Kapingamarangi - Judges

Chapter 1

1:1  I-muli di made Joshua, digau Israel ga-heeu gi Dimaadua, “Ma go di madawaawa behee i gimaadou ala e-hula matagidagi e-heebagi gi digau Canaan?”

1:2  Dimaadua ga-helekai, “Di madawaawa Judah e-hana matagidagi. Au gaa-wanga gi digaula gi-dagia tenua deelaa.”

1:3  Nia daangada o Judah ga-helekai gi-nia daangada o Simeon, “Lloomoi dalia gimaadou gi tenua dela gu-dugu-mai gi gimaadou, gei gidaadou ga-heebagi ngaadahi gi-nia daangada o Canaan. Gei gimaadou gaa-hula dalia goodou gi tenua dela gu-dugu-adu gi goodou.” Malaa, go nia madawaawa Simeon

1:4  mo Judah gaa-hula ga-heebagi ngaadahi. Dimaadua guu-hai digaula gi-aali i digau Canaan mo Perizzite, gu-haga-magedaa nadau daane e-madangaholu mana-(10,000) i Bezek.

1:5  Digaula gaa-gida Adonibezek i-golo ga-heebagi gi mee.

1:6  Mee gaa-lele gi-daha, gei digaula ga-waluwalu a-mee gaa-kumi gaa-tuu gi-daha ono madaalima mmaadua mono madaawae mmaadua.

1:7  Adonibezek ga-helekai, “Nia king e-madahidu guu-tuu gi-daha nadau madaalima mono madaawae mmaadua nogo ogoogo nadau meegai monnono i-lala dagu deebele. Dolomeenei God gu-hai-mai gi-di-au dagu hai nogo hai gi digaula.” Gei mee guu-lahi gi Jerusalem gaa-made i-golo.

1:8  Nia daangada o Judah gu-heebagi gi Jerusalem guu-kumi di-maa. Digaula gu-daaligi ono daangada gii-mmade, guu-dudu di waahale.

1:9  Muli di mee deenei ne-hai, digaula gaa-hula ga-heebagi gi digau Canaan ala e-noho i-nia guongo gonduu, mo i-tomo nia gonduu, mo i-nia gowaa maangoo i-baahi ngaaga.

1:10  Digaula gaa-hula belee heebagi gi digau Canaan ala e-noho i-lodo di waahale Hebron, dela nogo haga-ingoo bolo Kiriath=Arba. Digaula ga-haga-magedaa nia madahaanau o Sheshai, Ahiman, mo Talmai.

1:11  Nia daane o Judah ga-hagatanga mai i-golo, gaa-hula belee heebagi gi-di waahale Debir, dela nogo haga-ingoo bolo Kiriath=Sepher.

1:12  Tangada e-dahi i digaula go Caleb ga-helekai, “Au gaa-wanga dagu dama-ahina go Achsah e-lodo gi tangada ma-gaa-kumi di waahale go Kiriath=Sepher.”

1:13  Othniel, tama-daane ni tuaahina-daane Caleb dulii go Kenaz, gaa-kumi di waahale, gei Caleb gaa-wanga dana dama-ahina go Achsah gi-lodo ginai.

1:14  Di laangi ne-hai taga-hai-lodo, Othniel gaa-hai gi tama-ahina gi-madau-ina di gowaa gi dono damana. Tama-ahina gaa-doo gi-lala mo dana manu ‘donkey’, gei Caleb ga-heeu gi mee be di-maa di-aha dela e-hiihai gineia.

1:15  Tama-ahina ga-helekai, “Au e-hiihai gi hunu madapua wai. Di gowaa ne-gaamai kooe le e-maangoo.” Gei Caleb gaa-wanga gi mee nia monowai uwa-aga i-bahi-i-nua mo i-bahi-i-lala.

1:16  Di hagadili o tamana di lodo Moses go tangada Kenite, guu-hula dalia digau o Judah mai Jericho, di waahale o-di waa-niu, gaa-hula gi-lodo di anggowaa i-bahi-i-ngaaga o Arad i Judah. Digaula gaa-noho i-golo i-baahi digau Amalek.

1:17  Nia daane Judah guu-hula dalia nia daane Simeon, gei digaula gu-haga-magedaa digau Canaan ala nogo noho i-lodo di waahale Zephath. Digaula gu-haga-halauwa di waahale deelaa, gu-oho di-maa, gu-haga-ingoo di-maa bolo Hormah.

1:18  Dimaadua gu-hagamaamaa nia daane Judah, gei digaula gu-hai-mee gi-nia gowaa gonduu. Gei digaula digi gumidia Gaza, Ashkelon be go Ekron, mo nia gowaa i ono daha. Digau Judah e-deemee di-hagabagi digaula gi-daha, idimaa digau aanei ala e-noho i tongotai la iai nadau kulumaa dauwa baalanga.

1:19  Dimaadua gu-hagamaamaa nia daane Judah, gei digaula gu-hai-mee gi-nia gowaa gonduu. Gei digaula digi gumidia Gaza, Ashkelon be go Ekron, mo nia gowaa i ono daha. Digau Judah e-deemee di-hagabagi digaula gi-daha, idimaa digau aanei ala e-noho i tongotai la iai nadau kulumaa dauwa baalanga.

1:20  Hebron la-ne-wanga gi Caleb, gii-hai be nnelekai Moses ne-hai, gei mee gu-hagabagi nia madahaanau e-dolu i-di hagadili ni Anak.

1:21  Gei nia daane di madawaawa Benjamin digi hagabagia digau Jebus ala nogo noho i Jerusalem, gei digau Jebus guu-noho hua igolo dalia nia daangada o Benjamin.

1:22  Nia madawaawa Ephraim mo Manasseh ne-hula ga-heebagi gi-di waahale go Bethel, dela nogo haga-ingoo bolo Luz, gei Dimaadua gu-hagamaamaa digaula. Digaula gu-hagau nadau gau halahala-mee hagammuni gi-di waahale,

1:23  Nia madawaawa Ephraim mo Manasseh ne-hula ga-heebagi gi-di waahale go Bethel, dela nogo haga-ingoo bolo Luz, gei Dimaadua gu-hagamaamaa digaula. Digaula gu-hagau nadau gau halahala-mee hagammuni gi-di waahale,

1:24  gaa-mmada gi tangada e-hagatanga gi-daha mo-di waahale, ga-helekai gi mee, “Hagia-mai di hai e-ulu-ai gi-di waahale, gei gimaadou ga-hagalee daaligi goe.”

1:25  Taane deelaa ga-hagi-anga gi digaula, gei nia daangada o Ephraim mo Manasseh ga-daaligi nia daangada huogodoo i-lodo di waahale, taane hua deelaa mo dono madahaanau digi daaligidia.

1:26  Nomuli gei taane deelaa gaa-hana gi tenua digau Hittite, gaa-hau dana waahale ga-haga-ingoo bolo Luz.

1:27  Di madawaawa Manasseh digi hagabagia nia daangada ala nogo noho i-lodo nia waahale go Beth=Shan, Taanach, Dor, Ibleam, Megiddo mo nia waahale i nadau baahi, gei digau Canaan e-noho hua igolo.

1:28  Di madagoaa digau Israel ne-mada-maaloo-mai, digaula gaa-hono digau Canaan gi-ngalua ang-gi ginaadou, gei digau Israel digi hagabagia digaula huogodoo gi-daha.

1:29  Di madawaawa Ephraim digi hagabagia digau Canaan ala nogo noho i-lodo di waahale go Gezer, gei digau Canaan e-noho hua igolo dalia digau Israel.

1:30  Di madawaawa Zebulun digi hagabagia nia daangada ala nogo noho i-lodo nia waahale go Kitron mo Nahalal. Nia daangada a Zebulun guu-noho ginaadou mo digau Canaan, guu-hono digau Canaan gi-ngalua ang-gi ginaadou.

1:31  Di madawaawa Asher digi hagabagia digau ala nogo noho i-nia waahale go Acco, Sidon, Ahlab, Achzib, Helbah, Aphek mo Rehob.

1:32  Nia daangada Asher guu-noho ginaadou mo digau Canaan i digaula digi hagabagia gi-daha.

1:33  Di madawaawa Naphtali digi hagabagia nia daangada ala nogo noho i-nia waahale go Beth=Shemesh mo Beth=Anath. Nia daangada a Naphtali guu-noho ginaadou mo digau Canaan, guu-hono digau Canaan gi-ngalua ang-gi ginaadou.

1:34  Digau Amor guu-hono di madawaawa Dan gii-noho nia gowaa gonduu, digi dumaalia gi digaula gi-lloo-iha gi-di gowaa baba.

1:35  Digau Amor nogo noho hua igolo i Aijalon, Shaalbim mo i-di Gonduu Heres, gei nia madawaawa Ephraim mo Manasseh e-daahi-hua digaula i-lala nadau haganoho, mo-di hono digaula gi-ngalua ang-gi ginaadou.

1:36  Taalinga tenua digau Edom i-bahi-i-ngeia o Sela le e-hana laa-hongo di Ala Nnoonua o Akrabbim.

Chapter 2

2:1  Tangada di langi a Dimaadua ne-hagatanga i Gilgal gaa-hana gi Bochim, ga-helekai gi digau Israel, “Au ne-laha-mai goodou gi-daha mo Egypt, ga-laha-mai goodou gi tenua dela ne-hagababa ko-Au ang-gi godou maadua-mmaadua. Au ne-helekai boloo, ‘Au hagalee-loo e-oho dagu hagababa ne-hai-adu gi goodou gaa-hana-hua beelaa.

2:2  Goodou hudee hai hagababa gi digau ala e-noho i-lodo tenua deenei. Goodou e-hai gi-oho gi-daha nia gowaa dudu-tigidaumaha digaula.’ Gei goodou digi hai be dagu helekai dela ne-hai-adu gi goodou. Goodou ne-hai-hua go di baahi dela i-golo!

2:3  Au e-hai-adu gi goodou dolomeenei bolo Au ga-hagalee hagabagi digau aanei gi-daha mo godou mua. Digaula gaa-hai nia hagadaumee ni goodou, gei goodou gaa-kumi go nadau hai daumaha ang-gi nadau god.”

2:4  Di madagoaa tangada di-langi deelaa ne-helekai beenei, digau Israel huogodoo gu-daamada gu-tangitangi,

2:5  ge deelaa di mee ne-gahi-ai di gowaa deelaa boloo Bochim. Digaula gaa-hai nadau tigidaumaha ang-gi Dimaadua i-di gowaa deelaa.

2:6  Joshua ne-hagau digau Israel gii-hula, ge tangada-nei mo tangada-nei ne-hana gi dono gowaa donu ga-hai-henua ginai.

2:7  Di madagoaa Joshua nogo mouli, gei digau Israel nogo hai-hegau gi Dimaadua, gei i-muli o mee ne-made, digaula nogo hai-hegau hua igolo, i-lodo nia madagoaa o-nia dagi Israel ala ne-gidee-ginaadou nia mee haga-goboina a Dimaadua ala ne-hai gi Israel.

2:8  Tangada hai-hegau Dimaadua go Joshua go di tama a Nun la-ne-made gei mee e-lau madangaholu-(110) ono ngadau.

2:9  Mee ne-danu i-lodo dana gowaa i Timnath=Serah i-lodo tenua gonduu o Ephraim i-bahi-i-ngeia di Gonduu Gaash.

2:10  Nia daangada o-di adu-dangada deelaa la-guu-mmade huogodoo. Di adu dangada nomuli la-gu-dee-haawe-ginaadou Dimaadua mo ana mee ala ne-hai gi Israel.

2:11  Nia daangada Israel gu-hai-hala gi Dimaadua, gu-daamada gu-hai-hegau gi-nia Baal, ala go nia balu-god.

2:12  Digaula gu-hagalee daumaha gi Dimaadua, go di God o nadau maadua-mmaadua, di God dela ne-laha-mai digaula gi-daha mo Egypt, gei digaula gu-daamada gu-daumaha gi-nia balu-ieidu, nia god o-nia daangada ala i nadau baahi. Digaula e-pala gi-lala gi-nia maa, guu-hai Dimaadua gi-hagawelewele.

2:13  Digaula gu-hagalee daumaha gi Dimaadua, gu-hai-hegau gi-nia balu-god go Baal mo Astarte.

2:14  Dimaadua gu-hagawelewele huoloo gi digau Israel, guu-dugu-anga digaula gi nadau hagadaumee gi-heebagi gi digaula gi-kae nia goloo digaula. Mee guu-hai nia hagadaumee digaula gi-maaloo i digaula, gei digau Israel gu-deemee di bida madamada-humalia i ginaadou.

2:15  Nadau madagoaa huogodoo ala ma-gaa-hula gi tauwa, gei Dimaadua e-hai-baahi ang-gi digaula, gu-hai-hua be dana helekai dela bolo Ia gaa-hai beelaa. Digaula guu-noho i-lodo di madagoaa haingadaa huoloo mo-di manawa-gee damanaiee.

2:16  Nomuli gei Dimaadua gaa-wanga gi digau Israel nadau dagi e-daa digaula gi-daha mo nadau hagadaumee ala e-hagahuaidu nadau henua.

2:17  Gei digau Israel digi hagalongo gi nadau dagi. Israel la-hagalee nogo manawa-dahi ang-gi Dimaadua, ge nogo daumaha ang-gi nia balu-ieidu. Nadau maadua-mmaadua la-nogo daudali nnelekai Dimaadua, gei di adu-dangada hoou deenei la-gu-limalima di de-hagalongo.

2:18  Di madagoaa Dimaadua ma-gaa-wanga dana dagi gi digau Israel, gei Mee e-hagamaamaa di tagi deelaa e-daa nia daangada gi-daha mo nadau hagadaumee i-di waalooloo o-di mouli o tagi deelaa. Dimaadua e-hila-anga gi digau Israel i nadau tangitangi mo nadau hagaduadua llauehe i-lala nadau hagadaumee.

2:19  Di madagoaa di-nadau dagi ma-gaa-made, gei-ogo nia daangada gaa-hai labelaa nadau hai huaidu ala mai mua, e-koia e-huaidu i-nia huaidu o-nia adu-dangada ala i nomua. Digaula e-hai-hegau gei e-daumaha gi-nia balu-ieidu, ge haihai hua igolo nadau hai huaidu.

2:20  Gei Dimaadua ga-hagawelewele huoloo gi digau Israel, ga helekai, “Nia daangada aanei la-gu-oho di hagababa dela ne-hai ko-Au gi nadau maadua-mmaadua bolo ginaadou gi-daudalia-ai. Idimaa digaula ala digi hagalongo-mai gi-di-Au,

2:21  gei Au ga-hagalee hagabagi nia daangada ala nogo i-lodo tenua deelaa i-di madagoaa Joshua ne-made.

2:22  Au ga-haga-hai-hegau nia daangada aanei gei Au gaa-mmada be digau Israel aanei la-gaa-hai be nadau maadua-mmaadua ala nogo daudali agu hai, be deeai.”

2:23  Malaa, Dimaadua gaa-dugu ang-gi digau aanei gii-noho hua igolo i-lodo tenua. Dimaadua digi heia Joshua gi-haga-magedaa-ina digaula, ge digi hagabagia digaula hagalimalima i-muli di made o Joshua.

Chapter 3

3:1  Dimaadua gaa-dugu ana madawaawa dangada i-lodo tenua belee hagamada digau Israel ala digi hula i-nia dauwa i Canaan.

3:2  Mee ne-hai-hua di hai deenei belee aago nia adu-dangada o digau Israel i-di hai o tauwa, gei e-donu go digau Israel ala digi hula-loo i tauwa i-mua.

3:3  Nia madawaawa dangada ne-dugu i-lodo tenua la-go nia waahale digau Philistia e-lima, mo digau huogodoo o Canaan, mo digau Sidon mo digau Hivite ala nogo noho i-lodo nia Gonduu Lebanon mai di gonduu Baal=Hermon gaa-hana-loo gi-di Ala Nnoonua o Hamath.

3:4  Digaula guu-hai digau e-hagamada digau Israel, e-halahala be digau Israel ga-daudali nnelekai Dimaadua ala ne-wanga gi nadau maadua-mmaadua mai baahi o Moses, be deeai.

3:5  Malaa, digau Israel guu-noho i-baahi digau Canaan, digau Hittite, digau Amor, digau Perizzite, digau Hivite mo digau Jebus.

3:6  Digaula gu-haga-hai-lodo i nadau mehanga, ge daumaha gi-nia balu god digaula.

3:7  Digau Israel gu-de-langahia Dimaadua, go di-nadau God. Digaula guu-hai nadau ihala gi Mee, gu-daumaha gi-nia ada-balu-god go Baal mo Asherah.

3:8  Dimaadua gu-hagawelewele gi digau Israel, gu-dugu-anga gi-di king Cushan=Rishathaim o Mesopotamia gi-kumidia digaula. Digaula guu-noho i-lala di king deelaa i-nia ngadau e-walu.

3:9  Nomuli, gei digau Israel ga-tangi gi Dimaadua, gei Mee ga-haga-gila-aga dana dangada e-haga-dagaloaha digaula. Deenei la-go Othniel, tama-daane a tuaahina-daane dulii o Caleb go Kenaz.

3:10  Di Hagataalunga Dimaadua gu-hanimoi gi dono baahi, gei mee guu-hai di tagi ni digau Israel. Othniel guu-hana gi-tauwa, gei Dimaadua guu-hai a-mee gi-maaloo i-di king o Mesopotamia.

3:11  Di aumaalia gu-i tenua deelaa i-nia ngadau e-madahaa, gei nomuli Othniel gaa-made.

3:12  Digau Israel gu-ihala labelaa gi Dimaadua. Mai di hai deenei, Dimaadua gaa-hai di king Eglon o Moab gi-maaloo i digau Israel.

3:13  Eglon ga-buni-anga gi digau Ammon mo digau Amalek, ga-heebagi gi digau Israel gaa-kumi Jericho, di waahale o-di waa-niu.

3:14  Digau Israel gaa-noho i-lala di mogobuna o Eglon i-nia ngadau e-madangaholu maa-walu.

3:15  Digau Israel ga-tangi gi Dimaadua, gei Mee ga-haga-gila-aga dana dangada e-haga-dagaloaha digaula. Tangada deenei go Ehud, taane dono lima gau-ihala, tama-daane ni Gera, tangada di madawaawa Benjamin. Digau Israel ga-hagau a Ehud gi-di king Eglon, e-kae ana wanga-dehuia gi mee.

3:16  Ehud guu-hai dana hulumanu-gaa ono baahi e-lua, di looloo di-maa la di piidi e-dahi mo-di baahi. Mee guu-tai di-maa gi dono baahi gau-donu i-lala dono gahu.

3:17  Gei mee gaa-kae ana wanga-dehuia gi Eglon, taane bedi huoloo.

3:18  I-muli-hua Ehud ne-wanga gi mee ana wanga-dehuia, gei mee gaa-hai gi digau nogo aamo-mai nia maa bolo gii-hula gi-muli gi nadau guongo.

3:19  Gei-ogo Ehud gaa-huli gi-muli i-baahi nia hadu ne-paa ala e-hoohoo gi Gilgal, gaa-hana gi-muli gi Eglon ga-helekai, “Tangada aamua, au dagu helekai belee hai hagammuni adu gi-di-goe.” Malaa, di king gaa-hai gi ana gau hai-hegau gii-hula gi-daha, gei digaula guu-hula.

3:20  Di king nogo noho modogoia i-lodo dono ruum magalillili i-hongo di tua di hale, gei Ehud gaa-hana gi mee ga-helekai, “Au dagu helekai mai baahi o God adu gi-di-goe.” Di king ga-du-gi-nua,

3:21  gei Ehud ga-dahi-aga dono lima gau-ihala, ga-hudi-aga dana hulumanu dela i dono baahi gau-donu, ga-daalo-adu gi lodo tinae di king.

3:22  Tulumanu hagatau la-gu-ulu gi-lodo, huogodoo mo dono gau, gei nia giliidi o-maa guu-gahu di-maa. Ehud digi huudia di-maa gi-daha mo tinae di king, ge di-maa gu-ihaa i-tua i-mehanga ono wae.

3:23  Ehud ga-ulu gi-daha, gaa-tai nia bontai, ga-loogu nia maa,

3:24  ga-hagatanga. Digau hai-hegau ga-loomoi ga-gidee nia bontai la-gu-loogu, gei digaula e-maanadu bolo di king e-baguuguu.

3:25  Digaula nogo talitali gu-duai, gei mee digi huge di bontai, malaa, digaula ga-dahi-mai di gii gaa-huge. Gei di-nadau dagi le e-moe i-hongo di baba guu-made.

3:26  Ehud guu-hana gi-daha i-di madagoaa digaula nogo talitali di king. Mee gaa-hana la-baahi nia hadu paa, gaa-lele gi-daha gi Seirah.

3:27  Dono madagoaa ne-dau i-tenua gonduu o Ephraim, gei mee ga-ili dana buu-‘trumpet’ e-gahigahi digau Israel gi-di heebagi, ga-dagi-iha digaula i-nia gonduu aalaa.

3:28  Mee ga-helekai gi digaula, “Daudalia au. Dimaadua gu-dugu-adu godou hagadaumee digau Moab gi-lodo godou lima.” Digaula gu-daudali Ehud gi-lala, guu-kumi di gowaa digau Moab belee loo-adu-ai i-lodo di monowai Jordan. Digaula digi dumaalia gi tangada e-dahi i digaula gi-hanimoi laa-lodo di monowai.

3:29  Di laangi deelaa, gei digaula gu-daaligi nadau gau-dauwa Moab e-madangaholu mana-(10,000), deai tangada e-dahi ne-mouli ai.

3:30  Digau Israel gu-haga-magedaa digau Moab i-di laangi deelaa, di aumaalia gu-i tenua nia ngadau e-huowalu-(80).

3:31  Di tagi nomuli go Shamgar, tama-daane a Anath. Mee gu-haga-dagaloaha labelaa digau Israel, ne-daaligi ana gau Philistia e-ono-lau-(600) gi-di laagau e-dagidagi nia kau.

Chapter 4

4:1  I-muli Ehud ne-made, nia daangada Israel gu-ihala labelaa ang-gi Dimaadua.

4:2  Gei Dimaadua gaa-dugu-anga digau Israel gi-gumudia go Jabin, di king o Canaan nogo dagi i-lodo di waahale go Hazor. Di tagi damana o digau dauwa a Jabin la-go Sisera, dela nogo noho i Harosheth=Hagoiim.

4:3  Jabin la ana waga-dauwa hongo-henua e-hiwa-lau ne-hai gi-nia baalanga, gei mee nogo dagi digau Israel hagahuaidu i-lodo nia ngadau e-madalua. Gei digau Israel ga-tangi-anga gi Dimaadua bolo gi hagamaamaa-ina ginaadou.

4:4  Deborah, go di lodo o Lappidoth, la di ahina-soukohp, gei mee nogo hai tangada hai-gabunga ni digau Israel i-di madagoaa deelaa.

4:5  Mee e-nnoo-mau e-nohonoho i-lala di laagau ‘palm’ i-mehanga Ramah mo Bethel i-lodo tenua gonduu o Ephraim, ge digau Israel e-hula gi-golo e-kae nia donu o nadau gabunga.

4:6  Di laangi e-dahi, gei Deborah gaa-hai dana hegau gi Barak, tama-daane a Abinoam mai di waahale go Kedesh i Naphtali bolo gi-hanimoi. Deborah ga-helekai gi mee, “Dimaadua go di God o digau Israel gu-gowadu gi-di-goe telekai deenei: ‘Lahia au daane e-madangaholu mana-(10,000) mai nia madawaawa Naphtali mo Zebulun, dagia digaula gi-di Gonduu Tabor.

4:7  Au ga-laha-mai a Sisera go di tagi-dauwa o digau-dauwa a Jabin, e-heebagi-adu gi-di-goe i taalinga di monowai go Kishon. Mee ga-hanimoi mo ana waga-dauwa hongo-henua mo ana gau-dauwa, gei Au gaa-hai goe gi-maaloo i mee.’ ”

4:8  Barak ga-helekai gi Deborah, “Au e-hana maa goe e-hana madalia au; maa goe hagalee hana madalia au, gei au hagalee hana.”

4:9  Deborah ga-helekai, “E-humalia, au e-hana madalia goe, malaa, di aali la-ga-hagalee dau-adu gi-di-goe, idimaa, Dimaadua gaa-wanga a Sisera e-haga-magedaa go di ahina.” Malaa, Deborah gaa-hana gi Kedesh dalia a Barak.

4:10  Barak ga-gahi-mai nia madawaawa Zebulun mo Naphtali e-hula gi Kedesh, gei nia daane e-madangaholu mana-(10,000) ga-daudali-adu a-mee. Deborah guu-hana dalia a-mee.

4:11  Di madagoaa-hua deelaa, gei Heber, tangada Kenite gu-haga-duu-aga dono hale-laa hoohoo gi Kedesh i baahi di laagau-‘oak’ i baahi tama gowaa go Zanannim. Mee ne-hana gi-daha mo digau Kenite ala i-golo, ala go nia hagadili o Hobab, go tuaahina di lodo Moses.

4:12  Di madagoaa Sisera ne-longono bolo Barak guu-hana gi-di Gonduu Tabor,

4:13  gei mee ga-hagabudu-mai ana waga-dauwa hongo-henua e-hiwa-lau-(900) ala ne-hai gi-nia baalanga mo ana daane huogodoo, ga-hagau digaula mai Harosheth=Hagoiim gi-di monowai go Kishon.

4:14  Deborah ga-helekai gi Barak, “Hana! Dimaadua e-dagi goe. Dangi-nei, gei Mee guu-hai goe gi-aali i Sisera.” Malaa, Barak ga-haneia i-di Gonduu Tabor mo ana daane e-madangaholu mana-(10,000).

4:15  Barak mo ana gau-dauwa ga-heebagi, gei Dimaadua ga-hagahinihini Sisera mo ana waga-dauwa hongo-henua mo ana gau-dauwa. Sisera gaa-hobo gi-daha mo dono waga-dauwa, gaa-hana gaa-lele gi-daha.

4:16  Barak ga-waluwalu nia waga-dauwa mo digau-dauwa gi Harosheth=Hagoiim, gei-ogo digau-dauwa Sisera huogodoo la-gu-daaligi guu-mmade. Tangada e-dahi ne-dubu ai.

4:17  Sisera guu-hana guu-lele gi-di hale-laa a Jael, go di lodo a Heber, tangada Kenite, idimaa, di King o Hazor go Jabin e-humalia nadau mehanga mo-di madahaanau o Heber.

4:18  Jael ga-ulu gi-daha mo dono hale-laa belee heetugi gi Sisera, ga-helekai gi mee, “Meenei, hanimoi gi lodo dogu hale-laa. Hudee madagu.” Sisera gaa-hana gi-lodo, gei Jael gaa-dugu a-mee hagammuni i-tua di gahu.

4:19  Mee ga-helekai gi Jael, “Hudee heheia-mua, gaamai hunu wai e-inu, au e-hieinu.” Jael gaa-huge dana peege gilikau milugu ga-haga-inu a-mee, gaa-dugu a-mee hagammuni labelaa.

4:20  Sisera ga-helekai gi Jael, “Duu i-di bontai di hale-laa; maa tangada ga-hanimoi ga-heeu-adu be di-maa tangada i ginei, gei goe helekai bolo deeai.”

4:21  Sisera la-gu-duadua huoloo dela ga-limalima-iei mee dono kii danu-mmoe. Gei-ogo Jael ga-dahi-mai dana haamaa ge tei dama-laagau gaa ni-di hale-laa, ga-higihigi-adu gi baahi o mee, ga-haga-duu di laagau deelaa gi-di baahi di libogo o-maa, gaa-dogi gi-lodo di libogo o-maa gu-ihaa i-tua, gaa-dau-loo gi-nia gelegele, gu-daaligi a-mee gii-made.

4:22  Di madagoaa Barak ne-hanimoi e-halahala-mai a Sisera, Jael ga-ulu gi-daha belee heetugi gi mee, ga-helekai, “Hanimoi gi kinei! Au ga-hagi-adu taane dela e-halahala kooe.” Gei mee gaa-hana madalia a-mee, ge Sisera e-moe i-lala i-di gowaa deelaa, guu-made, gei di laagau e-daalo laa-lodo di libogo o-maa.

4:23  Di laangi deelaa, gei God guu-hai digau Israel gi-aali i Jabin, go di king digau Canaan.

4:24  Digaula ne-daahi maaloo mo-di daahi maaloo gi nonua i mee gaa-dae-loo gi di-nadau hagahuaidu a-mee.

Chapter 5

5:1  Di laangi deelaa, Deborah mo Barak tama-daane a Abinoam gaa-huwa taahili deenei:

5:2  Hagaamuina Dimaadua! Digau Israel la-gu-maanadu maaloo bolo ginaadou e-heebagi. Nia daangada gu-tenetene guu-bida hiihai bolo ginaadou e-dau i-di heebagi.

5:3  Hagalongo, goodou go nia king! Goodou go nia dagi, hagalongo-mai! Au e-daahili mo-di hai agu gatangi gi Dimaadua, go di God digau Israel.

5:4  Meenei Dimaadua, do hagatanga i-nia gonduu o Seir, do hanimoi i tenua go Edom, gei henuailala gu-ngalungalua ge di uwa guu-doo-iha i-di langi. Uaa, nia wai guu-too-iha i-nia gololangi.

5:5  Nia gonduu gu-polepole i nadau mmaadagu i-mua o Dimaadua o Sinai, i-mua o Dimaadua, go di God o Israel.

5:6  Di madagoaa o Shamgar, tama-daane Anath, i-di madagoaa o Jael, nia daangada gu-hagalee hula laa-lodo tenua, gei digaula gu-hai-hegau nia ala laa-tua.

5:7  Meenei Deborah, nia waahale o Israel gu-ono daangada ai, gaa-dae-loo gi do hanimoi, ne-hanimoi be tinana ni digau Israel.

5:8  Gei tauwa gu-i-golo i-lodo tenua, i-di madagoaa digau Israel ne-hilihili nadau god hoou. Mai i-lodo nia daane e-mada-haa mana o Israel, deai tangada nogo dana mee abaaba be taalo i-golo ai!

5:9  Dogu manawa le e-madalia nia dagi-dauwa o Israel, mo nia daangada ala nogo hiihai bolo ginaadou e-dau i tauwa. Hagaamuina Dimaadua!

5:10  Hagalangahia go goodou ala e-llele i-hongo nia ‘donkey’ kene, e-noho i-hongo nia lohongo hongo hoodo, mo goodou ala e-taele i-hongo nia ala.

5:11  Goodou hagalongo! Nia lee daangada dogologo e-hagalongoaa mai i-nia monowai e-haga-hagaamu nia maaloo Dimaadua, nia maaloo digau Israel! Gei nia daangada Dimaadua e-lloo-iha i nadau waahale.

5:12  Dagi gi-mua, Deborah, dagi gi-mua! Dagi gi-mua, huwa taahili! Dagi gi-mua! Hanadu gi-mua, Barak, tama-daane a Abinoam, dagia au gau galabudi gi-daha!

5:13  Ge digau manawa-dahi ga-loo-iha gi nadau dagi, nia daangada Dimaadua ga-loomoi gi Mee, gu-togomaalia e-heebagi.

5:14  Digaula ne-loomoi i Ephraim gaa-hula gi-lodo di gowaa mehanga gonduu, i-muli di madawaawa Benjamin mo ana daangada. Nia dagi-dauwa aamua ne-loo-iha i Machir, nia dagi lligi ne-loo-iha i Zebulun.

5:15  Nia dagi o Issachar ne-loomoi dalia Deborah. Gei-ogo Issachar gu-hanimoi mo Barak, gei digaula ne-daudali a-mee gi-lodo di gowaa mehanga gonduu. Gei di madawaawa Reuben la-guu-wwae, digaula gu-deemee di-maanadu be ginaadou e-lloomoi be deeai.

5:16  Digaula ne-noho dalia nia siibi eiaha? Ne-noho belee hagalongolongo gi digau hagaloohi siibi ala e-gahigahi nia hagabuulinga manu? Uaa, di madawaawa Reuben la-guu-wwae, digaula gu-deemee di-maanadu be ginaadou e-lloomoi be deeai.

5:17  Di madawaawa Gad la-guu-noho i-bahi-i-dua Jordan, gei di madawaawa Dan la-nogo noho hua igolo i baahi nia wagabaalii. Di madawaawa Asher la-nogo noho i-baahi gi tongotai, digaula e-noho i taalinga tongotai.

5:18  Gei nia daangada o Zebulun mo Naphtali gu-de-hagahuodia nadau mouli gi-lodo tauwa.

5:19  Nia king ne-loomoi ga-heebagi, nia king o Canaan gu-heebagi i Taanach, hoohoo gi tama monowai o Megiddo, gei digaula digi kae nadau silber.

5:20  Nia heduu gu-heebagi mai i-di langi. Mai i nadau maanege i-di gili di langi, digaula ne-heebagi gi Sisera.

5:21  Di labagee i-lodo di monowai Kishon la-guu-mmoli digaula gi-daha, di monowai Kishon dela e-mmidi i-di waalooloo. Au e-haele, e-haele gi-mua maaloo!

5:22  Gei-ogo nia hoodo e-llele-adu, e-dagadagahi nia gelegele gi nadau wae.

5:23  Tangada di-langi o Dimaadua ga-helekai, “Hagahalauwa-ina di waahale go Meroz, haga-halauwa-ina digau ala e-noho i-golo, idimaa, digaula hagalee ne-loomoi belee hagamaamaa Dimaadua, digaula hagalee ne-loomoi be digau-dauwa e-hai teebagi a-maa.”

5:24  Di ahina dela koia e-kaedahi e-maluagina huoloo la-go Jael, di lodo o Heber tangada o Kenite, go di ahina dela e-kaedahi e-maluagina i-nia ahina ala e-noho i-lodo nia hale-laa.

5:25  Sisera ne-dangi gi mee i-nia wai, gei mee gaa-wanga nia milugu. Mee ne-gaamai ana milugu gi mee i-lodo di boolo madamada.

5:26  Mee ne-dahi-aga dana dama-laagau e-gaa bungubungu i-lodo dono lima, mo-di haamaa i-lodo di lima dela i-golo, gaa-tugi di laagau gi-lodo di libogo o-maa. Mee ne-daalo di libogo o-maa gi-bongoo.

5:27  Sisera ga-hagabiga-ia gi-hongo ono duli, gaa-hinga gi-lala gi-baahi nia wae o Jael. Gi-baahi nia wae o-maa dela ne-haga-biga-iei mee gi ono duli, gaa-hinga gi-lala. Mee ne-hinga gi-hongo di gelegele, guu-made.

5:28  Tinana o Sisera gaa-mmada gi-daha laa-lodo di bontai dulii, mee gaa-mmada laa-tua tama bontai, gaa-dangi gi-nua, “Di waga hongo-henua o-maa e-aha dela e-duainau dono hanimoi? Nia hoodo a-maa e-buna di loomoi i di-aha?”

5:29  Nia hoo kabemee o-maa ga-hagi-anga gi mee, gei mee ga-tataanga helekai ang-gi deia boloo,

5:30  “Digaula holongo e-duwweduwwe nadau mee ne-kumi, di ahina e-dahi be dogolua ang-gi tangada-dauwa e-dahi, nia gahu madamada ang-gi Sisera, nia mee guu-hai ginai nia duaina ang-gi di uwa di lodo di king.”

5:31  Meenei Dimaadua, o hagadaumee huogodoo la-gii-mmade hualaa beelaa. O ehoo la-gi-maahina be-di laa dela e-hobo! Di aumaalia gu-i-hongo tenua deelaa i-nia ngadau e-madahaa.

Chapter 6

6:1  Digau Israel gu-ihala labelaa gi Dimaadua, gei Mee gaa-dugu-anga gi digau Midian gi-dagia digaula i-lodo nia ngadau e-hidu.

6:2  Digau Midian la-nogo mada-maaloo i digau Israel, gei nia daangada Israel gaa-pala hagammuni i digaula i-lodo nia lua mo i-nia bongoo ala i-lodo nia gonduu.

6:3  Nia madagoaa huogodoo o digau Israel ala ma-gaa-dogi nadau meegai, gei digau Midian, digau Amalek mo digau ala e-noho i-lodo di anggowaa i-bahi-i-dua ga-lloomoi ga-heebagi gi digaula.

6:4  Digaula ga-lloomoi gaa-noho i-hongo nia gowaa aalaa, ga-hunahuna nia meegai ala ne-dogi, gaa-hana-loo gaa-tugi i bahi-i-dai o Gaza. Digaula e-kae labelaa nia siibi, nia kau mo nia manu-‘donkey’, deai di mee ne-dubu belee mouli ginai digau Israel ai.

6:5  Digaula e-lloomoi mo nadau manu mo nadau hale-laa, e-logowaahee gadoo be-di waa-lamu-bege. Digaula mo nadau manu-‘camel’ le e-logowaahee balua e-deemee dono dau. Digaula e-lloomoi e-hagahuaidu tenua,

6:6  gei digau Israel e-deemee di-hai di-nadau mee gi digaula.

6:7  Gei nia daangada Israel ga-tangi-anga gi Dimaadua gi-hagamaamaa-ina ginaadou i digau Midian.

6:8  Gei Dimaadua ga-hagau gi digaula soukohp dela e-kae gi digaula nia helekai mai baahi Dimaadua, go di God o digau Israel, “Au ne-laha-mai goodou gi-daha mo-di hai-hege i Egypt.

6:9  Au ne-daa-mai goodou gi-daha mo digau Egypt mo digau ala nogo heebagi-adu gi goodou i-hongo tenua deenei. Au gu-hagabagi digaula gi-daha mo godou mua, gei Au gu-gowadu gi goodou nia gowaa digaula e-hai godou gowaa.

6:10  Au gu-helekai-adu gi goodou bolo Au go Dimaadua, go di-godou God, gei goodou hudee daumaha gi-nia god o digau Amor, ala nadau gowaa e-noho-ai goodou i-nonua dolomeenei. Gei goodou digi hagalongo-mai gi-di-Au.”

6:11  Tangada di-langi o Dimaadua ga-hanimoi gi-di waahale dulii go Ophrah, gaa-noho i-lala di laagau-‘oak’ a Joash, taane ni di madahaanau o Abiezer. Tama-daane a-maa go Gideon le e-aau ana palaawaa i-di gowaa e-ngala, di gowaa dagahi-waini, bolo gi-dee mmada digau Midian ang-gi deia.

6:12  Tangada di-langi o Dimaadua ga-hagagila gi mee i-golo, ga-helekai, “Taane haga-mataane gei e-maaloo, Dimaadua le e-madalia goe!”

6:13  Gideon ga-helekai gi mee, “Meenei, maa nei bolo Dimaadua le e-madalia gimaadou, gei nia mee huaidu huogodoo le e-aha ala e-hai-mai gi gimaadou? Nia mee huogodoo humalia huoloo ala nogo hagi-mai go madau damana-mmaadua bolo ala ne-hai go Dimaadua, dana hai ne-laha-mai digaula gi-daha mo Egypt, la-gu-aha? Dimaadua la-gu-diiagi gimaadou gi digau Midian!”

6:14  Dimaadua ga-helekai gi mee, “Hanadu mo oo mahi maaloo-dangihi, daawa digau Israel gi-daha mo digau Midian! Ko-Au dela e-hagau goe!”

6:15  Gideon ga-helekai, “Meenei Tagi, dehee dagu hai e-mee-ai dagu daa digau Israel? Idimaa, dogu madahaanau i-lodo nia madawaawa Manasseh la-koia e-bagege, gei au la tangada-hua hagalee-loo e-dau i-lodo dogu madahaanau.”

6:16  Dimaadua ga-helekai, “Goe e-mee di-hai di-maa, idimaa, Au ga-hagamaamaa-laa goe. Goe e-haingoohia-hua di-daaligi digau Midian, e-hai gadoo be tangada hua e-dahi.”

6:17  Gideon ga-helekai, “Maa goe gu-baba-mai gi-di-au, heia dau haga-modongoohia gi-hagadonu au bolo ma Kooe go Dimaadua.

6:18  Hudee heheia-mua, hudee hana gaa-dae-loo gi dagu gaamai agu meegai e-wanga gi-di-Goe.” Tangada di-langi ga-helekai, “Au e-noho gi-hanimoi-loo goe.”

6:19  Malaa, Gideon gaa-hana gi-lodo dono hale gaa-dunu tamaa-kuudi mo nia palaawaa digi unugi gi-nia ‘yeast’ ne-hai gi-nia pauna palaawaa e-motolu. Mee gaa-dugu nia goneiga gi-lodo di gada, mo di suub kuudi gi-lodo di baalanga, gaa-kae nia maa gi Tangada di-langi o Dimaadua i-lala di laagau-‘oak’ gaa-wanga nia maa gi Mee.

6:20  Tangada di-langi ga-helekai gi mee, “Dugua nia goneiga mo nia palaawaa gi-hongo di hadugalaa deenei, duu-ia di suub kuudi gi-hongo nia maa.” Gideon guu-hai gii-hai be nnelekai a-Maa.

6:21  Tangada di-langi o Dimaadua ga-hagatale di bida dana laagau nogo daahi gi-nia goneiga mo nia palaawaa, gei di ahi ga-ulaula-aga mai i-di hadugalaa deelaa, gaa-dudu nia goneiga mo nia palaawaa, ge tangada di-langi gu-de-igolo.

6:22  Gideon ga-iloo-ia bolo ma Tangada di-langi ni Dimaadua dela ne-mmada gineia, gei mee gu-madagu ga-helekai, “Meenei Tagi go Yihowah, au guu-mmada gi dau Dangada di-langi gi ogu golomada!”

6:23  Gei Dimaadua ga-helekai gi mee, “Di aumaalia gi-madalia goe, hudee madagu. Goe hagalee made.”

6:24  Malaa, Gideon ga-haga-duu dana gowaa hai tigidaumaha ang-gi Dimaadua i-golo, ga-haga-ingoo di-maa bolo “Yihowah Shalom” (Di mee deenei le e-duu hua igolo i Ophrah, tenua ni-di madahaanau o Abiezer.)

6:25  Di boo hua deelaa, gei Dimaadua ga-helekai gi Gideon, “Kae-ina di kau-daane o do damana mo tei kau-daane dela e-hidu ono ngadau, gei goe oho-ina di gowaa dudu-tigidaumaha do damana ang-gi di balu-god go Baal, hele-ina gi-daha di ada o-di god-ahina go Asherah, dela i-baahi di-maa.

6:26  Heia gi-humalia dau gowaa dudu-tigidaumaha ang-gi Dimaadua go doo God, i-hongo di gonduu deenei. Kae-ina togolua kau-daane, dudu-ina hagadogomaalia, e-hai-ai tigidaumaha, hai-hegau gi-nia dohomu mai di laagau o-di ada o Asherah, dela ne-hele kooe.”

6:27  Gideon gaa-lahi ana gau hai-hegau dilongoholu, gaa-hai di mee Dimaadua ne-helekai ang-gi deia. Mee nogo madagu i dono madahaanau mo nia daangada ala i-lodo di waahale i-di hai di-maa aa, malaa, gei mee gaa-hai di-maa boo.

6:28  Di madagoaa nia daangada ne-aala-aga hagaluada dono daiaa, digaula ga-gidee bolo di gowaa dudu tigidaumaha ang-gi Baal mo-di ada o Asherah la-gu-oho gi-daha, ge togolua kau-daane la-guu-dudu i-hongo di gowaa dudu tigidaumaha dela ne-hau i-golo.

6:29  Digaula ga-heheeu i nadau mehanga boloo, “Ma koai dela ne-hai di mee deenei?” Digaula ga-halahala gaa-gida bolo ma go Gideon go tama-daane a Joash dela ne-hai di-maa.

6:30  Digaula ga-helekai gi Joash, “Laha-mai dau dama-daane gi kinei e-daaligi. Mee gu-oho di gowaa dudu tigidaumaha ang-gi Baal, guu-hele di ada o-di god-ahina go Asherah dela nogo i-baahi di-maa.”

6:31  Joash ga-helekai gi digaula huogodoo ala e-heetugi hai-baahi ang-gi deia, “Goodou e-abaaba di balu-god Baal? Goodou e-hagamaamaa a-mee? Di-ingoo-hua tangada dela ma-ga-lagamaaloo-mai i mee la-ga-daaligi gii-made i-mua di luada. Maa nei bolo Baal la di god, dugua-anga gi mee gii-bida abaabalia ia. Ma di gowaa dudu tigidaumaha ni mee dela ne-oho.”

6:32  Tugi di madagoaa deelaa gaa-hana gi-muli, Gideon la-gu-haga-ingoo bolo “Jerub=Baal”, idimaa Joash gu-helekai boloo, “Dugua-anga gi Baal gii-bida abaabalia ia. Ma di gowaa dudu tigidaumaha ni mee dela ne-oho.”

6:33  Digau huogodoo Midian, Amalek mo nia madawaawa o-di anggowaa ga-dagabuli-mai, ga-lloo-adu gi-di baahi i-golo di monowai Jordan, gaa-noho i-hongo di gowaa mehanga gonduu o Jezreel.

6:34  Di Hagataalunga o Dimaadua ga-ulu gi-lodo o Gideon, gei mee ga-ili dana buu-‘trumpet’ e-gahi-mai nia daane o-di madahaanau o Abiezer belee hula dalia ia.

6:35  Mee ga-hagau ana gau kae-hegau laa-lodo nia gowaa Manasseh e-gahi-mai digaula e-hula dalia ia. Mee ga-hagau labelaa ana gau kae-hegau gi-nia madawaawa Asher, Zebulun mo Naphtali, gei digaula gu-loomoi labelaa e-hula madalia a-mee.

6:36  Gei Gideon ga-helekai gi God, “Goe gu-helekai bolo Goe ga-haga-hai-hegau au e-daa digau Israel gi-daha mo nia haingadaa.

6:37  Malaa, au e-dugu dagu gili-siibi gi-hongo di gelegele i-di gowaa dela e-hili-ai nia palaawaa. Ma-ga-luada, gei di-maa go di gili-siibi la-hua dela e-tiu, gei i-hongo di gelegele la-hagalee, gei au ga-iloo bolo Goe e-haga-hai-hegau au, e-daa digau Israel gi-daha mo nia haingadaa.”

6:38  Ge di-maa guu-hai beelaa. Di madagoaa Gideon ne-ala-aga haga-luada dono daiaa, gei mee gaa-tau di gili-siibi, ga-tau-mai ana wai e-dohu di-haga-hau di boolo gii-honu.

6:39  Gei Gideon ga-helekai gi God, “Hudee hagawelewele-mai gi-di-au. Dugua-mai au gi-helekai-adu labelaa. Dumaalia-mai e-hai dagu hagamada labelaa hagadahi gi-di gili-siibi. Tolongo-nei la-heia di gili-siibi gi-maangoo, gei-ogo di gelegele la-gi-tiu.”

6:40  Di boo deelaa, gei God guu-hai di mee deelaa gii-hai beelaa. Luada dono daiaa di gili-siibi le e-maangoo gei di gelegele le e-tiu.

Chapter 7

7:1  Gideon mo ana gau-dauwa huogodoo ga-aala-aga hagaluada, ga-haga-duu-aga nadau hale-laa i-baahi tama-monowai uwa-aga go Harod. Di waahale-laa digau Midian la i-hongo di gowaa mehanga gonduu i-di baahi gi-ngeia digaula i-baahi di Gonduu Moreh.

7:2  Dimaadua ga-helekai gi Gideon, “Au gau-dauwa le e-dogologo balua maa Au gaa-hai digaula gi-maaloo i digau Midian. Dolomaa digaula ga-helekai bolo ginaadou ne-maaloo mai hua i ginaadou, ge hagalee hagalaamua dogu mogobuna.

7:3  Haga-iloo-ina gi-nia daangada boloo, ‘Di-ingoo-hua tangada dela e-madagu, e-humalia e-hana gi dono hale, gei gidaadou gaa-noho i ginei i-di Gonduu Gilead.’ ” Malaa, nia daane e-madalua maa-lua mana-(22,000) ne-hula gi-muli, gei nia daane e-madangaholu mana-(10,000) ne-noho.

7:4  Dimaadua ga-helekai labelaa gi Gideon, “Au daangada le e-dogologo hua igolo. Lahia digaula gi-lala gi-di monowai, gei Au gaa-wwae digaula i-golo. Maa Au ga-helekai bolo taane deelaa e-hana i oo muli, gei mee e-hana i oo muli. Maa Au ga-helekai bolo taane deelaa hagalee hana i oo muli, gei mee hagalee hana.”

7:5  Gideon gaa-lahi ana gau-dauwa gi-baahi nia wai i-lala, gei Dimaadua ga-helekai gi mee, “Dugua-gee digau huogodoo ala ma-ga-inu-aga nia wai gi nadau holole gadoo be nia paana gi-daha mo digau huogodoo ala e-togo gi-lala gi-hongo nadau duli ga-inu-laa nadau wai.”

7:6  Nia daane e-dolu-lau ala e-huai nadau wai gi nadau lima ga-inu, gei digau huogodoo ala i-golo la-ne-togo gi-lala gi-hongo nadau duli ga-inu.

7:7  Dimaadua ga-helekai gi Gideon, “Au ga-benebene goe gi-daha mo nia haingadaa, gaa-hai goe gi-maaloo i digau Midian, e-hai-hegau gi digau e-dolu-lau ala nogo inu nadau wai gi nadau babaalima. Helekai gi digau ala i-golo huogodoo bolo gii-hula gi nadau guongo.”

7:8  Gideon ga-hagau digau Israel huogodoo gi nadau hale, aalaa-hua go digau e-dolu-lau ne-noho, ala nogo benebene nia goloo mo nia buu-‘trumpet’ o digau ala ne-hula. Nia hale-laa digau dauwa Midian la i-bahi-i-lala digaula i-hongo di gowaa mehanga gonduu.

7:9  Di boo hua deelaa, gei Dimaadua ga-helekai gi Gideon, “Du-gi-nua, hana heebagi gi digau Midian i nadau waahale-laa, idimaa, Au e-gowadu gi-di-goe di maaloo.

7:10  Maa goe e-madagu di heebagi, gei goe hana gi-di waahale-laa digaula, mo dau dangada hai-hegau go Purah.

7:11  Gei goe ga-longono be digaula e-helehelekai bolo-aha, gei goe ga-manawa-maaloo bolo e-heebagi.” Malaa, Gideon mo dana dangada hai-hegau go Purah gaa-hula gi-lala gi taalinga di gowaa o-nia hagadaumee.

7:12  Digau Midian, digau Amalek mo digau o-nia madawaawa o-di anggowaa le e-modoho gi-daha i-hongo di gowaa mehanga gonduu deelaa, e-logowaahee e-hai gadoo be-di waa-lamu-bege, ge nia ‘camel’ digaula e-logowaahee labelaa be nia gelegele i tongotai.

7:13  Di madagoaa Gideon ne-dau-adu gi-di waahale-laa digaula, mee ga-longono-ia tangada e-helekai gi dono ehoo i dana midi dela ne-hai. Mee e-helekai boloo, “Au ne-midi bolo di hagamunga palaawaa dela ne-hai-mai i-nia huwa o-di laagau-‘barley’ ne-doo-iha gi-lodo tadau waahale-laa, ga-nngenge i-di hale-laa. Di hale-laa deelaa la-guu-hinga guu-moe baabaa i-hongo di gelegele.”

7:14  Di hoo o-maa ga-helekai, “Ma go tulumanu-dauwa o tangada Israel, Gideon, go di tama a Joash! Ma e-deemee di-hai tuai hadinga! God la-guu-wanga gi mee di maaloo i digau Midian mo tadau gau-dauwa hagatau!”

7:15  Di madagoaa Gideon ne-longono-ia di midi taane deelaa mo dono hadinga, gei mee gaa-bala gi-hongo ono duli ga-daumaha gi Dimaadua. Gei mee gaa-hana gi-muli gi-di waahale-laa digau Israel ga-helekai, “Tu-gi-nua, Dimaadua le e-gowadu gi goodou di maaloo i digau dauwa Midian!”

7:16  Mee ga-wwae-dolu ana gau e-dolu-lau, gaa-wanga gi tangada-nei mo tangada-nei dana buu-‘trumpet’ mo dana loaabi dela iai di lama-ulaula i ono lodo.

7:17  Gideon ga-hagi-anga gi digaula, “Dogu dau-adu gi taalinga di gowaa digaula, goodou ga-mmada-mai gi-di-au, gaa-hai be dagu hai dela e-hai.

7:18  Au mo dagu buini ma-ga-ili madau buu-‘trumpet’, gei goodou ilihia huogodoo godou buu-‘trumpet’ mo-di wwolo boloo, ‘Ang-gi Dimaadua mo ang-gi Gideon!’ ”

7:19  Gideon mo ana daane e-lau gaa-dau i taalinga di waahale-laa i-mua di madahidi-waelua di boo, i-muli-hua di koodai o digau hagaloohi. Gei digaula ga-ili nadau buu-‘trumpet’ mo di hahaahi nia loaabi ala nogo daahi go digaula,

7:20  gei nia buini e-lua ala i-golo gaa-hai labelaa be nia mee di buini deelaa ne-hai. Digaula e-kumi nia lama-ulaula i-lodo nadau lima gau-ihala, nia buu-‘trumpet’ i-lodo nadau lima gau-donu gaa-wwolo gi-nua-loo, “Tulumanu-dauwa ang-gi Dimaadua mo ang-gi Gideon!”

7:21  Nia daane huogodoo guu-tuu i nadau lohongo e-haganiga di waahale-laa, gei digau-dauwa hagadaumee huogodoo guu-llele gi-daha mo-di wwolowwolo gi-nua.

7:22  Di madagoaa nia daane a Gideon nogo ili nadau buu-‘trumpet’, gei Dimaadua gaa-hai digau-dauwa hagadaumee gi-hagadau heebagi gi nadau hulumanu i nadau mehanga. Digaula ga-llele-adu beelaa gi Zarethan gaa-dae-adu gi Beth=Shittah, mo-di waahale go Abel=Meholah e-hoohoo gi-di gowaa go Tabbath.

7:23  Nia daane mai i-nia madawaawa Naphtali, Asher mo nia baahi e-lua o Manasseh ga gahi-mai, ga-waluwalu-adu i-muli digau Midian.

7:24  Gideon ga-hagau ana gau kae-hegau gi-lodo tenua gonduu o Ephraim hagatau, belee hai boloo, “Lloo-ia gi-lala e-heebagi gi digau Midian. Hagaloohia di monowai Jordan mono dama monowai, gaa-dau-adu-loo gi-di gowaa go Beth=Barah, gi-de lloomoi digau Midian laa-lodo nia maa.” Nia daane o Ephraim la-guu-gahi gi-di gowaa e-dahi, ga-hagaloohi di monowai Jordan mo nia dama monowai gaa-tugi-loo i Beth=Barah.

7:25  Digaula gaa-kumi nia dagi dogolua o Midian, go Oreb mo Zeeb, digaula ga-daaligi Oreb gii-made i Tadugalaa Oreb, gei-ogo Zeeb la i-di Gowaa Dagadagahi Waini a Zeeb. Digaula ga-waluwalu hua igolo digau Midian, ga gaamai nia libogo o Oreb mo Zeeb gi Gideon, dela gu-i-bahi-i-dua di monowai Jordan i di madagoaa deelaa.

Chapter 8

8:1  Nia daangada o Ephraim ga-helekai gi Gideon, “Goe e-aha dela digi gahi-ina gimaadou i doo hana belee heebagi gi digau Midian? Goe e-aha dela e-hai gimaadou beenei?” Digaula e-helehelekai hagahuaidu huoloo gi mee.

8:2  Gei mee ga-helekai gi digaula, “Dagu mee dela guu-mee dagu hai, la-hagalee hagatau gi godou mee ala guu-hai. Di mee dulii dela ne-hai go goodou digau Ephraim le e-dahidamee hua e-tanga i-nia mee ala ne-hai go dogu madahaanau damana huogodoo.

8:3  God gu-dugu-adu gi goodou gi-daaligidia nia dagi dogolua o Midian, go Oreb mo Zeeb. Ma di-aha guu-hai ko-au dela belee hagatau gi-di mee deelaa?” Di madagoaa Gideon ne-helekai beenei, gei digau Ephraim gu-hagalee hagawelewele.

8:4  Di madagoaa deenei, gei Gideon mo ana gau-dauwa e-dolu-lau-(300) gaa-dau gi-di monowai Jordan, ga-lloo-adu laa-lodo di maa. Digaula gu-duadua, gei e-waluwalu hua igolo nadau hagadaumee.

8:5  Di nadau dau-adu gi-di waahale go Sukkoth, Gideon ga-helekai gi digau o-di waahale deenei boloo, “Dumaalia, wanga-ina hunu palaawaa gi agu gau-dauwa. Digaula gu-duadua, gei au e-waluwalu nia king Midian go Zebah mo Zalmunna.”

8:6  Nia dagi o Sukkoth ga-helekai, “Gimaadou e-wanga madau meegai gi au gau-dauwa eimaha? Gei goe digi gumidia a Zebah mo Zalmunna!”

8:7  Gei Gideon ga-helekai, “E-humalia-hua! Malaa, di madagoaa Dimaadua ma-ga-dugu-mai a Zebah mo Zalmunna gi-di-au, gei au ga-haga-mamaawa goodou gi-nia manga-laagau duduia mono lau-laagau haga-laudia gili dangada mai i-di anggowaa!”

8:8  Gideon ga-hanadu gi-di waahale go Penuel gaa-hai labelaa dana dangidangi gi-nia daangada ala i-golo, gei digau o Penuel ga-hai-anga labelaa go telekai la-hua dela ne-hai go digau Sukkoth.

8:9  Gei Gideon ga-helekai gi digaula, “Di madagoaa au ga-hanimoi labelaa i-di aali, gei au gaa-oho di angulaa-mihalii deenei!”

8:10  Zebah mo Zalmunna la-nogo i Karkor mo nau gau-dauwa. Digau dauwa hua e-madangaholu maa lima mana-(15,000) ala ne-dubu i digau-dauwa huogodoo o-di anggowaa, gei e-lau madalua mana-(120,000) ne-mmade.

8:11  Gideon ga-hanadu i-hongo di ala i taalinga di anggowaa, i-bahi-i-dua o Nobah mo Jogbehah, ga-heebagi haga-homouli gi-di gau-dauwa digaula, ga-daaligi digaula.

8:12  Nia king Midian dogolua go Zebah mo Zalmunna guu-llele gi-daha, gei Gideon ga-waluwalu meemaa guu-kumi, ga-hidi-mai-ai nia gau-dauwa huogodoo gu-lellele dagidahi mmaadagu.

8:13  Di madagoaa Gideon ne-hanimoi i tauwa, mee ne-hana i-hongo di Ala Nnoonua go Heres,

8:14  gei mee gaa-kumi dana dama-daane mai Sukkoth ga-heheeu gi mee. Tama-daane deelaa gaa-hihi gi-lala nia ingoo nia dagi o Sukkoth e-mada-hidu maa-hidu-(77).

8:15  Gideon gaa-hana gi digau Sukkoth ga-helekai, “Goodou e-langahia di-godou dee-hiihai e-hagamaamaa au? Goodou ne-helekai bolo goodou e-deemee di-wanga godou meegai gi agu gau-dauwa ala nogo duadua, idimaa, bolo au dela digi gumidia a Zebah mo Zalmunna. Malaa, aanei la meemaa!”

8:16  Gei Gideon ga-dahi-aga nia manga-laagau duduia mono lau laagau haga-laudia gili dangada mai i-di anggowaa, ga-dadaaligi nia dagi o Sukkoth.

8:17  Mee gu-oho labelaa di angulaa-mihalii i Penuel ga-daaligi nia daane o-di waahale deelaa.

8:18  Gideon ga-heeu gi Zebah mo Zalmunna, “Nia daane e-hai behee ala ne-daaligi go goolua gii-mmade i Tabor?” Meemaa ga-helekai, “Digaula e-hai gadoo be goe, digaula huogodoo le e-hai be nia dama-daane ni-di king.”

8:19  Gideon ga-helekai, “Digaula la nia duaahina ni-oogu, nia dama-daane ni dogu dinana. Au e-hai dagu hagamodu e-donu bolo maa goolua ne-digi daaligidia digaula gii-mmade, gei au hagalee daaligi goolua gii-mmade.”

8:20  Gideon ga-helekai gi dana dama-daane madua go Jether, “Daaligidia meemaa gii-mmade!” Gei tama-daane la digi dahi-aga dana hulumanu-dauwa. Mee nogo haga-nonoogia, idimaa mee tama-daane hua dulii.

8:21  Zebah mo Zalmunna ga-helekai gi Gideon, “Heia, kooe hua daaligidia gimaua gii-mmade. Ma taane dela e-mee di-hai tegau o-nia daane.” Malaa, Gideon ga-daaligi meemaa, gaa-kae nia mee humu-mee ala nogo i-di gili nia uwa o nau manu-‘camel’.

8:22  Nomuli gei digau Israel ga-helekai gi Gideon, “Goe dagia gimaadou, kooe mo o hagadili gi-muli. Idimaa, kooe dela ne-haga-dagaloaha gimaadou gi-daha mo digau Midian.”

8:23  Gideon ga-helekai, “Au ga-hagalee dagi goodou, ge dagu dama-daane hogi ga-hagalee dagi goodou. Ma go Dimaadua dela e-hai di-godou Dagi.”

8:24  Gei mee ga-duudagi ana helekai, “Nnoo-malaa gi-helekai i-di mee e-dahi mai godou baahi. Tangada-nei mo tangada-nei i goodou gi-gaamai gi-di-au dahi akai dalinga mai i-nia mee akai dalinga ala ne-kae go goodou.” (Idimaa, digau Midian, e-hai be digau o-di anggowaa ala i-golo, e-ulu nia akai dalinga goolo.)

8:25  Nia daangada ga helekai, “Gimaadou e-tenetene di-gowadu nia maa gi-di-goe.” Digaula gaa-holo gi daha di-nadau gahu, gei nia daangada guu-dugu nadau akai dalinga gi-hongo di gahu deelaa mai i-nia mee ala ne-kae.

8:26  Nia akai dalinga ala ne-hai gi-nia goolo ala ne-kae go Gideon la i-hongo nia pauna e-madahaa, deenei la hagalee haga-puni gi-nia mee humu-mee ala i-golo, nia hau-uwa, nia gahu halatee luuli ala e-ulu nia king Midian, be go nia hau ala nogo i-di gili nia uwa o nadau manu-‘camel’.

8:27  Gideon gaa-hai dana ada-balu-god gi-nia goolo gaa-dugu i dono guongo go Ophrah. Digau Israel huogodoo gu-diiagi di-nadau God, guu-hula gi-golo, e-daumaha gi-di ada-balu-god deelaa. Di mee deenei la-guu-hai di hele ang-gi Gideon mo digau dono hale.

8:28  Malaa, Midian la-gu-haga-magedaa go digau Israel, gu-hagalee hai di mee e-hagalliga-ai. Tenua la-guu-noho i-di aumaalia i-lodo nia ngadau e-madahaa-(40), gaa-dae-loo gi-di made o Gideon.

8:29  Gideon gaa-hana gi dono guongo gaa-noho i-golo.

8:30  Mee ana dama-daane dogomada-hidu-(70), idimaa, mee e-logo ono lodo.

8:31  Mee dono lodo-hege labelaa i Shechem, guu-hai dana dama-daane gi mee, gei mee guu-gahi a-mee bolo Abimelech.

8:32  Gideon tama-daane a Joash, ne-made i dono madua, gaa-danu i-lodo taalunga o dono damana go Joash, i Ophrah, di waahale o-di madahaanau o Abiezer.

8:33  I-muli-hua di made o Gideon, gei digau Israel gu-hagalee manawa-dahi ang-gi Dimaadua labelaa, gu-daumaha gi-nia balu-god Baal. Digaula gu-hilihili di “Baal o-di Hagababa” bolo e-hai di-nadau god,

8:34  gu-hagalee hai-hegau gi Dimaadua, go di-nadau God, dela ne-haga-dagaloaha ginaadou gi-daha mo nadau hagadaumee huogodoo ala nogo haganiga ginaadou.

8:35  Digaula gu-hagalee tenetene gi-di madahaanau o Gideon ang-gi nia mee humalia huogodoo a-mee ala ne-hai ang-gi digau Israel.

Chapter 9

9:1  Tama-daane Gideon go Abimelech gaa-hana gi-di waahale Shechem, di gowaa dela e-noho-ai nia duaahina o dono dinana, ga-helekai gi digaula mo digau dono dinana huogodoo

9:2  bolo gi-heeu gi digau Shechem boloo, “Dehee di-godou mee dela e-hiihai ginai? E-hai nia dama-daane e-madahidu a Gideon huogodoo e-dagi goodou, be tangada hua e-dahi? Maanadu-ina bolo Abimelech la di todo ni goodou.”

9:3  Nia duaahina tinana o-maa ga-helekai gi digau Shechem i-nia mee aanei i-di gili Abimelech, gei digau Shechem ga-helekai bolo ginaadou e-daudali a Abimelech, idimaa, mee tuaahina ni ginaadou.

9:4  Digaula gaa-wanga gi mee nia silber e-madahidu mai i-nia silber o-di hale daumaha o-di “Baal o-di Hagababa”, gei Abimelech gaa-wanga nia silber aanei gi-nia balu daangada belee hai ono ehoo.

9:5  Mee gaa-hana gi-di hale o dono damana i Ophrah, ga-daaligi ono duaahina go nia dama Gideon e-madahidu gii-mmade i-hongo tadugalaa e-dahi. Gei-ogo Jotham go tama-daane kaedahi dulii la-ne-bala hagammuni, digi daaligidia.

9:6  Digau huogodoo Shechem mo Beth=Millo ga-dagabuli-mai gi-di laagau-‘oak’ haga-madagu i Shechem, di gowaa e-hai a Abimelech gii-hai di king.

9:7  Di madagoaa Jotham ne-longono-ia di mee deenei, gei mee gaa-hana gi tomo di Gonduu Gerizim, gaa-wolo gi-nua gi digaula, “Hagalongo-mai gi-di-au, goodou go digau Shechem, gei God ga-hagalongo-adu gi goodou.

9:8  Dahi madagoaa-hua, gei nia laagau tomo ga-dagabuli-mai belee hilihili di-nadau king. Digaula ga-helekai gi-di laagau-olib boloo, ‘Hanimoi, e-hai di-madau king’.

9:9  Gei-ogo di laagau-olib ga-helekai, ‘Maa au gaa-dagi goodou, gei au e-hai gi-hagalee hai agu lolo ala belee hagalaamua nia god mo nia daangada.’

9:10  Nomuli gei nia laagau ga-helekai gi-di laagau-‘fig’ boloo, ‘Hanimoi, e-hai di-madau king.’

9:11  Gei di laagau-‘fig’ ga-helekai boloo, ‘Maa au gaa-dagi goodou, gei au e-hai gi-hagalee hai ogu golee maangala.’

9:12  Nia laagau ga-helekai gi-di laagau-‘grape’ boloo, ‘Hanimoi e-hai di-madau king.’

9:13  Di laagau-‘grape’ ga-helekai, ‘Maa au gaa-dagi goodou, gei au e-hai gi-hagalee hai agu waini, ala e-hai nia god mo nia daangada gi-tenetene.’

9:14  Gei nia laagau ga-helekai gi-di laagau duduia boloo, ‘Goe hanimoi e-hai di-madau king.’

9:15  Di laagau duduia ga-helekai, ‘Maa goodou e-hiihai bolo au e-hai di-godou king, lloomoi-laa, e-noho i-lala dogu malu. Maa goodou ga-haga-deeai, gei di ahi ga-ulaula-mai i ogu manga-duduia gaa-dudu nia laagau-‘cedar’ o Lebanon.’ ”

9:16  Gei Jotham ga-duudagi-adu dana helekai boloo, “E-hai behee? Goodou gu-hagamaanadu guu-donu humalia bolo goodou gaa-hai a Abimelech gii-hai di-godou king? E-hai behee? Goodou gu-hagalabagau a Gideon mo-di hai hagahumalia dono madahaanau, gii-tau gi-nia mee humalia Gideon ala ne-hai?

9:17  Maanadu-ina bolo dogu damana la-nogo heebagi i godou gili. Mee gu-de hagahuodia dono mouli belee benebene goodou gi-daha mo digau Midian.

9:18  Gei dangi-nei, gei goodou gu-hai-baahi gi-di madahaanau o dogu damana. Goodou gu-daaligi nia dama-daane a-maa gii-mmade, nia daane e-madahidu i-hongo di hadugalaa e-dahi, mai-hua i-di gili o Abimelech, go dana dama-daane mai i-baahi dana ahina hai-hegau, idimaa mee tuaahina ni goodou, gei goodou guu-hai a-mee di king o Shechem.

9:19  Maa di-godou mee dela ne-hai dangi-nei gi Gideon mo dono madahaanau le e-humalia gei e-donu, malaa, noho-laa tenetene i-baahi o Abimelech, ge heia a-mee gi-tenetene adu gi goodou.

9:20  Maa ga-hagalee hai beelaa, gei di ahi la-gi-hanimoi i Abimelech e-dudu digau Shechem mo Beth=Millo. Di ahi gi-hanimoi i digau Shechem mo Beth=Millo e-dudu Abimelech.”

9:21  Nomuli, gei Jotham guu-lele guu-noho i Beer, idimaa, mee nogo madagu i dono duaahina go Abimelech.

9:22  Abimelech ne-dagi a Israel i-nia ngadau e-dolu.

9:23  Gei God gaa-hai Abimelech mo digau Shechem gi-huaidu i nadau mehanga, digaula gu-hai-baahi gi Abimelech.

9:24  God ne-hai di mee deenei bolo di hala Abimelech mo digau Shechem ala ne-daaligi nia dama-daane madahidu a Gideon, gaa-hui labelaa gi digaula.

9:25  Digau Shechem ga-palapala hagammuni e-dadaumada Abimelech i-hongo nia gonduu, gei digaula e-kae nia mee ni daangada huogodoo ala e-loomoi-laalaa. Di hai deenei gu-haga-iloo gi Abimelech.

9:26  Nomuli gei Gaal, tama-daane Ebed, ga-hanimoi gi Shechem mo ono duaahina-daane, gei digau Shechem gu-hagadagadagagee gi mee.

9:27  Digaula huogodoo gaa-hula gi nadau hadagee waini, guu-hadi nia golee laagau-‘grape’, gaa-hai nia waini gaa-hai di-nadau hagamiami. Digaula gaa-hula gi-lodo di hale daumaha o di-nadau god, ga-miami, inuinu, gaa-hai nadau helekai haga-gadagada-dangada i Abimelech.

9:28  Gaal ga-helekai, “Gidaadou la nia daangada hai behee i Shechem? Gidaadou e-ngalua gi Abimelech eiaha? Mee koai? Mee la tama-daane ni Gideon! Gei Zebul e-daudali nnelekai a Abimelech, gei gidaadou e-aha ala e-hai-hegau gi mee? Hagalongo gi godou damana-maadua go Hamor, dela ne-haga-duu-aga di-godou madahaanau damana!

9:29  Au bolo au gi-dagi-hua-laa digau aanei, gei au ga-daa gi-daha Abimelech. Au ga-helekai gi mee bolo gi-hagatogomaalia-ina ana gau-dauwa, gi-lloomoi e-heebagi!”

9:30  Zebul, tagi di waahale deelaa, ga-hagawelewele dana longono-ia nnelekai Gaal ne-hai.

9:31  Mee ga-hagau ana gau kae-hegau gi Abimelech i Arumah belee helekai boloo, “Gaal, tama-daane Ebed mo ono duaahina gu-lloomoi gi Shechem, digaula hagalee dumaalia-adu gi-di-goe gi-ulu gi-lodo di waahale.

9:32  Deenei-laa, goe mo au gau-dauwa gaa-hula boo, gaa-pala hagammuni i-lodo henua.

9:33  Luada daiaa i-di hobo di laa, goodou heebagi gi-di waahale. Gaal mo ana daane ma-ga-lloo-aga e-hai-baahi adu gi goodou, goodou heebagi hagamahi i godou mahi huogodoo!”

9:34  Abimelech mo ana gau-dauwa gaa-hula boo gaa-pala i-di gili Shechem, i nadau hagabuulinga daangada e-haa.

9:35  Di madagoaa o Abimelech mo ana gau-dauwa ne-mmada gi Gaal e-hanimoi e-ulu gi-daha, gaa-duu i-di bontai di waahale, digaula ga-tuu-aga mai nia gowaa nogo pala-ai.

9:36  Gei Gaal gaa-mmada gi digaula, ga-helekai gi Zebul, “Mmada, ma nia daane e-lloo-ia i-tomo nia gonduu.” Zebul ga-helekai, “Aalaa la-hagalee nia daangada. Ma nia malu hua i-hongo nia gonduu.”

9:37  Gaal ga-helekai labelaa, “Mmada, ma nia daane e-lloo-ia gi-lala taalinga di gonduu, digau labelaa e-lloomoi taalinga di ala mai di laagau-‘oak’ o digau halahala mee!”

9:38  Zebul ga-helekai gi mee, “Aahee la au helekai huogodoo llauehe dolomeenei? Ma kooe dela ne-heeu be gidaadou e-aha ala e-hai-hegau gi taane deenei go Abimelech. Aanei la-go nia daangada nogo hai ginai au kai haga-gadagada dangada. Hula dolomeenei heebagi gi digaula.”

9:39  Gei Gaal gaa-dagi digau Shechem ga-heebagi gi Abimelech.

9:40  Abimelech gu-hanadu i-muli Gaal, gei Gaal guu-lele. Digau dogologo gu-lauwa, gu-tugi-adu-loo gi-di bontai di waahale.

9:41  Abimelech guu-noho i Arumah, gei Zebul gu-hagabagi a Gaal mo ono duaahina gi-daha mo Shechem, gei digaula gu-deemee-loo di-noho i-golo.

9:42  Di laangi nomuli, gei Abimelech ga-longono-ia bolo digau Shechem e-hagabaubau bolo e-hula gi-lodo henua.

9:43  Gei mee gaa-wwae ana gau-dauwa i-nia buini e-dolu, gaa-hula gaa-pala hagammuni i-lodo henua, gaa-tali. Dono gidee i-nia daangada e-loomoi, e-ulu gi-daha mo-di waahale, mee ga-hanimoi gi-daha mo-di gowaa nogo pala hagammuni-ai belee daaligi digaula.

9:44  Di madagoaa Abimelech mo dana buini gau-dauwa nogo hula hagalimalima belee abaaba nia bontai di waahale, nia buini e-lua ala i-golo ga-heebagi gi-nia daangada i-lodo henua, gu-daaligi digaula huogodoo.

9:45  Teebagi ne-hai i-lodo di laangi dogomaalia. Abimelech guu-kumi di waahale, gu-daaligi ono daangada, gu-oho di-maa, guu-gahu dono gelegele gi-nia toolo.

9:46  Di madagoaa digau huogodoo o Shechem ala nogo noho i-lodo di abaaba ne-longono di hai deenei, digaula gaa-hula laa-lodo di gowaa e-pala-ai i-lodo di hale daumaha o-di “Baal o-di Hagababa”.

9:47  Abimelech gu-haga-iloo ginai bolo digaula gu-dagabuli i-golo,

9:48  gei mee gaa-hana mo ana gau-dauwa gi tomo di Gonduu Zalmon. Mee ga-dahi-mai dana dalai, gaa-tuu dana manga-laagau, ga-aamo gi-hongo dono bakau. Mee ga-helekai gi ana daangada gi-hagalimalima heia be dana hai ne-hai.

9:49  Digaula huogodoo guu-hele nadau hegemanga gu-daudali Abimelech, ga-hagabae nadau manga-laagau i-di gili di gowaa e-pala hagammuni-ai nia daangada, gaa-dudu nia maa, gei nia daangada e-mana-(1,000) ala nogo i-lodo di gowaa abaaba deelaa, nia daane mono ahina, guu-mmade huogodoo.

9:50  Nomuli, gei Abimelech gaa-hana gi Thebez, ga-haganiga di waahale deelaa, gaa-kumi di-maa.

9:51  Di angulaa hagaloohi mau-dangihi nogo i-di gowaa deelaa, gei digau huogodoo di waahale mo nadau dagi guu-llele guu-pala i-golo. Digaula guu-tai ginaadou gi-lodo, guu-hula gi-nua gi-di ulu di hale.

9:52  Di madagoaa Abimelech ne-hanimoi belee heebagi gi-di angulaa hagaloohi, mee gaa-hana gi-di bontai belee dudu di angulaa.

9:53  Gei di ahina ga-hudu-iha dana hadu mmili palaawaa gi-di libogo o-maa, di libogo o-maa gu-mahaa.

9:54  Gei Abimelech ga-helekai hagalimalima gi tama-daane nogo dagidagi ana goloo-heebagi boloo, “Daaligidia au gi dau hulumanu-dauwa. Au e-de-hiihai gi tangada ga-helekai bolo au ne-daaligi-hua go di ahina.” Tama-daane deelaa ga-daaligi a Abimelech gi dana hulumanu-dauwa.

9:55  Di madagoaa digau Israel ne-mmada bolo Abimelech la-guu-made, digaula huogodoo guu-hula gi nadau guongo.

9:56  Deenei di hai a God ne-haga-donu ang-gi Abimelech dana hai-hala ne-hai gi dono damana dela ne-daaligi ono duaahina-daane e-mada-hidu gii-mmade.

9:57  God gu-hagaduadua labelaa nia daangada o Shechem gi nadau mee huaidu ne-hai, gii-hai be nnelekai a Jotham, tama-daane a Gideon, ne-helekai bolo ia ga haga-halauwa digaula.

Chapter 10

10:1  I-muli di made Abimelech, Tola, tama-daane a Puah, go tama-daane a Dodo, ga-hanimoi belee haga-mehede digau Israel. Mee tangada mai di madawaawa Issachar e-noho i Shamir i-lodo tenua gonduu o Ephraim.

10:2  Mee nogo dagi Israel i-nia ngadau e-madalua maa-dolu, gei mee gaa-made gaa-danu i Shamir.

10:3  I-muli Tola, gei-ogo Jair, tangada mai Gilead, gaa-dagi Israel i-nia ngadau e-madalua maa-lua.

10:4  Mee ana dama-daane e-motolu nogo lellele i-hongo nia manu-‘donkey’ e-motolu. Digaula nadau waahale e-motolu i tenua go Gilead, e-gahigahi hua igolo bolo nia waahale lligi a Jair.

10:5  Gei Jair gaa-made gaa-danu i Kamon.

10:6  Digau Israel gu-ihala labelaa gi Dimaadua, e-daumaha gi-nia god-dilikai go nia Baal mo nia Astarte mo nia god o Syria, Sidon, Moab, Ammon, mo Philistia. Digaula gu-diiagi Dimaadua gu-hagalee daumaha gi Mee.

10:7  Gei Dimaadua gu-hagawelewele gi digau Israel, gu-dumaalia gi digau Philistia mo Ammon gi-haga-magedaa-ina digau Israel.

10:8  Nia ngadau e-madangaholu maa-walu, digaula nogo dagi mo-di hagaduadua digau Israel ala nogo noho i tenua digau Amor i Gilead i-bahi-i-dua Jordan.

10:9  Digau Ammon gu-lloo-adu laa-lodo di monowai Jordan belee heebagi gi-nia madawaawa Judah, Benjamin mo Ephraim. Israel gu-haingadaa huoloo.

10:10  Gei digau Israel ga-tangi-anga gi Dimaadua, ga helekai, “Gimaadou gu-ihala-adu gi-di-Goe, idimaa, gimaadou gu-diiagi Goe go di-madau God, gu-daumaha gi-nia balu-god go nia Baal.”

10:11  Dimaadua ga-helekai, “Nia daangada o Egypt, Amor, Ammon, Philistia,

10:12  Sidon, Amalek, mo digau Maonite ne-haga-huaidu goodou i-lodo di madagoaa gu-doo gi-daha, gei goodou ga-tangi-mai gi-di-Au. Au digi benabena-ina goodou gi-daha mo nia haingadaa mai digaula?

10:13  Gei goodou nogo diiagi-hua Au i-golo, ga-daumaha gi-nia balu-ieidu, malaa, Au ga-hagalee daa labelaa goodou gi-daha mo nia haingadaa.

10:14  Hula, tangi-ang-gi nia god ala ne-hilihili go goodou. Heia digaula gi-benabena-ina goodou gi-daha mo godou haingadaa!”

10:15  Gei digau Israel ga-helekai gi Dimaadua, “Gimaadou gu-ihala. Heia dau mee dela e-hiihai ginai, gei benabena-ina gimaadou dangi-nei.”

10:16  Malaa, digaula gaa-kili gi-daha nadau balu-god, ga-daumaha gi Dimaadua, gei Dimaadua gu-daamaha gi-nia haingadaa digau Israel.

10:17  Digau dauwa Ammon ga-hagatogomaalia e-heebagi, ga-haga-tuu nadau hale-laa i Gilead. Digau Israel ga-dagabuli-mai gi-di gowaa e-dahi, ga-haga-tuu nadau hale-laa i Mizpah i Gilead.

10:18  Digau Israel mo nadau dagi ga-heheeu i nadau mehanga, “Ma koai dela gaa-dagi di heebagi ang-gi digau Ammon? Tangada dela gaa-dagi tauwa, go mee dela e-dagi nia daangada huogodoo i Gilead.”

Chapter 11

11:1  Jephthah, tangada-dauwa maaloo mai Gilead, tama-daane ni-di ahina huihui dono huaidina. Dono damana go Gilead

11:2  guu-hai labelaa ana dama-daane gi dono lodo donu. Nadau tomo-aga gi-nua, gei digaula ga-hagabagi a Jephthah gii-hana gi-daha mo di-nadau hale. Digaula ne-helekai gi mee, “Goe hagalee hai-mee gi-di mee mai tadau damana. Goe tama-daane ni tuai ahina.”

11:3  Jephthah guu-lele gi-daha mo ono duaahina gaa-noho i tenua go Tob. Mee gaa-hai dana hagabuulinga balu daangada e-heehee i-muli o mee.

11:4  Nomuli gei digau Ammon ga-hai-tauwa gi digau Israel.

11:5  Di madagoaa di hai deenei ne-hai, nia dagi o Gilead guu-hula e-laha-mai a Jephthah mai tenua go Tob.

11:6  Digaula ga-helekai gi Jephthah, “Hanimoi e-dagi gimaadou gii-mee di-madau heebagi gi digau Ammon.”

11:7  Jephthah ga-helekai, “Goodou ne-de-hiihai-mai huoloo gi-di-au gaa-hono au gi-daha mo-di hale dogu damana. Goodou gu-i-lodo di haingadaa dolomeenei, e-aha ala e-lloomoi gi-di-au?”

11:8  Digaula ga-helekai gi Jephthah, “Gimaadou e-huli-adu gi-di-goe dolomeenei, idimaa, gimaadou e-hiihai bolo goe e-hana i madau mua e-heebagi gi digau Ammon, e-dagi digau Gilead huogodoo.”

11:9  Jephthah ga-helekai gi digaula, “Maa goodou gaa-lahi au gi-muli gi dogu guongo e-heebagi gi digau Ammon, gei Dimaadua gaa-hai au gi-maaloo, gei au gaa-hai di-godou dagi.”

11:10  Digaula ga-helekai, “Gimaadou e-donu ginai. Dimaadua la-go di-madau dangada hagadootonu.”

11:11  Jephthah gaa-hana dalia nia dagi o Gilead, gei nia daangada gaa-hai a-mee gii-hai di-nadau dagi. Jephthah ga-hagi-aga dono manawa i Mizpah i-mua nnadumada Dimaadua.

11:12  Jephthah ga-hagau ana daangada kae hegau gi-di king o Ammon mo dana helekai, “Dau dee-donu mai gi gimaadou la di-aha? Goe ne-heebagi-mai eiaha?”

11:13  Di king o Ammon ga-helekai gi-nia gau kae-hegau a Jephthah, “Di madagoaa digau Israel ne-loomoi i Egypt, digaula guu-kae agu gowaa mai di monowai Arnon gaa-hana gi-di monowai Jabbok mo-di monowai Jordan. Goodou gaamai nia maa gi-muli dolomeenei i-di aumaalia.”

11:14  Jephthah ga-hagau labelaa ana gau kae-hegau gi-di king o Ammon,

11:15  mo dana helekai, “Ma hagalee donu bolo Israel guu-kae tenua o Moab be go tenua o Ammon.

11:16  Deenei di mee ne-hai: Digau Israel ne-hagatanga i Egypt, gaa-hula laa-hongo di anggowaa, gaa-hula gi-di Malua o Aqaba ga-lloomoi gi Kadesh,

11:17  ga-hagau nadau gau kae-hegau gi-di king o Edom belee dangi-anga i-di nadau hula laa-hongo tenua o-maa. Gei di king o Edom hagalee dumaalia. Digaula gu-heeu labelaa gi-di king o Moab, gei mee hagalee dumaalia labelaa bolo digaula e-hula laa-lodo dono henua. Gei digau Israel ga-noho-hua i Kadesh.

11:18  Nomuli, gei digaula gaa-hula laa-hongo di anggowaa, laa-daha Edom mo Moab, gaa-dau-adu-loo gi bahi-i-dua i Moab, di baahi gi-daha di monowai Arnon. Digaula gaa-noho i-golo, digi hula laa-lodo di monowai Arnon, idimaa ma tagageinga ni Moab.

11:19  Digau Israel ga-hagau nadau daangada kae-hegau gi Sihon, di king o Amor dela nogo dagi i Heshbon, gaa-dangi gi-di king gi-dumaalia-anga gi ginaadou gii-hula laa-lodo dono henua gi di-nadau henua.

11:20  Sihon digi dumaalia gi digau Israel. Mee ne-haga-dagabuli-mai ana gau-dauwa huogodoo gaa-noho i Jahaz, ga-heebagi gi digau Israel.

11:21  Dimaadua, di God o digau Israel, guu-hai digau Israel gi-maaloo i Sihon mo ana gau-dauwa. Malaa, digau Israel gaa-kae nnenua huogodoo digau Amor ala nogo noho i tenua deelaa.

11:22  Digaula gaa-noho i nnenua huogodoo digau Amor mai di monowai Arnon i-bahi-i-ngaaga gaa-tugi i-di monowai Jabbok i-bahi-i-ngeia, mo mai di anggowaa i-bahi-i-dua gaa-tugi i-di monowai Jordan i-bahi-i-dai.

11:23  Ma go Dimaadua, go di God digau Israel, dela ne-hagabagi gi-daha digau Amor i-mua ana daangada, digau Israel.

11:24  Goe e-hagamada e-kae di-maa gi-muli? Goe e-mee di-daahi nia mee di-godou god go Chemosh ne-gowadu gi-di-goe. Gei gimaadou ga-daahi nia mee huogodoo ala ne-gaamai go Yihowah, di-madau God, gi gimaadou.

11:25  Goe e-hagabau bolo goe e-mada-humalia i Balak, tama Zippor, di king o Moab? Mee digi hai-baahi gi Israel, be guu-hai dana dauwa mai gi gimaadou.

11:26  Israel nogo noho i Heshbon mo Aroer i-nia ngadau e-dolu-lau, mo nia waahale i nau gili, mo nia waahale i taalinga di monowai Arnon. Goe e-aha dela digi lahia digaula gi-muli i-nia madagoaa huogodoo aanei?

11:27  Deeai, au digi hai dagu mee huaidu adu gi-di-goe. Goe e-hai dau mee hai-gee dela e-hai au dauwa mai gi-di-au. Dimaadua la-go tangada hai-gabunga. Mee gaa-hai dana hagamodu i-mehanga digau Israel mo digau Ammon dangi-nei.”

11:28  Malaa, di king Ammon hagalee hagalongo gi nnelekai mai baahi o Jephthah.

11:29  Di Hagataalunga Dimaadua gu-hanimoi gi-baahi o Jephthah, gei mee gaa-hana laa-lodo Gilead mo Manasseh ga-hanimoi gi-muli gi Mizpah i Gilead, gaa-hana gi Ammon.

11:30  Jephthah gaa-hai dana hagababa hagamodu ang-gi Dimaadua boloo: “Goe ma-ga-gaamai gi-di-au di maaloo i digau Ammon,

11:31  gei au gaa-dudu dagu tigidaumaha go tangada dela ma-ga-ulu matagidagi gi-daha mo dogu hale belee heetugi mai i dogu hanimoi i dogu maaloo. Au ga-gowadu tangada deelaa e-hai-ai tigidaumaha.”

11:32  Jephthah ga-hanadu laa-lodo di monowai Arnon, e-heebagi gi digau Ammon, gei Dimaadua gaa-hai a-mee gi-maaloo.

11:33  Mee ne-heebagi gi digaula mai i Aroer gaa-hana gi-di gowaa i-di gili Minnith, nia waahale huogodoo e-madalua, gaa-hana-loo gaa-tugi i Abel=Keramim. Nia daangada dogologo gu-daaligi guu-mmade, gei digau Ammon gu-haga-magedaa go digau Israel.

11:34  Di madagoaa Jephthah ne-hana gi dono hale i Mizpah, tama-ahina a-maa ga-hanimoi belee heetugi gi mee, e-gagaalege ge dadaagala i-di ‘tambourine’. Mee go tama-ahina hua e-dahi a-maa.

11:35  Dono madagoaa ne-mmada gi mee, gei Jephthah ga-hahaahi ono gahu i dono lodo huaidu, ga-helekai, “Oo, dagu dama-ahina, goe e-oho dogu manawa. Ma e-aha dela e-hai-loo kooe dela e-haga-mmae au? Au guu-hai dagu hagababa hagamodu gi Dimaadua dela e-deemee dagu haga-hai-gee.”

11:36  Tama-ahina ga-helekai gi mee, “Maa goe guu-hai dau hagababa gi Dimaadua, heia dau mee ne-helekai-ai bolo e-hai-mai gi-di-au, i Dimaadua dela gu-dugu-adu dau tala di hui gi o hagadaumee digau Ammon.”

11:37  Mee gaa-dangi gi dono damana, “Heia di mee dahi deenei mai gi-di-au. Dugua-mai nia malama e-lua e-hana-iei au mo ogu ihoo gi-taele i-hongo nia gonduu e-manawa-gee-iei au gi dogu made tama-ahina madammaa.”

11:38  Jephthah gu-dumaalia gi mee gii-hana, ga-hagau a-mee gii-hana i-nia malama e-lua. Mee gaa-hana mo nia hoo o-maa, gaa-hula gi-tomo nia gonduu ga-manawa-gee, idimaa mee gaa-made gei mee digi hai dono lodo ge ana dama ai.

11:39  I-muli nia malama e-lua, gei mee ga-hanimoi gi-muli gi dono damana. Tamana gaa-hai dana mee dela ne-hagababa ang-gi Dimaadua. Gei mee guu-made tama-ahina madammaa. Deenei taamada o-di hangahaihai mouli o digau Israel,

11:40  bolo nia dama-ahina Israel e-hula gi-daha i-lodo nia laangi e-haa i-nia ngadau huogodoo e-haga-manawa-gee ang-gi tama-ahina Jephthah o Gilead.

Chapter 12

12:1  Nia daane Ephraim e-hagatogomaalia e-heebagi; digaula ne-hula gi Zaphon laa-lodo di monowai Jordan, ga-helekai gi Jephthah, “Goodou e-aha ala e-loomoi belee heebagi gi digau Ammon ge hagalee gahi gimaadou belee hula i godou muli? Gimaadou gaa-dudu doo hale gi-lala i-hongo do libogo!”

12:2  Jephthah ga-helekai gi digaula, “Au mo agu daangada la-gu-lagalagamaaloo damana ang-gi digau Ammon. Au gu-gahigahi goodou, gei goodou digi benabena-ina au gi-daha mo digaula.

12:3  Dogu mmada bolo goodou hagalee daa au gi-daha mo-di haingadaa, gei au gu-de hagahuodia dogu mouli, gu-hanadu laa-hongo tagageinga ga-heebagi gi digaula, gei Dimaadua guu-hai au gi-maaloo. Gei goodou e-aha ala e-loomoi e-heebagi-mai gi-di-au dolomeenei?”

12:4  Jephthah ga-haga-dagabuli-mai nia daane Gilead huogodoo gi-di gowaa e-dahi, ga-heebagi ga-haga-magedaa digau Ephraim, idimaa digau Ephraim gu-helekai, “Goodou digau Gilead i-lodo Ephraim mo Manasseh, goodou ne-llele gi-daha mo Ephraim!”

12:5  Di hai belee daahi digau Ephraim gi-dee hula gi-daha, digau Gilead guu-kumi nia gowaa i-di gili di monowai Jordan ala e-mee di hula laa-lodo di monowai gi-di baahi dela i-golo. Di-ingoo-hua tangada Ephraim ma-ga-hagamada belee hana laa-lodo di monowai, gei nia daane Gilead ga-heeu, “Goe tangada Ephraim?” Maa mee ga-helekai boloo, “Deeai,”

12:6  gei digaula gaa-hai gi mee bolo gi-helekai boloo, “Shibboleth”, gei mee ga-helekai boloo, “Sibboleth”, idimaa mee e-de-iloo-ia di gahi di ingoo donu. Digaula ga-daaligi a-mee gii-made i-di gowaa dela e-hulahula-ai nia daangada laa-lodo di monowai Jordan. Di madagoaa deelaa, gei nia daangada e-madahaa maa-lua mana-(42,000) ne-daaligi gii-mmade.

12:7  Jephthah nogo dagi Israel i-nia ngadau e-ono. Gei mee gaa-made gaa-danu i dono gowaa i Gilead.

12:8  I-muli Jephthah, gei Ibzan tangada mai Bethlehem gaa-dagi Israel.

12:9  Mee ana dama-daane e-motolu, ge motolu dama-ahina. Mee guu-wanga ana dama-ahina gii-hai nadau lodo i-daha mo di-nadau madahaanau, ga-laha-mai nia dama-ahina e-motolu mai daha mo di-nadau madahaanau e-lodo gi ana dama-daane. Ibzan nogo dagi Israel i-nia ngadau e-hidu,

12:10  gei mee gaa-made gaa-danu i Bethlehem.

12:11  I-muli Ibzan, gei Elon tangada mai Zebulun gaa-dagi Israel i-nia ngadau e-madangaholu,

12:12  gei mee gaa-made gaa-danu i Aijalon i-lodo tenua go Zebulun.

12:13  I-muli Elon, gei Abdon tama-daane Hillel mai Pirathon gaa-dagi Israel.

12:14  Mee ana dama-daane e-madahaa, ana dama-daane nadau dama-daane e-motolu, digaula e-lellele i-nia manu-‘donkey’ e-madahidu. Abdon nogo dagi Israel i-nia ngadau e-walu,

12:15  gei mee gaa-made gaa-danu i Pirathon, i-tenua o Ephraim i-lodo tenua gonduu o digau Amalek.

Chapter 13

13:1  Digau Israel gu-ihala labelaa gi Dimaadua, gei Mee gaa-dugu-anga gi digau Philistia gi-dagia digaula i-lodo nia ngadau e-mada-haa.

13:2  Di madagoaa deelaa, gei taane nogo i-golo dono ingoo go Manoah mai di waahale go Zorah. Mee tangada ni-di madawaawa o Dan. Di lodo o-maa di ahina dee-huwa nogo deemee di hai ana dama.

13:3  Tangada di-langi o Dimaadua ga-haga-gila gi-di ahina deelaa, ga-helekai, “Goe di ahina dee-huwa nogo deemee di-hai au dama, malaa, goe ga-hai-dama hoohoo-mai, gaa-hai dau dama-daane.

13:4  Goe hudee inu nia waini be nia dagaao ala i-golo, ge hudee gai di-ingoo hua di mee i-nia meegai ala e-bule,

13:5  gei i-muli dau dama ma-ga-haanau, goe hagalee-loo e-tuu nia ngaahulu di libogo o-maa, idimaa, mee ga-hagadabu ang-gi God mai i dono haanau, e-hai di nasarait. Mee ga-daamada dana hegau dela e-haga-dagaloaha digau Israel gi-daha mo-di mogobuna o digau Philistia.”

13:6  Gei di ahina deelaa gaa-hana ga-hagi-anga gi dono lodo boloo, “Taane mai baahi o God ne-hanimoi gi-di-au e-dina be tangada di-langi o God, e-hagamadagudagu-dangada. Au digi heeu gi mee be mee ne-hanimoi i-hee, gei mee digi hagia-mai dono ingoo.

13:7  Gei mee gu-helekai-mai bolo au ga-hai-dama, gaa-hai dagu dama-daane. Mee ne-helekai-mai bolo au gi-hudee inu nia waini be nia dagaao ala i-golo, be e-gai nia meegai ala guu-bule, idimaa, tama-daane le e-hagadabu ang-gi God gadoo be-di nasarait i-di waalooloo o dono mouli.”

13:8  Gei-ogo Manoah ga-dalodalo gi Dimaadua, ga-helekai, “Meenei Dimaadua, dumaalia-mai, heia taane a God dela ne-hagau-mai Kooe gi-hanimoi labelaa gi gimaua, e-hagi-mai be di-maa di-aha dela e-hai gi tama-daane deelaa ma-ga-haanau.”

13:9  God guu-hai gii-hai be nia helekai a Manoah, ge tangada di-langi o God gu-hanimoi labelaa gi-di ahina, i-di madagoaa a-mee nogo noho-ai i-hongo di gowaa maalama. Di lodo o-maa la-nogo hagalee i-baahi o-mee,

13:10  gei mee gaa-lele ga-hagi-anga gi dono lodo, “Mmada! Taane dela ne-hanimoi gi-di-au anadilaangi, la-gu-haga-gila-mai labelaa!”

13:11  Manoah ga-du-gi-nua, ga-daudali dono lodo, gaa-hana gi taane deelaa, ga-heeu, “Goe go taane dela ne-helekai gi dogu lodo?” Mee ga-helekai, “Uaa.”

13:12  Gei Manoah ga-helekai, “Maa au helekai ma-ga-kila-aga, gei-ogo tama-daane le e-hai gii-hai dana-aha? Di mouli behee e-hai go mee?”

13:13  Tangada di-langi o Dimaadua ga-helekai, “Doo lodo le e-hai gii-hai nia mee huogodoo ala ne-hagi-anga ko-au gi mee.

13:14  Mee hagalee hai gii-gai di-ingoo-hua di mee mai di laagau-‘grape’, mee hagalee hai gi-inu nia waini be nia dagaao ala i-golo, be e-gai tei meegai ala guu-bule. Mee e-hai gii-hai nia mee huogodoo ala ne-hagi-anga ko-au gi mee.”

13:15  Manoah e-de-iloo-ia bolo ma tangada di-langi o Dimaadua, gei Manoah ga-helekai gi mee, “Dumaalia-malaa, hudee hana. Gimaua e-dunu-adu dau damaa-kuudi.” Gei-ogo tangada di-langi ga-helekai, “Maa au gaa-noho, gei au hagalee gai gulu meegai. Maa goolua e-hiihai e-hai di-maa, dudu-ina di-maa be tigidaumaha ang-gi Dimaadua.”

13:16  Manoah e-de-iloo-ia bolo ma tangada di-langi o Dimaadua, gei Manoah ga-helekai gi mee, “Dumaalia-malaa, hudee hana. Gimaua e-dunu-adu dau damaa-kuudi.” Gei-ogo tangada di-langi ga-helekai, “Maa au gaa-noho, gei au hagalee gai gulu meegai. Maa goolua e-hiihai e-hai di-maa, dudu-ina di-maa be tigidaumaha ang-gi Dimaadua.”

13:17  Manoah ga helekai, “Hagia-mai gi gimaua do ingoo gii-mee gimaua di hagalaamua goe i-di madagoaa ma-ga-kila-aga-ai au helekai.”

13:18  Tangada di-langi ga heeu, “Goe e-hiihai bolo gi-iloo dogu ingoo eimaha? Ma di-ingoo haga-gologolo dangada.”

13:19  Manoah gaa-kae dana damaa-kuudi mono golee palaawaa, gaa-wanga gi-hongo di hadugalaa ga-tigidaumaha ang-gi Dimaadua. Gei di mee haga-gologolo tangada e-hai i-di madagoaa deelaa.

13:20  Di madagoaa nia ulaula e-hula gi-nua mai di gowaa dudu-tigidaumaha, Manoah mo dono lodo gaa-mmada gi tangada di-langi o Dimaadua e-hana gi-nua gi-di langi i-lodo di ulaula. Manoah ga-modongoohia-laa bolo taane deelaa la-go tangada di-langi o Dimaadua. Mee mo dono lodo gaa-tinga gi-hongo di gelegele, ge nau golomada e-huli gi-hongo nia gelegele. Nomuli, gei meemaa gu-hagalee mmada labelaa gi tangada di-langi deelaa.

13:21  Di madagoaa nia ulaula e-hula gi-nua mai di gowaa dudu-tigidaumaha, Manoah mo dono lodo gaa-mmada gi tangada di-langi o Dimaadua e-hana gi-nua gi-di langi i-lodo di ulaula. Manoah ga-modongoohia-laa bolo taane deelaa la-go tangada di-langi o Dimaadua. Mee mo dono lodo gaa-tinga gi-hongo di gelegele, ge nau golomada e-huli gi-hongo nia gelegele. Nomuli, gei meemaa gu-hagalee mmada labelaa gi tangada di-langi deelaa.

13:22  Manoah ga-helekai gi dono lodo, “E-donu bolo gidaua nei bolo gaa-mmade, idimaa, gidaua guu-mmada gi God!”

13:23  Gei dono lodo ga-helekai, “Maa nei bolo Dimaadua la-gu-hiihai bolo e-daaligi gidaua, gei Mee hagalee dahi-mai tau tigidaumaha. Gei Mee hagalee hagi-mai nia mee aanei, be e-hagamodongoohia-mai nia mee i-di madagoaa deenei.”

13:24  Di ahina deelaa ga-haanau dana dama-daane, gaa-wanga dono ingoo go Samson. Di tama la-gaa-tomo-aga, gei-ogo Dimaadua e-hagahumalia a-mee.

13:25  Gei nia mahi di Hagataalunga o Dimaadua ga-daamada ga-hagamaaloo a-mee i-di madagoaa o-mee nogo i-mehanga Zorah mo Eshtaol i-lodo di waahale-laa a Dan.

Chapter 14

14:1  Di laangi e-dahi, gei Samson gaa-hana gi-lala gi Timnah, ga-gidee-ia dahi dama-ahina o Philistia i-golo.

14:2  Mee gaa-hana gi-muli gi dono guongo, ga-hagi-anga gi dono damana mo dono dinana boloo, “Tama-ahina Philistia i Timnah gu-hiihai ginai au. Laha-mai a-mee. Au e-hiihai e-lodo gi mee.”

14:3  Tamana mo tinana o-maa ga-heeu gi mee, “Goe e-aha dela e-hana gi digau bouli o Philistia bolo e-lodo ginai? Goe e-deemee di-gida dau dangada i lodo do mada-haanau be i-baahi tadau daangada huogodoo?” Gei Samson ga-helekai gi dono damana, “Deelaa dagu dangada e-hiihai ginai au bolo goe gi-gaamai gi-di-au. Au e-hiihai gi mee.”

14:4  Nia maadua o-maa la-digi iloo bolo ma go Dimaadua dela e-dagi a Samson gii-hai di mee deenei, idimaa, Dimaadua e-halahala di madagoaa humalia belee heebagi gi digau Philistia. Di madagoaa deelaa, gei digau Philistia la-nogo dagi Israel.

14:5  Malaa, Samson gaa-hana gi Timnah dalia dono damana mo dono dinana. Di-nadau lloo-adu laa-lodo nia hadagee-waini ala i Timnah, gei Samson ga-longono-ia di laion e-nguunguu.

14:6  Di madagoaa hua deelaa, gei di mogobuna o Dimaadua guu-hai a Samson gi-maaloo, gei Samson ga-haahi-lua di laion gi ono lima be tamaa-kuudi. Gei mee digi hagi-anga-ina dana mee dela ne-hai gi ono maadua.

14:7  Gei mee gaa-hana ga-helehelekai gi tama-ahina deelaa, gei mee gu-hiihai gi mee.

14:8  Nia laangi dulii nomuli, gei Samson gaa-hana belee lodo gi mee. Dono hanadu i-hongo di ala, gei mee gaa-hana gi-daha mo di ala belee mmada gi-di laion dela ne-daaligi ko-ia, gei mee gu-homouli ne-mmada gi tagabae lamu mo nia mee maangala i-lodo tuaidina di laion.

14:9  Mee ga-llagu-mai nia mee maangala gi-lodo ono lima, gaa-hana mo-di gaigai nia maa. Gei mee gaa-hana gi dono damana mo dono dinana gaa-wanga ana mee gi meemaa. Meemaa guu-gai nia maa, gei Samson digi hagi-anga gi meemaa bolo ia ne-gaamai nia maa mai i-lodo tuaidina o-di laion made.

14:10  Tamana o-maa gaa-hana gi-di hale o-di ahina, gei-ogo Samson gaa-hai dana hagamiami i-golo. Deenei di hai e-nnoo-mau e-haihai go nia dama-daane ala ga-hai-lodo.

14:11  Di madagoaa digau Philistia ne-mmada gi mee, digaula ga-hagau nadau dama-daane e-motolu belee noho i-baahi o mee.

14:12  Samson ga-helekai gi digaula, “Au ga-hagi-adu dahi ala-mee e-dongo go goodou. Maa tei goodou guu-dongo di-maa i-mua nia laangi e-hidu o tagamiami, gei au gaa-wanga gi tangada-nei mo tangada-nei i goodou dahi gahu lenge humalia mo tei bida gahu humalia. Gei maa goodou digi dongo di-maa i-mua nia laangi e-hidu o tagamiami, gei goodou gaamai gi-di-au nia mee labelaa beelaa.” Gei digaula ga-helekai, “Hagia-mai di ala-mee gi-hagalongo gimaadou.”

14:13  Samson ga-helekai gi digaula, “Au ga-hagi-adu dahi ala-mee e-dongo go goodou. Maa tei goodou guu-dongo di-maa i-mua nia laangi e-hidu o tagamiami, gei au gaa-wanga gi tangada-nei mo tangada-nei i goodou dahi gahu lenge humalia mo tei bida gahu humalia. Gei maa goodou digi dongo di-maa i-mua nia laangi e-hidu o tagamiami, gei goodou gaamai gi-di-au nia mee labelaa beelaa.” Gei digaula ga-helekai, “Hagia-mai di ala-mee gi-hagalongo gimaadou.”

14:14  Gei mee ga-helekai, “Mai i-lodo di mee gai-mee e-lloomoi-ai nia mee e-gai. Mai i-lodo di mee e-maaloo e-lloomoi-ai nia mee e-maangala.” I-muli nia laangi e-dolu, gei digaula digi gida tadinga di ala-mee deelaa.

14:15  Di haa laangi i-nia laangi e-hidu aalaa, gei digaula ga-helekai gi-di lodo o Samson, “Halahalau-ina doo lodo gi-hagia-mai tadinga di ala-mee deenei. Maa goe ga-hagalee hai, gei gimaadou gaa-dudu di hale do damana, gaa-dudu goe dalia di-maa. E-hai behee? Goolua ne-gahi-mai gimaadou belee kae madau goloo go goolua?”

14:16  Di lodo Samson gaa-hana gi mee mo-di dangi, ga-helekai gi mee, “Goe hagalee e-aloho i-di-au! Goe e-ginagina i-di-au. Goe ne-hai dau ala-mee gi ogu ihoo, gei goe digi hagia-mai tadinga di-maa!” Gei mee ga-helekai, “Mmada. Au digi hagi-anga-ina gi ogu maadua labelaa. Au e-hagi-adu di-maa gi-di-goe eimaha?”

14:17  Gei di lodo o-maa gu-dangidangi i-lodo nia laangi e-hidu huogodoo o tagamiami. Mee ne-hai ana helekai dee-donu e-logo, gei Samson ga-hagi-anga tadinga la gi mee i togohidu laangi. Gei-ogo mee ga-hagi-anga di-maa gi digau Philistia.

14:18  Malaa i-di hidu laangi, i-mua Samson ne-hana gi-lodo dono ruum-kii, nia daane o-di waahale ga-helekai gi mee, “Ma di-aha dela e-mee di mada-maangala i-nia mee-maangala ala ne-hai go nia lamu? Ma di-aha dela e-mee di-mada-maaloo i-di laion?” Samson ga-helekai “Maa goodou digi hagamaluu godou gelegele gi dagu kau, goodou deemee di-iloo tadinga o-di ala-mee dolomeenei.”

14:19  Di madagoaa hua deelaa, di mogobuna o Dimaadua guu-hai a Samson gi-maaloo, gei mee gaa-hana gi-lala gi Ashkelon, ga-daaligi ana daane e-motolu gii-mmade, ga-daa gi-daha nadau goloo gaa-wanga nia gahu humalia gi-nia daane ala ne-dongo di ala-mee. Nomuli gei mee gaa-hana gi dono guongo, e-hagawelewele huoloo i-di mee dela ne-hai.

14:20  Gei di lodo o-maa la-guu-wanga gi taane dela nogo hai tangada haga-modongoohia o di-nau haga-hai-lodo.

Chapter 15

15:1  Mai gi nomuli, i-di madagoaa e-hagi-ai nia golee-‘wheat’, gei Samson gaa-hana e-heetugi gi dono lodo, gaa-kae dana dama kuudi gi mee. Gei mee ga-helekai gi tamana o maa, “Au e-hiihai e-hana gi-di ruum o dogu lodo.” Gei mee hagalee dumaalia ang-gi mee gii-hana.

15:2  Mee ga-helekai gi Samson, “Au nei gu-hagabaubau bolo goe gu-de-hiihai gi mee, gei au guu-wanga a-mee gi do ehoo hagaaloho. Gei tuaahina-ahina dulii o-maa le e-mada-madanga. Goe e-mee di-hai doo lodo gi mee.”

15:3  Samson ga-helekai, “Tolongo-nei gei au hagalee dau gi dagu hai dela gaa-hai ang-gi digau Philistia.”

15:4  Gei mee gaa-hana gaa-kumi ana manu-‘fox’ e-dolu-lau. Gei mee ga-noonoo nia hugu digaula dau dogolua, gaa-nnoo ginai nia lama-ulaula i-mehanga nia ‘fox’ aalaa.

15:5  Gei mee gaa-dudu nia lama aalaa, ga diiagi digaula gii-hula gi-lodo nia hadagee-‘wheat’ digau Philistia. Di hai deenei dela ne-hai, mee guu-dudu nia golee palaawaa ala guu-hadi, mo nia mee labelaa ala e-tomo hua igolo i-lodo nadau hadagee. Nia hadagee waini mo nia hadagee laagau-olib la-guu-wwele labelaa.

15:6  Di madagoaa digau Philistia ne-heeu be di-ma koai dela ne-hai di mee deenei, gei digaula ga-iloo bolo ma go Samson dela ne-hai di-maa, idimaa, tamana o dono lodo go taane mai Timnah, la-guu-wanga di lodo Samson la gi dono ehoo. Gei-ogo digau Philistia gaa-hula gaa-dudu di ahina deelaa mo dono damana gii-mmade.

15:7  Samson ga-helekai gi digaula, “Maa deenei go di-godou hai e-hai, malaa, au e-hagamodu bolo au hagalee noho-loo gaa-dae-loo gi dagu hui-adu gi goodou!”

15:8  Mee ga-heebagi gi digaula ga-daaligi ana gau dogologo gii-mmade. Gei mee gaa-hana gaa-noho i-lodo di bongoo i-di gonduu helemodu i Etam.

15:9  Digau Philistia ga-loomoi ga-haga-duu-aga nadau hale-laa i Judah, ga-heebagi gi-di waahale go Lehi.

15:10  Digau Judah ga-heeu gi digaula, “Goodou e-heebagi-mai gi gimaadou eiaha?” Digaula ga-helekai, “Gimaadou ne-lloomoi belee galabudi a Samson, gaa-hai gi mee di hai a-mee dela ne-hai-mai gi gimaadou.”

15:11  Malaa, digau e-dolu mana-(3,000) o Judah gaa-hula gi-di bongoo i-di gonduu helemodu dela i Etam, ga-helekai gi Samson, “Goe e-de-iloo bolo digau Philistia le e-dagi gidaadou? Ma di-aha dela ne-hai kooe mai gi gidaadou?” Gei mee ga-helekai, “Au ne-hai gi digaula di mee digaula dela ne-hai-mai gi-di-au.”

15:12  Digaula ga-helekai gi mee, “Gimaadou ne-lloomoi gi kinei belee nnoo goe, e-wanga goe gi digaula.” Samson ga-helekai, “Goodou helekai-mai haga-huudonu, bolo goodou hagalee daaligi au gii-made.”

15:13  Digaula ga-helekai, “E-humalia, gimaadou dela-hua e-nnoo goe, gaa-wanga gi digaula. Gimaadou hagalee daaligi goe.” Malaa, digaula gaa-nnoo a-mee gi-nia hali hoou e-lua gaa-lahi a-mee i-di bongoo deelaa.

15:14  Di madagoaa o mee ne-dau i Lehi, digau Philistia gu-llele-mai gi mee mo-di wwolowwolo gi mee. Di madagoaa hua deelaa, gei di mogobuna o Dimaadua gaa-hai a-mee gi-maaloo, gei mee ga-haga-mmodummodu nia hali ala nogo i-di gili ono lima mo ono babaalima, gadoo be nia gili-hau guu-wwele.

15:15  Gei mee gaa-gida dana iwi-gauwae damana o-di manu-‘donkey’ dela dogo made hua. Mee ga-dahi-aga di-maa gi-nua, ga-daaligi ana daangada e-mana-(1,000) gi-di maa.

15:16  Gei Samson ga-daahili, “Au ne-daaligi agu daangada e-mana gi-di iwi-gauwae manu-‘donkey’. Au ne-hagabae digaula gi-nua i hagabae gi-di iwi-gauwae manu-‘donkey’.”

15:17  I-muli di mee deelaa, gei mee gaa-hudu di iwi-gauwae deelaa la-gi-daha. Di gowaa dela nogo-hai teebagi la-gu-haga-ingoo bolo Ramath=Lehi.

15:18  Gei-ogo Samson gu-hieinu huoloo, gei mee gaa-wolo ang-gi Dimaadua ga-helekai, “Goe ne-gaamai gi-di-au di aali damanaiee deenei. Malaa, dolomeenei gei au la-gaa-made i dogu hieinu, gaa-kumi go digau bouli o Philistia?”

15:19  Gei-ogo God ga-haga-mahuge dana gowaa i-lodo di gelegele i Lehi, gei nia wai ga-loo-aga i-lodo di-maa. Samson ga-inu, ga-daamada ga-manawa lamalia labelaa. Gei di monowai uwa-aga deelaa la-gu-haga-ingoo bolo En=Hakkore, dolomeenei gei di-maa i-golo-hua i Lehi.

15:20  Samson nogo madamada-humalia i Israel i-nia ngadau e-madalua, di madagoaa digau Philistia nogo dagi tenua.

Chapter 16

16:1  Dahi laangi hua, gei Samson gaa-hana gi-di waahale o digau Philistia go Gaza, di gowaa ne-heetugi-iei mee gi-di ahina huihui dono huaidina, gaa-hana gaa-kii i-baahi o mee.

16:2  Nia daangada o Gaza ga-iloo bolo Samson la i-golo, gei digaula ga-haganiga-mai i-di gili di gowaa deelaa, gaa-tali a-mee i-di bontai di abaaba o-di waahale, i-di waalooloo o-di boo. Digaula nogo noho deemuu i-golo i-di boo, e-hagabaubau boloo, “Gidaadou gaa-tali gi-di luada, ga-daaligi a-mee gii-made.”

16:3  Gei Samson ne-kii-hua gaa-tugi i-di madahidi-waelua di boo. Gei mee ga-ala-aga-hua, gaa-oho di bontai di abaaba di waahale, mono duludulu mo-di loogu mo nia mee huogodoo ala i-golo. Mee gaa-dugu nia maa gi-hongo ono bakau, gaa-kae gi tomo di gonduu dela e-huli-adu gi Hebron.

16:4  I-muli di mee deenei, gei Samson ga-hiihai gi-di ahina dono ingoo go Delilah, dela e-noho i-di gowaa mehanga gonduu o Sorek.

16:5  Nia king o digau Philistia dogolima gaa-hula gi-di ahina deelaa, ga-helekai, “Halahalau-ina Samson gi-hagia-adu be ia e-maaloo di-aha, gii-mee di-lawalawa a-mee, gaa-hai a-mee gi-bagege. Gimaadou huogodoo tangada e-dahi ga-gowadu gi-di-goe nia bahihadu silber e-mana maa-lau-(1,100).”

16:6  Delilah ga-helekai gi Samson, “Dumaalia, hagia-mai be-di maa di-aha dela e-maaloo-iei goe huoloo. Maa tangada ma-ga-hiihai e-nnoo goe e-hai goe gi-bagege, mee e-mee di hai di-maa behee?”

16:7  Samson ga-helekai, “Maa digaula ga-lawalawa au gi-nia uga hilahila hoou e-hidu ala digi maangoo, gei au ga-bagege be di-ingoo-hua tangada.”

16:8  Nia king o Philistia ga-gaamai nadau uga hilahila hoou e-hidu gi Delilah, nia uga digi haga-maangoo-ina, gei Delilah gaa-nnoo a Samson.

16:9  Delilah la ana daane nogo-talitali i-lodo tuai ruum, gei Delilah gaa-wolo gi-nua, “Samson! Digau Philistia gu-lloomoi!” Gei-ogo Samson ga-haga-mmodummodu nia uga aalaa gadoo be nia deleedu ne-tale gi-di ahi. Malaa, digau Philistia la-digi iloo hua igolo di mee dela e-maaloo-iei mee.

16:10  Delilah ga-helekai gi Samson, “Mmada, goe ne-halahalau au ge digi hagia-mai gii-donu. Dumaalia-mai, hagia-mai be goe e-mee di-lawalawa behee?”

16:11  Samson ga-helekai gi mee, “Maa digaula gaa-nnoo au gi nia hali hoou ala digi hai-hegau-ai, gei au ga-bagege-hua be di-ingoo-hua tangada.”

16:12  Gei-ogo Delilah ga-gaamai ana hali hoou gaa-nnoo a-mee. Gei Delilah gaa-wolo gi nua, “Samson, digau Philistia gu-lloomoi!” Nia daane la-nogo tali i lodo tuai ruum. Gei Samson la-ne-haga-mmodummodu nia hali gi-daha mo ono lima gadoo be nia loahi deleedu.

16:13  Delilah ga-helekai gi Samson, “Goe e-halahalau au hua igolo, hagalee hagi-mai gii-donu. Hagia-mai be goe e-mee di-nnoo behee?” Samson ga-helekai, “Maa goe gaa-bini nia hugu belu ngaahulu e-hidu i dogu libogo, ga-daahi gii-mau gi-di laagau, gei au ga-bagege-hua be di-ingoo-hua tangada.”

16:14  Delilah gaa-hai a-mee gii-kii, gaa-bini nia hugu belu ngaahulu i-di libogo o-maa, gaa-hai nia maa gii-mau gi-di laagau, gaa-wolo, “Samson! Digau o Philistia gu-lloomoi!” Gei Samson ga-ala-aga, ga-hagamehede ono ngaahulu.

16:15  Gei-ogo Delilah ga-helekai gi mee, “Goe e-helekai-mai bolo goe e-aloho i-di-au behee, be goe e-halahalau-hua au? Goe gu-halahalau au haga-dolu, gei goe digi hagia-mai be di-maa di-aha dela e-hai goe gi-maaloo dangihi.”

16:16  Nia laangi huogodoo, gei di ahina deelaa le e-heheeu gi mee di mee dela e-maaloo-iei mee. Samson gu-hagalongo-gee huoloo guu-buhi i dono lodo dela e-heheeu ana mee logo i-di gili di mee deelaa,

16:17  ga-hidi-mai-ei Samson ga-hagi-anga gi-di ahina gii-donu. Samson ga-helekai, “Ogu ngaahulu la-digi tuudia-loo. Au ne-hagadabu ang-gi God be-di nasarait mai i dogu haanau. Maa ogu ngaahulu la-gaa-tuu gi-daha, gei au ga-deai ogu mahi ai, ga-bagege-hua be di-ingoo-hua tangada.”

16:18  Di madagoaa Delilah ne-modongoohia bolo mee gu-hagi-anga gi-deia telekai e-donu, gei mee gaa-kae dana haga-iloo gi-nia king o Philistia boloo, “Lloomoi labelaa hagadahi. Mee gu-hagi-mai gi-di-au di tonu.” Gei digaula ga-lloomoi mo-di gaamai nadau bahihadu dalia ginaadou.

16:19  Delilah gaa-hai a Samson gii-kii i dono baahi, ga-gahi-mai taane e-tuu gi-daha nia hugu belu e-hidu o-nia ngaahulu o Samson. Nomuli gei Delilah ga-hagaduadua a-mee, i-mee dela gu-deai ono mahi ai.

16:20  Gei Delilah gaa-wolo gi-nua, “Samson! Digau o Philistia la-gu-lloomoi!” Mee ga-ala-aga ga-hagamaanadu boloo, “Au gaa-hai au gi-mehede be dagu hai dela nogo haihai.” Gei mee digi iloo-ia bolo Dimaadua la-gu-diiagi ia.

16:21  Digau Philistia gaa-kumi a-mee, gaa-kabe ono golomada gi-daha. Digaula gaa-lahi a-mee gi-di waahale o Philistia go Gaza, ga-lawalawa a-mee gi-nia daula-baalanga. Digaula ga-haga-ngalua a-mee e-olo ana palaawaa i-lodo di hale-galabudi.

16:22  Gei-ogo nia ngaahulu o-maa gu-daamada guu-tomo labelaa.

16:23  Nia king o digau Philistia ga-dagabuli-mai e-hai di nadau hagamiami mo-di hai di-nadau tigidaumaha damanaiee ang-gi di-nadau god go Dagon. Digaula ga-dadaahili boloo, “Di-madau god guu-hai gimaadou gi-maaloo i-di madau hagadaumee go Samson!”

16:24  Digaula nogo-tenetene ga-helekai, “Laha-mai a Samson e-haga-gadagada gidaadou.” Di-nadau madagoaa ne-daa gi-daha a-mee mo-di hale-galabudi, digaula gaa-hai a-mee gii-hai di mee e-haga-gadagada ginaadou, ga-haga-duu a-mee i-mehanga nia duludulu e-lua. Digaula gaa-mmada gi mee, gaa-huwa di-nadau daahili hagaamu gi di-nadau god boloo: “Di-madau god guu-hai gimaadou gi-maaloo i-di madau hagadaumee, dela ne-hagahuaidu madau henua mo-di daaligi ana daangada dogologowaahee i gimaadou guu-mmade!”

16:25  Digaula nogo-tenetene ga-helekai, “Laha-mai a Samson e-haga-gadagada gidaadou.” Di-nadau madagoaa ne-daa gi-daha a-mee mo-di hale-galabudi, digaula gaa-hai a-mee gii-hai di mee e-haga-gadagada ginaadou, ga-haga-duu a-mee i-mehanga nia duludulu e-lua. Digaula gaa-mmada gi mee, gaa-huwa di-nadau daahili hagaamu gi di-nadau god boloo: “Di-madau god guu-hai gimaadou gi-maaloo i-di madau hagadaumee, dela ne-hagahuaidu madau henua mo-di daaligi ana daangada dogologowaahee i gimaadou guu-mmade!”

16:26  Samson ga-helekai-adu gi tamagiigi dela nogo kumi dono lima, nogo dagi ia, “Heia au gii-bili gi-nia duludulu ala e-daahi di hale gi-nua, au e-hiihai e-hagapale gi-nia maa.”

16:27  Di hale deelaa la-guu-honu daane mo ahina. Gei-ogo nia king o Philistia dogolima huogodoo la-nogo i-golo. Holongo nia daane mo nia ahina nia mana e-dolu nogo i-hongo tuatala nogo mmada gi Samson.

16:28  Gei-ogo Samson ga-dalodalo, “Meenei Tagi go Yihowah, dumaalia-mai. Meenei God, langahia-laa au, gaamai ogu mahi, deenei hua hagadahi, gii-mee au di-hai-baahi hagadahi gi digau Philistia e-haga-tongaadahi au gi digaula ala ne-daa gi-daha ogu golomada e-lua.”

16:29  Samson gaa-kumi nia duludulu mugi-lodo ala e-daahi di hale. Gaa-wanga ono lima gi-di gili nia duludulu, gaa-hono nia maa,

16:30  mo-di wolo gi-nua, “Heia au gii-made dalia digau o Philistia!” Mee gaa-hono nia duludulu e-lua aalaa gi ono mahi huogodoo ala i dono baahi, gei di hale la-gu-meheu gi-lala gi-hongo nia king dogolima aalaa mo nia daangada huogodoo. Di madagoaa o-maa ne-made, gei mee ne-daaligi ana daangada dogologo i ana daangada ne-daaligi i dono madagoaa nogo mouli-ai.

16:31  Nia duaahina-daane o-maa mo digau huogodoo o dono damana gu-lloo-ia belee kae tuaidina o-maa. Digaula guu-lahi a-mee guu-danu i-mehanga nia waahale go Zorah mo Eshtaol i taalunga o dono damana go Manoah. Mee nogo hai di tagi ni digau Israel i-nia ngadau e-madalua.

Chapter 17

17:1  Taane dono ingoo go Micah nogo noho i-lodo tenua gonduu o Ephraim.

17:2  Mee ga-helekai gi dono dinana, “Di madagoaa tangada ne-gaiaa au bahihadu silber e-mana maa-lau-(1,100), goe gu-haga-halauwa tangada deelaa. Au ne-longono bolo goe guu-hai di-maa. Mmada, aanei nia bahihadu, ma ko-au dela ne-kae nia maa.” Tinana o-maa ga-helekai, “Dimaadua ga-haga-humalia-laa goe, dagu dama-daane!”

17:3  Gei Micah gaa-wanga nia bahihadu gi dono dinana, gei dono dinana ga-helekai, “Ko-au hua deenei e-wanga nia silber gi Dimaadua, belee daahi di halauwa gi-dee hana gi dagu dama-daane. Nia silber aanei le e-hai di ada-balu-ieidu laagau e-hii gi-nia silber. Dolomeenei gei au e-gowadu nia bahihadu silber gi-muli.”

17:4  Gei mee gaa-wanga nia bahihadu gi dono dinana. Tinana gaa-kae e-lua-lau-(200) gaa-wanga gi tangada ngalua-baalanga dela ne-paa di ieidu laagau, gaa-hii gi-nia silber. Di ada deenei ne-dugu i-lodo di hale Micah.

17:5  Taane deenei go Micah la dana gowaa hai-daumaha i-golo. Mee guu-hai ana ada balu-ieidu mo-di ‘ephod’, gaa-dongo dana dama-daane e-hai dana dangada hai-mee-dabu.

17:6  Di madagoaa deelaa, gei Israel nogo dono king ai. Nia daangada huogodoo gu-hai-hua nadau mee ala e-bida hiihai ginai.

17:7  I-di madagoaa hua deelaa, tama-daane i digau Levi nogo noho i-di waahale go Bethlehem i Judah.

17:8  Mee ga-hagatanga i Bethlehem belee halahala dono huai gowaa e-noho-ai. Mee gaa-hana ga-hanimoi gi-di hale o Micah i-lodo tenua gonduu o Ephraim.

17:9  Micah ga-heeu gi mee, “Goe ne-hanimoi i-hee?” Mee ga-helekai, “Au tangada Levi mai Bethlehem i Judah. Au e-halahala dagu gowaa e-noho-ai.”

17:10  Micah ga-helekai, “Noho i dogu baahi. Hai dagu dangada hagamaamaa mo dagu dangada hai-mee-dabu, gei au ga-gowadu nia bahihadu silber e-madangaholu di ngadau e-dahi, mo oo gahu mo au meegai.”

17:11  Tangada Levi guu-donu ginai bolo e-noho i-baahi Micah, guu-hai be tama-daane ni mee.

17:12  Micah gaa-dongo a-mee e-hai dana dangada hai-mee-dabu, gei mee gaa-noho i-lodo di hale Micah.

17:13  Micah ga-helekai, “Gei di-maa gu-iai tangada Levi guu-hai dagu dangada hai-mee-dabu, au e-iloo bolo Dimaadua gaa-hai nia mee gii-gila humalia mai gi-di-au.”

Chapter 18

18:1  Di madagoaa deelaa, di king nogo i Israel ai. Nia laangi aalaa di madawaawa Dan nogo halahala henua belee kumi e-noho-ai, idimaa digaula digi kae nadau henua i-mehanga nia madawaawa Israel.

18:2  Nia daangada Dan ga-hilihili nadau daane humalia dogolima mai i-lodo nia madahaanau huogodoo i-lodo di madawaawa, ga-hagau digaula mai nia waahale o Zorah mo Eshtaol mo nadau helekai e-hagadina hagammuni nia mee i-hongo tenua. Di-nadau dau i-lodo tenua gonduu o Ephraim, digaula gaa-noho i-di hale o Micah.

18:3  Nadau madagoaa nogo i-golo, digaula ga-modongoohia nia hagadilinga lee helekai o tangada Levi, digaula ga-loomoi gi mee ga-heeu, “Goe e-hai dau-aha i ginei? Ma koai dela ne-laha-mai goe gi kinei?”

18:4  Gei mee ga-helekai, “Au dagu duhongo-hegau i-baahi o Micah dela e-hui au dela e-hai dana dangada hai-mee-dabu.”

18:5  Digaula ga-helekai gi mee, “Dumaalia heeu gi God be gimaadou e-haadanga-lamalia i tolongo nei.”

18:6  Tangada hai-mee-dabu ga-helekai, “Goodou hudee de-nnoomaalia i dahi mee. Dimaadua e-madamada-humalia i goodou i tolongo nei.”

18:7  Gei nia daane dogolima ga-hagatanga gaa-hula gi-di waahale o Laish. Digaula gaa-mmada gi-di noho di aumaalia o-nia daangada e-hai gadoo be digau Sidon. Digaula la digau e-tenetene, e-noho deemuu, hagalee lagalagamaaloo, nadau mee huogodoo ala e-hiihai ginai gu-i-golo. Digaula e-noho mogowaa i digau Sidon, ge hagalee buni-anga gi nnuai daangada.

18:8  Di madagoaa nia daane dogolima ne-hula gi-muli gi Zorah mo Eshtaol, nia daangada ga-heeu gi digaula nadau mee ala ne-kida.

18:9  Digaula ga-helekai, “Gidaadou ga-heebagi gi Laish. Gimaadou guu-mmada gi tenua, tenua le e-humalia huoloo. Hudee noho i kinei, godou mee e-hai ai. Hagalimalima e-hula e-kumi di-maa!

18:10  Goodou gaa-dau i-golo, goodou gaa-gida bolo nia daangada hagalee hai bolo goodou e-hagabaubau huaidu. Ma tenua damana, nia mee huogodoo e-hiihai ginai nia daangada i-golo, gei God gu-gowadu di-maa gi goodou.”

18:11  Nia daane e-ono-lau-(600) o-di madawaawa Dan gu-hagatanga i Zorah mo Eshtaol, gu-togomaalia e-heebagi.

18:12  Digaula gaa-hula ga-haga-tuu nadau hale-laa i-bahi-i-dai o Kiriath=Jearim i Judah. Gaa-hidi-mai-ai di gowaa deelaa e-haga-ingoo hua igolo bolo “Di Gowaa Noho o Dan”.

18:13  Digaula gaa-hula mai di gowaa deelaa ga-loomoi gi-di hale o Micah i-lodo tenua gonduu o Ephraim.

18:14  Gei nia daane dogolima ne-hula belee hagadina hagammuni nia mee o tenua go Laish, ga-helekai gi nadau ihoo, “E-hai behee? Goodou e-iloo bolo di ada balu-ieidu e-hii gi-nia silber la i-lodo di hale e-dahi i-nia hale aanei? Nia ada balu-ieidu labelaa i-golo mo-di ‘ephod’. Goodou e-hagabaubau bolo tadau maa di-aha dela gaa-hai?”

18:15  Gei digaula gaa-hula gi-lodo di hale Micah, di gowaa e-noho-ai tangada Levi, ga-heeu be ia e-hai behee.

18:16  Di madagoaa-hua deelaa, gei digau-dauwa e-ono-lau-(600) nogo tuu i-di bontai di abaaba, gu-togomaalia e-heebagi.

18:17  Nia daane hagadina hagammuni-mee dogolima gaa-hula haga-huudonu gi-lodo di hale, gaa-kae di ada-laagau balu-ieidu dela ne-hii gi-nia silber, mo nia ada-mee ala i-golo, mo-di ‘ephod’, gei tangada hai-mee-dabu e-noho i-di bontai dalia digau-dauwa e-ono-lau-(600).

18:18  Di madagoaa nia daane ne-hula gi-lodo di hale Micah gaa-kae nia mee dabu, tangada hai-mee-dabu ga-heeu gi digaula, “Goodou e-hai di-godou aha?”

18:19  Digaula ga-helekai gi mee, “Hudee leelee. Hudee hai dau helekai e-dahi. Hanimoi dalia gimaadou, e-hai di-madau dangada hai-mee-dabu mo tangada hagamaamaa. Goe hagalee hiihai bolo goe e-hai tangada hai-mee-dabu o Israel hagatau, hagalee tangada hai-mee-dabu ni di madahaanau ni taane e-dahi?”

18:20  Deenei guu-hai tangada hai-mee-dabu gi-tenetene huoloo, gei mee gaa-kae nia mee dabu aalaa, gaa-hana dalia digaula.

18:21  Digaula gaa-huli gi-muli ga-hagatanga gaa-hula, gei nadau dama, nadau manu, mo nadau mee huogodoo e-hula i-mua digaula.

18:22  Digaula gu-mada mogowaa i-di hale, gei Micah ga-gahi-mai ana gau ala e-noho hoohoo ang-gi-deia belee heebagi. Digaula gu-loomoi gu-hoohoo-mai gi digau Dan,

18:23  gaa-wwolo gi digau Dan. Digaula ga-huli-mai gi-muli ga-heeu gi Micah, “Ma di-aha? Goe ne-hagadagabuli digau aanaa eiaha?”

18:24  Micah ga-helekai, “Goodou e-hai bolo-aha: ‘Ma di-aha?’ Goodou guu-kae dagu dangada hai-mee-dabu mo nia god ne-hai ko-au. Agu maa ni-aha ala guu-dubu?”

18:25  Digau Dan ga-helekai, “Goe e-humalia belee hagalee hai au helekai, gi-de hagawelewele digau aanei, ga-heebagi-adu gi-di-goe. Goe mo doo hale hagatau la-gaa-mmade.”

18:26  Gei digau Dan gaa-hula. Gei Micah guu-mmada bolo digaula e-maaloo balua i-deia, ga-huli-hua gi-muli gaa-hana gi dono hale.

18:27  I-muli digau Dan ne-kae tangada hai-mee-dabu mo nia mee Micah ne-hai, digaula gaa-hula ga-heebagi gi digau Laish, di waahale digau noho tenetene, noho deemuu ala nogo i-di gowaa mehanga gonduu dela e-noho labelaa di waahale go Beth=Rehob. Digaula gu-daaligi nia daangada, guu-dudu di waahale. Hagalee tangada belee benebene digaula gi-daha mo-di haingadaa ai, idimaa Laish le e-mogowaa i Sidon, gei digaula digi hai nadau ihoo gi-nia daangada i-golo ai labelaa. Digau Dan guu-hau hoou di waahale guu-noho gi-lala i-golo.

18:28  I-muli digau Dan ne-kae tangada hai-mee-dabu mo nia mee Micah ne-hai, digaula gaa-hula ga-heebagi gi digau Laish, di waahale digau noho tenetene, noho deemuu ala nogo i-di gowaa mehanga gonduu dela e-noho labelaa di waahale go Beth=Rehob. Digaula gu-daaligi nia daangada, guu-dudu di waahale. Hagalee tangada belee benebene digaula gi-daha mo-di haingadaa ai, idimaa Laish le e-mogowaa i Sidon, gei digaula digi hai nadau ihoo gi-nia daangada i-golo ai labelaa. Digau Dan guu-hau hoou di waahale guu-noho gi-lala i-golo.

18:29  Digaula guu-huli di ingoo di waahale mai Laish ang-gi Dan, gi di-nadau damana-madua go Dan, tama-daane ni Jacob.

18:30  Digau Dan gu-haga-duu-aga di ada-mee e-daumaha ginai, gei Jonathan, tama-daane a Gershom, dono damana go Moses, e-hai tangada hai-mee-dabu ni digau Dan, gei ono hagadili e-hai digau hai-mee-dabu gaa-dae-loo gi-di lahi galabudi o-nia daangada.

18:31  Nia ada balu-ieidu a Micah nogo i-golo i-di waalooloo o-di Hale-laa o God nogo duu i Shiloh.

Chapter 19

19:1  Nia laangi aalaa, i-mua digau Israel ne-hai di-nadau king, tangada Levi nogo noho i-lodo tenua gonduu o Ephraim. Mee ne-lahi dana dama-ahina mai Bethlehem i Judah belee hai dono lodo-hege.

19:2  Gei di ahina ga-hagalee manawa-dahi gi mee, gaa-hana gi-muli gi-di hale dono damana i Bethlehem, gaa-noho i-golo i-nia malama e-haa.

19:3  Taane deelaa ga-haga-maanadu bolo ia e-hana i-muli o mee, e-hagamada e-longilongi a-mee gi-hiihai di hanimoi gi-deia. Mee gaa-lahi dana dangada hai-hegau, ge lua manu-‘donkey’ dalia eia. Di ahina gaa-hai tangada Levi gi-ulu gi-lodo di hale, gei di madagoaa tamana di ahina ne-mmada gi mee, gaa-hai dana hagaaloho gi mee.

19:4  Tamana ga-hiihai gi tangada Levi gii-noho i-golo, gei mee gaa-noho nia laangi e-dolu. Taga-hai-lodo ga-miami gaa-noho i-golo i-nia boo aalaa.

19:5  Luada o togo-haa laangi, meemaa ga-aala-aga hagaluada-loo ga-togomaalia belee hula. Gei tamana di ahina ga-helekai gi tangada Levi, “Hai di-gulu mee e-gai i-mua. Gi-maaluu goolua haga-humalia. Goolua ga-hula-laa nomuli.”

19:6  Nia daane dogolua gaa-noho gi-lala ga-miami mo-di inu di gowaa e-dahi. Tamana di ahina ga-helekai gi taane Levi, “Noho i kinei boo-nei, tenetene.”

19:7  Tangada Levi ga-du-gi-nua belee hana, gei tamana ga-helekai gi mee bolo gii-noho, gei mee gaa-noho labelaa i-di boo deelaa.

19:8  Luada-loo o togo-lima laangi, gei mee ga-daamada bolo e-hagatanga, gei tamana di ahina ga-helekai, “Dumaalia, hagamolooloo. Taalia gi-muli di oodee dangi-nei.” Gei meemaa gaa-noho ga-miami di gowaa e-dahi.

19:9  Di madagoaa taane mo dono lodo-hege mo tangada hai-hegau ga-daamada e-hula labelaa, tamana di ahina ga-helekai, “Mmada, ma hoohoo ga-hiahi dolomeenei, goodou e-humalia-hua e-noho boo nei. Hoohoo-hua ge di-maa ga-bouli, noho i kinei e-tenetene. Daiaa goodou ga-aala-aga limalima gaa-hula gi-di-godou guongo.”

19:10  Gei taane gu-hagalee hiihai e-noho i-di boo labelaa i-golo, gei mee mo dono lodo-hege ga-daamada gaa-hula, mo dana dangada hai-hegau mo ana manu-‘donkey’ e-lua mo nia hii goloo nonua. Di-nadau hoohoo gi Jebus, dela go Jerusalem, ge di-maa gu-hoohoo gi-di hiahi, tangada hai-hegau ga-helekai gi dono dagi, “Gidaadou e-aha ala hagalee noho i ginei i-lodo di waahale digau Jebus?”

19:11  Gei taane gu-hagalee hiihai e-noho i-di boo labelaa i-golo, gei mee mo dono lodo-hege ga-daamada gaa-hula, mo dana dangada hai-hegau mo ana manu-‘donkey’ e-lua mo nia hii goloo nonua. Di-nadau hoohoo gi Jebus, dela go Jerusalem, ge di-maa gu-hoohoo gi-di hiahi, tangada hai-hegau ga-helekai gi dono dagi, “Gidaadou e-aha ala hagalee noho i ginei i-lodo di waahale digau Jebus?”

19:12  Tagi o-maa ga-helekai, “Gidaadou hagalee e-hagamolooloo i-di waahale ono daangada hagalee digau Israel. Gidaadou ga-hula-hua gaa-noho boo i Gibeah be go Ramah.”

19:13  Tagi o-maa ga-helekai, “Gidaadou hagalee e-hagamolooloo i-di waahale ono daangada hagalee digau Israel. Gidaadou ga-hula-hua gaa-noho boo i Gibeah be go Ramah.”

19:14  Digaula ga-diiagi Jebus, gaa-hula i-di nadau ala. Di ulu di laa, gei digaula gaa-dau gi Gibeah i-lodo di guongo di madawaawa Benjamin.

19:15  Digaula gaa-hula gi-daha mo-di ala belee noho i-di boo deelaa i-golo. Digaula ga-ulu gi-lodo di waahale deelaa, gaa-noho gi-lala i-lodo di gowaa heetugi dangada, gei deai tangada ne-lahi digaula belee noho boo i dono hale ai.

19:16  Di-nadau noho i-golo, taane madua ga-hanimoi-laalaa i-di hagaodi gi-muli o ana moomee di laangi i-di gowaa dogi mee. Mee tangada mai tenua gonduu o Ephraim, e-noho dolomeenei i Gibeah. (Digau i-golo di waahale deelaa la digau mai di madawaawa Benjamin.)

19:17  Taane madua ga-gidee digaula i-lodo di gowaa heetugi dangada ga-heeu, “Goodou e-hula gi-hee? Goodou ne-loomoi i-hee?”

19:18  Tangada Levi ga-helekai, “Gimaadou nogo i Bethlehem i Judah, gei dolomeenei e-hula gi-di-madau guongo i-lodo tenua gonduu i Ephraim. Tangada e-benebene gimaadou i-di boo ai,

19:19  ma e-aha maa gimaadou madau meegai i-golo ang-gi madau manu ‘donkey’, nia palaawaa mo nia waini ang-gi dogu lodo-hege mo au, mo ang-gi dagu dangada hai-hegau. Nia mee huogodoo e-hiihai ginai gimaadou gu-i-golo i madau baahi.”

19:20  Taane madua ga-helekai, “Goodou e-gahi-mai gi-lodo dogu hale! Au ga-madamada-humalia i goodou. Goodou hagalee kii i-lodo di gowaa heetugi dangada deenei.”

19:21  Taane madua gaa-lahi digaula ga-haangai nadau manu-‘donkey’. Digaula gaa-tono nadau wae ga-miami.

19:22  Digaula gu-tenetene ge digau huaidu mai di waahale ga-haganiga di hale deelaa ga-dugidugi di bontai, ga-helekai gi taane madua, “Laha-mai taane dela ne-hanimoi dalia goe. Gimaadou e-hiihai e-hai di manawa manu gi mee!”

19:23  Taane madua gaa-hana gi malaelae, ga-helekai gi digaula, “Deeai, ogu ihoo hagaaloho! Dumaalia! Hudee heia di mee huaidu! Taane deenei la taane e-benebene koau.

19:24  Mmada! Deenei di lodo-hege o-maa mo dagu dama-ahina madammaa. Au ga-laha-mai meemaa dolomeenei, gei goodou gaa-mee di-lahi meemaa. Heia goodou mee ala e-hiihai e-hai gi meemaa. Gei hudee heia di mee huaidu huoloo gi taane deenei!”

19:25  Gei nia daane gu-de-hiihai e-hagalongo gi mee. Gei taane Levi gaa-dugu dono lodo-hege gi-di malaelae gi-baahi digaula. Digaula gaa-hono a-mee gaa-hai di manawa manu gi mee, ga-hagahuaidu a-mee di waalooloo di boo gaa-dae-loo gi-di luada.

19:26  Luada-loo, gei di ahina ga-hanimoi gaa-hinga gi-lala i-di bontai di hale taane madua, di gowaa dela e-iai dono lodo. Di ahina la-nogo i-golo-hua i-di madagoaa gu-maalama-mai.

19:27  Dono lodo ga-ala-aga di luada deelaa, gaa-huge di bontai belee hana, gei mee ga-gidee dono lodo-hege e-moe i-mua di hale ge ono lima belee bili gi-di bontai.

19:28  Mee ga-helekai gi-mee, “Du-gi-nua, gaa-hula.” Gei di ahina digi helekai. Gei mee gaa-dugu tuaidina o-maa gi-hongo di manu-‘donkey’, gaa-hana gi dono guongo.

19:29  Dono madagoaa ne-dau i-golo, ga-ulu gi-lodo di hale, ga-dahi-mai dana hulumanu. Mee ga-dahi-mai tuaidina o dono lodo-hege, ga-duuduu gii-hai nia gunga e-madangaholu maa-lua, gaa-kae nia gunga e-dagi-dahi gi-nia madawaawa e-madangaholu maa-lua o Israel.

19:30  Digau huogodoo ala ne-mmada gi-di-maa, ga-helekai, “Gidaadou digi longono-loo di mee huaidu beenei! Di mee beenei ne-hai ai loo, tugi di hagatanga digau Israel i Egypt, gaa-dae-mai gi dolomeenei. Gidaadou e-hai gii-hai tadau hai gi di-maa! Ma di-aha dela gaa-hai?”

Chapter 20

20:1  Nia daangada Israel huogodoo mai Dan i-bahi-i-ngeia gaa-tugi i Beersheba i-bahi-i-ngaaga, mo mai Gilead i-bahi-i-dua gu-hai-hegau gi-di gahigahi dela ne-hai. Digaula ga-dagabuli-mai gi-di gowaa e-dahi i-mua o Dimaadua i Mizpah.

20:2  Nia dagi o-nia madawaawa Israel huogodoo nogo dau i tagabuli o-nia daangada a God, gei digau-dauwa e-haa-lau mana-(400,000) gu-i-golo.

20:3  Nia daangada o Benjamin ga-longono bolo digau Israel ala i-golo huogodoo la-gu-dagabuli i Mizpah. Digau Israel ga-heeu, “Hagia-mai gi gimaadou, be dehee di hai ne-hai di mee hala deenei?”

20:4  Tangada Levi dela dono lodo-hege ne-daaligi gii-made ga-helekai, “Gimaua mo dogu lodo-hege ne-hula gi Gibeah i-lodo tenua Benjamin belee noho i-golo di boo deelaa.

20:5  Nia daane o Gibeah ga-loomoi gi-di-au, ga-haganiga di hale boo. Digaula ne-belee daaligi au, gei digaula ne-hono-hua dogu lodo-hege, gaa-hai di manawa manu gi mee, gei mee la-guu-made.

20:6  Au gaa-kae tuaidina o-maa, ga-duuduu gaa-kae nia baahi dagi-dahi gi-nia madawaawa Israel. Digau aanei la-guu-hai di hai huaidu huoloo ge haga-langaadia i tadau mehanga.

20:7  Goodou huogodoo i ginei la digau Israel. Gidaadou gaa-hai tadau-aha gi-di hai deenei?”

20:8  Nia daangada huogodoo gaa-tuu i-nua di gowaa e-dahi, ga-helekai, “Tangada e-dahi i gidaadou e-hana gi dono guongo ai, hagalee hilihili be mee e-noho i-lodo di hale-laa be-di hale.

20:9  Deenei tadau mee gaa-hai: Gidaadou e-hilihili hunu daane e-heebagi gi Gibeah.

20:10  Dahi baahi madangaholu o-nia daane Israel e-dahi-aga nia meegai gi digau-dauwa, gei digau i-golo e-hula e-daaligi digau Gibeah gi di-nadau hai huaidu dela ne-hai i Israel.”

20:11  Nia daane Israel huogodoo gu-dagabuli gi-di mee hua e-dahi, bolo e-heebagi gi-di waahale deelaa.

20:12  Nia madawaawa Israel ga-hagau nadau daangada kae-hegau laa-lodo tenua hagatau o-di madawaawa Benjamin belee heeu boloo, “Ma di hala behee deenei guu-hai go goodou?

20:13  Dolomeenei dugua-mai digau huaidu i Gibeah, gei gimaadou ga-daaligi digaula gii-mmade, e-daa gi-daha nia hai huaidu beenei mo Israel.” Gei nia daangada o Benjamin digi hagalongo gi digau Israel aalaa.

20:14  Nia daangada mai nia waahale huogodoo o Benjamin gu-loomoi gi Gibeah belee heebagi gi digau Israel ala i-golo.

20:15  Digaula ne-gahi-mai nadau gau-dauwa e-madalua maa-ono mana-(26,000) mai i nadau waahale i-di laangi deelaa. Digaula gu-gahi-mai labelaa nia daane Gibeah hilihili e-hidu-lau-(700) ala nadau lima gau-ihala. Digaula huogodoo aanei e-mee di-puu di ngaahulu gi tagabaeha komii.

20:16  Digaula ne-gahi-mai nadau gau-dauwa e-madalua maa-ono mana-(26,000) mai i nadau waahale i-di laangi deelaa. Digaula gu-gahi-mai labelaa nia daane Gibeah hilihili e-hidu-lau-(700) ala nadau lima gau-ihala. Digaula huogodoo aanei e-mee di-puu di ngaahulu gi tagabaeha komii.

20:17  Digau Israel ala i-golo gu-hagabudu-mai nadau gau-dauwa gu-kuulu gi-nia hai heebagi e-haa-lau mana-(400,000).

20:18  Digau Israel gaa-hula gi-di gowaa hai-daumaha i Bethel, ga-heeu gi God i-golo, “Dehee di madawaawa e-humalia e-heebagi gi-nia daangada Benjamin matagidagi?” Dimaadua ga-helekai, “Di madawaawa Judah.”

20:19  Luada dono daiaa, gei digau Israel ga-daamada gaa-hula gaa-noho hoohoo gi-di waahale o Gibeah.

20:20  Digaula gaa-hula ga-heebagi gi digau-dauwa Benjamin, gaa-dugu nadau gau-dauwa gii-huli gi-di waahale.

20:21  Digau dauwa Benjamin ga-ulu gi-daha mo di-nadau waahale, gei i-mua di hagaodi di laangi, digaula gu-daaligi nadau gau-dauwa Israel e-madalua maa-lua mana-(22,000).

20:22  Digau Israel gaa-hula gi-di gowaa daumaha, ga-manawa-gee i-mua o Dimaadua gaa-dae-loo gi-di hiahi. Digaula ga-heeu gi Mee, “Gimaadou e-hula labelaa e-heebagi gi madau duaahina go digau Benjamin?” Dimaadua ga-helekai, “Uaa.” Digau dauwa Israel ga-hagamaaloo-aga nadau manawa, ga-haga-noho nadau gau-dauwa gi-di gowaa e-dahi nogo noho-ai ginaadou di laangi nomua.

20:23  Digau Israel gaa-hula gi-di gowaa daumaha, ga-manawa-gee i-mua o Dimaadua gaa-dae-loo gi-di hiahi. Digaula ga-heeu gi Mee, “Gimaadou e-hula labelaa e-heebagi gi madau duaahina go digau Benjamin?” Dimaadua ga-helekai, “Uaa.” Digau dauwa Israel ga-hagamaaloo-aga nadau manawa, ga-haga-noho nadau gau-dauwa gi-di gowaa e-dahi nogo noho-ai ginaadou di laangi nomua.

20:24  Digaula gaa-hai di lua heebagi gi-di gau-dauwa Benjamin.

20:25  I-di lua holongo, digau Benjamin ga-loomoi gi-daha mo Gibeah, ge tolongo deenei digaula gu-daaligi digau-dauwa o Israel e-madangaholu maa-walu mana-(18,000).

20:26  Digau Israel guu-hula gi Bethel manawa-gee. Digaula gaa-noho i-mua o Dimaadua digi miami gaa-dae-loo gi-di hiahi. Digaula gaa-hai nadau tigidaumaha hagadaubuni, gaa-dudu nadau tigidaumaha haga-dogomaalia, huogodoo ne-hai i-mua Dimaadua.

20:27  Tebedebe o-di Hagababa a God la-nogo i Bethel i-nia laangi aalaa, gei Phinehas tama-daane Eleazar, go tama-daane Aaron la-nogo dagi Tebedebe deelaa. Nia daangada ga-heeu gi Dimaadua, “Gimaadou e-hula labelaa e-heebagi gi madau duaahina nia daangada o Benjamin, be gimaadou gaa-hai bolo gimaadou guu-lawa, gu-magedaa.” Dimaadua ga-helekai, “Heebagi, daiaa gei Au gaa-hai goodou gi-maaloo i digaula.”

20:28  Tebedebe o-di Hagababa a God la-nogo i Bethel i-nia laangi aalaa, gei Phinehas tama-daane Eleazar, go tama-daane Aaron la-nogo dagi Tebedebe deelaa. Nia daangada ga-heeu gi Dimaadua, “Gimaadou e-hula labelaa e-heebagi gi madau duaahina nia daangada o Benjamin, be gimaadou gaa-hai bolo gimaadou guu-lawa, gu-magedaa.” Dimaadua ga-helekai, “Heebagi, daiaa gei Au gaa-hai goodou gi-maaloo i digaula.”

20:29  Digau Israel gaa-dugu nadau gau-dauwa hagammuni i-di gili Gibeah.

20:30  Tolu holongo, digaula gaa-hula e-hai-baahi gi digau-dauwa Benjamin, ga-haga-noho nadau gau-dauwa i-di baahi e-huli gi Gibeah, be di-nadau hai i-mua.

20:31  Digau Benjamin ga-loomoi belee heebagi, ga-hula-hua gi-daha mo-di waahale. Gadoo be di-nadau hai i-mua, digaula ga-daamada ga-dadaaligi hunu gau Israel i-lodo tenua i-hongo di ala dela e-hana gi Bethel mo Gibeah. Digaula ne-daaligi digau Israel holongo nia daangada e-motolu-(30).

20:32  Digau Benjamin ga-helekai, “Gidaadou gu-haga-magedaa digaula be-di hai i-mua.” Gei digau Israel ne-bilaan bolo e-hula gi-muli e-hagadali digaula gi-daha mo-di waahale, gii-hula gi-hongo nia ala.

20:33  Di baahi gau-dauwa damana Israel ga-hagammuu gi-muli ga-haganohonoho nadau buini i Baal=Tamar, gei nia daane ala nogo haganiga Gibeah ga-llele-mai gi-daha mo nadau gowaa nogo pala hagammuni-ai i-lodo tenua hadugalaa i-di gili di waahale.

20:34  Nia gau-dauwa madangaholu mana-(10,000) ala ne-hilihili mai digau Israel huogodoo, ga-heebagi gi Gibeah, gei di heebagi nogo haingadaa. Digau Benjamin digi iloo bolo ginaadou gaa-hai gi-mooho gi-daha.

20:35  Dimaadua guu-hai digau Israel gi-maaloo i digau-dauwa Benjamin. Digau Israel ne-daaligi nadau gau e-madalua maa-lima mana ge lau-(25,100) i-di laangi deelaa,

20:36  gei digau Benjamin gu-iloo bolo ginaadou gu-magedaa. Di baahi damana digau-dauwa Israel gu-lloomoi gi-muli gi-daha mo digau Benjamin, idimaa digaula nogo hagadagadagagee gi nadau gau ala nogo daalo hagammuni i-di gili o Gibeah.

20:37  Nia daane aanei gaa-llele haga-limalima gi Gibeah, ga-haga-modoho gi-daha i-lodo di waahale, ga-daaligi nia daangada huogodoo i-golo gii-mmade.

20:38  Di buini gau-dauwa damana Israel mo nia daane nogo pala hagammuni guu-hai di-nadau ada-mee haga-iloo. Digaula ma-gaa-mmada gi-di huiahi damana e-hanaga i-di waahale,

20:39  gei digau Israel ala i-hongo di gowaa dauwa, la-gii-huli gi-muli. Di madagoaa deelaa, gei nia daangada Benjamin la-gu-daaligi digau motolu o Israel. Digau Benjamin ga-helekai ang-gi ginaadou boloo, “Uaa, gidaadou gu-haga-magedaa digaula be gidaadou i-mua.”

20:40  Gei di ada haga-iloo-mee ga-gila-aga, di huiahi gaa-hana gi-nua mai di waahale. Digau Benjamin gaa-mmada gi nadau muli, gu-homouli gi-di waahale hagatau gu-ulaula.

20:41  Digau Israel gaa-huli gi-muli, gei digau Benjamin gu-lellele dagi-dahi, gu-mmaadagu huoloo i-di nadau iloo bolo ginaadou ga-daaligi gi-daha.

20:42  Digaula gaa-hula gi-muli gi-daha mo digau Israel, ga llele gi-di gowaa maalama, gu-deemee di-llele gi-daha. Digaula gu-i-mehanga nia buini gau-dauwa damana mo nia daane e-loomoi i-di waahale, gei digaula gu-daaligi guu-mmade.

20:43  Digau Israel gu-duuli nadau hagadaumee, digi noho, ga-waluwalu digaula gaa-dae-loo gi-bahi-i-dua o Gibeah, ga-dadaaligi digaula gi-mmademmade.

20:44  Digau dauwa koia e-maaloo Benjamin e-madangaholu maa-walu mana-(18,000) gu-daaligi guu-mmade.

20:45  Digau ala i-golo guu-huli guu-llele gi-lodo henua gi Tadugalaa Rimmon. Digau e-lima mana-(5,000) i-digaula ne-daaligi gii-mmade i-hongo nia ala. Digau Israel gu-waluwalu hua igolo digaula, gaa-tugi i Gidom, e-lua mana-(2,000) ne-daaligi.

20:46  Huogodoo, digau-dauwa hagamataane o Benjamin e-madalua maa-lima mana-(25,000) la-gu-daaligi guu-mmade i-di laangi deelaa.

20:47  Gei nia daane e-ono-lau-(600) guu-mee di-llele gi Tadugalaa Rimmon, gaa-noho i-golo i-nia malama e-haa.

20:48  Digau Israel gaa-huli gi-muli ga-hai-baahi gi digau Benjamin, ga-daaligi digaula huogodoo, nia daane, nia ahina, nia damagiigi, mo nia manu. Digaula guu-dudu nia waahale huogodoo i tenua deelaa.

Chapter 21

21:1  Di madagoaa digau Israel ne-dagabuli i Mizpah, digaula gu-hagababa ang-gi Dimaadua: “Deai tangada i gimaadou e-dumaalia gi taane o Benjamin gi-lodo gi dana dama-ahina ai.”

21:2  Malaa, nia daangada Israel gaa-hula gi Bethel gaa-noho gi-lala i-golo i-mua o God, gaa-dae gi-di hiahi. Digaula gu-manawa-gee huoloo, gu-tangitangi gi-nua boloo,

21:3  “Meenei Dimaadua, di God o Israel, di mee deenei la-ne-hai di-aha? Ma e-aha go di madawaawa Benjamin dela ga-hagalee i Israel?”

21:4  Luada-loo dono daiaa, nia daangada gaa-hau di-nadau gowaa dudu tigidaumaha i-golo. Digaula gaa-hai di-nadau tigidaumaha hagadaubuni, gaa-dudu nia tigidaumaha hagadogomaalia.

21:5  Digaula ga-heeu, “Ma di madawaawa i-golo mai i-nia madawaawa Israel ala digi hula gi tagabuli nogo hai i Mizpah?” (Digaula guu-hai di hagababa bolo tangada ma-ga-hagalee hana gi Mizpah le e-daaligi gii-made).

21:6  Digau Israel gu-tilikai hualaa gi nadau duaahina digau Benjamin, ga-helekai, “Dangi-nei Israel guu-ngala dono madawaawa e-dahi.

21:7  Di-madau maa di-aha e-hai e-wanga nia lodo ang-gi nia daane Benjamin ala e-dubu? Gimaadou gu-hagababa hagamodu ang-gi Dimaadua bolo gimaadou hagalee wanga madau dama-ahina gi digaula.”

21:8  Di-nadau heeu be di-maa di buini mai nia madawaawa Israel dela digi hana gi tagabuli Mizpah, digaula gaa-gida bolo deai tangada e-dahi mai di waahale o Jabesh i Gilead ne-hana gi-golo ai.

21:9  I-di gahigahi ne-hai go digau-dauwa, gei deai tangada mai Jabesh ne-helekai ai.

21:10  Malaa, tagabuli ga-hagau nadau daane haga-mataane e-madangaholu maa-lua mana-(12,000) mo di-nadau hegau boloo, “Hula daaligidia gii-mmade nia daangada huogodoo i Jabesh, mono ahina mo nia dama.

21:11  Daaligidia nia daane huogodoo mo nia ahina huogodoo ala hagalee madammaa.”

21:12  Digaula guu-kida nadau dama-ahina madammaa e-haa-lau-(400) i-mehanga nia daangada i Jabesh, gei digaula gu-laha-mai digaula gi Shiloh i Canaan.

21:13  Tagabuli hagatau ga-hagailoo gi digau Benjamin ala nogo i Tadugalaa o Rimmon gaa-hai bolo tauwa la-guu-lawa.

21:14  Digau Benjamin ga-lloomoi gi-muli, gei digau Israel ala i-golo gaa-wanga gi digaula nia dama-ahina mai Jabesh, ala digi daaligidia go digaula. Gei digaula hagalee dohu.

21:15  Nia daangada gu-tilikai hualaa gi digau Benjamin, idimaa Dimaadua gu-oho di hagadaubuni o-nia madawaawa Israel.

21:16  Nia dagi tagabuli ga-helekai, “Nia ahina o-di madawaawa Benjamin la-gu-hagalee. Ma di-aha dela e-hai go gidaadou e-dahi-aga nia lodo nia daane ala e-dubu?

21:17  Israel hagalee hai gi-hagalee dono madawaawa e-dahi. Gidaadou e-hai gii-gida di ala e-hai di madawaawa Benjamin gii-noho hua igolo.

21:18  Gei gidaadou e-deemee di-dumaalia gi digaula e-lodo gi tadau dama-ahina, idimaa gidaadou gu-haganoho di haga-halauwa tangada dela ma-ga-dugu-anga tangada Benjamin gi-lodo gi dana dama-ahina.”

21:19  Digaula ga-hagabaubau, “Tagabuli ngadau o Dimaadua i Shiloh la-gu-hoohoo-mai.” (Shiloh la i-bahi-i-ngeia Bethel, mo i-bahi-i-ngaaga Lebonah, mo i-bahi-i-dua di ala i-mehanga Bethel mo Shechem).

21:20  Digaula ga-helekai gi digau Benjamin, “Hula, pala hagammuni i-lodo nia hadagee waini,

21:21  ga-madamada. Nia dama-ahina Shiloh ma-ga-lloomoi belee gaalege, goodou ga-lloomoi gi-daha mo nnadagee waini. Tangada e-dahi i goodou tei gi-gumidia dono lodo mai i-nia dama-ahina aalaa, gaa-lahi gi tenua o Benjamin.

21:22  Maa nadau damana be nia duaahina ga-lloomoi gi goodou ga-helekai hai-baahi, helekai gi digaula boloo, ‘Dumaalia-mai gi gimaadou e-benebene digaula, idimaa gimaadou hagalee ne-lahi digaula mai godou baahi i-lodo tauwa belee hai madau lodo. Gei goodou digi gaamai digaula gi gimaadou, deelaa-laa goodou digi hala i-di oho di-godou hagababa hagamodu ne-hai!’ ”

21:23  Digau Benjamin guu-hai di hai deenei. Digaula gu-hilihili nadau lodo mai nia dama-ahina nogo hai nadau gaalege i Shiloh gaa-lahi digaula gi-daha. Digaula gaa-hula gi di-nadau henua, gaa-hau labelaa nadau hale gaa-noho i-golo.

21:24  Di madagoaa deelaa, gei digau Israel huogodoo gu-hagatanga guu-hula labelaa gi nadau gowaa mo nadau madahaanau mo nadau guongo donu.

21:25  Di madagoaa deelaa, gei Israel nogo dono king ai. Nia daangada huogodoo gu-hai-hua nadau mee ala e-hiihai ginai.