Geez - Joshua

Chapter 1

1:1  (ኦሪት ፡ ዘኢየሱስ ።)ወኮነ ፡ እምድኅረ ፡ ሞተ ፡ ሙሴ ፡ ገብረ ፡ እግዚአብሔር ፡ ተናገሮ ፡ ለኢየሱስ ፡ ወልደ ፡ ነዌ ፡ ለላእኩ ፡ ለሙሴ ፡ እንዘ ፡ ይብል ፤

1:2  ናሁ ፡ ሞተ ፡ ሙሴ ፡ ቍልዔየ ፡ ወይእዜኒ ፡ ተንሥእ ፡ ወዕድዎ ፡ ለዝንቱ ፡ ዮርዳንስ ፡ አንተ ፡ ወኵሉ ፡ ዝንቱ ፡ ሕዝብ ፡ ውስተ ፡ ምድር ፡ እንተ ፡ እሁበክሙ ፡ አነ ፡ ለክሙ ፡ ለደቂቀ ፡ እስራኤል ።

1:3  ኵሎ ፡ መካነ ፡ ኀበ ፡ ኬደት ፡ እግርክሙ ፡ ለክሙ ፡ እሁበክሙዎ ፡ በከመ ፡ እቤሎ ፡ ለሙሴ ፤

1:4  እምነ ፡ ገዳም ፡ [ወ]አንጢሊባኖን ፡ እስከ ፡ ፈለግ ፡ ዐቢይ ፡ ፈለገ ፡ [ኤ]ፍራጥስ ፡ ኵሎ ፡ ምድሮ ፡ ለኬጥያዊ ፡ ወእስከ ፡ ደኃሪት ፡ ባሕር ፡ ወእምነ ፡ ምዕራበ ፡ ፀሐይ ፡ ይኩንክሙ ፡ ደወልክሙ ።

1:5  ወአልቦ ፡ ሰብአ ፡ ዘይትቃወም ፡ ቅድሜክሙ ፡ በኵሉ ፡ መዋዕለ ፡ ሕይወትከ ፡ ወበከመ ፡ ሀለውኩ ፡ ምስለ ፡ ሙሴ ፡ ከማሁ ፡ እሄሉ ፡ ምስሌከ ፡ ወኢየኀድገከ ፡ ወኢይትዔወረከ ።

1:6  ጽናዕ ፡ ወትባዕ ፡ እስመ ፡ [አንተ ፡] ትከፍሎሙ ፡ ለዝንቱ ፡ ሕዝብ ፡ ምድረ ፡ እንተ ፡ መሐልኩ ፡ ለአበዊሆሙ ፡ ከመ ፡ አሀቦሙ ።

1:7  ወባሕቱ ፡ ጽናዕ ፡ ወትባዕ ፡ ጥቀ ፡ ከመ ፡ ትዕቀብ ፡ ወትግበር ፡ ኵሎ ፡ ሕገ ፡ ዘከመ ፡ አዘዘከ ፡ ሙሴ ፡ ቍልዔየ ፡ ወኢትትገሐሥ ፡ እምኔሁ ፡ ኢለየማን ፡ ወኢለፀጋም ፡ ከመ ፡ ታእምር ፡ ኵሎ ፡ ዘከመ ፡ ተሐውር ።

1:8  ወኢትትኀደግ ፡ መጽሐፉ ፡ ለዝንቱ ፡ [ሕግ ፡] እምነ ፡ አፉከ ፡ ወአንብብ ፡ ቦቱ ፡ መዐልተ ፡ ወሌሊተ ፡ ከመ ፡ ታእምር ፡ ገቢረ ፡ ኵሎ ፡ ዘጽሑፍ ፡ ውስቴቱ ፡ እስመ ፡ ትረትዕ ፡ ፍኖትከ ፡ ወቦቱ ፡ ትጠብብ ።

1:9  ወናሁ ፡ እኤዝዘከ ፡ ትባዕ ፡ ወጽናዕ ፡ ወኢትፍራህ ፡ ወኢትደንግፅ ፡ እስመ ፡ ሀለወ ፡ እግዚአብሔር ፡ ምስሌከ ፡ አምላክከ ፡ ውስተ ፡ ኵሉ ፡ ዘሖርከ ።

1:10  ወአዘዞሙ ፡ ኢየሱስ ፡ ለጸሐፍተ ፡ ሕዝብ ፡ ወይቤሎሙ ፤

1:11  ባኡ ፡ ውስተ ፡ ማእከለ ፡ ትዕይንት ፡ ወአዝዝዎሙ ፡ ለሕዝብ ፡ ወበልዎሙ ፡ አስተዳልው ፡ ለክሙ ፡ ሥንቀ ፡ እስመ ፡ እስከ ፡ ሠሉስ ፡ መዋዕል ፡ ተዐድውዎ ፡ ለዝንቱ ፡ ዮርዳንስ ፡ አንትሙ ፡ ወትበውኡ ፡ ትርከቡ ፡ ምድረ ፡ እንተ ፡ ይሁበክሙ ፡ እግዚአብሔር ፡ አምላከ ፡ አበዊክሙ ፡ ከመ ፡ ትትወረስዋ ።

1:12  ወለሮቤልሂ ፡ ወለጋድሂ ፡ ወለመንፈቀ ፡ ነገደ ፡ መናሴሂ ፡ ይቤሎሙ ፡ ኢየሱስ ፤

1:13  ተዘከሩ ፡ ቃለ ፡ ዘአዘዘክሙ ፡ ሙሴ ፡ ቍልዔሁ ፡ ለእግዚአብሔር ፡ ወይቤለክሙ ፡ ናሁ ፡ አዕረፈክሙ ፡ እግዚአብሔር ፡ ለክሙ ፡ ወወሀበክሙ ፡ ዛተ ፡ ምድረ ።

1:14  ለይንበራ ፡ አንስቲያክሙ ፡ ወደቂቅክሙ ፡ ወእንስሳክሙ ፡ ውስተ ፡ ዛቲ ፡ ምድር ፡ እንተ ፡ ወሀበክሙ ፡ ሙሴ ፡ በማዕዶተ ፡ ዮርዳንስ ፡ ወአንትሙሰ ፡ ዕድው ፡ ቅኑታኒክሙ ፡ ቅድመ ፡ አኀዊክሙ ፡ ኵሉ ፡ ጽኑዓኒክሙ ፡ ወተቃተሉ ፡ ሎሙ ፡ ምስሌሆሙ ፤

1:15  እስከ ፡ አመ ፡ ያዐርፎሙ ፡ እግዚአብሔር ፡ አምላክነ ፡ ለአኀዊክሙ ፡ ከማክሙ ፡ ወይወርሱ ፡ እሙንቱኒ ፡ ምድሮሙ ፡ እንተ ፡ ይሁቦሙ ፡ እግዚአብሔር ፡ አምላክነ ፡ ወተአትው ፡ እንከ ፡ አሐዱ ፡ አሐዱ ፡ እምኔክሙ ፡ ውስተ ፡ ርስቱ ፡ ወተዋረስዋ ፡ አንትሙኒ ፡ ለዛቲ ፡ ምድር ፡ እንተ ፡ ወሀበክሙ ፡ ሙሴ ፡ ቍልዔሁ ፡ ለእግዚአብሔር ፡ በማዕዶተ ፡ ዮርዳንስ ፡ በመንገለ ፡ ምሥራቀ ፡ ፀሐይ ።

1:16  ወአውሥእዎ ፡ ለኢየሱስ ፡ ወይቤልዎ ፡ ንገብር ፡ ኵሎ ፡ ዘአዘዝከነ ፡ ወነሐውር ፡ መካነ ፡ ኀበ ፡ ፈነውከነ ።

1:17  ወበከመ ፡ ተአዘዝነ ፡ ለሙሴ ፡ በኵሉ ፡ ከማሁ ፡ ንትኤዘዝ ፡ ለከሂ ፡ ወባሕቱ ፡ ምስሌከሂ ፡ ለየሀሉ ፡ እግዚአብሔር ፡ በከመ ፡ ሀለወ ፡ ምስለ ፡ ሙሴ ።

1:18  ወብእሲ ፡ ዘኢተአዘዘ ፡ ለከ ፡ ወዘክሕደከ ፡ ወኢሰምዐ ፡ ቃለከ ፡ ዘአዘዝካሁ ፡ ለይሙት ፡ ወይእዜኒ ፡ ጽናዕ ፡ ወትባዕ ።

Chapter 2

2:1  ወፈነወ ፡ ኢየሱስ ፡ እምነ ፡ ሳጢን ፡ ክልኤተ ፡ ወራዙተ ፡ ሰብአ ፡ ዐይን ፡ ጽምሚተ ፡ ወይቤሎሙ ፡ ዕረጉ ፡ ወርእይዋ ፡ ለይእቲ ፡ ምድር ፡ ወለኢያሪኮሂ ፡ ወሖሩ ፡ እልክቱ ፡ ክልኤቱ ፡ ወራዙት ፡ ወቦኡ ፡ ውስተ ፡ ኢያሪኮ ፡ ወቦኡ ፡ ውስተ ፡ ቤተ ፡ አሐቲ ፡ ብእሲት ፡ ዘማ ፡ እንተ ፡ ስማ ፡ ራአብ ፡ ወኀደሩ ፡ ህየ ።

2:2  ወአይድዕዎ ፡ ለንጉሠ ፡ ኢያሪኮ ፡ ወይቤልዎ ፡ ናሁ ፡ ቦኡ ፡ ዝየ ፡ ዕደው ፡ በሌሊት ፡ እምነ ፡ ደቂቀ ፡ እስራኤል ፡ ሰብአ ፡ ዐይን ፡ ከመ ፡ ይርአዩ ፡ ብሔረ ።

2:3  ወለአከ ፡ ንጉሠ ፡ ኢያሪኮ ፡ ኀበ ፡ ራአብ ፡ ወይቤ ፡ በልዋ ፡ ለራአብ ፡ አውፅኢአ ፡ ዕደወአ ፡ እለአ ፡ ቦኡአ ፡ ኀቤኪአ ፡ በሌሊትአ ፡ ወቦኡአ ፡ ቤተኪአ ፡ ሰብአ ፡ ዐይንአ ፡ እሙንቱአ ፡ ወከመአ ፡ ይርአዩአ ፡ ብሔረአ ፡ መጽኡአ ።

2:4  ወነሥአቶሙ ፡ ይእቲ ፡ ብእሲት ፡ ለእልክቱ ፡ ዕደው ፡ ክልኤቱ ፡ ወኀብአቶሙ ፡ ወትቤ ፡ ዕደውሰ ፡ ቦኡ ፡ ኀቤየ ፡ ወኢያእመርኩ ፡ እምአይቴ ፡ እሙንቱ ።

2:5  ወእንዘ ፡ ዕጽው ፡ ኆኅት ፡ በጽልመት ፡ ወፅኡ ፡ ውእቶሙ ፡ ዕደው ፡ ወኢያእመርኩ ፡ እንከ ፡ አይቴ ፡ ሖሩ ፡ ውእቶሙ ፡ ዕደው ፡ ወሑሩ ፡ ፍጡነ ፡ ወትልውዎሙ ፡ ወዴግንዎሙ ፡ ዮጊ ፡ ትረክብዎሙ ።

2:6  ወይእቲሰ ፡ አዕረገቶሙ ፡ ውስተ ፡ ናሕስ ፡ ወኀብአቶሙ ፡ ማእከለ ፡ ዕፀው ፡ ውስተ ፡ ሕለት ፡ ዘውጡሕ ።

2:8  ወዴገንዎሙ ፡ ውእቶሙ ፡ [ዕደው ፡] እንበለ ፡ ይቢቱ ፡ ወይእቲሰ ፡ ዐርገት ፡ ኀቤሆሙ ፡ ውስተ ፡ ናሕስ ።

2:9  ወትቤሎሙ ፡ አአምር ፡ ከመ ፡ አግብኦ ፡ እግዚአብሔር ፡ ለብሔር ፡ ለክሙ ፡ እስመ ፡ አምጽአ ፡ እግዚአብሔር ፡ ፍርሀተክሙ ፡ ላዕሌነ ፡ ወተመስው ፡ ኵሎሙ ፡ እለ ፡ ይነብሩ ፡ ውስተ ፡ ብሔር ፡ እምነ ፡ ገጽክሙ ።

2:10  እስመ ፡ ሰማዕነ ፡ ከመ ፡ አይበሳ ፡ እግዚአብሔር ፡ ለባሕረ ፡ [ኤ]ርትራ ፡ እምቅድመ ፡ ገጽክሙ ፡ አመ ፡ ወፃእክሙ ፡ እምነ ፡ ምድረ ፡ ግብጽ ፡ ወኵሎ ፡ ዘገብረ ፡ ላዕለ ፡ ነገሥተ ፡ አሞሬዎን ፡ እለ ፡ ሀለው ፡ ማዕዶተ ፡ ዮርዳንስ ፡ ለሴዎን ፡ ወለአግ ፡ እለ ፡ ሠሮክምዎሙ ።

2:11  ወሶበ ፡ ሰማዕነ ፡ ንሕነ ፡ ደንገፀነ ፡ ልብነ ፡ ወኢተርፈት ፡ ነፍሰ ፡ አሐዱ ፡ እምኔነ ፡ እምነ ፡ ቅድመ ፡ ገጽክሙ ፡ እስመ ፡ እግዚአብሔር ፡ አምላክክሙ ፡ ውእቱ ፡ አምላክ ፡ በሰማይ ፡ በላዕሉ ፡ ወበምድር ፡ በታሕቱ ።

2:12  ወይእዜኒ ፡ መሐሉ ፡ ሊተ ፡ በእግዚአብሔር ፡ በከመ ፡ ገበርኩ ፡ ምስሌክሙ ፡ ምሕረተ ፡ ከመ ፡ ትግበሩ ፡ ምስሌየ ፡ ምሕረተ ፡ ወምስለ ፡ ቤተ ፡ አቡየ ፡ ወትሁቡኒ ፡ ተአምረ ፡ በጽድቅ ።

2:13  ወአሕይው ፡ ቤተ ፡ አቡየ ፡ ወእምየኒ ፡ ወአኀዊየኒ ፡ ወኵሎ ፡ ቤትየ ፡ ወኵሎ ፡ ዘዚአሆሙ ፡ ወአድኅኑ ፡ ነፍሰነ ፡ እምነ ፡ ሞት ።

2:14  ወይቤልዋ ፡ እሙንቱ ፡ ዕደው ፡ ነፍስነ ፡ ህየንቴክሙ ፡ ውስተ ፡ ሞት ፡ ወትቤሎሙ ፡ ይእቲ ፡ አመ ፡ አግብአ ፡ እግዚአብሔር ፡ ለሀገርነ ፡ ውስተ ፡ እደዊክሙ ፡ ግበሩ ፡ ምሕረተ ፡ ምስሌየ ፡ ወጽድቀ ፡ ወይቤልዋ ፡ እሙንቱ ፡ ዕደው ፡ ለእመ ፡ ኢያይዳዕክሙ ፡ በእንቲአነ ፡ ንገብር ፡ ምሕረተ ፡ ምስሌኪ ፡ አመ ፡ አግብአ ፡ እግዚአብሔር ፡ ለሀገርክሙ ፡ ለነ ፡ ወጽድቀ ።

2:15  ወአውረደቶሙ ፡ በሐብል ፡ እንተ ፡ መስኮት ፡ እስመ ፡ ቤታ ፡ ውስተ ፡ ጥቅም ፡ ውእቱ ፡ ወነበረት ፡ ይእቲ ፡ ውስተ ፡ አረፍቱ ።

2:16  ወትቤሎሙ ፡ እንተ ፡ አድባር ፡ ሑሩ ፡ ከመ ፡ ኢይርከቡክሙ ፡ እለ ፡ ይዴግኑክሙ ፡ ወተኀብኡ ፡ ህየ ፡ ሠሉሰ ፡ መዋዕለ ፡ እስከ ፡ ይገብኡ ፡ እለ ፡ ይዴግኑክሙ ፡ ወእምዝ ፡ ትገብኡ ፡ ውስተ ፡ ፍኖትክሙ ።

2:17  ወይቤልዋ ፡ እሙንቱ ፡ ዕደው ፡ ንጹሓን ፡ ንሕነ ፡ እምነ ፡ መሐላኪ ፡ ዘአምሐልክነ ።

2:18  ናሁ ፡ ንሕነ ፡ ንበውእ ፡ ውስተ ፡ ጽንፈ ፡ ህገር ፡ ወደዪ ፡ ዘንተ ፡ ፈትለ ፡ ቀይሐ ፡ ዘለይ ፡ ውስተ ፡ መስኮት ፡ እንተ ፡ እምኔሃ ፡ አውረድክነ ፡ ወአ[ባ]ኪኒ ፡ ወእ[መ]ኪኒ ፡ ወአኀዊኪኒ ፡ አስተጋብኢ ፡ ኀቤኪ ፡ ውስተ ፡ ቤትኪ ።

2:19  ወኵሉ ፡ ዘወፅአ ፡ አፍአ ፡ እምነ ፡ ኆኅተ ፡ ቤትኪ ፡ ይመውት ፡ ወንሕነሰ ፡ ንጹሓን ፡ ንሕነ ፡ እምነ ፡ ዝንቱ ፡ መሐላ ፡ ዘአምሐልክነ ፡ ወኵሉ ፡ ባሕቱ ፡ ዘሀለወ ፡ ምስሌኪ ፡ ውስተ ፡ ቤትኪ ፡ ላዕሌነ ፡ ኀጢአቱ ፡ ለእመ ፡ ሞተ ።

2:20  ወለእመሰ ፡ ቦ ፡ ዘገፍዐነ ፡ ወከሠተ ፡ ነገረነ ፡ ንጹሓን ፡ ንሕነ ፡ እምነ ፡ ዝንቱ ፡ መሐላኪ ።

2:21  ወትቤሎሙ ፡ ይኩን ፡ በከመ ፡ ትቤሉ ፡ ወፈነወቶሙ ፡ ወሖሩ ፡ ወአሰረት ፡ ዝክተ ፡ ተአምረ ፡ ዘለይ ፡ ውስተ ፡ መስኮታ ።

2:22  ወወፅኡ ፡ ወሖሩ ፡ ውስተ ፡ አድባር ፡ ወነበሩ ፡ ህየ ፡ ሠሉሰ ፡ መዋዕለ ፡ እስከ ፡ ገብኡ ፡ እለ ፡ ዴገንዎሙ ፡ ወኀሠሥዎሙ ፡ እለ ፡ ዴገንዎሙ ፡ ወኢረከብዎሙ ፡ ውስተ ፡ ኵሉ ፡ ፍናዌ ።

2:23  ወገብኡ ፡ እልክቱ ፡ ዕደው ፡ ወወረዱ ፡ እምነ ፡ ደብር ፡ ወኀለፉ ፡ ወበጽሑ ፡ ኀበ ፡ ኢየሱስ ፡ ወልደ ፡ ነዌ ፡ ወዜነውዎ ፡ ኵሎ ፡ ዘከመ ፡ ገብሩ ።

2:24  ወይቤልዎ ፡ ለኢየሱስ ፡ አግብአ ፡ እግዚአብሔር ፡ ኵሎ ፡ ምድረ ፡ ውስተ ፡ እዴነ ፡ ወደንገፁ ፡ ኵሉ ፡ አሕዛብ ፡ እለ ፡ ይነብሩ ፡ ውስተ ፡ ይእቲ ፡ ምድር ፡ እምኔነ ።

Chapter 3

3:1  ወጌሠ ፡ በጽባሕ ፡ ኢየሱስ ፡ ወግዕዙ ፡ እምነ ፡ ሳጢን ፡ ወበጽሑ ፡ እስከ ፡ ዮርዳንስ ፡ ውእቱ ፡ ወኵሉ ፡ ደቂቀ ፡ እስራኤል ፡ ወኀደሩ ፡ ህየ ፡ እንበለ ፡ ይዕድው ።

3:2  ወእምድኅረ ፡ ሠሉስ ፡ መዋዕል ፡ ቦኡ ፡ ጸሐፍት ፡ ማእከለ ፡ ትዕይንት ።

3:3  ወአስተኃለፉ ፡ ለሕዝብ ፡ ወይቤሉ ፡ እምከመ ፡ ርኢክሙ ፡ ታቦተ ፡ ሕጉ ፡ ለእግዚአብሔር ፡ አምላክነ ፡ ወካህናቲነ ፡ ወሌዋውያኒነ ፡ እንዘ ፡ ይጸውርዋ ፡ ገዐዙ ፡ አንትሙኒ ፡ እምነ ፡ መካናቲክሙ ፡ ወትልው ፡ ድኅሬሃ ።

3:4  ወባሕቱ ፡ ርሑቀ ፡ [ይኩን ፡] ማእከሌክሙ ፡ ወማእከሌሃ ፡ መጠነ ፡ ዕሥራ ፡ ምእት ፡ በእመት ፡ ወበመስፈርቱ ፡ ቁሙ ፡ ወኢትቅረብዋ ፡ ከመ ፡ ታእምሩ ፡ ውስተ ፡ ፍኖት ፡ እንተ ፡ ተሐውሩ ፡ እስመ ፡ ኢሖርክምዋ ፡ ለይእቲ ፡ ፍኖት ፡ ትካት ።

3:5  ወይቤሎሙ ፡ ኢየሱስ ፡ ለሕዝብ ፡ አንጽሑ ፡ ርእሰክሙ ፡ ለጌሠም ፡ እስመ ፡ ጌሠመ ፡ ይገብር ፡ እግዚአብሔር ፡ መድምመ ፡ ለክሙ ።

3:6  ወይቤሎሙ ፡ ኢየሱስ ፡ ለካህናት ፡ እንዘ ፡ ይብል ፡ ንሥኡ ፡ ታቦተ ፡ ሕጉ ፡ ለእግዚአብሔር ፡ ወሑሩ ፡ ቅድመ ፡ ሕዝብ ፡ ወነሥኡ ፡ ካህናት ፡ ታቦተ ፡ ሕጉ ፡ ለእግዚአብሔር ፡ ወሖሩ ፡ ቅድመ ፡ ሕዝብ ።

3:7  ወይቤሎ ፡ እግዚአብሔር ፡ ለኢየሱስ ፡ ናሁ ፡ በዛቲ ፡ ዕለት ፡ እእኅዝ ፡ ኣዕቢከ ፡ ቅድመ ፡ ኵሉ ፡ ደቂቀ ፡ እስራኤል ፡ ከመ ፡ ያእምሩ ፡ ከመ ፡ ሀለውኩ ፡ ምስሌከ ፡ በከመ ፡ ሀለውኩ ፡ ምስለ ፡ ሙሴ ።

3:8  ወይእዜኒ ፡ አዝዞሙ ፡ ለካህናት ፡ እለ ፡ ይጸውሩ ፡ ታቦተ ፡ ወበሎሙ ፡ እምከመ ፡ ቦእክሙ ፡ ውስተ ፡ ጽንፈ ፡ ማዩ ፡ ለዮርዳንስ ፡ ቁሙ ፡ ውስቴቱ ፡ ለዮርዳንስ ።

3:9  ወይቤሎሙ ፡ ኢየሱስ ፡ ለደቂቀ ፡ እስራኤል ፡ ቅረቡ ፡ ዝየ ፡ ወስምዑ ፡ ቃለ ፡ እግዚአብሔር ፡ አምላክነ ።

3:10  ወይቤሎሙ ፡ ኢየሱስ ፡ በዝንቱ ፡ ተአምሩ ፡ ከመ ፡ ሕያው ፡ ውእቱ ፡ እግዚአብሔር ፡ ዘምስሌክሙ ፡ ወአጥፍኦ ፡ ያጠፍኦሙ ፡ እምቅድመ ፡ ገጽክሙ ፡ ለከናኔዎን ፡ [ወለኬጤዎን ፡] ወለፌሬዜዎን ፡ ወለኤዌዎን ፡ ወለአሞሬዎን ፡ ወለኢያቡሴዎን ፡ ወለጌርጌሴዎን ።

3:11  ወናሁ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ኵሉ ፡ ምድር ፡ [ተዐዱ ፡ ቅድሜክሙ ፡] ዮርዳንስ ።

3:12  ወኅረዩ ፡ ለክሙ ፡ ዐሠርተ ፡ ወክልኤተ ፡ ዕደወ ፡ እምነ ፡ ደቂቀ ፡ እስራኤል ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።

3:13  ወሶበ ፡ አቀሙ ፡ እገሪሆሙ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ኵሉ ፡ ምድር ፡ በውስተ ፡ ማየ ፡ ዮርዳንስ ፡ ይነጽፍ ፡ ማየ ፡ ዮርዳንስ ፡ ወማይኒ ፡ ዘይወርድ ፡ እምነ ፡ ላዕሉ ፡ ይቀውም ።

3:14  ወእምዝ ፡ ሶበ ፡ ግዕዘ ፡ ሕዝብ ፡ እምነ ፡ መኃድሪሆሙ ፡ ከመ ፡ ይዕድውዎ ፡ ለዮርዳንስ ፡ ወካህናትሰ ፡ ጾሩ ፡ ታቦተ ፡ ሕግ ፡ ወሖሩ ፡ ቅድመ ፡ ሕዝብ ።

3:15  ወሶበ ፡ ቦኡ ፡ ካህናት ፡ እለ ፡ ይጸውሩ ፡ ታቦተ ፡ ሕግ ፡ ውስተ ፡ ዮርዳንስ ፡ ወተጠምቃ ፡ እገሪሆሙ ፡ ለካህናት ፡ እለ ፡ ይጸውሩ ፡ ታቦተ ፡ ሕግ ፡ ውስተ ፡ ጽንፉ ፡ ለማየ ፡ ዮርዳንስ ፡ ወምሉእ ፡ ውእቱ ፡ ዮርዳንስ ፡ እስከ ፡ ድንጋጊሁ ፡ ከመ ፡ አመ ፡ መዋዕለ ፡ ክረምት ፡ ወከመ ፡ አመ ፡ ይሠዊ ፡ ስርናይ ፤

3:16  ወቆመ ፡ ማይ ፡ ዘይወርድ ፡ እምነ ፡ ላዕሉ ፡ ወቆመ ፡ ከመ ፡ አረፍት ፡ እንዘ ፡ ያርሕቅ ፡ ቀዊመ ፡ ጥቀ ፡ ወጥቀ ፡ እስከ ፡ ደወለ ፡ ቀርያታያርም ፡ ወዝክቱሰ ፡ ዘይወርድ ፡ ወረደ ፡ ውስተ ፡ ባሕር ፡ ዘአራባ ፡ ወባሕረ ፡ አሎን ፡ ወነጽፈ ፡ ወየብሰ ፡ ወቆመ ፡ ሕዝብ ፡ አንጻረ ፡ ኢያሪከ ።

3:17  ወቆሙ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ይቡስ ፡ በማእከለ ፡ ዮርዳንስ ፡ ርሱያኒሆሙ ፡ ወኵሉ ፡ ደቂቀ ፡ እስራኤል ፡ ዐደው ፡ እንተ ፡ ማእከለ ፡ ይቡስ ፡ እስከ ፡ ተገምረ ፡ ኵሉ ፡ ሕዝብ ፡ ወዐደው ፡ ዮርዳንስ ።

Chapter 4

4:1  ወሶበ ፡ ተገምረ ፡ ኵሉ ፡ ሕዝብ ፡ ወዐደው ፡ ዮርዳንስ ፡ ወይቤሎ ፡ እግዚአብሔር ፡ ለኢየሱስ ፤

4:2  ንሣእ ፡ ዐሠርተ ፡ ወክልኤተ ፡ ዕደወ ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።

4:3  ወአዝዞሙ ፡ ከመ ፡ ይንሥኡ ፡ ሎሙ ፡ እምዝየ ፡ እምነ ፡ ማእከለ ፡ ዮርዳንስ ፡ እምኀበ ፡ ቆማ ፡ እገሪሆሙ ፡ ለካህናት ፡ ዐሥሩ ፡ ወክልኤ ፡ ዕበነ ፡ ከዋዋተ ፡ ወንሥእዎን ፡ ምስሌክሙ ፡ ወዕቀብዎን ፡ በበ ፡ ሰራዊትክሙ ፡ በኀበ ፡ ኀደርክሙ ፡ ህየ ፡ በሌሊት ።

4:4  ወጸውዐ ፡ ኢየሱስ ፡ ዐሠርተ ፡ ወክልኤተ ፡ ዕደወ ፡ እምውስተ ፡ ክቡራኒሆሙ ፡ ለደቂቀ ፡ እስራኤል ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።

4:5  ወይቤሎሙ ፡ ኢየሱስ ፡ ንዑ ፡ ወአምጽኡ ፡ ቅድሜየ ፡ ወቅድመ ፡ እግዚአብሔር ፡ እምነ ፡ ማእከለ ፡ ዮርዳንስ ፡ ወንሥኡ ፡ እምህየ ፡ አሐተ ፡ አሐተ ፡ እብነ ፡ ወጹሩ ፡ ውስተ ፡ መታክፍቲክሙ ፡ በከመ ፡ ኍለቊሆሙ ፡ ለዐሠርቱ ፡ ወክልኤቱ ፡ ነገደ ፡ እስራኤል ፤

4:6  ከመ ፡ ይኵናክሙ ፡ ተአምረ ፡ ወይንበራክሙ ፡ ለዘላፉ ፡ ከመ ፡ ሶበ ፡ ተስእለከ ፡ ወልድከ ፡ ጌሠመ ፡ ወይቤለከ ፡ ምንት ፡ እማንቱ ፡ እላንቱ ፡ እበን ፡ ለክሙ ፤

4:7  ወንግሮ ፡ አንተ ፡ ለወልድከ ፡ ወበሎ ፡ እስመ ፡ ነጽፈ ፡ ዮርዳንስ ፡ ተከዚ ፡ እምቅድመ ፡ ታቦተ ፡ ሕጉ ፡ ለእግዚአብሔር ፡ ዘኵሉ ፡ ምድር ፡ እንዘ ፡ ተዐዱ ፡ ወይኩናክሙ ፡ እላንቱ ፡ እበን ፡ ተዝካረ ፡ ለክሙ ፡ ለደቂቀ ፡ እስራኤል ፡ እስከ ፡ ለዓለም ።

4:8  ወገብሩ ፡ ከማሁ ፡ ደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለአያሱስ ፡ ወነሥኡ ፡ ዐሥሩ ፡ ወክልኤ ፡ እበነ ፡ እምነ ፡ ማእከለ ፡ ዮርዳንስ ፡ በከመ ፡ አዘዞ ፡ እግዚአብሔር ፡ ለኢየሱስ ፡ ሶበ ፡ ተገምሩ ፡ ዐዲወ ፡ ደቂቀ ፡ እስራኤል ፡ ወዐቀብዎን ፡ ምስሌሆሙ ፡ ውስተ ፡ ተዓይኒሆሙ ፡ ወሤምዎን ፡ በህየ ።

4:9  ወአቀመ ፡ ኢየሱስ ፡ ካልኣተ ፡ እበነ ፡ ዐሥሩ ፡ ወክልኤ ፡ ውስተ ፡ ዮርዳንስ ፡ ውስተ ፡ ውእቱ ፡ መካን ፡ ኀበ ፡ ቆማ ፡ እገሪሆሙ ፡ ለካህናት ፡ እለ ፡ ይጸውሩ ፡ ታቦተ ፡ ሕግ ፡ ወሀለዋ ፡ ህየ ፡ እስከ ፡ ዮም ፡ ወእስከ ፡ ዛቲ ፡ ዕለት ።

4:10  ወቆሙ ፡ እልክቱ ፡ ካህናት ፡ እለ ፡ ይጸውሩ ፡ ታቦተ ፡ ሕግ ፡ ማእከለ ፡ ዮርዳንስ ፡ እስከ ፡ ፈጸመ ፡ ኢየሱስ ፡ ኵሎ ፡ ዘአዘዞ ፡ እግዚአብሔር ፡ ለኢየሱስ ፡ ከመ ፡ ይንግሮሙ ፡ ለሕዝብ ፡ ኵሎ ፡ በከመ ፡ አዘዞ ፡ ሙሴ ፡ ለኢየሱስ ፡ ወአፍጠኑ ፡ ዐዲወ ፡ ሕዝብ ።

4:11  ወሶበ ፡ ተገምረ ፡ ዐዲወ ፡ ሕዝብ ፡ ዐደወት ፡ ታቦተ ፡ ሕግሂ ፡ ወእላክቱኒ ፡ እበን ፡ እለ ፡ እምቅድሜሆሙ ።

4:12  ወዐደው ፡ ደቂቀ ፡ ሮቤል ፡ ወደቂቀ ፡ ጋድ ፡ ወመንፈቀ ፡ ነገደ ፡ መናሴ ፡ ርሱያኒሆሙ ፡ ቅድመ ፡ ደቂቀ ፡ እስራኤል ፡ በከመ ፡ አዘዞሙ ፡ ሙሴ ።

4:13  [፬፻-፻]ቅኑታኒሆሙ ፡ ለቀትል ፡ ዐደው ፡ ቅድመ ፡ እግዚአብሔር ፡ ከመ ፡ ይትቃተልዋ ፡ ለኢያሪኮ ፡ ሀገር ።

4:14  ወበይእቲ ፡ ዕለት ፡ አዕበዮ ፡ እግዚአብሔር ፡ ለኢየሱስ ፡ ቅድመ ፡ ኵሉ ፡ ዘመደ ፡ እስራኤል ፡ ወፈርህዎ ፡ ከመ ፡ ሙሴ ፡ አምጣነ ፡ መዋዕለ ፡ ሕያው ፡ ውእቱ ።

4:15  ወይቤሎ ፡ እግዚአብሔር ፡ ለኢየሱስ ፡ እንዘ ፡ ይብል ፤

4:16  አዝዞሙ ፡ ለካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ከመ ፡ ይፃኡ ፡ እምነ ፡ ዮርዳንስ ።

4:17  [ወአዘዞሙ ፡ ኢየሱስ ፡ ለካህናት ፡ ወይቤሎሙ ፡ ፃኡ ፡ እምዮርዳንስ ።]

4:18  ወኮነ ፡ ሶበ ፡ ወፅኡ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ እምነ ፡ ማእከለ ፡ ዮርዳንስ ፡ ወኬዱ ፡ በእገሪሆሙ ፡ ውስተ ፡ ምድር ፡ ሮጸ ፡ ማየ ፡ ዮርዳንስ ፡ ወገብአ ፡ ውስተ ፡ መካናቲሁ ፡ ወሖረ ፡ ከመ ፡ ትካት ፡ ወበጽሐ ፡ እስከ ፡ ድንጋጊሁ ።

4:19  ወአመ ፡ አሡሩ ፡ ለሠርቀ ፡ ቀዳሚ ፡ ወርኅ ፡ ወፅኡ ፡ ሕዝብ ፡ እምነ ፡ ዮርዳንስ ፡ ወግዕዙ ፡ ደቂቀ ፡ እስራኤል ፡ ውስተ ፡ ገልጋላ ፡ መንገለ ፡ ሠረቀ ፡ ፀሐይ ፡ እምነ ፡ ኢያሪኮ ።

4:20  ወአቀሞን ፡ ኢየሱስ ፡ ለእልክቱ ፡ እበን ፡ ዐሥሩ ፡ ወክልኤ ፡ ውስተ ፡ ገልጋላ ።

4:21  ወይቤሎሙ ፡ ኢየሱስ ፡ ለደቂቀ ፡ እስራኤል ፡ እንዘ ፡ ይብል ፡ ሶበ ፡ ተስእሉክሙ ፡ ደቂቅክሙ ፡ ወይቤሉክሙ ፡ ምንትኑ ፡ እላንቱ ፡ እበን ፤

4:22  ዜንውዎሙ ፡ ለደቂቅክሙ ፡ ወበልዎሙ ፡ እስመ ፡ እንተ ፡ የብስ ፡ ዐደውናሁ ፡ ለዝንቱ ፡ ዮርዳንስ ።

4:23  እስመ ፡ አይበሶ ፡ እግዚአብሔር ፡ ለማየ ፡ ዮርዳንስ ፡ ቅድሜነ ፡ እስከ ፡ ነዐዱ ፡ በከመ ፡ ገብራ ፡ እግዚአብሔር ፡ ለባሕረ ፡ [ኤ]ርትራ ፡ እንተ ፡ አይበሳ ፡ እግዚአብሔር ፡ አምላክነ ፡ እምነ ፡ ቅድሜነ ፡ እስከ ፡ ኀለፍነ ፤

4:24  ከመ ፡ ያእምሩ ፡ ኵሉ ፡ አሕዛበ ፡ ምድር ፡ ከመ ፡ ጽኑዕ ፡ ውእቱ ፡ ኀይሉ ፡ ለእግዚአብሔር ፡ ወከመ ፡ ትፍርህዎ ፡ አንትሙኒ ፡ ለእግዚአብሔር ፡ አምላክነ ፡ በኵሉ ፡ ግብር ።

Chapter 5

5:1  ወእምዝ ፡ ሶበ ፡ ሰምዑ ፡ ኵሉ ፡ ነገሥተ ፡ አሞሬዎን ፡ እለ ፡ ሀለው ፡ ማዕዶተ ፡ ዮርዳንስ ፡ መንገለ ፡ ባሕር ፡ ወኵሉ ፡ ነገሥተ ፡ ፊንቄስ ፡ እለ ፡ መንገለ ፡ ባሕር ፡ ከመ ፡ አይበሶ ፡ እግዚአብሔር ፡ ለተከዜ ፡ ዮርዳንስ ፡ እምቅድሜሆሙ ፡ ለደቂቀ ፡ እስራኤል ፡ ከመ ፡ ይዕድው ፡ እሙንቱ ፡ ተመስወ ፡ ልቦሙ ፡ ወተሰጥየ ፡ ወኀጥኡ ፡ እንተ ፡ ይሔልዩ ፡ እምቅድመ ፡ ገጾሙ ፡ ለደቂቀ ፡ እስራኤል ።

5:2  ወእምድኅረ ፡ እማንቱ ፡ መዋዕል ፡ ይቤሎ ፡ እግዚአብሔር ፡ ለኢየሱስ ፡ ግበር ፡ ለከ ፡ መጣብኀ ፡ ዘእብን ፡ እምውስተ ፡ እብነ ፡ እዝሕ ፡ ወንበር ፡ ወግዝሮሙ ፡ ለደቂቀ ፡ እስራኤል ፡ ዳግመ ።

5:3  ወገብረ ፡ ሎቱ ፡ ኢየሱስ ፡ መጣብኀ ፡ ዘእብነ ፡ እዝኅ ፡ ወገዘሮሙ ፡ ለደቂቀ ፡ እስራኤል ፡ በውስተ ፡ መካን ፡ ዘስሙ ፡ ወግረ ፡ ቍልፈታት ።

5:4  ወበበይነ ፡ ዝንቱ ፡ ገዘሮሙ ፡ ኢየሱስ ፤ (ለ)ኵሉ ፡ ሕዝብ ፡ እለ ፡ ወፅኡ ፡ እምነ ፡ ግብጽ ፡ ኵ[ሉ] ፡ ተባዕቶሙ ፡ ዕደው ፡ መስተቃትላን ፡ እለ ፡ ሞቱ ፡ በገዳም ፡ በፍኖት ፡ ወፂኦሙ ፡ እምነ ፡ ግብጽ ፡ [ኮኑ ፡ ግዙራነ ፡] ፡ ወኵሉ ፡ ሕዝብ ፡ እለ ፡ ተወልዱ ፡ በፍኖት ፡ በገዳም ፡ ወፂኦሙ ፡ እምነ ፡ ምድረ ፡ ግብጽ ፡ እስመ ፡ ኢኮነት ፡ ግዝረቶሙ ።

5:5  በከመ ፡ ያነጽሖሙ ፡ ኢየሱስ ፡ ለደቂቀ ፡ እስራኤል ፡ ለኵሎሙ ፡ እለ ፡ ተወልዱ ፡ በፍኖት ፡ ወለኵሎሙ ፡ እለ ፡ ኢኮኑ ፡ ግዙራነ ፡ አመ ፡ ወፅኡ ፡ እምነ ፡ ግብጽ ።

5:6  ወገዘሮሙ ፡ ኢየሱስ ፡ ለኵሎሙ ፡ እሉ ፡ እስመ ፡ አርብዓ ፡ ዓመ ፡ ኦዱ ፡ እስራኤል ፡ ውስተ ፡ ገዳም ፡ ዘመድብራ ፤ ወመብዝኅቶሙ ፡ ኢኮኑ ፡ ግዙራነ ፡ እምውስተ ፡ መስተቃትላን ፡ እለ ፡ ወፅኡ ፡ እምነ ፡ ምድረ ፡ ግብጽ ፡ እለ ፡ ክህዱ ፡ በትእዛዘ ፡ እግዚአብሔር ፡ ወይቤሎሙ ፡ እግዚአብሔር ፡ ከመ ፡ ኢትሬእይዋ ፡ ለይእቲ ፡ ምድር ፡ እንተ ፡ መሐለ ፡ እግዚአብሔር ፡ ለአበዊነ ፡ ከመ ፡ የሀበነ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ።

5:7  ወህየንተ ፡ ዚአሆሙ ፡ አቀመ ፡ ውሉዶሙ ፡ እለ ፡ ገዘሮሙ ፡ ኢየሱስ ፡ እስመ ፡ ኢኮኑ ፡ ግዙራነ ፡ እስመ ፡ በፍኖት ፡ ተወልዱ ፡ ወኢተገዝሩ ።

5:8  ወአመ ፡ ተገዝሩ ፡ ነበረ ፡ ትዕይንት ፡ ውዑል ፡ እስከ ፡ አመ ፡ ሐይው ።

5:9  ወይቤሎ ፡ እግዚአብሔር ፡ ለኢየሱስ ፡ ናሁ ፡ ዮም ፡ በዛቲ ፡ ዕለት ፡ አውፃእ[ኩ] ፡ ትዕይርቶሙ ፡ ለግብጽ ፡ እምኔክሙ ፡ ወሰመየ ፡ ስሞ ፡ ለውእቱ ፡ መካን ፡ ገልጋላ ፡ እስከ ፡ ዮም ፡ ወእስከ ፡ ዛቲ ፡ ዕለት ።

5:10  ወኀደሩ ፡ ደቂቀ ፡ እስራኤል ፡ [ውስተ ፡] ገልጋላ ፡ ወገብሩ ፡ ደቂቀ ፡ እስራኤል ፡ ፋስካ ፡ አመ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ እምነ ፡ ሰርክ ፡ በዐረቢሃ ፡ ለኢያሪኮ ፡ በማዕዶተ ፡ ዮርዳንስ ፡ በውስተ ፡ ገዳም ።

5:11  ወበልዑ ፡ እምውስተ ፡ እክ[ለ ፡ ምድር ፡] ናእተ ፡ ወሐዲሰ ።

5:12  ወበይእቲ ፡ ዕለት ፡ ኀልቀ ፡ መና ፡ በሳኒተ ፡ በልዑ ፡ እክለ ፡ ምድር ፡ ወኢረከቡ ፡ እንከ ፡ መና ፡ ደቂቀ ፡ እስራኤል ፡ ዳግመ ፡ እስመ ፡ አረሩ ፡ ብሔረ ፡ ፊንቆን ፡ በውእቱ ፡ ዓመት ።

5:13  ወኮነ ፡ እንዘ ፡ ሀለወ ፡ ኢየሱስ ፡ ውስተ ፡ ኢያሪኮ ፡ ወነጸረ ፡ በአዕይንቲሁ ፡ ወርእየ ፡ ብእሲ ፡ ይቀውም ፡ ቅድሜሁ ፡ ወሰይፍ ፡ ምሉኅ ፡ ውስተ ፡ እዴሁ ፡ ወቀርቦ ፡ ኢየሱስ ፡ ወይቤሎ ፡ እምነ ፡ ሰብአ ፡ ዚአነኑ ፡ አንተ ፡ አው ፡ እምነ ፡ ፀርነ ።

5:14  ወይቤሎ ፡ አንሰ ፡ መልአከ ፡ ኀይሉ ፡ ለእግዚአብሔር ፡ ወይእዜ ፡ በጻሕኩ ፡ ወወድቀ ፡ ኢየሱስ ፡ በገጹ ፡ ወሰገደ ፡ ሎቱ ፡ ውስተ ፡ ምድር ፡ ወይቤሎ ፡ ምንተ ፡ ቆምከ ፡ ኀበ ፡ ገብርከ ።

5:15  ወይቤሎ ፡ መልአከ ፡ ኀይሉ ፡ ለእግዚአብሔር ፡ ለኢየሱስ ፡ ፍታሕ ፡ አሣእኒከ ፡ እምውስተ ፡ እገሪከ ፡ እስመ ፡ መካን ፡ ኀበ ፡ ትቀውም ፡ ምድር ፡ ቅድስት ፡ ይእቲ ፡ ወገብረ ፡ ኢየሱስ ፡ ከማሁ ።

Chapter 6

6:1  ወኢያሪኮሰ ፡ ዕጹት ፡ ይእቲ ፡ ወጥቅም ፡ ዘላዕሌሃ ፡ ወአልቦ ፡ ዘይወፅእ ፡ እምውስቴታ ፡ ወአልቦ ፡ ዘይበውእ ።

6:2  ወይቤሎ ፡ እግዚአብሔር ፡ ለኢየሱስ ፡ ናሁ ፡ ኣገብኣ ፡ ለኢያሪኮ ፡ ውስተ ፡ እደዊክሙ ፡ ወለንጉሥ ፡ ዘውስቴታ ፡ እለ ፡ ጽኑዓን ፡ እሙንቱ ፡ ወኀያላን ።

6:3  ወአንተሰ ፡ አቅሞሙ ፡ ላዕሌሃ ፡ ውስተ ፡ ዐውዳ ፡ ለኵሎሙ ፡ መስተቃትላን ፡ ወይዑድዋ ፡ ለሀገር ፡ ኵሎሙ ፡ ዕደው ፡ መስተቃትላን ፡ ውስተ ፡ ዐውዳ ፡ በይእቲ ፡ ሀገር ፡ በበ ፡ ምዕር ፡ ወከማሁ ፡ ግበሩ ፡ ሰዱሰ ፡ መዋዕለ ።

6:4  ወበሳብዕቱ ፡ ካህናት ፡ ይነሥኡ ፡ ሰብዐተ ፡ አቅርንተ ፡ ዘኢዮቤል ፡ ቅድመ ፡ ታቦት ፡ ወአመ ፡ ሳብዕት ፡ ዕለት ፡ ስብዕ ፡ ይዑድዋ ፡ ለሀገር ፡ ወይንፍኁ ፡ ካህናት ፡ በእሙንቱ ፡ አቅርንት ።

6:5  ወሶበ ፡ ነፍኁ ፡ በእሙንቱ ፡ አቅርንት ፡ ዘኢዮቤል ፡ እምከመ ፡ ሰማዕክሙ ፡ ቃለ ፡ ቀርን ፡ ለይወውዑ ፡ ኵሎሙ ፡ ሕዝብ ፡ ኅቡረ ፡ ወእምከመ ፡ ወውዑ ፡ እሙንቱ ፡ ይወድቅ ፡ ለሊሁ ፡ አረፋቲሃ ፡ ለሀገር ፡ ታሕቴሆሙ ፡ ወይ[ባ]እ ፡ እንከ ፡ ኵሉ ፡ ሕዝብ ፡ ወይሩጹ ፡ አሐዱ ፡ አሐዱ ፡ ቅድመ ፡ ገጹ ፡ ውስተ ፡ ሀገር ።

6:6  ወቦአ ፡ ኢየሱስ ፡ ኀበ ፡ ካህናት ፡ ወይቤሎሙ ፡ ንሥኡ ፡ ታቦተ ፡ ሕግ ፡ ወሰብዐቱ ፡ ካህናት ፡ ይንሥኡ ፡ ሰብዐተ ፡ መጣቅዕተ ፡ ዘኢዮቤል ፡ በቅድመ ፡ እግዚአብሔር ።

6:7  ወይቤሎሙ ፡ እንዘ ፡ ይብል ፡ አዝዝዎሙ ፡ ለሕዝብ ፡ ከመ ፡ ይሑሩ ፡ ወይዑድዋ ፡ ለሀገር ፡ ወመስተቃትላንሂ ፡ ይሑሩ ፡ ምስለ ፡ ንዋየ ፡ ሐቅሎሙ ፡ ቅድመ ፡ ታቦቱ ፡ ለእግዚአብሔር ።

6:8  ወበከመ ፡ ይቤሎሙ ፡ ኢየሱስ ፡ ለሕዝብ ፡ ነሥኡ ፡ ሰብዐቱ ፡ ካህናት ፡ ሰብዐተ ፡ መጣቅዕተ ፡ ቅዱሳነ ፡ ከመ ፡ ይሑሩ ፡ ቅድመ ፡ እግዚአብሔር ፡ ወሐዊሮሙ ፡ ይጥቅዑ ፡ በኀይል ፡ ወበትእምርት ፡ ወታቦተ ፡ ሕጉሂ ፡ ለእግዚአብሔር ፡ ትተልዎሙ ።

6:9  ወመስተቃትላንሰ ፡ ፍጽመ ፡ የሐውሩ ፡ ወካህናት ፡ ይጠቅዑ ፡ በመጣቅዕት ፡ ወእለሂ ፡ ይኬውሉ ፡ ድኅረ ፡ ታቦተ ፡ ሕጉ ፡ ለእግዚአብሔር ፡ የሐውሩ ፡ እንዘ ፡ ይነፍኁ ፡ ቀርነ ።

6:10  ወአዘዞሙ ፡ [ኢየሱስ ፡] ለሕዝብ ፡ ከመ ፡ ኢያውክቱ ፡ ወአልቦ ፡ ዘይስማዕ ፡ ቃሎሙ ፡ መኑሂ ፡ ወከመ ፡ ኢይፃእ ፡ ቃል ፡ እምነ ፡ አፉሆሙ ፡ እስከ ፡ አመ ፡ ውእቱ ፡ ይኤዝዞሙ ፡ ከመ ፡ ይወውዑ ።

6:11  ወሖረት ፡ ታቦተ ፡ ሕጉ ፡ ለእግዚአብሔር ፡ ወዖደታ ፡ ለሀገር ፡ ወእምዝ ፡ ገብአት ፡ ውስተ ፡ ትዕይንት ፡ ወቤተት ፡ ህየ ።

6:12  ወበሳኒታ ፡ ዕለት ፡ ተንሥአ ፡ ኢየሱስ ፡ በጽባሕ ፡ ወካህናትኒ ፡ ጾሩ ፡ ታቦተ ፡ ሕጉ ፡ ለእግዚአብሔር ።

6:13  ወሰብዐት ፡ ካህናት ፡ ነሥኡ ፡ ሰብዐተ ፡ መጣቅዕተ ፡ ወሖሩ ፡ ቅድመ ፡ ታቦቱ ፡ ለእግዚአብሔር ፡ ወእምዝ ፡ ይተልው ፡ መስተቃትላን ፡ ወእምዝ ፡ ይተልው ፡ እለ ፡ ተርፉ ፡ ሕዝብ ፡ ወየሐውሩ ፡ ድኅረ ፡ ታቦተ ፡ ሕጉ ፡ ለእግዚአብሔር ፡ እንዘ ፡ ይነፍኁ ፡ በአቅርንት ፡ ወካህናትኒ ፡ ይጠቅዑ ፡ በመጣቅዕት ።

6:14  ወሕዝብኒ ፡ ኵሉ ፡ ዘተርፈ ፡ ዖድዋ ፡ ለሀገር ፡ አመ ፡ ሳኒት ፡ ዕለት ፡ እንዘ ፡ ይቀርብዋ ፡ ወእምዝ ፡ ካዕበ ፡ ገብኡ ፡ ውስተ ፡ ትዕይንት ፡ ወከመዝ ፡ ገብሩ ፡ ሰዱሰ ፡ መዋዕለ ።

6:15  ወኮነ ፡ አመ ፡ ሳብዕት ፡ ዕለት ፡ ተንሥኡ ፡ ጊዜ ፡ ይገውሕ ፡ ጽባሕ ፡ ወዖድዋ ፡ ከማሁ ፡ ለሀገር ፡ ስብዕ ፡ ወዳእሙ ፡ በይእቲ ፡ ዕለት ፡ ዖድዋ ፡ ስብዕ ፡ ለሀገር ።

6:16  ወኮነ ፡ ሶበ ፡ ዖድዋ ፡ ሰብዐተ ፡ ለሀገር ፡ ጠቅዑ ፡ ካህናት ፡ በመጣቅዕቲሆሙ ፡ ወይቤሎሙ ፡ ኢየሱስ ፡ ለደቂቀ ፡ እስራኤል ፡ ወውዑ ፡ እስመ ፡ አግብኣ ፡ እግዚአብሔር ፡ ለነ ።

6:17  ወአሕረምናሃ ፡ ለዛቲ ፡ ሀገር ፡ ወኵሉ ፡ ዘውስቴታ ፡ ለእግዚአብሔር ፡ ጸባኦት ፡ ትኩን ፡ ዘእንበለ ፡ ራኣብ ፡ ዘማ ፡ እንተ ፡ ታሐይው ፡ ኪያሃ ፡ ወኵሉ ፡ ዘሀለወ ፡ ውስተ ፡ ቤታ ፡ እስመ ፡ ኀብአቶሙ ፡ ለሰብአ ፡ ዐይን ፡ እለ ፡ ፈነውነ ።

6:18  ወአንትሙ ፡ ባሕቱ ፡ ዑቁ ፡ ኢትንሥኡ ፡ እምውስተ ፡ ዘሕሩም ፡ ዘአሕረምነ ፡ ኢትፍትው ፡ ወኢትንሥኡ ፡ እምውስቴቱ ፡ ወእመ ፡ አኮሰ ፡ ትገብርዋ ፡ ርግምተ ፡ ለትዕይንቶሙ ፡ ለደቂቀ ፡ እስራኤል ፡ ወትቀጠቅጡነ ።

6:19  ወኵሉ ፡ ወርቅ ፡ ወኵሉ ፡ ብሩር ፡ ወብርት ፡ ወኀፂን ፡ ቅዱሰ ፡ ለይኩን ፡ ለእግዚአብሔር ፡ ወውስተ ፡ መዝገበ ፡ እግዚአብሔር ፡ ይባእ ።

6:20  ወወውዑ ፡ ሕዝብ ፡ ወካህናትኒ ፡ ጠቅዑ ፡ በመጣቅዕት ፡ ወኅቡረ ፡ ወውዑ ፡ ኵሉ ፡ ሕዝብ ፡ በዐቢይ ፡ ውውዓ ፡ ወጽኑዕ ፡ ወወድቀ ፡ ኵሉ ፡ አረፋቲሃ ፡ ዘዐውዳ ፡ ወቦኡ ፡ ኵሉ ፡ ሕዝብ ፡ ውስተ ፡ ሀገር ፡ ወኵሎሙ ፡ ሮጹ ፡ ቅድሜሆሙ ፡ ወረከብዋ ፡ ለሀገር ።

6:21  ወአሕረማ ፡ ኢየሱስ ፡ ወኵሎ ፡ ዘሀለወ ፡ ውስቴታ ፡ ለይእቲ ፡ ሀገር ፡ እምተባዕቱ ፡ እስከ ፡ አንስቱ ፡ ወእምንዑሶሙ ፡ እስከ ፡ ልሂቆሙ ፡ ወእስከ ፡ ላህመ ፡ ወእስከ ፡ በግዐ ፡ ወእስከ ፡ አድገ ፡ ቀተሉ ፡ በኀፂን ።

6:22  ወይቤሎሙ ፡ ኢየሱስ ፡ ለእልክቱ ፡ ክልኤቱ ፡ ወራዙት ፡ ሰብአ ፡ ዐይን ፡ እለ ፡ ርእዩ ፡ ብሔረ ፡ [ሑ]ሩ ፡ ውስተ ፡ ቤታ ፡ ለእንታክቲ ፡ ብእሲት ፡ ዘማ ፡ ወአውፅእዋ ፡ እምህየ ፡ ወኵሎ ፡ ዘሀለወ ፡ ምስሌሃ ፡ በከመ ፡ መሐልክሙ ፡ ላቲ ።

6:23  ወቦኡ ፡ እልክቱ ፡ ክልኤቱ ፡ ወራዙት ፡ ሰብአ ፡ ዐይን ፡ እለ ፡ ርእይዋ ፡ ለይእቲ ፡ ሀገር ፡ ውስተ ፡ ቤታ ፡ ለይእቲ ፡ ብእሲት ፡ ወአውፅእዋ ፡ ለራኣብ ፡ ዘማ ፡ ወለአቡሃ ፡ ወለእማ ፡ ወለአኀዊሃ ፡ ወለኵሉ ፡ ዘመዳ ፡ ወኵሎ ፡ ዘባቲ ፡ ወአብጽሕዋ ፡ እስከ ፡ አፍአ ፡ እምነ ፡ ትዕይንቶሙ ፡ ለእስራኤል ።

6:24  ወውዕየት ፡ ሀገር ፡ ምስለ ፡ ኵሉ ፡ ዘውስቴታ ፡ በእሳት ፡ ዘእንበለ ፡ ወርቅ ፡ ወብሩር ፡ ወኵሉ ፡ ብርት ፡ ወኀፂን ፡ ዘአግብኡ ፡ ውስተ ፡ መዝገበ ፡ ቤቱ ፡ ለእግዚአብሔር ፡ ዘአብኡ ።

6:25  ወራኣብ ፡ ዘማ ፡ ወኵሉ ፡ ቤተ ፡ አቡሃ ፡ ዘአሕየወ ፡ ኢየሱስ ፡ ወነበረት ፡ ውስተ ፡ እስራኤል ፡ እስከ ፡ ዮም ፡ ወእስከ ፡ ዛቲ ፡ ዕለት ፡ እስመ ፡ ኀብአቶሙ ፡ ለሰብአ ፡ ዐይን ፡ እለ ፡ ፈነወ ፡ ኢየሱስ ፡ ከመ ፡ ይርአይዋ ፡ ለሀገር ፡ ኢያሪኮ ።

6:26  ወአምሐለ ፡ ኢየሱስ ፡ በይእቲ ፡ ዕለት ፡ ወይቤ ፡ ርጉመ ፡ ለይኩን ፡ ዘያነሥኣ ፡ ለይእቲ ፡ ሀገር ፤ በበኩሩ ፡ ለይሳርራ ፡ ወ[በ]ደኃሪ ፡ [ወል]ዱ ፡ ለያቅም ፡ ኆኅተ ፡ አንቀጻ ። ወከማሁ ፡ ገብረ ፡ [ኦዘን ፡] ዘእምነ ፡ ቤቴል ፤ በአቢሮን ፡ በኵሩ ፡ ሳረራ ፡ ወበደኃሪ ፡ [ወል]ዱ ፡ ዘድኅነ ፡ አቀመ ፡ ኆኅተ ፡ አንቀጻ ።

6:27  ወሀለወ ፡ እግዚአብሔር ፡ ምስሌሁ ፡ ለኢየሱስ ፡ ወበጽሐ ፡ ስሙ ፡ ውስተ ፡ ኵሉ ፡ ምድር ።

Chapter 7

7:1  ወአበሱ ፡ ደቂቀ ፡ እስራኤል ፡ ዐቢየ ፡ አበሳ ፡ ወነሥኡ ፡ እምውስተ ፡ ዘአሕረሙ ፡ ወነሥአ ፡ አካን ፡ ወልደ ፡ ከርሚ ፡ ወልደ ፡ ዝንብሪ ፡ ወልደ ፡ ዛራ ፡ ዘእምነ ፡ ነገደ ፡ ይሁዳ ፡ እምውስተ ፡ ዘአሕረሙ ፡ ወተምዕዐ ፡ እግዚአብሔር ፡ ላዕለ ፡ ደቂቀ ፡ እስራኤል ።

7:2  ወፈነወ ፡ ኢየሱስ ፡ ዕደወ ፡ እምነ ፡ ኢያሪኮ ፡ ውስተ ፡ ጋይ ፡ እንተ ፡ መንገለ ፡ ቤቴል ፡ መንገለ ፡ ጽባሒሃ ፡ ለቤቴል ፡ ወይቤሎሙ ፡ እንዘ ፡ ይብል ፡ ዕረጉ ፡ ወርእይዋ ፡ ለጋይ ፡ ወዐርጉ ፡ እሙንቱ ፡ ዕደው ፡ ወርእይዋ ፡ ለጋይ ።

7:3  ወገብኡ ፡ ኀበ ፡ ኢየሱስ ፡ ወይቤልዎ ፡ ኢይዕረግ ፡ ኵሉ ፡ ሕዝብ ፡ አላ ፡ ዕሥራ ፡ ምእት ፡ አው ፡ ሠላሳ ፡ ምእት ፡ ዕደው ፡ ይዕረጉ ፡ ወይትቃተልዋ ፡ ለይእቲ ፡ ሀገር ፡ ወኵሎሰ ፡ ሕዝበ ፡ ኢትሰድ ፡ ህየ ፡ እስመ ፡ ውሑዳን ፡ እሙንቱ ።

7:4  ወዐርጉ ፡ እምውስተ ፡ ሕዝብ ፡ የአክሉ ፡ ሠላሳ ፡ ምእት ፡ ወአንትዕዎሙ ፡ ሰብአ ፡ ጋይ ፡ ወጐዩ ፡ እምቅድመ ፡ ገጾሙ ።

7:5  ወቀተሉ ፡ እምኔሆሙ ፡ በውስተ ፡ ጋይ ፡ ሠላሳ ፡ ወስድስተ ፡ ዕደወ ፡ ወእምዝ ፡ ዴገንዎሙ ፡ እምኀበ ፡ አንቀጽ ፡ እስከ ፡ አጥፍእዎሙ ፡ ወቀተልዎሙ ፡ በውስተ ፡ ሙራድ ፡ ወደንገፀ ፡ ልቦሙ ፡ ለሕዝብ ፡ ወኮነ ፡ ከመ ፡ ማይ ።

7:6  ወሠጠጠ ፡ አልባሲሁ ፡ ኢየሱስ ፡ ወወድቀ ፡ ኢየሱስ ፡ በገጹ ፡ ውስተ ፡ ምድር ፡ ቅድመ ፡ ታቦቱ ፡ ለእግዚአብሔር ፡ እስከ ፡ ሰርክ ፡ ውእቱ ፡ ወሊቃናቲሆሙ ፡ ለእስራኤል ፡ ወወደዩ ፡ መሬተ ፡ ውስተ ፡ ርእሶሙ ።

7:7  ወይቤ ፡ ኢየሱስ ፡ ገነይኩ ፡ ለከ ፡ እግዚኦ ፡ እግዚኦ ፡ ለምንት ፡ አዕድዎ ፡ አዕደዎሙ ፡ ገብርከ ፡ ለዝንቱ ፡ ሕዝብ ፡ እምነ ፡ ዮርዳንስ ፡ ከመ ፡ ታግብኦሙ ፡ ውስተ ፡ እዴሆሙ ፡ ለአሞሬዎን ፡ ወከመ ፡ ታጥፍአነ ፤ ሶበ ፡ ኀደርነ ፡ ወነበርነ ፡ ማዕዶተ ፡ ዮርዳንስ ።

7:8  እግዚኦ ፡ ወምንተ ፡ እንከ ፡ እብል ፡ ናሁ ፡ ሜጠ ፡ እስራኤል ፡ ዘባኖ ፡ ኀበ ፡ ፀሩ ።

7:9  ወእምከመ ፡ ሰምዑ ፡ ከናአን ፡ ወኵሎሙ ፡ እለ ፡ ይነብሩ ፡ ውስተ ፡ ዛቲ ፡ ምድር ፡ የዐግቱነ ፡ ወያጠፍኡነ ፡ እምነ ፡ ምድር ፡ ወምንተ ፡ ተሬሲ ፡ ለስምከ ፡ ዐቢይ ።

7:10  ወይቤሎ ፡ እግዚአብሔር ፡ ለኢየሱስ ፡ ተንሥእ ፡ ወለምንት ፡ ትወድቅ ፡ አንተ ፡ በገጽከ ።

7:11  አበሱ ፡ ሕዝብ ፡ ወክሕዱ ፡ በኪዳንየ ፡ ዘተካየድኩ ፡ ምስሌሆሙ ፡ ወነሥኡ ፡ እምውስተ ፡ ዘሕሩም ፡ ወሰረቁ ፡ ወወደዩ ፡ ውስተ ፡ ንዋያቲሆሙ ።

7:12  ወኢይክሉ ፡ እንከ ፡ ደቂቀ ፡ እስራኤል ፡ ቀዊመ ፡ ቅድመ ፡ ፀሮሙ ፡ ወይመይጡ ፡ ዘባናቲሆሙ ፡ ቅድመ ፡ ፀሮሙ ፡ እስመ ፡ ርጉማነ ፡ ኮኑ ፡ ወኢይደግም ፡ እንከ ፡ ሀልዎ ፡ ምስሌክሙ ፡ ለእመ ፡ ኢያውጻእክሙ ፡ እምኔክሙ ፡ ዘርጉም ።

7:13  ወተንሥእ ፡ ቀድሶሙ ፡ ለሕዝብ ፡ ወያንጽሑ ፡ ርእሶሙ ፡ ለጌሠም ፡ እስመ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ ዘሕሩምአ ፡ ሀለወአ ፡ ውስቴትክሙ ፡ ወኢትክሉ ፡ እንከ ፡ ቀዊመ ፡ ቅድመ ፡ ፀርክሙ ፡ እስከ ፡ ታሴስሉ ፡ እምኔክሙአ ፡ ዘሕሩምአ ።

7:14  ወይጊሡ ፡ በጽባሕ ፡ ወይትጋብኡ ፡ ኵሎሙ ፡ በበ ፡ ሕዘቢሆሙ ፡ ወሕዝብ ፡ እንተ ፡ አርአየ ፡ እግዚአብሔር ፡ [ላዕሌሃ ፡] ለይትፋለጡ ፡ በበ ፡ ነገዶሙ ፡ ይቁሙ ፡ ወነገድ ፡ እንተ ፡ አርአየ ፡ እግዚአብሔር ፡ ላዕሌሃ ፡ ለይትፋለጡ ፡ ወይቁሙ ፡ በበ ፡ ቤቶሙ ፡ ወቤት ፡ ዘአርአየ ፡ እግዚአብሔር ፡ ላዕሌሃ ፡ ለይትፋለጡ ፡ ወለይቁሙ ፡ በበ ፡ ብእሲሁ ።

7:15  ወብእሲ ፡ ዘአርአየ ፡ ላዕሌሁ ፡ ለያውዕይዎ ፡ በእሳት ፡ ሎቱ ፡ ወለኵሉ ፡ ዘዚአሁ ፡ እስመ ፡ ክሕደ ፡ በኪዳኑ ፡ ለእግዚአብሔር ፡ ወእስመ ፡ ገብረ ፡ ኀጢአተ ፡ ላዕለ ፡ እስራኤል ።

7:16  ወጌሠ ፡ ኢየሱስ ፡ ወአስተጋብኦሙ ፡ ለሕዝብ ፡ በበ ፡ ሕዘቢሆሙ ፡ ወአስተርአየ ፡ ላዕለ ፡ ሕዝበ ፡ ይሁዳ ።

7:17  ወተፈልጡ ፡ በበ ፡ ነገዶሙ ፡ ዘእምነ ፡ ይሁዳ ፡ ወአስተርአየ ፡ ላዕለ ፡ ነገደ ፡ ዛሪ ፡ ወተፈልጠ ፡ ነገደ ፡ ዛሪ ፡ በበ ፡ ቤቱ ፡ ወአስተርአየ ፡ ላዕለ ፡ ቤተ ፡ ዘንብሪ ።

7:18  ወተፈልጠ ፡ ቤተ ፡ ዘንብሪ ፡ በበ ፡ ብእሲሁ ፡ ወአስተርአየ ፡ ላዕለ ፡ አካን ፡ ወልደ ፡ ከርሚ ፡ ወልደ ፡ ዛራ ፡ ዘእምነ ፡ ይሁዳ ።

7:19  ወይቤሎ ፡ ኢየሱስ ፡ ለአካን ፡ ወልድየ ፡ አእኵቶ ፡ ለእግዚአብሔር ፡ አምላከ ፡ እስራኤል ፡ ወእመኖ ፡ ወአይድዐኒ ፡ ምንተ ፡ ገበርከ ፡ ወኢትኅባእ ፡ እምኔየ ።

7:20  ወአውሥኦ ፡ አካን ፡ ለኢየሱስ ፡ ወይቤሎ ፡ አማን ፡ አነ ፡ አበስኩ ፡ ቅድመ ፡ እግዚአብሔር ፡ አምላከ ፡ እስራኤል ፡ ከመዝ ፡ ወከመዝ ፡ ገበርኩ ።

7:21  ሶበ ፡ ርኢኩ ፡ በውስተ ፡ በርበር ፡ ልብሰ ፡ ዐሥቅ ፡ አሐደ ፡ ወክልኤ ፡ ምእተ ፡ (ጠፋልሐ ፡) ዲድረክመ ፡ ዘብሩር ፡ ወልሳን ፡ አሐቲ ፡ እንተ ፡ ወርቅ ፡ ተአክል ፡ ፶ዲድረክመ ፡ ተውላጣ ፡ ፈተውኩ ፡ ወነሣእኩ ፡ ወናሁ ፡ ሀለወ ፡ ድፉን ፡ ውስተ ፡ ደብተራየ ፡ ወጠፋልሐ ፡ ብሩርኒ ፡ ሀለወ ፡ ድፉን ፡ መትሕቱ ።

7:22  ወፈነወ ፡ ኢየሱስ ፡ ደቆ ፡ ወሮጹ ፡ ኀበ ፡ ትዕይንት ፡ ውስተ ፡ ደብተራሁ ፡ ወሀለወ ፡ ዝንቱ ፡ ድፉን ፡ ውስተ ፡ ደብተራሁ ፡ ወብሩርኒ ፡ ሀለወ ፡ ምስሌሁ ፡ መትሕቶ ።

7:23  ወአውፅኡ ፡ እምውስተ ፡ ደብተራሁ ፡ ወወሰዱ ፡ ኀበ ፡ ኢየሱስ ፡ ወኀበ ፡ ኵሉ ፡ ሊቃናተ ፡ እስራኤል ፡ ወአንበሩ ፡ ቅድመ ፡ እግዚአብሔር ።

7:24  ወነሥኦ ፡ ኢየሱስ ፡ ለአካን ፡ ወልደ ፡ ዛራ ፡ ወለውእቱ ፡ ብሩር ፡ ወለውእቱ ፡ ልብስ ፡ ወለይእቲ ፡ ልሳን ፡ እንተ ፡ ወርቅ ፡ ወወሰዶሙ ፡ ውስተ ፡ ቈላተ ፡ አኮር ፡ ወለደቂቁ ፡ ወለአዋልዲሁ ፡ ወለአልህምቲሁ ፡ ወለአባግዒሁ ፡ ወለአእዱጊሁ ፡ ወለደብተራሁ ፡ ወለኵሉ ፡ ንዋዩ ፡ ወወሰዶሙ ፡ ውስተ ፡ ኤሜቃኮር ።

7:25  ወይቤሎ ፡ ኢየሱስ ፡ ለአካን ፡ ለምንት ፡ ሠሮከነ ፤ ለይሠሩከ ፡ እግዚአብሔር ፡ በከመ ፡ ዮም ፡ ወወገርዎ ፡ በእብን ፡ ኵሎሙ ፡ እስራኤል ፡ ወአውዐይዎሙ ፡ በእሳት ፡ ወወገርዎሙ ፡ በእብን ።

7:26  ወአቀሙ ፡ ሎቱ ፡ ሐውልተ ፡ እንተ ፡ እብን ፡ እስከ ፡ ዮም ፡ ወእስከ ፡ ዛቲ ፡ ዕለት ፡ ወአኅደገ ፡ እግዚአብሔር ፡ መንሱተ ፡ መዐቱ ፡ ወበበይነ ፡ ዝንቱ ፡ ሰመዮ ፡ ኤሜቃኮር ፡ እስከ ፡ ዮም ፡ ወእስከ ፡ ዛቲ ፡ ዕለት ።

Chapter 8

8:1  ወይቤሎ ፡ እግዚአብሔር ፡ ለኢየሱስ ፡ ኢትፍራህ ፡ ወኢትደንግፅ ፡ ንሥኦሙ ፡ ምስሌከ ፡ ለኵሎሙ ፡ ዕደው ፡ መስተቃትላን ፡ ወተንሥእ ፡ ወዕረግ ፡ ውስተ ፡ ጋይ ፡ እስመ ፡ ናሁ ፡ አግባእክዎ ፡ ውስተ ፡ እደዊከ ፡ ለንጉሠ ፡ ጋይ ፡ ወለሕዝቡሂ ፡ ወለሀገሩሂ ፡ ወለምድሩሂ ።

8:2  ወትገብሮሙ ፡ ለጋይ ፡ ወለንጉሦሙ ፡ ከመ ፡ ገበርካሃ ፡ ለኢያሪኮ ፡ ወንጉሣ ፡ ወበርበረ ፡ እንስሳሆሙ ፡ በርብር ፡ ለርእስከ ፡ ወባሕቱ ፡ ፈኑ ፡ ይዕግትዋ ፡ ለሀገር ፡ እንተ ፡ መንገለ ፡ ከዋላሃ ።

8:3  ወተንሥአ ፡ ኢየሱስ ፡ ወኵሉ ፡ ሕዝብ ፡ ዘመስተቃትላን ፡ ወዐርጉ ፡ ውስተ ፡ ጋይ ፡ ወኀርየ ፡ ኢየሱስ ፡ ሠለስተ ፡ እልፈ ፡ ዕደወ ፡ ጽኑዓነ ፡ ወመስተቃትላነ ፡ ወኀያላነ ፡ ወፈነዎሙ ፡ በሌሊት ።

8:4  ወአዘዞሙ ፡ ወይቤሎሙ ፡ ሑሩ ፡ ከመ ፡ ታእምሩ ፡ ዕግትዋ ፡ ለሀገር ፡ እንተ ፡ መንገለ ፡ ከዋላሃ ፡ ለሀገር ፡ ወኢትርሐቁ ፡ በሕቁ ፡ እምነ ፡ ሀገር ፡ ወንበሩ ፡ ኵልክሙ ፡ ድልዋኒክሙ ።

8:5  ወአንሰ ፡ ወኵሉ ፡ እለ ፡ ምስሌየ ፡ ነሐውር ፡ ኀበ ፡ ሀገር ፡ ወሶበ ፡ ወፅኡ ፡ ሰብአ ፡ ጋይ ፡ ወተቀበሉነ ፡ ከመ ፡ ቀዲሙ ፡ ንጐይይ ፡ እምቅድመ ፡ ገጾሙ ።

8:6  ወሶበ ፡ ወፅኡ ፡ ወዴገኑነ ፡ ናርሕቆሙ ፡ እምነ ፡ ሀገር ፡ ወይብሉ ፡ ነትዑ ፡ እሉሂ ፡ እምቅድመ ፡ ገጽነ ፡ ከመ ፡ ቀዲሙ ፡ ወንሕነሰ ፡ ንጐይይ ፡ እምቅድመ ፡ ገጾሙ ።

8:7  ወእምዝ ፡ እንከ ፡ ተንሥኡ ፡ አንትሙሂ ፡ ወአጥፍእዋ ፡ ለሀገሮሙ ፡ ወያገብኣ ፡ እግዚአብሔር ፡ አምላክክሙ ፡ ውስተ ፡ እደዊክሙ ።

8:8  ወእምከመ ፡ ቦእክምዋ ፡ ለሀገሮሙ ፡ አውዕይዋ ፡ በእሳት ፡ ወግበሩ ፡ በከመ ፡ እቤለክሙ ፡ ናሁ ፡ አዘዝኩክሙ ።

8:9  ወፈነዎሙ ፡ ኢየሱስ ፡ ወሖሩ ፡ ይዕግቱ ፡ ወነበሩ ፡ ማእከለ ፡ ቤቴል ፡ ወማእከለ ፡ ጋይ ፡ እምኀበ ፡ ባሕረ ፡ ጋይ ፡ ወቤተ ፡ ኢየሱስ ፡ ህየ ፡ በይእቲ ፡ ሌሊት ፡ ማእከለ ፡ ሕዝብ ።

8:10  ወጌሠ ፡ ኢየሱስ ፡ በጽባሕ ፡ ወርእዮሙ ፡ ለሕዝብ ፡ ወዐርጉ ፡ ውእቱ ፡ ወሊቃናቲሆሙ ፡ ለእስራኤል ፡ ፍጽመ ፡ ቅድመ ፡ ሕዝብ ፡ ላዕለ ፡ ጋይ ።

8:11  ወዐርጉ ፡ ኵሎሙ ፡ ሕዝብ ፡ መስተቃትላን ፡ ምስሌሁ ፡ ወሶበ ፡ ሖሩ ፡ ወበጽሑ ፡ ቅድመ ፡ ሀገር ፡ እንተ ፡ መንገለ ፡ ጽባሒሃ ። ወእለሂ ፡ ዐገትዋ ፡ ለሀገር ፡ እንተ ፡ መንገለ ፡ ጽባሐ ፡ ባሕር ፡ ወተአኀዝዋ ፡ እንተ ፡ መንገለ ፡ መስዕ ፡ ለጋይ ፡ ወፂኦት ፡ ማእከሎሙ ፡ ወማእከለ ፡ ጋይ ።

8:12  ወነሥአ ፡ ኀምሳ ፡ ምእተ ፡ ብእሴ ፡ ወአንበሮሙ ፡ ይዕግቱ ፡ ማእከለ ፡ ቤትውን ፡ ወማእከለ ፡ ጋይ ፡ መንገለ ፡ ባሕረ ፡ ጋይ ።

8:13  ወአኅደሩ ፡ ኵሉ ፡ ሕዝብ ፡ ተዓይኒሆሙ ፡ እንተ ፡ መንገለ ፡ መስዕ ፡ ዘሀገር ፡ ወጽንፉ ፡ እስከ ፡ ባሕረ ፡ ሀገር ፡ ወሖረ ፡ ኢየሱስ ፡ በይእቲ ፡ ሌሊት ፡ ማእከለ ፡ ውእቱ ፡ ፂኦት ።

8:14  ወሶበ ፡ ሰምዐ ፡ ንጉሠ ፡ ጋይ ፡ ጌሠ ፡ ፍጡነ ፡ ወወፅኡ ፡ ሰብአ ፡ ሀገር ፡ ወተቀበልዎሙ ፡ እንተ ፡ ቅድሜሆሙ ፡ ከመ ፡ ይትቃተልዎሙ ፡ ውእቱ ፡ ወኵሉ ፡ ሕዝብ ፡ ዘምስሌሁ ፡ በጊዜሃ ፡ መንጸረ ፡ አራባ ፡ ወኢያእመረ ፡ ውእቱሰ ፡ ከመ ፡ ዐገትዎሙ ፡ እንተ ፡ መንገለ ፡ ከወላሃ ፡ ለሀገር ።

8:15  ወሶበ ፡ በጽሕዎሙ ፡ ጐዩ ፡ ኢየሱስ ፡ ወኵሉ ፡ እስራኤል ፡ እምቅድመ ፡ ገጾሙ ፡ ወነትዑ ፡ ውስተ ፡ ፍኖተ ፡ ገዳም ።

8:16  ወኄለ ፡ ኵሉ ፡ ሕዝበ ፡ ብሔር ፡ ወተለውዎሙ ፡ ወሰደድዎሙ ፡ ወዴገንዎሙ ፡ እምድኅሬሆሙ ፡ ለደቂቀ ፡ እስራኤል ።

8:17  ወርሒቆሙ ፡ እሙንቱ ፡ እምነ ፡ ሀገር ፡ ሶበ ፡ አልቦ ፡ ዘተርፈ ፡ ወኢመኑሂ ፡ ውስተ ፡ ጋይ ፡ [ወ]ውስተ ፡ ቤቴል ፡ ዘኢተለዎሙ ፡ ወዘኢዴገኖሙ ፡ ለእስራኤል ፡ ወኀደግዋ ፡ ለሀገር ፡ ርኁተ ፡ ወሰደድዎሙ ፡ ለእስራኤል ፡ ወደገንዎሙ ።

8:18  ወይቤሎ ፡ እግዚአብሔር ፡ ለኢየሱስ ፡ አልዕል ፡ እዴከ ፡ በጋይሶ ፡ ዘውስተ ፡ እዴከ ፡ [ላዕለ ፡ ጋይ ፡] እስመ ፡ ውስተ ፡ እዴከ ፡ አግባእክዋ ፡ ወእለሂ ፡ ዐገቱ ፡ ለይትነሥኡ ፡ ፍጡነ ፡ እምነ ፡ መካናቲሆሙ ፡ ወአልዐለ ፡ እዴሁ ፡ ኢየሱስ ፡ በጋይሶ ፡ ላዕለ ፡ ሀገር ።

8:19  ወተንሥኡ ፡ እለሂ ፡ ዐገቱ ፡ ፍጡነ ፡ እምነ ፡ መካናቲሆሙ ፡ ወወፅኡ ፡ ሶበ ፡ አልዐለ ፡ እዴሁ ፡ በጋይሶ ፡ [ወቦኡ ፡ ሀገረ ፡] ወረከብዋ ፡ ወአውዐይዋ ፡ ፍጡነ ፡ በእሳት ።

8:20  ወሶበ ፡ ነጸሩ ፡ ድኅሬሆሙ ፡ ሰብአ ፡ ጋይ ፡ ወርእዩ ፡ ጢሰ ፡ የዐርግ ፡ ውስተ ፡ ሰማይ ፡ እምውስተ ፡ ሀገሮሙ ፡ ኀጥኡ ፡ እንከ ፡ ኀበ ፡ ይጐዩ ፡ ኢለፌ ፡ ወኢለፌ ፡ ወሕዝብኒ ፡ እለ ፡ ጐዩ ፡ ውስተ ፡ ገዳም ፡ ተመይጥዎሙ ፡ ለእለ ፡ ዴገንዎሙ ።

8:21  ወርእየ ፡ ኢየሱስ ፡ ከመ ፡ ረከብዋ ፡ ለሀገር ፡ እለ ፡ ዐገትዋ ፡ [ወአእመሩ ፡] ሶበ ፡ ርእዩ ፡ ጢሰ ፡ የዐርግ ፡ ውስተ ፡ ሰማይ ፡ እምነ ፡ ሀገር ፡ ወእምዝ ፡ ተመይጡ ፡ ወቀተልዎሙ ፡ ለሰብአ ፡ ጋይ ።

8:22  ወእልክቱሂ ፡ ወፅኡ ፡ እምነ ፡ ሀገር ፡ ወተቀበልዎሙ ፡ ወአግብእዎሙ ፡ ማእከለ ፡ ትዕይንቶሙ ፡ ለእስራኤል ፡ ወቀተልዎሙ ፡ ወእልክቱሂ ፡ እምከሓ ፡ ወእሉሂ ፡ እምለፌ ፡ እስከ ፡ ኢያትረፉ ፡ እምኔሆሙ ፡ ነፋጺተ ፡ ዘድኅነ ።

8:23  ወአኀዝዎ ፡ ለንጉሠ ፡ ጋይ ፡ ሕያዎ ፡ ወወሰድዎ ፡ ኀበ ፡ ኢየሱስ ።

8:24  ወሶበ ፡ አኅለቁ ፡ ቀቲሎቶሙ ፡ ለሰብአ ፡ ጋይ ፡ ደቂቀ ፡ እስራኤል ፡ በገዳም ፡ ወበሙራደ ፡ ደብር ፡ በኀበ ፡ ዴገንዎሙ ፡ ወቀተልዎሙ ፡ ለኵሎሙ ፡ በኀፂን ፡ ወአጥፍእዎሙ ፡ ወተመይጠ ፡ ኢየሱስ ፡ በጊዜሃ ፡ ውስተ ፡ ጋይ ፡ ወቀተላ ፡ በኀፂን ።

8:25  ወኮኑ ፡ ኵሎሙ ፡ እለ ፡ ሞቱ ፡ ይእተ ፡ አሚረ ፡ ተባዕቱ ፡ ወአንስቱ ፡ እልፍ ፡ ወዕሥራ ፡ ምእት ፡ ኵሉ ፡ ሰብአ ፡ ጋይ ።

8:26  ወኢሜጠ ፡ ኢየሱስ ፡ እዴሁ ፡ እንተ ፡ አልዐለ ፡ በጋይሶ ፡ እስከ ፡ አጥፍእዎሙ ፡ ለሰብአ ፡ ጋይ ።

8:27  ዘእንበለ ፡ እንስሳ ፡ ወበርበረ ፡ ሀገር ፡ ኵሎ ፡ ዘበርበሩ ፡ ደቂቀ ፡ እስራኤል ፡ ለርእሶሙ ፡ በትእዛዘ ፡ እግዚአብሔር ፡ በከመ ፡ አዘዞ ፡ እግዚአብሔር ፡ ለኢየሱስ ።

8:28  ወአውዐያ ፡ ኢየሱስ ፡ ለሀገር ፡ በእሳት ፡ ወኮነት ፡ ሐመደ ፡ ወረሰያ ፡ ከመ ፡ አልቦ ፡ ዘይነብራ ፡ ለዘላፉ ፡ እስከ ፡ ዮም ፡ ወእስከ ፡ ዛቲ ፡ ዕለት ።

8:29  ወለንጉሠ ፡ ጋይ ፡ ሰቀሎ ፡ ውስተ ፡ ዕፅ ፡ ዘግባ ፡ ወነበረ ፡ ውስተ ፡ ዕፅ ፡ እስከ ፡ ሰርክ ፡ ወሶበ ፡ ዐርበት ፡ ፀሐይ ፡ አዘዘ ፡ ኢየሱስ ፡ ወአውረድዎ ፡ እምውስተ ፡ ዕፅ ፡ ወወገርዎ ፡ ውስተ ፡ ግብ ፡ ውስተ ፡ አንቀጸ ፡ ሀገር ፡ ወገብሩ ፡ ሎቱ ፡ ነፍቀ ፡ አንተ ፡ እብን ፡ ዐባይ ፡ እስከ ፡ ዮም ፡ ወእስከ ፡ ዛቲ ፡ ዕለት ።

8:30  ወሶበ ፡ ሰምዑ ፡ ኵሎሙ ፡ ነገሥተ ፡ አሞሬዎን ፡ እለ ፡ ሀለው ፡ ማዕዶተ ፡ ዮርዳንስ ፡ እለ ፡ ውስተ ፡ አድባር ፡ ወእለ ፡ ውስተ ፡ ገዳም ፡ ወእለ ፡ ውስተ ፡ ኵሉ ፡ ሐይቀ ፡ ባሕር ፡ ዐቢይ ፡ ወእለ ፡ ውስተ ፡ አንጢሊባኖን ፡ ወኬጤዎን ፡ ወከናኔዎን ፡ ወፌሬዜዎን ፡ ወኤዌዎን ፡ ወአሞሬዎን ፡ ወጌርጌሴዎን ፡ ወኢያቡሴዎን ፤

8:31  ተጋብኡ ፡ ኅቡረ ፡ ከመ ፡ ይፅብእዎሙ ፡ ለኢየሱስ ፡ ወለኵሉ ፡ እስራኤል ።

8:32  ወነደቀ ፡ ኢየሱስ ፡ ምሥዋዐ ፡ ይእተ ፡ አሚረ ፡ ለእግዚአብሔር ፡ አምላከ ፡ እስራኤል ፡ በደብረ ፡ ጌባል ፤

8:33  በከመ ፡ አዘዞሙ ፡ ሙሴ ፡ ቍልዔሁ ፡ ለእግዚአብሔር ፡ ለደቂቀ ፡ እስራኤል ፡ በከመ ፡ ጽሑፍ ፡ ውስተ ፡ ሕገ ፡ ሙሴ ፡ ምሥዋዐ ፡ ዘእብን ፡ መብሐት ፡ ዘኢተወቅረ ፡ ወዘኢተገብረ ፡ በኅፂን ፡ ወአዕረገሂ ፡ ቍርባነ ፡ ለእግዚአብሔር ፡ ወመሥዋዕተ ፡ መድኀኒት ።

8:34  ወጸሐፎ ፡ ኢየሱስ ፡ ውስተ ፡ እብን ፡ ለዝክቱ ፡ ዳግም ፡ ኦሪት ፡ ሕገ ፡ ሙሴ ፡ ዘጸሐፈ ፡ በቅድሜሆሙ ፡ ለኵሉ ፡ ደቂቀ ፡ እስራኤል ።

8:35  ወኵሉ ፡ እስራኤል ፡ ወመኳንንቲሆሙ ፡ ወጸሐፍቶሙ ፡ የሐውሩ ፡ እምፀጋም ፡ ወእምየማን ፡ ቅድመ ፡ ታቦት ፡ ወካህናትሰ ፡ ወሌዋውያን ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ወመንፈቆሙ ፡ ለግዩራን ፡ ወእለሂ ፡ እምፍጥረቶሙ ፡ ጠቃ ፡ ደብረ ፡ ጌባል ፡ ወመንፈቆሙ ፡ ጠቃ ፡ ደብረ ፡ ጋሪዝን ፡ እለ ፡ አዘዞሙ ፡ ሙሴ ፡ ቍልዔሁ ፡ ለእግዚአብሔር ፡ ከመ ፡ ይባርክዎ ፡ ለሕዝበ ፡ እስራኤል ። ወእሙንቱ ፡ ይቀውሙ ፡ ወእምድኅረ ፡ ዝንቱ ፡ አንበበ ፡ ኢየሱስ ፡ ኵሎ ፡ ነገሮ ፡ ለዝንቱ ፡ ሕግ ፡ በረከቶሂ ፡ ወመርገሞሂ ፡ ኵሎ ፡ ዘጽሑፍ ፡ ውስተ ፡ ሕገ ፡ ሙሴ ። ወአልቦ ፡ ቃለ ፡ እምነ ፡ ኵሉ ፡ ዘአዘዞ ፡ ሙሴ ፡ ለኢየሱስ ፡ ዘኢያንበበ ፡ ወዘኢያስምዖሙ ፡ ኢየሱስ ፡ ለኵሉ ፡ ተዓይነ ፡ ደቂቀ ፡ እስራኤል ፡ ለዕደዊሆሙ ፡ ወለአንስቲያሆሙ ፡ ወለደቂቆሙ ፡ ወለግዩራን ፡ እለ ፡ ሖሩ ፡ ምስለ ፡ እስራኤል ፡ (ወለኵሉ ፡ እስራኤል ፡)፡

Chapter 9

9:1  ወሰምዑ ፡ እለ ፡ ይነብሩ ፡ ገባኦን ፡ ኵሎ ፡ ዘገብረ ፡ እግዚአብሔር ፡ ላዕለ ፡ ኢያሪኮ ፡ ወላዕለ ፡ ጋይ ።

9:2  ወገብሩ ፡ እሙንቱሂ ፡ በጕሕሉት ፡ ወመጽኡ ፡ ሠኒቆሙ ፡ ወአስተዳሊዎሙ ፡ ወጾሩ ፡ መሣንቀ ፡ ብሉየ ፡ ዲበ ፡ መታክፊሆሙ ፡ ወዝቀ ፡ ወይን ፡ ብሉየ ፡ ወሥጡጠ ፡ ወጥቁበ ።

9:3  ወብቱክ ፡ ቶታነ ፡ አሣእኒሆሙ ፡ ወብሉይ ፡ አሥእኒሆሙ ፡ ወግቱት ፡ ውስተ ፡ እገሪሆሙ ፡ ወአልባሲሆሙኒ ፡ ብሉይ ፡ ላዕሌሆሙ ፡ ወኅብስተ ፡ ሥንቆሙኒ ፡ ይቡስ ፡ ወሥሕቡብ ፡ ወንቁዝ ።

9:4  ወመጽኡ ፡ ኀቤሁ ፡ ለኢየሱስ ፡ ውስተ ፡ ትዕይንተ ፡ እስራኤል ፡ እስከ ፡ ገልጋላ ፡ ወይቤልዎሙ ፡ ለኢየሱስ ፡ ወለኵሉ ፡ እስራኤል ፡ እምርሑቅ ፡ ብሔር ፡ መጻእነ ፡ ወይእዜኒ ፡ ተማሐሉ ፡ ምስሌነ ።

9:5  ወይቤልዎሙ ፡ ደቂቀ ፡ እስራኤል ፡ ለኮራውያን ፡ እፎ ፡ ንትማሐል ፡ ምስሌክሙ ፡ መሐላ ፡ ዑቁ ፡ ዮጊ ፡ ቅሩባነ ፡ ትነብሩ ።

9:6  ወይቤልዎ ፡ ለኢየሱስ ፡ ንሕነሰ ፡ አግብርቲከ ፡ ንሕነ ፡ ወይቤሎሙ ፡ እምአይቴ ፡ አንትሙ ፡ ወእምአይቴ ፡ መጻእክሙ ።

9:7  ወይቤልዎ ፡ እምነ ፡ ርሑቅ ፡ ብሔር ፡ ጥቀ ፡ መጻእነ ፡ ንሕነ ፡ አግብርቲከ ፡ በስመ ፡ እግዚአብሔር ፡ አምላክከ ፡ እስመ ፡ ሰማዕነ ፡ ዘበእንቲአሁ ፡ ወኵሎ ፡ ዘገብረ ፡ [በግብጻውያን ፤

9:8  ወኵሎ ፡ ዘገብረ ፡] በክልኤቱ ፡ ነገሥተ ፡ አሞሬዎን ፡ እለ ፡ ይነብሩ ፡ ውስተ ፡ ማዕዶተ ፡ ዮርዳንስ ፡ ሴዎን ፡ ንጉሠ ፡ ሔሴቦን ፡ ወአግ ፡ ንጉሠ ፡ ባሳን ፡ ዘይነብር ፡ ውስተ ፡ አስጠሮት ፡ ወውስተ ፡ ኤድራይን ።

9:9  ወሶበ ፡ ሰማዕነ ፡ ይቤሉነ ፡ ሊቃናቲነ ፡ ወኵሉ ፡ ሰብአ ፡ ብሔርነ ፡ ንሥኡ ፡ ሥንቀክሙ ፡ ለፍኖት ፡ ወሑሩ ፡ ተቀበልዎሙ ፡ ወበልዎሙ ፡ አግብርቲክሙ ፡ ንሕነ ፡ ወይእዜኒ ፡ ተማሐሉ ፡ ምስሌነ ፡ መሐላ ።

9:10  ወናሁ ፡ ዝንቱ ፡ ኅብስትነ ፡ እንዘ ፡ ምውቅ ፡ ውእቱ ፡ ነሣእናሁ ፡ እምነ ፡ አብያቲነ ፡ በዕለተ ፡ ወፃእነ ፡ ከመ ፡ ንምጻእ ፡ ኀቤክሙ ፡ ወይእዜሰ ፡ ነቅዘ ፡ ወየብሰ ።

9:11  ወዝንቱኒ ፡ ዝቃተ ፡ ወይንነ ፡ [ዘ]መላእናሁ ፡ [ሐዲሰ ፡] ወይእዜሰ ፡ ዐርቀ ፡ ወበልየ ፡ ወተሠጠ ፡ ወአልባሲነሂ ፡ ወአሥእንነሂ ፡ በልየ ፡ እስመ ፡ ጥቀ ፡ ርሑቅ ፡ ፍኖት ።

9:12  ወነሥኡ ፡ መኳንንት ፡ ሥንቆሙ ፡ ወኢተስእሉ ፡ በኀበ ፡ እግዚአብሔር ።

9:13  ወገብረ ፡ ኢየሱስ ፡ ሰላመ ፡ ምስሌሆሙ ፡ ወተማሐለ ፡ ምስሌሆሙ ፡ ከመ ፡ ያድኅኖሙ ፡ ወመሐሉ ፡ ሎሙ ፡ መላእክተ ፡ ተዓይን ።

9:14  ወኮነ ፡ እምድኅረ ፡ ሠሉስ ፡ መዋዕል ፡ እምድኅረ ፡ ተማሐሉ ፡ ምስሌሆሙ ፡ መሐላ ፡ ሰምዑ ፡ ከመ ፡ እምቅሩብ ፡ እሙንቱ ፡ ወከመ ፡ ኀቤሆሙ ፡ እሙንቱ ፡ ይነብሩ ።

9:15  ወግዕዙ ፡ ደቂቀ ፡ እስራኤል ፡ ወበጽሑ ፡ ውስተ ፡ አህጉሪሆሙ ፡ አመ ፡ ሣልስት ፡ ዕለት ፡ ወእላንቱ ፡ እማንቱ ፡ አህጉሪሆሙ ፡ ገባኦን ፡ ወ [ክ]ፊራ ፡ ወቤሮት ፡ ወአህጉረ ፡ ኢያርም ።

9:16  ወኢተቃተልዎሙ ፡ ደቂቀ ፡ እስራኤል ፡ እስመ ፡ መሐሉ ፡ ሎሙ ፡ ኵሎሙ ፡ መላእክተ ፡ ተዓይን ፡ በእግዚአብሔር ፡ አምላከ ፡ እስራኤል ፡ ወአንጐርጐሩ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ላዕለ ፡ መላእክቲሆሙ ።

9:17  ወይቤልዎሙ ፡ ኵሉ ፡ መላእክት ፡ ለኵሉ ፡ ተዓይን ፡ ንሕነ ፡ መሐልነ ፡ ሎሙ ፡ በእግዚአብሔር ፡ አምላከ ፡ እስራኤል ፡ ወይእዜኒ ፡ ኢንክል ፡ ለኪፎቶሙ ፡ ወኢበምንትኒ ።

9:18  ወከመዝ ፡ ባሕቱ ፡ ንገብር ፡ ናሐይዎሙ ፡ ወንቀንዮሙ ፡ ወኢይከውን ፡ ላዕሌነ ፡ መንሱት ፡ በበይነ ፡ ዘመሐልነ ፡ ሎሙ ።

9:19  ወይቤልዎሙ ፡ መላእክት ፡ አሕየውናክሙ ፡ ወሤምናክሙ ፡ ትሕጥቡ ፡ ዕፀ ፡ ወትቅድሑ ፡ ማየ ፡ ለኵሉ ፡ ተዓይን ፡ ወከመዝ ፡ አዘዝዎሙ ፡ መላአክት ።

9:20  ወጸውዖሙ ፡ ኢየሱስ ፡ ወይቤሎሙ ፡ ለምንት ፡ ተሳለቅሙ ፡ ላዕሌየ ፡ ወትቤሉኒ ፡ ርሑቃን ፡ ንሕነ ፡ ጥቀ ፡ እምኔክሙ ፡ ወናሁ ፡ አድያሚሆሙ ፡ አንትሙ ፡ ለእለ ፡ ይነብሩ ፡ ምስሌነ ።

9:21  ወይእዜኒ ፡ ርጉማነ ፡ ኩኑ ፡ ኢይስዐር ፡ እምኔክሙ ፡ ገብር ፡ ዘየሐጥብ ፡ ዕፀ ፡ ወዘይቀድሕ ፡ ማየ ፡ ሊተ ፡ ወለአምላክየ ።

9:22  ወአውሥአዎ ፡ ወይቤልዎ ፡ ዜና ፡ ዜነውነ ፡ ኵሎ ፡ ዘይቤሎ ፡ እግዚአብሔር ፡ አምላክከ ፡ ለሙሴ ፡ ቍልዔሁ ፡ ከመ ፡ የሀብክሙዋ ፡ ለዛቲ ፡ ምድር ፡ ወከመ ፡ ያጥፍአነ ፡ ወለኵሉ ፡ እለ ፡ ይነብሩ ፡ ውስቴታ ፡ እምቅድመ ፡ ገጽክሙ ፡ ወ[በበይነዝ ፡] ገበርነ ፡ ዘንተ ፡ ነገረ ።

9:23  ወይእዜኒ ፡ ናሁ ፡ ንሕነ ፡ ውስተ ፡ እደዊክሙ ፡ ዘከመ ፡ ፈቀድክሙ ፡ ወዘከመ ፡ ይኤድመክሙ ፡ ትረስዩነ ፡ ረስዩነ ።

9:24  ወአድኀኖሙ ፡ ኢየሱስ ፡ በይእቲ ፡ ዕለት ።

9:25  ወረሰዮሙ ፡ ከማሁ ፡ ወፋርያነ ፡ ዕፀው ፡ ወሐዋርያነ ፡ ማይ ፡ ለኵሉ ፡ ተዓይን ፡ ወለምሥዋዐ ፡ እግዚአብሔር ፡ ወበበይነ ፡ ዝንቱ ፡ ኮኑ ፡ ሰብአ ፡ ገባኦን ፡ ወፋርያነ ፡ ዕፀው ፡ ወሐዋርያነ ፡ ማይ ፡ ለኵሉ ፡ ተዓይን ፡ ወለምሥዋዐ ፡ እግዚአብሔር ፡ እስከ ፡ ዮም ፡ ወእስከ ፡ ዛቲ ፡ ዕለት ፡ ወለመካን ፡ ዘኀርየ ፡ እግዚአብሔር ።

Chapter 10

10:1  ወሶበ ፡ ሰምዐ ፡ አዶኒቤዜቅ ፡ ንጉሠ ፡ ኢየሩሳሌም ፡ ከመ ፡ ነሥኣ ፡ ኢየሱስ ፡ ለጋይ ፡ ወሠረዋ ፡ በከመ ፡ ገብራ ፡ ለኢያሪኮ ፡ ወለንጉሣ ፡ ከማሁ ፡ ገብራ ፡ ለጋይ ፡ ወለንጉሣ ፡ ወከመ ፡ ለሊሆሙ ፡ ገረሩ ፡ ሰብአ ፡ ገባኦን ፡ ወመጽኡ ፡ ኀበ ፡ ኢየሱስ ፡ ወኀበ ፡ እስራኤል ፡ ወነበሩ ፡ ማእከሎሙ ፤

10:2  ወፈርሁ ፡ እምኔሆሙ ፡ ጥቀ ፡ እስመ ፡ ያአምሩ ፡ ከመ ፡ ዐባይ ፡ ሀገር ፡ ይእቲ ፡ ጥቀ ፡ ገባኦን ፡ ከመ ፡ አሐቲ ፡ እምነ ፡ አህጉረ ፡ [መንግሥት ፡] እስመ ፡ ይእቲ ፡ ተዐቢ ፡ አምነ ፡ ጋይ ፡ ወጽኑዓን ፡ እሙንቱ ፡ ኵሎሙ ፡ ዕደዊሃ ።

10:3  ወለአከ ፡ አዶኒቤዜቅ ፡ ንጉሠ ፡ ኢየሩሳለም ፡ ኀበ ፡ ኤለም ፡ ንጉሠ ፡ ኬብሮን ፡ ወኀበ ፡ ፊዶን ፡ ንጉሠ ፡ ኢየሬሙት ፡ ወኀበ ፡ ኤዬፍታ ፡ ንጉሠ ፡ ላኪስ ፡ ወኀበ ፡ ደቢት ፡ ንጉሠ ፡ ኦዶሎም ፡ ወይቤሎሙ ፤

10:4  ንዑአ ፡ ዕረጉአ ፡ ኀቤየአ ፡ ወርድኡኒ ፡ ከመ ፡ ንፅብኦሙ ፡ ለገባኦን ፡ እለ ፡ ገብኡ ፡ ለሊሆሙ ፡ ኀበ ፡ ኢየሱስ ፡ ወኀበ ፡ ደቂቀአ ፡ እስራኤልአ ።

10:5  ውተጋብኡ ፡ [ወዐርጉ ፡] እሉ ፡ ኀምስቱ ፡ ነገሥተ ፡ ኢየቡሴዎን ፡ ንጉሠ ፡ ኢየሩሳሌም ፡ ወንጉሠ ፡ ኬብሮን ፡ ወንጉሠ ፡ ኢየሬሙት ፡ ወንጉሠ ፡ ላኪስ ፡ ወንጉሠ ፡ ኦዶላም ፡ እሙንቱኒ ፡ ወኵሉ ፡ አሕዛቢሆሙ ፡ ወዐገትዋ ፡ ለገባኦን ፡ ወተቃተልዋ ።

10:6  ወለአኩ ፡ ሰብአ ፡ ገባኦን ፡ ኀበ ፡ ኢየሱስ ፡ ውስተ ፡ ትዕይንተ ፡ እስራኤል ፡ ውስተ ፡ ገልጋላ ፡ ወይቤሉ ፡ ኢትትሀከይአ ፡ እደዊከአ ፡ እምነ ፡ አግብርቲከ ፡ ዕረግ ፡ ኀቤነ ፡ ወ[ፍጡነ ፡] ርድአነ ፡ [ወአድኅነነ ፡] እስመ ፡ ተጋብኡ ፡ ላዕሌነ ፡ ኵሉ ፡ ነገሥተ ፡ አሞሬዎን ፡ እለ ፡ ይነብሩአ ፡ ውስተአ ፡ አድባርአ ።

10:7  ወዐርገ ፡ ኢየሱስ ፡ እምነ ፡ ገልጋላ ፡ ውእቱ ፡ ወኵሉ ፡ ሕዝብ ፡ መስተቃትላን ፡ ምስሌሁ ፡ ወኵሉ ፡ ዘጽኑዕ ፡ ኀይሉ ።

10:8  ወይቤሎ ፡ እግዚአብሔር ፡ ለኢየሱስ ፡ ኢትፍርሆሙ ፡ እስመ ፡ ውስተ ፡ እዴከ ፡ ኣገብኦሙ ፡ ወአልቦ ፡ ዘይተርፍ ፡ እምኔሆሙ ፡ ቅድሜክሙ ፡ ወኢአሐዱ ።

10:9  ወበጽሖሙ ፡ ኢየሱስ ፡ ግብተ ፡ በሌሊት ፡ ወፂኦ ፡ እምነ ፡ ገልጋላ ።

10:10  ወአደንገፆሙ ፡ እግዚአብሔር ፡ እምቅድመ ፡ ገጾሙ ፡ ለእስራኤል ፡ ወቀጥቀጦሙ ፡ እግዚአብሔር ፡ ዐቢየ ፡ ቅጥቃጤ ፡ በገባኦን ፡ ወዴገንዎሙ ፡ ውስተ ፡ ፍኖተ ፡ ምዕራገ ፡ ቤቶሮን ፡ ወወግእዎሙ ፡ እስከ ፡ አዜቃ ፡ ወእስከ ፡ መቄዳ ።

10:11  [ወ]ሶበ ፡ ነትዑ ፡ እምቅድመ ፡ ገጾሙ ፡ ለደቂቀ ፡ እስራኤል ፡ በውስተ ፡ ሙራዲሁ ፡ ለቤቶሮን ፡ ወወገሮሙ ፡ እግዚአብሔር ፡ እምሰማይ ፡ በእብነ ፡ በረድ ፡ እስከ ፡ አዜቃ ፡ ወፈድፈዱ ፡ እለ ፡ ሞቱ ፡ በእብነ ፡ በረድ ፡ እምነ ፡ እለ ፡ ቀተሉ ፡ ደቂቀ ፡ እስራኤል ፡ በኀፂኖሙ ፡ በውስተ ፡ ቀትል ።

10:12  ይእተ ፡ አሚረ ፡ ተናገረ ፡ ኢየሱስ ፡ ምስለ ፡ እግዚአብሔር ፡ አመ ፡ አግብኦሙ ፡ እግዚአብሔር ፡ ለአሞሬዎን ፡ ውስተ ፡ እዴሆሙ ፡ ለደቂቀ ፡ እስራኤል ፡ አመ ፡ ቀጥቀጥዎሙ ፡ በገባኦን ፡ ወተቀጥቀጡ ፡ እምቅድመ ፡ ገጾሙ ፡ ለእስራኤል ፡ ወይቤ ፡ ኢየሱስ ፡ ለትቁም ፡ ፀሐይ ፡ መንገለ ፡ ገባኦን ፡ ወወርኅኒ ፡ መንገለ ፡ ቈላተ ፡ ኤሎም ።

10:13  ወቆመ ፡ ፀሐይ ፡ ወወርኅ ፡ በምቅዋሞሙ ፡ በኀበ ፡ ሀለው ፡ እስከ ፡ አጥፍኦሙ ፡ እግዚአብሔር ፡ ለፀሮሙ ፡ ወናሁ ፡ ተጽሕፈ ፡ ዝንቱ ፡ ውስተ ፡ ዛቲ ፡ መጽሐፍ ፡ በጊዜሃ ፡ ወቆመት ፡ ፀሐይ ፡ ማእከለ ፡ ሰማይ ፡ ወኢሖረት ፡ መንገለ ፡ ዐረብ ፡ እስከ ፡ አምጣነ ፡ አሐቲ ፡ ዕለት ፡ ፍጽምት ።

10:14  ወኢኮነት ፡ እንተ ፡ ከመ ፡ ይእቲ ፡ ዕለት ፡ ኢእምቅድሜሃ ፡ ወኢእምድኅሬሃ ፡ ከመ ፡ ያውሥኦ ፡ እግዚአብሔር ፡ ለቃለ ፡ እጓለ ፡ እመሕያው ፡ እስመ ፡ እግዚአብሔር ፡ ፀብአ ፡ ሎሙ ፡ ለእስራኤል ።

10:15  ወገብኡ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ ውስተ ፡ ትዕይንት ፡ ውስተ ፡ ገልጋላ ።

10:16  ወጐዩ ፡ እልክቱ ፡ ኀምስቱ ፡ ነገሥት ፡ ወተኀብኡ ፡ ውስተ ፡ በአት ፡ ዘውስተ ፡ መቄዳ ።

10:17  ወዜነውዎ ፡ ለኢየሱስ ፡ ወይቤልዎ ፡ ተረክቡ ፡ እልክቱ ፡ ኀምስቱ ፡ ነገሥት ፡ ውስተ ፡ በአተ ፡ መቄደ ፡ ኀበ ፡ ተኀብኡ ።

10:18  ወይቤሎሙ ፡ ኢየሱስ ፡ አንኰርኵሩ ፡ እብነ ፡ [ዐቢየ ፡] ውስተ ፡ አፉሃ ፡ ለይእቲ ፡ በዐት ፡ ወአንብሩ ፡ ዕደወ ፡ ላዕሌሆሙ ፡ እለ ፡ የዐቅብዎሙ ።

10:19  ወአንትሙሰ ፡ [ኢትቁሙ ፡] ዴግኑ ፡ ፀረክሙ ፡ ኵሎ ፡ እስከ ፡ ጽንፎሙ ፡ ወኢታብሕዎሙ ፡ ይባኡ ፡ ውስተ ፡ አህጉሪሆሙ ፡ እስመ ፡ አግብኦሙ ፡ እግዚአብሔር ፡ አምላክነ ፡ ውስተ ፡ እደዊነ ።

10:20  ወእምዝ ፡ ሶበ ፡ አኅለቁ ፡ ቀቲሎቶሙ ፡ ኢየሱስ ፡ ወኵሉ ፡ እስራኤል ፡ ቀትለ ፡ ዐቢየ ፡ ጥቀ ፡ ዘአልቦ ፡ ማኅለቅተ ፡ ወእለሂ ፡ ድኅኑ ፡ እምኔሆሙ ፡ ድኅኑ ፡ ወቦኡ ፡ ውስተ ፡ አህጉር ፡ ጽኑዓት ፤

10:21  ወገብኡ ፡ ኵሉ ፡ ሕዝብ ፡ ውስተ ፡ ትዕይንት ፡ ኀበ ፡ ኢየሱስ ፡ ውስተ ፡ መቄዳ ፡ ድኅናኒሆሙ ፡ ወአልቦ ፡ ዘለሐሶሙ ፡ በልሳኑ ፡ መኑሂ ፡ ለደቂቀ ፡ እስራኤል ።

10:22  ወይቤሎሙ ፡ ኢየሱስ ፡ አርኅውዋ ፡ ለይእቲ ፡ በዐት ፡ ወአምጽእዎሙ ፡ ኀቤየ ፡ ለእልክቱ ፡ ነገሥት ፡ ኀምስቱ ፡ እምነ ፡ ይእቲ ፡ በዐት ።

10:23  ወገብሩ ፡ ከማሁ ፡ ወአ[ው]ጽእዎሙ ፡ ለእልክቱ ፡ ኀምስቱ ፡ ነገሥት ፡ እምውስተ ፡ በዐት ፡ ንጉሠ ፡ ኢየሩሳሌም ፡ ወንጉሠ ፡ ኬብሮን ፡ ወንጉሠ ፡ ኢየሬሙት ፡ ወንጉሠ ፡ ላኪስ ፡ ወንጉሠ ፡ ኦዶለም ።

10:24  ወወሰድዎሙ ፡ ኀበ ፡ ኢየሱስ ፡ ወጸውዖሙ ፡ ኢየሱስ ፡ ለኵሉ ፡ እስራኤል ፡ ለእለ ፡ ተቃተሉ ፡ ወለእለ ፡ ሖሩ ፡ ምስሌሁ ፡ ወይቤሎሙ ፡ ሑሩ ፡ ወደዩ ፡ እገሪክሙ ፡ ላዕለ ፡ ክሳዳቲሆሙ ፡ [ወወደዩ ፡ እገሪሆሙ ፡ ላዕለ ፡ ክሳዳቲሆሙ ፡]፡

10:25  ወይቤሎሙ ፡ ኢየሱስ ፡ ኢትፍርህዎሙ ፡ ወኢትደንግፁ ፡ እምኔሆሙ ፡ ትብዑ ፡ ወጽንዑ ፡ እስመ ፡ ከመዝ ፡ ይገብሮሙ ፡ እግዚአብሔር ፡ ለኵሉ ፡ ፀርክሙ ፡ ለእለ ፡ ትፀብእዎሙ ፡ አንትሙ ።

10:26  ወእምዝ ፡ ቀተሎሙ ፡ ኢየሱስ ፡ ወረገዝዎሙ ፡ ወሰቀልዎሙ ፡ ላዕለ ፡ ኀምስቱ ፡ ዕፀው ፡ ወነበሩ ፡ ስቁላኒሆሙ ፡ ዲበ ፡ ዕፀው ፡ እስከ ፡ ሰርክ ።

10:27  ወእምዝ ፡ ሶበ ፡ ዐረበት ፡ ፀሐይ ፡ አዘዘ ፡ ኢየሱስ ፡ ወአውረድዎሙ ፡ እምውስተ ፡ ውእቱ ፡ ዕፀው ፡ ወገደፍዎሙ ፡ ውስተ ፡ ይእቲ ፡ በዐት ፡ እንተ ፡ ውስቴታ ፡ ጐዩ ፡ ወአንኰርኰሩ ፡ እበነ ፡ ዐበይተ ፡ ዲቤሃ ፡ ለይእቲ ፡ በዐት ፡ እስከ ፡ ዮም ፡ ወእስከ ፡ ዛቲ ፡ ዕለት ።

10:28  ወመቄዳሂ ፡ ነሥእዋ ፡ በይእቲ ፡ ዕለት ፡ ወቀተልዎሙ ፡ በአፈ ፡ ኀፂን ፡ ወለንጉሣሂ ፡ ወአጥፍእዎሙ ፡ ለኵሉ ፡ ዘመንፈስ ፡ ዘውስቴታ ፡ ወኢትረፉ ፡ ውስቴታ ፡ ነፋጺተ ፡ ወኢመ[ነ]ሂ ፡ ወአልቦ ፡ ዘድኅነ ፡ ወገብርዎ ፡ ለንጉሠ ፡ መቄዳ ፡ ከመ ፡ ገብርዎ ፡ ለንጉሠ ፡ ኢያሪኮ ።

10:29  ወሖረ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ እምነ ፡ መቄዳ ፡ ውስተ ፡ ልብና ።

10:30  ወአግብኣ ፡ እግዚአብሔር ፡ ውስተ ፡ እዴሆሙ ፡ ለእስራኤል ፡ ወነሥእዋ ፡ ወነሥኦ ፡ ለንጉሣ ፡ ወቀተሎ ፡ በአፈ ፡ ኀፂን ፡ ወኢያትረፈ ፡ ውስቴታ ፡ እምነ ፡ ኵሉ ፡ ዘመንፈስ ፡ ወኢድኅነ ፡ ወኢአሐዱ ፡ ነፋጺት ፡ እምኔሆሙ ፡ ወገብርዎ ፡ ለንጉሣ ፡ በከመ ፡ ገብርዎ ፡ ለንጉሠ ፡ ኢያሪኮ ።

10:31  ወሖረ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ እምነ ፡ ልብና ፡ ውስተ ፡ ላኪስ ፡ ወነበሩ ፡ ላዕሌሃ ፡ ወተቃተልዋ ።

10:32  ወአግብኣ ፡ እግዚአብሔር ፡ ለላኪስ ፡ ውስተ ፡ እዴሆሙ ፡ ለእስራኤል ፡ ወነሥእዋ ፡ በሳኒተ ፡ ዕለት ፡ ወቀተልዎሙ ፡ በአፈ ፡ ኀፂን ፡ ወአጥፍእዋ ፡ በከመ ፡ ገብርዋ ፡ ለሌብና ።

10:33  ወዐርገ ፡ ይእተ ፡ አሚረ ፡ [ኤ]ላም ፡ ንጉሠ ፡ ጋዜስ ፡ ከመ ፡ ይር[ድኣ] ፡ ለላኪስ ፡ ወቀተሎ ፡ ኢየሱስ ፡ በአፈ ፡ ኀፂን ፡ ወለሕዝቡሂ ፡ እስከ ፡ ኢያትረፈ ፡ እምኔሆሙ ፡ ነፋጺተ ፡ ወአልቦ ፡ ዘደኅነ ።

10:34  ወሖረ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ እምነ ፡ ላኪስ ፡ ውስተ ፡ ኦዶለም ፡ ወነበሩ ፡ ላዕሌሃ ፡ ወ[ተቃ]ተልዋ ።

10:35  ወአግብኣ ፡ እግዚአብሔር ፡ ውስተ ፡ እዴሆሙ ፡ ለእስራኤል ፡ ወነሥእዋ ፡ በይእቲ ፡ ዕለት ፡ ወቀተልዋ ፡ በአፈ ፡ ኀፂን ፡ ወቀተሉ ፡ ኵሎ ፡ ዘመንፈስ ፡ ዘውስቴታ ፡ በከመ ፡ ገብርዋ ፡ ለላኪስ ።

10:36  ወሖረ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ ውስተ ፡ ኬብሮን ፡ ወነበሩ ፡ ላዕሌሃ ።

10:37  ወቀተልዋ ፡ በአፈ ፡ ኀፂን ፡ ወለኵሉ ፡ ዘመንፈስ ፡ ዘውስቴታ ፡ ወአልቦ ፡ ዘድኅነ ፡ በከመ ፡ ገብርዋ ፡ ለኦዶለም ፡ ወአጥፍእዋ ፡ ምስለ ፡ ኵሉ ፡ ዘውስቴታ ።

10:38  ወገብአ ፡ ኢየሱስ ፡ ወኵሉ ፡ እስራኤል ፡ ውስተ ፡ ዳቢር ፡ ወነበሩ ፡ ላዕሌሃ ።

10:39  ወነሥእዋ ፡ ወለንጉሣሂ ፡ ወለአህጉሪሃኒ ፡ ወቀተልዋ ፡ ወአጥፍእዋ ፡ በአፈ ፡ ኀፂን ፡ ወለኵሉ ፡ ዘመንፈስ ፡ ዘውስቴታ ፡ ወአልቦ ፡ ዘአትረፉ ፡ ውስቴታ ፡ ዘድኅነ ፡ በከመ ፡ ገብርዋ ፡ ለኬብሮን ፡ ወለንጉሣ ፡ ከማሁ ፡ ገብርዋ ፡ ለዳቤር ፡ ወለንጉሣ ።

10:40  ወቀተለ ፡ ኢየሱስ ፡ ኵሎ ፡ ምድሮሙ ፡ ለደወለ ፡ አድባር ፡ ወናቤ ፡ ወአሕቅልቲሃ ፡ ወአሴዶት ፡ ወነገሥታ ፡ ወአልቦ ፡ ዘአትረፉ ፡ እምኔሆሙ ፡ ዘድኅነ ፡ ወኵሎ ፡ ዘመንፈሰ ፡ ሕይወት ፡ አጥፍአ ፡ በከመ ፡ አዘዘ ፡ እግዚአብሔር ፡ አምላከ ፡ እስራኤል ፤

10:41  እምነ ፡ ቃዴስ ፡ በርኔ ፡ እስከ ፡ ጋዜስ ፡ ኵሎ ፡ ጎሶም ፡ እስከ ፡ ገባኦን ።

10:42  ወቀተለ ፡ ኢየሱስ ፡ ኵሎ ፡ ነገሥቶሙ ፡ ወምድሮሙሂ ፡ በምዕር ፡ እስመ ፡ እግዚአብሔር ፡ ይፀብእ ፡ ሎሙ ፡ ለእስራኤል ።

10:43  [ወገብአ ፡ ኢየሱስ ፡ ወኵሉ ፡ እስራኤል ፡ ምስሌሁ ፡ ኀበ ፡ ትዕይንት ፡ ውስተ ፡ ገልጋላ ።]

Chapter 11

11:1  ወሶበ ፡ ሰምዐ ፡ ኢያቢስ ፡ ንጉሠ ፡ አ[ሶ]ር ፡ ለአከ ፡ ኀበ ፡ ኢዮባብ ፡ ንጉሠ ፡ አመሮን ፡ ወኀበ ፡ ንጉሠ ፡ ሰሞኣን ፡ ወኀበ ፡ ንጉሠ ፡ አዚፍ ፤

11:2  ወኀበ ፡ ነገሥት ፡ እለ ፡ መንገለ ፡ ሲዶና ፡ እንተ ፡ ተዐቢ ፡ (እንተ ፡) ውስተ ፡ አድባር ፡ ወውስተ ፡ አራባ ፡ እንተ ፡ ቅድመ ፡ ኬኔሬት ፡ ወውስተ ፡ አሕቅልት ፡ ወውስተ ፡ ፌናዶር ፤

11:3  ወውስተ ፡ ጰራሊያ ፡ ዘከናአን ፡ ዘመንገለ ፡ ጽባሕ ፡ ወውስተ ፡ ጰራሊያ ፡ ዘአሞሬዎን ፡ ወኤዌዎን ፡ ወኢየቡሴዎን ፡ ወፌሬዜዎን ፡ እለ ፡ ውስተ ፡ አድባር ፡ ወኬጤዎን ፡ እለ ፡ ውስተ ፡ አሕቅልት ፡ ወውስተ ፡ መሴውመን ።

11:4  ወወፅኡ ፡ እሙንቱኒ ፡ ወነገሥቶሙኒ ፡ ምስሌሆሙ ፡ ከመ ፡ ኆጻ ፡ ባሕር ፡ ብዝኆሙ ፡ [ወአፍራስ ፡ ወሰረገላት ፡ ብዙኅ ፡ ጥቀ ፡]፡

11:5  ወተጋብኡ ፡ ኵሎሙ ፡ ነገሥቶሙ ፡ ወመጽኡ ፡ ኅቡረ ፡ ወተአኅዝዎሙ ፡ ይትቃተልዎሙ ፡ ለእስራኤል ፡ በኀበ ፡ ማየ ፡ መሮን ።

11:6  ወይቤሎ ፡ እግዚአብሔር ፡ ለኢየሱስ ፡ ኢትፍራህ ፡ እምቅድመ ፡ ገጾሙ ፡ እስመ ፡ ጌሠመ ፡ በዛቲ ፡ [ጊዜ ፡] አነ ፡ ኣገብኦሙ ፡ ከመ ፡ ይትቀተሉ ፡ በቅድመ ፡ እስራኤል ፡ ወለአፍራሲሆሙኒ ፡ ምትርዎን ፡ ሥረዊሆን ፡ ወሰረገላቲሆሙኒ ፡ አውዕዩ ፡ በእሳት ።

11:7  ወሖሩ ፡ ኢየሱስ ፡ ወኵሉ ፡ ሕዝብ ፡ መስተቃትላን ፡ ላዕሌሆሙ ፡ ኀበ ፡ ማየ ፡ መሮን ፡ ወአውገብዎሙ ፡ ወወረዱ ፡ ላዕሌሆሙ ፡ እምነ ፡ አድባር ።

11:8  ወአግብኦሙ ፡ እግዚአብሔር ፡ ውስተ ፡ እዴሆሙ ፡ ለእስራኤል ፡ ወዴገንዎሙ ፡ (ወ)እንዘ ፡ ይቀትልዎሙ ፡ እስከ ፡ ሲዶና ፡ ዐቢይ ፡ ወእስከ ፡ መሴሮን ፡ ወእስከ ፡ አሕቅልተ ፡ መሶኅ ፡ በመንገለ ፡ ጽባሒሁ ፡ ወቀተልዎሙ ፡ ኢያትረፉ ፡ እምኔሆሙ ፡ ነፋጺተ ።

11:9  ወገብሮሙ ፡ ኢየሱስ ፡ በከመ ፡ አዘዞ ፡ እግዚአብሔር ፡ መተረ ፡ ሥረዊሆን ፡ ለአፍራሲሆሙ ፡ ወሰረገላቲሆሙኒ ፡ አውዐየ ፡ በእሳት ።

11:10  ወተመይጠ ፡ ኢየሱስ ፡ በእማንቱ ፡ መዋዕል ፡ ወነሥኣ ፡ ለአሶር ፡ ወለንጉሣ ፡ እስመ ፡ አሶር ፡ ቀዲሙ ፡ ምኵናኒሆሙ ፡ ይእቲ ፡ ለኵሎሙ ፡ እሉ ፡ ነገሥት ።

11:11  ወቀተሉ ፡ ኵሎ ፡ ዘመንፈስ ፡ ዘውስቴታ ፡ በኀፂን ፡ ወአጥፍእዎሙ ፡ ለኵሎሙ ፡ እስከ ፡ ኢያትረፉ ፡ ውስቴታ ፡ ዘመንፈስ ፡ ወአውዐያ ፡ ለአሶር ፡ በእሳት ፡ ወለኵሉ ፡ አህጉረ ፡ ነገሥት ።

11:12  ወነሥኦሙ ፡ ኢየሱስ ፡ ለነገሥቶሙ ፡ ወቀተሎሙ ፡ በኀፂን ፡ ወሠረዎሙ ፡ በከመ ፡ አዘዞ ፡ ሙሴ ፡ ቍልዔሁ ፡ ለእግዚአብሔር ።

11:13  ወባዕደሰ ፡ አህጉረ ፡ ኵሎ ፡ ዘአድያም ፡ ኢያውዐዩ ፡ እስራኤል ፡ እንበለ ፡ አሶር ፡ ባሕቲታ ፡ ዘአውዐዩ ፡ እስራኤል ።

11:14  ወበርበርዋ ፡ ደቂቀ ፡ እስራኤል ፡ ለርእሶሙ ፡ ኵሎ ፡ በርበራ ፡ ወሎሙሰ ፡ ሠረውዎሙ ፡ ለኵሎሙ ፡ እስከ ፡ አጥፍእዎሙ ፡ በአፈ ፡ ኀፂን ፡ ወኢያትረፉ ፡ እምኔሆሙ ፡ ወኢአሐደ ፡ ዘመንፈስ ።

11:15  በከመ ፡ አዘዞ ፡ እግዚአብሔር ፡ ለሙሴ ፡ ቍልዔሁ ፡ ወሙሴ ፡ አዘዞ ፡ ለኢየሱስ ፡ ወከማሁ ፡ ገብረ ፡ ኢየሱስ ፡ ወኢኀደገ ፡ ወኢምንተ ፡ እምነ ፡ ኵሉ ፡ ዘአዘዞ ፡ ሙሴ ።

11:16  ወነሥአ ፡ ኢየሱስ ፡ ኵሎ ፡ ደወለ ፡ ምድሮሙ ፡ ዘመንገለ ፡ አድባር ፡ ወኵሎ ፡ ምድረ ፡ አዴብ ፡ ወኵሎ ፡ ምድረ ፡ ጎሶም ፡ ወአሕቅልቲሃ ፡ ወዘመንገለ ፡ ዐረቢሃ ፡ ወደብረ ፡ እስራኤል ፡ ወታሕትየኒ ፡ ደወሎሙ ፡ ዘመንገለ ፡ ደብር ፤

11:17  እምነ ፡ ደብረ ፡ ኤኬል ፡ ወየዐርግ ፡ እስከ ፡ ሴይር ፡ ወእስከ ፡ በለገድ ፡ ወአሕቅልተ ፡ ሊባኖስ ፡ ዘመንገለ ፡ ደብረ ፡ አኤርሞን ፡ ወአኀዞሙ ፡ ለኵሎሙ ፡ ነገሥቶሙ ፡ ወቀተሎሙ ፡ ወአጥፍኦሙ ።

11:18  ወጕንዱየ ፡ መዋዕለ ፡ ነበረ ፡ ኢየሱስ ፡ ኀበ ፡ እሉ ፡ ነገሥት ፡ እንዘ ፡ ይትቃተሎሙ ።

11:19  ወአልቦ ፡ ሀገረ ፡ እንተ ፡ ኢነሥኡ ፡ እስራኤል ፡ ኵሎን ፡ ነሥእዎን ፡ በቀትል ።

11:20  እስመ ፡ እግዚአብሔር ፡ አጽንዖሙ ፡ ልቦሙ ፡ ውስተ ፡ ቀትል ፡ ለእስራኤል ፡ ከመ ፡ ይሠርውዎሙ ፡ ወከመ ፡ ኢይምሐርዎሙ ፡ አላ ፡ ከመ ፡ ያጥፍእዎሙ ፡ ቦከመ ፡ አዘዞ ፡ እግዚአብሔር ፡ ለሙሴ ።

11:21  ወሖረ ፡ ኢየሱስ ፡ በእማንቱ ፡ መዋዕል ፡ ወአጥፍኦሙ ፡ ለእለ ፡ ውስተ ፡ አቂም ፡ እለ ፡ ውስተ ፡ አድባር ፡ እምነ ፡ ኬብሮን ፡ ወእምነ ፡ ዳቤር ፡ ወእምነ ፡ አናቦት ፡ ወእምውስተ ፡ ኵሉ ፡ ደወሎሙ ፡ ለእስራኤል ፡ ወእምነ ፡ አድባረ ፡ ይሁዳ ፡ ምስለ ፡ አህጉሮሙ ፡ ወአጥፍኦሙ ፡ ኢየሱስ ።

11:22  ወኢያትረፈ ፡ እምኔሆሙ ፡ ለእለ ፡ ውስተ ፡ አቂም ፡ እምውስተ ፡ እስራኤል ፡ እንበለ ፡ ውስተ ፡ ጋዜ ፡ ወውስተ ፡ [ጌት ፡ ወ]አሴዶ ፡ ዘተርፉ ።

11:23  ወነሥአ ፡ ኢየሱስ ፡ ኵሎ ፡ ምድሮሙ ፡ በከመ ፡ አዘዞ ፡ እግዚአብሔር ፡ ለሙሴ ፡ ወወሀቦሙ ፡ ኢየሱስ ፡ ርስቶሙ ፡ [ለእስራኤል ፡ ዘከመ ፡] ከፈሎሙ ፡ በበ ፡ ነገዶሙ ፡ ወአዕረፈት ፡ እንከ ፡ ምድር ፡ እምነ ፡ ቀትል ።

Chapter 12

12:1  ወእሉ ፡ እሙንቱ ፡ ነገሥት ፡ እለ ፡ ቀተሉ ፡ ደቂቀ ፡ እስራኤል ፡ ወተወርስዎሙ ፡ ምድሮሙ ፡ በማዕዶተ ፡ ዮርዳንስ ፡ ዘመንገለ ፡ ሠረቀ ፡ ፀሐይ ፡ እምነ ፡ ቈላተ ፡ አርኖን ፡ እስከ ፡ ደብረ ፡ አኤርሞን ፡ ወኵሎ ፡ ምድረ ፡ አራባ ፡ ዘመንገለ ፡ ጽባሒሁ ።

12:2  ሴዎን ፡ ንጉሠ ፡ አሞሬዎን ፡ ዘይነብር ፡ ውስተ ፡ ሔሴቦን ፡ ወይኴንን ፡ እምነ ፡ አርኖን ፡ እንተ ፡ ሀለወት ፡ ውስተ ፡ ቈላት ፡ ዘአሐዱ ፡ ኅብር ፡ ወመንፈቀ ፡ ገላአድ ፡ እስከ ፡ ኢያቦቅ ፡ ደወሎሙ ፡ ለደቂቀ ፡ አሞን ፤

12:3  ወአራባ ፡ እስከ ፡ ባሕረ ፡ ኬኔሬ[ት] ፡ ዘመንገለ ፡ ጽባሕ ፡ ወእስከ ፡ [ባሕረ ፡] አራባ ፡ ባሕረ ፡ አሎን ፡ እምነ ፡ ጽባሒሁ ፡ እምነ ፡ ፍኖት ፡ ዘመንገለ ፡ አሲሞት ፡ እምነ ፡ ቴመን ፡ እንተ ፡ መትሕተ ፡ ሜዶት ፡ ወፈስጋ ።

12:4  ወአግ ፡ ንጉሠ ፡ ባሳን ፡ ዘተርፈ ፡ እምነ ፡ ውስቴቶሙ ፡ ለእለ ፡ ያርብሕ ፡ እለ ፡ ይነብሩ ፡ ውስተ ፡ አስጣሮት ፡ ወኤ(ኔ)ድራይን ።

12:5  መስፍን ፡ ውእቱ ፡ እምነ ፡ አድባረ ፡ አኤርሞን ፡ ወእምነ ፡ ሴኬ ፡ ወኵሉ ፡ ባሳን ፡ እስከ ፡ አድዋለ ፡ ጌርጌሲ ፡ ወመካት ፡ ወመንፈቀ ፡ ገላአድ ፡ ደወሉ ፡ ለሴዎን ፡ ንጉሠ ፡ ሔሴቦን ።

12:6  ሙሴ ፡ ቍልዔሁ ፡ ለእግዚአብሔር ፡ ወደቂቀ ፡ እስራኤል ፡ ቀተልዎሙ ፡ ወወሀቦሙ ፡ ርስቶሙ ፡ ሙሴ ፡ ኪያሃ ፡ ምድረ ፡ ለሮቤል ፡ ወለጋድ ፡ ወለመንፈቀ ፡ ነገደ ፡ መናሴ ።

12:7  ወእሉ ፡ እሙንቱ ፡ ነገሥተ ፡ አሞሬዎን ፡ እለ ፡ ቀተሉ ፡ ኢየሱስ ፡ ወደቂቀ ፡ እስራኤል ፡ በማዕዶተ ፡ ዮርዳንስ ፡ በመንገለ ፡ ባሕረ ፡ በለጋድ ፡ በውስተ ፡ ገዳሙ ፡ ለሊባኖስ ፡ ወእስከ ፡ ደብረ ፡ ቀልከ ፡ ዘያዐርግ ፡ ውስተ ፡ ሴይር ፡ ወወሀቦሙ ፡ ኢየሱስ ፡ ይእተ ፡ ምድረ ፡ ለሕዝበ ፡ እስራኤል ፡ ርስተ ፡ [ወ]አውረሶሙ ፤

12:8  በውስተ ፡ ደብርኒ ፡ ወበውስተ ፡ ገዳምኒ ፡ ወበአራባ ፡ ወበአሴዶት ፡ ወበአሕቀልትኒ ፡ ወናጌብ ፡ ወኬጤዎን ፡ ወአሞሬዎን ፡ ወከናኔዎን ፡ ወፌሬዜዎን ፡ ወኢየቡሴዎን ፡ ወኤዌዎን ።

12:9  ወንጉሠ ፡ ኢያሪኮ ፡ ወንጉሠ ፡ ጋይ ፡ እንተ ፡ ምእኃዘ ፡ ቤቴል ።

12:10  ንጉሠ ፡ ኢየሩሳሌም ፡ ንጉሠ ፡ ኬብሮን ።

12:11  ንጉሠ ፡ ኢየሬሙት ፡ ንጉሠ ፡ ላኪስ ።

12:12  ንጉሠ ፡ ኤለም ፡ ንጉሠ ፡ ጋዜር ።

12:13  ንጉሠ ፡ ዳቢር ፡ ንጉሠ ፡ ጊሲ[ር] ።

12:14  ንጉሠ ፡ ኤርሞት ፡ ንጉሠ ፡ አረት ።

12:15  ንጉሠ ፡ ሌምና ፡ ንጉሠ ፡ አዶለም ።

12:16  ንጉሠ ፡ ኤዳሕ ።

12:17  ንጉሠ ፡ ኤጠፋድ ፡ ንጉሠ ፡ ዖፌር ።

12:18  ንጉሠ ፡ ዖፌቀጤሳሮት ፡ ንጉሠ ፡ አሶም ።

12:19  ንጉሠ ፡ ሶምዖን ፡ ንጉሠ ፡ መም[ሮ]ት ።

12:20  ንጉሠ ፡ አዚፍ ፡ ንጉሠ ፡ ቃ[ዴ]ስ ።

12:21  ንጉሠ ፡ ዘቀቅ ፡ ንጉሠ ፡ መሬዶት ።

12:22  ንጉሠ ፡ ዬቆም ፡ ዘኬርሜል ፡ ንጉሠ ፡ ኤዶር ፡ ዘፌኔአዶር ።

12:23  ንጉሠ ፡ ሐጊ ፡ ዘገልያ ፡ ንጉሠ ፡ ተርሳ ፤

12:24  ኵሎሙ ፡ እሉ ፡ ነገሥት ፡ ዕሥራ ፡ ወትስዐቱ ።

Chapter 13

13:1  ወልህቀ ፡ ኢየሱስ ፡ ወኀለፈ ፡ መዋዕሊሁ ፡ ወይቤሎ ፡ እግዚአብሔር ፡ ለኢየሱስ ፡ ናሁ ፡ ኀለፈ ፡ መዋዕሊከ ፡ ለከ ፡ ወተርፈት ፡ ምድር ፡ ብዝኅት ፡ ዘይትወረሱ ።

13:2  ወዛቲ ፡ ይእቲ ፡ ምድር ፡ እንተ ፡ ተርፈት ፡ ደወሎሙ ፡ ለፍል[ስጥኤ]ም ፡ ወዘጌሲሪ ፡ ወዘከናኔዎን ፤

13:3  እምነ ፡ በድው ፡ ዘመንገለ ፡ ገጸ ፡ ግብጽ ፡ እስከ ፡ ደወሎሙ ፡ ለአቃሮን ፡ ዘመንገለ ፡ ፀጋሞሙ ፡ ለአሞሬዎን ፡ ዘይትኌለቍ ፡ ለኀምስቱ ፡ በሓውርተ ፡ ፊልስጢእም ፡ ለጋዛ ፡ ወለአዛጦን ፡ ወለአስቀሎን ፡ ወለጌቴዎን ፡ ወለአቃሮን ፡ ወለኤዌዎን ።

13:4  እምነ ፡ ቴመን ፡ ወኵሎ ፡ ምድረ ፡ ከናአን ፡ ዘቅድመ ፡ ጋዛ ፡ ወሲዶናሂ ፡ እስከ ፡ ጣፌቅ ፡ እስከ ፡ አድዋሊሆሙ ፡ ለአሞሬዎን ።

13:5  ወኵሎ ፡ ምድረ ፡ ገልየድ ፡ ዘፊልስጢእም ፡ ወኵሎ ፡ ሊባኖን ፡ እምነ ፡ ሠርቀ ፡ ፀሐይ ፡ ወእምነ ፡ ገልጋላ ፡ ዘመትሕተ ፡ ደብረ ፡ አኤርሞን ፡ እስከ ፡ ምብዋኦ ፡ ለኤመት ።

13:6  ኵሎ ፡ እለ ፡ ይነብሩ ፡ ውስተ ፡ አድባር ፡ እምነ ፡ ሊባኖስ ፡ እስከ ፡ ሙዓለ ፡ ሴሬት ፡ ዘማይም ፡ ዘፎሜም ፡ ኵሎ ፡ ሲዶና ፡ እለ ፡ አነ ፡ ኣጠፍኦሙ ፡ እምቅድመ ፡ ገጾሙ ፡ ለእስራኤል ፡ በከመ ፡ እቤ ፡ ለከ ።

13:7  ወይእዜኒ ፡ ክፍሎሙ ፡ ዛተ ፡ ምድረ ፡ ወአስተዋርሶሙ ፡ ለትስዐቱ ፡ ሕዝብ ፡ ወለመንፈቀ ፡ ሕዝብ ፡ ዘመናሴ ።

13:8  እምነ ፡ ዮርዳንስ ፡ እስከ ፡ ባሕር ፡ ዐቢይ ፡ ዘመንገለ ፡ ዐረበ ፡ ፀሐይ ፡ ይሁቦሙ ፡ ወትከውኖሙ ፡ ወሰኖሙ ፡ ባሐር ፡ ዐቢይ ።

13:9  ለእልክቱ ፡ ክልኤቱ ፡ ነገድ ፡ ለሮቤል ፡ ወለጋድ ፡ ወለመንፈቀ ፡ ነገደ ፡ መናሴ ፡ ወሀቦሙ ፡ ሙሴ ፡ በማዕዶተ ፡ ዮርዳንስ ፤

13:10  ዘመንገለ ፡ ሠረቀ ፡ ፀሐይ ፡ ወሀቦሙ ፡ ሙሴ ፡ ቍልዔሁ ፡ ለእግዚአብሔር ፡ እምነ ፡ አሮኤር ፡ እንተ ፡ ውስተ ፡ ማዕዶተ ፡ ፈለገ ፡ አርኖን ፡ ወሀገር ፡ እንተ ፡ ውስተ ፡ ማእከለ ፡ ቈላት ፡ ወኵሉ ፡ ሚሶር ፡ እምነ ፡ [ሜ]ዳቦን ።

13:11  ኵሉ ፡ አህጉረ ፡ ሴዎን ፡ ንጉሠ ፡ አሞሬዎን ፡ ዘነግሠ ፡ በሔሴቦን ፡ እስከ ፡ ደወሎሙ ፡ ለደቂቀ ፡ ዐሞን ፤

13:12  ወለገላአድ ፡ ወለደወሎሙ ፡ ለጌሲሪ ፡ ወለማኬጢ ፡ ወለኵሉ ፡ አድባረ ፡ አኤርሞን ፡ ወኵሎ ፡ ባሳን ፡ እስከ ፡ አካ ።

13:13  ኵሎ ፡ መንግሥቶ ፡ ለአግ ፡ ዘባሳን ፡ ዘነግሠ ፡ በኤድራይን ፡ ወበአስጣሮት ፡ ውእቱ ፡ ዘተርፈ ፡ እምነ ፡ ደሞሙ ፡ ለእለ ፡ ያርብሕ ፡ ወቀተሎ ፡ ሙሴ ፡ [ወአጥፍኦ ፡] ፡ ወ[ኢያ]ጥፍእዎሙ ፡ ደቂቀ ፡ እስራኤል ፡ ለጌሲሪ ፡ ወለመካጢ ፡ ወለከናኔዎን ፡ እለ ፡ ውስቴቶሙ ፡ [ወ]ይነብር ፡ ንጉሠ ፡ ጌሲሪ ፡ ወመካጢ ፡ ውስተ ፡ ደቂቀ ፡ እስራኤል ፡ እስከ ፡ ዮም ፡ ወእስከ ፡ ዛቲ ፡ ዕለት ።

13:14  እንበለ ፡ ነገደ ፡ ሌዊ ፡ እለ ፡ ኢነሥኡ ፡ መክፈልቶሙ ፡ እስመ ፡ እግዚአብሔር ፡ አምላከ ፡ እስራኤል ፡ ውእቱ ፡ መክፈልቶሙ ፡ በከመ ፡ ይቤሎሙ ፡ እግዚአብሔር ፡ ወከማሁ ፡ ተከፈሉ ፡ በከመ ፡ ከፈሎሙ ፡ ሙሴ ፡ ለደቂቀ ፡ እስራኤል ፡ በ[አራቦ]ት ፡ ዘሞአብ ፡ በማዕዶተ ፡ ዮርዳንስ ፡ ዘመንገለ ፡ ኢያሪኮ ።

13:15  ወወሀቦሙ ፡ ሙሴ ፡ ለነገደ ፡ ሮቤል ፡ በበ ፡ ሕዘቢሆሙ ።

13:16  ወኮነ ፡ ደወሎሙ ፡ እምነ ፡ አሮኤር ፡ እንተ ፡ መንገለ ፡ ቈላተ ፡ አርኖን ፡ ወሀገሮሂ ፡ ዘውስተ ፡ ቈላተ ፡ አርኖን ፡ ወኵሉ ፡ ሚሶር ፡ እስከ ፡ ሔሴቦን ።

13:17  ወኵሉ ፡ አህጉር ፡ ዘሀለወ ፡ ውስተ ፡ ሚሶር ፡ ወዴቦን ፡ ወበሞን ፡ ወበዓል ፡ ወአብያት ፡ ሜዔልሞት ።

13:18  ወባሳን ፡ ወበቄድሞን ፡ ወሜፋት ።

13:19  ወቃርያትም ፡ ወሴባማ ፡ ወሴራዶት ፡ ወሲዮን ፡ በደብረ ፡ ኤነብ ።

13:20  ወቤተ ፡ ፌጎር ፡ ወኤሴዶት ፡ (ወ)ፈስጋ ፡ ወኤቤታነሲኖት ።

13:21  ወኵሉ ፡ አህጉረ ፡ ሚሶር ፡ ወኵሉ ፡ መግሥተ ፡ ሴዎን ፡ ንጉሠ ፡ አሞሬዎን ፡ ዘቀተለ ፡ ሙሴ ፡ ወመሳፍንተ ፡ [ምድያም ፡] ወኤዊን ፡ ወሮቦ[ቅ] ፡ ወሱር ፡ ወኡር ፡ ወሮቤ ፡ መሳፍንተ ፡ ጰራሊያ ፡ ወእለ ፡ ይነብሩ ፡ ውስተ ፡ ሲዮን ።

13:22  ወበላዓም ፡ ወልደ ፡ ቤዖር ፡ ዘመቅሰም ፡ ቀተልዎሙ ፡ በምዕር ።

13:23  ወኮነ ፡ ደወሎሙ ፡ ለሮቤል ፡ (ወ)ዮርዳንስ ፡ ወሰኖሙ ፡ ወዝንቱ ፡ መክፈልቶሙ ፡ ለደቂቀ ፡ ሮቤል ፡ በቦ ፡ ነገዶሙ ፡ ወአህጉሪሆሙኒ ።

13:24  ወወሀቦሙ ፡ ሙሴ ፡ ለደቂቀ ፡ ጋድ ፡ በበ ፡ ነገዶሙ ።

13:25  ወኮነ ፡ ደወሎሙ ፡ ኢያዜር ፡ [ወ]ኵሉ ፡ አህጉረ ፡ ገላአድ ፡ ወመንፈቀ ፡ [ምድረ ፡] ደቂቀ ፡ ዐሞን ፡ እስከ ፡ ዐራባ ፡ እንተ ፡ ቅድመ ፡ ገጸ ፡ አራድ ።

13:26  ወእምነ ፡ ሔሴቦን ፡ እስከ ፡ [አ]ራቦት ፡ እንተ ፡ መንገለ ፡ መሴፋ ፡ ወቦጣኒ ፡ ወማዐን ፡ እስከ ፡ ደወሎሙ ፡ ለዴቦን ።

13:27  ወበአዶም ፡ ወዖትርጋ ፡ ወዐበይን ፡ ዘትነብራ ፡ ወሴኮታ ፡ ወሳፈን ፡ ወባዕድኒ ፡ ዘተርፈ ፡ መንግሥቱ ፡ ለሴዎን ፡ ንጉሠ ፡ ሔሴቦን ፤ ወዮርዳንስ ፡ ወሰኖሙ ፡ እስከ ፡ አሐዱ ፡ ሕብር ፡ ዘባሕረ ፡ ኬኔሬት ፡ በማዕዶተ ፡ ዮርዳንስ ፡ ጽባሓዊ ።

13:28  ወዝንቱ ፡ ውእቱ ፡ መክፈልቶሙ ፡ ለደቂቀ ፡ ጋድ ፡ በበ ፡ ነገዶሙ ፤ ወሜጡ ፡ ዘባኖሙ ፡ ቅድመ ፡ ፀሮሙ ፡ እስመ ፡ በበ ፡ ነገዶሙ ፡ ኮነ ፡ አህጉሪሆሙኒ ፡ ወደብረ ፡ አህጉሪሆሙኒ ።

13:29  ወወሀቦሙ ፡ ሙሴ ፡ ለመንፈቀ ፡ ነገደ ፡ መናሴ ፡ በበ ፡ ሕዘቢሆሙ ።

13:30  ወኮነ ፡ ደወሎሙ ፡ እምነ ፡ መሐና ፡ ወኵሉ ፡ መንግሥተ ፡ ባሳን ፡ ወኵሉ ፡ መንግሥተ ፡ አግ ፡ ንጉሠ ፡ ባሳን ፡ ወኵሉ ፡ አህጉረ ፡ ኢያኢር ፡ እለ ፡ ሀለዋ ፡ ውስተ ፡ ባሳን ፡ ስሳ ፡ አህጉር ።

13:31  ወመንፈቀ ፡ ምድረ ፡ ገላአድ ፡ ወበአስጣሮት ፡ ወበኤ(ን)ድራይን ፡ አህጉረ ፡ መንግሥቱ ፡ ለአግ ፡ እለ ፡ ውስተ ፡ ባሳን ፡ ለደቂቀ ፡ ማኪር ፡ ትውልደ ፡ መናሴ ፡ ወለመንፈቆሙሂ ፡ ለደቂቀ ፡ ማኪር ፡ ዘትውልደ ፡ መናሴ ፡ በበ ፡ ሕዘቢሆሙ ።

13:32  [*እሉ ፡ እሙንቱ ፡ እለ ፡*] አስተዋረሶሙ ፡ ሙሴ ፡ በማዕዶተ ፡ ዮርዳንስ ፡ በአራቦት ፡ ዘሞአብ ፡ በማዕዶተ ፡ ዮርዳንስ ፡ ዘመንገለ ፡ ጽባሒሁ ፡ ለኢያሪኮ ።

Chapter 14

14:1  ወእሉ ፡ እሙንቱ ፡ እለ ፡ አስተዋረስዎሙ ፡ ለደቂቀ ፡ እስራኤል ፡ በምድረ ፡ ከናአን ፡ ወአስተዋረስዎሙ ፡ እልዓዛር ፡ ካህን ፡ ወኢየሱስ ፡ ወልደ ፡ ነዌ ፡ ወመላእክተ ፡ ቤተ ፡ አበወ ፡ ነገዶሙ ፡ ለእስራኤል ።

14:2  በበ ፡ መክፈልቶሙ ፡ ተዋረሱ ፡ በከመ ፡ አዘዘ ፡ እግዚአብሔር ፡ በእደ ፡ ኢየሱስ ፡ ለትስዐቱ ፡ ነገድ ፡ ወለመንፈቀ ፡ ነገደ ፡ መናሴ ፡ እምነ ፡ ማዕዶተ ፡ ዮርዳንስ ።

14:3  ወለሌዋውያንሰ ፡ ኢወሀብዎሙ ፡ መክፈልቶሙ ።

14:4  እስመ ፡ ደቂቀ ፡ ዮሴፍ ፡ ክልኤቱ ፡ ነገድ ፡ እሙንቱ ፡ ዘመናሴ ፡ ወዘኤፍሬም ፡ ወኢወሀብዎሙ ፡ መክፈልቶሙ ፡ ምድረ ፡ ለሌዋውያን ፡ እንበለ ፡ አህጉረ ፡ ዘውስቴታ ፡ ይነብሩ ፡ ዘፈለጠ ፡ ሎሙ ።

14:5  በከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ፡ ደቂቀ ፡ እስራኤል ፡ ወተካፈሉ ፡ ምድረ ።

14:6  ወመጽኡ ፡ ደቂቀ ፡ ይሁዳ ፡ ኀበ ፡ ኢየሱስ ፡ በገልጋላ ፡ ወይቤሎ ፡ ካሌብ ፡ ወልደ ፡ ዬፎኔ ፡ ቀኔዛዊ ፡ ለሊከ ፡ ታአምር ፡ ቃለ ፡ ዘይቤሎ ፡ እግዚአብሔር ፡ ለሙሴ ፡ ብእሴ ፡ እግዚአብሔር ፡ በእንቲአየ ፡ ወአንተኒ ፡ ውስተ ፡ ቃዴስ ፡ በርኔ ።

14:7  እስመ ፡ አርብዓ ፡ ዓም ፡ ሊተ ፡ አመ ፡ ፈነወኒ ፡ ሙሴ ፡ ቍልዔሁ ፡ ለእግዚአብሔር ፡ እምነ ፡ ቃዴስ ፡ በርኔ ፡ ከመ ፡ ንርአያ ፡ ለይእቲ ፡ ምድር ፡ ወዜነውዎ ፡ ነገረ ፡ ዘከመ ፡ ሕሊናሆሙ ፤ አኀዊየ ፡ እለ ፡ ዐርጉ ፡ ምስሌየ ፡ ወአክሐድዎ ፡ ለልበ ፡ ሕዝብ ፡ ወአንሰ ፡ ገባእኩ ፡ እትልዎ ፡ ለእግዚአብሔር ፡ አምላክ[የ] ።

14:8  ወመሐለ ፡ ሙሴ ፡ በይእቲ ፡ ዕለት ፡ እንዘ ፡ ይብል ፡ ምድር ፡ እንተ ፡ ውስቴታ ፡ ዐረገ ፡ አንተ ፡ ለከ ፡ ትከውን ፡ መክፈልተከ ፡ ወለውሉድከ ፡ ለዓለም ፡ እስመ ፡ ገባእኩ ፡ እትልዎ ፡ ለእግዚአብሔር ፡ አምላክነ ።

14:9  ወይእዜኒ ፡ አልሀቀኒ ፡ እግዚአብሔር ፡ ናሁ ፡ አርብዓ ፡ ወኀምስቱ ፡ [ዓም ፡] እምአመ ፡ ይቤሎ ፡ እግዚአብሔር ፡ ለሙሴ ፡ ዘንተ ፡ ቃለ ፡ ወሖሩ ፡ እስራኤል ፡ ውስተ ፡ ገዳም ፤

14:10  ወይእዜኒ ፡ ናሁ ፡ ዮምኒ ፡ እንዘ ፡ [፹]ወ፭ዓመት ፡ ሊተ ፤

14:11  ዓዲየ ፡ ጽኑዕ ፡ አነ ፡ ከመ ፡ አመ ፡ ይፌንወኒ ፡ ሙሴ ፡ ከማሁ ፡ ጽኑዕ ፡ አነ ፡ ይእዜኒ ፡ ለወፂእ ፡ ውስተ ፡ ፀብእ ፡ ወለአቲውኒ ።

14:12  ወይእዜኒ ፡ እስእለከ ፡ ዘንተ ፡ ደብረ ፡ በከመ ፡ ይቤ ፡ እግዚአብሔር ፡ በይእቲ ፡ ዕለት ፡ እስመ ፡ ለሊከ ፡ ሰማዕከ ፡ ይእተ ፡ አሚረ ፡ ዘንተ ፡ ቃለ ፤ ወይእዜሰ ፡ ሰብአ ፡ አቂን ፡ ህየ ፡ ሀለው ፡ ወአህጉሪሆሙኒ ፡ ዐበይት ፡ ወጽኑዓት ፡ ወእመሰ ፡ ሀለወ ፡ እግዚአብሔር ፡ ምስሌየ ፡ ኣጠፍኦሙ ፡ በከመ ፡ ይቤለኒ ፡ እግዚአብሔር ።

14:13  ወባረኮ ፡ ኢየሱስ ፡ ወወሀቦ ፡ ኬብሮን ፡ ለካሌብ ፡ ለወልደ ፡ ዬፎኔ ፡ ቀኔዛዊ ፡ መክፈልቶ ፡ እስከ ፡ ዮም ፡ እስከ ፡ ዛቲ ፡ ዕለት ፡ እስመ ፡ ተለወ ፡ ትእዛዞ ፡ ለእግዚአብሔር ፡ አምላከ ፡ እስራኤል ።

14:15  ወስማሰ ፡ ቀዲሙ ፡ ለኬብሮን ፡ ህገረ ፡ አርጎብ ፡ ወደብረ ፡ አህጉር ፡ ይእቲ ፡ ለእለ ፡ ውስተ ፡ አቂም ፡ ወአዕረፈት ፡ ምድር ፡ እምነ ፡ ቀትል ።

Chapter 15

15:1  ወኮነ ፡ ደወሎሙ ፡ ለነገደ ፡ ይሁዳ ፡ በበ ፡ ሕዘቢሆሙ ፡ እምነ ፡ አድዋሊሆሙ ፡ ለ[ኤዶማውያን ፡] እምነ ፡ ገዳም ፡ ዘ[ፂን] ፡ እስከ ፡ ቃዴስ ፡ መንገለ ፡ አዜብ ።

15:2  ወኮነ ፡ ደወሎሙ ፡ እምነ ፡ ሊቦስ ፡ እስከ ፡ አሐዱ ፡ ኅብር ፡ ዘባሕረ ፡ አሊቄ ፡ እምነ ፡ ፍኖት ፡ እንተ ፡ ትወስድ ፡ ላዕለ ፡ ሊባ ።

15:3  ወተሐውር ፡ ቅድመ ፡ አቅራቢን ፡ ወትወፅእ ፡ ላዕለ ፡ ሴናቀ ፡ ወተዐርግ ፡ እምነ ፡ ሊ[ቦ]ስ ፡ ላዕለ ፡ ቃዴስ ፡ በርኔ ፡ ወትወፅእ ፡ ላዕለ ፡ አስሮን ፡ ወተዐርግ ፡ ላዕለ ፡ ሰራዳ ፡ ወትወፅእ ፡ ላዕለ ፡ ዐረበ ፡ ቃዴስ ።

15:4  ወተሐውር ፡ ላዕለ ፡ ሴልሞናን ፡ ወትወፅእ ፡ ላዕለ ፡ ቈላተ ፡ ግብጽ ፡ ወይከውን ፡ ሞጻእቱ ፡ ለደወሎሙ ፡ ላዕለ ፡ ባሕር ፡ ወዝንቱ ፡ ውእቱ ፡ ደወሎሙ ፡ ዘመንገለ ፡ አዜብ ።

15:5  ወደወሎሙ ፡ ዘመንገለ ፡ ጽባሕ ፡ ኵሉ ፡ ባሕረ ፡ አሊቄ ፡ እስከ ፡ ዮርዳንስ ፤ ወደወሎሙ ፡ ዘመንገለ ፡ መስዕ ፡ እምነ ፡ ፍኖት ፡ እንተ ፡ ኀበ ፡ ባሕር ፡ ወእምነ ፡ አሐዱ ፡ ኅብር ፡ ዘዮርዳንስ ።

15:6  ወየዐርግ ፡ ደወሎሙ ፡ ዲበ ፡ ቤተ ፡ ግላዓም ፡ ወየኀልፍ ፡ ዲበ ፡ ቦራ ፡ ወየዐርግ ፡ ደወሎሙ ፡ ላዕለ ፡ ሊቶንቤዎን ፡ ዘወልደ ፡ ሮቤል ።

15:7  ወየዐርግ ፡ ደወሎሙ ፡ ላዕለ ፡ ራብዕቱ ፡ ለቈላተ ፡ አኮር ፡ ወይወርድ ፡ ላዕለ ፡ ገልገል ፡ እንተ ፡ ቅድመ ፡ ማዕዶተ ፡ አደሚን ፡ እንተ ፡ መንገለ ፡ አዜቡ ፡ ለቈላት ፡ ወታወፅእ ፡ ላዕለ ፡ ነቅዐ ፡ ማየ ፡ ሄልዩ ፡ ወይከውን ፡ ሞጻእቱ ፡ ነቅዐ ፡ ሮጌል ።

15:8  ወየዐርግ ፡ ደወሎሙ ፡ እንተ ፡ ቈላተ ፡ ወልደ ፡ ኤኖ[ም] ፡ እንተ ፡ መንገለ ፡ አዜባ ፡ ለኢያቡስ ፡ እንተ ፡ ይእቲ ፡ አያሩሳሌም ፡ ወያወፅእ ፡ ደወሎሙ ፡ ውስተ ፡ ርእሰ ፡ ደብር ፡ ዘሀለወ ፡ ቅድመ ፡ ቈላተ ፡ ኤኖም ፡ ዘኀበ ፡ ባሕር ፡ እንተ ፡ ውስተ ፡ አሐዱ ፡ ኅብር ፡ ዘምድረ ፡ ረፋይን ፡ ዘመንገለ ፡ መስዕ ።

15:9  ወይወስድ ፡ ደወሎሙ ፡ እምነ ፡ ውእቱ ፡ ርእሰ ፡ ደብር ፡ ላዕለ ፡ ነቅዐ ፡ ማይ ፡ ዘነፍቶ ፡ ወያበጽሕ ፡ ውስተ ፡ ደብረ ፡ ኤፍ[ሮን] ፡ ወይወስድ ፡ ደወሎሙ ፡ ላዕለ ፡ [በዓል ፡] እንተ ፡ ይእቲ ፡ ሀገረ ፡ ኢያሪን ።

15:10  ወየኀልፍ ፡ ደወሎሙ ፡ እምነ ፡ በዓል ፡ ላዕለ ፡ ባሕር ፡ ወየኀልፍ ፡ እንተ ፡ ደወለ ፡ አሳሬቱስ ፡ እንተ ፡ መንገለ ፡ አዜባ ፡ ለሀገረ ፡ ኢያሪም ፡ ወመስዓ ፡ ለከሰሎን ፡ ወይወርድ ፡ ላዕለ ፡ ሀገረ ፡ ኤልዩ ፡ ወየኀልፍ ፡ ላዕለ ፡ ሊባ ።

15:11  ወያወፅእ ፡ ደወሎሙ ፡ ላዕለ ፡ አዜባ ፡ ለዐቃሮን ፡ ወይገብእ ፡ ላዕለ ፡ መስዕ ፡ ወያወፅእ ፡ ደወሎሙ ፡ ዲበ ፡ ሶቆት ፡ ወየኀልፍ ፡ ደወሎሙ ፡ ላዕለ ፡ አዜብ ፡ ወያወፅእ ፡ ላዕለ ፡ ሌብና ፡ ወይከውን ፡ ሞፃእቱ ፡ ለደወሎሙ ፡ ዲበ ፡ ባሕር ፤ ወደወሎሙኒ ፡ ዘመንገለ ፡ ባሕር ፡ ባሕር ፡ ዐቢይ ፡ ወሰኖሙ ።

15:12  ወዝንቱ ፡ ውእቱ ፡ ደወሎሙ ፡ ለደቂቀ ፡ ይሁዳ ፡ ዘአውዶሙ ፡ በበ ፡ ሕዘቢሆሙ ።

15:13  ወለካሌብ ፡ ወልደ ፡ ዬፎኔ ፡ ወሀቦ ፡ መክፈልቶ ፡ በማእከሎሙ ፡ ለደቂቀ ፡ ይሁዳ ፡ በትእዛዘ ፡ እግዚአብሔር ፡ ወወሀቦ ፡ ኢየሱስ ፡ ሀገረ ፡ አ[ር]ቦቅ ፡ ደብረ ፡ አህጉረ ፡ ኤናቅ ፡ እንተ ፡ ይእቲ ፡ ኬብሮን ።

15:14  ወሠረዎሙ ፡ እምህየ ፡ ካሌብ ፡ ወልደ ፡ ዬፎኔ ፡ ለሠለስቲሆሙ ፡ ደቂቀ ፡ ኤናቅ ፡ ለ[ሡ]ሲ ፡ ወለጠ[ለ]ሚ ፡ ወለአኪማ ።

15:15  ወዐርገ ፡ እምህየ ፡ ካሌብ ፡ ላዕለ ፡ እለ ፡ ይነብሩ ፡ ውስተ ፡ ዳቢር ፡ ወስማ ፡ ለዳቢር ፡ ቀዲሙ ፡ ሀገረ ፡ መጽሐፍ ።

15:16  ወይቤ ፡ ካሌብ ፡ ዘነሥኣ ፡ ወቀተላ ፡ ለሀገረ ፡ መጽሐፍ ፡ ወአስተጋብኣ ፡ እሁቦ ፡ አ[ስ]ካ ፡ ወለትየ ፡ ትኵኖ ፡ ብእሲተ ።

15:17  ወነሥኣ ፡ ጎቶንዬል ፡ ወልደ ፡ ቄኔዝ ፡ እኁሁ ፡ ለካሌብ ፡ ወወሀቦ ፡ አ[ስ]ካ ፡ ወለቶ ፡ ትኵኖ ፡ ብእሲተ ።

15:18  ወእምዝ ፡ ሶበ ፡ ለሐዊር ፡ ተማከረቶ ፡ እንዘ ፡ ትብል ፡ እስአሎ ፡ ለአቡየ ፡ ገራህተ ፡ ወጸርኀት ፡ በዲበ ፡ አድግ ፡ ወይቤላ ፡ ካሌብ ፡ ምንተ ፡ ኮንኪ ።

15:19  ወትቤሎ ፡ ሀበኒ ፡ በረከተ ፡ እስመ ፡ ውስተ ፡ ምድረ ፡ ናጌ[ብ] ፡ መጠውከኒ ፡ ሀበኒ ፡ ቦታኒስ ፡ ወወሀባ ፡ ጎኔትላን ፡ እንተ ፡ ላዕሉ ፡ ወጎኔትላን ፡ እንተ ፡ ታሕቱ ፡ እምርስቶሙ ፡ ለነገደ ፡ ደቂቀ ፡ ይሁዳ ።

15:21  ወኮነ ፡ አህጉሪሆሙ ፡ አህጉር ፡ ዘነገደ ፡ ደቂቀ ፡ ይሁዳ ፡ በውስተ ፡ አድዋለ ፡ ኤዶም ፡ በገዳሙ ፡ ወቤሴሌኤል ፡ ወኣራ ፡ ወአሶር ።

15:22  ወኢቀም ፡ ወሬግማ ፡ ወአሩሔል ።

15:23  ወቃዴስ ፡ ወአስሪዮኔም ፡ ወሚናን ።

15:24  ወ[በ]ልማናን ፡ ወአዕጻዳቲሆን ።

15:25  ወአህጉረ ፡ አሴሮን ፡ እንተ ፡ ይእቲ ፡ አሶር ።

15:26  ወሴን ፡ ወሰማዓ ፡ ወሞላዳ ።

15:27  ወሴሪ ፡ ወቤፋላድ ።

15:28  ወኮላሶኤዳ ፡ ወበርሳቤሕ ፡ ወአዕጻዳቲሆን ።

15:29  ባላ ፡ ወባቆብ ፡ ወደብራቲሆን ፡ ወኣሶም ።

15:30  ወኤለቦሂ[ዳ]ድ ፡ ወቤቴል ፡ ወኤርማ ።

15:31  ወሴቄላቅ ፡ ወመከርም ፡ ወሴተነኅ ።

15:32  ወላቦስ ፡ ወሳሌ ፡ ወኤርሞት ፡ ዕሥራ ፡ ወትስዑ ፡ አህጉር ፡ ወአዕጻዳቲሆን ።

15:33  በውስተ ፡ ሐቅል ፡ አስጣሖል ፡ ወ[ሳ]ራ ፡ ወኣሳ ።

15:34  ወራሜን ፡ እንተ ፡ ላዕሉ ፡ ወኢዱቶት ፡ ወመሐንስ ።

15:35  ወኤርሙት ፡ ወኦዶለም ፡ ወሜምራ ፡ ወሰኦኮ ፡ ወሐዜቃ ።

15:36  ወሰቃርም ፡ ወገዴራ ፡ ወ[ደብራቲ]ሃ ፡ ዐሥሩ ፡ ወአርባዕ ፡ አህጉር ፡ ወአዕጻዳቲሆን ።

15:37  ሴና ፡ ወአዳሳን ፡ ወመገድገድ ።

15:38  ወአዳለል ፡ ወመ[ስ]ፋ ፡ ወይቃሬል ፡ ወማኬሳ ።

15:39  ወቦሴዶት ፡ ወይዴሓ ፡ ዶሌያ ።

15:40  ወኮብራ ፡ ወማክስ ፡ ወመሐኮስ ።

15:41  ወጌዶር ፡ ወቦጋዲየል ፡ ወኖማን ፡ ወመቄደም ፡ ዐሥሩ ፡ ወስሱ ፡ አህጉር ፡ ወአዕጻዳቲሆን ።

15:42  ሌምና ፡ ወኤተቅ ፡ ወአኖክ ።

15:43  ወአድና ፡ ወናሲብ ።

15:44  ወኢለም ፡ ወአቄዝም ፡ ወበቴሳር ፡ ወኤሎም ፡ ዐሥሩ ፡ አህጉር ፡ ወአዕጻዳቲሆን ።

15:45  አቃሮን ፡ ወአዕጻዳቲሃ ፡ ወደብራቲሆን ።

15:46  እምነ ፡ አቃሮን ፡ ጌማ ፡ ወኵሉ ፡ ዘሀለወ ፡ ቅሩበ ፡ አሴዶት ፡ ወአዕጻዳቲሆን ።

15:47  አሴዬዶት ፡ ወአዕጻዳቲሃ ፡ ወ[ደብራቲ]ሃ ፡ ወጋዛ ፡ ወአዕጻዳቲሃ ፡ ወደብራቲሃ ፡ እስከ ፡ ፈለገ ፡ ግብጽ ፡ ወባሕር ፡ ዐባይ ፡ ትፈልጦ ።

15:48  ወአድባረ ፡ ሳሚርሂ ፡ ወኢዬቴር ፡ ወሦካ ።

15:49  ወሬና ፡ ወሀገረ ፡ መጽሐፍ ፡ ይእቲ ፡ ዳቢር ።

15:50  ወአኖን ፡ ወሴቄማ ፡ ወኤሳማ ።

15:51  ወጎሶም ፡ ወ[ከ]ሉ ፡ ወ[ከ]ና ፡ ዐሥሩ ፡ ወአሐቲ ፡ አህጉር ፡ ወአዕጻዳቲሆን ።

15:52  ኤሬም ፡ ወሬምና ፡ ወ[ሶ]ማ ።

15:53  ወኢየማይን ፡ ወቤታቁ ፡ ወፋቁሕ ።

15:54  ወኤውማ ፡ ወአህጉረ ፡ አርቦቅ ፡ ይእቲ ፡ ኬብሮን ፡ ወሶሬት ፡ ትስዑ ፡ አህጉር ፡ ወደብራቲሆን ።

15:55  መሖር ፡ ወኬርሜል ፡ ወኦዚብ ፡ ወኢጣን ።

15:56  ወኢያሪዬል ፡ ወኢያሪቅም ፡ ወዘቃይን ።

15:57  ወጋባ ፡ ወተምና ፡ ተስዑ ፡ አህጉር ፡ ወአዕጻዳቲሆን ።

15:58  ወአ[ሉ]ዋ ፡ ወቤትሱር ፡ ወጌዶር ።

15:59  ወመገዶት ፡ ወቤተነም ፡ ወኤቴቁም ፡ ስሱ ፡ አህጉር ፡ ወአዕጻዳቲሆን ።

15:60  ቴቆ ፡ ወኤፍራታ ፡ እንተ ፡ ይእቲ ፡ ቤተ ፡ ልሔም ፡ ወፋጎር ፡ ወኤጣን ፡ ወቁሎን ፡ ወጠጦን ፡ ወሶቤሔ ፡ ወቃሬ ፡ ወጋሌም ፡ ወኤቴር ፡ ወመኖኮ ፡ ዐሥሩ ፡ [ወአሐቲ ፡] አህጉር ፡ ወአዕጻዳቲሆን ። ቃርያት ፡ በዐል ፡ እንተ ፡ ይእቲ ፡ ሀገረ ፡ ኢያርም ፡ ወሶቤታ ፡ ክልኤ ፡ አህጉር ፡ ወደብራቲሆን ።

15:61  ወባልዳጊስ ፡ ወተራበዐም ፡ ወኤሞን ።

15:62  ወሰኪዮዛን ፡ ወነፍላዛን ፡ ወአህጉሪሆን ፡ ሳለም ፡ ወአቃዴስ ፡ ሰብዑ ፡ አህጉር ፡ ወአዕጻዳቲሆን ።

15:63  ወኢየቡሴዎን ፡ እለ ፡ ይነብሩ ፡ ውስተ ፡ ኢየሩሳሌም ፡ ስእንዎሙ ፡ ደቂቀ ፡ ይሁዳ ፡ አጥፍኦቶሙ ፡ ወነበሩ ፡ ኢየቡሴዎን ፡ ውስተ ፡ ኢየሩሳሌም ፡ እስከ ፡ ይእቲ ፡ ዕለት ።

Chapter 16

16:1  ወኮነ ፡ ደወሎሙ ፡ ለደቂቀ ፡ ዮሴፍ ፡ እምነ ፡ ዮርዳንስ ፡ ዘመንገለ ፡ ኢያሪኮ ፡ እምነ ፡ ጽባሒሁ ፡ ወየዐርግ ፡ እምነ ፡ ኢያሪኮ ፡ ላዕለ ፡ አድባር ፡ ዘውስተ ፡ ገዳም ፡ ውስተ ፡ ቤቴል ፡ ሉዛ ።

16:2  ወይወፅእ ፡ ውስተ ፡ ቤቴል ፡ ወየኀልፍ ፡ ላዕለ ፡ ደወለ ፡ ከሮንቲ ።

16:3  ወየኀልፍ ፡ ላዕለ ፡ ደወሎሙ ፡ ሰብዐቱ ፡ አፍላግ ፡ በውስተ ፡ ደወሎሙ ፡ ለቤቶሮን ፡ ዘታሕትየ ፡ ወይከውን ፡ ሞጻእቶሙ ፡ ላዕለ ፡ ባሕር ።

16:4  ወተወርሱ ፡ ደቂቀ ፡ ዮሴፍ ፡ ኤፍሬም ፡ ወምናሴ ።

16:5  ወኮነ ፡ ደወሎሙ ፡ ለኤፍሬምኒ ፡ በበ ፡ ሕዘቢሆሙ ፡ ወኮነ ፡ ደወለ ፡ ርስቶሙ ፡ እምነ ፡ ጽባሒሃ ፡ ለአጣሮት ፡ ወኤሮኅ ፡ ወቤቶሮን ፡ እንተ ፡ ላዕሉ ፡ ወጋዛራ ።

16:6  ወየኀልፍ ፡ ደወሎሙ ፡ ላዕለ ፡ ባሕር ፡ እምነ ፡ መስዓ ፡ ለቴርማ ፡ ወየኀልፍ ፡ ላዕለ ፡ ጽባሕ ፡ ዲበ ፡ ቴናታ ፡ ወውስተ ፡ ኤላስ ፡ ወየኅልፍ ፡ እምነ ፡ ጽባሕ ፡ ውስተ ፡ ኢያኖከ ።

16:7  ወውስተ ፡ መራኮ ፡ ወአጣሮት ፡ ወአዕጻዳቲሆን ፡ ወይበውእ ፡ ዲበ ፡ ኢያሪኮ ፡ ወይወፅእ ፡ ዲበ ፡ ዮርዳንስ ።

16:8  ወእምነ ፡ [ጣ]ፉ ፡ የሐውር ፡ ደወሎሙ ፡ ላዕለ ፡ ባሕር ፡ ዲበ ፡ ኬልቃና ፡ ወይከውን ፡ ሞጻእቶሙ ፡ ዲበ ፡ ባሕር ፡ ወዝንቱ ፡ ውእቱ ፡ ርስቶሙ ፡ ለሕዝበ ፡ ኤፍሬም ፡ በበ ፡ ሕዘቢሆሙ ።

16:9  ወአህጉርኒ ፡ እለ ፡ ፈለጡ ፡ ለደቂቀ ፡ ኤፍሬም ፡ በውስተ ፡ ማእከለ ፡ ርስቶሙ ፡ ለደቂቀ ፡ መናሴ ፡ ኵሉ ፡ አህጉሪሆሙ ፡ ወአዕጻዳቲሆሙ ።

16:10  ወኢያጥፍኦሙ ፡ ኤፍሬም ፡ ለከናኔዎን ፡ እለ ፡ ይነብሩ ፡ ውስተ ፡ ጋዜር ፡ ወነበሩ ፡ ከናኔዎን ፡ ውስተ ፡ ኤፍሬም ፡ እስከ ፡ ዮም ፡ እስከ ፡ አመ ፡ ዐርገ ፡ ፈርዖን ፡ ንጉሠ ፡ ግብጽ ፡ ወነሥኣ ፡ ወአውዐያ ፡ በእሳት ፡ ወለከናኔዎን ፡ ወለፌሬዜዎን ፡ ወለእለ ፡ ይነብሩ ፡ ውሰተ ፡ ጋዜር ፡ ወግእዎሙ ፡ ወወሀባ ፡ ፈርዖን ፡ ለወለቱ ፡ ሕፄሃ ፡ ኪያሃ ።

Chapter 17

17:1  ወኮነ ፡ ደወሎሙ ፡ ለነገደ ፡ ደቂቀ ፡ መናሴ ፡ እስመ ፡ ውእቱ ፡ በኵሩ ፡ ለዮሴፍ ፤

17:2  ለማኪር ፡ ለበኵሩ ፡ ለመናሴ ፡ አቡሁ ፡ ለገላአድ ፡ እስመ ፡ ብእሲ ፡ መስተቃትል ፡ ውእቱ ፡ በውስተ ፡ ገላአድ ፡ ወበውስተ ፡ ባሳን ።

17:3  ወኮነ ፡ ለደቂቀ ፡ መናሴ ፡ ለእለ ፡ ተርፉ ፡ በበሕዘቢሆሙ ፡ ለደቂቀ ፡ ኢዬዚ ፡ ወለደቂቀ ፡ ቄሌዚ ፡ ወለደቂቀ ፡ ኢዬሪዬል ፡ ወለደቂቀ ፡ ኢሐኬም ፡ ወለደቂቀ ፡ ዖፌር ፤

17:4  እሉ ፡ ተባዕቶሙ ፡ በበ ፡ ሕዘቢሆሙ ።

17:5  ወሰልጰአድ ፡ ወልደ ፡ ዖፌር ፡ አልቦ ፡ ደቂቀ ፡ እንበለ ፡ አዋልድ ፡ ወዝንቱ ፡ ውእቱ ፡ አስማቲሆን ፡ ለአዋልደ ፡ ሰልጰአድ ፡ መሐላ ፡ ወኑኃ ፡ ወሔግላ ፡ ወሜልካ ፡ ወቴርሳ ።

17:6  ወቆማ ፡ ቅድመ ፡ እልዐዛር ፡ ካህን ፡ ወቅድመ ፡ ኢየሱስ ፡ ወቅድመ ፡ መላእክት ፡ ወይቤላ ፡ እግዚአብሔር ፡ አዘዘ ፡ በእደ ፡ ሙሴ ፡ ከመ ፡ የሀበነ ፡ ርስተ ፡ በውስተ ፡ ማእከለ ፡ አኀዊነ ፡ ወወሀብዎን ፡ በትእዛዘ ፡ እግዚአብሔር ፡ ምስለ ፡ አኀዊሁ ፡ ለአቡሆን ።

17:7  ወወድቀ ፡ ሐብሎን ፡ እምነ ፡ ሐናስ ፡ ወሐቅለ ፡ ለቤቅ ፡ እምነ ፡ ገላአድ ፡ ዘማዕዶተ ፡ ዮርዳንስ ።

17:8  እስመ ፡ አዋልደ ፡ ደቂቀ ፡ መናሴ ፡ ተወርሳ ፡ ርስተ ፡ በማእከለ ፡ አኀዊሆን ፤ ወምድረ ፡ ገላአድሰ ፡ ኮነት ፡ ለደቂቀ ፡ መናሴ ፡ ለእለ ፡ ተርፉ ።

17:9  ወኮነ ፡ ደወሎሙ ፡ ለደቂቀ ፡ መናሴ ፡ ዴላነት ፡ እንተ ፡ ቅድመ ፡ ገጾሙ ፡ ለደቂቀ ፡ ሐነት ፡ ወየሐውር ፡ ላዕለ ፡ ደወሎሙ ፡ ለኢያሚን ፡ ወውስተ ፡ ኢያሲብ ፡ ዲበ ፡ ነቅዐ ፡ ተፍቶት ።

17:10  ለመናሴ ፡ ኮነ ፤ ወጣፌት ፡ ላዕለ ፡ ደወሎሙ ፡ ለመናሴ ፡ ለደቂቀ ፡ ኤፍሬም ።

17:11  ወይወርድ ፡ ደወሎሙ ፡ ላዕለ ፡ ቈላተ ፡ ቃራና ፡ ዘኀበ ፡ አዜብ ፡ ወዲበ ፡ ቈላተ ፡ ኢያሪዬል ፡ ዎጤሬምንቶን ፡ ዘኤፍሬም ፡ ማእከለ ፡ አህጉረ ፡ መናሴ ፡ ወደወሉሂ ፡ ለመናሴ ፡ ላዕለ ፡ መስዕ ፡ እንተ ፡ ኀበ ፡ ፈለግ ፡ ወኮነ ፡ ሞጻእቱ ፡ ባሕር ፤ እንተ ፡ መንገለ ፡ አዜቡ ፡ ለኤፍሬም ፡ ወእንተ ፡ ኀበ ፡ መስዑ ፡ ለመናሴ ፡ ወባሕር ፡ ወሰኖሙ ፡ [ወበአሴር ፡ ይትራከቡ ፡ በመስዕ ፡ ወበይሳኮር ፡ እምጽባሕ ።] ወይከውን ፡ ለመናሴ ፡ በይሳኮር ፡ ወበአሴር ፡ ወቶሐን ፡ ወአዕጻዳቲሆን ፡ ወእለ ፡ ይነብሩ ፡ ውስተ ፡ ዶር ፡ ወአዕጻዳቲሃ ፡ ወእለ ፡ ይነብሩ ፡ ውስተ ፡ ጌዶ ፡ ወአዕጻዳቲሃ ፡ ወሣልስተ ፡ እዴሃ ፡ ለመ[ፌ]ታ ፡ ወአዕጻዳቲሃ ።

17:12  ወስእኑ ፡ ደቂቀ ፡ መናሴ ፡ አጥፍኦቶን ፡ ለእላንቱ ፡ አህጉር ፡ ወመጽኡ ፡ ከናኔዎን ፡ ይንበሩ ፡ ውስተ ፡ ይእቲ ፡ ምድር ።

17:13  ወጸንዕዎሙ ፡ እስራኤል ፡ ወቀነይዎሙ ፡ ወአጥፍኦ ፡ ባሕቱ ፡ ኢያጥፍእዎሙ ።

17:14  ወተዋሥእዎ ፡ ደቂቀ ፡ ዮሴፍ ፡ [ለኢየሱስ ፡] ወይቤልዎ ፡ በበይነ ፡ ምንት ፡ አውረስከነ ፡ አሐደ ፡ ርስተ ፡ ወአሐደ ፡ ሐብለ ፡ እንዘ ፡ ብዙኅ ፡ ሕዝብ ፡ አነ ፡ ወእግዚአብሔር ፡ ባረከኒ ።

17:15  ወይቤሎሙ ፡ ዕረጉ ፡ ኀበ ፡ ኦም ፡ ወአንጽሕዎ ፡ ለክሙ ፡ እመ ፡ ይጸብበክሙ ፡ ደብረ ፡ ኤፍሬም ።

17:16  ወይቤሉ ፡ ኢየአክለነ ፡ ደብረ ፡ ኤፍሬም ፡ ወከናኔዎን ፡ እለ ፡ ይነብሩ ፡ ውስቴቱ ፡ ቦሙ ፡ አፍራሰ ፡ ኅሩየ ፡ ወኀፂነ ፡ በቤቴስ ፡ ወበአዕጻዲሃ ፡ በቈላተ ፡ [ኢይዝ]ራኤል ።

17:17  ወይቤሎሙ ፡ ኢየሱስ ፡ ለደቂቀ ፡ ዮሴፍ ፡ እመ ፡ ብዙኅ ፡ ሕዝብ ፡ አንተ ፡ ወብከ ፡ ዐቢየ ፡ ኀይለ ፡ ኢይከውነከ ፡ አሐዱ ፡ ርስት ።

17:18  እስመ ፡ ሐቅል ፡ ለከ ፡ ውእቱ ፡ እስመ ፡ ገዳም ፡ ውእቱ ፡ ወታነጽሖ ፡ ለከ ፡ ወይከውነከ ፡ እስከ ፡ ታጠፍኦሙ ፡ ለከናኔዎን ፡ እስመ ፡ አፍራሰ ፡ ኅሩየ ፡ ቦሙ ፡ ወለሊከ ፡ አጽናዕካሆሙ ።

Chapter 18

18:1  ወተጋብኡ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ውስተ ፡ ሴሎ ፡ ወተከልዋ ፡ ህየ ፡ ለደብተራ ፡ መርጡል ፡ ወአጽንዕዋ ፡ ለምድር ፡ እሙንቱ ።

18:2  ወተርፉ ፡ ደቂ[ቀ ፡ እስራኤል ፡] እለ ፡ ኢተወርሱ ፡ ሰብዐቱ ፡ ነገድ ።

18:3  ወይቤሎሙ ፡ ኢየሱስ ፡ ለደቂቀ ፡ እስራኤል ፡ እስከ ፡ ማኡዜኑ ፡ ታፀንሕዋ ፡ ለምድር ፡ ከመ ፡ ኢትትዋረስዋ ፡ እንተ ፡ ወሀበክሙ ፡ እግዚአብሔር ፡ አምላክነ ።

18:4  አውፅኡ ፡ እምውስቴትክሙ ፡ ሠለስተ ፡ ዕደወ ፡ እምነ ፡ ነገድ ፡ ወይትነሥኡ ፡ ይዑድዋ ፡ ለምድር ፡ ወይጽሐፍዋ ፡ በቅድሜየ ፡ ዘከመ ፡ ዖድዋ ።

18:5  ወርእይዋ ፡ ወመጽኡ ፡ ኀቤሁ ፡ ወከፈሎሙ ፡ ሰብዐተ ፡ ክፍለ ፡ ወአቀመ ፡ ሎቱ ፡ ይሁዳ ፡ ደወሎ ፡ መንገለ ፡ አዜብ ፡ ወደቂቀ ፡ ዮሴፍ ፡ አቀሙ ፡ ሎሙ ፡ መንገለ ፡ መስዕ ።

18:6  ወአንትሙሰ ፡ ክፍልዋ ፡ ለምድር ፡ ሰብዐተ ፡ ክፍለ ፡ ወአምጽኡ ፡ ኀቤየ ፡ ዝየ ፡ ወኣበውእ ፡ ለክሙ ፡ ርስተ ፡ ቅድመ ፡ እግዚአብሔር ፡ አምላክክሙ ።

18:7  እስመ ፡ አልቦሙ ፡ ክፍለ ፡ ደቂቀ ፡ ሌዊ ፡ ምስሌክሙ ፡ እስመ ፡ ክህነቱ ፡ ለእግዚአብሔር ፡ ክፍሎሙ ፤

18:8  ወጋድሰ ፡ ወሮቤል ፡ ወመንፈቀ ፡ ነገደ ፡ መናሴ ፡ ነሥኡ ፡ ርስቶሙ ፡ በማዕዶተ ፡ ዮርዳንስ ፡ ጽባሓዊ ፡ ዘወሀቦሙ ፡ ሙሴ ፡ ቍልዔሁ ፡ ለእግዚአብሔር ።

18:9  ወተንሥኡ ፡ እሙንቱ ፡ ዕደው ፡ ወሖሩ ፡ ወአዘዞሙ ፡ ኢየሱስ ፡ ለእለ ፡ የሐውሩ ፡ ይዑድዋ ፡ ለምድር ፡ ወይቤሎሙ ፡ ሑሩ ፡ ዑድዋ ፡ ለምድር ፡ ወግብኡ ፡ ኀቤየ ፡ ዝየ ፡ ከመ ፡ አብእ ፡ ለክሙ ፡ ቅድመ ፡ እግዚአብሔር ፡ መክፈልተክሙ ፡ በሴሎ ።

18:10  ወሖሩ ፡ ወዖድዋ ፡ ለምድር ፡ ወርእይዋ ፡ ወጸሐፍዋ ፡ ውስተ ፡ መጽሐፍ ፡ በበ ፡ አህጉሪሃ ፡ ወአምጽኡ ፡ ኀበ ፡ ኢየሱስ ።

18:11  ወአብአ ፡ ኢየሱስ ፡ መክፈልቶሙ ፡ ቅድመ ፡ እግዚአብሔር ፡ በሴሎ ።

18:12  ወበጽሖ ፡ ክፍሉ ፡ ለብንያሚ ፡ ቅድመ ፡ በበ ፡ ሕዘቢሁ ፡ ወረከቦሙ ፡ ደወለ ፡ መክፈልቶሙ ፡ ማእከለ ፡ ይሁዳ ፡ ወማእከለ ፡ ዮሴፍ ።

18:13  ወኮነ ፡ ደወሎሙ ፡ [ዘመንገለ ፡ መስዕ ፡] እምነ ፡ ዮርዳንስ ፡ ወየዐርግ ፡ ደወሎሙ ፡ ላዕለ ፡ አዜባ ፡ ለኢየሪኮ ፡ ወይመጽእ ፡ ዲበ ፡ መስዕ ፡ ወየዐርግ ፡ ላዕለ ፡ ደብር ፡ ዘኀበ ፡ ባሕር ፡ ወይከውን ፡ ሞጻእቱ ፡ መድብራይጥስ ፡ ዘቤቶን ።

18:14  ወየኀልፍ ፡ እምህየ ፡ ላዕለ ፡ አድባረ ፡ ሉዛ ፡ እንተ ፡ መንገለ ፡ ዘባነ ፡ ሉዛ ፡ ዲበ ፡ አዜባ ፡ እንተ ፡ ይእቲ ፡ ቤቴል ፡ ወይወርድ ፡ ላዕለ ፡ ደወለ ፡ አጣሮት ፡ ዘሆሬኅ ፡ እንተ ፡ ላዕለ ፡ አድባር ፡ ዘመንገለ ፡ አዜባ ፡ ለቤቶሮን ፡ ታሕ[ታይ] ።

18:15  ወየኀልፍ ፡ ደወሎሙ ፡ ላዕለ ፡ አሐዱ ፡ ኅብር ፡ ዘይኔጽር ፡ ላዕለ ፡ ባሕር ፡ እንተ ፡ መንገለ ፡ አዜቡ ፡ ለደብር ፡ ዘቅድመ ፡ ቤቶሮን ፡ ዘዲበ ፡ አዜብ ፡ ወይከውን ፡ ሞጻእቱ ፡ ላዕለ ፡ ቀርየተ ፡ በዓል ፡ እንተ ፡ ይእቲ ፡ ቀርያትያርም ፡ ሀገረ ፡ ደቂቀ ፡ ይሁዳ ፡ ወዝንቱ ፡ ውእቱ ፡ ደወሎሙ ፡ ዘመንገለ ፡ ባሕር ።

18:16  ወደወሎሙኒ ፡ ዘመንገለ ፡ አዜብ ፡ እምነ ፡ ቀርያተ ፡ በዓል ፡ ወየኀልፍ ፡ ደወሎሙ ፡ ላዕለ ፡ ጋይን ፡ ዲበ ፡ ነቅዐ ፡ ማይ ፡ ዘነፍቶ ።

18:17  ወይወርድ ፡ ደወሎሙ ፡ ላዕለ ፡ አሐዱ ፡ ኅብር ፡ ዘቅድመ ፡ ናጴሳነም ፡ ዘመንገለ ፡ ገቦሃ ፡ [ለ]ኤመቀርፋይን ፡ ዘኀበ ፡ መስዕ ፡ ወይወርድ ፡ እምነ ፡ ናጲን ፡ ዲበ ፡ ዘባነ ፡ ኢየቡሴ ፡ ዘኀበ ፡ አዜብ ፡ ወይወርድ ፡ ዲበ ፡ ነቅዐ ፡ ሮጌል ።

18:18  ወየኀልፍ ፡ ዲበ ፡ ነቅዐ ፡ ቤታሳሚስ ፡ ወይበውእ ፡ ዲበ ፡ ከልዮት ፡ እንተ ፡ ቅድመ ፡ ዐቀበ ፡ ኤታሚን ፡ ወይወርድ ፡ ዲበ ፡ እብነ ፡ ቤዎን ፡ ዘደቂቀ ፡ ሮቤል ።

18:19  ወየኀልፍ ፡ ዲበ ፡ ዘባነ ፡ ቤተራብ ፡ ዘኀበ ፡ መስዕ ፡ ወይወርድ ፡ ደወሎሙ ፡ ዲበ ፡ ዘባነ ፡ ባሕር ፡ ዘኀበ ፡ መስዕ ።

18:20  ወይከውን ፡ ሞጻእቱ ፡ ለደወሎሙ ፡ ለዕለ ፡ ፍኖተ ፡ ባሕር ፡ ዘአሎን ፡ ዘዲበ ፡ መስዕ ፡ ወገቦሁ ፡ ለዮርዳንስ ፡ ዘኀበ ፡ አዜብ ፡ [ዝንቱ ፡ ደወለ ፡ አዜብ ፡] ፡ ወዮርዳንስ ፡ ወሰኖሙ ፡ እምገቦ ፡ ጽባሓዊ ፡ ወዝንቱ ፡ ውእቱ ፡ ደወሎሙ ፡ ዘዐውዶሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ፡ ዘተወርሱ ።

18:21  ወኮነ ፡ አህጉሪሆሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ፡ ኢየሪኮ ፡ ወቤተ ፡ ጌዎ ፡ ወአመቃስስ ።

18:22  ወቤተ ፡ ባራ ፡ ወሰ[ራ ፡ ወ]ቤሰና ።

18:23  ወኤኢን ፡ ወፋራ ፡ ወኤፍራታ ።

18:24  ወቀራፋ ፡ ወቄፍራ ፡ ወሞኒ ፡ ወጎባሕ ፡ ዐሥሩ ፡ ወክልኤ ፡ ኣህጉር ፡ ወአዕጻዳቲሆን ።

18:25  ገባኦን ፡ ወራማ ።

18:26  ወመሴማ ፡ ወቢሮን ፡ ወሞቄ ።

18:27  ወቤራ ፡ ወቃፈን ፡ ወቃና ፡ ወሴሌቀን ፡ ወተር[ኤ]ላ ።

18:28  ወኢየቡሴዎን ፡ እንተ ፡ ይእቲ ፡ ኢየሩሳሌም ፡ ሀገር ፡ ወገባኦት ፡ ወሀገረ ፡ ያሪም ፡ ዐሥሩ ፡ ወሠላስ ፡ አህጉር ፡ ወአዕጻዳቲሆን ፡ ወዝንቱ ፡ ውእቱ ፡ ርስቶሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ።

Chapter 19

19:1  ወበጽሖሙ ፡ ለደቂቀ ፡ ስምዖን ፡ ካልእ ፡ ክፍል ፡ ወኮነ ፡ ርስቶሙ ፡ ውስተ ፡ ማእከሎሙ ፡ ለደቂቀ ፡ ይሁዳ ።

19:2  ወረከቦሙ ፡ መክፈልቶሙ ፡ ቤርሳቤሕ ፡ ወሶማሕ ፡ ወቆለደም ።

19:3  ወአርሶላ ፡ ወበላ ፡ ወኢያሶን ።

19:4  ወልዑላ ፡ ወቡል ፡ ወኤርማ ።

19:5  ወሲቄላቅ ፡ ወቤተ ፡ ማኬሬብ ፡ ወሰርሱሲን ።

19:6  ወ[በተ]ሮት ፡ ወአሕቅልቲሆን ፡ ዐሥሩ ፡ ወሠላስ ፡ አህጉር ፡ ወአዕጻዳቲሆን ።

19:7  ወሬሞን ፡ ወተልካ ፡ ወኢያቴር ፡ ወአሳ ፡ አርባዕ ፡ አህጉር ፡ ወአዕጻዳቲሆን ።

19:8  ወዘዐውዶን ፡ ለእላንቱ ፡ አህጉር ፡ እስከ ፡ ባሌቅ ፡ ወየኀልፍ ፡ ላዕለ ፡ ባሜት ፡ መንገለ ፡ አዜባ ፡ ወዝንቱ ፡ ውእቱ ፡ ርስቶሙ ፡ ለነገደ ፡ ደቂቀ ፡ ስምዖን ።

19:9  እስመ ፡ ኮነ ፡ መክፈልቶሙ ፡ ለደቂቀ ፡ ይሁዳ ፡ ዐቢየ ፡ እምነ ፡ ዚአሆሙ ፡ ወወረሱ ፡ ደቂቀ ፡ ስምዖን ፡ ማእከለ ፡ መክፈልቶሙ ።

19:10  ወረከቦሙ ፡ ሣልስ ፡ መክፈልት ፡ ለዛቡሎን ፡ በበ ፡ ሕዘቢሆሙ ፤ ኮነ ፡ ደወለ ፡ ርስቶሙ ፡ ኤሴዴ[ቅ] ፡ ጎላ ፡ ደወሎሙ ፤

19:11  እምነ ፡ ባሕር ፡ ወመጌሬላ ፡ ወይትአኀዝ ፡ ምስለ ፡ ቤተ ፡ ራባ ፡ እንተ ፡ ውስተ ፡ ቈላት ፡ እንተ ፡ ቅድመ ፡ ገጸ ፡ ለኢየቀመን ።

19:12  ወተመይጠ ፡ እምነ ፡ ሰዱቅ ፡ ላዕለ ፡ ቅድመ ፡ ጽባሒሃ ፡ ለቤተ ፡ ሳሚ[ስ] ፡ ዲበ ፡ ደወለ ፡ ከሴሎቴት ፡ ወየኀልፍ ፡ እንተ ፡ ዳቢሮት ፡ ወየዐርግ ፡ ላዕለ ፡ ፌጤ ።

19:13  ወእምህየ ፡ የኀልፍ ፡ እንተ ፡ ቅድመ ፡ ጽባሒሃ ፡ ለሀገረ ፡ ጌቤሬ ፡ እንተ ፡ ኀበ ፡ ሴም ፡ ወየኀልፍ ፡ ዲበ ፡ ሬሞን ፡ ዘአምተርዮዛ ።

19:14  ወየኀልፍ ፡ ደወሎሙ ፡ ላዕለ ፡ መስዐ ፡ አሞት ፡ ወይከውን ፡ ሞጻእቶሙ ፡ ላዕለ ፡ ጌፋሔል ፡ እንተ ፡ ኀበ ፡ ነት ።

19:15  ወነባሐል ፡ ወሲሞዖን ፡ ወኢየሪከ ፡ ወሜትሜን ።

19:16  ዝንቱ ፡ ውእቱ ፡ ርስቶሙ ፡ ለነገደ ፡ ደቂቀ ፡ ዛቡሎን ፡ በበ ፡ ሕዘቢሆሙ ፡ አህጉር ፡ ወአዕጻዳቲሆን ።

19:17  ወረከቦ ፡ ለይሳኮር ፡ ራብዕ ፡ መክፈልት ።

19:18  ወኮነ ፡ ደወሎሙ ፡ ኢያዜር ፡ ወከልሰሎት ፡ ወሱሳን ።

19:19  ወአጊን ፡ ወሲዮነን ፡ ወርሔቴ ።

19:20  ወአነከሬት ፡ ወደቢሮት ፡ ወቂሶን ፡ ወሬቤስ ።

19:21  ወሬመን ፡ ወኤማሬቅ ፡ ወቤርሳቤስ ።

19:22  ወይትአኀዝ ፡ ደወሎሙ ፡ ላዕለ ፡ ጌተቦር ፡ ወላዕለ ፡ ሰሊም ፡ እንተ ፡ መንገለ ፡ ባሕር ፡ ወቤተ ፡ ሳሚ[ስ] ፡ ወይከውን ፡ ሞጻእተ ፡ ደወሎሙ ፡ ዮርዳንስ ።

19:23  ወዝንቱ ፡ ውእቱ ፡ ርስቶሙ ፡ ለነገዶ ፡ ደቂቀ ፡ ይሳኮር ፡ በበ ፡ ሕዘቢሆሙ ፡ ወአህጉሪሆሙኒ ፡ ወአዕጻዳቲሆን ።

19:24  ወረከቦሙ ፡ ኃምስ ፡ መክፈልት ፡ ለአሴር ።

19:25  ወኮነ ፡ ደወሎሙ ፡ እምነ ፡ ኤሌኬት ፡ ወአሌፍ ፡ ወቤቶቅ ፡ ወአኬያፋ ።

19:26  ወአሊሜሊ ፡ ወአሚሔል ፡ ወመሐስ ፡ ወይትአኀዝ ፡ በቀርሜሎ ፡ ዘመንገለ ፡ ባሕር ፡ ወበሲዮን ፡ ወለባነት ።

19:27  እምነ ፡ ጽባሒሁ ፡ ይገብእ ፡ ቤቴጌኔት ፡ ወይትአኀዝ ፡ በዛቡሎን ፡ ወእምጌጌ ፡ ወፍቴሔል ፡ ለመንገለ ፡ መስዕ ፡ ወይበውእ ፡ ደወሎሙ ፡ ውስተ ፡ ሰፍቴ ፡ ቤተሜኅ ፡ ወኤኔሔል ፡ ወየኀልፍ ፡ ውስተ ፡ ኮበም ፡ ወአሶሜል ።

19:28  ወኤብሮን ፡ ወራአብ ፡ ወኤሜማሖን ፡ ወቀን[ተ]ኔዎስ ፡ [እስከ ፡] ሲዶኖስ ፡ ዐባይ ።

19:29  ወይገብእ ፡ ደወሎሙ ፡ ውስተ ፡ አራ[ማ] ፡ ወእስከ ፡ ነቅዐ ፡ መስፋጥ ፡ ወ(ስ)ጢርዮን ፡ ወይገብእ ፡ ደወሎሙ ፡ ውስተ ፡ ኢያሲፍ ፡ ወይከውን ፡ ደወለ ፡ ሞጻእቱ ፡ ባሕር ፡ ወእምነ ፡ ሌብ ፡ ወኮዞብ ።

19:30  ወአርኮብ ፡ ወዓፌቅ ፡ ወራዐው ።

19:31  ወዝንቱ ፡ ውእቱ ፡ ርስቶሙ ፡ ለነገደ ፡ ደቂቀ ፡ አሴር ፡ በበ ፡ ሕዘቢሆሙ ፡ አህጉሪሆሙኒ ፡ ወአዕጻዳቲሆን ።

19:32  ወረከቦ ፡ ለንፍታሌም ፡ ሳድስ ፡ ክፍል ።

19:33  ወኮነ ፡ ደወሎሙ ፡ ሞሐላም ፡ ወሞላ ፡ ወቤ[ሴ]ሚይን ፡ ወአርሜ ፡ ወናቦ ፡ ወኢያፍቴሜ ፡ እስከ ፡ አኦደም ፡ ወኮነ ፡ ሞጻእቶሙ ፡ ዮርዳንስ ።

19:34  ወይገብእ ፡ ደወሎሙ ፡ ላዕለ ፡ ባሕረ ፡ አናትብሮን ፡ ወየኀልፍ ፡ እምህየ ፡ ላዕለ ፡ ኢቀናቃ ፡ ወይትአኀዝ ፡ በዛቡሎን ፡ እመንገለ ፡ አዜብ ፡ ወአሴርሂ ፡ ይትአኀዞሙ ፡ በመንገለ ፡ ባሕር ፡ ወዮርዳንስ ፡ እመንገለ ፡ ጽባሒሁ ።

19:35  ወአህጉረ ፡ ጢሮስሂ ፡ እለ ፡ ቅጽረ ፡ ቦን ፡ ወጢሮስሂ ፡ ወኦሞዳታቄት ፡ ወቄ[ኔ]ሬት ።

19:36  ወአርሜት ፡ ወአራሔል ፡ ወአሶር ።

19:37  ወቃዴስ ፡ ወአስራይስ ፡ ወነቅዐ ፡ አሶር ።

19:38  ወቄሮኅ ፡ ወሜገላሕርም ፡ ወቤታሜ ፡ ወቴሳሚስ ።

19:39  ወዝንቱ ፡ ውእቱ ፡ ርስቶሙ ፡ ለነገደ ፡ ደቂቀ ፡ ንፍታሌም ።

19:40  ወረከቦ ፡ ለዳን ፡ ሳብዕ ፡ ክፍል ።

19:41  ወኮነ ፡ ደወሎሙ ፡ ሰራሕት ፡ ወኣሳ ፡ ሀገረ ፡ ሳመውስ ።

19:42  ወሳላቢን ፡ ወአሞን ፡ ወሲላታ ።

19:43  ወኤሎን ፡ ወቴምናታ ፡ ወአቃሮን ።

19:44  ወለቃታ ፡ ወጌቤቶን ፡ ወጌቤላን ።

19:45  ወአዞር ፡ ወቤኔባቅጥ ፡ ወጌትሬሞ ።

19:46  ወእምነ ፡ ባሕር ፡ ኢየራቆን ፡ ደወል ፡ ዘቅሩበ ፡ ኢዮጴ ።

19:47  ወዝንቱ ፡ ውእቱ ፡ ርስቶሙ ፡ ለነገደ ፡ ደቂቀ ፡ ዳን ፡ በበ ፡ ሕዘቢሆሙ ፡ አህጉሪሆሙኒ ፡ ወአዕጻዳቲሆሙኒ ፡ ወኢያጠቅዎሙ ፡ ደቂቀ ፡ ዳን ፡ ለአሞሬዎን ፡ እለ ፡ ያጠውቅዎሙ ፡ በውስተ ፡ ደብር ፡ ወኢያበውሕዎሙ ፡ አሞሬዎን ፡ ይረዱ ፡ ውስተ ፡ ቈላት ፡ ወነሥኡ ፡ እምኔሆሙ ፡ አሐደ ፡ ኅብረ ፡ እምውስተ ፡ ደወለ ፡ መክፈልቶሙ ።

19:48  ወሖሩ ፡ ደቂቀ ፡ [ዳን ፡] ወቀተልዎሙ ፡ ለላኪስ ፡ ወነሥኡ ፡ ሀገሮሙ ፡ ወቀተልዋ ፡ በአፈ ፡ ኀፂን ፡ ወነበሩ ፡ ውስቴታ ፡ ወሰመዩ ፡ ስማ ፡ ለሴንዳ[ን] ፡ ወቆሙ ፡ አሞሬዎን ፡ ከመ ፡ ይንበሩ ፡ ውስተ ፡ ኤ[ሎ]ም ፡ ወውስተ ፡ [ሰ]ላሚን ፡ ወጸንዐት ፡ እዴሁ ፡ ለኤፍሬም ፡ ላዕሌሆሙ ፡ ወኮንዎሙ ፡ መጸብሔ ።

19:49  ወሖሩ ፡ ይኡድዋ ፡ ለምድር ፡ በውስተ ፡ ደወሎሙ ፡ ወወሀብዎ ፡ ደቂቀ ፡ እስራኤል ፡ ክፍሎ ፡ ለኢየሱስ ፡ በውስቴቶሙ ፡ በትእዛዘ ፡ እግዚአብሔር ።

19:50  ወወሀብዎ ፡ ሀገረ ፡ እንተ ፡ ሰአለ ፡ እንተ ፡ [ትምናስራህ] ፡ እንተ ፡ ውስተ ፡ ደብረ ፡ ኤፍሬም ፡ ወነደቃ ፡ ለይእቲ ፡ ሀገር ፡ ወነበረ ፡ ውስቴታ ።

19:51  ወዝንቱ ፡ ውእቱ ፡ አክፋሊሆሙ ፡ ዘከመ ፡ አስተዋረስዎሙ ፡ እልዓዛር ፡ ካህን ፡ ወኢየሱስ ፡ ወልደ ፡ ነዌ ፡ ወመላእክተ ፡ አበዊሆሙ ፡ ለነገደ ፡ እስራኤል ፡ በበ ፡ መክፈልቶሙ ፡ በሴሎ ፡ በቅድመ ፡ እግዚአብሔር ፡ በኀበ ፡ ኆኅተ ፡ ደብተራ ፡ ዘመርጡል ፡ ወሖሩ ፡ ይዑድዋ ፡ ለምድር ።

Chapter 20

20:1  ወነበቦ ፡ እግዚአብሔር ፡ ለኢየሱስ ፡ ወይቤሎ ፤

20:2  ንግሮሙ ፡ ለደቂቀ ፡ እስራኤል ፡ ወበሎሙ ፡ [ሀቡአ ፡ አህጉረአ ፡] ምስካይአ ፡ ዘእቤለክሙ ፡ በላዕለ ፡ ሙሴ ።

20:3  ምስካይ ፡ ለቀታሊ ፡ ለዘ ፡ ቀተለ ፡ ነፍሰ ፡ በኢያእምሮ ፡ እንዘ ፡ ኢይፈቅድ ፡ ወግበሩ ፡ ለክሙ ፡ አህጉረ ፡ ምስካይ ።

20:4  ወይስኪ ፡ ውስተ ፡ አሐቲ ፡ እምነ ፡ እላንቱ ፡ አህጉር ፡ ወይቁም ፡ ውስተ ፡ ኆኅተ ፡ አንቀጸ ፡ ሀገር ፡ ወይንግሮሙ ፡ ቃሎ ፡ ለሊቃናታ ፡ ለይእቲ ፡ ሀገር ፡ ወያብእ[ዎ] ፡ ሰብእ ፡ ኀቤሆሙ ፡ ወየሀብዎ ፡ መካነ ፡ ወይንበር ፡ ምስሌሆሙ ።

20:5  ወሶበ ፡ ዴገኖ ፡ አበ ፡ ደም ፡ ኢያግብእዎ ፡ ሎቱ ፡ ውስተ ፡ እዴሁ ፡ እስመ ፡ በኢያእምሮ ፡ ቀተሎ ፡ ለካልኡ ፡ ወእንዘ ፡ ኢይጸልኦ ፡ ቀዲሙ ።

20:6  ወይነብር ፡ ውስተ ፡ ይእቲ ፡ ሀገር ፡ እስከ ፡ ይበጽሕ ፡ ቅድመ ፡ ዐውድ ፡ ይትሐተት ፡ ወእስከ ፡ አመ ፡ ይመውት ፡ ካህን ፡ ዐቢይ ፡ ዘሀለወ ፡ በእማንቱ ፡ መዋዕል ፡ ወይእተ ፡ አሚረ ፡ ይገብእ ፡ ቀታሊ ፡ ወየአቱ ፡ ሀገሮ ፡ ወውስተ ፡ ቤቱ ፡ ወውስተ ፡ ሀገር ፡ እንተ ፡ እምኔሃ ፡ ሰከየ ። ወኢይቀትሎ ፡ አበ ፡ ደም ፡ ለቀታሊ ፡ እስከ ፡ ይቀውም ፡ ቅድመ ፡ ዐውድአ ፡ ይትሐተትአ ።

20:7  ወፈለጣ ፡ ለቃዴስ ፡ በገሊላ ፡ በውስተ ፡ ደብረ ፡ ንፍታሌም ፡ ወሲኬም ፡ በውስተ ፡ ደብረ ፡ ኤፍሬም ፡ ወሀገረ ፡ አርቦቅ ፡ በደብረ ፡ ይሁዳ ፡ እንተ ፡ ይእቲ ፡ ኬብሮን ።

20:8  ወበማዕዶተ ፡ ዮርዳንስ ፡ ኢየሪኮ ፡ ወእመንገለ ፡ ጽባሕ ፡ ወሀበ ፡ ቦሶር ፡ በሐቅለ ፡ ገዳም ፡ (ወ)እምነ ፡ ነገደ ፡ ሮቤል ፡ ወኤሬሞት ፡ በገላአድ ፡ (ወ)እምነ ፡ ነገደ ፡ ጋድ ፡ ወገውሎን ፡ በባሳን ፡ (ወ)እምነ ፡ ነገደ ፡ መናሴ ።

20:9  እላንቱ ፡ ዘኀርዩ ፡ ደቂቀ ፡ እስራኤል ፡ ወለግዩርኒ ፡ ዘሀለወ ፡ ውስቴቶሙ ፡ ከመ ፡ ይስኪ ፡ ህየ ፡ ቀታሊ ፡ ኵሉ ፡ ዘቀተለ ፡ ነፍሰ ፡ ሰብእ ፡ በኢያእምሮ ፡ ከመ ፡ ኢይቅትሎ ፡ አበ ፡ ደም ፡ እስከ ፡ ይቀውም ፡ ቅድመ ፡ ዐውድ ፡ ወይትሐተት ።

Chapter 21

21:1  ወመጽኡ ፡ መላእክቲሆሙ ፡ ለደቂቀ ፡ ሌዊ ፡ ኀበ ፡ እልዐዛር ፡ ካህን ፡ ወኀበ ፡ ኢየሱስ ፡ ወልደ ፡ ነዌ ፡ ወኀበ ፡ መላእክተ ፡ ነገደ ፡ አብያተ ፡ አበዊሆሙ ፡ ለሕዝበ ፡ እስራኤል ።

21:2  ወይቤልዎሙ ፡ በሴሎ ፡ በምድረ ፡ ከናኦን ፡ እንዘ ፡ ይብሉ ፡ አዘዘ ፡ እግዚአብሔር ፡ በእደ ፡ ሙሴ ፡ ከመ ፡ የሀበነ ፡ አህጉረ ፡ ዘውስቴቶን ፡ ንነብር ፡ ወፂኦታቲሆን ፡ ለእንስሳነ ።

21:3  ወወሀብዎሙ ፡ ደቂቀ ፡ እስራኤል ፡ ለሌዋውያን ፡ በትእዛዘ ፡ እግዚአብሔር ፡ እላንተ ፡ አህጉረ ፡ ወፂኦታቲሆን ።

21:4  ወበጽሖሙ ፡ መክፈልቶሙ ፡ ለደቂቀ ፡ ሕዝበ ፡ ቃዓት ፤ ወኮነ ፡ ለካህናት ፡ ለደቂቀ ፡ አሮን ፡ ወለሌዋውያን ፡ እምነ ፡ ሕዝበ ፡ ይሁዳ ፡ ወእምነ ፡ ሕዝበ ፡ ስምዖን ፡ ወእምነ ፡ ሕዝበ ፡ ብንያሚ ፡ መክፈልቶሙ ፡ ዐሠርቱ ፡ ወሠለስቱ ፡ አህጉር ።

21:5  ወለደቂቀ ፡ ቃዓት ፡ እለ ፡ ተርፉ ፡ እምውስተ ፡ ሕዝበ ፡ ኤፍሬም ፡ ወእምነ ፡ ሕዝበ ፡ ዳን ፡ ወእምነ ፡ መንፈቀ ፡ ነገደ ፡ መናሴ ፡ መክፈልቶሙ ፡ ዐሠርቱ ፡ (ወሠለስቱ ፡) አህጉር ።

21:6  ወለደቂቀ ፡ ጌድሶን ፡ እምነ ፡ ነገደ ፡ ሕዝበ ፡ ይሳኮር ፡ ወእምነ ፡ ሕዝበ ፡ አሴር ፡ ወእምነ ፡ ሕዝበ ፡ ንፍታሌም ፡ ወእምነ ፡ መንፈቀ ፡ ነገደ ፡ መናሴ ፡ በባሳን ፡ መክፈልቶሙ ፡ ዐሥሩ ፡ ወሠላስ ፡ አህጉር ።

21:7  ወለደቂቀ ፡ ሜራሪ ፡ በበ ፡ ሕዘቢሆሙ ፡ እምነ ፡ ነገደ ፡ ሮቤል ፡ ወእምነ ፡ ነገደ ፡ ጋድ ፡ ወእምነ ፡ ነገደ ፡ ዛቡሎን ፡ መክፈልቶሙ ፡ ዐሥሩ ፡ ወክልኤ ፡ አህጉር ።

21:8  ወወሀብዎሙ ፡ ደቂቀ ፡ እስራኤል ፡ ኤህጉረ ፡ ለሌዋውያን ፡ ወፂኦታቲሆን ፡ በከመ ፡ አዘዞ ፡ እግዚአብሔር ፡ ለሙሴ ፡ መክፈልቶሙ ።

21:9  ወወሀበ ፡ ነገደ ፡ ደቂቀ ፡ ይሁዳ ፡ ወነገደ ፡ ደቂቀ ፡ ስምዖን ፡ ወእምነ ፡ ነገደ ፡ ደቂቀ ፡ ብንያሚ ፡ እላንተ ፡ አህጉረ ፡ ወተሰምያ ፤

21:10  ለደቂቀ ፡ አሮን ፡ እምነ ፡ ሕዝበ ፡ ቃዓት ፡ ለደቂቀ ፡ ሌዊ ፡ እስመ ፡ ሎሙ ፡ ኮና ፡ መክፈልቶሙ ።

21:11  ወወሀብዎሙ ፡ ምድረ ፡ ቀራትርቦቅ ፡ ደብረ ፡ አህጉረ ፡ ኤነቅ ፡ እንተ ፡ ይእቲ ፡ ኬብሮን ፡ በደብረ ፡ ይሁዳ ፡ ወፂኦታቲሃ ፡ ዐውዳ ።

21:12  ወአሕቅልተ ፡ ሀገር ፡ ወአዕጻዳቲሃ ፡ ወሀቦሙ ፡ ኢየሱስ ፡ ለደቂቀ ፡ ካሌብ ፡ ወልደ ፡ ዬፎኔ ፡ ደወሎሙ ።

21:13  ወለደቂቀ ፡ አሮን ፡ ወሀቦሙ ፡ ሀገረ ፡ ምስካይ ፡ ለቀታሊ ፡ ኬብሮን ፡ ወዘፈለጡ ፡ ምስሌሃ ፡ ወሌምና ፡ ወዘፈለጡ ፡ ምስሌሃ ።

21:14  ወኤሎም ፡ ወዘፈለጡ ፡ ምስሌሃ ፡ ወጤማ ፡ ወዘፈለጡ ፡ ምስሌሃ ።

21:15  ወጌላ ፡ ወዘፈለጡ ፡ ምስሌሃ ፡ ወዳቢር ፡ ወዘፈለጡ ፡ ምስሌሃ ።

21:16  [ወኣሳ ፡ ወዘፈለጡ ፡ ምስሌሃ ፡] ወጣኒ ፡ ወዘፈለጡ ፡ ምስሌሃ ፡ ወ[ቤ]ትሰሚስ ፡ ወዘፈለጡ ፡ ምስሌሃ ፡ ትስዑ ፡ አህጉር ፡ (ወ)እምነ ፡ ክልኤቱ ፡ ሕዝብ ፡ ወእምነ ፡ እሉ ፡ ነገድ ።

21:17  ወእምነ ፡ ነገደ ፡ ብንያሚ ፡ ገባኦ ፡ ወዘፈለጡ ፡ ምስሌሃ ፡ [ወጋባ ፡ ወዘፈለጡ ፡ ምስሌሃ ።

21:18  ወአናቶት ፡ ወዘፈለጡ ፡ ምስሌሃ ፡ ወአልሞን ፡ ወዘፈለጡ ፡ ምስሌሃ ፡] አርባዕ ፡ አህጉር ።

21:19  ወኵሎን ፡ አህጉሪሆሙ ፡ ለደቂቀ ፡ አሮን ፡ ካህናት ፡ ዐሥሩ ፡ ወሠላስ ።

21:20  ወለነገደ ፡ ደቂቀ ፡ ቃዓት ፡ ለሌዋውያን ፡ እለ ፡ ተርፉ ፡ እምነ ፡ ደቂቀ ፡ ቃዓት ፤ ወኮነ ፡ አህጉሪሆሙ ፡ ለካህናቲሆሙ ፡ እምነ ፡ ሕዝበ ፡ ኤፍሬም ።

21:21  ወወሀቦሙ ፡ ሀገረ ፡ ምስካይ ፡ ለቀታሊ ፡ ሲኬም ፡ ወዘፈለጡ ፡ ምስሌሃ ፡ [ወጌዜር ፡ ወዘፈለጡ ፡ ምስሌሃ ።

21:22  ወቄቤሳይን ፡ ወዘፈለጡ ፡ ምስሌሃ ፡] ወቤቶሮን ፡ ወዘፈለጡ ፡ ምስሌሃ ፡ አርባዕ ፡ አህጉር ።

21:23  ወእምነ ፡ ሕዝበ ፡ ዳን ፡ ኤልቆቴም ፡ ወዘፈለጡ ፡ ምስሌሃ ፡ [ወገባቶን ፡ ወዘፈለጡ ፡ ምስሌሃ ።] ወኤሎን ፡ ወዘፈለጡ ፡ ምስሌሃ ፡ ወጌቴሬሞን ፡ ወዘፈለጡ ፡ ምስሌሃ ፡ አርባዕ ፡ አህጉር ።

21:24  ወእምነ ፡ መንፈቀ ፡ ነገደ ፡ መናሴ ፡ ጠናኅ ፡ ወዘፈለጡ ፡ ምስሌሃ ፡ ወዬቦታ ፡ ወዘፈለጡ ፡ ምስሌሃ ፡ ክልኤ ፡ አህጉር ።

21:25  ወኵሉ ፡ አህጉር ፡ ዐሥሩ ፡ ወዘፈለጡ ፡ ምስሌሆን ፡ ዘቅሩቦን ፡ ለነገደ ፡ ደቂቀ ፡ ቃዐት ፡ ለእለ ፡ ተርፉ ።

21:26  ወለደቂቀ ፡ ጌድሶን ፡ ለሌዋውያን ፡ እምነ ፡ መንፈቀ ፡ ነገደ ፡ መናሴ ፡ አህጉር ፡ እለ ፡ ፈለጡ ፡ ለቀታሊ ፡ ገውሎን ፡ በባሳን ፡ ወዘፈለጡ ፡ ምስሌሃ ፡ ወቦሶር ፡ ወዘፈለጡ ፡ ምስሌሃ ፡ ክልኤ ፡ አህጉር ።

21:27  [ወእምነ ፡ ሕዝበ ፡ ይሳኮር ፡ ቄስዮን ፡ ወዘፈለጡ ፡ ምስሌሃ ፡ ወዳቤራት ፡ ወዘፈለጡ ፡ ምስሌሃ ።

21:28  ወያሬሞት ፡ ወዘፈለጡ ፡ ምስሌሃ ፡ ወኤንጋን ፡ ወዘፈለጡ ፡ ምስሌሃ ፡ አርባዕ ፡ አህጉር ።] ወእምነ ፡ ሕዝበ ፡ አሴር ፡ በሴላ ፡ ወዘፈለጡ ፡ ምስሌሃ ፡ ወደቦ ፡ ወዘፈለጡ ፡ ምስሌሃ ።

21:29  ወኬልቀጥ ፡ ወዘፈለጡ ፡ ምስሌሃ ፡ ወራአብ ፡ ወዘፈለጡ ፡ ምስሌሃ ፡ አርባዕ ፡ አህጉር ።

21:30  ወእምነ ፡ ሕዝበ ፡ ንፍታሌም ፡ ሀገር ፡ እንተ ፡ ፈለጡ ፡ ለቀታሊ ፡ ጋዴስ ፡ በገሊላ ፡ ወዘፈለጡ ፡ ምስሌሃ ፡ ወጴመት ፡ ወዘፈለጡ ፡ ምስሌሃ ፡ ወአዔሞን ፡ ወዘፈለጡ ፡ ምስሌሃ ፡ ሠላስ ፡ አህጉር ።

21:31  ወኵሉ ፡ አህጉር ፡ ዘጌድሶን ፡ በበ ፡ ሕዘቢሆሙ ፡ ዐሥሩ ፡ ወሠላስ ፡ አህጉር ።

21:32  ወለነገደ ፡ ሕዝበ ፡ ሜራሪ ፡ ለእለ ፡ ተርፉ ፡ ሌዋውያን ፤ (ወ)እምነ ፡ ሕዝበ ፡ ዛቡሎን ፡ ማዐን ፡ ወፂኦታቲሃ ፡ ወቃዴስ ፡ ወፂኦታቲሃ ።

21:33  ወሴላ ፡ ወፂኦታቲሃ ።

21:34  ወበማዕዶተ ፡ ዮርዳንስ ፡ ዘመንገለ ፡ ኢየሪኮ ፡ እምነ ፡ ሕዝበ ፡ ሮቤል ፡ ሀገረ ፡ ምስካይ ፡ ለቀታሊ ፡ ቦሶር ፡ በገዳም ፡ ዘሚሶን ፡ ወፂኦታቲሃ ፡ ወያዜር ፡ ወፂኦታቲሃ ፡ ወጋዴዮን ፡ ወፂኦታቲሃ ፡ ወአውሳፋ ፡ ወፂኦታቲሃ ፡ አርባዕ ፡ አህጉር ።

21:35  ወእምነ ፡ ሕዝበ ፡ ጋድ ፡ ሀገር ፡ ለምስካየ ፡ ቀታሊ ፡ ራሞት ፡ በገላአድ ፡ ወፂኦታቲሃ ፡ ወቃሚን ፡ ወፂኦታቲሃ ፡ ወ[ሔ]ሴቦን ፡ ወፂኦታቲሃ ፡ ወያዜር ፡ ወፂኦታቲሃ ፡ አርባዕ ፡ ኵሉ ፡ አህጉር ።

21:36  ወዘደቂቀ ፡ ሜራሪኒ ፡ በበ ፡ ሕዘቢሆሙ ፡ ኵሉ ፡ አህጉሪሆሙ ፡ ለእለ ፡ ተርፉ ፡ እምነ ፡ ነገደ ፡ ሌዊ ፡ ወኮነ ፡ ደወሎሙ ፡ ዐሥሩ ፡ ወክልኤ ፡ አህጉር ።

21:37  ወኵሉ ፡ አህጉሪሆሙ ፡ ለሌዋውያን ፡ በማእከለ ፡ ደወሎሙ ፡ ለደቂቀ ፡ እስራኤል ፡ አርብዓ ፡ ወሰማኒ ፡ አህጉር ፡ ወፂኦታቲሆን ፡ ዘአውዶን ፡ ለእማንቱ ፡ አህጉር ።

21:38  ለለ ፡ ሀገር ፡ ፂኦታቲሃ ፡ ዐውዳ ፡ ለሀገር ፡ ለኵሎን ፡ እላንቱ ፡ አህጉር ፤ ወፈጸመ ፡ ኢየሱስ ፡ ከ[ፊለ] ፡ ምድር ፡ በበ ፡ ደወሎሙ ።

21:39  ወወሀብዎ ፡ ደቂቀ ፡ እስራኤል ፡ ክፍሎ ፡ ለኢየሱስ ፡ በትእዛዘ ፡ እግዚአብሔር ፡ ወወሀብዎ ፡ ሀገረ ፡ እንተ ፡ ሰአለ ፡ ተምናሳረኅ ፡ ወወሀብዎ ፡ በደብረ ፡ ኤፍሬም ፡ ወነደቃ ፡ ኢየሱስ ፡ ለይእቲ ፡ ሀገር ፡ ወነበረ ፡ ውስቴታ ።

21:40  ወነሥአ ፡ ኢየሱስ ፡ ዝክተ ፡ መጣብኀ ፡ ዘእዝኅ ፡ ዘቦቱ ፡ ገዘሮሙ ፡ ለደቂቀ ፡ እስራኤል ፡ ለእለ ፡ ሀለው ፡ ምስሌሁ ፡ ውስተ ፡ ፍኖት ፡ በገዳም ፡ እስመ ፡ ኢተገዝሩ ፡ በገዳም ፡ ወአንበሮን ፡ ውስተ ፡ ተምናሳረኅ ።

21:41  ወወሀቦሙ ፡ እግዚአብሔር ፡ ለደቂቀ ፡ እስራኤል ፡ ኵሎ ፡ ምድረ ፡ እንተ ፡ መሐለ ፡ ለአበዊሆሙ ፡ ወተወርስዋ ፡ ወነበሩ ፡ ውስቴታ ።

21:42  ወአዕረፎሙ ፡ እግዚአብሔር ፡ እምነ ፡ ዐውዶሙ ፡ በከመ ፡ መሐለ ፡ ለአበዊሆሙ ፡ ወአልቦ ፡ እንከ ፡ መኑሂ ፡ ዘተቃወሞሙ ፡ ቅድመ ፡ ገጾሙ ፡ እምነ ፡ ኵሉ ፡ ፀሮሙ ፡ እስመ ፡ አግብኦሙ ፡ እግዚአብሔር ፡ ለኵሉ ፡ ፀሮሙ ፡ ውስተ ፡ እዴሆሙ ።

21:43  ወኢተርፈት ፡ አሐቲ ፡ ቃል ፡ እምነ ፡ ኵሉ ፡ ሠናይት ፡ እንተ ፡ ይቤሎሙ ፡ እግዚአብሔር ፡ ለደቂቀ ፡ እስራኤል ፡ ኵሉ ፡ በጽሖሙ ።

Chapter 22

22:1  ወእምዝ ፡ ጸውዖሙ ፡ ኢየሱስ ፡ ለደቂቀ ፡ ሮቤል ፡ ወለደቂቀ ፡ ጋድ ፡ ወለመንፈቀ ፡ ነገደ ፡ መናሴ ።

22:2  ወይቤሎሙ ፡ ለሊክሙ ፡ ሰማዕክሙ ፡ ኵሎ ፡ ዘአዘዘክሙ ፡ ሙሴ ፡ ቍልዔሁ ፡ ለእግዚአብሔር ፡ ወሰማዕክሙ ፡ ቃልየ ፡ ኵሎ ፡ ዘአዘዝኩክሙ ።

22:3  ወኢኀደግሙ ፡ አኀዊክሙ ፡ በእማንቱ ፡ መዋዕል ፡ ብዙኃት ፡ እስከ ፡ ዮም ፡ ወእስከ ፡ ዛቲ ፡ ዕለት ፡ ወዐቀብክሙ ፡ ትእዛዞ ፡ ለእግዚአብሔር ፡ አምላክክሙ ።

22:4  ወይእዜሰ ፡ አዕረፎሙ ፡ እግዚአብሔር ፡ አምላክክሙ ፡ ለአኀዊክሙ ፡ በከመ ፡ ይቤሎሙ ፡ ወይእዜኒ ፡ ተመየጡ ፡ ወእትው ፡ ውስተ ፡ አብያቲክሙ ፡ ወውስተ ፡ ደወልክሙ ፡ ብሔረ ፡ ዘወሀበክሙ ፡ ሙሴ ፡ ገብረ ፡ እግዚአብሔር ፡ በማዕዶተ ፡ ዮርዳንስ ።

22:5  ወባሕቱ ፡ ተዓቀቡ ፡ ከመ ፡ ትግበሩ ፡ ጥቀ ፡ ትእዛዘ ፡ ወሕገ ፡ ዘአዘዘክሙ ፡ ከመ ፡ ትግበሩ ፡ ሙሴ ፡ ቍልዔሁ ፡ ለእግዚአብሔር ፡ ከመ ፡ ታፍቅርዎ ፡ ለእግዚአብሔር ፡ አምላክነ ፡ ወትሑሩ ፡ በኵሉ ፡ ፍናዊሁ ፡ ወትዕቀቡ ፡ ትእዛዞ ፡ ወትትልውዎ ፡ ወታምልክዎ ፡ በኵሉ ፡ ልብክሙ ፡ ወበኵሉ ፡ ነፍስክሙ ።

22:6  ወባረኮሙ ፡ ኢየሱስ ፡ ወፈነዎሙ ፡ ወአተው ፡ ውስተ ፡ አብያቲሆሙ ።

22:7  ወለመንፈቀ ፡ ነገደ ፡ መናሴ ፡ ወሀቦሙ ፡ ሙሴ ፡ በባሳን ፡ ወለመንፈቆሙሰ ፡ ወሀቦሙ ፡ ኢየሱስ ፡ ምስለ ፡ አኀዊሆሙ ፡ በማዕዶተ ፡ ዮርዳንስ ፡ ዘኀበ ፡ ባሕር ፤ ወሶበ ፡ ፈነዎሙ ፡ ኢየሱስ ፡ ውስተ ፡ አብያቲሆሙ ፡ ወባረኮሙ ፡ ወይቤሎሙ ።

22:8  ወአተው ፡ ምስለ ፡ ብዙኅ ፡ ንዋይ ፡ ውስተ ፡ አብያቲሆሙ ፡ ወምስለ ፡ ብዙኅ ፡ እንስሶ ፡ ጥቀ ፡ ወወርቅ ፡ ወብሩር ፡ ወብርት ፡ ወኀፂን ፡ ወልብስ ፡ ብዙኅ ፡ ጥቀ ፡ ተካፈሉ ፡ በርበረ ፡ ፀሮሙ ፡ ምስለ ፡ አኀዊሆሙ ።

22:9  ወተመይጡ ፡ ወአተው ፡ ደቂቀ ፡ ሮቤል ፡ ወደቂቀ ፡ ጋድ ፡ ወመንፈቀ ፡ ነገደ ፡ መናሴ ፡ እምነ ፡ ደቂቀ ፡ እስራኤል ፡ እምነ ፡ ሴሎ ፡ እምነ ፡ ምድረ ፡ ከናአን ፡ ከመ ፡ ይሑሩ ፡ ውስተ ፡ ምድረ ፡ ገላአድ ፡ ውስተ ፡ ደወሎሙ ፡ ወውስተ ፡ ርስቶሙ ፡ [ዘተዋረስዋ ፡] በትእዛዘ ፡ እግዚአብሔር ፡ በእደ ፡ ሙሴ ።

22:10  ወበጽሑ ፡ ውሰተ ፡ ገላአድ ፡ ዘዮርዳንስ ፡ ዘምድረ ፡ ከናአን ፡ ወነደቁ ፡ ደቂቀ ፡ ጋድ ፡ ወደቂቀ ፡ ሮቤል ፡ ወመንፈቀ ፡ ነገደ ፡ መናሴ ፡ በህየ ፡ ምሥዋዐ ፡ በኀበ ፡ ዮርዳንስ ፡ ዐቢየ ፡ ምሥዋዐ ፡ ዘያስተርኢ ።

22:11  ወሰምዑ ፡ ደቂቀ ፡ እስራኤል ፡ ከመ ፡ ነደቁ ፡ ምሥዋዐ ፡ ደቂቀ ፡ ጋድ ፡ ወደቂቀ ፡ ሮቤል ፡ ወመንፈቂ ፡ ነገደ ፡ መናሴ ፡ በውስተ ፡ ደወለ ፡ ምድረ ፡ ከናአን ፡ በኀበ ፡ ገላአድ ፡ ዘዮርዳንስ ፡ በማዕዶቶሙ ፡ ለደቂቀ ፡ እስራኤል ።

22:12  ወሰምዑ ፡ ደቂቀ ፡ እስራኤል ፡ ወተጋብኡ ፡ ኵሎሙ ፡ ደቂቀ ፡ እስራኤል ፡ ውስተ ፡ ሴሎ ፡ ከመ ፡ ይዕረጉ ፡ ይትቃተልዎሙ ።

22:13  ወለአኩ ፡ ደቂቀ ፡ እስራኤል ፡ ኀበ ፡ ደቂቀ ፡ ሮቤል ፡ ወኀበ ፡ ደቂቀ ፡ ጋድ ፡ ወኀበ ፡ መንፈቀ ፡ ነገደ ፡ መናሴ ፡ ውስተ ፡ ምድረ ፡ ገላአድ ፡ ፊንሕስ ፡ ወልደ ፡ እልዐዛር ፡ ወልደ ፡ አሮን ፡ ካህን ፤

22:14  ወዐሠርቱ ፡ እምውስተ ፡ መላእክት ፡ ምስሌሁ ፡ (ወ)መልአክ ፡ አሐዱ ፡ እምነ ፡ አብያተ ፡ አበዊሆሙ ፡ እምነ ፡ ኵሉ ፡ ነገደ ፡ እስራኤል ፡ ዕደወ ፡ መላእክተ ፡ አብያተ ፡ ኦበዊሆሙ ፡ መሳፍንት ፡ እሙንቱ ፡ ለእስራኤል ።

22:15  ወበጽሑ ፡ ኀበ ፡ ደቂቀ ፡ ጋድ ፡ ወኀበ ፡ ደቂቀ ፡ ሮቤል ፡ ወኀበ ፡ መንፈቀ ፡ ነገደ ፡ መናሴ ፡ ውስተ ፡ ገላአድ ፡ ወነገርዎሙ ፡ ወይቤልዎሙ ፤

22:16  ከመዝ ፡ ይቤሉ ፡ ኵሉ ፡ ተዓይነ ፡ እግዚአብሔር ፡ ምንትኑአ ፡ ዛቲአ ፡ አበሳአ ፡ እንተ ፡ አበስክሙ ፡ ቅድመ ፡ አምላከ ፡ እስራኤል ፡ ከመ ፡ ትኅድጉ ፡ ዮም ፡ ተሊዎቶ ፡ ለእግዚአብሔር ፡ ወትንድቁ ፡ ለክሙ ፡ ምሥዋዐ ፡ ወከመ ፡ ትክሐድዎ ፡ ዮም ፡ ለእግዚአብሔር ።

22:17  አስተንአስክሙኑ ፡ ኀጢአቶ ፡ ለፌጎር ፡ እንተ ፡ ኢነጻሕነ ፡ እምኔሃ ፡ እስከ ፡ ዮም ፡ ወኮነ ፡ መቅሠፍት ፡ ላዕለ ፡ ትዕይንተ ፡ እግዚአብሔር ።

22:18  ወዮምኒ ፡ አንትሙ ፡ ኀደግሙ ፡ ተሊዎቶ ፡ ለእግዚአብሔር ፡ ወእምከመ ፡ አንትሙ ፡ ዮም ፡ ክሕድክምዎ ፡ ለእግዚአብሔር ፡ ጌሠመ ፡ ላዕለ ፡ ኵሉ ፡ እስራኤል ፡ ይከውን ፡ መቅሠፍት ።

22:19  ወይእዜኒ ፡ እመ ፡ ትንእሰክሙ ፡ ደወለ ፡ ምድርክሙ ፡ ዕድው ፡ ውስተ ፡ ምድረ ፡ ደወለ ፡ እግዚአብሔር ፡ ኀበ ፡ ትነብር ፡ ህየ ፡ ደብተራሁ ፡ ለእግዚአብሔር ፡ ወተወረሱ ፡ ምስሌነ ፡ ወኢትክሐድዎ ፡ ለእግዚአብሔር ፡ ወኢትኅድግዎ ፡ ለእግዚአብሔር ፡ እስመ ፡ ነደቅሙ ፡ ምሥዋዐ ፡ አፍአ ፡ እምነ ፡ ምሥዋዒሁ ፡ ለእግዚአብሔር ፡ አምላክነ ።

22:20  አካኑ ፡ አካር ፡ ወልደ ፡ [ዛራ ፡] አበሰ ፡ ወጌገየ ፡ ወነሥአ ፡ እምነ ፡ ዘሕሩም ፡ ወላዕለ ፡ ኵሉ ፡ ትዕይንተ ፡ እስራኤል ፡ ኮነ ፡ መንሱት ፡ እንዘ ፡ ባሕቲቱ ፡ አበሰ ፡ ቦኑአ ፡ ባሕቲቱአ ፡ ሞተአ ፡ በኀጢአቱአ ።

22:21  ወአውሥኡ ፡ ደቂቀ ፡ ሮቤል ፡ ወደቂቀ ፡ ጋድ ፡ ወመንፈቀ ፡ ነገደ ፡ መናሴ ፡ ወይቤልዎሙ ፡ ለመላእክተ ፡ እስራኤል ፡ እንዘ ፡ ይብሉ ፤

22:22  እግዚአብሔር ፡ ውእቱ ፡ አምላክ ፡ ወእግዚእ ፡ ወአምላከ ፡ አማልክት ፡ ውእቱ ፡ እግዚአብሔር ፡ ያአምር ፡ ወለእስራኤልኒ ፡ ውእቱ ፡ ያአምሮ ፡ ከመ ፡ አኮ ፡ ለክሒድ ፡ ወለአብሶ ፡ ዘገበርነ ፡ ቅድሜሁ ፡ ለእግዚአብሔር ፡ ወእመአኮሰ ፡ ኢያድኅነነ ፡ ዮም ።

22:23  ወእመኒ ፡ ምሥዋዐ ፡ ነደቅነ ፡ ለነ ፡ ከመ ፡ ንክሐዶ ፡ ለእግዚአብሔር ፡ አምላክነ ፡ ወከመ ፡ ናዕርግ ፡ ውስቴቱ ፡ መሥዋዕተ ፡ ቍርባን ፡ ወእመኒ ፡ ከመ ፡ ንግበር ፡ ላዕሌሁ ፡ መሥዋዕተ ፡ መድኅኒት ፡ ውእቱ ፡ ለሊሁ ፡ እግዚአብሔር ፡ ለይትኀሠሠነ ።

22:24  እመ ፡ አኮ ፡ በበይነ ፡ ነገረ ፡ ፍርሀተ ፡ እግዚአብሔር ፡ ዘገበርናሁ ፡ ለዝንቱ ፡ እንዘ ፡ ንብል ፡ ከመ ፡ ኢይበሉ ፡ ጌሠመ ፡ ውሉድክሙ ፡ ለውሉድነ ፡ ምንተ ፡ ብክሙ ፡ ምስለ ፡ እግዚአብሔር ፡ አምላከ ፡ እስራኤል ።

22:25  እስመ ፡ አቀመ ፡ እግዚአብሔር ፡ ወሰነ ፡ ማእከሌክሙ ፡ ወማእከሌነ ፡ ለደቂቀ ፡ ሮቤል ፡ ወለደቂቀ ፡ ጋድ ፡ ወለመንፈቀ ፡ ነገደ ፡ መናሴ ፡ [ለዮርዳንስ ፡] ወአልብክሙ ፡ ክፍለ ፡ ምስለ ፡ እግዚአብሔር ፡ ወይሬስይዎሙ ፡ ነኪረ ፡ ውሉድክሙ ፡ ለውሉድነ ፡ (ከመ ፡ ኢያውፅ[እዎ]ሙ ፡) እምነ ፡ አምልኮ ፡ እግዚአብሔር ።

22:26  ወንቤ ፡ ከመ ፡ ንግበር ፡ ከመዝ ፡ ወንንድቅ ፡ ዘንተ ፡ ምሥዋዐ ፡ አኮ ፡ በበይነ ፡ ቍርባን ፡ ወአኮ ፡ በበይነ ፡ መሥዋዕት ።

22:27  አላ ፡ ከመ ፡ ይኩን ፡ ዝንቱ ፡ ስም[ዐ] ፡ ማእከሌነ ፡ ወማእከሌክሙ ፡ ወማእከለ ፡ ውሉድነ ፡ እምድኅሬነ ፡ ከመ ፡ ያምልክዎ ፡ አምልከ ፡ ለእግዚአብሔር ፡ በቅድሜሁ ፡ በቍርባንክሙ ፡ ወበመሥዋዕተ ፡ መድኀኒትክሙ ፡ ወኢይበልዎሙ ፡ ውሉድክሙ ፡ ለውሉድነ ፡ ጌሠመ ፡ አልብክሙ ፡ ክፍለ ፡ ምስለ ፡ እግዚአብሔር ።

22:28  ወንቤ ፡ እመቦ ፡ ከመ ፡ ኮነ ፡ ድኅረ ፡ ወይቤሉነ ፡ ጌሠመ ፡ አው ፡ ለውሉድነ ፡ ከመ ፡ ይቤልዎሙ ፡ ናሁ ፡ ርእዩ ፡ አምሳለ ፡ [ምሥዋዑ ፡] ለእግዚአብሔር ፡ ዘገብሩ ፡ አበዊነ ፡ አኮ ፡ በበይነ ፡ ቍርባን ፡ ወአኮ ፡ በበይነ ፡ መሥዋዕት ፡ አላ ፡ ከመ ፡ ይኩን ፡ ስምዕ ፡ ማእከሌነ ፡ ወማእከሌክሙ ።

22:29  ሐሰ ፡ ለነ ፡ እስከ ፡ ነኀድግ ፡ ተሊዎቶ ፡ ለእግዚአብሔር ፡ በእላንቱ ፡ መዋዕል ፡ ዮም ፡ ከመ ፡ ንክሐዶ ፡ ለእግዚአብሔር ፡ ወከመ ፡ ንንድቅ ፡ ለነ ፡ ምሥዋዐ ፡ ለቍርባን ፡ ወለመሥዋዕተ ፡ ሰላም ፡ ወለመሥዋዕተ ፡ መድኀኒት ፡ እንበለ ፡ በውስተ ፡ ምሥዋዒሁ ፡ ለእግዚአብሔር ፡ አምላክነ ፡ [ዘቅድመ ፡ ደብተራሁ ።]

22:30  ወሶበ ፡ ሰምዐ ፡ ፊንሕስ ፡ ካህን ፡ ወኵሉ ፡ መላእክተ ፡ ተዓይን ፡ ወመሳፍንተ ፡ እስራኤል ፡ እለ ፡ ምስሌሁ ፡ ቃለ ፡ ዘይቤልዎሙ ፡ ደቂቀ ፡ ሮቤል ፡ ወደቂቀ ፡ ጋድ ፡ ወመንፈቀ ፡ ነገደ ፡ መናሴ ፡ አርመሙ ።

22:31  ወይቤሎሙ ፡ ፊንሕስ ፡ ወልደ ፡ እልዐዛር ፡ ካህን ፡ ለደቂቀ ፡ ሮቤል ፡ ወለደቂቀ ፡ ጋድ ፡ ወለመንፈቀ ፡ ነገደ ፡ መናሴ ፡ ዮም ፡ አእመርነ ፡ ከመ ፡ ሀለወ ፡ እግዚአብሔር ፡ ምስሌነ ፡ እስመ ፡ ኢአበስክሙ ፡ ቅድመ ፡ እግዚአብሔር ፡ ዛተ ፡ ኀጢአተ ፡ ወእስመ ፡ አድኀንክምዎሙ ፡ ለእስራኤል ፡ እምእዴሁ ፡ ለእግዚአብሔር ።

22:32  ወገብአ ፡ ፊንሕስ ፡ ወልደ ፡ እልዐዛር ፡ ወመላእክት ፡ አምነ ፡ ደቂቀ ፡ ሮቤል ፡ ወደቂቀ ፡ ጋድ ፡ ወእምነ ፡ መንፈቀ ፡ ነገደ ፡ መናሴ ፡ እምነ ፡ ገላአድ ፡ ውስተ ፡ ምድረ ፡ ከናኣን ፡ ኀበ ፡ ደቂቀ ፡ እስራኤል ፡ ወነገርዎሙ ።

22:33  ወአደሞሙ ፡ ለደቂቀ ፡ እስራኤል ፡ ዝንቱ ፡ ነገር ፡ ወሶበ ፡ ነገርዎሙ ፡ ለደቂቀ ፡ እስራኤል ፡ ባረክዎ ፡ ለአምላከ ፡ ደቂቀ ፡ እስራኤል ፡ ወይቤሉ ፡ ኢንዕርግ ፡ እንከ ፡ ኀቤሆሙ ፡ ከመ ፡ ንትቃተሎሙ ፡ ወከመ ፡ ናጥፍኣ ፡ ለምድረ ፡ ደቂቀ ፡ ሮቤል ፡ ወደቂቀ ፡ ጋድ ፡ ወዘመንፈቀ ፡ ነገደ ፡ መናሴ ፤ ወነበሩ ፡ ላዕሌ[ሃ] ።

22:34  ወሰመዮ ፡ ኢየሱስ ፡ ለውእቱ ፡ ምሥዋዕ ፡ ዘሮቤል ፡ ወዘጋድ ፡ ወዘመንፈቀ ፡ ነገደ ፡ መናሴ ፡ ወይቤሉ ፡ እስመ ፡ ስምዕ ፡ ውእቱ ፡ ማእከሎሙ ፡ ከመ ፡ እግዚአብሔር ፡ ውእቱ ፡ አምላኮሙ ።

Chapter 23

23:1  ወእምዝ ፡ እምድኅረ ፡ ብዙኅ ፡ መዋዕል ፡ እምድኅረ ፡ አዕረፎሙ ፡ እግዚአብሔር ፡ አምላከ ፡ እስራኤል ፡ እምነ ፡ ኵሉ ፡ ፀሮሙ ፡ ዘአውደሙ ፡ ወልህቀ ፡ ኢየሱስ ፡ ወኀለፈ ፡ መዋዕሊሁ ።

23:2  ወጸውዐ ፡ ኵሎ ፡ ደቂቀ ፡ እስራኤል ፡ ወሊቃናቲሆሙ ፡ ወመላእክቲሆሙ ፡ ወጸሐፍቶሙ ፡ ወመኳንንቲሆሙ ፡ ወይቤሎሙ ፡ ናሁ ፡ ረሣእኩ ፡ አንሰ ፡ ወኀለፈ ፡ መዋዕልየ ።

23:3  ወለሊክሙ ፡ ርኢክሙ ፡ ኵሎ ፡ ዘገብረ ፡ እግዚአብሔር ፡ አምላክነ ፡ ላዕለ ፡ ሕዝብ ፡ እለ ፡ ቅድመ ፡ ገጽነ ፡ ከመ ፡ እግዚአብሔር ፡ አምላክነ ፡ ፀብኦሙ ፡ ለነ ።

23:4  ወናሁ ፡ ርእዩ ፡ ኀደጉ ፡ ለክሙ ፡ አሕዛብ ፡ እለ ፡ ተርፉ ፡ ውስተ ፡ አድዋሊክሙ ፡ ዘዘ ፡ ሕዘቢክሙ ፡ ወዘእምነ ፡ ዮርዳንስ ፡ ኵሎ ፡ አሕዛበ ፡ ሠሮክዎሙ ፡ ወእምነ ፡ ባሕር ፡ ዐቢይ ፡ ወሰንክሙ ፡ [ምዕራበ ፡ ፀሐይ ።]

23:5  ወእግዚአብሔር ፡ አምላክክሙ ፡ ውእቱ ፡ ያጠፍኦሙ ፡ ለክሙ ፡ እምቅድመ ፡ ገጽክሙ ፡ እስከ ፡ ይደመሰሱ ፡ ወይፌኑ ፡ ላዕሌሆሙ ፡ አራዊተ ፡ ሐቅል ፡ እስከ ፡ ያጠፍኦሙ ፡ ወለነገሥቶሙ ፡ እምነ ፡ ቅድሜክሙ ፡ ወትወርሱ ፡ ምድሮሙ ፡ በከመ ፡ ይቤለነ ፡ እግዚአብሔር ፡ አምላክነ ።

23:6  ወአጽንዑ ፡ ጥቀ ፡ ከመ ፡ ትዕቀቡ ፡ ወከመ ፡ ትግበሩ ፡ ኵሉ ፡ ዘጽሑፍ ፡ ውስተ ፡ መጽሐፈ ፡ ሕጉ ፡ ለሙሴ ፡ ከመ ፡ ኢትትገሐሡ ፡ እምኔሁ ፡ ኢለፀጋም ፡ ወኢለየማን ፤

23:7  ከመ ፡ ኢትባኡ ፡ ውስተ ፡ እሉ ፡ አሕዛብ ፡ እለ ፡ ተርፉ ፡ ምስሌክሙ ፡ ወአስማተ ፡ አማልክቲሆሙ ፡ ኢይሰመይ ፡ በውስቴትክሙ ፡ ወኢትምሐሉ ፡ ቦሙ ፡ ወኢትስግዱ ፡ ሎሙ ፡ ወኢታምልክዎሙ ።

23:8  አላ ፡ ለእግዚአብሔር ፡ አምላክክሙ ፡ ትልውዎ ፡ በከመ ፡ ገበርክሙ ፡ እስከ ፡ ዛቲ ፡ ዕለት ።

23:9  ወውእቱ ፡ እግዚአብሔር ፡ ያጠፍኦሙ ፡ እምቅድሙ ፡ ገጽክሙ ፡ ለአሕዛብ ፡ ዐበይት ፡ ወጽኑዓን ፡ ወአንትሙሰ ፡ አልቦ ፡ ዘይትቃወመክሙ ፡ ቅድሜክሙ ፡ እስከ ፡ ዛቲ ፡ ዕለት ።

23:10  አሐዱ ፡ ብእሲ ፡ እምኔክሙ ፡ ይሰድድ ፡ ዐሠርተ ፡ ምእተ ፡ እስመ ፡ እግዚአብሔር ፡ አምላክነ ፡ ይፀብእ ፡ ለነ ፡ በከመ ፡ ይቤለነ ።

23:11  ወተዓቀቡ ፡ ጥቀ ፡ ነፍስክሙ ፡ ከመ ፡ ታፍቅርዎ ፡ ለእግዚአብሔር ፡ አምላክነ ።

23:12  ወእመሰ ፡ ተመየጥክሙ ፡ ወኀደግምዎ ፡ ትገብኡ ፡ ውስተ ፡ እሉ ፡ አሕዛብ ፡ እለ ፡ ተርፉ ፡ ምስሌክሙ ፡ ወትትዋሰቡ ፡ ምስሌሆሙ ፡ ወትዴመሩ ፡ ውስቴቶሙ ፤

23:13  ወለሊክሙ ፡ አእምሩ ፡ ከመ ፡ ኢያጠፍኦሙ ፡ እንከ ፡ እግዚአብሔር ፡ ለእሉ ፡ አሕዛብ ፡ እምቅድሜክሙ ፡ ወይከውኑክሙ ፡ መሥገርተ ፡ ወዕቅፍተ ፡ ወቀኖታተ ፡ ውስተ ፡ ሰኰናክሙ ፡ ወይዴጕጹክሙ ፡ ውስተ ፡ አዕይንቲክሙ ፡ እስከ ፡ ትጠፍኡ ፡ እምነ ፡ ምድር ፡ ቡርክት ፡ እንተ ፡ ወሀበክሙ ፡ እግዚአብሔር ፡ አምላክክሙ ።

23:14  ወአንሰ ፡ አሐውር ፡ ውስተ ፡ ፍኖት ፡ ከመ ፡ ኵሉ ፡ እለ ፡ ውስተ ፡ ምድር ፡ ወአእምሩ ፡ በኵሉ ፡ ልብክሙ ፡ ወበኵሉ ፡ ነፍስክሙ ፡ ከመ ፡ ኢተኀድገት ፡ ወኢአሐቲ ፡ ቃል ፡ እምነ ፡ ኵሉ ፡ ሠናይት ፡ እንተ ፡ ይቤለክሙ ፡ እግዚአብሔር ፡ አምላክነ ፡ ወኵሉ ፡ በጽሐነ ፡ ወአልቦ ፡ ዘኢረከበነ ፡ እምኔሁ ።

23:15  ወበከመ ፡ በጽሐክሙ ፡ ኵሉ ፡ ቃል ፡ ሠናይ ፡ ዘይቤለክሙ ፡ እግዚአብሔር ፡ አምላክክሙ ፡ ከማሁ ፡ ያመጽእ ፡ እግዚአብሔር ፡ አምላክክሙ ፡ ላዕሌክሙ ፡ ኵሎ ፡ ቃለ ፡ እኩየ ፡ እስከ ፡ ያጠፍአክሙ ፡ እምነ ፡ ዛቲ ፡ ምድር ፡ ቡርክት ፡ እንተ ፡ ወሀበክሙ ፡ እግዚአብሔር ።

23:16  እምከመ ፡ ኀደግሙ ፡ ኪዳኖ ፡ ለአምላክክሙ ፡ ዘአዘዘክሙ ፡ እመ ፡ ሖርክሙ ፡ ወአምለክሙ ፡ አማልክተ ፡ ባዕድ ፡ ወሰገድክሙ ፡ ሎሙ ፡ ወይትመዓዕ ፡ በመዐት ፡ እግዚአብሔር ፡ ላዕሌክሙ ፡ ወፍጡነ ፡ ያጠፍአክሙ ፡ እምነ ፡ ምድር ፡ እንተ ፡ ወሀበክሙ ።

Chapter 24

24:1  ወአስተጋብኦሙ ፡ ኢየሱስ ፡ ለኵሉ ፡ ሕዝበ ፡ እስራኤል ፡ ውስተ ፡ ሴሎም ፡ ወጸውዖሙ ፡ ለሊቃናተ ፡ እስራኤል ፡ ወለመላእክቲሆሙ ፡ ወለጸሐፍቶሙ ፡ ወአቀሞሙ ፡ ቅድመ ፡ እግዚአብሔር ።

24:2  ወይቤሎሙ ፡ ኢየሱስ ፡ ለኵሉ ፡ ሕዝብ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ በማዕዶተ ፡ ፈለግ ፡ ነበሩ ፡ አበዊክሙ ፡ ቀደምት ፡ ታራ ፡ አቡሁ ፡ ለአብርሃም ፡ ወአቡሁ ፡ ለናኮር ፡ ወአምለኩ ፡ ባዕደ ፡ አማልክተ ።

24:3  ወነሣእክዎ ፡ ለአቡክሙ ፡ ለአብርሃም ፡ እምነ ፡ ማዕዶተ ፡ ፈለግ ፡ ወወሰድክዎ ፡ ውስተ ፡ ኵሉ ፡ ምድረ ፡ ከናአን ፡ ወአስተባዛኅኩ ፡ ዘርኦ ።

24:4  ወወሀብክዎ ፡ ይስሐቅሃ ፡ ወለይስሐቅ ፡ ያዕቆብ ፡ ወዔሳው ፡ ወወሀብክዎ ፡ ለዔሳው ፡ ደብረ ፡ ሴይር ፡ አውረስክዎ ፡ ወያዕቆብሰ ፡ ወደቂቁ ፡ ወረዱ ፡ ውስተ ፡ ግብጽ ፡ ወኮኑ ፡ በህየ ፡ ሕዝበ ፡ ዐቢየ ፡ ወበዝኁ ፡ ወጸንዑ ፡ ወሣቀይዎሙ ፡ ግብጽ ።

24:5  ወቀተልክዎሙ ፡ ለግብጽ ፡ በበይነ ፡ ዘገብሩ ፡ ላዕሌሆሙ ።

24:6  ወእምድኅረ ፡ ዝንቱ ፡ አውፅአክሙ ፡ ወአውፅኦሙ ፡ ለአበዊክሙ ፡ ወቦእክሙ ፡ ውስተ ፡ ባሕር ፡ ወዴገኑክሙ ፡ ግብጽ ፡ ወተለውክሙ ፡ ድኅሬሆሙ ፡ ለአበዊክሙ ፡ በአፍራስ ፡ ወበሰረገላት ፡ ውስተ ፡ ባሕረ ፡ [ኤ]ርትራ ።

24:7  ወጸራኅነ ፡ ኀበ ፡ እግዚአብሔር ፡ ወፈነወ ፡ ደመና ፡ ወቆባ[ረ] ፡ ማእከሌነ ፡ ወማእከለ ፡ ግብጽ ፡ ወአስተጋብአ ፡ ላዕሌሆሙ ፡ ባሕረ ፡ ወደፈኖሙ ፡ ወርእያ ፡ አዕይንቲክሙ ፡ ኵሎ ፡ ዘገብረ ፡ እግዚአብሔር ፡ በምድረ ፡ ግብጽ ፡ ወነበርክሙ ፡ ብዙኀ ፡ መዋዕለ ፡ ውስተ ፡ ገዳም ።

24:8  ወወሰደክሙ ፡ ውስተ ፡ ምድረ ፡ አሞሬዎን ፡ እለ ፡ ይነብሩ ፡ ውስተ ፡ ማዕዶተ ፡ ዮርዳንስ ፡ ወተቃተሎሙ ፡ ሙሴ ፡ ወአግብኦሙ ፡ እግዚአብሔር ፡ ውስተ ፡ እዴነ ፡ ወተወረስክሙ ፡ ምድሮሙ ፡ ወአጥፋእክምዎሙ ፡ እምቅድሜክሙ ።

24:9  ወተንሥአ ፡ በላቅ ፡ ወልደ ፡ ሴፎር ፡ ንጉሠ ፡ ሞአብ ፡ ወተቃተሎሙ ፡ ለእስራኤል ፡ ወለአከ ፡ ወጸውዖ ፡ ለበላዓም ፡ ወልደ ፡ ቤዖር ፡ ከመ ፡ ይርግመነ ።

24:10  ወኢፈቀደ ፡ እግዚአብሔር ፡ አምላክከ ፡ ያጥፍእከ ፡ ወበረከተ ፡ ባረከነ ፡ ወአድኀነነ ፡ እምነ ፡ እዴሆሙ ፡ ወአግብኦሙ ፡ ለነ ።

24:11  ወዐደውክሙ ፡ ዮርዳንስ ፡ ወበጻሕክሙ ፡ ውስተ ፡ ኢያሪከ ፡ ወተቃተሉነ ፡ እለ ፡ ይነብሩ ፡ ውስተ ፡ ኢያሪኮ ፡ ወአሞሬዎን ፡ ወከናኔዎን ፡ ወፌሬዜዎን ፡ ወኤዌዎን ፡ ወኢያቡሴዎን ፡ ወኬጤዎን ፡ ወጌርጌሴዎን ፡ ወአግብኦሙ ፡ እግዚአብሔር ፡ ውስተ ፡ እዴነ ።

24:12  ወፈነወ ፡ ላዕሌሆሙ ፡ እምቅድሜነ ፡ ዐኮተ ፡ ወአስዐሮሙ ፡ እምቅድሜነ ፡ ለዐሠርቱ ፡ ወክልኤቱ ፡ ነገሥት ፡ ዘአሞሬዎን ፡ አኮ ፡ በሰይፍከ ፡ ወአኮ ፡ በቀስትከ ።

24:13  ወወሀበክሙ ፡ ምድረ ፡ እንተ ፡ ኢጻመውክሙ ፡ ባቲ ፡ ወአህጉረ ፡ እለ ፡ ኢነደቅሙ ፡ ነበርክሙ ፡ ውስቴቶን ፡ ወአዕጻደ ፡ ወይን ፡ ወዘይት ፡ ዘኢተከልክሙ ፡ ትበልዑ ፡ አንትሙ ።

24:14  ወይእዜኒ ፡ ፍርህዎ ፡ ለእግዚአብሔር ፡ ወአምልክዎ ፡ በጽድቅ ፡ ወበርትዕ ፡ ወአሰስሉ ፡ አማልክተ ፡ ነኪር ፡ ዘአምለኩ ፡ አበዊክሙ ፡ በማዕዶተ ፡ ፈለግ ፡ ወበግብጽ ፡ ወአምልክዎ ፡ ለእግዚአብሔር ።

24:15  ወእመሰ ፡ ኢፈቀድክሙ ፡ ታምልክዎ ፡ ለእግዚአብሔር ፡ ኅረዩ ፡ ለክሙ ፡ ዮም ፡ መነ ፡ ታመልኩ ፡ እመ ፡ አኮ ፡ አማልክተ ፡ አበዊክሙ ፡ እለ ፡ ማዕዶተ ፡ ፈለግ ፡ ወእማእኮ ፡ አማልክተ ፡ አሞሬዎን ፡ እለ ፡ ውስተ ፡ ምድሮሙ ፡ ሀሎክሙ ፡ ወአንሰ ፡ ወቤትየ ፡ እግዚአብሔርሃ ፡ ናመልክ ፡ እስመ ፡ ቅዱስ ፡ ውእቱ ።

24:16  ወአውሥኡ ፡ ሕዝብ ፡ ወይቤሉ ፡ ሐሰ ፡ ለነ ፡ እስከ ፡ ነኀድጎ ፡ ለእግዚአብሔር ፡ ወናመልክ ፡ ባዕደ ፡ አማልክተ ።

24:17  ለነሰ ፡ እግዚአብሔር ፡ አምላክነ ፡ እስመ ፡ ውእቱ ፡ አምላክ ፡ ወውእቱ ፡ አውፅአነ ፡ ለነ ፡ ወለአበዊነ ፡ እምነ ፡ ግብጽ ፡ እምነ ፡ ቤተ ፡ ቅኔት ፡ ወኵሎ ፡ ዘገብረ ፡ ለነ ፡ ተአምረ ፡ ዐበይተ ፡ ወዐቀበነ ፡ በኵሉ ፡ ፍኖት ፡ እንተ ፡ ባቲ ፡ ሖርነ ፡ በውስተ ፡ ኵሉ ፡ አሕዛብ ፡ እለ ፡ ኀለፍነ ፡ ላዕሌሆሙ ።

24:18  ወአውፅኦሙ ፡ እግዚአብሔር ፡ ለአሞሬዎን ፡ ወለኵሉ ፡ አሕዛብ ፡ እለ ፡ ይነብሩ ፡ ውስተ ፡ ምድር ፡ እምቅድሜነ ፡ ወከማሁ ፡ ንሕነሂ ፡ ናመልኮ ፡ ለእግዚአብሔር ፡ እስመ ፡ ውእቱ ፡ አምላክነ ።

24:19  ወይቤሎሙ ፡ ኢየሱስ ፡ ለሕዝብ ፡ ኢትክሉ ፡ አምልኮቶ ፡ ለእግዚአብሔር ፡ እስመ ፡ ቅዱስ ፡ ውእቱ ፡ ወእምከመ ፡ አቅናእክምዎ ፡ ኢየኀድግ ፡ ለክሙ ፡ ኀጣይኢክሙ ፡ ወአበሳክሙ ።

24:20  እምከመ ፡ ኀደግምዎ ፡ ለእግዚአብሔር ፡ ወአምለክሙ ፡ ባዕደ ፡ አማልክተ ፡ ወየሐውር ፡ ወይሣቅየክሙ ፡ ወያጠፍአክሙ ፡ ህየንተ ፡ ዘአሠነየ ፡ ላዕሌክሙ ።

24:21  ወይቤልዎ ፡ ሕዝብ ፡ ለኢየሱስ ፡ ዳእሙ ፡ እግዚአብሔር ፡ ናመልክ ።

24:22  ወይቤሎሙ ፡ [ኢየሱስ ፡] ለሕዝብ ፡ ለሊክሙ ፡ ስምዕ ፡ ላዕለ ፡ ርእስክሙ ፡ ከመ ፡ ለሊክሙ ፡ ኀሬክምዎ ፡ ለእግዚአብሔር ፡ ታምልክዎ ፡ ወይቤሉ ፡ ሰማዕነ ።

24:23  ወይቤሎሙ ፡ ይእዜኒ ፡ አሰስሉ ፡ አማልክተ ፡ ነኪር ፡ ዘኀቤክሙ ፡ ወአርትዑ ፡ ልበክሙ ፡ ኀበ ፡ እግዚአብሔር ፡ አምላከ ፡ እስራኤል ።

24:24  ወይቤልዎ ፡ ሕዝብ ፡ ለኢየሱስ ፡ ለእግዚአብሔር ፡ አምላክነ ፡ ናመልክ ፡ ወቃለ ፡ ዚአሁ ፡ ንሰምዕ ።

24:25  ወተካየዶሙ ፡ ኢየሱስ ፡ ለሕዝብ ፡ በይእቲ ፡ ዕለት ፡ ወወሀቦሙ ፡ ሕገ ፡ ወፍትሐ ፡ በሴሎም ፡ በቅድመ ፡ ደብተራሁ ፡ ለአምላከ ፡ እስራኤል ።

24:26  ወጸሐፎ ፡ ኢየሱስ ፡ ለዝንቱ ፡ ነገር ፡ ውስተ ፡ መጽሐፈ ፡ ሕጉ ፡ ለእግዚአብሔር ፡ ወነሥአ ፡ ኢየሱስ ፡ እብነ ፡ ዐቢየ ፡ ወአቀማ ፡ መትሕተ ፡ ዕፀ ፡ ጤሬብንቶስ ፡ ቅድመ ፡ እግዚአብሔር ።

24:27  ወይቤሎሙ ፡ ለኵሉ ፡ ሕዝብ ፡ ኢየሱስ ፡ ናሁ ፡ ዛቲ ፡ እብን ፡ ስምዕ ፡ ላዕሌክሙ ፡ እስመ ፡ ይእቲ ፡ ሰማዕተ ፡ ኵሉ ፡ ዘተብህለ ፡ በኀበ ፡ እግዚአብሔር ፡ ዘከመ ፡ ተናገ[ረ]ክሙ ፡ ዮም ፡ ወትኩንክሙ ፡ ይእቲ ፡ ስም[ዐ] ፡ ላዕሌክሙ ፡ በደኃሪ ፡ መዋዕል ፡ ለእመ ፡ ሐሰውክምዎ ፡ ለእግዚአብሔር ፡ አምላክየ ።

24:28  ወፈነዎሙ ፡ ኢየሱስ ፡ ለሕዝብ ፡ ወአተው ፡ ኵሎሙ ፡ ውስተ ፡ በሓውርቲሆሙ ።

24:29  ወአምለክዎ ፡ እስራኤል ፡ ለእግዚአብሔር ፡ በኵሉ ፡ መዋዕሊሁ ፡ ለኢየሱስ ፡ ወበኵሉ ፡ መዋዕሊሆሙ ፡ ለሊቃናት ፡ እለ ፡ አንኁ ፡ መዋዕሊሆሙ ፡ እምድኅረ ፡ ኢየሱስ ፡ ወኵሎሙ ፡ እለ ፡ ርእዩ ፡ ግብሮ ፡ ለእግዚአብሔር ፡ ኵሎ ፡ ዘገብረ ፡ ለእስራኤል ።

24:30  ወኮነ ፡ እምድኅረ ፡ ዝንቱ ፡ ወሞተ ፡ ኢየሱስ ፡ ወልደ ፡ ነዌ ፡ ገብረ ፡ እግዚአብሔር ፡ ወምእት ፡ ወዐሠርቱ ፡ ዓመቲሁ ።

24:31  ወቀበርዎ ፡ ውስተ ፡ ደወለ ፡ ርስቱ ፡ ውስተ ፡ ተምናሳረኅ ፡ ውስተ ፡ ደብረ ፡ ኤፍሬም ፡ እመንገለ ፡ መስዑ ፡ ለደብረ ፡ ገላአድ ፤ ህየ ፡ ወደዩ ፡ ምስሌሁ ፡ ውስተ ፡ መቃብሩ ፡ ኀበ ፡ ቀበርዎ ፡ መጣብሐ ፡ ዘእዝኅ ፡ እለ ፡ ቦንቱ ፡ ገዘሮሙ ፡ ለደቂቀ ፡ እስራኤል ፡ በገልጋላ ፡ አመ ፡ ወፅኡ ፡ እምነ ፡ ግብጽ ፡ በከመ ፡ አዘዞ ፡ እግዚአብሔር ፡ ወህየ ፡ ሀለዋ ፡ እስከ ፡ ዮም ።

24:32  ወአዕጽምቲሁኒ ፡ ለዮሴፍ ፡ ዘአውጽኡ ፡ እምነ ፡ ግብጽ ፡ ወከረዩ ፡ ውስተ ፡ ሰቂማ ፡ ውስተ ፡ አሐዱ ፡ ኅብር ፡ ዘገራህት ፡ እንተ ፡ ተሣየጠ ፡ ያዕቆብ ፡ እምነ ፡ አሞሬዎን ፡ እለ ፡ ይነብሩ ፡ ውስተ ፡ ሰቂማ ፡ በምእት ፡ አባግዕ ፡ ወወሀቦ ፡ ለዮሴፍ ፡ ክፍሎ ።

24:33  ወኮነ ፡ እምድኅረ ፡ ዝንቱ ፡ ወእልዐዛር ፡ ወልደ ፡ አሮን ፡ ሊቀ ፡ ካህናት ፡ ሶበ ፡ ሞተ ፡ ወቀበርዎ ፡ ውስተ ፡ ምድረ ፡ [ገ]ባኦር ፡ እንተ ፡ ወሀቦ ፡ ለፊንሕስ ፡ ወልዱ ፡ በደብረ ፡ ኤፍሬም ። ወይእተ ፡ አሚረ ፡ ነሥኡ ፡ ደቂቀ ፡ እስራኤል ፡ ታቦቶ ፡ ለእግዚአብሔር ፡ ወወሰድዋ ፡ ምስሌሆሙ ፡ ወፊንሕስ ፡ ኮነ ፡ ሊቀ ፡ ካህናት ፡ ህየንተ ፡ እልዐዛር ፡ አቡሁ ፡ እስከ ፡ አመ ፡ ሞተ ፡ ወከረዩ ፡ ሎቱ ፡ ውስተ ፡ ገባኦር ፡ ውስተ ፡ ምደሮሙ ። ወአተው ፡ ኵሎሙ ፡ ደቂቀ ፡ እስራኤል ፡ ውስተ ፡ አብያቲሆሙ ፡ ወውስተ ፡ አህጉሪሆሙ ። ወአምለኩ ፡ ደቂቀ ፡ እስራኤል ፡ አስጣርጤን ፡ ወሳጣሮት ፡ ወአማልክተ ፡ አሕዛብ ፡ እለ ፡ ዐውዶሙ ፡ ወአግብኦሙ ፡ እግዚአብሔር ፡ ውስተ ፡ እደ ፡ ኤቅሎን ፡ ንጉሠ ፡ ሞአብ ፡ ወቀነዮሙ ፡ ዐሠርተ ፡ ወሰመንተ ፡ ዓመተ ። (ተፈጸመ ፡ ኦሪት ፡ ዘኢየሱስ ።)