Kapingamarangi - Joshua

Chapter 1

1:1  Muli-hua di made o Moses, tangada hai-hegau Dimaadua, gei Dimaadua ga-helekai gi tangada hagamaamaa Moses go Joshua, di tama a Nun,

1:2  ga-helekai, “Dagu dangada hai-hegau go Moses guu-made. Hagatogomaalia dolomeenei, goe mo digau Israel huogodoo, gaa-hula laa-lodo di monowai Jordan gi-lodo tenua dela e-gowadu ko-Au.

1:3  Au ga-gowadu gi-di-goe mo agu daangada huogodoo nnenua huogodoo ala ga-taele goodou no-lodo, be dagu hai ne-hagi-anga gi Moses.

1:4  Deenei di geinga o di-godou henua, tugi i-di anggowaa i-bahi-i-ngaaga gaa-hana gaa-dau-loo gi-nia gonduu o Lebanon i-bahi-i-ngeia, mai i-di monowai damana go Euphrates i-bahi-i-dua gaa-hana gi tenua o digau Hittite, gaa-dau-loo i-di Tai Damana go Mediterranean i-bahi-i-dai.

1:5  Joshua, deai tangada e-mee di-haga-magedaa goe i-di waalooloo o do mouli ai. Au ga-madalia goe be dagu hai dela nogo madalia Moses. Au ga-hagalee-loo e-diiagi be e-hudu goe gi-daha.

1:6  Goe gi-maaloo mo tee-madagu, idimaa, goe dela ga-dagi nia daangada aanei, i-di nadau hula e-hai-mee gi tenua dela ne-hagababa ko-Au ang-gi nadau maadua-mmaadua.

1:7  Goe gi-maaloo hudee madagu, hagamahi daudalia nia haganoho huogodoo ala ne-gowadu go dagu hege go Moses. Hudee haga-balumee-ina taganoho e-dahi i-nia maa, gei goe gaa-gila humalia i-nia gowaa huogodoo ala e-hana ginai goe.

1:8  Di Beebaa Haganoho e-hai gii-dau i-nia madagoaa huogodoo ma-ga-daumaha goodou. Kuulu-ina ginai boo mo aa. Goe daudalia nia mee huogodoo ala e-hihi no-lodo, gei goe ga-maluagina gei gaa-gila.

1:9  Goe gi-langahia agu helekai ala ne-hai-adu gi-di-goe, bolo goe gi-maaloo gei gi-de-madagu. Hudee madagu be manawa-gee, idimaa, Au go Dimaadua go doo God, ga-madalia goe i-nia gowaa huogodoo ala e-hana ginai goe.”

1:10  Joshua ga-helekai gi-nia dagi o digau Israel

1:11  bolo gii-hula gi-lodo di waahale-laa, ge gi-helekai gi-nia daangada huogodoo, “Hagatogomaalia-ina godou hagangudu, idimaa, i-muli nia laangi e-dolu, gei goodou gaa-hula gi-di baahi i-golo di Monowai Jordan, ga-hai-gowaa gi tenua a Dimaadua dela go di-godou God e-gowadu gi goodou.”

1:12  Joshua ga-helekai gi-nia madawaawa Reuben mo Gad, mo di baahi di madawaawa Manasseh boloo,

1:13  “Goodou gi-langahia Moses, go tangada hai-hegau Dimaadua, dela ne-hai-adu gi goodou bolo Dimaadua, dela go di-godou God, ga-gowadu gi goodou tenua deenei dela i-bahi-i-dua o Jordan e-noho-ai goodou.

1:14  Godou lodo mo godou dama mo godou manu gaa-noho i ginei, gei godou gau-dauwa ala gu-hagatogomaalia ang-gi tauwa, gaa-hula laa-lodo di monowai e-hula i-mua godou duaahina digau Israel e-hagamaamaa digaula,

1:15  gaa-dae-loo gi di-nadau kumi tenua dela i-bahi-i-dai Jordan dela e-wanga go Dimaadua di-godou God gi digaula. Di madagoaa hua nia madawaawa Israel huogodoo gaa-noho i-di aumaalia i-golo, gei goodou la-gaa-mee di-loomoi, gaa-noho i ginei, gaa-noho i-di-godou henua dela i-bahi-i-dua o Jordan, dela go tenua a Moses tangada hai-hegau Dimaadua ne-gowadu gi goodou.”

1:16  Gei digaula ga-helekai gi Joshua, “Gimaadou gaa-hai nia mee huogodoo ala ne-hagi-mai kooe, gaa-hula gi au gowaa huogodoo ala e-hagau ginai gimaadou.

1:17  Gimaadou ga-hagalongo-laa adu gi-di-goe, gadoo be gimaadou ala nogo hagalongo gi Moses. Dimaadua dela go doo God la-gi-madalia goe be dana hai dela nogo madalia Moses.

1:18  Tei dangada dela ma-ga-hai-baahi be hagalee e-hagalongo gi au haganoho de-hilihili, le e-daaligi gii-made. Goe gi-maaloo gei gi-de-madagu!”

Chapter 2

2:1  Joshua ga-hagau ana daangada hagadina hagammuni dogolua mai i-di waahale-laa i Acacia belee hula e-hagadina hagammuni tenua go Canaan kaedahi go di waahale go Jericho. Meemaa gaa-hula gi-di waahale deelaa, gaa-noho i-di hale o-di ahina huihui dono huaidina go Rahab.

2:2  Gei di king o Jericho ga-longono-ia bolo digau Israel gu-lloomoi anaboo belee hagadina hagammuni tenua deelaa.

2:3  Gei mee gaa-hai dana hegau gi Rahab boloo, “Nia daane ala i-lodo doo hale ne-lloomoi belee hagadina hagammuni tenua hagatau! Laha-mai meemaa!”

2:4  Gei di ahina deelaa ga-helekai-anga, “Nia daane gu-lloomoi gi dogu hale, gei au e-de-iloo be meemaa ne-loomoi i-hee. Malaa, meemaa guu-hula ana-hiahi i-mua di tai o-di bontai di abaaba, gei au e-de-iloo labelaa di gowaa dela ne-hula ginai meemaa. Gei maa goodou ga-limalima di-daudali meemaa, gei goodou gaa-dae-adu gi meemaa.” (Gei Rahab guu-lahi nia daangada hagadina hagammuni aalaa gi-tomo di hale, gaa-dugu meemaa hagammuni i-lala nia geinga ala ne-doho go mee i-golo.)

2:5  Gei di ahina deelaa ga-helekai-anga, “Nia daane gu-lloomoi gi dogu hale, gei au e-de-iloo be meemaa ne-loomoi i-hee. Malaa, meemaa guu-hula ana-hiahi i-mua di tai o-di bontai di abaaba, gei au e-de-iloo labelaa di gowaa dela ne-hula ginai meemaa. Gei maa goodou ga-limalima di-daudali meemaa, gei goodou gaa-dae-adu gi meemaa.” (Gei Rahab guu-lahi nia daangada hagadina hagammuni aalaa gi-tomo di hale, gaa-dugu meemaa hagammuni i-lala nia geinga ala ne-doho go mee i-golo.)

2:6  Gei di ahina deelaa ga-helekai-anga, “Nia daane gu-lloomoi gi dogu hale, gei au e-de-iloo be meemaa ne-loomoi i-hee. Malaa, meemaa guu-hula ana-hiahi i-mua di tai o-di bontai di abaaba, gei au e-de-iloo labelaa di gowaa dela ne-hula ginai meemaa. Gei maa goodou ga-limalima di-daudali meemaa, gei goodou gaa-dae-adu gi meemaa.” (Gei Rahab guu-lahi nia daangada hagadina hagammuni aalaa gi-tomo di hale, gaa-dugu meemaa hagammuni i-lala nia geinga ala ne-doho go mee i-golo.)

2:7  Gei digau hai-hegau o-di king ga-hagatanga i-di waahale gaa-hula, gei di bontai di abaaba guu-tai i-muli digaula ne-hula. Digaula gaa-hula ga-halahala digau hagadina hagammuni o Israel gaa-dau-loo gi-di ala dela e-hana laa-lodo di monowai Jordan.

2:8  I-mua nia daangada dogolua hagadina aalaa gaa-kii, gei Rahab gaa-hana gi-nua gi tomo di hale,

2:9  ga-helekai gi meemaa, “Au gu-iloo bolo Dimaadua ne-gowadu gi goodou tenua deenei. Digau huogodoo tenua deenei e-mmaadagu huoloo i goodou.

2:10  Gimaadou gu-longono di hai a Dimaadua dela ne-haga-bagu di Tai-Mmee i godou mua, i-di godou madagoaa dela nogo lloomoi i Egypt, gei gimaadou gu-longono labelaa bolo goodou gu-daaligi a Sihon mo Og, nia king dogolua o Amor i-bahi-i-dua o Jordan.

2:11  Gimaadou gu-mmaadagu huoloo i-di madau longono-gimaadou nia mee aanei, gei gimaadou huogodoo la-gu-paagege madau hagamaanadu i goodou. Dimaadua di-godou God, go di God i-di langi i-nua mo henuailala.

2:12  Dolomeenei gei goolua gi-heia di-gulu hagamodudahi mai i dono ingoo, bolo goolua ga-dumaalia ang-gi digau dogu hale, be dagu hai dela ne-dumaalia adu gi goolua. Gei goolua gi-heia tei mee haga-modongoohia gii-mee-ai dagu hagadonu goolua.

2:13  Goolua gi-hagababa-mai gi-di-au bolo goolua ga-haga-dagaloaha dogu damana mo dogu dinana, ogu duaahina-daane mo ogu duaahina-ahina, mo nadau hagadili huogodoo! Hudee dugu-anga gimaadou gi-mmademmade!”

2:14  Gei nia daane aalaa ga-helekai gi mee, “God gi-daawa-ina mau mouli maa gimaua ga-hagalee haga-gila-aga mau helekai aanei. Maa goe ga-hagalee hagi-anga gi dahi dangada i mau mee ala ne-hai, gei gimaua ga-hagababa-adu gi-di-goe bolo gimaua ga-hagahumalia goodou, i-di madagoaa o Dimaadua ma-ga-dugu-mai gi gimaadou tenua deenei.”

2:15  Rahab ga-gaamai dana loahi damana, ga-haga-hege-ia nia daane aalaa gi-lala i-lodo di bontai dulii, idimaa, di hale o-maa le e-hau i-hongo di abaaba di waahale deelaa.

2:16  Gei mee ga-helekai gi meemaa, “Goolua hula mehanga nia dama-gonduu aalaa, gi-dee-gida goolua go digau hai-hegau o-di king. Pala hagammuni i-golo i-nia laangi e-dolu, gei digaula ga-lloomoi, gei goolua gaa-mee di-hula i-di gulu ala.”

2:17  Nia daane aalaa ga-helekai gi mee, “Gimaua ga-dadaahi di hagababa dela ne-hai-mai kooe gi gimaua bolo gimaua gi-heia-adu gi-di-goe.

2:18  Deenei dau mee dela e-hai gii-hai: Di madagoaa dela ma-ga-ulu-mai-ai gimaadou belee oho di waahale deenei, gei goe gaa-nnoo dau loahi mmee deenei gi-di bontai dulii dela nogo haga-hege-ia gimaua i-no-lodo. Laha-mai do damana mo do dinana mo o duaahina mo-di madahaanau o do damana huogodoo gi-lodo doo hale.

2:19  Maa tangada i digaula ma-ga-ulu gi-daha mo-di hale gaa-hana gi-hongo di ala, gaa-made, gei dono made la di made hua ni-oono, gei gimaadou hagalee dau gi dono made. Gei maa dahi dangada dela i-lodo o doo hale ma-gaa-lauwa, deelaa di mee e-dau-mai gi gimaadou.

2:20  Maa goe ga-hagi-anga gi dahi dangada i mau mee ala nogo hai, gei gimaua gu-hagalee dadaahi dau hagababa dela ne-hai-mai kooe gi gimaua bolo gimaua gi-heia-adu gi-di-goe.”

2:21  Gei-ogo di ahina deelaa guu-baba, ga-hagau meemaa gii-hula. Muli-hua meemaa ne-hula, gei di ahina deelaa gaa-nnoo dana loahi mmee i-di bontai dulii deelaa.

2:22  Gei nia daane aalaa gaa-hula gi-lodo nia dama-gonduu ga-palapala hagammuni i-golo, gei digau hai-hegau o-di king ga-halahala meemaa, gei digi gidee-ginaadou meemaa. I-muli-hua nia laangi e-dolu, gei digaula ga-lloomoi labelaa gi Jericho.

2:23  Nia daane hagadina hagammuni dogolua aalaa ga-lloo-ia i-mehanga nia dama-gonduu, gaa-hula laa-lodo di monowai gi-di baahi i-golo, gaa-hula gi-baahi o Joshua, ga-hagi-anga gi mee i-nia mee huogodoo ala ne-hai.

2:24  Meemaa ga-helekai gi Joshua, “Gimaua gu-hagadonu bolo Dimaadua gu-dumaalia-mai gi gidaadou tenua deelaa hagatau. idimaa digau huogodoo ala i-golo gu-mmaadagu huoloo i gidaadou.”

Chapter 3

3:1  Luada dono daiaa, Joshua mo digau Israel huogodoo ga-aala-aga hagaluada, ga-hagatanga i Acacia, gaa-hula gi taalinga di monowai Jordan, gaa-noho i-golo, gaa-tali i-di gowaa deelaa belee hula laa-lodo di monowai deelaa.

3:2  Nia laangi e-dolu nomuli, gei nia dagi digaula gaa-hula laa-lodo di waahale-laa digaula,

3:3  ga-helekai gi-nia daangada, “Di-godou madagoaa ma-ga-gidee-e-goodou digau hai-mee-dabu e-kae Tebedebe o-di Hagababa Dimaadua di-godou God, gei goodou ga-dahi-aga godou goloo, ga-daudali-adu digaula.

3:4  Goodou digi lloomoi gi kinei anadilaangi, malaa, digaula ga-hagi-adu gi goodou di ala dela e-hula-ai. Malaa, goodou hudee hula gi-hoohoo gi Tebedebe o-di Hagababa. Hula gii-tanga i-di baahi maele i-muli di-maa.”

3:5  Joshua ga-helekai gi-nia daangada, “Haga-madammaa-ina goodou, idimaa, daiaa Dimaadua gaa-hai ana mogobuna haga-goboina i godou mua.”

3:6  Gei mee gaa-hai digau hai-mee-dabu gi-kae-ina Tebedebe o-di Hagababa i-mua nia daangada ala e-hula. Digaula guu-hai be nia helekai a-maa.

3:7  Dimaadua ga-helekai gi Joshua, “Dagu mee dela ma-gaa-hai ko-Au dangi-nei le e-hai nia daangada Israel gi-daamada gi-hagalaamua goe be tangada aamua, gei digaula gaa-donu ang-gi ginaadou bolo Au e-madalia goe, be Au dela nogo madalia a Moses.

3:8  Hai gi digau hai-mee-dabu gi-aamo-ina Tebedebe o-di Hagababa, kae-ina gii-dau i-di monowai, hula tuu i taalinga di monowai.”

3:9  Gei Joshua ga-helekai gi-nia daangada, “Lloomoi gi kinei e-hagalongo gi nnelekai Dimaadua di-godou God ala ga-helekai-ai.

3:10  Goodou ga-lloo-adu gi-mua, gei Mee ga-hagabagi gi-daha digau Canaan, mo digau Hittite, Hivite, Perizzite, Girgash, Amor, mo digau Jebus. Goodou ga-iloo-laa bolo di God mouli la i godou baahi,

3:11  i-di godou madagoaa ma-gaa-mmada gi Tebedebe o-di Hagababa o-di Tagi o henuailala hagatau gaa-hana laa-lodo Jordan i godou mua.

3:12  Malaa, dolomeenei hilihilia nia daane dilongoholu maa-lua, e-dahi mai i-di madawaawa e-dahi o Israel.

3:13  Di madagoaa hua digau hai-mee-dabu ma-ga-aamo Tebedebe o-di Hagababa Dimaadua, go di Tagi o henuailala hagatau, gaa-tuu gi-lodo nia wai, gei Jordan ga-hagalee mmidi. Nia wai ala e-mmidi-ia ga-honu-aga hua i-di gowaa e-dahi.”

3:14  Di madagoaa deelaa go di madagoaa o taugai, gei di monowai Jordan guu-mmidi huoloo. Di madagoaa nia daangada ga-hagatanga di-nadau gowaa nogo noho-ai, gaa-hula laa-lodo di monowai Jordan, digau hai-mee-dabu gaa-hula i-mua digaula, ga-aamo Tebedebe o-di Hagababa. Di madagoaa-hua digau hai-mee-dabu gaa-tuu gi-lodo di monowai,

3:15  Di madagoaa deelaa go di madagoaa o taugai, gei di monowai Jordan guu-mmidi huoloo. Di madagoaa nia daangada ga-hagatanga di-nadau gowaa nogo noho-ai, gaa-hula laa-lodo di monowai Jordan, digau hai-mee-dabu gaa-hula i-mua digaula, ga-aamo Tebedebe o-di Hagababa. Di madagoaa-hua digau hai-mee-dabu gaa-tuu gi-lodo di monowai,

3:16  nia wai gu-hagalee mmidi, gu-hagabudu i-di gowaa e-dahi e-mogowaa i-nua i-di waahale go Adam, di waahale dela i-baahi di waahale go Zarethan. Di baahi di monowai ia gi Tai Mmade la-guu-odi gu-maangoo, gei nia daangada guu-mee di-taele laa-lodo gi-di baahi i-golo hoohoo gi Jericho.

3:17  Di madagoaa nia daangada ne-taele laa-lodo di gowaa bagu, digau hai-mee-dabu ala e-aamo Tebedebe o-di Hagababa Dimaadua, le e-tuu i-di gowaa bagu i tungaalodo Jordan, gaa-dae-loo gi-nia daangada huogodoo la-guu-dau-adu gi-di baahi dela i-golo.

Chapter 4

4:1  Digau huogodoo gaa-hula laa-lodo Jordan, gei Dimaadua ga-helekai gi Joshua,

4:2  “Hilihilia nia daane dilongoholu maa-lua, tangada e-dahi mai di madawaawa e-dahi.

4:3  Helekai gi digaula gi-kae-ina nadau hadu e-madangaholu maa-lua i tungaalodo o Jordan, mai i-di gowaa dela nogo tuu-ai digau hai-mee-dabu. Helekai gi digaula gi aamo-ina nia hadu aalaa dalia ginaadou gi-dugua i-di gowaa dela ga-noho-ai goodou boo-nei.”

4:4  Malaa, Joshua ga-gahi-mai ana daane dilongoholu maa-lua ala ne-hilihili go mee,

4:5  ga-helekai gi digaula, “Hula gi-lodo Jordan i-mua Tebedebe o-di Hagababa Dimaadua di-godou God. Tangada e-dahi e-kae dana hadu e-dahi i-hongo dono bakau, e-dahi ang-gi di madawaawa e-dahi o Israel.

4:6  Nia hadu aanei ga-haga-langahia gi-nia daangada di hai a Dimaadua ne-hai. Dagidilaangi, godou dama ma-gaa-heeu be nia hadu aanei la ono hadinga-aha adu gi goodou,

4:7  gei goodou ga-hagi-anga gi digaula bolo nia wai o Jordan ne-noho, hagalee mmidi i-di madagoaa Tebedebe o-di Hagababa Dimaadua ne-hana laa-lodo di monowai. Nia hadu aanei e-haga-langahia-hua beelaa gi digau Israel di mee dela ne-hai i kinei.”

4:8  Malaa, nia daane aalaa gu-daudali nnelekai Joshua. Be nnelekai Dimaadua ne-hai ang-gi Joshua, digaula guu-kae nia hadu e-madangaholu maa-lua i tungaalodo o Jordan, e-dahi ang-gi-di madawaawa e-dahi o Israel, ga-aamo gi-di gowaa dela e-noho-ai digaula, gaa-dugu i-golo.

4:9  Joshua gu-hagabae labelaa ana hadu e-madangaholu maa-lua i tungaalodo Jordan, i-di gowaa dela nogo-tuu-ai digau nogo aamo Tebedebe o-di Hagababa. (Nia hadu aalaa la i-golo hua dangi-nei.)

4:10  Digau hai-mee-dabu nogo tuu i tungaalodo Jordan, gaa-dae-loo gi-nia mee huogodoo guu-lawa di-hai, be nnelekai Dimaadua gi Joshua bolo gi hagi-anga-ina gi-nia daangada gi-heia, be-di mee a Moses ne-helekai gi Joshua. Nia daangada gu-hagalimalima guu-hula laa-lodo di monowai gi-di baahi dela i-golo.

4:11  Di madagoaa digaula huogodoo ne-dau i-di baahi i-golo di monowai, digau hai-mee-dabu ala e-kae Tebedebe o-di Hagababa Dimaadua gaa-hula i-mua nia daangada.

4:12  Nia daane di madawaawa Reuben mo Gad, mo-di baahi di madawaawa Manasseh, ala gu-hagatogomaalia ang-gi tauwa, guu-hula laa-lodo di monowai i-mua digau Israel ala i-golo, be nnelekai Moses ne-hai gi digaula gi-heia.

4:13  Digau dauwa e-madahaa mana-(40,000) ala gu-hagatogomaalia gi tauwa, gaa-hula i-mua nnadumada Dimaadua gi-di gowaa baba hoohoo gi Jericho.

4:14  Di laangi-hua deelaa, gei Dimaadua guu-hai digau Israel gi-modongoohia bolo Joshua la tangada aamua huoloo. Digaula gu-hagalaamua a-mee i-di waalooloo o dono mouli, be-di hagalaamua digaula nogo hai gi Moses.

4:15  Malaa, Dimaadua ga-helekai gi Joshua

4:16  bolo gi-helekai gi digau hai-mee-dabu ala e-aamo Tebedebe o-di Hagababa gi-lloo-aga gi-daha mo Jordan.

4:17  Joshua gu-helekai gi digaula gii-hai beelaa,

4:18  gei di madagoaa digau hai-mee-dabu ne-dau taalinga di monowai, gei di monowai gu-daamada guu-mmidi-ia labelaa, guu-mmidi huoloo.

4:19  Nia daangada ne-hula laa-lodo Jordan i-di madangaholu laangi o tahi malama, ga-haga-duu di-nadau waahale-laa i Gilgal i-bahi-i-dua o Jericho.

4:20  Deelaa di gowaa Joshua ga-hagabae ana hadu madangaholu maa-lua ala ne-gaamai i Jordan.

4:21  Gei mee ga-helekai gi digau Israel, “Dagidilaangi, godou dama ga-heeu-adu gi goodou tadinga o-nia hadu aanei,

4:22  gei goodou ga-hagi-anga gi digaula di hai o-di madagoaa digau Israel ne-hula laa-lodo Jordan di gowaa maangoo.

4:23  Hagi-anga-ina gi digaula bolo Dimaadua di-godou God ne-haga-bagu di monowai Jordan, gaa-dae-loo gi-di-godou hula laa-lodo di-maa gi-di baahi dela i-golo, gadoo be dana hai dela ne-haga-bagu di Tai-Mmee mai gi gidaadou.

4:24  Di hai deenei gaa-hai nia daangada huogodoo henuailala gi-iloo di mogobuna o Dimaadua, gei goodou ga-hagalaamua Dimaadua di-godou God gaa-hana-hua beelaa.”

Chapter 5

5:1  Nia king o Amor huogodoo ala i-bahi-i-dai o Jordan mo nia king o Canaan huogodoo ala i-di gili di tai go Mediterranean ne-longono-ginaadou bolo Dimaadua gu-haga-bagu Jordan gaa-dae loo gi digau Israel ne-hula laa-lodo. Digaula gu-mmaadagu huoloo, gu-uli nadau gai i digau Israel.

5:2  Di madagoaa deelaa, gei Dimaadua ga-helekai gi Joshua, “Heia au hulumanu gi-nia hadu gaa, sirkumsais-ina digau Israel.”

5:3  Gei Joshua guu-hai be nnelekai Dimaadua ne-hai, ga-sirkumsais digau Israel i-di gowaa dela e-haga-ingoo bolo di Gonduu=Sirkumsais.

5:4  Di madagoaa digau Israel ne-hagatanga gi-daha mo Egypt, nia daane huogodoo guu-lawa di sirkumsais. Malaa, i lodo nia ngadau e-madahaa ala nogo heehee-ai nia daangada i-lodo di anggowaa, nia dama-daane la-digi sirkumsais. I-di hagaodi gi-muli di madagoaa deelaa, nia daane huogodoo ala guu-mee di-heebagi i-di madagoaa digaula ne-hagatanga i Egypt, la-guu-mmade, idimaa, digaula gu-hagalee daudali Dimaadua. Mee gu-hagamodu bolo digau aanei la hagalee dumaalia e-mmada gi tenua tomo ge logo ono meegai, dela ne-hagababa go Mee ang-gi nadau damana-mmaadua.

5:5  Di madagoaa digau Israel ne-hagatanga gi-daha mo Egypt, nia daane huogodoo guu-lawa di sirkumsais. Malaa, i lodo nia ngadau e-madahaa ala nogo heehee-ai nia daangada i-lodo di anggowaa, nia dama-daane la-digi sirkumsais. I-di hagaodi gi-muli di madagoaa deelaa, nia daane huogodoo ala guu-mee di-heebagi i-di madagoaa digaula ne-hagatanga i Egypt, la-guu-mmade, idimaa, digaula gu-hagalee daudali Dimaadua. Mee gu-hagamodu bolo digau aanei la hagalee dumaalia e-mmada gi tenua tomo ge logo ono meegai, dela ne-hagababa go Mee ang-gi nadau damana-mmaadua.

5:6  Di madagoaa digau Israel ne-hagatanga gi-daha mo Egypt, nia daane huogodoo guu-lawa di sirkumsais. Malaa, i lodo nia ngadau e-madahaa ala nogo heehee-ai nia daangada i-lodo di anggowaa, nia dama-daane la-digi sirkumsais. I-di hagaodi gi-muli di madagoaa deelaa, nia daane huogodoo ala guu-mee di-heebagi i-di madagoaa digaula ne-hagatanga i Egypt, la-guu-mmade, idimaa, digaula gu-hagalee daudali Dimaadua. Mee gu-hagamodu bolo digau aanei la hagalee dumaalia e-mmada gi tenua tomo ge logo ono meegai, dela ne-hagababa go Mee ang-gi nadau damana-mmaadua.

5:7  Nia dama-daane digau aanei la-digi sirkumsais, malaa, go di adu-dangada hoou deenei dela gu-sirkumsais go Joshua.

5:8  I-muli di sirkumsais ne-lawa, digau Israel huogodoo nogo noho-hua i-di nadau waahale-laa, gaa-dae-loo gi nadau gowaa ne-tuu la-guu-hili.

5:9  Dimaadua ga-helekai gi Joshua, “Dangi-nei gei Au ne-daa gi-daha mo goodou di haga-langaadia o di-godou hai-hege i Egypt.” Deelaa di mee ne-haga-ingoo di guongo deenei bolo Gilgal, di ingoo deenei i-golo hua.

5:10  Di madagoaa digau Israel nogo noho hua igolo i Gilgal i-di gowaa baba dela e-hoohoo gi Jericho, digaula gaa-hai Tagamiami Pasoobaa i-di hiahi o-di madangaholu maa-haa laangi o-di malama deelaa.

5:11  Dono daiaa, deelaa di laangi ga-daamada-ai digaula ga-miami nia meegai ala e-tomo i Canaan: nia golee dunu, mono palaawaa deai ono ‘yeast’ ai.

5:12  Nia ‘manna’ gu-hagalee monnono-ia, gei digau Israel guu-lawa di-gai nia maa. Daamada di madagoaa deelaa, gei digaula guu-gai nia meegai ala e-tomo i Canaan.

5:13  Di madagoaa Joshua ne-hoohoo-adu gi Jericho, mee gaa-mmada gi taane e-duu i ono mua, e-daahi dana hulumanu-dauwa. Joshua gaa-hana ga-heeu gi mee, “Goe tangada-dauwa ni gimaadou, be-di hagadaumee?”

5:14  Taane deelaa ga-helekai gi mee, “Hagalee tei nia maa. Au go tagi aamua digau-dauwa o Dimaadua.” Joshua gaa-bala-ia gi hongo di gelegele mo-di daumaha, ga-helekai, “Au tangada hai-hegau ni-aau, dau maa di-aha dela e-hiihai ginai belee hai ko-au?”

5:15  Gei di tagi o digau-dauwa o Dimaadua ga-helekai gi mee, “Daawaa-ina gi-daha oo suudi, goe e-duu i-hongo di gowaa haga-madagu.” Malaa, Joshua guu-hai be nia helekai a-maa ne-hai.

Chapter 6

6:1  Di abaaba Jericho la-guu-tai e-duuli digau Israel gi-daha. Deai tangada e-mee di-ulu gi-lodo be e-ulu gi malaelae mo-di waahale deelaa ai.

6:2  Dimaadua ga-helekai gi Joshua, “Au ga-dugu-adu Jericho gi-lodo doo lima, mo dono king mo ana gau dauwa mmaaloo huogodoo.

6:3  Goe mo au gau-dauwa haganiga-ina di waahale haga-dahi di laangi e-dahi i-nia laangi e-ono.

6:4  Digau hai-mee-dabu dogohidu e-kae dagidahi labaa, e-hula i-mua Tebedebe o-di Hagababa. I-di hidu laangi, goe mo au gau-dauwa gi-haganiga-ina di waahale haga-hidu, i-di madagoaa digau hai-mee-dabu ga-iliili nadau labaa.

6:5  Ga-nomuli, gei digaula gi-ilihia gii-hai be-di mee e-dahi i-di lee looloo gi nadau labaa. Di-godou madagoaa ma-ga-longono di lee looloo deelaa, gei nia daangada huogodoo gii-wwolo gi-nua, gei di abaaba di waahale gaa-doo gi-lala, ga-mooho, gei digau-dauwa huogodoo gaa-hula haga-huudonu gi-lodo i-di waahale.”

6:6  Joshua ga-haga-gahi digau hai-mee-dabu, ga-helekai gi digaula, “Kae-ina Tebedebe o-di Hagababa Dimaadua. Dogohidu i goodou gii-hula i-mua di-maa, e-kae godou labaa.”

6:7  Gei mee ga-helekai gi digau Israel bolo gi-daamada gi-taele haganiga-ina di waahale. Digau hagaloohi maaloo e-hula i-mua Tebedebe o-di Hagababa Dimaadua.

6:8  Malaa, guu-hai be nnelekai a Joshua ne-hai, nia madaloohi ga-daamada gaa-hula i-mua digau hai-mee-dabu ala e-iliili nadau labaa. I-muli digau aanei la-go digau hai-mee-dabu ala e-aamo Tebedebe o-di Hagababa Dimaadua, ga-nomuli la-go nia madaloohi ala i-golo. Di madagoaa dela e-hula-ai digaula, gei nia labaa e-iliili.

6:9  Malaa, guu-hai be nnelekai a Joshua ne-hai, nia madaloohi ga-daamada gaa-hula i-mua digau hai-mee-dabu ala e-iliili nadau labaa. I-muli digau aanei la-go digau hai-mee-dabu ala e-aamo Tebedebe o-di Hagababa Dimaadua, ga-nomuli la-go nia madaloohi ala i-golo. Di madagoaa dela e-hula-ai digaula, gei nia labaa e-iliili.

6:10  Joshua guu-bule gi digaula bolo gi-hudee wwolowwolo, ge hudee leelee gaa-dae-loo gi mee ga-hagadaba.

6:11  Malaa, mee guu-hai digaula gii-kae Tebedebe o-di Hagababa Dimaadua e-haganiga di gili di waahale tolongo matagidagi. Ga-lloomoi gi-muli gi di-nadau waahale-laa, gaa-kii i-golo.

6:12  Joshua ga-ala-aga hagaluada dono daiaa, gei-ogo digau hai-mee-dabu mo digau-dauwa ga-taele haganiga di waahale be-di hai i-di laangi nomua: i-mua go nia madaloohi, nomuli go digau hai-mee-dabu ala e-iliili nadau labaa, ga-nomuli la-go digau hai-mee-dabu ala e-aamo Tebedebe o-di Hagababa Dimaadua. Ga-haga-muliagina go nia madaloohi i-muli. Di madagoaa dela e-hula-ai digaula, gei nia labaa e-iliili.

6:13  Joshua ga-ala-aga hagaluada dono daiaa, gei-ogo digau hai-mee-dabu mo digau-dauwa ga-taele haganiga di waahale be-di hai i-di laangi nomua: i-mua go nia madaloohi, nomuli go digau hai-mee-dabu ala e-iliili nadau labaa, ga-nomuli la-go digau hai-mee-dabu ala e-aamo Tebedebe o-di Hagababa Dimaadua. Ga-haga-muliagina go nia madaloohi i-muli. Di madagoaa dela e-hula-ai digaula, gei nia labaa e-iliili.

6:14  I togolua laangi digaula gu-haganiga di gili di waahale deelaa haga-dahi, ga-lloomoi gi di-nadau waahale-laa. Malaa, digaula e-hai beenei i-nia laangi e-ono.

6:15  I-di hidu laangi, digaula ga-aala-aga hagaluada, ga-taele haganiga haga-hidu di gili di waahale deelaa be-di hai dela ne-hai i-mua. Malaa, di laangi hua deenei, digaula e-taele haganiga haga-hidu.

6:16  Di hidu haganiga, i-di madagoaa digau hai-mee-dabu ga-iliili nadau labaa, gei Joshua ga-hagadaba gi-nia daangada gii-wwolo gi-nua, gei mee ga-helekai, “Dimaadua gu-gowadu di waahale gi goodou!

6:17  Di waahale mono mee huogodoo no-lodo le e-hai-loo gi-mooho hagatau, e-hai-ai tigidaumaha ang-gi Dimaadua. Deelaa hua go di ahina huihui dono huaidina go Rahab mo digau o dono hale le e-dugu hagamouli, idimaa, mee ne-hagammuni nia daangada hagadina hagammuni.

6:18  Goodou hudee kae mee i-nia mee ala belee oho gi-mooho. Maa goodou gaa-kae godou mee, gei goodou ga-gaamai labelaa di haingadaa mo-di hagahuaidu gi-hongo di waahale-laa o digau Israel.

6:19  Nia mee huogodoo ala e-hai gi-nia silber, goolo, baalanga-mmee mo baalanga gi-dugu-ina gi-daha, e-hai nia mee ni Dimaadua. Nia mee aanei la-gi-wanga-ina gi-lodo di gowaa benebene-mee a Dimaadua.”

6:20  Malaa, digau hai-mee-dabu ga-iliili nadau labaa, gei nia daangada gu-longono-ginaadou, gaa-wwolo gi-nua, gei di abaaba guu-doo gi-lala gu-mooho. Gei di llongo dauwa huogodoo guu-hula haga-huudonu gi-hongo di gonduu gi-lodo di waahale gaa-kumi di waahale.

6:21  Digaula gu-daaligi digau huogodoo ala i-lodo di waahale gi nadau hulumanu-dauwa, nia daane mo ahina, digau lligi mo mmaadua. Digaula gu-daaligi labelaa nia kau, siibi mono ‘donkey’.

6:22  Joshua ga-helekai gi-nia daane dogolua ala nogo hagadina hagammuni di waahale i-mua, “Hula gi-lodo di hale di ahina huihui dono huaidina, laha-mai a-mee mo digau dono hale gi-daha, be di-gulu hagababa ne-hai gi mee.”

6:23  Malaa, meemaa gaa-hula ga-laha-mai a Rahab, mo tamana mo tinana, ono duaahina-daane mo digau di hale o-maa hagatau. Meemaa gaa-lahi digaula huogodoo, ala go nia gau o-maa mo nadau hege, gi-di gowaa i-di aumaalia i-di gili di waahale-laa o digau Israel.

6:24  Digaula gaa-dudu di waahale gi-baabaa gi-lala gii-tugi di gelegele, mo nia mee huogodoo ala i ono lodo, ala-hua go nia mee ala ne-hai gi-nia silber, goolo, baalanga-mmee, mono baalanga ala guu-kae go digaula guu-dugu i-di gowaa benebene-mee a Dimaadua.

6:25  Joshua gu-benebene di mouli di ahina huihui dono huaidina go Rahab mo ono gau huogodoo, idimaa, mee ne-hagammuni nia daangada dogolua ala ne-hagau go mee gi Jericho. (Di hagadili a-di ahina deenei e-noho hua igolo i Israel ga-dau-mai gi dangi-nei.)

6:26  Di madagoaa hua deelaa, gei Joshua gaa-hai dana bule hagalabagau: “Tangada dela ma-gaa-hai bolo ia e-hau labelaa di waahale go Jericho, geia ga-haga-halauwa go Dimaadua. Gei-ogo tangada dela gaa-hau di baba di-maa, gei dana dama madua la-gaa-made, gei-ogo tangada dela gaa-hau nia bontai di abaaba, gei dana dama dela kaedahi dulii la-gaa-made.”

6:27  Malaa, Dimaadua la-gu-madalia Joshua, gei ono longo gu-modoho gi-lodo tenua hagatau.

Chapter 7

7:1  Dimaadua ga-hagawaalanga gi digau Israel gi-dee-kae mee i-lodo nia mee ala ne-hai bolo gi-oho-ina i-lodo Jericho, gei digaula digi hagalongo. Taane dono ingoo go Achan digi daudali di waalanga deelaa, gei Dimaadua gu-hagawelewele huoloo gi digau Israel. (Achan tama ni Carmi, dono damana madua go Zabdi, taane di madawaawa Zerah, di manga di hagadili ni Judah.)

7:2  Joshua ne-hagau hunu daane i Jericho gi Ai, di waahale i-bahi-i-dua o Bethel, dela e-hoohoo gi Beth=Aven bolo gii-hula hagadina-ina tenua deelaa. Di madagoaa digaula ne-lawa-loo di-hagadina tenua deelaa,

7:3  gei digaula ga-hagi-anga gi Joshua, “Ma hagalee-loo bolo digau dauwa hagatau la-gii-hula e-heebagi. Hagau-ina-hua hunu gau-dauwa e-lua be e-dolu mana, hudee hagau-ina digau-dauwa hagatau, ma hagalee di guongo damana.”

7:4  Malaa, holongo digau-dauwa o Israel e-dolu mana-(3,000) ne-hula e-heebagi gi digaula, ge digaula gu-waluwalu go digau Ai.

7:5  Nia daane o Ai gu-waluwalu digaula mai di ngudu di bontai di guongo gaa-dau-loo gi-di gowaa hai-hadu, gu-daaligi gii-mmade holongo digau e-motolu maa-ono-(36) i digaula i-di nadau llele-ia i-tomo di gonduu. Digau Israel gu-paagege gu-mmaadagu.

7:6  Joshua mo nia dagi o Israel gu-hahaahi nadau goloo i-lodo nadau manawa-gee, guu-tinga gi-hongo nia gelegele i-di gili Tebedebe o-di Hagababa Dimaadua, gu-mmoemmoe i-golo gaa-dae-loo gi-di hiahi, gei nadau libogo gu-haga-dogolia gi-nia gelegele, e-haga-modongoohia nadau manawa-gee.

7:7  Gei Joshua ga-helekai, “Meenei Tagi go Yihowah! Goe ne-laha-mai gimaadou laa-lodo di Monowai Jordan eiaha? Belee wanga gimaadou gi digau Amor? Bolo gi-daaligidia gimaadou? Goe e-aha dela digi heia gimaadou gi-noho-hua i-di baahi dela i-golo o Jordan?

7:8  Au e-helekai bolo-aha, meenei Dimaadua, idimaa digau Israel gu-lellele gi-daha mo nadau hagadaumee?

7:9  Digau Canaan mo digau huogodoo ala i-lodo tenua deenei ga-longono-ginaadou di mee deenei. Digaula ga-duuli gimaadou, ga-daaligi gimaadou huogodoo! Gei Goe gaa-hai dau-aha belee benebene do ingoo aamua?”

7:10  Dimaadua ga-helekai gi Joshua, “Duu gi-nua! Goe e-kii i-lodo nia gelegele beleiaha?

7:11  Israel gu-hai-hala! Digaula gu-oho dagu hagababa dela ne-hai gi-digaula gi-daudalia. Digaula guu-kae hunu mee i-nia mee ala ne-hai-iei Au bolo gi-ohaa gi-daha. Digaula gu-gaiaa nia maa, gu-hagammuni nia maa gi-baahi nadau goloo.

7:12  Deenei di mee digau Israel ne-deemee di-hai-baahi gi nadau hagadaumee, idimaa digaula guu-hai belee hagammaa gi-daha. Au hagalee noho madalia goodou gaa-dae-loo gi-di-godou oho gi-daha nia mee ala ne-hai-iei Au adu gi goodou bolo hagalee kae!

7:13  Duu gi-nua! Haga-madammaa-ina nia daangada, hagatogomaalia-ina digaula gi-lloomoi gi ogu mua. Hagatogomaalia-ina gi daiaa, idimaa Au go Dimaadua go di God o Israel, e-helekai-adu beenei, ‘Digau Israel, goodou gu-hai-mee gi-nia goloo ala gu-hai-iei Au bolo gi-ohaa gi-daha! Goodou e-deemee di-hai-baahi gi godou hagadaumee gaa-dae-loo gi goodou gaa-kili gi-daha nia maa!’

7:14  Helekai gi digaula bolo luada daiaa gei digaula ga-laha-mai gi ogu mua, ga-hagadau madawaawa mai gi ogu mua. Di madawaawa dela gaa-dongo go-Au gi-lloomoi gi-mua, ga-hagadau i madahaanau llauehe. Di madahaanau damana dela gaa-dongo go-Au, ga-lloomoi gi-mua, ga-hagadau i madahaanau lligi. Di madahaanau dulii dela gaa-dongo go-Au, ga-lloomoi gi-mua ga-hagadau i dangada dagi-dahi.

7:15  Tangada dela gaa-dongo go-Au gaa-gida bolo nia goloo ala belee oho gi-daha la i-baahi o-mee, le e-dudu ngaadahi mo dono madahaanau dulii mo ana goloo hagatau, idimaa mee guu-wanga di hagalangaadia gi-hongo Israel, ge gu-oho dagu haganoho.”

7:16  Luada-loo dono daiaa, gei Joshua gu-laha-mai digaula gi mua hagadau madawaawa, gei di madawaawa Judah la-guu-dongo.

7:17  Mee gaa-gahi di madawaawa Judah gi-mua, ga-hagadau i madahaanau, malaa go di mada-haanau a Zerah dela ne-dongo. Mee gaa-gahi di madahaanau o Zerah gi-mua, ga-hagadau i madahaanau lligi, malaa go di madahaanau dulii o Zabdi ne-dongo.

7:18  Mee gaa-gahi di madahaanau dulii a Zabdi gi mua, ga-hagadau dagi-dahi, gei Achan, tama-daane ni Carmi, dono damana madua go Zabdi, la-guu-dongo.

7:19  Joshua ga-helekai gi mee, “Dagu dama-daane, goe helekai gii-donu i ginei i-mua o Dimaadua, go di God o Israel, mo-di haagi-aga. Hagia-mai gi-di-au dolomeenei di mee dela ne-hai kooe. Hudee hagammuni mee mai gi-di-au.”

7:20  Achan ga-helekai, “E-donu. Au gu-hai-hala ang-gi Dimaadua, go di God o Israel, deenei dagu mee ne-hai.

7:21  I-lodo nia goloo ne-kae go gimaadou, au gu-gidee di gahu laatua mai Babylon e-madamada huoloo, mo nia silber pauna e-lima ge dahi goolo looloo, di pauna e-dahi duumaa. Au gu-hiihai huoloo gi-nia maa, guu-kae nia maa. Nia mee aanei e-danu i-lodo dogu hale-laa, nia silber e-danu mugi-lala.”

7:22  Joshua gu-hagau ana daane guu-llele gi-di hale-laa a-maa, gu-gidee nia goloo ala ne-bule e-danu i-golo i-hongo nia silber.

7:23  Digaula ga-gaamai nia maa gi-daha mo-di hale-laa, gaa-kae nia maa gi Joshua mo digau Israel huogodoo, gaa-dugu gi-mua Dimaadua.

7:24  Joshua mo digau huogodoo o Israel guu-lahi a Achan, mono silber, mo-di gahu laa-daha, mo-di goolo looloo, nia dama-daane mono dama-ahina, mo ana kau, mo ana ‘donkey’ mo ana siibi, mo dono hale-laa, mo nia goloo o-maa hagatau gi-di gowaa dela e-haga-ingoo bolo di gowaa mehanga gonduu o-di Haingadaa.

7:25  Joshua ga helekai, “Goe ne-gaamai di haingadaa gi gimaadou eimaha? Dimaadua la-ga-gowadu labelaa di haingadaa gi-di-goe!” Digau Israel huogodoo gu-dilidili Achan gii-made. Gu-dilidili ana dama gii-mmade labelaa, guu-dudu nia goloo o-maa gii-wwele hagatau mo dono madahaanau hagatau.

7:26  Digaula gu-hagabae tagabae hadu gi-hongo o-mee, nia hadu aanei e-hagabae hua igolo dangi-nei. Deenei tadinga o di gowaa deenei e-haga-ingoo bolo di gowaa mehanga gonduu o-di Haingadaa. Gei Dimaadua gu-hagalee hagawelewele.

Chapter 8

8:1  Dimaadua ga-helekai gi Joshua, “Lahia nia gau-dauwa huogodoo gi Ai. Goe hudee madagu ge hudee manawa-bagege. Au gaa-hai goe gi-aali i-di king o Ai. Ana daangada mo dono guongo mo dono waahale ga-hai-mee ginai goe.

8:2  Goe gaa-hai gi Ai mo dono king be dau hai dela ne-hai gi Jericho mo dono king, malaa, tolongo-nei gei goodou ga-hai-mee gi-nia goloo mono manu digaula. Hagatogomaalia e-heebagi gi digaula haga-homouli e-daaligi digaula mai muli.”

8:3  Joshua gu-hagatogomaalia dono hana gi Ai mo ana gau-dauwa huogodoo. Mee ne-hili ana gau-dauwa humalia e-motolu-mana-(30,000) mai i-lodo ana buini-dauwa ga-hagau digaula boo,

8:4  mo nadau waalanga aanei, “Pala hagammuni i-di baahi i-golo di waahale, hagalee hai gi mogowaa di waahale. Hagatogomaalia e-heebagi.

8:5  Au mo agu daane ga-loo-adu gi-hoohoo gi-di waahale. Di madagoaa o-nia daane o Ai ga-lloomoi belee heebagi-mai gi gimaadou, gei gimaadou gaa-huli gi-muli gaa-llele, be tadau hai dela ne-hai i-di matagidagi.

8:6  Digaula ga-waluwalu gimaadou gaa-dae-loo gi digaula gaa-wodi mai gi-daha mo-di waahale. Digaula ga-maanadu bolo gimaadou e-llele gi-daha mo ginaadou, be tadau hai dela ne-hai i-di matagidagi.

8:7  Di madagoaa hua deelaa, gei goodou ga-lloomoi gi-daha mo di-godou gowaa nogo pala-ai, gaa-kumi di guongo. Dimaadua, go di-godou God ga-gowadu di guongo deelaa gi goodou

8:8  I-muli-hua di-godou kumi di waahale deelaa, gei goodou duungia di waahale gii-wele, gii-hai be-di hai a Dimaadua ne-hagawaalanga. Aanei godou mee gi-daudali-ai.”

8:9  Malaa, Joshua gu-hagau digaula gii-hula gi di-nadau gowaa dela belee pala hagammuni-ai, gaa-tali-laa i-golo, i-bahi-i-dai o Ai, i-mehanga Bethel mo Ai. Gei Joshua mo ana gau-dauwa guu-noho boo i-di waahale-laa.

8:10  Hooaga luada, Joshua ga-haga-dagabuli-mai digau-dauwa gi-di gowaa e-dahi, gei mee mo nia dagi o Israel gaa-dagi digaula gi Ai.

8:11  Digau dauwa ala nogo i-baahi o mee guu-hula hagahuudonu adu gi-di ngudu di bontai di waahale, gaa-hau nadau hale-laa i-golo, i-bahi-i-ngeia di waahale, di gowaa baba i-mehanga digaula mo Ai.

8:12  Mee ne-dugu hagammuni ana daane e-lima-mana-(5,000) i-bahi-i-dai di waahale, i-mehanga o Ai mo Bethel.

8:13  Digau dauwa e-haga-noho ginaadou gi-di hai-dauwa gi-bahi-i-ngeia di waahale, gei digau-dauwa ala i-golo gu-hagau gi-bahi-i-dai. Joshua nogo kii i-di gowaa baba deelaa.

8:14  Di madagoaa di king o Ai ne-gidee-ia nia gau-dauwa a Joshua, gei mee gu-hagalimalima gu-ulu gi-daha mo-di waahale mo ana gau-dauwa, gu-loo-adu gi-di gowaa mehanga gonduu o Jordan belee heebagi gi digau Israel i-di gowaa dela nogo heebagi-ai ginaadou anadilaangi, gei mee digi iloo-ia bolo tauwa le e-hai labelaa mai muli.

8:15  Joshua mo digau-dauwa e-halahalau digaula bolo gi-maanadu bolo ginaadou gu-mmaadagu guu-llele gi-di anggowaa.

8:16  Nia daane huogodoo i-lodo di waahale guu-hai ginai bolo gi-lloomoi e-waluwalu a Joshua mo ono ehoo, gei digaula gu-waluwalu digaula, gu-mogowaa gi-daha mo-di waahale.

8:17  Nia daane huogodoo i Ai guu-hula i-muli digau Israel, gei di waahale la-gu-diiagi, gu-mahuge dono bontai, gu-deai tangada i-golo bolo e-madamada humalia di guongo ai.

8:18  Gei Dimaadua ga-helekai gi Joshua, “Luia dau daalo gi Ai. Au ga-gowadu di-maa gi-di-goe.” Gei Joshua guu-hai be telekai ne-hai gi mee,

8:19  gei di madagoaa hua a mee ne-dahi-aga dono lima gi-nua, gei digau ala nogo pala hagammuni gaa-tuu i-nua haga-limalima, gaa-llele gi-lodo di waahale gaa-kumi di-maa. Digaula gu-haga-limalima guu-dudu di guongo.

8:20  Di madagoaa digau Ai ne-mmada-mai gi-muli, ga-gidee di huiahi dela guu-gohu gi-di langi i-nua. Malaa, digaula gu di-nadau gowaa e-llele hagammuni ginai ai, idimaa digau Israel ala nogo llele gi-di anggowaa la-gu-huli-mai gi-muli gu-heebagi gi digaula.

8:21  Joshua mo ana daane ga-gidee bolo nadau ihoo ala i-golo la-guu-kumi di guongo guu-dudu gu-ulaula, gei digaula gaa-huli gi-muli, ga-daamada ga-daaligi nia daane o Ai.

8:22  Digau dauwa o Israel nogo i-lodo di waahale, ga-lloo-ia gi-lala ga-ulu gi-lodo tauwa. Di madagoaa deenei, digau Ai gu-iloo-ginaadou bolo ginaadou gu-duuli go digau Israel, malaa, digaula huogodoo gu-daaligi guu-mmade, deai tangada e-lele hagammuni ai, tangada e-mouli ai,

8:23  dela hua go di king o Ai. Mee ne-kumi gaa-lahi gi Joshua.

8:24  Digau Israel gu-daaligi nadau hagadaumee huogodoo guu-mmade i-lodo di anggowaa, di gowaa nogo waluwalu digaula go digau Israel. Digaula gaa-hula gi-muli gi Ai, ga-daaligi digaula huogodoo ala i-golo gii-mmade.

8:25  Joshua e-lui hua igolo dana daalo gi Ai, digi dugu gi-lala gaa-dae-loo gi digau huogodoo gu-daaligi guu-mmade. Digau Ai ala gu-daaligi gii-mmade i-di laangi deelaa le e-madangaholu-ma-lua-mana-(12,000), nia daane mo nia ahina.

8:26  Joshua e-lui hua igolo dana daalo gi Ai, digi dugu gi-lala gaa-dae-loo gi digau huogodoo gu-daaligi guu-mmade. Digau Ai ala gu-daaligi gii-mmade i-di laangi deelaa le e-madangaholu-ma-lua-mana-(12,000), nia daane mo nia ahina.

8:27  Digau Israel gu-hai-mee gi-nia manu digaula mono goloo o-di guongo ala ne-kumi, be-di hai a Dimaadua ne-helekai gi Joshua.

8:28  Joshua guu-dudu Ai, gu-diiagi-hua gu-mooho i-golo. Dangi-nei e-dugu-hua mooho be di-maa.

8:29  Mee gu-daudau di king o Ai gi-tomo di laagau, ga-daudau i-golo gaa-dae-loo gi-di hiahi. Di laa ga-ulu, gei Joshua ga-hagadaba gi digaula gi-dugu-iha gi-lala tuaidina o-di king, gei digaula gaa-hudu tuaidina o-maa gi-lala gi-di ngudu di bontai di waahale. Digaula gaa-danu a-mee gi tagabae hadu damana, malaa dangi nei tagabae hadu deelaa la i golo hua.

8:30  Malaa, Joshua ga-hagaduu dana gowaa hai-tigidaumaha i-hongo di Gonduu Ebal ang-gi Dimaadua, go di God o digau Israel.

8:31  Mee ne-hai di-maa be-di hai a Moses, go tangada hai-hegau Dimaadua, dela ne-hagi-anga gi digau Israel, be-di kai dela e-hai i-lodo di Beebaa Nnaganoho Moses, boloo, “Di gowaa hai-tigidaumaha le e-hai gi-nia hadu ala hagalee ne-tuu gi-nia goloo baalanga.” I-hongo di-maa, digaula guu-hai nadau tigidaumaha dudu ang-gi Dimaadua, guu-hai labelaa nadau tigidaumaha hagadaubuni ang-gi Dimaadua.

8:32  Di gowaa deelaa, digau Israel e-daumada a Joshua e-hihi Nnaganoho Moses gi-hongo nia hadu.

8:33  Digau Israel mo nadau dagi mono gau aamua, mono gau hai-gabunga, mo digau mai i-daha ala e-noho madalia digaula, le e-tuu i-nia baahi e-lua o Tebedebe o-di Hagababa Dimaadua, e-tuu huli-adu gi digau hai-mee-dabu o-di madawaawa Levi ala e-aamo di-maa. Di baahi o-nia daangada le e-tuu huli nadau dua gi-di Gonduu Gerizim, gei di baahi dela i-golo le e-huli nadau dua gi-di Gonduu Ebal. Tangada hai-hegau o Dimaadua go Moses gu-helekai gi digaula gi-heia di mee deenei i di-nadau madagoaa dela gaa-kae di hagamaluagina.

8:34  Joshua gaa-dau gi-nua Nnaganoho hagatau, ngaadahi mo nia hagahuaidu mono hagahumalia, be nia maa ala e-hihi i-lodo di Beebaa Nnaganoho.

8:35  Nia haganoho huogodoo a Moses guu-dau go Joshua ang-gi tagabuulinga deelaa, ngaadahi mo nia ahina mo nia damagiigi, mo nia gau mai i-daha ala e-noho madalia digaula.

Chapter 9

9:1  Di maaloo digau Israel gu-longono nia king huogodoo ala i-bahi-i-dai di monowai Jordan, go nia king ala i-hongo nia gonduu, mo i tono nia gonduu, mo nia guongo ala i-di gili di Tai Damana go Mediterranean adu-loo gi-ngeia gi Lebanon, ala go nia king digau Hittite, digau Amor, digau Canaan, digau Perizzite, digau Hivite, mo digau Jebus.

9:2  Digaula ga-buni-mai gi-di gowaa e-dahi belee heebagi gi Joshua mo digau Israel.

9:3  Gei digau Gibeon ne-longono di hai a Joshua ne-hai ang-gi Jericho mo Ai,

9:4  gei digaula gaa-hai bolo ginaadou ga-halahalau a-mee. Digaula ga-hagauda nadau meegai gi-hongo nadau ‘donkey’ gi-nia peege mahaahaa mono mee hagahau waini bonobono.

9:5  Digaula gaa-gahu gi nadau goloo huaidu mahaahaa mono doolii momooho ala gu-bonobono. Nia palaawaa ala ne-kae go digaula la-gu-maangoo gei gu-huungina ono gili.

9:6  Digaula gaa-hula gi-di gowaa e-noho-ai digau Israel i Gilgal, ga-helekai gi Joshua mo digau Israel, “Gimaadou ne-lloomoi i-di gowaa mogowaa. Gimaadou e-hiihai bolo goodou gi-heia di hagababa i tadau mehanga.”

9:7  Gei digau Israel ga-helekai, “Gimaadou e-hai di-madau hagababa adu gi goodou eiaha? Holongo goodou e-noho hoohoo-mai!”

9:8  Digau Gibeon ga-helekai gi Joshua, “Gimaadou digau hai-hegau ni-aau.” Joshua ga-heeu, “Goodou goai? Goodou ne-lloomoi i-hee?”

9:9  Gei digaula ga-helekai, “Meenei, gimaadou ne-lloomoi i-di gowaa mogowaa-loo, idimaa gimaadou gu-longono di longo o Dimaadua go doo God. Gimaadou gu-longono-gimaadou nia mee huogodoo a-Maa ala ne-hai i-lodo i Egypt,

9:10  mo nia mee a-Maa ala ne-hai gi-nia king e-lua o Amor ala i-bahi-i-dua o Jordan, go Sihon di king o Heshbon, mo Og di king o Bashan, dela nogo noho i Ashtaroth.

9:11  Madau dagi mo digau ala e-noho i-di madau guongo ne-helekai-mai gi gimaadou bolo gi-hagatogomaalia-ina madau meegai e-lloomoi e-heetugi-adu. Gu-helekai-mai bolo gi-dugu-adu gimaadou gi-di-goe e-hai digau e-ngalua-adu gi-di-goe mo e-hai di hagababa labelaa i tadau mehanga.

9:12  Mmada malaa gi madau palaawaa. Di-madau madagoaa ne-haga-tanga gi-daha mo madau hale belee lloomoi e-heetugi-adu, gei nia maa la-nogo mahana hua igolo. Mmada, dolomeenei nia maa gu-momooho gu-maangooakii gu-huungina guu-pobo.

9:13  Di-madau madagoaa ne-haga-hau madau mee dugu waini, gei nia maa nogo hoou. Mmada gi-nia maa ala gu-momooho dolomeenei. Madau goloo mo madau doolii la-gu-momooho di-madau lloomoi-loo haga-mogowaa.”

9:14  Digau Israel gu-haga-donu-hua nia meegai digaula ala guu-pobo, gei digaula digi hagadina-ina gii-donu gi-baahi o Dimaadua.

9:15  Gei Joshua guu-hai dana hagababa bolo ginaadou e-hagadaubuni i nadau mehanga mo digau Gibeon, guu-hai digaula gii-mee di-mouli hua igolo. Nia dagi o digau Israel guu-hai di-nadau hagamodu bolo ginaadou e-daahi di-nadau hagababa dela ne-hai.

9:16  Nia laangi e-dolu i-muli di hagababa dela ne-hai, gei digau Israel ga-iloo-ginaadou bolo digaula le e-noho-hua hoohoo-mai.

9:17  Gei digau Israel ga-hagatanga gaa-hula nia laangi e-dolu, gei digaula gaa-dau i-nia guongo ala e-noho-ai digau aanei: Gibeon, Chephirah, Beeroth mo Kiriath=Jearim.

9:18  Gei digau Israel la-gu-deemee di-daaligi digaula, idimaa nadau dagi la-guu-hai di-nadau hagababa maaloo ang-gi digaula i-di ingoo Dimaadua, go di God o Israel. Digau huogodoo gu-leelee logo i-di mee deenei ang-gi nadau dagi.

9:19  Gei nia dagi gu-helekai, “Gimaadou guu-hai di-madau hagababa maaloo ang-gi digaula i-di ingoo Dimaadua, go di God o Israel. Dolomeenei gei gidaadou gu-deemee di-daaligi digaula.

9:20  Gidaadou e-dugu-hua digaula gi-mouli hagalee daaligi, idimaa gidaadou guu-hai ginai tadau hagababa. Maa deeai, God ga hagaduadua gidaadou.

9:21  Gidaadou gaa-hai digaula gi-mouli, malaa digaula e-hai digau hai-dohomu mo digau dali-wai ni gidaadou.” Deenei di maanadu o-nia dagi.

9:22  Joshua ga-hagailoo bolo digau Gibeon gi-laha-mai gi-deia, ga-heeu gi digaula, “Goodou ne-halahalau gimaadou eiaha i godou hagi-mai gi gimaadou bolo goodou digau e-noho mogowaa? Gei goodou digau e-noho-hua i-ginei!

9:23  Di-godou hai dela ne-hai, God gu-hagahuaidu goodou. Au daangada la-gaa-hai nia hege i-nia madagoaa huogodoo, gaa-hai digau hai-dohomu mo digau dali-wai ni-di gowaa hai-daumaha dogu God.”

9:24  Gei digaula ga-helekai, “Uaa meenei! Gimaadou gu-halahalau goodou, idimaa gimaadou gu-iloo bolo ma e-donu bolo Dimaadua go di-godou God gu-helekai gi Moses, go dana dangada hai-hegau, bolo Ia ga-gowadu tenua deenei hagatau gi goodou, gei gi-daaligidia gii-mmade digau huogodoo ala i no-lodo i-godou madagoaa ma-ga-lloo-adu gi tenua deenei. Gimaadou ne-hai di mee deenei, idimaa gimaadou gu-mmaadagu huoloo i goodou, gu-uli madau gai i madau mouli.

9:25  Dolomeenei gei gimaadou guu-hai digau e-huwahuwa-iei goe. Heia-mai gi gimaadou au mee ala e-iloo bolo e-humalia di hai go gimaadou.”

9:26  Malaa deenei di mee a Joshua ne-hai: Mee gu-abaaba digaula gi-de-daaligi go digau Israel.

9:27  Gei mee guu-hai digaula digau hai-dohomu mo digau dali-wai ni digau Israel mo ang-gi di gowaa hai-tigidaumaha o Dimaadua. Dae-mai gi dangi-nei, gei digaula e-duudagi hua igolo di-nadau moomee i-nia gowaa ala gu-hilihili go Dimaadua.

Chapter 10

10:1  Adoni=Zedek, di king o Jerusalem, ne-longono-ia bolo Joshua guu-kumi ge gu-daaligi di guongo go Ai, gei gu-daaligi di king digaula, be-di hai a-maa ne-hai gi Jericho mo dono king. Mee gu-longono-ia labelaa bolo nia daangada o Gibeon guu-hila ang-gi digau Israel, gei guu-noho dalia digaula.

10:2  Nia daangada o Jerusalem la-gu-uli nadau gai i-di mee deenei, idimaa, Gibeon la di guongo damana be nia guongo ala e-llauehe nadau king i-golo, gei e-damana i Ai, gei ono daane la digau e-iloo di-heebagi.

10:3  Malaa, Adoni=Zedek gaa-kae dana hegau gi-di King Hoham o Hebron, di King Piram o Jarmuth, di King Japhia o Lachish, mo-di King Debir o Eglon, e-hai boloo:

10:4  “Lloomoi e-hagamaamaa au e-heebagi gi Gibeon, idimaa, digaula guu-hila ang-gi Joshua mo digau Israel.”

10:5  Nia king dogolima o Amor, nia king o-nia waahale go Jerusalem, Hebron, Jarmuth, Lachish, mo Eglon guu-buni di baahi e-dahi, gu-haganiga di gili o Gibeon belee heebagi gi digaula.

10:6  Nia daane o Gibeon gaa-kae nadau hegau gi Joshua i-di gowaa dela e-noho-ai digau Israel i Gilgal, e-hai boloo, “Goe hudee dugua do hagamaamaa gimaadou! Lloomoi huogodoo e-hagamaamaa gimaadou! Nia king o Amor i tenua gonduu guu-buni hai-baahi belee daaligi gimaadou!”

10:7  Malaa, Joshua mo dana buini dauwa huogodoo mo ana dama-buini mmaaloo ga-hagatanga i Gilgal, gaa-hula.

10:8  Dimaadua ga-helekai gi Joshua, “Goe hudee madagu i digaula. Au gu-gowadu di aali gi-di-goe. Deai tangada e-dahi e-mee di-hai-baahi adu gi-di-goe ai.”

10:9  Joshua mo dana llongo dauwa gu-taele i-di boo deelaa mai Gilgal gi Gibeon, ga-dauwa haga-goboina ang-gi digau Amor.

10:10  Dimaadua guu-hai digau Amor gi-uli nadau gai i-di nadau mmada gi digau-dauwa o Israel. Digau dauwa o Israel gu-daaligi digaula i Gibeon, gu-waluwalu digaula i-di ala dela e-hana i-mehanga nia gonduu i Beth=Horon, ga-heebagi gi digaula gaa-tugi-loo i-bahi-i-ngaaga i Azekah mo Makkedah.

10:11  Di madagoaa digau Amor ne-llele-ia gi-lala i-nia gonduu gi-daha mo digau-dauwa o Israel, Dimaadua gaa-hai dana uwa-hadu-magalillili gii-doo gi-hongo digaula gaa-tugi-loo i Azekah. Nia daangada ala ne-daaligi go di uwa-hadu-magalillili la-gu-dogologo i-nia daangada ala ne-daaligi go digau Israel.

10:12  Di laangi Dimaadua ne-hai digau Israel gi-maaloo i digau Amor, Joshua gu-helekai gi Dimaadua i-mua digau Israel boloo, “Di laa gi-noho-hua i dono lohongo i-hongo Gibeon, di malama gii-noho labelaa i-hongo di gowaa mehanga gonduu o Aijalon.”

10:13  Gei-ogo di laa guu-noho de-ngalungalua, gei-ogo di malama digi menegenege gaa-dae-loo gi digau Israel gu-daaligi nadau hagadaumee. Di mee deenei e-hii i-lodo Di Beebaa go Jashar. Di laa guu-duu de-ngalungalua oodee, digi hana gi-lala i-di laangi dogomaalia deelaa.

10:14  Deai di laangi ne-hai beenei ai, ge deai di laangi gaa-hai maalia ai, bolo Dimaadua ne-hagalongo gi tangada. E-donu bolo Dimaadua nogo heebagi-mai i-di baahi digau Israel!

10:15  Muli di mee deenei, gei-ogo Joshua mo dana buini-dauwa gaa-hula labelaa gi-muli gi di-nadau gowaa nogo noho-ai i Gilgal.

10:16  Nia king dogolima o Amor la-guu-llele guu-pala hagammuni i-lodo di bagungoo i Makkedah.

10:17  Tangada ga-gidee digaula, ga-hagi-anga gi Joshua di gowaa digaula dela e-pala hagammuni-ai,

10:18  gei mee ga-helekai, “Hagadagadaga-ina hunu hadugalaa llauehe gi-di ngudu di bagungoo. Dugua nia madaloohi i-golo,

10:19  gei goodou hudee noho i-golo. Hula hua igolo i-muli godou hagadaumee, daaligidia digaula mai i-muli. Hudee heia digaula gii-dae gi nadau guongo! Dimaadua di-godou God guu-hai goodou gi-aali i digaula.”

10:20  Joshua mo digau Israel gu-daaligi digaula, gei hunu gau i digaula guu-kida nadau gowaa e-pala-ai i-lodo nia abaaba o nadau guongo, digi daaligidia.

10:21  Nia daane a Joshua huogodoo gu-lloomoi gi-muli gi-di gowaa e-noho-iei mee i Makkedah. Tangada i-lodo tenua bolo e-helekai hai-baahi ang-gi digau Israel ai.

10:22  Joshua ga-helekai, “Hugee di ngudu di bagungoo, laha-mai nia king dogolima gi di-au.”

10:23  Di bagungoo la-gu-mahuge, gei nia king o Jerusalem, Hebron, Jarmuth, Lachish, mo Eglon la-gu-laha-mai gi-daha,

10:24  guu-lahi gi Joshua. Joshua ga-hagadagabuli-mai nia daane o Israel huogodoo gi dono baahi, ga-helekai gi-nia dagi-dauwa o Israel ala nogo hula dalia a-mee gi-lloomoi gi-dugua nadau babaawae gi-hongo nia uwa o-nia king. Digaula guu-hai gii-hai be di-maa.

10:25  Joshua ga-helekai gi ana dagi-dauwa, “Goodou hudee mmaadagu be paagege godou manawa. Goodou la-gi-manawa-maaloo mo-di hagamahi, idimaa, deenei di hai a God gaa-hai gi godou hagadaumee huogodoo.”

10:26  Joshua ga-daaligi nia king e-lima aalaa, ga-daudau gi-nua gi-nia laagau dagi-dahi, gaa-dae-loo gi-di hiahi.

10:27  Di laa ga-ulu, gei Joshua ga-hagawaalanga bolo gi-dugu-ia digaula gi-lala, wanga-ina gi-lodo di bagungoo dela nogo pala hagammuni-ai digaula. Digaula guu-pono di ngudu di bagungoo deelaa gi-nia hadugalaa llauehaa, nia maa i-golo dolomeenei.

10:28  Joshua gu-heebagi guu-kumi di waahale go Makkedah mo dono king i-di laangi la-hua deelaa. Mee gu-daaligi digau huogodoo ala i-lodo di waahale gii-mmade, tangada ne-mouli ai. Mee guu-hai gi-di king o Makkedah be dana hai dela ne-hai gi-di king o Jericho.

10:29  I-muli di mee deenei ne-hai, gei Joshua mo ana gau-dauwa ga-hagatanga i Makkedah gaa-hula gi Libnah ga-heebagi gi di waahale deelaa.

10:30  Dimaadua guu-hai labelaa digau Israel gi-maaloo i digaula mo di-nadau king. Digaula digi dugu di-nadau dangada e-dahi hagamouli, gu-daaligi huogodoo digau ala i-lodo di guongo deelaa. Guu-hai gi-di king digaula di-nadau hai dela ne-hai gi-di king o Jericho.

10:31  Nomuli, Joshua mo ana gau-dauwa ga-hagatanga i Libnah gaa-hula gi Lachish, ga-duuli di waahale, ga-heebagi gi digaula.

10:32  Dimaadua guu-hai digau Israel gi-aali i digau Lachish i-di lua laangi o tauwa, gu-hai-hua be-di hai dela ne-hai gi Libnah, digaula digi dugu di-nadau dangada e-dahi hagamouli, gu-daaligi digau huogodoo ala i-lodo di guongo deelaa.

10:33  Di King Horam o Gezer gu-hanimoi bolo e-hagamaamaa a Lachish, malaa, Joshua gu-daaligi di king deelaa mo ana gau-dauwa huogodoo, tangada ne-dubu ai.

10:34  Nomuli, Joshua mo ana gau-dauwa ga-hagatanga i Lachish gaa-hula gi Eglon, ga-duuli di waahale deelaa, ga-heebagi gi digaula.

10:35  Digaula gaa-kumi di guongo deelaa i-di laangi la-hua deelaa, ga-daaligi digau huogodoo gii-mmade, gu-hai-hua be di-nadau hai dela ne-hai gi Lachish.

10:36  Nomuli, Joshua mo ana gau-dauwa ga-hagatanga i Eglon ga-lloo-adu gi-nua gi Hebron, ga-heebagi gi digaula,

10:37  gaa-kumi di guongo. Digaula ga-daaligi di king mo digau huogodoo o-di guongo mono gau ala e-noho i-nia guongo lligi i-di gili di waahale deelaa. Joshua gu-hai-hua di guongo deelaa gi-mooho-hua gi-daha, be dana hai dela ne-hai gi Eglon. Tangada ne-dugu haga-mouli i-di guongo deelaa ai.

10:38  Nomuli, Joshua mo ana gau-dauwa gaa-huli gi-muli gi Debir ga-heebagi gi digaula,

10:39  gaa-kumi di guongo deelaa, mo dono king mo nia guongo ala i-di gili di guongo deelaa. Digaula gu-daaligi digaula huogodoo gii-mmade. Joshua guu-hai gi Debir mo dono king be dana hai ne-hai gi Hebron mo Libnah mo nau king.

10:40  Joshua gu-heebagi gi-nia guongo o tenua hagatau. Gu-daaligi nia king o-nia henua gonduu, nia guongo ala i-bahi-i-dua mo i-bahi-i-dai, ngaadahi mo nia guongo i-lodo tenua maangoo ala i-bahi-i-ngaaga. Mee digi dugu dana dangada hagamouli: digau huogodoo gu-daaligi gii-mmade, gii-hai be nia waalanga Dimaadua, go di God o Israel.

10:41  Joshua gu-daamada guu-hai ana dauwa i Kadesh=Barnea i bahi-i-ngaaga, gaa-dau-adu-loo gi Gaza i tongotai, mo nia gowaa ala i-lodo Goshen, ga-hanadu-loo gi Gibeon.

10:42  Joshua guu-kumi huogodoo nia king mo nadau guongo i-lodo hua tolongo dauwa e-dahi, idimaa, Dimaadua go di God o Israel, nogo heebagi i-di baahi a Israel.

10:43  Nomuli, gei Joshua mo ana gau-dauwa gaa-hula gi-muli gaa-noho i Gilgal.

Chapter 11

11:1  Nia longo di maaloo digau Israel guu-dau i-di king o Hazor go Jabin, gei mee gu-hagau dana hegau gi-di king o Madon go Jobab, mo nia king o Shimron mo Achshaph,

11:2  mo nia king o-nia guongo gonduu ala i-bahi-i-ngeia, mo nia guongo i-lodo di gowaa baba o Jordan i-bahi-i-ngaaga di Tai o Galilee, mo nia guongo i tono nia gonduu mo i tongotai hoohoo gi Dor.

11:3  Mee gu-hagau dana hegau gi digau Canaan ala i-nia baahi e-lua o Jordan, mo digau Amor, Hittite, Perizzite mo digau Jebus ala ne-noho i-nia guongo gonduu, mo anga labelaa gi digau Hivite ala ne-noho i tono di gonduu go Hermon i-lodo di gowaa go Mizpah.

11:4  Digaula gu-lloomoi huogodoo mo nadau gau-dauwa, nia buini dauwa logowaahee gadoo be nia gelegele ala i tongotai. Digaula e-logowaahee nadau hoodo mono waga heebagi hongo henua.

11:5  Nia king huogodoo aanei guu-buni, gu-lloomoi gi-di gowaa e-dahi, guu-hai di-nadau gowaa noho i-baahi di monowai dulii go Merom belee heebagi gi digau Israel.

11:6  Dimaadua ga-helekai gi Joshua, “Hudee madagu i digaula. Di madagoaa beenei daiaa gei Au ga-daaligi digaula huogodoo ang-gi Israel. Goe gaa-hai nia hoodo digaula gi-deemee di-heehee, ga-dutudu nia waga heebagi digaula.”

11:7  Malaa, Joshua mo ana gau-dauwa huogodoo gu-heebagi gi digaula haga-goboina i-baahi di monowai dulii go Merom.

11:8  Dimaadua gaa-hai digau Israel gi-maaloo. Digau Israel gu-heebagi gi digaula gu-waluwalu-loo digaula gi-ngeia-loo gi Misrephoth=Maim mo Sidon, adu labelaa gi dua gi-di gowaa baba o Mizpah. Teebagi gu-hai-loo gi-mmademmade nia hagadaumee digaula huogodoo.

11:9  Joshua guu-hai gii-hai be-di waalanga Dimaadua ne-hai gi mee: Mee guu-hai nia hoodo gi-deemee di heehee, guu-dudu nia waga hai heebagi gii-wwele.

11:10  Joshua ga-huli-mai gi-muli, ga-heebagi gi Hazor ga-daaligi dono king. (Di madagoaa deelaa, gei Hazor nogo hai di guongo maaloo i-lodo nia guongo aalaa.)

11:11  Digaula gu-daaligi digau huogodoo ala i-golo gii-mmade. Tangada ne-dugu mouli ai, gei di waahale guu-dudu.

11:12  Joshua guu-kumi nia guongo mo nadau king huogodoo, gu-daaligi gii-mmade digaula huogodoo, be-di hai a Moses, go tangada hai-hegau Dimaadua, ne-hagawaalanga.

11:13  Gei digau Israel digi dudu nia waahale ala ne-hau i-hongo nia gonduu, dela hua go Hazor dela ne-dudu go Joshua.

11:14  Digau Israel guu-kae nia goloo mono manu o digau o-nia guongo aalaa, guu-hai nadau mee. Gei digaula gu-daaligi nia daangada o-nia guongo gii-mmade, deai tangada ne-mouli ai.

11:15  Dimaadua ne-hagawaalanga ang-gi dana dangada hai-hegau go Moses, gei Moses guu-wanga nia haganoho aalaa gi Joshua, gei Joshua gu-daudali nia maa. Mee gu-daudali huogodoo nia mee a Dimaadua ne-hagawaalanga gi Moses.

11:16  Joshua guu-kumi nia guongo huogodoo, nia gowaa i-bahi-i-ngeia, i-bahi-i-ngaaga, mo nia gowaa i Goshen, mo-di gowaa maangoo dela i-bahi-i-ngaaga Goshen, mo-di gowaa mehanga gonduu o Jordan.

11:17  Nia dama guongo ala e-hagatau-mai i-di Gonduu go Halak i-bahi-i-ngaaga adu gi Edom, gaa-tugi-loo i Baalgad i-bahi-i-ngeia i-lodo di gowaa mehanga gonduu o Lebanon dela i-bahi-i-ngaaga di Gonduu Hermon. Joshua nogo hai ana dauwa gi-nia king o-nia guongo aanei i-di madagoaa looloo, gei mee guu-kumi nia maa gu-dadaaligi digaula gii-mmade.

11:18  Nia dama guongo ala e-hagatau-mai i-di Gonduu go Halak i-bahi-i-ngaaga adu gi Edom, gaa-tugi-loo i Baalgad i-bahi-i-ngeia i-lodo di gowaa mehanga gonduu o Lebanon dela i-bahi-i-ngaaga di Gonduu Hermon. Joshua nogo hai ana dauwa gi-nia king o-nia guongo aanei i-di madagoaa looloo, gei mee guu-kumi nia maa gu-dadaaligi digaula gii-mmade.

11:19  Di waahale e-dahi dela ne-buni-aga gi digau Israel dela-hua go Gibeon, dela e-noho hunu gau o Hivite i-golo. Digau huogodoo ala i-golo la-gu-daaligi i-lodo tauwa.

11:20  Dimaadua guu-hai digaula gi-modudahi bolo ginaadou e-heebagi gi digau Israel, gi-dadaaligi digaula go digau Israel. Deenei di mee a Dimaadua ne-hagawaalanga gi Moses.

11:21  Deenei di madagoaa ne-hana-ai a Joshua ne-daaligi di hagadili digau llauehaa ala e-haga-ingoo bolo Anakim, ala nogo noho i nnenua gonduu o Hebron, Debir, Anab, mo i-lodo nia guongo gonduu huogodoo o Judah mo Israel. Joshua gu-daaligi digaula hagatau mo nadau waahale.

11:22  Tangada i-nia gau o Anakim ne-dubu mouli i-lodo Israel ai, gei di-maa digau hogoohi ne-dubu i Gaza, Gath, mo Ashdod.

11:23  Joshua guu-kumi tenua hagatau be-di hagawaalanga a Dimaadua ne-hai gi Moses. Gei Joshua gaa-wanga tenua deelaa gi digau Israel e-hai nadau gowaa, gei digaula ga-duuduu di-maa i nadau madahaanau. Nomuli, gei digaula gu-hagamolooloo mai i tauwa.

Chapter 12

12:1  Digau Israel guu-lawa di-kumi nia gowaa ala i-bahi-i-dua o Jordan, guu-noho no-lodo, daamada i-di gowaa mehanga gonduu o Arnon gaa-hana gi-di gowaa mehanga gonduu o Jordan, gaa-dae-adu-loo gi-di Gonduu Hermon i-bahi-i-ngeia. Digaula gu-daaligi nia king dogolua:

12:2  Go Sihon, di king o Amor dela nogo dagi i Heshbon. Ana gowaa nogo dagi la-go di baahi o Gilead, mai Aroer i taalinga di gowaa mehanga gonduu o Arnon, mo mai i-di waahale dela i tungaalodo di gowaa baba deelaa, gaa-hana-loo gaa-tugi i-di monowai go Jabbok, go di hagageinga o Ammon.

12:3  Daabui-mai gi-lodo di gowaa mehanga gonduu o Jordan mai di Tai o Galilee i-bahi-i-ngaaga o Beth=Jeshimoth (i-bahi-i-dua di Tai Mmade) ga-hanadu-loo gaa-tugi i tono di Gonduu Pisgah.

12:4  Digaula gu-daaligi labelaa Og, di king o Bashan, tangada e-dahi i digau ala e-hagamuliagina di hagadili ni Rephaim. Mee nogo dagi i Ashtaroth mo Edrei.

12:5  Nia gowaa a mee nogo dagi la-go di Gonduu Hermon, Salecah, mo tenua go Bashan hagatau, gaa-tugi-loo i-di hagageinga o Geshur mo Maacah, mo-di baahi o Gilead, ga-hana-adu-loo gi-nia guongo o Sihon, di king o Heshbon.

12:6  Nia king e-lua aanei ne-daaligi go Moses mo digau Israel. Moses, tangada hai-hegau Dimaadua, guu-wanga nia gowaa meemaa gi-nia madawaawa Reuben mo Gad mo di baahi di madawaawa Manasseh, gi-hai-mee ginai.

12:7  Joshua mo digau Israel gu-daaligi nia king huogodoo o-nia guongo ala i bahi-i-dai o Jordan, mai Baal=Gad i-di gowaa mehanga gonduu o Lebanon gaa-hana gi-di Gonduu Halak i-bahi-i-ngaaga hoohoo-adu gi Edom. Joshua gu-duuduu tenua deelaa i-nia madawaawa guu-wanga gi digaula gi-hai-mee ginai gaa-hana-hua beelaa.

12:8  Nia gowaa aanei la go nia guongo gonduu, mono gonduu ala i bahi-i-dai, mo-di gowaa mehanga gonduu o Jordan mo ono gonduu, mo nia gowaa mololo ala i-bahi-i-dua, mo-di gowaa maangoo dela i-bahi-i-ngaaga. Nia gowaa aanei nogo noho-ai digau Hittite, Amor, Canaan, Perizzite, Hivite mo digau Jebus.

12:9  Digau Israel gu-daaligi nia king o-nia guongo aanei: Jericho mo Ai (dela e-hoohoo gi Bethel),

12:10  Jerusalem, Hebron.

12:11  Jarmuth, Lachish,

12:12  Eglon, Gezer

12:13  Debir, Geder,

12:14  Hormah, Arad,

12:15  Libnah, Adullam,

12:16  Makkedah, Bethel,

12:17  Tappuah, Hepher,

12:18  Aphek, Lasharon,

12:19  Madon, Hazor,

12:20  Shimron=Meron, Achshaph,

12:21  Taanach, Megiddo,

12:22  Kedesh, Jokneam (i Carmel),

12:23  Dor (i tongotai), Goiim (i Galilee),

12:24  mo Tirzah. Nia king huogodoo ala ne-daaligi go digaula le e-motolu maa-dahi.

Chapter 13

13:1  Di madagoaa o Joshua ne-madumadua, Dimaadua ga-helekai gi mee, “Goe gu-madua huoloo, gei nia gowaa la i-golo-hua ala belee kumi:

13:2  go nia guongo huogodoo a Philistia mo Geshur,

13:3  mo nia guongo o digau Avvim ga-hanadu-loo gi ngaaga. (Di gowaa mai di monowai go Shihor, i tagageinga o Egypt, ga-hanadu gi bahi-ngeia gi tagageinga o Ekron dela e-hai bolo tenua ni digau Canaan. Nia king o Philistia le e-noho i Gaza, Ashdod, Ashkelon, Gath mo Ekron.)

13:4  Mo nia guongo huogodoo o digau Canaan, daabui-mai Mearah (dela nogo hai-mee ginai digau Sidon) gaa-hana gaa-tugi i Aphek, i tagageinga a Amor.

13:5  Mo di gowaa digau Gebal, go Lebanon hagatau gaa-tugi gi bahi-i-dua, mai Baal=Gad dela i-bahi-i-ngaaga o-di Gonduu Hermon, gaa-tugi gi-di Ala Nnoonua o Hamath i-bahi-i-ngeia.

13:6  Nia gowaa aanei le e-daabui-mai hagatau nia henua o digau Sidon, ala e-noho i-nia guongo gonduu i-mehanga nia Gonduu o Lebanon mo Misrephoth=Maim. Au ga-hagabagi digau aanei huogodoo gi-daha i-mua digau Israel. Goe duha-ina nia gowaa i digau Israel, be dagu hai ne-hagawaalanga-adu gi-di-goe.

13:7  Duha-ina di gowaa deenei i-nia madawaawa e-hiwa mo-di baahi di madawaawa Manasseh, gi-hai-mee ginai digaula.”

13:8  Di madawaawa Reuben mo Gad mo-di baahi di madawaawa Manasseh la-gu-hai-mee gi-nia gowaa ala guu-lawa di wanga go Moses, tangada hai-hegau Dimaadua, gi digaula. Nia guongo aanei la i-bahi-i-dua di monowai Jordan.

13:9  Nadau gowaa e-hana-loo e-tugi i Aroer ( i taalinga di gowaa mehanga gonduu o Arnon) mo i-di waahale dela i tungaalodo di gowaa baba deelaa, mo nia gowaa bapaba huogodoo mai i Medeba gaa-tugi i Dibon.

13:10  Nadau gowaa e-hana-loo e-tugi i-di hagageinga o Ammon gaa-hana-loo gi-nia waahale huogodoo ala nogo dagi go di king o Amor go Sihon, dela nogo dagi i Heshbon.

13:11  Nadau gowaa le e-daabui-mai Gilead, mo nia gowaa ala e-dau gi Geshur mo Maacah, mo-di Gonduu Hermon hagatau, mo tenua Bashan hagatau, gaa-tugi i Salecah.

13:12  Mo nia henua o-di king go Og, tangada hagamuliagina di madawaawa Rephaim, dela nogo dagi i-nia waahale go Ashtaroth mo Edrei. Moses ne-daaligi digau aanei ga-hagabagi digaula gi-daha mo nadau henua.

13:13  Gei digau Israel digi hagabagia gi-daha digau Geshur mo Maacah. Digaula e-noho hua igolo i Israel.

13:14  Moses digi wanga dana gowaa gi-di madawaawa Levi. Digaula e-hai-mee gi tuhongo dela mai i-nia tigidaumaha ala e-dudu i-hongo di gowaa dudu-tigidaumaha ang-gi Dimaadua, go di God o Israel, be-di kai a Dimaadua ne-hai gi Moses.

13:15  Moses ne-wanga di baahi di gowaa la-gi nia madahaanau o-di madawaawa Reuben e-hai-mee ginai.

13:16  Nadau gowaa le e-tugi i Aroer (i taalinga di gowaa mehanga gonduu o Arnon) mo-di waahale i tungaalodo di gowaa baba deelaa, mo nia gowaa i-hongo di gowaa bapaba dela i-di gili Medeba.

13:17  Mo Heshbon mo nia waahale huogodoo ala i-hongo di gowaa bapaba deelaa: go Dibon, Bamoth=Baal, Beth=Baal=Meon,

13:18  Jahaz, Kedemoth, Mephaath,

13:19  Kiriathaim, Sibmah, Zereth=Shahar i-hongo di gonduu i-lodo di gowaa baba deelaa,

13:20  mo Beth=Peor, mo nia mololo o-di Gonduu Pisgah, mo Beth=Jeshimoth,

13:21  mo nia waahale ala i-hongo di gowaa bapaba mo tenua hagatau o Sihon, di king o Amor, dela nogo dagi i Heshbon. Moses gu-daaligi a-mee mo nia dagi o Midian: go Evi, Rekem, Zur, Hur, mo Reba. Digaula huogodoo nogo dagi nia guongo a king Sihon.

13:22  Tangada hagi-aga-mee i-lodo digau ala ne-daaligi go digau Israel la-go Balaam, tama-daane a Beor.

13:23  Jordan la-go tagageinga i-bahi-i-dai di gowaa di madawaawa Reuben. Aanei la-nia guongo mono waahale ala ne-wanga gi-nia madahaanau o-di madawaawa Reuben belee hai-mee ginai.

13:24  Moses guu-wanga di baahi di gowaa gi-nia madahaanau o-di madawaawa Gad.

13:25  Nia gowaa digaula la aanei gadoo: di waahale go Jazer mo nia waahale huogodoo o Gilead, dahi baahi di gowaa Ammon gaa-hana gaa-tugi i Aroer dela i-bahi-i-dua o Rabbah.

13:26  Nia gowaa digaula e-hana e-tugi i Heshbon gaa-hana gi Ramath=Mizpeh mo Betonim, mai i Mahanaim gaa-tugi i-di tagageinga a Lo=Debar.

13:27  Mo Beth=Haram, Beth=Nimra, Sukkoth, Zaphon, mo nia guongo ala i-golo o king Sihon o Heshbon, ala i-lodo di gowaa mehanga gonduu o Jordan. Tagageinga bahi-i-dai o-nia guongo aanei la-go di Monowai Jordan gaa-hana gaa-tugi i-di Tai o Galilee.

13:28  Aanei nia waahale llauehe mono waahale lligi ala ne-wanga gi-nia madahaanau o-di madawaawa Gad belee hai-mee ginai.

13:29  Moses ne-wanga di baahi di gowaa gi-nia madahaanau di baahi di madawaawa Manasseh e-hai-mee ginai.

13:30  Nadau gowaa le e-tugi i Mahanaim mo nia gowaa huogodoo i Bashan, go nia guongo hagatau o-di king o Bashan go Og, mo nia dama waahale e-modoono o Jair i-lodo o Bashan.

13:31  Nia gowaa digaula la-go di baahi o Gilead, mo Ashtaroth mo Edrei, nia waahale aamua di king go Og i-lodo Bashan. Nia gowaa huogodoo aanei la-ne-wanga gi-nia madahaanau di baahi di madawaawa Machir tama-daane a Manasseh.

13:32  Deenei di hai a Moses ne-duwwe nia gowaa ala i-bahi-i-dua o Jericho mo Jordan i-di madagoaa mee nogo noho i Moab.

13:33  Moses digi wanga dana gowaa gi-di madawaawa Levi. Mee ne-hai gi digaula bolo nadau duhongo le e-hai-mai i-nia mee ala e-tigidaumaha gi Dimaadua, go di God o Israel.

Chapter 14

14:1  Deenei di hai o-di duwwe tenua go Canaan i-bahi-i-dai Jordan i digau Israel. Eleazar, tangada hai-mee-dabu, mo Joshua, tama-daane a Nun, mo nia dagi o-nia madahaanau o-nia madawaawa Israel ne-duwwe tenua gi-nia daangada Israel belee hai-mee ginai.

14:2  Nia gowaa ala belee hai-mee ginai nia madawaawa e-hiwa mo-di baahi ala i-bahi-i-dai o Jordan le e-hagamodongoohia go di hadu e-hudu, be-di hai a Dimaadua ne-hagawaalanga gi Moses.

14:3  Moses guu-lawa di-wanga nia gowaa i-bahi-i-dua o Jordan gi-nia madawaawa e-lua mo-di baahi. (Nia hagadili o Joseph gu-wwae-lua guu-hai nia madawaawa e-lua: go Manasseh mo Ephraim). Malaa, Moses digi wanga dana gowaa gi-di madawaawa Levi, dela-hua ne-wanga ginai nadau waahale belee noho-ai digaula, mo nia gowaa e-dugu-ai nadau manu mo nadau siibi.

14:4  Moses guu-lawa di-wanga nia gowaa i-bahi-i-dua o Jordan gi-nia madawaawa e-lua mo-di baahi. (Nia hagadili o Joseph gu-wwae-lua guu-hai nia madawaawa e-lua: go Manasseh mo Ephraim). Malaa, Moses digi wanga dana gowaa gi-di madawaawa Levi, dela-hua ne-wanga ginai nadau waahale belee noho-ai digaula, mo nia gowaa e-dugu-ai nadau manu mo nadau siibi.

14:5  Digau Israel guu-duwwe tenua deelaa gii-hai be-di hai o Dimaadua ne-hagawaalanga gi Moses.

14:6  Di laangi e-dahi, gei digau di madawaawa Judah gu-lloomoi gi Joshua i Gilgal. Tangada e-dahi i digaula dono ingoo go Caleb, tama-daane a Jephunneh tangada digau Kenizzite, ga-helekai gi mee, “Goe gu-iloo bolo Dimaadua la-gu-helekai i gidaua ang-gi Moses, taane a God i Kadesh=Barnea.

14:7  Di madagoaa deelaa, gei au nogo madahaa ogu ngadau, gei tangada hai-hegau Dimaadua go Moses ne-hagau au belee hagadina hagammuni tenua deenei. Au gu-haga-modongoohia gi mee di longo e-donu.

14:8  Nia daane ala ne-hula dalia au, la-guu-hai tadau daangada gi-mmaadagu. Gei au gu-modudahi di daudali a Dimaadua, go dogu God.

14:9  Idimaa dela au ne-hai beelaa, gei Moses gu-hagababa-mai bolo au mo agu dama e-hai-mee gi-di gowaa dela gu-haele-iei au nonua.

14:10  Mmada, tugi-mai gi dangi-nei nia ngadau gu-madahaa maa-lima i-muli Dimaadua ne-helekai beenei gi Moses. Di madagoaa deelaa, gei digau Israel nogo hula laa-lodo di anggowaa. Dimaadua gu-benebene au, gii-hai be dana hagababa gaa-dae-mai-loo gi dangi-nei. Mmada-mai gi-di-au: Au gu-huowalu-maa lima ogu ngadau!

14:11  Gei au e-maaloo hua igolo dangi-nei be au i dogu madagoaa ne-hagau go Moses. Au e-maaloo hua igolo di hana i-nia dauwa mo nia mee ala i-golo.

14:12  Deelaa-laa, gaamai di guongo gonduu dela ne-hagababa-mai go Dimaadua i-di laangi dela ne-haga-iloo gimaadou mo ogu ihoo. Gimaadou gu-helekai-adu gi-di-goe i-di madagoaa deelaa bolo di hagadili digau llauehe ala e-haga-ingoo bolo Anakim la i-golo i-lodo nia waahale llauehe ala gu-duuli gi-nia abaaba. Holongo Dimaadua ga-madalia au, gei au ga-hagabagi digaula gi-daha, gii-hai be nia helekai a Dimaadua ala ne-hai.”

14:13  Joshua ga-hagahumalia Caleb, tama-daane Jephunneh, gaa-wanga ginai di waahale go Hebron e-hai-mee ginai.

14:14  Hebron e-hai-mee ginai hua igolo nia hagadili o Caleb, tama-daane o Jephunneh tangada digau Kenizzite, idimaa mee nogo manawa-dahi di daudali Dimaadua, go di God o Israel.

14:15  I-mua, Hebron nogo haga-ingoo bolo Arba (ne-haga-ingoo gi tangada maaloo o digau Anakim). Malaa, tenua guu-noho i-di aumaalia.

Chapter 15

15:1  Nia madahaanau o-di madawaawa Judah ne-wanga ginai di baahi di gowaa be di hai deenei: Di gowaa e-hana gi-ngaaga gaa-tugi-loo i-di baahi ngaaga di Anggowaa o Zin, i tagageinga o Edom.

15:2  Tagageinga i-bahi-i-ngaaga o tenua deenei le e-daamada i-bahi-i-ngaaga Tai Mmade,

15:3  gaa-hana gi-ngaaga i-di Ala Nnoonua o Akrabbim ga-hanadu gi-di Anggowaa o Zin. E-hana-laa i-bahi-i-ngaaga o Kadesh=Barnea, diiagi Hezron ga-hanadu gi-nua gi Addar, gaa-biga-adu gi Karka,

15:4  ga-hanadu gi Azmon, ga-daudali di monowai dela e-hai tagageinga o Egypt gaa-tugi i-di Tai go Mediterranean, di gowaa dela e-odi-ai tagageinga. Deenei tagageinga dela i-bahi-i-ngaaga o Judah.

15:5  Tagageinga i-bahi-i-dua la dela go Tai Mmade, gaa-hana-loo gi-di ngudu di monowai Jordan. Tagageinga i-bahi-i-ngeia le e-daamada labelaa i-golo,

15:6  ga-hanaga gaa-tugi i Beth=Hoglah, gaa-hana i-bahi-i-ngeia nia gonduu go Beth=Arabah ala i-hongo di gowaa mehanga gonduu o Jordan, ga-hanaga gi-nua gi Tadugalaa o Bohan (Bohan la tama-daane ni Reuben),

15:7  Mai di gowaa mehanga gonduu o-di Hagaduadua, tagageinga deenei gaa-hana gi Debir, ga-hanadu gi ngeia gi Gilgal, dela e-huli-adu gi-di Ala Nnoonua o Adummim i-bahi-i-ngaaga di gowaa baba, ga-hanadu gaa-tugi nia monowai uwa-aga i En=Shemesh, gaa-hana gi-daha gi En=Rogel,

15:8  gaa-hana laa-lodo di gowaa mehanga gonduu o Hinnom, e-hana taalinga i-bahi-i-ngaaga tama gonduu dela e-dugu-ai di waahale digau Jebus go Jerusalem. Tagageinga e-hana-loo e-dau i-hongo tama gonduu dela i-bahi-i-dai di gowaa mehanga gonduu o Hinnom, dela di gowaa e-hagaodi gi-ngeia di gowaa mehanga gonduu o Rephaim.

15:9  E-tugi i-golo, gaa-hana labelaa gi-nia monowai uwa-aga i-lodo tenua o Nephtoah, gaa-hana gaa-tugi i-nia waahale hoohoo-adu gi-di Gonduu Ephron. Gaa-huli ga-hanadu gi Baalah (be go Kiriath=Jearim),

15:10  gaa-biga-loo i-bahi-i-dai Baalah ga-hanadu gi tenua gonduu o Edom, ga-hanadu-loo i-bahi-i-ngeia i-di Gonduu Jearim (be go Chesalon), ga-haneia gi Beth=Shemesh, ga-hanadu ga-diiagi Timnah.

15:11  Tagageinga la-gaa-hana gaa-tugi i tama gonduu i-bahi-i-ngeia i Ekron ga-hagabiga i-golo ga-hanadu gi Shikkeron, ga-hana-laalaa i-di Gonduu Baalah, ga-hanadu hua igolo gi Jamnia, gaa-hana-loo gaa-tugi i-di Tai go Mediterranean,

15:12  dela e-hai tagageinga i-bahi-i-dai o Judah. I-lodo nia hagageinga aanei le e-noho-ai nia madahaanau o-di madawaawa Judah.

15:13  Be di kai a Dimaadua ne-hagawaalanga gi Joshua, di baahi di gowaa o Judah guu-wanga gi Caleb, tama-daane a Jephunneh, mai di madawaawa Judah. Mee gu-hai-mee gi Hebron, di waahale a Arba, tamana o Anak.

15:14  Caleb gu-hagabagi nia hagadili o Anak gi-daha mo-di waahale deelaa, go nia madahaanau a Sheshai, Ahiman mo Talmai.

15:15  Nomuli gei mee ga-heebagi gi digau ala e-noho i Debir. (Di waahale deenei la-nogo haga-ingoo boloo Kiriath=Sepher.)

15:16  Caleb ga-helekai, “Au gaa-wanga dagu dama-ahina go Achsah e-hai dono lodo gi tangada dela ma-gaa-kumi di waahale go Kiriath=Sepher.”

15:17  Othniel, tama-daane Kenaz, go tuaahina o Caleb, gaa-kumi di waahale, malaa Caleb gaa-wanga dana dama-ahina go Achsah gii-lodo ginai.

15:18  Di laangi dela e-hai tagahai-lodo, gei Othniel gaa-hai gi Achsah gii-dangi gi dono damana i-di gowaa. Tama-ahina gaa-doo gi-lala mo hongo dana ‘donkey’, gei Caleb ga-heeu gi mee be di-maa di-aha e-hiihai gineia.

15:19  Tama-ahina ga-helekai, “Au e-hiihai gi-nia madapua wai. Di gowaa ne-gaamai kooe la di gowaa maangoo.” Malaa, Caleb gaa-wanga gi mee nia monowai uwa-aga ala i-bahi-i-nua mo i-bahi-i-lala.

15:20  Aanei nia gowaa nia madahaanau o-di madawaawa Judah ne-hai-mee ginai:

15:21  Nadau waahale ala adu gi baahi-ngaaga ala e-hoohoo-adu gi-di geinga o Edom: go Kabzeel, Eder, Jagur,

15:22  Kinah, Dimonah, Adadah,

15:23  Kedesh, Hazor, Ithnan,

15:24  Ziph, Telem, Bealoth,

15:25  Hazor=Hadattah, Kerioth=Hezron (be go Hazor),

15:26  Amam, Shema, Moladah,

15:27  Hazar=Gaddah, Heshmon, Bethpelet,

15:28  Hazar=Shual, Beersheba, Biziothiah,

15:29  Baalah, Iim, Ezem,

15:30  Eltolad, Chesil, Hormah,

15:31  Ziklag, Madmannah, Sansannah,

15:32  Lebaoth, Shilhim, Ain, mo Rimmon. Nia waahale huogodoo aanei le e-madalua maa-hiwa mono dama-waahale ala i nadau daha.

15:33  Nia waahale ala i tono nia gonduu: go Eshtaol, Zorah, Ashnah,

15:34  Zanoah, Engannim, Tappuah, Enam,

15:35  Jarmuth, Adullam, Socoh, Azekah,

15:36  Shaaraim, Adithaim, Gederah, mo Gederothaim. Nia waahale huogodoo aanei le e-madangaholu maa-lima mono dama-waahale ala i nadau daha.

15:37  Nia waahale labelaa aanei: go Zenan, Hadashah, Migdalgad,

15:38  Dilean, Mizpah, Joktheel,

15:39  Lachish, Bozkath, Eglon,

15:40  Cabbon, Lahmam, Chitlish,

15:41  Gederoth, Beth=Dagon, Naamah mo Makkedah. Nia waahale huogodoo aanei le e-madangaholu maa-ono, mono dama-waahale i nadau daha.

15:42  Nia waahale labelaa aanei: go Libnah, Ether, Ashan,

15:43  Iphtah, Ashnah, Nezib,

15:44  Keilah, Achzib, mo Mareshah. Nia waahale aanei le e-hiwa, mo nia dama-waahale ala i nadau daha.

15:45  Ekron mo ono waahale llauehe mo lligi ala i dono baahi,

15:46  mo nia waahale llauehe huogodoo ala i-di gili o Ashdod, mai i Ekron gaa-tugi i-di Tai go Mediterranean.

15:47  Ashdod mo Gaza, mo nau waahale llauehe mo lligi, gaa-tugi i-di monowai i-di geinga o Egypt, mo tongotai o Mediterranean.

15:48  Gei i tenua gonduu o Judah: go Shamir, Jattir, Socoh.

15:49  Dannah, Kiriath=Sepher (be go Debir),

15:50  Anab, Eshtemoa, Anim,

15:51  Goshen, Holon mo Giloh. Nia waahale aanei le e-madangaholu maa-dahi, mo nia dama-waahale ala i nadau daha.

15:52  Arab, Dumah, Eshan,

15:53  Janim, Beth=Tappuah, Aphekah,

15:54  Humtah, Hebron, mo Zior. Nia waahale aanei le e-hiwa, mo nia dama-waahale ala i nadau daha.

15:55  Maon, Carmel, Ziph, Juttah,

15:56  Jezreel, Jokdeam, Zanoah,

15:57  Kain, Gibeah mo Timnah. Nia waahale aanei le e-madangaholu, mo nia dama-waahale ala i nadau daha.

15:58  Halhul, Beth=Zur, Gedor,

15:59  Maarath, Bethanoth, mo Eltekon. Nia waahale aanei le e-ono, mo nia dama-waahale i nadau daha.

15:60  Kiriath=Baal (be go Kiriath=Jearim) mo Rabbah, nia waahale aanei le e-lua, mo nia dama-waahale i nau daha.

15:61  I-lodo di anggowaa: go Beth-Arabah, Middin, Secacah,

15:62  Nibshan, di Waahale Toolo, mo Engedi. Nia waahale aanei le e-ono, mo nia dama-waahale i nadau daha.

15:63  Gei digau Judah gu-deemee di-hagabagi gi-daha digau Jebus ala nogo noho i Jerusalem. Digau Jebus e-noho hua igolo ngaadahi mo digau Judah.

Chapter 16

16:1  Tagageinga i-bahi-i-ngaaga di gowaa ne-wanga gi-nia hagadili o Joseph e-daamada i Jordan hoohoo gi Jericho, i-bahi-i-dua nia monowai uwa-aga ala i Jericho, gaa-hana laa-lodo di anggowaa. Mai i Jericho, tagageinga gaa-hana gi-nua gi-lodo tenua gonduu gi Bethel.

16:2  Mai i Bethel, tagageinga gaa-hana gi Luz, ga-hanadu gi Ataroth=Addar, di gowaa dela nogo noho-ai digau Arkite.

16:3  Gaa-hana gi-dai gi-di gowaa dela nogo noho-ai digau Japhletite, gaa-hana-loo gi-di gowaa o Beth=Horon Bahi-lala. Gaa-hana gi Gezer, ga-odi i-di Tai go Mediterranean.

16:4  Nia hagadili o Joseph, go nia madawaawa Ephraim mo Manasseh Bahi-i-Dai, la-ne-wanga ginai nia henua aanei e-hai-mee ginai digaula.

16:5  Deenei di gowaa o-nia madahaanau o-di madawaawa Ephraim: Tagageinga digaula e-daamada i Ataroth=Addar gaa-hana gi-dua gi Beth=Horon Bahi-nua,

16:6  gaa-hana gi-di Tai go Mediterranean. Di waahale Michmethath la i-bahi-i-ngeia digaula. I-bahi-i-dua di gowaa deelaa, tagageinga gaa-hana gaa-tugi i Taanath=Shiloh gaa-hana ga-diiagi gi-muli i-bahi-i-dua gi Janoah,

16:7  Mai i Janoah, gei tagageinga gaa-hana gi-lala gi Ataroth mo Naarah, gaa-tugi i Jericho, ga-odi i Jordan.

16:8  Tagageinga e-hana i-bahi-i-dai Tappuah gaa-hana gaa-tugi di monowai Kanah ga-odi i-di Tai go Mediterranean. Deenei di gowaa ne-wanga gi-nia madahaanau o-di madawaawa Ephraim belee hai-mee ginai,

16:9  mo nia waahale ala i lodo tagageinga o Manasseh, ala-hua guu-wanga gi-di madawaawa Ephraim.

16:10  Gei digaula digi hagabagia gi-daha digau Canaan ala nogo noho i Gezer, malaa, digau Canaan e-noho hua igolo i-baahi digau Ephraim gaa-dae-mai gi dangi-nei, malaa digaula noho hai hege i-golo.

Chapter 17

17:1  Di baahi di gowaa dela i-bahi-i-dai Jordan la-ne-wanga gi hunu madahaanau i-nia dama a tama-daane madua a Joseph go Manasseh. Machir, dela dana dama-daane go Gilead, la tama-daane madua ni Manasseh, gei mee tangada-dauwa maaloo, malaa nia gowaa go Gilead mo Bashan ala i-bahi-i-dua Jordan, la-ne-wanga gi mee.

17:2  Di gowaa dela i-bahi-i-dai Jordan la-ne-wanga gi-nia madahaanau ala i-golo i-di madawaawa Manasseh: ala go Abiezer, Helek, Asriel, Shechem, Hepher mo Shemida. Aanei nia daane di hagadili ni Manasseh, tama-daane a Joseph, malaa digaula ala go nia dagi o-nia madahaanau.

17:3  Zelophehad, tama-daane ni Hepher, go tama a Gilead, dela go tama-daane a Machir, tama-daane a Manasseh, la dana dama ai, dela-hua ana dama-ahina. Nadau ingoo go Mahlah, Noah, Hoglah, Milcah mo Tirzah.

17:4  Digaula gaa-hula gi Eleazar taane hai-mee-dabu, gaa-hula labelaa gi Joshua, tama-daane a Nun, mo nia dagi, ga-helekai, “Dimaadua gu-hagawaalanga gi Moses gi-gaamai gi gimaadou nia gowaa e-hai-mee ginai gimaadou mo nia daane i madau madahaanau.” Malaa, Joshua gaa-wanga nia gowaa gi digaula, mo ang-gi nia duaahina-daane o nadau damana, gii-hai be-di waalanga a Dimaadua ne-hai.

17:5  Deenei di mee a Manasseh dela e-hai ana duhongo e-madangaholu ngaadahi mo nia gowaa o Gilead mo Bashan ala i-bahi-i-dua o Jordan,

17:6  idimaa, nia ahina ngaadahi mo nia daane o-di madawaawa deenei gu-hai-mee gi-nia gowaa aalaa. Gei tenua go Gilead gu-hai-mee ginai di hagadili o Manasseh dela i-golo.

17:7  Di gowaa o Manasseh le e-daamada i Asher gaa-hana gi Michmethath, i-bahi-i-dua o Shechem. Tagageinga le e-hana ngaaga e-daabui digau En=Tappuah.

17:8  Di gowaa dela i-di gili Tappuah la di gowaa ni Manasseh, gei di waahale go Tappuah dela i-hongo tagageinga la di waahale ni-di hagadili ni Ephraim.

17:9  Tagageinga deelaa le e-haneia gi-di monowai go Kanah. Nia waahale ala i bahi-i-ngaaga di monowai deelaa la ni Ephraim, ma eaha ma digaula e-noho i-lodo di gowaa o Manasseh. Tagageinga o Manasseh e-hana-loo i-bahi-i-ngeia di monowai deelaa gaa-tugi i-di Tai go Mediterranean.

17:10  Ephraim la i-bahi-i-ngaaga, gei Manasseh la i-bahi-i-ngeia, gei di Tai go Mediterranean dela tagageinga i-bahi-i-dai. Asher la i-bahi-i-dai a ngeia, gei Issachar la i-bahi-i-dua a ngeia.

17:11  Manasseh e-hai-mee gi Beth=Shan mo Ibleam ala i-lodo nia guongo o Issachar mo Asher, mo nia dama-waahale ala i nadau daha, mo nia waahale go Dor dela i tongotai, mo Endor, Taanach, Megiddo, mo nia dama-waahale ala i nadau daha.

17:12  Gei digau Manasseh la-gu-deemee di-hagabagi gi-daha digau ala e-noho i-lodo nia waahale aalaa, malaa digau Canaan e-noho hua igolo.

17:13  Ma e-aha maa digau Israel gu-maaloo-mai, gei digaula digi hagabagia digau Canaan gi-daha, malaa digaula guu-hai digaula gi-ngalua ang-gi ginaadou.

17:14  Nia hagadili o Joseph ga-helekai gi Joshua, “Goe e-aha dela ne-gaamai gi gimaadou di gowaa hua e-dahi e-hai-mee ginai gimaadou? Gimaadou e-dogologowaahee idimaa Dimaadua la-gu-hagahumalia gimaadou.”

17:15  Joshua ga-helekai, “Maa goodou e-dogologowaahee gei di gowaa gonduu o Ephraim le e-dulii adu gi goodou, hula gi lodo-geinga i tenua o digau Perizzite mo digau Rephaim, ga-haga-madammaa di-maa gi-humalia adu gi goodou.”

17:16  Digaula ga-helekai, “Di gowaa gonduu deelaa le e-dee-tau mai gi gimaadou, gei digau Canaan ala i-lodo nia gowaa baba la nadau waga hongo-henua ala ne-hai gi-nia baalanga, digaula ngaadahi ala e-noho i-lodo Beth=Shan mo nia dama-waahale ala i dono gili, mo digau ala e-noho i-di gowaa mehanga gonduu o Jezreel.”

17:17  Joshua ga-helekai gi-di madawaawa Ephraim mo Manasseh i-Bahi-i-Dai, “E-donu bolo goodou gu-dogologowaahee, gei goodou gu-maaloo dangihi. Goodou belee hai-mee gi-nia gowaa e-logo i-di gowaa e-dahi.

17:18  Di gowaa gonduu la-ga-hai-mee ginai goodou. Ma e-aha maa di gowaa geinga, gei goodou gaa-taa di-maa gii-mmaa, ga hai-mee ginai goodou, tugi i-di baahi i-golo gaa-tugi i-di baahi dela i-golo. Gei digau Canaan la-gi-hagabagia gi-daha mo tenua deelaa, ma e-aha maa nia waga hongo-henua digaula la nia waga baalanga, be digaula digau maaloo.”

Chapter 18

18:1  I-muli digaula ne-kumi tenua hagatau, gei digau Israel gu-dagabuli-mai gi Shiloh, ga-haga-duu di Hale-laa Dimaadua i-golo.

18:2  Di madagoaa deelaa gei nia madawaawa e-hidu o Israel digi wanga nadau gowaa.

18:3  Malaa, Joshua ga-helekai gi digau Israel, “E-waalooloo behee di-godou noho e-tali, dela hagalee hula gii-kae godou gowaa ala ne-gowadu gi goodou go Dimaadua, go di God o godou maadua-mmaadua?

18:4  Gaamai gi-di-au nia daane dogodolu mai nia madawaawa dagi-dahi. Au e-hagau digaula gi-lodo tenua hagatau e-halahala nia gowaa ala e-hiihai ginai digaula belee hai-mee ginai. Gei digaula ga-lloomoi labelaa gi-di-au.

18:5  Gei tenua la-ga-tuu-hidu i digaula: di madawaawa Judah gaa-noho i-lodo nadau gowaa i-bahi-i-ngaaga, nia madawaawa Joseph gaa-noho i nadau gowaa i-bahi-i-ngeia.

18:6  Hihia gi-lala nia hagamodongoohia o-nia gowaa e-hidu, gaamai gi-di-au, gei au gaa-hudu di hadu, ga-halahala di hiihai a Dimaadua adu gi goodou.

18:7  Di madawaawa Levi, la hagalee hai nadau duhongo gowaa madalia goodou, idimaa di-nadau duhongo le e-hai digau hai-mee-dabu ni Dimaadua. Gei nia madawaawa Gad, Reuben, mo Manasseh i-Bahi-i-dua la-guu-lawa di-kae nadau gowaa i-bahi-i-dua Jordan, ala guu-wanga gi digaula go Moses, tangada hai-hegau Dimaadua.”

18:8  Nia daane aanei guu-hula gu-halahala tenua deelaa i-muli Joshua ne-hagamodongoohia gi digaula, “Hula gi-lodo tenua hagatau, halahala-ina nia gowaa aalaa, gaa-lawa lloomoi gi-di-au. Gei au gaa-hudu agu hadu i ginei i Shiloh e-halahala di manawa Dimaadua adu gi goodou.”

18:9  Malaa, nia daane guu-hula gi-lodo tenua hagatau, guu-hihi gi-lala di-nadau hai dela e-duwwe-ai tenua i-nia gunga gowaa e-hidu, guu-hihi gi-lala labelaa nia ingoo o-nia waahale. Nomuli digaula gaa-hula labelaa gi Joshua i Shiloh.

18:10  Joshua gaa-hudu ana hadu ga-halahala-ai di manawa Dimaadua ang-gi digaula, gaa-lawa ga-hagi-anga nia gowaa gi-nia madawaawa Israel ala e-dubu gi-hai-mee ginai.

18:11  Nia guongo o-nia madahaanau o-di madawaawa Benjamin la-ne-belee wanga i-di matagidagi-loo. Di-nadau gowaa la i-mehanga nia gowaa o-di madawaawa Judah mo Joseph.

18:12  Tagageinga i-bahi-i-ngeia e-daamada i Jordan, ga-hanadu laa-nua gi-di mololo o Jericho, ga-hanadu-laa bahi-gi-dai gi-nia gowaa gonduu ga-hanadu-loo gi-di Anggowaa go Beth=Aven.

18:13  Tagageinga gaa-hana labelaa gi-di mololo i bahi-i-ngaaga o Luz (dela e-hagaingoo labelaa bolo Bethel), ga-haneia gi Ataroth=Addar, i-hongo di gonduu dela i baahi-ngaaga Beth=Horon Bahi-lala.

18:14  Tagageinga la-gaa-hana-hua beelaa gi-di baahi dela i-golo, gaa-hana gi-ngaaga, daamada i-di baahi dai o-di gonduu deelaa, gaa-hana gi Kiriath=Baal (be go Kiriath=Jearim), dela go di waahale di madawaawa Judah. Deenei la-go tagageinga i-bahi-i-dai o tenua o Benjamin.

18:15  Tagageinga i-bahi-i-ngaaga e-daamada i-di gili o Kiriath=Jearim, gaa-hana gi-nia Monowai Uwa-aga i-lodo tenua o Nephtoah.

18:16  Gaa-hana gi-lala gi tono di gonduu dela e-mmada-adu gi-di gowaa mehanga gonduu o Hinnom, i mada-ngeia di gowaa mehanga gonduu o Rephaim. Gaa-hana ngaaga laa-lodo di gowaa mehanga gonduu o Hinnom, i-bahi-i-ngaaga nia gonduu baba o Jebus ga-huli-adu gi En=Rogel.

18:17  E-dau i-golo gaa-hana ngeia gi En-Shemesh, gaa-hana-laa gi Geliloth, dela i-baahi i-golo di Ala Nnoonua o Adummim. Tagageinga gaa-hana gi-lala gi-di Hadugalaa o Bohan (Bohan la tama-daane ni Reuben)

18:18  Ga-hana-laa di baahi ngeia o-nia gonduu baba ala i-hongo di gowaa mehanga gonduu o Jordan. Ga-haneia laa-lodo di gowaa baba deelaa,

18:19  gaa-hana ga-diiagi gi-baahi ngeia nia gonduu baba o Beth=Hoglah, ga-odi i-di Tai Mmade, di gowaa dela e-hagaodi ginai di monowai Jordan. Deenei tagageinga dela i-bahi-i-ngaaga o tenua o Benjamin.

18:20  Jordan la-go tagageinga i-bahi-i-dua. Aanei nnagageinga di gowaa o-nia madahaanau o-di madawaawa Benjamin ala e-hai-mee ginai.

18:21  Nia waahale ala e-dau gi-nia madahaanau o-di madawaawa Benjamin: go Jericho, Beth=Hoglah, Emek Keziz,

18:22  Beth=Arabah, Zemaraim, Bethel,

18:23  Avvim, Parah, Ophrah

18:24  Chephar=Ammoni, Ophni, mo Geba. Nia waahale aanei le e-madangaholu maa-lua, mono waahale ala i nadau gili.

18:25  Nia waahale labelaa aanei: go Gibeon, Ramah, Beeroth,

18:26  Mizpah, Chephirah, Mozah,

18:27  Rekem, Irpeel, Taralah,

18:28  Zela, Haeleph, Jebus (be go Jerusalem), Gibeah, mo Kiriath=Jearim. Nia waahale aanei le e-madangaholu maa-haa, mono dama waahale ala i nadau daha. Deenei di gowaa dela ne-hai-mee ginai nia madahaanau o-di madawaawa Benjamin.

Chapter 19

19:1  Di lua hudihudi ne-wanga nia gowaa gi nia madahaanau o-di madawaawa Simeon. Di-nadau gowaa le e-hana e-tugi i-di gowaa dela ne-gai-ai di madawaawa Judah.

19:2  Ala go Beersheba, Sheba, Moladah,

19:3  Hazar=Shual, Balah, Ezem,

19:4  Eltolad, Bethul, Hormah,

19:5  Ziklag, Beth=Marcaboth, Hazar=Susah,

19:6  Beth=Lebaoth, mo Sharuhen. Nia waahale aanei le e-madangaholu maa-dolu mono dama-waahale ala i nadau daha.

19:7  Mo nia waahale aanei: go Ain, Rimmon, Ether, mo Ashan. Nia waahale aanei le e-haa mono dama-waahale ala i nadau daha.

19:8  Nia waahale lligi aanei le e-hagapuni gi-nia waahale lligi ala e-haganiga nia waahale llauehe le e-tugi-loo i Baalath=Beer (be go Ramah) dela i-bahi-i-ngaaga. Di gowaa deenei la di gowaa e-hai-mee ginai nia madahaanau o-di madawaawa Simeon.

19:9  Di gowaa ne-wanga gi Judah le e-mada-damana ang-gi ginaadou, malaa di baahi di guongo o Judah guu-wanga gi Simeon.

19:10  Di tolu hudihudi ne-wanga nia gowaa gi-nia madahaanau o-di madawaawa Zebulun. Tenua dela ne-wanga gi digaula le e-tugi-loo i Sarid.

19:11  Tugi i-golo, tagageinga la-gaa-hana gi dai gi Mareal, e-tale gi Dabbesheth mo-di monowai dulii i-bahi-i-dua o Jokneam.

19:12  Gei di baahi i-golo o Sarid, tagageinga le e-hana gi-dua gi tagageinga o Chisloth=Tabor, gaa-hana gi Daberath, gaa-hana gi-nua gi Japhia.

19:13  Gaa-hana-hua beelaa gi-dua gi Gath=Hepher mo Ethkazin, ga-huli-adu gi Neah i-di ala dela e-hana gi Rimmon.

19:14  Gei i-bahi-i-ngeia, tagageinga le e-huli-adu gi Hannathon, ga-odi i-di gowaa mehanga gonduu o Iphtahel.

19:15  E-hagapuni labelaa gi-nia waahale aanei: go Kattath, Nahalal, Shimron, Idalah, mo Bethlehem. Nia waahale aanei le e-madangaholu maa-lua mono dama-waahale ala i nadau daha.

19:16  Nia waahale aanei mo nadau waahale lligi la i-lodo tenua dela ne-wanga gi-nia madahaanau o-di madawaawa Zebulun e-hai-mee ginai.

19:17  Di haa hudihudi ne-wanga nia gowaa gi-nia madahaanau o-di madawaawa Issachar.

19:18  Tenua dela ne-hai-mee ginai digaula la nia waahale aanei nonua: go Jezreel, Chesulloth, Shunem.

19:19  Hapharaim, Shion, Anaharath,

19:20  Rabbith, Kishion, Ebez,

19:21  Remeth, Engannim, Enhaddah, mo Beth=Pazzez.

19:22  Tagageinga le e-tale gi Tabor, Shahazumah, mo Beth=Shemesh, gaa-tugi i Jordan. Nogo iai labelaa nia waahale llauehe e-madangaholu maa-ono mono dama-waahale i nadau daha.

19:23  Nia waahale aanei mo nadau waahale lligi la i-lodo tenua dela ne-wanga gi-nia madahaanau o-di madawaawa Issachar e-hai-mee ginai.

19:24  Di lima hudihudi ne-wanga nia gowaa gi-nia madahaanau o-di madawaawa Asher.

19:25  Tenua dela ne-hai-mee ginai Asher la nia waahale aanei nonua: go Helkath, Hali, Beten, Achshaph,

19:26  Allam=Melech, Amad, mo Mishal. I-bahi-i-dai, tagageinga le e-tale gi Carmel mo Shihor=Libnath.

19:27  Tagageinga ga-huli-aga gi-dua gaa-hana gi Beth=Dagon, gaa-tale gi tenua o Zebulun mo-di gowaa mehanga gonduu o Iphtahel, ga-hanadu gi Beth=Emek mo Neiel, ga-hanadu beelaa gi ngeia gi Cabul,

19:28  Ebron, Rehob, Hammon, mo Kanah, adu-loo gi Sidon.

19:29  Tagageinga ga-hagabiga i-golo gaa-hana gi Ramah, gaa-tugi i-di waahale abaaba maaloo dela go Tyre, ga-hagabiga i-golo gaa-hana gi Hosah, gaa-hana ga-odi i-di Tai go Mediterannean. Nogo iai labelaa nia waahale go Mahalab, Achzib,

19:30  Ummah, Aphek, mo Rehob. Nia waahale aanei le e-madalua maa-lua, mono dama-waahale ala i nadau daha.

19:31  Nia waahale aanei mo nadau waahale lligi la i-lodo tenua dela ne-wanga gi-nia madahaanau o-di madawaawa Asher e-hai-mee ginai.

19:32  Di ono hudihudi ne-wanga nia gowaa gi-nia madahaanau o-di madawaawa Naphtali.

19:33  Tagageinga le e-hana i Heleph gi-di laagau-‘oak’ i Zaanannim, gaa-hana gi Adaminekeb, gaa-hana labelaa gi Jamnia, ga-hanadu-loo gi Lakkum, gaa-tugi i Jordan.

19:34  E-tugi i-golo gaa-hana gi-dai gi Aznoth=Tabor, gaa-tugi i Hukkok, e-tale gi tenua o Zebulun la i-bahi-i-ngaaga, gei tenua o Asher la i-bahi-i-dai, gei di monowai Jordan la i-bahi-i-dua.

19:35  Nia waahale abaaba maaloo o Naphtali: la-go Ziddim, Zer, Hammath, Rakkath, Chinnereth,

19:36  Adamah, Ramah, Hazor,

19:37  Kedesh, Edrei, Enhazor,

19:38  Yiron, Migdalel, Horem, Beth=Anath, mo Beth=Shemesh. Nia waahale aanei le e-madangaholu maa-hiwa, mono dama-waahale ala i nadau daha.

19:39  Nia waahale aanei mo nadau waahale lligi la i-lodo tenua dela ne-wanga gi-nia madahaanau o-di madawaawa Naphtali e-hai-mee ginai.

19:40  Di hidu hudihudi ne-wanga nia gowaa gi-nia madahaanau o-di madawaawa Dan.

19:41  Tenua dela ne-hai-mee ginai Dan la nia waahale aanei nonua: go Zorah, Eshtaol, Irshemesh,

19:42  Shaalbim, Aijalon, Ithlah,

19:43  Elon, Timnah, Ekron,

19:44  Eltekeh, Gibbethon, Baalath,

19:45  Jehud, Beneberak, Gath=Rimmon,

19:46  Mejarkon, mo Rakkon, mo nia gowaa e-haganiga di waahale go Joppa.

19:47  Di madagoaa digau Dan ne-ngala nadau gowaa, digaula gaa-hula gi Lais ga-heebagi gi-di waahale deelaa, gaa-kumi ga-daaligi nia daangada gii-mmade, ga hai-mee gi-di waahale deelaa, gaa-huli di ingoo go Lais gi Dan, ne-gahi gi di-nadau damana-madua go Dan.

19:48  Nia waahale aanei mo nadau waahale lligi la i-lodo tenua dela ne-wanga gi-nia madahaanau o-di madawaawa Dan e-hai-mee ginai.

19:49  Di madagoaa digau Israel ne-lawa di-duwwe nadau gowaa, digaula gaa-wanga di gowaa gi Joshua, go tama-daane a Nun, e-hai-mee ginai.

19:50  Be-di hai o Dimaadua dela ne-hagawaalanga, digaula guu-wanga gi mee dana waahale dela bolo e-gai eia: Timnath=Serah, i-lodo tenua gonduu o Ephraim. Mee ga-haga-hoou di waahale deelaa, gaa-noho i-golo.

19:51  Eleazar, tangada hai-mee-dabu, mo Joshua, tama-daane Nun, mo nia dagi o-nia madahaanau o-nia madawaawa Israel ne-duwwe nia gowaa aanei gi-di hai o-di huduhudu nia hadu e-halahala-ai di manawa Dimaadua i-di ngudu di Hale-laa Dimaadua i Shiloh. Deenei di hai ne-duwwe-ai tenua digaula.

Chapter 20

20:1  Dimaadua ga-helekai gi Joshua

20:2  bolo gi-helekai gi digau Israel, “Hilihilia godou waahale pala hagammuni daangada dela gu-helekai-iei Au gi Moses bolo gi hagi-adu gi-di-goe.

20:3  Maa iai tangada i goodou gaa-tiba ga-daaligi dana dangada gaa-made, geia gaa-lele hagammuni gi-golo i tangada dela e-hiihai e-tala di hui.

20:4  Gei mee gaa-lele gi tei nia waahale aanei, hana gi-di gowaa hagi-aga i-di ngudu di bontai di waahale, hagamodongoohia-ina gi-nia dagi o-di waahale deelaa di mee dela ne-hai. Gei digaula ga-haga-ulu a-mee gi-lodo di waahale, gaa-wanga di gowaa e-noho-iei mee, gii-mee-ai di-noho i-golo.

20:5  Maa tangada ga-halahala a-mee gi-di gowaa deelaa e-hiihai e-tala di hui, gei digau o-di waahale deelaa hagalee wanga a-mee gi tangada deelaa. Digaula e-hai gi-abaaba a-mee, idimaa mee ne-tiba-hua ga-daaligi dana dangada, hagalee mai i-lodo di hagawelewele.

20:6  Mee e-mee di-noho-hua i-lodo di waahale deelaa, gaa-dae-loo gi-di gabunga damana gaa-hai, be di madagoaa tagi hai-mee-dabu la-guu-made. Gei mee gaa-mee di-hana labelaa gi dono guongo donu dela ne-hanimoi-ai.”

20:7  Malaa, digaula gu-hilihili nia waahale aanei i-bahi-i-dai Jordan, go Kedesh i-lodo Galilee i tenua gonduu o Naphtali, mo Shechem i tenua gonduu o Ephraim, mo Hebron i tenua gonduu o Judah.

20:8  Gei digaula gu-hilihili nia waahale aanei i-bahi-i-dua Jordan, go Bezer i-di anggowaa baba i-bahi-i-dua o Jericho i-lodo tenua o Reuben, mo Ramoth i tenua go Gilead, mo Golan i Bashan i-lodo tenua o Manasseh.

20:9  Aanei la nia waahale abaaba dangada ala ne-hilihili ang-gi digau Israel huogodoo mo digau mai-i-daha ala e-noho madalia digaula. Maa tangada guu-tiba gu-daaligi dana dangada gaa-made, le e-mee di-gida dono gowaa e-bala-ai i tei nia guongo aanei i tangada dela e-hiihai e-tala di hui. Digaula e-deemee di-daaligi gii-mmade gaa-dae-loo gi-di gabunga la-gaa-hai.

Chapter 21

21:1  Nia dagi o-nia madahaanau o Levi ne-hula gi Eleazar, taane hai-mee-dabu, mo Joshua, tama-daane a Nun, mo nia dagi o-nia madahaanau o-nia madawaawa huogodoo o Israel

21:2  i Shiloh, i-lodo tenua go Canaan, ga-helekai gi digaula, “Dimaadua la-gu-hagawaalanga mai baahi o Moses bolo goodou gi-gaamai gi gimaadou madau waahale e-noho-ai gimaadou, mo nia gowaa ono geingatolo i-golo ala e-mee di-haangai madau manu.”

21:3  Gei digau Israel ga-daudali nnelekai Dimaadua, gaa-wanga gi-di madawaawa Levi nadau waahale mo nadau gowaa iai ni geingatolo, mai i-lodo nadau gowaa ala ne-hai-mee ginai ginaadou.

21:4  Mai i-lodo di madawaawa Levi, ma go nia madahaanau lligi o-di madahaanau damana o Kohath ne-wanga ginai nadau waahale e-noho-ai i-di matagidagi. Nia madahaanau i-di madawaawa Levi ala nia hagadili ni Aaron, tangada hai-mee-dabu, la-ne-wanga ginai nia waahale e-madangaholu maa-dolu i-lodo nia gowaa a Judah, Simeon, mo Benjamin.

21:5  Digau ala i-golo i-di madahaanau damana o Kohath ne-wanga ginai nia waahale e-madangaholu i-nia guongo a Ephraim, Dan mo Manasseh i-Bahi-i-Dai.

21:6  Di madahaanau damana o Gershon la-ne-wanga ginai nia waahale e-madangaholu maa-dolu mai i-nia madawaawa Issachar, Asher, Naphtali mo Manasseh i-Bahi-i-Dua.

21:7  Nia madahaanau lligi o-di madahaanau damana o Merari la-ne-wanga ginai nia waahale e-madangaholu maa-lua i-nia madawaawa Reuben, Gad mo Zebulun.

21:8  Digau Israel guu-wanga nia waahale aanei mono gowaa geingatolo gi-di madawaawa Levi gi-di hai o-di hudihudi gi-nia hadu, be-di hagawaalanga a Dimaadua ne-hai ang-gi Moses.

21:9  Aanei nia ingoo o-nia waahale mai i-di madawaawa Judah mo Simeon ala ne-wanga

21:10  gi-di hagadili o Aaron dela go di madahaanau o Kohath, dela go di hagadili ni Levi. Go digaula ala e-gai i-di matagidagi.

21:11  Digaula guu-wanga ginai di waahale go Arba (Arba la-go tamana a Anak), dolomeenei e-gahi bolo Hebron, i-lodo tenua gonduu o Judah, mo dono gowaa geingatolo.

21:12  Malaa, nia gowaa maalama o-di waahale deenei, mono dama waahale ala i-tua di waahale damana la-guu-wanga gi Caleb tama-daane a Jephunneh e-hai-mee ginai.

21:13  Nia waahale aanei la-guu-wanga gi-di hagadili Aaron, tangada hai-mee-dabu: go Hebron (deenei di waahale dela e-mee di-bala-ai tangada), mo Libnah,

21:14  Jattir, Eshtemoa,

21:15  Holon, Debir,

21:16  Ain, Juttah, mo Beth=Shemesh, mo nadau gowaa geingatolo. Nia waahale aanei le e-hiwa mai i-nia madawaawa Judah mo Simeon.

21:17  Digaula guu-wanga ginai nia waahale e-haa mai i-di madawaawa Benjamin: go Gibeon, Geba,

21:18  Anathoth mo Almon, mo nadau gowaa geingatolo.

21:19  Nia waahale huogodoo mo nadau gowaa geingatolo ala ne-wanga gi-nia gau hai-mee-dabu, go di hagadili o Aaron, le e-madangaholu maa-dolu.

21:20  Nia madahaanau lligi ala i-golo o-di madahaanau damana o Kohath i-di madawaawa Levi la-guu-wanga ginai nia waahale mai i-di madawaawa Ephraim.

21:21  Nia waahale e-haa aanei la-guu-wanga gi digaula: go Shechem dela i tenua gonduu o Ephraim (deenei di waahale e-mee di-bala-ai tangada), mo Gezer,

21:22  Kibzaim, mo Beth=Horon, mo nadau gowaa geingatolo.

21:23  Nia waahale e-haa aanei mai i-di madawaawa Dan la-guu-wanga gi digaula: go Eltekeh, Gibbethon,

21:24  Aijalon, mo Gath=Rimmon, mo nadau gowaa geingatolo.

21:25  Digaula guu-wanga ginai nia waahale e-lua aanei mai i-nia guongo a Manasseh i-Bahi-i-Dai: go Taanach mo Gath=Rimmon mo nau gowaa geingatolo.

21:26  Nia waahale huogodoo mo nadau gowaa geingatolo ala guu-wanga gi-nia madahaanau lligi o-di madahaanau damana o Kohath, le e-madangaholu.

21:27  Di buini i-golo i-di madawaawa Levi dela go di madahaanau damana o Gershon, la-guu-wanga ginai nia waahale e-lua aanei i-nia guongo o Manasseh i-Bahi-i-Dua: go Golan i Bashan (deenei di waahale e-mee di-bala-ai tangada) mo Beshterah, mo nau gowaa geingatolo.

21:28  Digaula la-guu-wanga ginai nia waahale e-haa aanei mai i-di madawaawa Issachar, go Kishion, Daberath,

21:29  Jarmuth, mo Engannim, mo nadau gowaa geingatolo.

21:30  Digaula la-guu-wanga ginai nia waahale e-haa aanei mai i-di madawaawa Asher: go Mishal, Abdon,

21:31  Helkath, mo Rehob, mo nadau gowaa geingatolo.

21:32  Gei digaula guu-wanga ginai nia waahale e-dolu aanei mai i-di madawaawa Naphtali: go Kedesh i Galilee (deenei di waahale e-mee di-bala-ai tangada), Hammoth=Dor mo Kartan, mo nadau gowaa geingatolo.

21:33  Nia waahale huogodoo mo nadau gowaa geingatolo ala guu-wanga gi-nia madahaanau lligi o-di madahaanau damana o Gershon le e-madangaholu maa-dolu.

21:34  Gei di buini i-golo i-di madawaawa Levi, dela go di madahaanau damana o Merari, la-guu-wanga ginai nia waahale e-haa aanei mai i-di madawaawa Zebulun: go Jokneam mo Kartah,

21:35  Dimnah mo Nahalal, mo nadau gowaa geingatolo.

21:36  Digaula la-guu-wanga ginai nia waahale e-haa aanei mai i-di madawaawa Reuben: go Bezer mo Jahaz,

21:37  Kedemoth mo Mephaath, mo nadau gowaa geingatolo.

21:38  Digaula la-guu-wanga ginai nia waahale e-haa aanei mai i-di madawaawa Gad, go Ramoth i tenua go Gilead, (deenei di waahale e-mee di-bala-ai tangada), mo Mahanaim,

21:39  Heshbon mo Jazer, mo nadau gowaa geingatolo.

21:40  Malaa, nia waahale huogodoo ala ne-wanga gi-di madahaanau damana o Merari le e-madangaholu maa-lua.

21:41  Nia waahale huogodoo e-madahaa maa-walu mo nadau gowaa geingatolo la-guu-wanga gi-di madawaawa Levi, mai i-nia guongo ala ne-hai-mee ginai digau Israel.

21:42  Nia waahale huogodoo e-madahaa maa-walu mo nadau gowaa geingatolo la-guu-wanga gi-di madawaawa Levi, mai i-nia guongo ala ne-hai-mee ginai digau Israel.

21:43  Dimaadua guu-wanga gi digau Israel nia gowaa ala ne-hagababa ang-gi nia maadua-mmaadua digaula. Di madagoaa digaula ne-hai-mee gi-nia maa, gei digaula guu-noho i-golo.

21:44  Dimaadua guu-wanga gi digaula di aumaalia i-lodo tenua hagatau deelaa, be ana helekai ne-hai gi-nia maadua-mmaadua digaula. Di hagadaumee e-dahi i-nia hagadaumee huogodoo digaula guu-mee di-hai-baahi gi digaula ai, idimaa Dimaadua guu-wanga gi digau Israel di aali i nadau hagadaumee huogodoo.

21:45  Dimaadua gu-haga-kila-aga nia hagababa huogodoo ala ne-hai ang-gi digau o Israel.

Chapter 22

22:1  Nomuli, gei Joshua ga-haga-dagabuli nia madawaawa Reuben, Gad, mo Manasseh Bahi-i-Dua.

22:2  Mee ga-helekai gi digaula, “Goodou guu-hai nia mee huogodoo a Moses, tangada hai-hegau a Dimaadua, ne-hai bolo gi-heia, gei goodou gu-daudali huogodoo agu haganoho.

22:3  Ga-tugi-mai gi dolomeenei, gei goodou digi dugu di-godou hagamaamaa godou duaahina digau Israel ala i-golo. Goodou guu-hai digau e-hagalongo ge e-daudali di hiihai a Dimaadua, go di-godou God.

22:4  Dolomeenei gei Dimaadua, go di-godou God, la-guu-wanga di aumaalia gi godou duaahina digau Israel ala i-golo, be dana hagababa ne-hai. Malaa, dolomeenei gei goodou hula gi godou guongo ala ne-gai-ai goodou, nia gowaa ala i-bahi-i-dua Jordan, ala ne-gowadu gi goodou go Moses, go tangada hai-hegau Dimaadua.

22:5  Goodou gi-langahia-e-goodou gi-daudalia nnaganoho ala ne-hagi-adu go Moses gi goodou: Aloho i Dimaadua, go di-godou God, hagakila-ina-aga ana hiihai, daudalia ana helekai, gi-manawa-dahi gi Mee, hai-hegau gi Mee mai i-lodo godou manawa hagatau mo godou mouli hagatau.”

22:6  Joshua ga-hagahumalia digaula gi nnelekai aanei, ga-hagau digaula gi nadau guongo, “Goodou gaa-hula gi-muli gi godou guongo, gu-maluagina, gu-logowaahee godou manu, silber, goolo, baalanga-mmee, baalanga mono goloo uluulu. Goodou gi-hai-mee ngaadahi mo godou duaahina madawaawa ala i-golo i godou maluagina ala ne-gaamai i-baahi godou hagadaumee.” Malaa, digaula guu-hula gi nadau guongo. Moses ne-wanga nia gowaa ala i-bahi-i-dua Jordan gi-di baahi di madawaawa Manasseh, gei di baahi di madawaawa dela i-golo, Joshua ne-wanga di-nadau gowaa i-bahi-i-dai Jordan, dalia nia madawaawa ala i-golo.

22:7  Joshua ga-hagahumalia digaula gi nnelekai aanei, ga-hagau digaula gi nadau guongo, “Goodou gaa-hula gi-muli gi godou guongo, gu-maluagina, gu-logowaahee godou manu, silber, goolo, baalanga-mmee, baalanga mono goloo uluulu. Goodou gi-hai-mee ngaadahi mo godou duaahina madawaawa ala i-golo i godou maluagina ala ne-gaamai i-baahi godou hagadaumee.” Malaa, digaula guu-hula gi nadau guongo. Moses ne-wanga nia gowaa ala i-bahi-i-dua Jordan gi-di baahi di madawaawa Manasseh, gei di baahi di madawaawa dela i-golo, Joshua ne-wanga di-nadau gowaa i-bahi-i-dai Jordan, dalia nia madawaawa ala i-golo.

22:8  Joshua ga-hagahumalia digaula gi nnelekai aanei, ga-hagau digaula gi nadau guongo, “Goodou gaa-hula gi-muli gi godou guongo, gu-maluagina, gu-logowaahee godou manu, silber, goolo, baalanga-mmee, baalanga mono goloo uluulu. Goodou gi-hai-mee ngaadahi mo godou duaahina madawaawa ala i-golo i godou maluagina ala ne-gaamai i-baahi godou hagadaumee.” Malaa, digaula guu-hula gi nadau guongo. Moses ne-wanga nia gowaa ala i-bahi-i-dua Jordan gi-di baahi di madawaawa Manasseh, gei di baahi di madawaawa dela i-golo, Joshua ne-wanga di-nadau gowaa i-bahi-i-dai Jordan, dalia nia madawaawa ala i-golo.

22:9  Malaa, digau nia madawaawa Reuben, Gad mo Manasseh Bahi-i-Dua guu-hula gi-muli gi nadau guongo. Digaula gu-diiagi digau Israel ala i-golo i Shiloh i-lodo tenua go Canaan, gaa-hula gi nadau guongo donu, dela go Gilead, dela ne-hai-mee ginai digaula be-di hai Dimaadua ne-hai gi Moses.

22:10  Di madagoaa nia madawaawa Reuben, Gad, mo Manasseh Bahi-i-Dua gaa-dau i Geliloth, dela i-bahi-i-dai Jordan, digaula gaa-hau di-nadau gowaa hai-tigidaumaha damana i taalinga di monowai.

22:11  Digau Israel ala i-golo gaa-longo boloo, “Nia madawaawa Reuben, Gad mo Manasseh Bahi-i-Dua la-guu-hau di-nadau gowaa hai-tigidaumaha i Geliloth, i tadau baahi o-di Monowai Jordan!”

22:12  Digau Israel ga-longo-e-ginaadou di mee deenei, digaula ga-dagabuli gi-di gowaa e-dahi i Shiloh belee hula e-heebagi gi digaula ala go nia madawaawa i-bahi-i-dua.

22:13  Digau Israel ga-hagau Phinehas, tama-daane Eleazar, tangada hai-mee-dabu, gi digau o-nia madawaawa Reuben, Gad, mo Manasseh Bahi-i-Dua ala i-lodo tenua go Gilead.

22:14  Nia dagi daane madangaholu e-hula madalia Phinehas, taane e-dahi mai i-lodo nia madawaawa dagidahi i-bahi-i-dai. Nia daane aanei la nia dagi o-nia madahaanau ala i-lodo nia madahaanau o Israel.

22:15  Digaula gaa-hula gi tenua go Gilead, gi digau o-nia madawaawa Reuben, Gad mo Manasseh Bahi-i-Dua,

22:16  gaa-pono di lohongo o tenua hagatau, ga-helekai gi digaula, “Goodou e-aha ala guu-hai di-godou hai huaidu hai-baahi gi-di God o Israel? Goodou gu-hai-baahi ang-gi Dimaadua i-di godou hau di gowaa hai-tigidaumaha adu gi goodou! Goodou guu-hai digau hagalee daudali a-Mee!

22:17  Hagamaanadu-ina-malaa tadau huaidu ne-hai i Peor, i-di madagoaa Dimaadua ne-hagaduadua ana daangada donu gi tau-magi. Gidaadou e-huaidu-mai gi gidaadou hua igolo gi-di huaidu dela ne-hai go gidaadou. Ma e-aha di huaidu dela e-dee-dohu ginai gidaadou?

22:18  Malaa e-hai behee, goodou ga-hagalee daudali a-Mee dolomeenei? Maa goodou ga-hai-baahi gi Dimaadua dangi-nei, gei Mee ga-hagawelewele-mai gi gidaadou digau Israel huogodoo.

22:19  Deenei-laa, maa godou gowaa le e-dee-tau di daumaha-ai no-lodo, lloomoi gi-lodo tenua Dimaadua, dela iai di Hale-laa o-Maa. Halahala-ina godou gowaa mai gi gimaadou. Gei goodou hudee hai-baahi ang-gi Dimaadua, be e-hai gimaadou gi-dau-adu gi goodou i-di godou hai di-godou gowaa hai-tigidaumaha hai-gee mo-di gowaa hai-tigidaumaha ang-gi Dimaadua, go tadau God.

22:20  Maanadu-ina di hai o Achan tama-daane a Zerah dela ne-de-hiihai di-daudali nnelekai i-di hai o-nia goloo ala belee oho gi-daha. Digau Israel hagatau gu-hagaduadua gi-di hai a-maa ne-hai. Gei hagalee bolo go mee hua dela ne-made gi-di huaidu ne-hai go mee.”

22:21  Digau o-nia madawaawa Reuben, Gad, Manasseh Bahi-i-Dua ga-helekai gi-nia dagi o-nia madawaawa bahi-i-dai:

22:22  “Tagi Aamua go God! Ma go Mee go Dimaadua! Tagi Aamua go God! Ma go Mee go Dimaadua! Mee e-iloo-Ia tadinga di-madau mee ne-hai, gei gimaadou e-hiihai bolo goodou e-hai gi-iloo labelaa! Maa nei bolo gimaadou guu-hai digau e-hai-baahi hagalee daahi di-madau hagadonu Dimaadua, malaa, hudee heia gimaadou gi-mouli!

22:23  Maa nei bolo gimaadou gu-de-hagalongo gi Dimaadua dela ne-hau di-madau gowaa hai-tigidaumaha belee dudu tigidaumaha nonua, be di mee e-hai tigidaumaha golee-laagau, be-di mee e-hai tigidaumaha hagadaubuni, Dimaadua modogoia gi-haga-huaidu-ina gimaadou.

22:24  Deeai! Gimaadou ne-hai di mee deenei, idimaa gimaadou nogo mmaadagu bolo dagidilaangi godou dama ga-helekai-mai gi madau dama boloo, ‘Goodou gaa-hai di-godou aha gi Dimaadua go di God digau Israel?

22:25  Mee ne-hai di Monowai Jordan di hagageinga i-mehanga gimaadou mo goodou go nia madawaawa Reuben mo Gad. Goodou godou mee mai baahi Dimaadua ai!’ Gei godou dama gaa-hai madau dama gi-hagalee daumaha ang-gi Dimaadua.

22:26  Deelaa-laa gimaadou ne-hai di gowaa hai-tigidaumaha, hagalee belee hai di mee dudu tigidaumaha, be-di mee e-hai tigidaumaha,

22:27  gei ne-hai belee hai di ada haga-modongoohia ang-gi madau daangada mo ang-gi godou daangada, mo digau maalia ala i tadau muli, e-hai di mee e-haga-modongoohia bolo gimaadou nogo daumaha gi Dimaadua i-mua dono Hale-laa dabu, e-hai madau tigidaumaha dudu, ge e-hai madau tigidaumaha hagadaubuni. Deenei ne-hai bolo gi-de-helekai-hua godou dama maalia bolo gimaadou digau hua hagalee dau ang-gi Dimaadua.

22:28  Ma di maanadu ni gimaadou ne-hai, bolo ma-ga-gila-mai beenei tei laangi, gei madau dama e-mee di-helekai boloo, ‘Madau maadua-mmaadua ne-hai di gowaa hai-tigidaumaha gii-hai be-di gowaa hai-tigidaumaha a Dimaadua. Hagalee belee dudu nia tigidaumaha nonua be e-hai-ai nia tigidaumaha, ne-hai-hua belee hai di ada hagamodongoohia ang-gi madau daangada mo ang-gi godou daangada.’

22:29  Gimaadou hagalee-loo e-hai-baahi ang-gi Dimaadua, be gu-hagalee daumaha ang-gi Mee i-di madau hai di gowaa hai-tigidaumaha belee dudu tigidaumaha nonua, be e-hai-ai nia tigidaumaha golee-laagau, be e-hai-ai nia tigidaumaha. Gimaadou gu-hagalee hai tuai gowaa hai-tigidaumaha i-daha mo-di gowaa hai-tigidaumaha dela e-duu i-mua di Hale-laa Dimaadua, go tadau God.”

22:30  Phinehas, tangada hai-mee-dabu, mo nia dagi dilongoholu o-nia guongo nogo madalia a-mee, ala go nia dagi o-nia madahaanau digau bahi-i-dai, ga-longono-ginaadou nia helekai nia madawaawa Reuben, Gad, Manasseh Bahi-i-Dua ne-helekai-ai, gei digaula guu-noho manawa lamalia.

22:31  Phinehas, tama-daane a Eleazar, taane hai-mee-dabu, ga-helekai gi digaula, “Dolomeenei gei gimaadou gu-iloo bolo Dimaadua gu-i-tadau baahi. Goodou digi hai-baahi gi Mee, gei goodou gu-benebene digau Israel gi-daha mo-di hagaduadua o Dimaadua.”

22:32  Nomuli, gei Phinehas mo nia dagi guu-hula gu-diiagi digau Reuben mo Gad i-lodo tenua go Gilead, gaa-hula gi-muli gi Canaan, gi digau Israel ga-odi nadau helekai gi digaula.

22:33  Digau Israel guu-noho manawa lamalia gu-hagaamu a God. Digaula guu-dugu di-nadau helehelekai bolo e-hai-tauwa e-hagahuaidu di gowaa dela e-noho-ai nia madawaawa Reuben mo Gad.

22:34  Digau nia madawaawa Reuben mo Gad ga-helekai, “Di gowaa hai tigidaumaha deenei la di hagadootonu mai gi gidaadou bolo Dimaadua la-go God.” Malaa digaula gaa-gahi di-maa bolo di “Hagadootonu”.

Chapter 23

23:1  Mai gi no-muli Dimaadua guu-dugu ang-gi digau Israel gii-noho i-di aumaalia i nadau hagadaumee. Di madagoaa deelaa, gei Joshua gu-madumadua,

23:2  gei mee ga-gahi-mai digau Israel huogodoo, digau mmaadua, nia dagi, digau hai-gabunga, mo nia dagi o-nia daangada, ga-helekai, “Au gu-madumadua dolomeenei.

23:3  Goodou gu-gidee-goodou nia mee huogodoo Dimaadua, go di-godou God, ne-hai ang-gi nia henua aanei idimaa go goodou. Dimaadua, go di-godou God, nogo heebagi i-di godou lohongo.

23:4  Au guu-wanga nia gowaa ala e-dubu gi godou madawaawa e-hai-mee ginai, mono gowaa ala guu-kumi ko-au, mai i-di Monowai Jordan i-bahi-i-dua gaa-hana gi-di Tai go Mediterranean i-bahi-i-dai.

23:5  Dimaadua, go di-godou God, ga-hagabagi digaula gi-daha mo goodou. Mee gaa-hono digaula gi-daha mo godou mua, gei goodou ga-hai-mee gi-nia gowaa digaula, be-di hagababa Dimaadua, go di-godou God, ne-hai-adu gi goodou.

23:6  Goodou gi-maaloo, gii-pula i goodou gii-hai digau e-daudali nnaganoho huogodoo ala guu-hihi gi-lodo di Beebaa Nnaganoho Moses. Hudee haga-delangahia-ina tei haganoho i-nia maa.

23:7  Goodou hudee hagabuni-ina goodou gi digau o-nia guongo ala e-dubu i godou baahi, be e-helehelekai nia ingoo o-nia god digaula, be e-hai-hegau gi-nia ingoo o-nia god digaula i-lodo godou hagababa, be e-hai-daumaha ginai be e-pala-ang-ginai.

23:8  Goodou gi-manawa-dahi hua gi Dimaadua, be di-godou hai nogo hai gaa-dae-mai gi dolomeenei.

23:9  Dimaadua gu-hagabagi nia henua maaloo dangihi gi-daha mo goodou i-di godou lloo-adu gi tenua deenei, hagalee tenua guu-mee di-duu hai-baahi-adu gi goodou ai.

23:10  Di-ingoo-hua tangada e-dahi i goodou e-mee di-hagabagi ana daane e-mana gii-llele gi-daha, idimaa Dimaadua, go di-godou God, e-heebagi i godou lohongo, be dana hagababa ne-hai.

23:11  Malaa, goodou gii-pula i goodou, gii-hai digau e-aloha i Dimaadua, go di-godou God.

23:12  Maa goodou ga-de-hagalongo ga-buni-anga gi-nia guongo ala e-dubu hua igolo i godou baahi, ga-hai-lodo gi digaula,

23:13  goodou la-gi-iloo bolo Dimaadua, go di-godou God, la-ga-hagalee hagabagi gi-daha mo godou mua digau o-nia henua aanei. Digaula gaa-hai digau e-hagalliga huoloo ginai goodou, gadoo be di hele be-di lua llala, gei e-hagammae huoloo adu gi goodou be di mmae o-di loahi ma-ga-haga-maawa godou dua, be-di manga-laagau duduia i-lodo godou golomada. Di hai deenei e-hai-hua beelaa gaa-dae-loo gi tangada e-dahi e-dubu ai i-hongo tenua humalia deenei ne-gowadu go Dimaadua, di-godou God.

23:14  “Dolomeenei gei dogu madagoaa e-made-iei au guu-dae-mai. Goodou huogodoo gu-iloo i-lodo godou manawa mo i-lodo godou mouli bolo Dimaadua, go di-godou God, la-gu-gowadu nia mee humalia huogodoo ala ne-hagababa-adu gi goodou. Ana hagababa ne-hai gu-haga-kila-aga huogodoo, hagalee di mee digi heia ai.

23:15  Gei dana haga-kila-aga ana hagababa huogodoo adu gi goodou, dela hogi dana haga-kila-aga ana hagaduadua huogodoo ala gu-hagababa go Mee adu gi goodou.

23:16  Maa goodou ga-hagalee haga-kila-aga di hagababa a Dimaadua, go di-godou God, dela e-hiihai ginai bolo goodou gi-hagakila-ina-aga, gei goodou e-hai-hegau mo e-daumaha gi-nia balu-ieidu, malaa, mai i-lodo dono hagawelewele, gei Mee ga-hagaduadua goodou, gei tangada e-dahi i goodou e-dubu ai i-hongo tenua humalia deenei ne-gowadu go Mee gi goodou.”

Chapter 24

24:1  Joshua ga-haga-dagabuli nia madawaawa Israel gi-di gowaa e-dahi i Shechem. Mee gu-gahigahi-mai digau mmaadua, nia dagi, digau hai-gabunga mo digau aamua o Israel, gei digaula gu-lloomoi gi-mua nnadumada o God.

24:2  Joshua ga-helekai gi digau huogodoo, “Deenei di mee a Dimaadua go di God o Israel e-helekai-ai, ‘I-mua-loo, godou maadua-mmaadua nogo noho i-di baahi i-golo di monowai go Euphrates, nogo daumaha gi-nia balu-ieidu. Tangada e-dahi i digaula go Terah, tamana o Abraham mo Nahor.

24:3  Gei Au guu-lahi a Abraham, go di-godou damana-madua, gaa-lahi a-mee laa-lodo di Monowai Euphrates, gaa-dagi a-mee laa-lodo tenua hagatau o Canaan. Au guu-wanga gi mee dono hagadili gi-dogologowaahee. Au guu-wanga gi mee a Isaac,

24:4  gei Au guu-wanga gi Isaac a Jacob mo Esau. Au guu-wanga gi Esau tenua gonduu go Seir belee hai-mee ginai, gei di-godou damana-madua go Jacob mo ana dama ne-hula gi Egypt.

24:5  Ga-nomuli, gei Au ga-hagau a Moses mo Aaron, gei Au gaa-wanga di hagaduadua gi digau Egypt. Gei Au gaa-dagi goodou gi-daha mo tenua deelaa.

24:6  Au ne-laha-mai godou maadua-mmaadua gi-daha mo Egypt, gei digau Egypt ga-waluwalu digaula gi nadau waga-dauwa hongo-henua mo nadau gau-dauwa e-lellele i-nia hoodo, gei di madagoaa godou maadua-mmaadua ne-dau i-di Tai-Mmee,

24:7  digaula ga-tangi-mai gi-di-Au gi-hagamaamaa-ina ginaadou, gei Au ga-haga-bouli mehanga digaula mo digau Egypt. Au guu-hai di tai gi-hanimoi gi-gahu-ina digau Egypt, gi-mmaalemu digaula. Goodou gu-iloo dagu hai dela ne-hai gi digau Egypt. “ ‘Nomuli, gei goodou nogo noho i-lodo di anggowaa di madagoaa looloo.

24:8  Gei Au ga-laha-mai goodou gi tenua o digau Amor ala nogo noho i-bahi-i-dua Jordan. Digaula gu-heebagi-adu gi goodou, gei Au ga-gowadu gi goodou di maaloo. Goodou guu-kae nadau gowaa, ga-daaligi digaula i-di godou lloo-adu gi tenua deelaa.

24:9  Ga-nomuli, gei di king o Moab, go Balak tama Zippor, ga-heebagi-adu gi goodou, gaa-hai dana hegau gi Balaam di tama-daane a Beor, ga-helekai gi mee gi-haga-halauwa-ina goodou.

24:10  Gei Au digi hagalongo gi Balaam, malaa, gei mee gu-hagahumalia goodou, gei Au guu-daa goodou gi-daha mo Balak.

24:11  Goodou guu-hula laa-lodo Jordan gi Jericho. Digau Jericho gu-heebagi-adu gi goodou gadoo be digau Amor, mo digau Perizzite, digau Canaan, digau Hittite, digau Girgash, digau Hivite mo digau Jebus, gei Au gu-gowadu gi goodou di aali i digaula huogodoo.

24:12  I di-godou lloo-adu, gei Au guu-hai digaula gi-uli nadau gai, gii-mee goodou di-haga-magedaa nia king dogolua o digau Amor. Ma hagalee go godou hulumanu-dauwa mo godou maalei ala ne-haga-magedaa digaula!

24:13  Au gu-gowadu gi goodou di gowaa dela digi ngalua ginai goodou, gu-gowadu gi goodou nia waahale ala hagalee ne-hau go goodou. Dangi-nei goodou e-noho i-golo, e-miami e-gai nia huwa laagau-‘grape’ mai nia hadagee-waini ala hagalee ne-dogi go goodou, gei e-gai nia huwa-olib mai nia laagau-olib ala hagalee ne-dogi go goodou.’ ”

24:14  Joshua ga-duudagi-hua gi-muli, ga-helekai, “Dolomeenei goodou hagalaamua-ina Dimaadua, hai-hegau gi Mee hagahumalia mo-di manawa-dahi. Kilia gi-daha nia balu-god ala nogo daumaha ginai godou maadua-mmaadua i Mesopotamia mo Egypt, hai-hegau-hua gi Dimaadua.

24:15  Maa goodou hagalee hiihai e-hai-hegau gi Mee, hilihilia dangi-nei be di-ma koai dela ga-hai-hegau ginai goodou: go nia balu-god ala nogo daumaha ginai godou maadua-mmaadua i Mesopotamia, be go nia balu-god o digau Amor, di-nadau guongo dela e-noho-ai goodou dolomeenei. Gei au mo digau o dogu hale, gimaadou ga-hai-hegau gi Dimaadua!”

24:16  Gei digaula ga-helekai, “Gimaadou hagalee-loo e-diiagi Dimaadua, hagalee e-hai-hegau gi-nia balu-ieidu!

24:17  Dimaadua go di-madau God ne-laha-mai gimaadou mo madau maadua-mmaadua gi-daha mo madau hai-hege i Egypt, gei gimaadou gu-gidee ana mogobuna haga-goboina ala ne-hai. Mee gu-benebene gimaadou nia madagowaa huogodoo ala e-hula gimaadou gi-baahi nia henua huogodoo, ala ne-hula ginai gimaadou no-lodo.

24:18  Di-madau lloo-adu gi tenua deenei, Dimaadua gu-hagabagi gi-daha digau Amor ala nogo noho i ginei. Malaa, gimaadou hogi ga-hai-hegau gi Dimaadua, idimaa, Mee go di-madau God.”

24:19  Joshua ga-helekai gi digaula, “Goodou e-deemee di-hai-hegau gi Dimaadua, idimaa Mee di God dabuaahia, hagalee dumaalia-adu gi goodou i godou huaidu. Mee di God dubua.

24:20  Maa goodou ga-diiagi a-Mee, ga-hai-hegau gi-nia god o-nia guongo ala i-golo, gei Mee gaa-hai baahi-adu gi goodou, ga-hagaduadua goodou. Mee ga-haga-mooho goodou gi-hagalee, ma e-aha maa Mee nogo humalia adu gi goodou i-mua.”

24:21  Gei digaula ga-helekai gi Joshua, “Deeai! Gimaadou ga-hai-hegau gi Dimaadua!”

24:22  Joshua ga-helekai gi digaula, “Goodou gii-bida hagadootonu-ina di-godou haga-modongoohia dela bolo goodou gu-hilihili bolo goodou ga-hai-hegau gi Dimaadua.” Digaula ga-helekai, “Uaa, gimaadou nia hagadootonu.”

24:23  Gei Joshua ga-helekai, “Goodou kilia gi-daha godou balu-god ala i godou baahi dolomeenei, mo-di haga-modongoohia-aga di-godou hagalaamua gi Dimaadua, go di God o Israel.”

24:24  Digaula ga-helekai gi Joshua, “Gimaadou ga-hai-hegau gi Dimaadua, go di-madau God. Gimaadou ga-daudali ana helekai.”

24:25  Malaa, Joshua gaa-hai dana hagababa gi digaula i-di laangi deelaa i-lodo Shechem, gaa-wanga ana haganoho mono hangaahai gi digaula gi-daudalia.

24:26  Joshua gaa-hihi nnelekai aanei gi-lodo di Beebaa o Nnaganoho a God. Gei mee gaa-kae dana hadu damana, ga-haga-duu di-maa i-lala di laagau-‘oak’ i-lodo di gowaa haga-madagu o Dimaadua.

24:27  Mee ga-helekai gi digaula huogodoo, “Di hadu deenei la-gaa-hai di hagadootonu ni gidaadou. Di hadu gu-longono-ia nia helekai huogodoo a Dimaadua ala ne-helekai-mai gi gidaadou. Malaa, di hadu deenei gaa-hai di hagadootonu ni goodou, ge e-abaaba goodou gi-de-hai-baahi ang-gi di-godou God.”

24:28  Gei Joshua ga-hagau digaula huogodoo gi-muli gi nadau gowaa ala ne-hai-mee ginai.

24:29  Nomuli-mai, tangada hai-hegau Dimaadua go Joshua, tama-daane a Nun, gaa-made, gei mee ono ngadau e-lau madangaholu-(110).

24:30  Digaula gaa-danu a-mee i lodo dana gowaa donu i Timnath=Serah i-lodo tenua gonduu i lodo Ephraim i-bahi-i-ngeia di Gonduu Gaash.

24:31  I-di waalooloo o-di mouli o Joshua, digau Israel nogo hai-hegau gi Dimaadua. I-muli di made o-maa, gei digaula ga-hai-hegau gi Dimaadua i-di waalooloo o-di mouli o-nia dagi ala gu-gidee-ginaadou di hai a Dimaadua nogo hai gi Israel.

24:32  Tuaidina o Joseph, dela ne-gaamai go digau Israel i Egypt guu-danu i Shechem, i-lodo di gowaa a Jacob ne-hui mai nia dama-daane a Hamor gi-nia baahi-silber e-lau. Hamor go tamana-madua ni digau Shechem. Di gowaa deelaa la-ne-hai-mee ginai di hagadili o Joseph.

24:33  Eleazar, tama-daane Aaron, ne-made, gaa-danu i Gibeah, di waahale i-lodo tenua gonduu i-lodo Ephraim, di gowaa dela ne-wanga gi dana dama-daane go Phinehas.