Azeri - John

Chapter 1

1:1  باشلانيشدا کلمه وار ائدي، کلمه تارينين يانيندا ائدي، و کلمه تاري ائدي.

1:2  او، باشلانيشدا تارينين يانيندا ائدي.

1:3  هر شي اونون واسئطه​سئله ياراندي و اولموش اولانلاردان هچ بئري اونسوز اولمادي.

1:4  اوندا حيات وار ائدي و او حيات ائنسانلارا نور ائدي.

1:5  او نور قارانليقدا پارلايير. آمّا قارانليق اونا ظفر تاپماييب.

1:6  تاري طرفئندن گؤنده‌رئلمئش بئر کئشي وار ائدي، آدي يحيا.

1:7  او، شاهئد ائدي و نور حاقّيندا شهادت ورمک اوچون گلدي کي، اونون واسئطه​سئله بوتون ائنسانلار ائمان گتئرسئنلر.

1:8  او اؤزو، او نور ديئلدي. او آنجاق اونون اوچون گلدي کي، او نور حاقّيندا شهادت ورسئن.

1:9  او حقئقي نور ائدي کي، دونيايا گلئب بوتون ائنسانلاري ائشيقلانديرير.

1:10  ​​او، دونيادا ائدي و دونيا اونون واسئطه​سئله ياراندي، آمّا دونيا اونو تانيمادي.

1:11  ​​​اؤزونونکولرئن يانينا گلدي، آمّا اؤزونونکولر ده اونو قبول اتمه‌دئلر.

1:12  لاکئن اونو قبول ادنلرئن هاميسينا، اونون آدينا ائمان گتئرنلره بو حاقّي وردي کي، تارينين اؤولادلاري اولسونلار.

1:13  قاندان دوغولموش اؤولادلار يوخ، نفسئن​ ائسته‌دئيئندن​ دوغولموش​ اؤولادلار​ يوخ، ائنسانين ائراده​سئندن دوغولموش اؤولادلار يوخ، اونلار تاريدان دوغولدولار.

1:14  و کلمه ائنسان اولوب آراميزدا ساکئن اولدو و بئز اونون جلاليني گؤردوک، آتانين يگانه اوغلونون جلاليني. او، فيض و حقئقتله دولو ائدي.

1:15  يحيا اونون حاقّيندا شهادت ورئر. و نئدا ادئب: "بودور او ددئيئم آدام، مندن سونرا گلن آدام کي، مندن موقدّمدئر. چونکي من اولماميشدان، او وار ائدي."

1:16  اونون دولولوغوندان هاميميز فيض اوستونه فيض آلديق.

1:17  شرئعت موسانين واسئطه​سئله ورئلمئشدي. فيض و حقئقت عئسا مسئحئن واسئطه​سئله اولدو.

1:18  کئمسه تاريني هچ بئر زامان گؤرمه‌يئب. آتانين قوجاغيندا اولان يگانه اوغول اونو تانيتدي.

1:19  و بودور يحيانين شهادتي، او زامان کي، يهودئلر اورشلئمدن کاهئنلر​له لاوئلي‌لري اونون يانينا گؤنده‌ردئلر کي، اوندان سوروشسونلار: "سن کئمسن؟"

1:20  يحيا آچيقجا ائقرار اتدي. او ائقرار اتدي کي، "من مسئح ديئلم."

1:21  اونلار سوروشدولار: "بس کئمسن؟ ائليا؟" ددي: "ديئلم." "-آيا او پيغمبرسن؟" جاواب وردي: "ديئلم."

1:22  اوندان سوروشدولار: "بس کئمسن؟ اؤز حاقّيندا نه ديئرسن کي، بئزي گؤنده‌رنلره جاواب آپاراق؟"

1:23  يحيا جاواب وردي: "نجه اشعيا پيغمبر ديئب، من چؤلده جار چکن بئرئنئن سسئيم کي، ديئر؛ «ربّئن يولونو دوز ادئن.»"

1:24  اونلار فرئسئلر طرفئندن گؤنده‌رئلمئشدئلر.

1:25  و اوندان سوروشوب ددئلر: "اگر نه مسئحسن، نه ائليا‌سان، نه ده او پيغمبرسن، بس نه اوچون تعمئد ورئرسن؟"

1:26  يحيا جاواب ورئب ددي: "من سو ائله تعمئد ورئرم، آمّا آرانيزدا بئري دورور کي، اونو تانيميرسينيز.

1:27  او، مندن سونرا گلن همن او آدامدير کي، اونون آياق قابيسينين باغيني دا آچماغا بله لايئق ديئلم."

1:28  بو احوالات اوردون چايينين او تاييندا، بيت‌عنيادا، يحيانين تعمئد وردئيي يرده باش وردي.

1:29  او گونون صاباحيندا، يحيا عئسانين اونون يانينا گلمه‌سئني گؤره‌نده ددي: "بودور تارينين قوزوسو! دونيانين گوناهيني اورتادان قالديران!

1:30  بودور او کي، اونون حاقّيندا دمئشدئم؛ مندن سونرا بئر آدام گلئر کي، مندن موقدّم اولوب. چونکي من اولماميشدان، او وار ائدي.

1:31  ​​​من اؤزوم ده اونو تانيميرديم، آمّا بونون اوچون گلئب سودا تعمئد ورمه‌يي باشلاديم کي، او اؤزونو ائسرايئله ظاهئر اتسئن."

1:32  و يحيا شهادت ورئب ددي: "موقدّس روحو گؤرموشم کي، گؤيدن گؤيرچئن شکلئنده اِنئر و اونون اوستونه قونور.

1:33  اونو تانيميرديم. آمّا سو ائله تعمئد ورمک اوچون مني گؤنده‌رن، منه دمئشدي؛ «کئمئن اوستونه روحون انئب قالديغيني گؤره​سن، موقدّس روحلا تعمئد ورن او اؤزودور.»

1:34  و من گؤروب شهادت ورمئشم؛ بودور تارينين اوغلو!"

1:35  او گونون صاباحي، يحيا گئنه شاگئردلرئنئن ائکئسي ائله دورموشدو.

1:36  و عئسا گزئرکن، يحيا اونو گؤروب ددي: "بودور تارينين قوزوسو!"

1:37  او ائکي شاگئرد اونون ددئيئني اشئدئب عئسانين دالينجا گتدئلر.

1:38  عئسا دؤنوب اونلارين اؤز دالينجا گلمکلرئني​گؤردو ​و ​ددي: "نه آختاريرسينيز؟" اونلار اونا ددئلر: «رابّي (يعني اوستاد)، هارادا منزئل ادئبسن؟"

1:39  عئسا اونلارا ددي: "گلئن، گؤررسئنئز." بلجه اونلار دا گلئب عئسانين هارادا منزئل اتدئيئني گؤردولر و او گون اونونلا قالديلار. گونون اونونجو ساعاتي ائدی.

1:40  او ائکي آدامدان بئري کي، يحيانين سؤزلرئني اشئدئب عئسانين دالينجا گتمئشدي، شمعون پطروسون قارداشي آندرياس ائدي.

1:41  بو، اوّل اؤز قارداشي شمعونو تاپيب اونا ددي: "بئز مسئحي تاپميشيق."

1:42  آندرياس شمعونو عئسانين يانينا گتئردي. عئسا اونا باخيب ددي: "سن يونا اوغلو شمعونسان. سن کئفا چاغيريلاجاقسان."

1:43  او گونون صاباحي عئسا ائسته‌دي کی، جلئله گتسئن. و فئلئپوسو تاپيب اونا ددي: "داليمجا گل."

1:44  فئلئپوس دا آندرياس و پطروسون شهري بيت​صيدادان ائدي.

1:45  فئلئپوس نَته‌ناعئلي تاپيب اونا ددي: "بئز موسانين تؤوراتيندا يازيلديغي و پيغمبرلرئن اوندان سؤز اتدئيي آدامي تاپميشيق، يوسئف اوغلو ناصئره‌لي عئساني."

1:46  نَته‌ناعئل اونا ددي: "مگر ناصئره​دن ده ياخشي بئر شي چيخار؟!" فئلئپوس اونا ددي: "گل، اؤزون گؤر!"

1:47  عئسا نَته‌ناعئلئن اونون يانينا گلمه‌سئني گؤرنده، اونون حاقّيندا ددي: "بودور ائچئنده حئيله​سي اولمايان حقئقي بئر ائسرايئللي!"

1:48  نَته‌ناعئل اونا ددي: "سن مني هارادان تاني‌ييرسان؟" عئسا اونا جاواب ورئب ددي: "فئلئپوس حله چاغيرماميش، سني انجئر آغاجينين آلتيندا اولاندا گؤردوم."

1:49  نَته‌ناعئل اونا ددي: "اوستاد، سن تارينين اوغلوسان! سن ائسرايئلئن پادشاهي‌سان!"

1:50  عئسا اونا جاواب ورئب ددي: "آيا او سببدن ائنانيرسان کي، سني انجئر آغاجينين آلتيندا گؤردويومو ددئم؟! بونلاردان داها بؤيوک شيلر گؤره​جکسن."

1:51  عئسا اونا ددي: "دوغروسونو سئزه ديئرم؛ گؤي اورتاسينين آچيلديغيني و ائنسان اوغلونون اوستونه تاري ملکلرئنئن قالخيب اندئکلرئني گؤره​جکسئنئز."

Chapter 2

2:1  اوچونجو گون جلئلئن قانا کندئنده بئر توي وار ائدي و عئسانين آناسي دا اورادا ائدي.

2:2  عئسا دا شاگئردلري ائله بو تويا چاغيريلميشدي.

2:3  شرابين اسکئک گلدئيي زامان، عئسانين آناسي اونا ددي: "شرابلاري يوخدور."

2:4  عئسا آناسينا ددي: "منئمله ائشئن اولماسين آنا، منئم واختيم حله يتئشمه‌يئب."

2:5  آناسي خئدمت ادنلره ددي: "سئزه نه دسه، اونو ادئن."

2:6  يهودئلرئن طهارت عادتئنه گؤره، سو اوچون اورادا آلتي داش کوپ وار ائدي و هر بئرئسي ائکي يا دا اوچ اؤلچو سو توتوردو.

2:7  عئسا خئدمت ادنلره ددي: "کوپلري سو ائله دولدورون." و اونلار کوپلري آغيزلارينا قدر دولدوردولار.

2:8  عئسا اونلارا ددي: "ائندي اونلاردان چکئن و ضئيافت ريئسئنه آپارين." اونلار دا چکئب آپارديلار.

2:9  ضئيافت ريئسي بو شرابين هارادان گلدئيئني بئلمئردي، آنجاق سويو چکن خئدمتچئلر بئلئردئلر. شرابا دؤنموش سويو داديب، بَيي چاغيردي.

2:10  و اونا ددي: "هر کس اوّل ياخشي شرابي گتئرر و ائچئب کفلي اولاندان سونرا ياوا شرابي. سن بو لاپ ياخشي شرابي ائندئيه کئمي ساخلاييبسان!"

2:11  بو، عئسانين مؤجوزه​لرئنئن باشلانيشي ائدي کي، جلئلئن قانا کندئنده ادئب بلجه جلاليني ظاهئر اتدي. و شاگئردلري اونا ائمان گتئردئلر.

2:12  اوندان سونرا، عئسا آناسي، قارداشلاري و شاگئردلری ائله بئرلئکده کفرناحوما گتدي. آمّا اورادا آنجاق بئر نچه گون قالدي.

2:13  يهودئلرئن پاسخا بايرامي ياخينلاشيردي. و عئسا اورشلئمه گلدي.

2:14  و معبدده اؤکوز، قويون، گؤيرچئن ساتانلار، و صرّافليغا اوتوران صرّافلاري گؤردو.

2:15  ائپلردن بئر قامچي دوزلدئب اونلارين هاميسيني، قويونلاري و اؤکوزلری ائله برابر معبددن قوودو. صرّافلارين پوللاريني دا داغيديب، مئزلرئني چوئردي.

2:16  و گؤيرچئن ساتانلارا ددي: "بونلاري بورادان گؤتورون. آتامين اوئني آليش-ورئش اِوئنه دؤندرمه‌يئن."

2:17  اونون شاگئردلري خاطيرلاديلار کي، يازيليب: "سنئن اوئن اوچون اولان قيرتئم مني يانديريب تؤکر."

2:18  يهودئلر اونا ددئلر: «نه مؤجوزه بئزه گؤرسدئرسن کي، بله ادئرسن؟»

2:19  عئسا جاواب ورئب اونلارا ددي: "بو معبدي ييخين. اوچ گونده اونو آياغا قالديرارام."

2:20  يهودئلر ددئلر: "بو معبدئن بئنا ادئلمه‌سي قيرخ‌آلتي ائل چکئب و سن اونو اوچ گونده قالديراجاقسان!"

2:21  حال بو کي، عئسا معبد دمکده اؤز بدنئندن دانيشيردي.

2:22  اؤلولردن دئرئلندن سونرا، شاگئردلري عئسانين بو ددئيئني خاطيرلاديلار و موقدّس کئتابا و عئسانين ددئيي سؤزلره ائمان گتئردئلر.

2:23  عئسا پاسخا بايراميندا اورشلئمده اولاندا، چوخ آداملار اونون اتدئيي مؤجوزه​لري گؤروب اونا ائمان گتئردئلر.

2:24  آمّا عئسا اونلارا اعتئماد اتمئردي، چونکي بوتون ائنسانلاري تاني‌ييردي.

2:25  اونون ائنسان حاقّيندا هچ کسئن شهادتئنه احتئياجي يوخ ائدي. چونکي ائنسانين ائچئنده نه اولدوغونو بئلئردي.

Chapter 3

3:1  فرئسئلردن نئقودئموس آدلي بئر يهود ريئسي وار ائدي.

3:2  بو آدام گجه عئسانين يانينا گلئب اونا ددي: "اوستاد، بئز بئلئرئک کي، سن تارينين طرفئندن گؤنده‌رئلمئش بئر موعلّئمسن. چونکي هچ کس سن اتدئيئن علامتلري گؤرسه‌ده بئلمز، مگر تاري اونونلا اولسون."

3:3  عئسا جاوابيندا اونا ددي: "دوغروسونو سنه ديئرم؛ کئمسه تزه​دن دوغولمايينجا، تارينين پادشاهليغيني گؤره​بئلمز."

3:4  نئقودئموس اونا ددي: "بئر آدام قوجا ائکن نجه تزه​دن دوغولا بئلر؟ مگر اولار کي، آناسينين قارنينا گئرئب ائکئنجي دفه دوغولسون؟!"

3:5  عئسا جاواب وردي: "دوغروسونو سنه ديئرم؛ کئمسه سودان و موقدّس روحدان دوغولمايينجا، تارينين پادشاهليغينا گئره بئلمز.

3:6  جئسمدن دوغولان، جئسمدئر. روحدان دوغولان، روحدور.

3:7  تعجّوب اتمه کي، ددئم؛ تزه​دن دوغولماغينيز لازيمدير.

3:8  يل ائسته‌دئيي يرده اَسر. اونون سسئني اِشئده‌رسن، آمّا هارادان گلئب هارايا گتدئيئني بئلمزسن. روحدان دوغولموش آدام دا بله​دئر."

3:9  نئقودئموس جاواب ورئب اونا ددي: "بو شيلر نجه اولا بئلر؟"

3:10  عئسا جاواب ورئب اونا ددي: "سن ائسرايئلئن موعلّئمي اولان حالدا، بو شيلري بئلمئرسن؟!

3:11  دوغروسونو سنه ديئرم؛ بئز بئلدئيئمئزي ديئرئک، گؤردويوموزه شهادت ورئرئک و بئزئم شهادتئمئزي سئز قبول اتمئرسئنئز.

3:12  يره عاييد اولان شيلري سئزه ديئرم، ائنانميرسينيز. گؤيه عاييد اولان شيلردن دانيشسام، نجه ائناناجاقسينيز؟!

3:13  گؤيدن اِنمئش ائنسان اوغلوندان باشقا هچ کئم گؤيه چيخماييب

3:14  و نجه کي، موسا چؤلده ائلاني يوخاري قالديردي، ائنسان اوغلو دا بلجه يوخاري قالديريلمالي‌دير کي،

3:15  اونا ائمان گتئرن هر کس هلاک اولماييب، ابدي حياتي اولسون.

3:16  چونکي تاري دونياني اله سودي کي، اؤز يگانه اوغلونو فدا اتدي. اونا گؤره کي، اونا ائمان گتئرن هرکس هلاک اولماييب، ابدي حياتي اولسون.

3:17  چونکي تاري اوغلونو گؤنده‌رمه‌دي کي، دونياني موحاکئمه اتسئن. گؤنده‌ردي کي، دونيا اونون واسئطه​سئله نئجات تاپسين.

3:18  اونا ائمان گتئرن آدام محکوم اولماز. اونا ائمان گتئرمه‌ين اله ائندئدن محکوم اولوب، چونکي تارينين يگانه اوغلونا ائمان گتئرمه‌يئب.

3:19  و حؤکم بودور؛ نور دونيايا گلدي، آمّا ائنسانلار قارانليغي نوردان داها آرتيق سودئلر، چونکي عمللري پئس ائدي.

3:20  چونکي پئس ائشلر گؤرن هر آدام نوردان نئفرت ادر و اونا ياخين گلمز، مبادا ائشلري آشکار اولسون. ‌

3:21  آمّا حقئقتله ياشايان آدام نورا ياخين گلر کي، عمل​لرئنئن تاريدان ائطاعت اده‌رک يرئنه يتئشدئيي آشکار اولسون."

3:22  بوندان سونرا عئسا و شاگئردلري يهودئيه دئيارينا گلدئلر و عئسا بئر مودّت اونلارلا اورادا قاليب تعمئد ورئردي.

3:23  يحيا دا سالئمئن ياخينليغيندا، عِينوندا تعمئد ورئردي. چونکي اورادا سو چوخ ائدي. و خالق گلئب اوندان تعمئد آليرديلار.

3:24  يحيا حله زئندانا سالينماميشدي.

3:25  ​​​طهارت حاقّيندا يحيانين شاگئردلري ائله بئر يهودي آراسيندا موباحئثه دوشدو.

3:26  و اونلار يحيانين يانينا گلئب اونا ددئلر: "اوستاد، اوردونون او بئري تاييندا سنئنله اولان و حاقّيندا شهادت وردئيئن آدام، اؤزو تعمئد ورئر و هامي اونون يانينا گلئر."

3:27  يحيا جاواب ورئب ددي: "ائنسان هچ بئر شي آلا بئلمز، مگر گؤيدن اونا ورئلمئش اولسون.

3:28  سئز اؤزونوز شاهئدسئنئز کي، ددئم؛ من مسئح ديئلم، آمّا اوندان قاباق گؤنده‌رئلمئشم.

3:29  گلئن آلان، بَي‌دئر. آمّا بَيئن يانيندا دوران و اونا قولاق آسان دوستو، اونون سسئندن چوخ سِوئنَر. من ده بله سوئنئرم و ائندي بو شادليق کامئل اولوبدور.

3:30  او گرک آرتسين، آمّا من گرک اسکئلم.

3:31  يوخاريدان گلن هاميدان اوستوندور. دونيادان اولان دونيانينکي​دير و دونيادان دانيشار. گؤيدن گلن هاميدان اوستوندور.

3:32  او گؤردويونه-اشئتدئيئنه شهادت ورر، آمّا هچ کئم اونون شهادتئني قبول اتمز.

3:33  اونون شهادتئني قبول ادن آدام تارينين دوغرو اولدوغونا مؤهور باسيب.

3:34  ​​​تاري طرفئندن گؤنده‌رئلمئش آدام تاريدان دانيشار. چونکي تاري موقدّس روحو اؤلچو ائله ورمئر.

3:35  آتا اوغولو سوئر و هر شيي اونون ائختئياريندا قويوب.

3:36  اوغولا ائمان گتئره​نئن ابدي حياتي وار، آمّا اوغولدان ائطاعت اتمه‌ين آدام حيات گؤرمه‌يه‌جک، لاکئن تارينين قضبي اونون اوستونده قالير."

Chapter 4

4:1  فرئسئلر اِشئتدئلر کي، عئسا يحيادان داها چوخ آداملاري شاگئرد ادئب تعمئد ورئر.

4:2  حال بو کي، تعمئد ورن عئسا ديئلدي، اونون شاگئردلري ائدئلر.

4:3  رب بونو بئلدئکده يهودئيه وئلايتئني ترک ادئب گئنه جلئله گتدي.

4:4  و سامئره دئياريندان کچمه‌لي ائدي.

4:5  اونون اوچون ده سامئره​نئن سوخار آدلي بئر شهرئنه گلدي؛ او يرئن ياخينليغينا کي، يعقوب اؤز اوغلو يوسئفه ورمئشدي.

4:6  يعقوبون قويوسو اورادا ائدي. عئسا يولون يورغونلوغوندان بو قويونون يانيندا اوتوردو. تخمئنن گونون آلتينجي ساعاتي ائدی.

4:7  سامئره​لي بئر آرواد سو چکمک اوچون اورايا گلدي. عئسا اونا ددي: "منه سو ور، ائچئم."

4:8  شاگئردلري يمک آلماق اوچون شهره گتمئشدئلر.

4:9  سامئره​لي آرواد اونا ددي: "سن يهودئسن، من سامئره​لي بئر آرواد. نجه اولور کي، سن مندن سو ائسته‌يئرسن؟!" چونکي يهودئلر سامئره​لئلر​له قاتيشمازلار.

4:10  عئسا جاوابيندا اونا ددي: "اگر سن تارينين بخشئشئني بئلئردئن، اگر «منه سو ور ائچئم» دئيه‌نئن کئم اولدوغونو بئلئردئن، سن اوندان ائستَردئن و او سنه حيات سويونو وِرَردي."

4:11  آرواد اونا ددي: "آغا، سو چکمک اوچون دولچا يوخوندور، قويو دا درئندئر. بلجه هارادان بله بئر حيات ورن سويون وار؟

4:12  مگر سن بو قويونو بئزه ورن آتاميز يعقوبدان دا بؤيوکسن کي، هم اؤزو بو قويودان ائچئردي، هم ده اوغوللاري و مال-حيوانلاري؟!"

4:13  عئسا جاواب ورئب اونا ددي: "بو سودان ائچن هر کس گئنه سوسوز اولاجاق.

4:14  آمّا من ورن سودان کئمسه ائچسه، اصلا سوسوز اولماز. من ورن سو اونون ائچئنده قاينايان بئر بولاق اولار کي، اونا ابدي حياتي ورئر."

4:15  آرواد اونا ددي: "آغا، بو سويو منه ور کي، سوسوز اولماييم و سو چکمک اوچون بورايا گلمه‌يئم."

4:16  عئسا اونا ددي: "گت، اَرئني چاغير و بورايا گل."

4:17  آرواد جاواب وردي: "اَرئم يوخدور." عئسا اونا ددي: "اَرئم يوخدور دمکده دوغرو ديئرسن.

4:18  ​​​چونکي بش کئشئيه اَره گدئبسن و ائندي سنئنله ياشايان آدام اَرئن ديئل. ددئيئن سؤز دوغرودور."

4:19  آرواد عئسايا ددي: "آغا، گؤرورَم کي، سن بئر پيغمبرسن.

4:20  بئزئم آتالاريميز بو داغدا عئبادت ادئبلر. آمّا سئز يهودئلر ديئرسئنئز کي، عئبادت اده​جه‌يئمئز مکان اورشلئمده​دئر."

4:21  عئسا اونا ددي: "آرواد، منه ائنان. او واخت گلئر کي، آتايا نه بو داغدا نه ده اورشلئمده عئبادت اده​جکلر.

4:22  سئز بئلمه​دئيئنئزه عئبادت ادئرسئنئز، بئز بئلدئيئمئزه عئبادت ادئرئک. چونکي نئجات يهودئلردن گلئر.

4:23  آمّا او واخت گلئر، اله گلئبدئر ده کي، دوغرو عئبادت اِدَنلر، آتايا روحدا و حقئقتده عئبادت اده​جکلر. آتا اؤزونه بله عئبادت ادنلر آختارير.

4:24  تاري روحدور و اونو عئبادت ادنلر، اونا روحدا و حقئقتده عئبادت اتمه‌لي‌دئرلر."

4:25  آرواد اونا ددي: "بئلئرم کي، مسئح گلئر، او کي، اونا خيرئستوس ديئرلر. او، گلدئيي زامان، هر شيي بئزه آچيقلاياجاق."

4:26  عئسا اونا ددي: "من همن اويام کي، سنئنله دانيشيرام."

4:27  بو آرادا عئسانين شاگئردلري ده گلدئلر و اونو بئر آروادلا دانيشماقدا گؤرنده تعجّوب اتدئلر. آمّا هچ بئرئسي "نه ائسته‌يئرسن؟" يا ائنکي "نه اوچون اونونلا دانيشيرسان؟" سوروشمادي.

4:28  او زامان سامئره​لي آرواد کوزه​سئني قويوب شهره قاييتدي و خالقا ددي:

4:29  "گلئن، او آدامي گؤرون کي، گؤردويوم ائشلرئن هاميسيني منه ددي. آيا او مسئح ديئل؟!"

4:30  خالق شهردن اشئيه چيخيب، اونون يانينا گلمه‌يه باشلادي.

4:31  بو آرادا شاگئردلري اوندان خاهئش اتدئلر: "اوستاد، بئر آز چؤرک يه."

4:32  آمّا عئسا اونلارا ددي: "منئم يمک اوچون يئيه​جه‌يئم وار کي، سئزئن اوندان خبرئنئز يوخدور."

4:33  شاگئردلري بئربئرلرئنه ددئلر: "مگر کئمسه اونا يمک گتئرئب؟"

4:34  عئسا اونلارا ددي: "منئم يئيه​جيئم، مني گؤنده‌ره‌نئن ائسته‌دئيئني يرئنه يتئرمک و اونون ائشئني تاماملاماقدير.

4:35  ​​​آيا سئز دمئرسئنئز کي بئچئمئن گلمه‌سئنه حله دؤرد آي قالير؟! سئزه ديئرم، گؤزلرئنئزي آچين و اَکئنلره باخين! چونکي بئچئن اوچون حاضيرديرلار.

4:36  اله ائندي بئچَن زحمت حاقّيني آلير و محصولو ابدي حيات اوچون ييغير کي، اکن و بئچَن، بئربئرلري ائله برابر سوئنسئنلر.

4:37  اونا گؤره ده، بو سؤز دوغرودور کي، بئري اَکَر، او بئري بئچَر.

4:38  من سئزي زحمت چکمه‌دئيئنئز شِيئن بئچئمئنه گؤنده‌ردئم. زحمتي اؤزگه​لر چکدئلر، و سئز اونلارين زحمتلرئنئن منفعتئنه شرئک اولوبسونوز."

4:39  "گؤردويوم ائشلرئن هاميسيني منه ددي!" دئين آروادين سؤزونه گؤره، او شهردن بئر چوخ سامئره​لي عئسايا ائمان گتئردئلر.

4:40  اونون اوچون ده اونلار گلئب عئسايا يالوارديلار کي، اونلارين يانيندا قالسين. و او دا ائکي گون اونلارين يانيندا قالدي

4:41  و داها آرتيق آداملار عئسانين سؤزلري اوزوندن اونا ائمان گتئردئلر.

4:42  سامئره​لي‌لر او آروادا ددئلر: "بئزئم ائمان گتئرمه‌يئمئز آرتيق سنئن سؤزلرئنئن اوزوندن ديئل. چونکي بئز اؤزوموز اشئتمئشئک و بئلئرئک کي، بو آدام دونيانين حقئقي قورتاريجيسي‌دير."

4:43  ائکي گوندن سونرا عئسا اورادان چيخيب جلئله گتدي.

4:44  عئسا اؤزو دمئشدي کي، بئر پيغمبرئن اؤز وطنئنده حؤرمتي اولماز.

4:45  جلئله گلدئيي واخت، جلئللي​لر اونون پئشوازينا چيخديلار. اونلار پاسخا بايراميندا اونون اورشلئمده اتدئيي بوتون ائشلري گؤرموشدولر. چونکي اونلار دا بايرام اوچون اورايا گتمئشدئلر.

4:46  عئسا گئنه جلئلئن قانا کندئنه، سويو شرابا دؤنده‌ردئيي يره گلدي. اورادا پادشاهين آداملاريندان بئري وار ائدي کي، اونون اوغلو کفرناحومدا ناخوش ائدي.

4:47  بو آدام عئسانين يهودئيه​دن جلئله گلدئيئني اشئتدئکده، اونون يانينا گدئب اونا يالواردي کي، گلسئن و اونون اؤلوم حاليندا اولان اوغلونا شفا ورسئن.

4:48  عئسا اونا ددي: "سئز علامتلر و مؤجوزه​لر گؤرمه‌يئنجه ائمان گتئرمزسئنئز."

4:49  پادشاهين آدامي اونا ددي: "آغا، اوغلوم اؤلمه​مئش گل."

4:50  عئسا اونا ددي: "گت، اوغلون ياشاياجاق." او کئشي عئسانين اونا ددئيي سؤزونه ائنانيب گتدي.

4:51  و حله يولدا ائکن، نؤکرلري قاباغينا چيخيب خبر وردئلر: "اوغلون دئري‌دئر."

4:52  اونلاردان اوغلونون حالينين نه زامان ياخشيلاشديغيني سوروشدو. نؤکرلر جاواب وردئلر: "دونن، گونون يِدّئنجي ساعاتيندا قيزديرماسي کسئلدي."

4:53  او زامان اوغلانين آتاسي آنلادي کي، عئسانين اونا «اوغلون ياشاياجاقدير» ددئيي زامان بو، باش ورئب. و اؤزو و بوتون اِو اهلي عئسايا ائمان گتئردئلر.

4:54  بو، عئسانين ائکئنجي مؤجوزه​‌سي‌‌دئر کي، يهودئيه​دن جلئله گلدئيئندن سونرا گؤرستدي.

Chapter 5

5:1  بوندان بئر مودّت سونرا، يهودئلرئن بايراملاريندان بئري يتئشدي و عئسا اورشلئمه گتدي.

5:2  ​​​اورشلئمده، قويون ديئلن دروازانين يانيندا بش ايوانلي بئر حوووض وار کي، عئبراني دئلئنده اونا "بيت حسدا" ديئرلر.

5:3  بورادا ناخوش چوخ آداملار ياتارديلار: کورلار، توپاللار، علئللر. (و سويون ترپَشمه​سئني گؤزله‌يردئلر.

5:4  ​​​چونکي هردن، بئر ملک بو حوووضون ائچئنه انئب، اونو چالخالارميش. سو چالخالانديقدا حوووضون ائچئنه گئرن ائلک آدام بوتون ناخوشلوغوندان توختارميش.)

5:5  اورادا بئر آدام وار ائدي کي، اوتوز‌​سکّئز ائل ناخوشلوق الئنده اَسئر ائدي.

5:6  عئسا اونون اورادا ياتديغيني گؤروب، اوزون بئر زامان ناخوشلوق چکدئيئني آنلادي. و اونا ددي: "صاغالماق ائسته‌يئرسن؟"

5:7  ناخوش آدام اونا جاواب وردي: "آغا! هچ کسئم يوخدور کي، سويون چالخالانديغي زامان، مني حوووضون ائچئنه سالسين. اؤزومو ترپه‌دئب چاتينجا، آيري بئر آدام مندن قاباق اؤزونو حوووضا سالير."

5:8  عئسا اونا ددي: "قالخ، دؤشه‌يئني گؤتور، گت."

5:9  ناخوش آدام او آندا صاغالدي و دؤشه‌يئني گؤتوروب گتدي. و او گون سبّت گونو ائدي.

5:10  اونا گؤره يهودئلر او شفا تاپميش آداما ددئلر: "بو گون سبّت گونودور. سنئن اوچون جائز ديئل کي، دؤشه‌يئني گؤتوروب آپاراسان."

5:11  شفا تاپميش آدام اونلارا ددي: "مني شفا ورن آدام ددي؛ «دؤشه‌يئني گؤتور، گت.»"

5:12  او زامان اوندان سوروشدولار: "سنه «دؤشه‌يئني گؤتور، گت» دئين آدام کئمدئر؟"

5:13  شفا تاپميش آدام عئسانين کئم اولدوغونو بئلمئردي. چونکي عئسا خالقين قالاباليغيندا گؤزدن ائتمئشدي.

5:14  سونرا عئسا او آدامي معبدده تاپيب اونا ددي: "باخ صاغالدين. گوناهدان اَل چک کي، بوندان داها پئسئنه اسئر اولماياسان."

5:15  او آدام گدئب يهودئلره خبر وردي کي، اونا شفا ورن آدام عئسادير.

5:16  يهودئلر، عئسانين بو ائشلري سبّت گونونده اتدئيئنه گؤره، اونا اذئيّت ورئردئلر.

5:17  آمّا عئسا اونلارا ددي: "آتام ائندئيه کئمي ائشله‌يئر، من ده ائشله‌يئرم."

5:18  بو سببدن يهودئلر آرتيق اونو اؤلدورمک ائسته‌دئلر. چونکي فقط سبّت گونونو پوزموردو، تاريني دا آتاسي خئطاب ادئب، اؤزونو اونا تاي ادئردي.

5:19  اونون اوچون عئسا اونلارا بله جاواب ورئب ددي: "دوغروسونو سئزه ديئرم؛ اوغول اؤزوندن هچ بئر شي اِده بئلمز، مگر اونلار کي، آتا ادئر و اوغول گؤرور. چونکي آتا نه ادئر، اوغول دا اونو ادئر.

5:20  آتا اوغولو سوئر و بوتون اِتدئکلرئني اونا گؤرسه‌دئر. و بونلاردان داها بؤيوک شيلر ده اوغولا گؤرسده​جک کي، سئز تعجّوبدن مات قالاجاقسينيز.

5:21  آتا اؤلولري دئرئلدئب اونلارا حيات وردئيي کئمي، اوغول دا ائسته‌دئيي آداملارا حيات وره​جک.

5:22  چونکي آتا کئمسه​يه حؤکم اتمئر، اونا گؤره کي، حؤکم اتمه‌يي اوغولون اَلئنه ورئب کي،

5:23  آتايا حؤرمت گؤرسه‌دن، اوغولا دا اِله حؤرمت گؤرسدسئن. اوغولا حؤرمت گؤرسدمه‌ين آدام، اونو گؤنده‌رن آتايا دا حؤرمت گؤرسدمئر.

5:24  دوغروسونو سئزه ديئرم؛ منئم سؤزومو اشئدئب مني گؤنده‌ره‌نه ائمان گتئرن آدامين ابدي حياتي واردير. او، موحاکئمه اولماياجاق؛ اصلئنده او اؤلومدن حياتا کچئب.

5:25  دوغروسونو سئزه ديئرم، او واخت گلئر، اله گلئبدئر ده کي، اؤلولر تارينين اوغلونون سسئني اشئده​جکلر و اونو اشئدنلر ياشاياجاقلار.

5:26  چونکي آتانين اؤزونده حياتي اولدوغو کئمي، اوغولا دا عطا اِدئب کي، اؤزونده حياتي اولسون.

5:27  و اونا موحاکئمه اتمک قودرتئني ده ورئب، چونکي ائنسان اوغلودور.

5:28  بونا تعجّوب اتمه‌يئن. چونکي او ساعات گلئر کي، بوتون قبئرلرده اولانلار اونون سسئني اشئدئب

5:29  ​​​​اشئيه چيخاجاقلار؛ ياخشي عمل ادنلر ياشاماق اوچون چيخاجاقلار، پئس عمل ادنلر موحاکئمه اولونماق اوچون.

5:30  من اؤزومدن بئر شي اده بئلمه‌رم. اشئتدئيئم کئمي حؤکم ادئرم و منئم حؤکموم عادئل بئر حؤکمدور، چونکي اؤز ائسته‌دئيئمي يوخ، مني گؤنده‌رن آتانين اتسته‌دئيئني يرئنه يتئرمک ائسته‌يئرم."

5:31  "اگر من اؤز حاقّيمدا شهادت ورسم، شهادتئم اعتئبارسيزدير.

5:32  منئم حاقّيمدا شهادت ورن اؤزگه بئري وار. و اونون شهادتئنئن اعتئبارلي اولدوغونو بئلئرم.

5:33  سئز يحيانين يانينا آداملار گؤنده‌ردئنئز و او، حقئقت حاقّيندا شهادت وردي.

5:34  آمّا من ائنساندان شهادت قبول اتمئرم. لاکئن بونلاري ديئرم کي، سئز نئجات تاپاسينيز.

5:35  ​​​يحيا يانان و ائشيقلانديران بئر چيراق ائدي، و سئز آز بئر زامان اونون ائشيغيندا شادليق اتمک ائسته‌دئنئز.

5:36  ​​​آمّا يحيانين شهادتئندن داها اعتئبارلي شهادتئم واردير. چونکي تاماملاماق اوچون آتانين منه وردئيي او ائشلر کي، اله ائندي ده اونلارلا مشغولام، منئم آتا طرفئندن گؤنده‌رئلمئش اولدوغوما شهادت ورئرلر.

5:37  و مني گؤنده‌رن آتا، اؤزو منئم حاقّيمدا شهادت ورئب. سئز هچ بئر زامان نه اونون سسئني اشئدئبسئنئز، نه اونون صورتئني گؤروبسونوز،

5:38  نه ده اونون کلامي سئزده ساکئن اولور. چونکي اونون گؤنده‌ردئيئنه ائمان گتئرمئرسئنئز.

5:39  موقدّس کئتابي تفتئش ادئرسئنئز، چونکي اوندا ابدي حياتا مالئک اولاجاغينيزي دوشونورسونوز. همئن موقدّس کئتاب دا منئم حاقّيمدا شهادت ورئر.

5:40  آمّا گئنه ده ائسته‌مئرسئنئز کي، منئم يانيما گلئب حياتا صاحئب اولاسينيز.

5:41  ائنسانلاردان عئزّت قبول اتمئرم،

5:42  لاکئن سئزي تانيميشام و بئلئرم کي، سئزده تارينين سوگئسي يوخدور.

5:43  من آتامين آديندا گلمئشم و سئز مني قبول اتمئرسئنئز. اگر اؤزگه بئري اؤز آدي ائله گلسه، اونو قبول اِدَرسئنئز.

5:44  ​​​سئز نجه ائمان گتئره بئلرسئنئز، سئز کي، بئربئرلرئنئزدن عئزّت قبول ادئرسئنئز، آمّا واحئد تاريدان گلن عئزّتي آختارميرسينيز؟!

5:45  لاکئن گومان اتمه‌يئن کي، تارينين حوضوروندا سئزلري موتّهئم اده​جه‌يم. سئزلري موتّهئم ادن، اومئد باغلاديغينيز موسادير.

5:46  چونکي اگر موسايا ائنانسايدينيز، منه ده ائمان گتئرردئنئز. اونا گؤره کي، منئم حاقّيمدا موسا دا يازيب.

5:47  آمّا اگر اونون يازديقلارينا ائنانميرسينيز، منئم سؤزلرئمه نجه ائناناجاقسينيز؟!"

Chapter 6

6:1  بونلاردان بئر مودّت سونرا، عئسا جلئل (و يا طئبريا) گؤلونون او بئري تايينا کچدي.

6:2  و چوخ آدام اونون دالينجا گدئردي، چونکي ناخوش آداملارا اتدئيي مؤجوزه​لري گؤرموشدولر.

6:3  عئسا بئر داغا چيخيب شاگئردلري ائله اورادا اوتوردو.

6:4  يهودئلرئن پاسخا بايرامي ياخين ائدي.

6:5  عئسا گؤزلرئني قالديريب، يانينا جاماعاتين گلمه‌سئني گؤرنده فئلئپوسا ددي: "بونلارين يمه‌يي اوچون هارادان چؤرک ساتين آلاق؟"

6:6  عئسا بو سؤزو اونو ائمتاحان اتمک اوچون ددي، چونکي نه اده​جه‌يئني اؤزو ياخشي بئلئردي.

6:7  فئلئپوس جاواب وردي: "اونلارين هر بئرئسئنه بئر آز چاتماسي اوچون ائکي​​يوز دئنار چؤرک ده بس اتمز."

6:8  شاگئردلرئندن بئري، شمعون پطروسون قارداشي آندرياس عئسايا ددي:

6:9  "بورادا بئر اوغلان اوشاغي وار کي، بش آرپا چؤرک و ائکي باليغي وار. آمّا بو قدر آدام اوچون بو، نه اولاجاق؟"

6:10  عئسا ددي: "جاماعاتي يره اوتوردون." او يرده چوخ اوت وار ائدي. جاماعات اوتوردو و کئشئلرئن سايي تقرئبن بش مئن اولاردي.

6:11  او زامان عئسا چؤرکلري گؤتوردو و شوکور ادندن سونرا، اوتورانلار آراسيندا ائسته‌‌دئکلري قدر پايلادي. باليقلارلا دا بله اتدي.

6:12  هامي ييئب دوياندان سونرا، عئسا شاگئردلرئنه ددي: "آرتيق قالان تئکه​لري ييغين کي، هچ بئر شي هدر اولماسين."

6:13  شاگئردلر آداملارين يدئکلرئندن آرتيق قالميش بش آرپا چؤره‌يئن تئکه​لرئني ييغديلار و اون​​​ائکي زنبئل دولدو.

6:14  جاماعات عئسانين اتدئيي بو مؤجوزه​ني گؤره‌نده ددئلر: "دوغرودان دا بو اِله او پيغمبردئر کي، دونيايا گله​جک ائدي."

6:15  عئسا آنلادي کي، اونلار زورلا اونو آپاريب اؤز پادشاهلاري اتمک ائسته‌يئرلر. اونون اوچون ده گئنه تک باشينا داغا چکئلدي.

6:16  آخشام اولاندا شاگئردلري گؤله اِندئلر.

6:17  و بئر قاييغا مئنئب گؤلون او تايينا، کفرناحوم سمتئنه يولا دوشدولر. آرتيق قارانليق دوشموشدو، آمّا عئسا حله اونلارين يانينا گلئب چيخماميشدي.

6:18  گوجلو يل اسدئيئندن، گؤل کولکلي اولماغا باشلادي.

6:19  تخمئنن بئر آغاج گتمئشدئلر کي، عئساني گؤلون اوزونده يرئيئب قاييغا ياخينلاشديغيني گؤردولر و قورخدولار.

6:20  آمّا عئسا اونلارا ددي: "قورخمايين، منم."

6:21  او واخت ائسته‌دئلر کي، عئساني قاييغا آلسينلار و او آندا قاييق گده​جکلري يره يتئشمئشدي.

6:22  او گونون صاباحي گؤلون او تاييندا اولان جاماعات آنلادي کي، شاگئردلر اورادا اولان بئرجه قاييغا مئنئب گدئبلر و عئسا اونلارلا همن قاييغا مئنئب گتمه‌يئب.

6:23  ​​​بو آرادا طئبريادان اؤزگه قاييقلار، او يرئن ياخينليغينا گلدئلر کي، رب شوکور ادندن سونرا چؤرک يمئشدئلر.

6:24  ​​​​جاماعات عئسا و شاگئردلرئنئن اورادا اولماديغيني گؤرنده، قاييقلارا مئنئب اونو آختارماق اوچون کفرناحوما گلدئلر.

6:25  جاماعات گؤلون او تاييندا عئساني تاپديلار و اونا ددئلر: "اوستاد، نه واخت بورايا گلدئن؟"

6:26  عئسا اونلارا جاواب وردي: "دوغروسونو سئزه ديئرم؛ مؤجوزه​لر گؤردويونوز اوچون يوخ، چؤرکلردن ييئب دويدوغونوز اوچون مني آختاريرسينيز.

6:27  او يمک اوچون چاليشمايين کي، فاني‌دئر. او يمک اوچون چاليشين کي، ابدي حياتا قدر قالار. او حيات ورن يمک کي، ائنسان اوغلو سئزه وره​جک. آتا تاري بونون اوچون اونا تصدئق مؤهرونو باسيب."

6:28  او واخت عئسادان سوروشدولار: "تارينين ائشلرئني يرئنه يتئرمک اوچون نه اتملي​يئک؟"

6:29  عئسا جاواب ورئب اونلارا ددي: "تارينين ائشي بودور کي، اونون گؤنده‌ردئيي آداما ائمان گتئره​سئنئز."

6:30  اونلار او زامان عئسايا ددئلر: "نه علامت گؤرسدئرسن کي، گؤروب سنه ائمان گتئرک؟ نه ادئرسن؟

6:31  آتالاريميز چؤلده مانّا يدئلر. نجه کي، يازيليب؛ «يمک اوچون اونلارا گؤيدن يمک وردي.»"

6:32  عئسا اونلارا ددي: "دوغروسونو سئزه ديئرم؛ گؤيدن سئزه چؤرک ورن موسا ديئلدي، منئم آتامدير کي، گؤيدن سئزه حقئقي چؤره‌يي ورئر.

6:33  چونکي تارينين چؤره‌يي اودور کي، گؤيدن اِنئر و دونيايا حيات ورئر."

6:34  او زامان اونا ددئلر: "آغا، بو چؤره‌يي همئشه بئزه ور."

6:35  عئسا اونلارا ددي: "حيات چؤره‌يي منم. منئم يانيما گلن اصلا آج اولماز. منه ائمان گتئرن اصلا سوسوز اولماز.

6:36  ​​​آمّا سئزه دمئشم کي، مني گؤردويونوز حالدا، گئنه ائمان گتئرمئرسئنئز.

6:37  آتامين منه وردئيي آداملارين هاميسي منئم يانيما گله​جکلر و منئم يانيما گلني اصلا اشئيه قوومارام.

6:38  گؤيدن اِنمئشم کي، اؤز ائسته‌دئيئمي يوخ، مني گؤنده‌ره​نئن ائسته‌دئيئني يرئنه يتئرئم.

6:39  ​​​و مني گؤنده‌ره​نئن ائسته‌دئيي بودور کي، منه وردئکلرئنئن هچ بئرئسئني ائتئرمه‌يئب، آخير گونده اونلاري دئرئلدئم.

6:40  ​​​چونکي آتامين ائسته‌دئيي بودور کي، اوغولا باخيب اونا ائمان گتئرن هر کسئن ابدي حياتي اولسون. و من اونو آخير گونده دئرئلده​جه‌يم."

6:41  او واخت يهودئلر، عئسانين "گؤيدن اِنَن چؤرک منم" ددئيئنه گؤره اونون باره​سئنده ديئنميه باشلاديلار.

6:42  و ديئردئلر: "مگر بو آدام آتا-آناسيني تانيديغيميز يوسئف اوغلو عئسا ديئل؟ ائندي نجه «گؤيدن اِنمئشم» ديئر؟!"

6:43  عئسا اونلارا جاواب ورئب ددي: "آرانيزدا ميريلدانمايين.

6:44  هچ کس منئم يانيما گله​بئلمز، مگر مني گؤنده‌رن آتا اونو چکئب گتئرسئن و من آخير گونده اونو دئرئلده​جه‌يم.

6:45  ​​​​پيغمبرلرئن يازديقلاريندا يازيليب؛ «اونلارين هاميسي تاريدان اؤيرنه‌جکلر.» اونا گؤره آتادان اشئدئب اؤيره‌نَن هرکس منئم يانيما گلئر.

6:46  کئمسه آتاني گؤرمه‌يئب، مگر او کي، تاريداندير. آتاني او گؤروبدور.

6:47  ​​​دوغروسونو سئزه ديئرم؛ ائمان گتئرن آدامين ابدي حياتي وار.

6:48  حيات چؤره‌يي منم.

6:49  ​​​آتالارينيز چؤلده مانّا يدئلر، گئنه ده اؤلدولر.

6:50  آمّا بورادا گؤيدن انمئش اِله بئر چؤرک وار کي، اوندان يئين اؤلمه‌يه​جک.

6:51  ​​​گؤيدن انمئش او حيات ورن چؤرک منم. بو چؤرکدن يئين هرکس ابده کئمي ياشاياجاق. بو چؤرک منئم بدنئمدئر کي، دونيايا حيات ورمک اوچون اونو وره​جه‌يم."

6:52  او زامان يهودئلر بئربئرلري ائله ديئنميه باشلاديلار و ديئردئلر: "بو آدام اؤز بدنئني بئزه يمک اوچون نجه وره​بئلر؟!"

6:53  عئسا اونلارا ددي: "دوغروسونو سئزه ديئرم؛ ائنسان اوغلونون بدنئندن يمه‌يئنجه و اونون قانيندان ائچمه‌يئنجه سئزده حيات اولماياجاق!

6:54  منئم بدنئمدن يئين و منئم قانيمدان ائچَن آدامين ابدي حياتي وار. و من آخير گونده اونو دئرئلده​جه‌يم.

6:55  چونکي بدنئم حقئقي يمک و قانيم حقئقي ائچمک‌دئر.

6:56  بدنئمدن يئين و قانيمدان ائچن آدام منده قالير و من ده اوندا قاليرام.

6:57  ​​نجه کي، دئري آتا مني گؤنده‌ردي و منئم حياتيم اونا باغلي‌دير، مندن يئين آدام دا منه باغلي اولاراق ياشاياجاق.

6:58  ​​​گؤيدن انمئش چؤرک بودور. آتالارينيز مانّا يدئلر، لاکئن اؤلدولر. آمّا بو چؤرکدن يئين آدام ابده کئمي ياشاياجاق."

6:59  عئسا بو سؤزلري کفرناحومدا، بئر کنئسه​ده تعلئم ورن حالدا ددي.

6:60  عئسانين شاگئردلرئندن چوخلاري بونلاري اشئدنده ددئلر: "بو آغير بئر سؤزدور. کئم اونو قبول اده​بئلر؟!"

6:61  عئسا شاگئردلرئنئن بو باره​ده ميريلدانماقلاريني بئلئب اونلارا ددي: "بو سئزي ائنجئدئر؟

6:62  بس اگر ائنسان اوغلونون اوّلجه​دن اولدوغو يرئنه قالخديغيني گؤره​سئنئز، نجه؟

6:63  حيات​ورن تارينين روحودور. جئسمدن فايدا يوخدور. سئزه ددئيئم سؤزلر روح و حياتدير.

6:64  آمّا گئنه ده بعضئلرئنئز ائنانميرسينيز." چونکي عئسا کئمئن ائمانسيز اولدوغونو و کئمئن اونا خيانت اده‌جه‌يئني اوّلدن بئلئردي.

6:65  و ددي: "اونون اوچون سئزه دمئشم کي، کئمسه منئم يانيما گله​بئلمز، مگر بو اونا آتادان ورئلمئش اولسون."

6:66  بو زاماندان شاگئردلردن چوخو عئساني ترک ادئب آرتيق اونا پيرو اولماديلار.

6:67  عئسا او اون‌ائکي شاگئرددن سوروشدو: "يوخسا سئز ده مني ترک اتمک ائسته‌يئرسئنئز؟"

6:68  شمعون پطروس جاواب وردي: "کئمئن يانينا گده​بئله‌رئک، يارب؟ ابدي حياتين سؤزلري سنده​دئر.

6:69  بئز ائنانميشيق و بئلئرئک کي، سن دئري تارينين اوغلو مسئحسن."

6:70  عئسا اونلارا ددي: "مگر سئز اون​​ائکي نفري سچن من ديئلم؟ حال بو کي، سئزلردن بئري، ائبلئس بئر آدامدير."

6:71  ​​​عئسا بو سؤزو ائسکاريوتلو شمعونون اوغلو يهودانين حاقّيندا ديئردي کي، او اون‌​ائکي شاگئرددن بئري ائکن، عئسايا خيانت اده​جک ائدي.

Chapter 7

7:1  بونلاردان سونرا عئسا جلئل وئلايتئنده گزئب، اؤزونو يهودئيه وئلايتئندن اوزاق ساخلاييردي. چونکي يهودئلر اونو اؤلدورمک ائسته‌يئردئلر.

7:2  يهودئلرئن چادير بايرامي ياخينلاشيردي.

7:3  اونون اوچون ده عئسانين قارداشلاري اونا ددئلر: "بورادان چيخ، يهودئيه وئلايتئنه گت کي، شاگئردلرئن ده اتدئيئن ائشلري گؤرسونلر.

7:4  ​​​​چونکي اؤزونو تانيتديرماق ائسته‌ين آدام ائشئني گئزلئجه گؤرمز. اگر بو ائشلري سن ادئرسن، اؤزونو دونيايا ظاهئر ات."

7:5  ​​​عئسانين قارداشلارينين هچ بئري اونا ائمان گتئرمه​مئشدي.

7:6  بو سببدن عئسا اونلارا ددي: "منئم واختيم حله يتئشمه‌يئب. آمّا سئزئن واختينيز همئشه حاضيردير.

7:7  دونيا سئزدن نئفرت اده​بئلمز، آمّا مندن نئفرت ادئر. چونکي اونون ائشلرئنئن پئس اولدوغونا شهادت ورئرم.

7:8  سئز بو بايرام اوچون اورشلئمه گدئن. من بو بايرام اوچون حله گتمئرم، چونکي منئم دوروست واختيم حله يتئشمه‌يئب."

7:9  عئسا بو سؤزلري اونلارا ديئب جلئلده قالدي.

7:10  لاکئن عئسانين قارداشلاري بايرام اوچون اورادان آيريلاندان سونرا، او اؤزو ده اورشلئمه گتدي، آمّا آشکار يوخ، گئزلي.

7:11  يهودئلر بايرامدا عئساني آختاريب "بو آدام بس هارادادير؟" ديئب سوروشوردولار.

7:12  جاماعات آراسيندا اونون حاقّيندا چوخ پيچيلتي‌لار گزئردي. بعضئلري ديئردئلر: "او، ياخشي آدامدير." آمّا بعضئلري ده ديئردئلر: "يوخ، خالقي آلدادير."

7:13  آمّا يهودئلرئن قورخوسوندان هچ کس آچيقجا بئر سؤز دمئردي.

7:14  بايرامين ياريسينا قدر کچمئشدي کي، عئسا معبده گدئب تعلئم ورمه‌يه باشلادي.

7:15  يهودئلر تعجّوبدن مات قاليب ديئردئلر: "بو آدام تعلئم گؤرمه​مئش نجه موقدّس کئتابدان بو قدر بئلئر؟!"

7:16  عئسا اونلارا جاواب ورئب ددي: "وردئيئم تعلئم منئم اؤزومون ديئل، مني گؤنده‌ره‌نئن‌دئر.

7:17  اگر کئمسه اونون ائسته‌دئيئني يرئنه يتئرمک ائسته‌سه، وردئيئم تعلئمئن تاريدان اولدوغونو و يا منئم اؤزومدن اولدوغونو آنلاياجاق.

7:18  اؤزوندن دانيشان، اؤز عئزّتئني آختارار. آمّا اونو گؤنده‌ره‌نئن عئزّتئني آختاران آدام، حقئقت آدامي‌دير و اوندا يالان تاپيلماز.

7:19  آيا شرئعتي سئزه موسا ورمه‌دي؟ گئنه ده سئزدن هچ بئرئنئز شرئعتي يرئنه يتئرمئر. نه اوچون مني اؤلدورمک ائسته‌يئرسئنئز؟"

7:20  جاماعات جاواب ورئب ددي: "مگر دلي اولوبسان! کئم سني اؤلدورمک ائسته‌يئر؟"

7:21  عئسا اونلارا جاواب ورئب ددي: "بئر ائش گؤردوم و هامينيز تعجّوبدن مات قاليبسينيز.

7:22  ختنه اتمه‌يي موسا سئزه وردئيي اوچون، سبّت گونونده اوشاغي ختنه ادئرسئنئز. (اصلئنده موسا يوخ، آتالارينيز ختنه اتمه‌يي باشلادي.)

7:23  موسادان قالان قانونون پوزولماماسي اوچون، سبّت گونونده اوشاغينيزي ختنه ادئرسئنئز، ائندي نئيه بئر آدامين بوتون بدنئني سبّت گونونده شفا وردئيئم اوچون، منه قضبله‌نئرسئنئز؟

7:24  ظاهئره گؤره حؤکم اتمه‌يئن. عدالتله حؤکم ادئن."

7:25  او زامان اورشلئملي​لردن بعضئلري ددئلر: "اؤلدورمک ائسته‌‌دئکلري آدام مگر بو ديئل؟

7:26  بو کي، آچيقجا هر شيي ديئر، کئمسه​ده اونا بئر شي دمئر! بلکه ده ريئسلر اونون دوغرودان مسئح اولدوغونو بئلئبلر.

7:27  آمّا بئز کي، بو آدامين هارادان اولدوغونو بئلئرئک. لاکئن مسئح ظوهور ادنده، اونون هارادان اولدوغونو کئمسه بئلميه​جک."

7:28  بو آرادا عئسا معبدده تعلئم ورنده سسئني اوجالديب ددي: "سئز مني تاني‌ييرسينيز و منئم هارادان اولدوغومو بئلئرسئنئز. من اؤز طرفئمدن گلمه​مئشم، مني گؤنده‌رَن دوغرودور کي، سئز اونو تانيميرسينيز.

7:29  من اونو تاني‌ييرام چونکي اوندانام و او مني گؤنده‌رئب."

7:30  سؤز بورا يتئشن واخت، اونو توتماق ائسته‌دئلر، آمّا کئمسه اونا اَل اوزاتمادي، چونکي اونون واختي حله يتئشمه​مئشدي.

7:31  آمّا جاماعات آراسيندان چوخ آداملار اونا ائمان گتئردئلر و ديئردئلر: "مسئح ظوهور ادنده، مگر بو آدامدان آرتيق مؤجوزه گؤرسده​جک؟!"

7:32  فرئسئلر عئسانين حاقّيندا خالق آراسيندا اولان بله پيچيلتي‌لاري اشئتدئلر. باش کاهئنلر و فرئسئلر عئساني ياخالاماق اوچون معبدئن موحافئظلرئني گؤنده‌ردئلر.

7:33  ​اوندا عئسا ددي: "داها آز بئر مودّت سئز​ئنله وارام و سونرا مني گؤنده‌ره​نئن يانينا گده​جه‌يم.

7:34  مني آختاراجاقسينيز، آمّا تاپا بئلمه‌يه​جکسئنئز و اولدوغوم يره سئز گله ​بئلمزسئنئز."

7:35  او واخت يهودئلر آرالاريندا ددئلر: "بو آدام هارايا گتمک ائسته‌يئر کي، بئز اونو تاپماغا قادئر اولماياجاغيق؟ اولماسين ائسته‌يئر يونانئلر آراسيندا داغيلميش يهودئلرئن يانينا گدئب، يونانئلره تعلئم ورسئن؟

7:36  «مني آختاراجاقسينيز آمّا تاپا بئلميه​جکسئنئز» و «اولدوغوم يره سئز گله​بئلمزسئنئز» سؤزدن نه دمک ائسته‌يئر؟"

7:37  بايرامين آخيرينجي و بؤيوک گونونده عئسا دوروب اوجا سسله خئطاب ادئب ددي: "اگر کئمسه سوسوزدور، منئم يانيما گلئب ائچسئن.

7:38  منه ائمان گتئرن آدامين ائچئنده حيات ورن سو، چايلار کئمي آخاجاق، نجه کي، موقدّس کئتاب ديئب."

7:39  بو سؤزو موقدّس روحون حاقّيندا ديئردي کي، اونا ائمان گتئرنلره ورئله​جک ائدي. موقدّس روح حله ورئلمه​مئشدي، چونکي عئسا حله جلال تاپماميشدي.

7:40  ​آداملاردان بعضئلري اونون بو سؤزلرئني اشئدنده ددئلر: "دوغرودان دا بو، اِله او پيغمبردئر."

7:41  بعضئلري ده ديئردئلر: "بو، وعده​سي ورئلمئش مسئحدئر." آمّا بعضئلري گئنه ديئردئلر: "وعده​سي ورئلمئش مسئح نجه جلئلدن گله​بئلر؟!

7:42  مگر موقدّس کئتاب دمئر کي، مسئح داوود نسلئندن و ياشاديغي بيت‌لحم کندئندن گله​جک؟!"

7:43  بلجه عئسانين اوزوندن خالق آراسيندا ائختئلاف دوشدو.

7:44  بعضئلري اونو توتماق ائسته‌دئلر، آمّا کئمسه اونا ال اوزاتمادي.

7:45  معبدئن موحافئظلري باش کاهئنلرئن يانينا قاييداندا، اونلار موحافئظلردن سوروشدولار: "نه اوچون اونو گتئرمه‌دئنئز؟"

7:46  موحافئظلر ددئلر: "هچ کس هچ بئر زامان اونون کئمي دانيشماييب."

7:47  فرئسئلر ددئلر: "مگر سئز ده آزيبسينيز؟!

7:48  آيا ريئسلردن و يا فرئسئلردن کئمسه اونا ائنانيب؟

7:49  آمّا شرئعتدن بئخبر اولان بو خالق ملعوندور."

7:50  قاباق عئسانين يانينا گلن نئقودئموس کي، اونلاردان بئري ائدي، ددي:

7:51  "مگر بئزئم شرئعتئمئز کئمسه​ني اشئتمه‌دن و اونون نه اتدئيئني بئلمه‌دن محکوم ادئر؟"

7:52  اونلار جاواب ورئب ددئلر: "يوخسا سن ده جلئل​لي​سن؟! آراشدير و گؤررسن کي، جلئلدن بئر پيغمبر چيخماز."

7:53  و هرکس اؤز اِوئنه گتدي.

Chapter 8

8:1  عئسا زيتون داغينا گتدي.

8:2  و سحر ارکن گئنه معبده گلدي و بوتون خالق اونون اطرافينا ييغيلدي. عئسا دا اوتوروب اونلارا تعلئم ورئردي.

8:3  فرئسئلر و شرئعت موعلّئملري زئنا عملئنده ياخالانميش بئر آروادي گتئردئلر و اورتادا دوردوروب،

8:4  عئسايا ددئلر: "اوستاد، بو آرواد زئنا عملئنده ياخالانيب.

8:5  موسا شرئعتده بئزه امر ادئب کي، بله بئر آروادي داشلاياق. سن نه ديئرسن؟"

8:6  اونلار بو سوآللا عئساني ائمتاحان ادئردئلر کي، اونا بؤهتان وورماق اوچون بلکه بئر سبب تاپسينلار. آمّا عئسا ايئلئب بارماغي​ ائله يره يازي يازيردي.

8:7  لاکئن اونلارين دايانمادان بو سوآلي سوروشدوقلارينا گؤره، قالخيب اونلارا ددي: "آرانيزدا کئم گوناهسيزدير، قويون بئرئنجي داشي او آتسين."

8:8  و گئنه اَيئلئب يره يازي يازماغا باشلادي.

8:9  خالق بو سؤزو اشئدنده آغساقّاللاردان توتموش لاپ کئچئيئنه قدر بئر-بئر اورادان گتدئلر. و عئسا تک قالدي. او آرواد دا اورتادا دورموشدو.

8:10  عئسا قالخيب اوندان سوروشدو: "آرواد، سندن شئکايت ادنلره نه اولدو؟ کئمسه سني محکوم اتمه‌دي؟"

8:11  آرواد ددي: "خير، آغا." عئسا اونا ددي: "من ده سني محکوم اتمئرم. گت و داها گوناه اتمه."

8:12  عئسا گئنه خالقا خئطاب ادئب ددي: "دونيانين نورو منم. منئم داليمجا گلن قارانليقدا گزميه​جک و اوندا حيات نورو اولاجاق."

8:13  او زامان فرئسئلر اونا ددئلر: "سن اؤز حاقّيندا شهادت ورئرسن. بو شهادتئن اعتئباري يوخدور."

8:14  عئسا جاوابيندا اونلارا ددي: "حتّا اگر اؤز حاقّيمدا دا شهادت ورسم، شهادتئم اعتئبارلي‌دير، چونکي هارادان گلدئيئمي و هارايا گده‌جَيئمي بئلئرم. آمّا سئز منئم هارادان گلدئيئمي و هارايا گده​جه‌يئمي بئلمئرسئنئز.

8:15  سئز ائنسان گؤزو ائله حؤکم ادئرسئنئز. آمّا من کئمسه​يه حؤکم اتمئرم.

8:16  لاکئن حؤکم اتسم ده بله، منئم حؤکموم دوغرودور. چونکي تک ديئلم، منم و مني گؤنده‌رن آتا.

8:17  سئزئن شرئعتئنئزده ده ائکي آدامين شهادتئنئن اعتئبارلي اولدوغو يازيليب.

8:18  من اؤز حاقّيمدا شهادت ورئرم و مني گؤنده‌رن آتا دا منئم حاقّيمدا شهادت ورئر."

8:19  او واخت عئسادان سوروشدولار: "سنئن آتان هارادادير؟" عئسا جاواب وردي: "سئز نه مني تاني‌ييرسينيز نه ده آتامي. اگر مني تانيسايدينيز، منئم آتامي دا تانيياردينيز."

8:20  عئسا بو سؤزلري معبدده، خزانه صانديغي اولان يرده خالقا ددي و هچ کئم اونو توتمادي. چونکي اونون واختي حله يتئشمه‌مئشدي.

8:21  عئسا گئنه اونلارا ددي: "من گدئرم و سئز مني آختاراجاقسينيز و گوناهلارينيزين آلتيندا اؤله​جکسئنئز. من گدن يره سئز گله​بئلمزسئنئز."

8:22  او واخت يهودئلر ددئلر: "مگر اؤزونو اؤلدوره​جک کي، «من گدن يره سئز گله​بئلمزسئنئز» ديئر؟!"

8:23  عئسا اونلارا ددي: "سئز آشاغيدانسينيز، من يوخاريدانام. سئز بو دونيادانسينيز، من بو دونيادان ديئلم.

8:24  بوندان اؤتري سئزه ددئم کي، گوناهلارينيزين آلتيندا اؤله​جکسئنئز. چونکي اگر ددئيئم آدام اولدوغوما ائنانماياسينيز، گوناهلارينيزين آلتيندا اؤله‌جکسئنئز."

8:25  او واخت اوندان سوروشدولار: "سن کئمسن؟" عئسا اونلارا ددي: "من همئن اويام کي، اوّلدن سئزه ديئرم.

8:26  سئزئن حاقّينيزدا دئيه​جک و حؤکم اده​جک چوخ شيلرئم وار. آمّا مني گؤنده‌رن حاقدير و من اوندان اشئتدئکلرئمي دونيايا ديئرم."

8:27  اونلار آنلاماديلار کي، عئسا بو سؤزلري آتانين باره​سئنده ديئردي.

8:28  اوندان اؤتري عئسا ددي: "ائنسان اوغلونو قالديراندان سونرا بئله​جکسئنئز کي، من اويام و اؤزومدن بئر شي اتمئرم و نجه کي، آتادان اؤيرنمئشم، سئزه ديئرم.

8:29  و مني گؤنده‌رن منئمله‌دئر. او، مني تک قويماييب، چونکي همئشه اونون خوشونا گدن ائشلري گؤرورم."

8:30  بو سؤزلري دئين زامان، چوخ آدام اونا ائمان گتئردي.

8:31  عئسا اونا ائمان گتئرمئش يهودئلره ددي: "اگر سؤزومو ساخلاياسينيز، حقئقتن منئم شاگئردلرئمسئنئز.

8:32  و حقئقتي تانيياجاقسينيز و حقئقت سئزي آزاد اده​جک."

8:33  اونلار عئسايا ددئلر: "بئز ائبراهئم اؤولادي​ييق و کئمسه​نئن نؤکري اولماميشيق. نجه اولور کي، «آزاد اولاجاقسينيز» ديئرسن؟"

8:34  عئسا اونلارا جاواب وردي: "دوغروسونو سئزه ديئرم، گوناه ادن هرکس گوناهين نؤکري‌دئر.

8:35  نؤکر ابده کئمي عايئله​دن بئري ديئل. آمّا اوغول همئشه عايئله​دن بئري‌دئر.

8:36  اونون اوچون اگر اوغول سئزي آزاد اتسه، دوغرودان آزاد اولارسينيز.

8:37  ائبراهئم اؤولادي اولدوغونوزو بئلئرم. آمّا مني اؤلدورمک ائسته‌يئرسئنئز، اوندان اؤتري کي، منئم سؤزومو قبول اتمئرسئنئز.

8:38  من آتامين يانيندا گؤردوکلرئمي ديئرم و سئز آتانيزدان اشئتدئکلرئنئزي ادئرسئنئز."

8:39  اونلار جاوابدا عئسايا ددئلر: "بئزئم آتاميز ائبراهئمدئر." عئسا اونلارا ددي: "اگر ائبراهئمئن اؤولادلاريسينيز، ائبراهئمئن ائشلرئني يرئنه يتئرئن.

8:40  آمّا ائندي مني اؤلدورمک ائسته‌يئرسئنئز، من کي، تاريدان اشئتدئيئم حقئقتي سئزه دمئشم. ائبراهئم بله ائشلر گؤرمه‌دي.

8:41  سئز آتانيزين ائشلرئني گؤرورسونوز." اونلار عئسايا ددئلر: "بئز زئنادان دوغولماميشيق. بئر آتاميز وار، او دا تاري‌دير."

8:42  عئسا اونلارا ددي: "اگر تاري آتانيز اولسايدي، مني سِوَردئنئز. چونکي من تارينين طرفئندن گلمئشم و ائندي بورادايام. اؤزومدن گلمه‌مئشم، او، مني گؤنده‌رئب.

8:43  ​ددئکلرئمي نئيه آنلاميرسينيز؟ چونکي سؤزومه قولاق آسا بئلمئرسئنئز.

8:44  سئز آتانيز ائبلئسدنسئنئز و آتانيزين ائسته‌دئيئني يرئنه يتئرمک ائسته‌يئرسئنئز. او، باشلانيشدان قاتئل ائدي و حقئقت اوستونده دايانمادي، چونکي اوندا هچ دوغرولوق يوخدور. يالان دانيشان زامان ذاتيندان يالان دانيشير. چونکي او، يالانچي‌دير و يالانلارين آتاسي​دير.

8:45  آمّا حقئقتي ددئيئم اوچون سئز منه ائنانميرسينيز.

8:46  سئزدن کئم منئم گوناهکار اولدوغومو ائثبات اده​بئلر؟ اگر من حقئقتي ديئرم، نئيه منه ائنانميرسينيز؟

8:47  تارينينکي اولانلار تارينين سؤزلرئني اشئدرلر. سئز بو سببدن اشئتمئرسئنئز، چونکي تارينينکي ديئلسئنئز."

8:48  يهودئلر جاواب ورئب، عئسايا ددئلر: "سامئره​لي و دلي اولدوغونو دمکده دوغرو دمئردئک؟!"

8:49  عئسا ددي: "من دلي اولماميشام. من آتاما عئزّت ورئرم و سئز منه ذئلّت ورئرسئنئز.

8:50  من اؤزوم، اؤزوم اوچون عئزّت آختارميرام، منئم اوچون عئزّت آختاران وار و حؤکم ادن ده اودور.

8:51  دوغروسونو سئزه ديئرم، منئم سؤزومو ساخلايان آدام اصلا اؤلوم اوزو گؤرمه‌يه​جک."

8:52  يهودئلر اونا ددئلر: "ائندي بئلدئک کي، دلي اولوبسان. ائبراهئم و پيغمبرلر اؤلدولر و سن ديئرسن «منئم سؤزومو ساخلايان آدام اصلا اؤلميه‌جک.»

8:53  مگر سن آتاميز ائبراهئمدن ده اوستونسن؟ ائبراهئم اؤلدو، پيغمبرلر ده اؤلدولر. سن اؤزونو کئم ساييرسان؟"

8:54  عئسا جاواب وردي: "اگر من اؤزومو عئزّتلندئرم، بو عئزّت هچدئر. مني عئزّتلندئرن منئم آتامدير کي، سئز اونا «تاريميز​دير» ديئرسئنئز.

8:55  سئز اونو تانيماييبسينيز. آمّا من اونو تاني‌ييرام. و اگر اونو «تانيميرام» دسم، سئزئن کئمي يالانچينين بئري اولارام. آمّا اونو تاني‌ييرام و اونون سؤزونو ساخلاييرام.

8:56  آتانيز ائبراهئم منئم گونومو گؤره​جه‌يي اوچون شاد اولدو. او، بو گونو گؤردو و سوئندي."

8:57  يهودئلر اونا ددئلر: "سنئن حله الّي ياشين يوخدور، ائبراهئمي گؤروبسن؟!"

8:58  عئسا اونلارا ددي: "دوغروسونو سئزه ديئرم؛ ائبراهئم اولماميشدان من وارام."

8:59  بو سؤزو اشئدن واخت، يهودئلر اونو داشلاماق اوچون داشلار گؤتوردولر، آمّا عئسا گئزله‌نئب معبددن اشئيه چيخدي.

Chapter 9

9:1  عئسا يولدا گِدَرکن، آنادان کور دوغولموش بئر آدام گؤردو.

9:2  اونون شاگئردلري اوندان سوروشدولار: "اوستاد، کئمئن گوناهي اوزوندن بو آدام کور آنادان اولدو؟ اونون اؤزونون؟ يوخسا آتا-آناسينين؟"

9:3  عئسا جاواب وردي: "نه بو آدام گوناه اتدي، نه ده آتا-آناسي. او، آنادان کور اولدو کي، تارينين ائشلري اونون حياتيندا گؤرونسون.

9:4  مادام کي، گوندوزدور، مني گؤنده‌ر​ه‌نئن ائشلرئنه مشغول اولمالي‌يام. گجه گلئر کي، او زامان هچ کس ائشليه بئلمز.

9:5  دونيادا ائکن دونيانين نورويام."

9:6  بو سؤزلري دئيندن سونرا، عئسا يره توپوروب، توپورجکله پالچيق دوزلتدي و کورون گؤزونه سورتدو.

9:7  و اونا ددي: "گت، سئلوآم (يعني گؤنده‌رئلمئش) حوووضوندا يو." کور آدام گدئب يودو و گؤزو آچيلميش گلدي.

9:8  قونشولار و کور آدامين يولچولوق اتدئيئني ائره​لئدن بئلنلر ديئردئلر: "مگر بو اوتوروب يولچولوق ادن همن آدام ديئل؟"

9:9  بعضئلري "اودور" ديئردئلر. بعضئلري ده ديئردئلر: "خير، بو، او کور آداما اوخشايان بئر آدامدير.» آمّا او اؤزو "من اِله او آدامام" ديئردي.

9:10  اونون اوچون کور آدامدان سوروشدولار: "بس نجه گؤزلرئن آچيلدي؟"

9:11  او، جاواب وردي: "عئسا ديئلن آدام پالچيق دوزه‌لدئب گؤزومه سورتدو و منه ددي؛ «گت، سئلوآم حوووضوندا يو.» من ده گدئب يودوم و او زامان گؤزلرئم آچيلدي."

9:12  اونلار اوندان سوروشدولار: "بو آدام هارادير؟" ددي: "بئلمئرم."

9:13  اوّلجه کور اولان آدامي فرئسئلرئن يانينا آپارديلار.

9:14  عئسا پالچيق دوزه‌‌لدئب کور آدامين گؤزلرئني آچديغي گون، سبّت گونو ائدي.

9:15  اونون اوچون ده فرئسئلر گؤزلرئنئن نجه آچيلديغيني گئنه سوروشدولار. و او دا فرئسئلره ددي: "گؤزلرئمئن اوستونه پالچيق سورتدو و يودوم و ائندي گؤرورَم."

9:16  او واخت فرئسئلردن بعضئلري ددئلر: "بو آدام تاري طرفئندن ديئل، چونکي سبّت گونونو ساخلامير." آمّا بعضئلري ده ددئلر: "گوناهکار بئر آدام نجه بله مؤجوزه​لر اده ​بئلر؟"

9:17  او واخت کور آداما گئنه ددئلر: "سنئن گؤزلرئني آچان آدامين حاقّيندا اؤزون نه ديئرسن؟" جاواب وردي: "او آدام بئر پيغمبردئر."

9:18  يهودئلر او آدامين قاباق کور اولدوغونا و ائندي گؤزلرئنئن آچيلديغينا ائنانماديلار. اونون اوچون ده گؤزلري آچيلميش آدامين آتا-آناسيني چاغيريب،

9:19  سوروشدولار: "سئزئن ددئيئنئز آنادان کور دوغولان اوغول بودور؟ بس ائندي نجه گؤرور؟"

9:20  او آدامين آتا-آناسي جاواب وردئلر: "بو آدامين بئزئم اوغلوموز اولدوغونو و آنادان کور دوغولماسيني يقئن بئلئرئک.

9:21  آمّا ائندي بئلمئرئک کي، نجه گؤرور و کئم اونون گؤزلرئني آچيب. اؤزوندن سوروشون. او اؤزو حدّي-بولوغا چاتميش بئر آدامدير. اؤزو حاقّيندا قوي اؤزو دانيشسين."

9:22  او آدامين آتا-آناسي بو سؤزو يهودئلرئن قورخوسوندان ددئلر. چونکي يهودئلرئن ريئسلري بله قرار قويموشدولار کي، عئسانين مسئح اولدوغونا ائنانان هر کس کنئسه​دن قووولسون.

9:23  بو سببدن او آدامين آتا-آناسي "اونون اؤزوندن سوروشون. او اؤزو حدّي-بولوغا چاتميش بئر آدامدير." ددئلر.

9:24  اونون اوچون اوّلجه کور اولان آدامي ائکئنجي دفه چاغيرديلار و اونا ددئلر: "جلالي تارييا ور. بئز بو آدامين گوناهکار اولدوغونو بئلئرئک."

9:25  او واخت او آدام اونلارا ددي: "اونون گوناهکار اولوب اولماديغيني بئلمئرم. آنجاق بئر شي بئلئرم، کور ائدئم، ائندي گؤرورم."

9:26  فرئسئلر اوندان سوروشدولار: "او، سنه نه اتدي؟ گؤزلرئني نجه آچدي؟"

9:27  اونلارا جاواب وردي: "سئزه ائندي ددئم، مگر قولاق آسمادينيز؟! نئيه گئنه اشئتمک ائسته‌يئرسئنئز؟ يوخسا سئز ده اونون شاگئردلري اولماق آرزوسونداسينيز؟!"

9:28  فرئسئلر او آدامي سؤيوب ددئلر: "او آدامين شاگئردي سن​سن. بئز موسانين شاگئردلري​يئک.

9:29  بئز تارينين موسا ائله دانيشديغيني بئلئرئک. آمّا بو آدامين هارادان اولدوغونو بئلمئرئک."

9:30  او آدام جاواب ورئب اونلارا ددي: "اله تعجّوبلوسو ده بودور. سئز بو آدامين هارادان اولدوغونو بئلمئرسئنئز، حال بو کي، بو آدام منئم گؤزلرئمي آچيب.

9:31  ياخشي بئلئرئک کي، تاري گوناهکار آداملارا قولاق آسماز. تاري او آداما قولاق آسار کي، اونا عئبادت ادئر و اونون ائسته‌دئيئني يرئنه يتئرئر.

9:32  عالمئن باشلانيشيندان کئمسه اشئتمه‌يئب کي، آنادان کور دوغولموش بئر آدامين گؤزلري آچيلسين.

9:33  اگر بو آدام تاري طرفئندن اولماسايدي، هچ بئر شي اده​بئلمزدي."

9:34  فرئسئلر اونا جاواب ورئب ددئلر: "ائندي سن بئزه درس ورئرسن، سن کي، تامامن گوناه ائچئنده دوغولوبسان؟!" و اونو اشئيه سالديلار.

9:35  عئسا او آدامين اشئيه سالينديغيني اشئتدي و اونو تاپيب ددي: "آيا تارينين اوغلونا ائمان گتئرئرسن؟"

9:36  او آدام جاواب ورئب ددي: "آغا، او کئمدئر کي، اونا ائمان گتئرئم؟"

9:37  عئسا اونا ددي: "اونو گؤروبسن. سنئنله دانيشان او اؤزودور."

9:38  او آدام ددي: "يارب، ائمان گتئرئرم." و عئسايا پرستئش اتدي.

9:39  و عئسا ددي: "بو دونيايا حؤکم اتمک اوچون گلمئشم، اله کي، گؤرمه‌ينلر گؤرسونلر و گؤرنلر کور اولسونلار."

9:40  يانيندا اولان بعضي فرئسئلر بو سؤزلري اشئدئب اونا ددئلر: "يوخسا بئز ده کوروق؟!"

9:41  عئسا اونلارا ددي: "اگر کور اولسايدينيز، گوناهينيز اولمازدي. آمّا ائندي کي، «گؤروروک» ديئرسئنئز، گوناهينيز اوستونوزده قالير."

Chapter 10

10:1  "دوغروسونو سئزه ديئرم؛ قويون آغيلينا قاپيدان گئرمه‌يئب، آيري بئر يردن آشيب-گئرن آدام، اوغرو و حرامي‌دئر.

10:2  آمّا قاپيدان گئرن قويونلارين چوباني‌دير.

10:3  قاپيچي قاپيني اونا آچار و قويونلار اونون سسئنه قولاق آسارلار. چوبان اؤز قويونلاريني آدلاري ائله چاغيرار و اشئيه چيخاردار.

10:4  بوتون قويونلاريني اشئيه چيخارداندان سونرا، اونلارين قاباغيندا گِدَر و قويونلار اونون دالينجا گدرلر، چونکي اونون سسئني تاني‌ييرلار.

10:5  اونلار ياد آدامين دالينجا گتمزلر. اونون اوچون قاچارلار کي، ياد آدامين سسئني تانيميرلار."

10:6  عئسا بو مثلي اونلارا ددي، آمّا او آداملار اونون ددئيئني آنلاماديلار.

10:7  ​​اونون اوچون عئسا اونلارا گئنه ددي: "دوغروسونو سئزه ديئرم؛ قويونلار اوچون قاپي منم.

10:8  مندن قاباق گلنلرئن هاميسي اوغرو و حرامي ائدي. آمّا قويونلار اونلارين سسئنه قولاق آسماديلار.

10:9  ​​​قاپي منم. مندن گئرنلرئن هاميسي نئجات تاپاجاق؛ ائچه‌ري گئره​جکلر، اشئيه چيخاجاقلار و اوتلاق تاپاجاقلار.

10:10  ​​​اوغرو گلمز مگر اوغورلاماق، اؤلدورمک و هلاک اتمک اوچون. من گلمئشم کي، اونلار حياتا صاحئب اولسونلار و آرتيقليقلا اونا صاحئب اولسونلار.

10:11  ياخشي چوبان منم. ياخشي چوبان قويونلاردان اؤتري جانيندان کِچَر.

10:12  چوبان اولمايان و اوجرته ائشله‌ين آدام کي، قويونلارين صاحئبي ديئل، قوردون گلدئيئني گؤرونجه، قويونلاري بوراخيب قاچار و قورد اونلاري قاپيب داغيدار.

10:13  ​​​​اوجرته ائشله‌ين آدام قاچار، چونکي اوجرته ائشله‌يئر و قويونلارين قيدئنه قالمير.

10:14  ياخشي چوبان منم و منئم اولانلاري تاني‌ييرام و منئم اولانلار دا مني تاني‌ييرلار.

10:15  اله کي، آتا مني تاني‌يير و من ده آتاني تاني‌ييرام و قويونلاردان اؤتري جانيمدان کچئرم.

10:16  بو آغيلدان اولمايان اؤزگه قويونلاريم دا وار کي، اونلاري گتئرمه‌لئيم. اونلار سسئمي اشئده​جکلر و بئر چوباني اولان سورو اولاجاقلار.

10:17  بونون اوچون آتا مني سوئر کي، جانيمدان کچئرم، اِله کي، اونو تکرار آليم.

10:18  کئمسه اونو مندن آلمير. من اؤزوم اونو ورئرم. اونو ورمه‌يه ده ائختئياريم وار، اونو گئنه آلماغا دا. بو حؤکمو آتامدان آلميشام."

10:19  عئسانين بو سؤزلرئنه گؤره يهودئلرئن آراسيندا گئنه ده ائختئلاف دوشدو.

10:20  اونلاردان چوخلاري ديئردئلر: "او دلي اولوب. ناپاک روح الئنده اسئردئر. نه اوچون اونا قولاق آسيرسينيز؟"

10:21  اؤزگه​لري ده ديئردئلر: "دلي بئر آدام مگر کور بئر آدامين گؤزلرئني آچا بئلر؟"

10:22  اوندان سونرا، اورشلئمده وقف بايرامي يتئشدي.

10:23  قيش ائدي. عئسا معبدده، سوليمانين ايوانيندا گزئردي.

10:24  يهودئلر عئسانين اطرافينا ييغيليب اونا ددئلر: "نه واختا کئمي بئزي شک ائچئنده ساخلاياجاقسان؟ اگر وعده​سي ورئلمئش مسئح سنسن، آچيقجا بئزه ده."

10:25  عئسا اونلارا جاواب وردي: "سئزه ددئم و سئز ائنانميرسينيز. آتامين آديندا گؤردويوم ائشلر منئم حاقّيمدا شهادت ورئرلر.

10:26  آمّا سئز ائنانميرسينيز، چونکي منئم قويونلاريمدان ديئلسئنئز.

10:27  منئم قويونلاريم منئم سسئمي اشئدئرلر. من اونلاري تاني‌ييرام و اونلار منئم داليمجا گلئرلر.

10:28  و من اونلارا ابدي حيات ورئرم. اونلار هچ واخت هلاک اولمازلار و کئمسه ده اونلاري الئمدن قاپا بئلمز.

10:29  اونلاري منه ورن آتام، هاميدان بؤيوکدور و آتانين الئندن قاپماغا کئمسه قادئر ديئل.

10:30  من و آتا بئرئک."

10:31  يهودئلر اونو داشلاماق اوچون گئنه داش گؤتوردولر.

10:32  عئسا اونلارا ددي: "سئزه آتادان چوخ ياخشي ائشلر گؤرستدئم. بو ائشلرئن هانسيندان اؤتري مني داشلاييرسينيز؟"

10:33  يهودئلر اونا جاواب وردئلر: "سني ياخشي بئر ائش اوچون داشلاميريق، کوفر دانيشديغين اوچون سني داشلاييريق. اونون اوچون کي، بئر ائنسان ائکن اؤزونو تاري ادئرسن."

10:34  عئسا اونلارا جاواب وردي: "مگر «ددئم: سئز تاريلارسينيز» سؤزو شرئعتئنئزده يازيلماييب؟

10:35  تارينين موقدّس کلامي پوزولماز. اگر تاري اونون سؤزلرئني قبول ادن آداملاري «تاريلار» چاغيرير،

10:36  «تارينين اوغلويام» ددئيئم اوچون آتا طرفئندن موقدّس اولونوب دونيايا گؤنده‌رئلمئش آداما نجه «کوفر ديئرسن» دئيه بئلرسئنئز؟

10:37  اگر آتامين ائشلرئني گؤرمورم، منه ائنانمايين.

10:38  آمّا اگر گؤرورم، منه ائنانميرسينيز دا، اتدئيئم ائشلره ائنانين کي، آتانين منده و منئم ده آتادا اولدوغومو بئلئب آنلاسينيز."

10:39  او واخت گئنه اونو توتماغا چاليشديلار، آمّا عئسا اونلارين الئندن چيخدي.

10:40  و گئنه اوردون چايينين او بئري تايينا، يحيانين اوّلده تعمئد وردئيي يره گتدي و اورادا قالدي.

10:41  و چوخ آداملار اونون يانينا گلئب ددئلر: "يحيا حقئقتن هچ بئر مؤجوزه اتمه‌دي، آمّا بو آدامين حاقّيندا ددئيي بوتون سؤزلر دوغرو ائدي."

10:42  و اورادا چوخ آداملار اونا ائمان گتئردئلر.

Chapter 11

11:1  مريم و باجيسي مارتانين کندي بيت‌عنيادان، ائلعازر آديندا بئر کئشي ناخوش ائدي.

11:2  بو اله او مريم ائدي کي، ربّين آياقلارينا ياغ تؤکوب ساچلاري ائله سئلدي. ناخوش اولان ائلعازر اونون قارداشي ائدي.

11:3  اونا گؤره باجي‌لار عئسايا خبر گؤنده‌ردئلر: "آغا، سودئيئن آدام ناخوشدور."

11:4  عئسا بونو اشئدنده ددي: "بو ناخوشلوغون آخيري اؤلوم ديئل، تارينين جلالي اوچوندور کي، تارينين اوغلو اونونلا عئزّت تاپسين."

11:5  عئسا مارتا، باجيسي مريم، و ائلعازري سوئردي.

11:6  ​​​ائلعازرئن ناخوشلوغونو اشئدندن سونرا، عئسا قالديغي يرده ائکي گون ده قالدي.

11:7  اوندان سونرا شاگئردلرئنه ددي: "گلئن گئنه يهودئيه دئيارينا گدک."

11:8  شاگئردلري اونا ددئلر: "اوستاد، يهودئلر سني داشلاماق ائسته‌يئردئلر و ائندي سن گئنه اورايا گدئرسن؟!"

11:9  عئسا جاواب وردي: "مگر بئر گون اون‌ائکي ساعات ديئل؟ گوندوزده يرئين آدام سوروشمز. چونکي بو دونيانين ائشيغيندا گؤرور.

11:10  آمّا گجه قارانليغيندا گزن آدامدير کي، ائشيغي اولماديغينا گؤره سوروشر."

11:11  عئسا بو سؤزلري دئيندن سونرا اونلارا ددي: "دوستوموز ائلعازر يوخويا گدئب. گدئرم اونو يوخودان اوياديم."

11:12  شاگئردلر اونا ددئلر: "آغا، اگر يوخويا گتمئشسه، توختاياجاق."

11:13  عئسانين او سؤزدن مقصدي ائلعازرئن اؤلومو ائدي. آمّا اونلار اله گومان اتدئلر کي، يوخودان حاصئل اولان دئنجلمکدن دانيشير.

11:14  اونون اوچون ده عئسا آچيقجا اونلارا ددي: "ائلعازر اؤلوبدور.

11:15  سئزئن ائمان گتئرمه‌يئنئز اوچون اورادا اولماديغيمدان چوخ سوئنئرم. آمّا گلئن اونون يانينا گدک."

11:16  "اکئز" آدلانان توماس او بئري شاگئردلره ددي: "گلئن بئز ده اونونلا گدئب اونونلا بئرلئکده اؤلک."

11:17  عئسا بيت‌عنيايا ياخينلاشاندا، ائلعازرئن قبئره قويولماسيندان دؤرد گون کچئردي.

11:18  بيت عنيانين اورشلئمدن ياريم آغاجدان آز آراسي وار ائدي.

11:19  و يهودئلردن چوخلاري مريم و مارتانين يانينا گلمئشدئلر کي، قارداشلارينين اؤلومو اوچون اونلارا تسلّي ورسئنلر.

11:20  مارتا عئسانين گلدئيئني اشئدن واخت، اونون قاباغينا چيخدي. آمّا مريم اِوده اوتورموشدو.

11:21  مارتا عئسايا ددي: "آغا، اگر بورادا اولسايدين، قارداشيم اؤلمزدي.

11:22  و ائندي ده بئلئرم کي، تاريدان نه ائستيه​سن، تاري سنه وره​جک."

11:23  عئسا اونا ددي: "قارداشين گئنه دئرئله​جک."

11:24  مارتا اونا ددي: "بئلئرم کي، قئيامت گونونده، او آخير گونده گئنه دئرئله​جک."

11:25  عئسا اونا ددي: "«قئيامت و حيات منم. منه ائمان گتئرن اؤلسه ده، ياشايار.

11:26  و ياشايان هر کس منه ائمان گتئرسه، اصلا اؤلمز. آيا بونا ائنانيرسان؟"

11:27  مارتا اونا ددي: "بلي يارب، ائنانميشام کي، مسئح سنسن؛ او تارينين اوغلو کي، اونون بو دونيايا گله​جه‌يي قاباقدان خبر ورئلئب."

11:28  بونو دئيندن سونرا گدئب باجيسي مريمي گئزلئجه چاغيردي و اونا ددي: "اوستاد بورادادير و سني چاغيرير."

11:29  مريم بونو اشئدنده تله‌سئک قالخيب عئسانين يانينا گلدي.

11:30  عئسا حله کنده گئرمه​مئشدي و مارتا ائله راستلاشان يرده ائدي.

11:31  مريمله اِوده اوتوران يهودئلر و اونا تسلّي ورنلر مريمئن تله‌سئک قالخيب گتدئيئني گؤرنده اونون دالينجا گتدئلر و گومان ادئردئلر کي، گدئر قبئرئن اوستونده آغلاسين.

11:32  مريم عئسانين اولدوغو يره گلدي و اونو گؤرنده اونون آياقلارينا دوشوب ددي: "آغا، اگر بورادا اولسايدين، قارداشيم اؤلمزدي."

11:33  عئسا، مريم و اونونلا گلن يهودئلرئن آغلاديغيني گؤرنده روحونو قم باسدي و اوره‌يي سيخيلدي.

11:34  و ددي: "اونو هارايا قويوبسونوز؟" اونلار عئسايا ددئلر: "آغا، گل اؤزون گؤر."

11:35  عئسا آغلادي.

11:36  بونا گؤره يهودئلر ددئلر: "گؤر ائلعازري نه قدر سوئردي!"

11:37  آمّا اونلاردان بعضئلري ددئلر: "آيا کور آدامين گؤزلرئني آچان بو آدام، او کئشئنئن اؤلومونه مانع اولا بئلمزدي؟"

11:38  عئسانين روحونو گئنه قم باسدي و قبئرئن يانينا گلدي. قبئر بئر ماغارا ائدي و گئرئش آغيزيني بئر داش توتموشدو.

11:39  عئسا ددي: "داشي گؤتورون." اؤله‌نئن باجيسي مارتا اونا ددي: "آغا، ائندي او قوخويور. اؤلوموندن دؤرد گون کچئر."

11:40  عئسا مارتايا ددي: "دمه‌دئم اگر ائمان گتئره​سن، تارينين جلاليني گؤررسن؟!"

11:41  او واخت ماغارانين آغيزيني توتان داشي گؤتوردولر و عئسا گؤزلرئني گؤيه قالديريب ددي: "آتا، مني اشئتدئيئن اوچون سنه شوکور ادئرم.

11:42  و بئلئردئم کي، سن همئشه مني اشئدئرسن. آمّا بورادا دوران جاماعات اوچون ددئم کي، سنئن مني گؤنده‌ردئيئنه ائمان گتئرسئنلر."

11:43  و بو سؤزلري دئيندن سونرا اوجا بئر سسله چاغيردي: "ائلعازر، اشئيه گل."

11:44  اؤلموش آدام ال-آياغي کفن ائچئنده باغلي و اوزو دسماللا سرئلمئش اشئيه چيخدي. عئسا اونلارا ددي: "اونو آچين. قويون گتسئن."

11:45  او زامان مريمئن يانينا گلمئش يهودئلرئن چوخلاري، عئسانين بو ائشئني گؤره‌نده اونا ائمان گتئردئلر.

11:46  آمّا اونلاردان بعضئلري فرئسئلرئن يانينا گدئب، عئسانين اتدئيي ائشلرئني اونلارا خبر وردئلر.

11:47  بو سببدن باش کاهئنلر و فرئسئلر شورا قوروب ددئلر: "نه ادک؟ بو آدام بئر چوخ علامتلر گؤرسه‌دئر؟

11:48  اگر اونو بله اؤز-باشينا بوراخاق، هامي اونا ائمان گتئره​جک، و روملولار دا گلئب هم موقدّس يرئمئزي، هم ده مئلّتئمئزي يوخ اده​جکلر."

11:49  آمّا اونلاردان بئري قيافا، همئن ائلئن باش کاهئني، اونلارا ددي: "سئز هچ بئر شي بئلمئرسئنئز.

11:50  مگر دوشونمورسونوز کي، خالق يولوندا بئر آدامين اؤلمه‌سي بئزئم اوچون بوتون خالقين محو اولماسيندان داها ياخشي‌دير؟!"

11:51  قيافا بو سؤزو اؤزوندن دمئردي. قيافا همئن ائلئن باش کاهئني اولاراق، نبئلئک ادئب قاباقجادان خبر وردي کي، عئسا، مئلّت يولوندا اؤله​جک.

11:52  و فقط او مئلّت يولوندا يوخ، تارينين داغيلميش اؤولادلاري يولوندا دا کي، اونلاري بئر يره ييغيب هاميسيني بئر اتسئن.

11:53  اله او گوندن اونو اؤلدورمک اوچون مصلحتلشدئلر.

11:54  اونون اوچون عئسا آرتيق يهودئلر آراسيندا آچيقجا گزمئردي و اورادان آيريليب، کؤشنه ياخين اِفرايئم آدلي بئر شهره گتدي و شاگئردلری ائله اورادا قالديلار.

11:55  يهودئلرئن پاسخا بايرامي ياخينلاشيردي. اونون اوچون ده چوخ آداملار اؤزلرئني تطهئر اتمک اوچون بايرامدان قاباق هر يردن، اوزاقدان-ياخيندان اورشلئمه گتدئلر.

11:56  اونلار عئساني آختاريرديلار و معبدده بئربئرلرئنه ديئردئلر: "سئز نه دوشونورسونوز؟ آيا او، بايرام اوچون گله​جک؟"

11:57  چونکي باش کاهئنلر و فرئسئلر امر ورمئشدئلر کي، عئسانين يرئني بئلنلر، اونون ياخالانماسي اوچون گرک هارادا اولدوغونو اونلارا خبر ورسئنلر.

Chapter 12

12:1  عئسا، پاسخا بايراميندان آلتي گون قاباق، بيت عنيايا، اؤلولردن دئرئلتدئيي ائلعازرئن ياشاديغي يره گلدي.

12:2  اورادا اونون اوچون بئر قوناقليق وردئلر. مارتا خئدمت ادئردي و ائلعازر عئسا ائله سوفره باشيندا اوتورانلاردان بئري ائدي.

12:3  مريم بئر شوشه چوخ قئيمتلي خالئص سونبول ياغيني گؤتوروب عئسانين آياقلارينا سورتدو و ساچلاري​ ائله اونون آياقلاريني سئلدي. اِو سونبول ياغينين عطري ائله دولدو.

12:4  ائسکاريوتلو يهودا، عئسانين شاگئردلرئندن بئري کي، اونا خيانت اِتمَک نئيّتئنده ائدي، ددي:

12:5  "نه اوچون بو ياغ اوچ يوز دئنارا ساتيليب، مؤحتاج آداملارا ورئلمه‌دي؟"

12:6  بونو مؤحتاج آداملارين قيدئنه قالديغي اوچون دمئردي. اوغرو اولدوغو اوچون ديئردي. کئسه اونون يانيندا ائدي و اونا قويولانلاردان اؤزونه ده گؤتورَردي.

12:7  عئسا ددي: "اونونلا ائشئن اولماسين. قوي اونو منئم دفنئم اوچون ساخلاسين.

12:8  مؤحتاج آداملار همئشه آرانيزدا وارديرلار. آمّا من همئشه آرانيزدا ديئلم."

12:9  يهودئلردن چوخلاري عئسانين اورادا اولدوغوندان خبردار اولوب فقط عئساني گؤرمک اوچون يوخ، اؤلولردن دئرئلتدئيي ائلعازري گؤرمک اوچون ده اورايا گلدئلر.

12:10  اونون اوچون باش کاهئنلر مصلحتله‌شئب ائلعازري ده اؤلدورمه‌يه قرار قويدولار.

12:11  چونکي اونون اوزوندن يهودئلردن چوخلاري گدئب عئسايا ائمان گتئرئردئلر.

12:12  او گونون صاباحي بايراما گلن بؤيوک بئر جاماعات، عئسانين اورشلئمه گلمکده اولدوغونو اؤيره‌نَنده،

12:13  خورما بوداقلاريني گؤتوروب اونون پئشوازينا چيخديلار و سسله‌نئردئلر: "هوسانّا، ربّئن آديندا گلن ائسرايئلئن پادشاهي موبارک اولسون!"

12:14  عئسا بئر سيپا تاپيب اوستونه مئندي. نجه کي، يازيلميشدير:

12:15  صحيون قيزي، قورخما. باخ، پادشاهين گلئر. بئر سيپايا مئنمئش گلئر.

12:16  شاگئردلر بو شيلري اوّلجه آنلاماديلار. آمّا عئسانين جلال تاپديغيندان سونرا، بو سؤزلرئن اونون حاقّيندا يازيلديغيني و خالقين بو شيلري اونون اوچون اتدئکلرئني خاطيرلاديلار.

12:17  و عئسانين ائلعازري چاغيريب اؤلولردن دئرئلتدئيي زامان اونونلا اولموش خالق، بونا شهادت ورئردئلر.

12:18  اونون اوچون ده خالق اونون پئشوازينا چيخدي. چونکي اونون گؤرستدئيي بو مؤجوزه​ني اشئتدئلر.

12:19  فرئسئلر بئربئرلرئنه ددئلر: "گؤرورسونوز، الئمئزدن هچ بئر شي گلمئر. عالم اونون دالينجا گدئر."

12:20  بايرامدا عئبادت اوچون اورشلئمه گلنلر آراسيندا بعضي يونانئلر ده وار ائدي.

12:21  بو يونانئلر جلئلئن بيت صيدا کندئندن اولان فئلئپوسا ياخينلاشيب اوندان خاهئش اتدئلر: "آغا، عئساني گؤرمک ائسته‌يئرئک."

12:22  فئلئپوس گدئب بو مطلبي آندرياسا ددي. آندرياس و فئلئپوس دا گدئب بونو عئسايا خبر وردئلر.

12:23  عئسا اونلارا ددي: "ائنسان اوغلونون جلال تاپماق واختي يتئشدي.

12:24  دوغروسونو سئزه ديئرم؛ بوغدانين توخومو يره دوشوب اؤلمه‌سه، تک قالار. آمّا اؤلسه، چوخ محصول وِرَر.

12:25  جانيني سون، اونو ائتئرر. آمّا بو دونيادا جانيني سِومه‌ين، اونو ابدي حياتا کئمي حئفظ ادر.

12:26  منه خئدمت ادن آدام گرک منئم داليمجا گلسئن. من هارادا اولسام، منه خئدمت ادن ده اورادا اولاجاق. منه خئدمت ادن هر کس آتا طرفئندن عئزّت تاپاجاق.

12:27  ائندي جانيم سيخيلير. و نه ديئم؛ «آتا، مني بو ساعاتدان قورتار؟!» آمّا من اله بو ساعات اوچون گلدئم.

12:28  آتا اؤز آديني اوجالت." او زامان گؤيدن بئر سس گلدي: "اوجالتديم، گئنه ده اوجالتاجاغام."

12:29  اورادا دوران و بونو اشئدن خالق ددي: "گؤي گورولدادي." اؤزگه​لري ددئلر: "بئر ملک اونونلا دانيشيب."

12:30  عئسا ددي: "بو سس منئم اوچون گلمه‌دي، سئزئن اوچون گلدي.

12:31  بو دونيا ائندي موحاکئمه اولونور. ائندي بو دونيانين حؤکمداري اشئيه آتيلاجاق.

12:32  آمّا من، يردن قالديريلديغيم زامان، بوتون ائنسانلاري اؤزومه چکه​جه‌يم."

12:33  ​​​عئسا بو سؤزو دمکده نجه اؤله​جه‌يئني بئلدئردي.

12:34  خالق اونا ددي: "بئز شرئعتدن اؤيرنمئشئک کي، مسئح ابده کئمي قالاجاق. سن ائندي نجه ديئرسن ائنسان اوغلونون قالديريلماسي لازيمدير؟! بو ائنسان اوغلو کئمدئر؟"

12:35  عئسا اونلارا ددي: "نور آز بئر زامان داها آرانيزدا اولاجاق. نورونوز وار ائکن گزئن، مبادا قارانليق سئزي توتسون. قارانليقدا گزن آدام هارايا گتدئيئني بئلمز.

12:36  نورونوز وار ائکن نورا ائنانين کي، نورون اوغوللاري اولاسينيز." عئسا بو سؤزلري دئيندن سونرا گدئب اونلاردان گئزلندي.

12:37  عئسا گرچي اونلارين گؤزلري قاباغيندا چوخ علامتلر گؤرستدي، اونلار گئنه اونا ائمان گتئرمه‌دئلر کي،

12:38  اشعيا پيغمبرئن خبر وردئيي سؤز يرئنه يتئشسئن؛ يارب، وردئيئمئز خبره کئم ائناندي؟ و ربّئن قودرتي کئمه گؤروندو؟

12:39  اونلار اونون اوچون اونا ائمان گتئره بئلمئردئلر چونکي، اشعيا باشقا بئر يرده دمئشدي؛

12:40  تاري اونلارين گؤزلرئني کور اتدي، اورکلرئني داشا دؤنده‌ردي. اونون اوچون ده نه گؤزلری ائله گؤرمه‌يه قادئر اولدولار، نه اورکلری ائله آنلاماغا، نه ده منه طرف دؤنمه‌يه کي، من اونلارا شفا ورئم.

12:41  اشعيا بو سؤزلري ددي، چونکي ربّئن جلاليني گؤردو و اونون حاقّيندا دانيشدي.

12:42  گئنه ده ريئسلردن چوخلاري عئسايا ائمان گتئردئلر، آمّا فرئسئلر اوزوندن ائمان گتئردئکلرئني آچيقجا دمه‌دئلر. چونکي قورخوردولار کنئسه​دن اشئيه سالينسينلار.

12:43  چونکي اونلار ائنساندان گلن عئزّتي تاريدان گلن عئزّتدن داها چوخ سوئردئلر.

12:44  آمّا عئسا اوجا سسله اونلارا ددي: "منه ائمان گتئرن، منه يوخ، مني گؤنده‌ره‌نه ائمان گتئرئر.

12:45  و مني گؤرَن، مني گؤنده‌ره‌ني گؤرور.

12:46  من دونيايا نور اولاراق گلدئم کي، منه ائمان گتئرن هر کس قارانليقدا قالماسين.

12:47  سؤزلرئمي اشئدئب اونلارا ائنانمايان آداما من حؤکم اتمه‌يه​جه‌يم. چونکي دونياني موحاکئمه اتمک اوچون گلمه​مئشم، دونيايا نئجات ورمک اوچون گلمئشم.

12:48  مني ردّ ادن و سؤزلرئمي قبول اتمه‌ين آداما حؤکم ادن بئري وار؛ ددئيئم سؤزلر آخير گونده اونا حؤکم اده​جک.

12:49  چونکي من اؤزومدن دانيشماديم. مني گؤنده‌رن آتا نه دئيه​جه‌يئمي و نه دانيشاجاغيمي منه بويوردو.

12:50  و من بئلئرم کي، اونون بويوردوقلاري ابدي حياتدير. اونون اوچون نه دانيشيرام، آتا منه ددئيي کئمي دانيشيرام."

Chapter 13

13:1  پاسخا بايراميندان قاباق، عئسا بئلئردي کي، بو دونيادان آيريليب آتانين يانينا گده​جه‌يي ساعات يتئشئب. اونون اوچون ده، دونيادا اولان اؤزونونکولري سوه‌رک، اونلاري آخيرا قدر سِودي.

13:2  شام يئينده ائبلئس، ائسکاريوتلو شمعون اوغلو يهودانين اوره‌يئنه عئساني تسلئم اتمک فئکرئني سالميشدي.

13:3  عئسا آتانين هر شيي اونون ائختئياريندا قويدوغونو بئلئردي و تاريدان گلئب اونون يانينا گده​جه‌يئني ده بئلئردي.

13:4  عئسا يمکدن قالخدي و اوست پالتاريني چيخارديب بئر يانا قويدو. و بئر دسمال گؤتوروب بلئنه باغلادي.

13:5  سونرا لَيَنه سو تؤکوب شاگئردلرئن آياقلاريني يوماغا و بلئنه باغلاديغي دسماللا قورولتماغا باشلادي.

13:6  عئسا، شمعون پطروسون يانينا ياخينلاشاندا او، عئسايا ددي: "يارب، منئم آياقلاريمي سن يويورسان؟!"

13:7  عئسا جاواب ورئب اونا ددي: "منئم نه اتدئيئمي سن ائندي بئلمزسن. آمّا سونرا باشا دوشه​جکسن."

13:8  پطروس اونا ددي: "منئم آياقلاريمي اصلا يوماياجاقسان." عئسا اونا ددي: "اگر سنئن آياقلاريني يوماسام، منئمله پايين اولماز."

13:9  شمعون پطروس اونا ددي: "يارب، فقط آياقلاريمي يوخ، اللرئمي و باشيمي دا يو."

13:10  عئسا اونا ددي: "يويولموش آدامين فقط آياقلاريني يوماق لازيمدير. چونکي تامامن تمئزدئر. سئز ده تمئزسئنئز، آمّا هامينيز يوخ."

13:11  چونکي عئسا اونا خيانت اده‌ني تاني‌ييردي. اونون اوچون ده ددي؛ "هامينيز تمئز ديئلسئنئز."

13:12  عئسا شاگئردلرئن آياقلاريني يويوب اوست پالتاريني گِيَندن سونرا، گئنه سوفره باشيندا اوتوردو و اونلارا ددي: "آيا سئزه نه اتدئيئمي آنلادينيز؟

13:13  سئز مني اوستاد و رب چاغيريرسينيز و دوغرو دا چاغيريرسينيز، چونکي اويام.

13:14  اگر من رب و اوستاد اولدوغوم حالدا سئزئن آياقلارينيزي يودوم، سئز ده گرک بئربئرئزئن آياقلاريني يوياسينيز.

13:15  چونکي سئزه بئر نومونه وردئم کي، سئز ده منئم سئزه اتدئيئم کئمي اِده​سئنئز.

13:16  دوغروسونو سئزه ديئرم، قول آغاسيندان بؤيوک ديئل، الچي ده اونو گؤنده‌ره‌ندن اوستون ديئل.

13:17  ائندي کي، بو شيلري بئلئرسئنئز، اگر اونلارا عمل اده​سئنئز، بختورسئنئز."

13:18  "هامينيزين حاقّيندا دانيشميرام. من سچدئکلرئمي تاني‌ييرام. لاکئن بو اونون اوچوندور کي، موقدّس کئتابين يازديغي سؤز يرئنه يتئشسئن؛ «منئمله چؤرک يئين منه خيانت اتدي.»

13:19  بونو سئزه ائندئدن، حله باش ورمه‌دن ديئرم کي، باش ورن زامان منئم «او» اولدوغوما ائناناسينيز.

13:20  دوغروسونو سئزه ديئرم؛ منئم گؤنده‌ردئيئم آدامي قبول ادن، مني قبول ادئر و مني قبول ادن مني گؤنده‌رني قبول ادئر."

13:21  بو سؤزلري دئيندن سونرا، عئسانين روحو سيخيلدي و شهادت ورئب ددي: "دوغروسونو سئزه ديئرم کي، سئزدن بئري منه خيانت اده​جک."

13:22  شاگئردلر بئربئرلرئنه باخيب حيران قالميشديلار کي، کئمئن حاقّيندا دانيشير.

13:23  شاگئردلردن بئري سوفره باشيندا عئسانين يانيندا اوتوروب اونون سئنه‌سئنه سؤيکنمئشدي. عئسا بو شاگئردي سوئردي.

13:24  شمعون پطروس بو شاگئرده ائشاره ادئب اوندان سوروشدو: "کئمئن حاقّيندا ديئر؟"

13:25  او دا عئسايا آرتيق ياخينلاشيب اوندان سوروشدو: "يارب، او کئمدئر؟"

13:26  عئسا اونا جاواب وردي: "چورک تئکه​سئني باتيريب کئمه ورسم، او اؤزودور." او زامان عئسا، چؤرک تئکه​سئني باتيريب ائسکاريوتلو شمعون اوغلو يهودايا وردي.

13:27  يهودا چؤرک تئکه​سئني آلان زامان، شيطان اونون ائچئنه گئردي. او واخت عئسا اونا ددي: "اده​جه‌يئني تز ات."

13:28  آمّا سوفره باشيندا اوتورانلاردان هچ کئم بو سؤزون نه اوچون ددئيئني آنلامادي.

13:29  کئسه يهودانين يانيندا اولدوغوندان بعضئلري اِله گومان اتدئلر کي، عئسا اونا ديئر: "بايرام اوچون بئزه لازيم اولان شيلري ساتين آل" يا دا "مؤحتاج آداملارا بئر شي ور."

13:30  يهودا تئکه​ني آلاندان سونرا، درحال اشئيه چيخدي. و گجه ائدي.

13:31  يهودانين گتدئيئندن سونرا، عئسا ددي: "ائندي ائنسان اوغلو جلال تاپير و تاري اوغولدا جلال تاپير.

13:32  اگر تاري اوندا جلال تاپسا، تاري دا اوغولو اؤزونده عئزّتلندئره​جک و درحال اونا جلال وره​جک.

13:33  اؤولادلاريم، آرتيق قيسا بئر مودّته کئمي سئزئنله‌يَم. مني آختاراجاقسينيز، آمّا يهودئلره ددئيئم کئمي سئزه ده ائندي ديئرم؛ گده‌جه‌يئم يره سئز گله بئلمزسئنئز.

13:34  سئزه تزه بئر امر ورئرم؛ بئربئرئنئزي سوئن. من سئزي سودئيئم کئمي، سئز ده گرک بئربئرئنئزي سوه​سئنئز.

13:35  اگر بئربئرئنئزي سوه​سئنئز، بوندان بوتون ائنسانلار بئلرلر کي، سئز منئم شاگئردلرئمسئنئز."

13:36  شمعون پطروس اونا ددي: "يارب، سن هارايا گدئرسن؟" عئسا جاواب وردي: "من گده​جه‌يئم يره، سن ائندي داليمجا گله بئلمزسن. آمّا سونرا گله‌جکسن."

13:37  پطروس اونا ددي: "يارب، نئيه ائندي دالينجا گله بئلمه‌رم؟ من سنئن اوچون جانيمدان کچه‌رم."

13:38  عئسا جاواب وردي: "سن منئم اوچون جانيندان کچرسن؟! دوغروسونو سنه ديئرم، خوروز بانلاماميش سن مني اوچ دفه ائنکار اده‌جکسن.

Chapter 14

14:1  اوره‌يئنئز اوزولمه‌سئن. تارييا ائمان گتئرئن، منه ده ائمان گتئرئن.

14:2  آتامين اوئنده چوخ اوتاق وار. اولماسايدي، سئزه دئيردئم. اونا گؤره گدئرم سئزئن اوچون ير حاضيرلايام.

14:3  و اگر گدئب سئزئن اوچون بئر ير حاضيرلاسام، گئنه گلئب سئزي اؤز يانيما آپارارام کي، من اولان يرده سئز ده اولاسينيز.

14:4  هارايا گده‌جه‌يئمي بئلئرسئنئز، يولو دا تاني‌ييرسينيز."

14:5  توماس اونا ددي: "يارب، هارايا گده​جه‌يئني بئلمئرئک، يولو نجه بئله‌رئک؟"

14:6  عئسا اونا ددي: "يول، حقئقت و حيات منم. هچ کس آتانين يانينا گله بئلمز، مگر من واسئطه اولام.

14:7  اگر مني تانيسايدينيز، آتامي دا تانيياردينيز. ائندئدن اونو تاني‌ييرسينيز و اونو گؤروبسونوز."

14:8  فئلئپوس ددي: "يارب، آتاني بئزه گؤرسد و بو بئزئم اوچون کئفايت ادر."

14:9  عئسا اونا ددي: "فئلئپوس، بو قدر سئزئنله اولاراق مني حله تانيماييبسان؟ مني گؤرن آتاني گؤروب. نجه آتاني بئزه گؤرسد ديئرسن؟

14:10  ائنانميرسان کي، من آتادايام و آتا منده​دئر؟ سئزه ددئيئم سؤزلري اؤزومدن دمئرم. بو، منده اولان آتادير کي، اؤز ائشلرئني گؤرور.

14:11  ائنانين کي، من آتادايام و آتا دا منده​دئر. يوخسا، او ائشلره گؤره ائنانين.

14:12  دوغروسونو سئزه ديئرم، من اتدئيئم ائشلري، منه ائمان گتئرن آدام دا اده​جک. و بونلاردان داها بؤيوک ائشلر ده اده​جک، چونکي من آتانين يانينا گدئرم.

14:13  و منئم آديمدا هر نه ائسته‌يه​سئنئز، اونو اده​جه‌يم کي، آتا اوغولدا عئزّت تاپسين.

14:14  منئم آديمدا مندن هر نه ائسته‌يه​سئنئز، اده​جه‌يم."

14:15  "اگر مني سوئرسئنئز، امر اتدئکلرئمي يرئنه يتئررسئنئز.

14:16  و من آتادان خاهئش اده​جه‌يم و او سئزه باشقا بئر تسلّي ورن وره​جک کي، ابده کئمي سئزئنله قالسين.

14:17  او حقئقت روحودور کي، دونيا اونو قبول اده بئلمز. چونکي نه اونو گؤرر، نه ده اونو تانييار. آمّا سئز اونو تاني‌ييرسينيز، چونکي سئزئنله قالير و سئزده اولاجاق.

14:18  سئزي يتئم بوراخماياجاغام، سئزئن يانينيزا گله​جه‌يم.

14:19  بئر آز مودّت سونرا، دونيا داها مني گؤرمه‌يه​جک. آمّا سئز مني گؤره​جکسئنئز. من ياشاديغيم اوچون سئز ده ياشاياجاقسينيز.

14:20  او گون آنلاياجاقسينيز کي، من آتامدايام و سئز منده​سئنئز، و من سئزده‌يم.

14:21  مني سون او آدامدير کي، امر اتدئکلرئم اوندادير و اونلاري يرئنه يتئرئر. مني سون، آتام طرفئندن سوئله​جک و من اونو سوئب اؤزومو اونا ظاهئر اده​جه‌يم."

14:22  يهودا (نه او ائسکاريوتلو) عئسايا ددي: "يارب، نه اولوب کي، اؤزونو آرتيق دونيايا يوخ، بئزه ظاهئر اده​جکسن؟"

14:23  عئسا جاواب ورئب اونا ددي: "هر کس مني سِوسه، سؤزومو يرئنه يتئرر و آتام اونو سِوَر و بئز اونون يانينا گلئب اونونلا مسکن توتاريق.

14:24  مني سِومه‌ين آدام، سؤزلرئمي يرئنه يتئرمز. و اشئتدئيئنئز سؤزلر منئم اؤزومدن ديئل، مني گؤنده‌رن آتانيندير.

14:25  يانينيزدا اولارکن بونلاري سئزه ددئم.

14:26  لاکئن تسلّي وِرَن، همئن موقدّس روح کي، آتا منئم آديمدا گؤنده‌ره​جک، او، سئزه هر شيي اؤيرده​جک و سئزه دديئم هر شيي سئزه خاطيرلاداجاق.

14:27  سئزئن اوچون باريش قويورام. اؤز باريشيمي سئزه ورئرم. دونيا ورن کئمي يوخ، من سئزه ورئرم. اوره‌يئنئز اوزولمه‌سئن. قورخمايين.

14:28  اشئتدئنئز کي، سئزه دديم: «گدئرم آمّا گئنه يانينيزا گله​جه‌يم.» اگر مني سِوسَيدئنئز، آتامين يانينا گده​جه‌يئمدن سوئنردئنئز. چونکي آتا مندن بؤيوکدور.

14:29  و ائندي بونو، باش ورمه‌دن سئزه ديئرم کي، باش وردئيي زامان ائناناسينيز.

14:30  آرتيق سئزئنله چوخ دانيشماياجاغام، چونکي بو دونيانين حؤکمداري گلئر. اونون منئم اوستومده هچ بئر قودرتي يوخدور.

14:31  آمّا اونون اوچون کي، دونيا بئلسئن من آتاني سوئرم و آتانين منه امر اتدئکلرئني يرئنه يتئرئرم. دورون بورادان گدک.

Chapter 15

15:1  من حقئقي اوزوم آغاجي‌يام و آتام باغباندير.

15:2  منده اولوب ميوه ورمه‌ين هر بوداغي، او، کسئب آتير و ميوه ورن هر بوداغي تمئزله‌يئر کي، آرتيق ميوه ورسئن.

15:3  ائندي سئز، سئزه ددئيئم سؤزلر اوزوندن تمئزسئنئز.

15:4  منده قالين و من ده سئزده قالاجاغام. نجه کي، بوداق آغاجدا قالمايينجا اؤز-اؤزوندن ميوه وره بئلمز، سئز ده منده قالمايينجا بله‌سئنئز.

15:5  من اوزوم آغاجي‌يام و سئز بوداقلارسينيز. منده قالان و من اوندا قالان آدام چوخ ميوه گتئرر. چونکي منسئز هچ بئر شي اده​بئلمزسئنئز.

15:6  منده قالمايان آدام بوداق کئمي چؤله آتيليب قورويار. ائنسانلار اونلاري ييغيب اودا آتارلار و اونلار يانار.

15:7  اگر سئز منده قالاسينيز و منئم سؤزلرئم سئزده قالسا، نه آرزو ادئرسئنئز، ائسته‌يئن و سئزه ورئله​جک.

15:8  آتام سئزئن چوخ ميوه گتئرمه‌يئنئزله عئزّتله‌نئر و بلجه منئم شاگئردلرئم اولورسونوز.

15:9  نجه کي، آتا مني سِوئب، من ده سئزي اله سومئشم. منئم محبّتئمده قالين.

15:10  اگر منئم امرلرئمي يرئنه يتئره​سئنئز، منئم محبّتئمده قالارسينيز. نجه کي، من آتامين امرلرئني يرئنه يتئرمئشم و اونون محبّتئنده قاليرام.

15:11  بو شيلري اونون اوچون سئزه دمئشم کي، منئم شادليغيم سئزده قالسين و سئزئن شادليغينيز کامئل بئر شادليق اولسون.

15:12  منئم امرئم بودور؛ سئزي سِودئيئم کئمي، سئز ده بئربئرئنئزي سوئن.

15:13  هچ کسده بوندان بؤيوک بئر محبّت اولا بئلمز کي، جانيني دوستلاري يولوندا فدا اتسئن.

15:14  اگر سئزه امر اتدئکلرئمي يرئنه يتئره​سئنئز، منئم دوستلاريمسينيز.

15:15  آرتيق سئزي قول چاغيرميرام، چونکي قول آغاسينين نه اتدئيني بئلمز. سئزي دوست چاغيريرام، چونکي آتامدان اشئتدئيئم بوتون شيلري سئزه بئلدئردئم.

15:16  سئز مني سچمه‌دئنئز، من سئزي سچدئم و تعيئن اتدئم کي، گدئب ميوه گتئره​سئنئز و گتئردئيئنئز ميوه همئشه قالسين کي، منئم آديمدا آتادان ائسته‌دئيئنئزي آتا سئزه ورسئن.

15:17  بو امرلري اونون اوچون سئزه ورئرم کي، بئربئرئنئزي سوه​سئنئز.

15:18  اگر دونيا سئزدن نئفرت اتسه، بئلئن کي، سئزدن اوّل مندن نئفرت ادئب.

15:19  اگر دونيادان اولسايدينيز، دونيا اؤزونونکونو سوردي. آمّا سئز دونيادان ديئلسئنئز و من سئزي بو دونيادان سچمئشم. اونون اوچون ده دونيا سئزدن نئفرت ادئر.

15:20  سئزه ددئيئم سؤزو خاطيرلايين؛ «قول آغاسيندان بؤيوک ديئل.» اگر اونلار منه اذئيّت وردئلر، سئزه ده اذئيّت وره​جکلر. اگر منئم سؤزلرئمي يرئنه يتئردئلر، سئزئن ده سؤزلرئنئزي يرئنه يتئره​جکلر.

15:21  آمّا منئم آديم اوزوندن بوتون بو شيلري سئزه اده​جکلر، چونکي مني گؤنده‌ره‌ني تانيميرلار.

15:22  اگر گلئب اونلارلا دانيشماسايديم، گوناهلاري اولمازدي. آمّا ائندي گوناهلاري اوچون اونلارا هچ بئر عوذر قالماييب.

15:23  مندن نئفرت ادن، منئم آتامدان دا نئفرت ادئر.

15:24  اگر اونلارين آراسيندا آيري آداملارين الئندن گلمه‌ين عمللري اتمه‌سَيدئم، گوناهلاري اولمازدي. آمّا ائندي اونلار هم عمللرئمي گؤروبلر و هم مندن، هم ده آتامدان نئفرت ادئبلر.

15:25  آمّا بو اولدو کي، شرئعتده يازيلميش بو سؤز يرئنه يتئشسئن: «مندن سببسئز نئفرت اتدئلر.»

15:26  آتادان سئزه گؤنده‌ره​جه‌يئم تسلّي ورن گلدئکجه منئم حاقّيمدا شهادت وره​جک. همئن حقئقت روحو کي، آتادان چيخيب گلئر.

15:27  و سئز ده منئم حاقّيمدا شهادت وره​جکسئنئز، چونکي باشلانيشدان منئمله وارسينيز.

Chapter 16

16:1  بو سؤزلري اوندان اؤتري سئزه ددئم کي، ائمانينيز سوستلَشمه‌سئن.

16:2  سئزي کنئسه​لردن قوواجاقلار. بلي، اله واخت گلر کي، سئزي اؤلدورَن هر کس تارييا خئدمت اتدئيئني گومان اِدَر.

16:3  و بو ائشلري اِدَرلر، چونکي نه آتاني تاني‌ييرلار نه ده مني.

16:4  آمّا بو شيلري سئزه ددئم کي، همئن واخت گلنده، بونلاري سئزه ددئيئمي خاطيرلاياسينيز. بو شيلري باشلانيشدان سئزه دمه‌دئم، چونکي سئزئنله ائدئم.

16:5  آمّا ائندي مني گؤنده‌ره‌نئن يانينا گدئرم، و سئزدن هچ بئرئنئز مندن سوروشمور؛ «سن هارايا گدئرسن؟»

16:6  لاکئن بو شيلري سئزه ددئيئم اوچون اوره‌يئنئز قمله دولوب.

16:7  آمّا حقئقتي سئزه ديئرم؛ منئم گتمه‌يئم سئزئن اوچون خيئرلي​دئر. چونکي گتمه‌سم، تسلّي ورن سئزئن يانينيزا گلمز. آمّا اگر گِتسَم، اونو سئزئن يانينيزا گؤنده‌ره​رَم.

16:8  او، گلدئيي زامان، دونيانين آداملارينا گوناهين نه اولدوغونو، صالحلئيئن نه اولدوغونو، و تارينين موحاکئمه​سئنئن نه اولدوغونو بئلدئره‌جک.

16:9  اونلارين گوناهيني گؤرسده​جک کي، منه ائمان گتئرمئرلر.

16:10  حقئقي صالحلئيي اونلارا آشکار اده​جک، چونکي آتانين يانينا ​گدئرم و آرتيق مني گؤرمه‌يه​جکسئنئز.

16:11  و تارينين موحاکئمه​سئنئن نه اولدوغونو دا اونلارا گؤرسده​جک، چونکي بو دونيايا حؤکمدارليق ادن روح محکوم اولونوب.

16:12  سئزه دمه‌لي چوخ سؤزلرئم وار، آمّا ائندي اونلاري درک اده​بئلمزسئنئز.

16:13  لاکئن او، يعني حقئقت روحو گلنده، سئزي بوتون حقئقته هئدايت اده​جک. چونکي اؤزوندن هچ بئر شي دمه‌يه​جک. نه اشئدئر، اونلاري دئيه​جک و گله​جکده اولاجاقلاري سئزه خبر وره​جک.

16:14  او منه عئزّت وره​جک، چونکي منئم اولانلاردان آليب سئزه بئلدئره​جک.

16:15  آتانين هر شيي وار، منئمدئر. اونون اوچون ده ددئم کي، منئم اولانلاردان آليب سئزه بئلدئره​جک.

16:16  آز بئر زاماندان سونرا مني آرتيق گؤرمه‌يه​جکسئنئز و آز بئر زاماندان سونرا مني گئنه گؤره​جکسئنئز."

16:17  شاگئردلردن بعضئلري بئربئرلرئنه ددئلر: "«آز بئر زاماندان سونرا مني آرتيق گؤرمه‌يه​جکسئنئز و آز بئر زاماندان سونرا مني گئنه گؤره​جکسئنئز» و «چونکي آتانين يانينا گدئرم» سؤزدن نه نئيّتي وار؟"

16:18  اونا گؤره ده ديئردئلر: "«آز بئر زامان» دمکدن مقصدي نه‌دئر؟ اونون ددئيئني آنلاميريق."

16:19  عئسا اونلارين سوروشماق ائسته‌دئکلرئني آنلاييب اونلارا ددي: "«آز بئر زاماندان سونرا مني آرتيق گؤرمه‌يه​جکسئنئز» و «آز بئر زاماندان سونرا مني گئنه گؤره​جکسئنئز» ددئيئم اوچون بئربئرلرئنئزدن سوروشورسونوز؟

16:20  دوغروسونو سئزه ديئرم؛ سئز آغلاييب اَلَم چکه​جکسئنئز و دونيا شادليق اده​جک. سئز ماتم توتاجاقسينيز، آمّا سئزئن ماتمئنئز شادليغا دؤنه​جکدئر.

16:21  آرواد، اوشاغينين دوغوم واختي يتئشن زامان، آغري چکر، آمّا اوشاغيني دوغاندان سونرا، بئر ائنسان بو دونيايا گتئرمه‌سئنه گؤره، شادليغيندان آغري ياديندان چيخار.

16:22  ائندي سئز ده دوغرودان قوصّه​له‌نئرسئنئز، آمّا سئزي گئنه گؤره​جه‌يم و اوره‌يئنئز سوئنه​جک و هچ کئم سئزئن شادليغينيزي سئزدن آلماياجاق.

16:23  و او گون مندن هچ بئر شي سوروشماياجاقسينيز. دوغروسونو سئزه ديئرم؛ آتادان هر نه ائستيه​سئنئز، منئم آديمدا سئزه وره​جک.

16:24  ائندئيه کئمي منئم آديمدا هچ بئر شي ائستَمه‌يئبسئنئز. ائسته‌يئن و آلاجاقسينيز کي، شادليغينيز کامئل اولسون.

16:25  بو شيلري مثللر​له سئزه دمئشم. او ساعات گلئر کي، آرتيق سئزه مثللر​له دانيشماياجاغام. آتا حاقّيندا سئزئنله آچيقجا دانيشاجاغام.

16:26  او گون منئم آديمدا ائسته‌يه​جکسئنئز و دمئرم کي، سئزدن اؤتري آتادان خاهئش اده​جه‌يم.

16:27  چونکي آتا اؤزو سئزي سوئر، اونا گؤره کي، مني سوئبسئنئز و اونون يانيندان گلدئيئمه ائنانيبسينيز.

16:28  من آتانين يانيندان چيخيب بو دونيايا گلمئشم. دونياني ترک ادئب گئنه آتانين يانينا گدئرم."

16:29  شاگئردلري ددئلر: "آها! ائندي آچيقجا دانيشيرسان و هچ بئر مثلدن ائستئفاده اتمئرسن.

16:30  ائندي سنئن هر شيي بئلدئيئني آنلاييريق و احتئياجين يوخدور کي، کئمسه سندن سوآل سوروشسون. بوندان ائنانيريق کي، تارينين يانيندان چيخيب گلئبسن."

16:31  عئسا اونلارا ددي: "ائندي ائنانيرسينيز؟!

16:32  او ساعات گلئر و گلئبدئر ده کي، هر بئرئنئز اؤز طرفئنئزه داغيلاجاقسينيز و مني تک‌-‌​تنها بوراخاجاقسينيز. آمّا من تک ديئلم، چونکي آتا دا منئمله‌دئر.

16:33  بو شيلري سئزه ددئم کي، منده باريشينيز اولسون. بو دونيادا زحمت آلتينداسينيز، لاکئن جسور اولون! من دونيايا قالئب گلمئشم."

Chapter 17

17:1  عئسا بو سؤزلري دئيندن سونرا گؤزلرئني گؤيه قالديريب ددي: "آتا، ساعات يتئشئب. اوغلونا عئزّت ور کي، اوغول دا سنه عئزّت ورسئن.

17:2  نجه کي، بوتون ائنسانلار اوستونه سن اونا حاکئمئيّت وردئن کي، اونا وردئيئن ائنسانلارين هاميسينا ابدي حيات ورسئن.

17:3  و ابدي حيات بودور کي، اونلار سني، تک حقئقي تاري و گؤنده‌ردئيئن عئسا مسئحي تانيسينلار.

17:4  من سني ير اوزونده عئزّتلندئردئم؛ يرئنه يتئرمک اوچون منه تاپشيرديغين ائشي تاماملاماقلا.

17:5  و ائندي سن اي آتا، اؤز يانيندا مني عئزّتلندئر. او عئزّتله کي، دونيا يارانماميشدان سنئن يانيندا واريم ائدي.

17:6  من سنئن آديني بو دونيادان منه وردئيئن ائنسانلارا تانيتديرميشام. اونلار سنئن ائدئلر و سن اونلاري منه وردئن. و سنئن ددئکلرئندن ائطاعت ادئبلر.

17:7  ائندي اونلار بئلئبلر کي، منه وردئکلرئنئن هاميسي سندندئر.

17:8  چونکي منه وردئيئن سؤزلري اونلارا وردئم و اونلار قبول اتدئلر. سنئن يانيندان گلدئيئمي حقئقتن آنلاديلار و ائنانديلار کي، مني سن گؤنده‌رئبسن.

17:9  من اونلار اوچون يالواريرام. دونيا اوچون يوخ، منه وردئکلرئن اوچون يالواريرام. چونکي اونلار سنئندئرلر.

17:10  ​منئم اولان هر شي سنئندئر و سنئن اولانلار دا منئمدئر. و من اونلاردا عئزّتلنمئشم.

17:11  آرتيق من اوزون بئر مودّت اوچون بو دونيادا ديئلم، آمّا اونلار بو دونياداديرلار. و من سنئن يانينا گلئرم. اي موقدّس آتا، منه وردئيئن آدينلا اونلاري حئفظ ات کي، اونلار دا بئزئم کئمي بئر اولسونلار.

17:12  ​​​اونلارين يانيندا اولان زامان، منه وردئيئن آدينلا اونلاري حئفظ اتدئم و هلاکت اوغلوندان باشقا، اونلاردان هچ بئري هلاک اولمادي کي، موقدّس کئتابين ددئيي سؤز يرئنه يتئشسئن.

17:13  آمّا ائندي سنه گلئرم و بو سؤزلري بو دونيادا ائکن ديئرم کي، منئم شادليغيم اونلاردا کامئل اولسون.

17:14  سنئن سؤزونو اونلارا وردئم و دونيا اونلاردان نئفرت اتدي. چونکي اونلار بو دونيادان ديئللر، نجه کي، من بو دونيادان ديئلم.

17:15  يالوارميرام کي، اونلاري بو دونيادان گؤتوره​سن. يالواريرام کي، اونلاري شردن قوروياسان.

17:16  نجه کي، من بو دونيادان ديئلم، اونلار دا بو دونيادان ديئللر.

17:17  اونلاري حقئقتله موقدّس ات. حقئقت سنئن سؤزوندور.

17:18  نجه کي، سن مني بو دونيايا گؤنده‌ردئن، من ده اونلاري بو دونيايا گؤنده‌رئرم.

17:19  اونلار اوچون من اؤزومو وقف ادئرم کي، اونلار دا حقئقتن وقف اولونسونلار.

17:20  فقط اونلار اوچون يالوارميرام. اونلارين سؤزو ائله منه ائمان گتئره​جک آداملار اوچون ده يالواريرام کي،

17:21  هاميسي بئر اولسونلار. نجه کي، سن اي آتا منده​سن و من سنده​يم، اونلار دا بئزده اولسونلار کي، دونيا سنئن مني گؤنده‌ردئيئنه ائنانسين.

17:22  منه وردئيئن عئزّتي من اونلارا ورمئشم کي، بئز بئر اولدوغوموز کئمي، اونلار دا بئر اولسونلار.

17:23  من اونلاردايام و سن منده​سن کي، اونلار بئرلئکده کامئل اولسونلار و دونيا سنئن مني گؤنده‌ردئينه و اونلاري سودئيئنه ائنانسين، نجه کي، مني سودئن.

17:24  اي آتا، ائسته‌يئرم کي، منه وردئکلرئن ده من اولان يرده منئمله اولسونلار و سنئن منه وردئيئن عئزّتي گؤرسونلر. چونکي دونيانين يارانماسيندان مني سودئن.

17:25  اي عادئل آتا، دونيا سني دوغرودان تانيمادي، آمّا من سني تانيديم و بونلار دا آنلاديلار کي، سن مني گؤنده‌رئبسن.

17:26  سنئن آديني اونلارا بئلدئردئم و بئلدئره​جه‌يم. اله کي، مني سودئيئن او محبّت اونلاردا اولسون و من ده اونلاردا اولوم."

Chapter 18

18:1  بو دوعاني ادندن سونرا عئسا شاگئردلري ائله چيخيب قِدرون دره​سئنئن او بئري تايينا کچدي. اورادا بئر باغ وار ائدي. عئسا و شاگئردلري بو باغا گئردئلر.

18:2  عئسايا خيانت ادن يهودا دا بو يري تاني‌ييردي. چونکي عئسا تز-تز شاگئردلري ائله اورادا ييغيشيرديلار.

18:3  يهودا بئر دسته عسگر گؤتوروب، باش کاهئنلر و فرئسئلردن آلميش موحافئظلرله اورايا گلدي. اؤزلري ائله فنرلر، مشعللر و سئلاحلار گتئرمئشدئلر.

18:4  عئسا باشينا گله​جک هر شيي بئله‌رک قاباغا گلئب اونلارا ددي: "کئمي آختاريرسينيز؟"

18:5  اونلار جاواب وردئلر: "ناصئره​لي عئساني." عئسا اونلارا ددي: "منم." اونا خيانت ادن يهودا دا اونلارلا دورموشدو.

18:6  عئسا "منم" ددئيي واخت، اونلار گري چکئلئب يره ييخيلديلار.

18:7  عئسا گئنه ده اونلاردان سوروشدو: "کئمي آختاريرسينيز؟" اونلار جاواب وردئلر: "ناصئره​لي عئساني."

18:8  عئسا ددي: "سئزه ددئم کي، منم. اگر مني آختاريرسينيز، قويون بونلار گتسئنلر."

18:9  بله اولدو کي، قاباقجا ددئيي بو سؤز يرئنه يتئشسئن کي، "سنئن منه وردئکلرئنئن هچ بئرئسئني ائتئرمه​مئشم."

18:10  شمعون پطروس يانيندا داشيديغي قيلينجي چکدي و باش کاهئنئن قولونو ووروب اونون صاغ قولاغيني کسدي. او قولون آدي مالخوس ائدي.

18:11  او واخت عئسا پطروسا ددي: "قيلينجيني قينينا قوي. آتانين منه وردئيي پئياله​ني آيا ائچمه‌يئم؟"

18:12  بلجه عسگر دسته​سي، مئن باشي و يهودئلرئن موحافئظلري عئساني توتوب باغلاديلار

18:13  و اونو اوّل حنّانين يانينا آپارديلار. چونکي حنّا، او ائل باش کاهئن اولان قيافانين قايين‌‌آتاسي ائدي.

18:14  قيافا او آدام ائدي کي، خالقين يولوندا بئر تک آدامين اؤلمه‌سئني آرتيق مصلحت بئلئب يهودئلره تؤوصئيه اتمئشدي.

18:15  شمعون پطروس و آيري بئر شاگئرد عئسانين دالينجا گتدئلر. باش کاهئنله تانيش اولان بو شاگئرد عئسا ائله برابر باش کاهئنئن حيطئنه گئردي.

18:16  آمّا پطروس اشئگده، قاپينين يانيندا دورموشدو. اونون اوچون ده باش کاهئنله تانيش اولان او بئري شاگئرد قاپيچي قيزلا دانيشيب، پطروسو ائچه‌ري گتئردي.

18:17  بو آرادا قاپيچي قيز پطروسا ددي: "سن کي، بو آدامين شاگئردلرئندن ديئلسن، اله ديئل؟" پطروس ددي: "ديئلم."

18:18  هاوانين سويوق اولدوغو اوچون نؤکرلر و موحافئظلر کؤمور يانديرميشديلار و اونون اطرافيندا دوروب قيزيشيرديلار. پطروس دا اونلارين يانيندا دوروب اؤزونو قيزديريردي.

18:19  او زامان باش کاهئن عئساني شاگئردلري و تعلئملري حاقّيندا سورغويا چکدي.

18:20  عئسا اونا جاواب وردي: "من ددئکلرئمي عالمه آچيقجا دمئشم. همئشه يهودئلر ييغيلديغي کنئسه​ده و معبدده تعلئم ورمئشم. من گئزلئجه هچ بئر شي دمه​مئشم.

18:21  نئيه مندن سوروشورسان؟ اونلارا نه ددئکلرئمي، اشئدنلردن سوروش. اونلار منئم نه ددئکلرئمي بئلئرلر."

18:22  عئسانين آغزيندان بو سؤزلر چيخان واخت، يانيندا دوران موحافئظلردن بئري عئسايا شئلّه ووروب ددي: "باش کاهئنه بله جاواب ورئرسن؟!"

18:23  عئسا اونا ددي: "اگر سهو بئر سؤز دانيشديم، سهو اتدئيئمي گؤرسد. آمّا اگر ددئکلرئم دوغرودور، نه اوچون مني وورورسان؟"

18:24  او زامان حنّا عئساني قوللاري باغلي باش کاهئن قيافانين يانينا گؤنده‌ردي.

18:25  شمعون پطروس اورادا دوروب اؤزونو قيزديريردي. اونلار پطروسا ددئلر: "مگر سن ده اونون شاگئردلرئندن ديئلسن؟" پطروس ائنکار ادئب ددي: "ديئلم."

18:26  باش کاهئنئن قوللاريندان بئري کي، پطروسون طرفئندن وورولوب قولاغي کسئلن قوللا قوحوم ائدي، ددي: "مگر من سني اونونلا باغدا گؤرمه‌دئم؟!"

18:27  پطروس گئنه ده ائنکار اتدي و او آندا خوروز بانلادي.

18:28  سحر ارکن ائدي. يهودئلر عئساني قيافانين يانيندان روم والئسئنئن سارايينا آپارديلار. آمّا اؤزلري سارايا گئرمه‌دئلر کي، مبادا شرئعته اساسن ناپاک ساييليب پاسخا يمه‌يئني يئيه بئلمه‌سئنلر.

18:29  اونا گؤره ده پئلاط سارايدان اونلارين يانينا چيخيب ددي: "بو آدامدان نه شئکايتئنئز وار؟"

18:30  يهودئلر جاواب ورئب اونا ددئلر: "اگر بو آدام تقصئرلي اولماسايدي، اونو گتئرئب سنه تسلئم اتمزدئک."

18:31  پئلاط اونلارا ددي: "اونو سئز گؤتورون و قانونلارينيزا گؤره اؤزونوز اونون حاقّيندا حؤکم ادئن." يهودئلر اونا ددئلر: "بئزئم هچ کئمي اؤلومه محکوم اتمه‌يه ائختئياريميز يوخدور."

18:32  بونلار اونا گؤره اولدو کي، عئسانين نه‌جور اؤلومله اؤله​جه‌يي حاقّيندا ددئيي سؤز يرئنه يتئشسئن.

18:33  او زامان پئلاط گئنه سارايا قاييديب، عئساني چاغيردي و اونا ددي: "آيا سن يهودئلرئن پادشاهي‌سان؟"

18:34  عئسا جاواب وردي: "سن بونو اؤزوندن ديئرسن، يوخسا اؤزگه آداملار سنه مندن صؤحبت ادئبلر؟"

18:35  پئلاط جاواب وردي: "مگر من يهودئيم؟ سني اؤز مئلّتئن و باش کاهئنلر منه تسلئم ادئبلر. نه ادئبسن؟"

18:36  عئسا جاواب وردي: "منئم پادشاهليغيم بو دونيادان ديئل. اگر پادشاهليغيم بو دونيادان اولسايدي، نؤکرلرئم چاليشارديلار کي، من يهودئلرئن الئنه ورئلمه‌يئم. آمّا ائندي منئم پادشاهليغيم بورادان ديئلدئر."

18:37  او زامان پئلاط اونا ددي: "دمک دوغرودان دا بئر پادشاهسان؟" عئسا جاواب وردي: "سن ديئرسن کي، من بئر پادشاهام. من بونون اوچون آنادان اولموشام و بونون اوچون بو دونيايا گلمئشم کي، حقئقت حاقّيندا شهادت ورئم. حقئقتئن طرفداري اولان هر کس منئم سسئمي اشئدئر."

18:38  پئلاط اونا ددي: "حقئقت نه‌دئر؟" و بونو دئينده گئنه اشئيه، يهودئلرئن يانينا چيخيب اونلارا ددي: "من اوندا هچ بئر تقصئر گؤرمورم.

18:39  آمّا سئزئن بئر عادتئنئز وار کي، پاسخا بايراميندا سئزئن اوچون زئنداندان بئرئني آزاد ادئم. ائندي آيا ائسته‌يئرسئنئز کي، يهودئلرئن پادشاهيني سئزئن اوچون آزاد ادئم؟"

18:40  يهودئلر تکرار قيشقيريب ددئلر: "بو آدامي يوخ، باراباسي!" و بو باراباس اوغرو ائدي.

Chapter 19

19:1  او زامان پئلاط عئساني توتوب اونا شالّاق ووردوردو.

19:2  عسگرلر ده تئکانلاردان بئر تاج هؤروب اونون باشينا قويدولار و اونا قيرميزي رنگئنده بئر شئنل گيدئردئلر.

19:3  و اونون يانينا گلئب ددئلر: "سالام، اي يهودئلرئن پادشاهي." و اونا شئلّه ووروردولار.

19:4  پئلاط گئنه اشئيه گدئب يهودئلره ددي: "باخين، اونو سئزئن يانينيزا گتئرئرم کي، اوندا هچ بئر گوناه تاپماديغيمي بئله​سئنئز."

19:5  او واخت عئسا، باشيندا تئکاندان تاج و اَينئنده قيرميزي بئر شئنل، اشئيه چيخدي. پئلاط يهودئلره ددي: "باخين، او آدام!"

19:6  باش کاهئنلر و موحافئظلر عئساني گؤرن زامان چيغيريب ددئلر: "چارميخا چک! چارميخا چک!" پئلاط اونلارا ددي: "گؤتورون سئز اؤزونوز چارميخا چکئن. من اوندا هچ بئر گوناه گؤرمورَم."

19:7  يهودئلر جاواب وردئلر: "بئزئم بئر قانونوموز وار و او قانونا گؤره بو آدام اؤلملي‌دئر. چونکي اؤزونو تارينين اوغلو ادئب."

19:8  پئلاط بو سؤزو اشئدن واخت داها چوخ قورخدو

19:9  و تکرار سارايا قاييديب عئسايا ددي: "سن هارادانسان؟" آمّا عئسا اونا جاواب ورمه‌دي.

19:10  او واخت پئلاط اونا ددي: "منه جاواب ورمئرسن؟ بئلمئرسن کي، سني هم چارميخا چکمه‌يه قودرتئم وار، هم ده آزاد اتمه‌يه؟"

19:11  عئسا جاواب وردي: "اگر بو قودرت سنه يوخاريدان ورئلمه‌سَيدي، منئم اوستومده هچ بئر قودرتئن اولمازدي. اونا گؤره ده، او آدامين گوناهي کي، مني سنئن الئنه ورئب، داها بؤيوکدور."

19:12  بو زاماندان پئلاط عئساني آزاد اتمه‌يه چاليشدي، آمّا يهودئلر قيشقيريب ديئردئلر: "اگر بو آدامي بوراخاسان، آرتيق قيصرئن دوستو ديئلسن. اؤزونو پادشاه ادن بئر آدام قيصرئن ضئدّئنه قالخيب."

19:13  پئلاط بو سؤزلري اشئدنده عئساني اشئيه گتئردي و "داش دؤشه‌مه" ديئلن يرده حؤکم کورسوسونده اوتوردو. بو يره عئبراني دئلئنده "جابّاتا" ديئلئر.

19:14  او گون پاسخا بايرامينين حاضيرليق گونو ائدي. تقرئبن گونون آلتينجي ساعاتي ائدي. پئلاط يهودئلره ددي: "بودور، سئزئن پادشاهينيز!"

19:15  يهودئلر چيغيرديلار: "محو اولسون، محو اولسون. چارميخا چک!" پئلاط اونلارا ددي: "پادشاهينيزي چارميخا چکئم؟" باش کاهئنلر جاواب وردئلر: "قيصردن باشقا هچ پادشاهيميز يوخدور."

19:16  او زامان پئلاط عئساني چارميخا چکئلمک اوچون اونلارا تحوئل وردي. اونلار عئساني آليب گؤتوردولر.

19:17  عئسا چارميخيني داشيياراق کلّه ديئلن بئر يره گتئرئلدي. بو يره عئبراني دئلئنده جولجوتا ديئردئلر.

19:18  اونلار بو يرده عئسا و اونونلا برابر ائکي نفري ده چارميخا چکدئلر. بئرئني اونون بئر طرفئنده و او بئرئسئني اونون او بئري طرفئنده و عئسا اورتادا قالدي.

19:19  پئلاط بئر تخته يازيب اونو چارميخين باشينا ووردو. بو تخته​ده بله يازيلميشدي؛ "ناصئره​لي عئسا، يهودئلرئن پادشاهي"

19:20  يهودئلردن چوخلاري بو يازيني اوخودولار. چونکي عئسانين چارميخا چکئلدئيي ير شهرئن ياخينليغيندا ائدي و بو يازي عئبراني، يوناني، و لاتين دئلئنده يازيلميشدي.

19:21  او واخت يهودئلرئن باش کاهئنلري پئلاطا ددئلر: "يازما؛ يهودئلرئن پادشاهي، ياز؛ بو آدام «يهودئلرئن پادشاهي‌يام» ديئردي."

19:22  پئلاط جاواب وردي: "يازديغيمي يازميشام."

19:23  عسگرلر عئساني چارميخا چکندن سونرا اونون پالتارلاريني دؤرد يره بؤلدولر و هر بئرئسي بئر پاي گؤتوردو. اونون کؤينه‌يئني ده گؤتوردولر، آمّا کؤينک تئکئشسئز و باشدان باشا بئر توخوما ائدي.

19:24  اونا گؤره ده بئربئرلرئنه ددئلر: "بونو ييرتماياق. گلئن اونون کئمئن اولماسينا پوشک آتاق." و بونلار اونا گؤره اولدو کي، موقدّس کئتابين ددئيي سؤز يرئنه يتئشسئن؛ "اونلار پالتارلاريمي اؤز آرالاريندا بؤلدولر و کؤينه‌يئم اوچون پوشک آتديلار." عسگرلر بله اتدئلر.

19:25  عئسانين چارميخي يانيندا اونون آناسي، خالاسي، کلوپاسين آروادي مريم و مجدللي مريم دورموشدولار.

19:26  عئسا آناسي و اونون يانيندا سودئيي شاگئردئن دوردوغونو گؤرنده آناسينا ددي: "آنا، بودور، سنئن اوغلون!"

19:27  سونرا دا او شاگئرده ددي: "بودور، سنئن آنان." و او زاماندان او شاگئرد عئسانين آناسيني اؤز اوئنه آپاردي.

19:28  بوندان سونرا، عئسا بوتون ائشلرئن تامام اولدوغونو بئلدي و موقدّس کئتابدا ديئلن سؤزون يرئنه يتئشمه‌سي اوچون "سوسوزام" ددي.

19:29  اورادا سئرکه دولو بئر قاب قويولموشدو. سئرکه​دن بئر سونگر دولدوروب اونو بئر زوفا بوداغينا تاخيب عئسانين آغزينا اوزاتديلار.

19:30  عئسا سئرکه​ني داددي و سونرا ددي: "هر شي يرئنه يتئشدي." و باشيني اَيئب جان وردي.

19:31  او گون بايرامين حاضيرليق گونو ائدي و يهودئلر سبّت گونونده جسدلرئن چارميخدا قالماسيني ائسته‌مئردئلر، چونکي او سبّت بؤيوک بئر گون ائدي. اونا گؤره ده پئلاطدان ائسته‌دئلر کي، اونلارين قيچلاري سينديريلسين و چارميخدان گؤتورولسون.

19:32  بو سببدن عسگرلر گلئب بئرئنجي آدامين، سونرا دا عئسانين او بئري يانيندا چارميخا چکئلمئش آدامين قيچلاريني سينديرديلار.

19:33  آمّا عئسانين يانينا گلنده اونون اؤلموش اولدوغونو گؤروب قيچلاريني سينديرماديلار.

19:34  لاکئن، عسگرلردن بئري اونون بؤيرونه نئزه ووردو و او آندا اورادان قان و سو آخدي.

19:35  بونو گؤرن شهادت ورئب و اونون شهادتي دوغرودور. او، حقئقتي ددئيئني بئلئر و شهادت ورئر کي، سئز ده ائمان گتئره​سئنئز.

19:36  بو شيلرئن هاميسي باش وردي کي، موقدّس کئتابين يازديغي بو سؤز يرئنه يتئشسئن: "اونون سوموکلرئندن هچ بئري سينماياجاق."

19:37  و گئنه باشقا بئر يازي ديئر: "نئزه ووردوقلاري آداما باخاجاقلار."

19:38  بو حادئثه​لردن سونرا، آراماتايلي يوسئف پئلاطدان ائجازه ائسته‌دي کي، عئسانين بدنئني گؤتورسون. او، عئسانين شاگئردي ائدي، لاکئن يهودئلرئن قورخوسوندان اؤزونو گئزله​دئردي. پئلاط بو ائشه ائجازه وردي و او دا گلئب عئسانين بدنئني گؤتوردو.

19:39  نئقودئموس دا کي، اوّلجه گجه قارانليغيندا عئسانين يانينا گلمئشدي، يوز لئتراس قاريشميش مور و عؤد آغاجي ائله گلدي.

19:40  او زامان عئسانين بدنئني گؤتوروب عطئرلر​له کفنه بوکدولر. نجه کي، يهودئلرئن دفن عادتي ائدي.

19:41  ​​​عئسانين چارميخا چکئلدئيي يرده بئر باغ وار ائدي و بو باغدا تزه بئر مقبره قازيلميشدي کي، اونون ائچئنه بو زامانا قدر کئمسه​ني قويماميشديلار.

19:42  يهودئلرئن بايرامينين حاضيرليق گونو اولدوغونا گؤره، عئسانين بدنئني اورايا قويدولار. چونکي بو مقبره ياخين ائدي.

Chapter 20

20:1  هفته​نئن ائلک گونو، مجدللي مريم سحر ارکن قبئرئن يانينا گلدي. هاوا حله قارانليق ائدي. آمّا قبئرئن آغزيني اؤرتن ديئرمان داشيني بئر يانا دئيئرلَنمئش گؤردو.

20:2  ​​​او واخت قاچيب شمعون پطروس و عئسانين چوخ سودئيي او بئري شاگئردئن يانينا گلدي. و اونلارا ددي: "ربّي قبئردن گؤتوروبلر و بئلمئرئک کي، هارايا آپاريب قويوبلار."

20:3  پطروس و او بئري شاگئرد اودن چيخيب قبئر سمتئنه يولا دوشدولر.

20:4  يولدا برابر قاچيرديلار، لاکئن او بئري شاگئرد پطروسو اؤتوب، اوندان اوّل قبئره يتئشدي.

20:5  باشيني اَيئب قبئرئن ائچئنه باخدي. کتان پارچا اورادا يرده ائدي. آمّا گئنه ده قبئرئن ائچئنه گئرمه‌دي.

20:6  او واخت شمعون پطروس اونون آرخاسيندان اورايا يتئشدي و قبئرئن ائچئنه گئرئب عئسانين کفنئني اورادا يرده گؤردو.

20:7  عئسانين باشيني بورودوکلري دسمال، کفنله ديئلدي و آيري بئر يرده بوکولموش حالدا قويولموشدو.

20:8  بو زامان اوّلجه قبئرئن يانينا يتئشن او بئري شاگئرد ده قبئرئن ائچئنه گئردي. او گؤردو و ائناندي.

20:9  آمّا گئنه ده موقدّس کئتابين يازديغيني بئلمئردئلر کي، عئسا گرک اؤلولردن دئرئلسئن.

20:10  بوندان سونرا شاگئردلر اِوه قاييتديلار،

20:11  آمّا مريم قبئرئن يانيندا دورموشدو و آغلاييردي. آغلايا-آغلايا باشيني ايئب قبئرئن ائچئنه باخدي.

20:12  آغ گيئنمئش ائکي ملک گؤردو. عئسانين بدنئنئن قويولدوغو يرده ملکلردن بئري اونون باشي اولان يرده اوتورموشدو، او بئرئسي ده اونون آياقلاري اولان يرده.

20:13  او واخت ملکلر مريمه ددئلر: "آرواد نه اوچون آغلاييرسان؟" مريم ددي: "ربّئمي گؤتوروب آپاريبلار و هارايا قويدوقلاريني بئلمئرم."

20:14  بونو دئيندن سونرا آرخايا دؤندو و عئسانين اورادا دوردوغونو گؤردو. لاکئن اونون عئسا اولدوغونو بئلمه‌دي.

20:15  عئسا اونا ددي: "آرواد نه اوچون آغلاييرسان؟ کئمي آختاريرسان؟" مريم اونو باغبان گومان ادئب اونا ددي: "آغا، اگر سن اونو گؤتوروب آپاريبسان، هارايا قويدوغون يري منه ده. قوي گدئم اونو گؤتوروم."

20:16  عئسا اونا ددي: "مريم!" مريم دؤنوب عئبراني دئلئنده اونا ددي: "ربّوني" (يعني اوستاد)!

20:17  عئسا اونا ددي: "منه توخونما، چونکي حله آتانين يانينا قالخماميشام. آمّا قارداشلاريمين يانينا گت و اونلارا ده کي، آتامين يانينا و اونلارين آتاسينين يانينا قالخيرام، تاريمين يانينا و اونلارين تاريسينين يانينا."

20:18  مجدللي مريم گدئب شاگئردلره خبر وردي کي، ربّي گؤروب و رب اونا بونو ديئبدئر.

20:19  او گون، هفته​نئن ائلک گونو، آخشام اولاندا، شاگئردلر يهودئلرئن قورخوسوندان قاپيلاري باغلاييب ائچه‌رئده بئر يره ييغيلميشديلار کي، عئسا گلئب اونلارين اورتاسيندا دوردو و اونلارا ددي: "سئزه سالام!"

20:20  بونو دئيندن سونرا اللرئني و بؤيرونو اونلارا گؤرستدي. شاگئردلر ربّي گؤردوکلرئندن چوخ سوئندئلر.

20:21  عئسا اونلارا گئنه ددي: "سئزه سالام. نجه کي، آتا مني گؤنده‌ردي، من ده سئزي گؤنده‌رئرم."

20:22  و بونو دئيندن سونرا نَفَسئني اونلارا اوفوروب ددي: "موقدّس روحو آلين.

20:23  کئمئن گوناهلاريني باغيشلاياسينيز، باغيشلاناجاق. کئمئن ده گوناهلاريني باغيشلاماياسينيز، باغيشلانماياجاق."

20:24  اکئز ديئلن توماس کي، اون‌ائکي شاگئرددن بئري ائدي، عئسا اونلارا گؤرونن واخت، اونلارلا بئر يرده ديئلدي.

20:25  اونون اوچون ده گلدئيي واخت، او بئري شاگئردلر اونا خبر وردئلر: "ربّي گؤردوک!" آمّا توماس اونلارا ددي: "ميخلارين ياراسيني اونون اللرئنده گؤرمه‌يئنجه، بارماغيمي همن يارايا سوخمايينجا، الئمي اونون يارالي بؤيرونه قويمايينجا ائنانمارام!"

20:26  سکّئز گون سونرا شاگئردلر گئنه اوده بئر يره ييغيشميشديلار و بو زامان توماس دا اونلارلا اورادا ائدي. قاپيلار باغلي ائکن عئسا گلئب، اونلارين اورتاسيندا دوردو و اونلارا ددي: "سئزه سالام!"

20:27  سونرا توماسا ددي: "گل، بارماغيني اوزات، اللرئمه باخ! گل، الئني بؤيرومه قوي. ائمانسيز اولما، ائنان!"

20:28  توماس جاواب ورئب اونا ددي: "ربّئم! تاريم!"

20:29  عئسا اونا ددي: "مني گؤردويون اوچون ائناندين؟ بختور او آداملار کي، مني گؤرمه​مئش ائنانيب ائمان گتئرئرلر."

20:30  عئسا شاگئردلرئنئن گؤزلري قاباغيندا اؤزگه چوخ علامتلر گؤرستدي کي، بو کئتابدا يازيلماييب.

20:31  لاکئن بو قدر يازيليب کي، عئسانين موعود اولان مسئح اولدوغونا و تارينين اوغلو اولدوغونا ائناناسينيز و ائمان گتئرمکله اونون آديندا حياتينيز اولسون!

Chapter 21

21:1  بو حادئثه​لردن سونرا طئبريا گؤلونون قيراغيندا عئسا گئنه اؤزونو شاگئردلره گؤرستدي و بو ائش بله اولدو:

21:2  شمعون پطروس، اکئز ديئلن توماس، جلئلئن قانا کندئندن اولان نته‌ناعئل، زِبِدِيئن اوغوللاري، و عئسانين شاگئردلرئندن آيري ائکي نفر بئر يرده ائدئلر.

21:3  شمعون پطروس اونلارا ددي: "باليق توتماغا گدئرم." اونلار اونا ددئلر: "بئز ده سنئنله گلئرئک." اشئيه چيخيب قاييغا مئندئلر. آمّا او گجه هچ بئر شي توتا بئلمه‌دئلر.

21:4  سحر آچيلارکن عئسا ساحئلده دورموشدو، لاکئن شاگئردلر اونون عئسا اولدوغونو بئلمه‌دئلر.

21:5  عئسا اونلارا ددي: "اوشاقلار، يمک اوچون بئر شيئنئز وار؟" اونلار اونا جاواب وردئلر: "خير."

21:6  عئسا اونلارا ددي: "تورو قاييغين صاغ طرفئنه آتين کي، توتارسينيز." تورو آتديلار و باليقلارين چوخلوغوندان اونو چکه بئلمئردئلر.

21:7  او واخت عئسانين سودئيي شاگئرد پطروسا ددي: "ربدئر!" شمعون پطروس اونون رب اولدوغونو اشئدن واخت، اينئندن چيخارتديغي پالتارينا سارينيب، اؤزونو گؤله آتدي.

21:8  آمّا او بئري شاگئردلر باليق تورونو چکه‌رک قاييقلا گلدئلر، چونکي ساحئلدن اوزاق ديئلدئلر، آنجاق دوخسان متر اولاردي.

21:9  قورولوغا چيخديقلاري زامان اودون کؤمورون يانديغيني گؤردولر. اودون اوستونده باليق، يانيندا دا چؤرک وار ائدي.

21:10  عئسا اونلارا ددي: "ائندي توتدوغونوز باليقلاردان گتئرئن."

21:11  شمعون پطروس گدئب، تورو قورولوغا چکدي. تور يوز الّي اوچ ائري باليقلا دولموشدو و بو قدر چوخ اولدوغو حالدا تور ييرتيلماميشدي.

21:12  عئسا اونلارا ددي: "گلئن سحر يمه‌يئني ييئن." شاگئردلردن هچ بئري اوندان "سن کئمسن؟" سوروشماغا جسارت اتمئردي. چونکي اونون رب اولدوغونو بئلئردئلر.

21:13  عئسا گلدي و چؤره‌يي گؤتوروب اونلارا وردي. باليغي دا وردي.

21:14  عئسا اؤلومدن دئرئلندن سونرا، بو اوچونجو دفه ائدي کي، شاگئردلره گؤرونوردو.

21:15  سحر يمه‌يئني يئيندن سونرا، عئسا شمعون پطروسا ددي: "يونا اوغلو شمعون، آيا سن مني بونلاردان داها چوخ سوئرسن؟" شمعون اونا ددي: "بلي يارب، بئلئرسن کي، سني سوئرم." عئسا اونا ددي: "قوزولاريمي اوتار."

21:16  عئسا گئنه ائکئنجي دفه شمعونا ددي: "يونا اوغلو شمعون، آيا مني سوئرسن؟" شمعون اونا ددي: "بلي يارب، بئلئرسن کي، سني سوئرم." عئسا اونا ددي: "قويونلاريما چوبان اول."

21:17  عئسا اوچونجو دفه اونا ددي: "يونا اوغلو شمعون، آيا مني سوئرسن؟" عئسانين اوچونجو دفه اوندان "آيا مني سوئرسن؟" سوروشماسي پطروسو پرت اتدي. پطروس عئسايا ددي: "يارب، سن هر شيي بئلئرسن. بئلئرسن کي، سني سوئرم." عئسا اونا ددي: "قويونلاريمي اوتار.

21:18  دوغروسونو سنه ديئرم، جاوان اولدوغون زامان اؤزون اؤز بلئني باغلاييب، ائسته‌دئيئن يره گدَردئن، آمّا قوجاليغيندا اللرئني اوزاداجاقسان و اؤزگه بئري سنئن بلئني باغلاياجاق و ائستمه‌دئيئن يره آپاراجاقلار."

21:19  عئسا بو سؤزو دمکده او اؤلومه ائشاره ادئردي کي، پطروس اونونلا تاريني عئزّتلندئره​جک ائدي. و سونرا اونا ددي: "منئم داليمجا گل."

21:20  پطروس دؤنوب عئسانين سودئيي شاگئردئنئن آرخالاريندا گلمه‌سئني گؤردو، او شاگئردي کي، شام يمه‌يئنده عئسانين سئنه‌سئنه سؤيکه‌نئب، اوندان "يارب سنه خيانت ادن کئمدئر؟" سوروشموشدو.

21:21  پطروس بو شاگئردي گؤروب عئسايا ددي: "يارب، بس بو نه اولاجاق؟"

21:22  عئسا پطروسا ددي: "اگر من گلنه کئمي اونون قالماسيني ائسته‌سم، بوندان سنه نه؟ سن منئم داليمجا گل."

21:23  بلجه "او شاگئرد اؤلمه‌يه​جک" سؤزو قارداشلارين آراسيندا ياييلدي. آمّا عئسا پطروسا "او، اؤلمه‌يه​جک" دمه‌مئشدي. "اگر من گلنه کئمي اونون قالماسيني ائسته‌سم، بوندان سنه نه؟" دمئشدي.

21:24  بو همن او شاگئرددئر کي، بو شيلرئن حاقّيندا شهادت ورئب و يازيبدير و بئلئرئک کي، اونون شهادتي دوغرودور.

21:25  عئسانين اتدئيي اؤزگه چوخ شيلر حله وار کي، اگر تک‌-‌تک يازيلسايدي، گومان ادئرم يازيلان کئتابلار دونيايا بله سيغمازدي.