Kapingamarangi - John

Chapter 1

1:1  “Nnelekai” la-gu i-golo i taamada. “Nnelekai” la-gu i-baahi o God, gei “Nnelekai” la-go God.

1:2  “Nnelekai” gu i-baahi o God mai-loo i-taamada.

1:3  God ne-hai nia mee huogodoo mai i Mee, di mee e-dahi ne-hai laa-daha mo Mee ai.

1:4  “Nnelekai” lago taamada di mouli, gei di mouli deenei la-gu-haga-maalama nia daangada.

1:5  Di maalama e-maahina i-lodo di bouli, gei di bouli le e-deemee di-haga-bouli di maalama.

1:6  God ne-hagau-mai dana daane kae-hegau, dono ingoo go John.

1:7  Mee ne-hanimoi belee haga-modongoohia gi-nia daangada di maalama, bolo digaula ga-longono ga-hagadonu.

1:8  Mee hagalee go di maalama, gei Mee ne-hanimoi belee haga-modongoohia di maalama.

1:9  Di maalama deenei le e-donu, dela e-hanimoi gi henuailala e-haga-maalama nia daangada huogodoo.

1:10  “Nnelekai” gu-i henuailala. God ne-hai henuailala mai i Mee, gei digau henuailala e-de-iloo a-Mee.

1:11  Mee ne-hanimoi gi dono henua-donu, gei ana daangada-donu digi benebene a-Mee.

1:12  Gei hunu ginaadou gu-hagadonu, gu-benebene a-Mee, gei Mee gu-dugu ang-gi ginaadou di tonu bolo gii-hai nia dama ni God.

1:13  Digaula hagalee ne-hai nia dama ni God mai nadau haanau be mai di hiihai o tangada, gei mai baahi o God.

1:14  “Nnelekai” la-guu-hai-tangada, guu-noho i tadau baahi, gidaadou gu-gidee ono madamada e-honu i tumaalia mo-di tonu, di madamada ne-kae go-Mee, go Tama hua-e-dahi, mai baahi dono Damana.

1:15  John e-haga-modongoohia-aga a-Mee, e-wolowolo, “Deenei Taane dela nogo helehelekai-iei au bolo e-hanimoi i ogu muli, e-koia e-aamua i-di-au, idimaa Mee guu-i-golo i-mua dogu haanau.”

1:16  Mai di honu o dono dumaalia, Mee gu-hagahumalia gidaadou huogodoo gi-muli.

1:17  God ne-wanga gi Moses Nnaganoho, gei tumaalia mo-di tonu ne-lloomoi i-baahi o Jesus Christ.

1:18  Tangada ne-mmada gi God ai. Tama a God hua-e-dahi dela e-hai be God, e-noho i-baahi o Tamana, e-haga-modongoohia-aga a God gi-iloo nia daangada.

1:19  Digau aamua o Jew i Jerusalem ga-hagau nadau gau hai-mee-dabu, mono gau Levi gi John belee heeu gi mee, “Goe koai?”

1:20  John digi de-hiihai di-helekai gi-nia heeu digaula. Mee ga-helekai haga-madammaa, “Au hagalee go di Mesaia.”

1:21  Digaula ga-heeu labelaa, “Malaa, goe koai? Go Elijah?” John ga-helekai gi digaula, “Deeai, au hagalee go mee.” Digaula ga-heeu, “Goe di Soukohp?” Gei mee ga-helekai, “Deeai.”

1:22  Digaula ga-helekai gi mee, “Hagia-mai goe koai, gimaadou belee hai gii-kae madau helekai gi-muli gi digau ala ne-hagau-mai gimaadou. Malaa goe la-ga-helekai bolo-aha i-di-goe?”

1:23  John ga-helekai i telekai soukohp Isaiah, “Au go di lee o tangada dela e-wolowolo i-lodo di anggowaa boloo: Haga-huudonu-ina di ala o Dimaadua e-haele-ai!”

1:24  Digau kae-hegau aanei la-ne-hagau-mai go nia Pharisee,

1:25  ga-heeu gi John, “Maa goe hagalee go di Mesaia, be go Elijah, be go di Soukohp, malaa goe e-aha dela e-haihai au babdais?”

1:26  John ga-helekai, “Au e-hai agu babdais gi-nia wai. Tangada i-golo i-godou lodo, goodou e-de-iloo.

1:27  Mee e-hanimoi i ogu muli, gei au hagalee tau-loo bolo e-wwede nia suudi o-Maa.”

1:28  Nia mee huogodoo aanei la-ne-hai i Bethany i-di baahi gi-dua di monowai Jordan, di gowaa nogo hai nia babdais a John.

1:29  Di laangi nomuli, gei John gaa-mmada gi Jesus e-hanimoi, geia ga-helekai, “Deenei Tama-siibi a God, dela e-daa gi-daha nia huaidu o digau henuailala.

1:30  Deenei Tangada nogo helehelekai-iei au boloo, ‘Tangada dela e-hanimoi i ogu muli, le-koia e-aamua i-di-au, idimaa, Mee gu-i-golo i-mua dogu haanau.’

1:31  Au digi iloo a-Mee, gei au ne-hanimoi belee hai agu babdais gi-nia wai, belee haga-modongoohia a-Mee gi digau Israel.”

1:32  Deenei di haga-modongoohia a John ne-hai, “Au guu-mmada gi-di Hagataalunga e-haneia i-di langi gadoo be-di mwuroi gi-hongo o Mee.

1:33  Gei-au digi modongoohia bolo ma go Mee. Malaa God, dela ne-hagau-mai au belee hai agu babdais gi-nia wai, la-ne-helekai-mai boloo, ‘Goe gaa-mmada gi-di Hagataalunga ga-haneia gi-hongo Taane, deelaa go Mee e-hai ana babdais gi-di Hagataalunga-Dabu.’ ”

1:34  John ga-helekai, “Au gu-gidee-au, au e-hagi-adu gi goodou, Mee go Tama a God.”

1:35  Di laangi nomuli, John nogo duu labelaa i-golo mo ana dama-agoago dogolua.

1:36  Di madagoaa-hua a-mee ne-gidee Jesus e-haele i-golo, gei mee ga-helekai, “Deelaa Tama-siibi a God.”

1:37  Nia dama-agoago dogolua ne-longono a-mee ne-helekai beenei, gaa-hula i-muli o Jesus.

1:38  Jesus gaa-huli gi-muli, ga-gidee meemaa e-daudalia Ia, ga-heeu, “Goolua e-halahala di-gulu-aha?” Meemaa ga-helekai, “Rabai, Goe e-noho i-hee?” (Telekai “Rabai” dono hadinga bolo “Tangada Agoago”)

1:39  Gei Mee ga-helekai, “Lloomoi, mmada.” Gei meemaa gaa-hula i-muli o Mee, ga-gidee di gowaa dela e-noho-iei Mee, gaa-noho di laangi deelaa i-baahi o Mee (di madagoaa deelaa, la-i-muli di oodee, holongo di laa e-haa).

1:40  Tangada e-dahi i meemaa go Andrew, tuaahina-daane o Simon Peter.

1:41  Andrew ga-limalima di-gidee dono duaahina go Simon Peter, ga-helekai gi mee, “Gimaua gu-gidee di Mesaia.” (Telekai deenei dono hadinga bolo “Christ.”)

1:42  Gei mee gaa-lahi a Simon gi Jesus. Jesus ga-mmada-adu gi mee, ga-helekai, “Do ingoo go Simon, tama a John. Goe ga-haga-ingoo bolo Cephas.” (Di ingoo bolo Peter, dono hadinga bolo “Di hadugalaa.”)

1:43  Di laangi nomuli, gei Jesus gu-maanadu, bolo Ia gaa-hana gi Galilee. Mee ga-gidee-ia Philip, ga-helekai gi Mee, “Hanimoi i ogu muli.”

1:44  (Philip tangada Bethsaida, di waahale dela e-noho-ai a Andrew mo Peter).

1:45  Philip ga-gidee-ia Nathanael, ga-helekai gi mee, “Gimaadou gu-gidee Tangada a Moses dela ne-hihi ono helekai gi-lodo di Beebaa-Haganoho, nia soukohp labelaa guu-hihi i-Mee. Mee go Jesus, go di tama a Joseph tangada o Nazareth.”

1:46  Nathanael ga-heeu, “Ma di mee humalia i-golo e-mee di-gila-aga i-baahi Nazareth?” Philip ga-helekai, “Hanimoi, mmada.”

1:47  Di madagoaa Jesus ne-gidee Nathanael e-hanimoi, ge-Ia ga-helekai i mee, “Deenei tangada donu o Israel, ono hala ai!”

1:48  Nathanael ga-heeu gi Mee, “Goe e-iloo au di-aha?” Jesus ga-helekai gi mee, “Au gu-gidee goe nogo i-lala di laagau-‘fig’ i-mua Philip ne-gahigahi goe.”

1:49  Nathanael ga-helekai, “Tangada Agoago, Goe go Tama a God, di King o Israel!”

1:50  Jesus ga-helekai, “Goe ne-hagadonu i-di Au ne-helekai-adu bolo Au gu-gidee goe i-lala di laagau-‘fig’? Goe ga-gidee nia mee mada-humalia i-di mee deenei!”

1:51  Mee ga-helekai gi digaula, “Au e-hagi-adu gi goodou di tonu, bolo goodou ga-gidee di langi ga-mahuge, gei nia gau di-langi a God gaa-hula gi-nua ge e-lloo-ia gi-lala i-hongo Tama-Tangada.”

Chapter 2

2:1  Nia laangi e-lua nomuli, tagamiami haga-hai-lodo gaa-hai i-lodo di waahale Cana i Galilee. Tinana o Jesus nogo i-golo.

2:2  Jesus mo ana dama-agoago gu-gahi-mai labelaa gi tagamiami deelaa.

2:3  I-muli nia waini ne-odi, gei tinana o Jesus ga-helekai gi Mee, “Nia waini digaula la-guu-odi.”

2:4  Jesus ga-helekai, “Dogu dinana, hudee hagia-mai dagu mee belee hai. Dogu madagoaa la-digi dau-mai.”

2:5  Tinana o Jesus ga-helekai gi digau hai-hegau, “Heia nia mee a-Mee ala bolo gi-heia.”

2:6  Digau o Jew nadau haganoho daumaha i-golo i-di hai o-di haga-madammaa, aalaa ono ulu-mee hadu llauehe e-ono e-dugu i-golo, di ulu-mee e-dahi e-mee di-haga-hau nia galon wai madalua gaa-tugi nia galon e-motolu.

2:7  Jesus ga-helekai gi digau hai-hegau, “Hagahau-ina nia ulu-mee aanei gi-nia wai.” Digaula ga-hagahau nia maa gi-hontula.

2:8  Jesus ga-helekai gi digaula, “Dolomeenei llingia gi-daha dulii, kaina gi tagi o tagamiami.” Digaula gaa-kae nia wai gi mee.

2:9  Nia wai aalaa guu-huli guu-hai nia waini, gei mee gaa-momi nia maa. Mee e-de-iloo be nia waini ne-gaamai i-hee, gei digau ala ne-haga-hau-mai nadau wai, la-gu-iloo. Gei mee ga-gahigahi-mai taane hai-lodo,

2:10  ga-helekai gi mee, “Nia daangada huogodoo le e-taiaga nia waini humalia i-mua, e-inuinu go digau tagamiami gi-libaliba, gei nomuli ga-taiaga-laa nia waini ala hagalee-loo e-humalia. Gei goe nogo benebene au waini humalia, gaa-tugi-loo gi dolomeenei!”

2:11  Deenei di mogobuna matagidagi a Jesus ne-hai i Cana i Galilee. Deelaa di gowaa ne-haga-modongoohia-aga dono madamada, nia dama-agoago a-Maa gu-hagadonu a-Mee.

2:12  Nomuli, Jesus mo dono dinana, ono duaahina-daane, mo ana dama-agoago gaa-hula gi Capernaum, gaa-noho i-golo i-nia laangi dulii.

2:13  Hoohoo gi-di madagoaa Tagamiami Pasoobaa, Jesus gaa-hana gi Jerusalem.

2:14  Mee ga-gidee nia daangada i-lodo di Hale Daumaha e-huihui nadau kau, nia siibi mono mwuroi, gei digau koodai bahihadu e-noho i nadau deebele.

2:15  Mee gaa-hai dana bida hali haga-mamaawa, ga-hagabagi nia manu huogodoo, nia siibi mono kau gi-daha mo-di Hale Daumaha. Mee ga-hulihuli gi-lala nia deebele digau koodai bahihadu, ga-magamaga nia bahihadu digaula.

2:16  Mee ga-helekai-adu gi-nia daangada ala e-huihui nadau mwuroi, “Kae-ina godou mwuroi gi-daha mo kinei! Hudee heia di hale dogu Damana be-di hale huihui-mee!”

2:17  Ana dama-agoago gu-langahia nnelekai di Beebaa-Dabu e-helekai boloo, “Meenei God, dogu haa-manawa i doo hale, le e-ulaula i ogu lodo be-di ahi.”

2:18  Digau aamua o Jew ga-lloomoi gi Mee ga-heeu, “Di mogobuna behee e-mee di-hai Kooe e-haga-modongoohia oo donu di hai nia mee aanei?”

2:19  Jesus ga-helekai gi digaula, “Owwaa-ina gi-daha di Hale-Daumaha deenei, gei Au ga-haga-duu-aga labelaa di-maa i-lodo nia laangi e-dolu.”

2:20  Digaula ga-heeu gi Mee, “Goe bolo ga-haga-duu-aga di-maa i-lodo nia laangi e-dolu? Ma nia ngadau e-madahaa maa-ono ne-hau di Hale Daumaha deenei!”

2:21  Gei di hale daumaha dela e-helekai-iei Jesus, la-go dono huaidina.

2:22  Dono madagoaa ne-mouli-aga, gei ana dama-agoago gu-langahia bolo Mee gu-helekai beelaa. Digaula gu-hagadonu di Beebaa-Dabu, mo nnelekai Jesus nogo helehelekai-ai.

2:23  Jesus nogo i Jerusalem i-di madagoaa Tagamiami Pasoobaa, gei digau dogologowaahee gu-hagadonu i-di nadau gidee nia mogobuna haga-goboina a-Mee ne-hai.

2:24  Gei Jesus hagalee hagadonu digaula, idimaa, Mee e-iloo-Ia nia manawa digaula huogodoo.

2:25  Dono hadinga ai ma-ga-haga-modongoohia digaula gi Mee, idimaa, Mee e-iloo-ia-hua nia manawa digaula.

Chapter 3

3:1  Tagi i-golo, tangada o Jew, dono ingoo go Nicodemus, tangada i-nia Pharisee.

3:2  Di boo e-dahi, gei mee ga-hanimoi gi Jesus, ga-helekai, “Rabbai, gimaadou e-iloo bolo Goe tangada agoago ne-hagau-mai go God, idimaa, tangada e-mee di-hai ana mogobuna be Goe ai, maa God la-hagalee i dono baahi.”

3:3  Jesus ga-helekai, “Au e-hagi-adu gi-di-goe di tonu: Tangada e-mee di-gidee Teenua King o God ai, maa ia digi haanau labelaa.”

3:4  Nicodemus ga-heeu, “Tangada dela gu-madua, le e-haanau labelaa behee? Mee e-deemee di-ulu gi-lodo tinae dono dinana ga-haanau hagalua!”

3:5  Gei Jesus ga-helekai gi mee, “Au e-hagi-adu gi-di-goe di tonu: Ma tangada e-ulu i Teenua King o God ai, maa ia digi haanau i-nia wai mo-di Hagataalunga.

3:6  Tuaidina dangada goneiga ne-haanau-mai baahi nia maadua, gei di hagataalunga la-ne-haanau-mai i-di Hagataalunga.

3:7  Goe hudee homouli gi agu helekai, ala bolo goodou gi-haanau labelaa.

3:8  Di madangi e-gono gi-di gowaa dela e-hiihai ginai, gei goe e-longono dono lee, goe e-de-iloo be di-maa e-gono mai i-hee, be e-gono gi-hee. E-hai gadoo be digau huogodoo ala ne-haanau i-di Hagataalunga.”

3:9  Nicodemus ga-heeu, “Dehee dono hai?”

3:10  Jesus ga-helekai gi mee, “Goe tangada agoago aamua o Israel, gei goe e-de-iloo di-mee deenei?

3:11  Au e-hagi-adu gi-di-goe di tonu, bolo gimaadou e-helekai nia mee ala gu-iloo-gimaadou, gei gimaadou e-haga-modongoohia nia mee ala gu-gidee-gimaadou, gei tangada i goodou ne-hagadonu madau agoago ai.

3:12  Au gu-hagi-adu gi goodou nia mee o henuailala, gei goodou hagalee hagadonu. Gei nia mee o-di langi ma-ga-hagi-adu ko-Au gi goodou, le e-hagadonu go koodou behee?

3:13  Deai tangada ne-hana gi-di langi ai, dela-hua go Tama-Tangada, go Mee ne-haneia i-di langi.”

3:14  Moses ne-daudau dana gihaa baalanga-mmee i-hongo di laagau i-lodo di anggowaa, e-hai gadoo be-di hai a Tama-Tangada dela e-hai-loo gi-daudau gi-nua,

3:15  bolo digau huogodoo ala e-hagadonu a-Mee, la-ga-hai-mee gi-di mouli e-dee-odi.

3:16  Idimaa God ne-aloho huoloo i henuailala dela ne-hagau-mai dana Dama-daane hua e-dahi, bolo digau huogodoo ala e-hagadonu a-Mee, la-hagalee mmade, ga-hai-mee gi-di mouli e-dee-odi.

3:17  Idimaa, God hagalee ne-hagau-mai dana Dama belee hagi-aga henuailala. Mee ne-hagau-mai dana Dama belee hai di haga-mouli ni henuailala.

3:18  Be koai e-hagadonu dana Dama, geia e-hagalee hagi-aga. Be koai e-hagalee hagadonu dana Dama, eia guu-lawa di-hagi-aga, idimaa ia digi hagadonu di Tama hua-e-dahi a God.

3:19  Deenei di hai o-di hagi-aga: Di maalama gu-hanimoi gi henuailala, gei nia daangada le-aloho-hua i-di bouli laa-hongo di maalama, idimaa, nadau hangahaihai le e-huaidu.

3:20  Nia daangada ala e-hai nia huaidu, hagalee hiihai gi-di maalama, ginaadou hagalee lloomoi gi-di maalama, idimaa digaula hagalee hiihai nadau haihai huaidu gi-modongoohia-aga.

3:21  Nia daangada ala e-hai nia mee donu, le e-lloomoi gi-di maalama, bolo di maalama ga-haga-modongoohia-aga nadau hegau ala nogo hai, mai nadau hagalongo ang-gi God.

3:22  Nomuli, gei Jesus mo ana dama-agoago gaa-hula gi Judea, gaa-noho haga-dulii i-baahi digau i-golo, e-hai ana babdais.

3:23  John nogo babdais labelaa ana daangada i Aenon, hoohoo gi Salim, idimaa, di gowaa deelaa e-logo ono wai. Nia daangada e-hula e-babdais go mee.

3:24  (Di mee deenei la-ne-hai i-mua di galabudi o John.)

3:25  Hunu daangada i-nia dama-agoago a John ga-daamada ga-lagalagamaaloo ang-gi tangada o Jew i-di hai o-di hagahemeheme daumaha.

3:26  Digaula gaa-hula gi John, ga-helekai gi mee, “Tangada agoago, goe e-langahia Taane nogo goolua i-baahi i-dua di monowai Jordan dela nogo helekai-iei goe? Mee e-hai ana babdais dolomeenei, gei digau huogodoo e-hula gi Mee.”

3:27  John ga-helekai, “Tangada e-mee di-hai ana mee ai, maa God la-digi dugu-anga gi mee.

3:28  Goodou la-go ogu gau hagadootonu bolo au ne-helekai: Ma hagalee ko-au go di Mesaia. Au ne-hagau-mai i-mua o Mee.

3:29  Di ahina hai-lodo la-di ahina donu ni taane hai-lodo, gei di hoo taane hai-lodo dela e-duu i-baahi o mee e-hagalongo, gu-tenetene i dono hagalongo gi-di lee o taane hai-lodo. Deenei di hai o-di hagahonu o dogu tene.

3:30  Mee e-hai-loo gi-mada-hagalabagau, gei au gi-mada-dulii dogu hagalabagau.”

3:31  “Mee dela ne-haneia i-di langi e-aamua i-nia mee huogodoo. Gei tangada henuailala e-dau gi henuailala, e-helehelekai i-nia mee o henuailala. Gei Mee dela ne-haneia i-di langi, la-i-hongo nia mee huogodoo.

3:32  Mee e-haga-modongoohia-aga ana mee ne-gidee ge ne-hagalongo gineia, gei tangada e-dahi ne-hagadonu ana haga-modongoohia ai.

3:33  Tangada dela e-hagadonu ana haga-modongoohia, la-gu-haga-modongoohia bolo God le e-donu.

3:34  Tangada dela ne-hagau mai baahi o God, le e-helehelekai nia helekai a God, idimaa, God gu-haga-honu a-Mee gi dono Hagataalunga-Dabu.

3:35  Tamana e-aloho i dana Dama, gei gu-dugu-anga nia mee huogodoo gi Mee.

3:36  Be koai hua dela e-hagadonu Tama deelaa, geia e-hai-mee gi-di mouli dee-odi. Be koai hua dela e-de-hagalongo gi Tama deelaa, geia e-de-gidee di mouli, idimaa mee e-noho hua i-lala di hagawelewele o God.”

Chapter 4

4:1  Nia Pharisee gu-longono bolo digau agoago ala ne-babdais go Jesus le e-dogologo i-nia gau agoago ala ne-babdais go John.

4:2  (Gei di tonu, Jesus la-digi babdais dana dangada e-dahi, ala-hua go ana dama-agoago.)

4:3  Di madagoaa Jesus ne-longono nnelekai digaula, Mee ga-hagatanga i Judea, gaa-hana gi-muli gi Galilee,

4:4  gei Mee e-hai-loo gii-hana laa-lodo Samaria.

4:5  Mee gaa-dau-adu gi Sychar i Samaria, dela e-hagalee mogowaa i-di gowaa a Jacob ne-wanga gi dana dama-daane go Joseph.

4:6  Di monowai-geli Jacob la i-golo. Jesus gu-duadua i dono heehee, ge-Ia gaa-noho i-baahi di monowai-geli, gei gu-oodee.

4:7  Di ahina Samaria ga-hanimoi, belee udu ana wai, Jesus ga-helekai gi mee, “Gaamai hunu wai e inu.”

4:8  (Nia dama-agoago a-maa guu-hula gi-lodo di waahale e-hui mai nadau meegai.)

4:9  Di ahina ga-helekai, “Goe tangada o Jew, gei au tangada Samaria, malaa Goe e-madau au wai mai gi-di-au behee?” (Digau o Jew hagalee hai-hegau gi-nia ibu mo nia boolo o digau Samaria ala e-hai-hegau-ai.)

4:10  Jesus ga-helekai gi mee, “Maa goe e-iloo di mee a God dela e-wanga, ge e-iloo ma koai dela e-madau ana wai, goe gaa-dangi gi Mee, gei Mee ga-gowadu nia wai haga-mouli.”

4:11  Di ahina deelaa ga-helekai, “Meenei, dau begedu ai, gei di monowai-geli le e-llala. Gei nia wai haga-mouli le e-gaamai Kooe i-hee?

4:12  Ma go di-madau damana i-mua, go Jacob dela ne-gaamai gi gidaadou di monowai-geli deenei. Mee mo ana dama mo ana manu huogodoo nogo inu-mai i-di maa. Malaa, Goe e-koia e-aamua i Jacob?”

4:13  Jesus ga-helekai gi mee, “Digau ma-ga-inu nia wai aanei, e-hieinu labelaa.

4:14  Gei digau ala ga-inu nia wai gaa-wanga ko-Au, ginaadou hagalee hieinu labelaa. Nia wai ala gaa-wanga ko-Au, gaa-hai di monowai mouli i nadau lodo, e-wanga gi digaula di mouli dee-odi.”

4:15  Di ahina ga-helekai, “Meenei, gaamai-laa nia wai aalaa! Gi-dee hieinu hua au, ga-hanimoi labelaa gi-kinei e-udu agu wai.”

4:16  Jesus ga-helekai gi mee, “Hana, gahigahia-mai doo lodo, lloomoi.”

4:17  Di ahina ga-helekai, “Dogu lodo ai.” Jesus ga-helekai, “E-donu go dau helekai bolo goe doo lodo ai.

4:18  Gei goe gu-hai-lodo gi-nia daane dogolima, gei taane dela e-noho goolua dolomeenei, la-hagalee di lodo donu ni-oou. E-donu go au helekai.”

4:19  Di ahina deelaa ga-helekai, “Meenei, au gu-modongoohia bolo Goe di soukohp.

4:20  Madau maadua Samaria i-mua nogo daumaha ang-gi God i-tomo di gonduu deenei, gei goodou digau o Jew e-hai bolo Jerusalem la-hua go di gowaa belee daumaha-ai nia daangada ang-gi God.”

4:21  Jesus ga-helekai gi mee, “Di ahina-nei, hagadonu-ina Au, di madagoaa ga-dau-mai, gei nia daangada ga-hagalee daumaha ang-gi Tamana i-tomo di gonduu deenei, be i-lodo Jerusalem.

4:22  Goodou digau Samaria la-digi modongoohia-loo be goodou e-daumaha gi di-ai, gei gimaadou digau o Jew e-iloo be di-ma koai dela e-daumaha ginai gimaadou, idimaa, di hagamouli le e-hanimoi i-baahi digau o Jew.

4:23  Di madagoaa ga-dau-mai, gei gu-i kinei, di madagoaa nia daangada ga-daumaha ang-gi Tamana i-di hagataalunga mo-di tonu. Idimaa, deenei taumaha e-donu dela e-hiihai ginai Tamana bolo gidaadou gi-daumaha ang-gi de-Ia.

4:24  God la-di hagataalunga, gei digau ala e-daumaha ang-gi Mee, la-gi-daumaha mai i-di hagataalunga mo-di tonu.”

4:25  Di ahina ga-helekai gi Mee, “Au e-iloo bolo di Mesaia le e-hanimoi. Mee ga-hanimoi, le e-hagamodongoohia nia mee huogodoo.”

4:26  Gei Jesus ga-helekai, “Deenei Au go Mee, dela e-helehelekai-adu.”

4:27  Di madagoaa-hua deelaa, nia dama-agoago a Jesus gu-lloomoi labelaa, digaula gu-homouli huoloo i-di nadau gidee a Jesus e-hagabooboo gi-di ahina deelaa. Gei tangada i digaula ne-heeu gi-di ahina deelaa ai, boloo, “Ma di-aha e-hiihai ginai goe?” be e-heeu gi Jesus, “Goe e-aha, dela e-hagabooboo gi mee?”

4:28  Di ahina deelaa gaa-dugu dana mee udu-wai, gaa-hana gi-muli gi-di waahale deelaa, ga-odi gi-nia daangada,

4:29  “Lloomoi, mmada gi Taane dela ne-hagi-mai agu mee huogodoo ala nogo hai. Mee hagalee go di Mesaia?”

4:30  Digaula ga-hagatanga i-di waahale, gaa-hula gi Jesus.

4:31  Di madagoaa hua deelaa, gei nia dama-agoago a Jesus ga-helekai gi Mee, “Tangada Agoago, miami!”

4:32  Gei Mee ga-helekai gi digaula, “Agu meegai i-golo ala digi iloo-goodou.”

4:33  Gei nia dama-agoago a-Maa ga-daamada ga-heheeu i nadau mehanga, “Ma tangada gu-gaamai ana meegai gi Mee?”

4:34  Jesus ga-helekai, “Agu meegai la-go di daudali di hiihai o Tangada dela ne-hagau-mai Au, ge e-haga-lawa ana hegau bolo gi-heia.

4:35  Goodou di-godou kai i-golo: ‘Nia malama e-haa i-golo, gei taugai gaa-hagi.’ Malaa, au e-helekai-adu gi goodou: Mmada gi-humalia gi-di hadagee, nia huwa-laagau la-gu-mmaadua, gu-humalia di-hagi.

4:36  Tangada dela e-hagi, le e-kae dono hui i dana moomee, geia e-hagi gi-di mouli dee-odi. Deenei-laa, tangada dela e-dogi mo tangada dela e-hagi, meemaa huogodoo e-tenetene.

4:37  Di kai deenei le e-donu, boloo: ‘Tangada e-dahi e-dogi, ge dahi e-hagi.’

4:38  Au ne-hagau goodou, belee hagi di hadagee digi ngalua ginai goodou. Nia daangada ne-ngalua gi di-maa, gei goodou ga-hagahumalia mai nadau ngalua.”

4:39  Digau Samaria dogologo i-lodo di waahale deelaa ne-hagadonu a Jesus i nnelekai di ahina dela ne-hai: “Mee gu-hagi-mai agu mee huogodoo nogo hai.”

4:40  Gei di madagoaa digau o Samaria ne-lloomoi gi Mee, digaula gu-tangi gi Mee, bolo gii-noho i nadau baahi, gei Jesus gaa-noho i-golo nia laangi e-lua.

4:41  Digau dogologo gu-hagadonu a-Mee mai i ana agoago.

4:42  Gei digaula ga-helekai gi-di ahina, “Gimaadou gu-hagadonu dolomeenei, hagalee mai i au helekai, go gimaadou hua ne-bida hagalongo gi Mee. Gimaadou gu-iloo bolo ma go Mee go tahida o-di Hagamouli o henuailala.”

4:43  I-muli dono noho i-golo i-nia laangi e-lua, Jesus ga-hagatanga, gaa-hana gi Galilee.

4:44  Idimaa, Mee gu-helekai, “Soukohp la-hagalee hagalaamua i-lodo dono guongo donu.”

4:45  Dono dau i Galilee, nia daangada gu-hagaahi-mai a-Mee, idimaa, digaula ne-hula gi Tagamiami Pasoobaa i Jerusalem, gu-gidee ana mee huogodoo nogo hai i Tagamiami.

4:46  Jesus gaa-hana labelaa gi Cana i Galilee, di gowaa a-Mee ne-huli nia wai gii-hai nia waini. Tangada aamua oobidi i-golo, dana dama-daane e-magi i Capernaum.

4:47  Dono longono-hua bolo Jesus gu-hanimoi i Judea gi Galilee, mee gaa-hana gi Mee, gaa-dangi gi Mee gii-hana gi Capernaum, e-hagahili dana dama gu-hoohoo gaa-made.

4:48  Jesus ga-helekai gi mee, “Tangada i goodou e-hagadonu ai, maa goodou digi mmada gi-nia mogobuna mono mee haga-goboina dangada.”

4:49  Tangada aamua ga-helekai, “Meenei, hanimoi dalia au i-mua di made dagu dama.”

4:50  Jesus ga-helekai gi mee, “Hana, dau dama la-ga-mouli.” Taane deelaa gu-hagadonu nnelekai a Jesus, gaa-hana.

4:51  I dono hanadu-hua gi dono hale, nia hege a-maa ga-heetugi gi mee mo nadau longo, “Dau dama la-gu-mouli!”

4:52  Mee ga-heeu gi digaula di madagoaa behee dela ne-humalia-ai dana dama. Gei digaula ga-helekai, “Di laa e-dahi muli di oodee anaahi ne-hili-ai di magi o-maa.”

4:53  Tamana gu-langahia bolo deelaa di aawaa ne-helekai Jesus boloo, “Dau dama la-ga-mouli.” Malaa, mee mo digau o dono hale huogodoo gu-hagadonu.

4:54  Deenei di lua mogobuna Jesus ne-hai i-muli dono hanimoi i Judea gi Galilee.

Chapter 5

5:1  Nomuli, Jesus gaa-hana gi Jerusalem gi tagamiami daumaha.

5:2  Di monowai i nnelekai Hebrew bolo Bethzatha, e-hoohoo gi-di Bontai-Siibi i Jerusalem, e-tuu-ai nia balanda e-lima i dono gili.

5:3  Digau magi dogologo e-kiikii i-hongo nia balanda aalaa, digau deegida, digau mmade nadau wae, mo digau deemee di ngalungalua. [Digaula e-talitali-hua nia wai di monowai gi-milamila,

5:4  idimaa, hunu madagoaa-hua tangada di-langi o Dimaadua e-haneia gi-di monowai deelaa, e-haga-milamila nia wai. Tangada magi dela ga-ulu matagidagi gi-lodo nia-wai ala gu-ngalungalua, guu-hili-hua dono magi e-de-hilihili.]

5:5  Taane i-golo, nogo magi i-lodo nia ngadau e-motolu maa-walu.

5:6  Jesus gu-gidee a-mee e-moe i-golo, ge-Ia gu-iloo bolo mee nogo magi mai i-mua-loo, gei Mee ga-heeu, “Goe e-hiihai e-hagahili?”

5:7  Taane magi ga-helekai, “Meenei, dagu dangada e-hagamaamaa au ai gi-lodo di monowai ma-ga-ngalungalua. Au ga-menege-adu gi-lodo, gei tangada gu-i-golo i ogu mua.”

5:8  Jesus ga-helekai, “Duu-i-nua, dahi-aga-ina do moenge, haele!”

5:9  Gei taane deelaa gu-limalima guu-hili, ga-dahi-aga dono moenge, ga-haele. Di laangi ne-hai di mee deenei, la-di Laangi-Sabad.

5:10  Gei digau aamua o Jew ga-helekai gi tangada dela ne-hagahili, “Dangi-nei la di Laangi-Sabad, e-hai-baahi gi tadau haganoho i-dau dagidagi do moenge.”

5:11  Gei mee ga-helekai, “Tangada dela ne-haga-hili au, ne-helekai mai bolo au gi dahi-aga-ina dogu moenge gi-haele.”

5:12  Digaula ga-heeu gi mee, “Taane la-koai, dela ne-helekai-adu bolo goe gi-heia di-mee deenei?”

5:13  Gei taane dela ne-haga-hili le e-de-iloo-ia Jesus. Idimaa, nia daangada dogologowaahee i-di gowaa deelaa, gei Jesus guu-ngala i mee.

5:14  Nomuli, Jesus ga-gidee a-mee i-lodo di Hale Daumaha, ga-helekai, “Hagalongo, goe gu-humalia, malaa, hudee heia labelaa di huaidu gi-dee tale-adu labelaa di mee koia e-huaidu.”

5:15  Taane deelaa gaa-hana ga-hagi-anga gi digau aamua o Jew, bolo ma go Jesus dela ne-haga-hili ia.

5:16  Malaa, digaula ga-daamada ga-hagahuaidu a Jesus, i Mee dela ne-haga-hili dana dangada i-di Laangi-Sabad.

5:17  Jesus ga-helekai, “Dogu Damana le e-ngalua i-nia madagoaa huogodoo, gei Au hogi e-hai gi-ngalua.”

5:18  Nnelekai aanei guu-hai digau aamua o Jew gi-hiihai huoloo bolo e-daaligi Jesus gii-made. Hagalee bolo Mee ne-oho taganoho o-di Laangi-Sabad la-hua, mo dana helekai dela bolo God la-go dono Damana. Ana helekai la-guu-hai Ia gi-tongaadahi gi God.

5:19  Malaa, Jesus ga-helekai, “Au e-hagi-adu gi goodou di tonu bolo di Tama e-deemee di bida hai ana mee hua i-de-Ia. Mee e-hai-hua nia mee ala e-gidee-Ia e-hai go dono Damana. Nia mee ala e-hai go Tamana, aalaa nia mee a Tama e-hai.

5:20  Idimaa, Tamana e-aloho i dana Dama ge e-haga-modongoohia ana mee ala e-hai huogodoo gi dana Dama. Gei Mee ga-haga-modongoohia gi Mee nia mee humalia gi-nonua, gei goodou huogodoo ga-goboina.

5:21  Gadoo be Tamana dela e-haga-mouli-aga digau mmade, ge e-wanga di mouli gi digaula, di Tama hogi e-wanga di mouli gi ginaadou ala e-hiihai ginai e-Ia.

5:22  Tamana la hagalee hai dana hagi-aga. Mee guu-wanga gi dana Dama di tonu e-dohu di-hagi-aga,

5:23  bolo huogodoo gi-hagalaamua-ina Tama, be di-godou hagalaamua Tamana. Be koai-hua dela hagalee hagalaamua Tama, geia digi hagalaamua Tamana, dela ne-hagau-mai a-Mee.

5:24  “Au e-hagi-adu gi goodou di tonu: Digau ala e-longono agu helekai ga-hagadonu a-Mee dela ne-hagau-mai Au, e-hai-mee gi-di mouli dee-odi. Digaula hagalee hagi-aga, guu-too gi-daha mo di made, guu-hula gi-di mouli.

5:25  Au e-hagi-adu gi goodou di tonu: Di madagoaa e-dau-mai, gei gu-i kinei, di madagoaa digau mmade ga-longono di lee o Tama a God, gei digau ala ne-longono, ga-mouli-aga.

5:26  Gadoo be Tamana dela go taamada o-di mouli, i-di ala la-hua, Mee ne-hai dana Dama gii-hai taamada o-di mouli.

5:27  God guu-wanga di mogobuna o-di hagi-aga gi Tama, idimaa, Mee go Tama-Tangada.

5:28  Hudee goboina gi-nia mee aanei. Di madagoaa ga-dau-mai, digau mmade huogodoo ga-longono dono lee,

5:29  ga-lloomoi gi-daha mo nadau daalunga. Digau ala nogo haihai nia humalia, ga-aala-aga, ga-mouli, gei digau ala nogo haihai nia huaidu, ga-aala-aga, ga-hagaduadua.

5:30  “Au e-deemee di hai agu mee i dogu hiihai. Au e-hagamodongoohia-aga gii-hai be nnelekai a God, malaa, dagu hagamodongoohia-aga le e-donu, idimaa, Au hagalee hai agu mee ala e-hiihai ginai. E-hai-hua go nia mee ala e-hiihai ginai a-Mee dela ne-hagau-mai Au.

5:31  “Maa Au ga-hagamodongoohia-aga hua Au, gei dagu hagamodongoohia ga-hagalee gila bolo e-donu.

5:32  “Malaa, tangada i-golo e-hagamodongoohia-aga Au, gei Au e-iloo bolo ana helekai i-di-Au le e-donu.

5:33  Ma go John dela ne-hagau ginai godou gau kae-hegau, ana haga-modongoohia i-di Au le e-donu.

5:34  Ma hagalee hai bolo Au e-hai gii-hai dogu dangada haga-modongoohia. Au e-helekai-hua i-nia mee aanei, bolo gi-mouli-ai goodou.

5:35  John le e-hai be-di malama dela e-ulaula ge e-maahina, gei goodou gu-hiihai gu-tenetene hagabalua i-dono maalama.

5:36  “Malaa, agu hagamodongoohia i-golo, i-baahi nua di hagamodongoohia ne-hai go John: Nia mee Tamana bolo Au gi-heia, aanei e-hai ko-Au, e-haga-modongoohia-aga bolo Tamana la-ne-hagau-mai Au.

5:37  “Tamana ne-hagau-mai Au gu-haga-modongoohia-aga Au labelaa. Goodou digi longono dono lee, ge digi mmada gi ono golomada.

5:38  Goodou digi daahia nnelekai a-Maa i-lodo godou manawa, i godou de-hagadonu Tangada dela ne-hagau-mai go Mee.

5:39  Goodou e-halahala gi-lodo di Beebaa-Dabu, idimaa, goodou e-hagamaanadu bolo goodou ga-gidee di mouli dee-odi i-lodo di-maa, gei di Beebaa-Dabu deenei le e-helehelekai i-di-Au!

5:40  Gei goodou hagalee hiihai e-loomoi e-hai-mee gi-di mouli.

5:41  “Au hagalee hiihai gi-di hagaamu o-nia daangada.

5:42  Au e-iloo bolo goodou nnagadilinga daangada, godou manawa-aloho i God ai.

5:43  Au ne-hanimoi i-di mogobuna o dogu Damana, gei goodou digi hila-mai gi-di-Au. Maa tangada ma-gaa-bida hanimoi-hua i ono mogobuna, gei goodou e-hila ang-gi mee.

5:44  Goodou e-hiihai-hua e-haga-hagaamu i godou mehanga, gei goodou hagalee hiihai e-halahala di hagaamu mai baahi o God. Malaa e-hai behee, goodou e-mee di-hagadonu Au?

5:45  Hudee hagabaubau bolo ma ko-Au dela e-haga-huaidu goodou gi dogu Damana. Moses, go mee dela go di-godou hagadagadagagee, go mee dela e-hagi-aga godou huaidu.

5:46  Maa nei bolo goodou ne-hagadonu huoloo a Moses, gei goodou belee hagadonu Au labelaa, idimaa, nia mee a-mee ne-hihi la-ne-hihi i-di-Au.

5:47  Gei maa goodou hagalee hagadonu nia mee a-maa ala ne-hihi, gei goodou le e-hagadonu agu helekai behee?”

Chapter 6

6:1  Nomuli, Jesus ga-duu-adu laa-lodo Tai o Galilee (dela e-haga-ingoo bolo Tiberias).

6:2  Dogologowaahee e-daudali a-Mee, i-di nadau gidee ana mee haga-goboina haga-hili digau magi.

6:3  Jesus gaa-hana gi-di gowaa nnoonua, gaa-noho i-baahi ana dama-agoago.

6:4  Tagamiami Pasoobaa la-gu-hoohoo-mai.

6:5  Jesus gaa-mmada gi digau dogologowaahee e-lloomoi gi-de-Ia, gei Mee ga-heeu gi Philip, “Dehee di gowaa e-mee di-hui-mai tadau meegai e-dohu di-haangai nia daangada aanei?”

6:6  Mee ne-helekai beenei belee hagamada Philip. Gei Mee e-iloo-hua dana mee belee hai.

6:7  Philip ga-helekai, “Nia meegai ginigini dee-bau gi digau aanei le-hui gi-nia bahihadu-silber e-logo i-di lua-lau.”

6:8  Tama agoago i-golo dono ingoo go Andrew, tuaahina o Simon Peter, ga-helekai gi Mee,

6:9  “Tama-daane i-ginei ana palaawaa e-lima ge lua iga. Malaa, e-dee-dohu gi-nia daangada huogodoo aanei!”

6:10  Jesus ga-helekai gi digaula, “Haganoho-ina digaula gii-noho gi-lala.” (Di gowaa deelaa e-logo geinga-tolo) Malaa, digau huogodoo guu-noho gi-lala. Nia daane holongo e-lima-mana-(5,000).

6:11  Jesus ga-dahi-aga nia palaawaa, ga-danggee gi God, ga-duwwe gi digaula. Mee gaa-hai nia iga labelaa beelaa, gei digaula huogodoo gu-miami baagawa.

6:12  Di madagoaa digaula ne-maaluu, Mee ga-helekai gi ana dama-agoago, “Hagabudu-ina nia mee ala ne-dubu, hudee hagauwwou-ina.”

6:13  Gei digaula gu-hagabudu nia maa huogodoo, guu-haa nia gada e-madangaholu maa-lua ne-dubu i-nia palaawaa e-lima, ala ne-gai go nia daangada.

6:14  Nia daangada huogodoo ne-gidee nia mee haga-goboina a Jesus ne-hai, ga-helekai, “E-donu huoloo, deenei soukohp dela belee hanimoi gi henuailala!”

6:15  Jesus gu-iloo-Ia bolo digaula ga-lloomoi, ga-huuhuuli Ia gii king, gei Mee gaa-hana labelaa gi-daha modogoia gi-nia gonduu.

6:16  Hiahi-ia di-mee, gei ana dama-agoago ga-lloo-ia gi-di tai,

6:17  gaa-kaga gi-hongo di boodi, gaa-hula laa-lodo di tai gi-muli gi Capernaum. Gu-booia di-mee, gei Jesus digi hanimoi.

6:18  Di madangi guu-gono maaloo, guu-hai di tai gi-bagibagia.

6:19  Nia dama-agoago gu-aalo di-nadau boodi, holongo nia maele e-dolu be e-haa, gaa-mmada gi Jesus e-haele-mai i-hongo tai, gei digaula gu-uli nadau gai, gu-mmaadagu huoloo.

6:20  Jesus ga-helekai, “Goodou hudee mmaadagu, ma ko-Au.”

6:21  Digaula gu-tenetene huoloo gu-haga-uda a-Mee gi-lodo di boodi, gei di boodi guu-dau i-di gowaa dela belee hula ginai digaula.

6:22  Dono daiaa, gei digau dogologowaahee ala nogo noho i tongotai, gu-gidee bolo ma di boodi hua-e-dahi dela nogo i-golo. Digaula gu-iloo, bolo Jesus digi hana dalia ana dama-agoago, digaula ne-hula-hua mada-ginaadou.

6:23  Nia boodi mai Tiberias ga-lloomoi gi tongotai, hoohoo gi-di gowaa digau dogologowaahee nogo gai nadau palaawaa, i-muli-hua Tagi ne-hai dana danggee ang-gi God.

6:24  Di madagoaa digau dogologowaahee ne-gidee bolo Jesus gu-hagalee i-golo mo ana dama-agoago, digaula gaa-kaga gi-nia boodi, gaa-hula gi Capernaum, e-halahala a-Mee.

6:25  Di madagoaa nia daangada ne-gidee a Jesus i-baahi i-golo di tai, digaula ga-helekai gi Mee, “Tangada Agoago, Goe ne-dau i kinei ana-hee?”

6:26  Jesus ga-helekai, “Au e-hagi-adu gi goodou di tonu: Goodou e-halahala Au, i godou maaluu di gai nia palaawaa, gei hagalee i godou modongoohia agu mogobuna.

6:27  Hudee ngalua gi-nia meegai ala e-mee di-mooho. Ngaalua gi-nia meegai ala iai di mouli dono hagaodi ai, ala e-gowadu go Tama-Tangada, idimaa, Tamana go God la-guu-wanga di maaga haga-mogobuna gi-hongo o Mee.”

6:28  Digaula ga-heeu gi Mee, “Gimaadou e-hai di-madau aha, gii-mee-ai gimaadou di-hai nia mee a God ala e-hiihai ginai bolo gi-heia?”

6:29  Jesus ga-helekai, “Di mee a God e-hiihai ginai gi-heia bolo goodou gi-hagadonu-ina dana Dama dela ne-hagau-mai.”

6:30  Digaula ga-heeu, “Di mogobuna behee dela e-hai Kooe gaa-mmada ginai gimaadou, ga-hagadonu Goe? Goe gaa-hai dau-aha?

6:31  Madau maadua-namua ne-gai nadau ‘manna’ i-lodo di anggowaa, be nia helekai di Beebaa-Dabu e-helekai boloo: Mee ne-wanga gi digaula nia palaawaa mai di langi gi-geina.”

6:32  Jesus ga-helekai, “Au e-hagi-adu gi goodou di tonu: Hagalee go Moses dela ne-gowadu gi goodou nia palaawaa mai i-di langi. Ma go dogu Damana dela e-gowadu nia palaawaa donu mai i-di langi.

6:33  Di palaawaa a God dela e-gowadu, la-go Mee dela ne-haneia i-di langi gaa-wanga di mouli gi henuailala.”

6:34  Digaula ga-tangi gi Mee, “Meenei, gaamai di palaawaa deenei i-nia madagoaa huogodoo.”

6:35  Jesus ga-helekai, “Au go di palaawaa haga-mouli. Be koai-hua dela ga-hanimoi gi-di-Au, geia hagalee hiigai. Be koai-hua dela e-hagadonu Au, geia hagalee hieinu.

6:36  Au gu-hagi-adu gi goodou bolo goodou gu-gidee Au, gei digi hagadonu.

6:37  Digau huogodoo ala ga-gaamai go dogu Damana, ga-lloomoi gi-di-Au. Gei-Au hagalee kili digaula gi-daha,

6:38  idimaa Au ne-haneia i-di langi belee hai di hiihai o Mee dela ne-hagau-mai Au, hagalee go dogu hiihai.

6:39  Deenei di hiihai o-Maa dela ne-hagau-mai Au, bolo Au gi-hudee diagia tei dangada i ginaadou ala ne-gaamai go Mee, bolo gi-haga-mouli-ina digaula huogodoo i-di laangi hagaodi.

6:40  Idimaa, di hiihai dogu Damana le e-hai bolo digau huogodoo ala ma-gaa-mmada gi Tama, ga-hagadonu a-Mee, ga-hai-mee gi-di mouli dee-odi. Gei-Au ga-haga-mouli-aga digaula i-di laangi hagaodi.”

6:41  Digau o Jew ga-daamada ga-leelee hagamuhimuhi i Mee, idimaa, Mee ne-helekai boloo, ‘Au go di palaawaa dela ne-haneia i-di langi.’

6:42  Digaula ga-helekai, “Taane deenei go Jesus, la-hagalee go tama-daane a Joseph? Gidaadou e-iloo tamana mo tinana o-Maa. Mee e-helekai behee dela bolo Ia ne-haneia i-di langi?”

6:43  Jesus ga-helekai, “Hudee leelee hagamuhimuhi i godou mehanga.

6:44  Tangada e-mee di-hanimoi gi-di-Au ai, maa Tamana dela ne-hagau-mai Au, digi-dugu-mai a-mee, gei Au ga-haga-mouli-aga a-mee i-di laangi hagaodi.

6:45  Ma-guu-lawa di-hihi-ai nia soukohp boloo, ‘Nia daangada huogodoo le e-kabe nadau mee mai God.’ “Digau huogodoo ala gu-longono, guu-kabe mai Mee, le e-loomoi gi-di-Au.

6:46  “Deenei la-hagalee hai bolo tangada la-guu-mmada gi Tamana. Go Mee mai baahi o God, deelaa-hua go Mee ne-mmada gi Tamana.

6:47  Au e-hagi-adu di tonu: Koai e-hagadonu Au, geia e-hai-mee gi-di mouli dee-odi.

6:48  “Au go di palaawaa o-di mouli.

6:49  Godou maadua-mmaadua nogo gai nadau ‘manna’ i-lodo di anggowaa, gei digaula guu-mmade.

6:50  Deenei di hai o-di palaawaa dela ne-haneia i-di langi: Be koai-hua dela gaa-gai di-maa, geia hagalee made.

6:51  Au go di palaawaa mouli dela ne-haneia i-di langi. Be koai-hua ma-gaa-gai di palaawaa deenei, ia e-mouli gaa-hana-hua beelaa. Di palaawaa dela e-wanga ko-Au gi mee, la-go ogu goneiga bolo gi-mouli-ai henuailala.”

6:52  Deenei di mee ne-hidi-ai digau o Jew ne-daamada ga-lagalagamaaloo i nadau mehanga, ga-heheeu, “Dehee di hai Taane deenei e-mee di-gaamai ono goneiga e-gai go gidaadou?”

6:53  Jesus ga-helekai, “Au e-hagi-adu di tonu: Maa goodou hagalee gai nia goneiga ge hagalee e-inu nia dodo o Tama-Tangada, goodou di-godou mouli ai.

6:54  Be koai-hua dela e-gai ogu goneiga mo e-inu ogu dodo, ia e-hai-mee gi-di mouli dee-odi, gei Au ga-haga-mouli-aga a-mee i-di laangi hagaodi.

6:55  Idimaa, ogu goneiga la-go nia meegai donu, gei ogu dodo la-go nia wai-inu donu.

6:56  Be koai-hua gaa-gai ogu goneiga, ga-inu ogu dodo, ia e-noho i ogu lodo, Au e-noho i ono lodo.

6:57  Tamana dela e-mouli ne-hagau-mai Au, gei Au e-mouli mai i Mee. E-hai gadoo be tangada dela ma-gaa-gai ogu goneiga, ia e-mouli mai i-di-Au.

6:58  Deenei la-go di palaawaa dela ne-haneia i-di langi. Di palaawaa deenei la-hagalee hai be nia palaawaa o godou maadua-mmaadua ne-gai i-mua, nomuli digaula gaa-mmade. Tangada dela gaa-gai di palaawaa deenei, e-mouli gaa-hana-hua beelaa.”

6:59  Jesus ne-hai ana helekai aanei i dono madagoaa nogo agoago i-lodo synagogee i Capernaum.

6:60  Dogologo i ana dama-agoago ne-longono nnelekai aanei, ga-helekai, “Di agoago deenei le e-haingadaa. Ma koai e-mee di-hagalongo gi di-maa?”

6:61  Jesus gu-modongoohia nadau leelee logo, ga-helekai gi digaula, “Nia helekai aanei gu-haga-paagege goodou?

6:62  E-hai behee maa goodou gaa-mmada gi Tama-Tangada ma-gaa-hana gi-nua gi-di gowaa nogo noho-iei Mee i-mua?

6:63  Di Hagataalunga o God dela e-dugu-mai di mouli, gei nia mogobuna dangada le e-balumee. Agu helekai le e-gaamai di Hagataalunga haga-mouli a God.

6:64  Gei hunu goodou hagalee hagadonu.” (Jesus gu-modongoohia-hua mai i-di matagidagi digau ala hagalee hagadonu, mo tangada dela ga-hagi-anga Ia.)

6:65  Gei Mee ga-duudagi-adu boloo, “Deenei tadinga dagu mee ne-hagi-adu gi goodou boloo: Tangada e-mee di-hanimoi gi-di-Au ai, maa Tamana digi dumaalia-anga.”

6:66  Mai i-nia helekai aanei, digau dogologo i digau nogo daudali a Mee guu-huli gi-muli, gu-diiagi a-Mee.

6:67  Gei Jesus ga-helekai gi ana dama-agoago dilongoholu maa-lua, “Gei goodou, goodou e-hiihai e-hula labelaa?”

6:68  Simon Peter ga-helekai gi Mee, “Meenei Tagi, ma koai dela belee hula ginai gimaadou? Nia helekai ala e-iai di mouli dee-odi, la-aalaa-hua i do baahi.

6:69  Gimaadou gu-hagadonu ge gu-iloo bolo Goe go di Tama Dabuaahia dela ne-hanimoi i-baahi o God.”

6:70  Jesus ga-helekai, “Au ne-hili goodou dilongoholu maa-lua, gei tangada e-dahi i goodou la tangada huaidu!”

6:71  Mee nogo leelee i Judas, tama-daane Simon Iscariot. Ma e-aha maa mee tangada e-dahi i ana dama-agoago, gei go mee dela ga-hagi-anga a Jesus.

Chapter 7

7:1  Nomuli, gei Jesus gaa-hana laa-lodo Galilee. Mee e-de-hiihai di-hana gi Judea, idimaa, digau aamua o Jew e-hiihai e-daaligi a-Mee gii-made.

7:2  Tagamiami o-nia Damaa-hale Hagaabili o digau o Jew gu-hoohoo gaa-hai.

7:3  Gei nia duaahina-daane o Jesus ga-helekai gi Mee, “Hana gi-daha mo di gowaa deenei, hana gi Judea gi-gidee au dama-agoago au mee ala e-haihai.

7:4  Deai tangada e-hagammuni ana mee ala e-haihai ai, maa ia e-hiihai bolo nia daangada gi-iloo-e-ginaadou eia. Heia henuailala hagatau gi-modongoohia-ginaadou Goe!”

7:5  Ono duaahina-daane hogi hagalee hagadonu a-Mee.

7:6  Jesus ga-helekai gi digaula, “Di madagoaa dela e-daudonu mai gi-di-Au, la-digi dau-mai. Nia madagoaa huogodoo e-daudonu adu gi goodou.

7:7  Henuailala e-hiihai-adu gi goodou, gei e-de-hiihai-mai, idimaa, Au e-haga-modongoohia i-nia madagoaa huogodoo bolo ono hangaahai le e-huaidu.

7:8  Goodou hula gi Tagamiami. Au hagalee hana, idimaa, di madagoaa dela e-daudonu mai gi-di-Au, la-digi dau-mai.”

7:9  Mee ne-helekai beenei, gaa-noho-hua i Galilee.

7:10  I-muli-hua ono duaahina-daane ne-hula gi Tagamiami, gei Jesus guu-hana labelaa, malaa, Mee ne-hana hagammuni.

7:11  Digau aamua o Jew nogo halahala a-Mee i Tagamiami deelaa. Digaula ga-heheeu, “Mee i-hee?”

7:12  Nia daangada dogologo e-leelee haga-moolee i Mee i nadau mehanga. Hunu daangada e-helekai, “Mee tangada humalia.” Hunu daangada e-helekai, “Deeai, Mee e-halahalau nia daangada.”

7:13  Gei deai tangada e-hagabooboo hagammaa ai, idimaa, digaula e-mmaadagu i digau aamua o Jew.

7:14  Tagamiami ne-hoohoo gaa-lawa, gei Jesus gaa-hana gi-di Hale Daumaha, ga-daamada ga-agoago.

7:15  Digau aamua o Jew gu-homouli, ga-helekai, “Tangada deenei digi kuulu, gei Mee e-iloo nia mee logo mai ihee?”

7:16  Jesus ga-helekai gi digaula, “Agu agoago, la-hagalee ni-aagu, gei ne-lloomoi i-baahi o God, dela ne-hagau-mai Au.

7:17  Be koai-hua dela e-hiihai e-hai nia mee a God ala e-hiihai ginai, ia e-iloo be agu agoago la-ne-lloomoi i-baahi o God, be Au e-helekai i ogu mogobuna.

7:18  Tangada dela ma-ga-helehelekai i-deia, le e-hiihai bolo ia e-kae dono hagalaamua. Gei tangada dela e-ngalua e-hagalaamua Tangada dela ne-hagau-mai Ia, go Mee dela e-donu, gei di kai-tilikai i dono baahi ai.

7:19  E-donu bolo Moses la-gu-gowadu gi goodou nia haganoho. Malaa, tangada i goodou ne-daudali nia haganoho aalaa ai. Gei goodou e-aha ala e-hiihai bolo goodou e-daaligi Au gii-made?”

7:20  Digau dogologowaahee ga-helekai, “Di hagataalunga huaidu i oo lodo! Ma koai belee daaligi Goe gii-made?”

7:21  Jesus ga-helekai, “Di mogobuna haga-goboina e-dahi ne-hai ko-Au, gei goodou huogodoo gu-goboina huoloo.

7:22  Moses ne-hai dana haganoho bolo gi-sirkumsais-ina godou dama-daane (ma hagalee go Moses gei go godou maadua-mmaadua ne-daamada di-maa), malaa, goodou e-sirkumsais tama-daane i-di Laangi-Sabad.

7:23  Maa tama-daane ga-sirkumsais i-di Laangi-Sabad gi-de-mooho taganoho Moses, malaa goodou e-hagawelewele mai gi-di-Au eiaha, be Au ne-hai dagu dangada gi-humalia i-di Laangi-Sabad?

7:24  Hudee heia godou hagi-aga laa-daha. Hagi-aga-ina-hua gi-di mee dela e-donu!”

7:25  Hunu gau i digau Jerusalem e-helekai, “Ma hagalee go Taane deenei dela e-halahala go digau aamua belee daaligi gii-made?

7:26  Mmada! Mee e-agoago-hua i-mua digau dogologo, gei digaula hagalee helekai hai-baahi gi Mee! Malaa, digaula gu-iloo bolo Mee go di Mesaia?

7:27  Di madagoaa Mesaia ga-hanimoi, tangada e-iloo ai be Mee ne-hanimoi i-hee, gei gidaadou huogodoo e-iloo be Mee deenei ne-hanimoi i-hee.”

7:28  Di madagoaa Jesus nogo agoago i-lodo di Hale Daumaha, Mee ne-helekai gi-nua, “Goodou gu-iloo donu Au, be Au tangada mai-hee? Gei-Au hagalee ne-hanimoi-hua i ogu mogobuna. Ma go Mee dela ne-hagau-mai Au le e-donu. Gei goodou e-de-iloo a-Mee,

7:29  gei-Au e-iloo a-Mee, idimaa, Au ne-hanimoi i-baahi o Mee, go Mee ne-hagau-mai Au.”

7:30  Digaula belee kumi a-Mee, gei tangada e-dahi ne-bili gi Mee ai, idimaa, dono aawaa la-digi dau-mai.

7:31  E-dogologo digau i-lodo digau dogologowaahee aanei ne-hagadonu a-Mee. Digaula ga-helekai boloo, “Di Mesaia ga-hanimoi, le e-hai behee? Mee gaa-hai ana mogobuna e-mada-logo i-nia mogobuna a Taane deenei?”

7:32  Nia Pharisee gu-longono nia leelee haga-moolee digau dogologo i-di gili o Jesus, gei digaula mo nia dagi hai-mee-dabu, ga-hagau nadau gau hagaloohi e-kumi a Jesus.

7:33  Jesus ga-helekai, “Au e-noho-hua i godou baahi i-di madagoaa bodobodo, nomuli gei Au gaa-hana gi Mee dela ne-hagau-mai Au.

7:34  Goodou ga-halahala Au, gei e-dee-gidee, idimaa, goodou e-deemee di-hula gi-di gowaa dela ga-iei Au.”

7:35  Nia dagi aamua o Jew ga-helehelekai i nadau mehanga, “Mee gaa-hana gi-hee, dela ga-deemee di-gidee gidaadou? Mee gaa-hana gi-lodo nia waahale digau o Greece ala e-noho tadau daangada, gaa-hai ana agoago gi digau o Greece?

7:36  Mee ne-helekai bolo gidaadou ga-halahala Ia, gei e-dee-gidee, gei gidaadou e-deemee di-hula gi-di gowaa dela gaa-noho-eia. Dono hadinga bolo-aha?”

7:37  Di laangi haga-muliagina Tagamiami deelaa la-di laangi koia e-hagalabagau, gei Jesus gaa-duu gi-nua, ga-helekai gi-nua-loo, “Be koai-hua gu-hieinu, geia gi-hanimoi gi-di-Au.

7:38  Be koai-hua dela ga-hagadonu Au, geia gi-inumia. Idimaa di Beebaa-Dabu e-helekai boloo, ‘Nia wai haga-mouli ga-hali-mai i dono baahi.’ ”

7:39  Jesus ne-helekai i-di gili di Hagataalunga dela ga-hai-mee ginai digau ala ga-hagadonu Ia. Di madagoaa deelaa, gei di Hagataalunga digi haneia, idimaa, Jesus digi haga-uda ginai di madamada.

7:40  Hunu gau i-lodo digau dogologowaahee aanei, gu-longono a-Mee ne-helekai beenei. Digaula ga-helekai, “Taane deenei la soukohp donu.”

7:41  Hunu gau e-helekai, “Mee go di Mesaia.” Gei hunu gau e-helekai, “Di Mesaia la-hagalee hanimoi i Galilee.

7:42  Di Beebaa-Dabu e-helekai bolo di Mesaia le e-gila-mai i-di madawaawa o King David, e-haanau mai i Bethlehem di waahale a David.”

7:43  Digau dogologowaahee aalaa guu-noho hagabuulinga dagidahi i-di gili o Jesus.

7:44  Hunu gau bolo ginaadou e-kumi a-Mee, ge tangada ne-bili gi Mee ai.

7:45  Digau hagaloohi gaa-hula gi-muli, gei nia dagi hai-mee-dabu, mo nia Pharisee ga-heeu, “Goodou e-aha digi laha-mai a-Mee?”

7:46  Nia gau hagaloohi ga-helekai, “Ma deai tangada e-helehelekai be Tangada deenei ai!”

7:47  Gei nia Pharisee ga-helekai, “Mee gu-halahalau goodou labelaa?

7:48  Goodou gu-iloo be di-maa tangada aamua be-di Pharisee i-golo gu-hagadonu a-Mee?

7:49  Digau dogologowaahee aanei e-de-iloo nia haganoho Moses, gaa-hidi-ai digaula gaa-noho i-lala di hagahalauwa a God!”

7:50  Di Pharisee e-dahi, go Nicodemus, taane dela ne-hana ga-heetugi gi Jesus i-mua, ga-helekai gi digaula,

7:51  “Di tonu o tadau haganoho le e-hai bolo gidaadou e-deemee di-haga-huaidu nia daangada i-mua di-iloo di mee dela ne-hai.”

7:52  Gei digaula ga-helekai, “Goe tangada Galilee labelaa? Daulia di Beebaa-Dabu, gei goe ga-iloo bolo ma soukohp ne-hanimoi i Galilee ai!”

Chapter 8

8:1  [ Gei digaula huogodoo gaa-hula dagidahi gi nadau hale, gei Jesus gaa-hana gi-di Gonduu Olib.

8:2  Luada-loo dono daiaa, Mee gaa-hana gi-muli gi-di Hale Daumaha. Digaula huogodoo ga-dagabuli-mai gi-baahi o Mee, ge-Ia gaa-noho gi-lala, ga-daamada ga-aago digaula.

8:3  Digau haga-donudonu haganoho mo nia Pharisee ga-laha-mai di ahina ne-kumi nogo hai di huaidu hai be-di manu, ga-haga-duu a-mee i-mua digaula huogodoo.

8:4  Digaula ga-helekai gi Jesus, “Tangada Agoago, di ahina deenei ne-kumi i dana hai di huaidu hai be-di manu.

8:5  I-lodo tadau haganoho, Moses e-helekai bolo di ahina beenei, le e-dilidili gii-made. Malaa, Goe ga-helekai bolo-aha?”

8:6  Digaula ne-hai nadau heeu belee hagahala a-Jesus. Gei Mee ga-hagahaa gi-mua, gaa-hihi gi-hongo di gelegele gi dono madaalima.

8:7  Di madagoaa digaula e-tuu i-golo, e-haihai nadau heeu gi Mee, gei Mee ga-duu-aga gi-nua, ga-helekai gi digaula, “Be koai-hua i goodou digi hai dana hala, daamada dilidilia a-mee.”

8:8  Gei Mee ga-hagahaa labelaa gi-mua, gaa-hihi gi-hongo di gelegele.

8:9  Di madagoaa-hua digaula ne-longono nia mee aanei, digaula huogodoo ga-hagadau dagidahi gaa-hula, digau mmaadua i-mua. Jesus gaa-dubu modogoia, gei di ahina deelaa e-duu-hua i-golo.

8:10  Jesus ga-duu-aga, ga-helekai gi mee, “Aahee digaula? Ma tangada ne-dubu i-golo ai belee hagahuaidu goe?”

8:11  Di ahina deelaa ga-helekai, “Meenei, ma tangada ai.” Jesus ga-helekai, “E-humalia, Au hogi hagalee hagahuaidu goe. Hana, hudee heia labelaa di huaidu!”]

8:12  Jesus ga-helekai labelaa gi-nia Pharisee, “Au go di maalama o henuailala. Be koai-hua dela e-daudali Au, geia e-hai-mee gi-di maalama o-di mouli, ge hagalee e-haele i-lodo di bouli.”

8:13  Nia Pharisee ga-helekai gi Mee, “Dolomeenei gei Goe e-haga-modongoohia-hua Goe. Au helekai nogo helekai-iei Goe, la ono hagahonu ai.”

8:14  Jesus ga-helekai, “Deeai. Ma e-aha maa Au ne-haga-modongoohia-hua Au, gei agu helekai le e-donu, idimaa, Au e-iloo be Au ne-hanimoi i-hee ge e-hana gi-hee. Goodou e-de-iloo be Au ne-hanimoi i-hee ge e-hana gi-hee.

8:15  Goodou e-hagi-aga tangada i-di iloo o tangada. Gei-Au e-hagalee hagi-aga tangada.

8:16  Maa bolo Au gaa-hai dagu hagi-aga, dagu hagi-aga le e-donu, idimaa, Au hagalee modogoau hua. Tamana dela ne-hagau-mai Au, le e-madalia Au.

8:17  Ma e-hihi i-lodo di-godou haganoho bolo nia daangada hagadootonu dogolua ma-gaa-donu gi-di mee e-dahi, nnelekai meemaa le e-donu.

8:18  Au dela e-haga-modongoohia-aga dagu baahi, gei Tamana dela ne-hagau-mai Au, le e-haga-modongoohia-aga labelaa i-di-Au.”

8:19  Digaula ga-heeu gi Mee, “Do damana la-i-hee?” Jesus ga-helekai, “Goodou e-de-iloo Au mo dogu Damana. Maa goodou bolo ne-iloo goodou Au, gei goodou gu-iloo labelaa dogu Damana.”

8:20  Jesus ne-helehelekai nia mee aanei huogodoo, i dono madagoaa nogo agoago i-di Hale Daumaha i-di gowaa dela e-dugu-ai tebedebe hai-tigidaumaha. Gei tangada ne-kumi a-Mee ai, idimaa, di madagoaa o-Maa digi dau-mai.

8:21  Jesus ga-helekai labelaa gi digaula, “Au gaa-hana gi-daha, goodou ga-halahala Au, gei goodou gaa-mmade i-lodo godou huaidu. Goodou e-deemee di hula gi-di gowaa dela e-hana ginai Au.”

8:22  Gei digau aamua o Jew ga-helekai, “Mee e-helekai bolo gidaadou e-deemee di hula gi-di gowaa dela e-hana ginai e-Ia. Deenei le e-hai dono hadinga bolo Mee ga-daaligi Ia gii-made?”

8:23  Jesus ga-helekai, “Goodou digau ni henuailala, gei Au ne-haneia i-nua. Goodou digau henuailala, gei Au hagalee tangada o henuailala.

8:24  Deelaa-laa Au e-hagi-adu gi goodou, bolo goodou gaa-mmade i-lodo godou huaidu. Maa goodou hagalee hagadonu bolo Au Dela Ko-Au, gei goodou gaa-mmade i-lodo godou huaidu.”

8:25  Digaula ga-heeu gi Mee, “Goe koai?” Jesus ga-helekai, “Guu-lawa di-hagi-adu ko-Au i-taamada-loo!

8:26  Nia mee logowaahee belee helekai-iei Au i goodou. Nia mee logowaahee belee haga-huaidu-ai goodou. Tangada ne-hagau-mai Au, go Mee dela e-donu huoloo, gei Au ne-hagi ang-gi henuailala nia mee ala ne-longono-iei au mai baahi o Mee.”

8:27  Digaula digi modongoohia bolo Jesus nogo helehelekai gi ginaadou i Tamana.

8:28  Gei Mee ga-helekai gi digaula, “Di-godou madagoaa ma-ga-daudau gi-nua Tama-Tangada, goodou ga-iloo-laa, bolo Au Dela Ko-Au. Gei goodou ga-iloo labelaa, bolo Au hagalee hai agu mee hua i-di-Au. Au e-helekai-hua i-nia mee o dogu Damana bolo gi-helekai-ai.

8:29  Mee dela ne-hagau-mai Au, le e-madalia Au. Mee digi diagia Au gi modogoau, idimaa, Au e-hai nia mee ala e-hiihai ginai Mee i-nia madagoaa huogodoo.”

8:30  Digau dogologo ala ne-longono nia mee a Jesus nogo helehelekai-ai, gu-hagadonu a-Mee.

8:31  Jesus ga-helekai gi digau ala gu-hagadonu Ia, “Maa goodou ma-ga-daudali agu agoago, goodou guu-hai nia dama-agoago donu ni-aagu.

8:32  Goodou ga-iloo di tonu, gei di tonu ga-haga-mehede goodou.”

8:33  Digaula ga-helekai, “Gimaadou nia hagadili ni Abraham. Gimaadou digi hai-hege gi-nia daangada. Goe e-helekai bolo gimaadou ga-haga-maahede behee?”

8:34  Jesus ga-helekai, “Au e-hagi-adu gi goodou di tonu: Digau huogodoo ala e-huaidu, la nia hege ni-di huaidu.

8:35  Di hege la-hagalee tangada-donu ni-di madahaanau. Gei tama-daane la tangada-donu ni-di madahaanau gaa-hana-hua beelaa.

8:36  Maa di Tama ga-haga-mehede goodou, gei goodou gu-maahede donu.

8:37  Au e-iloo bolo goodou nia hagadili ni Abraham, gei goodou e-hagamada belee daaligi Au gii-made, idimaa, goodou ala hagalee daudali agu agoago.

8:38  Au e-helehelekai i-nia mee o dogu Damana ne-hagi-mai, gei goodou e-hai nia mee di-godou damana ne-hagi-adu.”

8:39  Digaula ga-helekai, “Di-madau damana la-go Abraham!” Jesus ga-helekai, “Maa nei bolo e-donu bolo goodou nia dama ni Abraham, goodou belee hai nia mee a-maa nogo hai.

8:40  Agu mee huogodoo ala nogo hai, le e-hagi-adu gi goodou di tonu, dela ne-hagalongo ginai Au mai baahi o God. Dolomeenei, gei goodou e-hagamada belee daaligi Au gii-made. Abraham digi hai dana mee beenei!

8:41  Goodou e-hai nia mee di-godou damana nogo hai.” Gei digaula ga-helekai, “Ma go God dela go di-madau damana. Gimaadou nia dama donu ni Mee.”

8:42  Jesus ga-helekai gi digaula, “Maa nei bolo God la Tamana-donu ni goodou, goodou la-belee aloho i-di-Au, idimaa, Au ne-hanimoi i-baahi o God, gei dolomeenei Au gu-i-ginei. Au hagalee ne-hanimoi-hua i-di-Au, go Mee ne-hagau-mai Au.

8:43  Goodou e-aha ala digi modongoohia agu helekai? Goodou hagalee modongoohia, idimaa, goodou e-deemee di-hagalongo gi agu helekai.

8:44  Goodou nia dama ni Setan, di-godou damana, gei goodou e-hiihai e-daudali di hiihai di-godou damana. Mai loo i taamada, gei mee tangada daaligi-dangada gii-made. Mee digi madalia-loo di baahi dela e-donu, idimaa, ma deai di tonu i ono lodo ai. Di madagoaa mee ma-ga-helekai kai-tilikai, mee e-hai-hua go dono iloo-mai ono lodo, idimaa, mee tangada hai-kai-tilikai, gei mee la-go tamana o-nia kai-tilikai huogodoo.

8:45  Gei-Au e-helekai nia helekai ala e-donu, deelaa di-godou mee ne-de-hagadonu Au.

8:46  Ma koai i goodou e-mee di haga-modongoohia-aga bolo Au gu-ihala, guu-hai di huaidu? Maa Au e-helekai i-di tonu, goodou e-aha ala hagalee hagadonu Au?

8:47  Tangada dela ne-hanimoi i-baahi o God, e-hagalongo gi-nia helekai a God. Go goodou-hua ala hagalee mai baahi o God, deelaa di mee e-de-hagalongo-ai goodou.”

8:48  Digaula ga-heeu-adu gi Jesus, “Madau helekai la-hagalee donu di helekai bolo goe tangada Samaria, di hagataalunga huaidu i oo lodo?”

8:49  Jesus ga-helekai, “Dogu hagataalunga huaidu ai. Au e-hagalaamua dogu Damana, gei goodou e-haga-balumee Au.

8:50  Au hagalee halahala dogu hagalaamua. Tangada i-golo dela e-halahala di-maa, gei go Mee dela e-donu dana hagi-aga.

8:51  Au e-hagi-adu gi goodou di tonu: Be koai-hua dela ga-daudali agu helekai, geia hagalee-loo e-made.”

8:52  Digau o Jew ga-helekai gi Mee, “Dolomeenei, gei gimaadou guu-donu bolo di hagataalunga huaidu i oo lodo. Abraham guu-made, nia soukohp guu-mmade, gei Goe e-helekai bolo be koai-hua dela ga-daudali au agoago, geia hagalee-loo e-made.

8:53  Madau damana Abraham guu-made. Goe e-helekai bolo Goe e-mada-aamua i-mee? Nia soukohp e-mmade labelaa. Goe e-hai bolo Goe koai?”

8:54  Jesus ga-helekai gi digaula, “Maa Au gaa-bida hagalaamua Au, dogu hagalaamua dono hadinga ai. Tangada dela e-hagalaamua Au, la-dela go dogu Damana, go Mee dela e-helekai-ai goodou bolo go di-godou God.

8:55  Goodou digi iloo a-Mee, gei Au e-iloo a-Mee. Maa Au ne-helekai bolo Au e-de-iloo-e-Au a-Mee, Au tangada hai-kai-tilikai be goodou. Au e-iloo a-Mee, ge e-daudali ana helekai.

8:56  Di-godou damana go Abraham guu-tene gi dono mmada gi dogu hanimoi. Mee guu-mmada gu-tenetene.”

8:57  Digaula ga-helekai, “O ngadau digi madalima, gei Goe bolo Goe gu-gidee Abraham?”

8:58  Jesus ga-helekai, “Au e-hagi-adu gi goodou di tonu: I-mua Abraham ne-haanau, gei Au Dela Ko-Au gu-i-golo.”

8:59  Digaula belee dilidili a-Mee gi-nia hadu, gei Jesus ga-haga-ngala Ia, ga-hagatanga gi-daha mo-di Hale Daumaha.

Chapter 9

9:1  Di madagoaa Jesus ne-heehee-adu, Mee ga-gidee taane deegida mai i dono haanau.

9:2  Ana dama-agoago ga-helekai-adu gi Mee, “Meenei Tangada Agoago, di huaidu ni-ooi dela ne-hidi-ei mee ga-haanau deegida? Di huaidu ni mee, be di huaidu ni ono maadua?”

9:3  Jesus ga-helekai, “Dono deegida la-hagalee ne-hidi-mai i ono huaidu be nia huaidu o ono maadua. Hagalee nia huaidu ni mee, be ni tamana, be ni tinana ala ne-hidi-iei mee ga-dee-gida. Mee e-dee-gida belee haga-kila-aga nia mogobuna o God i-baahi o mee.

9:4  I-di aa, gidaadou e-hai gii-hai nnegau a Tangada dela ne-hagau-mai Au, idimaa, di boo ga-dau-mai, tangada e-mee di-ngalua ai.

9:5  Dogu noho i henuailala, ko-Au go di maalama o henuailala.”

9:6  I-muli dana helehelekai nia mee aanei, Jesus gaa-bui ana haawale, ga-unugi gi-nia gelegele pigi, gaa-hunu gi-nia golomada o taane deelaa,

9:7  ga-helekai gi mee, “Hana gaugaulia o golomada i-di monowai Siloam. (Telekai deenei la dono hadinga bolo “Hagau”), gei taane deelaa gaa-hana, ga-gaugau ono golomada, ga-hanimoi, gu-gidee-ia.

9:8  Digau nogo noho hoohoo gi mee, mo digau ala nogo gidee a-mee nogo hai ana madamadau mee i-mua, ga-heheeu, “Ma hagalee go taane deenei dela nogo madamadau ana mee?”

9:9  Hunu gau e-helekai, “Go mee deenaa.” Hunu gau e-helekai, “Deeai, hagalee go mee, mee e-dina gi-mee.” Gei taane deelaa ga-helekai-aga, “Au go mee.”

9:10  Digaula ga-heeu gi mee, “O golomada la-ne-hai behee ga-gidee?”

9:11  Mee ga-helekai, “Taane dela e-haga-ingoo bolo Jesus, ne-hai ana gelegele-pigi, gaa-hunu gi ogu golomada, ga-helekai-mai bolo gii-hana gi Siloam, gaugaulia ogu golomada, gei au gaa-hana. Di madagoaa-hua dela ne-gaugau ogu golomada, gei au gu-gidee.”

9:12  Digaula ga-heeu labelaa, “Mee i-hee?” Mee ga-helekai, “Au e-de-iloo.”

9:13  Gei digaula gaa-lahi taane deelaa nogo deegida gi-baahi nia Pharisee.

9:14  Di laangi Jesus ne-hai ana gelegele-pigi ga-hagahili nia golomada o taane deelaa, la-di Laangi-Sabad.

9:15  Nia Pharisee ga-heeu labelaa gi taane deelaa di hai ne-gidee-ia. Gei mee ga-hagi-anga gi digaula, “Mee ne-wanga ana gelegele-pigi gi ogu golomada, gei au ga-gaugau ogu golomada, dolomeenei gei au gu-gidee.”

9:16  Hunu Pharisee ga-helekai, “Taane dela ne-hai di mee deenei, hagalee ne-hanimoi i-baahi o God, idimaa, Mee hagalee haga-kila-aga nia haganoho o-di Laangi-Sabad.” Gei hunu ginaadou e-helekai, “Tangada huaidu le e-mee di-hai nia hagadilinga mogobuna beenei?” Digaula gu-waewae ginaadou guu-noho geegee.

9:17  Nia Pharisee ga-heeu labelaa gi taane deelaa, “Goe e-helekai bolo taane ne-hai o golomada gi-gidee, e-haga-ingoo kooe bolo-aha?” Mee ga-helekai, “Mee go soukohp.”

9:18  Digau aamua o Jew hagalee hiihai e-hagadonu bolo mee nogo deegida i-mua ga-nomuli ga-gidee. Gei digaula ga-gahigahi-mai nia maadua o-maa,

9:19  ga-heeu gi meemaa, “Tama-daane ni goolua deenei? Goolua e-helekai bolo mee ne-haanau deegida? Malaa, mee e-aha dela gu-gidee dolomeenei?”

9:20  Nia maadua o-maa ga-helekai, “Gimaua e-iloo di-mau dama-daane, gimaua e-iloo bolo mee ne-haanau deegida.

9:21  Gei gimaua e-de-iloo be mee ne-aha dela gaa-mee di-gidee dolomeenei, koai ne-hai nia golomada o-maa gi-aala. Heeu gi mee, mee gu-madua, guu-mee-hua dana helekai.”

9:22  Nia maadua o-maa ne-helekai beenei i-di nau mmaadagu i digau aamua o Jew, idimaa, digaula guu-buni bolo tangada dela ga-haga-modongoohia a-Mee bolo Jesus go di Mesaia, digaula ga-hagabagi tangada gi-daha mo synagogee.

9:23  Dela di mee nia maadua o-maa ne-helekai, “Mee gu-madua, heeu gi mee.”

9:24  Digaula ga-gahi-mai haga-lua taane dela ne-haanau-mai deegida, ga-helekai-adu gi mee, “Hagamodu i-mua o God, bolo goe e-helekai i-di tonu. Gimaadou e-iloo bolo taane dela ne-hagahumalia goe, la taane hai mee hala.”

9:25  Taane deelaa ga-helekai, “Au e-de-iloo be Mee taane hai mee hala be deeai, gei au e-iloo bolo au nogo deegida, dolomeenei gei au gu-gidee.”

9:26  Digaula ga-heeu, “Mee ne-hai dana-aha adu gi-di-goe? Mee ne-hai o golomada gi-gidee behee?”

9:27  Mee ga-helekai, “Au guu-lawa dagu hagi-adu gi goodou, gei goodou hagalee hagalongo. Goodou e-aha ala e-hiihai e-hagalongo labelaa? Holongo goodou e-hiihai labelaa e-hai nia dama-agoago ni Mee?”

9:28  Digaula ga-haganneennee a-mee ga-helekai, “Goe di tama-agoago ni Mee, gimaadou nia dama-agoago ni Moses.

9:29  Gimaadou e-iloo bolo God gu-helekai gi Moses, gei Tangada deelaa, gimaadou e-de-iloo di gowaa dela ne-hanimoi-iei Mee.”

9:30  Taane ga-helekai, “Di mee haga-goboina deelaa! Goodou e-de-iloo di gowaa dela ne-hanimoi Taane deelaa, gei Mee ne-haga-hili ogu golomada!

9:31  Gidaadou e-iloo bolo God la-hagalee hagalongo gi digau hai mee hala, Mee e-hagalongo hua gi digau ala e-hagalaamua Ia mo-di haga-gila-aga dono hiihai.

9:32  Mai taamada o henuailala, deai tangada ne-longono bolo tangada i-golo ne-haga-gidee nia golomada tangada deegida mai i dono haanau.

9:33  Maa taane deenei la-hagalee mai baahi o God, Mee e-deemee di-hai ana mee!”

9:34  Digaula ga-helekai, “Goe ne-haanau, ga-madua-aga i-lodo di huaidu, goe bolo e-agoago-mai gimaadou?” Gei digaula ga-hagabagi a mee gi-daha mo synagogee.

9:35  Jesus ne-longono bolo digaula gu-hagabagi taane deelaa gi-daha mo synagogee, ga-gidee Ia a-mee, ga-heeu, “Goe e-hagadonu Tama-Tangada?”

9:36  Taane ga-helekai, “Meenei, hagia-mai Taane deenei, gii-mee au di-hagadonu a-Mee!”

9:37  Jesus ga-helekai gi mee, “Goe gu-gidee a-Mee, go Mee dela e-leelee-adu gi-di-goe dolomeenei.”

9:38  Taane deelaa ga-helekai, “Meenei dogu Dagi, au gu-hagadonu!” ga-dogoduli-ia i-mua o Jesus.

9:39  Jesus ga-helekai, “Au ne-hanimoi gi henuailala belee hai dagu hagi-aga. Digau deegida ga-gidee, gei digau ala e-gidee ga-dee-gida.”

9:40  Hunu Pharisee ala i-di gowaa deelaa gu-longono ana helekai, ga-heeu, “Ma e-hai be au helekai bolo gimaadou gu-dee-gida labelaa?”

9:41  Jesus ga-helekai, “Maa goodou e-dee-gida, gei godou huaidu ai. Gei goodou e-helekai bolo goodou e-gidee, dono hadinga bolo godou huaidu la-i-golo-hua.”

Chapter 10

10:1  Jesus ga-helekai, “Au e-hagi-adu gi goodou di tonu: Tangada dela hagalee e-ulu i-di bontai di abaaba-siibi, gei e-gaga gi-lodo i tuai gowaa, la tangada gaiaa.

10:2  Tangada dela e-ulu i-di bontai, deelaa tangada hagaloohi-siibi donu.

10:3  Tangada dela e-madamada humalia di bontai, le e-huge di bontai gi mee. Nia siibi e-longono dono lee ma-ga-gahigahi nadau ingoo, gaa-dagi ginaadou gi-malaelae.

10:4  Mee gaa-dagi digaula gi-malaelae, gaa-hana i-mua digaula, nia siibi ga-daudali a-mee, idimaa, digaula e-iloo dono lee.

10:5  Digaula hagalee daudali tangada-gee, e-llele-hua gi-daha mo mee, idimaa, digaula e-de-iloo dono lee.”

10:6  Jesus ne-hagi-anga dana ala-kai deenei gi digaula, gei digaula digi modongoohia be Mee ne-helekai bolo-aha.

10:7  Jesus ga-helekai labelaa, “Au e-hagi-adu gi goodou di tonu: Au go di bontai di abaaba-siibi.

10:8  Digau huogodoo ala ne-lloomoi i ogu mua, la digau gaiaa mo digau dada-mee, gei nia siibi digi hagalongo gi digaula.

10:9  Au go di bontai. Be koai-hua dela ga-ulu i-di-Au, le e-haga-mouli. Mee ga-ulu gi-lodo, ga-ulu gi-daha, e-gidee-ia ana meegai.

10:10  Tangada gaiaa e-hanimoi-hua belee gaiaa, e-daaligi gii-made mo-di oho gi-daha. Gei-Au ne-hanimoi bolo gi-mouli goodou i-di mouli hagatau.

10:11  “Au go tangada-hagaloohi siibi humalia, tangada hagaloohi siibi humalia le e-wanga-dehuia dono mouli gi ana siibi.

10:12  Tangada ngalua, dela hagalee tangada hagaloohi-siibi donu, ge hagalee hai-mee gi-nia siibi, dono madagoaa ma-gaa-mmada gi-di paana lodo-geinga e-hanimoi, gei mee ga-diiagi nia siibi gaa-lele, gei di paana lodo-geinga ga-waluwalu nia siibi gi-lellele dagidahi.

10:13  Tangada ngalua le e-lele-hua gi-daha, idimaa, mee tangada ngalua, ge hagalee haa-manawa i-nia siibi.

10:14  Au tangada hagaloohi-siibi humalia. Au e-iloo-e-Au agu siibi, gei agu siibi e-iloo-e-ginaadou Au.

10:15  E-hai be Tamana dela e-iloo Au, gadoo be Au dela e-iloo Tamana. Au e-wanga-dehuia dogu mouli i agu siibi.

10:16  Nia siibi labelaa i-golo ni-aagu, gei digaula hagalee i-lodo di abaaba siibi deenei. Gei-Au e-hai gi-laha-mai digaula labelaa. Digaula ga-longono dogu lee, gei digaula gaa-hai di hagabuulinga-siibi hua-e-dahi, e-hai di-nadau dangada hagaloohi-siibi hua-e-dahi.

10:17  “Tamana le e-aloho i-di-Au, idimaa, Au dela e-wanga dogu mouli, bolo gi-hai-mee labelaa ginai.

10:18  Deai tangada e-daa dogu mouli gi-daha mo Au ai. Ko-Au-hua e-bida wanga dogu mouli. Au ogu donu e-wanga dogu mouli, gei Au ogu donu e-daa di-maa labelaa. Deenei di-mee dogu Damana ne-hai-mai bolo Au gi-heia.”

10:19  Nnelekai aanei la-guu-hai nia daangada gii-noho waewae geegee.

10:20  Digau dogologo i digaula e-helekai boloo, “Di hagataalunga huaidu la-guu-noho i-baahi o Mee, Mee gu-boiboi. Goodou e-hagalongo gi Mee eiaha?”

10:21  Gei hunu gau e-helekai, “Tangada iai di hagataalunga huaidu, hagalee leelee beenei! Di hagataalunga huaidu e-mee di-haga-gidee tangada deegida behee?!”

10:22  Di madagoaa gu-dau-mai e-hai-ai Tagamiami e-hagadabu di Hale Daumaha i Jerusalem i-lodo di madagoaa magalillili.

10:23  Jesus e-heehee i-hongo di “Balanda-Solomon” i-lodo di Hale Daumaha,

10:24  gei digau o Jew ga-haganiga-mai a-Mee ga-helekai, “E-waalooloo behee go dau haga-gologolo gimaadou beenei? Hagia-mai haga-huudonu, be ma Kooe go di Mesaia?”

10:25  Jesus ga-helekai, “Au guu-lawa di-hagi-adu gi goodou, gei goodou hagalee hagadonu Au. Nia hegau haga-goboina ala nogo hai ko-Au i-di mogobuna dogu Damana, ne-haga-modongoohia-aga Au.

10:26  Goodou hagalee hagadonu, idimaa, goodou hagalee nia siibi ni-aagu.

10:27  Agu siibi e-hagalongo gi dogu lee. Au e-iloo digaula, gei digaula e-daudali Au.

10:28  Au e-wanga di mouli dee-odi gi digaula, digaula hagalee mmade, ge tangada e-daa digaula gi-daha mo Au ai.

10:29  Nia mee Tamana ne-gaamai gi-di-Au le-koia e-aamua i-nia mee huogodoo, tangada e-mee di-kae nia maa gi-daha mo dogu Damana ai.

10:30  Tamana mo Au le e-dahi.”

10:31  Gei nia daangada ga-ogo labelaa nadau hadu belee dilidili a-Mee.

10:32  Jesus ga-helekai gi digaula, “Au guu-hai agu hegau haga-goboina humalia e-logo i godou mua, aalaa nia mee ni Tamana ne-gaamai bolo gi-heia. Malaa, di mogobuna dehee i-nia maa dela belee dilidili-iei Au go goodou?”

10:33  Digaula ga-helekai, “Gimaadou hagalee dilidili Goe i au hegau humalia ne-hai. Gimaadou e-dilidili Goe, idimaa, Goe e-hagahuaidu a God. Goe tangada hua, gei Goe e-helekai bolo Goe go God.”

10:34  Jesus ga-helekai, “Ma-guu-lawa di-hihi i-lodo godou haganoho donu bolo God gu-helekai bolo goodou la nia god.

10:35  Gidaadou gu-iloo bolo nnelekai di Beebaa-Dabu le e-donu gaa-hana-hua beelaa, gei God ne-hagaingoo digau ala ne-wanga ginai ana helekai bolo nia god.

10:36  Gei mai gi-di-Au, Tamana ne-hilihili Au ga-hagau-mai gi henuailala. Malaa, e-hai behee go di-godou helekai bolo Au e-hagahuaidu a God, idimaa, Au dela ne-helekai bolo Au go Tama a God?

10:37  Hudee hagadonu-ina Au maa Au hagalee hai nia mee o dogu Damana e-hiihai ginai gi-heia.

10:38  Maa agu mee ala e-hai la-go nnegau o dogu Damana, e-aha dela goodou hagalee hagadonu Au, goodou belee hagadonu-hua agu hegau haga-goboina, gei goodou ga-iloo mo-di modongoohia bolo Tamana le e-noho i ogu lodo, gei Au e-noho i ono lodo.”

10:39  Digaula belee kumi a-Mee labelaa, gei Mee gu-haga-ngala eia gi-daha mo digaula.

10:40  Gei Jesus gaa-hana labelaa gi-muli gi-di baahi dela i-golo di monowai Jordan i-di gowaa John nogo hai ana babdais, gaa-noho i-golo.

10:41  Digau dogologo ne-loomoi gi Mee, ga-helehelekai, “John digi hai ana mogobuna haga-goboina, gei ana helekai huogodoo i-di gili Tangada deenei, le e-donu.”

10:42  Digau dogologo nogo i-golo gu-hagadonu a-Mee.

Chapter 11

11:1  Taane magi dono ingoo go Lazarus, e-noho i Bethany. Bethany la-go di guongo dela e-noho-ai a Mary mo dono duaahina ahina go Martha.

11:2  (Mary deenei la-go Mary ne-llingi dana lolo-kala gi-nia wae o Tagi, ga-omo gi-nia ngaahulu o dono libogo, dono duaahina go Lazarus nogo magi.)

11:3  Taga-haanau-ahina deelaa gaa-hai di-nau hegau gi Jesus boloo, “Meenei Tagi, do ehoo hagaaloho la-guu-magi.”

11:4  Di madagoaa Jesus ne-longono, geia ga-helekai, “Di hagaodi o-di magi deenei la-hagalee go di made o Lazarus. Di mee deenei ne-hai belee haga-madamada a God, ne-hai labelaa di-mee e-haga-madamada Tama a God.”

11:5  Jesus e-aloho i Martha, mo dono duaahina-ahina, mo Lazarus.

11:6  Jesus gu-longono bolo Lazarus guu-magi, malaa, Mee guu-noho-hua i-di gowaa deelaa i-nia laangi e-lua.

11:7  Nomuli, gei Mee ga-helekai gi ana dama-agoago, “Gidaadou gaa-hula gi-muli gi Judea.”

11:8  Ana dama-agoago ga-helekai, “Meenei, Tangada Agoago, nia laangi dulii ne-too gi-daha, gei nia daangada nogo hiihai e-dilidili Goe, gei Goe e-helekai bolo Goe e-hana labelaa gi-muli?”

11:9  Jesus ga-helekai, “Di laangi e-dahi e-madangaholu maa-lua ono aawaa, hagalee hai beelaa? Digau ma-ga-heehee i-di aa, la-hagalee tingatinga, idimaa, digaula e-gidee di maalama o henuailala.

11:10  Maa digaula ga-taele i-di boo, le e-tingatinga, idimaa, di maalama la-hagalee i-nadau baahi.”

11:11  Jesus ne-helekai nia mee aanei, ga-duudagi-adu, “Tadau ihoo Lazarus la-guu-kii. Au e-hana, e-hangahanga a-mee.”

11:12  Ana dama-agoago ga-helekai gi Mee, “Meenei, maa mee e-kii, mee ga-humalia-hua.”

11:13  Nnelekai a Jesus le e-hai bolo Lazarus la-guu-made, gei digaula e-hagamamaanadu bolo Mee ne-helekai bolo Lazarus e-kii-hua.

11:14  Jesus ga-haga-modongoohia haga-madammaa gi digaula, “Lazarus la-guu-made.

11:15  Gei-Au e-tenetene i goodou, i-di Au hagalee nogo madalia a-mee, bolo gi-hagadonu goodou. Gidaadou gaa-hula gi mee.”

11:16  Thomas (dela e-haga-ingoo bolo Didymus) ga-helekai ang-gi ono ehoo dama-agoago, “Gidaadou gaa-hula dalia Tangada Agoago, gii-mmade gidaadou dalia a-Mee.”

11:17  Di madagoaa Jesus ne-dau i-golo, gei Mee ga-iloo bolo Lazarus la-guu-danu i-nia laangi e-haa ne-too gi-daha.

11:18  Bethany le e-hoohoo gi Jerusalem, e-mogowaa baahi-lala nia maele e-lua.

11:19  Digau o Jew dogologo ne-loomoi belee haga-tenetene Martha mo Mary i-di made di-nau duaahina-daane.

11:20  Di madagoaa Martha ne-longono-ia bolo Jesus la-gu-hanimoi, mee gaa-hana belee haga-heetugi gi Mee, gei Mary le e-noho-hua i-lodo di hale.

11:21  Martha ga-helekai gi Jesus, “Meenei dogu Dagi, maa Goe ne i-ginei, gei dogu duaahina-daane la-digi made.

11:22  Gei au e-iloo bolo dolomeenei God ga-dumaalia-adu gi-di-Goe tei mee ma-gaa-dangi-iei Goe gi Mee.”

11:23  Jesus ga-helekai gi mee, “Do duaahina ga-mouli-aga.”

11:24  Martha ga-helekai gi Jesus, “Au e-iloo bolo dogu duaahina le e-mouli-aga i-di laangi hagaodi.”

11:25  Jesus ga-helekai gi mee, “Au go di haga-mouli-aga, mo-di mouli. Digau ala ga-hagadonu Au, ga-mouli, ma e-aha maa ginaadou gaa-mmade.

11:26  Digau ala e-mouli ge e-hagadonu Au, e-hagalee-loo e-mmade gaa-hana-hua beelaa. Goe e-hagadonu di mee deenei?”

11:27  Gei Martha ga-helekai gi Mee, “Uaa, Meenei, au e-hagadonu bolo Goe go di Mesaia, go Tama a God dela belee hanimoi gi henuailala.”

11:28  Muli-hua Martha ne-helekai, geia gaa-hana, ga-gahigahi hagammuni dono duaahina-ahina Mary, ga-helekai gi mee, “Tangada Agoago gu-i ginei, Mee e-heheeu goe.”

11:29  Di madagoaa Mary ne-longono-ia, ga-duu-i-nua, ga-hagalimalima gaa-hana ga-heetugi gi Mee.

11:30  Jesus digi dau i-di guongo deelaa, nogo i-di gowaa hua ne-heetugi e-Ia gi Martha.

11:31  Digau ala nogo haga-manawa lamalia Mary i-lodo di hale, ga-gidee a-mee ne-ulu hagalimalima gi-malaelae. Digaula ne-haga-bau bolo mee e-hana gi taalunga, e-dangi i-golo. Gei digaula ga-daudali a-mee.

11:32  Mary guu-dau i-di gowaa dela e-noho-ai a Jesus. Dono madagoaa ne-gidee-ia a-Mee, geia ga-dogoduli, ga-helekai, “Meenei Tagi, maa Goe ne-i-ginei, gei dogu duaahina-daane la-digi made.”

11:33  Jesus ga-gidee-Ia a-mee mo digau labelaa i-golo e-tangitangi, gei dono manawa gu-ngalungalua huoloo.

11:34  Gei Mee ga-heeu, “Goodou ne-danu a-mee i-hee?” Digaula ga-helekai gi Mee, “Meenei, hanimoi, mmada.”

11:35  Jesus gu-madatangi.

11:36  Digaula ga-helekai, “Mmada malaa, di aloho o-Maa la-gu-damanaiee huoloo i mee.”

11:37  Malaa, hunu gau i digaula ga-helekai, “Mee gu-haga-gida dana dangada deegida. Malaa e-hai behee, Mee e-deemee di-daa a Lazarus gi-daha mo-di made?!”

11:38  Jesus gu-ngalungalua labelaa dono manawa, gaa-hana gi taalunga. Taalunga la-di bagungoo, gei di bontai di-maa e-pono gi-di hadu.

11:39  Jesus ga-helekai, “Daawa-ina gi-daha di hadu.” Martha, tuaahina o tangada dela ne-made, ga-helekai gi Mee, “Meenei, ma-gu-bilau huoloo, idimaa, mee ne-made gei guu-haa ono laangi.”

11:40  Jesus ga-helekai gi mee, “Au digi helekai bolo goe ga-gidee di madamada o God, maa goe ga-hagadonu?”

11:41  Digaula ga-daa gi-daha di hadu, Jesus gaa-mmada gi-nua, ga-helekai, “Di-mee-bolo Goe, Tamana, i do hagalongo-mai gi-di-Au.

11:42  Au e-iloo bolo Goe e-hagalongo-mai i-nia madagoaa huogodoo, gei Au ne-helekai beenei bolo gi-hagadonu digau aanei, bolo ma Kooe dela ne-hagau-mai Au.”

11:43  I-muli-hua ana helekai aanei, ge-Ia ga-helekai gi-nua, “Lazarus, ulu-mai gi-daha!”

11:44  Mee ga-ulu-mai. Nia lima o-maa mono wae e-didi gi-di gahu lodo daalunga, gei nia hadumada o-maa e-gahu gi-di gahu. Jesus ga-helekai gi digaula, “Wweedee a-mee. Hagau-ina a-mee gii-hana.”

11:45  E-dogologo digau ne-lloomoi gi Mary, ne-mmada gi-nia mee ala ne-hai go Jesus, gu-hagadonu a Mee.

11:46  Hunu gau guu-hula gi-muli gi-nia Pharisee, ga-hagi-anga gi digaula nia mee a Jesus ne-hai.

11:47  Nia Pharisee mo nia dagi hai-mee-dabu, ga-gahi-mai di hagabuulinga gau hai-gabunga-aamua, ga-helekai, “Gidaadou gaa-hai tadau-aha? Mmada gi-nia mogobuna huogodoo Taane deenei ala e-haihai!

11:48  Maa gidaadou ga-dumaalia gi Mee gi-heia nia mee aanei, gei digau huogodoo ga-hagadonu a-Mee, gei digau aamua o Rome ga-lloomoi, ga-oho gi-daha tadau Hale Daumaha mo tadau henua hagatau!”

11:49  Tangada e-dahi i digaula, dono ingoo go Caiaphas, di tagi aamua hai-mee-dabu di ngadau deelaa, ga-helekai, “Goodou e-de-iloo nia mee!

11:50  Goodou digi modongoohia bolo maa tangada e-dahi e-made gi-nia daangada, la-koia e-humalia i-di haga-huaidu tenua huogodoo?”

11:51  (Caiaphas digi helekai hua i-deia, gei mee ne-helekai beenei, idimaa, mee tagi aamua hai-mee-dabu i-di ngadau deelaa, gei mee ne-haga-modongoohia, bolo Jesus le e-made gi digau o Jew,

11:52  malaa, hagalee go digaula la-hua. E-hagabuni-mai labelaa nia dama a God huogodoo ala gu-mamaaheu dagidahi.)

11:53  Daamada di laangi deelaa gaa-huli gi-muli, gei digau aamua o Jew ga-haga-maanadu bolo e-daaligi a Jesus gii-made.

11:54  Malaa, Jesus gu-hagalee heehee haga-mmaa i-lodo Judea, gu-hagatanga, guu-hana gi-di gowaa hoohoo gi-di anggowaa e-hana gi tama-guongo go Ephraim, di gowaa dela e-noho-iei Mee mo ana dama-agoago.

11:55  Tagamiami Pasoobaa digau o Jew la-gu-hoohoo-mai, gei digau dogologo gu-lloo-aga i nadau gowaa gi Jerusalem belee haga-kila-aga di-nadau hai haga-madammaa i-mua Tagamiami ga-daamada.

11:56  Digaula e-halahala a Jesus, ga-dagabuli i-lodo di Hale Daumaha, ga-heheeu, “Goodou le e-hai bolo-aha? Taane deelaa le e-hanimoi gi Tagamiami be deeai?”

11:57  Nia dagi hai-mee-dabu mo nia Pharisee guu-hai di-nadau haga-iloo, bolo tangada ga-gidee-ia Jesus, gi-haga-iloo gi-galabudi a-Mee.

Chapter 12

12:1  Nia laangi e-ono i-mua Tagamiami Pasoobaa, Jesus gaa-hana gi Bethany, di guongo o Lazarus, taane dela ne-haga-mouli go Mee.

12:2  Digaula ga-hagatogomaalia di-nadau hagamiami hiahi, gei Martha e-hagamaamaa e-duwwe nia meegai. Lazarus tangada e-dahi i digau ala e-noho i-baahi o Jesus i teebele.

12:3  Mary ga-gaamai dana loaabi lolo-kala, dela koia e-hui-ngadaa huoloo, ne-hai gi-nia ‘nard’, gaa-llingi gi-nia wae o Jesus, ga-omo gi-nia ngaahulu o dono libogo. Di lolo-kala guu-kala hagatau i-lodo di hale deelaa.

12:4  Tama agoago Jesus go Judas Iscariot, dela ga-hagi-anga a Mee, ga-helekai,

12:5  “Ma e-aha dela di lolo-kala deenei digi hui-ina gi-daha gi nia bahihadu-silber e-dolu-lau, nia bahihadu ga-gila-mai gaa-wanga gi digau hagaloale?”

12:6  Mee ne-helekai beenei, idimaa hagalee go dono manawa i digau hagaloale, gei idimaa, mee tangada gaiaa. Go mee dela e-benebene di budehede-hadu ge e-daadaa ana mee i di-maa.

12:7  Jesus ga-helekai, “Hudee heia a-mee, diagia hua gi mee dana mee i-dono baahi gi-di laangi dela e-danu-iei Au.

12:8  Godou gau hagaloale ga i-godou baahi i-di waalooloo, gei goodou ga-hagalee gidee Au i-nia madagoaa huogodoo.”

12:9  Digau dogologowaahee ne-longono bolo Jesus la-i Bethany, digaula gaa-hula gi-golo. Hagalee go Jesus hua dela ne-hula ginai ginaadou, e-hula labelaa e-mmada gi Lazarus ne-haga-mouli-aga go Jesus.

12:10  Malaa, nia dagi hai-mee-dabu gu-hagamaanadu bolo e-daaligi a Lazarus gii-made labelaa,

12:11  idimaa, go mee ne-hai digau o Jew dogologowaahee gi-diiagi digaula, ga-hagadonu a Jesus.

12:12  Hooaga dono daiaa, digau dogologowaahee ne-lloomoi gi Tagamiami Pasoobaa, ga-longono bolo Jesus e-hanimoi gi Jerusalem.

12:13  Digaula gaa-kae nadau manga-laagau be nia louniu, gaa-hula belee hagaheetugi gi Mee, ga-wwolowwolo, “Hagaamuina God! God gi-hagahumalia-ina a-Mee dela e-hanimoi i-di ingoo o Dimaadua! God gi-hagahumalia-ina di King o Israel!”

12:14  Jesus ga-gidee-Ia tama-‘donkey’, gaa-gaga gi-nonua, gaa-hana i-hongo di-maa, gii-hai be nnelekai di Beebaa-Dabu gu-helekai:

12:15  “Di waahale o Zion, goe hudee madagu! Di-godou king deenei e-hanadu i-hongo tama-‘donkey’.”

12:16  I-di matagidagi, gei nia dama-agoago a-Maa digi modongoohia nia mee aanei, gei i-muli Jesus ne-aali, gei digaula ga-langahia laa bolo di Beebaa-Dabu gu-helekai beenei, gei digaula la-guu-hai nia mee aanei gi Mee.

12:17  Nia daangada nogo i-baahi o Jesus i dono madagoaa ne-gahigahi a Lazarus gi-daha mo taalunga, ga-haga-mouli a-mee mai di made, gu-haga-iloo di-mee dela ne-hai.

12:18  Digau dogologowaahee gu-heetugi gi Jesus, idimaa, digaula gu-longono di mogobuna a-Maa dela ne-hai.

12:19  Nia Pharisee ga-helehelekai i nadau mehanga, “Goodou mmada, gidaadou hagalee-loo e-gila! Mmada, digau henuailala hagatau la-gu-daudali-hua a-Mee!”

12:20  Hunu gau Greece i-lodo digau ala e-hula gi Jerusalem belee daumaha i-di laangi Tagamiami Pasoobaa.

12:21  Digaula gaa-hula gi Philip (tangada mai Bethsaida i-lodo Galilee), ga-helekai, “Meenei, gimaadou e-hiihai e-heetugi gi Jesus.”

12:22  Philip gaa-hana, ga-hagi-anga gi Andrew, gei meemaa dogolua gaa-hula, ga-haga-iloo gi Jesus.

12:23  Jesus ga-helekai gi meemaa, “Di madagoaa la-gu-dau-mai ang-gi Tama-Tangada e-hai-mee gi dono madamada aamua.

12:24  Au e-hagi-adu di tonu: Di lii-‘wheat’ la-hagalee tomo, maa digi doo gi-lodo di gelegele, gii-made. Ma-gaa-made, gei di-maa gaa-huwa logowaahee.

12:25  Maa tangada ga-aloho i dono mouli, ga-hagalee mouli. Maa tangada ga-de-hiihai gi dono mouli henuailala, la-ga-hai-mee-hua gi-di mouli, gaa-hana-hua beelaa.

12:26  Be koai e-hiihai e-hai-hegau-mai, geia e-hai gi-daudali Au, geia ga-madalia Au i-di gowaa dela iei Au. Gei dogu Damana le e-hagalaamua tangada dela e-hai-hegau-mai gi-di-Au.

12:27  “Dolomeenei, Au gu-manawa-gee. Au ga-helekai bolo-aha? Au belee helekai boloo: ‘Tamana, Goe hudee dugu-mai di madagoaa deenei’? Gei deelaa tadinga dogu hanimoi, bolo gii-dau Au gi-di hagaduadua deenei!

12:28  Tamana, haga-madamada-ina do ingoo!” Di lee e-haneia i-di langi, “Au gu-haga-madamada dogu ingoo, gei Au ga-haga-madamada labelaa di-maa.”

12:29  Digau dogologo e-tuu i-golo gu-longono di lee deelaa, gei hunu ginaadou e-hai bolo ma di lee-atili, ge hunu ginaadou e-hai bolo ma tangada di-langi e-leelee gi Mee!

12:30  Jesus ga-helekai, “Di lee hagalee ne-hai-mai gi-di-Au, gei ne-hai-adu gi goodou.

12:31  Dolomeenei la di madagoaa e-hagi-aga-ai henuailala. Dolomeenei di tagi o henuailala gaa-hudu gi-daha.

12:32  Dogu madagoaa ma-ga-daudau gi-nua i henuailala, gei Au ga-dahi-mai gi-di-Au nia daangada huogodoo.”

12:33  Mee e-helekai i-nia mee aanei, belee haga-modongoohia-aga tagadilinga made dela e-made-ieia.

12:34  Digau dogologo ga-helekai, “Madau haganoho e-hagi-mai bolo di Mesaia le e-mouli gaa-hana-hua beelaa. E-hai behee, goe dela e-helekai bolo Tama-Tangada le e-daudau gi-nua? Tama-Tangada deenei la-koai?”

12:35  Jesus ga-helekai gi digaula, “Di maalama la-gaa-noho i godou baahi i-di madagoaa dulii. Llooadu hua-beelaa i-di godou ala, i-di madagoaa goodou e-hai-mee gi-di maalama, gi-deemee di-hanadu di bouli gi goodou. Tangada dela e-heehee i-lodo di bouli, le e-de-gidee dono gowaa e-hana ginai.

12:36  Hagadonu-ina di maalama i-di madagoaa goodou e-hai-mee gi di-maa, gii-hai goodou nia daangada ni-di maalama.” Muli Jesus ne-helekai, gei Mee gaa-hana hagammuni gi-daha mo digaula.

12:37  Ma e-aha Mee ne-hai ana mogobuna haga-goboina huogodoo aanei i-mua nadau golomada, gei digaula hagalee hagadonu a-Mee,

12:38  bolo gi-kila-ai nia helekai soukohp Isaiah boloo, “Meenei Tagi, ma koai dela e-hagadonu tadau mee ala gu-haga-modongoohia? God ne-haga-modongoohia ana mogobuna la-gi di-ai?”

12:39  Deenei tadinga di-nadau tee-hagadonu, idimaa, Isaiah gu-helekai labelaa boloo,

12:40  “God la-gu-haga-bouli nia golomada digaula, ge guu-tai nadau hagabaubau, bolo nadau golomada gi-de-gidee, gei nadau hagabaubau gi-de-modongoohia, gei digaula ga-hagalee huli-mai gi-di-Au, bolo gei Au ga-hagahili digaula. Aanei nia helekai a God.”

12:41  Isaiah ne-helekai beenei, idimaa, mee gu-gidee di madamada o Jesus, mee e-helekai i Mee.

12:42  Gei deeai, dogologowaahee nia dagi o digau o Jew ne-hagadonu a Jesus, gei digaula hagalee haga-modongoohia-aga nadau hagadonu, idimaa, digaula e-mmaadagu i-nia Pharisee gi-dee kili ginaadou gi-daha mo synagogee.

12:43  Digaula gu-hiihai e-haga-gila-aga nia hiihai o-nia daangada, laa-hongo di hiihai o God.

12:44  Jesus ga-helekai dono lee gi-nua, “Be koai-hua dela e-hagadonu Au, geia ne-hagadonu labelaa a-Mee dela ne-hagau-mai Au.

12:45  Be koai-hua e-gidee-ia Au, e-gidee labelaa a-Mee dela ne-hagau-mai Au.

12:46  Au go di maalama ne-hanimoi gi henuailala, bolo digau ala e-hagadonu Au, ga-hagalee noho i-lodo di bouli.

12:47  Au hagalee hagi-aga digau ala e-longono agu agoago, ge hagalee daudali nia maa. Au hagalee ne-hanimoi belee hagi-aga henuailala, Au ne-hanimoi belee haga-dagaloaha henuailala.

12:48  Tangada dela gaa-hudu Au gi-daha, ge hagalee daudali agu agoago, gei nia helekai ala ne-helekai-iei Au e-hagi-aga a-mee i-di laangi hagaodi.

12:49  Idimaa, hagalee nnelekai ni-aagu. Tamana dela ne-hagau-mai Au, go Mee hua dela ne-dugu-mai nia mee ala belee helekai mo di leelee iei Au.

12:50  Gei-Au e-iloo bolo dana haganoho deenei le e-gaamai di mouli dee-odi. Agu mee ala e-helekai-ai, la-go nia mee a Tamana ne-hagi-mai bolo gi-helekai-ai.”

Chapter 13

13:1  Di laangi i-mua Tagamiami Pasoobaa, Jesus gu-modongoohia dono madagoaa e-hagatanga i henuailala, e-hana gi-baahi Tamana la-gu-dau-mai. Mee e-aloho i ana daangada-donu henuailala. Mee e-aloho i digaula gaa-dae-loo gi-di hagaodi.

13:2  Jesus mo ana dama-agoago e-miami hiahi. Gei Setan guu-wanga gi-lodo Judas, tama-daane Simon Iscariot, di hagamaanadu e-wanga a Jesus gi digau huaidu.

13:3  Jesus e-iloo Tamana guu-wanga gi-de-Ia nia mogobuna huogodoo. Mee gu-iloo bolo Ia ne-hanimoi i-baahi o God, gaa-hana labelaa gi-baahi o God.

13:4  Jesus ga-du-gi-nua, ga-daa gi-daha dono gahu laa-daha, ga-dahi-aga dana daaole, gaa-nnoo gi dono huaidina,

13:5  gaa-llingi ana wai gi-lodo di baisin, ga-daamada gaa-tono nia babaawae o ana dama-agoago, ga-omo gi taaole dela i dono huaidina.

13:6  Mee gaa-dau-adu gi Simon Peter, gei Peter ga-helekai gi Mee, “Meenei, dogu Dagi, Goe gaa-tono ogu babaawae?”

13:7  Jesus ga-helekai gi mee, “Goe e-de-iloo agu mee ala e-hai dolomeenei. Maalia, gei goe ga-modongoohia-laa.”

13:8  Peter ga-helekai, “Goe hagalee-loo e-tono ogu babaawae.” Gei Jesus ga-helekai, “Maa Au ga-hagalee tono oo wae, gei goe e-deemee di-hai tama-agoago ni-aagu.”

13:9  Simon Peter ga-helekai, “Meenei Tagi, hagalee go ogu babaawae la-hua. Tono-ina labelaa ogu lima mo dogu libogo!”

13:10  Jesus ga-helekai, “Digau ala gu-gaugau, la-gu-madammaa, hagalee humalia di gaugau labelaa, e-tono-hua nadau babaawae. Malaa, goodou huogodoo la-gu-madammaa, tangada hua-e-dahi digi madammaa.”

13:11  Jesus gu-iloo ma koai dela ga-hagi-anga Ia, deelaa di mee a-Mee ne-helekai-ai bolo digau huogodoo gu-madammaa, tangada hua-e-dahi digi madammaa.

13:12  I-muli-hua Jesus ne-tono nia babaawae digaula, gei Mee ga-ulu gi-lodo dono gahu laa-daha, gaa-hana gi dono lohongo dela i teebele, ga-heeu, “Goodou gu-modongoohia dagu mee nogo hai-adu gi goodou?

13:13  Goodou e-haga-ingoo Au bolo Au Tangada Agoago, mo Tagi. E-donu go di-godou haga-ingoo Au beelaa, idimaa, ma ko-Au.

13:14  Au go di-godou Dagi mo di-godou Dangada Agoago dela guu-tono godou babaawae, malaa, goodou e-hai gi-hagadau-tono labelaa godou babaawae.

13:15  Au ne-hai dagu haga-modongoohia-adu gi goodou, bolo goodou gi heia be dagu hai dela ne-hai-adu gi goodou.

13:16  Au e-hagi-adu gi goodou di tonu: Ma di hege e-mada-aamua i dono dagi ai. Deai tangada kae-hegau e-mada-aamua i dono dangada ne-hagau ia ai.

13:17  Idimaa goodou gu-iloo di tonu deenei, goodou e-tenetene huoloo behee maa goodou ga-haga-hai-hegau di-maa!

13:18  “Au hagalee helekai i goodou huogodoo. Au e-iloo agu gau ala gu-hilihili. Malaa, nia helekai di Beebaa-Dabu, le e-hai gii-kila boloo, ‘Tangada dela e-miami madalia Au, go mee dela e-hai-baahi mai gi-di-Au.’

13:19  “Dolomeenei Au e-hagi-adu gi goodou i-mua di-maa ga-gila-aga, gei goodou gu-hagadonu bolo Au dela Ko-Au.

13:20  Au e-hagi-adu gi goodou di tonu: Be koai-hua e-benebene dagu dangada hagau, geia ne-benebene-hua Au. Be koai-hua e-benebene Au, geia ne-benebene-hua a-Mee dela ne-hagau-mai Au.”

13:21  I-muli Jesus ne-helekai nia mee aanei, gei Mee gu-lodo-huaidu, ga-helekai-aga, “Au e-hagi-adu gi goodou di tonu: tangada e-dahi i goodou, e-wanga Au gi ogu hagadaumee.”

13:22  Nia dama-agoago a-Maa guu-boo huoloo nadau lodo, gu-madamada i nadau mehanga be-di-maa koai dela e-helekai-iei Mee.

13:23  Tangada agoago e-dahi i-lodo nia dama-agoago aanei dela e-baa-iei a Jesus, e-noho i-baahi o Jesus.

13:24  Simon Peter ga-menege-adu gi mee, ga-helekai be ma koai dela e-helekai-iei Mee.

13:25  Tama agoago deelaa ga-menege gi Jesus, ga-heeu gi Mee, “Tagi, ma koai go tangada?”

13:26  Jesus ga-helekai gi mee, “Au ga-haga-tiu dagu palaawaa gi-lodo di ibu deenei, gaa-wanga gi mee, deelaa go taane.” Gei Mee ga-dahi-aga dana palaawaa, ga-haga-tiu, gaa-wanga gi Judas, go tama-daane a Simon Iscariot.

13:27  Di madagoaa Judas ne-kumi di palaawaa, Setan gu-ulu gi-lodo o mee. Gei Jesus ga-helekai gi mee, “Hagalimalima, heia dau mee dela belee hai gii-hai!”

13:28  Deai tangada i teebele e-modongoohia be Jesus la-ne-aha ga-helekai beelaa gi Judas.

13:29  Idimaa, Judas dela e-madamada-humalia i-di budehede-bahihadu digaula, gei hunu dama-agoago e-hagamaanadu, bolo holongo Jesus ne-helekai gi mee bolo gii-hana gi-huia-mai ana mee ala e-hai tagamiami, be e-wanga ana mee gi digau hagaloale.

13:30  Judas ne-kumi di palaawaa deelaa, ga-hagalimalima, ga-ulu gi-malaelae, gei di-maa guu-boo.

13:31  Muli-hua Judas ne-hana, Jesus ga-helekai, “Dolomeenei gei nia madamada o Tama-Tangada la-gu-modongoohia-aga. Dolomeenei nia madamada o God gu-modongoohia-aga mai i Mee.

13:32  Maa Tama-Tangada ga-haga-modongoohia-aga di madamada o God, malaa, God ga-haga-modongoohia-aga di madamada o Tama-Tangada mai dono baahi, gei Mee ga-limalima gaa-hai di mee deenei.

13:33  Agu dama, Au hagalee noho duai i godou baahi. Goodou ga-halahala Au, gei dolomeenei Au ga-hagi-adu gi goodou dagu mee dela ne-hagi ang-gi digau aamua o Jew: Goodou e-deemee di-hula gi-di gowaa dela e-hana ginai Au.

13:34  “Au e-gowadu gi goodou taganoho hoou: Hagadau-aaloho i goodou. Be dagu hai dela ne-aloho i goodou, goodou e-hai-loo gi-hagadau-aaloho i goodou.

13:35  Maa goodou ga-hagadau-aaloho, gei nia daangada huogodoo ga-modongoohia bolo goodou nia dama-agoago ni-aagu.”

13:36  Simon Peter ga-heeu gi Mee, “Meenei dogu Dagi, dehee di gowaa e-hana ginai Goe?” Jesus ga-helekai, “Goe e-deemee di-daudali Au gi-di gowaa dela e-hana ginai Au. Maalia, gei goe gaa-mee di-daudali Au.”

13:37  Peter ga-heeu, “Meenei Tagi, au e-aha, dela e-deemee di-daudali Goe dolomeenei? Au gu-togomaalia e-made-adu gi-di-Goe!”

13:38  Jesus ga-helekai, “Goe gu-togomaalia bolo goe gaa-made-mai gi-di-Au? Au e-hagi-adu gi-di-goe di tonu: Goe ga-haga-de-iloo-goe Au haga-dolu i-mua teduu ma-gaa-wolo.”

Chapter 14

14:1  Jesus ga-helekai gi digaula, “Goodou hudee de-nnoomaalia ge lodo-huaidu. Hagadonu-ina God ge gi-hagadonu-ina Au labelaa.

14:2  Nia ruum e-logo i-lodo di hale dogu Damana, gei Au e-hana e-hagatogomaalia di-godou lohongo. Maa nei bolo maa hagalee, gei Au e-hagalee hagi-adu gi goodou.

14:3  I-muli dagu hagatogomaalia di-godou lohongo, gei Au ga-hanimoi labelaa, gaa-lahi goodou gi-di gowaa dela e-noho-iei Au, ga-madalia Au.

14:4  Goodou gu-iloo di ala dela e-hana gi-di gowaa dela e-hana ginai Au.”

14:5  Thomas ga-helekai gi Mee, “Meenei Tagi, gimaadou e-de-iloo di gowaa dela e-hana ginai Goe. Dehee di-madau hai gaa-mee di-iloo di ala dela e-hana gi-golo?”

14:6  Jesus ga-helekai gi mee, “Au go di ala, go di tonu, go di mouli. Tangada e-hana laa-daha mo Au gi Tamana ai.

14:7  Maa goodou gu-iloo Au, goodou gu-iloo labelaa dogu Damana. Tugi dolomeenei gaa-hana gi-muli, goodou gu-iloo a-Mee, gu-gidee a-Mee.”

14:8  Philip ga-helekai gi Mee, “Meenei Tagi, haga-modongoohia-ina Tamana mai gi gimaadou, dela-hua di-madau mee e-hiihai ginai.”

14:9  Jesus ga-helekai, “Gu-waalooloo dogu madalia goodou. Philip, goe digi iloo Au? Tangada dela gu-gidee Au, geia gu-gidee labelaa Tamana. Ma e-aha goe dela e-helekai boloo: Haga-modongoohia-ina Tamana mai gi gimaadou?

14:10  Philip, goe hagalee hagadonu bolo Au i-lodo Tamana, ge Tamana la i ogu lodo?” Gei Jesus ga-helekai gi ana dama-agoago, “Nia helekai ala ne-hai-adu ko-Au gi goodou, hagalee ne-lloomoi i dogu baahi. Tamana dela e-noho i ogu lodo e-hai ana hegau.

14:11  Hagadonu-ina Au, bolo Au e-noho i-lodo o Tamana, ge Tamana le e-noho i ogu lodo. Maa deeai, hagadonu-ina-hua idimaa go agu mee ala ne-hai.

14:12  Au e-hagi-adu gi goodou di tonu: Digau ala ga-hagadonu Au, gaa-hai agu mee ala nogo hai, gei digaula gaa-hai nia maa gi-nonua, idimaa, Au gaa-hana gi-baahi o Tamana.

14:13  Gei-Au ga-haga-kila-aga godou mee huogodoo ala ma-ga-tangi-iei goodou i dogu ingoo, bolo gi-modongoohia-aga di madamada o Tamana mai i-baahi dana Dama.

14:14  Maa goodou ga-tangi-mai dahi mee i dogu ingoo, gei Au ga-hagagila di-maa.

14:15  “Maa goodou e-aloho i-di-Au, goodou ga-daudali agu haganoho.

14:16  Au gaa-dangi gi Tamana, gei Mee ga-gowadu gi goodou di Hagamaamaa, gaa-noho i godou baahi gaa-hana-hua beelaa.

14:17  Mee go di Hagataalunga dela e-hagi-aga di tonu a God. Henuailala e-deemee di hai-mee gi Mee, idimaa, digaula e-deemee di-mmada gi Mee, be e-iloo a-Mee. Gei goodou e-iloo a-Mee, i Mee e-noho i godou baahi mo i godou lodo.

14:18  “Au ma-gaa-hana, gei goodou hagalee noho mada-goodou. Au ga-hanimoi labelaa gi goodou.

14:19  Tama-madagoaa dulii i-golo, gei digau henuailala ga-de-gidee-ginaadou Au, gei goodou ga-gidee Au. Idimaa, Au e-mouli, gei goodou e-mouli labelaa.

14:20  Di laangi deelaa ma-ga-dau-mai, gei goodou gu-iloo bolo Au e-noho i-lodo dogu Damana, gei goodou le e-noho i ogu lodo, gadoo be Au dela e-noho i godou lodo.

14:21  “Be koai-hua e-hai-mee gi agu haganoho ge daudali-ai, go mee e-aloho i-di-Au. Dogu Damana e-aloho i mee dela e-aloho i-di-Au. Gei-Au hogi e-aloho i tangada mo-di haga-modongoohia Au gi mee.”

14:22  Judas (hagalee go Judas Iscariot) ga-helekai, “Meenei Tagi, ma e-hai behee go dau haga-modongoohia Goe mai gi gimaadou, ge hagalee ang-gi henuailala?”

14:23  Jesus ga-helekai gi mee, “Digau ala e-aloho i-di-Au, le e-daudali agu agoago. Gei dogu Damana ga-aloho i digaula, Au mo dogu Damana ga-lloomoi gi digaula, gaa-noho i nadau baahi.

14:24  Digau ala hagalee aloho i-di-Au, ginaadou hagalee haga-gila-aga agu helekai. Nia agoago ala ne-longono-goodou, la-hagalee ni-aagu, gei ne-loomoi i-baahi o Tamana dela ne-hagau-mai Au.

14:25  “Au ne-helekai-adu nia mee aanei i dogu madagoaa e-noho i godou baahi.

14:26  Di Hagamaamaa, go di Hagataalunga-Dabu ga-hagau-mai go Tamana i dogu ingoo, ga-agoago-adu-laa gi goodou nia mee huogodoo, gaa-hai goodou gi-mamaanadu agu mee ala ne-hagi-adu gi goodou.

14:27  “Au e-gowadu gi goodou di noho i-di aumaalia. Di aumaalia deenei la di mee donu ni-aagu e-gowadu gi goodou. Au hagalee gowadu gi goodou be-di hai o henuailala. Goodou hudee de-nnoomaalia, hudee lodo-huaidu, hudee mmaadagu.

14:28  Goodou gu-longono agu helekai bolo Au e-hana, gei Au ga-hanimoi labelaa gi goodou. Maa goodou e-aloho i-di-Au, goodou e-tenetene gi dogu hana gi Tamana, idimaa, Mee koia e-aamua i-di-Au.

14:29  Au gu-hagi-adu gi goodou dolomeenei i-mua di-maa ma-ga-gila-aga. Malaa, di madagoaa di-maa ma-ga-gila-aga, gei goodou ga-hagadonu.

14:30  Au hagalee hagabooboo-adu gi goodou gi-waalooloo, idimaa, di tagi o henuailala le e-hanimoi. Mee ono mogobuna i dogu gili ai,

14:31  gei henuailala la-gi-iloo bolo Au e-aloho i Tamana, ga-hidi-mai iei Au, gaa-hai nia mee a-Maa huogodoo ala bolo gi-heia. “Lloomoi, gidaadou gaa-hula gi-daha mo-di gowaa deenei.

Chapter 15

15:1  “Au go di laagau donu, gei dogu Damana tangada hai hadagee.

15:2  Mee e-haala nia manga huogodoo ala hagalee huwa mai i-di-Au. Mee e-haga-madammaa nia manga ala e-huwa, gii-huwa dau-logo.

15:3  Goodou gu-haga-madammaa go agu agoago adu gi goodou.

15:4  Goodou gi-buni-mai gi-di-Au, gei Au ga-buni-adu gi goodou. Di manga le e-deemee di-huwa modogoia. Maa ia gaa-buni gi tuaidina donu o-di laagau, ia gaa-mee di-huwa. E-hai gadoo be goodou: Goodou e-deemee di-huwa, maa goodou hagalee buni-mai gi-di-Au.

15:5  “Au go tuaidina o-di laagau, gei goodou go nia manga. Be koai-hua dela e-buni-mai gi-di-Au, gei Au e-buni ang-gi deia, geia gaa-huwa dau-logo, idimaa, goodou e-deemee di-hai godou mee laa-daha mo Au.

15:6  Be koai-hua hagalee buni-mai gi-di-Au, gaa-hudu gi-daha be-di manga-laagau, ga-maangoo. Nia manga-laagau beelaa la-ga-hagabudu-mai, gaa-kili gi-lodo di ahi, di gowaa dela e-dudu-ai.

15:7  Maa goodou ga-buni-mai gi-di-Au, agu helekai gaa-noho i godou lodo, gei goodou ga-dangi-mai di-ingoo-hua di mee dela e-hiihai ginai, malaa, goodou ga-hai-mee ginai.

15:8  Di madamada o dogu Damana le e-haga-gila-aga go di-godou huwa dau-logo. Di hai beenei, goodou gaa-hai nia dama-agoago ni-aagu.

15:9  Au e-aloho i goodou, gadoo be Tamana dela e-aloho i-di-Au. Goodou gi-dogi ang-gi dogu aloho.

15:10  Maa goodou ga-daudali agu helekai, goodou gu-dogi ang-gi dogu aloho, gadoo be Au dela ne-daudali nnelekai dogu Damana, gei au gu-dogi ang-gi dono aloho.

15:11  “Au ne-hagi-adu gi goodou nia mee aanei, bolo dogu tene la-gi i godou lodo, gei godou tene la-gi-dogomaalia.

15:12  Deenei dagu haganoho: Hagadau-aaloho i goodou, be Au dela e-aloho i goodou.

15:13  Di aloho kaedahi damanaiee dela e-mee di-hai go tangada, le e-wanga dono mouli gi ono ehoo.

15:14  Gei goodou nia hoo ni-oogu, maa goodou ga-daudali agu helekai.

15:15  Au hagalee haga-ingoo goodou bolo nia hege, idimaa, di hege le e-de-iloo nia mee o dono dagi ala e-hai. Au ga-haga-ingoo goodou bolo nia hoo ni-oogu, idimaa, Au gu-hagi-adu gi goodou nia mee huogodoo ala ne-hagi-mai go dogu Damana.

15:16  Goodou digi hilihili Au, ko-Au ne-hilihili goodou, ge ne-dongo goodou belee hagau e-huwa dau-logo, nia hagadilinga huwa ala e-hana-hua beelaa. Gei Tamana ga-gowadu di-ingoo-hua di mee dela gaa-dangi-ei goodou gi Mee i dogu ingoo.

15:17  Deenei dagu haganoho e-hai-adu gi goodou: Hagadau-aaloho.

15:18  “Maa henuailala le e-de-hiihai-adu gi goodou, goodou gi-langahia bolo digaula ne-de-hiihai-mai gi-di-Au i-mua.

15:19  Maa nei-boloo goodou digau ni henuailala, ge henuailala e-aloho i goodou be nia dama o henuailala. Gei au ne-hilihili-aga goodou mai i henuailala, gei goodou gu-hagalee hai nia daangada ni henuailala. Deelaa-laa, henuailala le e-de-hiihai adu gi goodou.

15:20  Gi-langahia agu mee ala ne-hagi-adu gi goodou: Di hege e-aamua i dono dagi ai. Maa digaula gu-hagahuaidu Au, digaula ga-hagahuaidu labelaa goodou. Maa digaula gu-daudali agu agoago, gei digaula ga-daudali labelaa godou agoago.

15:21  Digaula gaa-hai nia mee huogodoo aanei adu gi goodou, idimaa, goodou nia dama ni-aagu. Gei digaula e-de-iloo a-Mee ne-hagau-mai Au.

15:22  Maa nei bolo Au digi hanimoi e-hagi ang-gi digaula, gei digaula nadau huaidu ai. Dolomeenei digaula gu-deai nadau helekai hagahumalia nadau huaidu ai.

15:23  Be koai dela e-de-hiihai-mai gi-di-Au, geia e-de-hiihai labelaa gi dogu Damana.

15:24  Maa nei bolo Au digi hai nia hagadilinga mee digi hai-loo go tangada mai-i-mua i nadau baahi, digaula nadau huaidu ai. Dolomeenei digaula gu-gidee agu mee haga-goboina ne-hai, gei digaula e-de-hiihai-mai gi-di-Au mo dogu Damana.

15:25  Deenei ne-hai-loo gii-gila, belee haga-gila nia mee ala guu-hihi gi-lodo di-nadau haganoho boloo, ‘Te-hiihai digaula mai gi-di-Au la-dono hadinga ai.’

15:26  “Di Hagamaamaa ga-hanimoi, go di Hagataalunga e-haga-modongoohia di tonu o God, e-hanimoi i-baahi o Tamana. Au ga-hagau-mai a-Mee i-baahi Tamana, gei Mee ga-haga-modongoohia-aga Au.

15:27  Goodou ga-haga-modongoohia-aga Au labelaa, idimaa, goodou nogo madalia Au mai-loo i taamada.

Chapter 16

16:1  “Au ne-hagi-adu nia mee aanei bolo gi-dee kili gi-daha godou hagadonu.

16:2  Digaula ga-hagabagi goodou gi-daha mo nia synagogee, gei di madagoaa ga-dau-mai, digau huogodoo ala e-daaligi goodou gii-mmade, ga-hagamaanadu bolo di hai deenei le e-hai nnegau a God.

16:3  Digaula gaa-hai nia mee aanei adu gi goodou, i digaula e-de-iloo Tamana mo Au.

16:4  Malaa, Au gu-hagi-adu nia mee aanei, bolo goodou gi-langahia agu helekai i-di madagoaa digaula gaa-hai nia mee aanei adu gi goodou. “Au digi hagi-adu nia mee aanei i taamada, idimaa, Au nogo i godou baahi.

16:5  Malaa, dolomeenei gei Au gaa-hana gi Mee dela ne-hagau-mai Au, gei tangada i goodou e-heeu be Au e-hana gi-hee ai.

16:6  Di manawa-gee gu-haga-honu godou lodo i-di Au ne-hagi-adu gi goodou nia mee aanei.

16:7  Au e-hagi-adu di tonu: Dogu hana le e-humalia-adu gi goodou, idimaa, maa Au ga hagalee hana, gei di Hagamaamaa la-hagalee hanimoi gi goodou. Maa Au gaa-hana, gei Au ga-hagau-mai a-Mee gi goodou.

16:8  Mee ga-hanimoi, ga-hagamodongoohia gi henuailala bolo ginaadou e-hai-gee i-di huaidu, i-di mee dela e-donu, mo i-di hagi-aga a God.

16:9  Digaula e-hai-gee i-di huaidu, idimaa, digaula e-de-hagadonu Au.

16:10  Digaula e-hai-gee i-di hai di mee dela e-donu, idimaa, Au gaa-hana gi Tamana, gei goodou ga-de-gidee Au labelaa.

16:11  Digaula e-hai-gee i-di hagi-aga, idimaa, di tagi o henuailala la-gu-hagi-aga.

16:12  “Nia mee logowaahee i-golo belee helekai-iei Au adu gi goodou, gei e-haingadaa huoloo di-donu ginai goodou dolomeenei.

16:13  Gei di Hagataalunga dela e-donu ga-hanimoi, gaa-dagi goodou gi-nia mee huogodoo ala e-donu. Mee hagalee helekai-aga-hua i-de-Ia. Mee e-haga-modongoohia-aga-hua ana mee ala ne-hagalongo ginai, ga-hagi-adu gi goodou nia mee ala ga-lloomoi.

16:14  Mee ga-gaamai di madamada idimaa, Mee gaa-kae agu helekai, ga-hagi-adu gi goodou.

16:15  Nia mee huogodoo ala e-hai-mee ginai Tamana, la nia mee ni-aagu. Dela ne-helekai-iei Au bolo di Hagataalunga gaa-kae agu mee ala e-wanga gi Mee, ga-hagi-adu gi goodou.

16:16  “Di madagoaa bodobodo, gei goodou ga-de-gidee Au, gei i-muli di madagoaa bodobodo, gei goodou ga-gidee Au.”

16:17  Hunu daangada i ana dama-agoago ga-heheeu i nadau mehanga, “Di mee hai bolo-aha deenei? Mee gu-helekai bolo i-muli di madagoaa bodobodo, gei gidaadou ga-de-gidee Ia, gei i-muli di madagoaa bodobodo, gei gidaadou ga-gidee a-Mee. Mee gu-helekai labelaa boloo, ‘Idimaa, Au gaa-hana gi Tamana.’

16:18  Di madagoaa bodobodo deenei le e-hai bolo-aha? Gidaadou e-de-iloo be mee e-helekai bolo-aha!”

16:19  Jesus gu-modongoohia bolo digaula belee hai nadau heeu, malaa, gei Mee ga-helekai-adu gi digaula, “Au ne-helekai boloo, ‘Di madagoaa bodobodo, gei goodou ga-de-gidee Au, gei i-muli di madagoaa bodobodo, gei goodou ga-gidee Au.’ Deenei di mee e-heheeu i godou mehanga?

16:20  Au e-hagi-adu gi goodou di tonu: Goodou ga-tangitangi ge manawa-gee, gei henuailala ga-tenetene. Goodou ga-lodo-huaidu, gei godou lodo-huaidu gaa-huli ga-tenetene.

16:21  Di madagoaa di ahina ma-ga-hoohoo ga-haanau, mee e-manawa-gee, idimaa, dono madagoaa haga-mmaemmae la-gu-dau-mai. Gei di madagoaa di tama gaa-lawa di-haanau, mee gu-de-langahia dono mmaemmae, idimaa, mee gu-tenetene, bolo di tama la-gu-haanau-mai gi henuailala.

16:22  E-hai labelaa be goodou. Dolomeenei gei goodou e-lodo huaidu, gei Au ga-heetugi-adu labelaa gi goodou, gei godou manawa gaa-honu i-di tenetene. Tangada e-mee di-daa gi-daha di-godou tenetene ai.

16:23  “Di laangi dela ma-gaa-dae-mai, goodou hagalee dangi-mai i dahi mee. Au e-hagi-adu gi goodou di tonu: Tamana ga-dugu-adu gi goodou di-godou mee ga-tangi-ai i dogu ingoo.

16:24  Gaa-dae-mai gi dolomeenei, goodou digi tangi-mai i dahi mee i dogu ingoo. Dangidangi, gei goodou ga-hai-mee ginai, godou tenetene la-gaa-dohu.

16:25  “Au gu-hai-hegau gi-nia ala-kai belee hagi-adu gi goodou nia mee aanei, gei di madagoaa ga-dau-mai, gei Au ga-hagalee hai-hegau gi-nia ala-kai. Au ga-helekai-adu gi goodou haga-madammaa i Tamana.

16:26  Di laangi ga-dau-mai, gei goodou ga-tangi gi Mee i dogu ingoo. Au hagalee helekai bolo Au gaa-dangi gi Mee i goodou,

16:27  idimaa, ma go Tamana dela e-aloho i goodou. Mee e-aloho i goodou, idimaa, goodou e-aloho i-di-Au, gei goodou ne-hagadonu bolo Au ne-hanimoi i-baahi o God.

16:28  Au ne-hanimoi i-baahi Tamana gi henuailala. Gei dolomeenei Au ga-hagatanga i henuailala, gaa-hana gi-baahi Tamana.”

16:29  Gei ana dama-agoago ga-helekai gi mee, “Dolomeenei Goe gu-helekai madammaa, hagalee hai-hegau gi-nia ala-kai.

16:30  Dolomeenei gimaadou gu-iloo, bolo Goe e-iloo nia mee huogodoo. Dono hadinga gi-di-Goe ai bolo tangada e-hai-adu ana heeu. Di mee deenei e-hai gimaadou gi-hagadonu bolo Goe ne-hanimoi i-baahi o God.”

16:31  Jesus ga-helekai gi digaula, “Goodou gu-hagadonu-laa dolomeenei?

16:32  Di madagoaa ga-dau-mai, gei gu-i kinei, gei goodou huogodoo ga-maaheu, tangada-nei mo tangada-nei gaa-hana gi dono hale-donu. Gei-Au gaa-dubu modogoau. Au hagalee modogoau-hua, idimaa, Tamana le e-madalia Au.

16:33  Au ne-hagi-adu gi goodou nia mee aanei, bolo gii-noho goodou i-di aumaalia, i-di godou buni-mai gi-di-Au. Henuailala ga-hagaduadua goodou, malaa goodou gi-manawa-maaloo! Au gu-aali i henuailala!”

Chapter 17

17:1  I-muli ana helekai aanei, Jesus gaa-mmada gi-di langi, ga-helekai, “Tamana, di madagoaa gu-dau-mai. Haga-uda-ina di madamada gi Tama, gei Tama ga-haga-madamada Goe.

17:2  I do haga-uda ang-gi de-Ia di mogobuna e-dagi nia daangada huogodoo, bolo gii-mee-ai dana wanga di mouli dee-odi gi digau huogodoo ala ne-wanga Kooe gi-de-Ia.

17:3  Gei di mouli e-dee-odi, dono hadinga e-hai bolo gi-iloo-ginaadou Goe, go di God e-donu hua e-dahi, gi-iloo labelaa Jesus Christ dela ne-hagau-mai Kooe.

17:4  Au gu-haga-modongoohia do madamada gi henuailala. Au gu-haga-lawa dagu hegau dela ne-gaamai Kooe bolo gi heia.

17:5  Tamana! Haga-madamada-ina Au i-mua o hadumada dolomeenei, gi-di madamada dela nogo i dogu baahi i-mua henuailala ne-hai.

17:6  “Au gu-haga-modongoohia Goe gi au daangada ala ne-gaamai Koe gi-di-Au i henuailala. Nia daangada ni-aau, gei Goe ne-dugu-mai digaula gi-di-Au. Digaula gu-daudali au helekai,

17:7  gei dolomeenei digaula gu-iloo bolo nia mee huogodoo ala ne-gaamai Kooe, la-ne-lloomoi i do baahi.

17:8  Au guu-wanga gi digaula nia agoago ala ne-gaamai Kooe gi-di-Au, gei digaula guu-kae nia maa. Digaula gu-iloo bolo ma e-donu bolo Au ne-hanimoi i do baahi, gei gu-hagadonu bolo Goe ne-hagau-mai Au.

17:9  “Au e-dalodalo i digaula. Au hagalee dalodalo i digau henuailala hagatau, gei Au e-dalodalo-hua i digau ala ne-gaamai Kooe gi-di-Au, i digaula nia dama ni-aau.

17:10  Agu mee huogodoo nia mee ni-aau, gei au mee huogodoo la nia mee ni-aagu. Gei dogu madamada gu-modongoohia-aga mai i nadau baahi.

17:11  Dolomeenei, gei Au ga-hanadu gi-di-Goe. Au ga-hagalee noho i henuailala, gei digaula e-noho i henuailala. Meenei dogu Damana Dabu! Benabena-ina digaula i-nia mahi o do ingoo, di ingoo dela ne-gaamai Kooe gi-di-Au, gii-hai digaula gii-dahi, gadoo be Goe mo Au ala e-dahi.

17:12  Dogu madagoaa nogo i-baahi digaula, Au nogo benebene digaula i-nia mahi o do ingoo, go di ingoo dela ne-gaamai Kooe gi-di-Au. Au nogo madamada humalia i digaula, tangada digaula ne-ngala ai, dela hua go tangada dela gu-haga-ingoo bolo e-ngala, gii-donu-ai nia helekai o-di Beebaa-Dabu.

17:13  Dolomeenei gei Au ga-hanadu, gei Au e-helekai nia mee aanei i henuailala, bolo gii-honu dogu tene i-lodo nadau manawa.

17:14  Au guu-wanga gi digaula au agoago, gei digau henuailala e-de-hiihai gi digaula, idimaa, ma digaula la-hagalee digau ni henuailala, gadoo be Au dela hagalee tangada ni henuailala.

17:15  Au hagalee dangi-adu bolo Goe gi-daawa digaula gi-daha mo henuailala, gei Au e-dangi-adu bolo Goe gi-benabena-ina digaula gi-daha mo tangada haga-magiaa.

17:16  Digaula hagalee digau ni henuailala, gadoo be Au dela hagalee tangada ni henuailala.

17:17  Hagadabu-ina digaula adu gi-di-Goe gi-di tonu. Au helekai la-go di tonu.

17:18  Au ne-hagau digaula gi-lodo henuailala, gadoo be dau hagau-mai Au gi-lodo henuailala.

17:19  Au e-hagadabu Au adu gi-di-Goe i digaula, bolo gii-donu di hagadabu digaula adu gi-di-Goe.

17:20  “Au hagalee dalodalo-hua i agu dama agoago, gei Au e-dalodalo labelaa i digau ala e-hagadonu Au mai nadau agoago.

17:21  Au e-dalodalo i-digaula huogodoo gii-hai be di-mee e-dahi. Meenei Tamana, digaula belee hai gii-noho i-tau lodo, be Goe dela i ogu lodo, gei Au i oo lodo. Digaula belee hai gii-hai be di mee e-dahi, gei digau henuailala ga-hagadonu bolo ma Kooe dela ne-hagau-mai Au.

17:22  Au ne-wanga gi digaula di madamada dela ne-gaamai Kooe gi-di-Au, bolo gii-hai digaula gii-dahi, be Gidaua ala e-dahi.

17:23  Au i nadau lodo, gei Goe i ogu lodo, gei digaula gi-hai-hua be di mee e-dahi, gii-hai digau henuailala gi-iloo bolo ma Kooe dela ne-hagau-mai Au, ge e-aloho i digaula, be do aloho i-di-Au.

17:24  “Meenei Tamana, Goe ne-dugu-mai digaula gi-di-Au. Au e-hiihai bolo digaula gi-madalia Au i-di gowaa dela e-noho-iei Au, gi-gidee-ginaadou ogu madamada, go nia madamada ala ne-dugu-mai Kooe gi-di-Au, i do aloho i-di-Au i-mua di hai o henuailala.

17:25  “Meenei Tamana dela e-donu, digau henuailala e-de-iloo-e-ginaadou Goe, gei Au e-iloo-e-Au Goe. Gei digau aanei gu-iloo bolo ma Kooe dela ne-hagau-mai Au.

17:26  Au ne-haga-modongoohia-aga Goe gi digaula, gei Au ga-duudagi-hua beelaa, bolo di aloho dela ne-gaamai Kooe gi-di-Au, la-gii-noho i nadau lodo, gei Au gii-noho labelaa i nadau lodo.”

Chapter 18

18:1  I-muli ana dalodalo aanei, Jesus mo ana dama-agoago gaa-hula gi-di baahi dela i-golo tama-monowai Kidron. Gei di-maa di hadagee i-di gowaa deelaa, Jesus mo ana dama-agoago gaa-hula gi-golo.

18:2  Malaa, Judas, dela ga-hagi-anga a Jesus, e-iloo-ia di gowaa deelaa, idimaa, nia madagoaa e-logo Jesus mo ana dama-agoago e-nnoo-mau e-heheetugi i-di gowaa deelaa.

18:3  Malaa, Judas gaa-hana gi-di hadagee deelaa, e-lahi ana gau-dauwa o Rome, mono gau hagaloohi di Hale Daumaha ala ne-hagau go nia dagi hai-mee-dabu mo nia Pharisee. Digaula gu-ulu nadau goloo-dauwa, e-kae nadau malama mono ahi ulaula.

18:4  Jesus le e-iloo nia mee huogodoo ala gaa-hai ang-gi de-Ia, ge-Ia ga-duu-mai gi digaula, ga-helekai, “Ma koai dela e-halahala go koodou?”

18:5  Digaula ga-helekai gi Mee, “Jesus o Nazareth.” Jesus ga-helekai, “Au go Mee.” Gei Judas dela ga-hagi-anga a-Mee, le e-duu i-baahi digaula.

18:6  Di madagoaa Jesus ne-helekai gi digaula boloo, “Au go Mee,” digaula ga-mmaanege gi-muli, gaa-tinga gi-lala.

18:7  Jesus ga-heeu labelaa gi digaula, “Ma koai dela e-halahala go goodou?” Digaula ga-helekai, “Jesus o Nazareth.”

18:8  Jesus ga-helekai, “Au guu-lawa di-hagi-adu gi goodou bolo Au go Mee. Maa goodou e-halahala Au, hagau-ina digau aanei gii-hula.”

18:9  Mee ne-helekai beenei, bolo gii-donu ana helekai ala ne-hai, “Tamana, tangada e-dahi i au daangada ala ne-gaamai gi-di-Au e-ngala ai.”

18:10  Simon Peter dana hulumanu-dauwa, ga-dahi-aga di-maa, gaa-tuu talinga gau-donu o-di hege tagi hai-mee-dabu. Di ingoo di hege deelaa, la-go Malchus.

18:11  Jesus ga-helekai gi Peter, “Duguina dau hulumanu gi dono lohongo! Goe e-hagabau bolo Au hagalee belee inu di ibu o-di hagaduadua Tamana dela e-gaamai gi-di-Au?”

18:12  Nia gau-dauwa o Rome mo nadau dagi-dauwa, mo digau hagaloohi o Jew gaa-kumi Jesus, ga-lawalawa,

18:13  gaa-lahi a-Mee matagidagi gi Annas. Go Mee dela tamana-dauaga a Caiaphas, di tagi aamua hai-mee-dabu i-di ngadau deelaa.

18:14  Ma go Caiaphas dela ne-helekai hagamaamaa gi digau o Jew bolo ma koia e-humalia maa tangada hua e-dahi e-made ang-gi nia daangada huogodoo.

18:15  Simon Peter mo tama-agoago dela i-golo ga-lloo-adu i-muli o Jesus. Di tagi aamua hai-mee-dabu e-modongoohia tama-agoago dela i-golo. Tama agoago deelaa guu-hana madalia a Jesus gi-lodo di abaaba di hale tagi aamua hai-mee-dabu.

18:16  Peter le e-duu-hua i-malaelae i-baahi di bontai, gei tama-agoago dela e-iloo di tagi hai-mee-dabu, gaa-hana gi-muli ga-helekai gi-di ahina dela i-di bontai, gi-hagaulu mai a Peter.

18:17  Tama-ahina nogo i-di ngudu di bontai ga-heeu gi Peter, “Ma kooe tangada e-dahi i-nia dama-agoago a Taane deelaa!” Peter ga-helekai, “Deeai, hagalee ko-au!”

18:18  Di madagoaa gu-magalillili huoloo, gei nia hege mono gau hagaloohi ne-akaa di-nadau ahi belee haga-mahanahana ginaadou, gei Peter ga-hanadu, gaa-duu i-baahi digaula belee haga-mahana.

18:19  Tagi aamua hai-mee-dabu e-heheeu gi Jesus i-di gili nia dama-agoago a-Maa mo nia agoago a-Maa.

18:20  Jesus ga-helekai gi mee, “Au nogo helehelekai-hua haga-mmaa gi digau huogodoo. Au nogo agoago i-lodo nia synagogee mo i-lodo di Hale Daumaha i-nia gowaa ala e-lloomoi nia daangada gi-di gowaa e-dahi. Au digi helekai hagammuni.

18:21  Malaa, au heeu le e-hai-mai eimaha? Heeu gi-nia daangada ala ne-longono-ginaadou Au. Heeu gi digaula be Au ne-helekai gi digaula bolo-aha. Digaula e-iloo agu helekai.”

18:22  Di madagoaa Jesus ne-helekai beenei, tangada hagaloohi dela e-duu i-baahi o-Mee gaa-paa a Jesus, ga-helekai, “Deenaa hua dau helekai e-helekai gi tangada aamua hai-mee-dabu?!”

18:23  Jesus ga-helekai gi mee, “Maa Au gu-helekai hala, haga-modongoohia-ina gi digau huogodoo aanei di hala deelaa. Maa Au e-donu-hua, malaa goe ne-paa Au eiaha?”

18:24  Annas gaa-lahi a-Mee gi Caiaphas, go tagi aamua hai-mee-dabu, ga-lawalawa hua igolo.

18:25  Peter le e-duu-hua i-golo, e-haga-mahanahana, gei digau ala i-golo ga-helekai gi mee, “Kooe tangada labelaa e-dahi i-nia dama-agoago Taane deelaa!” Gei Peter ga-haga-de-iloo-ia, ga-helekai, “Deeai, hagalee ko-au!”

18:26  Tangada e-dahi i-nia hege tagi aamua hai-mee-dabu, e-hai dangada gi taane dela ne-tuu dono dalinga go Peter, ga-helekai-aga, “Au gu-mmada-adu gi-di-goe nogo madalia a-Mee i-lodo di hadagee!”

18:27  Peter ga-helekai labelaa, “Deeai!” Di madagoaa-hua deelaa, teduu gaa-wolo.

18:28  Heniheni-loo, gei digaula gaa-lahi a Jesus gi-daha mo di hale o Caiaphas gi-di hale o-di gobinaa o Rome. Gei digau o Jew la-digi ulu gi-lodo di gowaa deelaa, idimaa, digaula e-hiihai bolo ginaadou belee noho madammaa gii-mee ginaadou di-miami Tagamiami Pasoobaa.

18:29  Pilate ga-ulu gi-malaelae, ga-heeu, “Goodou e-hai bolo taane deenei le e-hala di-aha?”

18:30  Digaula ga-helekai gi mee, “Gimaadou e-hagalee laha-mai a Mee gi-di-goe, maa Mee digi hai dana hala.”

18:31  Pilate ga-helekai gi digaula, “Lahia a-Mee, gabunga-ina gii-hai be godou haganoho donu.” Digaula ga-helekai gi mee, “Gimaadou digi dumaalia ginai e-daaligi tangada gii-made.”

18:32  (Di hai deenei ne-hai bolo gii-donu-ai telekai a Jesus dono haga-modongoohia-aga di hagadilinga made dela gaa-made-ieia.)

18:33  Pilate ga-ulu gi-lodo dono hale, ga-gahigahi a Jesus, ga-heeu gi Mee, “Ma Kooe dela go di king o digau o Jew?”

18:34  Jesus ga-heeu, “Di heeu deenaa ne-hanimoi i do baahi, be hunu daangada ne-hagi-adu Au gi-di-goe?”

18:35  Pilate ga-helekai, “Goe hagabau bolo au tangada o Jew? O daangada donu mo nia dagi hai-mee-dabu ala ne-laha-mai Goe gi-di-au. Goe ne-hai dau-aha?”

18:36  Jesus ga-helekai, “Dogu henua la-hagalee ni henuailala. Maa nei bolo dogu henua la ni henuailala, digau ala e-daudali Au, gu-heebagi gi-dee lahi Au gi digau aamua o Jew. Dogu henua dagi la-hagalee ni henuailala.”

18:37  Gei Pilate ga-heeu gi Mee, “Malaa Goe di king?” Jesus ga-helekai gi mee, “Goe dela e-helekai bolo Au di king. Au ne-haanau ge ne-hanimoi gi henuailala gi tadinga-hua e-dahi belee haga-modongoohia di tonu. Be koai-hua tangada ni-di tonu, geia e-hagalongo-mai gi-di-Au.”

18:38  Pilate ga-heeu, “Di tonu la-di-aha?” Pilate gaa-hana gi-malaelae gi-baahi digau o Jew, ga-helekai gi digaula, “Au digi gida dagu mee e-hagahuaidu-iei Mee.

18:39  Nnangaahai godou mouli, au e-hagamehede tangada e-dahi i digau lawalawa i-di madagoaa di Pasoobaa. Goodou e-hiihai bolo au gi-haga-mehede-ina-adu gi goodou di King o digau o Jew?”

18:40  Digaula gaa-wwolo gi-nua gi telekai a-maa, ga-helekai, “Deeai! Hagalee go Mee! Gimaadou e-hiihai gi Barabbas!” (Barabbas la tangada huaidu).

Chapter 19

19:1  Gei Pilate gaa-lahi a Jesus belee haga-mamaawa.

19:2  Nia gau-dauwa gaa-hai di-nadau hau-king gi-di manga laagau-duduia, gaa-dugu gi-hongo di libogo o-Maa, ga-haga-ulu a-Mee gi-di gahu mmee-uli,

19:3  ga-mmaanege-mai ga-helekai gi Mee, “Di King o digau o Jew, Goe gi-mouli gaa-hana-hua beelaa!” Digaula ga-paapaa a-Mee.

19:4  Pilate ga-ulu labelaa gi-malaelae, ga-helekai gi digau dogologo, “Mmada, au ga-laha-mai a-Mee gi-kinei gi-gidee-goodou bolo au e-deemee di-gida dagu mee belee haga-huaidu iei Mee.”

19:5  Gei Jesus ga-ulu-mai gi-malaelae e-ulu di hau-duduia mo-di gahu mmee-uli, Pilate ga-helekai gi digaula, “Mmada! Deenei Taane!”

19:6  Di madagoaa nia dagi hai-mee-dabu mono gau hagaloohi di Hale Daumaha ne-gidee a-Mee, digaula ga-wwolo, “Daudaulia a-Mee! Daudaulia a-Mee!” Pilate ga-helekai gi digaula, “Goodou bida lahia a-Mee, daudaulia. Au digi gida dagu mee belee haga-huaidu iei Mee.”

19:7  Digau o Jew ga-helekai, “Di-madau haganoho i-golo, bolo Taane deenaa le e-hai gii-made, idimaa, Mee e-helekai bolo Ia di Tama ni God.”

19:8  Di madagoaa Pilate ne-hagalongo gi-nia helekai aanei, geia gu-madagu huoloo,

19:9  ga-ulu labelaa gi-lodo dono hale, ga-heeu labelaa gi Jesus, “Goe tangada mai hee?” Gei Jesus digi helekai.

19:10  Pilate ga-helekai gi Mee, “Goe hagalee helekai-mai gi-di-au? Goe hagalee hagamaanadu bolo ogu mogobuna i-golo e-mee di wwede Goe, mo e-daudau Goe?”

19:11  Jesus ga-helekai, “Goe o mogobuna i ogu nua ai maa God digi dugu-adu gi-di-goe. Gei tangada dela ne-gowadu Au gi-di-goe, la-koia gu-ihala gi-nonua.”

19:12  Di madagoaa Pilate ne-longono-ia nia helekai aanei, geia ga-hagamaanadu dana hai belee hagamehede a Jesus, gei digau o Jew ga-wwolowwolo ga-helekai, “Maa goe ga-hagamehede a-Mee, le e-haga-modongoohia bolo goe hagalee di hoo ni-di king damana o Rome, go Caesar. Tangada dela e-helekai bolo ia di king, le e-hai-baahi gi-di king o Rome!”

19:13  Di madagoaa Pilate ne-longono-ia nia helekai aanei, geia gaa-lahi a Jesus gi-malaelae, gaa-noho gi-lala gi-hongo di lohongo tangada hai-gabunga, i-di gowaa dela e-haga-ingoo bolo di “Baba-Hadu” (e-haga-ingoo i telekai Hebrew bolo “Gabbatha”).

19:14  Di laangi deelaa la-di laangi i-mua di Pasoobaa, i-mua di oodee. Pilate ga-helekai gi digau o Jew, “Deenei di-godou King!”

19:15  Digaula gaa-wwolo gi mee, “Daaligidia a-Mee gii-made! Daaligidia a-Mee gii-made! Daudaulia a-Mee!” Pilate ga-heeu gi digaula, “Goodou e-hiihai bolo au gi-daudaulia di-godou King?” Gei nia dagi hai-mee-dabu ga-helekai gi mee, “Di-madau king le e-dahi-hua, go di king damana o Rome!”

19:16  Gei Pilate gaa-wanga Jesus gi digaula bolo gi-daudaulia gi-nua. Digau-dauwa gaa-lahi a Jesus.

19:17  Mee gaa-hana, e-aamo dono loobuu, gaa-dau-adu gi-di gowaa dela e-haga-ingoo bolo “Di Gowaa Hangaibu-Libogo” (e-haga-ingoo i telekai Hebrew bolo “Golgotha”).

19:18  Deelaa di gowaa ne-daudau-iei Mee mono daane dogolua, tangada e-dahi i-di baahi gau-donu, tangada e-dahi i-di baahi gau-ihala, gei Jesus i-mehanga meemaa.

19:19  Pilate ne-hihi dana haga-iloo, gaa-dogi gi-hongo di loobuu, “Jesus o Nazareth, di King o digau o Jew.”

19:20  Digau o Jew dogologowaahee guu-dau di-hagailoo, idimaa, di gowaa dela e-daudau-ai Jesus, la-hagalee mogowaa i-di waahale. Di haga-iloo le e-hihi i-nia helekai Hebrew, Latin mo Greek.

19:21  Nia dagi hai-mee-dabu ga-helekai gi Pilate, “Hudee hihia bolo Di king o digau o Jew. Hihia bolo ‘Taane deenei ne-bida helekai boloo, Au go di king o digau o Jew.’ ”

19:22  Pilate ga-helekai gi digaula, “Agu mee ala guu-lawa di-hihi, le e-dugu-hua beelaa.”

19:23  I-muli-hua digau-dauwa ne-daudau a Jesus, gei digaula gaa-kae nia goloo o-Maa, gaa-wwae-haa, tuhongo e-dahi ni tangada-dauwa e-dahi. Digaula gaa-daa di gahu laa-tua o-Maa. Di gahu dela ne-hai-hua gi-di gahu e-dahi dogomaalia, ono duudagi ai.

19:24  Digau-dauwa ga-helehelekai i nadau mehanga, “Gidaadou hagalee hahaahi di-maa. Gidaadou e-hudihudi be di-maa koai dela e-hai-mee gi-di maa.” Deenei la-ne-hai bolo gii-kila nia helekai di Beebaa-Dabu, “Digaula gu-duwwe ogu goloo i ginaadou, ge gu-bilei dais i dogu gahu laa-tua.” Gei deenei di mee ne-hai go digau-dauwa.

19:25  Nia daangada ala e-tuu hoohoo gi-di loobuu o Jesus, la-go tinana o-Maa, tuaahina-ahina tinana o-Maa, mo Mary di lodo o Clopas, mo Mary mai Magdala.

19:26  Jesus gu-gidee-Ia dono dinana mo dana dama-agoago dela e-baa-ai e-tuu i-golo, ga-helekai gi dono dinana, “Mee go dau dama-daane.”

19:27  Nomuli, gei Mee ga-helekai gi dana dama-agoago, “Deenaa do dinana.” Di madagoaa deelaa, gei tama-agoago deelaa gaa-lahi tinana o Jesus gi dono hale belee noho i dono baahi.

19:28  Jesus gu-modongoohia-Ia bolo nia mee huogodoo guu-lawa, gei Mee ga-helekai, “Au gu-hieinu,” bolo gii-gila nia helekai di Beebaa-Dabu.

19:29  Di boolo nogo i-golo e-honu i-nia waini hui-ngoohia. Digaula ga-daalo di-nadau liimi gi-lodo, gaa-nnoo gi-di ngudu di laagau-‘hyssop’, ga-hagatale gi-nia malau-ngudu o-Maa.

19:30  Jesus ga-inu nia waini aalaa, ga-helekai, “Ma-guu-lawa!” Ge-Ia gaa-bala dono libogo gi-mua, gaa-made.

19:31  Nia dagi o digau o Jew gaa-dangi gi Pilate, bolo gi-dumaalia ang-gi ginaadou gi-hadihadia nia wae o digau ala ne-daudau gi-nua, gi-dugu-ia labelaa nia huaidina digaula gi-daha mo nia loobuu. Digaula ne-tangi gi mee, idimaa, di laangi deenei la-di lima-laangi, gei digaula e-de-hiihai bolo nia huaidina digaula e-daudau hua igolo i-lodo di Laangi-Sabad, idimaa, di Laangi-Sabad deelaa la-di laangi koia e-dabu.

19:32  Digau-dauwa gaa-hula, ga-hadihadi nia wae o tangada dela ne-daudau matagidagi mo nia wae taane i-golo dela ne-daudau madalia a Jesus.

19:33  Malaa digaula ga-lloomoi gi Jesus ga-modongoohia bolo Mee guu-made, gei digaula digi hadihadia nia wae o-Maa.

19:34  Dahi dangada-dauwa ga-daalo di baahi o Jesus gi taalo, gei nia dodo mono wai gu-hali-mai.

19:35  (Taane dela ne-gidee-ia nia mee aanei, gu-haga-modongoohia nia maa bolo gi-hagadonu goodou. Nia helekai a-maa le e-donu, gei mee e-iloo-ia bolo ia e-helekai donu.)

19:36  Nia mee aanei la-ne-hai belee haga-kila-aga nia helekai di Beebaa-Dabu, “Di iwi e-dahi i ono iwi e-mooho ai.”

19:37  Di gubu labelaa e-dahi i-golo, e-helekai: “Nia daangada gaa-mmada gi Mee dela ne-daalo go digaula.”

19:38  I-muli nia mee aanei, Joseph, tangada mai di guongo o Arimathea, ga-helekai gi Pilate, be ia e-mee di-kae tuaidina o Jesus. (Joseph la tangada hai-hegau ni Jesus, malaa mee hagammuni ia, idimaa, mee e-madagu i-nia dagi o digau o Jew.) Pilate ga-helekai gi mee, bolo mee e-mee di-kae tuaidina o-Maa, malaa Joseph gaa-hana gaa-kae tuaidina o-Maa.

19:39  Nicodemus, taane dela ne-hana gi-baahi o Jesus dahi boo, gaa-hana madalia a Joseph, e-kae ana pauna lolo-kala e-mada-hidu maa-lima madalia ia. Nia lolo ala ne-unugi gi-nia ‘myrrh’ mo nia ‘aloe’.

19:40  Nia daane dogolua aanei gaa-kae tuaidina Jesus, gaa-didi gi-di gahu-lenge mono lolo-kala, gii-hai be-di hai o digau o Jew e-hagatogomaalia tuaidina tangada e-danu.

19:41  Di hadagee i-golo i-di gowaa ne-daudau-ai Jesus gi-di loobuu, gei taalunga i-lodo tadagee deelaa digi dugu-loo tangada no-lodo.

19:42  Idimaa di laangi deelaa la-i-mua di Laangi-Sabad, gei di lua deelaa le e-hoohoo, meemaa gaa-dugu tuaidina o-Maa gi-golo.

Chapter 20

20:1  Luada-loo di laangi-tabu, gei di-maa e-bouli hua igolo, gei Mary mai Magdala ne-hana gi taalunga, ga-gidee-ia di hadu o taalunga la-gu-hagadaga gi-daha.

20:2  Gei mee gaa-lele gi Simon Peter mo dono ehoo dama-agoago dela e-baa-iei Jesus, ga-helekai gi meemaa, “Digaula guu-lahi Tagi gi-daha mo taalunga, gei gimaadou e-de-iloo di gowaa digaula ne-dugu iei Mee!”

20:3  Gei Peter mo tangada agoago dela i-golo gaa-hula gi taalunga.

20:4  Meemaa ne-llele, gei di hoo dama-agoago a Peter le-koia e-lele i Peter, guu-dau i taalunga i-mua.

20:5  Mee ga-bala gi-lala, gaa-mmada gi-di gahu-lenge, gei mee digi ulu gi-lodo taalunga.

20:6  Simon Peter dela ne-daudali-mai a-mee, gaa-dau-adu gi taalunga deelaa, ga-ulu gi-lodo, gaa-mmada gi-di gahu-lenge dela e-moe i-lodo,

20:7  gei di gahu dela nogo didi di libogo o Jesus la-hagalee i-baahi di gahu-lenge deelaa, e-wini e-dugu i tuai gowaa.

20:8  Gei tama-agoago dela ne-dau i taalunga i-mua, ga-ulu gi-lodo labelaa, guu-mmada, gu-hagadonu.

20:9  (Meemaa digi modongoohia nia helekai di Beebaa-Dabu ala e-helekai bolo Mee e-hai-loo gi-mouli-aga i-di made.)

20:10  Gei nia dama-agoago aalaa gaa-hula gi-muli gi nau hale.

20:11  Mary e-duu i-tua taalunga e-dangidangi. Di madagoaa-hua dela e-dangidangi-iei mee, gei mee ga-bala gi-lala, ga-mmada-adu gi-lodo taalunga,

20:12  ga-gidee nia daangada di-langi dogolua e-ulu nau goloo kene, e-noho i-di gowaa dela nogo dugu tuaidina Jesus. Tangada e-dahi i libogo, gei di hoo o-maa i wae.

20:13  Meemaa ga-heeu gi Mary, “Di ahina-nei, goe e-dangidangi di-aha?” Gei Mary ga-helekai gi meemaa, “Digaula guu-lahi dogu Dagi gi-daha, gei au e-de-iloo-eau be digaula ne-dugu a-Mee i-hee!”

20:14  Mee ne-helekai beenei, gaa-huli, gaa-mmada gi Jesus e-duu i dono baahi, digi iloo bolo ma go Jesus.

20:15  Jesus ga-heeu gi mee, “Di ahina-nei, goe e-dangidangi di-aha? Ma koai dela e-halahala kooe?” Gei Mary e-hagabau bolo Mee go tangada hai hadagee, geia ga-helekai gi Mee, “Meenei, ma Kooe dela ne-lahi a-Mee? Hagia-mai di gowaa dela ne-dugu a-Mee, au gaa-hana e-lahi a-Mee.”

20:16  Jesus gaa-gahi a-mee, “Mary.” Gei Mary ga-huli-adu gi Mee, ga-helekai gi Mee i telekai Hebrew, “Raboni!” (Dono hadinga bolo “Tangada Agoago.”)

20:17  Jesus ga-helekai gi mee, “Hudee dogi-mai, idimaa, Au digi hana gi-baahi dogu Damana. Hana gi-baahi ogu duaahina, hagi-anga-ina gi digaula, bolo Au gaa-hana gi-baahi o Mee dela go dogu Damana, mo di-nadau Damana, go dogu God, mo di-nadau God.”

20:18  Mary mai Magdala gaa-hana, ga-hagi-anga gi nia dama-agoago a-Maa bolo ia gu-gidee Tagi, gei mee ga-hagi-anga gi digaula nnelekai a-Maa ala ne-hai ang-gi deia.

20:19  Hiahi-hua di laangi-tabu deelaa, gei nia dama-agoago a Jesus ga-dagabuli-mai gi-lodo di hale tai, idimaa, digaula e-mmaadagu i digau aamua o Jew. Gei Jesus ga-hanimoi, gaa-duu i nadau lodo, ga-helekai, “Di aumaalia gi-madalia goodou.”

20:20  I-muli-hua dana helekai, gei Mee ga-haga-mmada digaula gi ono lima mo dono baahi. Gei nia dama-agoago a-Maa gu-tenetene huoloo i-di nadau gidee-ginaadou Tagi.

20:21  Jesus ga-helekai labelaa gi digaula, “Di aumaalia gi-madalia goodou. Gadoo be dogu Damana dela ne-hagau-mai Au, gei Au e-hagau labelaa goodou.”

20:22  Mee gaa-dogi gi-hongo digaula, ga-helekai, “Goodou kae-ina di Hagataalunga-Dabu.

20:23  Maa goodou ga-dumaalia gi-nia huaidu o-nia daangada, gei nadau huaidu la-gu-maahede. Maa goodou hagalee dumaalia gi nia huaidu digaula, gei nia huaidu digaula la-hagalee maahede.”

20:24  Tangada e-dahi i-nia dama-agoago dilongoholu maa-lua, go Thomas (dela e-haga-ingoo bolo Didymus), nogo hagalee i-baahi digaula i-di madagoaa Jesus ne-hanimoi.

20:25  Nia dama-agoago ala i-golo ga-helekai gi mee, “Gimaadou guu-mmada gi Tagi.” Thomas ga-helekai gi digaula, “Maa au digi mmada gi-nia lohongo baalanga, be e-daalo dogu madaalima gi-nia lohongo baalanga i ono lima mo dono baahi, au hagalee hagadonu.”

20:26  Muli di tabu e-dahi, ana dama-agoago ne-dagabuli labelaa gi-lodo di hale deelaa, gei Thomas gu-madalia digaula. Nia bontai guu-tai, gei Jesus gaa-duu gi-baahi digaula, ga-helekai, “Di aumaalia gi-madalia goodou.”

20:27  Gei Mee ga-helekai gi Thomas, “Dugua-mai do madaalima, mmada gi ogu lima. Holo-ina-mai doo lima, daalo-ina gi-lodo dogu baahi. Hudee maanadu logo, hagadonu-hua!”

20:28  Thomas ga-helekai gi Mee, “Dogu Dagi mo dogu God!”

20:29  Jesus ga-helekai gi mee, “Goe ne-hagadonu idimaa goe dela ne-gidee? E-maluagina go digau ala e-hagadonu, gei digi gidee.”

20:30  Jesus ne-hai ana mogobuna haga-goboina e-logo i-mua ana dama-agoago gei digi hihia gi-lodo di beebaa deenei.

20:31  Gei nia mee aanei la-ne-hihi, bolo gi-hagadonu goodou bolo Jesus la-go di Mesaia, go Tama a God. Mai godou hagadonu a-Mee, goodou ga-hai-mee gi-di mouli.

Chapter 21

21:1  I-muli-hua di-mee deenei, Jesus ga-haga-gida-e-Ia gi ana dama-agoago labelaa i-di tai go Tiberias. Deenei dono hai:

21:2  Simon Peter, Thomas (dela e-haga-ingoo bolo Didymus), Nathanael (tangada mai Cana o Galilee), nia dama Zebedee, mo nia dama-agoago dogolua ala i-golo, nogo i-di gowaa e-dahi.

21:3  Simon Peter ga-helekai gi digaula, “Au e-hana e-wagadaha.” Digaula ga-helekai, “Gimaadou e-hula dalia goe.” Malaa, digaula gaa-hula i-di boodi, gei di boo deelaa, digi kumi nadau iga.

21:4  Di madagoaa di laa ne-hobo, Jesus e-duu i tongotai, gei nia dama-agoago a-Maa digi iloo bolo ma go Jesus.

21:5  Gei Jesus ga-heeu gi digaula, “Digau-nei, goodou digi kumi godou iga?” Digaula ga-helekai, “Hagalee-loo.”

21:6  Gei Mee ga-helekai gi digaula, “Hudua di-godou kau gi-lala i-di baahi gau-donu o-di boodi, gei goodou gaa-kumi godou iga.” Malaa, digaula gaa-hudu di-nadau kau gi-lala, gu-deemee di-hudi-aga, i-di maa gu-hontula iga.

21:7  Tama agoago dela e-aloho-iei Jesus, ga-helekai gi Peter, “Ma go Tagi!” Di madagoaa a Peter ne-longono-ia bolo ma go Tagi, geia gaa-didi dono gahu laa-daha gi dono gili (idimaa, mee gu-liagi gi-daha ono goloo), gaa-hobo gi-lodo-tai.

21:8  Nia dama-agoago ala i-golo, ga-aalo-aga di-nadau boodi gi tongotai, ga-hudi-aga di kau honu-iga. Digaula hagalee mogowaa i tenua, holongo nia loho e-madalima mogowaa.

21:9  Di-nadau dau i tongotai, digaula gaa-mmada gi-di ahi e-gaa e-dunu nia iga nonua, mono palaawaa labelaa.

21:10  Jesus ga-helekai gi digaula, “Gaamai hunu iga i godou iga ala ne-kumi.”

21:11  Simon Peter gaa-hana gi-hongo di boodi, ga-hudi-aga dana kau honu-iga llauehaa, e-lau madalima maa-dolu, gi tongotai. Gei di kau deelaa la-gu-honu-iga huoloo, gei di-maa digi mahaa.

21:12  Jesus ga-helekai, “Lloomoi, miami.” Tangada i ana dama-agoago ai ne-heeu gi Mee be Ia la-koai, idimaa, digaula gu-iloo bolo Mee go Tagi.

21:13  Jesus ga-hanadu, ga-dahi-aga nia palaawaa, gaa-wanga gi digaula, gaa-duwwe labelaa nia iga.

21:14  Deenei la-di tolu holongo a Jesus ne-haga-gida gi ana dama-agoago i-muli dono haga-mouli-aga.

21:15  I-muli-hua di-nadau miami, gei Jesus ga-helekai gi Simon Peter, “Simon, tama a John, goe e-aloho i-di-Au laa-hongo digau aanei?” Gei mee ga-helekai, “Uaa, meenei Tagi, Goe e-iloo-hua bolo au e-aloho i-di-Goe.” Jesus ga-helekai gi mee, “Madamada humalia i agu dama-siibi.”

21:16  Mee ga-heeu haga-lua, “Simon, tama a John, goe e-aloho i-di-Au?” Gei mee ga-helekai gi Jesus, “Uaa, meenei Tagi, Goe e-iloo-hua bolo au e-aloho i-di-Goe.” Jesus ga-helekai gi mee, “Madamada humalia i agu siibi.”

21:17  Jesus ga-heeu haga-dolu, “Simon, tama a John, goe e-aloho i-di-Au?” Peter gu-manawa-gee, idimaa, Jesus gu-heeu haga-dolu gi mee bolo mee e-aloho i-deia. Gei mee ga-helekai gi Jesus, “Meenei Tagi, Goe e-iloo nia mee huogodoo. Goe e-iloo-hua bolo au e-aloho i-di-Goe.” Jesus ga-helekai gi mee, “Madamada humalia i agu siibi.

21:18  Au e-hagi-adu gi-di-goe di tonu: Do madagoaa nogo dulii, goe e-hagatogomaalia goe e-hana gi-di gowaa dela e-hiihai ginai goe. Do madagoaa ma-ga-madua, gei goe gaa-holo oo lima gi-daha, gei tangada gaa-nnoo oo lima, gaa-dagi goe gi-di gowaa dela e-de-hiihai di-hana ginai goe.”

21:19  (Jesus e-helekai i nnelekai aanei e-haga-modongoohia di made a Peter belee gaamai di madamada gi God.) Nomuli, gei Jesus ga-helekai, “Daudalia-mai Au.”

21:20  Peter gaa-huli gi-muli ga-gidee-ia tama-agoago a Jesus dela e-baa-ai e-daudali ginaua, go mee dela ne-menege-adu gi Jesus i-di madagoaa digaula nogo miami ga-heeu, “Meenei Tagi, ma koai dela ga-hagi-aga Goe?”

21:21  Di madagoaa Peter ne-gidee-ia a-mee, ga-heeu gi Jesus, “Meenei Tagi, taane deenei le e-hai behee?”

21:22  Jesus ga-helekai, “Maa au ga-hiihai bolo mee gi-mouli-hua beelaa, gaa-dae-loo gi dogu hanimoi, e-hai dana-aha adu gi-di-goe? Goe daudalia-mai Au.”

21:23  Malaa, di longo guu-dele gi digau ala e-hagadonu a Jesus, bolo tama-agoago Jesus deenei, la-ga-hagalee made. Jesus la-digi helekai bolo mee hagalee made. Mee ne-helekai-hua boloo, “Maa au ga-hiihai bolo mee gi-mouli-hua beelaa, gaa-dae-loo gi dogu hanimoi, e-hai dana-aha adu gi-di-goe?”

21:24  Mee go tama-agoago Jesus dela nogo helehelekai nia mee aanei. Go mee dela ne-hihi nia maa gi-lala, gei gidaadou gu-iloo-hua bolo ana helekai le e-donu.

21:25  Jesus guu-hai ana mee logowaahee i-golo. Maa nei bolo ne-hihi gi-lala hagatau, gei au bolo henuailala hagatau e-deemee di-daahi nia beebaa ala ma-ga-hihi ginai nia maa.