CopSahBible2 - II Maccabees

Chapter 1

Chapter 2

Chapter 3

Chapter 4

Chapter 5

5:27  ⲓⲟⲩⲇⲁⲥ ⲉⲧⲉⲙⲁⲕⲕⲁⲃⲁⲓⲟⲩⲥ ⲡⲉ ⲙⲛϩⲉⲛⲕⲟⲟⲩⲉ ⲛⲉⲙⲉϥ ⲉⲩⲙⲉϩⲙⲏⲧ ⲉⲩⲁⲛⲁⲭⲱⲣⲓ ⲉⲛⲧⲟⲩⲉⲓⲏ ⲁⲩϣⲱⲡⲉ ⲉⲩⲟ ⲛⲑⲉ ⲛⲛⲑⲏⲣⲓⲟⲛ ⲉⲩⲟⲩⲱⲙⲭⲟⲣⲧⲟⲥ ⲉⲩⲙⲏⲛ ⲉⲃⲟⲗ ϫⲉ ⲛⲉⲩⲙⲉⲧⲉⲭⲉ ⲉⲡⲧⲱⲗⲙ

Chapter 6

6:1  ⲙⲛϩⲛϩⲕⲟⲩⲉⲓ ⲛⲟⲩⲟⲉⲓϣ ⲁⲡⲣⲟ ϫⲟⲟⲩ ⲛⲟⲩϩⲗⲗⲟ ⲛ)ⲁⲑⲏⲛⲁⲓⲟⲥ ⲉϯϩⲧⲟⲣ ⲉⲛⲓⲟⲩⲇⲁⲓ ⲉⲡⲱⲛⲉ ⲉⲃⲟⲗ ⲛⲛⲛⲟⲙⲟⲥ ⲛⲛⲉⲩⲉⲓⲟⲧⲉ ⲉⲧⲙⲡⲟⲗⲓⲧⲉⲩⲉ ϩⲛⲛⲛⲟⲙⲟⲥ ⲛⲛⲉⲩⲉⲓⲟⲧⲉ

6:2  ⲉϫⲱϩⲙ ⲇⲉ ⲙⲡⲉⲣⲡⲉ ⲉⲧϩⲛⲓⲉⲣⲟⲩⲥⲁⲗⲏⲙ ⲉⲙⲟⲩⲧⲉ ⲉⲣⲟϥ ϫⲉ ⲡⲁⲍⲉⲩⲥ ⲛⲟⲗⲩⲙⲡⲓⲟⲥ ⲁⲩⲱ ⲡⲉⲧϩⲛⲕⲟⲣⲁⲍⲉⲓⲛ ϫⲉ ⲡⲁⲍⲉⲩⲥ ⲛⲝⲉⲛⲓⲟⲥ ⲕⲁⲧⲁⲡⲟⲩⲟⲡ

6:3  ⲛⲛⲉⲧⲟⲩⲏϩ ϩⲙⲡⲙⲁ ⲉⲧⲙⲙⲁⲩ ⲧⲕⲁⲕⲓⲁ ⲛⲧⲁⲥⲉⲓ ⲛⲉⲥⲟϣ ⲙⲙⲁⲧⲉ ⲁⲩⲱ ⲛⲉⲥⲙⲟⲕϩ ⲉϥⲓ ϩⲁⲣⲟⲥ ⲛⲛⲁϩⲣⲛⲟⲩⲟⲛ ⲛⲓⲙ

6:4  ⲡⲉⲣⲡⲉ ⲅⲁⲣ ⲁϥⲙⲟⲩϩ ⲙⲙⲛⲧϣⲛⲁ ϩⲓϫⲏⲣ ⲉⲃⲟⲗ ϩⲓⲧⲛⲛϩⲉⲑⲛⲟⲥ ⲉⲩⲣⲙⲛⲧⲁⲧϣⲁⲩ ⲙⲛⲛⲉϩⲓⲟⲙⲉ ⲉⲧⲛⲏϫ ⲉⲃⲟⲗ ϩⲛⲛⲉⲥⲧⲟⲁ ⲉⲧⲟⲩⲁⲁⲃ ⲁⲩⲱ ⲉⲩϫⲓ ⲉϩⲟⲩⲛ ⲉⲙⲉⲩ ⲛⲛⲉⲧⲉⲙⲉϣϣⲉ

6:5  ⲉⲩⲧⲁⲗⲟ ⲉϩⲣⲁⲓ ⲉϫⲛⲡⲉⲑⲩⲥⲓⲟⲁⲥⲧⲏⲣⲓⲟⲛ ⲛⲛⲉⲧϫⲁϩⲙ ⲛⲉⲛⲧⲁⲡⲛⲟⲙⲟⲥ ⲧⲥⲧⲟⲟⲩ ⲉⲃⲟⲗ

6:6  ⲛⲉⲙⲛ ⲅⲁⲣ ⲑⲉ ⲛⲣⲥⲁⲃⲃⲁⲧⲟⲛ ⲟⲩⲧⲉ ⲉⲁⲣⲏϩ ⲉⲛϣⲁⲉ ⲛⲛⲉⲛⲉⲓⲟⲧⲉ ⲟⲩⲧⲉ ⲉⲧⲣⲉⲩϩⲟⲙⲟⲗⲟⲅⲓ ϫⲉ ⲁϩⲉⲛⲓⲟⲩⲇⲁⲓ

6:7  ⲛⲉⲩⲉⲓⲛⲉ ⲙⲙⲟⲟⲩ ϩⲛⲟⲩⲁⲛⲁⲅⲕⲏ ⲉⲥⲥⲁϣ ⲉϩⲣⲉⲃⲟⲧ ⲇⲉ ⲙⲡⲉϩⲟⲟⲩ ⲙⲫⲟⲩⲙⲓⲥⲉ ⲙⲡⲣⲣⲟⲉⲣⲑⲩⲥⲓⲁ ⲁⲩⲱ ⲛⲧⲁⲣⲉϥⲓ ⲛϭⲓⲡϣⲁⲉ ⲙⲡⲇⲓⲟⲛⲩⲥⲟⲥ ⲁⲩϯϩⲧⲟⲣ ⲉⲣⲟⲟⲩ ⲉⲙⲟⲟϣⲉ ϩⲁⲧⲉϥϩⲏ ⲉⲣⲉϩⲉⲛⲕⲗⲟⲟⲙ ϩⲓϫⲱⲟⲩ

6:8  ⲁϥϫⲟⲟⲩ ⲛϭⲓⲡⲧⲟⲗⲉⲙⲁⲓⲟⲥ ⲛⲟⲩⲉϩⲥⲁϩⲛⲉ ⲉⲛⲡⲟⲗⲓⲥ ⲛⲟⲩⲉⲉⲓⲛⲓⲛ ⲉⲧϩⲓⲧⲟⲩⲱⲟⲩ ⲉⲣⲡⲁⲓⲥⲙⲟⲧ ⲛⲟⲩⲱⲧ ⲛⲓⲟⲩⲇⲁⲓ ⲉⲧⲣⲉⲩϥⲣⲑⲩⲥⲓⲁ

6:9  ⲛⲉⲧⲉⲥⲉⲛⲁⲟⲩⲱϣⲧ ⲇⲉ ⲁⲛ ⲉⲡⲱⲛⲉ ⲉⲛⲥⲱⲛⲧ ⲛⲛϩⲉⲗⲗⲏⲛ ⲥⲱⲛⲁⲕⲟⲛⲥⲟⲩ

6:10  ⲡⲕⲉⲡⲉⲑⲟⲟⲩ ⲇⲉ ⲟⲛ ⲁϥϣⲱⲡⲉ ⲉϥⲛⲟϣⲧ ⲉⲛⲉⲩⲉⲣⲟϥ ⲥϩⲓⲙⲉ ⲅⲁⲣ ⲥⲛⲧⲉ ⲉⲁⲩⲥⲃⲃⲉ ⲛⲛⲉⲩϣⲏⲣⲉ ⲕⲟⲩⲉⲓ ⲉⲛⲉⲩⲕⲓⲃⲉ ⲁⲩⲡⲉⲣⲓⲁⲅⲉ ⲙⲙⲟⲟⲩ ϩⲛⲧⲡⲟⲗⲟⲓⲥ ⲧⲏⲣⲥ ⲁⲩⲛⲟϫⲟⲩ ⲉⲃⲟⲗ ⲉⲡⲉⲥⲏⲧ

6:11  ϩⲉⲛⲕⲟⲟⲩⲉ ⲁⲩⲡⲱⲧ ⲛϫⲓⲟⲩⲉ ⲉϩⲣⲁⲓ ⲉⲛⲧⲁⲫⲟⲥ ⲉⲧϩⲏⲛ ⲉϩⲟⲩⲛ ⲉⲣⲟⲟⲩ ⲉⲧⲣⲉⲩⲧⲙⲣⲙⲡϣⲁ ⲛⲥⲁϣ ⲁⲩⲧⲁⲙⲉⲫⲓⲗⲓⲡⲡⲟⲥ ⲉⲣⲟⲟⲩ ⲁϥⲛⲟϫⲟⲩ ⲉⲃⲟⲗ ϫⲉ ⲛⲉⲩⲣϩⲟⲧⲉ ⲉⲣⲃⲟⲏⲑⲓ ⲉⲣⲟⲟⲩ ⲕⲁⲧⲁⲡⲉϩⲟⲟⲩ ⲛⲧⲙⲙⲛⲧⲥⲉⲙⲛⲟⲥ ⲉⲧⲧⲁⲉⲓⲏⲩ

6:12  ϯⲥⲟⲡⲥⲡ ϭⲉ ⲛⲛⲉⲧⲱϣ ⲙⲡⲁⲓϫⲱⲙⲉ ⲉⲧⲙⲡⲱϣ ⲛϩⲏⲧ ϩⲛⲛⲁⲓϩⲓⲥⲉ ⲁⲗⲗⲁ ⲉⲙⲟⲕⲙⲉⲕ ϫⲉ ⲉⲣⲉⲛⲁⲓⲑⲗⲓⲯⲓⲥ ϣⲟⲟⲡ ⲙⲡⲉⲛⲅⲉⲛⲟⲥ ⲉⲩⲧⲁⲕⲟ ⲁⲛ ⲁⲗⲗⲁ ⲉⲩⲥⲃⲱ

6:13  ⲉⲧⲙⲧⲣⲉⲩⲕⲁⲁⲛ ⲅⲁⲣ ⲡⲉ ⲉϣⲉϥⲧⲉ ⲁⲗⲗⲁ ⲧⲉⲛⲟⲩ ⲥⲉⲣⲉⲡⲓⲧⲓⲙⲁ ⲛⲁⲩ ⲟⲩⲙⲟⲉⲓⲛ ⲛⲛⲟϭ ⲡⲉ ⲉⲛⲁⲛⲟⲩϥ

6:14  ⲛⲉϥⲕⲣⲓⲛⲉ ⲅⲁⲣ ⲙⲙⲟⲛ ⲁⲛ ⲛϭⲓⲡϫⲟⲉⲓⲥ ⲛⲑⲉ ⲛⲛϩⲉⲑⲛⲟⲥ ⲉϣⲁϥϭⲱ ⲉϥϩⲟⲣϣ ⲛϩⲏⲧ ⲉϫⲱⲟⲩ ϣⲁⲛⲧⲟⲩϫⲱⲕ ⲉⲃⲟⲗ ⲛϥⲕⲟⲗⲁⲍⲉ ⲙⲙⲟⲟⲩ

6:15  ⲙⲏⲡⲱⲥ ϩⲱⲱⲛ ⲛⲧⲛⲉⲓ ⲉϩⲣⲁⲓ ⲉⲡϫⲱⲕ ⲛⲛⲉⲛⲛⲟⲃⲉ ⲛϥϫⲓⲕⲃⲁ ⲛϩⲏⲧⲛ

6:16  ⲉⲧⲃⲉⲡⲁⲓ ⲣⲱ ⲙⲡⲉϥϥⲓ ⲙⲡⲉϥⲛⲁⲁ ⲉⲛⲏϩⲉ ⲉⲃⲟⲗ ϩⲓϫⲱⲛ ⲁⲗⲗⲁ ⲉϥϯⲥⲃⲱ ⲙⲡⲉϥⲗⲁⲟⲥ ϩⲛ ϩⲉⲛⲑⲗⲓⲯⲓⲥ ⲉⲛϥⲕⲱ ⲙⲙⲟⲛ ⲁⲛ ⲛⲥⲱϥ

6:17  ⲡⲗⲏⲛ ⲛⲧⲁⲛϫⲓ ⲛⲁⲓ ⲉⲩⲣⲡⲙⲉⲉⲩⲉ ⲙⲁⲣⲛϣⲁϫⲉ ⲛⲇⲉ ⲉⲛⲉⲛⲧⲁⲩϣⲱⲡⲉ ϩⲓⲧⲛϩⲉⲛⲕⲟⲩⲉⲓ ⲛϣⲁϫⲉ

6:18  ⲉⲗⲉⲁⲍⲁⲣ ⲟⲩⲁ ⲛⲛⲟϭ ⲛⲅⲣⲁⲙⲙⲁⲧⲉⲩⲥ ⲡⲉ ⲟⲩⲣⲱⲙⲉ ⲉⲁϥⲁⲓⲁⲉⲓ ϩⲛⲧⲉϥϭⲟⲧ ⲉϥϫⲟⲥⲉ ⲉⲛⲉⲥⲱϥ ϩⲛⲡⲉϥⲥⲙⲟⲧ ⲙⲡⲉϥϩⲟ ⲉⲁⲩⲁⲛⲁⲅⲕⲁⲍⲉ ⲙⲙⲟϥ ⲉⲩⲱⲙⲉϥ ⲛⲣⲓⲣ

6:19  ⲛⲧⲟϥ ⲇⲉ ⲁϥⲥⲱⲡⲥ ⲛⲁϥ ⲙⲡⲙⲟⲩ ⲛⲟⲩⲉⲟⲟⲩ ⲉϩⲟⲩⲉⲡⲱⲛϩ ϩⲛⲟⲩϣⲓⲡⲉ ⲁϥϯⲡⲉϥⲟⲩⲁⲉⲓⲉ ⲟⲩⲁⲁϥ ⲉϩⲟⲩⲛ ⲉⲧⲃⲁⲥⲁⲛⲟⲥ ϩⲛⲟⲩⲟⲩⲣⲟⲧ

6:20  ⲉⲁϥϯⲧⲱⲕ ⲕⲁⲧⲁⲑⲉ ⲉⲧⲉϣϣⲉ ⲛⲛⲉⲧⲟⲩⲉϣϩⲩⲡⲟⲙⲓⲛⲉ ⲉⲧⲃⲉⲉϩⲟⲩⲛ ⲉⲡⲱⲛϩ

6:21  ⲛⲉⲧⲧⲏϣ ⲇⲉ ⲉϫⲛⲧⲉⲑⲩⲥⲓⲁ ⲛⲁⲛⲟⲙⲟⲛ ⲉⲧⲃⲉⲧⲙⲛⲧϣⲃⲏⲣ ⲉⲧⲉⲩⲛⲧⲁⲩⲥ ⲉϩⲟⲩⲛ ⲉⲡⲣⲱⲙⲉ ϫⲓⲛϣⲟⲣⲡ ⲛⲟⲩⲟⲉⲓϣ ⲁⲩϫⲓⲧϥ ⲛⲥⲁⲩⲥⲁ ⲁⲩⲥⲉⲡⲥⲱⲡϥ ⲉⲧⲣⲉⲩⲉⲓⲛⲉ ⲛⲁϥ ⲛϩⲉⲛⲁϥ ⲉⲁⲩⲧⲁⲙⲓⲟⲟⲩ ⲉⲃⲟⲗ ϩⲓⲧⲟⲟⲧϥ ⲛⲁⲓ ⲉϣⲁⲩⲟⲩⲱⲙ ⲉⲃⲟⲗ ⲛϩⲏⲧⲟⲩ ⲛϥϩⲩⲡⲟⲕⲣⲓⲛⲉ ⲇⲉ ⲛⲑⲉ ⲛⲛⲉⲧⲟⲩⲱⲙ ⲉⲃⲟⲗ ϩⲛⲛⲉϥⲑⲩⲥⲓⲁ ⲉⲛⲧⲁⲡⲣⲟ ⲟⲩⲉϩⲥⲁϩⲛⲉ ⲙⲙⲟⲟⲩ ϫⲉⲕⲁⲁⲥ ⲉⲃⲁⲣⲡⲁⲓ

6:22  ⲛⲥⲉⲕⲁⲁϥ ⲉⲃⲟⲗ ⲙⲡⲙⲟⲩ

6:23  ⲛⲧⲟϥ ⲇⲉ ⲁϥⲙⲉⲕⲙⲟⲩⲕϥ ϩⲛⲟⲩⲥⲁϩⲛⲉ ⲉⲛⲁⲛⲟⲩϥ ⲉϥⲙⲡϣⲁ ⲛⲧⲉϥⲙⲛⲧϩⲗⲗⲟ ⲉⲧⲧⲁⲓⲏⲩ ⲙⲛⲧⲡⲟⲗⲓⲧⲓⲁ ⲉⲧⲧⲃⲃⲏⲩ ⲁⲩⲱ ⲧⲁⲛⲁⲥⲧⲣⲟⲫⲏ ⲉⲧⲛⲁⲛⲟⲩⲥ ϫⲓⲛⲧⲉϥⲙⲛⲧⲕⲟⲩⲉⲓ ⲙⲛⲛⲟⲙⲟⲑⲉⲥⲓⲁ ⲉⲧⲟⲩⲁⲁⲃ ⲉⲛⲧⲁⲡⲛⲟⲩⲧⲉ ⲥⲟⲛⲧⲥ ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉ ϫⲟⲟⲩⲧ ⲉⲁⲙⲛⲧⲉ ϩⲛⲟⲩϭⲉⲡⲏ

6:24  ⲛⲧⲁϭⲟⲧ ⲁⲛ ⲧⲉ ϩⲩⲡⲟⲕⲣⲓⲛⲉ ϫⲉⲕⲁⲁⲥ ⲟⲩⲙⲏϣⲉ ⲛϣⲏⲣⲉ ϣⲏⲙ ⲉⲩⲙⲉⲩⲉ ϫⲉ ⲉⲗⲉⲁⲍⲁⲣⲟⲥ ⲉϥϩⲛⲡⲥⲧⲁⲓⲟⲩ ⲣⲣⲟⲙⲡⲉ ⲉⲛⲧⲁϥⲡⲱⲛⲉ ⲉⲩⲙⲛⲧϩⲉⲑⲛⲟⲥ

6:25  ⲛⲧⲟⲟⲩ ⲇⲉ ⲛⲥⲉⲡⲗⲁⲛⲁ ⲉⲧⲉϥϩⲩⲡⲟⲕⲣⲓⲥⲓⲥ ⲙⲛⲡⲁⲓⲕⲟⲩⲉⲓ ⲛⲱⲛϩ ⲉⲧⲥⲏϣ ⲧⲁϫⲡⲟ ⲛⲁⲣ ⲛⲟⲩⲧⲱⲗⲙ ⲙⲛⲟⲩϣⲓⲡⲉ ϩⲛⲧⲁⲙⲛⲧϩⲗⲗⲟ

6:26  ⲕⲁⲛ ⲉⲉⲓϣⲁⲛⲣⲃⲟⲗ ϯⲛⲟⲩ ⲉⲛⲥⲏϥⲉ ⲛⲣⲣⲱⲙⲉ ⲛϯⲛⲁⲣⲃⲟⲗ ⲁⲛ ⲉⲧϭⲓϫ ⲙⲡⲡⲁⲛⲧⲟⲕⲣⲁⲧⲱⲣ ⲟⲩⲧⲉ ⲉⲓⲟⲛϩ ⲟⲩⲧⲉ ⲉⲓϣⲁⲛⲙⲟⲩ

6:27  ⲉⲧⲃⲉⲡⲁⲓ ⲧⲉⲛⲟⲩ ⲙⲉⲛ ϯⲛⲁⲙⲟⲩ ϩⲛⲟⲩⲙⲛⲧϫⲱⲱⲣⲉ ⲧⲁⲩⲱⲛϩ ⲉⲃⲟⲗ ⲉⲓⲙⲡϣⲁ ⲛⲧⲁⲙⲛⲧϩⲗⲗⲟ

6:28  ⲧⲁⲕⲱ ⲇⲉ ⲛⲛϣⲏⲣⲉ ϣⲏⲙ ⲛⲟⲩⲥⲙⲟⲧ ⲙⲙⲛⲧϫⲱⲱⲣⲉ ⲉⲧⲣⲉⲩⲙⲟⲩ ϩⲱⲟⲩ ϩⲛⲟⲩⲟⲩⲣⲟⲧ ⲙⲛⲟⲩⲧⲱⲕ ⲛϩⲏⲧ ϩⲁⲡⲛⲟⲙⲟⲥ ⲉⲧⲟⲩⲁⲁⲃ ⲛⲥⲉⲙⲛⲟⲛ ⲛⲧⲁⲣⲉϥϫⲉⲛⲁⲓ ⲛⲧⲉⲩⲛⲟⲩ ⲁϥϯⲡⲉⲣⲟⲩⲟⲉⲓⲉ ⲉⲧⲃⲁⲥⲁⲛⲟⲥ

6:29  ⲛⲧⲟⲟⲩ ⲇⲉ ⲉⲩⲙⲟⲕϩ ⲛϩⲏⲧ ⲉϫⲱϥ ⲙⲛⲛⲥⲱⲥ ⲁⲩϭⲱⲛⲧ ⲉⲣⲟϥ ⲉⲧⲃⲉⲛⲉⲛⲧⲁϥϫⲟⲟⲩ ⲉⲩϫⲱ ⲙⲙⲟⲥ ϫⲉ ⲟⲩⲁⲡⲟⲛⲟⲓⲁ

6:30  ⲡⲉⲛⲧⲁⲣⲉϥⲛⲟⲩ ⲇⲉ ⲉⲙⲟⲩ ⲁϥⲁϣⲉϩⲟⲙ ⲉϥϫⲱ ⲙⲙⲟⲥ ϫⲉ ϥⲟⲩⲟⲛϩ ⲉⲃⲟⲗ ⲙⲡϫⲟⲉⲓⲥ ⲡⲉⲧⲥⲟⲟⲩⲛ ⲛϩⲱⲃ ⲛⲓⲙ ϫⲉ ⲟⲩⲛϭⲟⲙ ⲙⲙⲟⲓ ⲉⲧⲣⲉⲩⲕⲁⲧ ⲉⲃⲟⲗ ⲙⲡⲙⲟⲩ ⲛϯϥⲓ ϩⲁϩⲉⲛⲧⲕⲉ ⲉⲩⲛⲁϣⲧ ϩⲙⲡⲁⲥⲱⲙⲁ ⲉⲩⲙⲁⲥⲧⲓⲅⲟⲩ ⲙⲙⲟⲓ ϩⲁⲧⲁⲯⲩⲭⲏ ⲉⲉⲓϣⲱⲡ ⲛⲛⲁⲓϩⲓⲥⲉ ⲉⲧⲃⲉⲧⲉϥϩⲟⲧⲉ

6:31  ⲡⲁⲓ ⲙⲉⲛ ⲁϥⲛⲕⲟⲧⲕ ϩⲛⲡⲁⲓⲥⲙⲟⲧ ⲉⲁϥⲕⲱ ⲙⲡϥⲙⲟⲩ ⲙⲙⲟⲉⲓⲛ ⲛⲧⲙⲛⲧϫⲱⲱⲣⲉ ⲁⲩⲱ ⲛⲣⲡⲙⲉⲩⲉ ⲁⲣⲉⲧⲏ ⲟⲩ ⲙⲟⲛⲟⲛ ⲛⲛϣⲏⲣⲉ ϣⲏⲙ ⲁⲗⲗⲁ ⲙⲡⲉϩⲟⲩⲟ ⲛⲡϥϩⲉⲑⲛⲟⲥ

Chapter 7

7:1  ⲁⲥϣⲱⲡⲉ ⲛⲕⲉⲥⲟϣϥ ⲛⲥⲟⲛ ⲙⲛⲧⲉⲩⲙⲁⲁⲩ ⲉⲩϯϩⲧⲟⲣ ⲉⲣⲟⲟⲩ ϩⲓⲧⲙⲡⲣⲟ ⲉⲩⲱⲙ ⲉⲃⲟⲗ ϩⲛⲧⲉⲑⲩⲥⲓⲁ ⲉⲧϫⲁϩⲙ ⲉⲩϩⲓⲟⲩⲉ ⲉⲣⲟⲟⲩ ϩⲛϩⲉⲛⲙⲁⲥⲧⲓⲅⲝ ⲙⲛϩⲉⲛⲕⲱⲃϩ

7:2  ϩⲁⲟⲩⲁ ⲇⲉ ⲛϩⲏⲧⲟⲩ ⲛϣⲟⲣⲡ ⲛϣⲁϫⲉ ⲉϥϫⲱ ⲙⲙⲟⲥ ϫⲉ ⲉⲕϣⲓⲛⲉ ⲙⲙⲟⲛ ⲉⲟⲩ ⲛⲉ ⲕⲛⲁⲥⲉⲧⲙⲟⲩ ⲛⲧⲟⲧⲛ ⲧⲛⲥⲃⲧⲱⲧ ⲅⲁⲣ ⲉⲙⲟⲩ ⲉϩⲟⲩⲉⲡⲁⲣⲁⲃⲁ ⲛⲛⲟⲙⲟⲥ ⲛⲛⲉⲛⲉⲓⲟⲧⲉ

7:3  ⲁϥϭⲱⲛⲧ ⲛϭⲓⲡⲣⲣⲟ ⲁϥⲟⲩⲉϩⲥⲁϩⲛⲉ ⲉⲥⲁϩⲧⲉ ϩⲁϩⲉⲛⲗⲁⲕⲛⲧ ⲙⲛϩⲉⲛⲭⲁⲗⲕⲓⲟⲛ

7:4  ⲛⲧⲁⲣⲟⲩϫⲉⲣⲟ ⲇⲉ ⲁϥϫⲟⲟϥ ⲉϣⲱⲱⲧ ⲙⲡⲗⲉⲥ ⲙⲡⲉⲛⲧⲁϥϣⲁϫⲉ ⲛϣⲟⲣⲡ ⲛⲥⲉⲕⲉⲕⲡⲉϥϣⲁⲁⲣ ⲛⲥⲉⲛⲛⲉϥⲕⲉⲉⲥ ⲉⲃⲟⲗ ⲉⲩϭⲱϣⲧ ⲛⲥⲱϥ ⲛϭⲓⲛⲉϥⲥⲛⲏⲩ ⲙⲛⲧⲉϥⲙⲁⲁⲩ ⲛⲧⲁⲣⲉϥⲧⲁⲕⲟ ⲛⲇⲉ ⲉⲡⲧⲏⲣϥ

7:5  ⲉⲧⲓ ⲉϥⲛⲓϥⲉ ⲁϥⲟⲩⲉϩⲥⲁϩⲛⲉ ⲉⲧⲁⲗⲟϥ ⲉϩⲣⲁⲓ ⲉⲉϥ ⲛⲗⲁⲕⲛⲧ ⲛⲧⲁⲣⲉⲡⲕⲁⲡⲛⲟⲥ ⲇⲉ ⲛⲧⲗⲁⲕⲛⲧ ⲉⲓ ⲉϩⲣⲁⲓ ⲉⲡⲉϩⲟⲩⲟ ⲁⲩⲥⲟⲡⲥⲡ ⲛⲛⲉⲩⲉⲣⲏⲩ ⲙⲛⲧⲉⲩⲙⲁⲁⲩ ⲉⲩϫⲱ ⲙⲙⲟⲥ

7:6  ϫⲉ ⲙⲁⲣⲉⲛⲙⲟⲩ ϩⲱⲱⲛ ϩⲛⲟⲩⲙⲛⲧϫⲱⲱⲣⲉ ⲡϫⲟⲉⲓⲥ ⲅⲁⲣ ⲡⲛⲟⲩⲧⲉ ⲙⲓϣⲉ ⲉϫⲱⲛ ⲕⲁⲧⲁⲑⲉ ⲉⲛⲧⲁϥϫⲟⲟⲥ ⲛϭⲓⲙⲱⲟⲩⲥⲏⲥ ϩⲛⲧⲉϥⲱⲇⲏ ⲉⲧⲣⲙⲛⲧⲣⲉ ϫⲉ ⲥⲉⲛⲁⲥⲉⲡⲥⲱⲡ ⲉϫⲛⲛⲉϥϩⲙϩⲁⲗ

7:7  ⲛⲧⲁⲡϣⲟⲣⲡ ⲇⲉ ⲙⲟⲩ ϩⲛⲡⲉⲓⲥⲙⲟⲧ ⲡⲙⲉϩⲥⲛⲁⲩ ⲟⲛ ⲁⲩⲛⲧϥ ⲉⲩⲥⲱⲃⲉ ⲛⲥⲱϥ ⲁⲩⲕⲉⲕⲡϣⲁⲁⲣ ⲛⲧⲉϥⲁⲡⲉ ⲙⲛⲛⲉϥϥⲱⲉ ⲁⲩϫⲛⲟⲩϥ ϫⲉ ⲕⲛⲁⲟⲩⲱⲙ ⲉⲙⲡⲁⲧⲟⲩⲧⲓⲙⲱⲣⲓⲁ ⲙⲡⲉⲕⲥⲱⲙⲁ ⲕⲁⲧⲁⲙⲉⲗⲟⲥ

7:8  ⲛⲧⲟϥ ⲇⲉ ⲁϥⲟⲩⲱϣⲃ ϩⲛⲧⲉⲥⲡⲉ ⲛⲛⲉϥⲉⲓⲟⲧⲉ ⲉϥϫⲱ ⲙⲙⲟⲥ ϫⲉ ⲛⲑⲉ ⲛⲧⲁⲡϣⲟⲣⲡ ϥⲓ ϩⲁⲧⲃⲁⲥⲁⲛⲟⲥ ⲁⲛⲟⲕ ϩⲱⲱⲧ ⲟⲛ ⲛⲧⲉⲉⲓϩⲉ

7:9  ⲛⲧⲁⲣⲉϥⲛⲟⲩ ⲇⲉ ⲉϯⲡⲉ ⲡⲉϫⲁϥ ϫⲉ ⲛⲧⲟⲕ ⲙⲉⲛ ⲡⲣⲉϥⲣⲃⲱⲛ ⲉⲕⲛⲁⲣⲃⲟⲗ ϩⲛⲡⲁⲓⲱⲛϩ ⲡⲣⲣⲟ ⲇⲉ ⲙⲡⲕⲟⲥⲙⲟⲥ ⲉⲁⲛⲙⲟⲩ ϩⲁⲛⲉϥⲛⲟⲙⲟⲥ ϥⲛⲁⲧⲟⲩⲛⲟⲥⲛ ⲉⲩⲱⲛϩ ϣⲁⲉⲛⲉϩ

7:10  ⲙⲛⲛⲥⲁⲡⲁⲓ ⲁⲩⲉⲓⲛⲉⲡⲙⲉϩϣⲟⲙⲧ ⲁⲩⲁⲓⲧⲓ ⲙⲡⲉϥⲗⲉⲥ ⲛⲧⲉⲩⲛⲟⲩ ⲁϥⲧⲁⲩⲁϥ ⲉⲃⲟⲗ ⲁϥϥⲓ ⲛⲛⲉϥϭⲓϫ ⲉϩⲣⲁⲓ

7:11  ⲉϥⲧⲏⲕ ⲛϩⲏⲧ ⲉϥϫⲱ ⲙⲙⲟⲥ ϩⲛⲟⲩⲙⲛⲧϫⲱⲱⲣⲉ ⲛⲧⲁⲩϯⲛⲁⲓ ⲛⲏⲓ ⲉⲃⲟⲗ ϩⲛⲧⲡⲉ ⲁⲩⲱ ⲉⲉⲓⲛⲉ ⲉⲣⲟⲟⲩ ⲉⲧϥⲉ ⲛⲉϥϩⲟⲧⲉ ⲙⲛⲡⲉϥⲛⲟⲙⲟⲥ ⲉⲓⲛⲁϩⲧⲉ ϫⲉ ϯⲛⲁϫⲓⲧⲟⲩ ⲟⲛ ⲉⲃⲟⲗ ϩⲓⲧⲟⲟⲧϥ

7:12  ϩⲱⲥⲧⲉ ⲛⲥⲉⲣϣⲡⲏⲣⲉ ⲛⲧⲉⲯⲩⲭⲏ ⲙⲡϣⲏⲣⲉ ϣⲏⲙ ⲛϭⲟⲡⲣⲟ ⲙⲛⲛⲉⲧⲙⲙⲁϥ ⲛⲑⲉ ⲛⲧⲁϥⲟⲡϥ ⲙⲙⲟⲕϩⲥ ⲛⲑⲉ ⲛⲛⲓⲗⲁⲁⲩ

7:13  ⲛⲧⲁⲣⲉⲡⲁⲓ ⲇⲉ ⲙⲟⲩ ⲡⲙⲉϩϥⲧⲟⲟⲩ ⲟⲛ ⲛⲧⲉⲓϩⲉ ⲁⲩⲃⲁⲥⲁⲛⲓⲍⲉ ⲙⲙⲟϥ ⲉⲩϩⲓⲟⲩⲉ ⲉⲣⲟϥ

7:14  ⲛⲧⲁⲣⲉϥⲛⲟⲩⲉ ⲇⲉ ⲉⲙⲟⲩ ⲡⲉϫⲁϥ ⲛⲧⲉⲓϩⲉ ϫⲉ ⲛⲁⲛⲟⲩⲥ ⲛⲁⲛ ⲉⲙⲟⲩ ⲉⲃⲟⲗ ϩⲓⲧⲛⲣⲣⲱⲙⲉ ⲉϭⲱϣⲧ ⲉⲃⲟⲗ ϩⲏⲧⲥ ⲛⲑⲉⲗⲡⲓⲥ ⲙⲡⲛⲟⲩⲧⲉ ⲉⲧⲣⲉϥⲧⲟⲩⲛⲟⲥⲛ ⲛⲕⲉⲥⲟⲡ ⲛⲧⲟⲕ ⲇⲉ ⲙⲛⲁⲛⲁⲥⲧⲁⲥⲓⲥ ⲛⲱⲛϩ ϣⲟⲟⲡ ⲛⲁⲕ

7:15  ⲡⲙⲉϩϯⲟⲩ ⲟⲛ ⲛⲧⲁⲓϩⲉ ⲁⲩⲛⲧϥ ⲉⲩϩⲉⲧⲁⲍⲉ ⲙⲙⲟϥ ⲛⲧⲟϥ ⲇⲉ ⲁϥϭⲱϣⲧ ⲉϩⲟⲩⲛ ⲉϩⲣⲁϥ ⲡⲉϫⲁϥ ϫⲉ

7:16  ⲛⲧⲟⲕ ⲙⲉⲛ ⲛⲧⲕⲟⲩⲣⲱⲙⲉ ⲉϥⲛⲁⲧⲁⲕⲟ ⲁⲕϫⲓ ⲛⲧⲉⲝⲟⲩⲥⲓⲁ ⲛⲣⲣⲱⲙⲉ ⲉⲕⲉⲓⲣⲉ ⲙⲡⲉⲧⲉⲕⲟⲩⲁϣϥ ⲙⲡⲣⲣⲡⲙⲉⲩⲉ ϭⲉ ϫⲉ ⲛⲧⲁⲡⲛⲟⲩⲧⲉ ⲕⲁⲡⲉⲛⲅⲉⲛⲟⲥ ⲛⲥⲱϥ

7:17  ϭⲱϣⲧ ⲛⲇⲉ ⲛⲑⲉ ⲉⲧϥⲛⲁⲃⲁⲥⲁⲛⲓⲍⲉ ⲙⲙⲟⲕ ⲙⲛⲡⲉⲕⲥⲡⲉⲣⲙⲁ

7:18  ⲙⲛⲛⲥⲁⲡⲁⲓ ⲁⲩⲉⲓⲛⲉ ⲙⲡⲙⲉϩⲥⲟⲟⲩ ⲛⲧⲟϥ ⲇⲉ ⲛⲧⲁⲣⲉϥⲉⲓ ⲉϥⲛⲁⲙⲟⲩ ⲡⲉϫⲁϥ ϫⲉ ⲙⲡⲣⲣⲡⲗⲁⲛⲁ ⲉⲡϫⲓⲛϫⲏ ⲁⲛⲟⲛ ⲅⲁⲣ ⲉⲛϣⲱⲡ ⲛⲛⲁⲓ ⲉⲧⲃⲉ ⲛⲉⲛⲛⲟⲃⲉ ⲉⲛⲧⲁⲛⲁⲁⲩ ⲙⲡⲉⲛⲛⲟⲩⲧⲉ

7:19  ⲛⲧⲟⲕ ⲇⲉ ⲙⲡⲣⲣⲡⲙⲉⲩⲉ ϫⲉ ⲕⲛⲁⲣⲃⲟⲗ ⲉⲕϯ ⲟⲩⲃⲉⲡⲛⲟⲩⲧⲉ

7:20  ⲟⲩϣⲡⲏⲣⲉ ⲇⲉ ⲛϩⲟⲩⲟ ⲧⲉ ⲧⲉⲩⲙⲁⲁⲩ ϩⲱⲥ ⲉⲥⲙⲡϣⲁ ⲛⲟⲩⲣⲡⲙⲉⲩⲉ ⲉⲛⲁⲛⲟⲩϥ ⲧⲁⲓ ⲉⲧϭⲱϣⲧ ⲉϫⲛⲥⲁϣϥ ⲛϣⲏⲣⲉ ⲉⲩⲧⲁⲕⲟ ⲙⲙⲁϥ ϩⲛⲟⲩϩⲟⲟⲩ ⲛⲟⲩⲱⲧ ⲉⲥϥⲓ ϩⲁⲣⲟⲥ ϩⲛⲟⲩⲙⲛⲧϫⲱⲱⲣⲉ ⲉⲧⲃⲉⲑⲉⲗⲡⲓⲥ ⲙⲡⲛⲟⲩⲧⲉ

7:21  ⲉⲥⲥⲟⲡⲥⲡ ⲙⲡⲟⲩⲁ ⲡⲟⲩⲁ ⲙⲙⲟⲟⲩ ϩⲛⲧⲉⲥⲁⲥⲡⲉ ⲉⲥϫⲏⲕ ⲉⲃⲟⲗ ϩⲛⲟⲩⲙⲛⲧϫⲱⲣⲉ ⲉⲁⲥⲧⲟⲩⲛⲉⲥⲡⲉⲥⲙⲉⲩⲉ ⲛⲧⲉⲥⲙⲛⲧⲥϩⲓⲙⲉ ϩⲛⲟⲩϭⲱⲛⲧ ⲙⲙⲛⲧϩⲟⲟⲩⲧ ⲉⲥϫⲱ ⲙⲙⲟⲥ ⲛⲁⲩ

7:22  ϫⲉ ⲛϯⲥⲟⲟⲩⲛ ⲁⲛ ϫⲉ ⲛⲧⲁⲧⲉⲧⲛⲁϣ ⲛϩⲉ ϩⲣⲁⲓ ⲛϩⲏⲧ ⲟⲩⲇⲉ ⲁⲛⲟⲕ ⲁⲛⲁϩϯ ⲛⲏⲧⲛ ⲙⲡⲱⲛϩ ⲙⲛⲡⲉ ⲙⲛⲡⲥⲱⲙⲁ ⲙⲡⲟⲩⲁ ⲡⲟⲩⲁ

7:23  ⲧⲉⲛⲟⲩ ⲧⲉ ⲡⲣⲉϥⲥⲱⲛⲧ ⲙⲡⲕⲟⲥⲙⲟⲥ ⲧⲏⲣϥ ⲁϥⲡⲗⲁⲥⲥⲉ ⲙⲡⲣⲱⲙⲉ ⲙⲛⲛⲕⲁⲁ ⲛⲓⲙ ⲁϥϯ ⲛⲏⲧⲛ ⲟⲛ ⲙⲡⲉⲡⲛⲁ ⲙⲡⲱⲛϩ ϩⲛⲡⲉϥⲛⲁ ⲛⲑⲉ ⲛⲧⲁⲧⲉⲧⲛϣⲧⲏⲩⲧⲛ ⲉⲣⲱⲧⲛ ⲉⲧⲃⲉⲡⲉϥⲛⲟⲙⲟⲥ

7:24  ⲁⲛⲧⲓⲟⲭⲟⲥ ⲇⲉ ⲉϥϫⲱ ⲙⲙⲟⲥ ϫⲉ ⲥⲉⲕⲁⲧⲁⲫⲣⲟⲛⲓ ⲙⲙⲟⲉⲓ ⲉϥⲛⲁⲩ ⲉⲧⲉⲥⲙⲏ ⲉⲧⲟⲩⲛⲁϭⲛⲉϭ ⲙⲙⲟϥ ⲉⲧⲓ ⲉⲣⲉⲡⲕⲟⲩⲉⲓ ⲛϩⲏⲧⲟⲩ ϣⲟⲟⲡ ⲁϥⲥⲡⲥⲱⲡ ⲟⲩ ⲙⲟⲛⲟⲛ ϩⲙⲡϣⲁϫⲉ ⲁⲗⲗⲁ ϩⲛϩⲉⲛⲁⲛⲁϣ ⲉϥⲡⲓⲑⲉ ⲙⲙⲟϥ ϫⲉ ϯⲛⲁⲁⲁⲕ ⲣⲣⲙⲙⲁⲟ ⲁⲩⲱ ⲙⲙⲁⲕⲁⲣⲓⲟⲥ ⲉⲕϣⲁⲛⲡⲱⲱⲛⲉ ⲉⲃⲟⲗ ϩⲛ ⲛⲛⲟⲙⲟⲥ ⲛⲛⲉⲕⲉⲓⲟⲧⲉ ⲧⲁⲁⲕ ⲛⲁⲓ ⲛϣⲃⲏⲣ ϯⲛⲁⲁⲁⲕ ⲛϩⲉⲛⲉⲝⲟⲩⲥⲓⲁ

7:25  ⲡϣⲏⲣⲉ ϣⲏⲙ ⲛⲧⲁⲣⲉϥⲧⲙϯϩⲧⲏϥ ϩⲁⲡⲣⲣⲟ ⲙⲟⲩⲧⲉ ⲉⲧⲉϥⲙⲁⲁⲩ ⲁϥⲥⲉⲡⲥⲱⲡⲥ ⲉⲡⲓⲑⲉ ⲙⲡϣⲏⲣⲉ ϣⲏⲙ ⲉⲧⲣⲉϥⲟⲩϫⲁⲓ

7:26  ⲛⲧⲟⲥ ⲛⲇⲉ ⲛⲧⲁⲣⲉⲥⲥⲱⲧⲙ ⲁⲥⲡⲁϩⲧⲥ ϩⲁⲣⲉⲧϥ ⲙⲡϣⲏⲣⲉ ϣⲏⲙ

7:27  ⲉⲥⲛⲟϭⲛⲉϭ ⲙⲡⲧⲩⲣⲁⲛⲛⲟⲥ ⲟⲩⲉϩⲓⲏⲧ ⲡⲉϫⲁⲥ ⲛⲁϥ ⲛⲧⲉⲉⲓϩⲉ ϩⲛⲧⲉⲥⲁⲥⲡⲉ ϫⲉ ⲡⲁϣⲏⲣⲉ ⲛⲁⲉ ⲛⲁⲓ ⲧⲁⲓ ⲉⲛⲧⲁⲥϥⲓ ϩⲁⲣⲟⲕ ⲙⲡⲥⲓⲧ ⲛⲉⲃⲟⲧ ϩⲛⲑⲏ ⲁⲥⲧⲥⲉⲛⲕⲟⲕ ⲛϣⲁⲙⲧⲉ ⲣⲣⲟⲙⲡⲉ ⲁⲓⲥⲁⲛⲟⲩϣⲕ ⲁⲓⲁⲁⲕ ⲛⲧⲉⲓϭⲟⲧ

7:28  ϯⲥⲟⲡⲥⲉⲡ ⲙⲙⲟⲕ ⲡⲁϣⲏⲣⲉ ⲉⲧⲣⲉⲕϭⲱϣⲧ ⲉⲧⲡⲉ ⲙⲛⲡⲕⲁϩ ⲙⲛⲛⲉⲧⲛϩⲏⲧⲟⲩ ⲧⲏⲣⲟⲩ ⲉⲧⲣⲉⲕⲉⲓⲙⲉ ϫⲉ ⲛⲧⲁⲡⲛⲟⲩⲧⲉ ⲧⲁⲙⲓⲟⲟⲩ ⲉⲃⲟⲗ ϩⲛⲛⲉⲧⲉⲛⲥⲉϣⲟⲟⲡ ⲁⲛ ⲧⲁⲓ ⲟⲛ ⲧⲉ ⲑⲉ ⲙⲡⲅⲉⲛⲟⲥ ⲛⲣⲣⲱⲙⲉ

7:29  ⲙⲡⲣⲣϩⲟⲧⲉ ϩⲏⲧϥ ⲙⲡⲣⲉϥϩⲱⲧⲃ ⲁⲗⲗⲁ ϣⲱⲡⲉ ⲉⲕⲙⲡϣⲁ ⲛⲉⲕⲥⲛⲏⲩ ⲛⲅϣⲱⲡ ⲉⲣⲟⲕ ⲙⲡⲙⲟⲩ ϫⲉⲕⲁⲁⲥ ϩⲙⲡⲙⲁ ⲙⲡⲛⲟⲩⲧⲉ ⲉϥⲉⲧⲁⲁⲕ ⲛⲏⲓ ⲙⲛⲛⲉⲕⲥⲛⲏⲩ

7:30  ⲉⲙⲡⲁⲧⲉⲥⲟⲩⲱ ⲛⲛⲓϣⲁϫⲉ ⲡⲉϫⲁϥ ⲛϭⲓⲡⲏⲣⲉ ϣⲏⲙ ⲉⲧⲉⲧⲛϭⲉⲉⲧ ⲉⲛⲓⲙ ⲛⲧⲁⲥⲱⲧⲙ ⲁⲛ ⲛⲥⲁⲡⲟⲩⲁϩⲥⲁϩⲛⲉ ⲙⲡⲣⲣⲟ ⲡⲟⲩⲉϩⲥⲁϩⲛⲉ ⲇⲉ ⲛⲧⲟϥ ⲙⲡⲛⲟⲙⲟⲥ ⲙⲙⲱⲟⲩⲥⲏⲥ ⲉⲛⲧⲁϥⲁⲁϥ ⲛⲛⲉⲛⲉⲓⲁⲧⲉ ϯⲛⲁⲥⲱⲧⲙ ⲛⲥⲱϥ

7:31  ⲛⲧⲟⲕ ⲇⲉ ⲉⲕⲙⲉⲩⲉ ⲉⲡⲉⲑⲟⲟⲩ ⲛⲓⲙ ⲉϩⲟⲩⲛ ⲉⲛϩⲉⲃⲣⲁⲓⲟⲥ ⲛⲉⲕⲣⲃⲟⲗ ⲉⲧϭⲓϫ ⲙⲡⲛⲟⲩⲧⲉ ⲁⲛ

7:32  ⲁⲛⲟⲛ ⲅⲁⲣ ⲛⲧⲁⲛϣⲡⲛⲁⲓ ⲉⲧⲃⲉⲛⲉⲛⲛⲟⲃⲉ ⲉϥϫⲡⲓⲟ ⲙⲙⲟⲛ ⲛϭⲓⲡⲉⲛϫⲟⲉⲓⲥ ⲡⲉⲧⲟⲛϩ

7:33  ⲉⲁϥϭⲱⲛⲧ ⲉⲣⲟⲛ ⲛⲟⲩⲕⲟⲩⲉⲓ ⲉϥϯⲥⲃⲱ ⲛⲁⲛ ⲙⲛⲛⲥⲱⲥ ⲇⲉ ϥⲛⲁϩⲱⲧⲡ ⲉⲛⲉϥϩⲙϩⲁⲗ ⲉⲙⲡⲁⲧⲉⲕⲣⲃⲟⲗ ⲉⲧⲕⲣⲓⲥⲓⲥ ⲙⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ

7:34  ⲛⲧⲟⲕ ⲇⲉ ⲡⲉⲧϫⲁϩⲙ ⲉⲧⲟ ⲛⲃⲁⲧⲉ ⲛⲣⲣⲱⲙⲉ ⲛⲓⲙ ⲙⲡⲣϫⲓⲥⲉ ⲛϩⲏⲧ ⲉⲡϫⲓⲛϫⲏ ⲉϫⲛ ϩⲛϩⲉⲗⲡⲓⲥ ⲉⲩϣⲟⲩⲉⲓⲧ ⲉⲁⲕⲧⲟⲕ ⲉϩⲣⲁⲓ ⲉϫⲛⲛϣⲏⲣⲉ ⲛⲧⲡⲉ

7:36  ⲛⲁⲥⲛⲏⲩ ⲅⲁⲣ ⲧⲉⲛⲟⲩ ⲉⲁⲩϥⲓ ϩⲁⲟⲩⲕⲟⲩⲓ ⲛϩⲓⲥⲉ ⲁⲩϣⲱⲡⲉ ϩⲛⲇⲓⲁⲑⲏⲕⲏ ⲙⲡⲛⲟⲩⲧⲉ ⲛⲧⲟⲕ ⲇⲉ ϩⲣⲁⲓ ϩⲛⲧⲉϥⲕⲣⲓⲥⲓⲥ ⲕⲛⲁϫⲓ ⲛⲟⲩⲕⲟⲗⲁⲥⲓⲥ ⲉⲥⲙⲡϣⲁ ⲛⲧⲉⲕⲙⲛⲧϫⲁⲥⲓϩⲏⲧ

7:37  ⲁⲛⲟⲕ ⲇⲉ ⲟⲛ ⲛⲑⲉ ⲛⲛⲁⲕⲉⲥⲛⲏⲩ ϯⲛⲁϯ ⲙⲡⲁⲥⲱⲙⲁ ⲙⲛⲧⲁⲯⲩⲭⲏ ⲛⲛⲁⲛⲟⲙⲟⲥ ⲛⲛⲁⲉⲓⲁⲧⲉ ⲉⲉⲓⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲉⲕⲱⲉ ⲉⲃⲟⲗ ⲙⲡⲉⲛⲅⲉⲛⲟⲥ ϩⲛⲟⲩϭⲉⲡⲏ ⲛⲧⲟⲕ ⲇⲉ ϩⲛϩⲉⲛⲥⲏϣⲉ ⲙⲛϩⲉⲛⲙⲁⲥⲧⲓⲅⲝ ⲉⲧⲣⲉⲕϩⲟⲙⲟⲗⲟⲅⲉⲓ ϫⲉ ⲛⲧⲟϥ ⲡⲉ ⲡⲛⲟⲩⲧⲉ ⲟⲩⲁⲁϥ

7:38  ⲛⲥⲉϭⲱ ⲉϩⲣⲁⲓ ⲉϫⲱⲓ ⲙⲛⲛⲁⲥⲛⲏⲩ ⲛϭⲓⲧⲟⲣⲅⲏ ⲙⲡⲡⲁⲛⲧⲟⲕⲣⲁⲧⲱⲣ ⲧⲉⲛⲧⲁϥⲛⲧⲥ ⲉϩⲣⲁⲓ ⲉϫⲛⲡⲉⲛⲅⲉⲛⲟⲥ ⲧⲏⲣϥ ϩⲛⲟⲩⲙⲡϣⲁ

7:39  ⲁϥϭⲱⲛⲧ ⲇⲉ ⲉⲡⲁⲓ ⲛϩⲟⲩⲟ ⲛϭⲓⲡⲣⲣⲟ ⲡⲁⲣⲁⲡⲕⲉⲥⲉⲉⲡⲉ ⲧⲏⲣϥ ⲁϥⲙⲟⲟⲩⲧϥ ⲛⲧⲟϥ ⲙⲙⲓⲛ ⲙⲙⲟϥ ⲉϥϣⲓⲡⲉ ⲛⲑⲉ ⲉⲛⲧⲁϥⲛⲉϭⲛⲟⲩϭϥ

7:40  ⲧⲁⲓ ⲧⲉ ⲑⲉ ⲉⲛⲧⲁⲡⲉⲉⲓⲕⲉⲙⲟⲩ ϩⲛⲟⲩⲧⲃⲃⲟ ⲉϥⲛⲁϩⲧⲉ ⲉⲡϫⲟⲉⲓⲥ ϣⲁⲑⲁⲏ

7:41  ⲙⲛⲛⲥⲁⲛϣⲏⲣⲉ ⲇⲉ ⲧⲏⲣⲟⲩ ⲁⲥⲙⲟⲩ ϩⲱⲱⲥ ⲛϭⲓⲧⲉⲩⲙⲁⲁⲩ

Chapter 8

Chapter 9

Chapter 10

Chapter 11

Chapter 12

Chapter 13

Chapter 14

Chapter 15