Kapingamarangi - Mark

Chapter 1

1:1  Deenei di Longo-Humalia o Jesus Christ, Tama a God.

1:2  E-daamada be-di hai a soukohp Isaiah dela guu-hihi, “God ne-helekai boloo: Au ga-hagau dagu dangada kae-hegau i oo mua e-hagatogomaalia doo ala!

1:3  Tangada e-wolowolo i-lodo di anggowaa boloo: ‘Hagatogomaalia-ina di ala o Dimaadua. Haga-huudonu-ina di ala dela e-hana-iei Mee.’ ”

1:4  Malaa, John ga-gila-mai i-lodo di anggowaa, e-hai ana babdais mo-di agoago, “Huli gi-daha mo godou huaidu, gi-babdais, gei God ga-dumaalia gi godou huaidu.”

1:5  Dogologowaahee mai Judea mo-di waahale Jerusalem, ne-hula belee hagalongo gi-nia agoago a John. Digaula ne-haagi nadau ihala, gei mee ga-babdais digaula i-lodo di monowai Jordan.

1:6  John e-gahu i-nia gahu ngaahulu ‘camel’, e-hai dono duu gili-kau i dono huaidina, ana meegai la nia manu-‘locust’, mo nia meegai maangala o lodo henua.

1:7  Mee ga-haga-iloo gi-nia daangada, “Taane dela ma-ga-hanimoi i ogu muli, la-koia e-aamua i-di-au. Gei-au hogi hagalee tau di-bala gi-lala e-wwede nia suudi o-Maa.

1:8  Au e-babdais goodou gi-nia wai, gei Mee ga-babdais goodou gi-di Hagataalunga-Dabu.”

1:9  Di madagoaa-hua deelaa, gei Jesus ga-hanimoi i Nazareth, tama-waahale i tenua Galilee, ga-babdais go John i-di monowai Jordan.

1:10  Di madagoaa-hua Jesus ne-hanaga gi-daha mo nia wai, Mee gaa-mmada gi-di langi gu-mahuge, di Hagataalunga-Dabu e-haneia i ono nua, e-dina gi-di mwuroi.

1:11  Gei di lee ga-lee-eia i-di langi, “Goe go dagu Dama-daane dela e-aloho-iei Au. Au e-tenetene-adu gi-di-Goe.”

1:12  Di madagoaa-hua deelaa, gei di Hagataalunga-Dabu gaa-hai a Jesus gii-hana gi-di anggowaa,

1:13  gaa-noho i-golo nia laangi e-madahaa, nogo hagamadamada go Setan. Gei nia manu o lodo henua e-noho labelaa i-golo, gei nia daangada di-langi e-loomoi e-hagamaamaa a-Mee.

1:14  I-muli John ne-haga-ulu gi-lodo di hale-galabudi, gei Jesus gaa-hana gi Galilee, ga-hagadele di Longo-Humalia o God.

1:15  Mee ga-helekai, “Di madagoaa gu-dau-mai! Teenua King o God gu-hoohoo-mai! Huli gi-daha mo godou huaidu, hagadonu-ina di Longo-Humalia!”

1:16  Di hanadu-hua o Jesus la-taalinga Tai o Galilee, ga-gidee-ia nia daangada wagadaga dogolua, Simon mo dono duaahina-daane Andrew, e-dadaabui nau iga gi-di gubenge.

1:17  Jesus ga-helekai gi meemaa, “Lloomoi, daudali-mai Au, gei Au ga-aago goolua gi-di haangodo gi-nia daangada.”

1:18  Meemaa gu-limalima gu-diiagi nau gubenge, guu-hula i-muli o Mee.

1:19  Jesus ga-hanadu-hua haga-balua, ga-gidee labelaa tagahaanau daane dogolua, James mo John, nia dama-daane ni Zebedee. Meemaa e-bonobono di-nau gubenge i-hongo di-nau boodi.

1:20  Di madagoaa-hua Jesus ne-gidee meemaa, ga-gahigahi meemaa, gei meemaa ga-diiagi di-nau damana Zebedee mo ana gau-ngalua i-hongo di boodi, gaa-hula i-muli o Jesus.

1:21  Jesus mo ana dama-agoago e-hula gi-di waahale o Capernaum, ga-dau-mai di Laangi-Sabad, gei Jesus ga-ulu gi-lodo synagogee, ga-daamada ga-agoago.

1:22  Digau ala ne-longono, la-gu-goboina huoloo i-nia agoago a-Maa, i Mee hagalee e-agoago be digau haga-donudonu haganoho. Ana agoago le e-mogobuna.

1:23  Nomuli-hua, gei taane dela iai di hagataalunga huaidu i ono lodo, ga-hanimoi gi-lodo synagogee, ga-wolowolo,

1:24  “Ma di-aha dela gaa-hai Kooe mai gi gimaadou, Jesus o Nazareth? Goe ne-hanimoi gi-kinei belee hagahuaidu gimaadou? Au e-iloo-eau Goe: Goe go Tangada Dabuaahia a God dela ne-hagau-mai!”

1:25  Jesus ga-helekai, “Hudee leelee, ulu gi-daha mo taane deenaa!”

1:26  Di hagataalunga huaidu ga-haga-bolebole taane deelaa, ga-wolowolo, ga-ulu-mai gi-daha mo mee.

1:27  Nia daangada huogodoo gu-goboina huoloo, ga-leelee i nadau mehanga, “Ma di-aha deenei? Ma di agoago hoou deenei? Taane deenei le e-mogobuna, Mee e-helekai-hua gi-nia hagataalunga huaidu, gei digaula e-hagalongo gi Mee!”

1:28  Di longo o Jesus gu-limalima-hua guu-dele i-nia guongo o Galilee hagatau.

1:29  Jesus mo ana dama-agoago e-hagatanga i synagogee, e-hula ginaadou mo James mo John, gi-di hale o Simon mo Andrew.

1:30  Tinana di lodo o Simon e-moe magi welengina i-hongo dono moenge. Di dau-hua o Jesus i-golo, gei digaula ga-hagi-anga di ahina gi Mee.

1:31  Gei Jesus ga-hanadu gi mee, gaa-kumi di lima o-maa, ga-haga-duu gi-nua a-mee, dono magi guu-hili, gei mee ga-daamada ga-hai-hegau gi digaula.

1:32  Ga-hiahi-ia di-mee, nia daangada ga-laha-mai nadau gau magi, mono gau iai nia hagataalunga huaidu gi Jesus.

1:33  Digau huogodoo mai di waahale deelaa ga-dagabuli-mai gi-mua di hale deelaa.

1:34  Gei Jesus ga-hagahili digau dogologo ala e-magi i-nia hagadilinga magi, gei gu-hagabagi nia hagataalunga huaidu e-logo. Mee gaa-bule nia hagataalunga huaidu aalaa, bolo gi-hudee leelee, idimaa, digaula e-iloo a-Mee.

1:35  Heniheni dono daiaa, Jesus ga-ala-aga, ga-ulu gi-daha mo-di hale. Ge-Ia gaa-hana gi-daha mo tama-waahale deelaa, gaa-hana gi-di gowaa e-lomo, e-dalodalo.

1:36  Gei Simon mo ono ehoo gaa-hula, ga-halahala a-Mee.

1:37  I-di-nadau gidee a-Mee, ga-helekai, “Digau huogodoo e-halahala Goe.”

1:38  Jesus ga-helekai gi digaula, “Gidaadou e-hula labelaa gi-nia waahale ala e-hoohoo-mai. Au belee hai agu agoago labelaa i-golo, idimaa, deelaa dagu mee ne-hanimoi belee hai.”

1:39  Malaa, Mee gaa-hana laa-lodo Galilee, e-agoago i-lodo nia synagogee, mo-di hagabagibagi nia hagataalunga huaidu.

1:40  Taane magi genegene ga-hanimoi gi Jesus, ga-bala gi-lala i-mua o Mee, gaa-dangi i-di hagamaamaa, “Maa Goe e-hiihai, heia-mua au gi-madammaa.”

1:41  Jesus gu-aloho i-mee, gaa-bili gi mee, ga-helekai, “Au e-hiihai. Madammaa!”

1:42  Di madagoaa hua deelaa, gei di magi guu-hili i taane deelaa, gei mee gu-madammaa.

1:43  Gei Jesus ga-hagau a-mee gaa-bule gi mee, “Hagalongo, goe hudee hagi-anga-ina gi tangada di mee deenei ne-hai. Hana-hua haga-huudonu gi tangada hai-mee-dabu gi-haga-dina-ina goe. Nomuli, gei goe heia tigidaumaha a Moses bolo gi-heia, gi-iloo-ai nia daangada, bolo goe gu-madammaa.” Gei mee ga-hagau taane deelaa gii-hana.

1:44  Gei Jesus ga-hagau a-mee gaa-bule gi mee, “Hagalongo, goe hudee hagi-anga-ina gi tangada di mee deenei ne-hai. Hana-hua haga-huudonu gi tangada hai-mee-dabu gi-haga-dina-ina goe. Nomuli, gei goe heia tigidaumaha a Moses bolo gi-heia, gi-iloo-ai nia daangada, bolo goe gu-madammaa.” Gei mee ga-hagau taane deelaa gii-hana.

1:45  Gei taane deelaa gaa-hana-hua ga-hagadele di longo gi-nia madagowaa huogodoo, gaa-hidi-ai Jesus ga-deemee di-hana i-lodo nia waahale. Gei Mee ga-nohonoho-hua i-nia gowaa lomo, gei nia daangada o-nia gowaa huogodoo gu-lloomoi gi Mee.

Chapter 2

2:1  Nia laangi dulii nomuli, Jesus gaa-hana labelaa gi Capernaum, gei di longo guu-dele bolo Mee gu-i dono hale.

2:2  Nia daangada dogologowaahee ga-lloomoi, gu-deeoo i-lodo di hale, gu-deeoo-mai gi-di ngudu di bontai. Jesus ga-agoago i nnelekai a God gi digaula.

2:3  Dono madagoaa dela e-agoago, gei nia daane dogohaa ga-taga-mai di-nadau dangada mmade ono dudaginga gi Jesus.

2:4  Digaula gu-deemee di-lahi a-mee gi Jesus, idimaa gu-deeoo daangada i-baahi o Jesus. Malaa, digaula ga-haga-bongoo tuatala, gi-huudonu-ia gi Jesus, ga-haga-hege-ia taane magi deelaa i-hongo dono hada gi-baahi o Jesus.

2:5  Jesus ga-gidee-ia-hua nia hagadonu maaloo digaula, ga-helekai gi taane mmade ono dudaginga, “Dagu dama-daane, o huaidu la-gu-maahede.”

2:6  Hunu gau haga-donudonu haganoho e-noho i-golo, e-hagamamaanadu boloo,

2:7  “Taane deenei la-gaa-mee di-helekai beenei beleiaha? Mee e-helekai e-hagahuaidu-hua a God! Ma go God hua modogoia dela e-mee di-wwede nia huaidu!”

2:8  Jesus gu-iloo-hua nadau hagabaubau, ga-helekai gi digaula, “Goodou e-hagabaubau di mee deenei eiaha?

2:9  Dehee di mee e-helekai-ngoohia gi taane mmade ono dudaginga, e-helekai boloo, ‘O huaidu gu-maahede’, be e-helekai boloo, ‘Duu-i-nua, dahia-aga-ina do moenge, haele’?

2:10  Au e-haga-modongoohia-adu gi goodou, bolo ma go Tama-Tangada dela e-mogobuna di-hagamehede nia huaidu i henuailala.” Nomuli, gei Mee ga-helekai gi taane mmade ono dudaginga,

2:11  “Au e-helekai-adu gi-du-gi-nua, dahia-aga-ina do moenge, hana gi doo hale.”

2:12  Digaula e-daumada taane magi deelaa e-duu-i-nua, ga-dahi-aga dono moenge, gaa-hana. Digaula huogodoo gu-goboina huoloo, ga-hagaamu a God, ga-helekai, “Gidaadou digi gidee di mee beelaa.”

2:13  Jesus gaa-hana labelaa gi-muli gi tongotai Tai o Galilee. Nia daangada dogologowaahee ga-dagabuli-mai, gei Mee gaa-hai ana agoago gi digaula.

2:14  I dono haele, gei Mee ga-gidee tangada hagabudu dagitedi, go Levi, tama-daane a Alphaeus, e-noho i-lodo dono oobidi. Jesus ga-helekai gi mee, “Daudali-mai Au.” Gei Levi ga-du-gi-nua, ga-daudali a Mee.

2:15  Nomuli, gei Jesus nogo miami i-di hale o Levi. Dogologo digau hagabudu dagitedi mono gau huaidu nogo daudali a-Mee, gei digau dogologo i digaula e-miami dalia a Jesus mo ana dama-agoago.

2:16  Hunu gau haga-donudonu haganoho ala e-dau gi-nia Pharisee, ga-gidee bolo Jesus e-miami i-baahi digau huaidu, mono gau hagabudu dagitedi, gei digaula ga-heeu gi-nia dama-agoago a-Maa, “Mee e-miami i-baahi digaula beelaa eiaha?”

2:17  Jesus ga-longono, ga-helekai, “Digau nadau magi ai e-hagalee hiihai e-hula gi togidaa, aalaa-hua go digau magi. Au hagalee ne-hanimoi belee gahi-mai digau ala e-donu, gei go digau hua ala gu-huaidu!”

2:18  Tolongo e-dahi, gei nia dama kuulu a John Babdais mo nia dama kuulu a nia Pharisee e-noho hagaonge. Gei hunu gau ga-lloomoi, ga-heeu gi Jesus boloo, “Ma e-aha dela nia dama kuulu a John Babdais mo nia dama kuulu a nia Pharisee e-noho hagaonge, gei au dama e-hagalee hagaonge?”

2:19  Jesus ga-helekai, “Goodou e-hai bolo nia daangada ala i-di hagamiami haga-hai-lodo la-gii-noho hagaonge? Deeai! Di madagoaa taane hai-lodo ma-gaa-noho i nadau baahi gei digau ala i tagamiami deelaa la-hagalee noho hagaonge.

2:20  Tei laangi-hua, gei taane hai-lodo ga-hagatanga gi-daha mo digaula, deelaa di-nadau madagoaa gaa-noho hagaonge.

2:21  “Deai tangada e-pono dana gahu bobo gi-di mee gahu hoou ai, idimaa di mee gahu hoou la-ga-haahi di gahu bobo, koia gaa-hai di bongoo gi-damana.

2:22  Gei deai tangada hogi e-haga-hau ana waini hoou gi-lodo di ulu-mee gili-manu bobo ai, idimaa, nia waini hoou la-ga-haahi di ulu-mee gili manu bobo deelaa, ga-malingi. Nia waini hoou la-belee haga-hau-hua gi-lodo di ulu-mee gili manu hoou.”

2:23  Jesus e-hana laa-lodo di waa-laagau meegai ‘wheat’ i-di Laangi-Sabad. Ana dama-agoago e-hula madalia a-Mee, e-hagihagi nia huwa o-nia laagau-‘wheat’.

2:24  Gei nia Pharisee ga-helekai gi Jesus, “Mmada gi au dama-agoago ala e-hai nia mee ala e-bule go tadau haganoho bolo hagalee hai i-di Laangi-Sabad.”

2:25  Jesus ga-helekai gi digaula, “Goodou digi daulia di mee a David ne-hai i-di madagoaa mee mo ono ehoo ne-hiigai?

2:26  Digaula ne-ulu gi-lodo di hale o God, gaa-gai nia palaawaa dabu ala ne-hagadabu ang-gi God, i-di madagoaa tagi aamua hai-mee-dabu go Abiathar. Tadau haganoho le e-hai bolo go digau hai-mee-dabu hua ala e-mee di-gai nia palaawaa aalaa, gei David guu-gai nia maa, guu-wanga labelaa gi ono ehoo gi-geina.”

2:27  Jesus ga-helekai, “Di Laangi-Sabad la-ne-hai belee hagahumalia-ai tangada, gei tangada la-hagalee ne-hai ang-gi di Laangi-Sabad.

2:28  Malaa, Tama-Tangada le e-dagi labelaa di Laangi-Sabad.”

Chapter 3

3:1  Jesus ga-hanimoi gi-muli gi-di synagogee, gei taane made dono lima i-golo.

3:2  Hunu gau i-golo e-dadaumada a Jesus, bolo gii-gida di-nadau hala i Mee. Digaula ga-mmada-adu gii-donu be mee ga-hagahili taane deelaa i-di Laangi-Sabad.

3:3  Jesus ga-helekai gi taane, “Hanaga gi mua.”

3:4  Gei Mee ga-heeu gi digaula, “Tadau haganoho le e-dumaalia gi ni-aha e-hai go gidaadou i-di Laangi-Sabad? Di humalia be-di huaidu? E-benebene di mouli o tangada, be e-hagahuaidu?” Gei digaula digi helekai-loo.

3:5  Jesus gu-hagawelewele gi digaula, gei di madagoaa la-hua Mee gu-tilikai-hua-laa i digaula, idimaa i nadau lodo hamaaloo mo nadau hagabaubau ihala. Gei Mee ga-helekai gi taane deelaa, “Holohia doo lima gi-daha.” Gei mee gaa-holo dono lima gi-daha, guu-hili.

3:6  Nia Pharisee ga-ulu gi-daha mo synagogee, ga-dagabuli ginaadou mo digau ala e-huli-mai i Herod, e-haga-noho di-nadau hai belee daaligi a Jesus.

3:7  Jesus mo ana dama-agoago ne-lloo-adu gi tongotai di Tai o Galilee, gei digau dogologowaahee ne-daudali a-Mee. Digau aanei digau mai Galilee, Judea,

3:8  Jerusalem, nnenua o Idumea, i-baahi i-dua o Jordan, mo mai i-nia gowaa i-di gili nia waahale o Tyre mo Sidon. Digau huogodoo aanei ne-lloomoi gi Jesus i-di nadau longono i-nia mee a Jesus ala ne-hai.

3:9  Tagabuulinga dangada deelaa gu-dogologowaahee, gaa-hidi-ai Jesus, ga-helekai gi ana dama-agoago gi-hagatogomaalia-ina di boodi e-gaga-ieia, gi-aadee-eia.

3:10  Mee ne-hagahili ana gau magi dogologo, gei digau magi e-hagadau honohono, bolo gii-bili ginaadou gi Mee.

3:11  Digau ala iai nia hagataalunga huaidu ga-gidee-ginaadou a-Mee, gaa-pala gi-lala-loo i-mua o Mee, gaa-wwolo, “Goe go Tama a God!”

3:12  Jesus gaa-bule nia hagataalunga huaidu aalaa, bolo gi-hudee hagi-anga-ina Ia gi-nia daangada.

3:13  Jesus ne-hana gi-hongo dahi gonduu, gaa-gahi ana gau ala e-hiihai ginai, gei digaula guu-hula gi Mee.

3:14  Gei Mee ga-hilihili-aga dilongoholu maa-lua, ga-haga-ingoo go Mee bolo digau agoago-hagau. Mee ga-helekai, “Au ne-hili goodou belee madalia Au, e-hagau goodou e-hagadele di Longo-Humalia.

3:15  Goodou ga-mogobuna di hagabagi nia hagataalunga huaidu.”

3:16  Aanei digau dilongoholu maa-lua a-Mee ne-hilihili: Simon (Jesus gu-hagaingoo a-mee bolo Peter),

3:17  James, mo dono duaahina go John, nia dama-daane Zebedee (Jesus gu-haga-ingoo meemaa bolo Boanerges, dono hadinga boloo, “Nia Dama-daane ni-di Atili”),

3:18  Andrew, Philip, Bartholomew, Matthew, Thomas, James go tama-daane a Alphaeus, Thaddaeus, Simon di ‘Patriot’,

3:19  mo Judas Iscariot, dela ga-hagi-anga Jesus.

3:20  Jesus ne-hana gi dono hale, gei digau dogologo ga-mmui-mai gi Mee, gei Mee mo ana dama-agoago gu-de-aadee di-nadau miami.

3:21  Nia gau o-Maa gaa-longo, gaa-hula belee benebene a-Mee, idimaa, nia daangada e-helekai bolo Mee gu-dadaulia.

3:22  Digau haga-donudonu haganoho ne-lloomoi i Jerusalem, ga-helekai, “Beelzebul la-gu i-lodo o Mee, di tagi o-nia hagataalunga huaidu ne-hai a-Mee gi-mogobuna di-hagabagi digaula.”

3:23  Jesus ga-gahi-mai digaula, ga-helekai i-nia ala-kai, “Setan e-mee di-hagabagi Setan?

3:24  Tenua ma-ga-waewae hagabuulinga, la-ga-heheebagi, ga-mooho gi-daha.

3:25  Maa di madahaanau ma-ga-waewae, ga-heheebagi, di madahaanau deelaa la-ga-mooho.

3:26  Maa nei bolo nia daangada o Setan la-ga-waewae hagabuulinga, la-hagalee duai, ga-hagalee.

3:27  “Deai tangada e-mee di-ulu gi-lodo di hale o taane maaloo belee kae nia goloo o-maa. Go mee hua gu-lawalawa taane maaloo deelaa, gei mee gaa-mee-laa di-kae nia goloo o-di hale o-maa.

3:28  “Au e-hagi-adu di tonu bolo nia huaidu huogodoo o-nia daangada mo nadau helekai huaidu i God, e-mee-hua di-dumaalia ginai.

3:29  Gei tangada dela ma-ga-helekai huaidu i-di Hagataalunga-Dabu le e-deemee di-dumaalia ginai, idimaa, mee guu-doo gi-lodo di hala dela e-deemee di-mehede.”

3:30  Jesus e-helekai beenei, idimaa, hunu daangada ne-helekai, “Mee iai di hagataalunga huaidu i ono lodo.”

3:31  Nia duaahina-daane o Jesus mo tinana o-maa ne-dau-mai. Digaula e-tuu i-malaelae di hale, ga-hagau di-nadau hagailoo, belee gahi-mai a-Mee.

3:32  Digau dogologo i-baahi o Jesus, ga-helekai gi Mee, “Mmada, do dinana, o duaahina-daane, o duaahina-ahina i-malaelae, e-hiihai e-heetugi-adu.”

3:33  Gei Jesus ga-helekai gi digaula, “Dogu dinana la-koai? Ogu duaahina la-koai?”

3:34  Mee ga-mmada-adu-hua gi digau ala e-noho i dono baahi, ga-helekai, “Mmada! Aanei ogu dinana mo ogu duaahina!

3:35  Be ko-ai-hua dela e-hai nia mee a God bolo gi-heia, deelaa go dogu duaahina-daane, dogu duaahina-ahina, mo dogu dinana.”

Chapter 4

4:1  Jesus ga-daamada labelaa ga-agoago i tongotai Galilee. Digau dogologowaahee ga-dagabuli i-di gili o-Maa, ga-hidi-mai-iei Mee gaa-gaga gi-hongo di boodi gaa-noho, gei tagabuli dangada deelaa le e-tuu i tongotai.

4:2  Mee e-agoago gi digaula i-nia mee e-logo i-nia ala-kai, ga-helekai gi digaula,

4:3  “Hagalongo. Dahi daane ne-hana e-haga-nonnono ana lii gi-matilitili.

4:4  Dono haga-nonnono-hua ana lii, hunu lii guu-too gi-taalinga di-ala, gei nia manu ga-mmaangi-mai gaa-gai nia maa.

4:5  Hunu lii ne-too gi-hongo di gowaa haduhadu, e-dee-dohu ono gelegele, gei nia lii gu-matilitili-hua hagalimalima, i-nia gelegele la-hagalee llala.

4:6  Di laa gaa-dii, gaa-dudu nia maa gii-mae, idimaa nia aga digi tomo humalia, nia laagau ga-limalima-hua di maangoo.

4:7  Hunu lii guu-too gi-lodo nia geinga duduia, gei nia geinga duduia la-ga-tomo-aga, ga-haga-deaadee nia laagau aalaa, ga-dee-huwa.

4:8  Hunu lii ne-too gi-hongo nia gelegele humalia, ga-matili, gaa-tomo haga-dubuagina, gaa-huwa. Hunu maa ne-huwa dagi-motolu, dagi-modoono, dagi-llau.”

4:9  Gei Jesus ga-helekai, “Tangada ono dalinga i-golo, gi-hagalongo!”

4:10  Di madagoaa-hua Jesus nogo modogoia, gei nia dama-agoago dilongoholu maa-lua mono gau ala nogo hagalongo, ga-lloomoi, ga-helekai gi Mee gi-hagi-anga-ina nia hadinga o-nia ala-kai aalaa.

4:11  Jesus ga-helekai, “Go goodou-hua ala ne-dumaalia-anga ginai gi-iloo nia mee hagammuni o Teenua King o God, gei digau ala e-noho i-tua, le e-hagalongo-hua gi-nia mee huogodoo mai nia ala-kai.

4:12  Deelaa-laa, ‘Digaula gaa-mmada, gei e-de-gidee. Digaula ga-hagalongolongo, gei hagalee modongoohia! Maa nei bolo digaula ne-gidee, gu-modongoohia, digaula guu-huli ang-gi God, gei Mee ga-dumaalia gi nadau huaidu.’ ”

4:13  Jesus ga-heeu gi digaula, “Goodou digi modongoohia di ala-kai deenei? Malaa, dehee di-godou hai e-iloo nia ala-kai ala i-golo?

4:14  Tangada haga-nonnono lii, deenei la-go tangada dela e-hagadele nnelekai a God.

4:15  Hunu daangada e-hai be nia lii ne-too gi-taalinga di ala. I di-nadau longono-hua nia agoago, gei Setan ga-hanimoi, gaa-kae nia maa.

4:16  Hunu daangada le e-hai be nia lii ne-too gi-hongo nia gowaa haduhadu. I di-nadau longono nia agoago, gei digaula guu-tene ginai, guu-kabe.

4:17  Gei hagalee mau i nadau lodo, ge hagalee noho duai. Di haingadaa, be taaligi ne-hidi-mai i-di Longo-Humalia ma-ga-kila-aga, gei digaula gu-limalima di-diiagi nadau hegau.

4:18  Hunu gau le e-hai be nia lii ne-too gi-lodo nia geinga duduia. Aanei go digau ala ne-hagalongo gi-nia agoago,

4:19  gei e-manawa i-di mouli dolomeenei, mono hagagailaa gi-nia mee, mo nia hiihai gi-nia hagadilinga mee ala i-golo, ga-haga-deaadee nia agoago gi-deai ono huwa ai.

4:20  Hunu daangada le e-hai be nia lii ne-too gi-lodo di gelegele humalia. Aanei go digau ala ne-longono nia agoago, ga-hai-hegau ginai, gaa-huwa dau-logo: hunu gau ne-huwa dagi-motolu, dagi-modoono, dagi-llau.”

4:21  Jesus e-helehelekai hua igolo gi digaula, “Ma iai tangada i-golo e-dugu dana malama gi-lala di boolo, be gi-lala di hada-kiikii? Ma hagalee belee dugu gi-hongo dono lohongo donu?

4:22  Di mee dela e-ngala le e-haga-gila-mai, gei di mee dela e-dugu hagammuni, le e-huge-aga.

4:23  Tangada ono dalinga i-golo, gi-hagalongo!”

4:24  Jesus gu-helekai labelaa gi digaula, “Heia goodou gii-donu gi-nia mee ala ga-hagalongo ginai goodou. Di-godou hai e-hagi-aga digau ala i-golo, dela hogi di hai a God e-hagi-aga goodou, malaa koia ne-huaidu gi-nonua.

4:25  Idimaa, tangada dela ana mee i-golo, le e-wanga labelaa ana mee gi-nonua. Tangada dela ana mee ai, nia mee dulii ala i dono baahi, le e-daa gi-daha.”

4:26  Jesus ga-helekai, “Teenua King o God le e-hai be nia lii e-haga-nonnono go tangada i dana gowaa.

4:27  Mee e-kii i-di boo, ge e-ala i-di aa, gei dela di madagoaa ne-matili-ai nia lii, gaa-tomo, gei mee e-de-iloo be nia maa ne-hai behee.

4:28  Nia gelegele hua ala ne-haga-tomo nia laagau, gaa-hai nia maa gii-huwa. Matagidagi di tila, nomuli di laagau, nomuli gaa-huwa, nia huwa e-honu lii.

4:29  Di madagoaa ma-ga-mmaadua-ai nia huwa, gei tangada gaa-hagi nia maa, idimaa, guu-dau gi taugai.”

4:30  Jesus ga-heeu, “Gidaadou e-hai bolo Teenua King o God le e-hai be di-aha? Di ala-kai behee e-hai-hegau e-haga-modongoohia di-maa?

4:31  Ma e-hai be tangada ma-gaa-kae dana lii-‘mustard’ dela e-dulii-loo i-nia lii i henuailala, gaa-dogi gi-lodo di gelegele.

4:32  Nomuli ga-matili, gaa-tomo, gaa-hai di laagau damanaiee i-nia laagau huogodoo, ga-mangamanga gi-daha, gei nia manu ga-mmaangi-mai, gaa-hai nadau waehongo i dono malu.”

4:33  Jesus e-agoago gi-nia daangada i-nia ala-kai beenei e-logo, ala e-tau ang-gi nadau iloo.

4:34  Mee e-helekai-hua gi-nia daangada i-nia ala-kai. Dono madagoaa-hua ga-madalia ana dama-agoago, mee ga-haga-modongoohia nia hadinga o-nia ala-kai aalaa gi-iloo digaula.

4:35  Hiahi-hua di laangi deelaa, gei Jesus ga-helekai gi ana dama-agoago, “Gidaadou gaa-hula gi-di baahi i-golo o tai.”

4:36  Gei digaula ga-hagatanga gi-daha mo tagabuulinga dangada deelaa, gei nia dama-agoago gaa-kaga gi-di boodi dela e-noho Jesus nonua, gaa-hula ginaadou. Nia boodi labelaa nogo i-golo.

4:37  Gei di madangi guu-gono huoloo, di moana gu-bagibagia huoloo, di boodi gu-hahaawa, gu-hoohoo ga-abulu.

4:38  Jesus e-kii i-muli-waga di boodi, e-ulungi i-di ulungi. Nia dama-agoago ga-hangahanga a-Mee, ga-helekai, “Tangada Agoago, Goe e-de-hei-e-Goe bolo gidaadou gaa-mmade?”

4:39  Jesus ga-duu-i-nua, ga-helekai gi-di madangi, “Kila!” ga-helekai labelaa gi-nia beau, “Bapaba!” Gei di madangi guu-kila, di moana gu-bapaba.

4:40  Gei Jesus ga-helekai gi ana dama-agoago, “Goodou e-mmaadagu di-aha? Goodou digi hagadonu hegau?”

4:41  Digaula gu-mmaadagu huoloo, ga-leelee i nadau mehanga, “Taane deenei la-koai, dela e-hagalongo ginai di madangi mo nia beau?”

Chapter 5

5:1  Jesus mo ana dama-agoago ne-dau i-di baahi i-golo di Tai o Galilee, tenua go Gerasa.

5:2  Di doo-aga Jesus i-di boodi, gei Mee ga-heetugi gi taane ne-haneia i-di gowaa daalunga. Taane deelaa la iai di hagataalunga huaidu i ono lodo.

5:3  Mee e-noho i-di waa-daalunga deelaa, deai tangada e-mee di-lawalawa a-mee gi taula baalanga ai.

5:4  Nia holongo e-logo, ono wae mo ono lima e-lawalawa gi-nia tiini baalanga, gei mee e-haga-mmodummodu-hua nia maa. Mee maaloo dangihi i digau huogodoo ala belee kumi a-mee.

5:5  Di boo mo-di aa, gei mee e-hana i-mehanga waa-daalunga mo i-hongo nia gonduu, e-wolowolo ge e-haga-moholehole ia gi-nia hadugalaa.

5:6  Dono mmada gi Jesus haga-mogowaa, geia gaa-lele gi Mee, ga-dogoduli i-mua o Mee,

5:7  gaa-wolo gi-nua-loo, “Jesus, Tama a God Aamua Huoloo. Ma di-aha dela e-hiihai ginai Goe i-di-au? Au e-dangi-adu i-di ingoo o God, hudee hagahuaidu-ina au!”

5:8  Mee e-helekai beenei, idimaa, Jesus ne-helekai, “Di hagataalunga huaidu-nei, hanimoi gi-daha mo taane deenaa!”

5:9  Gei Jesus ga-heeu gi mee, “Do ingoo la-koai?” Gei taane ga-helekai, “Dogu ingoo go di hagabuulinga dangada dogologo, i gimaadou e-dogologo!”

5:10  Gei mee ga-dangidangi gi Jesus, gi-hudee hagau-ina nia hagataalunga huaidu gi-daha mo tenua deelaa.

5:11  Nia biigi e-logo i-golo, e-miami i-taalinga di gonduu.

5:12  Gei nia hagataalunga ga-tangi gi Jesus gi-hagau-ina ginaadou gi-lodo nia biigi aalaa.

5:13  Gei Mee ga-hagau digaula, gei nia hagataalunga huaidu ga-ulu gi-daha, ga-ulu gi-lodo nia biigi. Nia biigi aalaa, holongo e-lua-mana-(2,000), ga-gabadaa ngaadahi, ga-llele-ia gi-lala i-di laungudu mololo gi-lodo di monowai, gu-mmaalemu huogodoo.

5:14  Nia daane nogo benebene nia biigi, gaa-llele, ga-hagadele di longo nia mee ne-hai gi-lodo di waahale mo nia gowaa benebene manu. Nia daangada huogodoo ga-lloomoi gi-gidee-ginaadou di mee dela ne-hai.

5:15  Di-nadau dau gi-baahi o Jesus, ga-gidee-ginaadou taane dela nogo iai nia hagataalunga huaidu i ono lodo, e-noho hagahumalia, e-ulu ono gahu. Gei digaula gu-mmaadagu.

5:16  Digau ala ne-gidee di mogobuna ne-hai, gaa-kai gi-nia daangada di mee dela ne-hai gi taane deelaa mono biigi.

5:17  Gei digaula ga-tangi gi Jesus, gii-hana gi-daha mo di-nadau guongo.

5:18  I-di gaga-hua o Jesus gi-hongo di boodi, gei taane dela nogo iai nia hagataalunga huaidu, gaa-dangi gi Mee, “Au e-hana dalia Goe.”

5:19  Jesus digi dumaalia gi mee, ga-helekai-hua gi mee, “Hana gi doo hale, gi-baahi o duaahina. Hagi-anga-ina nia mee a Dimaadua ala ne-hai-adu, mo tumaalia o God ne-hai-adu gi-di-goe.”

5:20  Malaa, taane deelaa ga-hagatanga, gaa-hana laa-lodo nnenua o Decapolis, ga-hagadele nia mee a Jesus huogodoo ne-hai, gei digau huogodoo ala ne-longono, gu-goboina huoloo.

5:21  Jesus ne-hana labelaa gi-muli gi-di baahi i-golo o tai. Gei digau dogologo ga-dagabuli-mai gi Mee i tongotai.

5:22  Jairus, tangada aamua synagogee ga-dau-mai, ga-gidee a Jesus, ga-dogoduli gi-lala gi-baahi o-nia babaawae o-Maa,

5:23  ga-dangidangi hagamahi gi Jesus, “Dagu dama-ahina e-magi huoloo, hoohoo gaa-made. Dumaalia-mai-mua, hana, dugu-ina oo lima gi-hongo o-mee, gi-mouli a-mee.”

5:24  Gei Jesus ga-hagatanga, gaa-hana dalia a-mee. Malaa, nia daangada dogologo gaa-hula dalia a Jesus, e-buni-hua i dono gili.

5:25  Di ahina i-golo e-magi-halihali-dodo i-nia ngadau e-madangaholu maa-lua.

5:26  Di magi o-maa ne-hai go nia dogidaa dogologowaahee, gei gu-hagaodi ginai ana bahihadu huogodoo, gei digi hili, e-huaidu-hua-mai i-nia madagoaa huogodoo.

5:27  Mee ne-longono Jesus, gei mee ga-hanadu i-lodo nia daangada i-muli o-Mee,

5:28  ga-hagamaanadu, “Maa au gaa-bili-hua gi-di gahu o-Maa, gei au gaa-hili.”

5:29  Gei mee gaa-bili gi-di gahu o-Maa, gei dono magi guu-hili i-di madagoaa-hua deelaa. Mee gu-longono bolo ia gu-maaloo, dono magi guu-hili.

5:30  Di madagoaa-hua deelaa, gei Jesus gu-hagalongo-ia i-deia, bolo nia mogobuna guu-hula gi-daha mo Ia. Gei Mee gaa-huli gi-muli i-lodo digau dogologowaahee, ga-heeu, “Ma koai dela ne-bili gi dogu gahu?”

5:31  Ana dama-agoago ga-helekai gi Mee, “Goe e-gidee nia daangada dogologo gu-buni-hua i doo gili, gei Goe e-heeu ma koai ne-bili-adu?”

5:32  Jesus ga-halahala tangada dela ne-bili gi dono gahu.

5:33  Gei di ahina deelaa gu-modongoohia di mee dela ne-hai ang-gi deia, gei mee gu-madagu gu-bolebole, ga-hanadu gi-hoohoo gi Mee, ga-dogoduli i-mua o-Mee, ga-hagi-aga haga-huudonu gi Jesus nia mee huogodoo.

5:34  Jesus ga-helekai gi-di ahina, “Dagu dama-ahina, ma go do hagadonu dela ne-hai doo magi gii-hili. Hana i-di tenetene i doo magi dela guu-hili.”

5:35  Di madagoaa Jesus nogo helehelekai, gei digau kae-hegau ne-loomoi i-di hale o Jairus, ga-helekai gi mee, “Dau dama-ahina la-guu-made, gei goe hudee haga-daadaamee-ina Tangada Agoago deenaa.”

5:36  Gei Jesus digi hagalongo gi nnelekai digaula, ga-helekai gi Jairus, “Hudee madagu, hagadonu-hua.”

5:37  Gei Mee digi dumaalia gi tangada e-dahi e-hana dalia Ia, ala-hua go Peter mo James mo dono duaahina go John.

5:38  I di-nadau dau i-di hale o Jairus, Jesus gaa-mmada-hua gi-nia daangada gu-heehee hinihini nadau modongoohia, ga-longono di hagalongoaa mo tangihangi i-golo.

5:39  Mee ga-ulu-adu, ga-helekai gi digaula, “Ma di-aha dela e-hagalongoaa-iei goodou, gei e-dangidangi di-aha? Tama deenaa la-digi made, mee e-kii-hua.”

5:40  Gei digaula ga-gadagada haga-kai-tilikai a-Mee, gei Mee gaa-hai digaula gii-hula gi-malaelae, gaa-lahi tamana mo tinana di tama mo ana dama-agoago dogodolu, ga-ulu gi-lodo di ruum dela e-moe-ai di tama.

5:41  Mee gaa-kumi di lima o-di tama, ga-helekai-adu, “Talitha koum”, dono hadinga boloo, “Tama-ahina, Au e-helekai-adu gi-duu-i-nua.”

5:42  Tama-ahina ga-ala-aga ga-heehee. (Mee gu-madangaholu maa-lua ono ngadau). Di mee deenei ne-hai la-gu-haga-goboina huoloo nia daangada.

5:43  Gei Jesus gaa-bule maaloo gi digaula, bolo gi-hudee hagi-anga-ina gi dahi dangada, ga-helekai labelaa boloo, “Haangai-ina a-mee.”

Chapter 6

6:1  Jesus ga-hagatanga, gaa-hana gi-muli gi dono waahale donu, gei ana dama-agoago ga-daudali a-Mee.

6:2  Mee ga-daamada ga-agoago i-lodo synagogee i-di Laangi-Sabad. Digau dogologo gu-goboina gi-nia agoago a-Maa, ga-heheeu, “Nia agoago a-Maa ne-gaamai i-hee? Ma di kabemee-aha dela i Mee? Gei Mee e-hai ana mogobuna behee?

6:3  Ma hagalee go Mee tangada hau-hale, go tama-daane a Mary, tuaahina-daane o James, Joseph, Judas mo Simon? Gei ono duaahina-ahina hagalee e-noho-hua i-ginei?” Gei digaula ga-haga-balumee a-Mee.

6:4  Jesus ga-helekai gi digaula, “Nia soukohp le e-hagalabagau i-nia gowaa huogodoo, gei digaula nadau hagalabagau ai i-lodo nadau waahale-donu, i-baahi nadau gau, mo nadau madahaanau.”

6:5  Mee gu-deemee di-hai ana mogobuna i-golo, e-dugu-hua ono lima gi-hongo digau magi dulii, gei digaula guu-hili.

6:6  Mee gu-homouli huoloo i digaula nadau hagadonu ai. Gei Jesus gaa-hana gi-nia waahale lligi ala i-golo, ga-agoago gi-nia daangada.

6:7  Mee ga-gahi-mai ana dama-agoago dilongoholu maa-lua, ga-hagau digaula dau-dogolua. Gei Mee gaa-wanga gi digaula di mogobuna gi-maaloo i-nia hagataalunga huaidu,

6:8  ga-boloagi gi digaula, “Hudee kae mee, dela-hua go togodogo, hudee kae meegai, mee dugu-goloo, mo teenedi i-lodo godou budehede.

6:9  Gahu-ina goodou gi-nia suudi, hudee kae gahu digagi.

6:10  Digau ala ma-ga-benebene goodou, goodou noho i-golo, gaa-dae-loo gi-di-godou hagatanga gi-daha mo-di gowaa deelaa.

6:11  Maa di waahale ga-hagalee hagaahi-mai goodou, be hagalee hagalongo-adu, diagia, hula, duiduia nia gelegele godou babaawae, gi-iloo digaula di-nadau hagabalumee di mouli daumaha.”

6:12  Malaa digaula gaa-hula, ga-agoago gi-nia daangada, bolo gii-huli gi-daha mo nadau huaidu.

6:13  Digaula ga-hagabagi nia hagataalunga huaidu e-logo, ga-hagatulu digau magi dogologo gi-nia lolo-olib, gei nadau magi guu-hili.

6:14  King Herod ne-longono-ia nia mee huogodoo, idimaa, di longo o Jesus gu-baalahu. Hunu daangada e-helekai boloo, “John Babdais gu-mouli-aga i mee dela e-mee di-hai ana mogobuna.”

6:15  Hunu gau e-helekai bolo Mee go Elijah, gei hunu gau e-helekai bolo Mee dahi soukohp i-nia soukohp namua.

6:16  Gei Herod ga-longono-ia, ga-helekai, “Mee go John Babdais, ne-tuu dono uwa ko-au, dela gu-mouli labelaa.”

6:17  Herod ne-helekai bolo gi-kumidia John Babdais gi-lawalawa-ina, gi-hudua gi-lodo di hale-galabudi. Herod ne-hai di mee deenei, idimaa go Herodias, dela e-lodo ginai eia, gei di ahina la di lodo donu ni dono duaahina-daane go Philip.

6:18  John Babdais nogo helehelekai gi Herod, “Ma hagalee donu bolo goe e-lodo gi-di lodo o do duaahina.”

6:19  Deelaa di mee a Herodias e-dugineia huoloo i John, ga-hiihai e-daaligi a-mee gii-made, gei e-deemee, idimaa go Herod.

6:20  Herod nogo madagu i John, i mee dela e-iloo-ia bolo John tangada e-donu ge haga-madagu, malaa, mee e-benebene a-mee gi-de-daaligi go tangada. Herod e-hiihai e-hagalongo gi ana helekai, ma e-aha maa mee e-lodo-huaidu i-nia madagoaa huogodoo ma-ga-hagalongo gi John.

6:21  Nomuli, Herodias gaa-gida dana madagoaa humalia. Di laangi haanau Herod, gei Herod guu-hai dana hagamiami gi ana gau aamua mugi-nua, nia dagi-dauwa, mo nia dagi huogodoo Galilee.

6:22  Tama-ahina a Herodias ga-ulu-mai, ga-gagaalege, gu-haga-tenetene Herod mo digau tagamiami. Di king ga-helekai gi tama-ahina, “Goe e-hiihai gi-di-aha? Au ga-gowadu di-ingoo-hua di mee dela e-hiihai ginai goe.”

6:23  Mee gaa-hai dana hagamodu gi tama-ahina, “Au e-doangi bolo au e-gowadu di-ingoo-hua di mee dela e-hiihai ginai goe. E-de-hei-eau be di-maa go di baahi o dogu henua king.”

6:24  Tama-ahina deelaa gaa-hana gi-baahi dono dinana, ga-heeu, “Ma di-aha dela ga-madau ko-au gi mee?” Gei dono dinana ga-helekai, “Go di libogo o John Babdais.”

6:25  Tama-ahina gaa-hana hagalimalima gi-di king, ga-helekai, “Au e-hiihai goe gi-gaamai gi-di-au di libogo o John Babdais i-hongo di pileedi dolomeenei.”

6:26  Telekai deenei la-guu-hai di king gi-lodo huaidu, gei gu-deemee di-haga-deeai gi mee idimaa dana hagamodu dela ne-hai i-mua digau dogologo tagamiami.

6:27  Di madagoaa deelaa, gei mee ga-hagau tangada-dauwa haga-lellele, gi-gaamai di libogo o John. Gei tangada-dauwa gaa-hana gi-di hale-galabudi, gaa-tuu di uwa o John.

6:28  Mee ga-gaamai di libogo o-maa i-hongo di pileedi, gaa-wanga gi tama-ahina, gei tama-ahina gaa-kae gi dono dinana.

6:29  Nia dama-agoago a John la-ga-longono, ga-lloomoi, gaa-kae tuaidina o-maa, gaa-danu.

6:30  Digau agoago-hagau ga-lloomoi labelaa gi-baahi o Jesus, ga-hagi-anga nadau mee huogodoo ala ne-hai ge ne-agoago-ai.

6:31  Jesus mo ana dama-agoago gu-de-iloo di-miami, i digau dogologo ne-mmui-mai. Deenei di mee a Jesus ne-hidi-ai ga-helekai gi digaula, “Gidaadou gaa-hula mada-gidaadou gi tei gowaa e-lomo gi-hagamolooloo goodou.”

6:32  Gei digaula gaa-hula mada-ginaadou i-di boodi gi-di gowaa e-lomo.

6:33  Digau dogologo gaa-mmada gi digau ala e-hagatanga, ga-iloo-hua bolo ma go digaula. Digau huogodoo mai nia waahale gaa-hula lauda, gaa-dau i-di gowaa dela e-hula ginai, i-mua Jesus mo ana dama-agoago ne-dau i-golo.

6:34  Di madagoaa o Jesus ne-doo-aga i-di boodi, ga-gidee-Ia digau dogologowaahee, gei Mee guu-lodo aloho i digaula, i digaula guu-hai gadoo be nia siibi, deai di-nadau dangada hagaloohi ai. Gei Mee ga-daamada ga-agoago e-logo gi digaula.

6:35  Gaa-dae gi-di hiahi-ia di mee, ana dama-agoago ga-lloo-adu gi Mee, ga-helekai, “Ma-gaa-boo-ia di-mee, gei di gowaa deenei la-di gowaa lomo.

6:36  Haga-maaheu-ina digaula gii-hula gii-hui nadau meegai i-nia adu-hale mono gowaa ala e-hoohoo-mai.”

6:37  Jesus ga-helekai, “Goodou haangai-ina digaula.” Gei digaula ga-heeu, “Goe e-hiihai gimaadou gii-hula gi-huia mai madau meegai gi-nia silber e-lua-lau e-haangai digaula?”

6:38  Jesus ga-heeu, “Ma nia palaawaa e-hia i godou baahi? Hula, mmada.” Digaula ga-iloo, ga-hagi-anga gi Mee, “Nia palaawaa e-lima, ge lua iga.”

6:39  Jesus ga-helekai gi ana dama-agoago, “Waewae-ina digaula gii-noho i hagabuulinga gi-hongo nia geinga-tolo.”

6:40  Digaula gaa-noho gi-lala i-nia hagabuulinga-dangada, hagabuulinga-nei e-lau dangada, hagabuulinga-nei e-madalima dangada.

6:41  Jesus ga-dahi-aga nia palaawaa e-lima, ge lua iga, gaa-mmada gi-di langi, ga-danggee ang-gi God, ga-ginigini nia palaawaa, gaa-wanga gi ana dama-agoago bolo gi-duwwaa gi digaula. Gei Mee gaa-duwwe labelaa nia iga e-lua gi digaula huogodoo.

6:42  Digaula huogodoo gu-miami, gu-maaluu.

6:43  Nia dama-agoago gaa-haa nadau gada e-madangaholu maa-lua, guu-honu i-nia mee ala ne-dubu i-nia palaawaa e-lima ge lua iga.

6:44  Di hulu daane ala nogo miami le e-lima-mana-(5,000).

6:45  Jesus ga-helekai i-di madagoaa deelaa gi ana dama-agoago bolo gii-kaga gi-di boodi, gii-hula i ono mua gi Bethsaida, gi-di baahi i-golo o tai. Gei mee ga-haga-maaheu tagabuli dangada deelaa.

6:46  Gei muli dana hagau digaula, Mee gaa-hana gi-hongo di gonduu belee dalodalo.

6:47  Hiahi-ia di mee, gei di boodi la-gu-tungaalodo di monowai, gei Jesus modogoia-hua i-hongo tenua.

6:48  Mee gu-gidee ana dama-agoago e-maaloo gi nadau hoe, idimaa, digaula e-aalo gi-di madangi gono gaa-dae-loo gi mehanga di laa e-dolu mo-di laa e-ono luada, gei mee ga-haele-adu i-hongo tai. Mee ne-haele belee hai eia gii-haa gi-mua digaula,

6:49  gei digaula ga-gidee a-Mee e-haele i-hongo tai. Digaula ga-hagabau bolo ma di ieidu, mo-di wwolo gi-nua.

6:50  Digaula gu-uli nadau gai i-di nadau mmada gi Mee, gei Jesus ga-limalima ga-helekai-adu, “Hagadagadagagee, ma ko-Au deenei. Hudee mmaadagu!”

6:51  Geia gaa-gaga gi-baahi digaula i-hongo di boodi, gei di madangi guu-kila. Nia dama-agoago gu-goboina huoloo,

6:52  idimaa, digaula digi donu gi-di haangai o digau lima-mana-(5,000), i nadau lodo e-bouli hua igolo.

6:53  Digaula ga-aalo-adu gi-di baahi i-golo di tai, gaa-dau-aga i Gennesaret, ga-daula di boodi.

6:54  Di-nadau too-aga-hua i-di boodi, gei nia daangada gu-limalima-hua gu-iloo bolo ma go Jesus,

6:55  gaa-llele laa-lodo tenua hagatau, ga-laha-mai nadau gau magi ala i nadau moenge. Digaula ga-laha-mai digau magi gi-di gowaa ne-longono-ginaadou bolo mee i-golo.

6:56  Nia gowaa huogodoo a Jesus e-hana ginai, nia waahale lligi mo llauehe, nia daangada e-lahi nadau gau magi gi-nia gowaa huihui-mee, e-tangi gi Mee gi-dumaalia gi nadau gau magi gii-bili gi taalinga dono gahu. Malaa, huogodoo ala ne-bili gi-di gahu o-Maa la-guu-hili.

Chapter 7

7:1  Nia Pharisee mono gau haga-donudonu haganoho ne-lloomoi i Jerusalem, ga-dagabuli-mai gi-baahi o Jesus,

7:2  ga-gidee bolo hunu gau i ana dama-agoago e-miami hagalee tono nadau lima, di hai deenei le e-hagalee hiihai ginai nia Pharisee bolo nia daangada gi-heia.

7:3  (Idimaa, nia Pharisee mo digau o Jew ala i-golo, le e-daudali nia agoago o nadau maadua mai i-mua. Digaula hagalee miami, go di-maa hua digaula guu-tono nadau lima gi-humalia.

7:4  Digaula hagalee gai nia mee ala e-gaamai i-nia gowaa huihui-mee maa nia maa digi gaugau-lia. Gei digaula e-daudali nadau haganoho e-logo ala ne-daahi-mai i-mua, be-di hai dela e-tono-ai nia ibu, mono baalanga-miami, mono boolo-mmee, mo nadau hada-kiikii.)

7:5  Malaa, nia Pharisee mo digau haga-donudonu haganoho ga-heeu gi Jesus, “Meenei, au dama-agoago le e-aha, ala hagalee daudali di hai o tadau maadua mai i-mua i-di nadau miami ge hagalee tono nadau lima i-mua?”

7:6  Jesus ga-helekai gi digaula, “E-donu-hua go nia mee a Isaiah ala ne-hagi-aga godou huaidu, ge ala guu-hihi boloo, ‘God gu-helekai: Digau aanei le-hagalaamua-hua Au i nadau helekai, gei nadau lodo le e-mogowaa-loo i-di-Au.

7:7  E-balumee go di-nadau hai-daumaha mai gi-di-Au, i ginaadou e-agoago-hua nia haganoho o-nia daangada bolo nia mee mai dogu baahi.’

7:8  “Goodou guu-kili gi-daha nia haganoho a God, gu-haga-dahidamee-hua nia agoago o-nia daangada.”

7:9  Jesus ga-duudagi-adu-hua, “E-donu, idimaa, goodou e-oho nia haganoho a God, gei goodou e-hagalabagau-hua go godou agoago.

7:10  Idimaa, Moses gu-helekai boloo, ‘Gi-hagalabagau-ina do damana mo do dinana, gei tangada ma-ga-hagauwwou dono damana be go dono dinana, le e-daaligi gii-made.’

7:11  “Gei goodou e-agoago bolo maa tangada dana mee i-golo belee hagamaamaa dono damana be go dono dinana, gei mee gu-helekai bolo di mee deelaa la-di Corban (dono hadinga boloo, di mee ni God),

7:12  gei mee e-humalia-hua ma-ga hagalee hagamaamaa dono damana be dono dinana.

7:13  Godou agoago beenei ala e-hagadele gi-nia daangada le e-tono gi-daha nia helekai a God. E-logo nia mee beenei i-golo e-hai go goodou.”

7:14  Jesus ga-gahi-mai labelaa digau dogologo aalaa, ga-helekai, “Goodou huogodoo, hagalongo gii-donu.

7:15  Deai dahi mee i daha e-ulu gi-lodo tangada, ga-haga-milimilia a mee ai. Go nia mee hua ala e-loomoi i-lodo o mee ala e-haga-milimilia a-mee.

7:16  [Tangada ono dalinga i-golo, gi-hagalongo.”]

7:17  Gei Jesus ga-hagatanga gi-daha mo digau dogologo, ga-ulu gi-lodo di hale, ana dama-agoago ga-heeu gi Jesus tadinga di ala-kai deelaa.

7:18  Jesus ga-helekai gi digaula, “Goodou e-de-kabemee i digau ala i-golo! Goodou digi iloo? Di mee e-hana gi oo lodo e-haga-milimilia goe ai.

7:19  Idimaa, di mee deenei hagalee hana gi-lodo do manawa, e-hana-hua gi-lodo do dinae, gaa-lawa, ga-ulu gi-daha mo do huaidina.” (Telekai deenei, Jesus gu-haga-modongoohia bolo nia meegai huogodoo le e-humalia dono gai.)

7:20  Gei Mee ga-helekai, “Di mee dela e-hanimoi gi-daha mo lodo tangada, deelaa di mee e-haga-milimilia tangada.

7:21  Idimaa, mai di manawa o tangada e-loomoi-ai nia maanadu huaidu, e-dagi a-mee gi-nia mee huaidu, gaiaa, daaligi-dangada gii-made,

7:22  hai be-di manu, hagagailaa, mono huaidu ala i-golo, halahalau, hagalee langaadia i-di huaidu, dubua, maanga, hagamuamua mo tee-hagalongo.

7:23  Aanei nia mee huaidu e-daamada-aga i-lodo tangada ala e-haga-milimilia tangada.”

7:24  Jesus ga-hagatanga, gaa-hana gi tenua hoohoo gi-di waahale Tyre. Gei Mee ga-hanadu, ga-ulu-adu gi-lodo di hale, e-de-hiihai bolo nia daangada gi-iloo bolo Ia gu-i-golo, gei e-deemee di-ngala.

7:25  Di ahina dana dama-ahina iai di hagataalunga huaidu i ono lodo ga-iloo bolo Jesus i-di gowaa deelaa, ga-limalima dono hanadu, gaa-bala-ia gi-lala gi-nia babaewae Jesus.

7:26  Mee di ahina tuadimee, ne-haanau i Phoenicia i Syria. Gei mee gaa-dangi gi Jesus gi-haga-bagia di hagataalunga huaidu gi-daha mo dana dama-ahina.

7:27  Gei Jesus ga-helekai, “Gidaadou e-haangai nia dama i-mua, hagalee humalia di-kili tagangudu o-nia dama gi-nia paana.”

7:28  Gei di ahina ga-helekai, “Meenei, e-donu, gei nia paana i-lala teebele e-gai nia mee dubu i-nia dama.”

7:29  Jesus ga-helekai, “Idimaa goe gu-helekai beenaa, hana gi doo hale, di hagataalunga huaidu la-guu-hana gi-daha mo dau dama-ahina.”

7:30  Di ahina gaa-hana-hua gi dono hale, ga-gidee-ia dana dama-ahina e-moe i-hongo di hada-kii, di hagataalunga huaidu gu-de-igolo.

7:31  Jesus ga-hagatanga i-nia henua o Tyre, e-hana laa-lodo Sidon gi-di Tai o Galilee, mo laa-lodo tenua go Decapolis.

7:32  Gei nia daangada ga-laha-mai gi Mee di-nadau daane longoduli ge deemee di-leelee, gaa-dangi gi Jesus gi-dugu-ina dono lima gi-hongo o mee.

7:33  Gei Jesus gaa-lahi a-mee gi-daha mo nia daangada, gaa-wanga ono madaalima gi-lodo nia dalinga o-maa, gaa-bui ana haawale, gaa-bili gi tolole o taane deelaa.

7:34  Gei mee gaa-mmada gi-di langi, gaa-dogi gi-nua mo-di helekai-adu gi taane deelaa, “Ephphatha”, dono hadinga bolo “Maahuge!”

7:35  Gei nia dalinga o-maa gu-maahuge, gu-longono, gei dono holole guu-mee di-leelee.

7:36  Gei Jesus gaa-bule gi digaula, bolo hudee hagi-anga-ina di mee deenei gi-nia daangada. Gei digaula koia ne-maaloo-dangihi di-nadau hagadele di-maa.

7:37  Gei digau ala ne-longono, gu-goboina huoloo, ga-helekai, “Ana mee huogodoo ala ne-hai, guu-gila humalia huoloo! Mee ne-hai tangada longoduli ge deemee di-leelee gi-longono, gi-leelee!”

Chapter 8

8:1  Digi duai, tuai hagabuulinga dangada dogologo gu-dagabuli-mai gi-di gowaa e-dahi, guu-odi nadau meegai, gei Jesus ga-gahi-mai ana dama-agoago gi dono baahi, ga-helekai,

8:2  “Au gu-aloho i tagabuulinga dangada dogologo deenei, guu-dolu nadau laangi i dogu baahi, gu-nadau mee e-gai dolomeenei ai.

8:3  Maa Au ga-hagau digaula hiigai, gei digaula ga-hagalibelibeina i-di nadau hula, idimaa, hunu ginaadou ne-loomoi haga-mogowaa.”

8:4  Ana dama-agoago ga-heeu, “Di anggowaa beenei le e-mee di-gida nia meegai e-dohu di-haangai nia daangada huogodoo aanei?”

8:5  Jesus ga-heeu, “Nia palaawaa e-hia i godou baahi?” Digaula ga-helekai, “Nia palaawaa e-hidu.”

8:6  Mee ga-helekai gi tagabuulinga daangada gii-noho gi-lala. Gei Mee ga-dahi-aga nia palaawaa e-hidu, ga-danggee gi God, ga-ginigini, gaa-wanga gi ana dama-agoago gi-duwwaa gi digaula, gei ana dama-agoago gaa-duwwe nia maa.

8:7  Digaula nadau dama-iga labelaa i-golo, gei Jesus ga-danggee i-nia maa, ga-helekai gi ana dama-agoago gi-duwwaa-ina labelaa gi digaula.

8:8  Digaula ga-miami, gu-maaluu. Holongo digaula huogodoo le e-haa-mana-(4,000). Nia dama-agoago gaa-haa nia gada e-hidu gi-nia mee ala ne-dubu. Gei Jesus ga-haga-maaheu digaula.

8:9  Digaula ga-miami, gu-maaluu. Holongo digaula huogodoo le e-haa-mana-(4,000). Nia dama-agoago gaa-haa nia gada e-hidu gi-nia mee ala ne-dubu. Gei Jesus ga-haga-maaheu digaula.

8:10  Di madagoaa-hua deelaa, gei Jesus mo ana dama-agoago gaa-kaga gi-hongo di boodi, gaa-hula gi-nia henua o Dalmanutha.

8:11  Hunu Pharisee ne-lloomoi, gaa-hai nadau donu gi Jesus, e-hiihai e-haga-hala a-Mee, ga-helekai gi Mee, “Heia dau mogobuna gi-modongoohia bolo God la-i do baahi.”

8:12  Jesus gaa-dogi-aga-loo i ono lodo ga-helekai, “Nia daangada dolomeenei, le e-aha ala e-hiihai gi-di mogobuna? Goodou gi-iloo bolo di mogobuna e-wanga gi-di adu-dangada dolomeenei ai.”

8:13  Mee ga-hagatanga, gaa-hana i-di boodi gi-di baahi i-golo o tai.

8:14  Nia dama-agoago a-maa gu-de-haawa di-gaamai nadau palaawaa gii-dohu, di palaawaa hua-e-dahi dela i-baahi digaula i-hongo di boodi.

8:15  Jesus ga-helekai, “Goodou haga-ligaliga i-nia ‘yeast’ o-nia Pharisee mo nia ‘yeast’ o Herod.”

8:16  Digaula ga-leelee i nadau mehanga, “Mee e-helekai beelaa, idimaa, gidaadou tadau palaawaa ai.”

8:17  Jesus ga-iloo nadau helekai, ga-heeu, “Ma e-aha goodou e-helekai bolo godou palaawaa ai? Goodou digi donu, gei digi iloo nia mee aanei? Goodou e-noho-boo godou lodo?

8:18  Godou golomada i-golo gei e-dee-gida? Godou dalinga i-golo, gei e-dee-longono? Goodou gu-de-langahia

8:19  di madagoaa ne-ginigini agu palaawaa e-lima, gaa-duwwe gi digau e-lima-mana-(5,000)? Nia gada e-hia ala ne-haa go goodou gii-honu i-nia mee ala ne-dubu?” Digaula ga-helekai, “E-madangaholu maa-lua.”

8:20  Gei Jesus ga-heeu, “Di madagoaa ne-ginigini agu palaawaa e-hidu ang-gi digau e-haa-mana-(4,000), nia gada e-hia ala ne-haa go goodou gii-honu i-nia mee ala ne-dubu?” Gei digaula ga-helekai, “E-hidu.”

8:21  Jesus ga-heeu, “Malaa goodou digi donu beleiaha?”

8:22  Di-nadau dau i Bethsaida, gei nia daangada ga-laha-mai di-nadau dangada deegida gi Jesus, gaa-dangi gi Mee gii-bili gi di-nadau dangada.

8:23  Jesus gaa-kumi di lima o-maa, gaa-dagi gi-daha mo-di waahale. I-muli di-bui ana haawale gi-nia golomada o-maa, ga-daahi ono lima gi-hongo o-mee, ga-heeu, “Goe gu-gidee?”

8:24  Gei mee ga-ala-aga ga-helekai, “Uaa, au gu-gidee nia daangada, e-hai be nia laagau e-heehee.”

8:25  Jesus gaa-dugu labelaa ono lima gi-hongo nia golomada o-maa. Gei mee gaa-mmada-laa haga-madammaa gi-nia mee huogodoo.

8:26  Jesus ga-hagau a-mee gi dono hale ga-helekai gi mee, “Goe hudee hana labelaa laa-lodo di waahale deelaa.”

8:27  Gei Jesus mo ana dama-agoago gaa-hula gi-nia waahale e-hoohoo gi Caesarea Philippi. I di-nadau hula, gei Jesus ga-heeu, “Hagia-mai malaa, nia daangada le e-helekai bolo Au koai?”

8:28  Gei digaula ga-helekai, “Hunu gau e-helekai bolo Goe go John Babdais, gei hunu gau e-helekai bolo Goe go Elijah, hunu gau e-helekai bolo Goe tangada i-nia soukohp.”

8:29  Gei Jesus ga-heeu, “Gei goodou bolo Au koai?” Peter ga-helekai, “Goe go di Mesaia.”

8:30  Gei Jesus ga-helekai bule gi digaula, “Goodou hudee hagi-anga-ina Au gi-nia daangada.”

8:31  Jesus ga-daamada ga-agoago gi ana dama-agoago, “Tama-Tangada le e-hai-loo gi-hagaduadua, ge e-haga-balumee go nia dagi mmaadua, mo nia dagi aamua hai-mee-dabu, mo digau haga-donudonu haganoho. Gei Au ga-daaligi gii-made, gei i-muli nia laangi e-dolu, ga-mouli-aga.”

8:32  Mee gu-helekai haga-mmaa gi-modongoohia digaula. Malaa, Peter gaa-lahi a-Mee gi-mada-ginaua, gaa-hai ono ngudu gi Mee.

8:33  Gei Jesus gaa-huli gi-daha mo Peter, gaa-mmada gi ana dama-agoago, ga-haga-donu-adu Peter, “Tuu-i-daha mo Au, Setan. Au maanadu la-hagalee mai baahi o God, nia hagamaanadu hua dangada-dangada.”

8:34  Gei Jesus ga-haga-dagabuli-mai digau dogologo, mo ana dama-agoago, ga-helekai, “Maa tangada e-hiihai e-daudali Au, gi-haga-balumee-ina ia, aamoo dono loobuu, daudali-mai Au.

8:35  Maa goe e-hiihai e-bida benebene do mouli, gei goe ga-de-gidee do mouli. Maa goe ga-diiagi do mouli i-di-Au mo-di Longo-Humalia, goe ga-gidee do mouli.

8:36  Di humalia-aha e-gila-adu gi-di-goe maa goe ga-hai-mee gi henuailala hagatau, gei e-deemee di-hai-mee gi do mouli donu? Hagalee!

8:37  Di mee i-golo ai bolo e-wanga gei goe ga-hai-mee labelaa gi do mouli!

8:38  Tangada dela e-langaadia i-di-au, mo agu agoago i-lodo nia laangi mouli huaidu dolomeenei, gei Tama-Tangada le e-langaadia labelaa i mee, i dono hanimoi i-nia madamada o dono Damana, mo digau di-langi haga-madagu.”

Chapter 9

9:1  Jesus ga-helekai, “Au e-hagi-adu gi goodou bolo hunu gau i-ginei la-hagalee mmade, gaa-dae-loo gi di-nadau gidee Teenua King o God e-dau-mai mo ono mogobuna.”

9:2  I-muli nia laangi e-ono, Jesus gaa-lahi a Peter, James mo John gi-hongo di gonduu duuduu i-nua mada-ginaadou. Gei Mee gu-dina-gee i-mua digaula.

9:3  Dono gahu gu-madamada, gu-kene hila-mmaa, deai tangada i henuailala e-mee di-haga-mmaa ono gahu beelaa ai.

9:4  Nia dama-agoago dogodolu aalaa gaa-mmada gi Elijah mo Moses e-leelee ginaadou mo Jesus.

9:5  Peter ga-helekai gi Jesus, “Meenei, koia e-humalia go tadau noho i-ginei. Gimaadou ga-haga-duu-aga madau damaa-hale e-dolu, e-dahi ni-aau, ge e-dahi ni Moses, ge e-dahi ni Elijah.”

9:6  Peter gu-de-iloo-ia di-helekai, idimaa mee mo ono ehoo e-uli nadau gai.

9:7  Gei di gololangi ga-dehee-mai laa-nua, ga-haga-malu digaula, gei di lee ga-lee-mai i-lodo di gololangi, “Deenei dagu Dama dela e-aloho-iei Au, goodou hagalongo gi Mee!”

9:8  Digaula ga-mmada-adu-hua, go Jesus hua modogoia i nadau baahi.

9:9  I di-nadau lloo-ia i-di gonduu, gei Jesus gaa-bule digaula, “Hudee hagi-anga-ina godou mee ala ne-gidee-goodou gi tei dangada, gaa-dae-loo gi Tama-Tangada ma-ga-mouli-aga i-di made.”

9:10  Digaula gu-daudali ana helekai, gei digaula ga-daamada ga-heheeu i nadau mehanga tadinga telekai, “di mouli-aga i-di made”, le e-hai bolo-aha?

9:11  Digaula ga-heeu gi Jesus, “Digau haga-donudonu haganoho le e-aha ala e-helekai bolo Elijah le e-hai-loo gi-hanimoi matagidagi?”

9:12  Gei Jesus ga-helekai, “E-donu, Elijah le e-hanimoi i-mua, e-hagatogomaalia nia mee huogodoo. Di Beebaa-Dabu le e-aha dela e-helekai bolo Tama-Tangada le e-hagaduadua kono, ge haga-balumee?

9:13  Au e-hagi-adu gi goodou bolo Elijah la-gu-hanimoi, gei nia daangada ne-hai-anga go nadau mee ala e-hiihai ginai, be nnelekai ala guu-hihi gi-lodo di Beebaa-Dabu.”

9:14  Di-nadau dau-adu-hua gi ana dama-agoago ala i-golo, ginaadou gaa-mmada gi digau dogologo guu-hii digaula gi-lodo, mo digau haga-donudonu haganoho e-lagalagamaaloo gi digaula.

9:15  Di madagoaa o-nia daangada ne-gidee a Jesus, gei ginaadou gu-homouli huoloo, ga-llele-adu ga-hagaaloho gi Mee.

9:16  Jesus ga-heeu gi ana dama-agoago, “Ma di-aha dela e-lagalagamaaloo-ai goodou gi digaula?”

9:17  Taane i tagabuli deelaa ga-helekai, “Tangada Agoago, au gu-laha-mai dagu dama-daane gi-di-Goe, idimaa di hagataalunga huaidu la-gu i ono lodo, mee e-deemee di-leelee.

9:18  Di madagoaa di hagataalunga huaidu ma-ga-ulu gi-lodo o-mee, geia gu-hinga-hua gi-lala, guu-puu biabi dono ngudu, ge e-kadi ono niha, gei dono huaidina gu-dumaaloo. Gei-au ne-wanga a-mee gi au dama-agoago, gi-haga-bagia di hagataalunga huaidu deelaa, gei digaula e-deemee.”

9:19  Jesus ga-helekai, “Goodou digau de-hagadonu huoloo! E-waalooloo behee Au e-hai gii-noho i godou baahi? Ge waalooloo behee dogu hagakono ogu lodo i goodou? Laha-mai tama-daane deenaa!”

9:20  Digaula ga-laha-mai a-mee gi Jesus. Di madagoaa-hua di hagataalunga huaidu ne-gidee-ia a Jesus, gaa-hai tama-daane deelaa gi-bolebole, gaa-hinga gi-lala, ga-gaehagaeha i-hongo di gelegele, gaa-puu biabi dono ngudu.

9:21  Jesus ga-heeu gi tamana di tama, “Gu-waalooloo behee i-dana hai beenei?” Gei tamana ga-helekai, “Mai hua i tama.

9:22  Nia holongo e-logo, gei di hagataalunga huaidu belee daaligi a mee gii-made, i dana huduhudu a-mee gi-lodo di ahi, mo lodo nia monowai. Aloho-mai, hagamaamaa-ina-mai gimaua, maa Goe e-mee!”

9:23  Jesus ga-helekai, “Uaa, maa goe e-mee di hagadonu. Nia mee huogodoo le e-mee i-baahi digau ala nadau hagadonu i-golo.”

9:24  Di madagoaa-hua deelaa, tamana o tamagiigi-daane la-gaa-wolo gi-nua, “Au e-hagadonu, gei au e-dee-dohu-loo. Hagamaamaa-ina au i dogu hagadonu gi-maaloo!”

9:25  Jesus gaa-mmada gi tagabuulinga daangada deelaa, gu-honodia-hua guu-hii ginaadou gi-lodo, geia ga-helekai gi-di hagataalunga huaidu deelaa, “Goe go di hagataalunga longoduli ge hagalee leelee, Au e-helekai-adu gi-ulu-mai gi-daha mo tamagiigi-daane deenaa, hudee ulu labelaa gi-lodo o mee.”

9:26  Gei di hagataalunga deelaa gaa-dangi, ga-haga-hinga tama-daane gi-hongo di gelegele, ga-ulu-mai gi-daha, gei tama-daane la-guu-hai be tangada ne-made, gei hunu gau gu-helekai bolo mee guu-made.

9:27  Gei Jesus gaa-kumi di lima o-maa, ga-hagamaamaa-aga a-mee gi-du-gi-nua.

9:28  I-muli Jesus mo ana dama-agoago ne-mada-ginaadou i-lodo di hale, digaula ga-heeu gi Mee, “Gimaadou e-aha ala ne-deemee di-hagabagi di hagataalunga huaidu deelaa?”

9:29  Gei Jesus ga-helekai, “Tagadilinga deenei le e-hai-hua gi talodalo, di mee e-mee i-golo ai.”

9:30  Jesus mo ana dama-agoago ga-hagatanga, gaa-hula laa-lodo o Galilee. Jesus hagalee hiihai nia daangada gi-iloo di gowaa dela iei-Ia.

9:31  Idimaa, Mee e-aago gi ana dama-agoago boloo, “Tama-Tangada la-gaa-wanga gi digau ala belee daaligi a-Mee gii-made. Nia laangi e-dolu nomuli, gei Mee ga-mouli-aga.”

9:32  Malaa, digaula digi donu gi-di agoago deenei, digaula hogi e-mmaadagu di heeu gi Mee.

9:33  Di-nadau dau i Capernaum, ga-ulu gi-lodo di hale, gei Jesus ga-heeu gi ana dama-agoago, “Ma di-aha dela nogo lagamaaloo-ai goodou i tadau lloomoi i-hongo di ala?”

9:34  Gei digaula digi leelee, idimaa, digaula nogo lagamaaloo i nadau mehanga be-di ma koai dela koia e-aamua.

9:35  Jesus gaa-noho gi-lala, ga-gahi-mai ana dama-agoago dilongoholu maa-lua, ga-helekai, “Tangada i goodou e-hiihai gi-togodahi, geia gi-dugu eia gi-mugi-muli-loo gii-hege gi digau huogodoo.”

9:36  Gei Mee ga-gahi-mai dana damagiigi, ga-haga-duu i nadau mua, ga-bulubulu-mai a-mee gi ono lima, ga-helekai,

9:37  “Be koai-hua dela e-benebene tamagiigi beenei i dogu ingoo, ia ne-benebene-hua Au, gei tangada dela ne-benebene Au, ia ne-benebene Au mo Mee dela ne-hagau-mai Au.”

9:38  John ga-helekai gi Mee, “Tangada Agoago, gimaadou guu-mmada gi tangada e-hagabagi ana hagataalunga huaidu i do ingoo, gei gimaadou guu-bule gi mee bolo gi-hudee heia, idimaa, mee hagalee tangada i tadau hagabuulinga.”

9:39  Jesus ga-helekai, “Hudee buleina a-mee, idimaa, ma deai tangada e-hai ana mee haga-goboina i dogu ingoo, ga-nomuli ga-helekai huaidu i-di-Au ai.

9:40  Be koai-hua dela hagalee hai-baahi-mai gi gidaadou, la-di hoo ni gidaadou.

9:41  Be koai-hua dela ma-ga-gowadu dana ibu-wai gi-inumia go goodou, idimaa, goodou digau ni-aagu, mee e-hai-loo gii-kumi dono hui.

9:42  “Tangada dela ma-gaa-hai dana mee gi tamagiigi beenei, gaa-hidi-iei mee, gaa-hudu gi-daha dono hagadonu, tangada beenei le e-humalia e-nnoo dono uwa ginai di hadu mmili palaawaa damanaiee, e-hudu gi-lodo di moana.

9:43  Maa doo lima e-hagabagege do hagadonu, la-duudia gi-daha, ma koia e-humalia di-ulu gi-di mouli mo doo lima hua e-dahi, i doo hana mo oo lima e-lua gi-lodo di gowaa hagaduadua, di ahi e-deemee di-made.

9:44  [Nia ila ala e-gai digaula, e-deemee di-mmade, gei di ahi dela e-dudu digaula, e-deemee di-made.]

9:45  “Maa doo wae e-hagabagege do hagadonu, la-duudia gi-daha, idimaa, e-koia e-humalia di-ulu gi-di mouli mo doo wae e-dahi, i doo hana mo oo wae e-lua gi-lodo di gowaa hagaduadua.

9:46  [Nia ila ala e-gai digaula, e-deemee di-mmade, gei di ahi dela e-dudu digaula, e-deemee di-made.]

9:47  “Maa do golomada e-hagabagege do hagadonu, kabee-ina gi-daha. Ma koia e-humalia doo ulu gi Teenua King o God mo do golomada e-dahi, i-di goe dela gaa-hudu gi-lodo di gowaa hagaduadua mo o golomada e-lua.

9:48  Nia ila ala e-gai digaula, e-deemee di-mmade, gei di ahi dela e-dudu digaula, e-deemee di-made.

9:49  “Nia daangada le e-haga-madammaa gi-di ahi, gadoo be tigidaumaha dela e-haga-madammaa gi-nia toolo.

9:50  “Nia toolo la nia mee humalia, gei dolomaa nia toolo aalaa la-ga ono mmala ai, dehee tadau hai e-mee di-hai nia maa gii-mmala labelaa? “Godou mouli gi-humalia be nia toolo, goodou gi-hagadaubuni mo-di noho i-di aumaalia.”

Chapter 10

10:1  Jesus ga-hagatanga i-di gowaa deelaa, gaa-hana gi-lodo di gowaa Judea, e-hana laa-lodo di monowai Jordan. Digau dogologowaahee gu-dagabuli labelaa gi-baahi o Mee, gei Mee ga-agoago gi digaula be dana hai.

10:2  Nia Pharisee ga-lloomoi belee hai a-Mee gii-hala, ga-heeu gi Mee, “Hagia-mai be tadau haganoho le e-dumaalia gi taane di-hudu dono lodo gi-daha?”

10:3  Gei Jesus ga-heeu, “Nnaganoho Moses ne-gowadu gi goodou le e-hai bolo-aha?”

10:4  Digaula ga-helekai, “Moses guu-wanga di mogobuna gi taane e-hai di beebaa haga-maewae, gei taane la-gaa-mee di-diiagi dono lodo.”

10:5  Jesus ga-helekai gi digaula, “Moses ne-hihi taganoho deenei, idimaa, goodou ala e-aago-ngadaa.

10:6  Mai taamada i-di madagoaa nia mee ne-hai, di Beebaa Dabu gu-helekai boloo, ‘God ne-hai taane mo-di ahina.

10:7  Deenei tadinga taane gaa-tanga gi-daha mo dono damana mo dono dinana, gaa-buni gi dono lodo.

10:8  Meemaa dogolua guu-hai-hua tuaidina e-dahi.’ “Meemaa gu-hagalee dogolua, guu-dahi.

10:9  Di mee a God dela ne-haga-puni, gi-hudee wwae-ina go tangada.”

10:10  Di-nadau ulu labelaa gi-lodo di hale, gei ana dama-agoago ga-heeu gi Mee i-di agoago deenei.

10:11  Mee ga-helekai gi digaula, “Taane ga-diiagi dono lodo, gaa-lodo gi tuai ahina, mee guu-hai di huaidu hai be-di manu, gu-hai-baahi gi dono lodo-donu.

10:12  E-hai be-di ahina ma-ga-diiagi dono lodo, gaa-lodo gi tuai daane, mee guu-hai di huaidu hai be-di manu labelaa.”

10:13  Digau ne-laha-mai nadau damagiigi gi Jesus, bolo Mee gi-hagadau dugu-ina ono lima gi-hongo digaula, gei ana dama-agoago gaa-wwou gi digaula.

10:14  Jesus ga-iloo, gei Mee gu-de-hiihai, ga-helekai gi ana dama-agoago, “Heia nia damagiigi gi-lloomoi gi-di-Au, hudee bule-ina digaula, idimaa Teenua King o God la ni digau beenei.

10:15  Au e-hagi-adu gi goodou di tonu bolo tangada dela hagalee kae Teenua King o God be-di hai o-nia damagiigi, la-deemee dana ulu i Teenua King o God.”

10:16  Gei mee ga-dahi-mai nia damagiigi gi-lodo ono lima, ga-hagadau dugu ono lima gi-hongo digaula, ga-haga-maluagina digaula.

10:17  Di madagoaa Jesus e-hana labelaa i-hongo di ala, taane ga-lele-mai, ga-dogoduli i ono mua, ga-heeu gi Mee, “Tangada Agoago humalia, au e-hai dagu aha, gei au ga-hai-mee gi-di mouli dee-odi?”

10:18  Jesus ga-helekai, “Goe e-aha dela e-gahi Au bolo tangada agoago humalia? Deai tangada e-humalia, dela-hua go God modogoia.

10:19  Goe e-iloo nia haganoho: ‘Hudee daaligidia tangada gii-made, hudee hai be-di manu, hudee gaiaa, hudee dilikai, hudee halahalau-ina nia daangada, hagalabagau-ina do damana mo do dinana.’ ”

10:20  Taane deelaa ga-helekai, “Nia mee aanaa la-guu-hai huogodoo ko-au mai i dogu mouli damagiigi.”

10:21  Jesus ga-daumada-adu a-mee i dono aloho, ga-helekai, “Di mee e-dahi i-golo digi heia kooe: Hana, huia o goloo gi-daha, wanga-ina nia bahi-hadu gi digau hagaloale, gei goe gaa-kae o maluagina i-di langi. Nomuli, hanimoi, daudali-mai Au.”

10:22  Taane deelaa ga-longono-eia, gei mee guu-mmada hagadugina, guu-hana manawa-gee, idimaa, mee taane maluagina.

10:23  Jesus gaa-mmada gi ana dama-agoago, ga-helekai gi digaula, “E-haingadaa huoloo gi digau maluagina di-ulu i Teenua King o God.”

10:24  Nia dama-agoago a-Maa gu-gologolo gi ana helekai. Jesus ga-helekai, “Agu dama, e-haingadaa huoloo di-ulu i Teenua King o God!

10:25  Tangada maluagina ma-ga-ulu i Teenua King o God le e-koia e-haingadaa i-di manu-‘camel’ ma-ga-ulu laa-lodo di bongoo di iwi dui-mee.”

10:26  Gei nia dama-agoago gu-gologolo huoloo, ga-leelee boloo, “Malaa, koai dela gaa-mee di-mouli?”

10:27  Jesus ga-mmada-adu gi digaula, ga-helekai, “Di mee deenei e-deemee i-baahi tangada, gei e-mee-hua i-baahi o God. Nia mee huogodoo e-mee i-baahi o God.”

10:28  Gei Peter ga-helekai, “Mmada, gimaadou guu-dugu madau mee huogodoo, gu-daudali-hua Goe.”

10:29  Jesus ga-helekai, “Uaa, e-donu, gei Au e-hagi-adu gi goodou bolo be koai ma-ga-diiagi dono hale, be ono duaahina-daane mo ahina, be dono dinana be dono damana, be ana dama, be ana gowaa, i dogu gili mo-di Longo-Humalia,

10:30  mee gaa-kae ana mee logowaahee i-lodo di mouli deenei. Mee ga-hai-mee haga-lau holongo gi-nonua i ono hale, mono duaahina-daane mo ahina, mono dinana, mono dama, mono gowaa, ge e-kae di hagaduadua labelaa. Gei di madagoaa dela ma-gaa-dae-mai, gei mee ga-hai-mee gi-di mouli dee-odi.

10:31  E-dogologo digau ala i-mugi-mua dolomeenei, gaa-hula laa-muli, gei e-dogologo digau ala i-mugi-muli dolomeenei, gaa-hula laa-mua.”

10:32  Jesus mo ana dama-agoago e-hula i-hongo di ala gi Jerusalem, gei Jesus e-hana i-mua. Digaula e-hula uli nadau gai, gei nia daangada ala e-lloo-adu i nadau muli le e-mmaadagu. Gei Jesus ga-haga-dagabuli ana dama-agoago gi-mada-ginaadou, ga-hagi-anga gi digaula nia mee ala gaa-hai ang-gi de-Ia.

10:33  Ge-Ia ga-helekai, “Mmada, gidaadou e-hula gi Jerusalem, dela di gowaa Tama-Tangada gaa-wanga gi-nia lima o-nia dagi aamua hai-mee-dabu, mo digau haga-donudonu haganoho. Digaula ga-haga-balumee a Mee belee daaligi gii-made, gaa-wanga a-Mee gi digau tuadimee.

10:34  Digaula gaa-hai hagahuaidu a-Mee mo-di buibui nadau haawale gi Mee, ge e-haga-mamaawa a-Mee, ga-daaligi a-Mee gii-made, gei i-muli nia laangi e-dolu, ge-Ia ga-mouli-aga.”

10:35  Gei James mo John, go nia dama-daane a Zebedee, ga-lloomoi gi Jesus, ga-helekai, “Tangada Agoago, di mee i-golo gimaua e-hiihai bolo Goe gi-heia-mai gi gimaua.”

10:36  Jesus ga-heeu gi meemaa, “Ma di-aha dela e-hiihai ginai goolua?”

10:37  Gei meemaa ga-helekai-anga, “Do madagoaa dela ma-gaa-noho i-hongo do lohongo-king, gimaua e-hiihai bolo Goe gi-haga-noho-ina gimaua i do baahi, e-dahi i do baahi gau-donu, ge e-dahi i do baahi gau-ihala.”

10:38  Gei Jesus ga-helekai gi meemaa, “Goolua e-de-iloo di-gulu mee dela e-tangi-ai. Goolua e-mee di-inu di ibu o-di hagaduadua dela ga-inu-iei Au? Goolua e-mee di-babdais i-di babdais dela ga-babdais-iei Au?”

10:39  Gei meemaa ga-helekai, “Gimaua e-mee.” Jesus ga-helekai, “E-donu bolo goolua ga-inu di ibu dela ga-inu-iei Au, ge ga-babdais i-di babdais dela ga-babdais-iei Au.

10:40  Gei Au ogu donu ai e-hili tangada e-noho i dogu baahi gau-donu mo gau-ihala. Ma go God hua dela gaa-wanga nia lohongo aanei gi ana gau ala gu-hagatogomaalia ginai nia maa.”

10:41  Nia dama-agoago dilongoholu ala i-golo ne-longono-ginaadou di mee deenei, gu-hagawelewele gi James mo John.

10:42  Gei Jesus ga-haga-dagabuli digaula, ga-helekai, “Goodou e-iloo bolo nia dagi o digau tuadimee le e-mogobuna di-dagi digau tuadimee. Gei nia dagi le e-hai-mee gi-nia mogobuna dagi huogodoo.

10:43  Di hai deenei la-hagalee go di-godou hai dela e-hai-hegau-ai. Tangada i godou baahi dela bolo ia gi-aamua, geia gii-hai tangada hai-hegau ni goodou.

10:44  Tangada dela bolo ia gii-hai tangada aamua, geia gii-hai di hege ni digau huogodoo.

10:45  Tama-Tangada hogi la-hagalee ne-hanimoi bolo nia daangada gi-hai-hegau ang-gi de-Ia, ge-Ia ne-haneia belee hai-hegau gi digau huogodoo, gaa-wanga dehuia dono mouli gi-mouli-ai digau dogologo.”

10:46  Digaula ne-dau i Jericho. Di madagoaa Jesus mo ana dama-agoago, mo tagabuli damana ga-hagatanga gi-daha mo-di waahale deelaa, taane deegida dono ingoo go Bartimaeus, tama ni Timaeus, e-noho i taalinga di ala e-madamadau ana mee.

10:47  Dono longono-hua bolo ma go Jesus o Nazareth, geia gaa-wolo gi-nua, “Jesus, tama a David, dumaalia-mai gi-di-au!”

10:48  Digau dogologo guu-wwou gi mee gi-hudee leelee, geia koia ne-wolo gi-nonua, “Goe go Tama a David, Goe dumaalia-mai gi-di-au!”

10:49  Gei Jesus gaa-duu, ga-helekai, “Goodou laha-mai a-mee gi-di-Au.” Gei digaula ga-helekai gi taane deelaa, “Tenetene-laa, duu-i-nua, Mee dela e-gahigahi goe.”

10:50  Gei mee gaa-hobo gi-nua, gaa-hudu gi-daha dono gahu laa-daha, gaa-hana gi Jesus.

10:51  Gei Jesus ga-heeu gi mee, “Ma di-aha dela e-hiihai ginai goe bolo Au gi-heia-adu gi-di-goe?” Gei taane deegida ga-helekai, “Tangada Agoago, heia au gii-mee di-gidee labelaa.”

10:52  Gei Jesus ga-helekai, “Hana. Ma go do hagadonu dela ne-hagahumalia goe.” Di madagoaa-hua deelaa, gei mee guu-mee di-mmada, ga-daudali a Jesus i-hongo di ala.

Chapter 11

11:1  I di-nadau lloo-adu gi Jerusalem, hoohoo gi-nia waahale Bethphage mo Bethany, digaula ne-dau i-di Gonduu Olib, gei Jesus ga-hagau ana dama-agoago dogolua gii-hula gi-mua,

11:2  ga-helekai gi meemaa, “Hula gi-di waahale dela i-golo i gulu mua. Goolua ma-gaa-dau i-golo, ga-gidee tama-‘donkey’, digi hana tangada nonua, e-daula i-golo. Wwedee-ina, dagia-mai.

11:3  Maa tangada ga-heeu boloo, ‘Goolua e-hai di-gulu aha?’ Gei goolua helekai boloo, ‘Tagi e-hiihai e-hai-hegau-ai di-maa, ga-laha-mai-laa hagalee duai.’ ”

11:4  Gei meemaa gaa-hula, ga-gidee di ‘donkey’ digi madua-loo e-daula i-di ngudu di bontai di hale i taalinga di ala, gaa-wwede di-maa.

11:5  Hunu daangada i digaula nogo tuu i-golo ga-heeu gi meemaa, “Goolua e-wwede di ‘donkey’ eimaha?”

11:6  Gei meemaa ga-helekai nia helekai a Jesus ne-hai, gei nia daane aalaa ga-dumaalia gi meemaa gii-hula ginaadou.

11:7  Gei meemaa gaa-dagi tama-‘donkey’ gi Jesus, gaa-gahu di manu gi-di gahu, gei Jesus gaa-gaga gi-hongo di-maa.

11:8  Digau dogologo gaa-holo nadau gahu gi-hongo di ala, gei hunu daangada e-duuduu-mai nadau manga-laagau, e-magamaga laa-hongo di ala, e-haaligi di ala.

11:9  Digau ala e-hula i-mua mono gau ala e-dagi-mai muli, ga-momoogo, “Hagaamuina a God, God gi-hagahumalia-ina tangada dela e-hanimoi i-di ingoo o Dimaadua.

11:10  God gi-hagahumalia-ina tenua o tadau damana go David dela ga-dau-mai. Hagaamuina a God!”

11:11  Jesus ga-ulu gi-lodo Jerusalem, gaa-hana gi-lodo di Hale Daumaha, ga-madamada gi-nia mee huogodoo ala i-lodo. Ga-hiahi-ia di-mee, gei Mee gaa-hana gi-daha mo-di gowaa deelaa, gaa-hana gi Bethany mo ana dama-agoago dilongoholu maa-lua.

11:12  Dono daiaa, gei digaula ga-hagatanga labelaa i Bethany, gei Jesus gu-hiigai.

11:13  Gei Mee ga-gidee di laagau-‘fig’ haga-mogowaa, e-dau logo ono lau, ga-hanadu ginai belee mmada be Ia e-gida ana golee i di-maa. Gei dono dau-adu, nia lau-hua ala i-golo, idimaa, ma hagalee di madagoaa e-huwa-ai nia ‘fig’.

11:14  Jesus ga-helekai gi-di laagau-‘fig’, “Tangada e-gai labelaa dana golee mai i-di-goe ai.” Gei ana dama-agoago gu-longono-ginaadou a-Mee.

11:15  I di-nadau dau-adu-hua gi Jerusalem, gei Jesus gaa-hana gi-lodo di Hale Daumaha, ga-hagabagi digau huogodoo ala e-huihui mo-di huihui gi-daha nadau mee. Mee ga-hulihuli gi-lala nia deebele digau wawaaheei bahihadu, mo nia lohongo o digau huihui mwuroi.

11:16  Gei Mee gu-hagalee dumaalia gi tei dangada gi-dagidagia ana mee i-lodo di Hale Daumaha.

11:17  Mee ga-agoago gi digaula, “Ma-guu-hihi i-lodo di Beebaa-Dabu bolo God gu-helekai, ‘Dogu Hale Daumaha le e-haga-ingoo bolo di hale hai-dalodalo ni digau henuailala huogodoo.’ “Gei goodou guu-hai di-maa di lohongo hai-gaiaa!”

11:18  Nia dagi hai-mee-dabu, mono gau haga-donudonu haganoho ga-longono-ginaadou nnelekai aanei, gei digaula ga-daamada ga-halahala di-nadau hai belee daaligi a Jesus. Gei digaula e-mmaadagu, idimaa, nia daangada dogologo e-hagalabagau huoloo nia agoago a-Maa.

11:19  Ga-hiahi-ia di-mee, Jesus mo ana dama-agoago ga-hagatanga gi-daha mo-di waahale.

11:20  Hagaluada-loo dono daiaa, i-di nadau hula i-hongo di ala, ga-gidee di laagau-‘fig’ deelaa, la-guu-mae-aga i-lala.

11:21  Peter ga-langahia ga-helekai gi Jesus, “Tangada Agoago, mmada gi-di laagau dela ne-haga-halauwa Kooe, guu-mae!”

11:22  Jesus ga-helekai, “Hagadonu-ina a God.

11:23  Au e-hagi-adu gii-donu goodou bolo tangada ma-ga-helekai gi-di gonduu deenei boloo, ‘Hana, doo gi-lodo di moana,’ geia hagalee manawa-logo, e-haga-donu-hua bolo ma-gaa-hai-hua be ana helekai, gei di-maa gaa-gila.

11:24  Deenei-laa, Au e-hagi-adu bolo goodou ma-ga-dalodalo e-madau di-godou mee, hagadonu-ina bolo goodou ga-hai-mee gi-di mee dela e-madau-ai, gei di-maa ga-dugu-adu gi goodou.

11:25  Malaa, goodou ma-gaa-tuu ga-dalodalo, dumaalia gi-nia hala o tangada ne-hai-adu. Gei di-godou Damana i-di langi ga-dumaalia-adu gi godou ihala.

11:26  [Maa goodou hagalee dumaalia gi-nia hala digau ala i-golo, di-godou Damana dela i-di langi hagalee dumaalia gi godou ihala.”]

11:27  Digaula gaa-dau-adu labelaa gi Jerusalem. Di madagoaa-hua o Jesus e-hanadu gi-lodo di Hale Daumaha, gei nia dagi aamua hai-mee-dabu, mo digau haga-donudonu haganoho, mo nia dagi mmaadua ga-lloomoi,

11:28  ga-heeu, “Ma di mogobuna dagi mai hee dela e-hai-ai au mee aanei? Ma koai ne-dugu-adu di mogobuna deenei?”

11:29  Jesus ga-helekai, “Au gaa-hai dagu heeu hua e-dahi, maa goodou ga-hagi-mai, gei Au ga-hagi-adu di mogobuna dagi ni-ooi dela e-hai-ai agu mee aanei:

11:30  Hagia-mai, di mogobuna a John dela e-hai ana babdais, la-mai baahi o God, be mai baahi nia daangada?”

11:31  Digaula ga-daamada ga-lagamaaloo i nadau mehanga boloo, “Gidaadou la-ga-helekai bolo-aha? Maa gidaadou ga-helekai, ‘Mai baahi o God’, gei Mee ga-helekai, ‘Malaa e-aha goodou hagalee hagadonu a John?’

11:32  Maa gidaadou ga-helekai boloo, ‘Mai hua nia daangada...’ ” (Digaula e-mmaadagu i-nia daangada, idimaa, e-dogologo e-hagadonu bolo John la di soukohp e-donu.)

11:33  Malaa, digaula ga-helekai gi Jesus, “Gimaadou e-de-iloo.” Jesus ga-helekai gi digaula, “Au hogi hagalee hagi-adu di mogobuna mai hee dela e-hai-ai agu mee aanei.”

Chapter 12

12:1  Jesus ga-agoago i-nia ala-kai, “Tangada gaa-dogi dana hadagee-waini, ga-abaaba, gaa-hai dana gowaa tau-waini, ga-haga-duu dana angulaa hagaloohi. Mee gaa-wanga gi ana gau dogi-mee gi-ngalua-ai, gaa-hana haga-mogowaa.

12:2  Di madagoaa taugai, gei mee ga-hagau dana dangada hai-hegau gi digau dogi-mee aalaa, gi-gaamai dono duhongo i-di hadagee-waini deelaa.

12:3  Gei digau dogi-mee gaa-kumi tangada hai-hegau deelaa, ga-daaligi, ga-hagau gii-hana, dana mee ne-kae-ai.

12:4  Gei tangada dana hadagee-waini ga-hagau labelaa dana huai dangada hai-hegau. Digau dogi-mee ga-hagamaawa di libogo o-maa, gaa-hai di-nadau hai e-haga-langaadia a-mee.

12:5  Gei tangada dana hadagee ga-hagau labelaa dana huai dangada, gei digaula ga-daaligi a-mee. E-dogologo ne-hagau nomuli, gei guu-tale huogodoo gi-di haingadaa deelaa, hunu gau gu-hagamamaawa, ge hunu gau gu-daaligi gii-mmade.

12:6  Tangada dela ne-dubu i-golo, la-go tama-daane donu o tangada dana hadagee-waini. Muliagi-loo gei mee ga-hagau-hua go dana dama-daane donu gi digau dogi-mee aalaa. Ga-helekai, ‘Au e-iloo bolo digaula ga-hagalabagau-laa dagu dama-daane.’

12:7  Gei digau dogi-mee aalaa ga-leelee i nadau mehanga boloo, ‘Deenei la-go tama donu a-maa. Lloomoi, gidaadou ga-daaligi a-mee gii-made, gei gidaadou ga-hai-mee gi-nia mee a-maa ala belee hai-mee ginai.’

12:8  Malaa, digaula gaa-kumi tama-daane deelaa, ga-daaligi, gaa-hudu tuaidina o-maa gi-daha mo-di hadagee-waini.”

12:9  Jesus ga-heeu, “Malaa, tangada dana hadagee-waini la-gaa-hai dana aha? Mee ga-hanimoi, ga-dadaaligi nia daane aalaa, gaa-wanga di hadagee-waini gi nnuai daangada gi-benabena-ina.

12:10  Goodou digi daulia di Beebaa-Dabu dela e-helekai boloo, ‘Di hadu dela ne-hudu gi-daha go digau hau-hale bolo di balu-hadu, la-guu-hai di hadu dela e-kaedahi e-hagalabagau.

12:11  Di mee deenei la-ne-hai go Dimaadua, e-haga-goboina dangada.’ ”

12:12  Nia dagi o digau o Jew, gu-hagamada belee lawalawa a Jesus, i digaula e-iloo bolo di ala-kai a-Maa le e-hagatau ang-gi ginaadou. I di-nadau mmaadagu i digau dogologo aalaa, ga-diiagi a-Mee, gaa-hula.

12:13  Nia Pharisee mo digau hagamaamaa Herod ne-hagau gi Jesus, belee haga-ihala a-mee gi-nia heeu.

12:14  Digaula ga-lloomoi gi Mee ga-heeu, “Tangada Agoago, gimaadou e-iloo bolo Goe e-helekai donu, e-haga-balumee nia hagabaubau dangada, ge hagalee hilihili-dangada, ge e-agoago di tonu i-di hiihai a God gi-nia daangada. Hagia-mai be di-maa e-hai-baahi gi tadau haganoho di hui tadau dagitedi gi-di king o Rome? Gidaadou e-hui be deeai?”

12:15  Gei Jesus gu-gidee i-lodo nadau helekai halahalau, ga-helekai, “Goodou belee haga-ihala au eiaha? Gaamai teenedi silber gii-mmada au.”

12:16  Digaula gaa-wanga di-nadau teenedi, gei Mee ga-heeu, “Ma di ada ni-ooi, ge di ingoo ni-ooi aanei?” Gei digaula ga-helekai, “Ni di king o Rome.”

12:17  Gei Jesus ga-helekai, “Malaa, wanga-ina gi-di king nia mee a di king, ge wanga-ina gi God nia mee a God.” Gei digaula gu-goboina-e-ginaadou a Jesus.

12:18  Nia Sadduccee, ala e-agoago bolo nia daangada e-hagalee mouli-aga i-di made, ga-lloomoi gi Jesus ga-heeu,

12:19  “Tangada Agoago, Moses guu-hihi taganoho deenei, ‘Taane ma-gaa-made, gei dono lodo gaa-noho i-golo, dana dama ai, gei tuaahina-daane o taane dela ne-made gaa-lodo gi-di ahina deelaa, gi-gila-mai di tama e-ala be-di tama ni taane dela ne-made.’

12:20  “Dolomaa, tagahaanau daane dogohidu, di ulu-madua gaa-hai dono lodo, nomuli gaa-made, di-nau dama ai.

12:21  Gei togolua daane la-gaa-lodo labelaa gi-di ahina deelaa, geia gaa-made labelaa, di-nau dama ai, gei togodolu daane la-go di hai la-hua.

12:22  Taga-haanau-daane dogohidu aalaa guu-lodo huogodoo gi-di ahina deelaa, gei ginaadou guu-mmade huogodoo, nadau dama ai. Muliagina-loo gei di ahina la-gaa-made.

12:23  Di madagoaa digau mmade ma-ga-mouli-aga i-di laangi o-di mouli-aga, di ahina deelaa la-gaa-hai di lodo ni-ooi? Idimaa, digau dogohidu aalaa ne-lodo huogodoo gi mee.”

12:24  Jesus ga-helekai, “Goodou gu-ihala, idimaa goodou e-de-iloo nia helekai o-di Beebaa-Dabu mo-di mogobuna o God.

12:25  Digau mmade ma-ga-mouli-aga, la-hagalee hai nadau lodo, gadoo be digau di-langi.

12:26  Deenei di agoago o-di mouli-aga i-di made: goodou digi daulia di Beebaa Moses di kai o-di laagau e-ulaula? Ma-guu-hihi bolo God e-helekai gi Moses boloo, ‘Au go di God o Abraham, di God o Isaac, mo-di God o Jacob.’

12:27  “Mee go di God o digau mouli, hagalee ni digau mmade. Goodou digau gu-ihala!”

12:28  Tangada haga-donudonu haganoho i-golo, e-hagalongo gi-nia helekai aanei. Mee gu-iloo bolo nia helekai a Jesus ala ne-hai gi-di heeu o-nia Sadduccee, le e-humalia. Geia ga-hanimoi gi Jesus, ga-heeu, “Dehee taganoho koia e-hagalabagau i-nia haganoho huogodoo?”

12:29  Gei Jesus ga-helekai, “Deenei taganoho koia e-aamua: ‘Israel, gi-hagalongo! Dimaadua dela go tadau God, go Mee hua dela go God.

12:30  Goe gi-aloho i Dimaadua, go doo God, aga i-lodo do manawa hagatau, mo do hagataalunga hagatau, mo au hagabaubau huogodoo, mo oo mahi huogodoo.’

12:31  “Gei di lua haganoho le e-hai-hua be di-maa, boloo, ‘Goe gi-aloho i tangada dela i do baahi, gii-hai be do aloho i-di goe.’ “E-deai taganoho labelaa i-golo, e-aamua laa-hongo nia haganoho e-lua aanei ai.”

12:32  Tangada haga-donudonu haganoho ga-helekai gi Jesus, “Tangada Agoago, gu-hai-donu go au helekai ala ne-hai boloo: ‘Tagi la-dela-hua go God, deai di god labelaa i-golo ai, dela-hua go Mee.

12:33  Tangada la-gi-aloho i dono God, mai i-lodo dono manawa, mo ana hagabaubau mo ono mahi, gei gi-aloho i tangada dela i dono baahi be dono aloho i-deia.’ Koia e-hagalabagau go di hai-hegau gi-nia haganoho e-lua aanei, i tadau hai dela e-wanga-dehuia tadau manu gi-hongo di gowaa dudu-tigidaumaha, mono tigidaumaha huogodoo ala e-hai ang-gi God.”

12:34  Jesus ga-iloo-Ia, bolo nia helekai a-maa gu-hai-donu, ge-Ia ga-helekai gi mee, “Goe hagalee mogowaa i Teenua King o God.” Gei nomuli, gu-deai tangada e-heeu dana mee gi Mee ai.

12:35  Di madagoaa Jesus e-hai ana agoago i-lodo di Hale Daumaha, ge-Ia ga-heeu, “Digau haga-donudonu haganoho le e-aha ala e-hai bolo di Mesaia la di hagadili ni David?

12:36  Idimaa, di Hagataalunga-Dabu gu-haga-helekai a David: ‘Dimaadua gu-helekai gi dogu Dagi: Goe noho i dogu baahi gau-donu, gaa-dae-loo gi dogu madagoaa ma-gaa-dugu o hagadaumee gi-lala o babaawae.’

12:37  “David donu e-gahi a-mee bolo dono Dagi, malaa di Mesaia la di hagadili behee ni David?” Nia daangada dogologo nogo hagalongo tenetene gi-nia agoago a Jesus.

12:38  Mee ga-agoago gi digaula, “Goodou hudee kawe i digau haga-donudonu haganoho ala e-ulu i-nia gahu-lloo, ga-heehee-laa, gei e-hiihai bolo nia daangada gi-hagaaloho mo hagalaamua-ina ginaadou i-lodo nia gowaa huihui-mee,

12:39  ge e-hilihili nadau lohongo aamua i-lodo nia synagogee mo lodo nia hagamiami.

12:40  Aanei go digaula ala e-mada-maaloo e-kae nia goloo o-nia hale nia ahina guu-mmade nadau lodo, ge e-hai nadau dalodalo lloowehaa i-mua nia golomada o-nia daangada. Malaa, nadau hagaduadua la-koia e-huaidu.”

12:41  Jesus e-noho i-lodo di Hale Daumaha, hoohoo gi-di gowaa dela e-dugu ginai nia tigidaumaha, ge-Ia e-daumada digau ala e-dugu nadau teenedi. E-dogologo digau maluagina e-tigidaumaha nadau teenedi e-logo.

12:42  Di ahina hagaloale guu-made dono lodo ga-hanimoi nomuli, gaa-dugu ana teenedi e-lua.

12:43  Gei Jesus ga-gahi-mai ana dama-agoago gi dono baahi, ga-helekai, “Au e-hagi-adu gi goodou di tonu bolo tigidaumaha di ahina hagaloale deenei ne-hai, la-koia gu-damanaiee i-nia tigidaumaha digaula huogodoo.

12:44  Digau ala i-golo ne-dugu hunu teenedi gi-lodo di gowaa tigidaumaha mai nadau maluagina, gei di ahina hagaloale deenei gu-hagaodi-anga ana teenedi huogodoo ala belee hagahumalia-ieia.”

Chapter 13

13:1  Di madagoaa Jesus ne-hagatanga i-di Hale Daumaha, tangada i ana dama-agoago ga-helekai, “Tangada Agoago, mmada gi-nia hadu mono hale ala e-humalia!”

13:2  Jesus ga-helekai-anga, “Goe e-gidee nia hale humalia aanei? Di hadu e-dahi gaa-dubu i dono lohongo ai. Nia hadu huogodoo ga-meheu gi-lala.”

13:3  Jesus nogo noho i-hongo di Gonduu Olib, i-di baahi adu gi-di Hale Daumaha, gei Peter, James, John mo Andrew ga-mmaanege-adu gi-baahi o Mee, ga-heeu gi Mee mada-ginaadou,

13:4  “Meenei, hagia-mai be nia mee aanei le e-hai ma-gaa-hee, ge hagailongo gi-di-aha, bolo ma gu-hoohoo gaa-hai?”

13:5  Jesus ga-helekai, “Goodou pula i goodou, gi-de-halahalau-hua go tangada.

13:6  Idimaa, dogologo e-lloomoi i dogu ingoo, ga-hagi-adu, ‘Au go mee!’ Gei nia daangada dogologo ga-halahalau go digaula.

13:7  Di madagoaa goodou ma-ga-longono nia lee-dauwa ala e-hai hoohoo-mai mono longo-dauwa ala e-mogowaa, goodou hudee uli godou gai. Nia mee aanei le e-hai-loo gii-kila, gei hagalee haga-modongoohia bolo di hagaodi gu-dau-mai.

13:8  Nia henua ga-heheebagi, nia king ga-heheebagi, nia madagowaa huogodoo i henuailala ga-ngalungalua, nia dau-hiigai ga-i-golo. Nia mee aanei le e-hai gadoo be-di mmae matagidagi o-di ahina ma-ga-haanau.

13:9  “Goodou gii-noho kanakana, idimaa, goodou ga-lawalawa go nia daangada gaa-lahi gi-di gowaa hai-gabunga. Goodou ga-haga-mamaawa i-lodo nia synagogee gaa-lahi gi-mua nia king i dogu gili, bolo goodou gi-haga-modongoohia-ina gi digaula di hai o-di Longo-Humalia.

13:10  I-mua di hagaodi ga-dau-mai, di Longo-Humalia e-hai gii-dele gii-dau gi-nia henua huogodoo.

13:11  Malaa, goodou ma-ga-lawalawa, gaa-lahi gi-di gowaa hai-gabunga, gei goodou hudee maanadu e-logo be goodou ga-helekai bolo-aha i-mua digaula. Goodou helekai-hua nia mee ala ga-gowadu gi goodou i-di madagoaa deelaa. Idimaa, nia helekai ala ga-helekai-ai goodou, la-hagalee mai godou baahi, nia helekai mai baahi di Hagataalunga-Dabu.

13:12  Nia daane gaa-wanga nadau duaahina-daane gi-daaligidia gii-mmade. Nia damana hogi gaa-wanga nadau dama gi-daaligidia gii-mmade, gei nia dama ga-hai-baahi gi nadau maadua, gaa-wanga digaula gi-daaligidia gii-mmade.

13:13  Digau huogodoo ga-de-hiihai-adu gi goodou i dogu gili. Be koai hua dela e-dadaahi dono hagadonu gaa-dae-loo gi-di hagaodi ga-mouli.

13:14  “Goodou ga-gidee di ada-mee haga-manawa-gee dangada e-duu i-lodo di gowaa e-dee-duudanga belee duu-ai.” (Tangada dela e-dau di haga-iloo deenei, la-gi-iloo-ia tadinga o di-maa!) “Di madagoaa-hua deelaa, digau ala e-noho i Judea la-gii-llele gi-daha gi-tomo nia dama-gonduu.

13:15  Tangada dela i-tomo dono hale, la-hudee hai bolo ia e-haneia gi-lala e-ulu gi-lodo dono hale e-kae ana mee.

13:16  Tangada dela i-lodo henua, la-hudee haneia bolo e-kae dono gahu.

13:17  Koia e-huaidu ang-gi nia ahina hai-dama, mo nia ahina nadau dama-lligi i-nia laangi aalaa ma-ga-dau-mai!

13:18  Goodou dalodalo bolo nia mee aanei gi-hudee heia-adu i-di madagoaa magalillili!

13:19  Idimaa, nia haingadaa o-nia laangi aalaa, la-koia e-huaidu huoloo i-nia haingadaa mai taamada di madagoaa ne-hai henuailala go God, gaa-dae-mai-loo gi dolomeenei. Nia huaidu beenei e-kila-aga labelaa maalia ai.

13:20  Malaa, Dimaadua e-haga-hogoohi nia laangi aalaa; maa Mee ga-hagalee hai beelaa, deai tangada e-mouli ai. Mee e-haga-hogoohi-mai nia laangi aalaa, ne-hidi-mai i ana dama ala ne-hilihili.

13:21  “Tangada ma-ga-helekai-adu gi goodou, boloo, ‘Deenei di Mesaia!’ be, ‘Deelaa a-Mee!’ goodou hudee hagadonu-ina a-mee.

13:22  Idimaa, nia mesaia dilikai mono soukohp dilikai ga-kila-aga i-golo. Digaula gaa-hai nadau hagailongo haga-goboina mono mogobuna, belee halahalau nia dama a God ala gu-hilihili, be di-maa e-mee.

13:23  Gii-pula i goodou. Au e-hagi-adu nia mee aanei huogodoo i-mua di madagoaa.

13:24  “Nia laangi ala i-muli di haingadaa damana, di laa la-ga-bouli, gei di malama ga-hagalee maahina.

13:25  Nia heduu o-di langi ga-monnono, gei nia mogobuna o-di ahiaalangi ga-ngalungalua gi-daha mo nadau lohongo.

13:26  Gei goodou gaa-mmada gi Tama-Tangada e-haneia i-lodo nia gololangi, i-nia mahi mono madamada aamua.

13:27  Gei Mee ga-hagau ana gau di-langi gi-nia mada e-haa o henuailala, belee haga-dagabuli-mai digau a God ala gu-hilihili, e-loomoi i-nia mada huogodoo o henuailala.

13:28  “Goodou gaabee di mee deenei e-hagatau gi-di laagau-‘fig’. Nia manga o di-maa ala ma-ga-matilitili, gaa-tomo ono lau, goodou gu-iloo bolo di madagoaa mahanahana la-gu-hoohoo-mai.

13:29  E-hai gadoo beelaa, be goodou ala ma-ga-gidee nia mee aanei ala ma-ga-kila-aga, gei goodou gu-iloo-hua, bolo di madagoaa gu-hoohoo-mai, gu-togomaalia ga-daamada.

13:30  Gi-langahia bolo nia mee aanei le e-kila, e-hai i-mua di adu-dangada dela e-mouli dolomeenei ma-gaa-mmade huogodoo.

13:31  Di langi mo henuailala le e-odi, gei agu helekai la-hagalee e-odi.

13:32  “Deai tangada e-iloo di laangi deelaa be di aawaa ai; digau di-langi e-de-iloo hogi, mo Tama-daane hogi e-de-iloo-Ia labelaa, dela-hua go Tamana modogoia e-iloo.

13:33  Noho kanakana, i goodou e-de-iloo di dae-mai di madagoaa.

13:34  E-hai gadoo be taane ma-gaa-hai dono ala e-hana haga-mogowaa, gaa-dugu ana gau hai-hegau belee benebene dono hale, gaa-wanga nadau moomee e-hai. Geia ga-helekai gi-di hagaloohi o-di bontai, bolo gii-noho hilahila gi-daha.

13:35  Malaa, goodou gii-noho kanakana, i-di hanimoi o tagi di hale la-de-iloo-goodou, be ma hiahi, be i-di waelua di boo, be i-mua di ada, be i-mua di laa e-hobo.

13:36  Maa mee ga-limalima dono hanimoi, mee gi-de-boogia-hua goodou e-kii.

13:37  Agu helekai adu gi goodou, le e-helekai gi digau huogodoo, bolo goodou gii-noho kanakana.”

Chapter 14

14:1  Nia laangi e-lua i-mua Tagamiami Pasoobaa mo Tagamiami Palaawaa-Digi-Hagatanga, nia dagi aamua hai-mee-dabu, mo digau haga-donudonu haganoho e-halahala di nadau ala hagammuni e-kumi a Jesus e-daaligi gii-made.

14:2  Digaula ga-helekai, “Gidaadou hagalee hai di-mee deenei i-lodo di laangi Pasoobaa, gi-dee wwaa-hua nia daangada.”

14:3  Jesus nogo i Bethany i-di hale o Simon, taane nogo magi genegene i-mua. Di madagoaa-hua a Jesus e-miami, gei di ahina ga-hanimoi mo dana loaabi-‘alabaster’ e-honu lolo-kala hui-ngadaa ne-hai gi-nia ‘nard’, gaa-huge, ga-hagatulutulu di libogo o Jesus.

14:4  Digau ala nogo i-golo la-gu-hagawelewele, ga-helekai i nadau mehanga, “Ma e-aha dela gu-hagauwwou di lolo-kala deenei?

14:5  Maa bolo ne-hui gi-daha e-mee-hua di-kila-mai nia silber i-hongo dolu-lau, gaa-wanga gi digau hagaloale!” Gei digaula ga-helekai tamu i-di ahina deelaa.

14:6  Gei Jesus ga-helekai, “Diagia hua a-mee. Goodou e-haga-madugidugia a-mee eiaha? E-humalia ge madamada go dana hai dela ne-hai-mai gi-di-Au.

14:7  Digau hagaloale le e-noho i godou baahi i-nia madagoaa huogodoo, e-mee-hua di-godou hagamaamaa i di-ingoo-hua di madagoaa dela e-hiihai ginai goodou. Gei-Au e-hagalee waalooloo i godou baahi.

14:8  Gei di ahina deenei ne-hai go dana mee dela e-mee. Mee ne-hagatulutulu dana lolo-kala gi dogu huaidina, belee hagatogomaalia Au i-mua dogu danu.

14:9  Au e-hagi-adu gii-donu goodou bolo nia gowaa huogodoo i henuailala hagatau ala e-dele ginai di Longo-Humalia, dana mee dela ne-hai, le e-dele hogi, e-haga-langalangahia a-mee.”

14:10  Judas Iscariot, tangada i-nia dama-agoago dilongoholu maa-lua, gaa-hana gi-nia dagi aamua hai-mee-dabu, belee odi a Jesus gi digaula.

14:11  Digaula gu-tenetene huoloo gi telekai a Judas dela ne-hai ang-gi ginaadou, ga-hagababa bolo ginaadou e-wanga nadau teenedi gi mee. Malaa, Judas ga-daamada ga-halahala dana madagoaa humalia belee wanga a Jesus gi digaula.

14:12  Di laangi matagidagi o-nia laangi llauehe o Tagamiami Palaawaa-Digi-Hagatanga, dela go di laangi e-daaligi-ai nia siibi o Tagamiami Pasoobaa, gei nia dama-agoago a Jesus ga-heeu gi Mee, “Dehee dau gowaa e-hiihai gimaadou gi-hagatogomaalia-ina dau Hagamiami Pasoobaa?”

14:13  Jesus ga-hagau ana dama-agoago dogolua, ga-helekai, “Hula gi-di waahale damana deelaa, taane i-golo ga-heetugi-adu, e-kae dana mee hagahau wai, daudalia a-mee.

14:14  Gei goolua ga-helekai gi tangada donu di hale dela ga-ulu ginai mee, boloo, ‘Tangada Agoago e-helekai bolo dehee di ruum e-humalia ang-gi de-Ia mo ana dama-agoago, e-hai di-nadau Hagamiami Pasoobaa?’

14:15  Gei mee ga-hagi-adu dana ruum damana i-nua, gu-togomaalia. Deelaa di gowaa e-hagatogomaalia gulu mee mai gi gidaadou.”

14:16  Nia dama-agoago a-Maa gaa-hula gi-di waahale damana, ga-gidee nia mee huogodoo e-hai be nnelekai a Jesus, gei meemaa ga-hagatogomaalia Tagamiami Pasoobaa.

14:17  Hiahi-ia di-mee, Jesus mo ana dama-agoago dilongoholu maa-lua gaa-hula gi Jerusalem.

14:18  Di-nadau noho miami, gei Jesus ga-helekai, “Au e-hagi-adu gi goodou bolo tangada e-dahi i goodou la-gaa-wanga Au, mee e-miami dalia Au dolomeenei.”

14:19  Gei nia dama-agoago gu-de-nnoomaalia gi telekai deelaa, ga-hagadau dagidahi, e-hai nadau heeu gi Mee boloo, “Meenei, ma ko-au dela e-helekai-iei Goe?”

14:20  Gei Jesus ga-helekai, “Tangada e-dahi i goodou dilongoholu maa-lua dela gaa-hagatiu dana palaawaa gi-lodo di ibu dalia Au, deelaa go mee.

14:21  Tama-Tangada le e-made be nnelekai di Beebaa-Dabu. Gei e-huaidu huoloo ang-gi tangada dela ma-ga-hagi-anga Tama-Tangada. E-humalia-hua maa tangada deelaa hagalee belee haanau!”

14:22  I di-nadau miami-hua, gei Jesus ga-dahi-aga dana palaawaa, ga-danggee, ga-ginigini, gaa-duwwe gi ana dama-agoago, ga-helekai, “Geina, deenei la-go dogu huaidina.”

14:23  Nomuli ga-dahi-aga dana ibu-waini, ga-danggee ang-gi God, gaa-wanga gi digaula, huogodoo gu-inu di-maa.

14:24  Jesus ga-helekai, “Aanei la-go ogu dodo ala e-hali gi digau dogologo. Ogu dodo la di hagababa hoou a God.

14:25  Au e-hagi-adu gi goodou bolo Au hagalee e-inu di ibu-waini deenei labelaa, gaa-dae-loo gi-di laangi Au ma-ga-inu nia waini hoou i Teenua King o God.”

14:26  Nomuli-hua di-nadau daahili, digaula gaa-hula gi-di Gonduu Olib.

14:27  Jesus ga-helekai gi digaula, “Goodou huogodoo gaa-llele dagidahi, ga-diiagi Au, i-di Beebaa-Dabu e-helekai boloo, ‘God ga-daaligi tangada hagaloohi-siibi, gei nia siibi la-ga-lellele dagidahi.’

14:28  “Gei i-muli dogu mouli-aga, gei Au gaa-hana i godou mua gi Galilee.”

14:29  Peter ga-helekai gi Mee, “Ma e-aha maa digaula ga-diiagi Goe, gei au la-hagalee-loo e-diiagi Goe!”

14:30  Jesus ga-helekai gi Peter, “Au e-hagi-adu bolo i-mua teduu daane ma-gaa-wolo haga-lua boo-nei, gei goe ga-helekai haga-dolu bolo goe e-de-iloo-e-goe Au.”

14:31  Peter ga-helekai maaloo, “Au hagalee-loo e-helekai bolo au e-de-iloo-eau Goe, ma e-aha maa au e-hai gii-made dalia Goe!” Nia dama-agoago huogodoo ala i-golo e-helekai go telekai la-hua.

14:32  Digaula gaa-dau i Gethsemane, gei Jesus ga-helekai gi ana dama-agoago, “Noho i-ginei i dogu madagoaa e-hai agu dalodalo.”

14:33  Mee gaa-lahi a Peter, James mo John. Di manawa-gee guu-dau hogi i ono lodo,

14:34  ge-Ia ga-helekai gi digaula, “Ogu lodo gu-manawa-gee huoloo, be-di mee ga-hagahuaidu Au gii-made. Goodou noho i ginei mo-di madamada gi-daha.”

14:35  Gei Mee gaa-hana gi-mada-tanga i digaula, gaa-bala-ia gi-hongo di gelegele, ga-dalodalo be-di madagoaa o-di hagaduadua le e-mee di-daa gi-daha mo Ia, be di-maa e-mee.

14:36  Mee ga-helekai, “Abba, dogu Damana, Goe e-mee i-nia mee huogodoo. Daawa-ina di ibu o-di hagaduadua gi-daha mo Au. Gei hagalee go dogu hiihai, go do hiihai le e-hai.”

14:37  Gei Mee ga-hanimoi gi-baahi ana dama-agoago dogodolu, ga-gidee digaula e-kii. Gei Mee ga-helekai gi Peter, “Simon, goe e-kii hua? Goe e-deemee di-haga-aala i-di aawaa hua-e-dahi?”

14:38  Mee ga-helekai gi digaula, “Noho loloohi, dalodalo gi-dee too goodou gi-lodo di hagamada. Di hagataalunga le e-hiihai, gei tuaidina le e-bagege.”

14:39  Gei Mee gaa-hana labelaa, ga-dalodalo, go nnelekai la-hua nogo dalodalo-ai i-mua.

14:40  Ga-hanimoi labelaa gi-nia dama-agoago, gei digaula guu-kii, gu-deemee di-haga-aala. Digaula gu-de-iloo di-nadau helekai gi Mee.

14:41  Tolu holongo ne-hanimoi-iei Mee gi digaula, ga-helekai, “Goodou e-kii-hua molooloo? Guu-dohu di-godou molooloo! Di aawaa la-gu-dau-mai! Mmada, Tama-Tangada la-gaa-wanga gi-lodo nia lima digau huaidu.

14:42  Goodou tuu-i-nua, hula. Mmada, tangada dela e-wanga Au, la deenei gu-hanimoi!”

14:43  Jesus nogo leelee hua igolo, gei Judas, tangada i-nia dama-agoago dilongoholu maa-lua a-Maa, gu-dau-mai mo digau dogologo mo nadau hulumanu-dauwa mono goloo-heebagi. Digaula ne-hagau-mai go nia dagi hai-mee-dabu mo digau haga-donudonu haganoho mo nia dagi mmaadua.

14:44  Tangada dela e-hagi-aga a-Mee gu-haga-modongoohia gi tagabuulinga dangada deelaa, “Taane dela gaa-hongi ko-au, deelaa go Mee. Lawalawa-ina, lahia, hagaloohia gi-humalia.”

14:45  Di-dau-mai hua Judas, mee ga-hanadu gi Jesus, ga-helekai, “Tangada Agoago”, ga-hongi-adu a-Mee.

14:46  Gei digaula ga-lawalawa a Jesus gi-mau-dangihi.

14:47  Tangada i digau ala e-tuu i-golo ga-haga-mmuu dana hulumanu-dauwa, gaa-tuu talinga di hege a tagi aamua hai-mee-dabu.

14:48  Jesus ga-helekai, “Goodou e-aha, ala e-lloomoi mo godou goloo-heebagi belee lawalawa Au, guu-hai Au be tangada gu-ihala?

14:49  Nia laangi huogodoo, gei Au nogo agoago i-lodo di Hale Daumaha, goodou nogo i-golo, digi kumidia Au. Gei nnelekai di Beebaa-Dabu le e-hai gi-kila-aga.”

14:50  Nomuli, gei ana dama-agoago huogodoo ga-diiagi a-Mee, gaa-llele gi-daha.

14:51  Tama-daane e-ulu hua di gahu malali, nogo daudali a Jesus, gei digaula belee lawalawa a-mee,

14:52  gei mee gaa-lele, gu-diiagi ono goloo nogo ulu-ai.

14:53  Digaula gaa-lahi a Jesus gi-di hale o tagi aamua hai-mee-dabu, di gowaa e-dagabuli nia dagi aamua hai-mee-dabu huogodoo, nia dagi mmaadua, mo digau haga-donudonu haganoho.

14:54  Peter e-daudali a Jesus haga-mogowaa, ga-dau-loo gi-lodo di abaaba o-di hale o tagi aamua hai-mee-dabu. Geia gaa-noho gi-lala i-baahi digau-hagaloohi e-haga-mahanahana.

14:55  Nia dagi hai-mee-dabu, mo digau hai-gabunga-aamua e-hagamahi e-halahala nadau hagamodongoohia hai-baahi belee daaligi Jesus gii-made, gei e-deemee di-gida di-nadau mee.

14:56  E-dogologo digau haga-modongoohia dilikai e-hagahuaidu a Jesus, gei nia haga-modongoohia digaula hagalee buni.

14:57  Gei hunu daane ga-tuu-i-nua, ga-helekai tilikai e-hagahuaidu a Jesus,

14:58  “Gimaadou gu-hagalongo gi Mee e-helekai boloo, ‘Au ga-oho di Hale Daumaha dela ne-hau go nia daangada, gei i-muli-hua nia laangi e-dolu, gei Au ga-haga-duu-aga di-maa, hagalee e-hau go nia daangada.’ ”

14:59  Gei digaula hogi hagalee buni gi-di kai e-dahi.

14:60  Tagi aamua hai-mee-dabu ga-duu-i-nua i-mua digaula huogodoo, ga-heeu gi Jesus, “Au helekai i-golo ai gi-nia hagahuaidu digaula ala e-hai-adu?”

14:61  Gei Jesus e-noho-hua dee-muu. Tagi aamua hai-mee-dabu ga-heeu labelaa, “Goe go di Mesaia, Tama-daane a God Aamua?”

14:62  Jesus ga-helekai, “Ko-Au go Mee. Goodou huogodoo gaa-mmada-laa gi Tama-Tangada gaa-noho i-di baahi gau-donu o God Mogobuna, ga-hanimoi i-hongo nia gololangi.”

14:63  Tagi aamua hai-mee-dabu ga-duu-i-nua, ga-haahi dono gahu ga-helekai, “Gidaadou hagalee halahala tadau gau haga-modongoohia!

14:64  Goodou gu-longono nia hagahuaidu a-maa. Dehee di-godou hiihai?” Gei digaula ga-helekai hai-baahi, “Mee guu-doo gi-di hala, gu-humalia-hua dono hagamaehamaeha.”

14:65  Hunu gau i digaula e-buibui nadau haawale gi Mee, gaa-gahu nia golomada o-maa, ga-hagamamaawa a-Mee, ga-helekai, “Ma koai dela ne-hagamaawa goe?” Gei digau hagaloohi gaa-lahi a-mee mo-di paapaa.

14:66  Peter nogo i-lodo di abaaba, gei di ahina hai-hegau a tagi aamua hai-mee-dabu ga-hanimoi-laa dono baahi.

14:67  Di madagoaa di ahina ne-gidee a Peter e-haga-mahanahana, geia gaa-mmada haga-huudonu gi mee, ga-helekai, “Kooe nogo madalia labelaa a Jesus o Nazareth.”

14:68  Peter ga-haga-de-iloo-ia ga-helekai, “Au e-de-iloo di mee dela e-helekai-iei-goe,” gei mee ga-hanadu gi-di bontai, [gei teduu gaa-wolo.]

14:69  Tama-ahina gaa-mmada gi mee i-golo, ga-helekai labelaa gi digaula, “Mee tangada i digaula.”

14:70  Gei Peter ga-haga-de-iloo labelaa. Nomuli-hua, gei digau ala nogo tuu i-golo ga-helekai, “Goe e-deemee di hagammuni goe, i-di-goe tangada i digaula, tangada mai Galilee.”

14:71  Gei Peter ga-helekai, “Au e-helekai i-di tonu bolo God gi-hagahuaidu-ina au, be au e-helekai tilikai. Au e-de-iloo-eau Taane dela e-helekai-iei goodou!”

14:72  Nomuli-hua, gei teduu gaa-wolo i-di lua wolo, gei Peter ga-langahia nia helekai a Jesus ne-hai, “I-mua teduu gaa-wolo haga-lua, gei goe ga-helekai haga-dolu bolo goe e-de-iloo-e-goe Au.” Nomuli-hua, gei mee gu-lodo-huaidu huoloo, gu-dangidangi manawa-gee.

Chapter 15

15:1  Luada-loo, gei tagi aamua hai-mee-dabu gu-limalima di-heetugi gi-nia dagi mmaadua, digau haga-donudonu haganoho, digau hai-gabunga-aamua huogodoo, ga-haga-taele di-nadau hai. Digaula ga-lawalawa a Jesus gi tiini baalanga, gaa-lahi gi Pilate.

15:2  Gei Pilate ga-heeu gi mee, “Ma Kooe dela go di king o digau o Jew?” Gei Jesus ga-helekai, “Dela gu-helekai-iei goe.”

15:3  Nia dagi hai-mee-dabu gu-hagahuaidu a Jesus i-nia mee e-logo.

15:4  Malaa, Pilate ga-heeu labelaa gi Mee, “Goe hagalee helekai gi-nia helekai digaula? Hagalongo gi-nia hagahuaidu huogodoo digaula i-di-Goe!”

15:5  Jesus e-noho hua dee-muu, gei Pilate gu-gologolo huoloo.

15:6  Nia Hagamiami Pasoobaa huogodoo, gei Pilate e-nnoo-mau e-hai gi-hagamehede dana dangada galabudi dela e-hiihai ginai nia daangada.

15:7  Taane go Barabbas nogo galabudi madalia digau hai-baahi ala ne-daaligi nia daangada gii-mmade i-lodo nneebagi.

15:8  Digau dogologo ne-dagabuli-mai, ga-daamada ga-huuhuli a Pilate gi-heia go dana hai dela nogo hai ang-gi ginaadou.

15:9  Mee ga-heeu, “Goodou e-hiihai bolo au gi-haga-mehede-ina-adu di king o digau o Jew?”

15:10  Mee gu-iloo humalia, bolo nia dagi hai-mee-dabu la-ne-wanga a Jesus gi-deia, i-di nadau dubua i Mee.

15:11  Gei nia dagi hai-mee-dabu ga-huuhuli digau dogologo aalaa gi-helekai gi Pilate gi-hagamehede-ina a Barabbas.

15:12  Pilate ga-helekai labelaa gi digaula, “Malaa di-aha dela e-hiihai ginai goodou bolo au gi-heia gi taane dela e-hagaingoo go goodou bolo di king o digau o Jew?”

15:13  Gei digaula gaa-wwolo, “Daudaulia a-Mee!”

15:14  Pilate ga-heeu, “Malaa, di huaidu aha, dela ne-hai go Mee?” Gei digaula gaa-wwolo labelaa gi-nonua, “Daudaulia a-Mee!”

15:15  Pilate e-hiihai e-haga-manawa lamalia lodo digau dogologo aalaa, dela ga-hagamehede a Barabbas gi digaula, nomuli geia gaa-dugu ang-gi digaula gi-haga-mamaawa-dia Jesus, gi-daudau-ina a-Mee.

15:16  Digau dauwa gaa-lahi a Jesus gi-lodo di abaaba di hale gobinaa, ga-gahigahi-mai nadau ihoo gau-dauwa huogodoo.

15:17  Digaula ga-haga-ulu a Jesus gi-di gahu mmee-uli, gaa-bini di-nadau hau laagau duduia, gaa-wanga gi-di libogo o-Maa.

15:18  Gei digaula gaa-pala ga-hagaaloho gi Mee ga-helekai, “Di king o digau o Jew gi-mouli waalooloo!”

15:19  Gei digaula ga-haga-mamaawa dono libogo gi-di laagau, ga-buibui nadau haawale gi Mee, ga-dogoduli, ga-palapala gi Mee.

15:20  Gaa-lawa-loo di-nadau hagahuaidu a-Mee, gaa-daa gi-daha di gahu mmee-uli, ga-haga-ulu a-Mee labelaa gi ono gahu donu, gaa-dagi a-Mee gi-tua di waahale belee daudau gi-di loobuu.

15:21  Digaula ga-heetugi gi taane dono ingoo go Simon, tangada o Cyrene, tamana o Alexander mo Rufus. Mee ne-haneia i tenua gi-di waahale deelaa, gei digau-dauwa gaa-hai a-mee gi-aamo-ina di loobuu a Jesus.

15:22  Digaula gaa-lahi a Jesus gi-di gowaa dela e-haga-ingoo bolo Golgotha, dela dono hadinga boloo, “Di Gowaa Hangaibu-Libogo”.

15:23  Digaula ga-hagamada gaa-wanga nadau waini gu-unugi gi-nia ‘myrrh’, gei Jesus digi inu-mia nia maa.

15:24  Gei digaula ga-daudau a-Mee, gaa-duwwe nia gahu o-Maa i ginaadou. Ga-huduhudu nadau ‘dice’ belee halahala be dehee di mee gahu gaa-kae ko-ai.

15:25  Di laa e-hiwa luada dela ne-daudau-iei Mee.

15:26  Di haga-modongoohia taudau o-Maa, guu-hihi gi-hongo di loobuu e-hai boloo, “Di king o digau o Jew.”

15:27  Digaula gu-daudau labelaa nia daane huaidu dogolua i-baahi o Mee, e-dahi i dono baahi gau-donu, ge dahi i dono baahi gau-ihala.

15:28  [Di Beebaa-Dabu e-hai-donu i telekai deenei, “Mee guu-dau dalia digau huaidu.”]

15:29  Nia daangada ma-ga-lloomoi laa-laa, le e-lialiagi nadau libogo mo-di haganneennee a Jesus, ga-helehelekai, “Hahaa! Ma kooe dela belee oho di Hale Daumaha, ga-haga-duu-aga labelaa i-lodo nia laangi e-dolu!

15:30  Doo-iha laa gi-daha, heia Goe gi-mouli!”

15:31  Nia dagi hai-mee-dabu, mo digau haga-donudonu haganoho, e-haganneennee labelaa a Jesus, ga-helehelekai, “Mee e-mee di-haga-mouli nia daangada, gei e-deemee di haga-mouli Ia!

15:32  Heia gimaadou gi-gidee di Mesaia, di king o digau Israel, e-doo-iha gi-lala mo-di loobuu dolomeenei, gei gimaadou ga-hagadonu-laa Goe!” Nia daane ala ne-daudau dalia a-Mee e-haganneennee labelaa a Jesus.

15:33  I-di oodee, gei tenua hagatau gu-bouli dongoeho, gaa-dae-loo gi-di laa e-dolu.

15:34  I-di laa e-dolu, gei Jesus gaa-dangi gi-nua, “Eloi, Eloi, Lama, Sabaktani?” dono hadinga boloo, “Dogu God, dogu God, Goe gu-diiagi Au beleiaha?”

15:35  Hunu gau ala e-tuu i-golo gu-longono, ga-helekai, “Hagalongo, Mee e-gahigahi a Elijah!”

15:36  Tangada i digaula gaa-lele, gaa-kae dana liimi, ga-hagatiu gi-lodo nia waini hui-ngoohia, gaa-dui gi-di ngudu di laagau, gaa-togo gi-nia malau-ngudu o Jesus, ga-helekai, “Daalia, gii-mmada gidaadou be Elijah e-hanimoi e-dugu-ia a-Mee!”

15:37  Jesus gaa-dangi gi-nua, ga-hagaodi ono madangi.

15:38  Di gahu-duuli nogo dau i-lodo di Hale Daumaha, gu-mahaa-lua-eia i-nua, guu-modu gi-lala.

15:39  Tagi-dauwa nogo duu i-mua di loobuu, ne-gidee-ia di made o Jesus, ga-helekai, “Taane deenei la-go Tama donu a God.”

15:40  Nia ahina nogo i-golo, e-mmada mai i-daha. Mary mai Magdala, mo Mary tinana o James-dulii mo Joseph, mo Salome, nogo i-baahi digaula.

15:41  Aanei go digaula nogo madalia a Jesus i Galilee, nogo hagamaamaa a-Mee. Gei nia ahina dogologowaahee ala i-golo, ne-lloomoi labelaa dalia a-Mee gi Jerusalem.

15:42  Hiahi-ia di mee, gei Joseph tangada o Arimathea ga-dau-mai.

15:43  Mee tangada hagalabagau i-lodo digau hai-gabunga aamua, ge e-talitali hogi Teenua King o God. Di laangi deelaa la-di Laangi Hagatogomaalia, dela di laangi i-mua di Laangi-Sabad, malaa, Joseph gaa-hana hagamahi gi-mua o Pilate belee madau tuaidina o Jesus.

15:44  Pilate gu-homouli huoloo i dana longono bolo Jesus la-guu-made, geia ga-gahi-mai tagi-dauwa belee heeu be di-maa e-donu, bolo Jesus la-guu-made.

15:45  Dono modongoohia di made o Jesus mai tagi-dauwa, gei mee ga-hagi-anga gi Joseph gi-kae-ina tuaidina o Jesus.

15:46  Joseph gaa-hui dana gahu lenge, ga-dugu-ia tuaidina o-Maa gi-lala, gaa-hii a-Mee gi-di gahu deelaa, gaa-dugu gi-lodo taalunga dela ne-hodo gi-lodo tadugalaa. Gaa-lawa ga-haga-daga-mai tadugalaa damana, gaa-pono di bontai taalunga.

15:47  Mary mai Magdala, mo Mary tinana o Joseph nogo i-golo, gu-gidee di gowaa dela e-dugu-ai tuaidina o Jesus.

Chapter 16

16:1  I-muli di Laangi-Sabad, Mary mai Magdala, mo Mary tinana o James, mo Salome gaa-hui nadau lolo-kala, belee hula e-hagatulu tuaidina o Jesus.

16:2  Luada-loo di laangi-tabu, digaula gaa-dau i taalunga i-di madagoaa di laa e-hobo,

16:3  ge heheeu i nadau mehanga, “Ma koai dela ga-hagamaamaa gidaadou e-hagadaga tadugalaa gi-daha mo-di bontai o taalunga?” Idimaa tadugalaa le e-damanaiee.

16:4  Digaula ga-mmada-adu, gei di-maa guu-lawa di-hagadaga gi-daha.

16:5  Gei digaula ga-ulu-adu gi-lodo taalunga, gaa-mmada gi tama-daane e-ulu ono gahu kene hila-mmaa, e-noho i-di baahi gau-donu taalunga, gei digaula gu-homouli gu-mmaadagu.

16:6  Mee ga-helekai, “Goodou hudee mmaadagu, au e-iloo bolo goodou e-halahala a Jesus o Nazareth dela ne-daudau. Mee hagalee i-ginei, gu-mouli-aga. Mmada, deenei di gowaa nogo dugu-iei Mee.

16:7  Hula, haga-iloo-ina gi ana dama-agoago mo Peter boloo, ‘Mee guu-hana gi Galilee i godou mua, deelaa di gowaa e-heetugi-iai goodou gi Mee be ana helekai ala ne-hai-adu.’ ”

16:8  Digaula ga-ulu-mai gi-daha mo taalunga, ga-llele-hua i-lodo di-nadau mmaadagu, digi leelee gi tei dangada.

16:9  [I-muli di mouli-aga o Jesus luada-loo di laangi-tabu, mee ne-haga-gida-eia gi Mary mai Magdala matagidagi, di ahina a-Mee ne-hagabagi ono hagataalunga huaidu e-hidu.

16:10  Mary gaa-hana ga-odi gi-nia hoo o Jesus ala e-manawa-gee ge e-tangitangi.

16:11  Gei digaula digi hagadonu a-mee ne-helekai bolo Jesus gu-mouli-aga, gei guu-mmada gi Mee.

16:12  Nomuli-hua, gei Jesus ga-haga-gida eia i-nia ala geegee gi ana dama-agoago dogolua, i nau hula gi-di-nau guongo i-tua di waahale.

16:13  Meemaa ga-lloomoi labelaa ga-hagi-anga gi nau ihoo aalaa, gei digaula hagalee hagadonu.

16:14  I-di hagaodi nia mee huogodoo, Jesus ne-haga-gida gi-nia dama-agoago dilongoholu maa-dahi, i-di nadau madagoaa nogo miami. Ge-Ia ga-haga-buhi gi digaula i digaula nadau hagadonu ai, ge e-hagadonu-ngadaa digau ala ne-mmada gi-de-Ia ne-mouli-aga.

16:15  Mee ga-helekai gi digaula, “Hula gi-nia madagowaa huogodoo ala i henuailala, hagadele-ina di Longo-Humalia gii-dau i-nia daangada huogodoo.

16:16  Tangada dela ga-hagadonu, ga-babdais, geia gu-hagamouli. Tangada ma-ga-de-hagadonu, le e-hudu gi-daha.

16:17  Digau hagadonu le e-wanga ginai di mogobuna gii-mee-ai di-hagabagi nia hagataalunga huaidu i dogu ingoo. Digaula ga-leelee i-nia helekai henua-gee.

16:18  Maa digaula ma-ga-dahi-aga nia gihaa, ga-inu nia poisin, la-hagalee mmade. Digaula ma-ga-daahi nadau lima gi-hongo digau magi, nia magi le e-hili.”

16:19  Tagi Jesus i-muli ana helekai gi digaula, gei Mee gaa-lahi gi-di langi, gaa-noho i-di baahi gau-donu o God.

16:20  Gei nia dama-agoago gaa-hula, ga-agoago i-nia madagowaa huogodoo, gei Tagi le e-madalia digaula, e-hagamaaloo nia agoago digaula bolo e-donu, mai i nadau mogobuna haga-goboina ala e-hai.]