TpiKJPB - Deuteronomy

Chapter 1

1:1  ¶ Ol dispela em i ol tok Moses i tokim olgeta Isrel long dispela long dispela sait long Wara Jordan long hap graun i no gat man, na long ples i stret, na em i long fran bilong Retsi namel long Paran na Tofel na Leban na Haserot na Disahap.

1:2  (Ol dispela i elevenpela de long wokabaut long lusim Horep long rot bilong Maunten Sir i go long Kedes-bania.)

1:3  Na em i kamap olsem, long namba foti yia, na long namba eleven mun, na long namba wan de bilong dispela mun, Moses i tok long ol pikinini bilong Isrel, long toksave long olgeta samting BIKPELA i bin givim em long givim strongpela tok long ol.

1:4  Dispela i kamap bihain long em i bin kilim i dai Saihon, King bilong ol Amor, na em i bin i stap long Hesbon, na Ok, king bilong Basan, na em i bin i stap long Astarot long Edrei.

1:5  Long dispela sait bilong riva Jordan, long graun bilong Moap, Moses i stat long tokaut long dispela lo, na em i tok,

1:6  God BIKPELA bilong yumi i bin tok long yumi long Horep, na tok, Yupela i bin i stap longpela taim long dispela maunten na em inap.

1:7  Yupela i mas tanim yupela yet na kirap long wokabaut bilong yupela, na go long maunten bilong ol Amor na long olgeta hap i stap klostu long dispela, long ples i stret na long ol liklik maunten, na long ples daun, na long hap saut, na long arere bilong solwara, long graun bilong ol Kenan, na i go long Lebanon, na i go long dispela bikpela wara riva, em riva Yufretis.

1:8  Harim, Mi bin putim dispela hap graun long pes bilong yupela. Go insait na kisim dispela hap graun, BIKPELA i bin tok tru antap long dispela long ol papa bilong yupela, em Abraham, na Aisak, na Jekop, long givim dispela long ol na long ol pikinini na tumbuna pikinini i kamap bihain long ol.

1:9  ¶ Na mi Moses, mi bin toktok long yupela long dispela taim, na tok, Mi yet tasol, mi no inap karim yupela.

1:10  God bilong yupela, em BIKPELA, Em i bin mekim yupela i kamap planti na, harim, dispela de namba bilong yupela i stap olsem ol sta bilong heven.

1:11  (BIKPELA, God bilong yupela, Em i mas mekim yupela i kamap wan tausen taim planti moa long yupela i stap tude, na blesim yupela, olsem Em i bin promisim yupela!)

1:12  Olsem wanem mi yet tasol i inap karim ol samting i pasim yupela na ol hevi bilong yupela, na ol kros i stap namel long yupela?

1:13  Yupela i mas kisim ol man i gat save tru na gutpela save, na ol lain bilong yupela i save long ol, na bai mi makim ol long i stap ol bosman bilong yupela.

1:14  Na yupela i bin bekim long mi na tok, Dispela samting yu bin tokim mipela long em, em i gutpela long mipela i mekim.

1:15  Olsem, mi bin kisim ol hetman bilong ol lain bilong yupela, ol i man i gat save tru, na ol i save long ol. Na mi bin makim ol long i stap ol bosman bilong yupela, sampela i bosman bilong ol tausen, na sampela i bosman bilong ol handet, na sampela i bosman bilong ol fifti, na sampela i bosman bilong ol tenpela, na ol i stap ol lida namel long ol lain bilong yupela.

1:16  Long dispela taim mi givim tok bilong strongim ol jas bilong yupela, na mi tok, Harim ol hevi i stap namel long ol brata bilong yupela, na wokim stretpela kot namel long olgeta man na brata bilong em, na tu long ol man bilong narapela ples i stap wantaim em.

1:17  Yupela i no ken mekim wantok pasin long kot. Tasol yupela i mas harim man i no gat namba olsem yupela i harim man i gat bikpela namba. Yupela no ken pret long pes bilong man. Long wanem, dispela kot i bilong God. Na sapos wanpela hevi i hatpela tumas long yupela, bringim dispela i kam long mi, na bai mi harim dispela.

1:18  Na long dispela taim mi givim strongpela tok long yupela long olgeta samting yupela i mas mekim.

1:19  ¶ Na taim yumi lusim Horep, yumi bin i go namel long olgeta hap bilong dispela bikpela ples i no gat man i bin pretim yumi. Yupela i bin lukim dispela long rot bilong maunten bilong ol Amor, olsem BIKPELA, God bilong yumi, i bin givim strongpela tok long yumi. Na yumi bin i kam long Kedes-bania.

1:20  Na mi tok long yupela, Yupela i kam pinis long maunten bilong ol Amor, God BIKPELA bilong yumi i givim dispela long yumi.

1:21  Harim, God BIKPELA bilong yu i putim dispela hap graun long pes bilong yu. Go antap na kisim dispela olsem God BIKPELA bilong ol papa bilong yu i bin tok long yu. No ken pret na tu no ken pilim olsem yu no inap mekim.

1:22  Na yupela olgeta wan wan i bin kam klostu long mi na tok, Yumi bai salim ol man i go pas long yumi, na ol bai luksave long dispela hap graun bilong helpim yumi, na bringim tok long yumi gen long rot yumi mas i go antap long em, na wanem biktaun bai yumi kamap long ol.

1:23  Na dispela tok i amamasim mi. Na mi kisim twelpela man bilong yupela, em wanpela bilong ol lain.

1:24  Na ol i tanim ol yet na go antap long maunten, na kamap long ples daun bilong Eskol, na ol i luksave long dispela.

1:25  Na ol i kisim sampela bilong ol kaikai bilong dispela hap graun long ol han bilong ol, na ol i bringim dispela i kam daun long yumi. Na ol i bringim tok long yumi gen na tok, Dispela em i gutpela graun God BIKPELA bilong yumi i givim yumi.

1:26  Tasol tru tumas, yupela i no laik i go antap, tasol yupela i bikhet long strongpela tok bilong God BIKPELA bilong yupela.

1:27  Na yupela i mekim bikhet toktok long ol haus sel bilong yupela, na tok, BIKPELA i bin bringim yumi long lusim graun bilong Isip long givim yumi long han bilong ol Amor long bagarapim yumi, long wanem Em i no laikim tru yumi.

1:28  Bai mipela i go antap we? Ol brata bilong mipela i mekim bel bilong mipela i pilim olsem mipela i no inap mekim dispela. Na ol i tok dispela manmeri i bikpela moa na longpela moa long yumi, na ol biktaun i bikpela tru na banis bilong ol i go antap long heven. Na tu mipela i bin lukim ol pikinini man bilong ol Anak long dispela hap graun.

1:29  Long dispela taim mi tok long yupela, No ken pilim hevi o pret long ol.

1:30  God BIKPELA bilong yupela i go pas long yupela. Na Em bai pait bilong helpim yupela, long olgeta wankain pasin Em i bin mekim long yupela long Isip, long ol ai bilong yupela,

1:31  Na long ples i no gat man, long dispela hap graun yupela i bin luksave long God BIKPELA bilong yupela i karim yupela, olsem wanpela man i karim pikinini man bilong em, long olgeta rot yupela i go long em, inap long yupela i kam long dispela hap graun.

1:32  Tasol long dispela samting, yupela i no bin bilipim God BIKPELA bilong yupela.

1:33  Em i go pas long yupela long rot, long painim hap graun long yupela i ken putim ol haus sel bilong yupela long em. Em i go long paia long nait, long soim yupela wanem rot yupela mas i go long em, na long klaut long de.

1:34  Na BIKPELA i harim ol nek bilong ol tok bilong yupela, na Em i belhat na tok tru antap, na tok,

1:35  Tru tumas, i no gat wanpela bilong ol dispela man bilong dispela lain pikinini nogut bai lukim dispela gutpela graun, Mi bin tok tru antap long ol papa bilong yupela long givim dispela long ol.

1:36  Tasol Kelep, pikinini man bilong Jefune, em bai lukim dispela, na bai Mi givim long em dispela graun em i bin wokabaut antap long dispela, na long ol pikinini bilong em. Long wanem em i bin bihainim BIKPELA olgeta.

1:37  Na tu BIKPELA i kros long mi, na yupela i as bilong dispela, na Em i tok, Yu tu i no ken i go insait long dispela hap graun.

1:38  Tasol Josua, pikinini man bilong Nun, man i sanap long pes bilong yu, em bai go insait long dispela hap graun. Yu mas strongim bel bilong em. Long wanem em bai mekim Isrel i kisim dispela hap graun olsem samting papa i laik givim pikinini bilong em.

1:39  Na tu ol liklik lain bilong yupela, yupela i bin tok ol bai stap samting birua bai kisim, na ol pikinini bilong yupela long dispela de, em ol i no gat save long gutpela samting na samting nogut, ol bai go insait long dispela. Na bai Mi givim dispela long ol, na ol bai kisim dispela.

1:40  Tasol bilong yupela, tanim yupela na mekim wokabaut bilong yupela i go long ples i no gat man, long rot bilong Retsi.

1:41  Long dispela taim yupela i bekim long mi, na tok, Mipela i bin mekim sin i birua long BIKPELA, bai mipela i go antap na pait bilong bihainim olgeta samting God BIKPELA bilong mipela i givim strongpela tok long mipela. Na taim yupela olgeta wan wan man i putim ol samting bilong pait long woa long yupela yet, orait, yupela i redi long go antap long dispela liklik maunten.

1:42  Na BIKPELA i tok long mi, Tokim ol olsem, No ken go antap, na tu no ken pait, long wanem Mi no stap namel long yupela. Nogut yupela i kisim bagarap long pes bilong ol birua bilong yupela.

1:43  Mi bin tok olsem long yupela, na yupela i no laik harim, tasol yupela i bikhet long strongpela tok bilong BIKPELA, na yupela i bin sakim tok na go antap long dispela liklik maunten.

1:44  Na lain bilong Amor husat i stap long dispela maunten, ol i kam birua long yupela, na ranim yupela, olsem ol ninik i mekim, na ol i bagarapim yupela long Sir inap long Horma.

1:45  Na yupela i kam bek na krai long pes bilong BIKPELA. Tasol BIKPELA i no laik harim nek bilong yupela, o putim ia i go long yupela.

1:46  Olsem, yupela i stap long Kedes planti de, bilong bihainim ol de yupela i stap long dispela hap.

Chapter 2

2:1  ¶ Long dispela taim yumi tanim yumi yet na wokabaut long rot i go long ples i no gat man, long rot bilong Retsi, olsem BIKPELA i tok long mi. Na yumi bin raunim maunten Sir planti de.

2:2  Na BIKPELA i tok long mi, na tok,

2:3  Yupela i bin raunim dispela maunten inap taim. Tanim yupela yet i go long hap not.

2:4  Na yu mas givim strongpela tok long ol manmeri, na tok, Yupela bai wokabaut long arere bilong graun bilong ol brata bilong yupela, em ol pikinini bilong Iso husat stap long Sir, na ol bai pret long yupela. Olsem na yupela i mas lukaut gut long yupela yet.

2:5  Yupela i no ken kirapim belhat bilong ol. Long wanem bai Mi no givim graun bilong ol inap long mak bilong wanpela fut long yupela. Nogat. Long wanem Mi bin givim maunten Sir long Iso, bilong em i ken holim dispela.

2:6  Yupela i mas baim kaikai long ol long mani, bai yupela i ken kaikai. Na tu yupela i mas baim wara long ol long mani, bai yupela i ken dring.

2:7  Long wanem God BIKPELA bilong yupela i bin givim blesing long yu long olgeta wok bilong han bilong yu. Em i save long wokabaut bilong yu namel long dispela bikpela ples i no gat man. Dispela foti yia God BIKPELA bilong yu i bin i stap wantaim yu, na yu no bin sot long wanpela samting.

2:8  ¶ Na taim yumi i go klostu long ol brata bilong yumi, em ol pikinini bilong Iso, husat i stap long Sir long rot bilong ples stret i lusim Elat na i lusim Esion-geber, yumi bin tanim na go long rot bilong ples i no gat man bilong Moap.

2:9  Na BIKPELA i tok long mi, No ken givim hevi long ol Moap, na tu no ken pait wantaim ol long woa. Long wanem bai Mi no givim ol graun bilong ol long yu bilong holim. Long wanem Mi bin givim Ar long ol pikinini bilong Lot bilong holim.

2:10  Ol Imim i bin i stap long dispela hap pastaim. Ol i manmeri i bikpela na planti na longpela, olsem ol Anak.

2:11  Ol man tu i tingim ol i traipela manmeri, olsem ol Anak, tasol ol Moap i kolim ol, ol Imim.

2:12  Na tu ol Horim i bin i stap long Sir pastaim, tasol ol pikinini bilong Iso i kisim graun bilong ol taim ol i bin bagarapim ol long pes bilong ol. Na ol lain bilong Iso i bin stap long graun bilong ol, olsem Isrel i mekim long kisim ol graun BIKPELA i givim long ol.

2:13  Nau mi tok kirap, na yupela i mas winim liklik wara Seret. Na yumi bin i go hapsait long liklik wara Seret.

2:14  Na taim long yumi bin lusim Kedes-bania inap long yumi bin kam winim liklik wara Seret, em i 38 yia. Em inap long olgeta lain bilong ol man bilong mekim woa i dai na lusim bikpela ami bilong Isrel, olsem BIKPELA i bin tok tru antap i go long ol.

2:15  Long wanem, tru tumas han bilong BIKPELA i stap birua long ol long bagarapim ol long i stap namel long bikpela ami, inap long ol i pinis olgeta.

2:16  Na em i kamap olsem, taim olgeta bilong ol man bilong woa i pinis olgeta na dai pinis long namel long ol manmeri,

2:17  Orait BIKPELA i tok long mi, na tok,

2:18  Dispela de yu mas winim dispela na go long Ar na long arere bilong Moap na winim dispela.

2:19  Na taim yu kam klostu long arere bilong graun bilong ol pikinini bilong Amon, yu no ken givim hevi long ol, o mekim ol i belhat. Long wanem Mi no laik givim yu wanpela hap bilong graun bilong ol pikinini bilong Amon long holim. As bilong dispela em i Mi bin givim dispela long ol pikinini bilong Lot bilong holim.

2:20  Na tu dispela graun i bin i stap graun bilong ol traipela man. Ol traipela man i bin i stap long taim bipo tru, na ol Amon i makim ol, lain bilong Samsum.

2:21  Ol i manmeri i bikpela, na planti, na longpela olsem ol Anak. Tasol BIKPELA i bagarapim ol long pes bilong ol Amon, na ol i kisim graun bilong ol, na stap long hap bilong ol.

2:22  Olsem Em i bin mekim long ol pikinini bilong Iso, husat i stap long Sir, taim Em i bagarapim ol Hor long pes bilong ol, na ol i kisim graun bilong ol na stap long hap bilong ol inap long dispela de.

2:23  Na ol Avim husat i stap long Haserim inap long Asa, ol Kaptor, em lain i kam long hap Kaptor, ol i bagarapim ol na stap long hap bilong ol.

2:24  ¶ Yupela kirap na mekim wokabaut bilong yupela na go hapsait long wara riva Arnon. Harim, Mi bin givim i go long yu, Saihon, dispela man Amor, em king bilong Hesbon, wantaim ol graun bilong em. Stat long kisim dispela na pait wantaim em long woa.

2:25  Dispela de bai Mi stat long putim wari long yu na pret long yu i go long ol kantri i stap aninit olgeta hap bilong heven. Ol bai harim tok save long yu na ol bai guria, na pilim nogut, na yu as bilong dispela.

2:26  Na mi salim ol mausman long lusim ples i no gat man bilong Kedemot na go long Saihon, king bilong Hesbon, na ol i mekim tok bilong bel isi, na ol i tok,

2:27  Larim mi go hapsait long graun bilong yu. Mi bai go long bikpela rot na bai mi no tanim mi yet i go long han sut o long han kais.

2:28  Yu ken salim kaikai long mi bilong kisim mani, bai mi ken kaikai, na givim wara long mi bilong kisim mani, bai mi ken dring. Mi laik go hapsait tasol long ol fut bilong mi.

2:29  (Olsem ol pikinini bilong Iso husat i stap long Sir, na ol Moap husat i stap long Ar i bin mekim long mi.), inap long mi go hapsait long wara riva Jordan na go insait long graun God BIKPELA bilong mipela i givim mipela.

2:30  Tasol Saihon, king bilong Hesbon, i no laik larim yumi go long graun bilong em. Long wanem God BIKPELA bilong yu i mekim spirit bilong em i kamap olsem ston na mekim bel bilong em i bikhet, bai God i ken putim em long han bilong yu, olsem em i stap long dispela de.

2:31  Na BIKPELA i tok long mi, Harim, long pes bilong yu, Mi bin stat long givim Saihon na graun bilong em. Stat long holimpas dispela, bai yu ken kisim graun bilong em olsem samting papa i laik givim yu.

2:32  Long dispela taim Saihon i kamaut birua long yumi, em wantaim olgeta manmeri bilong em, long pait long Jahas.

2:33  Na God BIKPELA bilong yumi i givim em long pes bilong yumi, na yumi bin paitim em, na ol pikinini man bilong em, na olgeta manmeri bilong em.

2:34  Na long dispela taim yumi kisim olgeta biktaun bilong em, na bagarapim olgeta ol man, na ol meri, na ol liklik lain bilong olgeta wan wan biktaun. Yumi no larim wanpela i stap yet.

2:35  Yumi kisim ol bulmakau samting tasol bilong i stap ol samting bilong yumi yet, wantaim ol kago samting bilong ol biktaun yumi bin winim.

2:36  Long lusim Aroa, na dispela i stap long arere bilong wara riva bilong Arnon, na long lusim dispela biktaun i stap klostu long wara riva inap long Gileat, i no gat wanpela biktaun i strongpela inap long winim yumi. God BIKPELA bilong yumi i bin givim olgeta i go long yumi.

2:37  Tasol yu no bin kam long graun bilong ol pikinini bilong Amon, o long wanpela hap bilong wara riva Jabok, o long ol biktaun i stap long ol maunten, o long wanem hap God BIKPELA bilong yumi i bin tambuim yumi long kisim.

Chapter 3

3:1  ¶ Long dispela taim yumi tanim yumi yet na go antap long rot i go long Basan. Na Ok, king bilong Basan, em i kam birua long yumi, em na olgeta manmeri bilong em, long pait long Edrei.

3:2  Na BIKPELA i tok long mi, No ken pret long em. Long wanem bai Mi putim em, na olgeta manmeri bilong em, na graun bilong em, i go long han bilong yu. Na yu mas mekim long em olsem yu bin mekim long Saihon, king bilong ol Amor, lain i bin i stap long Hesbon.

3:3  Olsem, God BIKPELA bilong yumi i putim Ok, dispela king bilong Basan, tu long ol han bilong yumi, na olgeta manmeri bilong em. Na yumi paitim em inap long i no gat wanpela bilong em i stap yet.

3:4  Na long dispela taim yumi kisim olgeta biktaun bilong em, na i no gat wanpela biktaun yumi no kisim bilong ol, em olgeta hap bilong Argop, long kingdom bilong Ok, long Basan.

3:5  Ol i bin pasim olgeta bilong ol dispela biktaun long ol banis i antap tru, na ol dua bilong banis na ol bikpela plang bilong pasim ol dua. Na tu i gat planti liklik taun i no gat banis.

3:6  Na yumi bin bagarapim ol olgeta, olsem yumi bin mekim long Saihon, king bilong Hesbon. Yumi bagarapim olgeta ol man, na ol meri, na ol pikinini bilong olgeta wan wan biktaun.

3:7  Tasol yumi kisim i kam long yumi yet bilong winim pait, olgeta bulmakau samting, na ol gutpela samting bilong ol biktaun.

3:8  Na long dispela taim yumi kisim long han bilong dispela tupela king bilong ol Amor, graun i stap long dispela sait long riva Jordan, long lusim wara riva bilong Arnon i go long maunten Hermon.

3:9  (Ol Saidon i kolim maunten Hermon Sirion. Na ol Amor i kolim dispela Senir.)

3:10  Na yumi kisim olgeta biktaun bilong ples stret na olgeta hap bilong Gileat, na olgeta hap bilong Basan i go long Salka na Edrei, ol i ol biktaun bilong kingdom bilong Ok long Basan.

3:11  Long wanem, Ok, king bilong Basan, em tasol i stap yet bilong liklik lain i stap yet bilong ol traipela man. Harim, bet bilong em i bet ain, na ating em i stap yet long Rabat bilong ol pikinini bilong Amon? Longpela bilong dispela bet em i foa meta na brait bilong em i 1.8 meta bilong bihainim mak bilong man.

3:12  ¶ Na mi bin givim long lain bilong Ruben na lain bilong Gat dispela graun yumi kisim long dispela taim, em long Aroa i stap klostu long riva wara Arnon, na hap bilong maunten Gileat, na ol biktaun bilong em.

3:13  Na mi bin givim long hap lain bilong Manasa ol arapela hap bilong Gileat na olgeta hap bilong Basan, em kingdom bilong Ok, em olgeta hap bilong Argop wantaim olgeta hap bilong Basan. Ol i kolim dispela graun bilong ol traipela man.

3:14  Jair, pikinini man bilong Manasa, i kisim olgeta kantri bilong Argop i go inap long ol arere bilong Gesuri na Makati. Na em i kolim ol dispela hap graun Basan-havot-jair inap long dispela de, long bihainim nem bilong em yet.

3:15  Na mi givim Gileat i go long Makir.

3:16  Na mi givim long lain bilong Ruben na long lain bilong Gat, graun i lusim Gileat na i go long wara riva Arnon, em hap bilong ples daun, na arere i go inap long wara riva Jabok, na dispela em i arere bilong graun bilong ol pikinini bilong Amon.

3:17  Na tu mi givim ol ples stret na Jordan na arere bilong dispela long Kineret i go inap long solwara bilong ples stret, yes long solwara i gat planti sol. Dispela i stap aninit long Asdot-piska na long hap sankamap.

3:18  Na long dispela taim mi givim strongpela tok long yupela na tok, God BIKPELA bilong yupela i bin givim yupela dispela hap graun long holimpas dispela. Yupela olgeta inap long mekim woa i mas i go hapsait wantaim ol samting bilong pait long pes bilong ol brata bilong yupela, em ol pikinini bilong Isrel.

3:19  Tasol ol meri bilong yupela, na ol liklik lain bilong yupela na ol bulmakau samting bilong yupela, (long wanem Mi save olsem, yupela i gat planti bulmakau samting). Ol bai stap long ol biktaun Mi bin givim yupela,

3:20  Inap long BIKPELA i bin givim malolo long ol brata bilong yupela, na tu long yupela, na inap long ol tu i kisim dispela graun God BIKPELA bilong yupela i bin givim ol hapsait long wara Jordan. Na long dispela taim yupela olgeta wan wan man bai go gen long ol samting bilong em, Mi bin givim dispela long yupela.

3:21  ¶ Na long dispela taim mi givim strongpela tok long Josua, na tok, Ol ai bilong yu i bin lukim olgeta samting God BIKPELA bilong yupela i bin mekim long dispela tupela king. BIKPELA bai mekim olsem long olgeta kingdom yu go long em.

3:22  Yupela no ken pret long ol. Long wanem God BIKPELA bilong yupela bai pait bilong helpim yupela.

3:23  Na long dispela taim mi mekim askim long BIKPELA, na tok,

3:24  O GOD BIKPELA, Yu bin stat long soim wokboi bilong Yu, bikpela bilong Yu na strongpela han bilong Yu. Long wanem, wanem God i stap long heven o long dispela graun, na em i ken mekim olsem ol wok bilong Yu na olsem strong bilong Yu?

3:25  Mi askim Yu, larim mi go hapsait na lukim dispela gutpela graun i stap hapsait long riva Jordan, na dispela gutpela maunten, na Lebanon.

3:26  Tasol BIKPELA i kros long mi na yupela i as bilong dispela, na Em i no laik harim mi. Na BIKPELA i tok long mi, Larim dispela i inapim yu. Yu no ken toktok moa long Mi long dispela samting.

3:27  Yu go antap na go long antap bilong maunten Pisga, na apim tupela ai bilong yu i go long hap san i go daun, na hap not na hap saut, na hap bilong sankamap, na lukim dispela long ol ai bilong yu. Long wanem bai yu no go hapsait long dispela riva Jordan.

3:28  Tasol givim strongpela tok save long Josua, na givim gutpela tok long kirapim em, na strongim em. Long wanem em bai go hapsait long pes bilong dispela manmeri, na em bai kirapim ol long kisim dispela graun, yu bai lukluk long em.

3:29  Olsem yumi bin i stap long ples daun hapsait long Bet-pior.

Chapter 4

4:1  ¶ Olsem na, nau putim ia gut, O Isrel, long ol strongpela tok na long ol pe bilong kot mi skulim yupela long ol, bilong yupela i ken bihainim ol, bai yupela i ken i stap laip, na go insait na kisim dispela graun. God BIKPELA bilong ol papa bilong yupela i givim dispela long yupela.

4:2  Yupela i no ken bungim tok i go long dispela tok mi givim yupela strongpela tok long em. Na tu yupela i no ken rausim wanpela tok long dispela, bai yupela i ken bihainim ol strongpela tok bilong God BIKPELA bilong yupela na mi givim yupela strongpela tok long em.

4:3  Ol ai bilong yupela i bin lukim wanem samting BIKPELA i mekim taim Beal-pior i kamap. Long wanem olgeta man i bihainim Beal-pior, God BIKPELA bilong yu i bin bagarapim ol olgeta long namel long yupela.

4:4  Tasol yupela husat i pas wantaim BIKPELA, em God bilong yupela, olgeta wan wan bilong yupela i stap laip dispela de.

4:5  Harim, mi bin skulim yupela long ol strongpela tok na long ol pe bilong kot, olsem God BIKPELA bilong mi i givim strongpela tok long mi, bai yupela i ken mekim olsem long graun yupela i go long em long kisim dispela.

4:6  Olsem na bihainim na mekim ol, long wanem dispela em i save tru na gutpela save bilong yupela long ol ai bilong ol kantri, husat bai harim olgeta bilong ol dispela strongpela tok, na tok, Tru tumas dispela kantri i gat namba em i manmeri i gat save tru na gutpela save.

4:7  Long wanem, wanem kantri i gat namba olsem, ol i gat God i stap klostu tru long ol olsem God BIKPELA bilong yumi i stap long olgeta samting yumi singaut long Em long mekim?

4:8  Na wanem kantri i gat namba olsem, ol i gat ol strongpela tok na ol tok long pe bilong kot i stretpela tru, olsem olgeta hap bilong dispela lo mi putim dispela long pes bilong yupela tude?

4:9  Tasol yu mas lukaut long yu yet, na lukautim gut sol bilong yu, nogut yu lusim tingting long ol samting tupela ai bilong yu i bin lukim, na nogut ol i lusim bel bilong yu olgeta de bilong laip bilong yu. Tasol yu mas skulim ol pikinini man na ol tumbuna pikinini man long ol.

4:10  Tokaut klia long dispela de yu bin sanap long pes bilong God BIKPELA bilong yu long Horep, em taim BIKPELA i tok long mi olsem, Bungim ol manmeri wantaim long Mi, na bai Mi mekim ol i harim ol tok bilong Mi, bai ol i ken pret long Mi olgeta de ol i stap laip long dispela graun, na bai ol i ken skulim ol pikinini bilong ol.

4:11  Na yupela i kam klostu na sanap long as bilong maunten. Na maunten i kuk long paia i go inap long namel long heven, na dispela i stap wantaim tudak, na ol klaut, na bikpela tudak.

4:12  Na BIKPELA i tok long yupela long namel long dispela paia. Yupela i bin harim nek bilong ol tok, tasol yupela i no lukim wanpela i stap, yupela i harim wanpela nek tasol.

4:13  Na Em i tokaut long yupela long kontrak bilong Em, Em i bin givim strongpela tok long yupela long mekim, em dispela tenpela lo. Na Em i raitim ol long tupela stretpela hap ston.

4:14  Na long dispela taim BIKPELA i givim strongpela tok long mi, long skulim yupela long ol strongpela tok na long ol pe bilong kot, bai yupela i ken bihainim ol long dispela hap graun yupela i go hapsait long kisim dispela.

4:15  Olsem na yupela i mas lukaut gut long yupela yet, long wanem yupela i no bin lukim wanpela kain samting long dispela de BIKPELA i tok long yupela long Horep long tok i kamaut long namel long paia.

4:16  Nogut yupela i mekim yupela yet i sting, na yupela i mekim wanpela piksa long wanpela samting na yupela i bin wokim dispela i luk olsem man o meri,

4:17  O luk olsem wanpela animal i stap long dispela graun, o i luk olsem wanpela pisin i flai long win,

4:18  O i luk olsem wanpela samting i wokabaut long bel long graun, o i luk olsem wanpela pis i stap long ol wara i daunbilo long dispela graun.

4:19  Na nogut yu litimapim ol ai bilong yu i go long heven, na taim yu lukim san na mun na ol sta, em olgeta bikpela lain bilong heven, ol bai kirapim yu long lotu long ol na mekim wok bilong litimapim ol. Em ol God BIKPELA bilong yu i bin makim long i go long olgeta kantri i stap aninit long olgeta hap bilong heven.

4:20  Tasol BIKPELA i bin kisim yupela na bringim yupela i kamaut long aven ain, em ausait long Isip, long i stap wanpela pipel i go long Em bilong kisim ol samting long papa, olsem yupela i stap dispela de.

4:21  Na tu BIKPELA i belhat long mi long pasin yupela i mekim, na Em i tok tru antap long mi no ken go hapsait long Jordan. Na mi no ken i go insait long dispela gutpela graun God BIKPELA bilong yu i bin givim yu olsem samting papa i laik givim pikinini bilong em.

4:22  Tasol mi mas i dai pinis long dispela graun. Mi no ken i go hapsait long Jordan, tasol yupela bai go hapsait na kisim dispela gutpela graun.

4:23  Lukaut long yupela yet, nogut yupela i lusim tingting long kontrak bilong God BIKPELA bilong yupela. Em i bin mekim dispela wantaim yupela. Na yupela i wokim wanpela piksa long god giaman, o samting i luk olsem wanpela samting God BIKPELA bilong yu i bin tambuim yu long wokim.

4:24  Long wanem God BIKPELA bilong yu em i wanpela paia i kukim olgeta, yes Em i wanpela God i jeles.

4:25  Taim yu kamap papa bilong ol pikinini na ol tumbuna pikinini na yu bin sindaun longpela taim long dispela hap graun, na yu bai paulim yupela yet na wokim wanpela piksa long god giaman, o samting i luk olsem wanpela samting, na mekim pasin i nogut long ai bilong God BIKPELA bilong yu, long kirapim Em long belhat,

4:26  Orait mi singaut long heven na dispela graun long i stap witnes bilong kotim yupela long dispela de. Long yupela olgeta bai bagarap kwiktaim long lusim dispela hap graun yupela i laik go hapsait long Jordan long kisim dispela. Yupela i no inap mekim ol de yupela i stap long dispela graun i kamap planti, tasol yupela bai kisim bagarap olgeta.

4:27  Na BIKPELA bai tromoim nabaut yupela namel long ol kantri. Na yupela bai stap liklik lain namel long ol haiden long wanem hap BIKPELA i stiaim yupela.

4:28  Na long dispela hap graun yupela bai bihainim ol god, em wok bilong ol han bilong ol man long diwai na ston. Ol i no inap lukluk o harim o kaikai o smelim.

4:29  Tasol sapos long dispela hap yu wok long painim God BIKPELA bilong yu, yu bai painim pinis Em sapos yu wok long painim Em long bel olgeta bilong yu na long sol olgeta bilong yu.

4:30  Taim yu stap long bikpela hevi na dispela olgeta samting i kamap long yu, yes long ol de i kamap bihain, sapos yu tanim yu yet i go long God BIKPELA bilong yu na bihainim nek bilong Em,

4:31  (Long wanem, BIKPELA, God bilong yu, em i God i pulap long sori,) Em i no lusim yu o bagarapim yu o lusim tingting long kontrak bilong ol papa bilong yu, Em i bin tok tru antap long ol long dispela.

4:32  Long wanem mekim askim nau long ol de i bin kamap pastaim, ol i bin kamap pastaim long yu i go inap long dispela de God i wokim man long dispela graun, na mekim askim long wanpela sait long heven i go long hapsait long wanpela kain samting i bin kamap i olsem dispela bikpela samting i stap, o wanpela i bin harim stori olsem dispela?

4:33  Em i gat wanpela taim wanpela lain manmeri i bin harim nek bilong God i tokaut namel long paia olsem yu bin harim na ol i stap laip?

4:34  O God bin wok long i go na kisim i kam long Em wanpela kantri i stap namel long narapela kantri long ol traim na long ol bikpela mak na long ol samting i winim tingting na long woa na long han i strongpela tru na long han Em i taitim i kam na long ol bikpela samting i pretim man olsem long olgeta samting God BIKPELA bilong yupela i bin mekim long Isip long ol ai bilong yupela?

4:35  God i bin soim dispela long yu, bai yu ken save long BIKPELA Em i stap God, na i no gat narapela i olsem Em.

4:36  Em i mekim yu harim nek bilong Em i kam long heven, bai Em i ken skulim yu. Na long dispela graun Em i soim yu bikpela paia bilong Em. Na yu harim tok bilong Em i kamaut long namel long paia.

4:37  Na Em i laikim ol papa bilong yu, olsem na Em i makim ol pikinini bilong ol i kamap bihain long ol. Na long ai bilong Em, Em i bringim yu i kamaut long Isip long strongpela pawa bilong Em.

4:38  Em long rausim ol kantri i stap long pes bilong yu , na ol i bikpela moa na strongpela moa long yu. Long Em i ken bringim yu i kam insait long givim yu ol graun bilong ol long i stap wanpela samting papa i laik givim pikinini olsem em i stap dispela de.

4:39  Olsem na yu mas save na tingim dispela long bel bilong yu dispela de, long BIKPELA Em i stap God long heven antap na long dispela graun i stap daunbilo, na i no gat narapela i stap.

4:40  Olsem na yu mas bihainim ol strongpela tok bilong Em i stap long buk na ol strongpela tok bilong Em, mi givim strongpela tok long yu long ol tude, bai yu na ol pikinini bilong yu i kamap bihain long yu, yupela i ken i stap gut. Na yu ken mekim ol de yu stap long dispela graun i kamap planti moa. Em graun God BIKPELA bilong yu i givim long yu oltaim oltaim.

4:41  ¶ Long dispela taim Moses i makim tripela biktaun long dispela arere bilong Jordan i stap long hap sankamap,

4:42  Long wanpela i kilim i dai narapela i ken ranawe long dispela, em wanpela husat i kilim i dai wanpela i stap klostu long em, tasol em i no gat laik long bagarapim em na em i no birua long em pastaim, na em i ken ranawe long wanpela bilong ol dispela biktaun. Bai em i ken i stap laip.

4:43  Nem bilong ol dispela biktaun i olsem, Beser i stap long ples i no gat man, long hap graun i no gat diwai na i no gat maunten na em i bilong ol lain bilong Ruben. Na Ramot i stap long Gileat, na i bilong ol lain bilong Gat. Na Golan i stap long Basan, na i bilong ol lain bilong Manasa.

4:44  Na dispela em i lo Moses i putim long ai bilong ol pikinini bilong Isrel.

4:45  Ol dispela em ol testimoni, na ol strongpela tok i stap long buk na ol tok bilong God long pe bilong kot, Moses i tokim ol pikinini bilong Isrel long ol bihain long ol i kam ausait long Isip.

4:46  Em long dispela sait long riva Jordan long ples daun i stap klostu long Bet-pior, long graun bilong Saihon, king bilong ol Amor, na em i stap long Hesbon, na Moses na ol pikinini bilong Isrel i paitim em bihain long ol i lusim Isip na kamaut.

4:47  Na ol i kisim ol graun bilong em, na ol graun bilong Ok, king bilong Basan, tupela i ol king bilong ol Amor na ol i stap long dispela sait long riva Jordan, em long hap sankamap.

4:48  Dispela graun i lusim Aroa i stap long arere bilong riva Arnon na i go long maunten Sion, dispela em i maunten Herman,

4:49  Na olgeta hap graun i stap long dispela ples i no gat diwai na i no gat maunten i stap long dispela sait long riva Jordan i go long hap sankamap i go inap long solwara bilong dispela graun i no gat diwai na i no gat maunten na i stap daunbilo long ol hul wara i kamaut bilong Pisga.

Chapter 5

5:1  ¶ Na Moses i singautim olgeta manmeri bilong Isrel, na em i tokim ol, Harim O Isrel ol strongpela tok bilong God i stap long buk na ol tok bilong God long pe bilong kot mi tokaut long dispela de long ol long ol ia bilong yupela, bai yupela i ken kisim save long ol, na holimpas long ol na bihainim ol.

5:2  God BIKPELA bilong yumi i bin wokim kontrak wantaim yumi long Horep.

5:3  BIKPELA i no wokim dispela kontrak wantaim ol papa bilong yumi, tasol wantaim yumi, yes em yumi, em olgeta bilong yumi i stap hia long dispela de..

5:4  BIKPELA i bin toktok wantaim yupela long pes i lukim pes long maunten na tok i kamaut long namel long paia.

5:5  (Mi bin sanap namel long BIKPELA na yupela long dispela taim, long soim yupela tok bilong BIKPELA, long wanem yupela i pret na as bilong dispela em dispela paia. Na yupela i no go antap long maunten). Na Em i tok,

5:6  ¶ Mi stap God BIKPELA bilong yu, na Mi bringim yu long lusim graun bilong Isip, long lusim ples bilong i stap kalabus.

5:7  Yu no ken bihainim ol arapela god long pes bilong Mi.

5:8  Yu no ken wokim bilong yupela wanpela piksa o wanpela piksa ol i sapim long wanpela samting i stap long heven antap o i stap long dispela graun daunbilo, o i stap long ol wara aninit long dispela graun.

5:9  Yu no ken mekim yu yet i lindaun long ol o mekim wok long ol. Long wanem Mi God BIKPELA bilong yu em i jeles God, na Mi makim sin bilong ol papa i go long ol pikinini inap long tripela o fopela lain tumbuna pikinini bilong ol lain i no laikim tru Mi.

5:10  Na Mi soim sori i go long ol tausen bilong ol manmeri i laikim tru Mi, na bihainim ol strongpela tok bilong Mi.

5:11  Yu no ken yusim nating nem bilong God BIKPELA bilong yu. Long wanem BIKPELA bai i no makim man klinpela sapos em i yusim nating nem bilong Em.

5:12  Bihainim de sabat long makim dispela, olsem God BIKPELA bilong yu i bin givim strongpela tok long yu.

5:13  Sikispela de yu ken hatwok na mekim olgeta wok bilong yu.

5:14  Tasol de namba seven em i sabat bilong God BIKPELA bilong yu. Long em yu no ken mekim wanpela wok, yu, o pikinini man bilong yu, o pikinini meri bilong yu, o wokboi bilong yu, o wokmeri bilong yu, o bulmakau bilong yu, o donki bilong yu, o olgeta bilong ol bulmakau samting bilong yu, o man bilong narapela hap i stap insait long dua bilong banis bilong yu, bai wokboi bilong yu na wokmeri bilong yu i ken malolo olsem yu mekim.

5:15  Na holim tingting long yu bin i stap wokboi long graun bilong Isip, na long God BIKPELA bilong yu i bin bringim yu ausait long dispela hap long han i strong tru na long taim Em i taitim han. Olsem na God BIKPELA bilong yu i givim strongpela tok long yu long bihainim de sabat.

5:16  Givim ona long papa bilong yu na mama bilong yu olsem God BIKPELA bilong yu i bin givim strongpela tok long yu, bai ol de bilong yu i ken kamap planti moa na yu ken i stap gut long graun God BIKPELA bilong yu i givim long yu.

5:17  Yu no ken kilim i dai narapela.

5:18  Na tu yu no ken bagarapim marit long pasin pamuk.

5:19  Na tu yu no ken stil.

5:20  Na tu yu no ken mekim tok giaman long kotim man i stap klostu long yu.

5:21  Na tu yu no ken mangal long kisim meri bilong man i stap klostu long yu. Na tu yu no ken mangal long kisim haus bilong man i stap klostu long yu, o graun bilong em, o wokboi bilong em, o wokmeri bilong em, o bulmakau bilong em, o donki bilong em, o wanpela samting bilong man i stap klostu long yu.

5:22  Ol dispela tok BIKPELA i bin tokim olgeta bilong yupela long bung long maunten, na tok i kamaut long namel long paia, na long klaut, na long bikpela tudak long nek i strong tru. Na Em i no bungim sampela tok moa. Na Em i raitim ol dispela long tupela hap ston na Em i givim tupela long mi.

5:23  ¶ Na em i kamap olsem, taim yupela i harim dispela nek i kamaut long namel bilong bikpela tudak, (long wanem maunten i kuk long paia), yupela i kam klostu long mi, em olgeta hetman bilong ol lain bilong yupela na ol lapun hetman bilong yupela.

5:24  Na yupela i tok, Lukim God BIKPELA bilong yumi i soim yumi glori bilong Em, na bikpela bilong Em, na yumi i harim nek bilong Em i kamaut long namel bilong paia. Dispela de yumi lukluk long God i tok wantaim man na em i stap laip.

5:25  Olsem na nau bilong wanem mipela i mas i dai pinis? Long wanem dispela bikpela paia bai kukim mipela. Sapos mipela i harim nek bilong God BIKPELA bilong yumi wanpela taim moa, orait mipela bai i dai pinis.

5:26  Long wanem, husat bilong olgeta manmeri i bin harim nek bilong God i stap laip taim tok bilong Em i kamaut long namel long paia, olsem mipela na ol i stap laip?

5:27  Yu mas i go klostu na harim olgeta samting God BIKPELA bilong yumi i tokaut long em. Na yu mas tokaut long mipela long olgeta samting God BIKPELA bilong yumi i tokaut long yu, na bai mipela i harim dispela na bihainim dispela.

5:28  Na BIKPELA i harim nek bilong ol tok bilong yupela taim yupela i toktok long mi. Na BIKPELA i tok long mi, Mi bin harim nek bilong ol tok bilong dispela manmeri, ol i bin toktok long yu long dispela. Ol i tok tru long olgeta samting ol bin toktok long em.

5:29  Mi gat strongpela laik long dispela kain bel i stap insait long ol, long ol i pret long Mi na bihainim ol strongpela tok bilong Mi olgeta taim, bai em i ken stap gut long ol na long ol pikinini bilong ol oltaim oltaim.

5:30  Go tokim ol, Yupela go gen insait long ol haus sel bilong yupela.

5:31  Tasol bilong yu, yu mas sanap hia klostu long Mi na bai Mi tok long yu long olgeta strongpela tok na ol strongpela tok i stap long buk na ol pe bilong kot. Yu mas skulim ol long ol, bai ol i ken bihainim ol long dispela graun Mi givim long ol long i stap long em.

5:32  Olsem na yupela i mas strong long bihainim olsem God BIKPELA bilong yupela i bin givim strongpela tok long yupela. Yupela i no ken tanim yupela yet long han sut o long han kais bilong lusim stretpela rot.

5:33  Yupela i mas wokabaut long olgeta pasin God BIKPELA bilong yupela i bin givim yupela strongpela tok long em, bai yupela i ken stap laip, na long yupela i ken stap gut na long yupela i ken mekim ol de yupela i stap long dispela hap graun i kamap planti moa, em graun yupela bai stap long em.

Chapter 6

6:1  ¶ Na ol dispela i ol strongpela tok na ol strongpela tok i stap long buk, na ol tok long pe bilong kot God BIKPELA bilong yupela i bin givim strongpela tok long ol long skulim yupela, bai yupela i ken bihainim ol long graun yupela i go long em long holimpas em.

6:2  Long yu ken pret long God BIKPELA bilong yu na long lukautim olgeta strongpela tok i stap long buk bilong Em na ol strongpela tok bilong Em. Mi givim strongpela tok long dispela long yu na pikinini man bilong yu na tumbuna pikinini man bilong yu long bihainim olgeta de long laip bilong yu na long ol de bilong yu i ken i stap planti.

6:3  Olsem na, harim O Isrel, na lukaut long bihainim dispela, bai em i ken i stap gut long yu, na long yupela i ken kamap bikpela lain moa, olsem God BIKPELA bilong ol papa bilong yu i bin promisim yu, long dispela hap graun i pulap long susu na hani.

6:4  ¶ Harim, O Isrel, God BIKPELA bilong yumi em i wanpela BIKPELA.

6:5  Na yu mas laikim tru God BIKPELA bilong yu long olgeta hap bilong bel bilong yu na long olgeta hap bilong tewel bilong yu na long olgeta strong bilong yu.

6:6  Na ol dispela tok Mi givim strongpela tok long em long yu dispela de, em i mas i stap long bel bilong yu.

6:7  Na yu mas strong long skulim ol pikinini bilong yu long ol. Na yu mas tokaut long ol taim yu sindaun long haus bilong yu, na taim yu wokabaut long rot, na taim yu slipim yu yet, na taim yu kirap.

6:8  Na yu mas pasim ol bilong i stap wanpela mak long han bilong yu, na ol i mas i stap long samting yu pasim long poret namel long tupela ai bilong yu.

6:9  Na yu mas raitim ol antap long ol pos bilong haus bilong yu, na long ol dua bilong banis bilong yu.

6:10  Na em bai stap taim God BIKPELA bilong yu i bin bringim yu insait long dispela hap graun, em graun Em i bin tok tru antap long ol papa bilong yu, long Ebraham, na long Aisak, na long Jekop, long givim yu ol bikpela na gutpela biktaun, na yu no bin wokim ol,

6:11  Na ol haus i pulap long olgeta gutpela samting na yu no bin pulapim ol, na ol hul wara wanpela i bin digim na yu no bin digim ol na ol gaden bilong diwai wain na ol diwai oliv na yu no bin planim ol. Taim yu bin kaikai na stap bel tait,

6:12  Long dispela taim lukaut, nogut yu lusim tingting long BIKPELA dispela wanpela i bringim yu i kamaut long graun bilong Isip long ples bilong kalabus.

6:13  Yu mas pret long God BIKPELA bilong yu na mekim wok bilong Em na yu mas tok tru antap long nem bilong Em.

6:14  Yupela i no ken bihainim ol arapela god, em ol god bilong ol manmeri i stap raun nabaut long yupela.

6:15  (Long wanem God BIKPELA bilong yu e m i jeles God namel long yupela). Nogut belhat bilong God BIKPELA bilong yu i kirap long yu na bagarapim yu long lusim pes bilong dispela graun.

6:16  Yupela i no ken traim God BIKPELA bilong yupela olsem yupela i bin traim Em long Masa.

6:17  ¶ Yupela i mas strong long bihainim ol strongpela tok bilong God BIKPELA bilong yupela na ol testimoni bilong Em, na ol strongpela tok i bilong Em i stap long buk, Em i bin givim strongpela tok long yu long ol dispela.

6:18  Na yu mas mekim ol samting i stretpela na gutpela long ai bilong BIKPELA, bai em i ken stap gut long yu, na long yu ken i go insait na kisim dispela gutpela graun BIKPELA i bin tok tru antap long dispela long ol papa bilong yu.

6:19  Yu mas rausim olgeta birua bilong yu long i stap long pes bilong yu, olsem BIKPELA i bin tok.

6:20  Na taim pikinini man bilong yu i askim yu long taim i laik kamap, na em i tok, Wanem em i mining bilong ol testimoni na ol strongpela tok i stap long buk na ol tok long pe bilong kot God BIKPELA bilong yumi i bin givim strongpela tok long yupela long ol?

6:21  Long dispela taim yu mas tok long pikinini man bilong yu olsem, Mipela i bin i stap ol wokboi nating bilong Fero long Isip na BIKPELA i bringim mipela i lusim Isip long han i strong tru.

6:22  Na BIKPELA i soim ol mak na ol samting i winim tingting, em ol bikpela samting na strongpela samting i kamap long Isip na long Fero na long olgeta wanhaus bilong em, long ol ai bilong mipela.

6:23  Na Em i bringim mipela i kamaut long dispela hap, bai Em i ken bringim mipela i kam insait long givim mipela dispela hap graun Em i bin tok tru antap long dispela long ol papa bilong mipela.

6:24  Na BIKPELA i givim strongpela tok long mipela long bihainim olgeta bilong dispela ol strongpela tok i stap long buk na long pret long God BIKPELA bilong yumi bilong helpim mipela olgeta taim, bai Em i ken helpim yumi stap laip, olsem em i stap dispela de.

6:25  Na dispela bai stap stretpela pasin bilong yumi sapos yumi hatwok long bihainim olgeta bilong dispela ol strongpela tok long pes bilong God BIKPELA bilong yumi, olsem Em i bin givim strongpela tok long yumi.

Chapter 7

7:1  ¶ Taim God BIKPELA bilong yu bai bringim yu insait long dispela hap graun, em hap graun yu go long dispela. Na Em i rausim planti kantri long pes bilong yu, em ol Hit na ol Girga na ol Amor na ol Kenan na ol Peris na ol Hiv na ol Jebus, ol i sevenpela kantri i bikpela moa na strongpela moa long yu.

7:2  Na taim God BIKPELA bilong yu bai givim ol long pes bilong yu, yu mas paitim ol na bagarapim ol olgeta. Yu no ken wokim kontrak wantaim ol, o soim sori i go long ol.

7:3  Na tu yu no ken wokim ol marit wantaim ol. Yu no ken givim pikinini meri bilong yu long pikinini man bilong em, o yu no ken kisim pikinini meri bilong em long maritim pikinini man bilong yu.

7:4  Long wanem ol bai paulim pikinini man bilong yu long bihainim Mi, bai ol i ken mekim wok bilong ol arapela god. Long dispela pasin belhat bilong BIKPELA bai kirap long birua long yu na dispela bai bagarapim yu wantu tasol.

7:5  Tasol yupela mas mekim olsem long ol, yupela mas bagarapim olgeta ol alta bilong ol, na brukim ol god giaman bilong ol, na katim bilong daunim ol bung diwai bilong ol, na kukim long paia ol god giaman ol i bin wokim long han.

7:6  Long wanem yu stap wanpela holi manmeri long God BIKPELA bilong yu. Na God BIKPELA bilong yu i makim yu long i stap wanpela spesel manmeri long Em yet na i winim olgeta manmeri i stap long pes bilong dispela graun.

7:7  BIKPELA i no putim laikim tru bilong Em long yupela o makim yupela long wanem yupela i winim namba bilong narapela manmeri. Long wanem namba bilong ol manmeri bilong yupela i stap daunbilo long olgeta arapela lain manmeri.

7:8  Tasol BIKPELA i bin bringim yupela i kamaut long han i strong tru na Em i baim bek yupela long lusim ples bilong i stap kalabus, em long han bilong Fero, king bilong Isip, long wanem BIKPELA i laikim tru yupela, na long wanem Em i laik bihainim dispela tok tru antap Em i bin tok tru antap long ol papa bilong yupela.

7:9  Olsem na yu mas save long BIKPELA, God bilong yu, Em i God, na Em i God yu inap bilip long Em na Em i bihainim kontrak na sori long ol husat i laikim tru Em na bihainim ol strongpela tok bilong Em, na dispela bai kamap long wan tausen lain tumbuna pikinini i laik kamap bihain.

7:10  Na Em i bekim pe long pes bilong ol, long ol husat i no laikim tru Em long bagarapim ol. Em i no mekim slek pasin long man i no laikim tru Em, tasol Em bai bekim pe long em long pes bilong em.

7:11  Olsem na yu mas bihainim ol strongpela tok na ol strongpela tok i stap long buk na ol tok long pe bilong kot, mi givim strongpela tok long yu long ol, long bihainim ol, long dispela de.

7:12  ¶ Olsem na em bai kamap olsem, sapos yupela i harim gut ol dispela tok long pe bilong kot, na bihainim, na mekim ol, orait BIKPELA, God bilong yu, bai bihainim long yupela dispela kontrak na dispela sori Em i tok tru antap long ol tumbuna papa bilong yu.

7:13  Na Em bai laikim tru yu na blesim yu na mekim yu i kamap planti. Na tu Em bai blesim ol pikinini bilong yu na ol samting i kamap long graun bilong yu, em kon samting bilong yu na wain bilong yu na wel bilong yu na ol pikinini bilong bulmakau bilong yu na ol bung bilong sipsip bilong yu, long dispela hap graun Em i bin tok tru antap long dispela long ol papa bilong yu long givim long yu.

7:14  God bai blesim yu moa yet long olgeta arapela lain manmeri. I no gat wanpela man i no inap kamapim pikinini, o meri i no inap karim pikinini namel long yupela, o namel long ol bulmakau samting bilong yupela.

7:15  Na BIKPELA bai tekewe olgeta sik long yu, na bai Em i no putim wanpela bilong ol dispela sik nogut bilong Isip long yu, yu save long ol. Tasol Em bai putim ol long olgeta bilong ol i no laikim tru yu.

7:16  Na yu mas pinisim olgeta bilong dispela manmeri God BIKPELA bilong yu bai givim yu. Ai bilong yu i no ken sori long ol. Na tu yu no ken mekim wok long bihainim ol god bilong ol. Long wanem dispela bai stap wanpela umben long yu.

7:17  Sapos yu bai tok long bel bilong yu, Ol dispela kantri i gat planti manmeri moa long mi. Olsem wanem mi ken rausim ol?

7:18  Yu no ken pret long ol, tasol holim tingting gut long wanem samting God bilong yu i mekim long Fero na long olgeta manmeri bilong Isip,

7:19  Em ol bikpela traim tupela ai bilong yu i bin lukim, na ol mak, na ol samting i winim tingting, na long han i strong tru, na long han Em i taitim. God BIKPELA bilong yu i bin bringim yu i kamaut long ol dispela. God BIKPELA bilong yu bai mekim olsem long olgeta manmeri yu pret long ol.

7:20  Na tu God BIKPELA bilong yu bai salim ol ninik namel long ol inap long ol husat i stap yet na ol i haitim ol yet long yu, ol i bagarap olgeta.

7:21  Yu no ken pret long ol. Long wanem God BIKPELA bilong yu Em i stap namel long yupela na Em i God i strongpela na wanpela i kirapim pret.

7:22  Na God BIKPELA bilong yu bai rausim isi isi ol dispela kantri i stap long pes bilong yu. Yu no ken pinisim ol hariap, nogut ol animal bilong ples gras i kamap planti tumas long yu.

7:23  Tasol God BIKPELA bilong yu bai givim ol dispela kantri long yu, na Em bai bagarapim ol long bikpela bagarap, inap long ol i bagarap olgeta.

7:24  Na Em bai givim ol king bilong ol i go long han bilong yu, na yu mas bagarapim nem bilong ol long i stap aninit long heven. I no gat wanpela man inap sanap long pes bilong yu inap long yu bin bagarapim ol.

7:25  Yupela i mas kukim long paia ol piksa long ol god bilong ol. Yu no ken mangal long silva na gol i stap long ol, o kisim dispela i kam long yu. Nogut umben bilong dispela i kisim yu. Long wanem dispela i sting tru long tingting bilong God BIKPELA bilong yu.

7:26  Na tu yu no ken bringim wanpela samting i sting tru long tingting bilong God insait long haus bilong yu. Nogut yu stap wanpela samting God i laik bagarapim olsem dispela. Tasol yu mas i no laikim tru long kisim dispela, na yu mas tingim dispela em i samting nogut tru, long wanem God i laik bagarapim dispela samting.

Chapter 8

8:1  ¶ Yupela i mas lukautim bilong bihainim olgeta strongpela tok mi givim strongpela tok long dispela long yu long dispela de, bai yupela i ken i stap laip na kamap planti na go insait na kisim dispela hap graun BIKPELA i bin tok tru antap long dispela long ol papa bilong yupela.

8:2  Na yu mas holim tingting long olgeta we God BIKPELA bilong yu i yusim bilong i stap pasman long yu dispela foti yia long ples i no gat man, long skulim yu long daun pasin na long traim yu, long kisim save wanem samting i stap long bel bilong yu, bai yu holimpas ol strongpela tok bilong Em, o nogat.

8:3  Na Em i givim daun pasin long yu na larim yu i stap hangre na Em i givim kaikai long yu long mana, na yu no save long dispela, na tu ol papa bilong yu i no save, bai Em i ken mekim yu save olsem, man i no stap laip long bret tasol. Tasol man i stap laip long olgeta wan wan tok i kamaut long maus bilong BIKPELA.

8:4  Long dispela foti yia ol klos bilong yu i no kamap olpela long yu, na tu fut bilong yu i no solap.

8:5  Na tu, yu mas tingting gut long bel bilong yu long dispela, olsem wanpela man i stretim pikinini man bilong em olsem tasol God BIKPELA bilong yu i stretim yu.

8:6  Olsem na, yu mas holimpas ol strongpela tok bilong God BIKPELA bilong yu, long wokabaut long we bilong Em na long pret long Em.

8:7  Long wanem God BIKPELA bilong yu i bringim yu long wanpela gutpela graun, em graun bilong ol liklik wara riva na long ol hap wara i kamaut long graun na ol wara i go daunbilo tru i kamaut long ol ples daun na ol liklik maunten.

8:8  Em graun bilong wit na bali na ol diwai wain samting na ol diwai fik na ol pomigranet Em graun bilong wel oliv na hani.

8:9  Long dispela graun yu ken kaikai bret na em i no kamap sot, na long em yu no ken kamap sot long wanpela samting. Long dispela hap graun ol ston i stap ain, na yu ken digim bras i kamaut long ol liklik maunten bilong em.

8:10  ¶ Taim yu bin kaikai na yu bel tait, long dispela taim yu mas blesim God BIKPELA bilong yu, bilong dispela gutpela graun Em i bin givim dispela long yu.

8:11  Lukaut long yu no lusim tingting long God BIKPELA bilong yu, long yu no holimpas ol strongpela tok bilong Em, na ol tok bilong Em long pe bilong kot, na ol strongpela tok bilong Em i stap long buk. Mi givim strongpela tok long yu long dispela samting long dispela de.

8:12  Nogut taim yu bin kaikai na stap bel tait, na yu bin wokim ol naispela haus na stap insait long ol.

8:13  Na taim ol bulmakau samting bilong yu na ol sipsip samting bilong yu i kamap planti, na silva bilong yu na gol bilong yu i kamap planti, na olgeta samting bilong yu i kamap planti,

8:14  Lukaut long dispela taim nogut yu litimapim bel bilong yu na yu lusim tingting long God BIKPELA bilong yu, Em i bin bringim yu i kamaut long graun bilong Isip na long ples bilong i stap kalabus.

8:15  Em i bin go pas long yu long olgeta wokabaut long dispela bikpela ples i no gat man na dispela i ples bilong pret , long em ol snek i gat gip i stap na ol binatang i gat nil na ples drai, em ples i no gat wara i stap na Em i bin bringim wara i kamaut long bikpela ston masis bilong helpim yu.

8:16  Em i bin givim kaikai long yu long ples i no gat man long mana, na ol papa bilong yu i no save long dispela, bai Em i ken givim yu daun pasin na long Em i ken traim yu, long Em i ken mekim gutpela pasin long yu long dispela las hap bilong wokabaut.

8:17  Nogut yu tok long bel bilong yu, Pawa bilong mi na strong bilong han bilong mi i bin givim mi ol dispela mani samting.

8:18  Tasol yu mas holim tingting long God BIKPELA bilong yu. Long wanem em i Em husat i givim yu pawa long kisim mani samting, bai Em i ken strongim kontrak bilong Em, Em i bin tok tru antap long dispela long ol papa bilong yu, olsem em i stap long dispela de.

8:19  Na em bai stap, sapos yu lusim tingting long God BIKPELA bilong yu na wokabaut long bihainim ol arapela god na mekim wok long ol na lotu long ol, mi tokaut klia long birua long yupela dispela de olsem, tru tumas yupela bai bagarap olgeta.

8:20  Olsem ol kantri BIKPELA i bagarapim ol long pes bilong yupela, olsem tasol bai yupela i bagarap. Long wanem yupela i no laik bihainim nek bilong God BIKPELA bilong yupela.

Chapter 9

9:1  ¶ Harim, O Isrel, yu stap long i go hapsait long Jordan dispela de, long go insait long kisim graun bilong ol kantri i bikpela moa na strongpela moa long yu yet. Ol i gat ol biktaun i bikpela tru na ol i gat banis i go antap long heven.

9:2  Ol i manmeri i bikpela na longpela. Ol i ol pikinini bilong Anak na yu save long em na yu bin harim tok long ol olsem, Husat inap long sanap long pes bilong ol pikinini bilong Anak!

9:3  Olsem na yu mas kisim save long dispela de olsem God BIKPELA bilong yu em i man i go hapsait paslain long yu. Em i olsem wanpela paia i kukim ol samting na Em bai bagarapim ol na Em bai bringim ol daun long pes bilong yu, olsem bai yu rausim ol na bagarapim ol kwiktaim, olsem BIKPELA i bin tok long yu.

9:4  Bihain long God BIKPELA bilong yu i bin rausim ol long pes bilong yu, yu no ken tok long bel bilong yu na tok, Stretpela pasin bilong mi em i as bilong BIKPELA i bin bringim mi insait long kisim dispela graun. Tasol pasin nogut bilong ol dispela kantri em i as bilong BIKPELA i rausim ol long pes bilong yu.

9:5  Em i no long stretpela pasin bilong yu, o long stretpela pasin bilong bel bilong yu, long yu go long kisim graun bilong ol. Tasol em long pasin nogut bilong ol dispela kantri BIKPELA i rausim ol long pes bilong yu, na long Em i ken bihainim dispela tok BIKPELA i bin tok tru antap long dispela long ol papa bilong yu, Em Ebraham, na Aisak na Jekop.

9:6  Olsem na yu mas kisim save long dispela, God BIKPELA bilong yu i no givim yu dispela gutpela graun long kisim em long stretpela pasin bilong yu, nogat. Long wanem yu stap wanpela bikhet lain manmeri.

9:7  ¶ Holim tingting na no ken lusim tingting long we yu bin kirapim belhat long God BIKPELA bilong yu long ples i no gat man i go long de yu bin lusim graun bilong Isip inap long yupela i kamap long dispela ples, yupela i sakim tok bilong BIKPELA.

9:8  Na tu long Horep yupela i kirapim belhat bilong BIKPELA inap long BIKPELA i kros long yupela na Em i laik bagarapim yupela.

9:9  Taim mi go antap long maunten long kisim tupela hap ston, yes em hap ston bilong kontrak BIKPELA i mekim wantaim yupela. Long dispela taim mi stap long maunten foti de na foti nait, na mi no kaikai bret o dring wara.

9:10  Na BIKPELA i givim long mi tupela hap ston, pinga bilong God i bin rait long tupela na long tupela ol rait i tokaut long olgeta tok BIKPELA i tokim yupela long maunten, na tok i kamaut long namel long paia long de bilong dispela bung.

9:11  Na em i kamap olsem, long pinis bilong foti de na foti nait BIKPELA i givim mi dispela tupela hap ston, yes em tupela hap ston bilong dispela kontrak.

9:12  Na BIKPELA i tok long mi, Kirap, yu mas i go daun kwiktaim long lusim hia. Long wanem ol manmeri bilong yu, yu bin bringim ol i kamaut long lusim Isip, ol i paulim ol yet. Kwiktaim ol i tanim bilong lusim we Mi bin givim strongpela tok long ol long dispela. Ol i bin kukim bilong wokim wanpela piksa long god giaman.

9:13  Na tu moa yet BIKPELA i tok long mi na tok, Mi bin lukim dispela manmeri na harim, em i wanpela bikhet lain manmeri.

9:14  Larim Mi, bai Mi ken bagarapim ol na rausim nem bilong ol long aninit long heven. Na bai Mi kirapim long yu wanpela kantri i strongpela moa na bikpela moa long ol.

9:15  Olsem na mi tanim mi yet na kam daun long maunten, na dispela maunten i kuk long paia. Na tupela hap ston bilong kontrak i stap long tupela han bilong mi.

9:16  Na mi lukluk na harim, yupela i bin mekim sin long God BIKPELA bilong yupela , na yupela i bin wokim long paia wanpela piksa long pikinini bulmakau. Kwiktaim yupela i bin tanim long lusim dispela we BIKPELA i bin givim strongpela tok long yupela long dispela.

9:17  Na mi kisim tupela hap ston na tromoi tupela long lusim tupela han bilong mi na brukim tupela long ol ai bilong yupela.

9:18  Na mi pundaun long pes bilong BIKPELA olsem mi bin mekim nambawan taim, na stap foti de na foti nait. Mi no bin kaikai bret o dring wara, na as bilong olgeta bilong dispela em i ol sin bilong yupela. Na ol sin bilong yupela i olsem, long yupela i mekim pasin nogut long ai bilong BIKPELA long kirapim Em long belhat

9:19  Long wanem mi pret long belhat na bikpela kros, long dispela BIKPELA i belhat nogut tru long yupela long bagarapim yupela. Tasol BIKPELA i harim tok bilong mi long dispela taim tu.

9:20  Na BIKPELA i kros nogut tru long Eron na Em i laik bagarapim em. Na mi beten bilong helpim Eron tu long dispela taim.

9:21  Na mi kisim sin bilong yupela, em dispela piksa long pikinini bulmakau, yupela i bin wokim dispela, na mi kukim dispela long paia, na paitim dispela long lek na brukbrukim dispela inap long em i kamap ol liklik hap, yes inap long em i kamap liklik tru olsem das. Na mi tromoi dispela das long dispela i go long liklik wara riva i kamdaun ausait long maunten.

9:22  Na long Tabera na long Masa na long Kibrot-hatava yupela i bin kirapim BIKPELA long belhat.

9:23  Na tu, taim BIKPELA i salim yupela long lusim Kedes-bania, na Em i tok, Go antap na kisim dispela hap graun Mi bin givim dispela long yupela. Long dispela taim yupela i sakim strongpela tok bilong God BIKPELA bilong yupela na yupela i no bilipim Em, o harim nek bilong Em.

9:24  Yupela i bin sakim tok bilong BIKPELA long de mi kisim save long yupela inap long nau.

9:25  Olsem mi pundaun long pes bilong BIKPELA foti de na foti nait, olsem mi pundaun long namba wan taim, long wanem BIKPELA i bin tok long Em bai bagarapim yupela.

9:26  Olsem na, mi beten long BIKPELA, na tok, O Bikpela God, Yu no ken bagarapim ol manmeri bilong yu, na dispela samting Yu bin kisim. Yu bin baim bek ol long bikpela pasin bilong Yu, na Yu bin bringim ol i kamaut long Isip long strongpela han bilong Yu.

9:27  Holim tingting long ol wokboi bilong Yu, long Ebraham na Aisak na Jekop. Yu no ken lukluk long bikhet pasin bilong dispela manmeri, o long ol pasin nogut bilong ol, o long sin bilong ol.

9:28  Nogut ol manmeri bilong dispela hap graun Yu bin bringim mipela i kamaut long em, ol i tok, Em i bin bringim ol i go ausait long kilim ol i dai long ples i no gat man, na as bilong dispela i BIKPELA i no inap long bringim ol i kam insait long dispela hap graun Em i bin promisim ol, na narapela as i olsem Em i no laikim tru ol.

9:29  Yet ol i stap ol manmeri bilong Yu na ol samting yu bin kisim, na Yu bin bringim ol i kamaut long bikpela pawa bilong Yu, na long han Yu bin taitim.

Chapter 10

10:1  ¶ Long dispela taim BIKPELA i tok long mi, Yu mas katim tupela hap ston olsem namba wan tupela na kamap long Mi long maunten, na yu mas wokim wanpela bokis long diwai.

10:2  Na bai Mi rait long tupela hap ston ol tok i bin i stap long namba wan tupela hap ston yu bin brukim ol, na yu mas putim tupela insait long bokis.

10:3  Na mi wokim wanpela bokis long diwai sitim, na mi katim tupela hap ston olsem namba wan tupela, na mi go antap long maunten, na mi gat dispela tupela hap ston long han bilong mi.

10:4  Na Em i rait long tupela hap ston long bihainim namba wan rait, em dispela tenpela strongpela tok BIKPELA i tok long yupela long dispela long maunten na tok i kamaut long namel long paia long de bilong dispela bung. Na BIKPELA i givim tupela long mi.

10:5  Na mi tanim mi yet na kam daun long maunten, na mi putim tupela hap ston insait long bokis mi bin wokim dispela na tupela i stap long dispela bokis, olsem BIKPELA i givim strongpela tok long mi.

10:6  Na ol pikinini bilong Isrel i wokabaut long lusim Berot bilong ol pikinini bilong Jakan na i go long Mosera. Eron i dai pinis long dispela ples na ol i planim em long dispela ples. Na Eleasar pikinini man bilong em i kisim wok bilong em na wok long wok bilong pris.

10:7  Ol i lusim dispela ples na wokabaut long Gutgoda. Na ol i lusim Gutgoda na go long Jotbat, em graun bilong ol wara riva.

10:8  Long dispela taim BIKPELA i makim lain bilong Livai long karim bokis bilong kontrak bilong BIKPELA, na long sanap long pes bilong BIKPELA long mekim wok long Em, na long blesim nem bilong Em inap long dispela de.

10:9  Olsem na, Livai i no kisim wanpela hap o ol samting wantaim ol brata bilong em. BIKPELA em i olsem ol samting bilong em, olsem God BIKPELA bilong yu i promisim em.

10:10  Na mi bin stap long maunten, olsem namba wan taim, foti de na foti nait. Na BIKPELA i harim tok bilong mi long dispela taim tu, na BIKPELA i orait long Em i no bagarapim yu.

10:11  Na BIKPELA i tokim mi, Kirap, mekim wokabaut bilong yu long ai bilong ol manmeri, bai ol i ken i go insait na kisim dispela hap graun, Mi bin tok tru antap long dispela long ol papa bilong ol long givim dispela long ol.

10:12  ¶ Na nau Isrel, God BIKPELA bilong yu i makim wanem samting long yu mas mekim? Tasol em long pret long God BIKPELA bilong yu, na long wokabaut long olgeta we bilong Em, na long laikim tru Em, na long mekim wok long God BIKPELA bilong yu long olgeta hap bilong bel bilong yu na long olgeta hap bilong tewel bilong yu,

10:13  Na long holimpas ol strongpela tok bilong BIKPELA na ol strongpela tok i stap long buk bilong Em. Mi givim yu strongpela tok long ol dispela long dispela de bilong helpim yu.

10:14  Harim, heven na heven bilong ol heven na tu dispela graun wantaim olgeta samting i stap long em, ol i bilong God BIKPELA bilong yu.

10:15  Tasol BIKPELA i gat bikpela amamas long ol papa bilong yu long laikim tru ol na Em i makim ol pikinini na tumbuna pikinini bilong ol i kamap bihain long ol, na yupela i winim olgeta arapela manmeri olsem em i stap dispela de.

10:16  Olsem na yupela i mas mekim pasin i olsem yupela i katim skin long bel bilong yupela, na yupela i no ken stap bikhet moa.

10:17  Long wanem God BIKPELA bilong yupela em i God bilong ol god na Bikpela bilong ol bikpela. Em i wanpela bikpela God na Em i strongpela na Em i pretim man. Em i no tingim wanpela man i winim narapela na tu Em i no kisim pe bilong grisim.

10:18  Em i wokim stretpela kot long ol pikinini i nogat papa na meri man bilong em i dai pinis, na Em i laikim tru man o meri bilong narapela ples, long Em i givim em kaikai na klos.

10:19  Olsem na, yupela i mas laikim tru man o meri bilong narapela ples. Long wanem yupela i bin i stap lain bilong narapela ples long graun bilong Isip.

10:20  Yu mas pret long God BIKPELA bilong yu, yu mas mekim wok long Em na yu mas holimpas long Em na tok tru antap long nem bilong Em.

10:21  Em i stap wanpela yu mas litimapim na Em i stap God bilong yu. Em i bin wokim long helpim yu ol dispela bikpela samting na samting bilong pretim ol man, na ol ai bilong yu i bin lukim dispela.

10:22  Ol papa bilong yu i bin i go daun long Isip wantaim seventi manmeri. Na nau God BIKPELA bilong yu i mekim yu i kamap olsem ol sta bilong heven long namba bilong yu.

Chapter 11

11:1  ¶ Olsem na yu mas laikim tru God BIKPELA bilong yu. Na yu mas holimpas olgeta taim long ol samting Em i givim yu long lukautim na ol lo i stap long buk bilong Em, na ol tok long pe bilong kot bilong Em, na ol strongpela tok bilong Em.

11:2  Na yupela i mas save dispela de. Long wanem mi no tok wantaim ol pikinini bilong yupela, lain i no save na lain i no bin lukim pasin bilong mekim save bilong God BIKPELA bilong yupela, na ol bikpela samting Em i mekim, na strongpela han bilong Em, na taim Em i taitim han bilong Em,

11:3  Na ol mirakel bilong Em, na ol samting Em i mekim, Em i wokim ol dispela long namel bilong Isip na long Fero, king bilong Isip, na long olgeta hap bilong graun bilong em.

11:4  Na ol i no save long wanem samting Em i mekim long ami bilong Isip, na long ol hos bilong ol, na long ol karis bilong ol, long we Em i mekim wara bilong Retsi i karamapim ol taim ol i ranim yupela, na long we BIKPELA i bin bagarapim ol inap long dispela de.

11:5  Na long wanem samting Em i bin mekim long yupela long ples i no gat man, inap long yupela i kam long dispela ples.

11:6  Na wanem samting Em i mekim long Detan na Abairam, tupela pikinini man bilong Eliap, na em i pikinini man bilong Ruben, long we graun i opim maus bilong em na daunim ol na ol famili bilong ol, na ol haus sel bilong ol, na olgeta kago i stap wantaim ol, na dispela i kamap long namel long olgeta lain bilong Isrel.

11:7  Tasol ol ai bilong yupela i bin lukim olgeta bilong ol dispela bikpela wok bilong BIKPELA, taim Em i bin mekim ol dispela.

11:8  ¶ Olsem na yupela i mas holimpas olgeta bilong ol dispela strongpela tok mi givim strongpela tok long em dispela de, bai yupela i ken i stap strong na go insait na kisim dispela graun long wanem hap yupela i go long kisim em.

11:9  Na long yupela i ken mekim ol de bilong yupela i stap long dispela hap graun i kamap planti. Em graun BIKPELA i tok tru antap long ol papa bilong yupela long givim long ol na long ol pikinini na tumbuna pikinini bilong ol. Em i graun i gat planti susu na hani.

11:10  Long wanem dispela hap graun yu go long em long kisim em, em i no olsem graun bilong Isip, long hap yupela i bin kamaut long em. Long Isip yu bin tromoi pikinini kaikai bilong yu, na yu bin givim wara long em long fut bilong yu, olsem wanpela gaden bilong ol sayor.

11:11  Tasol dispela hap graun yupela i go long em long kisim em, em i graun bilong ol liklik maunten na ol ples daun na em i dringim wara long ren bilong heven.

11:12  Em graun God BIKPELA bilong yu i laikim em na ol ai bilong God BIKPELA bilong yu i lukluk long em, long stat bilong yia inap long pinis bilong yia.

11:13  Na em bai kamap olsem, sapos yupela bai harim gut ol strongpela tok bilong mi, mi givim strongpela tok long dispela long yupela long dispela de, long laikim tru God BIKPELA bilong yupela, na long mekim wok long Em long olgeta hap bilong bel bilong yupela na long olgeta hap bilong tewel bilong yupela,

11:14  Bai Mi givim yupela ren bilong graun bilong yupela long taim bilong em stret. Em namba wan ren na ren i kamap bihain, bai yu ken bungim ol kon samting bilong yu na ol wain bilong yu na ol wel bilong yu.

11:15  Na bai Mi salim i kam gras long ol ples op bilong yu bilong ol bulmakau samting bilong yu i ken kaikai, bai yu ken kaikai na stap bel tait.

11:16  Lukaut long yupela yet, bai bel bilong yupela i no giamanim yupela, na yupela i lusim rot na mekim wok long ol arapela god na lotu long ol.

11:17  Na long dispela taim belhat bilong BIKPELA bai kamap long yupela na Em i pasim heven, bai ren i no stap na long graun i no givim ol kaikai bilong em. Na nogut long yupela i bagarap kwiktaim long lusim dispela gutpela graun BIKPELA i givim dispela long yupela.

11:18  ¶ Olsem na yupela i mas holimpas ol tok bilong Mi long bel bilong yupela na long tewel bilong yupela, na pasim ol bilong wanpela mak long han bilong yupela na long ol i ken i stap long poret namel long tupela ai bilong yupela.

11:19  Na yupela i mas skulim ol pikinini bilong yupela long ol na toktok long ol taim yu sindaun long haus bilong yu na taim yu wokabaut long rot, na taim yu slipim yu yet na taim yu kirap.

11:20  Na yu mas raitim ol long ol pos bilong dua bilong haus bilong yu na long ol dua bilong banis bilong yu,

11:21  Bai ol de bilong yupela i ken i stap planti na tu ol de bilong ol pikinini bilong yupela , long dispela hap graun BIKPELA i bin tok tru antap long dispela long ol papa bilong yupela long givim long ol, olsem ol de bilong heven long dispela graun.

11:22  Long wanem sapos yupela i strong long bihainim olgeta bilong ol dispela strongpela tok mi givim strongpela tok long yupela long dispela, long bihainim ol na long laikim tru God BIKPELA bilong yupela na long wokabaut long olgeta pasin bilong Em na long holimpas long Em,

11:23  Long dispela taim BIKPELA bai rausim olgeta bilong ol dispela kantri long lusim pes bilong yupela, na yupela bai kisim ol kantri i bikpela moa na strongpela moa long yupela yet.

11:24  Olgeta hap aninit bilong ol fut bilong yupela i wokabaut long em bai i bilong yupela. Em long lusim ples i no gat man na Lebanon, em long lusim wara riva, dispela wara Yufretis, inap long dispela las bikpela solwara. Ol dispela bai stap ol arere bilong graun bilong yupela.

11:25  Na i no gat wanpela man inap sanap long pes bilong yupela. Long wanem God BIKPELA bilong yupela bai putim pret long yupela na bikpela wari long yupela long ol manmeri bilong olgeta hap graun yupela bai wokabaut long em, olsem Em i bin tokim yupela.

11:26  ¶ Harim, mi putim wanpela blesing na wanpela samting bilong kotim yupela i stap long pes bilong yupela dispela de.

11:27  Wanpela blesing sapos yupela i bihainim ol strongpela tok bilong God BIKPELA bilong yupela, mi givim strongpela tok long dispela long yupela long dispela de.

11:28  Na wanpela samting bilong kotim yupela, sapos yupela i no laik bihainim ol strongpela tok bilong God BIKPELA bilong yupela. Tasol yupela i tanim yupela yet long lusim pasin mi givim strongpela tok long yupela long dispela long dispela de, long i go long bihainim ol arapela god yupela i no bin save long ol.

11:29  Na em bai kamap olsem taim God BIKPELA bilong yu i bin bringim yu insait long dispela hap graun, em hap yu go long kisim dispela, long yu mas putim blesing long maunten Gerisim na dispela samting bilong kotim yupela long maunten Ebal.

11:30  Ating i tru long ol i stap long hapsait long wara Jordan, long rot bilong san i go daun, long graun bilong ol Kenan, na ol i stap long ples i no gat wara i stap hapsait long Gilgal, klostu long stretpela graun bilong More, a?

11:31  Long wanem yupela bai go hapsait long Jordan long go insait long kisim dispela hap graun God BIKPELA bilong yupela i givim dispela long yupela na yupela bai kisim dispela na stap long em.

11:32  Na yupela i mas stap strong long mekim olgeta bilong ol strongpela tok i stap long buk na ol tok long ol pe bilong kot mi putim long pes bilong yupela dispela de.

Chapter 12

12:1  ¶ Ol dispela em ol strongpela tok i stap long buk na ol tok long pe bilong kot, yupela i mas strong long holimpas long mekim ol long dispela hap graun God BIKPELA bilong ol papa bilong yu i givim dispela long yu long kisim em olgeta de yupela i stap laip long dispela graun.

12:2  Yupela i mas bagarapim olgeta, olgeta ples ol kantri bai yupela i kisim i bin mekim wok long ol god bilong ol long em. Em long ol maunten i antap tru na long ol liklik maunten na aninit olgeta wan wan grinpela diwai.

12:3  Na yupela i mas brukim i kam daun ol alta bilong ol na brukim ol bikpela pos bilong ol na kukim ol bung diwai bilong lotu long paia. Na yupela i mas katim long daunim ol piksa ol i bin wokim long ol god bilong ol na bagarapim ol nem bilong ol long lusim dispela ples.

12:4  Yupela i no ken mekim olsem long God BIKPELA bilong yupela.

12:5  ¶ Tasol long dispela wanpela ples God BIKPELA bilong yupela bai makim long olgeta lain bilong yupela long putim nem bilong Em long em, yes long ples Em i stap long em, yupela mas wok long painim na long dispela ples yu mas i kam.

12:6  Na long dispela ples yupela i mas bringim ol ofa bilong kukim bilong yupela, na pasin bilong kilim animal bilong mekim ofa bilong yupela, na ol namba ten hap bilong yupela, na ofa bilong litimapim bilong han bilong yupela, na ol strongpela promis long God, na ol ofa yupela i givim long laik bilong yupela yet, na ol namba wan pikinini bilong bulmakau samting bilong yupela na long ol sipsip samting bilong yupela.

12:7  Na yupela i mas kaikai long pes bilong God BIKPELA bilong yupela long dispela ples. Na yupela i mas amamas tru long olgeta samting yupela i putim han bilong yupela long em, em yupela na ol wanhaus bilong yupela, long ol samting God BIKPELA bilong yu i bin blesim yu.

12:8  Yupela i no ken mekim pasin i bihainim olgeta samting yumi mekim hia long dispela de, em long olgeta wan wan man i mekim pasin i stretpela long ol ai bilong em yet.

12:9  Long wanem yupela i no kam yet long dispela malolo na long dispela samting bilong kisim long papa, God BIKPELA bilong yupela i givim dispela long yupela.

12:10  Tasol taim yupela i go hapsait long Jordan na stap long dispela hap graun God BIKPELA bilong yupela i givim dispela long yupela long kisim ol samting bilong papa, na taim Em i givim yupela malolo long olgeta birua bilong yupela i stap raun nabaut long yupela i ken i sindaun gut,

12:11  Long dispela taim wanpela ples bai i stap, na God BIKPELA bilong yupela bai makim dispela long mekim nem bilong Em i stap long dispela ples. Yupela mas bringim olgeta samting mi givim strongpela tok long yupela long dispela ples, em ol ofa bilong kukim bilong yupela na ol ofa bilong kilim animal bilong yupela na ol namba ten hap, na ol ofa bilong litimapim bilong han bilong yupela na olgeta gutpela strongpela promis bilong yupela, na yupela i mekim dispela strongpela promis i go long BIKPELA.

12:12  Na yupela i mas amamas tru long pes bilong God BIKPELA bilong yupela, em yupela na ol pikinini man bilong yupela na ol pikinini meri bilong yupela, na ol wokboi bilong yupela na ol wokmeri bilong yupela, na dispela man bilong lain bilong Livai i stap insait long dua bilong banis bilong yupela, long wanem em i no gat wanpela hap o samting papa i givim long yupela.

12:13  Lukaut long yu yet, long yu no ken mekim ofa long ol ofa bilong kukim long olgeta ples yu lukim.

12:14  Tasol yu mas mekim ofa long dispela ples BIKPELA bai makim long graun bilong wanpela bilong ol lain bilong yu. Long dispela ples yu mas ofaim ol ofa bilong kukim bilong yu, na long dispela ples yu mas mekim olgeta samting mi givim strongpela tok long yu long em.

12:15  Tasol yu ken kilim na kaikai mit long olgeta dua bilong banis bilong yu long wanem samting tewel bilong yu i gat bikpela laik long kisim, bilong kisim blesing bilong God BIKPELA bilong yu Em i bin givim dispela long yu. Ol manmeri i no klin na ol i klin olgeta i ken kaikai dispela, em i olsem bikpela abus dia robak na olsem abus i dia man hat.

12:16  Wanpela samting tasol, yupela i no ken kaikai blut. Yupela i mas kapsaitim dispela long graun olsem wara.

12:17  Yu no ken kaikai insait long dua bilong banis bilong yu olsem, wanpela bilong tenpela hap bilong kon samting bilong yu o bilong wain bilong yu o bilong wel bilong yu o long namba wan pikinini bilong ol bulmakau samting bilong yu o long ol sipsip samting bilong yu o wanpela samting bilong ol strongpela promis long God bilong yu, yu bin mekim strongpela promis long dispela, o ol ofa yu givim long laik bilong yu, o ofa bilong litimapim long han bilong yu.

12:18  Tasol yu mas kaikai ol long pes bilong God BIKPELA bilong yu long dispela ples God BIKPELA bilong yu bai makim dispela, em yu na pikinini man bilong yu na pikinini meri bilong yu, na wokboi bilong yu na wokmeri bilong yu, na dispela man bilong lain Livai, em i stap insait ol dua bilong banis bilong yu. Na yu mas amamas tru long pes bilong God BIKPELA bilong yu long olgeta samting yu putim tupela han bilong yu long em.

12:19  Lukaut long yu yet, long yu no ken lusim dispela man long lain Livai inap long taim yu stap laip long dispela graun.

12:20  Taim God BIKPELA bilong yu bai mekim arere bilong graun bilong yu i kamap bikpela moa, olsem Em i bin promisim yu, na yu bai tok, Mi laik kaikai mit, long wanem tewel bilong yu i strong long kaikai mit. Yu ken kaikai mit, long wanem samting tewel bilong yu i strong long kisim.

12:21  Sapos dispela ples God BIKPELA bilong yu i bin makim long putim nem bilong Em long em i stap longwe tumas long yu, long dispela taim yu mas kilim sampela bilong ol bulmakau samting bilong yu na sampela bilong ol sipsip samting bilong yu, BIKPELA i bin givim ol long yu, olsem mi bin givim strongpela tok long yu, na yu mas kaikai wanem samting tewel bilong yu i strong long kisim insait long dua bilong banis bilong yu.

12:22  Em i olsem yu kaikai bikpela abus dia robak na abus dia man hat, olsem tasol yu mas kaikai ol. Ol i no stap klin na ol i stap klin olgeta bai kaikai long ol.

12:23  Wanpela samting tasol, yu mas i stap klia long em, yu no ken kaikai blut, long wanem blut em i laip na yu no ken kaikai laip wantaim mit.

12:24  Yu no ken kaikai dispela. Yu mas kapsaitim em long graun olsem wara.

12:25  Yu no ken kaikai dispela, bai yu na ol pikinini bilong yu i kamap bihain long yu, ol i ken i stap gut, taim yu bai mekim ol samting i stretpela long ai bilong BIKPELA.

12:26  Ol holi samting yu holim na ol strongpela promis long God yu bin mekim, ol dispela tasol bai yu kisim na go long ples BIKPELA bai makim em.

12:27  Na yu mas ofaim ol ofa bilong kukim, em mit na blut long dispela alta bilong God BIKPELA bilong yu. Na blut bilong ofa bilong kilim i dai animal bilong yu mas i kapsait long alta bilong God BIKPELA bilong yu. Na yu mas kaikai dispela mit.

12:28  Harim na lukautim olgeta bilong ol dispela tok mi givim strongpela tok long yu long ol, bai yu na ol pikinini bilong yu i kamap bihain long yu, ol i ken i stap gut oltaim oltaim, taim yu mekim ol samting i gutpela na stretpela long ai bilong God BIKPELA bilong yu.

12:29  Taim God BIKPELA bilong yu bai bagarapim ol dispela kantri long pes bilong yu long olgeta ples yu go long kisim ol na yu winim ol na sindaun long graun bilong ol,

12:30  Lukaut long yu yet, bai yu no ken stap long umben bilong bihainim pasin bilong ol bihain long ol i kisim bagarap long pes bilong yu. Na tu yu no ken kisim save long ol god bilong ol na tok, Olsem wanem ol dispela kantri i bin mekim wok long bihainim ol god bilong ol? Olsem na bai mi mekim wankain pasin.

12:31  Yu no ken mekim olsem long God BIKPELA bilong yu. Long wanem olgeta samting i sting tru long tingting bilong BIKPELA, na Em i no laikim tru dispela, ol i bin mekim ol dispela long ol god bilong ol. Long wanem ol i bin kukim ol pikinini man bilong ol na ol pikinini meri bilong ol long paia long bihainim ol god bilong ol.

12:32  Olgeta samting mi givim strongpela tok long yupela long ol, yupela i mas strong long mekim dispela. Yu no ken bungim sampela tok long em o rausim sampela tok long dispela.

Chapter 13

13:1  ¶ Sapos wanpela profet o wanpela i driman ol driman i kirap namel long yupela na em i givim yu wanpela mak o wanpela samting i winim tingting,

13:2  Na dispela mak o dispela samting i winim tingting i kamap olsem em i bin toktok long yu, na em i tok, Larim yumi go na bihainim ol arapela god yu no bin save long ol na larim yumi mekim wok long ol.

13:3  Yu no ken harim ol tok bilong dispela profet o dispela wanpela i driman ol driman. Long wanem God BIKPELA bilong yupela i traim yupela long save olsem, yupela i laikim tru God BIKPELA bilong yupela long olgeta hap bilong bel bilong yupela na long olgeta hap bilong tewel bilong yupela.

13:4  Yupela i mas wokabaut long bihainim God BIKPELA bilong yupela na pret long Em na holimpas ol strongpela tok bilong Em na bihainim nek bilong Em, na yupela i mas mekim wok long Em na pas long Em.

13:5  Na yupela i mas kilim i dai dispela profet o dispela wanpela i driman ol driman, long wanem em i bin tok long tanim yupela long lusim God BIKPELA bilong yupela. Em i bin bringim yupela long lusim graun bilong Isip na baim bek yupela long haus bilong i stap slev. Em i mekim dispela long subim yu long lusim we God BIKPELA bilong yu i givim strongpela tok long yu long wokabaut long em. Olsem yu mas rausim dispela pasin nogut long namel long yu.

13:6  ¶ Sapos brata bilong yu em pikinini bilong mama bilong yu o pikinini man bilong yu o pikinini meri bilong yu o meri bilong yu i stap klostu long bros bilong yu o pren bilong yu na em i stap olsem tewel bilong yu yet, sapos wanpela bilong ol i pulim yu hait na tok, Larim yumi go na mekim wok long ol arapela god yu no bin save long ol, em yu na ol papa bilong yu,

13:7  Em ol god bilong ol manmeri i stap raun nabaut long yupela, maski ol i klostu long yu o longwe long yu i go long wanpela arere bilong dispela graun inap long arapela arere bilong dispela graun,

13:8  Yu no ken orait long em o harim em, na tu ai bilong yu i no ken sori long em, na tu yu no ken helpim em long abrusim pe nogut, na tu yu no ken haitim em.

13:9  Tasol tru tumas yu mas kilim em i dai. Han bilong yu mas i stap pastaim long em bilong kilim em i dai na bihain han bilong olgeta manmeri.

13:10  Na yu mas paitim em long tromoi ol ston inap long em i dai pinis. Long wanem em i bin laik long subim yu long lusim God BIKPELA bilong yu. Em i bin bringim yu long lusim graun bilong Isip long dispela haus bilong i stap slev.

13:11  Na olgeta Isrel bai harim na pret. Na ol bai i no mekim dispela pasin nogut olsem em i stap namel long yupela.

13:12  ¶ Sapos yu harim tok long wanpela bilong ol biktaun bilong yu, God BIKPELA bilong yu i bin givim ol long yu long sindaun long ol, na tok i olsem,

13:13  Sampela man, em ol pikinini bilong Belial, ol i bin go long lusim namel long yupela na ol i pulim i go longwe ol manmeri i stap long biktaun bilong ol, na tok, Larim yumi go na mekim wok long ol arapela god yupela i no bin save long ol.

13:14  Long dispela taim yu mas mekim askim na wok long painimaut na mekim asking bilong kliaim tingting na harim, sapos dispela tok i tru na dispela samting i tru olgeta olsem dispela samting i sting tru ol i wokim namel long yupela,

13:15  Tru tumas yu mas paitim ol manmeri bilong dispela biktaun long arere bilong bainat na bagarapim dispela olgeta na olgeta samting i stap insait long em na ol bulmakau samting bilong em long arere bilong bainat.

13:16  Na yu mas bungim olgeta kago samting bilong dispela biktaun i go long namel bilong rot bilong em na yu mas kukim long paia dispela biktaun na olgeta samting bilong kago samting bilong em bilong mekim wok bilong God BIKPELA bilong yu. Na dispela bai stap wanpela liklik maunten oltaim oltaim. Yu no ken wokim biktaun long em gen.

13:17  Na i no gat wanpela samting bilong ol dispela i kisim pe nogut i ken pas long han bilong yu, bai BIKPELA i ken tanim long lusim bikpela belhat bilong Em na soim sori long yu na mekim pasin i soim sori long yu, na mekim yu kamap planti manmeri olsem Em i bin tok tru antap long ol papa bilong yu,

13:18  Taim yu harim bilong bihainim nek bilong God BIKPELA bilong yu long holimpas olgeta strongpela tok bilong Em, mi givim strongpela tok long ol dispela long yu long dispela de. Em long mekim ol samting i stretpela long ol ai bilong God BIKPELA bilong yu.

Chapter 14

14:1  ¶ Yupela i ol pikinini bilong God BIKPELA bilong yupela. Yupela i no ken katim yupela yet o mekim wanpela hap bilong het namel long tupela ai bilong yupela i kela bilong sori long ol daiman.

14:2  Long wanem yu stap holi manmeri long God BIKPELA bilong yu. Na BIKPELA i bin makim yu long i stap manmeri i dia tumas bilong Em yet. Na yupela i winim olgeta arapela kantri i stap long dispela graun.

14:3  Yu no ken kaikai wanpela samting i sting tru long ai bilong God.

14:4  Ol dispela i ol animal yupela i ken kaikai, em bulmakau na sipsip na meme,

14:5  Na abus dia man hat na bikpela abus dia robak na abus dia i retpela na wel meme na abus antelop na wel bulmakau na abus gasel.

14:6  Na olgeta animal i gat tupela hap kapa long ol pinga bilong fut bilong ol na ol apim kaikai long bel bilong ol na kaikai dispela gen taim ol i malolo, olsem bulmakau na i namel long ol kain animal dispela yu ken kaikai.

14:7  Tasol yupela i no inap kaikai ol dispela, em ol husat i apim kaikai long bel bilong ol na kaikai dispela gen taim ol i malolo tasol, o long ol husat i gat tupela hap kapa long fut bilong ol tasol, Em i olsem kamel na rabit na narakain rabit koni. Long wanem ol i apim kaikai long bel na kaikai dispela gen taim ol i malolo, tasol ol i no gat kapa i bruk long tupela hap long fut bilong ol. Olsem na ol i no stap klin long yupela.

14:8  Na pik, long wanem em i gat kapa i bruk long tupela hap long fut bilong em, tasol em i no apim kaikai long bel bilong em na kaikai dispela gen taim em i malolo. Em i no klin long yupela. Yupela i no ken kaikai mit bilong ol o putim han long bodi bilong ol taim ol i dai pinis.

14:9  Long olgeta bilong ol i stap long ol wara yupela i ken kaikai olsem, olgeta samting i gat pul long pis na grile bilong pis, orait yupela i ken kaikai.

14:10  Na olgeta samting i no gat pul bilong pis na grile bilong yis yupela i no ken kaikai. Dispela em i no klin long yupela.

14:11  Yupela i ken kaikai olgeta klinpela pisin.

14:12  Tasol yupela i no ken kaikai olsem, bikpela tarangau igal na tarangau osifrej na tarangau bilong solwara ospre,

14:13  Na narapela tarangau glid na tarangau kait na olgeta kain bikpela tarangau vultyur,

14:14  Na olgeta kain blakpela pisin reven,

14:15  Na tarangau bilong nait na narakain tarangau bilong nait na pisin kuku na olgeta kain tarangau hauk,

14:16  Na liklik tarangau bilong nait na bikpela tarangau bilong nait na bikpela pisin swan,

14:17  Na pisin pelikan na tarangau gia igal na pisin kormorant,

14:18  Na pisin stok na olgeta kain pisin heron na pisin lapwing na blakbokis,

14:19  Na olgeta binatang i flai nabaut i no klin long yupela. Yupela i no ken kaikai ol.

14:20  Tasol yupela i ken kaikai olgeta klinpela pisin.

14:21  Yupela i no ken kaikai wanpela samting i dai nating. Yu ken givim dispela long man bilong narapela kantri taim em i stap insait long dua bilong banis bilong yu, bai em i ken kaikai dispela, o yu ken salim dispela long mani long dispela man bilong narapela kantri. Long wanem yu stap wanpela holi lain manmeri long God BIKPELA bilong yu. Yu no ken kukim pikinini meme long susu bilong mama bilong em.

14:22  ¶ Yu mas givim wanpela bilong ol tenpela hap bilong olgeta pikinini kaikai i kamap long gaden long wanpela yia i go long narapela yia.

14:23  Na long pes bilong God BIKPELA bilong yu, long dispela ples Em bai makim long putim nem bilong Em long dispela ples, yu mas kaikai wanpela bilong ol tenpela hap bilong ol kon samting bilong yu na bilong wain bilong yu na bilong ol wel bilong yu, na namba wan pikinini bilong ol bulmakau samting bilong yu na bilong ol sipsip samting bilong yu, bai yu ken kisim save long pret olgeta taim long God BIKPELA bilong yu.

14:24  Na sapos rot em i longpela tumas long yu inap long yu no inap karim dispela, o sapos dispela ples BIKPELA bai makim long putim nem bilong Em long em, em i stap longwe tumas long yu, taim God BIKPELA bilong yu i bin blesim yu,

14:25  Long dispela taim yu mas salim dispela bilong kisim mani na pasim dispela mani long han bilong yu. Na yu mas i go long dispela ples God BIKPELA bilong yu bai makim.

14:26  Na yu mas yusim dispela mani bilong kisim wanem samting tewel bilong yu i laik kisim, em long bulmakau o long sipsip o long wain o long strongpela dring o long wanem samting tewel bilong yu i laikim. Na yu mas kaikai long dispela ples long pes bilong God BIKPELA bilong yu, na yu mas amamas tru. Em yu na ol wanhaus bilong yu,

14:27  Na dispela man long lain bilong Livai na em i stap insait long dua bilong banis bilong yu. Yu no ken lusim em. Long wanem em i no gat hap, o inap kisim ol samting bilong papa wantaim yu.

14:28  Long pinis bilong tripela yia, yu mas bringim i kam olgeta bilong wanpela bilong tenpela hap bilong ol samting gaden samting bilong yu i bin karim long dispela yia, na yu mas bungim dispela insait long ol dua bilong banis bilong yu.

14:29  Na dispela man long lain bilong Livai, (bikos em i no gat hap o inap kisim ol samting bilong papa wantaim yu), na ol man bilong narapela kantri na ol pikinini i no gat papa na ol meri man bilong em i dai pinis, na ol i stap insait long dua bilong banis bilong yu, ol bai kam na kaikai na stap inap tru, bai God BIKPELA bilong yu i ken blesim yu long olgeta wok bilong han bilong yu long ol samting yu mekim.

Chapter 15

15:1  ¶ Long pinis bilong olgeta sevenpela yia yu mas mekim pasin bilong lusim.

15:2  Na dispela em i pasin bilong lusim. Olgeta man i givim dinau long wanpela samting long man i stap klostu long em, em i mas lusim dispela. Em i no ken tokim man i stap klostu long em long bekim dispela, o long brata bilong em. Long wanem nem bilong dispela em i lusim bilong BIKPELA.

15:3  Yu ken kisim dispela dinau gen long ol man bilong narapela kantri. Tasol ol dinau i stap namel long yu na brata bilong yu, han bilong yu mas lusim dispela.

15:4  Tasol taim i no gat rabisman i stap namel long yupela yu no mas mekim dispela. Long wanem BIKPELA bai givim bikpela blesim long yu long dispela hap graun God BIKPELA bilong yu i givim yu olsem papa i givim pikinini long yu ken kisim dispela.

15:5  Na i gat wanpela rot long dispela bai kamap, em sapos yu putim ia gut long nek bilong God BIKPELA bilong yu long strong long bihainim olgeta bilong ol dispela strongpela tok, mi givim yu strongpela tok long ol long dispela de.

15:6  Long wanem God BIKPELA bilong yu i blesim yu olsem Em i bin promisim yu. Na bai yu givim dinau long planti kantri, tasol bai yu no kisim dinau. Na bai yu bosim planti kantri, tasol bai ol i no bosim yu.

15:7  Sapos wanpela rabisman i stap namel long yupela na em i bilong ol brata bilong yu i stap insait long ol dua bilong wanpela banis bilong yu long dispela hap graun God BIKPELA bilong yu i givim yu, yu no ken mekim bel bilong yu i olsem ston o pasim han bilong yu long brata bilong yu i stap rabis.

15:8  Tasol yu mas opim han bilong yu bikpela long em, na tru tumas yu mas givim dinau long em inap long wanem samting em i mas kisim, long ol samting em i sot long em.

15:9  Lukaut long i no gat wanpela tingting i stap long bel nogut bilong yu, na em i tok, Dispela namba seven yia em yia bilong lusim i kamap klostu. Na ai bilong yu i stap nogut long brata bilong yu i stap rabis na yu no givim em wanpela samting. Na em i krai long BIKPELA long pasin bilong yu, na dispela i stap sin i go long yu.

15:10  Tru tumas yu mas givim long em na bel bilong yu i no ken i stap hevi taim yu givim long em. Long wanem long dispela samting God BIKPELA bilong yu bai blesim yu long olgeta wok bilong yu na long olgeta samting yu putim han bilong yu long mekim.

15:11  Long wanem ol rabis manmeri bai i no pinis long i stap long dispela hap graun. Olsem na mi givim strongpela tok long yu, na tok, Yu mas opim han bilong yu bikpela long brata bilong yu na long rabis man o meri bilong yu na long ol manmeri bilong yu i sot, long hap graun bilong yu.

15:12  ¶ Na sapos wanpela i salim brata bilong yu, em wanpela Hibru man o wanpela Hibru meri long i stap slev bilong yu na em i mekim wok long yu sikispela yia, long dispela taim long namba seven yia yu mas larim em i go fri long lusim yu.

15:13  Na taim yu larim em i go fri long lusim yu, yu no ken larim em i lusim yu nating.

15:14  Yu mas givim em planti samting long ol sipsip samting bilong yu na long ol samting yu bungim long gaden bilong yu na long ples yu bungim wain bilong yu. Em ol samting God BIKPELA bilong yu i bin blesim yu. Yu mas givim dispela long em.

15:15  Na yu mas tingim gen long yu bin i stap slev long graun bilong Isip na God BIKPELA bilong yu i bin baim bek yu. Olsem na mi givim strongpela tok long yu long dispela samting tude.

15:16  Na em bai stap olsem, sapos em i tok long yu, Mi no laik go lusim yu, long wanem em i laikim tumas yu na haus bilong yu, long wanem em i stap gutpela wantaim yu,

15:17  Long dispela taim yu mas kisim wanpela nil samting na mekim hul long ia bilong em inap long dua bilong haus na em bai stap wokboi bilong yu oltaim. Na tu yu mas mekim wankain pasin long wokmeri bilong yu.

15:18  Em i no ken stap olsem i hatpela samting taim yu salim em fri long lusim yu. Long wanem em i bin stap inap long tupela wokboi yu mas baim ol long wan wan de, long em i bin mekim wok long yu sikispela yia. Na God BIKPELA bilong yu bai blesim yu long olgeta samting yu mekim.

15:19  ¶ Yu mas makim long i go long God BIKPELA bilong yu olgeta namba wan pikinini i pikinini man i kamap long ol bulmakau samting bilong yu na long ol sipsip samting bilong yu. Yu no ken mekim wok wantaim namba wan pikinini bilong bulmakau bilong yu o katim gras bilong namba wan pikinini bilong sipsip bilong yu.

15:20  Yu mas kaikai dispela long pes bilong God BIKPELA bilong yu olgeta yia long ples BIKPELA bai makim em, em yu na ol wanhaus bilong yu.

15:21  Na sapos wanpela bagarap i stap long em, olsem han o lek bilong em i krungut o aipas o i gat narapela bagarap, yu no ken yusim em long mekim ofa bilong kilim animal i go long God BIKPELA bilong yu.

15:22  Yu mas kaikai dispela insait long ol dua bilong banis bilong yu, manmeri i no klin o i klin olgeta i ken kaikai dispela olsem abus dia robak na olsem abus dia man hat.

15:23  Wanpela samting tasol, yu no ken kaikai blut bilong em. Yu mas kapsaitim dispela long graun olsem wara.

Chapter 16

16:1  ¶ Lukaut gut long mun Abip na mekim bikpela kaikai pasova i go long God BIKPELA bilong yu. Long wanem, long mun Abip God BIKPELA bilong yu i bin bringim yu long kamaut long Isip long nait.

16:2  Olsem na yu mas mekim ofa bilong kilim animal i dai bilong pasova i go long God BIKPELA bilong yu. Animal i mas i kam long ol sipsip samting na ol bulmakau na yu mas kaikai long ples BIKPELA bai makim long putim nem bilong Em long dispela ples.

16:3  Yu no ken kaikai bret i gat yis wantaim em. Yu mas kaikai bret i no gat yis sevenpela de long dispela taim, em bret bilong hevi, long wanem yu bin kamaut long graun bilong Isip long pasin bilong hariap. Mekim long yu ken holim tingting long olgeta de bilong laip bilong yu, long dispela de yu bin kamaut long graun bilong Isip.

16:4  Na wanpela i no ken lukim bret i gat yis i stap wantaim yu insait long olgeta arere bilong kantri bilong yu long dispela sevenpela de. Na tu dispela mit bilong ofa bilong kilim animal i dai yu mekim long namba wan de long apinun tru, i no gat wanpela hap bilong dispela i ken i stap olgeta nait inap long moningtaim.

16:5  Yu no ken mekim dispela ofa bilong kilim animal i dai bilong pasova insait long wanpela bilong ol dua bilong banis bilong yu, God BIKPELA bilong yu i givim ol long yu.

16:6  Tasol long ples God BIKPELA bilong yu bai makim long putim nem bilong Em long em, long dispela ples yu mas mekim ofa bilong kilim animal i dai bilong pasova long apinun tru, long taim san i go daun, long taim bilong yia yu bin kamaut long Isip.

16:7  Na yu mas kukim long paia na kaikai dispela long ples God BIKPELA bilong yu bai makim. Na long moningtaim yu mas tanim yu yet na go long ol haus sel bilong yu.

16:8  Yu mas kaikai bret i no gat yis sikispela de. Na long de namba seven, wanpela bikpela bung bilong lotu long God BIKPELA bilong yu mas i stap. Yu no ken mekim wok long dispela de.

16:9  Yu mas makim sevenpela wik long yu. Stat long makim dispela sevenpela wik taim yu stat long putim sarip long katim ol kon samting.

16:10  Yu mas bihainim dispela bikpela kaikai bilong ol wik i go long God BIKPELA bilong yu. Na yu mas kam wantaim planti samting bilong givim wanpela ofa long laik bilong yu yet na i stap long han bilong yu. Yu mas givim dispela long God BIKPELA bilong yu long wankain mak olsem God BIKPELA bilong yu i bin blesim yu.

16:11  Na yu mas amamas tru long pes bilong God BIKPELA bilong yu, em yu na pikinini man bilong yu na pikinini meri bilong yu, na wokboi bilong yu na wokmeri bilong yu, na man bilong lain bilong Livai i stap insait long ol dua bilong banis bilong yu, na man bilong narapela kantri, na ol pikinini i no gat papa, na ol meri man bilong em i dai pinis husat i stap namel long yupela. Kaikai dispela long ples God BIKPELA bilong yu i bin makim long putim nem bilong Em long dispela ples.

16:12  Na yu mas tingim gen long yu bin i stap slev long Isip. Na yu mas strong long mekim ol dispela strongpela tok i stap long buk.

16:13  Yu mas mekim dispela bikpela kaikai bilong ol haus sel long sevenpela de bihain long yu bin bungim ol kon samting bilong yu na ol wain bilong yu.

16:14  Na yu mas amamas tru long dispela bikpela kaikai bilong yu, em yu na pikinini man bilong yu na pikinini meri bilong yu, na wokboi bilong yu na wokmeri bilong yu, na man bilong lain bilong Livai, na man bilong narapela kantri, na ol pikinini i no gat papa, na ol meri man bilong em i dai pinis, em ol i stap insait long ol dua bilong banis bilong yu.

16:15  Sevenpela de yu mas mekim wanpela bikpela kaikai i go long God BIKPELA bilong yu long ples BIKPELA bai makim. Long wanem God BIKPELA bilong yu bai blesim yu long olgeta samting i kamap planti moa na long olgeta wok bilong ol han bilong yu. Olsem na tru tumas yu mas amamas tru.

16:16  Tripela taim long wanpela yia olgeta man na pikinini man bilong yu i mas kam long pes bilong God BIKPELA bilong yu long dispela ples Em bai makim, em long bikpela kaikai bilong bret i no gat yis na long bikpela kaikai bilong ol wik na long bikpela kaikai bilong ol haus sel. Na ol i no ken kam nating long pes bilong BIKPELA.

16:17  Olgeta wan wan man i mas givim olsem em inap long bihainim ol blesim bilong God BIKPELA bilong yu long ol samting Em i bin givim yu.

16:18  ¶ Yu mas makim ol jas na ol ofisa bilong yu i stap long olgeta dua bilong banis bilong ol biktaun bilong yu God BIKPELA bilong yu i givim yu namel long ol lain bilong yu. Na ol bai skelim tok bilong ol manmeri long stretpela kot.

16:19  Yu no ken paulim kot. Yu no ken tingim wanpela man i winim narapela na tu yu no ken kisim presen. Long wanem presen i mekim ol saveman i aipas na krungutim ol tok bilong stretpela man.

16:20  Yu mas bihainim ol pasin i stretpela olgeta, bai yu ken i stap laip na kisim olsem i long papa dispela hap graun God BIKPELA bilong yu i givim yu.

16:21  Yu no ken planim wanpela bung bilong wanpela kain diwai klostu long alta yu wokim dispela bilong God BIKPELA bilong yu.

16:22  Na tu yu no ken putim wanpela piksa bilong lotuim dispela, God BIKPELA bilong yu i no laikim tru dispela.

Chapter 17

17:1  ¶ Yu no ken mekim ofa bilong kilim animal i dai i go long God BIKPELA bilong yu long wanpela bulmakau o sipsip i gat sampela bagarap o i no luk gutpela tumas. Long wanem dispela pasin i sting tru long tingting bilong God BIKPELA bilong yu.

17:2  Sapos insait long wanpela bilong ol dua bilong banis bilong yu God BIKPELA bilong yu i givim yu, yupela i lukim namel long yupela wanpela man o meri na em i bin mekim pasin nogut long ai bilong God BIKPELA bilong yu long brukim kontrak bilong Em,

17:3  Na em i bin go na mekim wok long ol arapela god na lotu long ol, em san o mun o wanpela bilong ol bikpela lain bilong heven na mi no bin givim strongpela tok long yu long em,

17:4  Na ol i tokim yu long dispela na yu bin harim stori long dispela na yu mekim planti gutpela askim long dispela na harim em i tru na yu klia long dispela samting i sting tru i bin kamap long Isrel,

17:5  Long dispela taim yu mas bringim dispela man o dispela meri husat i bin mekim dispela samting nogut, i kam long ol dua bilong banis bilong yu, yes em dispela man o dispela meri, na yu mas tromoi ol ston long ol inap long ol i dai pinis.

17:6  Long maus bilong tupela witnes o tripela witnes yupela i mas kilim i dai dispela man i mekim sin inap long em i mas i dai pinis. Tasol yupela no ken kilim em i dai pinis long maus bilong wanpela witnes tasol.

17:7  Ol han bilong ol witnes i mas i stap namba wan long em long kilim em i dai pinis, na bihain ol han bilong olgeta manmeri. Long dispela we yu mas rausim dispela pasin nogut long namel long yupela.

17:8  ¶ Sapos wanpela samting i kirap na em i hatpela tumas long yu ken jasim, em namel long blut na blut, na namel long tok bilong kotim na tok bilong kotim, na namel long paitim na paitim, na ol dispela i ol samting bilong kirapim tupela tingting insait long ol dua bilong banis bilong yu, long dispela taim yu mas kirap na yu mas i go long dispela ples God BIKPELA bilong yu bai makim.

17:9  Na yu mas i kam long ol pris, em ol lain bilong Livai, na long dispela jas i stap long ol dispela de, na askim ol, na ol bai soim yu pe bilong dispela kot.

17:10  Na yu mas mekim ol samting i bihainim dispela tok long pe bilong kot ol i stap long dispela ples BIKPELA bai makim bai soim yu. Na yu mas strong long mekim pasin i bihainim olgeta samting ol i tokim yu long em.

17:11  Yu mas mekim dispela bilong bihainim dispela tok long pe bilong kot i bilong lo, ol bai skulim yu long dispela, na long bihainim tok bilong kot ol i bin tokim yu long em. Yu no ken abrusim dispela pe bilong kot, ol bai soim dispela long yu, na go long han sut o long han kais.

17:12  Na man i laik stap bikhet na em i no laik harim tok bilong dispela pris i sanap long mekim wok long dispela ples long pes bilong God BIKPELA bilong yu o long jas, yes dispela man mas i dai pinis. Na yu mas rausim dispela pasin nogut long Isrel.

17:13  Na olgeta manmeri bai harim na pret na bai ol i no mekim bikhet pasin moa.

17:14  ¶ Taim yu kamap pinis long dispela hap graun God BIKPELA bilong yu i givim em long yu na yu kisim dispela na sindaun insait long em, na yu bai tok, Mi laik makim wanpela king long bosim mi olsem olgeta kantri i stap raun nabaut long mi.

17:15  Yu mas putim man BIKPELA bai makim long i kamap king. Yu mas putim wanpela namel long ol brata bilong yu long i stap king bilong bosim yu. Yu no ken putim wanpela man bilong narapela kantri long bosim yu na em i no brata bilong yu.

17:16  Tasol em i no ken kisim planti hos long em yet o kirapim ol manmeri long i go bek long Isip, bai em i ken kisim planti hos. Long wanem BIKPELA i bin tokim yupela, Nau i go inap long oltaim yupela i no ken go bek long dispela rot.

17:17  Na tu em i no ken kisim planti meri long em yet, bai bel bilong em i no ken tanim long lusim God. Na tu em i no ken hipim planti silva na gol long em yet.

17:18  Na em bai kamap olsem, taim em i sindaun long sia king bilong kingdom bilong em, em i mas raitim bilong em yet wanpela buk i bihainim buk i stap long pes bilong ol pris, em lain bilong Livai, long dispela lo.

17:19  Na dispela bai stap wantaim em, na em i mas ritim dispela olgeta de long laip bilong em. Long em i ken kisim save long pasin bilong pret long God BIKPELA bilong em na long bihainim olgeta tok bilong dispela lo na ol dispela strongpela tok i stap long buk long mekim ol.

17:20  Long em i no litimapim bel bilong em antap long ol brata bilong em, na bai em i no tanim em yet long lusim dispela strongpela tok long han sut o long han kais. Bai em i ken mekim ol de bilong laip bilong em i kamap planti moa long kingdom bilong em long namel long Isrel. Dispela tok i bilong em na ol pikinini bilong em.

Chapter 18

18:1  ¶ Ol pris em ol Livai, na olgeta lain bilong Livai, bai i no gat wanpela hap o wanpela samting papa bai givim wantaim ol Isrel. Ol bai kaikai ol ofa ol i kukim long paia na i go long BIKPELA, na em i samting bilong Em.

18:2  Olsem na ol i no ken kisim ol samting bilong papa namel long ol brata bilong ol. BIKPELA em i samting bilong kisim bilong ol olsem Em i bin tokim ol.

18:3  Na dispela bai stap ol samting pris i ken kisim long ol manmeri. Long ol i mekim ofa bilong kilim animal i dai na em i bulmakau o sipsip ol i mas givim long pris sol na tupela wasket na namba wan bel bilong dispela ofa.

18:4  Na tu yu mas givim em ol namba wan kaikai bilong ol kon samting bilong yu na bilong ol wain bilong yu na bilong ol wel bilong yu na namba wan hap bilong ol gras bilong ol sipsip bilong yu.

18:5  Long wanem God BIKPELA bilong yu i bin makim em long olgeta lain bilong yu long sanap long mekim wok long nem bilong BIKPELA, em na ol pikinini man bilong em inap long oltaim oltaim.

18:6  Na sapos wanpela bilong lain bilong Livai i go long lusim wanpela bilong ol dua bilong banis bilong yu long olgeta hap bilong Isrel long ples em i bin sindaun long em, na em i kam wantaim olgeta laik bilong tingting bilong em long dispela ples BIKPELA bai makim,

18:7  Long dispela taim em i mas mekim wok long nem bilong God BIKPELA bilong em olsem olgeta brata bilong em i mekim. Em ol husat i sanap long dispela hap long pes bilong BIKPELA.

18:8  Ol i mas i gat wankain hap kaikai long kaikai. Na dispela i mas bung antap long ol samting i kam long salim ol samting papa bilong em i bin givim em.

18:9  ¶ Taim yu kam long graun God BIKPELA bilong yu i givim yu, yu no ken kisim save long mekim ol sting pasin bilong ol dispela kantri.

18:10  Yupela i no ken lukim namel long yupela wanpela i mekim pikinini man bilong em o pikinini meri bilong em i go insait long paia bilong i dai pinis, o wanpela i yusim spirit nogut long tok long ol samting bai i kamap, o wanpela i trikman, o wanpela i wokim pasin long pasin bilong toktok olsem snek, o wanpela masalai meri,

18:11  O wanpela i wokim poisin bilong mekim narapela i bihainim em, o wanpela glasman, o wanpela i wokim poisin long toktok i no klia, o wanpela i toktok wantaim spirit bilong ol daiman.

18:12  Long wanem olgeta manmeri i mekim ol dispela samting ol i samting i sting pinis long tingting bilong BIKPELA. Na ol dispela samting i sting tru em i as bilong God BIKPELA bilong yu i rausim ol long pes bilong yu.

18:13  Yu mas i stap inap tru long pasin yu mekim wantaim God BIKPELA bilong yu.

18:14  Long wanem ol dispela kantri, bai yu kisim ol graun bilong ol, ol i bin harim tok bilong ol trikman na long ol i yusim ol spirit nogut long tok long ol samting bai i kamap. Tasol bilong yu, God BIKPELA bilong yu i no larim yu mekim olsem.

18:15  ¶ God BIKPELA bilong yu bai kirapim i kam long yu wanpela profet i kam long namel long yu, em wanpela bilong ol brata bilong yu wankain olsem mi. Yupela i mas harim gut tok bilong em.

18:16  Em i bilong bihainim olgeta samting yu laikim bilong God BIKPELA bilong yu long Horep long dispela de bilong bung yu bin tok, Larim mi i no ken harim gen nek bilong God BIKPELA bilong mi, na tu no ken larim mi lukim dispela bikpela paia wanpela taim moa, bai mi no ken i dai pinis.

18:17  Na BIKPELA i tokim mi, Ol i bin mekim gutpela toktok long ol tok ol i autim.

18:18  Bai Mi kirapim wanpela profet bilong ol i kam long namel long ol brata bilong ol wankain olsem yu. Na bai Mi putim ol tok bilong Mi long maus bilong em. Na em bai tokim ol long olgeta samting Mi givim em strongpela tok long em.

18:19  Na em bai kamap olsem, wanem man o meri i no laik harim ol tok bilong Mi em bai autim dispela long nem bilong Mi, bai Mi mekim save long em.

18:20  Tasol bai profet i bikhet long mekim tok long nem bilong Mi na Mi no bin givim strongpela tok long em long tok long dispela, o em bai tok long nem bilong ol arapela god, dispela profet i mas i dai pinis.

18:21  Na sapos yu tok long bel bilong yu, Olsem wanem mipela inap save long dispela tok BIKPELA i no bin tok long em?

18:22  Taim wanpela profet i tok long nem bilong BIKPELA, sapos dispela samting i no kamap o em i no stap olsem, dispela em i samting BIKPELA i no bin tok long em. Tasol dispela profet i bin bikhet na tok long dispela. Yu no ken pret long em.

Chapter 19

19:1  ¶ Taim God BIKPELA bilong yu i bagarapim ol kantri God BIKPELA bilong yu i givim yu graun bilong ol na yu kisim ples bilong ol na sindaun long ol biktaun bilong ol na long ol haus bilong ol.

19:2  Yu mas makim tripela biktaun bilong yu long namel long graun bilong yu God BIKPELA bilong yu i givim dispela long yu long kisim.

19:3  Yu mas redim wanpela rot bilong yu na brukim long tripela hap ol arere bilong graun bilong yu God BIKPELA bilong yu i givim yu long kisim, olsem papa i givim ol pikinini, bai olgeta wan wan man o meri i kilim narapela i dai, ol i ken ranawe long em.

19:4  Na dispela em i pasin bilong dispela man o meri i kilim narapela i dai pinis long em i ken ranawe long dispela, bai em i ken i stap laip. Em man i kilim i dai nating man i stap klostu long em na em i no bin mekim pasin bilong em i no laikim tru dispela man pastaim.

19:5  Olsem, taim wanpela man i go long bus wantaim man i stap klostu long em long katim diwai na han bilong em i yusim akis bilong katim diwai bilong daunim em na het bilong akis i lusim handel bilong akis na em i paitim man i stap klostu long em inap long em i dai pinis. Em i mas ranawe i go long wanpela bilong ol dispela biktaun na stap laip.

19:6  Nogut dispela man bilong bekim bek blut i ranim dispela man i bin kilim man i dai taim em i belhat tru na em i winim em long wanem rot em i longpela, na em i kilim em i dai pinis. Tasol tarangu, em i no bin mekim rong inap long em i mas i dai pinis, long wanem em i no mekim pasin bilong i no laikim tru em pastaim.

19:7  Olsem na mi givim strongpela tok long yu na tok, Yu mas makim tripela biktaun bilong yu.

19:8  Na sapos God BIKPELA bilong yu i mekim arere bilong kantri bilong yu i kamap bikpela moa olsem Em i bin tok tru antap long ol papa bilong yu, na Em i givim yu olgeta graun Em i bin promisim ol papa bilong yu long givim,

19:9  Mi givim strongpela tok long yu long dispela de. Na sapos yu bai holimpas olgeta bilong ol dispela strongpela tok long bihainim ol, long laikim tru God BIKPELA bilong yu na long wokabaut olgeta taim long ol pasin bilong Em, long dispela taim bai yu bungim tripela biktaun moa bilong yu wantaim dispela tripela.

19:10  Bai blut i no bin mekim rong i no ken kapsait long graun bilong yu na dispela blut i stap long yu. God BIKPELA bilong yu i givim dispela graun long yu olsem papa i givim pikinini.

19:11  Tasol sapos wanpela man i no laikim tru man i stap klostu long em na em i wetim em na em i kirap long birua long em na paitim em inap long em i dai pinis, na em em i ranawe long wanpela bilong ol dispela biktaun,

19:12  Long dispela taim ol lapun hetman bilong biktaun bilong em bai salim man na kisim em long dispela biktaun na givim em i go long han bilong man bilong bekim bek blut, bai em i ken dai pinis.

19:13  Ai bilong yu i no ken sori long em, tasol yu mas rausim dispela asua bilong blut i no bin mekim rong long Isrel, bai ol samting i ken go gutpela long yu.

19:14  ¶ Yu no ken tekewe ol samting i makim arere bilong graun bilong man i stap klostu long yu. Pastaim tru ol i makim dispela long dispela hap graun yu kisim olsem samting papa i givim pikinini. Em dispela yu bai kisim olsem samting papa i givim pikinini long dispela hap graun God BIKPELA bilong yu i givim yu long kisim dispela.

19:15  Wanpela witnes i no inap kirap long kotim wanpela man long wanpela rong o long wanpela sin, em long wanpela sin em i mekim. Olgeta toktok bilong dispela samting i mas kamap long maus bilong tupela witnes o long maus bilong tripela witnes.

19:16  Sapos wanpela giaman witnes i kirap birua long wanpela man long tok long kotim em long tok i no stret,

19:17  Long dispela taim dispela tupela man i gat hevi i stap namel long ol, ol bai sanap long pes bilong BIKPELA na long pes bilong ol pris na ol jas i stap long ol dispela de.

19:18  Na ol jas bai mekim planti gutpela askim na harim, sapos dispela witnes i stap giaman witnes na em i bin tok giaman long kotim brata bilong em,

19:19  Long dispela taim yupela i mas mekim long em olsem em i bin tingting long mekim long brata bilong em. Orait bai yu putim dispela pasin nogut i stap longwe long yupela.

19:20  Na ol husat i stap yet bai harim na pret. Na bihain ol bai i no mekim kain pasin nogut olsem namel long yupela.

19:21  Na ai bilong yu i no ken sori long em. Tasol laip bai go bilong laip, na ai bilong ai, na tit bilong tit, na han bilong han, na fut bilong fut.

Chapter 20

20:1  ¶ Taim yu go long pait wantaim ol birua bilong yu na yu lukim ol hos na ol karis na manmeri i planti moa long yu, yu no ken pret long ol. Long wanem God BIKPELA bilong yu i stap wantaim yu. Na Em i bin bringim yu long lusim graun bilong Isip.

20:2  Na em bai stap olsem, taim yupela i kam klostu long ples bilong pait, pris i mas i kam na toktok long ol manmeri.

20:3  Na em i mas i tok long ol, Harim O Isrel, dispela de yupela i kam klostu long pait wantaim ol birua bilong yupela. No ken larim ol bel bilong yupela i lusim strong na no ken pret na no ken guria na tu yupela i no ken i stap pret tumas na ol i as bilong dispela.

20:4  Long wanem God BIKPELA bilong yupela em i man i go wantaim yupela long pait bilong helpim yupela long birua long ol birua bilong yupela long kisim bek yupela.

20:5  Na ol ofisa bilong ami bai tok long ol manmeri na tok, Wanem man i stap na em i wokim nupela haus na em i no bin makim dispela long i go long God? Larim em i go na go gen long haus bilong em. Nogut em i dai pinis long dispela pait na narapela man i makim dispela haus.

20:6  Na wanem man i stap na em i bin planim wanpela gaden diwai na em i no bin kaikai yet long em? Larim em tu i go na go gen long haus bilong em. Nogut em i dai pinis long dispela pait na narapela man i kaikai sampela bilong dispela.

20:7  Na wanem man i stap na em i bin makim wanpela meri long kamap meri bilong em na em i no bin kisim em? Larim em i go na go gen long haus bilong em. Nogut em i dai pinis long dispela pait na narapela man i kisim meri.

20:8  Na ol ofisa bai tok moa long dispela manmeri. Na ol bai tok, Wanem man i stap na em i pret na bel bilong em i no stap strong? Larim em i go na go gen long haus bilong em. Nogut bel bilong ol brata bilong em i lusim strong wankain olsem bel bilong em.

20:9  Na em bai stap olsem, taim ol ofisa i pinisim ol toktok long dispela manmeri, ol i mas makim ol kepten bilong ami long i stap ol pasman bilong ol dispela manmeri.

20:10  ¶ Taim yu kam klostu long wanpela biktaun long pait wantaim dispela, long dispela taim yu mas tokaut long bel isi ken i stap.

20:11  Na em bai stap olsem, sapos dispela biktaun i tok long bel isi long yu na ol i opim ol dua bilong banis long yu, orait em i mas i stap olsem, olgeta manmeri i stap insait long em bai stap wokboi na wokmeri bilong yu na ol bai mekim wok bilong yu.

20:12  Na sapos dispela biktaun i no laik stap bel isi wantaim yu, tasol ol i laik mekim woa wantaim yu, orait yu mas pasim em nabaut.

20:13  Na taim God BIKPELA bilong yu i bin givim dispela biktaun i go long ol han bilong yu, yu mas paitim olgeta man bilong dispela biktaun long arere bilong bainat.

20:14  Tasol bai yu kisim bilong yu yet ol meri na ol liklik pikinini na ol bulmakau samting na olgeta samting i stap long dispela biktaun, em olgeta kago samting bilong ol birua bilong yu. Na bai yu kaikai ol kaikai bilong birua bilong yu, God BIKPELA bilong yu i bin givim dispela long yu.

20:15  Yu mas mekim olsem long olgeta biktaun i stap longwe long yu na ol i no wanpela bilong ol biktaun bilong ol dispela kantri.

20:16  Tasol yu no ken larim wanpela samting i gat win i stap laip bilong ol biktaun bilong ol dispela manmeri God BIKPELA bilong yu i givim yu graun bilong ol long i stap samting papa i laik givim pikinini.

20:17  Tasol yu mas bagarapim olgeta ol olsem God BIKPELA bilong yu i bin givim strongpela tok long yu. Em lain bilong Hit na lain bilong Amor na ol lain bilong Kenan na lain bilong Peris na lain bilong Hiv na lain bilong Jebus.

20:18  Bai ol i no ken skulim yupela long mekim pasin i bihainim olgeta sting pasin bilong ol. Ol i bin mekim dispela long ol god bilong ol. Sapos yupela i mekim olsem, yupela bai mekim sin i birua long God BIKPELA bilong yupela.

20:19  Taim yu bai pasim nabaut wanpela biktaun longpela taim long mekim woa wantaim em bilong kisim em, yu no ken bagarapim ol diwai long dispela ples long paitim ol long akis. Long wanem yu ken kaikai ol pikinini kaikai bilong ol. Na yu no ken katim ol bilong daunim ol long yusim long pasim dispela biktaun. (Long wanem diwai bilong ples op em i laip bilong man.)

20:20  Yu ken katim i go daun long bagarapim ol diwai tasol yu save long ol i no diwai bilong kisim kaikai. Na yu mas wokim dispela diwai bilong pasim dispela biktaun i mekim woa wantaim yu inap long yu winim em.

Chapter 21

21:1  ¶ Sapos yu lukim wanpela daiman long dispela hap graun God BIKPELA bilong yu i givim yu long kisim dispela, na em i slip long wanpela ples op na yu no save husat i bin kilim em i dai,

21:2  Long dispela taim ol lapun hetman bilong yu na ol jas bilong yu bai kam long dispela ples na ol bai mitaim graun i stap namel long ol biktaun i stap nabaut long dispela daiman.

21:3  Na em bai stap olsem, biktaun i stap klostu moa long dispela daiman, em ol lapun hetman bilong dispela biktaun, ol bai kisim wanpela yangpela bulmakau meri, em wanpela i no bin mekim wok pastaim na em i no bin pulim karis long dispela samting i pasim nek bilong em.

21:4  Na ol lapun hetman bilong dispela biktaun bai bringim dispela yangpela bulmakau meri i go long ples daun i no isi long wokabaut. Na ol i no kisim kaikai o tromoi pikinini kaikai long dispela ples daun. Na ol bai katim na rausim nek bilong dispela yangpela bulmakau meri long dispela ples i long dispela ples daun.

21:5  Na ol pris, em ol pikinini man bilong Livai, ol bai kam klostu. Long wanem God BIKPELA bilong yu i bin makim ol long mekim wok long Em na long blesim long nem bilong BIKPELA. Na long tok bilong ol, ol bai skelim olgeta hevi na olgeta pasin bilong paitim narapela.

21:6  Na olgeta lapun hetman bilong dispela biktaun i stap klostu moa long dispela daiman bai wasim ol han bilong ol antap long dispela yangpela bulmakau meri i bin lusim het bilong em long dispela ples daun.

21:7  Na ol bai bekim tok na tok, Ol han bilong mipela i no bin kapsaitim dispela blut na tu ol ai bilong mipela i no bin lukim dispela.

21:8  Sori long ol manmeri bilong Yu Isrel, O BIKPELA, husat Yu bin baim bek, na no ken makim blut i no bin mekim rong i go long asua bilong ol manmeri bilong Yu i bilong Isrel. Na BIKPELA bai pogivim ol long dispela blut.

21:9  Na Yu bai rausim asua bilong blut i no bin mekim rong long namel long yupela taim yu bai mekim ol samting i stretpela long ai bilong BIKPELA.

21:10  ¶ Taim yu go long mekim woa wantaim ol birua bilong yu na God BIKPELA bilong yu i bin givim ol i go long ol han bilong yu na yu bin kalabusim ol,

21:11  Na yu lukim wanpela naispela meri i stap namel long dispela kalabus lain. Na yu gat laik long em, bai yu ken kisim em long i stap meri bilong yu.

21:12  Long dispela taim yu mas bringim em long ples long haus bilong yu. Na em i mas katim olgeta hetgras bilong em na katim ol nil bilong ol pinga bilong em.

21:13  Na em i mas putim ol klos bilong taim em i stap kalabus long lusim em na em i mas i stap long haus bilong yu na krai sori long papa bilong em na mama bilong em wanpela mun olgeta. Na bihain long dispela yu bai go long em na stap man bilong em na em bai i stap meri bilong yu.

21:14  Na em bai stap olsem, sapos yu no gat bikpela laik long em, orait yu mas larim em i go long wanem hap em i laikim. Tasol yu no ken salim em bilong kisim mani. Yu no ken mekim em kamap samting yu baim na salim, na as bilong dispela em yu bin daunim em.

21:15  ¶ Sapos wanpela man i gat tupela meri na em i laikim tumas wanpela na em i no laikim tru arapela na tupela i bin karim ol pikinini bilong em, em dispela wanpela em i laikim tumas na arapela em i no laikim tru. Na sapos namba wan pikinini man em i pikinini bilong meri em i no laikim tru,

21:16  Orait em bai stap olsem, taim dispela man i givim ol samting bilong em long ol pikinini man bilong em, em in no ken mekim pikinini man bilong meri em i laikim tumas i kisim hap bilong namba wan pikinini man na kisim namba bilong pikinini man bilong meri em i no laikim tru, na tru tumas em i namba wan pikinini man bilong em.

21:17  Tasol em i mas tokaut klia long pikinini man bilong meri em i no laikim tru em i namba wan pikinini man bilong em long pasin bilong givim em tupela hap bilong olgeta samting bilong em. Long wanem em i stat bilong strong bilong dispela papa na namba bilong i stap namba wan pikinini i bilong em.

21:18  ¶ Sapos wanpela man i gat pikinini man i bikhet na em i no harim tok na em i no bihainim nek bilong papa bilong em o nek bilong mama bilong em na taim ol i stretim em, em i no laik harim tok bilong ol,

21:19  Long dispela taim papa bilong em na mama bilong em bai pasim em na bringim em i kam long ol lapun hetman bilong biktaun bilong em na long dua bilong banis bilong ples bilong em.

21:20  Na tupela bai tok long ol lapun hetman bilong biktaun bilong em olsem, Dispela pikinini man bilong mipela em i bikhet na em i no harim tok na em i no laik bihainim nek bilong mipela. Na tu em i kaikai planti tumas na em i spakman.

21:21  Na olgeta man bilong biktaun bilong em bai paitim em long ol ston inap long em i dai pinis. Long dispela pasin yu bai putim pasin nogut i stap longwe long namel long yupela. Na olgeta Isrel bai harim na pret.

21:22  Na sapos wanpela man i bin mekim sin inap long em i mas i dai pinis, na em i stap bilong yu kilim em i dai, na yu hangamapim em long wanpela diwai,

21:23  Bodi bilong em i no ken i stap olgeta nait long dispela diwai. Tasol yu mas planim em dispela de. (Long wanem man ol i hangamapim, em i stap aninit long kot bilong God.) Na nogut graun bilong yu i kamap doti. Em graun God BIKPELA bilong yu i givim yu long i stap samting papa i givim long ol pikinini.

Chapter 22

22:1  ¶ Yu no ken lukim bulmakau bilong brata bilong yu o sipsip bilong em i lusim banis na raun nabaut na yu haitim yu yet long ol. Yu mas go bek na bringim ol gen long brata bilong yu.

22:2  Na sapos brata bilong yu i no stap klostu long yu, o sapos yu no save long em, orait yu mas bringim dispela i go long haus bilong yu yet na em bai stap wantaim yu inap long brata bilong yu i wok long painim dispela na yu mas givim dispela i go bek long em gen.

22:3  Yu mas mekim wankain pasin long donki bilong em. Na yu mas mekim olsem long klos bilong em na long olgeta samting i lus bilong brata bilong yu na em i bin lusim dispela na yu bin kisim, yu mas mekim wankain pasin. Yu no ken haitim yu yet.

22:4  Yu no ken lukim donki bilong brata bilong yu o bulmakau bilong em i pundaun long rot na yu haitim yu yet long ol. Tru tumas yu mas helpim em long litimapim ol gen.

22:5  ¶ Meri i no ken putim long em ol klos i samting bilong man. Na tu man i no ken putim long em klos bilong meri. Long wanem olgeta manmeri i mekim olsem ol i sting tru long tingting bilong God BIKPELA bilong yu.

22:6  Sapos haus bilong wanpela pisin i stap long pes bilong yu long rot, em long wanpela diwai o long graun, na sampela pikinini pisin o sampela kiau i stap na mama pisin i sindaun antap long ol pikinini o long ol kiau, yu no ken kisim mama wantaim ol pikinini.

22:7  Tasol yu mas larim mama i go na kisim ol pikinini i kam long yu, bai em i ken i stap gutpela long yu na long yu ken mekim ol de bilong yu i stap laip i planti moa.

22:8  Taim yu wokim nupela haus, long dispela taim yu mas mekim banis i stap long rup bilong yu, bai yu no ken bringim blut i stap long haus bilong yu sapos wanpela man i pundaun long dispela rup.

22:9  Yu no ken tromoi kain kain pikinini kaikai insait long gaden wain bilong yu. Nogut kaikai bilong dispela pikinini kaikai yu bin tromoi na dispela kaikai bilong gaden wain bilong yu i stap nogut.

22:10  Yu no ken brukim graun long yusim wanpela bulmakau na wanpela donki wantaim.

22:11  Yu no ken putim klos ol i wokim long kain kain samting bilong wokim olsem long gras bilong sipsip wantaim tret bilong linen.

22:12  Yu mas putim bilas bilong katim katim long fopela arere bilong ol klos bilong yu i karamapim yu yet.

22:13  ¶ Sapos wanpela man i maritim wanpela meri na em i go long em long mekim marit pasin, na em i no laikim tru dispela meri,

22:14  Na em i kirapim sampela taim bilong toktok i kamap bilong daunim dispela meri na em i kirapim nem nogut long em na man i tok, Mi bin kisim dispela meri na taim mi kam long em mi lukim em i no meri i no bin slip wantaim narapela man,

22:15  Long dispela taim papa bilong dispela meri na mama bilong em bai kisim ol mak bilong dispela meri i no bin slip wantaim wanpela man pastaim na bringim dispela i kam long ol lapun hetman bilong dispela biktaun, long dua bilong banis bilong em.

22:16  Na papa bilong dispela meri bai tok long ol lapun hetman olsem, Mi bin givim pikinini meri bilong mi long dispela man long em i ken maritim em na em i no laikim tru dispela meri.

22:17  Na, harim, em i bin kirapim em sampela taim bilong toktok i kamap bilong daunim dispela meri, na man i tok, Mi no lukim pikinini meri bilong yu i stap meri i no bin slip wantaim wanpela man pastaim. Na papa i tok gen, Na yet ol dispela em i stap mak bilong pikinini meri bilong mi i stap meri i no bin slip wantaim wanpela man pastaim. Na ol bai opim dispela laplap long ol ai bilong ol lapun hetman bilong dispela biktaun.

22:18  Na ol lapun hetman bilong dispela biktaun bai kisim dispela man na mekim save long em.

22:19  Na ol bai makim em long givim wan handret mani silva na givim dispela long papa bilong dispela meri. Long wanem em i bin bringim nem nogut long wanpela meri bilong Isrel i no bin slip wantaim wanpela man pastaim. Na dispela meri bai stap meri bilong em, na em i no inap rausim dispela meri long olgeta de bilong laip bilong em.

22:20  Tasol sapos dispela i tru na ol mak bilong meri i no bin slip wantaim wanpela man pastaim, ol i no stap bilong dispela meri.

22:21  Long dispela taim ol bai bringim dispela meri long dua bilong haus bilong papa bilong em na ol man bilong biktaun bilong dispela meri bai paitim em long ol ston long em i dai pinis. Long wanem em i bin mekim pasin nogut long Isrel long em i stap pamuk meri long haus bilong papa bilong em. Long dispela pasin bai yu putim pasin nogut i stap longwe long namel long yupela.

22:22  Sapos ol i lukim wanpela man i slip wantaim wanpela meri i marit long narapela man, orait tupela wantaim mas i dai pinis. Em dispela man i slip wantaim dispela meri, na dispela meri. Long pasin olsem yu mas putim pasin nogut i stap longwe long Isrel.

22:23  Sapos wanpela meri, em meri i no bin slip wantaim wanpela man pastaim, na ol i makim em long maritim wanpela man, na narapela man i lukim em long dispela biktaun na em i slip wantaim dispela meri,

22:24  Long dispela taim yupela i mas bringim tupela i kam long dua bilong banis bilong dispela biktaun na yupela i mas tromoi ston long paitim tupela bai ol i dai pinis. Em dispela meri, long wanem em i no bin singaut na em i stap insait long dispela biktaun, na dispela man, long wanem em i bin daunim meri bilong man i stap klostu long em. Long pasin olsem yu mas putim pasin nogut i stap longwe long namel long yupela.

22:25  Tasol sapos wanpela man i lukim wanpela meri ol i bin makim bilong maritim narapela man na dispela meri i stap long ples op, na man i strong long em, na em i slip wantaim dispela meri, long dispela taim dispela man tasol i bin slip wantaim dispela meri i mas i dai pinis.

22:26  Tasol yu no ken mekim wanpela samting long dispela meri. Dispela meri i no bin mekim sin inap long em i mas i dai pinis. Long wanem olsem taim wanpela man i kirap long birua long man i stap klostu long em na em i kilim em i dai pinis, em i wankain long dispela samting.

22:27  Long wanem em i lukim dispela meri i stap long ples op na dispela meri ol i bin makim long maritim narapela man i bin singaut na i no gat wanpela i stap bilong helpim em.

22:28  Sapos wanpela man i lukim wanpela meri i no bin slip wantaim wanpela man pastaim na ol i no bin makim em long maritim wanpela man, na em i holimpas dispela meri na slip wantaim em na ol i kisim save long tupela,

22:29  Long dispela taim dispela man i bin slip wantaim dispela meri i mas givim fifti mani silva long papa bilong dispela meri na dispela meri bai stap maritmeri bilong em, long wanem em i bin daunim dispela meri. Em i no ken rausim dispela meri long i stap meri bilong em inap long olgeta de long laip bilong dispela man.

22:30  Wanpela man i no ken kisim meri bilong papa bilong em o lukluk long sem bilong papa bilong em.

Chapter 23

23:1  ¶ Man i bagarap long ol ston bilong em o ol i bin katim na rausim sem bilong em, em i no ken i go insait long lain bung bilong BIKPELA.

23:2  Wanpela bastat i no ken i go insait long lain bung bilong BIKPELA inap long namba ten lain tumbuna pikinini bilong em, ol i no ken i go insait long lain bung bilong BIKPELA.

23:3  Wanpela bilong lain Amon o lain Moap i no ken go insait long lain bung bilong BIKPELA. Yes inap long winim namba ten lain tumbuna pikinini, ol i no ken i go insait long lain bung bilong BIKPELA oltaim oltaim.

23:4  Long wanem ol i no bin bungim yupela wantaim kaikai na wantaim wara long rot taim yupela i kam lusim Isip. Na bikos ol i bin baim Belam, pikinini man bilong Beor bilong Petor bilong Mesopotemia, long mekim tok long God i mas daunim yu.

23:5  Tasol God BIKPELA bilong yu i no laik harim tok bilong Belam. Tasol God BIKPELA bilong yu i bin tanim dispela tok long daunim yu long i kamap blesing long yu. Long wanem God BIKPELA bilong yu i laikim tru yu.

23:6  Yu no ken wok long painim bel isi wantaim ol o helpim ol long kisim planti kago samting long olgeta de bilong yu inap long oltaim oltaim.

23:7  Yu no ken tingting nogut long wanpela i bilong lain Idom. Long wanem em i brata bilong yu. Yu no ken tingting nogut long wanpela i bilong lain Isip bikos yu bin i stap man bilong narapela kantri long graun bilong em.

23:8  Ol pikinini ol i kamapim bai kam insait long lain bung bilong BIKPELA long namba tri lain pikinini.

23:9  ¶ Taim ami i go bilong pait wantaim ol birua bilong yupela, nau yu mas lukaut long stap longwe long olgeta samting nogut.

23:10  Sapos wanpela man i stap namel long yupela na em i no klin, long wanem em i kamap doti long nait, nau em i mas i go ausait long kem. Em i no ken kam insait long kem.

23:11  Tasol em bai stap olsem, taim apinun tru i kamap em i mas wasim em yet long wara. Na taim san i go daun em i mas kam insait long kem gen.

23:12  Na tu yu mas i gat wanpela ples i stap ausait long kem, na yu mas i go ausait na go long em.

23:13  Na yu mas i gat wanpela liklik savol i stap long spia bilong yu. Na em bai stap olsem, taim yu laik go ausait long sindaun bilong pekpek yu mas digim hul long dispela savol na yu mas tanim yu yet na karamapim dispela samting i kamaut long yu.

23:14  Long wanem God BIKPELA bilong yu i wokabaut long namel long kem bilong yu long helpim yu na long givim yu ol birua bilong yu long pes bilong yu. Olsem na kem bilong yu i mas i stap holi, bai Em i no lukim wanpela samting i no klin long yu na tanim Em yet long lusim yu.

23:15  ¶ Yu no ken givim i go bek long bosman bilong em wanpela wokboi nating i bin ranawe long dispela bosman na em i kam long yu.

23:16  Em bai sindaun wantaim yu, yes namel long yupela long wanem ples em bai makim insait long wanpela bilong ol dua bilong banis bilong yu long ples em i tingim i nambawan. Yu no ken givim hevi long em.

23:17  I no gat wanpela pamuk meri i ken i stap long ol pikinini meri bilong Isrel, o wanpela i bihainim ol pasin nogut bilong Sodom long ol pikinini man bilong Isrel.

23:18  Yu no ken bringim pe bilong wanpela pamuk meri o pe bilong baim wanpela i bihainim pasin nogut bilong Sodom, ol i kolim em dok, i kam insait long haus bilong God BIKPELA bilong yu bilong bihainim wanpela tok tru antap i go long God. Long wanem dispela tupela samting i sting tru long tingting bilong God BIKPELA bilong yu.

23:19  Yu no ken givim dinau bilong kisim profit mani samting long brata bilong yu. Em profit long mani o profit long kaikai o profit long wanpela samting ol i givim dinau bilong kisim dispela.

23:20  Yu ken givim dinau bilong kisim profit samting long wanpela man bilong narapela kantri. Tasol yu no ken givim dinau bilong kisim profit samting long ol brata bilong yu. Long God BIKPELA bilong yu i ken blesim yu long olgeta samting yu putim han bilong yu long mekim long graun yu go long em long kisim dispela.

23:21  Taim yu mekim tok tru antap i go long God BIKPELA bilong yu, yu no ken slek long baim dispela. Long wanem tru tumas God BIKPELA bilong yu bai i gat askim long dispela long yu. Na dispela bai stap sin long yu.

23:22  Tasol sapos yu bai i no laik mekim tok tru antap, dispela i no stap sin long yu.

23:23  Dispela tok i go ausait long arere bilong maus bilong yu, yu mas bihainim na mekim. Inap long ofa yu mekim long laik bilong yu, long bihainim tok tru antap yu bin mekim long God BIKPELA bilong yu na yu bin promisim dispela long maus bilong yu.

23:24  Taim yu kam long gaden wain bilong man i stap klostu long yu, nau yu ken kaikai ol pikinini wain long laik bilong yu inap long yu pulap, tasol yu no ken putim wanpela long basket samting bilong yu.

23:25  Taim yu kam long kon samting i sanap na i bilong man i stap klostu long yu, nau yu ken rausim ol pikinini kaikai long han bilong yu, tasol yu no ken putim wanpela sarip i go long dispela kon samting i sanap na i bilong man i stap klostu long yu.

Chapter 24

24:1  ¶ Taim wanpela man i kisim wanpela meri na maritim em, na em i stap long meri i no stap gutpela long ol ai bilong em. Long wanem em i bin lukim wanpela samting i no klin long em. Long dispela taim larim dispela man i raitim wanpela pepa long rausim meri long i stap meri bilong em na givim dispela long han bilong em na salim em long i lusim haus bilong em.

24:2  Na taim dispela meri i lusim haus bilong dispela man, meri inap i go na stap meri bilong narapela man.

24:3  Na sapos dispela namba tu man bilong em i no laikim tru em na raitim wanpela pepa long rausim meri long i stap meri bilong em na man i givim dispela long han bilong meri na salim em long i go lusim haus bilong em, o sapos namba tu man bilong em i dai pinis, em man i bin kisim em long i stap meri bilong em,

24:4  Man i bin i stap man bilong em pastaim na em i salim dispela meri long lusim em, em i no ken kisim dispela meri gen long i stap meri bilong em bihain long meri i no stap klin. Long wanem dispela pasin i sting tru long tingting bilong BIKPELA. Na yu no ken kirapim dispela hap graun long sin. Em graun God BIKPELA bilong yu i givim yu bilong kisim olsem samting papa i givim ol pikinini bilong em.

24:5  ¶ Taim wanpela man i kisim nupela meri bilong em, em i no ken go long woa na tu ol i no ken makim em long mekim sampela wok bisnis. Tasol em i mas i stap fri long haus wanpela yia na em i mas amamasim meri bilong em, em i bin kisim.

24:6  Wanpela man i no ken kisim ston i stap daunbilo o ston i stap antap bilong krungutim wit samting bilong i stap mak long papa bilong tupela ston bai bekim dinau, long wanem em i kisim laip bilong wanpela man long dispela mak.

24:7  Sapos ol i lukim wanpela man i stilim wanpela bilong ol brata bilong em bilong ol pikinini bilong Isrel bilong kisim mani long em o em i salim em, orait dispela stilman mas i dai pinis. Na yu bai putim pasin nogut i stap longwe long namel long yupela.

24:8  Lukaut long bikpela sik lepra, bai yu ken lukaut gut na mekim bilong bihainim olgeta samting ol pris na ol lain bilong Livai bai skulim yupela long em. Olsem mi givim strongpela tok long ol, olsem tasol yupela i mas lukaut long mekim.

24:9  Tingim gen wanem samting God BIKPELA bilong yu i mekim long Miriam long rot, bihain long yupela i bin kam long lusim Isip.

24:10  Taim yu givim dinau long wanpela samting long brata bilong yu, yu no ken i go insait long haus bilong em long kisim mak long em bai bekim dinau.

24:11  Yu mas sanap ausait na man yu laik givim dinau long em i mas bringim mak bilong bekim dinau i kamaut long haus na i kam long yu.

24:12  Na sapos dispela man i stap rabis, yu no ken slip wantaim mak long em bai bekim dinau bilong em.

24:13  Olgeta taim yu mas givim em gen dispela mak bilong bekim long taim san i go daun, bai em i ken slip long klos bilong em yet na blesim yu. Na dispela bai stap stretpela pasin i go long yu long ai bilong God BIKPELA bilong yu.

24:14  ¶ Yu no ken givim hevi long wanpela wokboi yu bin baim em long pe na em i stap rabis na sot long planti samting, maski em i stap brata bilong yu o wanpela bilong ol man bilong narapela kantri husat i stap long graun bilong yu na insait long dua bilong banis bilong yu.

24:15  Long de bilong em i mekim wok yu mas givim em pe bilong em. Na tu san i no ken go daun long dispela, long wanem em i rabis na bel bilong em i laik tru long kisim dispela. Nogut em i singaut long daunim yu long BIKPELA na dispela i stap sin long yu.

24:16  Ol i no ken kilim i dai pinis ol papa bilong bekim ol rong bilong ol pikinini. Na tu ol i no ken kilim i dai pinis ol pikinini bilong bekim ol rong bilong ol papa. Ol i mas kilim i dai pinis olgeta wan wan man bilong bekim ol rong bilong sin bilong em yet.

24:17  Yu no ken krungutim tok bilong kot bilong man bilong narapela kantri o bilong ol pikinini i no gat papa. Na tu yu no ken kisim klos bilong wanpela meri man bilong em i bin dai pinis long i stap mak bilong bekim dinau.

24:18  Tasol yu mas tingim gen long yu bin i stap slev long Isip na God BIKPELA bilong yu i bin baim bek yu long dispela ples. Olsem na mi givim strongpela tok long yu long mekim dispela samting.

24:19  Taim yu katim bilong daunim ol kaikai long ples op bilong yu na yu lusim tingting long wanpela bung bilong kaikai na em i stap long ples op, yu no ken i go gen long kisim dispela. Em i mas i stap bilong ol man bilong narapela kantri na bilong ol pikinini i no gat papa na bilong ol meri man bilong em i bin i dai pinis. Bai God BIKPELA bilong yu ken blesim yu long olgeta wok bilong ol han bilong yu.

24:20  Taim yu paitim diwai oliv bilong yu long kisim kaikai bilong em, yu no ken i go gen long ol han bilong dispela diwai. Dispela i mas i stap bilong man bilong narapela kantri na bilong ol pikinini i no gat papa na bilong meri man bilong em i bin i dai pinis.

24:21  Taim yu bungim ol kaikai bilong gaden wain bilong yu, yu no ken go bihain taim bilong kisim las liklik kaikai i stap yet. Dispela i mas i stap bilong man bilong narapela kantri na bilong ol pikinini i no gat papa na bilong meri man bilong em i bin i dai pinis.

24:22  Na yu mas tingim gen long yu bin i stap slev long graun bilong Isip. Olsem na mi givim strongpela tok long yu long mekim dispela samting.

Chapter 25

25:1  ¶ Sapos hevi i stap namel long tupela man na ol i kam long kot, bai ol jas i ken skelim tok bilong tupela. Long dispela taim ol jas i mas harim tok bilong man i mekim stretpela tok na kotim man i mekim pasin nogut.

25:2  Na em bai stap olsem, sapos man i mekim pasin nogut na dispela pasin em inap long em i mas kisim kanda, long dispela taim jas bai mekim em i slip long graun na kisim kanda long pes bilong dispela jas inap long rong bilong em. Na jas bai makim namba bilong ol taim ol paitim em long kanda.

25:3  Jas i ken makim em long kisim foti kanda na jas i no ken winim dispela. Nogut sapos jas i winim dispela namba na mekim save long em antap long ol dispela long givim em planti moa kanda, orait brata bilong yu bai stap olsem samting nogut long yu.

25:4  Yu no ken pasim maus bilong bulmakau i mekim wok long wokabaut long ol kon samting bilong rausim ol pikinini kaikai long ol stik.

25:5  ¶ Sapos ol brata i sindaun wantaim na wanpela bilong ol i dai pinis na em i no gat pikinini, meri bilong dispela daiman i no ken maritim ausait long lain, long man bilong narapela kantri. Brata tru bilong man bilong em bai kam long em na kisim em long i kamap meri bilong em na mekim pasin bilong brata bilong man i bin i stap man bilong en pastaim long dispela meri.

25:6  Na em bai stap olsem, namba wan pikinini dispela meri i karim, em bai kisim ol samting long nem bilong brata bilong em i bin dai pinis, bai nem bilong dispela daiman i no ken pinis long Isrel.

25:7  Na sapos dispela man i no laik kisim meri bilong brata bilong em, nau larim meri bilong brata bilong em i go long dua bilong banis bilong taun na go long ol lapun hetman na tok, Brata bilong man bilong mi i no laik kirapim pikinini long kisim nem bilong brata bilong em long Isrel. Em i no laik mekim pasin bilong brata bilong man bilong mi.

25:8  Long dispela taim ol lapun hetman bilong biktaun bilong em bai singautim em na tok long em. Na sapos em i strong long dispela na em i tok, Mi no laik kisim em,

25:9  Nau meri bilong brata bilong em mas i kam long em long ai bilong ol lapun hetman na lusim su bilong dispela man long fut bilong em na spet long pes bilong em. Na meri bai bekim na tok, Em bai kamap olsem long man i no laik strongim haus bilong brata bilong em.

25:10  Na long Isrel nem bilong dispela man bai stap olsem, Haus bilong dispela man meri i bin lusim su bilong em.

25:11  Taim tupela man i pait wantaim na meri bilong wanpela i kam klostu bilong helpim man bilong em i no ken i stap long han bilong man i paitim em, na meri i taitim han bilong em na pulim sem bilong arapela man,

25:12  Orait yu mas katim na rausim han bilong dispela meri. Ai bilong yu i no ken sori long em.

25:13  ¶ Yu no ken karim tupela samting bilong skelim hevi long bilum bilong yu na wanpela i hevi na wanpela i no hevi.

25:14  Yu no ken i gat long haus bilong yu tupela kain samting bilong tilim plaua samting wanpela i bikpela na wanpela i liklik.

25:15  Tasol yu mas i gat gutpela na stretpela samting i skelim hevi na yu mas i gat stretpela samting bilong skelim plaua samting. Mekim olsem bai ol de bilong yu i ken kamap planti moa yet long dispela hap graun God BIKPELA bilong yu i givim dispela long yu.

25:16  Long wanem olgeta manmeri i mekim ol dispela samting bilong giamanim narapela na olgeta i mekim pasin i no stretpela, ol i sting tru long tingting bilong God BIKPELA bilong yu.

25:17  Tingim gen long wanem samting Amalek i bin mekim long yu long rot, taim yupela i kamaut long Isip.

25:18  Long pasin em i bungim yu long rot na em i paitim ol lain bilong yu i stap bihain tru, em olgeta i no gat strong na i stap bihain long yu taim yu i no gat strong na les long bodi. Na em i no pret long God.

25:19  Olsem na em bai stap olsem, taim God BIKPELA bilong yu i givim yu malolo long olgeta birua bilong yu i stap raun nabaut long dispela hap graun God BIKPELA bilong yu i givim yu bilong i stap samting papa i givim ol pikinini long kisim dispela, bai yu mas rausim ol samting i holim tingting long Amalek long aninit long heven. Yu no ken lusim tingting long dispela.

Chapter 26

26:1  ¶ Na em bai stap olsem, taim yu kam insait long graun God BIKPELA bilong yu i givim yu bilong i stap olsem samting papa i givim pikinini na yu kisim dispela na sindaun long em,

26:2  Yu mas kisim sampela bilong ol samting i kamap pastaim bilong olgeta kaikai bilong dispela graun. Yu mas bringim dispela, em ol samting bilong graun bilong yu God BIKPELA bilong yu i givim yu. Na yu mas putim dispela long wanpela basket. Na yu mas i go long dispela ples God BIKPELA bilong bai makim long putim nem bilong Em long em.

26:3  Na yu bai go long pris husat i stap long ol dispela de na tokim em, Mi tokaut dispela de long God BIKPELA bilong yu long mi kam long dispela kantri BIKPELA i bin tok tru antap long ol papa bilong yumi long givim dispela long yumi.

26:4  Na pris bai kisim dispela basket long lusim han bilong yu na putim dispela daun long pes bilong alta bilong God BIKPELA bilong yu.

26:5  Na yu mas tokaut na tok long pes bilong God BIKPELA bilong yu olsem, Papa bilong mi i bin i stap wanpela man long lain Siria na em i klostu redi long bagarap na em i go daun long Isip na sindaun long dispela ples sampela taim wantaim liklik lain na ol i kamap wanpela kantri i bikpela na strongpela na planti manmeri long dispela ples.

26:6  Na ol manmeri bilong Isip i mekim pasin nogut long yumi na givim hevi long yumi na mekim hatwok long yumi.

26:7  Na taim yumi singaut long God BIKPELA bilong ol papa bilong yumi, BIKPELA i harim nek bilong yumi na Em i lukluk long ol hevi bilong yumi na pasin nogut yumi kisim.

26:8  Na BIKPELA i bin bringim yumi long lusim Isip long han i strongpela tru na Em i taitim han bilong Em na long pasin i kirapim pret nogut tru na long ol mak na long ol samting i winim tingting.

26:9  Na Em i bin bringim yumi long dispela ples na Em i givim yumi dispela hap graun, em graun i pulap long susu na hani.

26:10  Na nau lukim mi bin bringim ol namba wan kaikai bilong graun Yu O BIKPELA i givim mi. Na yu mas putim dispela long pes bilong God BIKPELA bilong yu na lotu long pes bilong God BIKPELA bilong yu.

26:11  Na yu mas amamas tru long olgeta gutpela samting God BIKPELA bilong yu i bin givim long yu na long hauslain bilong yu, em yu na man bilong lain bilong Livai na man bilong narapela kantri i stap namel long yupela.

26:12  ¶ Taim yu pinis long givim wanpela bilong olgeta tenpela samting i kamap long yu long namba tri yia, em dispela yia bilong givim wanpela hap bilong olgeta tenpela hap, na yu bin givim dispela long man bilong lain Livai na man bilong narapela kantri na ol pikinini i no gat papa na ol meri man bilong ol i bin i dai pinis, bai ol i ken kaikai insait long dua bilong banis bilong yu na stap bel tait.

26:13  Long dispela taim yu mas i tok long pes bilong God BIKPELA bilong yu olsem, Mi bin bringim i kam ausait long haus bilong mi ol samting bilong Yu. Na tu mi bin givim ol long man bilong lain bilong Livai na long man bilong narapela kantri na long ol pikinini i no gat papa na long meri man bilong em i bin i dai pinis bilong bihainim olgeta strongpela tok bilong Yu, Yu bin givim strongpela tok long mi long ol. Mi no bin sakim ol strongpela tok bilong Yu na tu mi no bin lusim tingting long ol.

26:14  Mi no bin kaikai long dispela long taim bilong hevi bilong mi. Na tu mi no bin kisim i go wanpela bilong ol dispela long yusim long wanpela samting i no klin. Na tu mi no bin givim wanpela bilong dispela long ol daiman. Tasol mi bin harim long bihainim nek bilong God BIKPELA bilong mi na mi bin mekim bilong bihainim olgeta samting yu bin givim strongpela tok long mi long em.

26:15  Lukluk daun long ples holi Yu stap long em, em long heven, na blesim ol manmeri bilong Yu Isrel na dispela hap graun Yu bin givim dispela long mipela olsem Yu bin tok tru antap long ol papa bilong mipela, em graun i pulap long susu na hani.

26:16  ¶ God BIKPELA bilong yu i bin givim strongpela tok long yu long mekim ol dispela strongpela tok bilong Em i stap long buk na ol tok long pe bilong kot. Olsem na yu mas holimpas na mekim ol long olgeta hap bilong bel bilong yu na long olgeta hap bilong tewel bilong yu.

26:17  Yu bin tokim BIKPELA dispela de long Em i stap God bilong yu na long yu bai wokabaut long ol we bilong Em. Na long yu bai holimpas ol strongpela tok long Em i stap long buk na ol strongpela tok bilong Em na ol tok bilong Em long long pe bilong kot. Na long yu bai harim bilong bihainim nek bilong Em.

26:18  Na BIKPELA i bin tokim yu dispela de long yu bai stap lain manmeri bilong Em tasol, olsem Em i bin promisim yu, na long yu mas holimpas long olgeta strongpela tok bilong Em.

26:19  Na long Em bai mekim yu i stap antap tru na antap long olgeta arapela kantri husat Em i bin wokim, long pasin bilong litimapim nem bilong Em na long nem na long biknem. Na long yu ken i stap wanpela lain manmeri i holi long God BIKPELA bilong yu, olsem Em i bin tok.

Chapter 27

27:1  ¶ Na Moses wantaim ol lapun hetman bilong Isrel ol i givim strongpela tok long ol manmeri na tok, Holimpas long olgeta strongpela tok mi givim strongpela tok long ol long yupela long dispela de.

27:2  Na em i mas i stap long de yupela bai go hapsait long wara Jordan na go long graun God BIKPELA bilong yu i givim dispela long yu, bai yu mas sanapim ol bikpela ston na plastaim ol long plasta.

27:3  Na yu mas raitim olgeta tok bilong dispela lo long ol taim yu go hapsait long yu ken i go insait long graun God BIKPELA bilong yu i givim dispela long yu, em graun i pulap long susu na hani, olsem God BIKPELA bilong ol papa bilong yu i bin promisim yu.

27:4  Olsem na em bai stap olsem, taim yupela i go hapsait long Jordan yupela i mas sanapim ol dispela ston long maunten Ebal, olsem mi givim strongpela tok long yupela long dispela long dispela de. Na yu mas plastaim ol long plasta.

27:5  Na long dispela ples yu mas wokim wanpela alta long God BIKPELA bilong yu, em alta bilong ol ston. Yu no ken litimapim wanpela samting ain bilong paitim ol.

27:6  Yu mas wokim alta bilong God BIKPELA bilong yu long ol ston i no bruk. Na yu mas ofaim ol ofa bilong kukim i go long God BIKPELA bilong yu long dispela.

27:7  Na yu mas ofaim ol ofa bilong givim bel isi. Na yu mas kaikai long dispela ples na amamas tru long pes bilong God BIKPELA bilong yu.

27:8  Na yu mas raitim klia tru olgeta tok bilong dispela lo long ol dispela ston.

27:9  Na Moses na ol pris, em ol lain bilong Livai, ol i tok long olgeta Isrel na tok, Pasim maus na harim gut, O Isrel. Dispela de yu kamap ol manmeri bilong God BIKPELA bilong yu.

27:10  Olsem na yu mas bihainim nek bilong God BIKPELA bilong yu na mekim ol strongpela tok bilong Em na ol strongpela tok bilong Em i stap long buk na mi givim strongpela tok long yu long dispela samting long dispela de.

27:11  ¶ Na long dispela wanpela de Moses i givim strongpela tok long dispela manmeri na em i tok,

27:12  Ol dispela lain bai sanap long maunten Gerisim long blesim ol manmeri taim yupela i kam hapsait long Jordan, em Simion na Livai na Juda na Isakar na Josep na Benjamin.

27:13  Na ol dispela lain bai sanap long maunten Ebal long tokaut long samting bilong kotim, em Ruben na Gat na Aser na Sebyulan na Dan na Naptalai.

27:14  Na lain bilong Livai bai tok na tokaut long olgeta man bilong Isrel long strongpela nek olsem,

27:15  God i kotim man i wokim wanpela piksa long god giaman, maski em i wokim long hama o kukim long paia. BIKPELA i tingim dispela i sting nogut tru, em wok bilong han bilong saveman long wokim na ol i putim dispela long ples hait. Na olgeta manmeri bai bekim na tok, Amen.

27:16  God i kotim man i tingim papa bilong em o mama bilong em i samting nating. Na olgeta manmeri bai tok, Amen.

27:17  God i kotim man i tekewe samting i makim arere bilong graun bilong man i stap klostu long em. Na Olgeta manmeri bai tok, Amen.

27:18  God i kotim man i mekim aipas i lusim rot bilong ol na paul nabaut. Na olgeta manmeri bai tok, Amen.

27:19  God i kotim man i paulim stretpela kot bilong man bilong narapela kantri o pikinini i no gat papa o meri man bilong em i dai pinis. Na olgeta manmeri bai tok, Amen.

27:20  God i kotim man i slip wantaim meri bilong papa bilong em, long wanem em i lukim bilong bagarapim samting hait bilong papa bilong em. Na olgeta manmeri bai tok, Amen.

27:21  God i kotim man i slip wantaim wanpela animal. Na olgeta manmeri bai tok, Amen.

27:22  God i kotim man i slip wantaim susa bilong em, em pikinini meri bilong papa bilong em o pikinini meri bilong mama bilong em. Na olgeta manmeri bai tok, Amen.

27:23  God i kotim man i slip wantaim mama bilong meri bilong em. Na olgeta manmeri bai tok, Amen.

27:24  God i kotim man i paitim hait man i stap klostu long em. Na olgeta manmeri bai tok, Amen.

27:25  God i kotim man i kisim mani samting long kilim i dai wanpela man i no bin mekim rong. Na olgeta manmeri bai tok, Amen.

27:26  God i kotim man i no tok yes long olgeta tok bilong dispela lo long bihainim ol. Na olgeta manmeri bai tok, Amen.

Chapter 28

28:1  ¶ Na em bai kamap olsem, sapos yu bai harim gut nek bilong God BIKPELA bilong yu long lukautim na bihainim olgeta strongpela tok bilong Em mi givim strongpela tok long yu long ol dispela de, orait God BIKPELA bilong yu bai putim yu antap tru na antap long olgeta kantri bilong dispela graun.

28:2  Na olgeta bilong ol dispela blesing bai kam long yu na stap wantaim yu sapos yu bai harim nek bilong God BIKPELA bilong yu.

28:3  Blesing bai stap long yu long biktaun na blesing bai stap long yu long ples op.

28:4  Blesing bai stap long ol pikinini bilong bodi bilong yu na ol kaikai bilong graun bilong yu na ol pikinini bilong ol bulmakau samting bilong yu na long ol wok bulmakau bilong yu i kamap planti moa na long ol bung bilong ol sipsip bilong yu.

28:5  Blesing bai stap long basket bilong yu na long ples yu wokim bret.

28:6  Blesing bai stap long yu taim yu kam insait na blesing bai stap long yu taim yu go ausait.

28:7  Ol birua bilong yu husat i kirap birua long yu BIKPELA bai mekim ol i kisim bagarap long pes bilong yu. Ol bai kamaut long birua long yu long wanpela rot na ranawe long pes bilong yu long sevenpela rot.

28:8  BIKPELA bai givim strongpela tok long blesim yu long ol haus stua na long olgeta samting yu putim han bilong yu long mekim. Na Em bai blesim yu long dispela hap graun God BIKPELA bilong yu i givim yu.

28:9  BIKPELA bai kirapim yu long i stap wanpela manmeri i holi long Em yet olsem Em i tok tru antap long yu sapos yu bai holimpas ol strongpela tok bilong God BIKPELA bilong yu na wokabaut long ol we bilong Em.

28:10  Na olgeta manmeri bilong dispela graun bai lukim olsem, ol i makim yu long nem bilong BIKPELA. Na ol bai pret long yu.

28:11  Na BIKPELA bai mekim yu i gat planti long kago samting na long ol pikinini na long ol pikinini bilong ol bulmakau samting bilong yu na long ol kaikai bilong graun bilong yu long dispela hap graun BIKPELA i tok tru antap long ol papa bilong yu long givim yu.

28:12  BIKPELA bai opim long yu gutpela samting i dia tumas bilong Em, em heven long givim ren long graun bilong yu long stretpela taim bilong Em na long blesim olgeta wok bilong han bilong yu. Na yu bai givim dinau long planti kantri na bai yu no kisim dinau.

28:13  Na BIKPELA bai mekim yu i stap het na i no tel. Na yu bai stap antap tasol na yu no bai stap aninit. Ol dispela bai kamap sapos yu harim ol strongpela tok bilong God BIKPELA bilong yu, mi givim strongpela tok long ol long dispela de long bihainim na long mekim ol.

28:14  Na yu no ken go popaia long wanpela bilong ol tok mi givim strongpela tok long yu long ol long dispela de. Yu no ken go long han sut o long han kais, long go bihainim ol arapela god long mekim wok bilong ol.

28:15  ¶ Tasol em bai kamap olsem, sapos yu no laik harim nek bilong God BIKPELA bilong yu long holimpas long mekim olgeta strongpela tok bilong Em na ol strongpela tok bilong Em i stap long buk, mi givim strongpela tok long yu long ol dispela de, orait olgeta bilong dispela pasin bilong God i kotim yu bai kam long yu na stap wantaim yu.

28:16  Bai yu stap aninit long kot insait long biktaun na yu bai stap aninit long kot long ples op.

28:17  Basket bilong yu na stua bilong yu bai stap aninit long kot.

28:18  Ol pikinini bilong bodi bilong yu na ol kaikai bilong graun bilong yu na ol pikinini bilong ol bulmakau bilong yu na ol bung sipsip bilong yu, olgeta bai stap aninit long kot.

28:19  Yu bai stap aninit long kot taim yu kam insait na yu bai stap aninit long kot taim yu go ausait.

28:20  BIKPELA bai salim long yu pasin bilong i stap aninit long kot na hevi na hatim long olgeta samting yu putim han bilong yu long mekim, inap long yu bagarap olgeta na inap long yu dai pinis kwiktaim. Na as bilong dispela em i ol pasin nogut bilong ol samting yu mekim na long dispela yu bin givim baksait long Mi.

28:21  BIKPELA bai mekim bikpela sik i bungim yu inap long Em i pinisim yu long lusim dispela hap graun, graun yu go long kisim.

28:22  BIKPELA bai paitim yu long sik i mekim yu i kamap bun nating na long skinhat na long bikpela skinhat na long bainat na long gaden i kisim sik na long kaikai i no kisim ren na ol bai ranim yu inap long yu bagarap.

28:23  Na skai bilong yu i stap antap long het bilong yu bai stap bras na graun i stap aninit long yu bai stap ain.

28:24  BIKPELA bai mekim ren bilong graun bilong yu i kamap paura na das. Em bai lusim heven na kam daun long yu inap long yu stap bagarap.

28:25  BIKPELA bai mekim yu i kisim bagarap long pes bilong ol birua bilong yu. Yu bai go ausait long wanpela rot long paitim ol na ranawe long sevenpela rot long pes bilong ol. Na ol bai tekewe yu i go long olgeta kingdom bilong dispela graun.

28:26  Na bodi bilong yu bai stap kaikai bilong olgeta pisin bilong skai na long ol animal bilong dispela graun. Na i no gat wanpela man bai pretim ol long ranawe.

28:27  BIKPELA bai bagarapim yu long buk bilong Isip na long buk i kamap long sem na long kaskas na long ol sik i mekim wanpela i skirapim skin. Na yu no inap kamap orait gen long ol dispela.

28:28  BIKPELA bai bagarapim yu long longlong tingting na kamap aipas na bel i pret tumas.

28:29  Na yu bai putim han i go ausait bilong pilim long belo, olsem aipas i putim han long tudak na bai yu no stap gutpela long ol we bilong yu. Na yu bai stap lain i kisim hevi tasol na lusim ol samting na i no gat wanpela bai helpim yu i stap gutpela.

28:30  Yu bai makim wanpela meri bilong i kamap meri bilong yu na narapela man bai slip wantaim em. Yu bai wokim wanpela haus na yu no inap stap insait long em. Yu bai planim wanpela gaden diwai wain na yu no inap bungim ol pikinini kaikai bilong dispela.

28:31  Ol bai kilim bulmakau bilong yu long pes bilong yu na yu no inap kaikai dispela. Ol bai stilim na tekewe donki bilong yu long pes bilong yu na bai wanpela i no kisim dispela i kam bek long yu. Ol bai givim ol sipsip bilong yu long ol birua bilong yu, na yu no gat wanpela bilong kisim ol i kam bek.

28:32  Ol bai givim ol pikinini man bilong yu na ol pikinini meri bilong yu long narapela manmeri, na ol ai bilong yu bai lukluk inap long kamap aipas long yu ken lukim ol olgeta taim long de. Na han bilong yu bai i no stap strong.

28:33  Wanpela kantri yu no save long ol bai kaikai olgeta kaikai bilong graun bilong yu na olgeta hatwok bilong yu. Na yu bai stap lain bilong kisim hevi tasol na lain i bruk nabaut olgeta taim.

28:34  Olsem na bai yu stap longlong bilong lukim long ol ai bilong yu, ol dispela yu bai lukim.

28:35  BIKPELA bai bagarapim yu long ol skru bilong lek na long ol lek long wanpela buk i nogut tru na i stap long aninit long fut bilong yu na i go inap long antap bilong het bilong yu na yu no inap oraitim dispela.

28:36  BIKPELA bai bringim yu na king bilong yu, yu bai makim em long bosim yu long i go long wanpela kantri, em kantri yu o ol papa bilong yu i no bin save long ol. Na long dispela ples bai yu mekim wok long ol arapela god bilong diwai na ston.

28:37  Na yu bai kamap wanpela samting nogut i winim tingting na wanpela samting bilong skulim ol arapela na wanpela samting bilong makim long tok bilas namel long olgeta kantri BIKPELA bai go pas long yu long ol.

28:38  Yu bai karim planti pikinini kaikai i go long gaden na yu bai bungim liklik long kamautim, long wanem ol grasop bai kaikai dispela.

28:39  Yu bai planim ol gaden wain na wok long ol, tasol bai yu no dring dispela wain o bungim ol pikinini kaikai bilong ol, long wanem ol liklik snek bai kaikai ol.

28:40  Yu bai gat ol diwai oliv i stap nabaut long olgeta hap i stap insait long ol arere bilong graun bilong yu, tasol yu no inap welim yu yet long dispela wel, long wanem ol diwai oliv bilong yu bai lusim ol oliv bilong em bipo ol i mau.

28:41  Yu bai karim ol pikinini man na pikinini meri, tasol yu no inap amamas wantaim ol, long wanem ol bai go long i stap kalabus.

28:42  Ol grasop bai kaikai olgeta diwai bilong yu na ol kaikai bilong graun bilong yu.

28:43  Man bilong narapela kantri i stap wantaim yu bai i stap antap tru long yu, na yu bai stap daunbilo tru.

28:44  Em bai givim dinau long yu na yu no inap givim dinau long em. Em bai stap het na yu bai stap tel.

28:45  ¶ Na moa yet olgeta bilong dispela kotim bai kam long yu na bihainim yu na winim yu inap long yu bagarap olgeta, long wanem yu no laik harim nek bilong God BIKPELA bilong yu long holimpas ol strongpela tok bilong Em na ol strongpela tok bilong Em i stap long buk na Em i bin givim strongpela tok long yu long ol.

28:46  Na ol bai stap long yu bilong i stap wanpela mak na bilong wanpela samting i winim tingting long ol pikinini na tumbuna pikinini bilong yu inap long oltaim oltaim.

28:47  Long wanem yu no mekim wok bilong God BIKPELA bilong yu wantaim pasin bilong amamas tru na long bel i amamas long dispela planti bilong olgeta samting yu bin kisim.

28:48  Olsem na yu bai mekim wok bilong ol birua bilong yu, BIKPELA bai salim ol long birua long yu. Na yu bai stap long hangre na long nek i drai na long pasin bilong i stap skin nating na long yu sot long olgeta samting. Na em bai pasim wanpela samting ain bilong pasim nek bilong bulmakau long nek bilong yu, inap long em i bagarapim yu.

28:49  BIKPELA bai bringim wanpela kantri long birua long yu. Ol i stap longwe tru, em long arere bilong dispela graun na ol i kam kwiktaim olsem tarangau i flai. Em wanpela kantri na bai yu no save long tok ples bilong ol.

28:50  Wanpela kantri pes bilong ol i pretim ol arapela na ol bai i no givim ona long ol lapun o laikim ol yangpela.

28:51  Na em bai kaikai ol pikinini bilong ol bulmakau bilong yu na ol kaikai bilong graun bilong yu inap long yu bagarap. Na tu bai ol i no larim yu holim kon samting o wain o wel o pikinini bilong ol bulmakau bilong yu o ol bungim bilong ol sipsip bilong yu inap long em i bagarapim yu.

28:52  Na em bai pasim yu insait long olgeta dua bilong banis bilong biktaun bilong yu inap long ol banis bilong yu i antap tru ol i kam daun. Yu bin bilip long ol long olgeta hap bilong graun bilong yu. Na em bai pasim yu insait long olgeta dua bilong banis bilong yu long olgeta hap bilong graun bilong yu God BIKPELA bilong yu i bin givim dispela long yu.

28:53  Na yu bai kaikai ol pikinini bilong bodi bilong yu, em mit bilong ol pikinini man bilong yu na bilong ol pikinini meri bilong yu God BIKPELA bilong yu i bin givim long yu long dispela taim bilong pasim yu na long hatpela taim na long dispela ol birua bilong yu bai givim hevi long yu.

28:54  Inap long man i no gat strong namel long yupela na em i malumalu man, ai bilong em bai i nogut long brata bilong em na long meri i stap long bros bilong em na long ol pikinini bilong em em i larim ol i stap yet.

28:55  Inap long em i no laik givim long wanpela bilong ol sampela mit bilong ol pikinini bilong em taim em i kaikai ol. As bilong dispela i olsem, em i no gat wanpela samting i stap yet long em long dispela taim bilong pasim ol na long dispela hatpela taim, na long dispela ol birua bilong yu bai givim hevi long yu insait long olgeta dua bilong banis bilong yu.

28:56  Meri i stap namel long yupela na em i no gat strong na em i malumalu meri inap long em i no laik putim aninit bilong fut bilong em long graun, long wanem em i no gat strong na em i malumalu tumas. Ai bilong dispela meri bai stap nogut long man bilong susu bilong em na long pikinini man bilong em na long pikinini meri bilong em,

28:57  Na long yangpela pikinini bilong em i kamaut long namel long tupela fut bilong em na long o pikinini em bai karim. Long wanem em bai kaikai ol, long wanem em i sot long olgeta samting long dispela taim bilong pasim na hatpela taim, na long dispela ol birua bilong yu bai givim hevi long yu insait long ol dua bilong banis bilong yu.

28:58  Sapos yu no laik holimpas long mekim olgeta tok bilong dispela lo i stap long rait long dispela buk, bai yu ken pret long dispela nem i gat glori na i kirapim pasin bilong pret, em BIKPELA GOD BILONG YU.

28:59  Long dispela taim BIKPELA bai mekim pasin bilong yu kisim bagarap i winim tingting na ol bagarap bilong ol pikinini bilong yu, ol i bikpela bagarap na ol i stap longpela taim na bikpela sik na dispela i stap longpela taim.

28:60  Na moa yet Em bai bringim olgeta sik bilong Isip long yu, yu bin pret long ol. Na ol bai pas long yu.

28:61  Na tu olgeta kain sik na olgeta kain bagarap i no stap long rait long buk bilong dispela lo, BIKPELA bai bringim ol long yu inap long yu stap bagarap.

28:62  Na bihain yupela bai stap liklik lain, tasol pastaim yupela i bin i stap olsem ol sta bilong heven long namba bilong hamas manmeri i stap, long wanem yu no laik bihainim nek bilong God BIKPELA bilong yu.

28:63  Na em bai kamap olsem, olsem BIKPELA i bin amamas tru long yupela long mekim gutpela samting long yupela na long mekim yupela i kamap planti manmeri, olsem tasol BIKPELA bai amamas tru long yupela long bagarapim yupela na long bringim yupela long i kamap samting nating. Na Em bai rausim yu long dispela hap graun yu go long kisim dispela.

28:64  Na BIKPELA bai tromoi yu nabaut namel long olgeta manmeri long wanpela arere bilong dispela graun inap long arapela arere. Na long dispela ples yu bai mekim wok long ol arapela god, yu na ol papa bilong yu i no bin save long ol, em ol god bilong diwai na ston.

28:65  Na namel long ol dispela kantri, yu no bai kisim bel isi na tu bai aninit bilong fut bilong yu i no kisim malolo. Tasol BIKPELA bai givim yu bel i guria na ol ai i hangre long lukim na hevi i stap long tingting.

28:66  Na long pes bilong yu, yu no klia bai yu stap laip o nogat na bai yu pret long de na nait. Na tu yu no save kisim bel isi long laip bilong yu.

28:67  Long moningtaim yu bai tok, Mi laikim God i mekim apinun tru i kamap nau! Na long apinun tru yu bai tok, Mi laikim God i mekim moningtaim i kamap nau! Na as em dispela pret bilong bel bilong yu na long dispela bai yu pret na long ol samting ol ai bilong yu i lukim taim yu lukim dispela.

28:68  Na BIKPELA bai bringim yu long Isip gen long ol sip long we mi tok long yu long em olsem yu no inap lukim dispela gen. Na long dispela ples ol bai salim yupela long ol birua bilong yupela bilong i stap slevman na slevmeri na no gat wanpela man bai baim yupela.

Chapter 29

29:1  ¶ Ol dispela em i ol tok bilong dispela kontrak BIKPELA i givim strongpela tok long Moses long mekim dispela wantaim ol pikinini bilong Isrel long graun bilong Moap, na dispela i stap wantaim kontrak Em i bin mekim wantaim ol long maunten Horep.

29:2  Na Moses i singaut long olgeta Isrel na tokim ol, Yupela i bin lukim olgeta samting BIKPELA i mekim long ol ai bilong yupela long graun bilong Isip. Em i mekim long Fero na long olgeta wokboi bilong em na long olgeta graun bilong em.

29:3  Em ol bikpela traim ol ai bilong yu i bin lukim na ol mak na ol bikpela mirakel.

29:4  Yet BIKPELA i no bin givim yupela wanpela bel long luksave na ol ai long lukim na ol ia long harim inap long dispela de.

29:5  Na Mi bin i go pas long yupela foti yia long dispela ples i no gat man. Ol klos bilong yupela i no kamap olpela long yu na su bilong yu i no kamap olpela long fut bilong yu.

29:6  Yupela i no bin kaikai bret na tu yupela i no bin dringim wain o arapela strongpela dring, bai yupela i ken save long Mi stap God BIKPELA bilong yupela.

29:7  Na taim yupela i kam long dispela ples Saihon king bilong Hesbon na Ok king bilong Basan ol i kamaut long birua long yumi long pait na yumi bin paitim ol.

29:8  Na yumi kisim graun bilong ol na givim dispela bilong i stap samting papa i laik givim pikinini long lain bilong Ruben na long lain bilong Gat na long hap lain bilong Manasa.

29:9  Olsem na yupela i mas holimpas ol tok bilong dispela kontrak na mekim ol, bai yupela i ken i stap gutpela long olgeta samting yupela i mekim.

29:10  ¶ Yupela i sanap dispela de long pes bilong God BIKPELA bilong yupela, yupela olgeta, em ol kepten bilong ol lain bilong yupela na ol lapun hetman bilong yupela na ol ofisa bilong yupela wantaim olgeta man bilong Isrel,

29:11  Ol liklik pikinini bilong yupela na ol meri bilong yupela na man bilong narapela kantri i stap long kem bilong yu, long wanpela i katim ol diwai bilong yu na i go long wanpela i kisim wara long yu.

29:12  Bai yu ken i go insait long kontrak wantaim God BIKPELA bilong yu, na insait long tok tru antap bilong Em. God BIKPELA bilong yu i mekim dispela wantaim yu long dispela de.

29:13  Bai Em i ken litimapim yu dispela de bilong i stap wanpela lain manmeri bilong Em yet na long Em i ken i stap wanpela God long yu olsem Em i bin tok long yu, na olsem Em i bin tok tru antap long ol papa bilong yu, long Ebraham na long Aisak na long Jekop.

29:14  Na i no wantaim yupela tasol Mi mekim dispela kontrak na dispela tok tru antap,

29:15  Tasol em i wantaim man i sanap hia wantaim yumi long dispela de long pes bilong God BIKPELA bilong yumi na tu wantaim man i no stap hia wantaim yumi long dispela de.

29:16  (Long wanem yupela i save olsem wanem yumi bin i stap long graun bilong Isip, na olsem wanem yumi bin i kam long namel bilong ol kantri yupela i bin i go hapsait long ol.

29:17  Na yupela i bin lukim ol pasin bilong ol i sting tru long tingting bilong God na ol god giaman bilong ol, em long diwai na ston na silva na gol na ol i stap namel long ol.)

29:18  Nogut wanpela man o meri o famili o lain i stap namel long yupela na dispela de em i tanim bel bilong em long lusim God BIKPELA bilong yumi long i go na mekim wok long ol god giaman bilong ol dispela kantri. Nogut wanpela pasin i gat gip long em na pasin i gat bagarap long em, em i stap namel long yupela.

29:19  Na em bai stap olsem, taim em i harim ol tok bilong dispela tok long God bai kotim, long em i blesim em yet long bel bilong em na tok, Bai mi gat bel isi, maski mi wokabaut long tingting bilong bel bilong mi long bungim pasin bilong i stap spakman wantaim pasin bilong nek i drai.

29:20  BIKPELA bai i no lusim rong bilong em, tasol belhat bilong BIKPELA na ai bilong Em i tudak, tupela bai kamap olsem smok long birua long dispela man na olgeta kot bilong God i stap long rait long dispela buk bai stap antap long em. Na BIKPELA bai rausim nem bilong em long aninit bilong heven.

29:21  Na BIKPELA bai makim em tasol long olgeta lain bilong Isrel long kisim samting i no gutpela long bihainim olgeta tok long kot bilong God bilong dispela kontrak i stap long rait long dispela buk bilong lo.

29:22  Olsem bai lain long kamap bilong ol pikinini bilong yupela i kamap bihain long yupela na man bilong narapela kantri husat bai kam long wanpela longwe graun, ol bai tok taim ol i lukim ol bikpela bagarap bilong dispela hap graun na ol sik BIKPELA i bin putim long em,

29:23  Na long olgeta hap bilong graun i stap ston sulfa na sol na em i kuk na ol i no inap tromoi pikinini kaikai long em. Na em i no karim kaikai o wanpela gras i ken i kamap long em. Em i olsem bagarap bilong Sodom na Gomora na Atma na Seboim. BIKPELA i bin bagarapim ol long kros bilong Em na long bikpela belhat bilong Em.

29:24  Inap long olgeta kantri bai tok, Olsem wanem BIKPELA i bin mekim dispela long dispela hap graun? Wanem em i as bilong dispela hatpela pasin bilong dispela bikpela belhat?

29:25  Long dispela taim ol man bai tok, Long wanem ol i bin sakim kontrak bilong God BIKPELA bilong ol papa bilong ol. Em i mekim dispela wantaim ol taim Em i bringim ol long lusim graun bilong Isip.

29:26  Long wanem ol bin i go na bihainim ol arapela god na lotu long ol. Em ol god ol i no bin save long ol na BIKPELA i no bin givim ol long ol.

29:27  Na kros bilong BIKPELA i bin kirap birua long dispela hap graun long bringim i kam long em olgeta kot bilong God i stap long rait long dispela buk.

29:28  Na BIKPELA i rausim ol long lusim graun bilong ol. Na Em i mekim dispela long kros na long belhat na long bikpela pasin bilong paitim ol na Em i tromoim ol long narapela graun olsem em i stap dispela de.

29:29  Ol samting hait i bilong God BIKPELA bilong yumi. Tasol ol dispela samting Em i soim long yumi na long ol pikinini bilong yumi inap long oltaim oltaim, bai yumi ken bihainim olgeta tok bilong dispela lo.

Chapter 30

30:1  ¶ Na em bai kamap olsem, taim dispela olgeta samting i kamap long yu, em dispela blesing na dispela kot bilong God na yu bai tingim ol namel long olgeta kantri, em ol hap God BIKPELA bilong yu i bin rausim yu long ol.

30:2  Na yu bai tanim yu yet long i go long BIKELA God bilong yu na yu bai bihainim nek bilong Em long bihainim olgeta samting mi givim strongpela tok long yu long dispela de long olgeta hap bilong tewel bilong yu, em yu na o pikinini bilong yu.

30:3  Long dispela taim God BIKPELA bilong yu bai tanim kalabus bilong yu na stap sori long yu. Na Em bai kam bek na bungim yu long lusim olgeta kantri, em ol hap graun God BIKPELA bilong yu i bin tromoi yu nabaut.

30:4  Sapos BIKPELA i rausim wanpela bilong yu i go ausait long las hap bilong heven, God BIKPELA bilong yu bai bungim yu long lusim dispela ples na Em bai kisim yu i kam long lusim dispela ples.

30:5  Na God BIKPELA bilong yu bai bringim yu i kam long dispela hap graun ol papa bilong yu i bin kisim na yu bai kisim em. Na Em bai mekim yu stap gutpela na mekim yu kamap planti na winim ol papa bilong yu.

30:6  Na God BIKPELA bilong yu bai katim skin bilong bel bilong yu na bel bilong ol pikinini bilong yu, long laikim tru God BIKPELA bilong yu long olgeta hap bilong bel bilong yu na long olgeta hap bilong tewel bilong yu, bai yu ken i stap laip.

30:7  Na God BIKPELA bilong yu bai putim olgeta bilong ol dispela kot bilong God i go long ol birua bilong yu na long ol i no laikim tru yu, em lain i bin givim hevi long yu.

30:8  Na yu bai kam bek na bihainim nek bilong BIKPELA na mekim olgeta strongpela tok bilong Em, mi givim strongpela tok long ol long yu dispela de.

30:9  Na God BIKPELA bilong yu bai mekim yu i kamap planti long olgeta wan wan wok bilong han bilong yu na long ol pikinini bilong bodi bilong yu na long ol pikinini bilong ol bulmakau samting bilong yu na long ol kaikai bilong graun bilong yu bilong mekim gut long yu. Long wanem BIKPELA bai amamas tru gen long yu bilong mekim gut long yu olsem Em i bin amamas tru long ol papa bilong yu.

30:10  Sapos yu bai harim bilong bihainim nek bilong God BIKPELA bilong yu long bihainim ol strongpela tok bilong Em na ol strongpela tok bilong Em i stap long buk na ol i stap long rait bilong dispela buk bilong lo, na sapos yu tanim yu yet i go long God BIKPELA bilong yu long olgeta hap bilong bel bilong yu na long olgeta hap bilong tewel bilong yu.

30:11  ¶ Long wanem dispela strongpela tok mi givim strongpela tok long em long yu dispela de, em i no stap hait long yu na tu em i no stap longwe.

30:12  Em i no stap long heven, bai yu ken tok, Husat bai go antap long heven bilong helpim mipela na bringim dispela long mipela, bai mipela i ken harim dispela na mekim dispela?

30:13  Na tu em i no stap hapsait long solwara, bai yu ken tok, Husat bai go hapsait long solwara bilong helpim mipela na bringim dispela long mipela, bai mipela i ken harim dispela na mekim dispela?

30:14  Tasol dispela tok i stap klostu tru long yu, em long maus bilong yu na long bel bilong yu, bai yu ken mekim dispela.

30:15  ¶ Lukim, dispela de mi bin putim laip na gutpela na i dai pinis na nogut long pes bilong yu.

30:16  Em i long dispela samting, mi givim strongpela tok long yu long dispela de long laikim tru God BIKPELA bilong yu na long wokabaut long ol we bilong Em na long bihainim ol strongpela tok bilong Em na ol strongpela tok bilong Em i stap long buk na ol tok long kot bilong God, bai yu ken i stap laip na kamap planti. Na God BIKPELA bilong yu bai blesim yu long dispela hap graun, em ples yu go long kisim em.

30:17  Tasol sapos bel bilong yu i tanim long lusim BIKPELA inap long yu no laik harim, tasol sin bai putim yu i go longwe na lotu long ol arapela god na mekim wok long ol.

30:18  Mi tokaut klia long yupela dispela de, tru tumas bai yupela i bagarap na bai yupela i no mekim ol de bilong yupela i stap long dispela hap graun i stap planti, em graun yu go hapsait long Jordan long go long kisim em.

30:19  Mi singaut long heven na dispela graun long makim dispela de bilong kotim yupela. Mi bin putim long pes bilong yupela laip na i dai pinis na blesim na kotim. Olsem na makim laip bai yu na ol pikinini bilong yu i ken i stap laip.

30:20  Bai yu ken laikim tru God BIKPELA bilong yu na long yu ken bihainim nek bilong Em na long yu ken pas wantaim Em. Long wanem Em i laip bilong yu na as bilong ol de bilong yu i stap planti. Bai yu ken i stap long dispela hap graun BIKPELA i bin tok tru antap long dispela long ol papa bilong yu, em long Ebraham na long Aisak na long Jekop long givim dispela long ol.

Chapter 31

31:1  ¶ Na Moses i go na autim ol dispela tok long olgeta Isrel.

31:2  Na em i tokim ol, Mi stap wan handet na twenti krismas dispela de. Mi no inap go ausait na kam insait. Na tu BIKPELA i bin tokim mi, Yu no ken i go hapsait long dispela Jordan.

31:3  God BIKPELA bilong yu, Em bai go hapsait paslain long yu na Em bai bagarapim ol dispela kantri long pes bilong yu na yu bai kisim ol. Na Josua em bai go hapsait paslain long yu olsem BIKPELA i bin tok.

31:4  Na BIKPELA bai mekim long ol olsem Em i bin mekim long Saihon na long Ok, tupela king bilong ol Amor, na long graun bilong ol Em i bin bagarapim.

31:5  Na BIKPELA bai givim ol long yupela long pes bilong yupela, bai yupela i ken mekim long ol long bihainim olgeta strongpela tok mi bin givim strongpela tok long ol long yupela.

31:6  Stap strong na bilong sanap strong long pait na no ken pret o stap pret long ol. Long wanem God BIKPELA bilong yu, Em i go wantaim yu. Bai Em i no stap wanpela i no inap long helpim yu o lusim yu.

31:7  Na Moses i singautim Josua na tokim em long ai bilong olgeta Isrel, Stap strong na long sanap strong long pait. Long wanem yu mas i go wantaim dispela manmeri long dispela hap graun BIKPELA i bin tok tru antap long em long ol papa bilong ol long givim long ol. Na bai yu stap as bilong ol i kisim dispela olsem samting papa i laik givim pikinini.

31:8  Na BIKPELA, em Em i go pas long yu na Em bai stap wantaim yu na Em i no stap wanpela i no inap helpim yu na tu lusim yu. Yu no ken pret o stap bel hevi.

31:9  ¶ Na Moses i bin raitim dispela lo na givim dispela long ol pris, em ol pikinini man bilong Livai, em lain i karim bokis bilong kontrak bilong BIKPELA, na long olgeta lapun hetman bilong Isrel.

31:10  Na Moses i givim strongpela tok long ol, na tok, Long pinis bilong olgeta sevenpela yia, na long taim bilong yia bilong lusim na long bikpela kaikai bilong ol haus sel,

31:11  Taim olgeta Isrel i kam long i stap long pes bilong God BIKPELA bilong yu long ples Em bai makim dispela, yu mas ritim dispela lo long pes bilong olgeta Isrel na long ol i ken harim.

31:12  Bungim ol manmeri wantaim, ol man na ol meri na ol pikinini na man bilong yu i bilong narapela kantri na i stap insait long ol dua bilong banis bilong yu, bai ol i ken harim na bai ol i ken kisim save na pret long God BIKPELA bilong yupela na lukautim bilong bihainim olgeta tok bilong dispela lo.

31:13  Na long ol pikinini bilong ol husat i no bin save long wanpela samting i ken harim na kisim save long pret long God BIKPELA bilong yupela inap long yupela i stap long dispela hap graun yupela i go hapsait long Jordan long kisim dispela.

31:14  ¶ Na BIKPELA i tok long Moses, Harim, ol de bilong yu i kam klostu long yu mas i dai pinis. Singautim Josua na sanapim yutupela yet insait long haus lotu sel bilong bung bilong ol manmeri bai Mi ken givim em tok bilong strongim em. Na Moses na Josua i go na sanapim tupela yet insait long haus lotu sel bilong bung bilong ol manmeri.

31:15  Na BIKPELA i kamap ples klia insait long haus lotu sel long wanpela klaut i go antap tru. Na dispela klaut i go antap tru i sanap antap long dua bilong haus lotu sel.

31:16  Na BIKPELA i tok long Moses, Harim yu bai slip wantaim ol papa bilong yu na dispela manmeri bai kirap na go mekim pamuk pasin bilong bihainim ol god bilong ol man bilong narapela kantri na i bilong dispela hap graun, em graun ol i go long i stap namel long ol. Na ol bai lusim Mi na brukim kontrak bilong Mi, Mi bin mekim dispela wantaim ol.

31:17  Long dispela taim belhat bilong Mi bai i kirap birua long ol long dispela de na bai Mi lusim ol na bai Mi haitim pes bilong Mi long ol, na ol bai stap olsem sampela i bin kaikai ol na planti samting nogut na hevi bai kamap long ol inap long ol bai tok long dispela de, Ating as bilong ol dispela samting nogut i kamap long yumi em God bilong yumi i no stap namel long yumi?

31:18  Na tru tumas bai Mi haitim pes bilong Mi long dispela de na as bilong dispela i olgeta pasin nogut ol i mekim, long ol i tanim ol yet long ol arapela god.

31:19  Olsem na nau yupela i mas raitim dispela song bilong yupela na skulim ol pikinini bilong Isrel long dispela. Putim dispela long maus bilong ol, bai dispela song i ken i stap witnes bilong Mi long kotim ol pikinini bilong Isrel.

31:20  Long wanem long taim Mi bai bringim ol insait long dispela hap graun Mi bin tok tru antap long dispela long ol papa bilong ol. Em i pulap long susu na hani na ol bai kaikai na pulapim ol yet na kamap patpela, long dispela taim ol bai tanim ol yet i go long ol arapela god na mekim wok long ol na kirapim Mi na brukim kontrak bilong Mi.

31:21  Na em bai kamap olsem, taim planti samting nogut na trabel i kam long ol, bai dispela song i kamap testimoni long kotim ol olsem wanpela witnes. Long wanem ol maus bilong ol pikinini bilong ol bai i no lusim tingting long dispela. Long wanem Mi save long tingting bilong bel bilong ol na ol i go nabaut long dispela. Yes em nau, pastaim long Mi bin bringim ol insait long dispela hap graun Mi bin tok tru antap long em.

31:22  ¶ Olsem na Moses i raitim dispela song long dispela de tasol na em skulim ol pikinini bilong Isrel long em.

31:23  Na em i givim Josua, pikinini man bilong Nun, tok bilong strongim na tok, Stap strong na long sanap strong long pait. Long wanem yu bai bringim ol pikinini bilong Isrel insait long graun Mi bin tok tru antap long dispela long ol. Na bai Mi stap wantaim yu.

31:24  Na em i kamap olsem, taim Moses i pinis long raitim ol tok bilong dispela lo long wanpela buk inap long ol i pinis,

31:25  Orait Moses i givim strongpela tok long lain bilong Livai, em lain i karim bokis bilong kontrak bilong BIKPELA, na em i tok,

31:26  Kisim dispela buk bilong lo na putim dispela insait long sait bilong dispela bokis bilong kontrak bilong God BIKPELA bilong yupela, bai em i ken i stap long dispela ples bilong i stap witnes bilong kotim yu.

31:27  Long wanem mi save long bikhet pasin bilong yu na long nek bilong yu i no laik i go daun. Harim, taim mi stap laip yet wantaim yupela dispela de, yupela i bin i stap bikhet na birua long BIKPELA, na hamas moa bihain long mi dai pinis?

31:28  Mekim olgeta lapun hetman bilong ol lain bilong yupela na ol ofisa bilong yupela i bung long mi, bai mi ken autim ol dispela tok long ol ia bilong ol. Na mi ken singaut long heven na dispela graun long mekim tok long kotim ol.

31:29  Long wanem mi save long bihain long mi dai pinis yupela bai mekim yupela yet i kamap nogut tru na tanim yupela yet long lusim we mi bin givim strongpela tok long yupela long dispela. Na ol samting nogut bai kamap long yupela long ol las de. As bilong dispela em yupela bai mekim pasin nogut long ai bilong BIKPELA, long kirapim Em long kros long wok bilong ol han bilong yupela.

31:30  Na Moses autim long ol ia bilong bung bilong olgeta manmeri bilong Isrel ol tok bilong dispela song inap long ol i pinis.

Chapter 32

32:1  ¶ Givim ia o yupela ol heven, na bai mi tok. Na harim o dispela graun, ol tok bilong maus bilong mi.

32:2  Skul bilong mi bai kam daun olsem ren na tok bilong mi bai kamap olsem tuhat na olsem liklik ren i kam long yangpela kumu na olsem ren i kam long gras.

32:3  Bikos mi bai tokaut long nem bilong BIKPELA. Yupela i mas makim God bilong yumi em i bikpela.

32:4  Em i stap dispela bikpela ston na wok bilong Em i inap tru. Long wanem olgeta we bilong Em em i tok bilong stretpela kot. Em i God bilong tok tru na Em i no gat sin. Em i mekim gutpela na stretpela pasin.

32:5  Ol i bin bagarapim ol yet, mak bilong ol i no mak bilong ol pikinini bilong Em. Ol i lain bilong giaman na krungutim we.

32:6  Yupela i mekim olsem long bekim long BIKPELA, o manmeri i kranki na i no gat gutpela save, a? Ating Em i no papa bilong yu na Em i bin baim yu, a? Ating Em i no bin wokim yu na strongim yu, a?

32:7  ¶ Tingim gen ol de bilong pastaim na tingim gut ol yia bilong planti lain. Askim papa bilong yu na em bai soim yu. Askim ol lapun hetman bilong yu na ol bai tokaut long yu.

32:8  Taim God i Antap tru i tilim ol samting bilong kisim long han bilong papa long ol kantri na taim Em i putim nabaut ol pikinini man bilong Adam, Em i bin makim ol arere bilong dispela manmeri bilong bihainim namba bilong ol pikinini bilong Isrel.

32:9  Long wanem em ol hap samting bilong BIKPELA em ol manmeri bilong Em. Jekop em i hap papa i makim bilong ol samting Em bai kisim long papa.

32:10  Em i bin painim pinis em long wanpela graun i drai na long ples i nogut na win i singaut na i no gat man. Na Em i go pas long em nabaut na Em i skulim em na Em i holim em olsem namel bilong ai bilong Em.

32:11  Olsem tarangau i tanim haus bilong em na mekim ol wing i kamap na kam daun antap long ol yangpela bilong em na em i mekim ol wing bilong em i go ausait na em i kisim ol na karim ol antap long ol wing bilong em,

32:12  Olsem BIKPELA tasol bin i go pas long em na i no gat wanpela narapela god wantaim em.

32:13  Em i mekim em i go antap long ol ples i antap bilong dispela graun, bai em i ken kaikai ol kaikai bilong ol gaden. Na Em i mekim em long dringim hani i kamaut long bikpela ston na wel i kamaut long bikpela ston flint,

32:14  Na kaikai bata bilong bulmakau na susu bilong sipsip wantaim gris bilong pikinini sipsip na sipsip man bilong lain i kamap long Basan na ol meme wantaim ol gris bilong insait bilong wit na yu bin dring wara bilong pikinini bilong diwai wain i no gat pipia long em.

32:15  ¶ Tasol Jesurun i kamap patpela na em i kik. Yu kamap patpela na yu stap strongpela na gris i karamapim yu. Long dispela taim em i lusim God husat i bin wokim em na em i tingim dispela Bikpela Ston bilong kisim bek em, em samting nating.

32:16  Ol i kirapim Em long jeles pasin long bihainim ol arapela god. Na long ol pasin i sting tru ol i kirapim Em long belhat.

32:17  Ol i mekim ofa i go long ol spirit nogut, na i no long God. Em long ol god ol i no bin save long ol. Em long ol god i kamap nupela na ol papa bilong yupela i no bin pret long ol.

32:18  Yu no gat tingting long dispela Bikpela Ston i bin kirapim yu, na yu bin lusim tingting long God husat i wokim yu.

32:19  ¶ Na taim BIKPELA i lukim dispela, Em i tingim ol i lain nogut, na as bilong dispela i ol i givim hevi long ol pikinini man bilong Em na ol pikinini meri bilong Em.

32:20  Na Em i tok, Bai Mi haitim pes bilong Mi long ol. Bai Mi lukim pinis bilong ol i wanem samting. Long wanem ol i lain i bikhet tru na ol pikinini i no gat bilip tru insait long ol.

32:21  Ol i bin kirapim Mi long ai i kamap tudak long dispela samting i no God. Ol i bin kirapim Mi long belhat long ol samting nating bilong ol. Na bai Mi kirapim ol long ai i tudak long ol husat i no wanpela lain manmeri. Bai Mi kirapim ol long belhat long wanpela kranki kantri.

32:22  Long wanem wanpela paia i kirap long belhat bilong Mi. Na em bai kuk inap long hap bilong hel i daunbilo tru. Na em bai pinisim dispela graun wantaim ol samting i kamap long em na mekim ol as ston bilong ol maunten i paia.

32:23  Bai Mi hipim ol hevi antap long ol. Bai Mi pinisim ol spia bilong Mi long ol.

32:24  Ol bai stap kuk long hangre na bikpela tuhat bilong kukim ol long bagarap i hatpela tru. Na tu bai Mi salim tit bilong ol animal long ol wantaim gip bilong ol snek bilong das.

32:25  Bainat bai stap ausait na bikpela pret bai stap insait. Ol bai bagarapim yangpela man wantaim meri i no bin slip wantaim man na bebi i pulim susu wantaim man bilong waitpela gras.

32:26  ¶ Mi tok, Mi laik tromoim ol long ol kona. Mi laik mekim pasin bilong tingim gen long ol i ken pinis long namel long ol man.

32:27  Sapos i no long Mi pret long belhat bilong birua, nogut pasin bilong ol birua bilong ol i kamap narakain na nogut ol i tok, Han bilong mipela i antap na BIKPELA i no bin wokim olgeta bilong dispela.

32:28  Long wanem ol i kantri i no gat lain i givim gutpela tok save na tu i no gat wanpela bilong ol i gat gutpela save.

32:29  O long ol i gat save tru na long ol i gat gutpela save long dispela na long ol i ken tingting gut long pinis bilong ol!

32:30  Olsem wanem wanpela i ken ranim wan tausen na tupela i ken rausim ten tausen sapos i no tru, Bikpela Ston bilong ol i bin salim ol, na BIKPELA i bin pasim ol?

32:31  Long wanem bikpela ston bilong ol i no Bikpela Ston bilong yumi inap long ol birua bilong yumi, ol yet i stap jas long dispela.

32:32  Long wanem han bilong diwai wain bilong ol i bilong han bilong diwai wain bilong Sodom na bilong gaden bilong Gomora. Ol pikinini bilong diwai wain bilong ol i stap ol pikinini bilong diwai wain bilong samting bilong pait ol i kolim gal na ol bung bilong ol i gat pait.

32:33  Wain bilong ol em i gip bilong ol dragon na strongpela marasin nogut bilong ol snek asp.

32:34  Ating dispela i no stap samting bilong holim na tingim bilong Mi na em i pas namel long ples Mi holim ol samting, a?

32:35  Bekim na bekim pe em bilong Mi. Fut bilong ol bai stap long graun i wel long stretpela taim. Long wanem de bilong bagarap i stap klostu na ol samting bai i kamap long ol em i hariap.

32:36  Long wanem BIKPELA bai i stap jas bilong ol manmeri bilong Em na tanim bel bilong Em yet bilong helpim ol wokboi bilong Em, taim Em i lukim strong bilong ol i pinis na i no gat wanpela i pasim ol o i stap yet.

32:37  Na Em bai tok, Ol god bilong ol i stap we, ol i bikpela ston bilong ol na ol i bin bilip long ol,

32:38  Ol i bin kaikai gris bilong ol ofa ol i kukim na dringim wain bilong ol ofa bilong dring bilong ol? Larim ol i kirap na helpim yupela na stap lain bilong lukautim yupela.

32:39  ¶ Lukluk nau long Mi, yes Mi stap Em na i no gat wanpela god i stap wantaim Mi. Mi kilim i dai pinis na Mi mekim ol i stap laip. Mi givim sua long pait na Mi mekim ol i kamap orait gen. Na i no gat wanpela i ken lusim ol long han bilong Mi.

32:40  Long wanem Mi litimapim han bilong Mi long heven na tok, Mi stap laip oltaim oltaim.

32:41  Sapos Mi sapim bainat bilong Mi i lait planti na han bilong Mi i kisim pasin bilong wokim kot, bai Mi bekim pe nogut long ol birua bilong Mi na givim pe long ol i no laikim tru Mi.

32:42  Bai Mi mekim ol spia bilong mi i pulap long blut na bainat bilong Mi bai kaikai mit, na dispela i kamap long blut bilong ol daiman na bilong ol kalabus long stat bilong bekim pe nogut long ol birua.

32:43  Amamas tru, O yupela kantri wantaim ol manmeri bilong Em. Long wanem Em bai bekim pe long blut bilong ol wokboi bilong Em. Na Em bai bekim pe nogut long ol birua bilong Em na Em bai pulap long sori long graun bilong Em na long ol manmeri bilong Em.

32:44  ¶ Na Moses i kam na tokaut long olgeta tok bilong dispela song long ol ia bilong ol manmeri, em Moses na Hosea, pikinini man bilong Nun.

32:45  Na Moses i pinis long tokaut long olgeta bilong dispela tok long olgeta Isrel.

32:46  Na em i tokim ol, Putim long ol bel bilong yupela olgeta tok mi bin mekim namel long yupela dispela de. Yupela i mas givim strongpela tok long dispela long ol pikinini bilong yupela long lukautim long mekim olgeta tok bilong dispela lo.

32:47  Long wanem dispela i no samting nating bilong yupela, na as bilong dispela em i dispela em i laip bilong yupela. Na long dispela samting yupela bai mekim ol de bilong yupela i kamap planti moa long dispela hap graun yupela i go hapsait long Jordan long kisim dispela.

32:48  Na long dispela de BIKPELA i tok long Moses na tok,

32:49  Yu mas go antap long dispela maunten Abarim, i go long maunten Nibo, em i stap long graun bilong Moap, na em i stap hapsait long Jeriko, na lukim graun bilong Kenan. Mi givim dispela long ol pikinini bilong Isrel bilong i stap samting bilong holim.

32:50  Na yu mas i dai pinis long dispela maunten yu go antap long em. Na yu mas bungim ol manmeri bilong yu olsem Eron, brata bilong yu, i bin i dai pinis long maunten Hor na em i bin bungim ol manmeri bilong em.

32:51  Long wanem yupela i bin mekim rong long Mi namel long ol pikinini bilong Isrel long ol wara bilong Meriba-kedes long ples i no gat man bilong Sen. Long wanem yupela i no bin makim Mi namel long ol pikinini bilong Isrel.

32:52  Tru yu bai lukim dispela hap graun i stap long pes bilong yu, tasol yu no ken i go long dispela hap graun Mi givim dispela long ol pikinini bilong Isrel.

Chapter 33

33:1  ¶ Na dispela em i blesing Moses man bilong God i bin blesim ol pikinini bilong Isrel long dispela pastaim long em i dai pinis.

33:2  Na em i tok, BIKPELA i bin kam lusim Sainai na kirap long lusim Sir na kam long ol. Em i stap bikpela lait long maunten Paran na Em i kam wantaim ten tausen bilipman tru. Na wanpela lo i paia i lusim han sut bilong Em bilong givim ol.

33:3  Yes, Em i laikim tru dispela manmeri. Olgeta bilipman tru i stap long han bilong Yu. Na ol i sindaun long tupela fut bilong Yu. Na olgeta wan wan bai kisim sampela bilong ol tok bilong Yu.

33:4  Moses i givim strongpela tok long mipela long wanpela lo, em ol samting papa i laik givim pikinini bilong ol lain i bung bilong Jekop.

33:5  Na Em i bin i stap king long Jesurun taim ol hetman bilong dispela manmeri na ol lain bilong Isrel i bung wantaim.

33:6  ¶ Larim Ruben i stap laip na em i no ken i dai pinis. Na no ken larim ol man bilong em i stap liklik lain.

33:7  Na dispela em i blesing bilong Juda. Na em i tok, Harim, BIKPELA, nek bilong Juda na bringim em i kam long ol manmeri bilong em. Larim tupela man bilong em i stap inap long em. Na Yu ken i stap wanpela helpim long em long daunim ol birua bilong em.

33:8  ¶ Na bilong Livai em i tok, Larim Tumim bilong yu na Yurim bilong yu stap wantaim dispela wanpela i holi bilong yu, yu bin traim em long Masa na wantaim em yu bin pait long ol wara bilong Meriba.

33:9  Em i tok long papa bilong em na long mama bilong em olsem, Mi no bin lukim em na tu em i no tok long ol i lain bilong mi long ol brata bilong em o save long ol pikinini bilong em. Long wanem ol i bin bihainim ol tok bilong Yu na holimpas long kontrak bilong Yu.

33:10  Ol bai skulim Jekop long ol tok bilong kot bilong Yu, na Isrel long lo bilong Yu. Ol bai putim paura i gat gutpela smel long pes bilong Yu na olgeta bilong ofa bilong kukim antap long alta bilong Yu.

33:11  BIKPELA, blesim ol samting bilong em na tok orait long wok bilong ol han bilong em. Paitim bel bilong ol i kirap birua long em na bilong ol i no laikim tru em, bai ol i no ken kirap gen.

33:12  ¶ Na bilong Benjamin em i tok, Dispela wanpela i stap long laikim tru bilong BIKPELA, em bai stap gutpela klostu long em. Na BIKPELA bai karamapim em olgeta taim long de, na em bai stap namel long tupela sol bilong Em.

33:13  Na bilong Josep em i tok, Blesing bilong BIKPELA i stap long graun bilong em, long ol samting i dia tumas bilong heven na long tuhat na long ples daun i stap aninit,

33:14  Na long ol kaikai i dia tumas na san i kirapim ol na long ol samting i dia tumas man i kirapim,

33:15  Na long ol nambawan samting bilong ol maunten i kamap bipo tru na long ol samting i dia tumas bilong ol liklik maunten i stap longpela taim.

33:16  Na long ol samting i dia tumas bilong dispela graun na ol samting i pulap long em na long laikim bilong Em i stap long dispela liklik diwai. Larim dispela blesing i kam antap long het bilong Josep na long antap tru bilong het bilong em i bin i stap longwe long ol brata bilong em.

33:17  Glori bilong em i olsem namba wan pikinini bilong bulmakau bilong em na ol kom bilong em i olsem ol kom bilong ol wail abus i gat wanpela kom. Long ol em bai subim ol manmeri wantaim long ol arere tru bilong dispela graun. Na ol i stap ol ten tausen bilong Ifraim na ol i stap ol tausen bilong Manasa.

33:18  ¶ Na bilong Sebyulan em i tok, Amamas tru Sebyulan long pasin bilong yu long i go ausait, na Isakar long ol haus sel bilong yu.

33:19  Ol bai singautim dispela manmeri long kam long dispela maunten. Long dispela ples ol bai ofaim ol ofa bilong stretpela pasin. Long wanem ol bai dringim planti samting bilong solwara na long ol samting i dia tumas i stap hait long wesan.

33:20  Na bilong Gat em i tok, Blesing i stap long man i mekim Gat i kamap bikpela moa. Em i stap olsem wanpela laion na em i brukim han long antap bilong het.

33:21  Na em i bin kisim namba wan hap bilong em yet na as bilong dispela em i bin sindaun long ples bilong man i givim lo na em i kam wantaim ol hetman bilong dispela manmeri na em i mekim stretpela kot bilong BIKPELA na stretpela tok bilong kot wantaim Isrel.

33:22  ¶ Na bilong Dan em i tok, Dan em i pikinini bilong laion. Em bai kalap long lusim Basan.

33:23  Na bilong Naptalai em i tok, O Naptalai, inap tru long gutpela pasin na pulap long blesing bilong BIKPELA yu mas kisim hap san i go daun na hap saut.

33:24  Na bilong Aser em i tok, Larim Aser i kisim blesing long ol pikinini i larim em i stap gutpela long ai bilong ol brata bilong em na larim em i putim fut bilong em long wel,

33:25  Ol su bilong yu bai stap ain na bras. Na olsem ol de bilong yu, olsem tasol strong bilong yu bai i stap.

33:26  ¶ I no gat wanpela i wankain olsem God bilong Jesurun na Em i go antap long heven long helpim yu, na long pasin bilong Em i stap king, Em i go long skai.

33:27  God i stap oltaim oltaim Em i ples hait bilong yu na aninit i stap tupela han bilong oltaim oltaim. Na Em bai subim ol birua long i kamaut long pes bilong yu na Em bai tok, Bagarapim ol.

33:28  Long dispela taim Isrel tasol bai stap gutpela. Ples bilong wara i kamaut long graun bilong Jekop bai stap long graun bilong kon na wain. Na tu ol heven bilong em bai kisim tuhat i kam daun.

33:29  Yu stap amamas, O Isrel. Husat i stap olsem yu, O manmeri BIKPELA i bin kisim bek, na Em i hap plang bilong helpim yu, na Em i stap bainat bilong yu stap olsem king! Na ol birua bilong yu bai kamap ples klia long yu long ol i lain bilong tok giaman. Na yu bai wokabaut long ol ples i antap bilong ol.

Chapter 34

34:1  ¶ Na Moses i go antap long lusim ol ples op bilong Moap na i go long maunten bilong Nibo long antap bilong Pisga, em i hapsait long Jeriko. Na BIKPELA i soim em olgeta hap bilong graun bilong Gileat i go long Dan.

34:2  Na olgeta Naptalai na graun bilong Ifraim na Manasa na olgeta hap bilong graun bilong Juda i go long solwara i stap longwe,

34:3  Na saut na ples op bilong ples daun bilong Jeriko, em biktaun bilong ol diwai palmen i go long Soar.

34:4  Na BIKPELA i tok long em, Dispela em i graun Mi bin tok tru antap long dispela long Ebraham na long Aisak na long Jekop na tok, Bai Mi givim dispela long ol pikinini bilong yu. Mi bin inapim yu long lukim dispela long tupela ai bilong yu, tasol yu no ken go hapsait na go long em.

34:5  ¶ Olsem Moses wokboi bilong BIKPELA i dai pinis long dispela ples long graun bilong Moap long bihainim tok bilong BIKPELA.

34:6  Na Em i planim em long wanpela ples daun long graun bilong Moap, hapsait long Bet-pior. Tasol i no gat wanpela man i save long ples matmat bilong em inap long dispela de.

34:7  Na Moses i stap wan handet na twenti krismas taim em i dai pinis. Ai bilong em i no bagarap na tu em i no lusim strong bilong bodi bilong em.

34:8  Na ol pikinini bilong Isrel i krai sori long Moses long tripela ten de long ol ples op bilong Moap. Olsem ol de bilong krai sori na pilim bel hevi long Moses i pinis.

34:9  ¶ Na Josua, pikinini man bilong Nun, i pulap long spirit bilong save tru. Long wanem Moses i bin putim ol han bilong em long em. Na ol pikinini bilong Isrel i bihainim tok bilong em na mekim olsem BIKPELA i bin givim strongpela tok long Moses.

34:10  Na i no gat wanpela profet i kirap bihain insait long Isrel i wankain olsem Moses, BIKPELA i bin save long em, pes i lukim pes.

34:11  Long olgeta mak na samting i winim tingting BIKPELA i bin salim em long mekim ol dispela long graun bilong Isip long Fero na long ol wokboi bilong em, na long olgeta hap bilong graun bilong em,

34:12  Na long olgeta samting bilong strongpela han na long olgeta samting bilong bikpela pret, Moses i bin soim ol dispela long ol ai bilong olgeta Isrel.