CSlElizabeth - I Maccabees

Chapter 1

1:1  И бысть, егда поражаше Александр Македонский сын Филиппа, иже изыде от земли Хеттиим, порази и Дариа царя Персскаго и Мидскаго, и воцарися вместо его первый во Елладе,

1:2  и состави брани многи, и одержа твердыни многи, и уби цари земския,

1:3  и пройде даже до краев земли, и взя корысти многих языков. И умолче земля пред ним. И возвысися, и вознесеся сердце его.

1:4  И собра силу крепку зело, и началствова над странами и языки и мучительми, и быша ему в данники.

1:5  И по сих паде на ложе и позна, яко умирает:

1:6  и созва отроки своя благородныя, иже с ним бяху совоспитани от юности его, и раздели им царство свое еще жив сый.

1:7  И царствова Александр лет дванадесять и умре.

1:8  И обладаша отроцы его кийждо в месте своем.

1:9  И возложиша вси диадимы по смерти его, и сынове их по них лета многа, и умножиша злая на земли.

1:10  И изыде от них корень греха Антиох Епифан, сын Антиоха царя, иже бе залогом в Риме: и царствова в лете сто тридесять седмем царства Еллинскаго.

1:11  Во днех тех изыдоша от Израиля сынове беззаконнии и наустиша многих глаголюще: пойдем и завещаем завет с языки, иже окрест нас, яко отнележе отлучихомся от них, обретоша нас многа злая.

1:12  И благоувидеся слово во очию их:

1:13  и предизбрашася нецыи от людий и идоша ко царю: и даде им власть творити оправдания языческая.

1:14  И создаша (себе) училище во Иерусалиме по законом языческим.

1:15  И сотвориша себе необрезание, и отступиша от завета святаго, и сопрягошася языком, и продашася еже творити лукавое.

1:16  И уготовася царство пред Антиохом: и умысли царствовати во Египте, яко да царствует над двема царствома.

1:17  И вниде во Египет в народе тяжце, на колесницах и на слонех, и на всадниках и на кораблех многих.

1:18  И состави брань на Птоломеа царя Египетскаго: и убояся Птоломей от лица его и побеже, и падоша язвени мнози.

1:19  И взяша грады тверды в земли Египетстей: и взя корысти земли Египетския.

1:20  И обратися Антиох, повнегда порази Египта во сто четыредесять третие лето: и взыде на Израиля и на Иерусалим в народе тяжце,

1:21  и вниде во святилище с гордынею, и взя олтарь златый и светилник свещный и вся сосуды его,

1:22  и трапезу предложения и возлиялники, и фиалы и кадилницы златыя, и катапетасму и венцы и украшение златое, еже на лицы церкви (бяше), и сокруши вся:

1:23  и взя сребро и злато и сосуды вожделенныя: и взя сокровища тайная, ихже обрете.

1:24  И взем вся отиде в землю свою, и сотвори убийство, и глагола в гордости велицей.

1:25  И бысть плачь велик во Израили на всяцем месте их.

1:26  И возстенаша началницы и старейшины, девы и юноши изнемогоша, и красота женская изменися.

1:27  Всяк жених прия плачь, и седящая на одре брачне бысть в печали.

1:28  И потрясеся земля на обитающих на ней, и весь дом Иаковль облечеся студом.

1:29  И по двою лету дний посла царь началника данем во грады Иудины. И прииде во Иерусалим с народом великим

1:30  и глагола к ним словеса мирная во льсти. И вероваша ему. И нападе на град внезапу и порази его язвою великою и погуби люди многи от Израиля:

1:31  и взя корысти града и сожже его огнем, и разори домы его и стены его окрест:

1:32  и плениша жен и чад, и скоты разделиша,

1:33  и оградиша град Давидов стеною великою и крепкою и башнями крепкими, и бысть им в крепость:

1:34  и посадиша тамо людий грешников, мужей беззаконных, и возмогоша в ней:

1:35  и положиша оружия и брашна, и собираху корысти Иерусалимския, и полагаху тамо: и быша в сеть велику,

1:36  и бысть в ловителство святыни и в диавола лукаваго Израилю выну.

1:37  И пролияша кровь неповинную окрест святилища и оскверниша святыню.

1:38  И бежаша обитающии во Иерусалиме их ради, и бысть обитание чуждим: и бысть чуждо семени рождения своего, и чада его оставиша его.

1:39  Святыня его разорена яко пустыня, праздницы его обращени суть во плачь, субботы его в поношение, честь его во уничижение:

1:40  по славе его умножися безчестие его, и высота его обращена бысть во плачь.

1:41  И писа царь Антиох всему царству своему, да будут вси людие едино,

1:42  и оставит кийждо закон свой. И соизволиша вси языцы по слову царя (Антиоха).

1:43  И мнози от Израиля изволиша служению его и пожроша идолом и оскверниша субботу.

1:44  И посла царь книги рукою вестников во Иерусалим и во грады Иудины, да пойдут вслед законов чуждих земли

1:45  и возбранят всесожжения и жертву и возлияние от святыни, и омерзят субботы и праздники,

1:46  и осквернят святыню и святых,

1:47  и созиждут требища и капища и кумирницы, и да жрут мяса свиная и скоты общыя:

1:48  и да оставят сыны своя необрезаны, еже осквернити душы их во всяцей нечистоте и осквернении,

1:49  яко да забудут закон и изменят вся оправдания (Божия).

1:50  И иже аще не сотворит по глаголу цареву, да умрет.

1:51  По всем словесем сим написа всему царству своему и пристави надзиратели над всеми людьми: и повеле градом Иудиным жрети во всяцем граде.

1:52  И собрашася мнози от людий к ним, всяк оставивый закон Господень: и сотвориша лукавая на земли

1:53  и положиша Израиля в тайных во всяцем убежищи их.

1:54  И в пятыйнадесять день месяца Хаслева, в лето сто четыредесять пятое создаша мерзость запустения на олтари (Божии), и во градех Иудиных окрест создаша требища.

1:55  И пред дверьми домов и на стогнах кадяху,

1:56  и книги закона (Божия), ихже обретоша, сожгоша огнем, раздирающе (их).

1:57  И идеже обреташеся у кого книга завета Господня, и аще кто соизволяше закону Господню, по повелению цареву закалаху его.

1:58  В силе своей творяху сице людем Израилевым, обретающымся во всяцем месяце и месяце во градех.

1:59  И в двадесять пятый день месяца жряху в капищи, еже бе на олтари.

1:60  И жен обрезавших чада своя закалаша по повелению (цареву),

1:61  и обешаху детища за шии их, домы их расхищаху, и обрезавших я умерщвляху.

1:62  И мнози от людий Израилевых удержашася и утвердишася в себе, еже не ясти скверных,

1:63  и избраша паче умрети, неже осквернитися брашны, и не хотеша преступити закона Божия святаго: и заклани быша.

1:64  И бысть гнев велий на Израиля зело.

Chapter 2

2:1  Во днех тех воста Маттафиа сын Иоаннов, сына Симеоня, священник от сынов Иоаривлих от Иерусалима, и седе во Модине.

2:2  И имяше сынов пять: Иоанна, иже проименовашеся Гаддис,

2:3  и Симона, иже проименовашеся Фассис,

2:4  Иуду, иже звашеся Маккавей,

2:5  Елеазара, иже проименовашеся Аваран, и Ионафана, иже проименовашеся Апфус.

2:6  И виде хуления бывающая во Иудеи и во Иерусалиме,

2:7  и рече: увы мне! Почто рожден есмь видети сотрение людий моих и сотрение града святаго, и седети зде, внегда предаватися ему в руце врагов и святыни в руки чуждих?

2:8  Бысть храм его яко человек безчестен,

2:9  сосуды славы его пленени отнесени суть, побиени суть младенцы его на стогнах, и юношы его падоша мечем вражиим:

2:10  кий язык не наследова царства его и не одержа корыстей его?

2:11  Вся утварь его взята есть, вместо свободнаго бысть в раба:

2:12  и се, святая наша и красота наша и слава наша опусте, и оскверниша я языцы:

2:13  почто убо нам еще жити?

2:14  И растерза ризы своя Маттафиа и сынове его, и облекошася во вретища, и плакаша зело.

2:15  И приидоша от царя принуждающии ко отступлению во град Модин, да пожрут.

2:16  И мнози от Израиля приложишася к ним: Маттафиа же и сынове его собрашася.

2:17  И отвещаша посланнии от царя и реша Маттафии глаголюще: князь и преславный и велий еси во граде сем, и утвержден в сынех и братиих:

2:18  ныне убо приступи первый и сотвори повеление царево, якоже сотвориша вси языцы и мужие Иудины и оставшии во Иерусалиме, и будеши ты и дом твой посреде другов царевых: и ты и сынове твои прославитеся в сребре и злате и в дарех мнозех.

2:19  И отвеща Маттафиа и рече гласом велиим: аще и вси языцы в дому царствия царя слушают его, еже отступити комуждо от служения отец своих, и соизволиша в заповедех его:

2:20  но аз и сынове мои и братия моя повинуемся закону отец наших:

2:21  милостив нам (буди, Боже), еже оставити закон и оправдания:

2:22  словес царевых не послушаем, еже преступити служение наше на десно или на шуее.

2:23  И яко преста глаголати словеса сия, приступи муж Иудеанин пред очима всех жрети в капищи, еже в Модине, по повелению цареву.

2:24  И виде Маттафиа и возревнова, и вострепеташа внутренняя его, и возжжеся ярость его по суду (закона), и наскочив разсече его в капищи.

2:25  И мужа, егоже царь посла, иже принуждаше жрети, уби во время оно и капище разори.

2:26  И возревнова о законе, якоже же сотвори Финеес Замврию сыну Саломлю.

2:27  И возопи Маттафиа во граде гласом велиим глаголя: всяк ревнуяй о законе и стояй в завете да изыдет вслед мене.

2:28  И отбежа сам и сынове его в горы, и оставиша, елика имеяху во граде.

2:29  Тогда снидоша мнози ищуще суда и правды в пустыню,

2:30  и седоша ту сами, и сынове их и жены их, и скоти их, яко умножишася на них злая.

2:31  И возвещено бысть мужем царевым и силам, иже бяху во Иерусалиме граде Давидове, яко отидоша мужие нецыи, иже разориша заповедь царску, в места тайная в пустыню.

2:32  И текоша вслед их мнози, и постигше их ополчишася на них, и составиша противу их брань в день субботный,

2:33  и рекоша к ним: доныне доволно, изыдите и сотворите по слову цареву, и живи будете.

2:34  И реша: не изыдем, ни сотворим по слову цареву, еже осквернити день субботный.

2:35  И ускориша на них брань.

2:36  И не отвещаша им, ниже камене вергоша на них, ниже заградиша мест тайных, рекуще:

2:37  умрем вси в простоте нашей, свидетеле будут на нас небо и земля, яко неправо погубляете нас.

2:38  И восташа на них в брани в субботы, и умроша сии и жены их, и сынове их и скоти их, даже до тысящи душ человек.

2:39  И позна Маттафиа и друзи его, и плакашася о них зело.

2:40  И рече муж искреннему своему: аще вси сотворим, якоже братия наша сотвориша, и не воополчимся на языки о душах наших и оправданиих наших, ныне нас скоро искоренят от земли.

2:41  И умыслиша в день он глаголюще: всяк человек, иже аще приидет к нам на брань в день субботный, ополчимся противу его, и не умрем вси, якоже умроша братия наша в тайных.

2:42  Тогда собрася к ним сонмище Иудейское крепцыи в силе от Израиля, всяк соизволяяй закону:

2:43  и вси иже бежаша от злых, приложишася им и быша им во утверждение.

2:44  И собраша воев и побиша грешных во гневе своем и мужей беззаконных в ярости своей: прочии же бежаша во языки спастися.

2:45  И обыде Маттафиа и друзи его, и разориша капища,

2:46  и обрезаша отроки необрезаныя, еликих обретоша в пределех Израилевых в силе,

2:47  и погнаша сынов гордыни, и успе дело в руку их:

2:48  и удержаша закон от руки языков и от руки царей, и не даша рога грешнику.

2:49  И приближишася дние Маттафии умрети, и рече сыном своим: ныне укрепися гордыня и обличение, и время низвращения и гнев ярости:

2:50  и ныне, чада, возревнуйте закону и дадите душы вашя за завет отцев наших.

2:51  Помяните дела отец наших яже сотвориша в родех своих, и приимете славу велию и имя вечное.

2:52  Авраам не во искушении ли обретен есть верен, и вменися ему в правду?

2:53  Иосиф во время тесноты своея сохрани заповедь и бысть господин Египту.

2:54  Финеес отец наш внегда возревнова ревностию, прият завет священства вечнаго.

2:55  Иисус, егда исполни слово, бысть судия во Израили.

2:56  Халев, егда засвидетелствова в церкви, восприя земли наследие.

2:57  Давид во своей милости наследова престол царствия во век века.

2:58  Илиа, егда возревнова ревностию закона, взяся даже на небо.

2:59  Ананиа, Азариа, Мисаил верующе спасошася от пламене.

2:60  Даниил в простоте своей изятся от уст львовых.

2:61  И тако помышляйте по роду и роду, яко вси уповающии Нань не изнемогут.

2:62  И от словес мужа грешна не убойтеся, понеже слава его в мотыла и в червие:

2:63  днесь вознесется, а утре не обрящется, яко обратися в персть свою, и помышление его погибе.

2:64  И вы, сынове, укрепитеся и мужайтеся в законе, яко в нем прославитеся.

2:65  И се, Симеон брат ваш, вем, яко муж совета есть, того послушайте вся дни, той будет вам во отца.

2:66  И Иуда Маккавей, сей крепок в силе от юности своея, сей будет вам началник воинства и сотворит брань людем.

2:67  И вы приведите к себе вся творцы закона и отмстите мщение людий ваших:

2:68  воздайте воздаяние языком и внемлите в заповеди закона.

2:69  И благослови их: и приложися ко отцем своим.

2:70  И умре в лето сто четыредесять шестое: и погребоша его сынове его во гробех отец его в Модине, и плакаша его весь Израиль плачем велиим.

Chapter 3

3:1  И воста Иуда нарицаемый Маккавей сын его вместо его.

3:2  И помогаху ему вси братия его и вси елицы прилепишася ко отцу его, и ополчахуся ополчением Израиль с веселием.

3:3  И распространи славу людем своим: и облечеся в броня яко исполин и препоясася оружием своим бранным, и состави рати, защищая ополчения мечем своим,

3:4  и уподобися льву в делех своих, и яко скимен рыкающь в ловитве:

3:5  и погна беззаконныя изследуяй, и смущающих люди его пожже пламенем.

3:6  И слякошася беззаконнии от страха его, и вси делателе беззакония смятошася, и благопоспешно быти спасение рукою его.

3:7  И огорчи цари многи и возвесели Иакова в делех своих, и даже до века память его во благословение:

3:8  и пройде грады Иудины, и погуби нечестивых от них, и отврати гнев от Израиля,

3:9  и именит бысть даже до последних земли, и собра погибающих.

3:10  Аполлоний же собра языки и от Самарии силу велию, еже ратовати на Израиля.

3:11  И уведа Иуда и изыде во сретение ему, и порази его и уби того: и падоша язвении мнози, а прочии убегоша.

3:12  И взя корысти их, и мечь Аполлониев отя Иуда, и бысть воюя им вся дни.

3:13  И услыша Сирон началник воев Сирских, яко собра Иуда совокупление и церковь верных с ним исходящих на брань,

3:14  и рече: сотворю себе имя, и прославлюся в царствии, и поборю Иуду и сущих с ним и уничижающих слово царево.

3:15  (И уготовася) и приложи еже взыти: и взыде с ним полк нечестивых крепок помощи ему и сотворити отмщение на сынех Израилевых.

3:16  И приближися даже до восхода Вефоронска: и изыде Иуда во сретение ему в мале.

3:17  Егда же увидеша полк грядущий во сретение им, реша Иуде: како можем в мале суще ополчатися противу множества толикаго крепкаго? И мы утруждени есмы постом днесь.

3:18  И рече Иуда: удобь есть объяти многих рукою малых: и несть разнствия пред Богом небесным спасти во многих или в малых:

3:19  яко не во множестве воев одоление брани есть, токмо от небесе крепость:

3:20  сии грядут к нам во множестве укоризны и беззакония, еже исторгнути нас и жены нашя и чада наша, еже взяти корысти нашя,

3:21  мы же ополчаемся за душы нашя и законы нашя:

3:22  и Сам Господь сокрушит их пред лицем нашим, вы же не устрашитеся их.

3:23  Якоже преста глаголати, и наскочи на них внезапу, и сотреся Сирон и вои его пред ним:

3:24  и погна его в низхождение Вефорона даже до поля: и падоша от них яко осмь сот мужей, прочии же побегоша в землю Филистимлю.

3:25  И нападе страх Иудин и братии его и боязнь на вся языки, яже окрест их.

3:26  И дойде до царя имя его, и о ополчениих Иудиных поведаху вси языцы.

3:27  Егда же услыша царь Антиох словеса сия, разгневася яростию, и послав собра силы вся царства своего, полк крепок зело:

3:28  и отверзе сокровище свое, и даде оброки воином своим на лето, и заповеда им в лето быти готовым на всяку потребу.

3:29  И виде, яко оскуде сребро от сокровищ, и дани от стран малы, ради несогласия и язвы, яже сотвори на земли, да возмет законная, яже бяху от первых дний.

3:30  И устрашися, да не вознеимеет единою и дважды в росходы и даяния, яже даяше прежде пространною рукою, и избыточествова паче царей бывших прежде.

3:31  И смятеся душею своею зело, и умысли ити в Персиду и прияти дани от стран и собрати сребра много.

3:32  И остави Лисию человека славна и от рода царска над вещьми царскими, от реки Евфрата даже до предел Египетских:

3:33  и питати Антиоха сына своего, дондеже возвратится сам.

3:34  И предаде ему пол силы и слонов и заповеда ему о всех, ихже совеща, и о обитающих во Иудеи и Иерусалиме,

3:35  послати на них силу, еже сокрушити и исторгнути крепость Израилеву и останок Иерусалима, и отяти память их от места,

3:36  и вселити сынов инородных во всех пределех их, и по жребию разделити землю их.

3:37  И царь взя пол силы оставших и изыде от Антиохии от града царства своего, лета сто четыредесять седмаго: и прейде Евфрат реку и прохождаше в вышния страны.

3:38  И избра Лисиа Птоломеа сына Дорименова, и Никанора, и Горгию мужы сильныя от другов царевых.

3:39  И посла с ними четыредесять тысящ мужей и седмь тысящ конников, еже ити в землю Иудину и растлити ю по словеси царску.

3:40  И отидоша со всею силою своею, и приидоша, и ополчишася близ Аммаума на земли полевой.

3:41  И слышаша купцы страны тоя имя их, и взяша сребро и злато много зело и отроки: и приидоша в станы, да возмут сынов Израилевых в рабы, и приложишася к ним вои Сирския и земли иноплеменников.

3:42  И виде Иуда и братия его, яко умножишася злая, и вои ополчахуся в пределех их: и познаша словеса царева, яже повеле людем сотворити в погубление и скончание.

3:43  И рече кийждо ко искреннему своему: востанем за истребление людий наших и ополчимся за люди нашя и святыя.

3:44  И собрася сонм еже быти готовым на брань и еже молитися и просити милости и щедрот.

3:45  И Иерусалим бе необитаемь аки пустыня: не бе входяй и исходяй от порождений его, и святыня попрана, и сынове инородных в краеградии, бысть обиталище языком: и взяся веселие от Иакова, и оскуде (ту) сопель и гусли.

3:46  И собрашася и приидоша в Массифу прямо Иерусалиму, понеже место молитвы в Массифе первее Израилю.

3:47  И постишася того дне, и облекошася во вретища, и пепел посыпаша на главы своя, и растерзаша одеяния своя,

3:48  и распростроша книгу закона, о нихже испытаху языцы написати на них подобия идол своих,

3:49  и принесоша ризы святителския и первородная и десятины: и воздвигнуша назиреев, иже наполниша дни,

3:50  и возопиша гласом (велиим) на небо, рекуще: что сотворим сим и камо их отведем?

3:51  И Святая Твоя попрашася и осквернишася, и священницы Твои в скорби и в смирении:

3:52  и се, языцы собрашася на ны, да расторгнут нас: Ты веси, яже помышляют на нас:

3:53  како возможем стати пред лицем их, аще не Ты поможеши нам?

3:54  И вострубиша трубами и возопиша гласом велиим.

3:55  И посем постави Иуда воеводы людий, тысящники и сотники, и пятьдесятники и десятоначалники.

3:56  И рекоша созидающым домы и обручающым жены, и насаждающым винограды и боязливым возвратитися комуждо в дом свой по закону.

3:57  И воздвижеся полк и ополчися на юг Аммаума.

3:58  И рече Иуда: препояшитеся, и будите в сыны сильны, и будите готови в заутрие ополчитися на языки сия, иже собрашася на ны растерзати нас и святая наша:

3:59  яко лучше есть нам умрети в брани, неже видети злая людий наших и святых:

3:60  и якоже воля будет на небеси, тако сотворит.

Chapter 4

4:1  И взя Горгиа пять тысящ мужей и тысящу конник избранных, и подвигоша полк нощию,

4:2  еже напасти на полк Иудейский и побити их внезапу, и сынове краеградия быша ему вождеве.

4:3  И услыша Иуда, и воста сам и сильнии, побити силу цареву, яже в Еммауме:

4:4  еще бо силы расточены быша от полка.

4:5  И прииде Горгиа в полк Иудин нощию и ни единаго обрете: и искаше их в горах, понеже рече: бежат сии от нас.

4:6  И вкупе со днем явися Иуда на поли со тремя тысящами мужей: обаче щитов и мечей не имяху, якоже хотяху.

4:7  И видеша полк языческий крепок вооружен и конники окрест его, и сии научени брани.

4:8  И рече Иуда мужем, иже с ним бяху: не убойтеся множества их и устремления их не ужасайтеся:

4:9  помяните, како спасени быша отцы наши в мори Чермнем, егда гоняше их фараон с вои многими:

4:10  и ныне возопиим на небо, негли како умилосердится на ны и помянет завет отцев наших и сокрушит полк сей пред лицем нашим днесь:

4:11  и уведят вси языцы, яко есть Избавляяй и Спасаяй Израиля.

4:12  И возведоша иноплеменницы очи свои и видеша их грядущих сопротиву,

4:13  и изыдоша из полка на брань и вострубиша иже со Иудою.

4:14  И сразишася: и сотрени быша языцы и побегоша в поле,

4:15  последнии же вси падоша мечем: и прогнаша их даже до Ассаримофа и даже до поль Идумейских и Азотских и Иамнийских, и падоша от них до триех тысящ мужей.

4:16  И возвратися Иуда и вои его от гонения вслед их,

4:17  и рече к людем: не вожделейте корыстей, понеже брань противу нас:

4:18  и Горгиа и вои его близ нас на горе: но стойте ныне противу врагов наших и поборите их, и по сих возмете корысти без боязни.

4:19  И еще глаголющу Иуде сия, се, явися часть некая приницающая с горы.

4:20  И виде, яко в бег обратишася, и зажгоша полк, иже суть со Иудою, дым бо зримый являше бывшее.

4:21  Смотрящии же сия убояшася зело: видяще же ополчение Иудино в поли готово на брань, бежаша вси в землю иноплеменников.

4:22  И обратися Иуда на корысти ополчения:

4:23  и взя злата много и сребра, и иакинфа и порфиры морския, и богатства велика.

4:24  И возвращающеся песнь пояху и благословляху Бога небеснаго, яко благ есть, яко в век милость Его.

4:25  И бысть спасение велико Израилю в день он.

4:26  Елицы же от иноплеменников уцелеша, пришедше возвестиша Лисии вся случившаяся.

4:27  Он же слышав уны душею и опечалися, яко не яже хотяше, такова быша Израилю, и не какова заповеда ему царь, сицевая сбышася.

4:28  И во грядущее лето собра Лисиа мужей избранных шестьдесят тысящ и конников пять тысящ, да побиет Иерусалим.

4:29  И приидоша во Идумею и ополчишася во Вефсурех, и срете их Иуда с десятию тысящьми мужей.

4:30  И виде полк крепок, и помолися, и рече: благословен еси, Спасе Израилев, сокрушивый стремление сильнаго рукою раба Твоего Давида, и предал еси полк иноплеменных в руки Ионафана сына Сауля и носящаго оружие его:

4:31  заключи полк сей рукою людий Твоих Израиля, и да постыдятся о силе и коннице своей:

4:32  даждь им боязнь и растай дерзость силы их, и да поколеблются сотрением своим:

4:33  низложи их мечем любящих Тя, и да восхвалят Тебе вси ведущии имя Твое в песнех.

4:34  И составиша брань, и падоша от полка Лисии до пяти тысящ мужей, и падоша пред ними.

4:35  Видя же Лисиа своего ополчения бывшее бежание, а Иудину бывшую дерзость, и яко готови суть или жити, или умрети храбро, отиде во Антиохию и собираше чуждих воев: и умножив бывшее воинство, умысли паки приити на Иудею.

4:36  Рече же Иуда и братия его: се, сотрени суть врази наши, взыдем ныне очистити святая и обновити.

4:37  И собрася весь полк и взыдоша на гору Сион:

4:38  и видеша святыню опустошену, и жертвенник осквернен, и врата сожжена, и в притворех возрастоша древие аки в дубраве, или аки во единей от гор, и пастофориа разбиена.

4:39  И растерзаша ризы своя и плакаша плачем велиим, и возложиша пепел на главы своя,

4:40  и падоша лицем на землю, и вострубиша трубным знамением, и возопиша на небо.

4:41  Тогда повеле Иуда мужем ратовати сущих в краеградии, дондеже очистит святая.

4:42  И избра священники непорочны волители закона Божия:

4:43  и очистиша святая и отвергоша камение осквернения в место нечисто:

4:44  и советоваша о жертвеннице всесожжения оскверненем, что ему сотворят:

4:45  и нападе им совет благ разорити его, да не когда будет им в поношение, яко оскверниша его языцы. И разориша жертвенник,

4:46  и положиша камение на горе храма на месте приличнем, дондеже приидет пророк отвещати о них:

4:47  и взяша камение цело по закону и создаша жертвенник нов по прежнему.

4:48  И создаша святая и вся яже внутрь храма, и притворы освятиша,

4:49  и сотвориша сосуды святыя новы, и внесоша светилник и жертвенник всесожжений и фимиамов и трапезу во храм,

4:50  и кадиша на жертвеннице, и возжгоша светилники, яже на подсвещнице, и светяху во храме,

4:51  и положиша на трапезе хлебы и простроша катапетасмы, и скончаша вся дела, яже творяху.

4:52  И зело рано восташа в пятый и двадесятый день месяца девятаго: сей месяц Хаслев, сто четыредесять осмаго лета.

4:53  И принесоша жертву по закону на олтарь всесожжений новый, егоже сотвориша:

4:54  по времени и по дни, в оньже оскверниша его языцы, во он обновися в песнех и гуслех и кинирех и в кимвалех.

4:55  И падоша вси людие на лице свое и поклонишася, и благословиша на небо Благопоспешившаго им:

4:56  и сотвориша обновление олтаря дний осмь, и принесоша всесожжения с веселием, и пожроша жертву спасения и хваления,

4:57  и украсиша сущее пред лицем храма венцы златыми и щитами, и обновиша врата и пастофориа, и поставиша двери.

4:58  И бысть веселие в людех велико зело, и отвращено бысть поношение языков.

4:59  И устави Иуда и братия его и весь собор Израилев, да празднуются дние обновления олтаря во времена своя на всяко лето дний осмь, от двадесять пятаго дне месяца Хаслев с веселием и радостию.

4:60  И создаша во время оно гору Сион, окрест стены высокия и пирги крепки, да не когда пришедше языцы поперут я, якоже прежде сотвориша.

4:61  И посади ту воев хранити ю, и утвердиша ю хранити Вефсуру, еже имети людем в твердыню противу лица Идумеи.

Chapter 5

5:1  И бысть егда услышаша языцы окрест, яко создася олтарь и обновися святыня якоже прежде, и разгневашася зело:

5:2  и совещашася погубити род Иаковль, иже беху посреде их, и начаша убивати в людех и истребляти.

5:3  И ратоваше Иуда на сыны Исавовы во Идумеи, яже во Акраватине, понеже обседяху Израиля: и порази их язвою великою, и утесни их, и взя корысти их.

5:4  И помяну злобу сынов Веаних, иже беху людем в сеть и в соблазн, во еже ловити им на путех.

5:5  И затворишася от него в пиргех, и наступи на них, и прокля их, и зажже пирги их огнем, со всеми яже в них бяху.

5:6  И пройде на сыны Аммони, и обрете руку крепку и люди многи, и Тимофеа вожда их.

5:7  И состави на них брани многи, и сотрени суть пред лицем его, и поби их,

5:8  и взя Иазира и дщери его, и возвратися во Иудею.

5:9  И собрашася языцы иже в Галаадитиде противу Израилтяном сущым в пределех их, да избиют их. И побегоша в Дафему твердыню.

5:10  И послаша писание ко Иуде и братии его, рекуще: собрашася на ны языцы, иже окрест нас, избити нас,

5:11  и готовятся приити и взяти твердыню, в нюже вбегохом, и Тимофей есть воевода сил их:

5:12  ныне убо пришед избави нас от руки их, яко паде множество от нас:

5:13  и вси братия наша сущии в местех Тувииних убиени суть, и плениша жен их и чад их и имения их, и погубиша тамо яко тысящу мужей.

5:14  И еще писания чтяхуся, и се, инии вестницы приидоша от Галилеи в раздраных ризах, возвещающе по словесем сим, рекуще:

5:15  собрашася на нас от Птолемаиды и Тира, и Сидона и всея Галилеи иноплеменник, еже искоренити нас.

5:16  Егда же услыша Иуда и людие словеса сия, собрася собор велик усоветовати, что сотворят братиям своим сущым в скорби и воюемым от них.

5:17  И рече Иуда Симону и брату своему: избери себе мужы и иди, и избави братию твою сущую в Галилеи: аз же и брат мой Ионафан пойдем в Галаадит.

5:18  И остави Иосифа сына Захариина и Азарию воеводы людем с прочими воины во Иудеи на хранение,

5:19  и заповеда им, глаголя: прилежите людем сим и не сотворите брани на языки, дондеже мы возвратимся.

5:20  И отделиша Симону мужей три тысящы, да идет в Галилею, Иуде же осмь тысящ мужей в Галаадит.

5:21  И иде Симон в Галилею и состави брани многи на языки, и сотрошася языцы от лица его,

5:22  и погна вслед их даже до врат Птолемаиды: и падоша от язык яко три тысящы мужей, и взя корысти их,

5:23  и поят сущих в Галилеи и во Арваттисех с женами и чады, и вся елика бяху им, и приведе во Иудею с веселием велиим.

5:24  И Иуда Маккавей и Ионафан брат его преидоша Иордан, и идоша путь триех дний в пустыни,

5:25  и сретоша Наватеев, и прияша их мирно, и поведаша им вся, яже случишася братии их в Галаадитиде,

5:26  и яко мнози от них заключени суть в Восоре и Восор, во Алемисех, Хасфоре, Македе и Карнаине: сии вси гради тверди и велицы:

5:27  и в прочиих градех Галаадитиды суть затворени, и во утрие строятся ополчитися на твердыни и яти и избити всех сих во един день.

5:28  И возвратися Иуда и вои его в путь в пустыню в Восор внезапу: и взя град, и уби всяк мужеск пол усты меча, и взя вся корысти их, и сожже его огнем:

5:29  и воста оттуду нощию и иде даже до твердыни.

5:30  И бысть пред зарею, и воздвигоша очи свои, и се, людие мнози, имже не бе числа, несуще лествицы и миханы взяти твердыню, и ратоваху их.

5:31  И виде Иуда, яко начася брань, и вопль града взыде даже до небесе трубами и гласом велиим,

5:32  и рече мужем силы: бийтеся днесь за братию вашу.

5:33  И изыде тремя началы созади их: и вострубиша трубами и возопиша в молитве.

5:34  И позна полк Тимофеов, яко Маккавей есть, и отбежа от лица его, и поби их язвою велиею, и падоша от них в день он яко осмь тысящ мужей.

5:35  И обратися (Иуда) в Масфу и повоева ю и взя ю, и уби весь мужеск пол ея и взя корысти ея, и сожже ю огнем:

5:36  оттуду пойде и взя Хасфор, Макед и Восор и прочыя грады Галаадитиды.

5:37  И по сих словесех собра Тимофей полк ин и ополчися к лицу Рафона об ону страну потока.

5:38  И посла Иуда соглядати полк. И возвестиша ему глаголюще: собрани суть к нему вси языцы, иже окрест нас, сила велия зело:

5:39  и Аравлян наяша в помощь себе, и ополчаются об ону страну потока, готови приити на тя на брань. И иде Иуда во сретение их.

5:40  И рече Тимофей началником воев своих: егда приближится Иуда и полк его к потоку водному, аще приидет к нам прежде, не можем постояти противу его, яко могий возможет противу нас:

5:41  аще же устрашится и ополчится об ону страну реки, прейдем к нему и возможем противу его.

5:42  Егда же приближися Иуда к потоку водному, постави книжники людий при потоце и повеле им глаголя: не оставляйте всякаго человека остатися в полце, но да грядут вси на брань.

5:43  И прейде на них прежде, и вси людие вслед его. И сотрени суть вси языцы пред лицем его, и повергоша оружия своя, и бежаша в капище, еже к Карнаине.

5:44  И взяша град, и капище сожгоша огнем со всеми, яже в нем: и побежден бысть Карнаин и не возможе ктому стати противу лица Иудина.

5:45  И собра Иуда всех Израилтян, иже беху в Галаадитиде, от мала даже до велика, и жены их и чада их и имения, полк велик зело, приити в землю Иудину.

5:46  И приидоша даже до Ефрона, и сей град велий на входе тверд зело: и не бе уклонитися от него на десно или шуее, но токмо сквозе его проити.

5:47  И заключишася, иже бяху в граде, и заградиша врата камением. И посла к ним Иуда со словесы мирными, глаголя:

5:48  пройдем по земли вашей, еже отити в землю нашу, и никтоже вас изобидит, токмо ногами пройдем. И не восхотеша отверсти ему.

5:49  И повеле Иуда проповедати в полце ополчитися коемуждо, в немже кто есть месте.

5:50  И ополчишася мужие силы и ратоваша град той весь день и всю нощь. И предадеся град в руки его.

5:51  И поби всяк мужеск пол усты меча и искорени его, и взя корысти его и пройде сквозе град по убиеным.

5:52  И преидоша Иордан в поле великое противу лицу Вефсана.

5:53  И бе Иуда собирая дальнейших и увещаваше людий по всему пути, дондеже приидут в землю Иудину.

5:54  И взыдоша на гору Сион с веселием и радостию и принесоша всесожжения, яко не паде от них ни един, дондеже возвратишася в мире.

5:55  И во дни, в няже бысть Иуда и Ионафан в Галааде, и Симон брат его в Галилеи противу лицу Птолемаиды,

5:56  слыша Иосиф Захариин сын и Азариа, началницы силы, о вещех благосодеянных и о бранех, яже сотвориша,

5:57  и реша: сотворим и мы себе имя и пойдем ратовати на языки, иже окрест нас.

5:58  И возвестиша сущым от силы яже с ними и идоша на Иамнию.

5:59  И изыде Горгиа из града и мужие его во сретение им на брань.

5:60  И побежден бысть Иосиф и Азариа, и гнани быша даже до предел Иудиных: и падоша в день он от людий Израилевых яко две тысящы мужей. И бысть язва велика в людех Израилевых,

5:61  понеже не послушаша Иуды и братий его, мнящеся храбри быти:

5:62  тии же не бяху от семене мужей онех, имиже дадеся спасение Израилю рукою их.

5:63  И муж Иуда и братия его прославишася зело пред всем Израилем и языки всеми, идеже слышашеся имя их.

5:64  И совокупишася к ним благо глаголющии.

5:65  И изыде Иуда и братия его, и ратоваху сынов Исавлих в земли яже к югу, и порази Хеврона и дщери его, и разори твердыни его, и столпы его пожже окрест.

5:66  И воздвижеся ити в землю иноплеменников и прохождаше Самарию.

5:67  В день он падоша священницы на брани, хотящии храбрее быти, внегда изыти им на брань без совета (его).

5:68  И уклонися Иуда во Азот в землю иноплеменников, и разори капища их, и изваяния богов их сожже огнем, и взя корысти от градов, и возвратися в землю Иудину.

Chapter 6

6:1  И царь Антиох прохождаше вышния страны и слыша, яко есть Елимаис в Персиде град славен богатством, сребром и златом,

6:2  и храм в нем богат зело, и ту запоны златы, и броня и оружия, яже остави ту Александр сын Филиппов, царь Македонский, иже царствова первый во Еллинех.

6:3  И прииде и искаше взяти град и пленити его, и не возможе, яко познася слово сущым во граде.

6:4  И восташа противу ему на брань, и побеже оттуду, и иде со скорбию велиею, и возвратися в Вавилон.

6:5  И прииде возвещаяй ему некто в Персиду, яко отбегоша полцы ходившии во Иудею.

6:6  И ходи Лисиа с силою крепкою в первых, и прогнан бысть от лица их, и возмогоша оружиями и силами и корыстьми многими, яже взяша от полков, ихже избиша.

6:7  И разориша мерзость, юже созда на олтари во Иерусалиме, и святыню, якоже прежде окружиша стенами высокими, и Вефсуру град его.

6:8  И бысть яко услыша царь словеса сия, устрашися и смутися зело: и паде на ложе и впаде в недуг от печали, понеже не сбыстся ему, якоже помышляше.

6:9  И бе ту дни многи, понеже обновися на нем печаль велика, и мняше, яко умрет.

6:10  И созва вся други своя и рече им: отиде сон от очию моею, и испадох сердцем от печали,

6:11  и рех в сердцы моем: до коликия скорби доидох и волны велия, в нейже ныне есмь? Яко благ и любимь бых во власти моей:

6:12  ныне же поминаю злая, яже сотворих во Иерусалиме, и взях вся сосуды златы и сребряны в нем, и послах изяти обитающих во Иудеи вотще:

6:13  познах убо, яко сих ради обретоша мя злая сия: и се, гибну скорбию велиею в земли чуждей.

6:14  И призва Филиппа единаго от другов своих, и постави его над всем царством своим,

6:15  и даде ему диадиму и ризу свою и перстень, еже водити Антиоха сына его и воспитати его еже царствовати.

6:16  И умре тамо Антиох царь в лето сто четыредесять девятое.

6:17  И позна Лисиа, яко умре царь. И постави царствовати Антиоха сына его вместо его, егоже воспита юношу, и нарече имя ему Евпатор.

6:18  И сущии во краеградии заключиша Израиля окрест святых и искаху им злая всегда и утверждение языком.

6:19  И умысли Иуда изгнати их: и созва вся люди, да обстоят их.

6:20  И собрашася вкупе и обседоша их в лето сто пятьдесятое, и сотвори на них стрелостоятелницы и миханы.

6:21  И изыдоша от них из заключения, и прилепишася тем нецыи нечестивии от Израиля,

6:22  и идоша ко царю и реша: доколе не сотвориши суда и отмстиши братию нашу?

6:23  Мы благоволим служити отцу твоему и ходити в заповедех его и последовати повелением его:

6:24  и облежени суть во краеградии сынове людий наших, сего ради и отчуждаются от нас: и елицы обретахуся от нас, погубляхуся, и наследия наша расхищаема бяху:

6:25  и не на нас токмо простроша руку, но и на вся пределы нашя:

6:26  и се, ополчишася днесь на краеградие во Иерусалиме, еже взяти его и святыню, и Вефсуру утвердиша:

6:27  и аще не предвариши их скорее, болшая сих сотворят, и не возможеши удержати их.

6:28  И прогневася царь, егда услыша, и собра вся други своя и началники силы своея и иже над конники:

6:29  и от царств иных и от островов морских приидоша к нему силы наемницы:

6:30  и бысть число сил его сто тысящ пешцев и двадесять тысящ конников, и слонов тридесять два ведящих брань.

6:31  И приидоша сквозе Идумею и ополчишася в Вефсуре, и ратоваху дни многи и сотвориша миханы: и изыдоша и пожгоша их огнем и бишася мужественне.

6:32  И отиде Иуда от краеградия и ополчися в Вефсахарии противу полка царева.

6:33  И воста царь зело рано и воздвиже ополчение во устремлении его по пути Вефсахарии: и устроишася силы на брань, и вострубиша трубами,

6:34  и слоном показаша кровь гроздову и ягоды, еже поострити их на брань:

6:35  и разлучиша зверей на полки и приставиша коемуждо слону тысящу мужей облеченных в броня железом соплетены, и шлемы медяни на главах их, и пять сот конников вчиненых коемуждо зверю избранных.

6:36  Сия беша прежде времене, идеже аще бе зверь: и идеже аще идяше, идяху вкупе и не отступаху от него.

6:37  И пирги древяни на них крепцы защищающии на коемждо звери, препоясани на нем миханами, и на коемждо мужей силы тридесять два воюющих на них, и Индианин управитель его.

6:38  И прочыя конники сюду и сюду поставиша на две части полка, побуждающе и заграждающе в дебрех.

6:39  Егда же возсия солнце на щиты златыя и медяныя, обсияша горы от них и облисташа яко лампады огненныя.

6:40  И отлучися часть некая от полка царева на горы высоки, и нецыи на нижшая, и идяху крепце и чинно.

6:41  И поколебашася вси слышащии глас множества их, и путьшествия многих, и сражения оружий: бе бо ополчение велико зело и крепко.

6:42  И приближися Иуда и полк его на брань, и падоша от полка царева шесть сот мужей.

6:43  И увиде Елеазар сын Саварань единаго от зверей облечена в броню царску, и бяше выше прочиих зверей, и возмнеся ему, яко на нем есть царь:

6:44  и вдадеся сам еже избавити люди своя и сотворити себе имя вечное,

6:45  и тече к нему с дерзостию в средину полка, и побиваше одесную и ошуюю, и разделяхуся от него сюду и сюду:

6:46  и вниде под слона, и подложися ему, и уби его, и паде на землю верху его, и умре ту.

6:47  И видеша силу царства и устремление воев, и уклонишася от них.

6:48  Сущии же от полка царева взыдоша противу их на Иерусалим: и ополчися царь на Иудею и на гору Сион.

6:49  И сотвори мир с сущими в Вефсурех: и изыдоша из града, яко не бе им тамо пищи, еже затворитися в нем, понеже суббота бяше земли.

6:50  И взя царь Вефсуру и постави ту стражу хранити ю.

6:51  И ополчися на место святыни дни многи, и постави ту стрелостоятелницы и миханы, и огнеметницы и каменометницы и скорпионы, еже бы метати стрелы и пращы.

6:52  Сотвориша же и тии миханы противу михан их, и брашася дни многи.

6:53  Пища же не бяше во граде, занеже седмое лето бе, и избежавшии во Иудею от язык поядоша останок сокровения.

6:54  И осташася во святилищи мужей мало, яко объят их глад, и расточени быша кийждо в место свое.

6:55  И слыша Лисиа, яко Филипп, егоже постави царь Антиох, еще жив сый, да воспитает Антиоха сына его, во еже царствовати ему,

6:56  возвратися от Персиды и Мидии, и вои царстии ходившии с ним, и яко ищет прияти вещы:

6:57  и потщася поити от краеградия и глаголати ко царю и воеводам силы и к мужем: оскудеваем на всяк день, и пища нам мала (есть), и место, еже обстоим, утверждено, и надлежит нам (строити) яже о царстве:

6:58  ныне убо дадим десницу человеком тем и сотворим с ними мир и со всеми людьми их,

6:59  и уставим им, да ходят в законех своих, якоже прежде: ради бо законов своих, яже разрушихом, прогневашася и сотвориша вся сия.

6:60  И угодно бысть слово пред царем и началники, и посла к ним мир сотворити. И прияша.

6:61  И клятся им царь и началницы: о сих изыдоша из твердыни.

6:62  И вниде царь в гору Сион и виде твердыню места: и отвержеся клятвы, еюже клятся, и повеле разорити стену окрест.

6:63  И отиде тщателно и возвратися во Антиохию, и обрете Филиппа господствующа над градом, и воева нань, и взя град нуждею.

Chapter 7

7:1  Лета сто пятьдесят перваго, изыде Димитрий Селевкиев сын от Рима, и взыде с малыми людьми во град приморский, и воцарися тамо.

7:2  И бысть, егда вхождаше в дом царства отец своих, яша силы Антиоха и Лисию привести их к нему.

7:3  И уведана бысть ему вещь, и рече: не покажите ми лиц их.

7:4  И убиша их воини, и седе Димитрий на престоле царства своего.

7:5  И приидоша к нему вси мужие беззаконнии и нечестивии от Израиля, и Алким предвождаше их, хотяй жречествовати:

7:6  и оклеветаша людий пред царем, глаголюще: погуби Иуда и братия его всех другов твоих и нас расточи от земли нашея:

7:7  ныне убо посли мужа, емуже вериши, да идет и видит истребления вся, яже сотвори нам и стране царстей, и да мучит их и всех помогающих им.

7:8  И избра царь Вакхида друга царска, иже господствоваше об ону страну реки, и великаго в царстве и верна цареви,

7:9  и посла его и Алкима нечестиваго, и устави ему жречество, и повеле ему сотворити отмщение в сынех Израилевых.

7:10  И отидоша и приидоша с силою велиею в землю Иудину: и посла вестники ко Иуде и братии его словесы мирными с лестию.

7:11  И не вняша словесем их: видеша бо, яко приидоша с силою велиею.

7:12  И собрашася ко Алкиму и Вакхиду собрания книжник изыскати праведная.

7:13  И первии Асидее беху в сынех Израилевых, и искаху от них мира.

7:14  Рекоша бо: человек жрец от семене Аароня прииде в силах и не изобидит нас.

7:15  И глагола с ними словеса мирна и клятся им, глаголя: не воздам вам злая, ниже другом вашым. И вероваша ему.

7:16  И поима от них шестьдесят мужей и уби их во един день по словесех, якоже писано есть:

7:17  плоти преподобных Твоих и крови их пролияша окрест Иерусалима, и не бе погребаяй их.

7:18  И нападе страх их и трепет на вся люди, яко рекоша: несть в них истины и суда: преступиша бо уставление и клятву, еюже кляшася.

7:19  И воздвижеся Вакхид от Иерусалима и ополчися в Визефе, и посла и ят многих отступивших от него мужей и некиих от людий, и закла их, (и) в кладязь велик (вверже):

7:20  и вручи страну Алкиму и остави силу в помощь ему: и отиде Вакхид ко царю.

7:21  И подвизашеся Алким о архиерействе.

7:22  И собрашася к нему вси возмущающии люди своя, и одержаша землю Иудину, и сотвориша язву велику во Израили.

7:23  И виде Иуда вся злая, яже сотвори Алким, и иже с ним бяху, сыном Израилевым паче языков.

7:24  И изыде во вся пределы Иудейския по окрест и сотвори отмщение на мужех отторгшихся, и престаша ходити во страну.

7:25  Егда же увиде Алким, яко укрепися Иуда и иже с ним, и позна, яко не может противостояти им, и возвратися ко царю и оклевета их лукавне.

7:26  И посла царь Никанора, единаго от началник своих славных, и ненавидящаго и враждующаго на Израиля, и повеле ему избити люди.

7:27  И прииде Никанор во Иерусалим с силою великою и посла ко Иуде и братии его с лестию словесы мирными, глаголя:

7:28  да не будет брань между мною и вами: прииду с мужы малыми, да вижду лица ваша с миром.

7:29  И прииде ко Иуде, и поздравляху друг друга мирно: и воини уготовани бяху восхитити Иуду.

7:30  И познася слово Иуде, яко с лестию прииде к нему: и устрашися от него и не восхоте ктому видети лица его.

7:31  И позна Никанор, яко открыся совет его, и изыде во сретение Иуде бранию близ Харфарсарама.

7:32  И падоша от сущих при Никаноре яко пять тысящ мужей, и бежаша во град Давидов.

7:33  И по словесех сих взыде Никанор на гору Сион: и изыдоша от иереев от святых и от старейшин людских поздравити его мирно и показати ему всесожжение приносимое за царя.

7:34  И поругася им и посмеяся им, и оскверни их и глагола гордо.

7:35  И клятся с яростию, рекий: аще не предастся Иуда и воини его в руки моя ныне, и будет, егда возвращуся в мире, сожгу храм сей. И изыде с яростию велиею.

7:36  И внидоша жерцы и сташа пред лицем олтаря и храма и плачуще рекоша:

7:37  Ты, Господи, избрал еси храм сей, нарещися имени Твоему в нем, да будет храм молитвы и прошения людем Твоим:

7:38  сотвори отмщение на человеце сем и на воех его, и да падут мечем: помяни хуления их и не даждь им обиталища.

7:39  И изыде Никанор от Иерусалима и ополчися в Вефороне и срете его сила Сирска.

7:40  Иуда же приближися во Адасу с тремя тысящьми мужей. И помолися Иуда и рече:

7:41  иже послани бяху от царя Ассирийскаго (Сеннахирима), Господи, егда похулиша Тя, изыде Ангел Твой и порази от них сто осмьдесят пять тысящ:

7:42  тако сокруши ополчение сие пред нами днесь, и да познают прочии, яко зло глагола на святая Твоя, и суди ему по злобе его.

7:43  И сотвориша воини брань в третийнадесять день месяца Адара, и сотреся ополчение Никанорово, и паде сам первый во брани.

7:44  Егда же увидеша вои его, яко паде Никанор, повергше оружия своя бежаша.

7:45  И гнаша их путь дне единаго от Адаса, дондеже приити в Газир, и трубами трубиша вслед их со знаменами.

7:46  И изыдоша от всех сел Иудейских окрест и заключиша их рогами, и возвращахуся тии к ним и падоша вси мечем, и не оста от них ни един.

7:47  И взяша корысти их и плен, и главу Никанорову отсекоша, и десницу его, юже простре гордо, и принесоша и повесиша противу Иерусалима.

7:48  И возвеселишася людие зело, и сотвориша день той день веселия великаго,

7:49  и уставиша праздновати на всяко лето день той третийнадесять месяца Адара.

7:50  И умолче земля Иудина на дни малы.

Chapter 8

8:1  И слыша Иуда имя Римлян, яко суть сильни крепостию, и тии благоволят о всех приложившихся к ним, и елицы приидут к ним, составляют с ними дружбу, и яко суть сильни крепостию.

8:2  И поведаша ему брани их и мужества блага, яже творят в Галатех, и яко одержаша их и приведоша их под дань:

8:3  и колика сотвориша во стране Испанийстей, еже удержати руды сребра и злата, еже тамо: и одержаша всяко место советом своим и долготерпением,

8:4  и место бе далече отстоящо от них зело: и царей нашедших на них от края земли сотроша, и поразиша их язвою великою, прочии же дают им дань по вся лета:

8:5  и Филиппа и Персеа Китиейскаго царя, и воставших на них сокрушиша их в брани и одержаша их:

8:6  и Антиоха великаго царя Асийскаго, шедшаго противу их на брань, имущаго сто двадесять слонов, конники и колесницы и силу велию зело, и сотрен бысть от них:

8:7  и яша его жива, и уставиша, да дает им той и царствующии по нем дань велику, и даяти залог и уставление,

8:8  и страну Индийску и Мидию, и Лидию и от предобрых стран их, и взявше их от него даша я Евмению царю:

8:9  и яко совещаша сущии от Еллады приити и взяти их: и уведано бысть слово тем,

8:10  и послаша на них воеводу единаго и воеваша на них, и падоша от них язвении мнози, и плениша жен их и чад их, и разграбиша их и землю их одержаша, и разориша твердыни их и поработиша их даже до сего дне:

8:11  и прочая царства и островы, иже некогда противишася им, истребиша и поработиша их:

8:12  с други же своими и примиряющимися к ним сохраняху дружбу, и одержаху царства ближняя и дальняя, и елицы слышаху имя их, бояхуся от них:

8:13  елицем же аще хотят помогати и воцаряти, царствуют: и ихже аще хотят, пременяют: и вознесошася зело:

8:14  и во всех сих не возлагаше ни един от них диадимы, ни облачашеся в порфиру, еже возвеличитися о ней:

8:15  и советную палату сотвориша себе, и на всяк день советоваху в ней о множестве (народов) еже благоустрояти их:

8:16  и вверяют единому человеку началство свое по лету, и господствовати всею землею их, и вси повинуются единому, и несть зависти ниже рвения в них.

8:17  И избра Иуда Евполемона сына Иоаннова, сына Аккосова, и Иасона сына Елеазарова, и посла их в Рим, составити с ними дружбу и споборение,

8:18  и еже отяти от них иго их, понеже видеша царство Еллинское порабощающее Израиля в работу.

8:19  И идоша в Рим, путь же велий зело, и внидоша в палату советную, и отвещаша и реша:

8:20  Иуда Маккавей и братия его и множество Иудейское послаша нас к вам составити с вами дружбу и мир и вписати нас споборниками и другами вашими.

8:21  И угодно бысть слово пред ними.

8:22  И сие списание послания, еже восписаша на дщицах медяных и послаша во Иерусалим быти у них тамо в память мира и споборства:

8:23  благо да будет Римляном и языку Иудейску на мори и на земли в век, оружие же и врази далече да будут от них:

8:24  аще же наступит брань Римляном первее или всем споборником их во всем господстве их,

8:25  споборет язык Иудейский, якоже время определит им, сердцем полным:

8:26  и ратующым не дадут, ниже ссудят пшеницею, оружием, сребром, кораблями, якоже угодно Римляном, и сохранят заповеди их ничтоже вземлюще:

8:27  такожде аще и языку Иудейску прежде случится брань, помогут Римляне от души, якоже им время определит:

8:28  и споборающым не дастся пшеница, оружие, сребро, корабли, якоже угодно Римляном: и сохраняти заповеди их, и без лести.

8:29  По сим словесем уставиша Римляне людем Иудейским.

8:30  Аще же по словесех сих совещаются сии и онии приложити или отяти нечто, сотворят от произволения своего, и еже аще приложат или отимут, будут тверда.

8:31  А о злобах, яже царь Димитрий творит в них, писахом ему, глаголюще: вскую отяготил еси иго твое на други нашя споборники Иудеи?

8:32  Аще убо паки прибегнут к нам на тя, сотворим им суд и ополчимся на тя морем и землею.

Chapter 9

9:1  И слыша Димитрий, яко паде Никанор и силы его во брани, и приложи Вакхида и Алкима паки послати во Иудею, и десный рог с ними.

9:2  И идоша путем, иже (ведет) в Галгалы, и ополчишася на Месалоф, иже есть во Арвилех, и взяша его, и побиша душ человеческих много.

9:3  И в месяц первый лета сто пятьдесят втораго, приступиша воини ко Иерусалиму,

9:4  и восташа и идоша в Верею в двадесяти тысящах мужей и две тысящы конников.

9:5  Иуда же бе ополчен во Елаасе, и три тысящы мужей избранных с ним.

9:6  И видеша множество сил, яко многи суть, и устрашишася зело: и избегоша мнози от полка, и не остася от них токмо осмь сот мужей.

9:7  И виде Иуда, яко расточися полк его, и брань оскорбляше его: и сокрушися сердцем, яко не имеяше времене собрати их,

9:8  и ослабе и рече оставшым: востанем и взыдем на супостаты нашя, аще можем ратовати противу их.

9:9  И отвращаху его рекуще: не можем, но спасем токмо душы своя ныне, и возвратимся со братиею нашею, и ополчимся на них: мы же мали.

9:10  И рече Иуда: не буди ми сотворити вещь сию, еже бежати от них: и аще приближися время наше, умрем мужественно ради братии нашея и не оставим вины славе нашей.

9:11  И воздвижеся сила от полка и ста во сретение им, и разлучишася конницы на две части, и пращницы и стрелцы предидяху силе, и предподвижницы вси сильнии.

9:12  Вакхид же бе на деснем розе, и приближися полк от двою страну, и возглашаху трубами.

9:13  И вострубиша, иже бяху от страны Иудины, и тии трубами: и поколебася земля от гласа ополчений. И бысть брань сражена от утра даже до вечера.

9:14  И виде Иуда, яко Вакхид и крепость полка в десных: и собрашася к нему вси крепцыи сердцем:

9:15  и сотреся десный рог от них, и гнаше вслед их даже до горы Азота.

9:16  И сущии в левем розе видеша, яко сотреся десный рог, и обратишася по стопам Иудиным и сущих с ним созади.

9:17  И отягчися брань, и падоша язвени мнози от сих и от тех:

9:18  и Иуда паде, прочии же бежаша.

9:19  И взяста Ионафан и Симон Иуду брата своего и погребоста его во гробе отец его в Модине.

9:20  И плакашася о нем и рыдаше его весь Израиль плачем велиим, и сетоваху дни многи и рекоша:

9:21  како паде сильный спасаяй Израиля?

9:22  Прочая же словес и браней Иудиных и благих мужеств, ихже сотвори, и величества его, не суть писана: многа бо бяху зело.

9:23  И бысть по преставлении Иудине, проникоша беззаконнии во всех пределех Израилевых, и прозябоша вси делающии беззаконие.

9:24  Во дни оны бысть глад велик зело, и отступи страна с ними.

9:25  И избра Вакхид нечестивых мужей и постави их господиями страны.

9:26  И искаху и испытаху другов Иудиных и привождаху тех к Вакхиду: и мстяше им и посмевашеся им.

9:27  И бысть скорбь велика во Израили, яже не бысть от дний, в нихже не явися пророк во Израили.

9:28  И собрашася вси друзи Иудины и рекоша Ионафану:

9:29  отнележе брат твой Иуда скончася, и муж подобен ему несть изыти противу врагов и Вакхида и враждующих языку нашему:

9:30  ныне убо тебе днесь избрахом, еже быти вместо его нам в началника и вожда, еже ратовати во брани нашей.

9:31  И прия Ионафан во время оно началство и воста вместо Иуды брата своего.

9:32  И позна Вакхид и искаше его убити.

9:33  И позна Ионафан и Симон брат его и вси иже с ним (бяху), и побегоша в пустыню Фекуе, и ополчишася при воде рва Асфара.

9:34  И позна Вакхид в день суббот, и прейде сам и вси вои его об ону страну Иордана.

9:35  И посла Ионафан брата своего вожда народу и моли Наватеов другов своих представити им приготовление их многое.

9:36  И изыдоша сынове Иамвриины от Мидавы, и яша Иоанна и вся елика име, и отидоша имуще та.

9:37  По словесех же сих возвестиша Ионафану и Симону брату его, яко сынове Иамвриины творят брак великий и ведут невесту от Надавафа, дщерь единаго от великих вельмож Ханаанских, с гордостию велиею.

9:38  И помянуша Иоанна брата своего, и взыдоша, и скрышася под сению горы:

9:39  и воздвигнуша очи свои и видеша, и се, плищь и уготование многое, и жених изыде и друзи его и братия его бо сретение им с тимпаны и мусикиами и оружии многими:

9:40  и восташа на них от засады иже при Ионафане и убиша их, и падоша язвени мнози, прочии же бегоша в гору: и взяша вся корысти их.

9:41  И обратися брак в сетование, и глас мусикии их в плачь.

9:42  И отмстиша отмщение крове брата своего и возвратишася на брег Иорданский.

9:43  И слыша Вакхид и прииде в день субботный даже до брегов Иорданских с силою многою.

9:44  И рече ко своим Ионафан: востанем ныне и ополчимся за душы нашя, несть бо днесь якоже вчера и третияго дне:

9:45  се бо, брань противу нас и созади нас: вода же Иорданская сюду и сюду, и блато и лес, и несть места, еже уклонитися:

9:46  ныне убо возопийте на небо, да избавитеся от рук врагов ваших. И сразися брань.

9:47  И простре Ионафан руку свою убити Вакхида, и уклонися и него вспять.

9:48  И вскочи Ионафан и иже с ним во Иордан, и преплываху на об ону страну, и не преидоша по них Иордана.

9:49  И падоша от страны Вакхидины дне онаго яко тысяща мужей.

9:50  И возвратися во Иерусалим и созда грады тверды во Иудеи, твердыню во Иерихоне и яже во Еммауме и Вефороне, и Вефили и Фемнафе, и Фарафоне и Тефоне, со стенами высокими и вратами и заворами,

9:51  и постави стражу в них, еже враждовати Израилю:

9:52  и утверди град иже в Вефсуре, и Газару, и краеградие, и постави в них силы и предложение брашен:

9:53  и взя сыны вождов страны в залог и посади их в краеградии во Иерусалиме под стражею.

9:54  И в лето сто пятьдесят третие месяца втораго, заповеда Алким разорити стену двора святых внутренняго, и разори дела пророков, и нача разоряти.

9:55  Во время оно поражен бысть Алким, и воспятишася дела его, и заградишася уста его, и разслабе и не можаше ктому глаголати слова и заповедати о доме своем.

9:56  И умре Алким во время оно с мукою велиею.

9:57  И виде Вакхид, яко умре Алким, и возвратися ко царю. И умолча земля Иудина лета два.

9:58  И совещаша вси беззаконницы рекуще: се, Ионафан и иже с ним в покои обитают уповающе: ныне убо наведем Вакхида, и поимает их всех во едину нощь.

9:59  И шедше совещашася с ним.

9:60  И воста ити с силою многою и посла епистолии тай всем споборителем его, иже во Иудеи, да имут Ионафана и сущих с ним. И не возмогоша, яко познася им совет их.

9:61  И яша от мужей страны началников злобы пятьдесят мужей и убиша их.

9:62  И отиде Ионафан и Симон и иже с ними в Вефвасию, яже в пустыни, и созда разореная ея и укрепи ю.

9:63  И позна Вакхид, и собра все множество свое, и сущым от Иудеи возвести.

9:64  И шед ополчися на Вефвасию, и воеваше ю дни многи, и сотвори миханы.

9:65  И остави Ионафан Симона брата своего во граде, и изыде во страну, и изыде в числе.

9:66  И порази Одомира и братию его и сынов Фасироних в жилищих их, и нача избивати и восходити в силах.

9:67  Симон же и иже с ним изыдоша из града и пожгоша миханы,

9:68  и ратоваху противу Вакхида, и сотреся от них, и озлобляху его зело, яко бе совет его и поход его вотще.

9:69  И прогневася яростию на мужей беззаконных, советовавших ему приити во страну, и уби от них многих, и совещася отити в землю свою.

9:70  И позна Ионафан и посла к нему старейшин составити мир с ним и отдати им плен.

9:71  И прия, и сотвори по словесем его, и клятся ему не искати ему зла во вся дни живота его.

9:72  И отдаде ему плен, егоже прежде плени от земли Иудины: и возвращься отиде в землю свою и не приложи ктому приити в пределы их.

9:73  И преста мечь от Израиля. И обита Ионафан в Махмасе: и нача Ионафан судити люди и истреби нечестивых от Израиля.

Chapter 10

10:1  И в лето сто шестьдесятое взыде Александр сын Антиохов Епифан и одержа Птолемаиду: и прияша его, и царствова тамо.

10:2  И слыша Димитрий царь, и собра воев много зело, и изыде противу ему на брань.

10:3  И посла Димитрий ко Ионафану епистолии словесы мирными, величая его.

10:4  Рече бо: предварим сотворити мир с ним, прежде неже сотворит со Александром противу нас:

10:5  воспомянет бо вся злая, яже сотворихом на него и на братию его и на язык его.

10:6  И даде ему власть собирати воины и уготовляти оружия, и быти ему другом его, и залог, иже бе в краеградии, повеле отдати ему.

10:7  И прииде Ионафан во Иерусалим и прочте епистолии во услышание всем людем и иже от краеградия.

10:8  И устрашишася страхом велиим, егда услышаша, яко даде ему царь власть собирати воины.

10:9  И предаша иже от краеградия Ионафану залог, и отдаде их родителем их.

10:10  И обита Ионафан во Иерусалиме, и нача созидати и обновляти град,

10:11  и рече ко творящым дела созидати стены и гору Сион окрест от камений четвероуголных ко утверждению, и сотвориша сице.

10:12  И побегоша иноплеменницы, иже бяху в твердынех, яже созда Вакхид:

10:13  и остави кийждо место свое и отиде в землю свою.

10:14  Обаче в Вефсуре осташася нецыи от оставльших закон и заповеди (Божия): бе бо им убежище.

10:15  И слыша Александр царь обещания, елика посла Димитрий Ионафану, и поведаша ему брани и мужества, яже сотвори той и братия его, и труды, яже имеху.

10:16  И рече: еда обрящем коего мужа такова? И ныне сотворим его в друга и споборника нашего.

10:17  И написа епистолии и посла ему по словесем сим, глаголя:

10:18  царь Александр брату Ионафану радоватися:

10:19  слышахом о тебе, яко муж силен еси крепостию и угоден еси быти нам друг:

10:20  и ныне поставихом тя днесь архиереа языка твоего, и еже другом царевым нарицатися (и посла ему порфиру и венец злат), и мудрствовати таяжде с нами и снабдевати дружбу к нам.

10:21  И облечеся Ионафан во святую ризу седмаго месяца лета сто шестьдесятаго, в день праздника сенопотчения, и собра силы и уготова оружия многа.

10:22  И слыша Димитрий словеса сия, и опечалися зело, и рече:

10:23  что сие сотворихом, яко предвари нас Александр составити дружбу со Иудеи во утверждение?

10:24  Напишу и аз им словеса просителная и возвышения и дары, яко да будут со мною в помощь.

10:25  И написа им по словесем сим: Царь Димитрий языку Иудейскому радоватися:

10:26  понеже сохранисте заветы к нам и пребывасте в дружбе нашей и не приступисте ко врагом нашым, слышахом и радовахомся:

10:27  и ныне пребывайте еще сохранити к нам веру, и воздадим вам благая, ихже ради творите с нами,

10:28  и оставим вам дани многи, и дадим вам дары:

10:29  и ныне свободных творю вас и оставляю всем Иудеом дани и цену от соли и от венцев:

10:30  и еже вместо третины семене и вместо половины плода древеснаго надлежащаго ми взяти, оставляю от днесь и потом, еже не взимати от земли Иудины и от триех стран прилежащих ей, от Самарии и Галилеи, и от днешняго дне и в вечное время:

10:31  и Иерусалим да будет свят и свободен со пределы своими, и десятины и дани:

10:32  оставляю и власть краеградия еже во Иерусалиме, и даю архиерею, да поставит в нем мужы, ихже аще изберет сам, хранити его:

10:33  и всяку душу Иудейскую, яже пленена есть от земли Иудины, во всем царстве моем оставляю свободну туне, и вси да оставятся от даней и скотов своих:

10:34  и вси праздницы и субботы и новомесячия и дние вчиненнии, и три дни прежде праздника и три дни по празднице, да будут вси дние свободы и оставления всем Иудеом сущым во царствии моем:

10:35  и никто имети будет власти делати и стужати кому от них о всяцей вещи:

10:36  и да напишутся от Иудей в воины царския до тридесяти тысящ мужей, и да дадутся им оброцы, якоже подобает всем воем царским:

10:37  и да поставятся от них в твердынех царских велиих, и от сих поставятся на потребы царства сущыя в верность: и сущии над ними и началницы да будут от них, и да ходят в законех своих, якоже повеле царь в земли Иудине:

10:38  и три пределы, прилежащии Иудеи от страны Самарийския, да приложатся ко Иудеи, да вменятся быти под единым, еже не послушати иныя власти, но токмо архиереа:

10:39  Птолемаиду и пределы ея дах в дар святым, сущым во Иерусалиме, на приличное иждивение святым,

10:40  и аз дам на коеждо лето пятьнадесять тысящ сикль сребра от сокровищ царских от мест прилежащих:

10:41  и всякое излишнее, еже не воздаша от потреб, якоже в первых летех, отныне дадут в дела храму:

10:42  и свыше сих пять тысящ сиклей сребра, ихже взимаху от потреб святилища, якоже в прежних летех от собрания на всякое лето, и сия оставляются, понеже надлежат сия жерцем служащым:

10:43  и елицы аще прибегнут к церкви сущей во Иерусалимех и во всех пределех его, одолжени суще царскими и всякою вещию, да отрешаются, и вся елика суть им во царствии моем:

10:44  и созидати и обновляти дела святых, и иждивение дастся от сокровища царскаго:

10:45  и еже созидати стены Иерусалима и утвердити окрест, и иждивение дастся от собрания царска, и еже создати стены во Иудеи.

10:46  Егда же услыша Ионафан и людие словеса сия, не вероваша им, ниже прияша, яко помянуша злобу велию, юже сотвори во Израили, и оскорби их зело.

10:47  И благоволиша о Александре, яко сей бысть им началник словес мирных, и споборяху ему во вся дни.

10:48  И собра царь Александр силу велию и ополчися противу Димитриа.

10:49  И сотвориша брань два царя, и побеже полк Димитриев, и гна его Александр и укрепися на них.

10:50  И превозможе брань зело, дондеже зайде солнце, и паде Димитрий в день он.

10:51  И посла Александр ко Птоломею царю Египетскому послы по словесем сим, рекий:

10:52  понеже возвратихся в землю царства моего, и седох на престоле отец моих, и одержах началство, и сокруших Димитриа, и возобладах страною нашею,

10:53  и составих противу его рать, и сокрушися той и ополчение его от нас, и седохом на престоле царства его:

10:54  и ныне составим между нами дружбу, и ныне даждь мне дщерь твою в жену, и буду зять твой, и дам тебе дары, и ей достойная тебе.

10:55  И отвеща царь Птоломей глаголя: благ день, в оньже возвратился еси в землю отец твоих и сел еси на престоле царства их:

10:56  и ныне сотворю ти, яже писал еси: но срящися во Птолемаиде, яко да видим друг друга, и будеши ми зять, якоже рекл еси.

10:57  И изыде Птоломей от Египта сам и Клеопатра дщи его, и внидоша во Птолемаиду лета сто шестьдесят втораго.

10:58  И срете его Александр царь: и даде ему Клеопатру дщерь свою и сотвори брак ея во Птолемаиде, якоже царие во славе велицей.

10:59  И написа Александр царь Ионафану приити во сретение ему.

10:60  И иде со славою во Птолемаиду и срете оба царя: и даде има сребро и злато и другом их, и дары многи, и обрете благодать пред нима.

10:61  И собрашася нань мужие губителе от Израиля, мужие беззаконнии клеветати нань. И не внят им царь.

10:62  И повеле царь совлещи Ионафана с риз его и облещи его в порфиру. И сотвориша тако.

10:63  И посади его царь с собою и рече началником своим: изыдите с ним на среду града и проповедите ни единому клеветати нань ни о единей вещи, и ни един ему да стужит о всяцем глаголе.

10:64  И бысть егда увидеша клеветницы славу его, якоже проповедаша, и облечена его порфирою, и бежаша вси.

10:65  И прослави его царь, и написа его в первых друзех, и постави его воеводу и участника началства.

10:66  И возвратися Ионафан во Иерусалим с миром и веселием.

10:67  И в лето сто шестьдесят пятое прииде Димитрий сын Димитриев от Крита в землю отец своих.

10:68  И слыша Александр царь, и опечалися зело, и возвратися во Антиохию.

10:69  И постави Димитрий Аполлониа сущаго от Килисирии: и собра силу велию, и ополчися во Иамнии, и посла ко Ионафану архиерею, глаголя:

10:70  ты ли един возносишися на ны, аз же бых в посмех и в поношение тебе ради: и чесо ради ты властелствуеши над нами в горах?

10:71  Ныне убо, аще надеешися в силах твоих, изыди к нам на поле и искусимся ту между собою, яко со мною есть сила градов:

10:72  вопроси и научися, кто есмь? И прочии помогающии нам, и глаголют: несть вам стояния ноги пред лицем нашим, яко дващи в бег обратишася отцы твои в земли их:

10:73  и ныне не возможеши стерпети конника и силы таковыя в поли, идеже несть камене, ни стены, ни места к бежанию.

10:74  Егда же услыша Ионафан словеса Аполлониева, подвижеся мыслию, и избра десять тысящ мужей, и изыде из Иерусалима, и снидеся с ним Симон брат его в помощь ему.

10:75  И ополчися на Июппию, и заступиша ему от града, яко стража Аполлониева в Июппии бысть, и ратоваша ю.

10:76  И убоявшеся отверзоша иже из града, и облада Ионафан Июппиею.

10:77  И слыша Аполлоний, и собра три тысящы конник и силу велию, и иде во Азот аки путьшествуя, и абие изыде на поле, зане имеяше множество конник и надеяшеся на них.

10:78  И гна Ионафан вслед его во Азот, и сразишася полцы на рать.

10:79  И остави Аполлоний тысящу конник созади их в тайне.

10:80  И позна Ионафан, яко есть засада созади его. И окружиша полк его и стреляху на люди от утра даже до вечера,

10:81  людие же стояша, якоже заповеда Ионафан: и утрудишася кони их.

10:82  И приведе Симон силу свою и нападе на полк: конницы бо утруждени бяху, и сокрушишася от него и побегоша,

10:83  и конницы расточишася по полю и бегоша во Азот, и внидоша в Вифдагон капище его, еже уцелети.

10:84  И пожже Ионафан Азот и грады иже беху окрест его, и взя корысти их и капище Дагоново, и вбегших в не пожже огнем.

10:85  И бысть падших мечем с сожжеными яко осмь тысящ мужей.

10:86  И отиде оттуду Ионафан и прииде во Аскалон, и изыдоша от града во сретение ему в славе велицей.

10:87  И возвратися Ионафан во Иерусалим с сущими с ним, имуще корысти многи.

10:88  И бысть егда услыша Александр царь словеса сия, и приложи прославити Ионафана:

10:89  и посла ему гривну златую якоже обычай есть даяти сродником царевым, и даде ему Аккарон и вся пределы его во одержание.

Chapter 11

11:1  И царь Египетский собра силу многу аки песок, иже вскрай моря, и корабли многи: и искаше обладати царство Александрово лестию и приложити е к царству своему.

11:2  И изыде в Сирию словесы мирными, и отверзаху ему иже от градов и сретаху его, яко заповедь бе Александра царя сретати его, зане бяше тесть его.

11:3  Егда же вхождаше во грады, Птоломей поставляше силы на стражу в коемждо граде.

11:4  Егда же приближися ко Азоту, показаша ему капище Дагоново сожжено, и Азот и окрестныя грады его разорены, и телеса повержена, и побиеных, ихже поби во брани: сметаша бо я в купы их при пути его.

11:5  И поведаша царю, яже сотвори Ионафан, еже бы возненавидети его. И умолча царь.

11:6  И срете Ионафан царя во Июппии со славою, и целоваста друг друга и почиста ту.

11:7  И иде Ионафан со царем даже до реки нарицаемыя Елевфера, и возвратися во Иерусалим.

11:8  Царь же Птоломей огосподствова грады приморскими даже до Селевкии приморския и размышляше на Александра советы лукавы.

11:9  И посла старейшин к Димитрию царю, глаголя: прииди, составим между нама завет, и дам тебе дщерь мою, юже имать Александр, и царствовати имаши во царствии отца твоего:

11:10  раскаяхся бо дав ему дщерь мою, искаше бо мя убити.

11:11  И похули его ради похотения царства его.

11:12  И отяв дщерь свою, даде ю Димитрию и отчуждися от Александра, и явися вражда их.

11:13  И вниде Птоломей во Антиохию и возложи две диадимы на главу свою, Асийскую и Египетскую.

11:14  Александр же царь бе в Киликии во времена она, понеже отметахуся иже от мест оных.

11:15  И слыша Александр и прииде нань бранию: и изведе Птоломей силу, и срете его рукою крепкою, и прогна его.

11:16  И побеже Александр во Аравию защититися тамо: царь же Птоломей вознесеся.

11:17  И усекну Завдииль Аравитин главу Александрову и посла Птоломею.

11:18  И царь Птоломей умре в третий день, и сущии в твердынех погибоша от сущих в твердынех.

11:19  И воцарися Димитрий в лето сто шестьдесят седмое.

11:20  Во дни оны собра Ионафан сущих от Иудеи, да воюют краеградие, еже во Иерусалиме, и сотвори на оное миханы многи.

11:21  И идоша нецыи ненавидящии языка их, мужие беззаконницы, ко царю Димитрию и возвестиша ему, яко Ионафан обстоит краеградие.

11:22  И слышав разгневася: егда же слыша, скоро прииде во Птолемаиду и написа ко Ионафану, да не обстоит краеградия, но да идет во сретение ему тщателно во Птолемаиду, еже беседовати с ним.

11:23  Егда же услыша Ионафан, повеле обстояти, и избра от старейшин Израилевых и иереев, и вдадеся в бедство:

11:24  и взяв злато и сребро и ризы и ины дары многи, иде ко царю во Птолемаиду и обрете благодать пред ним.

11:25  И клеветаху на него нецыи беззаконнии от языка (его).

11:26  И сотвори ему царь, якоже сотвориша ему, иже прежде его быша, и возвыси его пред всеми други своими,

11:27  и постави его началника священству, и елика ина имеяше прежде честная, и сотвори его в первых друзех быти.

11:28  И моли Ионафан царя сотворити Иудею безданну, и три топархии, и Самарию, и обеща ему триста талант.

11:29  И угодно бысть царю, и написа Ионафану епистолии о всех сих, имеющыя образ сицевый:

11:30  царь Димитрий брату Ионафану радоватися и языку Иудейскому:

11:31  списание епистолии, юже писахом Ласфену сроднику нашему о вас, писахом и к вам, да весте:

11:32  царь Димитрий Ласфену отцу радоватися:

11:33  языку Иудейску другом нашым и сохраняющым яже к нам праведная судихом благосотворити, ради благоприятства их к нам:

11:34  уставихом убо им пределы Иудейския и три страны, Аферему, Лидду и Рамафем, иже приложишася Иудеи от Самарии, и вся надлежащая к ним, всем жрущым во Иерусалиме, вместо царских, ихже взимаше царь от них первее на всяко лето от жит земли и от овощей древесных,

11:35  и ина надлежащая нам отныне десятин и даней надлежащих нам, и соли точила, и принадлежащих нам венцев,

11:36  вся щедро оставляем им, и ничтоже от сих отимется отныне и в вечное время:

11:37  ныне убо прилежите сотворити сих списание, и да дастся Ионафану и да положится в горе святей в месте честне.

11:38  И виде Димитрий царь, яко утишися земля пред ним, и ничто ему противится, и отпусти вся вои своя коегождо в место свое, кроме чуждих сил, ихже собра от островов языческих, и враждоваху ему вся силы отцев его.

11:39  Трифон же бе от Александровых первее, и виде, яко вся силы ропщут на Димитриа, и иде ко Емалкую Аравитину, иже воспита Антиоха детище Александрово:

11:40  и прилежаше ему, яко да даст ему е, да воцарит вместо отца его: и возвести ему, елика сотвори Димитрий, и вражду, еюже враждуют нань силы его, и пребысть ту дни многи.

11:41  И посла Ионафан ко Димитрию царю, да ижденет сущих во краеградии из Иерусалима и иже в твердынех: бяху бо воююще Израиля.

11:42  И посла Димитрий ко Ионафану глаголя: не токмо сия сотворю тебе и языку твоему, но и славою прославлю тя и язык твой, аще благовременство получу:

11:43  ныне убо право сотвориши, аще послеши ми мужей споборающих, яко отступиша вси вои мои.

11:44  И посла ему Ионафан три тысящы мужей сильных крепостию во Антиохию, и приидоша ко царю, и возвеселися царь о пришествии их.

11:45  И собрашася иже от града в средину града сто двадесять тысящ мужей и совещахуся убити царя.

11:46  И бежа царь во двор, и объяша иже беху от града пути градския, и начаша битися.

11:47  И призва царь Иудеов на помощь, и собрашася вси вкупе к нему: и расточишася вси по граду,

11:48  и убиша во граде в той день сто тысящ мужей, и сожгоша град, и взяша корысти многи во он день и избавиша царя.

11:49  И видеша иже бяху от града, яко одержаша Иудее град, якоже хотеша, и изнемогоша мысльми своими, и возопиша ко царю с молением, глаголюще:

11:50  даждь нам десницу, и да престанут Иудее ратовати нас и град.

11:51  И повергоша оружия своя и сотвориша мир. И прославишася Иудее пред царем и пред всеми иже во царствии его, и возвратишася во Иерусалим имеюще корысти многи.

11:52  И седе Димитрий царь на престоле царства своего, и упокоися земля пред ним.

11:53  И солга вся елика рече, и отчуждися Ионафана, и не воздаде ему по благотворением, яже воздаде ему, и оскорби его зело.

11:54  По сих же возвратися Трифон и Антиох с ним отрочищь юный: и воцарися и возложи диадиму.

11:55  И собрашася к нему вси вои, ихже расточи Димитрий, и ратоваша противу его, и побеже и побежден бысть.

11:56  И взя Трифон звери и одержа Антиохию.

11:57  И писа Антиох юный Ионафану, глаголя: уставляю тебе архиерейство и поставляю тебе над четырми странами, и будеши в друзех царских.

11:58  И посла ему сосуды златыя и служение, и даде ему власть пити из злата и быти в порфире и имети гривну злату.

11:59  И Симона брата его постави воеводою от страны Тира даже до предел Египта.

11:60  И изыде Ионафан и прохождаше об ону страну реки и во градех, и собрашася к нему вся силы Сирския в помощь, и прииде во Аскалон, и сретоша его честно от града.

11:61  И иде оттуду в Газу, и заключишася иже в Газе, и обстояше ю, и пожже окрестныя грады ея огнем, и плени я.

11:62  И молиша Ионафана иже от Газы, и даде им десницу, и взя сыны началников их в залог, и посла их во Иерусалим, и пройде страну даже до Дамаска.

11:63  И слыша Ионафан, яко суть началницы Димитриевы в Кадисе, иже в Галилеи, с силою многою, хотяще изринути его от страны.

11:64  И сретеся с ними, брата же своего Симона остави во стране.

11:65  И ополчися Симон на Вефсуру, и ратоваша ю дни многи, и заключи ю.

11:66  И просиша у него десницу прияти, и даде им, и изгна их оттуду, и взя град, и постави в нем стражу.

11:67  Ионафан же и полк его приидоша к воде Геннисар:

11:68  и идоша утро рано на поле насор, и се, полк иноплеменников срете его на поли, и поставиша нань ловителство в горах, сами же сретоша отсупротиву.

11:69  Ловителе же восташа от мест своих и составиша рать,

11:70  и побегоша иже со Ионафаном вси, и ни един остася от них, токмо Маттафиа сын Авессаломов, и Иуда сын Халфиев, началницы воинских сил.

11:71  И растерза Ионафан ризы своя, и возложи землю на главу свою, и помолися:

11:72  и обратися на них бранию и победи их, и бегоша.

11:73  И видеша свои бежавшии от него, и обратишася к нему, и гнаша с ним даже до Кадиса, даже до полка их, и ополчишася тамо.

11:74  И падоша от иноплеменник в день той три тысящы мужей. И возвратися Ионафан во Иерусалим.

Chapter 12

12:1  И виде Ионафан яко время ему споспешествует, и избра мужы и посла их в Рим составити и обновити с ними дружбу,

12:2  и ко Спартиатом и ко иным местом посла епистолии, по томужде образу.

12:3  И идоша в Рим и внидоша в советный дом и рекоша: Ионафан архиерей и язык Иудейский послаша нас обновити дружбу с вами и споборение по прежнему.

12:4  И даша епистолии им к ним по месту, да проводят их в землю Иудину с миром.

12:5  И сие списание епистолий, ихже писа Ионафан ко Спартиатом:

12:6  Ионафан архиерей и старейшины людий, и жерцы и прочии людие Иудейстии, Спартиатом братии радоватися:

12:7  еще прежде посланы бяху епистолии ко Онии архиерею от Дариа царствовавшаго в вас, яко есте братия наша, якоже списание содержит:

12:8  и прия Ониа мужа посланаго славно и прият епистолии, в нихже завещано о споборении и дружбе:

12:9  и мы убо не требующе сих, утешение имуще святыя книги, яже в руках наших,

12:10  покусихомся послати к вам обновити братство и дружбу, еже бы не отчуждитися вас: многа бо времена проидоша, отнележе посласте к нам:

12:11  мы убо во всяко время непрестанно и в праздники и в прочих подобающих днех воспоминаем вас в жертвах, яже приносим, и в молитвах, якоже подобает и лепо есть воспоминати братию:

12:12  веселимся убо о славе вашей:

12:13  нас же обыдоша многи скорби и многи брани, и ратоваша нас царие, иже окрест нас:

12:14  не хотехом убо стужати вам и прочиим споборником и другом нашым во бранех сих,

12:15  имеем бо с небесе помощь помогающую нам, и избавихомся от враг наших, и смиришася врази наши:

12:16  избрахом убо Нуминиа Антиохова сына и Антипатра Иасонова, и послахом к Римляном обновити с ними дружбу и споборение прежнее:

12:17  заповедахом убо им и к вам поити и поздравити вас, и дати вам от нас послания о обновлении и о братстве нашем:

12:18  и ныне добре сотворите отвещавающе нам на сия.

12:19  И сие списание посланий, ихже посла онии:

12:20  Дарий царь Спартиатов Онии священнику великому радоватися:

12:21  обретеся в писаниих о Спартиатех и Иудеех, яко суть братия и яко суть от рода Авраамля:

12:22  и ныне, отнележе сия познахом, добре сотворите пишуще нам о мире вашем:

12:23  и мы же восписахом вам: скоти ваши и имение ваше наша суть, и яже наша ваша суть: повелехом убо, да возвестят вам сия.

12:24  И слыша Ионафан, яко возвратишася началницы Димитриевы с силою многою, паче неже прежде, ратовати нань,

12:25  и изыде из Иерусалима, и срете их во Амафитстей стране: не бо даде им времене, да внидут во страну его:

12:26  и посла созиратели в полк их: и возвратишася и возвестиша ему, яко сице устрояются напасти на ня нощию.

12:27  Егда же зайде солнце, заповеда Ионафан своим бдети и быти во оружии и готовитися на брань всю нощь, и постави стражы окрест полка.

12:28  И слышаша супостати, яко готов есть Ионафан со своими на брань, и убояшася и ужасошася сердцем своим, и возжгоша огни в полце своем и отидоша.

12:29  Ионафан же и иже с ним беша, не познаша даже до утра: видяху бо огни горящыя.

12:30  И погна Ионафан вслед их и не достиже их, преидоша бо Елевферу реку.

12:31  И обратися Ионафан на Аравы, иже нарицахуся Заведее, и порази их, и взя корысти их.

12:32  И востав иде в Дамаск и прохождаше всю страну ту.

12:33  Симон же изыде и прииде даже до Аскалона и ближних твердынь, и уклонися во Июппию и взя ю.

12:34  Слыша бо, яко совещашася твердыню предати стране Димитриеве, и постави тамо стражу, да стрегут ю.

12:35  И возвратися Ионафан, и собра старейшины людския, и совещася с ними созидати твердыни во Иудеи

12:36  и возвысити стены Иерусалимския и воздвигнути высоту велию между краеградием и градом, еже бы отлучити оное от града, да будет сие на уединении, яко да ни купуют, ниже продают.

12:37  И собрашася созидати град, паде бо стена потока, яже от востока, и уготоваша нарицаемое Хафенафа.

12:38  И Симон созда Адиду в Сефиле и утверди врата и заворы.

12:39  И взыска Трифон царствовати во Асии и возложити диадиму и прострети руку на Антиоха царя,

12:40  и убояся, да не когда не попустит ему Ионафан и ратовати будет на него, и взыска пути, еже яти Ионафана и убити его: и востав прииде в Вефсан.

12:41  И изыде Ионафан во сретение ему с четыредесятию тысящию мужей избранных на ополчение и прииде в Вефсан.

12:42  И виде Трифон, яко прииде Ионафан с вои многими, и прострети нань руку убояся:

12:43  и восприят его честно, и постави его пред всеми други своими, и даде ему дары, и заповеда всем силам своим послушати его яко себе.

12:44  И рече Ионафану: вскую утрудил еси вся люди сия, брани не настоящей нам?

12:45  И ныне отпусти их в домы своя, избери же себе мужей мало, иже будут с тобою, и прииди со мною во Птолемаиду, и предам тебе ю и прочыя твердыни и силы прочыя, и всех иже над потребами, и возвращься отиду: сего бо ради приидох.

12:46  И веровав ему, сотвори, якоже рече, и отпусти силы, и отидоша в землю Иудину.

12:47  Остави же с собою три тысящы мужей, ихже две тысящы остави в Галилеи, тысяща же идоша с ним.

12:48  Егда же вниде Ионафан во Птолемаиду, заключиша врата градская во Птолемаиде, и яша его, и всех вшедших с ним убиша мечем.

12:49  И посла Трифон вои и конники в Галилею и на поле великое, еже погубити всех другов Ионафановых.

12:50  И познаша, яко ят бысть Ионафан и убиен и вси иже с ним, и увещаша сами себе и идоша уготовани на брань.

12:51  И видеша гонящии, яко о души им есть, и возвратишася.

12:52  И приидоша вси с миром в землю Иудину, и плакашася Ионафана и сущих с ним, и убояшася зело, и плакаше весь Израиль плачем велиим.

12:53  И взыскаша вси языцы, иже окрест их, сокрушити их, реша бо: не имеют началника и помогающаго: ныне убо поратуем их и отимем от человек память их.

Chapter 13

13:1  И слыша Симон, яко собра Трифон силу многу приити в землю Иудину и сокрушити ю,

13:2  и виде люди, яко суть в страсе и трепете, и взыде во Иерусалим и собра люди,

13:3  и увеща их и рече им: вы весте, елика аз и братия моя и дом отца моего сотворихом и о законех и о святых, и брани и тесноты, ихже видехом:

13:4  сего ради погибоша братия моя вси ради Израиля, и остах аз един:

13:5  и ныне не буди ми пощадити души моея во всяко время скорбей, не бо лучший есмь братии моея:

13:6  обаче отмщу о языце моем и о святых и о женах и чадех наших: яко собрашася вси языцы сотрети нас вражды ради.

13:7  И возгорешася духом людие вкупе послушати словес сих

13:8  и отвещаша гласом велиим, глаголюще: ты еси вождь наш вместо Иуды и Ионафана брата твоего:

13:9  побори брань нашу, и вся, елика аще речеши нам, сотворим.

13:10  И собра вся мужы бранники и ускори совершити вся стены Иерусалимския и утверди его окрест:

13:11  и посла Ионафана сына Авессаломова и с ним силу доволную во Июппию, и изгна сущих в ней и пребысть тамо в ней.

13:12  И воздвижеся Трифон от Птолемаиды с силою велиею внити в землю Иудину, и Ионафан с ним в стражи.

13:13  Симон же ополчися во Адиде на лицы поля.

13:14  И позна Трифон, яко воста Симон вместо брата своего Ионафана и яко сразитися с ним хощет бранию,

13:15  посла к нему послы глаголя: сребра ради, еже должен брат твой Ионафан царю, потреб ради, ихже имеяше, содержим его:

13:16  и ныне посли сребра талантов сто и два сына его в залог, яко да не отпущен отступит от нас, и отпустим его.

13:17  И позна Симон, яко лестию глаголют к нему, и посла сребро и отроки, да не когда вражду приимет велию от людий, глаголющих:

13:18  яко не посла ему сребра и отроков, и погибе.

13:19  И посла отроки и сто талант. И солга и не отпусти Ионафана.

13:20  И по сих прииде Трифон, да внидет во страну и сотрет ю, и обыде путь, иже ведет во Адору: а Симон и полк его противоидяше ему на всяко место, аможе идяше.

13:21  Сущии же от краеградия послаша к Трифону послов понуждающих его, да потщится приити к ним пустынею и послати им пищы.

13:22  И уготова Трифон вся конники своя, еже приити в нощь оную. И бе снег велий зело, и не прииде снега ради: и воста и отиде в Галаадитиду.

13:23  Егда же приближися к Васкаме, уби Ионафана, и погребен быти тамо.

13:24  И возвратися Трифон и иде в землю свою.

13:25  И посла Симон и взя кости Ионафана брата своего и погребе я в Модине граде отец своих.

13:26  И плакаша его весь Израиль плачем велиим и рыдаху его дни многи.

13:27  И созда Симон над гробом отца своего и братий своих, и вознесе его видением, камением тесаным созади и сопреди,

13:28  и постави на них седмь пирамид, едину противу единоя, отцу и матери и четырем братиям:

13:29  и сим сотвори ограды, и обложи столпы великия, и сотвори на столпех всеюружия в память вечную, и при всеюружиих корабли изваянныя, во еже видимым быти от всех плавающих на мори.

13:30  Сей гроб, егоже сотвори в Модине, даже до сего дне.

13:31  Трифон же хождаше лестию со Антиохом царем юным, и уби его,

13:32  и воцарися вместо его, и возложи на ся диадиму Асийскую, и сотвори язву великую на земли.

13:33  И созда Симон твердыни Иудейския, и огради столпами высокими и стенами велиими, и вратами и заворами, и положи пищы в твердынех.

13:34  И избра Симон мужы и посла ко Димитрию царю, да сотворит ослабление стране, яко вся дела Трифонова беша хищения.

13:35  И посла ему Димитрий царь по словесем сим, и отвеща ему, и написа ему епистолию сицеву:

13:36  царь Димитрий Симону архиерею и другу царей и старейшинам и языку Иудейску радоватися:

13:37  венец златый и перстень, яже послал еси, восприяхом, и готови есмы сотворити с вами мир велик и писати к сущым над даньми, еже оставити вам дани:

13:38  и елика уставихом вам, крепка суть, и твердыни, яже создасте, да будут вам:

13:39  отпущаем же неведения и согрешения даже до днешняго дне, и венец, егоже должни бысте, и аще кая иная дань бе во Иерусалиме, ктому да не будут даваемая:

13:40  и аще нецыи угодни от вас вписатися к нашым, да впишутся, и да будет между нами мир.

13:41  Лета сто седмьдесятаго отято бысть иго языческое от Израиля,

13:42  и начаша людие Израилевы писати в писаниих и в совещаниих: лета перваго при Симоне архиереи велицем и воине и вожди Иудейстем.

13:43  Во днех онех прииде Симон в Газу и окружи ю полками, и сотвори миханы и приближися ко граду, и изби столп един и взя.

13:44  И вскачаху во град иже бяху в михане, и бысть смятение велие в граде.

13:45  И взыдоша иже беху во граде с женами и чады на стену, растерзаны имуще ризы своя, и возопиша гласом велиим, моляще Симона десницу им дати,

13:46  и рекоша: не сотвори нам по лукавством нашым, но по милости твоей.

13:47  И умилостивися им Симон, не воева их, и изгна их от града: и очисти домы, в нихже бяху идоли, и тако вниде в онь с песньми благословя Господа:

13:48  и изверже из него всякую нечистоту, и всели в нем мужы, иже закон творят, и утверди его, и сотвори себе в нем обитание.

13:49  Сущым же от краеградия во Иерусалиме возбраняшеся исходити и входити во страну, и куповати и продавати: и взалкаша зело, и мнози от них гладом погибоша.

13:50  И возопиша к Симону десницу прияти, и даде им, и изгна их оттуду и очисти краеградие от осквернений.

13:51  И вниде в не в двадесять третий день втораго месяца, лета сто седмьдесят перваго с хвалением и ваиями, и в гуслех и кимвалех и сопелех, и в песнех и пениих, яко сокрушися враг велий от Израиля.

13:52  И устави на всякое лето провождати день той с веселием, и утверди гору святилища, яже близ краеградия, и вселися ту сам и иже с ним.

13:53  И виде Симон Иоанна сына своего, яко муж есть, и постави его вожда сил всех, и вселися в Газарех.

Chapter 14

14:1  И в лето сто седмьдесят второе, собра царь Димитрий силы своя и иде в Мидию собрати помощь себе, яко да ратует противу Трифона.

14:2  И слыша Арсак царь Персский и Мидский, яко прииде Димитрий в пределы его, и посла единаго от началник своих яти его жива.

14:3  И иде и порази ополчение Димитриево, и ят его и приведе его ко Арсаку: и всади его в темницу.

14:4  И умолча земля Иудина во вся дни Симоновы, и взыска благая языку своему, и угодна бысть им власть его и слава его во вся дни.

14:5  И со всею славою своею взя Июппию в пристанище и сотвори вход островом морским,

14:6  и распростре пределы языку своему, и одержа страну,

14:7  и собра пленение много, и господствова над Газары и Вефсуры и краеградием, и отят нечистоты от него, и не бысть противляющагося ему.

14:8  И кийждо делаше землю свою с миром, и земля даяше жита своя, и древеса польская плод свой.

14:9  Старейшины на стогнах седяху и вси о благих беседоваху, и юноши облачахуся славою и ризами ратными.

14:10  Градом даяше пищы и вчиняше их в сосуды утверждения, донележе именовася имя славы его даже до края земли.

14:11  Сотвори мир на земли, и возвеселися Израиль веселием велиим.

14:12  И седе кийждо под виноградом своим и смоковницею своею, и не бысть устрашающаго их.

14:13  И оскуде ратуяй их на земли, и царие сотрошася во дни оны.

14:14  И укрепи всех смиренных людий своих: закона взыска и отят всяко беззаконие и лукавство,

14:15  святая прослави и умножи сосуды святых.

14:16  И слышано бе в Риме, яко умре Ионафан, и даже до Спартии слышася, и оскорбишася зело.

14:17  Егда же услышаша, яко Симон брат его бысть вместо его архиерей и одержа всю страну и грады в ней,

14:18  писаша к нему на дщицах медяных, еже обновити с ним дружбу и споборение, яже сотвориша со Иудою и Ионафаном братиею его.

14:19  И прочтошася пред церковию во Иерусалиме.

14:20  И сей образ посланий, ихже послаша Спартиаты: Спартиатов началницы и град Симону иерею великому и старейшинам, и жерцем и прочым людем Иудейским братии радоватися:

14:21  послы, иже послани суть к людем нашым, возвестиша нам о вашей славе и чести, и возвеселихомся о приходе их,

14:22  и списахом яже от них речена в советех людий сице: Нуминий сын Антиохов и Антипатр Иасонов, послы Иудейстии, приидоста к нам возновляюща с нами дружбу:

14:23  и угодно бысть людем прияти мужы славно и положити восписание словес их во особыя людския книги, да будет память людем Спартиатов: образ же тех писахом Симону архиерею.

14:24  По сих посла Симон Нуминиа в Рим, имущаго щит злат велик весом мнас тысяща на уставление с ними дружбы.

14:25  Егда же услышаша людие словеса сия, реша: кую благодать воздадим Симону и сыном его?

14:26  Утверди бо сам и братия его и дом отца его, и поби враги Израилевы от них, и уставиша ему свободу.

14:27  И написаша на дсках медяных и поставиша на столпе в горе Сионе. И сей есть образ писания: во осмыйнадесять день месяца Елул, лета сто седмьдесят втораго, и сие третие лето при Симоне архиереи, в Сарамели,

14:28  в собрании велицем жерцев и людий, и князей языка и старейшин страны возвестися нам: понеже многащи быша брани в стране,

14:29  Симон же сын Маттафиев, сын сынов Иаривовых, и братия его вдаша себе в бедство, и противосташа сопостатом языка своего, яко да стоят святая их и закон, и славою великою прославиша люди своя:

14:30  и собра Ионафан люди своя, и бысть им архиерей, и приложися к людем своим:

14:31  и хотеша врази их внити в страну их, еже сокрушити страну их и простерти руку на святая их,

14:32  тогда воста Симон и брася за люди своя, и разда сребреников много своим, и вооружи мужы сильныя языка своего, и даде им оброки,

14:33  и утверди грады Иудейския и Вефсуру, яже в пределех Иудейских, идеже бяху оружия бранников прежде, и постави тамо на стражу мужы Иудейския:

14:34  и Июппию утверди, яже на примории, и Газару, яже в пределех Азота, в нейже врази прежде обитаху, и насели тамо Иудеи, и елика потребна бяху на управление сих, положи в них:

14:35  и видеша людие действо Симоново и славу, юже умысли сотворити языку своему, и поставиша его в вожда своего и архиереа, занеже сотвори сия вся, и правду и веру, юже соблюде языку своему, и взыска всяким образом вознести люди своя:

14:36  и во дни его благоуспеваше в руку его, еже изяти языки от страны их, и иже во граде Давидове беху во Иерусалиме, иже сотвориша себе краеградие, из негоже исхождаху и скверняху окрест святых и творяху язву велию в чистоте,

14:37  и насели в нем мужы Иудейски и утверди ко укреплению страны и града и возвыси стены во Иерусалиме:

14:38  и царь Димитрий устави ему началство жречества,

14:39  по сим сотвори его друга своего и прослави его славою великою:

14:40  слыша бо, яко наречени суть Иудее от Римлян друзи и споборницы и братия, и яко прияша послов Симоновых преславно:

14:41  и яко благоволиша Иудее и жерцы быти Симону вождом и архиереем в век, дондеже востанет Пророк верен:

14:42  и да будет над ними воевода, и яко да радеет о святых поставляти их над делами их и над страною, и над оружием и над твердынями,

14:43  и яко да радеет о святых, и да слушают его вси, и да пишутся на имя его вся писания во стране, и да облачится в порфиру и златую ризу,

14:44  и не леть будет ни комуже от людий и от жрец отврещи что от сих и вопреки глаголати от него реченым, или совокупити сонм во стране без него и облещися в порфиру и носити гривну злату:

14:45  а иже аще сотворит кроме сих, или отвержет что сих, повинен будет.

14:46  И угодно бысть всем людем уставити Симону и сотворити по словесем сим.

14:47  И прия Симон, и благоволи архиерействовати, и быти воеводою и началником языка Иудейска и жерцем, и началствовати над всеми.

14:48  И писание сие реша водрузити во дщицах медяных и поставити их в притворе святых, в месте славне,

14:49  списание же сих положити в газофилакии, яко да имать Симон и сынове его.

Chapter 15

15:1  И посла царь Антиох сын Димитриа царя послания от островов морских Симону архиерею и началнику языка Иудейска и всему языку.

15:2  И бяху содержаще образ сей: царь Антиох Симону жерцу великому и языка началнику и языку Иудейскому радоватися:

15:3  понеже мужие губителе одержаша царствия отец наших, хощу же снабдети царство, да устрою е якоже бе прежде, и от стран собрах множество сил и сотворих корабли воинския,

15:4  хощу же изыти во страну, да отмщу растлившым страну нашу и опустошившым грады многи в царствии (моем),

15:5  ныне убо утверждаю тебе вся оставления даней, яже оставиша тебе бывшии прежде мене царие, и елики ины дары оставиша тебе,

15:6  и попустих тебе творити кование особых пенязей во стране твоей,

15:7  Иерусалиму же и святынем быти свободным: и вся оружия, елика уготовал еси, и твердыни, ихже создал еси, ихже держиши, да будут тебе:

15:8  и весь долг царев, и яже подобают цареви, отныне и во все время да оставятся тебе:

15:9  егда же одержим царство наше, прославим тебе и люди твоя и святилище славою великою, яко да явленна будет слава ваша по всей земли.

15:10  Лета сто седмьдесят четвертаго изыде Антиох в землю отец своих, и собрашася к нему вси вои, яко малым быти оставшым со Трифоном.

15:11  И гнаше его Антиох царь, и прииде бежащь в Дору, яже при мори:

15:12  ведяше бо, яко собрашася злая нань и оставиша его воини.

15:13  И ополчися Антиох на Дору, и с ним дванадесять тем мужей бранных и осмь тысящ конников:

15:14  и обступи град, и корабли от моря приидоша, и оскорбляше град от земли и моря, и не остави ни единаго изыти и внити.

15:15  Прииде же Нуминий и иже с ним от Рима, имуще послание царем и странам, в нихже написана сия:

15:16  Левкий ипат Римский Птоломею царю радоватися:

15:17  послы Иудейстии приидоша к нам друзи наши и споборницы, обновляюще прежнюю дружбу и споборение, послани от Симона архиереа и людий Иудейских,

15:18  принесоша же и щит златый мнас тысящи:

15:19  угодно убо бысть нам писати ко царем и странам, да не наносят им зол и да не ратуют их, ни градов их, ни страны их, и да не споборают ратующым противу их:

15:20  и изволися нам прияти от них щит:

15:21  аще убо нецыи губителе пребежаша от страны их к вам, предайте их Симону архиерею, да отмстит им по закону своему.

15:22  Таяжде написа Димитрию царю и Атталу, и Ариарафу и Арсаку,

15:23  и во вся страны, и Сампсаку и Спартиатом, и в Дилон и в Миндон, и в Сикион и в Карию, и в Самон и в Памфилию, и в Ликию и в Аликарнас, и в Род и в Фасилиду, и в Кою и в Сидину, и в Арад и в Гортину, и в Книд и в Кипр и в Киринию.

15:24  Списание же их написаша Симону архиерею.

15:25  Антиох же царь ополчися на Дору вторицею, наводя выну на ню руки и миханы творя, и заключи Трифона еже не входити ниже исходити.

15:26  И посла ему Симон две тысящы мужей избранных в помощь ему и сребро и злато и сосуды многи.

15:27  И не восхоте их прияти, но отверже вся, елика завеща ему прежде, и отчуждися от него.

15:28  И посла к нему Афиновиа единаго от другов своих, да побеседует с ним, глаголя: вы держите Июппию и Газару и краеградие еже во Иерусалиме, грады царства моего,

15:29  пределы их опустошисте, и сотвористе язву велику на земли, и господствовасте местами многими в царствии моем:

15:30  ныне убо отдадите грады, ихже взясте, и дани мест, имиже огосподствовасте вне пределов Иудейских:

15:31  аще же ни, дадите место сих пять сот талантов сребра, и за опустошение, имже опустошисте, и за дани градов другия пять сот талантов: аще же ни, пришедше поратуем вас.

15:32  И прииде Афиновий друг царский во Иерусалим, и виде славу Симонову, и сокровище злата и сребра, и устроение доволно, и ужасеся, и возвести ему словеса царска.

15:33  И отвещав Симон, рече ему: ниже чуждую землю прияхом, ниже чуждая одержахом, но наследие отец наших, от враг же наших в некое время неправедно удержася:

15:34  мы же время имуще восприяхом наследие отец наших:

15:35  о Июппии же и Газарех, ихже просиши, сии творяху в людех язву велию в стране нашей, от сих дадим талант сто. И не отвеща ему Афиновий словесе.

15:36  Возвратися же с яростию ко царю и возвести ему словеса сия и славу Симонову и вся елика виде. И прогневася царь гневом велиим.

15:37  Трифон же всед к корабль, отбеже во Орфосиаду.

15:38  И постави царь Кендевеа воеводою приморским и силы пехотныя и конныя даде ему.

15:39  И повеле ему ополчитися противу лица Иудейска, и заповеда ему создати Кедрон и утвердити врата, и да ратует люди. Царь же гоняше Трифона.

15:40  И прииде Кендевей во Иамнию и нача раздражати люди и входити во Иудею и пленити люди и убивати: и созда Кедрон

15:41  и постави тамо конники и силы, яко да исходяще проходят пути Иудейския, якоже повеле ему царь.

Chapter 16

16:1  И взыде Иоанн от Газаров и возвести Симону отцу своему, яже сотвори Кендевей.

16:2  И призва Симон два сыны своя старейшыя Иуду и Иоанна и рече има: аз и братия моя и дом отца моего поборахом враги Израилевы от юности даже и до сего дне, и благопоспешествовася в руках наших избавити Израиля многащи:

16:3  ныне же состарехся и вы милостию (Бога) доволни есте в летех: будите вместо мене и брата моего, и изшедше поборствуйте за язык наш, помощь же с небесе с вама да будет.

16:4  И избра от страны двадесять тысящ мужей военных и конников, и идоша на Кендевеа и обнощеваша в Модине.

16:5  И воставше заутра идоша на поле, и се, сила велия во сретение им, пешая и конная, и бе поток среде их.

16:6  И ополчися противу лица их сам и людие его: и виде люди боящыяся прейти поток и прейде первый, и видеша его мужие и преидоша вслед его.

16:7  И раздели людий и конников посреде пеших: конницы же врагов мнози зело.

16:8  И вострубиша трубами, и побежден бысть Кендевей и полк его, и падоша от них язвени мнози: прочии же бегоша в твердыню.

16:9  Тогда уязвен бысть Иуда брат Иоаннов: Иоанн же гна их, дондеже прииде в Кедрон, егоже созда.

16:10  И побегоша даже до столпов сущих на селех Азотских, и зажже его огнем, и падоша от них две тысящы мужей: и возвратися в землю Иудину в мире.

16:11  И Птоломей сын Авувов поставлен бысть воеводою в поли Иерихона и имяше сребра и злата много:

16:12  бе бо зять архиереов.

16:13  И вознесеся сердце его, и восхоте одержати страну, и помышляше лестно на Симона и сынов его, погубити их.

16:14  Симон же прохождаше грады, яже во стране Иудейстей, попечение имея о прилежании их, и сниде во Иерихон сам и Маттафиа, и Иуда и сынове его, лета сто седмьдесят седмаго месяца первагонадесять, сей есть месяц Сават.

16:15  И прия их сын Авувов в твердыню, нарицаемую Док, с лестию, юже созда, и сотвори им пир велик, и сокры тамо мужы.

16:16  И егда упися Симон и сынове его, воста Птоломей и иже с ним, и взяша оружия своя, и внидоша к Симону на пир, и убиша его и два сына его и некиих от отрок его.

16:17  И сотвори прелесть велику во Израили и воздаде злая за благая.

16:18  И писа сия Птоломей и посла ко царю, да послет ему воев в помощь, и предаст ему страну их и грады.

16:19  И посла иныя в Газару погубити Иоанна, и тысящником посла послания, да приидут к нему, да даст им сребро и злато и дары.

16:20  И иныя посла объяти Иерусалима и гору святилища.

16:21  И предтек некий возвести Иоанну в Газаре, яко погибе отец его и братия его, и яко посла и тебе убити. И слышав ужасеся зело.

16:22  И ят мужы, иже приидоша погубити его, и уби их: позна бо яко ищут его убити.

16:23  И прочая словес Иоанновых и браней его и благих мужеств его, имиже благомужествова, и созидания стен, ихже созда, и деяний его,

16:24  се, сия писана суть в книзе дний архиерейства его, отнележе бысть архиерей по отце своем.