Azeri - Matthew

Chapter 1

1:1  ائبراهئم اوغلو، داوود اوغلو عئسا مسئحئن نسئل شجره​سي:

1:2  ائبراهئم ائسحاقين آتاسي ائدي، ائسحاق يعقوبون آتاسي ائدي، يعقوب يهودا و اونون قارداشلارينين آتاسي ائدي.

1:3  يهودا تاماردان دوغولان پِرِص و زِرَخئن آتاسي ائدي، پِرِص خِصرونون آتاسي ائدي، خِصرون اَرامين آتاسي ائدي.

1:4  اَرام عَمّئنادابين آتاسي ائدي، عَمّئناداب نَخشونون آتاسي ائدي، نَخشون سَلمونون آتاسي ائدي.

1:5  سَلمون راخابدان دوغولان بوعَزئن آتاسي ائدي، بوعَز روتدان دوغولان عوبئدئن آتاسي ائدي، عوبئد يَسّه‌نئن آتاسي ائدي.

1:6  يَسّه‌ داوود پادشاهين آتاسي ائدي، داوود اوريانين آرواديندان دوغولان سولِيمانين آتاسي ائدي.

1:7  سولِيمان رِخوبعامين آتاسي ائدي، رِحوبعام اَبئيانين آتاسي ائدي، اَبئيا آسانين آتاسي ائدي.

1:8  آسا يِهوشافاطين آتاسي ائدي، يِهوشافاط يِهورامين آتاسي ائدي، يِهورام عوزّئيانين آتاسي ائدي.

1:9  عوزّئيا يوتامين آتاسي ائدي، يوتام آخازين آتاسي ائدي، آخاز خئزقئيانين آتاسي ائدي.

1:10  خئزقئيا مِنسّه​نئن آتاسي ائدي، مِنسّه آمونون آتاسي ائدي، آمون يوشئيانين آتاسي ائدي.

1:11  يوشئيا يِکونيا و اونون قارداشلارينين آتاسي ائدي کي، بابئله اسئرلئيه آپاريلان زامان دوغولموشدو.

1:12  بابئله اسئرلئيه گدندن سونرا: يکونيا سِعَلتي‌اِلئن آتاسي ائدي، سِعَلتي‌اِل زِروبّابئلئن آتاسي ائدي.

1:13  زِروبّابئل اَبئهودون آتاسي ائدي، اَبئهود اِلياقئمئن آتاسي ائدي، اِلياقئم عازورون آتاسي ائدي.

1:14  عازور صادوقون آتاسي ائدي، صادوق آخئمئن آتاسي ائدي، آخئم اِلئهودون آتاسي ائدي.

1:15  اِلئهود اِلئعازارين آتاسي ائدي، اِلئعازار ماتّانين آتاسي ائدي، ماتّان يعقوبون آتاسي ائدي.

1:16  يعقوب مريمئن اَري يوسئفئن آتاسي ائدي، مريمدن ده مسئح آدلانان عئسا دوغولدو.

1:17  بلجه، ائبراهئمدن داوودا قدر اولان بوتون نسئللر، اون دؤرد نسئلدئر؛ داووددان بابئل اسئرلئيئنه قدر اون دؤرد نسئلدئر؛ و بابئل اسئرلئيئندن مسئحه قدر ده اون دؤرد نسئلدئر.

1:18  عئسا مسئحئن آنادان اولماسي بله اولدو؛ آناسي مريم يوسئفه نئشانلانميش اولان زامان، نئکاه کسئلمه​مئشدن، آشکار اولدو کي، موقدّس روحدان حامئله​دئر.

1:19  اونون اَري يوسئف، صالح بئر آدام اولدوغونا گؤره، ائسته‌مئردي کي، اونو روسواي اتسئن و بو نئيّتده ائدي کي، گئزلئجه اونو بوشاسين.

1:20  لاکئن بونلاري دوشونَن زامان، ربّئن بئر مَله‌يي رؤيادا اونا ظاهئر اولوب، ددي: "داوود اوغلو يوسئف، مريمي اؤزونه آروادليغا قبول اتمکدن قورخما، چونکي اونون بطنئنده​کي موقدّس روحداندير.

1:21  مريم بئر اوغول دوغاجاق و اونون آديني عئسا قوياجاقسان. چونکي او، اؤز خالقيني گوناهلاريندان خئلاص اده​جک."

1:22  بوتون بونلار اوندان اؤتري باش وردي کي، ربّئن پيغمبر واسئطه​سئله ددئيي سؤز يرئنه يتئشسئن:

1:23  "باخ، باکئره قيز بويلو اولوب، بئر اوغول دوغاجاق و اونون آديني عِمانوئل قوياجاقلار کي، معناسي بودور: تاري بئزئمله‌دئر."

1:24  يوسئف يوخوسوندان اوياناندان سونرا، ربّئن مَله‌يئنئن بويوردوغو کئمي ادئب، آرواديني قبول اتدي.

1:25  و ائلک اوغلونو دوغانا قدر مريمله ياخينليق اتمه‌دي؛ و اونون آديني عئسا قويدو.

Chapter 2

2:1  عئسا هئرود پادشاهين گونلرئنده، يهودئيه​نئن بيت‌لحمئنده آنادان اولان زامان، شرقدن موغلار اورشلئمه گلئب ددئلر:

2:2  "آنادان اولموش يهودئلرئن پادشاهي هارادادير؟ چونکي اونون اولدوزونو شرقده گؤردوک و گلمئشئک کي، اونا پرستئش ادک."

2:3  هئرود پادشاه بونو اشئدن واخت پرئشان اولدو و بوتون اورشلئم اهالئسي ده اونونلا پرئشان اولدولار.

2:4  هئرود خالقين بوتون باش کاهئنلر و دئن عالئملرئني بئر يره ييغيب، اونلاردان مسئحئن هارادا دوغولاجاغيني سوروشدو.

2:5  اونلار دا اونا ددئلر: "يهودئيه​نئن بِيت‌لِخِمئنده، چونکي پيغمبرئن واسئطه​سئله بله يازيليب:

2:6  و سن، اي بِيت‌لِخِم، يهودا دئياري، يهودا رَيئسلرئنئن آراسيندا، هچ ده کئچئک ديئلسن. چونکي سندن بئر رَيئس ظوهور اده​جک کي، منئم خالقيم ائسرايئله چوبان اولاجاقدير."

2:7  او زامان هئرود موغلاري گئزلئجه چاغيريب، اونلاردان اولدوزون نه واخت چيخديغيني بئلدي.

2:8  و اونلاري بِيت​لِخِمه گؤنده‌رئب، ددي: "گدئن و اوشاغين حاقّيندا دئقّتله آختارين. اونو تاپديغينيز زامان منه خبر ورئن کي، من ده گلئب، اونو پرستئش ادئم."

2:9  اونلار پادشاهين سؤزونو اشئدئب، يولا دوشدولر. شرقده گؤردوکلري اولدوز اونلارين قاباغيندا گدئردي؛ او قدر کي، گلئب اوشاغين اولدوغو يرئن اوستونده دوردو.

2:10  اونلار دا اولدوزو گؤردوکلري زامان بؤيوک سوئنجله حددن آرتيق شادليق اتدئلر.

2:11  و اوه گئرئب، اوشاغي آناسي مريمله گؤردولر و يره دوشوب، اونو پرستئش اتدئلر. و خزئنه​لرئني آچيب اونا قيزيل، بوخور و مور هدئيّه وردئلر.

2:12  و رؤيادا اونلارا تاري طرفئندن ائخطار ورئلدي کي، هئرودون يانينا قاييتماسينلار. اونلار دا آيري يوللا اؤز مملکتلرئنه گتدئلر.

2:13  موغلارين گتمه‌سئندن سونرا، ربّئن بئر مله‌يي رؤيادا يوسئفه ظاهئر اولوب، ددي: "دور، اوشاق و آناسيني گؤتور و مئصئره قاچ. من سنه خبر وِرَنه قدر، اورادا قال. چونکي هئرود اوشاغي آختاراجاق کي، اونو محو اتسئن."

2:14  يوسئف قالخيب اوشاق و آناسيني گجه ائله گؤتوردو و مئصئره گتدي.

2:15  و هئرودون اؤلومونه قدر اورادا قالدي کي، ربّئن پيغمبرئنئن واسئطه​سئله ديئلن سؤز يرئنه يتئشسئن: "اوغلومو مئصئردن چاغيرديم."

2:16  هئرود موغلارين طرفئندن آلدانميش اولدوغونو گؤره‌نده، چوخ قضبلندي و آدام گؤنده‌رئب، موغلاردان بئلدئيي واختا گؤره، بيت‌لحم و اونون اطرافيندا اولان بوتون ائکي ياشيندا و داها آشاغي اولان اوغلان اوشاقلاريني اؤلدورتدو.

2:17  او واخت اِرِميا پيغمبرئن واسئطه​سئله ديئلن بو سؤز يرئنه يتئشدي:

2:18  "رامادا بئر سس اشئدئلدي، آغلاشما و بؤيوک شئون. راحئل اوشاقلاري اوچون آغلايير، ائسته‌مئر ده کي، تسلّي تاپسين. چونکي اونلار يوخ اولدولار."

2:19  لاکئن هئرود اؤلندن سونرا، ربّئن بئر مله‌يي مئصئرده يوسئفه رؤيادا ظاهئر اولوب،

2:20  ددي: "دور، اوشاق و آناسيني گؤتور و ائسرايئل دئيارينا گت. چونکي اوشاغين جانيني آختارانلار اؤلوبلر."

2:21  يوسئف ده قالخدي، اوشاق و آناسيني گؤتوروب، ائسرايئل دئيارينا گتدي.

2:22  آمّا اشئدنده کي، آرخِلاعوس آتاسي هئرودون يرئنده يهودئيه​يه پادشاه اولوب، اورايا گتمَيه قورخدو و تاري طرفئندن رؤيادا ائخطار ورئلئب، جلئل سمتلرئنه گتدي.

2:23  و گلئب ناصئره آدلي بئر شهرده ساکئن اولدو کي، پيغمبرلرئن واسئطه​سئله ديئلمئش سؤز يرئنه يتئشسئن: "او ناصئره​لي آدلاناجاق."

Chapter 3

3:1  او گونلرده تعمئد ورن يحيا ظوهور اتدي و يهودئيه چؤلونده وعظ ادئب، ديئردي:

3:2  "تؤوبه ادئن، چونکي گؤيون پادشاهليغي ياخيندير."

3:3  بو، او شخص ائدي کي، اشعيا پيغمبرئن واسئطه​سئله ديئلمئشدي: "چؤلده بئرئنئن سسي نئدا ادئر: ربّئن يولونو حاضيرلايين، يوللاري اونون اوچون دوز ادئن."

3:4  يحيانين دَوه توکوندن پالتاري، بلئنده ده دَرئدن قاييشي وار ائدي؛ يدئيي چيئرتکه و چؤل بالي ائدي.

3:5  اورشلئمدن، بوتون يهودئيه​دن و اوردونون بوتون اطرافلاريندان خالق اونون يانينا گلئردي

3:6  و گوناهلارينا اعتئراف ادئب، اوردون چاييندا اوندان تعمئد آليردي.

3:7  لاکئن او زامان کي، يحيا فرئسئلر و صادوقئلردن بئر چوخلوسونو گؤردو کي، تعمئد آلماق اوچون اونون يانينا گلئرلر، اونلارا ددي: "اي افعئلر نسئلي! کئم سئزي خبردار اتدي کي، گله​جک قضبدن قاچاسينيز؟!

3:8  ائندي تؤوبه​يه لايئق ثمره گتئرئن.

3:9  و اؤزونوز-اؤزونوزده دوشونمه‌يئن کي، «آتاميز ائبراهئمدئر.» سئزه ديئرم: تاري قادئردئر کي، بو داشلاردان ائبراهئمه اؤولاد ياراتسين.

3:10  آرتيق بالتا آغاجلارين کؤکونه ياتير؛ بلجه ياخشي بار وِرمه‌ين هر آغاج کسئلئر و اودا آتيلير.

3:11  من سئزي تؤوبه اوچون سو ائله تعمئد ورئرم، آمّا مندن سونرا گلن، مندن داها قووّتلي‌دئر. من اونون آياق‌قابيسيني داشيماغا بله لايئق ديئلم. او، سئزي، موقدّس روح و اودلا تعمئد وره​جک.

3:12  اونون شنه​سي الئنده​دئر. خرمنئني تمئز سووروب، بوغداسيني آنبارا ييغاجاق، لاکئن ساماني سؤنمه‌ين اودلا يانديراجاقدير."

3:13  او زامان عئسا جلئلدن اوردونا، يحيانين يانينا گلدي کي، اوندان تعمئد آلسين.

3:14  لاکئن يحيا قويماييب، ددي: "من سنئن طرفئندن تعمئد آلماغا مؤحتاجام، سن منئم يانيما گلئرسن؟!"

3:15  عئسا اونا جاواب ورئب ددي: "ائندئلئک راضي اول، چونکي بئزه بله ياراشير کي، دوز اولان هر شيي يرئنه يتئرک." او زامان يحيا راضي اولدو.

3:16  عئسا تعمئد آليب درحال سودان چيخدي. او آندا گؤيلر آچيلدي و تارينين روحونو گؤردو کي، گؤيرچئن کئمي انئب اونون اوستونه قوندو.

3:17  و گؤيدن بئر سس ددي: "بو منئم سوگئلي اوغلومدور، اوندان چوخ راضي‌يام."

Chapter 4

4:1  بوندان سونرا موقدّس روح عئساني چؤله آپاردي کي، ائبلئس طرفئندن وسوسه اولونسون.

4:2  عئسا قيرخ گون-قيرخ گجه اوروج توتاندان سونرا آجيقدي.

4:3  اونو وسوسه ادن، اونون يانينا گلئب، ددي: "اگر تارينين اوغلوسان، امر ات کي، بو داشلار چؤره‌يه دؤنسون."

4:4  عئسا جاواب ورئب، ددي: "يازيليب کي، «ائنسان آنجاق چؤرکله يوخ، تارينين آغزيندان چيخان هر بئر سؤز​له ياشار.»"

4:5  سونرا ائبلئس اونو موقدّس شهره گتئردي و معبدئن بورجو اوستونه آپاريب،

4:6  ددي: "اگر تارينين اوغلوسان، اؤزونو آشاغي آت؛ چونکي يازيليب کي، «او سنئن حاقّيندا ملکلرئنه امر اده​جک، و اونلار سني اللري اوستونده گؤتوره​جکلر کي، مبادا آياغيني داشا ووراسان.»"

4:7  عئسا اونا جاواب ورئب ددي: "گئنه ده يازيليب کي، «رب تاريني ائمتاحانا چکمه.»"

4:8  ائبلئس گئنه عئساني چوخ اوجا بئر داغين اوستونه آپاردي و اونا دونيانين بوتون اؤلکه​لرئني و اونلارين بوتون شؤوکتلرئني گؤرسدئب،

4:9  ددي: "اگر يره دوشوب، منه سجده اده​سن، بونلارين هاميسيني سنه وره​رم."

4:10  عئسا اونا ددي: "ردّ اول، شيطان! چونکي يازيليب؛ «تارين ربّه سجده ات و آنجاق اونا خئدمت اله.»"

4:11  او زامان ائبلئس اونو بوراخدي و ملکلر گلئب، اونا خئدمت اتدئلر.

4:12  عئسا يحيانين توتولماسيني اشئدن واخت جلئله قاييتدي.

4:13  و ناصئره​ني ترک ادئب، زِبولون و نفتالي بؤلگه​سئنده گؤل قيراغيندا اولان کفرناحومدا ساکئن اولدو کي،

4:14  اشعيا پيغمبرئن واسئطه​سئله ديئلن سؤز يرئنه يتئشسئن:

4:15  "زبولون دئياري، نفتالي دئياري، دهنز قيراغي يولدا، اوردون چايينين او تاييندا، قيري‌يهودئلرئن جلئلئنده!

4:16  قارانليقدا ياشايان خالق بؤيوک بئر نور گؤردو، اؤلومون کؤلگه سالديغي دئياردا ياشايانلارا ائشيق دوغدو."

4:17  او واختدان عئسا وعظ اتمه‌يه باشلاييب، ددي: "تؤوبه ادئن، چونکي گؤيون پادشاهليغي ياخيندير."

4:18  عئسا جلئل گؤلونون قيراغيندا گزنده، ائکي قارداشي، پِطروس آدلانان شَمعونو و اونون قارداشي آندرياسي گؤردو کي، گؤله تور آتيرديلار. اونلار باليق اووچوسو ائدئلر.

4:19  عئسا اونلارا ددي: "منئم داليمجا گلئن. من سئزي ائنسان اووچوسو اِده‌رم."

4:20  اونلار دا او آندا تورلاريني قويوب اونون دالينجا گتدئلر.

4:21  اورادان ائره​لي گدئب، داها ائکي قارداشي، زِبِديئن اوغلو يعقوب و قارداشي يوحنّاني گؤردو کي، آتالاري زِبِدي‌‌له قاييقدا تورلاريني تعمئر ادئرلر. و اونلاري چاغيردي.

4:22  اونلار دا او آندا قاييق و آتالاريني قويوب عئسانين دالينجا گتدئلر.

4:23  عئسا بوتون جلئلي دولانيب، اونلارين کنئسه​لرئنده تعلئم ورئردي و گؤيون پادشاهليغينين موژده​سئني وعظ ادئب، خالق آراسيندا هر جور مرض و ناخوشلوغو صاغالديردي.

4:24  اونون حاقّينداکي خبر بوتون سورئيه دئيارينا ياييلدي و جوربه​جور ناخوشلوق و دردلره دوچار اولان ناخوشلاري، ناپاک روحلارا توتولانلاري، غشّئلري، و ائفلئجلري اونون يانينا گتئردئلر و اونلارا شفا وردي.

4:25  جلئلدن، دکاپولئسدن، اورشلئمدن، يهودئيه​دن، و اوردون چايينين اوتاييندان بؤيوک بئر جاماعات اونون دالينجا گدئردي.

Chapter 5

5:1  عئسا جاماعاتي گؤرن زامان داغا چيخيب، اورادا اوتوردو. شاگئردلري ده يانينا گلدئلر.

5:2  و اونلارا تعلئم ورمه‌يه باشلاييب، ددي:

5:3  "خوش روحدا يوخسول اولانلارين حالينا، چونکي گؤيون پادشاهليغي اونلاريندير.

5:4  خوش ياسلي اولانلارين حالينا، چونکي اونلار تسلّي تاپاجاقلار.

5:5  خوش حلئملرئن حالينا، چونکي اونلار يري مئراث آلاجاقلار.

5:6  خوش صالحلئيه آج و سوسوز اولانلارين حالينا، چونکي اونلار دوياجاقلار.

5:7  خوش رحم ادنلرئن حالينا، چونکي اونلارا رحم اولوناجاق.

5:8  خوش اوره‌يي تمئز اولانلارين حالينا، چونکي اونلار تاريني گؤره​جکلر.

5:9  خوش باريشي ساخلايانلارين حالينا، چونکي اونلارا تارينين اوغوللاري ديئله​جک.

5:10  خوش او آداملارين حالينا کي، صالحلئک اوچون سئتم چکئرلر، چونکي گؤيون پادشاهليغي اونلاريندير.

5:11  خوش سئزئن حالينيزا او زامان کي، منه گؤره سئزي تحقئر ادئرلر، عذاب ورئرلر، و سئزه هر جور بؤهتان آتيرلار.

5:12  سوئنئن و شادليق ادئن، چونکي گؤيده​کي اَجرئنئز بؤيوکدور! دوغرودان دا کي، سئزدن قاباق پيغمبرلره ده بله عذاب ورئبلر.

5:13  سئز ير اوزونون دوزوسونوز. آمّا اگر دوز داديني اَلدن ورسه، نجه تکرار دوزلو اولا بئلر؟ آرتيق هچ بئر شيه فايداسي يوخدور، مگر اشئيه آتيليب، ائنسانلارين آياقلاري آلتيندا ازئلسئن.

5:14  سئز دونيانين نوروسونوز. داغ اوستونده قورولان شهر گئزلي قالا بئلمز.

5:15  آداملار دا چيراق يانديريب، اونو قابين آلتينا قويمازلار. چيراقدانا قويارلار کي، اِوده اولانلارين هاميسينا ائشيق ورسئن.

5:16  بلجه قويون سئزئن نورونوز ائنسانلارين حوضوروندا اله شاخسين کي، ياخشي عمللرئنئزي گؤرسونلر و گؤيده‌کي آتانيزا حمد اتسئنلر.

5:17  گومان اتمه‌يئن کي، من شرئعتي و يا پيغمبرلرئن يازيلاريني پوزماغا گلمئشم؛ پوزماق اوچون يوخ، تاماملاماق اوچون گلمئشم.

5:18  چونکي دوغروسونو سئزه ديئرم، گؤي و ير آرادان گده‌نه کئمي، شرئعتدن لاپ کئچئک بئر حرف و يا نؤقطه بله يوخ اولماياجاق، اله کي، هاميسي يرئنه يتئشسئن.

5:19  بونا گؤره، هرکس بو لاپ کئچئک حرفلردن بئرئني پوزسا و بله اتمه‌يي ائنسانلارا اؤيرتسه، گؤيون پادشاهليغيندا او، لاپ کئچئک آدلاناجاق. لاکئن هرکس اونلارا عمل ادئب اؤيرتسه، گؤيون پادشاهليغيندا بؤيوک آدلاناجاقدير.

5:20  چونکي سئزه ديئرم کي، اگر سئزئن صالحلئيئنئز دئن عالئملري و فرئسئلرئن صالحلئيئندن آرتيق اولماسا، گؤيون پادشاهليغينا اصلا گئرميه​جکسئنئز.

5:21  اشئدئبسئنئز کي، قدئم زامانلارين آداملارينا ديئلمئشدي: «آدام اؤلدورمه؛ کئم آدام اؤلدورسه، گَرَک موحاکئمه اولونسون!»

5:22  آمّا من سئزه ديئرم؛ کئم قارداشينا سببسئز حئرصلَنسه، گَرَک موحاکئمه اولونسون. و کئم قارداشينا آخماق دسه، مئلّت محکمه​سئنئن قاباغيندا خاطاکار اولاجاق. و کئم «سن، اي آخماق» دسه، جهنّم اودونا موستحق اولاجاقدير.

5:23  بونا گؤره، اگر قوربانيني قوربانگاهين يانينا گتئردئيئن واخت، اورادا يادينا دوشسه کي، قارداشينين سندن بئر شئکايتي وار،

5:24  قوربانيني اورادا، قوربانگاهين يانيندا قوي. گت، اوّلجه قارداشينلا باريش و اوندان سونرا گل، قوربانيني تقدئم ات.

5:25  سندن شئکايتي اولان آداملا، يولدا ائکن تز صولح ات، يوخسا سني حاکئمه وِرَر، حاکئم ده سني مأمورا ورر و زئندانا آتيلارسان.

5:26  دوغروسونو سنه ديئرم، آخير قارا پولونو ورمه‌دن، اورادان اصلا چيخماياجاقسان.

5:27  اشئدئبسئنئز کي، قدئم زامانلارين آداملارينا ديئلئب: «زئنا اتمه!»

5:28  آمّا من سئزه ديئرم: بئر آروادا شهوتله باخان هر آدام، اوره‌يئنده اونونلا زئنا اتمئش اولور.

5:29  اگر صاغ گؤزون سني پئس يولا چکسه، اونو چيخارت و اؤزوندن آت‌‌​گتسئن. چونکي سنئن اوچون عوضولرئندن بئرئنئن يوخ اولماسي، بوتون بدنئنئن جهنّمه آتيلماسيندان داها ياخشي‌دير.

5:30  اگر صاغ الئن سني پئس يولا چکسه، اونو کس و اؤزوندن آت‌‌​گتسئن. چونکي سنئن اوچون عوضولرئندن بئرئنئن يوخ اولماسي، بوتون بدنئنئن جهنّمه آتيلماسيندان داها ياخشي‌دير.

5:31  اشئدئبسئنئز کي، ديئلئب: «کئم آرواديني بوشاسا، اونا بوشانما کاغيذي ورسئن!»

5:32  آمّا من سئزه ديئرم، هرکس کي، آرواديني زئنادان باشقا، اؤزگه بئر سببه گؤره بوشاسا، اونو زئنايا سالير. هر کس ده کي، بوشانميش آروادلا اِوله‌نئر، اونونلا زئنا ادئر.

5:33  گئنه، اشئدئبسئنئز کي، قدئم زامانلارين آداملارينا ديئلئب: «يالان يره آند ائچمه و ربّه اتدئيئن نذئرلري يرئنه يتئر!»

5:34  آمّا من سئزه ديئرم: هچ واخت آند ائچمه‌يئن؛ نه گؤيه، چونکي او، تارينين تختئدئر،

5:35  نه يره، چونکي اونون آياقلاري اوچون آياق​​آلتي‌دير، نه ده اورشلئمه، چونکي او، بؤيوک پادشاهين شهري‌دئر.

5:36  باشينيزا دا آند ائچمه‌يئن، چونکي بئر دنه ده اولسا، ساچي آغ و يا قارا اده بئلمزسئنئز.

5:37  آنجاق «بَلئنئز، بلي» اولسون و «خِيرئنئز، خير»؛ بوندان آرتيغي شرئردندئر.

5:38  اشئدئبسئنئز کي، ديئلئب: «گؤزه گؤز، دئشه دئش.»

5:39  آمّا من سئزه ديئرم: پئسلئيئن قاباغيندا موقاوئمت اِتمه‌‌يئن. کئم اوزونوزون صاغ طرفئنه وورسا، اونا سول طرفئني ده چوئرئن.

5:40  و اگر بئري محکمه​يه گدئب، کؤينه‌يئنئزي آلماق ائسته‌سه، اونا اوست پالتاريني دا ورئن.

5:41  کئم سني مئن مئل يول گِتمَيه زور اتسه، اونونلا ائکي مئن مئل گت.

5:42  سندن بئر شي ائسته‌ينه ور و سندن بورج ائسته‌ينه اوز چوئرمه.

5:43  اشئدئبسئنئز کي، ديئلئب: «اؤز قونشونو سِو و دوشمنئندن نئفرت ات.»

5:44  آمّا من سئزه ديئرم: دوشمنلرئنئزي سوئن و سئزي ائنجئدئب، اذئيّت ورنلر اوچون دوعا ادئن کي،

5:45  گؤيده اولان آتانيزين اوغوللاري اولاسينيز. چونکي او، اؤز گون ائشيغيني هم يامان آداملارين، هم ده ياخشي آداملارين اوستونه سالير. ياغيشني دا هم صالح اولانلارين، هم ده صالح اولمايانلارين اوستونه ياغديرير.

5:46  اگر آنجاق سئزي سِوَنلري سِوه​سئنئز، سئزئن نه اجرئنئز اولاجاق؟! مگر باج ييغانلار دا بله اتمئرلر؟!

5:47  و اگر آنجاق اؤز قارداشلارينيزي سالاملاياسينيز، نه آرتيق بئر شي ادئرسئنئز؟! مگر بوتپرستلر ده اله اتمئرلر؟!

5:48  بونون اوچون، گؤيده‌کي آتانيز کئمي، سئز ده کامئل اولون.

Chapter 6

6:1  دئقّت ادئن کي، ياخشي عمل‌لرئنئز ائنسانلارا اؤزونوزو گؤرسدمک اوچون اولماسين. يوخسا گؤيلرده اولان آتانيزين يانيندا اجرئنئز اولماياجاق.

6:2  اونا گؤره، صدقه وردئيئن زامان، اونو شيپورلارلا جار چکمه، نجه کي، رئياکار آداملار، خالقين يانيندا حؤرمت قازانماق اوچون، کنئسه​لر و کوچه​لرده ادئرلر. دوغروسونو سئزه ديئرم؛ اونلار بوتون اجرلرئني آليبلار.

6:3  لاکئن سن، صدقه وردئيئن واخت، قوي سول الئن ساغ الئنئن نه اتدئيئني بئلمه‌سئن.

6:4  صدقن گئزلي اولسون؛ گئزلئني گؤرن آتان دا سنه عوضئني وره​جک.

6:5  دوعا ادنده رئياکار آداملار کئمي اولما. چونکي اونلار سوئرلر کي، اؤزلرئني آيري آداملارا گؤرسدمک اوچون، کنئسه​لرده و کوچه​لرئن آغزيندا دوروب، دوعا اتسئنلر. دوغروسونو سئزه ديئرم؛ اونلار بوتون اجرلرئني آليبلار.

6:6  لاکئن سن، دوعا اتدئيئن واخت، اؤز اوتاغينا گئر و قاپيني باغلاييب، گئزلئنده اولان آتانا دوعا ات. گئزلئني گؤرن آتان دا سنه عوضئني وره​جک.

6:7  دوعا اتدئيئن واخت، بوتپرستلر کئمي بوش سؤزلر دمه؛ چونکي اونلار اله گومان ادئرلر کي، سؤزلرئنئن چوخلوغو ائله دوعالاري اشئدئله​جک.

6:8  اونلارا اوخشامايين؛ چونکي آتانيز سئزئن نَلره مؤحتاج اولدوغونوزو، سئز اوندان ائستمه‌دن، بئلئر.

6:9  بونون اوچون بله دوعا ادئن: اي گؤيلرده اولان آتاميز، سنئن آدين موقدّس اولسون.

6:10  سلطنتئن گلسئن. سنئن ائسته‌دئيئن، گؤيده اولدوغو کئمي، يرده ده اولسون.

6:11  گونده​لئک چؤره‌يئمئزي بو گون بئزه ور.

6:12  و بئزئم بورجلاريميزي بئزه باغيشلا، نجه کي، بئز ده، بئزه بورجلو اولانلاري باغيشلاييريق.

6:13  بئزي ائمتاحانا چکمه، لاکئن شردن خئلاص ات. چونکي سلطنت، قودرت و عئزّت ابده کئمي سنئندئر. آمئن.

6:14  چونکي اگر ائنسانلارين سئزه اتدئيي گوناهلاريني باغيشلاياسينيز، گؤيلرده اولان آتانيز دا سئزي باغيشلار.

6:15  آمّا اگر ائنسانلارين سئزه اتدئيي گوناهلاريني باغيشلاماياسينيز، آتانيز دا سئزئن گوناهلارينيزي باغيشلاماز.

6:16  اوروج توتدوغونوز زامان رئياکار آداملار کئمي قاشقاباقلي گزمه‌يئن؛ چونکي اونلار، اؤزلرئني ائنسانلارا گؤرسدمک اوچون، گؤرونوشلرئني ديئشئرلر. دوغروسونو سئزه ديئرم؛ اونلار بوتون اجرلرئني آليبلار.

6:17  لاکئن سن، اوروج توتدوغون واخت، باشينا ياغ سورت و اوزونو يو؛

6:18  اله کي، آداملارا يوخ، گئزلئنده اولان آتانا اوروجلو گؤرونه​سن. و گئزلئني گؤرن آتان دا سنه عوضئني وره​جک.

6:19  ير اوزونده اؤزونوزه خزئنه​لر ييغمايين؛ اورادا گووه و پاس اونلاري محو ادر؛ و اوغرولار اوراني ياريب اوغورلارلار.

6:20  آمّا اؤزونوزه گؤيده خزئنه​لر ييغين کي، اورادا نه گووه محو ادر نه پاس؛ نه ده اوغرولار اورايا گئرئب اوغورلارلار.

6:21  چونکي خزئنه‌نئزهارادا اولسا، اوره‌يئنئز ده اورادا اولاجاقدير.

6:22  بدنئن چيراغي گؤزدور؛ اونا گؤره، گؤزون صاغ اولسا، بوتون بدنئن ده ائشيقلي اولار.

6:23  اگر گؤزون پئس اولسا، بوتون بدنئن قارانليق اولار. بلجه اگر سنده‌کي ائشيق قارانليق اولسا، او قارانليق نه بؤيوکدور!

6:24  هچ کئم ائکي آغايا قوللوق اده بئلمز؛ چونکي يا بئرئندن نئفرت ادئب او بئرئسئني سوه​جک، يا دا بئرئنه باغلي قاليب او بئرئسئنه حقارتله باخاجاق. سئز هم تارييا، هم ده پولا قوللوق اده بئلمزسئنئز.

6:25  بونون اوچون سئزه ديئرم: جانينيز اوچون نئگاران اولمايين کي، نه ييئب نه ائچه​جکسئنئز، يا دا نه گِيه​جکسئنئز. مگر جان يمکدن و بدن گيمکدن داها افضل ديئل؟!

6:26  گؤيون قوشلارينا باخين؛ اونلار نه اکئرلر، نه بئچئرلر، نه ده آنبارلارا ييغيرلار. لاکئن گئنه ده، گؤيلرده اولان آتانيزدير کي، اونلاري دويورور. مگر سئز اونلاردان داها افضل ديئلسئنئز؟!

6:27  سئزلردن کئم وار کي، نئگاران اولماقلا عؤمرونه بئر ساعات آرتيرا بئلسئن؟!

6:28  نه اوچون پالتاردان اؤتري نئگاران اولورسونوز؟ زَمي زانباقلارينين نجه بؤيودوکلرئنه باخين؛ نه زحمت چکئرلر، نه ده ائپلئک ايئرئرلر.

6:29  آمّا سئزه ديئرم؛ سوليمان بله، بوتون شؤوکتئنده بونلاردان بئري کئمي گيئنمه​مئشدي.

6:30  اگر تاري بو گون مؤوجود اولوب صاباح اوجاغا آتيلان اوتو بله گيئندئرئر، آيا سئزي داها آرتيق گيئندئرميه​جک، اي آز ائمانلي‌لار؟!

6:31  بلجه «نه يئه​جه‌يئک؟»، «نه ائچه​جه‌يئک؟»، «نه گئيه​جه‌يئک؟» ديئب، نئگاران اولمايين.

6:32  چونکي بوتون بو شيلري بوتپرستلر آختاريرلار و گؤيده اولان آتانيز سئزئن بو شيلره مؤحتاج اولدوغونوزو بئلئر.

6:33  لاکئن سئز اوّلجه تارينين پادشاهليغيني و اونون صالحلئيئني آختارين و بونلارين هاميسي سئزه آرتيقليقلا ورئله​جک.

6:34  بونا گؤره، صاباح اوچون نئگاران اولمايين؛ چونکي صاباحکي گون اؤزو، اؤز فئکرئنده اولاجاق. هر گونون اؤزو اوچون اؤز نئگارانچيليغي وار.

Chapter 7

7:1  حؤکم اتمه‌يئن کي، سئزه ده حؤکم اولونماسين.

7:2  چونکي نه حؤکمله موحاکئمه اده​سئنئز، اونونلا دا موحاکئمه اولوناجاقسينيز؛ و هانسي اؤلچو ائله اؤلچه​سئنئز، او اؤلچو ائله ده سئزه اؤلچوله‌جک.

7:3  نه اوچون قارداشينين گؤزونده‌کي چؤپو گؤرورسن، لاکئن اؤز گؤزونده اولان تئري سچمئرسن؟!

7:4  اؤز گؤزونده تئر اولدوغو حالدا، قارداشينا نجه ديئرسن کي، قوي گؤزونده‌کي چؤپو چيخارديم؟!

7:5  اي رئياکار! قاباقجا اؤز گؤزوندن تئري چيخارت، او زامان ياخشي گؤررسن کي، قارداشينين گؤزونده‌کي چؤپو نجه چيخارداسان.

7:6  موقدّس سايديغينيز شيلري ائتلره ورمه‌يئن و مئروارئلرئنئزي دونگوزلارين قاباغينا آتمايين کي، اونلاري آياقلاري آلتيندا پايمال اتمه‌سئنلر و دؤنوب سئزي ده پارچالاماسينلار.

7:7  ائسته‌يئن، سئزه ورئله​جک؛ آختارين، تاپاجاقسينيز؛ قاپيني دؤيون، سئزه آچيلاجاق.

7:8  چونکي هر ائسته‌ين آلير؛ آختاران تاپير؛ و قاپي، اونو دؤينه آچيلير.

7:9  سئزدن کئم وار کي، اوغلو اوندان چؤرک ائسته‌ين واخت، اونا داش ورسئن؟!

7:10  و يا باليق ائسته‌ين واخت، اونا ائلان ورسئن؟!

7:11  بلجه، اگر سئز، پئس اولدوغونوز حالدا، اؤولادلارينيزا ياخشي هدئيّه​لر ورمه‌يي بئلئرسئنئز، نه قدر آرتيق گؤيده اولان آتانيز اوندان ائسته‌ينلره ياخشي شيلر وره​جک.

7:12  بونا گؤره، ائنسانلارين سئزئنله نجه رفتار اتمکلرئني ائسته‌يئرسئنئز، سئز ده اونلارلا اله رفتار ادئن. چونکي شرئعت و پيغمبرلرئن ددئکلري بودور.

7:13  دار قاپيدان گئرئن؛ چونکي هلاکا آپاران قاپي گنئش و يول اِنلئدئر؛ بو قاپيدان گئرنلر چوخدور.

7:14  حياتا آپاران قاپي دار و يول اِنسئزدئر؛ بو يولو تاپانلار آزديرلار.

7:15  يالانچي پيغمبرلردن اؤزونوزو اوزاق ساخلايين کي، يانينيزا قويون جئلدئنده گلئرلر، آمّا باطئنده وحشي قورددورلار.

7:16  اونلاري ميوه​لرئندن تانيياجاقسينيز. مگر تئکانلاردان اوزوم و قانقالدان انجئر دررلر؟!

7:17  بلجه، هر ياخشي آغاج ياخشي ميوه ورر؛ لاکئن پئس آغاج پئس ميوه گتئرر.

7:18  ياخشي آغاج پئس ميوه وره بئلمز؛ پئس آغاج دا ياخشي ميوه وره بئلمز.

7:19  ياخشي ميوه ورمه‌ين هر آغاج کسئلر و اودا آتيلار.

7:20  بلجه، يالانچي پيغمبرلري ميوه​لرئندن تانيياجاقسينيز.

7:21  منه «يارب، يارب» دئين هرکس گؤيلرئن پادشاهليغينا گئرميه​جک. اورايا آنجاق او آداملار گئره​جکلر کي، گؤيده‌کي آتامين ائراده‌سئنه عمل ادئرلر.

7:22  او گونده بئر چوخو منه دئيه​جک: «يارب، يارب، مگر بئز سنئن آديندا نبئلئک اتمه‌دئک؟! مگر سنئن آديندا ناپاک روحلاري ائنسانلارين ائچئندن قووماديق؟! مگر سنئن آديندا بئر چوخ مؤجوزه اتمه‌دئک؟!»

7:23  او زامان اونلارا دئيه​جه‌يم: .من سئزي هچ واخت تانيماميشام. گؤزومون قاباغيندان ائتئن، سئز اي حاقسيزليق ادنلر!»

7:24  بلجه، منئم بو سؤزلرئمي کئم اشئدئب اونلارا عمل اتسه، اونو او آغيلّي آداما بنزه‌دئرم کي، اوئني داش اوستونده تئکدي.

7:25  ياغيش ياغدي، سللر گلدي، يللر اسدي و او اِوه هوجوم اتدي. آمّا اِو اوچمادي. چونکي بونؤوره​سي داش اوستونده قويولموشدو.

7:26  لاکئن منئم بو سؤزلرئمي کئم اشئدئب اونلارا عمل اتمه‌سه، اونو او آغيلسيز آداما بنزه‌دئرم کي، اوئني قوم اوستونده تئکدي.

7:27  ياغيش ياغدي، سللر گلدي، يللر اسدي و او اوه هوجوم اتدي. و اِو اوچدو و اونون ييخيلماسي بئر موصئبت اولدو."

7:28  عئسا بو سؤزلري بئتئرندن سونرا، خالق اونون تعلئمئندن حيران قالميشدي.

7:29  چونکي اونلارا دئن عالئملري کئمي يوخ، ائقتئدار صاحئبي کئمي تعلئم ورئردي.

Chapter 8

8:1  داغدان اندئيي واخت، عئسانين دالينجا بؤيوک بئر جاماعات گتدي.

8:2  بو آرادا بئر جوذاملي گلدي و اونون قاباغيندا سجده ادئب ددي: "يارب، اگر ائستيه​سن، مني بو ناخوشلوقدان تمئز اده بئلرسن."

8:3  عئسا الئني اوزاتدي و اونا قويوب ددي: "ائسته‌يئرم، تمئز اول." جوذاملي آدام درحال جوذامدان تمئزلندي.

8:4  عئسا اونا ددي: "باخ، هچ کسه بئر سؤز دمه، آنجاق گت، اؤزونو کاهئنه گؤرسد و موسانين بويوردوغو قورباني تقدئم ات کي، ائنسانلارا شهادت اولسون."

8:5  عئسا کفر ناحوما گئرن واخت، بئر يوزباشي اونا ياخينلاشيب يالواردي:

8:6  "يارب، نؤکرئم فلج اولوب، اِوده ياتير و چوخ عذاب چکئر."

8:7  عئسا اونا ددي: "گلئب اونو صاغالدارام."

8:8  يوزباشي جاواب ورئب ددي: "يارب، لايئق ديئلم کي، سن منئم داميم آلتينا گئره​سن. آنجاق بئر سؤز بويور و نؤکرئم صاغالار.

8:9  چونکي من ده امر آلتيندا اولان بئر آدامام و امرئم آلتيندا عسگرلر وار. بئرئنه «گت» دِسَم، گدر. او بئرئنه «گل» دِسَم، گلر. و قولوما «بونو ات» دسم، ادر."

8:10  عئسا بونو اشئدن واخت تعجّوبلندي و آرخاسيندا گلنلره ددي: "دوغروسونو سئزه ديئرم؛ ائسرايئلده بله، بو قدر بؤيوک ائمانا راست گلمه‌دئم.

8:11  سئزه ديئرم کي، شرقدن و قربدن چوخ آدام گله​جک و گؤيلرئن پادشاهليغيندا ائبراهئم، ائسحاق، و يعقوبلا بئرلئکده سوفره​يه اوتوراجاق،

8:12  لاکئن بو پادشاهليغين اوغوللاري چؤل قارانليغينا آتيلاجاق؛ اورادا آغلاشما و دئش قيجيرتماسي اولاجاقدير."

8:13  سونرا عئسا يوزباشي‌يا ددي: "گت، ائنانديغين کئمي اولسون." و نؤکر او ساعات ياخشيلاشدي.

8:14  عئسا پطروسون اوئنه گئرئب، گؤردو کي، اونون قايناناسي قيزديرما ائچئنده ياتيب.

8:15  اونون الئندن توتدو و آروادين قيزديرماسي کسئلدي. او دا قالخيب، اونلارا خئدمت اتمه‌يه باشلادي.

8:16  آخشام اولاندا ناپاک روحلارا اسئر اولموش بئر چوخ آداملاري اونون يانينا گتئردئلر. و عئسا، بئر سؤزله روحلاري قوودو و ناخوشلارين هاميسينا شفا ورئردي کي،

8:17  اشعيا پيغمبرئن واسئطه​سئله ديئلن سؤز يرئنه يتئشسئن: "بئزئم ضعئفلئکلرئمئزي او، گؤتوردو، بئزئم ناخوشلوقلاريميزي او، داشيدي."

8:18  عئسا اطرافيندا بؤيوک بئر جاماعاتي گؤرن واخت، بويوردو کي، گؤلون او تايينا کچسئنلر.

8:19  بو زامان بئر دئن عالئمي گلئب، اونا ددي: "اوستاد! هارايا گده​سن، سنئن دالينجا گله​جه‌يم."

8:20  عئسا اونا ددي: "تولکولرئن يوواسي وار، گؤي قوشلارينين دا يوواسي؛ لاکئن ائنسان اوغلونون باشيني داياماغا بئر يري يوخدور."

8:21  آيري بئر شاگئرد عئسايا ددي: "يارب، منه ائجازه ور، اوّلجه گدئم آتامي باسديريم."

8:22  لاکئن عئسا اونا ددي: "سن منئم داليمجا گل. قوي اؤلولر، اؤلولرئني باسديرسينلار."

8:23  عئسا قاييغا مئندئيي زامان، شاگئردلري ده اونون دالينجا گتدئلر.

8:24  بئردن​بئره گؤلده بؤيوک بئر کولک باشلادي، اله کي، قاييق شپه​لر​له اؤرتولدو. لاکئن عئسا ياتميشدي.

8:25  شاگئردلر ياخينلاشديلار و عئساني اوياديب ددئلر: "بئزي خئلاص ات يارب، هلاک اولوروق."

8:26  عئسا اونلارا ددي: "اي آز ائمانلي‌لار! نه اوچون قورخورسونوز؟» سونرا دوروب، کوله‌يه و گؤله آجيقلاندي و بؤيوک بئر آرامليق دوشدو.

8:27  آداملار مات قاليب ديئردئلر: "بو، کئمدئر کي، هم کولک، هم ده گؤل اوندان ائطاعت ادئر؟"

8:28  عئسا، گؤلون او تاييندا اولان "جَدَرئلَرئن" دئيارينا گلدئيي زامان، ائکي نفره راست گلدي کي، قبئرلئک ماغارالاردان چيخيرديلار. ائبلئس الئنده اسئر ائدئلر. اونلار چوخ دلي ائدئلر و هچ کئم او يولدان کچه بئلمزدي.

8:29  بئردن باغيريب ددئلر: "اي تارينين اوغلو، بئزدن نه ائسته‌يئرسن؟ مگر گلئبسن کي، واختيندان قاباق بئزه عذاب وره​سن؟"

8:30  اونلاردان اوزاقدا بؤيوک بئر دونگوز سوروسو اوتلاييردي.

8:31  ائبلئسلر عئسايا يالوارديلار: "اگر بئزي قوواجاقسان، ائجازه ور کي، بو دونگوز سوروسونه گئرک."

8:32  عئسا اونلارا ددي: "گئرئن." اونلار دا چيخيب، دونگوز سوروسونه گئردئلر. او آندا سورونون هاميسي اوچورومدان گؤله آتيليب، سودا بوغولدولار.

8:33  اونلاري اوتارانلار قاچديلار و شهره گئرن واخت، بونلارين هاميسيني و ائبلئس الئنه توتولموشلارين باشينا گلن احوالاتي خبر وردئلر.

8:34  بونا گؤره، شهرئن بوتون خالقي عئسانين پئشوازينا چيخديلار و اونو گؤرن زامان يالوارديلار کي، اونلارين دئياريندان گتسئن.

Chapter 9

9:1  عئسا بئر قاييغا مئندي و گؤلون بو تايينا کچئب، اؤز شهرئنه گلدي.

9:2  اونون يانينا ياتاقدا ياتان ائفلئج بئر آدامي گتئردئلر. عئسا اونلارين ائمانيني گؤروب ائفلئجه ددي: "اوغول، اوره‌يئن اوزولمه‌سئن! گوناهلارين باغيشلاندي."

9:3  دئن عالئملرئندن بعضئلري اؤز-اؤزونه ددئلر: "بو آدام کوفر ديئر!"

9:4  عئسا اونلارين نه فئکر اتدئکلرئني بئلئب ددي: "نه اوچون اوره‌يئنئزده پئس شيلر دوشونورسونوز؟

9:5  هانسي آساندير؛ «گوناهلارين باغيشلاندي» دمک، يوخسا؛ «دور، يري» دمک؟

9:6  لاکئن اونون اوچون کي، بئله​سئنئز ائنسان اوغلونون ير اوزونده گوناهلاري باغيشلاماغا قودرتي وار…" او واخت ائفلئجه ددي: "دور، ياتاغيني گؤتور و اِوئنه گت."

9:7  ائفلئج ده دوروب اِوئنه گتدي.

9:8  خالق بونو گؤرنده قورخويا دوشوب، بله قودرتي آداملارا ورن تارييا حمد اتدي.

9:9  عئسا اورادان کچنده، متّا آدلي بئر آدامي گؤردو کي، باج ييغيلان يرده اوتورموشدو و اونا ددي: "داليمجا گل." او دا قالخيب اونون دالينجا گتدي.

9:10  متّانين اِوئنده سوفره باشيندا اوتوران واخت، بئر چوخ باج ييغانلار و گوناهکارلار گلدئلر و عئسا و شاگئردلری ائله سوفره باشيندا اوتوردولار.

9:11  فرئسئلر بونو گؤرنده، اونون شاگئردلرئنه ددئلر: "نه اوچون اوستادينيز باج ييغانلار و گوناهکارلارلا يمک ييئر؟"

9:12  آمّا عئسا بونو اشئدن واخت ددي: "صاغ آداملار يوخ، ناخوش آداملار طبئبه مؤحتاجديرلار.

9:13  گدئن بو سؤزون معناسيني اؤيره‌نئن کي، ديئر: «من قوربان يوخ، رحمت ائسته‌يئرم.»"

9:14  بو آرادا يحيانين شاگئردلري عئسانين يانينا گلئب ددئلر: "نه اوچون بئز و فرئسئلر اوروج توتوروق، آمّا سنئن شاگئردلرئن اوروج توتمورلار؟"

9:15  عئسا اونلارا ددي: "مگر اولار کي، بَيئن دوستلاري، بَي حله اونلارلا اولان واخت ياس توتسونلار؟ لاکئن او گونلر گله​جک کي، بَي اونلارين الئندن آلينسين. اونلار او زامان اوروج توتاجاقلار.

9:16  هچ کئم کؤهنه پالتارا تزه قوماشدان ياماق وورماز؛ سالينان ياماق کؤهنه پالتاردان قوپار و ييرتيق داها پئس اولار.

9:17  الجه ده، تزه شرابي کؤهنه تولوقلارا تؤکمزلر. بله اِتسه​لر، تولوقلار پارتلار، شراب تؤکولر، تولوقلار دا آرادان گدر. يوخ، تزه شرابي تزه تولوقلارا تؤکرلر؛ او زامان هر ائکئسي ده حئفظ اولونار."

9:18  عئسا بو شيلري ديئردي کي، رَيئسلردن بئري گلدي و اونون قاباغيندا يره دوشوب ددي: "قيزيم اله ائندي اؤلدو. آمّا گلئب اونا الئني قوياسان، ياشاياجاقدير."

9:19  عئسا دوروب شاگئردلرئله اونون دالينجا گتدي.

9:20  اله او واخت، بئر آرواد کي،​ اون​‌​ائکي ائل قان آخينماسينا دوچار ائدي، آرخاسيندان گلئب، عئسانين پالتارينين اَته‌يئنه ال سورتدو.

9:21  چونکي اؤز-‌​اؤزونه ديئردي: "آنجاق پالتارينا دَيسم بله، صاغالاجاغام."

9:22  عئسا دؤندو و اونو گؤروب ددي: "اوره‌يئن اوزولمه‌سئن، قيزيم. ائمانين سني صاغالتدي." و آرواد او ساعات صاغالدي.

9:23  عئسا ريئسئن اوئنه گلدئيي واخت، نوحه‌چئلر و شئون ادن جاماعاتي گؤردو.

9:24  و اونلارا ددي: "چکئلئن بورادان، چونکي قيز اؤلمه‌يئب، آنجاق ياتيب." اونلار عئسايا گولدولر.

9:25  لاکئن جاماعات اشئيه چيخارديلاندان سونرا، عئسا ائچه‌ري گئردي و قيزين الئندن توتدو. قيز آياغا قالخدي.

9:26  بونون خبري بوتون او دئيارا ياييلدي.

9:27  عئسا اورادان قاييدان واخت، دالينجا گدن ائکي کور قيشقيرديلار: "اي داوود اوغلو، بئزه يازيغين گلسئن!"

9:28  اِوه گئرندن سونرا کورلار اونون يانينا گلدئلر. عئسا اونلارا ددي: "آيا ائنانيرسينيز کي، بونو اتمه‌يه قودرتئم وار؟» کورلار ددئلر: "بلي آغا!"

9:29  او زامان عئسا اونلارين گؤزلرئنه ال قويوب ددي: "سئزه ائمانينيزا گؤره اولسون."

9:30  کورلارين گؤزلري آچيلدي. عئسا اونلارا جئدّي تاپشيريب ددي: "باخين، هچ کئم بو باره​ده بئر شي بئلمه‌سئن."

9:31  آمّا اونلار چيخيب، اونون حاقّينداکي خبري او دئيارين هر يرئنه يايديلار.

9:32  اونلار چيخاندان سونرا، ائبلئس الئنه توتولموش لال بئر آدامي عئسانين يانينا گتئردئلر.

9:33  ائبلئس قوولاندان سونرا، لال دانيشماغا باشلادي. خالق مات قاليب ددي: "ائسرايئلده بله بئر شي هچ واخت گؤرونمه‌يئب."

9:34  آمّا فرئسئلر ديئردئلر: "او، ائبلئسلر ريئسئنئن گوجو ائله ائبلئسلري قوور."

9:35  عئسا بوتون شَهَرلر و کندلري گزئب اونلارين کنئسه​لرئنده تعلئم ورئردي و پادشاهليغين خوش خبرئني وعظ ادئب، هر جور ناخوشلوغا و هر جور مرئضلئيه شفا ورئردي.

9:36  جاماعاتي گؤرن واخت، اونلارا اوره‌يي يانيردي، چونکي چوبانسيز قويونلار کئمي پرئشان و چاره​سئز ائدئلر.

9:37  او واخت عئسا شاگئردلرئنه ددي: "محصول چوخ، آمّا ائشچي آزدير.

9:38  اونا گؤره ده محصولون صاحئبي ربّه يالوارين کي، محصولونو ييغماق اوچون ائشچئلر گؤنده‌رسئن."

Chapter 10

10:1  عئسا اون‌ائکي شاگئردئني يانينا چاغيريب، اونلارا قودرت وردي کي، ناپاک روحلاري قووسونلار و هر جور ناخوشلوق و مرضه شفا ورسئنلر.

10:2  اون‌ائکي حوارئنئن آدلاري بونلاردير: بئرئنجئسي پطروس چاغيريلان شمعون، و اونون قارداشي آندرياس. زِبِدِيئن اوغلو يعقوب و قارداشي يوحنّا.

10:3  فئلئپوس، و بارتولماي. توما، و باج ييغان متّا. حالفايين اوغلو يعقوب، و تاداي.

10:4  وطنپرست شمعون، و عئسايا خيانت ادن يهودا ائسکاريوت.

10:5  عئسا بو اون​​ائکي​لري گؤنده‌ردي و اونلارا امر ادئب ددي: "قيري‌​يهودئلره گدن يولا چيخمايين و سامئره​لي​لرئن شهرلرئندن هچ بئرئنه گئرمه‌يئن.

10:6  بونون يرئنه ائسرايئل خالقينين ائتمئش قويونلارينين يانينا گدئن.

10:7  و گتدئکجه وعظ ادئب ديئن کي، گؤيلرئن پادشاهليغي ياخيندير.

10:8  ناخوشلارا شفا ورئن، اؤلولري دئرئلدئن، جوذاملي‌لاري صاغالدين، ائبلئسلري ائنسانلاردان قووون. موفته آليبسينيز، موفته ورئن.

10:9  قاييشلارينيزدا قيزيل، گوموش، يا دا مئس پول گؤتورمه‌يئن.

10:10  سفر اوچون نه توربا گؤتورون، نه آرتيق کؤينک، نه چاريق، نه ده دَيَنک. چونکي ائشچي اؤز روزئسئنه لايئقدئر.

10:11  هانسي شهره، يا دا کنده گئره​سئنئز، دَيَرلي بئرئني آختارين و يولا چيخانا قدر اورادا قالين.

10:12  اِوه گئرنده، اِوده​​کئلري سالاملايين.

10:13  اگر او اِوده​کئلر بونا لايئق اولسالار، وردئيئنئز سالام اونلارين اوستونده قالار. لايئق اولماسالار، سالامينيز اؤزونوزه قاييدار.

10:14  کئم سئزي قبول اتمه‌سه و سؤزلرئنئزه قولاق آسماسا، او اِودن و يا شهردن چيخان واخت، آياقلارينيزداکي توزو چيرپين.

10:15  دوغروسونو سئزه ديئرم؛ سودوم و گومورا دئيارينين حالي، قئيامت گونونده، او شهرئن حاليندان داها آسان اولاجاق."

10:16  باخين، قوردلار آراسينا سئزي قويونلار کئمي گؤنده‌رئرم؛ اونا گؤره ده، ائلان کئمي عاغيلّي، گؤيَرچئن کئمي ده ساده اولون.

10:17  لاکئن ائنسانلاردان اؤزونوزو گؤزله‌يئن؛ چونکي اونلار سئزي محکمه​لره تسلئم اده​جکلر و کنئسه​لرئنده سئزي دؤيه​جکلر.

10:18  مندن اؤتري والي‌لرئن و حؤکمدارلارين يانينا آپاريلاجاقسينيز کي، اونلارا و قيري​‌​يهودئلره شهادت اولسون.

10:19  سئزلري تسلئم ادن زامان، نجه و يا نه دئيه​جه‌يئنئزئن فئکرئنه قالمايين؛ چونکي نه دئيه​جه‌يئنئز او آندا سئزه بئلدئرئله​جک.

10:20  دوغرودان دا کي، دانيشان سئز ديئلسئنئز، سئزده دانيشان، آتانيزين روحودور.

10:21  قارداش قارداشي و آتا اؤولاديني اؤلومه تسلئم اده​جک. اؤولادلار آتا-آنالارينين ضئدّئنه قالخاجاقلار و اونلاري اؤلدورده​جکلر.

10:22  منئم آديما گؤره هامي سئزدن نئفرت اده​جک، آمّا آخيرا قدر صبر ادن نئجات تاپاجاقدير.

10:23  بئر شهرده سئزي قوودوقلاري زامان، او بئرئسئنه قاچين. چونکي دوغروسونو سئزه ديئرم، سئز، ائسرايئل شهرلرئني دولانيب قورتارماميش، ائنسان اوغلو گله​جک.

10:24  شاگئرد موعلّئمئندن افضل ديئل؛ قول دا آغاسيندان افضل ديئل.

10:25  شاگئردئن اؤز موعلّئمي کئمي اولماسي، قولون دا اؤز آغاسي کئمي اولماسي اونلارا کئفايتدئر. اگر اِو صاحئبئنه بعل-زبول دسه‌لر، اونون او اهلئنه نه قدر آرتيق دئيه‌جکلر.

10:26  اونا گؤره، اونلاردان قورخمايين؛ چونکي اله گئزلي بئر شي يوخدور کي، آچيغا چيخماسين و اله اؤرتولو شي ده يوخدور کي، بئلئنمه‌سئن.

10:27  سئزه قارانليقدا نه ديئرم، اونو آيدينليقدا ديئن؛ قولاغينيزا پيچيلداناني دا داملاردان اعلان ادئن.

10:28  اونلاردان قورخمايين کي، بدني اؤلدوروب، جاني اؤلدوره بئلمئرلر. آنجاق اوندان قورخون کي، هم جاني، هم ده بدني جهنّمده هلاک اتمه‌يه قادئردئر.

10:29  مگر ائکي سرچه بئر قارا پولا ساتيلمير؟ لاکئن آتانيزين حؤکمو اولمادان، بونلاردان تک بئري يره دوشمز.

10:30  سئزئن باشينيزداکي توکلر ده ساييليب.

10:31  اودور کي، قورخمايين. سئز بئر چوخ سرچه​دن داها افضلسئنئز.

10:32  کئم مني ائنسانلار قاباغيندا ائقرار اتسه، من ده اونو گؤيلرده اولان آتامين قاباغيندا ائقرار اده​جه‌يم.

10:33  آمّا کئم مني ائنسانلار قاباغيندا ائنکار اتسه، من ده اونو گؤيلرده اولان آتامين حوضوروندا ائنکار اده‌جه‌يم.

10:34  گومان اتمه‌يئن کي، ير اوزونه صولح گتئرميه گلمئشم؛ صولح يوخ، قيلينج گتئرميه گلمئشم.

10:35  چونکي من گلمئشم کی، اوغولو آتادان، قيزي آنادان، و گلئني قاينانادان آييريم.

10:36  آدامين دوشمنلري، اؤز اِوئنئن خالقي اولاجاق.

10:37  آتاسيني و يا آناسيني مندن آرتيق سون، منه لايئق ديئل؛ اوغلونو و يا قيزيني مندن آرتيق سون منه لايئق ديئل.

10:38  چارميخيني گؤتوروب منئم داليمجا گلمه‌ين، منه لايئق ديئل.

10:39  جانيني حئفظ ادن اونو ائتئره​جک؛ منئم اوچون جانيندان کچن، اونو حئفظ اده​جکدئر.

10:40  سئزي قبول ادن، مني قبول ادئر؛ و مني قبول ادن، مني گؤنده‌رني قبول ادئر.

10:41  پيغمبري پيغمبر آدي ائله قبول ادن، پيغمبر اجرئني آلاجاق و صالحي صالح آدي ائله قبول ادن، صالح اجرئني آلاجاقدير.

10:42  کئم بو کئچئکلردن بئرئنه، شاگئردئم اولدوغو اوچون، بئر کاسا سويوق سو ائچئرتسه، دوغروسونو سئزه ديئرم کي، اجرسئز قالماياجاقدير.

Chapter 11

11:1  عئسا اون ​ائکي شاگئردئنه نصئحت ورندن سونرا اورادان گتدي کي، اونلارين شهرلرئنده تعلئم ورئب، وعظ اتسئن.

11:2  يحيا زئنداندا مسئحئن اتدئيي ائشلري اشئدن واخت، شاگئردلرئندن بعضئسئني گؤنده‌ردي کي،

11:3  عئسادان سوروشسونلار: "آيا گلمه‌لي اولان سن​سن، يوخسا اؤزگه بئرئني گؤزله‌يک؟"

11:4  عئسا جاوابيندا اونلارا ددي: "گدئن نه اشئتدئيئنئزي و نه گؤردويونوزو يحيايا بئلدئرئن؛

11:5  کورلار گؤرورلر، آخساقلار يرئيئرلر، جوذاملي‌لار شفا تاپيرلار، کارلار اشئدئرلر، اؤلولر دئرئلئرلر، و يوخسوللارا ائنجئلئن خوش خبري ورئلئر.

11:6  خوش او آدامين حالينا کي، منئم باره​مده بودره‌مئر!"

11:7  يحيانين شاگئردلري گدن واخت، عئسا جاماعاتا يحيانين حاقّيندا دانيشماغا باشلادي: "چؤله نه گؤرمه‌يه گتدئنئز؟ يلئن ترپتدئيي بئر قاميشي؟

11:8  اگر يوخ، بس نه گؤرمه‌يه گتدئنئز؟ ظرئف پالتار گيئنمئش بئر آدامي؟ ظرئف پالتار گِينلر کي، پادشاهلارين سارايلارينداديرلار.

11:9  بس نه گؤرمه‌يه گتدئنئز؟ بئر پيغمبر؟ بلي، سئزه ديئرم، حتّا پيغمبردن اوستون اولاني.

11:10  بو، او آدامدير کي، اونون حاقّيندا يازيليب: «باخ، سندن قاباق من اؤز الچئمي گؤنده‌ره​جه‌يم. او، سنئن يولونو سنئن قاباغيندا حاضيرلاياجاق.»

11:11  دوغروسونو سئزه ديئرم؛ آرواددان دوغولانلار آراسيندا تعمئد ورن يحيادان داها بؤيوکو اولماييب؛ لاکئن گؤيلرئن پادشاهليغيندا لاپ کئچئک اولان، اوندان بؤيوکدور.

11:12  تعمئد ورن يحيانين گونلرئندن ائندئيه کئمي گؤيلرئن پادشاهليغي زورلا برقرار اولور و زورلو آداملار اونو اَله گتئرئرلر.

11:13  چونکي بوتون پيغمبرلر و شرئعت، يحيايا قدر اولاجاقلاري نبئلئک اتدئلر.

11:14  و اگر بونو قبول اتمک ائسته‌يئرسئنئز، يحيا اؤزو هَمَن گلمه‌لي اولان ائليادير.

11:15  قولاغي اولان قوي اشئتسئن.

11:16  بو نسئلي نه‌يه بنزه‌دئم؟ بازار ميدانيندا اوتوران اوشاقلارا بنزه‌يئرلر کي، يولداشلاريني چاغيريب ديئرلر:

11:17  «سئزه توتک چالديق، سئز اوينامادينيز، قملي ماهني‌لار اوخودوق، سئز آغلامادينيز.»

11:18  چونکي يحيا گلدي، نه ييئردي نه ده ائچئردي. و ديئرلر کي، «اوندا ائبلئس وار.»

11:19  ائنسان اوغلو گلئب، هم يِيئر هم ده ائچئر و ديئرلر: «باخ بو قارينقولو و شراب ائچن آداما؛ باج ييغانلارين و گوناهکارلارين دوستو!» حال بو کي، حئکمت گؤرستدئيي عمللرله تصدئق اولونور."

11:20  او زامان عئسا او شهرلري دانلاماغا باشلادي کي، مؤجوزه​لرئنئن چوخلاري اونلاردا باش ورمئشدي. چونکي اونلار تؤوبه اتمه‌دئلر:

11:21  "واي سنه اي خورازئن! واي سنه اي بيت​صيدا! چونکي سئزده باش ورن مؤجوزه​لر صور و صيدوندا باش ورسَيدي، اونلار چوخدان چولا بورونوب، کول اوستونده تؤوبه ادردئلر.

11:22  لاکئن سئزه ديئرم، قئيامت گونونده صور و صيدونون حالي سئزئنکئندن داها آسان اولاجاق.

11:23  و سن اي کفرناحوم، مگر گؤيه قدر اوجالاجاقسان؟! يوخ، اؤلولر دئيارينا قدر آلچالاجاقسان. چونکي سنده باش ورن مؤجوزه​لر سودومدا باش ورسَيدي، او، حله ده بو گونه کئمي دوراردي.

11:24  لاکئن سنه ديئرم کي، قئيامت گونو سودومون حالي سنئنکئندن داها آسان اولاجاق."

11:25  بوندان سونرا عئسا بله ددي: "اي آتا، گؤيون و يرئن ربّي، شوکور ادئرم سنه کي، بو شيلري آغيلّي‌لاردان و عالئملردن گئزله‌دئب، کئچئک اوشاقلارا بلّي ادئرسن!

11:26  بلي آتا! چونکي سنئن ريضان بله ائدي.

11:27  هر شي آتام طرفئندن منه ورئلئب. هچ کس اوغولو تانيماز مگر آتا، و هچ کس ده آتاني تانيماز مگر اوغول و او آداملار کي، اوغول اونلاري آتاني تانيماق اوچون سچئر.

11:28  اي بوتون يورغونلار، اي يوکلري آغير اولانلار، منئم يانيما گلئن و من سئزه راحاتليق وره​رم.

11:29  منئم يوغومو گؤتورون و مندن اؤيره‌نئن: چونکي من حلئم و اورکدن تواضؤعکارام. و جانينيزا راحاتليق تاپارسينيز.

11:30  چونکي يوغوم آسان و يوکوم يونگولدور."

Chapter 12

12:1  او زامان عئسا سبّت گونو اکئن زمئلرئندن کچئردي. شاگئردلري آج ائدئلر و سونبول​لري درئب يمه‌يه باشلاديلار.

12:2  لاکئن فرئسئلر بونو گؤرن زامان اونا ددئلر: "باخ، شاگئردلرئن سبّت گونو جائز اولمايان ائشي گؤرورلر."

12:3  عئسا اونلارا ددي: "مگر اوخوماييبسينيز کي، داوود نه اتدي او زامان کي، هم اؤزو آج ائدي، هم ده اونونلا اولانلار؟

12:4  نجه تارينين اوئنه گئردي و پروردئگارا تقدئم اولموش چؤرکلري يدئلر. حال بو کي، بونلاري يمه‌يه نه اؤزونون حاقّي وار ائدي نه ده اونونلا اولانلارين؟ بونو آنجاق کاهئنلر اده بئلردئلر.

12:5  و يا شرئعت کئتابيندا اوخوماييبسينيز کي، کاهئنلر معبدده سبّتي پوزورلار، لاکئن گوناهکار ساييلميرلار؟

12:6  آمّا سئزه ديئرم کي، بورادا معبددن داها افضل بئري وار.

12:7  لاکئن سئز اگر بو کلامين معناسيني بئلسَيدئنئز کي، ديئر: «من قوربان يوخ، مرحمت ائسته‌يئرم»، تقصئرسئزلري محکوم اتمزدئنئز.

12:8  چونکي ائنسان اوغلو سبّت گونونون ده صاحئبي‌دئر."

12:9  عئسا اورادان گدئب، اونلارين کنئسه​لرئنه گئردي.

12:10  اورادا اَلي قوروموش بئر آدام وار ائدي. عئسايا بؤهتان وورماق اوچون اوندان سوروشدولار: "آيا سبّت گونو شفا ورمک جائزدئر؟"

12:11  عئسا دا اونلارا ددي: "سئزلردن کئم وار کي، بئرجه قويونو اولسون و قويون سبّت گونو چوخورا دوشسون و آدام اونو توتوب چيخارتماسين؟!

12:12  ائنسان قويوندان داها افضلدئر. بونا گؤره سبّت گونو ياخشيليق اتمک جائزدئر."

12:13  او واخت عئسا اَلي قوروموش آداما ددي: "الئني اوزات." آدام الئني اوزاتدي و او ال، او بئري اَلي کئمي صاغ اولدو.

12:14  لاکئن فرئسئلر چؤله چيخيب، مصلحتلشدئلر کي، عئساني نجه هلاک اتسئنلر.

12:15  عئسا بونو بئلئب، اورادان اوزاقلاشدي. اونون دالينجا چوخ آدام گتدي و عئسا اونلارين هاميسينا شفا وردي.

12:16  و اونلارا جئدّي تاپشيردي کي، اونون کئم اولدوغونو بئلدئرمه‌سئنلر.

12:17  اله کي، اشعيا پيغمبرئن واسئطه​سئله ديئلمئش سؤز يرئنه يتئشسئن:

12:18  «بودور منئم سچدئيئم قول؛ منئم سوگئلئم کي، جانيم اوندان راضي‌دير. روحومو اونون اوستونه قوياجاغام، و او، مئلّتلره عدالتي اعلان اده​جک.

12:19  او، نه ساواشاجاق، نه ده چيغيراجاق، و هچ کئم کوچه​لرده اونون سسئني اشئتمه‌يه​جک.

12:20  ازئلمئش قاميشي قيرماياجاق، توستولنن پئلته‌ني سؤندورمه‌يه​جک و آخيريندا عدالتي ظفره چاتديراجاقدير.

12:21  و خالقلار اونون آدينا اومئد باغلاياجاقلار.»

12:22  او واخت ائبلئس الئنده اسئر اولموش کور و لال بئرئني عئسانين يانينا گتئردئلر و عئسا اونا شفا وردي. اِله کي، کور و لال اولان بو آدام، هم گؤرمه‌يه هم ده دانيشماغا باشلادي.

12:23  بوتون خالق حيرته گلئب ددي: "آيا بو، داوود اوغلو ديئل؟!"

12:24  آمّا فرئسئلر بونو اشئدن واخت ددئلر: "بو آدام ائبلئسلري، آنجاق ائبلئسلرئن ريئسي بعلزبولون گوجو ائله قووور."

12:25  عئسا اونلارين فئکئرلرئني بئلئب، اونلارا ددي: "اؤز ائچئنده بؤلونموش هر سلطنت وئران اولار؛ اؤز ائچئنده بؤلونموش هچ بئر شهر و اِو ده داوام گتئرمز.

12:26  اگر شيطان شيطاني قووسا، اؤز ائچئنده بؤلونموش اولور؛ بس اونون سلطنتي نجه داوام گتئرر؟

12:27  اگر من ائبلئسلري بعلزبولون گوجو ائله قوورام، بس سئزئن آداملارينيز کئمئن گوجو ائله قوورلار؟ اونا گؤره ده، سئزه حؤکم ادن اونلار اولاجاقلار.

12:28  آمّا اگر من ائبلئسلري تارينين روحو ائله قووورام، دمه‌لي تارينين پادشاهليغي سئزه يتئشئب.

12:29  بئر آدام قووّتلي بئرئنئن اوئنه گئرئب، اونون ماليني نجه اوغورلايا بئلر؟ مگر اوّل اونون قوللاريني باغلاسين. او زامان اِوئني اوغورلايا بئلر.

12:30  منئمله اولمايان منئم ضئدّئمه‌دئر و منئمله ييغمايان داغيدير.

12:31  بونا گؤره سئزه ديئرم: ائنسانلارين هر گوناه و کوفرو باغيشلانار، لاکئن موقدّس روحون ضئدّئنه ديئلن کوفر باغيشلانماز.

12:32  کئم ائنسان اوغلونون ضئدّئنه دانيشسا، باغيشلانار؛ آمّا کئم موقدّس روحون ضئدّئنه دانيشسا، نه بو عالمده باغيشلانار، نه ده گله‌جکده.

12:33  آغاجي ياخشي اِدئن، ميوه‌سي ده ياخشي اولار، و يا آغاجي پئس ادئن، ميوه‌سي ده پئس اولار؛ چونکي آغاج ميوه‌سئندن تانينار.

12:34  اي افعئلر نسئلي، سئز پئس اولدوغونوز حالدا، نجه ياخشي شيلر دانيشا بئلرسئنئز؟! چونکي آغيز اورکدن داشاني دانيشير.

12:35  ياخشي آدام ياخشيليق خزئنه​سئندن ياخشي شيلر چيخاردير؛ و پئس آدام پئسلئک خزئنه​سئندن پئس شيلر چيخاردير.

12:36  آمّا سئزه ديئرم: قئيامت گونونده ائنسانلار، دانيشديقلاري هر بوش سؤز اوچون حساب وره​جکلر.

12:37  چونکي اؤز سؤزلرئنئزه گؤره بوراخيلاجاقسينيز، و اؤز سؤزلرئنئزه گؤره ده محکوم اولاجاقسينيز."

12:38  او زامان دئن عالئملري و فرئسئلردن بعضئلري ددئلر: "اوستاد، ائسته‌يئرئک کي، سندن بئر علامت گؤرک."

12:39  عئسا جاوابيندا اونلارا ددي: "پئس و زئناکار نسئل بئر علامت آختارير؛ لاکئن اونا يونوس پيغمبرئن علامتئندن باشقا هچ بئر علامت ورئلمه‌يه​جک.

12:40  چونکي نجه يونوس اوچ گون-اوچ گجه نهنگئن قارنيندا قالدي، ائنسان اوغلو دا اوچ گون-اوچ گجه يرئن ائچئنده اِله قالاجاق.

12:41  نينوانين خالقي قئيامت گونونده بو نسل‌له قالخاجاق و اونو محکوم اده​جک. چونکي اونلار يونوسون وعظي ائله تؤوبه اتدئلر؛ و باخ ائندي، يونوسدان داها بؤيوکو بورادادير.

12:42  جنوب ملکه​سي قئيامت گونونده بو نسلله قالخاجاق و اونو محکوم اده​جک. چونکي او، دونيانين او باشيندان گلدي کي، سوليمانين حئکمتلي سؤزلرئني اشئتسئن؛ و باخ ائندي، سوليماندان داها بؤيوکو بورادادير.

12:43  ناپاک روح، آدامدان چيخاندان سونرا، قورو يرلرده دولانيب راحاتليق آختارار، لاکئن تاپماز.

12:44  او زامان دئير: «چيخديغيم اوئمه دؤنوم.» و گلدئيي واخت اونو بوش، سوپورولموش، و بزنمئش تاپار.

12:45  او زامان گِدَر، اؤزوندن داها پئس اولان يدّي اؤزگه روحو اؤزو ائله گتئرر و اورايا گئرئب، ياشايارلار؛ و او آدامين آخير حالي اوّلکئندن داها پئس اولار. بو پئس نسئله ده بله اولاجاق."

12:46  عئسا خالقا حله دانيشيردي کي، آناسي و قارداشلاري اشئکده دوروب، اونونلا دانيشماق ائسته‌دئلر.

12:47  و بئري عئسايا ددي: "باخ، آنان و قارداشلارين چؤلده دوروبلار و ائسته‌يئرلر کی، سنئنله دانيشسينلار."

12:48  لاکئن عئسا بو سؤزو دئين آداما جاواب ورئب ددي: "منئم آنام و قارداشلاريم کئملردئر؟"

12:49  و الئني شاگئردلرئنه طرف اوزاديب ددي: "باخين، منئم آنام و قارداشلاريم!

12:50  چونکي کئم منئم گؤيلرده اولان آتامين ائراده​سئني يرئنه يتئرسه، منئم قارداشيم، باجيم، و آنام دا اودور."

Chapter 13

13:1  او گون عئسا اِودن چيخدي و گدئب، گؤل قيراغيندا اوتوردو.

13:2  يانينا اله چوخ آدام ييغيلدي کي، اؤزو بئر قاييغا مئنئب، اورادا اَيلَشدي و بوتون خالق ساحئلده دوردو.

13:3  عئسا اونلارا مثل​لر​له چوخ شي دانيشيب، ديئردي: "باخين، بئر اکئنچي توخوم سپمه‌يه چيخدي.

13:4  سَپَن واخت توخوملاردان بعضئسي يول قيراغينا دوشدو و قوشلار گلئب اونلاري يدئلر.

13:5  بعضئسي تورپاغي چوخ اولمايان داشليق يرلره دوشدو. تورپاغين درئنلئيي اولماديغينا گؤره، تز بئتدي.

13:6  لاکئن گون چيخان واخت سولدو و کؤکو اولماديغينا گؤره قورودو.

13:7  توخوملاردان بعضئسي تئکانلار آراسينا دوشدو. تئکانلار بئتئب، اونلاري بوغدولار.

13:8  آمّا قالانلاري ياخشي تورپاغا دوشدولر؛ بعضئسي بئره يوز، بعضئسي بئره آلتميش، بعضئسي ده بئره اوتوز ثمره وردئلر.

13:9  قولاغي اولان اشئتسئن."

13:10  شاگئردلر ياخينلاشيب، عئسايا ددئلر: "نه اوچون اونلارا مثل​لر‌له دانيشيرسان؟"

13:11  عئسا جاوابيندا اونلارا ددي: "سئزه بو قابئلئيّت ورئلئب کي، گؤيلرئن پادشاهليغينين سئرّلرئني آنلاسينيز، لاکئن اونلارا ورئلمه‌يئب.

13:12  چونکي کئمده وارسا، اونا داها چوخ ورئله​جک و او بوللوق ائچئنده اولاجاقدير؛ آمّا کئمده يوخسا، الئنده اولان دا اوندان آليناجاق.

13:13  اونلارا مثل​لر​له دانيشديغيمين سببي بودور؛ دوغرودان دا کي، «گؤردوکلري حالدا گؤرمزلر، اشئتدئکلري حالدا اشئتمزلر، آنلامازلار دا.»

13:14  اشعيا پيغمبرئن اونلارين حاقّيندا ددئيي سؤز يرئنه يتئشئر کي، دمئشدي: «قولاغينيزلا اشئدرسئنئز، لاکئن باشا دوشمزسئنئز، گؤزلرئنئزله باخارسينيز، آمّا گؤرمزسئنئز،

13:15  چونکي بو خالقين اوره‌يي برک اولوب. قولاقلاري ائله آغير اشئدئرلر، گؤزلرئني يوموبلار کي، گؤزلري ائله گؤرمه‌سئنلر، قولاقلاري ائله اشئتمه‌سئنلر، اورکلري ائله آنلاييب منه دؤنمه‌سئنلر کي، من اونلارا شفا ورئم.»

13:16  لاکئن سئزئن گؤزلرئنئزئن خوش حالينا، چونکي گؤرورلر؛ قولاقلارينيزين خوش حالينا، چونکي اشئدئرلر.

13:17  دوغروسونو سئزه ديئرم: چوخ پيغمبرلر و صالح آداملار بو آرزودا اولدولار کي، سئزئن گؤردويونوز شيلري گؤرسونلر، آمّا گؤرمه‌دئلر؛ سئزئن اشئتدئيئنئز شيلري اشئتسئنلر، آمّا اشئتمه‌دئلر.

13:18  ائندي سئز اکئنچي حاقّينداکي مثله قولاق آسين:

13:19  کئم پادشاهليق باره​ده‌کي کلامي اشئدئب آنلاماسا، شرئر گلئب اوره‌يئنه سَپئلمئشي اوغورلايار. يول قيراغينا سپئلمئش بودور.

13:20  داشليق يرلره سپئلمئش اولان دا اودور کي، کلامي اشئدئر و آنَن اونو شادليقلا قبول ادئر.

13:21  لاکئن اؤز-اؤزونده کؤک سالماديغينا گؤره، آز بئر مودّت قالير و او زامان کي، بو کلامدان اؤتري دارليق و اذئيّت باش ورئر، آنَن بودره‌يئر.

13:22  تئکانلار آراسينا سپئلمئش اولان اودور کي، کلامي اشئدئر؛ آمّا دونيانين فئکئري و وارليليغين توولاتماسي کلامي بوغور و کلام ثمره‌سئز اولور.

13:23  ياخشي تورپاغا سپئلمئش اولان دا اودور کي، کلامي اشئدئر، آنلايير؛ بعضئسي بئره يوز، بعضئسي بئره آلتميش، بعضئسي ده بئره اوتوز ثمره ورئر."

13:24  عئسا اونلارا آيري بئر مثل ده نقل ادئب ددي: "گؤيلرئن پادشاهليغي او آداما دا بنزر کي، زمئسئنه ياخشي توخوم سپدي.

13:25  آمّا آداملار ياتاندان سونرا، اونون دوشمني گلدي و بوغدالارين آراسينا آلاق اوت سپئب، گتدي.

13:26  بوغدا بؤيويوب ثمره وردئيي زامان، آلاقلار دا گؤروندو.

13:27  زمي صاحئبئنئن قوللاري گلئب اونا ددئلر: «آغا، مگر سن زمئيه ياخشي توخوم سپمه‌دئن، بس آلاق اوت هارادان عمله گلئب؟»

13:28  آغا قوللارا ددي: «بونو دوشمن ادئب.» قوللار اونا ددئلر: «اگر بله​دئر، ائسته‌يئرسن گدئب اونلاري ييغاق؟»

13:29  زمي صاحئبي ددي: «خير، مبادا آلاقلاري ييغان واخت، اونلارلا بوغداني دا قوپارداسينيز.

13:30  قويون بئچئنه قدر هر ائکئسي ده بؤيوسونلر. بئچئن واختي من بئچئنچئلره دئيرم: اوّلجه آلاق اوتلاري ييغين و يانديرماق اوچون اونلاري دسته-دسته باغلايين. آمّا بوغداني آنبارلاريما ييغين.»"

13:31  عئسا اونلارا آيري بئر مثل ده نقل ادئب ددي: "گؤيلرئن پادشاهليغي خاردال توخومونا بنزر کي، بئر آدام گؤتوروب، اونو زمئسئنده اکدي.

13:32  خاردال، بوتون توخوملارين لاپ کئچئيي اولسا دا، بؤيوين واخت باغچادا بئتن بوتون بئتکئلردن بؤيوک اولار؛ لاپ آغاج بويدا اولار. اله کي، گؤيون قوشلاري گلئب، اونون بوداقلاريندا يووا تئکرلر."

13:33  عئسا اونلارا آيري بئر مثل ده ددي: "گؤيلرئن پادشاهليغي خمئرماياسينا بنزر کي، بئر آرواد اونو گؤتوروب، اوچ اؤلچو اون ائچئنه قاتدي، اله کي، بوتون خمئر تورشولادي."

13:34  عئسا بوتون بو شيلري خالقا مثل​لر​له ديئردي و اونلارا مثلسئز هچ بئر شي دمئردي کي،

13:35  نبي‌لر واسئطه​سئله ديئلن بو سؤز يرئنه يتئشسئن: «آغزيمي مثل​لرله آچاجاغام، او شيلري بيان اده​جه‌يم کي، دونيا ياراناندان بري گئزلي‌دئر.»

13:36  او زامان عئسا خالقي بوراخيب، اِوه گتدي. شاگئردلري اونا ياخينلاشيب ددئلر: "زمئده​کي آلاق اوتون مثلئني بئزه آچيقلا."

13:37  عئسا جاوابيندا اونلارا ددي: "ياخشي توخومو سپن ائنسان اوغلودور؛

13:38  زمي دونيادير؛ ياخشي توخوم پادشاهليغين اؤولادلاري‌دير. آلاق اوتلاري دا شرئرئن اؤولادلاري‌ديرلار

13:39  آلاق اوتو سَپَن دوشمن، ائبلئسدئر؛ بئچئن واختي بو عالمئن آخيري‌دير و بئچئنچئلر ملکلردئلر.

13:40  اونا گؤره نجه کي، آلاق اوتلار ييغيليب، اوددا يانديريلير، بو عالمئن آخيريندا دا اله اولاجاق.

13:41  ائنسان اوغلو ملکلرئني گؤنده‌ره​جک و اونلار گوناها چکن بوتون شيلري و پئسلئک ادن هر آدامي اونون پادشاهليغيندان ييغاجاقلار.

13:42  و اونلاري اود تندئرئنه آتاجاقلار. اورادا آغلاشما و دئش قيجيرتماسي اولاجاقدير.

13:43  او واخت صالح آداملار آتالارينين پادشاهليغيندا گون کئمي شاخاجاقلار. قولاقلاري اولان قوي اشئتسئن.

13:44  گؤيلرئن پادشاهليغي زمئده گئزله‌دئلن بئر خزئنه​يه بنزر کي، بئر آدام اونو تاپيب گئزلتدي. و شادليقلا گدئب، بوتون وار-يوخونو ساتدي و او زمئني آلدي.

13:45  گئنه، گؤيلرئن پادشاهليغي گؤزل مئرواري آختاران بئر تاجئره بنزر کي،

13:46  چوخ قئيمتلي بئر مئرواري تاپيب، گتدي و بوتون وار-يوخونو ساتيب، اونو آلدي.

13:47  گئنه، گؤيلرئن پادشاهليغي دهنزه آتيلان بئر تورا بنزر کي، هر جور باليق توتدو.

13:48  دولدوغو زامان اونو ساحئله چکدئلر و اوتوروب، ياخشي‌لاري قابلارا ييغديلار و پئسلري اِشئيه آتديلار.

13:49  بو عالمئن آخيريندا دا بله اولاجاق. ملکلر گلئب، پئسلري صالح آداملارين آراسيندان آييراجاقلار

13:50  و اونلاري اود تندئرئنه آتاجاقلار. اورادا آغلاشما و دئش قيجيرتماسي اولاجاقدير.

13:51  آيا بوتون بو شيلري آنلادينيز؟" اونلار عئسايا ددئلر: "بلي."

13:52  عئسا دا اونلارا ددي: "بونا گؤره، هر دئن عالئمي کي، گؤيلرئن پادشاهليغينا گؤره تعلئم تاپيب، بئر اِو صاحئبئنه بنزر کي، خزئنه‌سئندن تزه و کؤهنه شيلر چيخاردير."

13:53  عئسا بو مثل​لري بئتئرندن سونرا اورادان آيريلدي.

13:54  و اؤز دئيارينا گلئب، اوراداکي کنئسه​لرده خالقا تعلئم ورئردي. اله کي، اونلار حيران قاليب ديئردئلر: "بو آدام بله حئکمتي، بله موجوزه​لي قودرتي هارادان آليب؟

13:55  مگر بو، دولگر اوغلو ديئل؟ مگر آناسينين آدي مريم ديئل؟ مگر قارداشلاري يعقوب، يوسئف، شمعون و يهودا ديئل​لر؟

13:56  مگر بوتون باجيلاري آراميزدا ديئل​لر؟ بس بو آداما بوتون بو شيلر هارادان گلدي؟"

13:57  و اوندان ناراحات اولدولار. لاکئن عئسا اونلارا ددي: "هچ بئر پيغمبر هچ يرده حؤرمتسئز ديئل، مگر اؤز وطنئنده و اؤز اِوئنده."

13:58  و اونلارين ائمانسيزليغي اوزوندن اورادا چوخ مؤجوزه اتمه‌دي.

Chapter 14

14:1  او زامان هئرود تِترارخ عئسانين حاقّيندا اولان خبرلري اشئتدي

14:2  و نؤکرلرئنه ددي: "بو، تعمئد ورن يحيادير؛ او، اؤلولردن دئرئلئب. بونا گؤره ده اوندا بله مؤجوزه​لي قودرت گؤرونور."

14:3  هئرود، يحياني قارداشي فئلئپئن آروادي هئرودئياسين اوزوندن توتموشدو و باغلاييب، زئندانا آتميشدي.

14:4  چونکي يحيا هئرودا دمئشدي: "اونونلا اِولَنمک سنه جائز ديئل."

14:5  هئرود ائسته‌مئشدي کي، يحياني اؤلدورسون، لاکئن خالقدان قورخموشدو؛ چونکي خالق يحياني پيغمبر ساييردي.

14:6  هئرودون آنادان اولان گونو، هئرودئياسين قيزي مجلئسده اوينادي و بو دا هئرودون خوشونا گلدي.

14:7  بو سببدن ده آند ائچئب وعده وردي کي، قيز نه ائسته‌سه، اونا وره​جک.

14:8  آمّا قيز آناسينين تحرئکي ائله ددي: "تعمئد ورن يحيانين باشيني بورادا بئر سئني ائچئنده منه ور."

14:9  پادشاه قمگئن اولدو؛ آمّا آند ائچدئيئنه و مجلئسده اوتورانلارا گؤره امر اتدي کي، قيزين ائسته‌دئيئني ورسئنلر.

14:10  و آدام گؤنده‌رئب، زئنداندا يحيانين باشيني کسدئردي.

14:11  يحيانين باشي بئر سئني ائچئنده گتئرئلدي و قيزا ورئلدي. قيز دا آناسينا آپاردي.

14:12  يحيانين شاگئردلري گلدئلر، و اونون بدنئني گؤتوروب باسديرديلار. و گلئب عئسايا بو باره​ده خبر وردئلر.

14:13  عئسا بونو اشئدئب، اورادان تک باشينا قاييقلا ساکئت بئر يره گتدي. خالق بونو اشئدن واخت، شهرلردن پئيادا اونون دالينجا گتدي.

14:14  عئسا قاييقدان اِنَنده بؤيوک بئر جاماعاتي گؤردو و اونلارا يازيغي گلئب، ناخوشلارينا شفا وردي.

14:15  آخشاما ياخين، شاگئردلر اونون يانينا گلئب ددئلر: "بورا چولدور، واخت دا آرتيق گِجدئر؛ خالقي مورخّص ات کي، کندلره گدئب اؤزلرئنه يمک آلسينلار."

14:16  آمّا عئسا اونلارا ددي: "گتمکلري لازيم ديئل. اونلارا سئز يمک ورئن."

14:17  شاگئردلر عئسايا ددئلر: "بورادا بش چؤرک و ائکي باليقدان باشقا بئر شيئمئز يوخدور."

14:18  عئسا ددي: "اونلاري بورايا منئم يانيما گتئرئن."

14:19  و خالقا امر اتدي کي، اوت اوستونده اوتورسونلار. بش چؤرکله ائکي باليغي گؤتوردو، گؤيه باخيب، برکتله‌دي و چؤرکلري بؤلوب شاگئردلره وردي، شاگئردلر ده خالقين آراسيندا پايلاديلار.

14:20  هامي يِيئب دويدو و آرتيق قالان تئکه​لردن اون‌ائکي دولو سبد ييغديلار.

14:21  يئين آداملارين ساييسي، آروادلار و اوشاقلاردان باشقا، بش مئن نفره ياخين ائدي.

14:22  عئسا آنَن شاگئردلرئنه امر اتدي کي، قاييغا مئنئب، اؤزوندن قاباق او تايا گتسئنلر کي، او دا جاماعاتي مورخّص اتسئن.

14:23  خالقي يولا سالاندان سونرا، عئسا دوعا اتمک اوچون تک باشينا داغا چيخدي؛ آخشام دوشن واخت، اورادا تک ائدي.

14:24  بو آرادا، قاييق ساحئلدن چوخ اوزاقدا، کوله‌يئن اوزلرئنه اَسدئيي اوچون، شپه​لرله دؤيوشوردو.

14:25  گجه​نئن دؤردونجو نؤوبه​سئنده عئسا گؤلون اوستونده يرئيه-يرئيه اونلارين يانينا گلدي.

14:26  لاکئن شاگئردلر اونون گؤل اوستونده يرئمه‌سئني گؤرن واخت قورخوب ددئلر: "بو بئر روحدور." و دهشتدن چيغيرماغا باشلاديلار.

14:27  آمّا عئسا او آندا اونلارلا دانيشيب ددي: "اوره‌يئنئز اوزولمه‌سئن. منم، قورخمايين."

14:28  پطروس اونون جاوابيندا ددي: "يارب، اگر سن​سن، امر ات کي، سو اوزونده سنئن يانينا گلئم."

14:29  عئسا ددي: "گل." پطروس دا قاييقدان چيخيب، عئسانين يانينا گتمک اوچون سو اوستونده يرئمه‌يه باشلادي.

14:30  آمّا کوله‌يئن شئدّتلي اَسدئيئني گؤرن واخت قورخدو و باتماغا باشلاياندا چيغيردي: "يارب، منه نئجات ور."

14:31  عئسا او آندا الئني اوزاديب، اونو توتدو و ددي: "اي آز ائمانلي آدام، نه اوچون شک اتدئن؟"

14:32  و قاييغا مئندئکلري زامان کولک ساکئتلشدي.

14:33  قاييقدا اولانلار گلدئلر و اونا سجده ادئب ددئلر: "دوغرودان دا سن تارينين اوغلوسان."

14:34  اونلار گؤلون او تايينا کچئب، جِنئسارِت دئيارينا گلدئلر.

14:35  او يرئن آداملاري، عئساني تانيديقلاري زامان، اطرافا خبر يايديلار و ناخوش آداملارين هاميسيني عئسانين يانينا گتئردئلر.

14:36  و اونا يالوارديلار کي، آنجاق پالتارينين اَته‌يئنه توخونماغا ائجازه ورسئن. و توخونانلارين هاميسي صاغالدي.

Chapter 15

15:1  او زامان فرئسئلر و دئن عالئملري اورشلئمدن عئسانين يانينا گلئب ددئلر:

15:2  "نه اوچون شاگئردلرئن، آغساقّاللارين حدئثئني پوزورلار؟ چونکي چؤرک يئين زامان اَللرئني يومورلار؟"

15:3  عئسا جاوابيندا اونلارا ددي: "بس سئز نه اوچون اؤز حدئثئنئزدن اؤتري تارينين امرئني پوزورسونوز؟

15:4  چونکي تاري بويوروب: «آتانا و آنانا حؤرمت ات» و «آتاسينا يا دا آناسينا يامان دئين آدام گرک اؤلدورولسون.»

15:5  لاکئن سئز ديئرسئنئز: «کئم آتاسينا يا دا آناسينا دسه: مندن سنه يتئشن کؤمک تارييا تقدئم ادئلئب،

15:6  آرتيق آتاسينا حؤرمت اتمک مجبورئيّتئنده ديئل.» بلجه سئز، اؤز حدئثلرئنئزدن اؤتري تارينين امرئني باطئل ادئرسئنئز.

15:7  اي رئياکارلار! اشعيا پيغمبر سئزئن اوچون نه ياخشي ديئب:

15:8  «بو خالق دوداقلاري ائله منه حؤرمت ادئر، آمّا اور‌کلري مندن اوزاقدير.

15:9  منه بوش يره عئبادت ادئرلر، چونکي ائنسان امرلرئني، احکام آديندا تعلئم ورئرلر.»"

15:10  عئسا جاماعاتي يانينا چاغيريب، اونلارا ددي: "قولاق آسين و آنلايين!

15:11  آغيزا گئرن شي، ائنساني ناپاک اتمز؛ آغيزدان چيخان شي‌دئر کي، ائنساني ناپاک ادر."

15:12  او واخت شاگئردلر گلئب، اونا ددئلر: "آيا بئلئرسن کي، فرئسئلر بو سؤزو اشئدن واخت حئرصلَندئلر؟"

15:13  عئسا جاواب ورئب، اونلارا ددي: "گؤيده‌کي آتامين اَکمه‌دئيي هر بئتکي، کؤکوندن قوپاريلاجاق.

15:14  اونلاري بوراخين. اونلار کورلارين کور بلدچئلري‌دئرلر؛ کور، کورا يول گؤرسدسه، هر ائکئسي ده قويويا دوشر."

15:15  پطروس عئسايا جاواب ورئب ددي: "بئزه بو مثلي آچيقلا."

15:16  عئسا ددي: "آيا سئز ده حله باشا دوشمه‌يئبسئنئز؟

15:17  آنلاميرسينيز کي، آغيزا گئرن هر شي آدامين قارنينا گدئر و ائفراز اولونور؟

15:18  آمّا آغيزدان چيخان، اورکدن چيخار و ائنساني ناپاک ادر.

15:19  چونکي اورکدن پئس فئکئرلر، آدام اؤلدورمک، زئناکارليق، عئفّتسئزلئک، اوغورلوق، يالانچي شاهئدلئک و کوفر چيخار.

15:20  ائنساني ناپاک ادن شيلر بونلاردير. يويولماميش اللر​له يمک، ائنساني ناپاک اتمز."

15:21  عئسا اورادان چيخيب، صور و صيدون بؤلگه​سئنه گتدي.

15:22  کَنَعانلي بئر آرواد او طرفلردن گلئب، چيغيرا-چيغيرا ددي: "آغا، اي داوود اوغلو، منه يازيغين گلسئن. قيزيم ائبلئس اَلئنه توتولوب و پئس بئر حالدادير."

15:23  لاکئن عئسا جاوابيندا اونا بئر سؤز بله دمه‌دي. شاگئردلري عئسانين يانينا گلئب اونا يالوارديلار: "بونو مورخّص ات، گتسئن. آرخاميزدان باغيريب گلئر."

15:24  عئسا جاواب ورئب ددي: "من آنجاق ائسرايئل اوئنئن ائتمئش اولان قويونلارينين يانينا گؤنده‌رئلمئشم."

15:25  آمّا آرواد ياخينلاشدي و اونا سجده ادئب ددي: "يارب، منه ائمداد ات."

15:26  عئسا جاواب ورئب ددي: "اوشاقلارين چؤره‌يئني آليب، ائتلره آتماق روا ديئل."

15:27  آرواد ددي: "حاقلي‌سان يارب، آمّا ائتلر ده صاحئبلرئنئن سوفره​سئندن دوشن تئکه​لردن يئيرلر."

15:28  او واخت عئسا جاواب ورئب آروادا ددي: "آرواد، ائمانين بؤيوکدور. سنه ائسته‌دئيئن کئمي اولسون." و اونون قيزي او ساعاتدا صاغالدي.

15:29  عئسا اورادان چيخيب، جلئل گؤلونون ياخينليغينا گلدي و داغين باشينا چيخيب اورادا اوتوردو.

15:30  اونون يانينا بؤيوک بئر جاماعات ييغيلدي و آرالاريندا توپاللار، چولاقلار، کورلار، لاللار، و بونلاردان باشقا چوخلاري دا وار ائدي. اونلاري عئسانين آياقلاري يانينا قويدولار و عئسا اونلارا شفا وردي.

15:31  خالق لاللاري دانيشان، چولاقلاري صاغ، توپاللاري يرئين، و کورلاري گؤرن زامان تعجّوب ادئب ائسرايئلئن تاريسينا حمد اتدئلر.

15:32  عئسا شاگئردلرئني يانينا چاغيريب ددي: "خالقا اوره‌يئم يانير، چونکي اوچ گوندور کي، يانيمداديرلار و يمه‌يه هچ بئر شيلري يوخدور.ائسته‌مئرم اونلاري آج بوراخيم، مبادا يولدا طاقتدن دوشسونلر."

15:33  شاگئردلري اونا ددئلر: "چؤلده بو قدر جاماعاتي دويورماق اوچون چؤره‌يي هارادان تاپاق؟!"

15:34  عئسا اونلارا ددي: "نچه چؤره‌‌يئنئز وار؟" ددئلر: "يدّي چؤرک و بئر نچه کئچئک باليغيميز وار."

15:35  او واخت عئسا خالقا امر اتدي کي، يره اوتورسونلار.

15:36  يدّي چؤرکله باليقلاري گؤتوروب شوکور اتدي و بؤلوب شاگئردلرئنه وردي. شاگئردلر ده خالقا پايلاديلار.

15:37  هامي ييئب دويدو و آرتيق قالان تئکه​لردن يدّي دولو زنبئل ييغديلار.

15:38  يئينلر آروادلار و اوشاقلاردان باشقا دؤرد مئن نفر ائدئلر.

15:39  عئسا خالقي مورخّص اتدي و قاييغا مئنئب مجدل دئيارينا گلدي.

Chapter 16

16:1  فرئسئلر‌له صادوقئلر ياخينلاشيب، عئساني ائمتاحان اتمک اوچون اوندان ائسته‌دئلر کي، اونلارا گؤيدن بئر علامت گؤرسدسئن.

16:2  آمّا عئسا اونلارا جاواب ورئب ددي: "آخشام اولاندا ديئرسئنئز کي، «هاوا ائستي اولاجاق، چونکي گؤي قيزاريبدير.»

16:3  سحر واختي دا ديئرسئنئز: «بو گون کولک اولاجاق، چونکي گؤي قيزارميش و توتقوندور.» گؤيون حاليني سچه بئلئرسئنئز، لاکئن زامانين علامتلرئني سچه بئلمئرسئنئز؟

16:4  پئس و زئناکار نسئل بئر علامت آختارير؛ لاکئن اونا يونوس پيغمبرئن علامتئندن باشقا بئر علامت ورئلمه‌يه​جک." و اونلاري بوراخيب گتدي.

16:5  شاگئردلر گؤلون او تايينا کچنده، چؤرک گؤتورمه‌يي ياددان چيخارتميشديلار.

16:6  عئسا اونلارا ددي: "دئقّتلي اولون! فرئسئلر و صادوقئلرئن خمئرماياسيندان اؤزونوزو اوزاق ساخلايين."

16:7  شاگئردلر آرالاريندا موباحئثه ادئب ديئردئلر: "چؤرک گؤتورمه‌دئيئمئزه گؤره بله ديئر."

16:8  عئسا بونو باشا دوشوب اونلارا ددي: "اي آز ائمانلي‌لار! نه اوچون چؤرک گؤتورمه‌دئيئنئز حاقدا آرانيزدا موباحئثه ادئرسئنئز؟

16:9  حله آنلاميرسينيز؟ بش مئن آدام اوچون بش چؤره‌يي و نچه سبد ييغديغينيزي خاطيرلاميرسينيز؟

16:10  دؤرد مئن آدام اوچون يدّي چؤره‌يي و نچه زنبئل ييغديغينيزي دا خاطيرلاميرسينيز؟

16:11  نجه آنلاميرسينيز کي، من سئزه فرئسئلرئن و صادوقئلرئن خمئرماياسيندان اؤزونوزو اوزاق ساخلايين دئينده، چؤره‌يي نظرده توتماميشديم؟"

16:12  او زامان شاگئردلر آنلاديلار کي، چؤرک ماياسيندان يوخ، فرئسئلرئن و صادوقئلرئن تعلئمئندن اوزاق قالماقلاريني نظرده توتموشدو.

16:13  عئسا فئلئپ قيصرئيه​سي طرفلرئنه گلدئيي زامان، اؤز شاگئردلرئندن سوروشدو: "خالق ائنسان اوغلونون کئم اولدوغونو ديئر؟"

16:14  اونلار جاواب وردئلر: "بعضئلري تعمئد ورن يحيا، بعضئلري ائليا، بعضئلري ده ارميا و يا پيغمبرلردن بئرئسي ديئرلر."

16:15  عئسا اونلارا ددي: "سئز منئم کئم اولدوغومو ديئرسئنئز؟"

16:16  شمعون پطروس جاواب ورئب ددي: "سن دئري تارينين اوغلو مسئحسن."

16:17  عئسا اونا ددي: «خوش سنئن حالينا، اي يونا اوغلو شمعون! چونکي بونو سنه بئلدئرن جئسم و قان يوخ، گؤيلرده اولان آتامدير.

16:18  من ده سنه ديئرم کي، سن پطروس​سان و من کئلئسامي بو داش اوستونده بئنا اِده​جه‌يم و اؤلولر دئيارينين قاپيلاري اونا قالئب گله بئلمه‌يه​جکلر.

16:19  گؤيلرئن پادشاهليغينين آچارلاريني سنه وره​جه‌يم؛ ير اوزونده باغلاديغين هر شي، گؤيلرده باغلانميش اولور و ير اوزونده آچاجاغين هر شي، گؤيلرده آچيلميش اولور."

16:20  او واخت عئسا شاگئردلرئنه جئدّي تاپشيردي کي، اونون مسئح اولدوغونو هچ کسه دمه‌سئنلر.

16:21  بو زاماندان عئسا باشلاييب شاگئردلرئنه خبر وردي کي، اونون اورشلئمه گتمه‌سي، آغساقّاللار، باش کاهئنلر، و دئن عالئملرئنئن الئندن چوخ عذاب چکمه‌سي، اؤلدورولمه‌سي، و اوچونجو گونده دئرئلمه‌سي لازيمدير.

16:22  پطروس اونو بئر يانا چکدي و اعتئراض ادئب ددي: "حاشا آغا! سنئن باشينا بله بئر شي اصلا گلمز!"

16:23  آمّا عئسا دؤنوب پطروسا ددي: "مندن ردّ اول شيطان! سن مني بودره‌دن داشسان، چونکي سنئن فئکئرلرئن تارينين فئکئرلري ديئل، ائنسانين فئکئرلري‌دئر."

16:24  او زامان عئسا شاگئردلرئنه ددي: "کئم ائسته‌يئر منئم داليمجا گلسئن، گرک اؤزونو ائنکار اتسئن و چارميخيني گؤتوروب داليمجا گلسئن.

16:25  چونکي کئم جانيني خئلاص اتمک ائسته‌سه، اونو ائتئره​جک؛ لاکئن کئم جانيني منئم يولومدا ائتئرسه، اونو قازاناجاقدير.

16:26  آداما نه فايداسي وار کي، بوتون دونيايا صاحئب اولسون، آمّا جانيني ائتئرسئن. و يا ائنسان اؤز جاني عوضئنه نه وره بئلر؟

16:27  چونکي ائنسان اوغلو آتاسينين شؤوکتئنده اؤز ملکلری ائله گله​جک و او زامان هر کسه اؤز عملئنه گؤره عوض وره​جک.

16:28  دوغروسونو سئزه ديئرم: بورادا دورانلاردان بعضئسي وار کي، ائنسان اوغلونون اؤز پادشاهليغيندا گلمه‌سئني گؤرمه‌دن اؤلومو دادماياجاق."

Chapter 17

17:1  عئسا آلتي گوندن سونرا پطروس، يعقوب، و قارداشي يوحنّاني اؤزو ائله گؤتوروب، اونلاري آيريجا اوجا بئر داغين باشينا آپاردي.

17:2  اونلارين قاباغيندا عئسانين گؤرونوشو ديئشئلدي؛ اوزو گون کئمي پارلادي و پالتاري ائشيق کئمي آغ اولدو.

17:3  بئردن شاگئردلرئن گؤزونه عئسا ائله موسا و ائليا گؤروندولر. اونلار عئسا ائله صؤحبت ادئردئلر.

17:4  پطروس عئسايا ددي: "يارب، بورادا اولماغيميز نه ياخشي اولدو! اگر ائسته‌يئرسن، بورادا اوچ چادير قوراق؛ بئري سنه، بئري موسايا، بئري ده ائليايا."

17:5  پطروس حله دانيشيردي کي، نورلو بئر بولود اونلارين اوستونه کؤلگه سالدي. بئردن بولودلاردان بئر سس ددي: "بو منئم سوگئلي اوغلومدور. اوندان چوخ راضي‌يام. اونا قولاق آسين."

17:6  شاگئردلر بونو اشئدن واخت، قورخو ائچئنده اوزو-اوسته يره ييخيلديلار.

17:7  عئسا گلدي و اونلارا اَل قويوب ددي: "قالخين، قورخمايين."

17:8  اونلار دا گؤزلرئني قالديرديلار و عئسادان باشقا هچ کسي گؤرمه‌دئلر.

17:9  داغدان اِنَن واخت، عئسا شاگئردلرئنه امر ادئب ددي: "ائنسان اوغلونون اؤلولردن دئرئلمه‌سئنه کئمي، گؤردويونوزو هچ کئمه دمه‌يئن."

17:10  شاگئردلري اوندان سوروشدولار: "اگر اِله‌دئر، بس نه اوچون دئن عالئملري ديئرلر کي، اوّلجه ائليا گلمه‌لي‌دئر؟"

17:11  عئسا جاواب ورئب ددي: "دوزدور، اوّلجه ائليا گله​جک و هر شيي قايدايا سالاجاقدير.

17:12  آمّا سئزه ديئرم: ائليا گلدي و اونو تانيماديلار. لاکئن ائسته‌دئکلري هر شيي اونا اتدئلر. ائنسان اوغلو دا اونلارين اَلئندن اله عذاب چکه​جک."

17:13  شاگئردلر او زامان باشا دوشدولر کي، عئسا بو سؤزلري اونلارا، تعمئد ورن يحيا حاقّيندا ديئردي.

17:14  خالقين يانينا يتئشن زامان، بئر آدام گلدي و عئسانين قاباغيندا دئز چؤکوب ددي:

17:15  "يارب! اوغلوما يازيغين گلسئن، چونکي غشّئدئر و چوخ اذئيّت چکئر، چونکي تز-تز گاه اودا، گاه دا سويا دوشور.

17:16  اونو سنئن شاگئردلرئنئن يانينا گتئردئم، لاکئن صاغالدا بئلمه‌دئلر."

17:17  عئسا جاواب ورئب ددي: "اي ائمانسيز و ترسه نسئل! داها نه واختا قدر سئزئنله اولاجاغام؟ نه واختا قدر سئزه دؤزه​جه‌يم؟ اونو منئم يانيما گتئرئن."

17:18  و ائبلئسه آجيقلاندي و ائبلئس اوشاقدان اشئيه چيخدي. اوغلان او آندا صاغالدي.

17:19  سونرا شاگئردلر، تک اولان زامان، عئسانين يانينا گلئب ددئلر: "نه اوچون بئز اونو چيخاردا بئلمه‌دئک؟"

17:20  عئسا اونلارا ددي: "ائمانينيزين آز اولدوغو اوچون. دوغروسونو سئزه ديئرم: اگر بئر خاردال توخومو قدر ائمانينيز اولا و بو داغا «بورادان اورايا کؤچ» دئيه​سئنئز، داغ کؤچر. سئزئن اوچون مومکون اولمايان هچ بئر شي اولماز.

17:21  (لاکئن بو جئنس چيخماز، مگر دوعا و اوروجلا.)"

17:22  جلئلده اولان زامان، عئسا اونلارا ددي: "ائنسان اوغلو آداملارين الئنه تسلئم ادئله​جک،

17:23  اونو اؤلدوره​جکلر و اوچونجو گون دئرئله​جکدئر." شاگئردلر بونا چوخ پرت اولدولار.

17:24  کفرناحوما گلدئکلري واخت، معبد وِرگئسئني ييغانلار پطروسا ياخينلاشيب ددئلر: "سئزئن اوستادينيز ائکي دئرهم ورگئني ورمئر؟"

17:25  پطروس ددي: "ورئر." اِوه گلن زامان، عئسا اونو قاباقلاييب ددي: "شمعون، سن نجه دوشونورسن؟ يرئن پادشاهلاري ورگي، يا دا باجي کئملردن آليرلار؟ اؤز اوغوللاريندان، يوخسا قرئبلردن؟"

17:26  پطروس اونا ددي: "قرئبلردن." عئسا دا اونا ددي: "اگر بله‌دئر، اوندا اوغوللار آزادديرلار.

17:27  لاکئن اونلاري ائنجئتمه‌يک. گؤله گت و چنگلئني آت. ائلک چيخان باليغي گؤتور؛ اونون آغزيني آچ، دؤرد دئرهملئک تاپارسان. اونو گؤتور، منئمله سئزئن عوضئنئزده اونلارا ور."

Chapter 18

18:1  او زامان شاگئردلر عئسانين يانينا گلئب ددئلر: "گؤيلرئن پادشاهليغيندا لاپ بؤيوک کئمدئر؟"

18:2  عئسا بئر اوشاغي يانينا چاغيردي و اونو اورتايا قويوب،

18:3  ددي: "دوغروسونو سئزه ديئرم، اگر سئز دؤنوب کؤرپه اوشاقلار کئمي اولماياسينيز، گؤيلرئن پادشاهليغينا اصلا گئره بئلمزسئنئز.

18:4  اونا گؤره، کئم اؤزونو بو اوشاق کئمي آلچاق اِتسه، گؤيلرئن پادشاهليغيندا لاپ بؤيوک اودور.

18:5  و کئم بله بئر اوشاغي منئم آديمين خاطئري اوچون قبول اتسه، مني قبول اتمئش اولور.

18:6  آمّا کئم منه ائنانان بو کئچئکلردن بئرئني بودره‌تسه، اونون اوچون داها ياخشي اولار کي، بوينونا ائري بئر ديئرمان داشي آسيب، دهنزئن دئبئنه آتيلسين.

18:7  ائنسانلاري بودره‌دن شيلر اوچون واي بو دونيانين حالينا! بله شيلرئن گلمه‌سي گرکدئر، لاکئن واي او آدامين حالينا کي، بو شيلر اونون واسئطه​سئله گلئر.

18:8  اگر اَلئن، يا دا آياغين سني پئس يولا چکئر، اونو کس و اؤزوندن آت؛ سنئن اوچون توپال يا دا چولاق حياتا گئرمک، ابدي اودا ائکي اَل يا دا ائکي آياقلي آتيلماقدان داها ياخشي‌دير.

18:9  اگر گؤزون سني پئس يولا چکئر، اونو چيخارت و اؤزوندن آت؛ سنئن اوچون حياتا تک گؤزلو گئرمک، جهنّم اودونا ائکي گؤزلو آتيلماقدان داها ياخشي‌دير.

18:10  دئقّت ادئن کي، بو کئچئکلردن بئرئنه بله حقارتله باخماياسينيز. چونکي سئزه ديئرم، گؤيده، اونلارين ملکلري، گؤيده اولان آتامين اوزونو دائم گؤرورلر.

18:11  چونکي ائنسان اوغلو گلئب کي، ائتمئش اولانلاري نئجات ورسئن.

18:12  سئز نه گومان ادئرسئنئز؟ اگر بئر آدامين يوز قويونو اولسا و اونلاردان بئري يولونو آزسا، مگر دوخسان‌دوقّوزونو داغلاردا قويوب، ائتمئئش قويونو آختارماغا گتمز؟

18:13  و اگر اونو تاپا بئلسه، دوغروسونو سئزه ديئرم، او، يولونو آزمايان دوخسان‌دوقّوزوندان داها چوخ، اونون اوچون سوئنر.

18:14  بلجه ده، گؤيلرده‌کي آتانيزين اله بئر ائسته‌يي يوخدور کي، بو کئچئکلردن بئري هلاک اولسون. قارداش خاطاسي

18:15  اگر قارداشين سنئن حاقّيندا خاطا اتسه، گت و خاطاسيني اونا گؤرسد. هر شي آنجاق اؤز آرانيزدا قالسين. اگر سنه قولاق آسسا، قارداشيني قازانيبسان.

18:16  آمّا اگر قولاق آسماسا، يانينا داها بئر و يا ائکي نفر آل کي، ديئلن هر سؤز ائکي و يا اوچ شاهئدئن آغزي ائله تصدئق اولونسون.

18:17  و اگر اونلارين سؤزونه قولاق آسماق ائستمه‌سه، کئلئسايا ده. اگر کئلئسانين سؤزونه ده قولاق آسماق ائستمه‌سه، قوي او سنئن اوچون بوتپرست و يا باج ييغان کئمي اولسون.

18:18  دوغروسونو سئزه ديئرم؛ ير اوزونده باغلاديغينيز هر شي، گؤيده باغلانميش اولاجاق. و ير اوزونده آچديغينيز هر شي، گؤيده آچيلميش اولاجاق.

18:19  سئزه گئنه ديئرم کي، اگر سئزدن ائکي نفر ير اوزونده ائستيه​جکلري هر هانسي بئر شي اوچون موتّفئق اولالار، گؤيلرده اولان آتام اونلار اوچون اده​جک.

18:20  چونکي هارادا ائکي و يا اوچ نفر منئم آديمدا بئر يره ييغيلسالار، من اورادا، اونلارين آراسيندايام."

18:21  او زامان پطروس گلئب عئسايا ددي: "يارب، قارداشيم منئم حاقّيمدا نچه دفه خاطا اتسه، اونو باغيشلامالي‌يام، يدّي دفه؟"

18:22  عئسا اونا ددي: "سنه ديئرم: يدّي دفه يوخ، يتمئش دفه يدّي دفه!

18:23  چونکي گؤيون پادشاهليغي او پادشاها بنزر کي، نؤکرلری ائله حسابلاشماق ائسته‌دي.

18:24  حسابلاشماغا باشلاديغي زامان، اونون يانينا بئر نؤکر گتئرئلدي کي، اون مئن تالانت بورجو وار ائدي.

18:25  بورجونو ورمه‌يه بئر شيي اولماديغي اوچون، آغاسي امر وردي کي، او، آروادي و اوشاقلاري و بوتون وار-يوخو ساتيلسين و بورجو گري آلينسين.

18:26  او زامان نؤکر يره دوشدو و اونا سجده ادئب ددي: «منه مؤهلت ور، بورجومون هاميسيني وره​رم.»

18:27  آغاسينين قولا رحمي گلدي. اونو آزاد ادئب، بورجونو دا باغيشلادي.

18:28  آمّا او نؤکر چؤله چيخيب، اونا يوز دئنار بورجلو اولان بئر يولداشيني تاپدي. اونو ياخالادي و بوغازيندان ياپيشيب ددي: «بورجونو ور!»

18:29  يولداشي آياقلارينا دوشوب يالواردي: «منه مؤهلت ور، بورجومو وره​رم.»

18:30  لاکئن نؤکر قبول اتمه‌يئب، بورجونو وره‌نه قدر اونو زئندانا سالديردي.

18:31  بو آدامين يولداشلاري، باش وِرَن حادئثه​ني گؤرن واخت، چوخ پرت اولدولار و گدئب بوتون اولانلاري آغالارينا خبر وردئلر.

18:32  او زامان آغاسي نؤکري يانينا چاغيريب، ددي: «اي پئس نؤکر، يالوارديغين اوچون بوتون او بورجو سنه باغيشلاديم.

18:33  من سنه رحم اتدئيئم کئمي، مگر سن ده يولداشينا رحم اتمه‌لي ديئلدئن؟!»

18:34  و قضبله‌نئب بوتون بورجونو وره‌نه قدر، اونو ائشکنجه ورنلرئن الئنه وردي.

18:35  گؤيده اولان آتام دا سئزه اله اده‌جک، اگر سئزلردن هر بئرئنئز ده قارداشينيزين خاطاسيني اورکدن باغيشلاماياسينيز."

Chapter 19

19:1  عئسا بو سؤزلري بئتئرندن سونرا، جلئلدن چيخيب اوردونون او بئري تايينا، يهودئيه دئيارينا گلدي.

19:2  بؤيوک بئر جاماعات اونون دالينجا گتدي و عئسا اورادا اونلارا شفا وردي.

19:3  فرئسئلر اونو ائمتاحان اتمک اوچون اونون يانينا گلئب ددئلر: "آيا کئشئيه جائزدئر کي، آرواديني هر سببه گؤره بوشاسين؟"

19:4  عئسا جاواب ورئب ددي: "مگر اوخوماييبسينيز کي، «باشلانيشدا خالئق اونلاري کئشي و آرواد ياراتدي.»

19:5  و ددي: «بونا گؤره کئشي آتا-آناسيندان آيريليب، آروادينا ياپيشاجاق و ائکئسي بئر بدن اولاجاقلار.»

19:6  اله کي، اونلار آرتيق ائکي يوخ، بئر بدندئرلر. بلجه، تارينين بئرلشدئردئيئني، ائنسان آييرمامالي‌دير."

19:7  اونلار عئسايا ددئلر: "اگر بله‌دئر، بس نه اوچون موسا ديئب کي، اَر، آروادينا بئر بوشانما کاغيذي ورئب، اونو بوشايا بئلر؟"

19:8  عئسا اونلارا ددي: "اورکلرئنئزئن برکلئيئنه گؤره موسا ائجازه وردي کي، آروادلارينيزي بوشايا بئله​سئنئز. لاکئن باشلانيشدان بله ديئلدي.

19:9  سئزه ديئرم: کئم آرواديني زئنادان باشقا اؤزگه بئر سببه گؤره بوشاييب، آيري بئر آروادلا اِولنسه، زئنا ادئر."

19:10  شاگئردلر عئسايا ددئلر: "اگر اَرله آروادي آراسينداکي موناسئبت بله​دئر، دمه‌لي اولنمه​مک داها ياخشي‌دير."

19:11  آمّا عئسا اونلارا ددي: "هرکس بو سؤزو قبول اده بئلمز، مگر او آداملار کي، بو قابئلئيّت اونلارا ورئلئب.

19:12  چونکي اله خاجه​لر وار کي، آنا قارنيندان اله دوغولوبلار؛ و اله خاجه​لر ده وار کي، ائنسانلار طرفئندن اله ادئلئبلر. گؤيون پادشاهليغي اوچون اؤزلرئني خاجه سايانلار دا واردير. بونو قبول اده بئلن قبول اتسئن."

19:13  او واخت اوشاقلار عئسانين يانينا گتئرئلدي کي، اونلارا ال قويوب برکت ورسئن، آمّا شاگئردلري اونلارا آجيقلانديلار.

19:14  عئسا ددي: "قويون اوشاقلار منئم يانيما گلسئنلر! اونلارا مانع اولمايين، چونکي گؤيون پادشاهليغي بله​لرئنکئدئر."

19:15  و اونلارين اوستونه ال قويوب، اورادان گتدي.

19:16  بئر آدام عئسانين يانينا گلئب ددي: "اوستاد! ابدي حياتا مالئک اولماق اوچون نه ياخشي عمل اتملي‌يَم؟"

19:17  عئسا اونا ددي: "نه اوچون نه‌يئن ياخشي اولدوغو باره​ده مندن سوروشورسان؟ فقط واحئد اولاندير کي، ياخشي‌دير. لاکئن اگر ابدي حياتا گئرمک ائسته‌يئرسن، احکامي يرئنه يتئر."

19:18  آدام عئسايا ددي: "هانسي احکامي؟" عئسا دا ددي: "آدام اؤلدورمه؛ زئنا اتمه؛ اوغورلوق اتمه؛ يالان شهادت ورمه؛

19:19  آتا و آنانا حؤرمت ات؛ و قونشونو اؤزون کئمي سو."

19:20  جاوان اوغلان عئسايا ددي: "بوتون بونلاري يرئنه يتئرمئشم، داها نه‌يئم اسکئکدئر؟"

19:21  عئسا اونا ددي: "اگر کامئل اولماق ائسته‌يئرسن، گت نه‌يئن وارسا سات، يوخسوللارا پايلا. گؤيده خزئنن اولاجاق. سونرا گل، منه پيرو اول."

19:22  آمّا جاوان اوغلان بو سؤزو اشئدن واخت، پرت اولوب گتدي، چونکي چوخ مال-دؤولتي وار ائدي.

19:23  عئسا شاگئردلرئنه ددي: "دوغروسونو سئزه ديئرم: وارلي آدام گؤيون پادشاهليغينا چتئنلئکله گئره​جک.

19:24  گئنه سئزه ديئرم: دَوه​نئن ائينه دِشئيئندن کچمه‌سي، وارلي بئر آدامين تارينين پادشاهليغينا گئرمه‌سئندن داها آساندير."

19:25  شاگئردلري بونو اشئدنده چوخ تعجّوب ادئب ددئلر: "بس کئم نئجات تاپا بئلر؟!"

19:26  عئسا اونلارا باخيب ددي: "ائنسانلار اوچون بو، قِيري​مومکوندور، لاکئن تاري اوچون هر شي مومکوندور."

19:27  او واخت پطروس اونا جاواب ورئب ددي: "باخ، بئز هر شيي آتيب سنئن دالينجا گلمئشئک، اگر بله‌دئر، بس بئزئم نه‌يئمئز اولاجاق؟"

19:28  عئسا دا اونلارا ددي: "دوغروسونو سئزه ديئرم: او زامان کي، ائنسان اوغلو هر شيئن تزه​لنمه‌سئنده شؤوکتلي تختئنه اوتورور، منئم داليمجا گلن سئزلر ده اون‌ائکي تختئن اوستونده اوتوروب، ائسرايئلئن اون‌​ائکي قبئله​سئنه حؤکم اده​جکسئنئز.

19:29  و هر کئم منئم آديم اوزوندن اِوئني، قارداشلاريني، باجيلاريني، آتاسيني، آناسيني، اوشاقلاريني و يا زمئلرئني بوراخميش اولسا، يوز دفه آرتيق آلاجاق، هم ده ابدي حياتا وارئث اولاجاق.

19:30  لاکئن چوخ بئرئنجي‌لر آخيرکي و چوخ آخيرکي‌لار بئرئنجي اولاجاقلار."

Chapter 20

20:1  "دوغرودان دا گؤيون پادشاهليغي تورپاق صاحئبي اولان بئر آداما بنزر کي، سحر ارکن دوروب، اوزوم باغي اوچون ائشچي توتماغا چيخدي.

20:2  ائشچئلر‌له گونو بئر دئنارا راضيلاشيب، اونلاري اوزوم باغينا گؤنده‌ردي.

20:3  گونون اوچونجو ساعاتينا ياخين چيخيب، اؤزگه ائشچئلري ميداندا گؤردو کي، ائشسئز دوروبلار.

20:4  اونلارا ددي: «سئز ده اوزوم باغينا گدئن و حاقّينيزي وره​رم.» اونلار دا گتدئلر.

20:5  گونون آلتينجي و دوقّوزونجو ساعاتينا ياخين گئنه چيخيب بله اتدي.

20:6  گونون اون‌بئرئنجي ساعاتينا ياخين چيخيب، ائشسئز دوران اؤزگه ائشچئلري تاپدي و اونلارا ددي: «نه اوچون بورادا بوتون گون آوارا دوروبسونوز؟»

20:7  اونلار اونا ددئلر: «چونکي هچ کئم بئزي ائشه گؤتورمه‌يئب.» اونلارا ددي: «سئز ده باغيما گدئن.»

20:8  آخشام واختي باغ صاحئبي اؤز ناظئرئنه ددي: «ائشچئلري چاغير و آخيرکي‌لاردان باشلاييب، اوّلکي‌لره کئمي موزدلرئني ور.»

20:9  اون‌بئرئنجي ساعاتا ياخين ائشه گلنلر، هر بئري بئر دئنار آلديلار.

20:10  اونا گؤره ده، اوّلکي‌لر اله دوشوندولر کي، داها چوخ آلاجاقلار. لاکئن اونلار دا هر بئري بئر دئنار آلدي.

20:11  آلاندان سونرا، باغ صاحئبئنه شئکايت ادئب،

20:12  ددئلر: «بو آخيرکي‌لار آنجاق بئر ساعات ائشله‌دئلر، آمّا سن اونلاري بئزئمله کي، گونون آغيرليق و ائستئلئيئني چکمئشئک، بئر توتدون.»

20:13  لاکئن باغ صاحئبي جاواب ورئب، اونلارين بئرئنه ددي: «دوستوم! من سنه حاقسيزليق اتمئرم. مگر سن منئمله بئر دئنارا راضيلاشمادين؟

20:14  موزدونو آل، گت. ائسته‌يئرم کي، بو آخيرکي‌لارا دا سنه وردئيئم قدر ورئم.

20:15  آيا ائختئياريم يوخدور کي، اؤز ماليملا نه ائسته‌دئيئمي اِدئم؟ آيا سن منئم سخاوتلي اولدوغوما پاخيلّيق ادئرسن؟»

20:16  بلجه ده آخيرکي‌لار اوّل و اوّلکي‌لر آخيرکي اولاجاقلار."

20:17  عئسا اورشلئمه طرف يولا دوشنده اون‌​ائکي شاگئردي بئر يانا آپاريب، اونلارا ددي:

20:18  "باخين، اورشلئمه گدئرئک. ائنسان اوغلو باش کاهئنلر و دئن عالئملرئنئن اَلئنه ورئله​جک. اونو اؤلومه محکوم ادئب

20:19  قيري​يهودئلره تسلئم اده​جکلر کي، اونلار اونو اَله سالسينلار، قامچي ائله دؤيوب، چارميخا چکسئنلر. آمّا او، اوچونجو گون دئرئله​جکدئر."

20:20  او زامان، زِبِدِي اوغوللارينين آناسي، اوغوللاري ائله عئسانين يانينا گلئب، تعظئم اتدي و ددي کي، اوندان بئر خاهئشي وار.

20:21  عئسا اونا ددي: "نه ائسته‌يئرسن؟" آرواد اونا ددي: "امر ات کي، منئم بو ائکي اوغلوم سنئن پادشاهليغيندا بئري صاغيندا و بئري ده سولوندا اوتورسون."

20:22  لاکئن عئسا جاواب ورئب ددي: "سئز نه ائسته‌دئيئنئزي بئلمئرسئنئز. مگر ائچه​جه‌يئم پئياله​دن ائچه بئلرسئنئز؟" اونلار ددئلر: "اده بئلرئک."

20:23  عئسا اونلارا ددي: "ائچه​جه‌يئم پئياله​دن ائچه​جکسئنئز؛ آمّا صاغيمدا، يا دا سولومدا اوتورماغا ائجازه ورمک منئم اَلئمده ديئل. آتام بو يرلري موعيّن آداملار اوچون حاضيرلاييب."

20:24  اون شاگئرد، بونو اشئدن واخت، ائکي قارداشا قضبلندئلر.

20:25  آمّا عئسا اونلاري يانينا چاغيريب ددي: "بئلئرسئنئز کي، قيري​يهودئلرئن ريئسلري اونلارا حؤکمدارليق ادرلر و آغالاري اونلارين اوستونه حاکئمئيّت سوررلر.

20:26  آمّا سئزئن آرانيزدا گرک بله اولماسين. سئزئن آرانيزدا بؤيوک اولماق ائسته‌ين هر کس، او بئرئلرئن نؤکري اولسون.

20:27  و آرانيزدا بئرئنجي اولماق ائسته‌ين، او بئرئلرئن قولو اولسون.

20:28  چونکي ائنسان اوغلو گلمه‌يئب کي، اونا خئدمت اولونسون. گلئب کي، خئدمت اتسئن و بئر چوخلاري اوچون جانيني فئدئيه ورسئن."

20:29  ارئحادان چيخاندا بؤيوک بئر جاماعات عئسانين دالينجا گتدي.

20:30  يول قيراغيندا اوتوران ائکي کور، عئسانين کچدئيئني اشئدن واخت، باغيرديلار: "آغا، اي داوود اوغلو! بئزه يازيغين گلسئن."

20:31  آمّا جاماعات اونلارا آجيقلانيب، ساکئت اتمه‌يه چاليشديلار. آمّا اونلار داها اوجادان باغيرديلار: "آغا، اي داوود اوغلو! بئزه يازيغين گلسئن."

20:32  عئسا داياندي و اونلاري چاغيريب ددي: "مندن نه ائسته‌يئرسئنئز کي، سئزه ادئم؟"

20:33  اونلار اونا ددئلر: "يارب، گؤزلرئمئز آچيلسين."

20:34  عئسانين اونلارا رحمي گلئب، گؤزلرئنه ال سورتدو؛ او آندا اونلارين گؤزلري آچيلدي و عئسانين دالينجا گتدئلر.

Chapter 21

21:1  اونلار اورشلئمه ياخينلاشيب زيتون داغينين يانيندا اولان بيت فاجي‌يا گلن زامان، عئسا ائکي شاگئردئنه بو سؤزلري ديئب اونلاري گؤنده‌ردي:

21:2  "قاباغينيزداکي کنده گدئن. گئردئکده باغلي بئر اششکله بئر سيپاني تاپاجاقسينيز. اونلاري آچيب منه گتئرئن.

21:3  اگر کئمسه سئزه بئر شي دسه، دئيرسئنئز کي، ربّئن بونا احتئياجي وار، آنَن گري گؤنده‌ره​جک."

21:4  بو، اونون اوچون باش وردي کي، پيغمبر واسئطه​سئله ديئلن سؤز يرئنه يتئشسئن:

21:5  "صحيون قيزينا ديئن، باخ، پادشاهين سنئن يانينا گلئر؛ او حلئمدئر، اِششه‌يه مئنمئش، سيپايا مئنمئش، اششه‌يئن بالاسينا مئنمئش."

21:6  شاگئردلر گدئب عئسانين اونلارا ددئيي کئمي اتدئلر.

21:7  اششکله سيپاني گتئردئلر، پالتارلاريني اونلارين اوستونه قويدولار و عئسا اونلارين اوستونه مئندي.

21:8  جاماعاتين چوخلاري پالتارلاريني يولا دؤشه​دئلر و اؤزگه​لر ده آغاجلارين بوداقلاريني کسئب يولا سردئلر.

21:9  عئسانين قاباغيندا گدن و دالينجا گلن جاماعات قيشقيريرديلار: "هوسانّا، داوودون اوغلونا! ربّئن آديندا گلن موبارک اولسون! لاپ اوجالاردا هوسانّا!"

21:10  عئسانين اورشلئمه گئردئيي زامان، بوتون شهر جوشا گلئب سوروشدو: "بو کئمدئر؟"

21:11  جاماعات ديئردئ: "بو جلئلئن ناصئره شهرئندن اولان عئسا پيغمبردئر."

21:12  عئسا معبده گئردي و آليش-ورئش ادنلرئن هاميسيني اشئيه قوودو؛ صرّافلارين مئزلرئني و گؤيرچئن ساتانلارين کورسولرئني چوئردي.

21:13  و اونلارا ددي: "يازيليب کي، «منئم اِوئمه دوعا اِوي ديئله​جک، آمّا سئز اونو اوغرولار يوواسينا دؤنده‌رئرسئنئز.»"

21:14  معبدده کورلار و توپاللار اونون يانينا گلدئلر و عئسا اونلارا شفا وردي.

21:15  لاکئن باش کاهئنلر و دئن عالئملري اونون عجايئب ائشلرئني و معبدده "هوسانّا، داوودون اوغلونا" باغيران اوشاقلاري گؤرن واخت، قضبله‌نئب ددئلر:

21:16  "بونلارين نه ددئکلرئني اشئدئرسن؟" عئسا ددي: "بلي، مگر هچ اوخوماييبسينيز کي، «اوشاقلارين و سود اَمَنلرئن آغزيندان حمد تؤکدوردون؟!»"

21:17  و اونلاري قويوب شهردن کنارا، بيت عنيايا گتدي و گجه​ني اورادا قالدي.

21:18  سحر ارکن عئسا شهره قاييداندا آجيقدي.

21:19  يول قيراغيندا بئر انجئر آغاجي گؤروب اونا ياخينلاشدي، آمّا اوندا يارپاقدان باشقا هچ بئر شي تاپمادي. او زامان اونا ددي: "قوي بوندان سونرا سندن هچ ميوه چيخماسين!" و انجئر آغاجي او آندا قورودو.

21:20  شاگئردلري بونو گؤرن واخت، تعجّوب ادئب ددئلر: "انجئر آغاجي بئر آندا نجه قورودو؟!"

21:21  عئسا اونلارا جاواب ورئب ددي: "دوغروسونو سئزه ديئرم: اگر ائمانينيز اولوب شوبهه اتميه​سئنئز، نه ائنکي انجئر آغاجينا ادئله‌ني اده بئلرسئنئز، بو داغا دئيه​سئنئز ده کي، «قالخ، دهنزه آتيل»، اولاجاقدير.

21:22  اگر ائمان اده​سئنئز، دوعادا نه ائستيه​سئنئز، آلاجاقسينيز."

21:23  عئسا معبده گئرئب اورادا تعلئم ورئردي کي، باش کاهئنلر و خالقين آغساقّاللاري اونون يانينا گلئب ددئلر: "بو ائشلري نه ائقتئدارلا ادئرسن؟ و سنه بو ائقتئداري کئم ورئب؟"

21:24  عئسا اونلارا جاواب ورئب ددي: "من ده سئزدن بئر سوآل سوروشاجاغام. اگر منه جاواب وره​سئنئز، او زامان من ده سئزه دئيه​جه‌يم کي، بو ائشلري کئمئن ائقتئداري​ائله گؤرورم.

21:25  يحيانين تعمئدي هارادان ائدي؟ گؤيدن ائدي يوخسا ائنسانلاردان؟" اونلار آرالاريندا مصلحتله‌شئب ددئلر: "اگر «گؤيدن ائدي دسک»، دئيه​جک: «بس نه اوچون اونا ائمان گتئرمه‌دئنئز؟»

21:26  آمّا اگر «ائنسانلاردان ائدي دسک»، جاماعاتدان قورخوروق، چونکي هامي يحياني بئر پيغمبر سايير."

21:27  اونا گؤره ده عئسايا بله جاواب وردئلر: "بئلمئرئک." عئسا دا اونلارا ددي: "من ده سئزه دمئرم کي، بو ائشلري نه ائقتئدارلا گؤرورم.

21:28  بونا نجه دوشونورسونوز؟ بئر آدامين ائکي اوغلو وار ائدي. بئرئنجئسئنئن يانينا گدئب ددي: «اوغول، بو گون گت اوزوم باغيندا ائشله.»

21:29  اوغول جاواب وردي: «ائسته‌مئرم.» لاکئن سونرا، پشمان اولوب گتدي.

21:30  آدام ائکئنجئسئنئن يانينا دا گلئب همن سؤزو ددي. اوغول جاواب وردي: «گده‌رم، آغا.» آمّا گتمه‌دي.

21:31  بو ائکئسئندن هانسي آتاسينين ائسته‌دئيئني يرئنه يتئردي؟" جاواب وردئلر: "بئرئنجئسي" عئسا اونلارا ددي: "دوغروسونو سئزه ديئرم: باج ييغانلار و فاحئشه​لر تارينين پادشاهليغينا سئزدن قاباق گئررلر.

21:32  چونکي يحيا سئزه صالحلئک يولوندا گلدي، سئز اونا ائنانمادينيز. لاکئن باج ييغانلار و فاحئشه​لر ائنانديلار. بونو گؤرندن سونرا بله پشمان اولوب اونا ائنانمادينيز.

21:33  آيري بئر مثل اشئدئن: بئر مالئک وار ائدي کي، اوزوم باغي اکدي. باغين اطرافينا حاصار چکدي. اوزومو سيخماق اوچون ائچئنده بئر حوووض قازدي و بئر بورج تئکئب باغي باغبانلارا ائجاره​يه وردي و سفره چيخدي.

21:34  محصول زاماني يتئشن واخت، باغبانلارين يانينا نؤکرلرئني گؤنده‌ردي کي، محصولو آلسينلار.

21:35  آمّا باغبانلار نؤکرلري توتوب بئرئني دؤيدولر، بئرئني اؤلدوردولر، بئرئني ده داشا باسديلار.

21:36  باغ صاحئبي بو دفه اوّلکئندن داها چوخ نؤکر گؤنده‌ردي. باغبانلار بونلارا دا اله اتدئلر.

21:37  آخيردا باغ صاحئبي اونلارين يانينا اوغلونو گؤنده‌ردي و ديئردي کي، اوغلوما حؤرمت اِدَرلر.

21:38  لاکئن باغبانلار، اوغولو گؤرن واخت، آرالاريندا ددئلر: «وارئث بودور؛ گلئن اونو اؤلدورک و مئراث بئزه قالسين.»

21:39  و اوغولو توتدولار، باغدان اشئيه ساليب اؤلدوردولر.

21:40  بلجه، باغين صاحئبي گلنده بو باغبانلارا نه اده​جک؟"

21:41  اونلار عئسايا ددئلر: "بو خائنلري قورخولو بئر اؤلومه محکوم اده​جک، اوزوم باغيني دا اؤزگه باغبانلارا ائجاره​يه وره​جک کي، محصولو اونا اؤز واختيندا ورسئنلر."

21:42  عئسا اونلارا ددي: "مگر موقدّس يازيلاردا اوخوماييبسينيز کي: «بنّالارين ردّ اتدئيي داش کونجون باش داشي اولدو. بو ربّئن ائشئدئر، و گؤزوموزده حيرتلي گؤرونور.»

21:43  بونا گؤره، سئزه ديئرم کي، تارينين پادشاهليغي سئزدن آلينيب اله بئر خالقا ورئله​جک کي، حاصئلي يتئشدئره بئلسئن.

21:44  بو داشين اوستونه دوشن تئکه-تئکه اولاجاق، آمّا داش کئمئن اوستونه دوشسه، اونو اَزه​جکدئر."

21:45  باش کاهئنلر و فرئسئلر اونون مثل​لرئني اشئدن واخت، آنلاديلار کي، بو سؤزلري اونلارين حاقّيندا ديئر.

21:46  اونو توتماغا قصد اتدئلر، لاکئن جاماعاتدان قورخدولار، چونکي اونلار عئساني پيغمبر حساب ادئردئلر.

Chapter 22

22:1  عئسا گئنه اونلارا مثل​لر​له دانيشيب ددي:

22:2  "گؤيون پادشاهليغي اوغلونا توي ضئيافتي ورن بئر پادشاها بنزر.

22:3  او، قوللاريني گؤنده‌ردي کي، توي ضئيافتئنه دعوت اولونانلاري چاغيرسينلار، آمّا اونلار گلمک ائستمه‌دئلر.

22:4  پادشاه اؤزگه قوللاري بئر داها گؤنده‌رئب اونلارا ددي: «دعوت اولونانلارا ديئن کي: {باخين، سوفرم حاضيردير؛ اؤکوزلر و بسلنمئش ماللار کسئلمئش، هر شي حاضيردير. توي مجلئسئنه گلئن.}»

22:5  لاکئن اونلار اعتئنا اتمه‌يئب اؤز يوللارينا گتدئلر؛ بئرئسي زمئسئنه، بئرئسي تئجارتئنه گتدي.

22:6  قالانلاري دا اونون قوللاريني توتدولار و تحقئر ادئب اؤلدوردولر.

22:7  پادشاه قضبلندي و قوشونلاريني گؤنده‌رئب، او قاتئل​لري محو اتدي، شهرلرئني ده يانديردي.

22:8  او زامان قوللارينا ددي: «توي مجلئسي حاضيردير، لاکئن چاغيريلميش قوناقلار بونا لايئق ديئلدئرلر.

22:9  کوچه​لر باشينا گدئن و تاپديغينيز هر آدامي توي مجلئسئنه دعوت ادئن.»

22:10  بلجه، قوللار يوللارا چيخديلار، ياخشيدان پئسدن تاپديقلاري هر کسي ييغديلار و توي مجلئسي قوناقلارلا دولدو.

22:11  پادشاه قوناقلاري گؤرمک اوچون مجلئسه گئرنده، اورادا توي پالتاري گيمه​مئش بئر نفري گؤردو.

22:12  و اونا ددي: «دوستوم! توي پالتاري گيمه​مئش بورايا نجه گئردئن؟» آدامين دئلي توتولدو.

22:13  او زامان پادشاه نؤکرلرئنه ددي: «اونون ال-آياغيني باغلايين و گؤتوروب چؤل قارانليغينا آتين؛ او يره کي، اورادا آغلاشما و دئش قيجيرتماسي اولاجاق.»

22:14  چونکي دعوت اولونموشلار چوخ، آمّا سچئلمئشلر آزديرلار."

22:15  او زامان فرئسئلر موشاوئره اتدئلر کي، اونو سؤز اوستونده نجه توتسونلار.

22:16  اؤز شاگئردلرئني هئرودچولارلا بئر يرده عئسانين يانينا گؤنده‌رئب ددئلر: "اوستاد! بئلئرئک کي، سن صادئق بئر آدامسان و تارينين يولونو دوغرولوقلا اؤيره‌دئرسن و هچ کسدن ده طرفدارليق اتمئرسن، چونکي هچ کسئن نه طبقه​دن اولدوغونا باخميرسان.

22:17  ائندي بئزه ده گؤرک، سنئن نظرئن نه‌دئر؟ قيصره باج ورمک جائزدئر يا يوخ؟"

22:18  لاکئن عئسا اونلارين پئس نئيّتلرئني بئلدئيئندن اونلارا ددي: "مني نه اوچون ائمتاحان ادئرسئنئز، اي رئياکارلار؟

22:19  باج وردئيئنئز سئکّه​ني منه گؤرسدئن." اونلار اونا بئر دئنار گتئردئلر.

22:20  عئسا اونلارا ددي: "سئکّه​نئن اوستونده‌کي بو صورت و يازي کئمئندئر؟"

22:21  ددئلر: "قيصرئن." او واخت عئسا اونلارا ددي: "اگر اله‌دئر، قيصرئنکئني قيصره، تارينينکيني دا تارييا ورئن."

22:22  اونلار بونو اشئدنده حيران قالديلار و عئساني ترک ادئب گتدئلر.

22:23  همئن گون "دئرئلمه يوخدور" دئين صادوقئلر عئسانين يانينا گلئب اوندان سوروشدولار:

22:24  "اوستاد! موسا ديئب: «اگر بئر آدام اوشاغي اولمادان اؤلسه، قارداشي اونون دولونو آليب اؤلن قارداشينا نسئل يتئشدئرسئن.»

22:25  بئزئم آراميزدا يدّي قارداش وار ائدي. بئرئنجئسي اِولندي و اؤلدو. اوشاغي اولماديغيندان آرواديني قارداشي اوچون قويدو.

22:26  ائکئنجئسي و اوچونجوسو، حتّا يدّئنجئسئنه قدر اِله اولدو.

22:27  هاميسيندان سونرا دا او آرواد اؤلدو.

22:28  ائندي قئيامت گونونده، آرواد او يدّي نفردن کئمئن آروادي اولاجاق؟ چونکي هاميسي اونونلا اولنمئش ائدئلر."

22:29  عئسا جاواب ورئب اونلارا ددي: "سئز سهو ادئرسئنئز، چونکي نه موقدّس يازيلاري بئلئرسئنئز نه ده تارينين قودرتئني.

22:30  اونا گؤره کي، قئيامت گونونده نه اِوله‌نرلر، نه ده اَره گِدَرلر. آنجاق گؤيده‌کي ملکلر کئمي اولارلار.

22:31  مگر اؤلولرئن دئرئلمه‌سي حاقّيندا تاري طرفئندن سئزه ديئلن سؤزو اوخوماييبسينيز:

22:32  «من ائبراهئمئن تاريسي، ائسحاقين تاريسي، و يعقوبون تاريسي‌يام!» تاري اؤلولرئن يوخ، دئرئلرئن تاريسي‌دير."

22:33  جاماعات بونو اشئدئب اونون تعلئمئندن تعجّوبلندئلر.

22:34  فرئسئلر، عئسانين صادوقئلرئن آغيزلاريني باغلاديغيني اشئدن واخت، بئر يره ييغيلديلار.

22:35  اونلاردان بئري کي، شرئعت عالئمي ائدي، عئساني ائمتاحان اتمک اوچون اوندان سوروشدو:

22:36  "اوستاد! شرئعتئن لاپ بؤيوک امري هانسي‌دير؟"

22:37  عئسا اونا ددي: "رب تاريني بوتون اوره‌يئنله، بوتون جانينلا، و بوتون فئکرئنله سو.

22:38  بو، بئرئنجي و لاپ بؤيوک امردئر.

22:39  بونا بنزه‌ين ائکئنجئسي ده بودور: قونشونو اؤزون کئمي سو.

22:40  بوتون شرئعت و پيغمبرلرئن سؤزلري بو ائکي حؤکمون اوستونده دورور."

22:41  فرئسئلر بئر يره ييغيلاندا عئسا اونلاردان سوروشدو:

22:42  "مسئح حاقّيندا نه دوشونورسونوز؟ او، کئمئن اوغلودور؟" اونلار ددئلر: "داوودون اوغلو."

22:43  عئسا اونلارا ددي: "اگر اِله‌دئر، بس نه اوچون داوود روحدان ائلهام آليب، اونا رب خئطاب ادئر و ديئر کي،

22:44  ربّ منئم ربّئمه ددي: «دوشمنلرئني آياقلارينين آلتينا قويانا قدر، صاغيمدا اوتور.»

22:45  اگر داوود اونو رب چاغيرير، نجه اولور کي، او، داوودون اوغلو اولور؟"

22:46  هچ کئم اونا، جاوابيندا بئر سؤز دئيه بئلمه‌دي. و او گوندن سونرا آرتيق هچ کس جسارت اتمه‌دي کي، اوندان بئر شي سوروشسون.

Chapter 23

23:1  بوندان سونرا عئسا جاماعاتا و اؤز شاگئردلرئنه ددي:

23:2  "دئن عالئملري و فرئسئلر موسانين کورسوسونده اوتورورلار.

23:3  بونا گؤره ده، سئزه امر اتدئيي هر شيي گرک يرئنه يتئره​سئنئز. لاکئن اونلارين اتدئکلرئني اتمه‌يئن، چونکي وعظ اتدئکلرئنه عمل اتمئرلر.

23:4  اونلار آغير يوکلر باغلاييب ائنسانلارين چئيئنلرئنه قويورلار، آمّا اونلاري داشيماق اوچون ائسته‌مئرلر کی، اؤزلرئنئن بئر بارماغيني بله ترپتسئنلر.

23:5  عمل اتدئکلرئنئن هاميسيني، اونون اوچون ادئرلر کي، ائنسانلارا نومايئش ورسئنلر. دوعا بازوبندلرئني اِنلي و پالتارلارينين ساجاقلاريني اوزون ادئرلر.

23:6  ضئيافتلرده مجلئسئن باشيني، کنئسه​لرده ده باش کورسولري توتماغي سوئرلر.

23:7  بازار ميدانلاريندا سلاملار آلماغي و ائنسانلارين اونلارا اوستاد آديندا خئطاب اتمه‌سئني سوئرلر.

23:8  لاکئن سئز اوستاد چاغيريلمامالي​سينيز، چونکي سئز هامينيز قارداشسينيز و آنجاق بئر موعلّئمئنئز وار.

23:9  ير اوزونده هچ کسه ده آتا دمه‌يئن. چونکي بئر آتانيز وار، او دا گؤيده​دئر.

23:10  هچ کئم سئزي موعلّئم چاغيرماسين، چونکي بئر موعلّئمئنئز وار، او دا مسئحدئر.

23:11  آرانيزدا بؤيوک اولان، او بئرئلرئن نؤکري اولاجاق.

23:12  چونکي اؤزونو قالديران آلچالاجاق، و اؤزونو آلچاق ادن اوجالاجاقدير.

23:13  واي سئزه، اي دئن عالئملري و فرئسئلر، اي رئياکارلار! سئز گؤيون پادشاهليغينين قاپيسيني ائنسانلارين اوزونه باغلاييرسينيز. نه اؤزونوز گئرئرسئنئز، نه ده گئرمک ائسته‌ينلري قويورسونوز.

23:14  واي سئزه، اي دئن عالئملري و فرئسئلر، اي رئياکارلار! چونکي سئز دول آروادلارين اِوئني غارت ادئرسئنئز و اؤزلرئنئزي گؤرسدمک اوچون اوزون دوعالار ادئرسئنئز. بونون اوچون ده، داها آغير محکومئيّته محکوم اولاجاقسينيز.

23:15  واي سئزه، اي دئن عالئملري و فرئسئلر، اي رئياکارلار! چونکي سئز بئر نفري ائمانا گتئرمک اوچون دهنزي و قورولوغو دولانيرسينيز و گتئرندن سونرا، اونو ائکي قات اؤزونوزدن آرتيق جهنّم اؤولادي ادئرسئنئز.

23:16  واي سئزه، اي کور بلدچئلر! ديئرسئنئز: «کئم معبده آند ائچسه، اهمئيّتلي بئر شي ديئلدئر، آمّا کئم معبدئن قيزيلينا آند ائچسه، اؤز آندينا باغلي اولور.»

23:17  سئز اي آخماقلار، اي کورلار! هانسي داها بؤيوکدور؟ قيزيل، يوخسا قيزيلي موقدّس ادن معبد؟

23:18  ديئرسئنئز: «کئم قوربانگاها آند ائچسه، اهمئيّتلي بئر شي ديئلدئر، آمّا کئم قوربانگاهين اوستونده‌کي قوربانا آند ائچسه، اؤز آندينا باغلي اولور.»

23:19  سئز، اي کورلار! هانسي داها بؤيوکدور؟ قوربان، يوخسا قورباني موقدّس ادن قوربانگاه؟

23:20  بلجه، قوربانگاها آند ائچن، اونا و اونون اوستونده اولان بوتون شيلره آند ائچئر.

23:21  معبده آند ائچن، اونا و اوندا ساکئن اولانا آند ائچئر.

23:22  گؤيه آند ائچن تارينين تختئنه و اونون اوستونده اوتورانا آند ائچئر.

23:23  واي سئزه، اي دئن عالئملري و فرئسئلر، اي رئياکارلار! چونکي نانَع، شويود، و زئره​نئن اوندا بئرئني ورئرسئنئز، لاکئن شرئعتئن داها موهوم ائشلرئني، عدالتي، مرحمتي، و ائماني آتيرسينيز. اوندا​بئر حئصّه​ني ورمکده اهمال اتمه‌دن، سئزه گرکدئر کي، اساس بونلارا عمل اده‌سئنئز.

23:24  اي کور بلدچئلر! مئلچه‌يي سوزورسونوز، لاکئن دَوه​ني اودورسونوز.

23:25  واي سئزه، اي دئن عالئملري و فرئسئلر، اي رئياکارلار! چونکي سئز فئنجان و بوشقابين چؤلونو تمئزله‌يئرسئنئز، آمّا اونلارين ائچي قارت و طاماحکارليقلا دولودور.

23:26  سن، اي کور فرئسي، اوّلجه فئنجان و بوشقابين ائچئني تمئزله کي، چؤلو ده تمئز اولسون.

23:27  واي سئزه، اي دئن عالئملري و فرئسئلر، اي رئياکارلار! چونکي سئز آغارديلميش مقبره​لره بنزه‌يئرسئنئز: چؤلو گؤزل گؤرونور، آمّا ائچي اؤلو سوموکلري و هر جور کئفئرله دولودور.

23:28  سئز ده ائنسانلارا ظاهئرده صالح گؤرونورسونوز، آمّا باطئنئنئز رئياکارليق و پئسلئکله دولودور.

23:29  واي سئزه، اي دئن عالئملري و فرئسئلر، اي رئياکارلار! چونکي سئز نبي‌‌لره مقبره​لر تئکئرسئنئز، صالحلرئن مقبره‌لرئني بزه‌يئرسئنئز.

23:30  ديئرسئنئز کي: «بئز اگر آتالاريميزين ياشاديقلاري گونلرده اولسايديق، پيغمبرلرئن قانيني تؤکمکده اونلارلا اَل اولمازديق.»

23:31  بلجه سئز اؤزونوز شهادت ورئرسئنئز کي، پيغمبرلري اؤلدورنلرئن اؤولادلاريسينيز.

23:32  اگر اِله‌دئر، اوندا آتالارينيزين گوناه اؤلچوسونو دولدورون!

23:33  سئز اي ائلانلار و افعئلر نسئلي! جهنّم جزاسيندان نجه قاچاجاقسينيز؟

23:34  باخين، بونون اوچون سئزه پيغمبرلر، معرئفت آداملاري، و دئن عالئملري گؤنده‌رئرم: سئز اونلاردان بعضئلرئني اؤلدوره​جکسئنئز، چارميخا چکه‌جکسئنئز. بعضئلرئني ده کنئسه‌لرئنئزده دؤيوب شهردن شهره قوواجاقسينيز کي،

23:35  هر صالح آدامين ير اوزونده تؤکولن قاني، سئزئن اوستونوزه گلسئن؛ صالح هابئلئن قانيندان بِرِکئيا اوغلو زِکَريانين قانينا قدر کي، اونو معبدله قوربانگاهين آراسيندا اؤلدوردونوز.

23:36  دوغروسونو سئزه ديئرم: بوتون بو شيلر بو نسلئن اوستونه گله​جک.

23:37  اي اورشلئم، اورشلئم! پيغمبرلري اؤلدورن و سنه گؤنده‌رئلنلري داشا باسان! تويوق اؤز جوجه​لرئني قانادلاري آلتينا ييغان کئمي، من ده نچه دفه ائسته‌دئم کي، اؤولادلاريني بئر يره ييغيم، آمّا سئز ائستمه‌دئنئز!

23:38  باخ، اوئنئز بوش بوراخيلاجاق.

23:39  چونکي سئزه ديئرم: «ربّئن آدي ائله گلن آدام موبارک اولسون» دئيه​جه‌يئنئز واختاجاق مني آرتيق گؤرمه‌يه​جکسئنئز."

Chapter 24

24:1  عئسا معبددن چيخيب گدنده، شاگئردلري اونا ياخينلاشديلار و ائسته‌دئلر کی، معبدئن بئنالاريني اونا گؤرسدسئنلر.

24:2  عئسا اونلارا ددي: "آيا بوتون بو شيلري گؤرورسونوز؟ دوغروسونو سئزه ديئرم: بورادا داش، داش اوستونده قالماياجاق. هاميسي ييخيلاجاقدير."

24:3  عئسا زيتون داغيندا اوتورموشدو کي، شاگئردلر تکلئکده اونون يانينا گلئب ددئلر: "بئزه ده گؤرک، بو ددئکلرئن نه واخت باش وره‌‌جک؟ سنئن گلئشئنئن و بو دؤورون باشا چاتماسينين علامتي نه اولاجاق؟"

24:4  عئسا جاواب ورئب اونلارا ددي: "دئقّتلي اولون کي، کئمسه سئزي آلداتماسين.

24:5  چونکي چوخ آداملار منئم آديمدا گلئب «مسئح منم» دئيه​جکلر و چوخ آداملاري آلداداجاقلار.

24:6  موحارئبه گورولتولري و ساواش خبرلري اشئده​جکسئنئز. باخين، قورخمايين، چونکي بوتون بونلارين باش ورمه‌سي گرکدئر. آمّا بو حله ده آخير ديئل.

24:7  مئلّت مئلّتئن ضئدّئنه، دؤولت دؤولتئن ضئدّئنه قالخاجاق. موختلئف يرلرده قحطي‌لر و زلزله​لر اولاجاق.

24:8  بوتون بونلار دوغوم سانجي‌لارينين باشلانيشي‌دير.

24:9  او زامان سئزه اذئيّت ورئب، سئزي اؤلدوره​جکلر و منئم آديما گؤره، بوتون خالقلار سئزدن نئفرت اده​جکلر.

24:10  او واخت بئر چوخلاري ائماندان بودره​يه​جکلر، بئربئرلرئني تسلئم ادئب بئربئرلرئندن نئفرت اده​جکلر.

24:11  بئر چوخ يالانچي پيغمبرلر ظوهور ادئب، چوخ آداملاري آزديراجاقلار.

24:12  پئسلئيئن آرتديغيندان چوخ آداملارين سِوگئسي سويوياجاق.

24:13  لاکئن آخيرا قدر صبر ادن نئجات تاپاجاقدير.

24:14  گؤيون پادشاهليغي حاقّيندا اولان بو موژده بوتون دونيايا وعظ اولوناجاق کي، هامي مئلّتلره شهادت اولسون. و آخير او واخت گله‌جکدئر.

24:15  نه واخت گؤردونوز کي، دانيال پيغمبرئن واسئطه​سئله ديئلمئش او وئرانه​لئک گتئرن ائيرنج شي موقدّس يرده دورور، (قوي اوخويان آنلاسين)،

24:16  يهودئيه​ده اولان داغلارا قاچسين.

24:17  دامدا اولان اِوئندن بئر شي گؤتورمه‌يه اِنمه‌سئن.

24:18  زمئده اولان دا رداسيني گؤتورمک اوچون گري دؤنمه‌سئن.

24:19  او گونلرده بويلو اولانلارين و اوشاق اَمئزدئرنلرئن واي حالينا!

24:20  دوعا ادئن کي، قاچماغينيز قيشدا، يا دا سبّت گونونده اولماسين.

24:21  چونکي او زامان اله بؤيوک مشقّت اولاجاق کي، دونيانين باشلانيشيندان ائندئيه کئمي بله بئر شي نه اولوب، نه ده اولاجاق.

24:22  اگر او گونلر قيسالماسايدي، هچ بئر ائنسان نئجات تاپمازدي. لاکئن سچئلمئش اولانلارين خاطئرئنه گؤره، او گونلر قيسالديلاجاق.

24:23  اگر او زامان کئمسه سئزه دسه: «باخ، مسئح بورادادير»، يا دا «اورادادير»، اونا ائنانمايين.

24:24  چونکي يالانچي مسئحلر و يالانچي پيغمبرلر ظوهور ادئب بؤيوک علامتلر و مؤجوزه​لر گؤرسده​جکلر کي، مومکون اولسا، سچئلمئش اولانلاري دا آلداتسينلار.

24:25  باخين، من سئزه ائره​لئدن خبر وردئم.

24:26  بلجه، اگر سئزه «باخ، او چؤلده​دئر» دسه​لر ده، چيخمايين؛ «باخ، او ائچه‌ري اوتاقلاردادير» دسه​لر ده، ائنانمايين.

24:27  چونکي نجه شئمشک شرقدن چيخيب قربه کئمي گؤرونور، ائنسان اوغلونون گلمه‌‌سی ده اله اولاجاقدير.

24:28  لِش هارادا اولسا، کرکسلر ده اورايا ييغيلارلار.

24:29  او گونلرئن مشقّتئندن درحال سونرا، گون قارالاجاق، آي ائشيغيني ورمه‌يه​جک، اولدوزلار گؤيدن دوشه​جک، سماوي قووّتلر تئتريه​جک.

24:30  او زامان ائنسان اوغلونون علامتي گؤيده گؤرونه​جک و ير اوزونون بوتون خالقلاري شئون اده​جکلر و گؤره​جکلر کي، ائنسان اوغلو گؤيون بولودلاري اوستونده قودرت و بؤيوک عئزّتله گلئر.

24:31  و او، ملکلرئني اوجا سسلي شيپورلا گؤنده‌ره​جک. ملکلر ده سچئلمئشلري دؤرد طرفدن، گؤيلرئن بئر اوجوندان او بئري اوجونا قدر ييغاجاقلار.

24:32  ائندي، انجئر آغاجيندان عئبرت آلين. بوداقلاري تزه​له‌نئب يارپاق آچاندا بئلئرسئنئز کي، ياي ياخيندير.

24:33  سئز ده بوتون بو شيلري گؤرنده بئلئن کي، ائنسان اوغلو ياخيندير، قاپيدادير.

24:34  دوغروسونو سئزه ديئرم، بوتون بو شيلر باش ورمه‌يئنجه بو نسئل کچئب گتميه​جک.

24:35  گؤي و ير کچئب گده​جک، آمّا منئم سؤزلرئم اصلا کچئب گتمه‌يه​جکدئر.

24:36  لاکئن هچ کس او گون و او ساعاتي بئلمئر، نه گؤيون ملکلري، نه ده اوغول. آتادان باشقا هچ کئم بئلمئر.

24:37  نوحون زامانيندا نجه اولدو، ائنسان اوغلونون گلئشي ده اله اولاجاق.

24:38  نجه کي، طوفاندان ائره​لي اولان گونلرده، نوح گمئيه گئرن گونه کئمي، ائنسانلار ييئب، ائچئب، آرواد آليب، اَره گدئردئلر.

24:39  و طوفانين گلئب هاميسيني آپارينجايا قدر، باشلارينا نه گله​جه‌يئندن بئخبر ائدئلر، ائنسان اوغلونون گلئشي ده بو جور اولاجاق.

24:40  او گون زمئده اولان ائکي نفردن بئري آليناجاق، بئري قالاجاقدير.

24:41  ديئرماندا دارتان ائکي آرواددان بئري آليناجاق، بئري قالاجاقدير.

24:42  اونا گؤره ده، اوياق دورون؛ چونکي ربّئن هانسي گون گله​جه‌يئني بئلمئرسئنئز.

24:43  آمّا بونو بئلئن کي، اگر اِو صاحئبي اوغرونون هانسي ساعاتدا گله​جه‌يئني بئلسَيدي، اوياق قاليب اؤز اِوئني اوغورلانماغا قويمازدي.

24:44  بونون اوچون سئز ده حاضير اولون؛ چونکي ائنسان اوغلو سئزئن گومان آپارماديغينيز ساعاتدا گله​جکدئر.

24:45  کئمدئر او صادئق و عاغيلّي قول کي، آغاسي، اِوئنئن اهلئني اونا تاپشيريب اله کي، قوللارين يمه‌يئني واختلي-واختيندا ورسئن؟

24:46  بختور او قول کي، آغاسي گلنده اونو بو جور ائشه مشغول تاپسين.

24:47  دوغروسونو سئزه ديئرم؛ آغاسي بوتون مال-دؤولتئني اونا تاپشيراجاقدير.

24:48  آمّا اگر قول پئس اولوب اوره‌يئنده دسه کي، «آغام گج گله​جک»،

24:49  و يولداشلاريني دؤيوب عيّاشلارلا ييئب ائچمه‌يه باشلاسا.

24:50  قولون آغاسي، اونون گؤزلمه​دئيي بئر گونده و بئلمه‌دئيي بئر ساعاتدا گله​جک،

24:51  اونو ائکي شقّه ادئب رئياکارلارلا همن عاقئبته آتاجاق؛ اورايا کي، اورادا آغلاشما و دئش قيجيرتماسي اولاجاقدير."

Chapter 25

25:1  "او زامان گؤيون پادشاهليغي او اون باکئره قيزا بنزه‌يه​جک کي، چيراقلاريني گؤتوروب به‌يئن پئشوازينا چيخديلار.

25:2  اونلاردان بشي عاغيلّي، بشي عاغيلسيز ائدي.

25:3  عاغيلسيزلار چيراقلاريني گؤتورموشدولر، آمّا ياغ گؤتورمه​مئشدئلر.

25:4  آمّا عاغيلّي‌لار اؤزلری ائله قابلاريندا ياغ دا گؤتورموشدولر.

25:5  بَيئن يوبانديغينا گؤره، اونلارين هاميسيني يوخو باسدي و ياتديلار.

25:6  گجه ياريسي بئر قيشقيريق دوشدو: «باخين، بَي گلئر. اونون پئشوازينا چيخين!»

25:7  او واخت قيزلارين هاميسي دوروب چيراقلاريني حاضيرلاديلار.

25:8  عاغيلسيزلار عاغيلّي‌لارا ددئلر: «ياغينيزدان بئزه ده ورئن، چونکي چيراقلاريميز سؤنور.»

25:9  لاکئن عاغيلّي‌لار جاواب ورئب ددئلر: «بله اولماسين کي، ياغ نه بئزه چاتسين، نه ده سئزه. ياخشيسي بودور کي، گدئب ياغ ساتانلاردان اؤزونوز اوچون آلاسينيز.»

25:10  اونلار ياغ آلماغا گدندن سونرا بَي گلدي و حاضير اولانلار اونونلا توي مجلئسئنه گئردئلر و قاپي باغلاندي.

25:11  سونرا او بئري قيزلار دا گلدئلر و ددئلر: «آغا، آغا، قاپيني بئزه آچ.»

25:12  آمّا او جاواب ورئب ددي: «دوغروسونو سئزه ديئرم: سئزي تانيميرام.»

25:13  اونا گؤره سئز ده اوياق اولون. چونکي ائنسان اوغلونون نه گله​جک گونونو بئلئرسئنئز نه ده ساعاتيني.

25:14  گؤيون پادشاهليغي سفره چيخماق ائسته‌يَن بئر آداما بنزر کي، قوللاريني چاغيريب مال-دؤولتئني اونلارا تاپشيردي.

25:15  بئرئنه بش تالانت وردي، بئرئنه ائکي تالانت، بئرئنه ده بئر تالانت. هر بئرئنه اؤز قابئلئيّتئنه گؤره ورئب، سفره چيخدي.

25:16  بش تالانت آلان گدئب اونلارلا تئجارت اتدي و داها بش تالانت قازاندي.

25:17  ائکي تالانت آلان دا بلجه داها ائکي تالانت قازاندي.

25:18  آمّا بئر تالانت آلان آدام گدئب، يري قازدي و آغاسينين پولونو گئزلتدي.

25:19  اوزون بئر زاماندان سونرا بو قوللارين آغاسي قاييتدي و اونلارلا حسابلاشماق ائسته‌دي.

25:20  بش تالانت آلان آدام گلدي و داها بش تالانت گتئرئب ددي: «آغا! سن منه بش تالانت وردئن، باخ، من داها بش تالانت قازانديم.»

25:21  قولون آغاسي اونا ددي: «آفرئن ياخشي و صادئق قول! سن خيردا ائشلرده صادئق اولدون، سني بؤيوک ائشلر اوستونه قوياجاغام. آغانين شادليغينا شرئک اول.»

25:22  ائکي تالانت آلان دا گلئب ددي: «آغا! منه ائکي تالانت وردئن. باخ، من داها ائکي تالانت قازانديم.»

25:23  قولون آغاسي اونا ددي: «آفرئن ياخشي و صادئق قولوم! سن خيردا ائشلرده صادئق اولدون، سني بؤيوک ائشلر اوستونه قوياجاغام. آغانين شادليغينا شرئک اول.»

25:24  بئر تالانت آلميش اولان دا گلئب ددي: «آغا! سنئن برک بئر آدام اولدوغونو بئلئردئم؛ اکمه‌دئيئني، يردن بئچرسن، سپمه‌دئيئني، يردن ييغارسان.

25:25  قورخدوم و گدئب سنئن تالانتيني ير آلتيندا گئزلتدئم. بويور، بو دا مالين.»

25:26  آمّا قولون آغاسي اونا جاواب ورئب ددي: «اي پئس و تنبل قول! منئم، اکمه‌دئيئمي يردن بئچدئيئمي، سپمه‌دئيئمي يردن ييغديغيمي بئلئردئن، هه؟

25:27  اوندا گرک منئم پولومو صرّافلارا وره‌يدئن کي، من قاييداندا، اونو فايداسي ائله گري آليم.

25:28  تالانتي اوندان آلين و اون تالانتي اولانا ورئن.

25:29  چونکي کئمده وارسا، اونا داها چوخ ورئله​جک و او بوللوق ائچئنده اولاجاق. آمّا کئمده يوخسا، الئنده اولان دا اوندان آليناجاقدير.

25:30  او دَيَرسئز قولو چؤل قارانليغينا آتين. اورادا آغلاشما و دئش قيجيرتماسي اولاجاقدير.»

25:31  ائنسان اوغلو اؤز جلالي ائچئنده بوتون ملکلری ائله بئرلئکده گلنده، شؤوکتلي تختي اوستونده اوتوراجاق.

25:32  بوتون خالقلار اونون حوضورونا ييغيلاجاقلار. او زامان، چوبان قويونلاري کچئلردن آييرديغي کئمي، اونلاري بئر​بئرئندن آييراجاق.

25:33  قويونلاري صاغينا و کچئلري سولونا قوياجاق.

25:34  او زامان، پادشاه صاغينداکي‌لارا دئيه​جک: «اي سئز، آتامين موبارکلري، گلئن و او سلطنتي مئراث آلين کي، دونيا ياراناندان بري سئزئن اوچون حاضيرلانيب.

25:35  چونکي آج ائدئم، منه يمک وردئنئز؛ سوسوز ائدئم، منه سو وردئنئز؛ قرئب ائدئم، مني قبول اتدئنئز.

25:36  لوت ائدئم، مني گيئندئردئنئز. ناخوش ائدئم، منه باش چکدئنئز؛ زئنداندا ائدئم، يانيما گلدئنئز.»

25:37  او زامان صالح آداملار اونا جاواب ورئب دئيه​جکلر: «يارب، بئز سني نه زامان آج گؤروب يدئرتدئک، يا دا سوسوز گؤروب سو وردئک؟

25:38  نه زامان سني قرئب گؤروب قبول اتدئک، يا دا لوت گؤروب گيئندئردئک؟

25:39  نه زامان سني ناخوش، يا دا زئنداندا گؤروب يانينا گلدئک؟»

25:40  پادشاه اونلارا جاواب ورئب دئيه​جک: «دوغروسونو سئزه ديئرم: هر نه کي، منئم لاپ کئچئک قارداشلاريمين بئرئنه اتدئنئز، منه ده اتمئش اولدونوز.»

25:41  او زامان سولونداکي‌لارا دئيه​جک: «اوزاق اولون، اي ملعونلار! ائبلئسه و اونون ملکلرئنه حاضيرلانميش ابدي اودا يوللانين.

25:42  چونکي آج ائدئم، منه يمک ورمه​دئنئز؛ سوسوز ائدئم، منه سو ورمه​دئنئز.

25:43  قرئب ائدئم، مني قبول اتمه‌دئنئز. لوت ائدئم، مني گيئندئرمه​دئنئز؛ ناخوش و زئنداندا ائدئم، فئکرئمه اولمادينيز.»

25:44  او زامان اونلار دا جاواب ورئب دئيه​جکلر: «يارب! سني نه واخت آج، سوسوز، قرئب، لوت، ناخوش، يا دا زئنداندا گؤردوک کي، سنه خئدمت اتمه​دئک؟»

25:45  پادشاه دا اونلارا جاواب ورئب دئيه​جک: «دوغروسونو سئزه ديئرم: هر نه کي، منئم بو لاپ کئچئکلرئمدن بئرئنه اِتمه​دئنئز، منه ده اِتمه​مئش اولدونوز.»

25:46  بونلار ابدي عذابا دوچار اولاجاقلار، آمّا صالحلر ابدي حياتا مالئک اولاجاقلار."

Chapter 26

26:1  عئسا بوتون بو سؤزلري بئتئرندن سونرا، شاگئردلرئنه ددي:

26:2  "نجه کي، بئلئرسئنئز ده، ائکي گوندن سونرا پاسخا بايرامي باشلاناجاق و ائنسان اوغلو چارميخا چکئلمک اوچون اَله ورئله​جک."

26:3  او زامان باش کاهئنلر و خالقين آغساقّاللاري قيافا آدلي باش کاهئنئن سارايينا ييغيشديلار

26:4  و مصلحتلشدئلر کي، نجه عئساني حئيله ائله توتوب اؤلدورسونلر.

26:5  آمّا ددئلر: "بو ائش بايرامدا اولماسين، يوخسا خالق آراسيندا ائغتئشاش باش ورر."

26:6  عئسا بيت عنيادا، جوذاملي شمعونون اوئنده اولان واخت،

26:7  بئر آرواد اونون يانينا گلدي. آرواد مرمر بئر قابدا چوخ قئيمتلي بئر عطئر گتئرمئشدي. عئسا سوفره​ده اوتورارکن، آرواد عطئري اونون باشينا تؤکمه‌يه باشلادي.

26:8  شاگئردلر، بونو گؤرن واخت، قضبله‌نئب ددئلر: "بو ائسراف نه اوچون؟

26:9  اولاردي کي، بو عطئر باها بئر قئيمته ساتيليب يوخسوللارا ورئلسئن."

26:10  آمّا عئسا بونو بئلئب اونلارا ددي: "نه اوچون بو آروادي ائنجئدئرسئنئز؟ او منه ياخشيليق اتدي.

26:11  يوخسوللار همئشه يانينيزداديرلار، لاکئن من همئشه يانينيزدا ديئلم.

26:12  بو آرواد بو عطئري منئم بدنئمه تؤکمکله مني دفن اوچون حاضيرلادي.

26:13  دوغروسونو سئزه ديئرم: ائنجئلئن بو خوش خبري دونيانين هاراسيندا وعظ ادئلسه، بو آروادين اتدئيي ده ديئلئب خاطيرلاناجاق."

26:14  او زامان اون​ائکئلردن، يهودا ائسکاريوت آدلانان بئري، باش کاهئنئن يانينا گدئب ددي:

26:15  "اونو اَله ورسم، منه نه وِرَرسئنئز؟" اونلار دا يهودايا اوتوز گوموش پاراسي وعده وردئلر.

26:16  او واختدان يهودا، عئساني اَله ورمک اوچون فورصت آختاريردي.

26:17  فطئر بايرامينين بئرئنجي گونونده شاگئردلر عئسانين يانينا گلئب ددئلر: "هارادا ائسته‌يئرسن کي، سنئن اوچون پاسخا يمه‌يئني حاضيرلاياق؟"

26:18  عئسا دا ددي: "شهره گئرئب فئلانکسئن يانينا گدئن و اونا ديئن: «اوستاد ديئر؛ واختيم ياخيندير. شاگئرلرئمله بئر يرده پاسخاني سنئن اوئنده يرئنه يتئره​جه‌يئک.»"

26:19  شاگئردلر عئسانين اونلارا امر اتدئيي کئمي ادئب پاسخاني حاضيرلاديلار.

26:20  آخشام دوشنده، عئسا اون‌ائکي شاگئردي ائله يمه‌يه اوتوردو.

26:21  يمک يئينده عئسا ددي: "دوغروسونو سئزه ديئرم: سئزلردن بئري مني اَله وره​جک."

26:22  اونلار چوخ پرت اولدولار و هر بئرئسي "حتمن کي، من ديئلم، يارب؟" دمه‌يه باشلادي.

26:23  عئسا جاواب ورئب ددي: "اَلئني منئمله بوشقابا اوزادان، مني اَله وره​جک.

26:24  ائنسان اوغلو نجه کي، اونون باره​سئنده يازيليب، گدئر. آمّا واي او آدامين حالينا کي، ائنسان اوغلو اونون واسئطه​سئله اله ورئلئر! او آدام هچ آنادان اولماسايدي، اونون اوچون داها ياخشي اولاردي."

26:25  اونو اله ورن يهودا ددي: "حتمن کي، من ديئلم، اوستاد؟" عئسا دا اونا ددي: "ددئيئن کئمي​دئر."

26:26  اونلار يمک يئيرکن، عئسا چؤره‌يي گؤتوردو و برکتله​يئب پارچالادي و شاگئردلره ورئب ددي: "آلين، ييئن! بو منئم بدنئمدئر."

26:27  بئر پئياله ده گؤتوروب شوکور اتدي و اونلارا ورئب ددي: "بوندان هامينيز ائچئن.

26:28  چونکي بو منئم قانيمدير، عهدئن قاني کي، گوناهلارين باغيشلانماسي اوچون بئر چوخلاري يولوندا تؤکولور.

26:29  سئزه ديئرم: اوزوم آغاجينين بو محصولوندان آرتيق ائچميه​جه‌يم، او گونه کئمي کي، اونو آتامين پادشاهليغيندا سئزئنله برابر تزه​سئني ائچئم."

26:30  و ائلاهي ماهني‌لار اوخوياندان سونرا زيتون داغينا گتدئلر.

26:31  او زامان عئسا اونلارا ددي: "بو گجه هامينيز مندن دؤنه​جکسئنئز. چونکي يازيليب: «چوباني ووراجاغام، و سورونون قويونلاري داغيلاجاق.»

26:32  آمّا من، دئرئلندن سونرا، سئزدن قاباق جلئله گده​جه‌يم."

26:33  پطروس جاواب ورئب ددي: "هامي سندن دؤنسه ده، من سندن اصلا دؤنميه​جه‌يم."

26:34  عئسا اونا ددي: "دوغروسونو سنه ديئرم: اِله بو گجه، خوروز بانلاماميشدان سن مني اوچ دفه ائنکار اده​جکسن."

26:35  پطروس اونا ددي: "منه سنئنله بئر يرده اؤلمک لازيم گلسه بله، سني اصلا ائنکار اتمه‌يه​جه‌يم." شاگئردلرئن هاميسي دا اِله ددئلر.

26:36  او زامان عئسا اونلارلا جتسئماني آدلانان بئر يره گلئب شاگئردلرئنه ددي: "من اورايا گدئب دوعا ادرکن، سئز بورادا اوتورون."

26:37  پطروسلا زِبِدِيئن ائکي اوغلونو اؤزو ائله گؤتوردو. قم و ائضطئراب عئسايا حاکئم اولماغا باشلاميشدي.

26:38  او واخت اونلارا ددي: "جانيم اؤلوم درجه​سئنده قمگئندئر. بورادا دورون و منئمله اوياق قالين."

26:39  و بئر آز ائره​لي گتدي، اوزو-اوسته يره دوشوب دوعا اتدي: "اي آتام، اگر مومکوندور، قوي بو پئياله مندن کچسئن، آمّا منئم ائسته‌دئيئم کئمي يوخ، سنئن ائسته‌دئيئن کئمي اولسون."

26:40  شاگئردلرئنئن يانينا قاييتدي و اونلاري يوخولاميش تاپدي. پطروسا ددي: "منئمله بئر ساعات دا اولسا، اوياق قالماغا قادئر ديئلدئنئز؟

26:41  اوياق قالين و دوعا ادئن کي، ائمتاحانا دوشمه‌يه​سئنئز. روح راضي، لاکئن جئسم ضعئفدئر."

26:42  عئسا ائکئنجي دفه گدئب دوعا اتدي: "اي آتام، اگر مومکون ديئل کي، او پئياله من اونو ائچمه‌دن کچسئن، قوي سنئن ائسته‌دئيئن اولسون."

26:43  و قاييديب اونلاري گئنه يوخولاميش تاپدي، چونکي اونلارين گؤزلري آغيرلانميشدي.

26:44  اونلاري قويوب گئنه گتدي و اوچونجو دفه دوعا ادئب گئنه همن سؤزلري ددي.

26:45  او واخت شاگئردلرئنئن يانينا گلئب اونلارا ددي: "سئز حله ده ياتيب ائستئراحت ادئرسئنئز؟ باخين، ساعات ياخينلاشيب و ائنسان اوغلو گوناهکارلارين الئنه تسلئم ادئلئر.

26:46  دورون گدک! باخين، مني تسلئم ادن گلئر!"

26:47  عئسا حله دانيشيردي کي، اون​‌​ائکي‌لردن بئري اولان يهودا گلدي؛ يانيندا قيلينجلي و دينکلي بؤيوک بئر جاماعات وار ائدي کي، باش کاهئنلر و خالقين آغساقّاللاري طرفئندن گؤنده‌رئلمئشدئلر.

26:48  اونو تسلئم ادن اونلارا بئر علامت ورئب دمئشدي کي، "کئمي اؤپسم، اودور؛ اونو توتون."

26:49  و او آندا عئسايا ياخينلاشيب "سالام، اوستاد!" ددي و اونو اؤپدو.

26:50  عئسا دا اونا ددي: "دوستوم، نه اوچون گلدئيئني ات!" او زامان اونلار عئسايا ياخينلاشديلار و ال آتيب اونو توتدولار.

26:51  عئسا ائله اولانلاردان بئري ال آتيب، قيلينجيني چکدي و باش کاهئنئن نؤکرئني ووروب قولاغيني کسدي.

26:52  او زامان عئسا اونا ددي: "قيلينجيني يرئنه قوي، چونکي بوتون قيلينج چکنلر قيلينجلا هلاک اولاجاقلار.

26:53  مگر اله گومان ادئرسئنئز کي، قادئر ديئلم آتامدان کؤمک ائسته​يم؟! ائسته​سم، اله همئن بو آن منه ائکي قوشوندان چوخ ملک گؤنده‌رر.

26:54  اوندا بس نجه يازيلار دوغرو چيخاردي کي، بله اولماسينين لازيم اولدوغونو ديئر؟"

26:55  او زامان عئسا جاماعاتا ددي: "مني توتماغا اله قيلينجلار و دينکلرله گلئبسئنئز کي، اله بئل اوغرو توتماغا چيخيبسينيز. من هر گون معبدده اوتوروب تعلئم ورئردئم، لاکئن مني توتمادينيز.

26:56  آمّا بونلارين هاميسي اونون اوچون باش ورئر کي، پيغمبرلرئن يازيلاري يرئنه يتئشسئن." او زامان شاگئردلرئن هاميسي عئساني قويوب قاچديلار.

26:57  عئساني توتانلار اونو باش کاهئن قيافانين يانينا گتئردئلر. دئن عالئملري و آغساقّاللار دا بورادا ييغيلميشديلار.

26:58  پطروس باش کاهئنئن سارايينا قدر اوزاقدان عئسانين دالينجا گتدي و ائچه‌ري گئرئب، ائشئن آخيريني گؤرمک اوچون موحافئظلرئن يانيندا اوتوردو.

26:59  باش کاهئنلر و بوتون شورا عئساني اؤلدورمک اوچون اونون ضئدّئنه يالان شهادت آختاريرديلار.

26:60  اورتايا بئر چوخ يالانچي شاهئدلر چيخديغي حالدا، آختارديقلاريني تاپا بئلمه‌دئلر. نهايت ائکي يالانچي شاهئد گلئب ددي:

26:61  "بو آدام ددي کي، «من تارينين معبدئني ييخيب، اوچ گونده تئکه بئله‌رم.»"

26:62  باش کاهئن آياغا قالخيب عئسايا ددي: "سن هچ جاواب ورمئرسن؟ بونلارين سنئن ضئدّئنه وردئکلري شهادت نه‌دئر؟"

26:63  آمّا عئسا سوکوت اتدي. باش کاهئن اونا ددي: "سني آند ورئرم ياشايان تارييا، بئزه ده گؤرک، آيا سن تارينين اوغلو مسئحسن؟"

26:64  عئسا اونا ددي: "ددئيئن کئمي​دئر. حتّا بونو دا سئزه ديئرم؛ بوندان سونرا ائنسان اوغلونو گؤره‌جکسئنئز کي، قادئرئن صاغيندا اوتوروب، گؤيون بولودلاري اوستونده گلئر."

26:65  او زامان باش کاهئن اؤز پالتاريني جيريب ددي: "او کوفر ديئر، داها شاهئدلره نه احتئياجيميز وار؟ باخين، اله ائندي اونون کوفر ددئيئني اشئتدئنئز.

26:66  سئزه نجه گلئر؟" اونلار جاواب ورئب ددئلر: "او، اؤلومه لايئقدئر."

26:67  او زامان عئسانين اوزونه توپوروب، اونا يومروق ووردولار. بعضئلري ده اونون اوزونه شئلّه ووروب،

26:68  ديئردئلر: "اي مسئح، بئزه پيغمبرلئيئني گؤرسد گؤرک، سني ووران کئمدئر؟"

26:69  بو زامان پطروس اشئکده، حيطده اوتورموشدو. بئر کنئز اونا ياخينلاشيب ددي: "سن ده جلئللي عئسا ائله ائدئن."

26:70  آمّا او، هامينين قاباغيندا ائنکار ادئب ددي: "سنئن نه ددئيئني باشا دوشمورم."

26:71  سونرا دروازايا طرف گتدي. اورادا آيري بئر کنئز اونو گؤروب اوراداکي‌لارا ددي: "بو دا ناصئره​لي عئسا ائله ائدي."

26:72  او، گئنه ائنکار ادئب آند ائچدي: "او آدامي تانيميرام."

26:73  بئر آز سونرا اورادا دورانلار گلئب پطروسا ددئلر: "دوغرودان سن ده اونلاردانسان، چونکي دانيشيغين سني ائفشا ادئر."

26:74  او زامان پطروس لعنت وره-وره آند ائچمه‌يه باشلادي: "او آدامي تانيميرام." و او آندا خوروز بانلادي.

26:75  پطروس عئسانين سؤزونو خاطيرلادي کي، اونا دمئشدي؛ "خوروز بانلاماميشدان سن مني اوچ دفه ائنکار اده​جکسن." و اورادان چيخيب آجي-آجي آغلاماغا باشلادي.

Chapter 27

27:1  سحر آچيلاندا بوتون باش کاهئنلر و خالقين آغساقّاللاري عئساني اؤلدورمک اوچون موشاوئره اتدئلر.

27:2  عئساني باغلاديلار و اونو والي پئلاطين يانينا آپاريب اونا تسلئم اتدئلر.

27:3  او زامان اونو اَله ورن يهودا، عئسانين محکوم ادئلدئيئني گؤروب پشمان اولدو و اوتوز گوموش پاراسيني باش کاهئنلر و آغساقّاللارا قايتاريب

27:4  ددي: "من گوناه اتمئشم، چونکي تقصئرسئز قاني اَله ورمئشم." اونلار جاواب وردئلر: "بئزه نه؟ اؤزون بئل."

27:5  يهودا گوموشلري معبدئن ائچئنه آتيب اورادان چيخدي و گدئب اؤزونو آسدي.

27:6  باش کاهئنلر گوموشو گؤتوروب ددئلر: "قان باهاسي اولدوغونا گؤره، بو گوموشلري معبدئن خزئنه​سئنه قويماق جائز ديئل."

27:7  و موشاوئره ادئب قرئبلري دفن اتمک اوچون او پوللا کوزه​گر زمئسئني ساتين آلديلار.

27:8  بونا گؤره او زمئيه بو گونه قدر قان زمئسي ديئلئر.

27:9  او واخت اِرِميا پيغمبرئن واسئطه​سئله ديئلمئش سؤز يرئنه يتئشدي: «و اونلار اوتوز گوموش پاراسيني گؤتوردولر، او آدامين قئيمتئني کي، ائسرايئل اوغوللاري اونا قئيمت قويموشدولار.

27:10  و ربّئن منه بويوردوغو کئمي کوزه​گر زمئسي اوچون وردئلر.»

27:11  بو آرادا، عئسا والئنئن قاباغيندا دوردو. والي اوندان سوروشدو: "آيا سن يهودئلرئن پادشاهي‌سان؟" عئسا اونا ددي: "ددئيئن کئمي​دئر."

27:12  آمّا باش کاهئنلر و آغساقّاللار عئسايا بؤهتان ووران زامان دا، او هچ بئر جاواب ورمه‌دي.

27:13  او واخت پئلاط اونا ددي: "اشئتمئرسن کي، سنئن ضئدّئنه نه قدر شهادت ورئرلر؟"

27:14  آمّا عئسا اونا هچ بئر جاواب ورمه‌دي. والي بوندان چوخ تعجّوب اتدي.

27:15  پاسخا بايراميندا، والي عادتن خالقين ائسته‌دئيي زئنداني​لردن بئرئني آزاد ادردي.

27:16  او زامان باراَبّا آدلي مشهور بئر زئنداني حبسده ساخلانيردي.

27:17  بونا گؤره ده، جاماعات بئر يره ييغيلديقلاري زامان، پئلاط اونلارا ددي: "هانسيني ائسته‌يئرسئنئز کي، سئزئن اوچون آزاد ادئم؟ باراَبّاني، يوخسا مسئح ديئلن عئساني؟"

27:18  چونکي بئلئردي کي، اونلار عئساني پاخيلّيقدان اونا تسلئم ادئبلر.

27:19  پئلاط حؤکم کورسوسونده اوتورموشدو کي، آروادي اونا خبر گؤنده‌ردي: "بو صالح آداملا سنئن هچ بئر ائشئن اولماسين؛ چونکي بو گون اونون حاقّيندا يوخودا چوخ عذابلار چکمئشم."

27:20  آمّا باش کاهئنلر و آغساقّاللار جاماعاتي تحرئک ادئردئلر کي، باراَبّاني ائسته​سئنلر و عئساني اؤلومه ورسئنلر.

27:21  او زامان والي اونلاردان سوروشدو: "ائکئسئندن هانسيني ائسته‌يئرسئنئز کي، سئزئن اوچون آزاد ادئم؟" اونلار دا ددئلر: "باراَبّاني."

27:22  پئلاط اونلارا ددي: "بس مسئح ديئلن عئسايا نه ادئم؟" اونلارين هاميسي ددئلر: "چارميخا چکئلسئن."

27:23  والي ددي: "مگر او نه يامانليق ادئب؟!" آمّا اونلار داها اوجادان باغيريب ددئلر: "چارميخا چکئلسئن."

27:24  پئلاط گؤردو کي، هچ بئر شي آرتيق فايدا اتمئر و عکسئنه ائغتئشاش داها دا گوجله‌نئر، سو گؤتوردو و خالقين قاباغيندا اَللرئني يويوب ددي: "من بو صالح آدامين قانيندان تقصئرسئزم. اؤزونوز بئلئن!"

27:25  بوتون خالق جاواب ورئب ددي: "اونون قاني بئزئم بوينوموزا و اوشاقلاريميزين بوينونا اولسون!"

27:26  او زامان پئلاط اونلارا باراَبّاني آزاد اتدي. و عئساني، دؤيدورندن سونرا، چارميخا چکئلمه‌يه تسلئم اتدي.

27:27  او واخت، والئنئن عسگرلري عئساني دئوانخانايا آپارديلار؛ و بوتون فوج اونون باشينا ييغيلدي.

27:28  اونو سويوندوروب، اونا قيرميزي بئر شئنل گيدئردئلر.

27:29  تئکانلاردان بئر تاج هؤروب، باشينا قويدولار، صاغ الئنه ده بئر قاميش وردئلر؛ اونو اَله ساليب قاباغيندا دئز چؤکوردولر و ديئردئلر: "سالام، اي يهودئلرئن پادشاهي!"

27:30  اونا توپوردولر، قاميشي گؤتوروب باشينا ووردولار.

27:31  اونو اَله سالاندان سونرا، شئنلي اَينئندن چيخارديب، اؤز پالتاريني گيدئردئلر؛ و اونو چارميخا چکمه‌يه آپارديلار.

27:32  باييرا چيخاندا، شمعون آدلي کرِنِيلي بئر آدام تاپديلار؛ اونو مجبور اتدئلر کي، عئسانين چارميخيني داشيسين.

27:33  جولجوتا، يعني "کلّه يري" آدلانان يره گلدئکلري زامان،

27:34  ائچمه‌يي اوچون اونا عؤد​له قاريشيق تورش شراب وردئلر. عئسا اونو داديب ائچمک ائستمه‌دي.

27:35  اونو چارميخا چکندن سونرا، پوشک آتيب پالتارلاريني آرالاريندا پايلاديلار.

27:36  و اورادا اوتوروب اونون کشئيئني چکدئلر.

27:37  اونون باشي اوستونه تقصئرئني يازيب ووردولار: "بودور يهودئلرئن پادشاهي عئسا."

27:38  او زامان اونونلا ائکي اوغرونو دا چارميخا چکدئلر؛ بئري صاغيندا، بئري ده سولوندا.

27:39  يانيندان کچنلر اونو سؤيوردولر و باشلاريني ترپه‌دئب،

27:40  ديئردئلر: "اي معبدي ييخيب اوچ گونده تئکن! اگر تارينين اوغلوسان، اؤزونو خئلاص ات و چارميخدان دوش!"

27:41  باش کاهئنلر ده، دئن عالئملري و آغساقّاللارلا اونو اَله ساليب، ديئردئلر:

27:42  "اؤزگه​لري خئلاص ادئردي، آمّا اؤزونو خئلاص اده بئلمئر! اگر ائسرايئلئن پادشاهي‌دير، قوي ائندي چارميخدان دوشسون و بئز ده اونا ائمان گتئرک.

27:43  تارييا بل باغلاييردي؛ اگر تاري اونو سِوئر، قوي ائندي اؤزو اونو خئلاص اتسئن. چونکي ديئردي من تارينين اوغلويام."

27:44  اونونلا چارميخا چکئلن اوغرولار دا اونو سؤيوردولر.

27:45  آلتينجي ساعاتدان دوقّوزونجو ساعاتا قدر، بوتون اؤلکه​يه قارانليق دوشدو.

27:46  دوقّوزونجو ساعاتا ياخين، عئسا اوجا سَسله قيشقيردي: "ائلويي، ائلويي، لاما سَبَقته‌ني؟" يعني "تاريم، تاريم، نه اوچون مني ترک اتدئن؟"

27:47  اورادا دورانلاردان بعضئلري بونو اشئدنده ددئلر: "ائلياني چاغيرير."

27:48  او آندا، اونلاردان بئري قاچيب بئر بولوط گؤتوردو، تورش شرابلا دولدوروب بئر قاميشا تاخدي و اونا اوزاتدي کي، ائچسئن.

27:49  لاکئن قالانلاري ديئردئلر: "قويون گؤرک، آيا ائليا اونو خئلاص اتمه‌يه گلئر؟"

27:50  عئسا گئنه اوجا سَسله قيشقيريب روحونو تسلئم اتدي.

27:51  او آندا معبدئن پرده​سي يوخاريدان آشاغي‌يا قدر ائکي يره بؤلوندو. ير لرزه​يه گلدي، قايالار چاتلاديلار.

27:52  قبئرلر آچيليب، وفات اتمئش بئر چوخ موقدّسئن جسدي دئرئلدي.

27:53  اونلار قبئرلردن چيخيب، عئسانين دئرئلمه​سئندن سونرا، موقدّس شهره گئردئلر و بئر چوخ آداملارا گؤروندولر.

27:54  يوزباشي و اونونلا عئسانين کشئيئني چکنلر، زلزله​ني و واقع اولان شيلري گؤروب قورخدولار و ددئلر: "دوغرودان دا بو آدام تارينين اوغلو ائدي."

27:55  بئر چوخ آرواد کي، جلئلدن عئسانين دالينجا گلئب اونا خئدمت اتمئشدئلر، اورادا دوروب اوزاقدان تاماشا ادئردئلر.

27:56  مجدللي مريم، يعقوبلا يوسانين آناسي مريم و زِبِدِيئن اوغوللارينين آناسي اونلارين آراسيندا ائدي.

27:57  آخشام دوشنده يوسئف آدلي وارلي بئر آرئماتايلي گلدي کی، عئسانين شاگئردي اولموشدو.

27:58  بو آدام پئلاطين يانينا گدئب عئسانين جسدئني ائسته‌دي. او زامان پئلاط امر اتدي کي، جسد ورئلسئن.

27:59  يوسئف جسدي آليب تمئز بئر کتانا بورودو.

27:60  اونو قايا ائچئنده تزه اووولموش اؤز مقبره​سئنه قويدو و مقبره​نئن گئرئشئنه بئر ائري داش ديرله‌دئب گتدي.

27:61  مجدللي مريمله او بئري مريم اورادا، قبئرئن قاباغيندا اوتورموشدولار.

27:62  او گونون صاباحي، يعني حاضيرليق گونوندن سونرا گلن گون، باش کاهئنلر و فرئسئلر پئلاطين يانينا ييغيليب

27:63  ددئلر: "جناب، بئز خاطيرلاييريق کي، او يالانچي، دئري اولان واختيندا ديئردي کي، اوچ گون سونرا دئرئله​جه‌يم.

27:64  بونا گؤره، امر ات کي، مقبره​ني قوروسونلار. اولماسين شاگئردلري گلئب اونو اوغورلاسينلار و خالقا دسئنلر کي، او، اؤلولردن دئرئلدي. بو آزديرماق اوّلکئندن ده داها پئس اولار."

27:65  پئلاط اونلارا ددي: "بئر دسته کشئچکي گؤتورون؛ گدئن بئلدئيئنئز کئمي مقبره​ني قورويون."

27:66  اونلار گدئب مقبره​نئن قاباغيندا کشئکچي قويدولار و مقبره​نئن داشيني مؤهورله​دئلر و بلجه مقبره​ني بوتون خطرلردن قورودولار.

Chapter 28

28:1  سبّت گونو کچندن سونرا، هفته​نئن ائلک گونو سحر آچيلاندا، مجدللي مريم و او بئري مريم مقبره​ني گؤرمه‌يه گلدئلر.

28:2  باخ، بؤيوک بئر زلزله اولموشدو: چونکي ربّئن بئر مله‌يي گؤيدن انئب، داشي مقبره​نئن آغزيندان ديرله‌دئب اوستونده اوتورموشدو.

28:3  اونون گؤرونوشو شئمشک کئمي ائدي؛ پالتاري قار کئمي آغ ائدي.

28:4  اونون قورخوسوندان کشئکچئلر تئتره‌يئب اؤلو کئمي اولموشدولار.

28:5  ملک آروادلارا ددي: "سئز قورخمايين، چونکي بئلئرم کي، چارميخا چکئلمئش عئساني آختاريرسينيز.

28:6  او، بورادا ديئل، چونکي ددئيي کئمي دئرئلدي. گلئن ربّئن ياتديغي يري گؤرون.

28:7  و تز گدئب اونون شاگئردلرئنه ديئن: او، اؤلولردن دئرئلئب و سئزدن قاباق جلئله گدئر. اورادا اونو گؤره​جکسئنئز. ائندي، سئزه خبر وردئم."

28:8  آروادلار قورخو و بؤيوک شادليقلا او ساعات مقبره​دن چيخديلار و شاگئردلره خبر ورمه‌يه قاچديلار.

28:9  شاگئردلره خبر ورمه‌يه گدنده، بئردن عئسا اونلارين قاباغينا چيخيب ددي: "سئزه سالام!" اونلار دا ياخينلاشيب عئسانين آياقلارينا دوشدولر و اونا سجده اتدئلر.

28:10  او زامان عئسا اونلارا ددي: "قورخمايين! گدئن، قارداشلاريما خبر ورئن کي، جلئله گتسئنلر. مني اورادا گؤره​جکلر."

28:11  آروادلارين گتدئيئندن سونرا، کشئکچئلردن بعضئسي شهره گلئب، باش ورن بوتون شيلري باش کاهئنلره خبر وردئلر.

28:12  اونلار آغساقّاللارلا بئر يره ييغيليب موشاوئره ادندن سونرا، عسگرلره چوخلو پول ورئب ددئلر:

28:13  "ديئن کي، شاگئردلري بئز يوخودا ائکن گجه ائله گلئب اونو اوغورلاييبلار.

28:14  اگر بو باره​ده خبر والئيه گلئب چاتسا، بئز اونو راضي اِده‌رئک و سئزي بلادان قورتاراريق."

28:15  اونلار دا پولو آليب امر ادئلدئيي کئمي اتدئلر. و بو سؤز بو گونه کئمي يهودئلر آراسيندا ياييليبدير.

28:16  آمّا اون بئر شاگئرد جلئله، عئسانين اونلارا بئلدئردئيي داغا گتدئلر.

28:17  عئساني گؤرن زامان، اونا سجده اتدئلر؛ آمّا بعضئلري شوبهه ائچئنده ائدئلر.

28:18  عئسا ياخينلاشيب اونلارا ددي: "گؤيده و ير اوزونده بوتون قودرت منه ورئلئب.

28:19  اونا گؤره گدئن و بوتون خالقلاري منه شاگئرد ادئن. و اونلاري آتا، اوغول و موقدّس روحون آدي ائله تعمئد ورئن.

28:20  اونلارا اؤيره‌دئن کي، سئزه امر اتدئيئم بوتون شيلري ساخلاسينلار. باخين، من دونيانين آخيريناجاق هر گون سئزئنله وارام."