Kapingamarangi - Deuteronomy

Chapter 1

1:1  Di hagahonu o lodo di beebaa deenei la-go nia agoago Moses ala ne-hai gi digau Israel i-di nadau madagoaa nogo noho i-lodo di anggowaa i-di baahi gi-dua di Monowai Jordan. Digaula nogo noho i-lodo di gowaa mehanga gonduu o Jordan hoohoo-adu gi Suph, i-mehanga di waahale Paran i-di baahi i-golo, mo nia waahale Tophel, Laban, Hazeroth mo Dizahab i-di baahi dela i-golo.

1:2  (Nia laangi e-madangaholu maa-dahi o tangada dela ma-ga-haele daamada i-di Gonduu Sinai, e-hana laa-lodo tenua gonduu o Edom e-tugi i Kadesh=Barnea.)

1:3  I-di laangi matagidagi o-di madangaholu maa-dahi malama i-di mada-haa ngadau i-muli di-nadau hagatanga mai gi-daha mo Egypt, gei Moses gu-agoago digau Israel nia helekai huogodoo a Dimaadua ala ne-helekai bolo gi-hagi-anga-ina gi digaula.

1:4  Di mee deenei ne-hai i-muli Dimaadua ne-haga-magedaa di king Sihon o digau Amor, dela nogo dagi i-lodo di waahale go Heshbon, mo Og di king o Bashan dela nogo dagi i-lodo nia waahale go Ashtaroth mo Edrei.

1:5  Moses ga-daamada ga-haga-donudonu nnaganoho a God ang-gi nia daangada, i nadau madagoaa nogo noho i-di baahi gi-dua Jordan, i-lodo tenua go Moab. Mee e-helekai,

1:6  “Tadau noho i-di Gonduu Sinai, gei Dimaadua go tadau God gu-helekai, ‘Goodou gu-waalooloo di-noho i-di gonduu deenei.

1:7  Goodou hagatanga hula. Goodou hula gi tenua gonduu o digau Amor mo-di modoho-adu gi-nia gowaa huogodoo ala i-di gili di guongo digaula, go-di gowaa mehanga gonduu o Jordan, mo tenua gonduu, mo nia gowaa baba, gaa-tugi-loo i-di baahi gi-ngaaga, gaa-dau-adu gi-di tai go Mediterranean. Goodou gi-lloo-adu gi tenua go Canaan gi-di baahi i-golo nia gonduu o Lebanon gi-dau-adu gi-di monowai damana go Euphrates.

1:8  Deelaa tenua ne-hagababa ko-Au, go Dimaadua, belee wanga gi godou damana-mmaadua go Abraham, Isaac mo Jacob, mo nadau hagadili. Goodou hula, hai-mee gi tenua deelaa.’ ”

1:9  Moses ga-helekai gi-nia daangada, “Tadau madagoaa nogo i-di Gonduu Sinai, gei au gu-helekai-adu gi goodou boloo, ‘Tegau dela e-dagi goodou, le e-damanaiee balua mai gi-di-au. Au e-deemee di-hai di-maa modogoau.

1:10  Dimaadua di-godou God, la-guu-hai goodou gi-dogologowaahee be nia heduu di langi.

1:11  Dimaadua go di God o godou maadua mmaadua, gi-heia goodou gi-mada-dogologo nia holongo e-mana gi nonua, gi-heia goodou gii-gila humalia, gii-hai be dana hagababa!

1:12  Gei au modogoau le e-dugu godou lagalagamaaloo behee, be di-maa tegau haingadaa?

1:13  Hilihilia hunu daane gu-maalama, ge gu-iloo nia mee mai lodo nia madawaawa, gei au gaa-hai digaula gii-dagi goodou.’

1:14  Gei goodou guu-baba bolo deenei di mee humalia e-hai.

1:15  Malaa, au guu-hai digau ala e-iloo nia mee, ala ne-hilihili go goodou gii-hai godou dagi. Hunu gau e-dagi nadau daangada e-mana, hunu gau dagi llau, hunu gau dagi madalima, ge hunu gau dagi madangaholu. Au guu-hili labelaa hunu dagi mai i-lodo nia madawaawa huogodoo.

1:16  “Di madagoaa deelaa, gei au ga-helekai gi digaula boloo: Hagalongo gi-nia lagalagamaaloo ala e-kila-aga i-mehanga godou daangada. Hagadonu-ina nia lagalagamaaloo huogodoo gi-humalia gi-tau-anga, de-hilihili be nia maa nia mee e-dau gi godou daangada donu, be e-dau gi digau mai i-daha ala e-noho i godou mehanga.

1:17  Hudee hai dangada i lodo godou hagamodu mee, hagadonu-ina nia daangada huogodoo be di-mee e-dahi, hagalee hilihili be mee koai. Hudee mmaadagu i dahi dangada, idimaa, godou hagamodu e-lloomoi i-baahi o God. Maa di mee e-haingadaa dono hagadonu go goodou, gaamai gei au ga-hagadonu.

1:18  Di madagoaa-hua deelaa, gei au gu-hagi-adu di hai dela belee hai godou mee huogodoo ala i-golo.

1:19  “Gidaadou guu-hai nia mee Dimaadua go tadau God ne-helekai bolo gidaadou gi-heia. Gidaadou ne-hagatanga i-di Gonduu Sinai, gaa-hula laa-hongo di anggowaa palaha ge hagalliga, e-hula gi tenua gonduu o digau Amor. Tadau dau i Kadesh=Barnea,

1:20  gei au ga-helekai-adu gi goodou boloo, ‘Dolomeenei goodou gu-lloomoi gi tenua gonduu digau Amor, dela ne-gaamai go Dimaadua go tadau God, go di God o tadau maadua mmaadua. Mmada, deelaa di guongo. Hula, noho i-golo gii-hai be dana hagababa. Hudee dennoomaalia be mmaadagu.’

1:21  gei au ga-helekai-adu gi goodou boloo, ‘Dolomeenei goodou gu-lloomoi gi tenua gonduu digau Amor, dela ne-gaamai go Dimaadua go tadau God, go di God o tadau maadua mmaadua. Mmada, deelaa di guongo. Hula, noho i-golo gii-hai be dana hagababa. Hudee dennoomaalia be mmaadagu.’

1:22  “Gei goodou ne-loomoi gi-di-au ga-helekai, ‘Gidaadou ga-hagau tadau daane i tadau mua e-hagadina hagammuni tenua, ge digaula ga-iloo di-hagi-mai gi gidaadou, be dehee di ala e-humalia e-hula-ai, ge nia maa nia waahale hai behee ala i-golo.’

1:23  “Di-mee deelaa le e-hai be di mee humalia e-hai, gei au ga-hilihili agu daane dilongoholu maa-lua, e-dahi mai i-lodo di madawaawa e-dahi.

1:24  Digaula ne-hula gi tenua gonduu, gaa-dau-adu-loo gi-di gowaa mehanga gonduu o Eschol, ga-hagadina di-maa.

1:25  Digaula gu-gaamai nadau huwa laagau ala ne-gidee-ginaadou i-golo, ga-odi-mai bolo tenua dela ne-gaamai go Dimaadua go tadau God la tenua tomo huoloo ge e-huwa humalia.

1:26  “Gei goodou guu-hai baahi gi nnelekai mai baahi Dimaadua di-godou God, malaa goodou hagalee hula gi tenua deelaa.

1:27  Goodou nogo nguunguu i godou mehanga boloo, ‘Dimaadua le e-ginagina i gidaadou. Mee ne-laha-mai gidaadou gi-daha mo Egypt, belee wanga gidaadou gi digau Amor gi-daaligidia.

1:28  Gidaadou belee hula gi-golo eiaha? Gidaadou e-mmaadagu. Tadau daane ne-hagau, e-helekai-mai gi gidaadou bolo nia daangada ala i-golo le e-mada-maaloo ge e-mada-lloo i gidaadou, gei digaula e-noho i-lodo nia waahale ono abaaba lloowehaa e-dau-adu gi-di langi. Digaula gu-gidee nia daangada llauehaa i-golo!’

1:29  “Gei au gu-hagi-adu boloo, ‘Hudee mmaadagu i digaula.

1:30  Dimaadua di-godou God gaa-dagi-laa goodou, ga-heebagi i goodou, gadoo be di-godou gidee dana hai ne-hai i Egypt

1:31  mo i-hongo di anggowaa. Goodou gu-gidee dana hai ne-laha-mai goodou hagahumalia, gaa-dae-mai-loo gi-di gowaa deenei, e-hai gadoo be dahi damana ma-gaa-lahi dana dama-daane.’

1:32  Ma e-aha maa agu helekai ala ne-hai, goodou hagalee hagadagadagagee gi Dimaadua hua i-golo,

1:33  ma e-aha maa Mee e-hana i godou mua i-nia madagoaa huogodoo, e-halahala di gowaa e-hagamolooloo-ai goodou. Dana hai e-hagi-adu gi goodou di ala, i-di boo gei Mee e-hana i godou mua i-lodo di waduu-ahi, gei i-di aa gei Mee e-hana i-lodo di waduu-gololangi.

1:34  “Dimaadua gu-longono godou helehelekai hai-baahi gi-nia mee, ga-hagawelewele ga-haga-iloo boloo,

1:35  ‘Hagalee tangada e-dahi mai di adu-dangada huaidu deenei e-ulu i tenua humalia e-huwa humalia ai, go tenua dela ne-hagababa ko-Au bolo e-wanga gi godou maadua mmaadua.

1:36  Deelaa-hua go Caleb, tama-daane Jephunneh, dela ga-ulu i tenua deelaa. Mee nogo manawa-dahi mai gi-di Au, gei Au gaa-wanga gi mee mo dono hagadili gi-muli tenua dela ne-hagadina go mee.’

1:37  Ma go goodou, dela ne-hidi-mai Dimaadua ga-hagawelewele labelaa mai gi-di-au, gei Mee ga-helekai mai, ‘Mo goe labelaa, go Moses, goe hagalee ulu gi tenua deelaa.

1:38  Malaa, hagamaaloo-ina-aga di manawa o dau dangada hagamaamaa go Joshua, tama-daane Nun. Mee gaa-dagi digau Israel, e-hai henua gi tenua deelaa.’

1:39  “Dimaadua ga-helekai-mai gi gidaadou huogodoo boloo, ‘Godou dama ala e-lligi balua, digi iloo nia mee humalia mono mee hala, ga-ulu gi tenua deelaa, go nia dama ala ne-helekai goodou bolo gaa-kumi go godou hagadaumee. Au gaa-wanga tenua gi digaula, gei digaula ga-noho-ai.

1:40  Gei goodou, huli gi-muli, hula gi-di anggowaa i-hongo di ala dela e-hana gi-di Malua o Aqaba.’

1:41  “Goodou gu-helekai-mai, ‘Meenei Moses, gimaadou gu-hai-hala gi Dimaadua. Gei dolomeenei gimaadou ga-heebagi, be di hai Dimaadua go di-madau God dela ne-hai-mai gi gimaadou.’ Malaa, tangada-nei mo tangada-nei i goodou gi-hagatogomaalia e-heebagi ge e-maanadu bolo ma e-haingoohia-hua di heebagi, gaa-kumi tenua gonduu deelaa.

1:42  “Dimaadua ga-helekai mai gi-di-au, ‘Hagailoo-ina hua gi digaula gi-hudee heebagi, idimaa Au ga-hagalee madalia ginaadou, gei nadau hagadaumee ga-hagamagedaa ginaadou.’

1:43  Au gu-hagi-adu nnelekai Dimaadua, gei goodou e-de-hagahuodia goodou. Goodou gu-hai-baahi gi Mee. Mai i-lodo godou manawa hagamuamua, goodou gaa-bida dagi-hua goodou gi-lodo tenua gonduu deelaa.

1:44  Gei digau Amor ala e-noho i-hongo nia gonduu, gu-lloomoi dogologo-waahee be nia lamu, gu-hai-baahi adu gi goodou. Digaula ga-waluwalu goodou gaa-dae-adu-loo gi Hormah, ga-hagamagedaa goodou i-lodo tenua gonduu o Edom.

1:45  Gei goodou ga-tangi gi Dimaadua i-di hagamaamaa, gei Mee hagalee hagalongo-adu gi goodou, ge e-de-hagahuodia-e-Ia godou dangidangi.

1:46  “Gei i-muli di madagoaa looloo nogo noho gidaadou i Kadesh,

Chapter 2

2:1  gidaadou gaa-huli, gaa-hula gi-lodo di anggowaa i-hongo di ala e-hana gi-di Malua o Aqaba, be di helekai Dimaadua ne-hai, nogo heehee di madagoaa waalooloo i-lodo tenua gonduu o Edom.

2:2  “Gei Dimaadua gu-hagi-mai gi-di-au

2:3  bolo gidaadou gu-waalooloo hogi tadau heehee i-lodo nia gonduu aalaa, malaa gidaadou belee hai-loo gii-hula gi-baahi ngeia.

2:4  Mee ne-helekai-mai bolo gi-hagi-adu-ina gi goodou nnelekai aanei, ‘Goodou bolo gaa-hula laa-lodo tenua gonduu o Edom, di gowaa ni godou dangada ala e-mogowaa, ala go-di hagadili o Esau. Digaula ga-mmaadagu i goodou,

2:5  gei goodou hudee daamada-ina di-godou dauwa gi digaula, idimaa Au hagalee gowadu gi goodou dahi piidi o nadau gowaa. Au guu-wanga tenua go Edom gi-di hagadili o Esau.

2:6  Goodou e-mee di-hui godou meegai mono wai gi digaula.’

2:7  “Gi-langahia di hai Dimaadua di-godou God, dela ne-hagahumalia goodou, i godou mee huogodoo ala ne-hai. Mee nogo madamada humalia i goodou, i godou heehee i-lodo di anggowaa damana deenei. Mee nogo i godou baahi i-nia ngadau e-madahaa aanei, gei goodou gu-humalia adu gi goodou i-nia mee huogodoo.

2:8  “Malaa, gidaadou ga-lloo-adu hua i-golo, ga-diiagi di ala dela e-hana gi-nia waahale o Elath mo Ezion-Geber, gaa-hula gi-di Tai Mmade, ga-malui-adu gi dua-ngeia hagahuudonu gi Moab.

2:9  Dimaadua ga-helekai-mai: Hudee hai mee huaidu gi digau Moab, dela go-di hagadili o Lot, be e-daamada di-godou dauwa gi digaula. Au guu-wanga di waahale Ar gi digaula, gei Au hagalee gowadu gi goodou tei gowaa i nadau gowaa.”

2:10  (Nnagadilinga daangada maaloo ge llauehe e-hagaingoo bolo digau Emim nogo noho i Ar. Digaula digau lloowehaa be digau Anakim, nnuai hagadilinga daangada llauehaa labelaa.

2:11  Digaula e-hagaingoo labelaa bolo digau Rephaim, gadoo be digau Anakim; gei digau Moab e-hagaingoo digaula bolo digau Emim.

2:12  I-mua gei digau Horite nogo noho i Edom, gei di hagadili o Esau ne-hagabagi digaula gi-daha, gaa-oho tenua digaula, gei digaula gaa-noho i-golo, e-hai gadoo be digau Israel nomuli, ala ne-hagabagi nadau hagadaumee gi-daha mo tenua dela ne-wanga go Dimaadua gi ginaadou.)

2:13  “Malaa, gimaadou ga-lloo-adu laa-lodo di Monowai Zered, be di hai Dimaadua ne-hagi-mai gi gimaadou.

2:14  Di madagoaa deenei, la nia ngadau e-motolu maa-walu i-muli madau hagatanga i Kadesh=Barnea. Nia daane hai heebagi huogodoo o-di madawaawa deelaa la-guu-mmade, be telekai Dimaadua ne-hagamodu bolo digaula e-mmade.

2:15  Dimaadua nogo hai baahi hua igolo gi digaula, gaa-tugi-loo gi dono madagoaa dela ne-daaligi digaula hagatau gu-hagalee.

2:16  “I-muli-hua digaula ne-mmade huogodoo,

2:17  Dimaadua ga-helekai-mai gi gimaadou,

2:18  ‘Dangi-nei goodou gaa-hula laa-lodo tenua o Moab, i-di ala o Ar.

2:19  Gei goodou la-ga-hoohoo gi-di gowaa digau Ammon, dela go-di hagadili o Lot. Hudee hai mee huaidu gi digaula, be e-daamada di-godou dauwa gi digaula, idimaa, Au hagalee gowadu gi goodou tei gowaa i-nia gowaa ala ne-wanga ko-Au gi digaula.’ ”

2:20  (Di gowaa deenei la dono ingoo labelaa bolo di gowaa ni digau Rhephaim, di hagaingoo ni nia daangada ala nogo noho i-golo matagidagi. Digau Ammon e-hagaingoo digaula bolo digau Zamzummin.

2:21  Digaula e-lloowehaa be digau Anakim. Digaula e-dogologowaahee ge maaloo. Malaa, Dimaadua gu-daaligi digaula gii-mee-ai di-kae di gowaa digaula go digau Ammon e-noho-ai.

2:22  Dimaadua guu-hai labelaa dana hai deenei gi digau Edom, go-di hagadili o Esau, ala nogo noho i tenua gonduu o Edom. Dimaadua gu-daaligi digau Horite, bolo gii-mee di-kae di gowaa digaula go digau Edom e-noho-ai, digaula hogi e-noho hua igolo dolomeenei.

2:23  Nia gowaa ala i taalinga Tai Mediterranean la-guu-noho-ai nia daangada mai tenua go Crete. Digaula gu-daaligi digau Avvim, go digau nogo noho i-golo matagidagi, gaa-kae nia gowaa digaula huogodoo ala adu gi bahi-i-ngaaga gaa-tugi loo i-di waahale go Gaza.)

2:24  “I-muli di-madau diiagi gi-muli tenua o Moab, gei Dimaadua ga-helekai-mai gi gimaadou, ‘Dolomeenei goodou daamada hula laa-lodo di Monowai Arnon. Au e-dugu Sihon, di king digau Amor o Heshbon, gi-lala godou mogobuna, mo ana gowaa, gi-heebagi gi-mee, ge gi-daamada gii-noho i-lodo dana gowaa.

2:25  Daamada dangi-nei, gei Au gaa-hai nia daangada huogodoo gi-mmaadagu i goodou. Digau huogodoo ga-mmaadagu, ga-bolebole i-di nadau hagalongo gi godou ingoo ma-ga-hagawaalanga.’

2:26  “Gei au ga-hagau agu gau kae-hegau mai di anggowaa o Kedemoth, gi-di king o Heshbon go Sihon, mo nadau helekai humalia e-hagamodongoohia di aumaalia i madau mehanga e-hai boloo,

2:27  ‘Heia gimaadou gii-mee di-hula laa-lodo do henua. Gimaadou gaa-hula hagahuudonu hagalee hula laa-daha mo-di ala.

2:28  Gimaadou gaa-hui madau meegai ala e-gai mo madau wai ala e-inu. Di-madau hiihai la deelaa hua belee hula laa-lodo do henua,

2:29  gaa-dae-loo gi-di-madau hula laa-lodo di Monowai Jordan, gi-lodo di gowaa Dimaadua go di-madau God dela e-gaamai gi gimaadou. Di hagadili o Esau ala e-noho i Edom, mo digau Moab ala e-noho i Ar, guu-hai gimaadou gii-mee di-hula laa-lodo nadau gowaa.’

2:30  “Gei di King Sihon digi dumaalia-mai gi gimaadou gii-hula laa-lodo dono henua. Dimaadua di-godou God guu-hai a-mee gi-manawa hamaaloo mo-di hai-baahi, bolo gii-mee gidaadou di-hagamagedaa a-mee, gaa-kae dana gowaa dela e-noho-iei gidaadou hua igolo.

2:31  “Gei Dimaadua ga-helekai-mai, ‘Mmada, Au guu-hai di King Sihon mo dono henua gi-paagege i godou mua. Kaina tenua o-maa, noho i-golo.’

2:32  Sihon gu-hanimoi mo ana daane huogodoo belee heebagi mai gi gimaadou hoohoo gi-di waahale Jahaz,

2:33  gei Dimaadua go-di madau God gu-dugu-mai a-mee gi-lala madau mogobuna, gei gimaadou gu-daaligi a-mee gii-made, mo ana dama-daane, mo ana daane huogodoo.

2:34  Di madagoaa-hua deelaa, gimaadou guu-kumi, ge gu-oho nia waahale huogodoo, guu-hai digaula gii-mmade hagatau, nia daane, nia ahina mono dama. Gimaadou digi dugu madau daangada hagamouli.

2:35  Gimaadou guu-kae nia manu digaula, guu-kae nia mee digaula hagahuaidu.

2:36  Dimaadua go-di-madau God guu-hai gimaadou gii-mee di-kumi nia waahale huogodoo mai Aroer i taalinga di gowaa mehanga gonduu o Arnon, mo-di waahale i tungaalodo di gowaa baba deelaa, gaa-hana gaa-tugi-loo i Gilead. Deai di waahale ono abaaba i-golo bolo e-haingadaa mai gi gimaadou ai.

2:37  Gei gimaadou digi hula gi-hoohoo gi-di gowaa digau Ammon, be e-hula gi taalinga di Monowai Jabbok, be gi-nia waahale nia henua gonduu, be gi-nia madagowaa ala digi hagababa mai go Dimaadua go-di madau God bolo gii-hula ginai.

Chapter 3

3:1  “Nomuli, gimaadou gaa-hula gi ngeia, adu gi tenua go Bashan, gei King Og mo ana daane huogodoo ga-lloomoi bolo e-heebagi mai gi gimaadou, hoohoo gi-di waahale Edrei.

3:2  Malaa, Dimaadua ga-helekai-mai gi-di-au, ‘Hudee madagu i-mee. Au ga-gowadu a-mee mo ana daane, mo ana gowaa hagatau gi-di-goe. Heia ang-gi mee go dau hai dela ne-hai gi Sihon, di king digau Amor nogo dagi i Heshbon.’

3:3  “Malaa, Dimaadua guu-dugu King Og mo ana daangada gi-lala madau mogobuna, ge gimaadou gu-daaligi digaula huogodoo hagahuaidu.

3:4  Di madagoaa-hua deelaa, gimaadou guu-kumi ana guongo huogodoo, deai di guongo digi kae go gimaadou ai. Nia guongo huogodoo e-modoono-(60) ala ne-kumi go gimaadou, di gowaa Argob hagatau, dela nogo dagi go Og, di King o Bashan.

3:5  Nia waahale aanei huogodoo la-gu-duuli gi-nia abaaba duuduu i-nua, mono bontai, mono dagigoo be nia baalanga ala e-loogu nia bontai, gei e-logo nia waahale lligi ono abaaba ai.

3:6  Gimaadou gu-oho nia guongo huogodoo, ge gu-daaligi nia daane huogodoo gii-mmade, mono ahina, mono dama, e-hai gadoo be di-madau hai ne-hai i-lodo nia guongo o-di king o Heshbon go Sihon.

3:7  Gimaadou guu-kae nia manu digaula, gu-haga-huaidu nia waahale digaula, guu-kae nia goloo digaula.

3:8  “Di madagoaa deelaa, gimaadou guu-kae nia gowaa ala i-bahi-i-dua di Monowai Jordan, ala nogo dagi go nia king digau Amor dogolua, tugi i-di monowai go Arnon gaa-huli gi-di Gonduu Hermon.

3:9  (Di Gonduu Hermon e-hagaingoo go digau Sidon bolo Sirion, ge digau Amor e-hagaingoo di-maa bolo Senir.)

3:10  Gimaadou guu-kae nia waahale lligi huogodoo ala i-nia gowaa mada-habanua, mo nia gowaa Gilead hagatau mo Bashan huogodoo, gaa-tugi-loo i bahi-i-dua i-nia waahale o Salecah mo Edrei, nia waahale ni tenua dagi go King Og o Bashan.”

3:11  (King Og la-go di king hagamuliagina o-di madahaanau Rephaim. Dono debedebe ne-danu-ai la-ne-hai gi-nia hadu, nia piidi e-ono di palaha, ge dono looloo e-hoohoo gi-nia piidi e-madangaholu maa-haa ne-hagatau gi-di hai dela e-hagatau nia mee. Taalunga la i-golo hua dolomeenei, i-lodo di waahale digau Ammon go Rabbah.)

3:12  “Di-madau madagoaa ne-kumi tenua deelaa, gei au gaa-wanga di gowaa dela i bahi-i-ngeia di waahale o Aroer, hoohoo gi-di Monowai Arnon, ge e-dau gi tenua gonduu o Gilead, mo ono waahale, gi-nia madawaawa Reuben mo Gad.

3:13  Gei di baahi o Gilead mo tenua o Bashan huogodoo dela nogo dagi go Og, dela go tenua o Argob hagatau, la-guu-wanga ko-au gi-di baahi di madawaawa Manasseh.” (Bashan la nogo hai tenua ni digau Rephaim.

3:14  Jair, mai di madawaawa Manasseh, guu-kae Argob hagatau, dela go Bashan, gaa-tugi loo i-nia hagageinga o Geshur mo Maacah. Mee gu-hagaingoo nia waahale lligi aalaa gi dono ingoo, gei nia maa e-hagaingoo hua igolo bolo nia waahale o Jair.)

3:15  “Au guu-wanga Gilead gi-di madahaanau o Machir, dela mai di madawaawa Manasseh.

3:16  Au guu-wanga nia gowaa ala e-tugi i Gilead, gaa-hana gaa-tugi di Monowai Arnon, gi-nia madawaawa Reuben mo Gad. Tungaalodo di monowai la-go di-nau hagageinga baahi-ngaaga, gei di-nau hagageinga bahi-i-ngeia la-go di Monowai Jabbok, dela go-di hagageinga digau Ammon.

3:17  I-di baahi gi-dai, gei di-nadau gowaa le e-hana-loo e-tugi di Monowai Jordan, mai Tai o Galilee i-ngeia gaa-hana gi-lala gi Tai Mmade i-ngaaga, gaa-hana gi-di Gonduu Pisgah i-bahi-i-dua.

3:18  “I-di madagoaa-hua deelaa, gei au ne-wanga gi digaula nnelekai aanei, ‘Dimaadua go tadau God, gu-gowadu gi goodou di gowaa dela i baahi-dua Jordan e-noho-ai. Dolomeenei, goodou hagatogomaalia-ina godou gau-dauwa, hagau-ina digaula laa-lodo di Monowai Jordan, i-mua nia madawaawa Israel ala i-golo, e-hagamaamaa digaula gii-noho i-lodo nadau gowaa.

3:19  Aalaa-hua go godou lodo, godou dama, mo godou manu — au e-iloo bolo goodou e-logo godou manu — gaa-noho-hua i-lodo nia waahale ala ne-hagaingoo adu gi goodou.

3:20  Hagamaamaa-ina godou ihoo digau Israel ala i-golo, gaa-dae-loo gi di-nadau noho gi-hongo di gowaa dela e-wanga go Dimaadua ga-haganoho digaula i-di aumaalia, gadoo be dana hai ne-hai-adu gi goodou i kinei. Nomuli gei goodou gaa-mee di-lloomoi gi-muli, gi dogu gowaa ne-hagaingoo adu gi goodou.’

3:21  “Gei au ga-aago Joshua, ‘Goe gu-gidee nia mee Dimaadua di-godou God, ne-hai gi-nia king dogolua ala go Sihon mo Og. Gei Mee gaa-hai go di hai la-hua gi digau huogodoo ala ma-ga-heebagi ginai goodou i nadau gowaa.

3:22  Hudee mmaadagu i digaula, i Dimaadua di-godou God ga-heebagi-laa i godou baahi.’

3:23  “Di madagoaa deelaa, gei au ga-dalodalo hagamahi boloo,

3:24  ‘Meenei Tagi go Yihowah, au e-iloo bolo Goe ne-hagamodongoohia-mai taamada o au mee humalia ge hagagoboina ala belee hai. Deai di god i-di langi be i henuailala e-mee di-hai au mee llauehe ala ne-hai ai!

3:25  Dimaadua, heia au gii-hana laa-lodo di Monowai Jordan, e-mmada gi tenua huwa humalia i-di baahi i-golo, dela go tenua gonduu madamada, mo nia Gonduu Lebanon.’

3:26  “Gei di-maa go goodou ala ne-hidi ai Dimaadua, ga-hagawelewele mai, ga-hagalee hagalongo-mai. Gei Mee ga-helekai, ‘Deelaa hua! Hudee helekai di-mee deenei labelaa!

3:27  Hana gi-di ulu di Gonduu Pisgah, mmada gi-ngeia mo ngaaga, gi-dua mo dai. Mmada hagahumalia gi-nia mee ala e-gidee-goe, idimaa goe hagalee-loo hana laa-lodo Jordan.

3:28  Agoago-ina Joshua. Hagamaaloo-ina-aga dono manawa maaloo, idimaa mee gaa-dagi nia daangada, e-hula e-noho i tenua dela e-mmada ginai goe.’

3:29  “Malaa, gidaadou nogo noho-hua i-golo, i-hongo di gowaa baba, e-huli-adu gi-di waahale Beth=Peor.”

Chapter 4

4:1  Moses ga-helekai gi-nia daangada, “Goodou hagalongo gi-humalia gi-nia haganoho huogodoo ala e-agoago ko-au adu gi goodou, gei goodou gi-daudalia nia maa, gei goodou ga-mouli, gaa-mee di-ulu gei ga-hai-mee gi tenua dela ga-gowadu go Dimaadua gi goodou, dela go-di God o godou maadua-mmaadua.

4:2  Goodou hudee haga-puni-anga tei bida helekai gi-lodo nia haganoho ala e-hai-adu ko-au gi goodou, be e-daa tei bida helekai. Goodou gi-daudalia-hua nia haganoho Dimaadua di-godou God, ala gu-gowadu ko-au gi goodou.

4:3  Goodou gu-modongoohia-hua di mee a Dimaadua dela ne-hai i-di Gonduu Peor, dana hai dela ne-daaligi gi-daha hunu gau i godou lodo ala nogo daumaha gi-di balu-god go Baal i-di gowaa deelaa.

4:4  Gei goodou ala ne-hagalongo gi Dimaadua di-godou God, e-mouli hua igolo gaa-dae-mai gi dangi-nei.

4:5  “Au gu-haga-modongoohia-adu gi goodou nia haganoho huogodoo a Dimaadua dela go dogu God, ne-helekai-mai gi-di-au bolo goodou gi-haga-gila-aga-ina nia mee aanei i-lodo tenua dela ga-ulu ga-hai-mee ginai goodou.

4:6  Goodou gi-haga-gila-ina-aga gi-humalia nia maa, e-hai di haga-modongoohia ang-gi nia henua ala i-golo bolo goodou gu-kabemee, gei digaula ga-longono di hai o-nia haganoho aanei huogodoo, gei digaula ga-hagaamu, ga-helekai bolo ma deai digau e-kabemee be digau o tenua aamua deenei ai!

4:7  “Deai tenua aamua i-golo ai dela di-nadau god e-hoohoo-anga gadoo be Dimaadua go tadau God dela e-hoohoo-mai gi gidaadou i tadau madagoaa ma-ga-dalodalo gi Mee.

4:8  Deai tenua aamua i-golo labelaa, dela ana haganoho e-donu be nia haganoho ala e-gowadu ko-au gi goodou dangi-nei.

4:9  Goodou gi-madamada gi-humalia huoloo, gi-dee de-langahia-e-goodou nia mee ala guu-mmada ginai goodou. Goodou gi-dadaahia-hua beelaa i-di waalooloo o godou mouli. Goodou gi-aago-ina ang-gi godou dama mo nia dama o godou dama

4:10  di hai o-di laangi dela nogo tuu-ai goodou i-mua nnadumada o Dimaadua di-godou God i-di Gonduu Sinai, deelaa di madagoaa Dimaadua ne-helekai-mai gi-di-au, ‘Haga-dagabuli-ina-mai nia daangada gi ogu mua, gi-hagalongo digaula gi agu helekai, gi-daudali go digaula mo-di hagalabagau Au i-di waalooloo o nadau mouli, gei digaula gi-agoago nadau dama di-nadau hai dela e-hagalabagau Au.’

4:11  “Hagi-anga-ina gi godou dama di-godou hai ne-loomoi, ga-dagabuli-mai gi-di gili di gonduu deelaa, i-di madagoaa di gonduu deelaa nogo ulaula guu-hana dono ulaula gi-di langi i-nua, gu-haganiga go-di gabua luuli.

4:12  Gei Dimaadua gu-helekai-adu gi goodou mai i-lodo di ulaula o-di ahi, gei goodou gu-longono dono lee, gei goodou e-de-gidee-loo di ada o tuaidina o-Maa.

4:13  Gei Mee gu-hagi-adu gi goodou dana hagababa, bolo goodou gi-haga-gila-ina-aga ana haganoho ala go di Madangaholu Haganoho, dela ne-hihi go Mee gi-hongo nia baahi-hadu e-lua.

4:14  Gei Dimaadua gu-helekai-mai gi-di-au bolo au gi-agoago-ina adu gi goodou nia haganoho huogodoo, bolo goodou gi-haga-gila-ina-aga i-lodo tenua dela ga-ulu ginai goodou ga-hai-mee ginai.

4:15  “Goodou gii-pula i goodou, idimaa, goodou digi mmada gi-di ada-mee i-di laangi Dimaadua dela nogo helehelekai-adu gi goodou mai i-lodo di ulaula o-di ahi i-di Gonduu Sinai,

4:16  bolo goodou gi-dee-hai-gee-hua gaa-hai godou ada-balu-ieidu de-hilihili: di ada-daane be-di ada-ahina,

4:17  di ada-manu, be-di ada-manu mamaangi,

4:18  di ada-manu dolodolo be-di ada-iga.

4:19  Di-godou mmada gi-nua gi-di gili di langi ga-gidee-goodou tagabae mee, aalaa go-di laa, di malama mo nia heduu, goodou gi-dee-hala-hua gaa-hai bolo ma nia god, gei goodou ga-daumaha gi-nia maa, idimaa, Dimaadua di-godou God ne-wanga nia mee aanei gi-nia henua huogodoo ala i-golo bolo gi-daumaha ginai.

4:20  Dimaadua ne-hilihili-aga goodou ga-dagi-mai gi-daha mo Egypt, dela e-hai gadoo be-di ahi-gaa dela e-dudu nia baalanga gi-waiwai. Mee ne-laha-mai goodou belee hai ana daangada donu, be goodou aanaa dolomeenei.

4:21  Dimaadua di-godou God gu-hagawelewele-mai gi-di-au ne-hidi-mai i goodou, gei Mee gu-helekai bolo au hagalee hana laa-lodo di Monowai Jordan, ge hagalee hogi e-dau i tenua huwa humalia dela ga-gowadu go Mee gii-hai henua ginai goodou.

4:22  Au gaa-made-hua i-lodo tenua deenei, hagalee hana laa-lodo di Monowai Jordan, gei goodou bolo gaa-hula ga-hai-henua gi tenua huwa humalia deelaa.

4:23  Goodou gii-pula i goodou, gi-hudee de-langahia di hagababa a Dimaadua di-godou God dela ne-hai-adu gi goodou. Goodou hudee heia nia hagadilinga balu-god gi-dee-hai-baahi goodou gi-nia mee a Dimaadua di-godou God ala gu-haga-noho.

4:24  Dimaadua di-godou God le e-hai gadoo be-di ulaula o-di ahi, idimaa, Mee di God dubua.

4:25  “I-muli-hua di-godou noho waalooloo i-lodo tenua deelaa, gaa-hai godou dama, gei godou dama gaa-hai labelaa nadau dama, gei goodou gii-pula i goodou gi-dee-hala-hua goodou, gaa-hai godou ada balu-ieidu gi-di-ingoo-hua di mee be di-aha. Nia mee beelaa la nia mee hagalee hiihai ginai a Dimaadua di-godou God, nia mee e-hai a-Mee gi-hagawelewele.

4:26  Dangi-nei, gei-au gu-hagamodudahi gi-di ingoo o-di langi mo henuailala, bolo goodou ma-gaa-hai nia mee aanei, gei goodou ga-huaidu, hagalee mouli waalooloo i-lodo tenua dela belee hai-mee ginai goodou, idimaa, goodou ga-daaligi gi-daha.

4:27  Dimaadua ga-hagabagi goodou gi-daha gii-hula gi-modoho gi-lodo nnenua ala i-golo, gei digau dulii i goodou ga-mouli.

4:28  I-lodo nia gowaa ala ga-noho-ai goodou, goodou ga-daumaha gi-nia balu-ieidu ala ne-hai go nia daangada gi-nia laagau mono hadu, go nia god ala e-dee-gida ge e-deemee di-hagalongo, ge e-deemee di-miami, ge e-deemee di-hagadungu di mee.

4:29  Goodou ga-huli-mai gi Dimaadua di-godou God i-nia gowaa aalaa. Maa goodou ga-halahala a-Mee mai i-lodo godou manawa madammaa, mo godou mouli hagatau, gei goodou ga-gidee a-Mee.

4:30  I-muli-hua nia haingadaa e-logo ma-gaa-tale adu gi goodou, gei goodou ga-hiihai e-lloomoi gi Dimaadua di-godou God, e-haga-gila-aga ana haganoho.

4:31  Idimaa, Dimaadua di-godou God la di God dumaalia. Mee hagalee kili goodou gi-daha ge hagalee daaligi goodou, gei Mee hagalee haga-de-langahia dana hagababa dela ne-hai gi godou maadua-mmaadua.

4:32  “Halahala-ina nia mee ala ne-kila i-lodo di madagoaa dela gu-doo gi-daha, go nia laangi ala i-mua di-godou haanau, daamada i-di madagoaa God dela ne-hai nia daangada i henuailala. Halahala-ina nia madagowaa huogodoo i henuailala be di-maa nia mee beenei gu-kila-aga i-mua ga-huli-mai gi dolomeenei?! Be di-maa di longo i-golo guu-hana guu-dele beenei?!

4:33  E-hai behee? Ma nia daangada i-golo gu-longono di lee o God dela nogo leelee-mai i-lodo di ulaula o-di ahi gadoo be goodou ala ne-longono, gei goodou e-mouli-hua digi mmade?!

4:34  Ma di god i-golo guu-daa ana daangada gi-daha mo tuai henua belee hai nia daangada ni-aana, be-di hai a Dimaadua di-godou God dela ne-hai-adu gi goodou i Egypt?! Goodou guu-mmada gi godou golomada donu bolo ma go Mee dela ne-wanga gi digaula nia magi huaidu mo tauwa mai i ono mahi mogobuna, ge e-hai nia hagadilinga mogobuna haga-goboina mono mogobuna hagamadagudagu dangada.

4:35  Nia mee aanei huogodoo ne-hai belee hai goodou gi-hagadonu bolo ma go Dimaadua hua dela di God, deai di god i-golo labelaa ai.

4:36  Mee gu-dumaalia adu gi goodou bolo gi-hagalongo gi dono lee e-helekai-mai i-di langi, bolo gii-mee Ia di-aago goodou. Mee ne-dumaalia adu gi goodou bolo gii-mmada goodou i henuailala gi dana ahi, gei goodou gu-longono dono lee mai i-lodo di ahi deelaa.

4:37  Mee ne-aloho i godou damana-mmaadua, gei Mee ne-hilihili-aga goodou, gei go Mee hua dela ne-dagi-mai goodou gi-daha mo Egypt gi ono mogobuna aamua.

4:38  Gei Mee ne-hagabagi gi-daha nia henua dogologowaahee ono daangada, ge e-maaloo i goodou, bolo gii-mee di-godou ulu i tenua digaula e-hai-mee ginai, go tenua dela e-noho-ai goodou dolomeenei.

4:39  Gei goodou gi-iloo bolo Yihowah la di God i-di langi mo i henuailala, deai di god i-golo ai. Goodou haga-langalangahia-ina di mee deenei gaa-hana-hua beelaa.

4:40  Goodou gi-daudalia-hua nia haganoho huogodoo ala e-gowadu ko-au gi goodou dangi-nei, gei goodou mo di-godou hagadili ga-haadanga-lamalia i-nia madagoaa huogodoo, gei ga-mouli duai i-lodo tenua o Dimaadua di-godou God e-gowadu gi goodou gaa-hai di-godou henua gaa-hana-hua beelaa.”

4:41  Gei Moses gaa-dugu-gee nia waahale e-dolu i bahi-i-dua di Monowai Jordan

4:42  belee hana ginai dahi dangada, gi-daha mo-di haingadaa, maa tangada deelaa gaa-tiba daaligi dana dangada gii-made, gei dana mee hala ne-hai i-mua gi tangada deelaa ai, gei mee e-mee di-lele gi-golo e-bala hagammuni, hagalee e-daaligi gii-made.

4:43  Ang-gi-di madawaawa Reuben, la-go di waahale Bezer, i-hongo di anggowaa maalama; ang-gi di madawaawa Gad, la-go Ramoth i-lodo tenua go Gilead; ge ang-gi di madawaawa Manasseh la-go Golan i-lodo tenua go Bashan.

4:44  Moses guu-wanga nnaganoho a God mono agoago ang-gi digau Israel.

4:45  Mee ne-wanga gi digaula nnaganoho aanei i-muli nadau lloomoi i Egypt, gei digaula nogo i-di gowaa baba bahi-i-dua di Monowai Jordan, i-di baahi e-huli-adu gi-di waahale o Beth=Peor, deenei di gowaa ne-wanga nnaganoho aanei gi digaula. Deenei la-nogo i-lodo di gowaa di king digau Amor go Sihon, dela nogo dagi i-di waahale o Heshbon. Moses mo digau Israel gu-hagamagedaa a-mee i-di nadau lloomoi i Egypt.

4:46  Mee ne-wanga gi digaula nnaganoho aanei i-muli nadau lloomoi i Egypt, gei digaula nogo i-di gowaa baba bahi-i-dua di Monowai Jordan, i-di baahi e-huli-adu gi-di waahale o Beth=Peor, deenei di gowaa ne-wanga nnaganoho aanei gi digaula. Deenei la-nogo i-lodo di gowaa di king digau Amor go Sihon, dela nogo dagi i-di waahale o Heshbon. Moses mo digau Israel gu-hagamagedaa a-mee i-di nadau lloomoi i Egypt.

4:47  Digaula guu-noho i dono henua mo tenua di king digau Bashan go Og, go di king i-golo o digau Amor dela nogo noho i-bahi-i-dua Jordan.

4:48  Tenua deenei le e-duudagi mai di waahale o Aroer, i taalinga di Monowai Arnon, gaa-hana-loo gi-ngeia gi-di Gonduu Sirion, dela go-di Gonduu Hermon.

4:49  Di gowaa deenei e-dau labelaa gi-nia gowaa huogodoo ala i-bahi-i-dua di Monowai Jordan, ga-hanadu-loo gi-ngaaga, gi Tai Mmade, mo adu gi bahi-dua gi tono di Gonduu Pisgah.

Chapter 5

5:1  Moses ga-gahi-mai digau Israel huogodoo, ga-helekai gi digaula, “Nia daangada Israel, hagalongo gi-nia haganoho huogodoo ala e-gowadu ko-au gi goodou dangi-nei. Kaabe-ina nia maa, ge goodou e-hai gi daudali nia maa.

5:2  I-di Gonduu Sinai, gei Dimaadua go tadau God guu-hai dana hagababa,

5:3  hagalee anga-hua gi tadau damana, ge mai labelaa gi gidaadou huogodoo ala e-mouli dangi-nei.

5:4  I-hongo di gonduu, gei Dimaadua gu-helekai-adu gi goodou hagamadammaa mai i-lodo di ahi.

5:5  Au nogo duu i godou mehanga mo Dimaadua belee hagi-adu ana helekai, idimaa goodou nogo mmaadagu i-di ahi, ge digi hula gi-hongo di gonduu. “Dimaadua ga-helekai,

5:6  ‘Au go Yihowah go di-godou God dela ne-daa-mai goodou gi-daha mo Egypt, di-godou gowaa dela nogo ngalua hege-ai.

5:7  “ ‘Goodou hudee hai god hua-gee mo au.

5:8  “ ‘Goodou hudee hai god gi-nia ada o tei mee i-di langi i-nua be i henuailala, be i-lodo di moana o lala henuailala.

5:9  Hudee pala ang-gi dahi ada-mee be e-daumaha gi-di maa, idimaa, Au go Yihowah go-di godou God, Au go di God dubua. Digau ala ma-ga-ginagina i di-Au, gei Au ga-hagaduadua digaula mo nadau hagadili gi-muli, gaa-dae-loo gi-di tolu mo-di haa adu-dangada.

5:10  Gei Au e-dumaalia-hua gi-nia madahaanau e-mana o digau ala e-aloho i-di-Au ge e-haga-kila-aga agu haganoho.

5:11  “ ‘Goodou hudee hai-hegau ihala gi dogu ingoo, idimaa, Au go Yihowah di-godou God, dela e-hagahuaidu tangada dela ma-ga-hai-hegau ihala dogu ingoo.

5:12  “ ‘Goodou gi-langahia di Laangi-Sabad, heia gi-dabuaahia, gii-hai be agu helekai ala ne-hai ko-Au go Dimaadua di-godou God adu gi goodou.

5:13  Heia godou moomee gii-lawa i-lodo nia laangi e-ono.

5:14  Gei di hidu laangi la di laangi hagamolooloo, e-haga-dabu-ai goodou gi-di Au. Deai tangada i goodou e-hai ana moomee ai, goodou, godou dama, godou hege, godou manu be go digau mai i-daha ala e-noho i godou henua. Godou hege e-hai gi-hagamolooloo gadoo be goodou.

5:15  Hagamaanadu-ina bolo goodou nogo hai nia hege i Egypt, gei Au go Dimaadua, go di-godou God, ga-daa-mai goodou gi-daha gi ogu mogobuna mo ogu mahi. Deelaa-laa e-hagadaba-ei Au adu gi goodou bolo gi-hagadabu-ina di Laangi-Sabad.

5:16  “ ‘Hagalabagauina do damana mo do dinana, gii-hai be agu helekai ala e-hai ko-Au go Dimaadua go doo God adu gi goodou, gi humalia adu gi goodou i-nia mee huogodoo, ge gi-mouli goodou waalooloo i-hongo dagu henua dela ga-gowadu ko-Au gi goodou.

5:17  “ ‘Hudee daaligidia tangada gii-made.

5:18  “ ‘Hudee kii i-baahi tangada i-daha mo doo lodo.

5:19  “ ‘Hudee gaiaa.

5:20  “ ‘Hudee hagahuaidu-ina tangada gi-nia kai-tilikai.

5:21  “ ‘Hudee hagagailaa gi-di hale o tangada, be go dono lodo, be go ana ‘donkey’, be go dana kau, be go di-ingoo-hua di-mee i ana mee.’

5:22  “Aanei la-go nnaganoho Dimaadua, ne-gowadu gi goodou huogodoo nogo dagabuli i-di gonduu. Aanei-hua nnaganoho a-Maa ne-gaamai, i dono lee maaloo mai i-lodo di ahi mo mai i-lodo nia gololangi maadolu, nia mee i-golo ai. Gei Mee gaa-hihi nia maa gi-hongo nia baahi hadu baabaa e-lua, ga-gaamai gi-di-au.

5:23  “Di madagoaa di gonduu hagatau ne-wele, ge goodou gu-longono di lee mai i-lodo di bouli, godou dagi mo nia dagi o godou madawaawa ga-lloomoi gi-di-au,

5:24  ga-helekai-mai, ‘Dimaadua go tadau God gu-hagi-mai dono maaloo mo dono madamada i tadau madagoaa ne-hagalongo gi Mee ne-helekai mai i-lodo di ahi! Dangi-nei gidaadou gu-gidee bolo tangada e-mee di mouli hua igolo, i-muli God ne-helekai ang-gi mee.

5:25  Malaa, gidaadou e-aha ala e-hagalliga gi-di made labelaa? Di ahi huaidu deelaa la-ga-hagahuaidu gidaadou. Gidaadou e-mmade-hua, maa gidaadou ga-hagalongo gi Dimaadua go tadau God, ma-ga-helekai labelaa.

5:26  Maa iai tangada i-golo gu-mouli i-muli dono hagalongo gi-di God mouli e-helekai-mai i-di ahi?

5:27  Hana gi-muli, Moses, hana hagalongo gi-nia mee huogodoo Dimaadua go tadau God ma-ga-helekai-ai. Nomuli, gei goe ga-hanimoi, ga-hagi-mai-laa ana mee ne-helekai-adu. Gimaadou ga-hagalongo ga-daudali-ai.’

5:28  “Di madagoaa Dimaadua ne-longono nnelekai aanei, gei Mee ga-helekai-mai, ‘Au gu-longono nnelekai digau aanei, ge digaula e-donu.

5:29  E-humalia bolo digaula la-gi-hagabaubau-hua-laa beenei i-nia madagoaa huogodoo! E-humalia bolo digaula la-gi-hagalaamua-ina Au, ge gi-daudalia agu hagababa huogodoo i-nia madagoaa huogodoo, gei nia mee huogodoo ga-humalia i nadau baahi mo nadau hagadili gi-muli gaa-hana-hua beelaa.

5:30  Hana, helekai gi digaula bolo gii-hula gi-muli gi nadau hale-laa.

5:31  Gei goe, go Moses, noho i-kinei i dogu baahi, gei Au ga-gowadu agu haganoho mo agu hagababa huogodoo. Agoago-ina nia maa gi-nia daangada gii-mee digaula di-haga-kila-aga nia maa i tenua dela e-wanga ko-Au gi digaula.’

5:32  “Nia daangada Israel, goodou gi-dagatonu-adu gi goodou bolo goodou gi-heia nia mee huogodoo Dimaadua go di-godou God ne-helekai-adu gi goodou. Hudee de-hagalongo gi tei haganoho i ana haganoho.

5:33  Daudalia nia maa huogodoo, gei nia mee huogodoo gaa-gila humalia i godou baahi, gei goodou ga-duudagi-adu-hua di-godou noho i-hongo tenua dela ga-hai-mee ginai goodou.

Chapter 6

6:1  “Aanei nia haganoho huogodoo ala ne-hagi-mai go Dimaadua di-godou God bolo au gi-agoago-ina adu gi goodou. Goodou la-gi-haga-gila-ina-aga nia maa i-lodo tenua dela ga-hai-mee ginai goodou.

6:2  Di waalooloo o godou mouli, gei goodou mo godou madawaawa gi-hagalaamua-ina Dimaadua di-godou God, mo-di haga-gila-ina-aga ana haganoho huogodoo ala e-gowadu ko-au gi goodou, gei goodou ga-mouli waalooloo i-lodo tenua deelaa.

6:3  Goodou go digau Israel, hagalongo mo-di daudalia nia maa, gei goodou ga-haadanga-lamalia gaa-hai tenua maaloo, gaa-noho i-lodo tenua tomo ge logo ono meegai, be-di hagababa a Dimaadua di-godou God dela ne-hai ang-gi godou damana-mmaadua.

6:4  “Goodou go digau Israel, goodou gi-langahia di mee deenei! Dimaadua dela go tadau God, go Mee hua dela go God.

6:5  Aloho i Dimaadua go doo God aga i-lodo do manawa hagatau, mo do mouli hagatau, mo oo mahi hagatau.

6:6  Hudee delangahia nnaganoho aanei, ala e-gowadu ko-Au gi goodou dangi-nei.

6:7  Agoago-ina nia maa gi au dama i-lodo doo hale, mo do madagoaa dela e-heehee-iei goe i malaelae, mo do madagoaa ma-gaa-moe gi-lala mo do madagoaa ma-ga-ala-aga.

6:8  Nnoo-ina nia maa gi oo lima mo doo lae gi-langalangahia goodou nia maa.

6:9  Hihia nia maa gi-di gili nia duludulu mo-di gili di bontai o doo hale.

6:10  “Dimaadua di-godou God gaa-dagi goodou gi tenua dela ne-hagababa go Mee gi godou damana-mmaadua, go Abraham, Isaac mo Jacob, bolo e-gowadu gi goodou, tenua deelaa iai nia waahale llauehe ge humalia huoloo, ge hagalee ni goodou ne-hau.

6:11  Nia hale le e-honu nia goloo humalia, ge hagalee nia mee ni goodou ne-haga-budu-mai. Nia monowai-geli hagalee nia mee ni goodou ne-geli, gei nia hadagee-waini mo nia laagau-olib, hagalee nia mee ni goodou ne-dogi. Di madagoaa Dimaadua gaa-dagi goodou gi-lodo tenua deenei, gei goodou gaa-noho ga-miami-laa.

6:12  Malaa, hudee de-langahia Dimaadua dela ne-laha-mai goodou i Egypt, tenua nogo hai-hege-iei goodou.

6:13  Hagalabagau-ina Dimaadua di-godou God, daumaha-hua gi Mee, gei gi-hai-hua godou hagamodu i dono ingoo.

6:14  Gei goodou gi-hudee daumaha gi-nia balu-ieidu o nnenua ala e-haganiga-mai godou gili.

6:15  Maa goodou ga-daumaha gi-nia balu-ieidu, gei di hagawelewele o Dimaadua ga-tale-adu gi goodou, ga-daaligi goodou gi-daha mo henuailala, idimaa, Dimaadua di-godou God dela i godou baahi la di God dubua.

6:16  “Goodou gi-hudee haga-madamada-ina Dimaadua di-godou God, be di-godou hai dela nogo hagamada a-Mee i-lodo di anggowaa i Massah.

6:17  Goodou heia gi-haga-gila-ina-aga nia haganoho huogodoo a Dimaadua di-godou God ne-gowadu gi goodou.

6:18  Heia nia mee ala e-hiihai ginai Dimaadua, gei goodou ga-haadanga-lamalia, gaa-mee di-godou ulu gei ga-hai-mee gi tenua huwa humalia dela gu-hagababa go Dimaadua ang-gi godou damana-mmaadua.

6:19  Gei goodou ga-hagabagi gi-daha godou hagadaumee ala i godou mua, be dana hagababa dela ne-hai.

6:20  “I-lodo nia madagoaa ala ma-gaa-dae-mai, gei godou dama-daane ga-heeu-adu gi goodou, ‘Dimaadua go tadau God ne-helekai-mai gi gidaadou bolo gi-hagakila-ina-aga nia haganoho huogodoo aanei la eimaha?’

6:21  Gei goodou ga-helekai gi digaula, ‘Gimaadou nogo hai-hua nia hege ni-di king i-lodo Egypt, gei Dimaadua ga-dagi-mai gimaadou gi-daha mo Egypt gi ono mogobuna aamua.

6:22  Gei gimaadou guu-mmada gi-nia mogobuna haga-goboina a-Mee ala ne-hai ang-gi digau Egypt, ga-hidi-mai-ai di haadanga-balua guu-tale ang-gi di king o Egypt mo ana daangada aamua huogodoo.

6:23  Mee ne-laha-mai gidaadou gi-daha mo Egypt belee lahi gi tenua dela gu-hagababa go Mee gi tadau damana-mmaadua bolo e-gaamai gi gidaadou.

6:24  Dimaadua go tadau God guu-hai bolo gidaadou gi-haga-kila-aga-ina nia haganoho huogodoo aanei, ge gi-hagalabagau-ina a-Mee. Maa gidaadou ga-haga-kila-aga nia maa, gei Mee ga-madamada humalia i gidaadou i-nia madagoaa huogodoo, ga-hagahumalia gidaadou.

6:25  Gidaadou ma-ga-manawa-dahi-hua i tadau daudali mo-di haga-kila-aga nia haganoho huogodoo aanei i-mua nnadumada o Dimaadua go tadau God gadoo be ana helekai mai gi gidaadou, gei gidaadou gaa-kila humalia.’

Chapter 7

7:1  “Dimaadua di-godou God gaa-dagi goodou gi-hai-mee gi tenua dela ga-hoohoo ga-ulu ginai goodou no-lodo, gei Mee ga-hagabagi gi-daha nia madawaawa e-logo i godou mua, aanei la nia madawaawa Hittite, Girgashite, Amor, Canaan, Perizzite, Hivite mo Jebus. Nia madawaawa e-hidu aanei koia e-maaloo i goodou.

7:2  Di madagoaa Dimaadua di-godou God dela ga-dugu-adu digaula gi-lala godou mogobuna, gei goodou ga-haga-magedaa digaula, goodou gi-daaligidia digaula gi-hagalee, gei goodou gi-hudee hai hagababa gi digaula be e-dumaalia gi digaula.

7:3  Goodou gi-hudee wanga-ina godou dama-ahina e-lodo gi-nia dama-daane digaula, be e-laha-mai nia dama-ahina digaula e-lodo ginai godou dama-daane.

7:4  Idimaa, digaula ga-halahalau godou dama-daane gii-huli gi-daha mo Dimaadua gi-daumaha gi-nia balu-ieidu, ga-hidi-mai-ai gei Dimaadua ga-hagawelewele adu gi goodou, ga-daaligi goodou.

7:5  Deenei-laa: Oho-ina nia gowaa dudu-tigidaumaha digaula, haga-hingahinga-ina gi-lala nia duludulu-dabu digaula, hele-ina gi-lala nadau ada o-di god-ahina go Asherah, duungia nia ada-balu-ieidu digaula.

7:6  Heia nia mee aanei, idimaa Dimaadua di-godou God gu-hai-mee gi goodou, gei goodou guu-hai digau guu-dabu, digau ni Mee ne-hilihili-mai i-lodo nia henua huogodoo o henuailala.

7:7  “Dimaadua ne-aloho i goodou ge ne-hilihili-aga goodou, hagalee ne-hilihili idimaa goodou ala e-dogologo i-nia henua ala i-golo, deeai, goodou la tenua hua-dulii.

7:8  Gei Dimaadua ne-hilihili goodou, idimaa, Mee e-aloho i goodou, gei e-dadaahi-hua beelaa dana hagababa dela ne-hai gi godou damana-mmaadua. Gei dela hogi di mee a Mee ne-daa-mai goodou gi ono mogobuna aamua, gei Mee ne-haga-dagaloaha-mai goodou gi-daha mo godou hai-hege i-lala nia mogobuna o-di king o Egypt.

7:9  Goodou la-gi-langahia bolo Dimaadua di-godou God la deelaa hua go Mee di God. Mee e-manawa-dahi ge dadaahi-hua beelaa dana hagababa mo dono aloho dee-odi, ang-gi nia madahaanau e-mana ala e-aloho i Mee mo-di haga-gila-aga ana haganoho.

7:10  Gei Mee hagalee madugidugia di-daaligi digau ala e-de-hiihai ang-gi de-Ia.

7:11  Goodou la-gii-pula i goodou i-di godou haga-gila-aga nnagadilinga haganoho huogodoo aanei ala ne-agoago adu gi goodou dangi-nei.

7:12  “Goodou ma-ga-hagalongo gi-humalia mo-di daudali nia haganoho aanei, Dimaadua di-godou God le e-dadaahi-hua beelaa dana hagababa mo dono aloho i goodou, be dana hagamodu dela ne-hai ang-gi godou damana-mmaadua.

7:13  Mee ga-aloho i goodou mo-di haga-dogologo goodou. Mee ga-haga-maluagina goodou, gaa-hai goodou gi-dogologowaahee gaa-hai godou dama gii-logo, gaa-hai nia laagau gii-huwa logo: ala go nia ‘wheat’ mono waini mono lolo-olib. Godou damaa-kau mo godou dama-siibi gaa-logo. Mee ga-gowadu gi goodou nia haga-maluagina huogodoo aanei i tenua dela ne-hagababa go Mee gi godou damana-mmaadua bolo e-gowadu gi goodou.

7:14  Goodou koia ga-maluagina i-nia henua ala i-golo huogodoo. Deai dahi daane be ahina i goodou ga-hagalee huwa ai, mo godou manu-daane mo ahina hogi deai dahi manu hagalee huwa ai.

7:15  Dimaadua ga-daa gi-daha mo goodou nia magi huogodoo, Mee hagalee gowadu gi goodou nia hagadilinga magi huaidu ala nogo hagaduadua goodou i Egypt, nia magi aanei gaa-wanga go Mee gi godou hagadaumee.

7:16  Goodou la-gi-daaligidia gi-daha nnenua huogodoo ala ga-dugu-adu go Dimaadua di-godou God gi-lala godou mogobuna. Goodou hudee dumaalia gi digaula be e-daumaha gi-nia balu-ieidu digaula, idimaa, goodou ma-ga-daumaha gi-nia balu-ieidu digaula, gei goodou gaa-mmade.

7:17  “Holongo goodou ga-hagabaubau boloo, ‘Nia henua digaula koia e-dogologowaahee i gidaadou, ge dehee tadau hai e-hagabagi digaula gi-daha mo kinei?’

7:18  Goodou hudee mmaadagu i digaula, goodou gi-langahia di mee Dimaadua di-godou God dela ne-hai gi-di king o Egypt mo digau Egypt huogodoo.

7:19  Goodou gi-langahia di hagaduadua damana dela guu-mmada ginai godou golomada, nia hagadilinga mogobuna haga-goboina, mo nia mogobuna mo nia mahi aamua o Dimaadua di-godou God ala ne-hai, nogo laha-mai goodou gi-daha mo Egypt. Go nia mogobuna hua aanei ala gaa-hai go Dimaadua di-godou God ang-gi nia daangada ala e-mmaadagu-ai goodou dolomeenei.

7:20  Dimaadua di-godou God ga-hagau-mai gi digaula di lamu-kadi-dangada mmae e-daaligi digau ala ma-gaa-dubu i-golo ala ne-pala hagammuni.

7:21  Malaa, goodou hudee mmaadagu i digaula, idimaa Dimaadua di-godou God le e-madalia goodou, Mee di God aamua gei go Mee hua dela belee mmaadagu-iei goodou.

7:22  Dimaadua di-godou God ga-haga-madammaa gi-daha nia madawaawa ala i godou mua. Goodou ga-deemee di-daaligi digaula i tolongo hua e-dahi, ma-gaa-hai beenei gei nia manu lodo-geinga ga-logowaahee i-lodo tenua, ga-hagalliga-adu gi goodou.

7:23  Dimaadua ga-dugu-adu digaula gi-lala godou mogobuna, ga-hagahinihini digaula gei goodou ga-dadaaligi digaula gii-odi.

7:24  Nia king digaula ga-dugu-adu labelaa go Mee gi-lala godou mogobuna, gei goodou ga-daaligi digaula ge nia ingoo digaula ga-de-langahia i-nia madagoaa huogodoo i henuailala. Deai tangada e-mee di-hai-baahi adu gi goodou ai. Goodou ga-daaligi digaula huogodoo gi-daha.

7:25  Goodou gi-duungia nia ada-balu-ieidu digaula, goodou hudee hagagailaa gi-nia goolo mo nia silber ala i-di gili nia ada aalaa. Goodou hudee kae-ina nia maa. Maa goodou gaa-hai beelaa, gei goodou ga-huaidu adu gi goodou, idimaa, Dimaadua di-godou God e-de-hiihai gi-nia ada balu-god.

7:26  Gei goodou gi-hudee gaamai nia ada balu-ieidu gi-lodo godou hale. Goodou gaa-hai beelaa, gei di halauwa dela i-baahi digaula ga-tale-adu gi goodou. Hudee hiihai gi-nia mee aanei, kilia gi-daha, idimaa nia mee aanei la-gu-haga-halauwa go Dimaadua.

Chapter 8

8:1  “Goodou haga-gila-ina-aga nnaganoho huogodoo ala ne-agoago-adu ko-au gi goodou dangi-nei, gei goodou gaa-mee di-mouli, ga-dogologo ga-hai-mee gi tenua a Dimaadua dela ne-hagababa ang-gi godou damana-mmaadua.

8:2  Goodou gi-langahia di-godou laha-mai haga-mogowaa go Dimaadua di-godou God i-lodo di anggowaa i-lodo nia ngadau e-madahaa. Mee ne-dugu goodou gi-lodo nia haingadaa belee hagamada goodou gi-modongoohia-e-Ia be lodo godou manawa la-gu-modudahi i-di haga-kila-aga ana haganoho be deeai.

8:3  Mee gu-haga-hiigai goodou, gei gu-haangai goodou gi-nia ‘manna’, tagadilinga meegai digi gidee-e-goodou mo godou maadua-mmaadua i-mua. Mee ne-hai di mee deenei bolo gi-modongoohia-e-goodou bolo ma hagalee go nia meegai la-hua ala e-haga-mouli tangada, gei go nia helekai huogodoo ala e-lloomoi i-baahi o Dimaadua.

8:4  I-lodo nia ngadau e-madahaa aanei, gei godou goloo ala nogo gahu-ai goodou la-digi mooho. Gei godou wae digi moholehole.

8:5  Goodou gi-langahia bolo Dimaadua di-godou God le e-haga-donu ge e-hagaduadua goodou, gadoo be tamana dela e-haga-donu ge e-hagaduadua dana dama.

8:6  Malaa, goodou haga-gila-ina-aga nia mee Dimaadua ala ne-haga-modongoohia-adu gi goodou, gei gi-mouli ang-gi ana haganoho mo-di hagalaamua a-Mee.

8:7  Dimaadua di-godou God le e-lahi goodou gi-lodo tenua huwa humalia dela iai ono monowai, gei e-uwa-aga nia wai i-lodo nia gelegele e-hula gi-nia gowaa baba mo i-mehanga nia gonduu,

8:8  gei e-huwa humalia nia ‘wheat’, ‘barley’, ‘grape’, huwa-‘fig’, huwa-‘pomegranate’, huwa-olib mo nia mee maangala.

8:9  Deenei tenua dela ga-maaluu-ai goodou i-nia hagadilinga meegai huogodoo, deai dahi mee e-hagalee ai. Nia baalanga i-lodo nia hadugalaa, gei nia baalanga mmee e-logo e-mee di-geligeli go goodou mai i-lodo nia gonduu.

8:10  Di-godou madagoaa dela ma-ga-miami ga-maaluu, gei gaa-noho manawa lamalia, gei goodou gi-hagaamuina Dimaadua di-godou God i dana dugu-adu gi goodou tenua huwa humalia deenei.

8:11  “Goodou gii-pula i goodou gi-dee de-langahia goodou Dimaadua di-godou God. Hudee hai bolo goodou ga-hagalee daudali dahi haganoho i agu mee ala e-agoago ko-au adu gi goodou dangi-nei.

8:12  I di-godou madagoaa ma-ga-miami-ai goodou, ga-maaluu, gaa-noho manawa lamalia, gei guu-hau godou hale humalia guu-noho-ai goodou,

8:13  gei godou kau mono siibi, godou bahihadu silber mono goolo, mo nia mee huogodoo ala e-hai-mee ginai goodou la-gu-logowaahee,

8:14  gei goodou gii-pula i goodou gi-de-hagamuamua-hua goodou, ga-de-langahia-e-goodou Dimaadua di-godou God dela ne-laha-mai goodou gi-daha mo Egypt, di gowaa dela nogo hai-hege-ai goodou.

8:15  Mee ne-dagi-mai goodou i-lodo di anggowaa looloo, dela iai nia gihaa poisin mono ‘scorpion’. Tenua maangoo deai ono wai ai, gei Mee gu-haga-hali-mai nia wai i-di gili nia hadugalaa adu gi goodou.

8:16  I-lodo di anggowaa, gei Mee gu-gowadu labelaa gi goodou nia ‘manna’ gi-geina, tagadilinga meegai digi geina go godou maadua-mmaadua i-mua. Mee gu-dugu-adu gi goodou nia haingadaa llauehe belee hagamada goodou, bolo i-di hagaodi gi-muli ge-Ia ga-haga-maluagina-laa goodou.

8:17  Malaa, goodou hudee hagamaanadu bolo ma nia mogobuna mono mahi hua ni goodou ala ne-maluagina-ai goodou.

8:18  Goodou gi-langalangahia Dimaadua di-godou God, idimaa, ma go Mee dela ne-dugu-adu gi goodou di mogobuna gi-maluagina-ai goodou. Go di hai deenei dela ne-haga-gila-aga-ai dana hagababa dela ne-hai ang-gi godou damana-mmaadua i-mua.

8:19  Hudee haga-de-langahia-ina Dimaadua di-godou God, be daumaha gi-nia balu-ieidu mo-di ngalua gi digaula. Maa goodou gaa-hai beenei, gei-au e-haga-iloo-adu gi goodou, bolo goodou ga-daaligi gi-daha.

8:20  Maa goodou ga-de-hagalongo gi Dimaadua, goodou ga-hagahuaidu gadoo be nia henua llauehe ala gaa-oho go Mee i godou mua.

Chapter 9

9:1  “Goodou go digau Israel, hagalongo gi-humalia! Dolomeenei gei goodou bolo gaa-hula laa-lodo di Monowai Jordan, gaa-noho i tenua e-dogologowaahee ono daangada, ge koia e-maaloo i goodou, gei nia waahale digaula e-llauehaa, e-duuduu i-nua ono abaaba e-hula e-tugi lala di langi.

9:2  Nia daangada o-di gowaa deelaa le e-lloowehaa ge maaloo, digau llauehe o-di madawaawa Anak. Goodou gu-longono i digaula bolo ma deai tangada e-mee di-hai-baahi ang-gi digaula ai.

9:3  Dolomeenei gei goodou ga-iloo hagahumalia bolo Dimaadua di-godou God dela gaa-hana i godou mua gadoo be-di ulaula o-di ahi. Mee ga-haga-bagege digaula i-di godou lloo-adu, gei goodou ga-waluwalu digaula ga-daaligi digaula hagalimalima, be dana hagababa dela ne-hai.

9:4  “I-muli Dimaadua di-godou God dela ma-ga-hagabagi digaula gi-daha mo godou mua, gei goodou hudee bida hagamamaanadu i-lodo godou manawa boloo, ‘Gidaadou la digau hai-hegau donu, dela gei Dimaadua gaa-dugu-mai gi gidaadou gi-hai-mee gi tenua deenei.’ Deeai, Dimaadua ne-hagabagi digaula gi-daha mo godou mua, idimaa digaula digau huaidu.

9:5  Hagalee bolo idimaa go goodou digau humalia ge e-hai nia mee donu dela ga-ulu-iei goodou gi-lodo tenua digaula, ga-hai-mee ginai. Dimaadua e-hagabagi digaula gi-daha, idimaa digaula digau hai-mee huaidu, ge di-maa hogi belee haga-gila-aga di hagababa dela ne-hagamodu go Mee ang-gi godou damana-mmaadua, go Abraham, Isaac mo Jacob.

9:6  Malaa, goodou gi-iloo ge gi-modongoohia bolo ma hagalee go goodou digau e-hai-hegau donu dela gaa-hidi-ai Dimaadua ga-gowadu gi goodou tenua huwa humalia deenei, gi-hai-mee ginai goodou. Deeai, goodou la digau hua lodo-hamaaloo.

9:7  “Goodou hudee de-langahia di-godou hai dela ne-hai a Dimaadua di-godou God gi-hagawelewele i-lodo di anggowaa. Mai di laangi dela ne-hagatanga goodou mai i Egypt, ga-dau-mai-loo gi-di gowaa deenei, gei goodou nogo hai-baahi gi Mee.

9:8  Goodou guu-hai Dimaadua gi-hagawelewele adu gi goodou i-di Gonduu Sinai, gu-hagawelewele bolo ga-hagahuaidu goodou.

9:9  Au guu-hana gi-tomo di gonduu deelaa belee gaamai agu baahi-hadu e-lua, ala ne-hihi ginai di hagababa Dimaadua dela ne-hai-adu gi goodou. Au nogo noho i-tomo di gonduu deelaa i-nia laangi e-madahaa ge madahaa boo, digi miami be e-inu.

9:10  Dimaadua ga-gaamai gi-di-au nia baahi-hadu e-lua ala guu-lawa di-hihi go Mee gi dono lima nia mee huogodoo ala ne-helekai-iei Mee adu gi goodou mai i-lodo di ahi i-di laangi dela nogo dagabuli-ai goodou i-di gili di gonduu deelaa.

9:11  Di hagaodi gi-muli nia laangi e-mada-haa, gei Dimaadua ga-gaamai gi-di-au nia baahi-hadu e-lua, ala guu-hihi go Mee dana hagababa nonua.

9:12  “Gei Dimaadua ga-helekai-mai, ‘Hana gi-lala hagalimalima! Au daangada ala ne-laha-mai kooe gi-daha mo Egypt la-gu-ihala, guu-huli gi-daha mo-di ala dela ne-haga-modongoohia ko-Au ang-gi digaula. Digaula guu-hai di-nadau ada-balu-ieidu ang-gi ginaadou.’

9:13  “Dimaadua ga-helekai labelaa mai, ‘Au e-iloo-e-Au digau aanei la digau hua hamaaloo nadau lodo!

9:14  Goe hudee dugua Au. Au ga-hagahuaidu digaula gaa-tono gi-daha nia ingoo digaula i-nia madagoaa huogodoo i henuailala. Au gaa-hai goe gii-hai dahi henua e-maaloo gei e-dogologowaahee i digaula.’

9:15  “Malaa, au ne-haneia gi-daha mo hongo di gonduu deelaa, e-gaweia agu baahi-hadu e-lua, gei di gonduu nogo ulaula.

9:16  Au gu-gidee-au bolo goodou gu-de-hagalongo gi-nia haganoho ala ne-gowadu go Dimaadua di-godou God gi goodou, gaa-hai di-godou mee hala, ga-hai-baahi gi Mee i-di godou hai ne-hai di-godou ada kau-daane gi-nia baalanga.

9:17  Au ga-dahi-aga nia baahi-hadu e-lua aalaa, gaa-kili gi-lala i godou mua, gu-mooho.

9:18  Au gaa-moe huli gi-lala i-hongo di gelegele i-mua nnadumada o Dimaadua be agu hai ne-hai i-mua, i-nia laangi e-madahaa ge madahaa boo, gei au digi miami ge digi inu nia wai, idimaa go-di huaidu dela ne-hai go goodou i-mua nnadumada o Dimaadua, dela ne-hai a-Mee gi-hagawelewele.

9:19  Au gu-madagu huoloo i-di hagawelewele damana o Dimaadua, dela bolo ga-daaligi goodou, gei Dimaadua gu-hagalongo-mai gi-di-au i-di madagoaa deelaa.

9:20  Dimaadua gu-hagawelewele labelaa gi Aaron, ga-hagamaanadu bolo e-daaligi a-mee. Gei au ga-dalodalo i mee i-di madagoaa deelaa.

9:21  Au guu-kae di mee huaidu dela ne-hai go goodou, dela go tama kau-daane dela ne-hai go goodou gi-nia baalanga, gaa-hudu gi-lodo di ahi. Au gaa-mmili nia maa gii-hai be nia gohu dogolia, gaa-llingi nia maa gi-lodo nia wai ala e-hali-iha i-tomo di gonduu.

9:22  “Goodou guu-hai a Dimaadua di-godou God gi-hagawelewele i-lodo Taberah, mo Massah, mo lodo labelaa Kibroth=Hattaavah.

9:23  Di madagoaa o Dimaadua ne-hagau goodou i Kadesh=Barnea ga-helekai-adu bolo gii-hula gi-hai-henua gi tenua dela gu-gowadu gi goodou, gei goodou gu-hai-baahi gi Mee. Goodou digi hagadagadagagee gi Mee ge digi hagalongo gi Mee.

9:24  Dogu madagoaa ne-daamada gaa-noho i godou baahi, gei goodou nogo hai-baahi ang-gi Dimaadua.

9:25  “Au ga-dogoduli gi-lala i-hongo di gelegele i-mua nnadumada o Dimaadua, gaa-noho i-di gowaa deelaa i-nia laangi e-mada-haa ge madahaa boo, idimaa, Dimaadua ne-helekai-mai bolo Ia ga-hagahuaidu goodou.

9:26  Au guu-dangi gi Dimaadua ga-helekai, ‘Meenei Tagi go Yihowah, Goe hudee hagahuaidu-ina au daangada, go au daangada ala ne-haga-mehede-mai Kooe i Egypt, ga-laha-mai digaula gi oo mahi mogobuna aamua huoloo.

9:27  Gi-langahia-e-Goe au gau hai-hegau Abraham, Isaac mo Jacob. Goe hudee hei-e-Goe nia lodo hamaaloo mo nia huaidu mo nia hala o digau aanei.

9:28  Gi-dee-hai digau Egypt bolo Goe e-deemee di-lahi au daangada gi tenua dela ne-hagababa Kooe ang-gi digaula. Digaula gaa-hai-hua bolo Goe ne-lahi digaula gi-lodo di anggowaa belee daaligi digaula i do dee-hiihai gi digaula.

9:29  Digaula la nia daangada ni-aau, ne-hilihili belee hai au daangada, ga-laha-mai Kooe i Egypt gi oo mahi mo o mogobuna aamua.

Chapter 10

10:1  “Gei Dimaadua ga-helekai-mai, ‘Haahia au baahi-hadu e-lua be nia mee ala i-mua. Hauhia dau debedebe laagau e-dugu nia maa gi-no-lodo, gei goe hanaga gi-di-Au i-hongo di gonduu.

10:2  Gei Au gaa-hihi gi-hongo nia baahi hadu e-lua aalaa gi nnelekai ala nogo hihi i-hongo nia baahi hadu ala i-mua ala gu-oho kooe, gei goe gaa-dugu nia maa gi-lodo tebedebe deelaa.’

10:3  “Malaa, au gaa-hau dagu debedebe mai i-di laagau-‘acacia’, gaa-hai agu baahi-hadu e-lua be nia mee ala i-mua, gaa-hana gaa-kae nia baahi hadu gi-hongo di gonduu deelaa.

10:4  Gei Dimaadua gaa-hihi gi-hongo nia baahi hadu aalaa go nia helekai la-hua ala ne-hihi gi-hongo nia baahi hadu e-lua ala i-mua, aalaa go di Madangaholu Haganoho ala nogo dau-adu go Mee gi goodou i-hongo di gonduu i-lodo di ulaula, i-di laangi dela nogo dagabuli-ai goodou gi-di gonduu, gei Dimaadua ga-gaamai gi-di-au nia baahi hadu e-lua aalaa.

10:5  Gei au ga-haneia i-di gonduu deelaa, gaa-dugu nia maa gi-lodo dagu debedebe dela ne-hau, gii-hai be nnelekai Dimaadua ala ne-hai-mai gi-di-au. Gei nia maa i-golo-hua gaa-dae-mai-loo gi dolomeenei.”

10:6  (Digau Israel ne-hagatanga-ia i-nia monowai-geli o-di hagadili ni Jaakan, gaa-hula gi Moserah, gaa-dau-adu gi-golo, gei Aaron gaa-made, gaa-danu labelaa i-golo. Eleazar go dana dama-daane gaa-pono di lohongo o-maa gaa-hai nnegau o tangada hai-mee-dabu.

10:7  Digaula ga-hagatanga i-golo ga-lloo-adu gi Gudgodah, ga-hagatanga i-golo ga-lloo-ia gi Jotbathah, go di gowaa dela nia dama monowai e-logo i-golo.

10:8  I-di madagoaa deelaa, gei Dimaadua ga-haga-noho gaa-dugu di madawaawa Levi bolo e-madamada humalia Tebedebe o-di Hagababa, gei e-hai nnegau o tangada hai-mee-dabu, gei e-hai di haga-maluagina mai i-di ingoo o Dimaadua, be-di hai dela nogo hai-mai i-mua gaa-dae-mai-loo gi dangi-nei.

10:9  Deelaa di mee o-di madawaawa Levi digi hai dono duhongo gowaa be nia madawaawa ala i-golo ala guu-hai nadau gowaa. Gei di mee digaula ne-kae la-go di moomee o digau hai-mee-dabu Dimaadua, be nnelekai o Dimaadua di-godou God dela guu-lawa-ai di hagababa.)

10:10  “Au nogo noho i-hongo di gonduu deelaa i-nia laangi e-madahaa ge madahaa boo, be dagu hai dela nogo hai matagidagi. Gei Dimaadua gu-longono-Ia agu dangidangi i-di madagoaa deelaa, gei Mee gu-hila-adu gi goodou gu-hagalee e-daaligi goodou.

10:11  Gei Mee ga-helekai-mai, ‘Hana gi-baahi au daangada, dagia digaula gii-hula gi-hai-henua gi tenua dela guu-lawa-ai di hagababa ko-Au ang-gi nadau damana-mmaadua bolo e-wanga gi digaula.’

10:12  “Deenei-laa, goodou go digau Israel, goodou gi-hagalongo gi-di mee a Dimaadua dela e-hiihai ginai mai i godou baahi: E-hiihai bolo goodou gi-daumaha gi Dimaadua mo di haga-kila-aga ana helekai huogodoo. Aloho i Mee, ge gi-hai-hegau-hua gi Mee mai i-lodo godou manawa hagatau,

10:13  ge hagakila-ina-aga ana haganoho huogodoo ala guu-lawa-ai dagu boloagi-adu gi goodou dangi-nei, gi-mouli goodou manawa lamalia.

10:14  Di langi i-nua mo henuailala mo ono hagahonu huogodoo la nia mee ni Dimaadua di-godou God.

10:15  Gei di aloho o Dimaadua i godou damana-mmaadua ala i-mua le e-damana huoloo, dela gei Mee ga-hilihili goodou gi-daha mo digau ala i-golo. Goodou nia daangada ne-hilihili ga-tugi-mai-loo gi dangi-nei.

10:16  Deenei-laa, tugi dangi-nei gaa-huli gi-muli, gei goodou gi-hagalongo ang-gi Dimaadua, gei gii-lawa gi-daha mo godou manawa hamaaloo dangihi.

10:17  Dimaadua di-godou God la di God koia e-aamua gei e-mogobuna huoloo i-nia god huogodoo ala i-golo. Go Mee dela koia e-aamua gei e-mahi, malaa, nia mee huogodoo gi-hagalongo ang-gi Mee. Mee hagalee hilihili dangada, gei Mee hagalee kae di hui halahalau.

10:18  Mee e-hagamaamaa nia donu o-nia dama ala guu-mmade nadau maadua, mo nia ahina ala guu-mmade nadau lodo, gei e-aloho huoloo i digau tuadimee ala e-noho i tadau baahi, e-haangai digaula gei e-haga-gahu digaula.

10:19  Goodou gi-haga-gila-ina-aga godou aloho ang-gi digau mai i-daha, idimaa, goodou nogo hai digau mai i-daha i-mua i-lodo tenua go Egypt.

10:20  Goodou gi-hagalabagau-ina Dimaadua di-godou God, gei gi-daumaha-hua gi Mee. Goodou gi-manawa-dahi-hua gi Mee mo-di hai hagamodu-hua i dono ingoo.

10:21  Gi-hagaamuina a-Mee, Mee go di-godou God, dela nogo hai-adu gi goodou ana mee haga-goboina ala gu-gidee-goodou, gei guu-mmada ginai godou golomada.

10:22  Di madagoaa o godou maadua-mmaadua ne-hula gi Egypt, digaula digau hua dogo mada-hidu, gei dolomeenei Dimaadua di-godou God guu-hai goodou gi-dogologowaahee guu-hai gadoo be nia heduu o-di langi.

Chapter 11

11:1  “Aloho i Dimaadua di-godou God mo-di daudali ana haganoho huogodoo i-nia madagoaa huogodoo.

11:2  Dangi-nei, goodou gi-langahia godou mee ala ne-kabe i-baahi Dimaadua mai godou gidee ana hegau. Goodou gu-gidee di aamua o Dimaadua, ono mogobuna, ono mahi,

11:3  mo ono mogobuna hagagoboina dangada. Goodou gu-gidee dana hai ne-hai gi-di king o Egypt, mo dono henua hagatau.

11:4  Goodou gu-gidee Dimaadua ne-daaligi gi-daha digau dauwa Egypt hagatau, mo nadau hoodo mo nadau kulumaa, mai i dana haga-abulu digaula i-lodo Tai Mmee, di madagoaa digaula nogo waluwalu mai goodou.

11:5  Goodou e-iloo di-mee Dimaadua ne-hai-adu i-hongo di anggowaa i-mua di-godou dau-mai gi kinei.

11:6  Goodou e-langahia dana hai ne-hai gi Dathan mo Abiram, nia dama daane a Eliab mai di madawaawa Reuben. I-mua nia hadumada o-nia daangada huogodoo, henuailala ne-mahuge gi-nua ga-hagaholi meemaa, mo nau madahaanau, nau hale-laa, nau gau hai-hegau, mo nau manu huogodoo.

11:7  Uaa, ma go goodou go digau ala ne-mmada gi-nia mee hagagoboina huogodoo Dimaadua ala ne-hai.

11:8  “Daudalia agu mee huogodoo ala ne-helekai-adu gi goodou dangi-nei. Gei goodou gaa-mee di-lloo-adu laa-lodo di monowai, gaa-noho i tenua dela bolo ga-ulu ginai goodou.

11:9  Ge goodou gaa-noho waalooloo i tenua tomo ge logo ono meegai, dela ne-hagababa go Dimaadua bolo e-wanga gi godou maadua mmaadua mo nadau hagadili gi-muli.

11:10  Tenua dela bolo ga-noho-ai goodou, la hagalee hai be Egypt, dela nogo noho goodou anadilaangi. Di madagoaa goodou ne-dogi godou golee laagau i-golo, gei goodou e-ngalua kono ginai, e-hai nia wai e-haganannanu nia gowaa dogi-mee.

11:11  Gei tenua dela bolo ga-ulu ginai goodou, la tenua gonduu, ono gowaa baba, tenua e-honu ono wai uwa.

11:12  Dimaadua di-godou God, e-madamada humalia tenua deenei, ge pula-ai di-maa i-lodo di ngadau.

11:13  “Malaa, daudalia nnagababa ala gu-gowadu ko-au dangi-nei, aloho i Dimaadua di-godou God, ge gi-hai-hegau gi Mee mai i godou manawa hagatau.

11:14  Maa goodou gaa-hai nia mee aanei, gei Mee ga-hagau-eia ana uwa gi godou gowaa, i-di madagoaa dela e-humalia ginai nia maa, i-lodo di madagoaa dogi-mee mo-di madagoaa hadi-mee, gi-iai godou huwa laagau ‘wheat’, waini, mono lolo-olib,

11:15  mo nia geinga-tolo ang-gi godou kau. Goodou ga-hai-mee gi-nia meegai huogodoo ala e-hiihai ginai goodou.

11:16  Hudee heia goodou gi-dagia gi-daha mo Dimaadua, bolo e-daumaha ge hai-hegau gi-nia balu-ieidu.

11:17  Maa goodou gaa-hai beelaa, gei Dimaadua ga-hagawelewele adu gi goodou. Mee gaa-dugu nia uwa, gei godou gelegele ga-maangoo di tomo nia meegai. Gei hoohoo-mai-hua, gei goodou gaa-mmade i-golo, ma e-aha maa tenua la tenua humalia dela e-gowadu go Mee gi goodou.

11:18  “Goodou gi-langahia nnagababa aanei, mo-di haga-dahidamee-ina nia maa. Lawalawa-ina gi-hongo godou lima, mo-di ulu i-hongo godou lae, e-haga-langalangahia-adu gi goodou.

11:19  Aago-ina nia maa gi godou dama. Helehelekai i-nia maa i godou hale mo i-nia gowaa ala e-noho-ai goodou, mo godou madagoaa e-hagamolooloo-ai, mo godou madagoaa e-ngalua.

11:20  Hihia nia maa i-hongo nia duludulu nia bontai godou hale, mo i-hongo nia bontai godou abaaba.

11:21  Gei goodou mo godou dama ga-mouli waalooloo i tenua Dimaadua di-godou God, ne-hagababa bolo e-wanga gi godou damana-mmaadua. Goodou gaa-noho waalooloo be di waalooloo o-di langi dela i baahi-i-nua henuailala hua igolo.

11:22  “Daudalia hagahumalia nnaganoho huogodoo ala ne-helekai ko-au adu gi goodou. Aloho i Dimaadua di-godou God, heia ana mee huogodoo ala ne-helekai bolo gi-heia, ge gi-manawa-dahi gi Mee.

11:23  Gei Mee ga-hagabagi nia henua huogodoo i-mua di-godou lloo-adu, gei goodou gaa-noho i nnenua digau ala e-aamua ge maaloo i goodou.

11:24  Nia gowaa huogodoo ala e-taele-ai goodou nonua, gaa-hai nia gowaa ni goodou. Di-godou henua la-ga-duudagi mai di gowaa baba dela i-bahi-i-ngaaga gaa-hana gi-nia Gonduu Lebanon i bahi-i-ngeia, mo mai di Monowai Euphrates i-bahi-i-dua gaa-hana gi Tai Mediterranean i-bahi-i-dai.

11:25  Dimaadua di-godou God gaa-hai nia daangada gi-mmaadagu i goodou i tei gowaa hua dela e-hula ginai goodou i-lodo tenua deelaa, be dana hagababa dela ne-hai, malaa, deai tangada e-mee di-dugu goodou ai.

11:26  “Dangi-nei gei au e-gowadu gi goodou di hilihili mehanga di hagahumalia mo-di haga-huaidu:

11:27  Goodou gaa-kae di hagahumalia, maa goodou ga-daudali nia hagababa Dimaadua di-godou God, ala e-gowadu ko-au gi goodou dangi-nei,

11:28  gei goodou gaa-kae di hagahuaidu, maa goodou ga-hagalee daudali nia hagababa aanei, gaa-huli gi-daha ga-daumaha gi-nia balu-ieidu ala digi daumaha ginai goodou anadilaangi.

11:29  Di madagoaa Dimaadua ma-ga-laha-mai goodou gi-lodo tenua dela belee hai-henua ginai goodou, goodou belee haga-iloo di hagahumalia mai tomo di Gonduu Gerizim, ge gi-haga-iloo di hagahuaidu mai tomo di Gonduu Ebal.

11:30  (Nia gonduu e-lua aanei la i-bahi-i-dai di Monowai Jordan, i-lodo tenua digau Canaan ala e-noho i-hongo di gowaa mehanga gonduu o Jordan. Nia gonduu aanei la adu gi-bahi-i-dai, hagalee mogowaa i-nia laagau hagamadagu o Moreh, hoohoo gi-di waahale o Gilgal.)

11:31  Goodou ala ga-tuu-adu laa-lodo di Monowai Jordan, gaa-noho i tenua Dimaadua di-godou God e-gowadu gi goodou. Di madagoaa goodou gaa-kae di-maa gaa-noho i-golo,

11:32  gei goodou heia gi-daudali nnaganoho huogodoo ala e-gowadu ko-au gi goodou dangi-nei.

Chapter 12

12:1  “Aanei nia haganoho e-hai gi-daudali go goodou i-di waalooloo o godou noho i-lodo tenua a Dimaadua, go-di God o godou maadua-mmaadua e-gowadu gi goodou. Hagalongo gi-nia maa!

12:2  I-lodo tenua dela ga-hai-henua ginai goodou, goodou gi-ohaa gi-daha nia gowaa huogodoo ala e-daumaha-ai nia daangada gi nadau god i-hongo nia gonduu nnoonua, i-hongo nia gonduu lligi, mo i-lala nia laagau ala e-tomo.

12:3  Ohaa gi-daha nadau gowaa dudu tigidaumaha, ohaa gi-daha nadau duludulu hadu haga-madagu gi-mooho haga-ligiligi. Duungia gi-daha nadau ada o-di god-ahina go Asherah, hele-ina gi-lala nadau ada-god gi-deemee digaula di-daumaha labelaa i-golo.

12:4  “Hudee daumaha gi Dimaadua di-godou God be di-nadau hai dela e-daumaha-ai ginaadou gi nadau god.

12:5  Dimaadua ga-hilihili dana gowaa e-dahi mai i-lodo nnenua o godou madawaawa huogodoo, deelaa di gowaa belee lloomoi ginai nia daangada gi ono mua, e-hagalaamua di ingoo o-Maa.

12:6  Deelaa di gowaa e-hai godou tigidaumaha ala e-dudu, mo godou tigidaumaha ala i-golo, godou tigidaumaha-ina dahi baahi e-madangaholu o godou maluagina, mo godou kisakis, aalaa go nia kisakis ala guu-lawa di hagababa go goodou gi Dimaadua, mo nia kisakis aga i-lodo goodou manawa donu, mo-di kisakis o-di ulumadua o godou kau mo goodou siibi.

12:7  Dimaadua di-godou God dela ne-hagahumalia goodou, ga-madalia goodou i-di gowaa deelaa, malaa, goodou mo godou madahaanau ma-ga-miami ga-tenetene gi godou mee humalia ala ne-ngalua ginai.

12:8  “I-di madagoaa deelaa ma-gaa-dae-mai, goodou hudee heia di hai dela nogo haihai go goodou. Gaa-dae-mai gi dolomeenei, goodou huogodoo nogo daumaha-hua gi-di-godou hiihai,

12:9  idimaa, goodou digi dau gi-lodo tenua Dimaadua di-godou God dela e-gowadu gi goodou, deelaa di gowaa ga-noho-iei goodou i-di aumaalia.

12:10  Di-godou madagoaa ma-gaa-lloo-adu laa-lodo di Monowai Jordan, Dimaadua di-godou God ga-gowadu tenua deelaa e-hai-henua ginai goodou. Dimaadua ga-duuli goodou gi-daha mo godou hagadaumee, gei goodou gaa-noho i-lodo di aumaalia.

12:11  Dimaadua ga-hilihili dana gowaa dela belee hagalaamua-ai goodou di ingoo o-Maa. Deelaa di gowaa belee wanga gi Mee nia mee huogodoo ala ne-hagi-adu ko-au gi goodou: godou tigidaumaha dudu, mo godou tigidaumaha ala i-golo, dahi baahi e-madangaholu o di-godou maluagina, mo godou kisakis, mo godou kisakis hagalabagau ala gu-hagababa go goodou gi Dimaadua.

12:12  Goodou gi-madalia a-Mee mo-di tenetene i-lodo di gowaa deelaa, ngaadahi mo godou dama-daane mo godou dama-ahina, godou hege, mo digau Levi ala e-noho i-lodo godou waahale. Goodou gi-langahia bolo digau Levi la-hagalee hai-mee gi-nia gowaa e-hai nadau mee donu.

12:13  Goodou hudee hai tigidaumaha i di-ingoo-hua di gowaa dela e-hiihai ginai goodou.

12:14  Godou tigidaumaha le e-hai-hua i-di gowaa e-dahi dela ga-hilihili-aga go Dimaadua mai i-lodo nnenua o godou madawaawa. Deelaa-hua di gowaa belee hai godou tigidaumaha e-dudu, mo nia mee huogodoo ala i-golo ala guu-lawa dagu hagi-adu gi goodou.

12:15  “Goodou e-mee-hua di-daaligi godou manu mo-di gai nia maa i di-ingoo-hua di gowaa dela e-noho-ai goodou. Goodou e-mee di-gai gi-logowaahee nia mee a Dimaadua di-godou God ala ma-ga-gowadu gi goodou. Ma e-aha maa goodou e-madammaa be hagalee madammaa godou lodo, goodou huogodoo e-mee-hua di-gai nia maa, gadoo be goodou ala e-mee di-gai nia goneiga o-di ee be go-di manu ‘antelope’.

12:16  Malaa, goodou hudee geina-loo nia dodo o-nia maa, goodou duia gi-daha nia dodo gi-lodo nia gelegele be nia wai.

12:17  Nia mee ala e-tigidaumaha gi Dimaadua la-hagalee gai i-nia gowaa ala e-noho-ai goodou. Hagalee gai dahi baahi e-madangaholu o godou meegai, mo godou waini, mo godou lolo-olib, be nia ulumaadua o godou kau mo godou siibi, be nia tigidaumaha ala gu-hagababa go goodou gi Dimaadua, be go godou tigidaumaha o godou manawa, be go nia tigidaumaha ala i-golo.

12:18  Goodou mo godou dama-daane, dama-ahina, godou hege, mo digau Levi ala e-noho i-lodo godou waahale, goodou gi-geina-hua nia tigidaumaha aanei i-mua o Dimaadua di-godou God, i-di gowaa dela e-hilihili go Dimaadua di-godou God. Goodou gi-tenetene i-di gowaa deelaa gi godou mee huogodoo ala ne-hai.

12:19  Di waalooloo o di-godou noho i-lodo di-godou henua, goodou gi-hudee de-langahia di-godou hagamaamaa digau Levi.

12:20  “Di madagoaa Dimaadua di-godou God ma-ga-haga-logo godou henua, gii-hai be dana hagababa dela ne-hai, goodou e-mee-hua di-gai nia goneiga i di-ingoo-hua di gowaa dela e-hiihai ginai goodou.

12:21  Maa di gowaa dela belee hagalaamua-ai goodou di ingoo o Dimaadua le e-mogowaa-loo, gei goodou e-mee-hua di-daaligi tei kau be tei siibi dela ne-gowadu go Dimaadua gi goodou. Gei goodou e-mee-hua di-gai nia goneiga o-nia maa i godou hale, be dagu hai dela ne-hagi-adu gi goodou.

12:22  Tangada dela e-madammaa ono lodo be hagalee madammaa ono lodo, ia e-mee-hua di-gai nia goneiga aalaa, be dana hai dela e-gai nia goneiga o-di ee be go-di manu ‘antelope’.

12:23  Malaa, goodou hudee geina nia goneiga ala ono dodo i ono lodo, idimaa, di mouli la i-lodo nia dodo, gei goodou hudee geina di mouli dalia nia goneiga.

12:24  Hudee hai-hegau gi-nia dodo i-nia meegai, duia-hua gi-daha be goodou ma-gaa-dui nia wai gi-lodo nia gelegele.

12:25  Maa goodou ga-daudali taganoho deenei, Dimaadua ga-manawa-tenetene adu gi goodou, gei nia mee huogodoo gaa-kila humalia adu gi goodou mo godou hagadili gi-muli.

12:26  Godou tigidaumaha mo godou kisakis ala gu-hagababa ang-gi Dimaadua, la-gi-kae-ina gi-di gowaa e-dahi dela e-daumaha-ai goodou.

12:27  Tigidaumaha-ina godou tigidaumaha ala belee dudu hagatau i-hongo di gowaa dudu-tigidaumaha a Dimaadua. Tigidaumaha-ina labelaa nia tigidaumaha ala e-gai ono goneiga go goodou, gei nia dodo o-nia maa la-gi-duia gi-hongo di gowaa dudu tigidaumaha.

12:28  Daudalia nia mee huogodoo ala ne-hagi-adu ko-au gi goodou, gei nia mee huogodoo gaa-kila humalia adu gi goodou mo godou hagadili gi-muli, gaa-hana-hua beelaa, idimaa, goodou e-hai nia mee ala e-donu mo nia mee ala e-haga-tenetene Dimaadua di-godou God.

12:29  “Dimaadua di-godou God ga-hunahuna nia henua aalaa, i di-godou madagoaa ma-ga-heebagi gi digaula, gei goodou ga-hai-mee gi tenua deelaa gaa-noho i-golo.

12:30  I-muli Dimaadua ga-hunahuna gi-daha nia henua aalaa, goodou gi-madamada humalia i goodou, hudee daudalia nadau hai-daumaha, idimaa, deelaa di mee e-huaidu huoloo. Goodou hudee halahala-ina di-nadau hai dela e-daumaha-ai gi nadau balu-god belee kabe go goodou.

12:31  Goodou hudee daumaha gi Dimaadua di-godou God be di-nadau hai e-daumaha-ai gi nadau balu-god, idimaa, nadau hai e-daumaha-ai, digaula e-hai nia mee hagaginagina-dangada huogodoo ala e-de-hiihai ginai Dimaadua. Digaula e-tigidaumaha hogi nadau dama i-lodo di ahi, i-hongo nadau gowaa dudu tigidaumaha.

12:32  “Heia nia mee huogodoo ala ne-hagi-adu ko-au bolo goodou gi-heia. Goodou hudee wanga dahi mee be e-daa dahi mee i-nia maa gi-daha.

Chapter 13

13:1  “Dolomaa dahi soukohp be tangada haga-donu midi e-hagababa-adu gi goodou dana mogobuna, be go dana mee haga-goboina,

13:2  bolo gii-dagi goodou gi-daumaha gi-nia god ala digi daumaha ginai goodou i-mua. Ma e-aha maa ana mee ala gu-hagababa le e-kila-aga,

13:3  goodou hudee hagalongo gi mee. Dimaadua di-godou God e-hai a-mee belee hagamada goodou, gi-iloo-Ia be goodou e-aloho i Dimaadua mai i-lodo godou manawa hagatau.

13:4  Daudalia-hua Dimaadua, hagalaamua-ina a-Mee. Hagalongo gi Mee, ge gi-daudalia ana helekai. Gi-daumaha gi Mee, ge heia goodou gi-manawa-dahi ang-gi Mee.

13:5  Gei goodou gi-daaligidia gii-mmade nia daangada haga-donu midi, be go nia soukohp ala e-dagi goodou gi hai-baahi gi Dimaadua, dela ne-daa goodou gi-daha mo Egypt, di gowaa nogo hagaduadua-ai goodou. Nia daangada ala e-hai beelaa, le e-hai di huaidu, e-hiihai e-dagi goodou gi-daha mo-di mouli o Dimaadua dela ne-hagi-adu gi goodou bolo gi mouli-ai. Digaula le e-hai-loo gi-daaligi gii-mmade, gii-mmaa nia huaidu gi-daha mo goodou.

13:6  “Dolomaa do duaahina daane, be go dau dama-daane, be go dau dama-ahina, be go doo lodo dela e-aloho-iei goe, be go do ehoo hagaaloho haga-tenetene e-hagamada e-dagi goe hagammuni gi-daumaha gi-nia balu-ieidu, nia god ala digi daumaha ginai goe mo o maadua-mmaadua mai i-mua.

13:7  Dolomaa hunu ginaadou e-hagamada e-dagi goe gi-daumaha gi-nia god o-nia daangada ala e-noho i do baahi, be go nia god o-nia daangada ala e-noho mogowaa i-di-goe.

13:8  Goe hudee heia dahi dangada i digaula gi-halahalau-ina goe. Goe hudee hagalongo gi mee. Goe hudee dumaalia gi mee, gei goe hudee benabena-ina a-mee.

13:9  Daaligidia a-mee gii-made! Goe gi-adamua di dilidili a-mee, ga-nomuli dugua ang-gi digau huogodoo ala i-golo gi-dilidilia a-mee labelaa.

13:10  Dilidilia a-mee gii-made, idimaa, mee gu-hagamada guu-dagi goe gi-daha mo Dimaadua go doo God, dela ne-daa goe gi-daha mo do hagaduadua i Egypt.

13:11  Gei nia daangada huogodoo o Israel ga-longono-ginaadou di mee dela ne-hai, gei digaula ga-mmaadagu, ga-deai tangada e-hai nia mee huaidu beenei ai.

13:12  “Goodou ma-gaa-noho i-lodo nia waahale ala e-gowadu go Dimaadua di-godou God, dolomaa goodou ga-longono

13:13  bolo hunu balu daangada mai godou henua gu-dagi-gee nia daangada o nadau waahale gi-daumaha gi-nia god ala digi daumaha ginai ginaadou i-mua.

13:14  Maa goodou ga-hagalongo gi-di longo hagaboo beelaa, halahalaina gii-donu humalia. Ma-gaa-donu bolo di hai huaidu deenei la-guu-hai,

13:15  daaligidia nia daangada huogodoo ala i-lodo di waahale deelaa, mo nadau manu labelaa. Ohaa-ina di waahale deelaa gi-mooho hagatau.

13:16  Hagabudu-ina mai nia goloo huogodoo o-nia daangada ala nogo noho i-golo, hagabae-ina gi-nua i-di gowaa maalama o-di waahale deelaa, gaa-dudu di waahale deelaa mono mee huogodoo i ono lodo, e-hai-ai tigidaumaha gi Dimaadua di-godou God. Di waahale deelaa belee hai-loo gii-dugu mooho-hua beelaa, hagalee hau labelaa.

13:17  Hudee hai-mee gi-di ingoo-hua di-mee dela gu-hagahuaidu bolo e-hunahuna gi-daha, gei Dimaadua gaa-huli gi-daha mo dono hagawelewele damanaiee, ga-dumaalia-adu gi goodou. Mee ga-dumaalia-adu gi goodou ga-hagadogologo goodou, be dana hagababa ne-hai gi godou maadua-mmaadua,

13:18  maa goodou ga-daudali ana hagababa hagatau ala ne-gowadu ko-au gi goodou dangi-nei, mo-di hai ana mee ala bolo gi-heia.

Chapter 14

14:1  “Goodou nia daangada ni Dimaadua di-godou God. Goodou ma-gaa-lodo huaidu gi tangada made, goodou hudee duuduu-ina godou gili be e-dahi gi-daha nia ngaahulu ala i-hongo godou lae, be di hai digau ala i-golo.

14:2  Goodou nia daangada ni Dimaadua di-godou God. Mee ne-hilihili goodou belee hai ana daangada mai i-lodo nia daangada huogodoo ala e-noho i-hongo henuailala.

14:3  “Hudee geina di-ingoo-hua di-mee dela gu-helekai-ai Dimaadua bolo hagalee mada-mmaa.

14:4  Aanei nia manu e-gai go goodou: nia kau, siibi, nia kuudi,

14:5  nia ee, nia siibi lodo-geinga, kuudi lodo-geinga, be nia ‘antelope’,

14:6  di-ingoo-hua nia manu ala nadau babaawae e-manga-lua gei e-gowaga nadau meegai i-lodo nadau dinae gaa-mama labelaa.

14:7  Malaa, deai nia manu e-gai ai, go nia manu hua ala nadau babaawae e-manga-lua, ge e-mama nadau meegai. Goodou hagalee gai nia ‘camel’, ‘rabbit’ be nia ‘badger’. Nia manu aanei la-hagalee madammaa, digaula e-mama nadau meegai, gei nadau babaawae hagalee manga-lua.

14:8  Hudee geina nia biigi. Dugua nia biigi bolo hagalee madammaa, nia wae digaula e-manga-lua, gei e-hagalee mama nadau meegai. Hudee geina nia manu aanei, ge hudee bili hogi gi nadau huaidina mmade.

14:9  “Goodou e-mee di-gai di-ingoo-hua di-iga dela ono hiwahiwa be ono una i-golo,

14:10  gei di-ingoo-hua di-mee dela e-mouli i-lodo nia wai, dela ono hiwahiwa be ono una ai, la-hagalee gai, dugu-ina bolo ma hagalee madammaa.

14:11  “Goodou e-mee di-gai di-ingoo-hua di-manu dela e-madammaa.

14:12  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:13  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:14  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:15  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:16  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:17  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:18  Gei aanei nnagadilinga manu ala hagalee gai: nia ‘eagle’, ‘owl’, ‘hawk’, ‘falcon’, ‘buzzard’, ‘vulture’, ‘crow’, ‘ostrich’, ‘seagull’, ‘stork’, ‘heron’, ‘pelican’, ‘gormorant’, ‘hoopoe’, mo nia koomoli.

14:19  “Nia lamu huogodoo ala nadau bakau i-golo, la hagalee madammaa, hudee geina nia maa.

14:20  Goodou e-mee di-gai nia lamu ala e-madammaa.

14:21  “Hudee geina di manu dela ne-made. Goodou e-mee di hai digau henua-gee ala e-noho i godou mehanga gi gai di-maa, be goodou e-mee di-hui di-maa gi digau henua-gee ala i-golo. Gei goodou digau ni Dimaadua di-godou God, goodou nia daangada ni Mee. “Hudee dunu-ina tama-siibi be tamaa-kuudi i-lodo nia milugu dono dinana.

14:22  “Dugua gi-daha dahi baahi madangaholu o-nia mee huogodoo ala gaa-hai go goodou mai i godou hadagee i-lodo di ngadau e-dahi.

14:23  Gei goodou hula gi-di gowaa Dimaadua di-godou God ga-hilihili belee hagalaamua-ai di ingoo o-Maa, gaa-gai i ono mua godou taiaga dahi baahi madangaholu o godou huwa-laagau, waini mo nia lolo-olib, mo nia ulu-mmaadua o godou kau mo godou siibi. Heia di hai deenei, gei goodou gaa-kabe di hagalaamua Dimaadua di-godou God, i-nia madagoaa huogodoo.

14:24  Maa di gowaa belee hagalaamua-ai goodou di ingoo Dimaadua le e-mogowaa balua di-kae godou dahi baahi madangaholu o godou huwa-laagau ala ne-hagahumalia goodou go Dimaadua, gei goodou gaa-hai beenei:

14:25  Huia gi-daha godou huwa-laagau, gaa-kae nia bahi-hadu dalia goodou gi-di gowaa hai-daumaha dela ga-hilihili go Dimaadua.

14:26  Huihuia godou mee ala e-hiihai ginai, nia goneiga kau, dama-siibi, waini, mono dagaao, ge goodou mo godou madahaanau ga-miami ge tenetene i-mua o Dimaadua di-godou God, i-di gowaa deelaa.

14:27  “Goodou hudee de-langahia di-godou hagamaamaa digau Levi ala e-noho i-lodo godou waahale. Digaula nadau henua donu ai.

14:28  Di hagaodi nia ngadau dagi-dolu huogodoo, goodou gi-gaamai dahi baahi madangaholu o godou meegai hadagee, ga-benebene i-lodo godou waahale.

14:29  Nia meegai aanei la-anga gi digau Levi, idimaa digaula nadau henua donu ai, ge anga labelaa gi digau henua-gee, digau guu-mmade nadau maadua, mo nia ahina guu-mmade nadau lodo ala e-noho i-lodo godou waahale. Digaula belee lloomoi e-kae nadau mee huogodoo ala e-dee-dohu i nadau baahi. Heia di hai deenei, gei Dimaadua di-godou God, ga-hagahumalia goodou i godou mee huogodoo ala ma-gaa-hai.

Chapter 15

15:1  “Di hagaodi nia ngadau dagi-hidu huogodoo, gei goodou gaa-kili gi-daha nia boibana bahi-hadu o-nia daangada adu gi goodou.

15:2  Deenei di-godou hai di-mee deenei: Digau huogodoo ala ne-dumaalia gi tei dangada Israel gi-boibana ana bahi-hadu, la-gi-hagalawa-ina di boibana deelaa, ge gi-hudee hai-loo bolo goodou e-hagabudu-mai nia boibana aalaa. Go Dimaadua la hua ne-helekai bolo di boibana deenei la-gi-hunahuna gi-daha.

15:3  Goodou e-mee di-hagabudu-mai di boibana o tangada henua-gee dela e-boibana-adu gi goodou, gei goodou hagalee hagabudu-mai di boibana o tei goodou ne-boibana-adu.

15:4  “Dimaadua di-godou God, ga-hagahumalia-laa goodou i tenua dela e-gowadu go Mee gi goodou. Deai tangada i goodou bolo ga-hagaloale ai,

15:5  maa goodou ga-hagalongo gi Mee, gaa-pula i-di-godou daudali ana haganoho huogodoo ala e-hai ko-au adu gi goodou dangi-nei.

15:6  Dimaadua la-ga-hagahumalia goodou be dana helekai dela ne-hai. Goodou gaa-wanga godou bahi-hadu e-boibana go nnenua e-logo, gei goodou hagalee hai gi-boibana bahi-hadu mai tei henua. Goodou gaa-mee di-dagi nia henua e-logo, gei tenua e-mee di-dagi goodou ai.

15:7  “Maa iai tangada Israel i-lodo di gowaa dela e-gowadu go Dimaadua di-godou God e-dee-dohu ana mee, hudee dumaanga, ge hudee buhi di hagamaamaa a-mee.

15:8  Di-godou mee belee hai, la-gi-dumaalia wanga-ina gi mee ana mee ala e-dee-dohu-ai.

15:9  Hudee de-hiihai di-wanga nia mee gi mee, idimaa di ngadau dela e-hagalawa gi-daha nia boibana la dela gu-hoohoo-mai. Hudee heia nia maanadu huaidu beelaa gi-ulu gi-lodo godou libogo. Maa goodou ga-de-hiihai gi mee e-boibana, gei mee gaa-dangi gi Dimaadua e-hai-baahi adu gi goodou, gei goodou gaa-too gi-di hala.

15:10  Wanga-ina gi mee dehuia mai i-lodo di manawa dumaalia, gei Dimaadua ga-hagahumalia goodou i godou mee huogodoo ala e-hai.

15:11  Nia madagoaa huogodoo, hunu gau Israel i-golo e-hagaloale, e-dee-dohu nadau mee, gei au e-hagababa-adu gi goodou bolo goodou gi-dumaalia gi digaula.

15:12  “Ma tei digau Israel, taane be-di ahina, ma-gaa-hui eia adu be-di hege, gei goodou hagau-ina a-mee gii-hana i-muli dono ngalua adu gi goodou i-nia ngadau e-ono. Di hidu ngadau ma-ga-dau-mai, gei goodou heia a-mee loo gi-mehede ang-gi deia.

15:13  Goodou ma-ga-hagamehede a-mee, hudee hagau-ina a-mee beelaa ana mee ai,

15:14  wanga-ina gi mee hunu mee i-nia mee a Dimaadua ne-hagahumalia goodou, nia mee be nia siibi, golee laagau, mono waini.

15:15  Hagamaanadu-ina bolo goodou nogo hai nia hege i Egypt, ge Dimaadua di-godou God ne-hagamehede goodou, ga-hidi-mai-ai-iei au ga-gowadu taganoho deenei gi-daudalia go goodou.

15:16  “Holongo di hege ga-hagalee hiihai e-hana gi-daha mo goe, mee e-aloho i di-goe mo digau doo hale, ga-hiihai-hua bolo e-noho i godou baahi.

15:17  Gei goe gaa-lahi a-mee gi-di bontai doo hale, ga-haga-bongoo dono dalinga i-golo, gei mee gaa-hai dau hege di waalooloo o dono mouli. Heia au hege-ahina beelaa.

15:18  Hudee lodo hagawelewele maa goe ga-hagamehede dau hege, mee ne-ngalua-adu gi-di-goe i-nia ngadau e-ono, e-hui kooe gi-di baahi di hui o oo gau ngalua. Heia beenei, gei Dimaadua go doo God, ga-hagahumalia goe i au mee huogodoo ala e-hai.

15:19  “Dugu-ina-gee godou ulu-mmaadua kau-daane mono siibi huogodoo ang-gi Dimaadua di-godou God. Hudee haga-hai-hegau-ina nia kau aanei, hudee dahia nia gili o-nia siibi aanei.

15:20  I-lodo di ngadau e-dahi, goodou mo digau godou hale, gi-geina nia manu aanei i-mua Dimaadua, i-di gowaa hai-daumaha dela ga-hilihili go Dimaadua.

15:21  Maa ga-iai nia mee hala i-di gili nia manu aalaa, be nia maa e-habehabe, be deegida, be dee-dohu nadau gowaa i-golo, la-hudee tigidaumaha-ina gi Dimaadua di-godou God.

15:22  Goodou e-mee di-gai nia manu beenei i godou hale. Goodou huogodoo, be goodou e-madammaa be hagalee madammaa, e-mee di gai nia maa, be di-godou gai nia ee mo nia ‘antelope’.

15:23  Gei hudee hai-hegau gi-nia dodo nia maa e-hai nia meegai, goodou gi-duia nia maa gi-hongo nia gelegele be nia wai.

Chapter 16

16:1  “Hagalaamua-ina Dimaadua di-godou God i-di godou budu di Pasoobaa i-lodo di malama go Abib. Go-di malama deelaa, i-di boo, dela ne-laha-mai goodou go Mee gi-daha mo-di haingadaa o Egypt.

16:2  Hula gi-di gowaa a Dimaadua dela ga-hilihili belee hai di gowaa e-hagalaamua-ai dono ingoo, daaligidia dahi siibi be dahi kau ang-gi tagamiami Pasoobaa, e-hagalaamua Dimaadua, go di-godou God.

16:3  Goodou ma-ga-miami tagamiami deenei, hudee geina nia palaawaa ne-hai gi-nia ‘yeast’. Nia laangi e-hidu, gei goodou e-gai godou palaawaa ono ‘yeast’ ai, gadoo be di-godou hagatanga i Egypt hagallebullebu. Di palaawaa deenei ga-hagaingoo bolo di palaawaa o-di hagaduadua. Geina di palaawaa deenei gi-langahia-goodou i-di waalooloo godou mouli di-godou lloomoi i Egypt, dela go di gowaa hagaduadua.

16:4  I-lodo nia laangi e-hidu, deai tangada i-hongo di-godou henua e-hai mee gi-di ‘yeast’ i-lodo dono hale ai, gei nia goneiga di manu dela ne-daaligi hiahi di laangi matagidagi, le e-gai-hua i-di boo deelaa.

16:5  Daaligidia nia manu o-di Pasoobaa i-di gowaa a Dimaadua dela ga-hilihili belee hai di gowaa e-hagalaamua-ai dono ingoo, ge deai di gowaa i-golo i-hongo tenua e-gowadu go Dimaadua di-godou God gi goodou ai. Heia di-mee deenei i-di ulu di laa, di madagoaa o-di laangi ne-hagatanga-ai goodou i Egypt.

16:6  Daaligidia nia manu o-di Pasoobaa i-di gowaa a Dimaadua dela ga-hilihili belee hai di gowaa e-hagalaamua-ai dono ingoo, ge deai di gowaa i-golo i-hongo tenua e-gowadu go Dimaadua di-godou God gi goodou ai. Heia di-mee deenei i-di ulu di laa, di madagoaa o-di laangi ne-hagatanga-ai goodou i Egypt.

16:7  Dunu-ina nia goneiga, geina i-di gowaa daumaha dela ga-hilihili go Dimaadua, gei di luada dono daiaa gaa-hula gi-muli gi godou guongo.

16:8  Nia laangi e-ono ala nomuli, gei goodou e-gai nia palaawaa ala hagalee ne-hai gi-nia ‘yeast’, ge di hidu laangi, dagabuli e-daumaha gi Dimaadua di-godou God, ge hudee hai moomee i-di laangi deelaa.

16:9  “Daulia nia dabu e-hidu, mai di-godou madagoaa ne-daamada ne-hadi nia huwa-laagau-‘wheat’,

16:10  gaa-budu Taumaha o-di Hagadogodo o-nia Huwa-laagau, e-hagalaamua Dimaadua di-godou God, e-wanga dehuia gi Mee tigidaumaha dela e-hagatau gii-hai be-di hagahumalia a-Mee ne-hai-adu gi goodou.

16:11  Gi-tenetene i-mua Dimaadua, ngaadahi mo godou dama, godou gau hai-hegau, digau Levi, digau henua-gee, nia dama guu-mmade nadau maadua, mo nia ahina guu-mmade nadau lodo ala e-noho i godou waahale. Deenei di-godou hai e-hai i-di gowaa a Dimaadua dela ga-hilihili belee hai di gowaa e-hagalaamua-ai dono ingoo.

16:12  Goodou e-hai gi-daudali nnaganoho aanei, hudee de-langahia bolo goodou nogo hai nia hege i Egypt.

16:13  “I-muli godou hagamadammaa godou huwa-laagau, mo-di tau godou waini huogodoo, goodou gaa-budu Tagamiami o-nia Damaa-hale Hagaabili i-lodo nia laangi e-hidu.

16:14  Tenetene gi-di maa, mo godou dama, godou gau hai-hegau, digau Levi, digau henua-gee, nia dama guu-mmade nadau maadua, mo nia ahina guu-mmade nadau lodo ala e-noho i godou guongo.

16:15  Hagalaamua-ina Dimaadua di-godou God gi-di godou budu di laangi deenei i-nia laangi e-hidu i-di gowaa hai-daumaha dela ga-hilihili go Dimaadua. Gi-tenetene, i Dimaadua gu-hagahumalia di hadi godou huwa-laagau mo godou moomee.

16:16  “Nia daane huogodoo o godou henua, gi-lloomoi e-daumaha gi Dimaadua hagadolu i-di ngadau e-dahi, i-di gowaa hai-daumaha dela ga-hilihili go Dimaadua: i-di Laangi Pasoobaa, i Taumaha o-di Hagadogodo o-nia Huwa-laagau, mo Tagamiami o-nia Damaa-hale Hagaabili. Taane e-dahi e-gaamai dana wanga-dehuia

16:17  dela e-mee dana hai, e-hagatau gi-nia hagahumalia Dimaadua di-godou God, ne-wanga gi deia.

16:18  “Dongo-ina nia gau hai-gabunga, mono dagi ala i-golo, i-lodo nia waahale huogodoo ala e-gowadu go Dimaadua di-godou God. Nia daane aanei le e-hai nia daangada hagahumalia be di-mee e-dahi.

16:19  Digaula hagalee e-hai nia daangada geegee, be e-hagamodongoohia di-nadau hai dangada i nadau hagadonu mehanga dangada. Digaula hagalee e-kae nia hui halahalau, idimaa nia wanga-dehuia le e-haga-de-gidee nia golomada digau kabemee, mo digau hai-mee donu, gaa-hai digaula gii-hai nadau hagamodu hai-gee.

16:20  Nia madagoaa huogodoo, goodou gi-heia nia daangada be di-mee e-dahi, i godou mee ala e-hai, gei goodou gaa-noho beelaa gi-muli, i-hongo tenua Dimaadua di-godou God, dela e-gowadu gi goodou.

16:21  “Goodou ma-gaa-hai di-godou gowaa hai tigidaumaha ang-gi Dimaadua di-godou God, hudee dugu-ina di ada-laagau o-di god-ahina, dela go Asherah, i dono baahi.

16:22  Ge hudee hagaduu-aga dahi waduu hadu, ang-gi di hai daumaha gi-nia ada-mee. Dimaadua e-ginagina nia maa.

Chapter 17

17:1  “Hudee tigidaumaha-ina gi Dimaadua di-godou God, dahi kau be siibi dela e-dee-dohu di-mee i dono gili. Dimaadua e-ginagina-ai.

17:2  “Dolomaa goodou guu-longo bolo i-lodo di waahale e-dahi o godou waahale, dahi daane be dahi ahina gu-hai-hala ang-gi Dimaadua, gu-oho dana hagababa

17:3  i-dana daumaha mo-di hai-hegau gi-nia balu-ieidu, be di laa, be di malama, be nia heduu, e-hai baahi gi-taganoho Dimaadua.

17:4  Maa goodou ga-longono di longo beelaa, hagadina-ina di-maa hagatau. Ma-gaa-donu bolo di-mee huaidu deenei la-guu-gila i Israel,

17:5  lahia tangada deelaa gi-daha mo-di waahale, ga-dilidili gii-made.

17:6  Malaa, mee belee hai-hua gii-made, be di-maa nia daangada hagadootonu e-lua be nonua ne-hagamodongoohia-aga a-mee. Deai tangada ga-dilidili gii-made be di-maa tangada hagadootonu hua e-dahi e-hagamodongoohia-aga a-mee ai.

17:7  Digau hagadootonu e-hai gii-kili nadau hadu matagidagi, nomuli gei digau ala i-golo ga-dilidili a-mee. Deenei di hai e-hai, gei di hai huaidu deenei ga-hagalee i godou baahi.

17:8  “Hunu gabunga ala ga-mada-haingadaa dono hai go digau hai-gabunga, ala go nia gabunga i-nia mee be nia goloo nia daangada, be go-di lauwa tuaidina, be go-di hagamodongoohia di hai-geegee o taaligi tangada dela belee daaligi gii-made, mo-di daaligi tangada ge tangada la-gaa-made. Maa di gabunga haingadaa beenei ga-gila-aga, hula gi-di gowaa hai daumaha hua e-dahi dela ne-hilihili go Dimaadua di-godou God,

17:9  ga-hagi-anga di hai deenei gi digau hai-mee-dabu ala go nia dama Levi, mo tangada hai-gabunga dela i-lodo di oobidi di madagoaa deelaa, e-hagamodu go digaula.

17:10  Digaula gaa-hai di-nadau hagamodu, gei goodou gaa-hai-loo gii-hai be nnelekai digaula.

17:11  Hai-mee gi di-nadau hagamodu, gi-daudalia nadau helekai huogodoo.

17:12  Tangada ma-ga-de-hagalongo gi tangada hai-gabunga be tangada hai-mee-dabu dela e-ngalua, le e-daaligi gii-made. Deenei di ala gaa-daa di hai-huaidu deenei gi-daha mo Israel.

17:13  Gei nia daangada huogodoo ga-longono-ginaadou di-maa, ga-mmaadagu-ai, deai tangada bolo ia gaa-hai labelaa di hai deelaa ai.

17:14  “I-muli godou kae tenua dela ga-gowadu go Dimaadua di-godou God gaa-noho ai, gei goodou ga-hagamaanadu bolo goodou e-hiihai e-hai di-godou king, gadoo be nia henua ala i godou baahi.

17:15  Goodou gi-dagatonu bolo taane dela ne-hilihili go goodou gii-hai di king, la-go mee dela ne-hilihili go Dimaadua mai godou mehanga, hudee hai king gi tangada hua-gee.

17:16  Di king hagalee hai-mee gi-nia hoodo e-logo ang-gi ana gau-dauwa, gei mee hagalee hagau ana gau gi Egypt e-hui nia hoodo, idimaa Dimaadua gu-helekai bolo ana daangada la-hagalee hula labelaa gi-golo.

17:17  Di king hagalee hai ono lodo e-logo, idimaa di hai deenei gaa-hai a-mee gii-huli gi-daha mo Dimaadua, gei mee hagalee hai eia gi-maluagina gi-nia silber mono goolo.

17:18  Dono madagoaa gaa-king, mee e-hai gi-hai-mee gi-di beebaa o-nia beebaa haganoho a Dimaadua, mo nia agoago mai di beebaa matagidagi dela e-benebene go digau hai-mee-dabu ala go nia dama Levi.

17:19  Mee e-hai gi-benebene di beebaa deenei gi-hoohoo gi-deia, gei e-daudau di-maa i-di waalooloo o dono mouli, gei mee ga-iloo-ia di-hagalaamua Dimaadua, ge e-daudali manawa-dahi nia haganoho huogodoo ala e-hihi no-lodo.

17:20  Deenei di-mee e-hai a-mee gi-de-hagamaanadu bolo ia e-mada-humalia i ono ehoo Israel, gei e-hai a-mee gi-dee de-hagalongo gi nnaganoho Dimaadua. Gei mee gaa-dagi tenua i-nia ngadau e-logowaahee, ge ono hagadili gaa-dagi Israel i-nia adu-dangada e-logo gi-muli.

Chapter 18

18:1  “Digau hai-mee-dabu o-di madawaawa Levi la-hagalee hai nadau duhongo gowaa i Israel. Digaula e-mouli-hua mai nia tigidaumaha, mo nia wanga-dehuia ala ne-wanga gi Dimaadua.

18:2  Digaula hagalee hai-mee gi-nia gowaa gadoo be nia madawaawa ala i-golo, nadau duhongo la-go di moomee humalia dela ne-kae go ginaadou, ala guu-hai digau hai-mee-dabu ni Dimaadua, be di hagababa Dimaadua dela ne-hai.

18:3  “Nia madagoaa di kau be siibi ma-ga-wanga-dehuia, digau hai-mee-dabu le e-wanga ginai di bakau, di mudamuda, mo tinae.

18:4  Digaula e-kae tuhongo matagidagi o-nia huwa-laagau-‘wheat’, waini, lolo-olib, mo nia huluhulu siibi.

18:5  Dimaadua ne-dongo di madawaawa Levi mai mehanga godou madawaawa huogodoo bolo e-hai-hegau ang-gi de-Ia, gaa-hana hua beelaa.

18:6  “Di-ingoo-hua tangada Levi dela e-hiihai, le e-mee di hanimoi i tei waahale hua i-lodo Israel, gaa-hana gi-di gowaa hai-daumaha hua e-dahi,

18:7  gei mee e-mee di-hai-hegau i-golo, e-hai tangada hai-mee-dabu ni Dimaadua dono God, e-hai be digau Levi ala i-golo ala e-ngalua i-golo.

18:8  Mee e-kae ana meegai e-logo be nia meegai digau hai-mee-dabu ala i-golo, gei mee e-mee di-hai-mee gi-nia mee o ono gau ma-ga-hagau ang-gi-deia.

18:9  “Di-godou madagoaa ma-ga-lloomoi gi tenua dela e-gowadu Dimaadua di-godou God, hudee daudalia nia hangaahai hagaginagina-dangada o-nia henua ala i-golo.

18:10  Hudee tigidaumaha godou dama i-lodo nia ahi be i-hongo godou gowaa dudu tigidaumaha, gei gi-hudee heia godou daangada gii-hai nadau hagadilinga mee be nia buubuu, be e-halahala di longo mai baahi nadau balu-god,

18:11  be e-hai nia buubuu e-hagahumalia be e-hagahuaidu nia daangada, hudee heia digaula gi halahala nadau hagamaamaa mai baahi nia hagataalunga o digau mmade.

18:12  Dimaadua di-godou God e-ginagina nia daangada ala e-hai nia mee haga-ginagina dangada beenei, deenei tadinga Dimaadua e-hagabagi nia henua aalaa gi-daha mo tenua dela e-llooadu ginai goodou.

18:13  Gi-manawa-dahi hagatau ang-gi Dimaadua.”

18:14  Moses ga-helekai gi digaula, “Nia daangada o tenua dela bolo ga-hai-mee ginai goodou, digaula e-daudali digau hai-buubuu ge e-halahala di longo mai baahi nadau balu-god, gei-ogo Dimaadua di-godou God hagalee hiihai bolo goodou gi-daudali nia mee beenei.

18:15  Mee ga-hagau-mai dana soukohp e-hai be au, tangada mai i godou lodo, malaa, goodou e-hai-loo gi-hagalongo gi mee.

18:16  “Di-godou madagoaa dela nogo dagadagabuli gi-di Gonduu Sinai, gei goodou gu-tangi bolo goodou hagalee hiihai e-hagalongo labelaa gi-di lee o Dimaadua, be e-mmada gi-di ulaula o-di ahi dela e-hagamadagudagu, idimaa, goodou guu-hai bolo goodou gaa-mmade.

18:17  Gei-ogo Dimaadua gu-helekai-mai gi-di-au boloo, ‘E-donu go nia dangidangi digaula.

18:18  Au ga-hagau gi digaula soukohp dela e-hai-hua be goe mai i nadau mehanga. Au ga-hagi-anga gi mee dana helekai dela e-hai, gei mee ga-hagi-anga gi nia daangada agu mee huogodoo ala ga-helekai-iei Au.

18:19  I-di madagoaa dela ma-ga-helekai-ai soukohp deelaa i dogu ingoo, gei tangada dela ma-ga-hagalee hagalongo, gei Au ga-hagaduadua a-mee.

18:20  Gei di-maa iai soukohp ga-helekai dana mee i dogu ingoo ge di-maa hagalee di mee ni-aagu bolo gi-heia, be tei soukohp dela e-helekai i-di ingoo o-nia balu-ieidu, nia soukohp beelaa le e-daaligi gii-mmade.’

18:21  “Holongo goodou ga-heheeu i godou mehanga boloo, ‘Dehee di-madau hai ga-iloo-ai gimaadou bolo telekai a soukohp la-hagalee di mee mai baahi Dimaadua?’

18:22  Gei di-maa soukohp ga-helekai i dahi mee i-di ingoo o Dimaadua, ge di mee a-mee dela ne-helekai-ai la-digi gila, malaa, di mee deenei la hagalee di mee mai baahi o Dimaadua, di hiihai-hua ni mee, goodou hudee mmaadagu i mee.

Chapter 19

19:1  “I-muli Dimaadua di-godou God gu-daaligi nia daangada ala nadau gowaa ga-gowadu go Mee gi goodou, mo i-muli di-godou kae nadau waahale mo nadau hale, gaa-noho i-golo,

19:2  goodou haahia-dolu tenua deelaa, di guongo e-dahi e-hai gi-iai dono waahale dela e-golongoohia di-hula ginai. Taane ma-ga-daaligi dana dangada gii-made la-gaa-mee di-lele gi tei nia waahale aanei e-duuli eia i-nia haingadaa.

19:3  goodou haahia-dolu tenua deelaa, di guongo e-dahi e-hai gi-iai dono waahale dela e-golongoohia di-hula ginai. Taane ma-ga-daaligi dana dangada gii-made la-gaa-mee di-lele gi tei nia waahale aanei e-duuli eia i-nia haingadaa.

19:4  Maa taane gaa-tiba ga-daaligi dana dangada gii-made, gei mee hagalee di-hagadaumee ni-oono, geia e-mee di-lele gi tei nia waahale aanei gii-noho eia hagahumalia.

19:5  Deenei dono hagamodongoohia: dolomaa nia daane dogolua gaa-hula gi-lodo henua belee hele nau laagau, gei tangada e-dahi gaa-hele dana laagau, gei di libogo talai ga-baeha, gaa-lele ga-daaligi dono ehoo dela i-golo gaa-made, mee e-mee di-lele gi tei nia waahale aanei, gii-noho eia hagahumalia.

19:6  Maa gaa-bolo di waahale hua e-dahi, gei di-maa holongo ga-mogowaa ge tangada o tangada ne-daaligi dela belee hai-hui gi-di made o-maa, gaa-mee di-kumi a-mee, holongo ga-daaligi gii-made dana dangada ono hala ai i-lodo dono hagawelewele. Malaa, tangada a-mee ne-daaligi, la-ne-daaligi-hua-hala, hagalee di hagadaumee ni mee.

19:7  Deenei tadinga o dagu helekai dela ne-hai bolo goodou gi-dugua nia waahale e-dolu gi-daha.

19:8  “Di madagoaa Dimaadua di-godou God, ga-haga-damana di-godou gowaa, be dana kai dela ne-hai gi godou maadua-mmaadua, ga-gowadu ana gowaa huogodoo ala ne-hagababa-adu,

19:9  goodou belee hilihili labelaa nia waahale e-dolu i-golo. (Mee ga-gowadu di gowaa deenei maa goodou gaa-hai agu mee huogodoo ala ne-helekai-adu gi goodou dangi-nei ge maa goodou e-aloho i Dimaadua di-godou God, mo-di mouli gii-hai be ana agoago).

19:10  Heia di hai deenei, gi-dee-mmade digau nadau ihala ai, gei goodou ga-hagalee dau gi-di hala, ma-gaa-hai godou daangada gii-mmade i-hongo tenua Dimaadua e-gowadu gi goodou.

19:11  “Dolomaa taane gaa-bida hiihai-hua ga-daaligi dono hagadaumee gii-made, gaa-lawa gaa-lele gi dahi waahale i-nia waahale aanei bolo gi-humalia ia.

19:12  Di hai deenei, gei nia dagi o dono waahale, ga-laha-mai a-mee gaa-wanga gi tangada o-maa, dela belee tala di hui di made o-maa, gii-hai a-mee gii-made.

19:13  Tumaalia e-hai gi mee ai. Hagammaa-ina gi-daha mo Israel taaligi dangada gii-made, gei nia mee huogodoo ga-gila humalia i godou baahi.

19:14  “Hudee nege-ina tagageinga digau do baahi, dela gu-hagaduu namua-loo i-lodo tenua Dimaadua di-godou God e-gowadu gi goodou.

19:15  “Tangada hagadootonu e-dahi e-dee-dohu di-hagi-aga di hala o tangada ne-hai. Di hagadootonu o-nia daangada dogolua be dogodolu e-mee di-hagi-aga di hala o tangada.

19:16  Maa iai tangada hagadootonu ga-hagamada ga-hagahuaidu tuai dangada mai i ana hai-kai-tilikai,

19:17  malaa, meemaa dogolua le e-hai gii-hula gi-di gowaa e-dahi dela e-daumaha-ai, gei digau hai-mee-dabu mo digau hai-gabunga ga-gabunga meemaa.

19:18  Digau hai-gabunga ga-halahala hagatau di hai o tangada dela e-hala. Maa digaula gaa-gida bolo mee ne-hagadootonu kai-tilikai gi tuai dangada Israel,

19:19  mee e-hai gii-kae di hagaduadua o tangada dela belee hagahuaidu go mee. Deenei di hai e-hai, gei di hai huaidu deenei ga-hagalee i godou baahi.

19:20  Gei digau huogodoo ala i-golo ga-longono-ginaadou di mee dela ne-hai, gei digaula ga-mmaadagu, ga-deai dahi dangada e-hai labelaa di huaidu beenei ai.

19:21  Ma-gaa-hai beelaa, hudee dumaalia, di hagaduadua le e-hai gi-tongaadahi, di mouli ang-gi di mouli, di golomada ang-gi di golomada, di niha ang-gi di niha, di lima ang-gi di lima, di wae ang-gi di wae.”

Chapter 20

20:1  “Goodou ma-gaa-hula belee heebagi gi godou hagadaumee, gaa-mmada gi-nia kulumaa mono hoodo, mono gau dauwa ala e-dogologo i goodou, hudee mmaadagu i digaula. Dimaadua di-godou God, dela ne-haga-dagaloaha goodou mai Egypt, ga-madalia goodou.

20:2  I-mua goodou ga-heebagi, tangada hai-mee-dabu e-hana gi-mua e-helekai gi godou gau dauwa boloo,

20:3  ‘Nia daane o Israel, hagalongo! Dangi-nei goodou gaa-hula gi tauwa. Hudee mmaadagu i godou hagadaumee, be lodo paagege, be uli godou gai.

20:4  Dimaadua di-godou God le e-hana dalia goodou, ga-gowadu di maaloo gi goodou.’

20:5  “Gei nia dagi dauwa ga-agoago gi-nia daane ga-helekai, ‘Maa iai taane i-kinei dogo hau-hua dono hale malaa digi hagadabu-ina? Maa i-golo, gei mee gii-hana gi dono hale. Maa mee ga-hagalee hana, gaa-made-hua i-lodo tauwa, ge tuai dangada ga-hagadabu di hale o-maa.

20:6  Maa iai taane i-kinei, dogo dogi-hua dana hadagee-waini, gei digi hai dono madagoaa e-hadi ana ‘grape’? Maa i-golo, gei mee e-hana gi dono hale. Maa mee ga-hagalee hana, gaa-made-hua i-lodo tauwa, ge tuai dangada ga-hiaagina ang-gi deia nia waini aalaa.

20:7  Maa tangada i-kinei dogo hagababa-hua belee hai dono lodo? Maa i-golo, geia gii-hana gi dono hale gi-dee-made-hua i-lodo tauwa, ge tuai dangada gaa-noho gi-di hagababa o-maa.’

20:8  “Nia dagi-dauwa ga-helekai labelaa gi-nia daane boloo, ‘Maa iai taane i-kinei guu-lodo bagege gu-madagu? Maa tangada beenei i-golo, gei mee gii-hana gi dono hale gi-de-hagabagege go mee nia hagamataane o digau ala i-golo.’

20:9  Di madagoaa nia dagi-dauwa ne-lawa nadau leelee gi digau-dauwa, digaula ga-hilihili nia dagi mai nia buini dagi dahi.

20:10  “I-mua goodou ma-gaa-hula ga-heebagi gi-di waahale, gei goodou wanga-ina di madagoaa digaula e-hagamodongoohia di-nadau magedaa.

20:11  Maa digaula gaa-huge nia bontai bolo ginaadou gu-magedaa, digaula hagatau e-hai godou hege, ge digaula gaa-hai godou moomee ala e-hono gi digaula.

20:12  Maa digau di waahale deelaa ga-hagalee hai bolo ginaadou gu-magedaa, e-heebagi-hua, gei goodou haganiga-ina di-nadau waahale gi godou gau-dauwa.

20:13  Di madagoaa Dimaadua di-godou God, gaa-hai goodou gii-kumi di waahale deelaa, gei goodou daaligidia nia daane huogodoo ala i-golo.

20:14  Goodou guu-mee di-lahi nia ahina, nia damagiigi, nia manu, mo nia mee huogodoo ala i-lodo di waahale. Goodou guu-mee di-hai-hegau gi-nia mee o godou hagadaumee huogodoo. Dimaadua gu-gowadu nia maa gi goodou.

20:15  Deelaa di-godou hai e-hai gi-nia waahale ala e-mogowaa mo tenua dela ga-noho-ai goodou.

20:16  “Gei goodou ma-gaa-kumi nia waahale i-lodo tenua Dimaadua di-godou God, dela e-gowadu gi goodou, daaligidia nia daangada huogodoo gii-mmade.

20:17  Daaligidia nia daangada aanei hagatau: digau Hittite, Amor, Canaan, Perizzite, Hivite, mo digau Jebus, be di hai Dimaadua ne-hagi-adu gi goodou bolo gi-heia.

20:18  Daaligidia digaula gii-mmade, gi-dee-hai goodou go digaula gii-hala ang-gi Dimaadua, i-di nadau aago goodou gi-heia nia mee hagaginagina-dangada ala e-hai go ginaadou ma-ga-daumaha gi nadau god.

20:19  “Goodou ma-gaa-hai bolo e-kumi di-godou waahale, hudee hele-ina gi-lala nia laagau ala e-hai ono huwa ma e-aha maa di kumi o-di waahale le e-duainau. Geina nia huwa o-nia maa, hudee hunahuna-ina nia laagau. Nia laagau la-hagalee nia hagadaumee ni goodou.

20:20  Goodou e-mee di-hele nia laagau ala i-golo, gaa-hai godou hagabae duuli, gaa-dae-loo gi-di kumi o-di waahale.

Chapter 21

21:1  “Dolomaa tangada ne-gida i-lodo di gowaa maalama, gu-daaligi guu-made, i-lodo tenua dela belee gowadu go Dimaadua di-godou God, gei goodou e-de-iloo be ni-aai ne-daaligi a-mee.

21:2  Godou dagi mono gau hai-gabunga e-hula e-hagatau nia mogowaa i-mehanga di gowaa nogo gida tangada made, mo nia waahale ala e-hoohoo gi-golo.

21:3  Gei nia dagi o-di waahale dela e-mada-hoohoo gi-di gowaa ne-gida tangada made, la-gi-hilihilia tamaa-kau dela digi haga-hai-hegau-ina.

21:4  Digaula gi-kaina di-maa gi-di gowaa i-baahi di monowai dela e-mmidi beelaa, gei di gowaa deelaa, la di gowaa digi hagamaluu-ina, be dogi go tangada, gei digaula gi-haadia di uwa di manu la i-golo.

21:5  Digau hai-mee-dabu ala go nia dama Levi gii-hula labelaa gi-golo, idimaa, go digaula ala e-hai nia hagamodu i-di gili nia mee be nia heebagi mono mee beelaa. Dimaadua di-godou God, gu-hilihili digaula bolo e-hai-hegau ang-gi de-Ia, ge e-hagamodongoohia nia hagahumalia i dono ingoo.

21:6  Gei nia dagi huogodoo o-di waahale dela e-hoohoo gi-di gowaa ne-gida tangada made, le e-tono nadau lima i-hongo di kau,

21:7  ga-helekai: Gimaadou digi daaligidia tangada deenei, gei gimaadou e-de-iloo be koai ne-daaligi a-mee.

21:8  Meenei Dimaadua, Goe dumaalia gi au daangada digau Israel, ala ne-haga-dagaloaha Kooe mai i Egypt. Dumaalia-mai gi gimaadou, hudee heia gimaadou gii-dau gi-di made o tangada digi hai dana mee hala deenei.

21:9  Malaa, maa goodou gaa-hai di hiihai Dimaadua, gei goodou ga-hagalee dau gi-di made deelaa.

21:10  “Di madagoaa Dimaadua di-godou God ga-gowadu gi goodou gi-maaloo i tauwa, gei goodou gaa-kumi godou daangada gaa-hai digau galabudi ni goodou,

21:11  dolomaa goe ga-gidee dahi ahina madanga i-lodo digaula, dela e-hiihai ginai goe bolo e-lodo ginai.

21:12  Lahia a-mee gi doo hale, heia a-mee gii-dahi dono libogo, tuudia nia madaaniha ono madaalima,

21:13  ga-koodai ono goloo. Mee e-noho i doo hale, e-dangidangi i ono maadua i-di malama e-dahi, nomuli, gei goe guu-mee di-lodo gi mee.

21:14  Nomuli, maa goe ga-hagalee hiihai gi mee, goe gaa-hai a-mee gii-hana. Idimaa goe dela guu-hono gi mee gii-kii i do baahi, goe e-deemee di hai a-mee be-di hege, gaa-hui a-mee gi-daha.

21:15  “Dolomaa taane ono lodo dogolua, gei nia ahina guu-hai nau dama-daane dagi-dahi gi taane deelaa, gei tama-daane matagidagi la-hagalee di tama ni-di lodo o-maa dela e-mohoni ginai.

21:16  Maa taane ga-hagamaanadu be dehee dana hai e-duwwe ana mee i ana dama, geia gi-hudee hagamaanadu bolo gaa-wanga tuhongo tama-daane dela ne-haanau matagidagi gi tama-daane o dono lodo dela e-mohoni ginai.

21:17  Mee belee wanga ana duhongo e-lua gi dana dama-daane matagidagi ma e-aha maa mee hagalee di tama ni dono lodo dela e-mohoni ginai. Taane e-hai gi-iloo di tonu o dana dama-daane matagidagi, gaa-wanga gi mee tuhongo dela e-donu ge hagaingoo gi mee.

21:18  “Dolomaa dahi daane dana dama-daane de-hagalongo ge hai-baahi, tama-daane dela gu-de-hiihai di-hagalongo gi ono maadua, ge meemaa hogi e-hagaduadua a-mee i-di-nau agoago a-mee.

21:19  Nia maadua o-maa la-gi-lahia a-mee gi-mua nia dagi o-di waahale dela e-noho-iei mee, e-hai ono gabunga.

21:20  Meemaa gi-helekai gi digaula boloo, ‘Di-mau dama-daane le e-aago-ngadaa, ge hai-baahi, ge de-hiihai di-hagalongo mai gi gimaua. Mee hagauwwou bahi-hadu ge nnoo-mau e-libaliba.’

21:21  Gei nia daane o-di waahale gi-dilidilia a-mee gii-made, gei di huaidu deenei ga-hagalee i godou baahi. Digau huogodoo ala i Israel ga-longono di-mee dela ne-hai, ga-mmaadagu.

21:22  “Maa tangada gaa-hai gii-made i dana hala ne-hai, ge tuaidina o-maa e-daudau i-hongo di laagau,

21:23  tuaidina deelaa la-hagalee dugu beelaa gi dono daiaa, e-hai gi danu i-di laangi deelaa, idimaa tuaidina made dela e-daudau i-hongo di laagau la-gaa-hidi-ai Dimaadua ga-gaamai di hagahuaidu gi-hongo di guongo. Danu-mia tuaidina deelaa, gei goodou ga-hagalee hagahuaidu tenua Dimaadua di-godou God dela e-gowadu gi goodou.

Chapter 22

22:1  “Maa goodou ga-gidee di kau be siibi tangada Israel, e-heehee i-daha, hudee mmada-hua ginai, kaina gi-muli, wanga-ina gi mee.

22:2  Maa tangada dana manu le e-noho mogowaa, be goe e-de-iloo be di-maa di manu ni-aai, la-kaina di-maa dalia goe gi doo hale. Tangada dana manu ma-ga-hanimoi e-halahala di-maa, wanga-ina gi mee.

22:3  Heia go-di hai la-hua, ma-gaa-gida dau ‘donkey’, be di bida gahu, be di-ingoo-hua di-mee tangada Israel ma-gaa-ngala.

22:4  “Dolomaa di ‘donkey’ be di kau tangada Israel ne-hinga gi-lala, hudee noho-hua, hagamaamaa-ina a-mee, e-hagaduu-aga a-mee labelaa.

22:5  “Nia ahina la-hagalee ulu nia gahu daane, gei nia daane hagalee ulu nia gahu ahina. Dimaadua di-godou God e-ginagina digau ala e-hai nadau mee beelaa.

22:6  “Dolomaa goe gaa-gida dau waehongo manu i-tomo di laagau, be i-hongo di gelegele, ge tinana e-noho i-hongo nia ngogo, be madalia ana dama, goe hagalee kae tinana nia dama.

22:7  Goodou e-mee di-kae nia dama manu, malaa, goodou e-hai-loo gi-hagau tinana gii-hana, gei goodou ga-mouli waalooloo ge humalia adu gi goodou.

22:8  “Goodou ma-gaa-hau godou hale hoou, heia-laa di abaaba e-haganiga di longodala di hale. Gei goodou ga-hagalee dau gi-di made o tangada ma-gaa-doo i-golo.

22:9  “Hudee dogi huai mee i-lodo godou hadagee waini. Ma-gaa-hai beelaa, gei goodou gaa-bule gi-di hai-hegau gi-nia huwa nia mee aalaa, be nia ‘grape’.

22:10  “Hudee nneennagia di kau-daane mo-di ‘donkey’ bolo e-hagamaluu nia gelegele.

22:11  “Hudee ulu nia goloo ala ne-llanga gi-nia gili siibi mo nia deleedu gahu.

22:12  “Duia nia tasel hagamadamada-mee gi-nia madaaduge e-haa o godou goloo.

22:13  “Dolomaa taane ma-gaa-lodo gi dahi dama-ahina, ga-nomuli ga-hagamaanadu bolo ia gu-de-hiihai gi mee.

22:14  Gei mee gaa-hai ana kai dilikai, ga-helekai hai-baahi gi mee bolo mee hagalee di ahina digi kii i-baahi taane di-nau madagoaa ne-haga-hai-lodo.

22:15  Maa di-mee beenei gaa-gila-aga, gei nia maadua tama-ahina gi-kaina di tei haga-hai-lodo, dela e-bigibigi dodo, dela e-hagamodongoohia bolo mee di ahina digi kii i-baahi taane. Gei meemaa gi-haga-gida-ina di-maa i-di gowaa hai gabunga, ang-gi-nia dagi o-di guongo.

22:16  Tamana tama-ahina gi-helekai gi digaula boloo, ‘Au guu-wanga dagu dama-ahina gi taane deenei gi-lodo ginai, dolomeenei gei mee gu-de-hiihai gi mee.

22:17  Mee guu-hai ana kai dilikai hai-baahi gi mee, e-hai bolo mee hagalee nogo di ahina digi kii i-baahi taane dono madagoaa ne-lodo gi mee. Gei di-maa, deelaa dono hagadonu i-golo, bolo dagu dama-ahina la-digi kii i-baahi taane: mmada gi-di angammee dodo dela i-di gili di tei haga-hai-lodo!’

22:18  Malaa, nia dagi di guongo gi-lahia taane hai-lodo deelaa, daaligidia.

22:19  Digaula e-hai a-mee gii-hui ana silber e-lau labelaa, gaa-wanga nia bahi-hadu aalaa gi tamana tama-ahina, idimaa taane la-gu-haga-balumee tama-ahina Israel. Ga-hagapuni-anga, tama-ahina le e-lodo-hua gi mee, gei taane e-deemee di-hagamaewae ginaua, i-di waalooloo o dono mouli.

22:20  “Maa bolo nnelekai hai-baahi taane le e-donu, gei di-maa deai di hagamodongoohia ai bolo ma tama-ahina digi kii i-baahi taane i-mua dono hai-lodo gi mee,

22:21  gei digaula gi-lahia tama-ahina gi-di bontai di hale dono damana, ga-dilidili a-mee gii-made go nia daane o dono guongo. Mee guu-hai dana mee haga-langaadia dangada i-mehanga tadau daangada, dela ne-kii i-baahi taane i-mua gei mee digi hai dono lodo, dono madagoaa nogo noho i-lodo di hale dono damana. Malaa, deenei di-godou hai ga-tanga-iei goodou gi-daha mo-di hagadilinga hai huaidu beenei.

22:22  “Maa dahi daane ma-gaa-gida bolo mee guu-kii ginaua mo-di lodo tuai daane, meemaa dogolua e-daaligi gii-mmade. Malaa, deenei di-godou hai ga-tanga-iei goodou gi-daha mo-di hagadilinga hai huaidu beenei.

22:23  “Dolomaa dahi daane ne-mmada ginai digau di guongo e-kii ginaua mo tama-ahina gu-hagababa gi tuai dangada.

22:24  Goodou lahia meemaa gi-daha mo-di waahale, ga-dilidili meemaa gii-mmade. Tama-ahina e-hai gii-made i mee digi gahigahi dana hagamaamaa, gei mee hogi nogo i-lodo di waahale di lee o-maa belee mee-hua di longono. Taane e-hai gii-made i mee dela ne-kii ginaua mo tama-ahina gu-hagababa. Malaa, deenei di-godou hai gaa-tanga-iei goodou gi-daha mo-di hagadilinga hai huaidu beenei.

22:25  “Dolomaa taane ga-mada-maaloo, gaa-kumi dana dama-ahina gu-hagababa gi tuai dangada, i-di gowaa mogowaa ono hale ai. Malaa, go taane la-hua dela e-hai gii-made,

22:26  hagalee di hai e-hai gi tama-ahina ai, idimaa mee digi hai di huaidu dela e-tau gi-di made. Di mee deenei le e-hai dono ala be-di huaidu o dahi daane ma-ga-heebagi gi tei daane, ga-daaligi a-mee gii-made.

22:27  Taane ne-mada-maaloo gaa-kumi tama-ahina dela guu-lawa di hagababa, i-di gowaa mogowaa, gei mee hogi gu-wolowolo bolo gi-hagamaamaa-ina ia, gei di-maa tangada e-hagamaamaa a-mee ai.

22:28  “Dolomaa taane gaa-gida bolo mee ne-mada-maaloo gaa-kumi dana dama-ahina dono hagababa ai.

22:29  Taane deelaa le e-hui gi tamana tama-ahina di hui o-di ahina nogo hai-hua dono lodo, nia silber e-madalima ge tama-ahina le e-noho gi taane, idimaa taane la-ne-mada-maaloo gi tama-ahina gii-kii ginaua. Taane e-deemee di hudu a-mee gi-daha, i-di waalooloo o dono mouli.

22:30  “Deai taane e-haga-langaadia be e-haga-balumee dono damana ai, i dono kii i-baahi tei o-nia lodo o dono damana.

Chapter 23

23:1  “Taane dela guu-kabe ono goloo-daane, le e-deemee di-dau gi-baahi nia daangada Dimaadua.

23:2  “Deai tangada ne-haanau go-di ahina dono lodo ai, e-mee di-madalia be e-daumaha dalia nia daangada Dimaadua ai. Nia dama, be go-di hagadili o tangada beelaa, e-deemee labelaa, gaa-hana-loo gaa-tugi i-di madangaholu adu-dangada.

23:3  “Deai tangada Ammon be Moab, be tei o nadau hagadili e-tugi adu-loo gi-di madangaholu adu-dangada, e-mee di-dau gi-baahi nia daangada Dimaadua ai.

23:4  Digaula nogo de-hiihai gi-gowadu godou meegai mono wai i-di-godou lloomoi i Egypt, ge digaula ga-hagangalua Balaam go tama-daane Beor, mai di waahale o Pethor i Mesopotamia belee haga-halauwa goodou.

23:5  Gei Dimaadua go di-godou God, hagalee hagalongo gi Balaam; ge Dimaadua gaa-huli di hagahuaidu gii-hai di hagahumalia i dono aloho i goodou.

23:6  Di waalooloo di mouli o godou henua, gei goodou hudee hai-mee e-hagamaamaa nia henua aanei, be e-hai digaula gi-humalia ang-gi ginaadou.

23:7  “Hudee haga-balumee-ina digau Edom, idimaa digaula nia gau ni goodou. Hudee haga-balumee-ina digau Egypt, idimaa goodou gu-iai godou holongo e-noho i nadau guongo.

23:8  Mai tolu adu-dangada gaa-huli gi-mua, di hagadili digaula guu-mee di madalia nia daangada Dimaadua.

23:9  “Goodou ma-gaa-noho hagadulii i tei gowaa i-di madagoaa tauwa, goodou hagapaa i-daha i-nia mee ala gaa-hai goodou gi-hagalee madammaa.

23:10  Maa taane gu-hagalee madammaa idimaa mee guu-hai dana midi tiu i-di boo, gei mee e-hana e-noho i-tua, i-daha mo-di gowaa dela e-noho-ai digaula.

23:11  Di mee ga-hiahi-mai, gei mee e-gaugau eia di madagoaa di laa ga-ulu, gei mee ga-hana-laa gi-di gowaa dela e-noho-ai ginaadou.

23:12  “Goodou belee hai godou gowaa i-tua, di gowaa dela e-noho-ai goodou ge baguuguu-ai.

23:13  Dagidagia godou laagau dalia godou goloo. Goodou ma-ga-baguuguu, gelia godou lua, gaa-lawa gaa-danu.

23:14  Haga-madamada-ina godou waahale-laa gi-madammaa, idimaa Dimaadua di-godou God le e-madalia goodou i-lodo godou waahale-laa e-abaaba goodou ge gowadu gi goodou di aali i godou hagadaumee. Hudee hai dahi mee hagalee humalia gaa-hidi-ai Dimaadua gaa-huli dono dua adu gi goodou.

23:15  “Di hege ma-gaa-lele gi-daha mo dono dagi, ga-hanadu gi-di-goe bolo e-madamada humalia-ai, hudee hagau-ina a-mee gi-muli.

23:16  Mee e-mee di-noho i tei godou guongo, dela ma-ga-hilihili go mee, gei goodou hudee heia a-mee hagahuaidu.

23:17  “Deai tangada Israel, taane be-di ahina, e-hai tangada huihui dono huaidina i-di Hale Daumaha ai.

23:18  Nia bahi-hadu ala ne-kila-mai di gili di mouli beelaa, la hagalee gaamai gi-lodo di hale Dimaadua di-godou God, bolo e-hagagila di hagababa hagamodu. Dimaadua e-ginagina digau di Hale Daumaha ala e-huihui ginaadou.

23:19  “Goodou ma-ga-dugu-anga gi godou ihoo Israel gi-boibana nadau bahihadu, meegai, be di-ingoo-hua di-mee, hudee heia digaula gii-hui nia wiini.

23:20  Goodou e-mee di-hagagaga nia wiini gi godou mee ala e-wanga boibana gi digau henua-gee, ge hagalee ang-gi godou ihoo gau Israel. Daudalia taganoho deenei, gei Dimaadua di-godou God ga-hagakila humalia godou mee huogodoo ala e-hai i tenua dela ga-noho-ai goodou.

23:21  “Goodou ma-gaa-hai godou hagababa gi Dimaadua di-godou God, hudee haga-duaina di-hai godou mee ala ne-hagababa. Dimaadua bolo ma kooe hua dela e-hai gi-hagahonu di hagababa deelaa, ge di-maa di hala, maa di hagababa deelaa ga-hagalee hai-hegau ginai.

23:22  Ma hagalee di hala, maa gidaadou ga-hagalee hai tadau hagababa gi Dimaadua.

23:23  gei goodou gaa-bida hiihai-hua bolo e-hai godou hagababa, gei goodou gi-modongoohia bolo goodou e-hai-loo gi-daudali di-maa.

23:24  “Maa goodou ga-taele i-di ala i-lodo tadagee waini tangada, goodou e-mee di-gai godou huwa ‘grape’ ala e-hiihai ginai, malaa, goodou hagalee haa godou ‘grape’ gi-lodo nia mee e-kae.

23:25  Maa goodou ga-taele di ala i-lodo tadagee huwa-‘wheat’ tangada, goodou e-mee di-gai nia ‘wheat’ ala e-mee di-hagi gi godou lima, malaa, goodou hudee duuduu-ina nia maa gi-di hulumanu.

Chapter 24

24:1  “Dolomaa taane gaa-lodo gi-di ahina ga-noho-mai gi-nomuli, gei mee ga-hagalee hiihai e-noho gi mee, idimaa, mee guu-gida dana hala i-baahi o mee. Mee gaa-hai dana beebaa haga-maewae gaa-wanga gi-di ahina, ga-hagau a-mee gi-daha mo dono hale.

24:2  Dolomaa di ahina deelaa gaa-hai dono lodo gi tuai daane,

24:3  gei taane dela ne-lodo ginai mee, gaa-buhi labelaa i-di ahina deelaa, gaa-hudu gi-daha a-mee, gei taane deelaa gaa-hai labelaa dana beebaa haga-maewae gaa-wanga gi-di ahina, ga-hagau a-mee gi-daha mo dono hale. Be dolomaa taane deelaa gaa-made.

24:4  Ge di-maa go taane dela ne-lodo gi-di ahina deelaa i-mua, ia e-deemee di-lodo gi-di ahina deelaa labelaa, idimaa di ahina deelaa la-gu-gulugulua. Maa meemaa ma-ga-haga-hai-lodo labelaa, gei di-maa e-hala i-mua nnadumada o Dimaadua. Goodou gi-hudee heia di hagadilinga huaidu beenei i-lodo tenua Dimaadua di-godou God dela e-gowadu gi goodou.

24:5  “Maa taane dogo hai-hua dono lodo, malaa, hudee hagau-ina a-mee gi-tauwa, be e-hai nnegau o tenua. Mee dela-hua e-noho i dono hale i-di ngadau e-dahi e-haga-tenetene dono lodo.

24:6  “Maa tangada ga-boibana dana mee i-di-goe, goe hudee daawa dana hadu-mmili huwa-laagau belee hai tigagi e-pono dono boibana. Maa nei bolo goe ne-hai beenei, goe ne-daa gi-daha di mee hai meegai a-maa mo digau dono hale.

24:7  “Maa tei goodou gaa-lahi hagammuni dono duaahina tangada Israel, gaa-hai a-mee di hege be e-hui gi tuai dangada e-hai di hege ni mee, tangada dela guu-hai di mee deenei la-gi-daaligidia gii-made. Malaa, deenei di-godou hai ga-tanga-iei goodou gi-daha mo-di hagadilinga hai huaidu beenei.

24:8  “Maa goe gaa-hai doo magi genegene, gei goe e-hai gi-hagalongo hagahumalia gi tangada hai-mee-dabu o di madawaawa Levi, dela ma-ga-gowadu gi-di-goe nnaganoho o-di hai o doo magi.

24:9  Goe gi-langalangahia di mee o Dimaadua dela go doo God ne-hai gi Miriam i-di madagoaa ne-lloomoi goodou i Egypt.

24:10  “Maa tangada ga-boibana dana mee mai i-di-goe, gei goe gi-hudee hana-hua e-ulu gi-lodo di hale o-maa, e-kae au goloo bolo e-hai-ai di mee digagi e-pono dau mee dela ne-wanga gi tangada.

24:11  Goe duu-hua i-tua di hale, gei mee ga-gowadu gi-di-goe dau mee.

24:12  Gei di-maa mee tangada hagaloale, gei goe gi-hudee dadaahi gi-duai gi-di boo dogomaalia.

24:13  Goe gi-kae-ina-hua di gahu a-maa i-mua di laa dela ma-ga-ulu, gii-mee di-hai-hegau-ei mee gi ono goloo ma-gaa-kii. Goe gaa-hai beenei, gei mee ga-gowadu gi-di-goe di hagaamu, gei-ogo Dimaadua go doo God ga-tenetene adu gi-di-goe.

24:14  “Goe hudee halahalau-ina dau dangada hai-hegau dela e-hagaloale ge haingadaa, ma e-aha maa mee tangada Israel be tangada mai i-daha dela e-noho i-lodo tei godou waahale.

24:15  Nia laangi huogodoo gei goe gi-wanga-ina di hui o-di ngalua o-maa i-di laangi i-mua di laa ma-ga-ulu, idimaa, mee tangada hagaloale, mee e-hiihai gi-di bahihadu ang-gi dono mouli. Maa goe ga-hagalee wanga di hui o-maa, gei mee gaa-dangi i-mua nnadumada o Dimaadua, ga-hidi-mai-iei goe gaa-tale gi-di hala.

24:16  “Nia maadua hagalee daaligi gii-mmade i-nia huaidu o nadau dama, gei nia dama hagalee daaligi gii-mmade gi-nia huaidu o nadau maadua. Tangada dela e-daaligi gii-made, le e-daaligi-hua gi ono huaidu ala ne-hai.

24:17  “Goe e-deemee di-daa gi-daha be e-hagahuaidu nia donu o tangada mai i-daha be tama guu-mmade ono maadua. Goe e-deemee di-daa di gahu o-di ahina guu-made dono lodo, e-hai-ai tigagi e-pono dono boibana i-di-goe.

24:18  Goe gi-langalangahia bolo goe nogo hai di hege i-lodo tenua go Egypt, gei Dimaadua go doo God deelaa go Mee ne-haga-dagaloaha-mai goe gi-daha mo-di gowaa deelaa, malaa, deenei tadinga dagu mee dela ne-gowadu gi-di-goe taganoho deenei.

24:19  “Do madagoaa dela ma-ga-hagi-ai nia huwa-laagau o do gowaa, gei goe gu-diiagi au mee gu-de-langahia, gei goe gi-hudee hana labelaa ginai bolo e-gaamai. Diagia-hua nia maa gii-kae go digau mai i-daha, mo nia dama guu-mmade nadau maadua, mo nia ahina guu-mmade nadau lodo. Goe gaa-hai beenei, gei Dimaadua go doo God ga-hagahumalia goe gi-nia mee huogodoo.

24:20  Do madagoaa ma-gaa-hagi ga-hagabudu nia huwa o-di laagau-olib, goe gi-hudee hana labelaa e-hagi haga-lua nia maa. Diagia-hua e-hagi go digau mai i-daha, mo nia dama guu-mmade nadau maadua, mo nia ahina ala guu-mmade nadau lodo.

24:21  Goe ma-gaa-hadi nia huwa o au laagau-‘grape’ holongo dahi, goe gi-hudee hana labelaa e-hadi haga-lua nia huwa ala guu-dubu. Diagia-hua e-hadi go digau mai i-daha, mo nia dama guu-mmade nadau maadua, mo nia ahina ala guu-mmade nadau lodo.

24:22  Goe gi-langahia bolo goe nogo hai di hege i-lodo tenua go Egypt, deenei-laa tadinga dagu mee e-gowadu gi-di-goe taganoho deenei.

Chapter 25

25:1  “Dolomaa, nia daangada dogolua ala gaa-hula gi-di gowaa hai-gabunga belee halahala nau donu, digau hai-gabunga ga-haga-noho be koai dela e-donu ge koai dela e-hala.

25:2  Maa tangada dela ne-hala la-gu-haga-noho bolo di hagaduadua o-maa le e-dadaaligi, gei tangada hai-gabunga ga-haga-kii a-mee huli gi-lala i ono mua, gaa-hai a-mee gi-haga-mamaawa gii-tau gi-di hala a-mee dela ne-hai.

25:3  Di mee deenei hagalee hai gii-hana la-nua nia haga-mamaawa e-mada-haa. Gei di-maa gaa-hidi la-nua di mada-haa, gei do duaahina la-gu-deai ono haga-madagu i-mua nia hadumada nia daangada ai.

25:4  “Goe hudee noodia di ngudu di kau dela e-dagadagahi ana lii-‘wheat’.

25:5  “Tagahaanau ala e-noho i-di gowaa e-dahi, gei tei meemaa gaa-made, gei mee dana dama-daane ai, di ahina dela ne-made dono lodo, e-deemee di-hai dono lodo ang-gi taane hua-gee i-daha mo-di madahaanau deelaa ai. Malaa, tuhongo-hegau o tuaahina-daane o tangada dela ne-made, la-gi-lodo gi-di ahina deelaa.

25:6  Malaa, di ulumadua dela ma-ga-haanau go-di ahina deelaa, ga-haga-ingoo bolo di tama ni taane dela ne-made, e-hai beenei bolo gi-dee-ngala-hua di madahaanau o-maa gi-daha mo Israel.

25:7  Maa tuaahina o tangada dela ne-made la-hagalee hiihai e-lodo gi-di ahina deelaa, gei di ahina deelaa gaa-hana gi-di gowaa hai-gabunga o digau mmaadua o-di waahale deelaa, ga-hagi-anga gi digaula boloo, ‘Tuaahina-daane o dogu lodo hagalee haga-gila-aga dono duhongo-hegau dela belee hai-mai gi-di-au. Mee hagalee hiihai e-duudagi di ingoo dono duaahina i-lodo tenua go Israel.’

25:8  Digau mmaadua o-di waahale ga-gahi-mai taane deelaa, ga-helekai gi mee. Maa mee e-de-hiihai hua igolo di-lodo gi-di ahina deelaa,

25:9  gei-ogo di ahina deelaa la-ga-menege-mai gi-baahi taane deelaa i-mua digau mmaadua o-di waahale deelaa, ga-haga-mmuu gi-daha di hiiwae e-dahi o-maa, gaa-bui ana haawale gi-nia golomada o-maa, ga-helekai gi mee, ‘Deenei di hai dela e-hai gi taane dela hagalee hiihai e-dadaahi di hagadili o dono duaahina.’

25:10  Malaa, di madahaanau o taane deenei ga-haga-ingoo i-lodo o Israel boloo: ‘Di madahaanau o taane dela ne-hagammuu gi-daha dono hiiwae.’

25:11  “Dolomaa nia daane dogolua e-heebagi, gei di lodo taane e-dahi gaa-hai bolo ia e-hagamaamaa dono lodo, gaa-kumi nia goloo-daane o taane dela i-golo,

25:12  hudee dumaalia gi mee, tuu-ina di lima o-maa gi-daha.

25:13  “Hudee hagamagiaa i godou hai-hegau gi-nia pauna-mee, mo godou hagatautau mee.

25:14  “Hudee hagamagiaa i godou hai-hegau gi-nia pauna-mee, mo godou hagatautau mee.

25:15  Hai-hegau gi-nia mee pauna-mee mo nia mee hagatau mee hai-donu ge dau-donu, gi-mouli goodou di madagoaa waalooloo i tenua Dimaadua di-godou God e-gowadu gi goodou.

25:16  Dimaadua e-ginagina nia daangada halahalau dangada.

25:17  “Gi-langahia di-mee digau Amalek ne-hai adu gi goodou, di-godou lloomoi i Egypt.

25:18  Digaula nadau mmaadagu Dimaadua ai, ge digaula ga-heebagi-adu i godou muli i-di madagoaa goodou gu-duadua, godou mahi ai, ga-daaligi gii-mmade digau huogodoo ala nogo dagi mai muli loo.

25:19  Malaa, di madagoaa Dimaadua di-godou God ma-ga-gowadu tenua ga-haga-dagaloaha goodou i godou hagadaumee ala e-noho i godou daha, goodou e-hai loo gi daaligi digau Amalek hagatau, gei di-maa ga-hagalee, tangada e-langahia digaula ai. Hudee delangahia!

Chapter 26

26:1  “I-muli di-godou ulu gi-lodo tenua o Dimaadua di-godou God dela e-gowadu gi goodou, gei goodou gu-hai-mee ginai,

26:2  tangada-nei mo tangada-nei e-hai gii-haa gi-lodo di gada nnagadilinga huwa-laagau ala ma-gaa-hagi matagidagi, gaa-kae gi-di gowaa a Dimaadua dela ga-hilihili belee hai di gowaa e-hagalaamua-ai dono ingoo.

26:3  Hana gi tangada hai-mee-dabu dela e-ngalua i-di madagoaa deelaa, ga-helekai gi mee boloo, ‘Dangi-nei, gei-au e-hai dagu haga-modongoohia ang-gi Dimaadua go dogu God, bolo au gu-ulu i tenua dela ne-hagababa go Mee gi tadau maadua-mmaadua.’

26:4  “Gei tangada hai-mee-dabu gaa-kumi au mee ala ne-gaamai belee hagadagodo, gaa-dugu gi-lala i-mua di gowaa hai-tigidaumaha o Dimaadua go doo God.

26:5  Ga-nomuli, gei goe ga-haga-modongoohia-aga i-mua nnadumada Dimaadua, gaa-hai boloo, ‘Dogu damana-madua la tangada mai Aram, dela nogo hagadau i-hongo nia gowaa aanei, gaa-lahi digau dono hale gi Egypt, gaa-noho i-golo. I-di madagoaa deelaa, gei nia gau digaula nogo hogoohi, gei digaula gaa-noho i-golo, ga-hagadili, ga-dogologo, gaa-hai tenua dogologo ge maaloo.

26:6  Gei-ogo digau Egypt ga-hagaduadua gimaadou hagahuaidu, digaula guu-hai gimaadou nia hege ni ginaadou.

26:7  Gei gimaadou ga-dangidangi gi Dimaadua, go-di God o madau damana-mmaadua, gei Mee gu-hila-mai gi madau dangidangi, mo di mmada gi madau haingadaa mo madau lodo-huaidu.

26:8  Malaa, Dimaadua gu-daa-mai gimaadou gi-daha mo Egypt gi ono lima mogobuna. Mee guu-hai nia hagadilinga mogobuna haga-goboina mo ana mee hagamadagudagu dangada.

26:9  Mee ne-laha-mai gimaadou gi kinei, ga-gaamai gi gimaadou tenua tomo e-logo ono meegai.

26:10  Deenei-laa, au gu-gaamai gi Dimaadua dogu taiaga ala go nia huwa-laagau ne-hagi matagidagi i-nia huwa-laagau ala ne-gaamai go Mee gi-di-au.’ “Ga nomuli, gei goe gaa-dugu di gada gi-mua Dimaadua, ga-bala gi-lala ga-daumaha gi Mee i-golo.

26:11  Malaa, goe mo digau Levi mo digau mai i-daha ala e-noho i godou baahi, gaa-hai di-godou hagamiami mo-di tenetene gi-nia huwa-laagau humalia ala ne-gowadu go Dimaadua gi-di-goe mo do madahaanau.

26:12  “Nia ngadau dagi-dolu huogodoo, gei goe gaa-wanga dahi baahi e-madangaholu o au huwa-laagau, duwwe-ina gi digau aanei: tuhongo Levi, tuhongo digau mai i-daha, tuhongo nia dama guu-mmade nadau maadua, tuhongo nia ahina ala guu-mmade nadau lodo. Heia digaula gii-dohu nadau meegai i-lodo godou waahale.

26:13  Nomuli, gei goe ga-helekai gi Dimaadua, ‘Au gu-daa gi-daha tuhongo haga-madagu dela i dogu hale, guu-wanga gi digau Levi, mo digau mai i-daha, mo nia dama guu-mmade nadau maadua, mo nia ahina ala guu-mmade nadau lodo, gii-hai be au helekai. Gei au hagalee de-hagalongo be de-langahia tei haganoho i-di hai o-di taiaga o dahi baahi e-madangaholu o-nia huwa-laagau i agu mee.

26:14  Gei au digi miami i-nia mee o tuhongo haga-madagu i dogu madagoaa dela nogo manawa-gee-iei au, gei au digi kae-ina nia maa i dogu madagoaa nogo milimilia ang-gi di hai-daumaha, be e-dugu-anga nia maa e-hai nia mee hai-tigidaumaha i-di gili digau ala guu-mmade. Gei au gu-hagalongo-adu gi-di-goe, meenei Dimaadua go dogu God, ge e-haga-kila-aga au mee ala bolo au gi-heia i-di hai o-di taiaga dahi baahi e-madangaholu i agu mee.

26:15  Goe mmada-ia i do henua haga-madagu i-di langi, e-hagahumalia au dama digau Israel, mo tenua tomo ge logo ono meegai, tenua dela ne-gaamai gi gimaadou, gadoo be dau hagababa dela ne-hai ang-gi madau damana-mmaadua.’

26:16  “Dangi-nei, gei Dimaadua di-godou God e-helekai-adu gi goodou bolo goodou gi-daudalia ana haganoho huogodoo. Daudalia nia maa aga i-lodo godou manawa hagatau.

26:17  Dangi-nei gei goodou guu-hai godou haga-modongoohia bolo Dimaadua gaa-hai di-godou God, gei goodou guu-hai bolo goodou ga-daudali a-mee, mo-di haga-gila-aga ana haganoho huogodoo.

26:18  Dangi-nei gei Dimaadua gu-hila-adu gi goodou bolo goodou gaa-hai tenua ni-oono, go tenua hagalabagau, gii-hai be dana hagababa dela ne-hai, gei mee e-hai-adu bolo goodou gi-daudalia ana haganoho huogodoo.

26:19  Gei mee ga-haga-menege-aga goodou gi-hongo nnenua huogodoo ala ne-hai ko-Ia, gei nia daangada huogodoo ga-hagaamu a-Mee ga-hagalaamua dono ingoo mai i goodou, gei goodou gaa-hai tenua dela e-hagadabu ang-gi Dimaadua di-godou God, gii-hai be dana hagababa dela ne-hai.”

Chapter 27

27:1  Gei Moses, ngaadahi mo nia dagi Israel, ga-helekai gi-nia daangada boloo, “Daudalia agu helekai huogodoo ala e-gowadu gi goodou dangi-nei.

27:2  I-di laangi dela ma-gaa-hula goodou laa-lodo di Monowai Jordan, ga-ulu gi tenua dela e-gowadu go Dimaadua di-godou God, goodou ga-hagaduu-aga godou hadu llauehe, gaa-wanga nia wai mono gelegele pigi, e-hii nia maa,

27:3  gaa-hihi nnaganoho mono agoago huogodoo aanei gi-hongo nia maa. Goodou ma-gaa-dau-adu gi tenua tomo ge logo ono meegai, dela ne-boloagi-adu go Dimaadua go-di God o godou maadua-mmaadua,

27:4  gei goodou gu-i-di baahi i-golo di Monowai Jordan, hagaduu-aga-ina nia hadu aanei i-hongo di Gonduu Ebal, be dagu hai dela e-hagi-adu gi goodou dangi-nei, gaa-mmili ginai nia mee e-gahu-ai nia maa.

27:5  Hau-hia di gowaa dudu tigidaumaha, hau-hia gi-nia hadu ala digi hai-hegau ginai nia goloo hai-mee baalanga.

27:6  Idimaa, goodou ma-gaa-hau godou gowaa dudu tigidaumaha gi Dimaadua di-godou God, le e-hau gi-nia hadu ala digi duduudia. Go-di gowaa deelaa, dela belee kae ginai godou tigidaumaha ala belee dutudu,

27:7  deelaa di gowaa e-tigidaumaha-ai goodou, ga-miami tigidaumaha hagadaubuni deelaa, ga-danggee manawa lamalia i-mua o Dimaadua di-godou God.

27:8  I-hongo nia hadu ala gu-hagamaalali ono gili, hihia gi-modongoohia nnelekai o nnaganoho God huogodoo.”

27:9  Gei Moses mo digau hai-mee-dabu mai di madawaawa Levi, ga-helekai gi digau Israel huogodoo, “Digau Israel, noho deemuu, hagalongo mai gi-di-au. Dangi-nei, goodou guu-hai nia daangada ni Dimaadua di-godou God.

27:10  Malaa, goodou hagalongo mo-di daudalia ana haganoho huogodoo, ala e-gowadu ko-au gi goodou dangi-nei.”

27:11  Gei Moses ga-helekai gi-nia daangada Israel,

27:12  “I-muli di-godou lloo-adu laa-lodo di Monowai Jordan, gei nia madawaawa aanei la-gii-tuu i-hongo di Gonduu Gerizim, i-di madagoaa nia hagahumalia ma-ga-hagamodongoohia gi-nia daangada: Simeon, Levi, Judah, Issachar, Joseph mo Benjamin.

27:13  Gei nia madawaawa aanei la-gii-tuu i-hongo di Gonduu Ebal, i-di madagoaa nia haga-halauwa ma-ga-hagawaalanga: Reuben, Gad, Asher, Zebulun, Dan, mo Naphtali.

27:14  Digau Levi ga-helekai nnelekai aanei i-di lee damana:

27:15  “ ‘Di haga-halauwa Dimaadua la-gii-tale ang-gi tangada dela e-hai ana ada-hadu, ada-laagau, be ada-baalanga, ga-daumaha ginai hagammuni. Dimaadua e-ginagina di hai daumaha gi-nia ada-mee.’ “Gei nia daangada huogodoo ga-helekai, ‘Amen!’

27:16  “ ‘Di haga-halauwa a Dimaadua la-gii-tale ang-gi tangada dela hagalee hagalaamua dono damana be dono dinana.’ “Gei nia daangada huogodoo ga-helekai, ‘Amen!’

27:17  “ ‘Di hagahalauwa a Dimaadua la-gii-tale ang-gi tangada dela e-nege tagageinga tangada dela e-noho i dono baahi.’ “Gei nia daangada huogodoo ga-helekai, ‘Amen!’

27:18  “ ‘Di haga-halauwa a Dimaadua la-gii-tale ang-gi tangada dela e-dagi dana dangada deegida i-di ala hala.’ “Gei nia daangada huogodoo ga-helekai, ‘Amen!’

27:19  “ ‘Di haga-halauwa a Dimaadua la-gii-tale ang-gi tangada dela e-duuli be daa gi-daha nia donu digau mai i-daha, mo nia dama guu-mmade nadau maadua, mo nia ahina ala guu-mmade nadau lodo.’ “Gei nia daangada huogodoo ga-helekai, ‘Amen!’

27:20  “ ‘Di hagalauwa a God la-gii-tale ang-gi tangada dela e-hagabalumee ge hagalangaadia dono damana i dana kii i-baahi tei o-nia lodo o dono damana.’ “Gei nia daangada huogodoo ga-helekai, ‘Amen!’

27:21  “ ‘Di hagahalauwa a Dimaadua la-gii-tale ang-gi tangada dela e-kii be e-hai ana mee huaidu gi dahi manu.’ “Gei nia daangada huogodoo ga-helekai, ‘Amen!’

27:22  “ ‘Di hagahalauwa a Dimaadua la-gii-tale ang-gi tangada dela ma-gaa-kii ginaua mo dono duaahina ahina, be ginaua mo dono duaahina-ahina dela e-hai duaahina ang-gi deia, mai tei ono maadua.’ “Gei nia daangada huogodoo ga-helekai, ‘Amen!’

27:23  “ ‘Di haga-halauwa a Dimaadua la-gii-tale ang-gi tangada dela ma-gaa-kii ginaua mo tinana dono lodo.’ “Gei nia daangada huogodoo ga-helekai, ‘Amen!’

27:24  “ ‘Di haga-halauwa a Dimaadua la-gii-tale ang-gi tangada dela ma-ga-daaligi dana dangada gii-made hagammuni.’ “Gei nia daangada huogodoo ga-helekai, ‘Amen!’

27:25  “ ‘Di haga-halauwa a Dimaadua la-gii-tale ang-gi tangada dela e-haimee gi-nia bahi-hadu, ala belee hui tangada e-daaligi dana dangada ono hala ai gii-made.’ “Gei nia daangada huogodoo ga-helekai, ‘Amen!’

27:26  “ ‘Di haga-halauwa a Dimaadua la-gii-tale ang-gi tangada dela hagalee daudali nnaganoho Dimaadua mo ana agoago huogodoo.’ “Gei nia daangada huogodoo ga-helekai, ‘Amen!’

Chapter 28

28:1  “Maa goodou ga-hagalongo gi Dimaadua di-godou God, ge manawa-dahi di-hagagila-aga ana haganoho huogodoo ala e-gowadu ko-au gi goodou dangi-nei, gei Mee ga-hagamenegenege-aga goodou gi-baahi i-nua nia henua huogodoo ala i henuailala.

28:2  Hagalongo gi Dimaadua di-godou God, gei nia hagahumalia aanei huogodoo gaa-hai godou mee:

28:3  “Dimaadua ga-hagahumalia godou guongo, mo godou gowaa dogi mee.

28:4  “Dimaadua ga-hagahumalia goodou gi-nia dama dogologo, mono huwa laagau e-logo, mo nia kau mono siibi e-logo.

28:5  “Dimaadua ga-hagahumalia nia huwa ‘wheat’ godou hagadili, mo nia meegai ala e-hai go goodou mai i-nia maa.

28:6  “Dimaadua ga-hagahumalia godou mee huogodoo ala e-hai.

28:7  “Dimaadua ga-hagamagedaa godou hagadaumee, maa digaula ga-heebagi-adu gi goodou. Digaula ga-heebagi-adu gi goodou mai di gowaa e-dahi, gei digaula gaa-llele gi-daha mo goodou i-nia gowaa dagi-hidu.

28:8  “Dimaadua ga-hagahumalia godou moomee, mo-di haga-honu godou hale dugu-mee gi-nia huwa-laagau-‘wheat’. Mee ga-hagahumalia godou i-lodo tenua dela e-gowadu go Mee.

28:9  “Maa goodou ga-hagalongo gi Dimaadua di-godou God, gaa-hai ana mee huogodoo ala ne-hagababa, gei Mee gaa-hai goodou nia dama donu ni-aana, be dana hai dela ne-hagababa.

28:10  Gei nia daangada henuailala huogodoo ga-gidee bolo Dimaadua ne-hilihili goodou belee hai nia daangada donu ni-aana, gei digaula ga-mmaadagu i goodou.

28:11  “Dimaadua ga-gowadu gi goodou nia dama dogologo, nia kau e-logo, nia huwa laagau-‘wheat’ e-logo i tenua dela ne-hagababa go Mee gi godou maadua-mmaadua bolo e-gowadu gi goodou.

28:12  Dimaadua ga-hagau-mai ana uwa i-nia madagoaa ala e-humalia ai, mai i dana hale goloo maluagina i-di langi, ga-hagahumalia godou moomee huogodoo, gei goodou gaa-mee di-wanga boibana gi-nia henua e-logo, malaa, goodou hagalee hai gi-boibana mai tei henua.

28:13  Dimaadua gaa-hai goodou di tagi o-nia henua, hagalee dagi go tei henua. Nia madagoaa huogodoo goodou ga-humalia adu gi goodou, e-deemee bolo ga-dee-gila humalia, maa goodou ga-manawa-dahi di-daudali ana haganoho huogodoo ala e-gowadu ko-au gi goodou dangi-nei.

28:14  Gei goodou hudee hula laa-daha mo agu helekai, be e-daumaha mo-di hai-hegau gi-nia balu-ieidu.

28:15  “Gei goodou ma-ga-hagalee hagalongo gi Dimaadua di-godou God, ge hagalee manawa-dahi di-daudali ana hagababa mo ana haganoho huogodoo ala e-gowadu ko-au gi goodou dangi-nei, gei nia mee huaidu huogodoo aanei gaa-tale adu gi goodou:

28:16  “Dimaadua ga-hagahuaidu godou guongo mo godou gowaa dogi mee.

28:17  “Dimaadua ga-hagahuaidu godou huwa-laagau-‘wheat’, mo godou meegai ala e-hai mai i-nia maa.

28:18  “Dimaadua ga-hagahuaidu goodou i dana gowadu nia dama hua hogoohi, nia huwa laagau huaidu, mo nia kau mono siibi hogoohi.

28:19  “Dimaadua ga-hagahuaidu godou mee huogodoo ala ma-gaa-hai.

28:20  “Maa goodou gaa-hai di huaidu, ga-hagalee hai-mee gi Dimaadua, gei Mee ga-gowadu gi goodou tangihi, di hinihini, mo-di haingadaa, i-di gili godou mee huogodoo ala ma-gaa-hai, gaa-dae-loo gi-di limalima di-godou halauwa hagatau.

28:21  “Dimaadua ga-hagahagau-adu ana magi gi goodou, gaa-dae-loo gi goodou gu-hagalee, deai tangada e-dubu i tenua dela belee hai-henua ginai goodou ai.

28:22  “Dimaadua ga-haga-paagege goodou gi-nia daumagi, mono magi hagahula mo welengina. Mee ga-hagau-mai di madagoaa ono uwa ai, di madangi welengina e-hagahuaidu godou huwa laagau-‘wheat’. Nia mee huaidu aanei gaa-noho i godou baahi, gaa-dae-loo gi godou mmade.

28:23  Di uwa e-doo ai, gei di gelegele o-di-godou guongo la-ga-hamaaloo be-di baalanga.

28:24  “Dimaadua ga-hagahagau-eia ana gohu mono gelegele e-pono di lohongo nia uwa, gaa-dae-loo gi-di godou mmade.

28:25  “Dimaadua gaa-hai godou hagadaumee e-hagamagedaa goodou. Goodou ga-heebagi gi digaula mai di gowaa e-dahi, malaa, goodou gaa-llele dagidahi gi-daha mo digaula, gei nia daangada henuailala huogodoo ga-uli nadau gai, i nadau gidee nia mee ala e-hai-adu gi goodou.

28:26  Goodou ma-gaa-mmade, gei nia manu mamaangi mo nia manu lodo-geinga, ga-lloomoi gaa-gai godou huaidina, deai tangada e-hagabagi nia maa gi-daha ai.

28:27  “Dimaadua gaa-hai goodou gi-magibuu be dana hai ang-gi digau Egypt. Mee gaa-hai godou huaidina gi-magibala. Godou huaidina gaa-buni magibala, gei goodou ga-laudia, malaa, hagalee ono hagahili ai.

28:28  “Dimaadua gaa-hai goodou gi-deemee di-hagamaanadu humalia, gei Mee gaa-hai goodou gi dee-gidee nia mee, ge hinihini godou maanadu.

28:29  Goodou ga-heehee haahaa i-di laangi maalama be tangada deegida, gei goodou ga-de-gidee godou ala. Godou mee huogodoo ala e-hai ga-hagalee kila humalia. Goodou ga-haihai hagahuaidu go nia daangada, ga-gaiaa mo-di kaekae godou mee go nia daangada hagahuaidu.

28:30  Goe ga-hagababa bolo e-lodo gi dahi dama-ahina, gei di-maa tuai dangada hua dela gaa-noho gi mee. Goe gaa-hau dau hale gei goe e-deemee di-noho i ono lodo. Goe gaa-dogi dau hadagee-waini, gei goe e-deemee di-gai ono huwa.

28:31  Godou kau ga-dadaaligi i-mua godou golomada, gei goodou deai godou goneiga e-gai i-nia maa ai. Godou ‘donkey’ gaa-dagi gi-daha i-mua godou golomada, gei nia maa hagalee gaamai gi-muli gi goodou. Godou siibi gaa-wanga gi godou hagadaumee, malaa, hagalee tangada e-hagamaamaa goodou ai.

28:32  Godou dama-daane mo dama-ahina gaa-wanga gi digau henua-gee be nia hege, gei goodou e-mmada-hua, dee-mee di-hai godou mee. Nia laangi huogodoo, gei goodou e-hagapili godou golomada e-madamada balumee bolo godou dama ga-lloo-adu labelaa gi goodou.

28:33  Dahi henua gee, gaa-kae nia huwa-laagau huogodoo ala ne-ngalua damana ginai goodou e-dogi, gei deai di-godou mee e-kae ai, dela hua e-nnoo-mau e-haihai hagahuaidu.

28:34  Godou duadua la-gaa-hai goodou gi-deemee di-hagamaanadu humalia.

28:35  “Dimaadua gaa-hai godou wae gii-buni magibala ala e-mmae, ge e-deemee di-hagahili. Nia magibuu gaa-hii godou gili, tugi di libogo gaa-huli gi-di wae.

28:36  “Dimaadua gaa-lahi goodou mo di-godou king gi tuai henua, di gowaa digi noho-ai goodou be godou maadua-mmaadua i-mua, gei goodou ga-hai-hegau gi-nia god ala ne-hai gi-nia laagau mono hadu i-golo.

28:37  I-lodo nnenua Dimaadua ala gaa-lahi ginai goodou, nia daangada ga-gologolo i-nia mee ala ne-hai-adu gi goodou, digaula ga-gadagada ga-haganneennee goodou.

28:38  “Goodou gaa-dogi godou lii logowaahee, malaa, e-hagi-hua godou mee dulii, idimaa nia manu gaa-gai godou hagadili.

28:39  Goodou gaa-dogi godou hadagee-waini, ga-madamada humalia-ai, gei goodou hagalee hagi ono huwa be e-inu godou waini i-nia maa, idimaa nia ila gaa-gai nia maa.

28:40  Nia laagau-olib gaa-tomo i-nia gowaa huogodoo i godou henua, gei goodou ga-deemee di-hai mee gi-nia lolo-olib, idimaa nia golee nia maa ga-monnono.

28:41  Goodou gaa-hai godou dama-daane mono dama-ahina, gei digaula ga-hagalee i godou baahi, idimaa digaula gaa-lahi gi-daha be digau ne-kumi i tauwa.

28:42  Godou laagau mo godou hagadili huogodoo gaa-gai go nia manu.

28:43  “Digau henua-gee ala e-noho i godou guongo, la-ga-maaloo-mai nadau mogobuna, ge godou mogobuna ga-paagege-mai.

28:44  Digaula ga-iai nadau bahi-hadu e-boibana-adu gi goodou, gei godou bahi-hadu e-boibana ang-gi digaula ai. Di hagaodi gi-muli, digaula gaa-hai nia dagi ni goodou.

28:45  “Nia haingadaa huogodoo aanei ga-tale-adu gi goodou, ga-madalia goodou, gaa-dae-loo gi-di godou mooho gi-daha, idimaa, goodou digi hagalongo gi Dimaadua di-godou God, mo-di daudali ana haganoho huogodoo ala ne-gowadu gi goodou.

28:46  Nia mee aanei la nia hagamodongoohia ni di hagiaga a God i godou gili mo godou hagadili gi-muli, gaa-hana-hua beelaa.

28:47  Dimaadua gu-hagahumalia goodou i-nia mee huogodoo, gei goodou hagalee hai-hegau gi Mee i-di manawa lamalia mo-di tene.

28:48  Malaa, goodou ga-hai-hegau gi-nia hagadaumee Dimaadua ala ga-hagau-adu, e-hai-baahi-adu gi goodou. Goodou ga-hiigai, ga-hieinu, ga-deai godou goloo ai, ga-angaanga-gee i-nia mee huogodoo. Dimaadua gaa-hai goodou hagahuaidu, gaa-dae-loo gi-di-godou hagammaa gi-daha.

28:49  Dimaadua ga-laha-mai dana henua mai nia mada henuailala, e-hai-baahi adu gi goodou, tenua dela e-de-iloo-e-goodou ono helekai. Digaula ga-hagadaha-ia godou nua be-di ‘eagle’.

28:50  Digaula ga-hagamuamua, ge hagalee dumaalia gi-di ingoo hua tangada, madua be dulii.

28:51  Digaula gaa-gai godou kau mono huwa-laagau, gei goodou ga-hiigai gaa-mmade. Digaula hagalee dugu-adu nia mee mai nia huwa laagau ‘wheat’, waini, lolo-olib, nia kau be nia siibi, gei goodou gaa-mmade.

28:52  Digaula ga-heebagi gi-nia waahale huogodoo o tenua Dimaadua di-godou God, dela e-gowadu gi goodou, gei nia abaaba duuduu i-nua ge mau, ala nogo hagadagadagagee ginai goodou, la-gaa-tinga gi-lala.

28:53  “Godou hagadaumee ma-ga-duuli godou waahale, gei goodou ga-angaanga-gee meegai, gaa-gai godou dama ala ne-gowadu go Dimaadua di-godou God.

28:54  Tangada hogi humalia, dela ne-haanau mai di madawaawa aamua ge maluagina, e-hiigai i-di madagoaa deelaa, gaa-gai labelaa ana dama i ana dama, idimaa mee gu-ana meegai i-golo ai. Mee hogi hagalee wanga ana meegai gi dono duaahina-daane, be go dono lodo dela e-aloho-ai, be gi tei ana dama ala ne-dubu.

28:55  Tangada hogi humalia, dela ne-haanau mai di madawaawa aamua ge maluagina, e-hiigai i-di madagoaa deelaa, gaa-gai labelaa ana dama i ana dama, idimaa mee gu-ana meegai i-golo ai. Mee hogi hagalee wanga ana meegai gi dono duaahina-daane, be go dono lodo dela e-aloho-ai, be gi tei ana dama ala ne-dubu.

28:56  Di ahina hogi humalia dela ne-haanau mai di madawaawa aamua ge maluagina, hagalee haele halahala ana mee hagamogowaa i-mua, dolomeenei gei mee gaa-hai-hua be di-maa. Di madagoaa dono waahale ne-duuli go digau dauwa, gei mee ga-angaanga-gee meegai nia meegai, gei mee gaa-gai hagammuni dana dama nogo haanau-hua, mono mee ne-lloomoi dalia di tama. Mee hagalee wanga nia mee gi dono lodo dela e-aloho-ai, be gi tei ana dama.

28:57  Di ahina hogi humalia dela ne-haanau mai di madawaawa aamua ge maluagina, hagalee haele halahala ana mee hagamogowaa i-mua, dolomeenei gei mee gaa-hai-hua be di-maa. Di madagoaa dono waahale ne-duuli go digau dauwa, gei mee ga-angaanga-gee meegai nia meegai, gei mee gaa-gai hagammuni dana dama nogo haanau-hua, mono mee ne-lloomoi dalia di tama. Mee hagalee wanga nia mee gi dono lodo dela e-aloho-ai, be gi tei ana dama.

28:58  “Maa goodou ga-hagalee manawa-dahi di-daudali nia agoago Dimaadua huogodoo ala gu-i-lodo di beebaa deenei, gei goodou ma-ga-hagalee hagalaamua di ingoo humalia ge hagagoboina o Dimaadua di-godou God,

28:59  malaa, Mee ga-hagau-adu gi goodou mo godou dama gi-muli nia magi deemee di-hagahili, mono daumagi huaidu e-deemee di-ngudu.

28:60  Mee ga-gowadu labelaa nia magi huogodoo hagamadagudagu dangada ala gu-iloo-e-goodou i Egypt, gei goodou ga-deemee di-hagahili.

28:61  Mee ga-hagau adu labelaa nia hagadilinga magi, mono daumagi ala hagalee hagamodongoohia i-lodo di beebaa haganoho mono agoago a Dimaadua, ge goodou ga-hagammaa gi-daha.

28:62  Ma e-aha maa goodou ala gu-dogologo be nia heduu ala i-di langi, digau hua dulii i goodou ala ga-mouli, idimaa, goodou digi hagalongo gi Dimaadua di-godou God.

28:63  Be di hai Dimaadua dela e-tene dana hagagila humalia mo-di hagadogologo goodou, gei Mee e-hiihai labelaa e-hunahuna goodou mo-di gowadu nia haingadaa gi goodou. Goodou ga-daagi gi-daha mo tenua dela belee hai-henua ginai goodou.

28:64  “Dimaadua ga-hagamodoho goodou dagi-dahi, gi-mehanga nia henua huogodoo, mai di bida e-dahi o henuailala, gaa-hana gi-di bida i-golo, gei goodou ga-hai-hegau gi-nia god ala ne-hai gi-nia laagau mono hadu, go nia god digi daumaha ginai goodou mo godou maadua-mmaadua anadilaangi.

28:65  Nia madagoaa huogodoo, goodou ga-deemee di noho i-di aumaalia. Deai di madagoaa e-hagaingoo bolo di gowaa donu ni goodou ai. Dimaadua ga-hagahonu godou hagamaanadu gi-nia de-nnoomaalia mo tilikai hualaa ge godou hagadagadagagee ai.

28:66  Nia madagoaa huogodoo, godou mouli e-mouli i-lodo di hagalliga. Boo mo aa, gei goodou e-noho uli godou gai di waalooloo, ge goodou e-noho mmaadagu di made.

28:67  Godou manawa ga-bolebole, ga-mmaadagu i godou mee huogodoo ala ma-gaa-mmada ginai. Nia luada huogodoo, goodou e-hiihai bolo ma-gi-hiahi-hua laa, gei nia hiahi huogodoo, goodou ga-hiihai bolo ma-gi-luada.

28:68  Dimaadua ga-hagau goodou gi-muli gi Egypt i-nia wagabaalii, ma e-aha maa Mee hogi gu-helekai bolo goodou hagalee-loo e-hula gi-golo labelaa. Goodou ga-hagamada bolo e-huihui goodou gi godou hagadaumee be nia hege, ge di-maa hagalee, tangada e-hiihai e-hui goodou ai.”

Chapter 29

29:1  Aanei nnelekai hagamodongoohia di hagababa Dimaadua gi Moses bolo gi-heia gi digau Israel, i-lodo di guongo go Moab. Nnelekai aanei huogodoo e-hagapuni gi-di hagababa dela ne-hai go Dimaadua gi digaula i-di Gonduu Sinai.

29:2  Moses ga-gahi-mai digau Israel huogodoo gi-di gowaa e-dahi, ga-helekai gi digaula, “Goodou gu-gidee nia mee Dimaadua ne-hai ang-gi-di king o Egypt, mo ang-gi ana gau aamua, mo ang-gi dana henua hagatau.

29:3  Goodou guu-mmada gi-nia hagaduadua huaidu huoloo, mono mogobuna, mo nia mee hagagoboina ala ne-hai go Dimaadua.

29:4  Malaa, gaa-dae-mai-loo gi dangi-nei, gei Mee digi heia goodou gi-modongoohia godou mee ala ne-gidee mo-di longono-ai.

29:5  I-nia ngadau e-madahaa, gei Dimaadua nogo dagi goodou laa-lodo di anggowaa, gei godou goloo gahu mo godou hii-wae digi momooho.

29:6  Goodou nogo godou palaawaa e-gai ai, be godou waini be nia dagaao e-inu ai, gei Dimaadua gu-gowadu godou mee ala e-hiihai ginai belee aago-adu labelaa gi goodou bolo Ia go di-godou God.

29:7  Tadau dau-mai gi-di gowaa deenei, gei Sihon, di king o Heshbon, mo Og, di king o Bashan, ga-lloomoi ga-heebagi-mai gi gidaadou. Gei gidaadou gu-hagamagedaa digaula,

29:8  guu-kumi nia gowaa digaula, gaa-duwwe i-nia madawaawa Reuben mo Gad, mo-di baahi di madawaawa Manasseh.

29:9  Daudalia manawa-dahi nia helekai hagamodongoohia huogodoo o-di hagababa deenei, gii-kila humalia-ai godou mee huogodoo ala e-hai.

29:10  “Dangi-nei goodou e-tuu i-mua o Dimaadua di-godou God, goodou huogodoo, godou dagi, godou gau aamua, godou daane,

29:11  godou ahina, godou dama, mo digau henua-gee ala e-noho i godou mehanga, ala e-duuduu nadau dohomu ge dagidagi godou wai.

29:12  Goodou ala i-kinei dangi-nei belee daahi di hagababa deenei, dela e-hai go Dimaadua di-godou God adu gi goodou, bolo goodou gi-hai-mee gi ana hegau,

29:13  gei Dimaadua gaa-dugu goodou bolo nia daangada ni-aana, gei Ia gaa-hai di-godou God, be dana hagababa adu gi goodou, mo godou maadua-mmaadua go Abraham, Isaac, mo Jacob.

29:14  Ma hagalee go goodou hua ala e-hai ginai di hagababa deenei, mo ono hegau.

29:15  Mee e-hai di-maa mai gi gidaadou huogodoo ala e-tuu i ono mua dangi-nei, mo anga labelaa gi tadau hagadili ala digi haanau.

29:16  “Goodou e-langahia be-di mouli la-nogo hai behee i Egypt, mo-di hula laa-lodo la-nogo hai behee i-nia guongo o-nia henua ala i-golo.

29:17  Goodou gu-gidee nadau ada balu-god hagaginagina-dangada ala ne-hai gi-nia laagau, nia hadu, nia silber, mono goolo.

29:18  Goodou gi-dagatonu-adu gi goodou bolo deai taane, be-di ahina, di madahaanau, be-di madawaawa i goodou ala e-tuu i-kinei dangi-nei, e-huli gi-daha mo Dimaadua go tadau God, e-daumaha gi-nia god o-nia henua ala i-golo ai. Deenei la-gaa-hai be-di aga dela e-tomo gaa-hai di laagau mmala ge honu poisin.

29:19  Gii-donu humalia dangi-nei i-kinei bolo deai tangada e-hagalongo gi-nia helekai hagalabagau aanei ai, ga-nomuli, gaa-hai bolo nia mee huogodoo la-gaa-kila humalia i dono baahi ma e-aha maa ia e-lodo hamaaloo e-hai hua go dono hiihai. Deelaa la-ga-daaligi goodou hagatau, digau humalia mo huaidu, e-hai-hua be di-mee e-dahi.

29:20  Dimaadua ga-hagalee dumaalia gi tangada beelaa. Di hagawelewele o-Maa ga-ulaula ga-hai-baahi gi-mee, gei nia haingadaa huogodoo ala e-hii i-lodo di beebaa deenei, la-gaa-hai gi mee, gaa-dae-loo gi dono made.

29:21  Dimaadua gaa-hai dana hagamodongoohia i-di gili o-maa i-mua nia madawaawa Israel huogodoo, gaa-wanga gi mee nia haingadaa, gii-hai be nia haga-halauwa huogodoo ala e-hagatau i-lodo di hagababa dela guu-hihi i-lodo di beebaa agoago Dimaadua deenei.

29:22  “Nia adu dangada ala ma-ga-dagidilaangi, gei godou hagadili gi-muli, gei digau henua-gee mai nnenua mogowaa, la-ga-gidee nia haingadaa, mo nia hagaduadua Dimaadua ne-gaamai gi godou guongo.

29:23  Nia gowaa dogi-mee la-gaa-hai di anggowaa, gaa-gahu go nia ‘sulphur’ mono toolo, hagalee nia mee e-dogi ai, nia geinga hogi hagalee tomo i-golo. Godou gowaa la-gaa-hai be-nia waahale Sodom mo Gomorrah, mo Admah mo Zeboiim, ala ne-oho go Dimaadua, i dono madagoaa nogo hagawelewele huoloo.

29:24  Gei henuailala hagatau ga-heeu, ‘Dimaadua la-ne-aha gaa-hai dana hai deenei gi-di gowaa digaula? Tadinga di hagawelewele damana o-Maa la-di-aha?’

29:25  Gei deenei telekai gaa-hai gi digaula, ‘Idimaa, nia daangada Dimaadua gu-oho di-nadau hagababa ne-hai gi Mee, di God o nadau maadua-mmaadua, i dono madagoaa ne-laha-mai digaula gi-daha mo Egypt.

29:26  Digaula gu-hai-hegau gi-nia balu-ieidu digi daumaha ginai ginaadou i-mua, nia god ala ne-bule go Dimaadua bolo gi-de-daumaha ginai.

29:27  Malaa, Dimaadua gu-hagawelewele gi ana daangada, ga-gaamai nia haingadaa huogodoo ala gu-hihi i-lodo di beebaa deenei.

29:28  Dimaadua gu-hagawelewele huoloo, gei i-lodo dono hagawelewele, Mee gu-daagi digaula gi-daha mo nadau gowaa, guu-kili digaula gi-hongo tuai henua, dela e-noho-ai digaula dangi-nei.’

29:29  “Ma iai nia mee e-hagammuni go tadau God go Dimaadua, gei Mee gu-hagagila-aga madammaa ana haganoho, gei gidaadou mo tadau hagadili gi-muli la-gi-daudalia nia maa gaa-hana-hua beelaa.

Chapter 30

30:1  “Dolomeenei gei au gu-gowadu gi goodou di hilihili i-mehanga di hagahumalia mo-di hagahuaidu. Di madagoaa nia mee aanei huogodoo gaa-kila-adu gi goodou, gei goodou gaa-noho dagidahi i-lodo nia henua a Dimaadua di-godou God ne-hagabagi ginai goodou, goodou ga-langahia dagu hilihili dela ne-gowadu gi goodou bolo gi-heia.

30:2  Maa goodou mo godou hagadili ga-lloomoi labelaa gi Dimaadua di-godou God, mo-di daudali-aga i-lodo godou manawa mo godou mouli hagatau ana helekai ala e-gowadu ko-au gi goodou dangi-nei,

30:3  malaa, Dimaadua di-godou God ga-dumaalia-adu goodou. Mee ga-laha-mai goodou gi-daha mo nia henua ala nogo noho goodou dagidahi, gaa-hai goodou gi-maluagina labelaa.

30:4  Ma e-aha maa goodou guu-hula gi-nia mada o henuailala, gei Dimaadua di-godou God ga-haga-dagabuli-mai goodou labelaa, gaa-dagi-mai goodou gi tenua deenei.

30:5  Dimaadua di-godou God ga-laha-mai goodou gi-lodo tenua dela nogo hai-mee ginai godou maadua-mmaadua, gei goodou ga-hai-mee gi tenua deelaa. Gei Mee ga-haga-maluagina goodou, gaa-hai goodou gi-dogologo gi-nonua.

30:6  Gei Dimaadua di-godou God ga-gowadu gi goodou mo godou hagadili di manawa hagalongo, gi-aloho goodou i Mee aga i-lodo godou manawa mo godou mouli hagatau, gii-mee-ai di mouli goodou i-lodo tenua deelaa.

30:7  Gei Dimaadua di-godou God ga-hagahuaidu godou hagadaumee gaa-wanga ginai nia haga-halauwa aanei, aalaa go digau ala gu-hai-baahi-adu gi goodou, mo digau ala gu-haga-hai-gee goodou.

30:8  Gei goodou ga-hagalongo labelaa gi Mee, ga-daudali ana haganoho ala e-hagi-adu ko-au gi goodou dangi-nei.

30:9  Gei Dimaadua di-godou God ga-haga-maluagina goodou i-nia mee huogodoo ala e-hai go goodou gi godou lima, gaa-hai gi-dogologo godou hagadili, gaa-hai nia dama o godou kau mono siibi gii-logo, ga-haga-maluagina goodou gi-nia huwa o godou gelegele. Dimaadua ga-tenetene labelaa adu gi goodou, ga-haga-maluagina goodou, be dana hai nogo haga-maluagina godou maadua-mmaadua.

30:10  Gei goodou e-hai gi-hagalongo gi Mee, mo-di daudali ana helekai mo ana haganoho ala guu-hihi i lodo di beebaa haganoho deenei, gei goodou la-gii-huli gi Mee mai i-lodo godou manawa hagatau, mo aga i-lodo godou mouli hagatau.

30:11  “Idimaa, taganoho deenei dela e-gowadu ko-au gi goodou dangi-nei la-hagalee haingadaa adu gi goodou, gei hagalee mogowaa-loo i-daha mo goodou.

30:12  Ma hagalee i-di langi, gi-de-helekai-hua goodou boloo, ‘Ma ko-ai dela gaa-hana gi-nua gi-di langi e-goweia di-maa gi gidaadou, gi-longono-gidaadou di-maa, gaa-mee di-daudali di-maa?’

30:13  Ma hogi hagalee i-baahi gi-golo o-di moana, gi-de-helekai-hua goodou boloo, ‘Ma ko-ai dela gaa-hana gi-di baahi i-golo di moana e-gaamai di-maa gi gidaadou, gi-longono-gidaadou di-maa, gaa-mee di-daudali di-maa?’

30:14  Deeai, agu helekai le e-hoohoo-adu hua gi goodou, i-lodo godou ngudu mo i-lodo godou hadu-manawa, e-mee-hua di-daudali go goodou.

30:15  “Mmada, dangi-nei au gu-dugu-adu gi godou mua di hilihili i-mehanga di humalia mo-di huaidu, i-mehanga di mouli mo-di made.

30:16  Maa goodou ga-daudali nia helekai Dimaadua di-godou God, ala e-gowadu ko-au gi goodou dangi-nei, maa goodou ga-aloho i Mee, ga-daudali ana helekai, ga-haga-gila-aga ana haganoho huogodoo, gei goodou gaa-hai digau e-maluagina, gei godou hagadili gi-muli ga-dogologowaahee. Dimaadua di-godou God ga-haga-maluagina goodou i-lodo tenua dela bolo ga-hai-henua ginai goodou.

30:17  Maa godou manawa gaa-huli gi-daha, ga-de-hagalongo, ga-haga-mogowaa goodou gi-daha mo Mee, ga-daumaha gi-nia balu-ieidu, ga-daudali nia maa,

30:18  au e-hagi-adu gi goodou dangi-nei, bolo goodou e-hai-loo gii-mmade. Godou laangi ala e-mouli-iei goodou hagalee waalooloo i-lodo tenua dela e-hula ginai goodou dela i-di baahi i-golo di Monowai Jordan, bolo ga-hai-henua ginai goodou.

30:19  Au e-gowadu gi goodou dangi-nei di hilihili i-mehanga di mouli mo-di made, i-mehanga di hagahumalia a God mo-di hagahuaidu a God. Gei au e-gahigahi di langi mo henuailala gi-hagadootonu di-godou mee dela e-hilihili. Hilihili-ina di mouli!

30:20  Aloho i Dimaadua di-godou God, hagalongo gi Mee, mo-di heia goodou gi-manawa-dahi gi Mee, gei goodou mo godou hagadili gaa-noho waalooloo i-lodo tenua dela ne-hagababa go Mee gi godou damana-mmaadua, go Abraham, Isaac mo Jacob.”

Chapter 31

31:1  Moses ga-helekai nia helekai aanei gi-nia daangada Israel huogodoo,

31:2  ga-helekai, “Ogu ngadau la-gu lau-madalua dangi-nei. Gei au gu-deemee di-dagi goodou, gei Dimaadua gu-helekai-mai gi-di-au bolo au hagalee hana gi-di baahi i-golo o Jordan.

31:3  Ma go Dimaadua di-godou God dela e-hana i godou mua gi-di baahi i-golo o Jordan. Mee ga-hunahuna gi-daha nia henua huogodoo ala i-golo, gei goodou ga-hagabagi digaula gi-daha mo nadau henua, gaa-noho goodou i-golo. Ma go Joshua dela gaa-hai di-godou dagi, gii-hai be nia helekai a Dimaadua.

31:4  Dimaadua ga-daaligi digaula, ga-haga-mmaa digaula gi-daha be dana hai dela ne-hai gi Sihon mo Og, nia king o digau Amor, mo dana hagahuaidu di-nau henua.

31:5  Dimaadua gaa-hai goodou gi-haga-magedaa digaula, gei goodou gaa-hai gi digaula gadoo be nia mee huogodoo ala ne-hagi-adu ko-au gi goodou.

31:6  Goodou gi-maaloo mo-di hagamahi. Goodou hudee mmaadagu i digaula, idimaa, Dimaadua di-godou God gaa-hana madalia goodou. Mee hagalee tanga gi-daha, gei hagalee diiagi goodou.”

31:7  Moses ga-gahigahi a Joshua ga-helekai gi mee i-mua digau huogodoo o Israel boloo, “Goe gi-maaloo mo-di hagamahi, idimaa, ma kooe dela gaa-dagi nia daangada aanei gi-hai-mee gi tenua dela ne-hagababa go Dimaadua gi nadau maadua-mmaadua.

31:8  Dimaadua gaa-hana i oo mua, ga-madalia goe. Mee hagalee de-langahia goe, be e-diiagi goe. Goe hudee madagu be manawa-logo.”

31:9  Moses gaa-hihi Nnaganoho a God, gaa-wanga gi digau hai-mee-dabu ala go nia dama Levi ala e-kae Tebedebe o-di Hagababa Dimaadua, mo ang-gi digau mmaadua huogodoo o Israel.

31:10  Moses ga-helekai gi digaula, “Daulia nia haganoho aanei i-nia hagaodi o-nia ngadau dagi-hidu huogodoo, i-di ngadau dela e-haga-maahede nia boibana, i-di madagoaa di budu Tagamiami o-nia Damaa-hale Hagaabili.

31:11  Daulia nia haganoho aanei i-mua nia daangada Israel hagatau i nadau dagabuli-mai e-daumaha ang-gi Dimaadua di-godou God, i dana gowaa dela ga-hilihili go Mee.

31:12  Haga-dagabuli-ina nia daangada huogodoo: nia daane mo nia ahina mono dama mono daangada henua-gee ala e-noho i-lodo godou waahale, gii-mee-ai digaula huogodoo di-longono, ge gii-kabe di hagalaamua Dimaadua di-godou God, mo-di daudali hagahumalia nia helekai huogodoo o nnaganoho aanei.

31:13  Di hai deenei, gei godou dama ala digi longono-ginaadou Nnaganoho a Dimaadua di-godou God, ga-longono-iei digaula, ga-iloo-ei ginaadou ga-hagalongo i-di waalooloo o di-nadau noho i-lodo tenua dela bolo ga-hai-mee ginai goodou, i-muli di-godou hula gi-di baahi i-golo o Jordan.”

31:14  Dimaadua ga-helekai gi Moses, “Do madagoaa e-made-iei goe la-gu-hoohoo-mai. Gahigahia-mai a Joshua, laha-mai a-mee gi dogu Hale-laa, gei Au gaa-wanga gi mee dana hegau.” Malaa, Moses mo Joshua gaa-hula gi-di Hale-laa deelaa.

31:15  Dimaadua ga-haga-gida Ia i-lodo di waduu-gololangi, gaa-duu i-di ngudu o-di bontai di Hale-laa deelaa.

31:16  Dimaadua ga-helekai gi Moses, “Mmada, do madagoaa e-made-iei goe la-gu-hoohoo-mai, gei nia daangada aanei ga-limalima-hua ga-diiagi Au, ga-daumaha gi-nia balu-god o tenua dela e-hula ginai digaula, gaa-oho dagu hagababa dela ne-hai ang-gi digaula.

31:17  I-di madagoaa deelaa, dogu hagawelewele gi digaula ga-gila-aga ga-damana. Au ga-diiagi digaula, gei digaula la-ga-daaligi gii-mmade. Nia haingadaa llauehe e-logo gaa-tale ang-gi digaula, gei digaula ga-modongoohia-ginaadou i-di madagoaa deelaa, bolo nia haingadaa llauehe e-logo aalaa la-guu-tale ang-gi ginaadou, idimaa Au, go di-nadau God, la-hagalee i nadau baahi.

31:18  Gei Au hagalee hagamaamaa digaula i-di laangi deelaa, idimaa, digaula guu-hai di huaidu mo-di daumaha gi-nia balu-ieidu.

31:19  “Deelaa-laa, hihia taahili deenei dolomeenei. Aago-ina gi-nia dama o Israel, e-hai di hagadootonu ni-aagu ang-gi digaula.

31:20  Idimaa, Au gaa-lahi digaula gi-lodo tenua tomo ge logo ono meegai, tenua dela ne-hagababa ko-Au gi nadau maadua-mmaadua. Digaula ga-miami ga-maaluu i-golo, gu-maluagina ang-gi ginaadou, gei digaula gaa-huli gi-nia balu-ieidu, ga-daumaha ginai, ga-diiagi au, gaa-oho dagu hagababa.

31:21  Di madagoaa nia haingadaa llauehe e-logo gaa-tale ang-gi digaula, taahili deenei la-ga-dadaahili-ai hua igolo, gaa-hai di hagadootonu, idimaa e-deemee di-de-langahia go nadau hagadili gi-muli. Au gu-iloo di-nadau hiihai dangi-nei, i-mua dagu lahi digaula gi tenua dela ne-hagababa ko-Au.”

31:22  Moses gaa-hihi taahili deenei i-di laangi hua deelaa, geia ga-aago nia dama o Israel taahili deelaa.

31:23  Gei Dimaadua ga-hagau a Joshua, di tama a Nun, ga-helekai gi mee, “Goe gi-maaloo, gei goe gi-hagamahi, idimaa, ma kooe dela gaa-lahi nia dama o Israel gi-lodo tenua dela ne-hagababa ko-Au gi digaula, gei Au ga-madalia goe.”

31:24  Moses guu-hihi Nnaganoho a God hagatau gi-lodo di beebaa,

31:25  gei dono madagoaa ne-lawa, gei mee ga-helekai gi digau hai-mee-dabu ala go nia dama Levi ala nogo benebene Tebedebe o-di Hagababa Dimaadua,

31:26  “Deenei di beebaa o Nnaganoho a God. Kae-ina, dugu-ina i-baahi Tebedebe o-di Hagababa Dimaadua di-godou God, e-hagi-aga di hagadootonu gi ana daangada i-di gowaa deelaa.

31:27  Au e-iloo bolo digaula e-manawa hamaaloo ge hai-baahi. Digaula nogo hai-baahi gi Dimaadua i-di waalooloo o dogu mouli, gei digaula ga-hai-baahi gi-nonua i-muli dogu made.

31:28  Haga-dagabuli-ina-mai gi ogu mua nia dagi o-nia madawaawa huogodoo mo digau aamua, gei au ga-hagi-anga gi digaula nia mee aanei. Au e-hiihai bolo di langi mo henuailala gi-hagadootonu gi-nia mee aanei.

31:29  Au e-iloo bolo i-muli-hua dogu made, nia daangada ga-haihai di huaidu, gaa-kili gi-daha agu mee ala ne-aago digaula. Gei di madagoaa gaa-dae-mai, gei digaula gaa-tale gi-di haingadaa, idimaa digaula gaa-hai nia mee ala ne-bule go Dimaadua bolo gi-hudee heia, gei digaula gaa-hai Dimaadua gi-hagawelewele.”

31:30  Moses gu-haga-modongoohia taahili deenei hagatau gi digau Israel ala e-hagalongo gi mee:

Chapter 32

32:1  “Di langi i-nua mo henuailala, hagalongo gi agu helekai gi digau Israel, hagalongo gii-donu.

32:2  Agu agoago ga-monnono be-nia madaua o-di uwa, ga-hagabudu i-hongo o henuailala gadoo be-di magalillili o-di ahiaalangi. Agu helekai gaa-doo be-di uwa gi-hongo nia dama-laagau, ga-honihoni be-di uwa ma-ga-honihoni gi-hongo nia geinga-tolo ala e-tomo-aga i-lala.

32:3  Gei au ga-hagadele ga-hagaamu di ingoo o Dimaadua, gei ana daangada ga-agoago dono aamua.

32:4  “Dimaadua la-go di-godou Dangada Abaaba Aamua, e-hai donu gei hagalee hai-gee i-lodo ana haihai huogodoo. Di-godou God le e-manawa-dahi ge e-donu. Mee e-hai di mee dela e-donu gei e-humalia.

32:5  Malaa, goodou hagalee manawa-dahi ge hagalee tau belee hai ana dama. Goodou la tenua e-honu di huaidu mo nia hagahuaidu huogodoo.

32:6  Goodou tenua dadaulia, e-hai behee: ma deenei di hai e-hai ang-gi Dimaadua? Go Mee go di-godou damana dela ne-hai goodou gii-hai tenua.

32:7  “Goodou gi-maanadu-ina di madagoaa i-mua-loo. Heeu-ina gi godou maadua gi-hagi-adu gi goodou nia mee ala ne-hai. Heeu-ina gi godou daangada mmaadua gi-hagi-adu gi goodou di madagoaa i-mua.

32:8  God Aamua Muginua ne-wanga nia gowaa gi-nia daangada. Ma go Mee dela ne-haga-noho nia daangada gi-nia gowaa ala e-noho-ai digaula. Mee guu-wanga tangada di-langi e-dahi ang-gi-di gowaa e-dahi.

32:9  Gei-ogo tuhongo dela ne-hilihili go Dimaadua la-go di hagadili ni Jacob.

32:10  “Mee ne-gidee digaula e-heehee-hua i-lodo di anggowaa, di gowaa lomo e-gonogono-ai di madangi maaloo. Mee gu-benebene hagahumalia digaula be dono huaidina donu.

32:11  Dimaadua gu-benebene a Israel gi-dee-doo, gadoo be-di ‘eagle’ e-aago ana dama gi-iloo di mamaangi, e-higahiga digaula i-hongo ono bakau.

32:12  Dimaadua hua modogoia ne-dagi ana daangada. Deai di god gee ne-hagamaamaa a-Mee ai.

32:13  “Mee guu-wanga gi digaula nnenua nnoonua gi-dagi-ina, gei digaula guu-gai nia meegai ala e-tomo i-golo. Digaula gu-gidee-ginaadou nia meegai maangala i-di gowaa haduhadu, nadau laagau-olib guu-tomo hagadubuagina i-lodo di gelegele haduhadu.

32:14  Nadau kau mo nadau kuudi guu-hai nadau milugu logowaahee. Nia siibi, nia kuudi mo nia kau digaula le e-kaedahi humalia. Nadau palaawaa mono waini e-koia e-kaedahi humalia gi-nonua.

32:15  “Nia daangada a God gu-maluagina, gei digaula gu-hai-baahi. Digaula guu-honu meegai, guu-hai nia daangada pedi, gei digaula gu-diiagi a God dela ne-hai ginaadou, ge guu-huli gi-daha mo di-nadau Hagamouli Aamua.

32:16  Nadau daumaha ang-gi nia balu-god guu-hai Dimaadua gi-dubua, nadau haihai huaidu guu-hai a-Mee gi-hagawelewele.

32:17  Digaula gu-tigidaumaha gi-nia balu-god, ala go nia god o nadau maadua-mmaadua e-de-iloo-ai, go nia god digau Israel digi hagalongo ginai i-mua.

32:18  Digaula gu-haga-de-langahia di-nadau God, di-nadau God Hagamouli Aamua, dela ne-wanga di mouli gi digaula.

32:19  “Di madagoaa Dimaadua ne-gidee-Ia di mee deenei, Mee gu-hagawelewele, guu-kili gi-daha ana dama-daane mo ana dama-ahina.

32:20  Mee ga-helekai, ‘Au hagalee hagamaamaa digaula, gii-mmada Au gi digaula be di-maa di-aha dela gaa-tale ang-gi digaula, ala e-manawa hamaaloo ge hagalee manawa-dahi.

32:21  Digaula guu-hai Au gi-dubua gi nadau balu-ieidu, guu-hai Au gi-hagawelewele gi nadau dadaumaha gi-nia balu-god, nia god ala hagalee nia god donu. Malaa, Au gaa-hai agu daangada donu gi-manawa-dubua mai i digau tuadimee balumee, gaa-hai agu daangada gi-hagawelewele mai i digau tuadimee de-kabemee.

32:22  Dogu hagawelewele ga-ulaula gadoo be-di ahi, gaa-dudu nia mee huogodoo i-hongo o henuailala. Dogu hagawelewele gaa-tugi i-di gowaa o digau mmade dela i-bahi-i-lala o henuailala, gaa-dudu hagatau nia hagamau o-nia gonduu.

32:23  “ ‘Au ga-haga-uda ang-gi digaula nia haingadaa llauehe gaa-hana-hua beelaa, gei Au ga-hai-hegau i agu amu-maalei huogodoo gi digaula.

32:24  Digaula ga-mmademmade i tau-magamaga mo-di magi welengina, ga-mmademmade i nadau magi huaidu huoloo. Gei Au ga-hagau agu manu lodo-geinga gi-heebagi gi digaula, ga-hagau agu gihaa poisin gi-gadigadia digaula.

32:25  Tauwa ga-haga-mmade nia daangada i-hongo nia ala. Nia guongo ga-huaidu ang-gi ginaadou i-di mmaadagu huoloo. Nia dama-daane mo nia dama-ahina ga-mmademmade. Nia dama mo digau mmaadua gaa-mmade labelaa.

32:26  Au bolo Au ga-hunahuna digaula hagatau la-gi-daha, gi-deemee dahi dangada e-langahia digaula.

32:27  Maa nei bolo Au gaa-hai beelaa, gei nadau hagadaumee gaa-bida hagaamu ginaadou, ga-hagahuaidu Au boloo, “Ma go gimaadou hua ala ne-haga- magedaa digaula, hagalee go Dimaadua!” ’

32:28  “Israel la digau nadau hagabaubau ai, digaula hagalee-loo nadau kabemee ai.

32:29  Digaula e-de-iloo-loo be ginaadou ne-aha ala gu-magedaa. Digaula e-de-iloo-ginaadou be di-maa di-aha dela ne-hai.

32:30  Ma ne-aha tangada e-dahi i nadau hagadaumee e-mee di-haga-magedaa ana daangada e-mana? Ma ne-aha nia daangada dogolua e-mee di-haga- magedaa nau daangada e-madangaholu-mana? Idimaa, Dimaadua go di-nadau God la-gu-diiagi digaula. Di-nadau God Aamua guu-kili digaula gi-daha.

32:31  Nadau hagadaumee e-iloo-ginaadou bolo nadau god donu le e-paagege-hua, hagalee maaloo be-di God o digau Israel.

32:32  Nadau hagadaumee e-huaidu gadoo be Sodom mo Gomorrah, e-huaidu gadoo be nia laagau-‘grape’ ala e-mmala mo poisin,

32:33  e-huaidu gadoo be nia waini ala ne-hai gi-nia poisin o-nia gihaa.

32:34  “Dimaadua e-langahia-e-Ia nia mee o nadau hagadaumee ne-hai, gei Mee e-tali-hua di madagoaa dela e-donu belee hagaduadua-ai digaula.

32:35  Dimaadua gaa-tala di hui, ga-hagaduadua digaula. Di madagoaa e-tinga-ai digaula la-gaa-dae-mai. Di laangi e-hagaduadua digaula la-gu-hoohoo-mai.

32:36  Di madagoaa Dimaadua ma-ga-gidee-Ia ana daangada bolo digaula la-gu-paagege, gei Mee ga-haga-dagaloaha digaula. Mee ga-dumaalia gi digau ala e-hai dono manawa, i dono madagoaa ma-ga-gidee-Ia bolo digaula la-deai nadau hagamaamaa ai.

32:37  Gei Dimaadua ga-heeu gi ana daangada boloo, ‘Aahee nia god maaloo ala nogo hagadagadagagee ginai goodou?

32:38  Goodou gu-haangai digaula gi-nia kiliidi o godou tigidaumaha, gei goodou guu-wanga gi digaula nia waini gi-inumia. Heia digaula gi-lloomoi gi goodou dolomeenei gi-hagamaamaa-ina goodou! Heia digaula gi-daawa-ina goodou gi-daha mo godou haingadaa!

32:39  “ ‘Ko-Au hua modogoau dela go God. E-deai dahi God i-daha mo Au ai! Au e-haga-made, gei Au e-haga-mouli, au e-haga-lauwa, gei Au e-hagahili. E-deai dahi dangada e-mee di-hai-baahi gi agu mee ala e-hai ai.

32:40  Go di-maa Au dela go-di God Mouli, deenei-laa Au e-dahi-aga dogu lima e-hai dagu hagababa hagamodudahi

32:41  bolo Au ga-akaa dagu hulumanu-dauwa dabadaba, gei Au gaa-hai di tonu la-gii-gila. Au gaa-tala di hui ang-gi ogu hagadaumee, gei Au ga-hagaduadua digau ala e-de-hiihai-mai gi-di-au.

32:42  Agu amu-maalei la-ga-haga-hali nadau dodo, gei dagu hulumanu-dauwa ga-daaligi gii-mmade digau huogodoo ala e-hai-baahi mai gi-di-Au. Au hagalee haga-mouli dahi dangada i digau ala e-heebagi-mai gi-di-Au. Digau ala gu-lauwa mo nia daangada galabudi hogi la-gaa-mmade huogodoo.’

32:43  “Nia henua ala i-golo, goodou gi-hagaamuina nia daangada Dimaadua. Mee e-hagaduadua digau huogodoo ala e-daaligi digaula. Mee e-tala di hui ang-gi ono hagadaumee, gei Mee e-dumaalia gi-nia hala o ana daangada.”

32:44  Moses mo Joshua dela go tama a Nun, meemaa e-huwahuwa taahili deenei, bolo gii-mee-ai nia daangada Israel gi-longono-ginaadou.

32:45  Di madagoaa a Moses guu-lawa dana agoago gi-nia daangada nia helekai a God,

32:46  gei mee ga-helekai, “Goodou e-hai-loo gi-daudali agu helekai ala ne-gowadu gi goodou dangi-nei. Tataanga-ina nia maa gi godou dama, gii-mee-ai digaula di-daudali nia agoago huogodoo a God mo-di manawa-dahi.

32:47  Nia agoago aanei la-hagalee nia balu-helekai hua. Nia agoago aanei la-go di-godou mouli donu. Hagalongo gi-nia maa, gei goodou ga-mouli waalooloo i-lodo tenua dela i-baahi i-golo o Jordan dela bolo ga-hai-henua ginai goodou.”

32:48  Go-di laangi la-hua, Dimaadua ga-helekai gi Moses,

32:49  “Hana gi-nia Gonduu Abarim ala i-lodo tenua go Moab dela i-di baahi gi-golo o-di waahale go Jericho, gaga gi tomo di Gonduu Nebo, gei goe ga-gidee tenua go Canaan, deelaa tenua gaa-wanga ko-Au gi-nia daangada Israel.

32:50  Gei goe gaa-made i-hongo di gonduu deelaa, gadoo be do duaahina go Aaron dela ne-made i-hongo di Gonduu Hor,

32:51  idimaa, goolua gu-hagalee manawa-dahi mai gi-di-Au i-mua nia daangada Israel. Di madagoaa goolua nogo i-baahi nia wai o Meribah, e-hoohoo gi-di waahale go Kadesh i-lodo di Anggowaa o Zin, goolua gu-haga-balumee Au i-mua nia daangada.

32:52  Goe ga-gidee haga-mogowaa tenua deelaa, gei goe hagalee e-ulu gi-lodo tenua dela e-wanga ko-Au gi-nia daangada Israel.”

Chapter 33

33:1  Aanei la nia hagahumalia a Moses, taane ni God, ne-haga-iloo gi-nia daangada Israel i-mua dono made.

33:2  Mee ga-helekai, “Dimaadua ne-haneia i-di Gonduu Sinai, ga-daamada ga-maahina gadoo be-di laa i-hongo Edom, ga-haga-maalama ana daangada mai di Gonduu Paran. Nia daangada di-langi e-madangaholu-mana nogo madalia a-Mee, gei di ahi dela e-gaa nogo i dono baahi gau-donu.

33:3  Dimaadua e-aloho i ana daangada, gei e-benebene digau ala e-hai-mee gineia. Gidaadou gaa-pala ang-gi ono babaawae, ga-hagalongo gi ana helekai.

33:4  Gidaadou e-daudali Nnaganoho a Moses ala ne-gaamai gi gidaadou, aalaa go nia mee e-kaedahi e-hagalabagau o tadau henua.

33:5  Dimaadua guu-hai di King o ana daangada Israel i-di madagoaa nadau madahaanau mo nia dagi ne-dagabuli-mai gi-di gowaa e-dahi.”

33:6  Moses ga-helekai i-di madawaawa Reuben boloo: “Ma e-aha maa digaula e-hogoohi, gei Reuben la-gi-hudee made gi-daha.”

33:7  Moses ga-helekai i-di madawaawa Judah boloo: “Meenei Dimaadua, gi-hagalongo gi nadau dangidangi i-di hagamaamaa. Hagabuni-ina digaula gi-nia madawaawa ala i-golo. Heebagi i nadau baahi, meenei Dimaadua, ge hagamaamaa-ina digaula i-di nadau hai-baahi gi nadau hagadaumee.”

33:8  Moses ga-helekai i-di madawaawa Levi boloo: “Meenei Dimaadua, Kooe haga-gila-ina do hiihai mai di haga-modongoohia o nia ‘Urim’ mo ‘Thummim’ mai baahi au gau hai-hegau, go digau Levi. Goe guu-lawa di-hagamada digaula i Massah, gei Goe gu-iloo bolo digaula le e-donu-hua i-nia wai o Meribah.

33:9  Digaula gu-hagalaamua Goe i-hongo nadau maadua, nadau duaahina-daane, mo nadau dama. Digaula gu-hagalongo gi au helekai, ge gu-daudali dau hagababa.

33:10  Digaula ga-aago-laa au daangada gi-daudalia au haganoho. Digaula gaa-hai nadau tigidaumaha ‘incense’ i oo mua, mo nadau tigidaumaha-dudu i-hongo dau gowaa dudu-tigidaumaha.

33:11  Meenei Dimaadua, hagamaamaa-ina nadau madawaawa gii-tomo maaloo. Manawa-lamalia gi nadau mee ala e-hai. Hunahuna-ina gi-daha nadau hagadaumee, ge hudee heia digaula gi-gila-aga labelaa.”

33:12  Mee ga-helekai i-di madawaawa Benjamin boloo: “Deenei di madawaawa a Dimaadua e-aloho-ai ge e-benebene. Mee e-madamada humalia i digaula i-di laangi dogomaalia, gei Mee e-noho i nadau baahi.”

33:13  Mee ga-helekai i-di madawaawa Joseph boloo: “Dimaadua gi-hagahumalia-ina nadau henua gi-nia uwa, mo nia wai mai bahi-i-lala o henuailala.

33:14  Nadau henua gi hagahumalia-ina gi-nia huwa-laagau ala e-haga-tomo-aga go-di laa. Hagahumalia-ina gi-nia huwa-laagau ala e-koia e-humalia di huwa i-nia madagoaa huogodoo e-huwa ai.

33:15  Nadau gowaa nnoonua namua mo nadau gonduu ala e-noho-hua beelaa la-gi-logowaahee nadau huwa-laagau ala e-hiihai ginai ginaadou.

33:16  Nadau henua gi-hagahonu gi-di hagahumalia dela ne-haga-maluagina go-di humalia o Dimaadua, dela ne-helekai mai i-lodo di ulaula o-di ahi i-lodo di laagau geinga. Nia maluagina aanei gii-tale ang-gi di madawaawa Joseph, idimaa, ma go mee dela ne-hai di tagi ni ono duaahina.

33:17  Joseph e-maaloo be-di kau-daane, e-maaloo be nia madaagoo o-di manu-‘ox’ o lodo-geinga. Ono madaagoo la digau e-mana duumaa o Manasseh, mo digau e-madangaholu mana duumaa o Ephraim. Ono madaagoo e-daalo nia henua llauehe huogodoo mo-di hono digaula gi-nia mada o henuailala.”

33:18  Mee ga-helekai i-nia madawaawa Zebulun mo Issachar boloo: “Zebulun la-gi-maluagina mai i nadau hagadau-huihui goloo i hongo tai. Nia maluagina o Issachar gi-damana mai i-lodo dono guongo dela e-noho-ai.

33:19  Digaula e-gahigahi-mai nia daangada gi di-nadau gonduu, gaa-hai nia tigidaumaha ala e-donu i-golo. Digaula e-gaamai nadau maluagina mai di tai mo mai di gelegele kene o tongotai.”

33:20  Mee ga-helekai i-di madawaawa Gad boloo: “Gi-hagaamuina Dimaadua dela ne-hai nadau henua gi-damana. Gad e-hai gadoo be-di laion de-madagu dela e-talitali belee gaui gi-daha di lima be-di libogo o dono hagadaumee.

33:21  Digaula guu-kae tenua e-kaedahi e-humalia ang-gi ginaadou. Tuhongo o tangada dagi la-ne-wanga gi digaula. Digaula gu-daudali nia helekai mo nia haganoho o Dimaadua i-di madagoaa nia dagi o Israel ne-dagabuli-mai gi-di gowaa e-dahi.”

33:22  Mee ga-helekai i-di madawaawa Dan boloo: “Dan le e-hai be tama-laion. Mee e-hobo gi-daha mai Bashan.”

33:23  Mee ga-helekai i-di madawaawa Naphtali boloo: “Mai di hiihai ni Dimaadua dela ne-haga-maluagina a Naphtali. Nadau henua e-hana gaa-dau-adu gi-di baahi gi-ngaaga o Tai o Galilee.”

33:24  Mee ga-helekai i-di madawaawa Asher boloo: “Asher la-gu-hagahumalia gi-nonua i-nia madawaawa ala i-golo. Mee gii-hai tangada e-hiihai ginai ono duaahina. Dono henua gi-maluagina gi-nia lolo-olib.

33:25  Ono waahale gi-duulia gi-nia bontai baalanga, gei mee gii-noho i-di aumaalia i-di waalooloo o dono mouli.

33:26  “Nia daangada Israel, e-deai dahi god i-golo e-hai be di-godou God ai, dela e-dele laa-lodo di langi i-nua i ono madamada, e-dele-mai i lodo nia gololangi e-hagamaamaa goodou.

33:27  God la-guu-duuli goodou i-nia madagoaa huogodoo. Ono lima la-go di-godou hagamaamaa gaa-hana-hua beelaa. Di-godou madagoaa nogo hula gi-mua, gei Mee gu-hagabagi gi-daha godou hagadaumee, gu-helekai-adu bolo gi-daaligidia digaula huogodoo gii-mmade.

33:28  Di hagadili ni Jacob le e-noho i-lodo di aumaalia, e-humalia ang-gi nadau henua honu meegai mo honu wai, i-di gowaa dela e-tiutiu-mai di magalillili o-di ahiaalangi.

33:29  Nia daangada Israel, e-maluagina huoloo go goodou! E-deai dahi henua e-hai be goe ai, dela ne-haga-dagaloaha go Dimaadua. Dimaadua la-go di-godou abaaba mo-di-godou hulumanu-dauwa. E-duuli goodou ge e-hai goodou gi-maaloo. Godou hagadaumee ga-lloomoi ga-tangitangi-adu gi goodou bolo goodou gi-dumaalia ang-gi ginaadou, gei goodou ga-dagadagahi digaula gi-lala.”

Chapter 34

34:1  Moses ga-hagatanga i-nia gowaa baba o Moab gaa-hana gi-di Gonduu Nebo, gaa-hana gi tomo di Gonduu Pisgah dela i bahi-i-dua o Jericho. Dimaadua ga-haga-mmada a Moses gi tenua hagatau: tenua go Gilead mo adu gi ngeia gi-di waahale go Dan,

34:2  mo tenua o Naphtali hagatau, mo nia henua o Ephraim mo Manasseh, mo tenua o Judah gaa-tugi i-di Tai go Mediterranean dela i bahi-i-dai,

34:3  mo-di baahi gi-ngaaga o Judah, mo-di gowaa baba dela i-mehanga o Zoar mo Jericho, deelaa go-di waahale iei nia niu.

34:4  Dimaadua ga-helekai gi Moses, “Deenei la-go tenua dela ne-hagababa ko-Au gi Abraham, Isaac, mo Jacob bolo e-hai-mee ginai nadau hagadili gi-muli. Au guu-hai goe gii-mmada gi tenua deelaa, gei goe hagalee hana gi-golo.”

34:5  Moses, di hege a Dimaadua, gaa-made i-golo i tenua go Moab, be-di hai a Dimaadua ne-helekai-ai bolo deelaa di gowaa e-made-ai a Moses.

34:6  Dimaadua guu-danu a Moses i-lodo di gowaa baba i-lodo Moab, i-baahi gi-golo o-di waahale go Beth=Peor. Tugi-mai gi dangi-nei, e-deai tangada e-iloo-ia di gowaa ne-danu a Moses ai.

34:7  Moses ne-made gei mee e-lau-madalua ono ngadau. Mee nogo maaloo hua, gei ono golomada nogo gidee-hua hagahumalia.

34:8  Nia daangada Israel gu-tangitangi gu-manawa-gee gi mee i-lodo nia laangi e-motolu i-nia gowaa baba i Moab.

34:9  Joshua tama-daane a Nun guu-honu i-di kabemee, idimaa, Moses ne-daahi-aga ono lima gi-hongo di libogo o-maa. Nia daangada Israel gu-hagalongo mo-di daudali a Joshua, ginaadou e-daahi-hua nia haganoho a Dimaadua ala ne-wanga gi Moses.

34:10  E-deai dahi soukohp i-golo mai mua e-hai be Moses i-lodo Israel ai. Dimaadua ne-helekai gi Moses hua hagammaa.

34:11  E-deai dahi soukohp i-golo dela guu-mee di-hai nia hagadilinga mogobuna haga-goboina gadoo be nia mee a Dimaadua ala ne-wanga gi Moses bolo gi-heia gi-di king o Egypt mo ana daangada aamua mo tenua huogodoo ai.

34:12  E-deai dahi soukohp i-golo ne-mee di-hai nia mee humalia mo nia mee hagamadagudagu-dangada a Moses ne-hai i-mua digau Israel huogodoo ai.