ፡ ወንቢት ፡ ውስቴታ ።

19:12  ወይቤሎ ፡ እግዚኡ ፡ ኢይግሕሥ ፡ ውስተ ፡ ሀገረ ፡ ነኪር ፡ እንተ ፡ ኢኮነት ፡ ለደቂቀ ፡ እስራኤል ፡ ነኀልፍ ፡ እስከ ፡ ገባኣ ።

19:13  ወይቤሎ ፡ ለቍልዔሁ ፡ ነዓ ፡ ንግሐሥ ፡ ውስተ ፡ አሐዱ ፡ መካን ፡ ወንሕድር ፡ ውስተ ፡ ገባኣ ፡ እንተ ፡ ራማ ።

19:14  ወኀለፉ ፡ ወሖሩ ፡ እስከ ፡ ዐርበ ፡ ፀሐይ ፡ በጺሖሙ ፡ ገባኣ ፡ እንተ ፡ ብንያም ።

19:15  ወግሕሡ ፡ ህየ ፡ ከመ ፡ ይባኡ ፡ ወይኅድሩ ፡ ውስተ ፡ ገባኣ ፡ ወቦኡ ፡ ወነበሩ ፡ ውስተ ፡ መርሕበ ፡ ሀገር ፡ ወአልቦ ፡ ዘያበውኦሙ ፡ ውስተ ፡ ቤት ፡ ወዘያኀድሮሙ ።

19:16  ወመጽአ ፡ ብእሲ ፡ ልሂቅ ፡ እምነ ፡ ግብሩ ፡ ወብእሲሁሰ ፡ እምነ ፡ ደብረ ፡ ኤፍሬም ፡ ወምንባሪሁ ፡ ውስተ ፡ ገባኣ ፡ ወሰብአ ፡ ብሔር[ሰ] ፡ ደቂቀ ፡ ብንያሙ ።

19:17  [ወ]ነጸ[ረ] ፡ በአዕይንቲ[ሁ] ፡ ወርእ[ዮ] ፡ ለዝክቱ ፡ ብእሲ ፡ ነጋዲት ፡ ውስተ ፡ መርሕበ ፡ ሀገር ፡ ወይቤሎ ፡ ዝክቱ ፡ ልሂቅ ፡ አይቴ ፡ ተሐውር ፡ ወእምአይቴ ፡ መጻእከ ።

19:18  ወይቤሎ ፡ ኀላፊት ፡ ንሕነ ፡ እምነ ፡ ቤተ ፡ ልሔም ፡ ዘይሁዳ ፡ እስከ ፡ አመ ፡ ንበጽሕ ፡ ደብረ ፡ ኤፍሬም ፡ እስመ ፡ እምህየ ፡ አነ ፡ ወሖርኩ ፡ እስከ ፡ ቤተ ፡ ልሔም ፡ ዘይሁዳ ፡ ወአአቱ ፡ ቤትየ ፡ ወአልቦ ፡ ዘአግሐሠኒ ፡ ውስተ ፡ ቤቱ ።

19:19  ወሐሠረሰ ፡ ወእክለኒ ፡ ብነ ፡ ለአእዱግነ ፡ ወኅብስተኒ ፡ ወወይነኒ ፡ ብነ ፡ ወለአመትከኒ ፡ ወለቍልዔ ፡ አግብርቲከ ፡ አልቦ ፡ ዘነኀጥእ ፡ እምነ ፡ ኵሉ ፡ መፍቅድነ ።

19:20  ወይቤሎ ፡ ዝክቱ ፡ ብእሲ ፡ ልሂቅ ፡ ሰላም ፡ ለከ ፡ ወኵሉ ፡ ዘአልብከ ፡ ላዕሌየ ፡ ወባሕቱ ፡ ውስተ ፡ መርሕብ ፡ ኢትኅድር ።

19:21  ወአብኦ ፡ ውስተ ፡ ቤቱ ፡ ወአቅመኀ ፡ ለአእዱጊሁ ፡ ወኀፀቡ ፡ እገሪሆሙ ፡ ወበልዑ ፡ ወሰትዩ ።

19:22  ወእምዝ ፡ ሶበ ፡ ተፈሥሖሙ ፡ ልቦሙ ፡ ወናሁ ፡ ደቂቀ ፡ ኃጥኣን ፡ ሰብአ ፡ ሀገር ፡ ዐገትዎ ፡ ለውእቱ ፡ ቤት ፡ ወጐድጐዱ ፡ ኆኅተ ፡ ወይቤልዎ ፡ ለዝክቱ ፡ ብእሲ ፡ ልሂቅ ፡ ባዕለ ፡ ቤት ፡ አውጽኦ ፡ ለዝክቱ ፡ ብእሲ ፡ ዘቦአ ፡ ውስተ ፡ ቤትከ ፡ ከመ ፡ ንሑሮ ።

19:23  ወወፅአ ፡ ኀቤሆሙ ፡ ዝክቱ ፡ ብእሲ ፡ ባዕለ ፡ ቤት ፡ ወይቤሎሙ ፡ ሐሰ ፡ ለክሙ ፡ አኀዊነ ፡ ኢትግበሩ ፡ እኩየ ፡ እምድኅረ ፡ ቦአ ፡ ብእሲ ፡ ውስተ ፡ ቤትየ ፡ ኢትግበሩ ፡ ዛተ ፡ እበደ ።

19:24  ናሁ ፡ ወለትየ ፡ ድንግል ፡ ወዕቅብቱ ፡ ኣውፅኦን ፡ ወአኅስርዎን ፡ ወግበሩ ፡ ላዕሌሆን ፡ ዘይኤድመክሙ ፡ በውስተ ፡ አዕይንቲክሙ ፡ ወላዕለ ፡ ዝክቱ ፡ ብእሲ ፡ ኢትግበሩ ፡ ዘንተ ፡ ነገረ ፡ እበድ ።

19:25  ወኢፈቀዱ ፡ እሙንቱ ፡ ሰብእ ፡ ይስምዕዎ ፡ ወነሥኣ ፡ ዝክቱ ፡ ብእሲ ፡ ለዕቅብቱ ፡ ወአውፅኣ ፡ አፍአ ፡ ኀቤሆሙ ፡ ወአኅሰርዋ ፡ ወተወነይዋ ፡ ኵላ ፡ ሌሊተ ፡ እስከ ፡ ጸብሐ ፡ ወፈነውዋ ፡ ሶበ ፡ ዐርገ ፡ ጎሕ ።

19:26  ወመጽአት ፡ ይእቲ ፡ ብእሲት ፡ በጽባሕ ፡ ወወድቀት ፡ ኀበ ፡ መድረከ ፡ ኆኅት ፡ ዘውእቱ ፡ ብእሲ ፡ ባዕለ ፡ ቤት ፡ ኀበ ፡ ሀለወ ፡ ህየ ፡ እግዚኣ ፡ እስከ ፡ ጸብሐ ።

19:27  ወተንሥአ ፡ እግዚኣ ፡ በጽባሕ ፡ ወአርኀወ ፡ ኆኅተ ፡ ውእቱ ፡ ቤት ፡ ወወፅአ ፡ ከመ ፡ ይሑር ፡ ፍኖቶ ፡ ወረከባ ፡ ለዕቅብቱ ፡ ውድቅተ ፡ ኀበ ፡ ኆኅተ ፡ ውእቱ ፡ ቤት ፡ ወእደዊሃ ፡ ላዕለ ፡ መድረክ ።

19:28  ወይቤላ ፡ ተንሥኢ ፡ ንሑር ፡ ወኢያውሥአቶ ፡ እስመ ፡ ሞተት ፡ ወጸዐና ፡ ዲበ ፡ አድግ ፡ ወተንሥአ ፡ ውእቱ ፡ ብእሲ ፡ ወአተወ ፡ ብሔሮ ።

19:29  ወቦአ ፡ ቤቶ ፡ ወነሥአ ፡ መጥባሕተ ፡ ወአኀዛ ፡ ለዕቅብቱ ፡ ወመተራ ፡ እምነ ፡ መለያልየ ፡ አዕጽምቲሃ ፡ ዐሠርተ ፡ ወክልኤተ ፡ ክፍለ ፡ ረሰያ ፡ ወፈነዋ ፡ ውስተ ፡ ሕዝበ ፡ እስራኤል ።

19:30  ወእምዝ ፡ ኵሉ ፡ ዘርእያ ፡ ይቤ ፡ አልቦ ፡ አመ ፡ ኮነ ፡ ከመዝ ፡ ወአልቦ ፡ አመ ፡ አስተርአየ ፡ እምአመ ፡ ወፅኡ ፡ እስራኤል ፡ እምነ ፡ ግብጽ ፡ እስብ ፡ ዮም ። ወአዘዞሙ ፡ ለእልክቱ ፡ ሰብእ ፡ እለ ፡ ፈነዎሙ ፡ ወይቤሎሙ ፡ ከመዝ ፡ በልዎሙ ፡ ለኵሉ ፡ ሰብአ ፡ እስራኤል ፡ ቦኑአ ፡ አመአ ፡ ኮነአ ፡ ከመዝአ ፡ እምአመአ ፡ ወፅኡአ ፡ ደቂቀ ፡ አስራኤልአ ፡ እምነአ ፡ ግብጽአ ፡ እስከአ ፡ ዮምአ ፡ ወረስዩአ ፡ ለክሙአ ፡ ምክረአ ፡ ወተናገሩአ ።

Chapter 20

20:1  ወወፅኡ ፡ ኵሎሙ ፡ ደቂቀ ፡ እስራኤል ፡ ወአንገለጉ ፡ ተጋቢኦሙ ፡ ኵሎሙ ፡ ማኅበሮሙ ፡ ከመ ፡ አሐዱ ፡ ብእሲ ፡ እምነ ፡ ዳን ፡ እስከ ፡ ቤርሳቤሕ ፡ ወገላአድኒ ፡ ውስተ ፡ መሴፋ ።

20:2  ወቆመ ፡ ኵሉ ፡ ሕዝብ ፡ ወኵሉ ፡ ነገደ ፡ እስራኤል ፡ ውስተ ፡ ማኅበረ ፡ ኵሉ ፡ ሕዝቡ ፡ ለእግዚአብሔር ፡ አርብዓ ፡ እልፍ ፡ አጋር ፡ ዘይጸውር ፡ ኵናተ ።

20:3  ወሰምዑ ፡ ደቂቀ ፡ ብንያም ፡ ከመ ፡ ተጋብኡ ፡ ደቂቀ ፡ እስራኤል ፡ ውስተ ፡ መሴፋ ፡ ወይቤሉ ፡ ደቂቀ ፡ እስራኤል ፡ አይድዑ ፡ በአይቴ ፡ ኮነት ፡ ዛቲ ፡ እኪት ።

20:4  ወአውሥአ ፡ ዝክቱ ፡ ብእሲ ፡ ሌዋዊ ፡ ምታ ፡ ለእንታክቲ ፡ ብእሲት ፡ እንተ ፡ ቀተሉ ፡ ወይቤ ፡ በገባአ ፡ ዘብንያሚ ፡ መጻእኩ ፡ አነ ፡ ወዕቅብትየ ፡ ንኅድር ።

20:5  ወተንሥኡ ፡ ላዕሌነ ፡ ሰብአ ፡ ገባኣ ፡ ወዐገቱ ፡ ዲቤነ ፡ ውእተ ፡ ቤተ ፡ ሌሊተ ፡ ወኪያየኒ ፡ ፈቀዱ ፡ ይቅትሉኒ ፡ ወለዕቅብትየሰ ፡ አኅሰርዋ ፡ ወተወነይዋ ፡ ወሞተት ።

20:6  ወነሣእክዋ ፡ ለዕቅብትየ ፡ ወመተርክዋ ፡ በበ ፡ መለያልያ ፡ ወፈነውኩ ፡ ውስተ ፡ ኵሉ ፡ ደወለ ፡ ርስቶሙ ፡ ለእስራኤል ፡ እስመ ፡ ገብሩ ፡ እበደ ፡ ውስተ ፡ እስራኤል ።

20:7  ወናሁ ፡ ኵልክሙ ፡ አንትሙ ፡ ደቂቀ ፡ እስራኤል ፡ ዝየ ፡ አቅሙ ፡ ለክሙ ፡ [ቃለ ፡] ወምክረ ።

20:8  ወቆሙ ፡ ኵሉ ፡ ሕዝብ ፡ ከመ ፡ አሐዱ ፡ ብእሲ ፡ ወይቤሉ ፡ ኢነአቱ ፡ አብያቲነ ፡ ወኢንገብእ ፡ በሓውርቲነ ።

20:9  ወይእዜኒ ፡ ከመዝ ፡ ግበሩ ፡ ላዕለ ፡ ገባአ ፡ ነዐርግ ፡ ላዕሌሆሙ ፡ በበ ፡ መክፈልትነ ።

20:10  ወንነሥእ ፡ በበ ፡ ዐሠርቱ ፡ ዕደው ፡ ለለ ፡ ምእት ፡ ለኵሉ ፡ ሕዝበ ፡ እስራኤል ፡ ከማሁ ፡ ወምእተ ፡ ለዐሠርቱ ፡ ምእት ፡ ወዐሠርቱ ፡ ምእት ፡ ለእልፍ ፡ እለ ፡ ይጸውሩ ፡ ሥንቀ ፡ ለሕዝብ ፡ ውስተ ፡ ፍኖት ፡ ለእለ ፡ የሐውሩ ፡ ይትቃተልዎሙ ፡ ለገባኣ ፡ [ዘ]ብንያሚ ፡ በበይነ ፡ ኵሉ ፡ እበድ ፡ እንተ ፡ ገብሩ ፡ ላዕለ ፡ እስራኤል ።

20:11  ወተጋብኡ ፡ ኵሉ ፡ እስራኤል ፡ እምነ ፡ አህጉሪሆሙ ፡ ከመ ፡ ይባኡ ።

20:12  ወለአኩ ፡ ሕዝበ ፡ እስራኤል ፡ ውስተ ፡ ኵሉ ፡ ነገደ ፡ ብንያሚ ፡ እንዘ ፡ ይብሉ ፡ ምንትአ ፡ ዛቲአ ፡ እኪትአ ፡ እንተአ ፡ ኮነትአ ፡ በውስቴትክሙአ ።

20:13  ወይእዜኒአ ፡ አግብኡአ ፡ ዕደወአ ፡ እለአ ፡ አበሱአ ፡ በገባአ ፡ ደቂቀአ ፡ በለዓምአ ፡ ወንትቃቴሎሙአ ፡ ወናውፅእአ ፡ እኪተአ ፡ እምነ ፡ እስራኤልአ ፡ ወአበዩ ፡ ደቂቀ ፡ ብንያሚ ፡ ሰሚዖቶሙ ፡ ለአኀዊሆሙ ፡ ለደቂቀ ፡ እስራኤል ።

20:14  ወተጋብኡ ፡ ደቂቀ ፡ ብንያሚ ፡ እምነ ፡ አህጉሪሆሙ ፡ ውስተ ፡ ገባኣ ፡ ከመ ፡ ይፃኡ ፡ ወይትቃተልዎሙ ፡ ለደቂቀ ፡ እስራኤል ።

20:15  ወተኈለቁ ፡ ደቂቀ ፡ ብንያሚ ፡ በይእቲ ፡ ዕለት ፡ እምነ ፡ አህጉሪሆሙ ፡ ክልኤ ፡ እልፍ ፡ ወኀምሳ ፡ ምእት ፡ ብእሲ ፡ እለ ፡ ይጸውሩ ፡ ኵናተ ፡ እንበለ ፡ እለ ፡ ይነብሩ ፡ ውስተ ፡ ገባኣ ።

20:16  ወእሙንቱኒ ፡ ተኈለቁ ፡ ሰብዐቱ ፡ ምእት ፡ ወራዙት ፡ ኅሩያን ፡ እለ ፡ ክልኤሆን ፡ እደዊሆሙ ፡ የማንያን ፡ ኵሎሙ ፡ ወኵሎሙ ፡ እሉ ፡ ወፃፍያን ፡ በሞፀፍተ ፡ እብን ፡ ወየሀይጱ ፡ ሥዕርተ ፡ ወኢይስሕቱ ።

20:17  ወተኈለቁ ፡ ኵሎሙ ፡ ደቂቀ ፡ እስራኤል ፡ እንበለ ፡ ደቂቀ ፡ ብንያሚ ፡ ፵፻-፻ብእሲ ፡ ጸዋሬ ፡ ኵናት ፡ ወኵሎሙ ፡ እሉ ፡ ዕደው ፡ መስተቃትላን ።

20:18  ወተንሥኡ ፡ ወዐርጉ ፡ ውስተ ፡ ቤቴል ፡ ወተስእሉ ፡ ኀበ ፡ እግዚአብሔር ፡ ወይቤሉ ፡ ደቂቀ ፡ እስራኤል ፡ መኑ ፡ የዐርግ ፡ ለነ ፡ መስፍነ ፡ ዘይትቃተሎሙ ፡ ለነ ፡ ለብንያሚ ፡ ወይቤሎሙ ፡ እግዚአብሔር ፡ ይሁዳ ፡ ይዕርግ ፡ ለክሙ ፡ መስፍነ ።

20:19  ወተንሥኡ ፡ ደቂቀ ፡ እስራኤል ፡ ወኀደሩ ፡ ላዕለ ፡ ገባአ ።

20:20  ወወፅኡ ፡ ኵሎሙ ፡ ዕደወ ፡ እስራኤል ፡ ውስተ ፡ ቀትል ፡ ምስለ ፡ ብንያሚ ፡ ወተአኀዝዎሙ ፡ በገባኣ ።

20:21  ወወፅኡ ፡ ደቂቀ ፡ ብንያሚ ፡ እምነ ፡ ሀገር ፡ ወቀተሉ ፡ እምነ ፡ እስራኤል ፡ ክልአ ፡ እልፈ ፡ ወዕሥራ ፡ ምእተ ፡ ብእሴ ፡ ይእተ ፡ አሚረ ፡ እለ ፡ ወድቁ ፡ ውስተ ፡ ምድር ።

20:22  ወተጸንዑ ፡ ደቂቀ ፡ እስራኤል ፡ ወደገሙ ፡ ወፅኡ ፡ ይትቃተሉ ፡ ውስተ ፡ ዝክቱ ፡ መካን ፡ ኀበ ፡ ተቃተሉ ፡ አመ ፡ ቀዳሚት ፡ ዕለት ፡ ህየ ።

20:23  ወዐርጉ ፡ ደቂቀ ፡ እስራኤል ፡ ወበከዩ ፡ ቅድመ ፡ እግዚአብሔር ፡ እስከ ፡ ሰርክ ፡ ወተስእሉ ፡ ኀበ ፡ እግዚአብሔር ፡ ወይቤሉ ፡ ንድግምኑ ፡ ዓዲ ፡ ተቃትሎ ፡ ምስለ ፡ ብንያሚ ፡ እኁነ ፡ ወይቤሎሙ ፡ እግዚአብሔር ፡ ዕረጉ ፡ ኀቤሆሙ ።

20:24  ወመጽኡ ፡ ደቂቀ ፡ እስራኤል ፡ ኀበ ፡ ብንያሚ ፡ አመ ፡ ሳኒት ፡ ዕለት ።

20:25  ወወፅኡ ፡ ብንያሚ ፡ ወተቀበሎሙ ፡ አመ ፡ ሳኒት ፡ ዕለት ፡ እምነ ፡ ገባአ ፡ ወቀተሉ ፡ እምኔሆሙ ፡ እልፈ ፡ ወሰማንያ ፡ ምእተ ፡ ብእሴ ፡ እለ ፡ ወድቁ ፡ ውስተ ፡ ምድር ፡ ወኵሎሙ ፡ እለ ፡ ይጸውሩ ፡ ኵናተ ።

20:26  ወዐርጉ ፡ ኵሎሙ ፡ ደቂቀ ፡ እስራኤል ፡ ወኵሉ ፡ ሕዝብ ፡ ወሖሩ ፡ ቤቴል ፡ ወበከዩ ፡ ወነበሩ ፡ ህየ ፡ ቅድመ ፡ እግዚአብሔር ፡ ወጾሙ ፡ ሕዝብ ፡ እስከ ፡ ሰርክ ፡ ወአዕረጉ ፡ መሥዋዕተ ፡ መድኀኒት ፡ ለእግዚአብሔር ።

20:27  ወተስእሉ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወሀለወት ፡ ህየ ፡ ታቦተ ፡ እግዚአብሔር ፡ በእማንቱ ፡ መዋዕል ።

20:28  ወፊንሐስ ፡ ወልደ ፡ እልዓዛር ፡ ወልደ ፡ አሮን ፡ ይቀውም ፡ ቅድሜሃ ፡ በእማንቱ ፡ መዋዕል ፡ ወይቤሉ ፡ ንድግምኑ ፡ ዓዲ ፡ ወፂኦ ፡ ውስተ ፡ ቀትል ፡ ምስለ ፡ ደቂቀ ፡ ብንያሚ ፡ እኁነ ፡ አው ፡ ንኅድግ ፡ ወይቤሎሙ ፡ እግዚአብሔር ፡ ዕረጉ ፡ እስመ ፡ ጌሠመ ፡ ኣገብኦሙ ፡ ውስተ ፡ እዴክሙ ።

20:29  ወአንበሩ ፡ ደቂቀ ፡ እስራኤል ፡ እለ ፡ የዐግትዋ ፡ ለገባአ ፡ ዐውዳ ።

20:30  ወተአኀዝዎሙ ፡ እስራኤል ፡ ለብንያሚ ፡ አመ ፡ ሣልስት ፡ ዕለት ፡ ወተቃተልዎሙ ፡ በኀበ ፡ ገባአ ፡ ከመ ፡ ቀዲሙ ።

20:31  ወወፅኡ ፡ ደቂቀ ፡ ብንያሚ ፡ ተቀበልዎሙ ፡ ለሕዝብ ፡ ወጐዩ ፡ እምኀበ ፡ ሀገር ፡ ወአኀዙ ፡ ይትቃተሉ ፡ እምነ ፡ ሕዝብ ፡ ከመ ፡ ቀዲሙ ፡ በውስተ ፡ ፍኖት ፡ አሐቲ ፡ እንተ ፡ ታዐርግ ፡ ለቤቴል ፡ ወአሐቲ ፡ እንተ ፡ ታዐርግ ፡ ለገባኣ ፡ በውስተ ፡ ገዳም ፡ የአክሉ ፡ ፴ብእሲ ፡ እምነ ፡ እስራኤል ።

20:32  ወይቤሉ ፡ ደቂቀ ፡ ብንያሚ ፡ ይመውቱ ፡ ቅድሜነ ፡ ከመ ፡ ቀዲሙ ፡ ወይቤሉ ፡ ደቂቀ ፡ እስራኤል ፡ ንጐይይ ፡ ወናርሕቆሙ ፡ እምነ ፡ ሀገር ፡ ውስተ ፡ ፍናዌ ።

20:33  ወተንሥኡ ፡ ኵሎሙ ፡ ዕደወ ፡ እስራኤል ፡ እምነ ፡ መካኖሙ ፡ ወተቃተሉ ፡ በበዓልታመር ፡ ወማዕገቶሙኒ ፡ ለእስራኤል ፡ ተባአሱ ፡ በመካኖሙ ፡ እምነ ፡ ዐረቢሃ ፡ ለገባኣ ።

20:34  ወገብኡ ፡ እንተ ፡ ቅድሜሃ ፡ ለገባኣ ፡ እልፍ ፡ ብእሲ ፡ ኅሩያን ፡ እምነ ፡ እስራኤል ፡ ወጸንዐ ፡ ቀትል ፡ ወእሙንቱሰ ፡ ኢያእመሩ ፡ ከመ ፡ በጽሐቶሙ ፡ እከይሆሙ ።

20:35  ወአውደቆሙ ፡ እግዚአብሔር ፡ ለብንያሚ ፡ ቅድመ ፡ እስራኤል ፡ ወቀተልወሙ ፡ ደቂቀ ፡ እስራኤል ፡ ለብንያሚ ፡ ፪፻-፻ወ፶ወ፩፻ወኵሎሙ ፡ እሉ ፡ እለ ፡ ይጸውሩ ፡ ኵናተ ።

20:36  ወርእየ ፡ ብንያሚ ፡ ከመ ፡ ተቀትለ ፡ ወወሀብዎሙ ፡ እስራኤል ፡ መካነ ፡ እስመ ፡ ተአመኑ ፡ በማዕገቶሙ ፡ ዘሤሙ ፡ ላዕለ ፡ ገባአ ።

20:37  ወሖሩ ፡ እልክቱ ፡ እለ ፡ ዐገቱ ፡ ወቀተልዋ ፡ ለሀገር ፡ በአፈ ፡ ሐፂን ።

20:38  ወአዘዝዎሙ ፡ እስራኤል ፡ ለእለ ፡ የዐግቱ ፡ ከመ ፡ በኀፂን ፡ ይቅትልዎሙ ፡ ወያዕርግዎ ፡ ለጢሰ ፡ ሀገር ፡ ከመ ፡ ማኅፈድ ።

20:39  ወተመይጡ ፡ ዕደወ ፡ እስራኤል ፡ በውስተ ፡ ቀትል ፡ ወለብንያምሰ ፡ አኀዝዎ ፡ ይቅትልዎ ፡ ዕደወ ፡ እስራኤል ፡ የአክሉ ፡ ስድስተ ፡ ምእተ ፡ ብእሲ ፡ እስመ ፡ ይቤ ፡ እንበለ ፡ ይቅትሉኒ ፡ ቀተልክዎሙ ፡ በቅድሜየ ፡ ከመ ፡ ቀትለ ፡ ቀዲሙ ።

20:40  ወዝክቱ ፡ ማኅፈደ ፡ ጢስ ፡ እምነ ፡ ሀገር ፡ ከመ ፡ ዐምድ ፡ ወነጸረ ፡ ብንያሚ ፡ ድኅሬሁ ፡ ወናሁ ፡ ዐርገ ፡ ጥፍዐተ ፡ ሀገር ፡ ውስተ ፡ ሰማይ ።

20:41  ወተመይጡ ፡ ዕደወ ፡ እስራኤል ፡ ወተወላወሉ ፡ ዕደወ ፡ ብንያሚ ፡ ወርእዩ ፡ ከመ ፡ በጽሐቶሙ ፡ እከይሆሙ ።

20:42  ወነትዑ ፡ ቅድሜሆሙ ፡ ለእስራኤል ፡ ውስተ ፡ ፍኖተ ፡ ገዳም ፡ ወበጽሖሙ ፡ ቀትል ፡ ወእለሂ ፡ እምነ ፡ አህጉር ፡ ቀተልዎሙ ፡ በማእከሎሙ ።

20:43  ወቀተልዎሙ ፡ ለብንያሚ ፡ ወአጥፍእዎሙ ፡ ወደምስሶ ፡ ደምሰስዎሙ ፡ በቅድመ ፡ ገባአ ፡ እመንገለ ፡ ጽባሒሃ ።

20:44  ወወድቁ ፡ እምነ ፡ ብንያሚ ፡ እልፍ ፡ ወሰማንያ ፡ ምእት ፡ ብእሲ ፡ ወኵሎሙ ፡ እሉ ፡ ጽኑዓን ፡ ዕደው ።

20:45  ወነትዑ ፡ ወጐዩ ፡ ኀበ ፡ ኰኵሐ ፡ ሬሞን ፡ ወአረይዎሙ ፡ ኀምሳ ፡ ምእተ ፡ ብእሲ ፡ ወዴገንዎሙ ፡ ወተለውዎሙ ፡ እስከ ፡ [ጌዴአም ፡] ወቀተሉ ፡ እምኔሆሙ ፡ ፳፻ብእሴ ።

20:46  ወኮኑ ፡ ኵሎሙ ፡ እለ ፡ ወድቁ ፡ እምነ ፡ ብንያሚ ፡ ፪፻-፻ወ፶፻ብእሲ ፡ እለ ፡ ይጸውሩ ፡ ኵናተ ፡ በይእቲ ፡ ዕለት ፡ ወኵሎሙ ፡ እሉ ፡ ዕደው ፡ ጽኑዓን ።

20:47  ወነትዑ ፡ ወጐዩ ፡ ውስተ ፡ ኰኵሐ ፡ ሬሞን ፡ ስድስቱ ፡ ምእት ፡ ብእሲ:ወነበሩ ፡ ውስተ ፡ ኰኵሐ ፡ ሬሞን ፡ አርባዕተ ፡ አውራኀ ።

20:48  ወዐጸውዎሙ ፡ ሰብአ ፡ እስራኤል ፡ ለደቂቀ ፡ ብንያሚ ፡ ወቀተልዎሙ ፡ በአፈ ፡ ኀፂን ፡ ወለሀገሮሙኒ ፡ ወለእንስሳሆሙ ፡ ወኵሉ ፡ ዘተረክበ ፡ ውስተ ፡ አህጉር ፡ ወአህጉሪሆሙ ፡ እለ ፡ ረከቡ ፡ አውዐይዎን ፡ በእሳት ።

Chapter 21

21:1  ወተማሐሉ ፡ ሰብአ ፡ እስራኤል ፡ በመሴፋ ፡ እንዘ ፡ ይብሉ ፡ ከመ ፡ ኢየሀብ ፡ ብእሲ ፡ እምኔነ ፡ ወለቶ ፡ ለብንያሚ ፡ ያስተዋስብ ።

21:2  ወሖሩ ፡ ኵሉ ፡ ሕዝብ ፡ ውስተ ፡ መሴፋ ፡ ወውስተ ፡ ቤቴል ፡ ወነበሩ ፡ እስከ ፡ ሰርክ ፡ ቅድመ ፡ እግዚአብሔር ፡ ወጸርኁ ፡ ወበከዩ ፡ ዐቢየ ፡ ብካየ ።

21:3  ወይቤሉ ፡ ለምንት ፡ እግዚኦ ፡ ኮነት ፡ ዛቲ ፡ በውስተ ፡ እስራኤል ፡ ከመ ፡ ትፃእ ፡ ዮም ፡ አሐቲ ፡ ሕዝብ ፡ እምነ ፡ እስራኤልል ።

21:4  ወእምዝ ፡ በሳኒታ ፡ ጌሡ ፡ ሕዝብ ፡ ወነደቁ ፡ ህየ ፡ ምሥዋዐ ፡ ወአዕረጉ ፡ መሥዋዕተ ፡ መድኀኒት ።

21:5  ወይቤሉ ፡ ደቂቀ ፡ እስራኤል ፡ መኑ ፡ ዘኢዐርገ ፡ እምነ ፡ ማኅበር ፡ እምነ ፡ ኵሉ ፡ ሕዝበ ፡ እስራኤል ፡ ኀበ ፡ እግዚአብሔር ፡ እስመ ፡ ዐቢይ ፡ መሐላሆሙ ፡ ከመ ፡ ዘኢዐርገ ፡ ኀበ ፡ እግዚአብሔር ፡ ውስተ ፡ መሴፋ ፡ ሞተ ፡ ይሙት ፡ ይቤሉ ።

21:6  ወተዓረቅዎ ፡ ደቂቀ ፡ እስራኤል ፡ ለብንያሚ ፡ እኁሆሙ ፡ ወይቤሉ ፡ ትወፅእኑ ፡ ዮም ፡ አሐቲ ፡ ሕዝብ ፡ እምነ ፡ እስራኤል ።

21:7  ምንተ ፡ እንከ ፡ ንሬስዮሙ ፡ ለእለ ፡ ተርፉ ፡ በእንተ ፡ አንስት ፡ ናሁ ፡ መሐልነ ፡ ንሕነ ፡ በእግዚአብሔር ፡ ከመ ፡ ኢነሀቦሙ ፡ እምነ ፡ አዋልዲነ ፡ ያውስቡ ።

21:8  ወይቤሉ ፡ መኑ ፡ እምነ ፡ አሐቲ ፡ ሕዝበ ፡ እስራኤል ፡ ዘኢዐርገ ፡ ኀበ ፡ እግዚአብሔር ፡ ውስተ ፡ መሴፋ ፡ ወናሁ ፡ አሐዱ ፡ ብእሲ ፡ ኢመጽአ ፡ እምነ ፡ ኢያቢስ ፡ ዘገላአድ ፡ ውስተ ፡ ማኅበሮሙ ።

21:9  ወተፋቀዱ ፡ ሕዝብ ፡ ወናሁ ፡ ፩ብእሲ ፡ ዘእምነ ፡ ኢያቢስ ፡ ዘገላአድ ፡ ኢሀለወ ።

21:10  ወለአኩ ፡ ህየ ፡ ማኅበሮሙ ፡ እልፈ ፡ ወዕሥራ ፡ ምእተ ፡ ብእሴ ፡ እምነ ፡ ደቂቀ ፡ ኀይል ፡ ወአዘዝዎሙ ፡ እንዘ ፡ ይብሉ ፡ ሑሩ ፡ ወቅትሉ ፡ ኵሎ ፡ እለ ፡ ይነብሩ ፡ ውስተ ፡ ኢያቤስ ፡ ዘገላአድ ፡ በአፈ ፡ ኀፂን ፡ ወአንስተኒ ፡ ወሕዝበኒ ።

21:11  ወከመዝ ፡ ግበሩ ፡ ኵሎ ፡ ተባዕተ ፡ ወኵሎ ፡ አንስተ ፡ አለ ፡ ያአምራ ፡ ብእሴ ፡ ቅትሉ ።

21:12  ወረከቡ ፡ እምነ ፡ እለ ፡ ይነብሩ ፡ ውስተ ፡ [ኢያቤስ ፡ ዘ]ገላአድ ፡ አርባዕተ ፡ ምእተ ፡ አዋልደ ፡ ደናግለ ፡ እለ ፡ ኢያእመራ ፡ ብእሴ ፡ ወአምጽእዎን ፡ ውስተ ፡ ትዕይንት ፡ ውስተ ፡ ሴሎ ፡ ውስተ ፡ ምድረ ፡ ከናአን ።

21:13  ወለአኩ ፡ ኵሉ ፡ ማኅበሮሙ ፡ ኀበ ፡ ብንያሚ ፡ እለ ፡ ውስተ ፡ ኰኵሐ ፡ ሬሞን ፡ ወጸውዕዎሙ ፡ ለሰላም ።

21:14  ወገብአ ፡ ብንያሚ ፡ ኀበ ፡ ደቂቀ ፡ እስራኤል ፡ በእማንቱ ፡ መዋዕል ፡ ወወሀብዎሙ ፡ አንስተ ፡ እለ ፡ እምነ ፡ አንስተ ፡ ኢያቤስ ፡ ዘገላአድ ፡ ወሠምሩ ፡ በዝንቱ ።

21:15  ወሕዝብኒ ፡ ተኳነንዎሙ ፡ ለብንያሚ ፡ እስመ ፡ ገብረ ፡ እግዚአብሔር ፡ ቀትለ ፡ ውስተ ፡ ሕዝበ ፡ እስራኤል ።

21:16  ወይቤሉ ፡ ሊቃናተ ፡ ማኅበር ፡ ምንተ ፡ ንገብር ፡ በእንተ ፡ እለ ፡ ተርፉ ፡ በበይነ ፡ አንስት ፡ እስመ ፡ ጠፍአ ፡ አንስት ፡ እምነ ፡ ብንያሚ ።

21:17  ወይቤሉ ፡ ርስት ፡ ተርፈ ፡ ለብንያሚ ፡ ወኢትደምሰስ ፡ ሕዝብ ፡ እምነ ፡ እስራኤል ።

21:18  ወንሕነኒ ፡ ኢንክል ፡ ውሂቦቶሙ ፡ አንስተ ፡ እምነ ፡ አዋልዲነ ፡ እስመ ፡ መሐልነ ፡ ደቂቀ ፡ እስራኤል ፡ እንዘ ፡ ንብል ፡ ርጉም ፡ ውእቱ ፡ ዘይሁብ ፡ ብእሲተ ፡ ለብንያሚ ።

21:19  ወይቤሉ ፡ በዓለ ፡ እግዚአብሔር ፡ በሴሎ ፡ እምነ ፡ መዋዕል ፡ በበ ፡ መዋዕሊሁ ፡ ውእቱ ፡ እመንገለ ፡ መስዐ ፡ ቤቴል ፡ ወጽባሒሃ ፡ ለፍኖት ፡ እንተ ፡ ታዐርግ ፡ እምነ ፡ ቤቴል ፡ ለሲቂማ ፡ ወእመንገለ ፡ አዜባ ፡ ለሌቦና ።

21:20  ወአዘዝዎሙ ፡ ለደቂቀ ፡ ብንያሚ ፡ ወይቤልዎሙ ፡ ሑሩ ፡ ወዕግቱ ፡ ውስተ ፡ አዕጻደ ፡ ወይን ።

21:21  ወተዐቀቡ ፡ አዋልዲሆሙ ፡ ለእለ ፡ ይነብሩ ፡ ውስተ ፡ ሴሎ ፡ እንዘ ፡ ይትዌነያ ፡ በመሰንቆ ፡ ወትወፅኡ ፡ እምነ ፡ አዕጻደ ፡ ወይን ፡ ወምስጡ ፡ ለክሙ ፡ አንስተ ፡ እምነ ፡ አዋልደ ፡ ሴሎ ፡ ወእትው ፡ ውስተ ፡ ብንያሚ ።

21:22  ወለእመ ፡ መጽኡ ፡ አበዊሆን ፡ ወአኀዊሆን ፡ ይሰነኑክሙ ፡ ንብሎሙ ፡ መሐርዎሙ ፡ እስመ ፡ ኢያውፅኡ ፡ አንስቲያሆሙ ፡ እምነ ፡ ቀትል ፡ እስመ ፡ አኮ ፡ አንትሙ ፡ ዘወሀብክምዎሙ ፡ በእማንቱ ፡ መዋዕል ፡ ኢትነስሑ ።

21:23  ወገብሩ ፡ ከማሁ ፡ ደቂቀ ፡ ብንያሚ ፡ ወነሥኡ ፡ አንስተ ፡ በኍልቆሙ ፡ እምነ ፡ እለ ፡ ይትዌነያ ፡ ተመሰጥዎን ፡ ወአተው ፡ ወገብኡ ፡ ውስተ ፡ ርስቶሙ ፡ ወነደቁ ፡ ሎሙ ፡ አህጉረ ፡ ወነበሩ ፡ ውስቴቶን ።

21:24  ወአተው ፡ እምህየ ፡ ደቂቀ ፡ እስራኤል ፡ ብእሲ ፡ ብእሲ ፡ ውስተ ፡ ሕዝቡ ፡ ወውስተ ፡ ነገዱ ፡ ወአተው ፡ እምህየ ፡ ብእሲ ፡ ብእሲ ፡ ውስተ ፡ ርስቱ ።

21:25  ወበእማንቱ ፡ መዋዕል ፡ አልቦሙ ፡ ንጉሠ ፡ እስራኤል ፡ ብእሲ ፡ ብእሲ ፡ ዘአደሞ ፡ ቅድመ ፡ አዕይንቲሁ ፡ ይገብር ። (ተፈጸመ ፡ ኦሪት ፡ ዘመሳፍንት ።)