Azeri - Mark

Chapter 1

1:1  تارينين اوغلو عئسا مسئحئن خوش خبرئنئن باشلانيشي.

1:2  اشعيا پيغمبرئن کئتابيندا يازيليب: «باخ، من سنئن قاباغيندا اؤز الچئمي گؤنده‌رئرم کي، سنئن يولونو حاضيرلاسين.

1:3  چؤلده بئرئنئن سسي نئدا ادئر: ربّئن يولونو حاضيرلايين. اونون يوللاريني دوز ادئن.»

1:4  و يحيا بلجه ظوهور اتدي و چؤلده ائنسانلاري تعمئد ورئب، گوناهلارين باغيشلانماسي اوچون تؤوبه تعمئدئني وعظ ادئردي.

1:5  اورشلئملي​لر و بوتون يهودئيه وئلايتئنده ياشايانلار، اونون يانينا گلئردئلر و گوناهلارينا اعتئراف ادئب، اوردون چاييندا اوندان تعمئد آليرديلار.

1:6  يحيا دَوه توکوندن پالتار گيئنئب، درئدن بلئنه قاييش باغلاميشدي و چيئرتکه و چؤل بالي ييئردي.

1:7  او وعظ ادئب ديئردي: "مندن سونرا مندن داها قووّتلي اولان گلئر کي، من اَيئلئب اونون آياق قابينين باغيني دا آچماغا بله لايئق ديئلم.

1:8  من سئزي سو ائله تعمئد وردئم، آمّا او سئزي موقدّس روحلا تعمئد وره​جک."

1:9  او گونلرده، عئسا جلئلئن ناصئره شهرئندن گلئب، اوردون چاييندا يحيادان تعمئد آلدي.

1:10  و سودان چيخار-چيخماز گؤيون ياريلديغيني و روحون گؤيرچئن شکلئنده اونون اوستونه اندئيئني گؤردو.

1:11  و گؤيدن بئر سس گلدي: "سن منئم سِودئيئم اوغلومسان. سندن راضي‌يام!"

1:12  اله او آندا موقدّس روح عئساني چؤله آپاردي،

1:13  و او، قيرخ گون اورادا قاليب شيطان طرفئندن وسوسه اولونوردو. عئسا اورادا وحشي حيوانلارلا قاليردي و ملکلر ده اونا خئدمت ادئردئلر.

1:14  يحيانين توتولماسيندان سونرا، عئسا جلئله گلدي و تارينين خوش خبرئني وعظ ادئب ديئردي:

1:15  "واخت تامام اولور. تارينين پادشاهليغي ياخينلاشيب. تؤوبه ادئن و خوش خبره ائنانين."

1:16  عئسا جلئل دهنزئنئن قيراغيندان کچن واخت، شمعون و قارداشي آندرياسي گؤردو. اونلار دهنزه تور آتيرديلار، چونکي باليق اووچوسو ائدئلر.

1:17  و اونلارا ددي: "منئم داليمجا گلئن. من سئزي ائنسانلار اووچوسو اده‌رم."

1:18  اونلار دا او آندا تورلاريني بوراخيب، اونون دالينجا گتدئلر.

1:19  اورادان بئر آز ائره​لي گتدئکده عئسا زِبِدِي اوغلو يعقوب و قارداشي يوحنّاني گؤردو. اونلار قاييقدا اوتورموشدولار و تورلاريني تعمئر ادئردئلر.

1:20  عئسا اله او ساعاتدا اونلاري دعوت اتدي. اونلار دا آتالاري زِبِدِيي ائشچئلر‌له قاييقدا قويوب، اونون دالينجا گتدئلر.

1:21  اونلار کفرناحوما گلدئلر. سبّت گونو يتئشنده، عئسا کنئسه​يه گئرئب تعلئم ورمه‌يه باشلادي.

1:22  اونون تعلئمئندن هامي حيران قالميشدي، چونکي اونلارا دئن عالئملري کئمي يوخ، ائقتئدار صاحئبي کئمي تعلئم ورئردي.

1:23  کنئسه​ده ناپاک روح الئنده توتولموش بئر آدام وار ائدي. بو آدام باغيرا-باغيرا ددي:

1:24  "ناصئره‌لي عئسا، بئزدن نه ائسته‌يئرسن؟ آيا بئزي هلاک اتمک اوچون گلئبسن؟ سنئن کئم اولدوغونو بئلئرم: سن تارينين موقدّسي‌سن!"

1:25  لاکئن عئسا اونا آجيقلانيب ددي: "ساکئت اول و اوندان اشئيه چيخ!"

1:26  او واخت ناپاک روح، آدامي شئدّتله اَسدئردي و اوجا سَسله چيغيريب اوندان اشئيه چيخدي.

1:27  هامي تعجّوبدن مات قالميشدي و بئر​بئرلرئندن سوروشوردولار: "بو نه‌دئر؟! ائقتئدارلي تزه بئر تعلئم! ناپاک روحلارا بله امر ادئر، و اونلار اوندان ائطاعت ادئرلر."

1:28  و چوخ چکمه‌دي کي، عئسانين شؤهرتي جلئلئن بوتون يرلرئنده ياييلدي.

1:29  اونلار کنئسه​دن چيخان واخت، يعقوب و يوحنّا ائله، شمعون و آندرياسين اِوئنه گتدئلر.

1:30  شمعونون قايناناسي قيزديرما ائچئنده ياتاقدا ائدي. اونون حاليندان آنَن عئساني خبردار اتدئلر.

1:31  عئسا او آروادا ياخينلاشدي و اونون الئندن توتوب آياغا قالديردي. آروادين قيزديرماسي کسئلدي و اونلارا خئدمت اتمه‌يه باشلادي.

1:32  آخشام، گون باتان واخت، بوتون ناخوشلار و ناپاک روحلار الئنده توتولموش ائنسانلاري اونون يانينا گتئردئلر.

1:33  شهرئن بوتون خالقي قاپي‌يا ييغيلميشدي.

1:34  عئسا جوربه​جور ناخوشلوقلارا دوچار اولموش بئر چوخ ائنساني صاغالتدي و بئر چوخ ناپاک روحلاري قوودو. او، ناپاک روحلارين دانيشماغينا ائجازه ورمئردي، چونکي اونو تاني‌ييرديلار.

1:35  سحر، گون چيخماميش عئسا قالخدي و اِودن چيخيب ساکئت بئر يره گتدي و اورادا دوعا ادئردي.

1:36  شمعون و اونونلا اولانلار، اونو آختارماغا چيخديلار و اونو تاپيب ددئلر:

1:37  "هامي سني آختارير."

1:38  عئسا اونلارا ددي: "گلئن آيري يرلره، بو ياخين قصبه​لره ده گدک کي، اونلاردا دا وعظ ادئم. چونکي من بونون اوچون گلمئشم."

1:39  و جلئلئن بوتون يرلرئنده گزئردي و اونلارين کنئسه​لرئنده وعظ ادئب، ناپاک روحلاري قوووردو.

1:40  بئر نفر جوذاملي عئسانين يانينا گلدي و اونون قاباغيندا دئز چؤکوب يالوارا-يالوارا ددي: "اگر ائسته‌يه​سن مني بو ناخوشلوقدان تمئز اده بئلرسن."

1:41  عئسانين او آداما رحمي گلدي و الئني اوزاديب، اونون اوستونه قويدو و اونا ددي: "ائسته‌يئرم، تمئز اول."

1:42  او آندا جوذام بو آدامي ترک اتدي و او، بو مرضدن تمئز اولدو.

1:43  عئسا اونا جئدّي تاپشيريب، آنَن اونو مورخّص اتدي و اونا ددي:

1:44  "باخ! هچ کئمه بئر سؤز دمه، آنجاق گت کاهئنه گؤرون و تمئزلئيئن اوچون موسانين امر اتدئکلرئني تقدئم ات کي، اونلارا شهادت اولسون."

1:45  آمّا او آدام چيخيب، چوخ شيلر جار چکدي و اولوب-کچنلري هر يرده يايدي. اله کي، عئسا آرتيق هچ بئر شهره آچيقجا گئره بئلمه‌يئب، شهردن اشئگده، چؤلده قاليردي. آمّا آداملار هر طرفدن اونون يانينا گلئردئلر.

Chapter 2

2:1  بئر نچه گون سونرا عئسا گئنه کفرناحوما گلدي و اونون اِوده اولماسينين خبري ياييلدي

2:2  و او قدر چوخ آدام اورايا ييغيلدي کي، قاپي آغزيندا دا بله ير قالمادي و عئسا اونلارلا تارينين کلاميندان دانيشيردي.

2:3  بو آرادا بئر عئدّه، ائفلئج آدامي دؤرد نفرئن وسئله​سئله داشي‌ييب اونون يانينا گتئردئلر.

2:4  آمّا آداملارين چوخلوغوندان اونا ياخينلاشا بئلمه‌دئلر. اونون اوچون ده عئسانين اولدوغو اِوئن داميني سؤکوب يارديلار و ائفلئج آدامي ياتاغي​ ائله آشاغي اِندئردئلر.

2:5  عئسا اونلارين ائمانيني گؤرنده ائفلئجه ددي: "اوغول، گوناهلارين باغيشلاندي."

2:6  آمّا عالئملردن بئر نچه​سي اورادا اوتوروب اورَکلرئنده دوشونوردولر:

2:7  "بو آدام نه اوچون بله کوفرلر دانيشير؟ تاريدان باشقا کئم گوناهلاري باغيشلايا بئلر؟"

2:8  عئسا روحوندا اونلارين اؤز آرالاريندا بله دوشوندوکلرئني آنلاييب اونلارا ددي: "نه اوچون اورکلرئنئزدن بله فئکئرلر کچئردئرسئنئز؟

2:9  هانسي داها آسان‌دير؟ ائفلئجه «گوناهلارين باغيشلاندي» دمک؟ يوخسا «قالخ، دؤشه‌يئني گؤتور گت» دمک؟

2:10  آمّا بئله​سئنئز کي، ائنسان اوغلونون ير اوزونده گوناهلاري باغيشلاماق قودرتي وار…" عئسا ائفلئجه ددي:

2:11  "سنه ديئرم قالخ، دؤشه‌يئني گؤتور و اوئنه گت."

2:12  او آندا ائفلئج يردن قالخيب دؤشه‌يئني گؤتوردو و هامينين گؤزو قاباغيندا چيخيب گتدي. اله کي، هامي تعجّوبدن مات قالدي و تاريني حمد ادئب ديئردئلر: "بله بئر شي اصلا گؤرمه​مئشدئک."

2:13  عئسا گئنه دهنزئن قيراغينا گتدي و بوتون خالق اونون يانينا گلدي و او دا اونلارا تعلئم ورئردي.

2:14  يولدان کچنده آلفاعوس اوغلو لاوئني باج ييغيلان يرده اوتورموش گؤردو و اونا ددي: "منئم داليمجا گل." لاوي ده قالخيب اونون دالينجا گتدي.

2:15  عئسا لاوئنئن اوئنده سوفره باشيندا اوتورموشدو. بئر چوخ باج ييغانلار و گوناهکارلار دا او و شاگئردلرئله سوفره باشيندا اوتورموشدولار. چونکي چوخ آداملار اونون دالينجا گدئردئلر.

2:16  فرئسئلرئن عالئملري عئسانين گوناهکارلار و باج ييغانلارلا يمک يدئيئني گؤرنده اونون شاگئردلرئنه ددئلر: "نه اوچون او، باج ييغانلار و گوناهکار آداملارلا ييئب-ائچئر؟"

2:17  عئسا بو سؤزو اشئدن زامان اونلارا ددي: "صاغ آداملار يوخ، ناخوشلار طبئبه مؤحتاجديرلار. من صالح آداملاري يوخ، گوناهکار آداملاري دعوت اتمه‌يه گلمئشم."

2:18  يحيانين شاگئردلري و فرئسئلر اوروج توتموشدولار. بونلار عئسانين يانينا گلئب اونا ددئلر: "يحيانين و فرئسئلرئن شاگئردلري نه اوچون اوروج توتورلار، آمّا سنئن شاگئردلرئن اوروج توتمورلار؟"

2:19  عئسا اونلارا ددي: "بَيئن قوناقلاري، بَي اونلارلا اولان واخت، مگر اوروج توتارلار؟ نه قدر کي، بَي اونلارلا وار، اونلار اوروج توتا بئلمزلر.

2:20  آمّا او گونلر يتئشه​جک کي، بَي اونلارين الئندن آليناجاق و او زامان اونلار اوروج توتاجاقلار.

2:21  هچ کس کؤهنه پالتارا تزه قوماشدان ياماق تئکمز. يوخسا تزه ياماق کؤهنه پالتاردان قوپار و ييرتيق داها پئس اولار.

2:22  هچ کس ده تزه شرابي کؤهنه تولوقلارا تؤکمز. يوخسا تزه شراب کؤهنه تولوقلاري پارتلادار. هم شراب تؤکولوب گدر، هم ده تولوق تلف اولار. تزه شرابي تزه تولوقلارا تؤکرلر."

2:23  بئر گون عئسا سبّت گونونده شاگئردلري ائله اَکئنلر آراسيندان کچئردي. کچنده شاگئردلر سونبوللري درمه‌يه باشلاديلار.

2:24  فرئسئلر اونا ددئلر: "باخ! سبّت گونونده جائز اولمايان ائشي نه اوچون گؤرورلر؟"

2:25  عئسا اونلارا ددي: "آيا هچ اوخوماييبسينيز کي، داوود و اونونلا آج اولانلار، آج و مؤحتاج قالاندا نه اتدئلر؟

2:26  نجه داوود باش کاهئن اَبياتارين زامانيندا تارينين اِوئنه گئرئب، تارييا تقدئم اولونموش چؤره‌يي يدي و اونونلا اولانلارا دا وردي، حال بو کي، اونلاري يمک کاهئنلردن باشقا هچ کسه جائز ديئلدي؟!"

2:27  و عئسا اونلارا ددي: "ائنسان سبّت گونو اوچون يوخ، سبّت گونو ائنسان اوچون اولوب.

2:28  بونا گؤره ائنسان اوغلو سبّت گونونون ده صاحئبئدئر."

Chapter 3

3:1  عئسا گئنه کنئسه​يه گئردي. اورادا اَلي قوروموش بئر آدام وار ائدي.

3:2  اونلار عئساني دئقّتله گؤز آلتينا آلميشديلار کي، سبّت گونونده او کئشئيه شفا ورسئن و بونون اوچون اونا ائتّئهام وورسونلار.

3:3  عئسا اَلي قوروموش آداما ددي: "اورتادا دور."

3:4  و اونلارا ددي: "سبّت گونونده نه اتمک جائزدئر ياخشيليق اتمک، يوخسا پئسلئک اتمک؟ جان قورتارماق، يوخسا جان آلماق؟" اونلار ساکئت دورموشدولار.

3:5  عئسا اطرافيندا اولان آداملارا قضبله باخيب، اونلارين اورکلرئنئن برکلئيئندن چوخ قمگئن اولدو و او کئشئيه ددي: "الئني اوزات." او آدام الئني اوزاتدي و اَلي اوّلکي کئمي اولدو.

3:6  فرئسئلر آنَن چيخيب هئرودچولارلا برابر عئساني اؤلدورمک اوچون مشورت اتدئلر.

3:7  آمّا عئسا شاگئردلری ائله دهنز طرفئنه چکئلدي و جلئلدن چوخ آداملار اونون دالينجا گتدئلر.

3:8  و اونون بوتون اتدئکلرئني اشئدنلر يهودئيه​دن، اورشلئمدن، ائدومئيه​دن، اوردون چايينين او تاييندان، صور و صيدانين اطرافلاريندا ياشايانلاردان بؤيوک بئر جاماعات اونون يانينا گلدي.

3:9  جاماعاتين اونو سيخيشديرماسي اوزوندن عئسا شاگئردلرئنه ددي کي، اونون اوچون بئر قاييق حاضيرلاسينلار.

3:10  چوخ ائنسانلاري شفا وردئيي اوزوندن ناخوش آداملاردان چوخلاري عئسانين اوستونه آتيليرديلار کي، اونا توخونسونلار.

3:11  و ناپاک روحلار اونو گؤرنده قاباغيندا يره قاپانيرديلار و باغيريب ديئردئلر: "سن تارينين اوغلوسان."

3:12  آمّا عئسا اونلارا قدغن ادئردي کي، اونون کئم اولدوغونو آشکار اتمه‌سئنلر.

3:13  عئسا داغا چيخيب، اؤزو ائسته‌دئيي آداملاري يانينا چاغيردي و اونلار اونون يانينا گتدئلر.

3:14  و اون‌ائکي نفر تعيئن اتدي کي، اونونلا قالسينلار و اونلاري وعظ اتمه‌يه گؤنده‌رسئن

3:15  و ائقتئدارلاري اولسون کي، ناپاک روحلاري آداملاردان قووسونلار.

3:16  تعيئن اتدئيي آداملار بونلار ائدئلر: شمعون کی، اونا "پطروس" لقبئني ورمئشدی،

3:17  زِبِدِي اوغلو يعقوب و قارداشي يوحنّا کي، اونلارا "بواَنرجس" لقبئني ورمئشدي، بواَنرجس يعني ائلديرم اوغوللاري،

3:18  آندرياس، فئلئپوس، بَرتولوما، متّا، توماس، و آلفاعوس اوغلو يعقوب، تَداي، وطن‌پرست شمعون،

3:19  و ائسکاريوتلو يهودا کي، اونو دوشمن اَلئنه تسلئم اتدي.

3:20  اونلار اِوه گلدئلر و گئنه جاماعات ييغيلدي، اِله کي، چؤرک يمه‌يه بله ائمکانلاري اولمادي.

3:21  قوحوملاري بونو اشئدن زامان اونو آپارماغا گلدئلر. ديئردئلر: "دلي اولوب."

3:22  اورشلئمدن گلن عالئملر ديئردئلر: "بعلزبول اونون ائچئنه گئرئب و ائبلئسلر ريئسئنئن واسئطه​سئله ائبلئسلري قوور."

3:23  عئسا اونلاري يانينا چاغيريب مثل‌له ددي: "شيطان، شيطاني نجه قووا بئلر؟

3:24  ائکي يره بؤلونموش بئر مملکت داوام گتئره بئلمز.

3:25  اؤز ائچئنده ائکئيه بؤلونن بئر اِو ده آياق اوستونده قالا بئلمز.

3:26  اگر شيطان اؤزونه ضئدّ دوروب اؤزونده آيريليق سالسا، داوام گتئره بئلمز و اونون آخيري يتئشئب.

3:27  هچ کئم گوجلو بئر آدامين اِوئنه گئرئب ماليني اوغورلايا بئلمز، مگر اوّلجه اونون قوللاريني باغلاسين. او زامان اونون ماليني اوغورلايا بئلر.

3:28  دوغروسونو سئزه ديئرم، هامي گوناهلار، هامي کوفرلر ائنسان اوغوللارينا باغيشلانار

3:29  آمّا موقدّس روح حاقّيندا کوفر دئين آدامين گوناهي هچ واخت باغيشلانماز و تقصئري ابده کئمي اوستونده قالار."

3:30  چونکي اونلار "اوندا ناپاک روح وار" ديئردئلر.

3:31  عئسانين آناسي و قارداشلاري گلدئلر و اشئکده دوروب عئساني چاغيرماق اوچون اونون يانينا آدام گؤنده‌ردئلر.

3:32  عئسانين اطرافيندا اوتوران خالق اونا ددئلر: "آنان و قارداشلارين اشئکده دوروب سني آختاريرلار."

3:33  عئسا اونلارا جاواب ورئب ددي: "آنام و قارداشلاريم کئملردئر؟"

3:34  و اطرافيندا اوتورانلارا باخيب ددي: "باخين، آنام و قارداشلاريم.

3:35  هر کس تارينين ائسته‌دئيئني يرئنه يتئرسه، قارداشيم، باجيم، و آنام اودور."

Chapter 4

4:1  عئسا گئنه دهنزئن قيراغيندا تعلئم ورمه‌يه باشلادي. اونون يانينا او قدر آدام ييغيلدي کي، او دهنزئن قيراغيندا سو اوستونده اولان قاييغا مئنئب اوتوردو. بوتون او جاماعات دهنزئن قيراغيندا دورموشدو.

4:2  عئسا اونلارا مثللر​له چوخ شيلر تعلئم وردي و اؤيرتدئکلرئنده اونلارا بله ددي:

4:3  "قولاق آسين. بئر اَکئنچي توخوم سپمه‌يه چيخدي.

4:4  توخوملاري سپنده اونلاردان بعضئسي يولون قيراغينا دوشدو و قوشلار گلئب اونو يدئلر.

4:5  بعضئسي تورپاغي چوخ اولمايان داشليغا دوشوب تز بئتدي، چونکي تورپاغين درئنلئيي يوخ ائدي.

4:6  گون چيخاندا گونش اونو يانديردي و کؤکو اولماديغي اوچون قورودو.

4:7  توخوملاردان بعضئسي تئکانلار آراسينا دوشدو و تئکانلار بئتئب، اونو بوغدولار و ثمره ورمه‌دي.

4:8  او بئرئلري ده برکتلي تورپاغا دوشوب بئتدئلر و بؤيويوب بعضئسي بئره اوتوز، بعضئسي بئره آلتميش، و بعضئسي ده بئره يوز ثمره وردئلر."

4:9  عئسا اونلارا ددي: "اشئتمه‌يه قولاقلاري اولان اشئتسئن!"

4:10  تک اولان زامان، اون‌ائکي شاگئرد و اونلارلا اطرافيندا اولان آداملار بو مثل حاقّيندا اوندان سوآل سوروشوردولار.

4:11  عئسا اونلارا ددي: "تارينين پادشاهليغينين سئرّئني بئلمک سئزه ورئلئب. آمّا اشئگده اولانلارا هر شي مثللرله اولور کي،

4:12  باخا-باخا گؤرمه‌سئنلر، قولاق آسا-آسا آنلاماسينلار، مبادا دؤنوب باغيشلانسينلار."

4:13  و اونلارا ددي: "بو مثلي باشا دوشمورسونوز؟ بس اؤزگه مثللري نجه باشا دوشه​جکسئنئز؟

4:14  اکئنچي کلامي سپئر.

4:15  يول قيراغينا دوشنلر اونلارديرلار کي، کلامي اشئدئرلر، آمّا شيطان تزلئکله گلئب اونلارا سَپئلن کلامي گؤتوروب آپارير.

4:16  بلجه ده داشليق يرلره دوشنلر: کلامي اشئدئب آنَن اونو شادليقلا قبول ادئرلر.

4:17  آمّا اونلاردا کؤک يوخدور. بئر آز زامان قاليرلار، و سونرا بو کلامدان اؤتري سيخينتي و اذئيّت باش ورنده، آنَن ائماندان دوشورلر.

4:18  تئکانلار آراسينا دوشنلر اونلارديرلار کي، کلامي اشئدئرلر،

4:19  آمّا بو دونيانين اوموراتي، مال-دؤولتئن آلداديجيليغي، و آيري شيلرئن هوسلري آرايا گئرئب کلامي بوغور و او، ثمره​سئز اولور.

4:20  برکتلي تورپاغا دوشنلر اونلارديرلار کي، کلامي اشئدئب اونو قبول ادئرلر و بئره اوتوز، بئره آلتميش، و بئره يوز ثمره ورئرلر."

4:21  عئسا اونلارا ددي: "آيا لامپاني يانديريب دولچا آلتينا يا دا ياتاق آلتينا قويارلار؟ مگر لامپا، اونون اوچون ديئل کي، لامپا قابينا قويولسون؟

4:22  چونکي گئزلي بئر شي يوخدور کي، آچيغا چيخماسين و اؤرتولو بئر شي يوخدور کي، آشکارا چيخماسين.

4:23  اشئتمه‌يه قولاقلاري اولان، اشئتسئن."

4:24  و اونلارا ددي: "نه اشئتدئيئنئزه دئقّت ادئن. هانسي اؤلچو ائله اؤلچرسئنئز، سئزه ده او اؤلچو ائله اؤلچوله​جک و داها دا چوخ ورئله‌جک.

4:25  چونکي کئمئن وارسا، اونا ورئله​جک و کئمئن يوخوسا، اولانلاري دا آليناجاقدير."

4:26  عئسا اونلارا ددي: "تارينين پادشاهليغي تورپاغا توخوم سَپَن بئر آداما بنزر.

4:27  گجه-گوندوز ياتار-دورار. توخوم بئتئب بؤيوير، آمّا او، بونون نجه اولدوغونو بئلمز.

4:28  ير اؤز-اؤزوندن ثمره ورئر: اوّل اوتو، سونرا سونبولو، داها سونرا دا سونبولده يتئشمئش دَني.

4:29  محصول يتئشدئيي واخت، آنَن اوراغ سالينار، چونکي بئچئن واختي يتئشئب."

4:30  و اونلارا ددي: "تارينين پادشاهليغيني نه‌يه بنزه‌دک؟ و يا اونو نه مثل‌له سئزه آيدينلاشديراق؟

4:31  تارينين پادشاهليغي خاردال توخومو کئمي​دئر کي، تورپاقدا اکئلدئيي واخت، يرده اولان توخوملارين هاميسيندان کئچئکدئر.

4:32  آمّا اکئلندن سونرا بؤيويور و بوتون سبزه​لردن داها بؤيوک اولور. اله ائري بوداقلار سالير کي، گؤيون قوشلاري اونون کؤلگه​سي آلتينا قونا بئلئرلر."

4:33  عئسا کلامي بو کئمي مثللرله اونلارا آنلاديقلاري قدر تعلئم ورئردي

4:34  و مثلسئز هچ بئر شيي اونلارلا دانيشميردي. لاکئن تک اولان زامان اؤز شاگئردلرئنه بو شيلرئن هاميسيني آچيقلاييردي.

4:35  او گون، آخشام اولاندا، عئسا شاگئردلرئنه ددي: "دهنزئن او تايينا کچک."

4:36  اونلار دا جاماعاتي بوراخيب، عئسانين اوتوردوغو قاييقلا دهنزئن او بئري طرفئنه يولا دوشدولر. اؤزگه قاييقلار دا اونلارلا گلئردئلر.

4:37  بؤيوک بئر طوفان اولدو و شپه​لر قاييغين ائچئنه اِنئردئلر. اله کي، قاييق سو ائله دولوردو.

4:38  عئسا قاييغين دال طرفئنده ياستيغين اوستونده ياتميشدي. اونلار اونو اوياديب ددئلر: "اوستاد، مگر بئزئم هلاک اولماغيميز سني ناراحات اتمئر؟"

4:39  عئسا اويانيب يله آجيقلاندي و دهنزه ددي: "ساکئت اول، آرام اول!" يل داياندي و بؤيوک بئر آرامليق اولدو.

4:40  عئسا اونلارا ددي: "نه اوچون بو قدر قورخاقسينيز؟ نه اوچون ائمانينيز يوخدور؟"

4:41  اونلار چوخ قورخموشدولار و بئربئرلرئنه ديئردئلر: "بو کئمدئر کي، هم يل، هم ده دهنز اوندان ائطاعت ادئر؟"

Chapter 5

5:1  و دهنزئن او بئري تايينا، جِراسئنئلرئن وئلايتئنه گلدئلر.

5:2  قاييقدان چيخان واخت، ناپاک روحو اولان بئر آدام قبئرئستاندان چيخيب عئسايا راست گلدي.

5:3  بو آدام قبئرئستاندا ياشاييردي و آرتيق هچ کئم اونو حتّا زنجئرلر​له بله باغلايا بئلمئردي.

5:4  گرچي چوخ دفه کونده​لر و زنجئرلر‌له باغلانميش ائدي، آمّا کونده​لري سينديريب، زنجئرلري ده قيرميشدي و کئمسه اونو ضبط اتمه‌يه قادئر ديئلدي.

5:5  دائم، گجه-گوندوز، داغلاردا و قبئرلر آراسيندا باغيريب، داشلارلا اؤزونو يارالاييردي.

5:6  بو آدام عئساني اوزاقدان گؤرنده قاچا-قاچا گلدي و اونون قاباغيندا دئز چؤکدو.

5:7  و اوجا بئر سَسله باغيريب اونا ددي: "مندن نه ائسته‌يئرسن عئسا، اوجالاردا ساکئن اولان تارينين اوغلو؟ سني آند ورئرم تارييا، منه عذاب ورمه‌يه​سن."

5:8  چونکي عئسا اونا دمئشدي: "اي ناپاک روح، بو آدامدان اشئيه چيخ!"

5:9  عئسا اوندان سوروشدو: "آدين نه‌دئر؟" او آدام جاواب وردي: "منئم آديم قوشوندور. چونکي بئز چوخوق!"

5:10  و عئسايا چوخ يالواردي کي، اونلاري او وئلايتدن قووماسين.

5:11  اورادا، داغين اته‌يئنده بؤيوک بئر دونگوز سوروسو اوتلاييردي.

5:12  ناپاک روحلار عئسايا يالواريب ددئلر: "بئزي او دونگوزلارا گؤنده‌ر، قوي اونلارين ائچئنه گئرک."

5:13  عئسا ائجازه وردي و ناپاک روحلار او آدامدان چيخيب، دونگوزلارا گئردئلر. دونگوزلار داغين اته‌يئندن اوچوروما طرف قاچيب، اورادان دهنزه آتيلديلار و اورادا بوغولدولار. او سورونون ساييسي ائکي مئن اولاردي.

5:14  سورونو اوتارانلار قاچيب، بو خبري شهرده و کندلرده يايديلار و خالق دا اولوب-کچنلري گؤرمک اوچون اورايا گلدي.

5:15  اونلار عئسانين يانينا گلدئلر و بئر قوشونا قدر ناپاک روحو اولان آدامي آرام اوتورموش، اَينئنه پالتار گيئنمئش، و عاغيللاشميش گؤرنده قورخدولار.

5:16  باش ورمئشلري گؤرنلر، ناپاک روحو اولان آدام و دونگوزلارين باشينا گلنلري خالقا نقل اتدئلر.

5:17  اونلار دا عئسايا يالوارديلار کي، اونلارين وئلايتئندن چيخيب گتسئن.

5:18  قاييغا مئنن واخت، قاباقجا ناپاک روحو اولان آدام عئسايا يالواردي کي، او دا اونونلا گتسئن.

5:19  آمّا عئسا اونا ائجازه ورمه‌يئب، ددي: "اؤز اوئنه، اؤز قوحوملارينين يانينا گت و اونلارا ده کي، رب سنه نه قدر بؤيوک ائشلر ادئب و سنه نه قدر مرحمت گؤرسدئب."

5:20  او آدام اونلاردان آيريليب عئسانين اونا نه اتدئيئني دکاپولئس دئياريندا نقل اتمه‌يه باشلادي. و هامي تعجّوب ادئردي.

5:21  عئسا قاييقلا گئنه دهنزئن او بئري تايينا کچنده، يانينا بؤيوک بئر جاماعات ييغيلدي. او اؤزو دهنزئن قيراغيندا ائدي.

5:22  يايروس آديندا کنئسه ريئسلرئندن بئري اونون يانينا گلدي و عئساني گؤرن زامان قاباغيندا دئز چؤکوب،

5:23  يالوارا-يالوارا اونا ددي: "قيزيم اؤلوم حاليندادير. گل اَللرئني اونون اوستونه قوي کي، صاغاليب ياشاسين."

5:24  عئسا اونونلا گتدي و اونلارين دالينجا چوخ آدام گِدئردي، اله کي، اونو سيخيشديريرديلار.

5:25  اورادا اون‌ائکي ائلدن بري قان آخينماسينا دوچار اولموش بئر آرواد وار ائدي.

5:26  بو آرواد بئر چوخ حکئملر الئندن عذابلار چکمئش و بوتون وار-يوخونو صرف اتمئشدي، آمّا هچ فايدا گؤرمه​مئشدي. حالي داها دا پئسلَشمئشدي.

5:27  آرواد عئسانين حاقّينداکي سؤزلري اشئدئب، جاماعاتين آراسيندا عئسانين آرخاسيندان گلدي و اونون پالتارينا اَل سورتدو.

5:28  چونکي ديئردي: "اگر اَلئم پالتارينا دا ديسه بله، شفا تاپاجاغام."

5:29  او آندا قان آخينماسي آرواددان کسئلدي و او بلادان قورتارديغيني بدنئنده آنلادي.

5:30  عئسا آنَن اؤزوندن چيخان قودرتي بئلدي و جاماعاتا دؤنوب ددي: "کئم منئم پالتاريما اَل سورتدو؟"

5:31  عئسانين شاگئردلري اونا ددئلر: "جاماعاتين سني نجه سيخيشديرديغيني گؤرورسن، گئنه ده، «منه کئم اَل سورتدو؟» سوروشورسان؟"

5:32  عئسا بونو اِده‌ني گؤرمک اوچون اطرافا باخدي.

5:33  آرواد، اؤزونه نه اولدوغونو بئلئب قورخا-قورخا، تئتره‌يه-تئتره‌يه گلدي و اونون آياقلارينا دوشوب، بوتون حقئقتي عئسايا ددي.

5:34  عئسا او آروادا ددي: "قيزيم، ائمانين سنه شفا وردي. سالامات گت و چکدئيئن عذابدان خئلاص اول."

5:35  عئسا حله او آروادلا دانيشيردي کي، کنئسه ريئسئنئن اوئندن خبر گتئردئلر: "قيزين اؤلدو، آرتيق نه اوچون اوستادا زحمت ورئرسن؟"

5:36  آمّا عئسا ديئلن سؤزه قولاق آسماييب کنئسه ريئسئنه ددي: "قورخما، آنجاق ائنان."

5:37  و پطروس، يعقوب و يعقوبون قارداشي يوحنّادان باشقا هچ کئمه ائجازه ورمه‌دي کي، اونلارلا گلسئن.

5:38  اونلار کنئسه ريئسئنئن اوئنه گلدئلر. عئسا اورادا آغلاييب اوجا سَسله فغان اِدنلري گؤردو

5:39  و اوه گئردئيي زامان اونلارا ددي: "نه اوچون هاي ساليب آغلاشيرسينيز؟ قيز اؤلمه‌يئب، آنجاق ياتيب."

5:40  اِوده اولانلار اونا گولدولر. آمّا عئسا اونلارين هاميسيني اشئيه چيخارديب، اوشاغين آتا-آناسي و اؤزو ائله اولانلارلا اوشاغين ياتديغي يره گئردي.

5:41  و اونون اَلئندن توتوب اونا ددي: "تالئتا قوم!" ترجومه​سي؛ "قيزيم، سنه ديئرم قالخ!"

5:42  او آندا قيز يرئندن قالخيب يرئمه‌يه باشلادي. او قيزين اون‌ائکي ياشي وار ائدي. اونلار حيرتدن قوروموشدولار.

5:43  عئسا اونلارا امر اتدي کي، بونلاردان هچ کئمه بئر سؤز بئلدئرمه​سئنلر و ددي کي، قيزا يمک اوچون بئر شي ورسئنلر.

Chapter 6

6:1  عئسا اورادان چيخيب، اؤز وطنئنه گلدي. شاگئردلري ده اونون دالينجا گتدئلر.

6:2  سبّت گونو يتئشنده کنئسه​ده تعلئم ورمه‌يه باشلادي و اشئدنلردن چوخلاري حيرتده قاليب ديئردئلر: "بو آداما بو شيلر هارادان ورئلئب؟! بونا ورئلن بو حئکمت نه‌دئر؟! نجه بله مؤجوزه​لر ادئر؟!

6:3  مگر بو آدام او دولگر ديئل، مريم اوغلو يعقوب، يوسا، يهودا، و شمعونون قارداشي؟! مگر اونون باجيلاري بورادا آراميزدا ديئل‌لر؟!» و اوندان ائنجئدئلر.

6:4  عئسا اونلارا ددي: "هچ پيغمبر هچ يرده حؤرمتسئز ديئل، مگر اؤز وطنئنده، قوحوملاري آراسيندا و اؤز اوئنده."

6:5  و اورادا هچ بئر مؤجوزه اِده بئلمه‌دي، آنجاق بئر نچه ناخوش آدامين اوستونه اَللرئني قويوب اونلارا شفا وردي.

6:6  و او آداملارين ائمانسيزليغينا تعجّوب ادئردي و اطرافداکي کندلري گزئب، اونلاردا تعلئم ورئردي.

6:7  عئسا اون‌ائکي شاگئردي يانينا چاغيريب، اونلاري جوت-جوت گؤنده‌رمه‌يه باشلادي. و اونلارا ناپاک روحلاري قووماغا ائقتئدار وردي.

6:8  عئسا اونلارا امر اتدي کي، يول اوچون اؤزلري​ ائله اَل​آغاجيندان باشقا هچ بئر شي گؤتورمه‌سئنلر؛ نه چؤرک، نه توربا، نه ده کمرلرئنده پول.

6:9  اونلارا چاريق گيمکلرئني ددي، هم ده "بئر کؤينکدن آرتيق گيمه‌يئن."

6:10  عئسا اونلارا ددي: "هر يرده، هانسي اِوه گئرئرسئنئز، اورادان چيخانا کئمي اورادا قالين.

6:11  هر يرده سئزي قبول اتمه‌دئلر و يا سئزه قولاق آسماديلار، اورادان چيخاندا آياقلارينيزين آلتينداکي توزو سئلکئن کي، اونلار اوچون شهادت اولسون."

6:12  اونلار گدئب آداملار آراسيندا اونلارين تؤوبه اتمکلرئني وعظ اتدئلر.

6:13  چوخ ناپاک روحلاري آداملاردان قوودولار و ناخوش چوخ آداملاري ياغلا مسح ادئب، اونلارا شفا وردئلر.

6:14  هئرود پادشاه دا بو باره​ده اشئتدي، چونکي عئسانين آدي مشهور اولموشدو. بعضئلر ديئردئلر: "بو آدام تعمئد ورن يحيادير کي اؤلولردن دئرئلئب. بونا گؤره ده، اوندان بله مؤجوزه​لي قودرتلر گؤرولور."

6:15  بعضئلري ده ديئردئلر: "او ائليادير." لاکئن آيري آداملار ديئردئلر: "قدئم پيغمبرلردن بئري کئمي بئر پيغمبردئر."

6:16  آمّا هئرود بونو اشئدن زامان ددي: "بو، باشيني کسدئردئيئم يحيادير کي، اؤلولردن دئرئلئب."

6:17  چونکي هئرود اؤزو يحيانين توتولماسينا امر ادئب، اونو زئندانا سالميشدي. بو ائشي قارداشي فئلئپئن آروادي هئرودئياسدان اؤتري اِتمئشدي. چونکي هئرود اونونلا اِولنمئشدي

6:18  و يحيا اونا ديئردي: "قارداشين آروادي ائله اِولنمک سنئن اوچون جائز ديئل."

6:19  هئرودئياس يحيايا کئن باغلاييب اونو اؤلدورمک ائسته‌يئردي، لاکئن بونو اِده بئلمئردي.

6:20  چونکي هئرود يحيادان قورخوردو و اونون صالح و موقدّس بئر آدام اولدوغونو بئلئردي و اونو قورويوردو. هئرود يحيانين سؤزونو اشئدن زامان پرئشان اولوردو، آمّا گئنه ده اونون سؤزلرئنه شادليقلا قولاق آسيردي.

6:21  موناسئب گون يتئشدي. هئرود، اؤزونون دوغوم گونو اوچون، اعيانلارينا، مئن باشيلارينا، و جلئلئن آدلي-سانلي آداملارينا ضئيافت ورئردي.

6:22  هئرودئياسين قيزي ائچه‌ري گئرئب اوينادي و بو، هئرود و اونون قوناقلارينين خوشونا گلدي. هئرود قيزا ددي: "مندن نه ائستيه​سن، سنه وره‌جه‌يم."

6:23  و آند ائچئب قيزا ددي: "مندن نه ائستيه​سن، سنه وره​جه‌يم، حتّا پادشاهليغيمين ياريسيني دا بله."

6:24  قيز دا گدئب آناسيندان سوروشدو: "نه ائسته‌يئم؟" و آناسي اونا ددي: "تعمئد ورن يحيانين باشيني."

6:25  قيز او آندا تله‌سئک پادشاهين يانينا گدئب، اونا ددي: "ائسته‌يئرم تعمئد ورن يحيانين باشيني بئر سئني ائچئنده بو ساعات منه وره‌سن."

6:26  پادشاه چوخ پرت اولدو، لاکئن آند ائچدئيي اوچون، و اورادا اوتوران قوناقلار اوچون ائستَمه‌دي کي، قيزين ائسته‌دئيئني ردّ اتسئن.

6:27  پادشاه آنَن جلاّد گؤنده‌رئب امر اتدي کي، يحيانين باشيني گتئرسئنلر. و جلاّد دا گدئب زئنداندا يحيانين باشيني کسدي.

6:28  و اونو بئر سئني ائچئنه قويوب گتئردي و قيزا وردي. قيز دا يحيانين باشيني آناسينا وردي.

6:29  يحيانين شاگئردلري بونو اشئدنده، گلئب اونون جسدئني آلديلار و قبئره قويدولار.

6:30  حوارئلر عئسانين يانينا ييغيليب، اتدئکلري و اؤيرتدئکلري هر شيي اونا نقل اتدئلر.

6:31  عئسا اونلارا ددي: "گلئن تک-باشيميزا ساکئت بئر يره گدک و بئر آز دئنجه​لئن." چونکي گلئب-گدن او قدر چوخ ائدي کي، يمک يمه‌يه بله مجاللاري يوخ ائدي.

6:32  اونلار تک-باشلارينا قاييقلا ساکئت بئر يره گتدئلر.

6:33  اونلارين گتدئکلرئني گؤرن چوخ آدام اونلاري تانيديلار و بوتون شهرلردن پئيادا اورايا قاچيب، اونلاردان قاباق اورايا چاتديلار و اونلارين يانينا گلدئلر.

6:34  قاييقدان انن واخت، عئسا بؤيوک بئر جاماعات گؤردو و اونلارا يازيغي گلدي. چوبانسيز بئر قويون سوروسو کئمي ائدئلر. عئسا اونلارا چوخ شيلري تعلئم ورمه‌يه باشلادي.

6:35  گوندن چوخ کچمئش اولدوغو اوچون، شاگئردلري عئسانين يانينا گلئب ددئلر: "بورا چؤللوکدور، واخت دا گج.

6:36  بونلاري مورخّص ات کي، ياخينداکي کندلره و قصبه​لره گدئب، اؤزلري اوچون يمک آلسينلار."

6:37  آمّا عئسا اونلارا جاواب ورئب ددي: "اونلارا سئز يمک ورئن." شاگئردلر اونا ددئلر: "آيا گدئب ائکي‌يوز دئنارليق چؤرک آليب، يمک اوچون اونلارا ورک؟!"

6:38  عئسا اونلارا ددي: "گدئن گؤرون نچه چؤره‌يئنئز وار؟" اونلار گدئب باخديلار و اونا ددئلر: "بش چؤرک، ائکي باليق."

6:39  عئسا اونلارا بويوردو کي، آداملارين هاميسيني دسته-دسته ياشيل اوتلار اوستونده اوتورتسونلار.

6:40  شاگئردلر آداملارين هاميسيني دسته-دسته، يوز-يوز، الّي-الّي، اوتورتدولار.

6:41  عئسا بش چؤرک و ائکي باليغي گؤتوروب، گؤيه باخدي و برکت ورئب چؤرکلري بؤلدو و شاگئردلرئنه وردي کي، آداملارين قاباغينا قويسونلار. ائکي باليغي دا اونلارين هاميسينين آراسيندا پايلادي.

6:42  اونلارين هاميسي ييئب دويدولار.

6:43  شاگئردلر چؤرک و باليقدان آرتيق قالان تئکه​لردن اون‌ائکي سبد دولدوردولار.

6:44  او چؤرکلردن يئين آداملارين ساييسي بش‌مئن کئشي اولاردي.

6:45  عئسا آنَن شاگئردلرئني قاييغا مئندئردي کي، اوندان قاباق دهنزئن او تايينا، بيت​صيدايا گتسئنلر و او اؤزو جاماعاتي مورخّص ادئردي.

6:46  اونلاري يولا سالاندان سونرا دوعا اتمک اوچون داغا چيخدي.

6:47  آخشام اولاندا قاييق دهنزئن اورتاسيندا ائدي و او، تک-باشينا، قورولوقدا.

6:48  عئسا شاگئردلرئن زحمتله آوار چکدئکلرئني گؤردو، چونکي کولک اونلارين اوزونه ائدي. گجه​نئن دؤردونجو نؤوبه​لرئنه ياخين عئسا دهنزئن اوستونده يرئيه-يرئيه اونلارين يانينا گلدي و يانلاريندان کچمک ائسته‌دي.

6:49  آمّا شاگئردلر اونون دهنز اوستونده يرئمه‌سئني گؤرنده، اونو بئر روح گومان ادئب باغيرديلار.

6:50  چونکي اونلارين هاميسي اونو گؤروب، دهشته دوشموشدولر. عئسا آنَن اونلارلا دانيشيب، ددي: "اوره‌يئنئز اوزولمه‌سئن، منم. قورخمايين."

6:51  و قاييغا، اونلارين يانينا چيخدي. و يل ياتدي. اونلار ائچلرئنده چوخ تعجّوب اتدئلر،

6:52  چونکي چؤرکلرئن مؤجوزه​سئني آنلاماميشديلار. اونلارين ذهئنلري کور اولموشدو.

6:53  اونلار دهنزئن او تايينا کچئب، جِنئسارته گلدئلر و اورادا لنگر سالديلار.

6:54  قاييقدان چيخاندا خالق آنَن اونو تانيدي.

6:55  اونون هارادا اولدوغونو اشئدنلر. او وئلايتئن بوتون يرلرئندن قاچيب، ناخوشلاري يورغان-دؤشکلری ائله داشيديلار و اونون يانينا گتئرمه‌يه باشلاديلار.

6:56  هر يره کي، گئرئردي؛ شهرلره، قصبه​لره، کندلره، ناخوشلاري ميدانلارا قويوردولار. و پالتارينين اَته‌يئنه توخونماق اوچون بله اونا يالواريرديلار و اونا توخونانلارين هاميسي صاغاليردي.

Chapter 7

7:1  فرئسئلر و اورشلئمدن گلن بعضي عالئملر عئسانين يانينا ييغيلديلار.

7:2  و اونون شاگئردلرئندن بعضئلرئني گؤردولر کي، نجئس اَللرله، يعني يويولماميش اَللر​له چؤرک ييئرلر.

7:3  چونکي فرئسئلر و بوتون يهودئلر اجدادلاريندان قالميش عادته گؤره، اَللرئني ياخشي يومايينجا يمک يمزلر.

7:4  و بازاردان گلن واخت دا قوسل اتمه‌يئنجه يمک يمزلر. کاسالارين، چاينئکلرئن، و مئس قابلارين يويولماسي کئمي اؤزگه چوخ عادتلر رئعايت ادئرلر.

7:5  فرئسئلر و عالئملر عئسادان سوروشدولار: "نه اوچون سنئن شاگئردلرئن اجدادلاريميزين عادتلرئني رئعايت اتمه‌يئب، نجئس اَللر​له چؤرک ييئرلر؟"

7:6  عئسا اونلارا ددي: "اشعيا پيغمبر نه ياخشي سئز رئياکار آداملار باره​سئنده نبئلئک ادئب! نجه کي، يازيليب؛ «بو خالق دوداقلاري​ ائله منه حؤرمت ادئر، لاکئن اورکلري مندن چوخ اوزاقدير.

7:7  عبث يره منه عئبادت ادئرلر، ائنسانين ددئکلرئني منئم ددئکلرئم يرئنده تعلئم ورئرلر.»

7:8  سئز تارينين ددئکلرئني بوراخيب، ائنسانلارين عادتلرئني رئعايت ادئرسئنئز."

7:9  و اونلارا ددي: "سئز، اؤز حدئثلرئنئزي رئعايت اتمک اوچون، تارينين امرئني نه گؤزل آتيرسينيز.

7:10  چونکي موسا ددي: «آتا و آنانا حؤرمت ات.» و «آتاسينا يا دا آناسينا يامان دئين آدام گرک اؤلومه ورئلسئن.»

7:11  آمّا سئز ديئرسئنئز: «اگر بئر آدام آتا-آناسينا دسه؛ مندن گؤزله​دئيئنئز کؤمک وقف‌دئر، يعني، هدئيه آديندا تارييا تقدئم اولوب.»

7:12  آرتيق آتا-آناسينا کؤمک اتمک اوچون اونا ائجازه ورمئرسئنئز.

7:13  بلجه نسئلدن​ ​نسئله کچمئش عادتلرئنئزله، سئز تارينين سؤزونو باطئل ادئب، بونا اوخشار چوخ شيلر ادئرسئنئز."

7:14  عئسا جاماعاتي گئنه يانينا چاغيريب ددي: "هامينيز منه قولاق آسين و آنلايين.

7:15  هچ بئر شي يوخدور کي، اشئگدن ائنسانين ائچئنه گئرئب اونو نجئس اتسئن. ائنساني نجئس ادن اونون ائچئندن چيخان شيلردئر.

7:16  اشئتمه‌يه قولاغي اولان اشئتسئن."

7:17  و جاماعاتي ترک ادئب، اِوه گئرنده شاگئردلري اوندان بو مثلئن معناسيني سوروشدولار.

7:18  عئسا اونلارا ددي: "مگر سئز ده بو قدر نادانسينيز؟! مگر آنلاميرسينيز کي، هچ شي اشئگدن ائنسانين ائچئنه گئرئب اونو نجئس اده بئلمز؟

7:19  چونکي اوره‌يئنه يوخ، قارنينا گئرئر و اورادان اشئيه چيخير." عئسا بو سؤز​له بوتون يمکلري تمئز سايدي.

7:20  و سؤزونه بله داوام وردي: "ائنساني نجئس ادن، ائنسانين ائچئندن چيخاندير.

7:21  چونکي ائچه‌رئدن، ائنسانين اوره‌يئندن‌دئر کي، پئس دوشونجه​لر، عئفّتسئزلئک، اوغورلوق، جئنايت، زئنا،

7:22  طاماحکارليق، پئسلئک، حئيله، شهوت، پئس​گؤز، کوفر، قورور، و سفه​لئک اشئيه چيخير؛

7:23  بوتون بو شيلر ائنسانين ائچئندن چيخيب، اونو نجئس ادئر."

7:24  عئسا اورادان چيخيب صور سرحدلرئنه گتدي و بئر اِوه گئرئب هچ کسئن بئلمه‌سئني ائسته‌مه‌دي. لاکئن گئزلي قالا بئلمه‌دي.

7:25  بئر آرواد کي، کئچئک ياشلي قيزي ناپاک روح الئنده اسئر ائدي، عئسانين حاقّيندا اولان خبرلري اشئدئب گلدي و اونون آياقلارينا دوشدو.

7:26  بو آرواد يهودي ديئلدي، سورئيه​​فئنئقي عئرقئندن ائدي. آرواد گلئب عئسايا يالواردي کي، او ناپاک روحو قيزيندان اشئيه قووسون.

7:27  عئسا اونا ددي: "قوي اوّل اوشاقلار دويسونلار. چونکي اوشاقلارين چؤره‌يئني آليب، ائتلره آتماق ياخشي ديئل."

7:28  آرواد عئسايا جاواب ورئب ددي: "بلي، يارب! آمّا ائتلر ده سوفره آلتيندا اوشاقلارين قيرينتي‌لاريندان يئيرلر."

7:29  عئسا آروادا ددي: "بو سؤزو ددئيئن اوچون گت، او ناپاک روح قيزيني بوراخيب."

7:30  آرواد اوئنه گدئب، ناپاک روحو قيزيندان چيخميش و قيزيني ياتاغي اوستونده ياتميش تاپدي.

7:31  عئسا گئنه صور سرحدلرئني ترک ادئب، صيدا بؤلگه​سئندن دکاپولئس دئيارينين اورتاسينا، جلئل دهنزئنه گلدي.

7:32  کار و پلتک بئر آدامي اونون يانينا گتئردئلر و اونا يالوارديلار کي، اَلئني اونون اوستونه قويسون.

7:33  عئسا اونو خالقين يانيندان آييريب، بئر يانا چکدي و بارماقلاريني اونون قولاقلارينا قويدو و توپوروب اونون دئلئنه سورتدو.

7:34  و گؤيه باخيب آه چکدي و اونا ددي: "اِفّاتا، يعني آچيل."

7:35  او آدامين قولاقلاري آچيلدي و درحال دئلئنئن دويونو آچيليب، دوزگون دانيشماغا باشلادي.

7:36  عئسا اونلارا تاپشيردي کي، هچ کئمه بو باره​ده بئر شي دمه‌سئنلر. آمّا نه قدر جئدّي تاپشيريردي، او قدر ده چوخ ياييرديلار.

7:37  و لاپ چوخ حيرتله‌نئب ديئردئلر: "هر شيي ياخشي ادئر؛ هم کارلاري اشئتدئرئر، هم ده دئلسئزلري دانيشديرير."

Chapter 8

8:1  او گونلرده گئنه بؤيوک بئر جاماعات ييغيلدي و يمک اوچون هچ شيلري يوخ ائدي. عئسا شاگئردلرئني چاغيريب اونلارا ددي:

8:2  "جاماعاتا يازيغيم گلئر، چونکي اوچ گوندور يانيمداديرلار و يمک اوچون هچ بئر شيلري يوخدور.

8:3  اگر اونلاري اِولرئنه آج يولا سالام، يولدا طاقتدن دوشرلر، چونکي بعضئلري اوزاقدان گلئبلر."

8:4  شاگئردلري جاواب وردئلر: "بو چؤللوکده بو قدر آدامي دويورماق اوچون کئم هارادان چورک تاپا بئلر؟"

8:5  عئسا اونلاردان سوروشدو: "نچه چؤره‌يئنئز وار؟" شاگئردلر ددئلر: "يدّي چؤرک."

8:6  عئسا جاماعاتا امر اتدي کي، يره اوتورسون. و يدّي چؤره‌يي گؤتوروب شوکور اتدي و بؤلوب شاگئردلرئنه وردي کي، جاماعات آراسيندا پايلاسينلار. اونلار دا پايلاديلار.

8:7  اونلارين بئر نچه کئچئک باليغي دا وار ائدي. عئسا اونلاري دا برکتله​يئب امر اتدي کي، جاماعات آراسيندا پايلاسينلار.

8:8  جاماعات ييئب دويدولار و آرتيق قالان تئکه​لردن يدّي زنبئل دولدو.

8:9  اونلارين ساييسي دؤرد مئن اولاردي. عئسا اونلاري مورخّص اتدي.

8:10  و شاگئردلری ائله آنَن قاييغا مئندي و دالمانوتا دئيارينا گلدي.

8:11  فرئسئلر چيخيب اونونلا موباحئثه اتمه‌يه باشلاديلار و اونو ائمتاحان اتمک اوچون گؤيدن بئر علامت ائسته‌دئلر.

8:12  عئسا اورکدن درئن آه چکئب ددي: "بو نسئل نه اوچون علامت طلب ادئر؟ دوغروسونو سئزه ديئرم، بو نسئله هچ بئر علامت ورئلمه‌يه​جک."

8:13  و اونلاري ترک ادئب، گئنه قاييغا مئندي و دهنزئن او تايينا کچدي.

8:14  اونلار چؤرک گؤتورمه‌يي ياددان چيخارتديلار و اؤزلری ائله بئر چؤرکدن باشقا هچ بئر شيلري يوخ ائدي.

8:15  عئسا شاگئردلرئنه تاپشيريب ددي: "فرئسئلرئن ماياسيندان و هئرودون ماياسيندان اوزاق قالين."

8:16  شاگئردلر آرالاريندا بحث ادئب ديئردئلر: "چؤره‌يئمئز اولماديغي اوچون بله ديئر."

8:17  عئسا بونو باشا دوشوب اونلارا ددي: "چؤره‌يئنئز اولماديغي اوچون نئيه بحث ادئرسئنئز؟ حله ده باشا دوشمه‌يئبسئنئز؟ حله ده آنلاماييبسينيز؟ اوره‌يئنئز داشدير؟

8:18  آيا گؤزلرئنئز اولا-اولا گؤرمورسونوز؟ قولاقلارينيز اولا-اولا اشئتمئرسئنئز؟

8:19  آيا خاطيرلاميرسينيز او زاماني کي، بش چؤره‌يي بش مئن نفرئن آراسيندا پايلاديم؟! آرتيق قالان تئکه​لردن نچه سبد دولدوردونوز؟" شاگئردلر جاواب وردئلر: "اون‌ائکي سبد."

8:20  "يدّي چؤره‌يي دؤرد مئن نفرئن آراسيندا پايلاديغيم زامان، آرتيق قالان تئکه​لردن نچه زنبئل دولدوردونوز؟" شاگئردلر جاواب وردئلر: "يدّي زنبئل."

8:21  عئسا اونلارا ددي: "حله ده آنلاميرسينيز؟!"

8:22  اونلار بيت​صيدايا گلدئلر. کور بئر آدامي اونون يانينا گتئرئب، عئسايا يالوارديلار کي، اونا ال قويسون.

8:23  عئسا کورون الئندن توتوب اونو کنددن اشئيه چيخارتدي و گؤزلرئنه توپوروب اَللرئني اونون اوستونه قويدو و اوندان سوروشدو: "بئر شي گؤرورسن؟"

8:24  کور آدام يوخاري باخيب ددي: "آداملاري گؤرورم، اونلاري آغاجلار کئمي گؤرورم کي، يرئيئرلر."

8:25  او واخت عئسا اَللرئني گئنه کورون گؤزلري اوستونه قويدو. کور آدام دئقّتله باخيب صاغالدي و بوتون شيلري سرراست گؤردو.

8:26  عئسا اونو اِوئنه گؤنده‌رئب ددي: "کنده اصلا گئرميه​سن."

8:27  عئسا شاگئردلری ائله فئلئپي قيصرئيه​سئنئن کندلري طرفئنه يولا دوشدو. يولدا شاگئردلردن سوروشوب اونلارا ددي: "خالق منئم کئم اولدوغومو ديئر؟"

8:28  شاگئردلر جاواب وردئلر: "تعمئد ورن يحيا، بعضي آداملار ائليا و اؤزگه​لري ده پيغمبرلردن بئري."

8:29  عئسا اونلارين اؤزوندن سوروشدو: "سئز منئم کئم اولدوغومو ديئرسئنئز؟" پطروس اونا جاواب ورئب ددي: "سن مسئحسن."

8:30  عئسا اونلارا جئدّي تاپشيردي کي، اونون باره​سئنده هچ کئمه بئر شي دمه‌سئنلر.

8:31  و اونلارا تعلئم ورمه‌يه باشلادي کي، ائنسان اوغلو گرک چوخ عذاب چکسئن و آغ ساقّاللار، باش کاهئنلر و دئن عالئملري طرفئندن ردّ اولونوب اؤلدورولسون و اوچ گون سونرا دا دئرئلسئن.

8:32  عئسا بو سؤزو اونلارا آچيقجا ددي. پطروس اونو بئر يانا چکئب دانلاماغا باشلادي.

8:33  آمّا عئسا دؤنوب شاگئردلرئنه باخدي و پطروسا آجيقلانيب ددي: "اي شيطان، مندن ردّ اول. چونکي سن تارينين ائشلرئني يوخ، ائنسانين ائشلرئني دوشونورسن."

8:34  عئسا جاماعاتي شاگئردلری ائله يانينا چاغيريب ددي: "اگر کئمسه ائسته​يئر منئم داليمجا گلسئن، گرک اؤزونو ائنکار ادئب چارميخيني گؤتورسون و منئم داليمجا گلسئن.

8:35  چونکي جانيني قورتارماق ائسته‌يَن هر کس، اونو هلاک اده​جک. آمّا کئم جانيني مندن اؤتري و ائنجئلدن اؤتري اَلدن ورسه، اونو قورتاراجاقدير.

8:36  ائنسان اوچون نه خيئري وار کي، بوتون دونياني قازانسين، لاکئن جانيني محو اتسئن.

8:37  ائنسان اؤز جاني عوضئنه نه وره بئلر؟

8:38  چونکي بو زئناکار و گوناهکار نسلئن ائچئنده، هر کس مندن و منئم سؤزلرئمدن اوتانسا، ائنسان اوغلو دا آتانين عئزّتئنده موقدّس ملکلر​له گلدئيي واخت اوندان اوتاناجاق."

Chapter 9

9:1  عئسا اونلارا ددي: "دوغروسونو سئزه ديئرم، بورادا دورانلار آراسيندا بعضئسي وار کي، تارينين پادشاهليغينين قودرتله گلمه‌سئني گؤرمه‌يئنجه اؤلومو دادماياجاقلار."

9:2  آلتي گوندن سونرا عئسا، پطروس، يعقوب و يوحنّاني اؤزو​ ائله گؤتوردو و تک​باشينا اونلاري اوجا بئر داغين اوستونه آپاردي و اونلارين گؤزلري قاباغيندا گؤرونوشو ديئشئلدي.

9:3  پالتارلاري پارلاق اولوب اِله آغاردي کي، ير اوزونده هچ يون آغاردان اونو يويوب بله آغاردا بئلمز.

9:4  شاگئردلره ائليا ائله موسا دا گؤروندو. اونلار عئسا ائله صؤحبت ادئردئلر.

9:5  پطروس عئسايا ددي: "اوستاد، بورادا اولماغيميز نه ياخشي اولدو! قوي بورادا اوچ چادير قوراق، بئري سنه، بئري موسايا، و بئري ده ائليايا."

9:6  اونلار او قدر قورخموشدولار کي، پطروس بئلمئردي نه دسئن.

9:7  بو آرادا بئر بولود گلئب اونلارا کؤلگه سالدي. و بولوددان بئر سس گلدي: "بودور منئم عزئز اوغلوم، اونا قولاق آسين."

9:8  شاگئردلر بئردن اطرافلارينا باخديلار، آمّا يانلاريندا عئسادان باشقا هچ کئمي گؤرمه‌دئلر.

9:9  داغدان اِننده عئسا شاگئردلرئنه تاپشيردي کي، ائنسان اوغلونون اؤلولردن دئرئلمه​يئنه​جک، گؤردوکلري باره​ده هچ کئمه بئر شي دمه‌سئنلر.

9:10  اونلار دا عئسانين بو سؤزونو يادلاريندا ساخلاييب اؤلولردن دئرئلمه​يئن نه اولدوغو باره​ده آرالاريندا موباحئثه ادئردئلر.

9:11  و اوندان سوروشدولار: "نه اوچون دئن عالئملري ديئرلر کي، اوّلجه ائليا گلمه‌لي‌دئر؟"

9:12  عئسا اونلارا ددي: "دوغرودان دا ائليا اوّلجه گلئب، هر شيي ائصلاح اده​جک. ائنسان اوغلو حاقّيندا نه يازيليب؟ بو کي، او گرک عذاب چکئب تحقئر اولونسون.

9:13  سئزه ديئرم کي، ائليا حقئقتن گلدي و نه ائسته‌دئکلرئني اونا اتدئلر، نجه کي، اونون باره​سئنده يازيليب."

9:14  شاگئردلرئنئن يانينا قاييتديقلاري زامان، اونلارين اطرافيندا بؤيوک بئر ائزدئحامي گؤردولر و دئن عالئملري شاگئردلرله موباحئثه ادئردئلر.

9:15  جاماعات اونو گؤردويو زامان چوخ حيرت اتدئلر و اونون طرفئنه قاچيب، اونا سالام وردئلر.

9:16  عئسا اونلاردان سوروشدو: "بونلارلا نه موباحئثه ادئرسئنئز؟"

9:17  جاماعات آراسيندان بئر کئشي جاواب وردي: "اوستاد، اوغلومو سنئن يانينا گتئرمئشم. ائچئنده دئلسئز بئر روح وار.

9:18  اوشاغي هارادا توتسا، اونو يره چيرپير. اوشاق کؤپور، دئشلرئني قيجيردير و قورويوب قالير. شاگئردلرئندن ائسته‌دئم کي، بو روحو اوندان اشئيه قووسونلار، لاکئن اِده بئلمه‌دئلر."

9:19  عئسا اونلارا جاواب ورئب ددي: "اي ائمانسيز نسئل. نه واختا کئمي سئزئنله اولمالي‌يام؟ نه واختا کئمي سئزي دؤزملي‌يم؟ اونو منئم يانيما گتئرئن."

9:20  اونلار اوشاغي عئسانين يانينا گتئردئلر. روح اونو گؤرر-گؤرمز، اوشاغي شئدّتله اسدئرئب، يره چيرپدي. اوشاق يره ييخيليب آغيزي کؤپوکلندي و دئيئرله‌نئردي.

9:21  عئسا اوشاغين آتاسيندان سوروشدو: "نه واختدان بري اونون باشينا بو ائش گلئب؟" اوشاغين آتاسي ددي: "اوشاقليغيندان.

9:22  روح اوشاغي هلاک اتمک اوچون اونو اودا-سويا سالير. لاکئن اگر بئر شي اده بئلئرسن، بئزه يازيغين گلسئن. بئزه ائمداد ات."

9:23  عئسا اونا ددي: "بئر شي اده بئلئرسن! ائمان گتئرن آداما هر شي مومکوندور."

9:24  اوشاغين آتاسي او آندا باغيريب ددي: "ائمان گتئرئرم، منئم ائمانسيزليغيما ائمداد ات."

9:25  عئسا خالقين اونون يانينا قاچا-قاچا گلمه‌سئني گؤرنده او ناپاک روحا آجيقلانيب ددي: "اي کار و دئلسئز روح، سنه امر ادئرم اوندان اشئيه چيخ و بئر داها اونا داخئل اولما."

9:26  روح باغيردي و چوخ عذاب ورئب، اوندان اشئيه چيخدي و اوشاق اؤلو کئمي يرده قالدي، اله کي، چوخ آدام ددي: "او اؤلدو."

9:27  لاکئن عئسا اوشاغين الئندن توتوب اونو قالديردي و اوشاق دوروب داياندي.

9:28  عئسا اِوه گئرندن سونرا شاگئردلري اوندان سوروشدولار: "نه اوچون بئز اونو چيخاردا بئلمه‌دئک؟"

9:29  عئسا اونلارا ددي: "بو جئنس دوعادان باشقا هچ بئر يوللا چيخماز."

9:30  اورادان چيخيب جلئل بؤلگه​سئندن کچدئلر. عئسا هچ کسئن بئلمه‌سئني ائسته‌مئردي.

9:31  چونکي شاگئردلرئنه تعلئم ورئب، اونلارا ددي: "ائنسان اوغلو ائنسانلارين الئنه ورئله​جک و اونلار اونو اؤلدوره​جکلر و اؤلدورولمه‌سئندن اوچ گون سونرا دئرئله​جک."

9:32  لاکئن شاگئردلر بو سؤزو آنلاماديلار و اوندان سوروشماغا دا قورخدولار.

9:33  اونلار کفرناحوما گلدئلر. اوه گئرندن سونرا عئسا اونلاردان سوروشدو: "يولدا نه باره​ده موباحئثه ادئردئنئز؟"

9:34  شاگئردلرئن هچ بئرئندن سس چيخمادي، چونکي يولدا هانسينين لاپ بؤيوک اولدوغو باره​سئنده موباحئثه اتمئشدئلر.

9:35  عئسا اوتوردو و او اون‌‌​ائکي شاگئردي يانينا چاغيريب اونلارا ددي: "بئرئنجي اولماق ائسته‌ين هر کس، گرک هاميدان آخير اولسون و هامييا خئدمت اتسئن."

9:36  و کئچئک بئر اوشاغي آليب، اورتادا دوردوردو و اونو قوجاقلاييب، اونلارا ددي:

9:37  "کئم بله کئچئک اوشاقلاردان بئرئني منئم آديمين خاطئرئنه قبول اتسه، مني قبول ادئر و مني قبول ادن هر کس، مني يوخ، مني گؤنده‌ره‌ني قبول ادئر."

9:38  يوحنّا عئسايا ددي: "اوستاد، بئر آدام گؤردوک کي، سنئن آديندا ناپاک روحلاري اشئيه قوووردو، آمّا سنه پيرو ديئل. اونون اوچون ده اونو بو ائشدن منع اتدئک."

9:39  آمّا عئسا اونا ددي: "اونا مانع اولمايين. هچ کئم يوخدور کي، منئم آديمدا مؤجوزه ادئب، سونراسي دا مني يامانلاسين.

9:40  بئزه ضئدّ اولمايان بئزئم طرفداريميزدير.

9:41  مسئحئنکي اولدوغونوز اوچون کئم سئزه منئم آديمين خاطئري اوچون بئر بارداق سو ائچئرتسه، دوغروسونو سئزه ديئرم، اونون اَجري اصلا آرادان گتمه‌يه​جک.

9:42  منه ائمان گتئرن بو اوشاقلاردان بئرئني کئم گوناها باتيرسا، اونون اوچون داها ياخشي‌دير کي، بوينونا ديئرمان داشيني باغلاييب، دهنزه آتيلسين.

9:43  اگر اَلئن سني گوناها سالير، اونو کس. سنئن اوچون علئل حياتا گئرمک، ائکي ال‌له جهنّمه، او سؤنمه‌ين اودا دوشمکدن داها ياخشي‌دير.

9:44  اورايا کي، اونلارين قوردو اؤلمز، اودو دا سؤنمز.

9:45  اگر آياغين سني بودره​دئر، اونو کس. سنئن اوچون تک آياقلي حياتا گئرمک، ائکي آياقلي جهنّمه دوشمکدن داها ياخشي‌دير.

9:46  اورايا کي، اونلارين قوردو اؤلمز، اودو دا سؤنمز.

9:47  اگر گؤزون سني گوناها باتيرير، اونو چيخارت. سنئن اوچون تک گؤزلو تارينين پادشاهليغينا گئرمک، ائکي گؤزلو جهنّمه دوشمکدن داها ياخشي‌دير.

9:48  اورايا کي، اونلارين قوردو اؤلمز، اودو دا سؤنمز.

9:49  چونکي هرکس اودلا دوزلاناجاق.

9:50  دوز ياخشي شي‌دئر، لاکئن اگر دوز، دوزسوز اولسا، نجه اونو گئنه دوزلو اتمک اولار؟ ائچئنئزده دوز اولسون و آرانيزدا باريش."

Chapter 10

10:1  عئسا اورادان چيخيب يهودئيه بؤلگه​سئنه، اوردون چايينين او تايينا گلدي. جاماعات گئنه اونون يانينا ييغيلدي و او، نجه کي، عادتي ائدي، گئنه اونلارا تعلئم وردي.

10:2  فرئسئلر عئسايا ياخينلاشيب، اونو ائمتاحان اتمک اوچون سوروشدولار: "آيا کئشئيه ائجازه ورئلئب کي، آرواديني بوشاسين؟"

10:3  عئسا جاواب ورئب اونلارا ددي: "موسا سئزه نه امر ادئب؟"

10:4  ددئلر: "کئشئيه ائجازه ورئب کي، بوشانما کاغيذي يازيب آرواديني بوشاسين."

10:5  عئسا اونلارا ددي: "داش اورکلي اولدوغونوز اوچون موسا بله بئر امري سئزه يازدي.

10:6  لاکئن خئلقتئن باشلانيشيندان تاري اونلاري کئشي و آرواد ياراتدي.

10:7  بو سببدن کئشي آتا-آناسيندان آيريلاجاق و آروادينا ياپيشاجاق

10:8  و ائکئسي بئر بدن اولاجاقلار، اله کي، آرتيق ائکي بدن يوخ، بئر بدن اولاجاقلار.

10:9  اونون اوچون تارينين بئرلشدئردئيئني ائنسان آييرماسين."

10:10  اِوده گئنه شاگئردلر بو باره​ده اوندان سوآل سوروشدولار.

10:11  عئسا اونلارا ددي: "هر کس آرواديني بوشاييب اؤزگه بئر آروادلا اِولَنسه، آروادينين حاقّيندا زئنا ادئر.

10:12  آرواد دا اگر اَرئندن بوشانيب اؤزگه بئر کئشئله اِولَنسه، زئنا ادئر."

10:13  و کئچئک اوشاقلاري عئسانين يانينا گتئردئلر کي، اونلاري مَسح اتسئن. لاکئن شاگئردلر اونلارا آجيقلانديلار.

10:14  عئسا بونو گؤرنده قضبله‌نئب، اونلارا ددي: "قويون اوشاقلار يانيما گلسئنلر. اونلارا مانع اولمايين. چونکي تارينين پادشاهليغي بونلار کئمئلرئندئر.

10:15  دوغروسونو سئزه ديئرم، تارينين پادشاهليغيني بئر اوشاق کئمي قبول اتمه‌ين اونا گئره بئلمز."

10:16  و اوشاقلاري قوجاغينا آليب، اللرئني اونلارين اوستونه قويدو و اونلارا برکت وردي.

10:17  يولا چيخاندا بئري قاچا-قاچا عئسانين يانينا گلدي و اونون قاباغيندا دئز چؤکوب سوروشدو: "ياخشي اوستاد، ابدي حياتي مئراث آلماق اوچون نه اتملي‌يَم؟"

10:18  عئسا اونا ددي: "نه اوچون منه ياخشي ديئرسن؟ تاريدان باشقا هچ کس ياخشي ديئل.

10:19  احکامي بئلئرسن: قتل اتمه، زئنا اتمه، اوغورلاما، يالانچي شاهئدلئک اتمه، هچ کئمي آلداتما، آتا و آنانا حؤرمت ات."

10:20  او آدام عئسايا ددي: "اوستاد، بونلارين هاميسيني اوشاقليغيمدان رئعايت اتمئشم."

10:21  عئسا اونا باخيب اونو سِودي و اونا ددي: "سنئن بئر شيئن اَسکئکدئر. گت نه‌يئن وارسا، سات، مؤحتاج آداملارا پايلا، گؤيده ثروتئن اولاجاق. سونرا گل منه پيرو اول."

10:22  آمّا او آدام بو سؤزو اشئدن واخت پرئشان اولدو و قمگئن گتدي، چونکي چوخ مال-دؤولتي وار ائدي.

10:23  عئسا اطرافينا باخيب شاگئردلرئنه ددي: "تارينين پادشاهليغينا گئرمک وارلي آداملار اوچون نه قدر چتئندئر!"

10:24  شاگئردلر اونون سؤزوندن حيران قالديلار. آمّا عئسا اونلارا گئنه جاواب ورئب ددي: "اوشاقلار، تارينين پادشاهليغينا گئرمک نه قدر چتئندئر!

10:25  دَوه​نئن ائينه دشئيئندن کچمه‌سي، وارلي بئر آدامين تارينين پادشاهليغينا گئرمه‌سئندن داها آساندير."

10:26  اونلار داها چوخ تعجّوب اتدئلر و اونا ددئلر: "بس کئم نئجات تاپا بئلر؟"

10:27  عئسا اونلارا باخيب ددي: "ائنسانلار اوچون بو قيري‌​مومکوندور، لاکئن تاري اوچون يوخ. تاري اوچون هر شي مومکوندور."

10:28  پطروس اونا ددي: "بئز هر شيي آتيب، سنه پيرو اولدوق."

10:29  عئسا ددي: "دوغروسونو سئزه ديئرم، اله بئر آدام يوخدور کي، منئم اوچون و ائنجئلئن خاطئري اوچون اِوئني، قارداشلاريني، باجيلاريني، آناسيني، آتاسيني، اوشاقلاريني، يا دا زمئلرئني آتميش اولسون

10:30  و ائندي، بو زاماندا، اذئيّتلرله يوز قات اِولر، قارداشلار، باجيلار، آنالار و آتالار، اوشاقلار و زمئلر، گله​جک زاماندا دا ابدي حيات آلماسين.

10:31  لاکئن بئرئنجئلرئن چوخلاري آخيرينجي، و آخيرينجي‌لارين چوخلاري بئرئنجي اولاجاقلار."

10:32  اونلار اورشلئمه گدن يولدا ائره​لي گدئردئلر و عئسا اونلارين قاباغيندا گدئردي. شاگئردلر حيران قالميشديلار و اونون آرخاسيندان گدنلره قورخو دوشموشدو. عئسا گئنه او اون‌ائکي نفري يانينا چاغيريب باشينا نه گله​جه‌يي باره​ده دانيشماغا باشلادي:

10:33  "باخين، اورشلئمه گدئرئک و ائنسان اوغلو باش کاهئنلر و دئن عالئملري الئنه ورئله​جک. اونلار اونو اؤلومه محکوم ادئب قيري‌يهودئلره تسلئم اده​جکلر.

10:34  و اونلار اونا ائستهزا ادئب، توپوره​جکلر و اونا شالّاق ووروب اؤلدوره​جکلر. و او، اوچ گون سونرا دئرئله​جک."

10:35  زِبِدِي اوغوللاري يعقوب و يوحنّا عئسايا ياخينلاشيب، اونا ددئلر: "اوستاد، ائسته‌يئرئک سندن نه خاهئش اتدئيئمئزي، سن بئزئم اوچون اده​سن."

10:36  عئسا اونلارا ددي: "سئزئن اوچون نه ائسته‌يئرسئنئز ادئم؟"

10:37  اونلار عئسايا ددئلر: "ائجازه ور سنئن جلاليندا بئرئمئز صاغيندا، بئرئمئز ده سولوندا اوتوراق."

10:38  عئسا اونلارا ددي: "نه ائسته‌دئيئنئزي بئلمئرسئنئز. منئم ائچه​جه‌يئم پئياله​دن آيا سئز ائچه​بئلرسئنئز؟ و يا منئم تعمئد آلديغيم تعمئدده آيا سئز ده تعمئد آلا بئلرسئنئز؟"

10:39  ددئلر: "اده بئلرئک." عئسا اونلارا ددي: "ائچه​جه‌يئم پئياله​دن ائچه​جکسئنئز و آلديغيم تعمئدده سئز ده تعمئد آلاجاقسينيز،

10:40  لاکئن صاغيمدا يا دا سولومدا اوتورماغا ائجازه ورمک منئم الئمده ديئل. بو يرلر او آداملار اوچوندور کي، اونلار اوچون حاضيرلانيب."

10:41  بونو اشئدن او اون‌شاگئرد يعقوب و يوحنّايا قضبلندئلر.

10:42  عئسا اونلاري يانينا چاغيريب ددي: "بئلئرسئنئز کي، قيري‌يهودئلر آراسيندا حاکئم ساييلانلار، اونلارا حؤکمرانليق ادرلر و اونلارين ريئسلري اونلارا آغاليق سوررلر.

10:43  آمّا سئزئن آرانيزدا بله اولمامالي‌دير. آرانيزدا بؤيوک اولماق ائسته‌ين، گرک او بئرئلرئنه خئدمت اتسئن

10:44  و آرانيزدا بئرئنجي اولماق ائسته‌ين، گرک هامينين نؤکري اولسون.

10:45  چونکي حتّا ائنسان اوغلو دا، اونا خئدمت اولونماق اوچون گلمه‌دي. او گلدي کي، خئدمت اتسئن و جانيني چوخ آداملارين يولوندا فئدئيه ورسئن."

10:46  اونلار اَرئحايا گلدئلر. عئسا شاگئردلري و اونلارلا بؤيوک بئر جاماعاتلا اَرئحادان چيخاندا، تئماوس اوغلو بارتئماوس آديندا کور بئر يولچو يولون قيراغيندا اوتورموشدو.

10:47  بارتئماوس اونون ناصئره​لي عئسا اولدوغونو اشئدن واخت قيشقيريب ددي: "داوود اوغلو عئسا، منه رحمئن گلسئن."

10:48  چوخ آداملار اونا آجيقلانديلار و ساکئت اولماغيني ائسته‌دئلر. آمّا او، داها چوخ باغيريب ددي: "داوود اوغلو عئسا، منه رحمئن گلسئن."

10:49  عئسا دايانيب ددي: "اونو چاغيرين." اونلار کور آدامي چاغيريب ددئلر: "اوزولمه قالخ، سني چاغيرير."

10:50  بارتئماوس عباسيني اوستوندن آتدي و يردن سيچراييب عئسانين يانينا گلدي.

10:51  عئسا اوندان سوروشدو: "نه ائسته​يئرسن کي، سنه ادئم؟" کور آدام اونا ددي: "اوستاد، گؤزلرئم گئنه گؤرسون."

10:52  عئسا اونا ددي: "گت، ائمانين سنه شفا وردي." او آندا کور آدامين گؤزلري گؤرمه‌يه باشلادي و يولا دوشوب عئسانين دالينجا گتدي.

Chapter 11

11:1  اورشلئمه ياخينلاشيب زيتون داغينين يانيندا اولان بيت‌فاجي و بيت‌عنيايا يتئشن زامان، عئسا شاگئردلرئندن ائکئسئني گؤنده‌رئب

11:2  اونلارا بله ددي: "قاباغينيزداکي کنده گدئن. اورايا گئرنده اورادا باغلي دوران بئر سيپا گؤره​جکسئنئز کي، ائندئيه کئمي هچ کس اونا مئنمه‌يئب. اونو آچين و منئم يانيما گتئرئن.

11:3  و اگر بئري سئزه دسه: «نه اوچون بونو ادئرسئنئز؟» دئيرسئنئز: «ربّئن بونا احتئياجي وار و آنَن اونو بورايا قايتاراجاق.»"

11:4  اونلار گتدئلر و کوچه​ده قاپينين يانيندا باغلي بئر سيپا تاپيب، اونو آچديلار.

11:5  اورادا دورانلاردان بعضئسي ددي: "نه ادئرسئنئز؟ بو سيپاني نه اوچون آچيرسينيز؟"

11:6  شاگئردلر عئسانين ددئيي کئمي اونلارا جاواب وردئلر و آداملار اونلاري بوراخديلار.

11:7  سيپاني عئسانين يانينا گتئرئب، پالتارلاريني اونون اوستونه سالديلار و عئسا اونا مئندي.

11:8  چوخ آداملار پالتارلاريني، بعضئلري ده زمئلردن کسدئکلري آغاج بوداقلاريني يولا سردئلر.

11:9  قاباقدا گدنلر و آرخادان گلنلر چيغيريب ديئردئلر: "هوسانّا! ربّئن آديندا گلن موبارک اولسون.

11:10  آتاميز داوودون گلن پادشاهليغي موبارک اولسون. لاپ اوجالاردا، هوسانّا!"

11:11  عئسا اورشلئمه گئرئب معبده گتدي و هر شيي گؤزدن کچئرتدي. گج اولدوغونا گؤره، او اون‌ائکي شاگئرد​له بيت عنيايا گتدي.

11:12  او گونون صاباحي بيت عنيادان چيخديقلاري زامان، عئسا آجيقدي.

11:13  اوزاقدا يارپاقلي بئر انجئر آغاجي گؤردو. آغاج اوستونده بئر شي تاپماق اومئدی ائله اونا ياخينلاشدي، آمّا يانينا گلن واخت، يارپاقدان باشقا اوندا بئر شي تاپمادي، چونکي انجئر مؤوسومو ديئلدي.

11:14  عئسا اونا ددي: "آرتيق سندن هچ کئم اصلا ميوه يمه‌سئن." و شاگئردلري بو سؤزو اشئتدئلر.

11:15  اورشلئمه گلدئلر. عئسا معبده گئردي و اورادا آليش-ورئش ادنلري اشئيه قوودو. صرّافلارين مئزلرئني و گؤيرچئن ساتانلارين چارپايالاريني چوئردي.

11:16  و هچ کسي قويمادي کي، معبدئن حيطئندن بئر شي کچئرتسئن.

11:17  و اونلارا تعلئم ورئب ددي: "مگر يازيلماييب کي، «منئم اوئم بوتون مئلّتلر اوچون دوعا اوي چاغيريلاجاق؟!» لاکئن سئز، اونو اوغرولار يوواسينا دؤنده‌رئبسئنئز."

11:18  باش کاهئنلر و دئن عالئملري بونو اشئتدئلر و عئساني هلاک اتمک اوچون بئر يول تاپماغا باشلاديلار. چونکي اوندان قورخوردولار. اونا گؤره کي، بوتون خالق اونون تعلئملرئندن حيران قالميشدي.

11:19  آخشام اولاندا اونلار شهردن اشئيه چيخديلار.

11:20  او گونون صاباحي انجئر آغاجينين يانيندان کچنده، اونو کؤکوندن قوروموش گؤردولر.

11:21  پطروس عئسايا خاطيرلاديب ددي: "اوستاد باخ، لعنت اتدئيئن انجئر آغاجي قورويوب!"

11:22  عئسا جاواب ورئب اونلارا ددي: "تارييا ائمانينيز اولسون!

11:23  دوغروسونو سئزه ديئرم، هرکس بو داغا دسه: «قالخ، دهنزه آتيل!» و اوره‌يئنده شوبهه اتمه‌يئب ددئيئنئن اولاجاغينا ائنانسا، ددئيي کئمي اولاجاق.

11:24  بونون اوچون سئزه ديئرم، دوعا اتدئيئنئز و ائسته‌دئيئنئز هر شيئن اِله ائندئدن آلديغينيزا ائنانين و سئزئن اوچون اولاجاق.

11:25  دوعايا دوردوغونوز زامان، هر بئر آدامين ضئدّئنه اوره‌يئنئزده نه ساخلاييبسينيز، باغيشلايين کي، گؤيلرده اولان آتانيز دا سئزئن تقصئرلرئنئزي سئزه باغيشلاسين.

11:26  اگر باغيشلاماياسينيز، گؤيلرده‌کي آتانيز دا سئزئن تقصئرلرئنئزي سئزه باغيشلاماياجاق."

11:27  اونلار گئنه اورشلئمه گلدئلر. عئسا معبدئن حيطئنده گزنده، باش کاهئنلر، دئن عالئملري و آغساقّاللار ياخينلاشيب،

11:28  اونا ددئلر: "نه صلاحئيّتله بو ائشلري ادئرسن؟ بونلاري اتمک اوچون بو صلاحئيّتي سنه کئم ورئب؟"

11:29  عئسا اونلارا ددي: "من ده سئزدن بئر سوآل سوروشاجاغام. منه جاواب ورئن، او واخت من ده سئزه دئيه‌رم کي، بو ائشلري نه صلاحئيّتله گؤرورم.

11:30  يحيانين تعمئد ورمک صلاحئيّتي هارادان گلدي؟ گؤيدن، يوخسا ائنسانلاردان؟ جاواب ورئن."

11:31  اونلار آرالاريندا مصلحتله‌شئب ددئلر: "اگر دسک گؤيدن، دئيه​جک بس نه اوچون اونا ائنانمادينيز؟

11:32  لاکئن اگر دسک؛ ائنسانلاردان…" اونلار خالقدان قورخدولار، چونکي هامي يحياني حقئقي بئر پيغمبر بئلئردي.

11:33  و عئسايا جاواب ورئب ددئلر: "بئلمئرئک." عئسا دا اونلارا ددي: "من ده سئزه دمئرم کي، بو ائشلري نه صلاحئيّتله گؤرورم."

Chapter 12

12:1  عئسا مثللر​له اونلارلا دانيشماغا باشلادي: "بئر آدام اوزوم باغي اکدي و اونون اطرافينا دووار چکدي. شئره اوچون بئر حوووض قازيب، باغدا بئر بورج ده تئکدي و سونرا باغي باغبانلارا ائجاره​يه ورئب، سفره چيخدي.

12:2  محصول زاماني باغبانلارين يانينا بئر قول گؤنده‌ردي کي، باغبانلاردان باغين محصولوندان آلسين.

12:3  لاکئن باغبانلار اونو توتوب دؤيدولر و الي​بوش قايتارديلار.

12:4  باغين صاحئبي باغبانلارين يانينا آيري بئر قول گؤنده‌ردي. آمّا اونلار بو قولون باشيني يارالاييب، تحقئر اتدئلر.

12:5  باغ صاحئبي باشقا بئرئني ده گؤنده‌ردي. اونو دا اؤلدوردولر. داها بئر چوخ قول گؤنده‌ردي. اونلارين بعضئسئني دؤيدولر، بعضئسئني ده اؤلدوردولر.

12:6  باغ صاحئبئنئن سوگئلي بئر اوغلو وار ائدي. «اوغلوما حؤرمت اده​جکلر» ديئب، آخيردا اونو باغبانلارين يانينا گؤنده‌ردي.

12:7  لاکئن اونلار بئربئرلرئنه ددئلر: "وارئث بودور. گلئن بونو اؤلدورک و مئراث بئزه قالسين."

12:8  اونو دا توتوب اؤلدوردولر و باغدان اشئيه آتديلار.

12:9  "ائندي باغين صاحئبي اونلارا نه اده​جک؟ گله​جک، باغبانلاري هلاک ادئب، باغي اؤزگه آداملارا وره​جک.

12:10  مگر بو يازيني اوخوماييبسينيز کي، «بنّالارين ردّ اتدئيي داش، بئنا کونجونون باش داشي اولدو.

12:11  بو ربّئن ائشي ائدي، و گؤزلرئمئزئن قاباغيندا عجايئب ائشدئر!»"

12:12  اونلار چاليشديلار عئساني بئر نحو​له توتسونلار، چونکي باشا دوشدولر کي، بو مثلي اونلارين باره​سئنده ديئر. لاکئن جاماعاتدان قورخدوقلاري اوچون اونو بوراخيب گتدئلر.

12:13  سونرا فرئسئلردن و هئرودچولاردان بعضئلرئني عئسانين يانينا گؤنده‌ردئلر کي، اونون اؤز سؤزو ائله اونو تورا سالسينلار.

12:14  اونلار گلئب عئسايا ددئلر: "اوستاد، بئلئرئک کي، سن حقئقت​سِوَن بئر آدامسان و هچ کسدن باکين يوخدور، چونکي آداملار آراسيندا فرق قويمادان تارينين يولونو اؤيره‌دئرسن. قيصره باج ورمک آيا جائزدئر يا خير؟ وِرَک يا ورمه‌يک؟"

12:15  عئسا اونلارين ائکي​اوزلويونو بئلئب، اونلارا ددي: "مني نه اوچون ائمتاحان ادئرسئنئز؟ بئر دئنار گتئرئن گؤروم."

12:16  اونا بئر دئنار گتئردئلر. عئسا اونلارا ددي: "بو صورت و بو يازي کئمئندئر؟" جاواب وردئلر: "قيصرئن."

12:17  عئسا اونلارا ددي: "قيصرئنکئني قيصره و تارينينکيني تارييا ورئن." اونلار اونا حيرتدن مات قالديلار.

12:18  "اؤلومدن سونرا دئرئلمه يوخدور" دئين صادوقئلر اونون يانينا گلئب سوروشدولار:

12:19  "اوستاد، موسا بئزه يازيب کي، اگر بئرئنئن قارداشي اؤلوب آروادي قالسا، لاکئن اوشاقلاري اولماسا، قارداشي اونون آرواديني آليب، قارداشينا نسئل يتئشدئرسئن.

12:20  يدّي قارداش وار ائدي، بئرئنجئسي آرواد آلدي، اؤلدو. آمّا اؤزوندن اؤولاد قويمادي.

12:21  ائکئنجي قارداش او آروادي آلدي و او دا اؤولادسيز اؤلدو. اوچونجوسو ده بله.

12:22  او يدّي قارداشين هچ بئرئندن نسئل قالمادي. هاميدان سونرا آرواد دا اؤلدو.

12:23  قئيامت گونونده اونلار دئرئلَنده، بو آرواد هانسينين آروادي اولاجاق؟ چونکي اونلارين يدّئسي ده بو آروادلا اِولَندي."

12:24  عئسا اونلارا ددي: "سئزئن سهو اتدئيئنئزئن سببي ده اله بودور، چونکي نه موقدّس کئتابي آنلاييرسينيز، نه ده تارينين قودرتئني. اله ديئل؟

12:25  چونکي اؤلولردن دئرئلن واخت نه اوله‌نئرلر نه ده اَره گدئرلر، آنجاق گؤيلرده‌کي ملکلر کئمي اولورلار.

12:26  لاکئن اؤلولردن دئرئلمه مطلبئنه گلئنجه، مگر موسانين کئتابيندا، آلوولانان بوتا باره​ده‌کي فصئلده اوخوماييبسينيز کي، تاري اونا ديئر: «من ائبراهئمئن تاريسي، ائسحاقين تاريسي و يعقوبون تاريسي‌يام؟!»

12:27  او اؤلولرئن تاريسي يوخ، دئرئلرئن تاريسي‌دير. سئز چوخ سهو ادئرسئنئز."

12:28  دئن عالئملرئندن بئري ياخينلاشيب، اونلارين موباحئثه​لرئنه قولاق آسدي و عئسانين اونلارا ياخشي جاواب وردئيئني اشئدنده، عئسادان سوروشدو: "امرلرئن لاپ بئرئنجئسي هانسي‌دير؟"

12:29  عئسا جاواب وردي: "امرلرئن لاپ بئرئنجئسي بودور: «اشئت اي ائسرايئل! رب تاريميز واحئددئر.

12:30  و سن رب تاريني گرک بوتون اوره‌يئنله، بوتون جانينلا، بوتون فئکرئنله، و بوتون قووّتئنله سِوه​سن.»

12:31  ائکئنجي امر بودور: «سن گرک قونشونو دا اؤزون کئمي سِوه​سن.» بونلاردان بؤيوک امر يوخدور."

12:32  دئن عالئمي عئسايا ددي: "چوخ گؤزل، اوستاد! دوغرو ددئن کي، تاري واحئددئر و اونا تاي يوخدور.

12:33  و اونو بوتون اورکله، بوتون فهمله، و بوتون قووّتله سومک، و قونشونو دا اؤزون کئمي سومک بوتون يانديرما هدئيه​لر و قوربانلاردان افضلدئر."

12:34  عئسا اونون عاغيلّي جاواب وردئيئني گؤرنده اونا ددي: "سن تارينين پادشاهليغيندان اوزاق ديئلسن." داها هچ کئم اوندان بئر شي سوروشماغا جورعت اتمه‌دي.

12:35  عئسا معبدده تعلئم ورئب بله ددي: "دئن عالئملري نجه ديئرلر کي، مسئح داوودون اوغلودور؟

12:36  داوود اؤزو موقدّس روحدان ائلهام آليب ددي؛ «رب منئم ربّئمه ددي: دوشمنلرئني آياقلارينين آلتينا سالاناجاق صاغيمدا اوتور.»

12:37  اگر داوود اؤزو اونا رب ديئر، بس نجه اونون اوغلو اولور؟" اوراداکي بؤيوک جاماعات عئسانين سؤزلرئنه شادليقلا قولاق آسيردي.

12:38  عئسا تعلئملرئنده اونلارا بله ددي: "آييق اولون دئن عالئملرئندن کي، اوزون پالتارلاردا گزمه‌يي، بازارلاردا سالام آلماغي،

12:39  کنئسه​لرده باش کورسولري و ضئيافتلرده يوخاري باشدا اوتورماغي چوخ سوئرلر،

12:40  دول آروادلارين مال-مولکونه يئيه چيخيرلار و رئياکارليقلاريندان دوعالاري اوزاديرلار! بو آداملارين جزاسي داها دا آغير اولاجاق."

12:41  عئسا خزئنه صانديغينين قاباغيندا اوتوروب، خالقين نجه خزئنه​يه پول آتديغينا باخيردي. بئر چوخ وارلي آداملار چوخ پول آتيرديلار.

12:42  اونلاردان سونرا بئر دول آرواد گلئب، ائکي قارا پول صانديغا آتدي.

12:43  عئسا شاگئردلرئني يانينا چاغيريب ددي: "دوغروسونو سئزه ديئرم، بو دول فاغير آرواد صانديغا پول آتانلارين ​هاميسيندان چوخ​آتدي.

12:44  چونکي اونلارين هاميسي آرتيقليقلاريندان آتديلار، لاکئن بو آرواد کاسيبليغيندان بوتون واريني، بوتون کچئنه​جک پولونو آتدي."

Chapter 13

13:1  عئسا معبددن چيخاندا شاگئردلرئندن بئري اونا ددي: "اوستاد باخ! نه بؤيوک داشلار، نه عظمتلي عئمارتلر!"

13:2  عئسا اونا ددي: "بو بؤيوک عئمارتلري گؤرورسن؟ اونلارين داشي، داش اوسته قالماياجاق. هاميسي ييخيلاجاقدير."

13:3  عئسا، زيتون داغيندا، معبدئن قاباغيندا اوتورموشدو کي، پطروس، يعقوب، يوحنّا، و آندرياس آيريجا اوندان سوروشدولار:

13:4  "بئزه ده گؤرک بو ائشلر نه زامان اولاجاق؟ نه علامت وار کي، بئزه بونلارين عنقرئب تامام اولاجاغيني گؤرسدسئن؟"

13:5  عئسا دا اونلارا دمه‌يه باشلادي: "دئقّتلي اولون کي، کئمسه سئزي آزديرماسين.

13:6  چوخ آداملار منئم آديمدا گله​جکلر و «من اويام» ديئب، چوخ آداملاري آزديراجاقلار.

13:7  جنگلر و موحارئبه​لر خبرلرئني اشئتدئيئنئز زامان، اوره‌يئنئز اوزولمه‌سئن. بونلارين اولماسي گرکدئر، آنجاق حله آخير ديئل.

13:8  چونکي مئلّت، مئلّت اوستونه و مملکت، مملکت اوستونه قالخاجاق. چوخ يرلرده زلزله​لر اولاجاق، آجليق دوشه​جک، بونلار سانجي‌لارين باشلانيشي‌دير.

13:9  لاکئن سئز آييق اولون. سئزي محکمه​لره وره​جکلر، کنئسه​لرده دؤيوله​جکسئنئز و منه گؤره، سئز حؤکمدارلار و پادشاهلار قاباغيندا دوراجاقسينيز کي، اونلارا شهادت اولسون.

13:10  اوّلجه خوش خبرئن بوتون مئلّتلره يتئشمه‌سي گرکدئر.

13:11  سئزي توتوب تسلئم اتدئکلري زامان، نه دئيه​جه‌يئنئزئن باره​سئنده نئگاران اولمايين. او ساعاتدا سئزه نه ورئلسه، اونو ديئن. چونکي دانيشان سئز يوخ، موقدّس روحدور.

13:12  قارداش قارداشي، و آتا اؤولادي اؤلومه وره​جک. و اؤولادلار آتا-‌آنانين ضئدّئنه قالخيب، اونلاري اؤلدوره​جکلر.

13:13  منئم آديما گؤره هامي سئزدن نئفرت اده​جک. لاکئن آخيرا کئمي دايانان نئجات تاپاجاق.

13:14  دانيال پيغمبرئن يازديغي کئمي، وئرانه​لئک گتئرن ائيرنج شيئن لايئق اولمايان يرده دوردوغونو گؤردويونوز زامان، يهودئيه​ده اولانلار داغلارا قاچسينلار.

13:15  دامدا اولان آشاغي انئب بئر شي گؤتورمک اوچون اِوئنه گئرمه‌سئن.

13:16  زمئده اولان عباسيني گؤتورمک اوچون دالي قاييتماسين.

13:17  واي او گونلرده بويلو و اَمزئکلي اولانلارين حالينا!

13:18  دوعا ادئن کي، قاچماغينيز قيشا راستلاماسين.

13:19  چونکي او گونلرده اله موصئبت اولاجاق کي، تارينين ياراتديغي کائناتين باشلانيشيندان ائندئيه قدر اونون کئمي نه اولوب، نه ده اولاجاق.

13:20  اگر رب او گونلري قيسالتماسايدي، هچ بئر ائنسان خئلاص اولا بئلمزدي. آمّا سچدئيي سچئلمئشلرئن خاطئري اوچون او گونلري قيسالتدي.

13:21  اگر او زامان کئمسه دسه: «باخ، مسئح بورادا.» و يا «باخ، اورادا!»، اونا ائنانمايين.

13:22  چونکي يالانچي مسئحلر و يالانچي پيغمبرلر ظوهور اده​جکلر و اله علامتلر و مؤجوزه​لر گؤرسده​جکلر کي، مومکون اولسا، سچئلمئشلري ده آزديرسينلار.

13:23  آمّا سئز دئقّتلي اولون! سئزه هر شيي اوّلجه​دن خبر وردئم.

13:24  «لاکئن او گونده، او موصئبتدن سونرا، گونش قارالاجاق، آي ائشيغيني ورمه‌يه​جک.

13:25  اولدوزلار گؤيدن دوشه​جکلر، و گؤيلرده اولان قودرتلر اسه​جکلر.»

13:26  او زامان ائنسان اوغلونون بؤيوک عئزّت و قودرتله بولودلاردا گلدئيئني گؤره​جکلر.

13:27  ائنسان اوغلو او واخت ملکلرئني گؤنده‌ره​جک و اؤز سچدئکلرئني دؤرد طرفدن، يرئن اوجوندان گؤيون اوجونا قدر، ييغاجاق.

13:28  ائندي مثلي انجئر آغاجيندان اؤيره‌نئن: اونون بوداقلاري تزه​له‌نئب يارپاقلاري چيخان زامان، يايين ياخين اولدوغونو آنلاييرسينيز.

13:29  الجه سئز ده بو شيلرئن باش وردئيئني گؤرنده، بئلئن کي، او ياخيندير، لاپ قاپيدادير.

13:30  دوغروسونو سئزه ديئرم؛ بوتون بونلار باش ورمه‌دن بو نسئل کچمه‌يه​جک.

13:31  دوغروسونو سئزه ديئرم؛ گؤي و ير کچئب گده​جک، لاکئن منئم سؤزلرئم اصلا کچئب گتمه‌يه​جک.

13:32  آمّا او گونو و او ساعاتي نه گؤيده‌کي ملکلر بئلئر، نه ده اوغول اؤزو. آتادان باشقا هچ کئم بئلمئر.

13:33  دئقّتلي و اوياق اولون! چونکي او واختين نه زامان اولدوغونو بئلمئرسئنئز.

13:34  بو، قوربته گدن بئر آدامين وضعئنه بنزر. اِوئندن آيريلان واخت، اِوئنئن ائختئياريني نؤکرلرئنه ورئب، هره‌يه اؤز ائشئني تاپشيردي و قاپيچي‌يا دا امر اتدي کي، اوياق قالسين.

13:35  سئز ده اوياق قالين، چونکي اِو صاحئبئنئن نه واخت گله​جه‌يئني بئلمئرسئنئز. بئلمئرسئنئز آخشام گله​جک و يا گجه ياريسي، خوروزلارين بانلاديغي واخت گله​جک و يا سحر.

13:36  يوخسا قفلتن گلئب، سئزي يوخودا تاپار.

13:37  سئزه ددئکلرئمي هر کسه ديئرم: اوياق قالين."

Chapter 14

14:1  پاسخا و فطئر بايرامينا ائکي گون قالميشدي. باش کاهئنلر و دئن عالئملري عئساني حئيله ائله توتوب اؤلدورمه‌سي باره​ده بئر يول آختاريرديلار.

14:2  آنجاق ديئردئلر: "بو ائش بايرام گونلرئنده اولماسين، يوخسا خالق آراسيندا ائغتئشاش باش ورر."

14:3  عئسا بيت‌عنيادا، جوذاملي شمعونون اوئنده، سوفره باشيندا اوتورموشدو کي، بئر آرواد مرمر قابدا چوخ باهالي خالئص سونبول ياغي گتئردي و قابي سينديريب، ياغي عئسانين باشينا تؤکدو.

14:4  بعضئلري گئليله‌نئب آرالاريندا ددئلر: "بو ياغ نه اوچون بله ائسراف اولوندو؟

14:5  چونکي بو ياغ اوچ يوز دئناردان چوخ ساتيليب فاغيرلارا ورئله بئلردي." و آروادا ديئنمه‌يه باشلاديلار.

14:6  آمّا عئسا ددي: "اونونلا ائشئنئز اولماسين! نه اوچون اونو ائنجئدئرسئنئز؟ او، منه ياخشيليق اتدي.

14:7  چونکي فاغيرلار دائم سئزئن يانينيزداديرلار و نه زامان ائستيه​سئنئز، اونلارا ياخشيليق اده بئلرسئنئز. لاکئن من، دائم سئزئن يانينيزدا ديئلم.

14:8  آرواد الئندن گلني اتدي و باسديريلماق اوچون منئم بدنئمي ائره​لئدن ياغلادي.

14:9  دوغروسونو سئزه ديئرم؛ بو خوش خبر دونيانين هاراسيندا موژده ورئلسه، بو آروادين اتدئيي ائشدن ده ياد ادئله​جک."

14:10  اون‌ائکي شاگئرددن بئري، ائسکاريوتلو يهودا، باش کاهئنلرئن يانينا گتدي کي، عئساني اونلارا تسلئم اتسئن.

14:11  کاهئنلر بونو اشئدنده سوئندئلر و يهودايا پول وعده​سي وردئلر. او دا موناسئب بئر فورصت آختاريردي کي، عئساني اونلارين الئنه ورسئن.

14:12  فطئر بايرامينين اوّلئنجي گونو کي، پاسخانين قوربان قوزوسو او گونده کسئلردي، شاگئردلر عئسايا ددئلر: "پاسخا يمه‌يئني هارادا يمک ائسته‌يئرسن؟ گدئب هارادا حاضيرلاياق؟"

14:13  عئسا شاگئردلرئندن ائکئسئني گؤنده‌رئب اونلارا ددي: "شهره گدئن، سهنگله سو داشي‌يان بئر نفر سئزه راست گلر. اونون دالينجا گدئن.

14:14  بو آدام هارايا گئرسه، او اِوئن صاحئبئنه ديئن:​ «اوستاد ديئر: هارادادير او حاضيرلانان اوتاق کي، شاگئردلرئمله بئر يرده پاسخا يمه‌يئني اورادا يِيئم؟»

14:15  او دا سئزه بالاخانادا دؤشنمئش و حاضيرلانميش بئر اوتاق گؤرسه‌در. پاسخا يمه‌يئني اورادا حاضيرلايين."

14:16  شاگئردلر چيخيب، شهره گتدئلر و هر شيي اونلارا ددئيي کئمي تاپيب، پاسخا يمه‌يئني حاضيرلاديلار.

14:17  آخشام اولاندا عئسا اون‌ائکئلر​له گلدي.

14:18  سوفره باشينا اوتوروب يمک يئينده، عئسا اونلارا ددي: "دوغروسونو سئزه ديئرم، سئزدن بئري، منئمله سوفره باشيندا اوتورانلاردان بئري، منه خيانت اده​جک."

14:19  شاگئردلر پرت اولدولار و بئر-بئر اوندان سوروشدولار: "يقئن کي، من ديئلم؟"

14:20  عئسا اونلارا ددي: "او آدام اون‌ائکئلردن بئري‌دئر، او کي، اَلئني منئمله اوزاديب، چؤره‌يئني کاسايا باتيرير.

14:21  چونکي ائنسان اوغلو اؤزو حاقّيندا يازيلميش اولدوغو کئمي گدئر، لاکئن واي او آدامين حالينا کي، ائنسان اوغلو اونون الئله تسلئم اولونور! او آدام آنادان اولماسايدي، اونا داها ياخشي اولاردي!"

14:22  يمک يئينده عئسا چؤره‌يي گؤتوروب شوکور اتدي و بؤلوب شاگئردلره وردي و اونلارا ددي: "آلين، بو، منئم بدنئمدئر."

14:23  و بئر پئياله گؤتوردو و شوکور ادئب اونلارا وردي و هامي اوندان ائچدي.

14:24  عئسا اونلارا ددي: "بو منئم قانيمدير، عهدئن قاني کي، چوخ آداملار يولوندا تؤکوله​جک.

14:25  دوغروسونو سئزه ديئرم، اوزوم محصولوندان​آرتيق ائچميه​جه‌يم، او گونه قدر کئمي کي، تارينين پادشاهليغيندا تزه​سئني ائچئم."

14:26  و اونلار بئر ماهني اوخوياندان سونرا زيتون داغينا گتدئلر.

14:27  عئسا اونلارا ددي: "هامينيز بودره​يئب دوشه​جکسئنئز. چونکي يازيليب؛ «چوباني ووراجاغام

14:28  آمّا من، دئرئلندن سونرا سئزدن قاباق جلئله گده​جه‌يم."

14:29  لاکئن پطروس اونا ددي: "هامي بودره‌يئب دوشسه ده، من دوشميه​جه‌يم."

14:30  عئسا پطروسا ددي: "دوغروسونو ديئرم؛ بو گون، اله بو گجه خوروز ائکي دفه بانلاماميش، سن مني اوچ دفه ائنکار اده​جکسن."

14:31  آمّا پطروس داها آرتيق تأکئد ادئب ددي: "اگر سنئنله بئرلئکده اؤلمک منه لازيم گلسه بله، سني اصلا ائنکار اتمه‌رم." آيري شاگئردلر ده اله ددئلر.

14:32  اونلار جِتسئماني آديندا بئر يره گلدئلر. عئسا شاگئردلرئنه ددي: "سئز بورادا اوتورون اله کي، من دوعا ادئم."

14:33  و پطروس، يعقوب، و يوحنّاني اؤزو ائله گؤتوردو. درئن سيخينتي و اَلَم عئسانين جانينا دوشدو.

14:34  اونلارا ددي: "جانيم اؤلوم درجه​سئنده کدرلي‌دئر. بورادا قالين و اوياق اولون."

14:35  و اؤزو بئر آز ائره​لي گدئب يره دوشدو و دوعا ادئردي کي، اگر مومکوندور، او ساعات اوندان کچسئن.

14:36  و ديئردي: "آبّا-آتا، سنه هر شي مومکوندور. بو پئياله​ني مندن اوزاقلاشدير. لاکئن منئم ائسته‌دئيئم يوخ، سنئن ائسته‌دئيئن اولسون.»

14:37  عئسا قاييديب شاگئردلري يوخودا تاپدي و پطروسا ددي: «شمعون ياتيبسان؟ بئر ساعات اوياق قالا بئلمه‌دئن؟

14:38  اوياق قاليب دوعا ادئن کي، ائمتاحانا دوشمه‌يه​سئنئز. دوغرودان دا روح ائسته‌يئر، لاکئن بدن ضعئفدئر."

14:39  و گئنه گدئب دوعا اتدي و همن سؤزلري ددي.

14:40  و گلئب گئنه ده اونلاري يوخولاميش تاپدي. چونکي گؤزلري آغيرلاشميشدي و اونا نه جاواب وره​جکلرئني بئلمئردئلر.

14:41  عئسا اوچونجو دفه گلئب، اونلارا ددي: "حله ده ياتيبسينيز؟ حله ده ائستئراحت ادئرسئنئز؟ آرتيق بسدئر. واخت گلدي؛ باخ، ائنسان اوغلو گوناهکارلارين الئنه ورئلئر.

14:42  دورون گدک. باخين، منه خيانت ادن ياخينلاشير."

14:43  عئسا، بو سؤزلري دئين زامان، اون‌ائکئلردن بئري اولان يهودا و اونونلا بئرلئکده، باش کاهئنلر، دئن عالئملري و آغساقّاللار طرفئندن گؤنده‌رئلمئش بؤيوک بئر دسته گلدي. اونلار قيلينجلار و دينکلر​له سئلاحلانميشديلار.

14:44  عئساني تسلئم ادن اونلارلا قرارلاشيب دمئشدي: «کئمي اؤپسم، عئسا اودور. اونو توتون و احتئياطلا آپارين.»

14:45  يهودا، گلدئيي آندا عئسايا ياخينلاشيب «اوستاد» دئيه-دئيه اونو اؤپدو.

14:46  اونلار عئساني ياخالاييب توتدولار.

14:47  لاکئن يانيندا دورانلاردان بئري قيلينجي چکدي و باش کاهئنئن قولونون قولاغيني ووروب کسدي.

14:48  عئسا اونلارا ددي: "مني توتماق اوچون اله قيلنجلار و دينکلر​له گلئبسئنئز کي، اله بئل اوغرو توتورسونوز؟!

14:49  من هر گون معبدده تعلئم ورنده يانينيزدا ائدئم، آمّا مني توتمادينيز. لاکئن قوي يازيلار يرئنه يتئشسئن."

14:50  شاگئردلرئن هاميسي عئساني قويوب قاچديلار.

14:51  عئسانين دالينجا آنجاق چيلپاق بدنئني کتان اؤرتويه سرئمئش بئر جاوان گدئردي. اونلار اونو دا توتدولار.

14:52  لاکئن او، کتان اؤرتويو بوراخيب، چيلپاق قاچدي.

14:53  عئساني باش کاهئنئن يانينا آپارديلار. بوتون باش کاهئنلر، آغساقّاللار، و دئن عالئملري اورايا ييغيلديلار.

14:54  پطروس باش کاهئنئن حيطئنئن ائچه‌رئسئنه قدر اوزاقدان عئسانين دالينجا گتدي و اورادا موحافئظلرله اود يانيندا اوتوروب اؤزونو قيزيشديريردي.

14:55  بو واخت، باش کاهئنلر و بوتون مجلئسده اولانلار عئساني اؤلدورمک اوچون اونون ضئدّئنه شهادت آختاريرديلار، لاکئن تاپميرديلار.

14:56  گرچي بئر چوخلاري اونون ضئدّئنه يالاندان شهادت ورئردئلر، آمّا بو شهادتلر بئر​بئری ائله راست گلمئردي.

14:57  بعضئلري قالخيب عئسانين ضئدّئنه يالاندان شهادت ورئب ديئردئلر:

14:58  "بئز اشئتدئک کي، ديئردي: «ال​‌له تئکئلمئش بو معبدي ييخيب، ال​‌له تئکئلمه​مئش اؤزگه بئرئني اوچ گونده بئنا اده‌رم.»"

14:59  لاکئن اونلارين شهادتلري بئربئري ائله راست گلمئردي.

14:60  باش کاهئن اورتادا آياغا قالخيب، عئسادان سوروشدو: "هچ جاواب ورمئرسن؟ بونلارين سنئن ضئدّئنه وردئکلري شهادت نه‌دئر؟"

14:61  آمّا عئسا سوکوت ادئب، اونون سوآلينا جاواب ورمه‌دي. باش کاهئن گئنه اوندان سوروشوب ددي: "آيا سن موتبارک تارينين اوغلو مسئحسن؟"

14:62  عئسا ددي: "منم. و سئز ائنسان اوغلونو گؤره​جکسئنئز کي، قادئر اولانين صاغيندا اوتوروب بولودلار آراسيندا گلئر."

14:63  باش کاهئن پالتاريني جيريب ددي: "داها شاهئدلره نه احتئياجيميز وار؟

14:64  کوفرونو اشئتدئنئز. سئز نه ديئرسئنئز؟" اونلارين هاميسي عئساني اؤلومه محکوم اتدئلر.

14:65  و بعضئلري اونون اوستونه توپورمه‌يه باشلاديلار. عئسانين گؤزلرئني باغلاييب اونا يوموروق وورا-وورا ديئردئلر: "نبئلئک ات!" و موحافئظلر اونو توتوب ياناقلارينا شئلّه ووروردولار.

14:66  پطروس آشاغيدا، حيطده ائکن، باش کاهئنئن کنئزلرئندن بئري گلدي

14:67  و پطروسو اود يانيندا قيزيشان حالدا گؤرنده، اونا دئقّتله باخيب ددي: "سن ده او ناصئره​لي عئسا ائله ائدئن."

14:68  لاکئن پطروس ائنکار ادئب ددي: "سنئن نه ددئيئني بئلمئرم و آنلاميرام." و چؤله، دالانا چيخدي.

14:69  کنئز قيز اونو گئنه گؤروب، اورادا دورانلارا ددي: "بو آدام، اونلاردان بئرئدئر."

14:70  آمّا پطروس گئنه ده ائنکار اتدي. بئر آز سونرا اورادا دورانلار پطروسا ددئلر: "جلئل​لي اولدوغون اوچون دوغرودان دا سن اونلاردان بئرئسن."

14:71  لاکئن پطروس اؤزونه لعنت ادئب، آند ائچمه‌يه باشلادي: "ددئيئنئز او آدامي تانيميرام."

14:72  و او آندا خوروز ائکئنجي دفه بانلادي. پطروس عئسانين اونا ددئيي سؤزو خاطيرلادي کي، "خوروز ائکي دفه بانلاماميشدان، سن اوچ دفه مني ائنکار اده‌جکسن." و هؤنکور-هؤنکور آغلاماغا باشلادي.

Chapter 15

15:1  سحر تزدن، باش کاهئنلر، آغساقّاللار، دئن عالئملري و بوتون سنهدرئن مصلحتلشدئلر. اونلار عئساني باغلاييب آپارديلار و پئلاطا تسلئم اتدئلر.

15:2  پئلاط اوندان سوروشدو: "آيا يهودئلرئن پادشاهي سَنسن؟" عئسا جاواب ورئب اونا ددي: "ددئيئن کئمي​دئر."

15:3  باش کاهئنلر اونا چوخ شيلرده ائتّئهام ووردولار.

15:4  لاکئن پئلاط گئنه اوندان سوروشدو: "سن هچ جاواب ورمئرسن؟ باخ گؤر نه قدر سنئن ضئدّئنه شهادت ورئرلر."

15:5  آمّا عئسا حله ده جاواب ورمئردي، اله کي، پئلاط تعجّوب اتدي.

15:6  پئلاط هر بايرامدا اوندان خاهئش اتدئکلري محبوسو اونلارا عفو ادردي.

15:7  باراباس آدلي بئري وار ائدي کي، عوصيان واختي آدام اؤلدورن عوصيانچيلارلا بئرلئکده زنجئره وورولموشدو.

15:8  خالق گلئب پئلاطدان ائسته‌دئلر کی، اونلارلا هر زامانکي کئمي اتسئن.

15:9  پئلاط اونلارا جاواب ورئب ددي: "ائسته‌يئرسئنئز سئزئن اوچون يهودئلرئن پادشاهيني آزاد ادئم؟"

15:10  پئلاط بئلئردي کي، باش کاهئنلر پاخيلّيقدان عئساني اونون الئنه ورئبلر.

15:11  لاکئن باش کاهئنلر خالقي قيزيشديرديلار کي، اونون عوضئنه باراباسي آزاد اتسئن.

15:12  او واخت پئلاط گئنه اونلاردان سوروشدو: "بس يهودئلرئن پادشاهي چاغيرديغينيز آداما نه ادئم؟"

15:13  اونلار تکرار چيغيرديلار: "چارميخا چک."

15:14  پئلاط اونلارا ددي: "آخي او، نه پئس ائش گؤروب؟" اونلار داها چوخ باغيرديلار: "اونو چارميخا چک!"

15:15  پئلاط خالقي راضي اتمک اوچون باراباسي آزاد اتدي و عئسايا شالّاق ووردوراندان سونرا اونو چارميخا چکئلمه‌يه وردي.

15:16  عسگرلر عئساني سارايين ائچئنه، "پرِتورئيوم" ديئلن يره آپارديلار و فوجون هاميسيني بئر يره ييغديلار.

15:17  اونا قيرميزي شئنل گيدئردئلر و تئکاندان تاج هؤروب اونون باشينا قويدولار.

15:18  و اونا سالام ورمه‌يه باشلاييب ديئردئلر: "سالام، اي يهودئلرئن پادشاهي!"

15:19  قاميشلا عئسانين باشينا ووروردولار، اوستونه توپوروردولر، و دئز چؤکوب اونا سجده ادئردئلر.

15:20  عسگرلر عئساني ائستهزا ادندن سونرا قيرميزي شئنلي اونون اَينئندن چيخارديب اؤز پالتاريني گيدئردئلر. و اونو چارميخا چکئلمک اوچون اشئيه چيخارتديلار.

15:21  شمعون آديندا کرِنِيلي بئر آدام شهرئن اشئيئندن گلئب اورادان کچئردي. شمعون ائسکندر و روفوسون آتاسي​دير. عسگرلر اونو مجبور اتدئلر کي، عئسانين چارميخيني داشيسين.

15:22  عئساني جولجوتا ديئلن يره گتئردئلر (ترجومه اولونسا، او يرئن آدي "کلّه يري" دمکدئر.)

15:23  او واخت اونا مورلا قاريشميش شراب وردئلر. لاکئن عئسا ائچمه‌دي.

15:24  اونو چارميخا چکدئلر و پالتاريني آرالاريندا پايلاشيب، کئمه نه چاتماسي اوچون پوشک آتديلار.

15:25  گونون اوچونجو ساعاتيندا عئساني چارميخا چکدئلر.

15:26  اونون تقصئري باشينين اوستونده يازيلميش ائدي: "يهودئلرئن پادشاهي."

15:27  اونونلا ائکي اوغرونو دا چارميخا چکدئلر، بئرئني صاغ طرفئنده، او بئرئني ده سول طرفئنده.

15:28  و بلجه موقدّس کئتابدا يازيلديغي سؤز يرئنه يتئشدي کي، ديئر: "موجرئملرله ساييلدي."

15:29  اورادان کچنلر عئساني سؤيوردولر و باشلاريني ترپه‌دئب ديئردئلر: "هِي! معبدي ييخيب اوچ گونده تئکن،

15:30  اؤزونو خئلاص ات. چارميخدان آشاغي اِن."

15:31  باش کاهئنلر و دئن عالئملري ده آرالاريندا اونو رئشخند ادئب ديئردئلر: "اؤزگه​لري قورتاردي، لاکئن اؤزونو قورتارا بئلمئر.

15:32  ائسرايئلئن پادشاهي مسئح، قوي ائندي چارميخدان دوشسون و بئز گؤروب اونا ائمان گتئرک." عئسانين يانيندا چارميخا چکئلنلر ده اونو سؤيوردولر.

15:33  گونون آلتينجي ساعاتي بوتون اؤلکه‌يه قارانليق دوشدو و ساعات دوقّوزا قدر داوام اتدي.

15:34  دوقّوزونجو ساعاتدا عئسا اوجا سَسله باغيردي: "ائلويي، ائلويي، لاما سبقته‌ني؟" ترجومه​سي: "تاريم، تاريم! نه اوچون مني ترک اتدئن؟"

15:35  اورادا دورانلاردان بعضئسي بونو اشئدنده ددئلر: "باخين، ائلياني چاغيرير."

15:36  آرالاريندان بئري قاچيب، بئر ​سونگري سئرکه​يه باتيردي و اونو بئر قاميشين اوجونا تاخيب عئسايا ائچئرتدي و ددي: "قويون گؤرک آيا ائليا اونو اندئرمه‌يه گلئر؟"

15:37  آمّا عئسا اوجا سَسله باغيريب، جان وردي.

15:38  او آندا معبدئن پرده​سي يوخاريدان آشاغي‌يا قدر ييرتيليب ائکي بؤلوندو.

15:39  عئسانين قاباغيندا دوران يوز باشي، اونون بله قيشقيريب جان وردئيئني گؤرنده ددي: "دوغرودان دا بو آدام، تارينين اوغلو ائدي."

15:40  اورادا باش ورنلره تاماشا ادن بعضي آروادلار دا وار ائدي. اونلارين آراسيندا مجدللي مريم، يوسايين و کئچئک يعقوبون آناسي مريم و سالومه ده دايانميشدي.

15:41  عئسا جلئلده ائکن بو آروادلار اونون دالينجا گدئب، اونا خئدمت ادئردئلر. عئسا ائله اورشلئمه گلمئش بئر چوخ آرواد دا اولوب-کچنلره تاماشا ادئردئلر.

15:42  آرتيق آخشام اولموشدو. حاضيرليق گونو، يعني سبّتدن بئر گون قاباق،

15:43  آرئماتايلي يوسئف گلدي و جسارتئني بئر يره ييغيب پئلاطين يانينا گتدي و عئسانين جسدئني ائسته‌دي. يوسئف يهود مجلئسئنئن حؤرمتلي عوضولرئندن بئري​ ائدي و تارينين پادشاهليغيني گؤزله‌يئردي.

15:44  پئلاط عئسانين بله تز اؤلدويوندن تعجّوب اتدي و يوزباشيني يانينا چاغيريب اوندان سوروشدو: "چوخدان اؤلوب؟"

15:45  و يوزباشيدان احوالاتي بئلندن سونرا عئسانين جسدئني يوسئفه باغيشلادي.

15:46  يوسئف ده کتان ساتين آلدي و عئسانين بدنئني چارميخدان آشاغي اندئرئب، کتانا ​بوکدو. ​اونو قايادا قازيلميش بئر قبئره قويدو و قبئرئن آغزينا بئر داش دئيئرلتدئلر.

15:47  مجدللي مريم و يوسايين آناسي مريم اونون هارايا قويولدوغونو گؤروردولر.

Chapter 16

16:1  سبّت گونو کچندن سونرا، مجدللي مريم، يعقوبون آناسي مريم، و سالومه عطئرلر ساتين آلديلار کي، گدئب عئساني عطئرله‌سئنلر.

16:2  و هفته​نئن ائلک گونونده، سحر چوخ اِرکن، گونش دوغان واخت قبئره گلدئلر.

16:3  و آرالاريندا ديئردئلر: "گؤره​سن قبئرئن آغزينداکي داشي بئزئم اوچون کئم دئيئرله‌ده‌جک؟"

16:4  لاکئن باشلاريني قالديريب باخاندا، داشي بئر يانا دئيئرلنمئش گؤردولر. او داش چوخ بؤيوک بئر داش ائدي.

16:5  قبئره گئردئلر و صاغ طرفده آغ پالتار گيئنمئش بئر جاواني اوتورموش گؤره‌نده حيرت اتدئلر.

16:6  جاوان اونلارا ددي: "حيرت اتمه‌يئن! سئز چارميخا چکلئمئش ناصئره​لي عئساني آختاريرسينيز. او دئرئلئب، بورادا ​ديئل. باخين، اونو قويدوقلاري​ ير بورادير.

16:7  ائندي اونون شاگئردلرئنئن و پطروسون يانينا گدئن و اونلارا ديئن کي، او سئزدن قاباق جلئله گدئر. ددئيي کئمي اونو اورادا گؤره​جکسئنئز."

16:8  اونلار قبئردن چيخيب قاچديلار، چونکي تئتره‌مه و حيرت اونلاري بوروموشدو. قورخدوقلاريندان هچ کسه بئر شي دمه‌دئلر.

16:9  هفته​نئن ائلک گونو سحر ارکن، عئسا دئرئلندن سونرا اوّلجه اؤزونو مجدللي مريمه گؤرستدي. عئسا مريمدن يدّي ناپاک روح قووموشدو.

16:10  مريم گدئب عئسا ائله اولانلارا خبر وردي. اونلار ياس توتوب آغلاييرديلار.

16:11  لاکئن عئسانين دئري اولوب اونا گؤروندويونو اشئدنده ائنانماديلار.

16:12  بو شيلردن سونرا، عئسا اونلاردان ائکئسئنه، آيري بئر صورتده کنده گدن واخت گؤروندو.

16:13  بونلار قاييديب شاگئردلره خبر وردئلر، آمّا اونلار بونلارا دا ائنانماديلار.

16:14  و اوندان سونرا عئسا اؤزونو او اون​بئر شاگئرده، اونلار سوفره باشيندا اولاندا ظاهئر اتدي و اونلاري ائمانسيزليقلاري و داش اورکلي اولدوقلاري اوچون دانلادي. چونکي اونلار اونون اؤلولردن دئرئلندن سونرا اونو گؤرنلرئن سؤزلرئنه ائنانماميشديلار.

16:15  عئسا اونلارا ددي: "بوتون دونيايا گدئن و ائنجئلي بوتون خالقا وعظ ادئن.

16:16  ائمان گتئرئب تعمئد اولونان نئجات تاپاجاق؛ لاکئن ائمان گتئرمه‌ين محکوم اولاجاقدير.

16:17  بو علامتلر ائمان گتئرنلرله گده​جک: منئم آديملا ناپاک روحلاري قوواجاقلار. تزه دئللر​له دانيشاجاقلار.

16:18  ائلانلاري اَللري ائله توتاجاقلار. اؤلدورن زَهَر ده ائچسه​لر، اونلارا زئيان يتئرمه‌يه​جک. ناخوشلار اوستونه اللرئني قوياجاقلار و اونلار صاغالاجاقلار."

16:19  بلجه رب عئسا اونلارلا صؤحبت ادندن سونرا گؤيه قالخدي و تارينين صاغيندا اوتوردو.

16:20  شاگئردلر ده گدئب، تارينين سؤزونو هر يرده يايديلار. رب اونلارلا ائدي و کلامي آرخادان گلن علامتلرله تصدئق ادئردي.