PohnOld - John

Chapter 1

1:1  MASAN kotier ni tapi o, a masan kotier ren Kot, a masan me udan Kot.

1:2  I me kotikot ren Kot ni tapi o.

1:3  I me dipisou karos tapi kidar, o sota man meakot mia, me kaidin i kotin wiadar.

1:4  Maur mi re a; o iei maur o marain en aramas.

1:5  A marain o me dakarada rotorot, a rotorot sota lingan kila.

1:6  Aramas amen me pakadarador sang ren Kot ad a Ioanes!

1:7  I me pwara dong kadede, pwen kadede marain o pwe karos en poson pweki i.

1:8  Kaidin i me marain o, a a kin kadede marain o.

1:9  Iei marain melel, me pwara dong sappa, ap kamaraini aramas karos.

1:10  I me kotier sappa, o i me sappa tapi kidar, a sappa sasa i.

1:11  A koti dong udan sapwilim a, a sapwilim a kan me san i.

1:12  Karos, me kasamo i, a kotiki ong ir manaman, en wiala seri en Kot, ir, me poson mar a,

1:13  Me kaidin ipwidi sang nta, de inong en uduk, de inong en ol o, pwe ipwidier sang ren Kot.

1:14  Masan me wia uduk ala o kotikot re atail, o kitail kilanger a lingan, lingan dueta lingan en Ieros eu sang ren Sam o, me dir en mak melel.

1:15  Ioanes me kadede i ngil laudeda indada: Iei i, me i padaki wei: Me pan kotido mur i, iei me mier mo i, pwe a kotikotier mo i.

1:16  Pwe kitail karos ale sang nan audepa a mak sapan potopot.

1:17  Pwe kapung me kokido sang Moses, a mak o melel sang Iesus Kristus.

1:18  Sota me kilanger Kot kokodo, Ol ieros ta, me kin kotikot pan kupur en Sam o, i me kotin kasaledar i.

1:19  A met en Ioanes a kadede, ni men Sus kadarala sang Ierusalem samero o lepit oko, pwen idok re a: Is koe?

1:20  I ari kotin kadede; a sota likam; a kotin kadede: Kaidin Kristus ngai.

1:21  Irail idok re a: A is? Elias komui? A masani: Kaidin ngai i. Komui saukop o? A sapeng: Kaidin.

1:22  Irail ap indang i: A is komui? Pwe sen sapeng irail me kadar kit dor. Da me komui kadedeki pein komui?

1:23  A masani: Ngai ngil eu, me likelikwir sili nan sap tan: Kaineneda al en Kaun o, duen saukop Iesaia masanier!

1:24  A irail pakadaradoer sang ren Parisär akan.

1:25  Irail ap idok re a indada: Da me komui wia paptaisiki, ma komui kaidin Kristus, o kaidin Elias, o pil kaidin saukop o?

1:26  Ioanes sapeng irail masani: Ngai me paptaisiki pil, a amen kin kotikot nan pung omail, me komail sasa.

1:27  Iei i me kotido mur i, me ngai sowar ong, en lapwada sal en sapwilim a sut.

1:28  Mepukat wiauier Petapara palilan Iordan, wasa Ioanes kin wia paptais ia.

1:29  Mandan ran o a masani Iesus a koti dong i ap masani: Kilang Sippul en Kot, me kin wawei dip en sappa!

1:30  Iei i, me i padaki wei: Ol amen pan kotido mur i iei, me mier mo i, pwe a kotikotier mo i.

1:31  A ngai so asa i, a pwe i en sansal dong Israel, iei me i kokido paptaisiki pil.

1:32  A Ioanes kadede masani: I kilanger Ngen o kotidido sang nanlang ni mom en muroi kotikot re a.

1:33  A ngai so asa i, a me porone ia don wia paptaisiki pil, iei me kotin masani ong ia: Me koe pan kilang. Ngen piridi sok poa, o kotikoteta re a, iei i, me kin wia paptaisiki Ngen saraui.

1:34  A i kilangadar ap kadedeki, me iei Sapwilim en Kot.

1:35  Mandan ran o Ioanes pil kotida wasa o, o na tounpadak riamen iang i.

1:36  A ni a udial Iesus kotikot kokodo, ap masani: Kilang Sippul en Kot!

1:37  A tounpadak riamen rongadar a masan, ap idauen wei Iesus.

1:38  Iesus ap kotin saupeido masani ara idedauen, ap kotin masani ong ira: Da me koma rapaki? Ira potoan ong: Rapi (iet wewe: Saunpadak), ia wasa re kin kotikot ia?

1:39  A kotin masani ong ira: Kodo kilang! Ira ap poto dong kilanger wasa, me a kotikot ia, ap mimieta re a ni ran o. Mepukat wiauier impan auer kaeisok.

1:40  Andreas, ri en Simon Petrus amen re ra, me rongadar sang ren Ioanes ap idedauen i.

1:41  I me diaradar mas udan ri a Simon, indai ong i: Se diaradar Mesias (iet wewe: Kristus).

1:42  I ap kalualang i ren Iesus. A Iesus lao masani i, ap masani: Simon, koe nain Iona, koe nok adaneki Kepas (iet wewe: Paip).

1:43  Mandan ran o a pan kotilang Kaliläa, Iesus ap kotin diaradar Pilipus, masani ong i: Idauen ia do!

1:44  Pilipus men Petsaida, kanim en Andreas o Petrus.

1:45  Pilipus diaradar Natanael, ap indang i: Se diaradar i, duen me Moses intingiedier nan puk en kapung o saukop akan: Iesus men Nasaret, sapwilim en Iosep.

1:46  A Natanael indai ong i: Pala maukot pan kak pwarada sang Nasaret? Pilipus indang i: Kodo kilang!

1:47  Iesus kotin masani Natanael koko dong i, ap masani duen i: Kilang, ol melel en Israel amen, me sota kin widing.

1:48  Natanael potoan ong i: Re kotin mangi ia sang ia? Iesus kotin sapeng masani ong i: Mon Pilipus a eker uk edo, ni om mod pan tuka pik o, I kilang uk ada.

1:49  Natanael sapeng potoan ong i: Rapi, ir me Sapwilim en Kot, ir me Nanmarki en Israel.

1:50  Iesus kotin sapeng masani ong i: Pweki I indai ong uk, me I kilang uk ada pan tuka pik o, iei me koe posonki, a koe nok kilang me lapa sang mepukat.

1:51  A kotin masani ong i: Melel, melel I indai ong komail, sang met komail pan kilang nanlang a ritida o tounlang en Kot akan dauda o daudi pwarado ren Nain aramas.

Chapter 2

2:1  A NI kasilu en ran kamadip en kapapaud wiaui Kana nan Kaliläa; a in en Iesus kot wasa o.

2:2  Iesus o sapwilim a tounpadak kan me pil luke dong kamadip o.

2:3  Arail wain lao roselar, in en Iesus ap masani ong i: Solar arail wain.

2:4  Iesus kotin masani ong i: Li, menda re om? Ai ansau saikenta leler.

2:5  In a ap masani ong papa kan: Komail wiada meakaros, me a pan kotin masani ong komail.

2:6  Ari, potel takai wonu mi wasa o, en Sus akan ar men dopedop lole. Eu me laude ong metreten riau de silu.

2:7  Iesus kotin masani ong irail: Komail idip ong pil en potel akan! Irail ari kodiada lel au ar.

2:8  A ap kotin masani ong irail: Deukada, wala ren me kaun en konot: Irail ap wala.

2:9  Kaun en konot lao song kis pil, me wia wain la, o so asa, a idipi sang ia, a papa kan, me idip pil da, asa. Kaun en konot ap ekeredo ol kamod o,

2:10  Indang i: Aramas karos kin kida mas wain mau, toun kamadip lao medilar, re kin kida, me sota non mau. A komui kin nekinekid wain mau lel met.

2:11  I met tapidan kilel akan, me Iesus kotin wiadar Kana nan Kaliläa, o kotin kasaleda a lingan, o sapwilim a tounpadak kan posonla i.

2:12  A murin met a kotidilang Kapernaum, i o in a, o ri a ol akan, o sapwilim a tounpadak kan, ari, sota non ran toto, me re kotikot wasa o.

2:13  A pasa en Sus akan me korendor, a Iesus kotidalang Ierusalem.

2:14  A kotin masani nan im en kaudok men netinet en kau, o sip, o muroi, o men wiliandi moni me momod ia.

2:15  Ap kotin wiakida men wokiwok sal akai, ap woki ir sang nan im en kaudok iangaki sip o kau akan, o moni en saunwiliandi a kotin kasapokela o kotin wukedidi tepel akan.

2:16  Ap kotin masani ong men netinet en muroi kan: Wawei sang met met akan, o der wiakidar tanpas en Sam ai im en net eu!

2:17  A sapwilim a tounpadak kan tamanda me intingidier: Limpok ong tanpas omui me kasor ia dier.

2:18  Sus oko ap sapeng indang i: Kilel da, me kom kadedeki ong kit, me komui manaman ong, en wiada mepukat?

2:19  Iesus kotin sapeng masani ong irail: Palanga pasang im en kaudok wet, a pong sili pong I pan kauada.

2:20  Sus oko ap indada: Par ngaulwonu me im en kaudok wet wiaui kidar, a pong sili pong komui pan kaua kida?

2:21  Ari, tanpas en pali war a, me a kotin masanie kida.

2:22  A lao iasadar sang a matalar, sapwilim a tounpadak kan ap tamandar, me a kotin masanier mepukat. Irail ari poson kisin likau kan o masan, me Iesus kotin masaniadar.

2:23  Ni a kotikot Ierusalem ni pasa, ni kamadip o, me toto posonla mar a, ni ar kilanger kilel akan, me a kotin wiadar.

2:24  A Iesus sota kotin liki ong ir pein i, pwe a kotin mangi irail karos.

2:25  O a sota mau ong, meamen en kadede ong i aramas amen, pwe pein i kotin mangi lol en aramas.

Chapter 3

3:1  ARAMAS amen mia, kisan Parsär akan, me mar a Nikodemus, me saumas amen ren Sus akan,

3:2  Me poto dong i ni pong o, katiti ong i: Rapi, se asa, me komui saunpadak amen, me tapido sang ren Kot, pwe sota, me kak wia kilel akan due me komui kotin wiada, ma Kot so iang.

3:3  Iesus kotin sapeng masani ong i: Melel, melel I indai ong uk, meamen so ipwi sapal, sota pan kak kilang wein Kot.

3:4  Nikodemus potoan ong i: Iaduen aramas laud pan kak ipwidi? A pan kak pur ong nan kaped en in a, ipwidi sang?

3:5  Iesus kotin sapeng: Melel, melel I indai ong uk, meamen so ipwiki pil o ngen, a sota kak pedelong ong nan wein Kot!

3:6  Me ipwiki uduk, iei uduk, a me ipwiki Ngen, iei ngen.

3:7  Koe der puriamuiki, me I katitiki ong uk: Komail en ipwi sapal.

3:8  Ang kin pein ipip sili, o koe kin rong ngil a, a koe sasa, wasa a tapi sang ia o wasa a ko ong ia; iduen amen amen, me ipwiki Ngen.

3:9  Nikodemus sapeng indai ong i: Iaduen mepukat kak wiaui?

3:10  Iesus kotin sapeng masani ong i: Saunpadak en Israel amen koe, a koe sasa duen mepukat?

3:11  Melel, melel I indai ong uk, me se asadar, iei me se kin indada, o me se kilanger, iei me se katitiki, a komail sota kin kamelele at kadede.

3:12  Ma I katitiki ong komail men pa, a komail ap sota kamelele, a iaduen, komail pan kamelele, ma I katitiki ong komail men nanlang?

3:13  Sota meamen, me kodala nanlang, i eta, me kodido sang nanlang, Nain aramas, me kin mimieta nanlang.

3:14  Duen Moses me kauadar serpent amen nan sap tan, iduen Nain aramas pan kakauda.

3:15  Pwe meamen posonla i, sota pan lokidokila, a en aneki maur soutuk.

3:16  Pwe iet duen Kot kotin kupura sappa, me a kotikidoki sapwilim a Ieros, pwe karos, me posonla i, ender salongala, a en aneki maur soutuk.

3:17  Pwe Kot me kotin porone dong sappa sapwilim a Ol, kaidin en kadeikada sappa, a pwe sappa en kamauri kila i.

3:18  Me poson i, sota pan pakadeikada, a me so poson i, iei pakadeikadar, pweki a sota poson mar en sapwilim en Kot ieros.

3:19  A iet kadeik o, marain pwara dong sappa, a aramas pok ong rotorot mon marain, pweki ar wiawia kan me sued.

3:20  Pwe amen amen, me wiawia sued, kin kailongki marain, o sota kin pwara dong marain, pwe a wiawia kan de sansaleda.

3:21  A me wiawia melel, kin ko dong marain, pwe a wiawia kan en sansaleda, me re tapi sang ren Kot.

3:22  Murin mepukat Iesus o sapwilim a tounpadak kan kotilang sap en Iudäa ap kotikot ia wia paptais.

3:23  A Ioanes pil wia paptais Enon koren iong Salim, aki pil toto mi wasa o, irail ari koieila paptaisela.

3:24  Pwe Ioanes saikenta lokidokilar nan imateng.

3:25  En Ioanes a tounpadak kan o ol en Sus amen ap akamaiki pena duen kamakelekel.

3:26  Irail ari ko dong ren Ioanes indang i: Rapi, me kot re omui palilan Iordan, me komui kin kadede, masani, a kin wia paptais o karos kin pwarala re a.

3:27  Ioanes sapeng masani: Aramas amen sota kak aneki meakot, ma a so aneki sang nanlang.

3:28  Komail pein kadede kin ia, me i indada: Kaidin Kristus ngai, pwe ngai me pakatarador mo a.

3:29  Me li amen kisin nin ong, iei ol kamod. A kompoke pan ol kamod kin u rongerong perenki ngil en ol kamod; ari, iei ai peren unsokala.

3:30  I en kakairida, a ngai en kakairidi.

3:31  Me kotido sang poa, i me poedi karos, a me kisan sappa, iei men sappa, o a kin kasokasoia duen sappa. A me kotido sang nanlang, me poedi karos,

3:32  O me a kilangada o rongada, iei me a kin kadedeki, a sota me kamelele a kadede.

3:33  A me kamelele a kadede, kin kadede, me Kot me melel.

3:34  Pwe i, me Kot kotin poronedor, kin kida en Kot a masan, pwe Kot sota kotikida Ngen ki men song.

3:35  Sam me kotin kupura sapwilim a Ol o kotiki onger ni lim a meakaros.

3:36  Me poson sapwilim a Ol, aneki maur soutuk. A me sota poson sapwilim a Ol, sota pan kilang maur, a ongiong en Kot pan mimieta re a.

Chapter 4

4:1  KAUN lao kotin mangi, me Parisär akan rongadar, me Iesus kin wiada tounpadak kan o paptais toto sang Ioanes,

4:2  Ari, pwe sota me pein Iesus kotin paptais, sapwilim a tounpadak kan ta,

4:3  Ap kotila sang Iudäa, kotin purelang Kaliläa.

4:4  A a kotin weid nan wein Samaria.

4:5  I ap kotilang kanim en Samaria eu, me adaneki Sikar, koren iong sap, me Iakop ki ong na ol Iosep.

4:6  Iei wasa en Iakop a parer eu mia. Iesus ari ngirekila a sapasapal, ap kaipokedi pon parer o, ari mepukat wiauier impan auer kawonu.

4:7  A li en Samaria amen ap kodon idip pil ia. Iesus kotin masani ong i: Kido lim ai kis pil en!

4:8  Pwe sapwilim a tounpadak kan ko ong nan kanim, pan netiada sak arail.

4:9  Li en Samaria ap indang i: Iaduen, komui kisan men Sus, ap poeki pil re i? Pwe ngai li en Samaria amen, pwe Sus akan sota kin waroki ong men Samaria.

4:10  Iesus kotin sapeng masani ong i: Ma koe asa duen kisakis sang ren Kot o is i, me indang uk: Kido lim ai kis pil en, koe pan poeki re a, a ap pan ki ong uk pil memaur.

4:11  Li o indang i: Maing, sota sapwilim omui men idip pil, a parer me lol, a ia wasa, kom pan idip sang ia pil memaur?

4:12  De komui lapa sang sam at Iakop, me kotiki ong kit er parer en, o pein nima sang, o na kan, o na man akan?

4:13  Iesus kotin sapeng masani ong i: Karos, me nima sang pil wet, pan pur ong men nim pilada.

4:14  A meamen, me nima sang pil, me I ki ong i, pan solar men nim pilada kokolata, pwe pil, me I kin ki ong, pan pot loli kusukusudang maur soutuk.

4:15  Li o ap indai ong i: Maing, kom kotiki ong ia kisan pil o, pwe i en solar men nim pil, o solar kodo o idipa sang met!

4:16  Iesus kotin masani ong i: Kowei ukedo om paud!

4:17  Li o sapeng indada: Sota ai paud. Iesus kotin masani ong i: Melel om lokaia: Sota ai paud.

4:18  Pwe om paud me limen mas kokodo, a kaidik om paud, me koe paudeki met; iei melel, me koe indada.

4:19  Li o indang i: Maing, i ap asaer, me saukop amen komui.

4:20  Sam at akan kaukaudok pon nana wet, a komail kin inda dene Ierusalem eta wasa me aramas en kaudok ia.

4:21  Iesus kotin masani ong i: Li, kamelele ia, a korendor ansaun omail pan solar kaukaudok ong Sam pon nana wet, pil sota Ierusalem.

4:22  Komail kin sasa, me komail kin kaukaudok ong. A kit asa, me se kaukaudok ong, pwe kamaur pwarado sang ren men Sus akan.

4:23  A ansau korendor, ari a leler, me toun kaudok melel akan pan kaudok ong Sam ni Ngen o melel, pwe iei ta song en toun kaudok kan, me Sam pil kotin kupura.

4:24  Ngen eu Kot, a me kaudok ong i, ren kaudokki Ngen o melel.

4:25  Li indai ong i: I asa, me Mesias pan kotido, me maraneki Kristus. I lao kotido, a pan katiti ong kit meakaros.

4:26  Iesus kotin masani ong i: Ngai i, me lokelokaia ong uk.

4:27  A sapwilim a tounpadak kan ap purodo, puriamui a masan ong li amen. Ari so, sota me indada: Da me re kotin kainoma, de da me re kotin mamasani ong i?

4:28  Li o ap pwilikidi potel en pil o, ap koieilang kanim o kasoi ong aramas akan:

4:29  Kodo, kilang aramas amen, me kasale ong ia karos, me i wiadar, ma i kaidin Kristus?

4:30  Rap koieila sang nan kanim o potodo re a.

4:31  Ni ansau ota sapwilim a tounpadak kan poeki re a, potoan ong: Rapi, re kotin konot!

4:32  A kotin masani ong irail: Kan ai kisin manga mia, me komail sasa.

4:33  Tounpadak kan ap kasokasoi nan pung arail: Muein amen wa dong i sak.

4:34  Iesus kotin masani ong irail: Wiawia kupur en me kadar ia do, o kapwaiada sapwilim a dodok, iei kan ai,

4:35  Komail sota kin indada: Saunipong paieu mi mon rak? Kilan, I indai ong komail, sarada, kilang matuel o pwe a malar.

4:36  Me dolung kin pwaipwai o nanak ong maur soutuk, pwe ira karos, me kamorok o me dolung en peren pena.

4:37  Pwe ni mepukat kasoi o pwaidar: Amen me kin kamokamorok, a amen me kin dolung.

4:38  I kadar komail wei, en dolung pena, me komail so doke, Akai me dodoker, a komail me id aneki arail rak.

4:39  Men Samaria toto kisan kanim o posonla i pweki kasoi en li o, me kadede: A kotin kasale ong ia karos, me i wiadar.

4:40  Men Samaria kan lao pokon dong i, rap poeki re a, en kotikot re ’rail. I ari kotikot ia pong ria pong.

4:41  A me toto me posonlar pweki a masan,

4:42  Ap indang li o: Se poson kila kaidin om kasoi, pwe se pein rongadar o weweki, me i melel Saunkamaur pan sappa.

4:43  Murin ran riau Iesus kotila sang wasa o, kotilang Kaliläa.

4:44  Pwe pein Iesus kotin kadedeki, me saukop amen sota kin mau nan udan sap we.

4:45  A lao kotilang Kaliläa, men Kaliläa me kasamo i, pwe re iang kilanger me a kotin wiadar Ierusalem ni kamadip o, pwe re toun iang kamadip.

4:46  Iesus ari kotin pure dong Kana nan Kaliläa, wasa a kotin kapikila pil wain. A monsap amen mia, me na ol somau nan Kapernaum.

4:47  A lao rongadar, me Iesus koti dong Kaliläa sang Iudäa, ap poto dong re a, poeki i en kotidi, kakelada na ol, pwe a koren iong mela.

4:48  Iesus ap kotin masani ong i: Ma komail so kilang kilel o manaman akan komail sota pan poson.

4:49  Monsap potoan ong i: Maing kotidi mon nai seri mela!

4:50  Iesus kotin masani ong i: U kowei, noum ol memaur. Ari aramas o poson masan o, me Iesus kotin masani ong i ap koieila.

4:51  A ni a kodila, a ladu kan me tu ong i, kasoi ong i, me na putak mauredar.

4:52  I ap kalelapok re ’rail: Ansau da me a pikikidi maur? Irail indang i: Aio ni auer kaisu karakar ko sanger.

4:53  Sam o ap asadar, me i ansau, me Iesus kotin masani ong i: Noum ol memaur. I ari o na kan me posonla i.

4:54  Iet kilel kariau, me Iesus kotin wiadar ni a koti dong Kaliläa sang Iudäa.

Chapter 5

5:1  MURIN mepukat ran lapalap eu en Sus oko pwaida; Iesus ap kotilang Ierusalem.

5:2  Len pil eu mi Ierusalem impan im en sip, me ad a Petesda ni lokaia en Ipru; im limau mi impa,

5:3  Me somau toto mi lole: Me maskun, o me dangidang, o me motor mia, auiaui lao pil o pan mokimokid.

5:4  Pwe akai ansau tounlang amen kin koti dong le o kamokideda pil o, a meamen me madang tiong mas nan pil o ni a mokimokid, iei me kin maureda sang a somau kan karos, me mi re a.

5:5  A aramas amen mia, me somauki par sileisokwalu.

5:6  Iesus lao kotin masani men et a wonon, ap kotin mangi, me a wonon ansau warai, ap kotin masani ong i: Koe so men kelailada?

5:7  Ol somau potoan ong i: Maing, sota nai aramas, me pan wa ia di wong ni pil o ansaun a mokideda. Pwe ni ai kokodi, amen kin madang mo i.

5:8  Iesus ap kotin masani ong i: Uda, ale ki om, kokowei!

5:9  Aramas o ap madang kelailadar, kida ki e, alu wei, a ran o ran en sapat.

5:10  Sus oko ap indai ong me kelailadar: Ran wet ran en sapat. A sota pung koe en wewa sili ki om.

5:11  A sapeng irail: Me kakela ia da, masani ong ia: Ale ki om koko wei!

5:12  Irail ap kalelapok re a: Is aramas o me indai ong uk: Ale ki om kokowei?

5:13  A me kelailadar sasa i, pwe Iesus kotila sanger, pwe pokon mi wasa o.

5:14  Kadekadeo Iesus kotin diaradar i nan im en kaudok o ap kotin masani ong i: Kilang, koe kelailadar, koe der pil wia dip, pwe me sued kot sang mas de ko dong uk!

5:15  Aramas o ap koieila, kaireki Sus oko, me Iesus kakeladar i.

5:16  I me Sus oko ap raparapaki Iesus, o masamasan, pwen kamela i, pweki a kotin wiadar meakan ni ran en sapat.

5:17  Iesus kotin sapeng irail: Sam ai kin dodok kokodo, a ngai pil iang dodok.

5:18  I me Sus oko ap masamasan melel, en kamatala i, pweki a kotin kawela ran en sapat o pil masani, me dene Kot Sam a, o a kaparoki ong pein i Kot.

5:19  Iesus ap kotin sapeng masani ong irail: Melel melel I indai ong komail, a sota kak, Na en pein wia meakot, pwe i eta, me a kilang ren Sam, me a wiada. Pwe me a kin wiada, iei me Na pil kin wiada.

5:20  Pwe sam pok ong Na o kasansale ong i karos, me pein i kin wiada. O a pan kasale ong i wiawia kan, me lapa sang met akan, pwe komail en puriamui kila.

5:21  Pwe duen Sam kin kapikapirida me melar akan, kamaur ir ada, iduen Na pil kamaureda me a mauki.

5:22  Pwe sota me Sam kin kadeikada, pwe a kotiki ong Na kadeik o.

5:23  Pwe karos en wauneki Na, dueta ar wauneki Sam. Me sota wauneki Na, sota kin wauneki Sam, me kadar i dor.

5:24  Melel, melel I indai ong komail, meamen rong ai padak o poson, me kadar ia do, a aneki maur soutuk. A a sota pan pangalang kadeik o, pwe a sapale sang mela sapal ong maur.

5:25  Melel, melel I indai ong komail, ansau kokodo, iei a leler, me melar akan pan rongada ngil en Nain Kot, a me rongadar pan maureda.

5:26  Pwe duen Sam a udan maur, iduen a ki ong Na, en pil udan maur.

5:27  O a kotiki ong i manaman, en kaunda kadeik o, pweki Nain aramas i.

5:28  Der puriamuiki met, pwe ansau kokodo me irail, me mi nan sousou kan, pan rong ngil a.

5:29  Irail ap pan pwarada: Me wiadar me mau, en maureda, pwen memaur, a me wiadar mesued, en maureda, pwen pangalang kadeik o.

5:30  Sota me I kak wiada sang pein ngai, duen me I kin rong, iduen I kin kadeikada, o ai kadeik me pung, pwe I sota kin rapaki insen ai, pwe kupur en i, me kadar ia do.

5:31  Ma I kadede pein ngai, ai kadede sota melel.

5:32  Amen me kadede ia, a I asa melel, me a kadede ia me melel.

5:33  Komail me ilakilang Ioanes, i ari me kadede melel.

5:34  A I sota kin ale kadede ren aramas, a iet me I indawei, pwe komail en dorola.

5:35  I me ser umpul o marain eu, a komail men perenki a marain ansau kis.

5:36  A ai kadede me lapa sang en Ioanes. Pwe dodok kan, me Sam o kotiki ong ia, I en kapwaiada, iei dodok kan, me I kin wiawia, me kadede ia, me Sam kadar ia dor.

5:37  A Sam, me kadar ia dor, pein i kadede ia. Komail sota rongadar ngil a, o sota kilang mom a.

5:38  O a masan sota kin kot re omail, pwe komail sota poson, me a kadarador.

5:39  Komail kin kalelapok nan kisin likau kan, pwe komail lamelame, me maur soutuk mi lole. Ari, iei irail, me kin kadede ia.

5:40  A komail kang ko dong ia, pwe komail en aneki maur.

5:41  I sota kin mauki ale wau ren aramas akan.

5:42  I asa komail, limpok en Kot sota kin mi re omail.

5:43  I kodo ni mar en Sam ai, a komail sota kin kasamo ia. A ma amen pan kokido pein ad a, komail pan kasamo i.

5:44  Pala komail kak poson ni omail ngongongki wau ren aramas, ap sota rapaki wau sang ren Kot.

5:45  Der kiki ong, me I pan mpäkin komail ren Sam, amen me kin mpäkin komail: Moses, me komail kin kaporoporeki.

5:46  Pwe ma komail posonla Moses, komail pan poson ia, pwe i me intingiedier duen ngai.

5:47  A ma komail so kamelele a inting kan, pala komail pan kamelele ai padak kan?

Chapter 6

6:1  MURIN mepukat Iesus kotin kotela le en Tiperias nan Kaliläa.

6:2  A pokon kalaimun me idedauen i pweki ar kilanger kilel akan, me a kotin wiai ong me somau kan.

6:3  Iesus ap kotidala pon dol o, kaipokedi wasa o ren sapwilim a tounpadak kan.

6:4  A pasa o, ran lapalap en Sus oko me korendor.

6:5  Iesus lao kotin masanda masani pokon kalaimun koko dong i, ap kotin masani ong Pilipus: Ia wasa, sen neti sang ia kisin manga, pwe mepukat en manga?

6:6  A kotin masani mepukat, pwen kasongesong i. Pwe pein i mangi, me a pan wiada.

6:7  Pilipus potoan ong i: Prot me denar riepuki sota pan itar ong irail, pwe amen amen en tungole ekis.

6:8  Andreas, sapwilim a tounpadak amen, ri en Simon Petrus potoan ong i:

6:9  Kisin putak amen mia, me a lopon en prot limau o mam riamen, a sota katepa ren me toto.

6:10  Iesus kotin masani: Kamod ong irail edi! Ari, wasa o me reen. Impan ol limekid ap mondi.

6:11  Iesus ap kotikida lopon ko, a lao laolaoki, ap kotin nek ong irail me mondier, pil dueta mam oko, irail lao metilar.

6:12  Irail lao metier, a kotin masani ong sapwilim a tounpadak kan: Ki pena me lua, pwe ekis der lokidokila!

6:13  Irail ap ki pena kopou eisokriau kisan lopon ko, me luadi murin arail manga.

6:14  Aramas akan lao kilanger kilel o, me Iesus kotin wiadar, re ap indada: Melel i Saukop o, me pan pwara dong sappa.

6:15  Iesus lao kotin mangi, me re pan poto dong i, pwen kasapwiladang i Nanmarki, ap pil kotidalang nin dol o, kotin kelepala.

6:16  A lao sautik pena, sapwilim a tounpadak kan ap kotilang ni oror,

6:17  Kereda pon sop pot, kotela kokolang Kapernaum. A lao wasa pongier, Iesus saikenta iang irail.

6:18  A sed me iluken, pwe ang me ma.

6:19  Irail seisei kila mail eisoklimau de rieisok, rap kilangada Iesus a kotikotido pon sed koren iong sop, irail ap masapwekadar.

6:20  A kotin masani ong irail: Ngai i komail der masak!

6:21  lrail ap men kasamo i pon sop o, a sop o madang milar ni sap o, me re ko ong ia.

6:22  A mandan ran o pokon o, me mi palilan le, lao kilanger, me sota apot sop mi wasa o, pwe i eta, me sapwilim a tounpadak kan keredang poa, o me Iesus sota iang sapwilim a tounpadak kan kotidang pon sop o, pwe a tounpadak kan kola kelep.

6:23  A pil akai kisin sop me pwarado sang Tiperias, tanga dong wasa o, me re mangamanga ia, murin Kaun o kotin laolao.

6:24  Aramas akan lao kilanger, me Iesus solar kotikot ia, o sapwilim a tounpadak kan pil so, rap dake sop pot kolang Kapernaum, raparapaki Iesus.

6:25  Irail lao diaradar i palilan le, ap potoan ong: Rapi iad me re kotido?

6:26  Iesus kotin sapeng irail masani: Melel, melel I indai ong komail, komail kin rapakin ia kaidin pweki kilel akan, me komail kilang, a pweki komail kangala kisin prot ap metier.

6:27  Komail der dokki manga, me kin ola, a dokki manga me kin mimieta ong maur soutuk, me Nain aramas pan ki ong komail, pwe i me Kot Sam kileledier.

6:28  Irail ap potoan ong i: Da me sen wiada, pwen kapwaiada en Kot a dodok kan?

6:29  Iesus kotin sapeng masani ong irail: Iet en Kot a dodok: Komail en poson i, me a kadarado.

6:30  Irail ari potoan ong i: Kilel da, me re kotikida, pwe sen kilang o poson ir? Da me re kotin wiada?

6:31  Sam at akan me kangala mana nan sap tan o, duen a intingidier: A kotiki ong irail prot sang nanlang, en kangala.

6:32  Iesus ap kotin masani ong irail: Melel, melel I indai ong komail, kaidin Moses, me ki ong komail prot sang nanlang, a Sam ai kin ki ong komail prot melel sang nanlang.

6:33  Pwe me kodido sang nanlang, o ki ong sappa maur, iei prot en Kot.

6:34  Irail ap indang i: Maing, kotiki dong kit prot wet kaukaule!

6:35  Iesus kotin masani ong irail: Prot en kamaur ngai, me ko dong ia solar pan men mangadar, o me poson ia, solar men nim piladar.

6:36  A I indai ong komail er, komail kilang ia er, ap so poson la.

6:37  Karos me Sam ki ong ia, pan ko dong ia, a me ko dong ia, I sota pan kasela.

6:38  Pwe ngai kodido sang nanlang, kaidin pwen wiada insen ai, pwe kupur en i, me kadar ia do.

6:39  Pwe iet kupur en me kadar ia do, karos me a ki ong ia er, I ender kasela amen, pwe I en kamaureda ni ran nik o.

6:40  A iet kupur en Sam ai, amen amen, me kin kilang Na o poson i, en aneki maur soutuk, a I pan kamaureda i ni ran nik o.

6:41  Sus oko ap lipanedeki i, pweki a kotin masani: Ngai prot, me kodi sang nanlang.

6:42  Irail indada: Kaidin i Iesus nain Iosep? A sam a o in a se asa. Ari, daduen a indada: I kodido sang nanlang?

6:43  Iesus kotin sapeng masani ong irail: Komail der lipaned nan pung omail!

6:44  Sota me pan kak ko dong ia, ma Sam, me kadar ia dor, sota kainongido i. A I pan kamaureda i ni ran nik o.

6:45  A intingidier nan saukop akan: Irail karos pan ale padak sang ren Kot. Amen amen me rongadar o padakki ren Sam, kin ko dong ia.

6:46  Ari, kaidin pweki meamen kilang Sam; i eta, me kodo sang ren Kot, i me kilanger Sam.

6:47  Melel, melel I indai ong komail, me poson ia, iei me aneki maur soutuk.

6:48  Prot en maur ngai.

6:49  Sam omail oko, me kangala mana nan sap tan o, ir ari melar.

6:50  Met prot, me kodido sang nanlang, meamen kin kang sang i, sota pan mela.

6:51  Ngai prot maur, me kodido sang nanlang, meamen kang sang prot wet, pan memaur kokolata. Prot, me I pan kida, iei uduk ai, me i pan kida en kamaur kida sappa.

6:52  Sus oko ari akamaiki pena indada: Iaduen men et pan kak ki ong kit uduk a sen kang?

6:53  Iesus ap kotin masani ong irail: Melel, melel I indai ong komail, ma komail sota pan kang uduk en Nain aramas o nim nta, sota maur omail.

6:54  Me kin kang uduk ai o nim nt’ ai, iei me aneki maur soutuk, a I pan kamaureda i ni ran nik o.

6:55  Pwe manga melel uduk ai, o pil melel nt’ ai.

6:56  Me kin kang uduk ai o nim nt’ ai, iei me podidi ong ia o ngai podidi ong i.

6:57  Duen Sam ieias kadar ia do, o ngai memaureki Sam, iduen me kang uduk o nt’ ai, pan meaureki ngai.

6:58  Iet prot, me kodido sang nanlang, kaidin duen sam omail akan, me kangala mana ap mela, a meamen kin kang prot wet, pan memaur kokolata.

6:59  Mepukat a kotin masani wei nan sinakoke, ni a kotin kawewe nan Kapernaum.

6:60  Ari, me toto ren sapwilim a tounpadak kan, me rongadar mepukat indada: Padak pot et meid apwal! Is me kak rong?

6:61  Iesus lao kotin angi nan kupur a, me sapwilim a tounpadak kan lipanedeki mepukat, ap kotin masani ong irail: Komail makaraki mepukat?

6:62  A ma komail pan kilang Nain aramas kodala wasa, me a kauson ia mas o?

6:63  Ngen me kin kamaureda, a uduk sota katepa. Padak kan, me I kin padapadaki ong komail, iei Ngen o maur.

6:64  A akai mi re omail, me so poson. Pwe Iesus kotin mangi, me so poson o me pan pangala i.

6:65  A kotin masani: I me I indaki ong komail, sota me kak ko dong ia, ma Sam sota kainongido.

6:66  Sang ni ansau o sapwilim a tounpadak kan toto mueiwei sang o solar idauen i.

6:67  Iesus ap kotin kainoma ren ekriamen oko: Komail pil pan kola?

6:68  A Simon Petrus ap sapeng i: Maing, is me se en ko ong? Pwe ar masan akan iei maur soutuk.

6:69  A kit posonlar o asaer, me ir me Saraui en Kot.

6:70  Iesus kotin sapeng irail: Kaidek komail ekriamen, me I piladar, a amen komail me tewil amen.

6:71  A kotin masaniada duen Iudas Iskariot nain Simon, pwe i amen ren ekriamen oko, me pan pangala i.

Chapter 7

7:1  MURIN mepukat Iesus kotin kakan sili Kaliläa, pwe a solar men kakan sili Iudäa, pweki Sus oko masamasan kamatala i.

7:2  A ran lapalap en Sus oko; iei ran en im en tan tuka korendor.

7:3  Ri a ol akan ap indai ong i: Kom kotiwei kotilang Iudäa, pwe omui tounpadak kan en pil udial omui wiawia kan, me kom kin wiawia.

7:4  Pwe sota me kin wiada meakot wasa rir, ma a men indand sili. Ma komui wia mepukat, en kasansale ong sappa.

7:5  Pwe ri a ol akan pil sota poson i.

7:6  Iesus ap kotin masani ong irail: Ai ansau saikenta leler, a omail ansau mia ansau karos.

7:7  Sappa sota kak kailongki komail, a ngai me a kin kailongki, aki I kin kadede, me a wiawia kan me sued.

7:8  Komail kodalang kamadip et, I sota pan kodalang kamadip et, pwe ai ansau saikenta leler.

7:9  A kotin masani ong irail mepukat, ap kotikotita Kaliläa.

7:10  A ri a ol akan lao samalar, i ap pil kotidalang kamadip, ap so sansal a duen me rir.

7:11  Sus akan ari rapaki i ni kamadip o indada: Ari, ia wasa a kotikot ia?

7:12  A aramas akan lokolokaia toto duen i, pwe akai indada: Me mau men. A akai me indada: Kaidin, pwe a kin kaweid sapung aramas.

7:13  Sota me lokaia sansal duen i, pweki ar masak Sus oko.

7:14  Lao lel ailepan kamadip o, Iesus ap kotin kodalang im en kaudok o kaukaweweda.

7:15  A Sus akan ap puriamui kila indada: Da duen men et asa wewe en kisin likau, pwe a sota iang padakki.

7:16  Iesus ap kotin sapeng irail masani: Kaidin ai padak, me I kin kida a en me kadar ia do.

7:17  Meamen wiawia kupur a, pan weweki ai padak, ma a ren Kot, de sang ren pein ngai.

7:18  Me kin padapadak sang ni pein i, kin rapaki pein wau i, a me kin rapaki wau en me kadarala i, iei me melel o sota man sued kot pit.

7:19  Kaidin Moses, me ki ong komail kapung o, a sota amen komail kin kapwaiada kapung o? A da me komail rapakiki kame ia la?

7:20  Aramas oko sapeng indada: Koe me tanwar en tewil, is me rapaki kame uk ala?

7:21  Iesus kotin sapeng masani ong irail: Dok taieu, me I wiadar, a komail puriamui kila.

7:22  Moses ki ong komail er sirkomsais, a kaidin tapi sang ren Moses, pwe sang ren sam akan, a komail kin sirkomsais aramas ni ran en sapat.

7:23  Ari ma aramas amen ale sirkomsais ni ran en sapat, pwe kapung en Moses ender sapungala, a komail kin suede kin ia, pweki ai kakelailada aramas pon ni ran en sapat?

7:24  Der kadeikada duen pali liki, a komail kasaui nin tiak en kadeik pung.

7:25  Men Ierusalem kai ap inda: Kaidin i, me re raparapaki en kamela?

7:26  A kilang, a padapadak sansal, a re sota man lokaia ong i, de muein saumas akan asaer mau, me i Kristus?

7:27  Ari, se asaer, wasa men et ko sang ia, a Kristus lao kotido sota me pan asa wasa, me a pwarado sang ia.

7:28  Iesus ap kotin kapitie laudeda kawewe nan im en kaudok masani: Komail asa ia o wasa I ko sang ia. Ari, kaidin pein ngai, me I kokido, a me kadar ia dor, me melel, me komail sasa.

7:29  A I asa i, pwe I kodo sang re a, o i me kadar ia dor.

7:30  Irail ap song saikidi i, a sota me sair i, pwe a ansau kaikenta leler,

7:31  Aramas toto sang nan pokon o posonla i indada: Iaduen, Kristus lao pwarado, a pan wia kilel toto sang mepukat, me men et wiadar?

7:32  Parisär akan rongadar, me aramas akan lokelokaia mepukat duen i. Samero lapalap o Parisär akan ap kadarala papa kan, en saikidi i.

7:33  Iesus ap kotin masani: I pan mi re omail ansau motomot. I ap pan kola ren me kadar ia do.

7:34  Komail pan rapakin ia, ap sota diar, a wasa, me I pan mi ia, komail sota pan kak ong.

7:35  Sus oko ap inda nan pung arail: A pan kola ia, pwe sen solar diar i? A pan kola ren me salongalar ren men Krik kan, kaukawewe ong men Krik?

7:36  Iaduen masan en, me a indada: Komail pan rapakin ia, ap sota diar, a wasa, me I pan mi ia, komail sota pan kak ong?

7:37  Ni ran en kamadip a nikilar, ni ran lapalap o, Iesus kotida, kapitie laudeda masani: Meamen men nim piladar, i en ko dong ia nim.

7:38  Me poson ia, duen kisin likau kan indada, sang nan war a pil memaur pan pwilipwili sang ia.

7:39  Mepukat a kotin masani duen Ngen, me irail, me poson i, en tungole; pwe Ngen saikenta pakadarado, aki Iesus saikenta linganlar.

7:40  Ari, akai sang nan pokon o ni ar rongadar masan pukat ap indada: Melel Saukop o.

7:41  A akai indada: Kristus men et! A akai indada: Da, Kristus pan pwarado sang Kaliläa?

7:42  Kaidin kisin likau me inda, me Kristus pan wan Dawid o kisan men Petleem, kanim o, me Dawid kotikot ia?

7:43  Irail ap liak toror pasang pweki i.

7:44  A akai men saikidi i, a sota me sair i.

7:45  A papa ko ap pure dong ren samero lapalap o Parisär akan. Irail ari idok re irail: Da me komail sota wakido?

7:46  A papa ko sapeng: Sota man aramas amen padapadak duen men et.

7:47  Parisär oko ap sapeng irail: Komail pil pakodauelar?

7:48  Iaduen saumas de Parisär amen posonla i?

7:49  A aramas pukat, me so asa kapung o, re rialar.

7:50  Nikodemus kis arail ap indang irail:

7:51  Iaduen, atail kapung pil kin kadeikada aramas amen mon a rong o asa sang pein i duen a wiawia?

7:52  Irail sapeng indang i: Iaduen, komui pil kisan men Kaliläa? Rapaki o kilang, me sota saukop amen ko sang Kaliläa.

7:53  Amen amen ap purelang deu a.

Chapter 8

8:1  IESUS ap kotidala pon dol Oliwe.

8:2  A nin soran a kotin pure dong ong nan im en kaudok. Aramas karos ap pokon dong i. I ari kaipokedi kaukawewe ong irail.

8:3  A saunkawewe o Parisär akan wa dong i li amen, me diarokadar ni a kamal. Irail kidang i nan pung arail.

8:4  Ap indang i: Saunpadak, li men et diarokadar ni a kamal.

8:5  A Moses masani ong kitail nan kapung o, sen kate song en. A komui, da me komui masani?

8:6  A mepukat re indang i, pwen kasongesong i, pwe ren kak impimpaiki i meakot. A Iesus kotin idiokidi, intingiekidi ong nani pwel sondin lim a.

8:7  A ni ar poden kalekalelapok re a, a ap kotin dengida masani ong irail: Ari, me sota dip a nan pung omail, a pan tapiada kate i.

8:8  A pil kotin idiokidi intingiedi ong nan pwel.

8:9  Irail lao rongadar met, rap mulikidar tentelwei, me laud mas lel me tikitik o. A Iesus kelepela, li eta, me mi re a.

8:10  Iesus lao kotin dengida o sota masani meamen, li eta, ap masani ong i: Ia me karaun uk edi kan? Sota me kadeik uk ada?

8:11  A potoan ong: Sota Maing. Iesus ap kotin masani ong i: I sota pil pan kadeik uk ada. Kowei, koe der pil wiada dip!

8:12  Iesus ap pil kotin padaki ong irail masani: Ngai marain en sappa. A me kin idauen ia, sota pan weid ni rotorot, pwe marain en maur pan mi re a.

8:13  Parisär oko ap indai ong i: Komui kadede pein komui; ari, omui kadede sota melel.

8:14  Iesus kotin sapeng masani ong irail: Ma I kadede pein ngai, ari melel ai kadede, pwe I asa, wasa I kodo sang ia o wasa I koko ong ia, a komail sasa, wasa I ko sang ia o wasa I koko ong ia.

8:15  Komail kin kadeikada duen pali uduk, a sota meamen, me I kin kadeikada.

8:16  Ari so ma I kadeikada, ai kadeik pan melel, pwe I sota kin kelep, pwe ngai o Sam, me kadar ia dor.

8:17  A pil intingidier nan omail kapung, me kadede en aramas riamen me melel.

8:18  Ngai me kin kadede pein ngai o Sam, me kadar ia dor, kin kadede ia.

8:19  Irail ap indai ong i: Ia Sam omui? Iesus kotin sapeng: Komail sota asa ngai, pil sota Sam ai. Ma komail asa ia, komail pil pan asa Sam ai.

8:20  Masan pukat Iesus kotikida nan pera en moni, ni a kotin kaukawewedar nan im en kaudok o. A sota me koledi i, pwe a ansau saikenta leler.

8:21  Iesus pil kotin masani ong irail: I kokola, a komail pan rapakin ia o mela ni omail dip akan, a wasa, me I pan kola ia, komail sota pan kak ong.

8:22  Sus oko ap indada: A pan kamela pein i, pweki a inda: A wasa, me I pan kola ia, komail sota pan kak ong?

8:23  A kotin masani ong irail: Komail kisan men pa, a ngai kisan men poa. Komail kisan sappa et, a ngai kaidin kisan sappa et.

8:24  Iei me I indaki ong komail, komail pan mela ni omail dip akan, pwe ma komail sota kamelele ia, komail pan mela ni omail dip akan.

8:25  Irail ap indai ong i: Is koe? Iesus kotin masani ong irail: Me I indawei mas o, i eta.

8:26  Me toto I men padaki ong komail o kadeikada, ari so, me kadar ia do me melel. A I kin kasoia ong komail, me I rongadar re a.

8:27  Irail ari sasa, me a kotin kasoia ong irail duen Sam a.

8:28  Iesus ap kotin masani ong irail: Komail lao kauadar Nain aramas, komail ap pan asa, me ngai i, o me I sota wia meakot sang pein ngai. A duen Sam, me padaki ong ia er, iduen I kin kasoia wei.

8:29  Me kadar ia do, kin ieiang ia, a sota lokit ia la, pwe I kin potin wia, me a kupura mauki.

8:30  Ni a kotin masani mepukat, me toto ap posonla i.

8:31  Iesus ap kotin masani ong Sus oko, me poson i: Ma komail pan podidi ong ai padak, nan ai tounpadak melel komail.

8:32  O komail pan asala melel, o melel pan kamaio komail da.

8:33  Irail sapeng i: Wan Apraam kit, sota me se lidui sang mas kokodo. A iaduen, komui indada: Komail pan maioda?

8:34  Iesus kotin sapeng irail masani: Melel, melel I indai ong komail, meamen; me wiawia dip, i me ladun dip.

8:35  A ladu o sota pan mimieta nan im o, na eta pan mimieta.

8:36  Ari, ma Na pan kamaio komail da, komail pan maioda melel.

8:37  I asa, me wan Apraam komail, a komail kin rapaki, en kame ia la, pwe ai padak sota kin podidi ong komail.

8:38  Me I kilang ren Sam ai, iei me I inda wei, a komail kin wiawia, me komail rongada ren sam omail.

8:39  Irail sapeng indang i: Sam at Apraam. Iesus kotin masani ong irail: Ma komail nain Apraam, seri kan, komail pan wia duen en Apraam a wiawia kan.

8:40  Ari, met komail kin rapaki kame ia la, aramas amen, me kasoi ong komail melel, me I rongadar ren Kot, i me Apraam sota wiadar.

8:41  Komail kin kapwaiada wiawia kan en sam omail. Irail ap indang i: Kaidik kit ipwin nenek. Sam at me ta men Kot.

8:42  Iesus kotin masani ong irail: Ma Kot Sam omail, komail pan pok ong ia, pwe I kodo sang ren Kot, kaidik sang pein ngai, me I kokido, pwe i me kadar ia do.

8:43  Da me komail sota weweki ai padak? Pweki omail sota kak rong ai padak.

8:44  Komail tapi sang ren sam omail tewil, o inong en sam omail, me komail men wiada. Nan i men kamela men sang ni tapi o, o a sota dadaurata melel, pwe sota man melel mi re a, ni a lalal likam, a kin kida sang pein audepa, pwe i me likam men o sam en likam o.

8:45  A komail sota kamelele ia, pweki I padaki ong komail melel.

8:46  Is re omail, me kak indang ia, me dip ai mia? A ma I kasoi melel, menda komail so poson?

8:47  Men ren Kot kin rong en Kot a masan akan. Komail ari sota rong, pwe kaidin me ren Kot komail.

8:48  Sus oko sapeng indang i: Kaidik meid melel, koe men Samaria amen o tanwar en tewil.

8:49  Iesus kotin masani: Kaidik tanwar en tewil ngai, pwe I wauneki Sam ai, a komail kin kisang ia wau i.

8:50  I sota kin rapaki pein wau i, amen mia, me kin raparapaki o kadeikada.

8:51  Melel, melel I indai ong komail, meamen kapwaiada ai padak, sota pan mela kokolata.

8:52  Sus oko ap indai ong i: Se ap asaer, me koe tanwar en tewil. Apraam melar, pil saukop akan, a koe me inda: Meamen kapwaiada ai padak, sota pan mela kokolata,

8:53  Da, komui me lapa sang sam at Apraam, me matalar, pil saukop akan, me matalar? Is me komui pein wia kin uk?

8:54  Iesus kotin sapeng: Ma I pein kaka kin ia, ai kaka me mal. A Sam ai, me kaka kin ia, me komail kin inda: I atail Kot.

8:55  Komail ari kaikenta asa i, a I asa i, a ma I inda, me I sasa i, I pan me likam amen dueta komail. A I asa i o kapwaiada a masan akan.

8:56  Sam omail Apraam peren kida, me a pan kilang ai ran. I ari kilanger ap peren kidar,

8:57  Sus oko ap indang i: Par limeisok kaik dau po ’mui, a kom kilanger Apraam?

8:58  Iesus kotin masani ong irail: Melel, melel I indai ong komail, I mier mon Apraam.

8:59  Irail ap rik takai, pwen kasuk i, i ap kotin oki sang irail pein i, kotila sang nan im en kaudok o.

Chapter 9

9:1  IESUS lao kotin daulul, ap masani aramas amen me maskun sang a ipwidi.

9:2  Sapwilim a tounpadak kan ap idok re a potoan ong: Rapi, is me wiadar dip, i de sam a in a, pweki a ipwidi maskun?

9:3  Iesus kotin sapeng: Kaidik i me wiadar dip, pil kaidik in a de sam a, a pwe en Kot a wiawia kan en kasansal kida i.

9:4  I en kapwaiada wiawia kan en me kadar ia do arain ansaun ran, pwe pong pan kodo, i ansau solar amen kak dodok.

9:5  Arain ai mi sappa, ngai marain en sappa.

9:6  A lao kotin masanier met, ap likidi nani pwel, wiakida pwel madak iriski mas a.

9:7  Masani ong i: Kolang pil en Siloa (iet wewe: Pakadarado), opinok ia! I ari kola opinok, ap puredo kilangada wasa.

9:8  A men imp a kan, o me iang kilangadar, me a men poekipoek amen mas o, rap indada: Kaidik i, me wonon poekipoeki?

9:9  Akai me inda: I met; a akai me inda: Likamata i, a pein i indada: Ngai i.

9:10  Irail ari indang i: Iaduen por en mas om akan a kapad pasang?

9:11  A sapeng indada: Aramas amen me adaneki Iesus, me wiadar pwel madak, iriski mas ai, masani ong ia: Kolang pil en Siloa, opinok ia! I ari kola opinok, ap kilangada wasa.

9:12  Irail ap idok re a: Ia i? A sapeng: I sasa.

9:13  Irail ap kalualang ren Parisär akan me maskun mas.

9:14  Ari, ni ran en sapat, me Iesus kotin wiadar pwel, kapad pasang por en mas a kan.

9:15  Parisär akan pil idok duen me a kilang kida wasa. A sapeng irail: A ki ong pwel ni por en mas ai, i ap opinok, ngai ari kilangada wasa.

9:16  Parisär kai ap inda: Aramas men et kaidik men ren Kot, aki a sota apwali ran en sapat. Akai indada: Daduen, aramas dipan amen kak wia kilel pukat? Irail ari liak toror pasang.

9:17  Irail pil kalelapok ren me maskun o: Da me koe lamelame duen i? Pwe a kapad pasang mas om? A sapeng: Saukop amen i.

9:18  Men Sus oko ap sota kamelele, me a ipwiki wei maskun, ap kilangada wasa. Irail lao ekeredo sam o in en me kilangada wasa.

9:19  Irail idok re ’ra: Nouma ol men et, me komail indinda, me a ipwiki wei maskun? Iaduen a ngarada wasa ansau wet?

9:20  Sam a in a sapeng ir indada: Se asa, me nait ol et, me ipwiki wei maskun.

9:21  A se sasa duen a ngarada wasa o me kapad pasang por en mas a. A malar, kainoma re a, a pan pein sakaraki i.

9:22  Sam o in a inda mepukat, pweki ar masak Sus oko. Pwe Sus oko inauki pena, ma meamen pan kadede me i Kristus a pan lokidokila sang nan sinakoke.

9:23  I me sam o in a indada kida: A malar, kainoma re a.

9:24  Irail ap eker aramas maskun kariapak indai ong i: Wauneki Kot, se asa, me aramas men et me dipan amen,

9:25  A sapeng ir indada: I sasa, ma i me dipan amen de so. I eta me i asa, me ngai me maskun mas o, i ap potoan ngaradar wasa.

9:26  Irail ap pil idok re a: Da me a wiai ong uk? Iaduen a kapad pasang mas om?

9:27  A sapeng irail: I indai ong komail er, a komail sota rong? Da me komail pil men rongki? Komail pil pan a tounpadak ala?

9:28  Irail kaurureki indada: A tounpadak amen koe, a kit tounpadak en Moses akan.

9:29  Kit asa, me Kot masani ong Moses. A lap o se sasa, wasa a ko sang ia.

9:30  Aramas o sapeng indang irail: Meid kapuriamui! I me kapad pasang mas ai kat, a komail sasa, wasa a koti sang ia.

9:31  Kitail asa, me Kot sota kin mangi me dipan akan. A meamen, me lan Kot, o dadaurata kupur a, iei me a kin kotin mangi.

9:32  Sang mas kokodo sota me rongadar, me meamen kapad pasang mas en me ipwiki wei maskun.

9:33  Ma men et sota me ren Kot, a sota pan kak wia meakot.

9:34  Irail sapeng indang i: Koe me ipwiki wei dip akan a koe ap padaki ong kit? Irail ari kasela i.

9:35  Iesus lao kotin mangidar, me re kasela i, a lao masani i, ap kotin masani ong i: Koe kin poson Nain Kot?

9:36  A sapeng potoan ong: Maing, is i pwe i en poson i?

9:37  Iesus kotin masani ong i: Koe me kilang i. A iet i, me kasokasoi ong uk.

9:38  A sapeng i: Maing, i posonlar, i ari kaudok ong i.

9:39  Iesus kotin masani: I kodon kadeik nan sappa et, pwe me so kilang wasa, en kilangada, a me kilang wasa, en maskunla.

9:40  A Parisär akan, me mi re a, rongadar a masan pukat, re ap peidok re a: Da, kit me pil maskun?

9:41  Iesus kotin masani ong irail: Ma komail maskun, sota pan dip omail. A komail indada: Se kilekilang wasa, iei me omail dip pan mimietaki.

Chapter 10

10:1  MELEL, melel I indai ong komail, me so weid nan wanim, pedelong ong nan deun sip, a dauda wasa toror, iei men lipirap o men kuli.

10:2  A me kin pedelong pan wanim, iei silepan sip o.

10:3  Iei me silepan wanim o kin ritingada mo a; a sip akan kin rong ngil a; i me ekereki na sip akan ad arail, kare irail wei.

10:4  A kin kapedoi na sip akan, ap tiong mo ’rail, o sip akan kin idedauen i, pwe re anlar ngil a.

10:5  A re sota pan idauen, me re san, pwe re pan tang sang, pwe re san ngil arail.

10:6  Iesus kotin masani ong irail karaseras pot et, a irail sota weweki mepukat, me a kotin masani ong irail.

10:7  Iesus pil kotin masani ong irail: Melel, melel I indai ong komail: Ngai wanim en sip akan.

10:8  Karos, me pwarador mo i, iei lipirap o men kuli, o sip akan sota kin rong irail.

10:9  Ngai wanim o, a meamen pedelong re i, pan kamaurela o diar manga purepure.

10:10  Lipirap kin kodon pirapela, o kamela, o kaokaoe, a ngai kodo, pwe irail en ale maur, kakairida kokolata.

10:11  Ngai silepa mau; a silepa mau kin tonmeteki ong na sip akan maur i.

10:12  A me kin pwaipwai o me sota udan silepa, o me kaidin udan na sip oko, iei me ngingar kidi en wel kokodo, ap kasela sip oko, tangdaui, a kidi en wel saikidi sip oko, kamueit ir pasang.

10:13  Me pwaipwai o kin tangdaui, aki a pwaipwai, o sota insenoki sip oko.

10:14  Ngai silepa mau, o I asa nai kan, o nai kan pil asa ia.

10:15  Duen Sam o asa ia, iduen I asa Sam, o I tonmeteki ong sip akan maur i.

10:16  A pil akai nai sip, me so kisan nan kel wet, mepuko I pil pan wado, o re pan rong ngil ai, o a pan pwin taieu o silepa me ta men,

10:17  Iei me Sam pok ong ia, pwe I kidi maur i, pwe I en pur ong ale.

10:18  Sota me ki sang ia, pwe pein ngai kidi. I manaman ong kidi maur i, I pil manaman ong kapure dong ia. Kusoned pot et I aleer sang ren Sam ai.

10:19  Iei me Sus oko ap pil liak toror pasang pweki masan pukat.

10:20  Me toto re ’rail indada: A tanwar en tewil o iakalar. Menda komail rong i?

10:21  Akai me indada: Kaidik padak en tanwar en tewil pukat, da, tewil pan kak kapad pasang mas en me maskun amen?

10:22  A ran en isimas en im en kaudok wiaui nan Ierusalem, i ansaun kapau.

10:23  A Iesus kotikot sili nan im en kaudok, nan palang en Salomo.

10:24  Sus oko kapili pena i indang i: Arai da komui pan okioki sang kit? Ma komui Kristus, en kadede ong kit sansal!

10:25  Iesus kotin masani ong irail: I indai ong komail er, a komail sota poson dodok kan, me I wiadar ni mar en Sam ai, iei me kin kadede ia.

10:26  A komail sota poson, pwe komail kaidik kisan nai sip, duen me I indai ong komail er.

10:27  Nai sip oko kin rong ngil ai, a I asa irail a re kin idauen ia.

10:28  A I ki ong irail maur soutuk, a re sota pan salongala kokolata, o sota, me pan ki sang irail nan pa i.

10:29  Sam ai, me ki ong ia irail, me lapa sang meakaros, o sota me pan kak ki sang irail ni lim en Sam ai.

10:30  Ngai o Sam me ta men.

10:31  Sus oko ap pil rik takai, pwen kasuk i.

10:32  Iesus kotin sapeng irail: Dodok mau toto, me I kasale ong komail er sang ren Sam o, a menia dodok ren mepukat, me komail kate kin ia?

10:33  Sus oko ap sapeng i: Kaidik dodok mau eu, me se kate kin komui, a pweki lalaue, o pweki aramas amen koe, me wia kin pein uk Kot,

10:34  Iesus kotin sapeng irail: A so intingidier nan omail kapung: I indada, komail kot akan,

10:35  Ari, ma a kin wia kin ir kot, me aleer masan en Kot, pwe kisin likau kan sota kak sapungala;

10:36  A komail kin inda kin i, me Sam a kasarauialar, o kadara dong sappa, koe lalaue, pweki ai indada: Sapwilim en Kot ngai?

10:37  Ma I so wiawia dodok kan en Sam ai, komail der kamelele ia.

10:38  A ma I kin wiawia, komail en posonki dodok kan, ma komail sota poson ia, pwe komail en asa o poson, me Sam ai podidi ong ia, o ngai podidi ong i.

10:39  Irail ap pil song saikidi i. I ari piti sang ni pa ’rail.

10:40  O kotin purelang palilan Iordan, wasa Ioanes kin wia paptais ia mas; I ari kotikot wasa o.

10:41  A me toto pokon dong i indada: Ioanes sota wiadar kilel eu; a melel eta karos, me Ioanes masanieki men et.

10:42  A me toto posonla i wasa o.

Chapter 11

11:1  OL amen somaudar ad a Lasarus, men Petanien, kanim en Maria o ri a li Marta.

11:2  Iei Maria, me keieki potik Kaun o, o limwieki a pwilipeipei aluwilu a, me ri a ol Lasarus somaudar.

11:3  Ri a li ko ari kadar wong i kaireki wong i: Maing, kotin mangi, me re pok ong me somaudar.

11:4  Iesus lao mangi, ap kotin masani: Kaidik somau en mela eu met, a pweki lingan en Kot, pwe Nain Kot en kalingana kila.

11:5  Iesus kotin kupura Marta, o ri a li, o Lasarus.

11:6  A lao kotin mangier, me a somaudar, i ari kotikoteta wasa o pong ria pong.

11:7  Ap kotin masani ong sapwilim a tounpadak kan: Kitail pan purelang Iudäa.

11:8  Sapwilim a tounpadak kan potoan ong i: Rapi, Sus oko apton men kasuk ir, a re pan kotin purelang ia?

11:9  Iesus kotin masani: So auer eisokriau ni ran eu? Meamen alialu ni ran, sota pan dipikelekel, aki a ngingar marain en sappa.

11:10  A meamen alialu ni pong, a pan dipikelekel, aki marain sota mi re a.

11:11  A kotin kasoiada mepukat, ap masani ong irail: Kompoke patail Lasarus mairelar, a I kokolan kapirida i.

11:12  A sapwilim a tounpadak kan indang i: Maing, ma a mairelar, a pan maureda.

11:13  Ari, Iesus kotin masanieda duen a melar, a irail kiki ong, me a masanieda duen a mair en kamol.

11:14  Iesus ap sansal masani ong irail: Lasarus melar,

11:15  A I peren kida, me I sota mi wasa o pweki komail, pwe komail en posonla. Ari, kitail en koko wei re a!

11:16  Tomas, me pil ad a Didimus, ap indai ong warok tei kan: Kitail en pil kokola, pwen iang i mela.

11:17  Iesus lao kotido, ap kotin diarada, me a mi nan sousou pong pa pong.

11:18  Petanien me koren iong Ierusalem impan mail riau.

11:19  A Sus oko me toto ko dong Marta o Maria, pwen kamait ira la pweki ri ara ol o.

11:20  Marta lao rongadar, me Iesus kotido, ap koieila tu ong i. A Maria momod nan im o.

11:21  Marta ap potoan ong Iesus: Maing, ma re kotikot met, ri ai ol sota pan mela.

11:22  Ari so, i asa meakot re pan kotin poeki ren Kot, Kot pan kotiki ong ir.

11:23  Iesus kotin masani ong i: Ri om ol pan maureda.

11:24  Marta potoan ong i: I asa, me a pan maureda ni ias en ni ran nik o.

11:25  Iesus kotin masani ong i: Ngai kamaur o maur, me poson ia, pan memaureta pil murin a mela.

11:26  A meamen me maur o poson ia, sota pan mela kokolata; koe kamelele mepukat?

11:27  A potoan ong i: Ei Maing, i poson, me ir me Kristus Sapwilim en Kot, me udan pwara dong sappa.

11:28  A lao indada met, ap koieila ren Maria ri a li, monginki ong i: Saunpadak kotidor kainoma uk.

11:29  A lao rongadar, ap uda, madang wei re a,

11:30  A Iesus saikenta lel ong kanim o, pwe a kotikoteta wasa Marta tu ong i ia.

11:31  Sus oko, me mi re a nan im o, pwen kamait i ala, lao kilangada, me Maria madang uda tang wei, rap idauenla i, indinda: A pan ko ong ni sousou, pwen sangesang ia.

11:32  Maria lao lel wasa o, o kilang i, ap poridi ong ni aluwilu a indang i: Maing, ma re kotikot met, ri ai ol sota pan mela.

11:33  Iesus lao masani i sangesang, o Sus oko, me iang i kokodo pil sangesang, ap kupurola,

11:34  Masani: Komail pwilikidi ia i? Irail potoan ong i: Maing, kotido masani.

11:35  Iesus kotin tontonir.

11:36  Sus oko ap inda: Kilang duen a pok ong i!

11:37  A akai ir me indada: A so kak pan men et me kapad pasang mas en me maskun o, me ol men et ender mela?

11:38  Iesus pil kupurola koti dong sousou o. A por o ulong nan kisin dol o takai eu mi poa.

11:39  Iesus kotin masani: Katapure wei takai en! A Marta, en me melar ri a li, indada: Maing, a matalar, pwe a mi met pong pa pong.

11:40  Iesus kotin masani ong i: I so indai ong uk, ma koe poson, koe pan kilangada lingan en Kot.

11:41  Irail ap katapure sang takai o. A Iesus kotin masanda masani: Sam, I danke komui, me komui mangi ia er.

11:42  A i asa, me komui kin mangi ia ansau karos, a pweki pokon o, me u sili, I indaki mepukat, pwe irail en poson, me komui, me kadar ia do.

11:43  A lao kotin masani met, ap kapitie laudeta masani: Lasarus, koieido!

11:44  A me melar o ap pedoido, likau en sousou kidim pena na o pa kan, o mas a me pirapinki pena lim en puto. A Iesus kotin masani ong irail: Lapwada kapitila i!

11:45  Men Sus toto, me ko dong Maria, o kilanger, me Iesus kotin wiadar, posonla i.

11:46  A akai ir kowei ren Parisär oko, kaire kin irail me Iesus kotin wiadar.

11:47  Samero lapalap o Parisär akan ap pokon pena kapung indada: Da me kitail en wiada? Pwe aramas men et kin wia kilel toto.

11:48  Ma kitail sota pan mokidi ong i, karos pan posonla i, o men Rom pan kodo, ki sang kitail wei o atail kainok.

11:49  A amen irail ad a Kaipas, me samoro lapalap ni par o, indang irail: Komail meid so lolekong.

11:50  O sota lamelame, me a mau ong komail, aramas ta men en kam kila aramas akan, pwe kainok pokon ender lokidokila.

11:51  A kaidik sang pein i, me a katitiki met, a i me samero lapalap ni par o, i ari kopada, me Iesus pan kamataki kainok o.

11:52  A kaidik kainok eta, pwe a pil pan kapokon pena seri en Kot akan, me muei pasang nin sap akan.

11:53  Sang ni ran o irail raparapaki en kamatala i.

11:54  Iesus ap solar kotikot sili sansal ren Sus oko, pwe a kotilang eu sap impan sap tan ni kanim eu ad a Epren, o kotikot ia iang sapwilim a tounpadak kan.

11:55  A pasa en Sus oko me korendor, o me toto koeie sang nan sap karos, kodalang Ierusalem mon pasa, pwen kamaui pein irail.

11:56  Irail ari raparapaki Iesus idedok nan pung arail, ni ar pokopokon nan im en kaudok: Da me komail lamelame, a sota pan ko dong kamadip o?

11:57  A samero lapalap o Parisär akan wiadar kusoned eu, meamen me asa wasa a kot ia, i en kasaleda, pwe ren saikidi i.

Chapter 12

12:1  PONG wonu pong mon pasa Iesus kotilang Petanien, wasa Lasarus me melar, kauson ia, me Iesus kotin kamauredar sang ren me melar akan.

12:2  Irail ari kaonopada konot, pwe a en kotin kasipong re ’rail; Marta papa, a Lasarus amen irail me iang I kotikot ni tepel.

12:3  Maria ap wado paun en men kei eu, udan pil en narde, me kasampwalia, keiedi ong ni aluwilu en Iesus o limwieki a pwilipeipei aluwilu a; a im o me dir kila po en men kei.

12:4  Iudas Iskariot, amen ren sapwilim a tounpadak kan, nain Simon, me pan pangala i, ap indada:

12:5  Da men kei wet sota netilar, kareda denar silepuki, ap nek ong samama kan?

12:6  Kaidik a pok ong me samama kan, me a idokki met, a pweki lipirap amen i, o saunkanikid en moni, wewa moni, me aramas kidar.

12:7  Iesus ap kotin masani: Der mokidi ong i! Pwe a kaonopadang ran en ai pan saredi.

12:8  Pwe me samma kan kin potopot re omail, a ngai sota sota kin potopot re omail.

12:9  Sus oko me toto ari asaer, me a kot wasa o, irail ari kodo pweki Iesus o pil, pwen kilang Lasarus, me a kotin kamauredar sang ren me melar akan.

12:10  Samero lapalap akan pil raparapaki, en pil kamela Lasarus.

12:11  Pwe Sus oko toto kola o poson Iesus pweki i.

12:12  Mandan ran o aramas toto, me toun iang kamadip o, lao rong, me Iesus pan kotilang Ierusalem,

12:13  Ap paledi ran tuka kan o koieila tu ong i, ngisingisida: Osiana! Meid iasanai me kotido ni mar en Kaun o Nanmarki en Israel!

12:14  A Iesus lao kotin masani esel pul amen, ap kaipokedi poa, duen a intingidier:

12:15  Der masak nain Sion seripein! Kilang om Nanmarki kotido, kaipokedi pon nain esel amen.

12:16  A sapwilim a tounpadak kan sota madang weweki mepukat. A Iesus lao linganlar, irail ap tamanda mepukat, me indingidier duen i, o me ir wiai ong i mepukat.

12:17  A pokon o, me iang i ni a kotin molipei Lasarus sang nan sousou o, ni a kotin kamauredar i sang ren me melar akan, kadede i!

12:18  Iei me aramas kokiieilang i, pwe irail rongadar, me a kotin wiadar kilel wet.

12:19  Parisär oko ap indada nan pung ar: Komail kilang, me komail sota kak wia meakot. Kilang, toun sap akan idauenla i.

12:20  Akai men Krik iang irail, me koda dong kamadip o, pwen kaudok.

12:21  Mepukat ko dong Pilipus, men Petsaida en Kaliläa, poeki re a indada: Maing, se men udial Iesus.

12:22  Pilipus ap kodo kaireki Andreas, a Andreas o Pilipus kaireki Iesus.

12:23  A Iesus kotin sapeng irail masani: Ansau leler, me Nain aramas pan kalinganla.

12:24  Melel, melel I indai ong komail, ma wan korn so moredi ong nan pwel o mela, a pan kelepata, a ma a pan mela, a pan kaparapar wa toto.

12:25  Me pokepoke maur i, pan salongala; a me tounmeteki maur i pali pa, pan diarada maur soutuk.

12:26  Meamen papa ia, i en idauen ia! A wasa I mi ia, i wasa me papa ia, pan pil mi ia. Ma meamen papa ia, i me Sam o pan kasapwilada.

12:27  I ap lol olar, a da me I en inda? Sam kamaio wei sang ia ansau wet, ari so, i me I koki dong ansau wet.

12:28  Sam, kalinganada mar omui! Ngil eu ap peidido sang nanlang indada: I kalinganadaer, o I pan pil kalinganada.

12:29  A aramas akan me u sili me rongadar, indada: A nansapwe. A akai indada: Tounlang amen me kasoia ong i.

12:30  Iesus kotin sapeng masani: Kaidik pweki ngai, me ngil wet wiauikier a pweki komail.

12:31  Met ansau en kadeik en sappa wet. Met kaun en sappa et pan lokidokila.

12:32  A ngai lao langada sang sappa, I pan kainonga dong ia karos.

12:33  I me a kotin kokop kidar duen a pan kamatala.

12:34  Aramas akan sapeng i: Se rongadar sang nan kapung o, me Kristus pan potopoteta, a iaduen, kom kasoiada, me Nain aramas en kakauda. Is Nain aramas men et?

12:35  Iesus ap kotin masani ong irail: Marain mi re omail ansau kis. Weweid, ni ansau marain mi re omail, pwe rotorot ender kono komail edi. Pwe me kin weweid nan rotorot, kin sasa wasa, me a ko ong ia.

12:36  Poson marain, ni a mimi re omail, pwe komail en seri en marainla. Iesus kotin masani mepukat, ap kotila karukila pein i sang irail.

12:37  A i me kotin wiadar kilel toto mo ’rail, ari so, irail sota poson i,

12:38  Pwe kokop en saukop Iesaia en pwaida, me a masani: Kaun o, is me poson at kasoi? O is me lim en Kaun kasansal ong?

12:39  Irail ari sota kak poson, pwe Iesaia pil katitiki:

12:40  A kotin karotongala mas arail o kakekaluakala mongiong arail, pwe ren so kilangki mas arail, o asaki mongiong arail, o wukila, o I en kakel ir ada.

12:41  Mepukat Iesaia masanier, ni a kilanger a lingan o katitiki i.

12:42  Ari ren saumas lapalap me toto, me poson i, a pweki Parisär akan re sota ponasa i, pwe ren der lokidokila sang nan sinakoke.

12:43  Pwe re mauki konekon ren aramas akan mon konekon ren Kot.

12:44  Iesus kotin kapitie laudeda masani: Me poson ia, kaidin ngai, me a kin poson, a me kadar ia dor.

12:45  A me kilang ia, a pil kilang, me kadar ia dor.

12:46  I kodon kamaraini sappa, pwe amen amen me poson ia, ender mimieta nan rotorot.

12:47  A ma meamen rong ai padak kan, ap sota apapwali, I sota kin kadeikada i, pwe I sota kodon kadeikada sappa, a pwen kamaurida sappa.

12:48  Me kase ia la o so oke ai padak kan, nan kadeikapa mia: Ai padak, me I kida, i me pan kadeikada i ni ran nik o.

12:49  Pwe I sota padaki wei sang pein ngai. A Sam, me kadar ia dor, i me ki ong ia er kusoned eu, me I en inda o padakieki.

12:50  O I asa, maur soutuk a kusoned o. Ari, karos me I padaki wei, I kin padaki duen Sam masani ong ia.

Chapter 13

13:1  MON kamadip en pasa Iesus lao kotin mangier, me ansaun a pan kotila sang sappa, kotila ren Sam a korendor, duen a kotin kupuramauki sapwilim a kan, me mi sappa, iduen a kotin kupura irail lel imwi,

13:2  Ni ar kotin kasipong ansau me tewil ki ong er nan mongiong en Iudas Iskariot nain Simon, en pangala i.

13:3  Iesus lao kotin mangier, me Sam kotiki onger ni lim a kan meakaros, o me a kotido sang ren Kot, o me a pan kotila ren Kot,

13:4  Ap kotida sang ni kasipong, kotikidi sapwilim a likau en liki ap ale dauel eu pirakidi pein i,

13:5  A wutoki pil nan dal, ap pikikidi widen nä en sapwilim a tounpadak kan, o limwieki dauel, me a piraki pena.

13:6  A lao kotin lel Simon Petrus, a ap potoan ong i: Maing, re pan kotin widen nä i kat?

13:7  Iesus kotin sapeng masani ong i: Koe kin sasa, me I wia metet, a mur koe pan asala.

13:8  Petrus potoan ong i: Re sota pan kotin widen nä i kat kokolata. Iesus kotin sapeng i: Ma I sota widen uk, nan sota pwais om re i.

13:9  Simon Petrus ap potoan ong i: Maing, kaidin nä eta, a pil pa o mong ai!

13:10  Iesus kotin masani ong i: Me duduer, solar mau ong omiom o opinok, pwe a makelekeler, a nä eta, me pan wideut; komail me makelekel, a kaidin karos.

13:11  Pwe a kotin mangi, me pan pangala i; i me a kotin masanieki: Kaidin komail karos me makelelkel.

13:12  A lao kotin widener nä ar akan, a kotin pur ong sapwilim a likau en liki. A pil kaipokedi ni tepel masani ong irail: Komail asaer me I wiai ong komail er?

13:13  Komail kin adane kin ia Saunpadak o Kaun, ari me pung, pwe iei ngai.

13:14  Ari, ma ngai, Kaun o Saunpadak widen nä omail, komail ari pil widen nä omail pena.

13:15  Pwe I ki ong komail er sansal mau eu, pwe komail en kaalemongi ia, o wia, duen I wiai ong komail.

13:16  Melel, melel I indai ong komail, ladu me sota laude sang a saumas, de me pakadarado me sota laude sang me kadarado i.

13:17  Ma komail asa mepukat, komail meid pai, ma komail wiada.

13:18  Kaidin komail karos, me I indinda. I asa, me I piladar. A pwe kisin likau en pwaida: Me iang ia kangkang prot, kin tiaki ia di.

13:19  Ansau wet I indai ong komail mepukat mon a pan wiaui, pwe a lao wiaui, komail en poson, me ngai i.

13:20  Melel, melel I indai ong komail, meamen me kasamo, me I kadar wei, kin kasamo ia, a me kin kasamo ia, kin kasamo, me kadar ia do.

13:21  Iesus lao kotin masani wei mepukat, ap kupurola kadede masani: Melel, melel I indai ong komail, amen komail pan pang ia la.

13:22  Sapwilim a tounpadak kan ap soupei pena o sasa, is i, me a kotin masanieki.

13:23  A amen sapwilim a tounpadak kan, me Iesus kotin kupura mauki, momod ni tepel impan Iesus.

13:24  Simon Petrus ap olol ong i, en idok, is i me a kotin masani.

13:25  I ap kai ong pan kupur en Iesus potoan ong i: Maing, is i?

13:26  Iesus kotin sapeng: Iei i, me I pan ki ong kisin prot i lao kaduedier nan dal o. A lao kotin kaduedier kisin prot o, a kotiki ong Iudas Iskariot nain Simon.

13:27  A lao tungole kisin prot o, Satan ap tilong lole. Iesus ap kotin masani ong i: Wiada madang, me koe pan wiada!

13:28  A sota, ren me momod ni tepel, asa, da me a kotin masanieki ong i met.

13:29  Pwe akai kiki ong, me Iesus kotin masani ong i: Netie dong kitail kapwa en kamadip o, de a en ki ong me samama ko meakot, pwe a kin wewa ed en moni.

13:30  A lao tungoler kisin prot, ap madang pedoi wei, a wasa pongier.

13:31  A lao pedoi sanger, Iesus ap kotin masani: Nain aramas ari linganlar, o Kot me lingana kilar i.

13:32  Ma Kot lingan kilar i, Kot ap pan pil kalinganaki pein i. A pan madang kalinganada i.

13:33  Seri ko, I pan ieiang komail ansau kis, komail pan rapa kin ia, a duen I indai ong Sus akan: Wasa me I pan kola ia, komail sota pan kak ong. Iei duen I pil indai ong komail ansau wet.

13:34  I ki ong komail kusoned kap eu, pwe komail en poke pena, duen I pok ong komail er, iei duen komail en poke pena!

13:35  Pwe i me karos pan asaki, me komail ai tounpadak kan, ma komail limpok pena.

13:36  Simon Petrus potoan ong i: Maing, re pan kotila ia? Iesus kotin sapeng i: Wasa me I pan kola ia, koe sota kak idauen ia ansau wet, a koe pan idauen ia eu ran.

13:37  Petrus potoan ong i: Maing, da me i so kak idauen ir ki met? I pan kasela maur i pweki komui.

13:38  Iesus kotin masani ong i: Koe pan kasela maur om pweki ngai? Melel, melel I indai ong uk, mon malek pan kakorot, koe pan kamam kin ia pan me sili pak.

Chapter 14

14:1  MONGIONG omail der padau! Komail kin poson Kot; en pil poson ia!

14:2  Nan tanpas en Sam ai pera toto mia. Ma so I pan indai ong komail. Pwe I kokolan kaonopada deu ’mail,

14:3  Ma I kola kaonopada deu ’mail, I pan puredo, uk komail dong ia. Pwe wasa I kin mi ia, komail en pil mi ia.

14:4  A komail asa, wasa I kola ia, o komail asa al o.

14:5  Tomas potoan ong i: Maing, se sasa, wasa re pan kotila ia, o pala se pan asa al o?

14:6  Iesus kotin masani ong i: Ngai me al, o melel, o maur, sota me kak kodong Sam, ma so ngai.

14:7  Ma komail asa ia er, komail pil asa Sam ai. A komail asa i sang ansau wet kokolata o kilangadar i.

14:8  Pilipus potoan ong i: Maing, kotin kasale dong kit Sam, kit ap pan nenenla!

14:9  Iesus kotin masani ong i: Pilipus, I ieiang komail er ansau warai, a koe so wewe kin ia? Me kilang ia er i me kilangadar Sam. A iaduen om indada: Kasale ong kit Sam?

14:10  Koe so kamelele, me ngai podidi ong Sam o Sam podidi ong ia? A padak kan, me I ki ong komail, kaidin pein ai, a en Sam, me mi re i, i me kin wiawia dodok pukat.

14:11  Kamelele ia, ngai podidi ong Sam, o Sam kin podidi ong ia; a ma so, komail kamelele ia pweki ai wiawia kan.

14:12  Melel, melel I indai ong komail, meamen poson ia, a pil pan wiawia dodok kan me I kin wiawia, o a pan wiada, me lapa sang mepukat, pweki I kokola ren Sam.

14:13  A meakot komail pan poeki ni ad ai, iei me I pan wia, pwe Sam en lingana kida Na.

14:14  Ma komail pan poeki maekot ni ad ai, I pan wia.

14:15  Ma komail pok ong ia, en kapwaiada ai kusoned akan!

14:16  A I pan poeki ren Sam, a i me pan porone dong komail amen saunkamait, pwen mi re omail kokolata.

14:17  Ngen en melel, me sappa so kak ale, pwe re sota kilang i pil sota asa i. A komail asa i pwe a kin mi re omail, o a pan mi lol omail.

14:18  I sota pan mueid ong komail, en sapoupou, I pan ko dong komail.

14:19  Ansau kis sappa solar pan kilang ia, a komail kin kilang ia. Ngai me maur, o i me komail pil pan memaureki.

14:20  Ni ran o komail pan asa, me ngai podidi ong Sam ai o komail podidi ong ia o ngai ong komail.

14:21  Me aleer ai kusoned akan o kapwaiada, iei me kin pok ong ia, a me kin pok ong ia, kin konekon ren Sam ai, a I pan pok ong i, o kasansale ong i pein ngai.

14:22  Iudas, kaidik Iskariot, potoan ong i: Maing, iaduen re pan kotin kasansale ong kit pein ir, a ong sappa so?

14:23  Iesus kotin sapeng masani ong i: Ma meamen pok ong ia, a pan kapwaiada ai padak kan, a Sam ai pan pok ong i, a se pan ko ong re a kaukauson re a.

14:24  A me so pok ong ia, sota kin kapwaiada ai padak kan. A kaidik ai padak, me komail kin rong, a en Sam o, me kadar ia dor.

14:25  Mepukat I padaki ong komail er ni ai mi re omail.

14:26  A saunkamait, Ngen saraui, me Sam o pan poronedo ni ad ai, i me pan kawewe ong komail meakaros o kataman kin komail me I padaki ong komail er.

14:27  I mueid ong komail popol. Ai popol me I ki ong komail, kaidin duen sappa kikida, me I ki ong komail. Mongiong omail der patau, pil der masak.

14:28  Komail rongadar, me I indai ong komail er, I koko wei o pan pure dong komail. Ma komail pok ong ia, komail pan perenki, me I kokola ren Sam, pwe Sam o me lapa sang ia.

14:29  Ansau wet I indai ong komail er mepukat, mon a pan wiaui, pwe a lao wiaui, komail en poson.

14:30  I solar pan kasokasoi toto ong komail, pwe kaun en sappa o kokodo, a sota a meakot re i.

14:31  A pwe sappa en asa, me I kin pok ong Sam, o me I kin wiawia duen me Sam masani ong ia er, kitail en uda kokowei!

Chapter 15

15:1  NGAI wain melel pot, a Sam ai saumat.

15:2  Ra karos, me podidi ong ia, ap sota wa, a kin lepuke sang, a karos me wa, a kin koko, pwen wa totola.

15:3  Komail ari makelekel kidar padak, me I ki ong komail er.

15:4  Komail podidi ong ia o ngai ong komail. Ra sota kak pein wa, ma a so podidi ong wain, iduen komail, ma komail so podidi ong ia.

15:5  Ngai wain pot, a ra kan komail. Me podidi ong ia o ngai ong i, iei i, me kin wawa toto; pwe komail sota kak wia meakot ma sota ngai.

15:6  Meamen so podidi ong ia, pan lokidokila dueta ra, ap mongedi; aramas kin wasa ir pena, kase ir ala nani iai, ir ari pan rongala.

15:7  Ma komail podidi ong ia, o ai padak kan podidi ong komail, komail pan poeki meakot, me komail mauki, a a pan pwai ong komail.

15:8  Nan i me Sam ai kalingana kila, omail wawa toto, o komail pan wiala ai tounpadak kan.

15:9  Due Sam o pok ong ia er, iduen I pil pok ong komail; komail podidi ong ai limpok!

15:10  Ma komail pan peiki ong ai kusoned akan, komail pan podidi ong ai limpok, duen I kin peiki ong en Sam ai kusoned akan, o podidi ong a limpok.

15:11  Mepukat I padaki ong komail er, pwe ai peren en podidi ong komail, o omail peren en unsokela.

15:12  Nan iet ai kusoned: Komail en poke pena, duen i pok ong komail er.

15:13  Sota me a limpok laude sang met, me pan mueid kila maur i kompokepa kan.

15:14  Komail me kompokepa i, ma komail wiawia, me I indai ong komail.

15:15  I solar kaadaneki komail ladu, pwe ladu sasa, me a saumas kin wia. A I kaadane kin komail kompokepa i kan, aki I kasale ong komail er karos, me I rongadar sang ren Sam ai.

15:16  Kaidin komail me pil ia dar, a ngai me piladar komail o kilele ong komail, en kokowei kapareda wa, o omail wa en mimieta, pwe karos, me komail pan poeki ren Sam ni ad ai, a pan kotiki ong komail.

15:17  A iet me I panaui kin komail, komail en poke pena!

15:18  Ma sappa kailong kin komail, komail en asa, me a kailong kin ia mo omail.

15:19  Ma kisan sappa komail, sappa pan pok ong me a; a komail kaidin kisan sappa, pwe I pil komail dar sang sappa, iei me sappa kailong kin komail.

15:20  Tamatamanda kasoi o, me I kasoia ong komail er: Ladu me sota laude sang a saumas ma re kame ia er, re pil pan kame komail. A ma irail pan kapwaiada ai padak, re pil pan kapwaiada omail.

15:21  A mepukat karos re pan wiai ong komail pweki ad ai, aki ar so asa me kadar ia dor.

15:22  Ma I so kodo o padaki ong irail, nan sota pan dip arail, a met sota peikid pan dip arail.

15:23  Me kailong kin ia, pil kin kailongki Sam ai.

15:24  Ma I so wiadar dodok kan nan pung arail, me sota amen wiadar, nan sota pan dip arail. A met irail kilanger o kailong kin ia er o pil Sam ai.

15:25  A mepukat wiauier pwe masan o en pwaida, me intingidier nan arail kapung: Irail kailong kin ia, a sota karepa.

15:26  A saunkamait lao kodoer, me I pan kadarado sang ren Sam, iei Ngen en melel, me kin kodo sang ren Sam, i me pan kadede ngai.

15:27  A komail pil pan kadede, pwe komail iang ia er sang ni tapi o.

Chapter 16

16:1  MEPUKAT I padaki ong komail er pwe komail der makarada.

16:2  Irail pan kase komail la sang nan sinakoke, a eu ansau kokodo, meamen kame komail la, pan kiki ong, me a papa Kot.

16:3  A mepukat re pan wiai ong komail, pweki ar sasa Sam o ngai.

16:4  A mepukat I padaki ong komail er, pwe ansau lao leler, komail en tamanda, me I indai ong komail er. A mepukat I sota indai ong komail er ni tapi o, pwe I ieiang komail.

16:5  A met I kola ren me kadar ia do, a sota amen komail kin idok re i: Ia wasa kom pan kola ia?

16:6  A pweki ai padaki ong komail mepukat, mongiong omail me dir en insensued.

16:7  Ari so, I kasoi ong komail melel, me mau ong komail I en kola. Pwe ma I so kola saunkamait sota pan pwara dong komail. A ma I kola, I pan kadara dong komail i.

16:8  A i lao kodo, a pan kasaui ong sappa dip, o pung, o kadeik.

16:9  Duen dip, pweki irail sota poson ia.

16:10  Duen pung, pweki I kola ren Sam, o komail solar pan kilang ia.

16:11  A duen kadeik o, pweki kaun en sappa wet me pakadeikadar.

16:12  I men padaki ong komail me toto, a met komail sota kak ong.

16:13  A Ngen en melel lao pwarado, a pan padaki ong komail melel akan karos. Pwe a sota pan padaki wei sang nan pein i, a meakot a pan rong, i me a pan indada. O a pan kasale ong komail meakan me pan wiaui.

16:14  A pan kalingana ia da, pwe a pan ale me ai o kasale ong komail.

16:15  Sapwilim en Sam meakaros, iei me pil udan ai. I me I indakier, me a pan ale me ai o kasale ong komail.

16:16  Murin ansau kis komail solar pan kilang ia; o pil murin ansau kis, a komail pan kilang ia, pwe I kola ren Sam.

16:17  Sapwilim a tounpadak kai ap indada nan pung ar: Dakot met, me a kotin masani ong kitail: Murin ansau kis komail solar pan kilang ia, o pil murin ansau kis, a komail pan kilang ia, pwe I kokola ren Sam?

16:18  Irail ap indada: Dakot murin ansau kis, me a kotin masanieki? Kitail sota weweki, me a kotin masani.

16:19  A Iesus kotin angi, me re men idok re a, ap kotin masani ong irail: Komail kakaaki nan pung omail, me I indada: Murin ansau kis komail solar pan kilang ia, o pil murin ansau kis, a komail pan kilang ia.

16:20  Melel, melel I indai ong komail, komail pan sangesang o mamaiei, a sappa pan pereperen; komail pan mamauk, a omail mauk pan wiki ong popol.

16:21  Li o ni a pan naitik kin insensued, aki a ansau leler; a a lao naitikidier seri o, a solar kin tamanda a insensued, aki a peren kida, me aramas amen ipwidi ong sappa.

16:22  Pil dueta komail kin insensued ansau wet. A I pil pan kilang komail o mongiong omail pan pereperen. A sota me pan atia sang komail omail peren.

16:23  A lao ni ran o komail sota pan idok re i meakot. Melel, melel I indai ong komail, ma komail pan poeki meakot ren Sam ni ad ai, a pan kotiki ong komail.

16:24  Sang mas kokodo komail sota poeki meakot ni ad ai. Poeki, a komail pan ale; pwe omail peren en unsokela.

16:25  Mepukat I padaki ong komail er ni karaseras akan. A eu ansau kokodo, me I solar pan padapadak ni karaseras, pwe I pan sansal padaki ong komail duen Sam.

16:26  Lao ran o komail pan poeki ni ad ai. A I sota indai ong komail, me I pan kapakapa kin komail ren Sam.

16:27  Pwe Sam pein pok ong komail, pweki komail pok ong ia er o kamelele, me I kodo sang ren Kot.

16:28  I kodo sang ren Sam o kodido sappa; I pil kokola sang nin sappa, kokola ren Sam.

16:29  Sapwilim a tounpadak kan potoan ong i: Masani, ansau wet re kin kotin sansal padaki ong kit o solar ni karaseras.

16:30  Kit ap asaer, me re kotin mangier meakaros, o re sota mau ong, amen en idok meakot re omui. I me se posonki, me re kotido sang ren Kot.

16:31  Iesus kotin sapeng irail: Komail posonlar met?

16:32  Kilang, ansau kokodo, ari a leler, me komail pan kamueit pasang, amen amen nan udan deu a o kase ia la. I ap pan kelep; ari so, I sota kin kelep, pwe Sam o ieiang ia.

16:33  Mepukat I padaki ong komail, pwe komail en popole kin ia. Nan sappa komail kin kalokolok, ari so, komail popol, pwe I kaloedier sappa.

Chapter 17

17:1  IESUS kotin masani wei mepukat, ap kotin masanda nanlang masani: Sam ai, ansau o leler, en kalinganada sapwilim omui Ol, pwe sapwilim omui Ol en pil kalinganada komui.

17:2  Duen komui kotiki ong i er manaman, en poedi uduk karos, pwe a en ki ong karos, me komui ki ong i er, maur soutuk.

17:3  A iet maur soutuk: Ren asa komui la, me komui ta Kot melel, o Iesus Kristus, me komui kadarador.

17:4  I kalingana komui dar nin sappa, I kanikialar dodok, me komui kotiki dong ia, I en wiada.

17:5  A met Sam ai, kom kotin kalingana kin ia pein omui lingan, me I linganakier, ni ai mi re omui, ni sappa saikenta mia.

17:6  I kasansale ong aramas akan mar omui, me komui ki ong ia er sang nin sappa. Irail udan noumui, a komui ki ong ia er irail; a re kin kapwaiada omui masan.

17:7  A met re asalar, me karos, me komui ki ong ia er, pwili sang komui.

17:8  A masan akan, me komui ki ong ia er, i me I ki ong irail er, o irail aleer o wewekilar melel, me I pwarado sang komui, o re posonlar, me komui kadar ia dor.

17:9  I kin kapakapa kin ir, I sota kin kapakapa kin sappa, a irail, me komui ki ong ia er, pwe noumui irail.

17:10  Pwe karos me ai, iei noumui; a karos me noumui, iei ai o I lingan kin irail lar.

17:11  I solar mi sappa, a mepukat mi sappa. I kola re omui. Sam ai saraui, kanikid irail ni mar omui, me komui ki ong ia er, pwe irail en me ta men dueta kita.

17:12  Ni ai mi re irail, I nikid irail er ni mar omui, me komui ki ong ia er; I nikid irail er; sota amen ir salongalar, seri salongala eta, pwe kisin likau en pwaida.

17:13  A met I koko wei re omui. I padaki wei mepukat nan sappa, pwe ai peren unsok en mi re ’rail.

17:14  I ki ong irail er omui masan, o sappa kailong kin irail er, pwe irail kaidin kisan sappa, dueta, ngai kaidin kisan sappa.

17:15  I sota kin poeki, komui en wa irail sang nin sappa, a pwe komui en pera wei sang irail me sued.

17:16  Irail kaidin kisan sappa, dueta ngai kaidin kisan sappa.

17:17  Kasaraui kin ir ala melel, pwe me melel omui masan.

17:18  Duen komui kadar ia dong sappa, iduen I kadar ir alang sappa.

17:19  I kasarauila pein ngai pweki irail, pwe irail kasaraui kila melel.

17:20  A kaidin mepukat eta, me I kapakapaki, a pil irail, me pan poson ia pweki arail padak.

17:21  Pwe irail karos en me ta men, duen komui Sam podidi ong ia o ngai ong komui, pwe irail en pil me ta men re ata, pwe sappa en poson, me komui kadar ia dor.

17:22  A lingan, me komui ki ong ia er, I ki ong irail er, pwe irail en me ta men, dueta kita me ta men.

17:23  Ngai ong irail, o komui ong ia, pwe re en song laieu, pwe sappa en asa, me komui kadar ia dor, o pok ong irail, dueta komui pok ong ia er.

17:24  Sam, I men, irail, me komui ki ong ia er, en pil mi wasa, me I kin mi ia, pwe ren ududial ai lingan, me komui ki ong ia er, pwe komui pok ong ia er mon sappa a tapidar.

17:25  Sam ai pung, sappa sasa komui, a ngai me asa komui, a mepukat asaer, me komui kadar ia dor.

17:26  O I kasale ong irail er mar omui. O I pan pil kasaleda i, pwe limpok ota, me komui poke kin ia er, en podidi ong ir o ngai ong irail.

Chapter 18

18:1  IESUS lao kotin masanier mepukat, ap kotila palilan pil Kidron, o sapwilim a tounpadak kan iang i: Matuel eu mi wasa o, me i o sapwilim a tounpadak kan kotilong ong lole.

18:2  A Iudas me pangala i, pil asa wasa o, pwe Iesus o sapwilim a tounpadak kan kin purepure wasa o.

18:3  Iudas lao aleer pokon o papa kan sang ren samero lapalap o Parisär akan, ap kokiieila lamp, o ser akan, o kapwa en pei kan.

18:4  A Iesus me kotin mangier meakaros, me pan pit i, kotiei wong irail masani ong irail: Is me komail rapaki?

18:5  Re sapeng i: Iesus men Nasaret. Iesus kotin masani ong irail: Ngai i. A Iudas, me pangala i, pil u iang irail.

18:6  Iesus lao kotin masani ong irail: Ngai i, re ap puioki sang, pupodi ong nan pwel.

18:7  A pil kotin kainoma re irail. Is me komail rapaki? Irail inda: Iesus men Nasaret.

18:8  Iesus kotin masani: I indai ong komail er, me ngai i. Ari, ma komail rapakin ia, en purewei sang mepukat!

18:9  Pwe lepen masan en pwaida, me a kotin masanier: Sota amen irail, me komui ki ong ia er, me salongalar.

18:10  A Simon Petrus, me na kodlas mia, ap usa pasang, päleki en samero lapalap a ladu, päle pasang salong a pali maun. A ladu o me ad a Malkus.

18:11  Iesus ap kotin masani ong Petrus: Kapure ong om kodlas nan deu a! Da, dal o, me Sam o kotiki ong ia er, i ender nim?

18:12  Ari, pokon o, o ar kaun, o papa en men Sus akan saikidi Iesus o saliedi i.

18:13  O kalua mas ren Anas, pwe i sam en Kaipas a paud o samero lapalap ni par o.

18:14  Iei i Kaipas, me indai ong Sus oko: Me mau, aramas ta men en kam kila aramas akan.

18:15  A Simon Petrus o pil amen tounpadak idauenla Iesus. A tounpadak men et, me samero lapalap asaer, iang Iesus kotilong ong nan matuel en samero lapalap.

18:16  A Petrus u liki impan wanim o. Tounpadak teio, me samero lapalap asaer, pedoi sang kasokasoi ong me sinsila wanim o ukelong ong Petrus lole.

18:17  Seripein o, me sinsila wanim, ap indai ong Petrus: Kaidin amen ren tounpadak kan en aramas men et koe? A inda: Ngai so.

18:18  A ladu o papa kan u wasa o, saunda kisiniai, pwe a kapau; irail rangerang ia, a Petrus pil iang u rangerang.

18:19  Samero lalalap ap kalelapok ren Iesus duen sapwilim a tounpadak kan o duen a padak.

18:20  Iesus kotin sapeng i: I padapadak sansal ong sappa; ansau karos I kaukawewedar nan sinakoke o nan im en kaudok, wasa me Sus oko karos kin pokon pena ia; a sota man meakot, me I padak wasa rir.

18:21  Da me kom peidokki re i? Kalelapok ren me rong ia er, me I padaki ong irail er, kilang, re asa, me I indada.

18:22  Ni en Iesus a kotin masani met, amen sang ren papa ko, me uda impa, ap pikir silang en Iesus indada: Iduen om sapeng ong samero lapalap?

18:23  Iesus kotin sapeng i: Ma ai lokaia sued, koe ap kadede ki duen a sued, a ma me pung menda koe pikir ia?

18:24  A Anas ap kadar wong sensal ren samero lapalap Kaipas.

18:25  A Simon Petrus u, rangerang irail ap indai ong i: Ele koe pil amen a tounpadak kan? A kamamada indada: Ngai so.

18:26  Ladun samero lapalap amen, me sauneki ol o, me Petrus pale sang salong a, ap indada: Kaidin koe me i kilanger re a nan matuel o?

18:27  Petrus ap pil kamamada. Malek madang kakorotada,

18:28  Irail ap kalua sang Iesus ren Kaipas, walang nan im en kadeik. Ari, me sangkonai. A irail sota pedelong ong nan im en kadeik, pwe re de kasaminela pein irail, pwe re en kak ong tungole pasa.

18:29  Pilatus ap pedoi wong re irail indada: Da me komail karauneki aramas men et?

18:30  Irail sapeng indang i: Ma men et sota me sued amen, se sota pan pangalang komui i.

18:31  Pilatus ap masani ong irail: Pein komail ale i, kadeikada i duen omail kapung. Sus oko ap indai ong i: A sota muei ong kit, sen kamela amen.

18:32  Pwe masan en Iesus en pwaida, me a kotin masanieda, pwen kasaleda, duen a pan kamatala.

18:33  A Pilatus pur ong nan im en kadeik ekeredo Iesus, kalelapok re a: Komui Nanmarki en Sus akan?

18:34  Iesus kotin sapeng i: Kom indada mepukat sang nan pein omui pam? De akai indai ong komui duen ngai?

18:35  Pilatus sapeng: Da, men Sus amen ngai? Toun sap omui o samero lapalap akan panga dong ia komui; da me komui wiadar?

18:36  Iesus kotin sapeng: Ai wei kaidin men sappa et. Ma ai wei men sappa et, nan ai papa kan pan pepeita, pwe I ender pan pangalang Sus akan; a kaidin ai wei ansau wet,

18:37  Pilatus ap indai ong i: Ari, Nanmarki amen komui? Iesus kotin sapeng: Komui me inda, me Nanmarki amen ngai. I me I ipwikidier o pwara kidong sappa pwe I en kadede melel. Kisan melel akan kin rongerong ngil ai.

18:38  Pilatus indai ong i: Dakot melel? A lao indawei mepukat, ap pil pedoi ong ren men Sus indai ong irail: I sota man diar dip a.

18:39  A tiak eu mi re omail, i en lapwada meamen ni pasa. Komail so men, i en lapwadang komail Nanmarki en Sus akan?

18:40  Irail karos pil weriwereda indada: Kaidik men et, a Parapas! A Parapas me lolap amen.

Chapter 19

19:1  PILATUS ap ale Iesus wokida i.

19:2  A saunpei ko irada el en tek eu, rap kidang pon kadokenmai o kapwataki i likau waitata.

19:3  Re ap kai dong i indada: Iong Nanmarki en Sus akan! O re pikir silang i.

19:4  Pilatus ap pil pedoi indai ong irail: Kilang, i wa dong komail i, pwe komail en asa, me i sota diaradar dip a.

19:5  Iesus ap kotieila, kapwataki el en tek o likau pup waitata. A indai ong irail: Kilang, song en aramas o!

19:6  Samero lapalap o papa ko lao udial i, irail ap weriwereda indada: Kalopuela i! Kalopuela i! Pilatus indai ong irail: Pein komail ale i kalopuela i! Pwe i sota diar dip a.

19:7  Sus oko sapeng i: At kapung mia, a duen at kapung a pan kamatala, pwe a wiaki sapwilim en Kot pein i.

19:8  Pilatus lao rongadar mepukat, ap masapwekadar kaualap,

19:9  O purelong ong nan im en kadeik o, kalelapok ren Iesus: Komui koti sang ia? A Iesus sota kotin sapeng i.

19:10  Pilatus ap indai ong i: Komui sota sapeng ia? Komui sota asa, me i manaman ong kapiti uk ala o pil manaman ong kalopue uk ala?

19:11  Iesus kotin sapeng: Sota man om manaman en kaoe ia, ma a so muei ong komui sang poa. Ari, dip en me panga ia dong komui er me lapa sang.

19:12  Ari, Pilatus ap song kapitila i, a Sus oko weriwer indada: Komui kaidin kompoke pan Sisa, ma komui pan kapitila men et. Meamen kasapwiladang nanmarki pein i kin palian Sisa.

19:13  Pilatus lao rongadar kasoi pukat ap kapwareda Iesus, kaipokedi pon deun kadeik, wasa me adaneki Pepment, a ni lokaia en Ipru: Kapata,

19:14  A i ran en onop ong pasa impan auer kawonu. I ari masani ong Sus oko: Kilang, omail Nanmarki!

19:15  A re weriwereda: Sikenewei! Sikenewei! Kalopuela i! Pilatus masani ong irail: Da, i en kamela omail Nanmarki? Samero lapalap akan sapeng: Sota at nanmarki, Sisa eta.

19:16  I ari pangalang irail i, pwen lopuela. Rap koledi Iesus kaluala.

19:17  A pein i kotin wa a lopu, kotilang wasa me adaneki wasan pondal, a ni lokaia en Ipru: Kolkata,

19:18  Wasa re kalopuela i iangaki riamen, amen ni pali maun, a amen ni pali maing, a Iesus nan pung ara.

19:19  Pilatus ap pil wiadar inting eu, kakonei ong pon lopu o. A iet inting: Iesus en Nasaret, Nanmarki en Sus akan.

19:20  Sus akan me toto, me wadokedi inting wet, pwe wasa Iesus kotin lopuela ia, me salong kanim o. A inting o wiauier ni lokaia en Ipru o Krik o Latain.

19:21  Ari, samero lapalap oko potoan ong Pilatus: Der intingiedi: Nanmarki en Sus akan, a me a indada: Ngai Nanmarki en Sus akan!

19:22  Pilatus sapeng: Me i intingiedier, i eta ai inting.

19:23  Saunpei ko lao kalopuela Iesus, rap ale sapwilim a likau kan, lepuk pasang, wiakida pakis paieu, pakis eu ong amen amen en saunpei ko o pil sapwilim a sakit, me so deidei pena, a pon ta sang poa lel pa.

19:24  Irail ap kasoi nan pung arail: Kitail ender ter pasang i, a kadoropwaki, me pan aneki, pwe kisin likau en pungala, me indinda: Irail nek pasang ai likau kan nan pung ar o kadoropwa ai sakit. Iei me saunpei ko wiakida mepukat.

19:25  A in en Iesus u ni tapin lopu en Iesus, o ri en in a Maria, en Kleopas a paud, o Maria men Makdala.

19:26  Iesus lao kotin masani in a o tounpadak men u imp a me a kotin kupura mauki, ap kotin masani ong in a: Li, kilang noum ol!

19:27  Ap kotin masani ong tounpadak o: Kilang in om! Ari, sang ni auer ota tounpadak o apwali i.

19:28  Iesus lao kotin mangier, me meakaros nikier, ap kotin masanier: I men nim pilada, pwe kisin likau en pungala.

19:29  A kasak mi wasa o, me audeki pineka. Irail kaduedi lim eu nan pineka, ki ong ni alek apot, kidalang ni silang i.

19:30  Iesus lao kotin uraker pineka, ap kotin masani: A nikier. I ari kotin kamotauiedi kadokenmai, kadarala ngen e.

19:31  Sus oko ap poeki ren Pilatus, me nä arail en katipitip pasang o ren wisiki sang, pwe war arail ender langelang nin lopu ran en sapat. Pwe iei ran o ran en kaonop, pwe iei ran en sapat o me lapalap.

19:32  Saunpei ko ap kai ong, katip pasang nä en me pali et o en me teio, me iang lopuelar.

19:33  A re lao kai ong Iesus o diaradar, me a matalar, rap sota katip pasang aluwilu a kan.

19:34  A saunpei men dokoki katieu pot pangepang a; madang nta o pil kusekusewei.

19:35  A me udial mepukat, kin kadede o a kadede me melel, o a asa, me a kin kadede, iei me melel, pwe komail en pil poson.

19:36  Pwe mepukat wiauier, pwe kisin likau en pungala: Aluwilu a sota pan tip pasang.

19:37  O pil eu kisin likau kin inda: Irail pan kangkakil i, me re dokodi.

19:38  Murin mepukat Iosep men Arimatia, tounpadak en Iesus amen, ari me rir, pweki a masak Sus oko, ap poeki ren Pilatus, en mueid ong i kalep en Iesus. Pilatus ari mueid ong i. I ari waiki sang kalep en Iesus.

19:39  Nikodemus me poto dong Iesus ni pong, pil kodo, wado paun epuki en potik en mire o alos.

19:40  Irail ap ale kalep en Iesus, kidimki pena likau linen kai iangaki pomau kan, duen tiak en Sus akan, ni ar kin sarepedi.

19:41  A wasa me a kotin lopuela ia, matuel eu mia ia, a nan matuel sousou kap eu mia, me saikenta amen saredi ia.

19:42  I wasa me ira nekidala Iesus, pweki ran en kaonop en Sus akan, o sousou me koren.

Chapter 20

20:1  NI ran kaieu en wik Maria men Makdala pwara dong sousou o nin soran, a saikenta ran pasang, ap diaradar, me takai o katapur sanger mon sousou o.

20:2  I ap tanga wei, ko dong Simon Petrus o tounpadak teio, me Iesus kotin kupura mauki, indai ong ira: Irail wa sanger Kaun o nan sousou o, a se sasa, wasa re kidi ong ia i.

20:3  Petrus ari koieila o tounpadak teio ap ko dong sousou o.

20:4  Ira wiaki eu tanga wei, a tounpadak teio me madang mon Petrus lel sousou mas.

20:5  A lao itiokidi, ap kilangada likau linen wonon, ap sota pedelong ong lole.

20:6  Simon Petrus ap kokodo idauen i, ap pedelong ong nan sousou o, diarada likau linen ko wonon.

20:7  O lim en pudo me pira a kadokenmai, me sota iang likau linen ko; a lim pena wasa toror.

20:8  A tounpadak teio me tiong dong sousou o, ap pil ko ong lole; i ari diarada o posonla.

20:9  Pwe ira kaikenta weweki kisin likau, me a en iasada sang a matala,

20:10  Tounpadak ko ap pur onger nan deu ’ra.

20:11  A Maria u liki sal ong sousou o sangesang. O ni a sangesang a poridi, kilanglong ong nan sousou o,

20:12  Kilangada tounlang riamen momod ia, kapwateki likau pwetepwet, amen liman kadokenmai a amen liman aluwilu a kan, wasa kalep en Iesus kotikot iaer,

20:13  Ira ari masani ong i: Li, da me koe sangesangki? A indai ong ira: Aki irail wa sanger ai Kaun, a i sasa, wasa re kidi ong ia i.

20:14  A lao indada met, ap soupei wei kilanger Iesus kotia u o sasa, me i Iesus.

20:15  Iesus kotin masani ong i: Li, da me koe sangesangki? Is me koe kin raparapaki? A kiki ong, me i me saumat o, ap indang i: Maing, ma komui wa sanger i, indai ong ia, wasa komui kidi ong ia i, i ap pan wala sang i.

20:16  Iesus ap kotin masani ong i: Maria! I ari soupei ong, potoan ong i: Rapuni! Iet wewe: Saunpadak.

20:17  Iesus kotin masani ong i: Der sair ia, pwe I kaikenta pwarala ren Sam ai, a kola ren ri ai kan, kaire kin irail, I kokodala ren Sam ai o Sam omail, ren ai Kot o omail Kot,

20:18  Maria men Makdala kodo kaireki tounpadak kan, me a kilangadar Kaun o, o me a kotin masani ong i mepukat.

20:19  Lao nin sautik en ran ota, ni ran kaieu en wik, ni wanim ko me ritidier, wasa tounpadak kan pokon pena ia, pweki ar masak Sus oko, Iesus ap kotido u nan pung arail, masani ong irail: Komail popol!

20:20  A lao masaniada met, ap kasale ong irail lim a kan o pangepang a. Tounpadak kan ap perenda ni ar kilangada Kaun o.

20:21  Iesus ap pil kotin masani ong irail: Komail popol! Duen Sam o kadar ia do, iduen I kadar komail la.

20:22  A lao masanier met, ap ngidi ong irail masani: Komail ale Ngen saraui!

20:23  Me komail pan lapwada dip ar akan, re lapwadar; o me komail katengedie dip ar akan, pan tengedier.

20:24  A Tomas amen ekriamen, me adaneki Didimos, sota iang irail, ni Iesus kotin pwarador.

20:25  Tounpadak teio ap indai ong i: Se kilanger Kaun o. A i me indai ong irail: Ma i sota pan kilang lip en mata nan lim a kan, o kilong ong nan lip en mata sondi en pa i, o kilong ong pa ni pangepang a, i sota pan poson.

20:26  Murin ran walu sapwilim a tounpadak kan pil pokon pena, o Tomas iang irail. Wanim ko lao ritidier, Iesus ap kotido, u nan pung arail masani: Komail popol!

20:27  Ap kotin masani ong Tomas: Kido sondin pa om o kilang pa i kat, o kido pa om, kilong ong nan pangepang ai, o der soposon, a poson ta!

20:28  A Tomas sapeng indang i: Ai Kaun o ai Kot!

20:29  Iesus kotin masani ong i: Pweki om kilang ia er, koe poson kilar, a meid pai, me kaikenta kilang ap poson.

20:30  Kilel toto me so intingidier nan puk wet, me Iesus kotin wiadar nan pung en sapwilim a tounpadak kan.

20:31  A mepukat me intingidier, pwe komail en poson, me Iesus me Kristus sapwilim en Kot Ol. O komail en poson ap aneki maur pweki mar a.

Chapter 21

21:1  A MURIN mepukat Iesus pil kasale ong tounpadak kan pein i pon le en Tiperias; a iet duen a kasaledar:

21:2  Simon Petrus o Tomas, me adaneki Didimos, o Natanael men Kana nan Kaliläa, o nain Sepedäus ol oko, o pil sapwilim a tounpadak riamen me pokon pena,

21:3  Simon Petrus indai ong irail: I pan kola laid. Irail indai ong i: Se pil pan iang uk. Irail ari koieila, kereda pon kisin sop pot. A ni pong o re sota saikidi meakot.

21:4  A lao wasa ranier, Iesus ap kotikot ni oror, a sapwilim a tounpadak kan sasa, me i Iesus.

21:5  Iesus ap kotin masani ong irail: Seri ko, sota kan omail? Re sapeng i: Sota.

21:6  A kotin masani ong irail: Kaduedi uk o pali maun en sop o, a komail pan diarada. Irail ap kaduedi; re ap solar kak apiada pweki mam toto.

21:7  Tounpadak o, me Iesus kotin kupura mauki, ap indai ong Petrus: Iei Kaun o. Simon Petrus loa rongadar, me i Kaun o, ap pira ong a sakit en liki pwe a kiliso, ap lusedi ong nan le o.

21:8  A tounpadak tei kan seisei kodo nan kisin sop, pwe re so doo sang sap o, ele tipong en pa riepuki, urakido uk o mam oko.

21:9  Irail leler sap, rap diaradar kisiniai o mam oko mi poa o prot.

21:10  Iesus ap kotin masani ong irail: Wado kisan saik omail!

21:11  Simon Petrus ap koda waikelong dong nan sap uk o, me dir en mam kalaimun epuki limek silimen; mam me toto, ari so, uk sota olar.

21:12  Iesus kotin masani ong irail: U kodo manga! A sota amen ren tounpadak kan kak idok re a: Is komui? Pwe re asaer, me i Kaun o.

21:13  Iesus ap kotido limada prot, nek ong irail o pil mam oko.

21:14  A i me kasilepak en Iesus a kotin kasale ong sapwilim a tounpadak kan pein i, murin a iasada sang a matalar.

21:15  Irail lao mangaer. Iesus ap kotin masani ong Simon Petrus: Simon, nain Iona, koe kin pok ong ia mon mepukat? A i potoan ong i: Ei Maing, ir me mangi, me i kin pok ong ir. A kotin masani ong i: Apwali nai sippul akan!

21:16  A pil masani ong i kariapak: Simon, nain Iona, koe kin pok ong ia? A sapeng i: Ei Maing, ir me kotin mangi, me i kin pok ong ir. A kotin masani ong i: Apwali nai sip akan!

21:17  A kotin masani ong i kasilepak: Simon, nain Iona, koe kin pok ong ia? Petrus ap mamauki a peidok pan silepak: Koe pok ong ia? A potoan ong i: Maing, ir me kotin mangi meakaros, re kotin mangi, me i kin pok ong ir. Iesus kotin masani ong i: Apwali nai sip akan!

21:18  Melel, melel I indai ong uk, ni om manakap koe pein pirai uk pena, ap alu wei wasa, me koe mauki. A koe lao likailapala, koe nek kida wei pa om akan, a amen pan pirai uk edi o kalualang wasa, me koe kang kola ia.

21:19  I me a kotin kokop kidar, duen a pan kapingaki Kot a matala. A lao kotin masanier met, ap masani ong i: Idauen ia!

21:20  Petrus ap soupewei, kilang tounpadak o idauen ira, me Iesus kotin kupura mauki o me pil mi pan kupur a ni kamadip o kalelapok: Maing, is i, me pan pang komui la?

21:21  Petrus lao kilanger i, ap indai ong Iesus: Maing, menda men et?

21:22  Iesus kotin masani ong i: Ma I mauki, a en mimieta I lao puredo, menda re om? Koe en idauen ia!

21:23  Kasoi pot et ap loloki sili nan pung en saulang kan, me dene tounpadak o sota pan mela. A Iesus sota kotin masanier, me a sota pan mela, a: Ma I mauki, a en mimieta I lao puredo, menda re om?

21:24  Iet tounpadak, me kadele mepukat o intingiedier mepukat; a se asa, me a kadede me melel.

21:25  A song toto, me Iesus kotin wiadar a ma irail karos pan intingidi, i lamelame, me sappa sota itar ong koledi puk kan, me pan intingidi.