LinVB - John

Chapter 1

1:1  O libandela Liloba azalákí. Liloba azalákí epai ya Nzámbe mpé Liloba azalákí Nzámbe.

1:2  Ut’o libandela Liloba azalákí epái ya Nzámbe.

1:3  Bínso bisálémí na yě ; sókí yě té, elóko yǒ kó esálémákí té.

1:4  Bomoi bozalákí o Liloba mpé bomoi bozalákí Mwínda mwa bato.

1:5  Mwínda mozalákí kongenge o káti ya molílí, kasi bato ba molílí bayambí mwangó té.

1:6  Nzámbe atíndí moto mǒkó nkó­mbó ’te Yoáne.

1:7  Yě moto ayéí lokóla nzénénéké kosangela bato Mwínda, mpô ’te bato bánso báyamba Mwínda mpô ya maloba ma yě.

1:8  Yě mpenzá azalákí Mwínda té, azalákí bobélé nzénénéké óyo ayéí kosangela bato Mwínda.

1:9  Mwínda moye, mwínda mwa sôló moyéí o nsé kongengele bato bánso.

1:10  Liloba azalákí áwa o mokili. Na yě Nzámbe akeláká mokili ; nzókandé bato ba mokili baya­mbí yě té.

1:11  Ayéí o ekólo ya yě mǒ­kó, kasi bato ba yě bayambí yě té.

1:12  Kasi baye bayambí yě, baye ba­ndimí Nkómbó ya yě, apésí bangó likokí lya kokóma bána ba Nzámbe.

1:13  Bakómí bána ba Nzámbe na loléngé la bomoto té, na mpósá ya nzóto té, kasi babótámí na Nzámbe.

1:14  Liloba akómí moto mpé azalákí o ntéi ya bísó, Tomónókí nkémbo ya yě, nkémbo ya Mwána sé mǒkó eye azwí na Tatá atóndí na bolingi mpé na bosôló.

1:15  Yoáne asakólí mpô ya yě, alobí : « Tálá moto óyo nayébísí bínó ’te Oyo akoyâ nsima ya ngáí, alekí ngáí, zambí yě azalákí liboso na ngai. »

1:16  Oyo atóndí na makabo maye akabélí bísó bánso, apésí bísó ngrá­sya mbala na mbala.

1:17  Tozwákí Mobéko na mabóko ma Móze, kasi ngrásya na bosôló iyéí na Yézu Krístu.

1:18  Moto mǒkó amóní naíno Nzámbe té ; kasi Mwána sé mǒkó wa Yě, óyo azalí o mbóka Tatá, yě moto ayébísí bísó Nzámbe.

1:19  maye mazali maloba Yoáne alobákí ntángo ba-Yúda ba Yerúzalem batí­ndákí banganga Nzámbe na ba-Lévi epái ya yě bátúna yě : « Yǒ ozalí náni ? »

1:20  Yoáne asakólí polélé, awángání té, alobí : « Ngáí nazalí Krístu té. »

1:21  Batúní yě : « Bôngó yǒ náni ? Yǒ ndé Elía ? » Alobí : « Nazalí Elía té. » Batúní lisúsu : « Ozalí proféta óyo asengélí koyâ ? » Alobí : « Té. »

1:22  Batúní yě lisúsu : « Bôngó yǒ náni ? Yébísá bísó, tókende kopésa eyano na bato batíndí bísó. Yǒ mǒkó olobí ’te ozalí náni ? »

1:23  Yoáne ayanólí : « Ngáí nazalí mongóngó mwa moto óyo azalí kobélela o elíkí : Bóbongisela Mokonzi nzelá, lokóla proféta Izaya alobáká. »

1:24  Baye batíndámákí bazalákí ba lingómbá lya ba-Farizéo.

1:25  Batúní yě : « Sókó ozalí Krístu té, Elía té, proféta mpé té óyo asengélí koyâ, mpô níni ozalí kobátisa bato ? »

1:26  Yoáne ayanólí bangó : « Ngáí nazalí kobátisa na mái ; kasi o ntéi ya bínó moto mǒkó azalí, bínó boyébí yě té.

1:27  Yě akoyâ nsima ya ngáí, kasi nabongí kofungola nsinga ya bikótó bya yě té. »

1:28  Makambo maye mánso malekákí o Betánia o ngámbo ya Yordáne, esíká Yoáne azalákí kobátisa.

1:29  Mokolo mwa nsima, ntángo Yoáne amóní Yézu azalákí koyâ epái ya yě, alobí : « Tálá mwâ Mpatá ya Nzámbe, óyo akolongola lisúmu lya nsé.

1:30  Mpô ya yě nalobákí ’te : Nsima ya ngáí moto mǒkó akoyâ, alekí ngáí, zambí azalákí ntángo babótí ngáí naíno té.

1:31  Ngáí mpé nayébákí yě té, kasi nayéí kobátisa na mái mpô ’te ba-Israél báyéba yě. »

1:32  Mpé Yoáne akóbí kosakola : « Namónókí Elímo aútí o likoló lokóla ebengá mpé atíkálí likoló lya yě.

1:33  Ngáí mpé nayébákí yě té ; kasi óyo atíndí ngáí nábátisa na mái, alobí na ngáí : Moto óyo okomóno Elímo akokitela yě, yě moto akobátisa na Elímo Sántu.

1:34  Ngáí moto namónókí yangó, yangó wâná nasakólí ’te Yě azalí Mwána wa Nzámbe. »

1:35  Mokolo mwa nsima Yoáne azalákí wâná lisúsu na bayékoli ba yě bábalé.

1:36  Yoáne atálí Yézu ntángo azalákí koleka, alobí : « Tálá mwâ Mpatá ya Nzámbe. »

1:37  Eyókí bayékoli bábalé maloba mâná, balandí Yézu.

1:38  Yézu atálí o nsima, amóní bangó bazalákí kolanda yě, alobí na bangó : « Bozalí koluka níni ? » Bayanólí yě : « Rábi, lokóla ’te Motéyi, okofándaka wápi ? »

1:39  Yézu alobí na bangó : « Bóyâ kotála. » Bôngó bakeí na yě mpô bámóno esíká azalákí kofánda ; mokolo môná batíkálí epái ya yě. Ezalákí ngonga sókí ya ínei ya mpókwa.

1:40  Andréa, ndeko wa Simóni Pétro, azalákí mǒkó wa bayékoli baye bábalé bayókákí maloba ma Yoáne mpé balandákí Yézu.

1:41  Andréa akútání libosó na ndeko wa yě Simóni, alobí na yě : « Tomóní Mesíya », yě ndé Krístu.

1:42  Akeí na yě epái ya Yézu. Yézu atálí yě, alobí : « Yǒ Simóni, mwána wa Yoáne, út’o leló bakobénga yǒ Pétro », lokóla ’te libángá.

1:43  Mokolo mwa nsima Yézu akání kokende o Galiléa, akútání na Filípo, alobí na yě : « Landá ngáí. »

1:44  Filípo azalákí moto wa Betsáida, mbóka ya Andréa na Pétro.

1:45  Filípo akútání na Natánael, alobí na yě : « Tomóní moto óyo Móze akomáká mpô ya yě o búku ya Mo­béko, óyo baproféta bayébísáká : Yézu, mwána wa Yozéfu, wa Nazaréte. »

1:46  Natánael ayanólí yě : « Elóko níni ya malámu ekokí (ndé) koúta o Nazaréte ? » Filípo alobí na yě : « Yáká, ótála. »

1:47  Yézu amóní Natánael azalákí koyâ epai na ye, alobí mpô ya yě : « Tálá mo-Israél wa sôló, moto azalí na lokutá té. »

1:48  Natánael atúní yě : « Ndéngé níni oyébí ngáí ? » Yézu azóngísélí yě : « Libosó ’te Filípo ábê­nga yǒ, namónókí yǒ o nsé ya nzeté ya fígi. »

1:49  Natánael azóngísí : « Rábi, yǒ ozalí Mwána wa Nzámbe, ozalí Mokonzi wa Israél. »

1:50  Yézu ayanólí yě : « Oya­mbí zambí nalobí na yǒ ’te namónókí yǒ o nsé ya nzeté ya fígi ! Okomóno makambo masúsu makoleka óyo na bonéne. »

1:51  Mpé abakísí : « Ya sôló sôló, nalobí na bínó : bokomóno likoló likofungwama mpé bǎnzelú ba Nzámbe bakobuta mpé bakokita mpô ya Mwána wa Moto. »

Chapter 2

2:1  Nsima ya mikolo míbalé eyenga ya libála ezalákí o Kána o Galiléa ; mamá wa Yézu azalákí kúná.

2:2  Babéngí mpé Yézu na bayékoli ba yě o limpáti.

2:3  Awa víno esílí, mamá wa Yézu alobí na yě : « Bazalí na víno té. »

2:4  Yézu azóngísélí yě : « Mwasi, likambo níni ngai na yo ? Elaká ya ngáí ekokí naíno té. »

2:5  Mamá wa yě alobí na basáleli : « Sóko alobi likambo, bosála. »

2:6  Ezalákí wâná mbéki motóbá mpô ya komípétola, lokóla ba-Yúda bameséní kosála. Mbéki yǒ kó yǒ kó ekokí kokwa masangála mwambe tǒ zómi na mábalé.

2:7  Yézu alobí na bangó : « Bótóndisa mbéki na mái. » Bató­ndísí yangó meké.

2:8  Yézu alobí : « Bótóka mwâ moké sikáwa, bókende kopésa yangó na kapíta wa balámbi. » Bakeí kopésa yě.

2:9  Kapíta amekí mái mabóngwání víno, ayébí té epái eútí ; kasi basáleli batókákí mái bayébí. Kapíta wa balámbi abéngí mobáli abálí sika,

2:10  alobí na yě : « Bakopésaka víno elengi libosó ; mpé ntángo bato bamelí míngi, bakopésa víno ezalí elengi míngi té. Kasi yǒ obómbí víno elengi téé siká­wa. »

2:11  Ezalí likamwísi lya yambo Yézu asálí. Asálí lyangó o Kána o Galiléa. Alakísí bôngó nkémbo ya yě, mpé bayékoli ba yě baya­mbí yě.

2:12  Na nsima akeí o Kafárnaum elongó na mamá, na bandeko mpé na bayékoli ba yě, kasi batíkálí kúná mikolo míngi té.

2:13  Pásiká ya ba-Yúda ekómí penepene ; Yézu akeí o Yerúzalem.

2:14  O Té­mpelo akútí bato bakotékeke ngó­mbé, mpatá na bibengá, ná mpé bato bakosénzeke mbóngo bafándí wâná.

2:15  Asálí fímbo na mikulu, abengání bangó bánso o Témpelo, ná mpatá, ná ngómbé ; apanzí mosolo mwa baye bazalákí kosénze mbóngo, mpé akwêísí méza ya bangó.

2:16  Alobí na bato bazalákí kotéke bibengá : « Bólongola byangó áwa ! Bókómisa ndáko ya Tatá wa ngáí ndáko wa mombó­ngo té ! »

2:17  Bayékoli bakundólí o mitéma maloba maye : Nawéí na mpósá ya kokúmisa ndáko ya Yǒ.

2:18  Bôngó ba-Yúda batúní yě : « elembo níni okolakisa bísó ’te okokí kosála bôngó ? »

2:19  Yézu azóngísélí bangó : « Bóboma ndáko eye esan­tu, na mikolo mísáto nakotó­nga yangó lisúsu. »

2:20  Ba-Yúda bazóngísélí yě : « Basengélákí na mibú ntúkú ínei na motóbá mpô ya kotónga ndáko eye esántu, bôngó yǒ okotónga yangó lisúsu na mikolo mísáto. »

2:21  Kasi Yézu alobákí bôngo mpô ya ndáko esántu ya nzóto ya yě.

2:22  Ntángo asékwí o bawá, bayékoli bakundólí o mitéma ’te alobákí bôngó, mpé bayambí maye makomámí o Minkandá Misántu ná mpé maloba Yézu alobákí.

2:23  Ntángo Yézu azalákí o Yerúzalem mpô ya eyenga ya Pásiká, bato míngi, áwa bamóní makamwísi yě asálí, bayambí Nkómbó ya yě.

2:24  Kasi Yézu atíí motéma na bangó té, zambí ayébí bangó bánso ;

2:25  moto mǒ­kó té asengélákí koyébisa yě makambo ma bato, zambí ayébí maye mazalí o mitéma mya bangó.

Chapter 3

3:1  Ezalaki mǒkó wa ba-Farizéo, nkómbó ’te Nikodémo, nkúmú wa ba-Yúda,

3:2  ayéí na butú epái ya Yézu. Alobí na yě : « Motéyi, toyébí ’te Nzámbe atíndí yǒ mpô ótéya bato ; moto mǒkó té akokí kosála bilémbo biye yǒ ozalí kosála, sókó Nzámbe azalí na yě té. »

3:3  Yézu azóngísélí yě : « Ya sôló sôló, nalobí na yǒ : moto mǒkó té akokí komóno Bokonzi bwa Nzámbe, sókó abótámí mbala ya íbalé té. »

3:4  Nikodémo atúní yě : « Bóníbóní moto akokí kobótama lisúsu, áwa asílí akómí mobangé ? Akokí ndé kozónga o libumu lya mamá mpé kobótama mbala ya íbalé ? »

3:5  Yézu ayanólí : « Ya sôló sôló, nalobí na yǒ : moto mǒkó té akokí kokóto o Bokonzi bwa Nzámbe sókó abótámí na mái mpé na Elímo Sántu té.

3:6  Oyo abótámí na mosuni azalí mosuni, óyo abótámí na Elímo azalí elímo.

3:7  Oká­mwa té zambí nalobí na yǒ : Bose­ngélí bóbótama lisúsu.

3:8  Mompepe mokopepe epái moli­ngí, mpé okoyóka lokitó la mwa­ngó ; kasi okoyéba té epái mompepe mokoúta tǒ mokokende. Sé bôngó bato bánso babótámí na Elímo. »

3:9  Nikodémo ayanólí yě : « Yangó ekosálema bóníbóní ? »

3:10  Yézu azóngísélí yě : « Yǒ ozalí motéyi o Israél mpé oyébí makambo óyo té ?

3:11  Ya sôló sôló, nalobí na yǒ : bísó tokolobaka maye toyébí, mpé tokoyébisaka maye tomónókí ; kasi bínó bondimí maloba ma bísó té.

3:12  Sókó bondímí makambo ma nsé té, maye nayébísí bínó, bóníbóní bokoya­mba sókó nayébísí bínó mambí ma likoló ?

3:13  Moto mǒkó té asílí abutí o likoló, bobélé Oyo aútákí o likoló, yě ndé Mwána wa Moto.

3:14  Móze atómbólákí nyóka o elíkí, bobélé bôngó Mwána wa Moto asengélí kotó­mbwama,

3:15  mpô ’te moto nyó­nso ayambí yě ázwa bomoi bwa sékô.

3:16  Nzámbe akolingaka bato míngi mpenzá, yangó wâná apésí bangó Mwána sé mǒkó wa yě, mpô ’te moto nyónso ayambí yě ábú­ngama té, kasi ázwa bomoi bwa sékô.

3:17  Nzámbe atíndí Mwána wa yě áwa o nsé mpô ya kosámbisa bato té, kasi mpô ’te ábíkisa bangó.

3:18  Moto ayambí Mwána, bakosá­mbisa yě té ; kasi moto ayambí Mwána té, asílí akití o likambo, mpámba té, ayambí Nkó­mbó ya Mwána sé mǒkó wa Nzámbe té.

3:19  Tálá ndéngé bakokáta likambo : Mwínda moyéí o nsé ; kasi bato bapusí kolinga molílí, mpô misálá mya bangó mizalí mabé.

3:20  Ya sôló, moto nyónso akosálaka mabé, akoyinaka mwínda mpé akokímaka mwangó, mpô ’te misálá mya yě míyébana té.

3:21  Kasi moto akosálaka mambí ma bosôló akokende epái ya mwínda, mpô ’te émónono ’te misálá mya yě misálémí na botósi Nzámbe. »

3:22  Nsima yangó Yézu na bayékoli ba yě bakeí o ekólo ya Yudéa ; atíkálí kuná mwâ mikolo elongó na bangó, mpé abátísí bato.

3:23  Yoáne mpé azalákí kobátisa o Enon penepene na Salim, mpô mái mazalákí míngi kúná ; bato míngi bayéí kokúla batísimo.

3:24  O ntángo êná Yoáne akangémákí naíno o bolóko té.

3:25  Mokolo mǒkó bayékoli basúsu ba Yoáne bawélání ntembe na mo-Yúda mǒkó mpô ya ndéngé bakomípétolaka.

3:26  Bakeí epái ya Yoáne, balobí na yě : « Rábi, moto óyo azalákí na yǒ o ngámbo ya Yordáne, óyo osakólákí mpô ya yě, akómí kobátisa bato mpé bánso bazalí kokende epái ya yě. »

3:27  Yoáne azóngísí : « Moto akokí kozwa elóko té, sókó Nzámbe apésí yě té.

3:28  Bínó mǒkó boyókákí ’te nalobákí : Ngáí nazalí Krístu té, kasi natíndámí libosó lya yě.

3:29  Nkóló wa mwásí ndé mobáli, kasi móníngá wa boló­ngani, óyo atélémí penepene na yě mpé ayókí yě, atóndí na nsáí mpô ayókí mongóngó mwa mobáli. Yangó ndé esengo ya ngáí, mpé nayókí esengo enéne mpenzá.

3:30  Yě asengélí kokóla, ngáí námíkitisa.

3:31  Oyo aútí o likoló alekí bánso ; óyo aútí o nsé, azalí moto wa nsé mpé akolobaka lokóla moto wa nsé. Kasi óyo aútí o likoló alekí bánso ;

3:32  akosakolaka maye amónókí mpé ayókákí, kasi moto mǒkó akoyamba maloba ma yě té.

3:33  Moto ayambí maloba ma yě, andimí ’te Nzámbe akolobaka mambí ma bosôló.

3:34  Moto óyo Nzámbe atíndí, akolobaka maloba ma Nzámbe mpenzá, mpô Nzámbe atóndísí yě na Elímo wa yě.

3:35  Tatá alingí Mwána mpé atíí mánso o mabóko ma yě.

3:36  Moto ayambí Mwána, azalí na bomoi bwa sékô ; moto abóyí koyamba Mwána, akozwa bomoi té ; nkándá ya Nzámbe ekokwêla yě sékô. »

Chapter 4

4:1  Ba-Farizéo bayókákí ’te Yézu akómí na bayékoli míngi mpé azalákí kobátisa bato, leká Yoáne.

4:2  Nzókandé Yézu yě mǒkó azalákí kobátisa té, sé bayékoli ba yě bazalákí kobátisa.

4:3  Eyókí Yézu bôngó, alongwí o Yudéa mpé azóngí o Galiléa.

4:4  Asengélákí kokátisa Samaría ;

4:5  akómí bôngó o Sikar, mbóka yǒ kó ya Samaría, penepene na mabelé maye Yakób apésáká mwána wa yě Yozéfu.

4:6  Libúlú lya mái lya Yakób lizalí o esíká êná. Yézu alembí na botámboli, afándí o mpe­mbéni ya libúlú lyangó. Ezalákí penepene na ngonga ya midí.

4:7  Mwásí mǒkó wa Samaría ayéí kotóka mái. Yézu alobí na yě : « Pésá ngáí mái námele. »

4:8  Bayékoli bakendékí o mbóka kosómba bilóko bya kolía.

4:9  Mwásí wa Samaría alobí na yě : « Ndéngé níni yǒ mo-Yúda okokí kosénge ngáí, mwásí wa Samaría, mái ? » Atúní yangó mpámba té, mpô ba-Yúda na ba-Samaría bazalákí koyókana té.

4:10  Yézu azóngísélí yě : « Sókó oyébákí likabo la Nzámbe, mpé sókó oyébákí náni mpenzá asé­ngí yǒ mái ma komele, mbele yǒ mǒkó olingákí kosénge mái, mpé yě alingákí kopésa yǒ mái ma bomoi. »

4:11  Mwásí alobí na yě : « Mokonzi, ozalí na elóko ya kotóka mái té, mpé libúlú lizalí bozi­ndó. Bôngó okozwa mái ma bomoi wápi ?

4:12  Okanísí ndé ’te olekí nkóko wa bísó Yakób ? apésákí bísó libúlú liye ; azalákí komele mái áwa, yě mǒkó ná bána ba yě, ná bibwélé bya yě. »

4:13  Yézu azóngísélí yě : « Mo­to akomele mái maye, akoyóka lisúsu mpósá ya mái ;

4:14  kasi moto akomele mái ngáí nakopésa, akoyóka lisúsu mpósá ya mái mokolo mǒ­kó té, zambí mái ngáí nakopésa yě, makokómela yě líziba likopésa bomoi bwa sékô. »

4:15  Mwásí alobí na yě : « Mokonzi, pésá ngáí mái mâná, bôngó náyóka lisúsu mpósá ya mái té, mpé náyâ lisúsu kotóka áwa té. »

4:16  Yézu alobí na yě : « Kendé kobênga mobáli wa yǒ mpé zóngá áwa. »

4:17  Mwásí azóngísélí yě : « Nazalí na mobáli té. » Yézu alobí na yě : « Olobí ya sôló ’te ozalí na mobáli té,

4:18  zambí ozalákí na babáli bátáno, mpé óyo afándí na yǒ sikáwa azalí mobáli wa yǒ té. Olobí likambo lya sôló. »

4:19  Mwásí alobí na yě : « Mokonzi, namóní ’te ozalí proféta.

4:20  Ba­nkóko ba bísó bakúmísáká Nzámbe o ngómbá eye ; kasi bínó ba-Yúda bokolobaka ’te : ‘Basengélí kokúmisa Nzámbe o Yéruzalem’. »

4:21  Yézu alobí na yě : « Mwási, ndimá maloba ma ngáí : eleko ekoyâ bakokúmisa Tatá o ngómbá eye tǒ o Yerúzalem té.

4:22  Bínó ba-Samaría bokokúmbamelaka Nzámbe óyo boyébí té ; bísó tokokúmbamelaka Nzámbe óyo toyébí, zambí libíkí likoúta na ba-Yúda.

4:23  Kasi eleko ekoyâ, yangó esílí ekokí, bato bakosámbelaka sôló bakokú­mbamela Tatá o mitéma na ndéngé ya sôló, zambí Tatá alingí bato bakokúmbamelaka yě bôngó.

4:24  Nzámbe azalí Elímo, mpé bato bakokúmbamelaka yě base­ngélí kosála yangó o mitéma na ndéngé ya sôló. »

4:25  Mwásí alobí na yě : « Nayébí ’te Mesíya óyo bakobéngaka Krístu akoyâ. Ntángo akoyâ, akolimbolela bísó mánso. »

4:26  Yézu alobí na yě : « Mesíya, ngáí óyo nazalí koloba na yǒ. »

4:27  O ntángo êná bayékoli ba yě bazóngí. Bamóní ’te Yézu azalákí kosolola na mwásí, nzókandé moto mǒkó té alobí na yě : « Ozalí kotúna yě níni ? » tǒ : « Ozalí kosolola na yě níni ? »

4:28  Mwásí atíkí mbéki ya yě, akeí mbángu o mbóka mpé alobí na bato :

4:29  « Yákáni botála moto ayébísí ngáí mánso nasálí. Akokí kozala Krístu té ? »

4:30  Bato babimí o mbóka mpé bakeí epái ya Yézu.

4:31  O ntángo êná bayékoli babó­ndélí Yézu, balobí : « Motéyi, líá mwâ moké. »

4:32  Kasi alobí na bangó : « Bilóko ngáí nasengélí kolía, bínó boyébí byangó té. »

4:33  Bayékoli batúnání : « Moto mǒkó ayélákí yě bilóko bya kolía tǒ ? »

4:34  Yézu alobí na bangó : « Biléi bya ngáí, ndé kosála maye óyo atíndí ngáí akolingaka, mpé kosúkisa mosálá mwa yě !

4:35  Bínó bokoloba té ’te etíkálí sánzá ínei tókóma o eleko ya bobúki mbuma ? Kasi ngáí nalobí : Bótómbola míso mpé bótála bilanga : mbuma ikomélí, bakokí kobúka yangó.

4:36  Moto abúkí mbuma asílí kozwa lifúta lya yě mpé asangísí mbuma mpô ya bomoi bwa lobíko. Bôngó moto alóní mbóto ná óyo abúkí mbuma bakosepela elongó.

4:37  Bakolobaka : Mosúsu akolóna, mosúsu akobúka mbuma : ezalí ya sôló.

4:38  Ngáí natí­ndí bínó bóbúka mbuma iye bínó bolónákí té ; bato basúsu bamíle­mbísákí na mosálá mwangó, mpé bínó bozwí bolámu mpô ya mosálá bangó basálí. »

4:39  O mbóka êná ba-Samaría baíké bayambí Yézu mpô ya maloba mwásí alobákí : « Ayébísí ngáí mánso nasálí. »

4:40  Bôngó ntángo ba­kómí epái ya yě, babóndélí yě ’te átíkala o mbóka ya bangó. Yangó wâná Yézu atíkálí kúná mikolo míbalé.

4:41  Bato basúsu naíno míngi bayambí yě mpô ya maloba ma yě ;

4:42  balobí na mwásí ôná : « Sikáwa toyambí bobélé mpô ya maloba ma yǒ té ; bísó mǒkó toyókí mpé toyébí ’te azalí sôló Mobíkisi wa bato bánso. »

4:43  Nsima ya mikolo míbalé Yézu alongwí kúná mpé akeí o Galiléa.

4:44  Yě mǒkó asakólákí ’te proféta mǒ­kó té akozwa lokúmu o mbóka ya yě méí.

4:45  Ekómí yě o Galiléa, bato ba Galiléa bayambí yě malámu, zambí bangó mpé bakendékí o Yerúzalem mpô ya eyenga, mpé bamónókí mánso asálákí o ntángo ya eyenga êná.

4:46  Yézu azóngí o Kána ya Gali­léa, esíká abóngólákí mái víno. Ezalákí o Kafárnaum mosáleli monéne wa érode, mwána wa yě azalákí kobéle.

4:47  Ntángo ayókákí ’te Yézu alongwí o Yudéa mpé akómí o Galiléa, moto ôná akeí kokútana na Yézu mpé abóndélí yě ’te áyâ kobíkisa mwána wa yě azalákí kobunda na mpási ya liwá.

4:48  Yézu alobí na yě : « Bínó sókó bomóní bilembo na makamwísi té, bokoyamba té ! »

4:49  Mosáleli wa érode azóngísí : « Mokonzi, yáká libosó ’te mwána ákáta motéma. »

4:50  Yézu alobí na yě : « Kendé, mwána wa yǒ azalí na bomoi ! » Andimí maloba ma Yézu mpé akeí.

4:51  Ntángo azalákí kozónga, basáleli ba yě bayéí kokútana na yě, bayébísí yě ’te mwána azalákí na bomoi.

4:52  Atúní bangó o ngonga níni mwána abandákí koyóka malámu. Balobí ná yě : « Lóbí, o ngonga ya libosó nsima ya midí, féfele etíkí yě. »

4:53  Tatá ayébí ’te ezalákí bobélé ngonga eye Yézu alobákí na yě : « Mwána wa yǒ azalí na bomoi. » Ayambí, yě na libótá lya yě mobimba.

4:54  Elémbo eye, ezalí lya mába­lé, Yézu asálí lyangó ntángo alo­ngwí o Yudéa mpé azóngí o Galiléa.

Chapter 5

5:1  Nsima yangó Yézu akeí o Yerúzalem mpô ya eyenga ya ba-Yúda.

5:2  O Yerúzalem, penepene na ‘Ezibeli ya mpatá’, mwâ etíma ezalákí na mbalasáni ítáno, eye bakotángaka o ebréi Betzata.

5:3  Bato ba bokono baíké bazalákí kolála o mbalasáni iye : bato ba lolandá, bato babúkáná makolo na baténgoli. Bazalákí kozila ’te mái máningana.

5:4  Mpámba té, ntángo esúsu ǎnzelú wa Nzámbe azalákí kokita o etíma mpé koningisa mái. Moto wa libosó akótí o mái ntángo mabandí koningana, abíkí, atâ azalákí na mpási níni.

5:5  Ezalákí wâná moto asílí abélí mibú ntúkú mísáto na mwambe.

5:6  Yézu amóní yě alálí wâná, ayébí ’te abélí út’o kala, atúní yě : « Olingí kobíka ? »

5:7  Moto wa bokono azóngísí : « Mokonzi, nazalí na moto té ábwáka ngáí o líziba ntángo mái mabandí koningana ; mpé sókó namekí kokende ngáí mǒkó, mosúsu asílí akótí libosó. »

5:8  Yézu alobí na yě : « Télémé, kamátá kitikwálá ya yǒ mpé támbólá. »

5:9  Na mbala yǒ kó abíkí, akamátí kitikwálá ya yě mpé akeí. Nzókandé mokolo wana ezalákí mokolo mwa sábato.

5:10  Yangó wâná ba-Yúda balobí na moto abíkí : « Leló mokolo mwa sábato, okokí komeme kiti­kwálá ya yǒ té. »

5:11  Azóngísí : « Moto óyo abíkísí ngáí alobákí : Kamátá kitikwálá ya yǒ mpé támbólá. »

5:12  Batúní yě : « Náni moto alobákí na yǒ : Kamátá kitikwálá ya yǒ mpé támbólá ? »

5:13  Kasi moto abíkí ayébí yě té, zambí Yézu amónóní lisúsu té, mpô bato balekí míngi o esíká êná.

5:14  Na nsima Yézu akútí yě o Témpelo, alobí na yě : « Sikáwa obíkí, ósála lisúsu masúmu té, mpô ’te likambo lilekí mabé líkwêla yǒ té. »

5:15  Moto ôná akeí koyébisa ba-Yúda ’te Yézu moto abíkísí yě.

5:16  Yangó wâná ba-Yúda bakómí kokánela Yézu, zambí asálí bôngó o mokolo mwa sábato.

5:17  Kasi Yézu alobí na bangó : « Tatá wa ngáí akosálaka mosálá téé leló ; ngáí mpé nazalí kosála mosá­lá. »

5:18  Mpô ya maloba mâná mpé ba-Yúda balukí nzelá ya koboma yě, zambi abúkí bobélé mobéko mwa sábato té, kasi atángí mpé Nzámbe ‘Tatá wa yě ’ mpenzá, lokóla ’te yě mǒkó akokání na Nzámbe.

5:19  Na nsima Yézu alobí lisúsu : « Ya sôló sôló, nalobí na bínó : Mwána yě mǒkó akokí kosála elóko té, akosálaka bobélé maye amóní Tatá azalí kosála. Mánso Tatá akosálaka, Mwána mpé akosálaka mangó.

5:20  Zambí Tatá alingí Mwána, mpé akolakisaka yě mánso yě mǒkó akosálaka. Akolakisa yě mpé misálá misúsu milekí misálá miye na bonéne. Bokokámwa na mya­ngó !

5:21  Lokóla Tatá akosékwisa bato bawéí mpé akozóngisela bangó bomoi, sé bôngó Mwána mpé akopésa bomoi na baye yě mǒkó alingí.

5:22  Tatá akokáta likambo lya moto mǒ­kó té ; apésí Mwána likokí lya kokáta makambo mánso,

5:23  mpô ’te bánso bákúmisa Mwána lokóla bakokúmisaka Tatá. Moto akokúmisa Mwána té, akokúmisa Tatá mpé té, óyo atíndí Mwána.

5:24  Ya sôló sôló, nalobí na bínó : Moto ayókí maloba ma ngáí, mpé ayambí óyo atíndí ngáí, azalí na bomoi bwa sékô. Bakokitisa yě o li­kambo té, zambí asílí abíkí o liwá, a­zwí bomoi.

5:25  Ya sôló sôló, nalobí na bínó : Ntá­ngo ekoyâ, mpé esílí ekokí, bato bawéí bakoyóka loláká la Mwána wa Nzámbe, mpé baye bakoyókemela langó bakozala na bomoi.

5:26  Lokóla Tatá azalí na bomoi bó­nso, asálí ’te Mwána mpé ázala na bomoi bónso.

5:27  Apésí Mwána mpé likokí lya kokáta makambo ma bato, zambí yě azalí Mwána wa Moto.

5:28  Bókámwa té, mokolo mǒkó bato bánso balálí o malíta bakoyóka loláká la yě

5:29  mpé bakobima. Baye basálákí malámu bakosékwa mpô ’te bázwa bomoi bwa sékô ; kasi baye basálákí mabé bakosékwa mpô ’te bákita o likambo.

5:30  Na ngúyá ya ngáí mǒkó nakokí kosála elóko té. Nakokáta makambo lokóla Nzámbe akoyébisa ngáí ; mpé nakokáta makambo sé na bosémbo, zambí nakolukaka mpô elingí ngáí mǒkó té, kasi sé mpô elingí óyo atí­ndí ngáí.

5:31  Sókó ngáí mǒkó nasakólí likambo litálí ngáí, maloba ma ngáí mazalí mpámba.

5:32  Kasi mosúsu akosakola mpô ya ngáí ; mpé nayébí ’te maye akolobaka mpô ya ngáí mazalí ma sôló.

5:33  Bínó botíndákí bato epái ya Yoáne, mpé Yoáne asakólákí mpô ya ngáí mambí ma sôló.

5:34  Nzókandé ngáí nasengélí na maloba ma moto té ; kasi nalobí bôngó bobélé mpô ya bolámu bwa bínó.

5:35  Yoáne azalákí mwínda mopelí mpé mongengí, mpé bondimákí kosepela mwâ ntángo eké na mwínda mwa yě.

5:36  Kasi eye ezalí kosengisa bato bá­ndima ngáí, leká maye Yoáne alobákí mpô ya ngáí, yangó ndé : misálá nakosálaka, miye Tatá apésí ngáí násála mpé násúkisa myangó, milakísí ’te Tatá moto atíndí ngáí.

5:37  Tatá óyo atíndí ngáí, yě méí akosakolaka mpô ya ngáí. Mokolo mǒkó té boyókí loláká la yě mpé bomóní elongi ya yě.

5:38  Bokobó­mbaka maloba ma yě té, zambí bobóyí koyamba óyo yě atíndí.

5:39  Bokoyékolaka Minka­ndá Misántu mpô bokanísí ’te bokozwa bôngó bomoi bwa sékô. Nzókandé minkandá miye mizalí koloba mpô ya ngáí.

5:40  Kasi bínó bobóyí koyâ epái ya ngáí mpô ya kozwa bomoi !

5:41  Nakolukaka lokúmu epái ya bato té,

5:42  kasi nayébí ’te bozalí na bolingi Nzámbe o mitéma té.

5:43  Nayéí o nkómbó ya Tatá wa ngáí, nzókandé bobóyí koyamba ngáí. Sókó moto mosúsu ayéí o nkómbó ya yě mǒkó, bokondima yě.

5:44  Bínó bato bolingí kozwa lokúmu epái ya báníngá, kasi lokúmu loye lokoútaka na Nzámbe sé mǒkó, bokolukaka langó té. Bô­ngó ndéngé níni bokokí koyamba ?

5:45  Bókanisa té ’te ngáí nakofúnda bínó epái ya Tatá. Moto akofúnda bínó, ndé Móze, óyo bínó botíí mitéma.

5:46  Sókó boyambákí Móze, mbele boyambí ngáí lokóla, zambí yě akomákí o Bikomá mpô ya ngáí.

5:47  Kasi áwa boyambí té maye akomákí, bóníbóní bokoyamba maloba ma ngáí ? »

Chapter 6

6:1  Na nsima Yézu akeí o ngámbo ya etíma ya Galiléa, eye bako­tá­ngaka mpé etíma ya Tibéria.

6:2  Bato ebelé balandí yě, zambí bamónókí makamwísi asálákí na bobíkisi bato ba bokono.

6:3  Yézu abutí ngómbá, afándí wâná na bayékoli ba yě.

6:4  Eyenga ya Pásiká ya ba-Yúda ekómí penepene.

6:5  Yézu átála boye, amóní bato ebelé bazalákí koyâ epái ya yě. Atúní Filípo : « Tokosómba mámpa wápi mpô ’te bato baye bálía ? »

6:6  Alobí bôngó mpô ya komeka yě motéma ; yě mǒkó asílí ayébí níni akosála.

6:7  Filípo azóngísélí yě : « Atâ tosómbí mámpa ma denário nkámá íbalé, makokoka té mpô ’te moto na moto ázwa mwâ ndámbo. »

6:8  Mǒ kó wa bayékoli, Andréa, ndeko wa Simóni Pétro, alobí :

6:9  « Mwána mobáli mǒkó azalí áwa na mámpa mátáno mpé na mbísi íbalé. Kasi yangó ndé ekokoka na bato ebelé boye ? »

6:10  Yézu alobí na bangó : « Bófándisa bato bánso. » O esíká êná matíti mazalákí míngi. Bato bafándí, babáli sókí nkóto ítáno.

6:11  Yézu akamátí mámpa, asámbélí losá­mbo la botóndi, akabélí bato bafá­ndí wâná mámpa ; apésí bangó mpé mbísi, baléi lokóla mitéma mya bangó milingí.

6:12  Awa bato baléí mpé batóndí, alobí na bayékoli : « Bólókoto mintíka, míbéba té. »

6:13  Balokótí byangó, batóndísí bikoló zómi na bíbalé na mintíka mya mámpa mátáno.

6:14  Emóní bato elémbo Yézu asálí, balobí : « Sôló, moto óyo azalí proféta óyo asengélí koyâ o mokili. »

6:15  Awa Yézu amóní ’te balingí kokamata yě na makási mpô ya kolubola yě mokonzi, akímí mpé akeí lisúsu o ngómbá yě mǒkó.

6:16  Awa butú bolingí bóínda, bayékoli bakeí penepene na etíma,

6:17  ba­kwélí o bwáto, bakátísí ngámbo ya etíma, epái ya Kafárnaum. Ntángo molílí mokómí tû, Yézu akómí naíno epái ya bangó té.

6:18  Mompepe mopepí makási, mái matombókí.

6:19  Basílí balúkí nkái kilométele sókí ítáno na ndá­mbo, ntángo bamóní Yézu azalákí kotámbola likoló lya mái, abelémí na bwáto ; babángí.

6:20  Kasi Yézu alobí na bangó : « Bóbánga té, ezalí ngáí. »

6:21  Balingí koya­mba yě o bwáto, kasi sé o ntángo êná bwáto bokómí o libóngo, esíká bazalákí kokende.

6:22  Mokolo mwa nsima, bato batíkálí o ngámbo ya étíma bamónókí ’te bwáto bozalákí sé bǒ kó, mpé Yézu akwélákí o bwáto bôná té, bayékoli bakendékí bangó mǒkó.

6:23  Nzókandé máto masúsu malo­ngwákí o Tibéria, masémí penepene na esíká balíákí mámpa.

6:24  Awa bato bamóní ’te Yézu azalákí wâná té, bayékoli ba yě mpé té, bakwélí o máto, bakeí koluka Yézu o Kafárnaum.

6:25  Bakútí yě o ngámbo, balobí na yě : « Motéyi, okómí áwa ntángo níni ? »

6:26  Yézu azóngísí : « Ya sôló sôló, nalobí na bínó : bozalí koluka ngáí ezalí té mpô ya bilembo bomónókí, kasi mpô bolíákí mámpa mpé botóndákí, kasi.

6:27  Bósála mosálá té mpô ya biléi bikobéba, kasi mpô ya biléi bikoúmela kín’o bomoi bwa lobíko. Mwána wa Moto akopésa biléi bîná, zambí Tatá Nzámbe alakísí polélé ’te atíndí yě. »

6:28  Bôngó batúní yě : « Tósála níni mpô tókokisa misálá miye Nzámbe alingí ? »

6:29  Yézu azóngísí : « Mosálá Nzámbe akolingaka, boyamba óyo yě atíndí. »

6:30  Balobí na yě : « Bôngó elembo níni okolakisa bísó mpô tóyamba yǒ ? Okokí kosála níni ?

6:31  Bankóko ba bísó balíákí manú o elíkí, lokóla ekomámí o Bikomá Bisántu : Apésí bangó mámpa maútí o liko­ló. »

6:32  Yézu azóngísí : « Ya sôló sôló, nalobí na bínó : mámpa maútí o likoló Móze té moto apésákí bínó mangó, kasi Tatá wa ngáí akopésa bínó mámpa ma sôló maútí o likoló ;

6:33  zambí mámpa Nzámbe akopésa mazalí maye maútí o likoló, mpé makopésaka bato ba nsé bomoi. »

6:34  Balobí na yě : « Mokonzi, pésá bísó mámpa mâná mikolo mínso. »

6:35  Yézu azóngísí : « Ngáí nazalí má­mpa makopésa bomoi. Moto ako­yâ epái ya ngáí akoyóka nzala lisúsu té ; moto akoyamba ngáí akoyóka lisúsu mpósá ya mái té.

6:36  Nasílí nalobí na bínó : Bomónókí ngáí, kasi boyambí ngáí té.

6:37  Bato bánso Tatá apésí ngáí bakoyâ epái ya ngáí ; baye bakoyâ epái ya ngáí, nakobwáka bangó o libándá té,

6:38  zambí naútí o likoló mpô ya kosála mpô elingí ngáí té, kasi bobélé mpô elingí óyo atíndí ngáí.

6:39  Oyo atíndí ngáí alingí boye : Wa baye yě apésí ngáí nábúngisa moto mǒkó té, kasi násékwisa yě o mokolo mwa nsúka.

6:40  Tatá wa ngáí alingí ’te baye bánso bamóní Mwána mpé bayambí yě, bázwa bomoi bwa sékô, mpé ngáí nakosékwisa bangó o mokolo mwa nsúka. »

6:41  Ba-Yúda babandí kolobaloba míngi mpô ya Yézu mpô alobákí : « Ngáí nazalí mámpa maútí o likoló. »

6:42  Balobí : « Yě Yézu, mwána wa Yozéfu té ? Toyébí tatá na mamá wa yě. Bóníbóní akokí koloba : Ngáí naútí o likoló ? »

6:43  Yézu ayanólí bangó : « Bótíka kolobaloba.

6:44  Moto mǒkó akokí koyâ epái ya ngáí té sókó Tatá óyo atíndí ngáí, abéndí yě té ; mpé ngáí nakosékwisa yě o mokolo mwa nsúka.

6:45  Baproféta bakomáká ’te : Nzámbe akotéya bato bánso. Moto nyónso akoyóka matéya ma Nzámbe mpé akondima mangó, akoyâ epái ya ngáí.

6:46  Yangó elakísí té ’te moto mǒkó amóní Tatá ; bobélé óyo aútí epái ya Nzámbe, amóní Tatá.

6:47  Ya sôló sôló, nalobí na bínó : Moto ayambí, azalí na bomoi bwa sékô.

6:48  Ngáí nazalí mámpa ma bomoi.

6:49  Bankóko ba bínó balíákí manú o elíkí, nzókandé bawákí.

6:50  Kasi má­mpa maye maútí o likoló mpô ’te moto alía mangó mpe ákúfa té.

6:51  Ngáí nazalí mámpa ma bomoi maútí o likoló. Moto akolía mámpa maye, akozala na bomoi bwa sékô. Má­mpa ngáí nakopésa mazalí nsuni ya ngáí ; nakopésa mangó mpô ’te bato bázwa bomoi. »

6:52  Kasi ba-Yúda bawélání ntembe makási, balobí : « Bóníbóní moto óyo akokí kopésa bísó nsuni ya yě tólía yangó ? »

6:53  Yézu azóngísélí bangó : « Ya sôló sôló, nalobí na bínó : Sókó bokolía nsuni ya Mwána wa Moto té, mpé bokomele makilá ma yě té, bokozala na bomoi té.

6:54  Oyo akolía nsuni ya ngáí mpé akomele makilá ma ngáí, azalí na bomoi bwa sékô, mpé nakosékwisa yě o mokolo mwa nsúka.

6:55  Zambí nsuni ya ngáí ezalí biléi bya sôló, mpé makilá ma ngáí mazalí limelí lya sôló.

6:56  Moto akolía nsuni ya ngáí mpé akomele makilá ma ngáí, bísó na yě tokokóma sé moto mǒkó.

6:57  Tatá atíndí ngáí azalí na bomoi, nazalí na bomoi mpô ya Tatá. Bobélé bôngó, moto akolía ngáí, yě mpé akozala na bomoi mpô ya ngáí.

6:58  Mámpa maútí o likoló mangó maye, makeséní na mámpa bankóko balíá. Bangó bánso bakúfá. Kasi moto akolía mámpa maye akozala na bomoi sékô. »

6:59  Yézu atéyákí matéya mâná o sinagóga ya Kafárnaum.

6:60  Awa bayókí yangó, bayékoli mí­ngi balobí : « Maloba mâná mazalí makási ! Náni akokí kondima mangó ? »

6:61  Kasi Yézu, áwa ayébí ’te bayékoli bazalákí kolobaloba mpô ya likambo liye, atúní bangó : « Boyókí mabé mpô ya yangó ?

6:62  Bôngó sókó bokomóno Mwána wa Moto akobuta o esíká azalákí libosó, bokokanisa níni ?

6:63  Elímo moto akopésaka bomoi, nsuni ezalí na ntína yǒ­kó té. Maloba nayébísí bínó mazalí maloba ma elímo mpé ma bomoi.

6:64  Kasi o ntéi ya bínó basúsu bazalí koyamba té. » Yézu ayébákí út’o ebandela banáni bakoyamba té, mpé náni akokaba yě.

6:65  Abakísí naíno : « Yangó wâná nayébísí bínó ’te moto mǒkó akokí koyâ epái ya ngáí té, sókó Tatá asálísí yě té. »

6:66  Bandá mokolo môná bayékoli baíké bamíbéndí, mpé balandí yě lisúsu té.

6:67  Na nsima Yézu atúní ba-zómi na bábalé : « Bínó mpé bolingí kokende ? »

6:68  Simóni Pétro azóngísí : « Mokonzi, tokokende epái ya náni ? Yǒ moto ozalí na maloba makopésa bomoi bwa sékô.

6:69  Bísó toyambí mpé toyébí ’te ozalí Mosántu wa Nzámbe. »

6:70  Yézu alobí : « Ngáí moto naponókí bínó zómi na bábalé té ? Nzókandé mǒkó o ntéi ya bínó azalí zábolo. »

6:71  Alobí bôngó mpô ya Yudási, mwána wa Simóni Iskarióte, zambí Yudási óyo akokaba Yézu, azalákí mǒkó wa ba-zómi na bábalé.

Chapter 7

7:1  Nsima ya yangó Yézu atámbólí o Galiléa ; alingí kotá­mbola lisúsu o Yudéa té, zambí ba-Yúda bazalákí koluka koboma yě.

7:2  Eyenga ya ba-Yúda, eye bako­bé­ngaka eyenga ya Miláko ekómí pene­pene.

7:3  Bandeko ba yě balobí na yě : « Longwá áwa, kendé o Yudéa, mpô bayékoli ba yǒ mpe bámóno misálá okosálaka.

7:4  Sókó moto alingí ’te báyéba yě, akobómbama té. Awa yǒ ozalí kosála misálá minéne, sálá míangó o míso ma bato. »

7:5  Atâ bandeko ba yě mǒkó bayambí yě té.

7:6  Yézu alobí na bangó : « Elaká ya ngáí ya kokende ekokí naíno té ; kasi elaká ya bínó ekobongelaka bínó ntángo ínso.

7:7  Bato ba nsé bakokí koyina bínó té, kasi bayiní ngáí zambí nalakísí bangó ’te bakosálaka mabé.

7:8  Bínó bókende o eyenga, kasi ngáí nakokende o eyenga êná té, zambí elaká ya ngáí ekokí naíno té. »

7:9  Elobí yě bôngó, atíkálí o Galiléa.

7:10  Ntángo bandeko ba yě basílí kokende o eyenga, yě mpé akeí, kasi na bonkútú, amílakísí té.

7:11  Ba-Yúda bazalákí koluka yě o mikolo mya eyenga, batúní : « Azalí wápi ? »

7:12  Bipái bínso bazalákí kolobaloba mpô ya yě. Basúsu balobí ’te : « Azalí moto malámu », basúsu balobí : « Té, azalí kokósa bato. »

7:13  Nzókandé moto mǒkó té azalákí koloba polélé, zambí bazalákí kobánga ba-Yúda.

7:14  O káti ya mikolo mya eyenga Yézu akeí o Témpelo mpé abandí kotéya.

7:15  Ba-Yúda bakámwí mpe­nzá, balobí : « Yě ayékólá té, bôngó ndéngé níni ayébí minkandá ? »

7:16  Yézu azóngísí : « Matéya nakotéyaka mazalí ma ngáí té, kasi ma óyo atíndí ngáí.

7:17  Moto alingí kosála maye Nzámbe alingí, akoyéba sókó matéya ma ngáí maútí na Nzámbe tǒ na ngáí mǒkó.

7:18  Moto akoloba na ntína na yě mǒkó, akoluka sé lokúmu la yě mǒkó ; kasi moto akoluka lokúmu la óyo atíndí yě, azalí na mayéle mabé té mpé akoloba mambí ma sôló.

7:19  Móze apésí bínó Mobéko té ? Kasi mǒkó wa bínó té azalí kotósa mwangó ! Mpô níni bolingí koboma ngáí ? »

7:20  Bato bazóngísí : « Ozalí na zábolo. Náni alingí koboma yǒ ? »

7:21  Yézu azóngísélí bangó : « Nasálákí sé likamwísi lyǒ­kó, mpé bínó bánso bokámwí !

7:22  Móze apésí bínó mobéko mwa bokátisi nzóto (mobéko moye moútí na Móze té, kasi na bankóko), mpé bokokátisaka moto nzóto o mokolo mwa sábato.

7:23  Bôngó, sókó bokokí kokátisa moto nzóto o mokolo mwa sábato mpô ’te bóbúka mobéko mwa Móze té, ndéngé níni bozalí koyóka mabé áwa nabíkísí moto mobimba o mokolo mwa sábato ?

7:24  Bótíka kokáta makambo sé lokóla bozalí komóno na míso ; bókáta mangó na bosémbo. »

7:25  Bato basúsu ba Yerúzalem balobí : « Moto balingí koboma, yě óyo té ?

7:26  Mpé tálá, azalí kotéya o míso ma bato bánso mpé bazalí koloba na yě elóko té ! Bôngó bakonzi bandimí sôló ’te azalí Mesíya ?

7:27  Mokolo Krístu akoyâ, moto mǒ­kó té akoyéba esíká akoúta, nzókandé toyébí malámu esíká moto óyo aútí. »

7:28  Ntángo Yézu azalákí kotéya o Témpelo, alobí na mongóngó makási : « Boyébí ngáí mpé boyébí esíká naútí ; nzókandé ngáí nayéí na ngúyá ya ngáí mǒkó té. Kasi óyo azalí na bosôló, yě moto atíndí ngáí ; bínó boyébí yě té.

7:29  Ngáí nayébí yě, zambí naútí epái ya yě, mpé yě moto atíndí ngáí. »

7:30  Balingí kokanga yě, kasi moto mǒkó aka­ngí yě té, zambí elaká ya yě ekokákí naíno té.

7:31  O ntéi ya bangó bato baíké bayambí yě, balobí : « Mokolo Krístu akoyâ, akokí ndé koleka moto óyo na bosáli makamwísi ? »

7:32  Ba-Farizéo bayókí makambo bato bazalákí koloba mpô ya Yézu, batíndí bakéngeli bákanga yě.

7:33  Yézu alobí : « Nakozala na bínó lisúsu mikolo míngi té, nakozónga epái ya óyo atíndí ngáí.

7:34  Bokoluka ngáí, kasi bokomóno ngáí té : esíká ngáí nakokende, bínó bokokí kokóma té. »

7:35  Ba-Yúda balobání : « Tómóno yě lisúsu té, bôngó alingí kokende wápi ? Akokende ndé epái ya ba-Yúda bapalángání o káti ya ba-Gréki ? Mbele akokende kotéya ba-Gréki ?

7:36  Na maloba mâná alingí koloba níni : ‘Bokoluka ngáí, kasi bokomóno ngáí té ; esíká ngáí nakokende, bínó bokokí kokóma té’ ? »

7:37  Mokolo mwa nsúka mwa eyenga, mokolo monéne, Yézu atélémí mpé agángí : « Sókó moto ayókí mpósá ya mái, áyâ epái ya ngáí, mpé moto ayambí ngáí ámele.

7:38  Ekomámí bôngó o Minkandá Misántu : Moto ayambí ngáí, mái ma bomoi makobima yě lokóla ebale. »

7:39  Alobí mpô ya Elímo óyo akokitela bato bakoyamba yě. Téé sikáwa Elímo ayéí naíno té, zambí Yézu akómí naíno na nkémbo ya yě té.

7:40  O ntéi ya baye bayókákí maloba mâná bato baíké balobí : « Azalí proféta sôló ! »

7:41  Basúsu balobí : « Azalí Krístu ! » Kasi basúsu balobí : « Krístu akoúta ndé o Galiléa ?

7:42  O Bikomá Bisántu ekomámí té ’te Krístu akozala mwána wa Davídi, akoúta o Beteléme, mbóka Davídi azalákí. »

7:43  Bô­ngó bato bakabwání mpô ya yě.

7:44  Basúsu balingí kokanga yě, kasi moto mǒkó akangí yě té.

7:45  Bakéngeli bazóngí epái ya banganga bakonzi mpe na ba-Farizéo. Bangó batúní : « Mpô níni boyéí na yě té ? »

7:46  Bakéngeli bazóngísí : « Mokolo mǒ­kó té moto alobákí lokóla moto óyo ! »

7:47  Ba-Farizéo batúní bangó : « Bôngó bínó mpé bomítíkí mpô ákósa bínó ?

7:48  Mǒ kó wa ba­nkúmú tǒ wa ba-Farizéo ayambí ndé yě ?

7:49  Kasi bato baké, baye bayébí Mobéko té, batómbélí bangó bobé ! »

7:50  Kasi mǒkó wa bangó, Nikodémo, óyo ayákí epái ya Yézu na butú, alobí na bangó :

7:51  « Mobéko mwa bísó mokokitisa moto mǒkó té sókó libosó batúní yě té, mpô báyéba maye asálákí. »

7:52  Bazóngísélí yě : « Bôngó yó mpé ozalí moto wa Galiléa ? Tángá Minkandá malámu ! Okomóno ’te proféta akoúta o Galiléa té. »

7:53  Na nsima bazóngí, moto na moto o ndáko ya yě.

Chapter 8

8:1  Yézu akeí o ngómbá ya Olíva.

8:2  Kasi na ntá ntóngó azóngí o Té­mpelo ; bato ebelé bazíngí yě. Afándí mpé abandí kotéya bangó.

8:3  Batéyi ba Mobéko na ba-Farizéo bayéí na mwásí mǒkó bakangákí na mobáli mosúsu. Batélémísí yě o káti ya bangó.

8:4  Balobí na Yézu : « Motéyi, bakangí mwásí óyo na mobáli mosúsu.

8:5  O búku ya Mobéko Móze atí­ndí bísó tóboma na mabángá básí ba ndenge óyo. Yǒ olobí níni ? »

8:6  Balobí bôngó mpô ya ko­tíela yě motámbo, bázwa ntína ya kofúnda yě. Kasi Yézu asunámí, abandí kokoma na mosapi o mabelé.

8:7  Awa baléndísí kotúna yě, atálí bangó mpé alobí : « Oyo o ntéi ya bínó azalí na lisúmu té, ábwá­kela yě libángá lya libosó ! »

8:8  Asunámí lisúsu mpé akomí lisúsu o mabelé.

8:9  Eyókí bangó bôngó, balongwí mǒkó mǒkó, bakóló libosó. Yézu atíkálí yě mǒkó ná mwásí atélémí sé wâná.

8:10  Sikáwa Yézu atálí yě mpé alobí : « Mwasi, wápi bangó ? Moto mǒkó akitísí yǒ té ? »

8:11  Azóngísí : « Moto mǒkó té, mokonzi. » Bôngó Yézu alobí na yě : « Ngáí mpé nakokitisa yǒ té. Kendé, banda sik’óyo ósála masúmu lisúsu té. »

8:12  Yézu alobí na bangó lisúsu : « Ngáí nazalí mwínda mwa nsé. Moto akolanda ngáí, akotámbola o molílí té, kasi akozala na mwínda mokopésa bomoi. »

8:13  Ba-Farizéo balobí na yě : « Ozalí koloba mpô ya yǒ mǒkó, maloba ma yǒ mazalí mpámba. »

8:14  Yézu ayanólí bangó : « Atâ nazalí koloba mpô ya ngáí mǒkó, maloba ma ngáí mazalí sé maloba ma bosôló, zambí nayébí epái naútí mpé epái nakokende. Kasi bínó boyébí té epái naútí mpé epái nakokende.

8:15  Bínó bokokátaka makambo sé na mayéle ma bato ; ngáí nakosá­mbisa moto mǒkó té.

8:16  Sókó nakokáta likambo lya moto, nakokáta lyangó na bosémbo, zambí nazalí sé ngáí mǒ­kó té ; tozalí bísó bábalé : ná ngáí, ná óyo atíndí ngáí.

8:17  O mobéko mwa bínó ekomámí ’te sókó bato bábalé bazalí koloba sé ndéngé yǒ kó, maloba ma bangó makondimama.

8:18  Ngáí mǒkó nakosakola mpô ya ngáí ; kasi Tatá óyo atíndí ngáí, yě mpé akosakola mpô ya ngáí. »

8:19  Batúní yě : « Tatá wa yǒ azalí wápi ? » Yézu azóngísí : « Boyébí ngáí té, boyébí mpé Tatá wa ngáí té. Sókó boyébákí ngáí, mbele boyébákí mpé Tatá wa ngáí. »

8:20  Yézu alobákí maloba mâná ntángo aza­lákí kotéya o Té­mpelo o esíká ba­kobómbaka makabo. Moto mǒkó aka­ngí yě té, zambí elaká ya yě ekokákí naíno té.

8:21  Yézu alobí na bangó lisúsu : « Nakokende mpé bokoluka ngáí, kasi bokokúfa na masúmu ma bínó. Esíká nakokende, bínó bokokí kokóma té. »

8:22  Ba-Yúda balobání : « Alingí ndé komíboma, mpô azalí koloba ’te ‘Esíká nakokende, bínó bokokí kokóma té’ ? »

8:23  Yézu azóngísélí bangó : « Bínó boútí bobélé o nsé ; ngáí naútí o likoló. Bínó bozalí bato ba nsé eye ; ngáí nazalí moto wa nsé eye té.

8:24  Yangó wâná nalobákí na bínó ’te bokokúfa na masúmu ma bínó. Sókó boyambí té ’te Ngáí Nazalí, bokokúfa na masúmu ma bínó. »

8:25  Bôngó balobí na yě : « Yǒ náni ? » Yézu alobí na bangó : « Nazalí sé óyo nalobákí na bínó út’o ebandela.

8:26  Nazalí na makambo míngi ma koloba matálí bínó, maye makosámbisa bínó. Oyo atíndí ngáí akolobaka mambí ma sôló, mpé ngáí nakoloba na bato bobélé mambí nayókí epái ya yě. »

8:27  Bangó bayébí té ’te azalí koloba na bangó mpô ya Tatá.

8:28  Bôngó Yézu alobí na bangó : « Mokolo boko­tó­mbola Mwána wa Moto, bokoyéba ’te Ngáí Nazalí. Bokoyéba mpé ’te nakosála elóko yǒ kó té na ngúyá ya ngáí mǒkó, kasi nakoloba bobélé maloba Tatá alakísí ngáí.

8:29  Oyo atíndí ngáí azalí na ngáí, atíkí ngáí mǒkó té, zambí nakosálaka ntángo ínso maye makosepelisa yě. »

8:30  Awa alobí bôngó, bato míngi ba­ndimí yě.

8:31  Yézu alobí na ba-Yúda baye bayambí yě : « Sókó botósí maloba ma ngáí, bozalí sôló bayékoli ba ngáí,

8:32  bôngó bokoyéba bosôló, mpé bo­sôló bokopésa bínó bonsómí. »

8:33  Bazóngísélí yě : « Tozalí bato ba libótá lya Abaráma, mokolo mǒkó té tozalákí baómbo ba moto. Bóníbóní okokí koloba : bokozala ba­nsómí ? »

8:34  Yézu azóngísélí bangó : « Ya sôló sôló, nayébísí bínó : Moto nyó­nso akosála lisúmu, azalí moómbo wa lisúmu.

8:35  Moómbo akotíkala sékô moto wa libótá té, kasi mwána azalí moto wa libótá sékô.

8:36  Bôngó sókó Mwána asikólí bínó, bokozala na bonsómí sôló.

8:37  Nayébí ’te bozalí bato ba libótá lya Abaráma ; kasi bolingí koboma ngáí, zambí bondimí maloba ma ngáí té.

8:38  Ngáí nakolobaka maye namónókí epái ya Tatá wa ngáí, kasi bínó bokosálaka maye bomónókí epái ya tatá mobóti wa bínó. »

8:39  Bazóngísélí yě : « Abaráma azalí tatá wa bísó. » Yézu alobí na bangó : « Sókó bozalí bána ba Abaráma, bósála lokóla yě asálákí.

8:40  Kasi áwa nalobí na bínó mambí ma bosôló, maye nayókákí epái ya Nzámbe, bolingí koboma ngáí ! Abaráma asálákí bôngó té !

8:41  Bínó bokosálaka misálá miye tatá wa bínó asáláká. » Balobí na yě : « Bísó tozalí bána ba bokáli té, tozalí sé na tatá mǒkó, Nzámbe. »

8:42  Yézu alobí na bangó : « Sókó Nzámbe azalákí tatá wa bínó sôló, mbele bolingákí ngáí, zambí naútí na Nzámbe, mpé nayéí áwa o nkómbó ya yě. Nayákí o nkómbó ya ngáí mǒ­kó té, kasi yě moto atíndí ngáí.

8:43  Mpô níni botongólí ntína ya maloba ma ngáí té ? Mpô bokokí kondima matéya ma ngáí té.

8:44  Bozalí bána ba tatá wa bínó zábolo, mpé bolingí kosála maye tatá wa bínó akolingaka. Ut’o ebandela yě azalí mobomi, akondimaka bosôló té ; mambí ma bosôló mazalí na yě té. Awa akobúkaka lokutá, akolobaka maye maútí o motéma mwa yě, zambí azalí mokósi mpé akobimisaka sé mambí ma lokutá.

8:45  Kasi ngáí nakolobaka mambí ma bosôló, yangó wâná boyambí ngáí té.

8:46  Nání o ntéi ya bínó akokí kotángela ngáí lisúmu nasálí ? Sókó nalobí mambí ma bosôló, mpô níni boya­mbí ngáí té.

8:47  Moto wa Nzámbe akoyókaka maloba ma Nzámbe. Kasi bínó bokoyókaka té, zambí bozalí bato ba Nzámbe té. »

8:48  Ba-Yúda bazóngísélí yě : « Tolobí ya sôló té ’te ozalí mo-Samaría mpé ozalí na zábolo ? »

8:49  Yézu azóngísí : « Ngáí nazalí na zábolo té, nakokúmisaka tatá wa ngáí, kasi bínó bolukí kosámbwisa ngáí.

8:50  Nakolukaka lokúmu la ngáí té. Mosúsu akolukaka langó, yě ndé akokáta makambo.

8:51  Ya sôló sôló, nalobí na bínó : Moto akotósaka maloba ma ngáí, akokúfa sókí té. »

8:52  Ba-Yúda balobí : « Sikáwa toyébí sôló ’te ozalí na zábolo. Abaráma akúfá, baproféta mpé bakúfá, mpé yǒ olobí : ‘Moto akotósaka maloba ma ngáí, akokúfa sókí té’.

8:53  Olekí ndé tatá wa bísó Abaráma óyo akúfá ? Baproféta bakúfá lokóla. Okanísí ’te yǒ ndé náni ? »

8:54  Yézu azóngísí : « Sókó namíkúmísí, lokúmu la ngáí lozalí mpámba ; kasi moto akokúmisaka ngáí, yě ndé Tatá wa ngáí, óyo bínó bokolobaka ’te ‘Azalí Nzámbe wa bísó’ ;

8:55  bínó boyébí yě té, kasi ngáí nayébí yě. Sókó nalobákí ’te nayébí yě té, mbele nazalákí moto wa lokutá lokóla bínó. Kasi nayébí yě mpé nakotósaka maloba ma yě.

8:56  Tatá wa bínó Abaráma asepélákí míngi áwa akanísákí ’te akomóno boyéi bwa ngáí : amónókí bwa­ngo mpé asepélákí míngi. »

8:57  Bôngó ba-Yúda balobí na yě : « Naíno okokísí mibú ntúkú ítáno té, mpé olobí ’te omóní Abaráma ! »

8:58  Yézu alobí : « Ya sôló sôló, nalobí na bínó : libosó ’te Abaráma ábótama, Ngáí Nazalí. »

8:59  Ba-Yúda balokótí mabángá mpô ’te bábwákela yě ; kasi Yézu amíbó­mbí mpé abimí o Témpelo.

Chapter 9

9:1  Ntángo azali koléka, Yézu amóní moto mǒkó abótámá na lolandá.

9:2  Bayékoli batúní yě : « Motéyi, nání asálákí lisúmu, yě tǒ babóti ba yěmpô moto óyo abótáma na lolandá ? »

9:3  Yézu ayanólí : « Yě asálí lisúmu té, babóti ba yě mpé té, kasi abótámí bôngó mpô ’te misálá mya Nzámbe mímónono o nzóto ya yě.

9:4  Awa mói mozalí naíno, nasengélí kosála mambí ma óyo atíndí ngáí. Ekómí butú, moto mǒkó akokoka kosála mosálá té.

9:5  Ntángo nazalí áwa o nsé, nazalí mwínda mwa bato. »

9:6  Elobí yě bôngó, abwákí nsóí o mabelé, asálí na yangó potopóto mpé apakólí yangó o míso ma moto ôná.

9:7  Alobí na yě : « Kendé komísukola o líziba lya Silowé (lokóla ’te ‘Motí­ndami’). » Moto wa lola­ndá akeí mpé amísukólí. Ntángo azóngí, akómí komóno malámu.

9:8  Baye bayébí yě mpé baye bamónókí yě libosó ntángo azalákí kosénge bato makabo, balobí : « Moto azalákí kofánda áwa mpô ya kosé­nge bato makabo, yě té ? »

9:9  Basúsu balobí : « Ezalí yě. » Basúsu balobí : « Ezalí yě té, kasi aúlání na yě. » Yě mǒ­kó alobí : « Ezalí ngáí. »

9:10  Bôngó batúní yě : « Bóníbóní míso ma yǒ mafu­ngwámí ? »

9:11  Ayanólí : « Oyo ba­kobénga­ka Yézu asálí potopóto, apakólí yangó o míso ma ngáí mpé alobí : ‘Kendé komísukola o Silowe’. Bôngó nakendékí, namísukólí mpé nakómí komóno. »

9:12  Batúní yě : « Azalí wápi ? » Azó­ngísí : « Nayébí té. »

9:13  Bamemí moto azalákí na lola­ndá epái ya ba-Farizéo.

9:14  Kasi mokolo Yézu asálákí potopóto mpé afu­ngólákí yě míso, ezalákí mokolo mwa sábato.

9:15  Ba-Farizéo mpé batúní yě bóníbóní akómí komóno sikáwa. Alobí na bangó : « Atíí ngáí potopóto o míso, namísukólí mpé nakómí komóno. »

9:16  Ba-Farizéo basúsu balobí : « Moto óyo aútí na Nzámbe té, zambí atósí mobéko mwa sábato té. » Basúsu balobí : « Bóníbóní moto wa masúmu akokí kosála bilembo biye ? » Bayókání té.

9:17  Batúní lisúsu moto wa lolandá, balobí : « Yǒ olobí níni mpô ya moto a­fungólí yǒ míso ? » Ayanólí : « Azalí proféta. »

9:18  Ba-Yúda bandimí té ’te abótámákí na lolandá mpe akomi komono lisusu libosó ’te bábênga babóti ba moto óyo akómí komóno sikáwa.

9:19  Batúní bangó : « Oyo ndé mwá­na wa bínó, bokolobaka ’te abótámá na lolandá ? Bóníbóní akómí komóno sikáwa ? »

9:20  Babóti bazóngísí : « Toyébí ’te óyo azalí mwána wa bísó óyo abótámá na lolandá.

9:21  Kasi toyébí té bóníbóní akómí komóno sikáwa, toyébí mpé té sókó náni afungólí yě míso. Bótúna yě mǒkó, azalí mokóló, yě mǒkó álimbola. »

9:22  Babóti balobí bôngó mpô babángí ba-Yúda, zambí ba-Yúda bayókání ’te, sókó moto andi­mí ’te Yézu azalí Krístu, bakobengana yě o sinagóga.

9:23  Yangó wâná babóti balobí : « Azalí mokóló, bótúna yě mǒkó. »

9:24  Ba-Yúda babéngí lisúsu moto azalákí na lolandá, balobí na yě : « Kémbísá Nzámbe. Bísó toyébí ’te moto ôná azalí mosúmuki. »

9:25  Ayanólí : « Nayébí té sókó azalí mosúmuki, ngáí nayébí sé mpô yǒ­kó : nazalákí na lolandá, sikáwa nazalí komóno. »

9:26  Sikáwa batúní yě : « Asálí yǒ níni ? Bóníbóní afungólí yǒ míso ? »

9:27  Ayanólí bangó : « Nasílí nayébísí bínó, kasi bo­ndimí té. Mpô níni bolingí koyóka yangó lisúsu ? Bínó mpé bolingí ndé kokóma bayékoli ba yě ? »

9:28  Bafíngí yě, balobí : « Yó moto ozalí moyékoli wa yě, bísó tozalí bayékoli ba Móze.

9:29  Toyébí ’te Nzámbe alobákí na Móze. Bísó toyébí té epái wápi yě aútí. »

9:30  Moto ôná ayanólí bangó : « Tálá likambo lya kokámwa sôló : afungólí ngáí míso, mpé boyébí esíká aútí té !

9:31  Toyébí ’te Nzámbe akondimelaka basúmuki té, kasi sókó moto akomemyaka Yě mpé akosálaka maye Yě alingí, akondimela yě.

9:32  Mokolo mǒ­kó té toyókí ’te moto mǒkó afungólí míso ma moto abótámá na lolandá.

9:33  Sókó moto ôná aútí na Nzámbe té, mbele akokákí kosála elóko té. »

9:34  Bayanólí yě : « Ut’o mbótama ya yó otóndí na masúmu, mpé olingí kotéya bísó ? » Na nsima babwákí yě o libándá.

9:35  Yézu ayókí ’te babwákí yě o libándá. Ntángo akútání na yě, atúní yě : « Oyambí Mwána wa Moto ? »

9:36  Azóngísí : « Mokonzi, yébísá ngáí sókó yě náni, bôngó náyamba yě. »

9:37  Yézu alobí : « Ozalí komóno yě, ezalí óyo azalí koloba na yǒ ! »

9:38  Yě azóngísí : « Mokonzi, nayambí », mpé agúmbámélí yě.

9:39  Yézu alobí lisúsu : « Nayéí áwa o nsé kosámbisa bato mpô ’te bato ba lolandá bámóno, mpé baye bazalí komóno bámóno lisúsu té. »

9:40  Ba-Farizéo baye batélémí pene na yě bayókí maloba mâná, batúní yě : « Bôngó bísó mpé tozalí na lolandá ? »

9:41  Yézu azóngísí : « Sókó bokúfákí míso, mbele bozalákí na lisúmu té ; kasi áwa bolobí ’te bozalí komóno, bokotíkala na masúmu ma bínó. »

Chapter 10

10:1  « Ya sôló sôló, nalobí na bínó : moto akótí o lopángo la mpatá epái ya ezibeli ya lopángo té, kasi ayíngélí epái esúsu, azalí moyíbi mpé mobébisi.

10:2  Kasi sókó akótí epái ya ezibeli ya lopángo, azalí mokéngeli wa mpatá.

10:3  Sínzílí akofungolela yě ezibeli, mpé mpatá iko­yóka mongó­ngó mwa yě. Akobénga mpatá ya yě yǒ kó yǒ kó na nkómbó ya yangó, mpé akokamba yangó o libándá.

10:4  Ntángo abimísí bibwélé bya yě bí­nso, akokende libosó mpé mpatá ikolanda yě, zambí iyébí mongóngó mwa yě.

10:5  Mpatá ikolanda mompaya té, kútu ikokíma yě, zambí iyébí mongóngó mwa yě té. »

10:6  Yézu alobí na bangó moúlání moye, kasi bayókí ntína té ya maye alingí koloba na bangó.

10:7  Yangó wâná Yézu alobí lisúsu : « Ya sôló sôló, nalobí na bínó : ngáí nazalí ezibeli ya lopángo la mpatá.

10:8  Baye bánso bayákí libosó lya ngáí bazalí bayíbi na babébisi, kasi mpatá iyókákí bangó té.

10:9  Ngáí nazalí ezibeli ya lopángo. Moto akokóto epái ya ngáí, akobíka : akoyíngela mpé akobima, akozwa esíká ya matíti ya kolia.

10:10  Moyíbi ako­yâ bobélé koyíba, koboma mpé kobébisa. Ngáí nayéí mpô ’te mpatá ízwa bomoi, ízwa bwangó míngi.

10:11  Ngáí nazalí mokéngeli malámu. Mokéngeli malámu wa mpatá akokaba bomoi bwa yě mpô ya kobíkisa mpatá ya yě.

10:12  Moto akosálaka mpô ya mosolo, óyo azalí mokéngeli wa sôló té, nkóló wa mpatá mpé té, akotíka mpatá mpé akokíma sókó amóní nkoi ezalí koyâ ; nkoi ekokanga mpé ekopanza etó­nga.

10:13  Mpámba té, yě akosálaka sé mpô ya mosolo, akopa­nganaka na mpatá té.

10:14  Ngáí nazalí mokéngeli malámu ; nayébí mpatá ya ngáí, mpé mpatá iyébí ngáí,

10:15  sé lokóla Tatá ayébí ngáí mpé ngáí nayébí Tatá. Nakokaba bomoi bwa ngáí mpô ya mpatá ya ngáí.

10:16  Nazalí naíno na mpatá isúsu izalí o lopango loye té. Nasengélí kokamba yangó lokóla ; ikoyóka monoko mwa ngáí. Bôngó ekokóma etó­nga yǒ kó na mokéngeli sé mǒkó.

10:17  Tatá alingí ngáí, zambí nakokaba bomoi bwa ngáí mpô ’te názwa bwangó lisúsu.

10:18  Moto mǒ­kó té akobótolo ngáí bomoi, ngáí mǒkó nakokaba bwangó. Nazalí na likokí lya kokaba bomoi bwa ngáí mpé lya kozwa bwangó lisúsu : Tatá wa ngáí atíndí ngáí násála bôngó. »

10:19  Ba-Yúda bakabwání lisúsu mpô ya maloba mâná.

10:20  Baíké o káti ya bangó balobí : « Akangémí na zábolo ; azalí na ligbómá ; mpô níni bozalí koyóka yě ? »

10:21  Basúsu balobí : « Moto akangémí na zábolo akolobaka bô­ngó té. Zábolo akokí ndé kofungola míso ma moto wa lola­ndá ? »

10:22  O Yerúzalem bazalákí kosepela eyenga ya bobenisi Témpelo : ezalákí o eleko ya mpío.

10:23  Yézu atá­mbólí o mbalasáni ya Salomó o Témpelo.

10:24  Ba-Yúda bazíngí yě mpé batúní yě : « Mikolo bóní naíno okotíka bísó bobélé na ntembe ? Sókó ozalí Krístu, yébísá bísó polélé. »

10:25  Yézu ayanólí bangó : « Nasílí nayébísí bínó, kasi boyambí té. Misálá nakosálaka o nkó­mbó ya Tatá wa ngáí mizalí kolakisa ngáí polélé.

10:26  Kasi boyambí té, mpô bozalí mpatá ya ngáí té.

10:27  Mpatá ya ngáí ikoyókaka monoko mwa ngáí ; nayébí yangó mpé ikolandaka ngáí.

10:28  Nakopésa yangó bomoi bwa sé­kô ; ikokúfa sókí té ; moto mǒkó akobótolo yangó o mabóko ma ngáí té.

10:29  Tatá óyo apésí ngáí yangó, alekí bánso ; moto mǒkó té akokí kobótolo elóko o mabóko ma Tatá.

10:30  Bísó na Tatá tozalí sé moto mǒ­kó. »

10:31  Ba-Yúda balokótí lisúsu mabángá mpô ya koboma yě.

10:32  Kasi Yézu alobí na bangó : « Nalakísí bínó misálá malámu míngi, miye nasálí na ngúyá ya Tatá. Mpô ya mosálá níni bolingí koboma ngáí na mabángá ? »

10:33  Ba-Yúda bazóngísélí yě : « Tokoboma yǒ té mpô ya mosálá malámu osálí, kasi mpô otúkí Nzámbe. Yó ozalí bobélé moto, mpé olobí ’te ozalí Nzámbe. »

10:34  Yézu azóngísélí bangó : « O Mobéko mwa bínó ekomámí té ’te : Nalobákí : bozalí banzámbe ?

10:35  Bakokí kobóya Minkandá Misántu té. Bôngó sókó Mobéko motángí ‘banzámbe’ baye Nzámbe atíndélí bangó maloba,

10:36  bóníbóní bolobí na ngáí ‘otúkí Nzámbe’, áwa nalobákí ’te ‘nazalí Mwána wa Nzámbe’ ? Zambí yě mpenzá asántísí ngáí mpé atíndí ngáí o nsé.

10:37  Sókó nasálí misálá mya Tatá wa ngáí té, bóyamba ngáí té.

10:38  Kasi sókó nasálí myangó, atâ boyambí ngáí té, bóyamba misálá miye, bôngó bóndima ’te Tatá asangání na ngáí, mpé ngáí nasangání na Tatá. »

10:39  Bamekí lisúsu kokanga yě, kasi alongwí o káti ya bangó.

10:40  Akeí lisúsu o ngámbo ya Yordáne, esíká Yoáne abátísákí libosó, atíkálí kúná.

10:41  Bato baíké bayéí epái ya yě, balobí : « Yoáne asálákí likamwísi lyǒ­kó té ; kasi mánso alobákí mpô ya moto óyo, mazalí ma sôló. »

10:42  Kúná bato baíké bayambí yě.

Chapter 11

11:1  Moto mǒkó azalákí na bokono, nkómbó ya yě Lazáro, wa Betánia, mbóka ya María na ndeko wa yě Márta.

11:2  María azalákí mwásí óyo apakólákí Mokonzi malási mpé apangúsákí yě makolo na nsúki ya yě. Ndeko wa yě Lazáro azalákí kobéle.

11:3  Bandeko ba yě básí bábalé batíndélí Yézu maloba : « Mokonzi, óyo okolingaka azalí kobéle. »

11:4  Ntángo Yézu ayókí yangó, alobí : « Akokúfa na bokono bôná té, kasi bokono bôná bokolakisa nkémbo ya Nzámbe, mpé bokopésa lokúmu na Mwána wa Nzámbe. »

11:5  Yézu azalákí kolinga Márta ná ndeko wa yě, ná Lazáro.

11:6  Eyókí yě ’te Lazáro azalákí kobéle, atíkálí naíno mikolo míbalé o esíká azalákí.

11:7  Bobélé na nsima alobí na bayékoli : « Tózónga o Yudéa. »

11:8  Bayékoli balobí : « Motéyi, bobélé sikáwa ba-Yúda balingákí koboma yǒ na mabángá, mpé okozónga kúná ? »

11:9  Yézu azóngísí : « O mokolo mǒkó mói mokoúmelaka ngonga zómi na íbalé té ? Sókó moto atámbólí na mói, akotúta libakú té, mpô azalí komóno mwínda mwa nsé eye.

11:10  Kasi sókó atámbólí na butú, akotúta libakú, zambí azalí lisúsu na mwínda té. »

11:11  Elobí Yézu bôngó, abakísí : « Móníngá wa bísó Lazáro alálí mpongí, kasi nakeí kolamusa yě. »

11:12  Bayékoli balobí : « Sókó alálí mpongí, akobíka. »

11:13  Yézu alingákí koloba ’te Lazáro awéí, kasi bangó bakanísí ’te azalákí kolála mpongí.

11:14  Na nsima Yézu alobí polélé : « Lazáro awéí.

11:15  Sókó nasepélí ’te nazalákí wâná té, ezalí mpô ya bínó, mpô ’te bóyamba. Kasi tókende epái ya yě ! »

11:16  Tomá, nkómbó ya yě mpé Lipása, alobí na bayékoli basúsu : « Bísó mpé tókende mpô tókúfa elongó na yě ! »

11:17  Ntángo Yézu akómí kúná, basílí bakundí Lazáro mikolo mínei.

11:18  Betánia ezalí mosíká na Yerúzalem té, sé kilométele ísáto.

11:19  Ba-Yúda baíké bayákí kobóndo Márta na María mpô ya liwá lya ndeko wa bangó.

11:20  Ntángo Márta ayókí ’te Yézu ayéí, akeí kokútana na yě, kasi María atíkálí o ndáko.

11:21  Márta alobí na Yézu : « Mokonzi ; sókó ozalákí áwa, mbele ndeko wa ngáí akúfákí té.

11:22  Kasi atâ sikáwa nayébí ’te Nzámbe akopésa yǒ mánso okosénge yě. »

11:23  Yézu alobí na yě : « Ndeko wa yǒ akosékwa. »

11:24  Márta azóngísí : « Nayébí ’te akosékwa o mokolo mwa nsúka, mokolo bato bánso bakosékwa. »

11:25  Yézu alobí na yě : « Ngáí nazalí nsékwa mpé bomoi. Moto ayambí ngáí, atâ awéí, ndâzalí na bomoi ;

11:26  mpé moto nyónso óyo azalí na bomoi mpé ayambí ngáí, akokúfa sékô té. Oyambí yangó ? »

11:27  Márta ayanoli : « Iyo, Mokonzi, nayambí ’te yǒ ozalí Krístu, Mwána wa Nzámbe, óyo ayéí o nsé. »

11:28  Elobí yě bôngó, akeí kobênga ndeko wa yě María ; alobí na yě malémbe : « Mokonzi ayéí, azalí kobê­nga yǒ. »

11:29  Eyókí María bôngó, atélémí nokí mpé akeí kokútana na yě.

11:30  Yézu akómí naíno o mbóka té, azalákí bobélé esíká Márta ayéí kokútana na yě.

11:31  Ntángo ba-Yúda baye bazalákí na María o ndáko mpô ya kobóndo yě bamóní ’te atélémí nokí mpé abimí, balandí yě ; bakanísí ’te akeí kolela o lilíta.

11:32  María akómí o esíká Yézu azalákí, amóní yě, akúmbámélí yě, alobí na yě : « Mokonzi, sókó ozalákí áwa, mbele ndeko wa ngáí akúfákí té. »

11:33  Emóní Yézu ’te azalákí kolela, yě na ba-Yúda bayákí elongó na yě, motéma mwa yě moléngí mpé atatábání,

11:34  atúní : « Batíí yě wápi ? » Balobí : « Mokonzi, yáká ótála. »

11:35  Yézu alelí.

11:36  Ba-Yúda balobí : « Tálá bóníbóní alingákí yě ! »

11:37  Kasi basúsu balobí : « Oyo afungólí moto wa lolandá míso, akokákí kosála té ’te moto óyo ákúfa té ? »

11:38  Motéma mwa Yézu moléngí lisúsu mpé akeí o lilíta, liye likátémí o káti ya mabángá, libángá lizipí lyangó.

11:39  Yézu alobí : « Bólongola libángá ! » Márta, ndeko wa mowéi, alobí na yě : « Mokonzi, asílí alumbí, awéí mikolo mísáto milekí. »

11:40  Yézu azóngísí : « Nalobákí na yǒ té ’te sókó ozalí na boyambi, okomóno nkémbo ya Nzámbe ? »

11:41  Bôngó balongólí libá­ngá. Yézu atómbólí míso o likoló, alobí : « Tatá, natóndí yǒ zambí ondimélí ngáí.

11:42  Nayébí ’te okondimaka ngáí ntángo ínso ; kasi nalobí bôngó mpô ya bato bazíngí ngáí : báyamba ’te yǒ moto otíndí ngáí. »

11:43  Elobí yě bôngó, agángí makási : « Lazáro, bimá ! »

11:44  Mowéi abimí ; makolo ná mabóko mazíngámí na bilambá, elongi ya yě mpé ezí­ngámí na elambá. Yézu alobí na bangó : « Bókangola yě, bótíka yě ákende. »

11:45  Káti ya ba-Yúda bayákí epái ya María, míngi bayambí Yézu áwa bamóní likambo liye asálí.

11:46  Nzókandé basúsu bakeí koyébisa ba-Farizéo maye Yézu asálí.

11:47  Banganga bakonzi na ba-Farizéo basa­ngání likita, balobí : « Tósála bóní ? Moto óyo akosálaka makamwísi míngi.

11:48  Sókó totíkí yě bôngó, bánso bakoyamba yě, mpé ba-Róma bakoyâ, bakoboma Témpelo mpé ekólo ya bísó. »

11:49  Mǒ kó wa bangó, Kaífa, moto azalákí nganga mokonzi o mobú môná, alobí na bangó : « Bínó boyébí elóko té !

11:50  Bomóní té ’te ebongélí bínó ’te moto mǒkó ákúfa mpô ya bato bá­nso, bôngó ekólo mobimba ékúfa té ! »

11:51  Alobí bôngó na mayéle ma yě mǒkó té ; kasi áwa azalákí nganga mokonzi, asakólí lokóla proféta ’te Yézu akokúfa mpô ya ekólo mobimba.

11:52  Akokúfa bobélé mpô ya ekólo kaka té, kasi mpô ’te ásangisa o libótá lyǒ­kó bána ba Nzámbe bapalángá­ní.

11:53  Bandá mokolo môná bakání koboma yě.

11:54  Yangó wâná Yézu abi­mí lisúsu o káti ya ba-Yúda té, kasi akeí o ekólo penepene na elíkí, o mbóka yǒ kó nkómbó ’te Efraim ; atíkálí kúná elongó na bayékoli ba yě.

11:55  Pásiká ya ba-Yúda ekómí penepene. Bato baíké balongwí o mbóka ya bangó, bakeí o Yerúzalem komí­pétola libosó lya eyenga.

11:56  Balukí Yézu, mpé o Témpelo bazalákí kotúnana : « Bokanísí níni ? Akoyâ o eyenga tǒ akoyâ té ? »

11:57  Banganga bakonzi na ba-Farizéo batíndí etíndá : Sókó moto ayébí esíká Yézu azalí, áyébisa bangó, bôngó bákanga yě.

Chapter 12

12:1  Mikolo motóbá libosó lya eyenga ya Pásiká, Yézu ayéí o Betánia, mbóka ya Lazáro, óyo Yézu asékwísí o bawá.

12:2  Kúná balámbélí yě limpáti ; Márta asálélí bangó. Lazáro mpé afándí o méza elongó na Yézu.

12:3  María akamátí ndámbo ya lítele ya malási ma nsolo mpímbó ma motúya monéne, apakólí na mangó makolo ma Yézu, apangúsí mangó na nsúki ya yě. Ndáko etóndí na nsolo ya malási.

12:4  Mǒ kó wa bayékoli, Yudási Iskarióte, moto akokaba Yézu, alobí :

12:5  « Mpô níni batékí malási mâná na denário nkámá ísáto té mpô ’te bákabela babóla ? »

12:6  Alobí bôngó té mpô azalákí kopangana na babóla, kasi mpô azalákí moyíbi ; azalákí kobó­mba líbenga lya mosolo, mpé koyíba mbóngo bato bakopésaka bangó.

12:7  Yézu alobí : « Tíka mwásí óyo ; asálí bôngó mpô ya mokolo bakokunda ngáí.

12:8  Babóla bakozala na bínó mikolo mínso, kasi ngáí nakozala na bínó sékô té. »

12:9  Ba-Yúda baíké mpenzá bayókí ’te Yézu azalákí o Betánia. Bakeí kúná bobélé mpô ya Yézu té, kasi mpé mpô ya komóno Lazáro, óyo Yézu asékwísí o bawá.

12:10  O ntángo êná banganga bakonzi bakání koboma Lazáro lokóla,

12:11  mpô ba-Yúda baíké batíkí bangó, mpé bayambí Yézu mpô ya Lazáro.

12:12  Mokolo mwa nsima, bato ebelé baye bayákí mpô ya eyenga bayókí ’te Yézu azalákí koyâ o Yerúzalem.

12:13  Bakamátí mandalála, bakeí kokútana na yě mpé bagángí : « Ozána ! Bábenisa mokonzi wa Israél, óyo akoyâ o nkómbó ya Mokonzi ! »

12:14  Yézu azwí mwána wa mpúnda, abutélí yangó, lokóla ekomámí : «

12:15  Obá­nga té, engumbá Sion, tálá mokonzi wa yǒ akoyâ, akofánda o mwána wa mpúnda mwásí. »

12:16  Mokolo môná bayékoli bayókákí naíno ntína ya yangó té, kasi ntángo Yézu ayíngélí o nkémbo, bakundólí o mitéma ’te bakomá yangó o Minkandá mpô ya yě, mpé esálémí na yě sé bôngó.

12:17  Bato bánso bazalákí na Yézu ntángo abéngákí Lazáro o libándá lya lilíta mpé asékwísí yě o bawá, basakólí mpô yangó.

12:18  Yangó wâná mpé bato ebelé bayéí kokútana na yě, mpô bayókákí ’te asálí likamwísi lyangó.

12:19  Ba-Farizéo balobání : « Bomóní ’te tokokí kosála elóko té ! Bato bánso bakómí kolanda yě ! »

12:20  O káti ya bato bayákí kokúmisa Nzámbe o eyenga, basúsu bazalákí ba-Yúda té.

12:21  Bakeí epái ya Filípo, moto wa Betsáida o Galiléa, balobí na yě : « Tatá, tolingí komóno Yézu. »

12:22  Filípo akeí koloba yangó na Andréa. Andréa na Filípo bakeí koyébisa Yézu.

12:23  Yézu azóngísélí bangó : « Elaká ekokí ’te Mwána wa Moto azwa nkémbo.

12:24  Ya sôló sôló, nalobí na bínó : Sókó mbóto ekwéí o mabelé té, mpé ewéí té, ekotíkala yangó mǒkó ; kasi sókó ewéí, ekobóta mbuma míngi.

12:25  Moto alingí bomoi bwa yě, akobúngisa bwangó ; moto abóyí bomoi bwa yě áwa o nsé, akozala na bwangó sékô.

12:26  Sókó moto alingí kosálela ngáí, álanda ngáí. Bô­ngó o esíká ngáí nazalí, mosáleli wa ngáí akozala mpé wâná. Tatá wa ngáí akokúmisa moto óyo akosálela ngáí.

12:27  Sikáwa nazalí koyóka motéma nsómo. Náloba níni ? Tatá, bíkísá ngáí na élaká óyo ? Kasi nayéí áwa mpô na élaká óyo.

12:28  Tatá, kúmísá nkómbó ya yǒ ! » O ntángo êná loláká lolobí út’o likoló : « Nasílí nakúmísí yango, mpé nakokúmisa yango lisúsu. »

12:29  Bato bazalákí wâná bayókí loláká, balobí ’te nkáké ebétí. Basúsu balobí : « Anzelú asolólí na yě. »

12:30  Kasi Yézu alobí : « Loláká loye lolobí mpô ya ngáí té, kasi mpô ya bínó.

12:31  Sikáwa bakokáta likambo lya nsé ; sikáwa bakobengana mokonzi wa nsé eye.

12:32  Mpé ngáí, mokolo bakotómbola ngáí, nakobénda bato bánso epái ya ngáí. »

12:33  Na maloba mâná alakísí liwá níni akokúfa.

12:34  Bato bazóngísélí yě : « O Búku ya Mobéko totángí ’te Krístu akozala sékô. Ndéngé níni okokí koloba ’te bakotómbola Mwána wa Moto ? Bôngó Mwána wa Moto, yě náni ? »

12:35  Yézu alobí na bangó : « Mói mokozala na bínó naíno bobélé mwâ mikolo. Bótámbola ntángo bozalí naíno na mói, mpô ’te molílí mókwêla bínó té. Oyo akotámbola o molílí akoyéba té esíká azalí kokende.

12:36  Ntángo bozalí na mói, bóyamba mwangó, mpô bózala bána ba mói. » Esílísí Yézu koloba bôngó, akeí mpé alongwí o míso ma bangó.

12:37  Atâ asálákí bilembo míngi o míso ma bangó, bayambí yě té.

12:38  Esálémí bôngó mpô ya kokokisa maloba ma proféta Izáya : Mokonzi, náni ayambí matéya ma bísó ? Mokonzi alakísí ngúyá ya yě na náni ?

12:39  Yangó wâná bakokákí koyamba té, mpô Izáya alobákí mpé boye :

12:40  Akangí míso ma bangó, akómísí mitéma mya bangó lokóla mabángá, mpô ’te bámóno na míso té, bátongolo ntína té, bábóngola mitéma té, mpé nábíkisa bangó té.

12:41  Izáya alobákí bôngó, zambi amónókí nkémbo ya Yézu, mpé alobákí mpô ya yě.

12:42  Nzókandé atâ o ntéi ya bankúmú ba ba-Yúda míngi bayambí yě ; kasi basakólí yangó té, mpô bazalákí kobánga ’te ba-Farizeó bakobengana bangó o sinagóga.

12:43  Bapusí kolinga lokúmu loútí na bato, leká lokúmu loútí na Nzámbe.

12:44  Yézu alobí na mongóngó makási : « Moto ayambí ngáí, ayambí ngáí mpenzá té, kasi ayambí óyo atíndí ngáí.

12:45  Moto amóní ngáí, amóní óyo atíndí ngáí.

12:46  Ngáí nayéí o nsé lokóla mói, mpô ’te baye bánso bayambí ngáí bátíkala o molílí té.

12:47  Sókó moto ayókí maloba ma ngáí, kasi atósí mangó té, ngáí moto nakokitisa yě té, zambí nayéí kokitisa bato té, nayéí kobíkisa bangó.

12:48  Moto abóyí ngáí, mpé ayambí maloba ma ngáí té, óyo akokitisa yě azalí : maye ngáí nasakólí makokáta likambo lya yě o mokolo mwa nsúka.

12:49  Zambí nalobí o nkó­mbó ya ngáí mǒkó té ; kasi Tatá óyo atíndí ngáí, yě moto ayébísí ngáí maye nasengélí koloba mpé kosakola.

12:50  Mpé nayébí ’te moto akotósa maye Tatá atíndí, akozwa bomoi bwa lobíko. Bôngó mánso nalobí, nalobí mangó sé lokóla Tatá ayébísákí ngáí. »

Chapter 13

13:1  Libosó lya eyenga ya Pásiká, Yézu ayébí ’te elaká ya yě ekokí : akolongwa o nsé eye, akokende o mbóka Tatá. Lokola ali­ngákí bato ba yě áwa o nsé ; alingí bangó téé nsúka.

13:2  Ntángo bazalákí kolía, zábolo asílí kotía o motéma mwa Yudási Iskarióte, mwána wa Simóni, mokáno mwa kokaba Yézu.

13:3  Yézu ayébí ’te aútí na Nzámbe mpé akozónga o mbóka Nzámbe ; ayébí mpé ’te Tatá atíí bínso o mabóko ma yě.

13:4  Bôngó atélémí, alongwí o méza, alongólí moláto, akamátí elambá, akangí yangó o lokéto.

13:5  Na nsima asopí mái o sǎ ni, abandí kosukola bayékoli makolo mpé apangúsí mangó na ela­mbá eye akangákí o lokéto.

13:6  Ekómí yě epái ya Simóni Pétro, Pétro alobí na yě : « Mokonzi, yǒ ndé okosukola ngáí makolo ? »

13:7  Yézu azóngísí : « óyo nakosála sikáwa, oyébí ntína ya yangó té ; okoyéba nsima. »

13:8  Pétro alobí na yě : « Okosukola ngáí makolo té, atâ mokolo mǒkó té ! » Yézu azóngísí : « Sókó obóyí ’te násukola yǒ makolo, okozala moto wa ngáí té. »

13:9  Simóni Pétro alobí : « Mokonzi, sókó ezalí bôngó, ósukola ngáí bobélé makolo té, kasi mabóko ná motó lokóla ! »

13:10  Yézu azóngísí : « Moto asukólí nzóto, asengélí kosukola bobélé makolo, zambí azalí mobimba péto. Bínó mpé bozalí péto, kasi bánso té. »

13:11  Ayébí náni moto akokaba yě, yangó wâná alobí : « Bínó bánso bozalí péto té. »

13:12  Awa asukólí bangó makolo, alátí lisúsu moláto, akeí kofánda o méza, a­lobí na bangó : « Eye nasálí bínó, boyébí ntína ya yangó ?

13:13  Bo­ko­tángaka ngáí Motéyi mpé Mokonzi, mpé bolobí malámu, zambí nazalí Motéyi mpé Mokonzi sôló.

13:14  Bôngó, sókó ngáí, Mokonzi mpé Motéyi, nasukólí bínó makolo, bínó mpé bosengélí kosukolana makolo.

13:15  Napésí bínó ndakisa mpô ’te bínó mpé bósálaka lokóla ngáí nasálí bínó.

13:16  Ya sôló sôló, nalobí na bínó : Mosáleli alekí mokonzi wa yě té ; sé bôngó na moto atíndámí, óyo atíndí yě alekí yě.

13:17  Awa boyébí yangó, esengo na bínó sókó bosálí bôngó !

13:18  Nalobí bôngó mpô ya bínó bánso té. Nayébí baye naponí. Kasi esengélí ’te maloba ma Minkandá másálema : Moto azalí kolía mámpa na ngáí atombókélí ngáí !

13:19  Nasílí nayébísí bínó yangó libosó ’te ésálema, mpô ’te ntángo ekosálema, bóyamba ’te Ngáí Nazalí.

13:20  Ya sôló sôló, nalobí na bínó : Moto ayambí óyo ngáí natíndí, ayambí ngáí mǒkó : mpé moto ayambí ngáí, ayambí óyo atíndí ngáí. »

13:21  Elobí Yézu bôngó, atatábání, alobí : « Ya sôló sôló, nayébísí bínó : mǒ­kó wa bínó akokaba ngáí. »

13:22  Bayékoli batálání, bayébí té sókó alobí bô­ngó mpô ya náni.

13:23  Moyékoli mǒkó, óyo Yézu akolingaka, afándí penepene na yě o méza.

13:24  Simóni Pétro ayébísí yě na míso, átúna yě sókó alobákí bôngó mpô ya náni.

13:25  Moyékoli ôná alálísí motó penepene na bontólo bwa Yézu, atúní yě malémbe : « Mokonzi, ezalí náni ? »

13:26  Yézu azóngísí : « Nakotuna eténi ya límpa o sǎ ni ; óyo nakopésa límpa, yě wâná. » Yézu akamátí eténi ya límpa, atuní yangó o sǎ­ni, apésí Yudási, mwána wa Simóni Iskarióte.

13:27  Ntángo azwí eténi ya límpa, zábolo akótélí yě o motéma. Yézu alobí na yě : « óyo olingí kosála, sálá yangó nokí. »

13:28  Kasi moto mǒkó té wa baye bazalákí o méza ayébí ntína níni alobákí na yě bôngó.

13:29  Yudási azalákí kobómba mosolo, bôngó basúsu bakanísí ’te Yézu alobí na yě : « Sómbá bilóko bisengélí na bísó mpô ya eyenga », tǒ ákabela babóla mwâ elóko.

13:30  Ekamátí Yudási eténi ya lí­mpa, abimí ; butú bosílí boíndí.

13:31  Awa Yudási abimí, Yézu alobí : « Sikáwa Mwána wa Moto akozwa nkémbo, mpé Nzámbe akozwa nké­mbo mpô ya yě.

13:32  Awa Nzámbe azwí nkémbo mpô ya yě, Nzámbe mpé akopésa Mwána nkémbo o mbóka yě, mpé akokémbisa yě nokí.

13:33  Bána ba ngáí ba bolingo, nakoúmela o ntéi ya bínó lisúsu míngi té. Ndébolukí ngáí, mpé nakoloba na bínó sikáwa lokóla nalobákí na ba-Yúda : Esíká nakokende, bínó bokokí kokóma té.

13:34  Napésí bínó mobéko mwa sika : Bólingana, lokóla ngáí nakolingaka bínó.

13:35  Sókó bolingání, bato bánso bakoyéba ’te bozalí bayékoli ba ngáí. »

13:36  Simóni Pétro atúní yě : « Mokonzi, okokende wápi ? » Yézu azóngísí : « Esíká nakokende, okokí kolanda ngáí sikáwa té, okolanda ngáí nsima. »

13:37  Pétro alobí : « Mpô níni nakokí kolanda yǒ sikáwa té ? Nakokaba bomoi bwa ngáí mpô ya yǒ. »

13:38  Yézu azóngísí : « Sôló, okokaba bomoi bwa yǒ mpô ya ngáí ? Ya sôló sôló, nayébísí yǒ : Nsósó naíno elelí té, okowángana ngáí mbala ísáto. »

Chapter 14

14:1  « Bózala mitéma likoló likoló té. Bóyamba Nzámbe, bóyamba mpé ngáí.

14:2  O ndáko ya Tatá wa ngáí bisíká bizalí míngi. Sókó ezalákí bôngó té, mbele nayé­bísákí bínó té, nakokende ko­bo­ngisela bínó esíká.

14:3  Sókó nakeí, mpé nabongísélí bínó esíká, nakoyâ lisúsu mpé nakokamata bínó o mbóka ngáí, mpô ’te bínó mpé bózala esíká ngáí nazalí.

14:4  Boyébí esíká nakokende, boyébí mpé nzelá yangó. »

14:5  Tomá alobí na yě : « Mokonzi, toyébí té esíká okokende. Bóníbóní tokokí koyéba nzelá ? »

14:6  Yézu alobí na yě : « Ngáí nazalí Nzelá, Bosôló mpé Bomoi. Moto mǒkó té akokende epái ya Tatá, sókó alekí epái ya ngáí té.

14:7  Sókó boyébí ngáí, bokoyéba mpé Tatá wa ngáí. Bandá sikáwa boyébí yě, mpé bomóní yě. »

14:8  Filípo alobí na yě : « Mokonzi, lakísá bísó Tatá, yangó ekokí na bísó. »

14:9  Yézu alobí na yě : « Mikolo míngi nazalí na bínó, Filípo, kasi oyébí ngáí té, sôló ? Moto amóní ngáí, amóní Tatá. Bôngó ndéngé níni okokí koloba : Lakísá bísó Tatá ?

14:10  Oyambí té ’te ngáí nasangání na Tatá, mpé Tatá asangání na ngáí ? Maloba nazalí koloba na bínó, mazalí maloba ma ngáí mǒkó té ; kasi Tatá óyo asangání na ngáí, yě moto akosála misálá mya yě.

14:11  bóndima yangó ’te nasangání na Tatá mpé Tatá asangání na ngáí. Bóyamba atâ mpô ya misálá miye.

14:12  Ya sôló sôló, nalobí na bínó : moto ayambí ngáí, akosála misálá ngáí nakosálaka. Akosála mpe misálá milekí myangó na bonéne, zambí nazalí kokende o mbóka Tatá.

14:13  Mánso bokosénge o nkómbó ya ngáí, nakosála mangó, mpô ’te na Mwána nkémbo ya Tatá émónono.

14:14  Eye bokosénge o nkómbó ya ngáí, nakosála yangó.

14:15  Sókó bolingí ngáí, bokotósa mibéko mya ngáí.

14:16  Ngáí nakobó­ndela Tatá, mpé Tatá ndâpésí bínó Mobó­ndi mosúsu, ázala na bínó sékô.

14:17  Bato ba nsé bakokí koya­mba Elímo wa Bosôló té, mpô bamóní yě té, mpé bayébí yě té. Bínó boyébí yě, mpô afándí na bínó mpé azalí o mitéma mya bínó.

14:18  Nakotíka bínó lokóla bána bitíké té. Nakozóngela bínó.

14:19  Etíkálí moké bato bakomóno ngáí lisúsu té. Kasi bínó ndébomóní ngáí, zambí nazalí na bomoi ; bínó lokóla bokozala na bomoi.

14:20  Mokolo môná bokoyéba ’te nasangání na Tatá wa ngáí, mpé bínó bosangání na ngáí, mpé ngáí na bínó.

14:21  Moto amemyí mibéko mya ngáí mpé atósí myangó, yě moto alingí ngáí. Oyo alingí ngáí, Tatá akolinga yě, ngáí mpé nakolinga yě, mpé nakomílakisa na yě. »

14:22  Yudási, kasi Iskarióte té, alobí na yě : « Mokonzi, bóníbóní okomílakisa na bísó, kasi na bato basúsu té ? »

14:23  Yézu azóngísélí yě : « Sókó moto alingí ngáí, akotósa maloba ma ngáí, mpé Tatá wa ngáí akolinga yě, tokoyâ o mbóka yě, mpé tokofánda epái ya yě.

14:24  Moto alingí ngáí té, akotósa maloba ma ngáí té. Maloba bínó boyókí mazalí maloba ma ngáí té, kasi maloba ma Tatá moto atíndí ngáí.

14:25  Nayébísí bínó yangó, áwa nazalí naíno na bínó.

14:26  Kasi Mobó­ndi, Elímo Sántu, óyo Tatá akotí­nda o nkómbó ya ngáí, akolakisa bínó mánso, mpé akokundolela bínó mánso nalobákí na bínó.

14:27  Nakotíkela bínó bobóto ; nakopésa bínó bobóto bwa ngáí. Ngáí nakopésa bínó bobóto té lokóla bato ba nsé bakopésaka. Bóyóka nsómo o mitéma té, bóbánga té.

14:28  Boyókí ’te nalobákí na bínó : Nakokende mpé nakozónga epái ya bínó. Sókó bolingákí ngáí, mbele bosepélákí míngi, zambí nakokende o mbóka Tatá, mpô Tatá alekí ngáí na bonéne.

14:29  Nayébísí bínó yangó, áwa esálémí naíno té, mpô ’te ntángo ekosálema, bóyamba.

14:30  Nakoloba na bínó lisúsu míngi té. Mokonzi wa nsé eye azalí koyâ. Akokí kosála ngáí elóko té.

14:31  Kasi bato basengélí koyéba ’te nakolingaka Tatá, mpé nakosálaka sé lokóla atíndí ngáí. Bótéleme ! Tólongwa áwa !

Chapter 15

15:1  Ngáí nazalí nzeté ya sôló ya víno. Tatá wa ngáí azalí nkóló wa elanga ya víno.

15:2  Etápi lya ngáí ínso ibótí mbuma té, akokáta lyangó ; etápi ibótí mbuma, akopétola lyangó mpô ’te íbóta mbuma míngi.

15:3  Bínó bosílí bokómí péto mpô ya matéya natéyákí bínó.

15:4  Bókangana na ngáí lokóla ngáí nakangání na bínó. Etápi ekokí kobóta mbuma té sókó ekangání na nzeté té. Sé bôngó bínó mpé bokokí kobóta mbuma té sókó bokangání na ngáí té.

15:5  Ngáí nazalí nzeté ya víno, bínó bozalí bitápi. Moto akangání na ngáí lokóla ngáí nakangání na yě, akobóta mbuma míngi, zambí sókó tokabwání, bokokí kosála elóko té.

15:6  Sókó moto akangání na ngáí lisúsu té, bakobwáka yě o libándá, lokóla etápi eye ekátání : etápi ekokauka, bakolokoto yangó mpé bakobwáka yangó o móto, ekozíka.

15:7  Sókó bokangání na ngáí, sókó bobómbí maloba ma ngáí o mitéma, bokokí kosénge mánso bolingí, mpé bokozwa mangó.

15:8  Tatá wa ngáí akozwa nkémbo sókó bobótí mbuma míngi mpé sókó bokomílakisaka bayékoli ba ngáí.

15:9  Lokóla Tatá alingí ngáí, ngáí mpé nalingí bínó. Bózalaka o bolingí bwa ngáí.

15:10  Sókó botósí mibéko mya ngáí, bokotíkala o bolingí bwa ngaí, sé lokóla ngáí natósí mibéko mya Tatá wa ngáí, mpé natíkálí o bolingi bwa yě.

15:11  Nayébísí bínó yangó mpô ’te esengo ya ngáí ézala na bínó, mpé esengo étónda o mitéma mya bínó.

15:12  Mobéko mwa ngáí, mwangó moye : Bólinganaka lokóla ngáí na­koli­ngaka bínó.

15:13  yangó ndé nsúka ya bolingi ! Sókó moto akabí bomoi bwa yě mpô ya báníngá.

15:14  Bínó bozalí báníngá ba ngáí, sókó bokosála maye natíndí bínó.

15:15  Nakotá­nga bínó lisúsu basáleli té, zambí mosáleli ayébí té maye mokonzi akosálaka ; kasi nakotánga bínó báníngá, zambí nalakísí bínó mánso nayókí epái ya Tatá.

15:16  Bínó boponí ngáí té, kasi ngáí naponí bínó mpé natíndí bínó bókende, bóbóta mbu­ma, mpé mbuma ya bínó íúmela sékô, mpô ’te mánso bokosénge Tatá o nkómbó ya ngáí, ápésa bínó mangó.

15:17  Yangó ndé natíndí bínó : bólinganaka.

15:18  Sókó bato ba nsé eye bayiní bínó, bóyéba ’te bayinákí ngáí libosó.

15:19  Sókó bozalákí bato ba nsé, mbele bato ba nsé balingákí bínó lokóla elóko ya bangó. Kasi bozalí báníngá ba bangó té, zambí naponí bínó mpé nalongólí bínó o ntéi ya bangó, yangó wâná bato ba nsé bayiní bínó.

15:20  Bókundola o mitéma maloba nalobákí na bínó : mosáleli alekí mokonzi wa yě té. Sókó ba­nyókólókí ngáí, bako­nyókolo bínó lokóla ; sókó bandimákí maloba ma ngáí, bakondima mpé maloba ma bínó.

15:21  Kasi bakosála bínó mâná mánso mpô ya nkómbó ya ngáí, zambí óyo atíndí ngáí, bayébí yě té.

15:22  Sókó nayákí té, sókó mpé nalobákí na bangó té, mbele bazalákí na lisúmu té. Kasi sikáwa bazalí na lisú­mu, bakokí komílóngisa té.

15:23  Moto ayiní ngáí, ayiní mpé Tatá wa ngáí.

15:24  Nasálákí o míso ma bangó misálá miye moto mosúsu asálí té. Sókó nasálákí myangó té, mbele bazalákí na lisúmu té. Kasi bamónókí misálá mya ngáí mpé bayiní bísó, bísó na Tatá wa ngáí.

15:25  Esálémí bôngó mpô ya kokokisa maloba makomámí o Mobéko mwa bangó : Bayinákí ngáí na ntína té.

15:26  Ntángo Mobóndi akoyâ, óyo nakotíndela bínó o nkómbó ya Tatá, akosakola mpô ya ngáí. Yě ndé Elímo wa Bosôló akoúta epái ya Tatá.

15:27  Bínó mpé bokosakola mpô ya ngáí, zambí bozalí na ngáí út’o ebandela.

Chapter 16

16:1  Nayébísí bínó mambí maye mpô ’te bótúta libakú té.

16:2  Ndébabengání bínó o sinagóga, mpé elako ekoyâ bakoboma bínó mpé bakokanisa ’te na yangó bakokúmisa Nzámbe.

16:3  Ndébasálí bínó bôngó, zambí bayébí Tatá té, bayébí ngáí mpé té.

16:4  Nayébísí bínó yangó mpô ’te, sókó elaká ya bangó ekokí, bókundola o mitéma ’te nalobákí na bínó bôngó. Nalobákí na bínó mpô yangó út’o ebandela té, zambí nazalákí na bínó.

16:5  Sikáwa nakokende o mbóka ya óyo atíndí ngáí, mpé mǒkó té o ntéi ya bínó atúní ngáí : ‘Okokende wápi ?’

16:6  Kasi áwa nalobí na bínó mambí mâná, mitéma mya bínó mitóndí na mawa.

16:7  Nzókandé nayébí­sí bínó likambo lya sôló : ebongélí bínó ’te nákende ; zambí sókó nakeí té, Mobó­ndi akoyâ epái ya bínó té. Kasi sókó nakeí, ngáí mǒkó nakotínda yě epái ya bínó.

16:8  Mokolo akoyâ, akolakisa bato ba nsé maye matálí lisúmu, bosémbo mpé bokáti likambo.

16:9  Mpô na lisúmu, mpô bayambí ngáí té.

16:10  Mpô na bosémbo, zambí nakokende epái ya Tatá, mpé bokomóno ngáí lisúsu té.

16:11  Mpô na bokáti likambo ; mpámba té, mokonzi wa nsé asílí akití o likambo.

16:12  Nazalí naíno na makambo míngi ma koloba na bínó, kasi bokokí na mangó sikáwa té.

16:13  Mokolo Elímo wa bosôló akoyâ, akosangela bínó mambí mánso ma Bosôló, zambí akoloba o nkómbó ya yě mǒkó té ; akoloba mambí ayókákí, mpé akosangela bínó maye makoyâ nsima.

16:14  Yě moto akokúmisa ngáí, zambí akosangela bínó maye akozwa epái ya ngáí.

16:15  Bínso bizalí bya Tatá, bizalí bya ngáí. Yangó wâná nalobí : akosangela bínó maye akozwa epái ya ngáí.

16:16  Etíkálí moké bokomóno ngáí lisúsu té, mpé mwâ moké na nsima ndébomóní ngáí lisúsu. »

16:17  Bayékoli basúsu babandí kotúnana : « Alobí na bísó : ‘Etíkálí moké bókomóno ngáí lisúsu té, mpé mwâ moké na nsima ndébomóní ngáí lisúsu’, ‘zambi nakokende epái ya Tatá’. Yangó elakísí níni ? »

16:18  Batúnání : « Níni yangó : mwâ moké ? Toyókí ntína ya maloba mâná té ! »

16:19  Yézu amóní ’te balingí kotúna yě, alobí : « Bozalí komítúna ntína ya maloba ma ngáí maye : ‘Etíkálí moké bókomóno ngáí lisúsu té mpé mwâ moké na nsima ndébomóní ngáí lisúsu’.

16:20  Ya sôló sôló, nalobí na bínó : Bokolela mpé bokozala na mawa ; bato ba nsé bakosepela, bínó bokoyóka mawa ; kasi mawa ma bínó makobóngwana esengo.

16:21  Ntango mwásí alingí ábóta, akoyóka nsómo, mpô elaká ya yě ekómí ; kasi áwa abótí, akokanisa lisúsu malózí té, mpô ya esengo ’te mwána abótámí.

16:22  Bínó sé bôngó : Sikáwa bozalí na mawa ; kasi nakomóno bínó lisúsu, bokosepela, mpé moto mǒkó té akobótolo bínó esengo êná.

16:23  O mokolo môná bokotúna ngáí motúna mǒkó té. Ya sôló sôló, nayébísí bínó : Tatá wa ngáí akopésa bínó mánso bokosénge o nkómbó ya ngáí.

16:24  Téé sikáwa boséngí naíno elóko yǒ­kó o nkómbó ya ngáí té ; bósénge mpé bokozwa ; bôngó esengo étónda o mitéma mya bínó.

16:25  Nalobákí na bínó libosó mangó mánso na miúlání. O elako ekoyâ nakoloba na bínó lisúsu na miúlání té, kasi nakosangela bínó polélé mambí ma Tatá wa ngáí.

16:26  Mokolo môná ndéboséngí o nkómbó ya ngáí. Bókanisa té ’te nasengélí na Tatá mpô ya bínó,

16:27  zambí Tatá yě mǒkó alingí bínó, mpô bolingí ngáí mpé bondimí ’te naútí epái ya Nzámbe.

16:28  Naútí epái ya Tatá mpé nakómí o nsé ; sikáwa nakotíka nsé mpé nakokende o mbóka Tatá. »

16:29  Bayékoli balobí na yě : « Sikáwa olobí polélé, na miúlání lisúsu té !

16:30  Sikáwa tomóní ’te oyébí mánso ; esengélí té ’te bátúna yǒ. Yangó wâná toyambí ’te oútí epái ya Nzámbe. »

16:31  Yézu azóngísí : « Bo­ya­mbí sikáwa,

16:32  kasi elako eko­yâ, mpé esílí eyéí, bokopanzana, moto na moto o esíká ya yě, mpé bokotíka ngáí mǒkó. Kasi nazalí bobélé ngáí mǒ­kó té, tozalí bísó na Tatá.

16:33  Nalobí na bínó mpô yangó mpô ’te bózala na bobóto o boyambi ngáí. Awa o nsé bokoyóka mpási. Kasi bóléndisa mitéma ! Ngáí esi nalóngí nsé ! »

Chapter 17

17:1  Elobí Yézu bôngó, atómbólí míso epái ya likoló, alobí : « Tatá, elaká ekokí. Kúmísá Mwána wa yǒ mpô ’te Mwána wa yǒ ákúmisa yǒ.

17:2  Osílí opésí yě bokonzi bwa bato bánso, mpô ’te ákabela bato opésí yě bomoi bwa sékô.

17:3  Bomoi bwa sékô, bwangó ’te báyéba yǒ, Nzámbe wa sôló sé mǒ­kó, báyéba mpé óyo otíndí : Yézu Krístu !

17:4  Na bosílisi mosálá opésí ngáí, nalakísí bato ba nsé nkémbo ya yǒ.

17:5  Sikáwa, Tatá, pésá ngáí nkémbo epái ya yǒ, eye nazalákí na yangó ntángo likoló na nsé bizalákí naíno té.

17:6  Nasangélí bato nkómbó ya yǒ, bato baye olongólí o nsé eye mpô ’te ópésa ngáí. Bazalákí bato ba yǒ, opésí ngáí bangó, mpé bayambí maloba ma yǒ.

17:7  Sikáwa bayébí ’te mánso opésí ngáí maútí epái ya yǒ.

17:8  Nayébísí bangó maloba oyébísákí ngáí ; bayambí mangó ; sikáwa bayébí sôló ’te naútí epái ya yǒ, mpé bayambí ’te yǒ moto otí­ndí ngáí.

17:9  Nazalí kosámbela mpô ya bangó. Nakosámbela mpô ya bato ba nsé té, kasi mpô ya bato opésí ngáí, zambí bazalí bato ba yǒ.

17:10  Bínso bizalí bya ngáí, bizalí bya yǒ ; bínso bizalí bya yǒ, bizalí bya ngáí ; nazwí lokúmu mpô ya bangó.

17:11  Ngáí nakoúmela lisúsu o nsé eye té, ngáí nakoyâ epái ya yǒ ; kasi bangó bafándí o nsé. Tatá mosántu, bátélá o nkómbó ya yǒ baye opésí ngáí, mpô ’te bázala sé moto mǒkó lokóla bísó na yǒ.

17:12  Ntángo nazalákí na bangó, nabátélákí bangó na ngúyá ya nkómbó ya yǒ, nkómbó opésí ngáí. Nakéngélékí bangó : mǒ­kó wa bangó abúngámí té, tíká sé óyo asengélákí kobúngama mpô ’te ésálema lokóla ekomámí o Minkandá Misántu.

17:13  Kasi sikáwa nakoyâ epái ya yǒ. Nalobí bôngó áwa nazalí naíno o nsé, mpô ’te bázala na esengo ya ngáí o mitéma mya bangó mpé bátónda na yangó.

17:14  Nalakísí bangó matéya ma yǒ, mpé bato ba nsé bayiní bangó, zambí bangó bazalí bato ba nsé té, lokóla ngáí mpé nazalí moto wa nsé té.

17:15  Nabóndélí yǒ : ólongola bangó o nsé té, kasi óbíkisa bangó o mabóko ma mobébisi.

17:16  Bazalí bato ba nsé té, lokóla ngáí mpé nazalí moto wa nsé té.

17:17  Osántisa bangó na bosôló ; maloba ma yǒ mazalí sé ma bosôló.

17:18  Natíndí bangó o káti ya bato, lokóla yǒ otíndákí ngáí o káti ya bato.

17:19  Nakomíkaba mobimba mpô ya bangó mpô ’te bangó mpé bákóma sôló bato ba yǒ.

17:20  Nazalí kosámbela bobélé mpô ya bangó té, kasi mpé mpô ya bato bakoyóka matéya ma bangó mpé bakoyamba ngáí nsima mpô ya matéya ma bangó,

17:21  mpô ’te bánso bázala sé moto mǒkó. Lokóla bísó na yǒ, Tatá, tozalí sé moto mǒkó, bangó mpé bázala na bísó lisangá, mpô ’te bato ba nsé báyamba ’te yǒ moto otíndí ngáí.

17:22  Napésí bangó nkémbo óyo opésákí ngáí, mpô ’te bázala sé moto mǒkó lokóla bísó na yǒ tozalí sé moto mǒ­kó :

17:23  ngáí násangana na bangó mpé yǒ ósangana na ngáí, mpô ’te bázala sé moto mǒ­kó mpenzá, mpé bato ba nsé báyéba ’te yǒ moto otíndí ngáí, mpé okolingaka bangó lokóla okoli­ngaka ngáí.

17:24  Tatá, nalingí ’te baye opésí ngáí bázala na ngáí esíká ngáí nakoke­nde, bámóno nkémbo ya ngáí, eye opésí ngáí, zambí olingákí ngáí naíno mokili mokelámí té.

17:25  Tatá wa bosémbo, bato ba nsé bayébí yǒ té, kasi ngáí nayébí yǒ, mpé bato baye bandimí ’te yǒ moto otíndí ngáí.

17:26  Nalakísí bangó nkómbó ya yǒ mpé nakokóba kolakisa yangó naíno mpô ’te bolingi okolingaka ngáí bózala o mitéma mya bangó, mpé ngáí mǒkó názala o mitéma mya bangó. »

Chapter 18

18:1  Esílísí Yézu koloba bôngó, abimí elongó na bayékoli ba yě ; bakátísí ngámbo ya mái ma Sédron. Lopángo lozalákí wâná ; Yézu ayíngélí wâná na bayékoli ba yě.

18:2  Yudási, moto akokaba yě, ayébí mpé esíká yangó, zambí Yézu azalákí kokende kúná mbala míngi na bayékoli ba yě.

18:3  Yudási akambí libóké lya basodá na bakéngeli baye banganga bakonzi na ba-Farizéo bapésí yě ; bayéí wâná na miínda, na bisúngi mpé na bibuneli.

18:4  Yézu ayébí mánso makokwêla yě, yangó wâná akeí epái ya bangó mpé alobí : « Bozalí koluka náni ? »

18:5  Bazóngísí : « Yézu wa Nazaréte. » Yézu alobí na bangó : « Ngáí óyo. » Yudási, moto akabí yě, azalákí mpé wâná elongó na bangó.

18:6  Awa Yézu alobí na bangó « Ngáí óyo », bazóngí nsima mpé bakwéí o nsé.

18:7  Yézu atúní bangó lisúsu : « Bozalí koluka náni ? » Balobí : « Yézu wa Nazaréte. »

18:8  Yézu azóngísí : « Nasílí nalobí : Ngáí óyo. Sókó bozalí koluka ngáí, bótíka bangó báke­nde. »

18:9  esálémí bôngó sé lokóla yě mǒ­kó alobákí : ‘Na baye opésí ngáí, nabúngísí atâ mǒ­kó té’.

18:10  Simóni Pétro azalákí na mompánga, abimísí mwangó, abétí mosáli wa nganga mokonzi mpé akátí yě litói lya mobáli. Nkómbó ya mosáli ôná Málko.

18:11  Kasi Yézu alobí na Pétro : « Zóngísá mompánga o esíká ya yangó. Nkéni Tatá apésí ngáí, námele yangó té ? »

18:12  Na nsima basodá, komandá na bakéngeli ba ba-Yúda bakangí Yézu na nsinga.

18:13  Bakeí na yě epái ya Ana. Ana azalákí bokiló wa Kaífa ; azalákí nganga mokonzi o mobú wana.

18:14  Kaífa moto apésáká ba-Yúda lilako liye : « Malámu bobélémoto mǒkó ákúfa mpô ya bato bánso. »

18:15  Simóni Pétro na moyékoli mosúsu, balandí Yézu. Moyékoli ôná ayébání na nganga mokonzi ; bôngó akótí elongó na Yézu o lopángo la nganga mokonzi.

18:16  Pétro atíkálí o libándá penepene na monoko mwa lopángo. Moyékoli mosúsu, óyo ayébání na nganga mokonzi, abimí ; asolólí na mwásí mokéngeli wa lopángo, akótísí Pétro.

18:17  Mokéngeli mwásí ôná alobí na Pétro : « Yǒ mpé ozalí mǒkó wa bayékoli ba moto óyo té ? » Pétro azóngísí : « Té, ngáí té. »

18:18  Mpô ezalákí mpío, basáli na basodá bapelísákí móto, bazalákí koyóto móto. Pétro atélémí epái ya bangó, yě mpé azalákí koyóto móto.

18:19  Nganga mokonzi atúní Yézu mpô ya bayékoli mpé mpô ya matéya ma yě.

18:20  Yézu azóngísí : « Nazalákí koloba polélé o míso ma bato bánso. Mikolo mínso nazalákí kotéya o sinagóga mpé o Témpelo, esíká ba-Yúda bánso bakosanganaka ; nalobákí elóko yǒ kó na bonkútú té.

18:21  Mpô níni otúní ngáí ? Túná bato bayókákí matéya nazalákí kotéya ; bangó bayébí níni nalobákí. »

18:22  Elobí yě bôngó, mosáleli mǒkó, óyo atélémí penepene na Yézu, abétí yě mbatá, alobí : « Bakoyanolaka nganga mokonzi ndé boye ? »

18:23  Yézu azóngísélí yě : « Sókó nalobí mabé, lakísá mabé mâná ; kasi sókó nalobí malámu, mpô níni obétí ngáí ? »

18:24  Na nsima Ana atíndí Yézu epái ya Kaífa, nganga mokonzi. Yézu azalákí sé kokangema, nsinga o mabóko.

18:25  Simóni Pétro azalákí sé koyóto móto ntángo balobí na yě : « Yǒ mpé ozalí mǒkó wa bayékoli ba yě té ? » Awángání, alobí : « Té, ngáí té. »

18:26  Mosáleli mǒkó wa nganga mokonzi, ndeko wa moto óyo Pétro akátákí yě litói, alobí lisúsu : « Namónókí yǒ o lopángo elongó na yě té ? »

18:27  Pétro awángání lisúsu, mpé bobélé o ntá­ngo êná nsósó elelí.

18:28  Na ntóngó mpenzá balongwí epái ya Kaífa, bakeí na Yézu o ndáko ya moyángeli wa ekólo. Ba-Yúda bakótí o ndáko ya moyángeli té, mpô ’te bákóma na mbindo té, mpô bákoka kolía limpáti lya Pásiká.

18:29  Bôngó Piláto abimí mpé akeí epái ya bangó. Atúní bangó : « Boyéí kofúnda moto óyo na likambo níni ? » Bazóngísélí yě :

18:30  « Sókó azalákí moto mabé té, mbele tokabí yě o mabóko ma yǒ té. »

18:31  Piláto alobí na bangó : « Bínó mǒkó bókamata yě, mpé bósámbisa yě, engébéné na Mobéko mwa bínó. » Ba-Yúda bazóngísélí yě : « Balingísí bísó koboma moto té. »

18:32  Esálémí bôngó mpô ya kokokisa maye Yézu alobákí ntángo ayébísákí ndéngé níni akowá.

18:33  Piláto akótí lisúsu o ndáko, abyá­ngí Yézu, atúní yě : « Ozalí mo­konzi wa ba-Yúda ? »

18:34  Yézu azóngísí : « Olobí bôngó na mayéle ma yǒ mǒ­kó, tǒ bato basúsu bayébísí yǒ bôngó mpô ya ngáí ? »

18:35  Piláto ayanólí : « Ngáí nazalí ndé mo-Yúda ? Bato ba ekólo ya yǒ na banganga bakonzi bakabí yǒ o mabóko ma ngáí. Osálí níni ? »

18:36  Yézu azóngísí : « Bokonzi bwa ngáí bozalí bwa nsé eye té. Sókó bokonzi bwa ngáí bozalákí bwa nsé eye, mbele bato ba ngáí babundí mpô ’te nákwéya o mabóko ma ba-Yúda té. Kasi bokonzi bwa ngáí bozalí bwa nsé eye té. »

18:37  Piláto alobí na yě : « Bôngó ozalí mokonzi ? » Yézu azó­ngísí : « Lokóla olobí, nazalí mokonzi. Nabótámí mpé nayéí áwa o mokili mpô ’te násakola bosôló. Moto nyónso akondima bosôló, akoyóka ngáí ! »

18:38  Piláto alobí na yě : « Bosôló, níni yangó ? » Elobí yě bôngó, abimí lisúsu, akeí epái ya ba-Yúda, alobí na bangó : « Namóní ntína yǒ kó té ya kokitisa moto óyo.

18:39  Kasi bozalí na momeseno ’te nábimisela bínó moto mǒkó wa bo­lóko o eyenga ya Pásiká. Bolingí nábimisela bínó mokonzi wa ba-Yúda ? »

18:40  Bánso bagángí lisúsu, bangó ’te : « Yě té, kasi Báraba ! » Báraba azalákí moyíbi monéne.

Chapter 19

19:1  Na nsima Piláto abétísí Yézu fímbo.

19:2  Basodá bato­ngí ekáta ya nzúbe, batíí yangó o motó mwa Yézu ; balátísí yě elambá ya lángi lo­ngóndo ;

19:3  babelémí na yě, balobí : « Losáko, mokonzi wa ba-Yúda ! » mpé babétí yě mbatá.

19:4  Piláto abimí lisúsu, alobí na bangó : « Tálá, nakobimisa yě o míso ma bínó mpô bóyéba ’te ngáí namóní ntína yǒ kó té ya kokitisa yě. »

19:5  Bôngó Yézu abimí, ekáta ya nzúbe o motó, alátí elambá ya lángi longóndo. Piláto alobí na bangó : « Botálá moto óyo ! »

19:6  Ntángo banganga bakonzi na bakéngeli ba bangó bamóní yě, bagángí : « Báká yě o kurúse ! Báká yě o kurúse ! » Piláto alobí na bangó : « Bínó mǒ­kó bókamata yě, bóbáka yě o kurúse ; ngáí namóní ntína yǒ kó té ya kokitisa yě. »

19:7  Ba-Yúda bazóngísélí yě : « Bísó tozalí na Mobéko, engébéné na Mobéko mwangó asengélí kokúfa, mpô alobákí ’te azalí Mwána wa Nzámbe. »

19:8  Eyókí Piláto bôngó, akó­mí kobánga míngi.

19:9  Akótí lisúsu o ndáko, alobí na Yézu : « Oútí wápi ? » Kasi Yézu azóngísí liloba té.

19:10  Bô­ngó Piláto alobí na yě : « Obóyí koloba na ngáí ? Oyébí té ’te nakokí kobíkisa yǒ, nakokí mpé kolingisa ’te bábáka yǒ o kurúse ? »

19:11  Yézu azóngísí : « Sókó Nzámbe alingísákí yǒ yangó té, mbele okokí kosála ngáí elóko té. Yangó wâná moto akabí ngáí o mabóko ma yǒ, asálí lisúmu lilekí bonéne. »

19:12  Ut’o ntángo êná Piláto alukí nzelá ya kobíkisa yě ; kasi ba-Yúda bakóbí kogánga : « Sókó otíkí yě, ozalí móníngá wa Kaizáro té ! Moto akomítángaka mokonzi, azalí mongúná wa Kaizáro. »

19:13  Eyókí Piláto bôngó, abimísí Yézu o libándá, afándí o kíti ya esámbi, o esíká bakobéngaka ‘Litóstrotos’ o lokóta la ba-Gréki mpé ‘Gabata’ o ebréi.

19:14  Ezalákí mokolo mwa boléngeli eyenga ya Pásiká, penepene na ngo­nga ya midí. Piláto alobí na ba-Yúda : « Táláni mokonzi wa bínó. »

19:15  Kasi bangó bagángí : « Akúfa ! Akúfa ! Báká yě o kurúse ! » Piláto atúní bangó : « Bôngó nábáka mokonzi wa bínó o kurúse ? » Banganga bakonzi bazóngísí : « Bísó tozalí na mokonzi mosúsu té, bobélé Kaizáro ! »

19:16  Na nsima Piláto atíkélí bangó Yézu bábáka yě o kurúse. Bakeí na Yézu.

19:17  Yě mǒkó amemí kurúse ya yě, abimí o engumbá mpé akómí o esíká bakobyángaka ‘Ekwókóló’, o lokóta la ebréi ‘Gólgota’.

19:18  Kúná babákí yě o kurúse, elongó na bato basúsu bábalé : mǒ­kó epái, mosúsu epái, Yézu o káti.

19:19  Piláto akomísí mwâ libáyá mpé atíndákí ’te bábáka lyangó o kurúse ; bakomí wâná : ‘Yézu wa Nazaréte, mokonzi wa ba-Yúda’.

19:20  Ba-Yúda baíké batángí maloba mâná, mpô esíká babákí Yézu o kurúse ezalákí penepene na engumbá, mpé maloba mâná makomámí o ebréi, o latíni mpé o gréki.

19:21  Banganga bakonzi ba ba-Yúda bakeí koloba na Piláto : « Okoma té : Mokonzi wa ba-Yúda, kasi komá : Moto óyo alobákí : nazalí mokonzi wa ba-Yúda. »

19:22  Piláto azóngísí : « Maye nakomí, nasílí nakomí. »

19:23  Awa basodá babákí Yézu o kuruse, bakamátí bilambá bya yě, mpé bakabólí byangó na biténi bínei : sodá mǒkó mǒkó ázwa eténi. Bakamátí mpé monkóto mwa yě molaí, moto­ngámá, basoní mwangó té.

19:24  Basodá balobání : « Tópasola mwa­ngó té ; kasi tóbéte mbese sókó náni akozwa mwangó. » Basálí bôngó mpô ya kokokisa maloba ma Minkandá Misántu : Bakabólání bilambá bya ngáí, babétí mbese mpô ya kozwa moláto mwa ngáí. Basodá basálí sé bôngó.

19:25  Penepene na kurúse ya Yézu mamá wa yě atélémí, na ndeko wa mamá wa yě, María mwásí wa Kléofa, ná María wa Mágdala.

19:26  Emóní Yézu mamá wa yě, mpé penepene na yě moyékoli óyo akolingaka míngi, alobí na mamá : « Mamá, tálá mwána wa yǒ. »

19:27  Na nsima alobí na moyékoli : « Tálá mamá wa yǒ. » Bandá ntángo êná moyékoli akamátí yě o ndáko ya yě.

19:28  Nsima ya yangó Yézu ayébí ’te akokísí mánso. Mpô ’te ésálema lokóla ekomámí o Minkandá Misántu, alobí : « Nayókí mpósá ya mái. »

19:29  Mbéki ezalákí wâná etóndí na víno ngai. Basodá bakamátí linyuká, batuní lyangó o víno, bakangí lyangó o nkékélé, batómbólí lyangó téé o monoko mwa Yézu.

19:30  Emekí Yézu víno ngai, alobí : « Mánso makokísámí. » Asunísí motó mpé akátí motéma.

19:31  Ezalákí mokolo mwa boléngeli eyenga ya Pásiká. Ba-Yúda balingí té ’te nzóto ya bato ítíkala o kurúse o mokolo mwa eyenga, mpô ezalákí eyenga enéne. Yangó wâná basé­ngí Piláto ’te bábúka bangó makolo mpé bálongola bangó.

19:32  Bôngó basodá bayéí, babúkí makolo ma moto wa libosó mpé ma moto mosúsu baye babákémí o kurúse elongó na Yézu.

19:33  Ntángo bakómí epái ya Yézu, bamóní ’te asílí kokáta motéma ; babúkí makolo ma yě té.

19:34  Kasi sodá mǒkó atúbólí yě mopanzí na likongó ; sé o ntángo êná makilá na mái mabimí.

19:35  Oyo amóní yangó na míso, yě moto asakólí yangó ; maye asakólí mazalí ma sôló, mpé ayébí ’te alobí mambí ma sôló mpô ’te bínó mpé bóyamba.

19:36  Esálémí bôngó mpô ya kokokisa maye makomámí o Minkandá Misántu : Ndébabúkí yě atâ monkúwa mǒkó té.

19:37  Mpé o esíká esúsu bakomí ’te : Bakotála moto óyo batúbólí na likongó.

19:38  Nsima ya yangó Yozéfu wa Arimatéa aséngí Piláto álingisa yě kobákola nzóto ya Yézu. Yozéfu azalákí moyékoli wa Yézu, kasi na bonkútú, mpô azalákí kobánga ba-Yúda. Piláto alingísí yě, bôngó ayéí kolongola nzóto.

19:39  Nikodémo mpé ayéí, óyo ayáká kotála Yézu na butú ; ayéí na malási masangání na míra kópo sókí monkámá.

19:40  Bakamátí nzóto ya Yézu, elongó na malási bazíngí yangó na bilambá, lokóla ba-Yúda bakosálaka ntángo baku­ndí moto.

19:41  O esíká babákákí Yézu o kurúse elanga ezalákí, mpé o elanga lilíta lya sika, esíká bakundí naíno moto mǒkó té.

19:42  Bakundí Yézu wâná : basálí bô­ngó, mpô ezalákí mokolo mwa boléngeli eyenga ya ba-Yúda, mpé lilíta lizalákí penepene.

Chapter 20

20:1  Mokolo nsima ya sábato, na ntá ntóngó, ezalákí naíno molílí, María wa Mágdala akeí o lilíta. Amóní ’te libángá lilongwí o monoko mwa lilíta.

20:2  Akeí mbángu epái ya Simóni Pétro na moyékoli mosúsu óyo Yézu azalákí kolinga, alobí na bangó : « Balongólí Mokonzi o lilíta, mpé toyébí té esíká batíí yě. »

20:3  Pétro na moyékoli mosúsu babimí, bakeí o lilíta.

20:4  Bánso bábalé batámbwísí makolo, kasi moyékoli mosúsu alekí Pétro na mbángu, atíkí yě nsima, akómí libosó o lilíta.

20:5  Asunámí, amóní bilambá bilálí o nsé, kasi akótí té.

20:6  Pétro ala­ndí yě o nsima, yě mpé akómí. Ayíngélí o lilíta, amóní bilambá bilálí o nsé,

20:7  ná mpé elambá eye bazíngákí Yézu o motó. Elambá êná elálí esíká yǒ kó na bilambá té, kasi ezíngámí o esíká esúsu.

20:8  O ntángo êná moyékoli mosúsu, óyo ayákí libosó, akótí mpé. Amóní mpé ayambí.

20:9  Naíno bayékoli bayébákí ntína ya maloba ma Mindanká Misántu té ’te Yézu asengélákí kosé­kwa o bawá.

20:10  Na nsima bayékoli bazóngí epái ya bangó.

20:11  María atélémí o libándá penepene na lilíta, azalákí kolela. Ezalákí yě kolela bôngó, asunámí epái ya lilíta,

20:12  amóní bǎnzelú bábalé balátí bilambá mpémbé, bafándí esíká nzóto ya Yézu elálákí, mǒkó epái ya motó, mosúsu epái ya makolo.

20:13  Batúní yě : « Mwasi, mpô níni ozalí kolela ? » Azóngísí : « balongólí Mokonzi wa ngáí, mpé nayébí té esíká batíí yě. »

20:14  Elobí yě bôngó, amíbóngólí, amóní Yézu, kasi ayébí té ’te ezalákí yě.

20:15  Yézu alobí na yě : « Mwasi, mpô níni ozalí kolela ? Ozalí koluka náni ? » María akanísí ’te ezalákí mosáli wa lopángo, alobí na yě : « Tatá, sókó yǒ moto olongólí yě, yébísá ngáí esíká níni otíí yě, bôngó nákende kokamata yě. »

20:16  Yézu alobí na yě : « María ! » María amíbó­ngólí, alobí na Yézu o ebréi : « Rabóni ! » lokóla ’te « Motéyi. »

20:17  Yézu alobí na yě : « Osímba ngáí té, mpô nabutí naíno epái ya Tatá té. Kasi kendé koyébisa bandeko ba ngáí ’te nakobuta epái ya Tatá wa ngáí, óyo azalí mpé Tatá wa bínó ; epái ya Nzámbe wa ngáí, óyo azalí mpé Nzámbe wa bínó. »

20:18  María wa Má­gdala akeí koyébisa bayékoli ’te amónókí Mokonzi ná mpé maye alobákí na yě.

20:19  Sé mokolo môná, mokolo nsima ya sábato, na mpókwa, bayékoli ba Yézu basangání esíká yǒ kó ; bizibeli bya ndáko bínso bikangémí, mpô bazalákí kobánga ba-Yúda. Yézu ayéí, atélémí o ntéi ya bangó, alobí : « Bobóto na bínó ! »

20:20  Elobí yě bôngó, alakísí bangó mabóko na mopanzí. Awa bamóní Mokonzi, bayékoli basepélí míngi.

20:21  Alobí na bangó lisúsu : « Bobóto na bínó ! Lokóla Tatá atíndákí ngáí, ngáí mpé natíndí bínó. »

20:22  Nsima ya maloba maye apémélí bangó mpéma mpé alobí : « Bókúla Elímo Sántu ;

20:23  masúmu ma bato bínó bokolímbisa, makolímbama ; masúmu ma baye bínó bokolímbisa té, makotíkala na bangó. »

20:24  Kasi Tomá, mǒkó wa ba-zómi na bábalé, óyo bakobéngaka Lipása, azalákí na bangó té ntángo Yézu ayákí.

20:25  Bayékoli basúsu balobí na yě : « Tomónókí Mokonzi. » Kasi yě alobí : « Sókó namóní bilembo bya nsété o mabóko ma yě té, sókó natíí mosapi o mpótá ya nsété té, mpé sókó natíí lobóko o mopanzí mwa yě té, nakoyamba té. »

20:26  Nsima ya mikolo mwambe, bayékoli basangání lisúsu o ndáko, mpé Tomá azalákí na bangó. Bizibeli bikangémí. Yézu ayéí, atélémí o ntéi ya bangó, alobí : « Bobóto na bínó ! »

20:27  Na nsima alobí na Tomá : « Tíá mosapi mwa yǒ áwa mpé tálá mabóko ma ngáí. Tandá lobóko mpé tíá langó o mopanzí mwa ngáí ; tíká kobéte ntembe, kasi yambá sé boyambi. »

20:28  Tomá azóngísélí yě : « Mokonzi wa ngáí mpé Nzámbe wa ngáí ! »

20:29  Yézu alobí : « Oyambí zambí omóní ngáí ; kasi esengo na bato bakoyamba atâ bamóní té. »

20:30  O míso ma bayékoli Yézu asálí bilembo bisúsu míngi, biye bikomámí o búku eye té.

20:31  Kasi biye bikomamí áwa bikomámí mpô ’te bóyamba ’te Yézu azalí Krístu, Mwána wa Nzámbe, mpé mpô ’te, sókó boyambí, bózwa bomoi mpô ya nkómbó ya yě.

Chapter 21

21:1  Na nsima Yézu abimélí bayekoli lisúsu o libóngo lya etíma ya Tibéria. Abimélí bangó boye :

21:2  Simóni Pétro, Tomá, óyo bakobé­ngaka Lipása, Natánael wa Kána o Galiléa, bána ba Zebedéo, na bayékoli basúsu bábalé, bazalákí esíká yǒ kó.

21:3  Simóni Pétro alobí na bangó : « Nakeí kolóbo mbísi. » Balobí na yě : « Bísó mpé tokokende na yǒ. » Bakeí mpé bakwélí o bwáto. Kasi o butú bôná babomí elóko té.

21:4  Awa ntóngó ebandí kotána, Yézu atélémí o libóngo, kasi bayékoli bayébí té ’te ezalákí Yézu.

21:5  Yézu abé­ngí bangó : « Bána é, bozwí mwâ mbísi ? » Bazóngísí : « Té. »

21:6  Alobí na bangó : « Bóbwáka monyámá o lobóko la mobáli la bwáto, bokozwa. » Ba­bwákí monyámá, mpé bakokí kobé­nda mwangó lisúsu té : monyámá motóndí na mbísi.

21:7  Moyékoli óyo Yézu azalaki kolinga alobí na Pétro : « Mokonzi yě wâná ! » Eyókí Pétro ’te ezalákí Mokonzi, alátí elambá ya yě, zambí alátákí elambá té ; amíbwákí o mái.

21:8  Bayékoli basúsu bayéí na bwáto, babé­ndí monyámá na mbísi ; bazalákí penepene na libóngo, mabóko sókí nkámá íbalé.

21:9  Balubwí o mokili, bamóní móto mwa makála, na mbísi likoló lya móto, ná mámpa.

21:10  Yézu alobí : « Bóyâ na mwâ mbísi boútí koboma. »

21:11  Simóni Pétro akwélí o bwáto mpé abéndí monyámá o mokili. Monyámá motóndí na mbísi : mbísi inéne monkámá na ntúkú ítáno na ísáto ; atâ mbísi izalákí ebelé boye, monyámá mopaswání té.

21:12  Yézu alobí na bangó : « Yákáni kolía. » Moto mǒkó té amekí kotúna yě : « Yǒ náni ? », zambí bayébí malámu ’te ezalákí Mokonzi.

21:13  Yézu ayéí penepene, akamátí mámpa, apésí bangó ; apésí bangó mpé mbísi.

21:14  Ezalákí mbala ya ísáto Yézu abimélí bayékoli bandá mokolo asékwí o bawá.

21:15  Awa basílísí kolía, Yézu alobí na Simóni Pétro : « Simóni, mwána wa Yoáne, okolingaka ngáí leká bání­ngá ? » Azóngísí : « Iyo, Mokonzi, oyébí ’te nakolingaka yǒ. » Yézu alobí na yě : « Kambá bana meme ba ngáí. »

21:16  Atúní yě mbala ya íbalé : « Simóni, mwána wa Yoáne, okolingaka ngáí ? » Azóngísí : « Iyo, Mokonzi, oyébí ’te nakolingaka yǒ. » Yézu alobí na yě : « Kambá mpatá ya ngáí. »

21:17  Alobí na yě mbala ya ísáto : « Simóni, mwána wa Yoáne, okoli­ngaka ngáí ? » Pétro ayókí mawa míngi, zambí Yézu atúní yě mbala ísáto : Okolingaka ngáí ? Alobí na yě : « Mokonzi, oyébí mánso, oyébí ’te nakolingaka yǒ. » Yézu alobí na yě : « Kambá mpatá ya ngáí.

21:18  Ya sôló sôló, nayébísí yǒ : Ntángo ozalákí elengé, yǒ mǒkó ozalákí kokanga nkámba o lokéto mpé kokende esíká yǒ mǒkó olingákí. Kasi ntángo okokóma mobangé, okotanda mabóko, mpé moto mosúsu akolátisa yǒ nkámba o lokéto, mpé akoka­mba yǒ esíká okolinga té. »

21:19  Na maloba maye Yézu alakísí na liwá níni asengélákí kokúmisa Nzá­mbe. Na nsima Yézu alobí na yě : « Landá ngáí ! »

21:20  Pétro amíbóngólí, amóní ’te moyékoli óyo Yézu akolingaka azalákí kolanda bangó. Yě moto alálísákí motó penepene na bontólo bwa Yézu o ntángo ya limpáti, mpé atúnákí Yézu : « Mokonzi, náni akokaba yǒ. »

21:21  Awa Pétro amóní yě, alobí na Yézu : « Mokonzi, bôngó na yě ekozala ndéngé níni ? »

21:22  Yézu azóngísí : « Sókó nalingí ’te átíkala téé mokolo nakoyâ, ezalí ndé likambo lya yǒ ? Yǒ, landá ngáí. »

21:23  Nsango epalángání o ntéi ya bandeko ’te moyékoli óyo akokúfa té. Nzókandé Yézu alobákí na Pétro té ’te akokúfa té, kasi « Sókó nalingí ’te átíkala téé mokolo nakoyâ, ezalí ndé likambo lya yǒ ? »

21:24  Moyékoli óyo asakólí makambo maye amónókí, akomí mangó o mo­nkandá, mpé toyébí ’te makambo asakólí mazalí ma sôló.

21:25  Yézu asálí naíno misala misúsu míngi. Sókó bakomákí mangó mǒ­kó mǒkó, nakanísí ’te mokili mobimba mokokoka té mpô ya kokwa búku eye.