Kapingamarangi - Matthew

Chapter 1

1:1  Deenei di hagatau o-nia maadua-mmaadua o Jesus Christ, di hagadili o David, di hagadili mai Abraham.

1:2  Deenei di hagatau o-nia maadua-mmaadua mai Abraham, gaa-dae gi King David: Abraham tamana o Isaac, Isaac tamana o Jacob, Jacob tamana o Judah mo ono duaahina-daane,

1:3  Judah tamana o Perez mo Zerah (di-nau dinana go Tamar), Perez tamana o Hezron, Hezron tamana o Ram,

1:4  Ram tamana o Amminadab, Amminadab tamana o Nahshon, Nahshon tamana o Salmon,

1:5  Salmon tamana o Boaz (dono dinana go Rahab), Boaz tamana o Obed (dono dinana go Ruth), Obed tamana o Jesse,

1:6  Jesse tamana o King David. Di hagatau o-nia maadua-mmaadua i-muli King David gaa-dae-loo gi digau Israel ala ne-lahi gi Babylon: David tamana o Solomon mai di lodo Uriah,

1:7  Solomon tamana o Rehoboam, Rehoboam tamana o Abijah, Abijah tamana o Asa,

1:8  Asa tamana o Jehoshaphat, Jehoshaphat tamana o Jehoram, Jehoram tamana o Uzziah,

1:9  Uzziah tamana o Jotham, Jotham tamana o Ahaz, Ahaz tamana o Hezekiah,

1:10  Hezekiah tamana o Manasseh, Manasseh tamana o Amon, Amon tamana o Josiah,

1:11  Josiah tamana o Jehoiachin mo ono duaahina-daane, i-di madagoaa digau Israel ne-lahi gi Babylon.

1:12  Di hagatau o-nia maadua-mmaadua i-muli di-nadau lahi gi Babylon, gaa-dae gi-di haanau o Jesus Christ: Jehoiachin tamana o Shealtiel, Shealtiel tamana o Zerubbabel,

1:13  Zerubbabel tamana o Abiud, Abiud tamana o Eliakim, Eliakim tamana o Azor,

1:14  Azor tamana o Zadok, Zadok tamana o Achim, Achim tamana o Eliud,

1:15  Eliud tamana o Eleazar, Eleazar tamana o Matthan, Matthan tamana o Jacob,

1:16  Jacob tamana o Joseph. Joseph ne-hai lodo gi Mary, go tinana o Jesus, Jesus dela e-haga-ingoo bolo Mesaia.

1:17  Malaa, nia adu-daangada i-muli o Abraham gaa-dae gi David le e-madangaholu maa-haa. Nia adu-daangada i-muli o David gaa-dae gi-di lahi gi Babylon e-madangaholu maa-haa. Nia adu-daangada i-muli di lahi gi Babylon gaa-dae gi-di haanau o Mesaia e-madangaholu maa-haa.

1:18  Deenei di hai o-di haanau o Jesus Christ. Dono dinana go Mary ne-hagababa ang-gi Joseph, gei meemaa digi haga-hai-lodo. Mary gu-iloo bolo ia gu-hai-dama i-di Hagataalunga-Dabu.

1:19  Joseph taane hai-hegau donu, hagalee hiihai e-haga-langaadia Mary i-mua nia daangada, ga-hagamaanadu bolo ia ga-haga-lawa hagammuni-hua di-nau hagababa.

1:20  I dono hagamamaanadu-hua beenei, tangada di-langi o Dimaadua ga-hanimoi i-lodo di moe, ga-helekai, “Joseph, tangada mai di hagadili o David, goe hudee madagu di-lahi a Mary e-hai doo lodo, idimaa, mee e-hai-dama i-di Hagataalunga-Dabu.

1:21  Mee ga-haanau dana dama-daane, gei goe gi-wanga-ina dono ingoo go Jesus, dono hadinga bolo Mee ga-haga-dagaloaha ana daangada gi-daha mo nadau huaidu.”

1:22  Nia mee huogodoo aanei ne-belee haga-kila-aga nia helekai Dimaadua ang-gi soukohp bolo gi-haga-iloo-ina,

1:23  “Tama-ahina madammaa ga-hai-dama, ga-haanau dana dama-daane, ga-haga-ingoo bolo Immanuel, dono hadinga boloo, God e-madalia gidaadou.”

1:24  Joseph ga-ala-aga, gaa-lodo gi Mary gii-hai be nia helekai tangada di-langi o Dimaadua.

1:25  Malaa, Joseph digi haga-gila-ina di hiihai mouli o taga-hai-lodo ang-gi Mary i-mua di haanau di tama. Joseph gaa-wanga di ingoo o-Maa go Jesus.

Chapter 2

2:1  Jesus ne-haanau i-lodo di waahale Bethlehem i Judea, i-lodo di madagoaa di King Herod. Hunu daane halahala hagailongo-mee gi-nia heduu, ne-llooia i-bahi-i-dua, gaa-dau i Jerusalem,

2:2  ga-heheeu, “Dehee di Tama dela ne-haanau belee hai di king digau o Jew? Gimaadou gu-gidee di heduu o-Maa dela ne-gila-aga i-bahi-i-dua, gimaadou ga-lloo-ia belee daumaha gi Mee.”

2:3  Di madagoaa King Herod ne-longono di mee deenei, geia mo digau Jerusalem huogodoo gu-lodo huaidu huoloo.

2:4  Mee ga-gahi-mai nia dagi hai-mee-dabu mono gau haga-donudonu haganoho huogodoo, ga-heeu gi digaula, “Di Mesaia la-bolo e-haanau i-hee?”

2:5  Digaula ga-helekai, “I-lodo di waahale Bethlehem i Judea, be nnelekai ala guu-lawa di hihi mai baahi soukohp:

2:6  ‘Bethlehem, goe dela i-lodo Judea. Hudee hai bolo goe e-koia e-dulii i-nia waahale aamua i Judea, idimaa, Tagi dela e-dagi agu daangada Israel, le e-gila-aga i do baahi.’ ”

2:7  Herod ga-haga-dagabuli-mai hagammuni digau ala ne-lloo-ia i-bahi-i-dua, ga-heeu gi digaula di madagoaa ne-gila-aga di heduu deelaa,

2:8  ga-hagau digaula gi Bethlehem, ga-helekai, “Goodou hula halahala-ina hagahumalia di Tama dulii deelaa. Goodou gu-gidee, haga-iloo-ina-mai, au e-hanadu labelaa e-daumaha gi Mee.”

2:9  Muli-hua di-nadau hagalongo gi nnelekai aanei, digaula gaa-hula, gaa-mmada gi-di heduu la-hua dela ne-mmada ginai ginaadou i bahi-i-dua, e-hana i nadau mua e-dagi ginaadou, gaa-hana-loo, ga-haga-huudonu-ia gi-hongo di gowaa dela e-noho-ai Tama-dulii deelaa.

2:10  Digaula gu-tenetene huoloo i-di-nadau gidee labelaa di heduu deelaa.

2:11  Digaula ga-ulu-adu gi-lodo di hale, ga-gidee Tama-dulii mo dono dinana go Mary, gei digaula ga-dogoduli ga-daumaha ang-gi Mee, ga-dahi-aga nadau goloo hagalabagau aanei: nia goolo, nia ‘frankincense’ mono ‘myrrh’, ga-dugu-adu gi-Mee.

2:12  God gu-helekai gi digaula i-lodo di moe, bolo gi-hudee hula labelaa gi Herod, gei digaula gaa-hula i tuai ala gi nadau henua.

2:13  I-muli digaula ne-hula, tangada di-langi o Dimaadua ga-haga-gida gi Joseph i-lodo di midi, ga-helekai, “Herod e-halahala di Tama deenaa belee daaligi gii-made. Nnoinua, lahia di Tama deenaa mo dono dinana, hula hagammuni gi Egypt, noho i-golo gaa-dae-loo gi-di madagoaa au ga-helekai bolo gi-hagatanga.”

2:14  Joseph ga-du-gi-nua, ga-hagatanga i-di boo hua deelaa, gaa-lahi Tama deelaa mo dono dinana, gaa-hula gi Egypt,

2:15  gaa-noho i-golo, gaa-dae-loo gi-di made o Herod. Di mee deenei ne-hai bolo gi-kila-ai nia helekai a Dimaadua mai i-baahi soukohp, “Au ne-gahi dagu Dama-daane gi-daha mo Egypt.”

2:16  Herod gu-modongoohia bolo digaula gu-halahalau eia, gu-hagawelewele huoloo, ga-helekai bolo nia dama-daane huogodoo ala i-lodo Bethlehem mo i-lodo nia guongo ala i-nodaha la-gi-daaligidia gii-mmade, nia dama-daane huogodoo ala gu-dagi-lua nadau ngadau gaa-huli gi-lala. Mee ne-hai di-mee deenei idimaa mee gu-iloo mai baahi digau hagailongo-mee gi-nia heduu, di madagoaa ne-gila-ai di heduu deelaa.

2:17  Di mee deenei ne-hai guu-gila be-di haga-modongoohia soukohp Jeremiah, dela ne-hihi boloo:

2:18  “Dahi lee e-hanimoi i Ramah, di lee dangidangihia. Rachel e-dangidangi i ana dama, gu-deemee di manawa lamalia, i digaula guu-odi di-mmade.”

2:19  Muli di made o Herod, tangada di-langi o Dimaadua ga-hagagida gi Joseph i-lodo di moe,

2:20  ga-helekai gi mee, “Nnoinua, lahia di Tama mo dono dinana, hula gi Israel, idimaa, digau ala ne-belee daaligi di Tama deenaa, la-guu-mmade.”

2:21  Joseph ga-du-gi-nua, gaa-lahi Tama deelaa mo tinana o-maa, gaa-hula gi-muli gi Israel.

2:22  Gei Joseph ga-longono bolo Archelaus guu-hai di king o Judea i-muli dono damana go Herod, geia guu-lliga huoloo di-hana gi-golo. Dimaadua ga-haga-modongoohia gi mee i-lodo di moe, gei mee gaa-hana gi Galilee,

2:23  gaa-noho i-lodo tama-waahale go Nazareth. Malaa, nia helekai soukohp la-guu-kila boloo, “Mee e-haga-ingoo bolo tangada o Nazareth.”

Chapter 3

3:1  Di madagoaa deelaa, John Babdais gu-hanimoi gi-lodo di anggowaa i Judea, ga-daamada ga-agoago,

3:2  “Goodou huli gi-daha mo godou huaidu, idimaa, Teenua King o God di Langi la-gu-hoohoo-mai!”

3:3  John la-go taane dela nogo helekai-ai soukohp Isaiah: “Tangada e-wolowolo i-lodo di anggowaa boloo: ‘Haga-adee-ina di ala o Dimaadua gi togomaalia gi Mee. Haga-huudonu-ina di ala e-hana-iei Mee!’ ”

3:4  Nia gahu o-maa ne-hai gi-nia ngaahulu ‘camel’, dono tuu ne-hai gi-di gili-kau, ana meegai la nia manu-‘locust’ mo nia mee maangala lodo-henua.

3:5  Digau Jerusalem, digau mai nia madagowaa e-logo i Judea, mo nia guongo ala i-di gili di monowai Jordan ne-lloomoi gi-baahi o mee.

3:6  Digaula ga-haagi nadau huaidu, gei mee ga-babdais digaula i-lodo di monowai Jordan.

3:7  Di madagoaa John ne-gidee nia Pharisee mono Sadduccee dogologo ne-lloomoi bolo e-babdais, gei mee ga-helekai gi digaula, “Goodou e-hai be nia gihaa. Ma koai ne-hagi-adu bolo goodou e-mee di-tanga gi-daha mo-di hagaduadua a God dela ga-dau-mai?

3:8  Goodou haga-kila-aga-ina godou hangaahai gi-modongoohia bolo goodou guu-huli gi-daha mo godou ihala.

3:9  Hudee hagamaanadu, bolo goodou e-mee-hua di-tanga gi-daha mo-di hagaduadua a God, i goodou e-helekai bolo goodou nia dama ni Abraham. Au e-hagi-adu gi goodou bolo God le e-mee-hua di-huli nia hadu aanei gii-hai nia dama ni Abraham!

3:10  Talai la-gu-togomaalia i-tono nia laagau. Malaa, nia laagau ala hagalee huwa humalia, le e-hele gi-daha, e-kili gi-lodo di ahi.

3:11  Au e-babdais goodou gi-nia wai, e-haga-modongoohia bolo goodou guu-huli godou lodo, gei Tangada dela e-gila-aga i ogu muli, go Mee dela e-babdais goodou gi-di Hagataalunga-Dabu, mo-di ahi. Mee koia e-aamua i-di-au, gei au e-dee-tau-loo bolo e-dagidagi nia suudi o-Maa.

3:12  Dana daawolo hili-mee gu-i dono lima, e-hili ana palaawaa-‘wheat’, ga-hagabudu-mai nia lii ala e-hai nia palaawaa gi-lodo dono hale-benebene-mee, gei nia geinga le e-dudu i-lodo di ahi ga-dee-ngudu.”

3:13  I-di madagoaa deelaa, gei Jesus ne-hanimoi i Galilee gi Jordan, belee babdais go John.

3:14  Gei John belee hai a Jesus gii-huli ana maanadu, ga-helekai gi Mee, “Ma ko-au dela belee babdais Kooe, gei Goe e-hanimoi bolo au gi-babdais-ina Goe!”

3:15  Jesus ga-helekai, “Heia-hua gii-hai beelaa dolomeenei, idimaa, deenei di hai gaa-mee gidaua di-haga-gila-aga di manawa o God.” Gei John guu-baba ginai.

3:16  Jesus ne-lawa di babdais, geia ga-manawa-aga gi-daha mo nia wai, di langi gu-mahuge, gei Jesus ga-gidee-Ia di Hagataalunga o God e-haneia be-di mwuroi, gaa-dogo gi-hongo o-Mee.

3:17  Gei di lee ga-helekai-ieia i-di langi, “Deenei dagu Dama dela e-aloho ge e-tene ginai Au.”

Chapter 4

4:1  Nomuli, gei di Hagataalunga gaa-lahi a Jesus gi-di anggowaa belee hagamada go Setan.

4:2  I-muli nia laangi madahaa ge madahaa boo, gei Mee digi miami, gu-hiigai.

4:3  Gei Setan ga-hanimoi gi Mee, ga-helekai, “Maa goe di Tama a God, helekai gi-nia hadu aanei gii-hai nia palaawaa.”

4:4  Jesus ga-helekai, “Ma-guu-lawa di-hihi i-lodo di Beebaa-Dabu boloo: ‘Tangada la-hagalee mouli-hua mai di palaawaa, gei e-mouli i-nia helekai huogodoo ala e-lloomoi i-baahi o God.’ ”

4:5  Setan gaa-lahi Jesus gi Jerusalem, go di Waahale-Hagamadagu, gaa-dugu a-Mee gi-di ulu di Hale Daumaha,

4:6  ga-helekai gi Mee, “Maa goe di Tama a God, hobo-ia gi-daha, gii-hai be nnelekai di Beebaa-Dabu boloo: ‘God ga-helekai gi ana gau di-langi i-di-Goe, digaula ga-daahi Goe gi-dee-tugi oo wae gi-nia hadu.’ ”

4:7  Jesus ga-helekai, “Ma-guu-lawa di-hihi labelaa i-lodo di Beebaa-Dabu boloo: ‘Gi-hudee haga-mada-ina Dimaadua go doo God.’ ”

4:8  Setan gaa-lahi labelaa a-Mee gi-tomo di gonduu duuduu i-nua ga-hagi-anga gi Mee nia henua huogodoo o henuailala mo nadau madamada,

4:9  ga-helekai, “Au ga-gowadu gi-di-Goe nia mee huogodoo aanei, maa Goe ga-dogoduli, ga-daumaha-mai gi-di-au.”

4:10  Jesus ga-helekai, “Tuu i-daha mo Au, Setan! Di Beebaa-Dabu e-helekai boloo: ‘Daumaha ang-gi Dimaadua go doo God, gei deelaa-hua go Mee gi-hai-hegau ginai goe!’ ”

4:11  Setan guu-hana gi-daha mo Jesus. Gei digau di-langi ga-lloomoi, ga-hagamaamaa a-Mee.

4:12  Di madagoaa Jesus ne-longono bolo John la-guu-lahi gi-lodo di hale-galabudi, ge-Ia gaa-hana gi Galilee.

4:13  Gei Mee digi noho i Nazareth, gaa-hana, gaa-noho i Capernaum, tama-waahale i tongotai di Tai o Galilee, i-lodo nnenua Zebulun mo Naphtali.

4:14  Di mee deenei ne-hai bolo gi-kila-ai nia helekai ala ne-hai go soukohp Isaiah:

4:15  “Tenua go Zebulun mo Naphtali, i-taalinga di ala dela e-hana gi-di tai dela i-baahi i-golo o Jordan, Galilee go tenua digau tuadimee.

4:16  Nia daangada ala nogo noho i-lodo di bouli, ga-gidee di maalama aamua. Di maalama ga-haga-maalama digau ala nogo noho i-lodo tenua bouli o-di made.”

4:17  Daamada i-di madagoaa deelaa, gei Jesus ga-agoago, “Huli gi-daha mo godou huaidu, idimaa, Teenua King o God di Langi la-gu-hoohoo-mai!”

4:18  Jesus nogo haele i tongotai di Tai o Galilee, ga-gidee tagahaanau daane hai-waga-daha dogolua, go Simon e-haga-ingoo bolo Peter, mo Andrew, e-wagadaha i-di gubenge i-lodo di monowai.

4:19  Jesus ga-helekai gi meemaa, “Lloomoi i ogu muli, gei Au ga-aago goolua di haangodo gi-nia daangada.”

4:20  Di madagoaa hua deelaa, meemaa ga-diiagi nau gubenge, gaa-hula i-muli o Jesus.

4:21  Mee ga-hanadu, ga-gidee labelaa tagahaanau dogolua go James mo John, nia dama-daane ni Zebedee. Meemaa i-hongo di boodi i-baahi di-nau damana Zebedee, e-hagatogomaalia nadau gubenge. Jesus gaa-gahi meemaa.

4:22  Di madagoaa-hua deelaa, meemaa ga-diiagi di-nau boodi mo tamana, gaa-hula i-muli o Jesus.

4:23  Jesus gaa-hana gi-lodo Galilee hagatau, ga-agoago i-lodo nia synagogee digaula, e-agoago di Longo-Humalia Teenua King o God, gei e-hagahili ana hagadilinga magi e-logo.

4:24  Di longo o-Maa guu-dele gi-nia gowaa huogodoo i Syria, gei nia daangada ga-laha-mai gi Jesus nadau gau magi huogodoo i-nia hagadilinga magi e-logo: digau gu-iai di hagataalunga huaidu, hai hoodube, mo digau mmade nadau huaidina, gei Jesus gu-haga-hili nia magi digaula huogodoo.

4:25  Nia daangada dogologowaahee nogo daudali a-Mee mai i Galilee, Decapolis, Jerusalem, Judea, mo tenua i-bahi-i-dua di monowai Jordan.

Chapter 5

5:1  Jesus gaa-mmada gi tagabuulinga dangada deelaa, ge-Ia gaa-hana gi tomo di gonduu, gaa-noho gi-lala, ana dama-agoago ga-lloomoi gi-baahi o Mee,

5:2  gei Mee ga-daamada ga-agoago gi digaula:

5:3  “E-maluagina go digau ala bolo nadau hagataalunga le e-dee-dohu, idimaa digaula e-hai-henua gi Teenua King o God di Langi.

5:4  “E-maluagina go digau ala e-tangitangi lodo-huaidu, idimaa, God ga-haga-manawa lamalia-laa ginaadou.

5:5  “E-maluagina go digau ala e-manawa-hila-gi-lala, idimaa, ginaadou ga-hai-mee gi henuailala.

5:6  “E-maluagina go digau ala e-hagamahi huoloo e-haga-gila-aga di manawa o God, idimaa, God gaa-hai-laa ginaadou gii-dohu.

5:7  “E-maluagina go digau ala e-dumaalia ang-gi digau ala i-golo, idimaa, ginaadou gaa-kae tumaalia mai baahi o God.

5:8  “E-maluagina go digau ala e-madammaa nadau lodo, idimaa, ginaadou ga-gidee a God.

5:9  “E-maluagina go digau ala e-hagahumalia mehanga daangada, idimaa, God gaa-hai digaula nia dama donu ni-aana!

5:10  “E-maluagina go digau ala e-hagaduadua i-di nadau haga-gila-aga di manawa o God, idimaa, digaula e-hai-henua gi Teenua King o God di Langi.

5:11  “E-maluagina go goodou, maa nia daangada ga-helekai huaidu i goodou, ga-hagaduadua ge hagahuaidu goodou i-nia hagadilinga dilikai huaidu huogodoo, idimaa goodou nia daangada ni-aagu.

5:12  Goodou gi-manawa lamalia-hua mo-di tenetene, idimaa, di-godou hui i-di langi le e-damanaiee. Dela gadoo di-nadau hai dela nogo hagahuaidu nia soukohp ala i godou mua.

5:13  “Goodou go nia toolo o henuailala. Malaa, nia toolo ga-ono mmala ai, dehee di hai e-hai nia maa gii-mmala labelaa? Nia maa gu-balumee-hua, e-mee-hua di-kili gi-daha, ga-dagadagahi go nia daangada.

5:14  “Goodou go di haga-maalama o henuailala hagatau. Di waahale dela i-hongo di gonduu, e-deemee di-ngala.

5:15  Ma tangada e-dudu dana malama gaa-dugu gi-lala di boolo ai. Mee e-dugu di-maa gi-hongo dono lohongo-donu, e-inaina nia daangada huogodoo ala i-lodo di hale.

5:16  E-hai gadoo be goodou: godou maalama la-heia gi-maahina i-mua nia daangada gi-gidee-ginaadou godou hangahaihai humalia, gei digaula ga-hagaamu di-godou Damana dela i-di langi.

5:17  “Goodou hudee hai bolo Au ne-hanimoi belee daa gi-daha Nnaganoho Moses mo nia Agoago o-nia Soukohp. Au hagalee ne-hanimoi belee daa gi-daha nia maa, Au ne-hanimoi belee haga-kila-aga nia maa gii-dohu.

5:18  Au e-hagi-adu gi goodou di tonu bolo di madagoaa di langi mo henuailala e-noho-hua i-golo, deai di mee dulii-loo i-di gili nia haganoho aalaa e-hagalee ai, gaa-dae-loo gi-di haga-lawa o-nia mee huogodoo.

5:19  Tangada dela hagalee daudali taganoho e-dahi, ma e-aha maa taganoho koia e-dulii-loo i-lodo nia haganoho, ga-aago gi-nia daangada bolo gi-hudee daudalia, deelaa tangada e-koia i-mugi-lala-loo i Teenua King o God di Langi. Gei tangada dela ma-ga-daudali nnaganoho ge aago gi nia daangada bolo gi-heia beelaa, le e-hai tangada aamua i Teenua King o God di Langi.

5:20  Au e-hagi-adu gi goodou bolo goodou e-mee-hua di-ulu i Teenua King o God di Langi maa godou mouli hai-donu ga-llauehe laa-hongo di mouli o-nia Pharisee mo digau haga-donudonu haganoho.

5:21  “Goodou gu-longono di agoago dela guu-hai gi digau namua boloo: ‘Hudee daaligidia tangada gii-made. Tangada dela ma-ga-daaligi dana dangada gii-made, le e-lahi gi-di gowaa hai-gabunga.’

5:22  “Gei-Au e-hagi-adu gi goodou bolo tangada dela ma-ga-hagawelewele gi dono duaahina, le e-lahi gi-di gowaa hai-gabunga. Gei tangada dela ma-ga-helekai gi dono duaahina boloo: ‘Di balu-dangada!’ le e-lahi gi-di gowaa hai-gabunga-aamua. Gei tangada dela ma-ga-helekai gi tei ono duaahina, boloo, ‘Dadaulia!’ le e-kae dono hagaduadua i-lodo di ahi i-di gowaa hagaduadua.

5:23  Deenei-laa, do madagoaa ma-ga-tigidaumaha ang-gi God i-hongo di gowaa hai-tigidaumaha, gei goe ga-langahia bolo do duaahina i-golo e-huaidu-adu gi-di-goe,

5:24  dugua dau tigidaumaha i-mua di gowaa hai-tigidaumaha, hana hagahumalia-ina gulu mehanga i-mua, gaa-lawa, ga-hanimoi-laa, gaa-hai dau tigidaumaha ang-gi God.

5:25  Maa tangada bolo ia e-kae goe gi-di gowaa hai-gabunga, hagahumalia-ina gulu mehanga i-mua gi-dee lahi goe go mee gi-di gabunga, gei tangada hai-gabunga gaa-wanga goe gi-nia tinggee, ga-galabudi.

5:26  Au e-hagi-adu di tonu, goe ga-galabudi gaa-dae-loo gi doo hui oo hala huogodoo ala gu-haga-anga-adu gi-di-goe.

5:27  “Goodou gu-longono di agoago dela e-hai boloo: ‘Hudee mouli i-di mouli hai be-di manu.’

5:28  “Gei-Au e-hagi-adu gi goodou, tangada ma-gaa-mmada gi-di ahina ga-maanadu huaidu i-ono lodo, geia gu-ihala i-di mouli hai be-di manu i-lodo dono manawa.

5:29  Maa do golomada gau-donu e-hai goe gii-hala, gaabee gi-daha. Ma e-koia e-humalia i do huaidina dogomaalia dela gaa-hudu gi-lodo di ahi.

5:30  Maa doo lima gau-donu e-hai goe gii-hala, duudia gi-daha. Ma e-koia e-humalia i do huaidina dogomaalia dela gaa-hudu gi-lodo di ahi.

5:31  “Goodou gu-longono di agoago boloo: ‘Taane ma-gaa-hudu gi-daha dono lodo, geia e-hai gii-wanga gi dono lodo di beebaa hagadootonu o-di haga-maewae.’

5:32  “Gei Au e-hagi-adu gi goodou, tangada ma-gaa-hudu gi-daha dono lodo i nnadinga i-daha mo-di mouli hai be-di manu o dono lodo, gei taane deelaa la-gu-ihala guu-hai di ahina deelaa gii-hai di hala o-di hai be-di manu maa di ahina deelaa la-guu-hai labelaa dono lodo. Gei taane ma-gaa-hai dono lodo gi-di ahina dela ne-hudu gi-daha, mee guu-hai labelaa di hala o-di hai be-di manu.

5:33  “Goodou gu-longono labelaa bolo ma-guu-lawa di helekai gi digau namua loo boloo: ‘Hudee ohaa dau hagababa ang-gi God, gi-hagagila-aga-ina au mee ala ne-hagamodu ang-gi Dimaadua bolo e-hai kooe.’

5:34  “Gei Au e-hagi-adu gi goodou dolomeenei bolo hudee hai loo hagamodu. Goodou hudee hai hagamodu gi-di langi, idimaa, di langi la-di lohongo-king ni God.

5:35  Hudee hai hagamodu gi henuailala, idimaa, ma-di gowaa e-hagamolooloo-ai ono babaawae. Hudee hai hagamodu gi Jerusalem, idimaa, ma di waahale damana ni-di King Aamua.

5:36  Hudee hai hagamodu gi godou libogo, idimaa, goodou e-deemee di-hai di ngaahulu e-dahi i godou libogo gii-kene be gi-luuli.

5:37  Goodou gi-helekai-hua boloo: ‘Uaa’ be ‘Deeai’, idimaa, nia mee ala i-tua nia mee aanei, la-ne-lloomoi i-baahi tangada huaidu.

5:38  “Goodou gu-longono di agoago boloo: ‘Di golomada le e-hui gi-di golomada, gei di niha le e-hui gi-di niha.’

5:39  “Gei Au e-hagi-adu gi goodou bolo hudee hai-hui gi tangada dela ma-gaa-hai dana huaidu adu gi goodou. Maa tangada gaa-paa do gauwae gau-donu, gei goe huluhia di baahi dela i-golo gi mee.

5:40  Maa tangada gaa-lahi goe gi-di gowaa hai-gabunga belee daa doo gahu uluulu, gei goe wanga-ina labelaa gi mee doo gahu mahaa.

5:41  Maa tangada gaa-hono goe gi-kae-ina dana budehede-goloo i-di maele e-dahi, gei goe hana i-muli o mee i-nia maele e-lua.

5:42  Maa tangada ga-dangi-adu gi-di-goe i dahi mee, gei goe wanga-ina. Gei maa tangada ga-madau dana mee bolo ga-gowadu-laa nomuli, gei goe gi-dumaalia gi mee.

5:43  “Goodou gu-longono di agoago boloo: ‘Goe gi-aloho i tangada dela i do baahi, gei gi-hagadugina i do hagadaumee.’

5:44  “Gei-Au e-hagi-adu gi goodou bolo gi-aaloho i godou hagadaumee, gei gi-dalodalo i digau ala e-hagahuaidu goodou,

5:45  gii-hai goodou nia dama ni Tamana dela i-di langi, dela e-haga-hobo dana laa gi-hongo digau huaidu mo digau humalia, gei e-haga-doo dana uwa gi-hongo digau ala e-hai nia mee humalia mo digau ala e-hai nia mee huaidu.

5:46  Maa goodou e-aaloho-hua i digau ala e-aaloho i goodou, malaa, God e-hagahumalia goodou behee? Digau hagabudu dagitedi le e-hai labelaa beenei!

5:47  Maa goodou ga-manawa humalia-hua gi godou duaahina, di hai-geegee behee ang-gi digau ala i-golo, digau tuadimee le e-hai labelaa beenei!

5:48  Malaa, godou mouli la-heia gii-dohu dogomaalia, gii-hai be di-godou Damana di langi dela e-dohu i-nia mee huogodoo.

Chapter 6

6:1  “Goodou hudee hai-hegau daumaha ngudu golomada. Maa goodou gaa-hai beenei, gei goodou e-deemee di-kae godou hui mai baahi Tamana i-di langi.

6:2  Maa goe gaa-wanga dau mee gi tangada hagaloale, hudee haga-iloo-ina be digau hai-hegau ngudu-golomada i-lodo nia hale daumaha mo i-hongo nia-ala, bolo gi-hagaamu ginaadou go nia daangada. Au e-hagi-adu gi goodou bolo digau beenei la-guu-lawa di-kae nadau hui.

6:3  Malaa, do madagoaa ma-ga-hagamaamaa tangada hagaloale, hagamaamaa-ina gi-di hai dela e-de-iloo tangada.

6:4  Dau hagamaamaa la-gi-heia hagammuni. Tamana i di-langi e-iloo nia mee ala e-hai hagammuni, ga-dugu-adu-laa doo hui.

6:5  “Maa goe ga-dalodalo, hudee hai be digau hai-hegau ngudu-golomada ala e-hiihai e-tuu-aga, e-dalodalo i-lodo nia hale daumaha, be i-nia buu nia-ala, bolo gii-mmada ginai digau dogologo. Gei-au e-hagi-adu gi goodou di tonu, bolo digaula la-guu-lawa di-kae nadau hui.

6:6  Do madagoaa ma-ga-dalodalo, hana gi-lodo doo ruum, haidia di bontai, dalodalo ang-gi do Damana i-di gowaa de-gidee, gei Mee e-gidee au mee ala e-hai modogoe, ga-dugu-adu-laa doo hui.

6:7  Maa goe ga-dalodalo, hudee hai-hegau i-nia balu-helekai e-logo, be digau ala digi maalama, ala e-hagamamaanadu bolo God ga-hila-anga-laa gi ginaadou i-nadau dalodalo lloowehaa.

6:8  Goodou hudee hai be digaula. Tamana i-di langi gu-iloo nia mee ala hagalee dohu i godou baahi i-mua di-godou tangi ang-gi Mee.

6:9  Malaa, e-hai beenei go di-godou hai e-dalodalo-ai: ‘Di-madau Damana dela i-di langi, do ingoo gi-dabuaahia,

6:10  do Heenua King gi-gila-mai, do manawa gii-gila i henuailala, gii-hai be doo hai i-di langi.

6:11  Gaamai madau meegai gi-humalia mai gi gimaadou dangi-nei.

6:12  Weedee madau ihala la-gi-daha, gii-hai be gimaadou ala e-dumaalia gi-nia hala o digau ala ne-hai-mai gi gimaadou.

6:13  Hudee dugu-anga gimaadou gi-nia hagamada. Dahia-adu gimaadou gi-daha mo nia huaidu. [Idimaa, ni-aau go do Heenua, di mogobuna, mo-di madamada, gaa-hana-hua beelaa. Amen.’]

6:14  “Maa goodou ga-dumaalia gi-nia hala o digau ala ne-hai-adu gi goodou, Tamana di langi ga-dumaalia labelaa adu gi goodou.

6:15  Maa goodou hagalee dumaalia ang-gi digau ala i-golo i nadau hai-hala, gei Tamana hagalee dumaalia-adu gi godou hai-hala.

6:16  “Di madagoaa e-hagaonge-ai goodou, hudee golomada lodo-huaidu be digau hai-hegau ngudu-golomada ala e-hai nia daangada gi-iloo bolo ginaadou e-hagaonge. Au e-hagi-adu gi goodou di tonu bolo digaula guu-lawa di-kae nadau hui.

6:17  Maa goe ga-hagaonge, gaugaulia o golomada, dala-ina do libogo,

6:18  gei nia daangada ga-de-iloo bolo goe e-hagaonge, gei do Damana dela i-di gowaa de-gidee e-iloo-Ia. Tamana e-iloo au hegau huogodoo hagammuni, ga-dugu-adu-laa doo hui.

6:19  “Hudee benabena-ina godou maluagina henuailala ala e-tomo, gei e-gai go hingodo, gei digau gaiaa e-loomoi e-oho nia hale, e-gaiaa.

6:20  Hagamahi benebene-ina godou maluagina i-di langi, di gowaa hagalee ngudu, hagalee gai go hingodo, gei digau gaiaa e-deemee di-oho nia hale, e-gaiaa.

6:21  Idimaa, di gowaa dela iai o maluagina, deelaa di gowaa e-haa-manawa-iei goe.

6:22  “Nia golomada le e-hai be-di malama e-haga-maalama tuaidina. Maa o golomada le e-humalia, gei do huaidina le e-honu di maalama.

6:23  Gei o golomada ga-hagalee humalia, gei do huaidina le e-honu di bouli. Maa di maalama i oo lodo le e-bouli, gei di-maa e-koia e-bouli dongoeho!

6:24  “Tangada e-mee di-hai-hege gi-nia dagi dogolua ai. Mee ga-de-hiihai gi tagi e-dahi, ga-hiihai gi tagi dela i-golo. Mee ga-manawa-dahi gi tangada e-dahi, tangada dela i-golo la-ga-haga-balumee. Deenei-laa, goodou e-deemee di-hai-hegau gi God mo nia bahihadu.

6:25  “Deelaa-laa, Au e-hagi-adu gi goodou gi-hudee boo godou lodo gi-nia meegai mo nia wai ang-gi godou mouli, be goodou e-gahu gi-di-aha. E-hai behee: di mouli la-hagalee koia e-hagalabagau i-nia meegai? Tuaidina la-hagalee koia e-hagalabagau i-nia gahu?

6:26  Mmada gi-nia manu mamaangi. Digaula hagalee dogi nadau lii, hagalee hadi nadau meegai, hagalee benebene nadau mee. Tamana di-langi e-benebene digaula. Malaa e-hai behee: goodou hagalee koia e-hagalabagau i-nia manu?

6:27  Ma koai e-mee di-mouli waalooloo i dono de-nnoomaalia?

6:28  “Goodou e-aha ala e-de-nnoomaalia e-hagamamaanadu nia gahu? Goodou mmada gi-nia daladala lodo-henua ala e-tomo. Nia maa hagalee ngalua be e-bida hai nadau gahu.

6:29  Au e-hagi-adu gi goodou bolo Solomon i dono madagoaa nogo maluagina-ai, mee digi ulu ono gahu madamada be nia daladala aanei.

6:30  Ma go God dela e-haga-madamada nia geinga lodo-henua dangi-nei, gei daiaa nia maa gaa-kili gi-lodo di ahi. Malaa e-hai behee: Mee hagalee ga-haga-gahu goodou hagahumalia i dana benebene nia mee aanei? Godou hagadonu le e-lligi-loo!

6:31  “Hudee de-nnoomaalia be goodou ga-gaamai godou meegai, godou wai, be godou gahu i-hee.

6:32  Digau digi maalama e-haa-manawa, e-halahala nia mee aanei huogodoo. Di-godou Damana di-langi e-iloo-Ia nia mee huogodoo ala e-dee-dohu i godou baahi.

6:33  Malaa, goodou halahala-ina i-mua Teenua King o God mo dono hiihai, gei nia mee huogodoo ala i-golo, ga-dugu-adu gi goodou.

6:34  Deenei-laa, goodou hudee manawa-gee, hudee maanadu-ina daiaa, idimaa, daiaa mo ono haingadaa. Nia laangi huogodoo mo nadau haingadaa.

Chapter 7

7:1  “Hudee hagi-aga-ina tangada gi-de-hagi-aga-hua goe go God,

7:2  idimaa, God ga-hagi-aga goodou be di-godou hai e-hagi-aga nia daangada, gei Mee ga-hai-hegau gi-nnaganoho nogo hai-hegau-ai goodou gi-nia daangada.

7:3  Goe e-aha dela e-daumada di madageinga dela i-lodo di golomada o do duaahina, gei e-de-hei-e-goe di bida-laagau dela i-lodo do golomada?

7:4  Dehee dau hai e-helekai gi do duaahina boloo: ‘Dumaalia-mai daawa-ina di madageinga dela i-lodo do golomada,’ gei di-maa di bida-laagau dela i-lodo do golomada?

7:5  Goe tangada hai-hegau ngudu-golomada! Daawa-ina i-mua di bida-laagau dela i-lodo do golomada, gei goe ga-gidee di-daa gi-daha di madageinga dela i-lodo di golomada o do duaahina.

7:6  “Hudee wanga-ina nia mee dabu gi-nia paana, digaula ga-huli-adu, ga-gadigadi goodou. Hudee kilia godou hadu hagalabagau gi-mua nia biigi, digaula ga-dagadagahi-hua nia maa.

7:7  “Tangi-anga, gei goodou ga-hai-mee ginai. Halahala-ina, gei goodou ga-gidee. Dugidugi, gei di bontai la-ga-huge-adu gi goodou.

7:8  Idimaa, digau ala ga-tangi-anga, e-hai-mee ginai, digau ala e-halahala, ga-gidee, digau ala e-dugidugi, di bontai ga-huge-anga.

7:9  Ma iai tamana i godou lodo e-wanga dana hadugalaa gi-di tama dela e-dangi-anga dana palaawaa?

7:10  Be e-wanga di gihaa lodo-geinga gi tama dela e-dangi-anga dana iga?

7:11  Goodou nia daangada huaidu ge e-iloo di-wanga gi godou dama nia mee ala e-humalia. Malaa, Tamana di langi gaa-wanga gi digau ala e-tangi ang-gi de-Ia nia mee ala koia e-humalia!

7:12  “Goodou gi-heia ang-gi nia daangada godou mee ala e-hiihai digaula gi-heia-adu gi goodou. Deenei tadinga Nnaganoho Moses mo nia Agoago o-nia Soukohp.

7:13  “Goodou gi-ulu i-di bontai mada-giigi, idimaa, di bontai gi-di gowaa hagaduadua le e-mada-laaniu, gei di ala dela e-hula-ai le e-haingoohia, digau dogologo e-taele-ai.

7:14  Gei di bontai dela e-ulu gi-di mouli le e-mada-giigi, gei di ala deelaa le e-haingadaa, digau hua hogoohi e-gidee di-maa.

7:15  “Goodou gi-haga-ligaliga i-nia soukohp dilikai ala e-lloo-adu gadoo be nia siibi, gei lodo digaula e-hai be nia paana lodo-geinga.

7:16  Goodou ga-iloo digaula mai i nadau hegau ala e-hai. Nia laagau geinga duduia e-deemee di-huwa nia ‘grape’, gei nia laagau akai duduia e-deemee di huwa nia ‘fig’.

7:17  Di laagau tomo maaloo e-huwa humalia, di laagau tomo bagege e-huwa huaidu.

7:18  Di laagau tomo maaloo e-deemee di-huwa huaidu, di laagau tomo bagege e-deemee di-huwa humalia.

7:19  Di laagau dela hagalee huwa humalia, le e-hele gi-lala, e-hudu gi-lodo di ahi.

7:20  Malaa, goodou ga-iloo nia soukohp dilikai mai i nadau hegau ala e-hai.

7:21  “Hagalee go digau huogodoo ala e-gahigahi Au boloo, ‘Meenei dogu Dagi’, e-ulu i Teenua King o God di Langi, ma go digau hua ala e-hai di manawa o dogu Damana dela i-di langi.

7:22  Di madagoaa di Laangi Hagi-aga, gei nia daangada dogologo ga-helekai-mai boloo, ‘Meenei di-madau Dagi, Meenei di-madau Dagi, gimaadou nogo agoago nia helekai a God, gu-hagabagi nia hagataalunga huaidu, guu-hai madau mogobuna e-logo i do ingoo!’

7:23  Gei-Au ga-helekai gi digaula boloo, ‘Au e-de-iloo-e-Au goodou. Tuu-i-daha mo Au, goodou digau huaidu!’

7:24  “Maa tangada gu-longono agu helekai aanei, ge kawe-ai, mee e-hai be taane kabemee dela ne-hau dono hale i-hongo tadugalaa.

7:25  Di uwa gaa-doo, di monowai gu-hontula guu-mmidi, di madangi gaa-gono maaloo gi-di hale deelaa, gei di hale digi hinga, idimaa ne-hau i-hongo tadugalaa.

7:26  “Maa tangada e-longono agu helekai aanei, geia hagalee kawe-ai, mee e-hai be taane dadaulia ne-hau dono hale i-hongo di gelegele.

7:27  Di uwa gaa-doo, di monowai gu-hontula guu-mmidi, di madangi gaa-gono maaloo gi-di hale deenei, gei di hale guu-hinga, gu-mooho!”

7:28  Di madagoaa Jesus ne-haga-lawa ana helekai i-nia mee aanei, digau dogologo gu-goboina huoloo i dana hai agoago.

7:29  Mee nogo agoago i-dono mogobuna dagi, hagalee agoago be digau haga-donudonu haganoho.

Chapter 8

8:1  Di haneia o Jesus i-tomo di gonduu, digau dogologo nogo daudali a-Mee.

8:2  Taane magi-genegene ga-hanimoi gi Mee, ga-dogoduli i-mua o Mee, ga-helekai, “Meenei, maa Goe e-hiihai, Goe e-mee di-haga-madammaa au.”

8:3  Jesus ga-daahi-adu dono lima gaa-bili gi mee, ga-helekai, “Uaa, Au e-hiihai. Madammaa!” Di madagoaa-hua deelaa, gei di magi o-maa guu-hili.

8:4  Jesus ga-helekai gi mee, “Hagalongo! Hudee hagi ang-gi dahi dangada. Hana haga-huudonu gi tangada hai-mee-dabu gi-haga-dina-ina goe, wanga-ina tigidaumaha dela guu-lawa di haga-noho go Moses gi-nia daangada bolo tigidaumaha e-hagamodongoohia bolo goe gu-madammaa.”

8:5  Di ulu-adu o Jesus gi Capernaum, tagi-dauwa o Rome ga-heetugi gi Mee, ga-dangi-anga i-di hagamaamaa,

8:6  “Meenei, dagu dangada hai-hegau e-moe i dogu hale e-magi pale, e-mmae huoloo.”

8:7  Jesus ga-helekai gi mee, “Au gaa-hana, ga-hagahili-laa a-mee.”

8:8  Tagi-dauwa ga-helekai, “Deeai, Meenei. Au e-de-tau-loo di hagaulu Goe gi-lodo dogu hale. Helekai-hua, gei dagu dangada hai-hegau la-gaa-hili.

8:9  Au tangada labelaa e-noho i-lala nia mogobuna dogu dagi, gei au e-dagi labelaa agu gau-dauwa. Au ga-helekai gi tangada i digaula boloo, ‘Hana!’ gei mee e-hana. Gei-au ga-helekai gi tangada boloo, ‘Hanimoi!’ gei mee e-hanimoi. Gei-au ga-helekai gi dagu hege boloo, ‘Heia di mee deenei!’ gei mee e-hai.”

8:10  Jesus gu-goboina huoloo dono hagalongo gi-di mee deenei, ga-helekai gi digau ala nogo daudali Ia, “Au e-hagi-adu gi goodou di tonu bolo au digi gidee-loo tangada hagadonu beenei i Israel.

8:11  Au e-hagi-adu gi goodou bolo digau dogologo e-lloomoi i-bahi-i-dua mo i-bahi-i-dai, gaa-noho dalia a Abraham, Isaac mo Jacob i tagamiami i Teenua King o God di Langi.

8:12  Gei digau ala belee dau gi Teenua King o God, la-gaa-kili gi-daha gi-lodo di bouli-dongoeho, di gowaa dela e-tangitangi-ai, ge gadigadi nadau niha.”

8:13  Jesus ga-helekai gi tagi-dauwa, “Hana-laa gi doo hale, dau mee dela e-hagadonu kooe ga-dugu-adu-laa gi-di-goe.” Di madagoaa-hua deelaa, gei tangada hai-hegau a-maa guu-hili.

8:14  Jesus gaa-hana gi-di hale o Peter, ga-gidee-Ia tinana di lodo o Peter e-moe magi welengina.

8:15  Jesus gaa-bili gi-di lima o-maa, gei di welengina o-maa gu-hagalee. Di ahina deelaa ga-nnoinua, ga-daamada ga-benebene Jesus.

8:16  Hiahi-ia di mee, gei nia daangada gu-laha-mai nadau gau magi hagataalunga huaidu dogologo. Jesus gu-hagabagi nia hagataalunga huaidu gi telekai, gu-hagahili digau huogodoo ala guu-magi.

8:17  Mee ne-hai nia mee aanei bolo gii-gila di mee a soukohp Isaiah ne-haga-modongoohia-aga, “Mee ne-kae tadau magi ga-hagahili tadau magi huogodoo.”

8:18  Jesus gaa-mmada gi digau dogologo ala e-haganiga dono gili, ge-Ia ga-helekai gi ana dama-agoago bolo gii-hula gi-di baahi dela i-golo di monowai.

8:19  Gei tangada haga-donudonu haganoho ga-hanimoi gi dono baahi, ga-helekai, “Meenei Tangada Agoago, deenei au gu-togomaalia e-daudali goe gi-nia gowaa huogodoo ala e-hana ginai Goe.”

8:20  Jesus ga-helekai, “Nia manu-‘fox’ iai nadau bongoo, nia manu-mamaangi iai nadau waehongo. Gei Tama-Tangada dana gowaa e-hagamolooloo ia ai.”

8:21  Tangada labelaa i-nia dama-agoago a-maa ga-helekai, “Meenei, dugu-ina-mai gi-di-au e-hana e-danu dogu damana.”

8:22  Jesus ga-helekai, “Daudalia-mai Au, dugu-ina-anga gi digau mmade gi-danumia nadau gau mmade.”

8:23  Jesus gaa-gaga gi-hongo di boodi, ana dama-agoago gaa-hula madalia a-Mee.

8:24  Di madagoaa deelaa, di madangi guu-gono huoloo, di boodi gu-hahaawaa gu-hoohoo ga-abulu. Jesus nogo kii.

8:25  Ana dama-agoago ga-lloo-adu gi Mee, ga-hangahanga, ga-helekai, “Meenei Tagi, hagamaamaa-ina gimaadou, gidaadou gaa-mmade hua!”

8:26  Jesus ga-heeu, “Goodou e-mmaadagu di-aha? Godou hagadonu le e-lligi!” Gei Mee ga-duu-aga, ga-helekai gi-di madangi mono beau gii-noho, gei gu-kila-loo!

8:27  Huogodoo gu-goboina huoloo, ga-helekai, “Tangada behee deenei? Di madangi mono beau hogi e-hagalongo gi Mee!”

8:28  Jesus ne-dau-adu gi tenua go Gadara i-baahi i-golo di monowai. Gei nia daane dogolua ala iai di hagataalunga huaidu ga-heetugi gi Jesus. Meemaa ne-lloomoi i-baahi nia daalunga gau mmade, meemaa e-llamu-dauwa huoloo, nia daangada e-de-hiihai di-hula di ala dela e-hana gi-golo.

8:29  Di madagoaa deelaa, meemaa ga-wwolowwolo gi Mee, “Goe go Tama a God, Goe e-hiihai gi-di-aha i mau baahi? Goe ne-hanimoi belee hagaduadua gimaua i-mua di madagoaa donu belee hagaduadua-ai gimaua?”

8:30  Nia biigi e-logo nogo miami i-di gowaa hoohoo gi-golo.

8:31  Nia hagataalunga huaidu aalaa ga-tangi-anga gi Jesus, “Maa Goe ga-hagabagi gimaadou gi-daha, hagau-ina gimaadou gi-lodo nia biigi aalaa.”

8:32  Jesus ga-helekai, “Hula!” Nia hagataalunga huaidu ga-ulu gi-daha mo nia daane aalaa, ga-ulu gi-lodo nia biigi. Gei nia biigi aalaa huogodoo ga-llele-ia gi-lala i-di laungudu gi-lodo di monowai, gu-mmaalemu.

8:33  Digau madamada-humalia i-nia biigi aalaa gaa-llele gi-lodo di waahale, ga-haga-iloo nia mee huogodoo ala ne-hai, mo nia mee ne-hai gi-nia daane dogolua ala nogo iai nia hagataalunga huaidu.

8:34  Digau o-di waahale ga-lloomoi huogodoo, ga-heetugi gi Jesus, ga-tangi gi Mee gii-hana gi-daha mo di-nadau gowaa.

Chapter 9

9:1  Jesus ne-gaga gi-hongo di boodi, gaa-hana gi-baahi i-golo di tai gi dono guongo-donu.

9:2  Gei nia daangada ga-laha-mai di-nadau dangada made dono huaidina dela e-moe i-hongo dono hada. Jesus e-iloo hua nia hagadonu digau aanei, ga-helekai gi tangada magi, “Dagu dama-daane, hagadagadagagee, o huaidu la-gu-maahede.”

9:3  Hunu gau haga-donudonu haganoho ga-helehelekai i nadau mehanga, “Taane deenei le e-haga-balumee a God.”

9:4  Jesus gu-iloo hua nia hagamaanadu digaula, ga-helekai, “Goodou e-aha ala e-maanadu huaidu?

9:5  Dehee di mee e-haingoohia, e-helekai boloo, ‘O huaidu la-gu-maahede,’ be e-helekai boloo, ‘Duu-i-nua, haele’?

9:6  Au ga-haga-modongoohia-adu gi goodou bolo Tama-Tangada iai ono mogobuna e-wwede nia huaidu i henuailala.” Gei mee ga-helekai gi taane made dono huaidina, “Duu-i-nua, dahi-aga-ina do moenge, hana gi doo hale.”

9:7  Taane magi deelaa ga-duu-i-nua, gaa-hana gi dono hale.

9:8  Digau dogologo gu-gidee di mee deenei, gu-mmaadagu huoloo, gu-hagaamu a God i-ana helekai mogobuna ala ne-wanga gi-nia daangada.

9:9  Jesus ga-hagatanga i-di gowaa deelaa, ga-gidee-Ia tangada hagabudu dagitedi, go Matthew, e-noho i-lodo dono oobidi. Jesus ga-helekai, “Daudali-mai Au.” Matthew gaa-duu gi-nua, ga-daudali Jesus.

9:10  Di madagoaa Jesus nogo noho miami i-di hale o Matthew, gei digau hagabudu dagitedi dogologo, mo digau huaidu gaa-noho-adu dalia a Jesus mo ana dama-agoago gi teebele deelaa.

9:11  Hunu Pharisee ga-gidee di hai deenei, ga-heheeu ang-gi nia dama-agoago a-Maa, “Di-godou Dangada Agoago e-aha dela e-miami dalia digau hagabudu dagitedi mo digau huaidu?”

9:12  Jesus ga-longono digaula, ga-helekai, “Ma hagalee go digau maaloo e-heetugi gi togidaa, go digau hua ala e-magi.

9:13  Goodou halahala-ina tadinga o-nia helekai di Beebaa-Dabu ala e-helekai boloo, ‘Au hagalee hiihai gi-nia tigidaumaha ala ne-hai gi-nia manu, gei go tumaalia hua.’ Au hagalee ne-hanimoi belee gahigahi digau humalia, gei go digau ala e-huaidu.”

9:14  Nia dama-agoago a John Babdais ga-lloomoi gi Jesus, ga-heeu, “Ma e-aha gimaadou mono Pharisee e-hagaonge, gei au dama-agoago hagalee-loo e-hagaonge?”

9:15  Jesus ga-helekai, “Goodou bolo nia daangada ala ne-gahi gi tagamiami haga-hai-lodo, la-gii-noho lodo-huaidu i-di madagoaa taane hai-lodo e-noho i nadau baahi? Deeai! Di laangi ga-dau-mai, gei taane hai-lodo la-gaa-lahi gi-daha mo digaula, deelaa di madagoaa digaula gaa-noho-laa hagaonge.

9:16  “Tangada e-pono dana gahu bobo gi-di mee gahu hoou ai, idimaa, di mee gahu hoou la-ga-mmuni-mai, ga-haga-damana di bongoo di gahu.

9:17  “Gei tangada e-haga-hau ana waini hoou gi-lodo di mee dugu-waini bobo ai. Ma-gaa-hai beenei, di mee-dugu-waini la-ga-mahaa, nia waini la-ga-maalingi, gei di mee-dugu-waini la-ga-mooho. Tangada le e-haga-hau-hua ana waini hoou gi-lodo di mee-dugu-waini hoou, gei nia maa huogodoo la-ga-benebene hagahumalia.”

9:18  Di madagoaa-hua Jesus nogo helehelekai gi digaula i-nia mee aanei, gei tangada aamua o Jew ga-hanimoi gi Mee, ga-dogoduli, ga-helekai, “Meenei, dagu dama-ahina dela-hua dogo made. Hanimoi, e-dugu oo lima gi-hongo o mee, gei mee ga-mouli.”

9:19  Gei Jesus ga-duu-aga, gaa-hana dalia a-mee mo ana dama-agoago.

9:20  Di ahina magi halihali dodo i-nia ngadau e-madangaholu maa-lua ga-hanimoi laa-tua o Jesus, gaa-bili gi taalinga di gahu o-Maa.

9:21  Mee ga-daalo ang-gi ono lodo boloo, “Koau hua gii-bili gi-di gahu o-Maa, gei au guu-hili.”

9:22  Jesus gaa-huli gi-muli, ga-gidee-Ia di ahina, ga-helekai, “Dagu dama-ahina, hagadagadagagee. Do hagadonu deelaa ne-hagahili doo magi.” Digi duai-hua, gei di magi o-maa guu-hili.

9:23  Jesus gaa-hana gi-lodo di hale tangada aamua. Dono gidee-Ia hua digau hai-daahili mo digau dogologo ala e-hagalongoaa i-di gowaa deelaa,

9:24  ge-Ia ga-helekai, “Goodou huogodoo ulu gi-daha. Tama-ahina le e-kii, mee digi made!” Digau huogodoo gu-gadagada haga-balumee a-Mee.

9:25  I-muli-hua digaula ne-ulu gi-daha, Jesus ga-ulu gi-lodo di ruum tama-ahina, ga-dahi-aga di lima o-maa, gei tama-ahina ga-duu-i-nua.

9:26  Malaa, di longo deenei la-guu-dele gi-nia guongo huogodoo o tenua.

9:27  Jesus ne-hagatanga i-di gowaa deelaa, gei nia daane deegida dogolua ga-daudali a-Mee, ga-wwolowwolo gi-nua boloo, “Meenei, tama-daane a David, hila-mai gi gimaua.”

9:28  Jesus ga-ulu-adu gi-lodo di hale, gei meemaa ga-lloo-adu gi Mee, gei Mee ga-heeu, “Goolua e-hagadonu bolo Au e-mee di-hagahili gulu magi?” Meemaa ga-helekai, “Uaa, meenei Tagi.”

9:29  Jesus gaa-bili gi-nia golomada meemaa, ga-helekai, “Gi-heia adu gi goolua gii-hai be di-gulu hagadonu.”

9:30  Nia golomada o meemaa gu-aala, gei Jesus ga-helekai, “Hudee hagi-anga-ina di mee deenei gi dahi dangada.”

9:31  Gei meemaa gaa-hula-hua, ga-hagadele di longo o Jesus gi-nia guongo huogodoo o tenua deelaa.

9:32  Di madagoaa meemaa ne-hula, gei nia daangada ga-laha-mai gi Jesus taane e-de-leelee, idimaa, di hagataalunga huaidu gu-i dono baahi.

9:33  Di madagoaa-hua di hagataalunga huaidu ne-hagabagi gi-daha, gei mee gu-leelee. Digau huogodoo gu-goboina, ga-helekai, “Di mee beenei ne-gidee-gidaadou i Israel ai!”

9:34  Gei nia Pharisee ga-helekai, “Di tagi o-nia hagataalunga huaidu dela ne-wanga gi Mee di mogobuna e-hagabagi nia hagataalunga huaidu i-baahi nia daangada.”

9:35  Jesus ga-hagadau i-baahi nia guongo mono waahale huogodoo, ga-agoago i-lodo nia synagogee, e-hagadele di Longo-Humalia Teenua King o God, gei e-hagahili nia hagadilinga magi huogodoo.

9:36  Dono gidee digau dogologowaahee, ge-Ia gu-aloho huoloo i digaula, idimaa, digaula e-de-nnoomaalia, tangada e-benebene ginaadou ai. Digaula guu-hai be nia siibi, deai nadau hagaloohi ai.

9:37  Deenei dana mee ne-hagi ang-gi ana dama-agoago, “E-donu bolo taugai e-damanaiee, gei digau ngalua le e-hogoohi.

9:38  Goodou hai dangidangi ang-gi tagi o taugai gi-hagau-ina-mai ana gau ngalua e-ngalua gi taugai.”

Chapter 10

10:1  Jesus ne-haga-dagabuli ana dama-agoago dilongoholu maa-lua, gaa-wanga gi digaula di mogobuna e-hagabagi nia hagataalunga huaidu ge hagahili nia hagadilinga magi huogodoo.

10:2  Aanei nia ingoo digau agoago-hagau: Simon e-haga-ingoo bolo Peter, dono duaahina daane go Andrew, James mo dono duaahina daane go John, nia dama-daane Zebedee,

10:3  Philip mo Bartholomew, Thomas mo Matthew go tangada hagabudu dagitedi, James tama Alphaeus, mo Thaddaeus,

10:4  Simon di ‘Patriot’, mo Judas Iscariot, taane e-wanga a Jesus.

10:5  Jesus ne-hagau ana gau dilongoholu maa-lua aanei, ga-helekai, “Goodou hudee hula gi-nia gowaa digau tuadimee, be gi-nia waahale digau Samaria.

10:6  Goodou hula gi-baahi nia siibi ala ne-nngala, go nia madawaawa Israel.

10:7  Hula agoago boloo, ‘Teenua King o God di Langi la-gu-hoohoo-mai!’

10:8  Hagahili-ina digau magi, haga-mouli-aga-ina digau mmade, haga-madammaa-ina nia magi genegene, hagabagia nia hagataalunga huaidu. Wanga-ina be godou mee ala ne-hai-mee ginai dehuia.

10:9  Hudee kae goolo, silber, be nia bahihadu i-lodo godou budehede.

10:10  Hudee kae gada-goloo be nia gahu mono suudi digagi, be togodogo, idimaa, tangada hai-hegau le e-wanga ginai nia mee ala e-hagalee i dono baahi.

10:11  “Di-godou dau-adu gi-lodo dahi waahale, be i-lodo dahi guongo, halahala-ina i-mua tangada dela e-tau di-benebene goodou, noho-hua i-baahi o mee, gaa-dae-loo gi-di-godou hagatanga.

10:12  Di-godou ulu-adu gi-lodo dahi hale, gi-hagaaloho beenei, ‘Di aumaalia gi-madalia goodou.’

10:13  Maa digau di hale deelaa ga-hagaahi-mai goodou, heia di aumaalia dela i godou baahi gii-noho i-baahi digaula. Maa digaula ga-hagalee benebene goodou, gaamai gi-muli di-godou hagaaloho.

10:14  Maa di hale, be-di waahale ga-hagalee hila-adu gi goodou, be hagalee hagalongo-adu gi godou agoago, hagatanga gi-daha, duiduia ginai nia gelegele o godou babaawae.

10:15  Au e-hagi-adu gi-iloo-goodou, bolo di Laangi Hagi-aga, God la-ga-koia dumaalia gi digau Sodom mo Gomorrah i-digau di waahale deelaa!

10:16  “Hagalongo! Au ga-hagau goodou be nia siibi gi-nia paana lodo-geinga. Gii-pula i goodou gadoo be nia gihaa, hila-gi-lala be nia mwuroi.

10:17  Pula i goodou, idimaa, nia daangada ga-lawalawa goodou, gaa-lahi gi-nia hale-gabunga, ga-dadaaligi goodou i-lodo nia synagogee.

10:18  Goodou gaa-lahi gi-mua nia dagi mo nia king i-di-Au, e-haga-modongoohia gi digaula mo digau tuadimee di Longo-Humalia.

10:19  Di madagoaa digaula gaa-lahi goodou gi-di gabunga, hudee de-nnoomaalia be goodou ga-helekai bolo-aha. Idimaa, di madagoaa hua deelaa ga-dugu-adu nnelekai ala e-helekai-ai goodou.

10:20  Godou helekai ala ga-helekai-ai, la-hagalee mai i godou baahi, e-lloomoi i-baahi di Hagataalunga o Tamana, e-helekai i godou baahi.

10:21  “Nia daangada gaa-wanga nadau duaahina gi-daaligidia gii-mmade, gei nia damana gaa-hai gadoo beelaa ang-gi nadau dama. Nia dama ga-hai-baahi gi nadau maadua, gaa-hai digaula gi-daaligi gii-mmade.

10:22  Nia daangada huogodoo ga-hudiou adu gi goodou i-di-Au. Gei tangada dela ga-daahi dono hagadonu gaa-dae-loo gi-di hagaodi, deelaa go mee ga-hagamouli.

10:23  Maa goodou ga-hagahuaidu go dahi waahale, hula gi-di waahale dela i-golo. Goodou gi-iloo bolo goodou e-deemee di-hagalawa godou hegau i-lodo nia waahale Israel, i-mua di hanimoi Tama-Tangada.

10:24  “Tamagiigi-kuulu e-aamua i dono tintei ai, di hege e-aamua i dono dagi ai.

10:25  Malaa, tamagiigi-kuulu gii-donu bolo ia gaa-hai be dono tintei. Gei di hege gii-donu bolo ia gaa-hai be dono dagi. Maa tagi o-di hale e-haga-ingoo bolo Beelzebul, digau o dono hale la-ga-haga-ingoo gi-nia ingoo koia e-huaidu gi-nonua!

10:26  “Malaa, goodou hudee mmaadagu i-nia daangada. Nia mee ala e-hagammuni, la-ga-haga-kila-aga, gei nia mee ala e-de-modongoohia huogodoo, la-ga-haga-modongoohia-aga.

10:27  Agu mee ala ne-helekai-adu gi goodou i-lodo di bouli, goodou e-hai gi-helekai nia maa i-lodo di laangi maalama. Gei agu mee ala ne-helekai haga-moolee adu gi goodou, hagadele-ina i-nia dahuhu o-nia hale.

10:28  Hudee mmaadagu i digau ala e-daaligi tuaidina, gei e-deemee di-daaligi di mouli. Gei goodou gi-mmaadagu i God dela e-mee di-daaligi tuaidina mo-di mouli i-lodo di gowaa hagaduadua dee-odi.

10:29  Nia manu mamaangi e-lua e-mee di-hui gi teenedi hua e-dahi, gei dahi manu i-nia maa e-doo gi-hongo di gelegele ai maa di-godou Damana digi dumaalia-anga gii-doo.

10:30  Gei adu gi goodou, nia ngaahulu o godou libogo la-guu-lawa di dau.

10:31  Malaa, hudee mmaadagu, idimaa, goodou koia e-hagalabagau i-nia manu huogodoo.

10:32  “Tangada dela ga-haga-modongoohia-aga i-mua nia daangada bolo ia tangada ni-aagu, gei Au ga-haga-modongoohia-aga a-mee labelaa i-mua dogu Damana dela i-di langi.

10:33  Maa tangada ga-hai-baahi mai gi-di Au i-mua nia daangada, gei Au e-hai-baahi gi mee i-mua dogu Damana i-di langi.

10:34  “Goodou hudee hagamaanadu bolo Au ne-hanimoi belee gaamai di aumaalia gi henuailala. Deeai, Au hagalee ne-hanimoi belee gaamai di aumaalia, gei di hulumanu-dauwa.

10:35  Au ne-hanimoi belee hagangalua-aga i-lodo nia dama-daane gi-hai-baahi gi nadau damana, nia dama-ahina gi-hai-baahi gi nadau dinana, nia ahina dau-aga gi-hai-baahi gi nadau dinana dau-aga.

10:36  Nia hagadaumee o tangada ala koia e-huaidu, la-go digau dono hale.

10:37  “Tangada dela e-aloho i dono damana mo dono dinana la ogu nua, la-hagalee e-tau bolo e-hai dagu dama-agoago. Tangada dela e-aloho i dana dama-daane mo dana dama-ahina la ogu nua, la-hagalee e-tau bolo e-hai dagu dama-agoago.

10:38  Tangada dela hagalee kae dono loobuu ga-daudali-mai Au, geia hagalee e-tau bolo e-hai dagu dama-agoago.

10:39  Tangada dela e-daahi-hua dono mouli, geia ga-de-gidee dono mouli, gei tangada dela ga-de-hagahuodia eia dono mouli i-di-au, ia ga-gidee dono mouli.

10:40  “Tangada dela ga-benebene goodou, ko-Au hua dela ne-benebene go mee. Gei tangada dela e-benebene Au, geia ne-benebene hua Tangada dela ne-hagau-mai Au.

10:41  Tangada dela ga-benebene tangada kae-hegau a God, idimaa mee tangada kae-hegau ni God, tangada dela ne-benebene a-mee e-kae dono hui duhongo i-di hui o tangada kae-hegau. Gei tangada dela ga-benebene dana dangada hai-donu, idimaa mee tangada hai-donu, tangada dela ne-benebene a-mee e-kae dono duhongo hui i tuhongo o tangada hai-donu.

10:42  Au e-hagi-adu gi goodou di tonu, tangada ma-gaa-wanga dana ibu-wai magalillili gi dogu ihoo dulii i agu daangada aanei, idimaa mee tama-agoago ni-aagu, geia e-kae dono hui.”

Chapter 11

11:1  I-muli-hua Jesus ne-lawa ana helekai gi ana dama-agoago dilongoholu maa-lua, ge-Ia gaa-hana ga-aago mo-di agoago gi nia waahale ala e-hoohoo-mai.

11:2  Di madagoaa John Babdais nogo i-lodo di hale-galabudi ne-longono-ia nia mee a Christ ala ne-hai, geia ga-hagau hunu gau i ana dama-agoago gi Mee.

11:3  Meemaa ga-heeu gi Jesus, “Ma kooe dela nogo helekai iai a John bolo e-hanimoi, be gimaadou e-talitali tangada i-golo?”

11:4  Jesus ga-helekai, “Hula hagi-anga-ina gi John gulu mee ala ne-longono-ai ge ne-gidee:

11:5  Digau deegida gu-gidee, digau mmade nadau dudaginga gu-heehee, digau magi genegene gu-madammaa, digau longoduli gu-longono, digau mmade gu-haga-mouli-aga, mo di Longo-Humalia la-gu-agoago gi digau hagaloale.

11:6  E-maluagina go digau ala hagalee manawa-lua i-di-Au.”

11:7  Nia dama-agoago a John gaa-hula, gei Jesus ga-helekai gi digau dogologowaahee di hai o John, “Di-godou hula gi-baahi o John i-lodo di anggowaa, ma di-aha ne-belee mmada ginai goodou? Di aalek dela e-hahaangi i-di madangi?

11:8  Ma di-aha dela ne-hula ginai goodou belee mmada ginai? Taane dela e-ulu nia gahu madamada? Digau ala e-ulu nia goloo beelaa, le e-noho i-lodo nia hale king!

11:9  Hagia-mai ma-di-aha dela ne-hula ginai goodou belee mmada ginai? Di soukohp? Uaa, e-donu, gei goodou ne-mmada gi tangada dela e-aamua i-nia soukohp.

11:10  Idimaa John lago mee dela e-helekai-ai di Beebaa Dabu boloo: ‘God gu-helekai bolo Au ga-hagau dagu dangada kae-hegau i oo mua, e-hagatogomaalia doo ala.’

11:11  “Au e-hagi-adu gi goodou di tonu, bolo tangada ne-haanau i henuailala e-aamua i John Babdais ai. Gei tangada dela koia e-mugi-lala-loo i Teenua King o God di Langi le e-mada-aamua i John.

11:12  Di madagoaa o John nogo agoago di Longo-Humalia gaa-dae-mai gi dangi-nei, Teenua King o God di Langi la-gu-duadua i-nia heebagi maaloo, gei digau huaidu e-hagamada belee kumi di-maa.

11:13  Nia Beebaa o-nia Soukohp huogodoo mo Nnaganoho Moses gu-haga-modongoohia di hai Teenua King o God di Langi, mai i-mua gaa-dae-mai gi-di madagoaa John.

11:14  Maa goodou e-hiihai e-hagadonu nia agoago digaula, goodou gi-iloo bolo John la-go Elijah, dela ne-haga-modongoohia bolo e-hai-loo gi-hanimoi.

11:15  Tangada ono dalinga i-golo, gi-hagalongo!

11:16  “Gei-Au e-hagatau nia daangada dolomeenei gi di-aha? Digaula e-hai be nia damagiigi ala e-noho i-lodo nia gowaa huihui-mee. Di buini e-dahi e-wwolowwolo gi-di buini dela i-golo boloo,

11:17  ‘Gimaadou guu-hai madau daahili haga-hai-lodo gi-nia mee hai-daahili adu gi goodou, gei goodou digi gaalege. Gimaadou gu-daahili nia daahili tangada made, gei goodou digi tangitangi!’

11:18  Di madagoaa John ne-hanimoi, geia gu-hagaonge, digi inu nia waini, gei nia daangada e-hai bolo mee tangada gu-iai di hagataalunga huaidu i ono lodo.

11:19  Di madagoaa Tama-Tangada ne-hanimoi, ge-Ia gu-miami, gu-inu, gei digaula e-helekai boloo, ‘Mmada gi tangada hagalugai, e-inu nia waini, Mee di hoo ni digau hagabudu dagitedi mo digau huaidu.’ Di iloo-mee o God le e-donu ge hagamodongoohia go ana hegau.”

11:20  Jesus gu-hagadugina gi-nia daangada o-nia waahale ala nogo hai ana mogobuna, gei digaula digi huli-hoou, ga-helekai,

11:21  “E-huaidu adu gi-di-goe Chorazin! E-huaidu adu gi-di-goe, Bethsaida! Maa nei bolo nia mogobuna ala ne-hai-adu gi goolua la-ne-hai gi digau Tyre mo Sidon, digaula gu-ulu gi-lodo nadau goloo lodo-huaidu, guu-wanga nadau luaahi gi-hongo nadau libogo mai i-mua loo, e-haga-modongoohia-aga nadau maalui mo-di huli-hoou.

11:22  Malaa, Au bolo goolua gi-iloo bolo i-di Laangi Hagi-aga a God, God ga-mada-dumaalia gi digau o Tyre mo Sidon i goolua!

11:23  Goe go Capernaum, goe e-bida dahi-aga goe gi-di langi? Goe gaa-hudu gi-lodo di gowaa hagaduadua dee-odi! Maa nei bolo nia mogobuna ala ne-hai-adu gi-di-goe la-ne-hai gi Sodom, gei Sodom la-i-golo-hua dangi-nei.

11:24  Gi-iloo-e-goe bolo i-di Laangi Hagi-aga, God ga-koia ga-damana dono dumaalia gi Sodom i-di-goe!”

11:25  Di madagoaa deelaa, Jesus ga-helekai, “Tamana, Tagi o-di langi mo henuailala! Au e-danggee i dau haga-modongoohia ang-gi digau de-kabemee i au mee ala e-daalo hagammuni i digau kabemee mo digau e-iloo nia mee.

11:26  Uaa, Tamana, di mee deenei ne-hai-mai i do hiihai.

11:27  “Dogu Damana gu-dugu-mai nia mee huogodoo. Tangada e-iloo Tama ai, go Tamana hua, tangada e-iloo Tamana ai, go Tama hua e-iloo-Ia mo digau ala ne-hilihili go Tama belee haga-modongoohia-aga a-Mee.

11:28  “Lloomoi gi-di-Au, goodou huogodoo ala gu-daamaha i godou mee aamo, gei Au ga-gowadu di molooloo!

11:29  Goodou kae-ina dagu mee aamo-mee, dugu-ina gi godou nua, ge kaape-ina-mai i-di-Au, idimaa, Au e-manawa balabala ge hila-gi-lala i-di hagataalunga, gei goodou ga-gidee di-godou hagamolooloo.

11:30  Idimaa, dagu mee aamo-mee dela ga-gowadu le e-haingoohia, gei agu mee ala e-hagauda-adu le e-maamaa.”

Chapter 12

12:1  Digi duai, Jesus gaa-hana laa-lodo di gowaa dogi laagau-‘wheat’ i-di Laangi-Sabad, gei ana dama-agoago gu-hiigai, gaa-hagi nadau huwa-laagau ‘wheat’ gaa-gai.

12:2  Nia Pharisee ga-gidee, ga-helekai gi Jesus, “Meenei, mmada, au dama-agoago e-hai-baahi gi tadau haganoho Laangi-Sabad!”

12:3  Jesus ga-helekai, “Goodou digi daulia di hai a David i-di madagoaa o-mee mo ono ehoo ne-hiigai?

12:4  Mee mo ono ehoo ne-ulu gi-lodo di hale o God, gaa-gai nia palaawaa ala gu-tigidaumaha gi God, gei di-maa e-hai-baahi gi taganoho maa digaula gaa-gai nia palaawaa aalaa. Go digau hai-mee-dabu la-hua ala e-mee di-gai nia maa.

12:5  Goodou digi daulia nia haganoho Moses i-di hai o digau hai-mee-dabu o-di Hale Daumaha ala e-oho nia haganoho o-di Laangi-Sabad, i-di nadau ngalua i-lodo nia Laangi-Sabad huogodoo, gei digaula hagalee hala?

12:6  Goodou gi-iloo bolo ma di mee i-ginei e-koia e-aamua i-di Hale Daumaha!

12:7  Di Beebaa-Dabu e-helekai boloo, ‘Au e-hiihai-hua gi nnangaahai humalia, gei hagalee go tigidaumaha manu.’ “Maa goodou ga-iloo tadinga di mee deenei, gei goodou ga-deemee di-hagahuaidu nia daangada ala digi hai nadau mee hala.

12:8  Idimaa, Tama-Tangada la-go di Tagi o-di Laangi-Sabad.”

12:9  Jesus ga-hagatanga i-di gowaa deelaa, gaa-hana gi-lodo synagogee.

12:10  Taane made dono lima i-golo. Hunu daangada e-hiihai e-haga-huaidu a Jesus gii-ihala ga-heeu gi Mee, “Maa hagalee e-hai-baahi gi tadau haganoho maa tangada ga-hagahili dana dangada magi i-di Laangi-Sabad?”

12:11  Jesus ga-helekai, “Dolomaa tangada i goodou gaa-doo dana siibi gi-lodo di luwa llala i-di Laangi-Sabad, mee hagalee ga-dahi-aga a-mee hagalimalima gi-daha mo-di luwa deelaa?

12:12  Tangada la-koia e-hagalabagau i-di siibi! Deenei di mee Nnaganoho e-dumaalia-mai gi gidaadou gi-hagamaamaa-ina tangada i-di Laangi-Sabad.”

12:13  Jesus ga-helekai gi taane made dono lima, “Holohia doo lima gi-daha.” Gei taane deelaa gaa-holo dono lima, gei di-lima o-maa gu-humalia, guu-hai be dono lima dela i-golo.

12:14  Gei nia Pharisee gaa-hula, ga-haga-noho di nadau hai belee daaligi a Jesus gii-made.

12:15  Jesus ga-longono-ia di hai-baahi deenei, gaa-hana gi-daha mo-di gowaa deelaa. Digau dogologo gaa-hula dalia a-Mee, ge-Ia ga-hagahili nia magi huogodoo digaula.

12:16  Gei Mee gaa-bule gi digaula bolo gi-hude hagi-anga-ina Ia gi-nia daangada.

12:17  Mee ne-helekai beenei bolo gi-gila-ai nia helekai a God mai baahi soukohp Isaiah, boloo,

12:18  “Deenei dagu dangada hai-hegau ne-hilihili dela e-aloho-iei Au, gei e-tene ginai Au. Gei-Au ga-haga-uda dogu Hagataalunga gi Mee, gei Mee ga-haga-iloo ang-gi nia henua huogodoo di hai o dagu hagi-aga.

12:19  Mee hagalee lagamaaloo, be wolowolo, be haga-hohooho i-hongo nia-ala.

12:20  Mee hagalee hadi gi-daha di aalek dela guu-biga, be e-diinai di malama dela gu-dabadaba, gaa-dae-loo gi dana hagagila-aga di tonu gi-aali.

12:21  Nia daangada nnenua huogodoo ga-hagadagadagagee gi dono ingoo.”

12:22  Hunu daangada ne-laha-mai di-nadau daane deegida ge e-deemee di-leelee gi Jesus, idimaa, di hagataalunga huaidu gu i ono lodo. Jesus ga-hagahili di magi o-maa, guu-mee di-leelee, gu-gidee.

12:23  Digau dogologo gu-goboina huoloo, ga-heheeu, “Mee go Tama a David?”

12:24  Nia Pharisee ga-longono di mee deenei, ga-helekai, “Mee e-hagabagi nia hagataalunga huaidu idimaa nadau dagi go Beelzebul ne-dugu ang-gi Mee di mogobuna e-hai nia mee aanei.”

12:25  Gei Jesus gu-iloo nia hagamamaanadu digaula, ga-helekai, “Tenua dela e-dee-buni ono daangada ge e-heheebagi, la-hagalee mouli waalooloo! Di waahale be-di madahaanau dela e-dee-buni ge e-heheebagi, la-ga-mooho gi-daha!

12:26  Maa nia hagabuulinga Setan ga-heheebagi i nadau mehanga, malaa tenua o Setan la-ga-wwae-lua, ga-limalima dono mooho.

12:27  Goodou e-hai bolo Au e-hagabagi nia hagataalunga huaidu, idimaa Beelzebul ne-dugu-mai gi-di-Au di mogobuna di hagabagi. Malaa, koai dela ne-wanga gi godou gau-agoago di mogobuna e-hagabagi nia hagataalunga huaidu? Nia mee ala e-hai go digaula, le e-haga-modongoohia bolo goodou e-hai-gee.

12:28  Deeai, ma hagalee go Beelzebul, ma go di Hagataalunga o God dela ne-dugu-mai gi-di-Au di mogobuna e-hagabagi nia hagataalunga huaidu i-baahi nia daangada. Deenei le e-haga-modongoohia-aga bolo Teenua King o God la-gu i godou baahi.

12:29  “Deai tangada e-mee di-oho di hale o taane maaloo ga-gaiaa nia goloo o-maa ai, maa ia digi lawalawa-ina a-mee i-mua, ga-nomuli geia gaa-mee-laa di-kae nia goloo o-di hale o-maa.

12:30  “Tangada dela hagalee madalia Au, le e-hai-baahi mai gi-di-Au. Tangada dela hagalee hagabudu madalia Au, geia e-wweu gi-daha nia maa.

12:31  Deelaa-laa, Au e-hagi-adu gi goodou bolo nia hala huogodoo mo nnelekai huaidu huogodoo e-mee di-dumaalia ginai, gei di hala o-di helekai huaidu hai-baahi gi-di Hagataalunga-Dabu, e-deemee di-dumaalia ginai.

12:32  Tangada dela ga-helekai huaidu i Tama-Tangada, e-mee di-dumaalia ginai. Tangada dela ga-helekai huaidu i-di Hagataalunga-Dabu, e-deemee di-dumaalia ginai, dolomeenei gaa-hana-hua beelaa.

12:33  “Maa goodou gaa-dogi di laagau tomo hagadubuagina, gei di-maa gaa-huwa humalia. Maa goodou gaa-dogi di laagau tomo diliwoi, gei di-maa gaa-huwa huaidu. Goodou e-iloo di laagau mai i ono huwa.

12:34  Goodou e-hai be nia gihaa. Goodou e-helekai humalia, gei godou lodo le e-huaidu! Idimaa, di ngudu o tangada le e-helekai nia mee ala e-honu i-lodo dono manawa.

12:35  Tangada humalia e-haga-gila-aga ana mee humalia, i mee e-honu i-nia mee humalia. Tangada huaidu e-haga-gila-aga ana mee huaidu, i mee e-honu i-nia mee huaidu.

12:36  “Au e-hagi-adu gi goodou bolo i-di Laangi Hagi-aga, nia daangada huogodoo e-hai gi-haga-modongoohia-aga nadau balu-helekai huogodoo ala ne-hai.

12:37  Godou helekai le e-hagi-aga goodou, be goodou e-donu, be e-hala.”

12:38  Digau haga-donudonu haganoho mono Pharisee ga-helekai gi Jesus, “Tangada agoago, gimaadou e-hiihai e-mmada gi au mogobuna.”

12:39  Jesus ga-helekai, “Nia daangada dolomeenei gu-huaidu huoloo gei gu-hagalee manawa-dahi! Goodou bolo Au gi-heia dagu mogobuna? Di mogobuna e-hai-adu gi goodou ai, dela-hua go di mogobuna ne-hai gi soukohp Jonah.

12:40  Di hai o Jonah nogo noho i-lodo tinae o-di iga damanaiee i-nia laangi e-dolu ge dolu boo, e-hai be Tama-Tangada, gaa-noho i-lodo di gelegele i-nia laangi e-dolu ge dolu boo.

12:41  Di Laangi Hagi-aga, digau o Nineveh ga-tuu-aga ga-hagahuaidu goodou, idimaa, digaula guu-huli gi-daha mo nadau huaidu i-di nadau longono-ginaadou nia agoago a Jonah. Gei-Au e-hagi-adu gi goodou bolo ma tangada i-kinei koia e-aamua i Jonah!

12:42  Di Laangi Hagi-aga, di king-ahina o Sheba ga-duu-aga ga-hagahuaidu goodou, idimaa, mee ne-hanimoi hagamogowaa i dono henua, gaa-hana-loo gi-longono-ia nia agoago kabemee King Solomon. Gei-Au e-hagi-adu gi goodou bolo tangada i-kinei e-koia e-aamua i Solomon!

12:43  “Di madagoaa di hagataalunga huaidu ga-ulu gi-daha mo tangada, mee e-heehee i-lodo di anggowaa e-halahala dana madagowaa e-hagamolooloo-ai, gei digi gidee,

12:44  gei mee ga-maanadu i ono lodo boloo, ‘Au gaa-hana gi-di gowaa dela ne-hanimoi-iei au.’ Gei mee gaa-hana ga-ulu gi-lodo ga-gidee-ia di gowaa la-gu-aadee, gu-madammaa, gei gu-benebene gi-humalia.

12:45  Mee ga-ulu gi-daha, ga-laha-mai ana hagataalunga e-hidu ala e-huaidu gi-nonua, gaa-noho i-lodo. Nomuli, tangada deenei koia ne-huaidu i-di matagidagi. Deenei di mee gaa-hai gi digau huaidu dolomeenei.”

12:46  Jesus nogo helehelekai hua igolo gi-nia daangada, gei tinana mo nia duaahina o-maa ga-dau-mai gi-tua di hale, e-hiihai e-heetugi gi Mee.

12:47  Tangada ga-helekai gi Jesus, “Meenei, do dinana mo o duaahina i-tua di hale e-hiihai e-heetugi-adu.”

12:48  Jesus ga-helekai-anga, “Koai go dogu dinana? Koai go ogu duaahina?”

12:49  Gei Mee gaa-hihi dono lima gi ana dama-agoago, ga-helekai, “Mmada! Aanei go dogu dinana mo ogu duaahina!

12:50  Tangada dela e-haga-gila-aga di manawa o dogu Damana dela i-di langi, deelaa go dogu duaahina-daane, duaahina-ahina, mo dogu dinana.”

Chapter 13

13:1  Di laangi la-hua, Jesus ne-hagatanga i-di hale, gaa-hana, gaa-noho i tongotai belee hai ana agoago.

13:2  Digau dogologowaahee gu-haganiga i dono gili, gaa-hidi-iei Mee, gaa-gaga gi-hongo di boodi, gaa-noho i-lodo, gei nia daangada e-tuu i tongotai.

13:3  Mee nogo agoago i-nia ala-kai, e-hagi ang-gi digaula nia mee e-logo boloo, “Dahi daane ne-hana ga-haga-nonnono ana lii.

13:4  Dana haga-nonnono i-lodo di hadagee deelaa, hunu lii guu-too gi-hongo di ala-dulii, gei nia manu gu-mmaangi-mai, guu-gai nia maa.

13:5  Hunu maa ne-monnono gi-lodo di gowaa haduhadu, di gowaa dela e-hogoohi ono gelegele, gei guu-tomo limalima, idimaa, nia gelegele la-hagalee llala.

13:6  Di madagoaa di laa ne-dii, gei nia lii ala ne-tomo, la-guu-mae, idimaa, nia aga o-nia maa digi tomo gi-di gowaa llala.

13:7  Hunu lii ne-monnono gi-lodo nia geinga duduia. Di madagoaa nia geinga duduia ne-tomo-aga, gu-hagadeaadee nia lii gi-dee-tomo.

13:8  Hunu lii ne-monnono gi-hongo nia gelegele humalia, guu-tomo, guu-huwa dagi-llau, dagi-modoono, dagi-motolu.”

13:9  Jesus ga-hagaodi dana agoago, ga-helekai, “Tangada ono dalinga i-golo, gi-hagalongo!”

13:10  Ana dama-agoago ne-lloomoi gi Jesus, ga-heeu gi Mee, “Goe e-aha dela e-hai-hegau i-nia ala-kai ang-gi nia daangada?”

13:11  Jesus ga-helekai, “Idimaa, ma-gu-dumaalia-adu gi goodou gi-iloo nia mee ngala huogodoo o Teenua King o God di Langi, gei hagalee ang-gi digaula.

13:12  Tangada dela iai dana mee, geia e-haga-uda-anga ginai nia mee e-logo gii-dohu gi-nonua. Gei tangada dela dana mee ai, dana mee dulii dela i dono baahi, le e-daa gi-daha.

13:13  Deenei tadinga o agu ala-kai agoago: digaula e-mmada, gei e-de-gidee, e-hagalongo gei e-de-longono be e-de-modongoohia.

13:14  Deenei-laa di kokohp o Isaiah e-helekai i digaula boloo, ‘Digau aanei ga-hagalongo, ga-hagalongo, gei e-de-iloo, digaula gaa-mmada, gaa-mmada, gei e-de-gidee.

13:15  Idimaa, nia hagamaanadu digaula gu-hamaaloo, nia dalinga digaula gu-bonodia, nia golomada digaula gu-dee-gida. Gei di-maa hagalee hai beenei, nadau golomada e-mee-hua di-mmada, nadau dalinga e-mee di-hagalongo, gei nadau hagamaanadu le e-modongoohia, gei digaula ga-lloomoi gi-muli gi-di-Au, gei Au ga-hagahili digaula. Aanei nnelekai a God.’

13:16  “Gei goodou gu-maluagina, idimaa, godou golomada e-gidee, godou dalinga e-longono.

13:17  Au e-hagi-adu gi goodou di tonu bolo nia soukohp dogologo mo nia daangada a God dogologo e-hiihai huoloo e-mmada gi-nia mee ala ne-mmada ginai goodou, gei digaula e-deemee. Digaula e-hiihai e-hagalongo gi-nia mee ala ne-hagalongo ginai goodou, gei digaula e-deemee.

13:18  “Hagalongo, kaabee-ina tadinga di ala-kai o tangada haga-nonnono lii:

13:19  Digau ala gu-longono nia helekai o Teenua King o God, gei e-de-iloo, le e-hai gadoo be nia lii ala ne-monnono gi-hongo di ala-dulii. Di hagataalunga huaidu ga-hanimoi, gaa-kae nia mee ne-haga-monnono gi nadau lodo.

13:20  Nia lii ala ne-monnono gi-hongo di gowaa haduhadu, aalaa go digau e-hagalongo gi-nia agoago, ga-limalima ga-tenetene i-di nadau longono nia maa.

13:21  Gei hagalee mau i nadau baahi, i-di madagoaa di haingadaa be taaligi gaa-tale gi digaula i-di gili nia agoago aanei, digaula ga-limalima-hua di-kili gi-daha nadau hagadonu.

13:22  Gei nia lii ala ne-monnono gi-mehanga nia geinga duduia, go digau ala ne-longono nia agoago, gei te-nnoomaalia o-di mouli-nei, mo-di hiihai gi-nia maluagina gu-haga-deaadee nia agoago aalaa, gaa-hidi-ai digaula ga-dee-huwa.

13:23  Gei nia lii ala ne-monnono gi-hongo nia gelegele humalia, go digau ala ne-longono nia helekai ga-iloo, gaa-huwa dagi-llau, dagi-modoono, dagi-motolu.”

13:24  Jesus ne-hagi ang-gi digaula tuai ala-kai: “Teenua King o God di Langi e-hai beenei: Dahi daane hai-hadagee ne-haga-nonnono ana lii humalia i-lodo dana hadagee.

13:25  Dahi boo hua, di madagoaa nia daangada guu-kii, tangada hagadaumee ga-hanimoi, ga-haga-nonnono ana lii huaidu i-mehanga nia lii humalia aalaa, gaa-hana.

13:26  Nia lii humalia gaa-tomo, gu-daamada gaa-huwa, gei nia geinga huaidu gu-tomo-aga labelaa.

13:27  Digau hai-hegau ga-lloomoi gi mee, ga-helekai boloo, ‘Meenei, nia lii humalia ne-haga-nonnono kooe gi-lodo dau hadagee, ma nia geinga huaidu ne-lloomoi i-hee?’

13:28  Tangada dana hadagee ga-helekai boloo, ‘Tangada hagadaumee dela ne-hai di mee deenei.’ Digaula ga-heeu, ‘Goe e-hiihai bolo gimaadou gi-daagia nia geinga huaidu aalaa?’

13:29  Mee ga-helekai, ‘Deeai. Maa goodou ga-daagi nia geinga huaidu, gei goodou ga-daagi labelaa nia laagau humalia dalia nia geinga huaidu aalaa.

13:30  Goodou heia nia geinga huaidu mono laagau humalia gii-tomo ngaadahi, gii-dae gi-di laangi dela e-hadi-ai nia maa. Gei-au ga-helekai gi digau hadi huwa-laagau gi-daagia nia geinga huaidu i-mua, gi-nnoodia gii-hai nia uu-mee e-dudu, gei nia huwa-laagau humalia la-ga-hagabudu, gaa-dugu gi-lodo dogu hale benebene-mee.’ ”

13:31  Jesus ne-helekai gi digaula i-tuai ala-kai: “Teenua King o God di Langi le e-hai be-di lii-laagau-‘mustard’. Tangada ne-kae di-maa, gaa-dogi i-lodo dana gowaa dogi-mee.

13:32  Di lii deenei, dela koia e-dulii-loo i-nia lii huogodoo, ga-tomo-aga gaa-hai di laagau damanaiee i-nia laagau huogodoo. Gei nia manu ga-mmaangi-mai gaa-hai nadau waehongo i-hongo nia manga.”

13:33  Jesus ne-helekai ang-gi digaula i-tuai ala-kai: “Teenua King o God di Langi le e-hai beenei. Di ahina ne-kae ana ‘yeast’, ga-unugi gi-nia palaawaa, gei nia palaawaa aalaa la-guu-tanga huogodoo.”

13:34  Jesus e-agoago nia mee huogodoo aanei gi digau dogologo i-nia ala-kai. Mee e-agoago-hua i-nia ala-kai gi digaula.

13:35  Mee ne-hai beenei bolo gi-gila-ai nia helekai soukohp boloo, “Au e-hai-hegau i-nia ala-kai i dogu madagoaa e-helekai gi digaula. Au ga-haga-modongoohia gi digaula nia mee huogodoo ala e-dee-modongoohia mai taamada henuailala.”

13:36  Jesus ga-hagatanga gi-daha mo digau dogologo, ga-ulu gi-lodo di hale. Ana dama-agoago ga-lloomoi gi Mee, ga-helekai, “Hagamodongoohia-ina di ala-kai o-nia geinga huaidu ala i-lodo di hadagee le e-hai bolo-aha?”

13:37  Jesus ga-helekai, “Tangada ne-haga-nonnono ana lii humalia, la-go Tama-Tangada.

13:38  Di hadagee la-go henuailala. Nia lii humalia la-go digau Teenua King o God. Nia geinga huaidu la-go nia hoo o Setan.

13:39  Di hagadaumee dela ne-haga-nonnono ana lii geinga huaidu, la-go Setan. Di madagoaa e-hadi nia huwa-laagau la-go di hagaodi o-di madagoaa. Digau hadi huwa-laagau, la-go digau di-langi.

13:40  Di hai o-nia geinga huaidu ala e-hagabudu-mai gi-di gowaa e-dahi e-kae e-dudu i-lodo di ahi, e-hai gadoo be-di hai dela gaa-hai i-di laangi hagaodi.

13:41  Tama-Tangada ga-hagau ana gau di-langi gi-daawaa gi-daha mo dono Heenua King digau huogodoo ala e-hai nia daangada gii-too gi-lodo di huaidu, mo nia daangada ala e-haihai nia mee huaidu huogodoo ala i-golo,

13:42  bolo gi-kilia digaula gi-lodo di ahi maaloo, di gowaa e-tangitangi-ai, ge e-gadigadi nadau niha.

13:43  Gei nia dama a God ga-maahina gadoo be-di laa i-lodo Teenua King o di-nadau Damana. Tangada ono dalinga i-golo, gi-hagalongo!

13:44  “Teenua King o God di Langi e-hai beenei: Taane gaa-gida di maluagina dela e-ngala i-lodo di gelegele. Gei taane gaa-danu labelaa di-maa, gu-tenetene huoloo, gaa-hana gaa-hui gi-daha ana mee huogodoo ala e-hai-mee ginai, gaa-hana gaa-hui di gowaa.

13:45  “Teenua King o God di Langi e-hai beenei: Tangada e-halahala ana hadu lodo-baehua humalia.

13:46  Geia ga-gidee-ia di hadu kaedahi hagalabagau, geia gaa-hana, gaa-hui gi-daha ana mee huogodoo, gaa-hui di hadu lodo-baehua deelaa.

13:47  “Teenua King o God di Langi le e-hai labelaa beenei: Digau hai-iga ne-hudu nadau gubenge gi-lodo di monowai belee kumi nnagadilinga iga huogodoo.

13:48  Gei di gubenge la-guu-honu, digaula ga-hudi-aga gi tongotai, gaa-noho gi-lala belee hili nia iga. Nia iga humalia gaa-haa gi-lodo nia begedu, nia iga huaidu gaa-kili gi-daha.

13:49  Deenei di mee gaa-hai i-di hagaodi o-di madagoaa. Digau di-langi ga-hagau e-hili digau huaidu huogodoo gi-daha mo digau humalia,

13:50  gaa-kili digau huaidu gi-lodo di ahi maaloo i-di gowaa e-tangitangi-ai digaula, gei e-gadigadi nadau niha.”

13:51  Jesus ga-heeu gi digaula, “Goodou gu-iloo nia mee aanei?” Digaula ga-helekai, “Uaa.”

13:52  Ge-Ia ga-helekai gi digaula, “Malaa, tangada haga-donudonu haganoho dela ma-gaa-hai tama-agoago i-lodo Teenua King o God di Langi, le e-hai be tagi o-di hale dela e-daa ono maluagina hoou mo pobo gi-daha mo dono hale benebene-mee.”

13:53  Jesus ga-haga-lawa ana ala-kai nogo agoago gi digaula, ga-hagatanga gi-daha mo-di gowaa deelaa,

13:54  gaa-hana gi dono guongo, ga-agoago i-lodo synagogee, gei digaula gu-goboina huoloo, ga-heeu boloo, “Di kabemee mono haga-goboina a-maa ne-gaamai i-hee?

13:55  Mee hagalee go tama a taane hau-hale? Tinana o-Maa hagalee go Mary, ono duaahina go James, Joseph, Simon mo Judas?

13:56  Gei ono duaahina-ahina la hagalee aanei i tadau baahi? Malaa, nia mee a-Maa ne-gaamai i-hee?”

13:57  Gei digaula gu-haga-balumee a-Mee. Jesus ga-helekai gi digaula, “Nia soukohp e-hagalaamua i-nia gowaa huogodoo, gei hagalee hagalaamua go dono guongo donu mo ono gau donu.”

13:58  Jesus digi hai ana mogobuna e-logo i-golo, idimaa, digaula hagalee hagadonu.

Chapter 14

14:1  Di madagoaa deelaa, Herod di tagi o Galilee ga-longono ia di hai o Jesus.

14:2  Mee ga-helekai gi ana daane hai-hegau, “Ma go John Babdais hua dela ne-mouli-aga, i Mee ono mogobuna e-hai ana mee haga-goboina dangada.”

14:3  Idimaa, Herod ne-hai dana haga-iloo bolo gi-kumidia John, gei digaula gaa-nnoo nia lima o-maa, gaa-haa a-mee gi-lodo di hale-galabudi. Mee ne-hai di mee deenei idimaa go Herodias, go di lodo o dono duaahina-daane go Philip.

14:4  John ne-helekai gi Herod boloo, “Ma hagalee donu di hai doo lodo gi Herodias!”

14:5  Herod gu-hiihai bolo ia ga-daaligi a John, geia e-lliga huoloo i digau o Jew ala e-hai bolo John la di soukohp.

14:6  I-di laangi haanau o Herod, tama-ahina a Herodias ne-duu-aga, gaa-hai ana gaalege i-mua digau dogologo. Gei Herod gu-tenetene huoloo,

14:7  gaa-hai dana hagababa, “Au e-hagamodu bolo au ga-gowadu gi-di-goe di-ingoo-hua di mee dela e-hiihai ginai goe!”

14:8  Tama-ahina ga-hagi-anga telekai dono dinana, ga-dangi-anga gi Herod, “Gaamai gi-di-au di libogo o John Babdais i-hongo di pileedi!”

14:9  Di king gu-manawa-gee huoloo i nnelekai tama-ahina deelaa, idimaa mee gu-hagababa i-mua digau tagamiami dogologo bolo ia e-hagagila di hiihai o tama-ahina.

14:10  Mee ga-helekai gi digaula bolo gi-tuudia di uwa o John dela i-lodo di hale-galabudi.

14:11  Digaula ga-gaamai di libogo o-maa i-hongo di pileedi gi tama-ahina, geia gaa-kae gi dono dinana.

14:12  Nia dama-agoago a John ga-lloomoi gaa-kae tuaidina o-maa, gaa-danu, gaa-hula ga-haga-iloo gi Jesus.

14:13  Jesus ne-longono di longo deenei, ge-Ia ga-hagatanga i-di gowaa deelaa, gaa-hana i-di boodi gi-di gowaa lomo modogoia. Gei nia daangada ne-longono-ginaadou dono hana, ga-hagatanga i nadau waahale ga-daudali a-Mee laa-uda.

14:14  I dono doo-aga i-di boodi, ge-Ia ga-gidee digau dogologowaahee, Mee gu-aloho huoloo i digaula, ga-hagahili nadau magi.

14:15  Ga-hiahi-ia di mee, ana dama-agoago ga-mmaanege-adu gi Mee, ga-helekai, “Ma-guu-boo, gei di-maa di anggowaa lomo deenei, hagau-ina digaula gii-hula, e-hui nadau meegai i-lodo nia waahale lligi aalaa.”

14:16  Jesus ga-helekai, “Digaula hagalee hagau. Wanga-ina nia mee digaula e-gai!”

14:17  Digaula ga-helekai gi Mee, “Ma nia palaawaa hua e-lima ge lua dama-iga ala i madau baahi.”

14:18  Jesus ga-helekai, “Gaamai nia maa gi-di-Au.”

14:19  Gei mee ga-helekai gi-nia daangada gii-noho gi-hongo nia geinga tolo, gei Mee ga-dahi-aga nia palaawaa e-lima ge lua dama-iga, gaa-hila gi-di langi, ga-danggee gi God, ga-ginigini nia palaawaa aalaa, gaa-wanga gi ana dama-agoago gi-duwwee gi-nia daangada.

14:20  Digaula huogodoo gu-miami gu-maaluu. Gei nia dama-agoago gaa-haa nia mee ala ne-dubu, guu-hai nia gada e-madangaholu maa-lua.

14:21  Togologo daane ala ne-miami, digau e-lima-mana-(5,000), nia ahina mono dama digi daulia.

14:22  Jesus ga-helekai gi ana dama-agoago gii-kaga gi-hongo di boodi gii-hula i ono mua gi-di baahi i-golo tai deelaa, gei Mee ga-hagau digau dogologo aalaa gii-hula.

14:23  I-muli dana hagau nia daangada gii-hula, gei Mee gaa-hana gi-hongo tama gowaa nnoonua belee dalodalo. Gaa-dae-loo gi-di hiahi, Mee nogo modogoia-hua.

14:24  Di madagoaa deelaa, gei di boodi la-gu i tungaalodo di tai deelaa, gu-huduhudu go nia beau, idimaa, di madangi la-guu-gono-mai i-mua.

14:25  Gaa-dae-loo gi-di boo, mehanga di laa e-dolu mo-di laa e-ono luada, Jesus ga-haele-adu gi digaula i-hongo tai.

14:26  Nia dama-agoago a-Maa gaa-mmada gi-Mee e-haele i-hongo tai, gei gu-wwolowwolo mmaadagu bolo ma di ieidu.

14:27  Di madagoaa-hua deelaa, Jesus ga-helekai gi digaula, “Goodou hagadagadagagee. Ma ko-Au deenei. Goodou hudee mmaadagu!”

14:28  Peter ga-helekai, “Meenei Tagi. E-donu ma Kooe deenaa, helekai-mai gi-di-au gi-haele-adu au gi-di-Goe i-hongo tai.”

14:29  Jesus ga-helekai, “Hanimoi-laa!” Gei Peter ga-doo-iha gi-daha mo-di boodi, gaa-duu gi-hongo tai ga-haele gi Jesus.

14:30  Di madagoaa-hua Peter ne-longono-ia nia mahi o-di madangi, geia gu-madagu ga-daamada ga-abulu gi-lala. Geia gaa-wolo boloo, “Meenei! Hila-mai!”

14:31  Di madagoaa-hua deelaa, Jesus ga-daahi-adu dono lima ga-dahi-aga a-mee, ga-helekai, “Do hagadonu le e-dulii, goe e-aha dela e-manawa-lua?”

14:32  Meemaa gaa-kaga gi-hongo di boodi, gei di madangi guu-kila.

14:33  Ana dama-agoago ga-pala ang-gi Jesus i-hongo di boodi, ga-helekai, “Ma e-donu-hua bolo Goe go Tama a God!”

14:34  Digaula ga-dele-adu, ga-dau-aga i Gennesaret.

14:35  Digau o-di guongo deelaa ga-modongoohia Jesus, ga-haga-iloo gi digau magi o-di gowaa deelaa mono gowaa ala e-hoohoo-mai gi-laha-mai nadau gau magi gi Jesus.

14:36  Digaula ga-tangi gi Mee gi-dumaalia ang-gi digau magi gii-pili-hua gi-di bida o dono gahu, malaa, digau magi huogodoo ala ne-pili gi dono gahu la-guu-hili nadau magi.

Chapter 15

15:1  Nia Pharisee mono gau haga-donudonu haganoho ne-lloomoi i Jerusalem, ga-heeu gi Jesus,

15:2  “Au dama-agoago le e-aha ala e-haga-balumee nia haganoho tadau maadua-mmaadua mai i-mua? Digaula hagalee tono nadau lima i-mua nadau miami!”

15:3  Jesus ga-helekai, “Gei goodou e-aha ala e-hagalee daudali nia haganoho a God, e-daudali-hua godou hangaahai?

15:4  God gu-helekai bolo goe gi-hagalabagau-ina do damana mo do dinana. Maa tangada gaa-hai hagahuaidu dono damana be go dono dinana e-humalia-hua e-daaligi gii-made.

15:5  Gei goodou gu-agoago bolo maa tangada dana mee i-golo e-mee di-hagamaamaa dono damana mo dono dinana, geia e-hai boloo, ‘Di mee deenei la di mee ni God,’

15:6  gei mee hagalee hai gi-hagalaamua dono damana. Malaa, deenei di-godou hai ne-haga-balumee nia helekai a God, mai i godou daudali-hua godou agoago.

15:7  Goodou digau hai-hegau ngudu-golomada! Ma e-donu-hua go nia haga-modongoohia soukohp Isaiah i goodou boloo,

15:8  ‘God gu-helekai bolo digau aanei e-hagalaamua hua Au mai i-lodo nadau helekai, gei nadau manawa e-mogowaa-loo i-di-Au.

15:9  Malaa, nadau hai-daumaha mai gi-di-Au le e-balumee-hua, idimaa, digaula e-agoago nia haganoho dangada bolo ma go agu haganoho.’ ”

15:10  Jesus ga-gahi-mai nia daangada dogologo, ga-helekai, “Goodou hagalongo gi-modongoohia humalia.

15:11  Ma hagalee go di mee dela e-ulu gi-lodo di ngudu dela e-haga-dogolia tangada, ma go di mee dela e-hanaga i-lodo di ngudu dela e-hai tangada gi hagalee madammaa.”

15:12  Nia dama-agoago a-maa ga-mmaanege-adu gi Mee, ga-helekai, “Goe e-iloo bolo nia Pharisee la-gu-hagawelewele gi dau agoago?”

15:13  Jesus ga-helekai, “Nia laagau huogodoo ala hagalee ne-dogi go dogu Damana i-di langi, le e-daagi gi-daha.

15:14  E-hai di-aha, digaula nia dagi deegida o digau deegida. Maa tagi deegida gaa-dagi dono ehoo deegida, meemaa huogodoo la-gaa-too gi-lodo di lua.”

15:15  Peter ga-helekai, “Meenei, haga-modongoohia-ina mai gi gimaadou dau ala-kai deenaa.”

15:16  Jesus ga-helekai, “Ma e-aha goodou digi modongoohia labelaa?

15:17  Goodou e-de-iloo bolo nia mee ala e-wanga gi-lodo di ngudu tangada e-hula gi-lodo tinae, gaa-lawa ga-lloomoi gi-daha mo tuaidina?

15:18  Gei nia mee ala e-lloomoi i-lodo di ngudu o tangada, ne-daamada i-lodo di manawa, e-haga-dogolia tangada.

15:19  Idimaa, nia maanadu huaidu e-daamada i-lodo di manawa o tangada, daaligi dangada, mouli hai be-di manu, gaiaa, hai-kai-tilikai, mo tamu-dangada.

15:20  Aanei nia mee ala e-haga-dogolia tangada. Gei di miami, hagalee tono ono lima, la-hagalee hai tangada gi-dogolia.”

15:21  Jesus ne-hagatanga i-di gowaa deelaa, gaa-hana gi-di gowaa e-hoohoo gi-nia waahale Tyre mo Sidon.

15:22  Di ahina Canaan e-noho i-di gowaa deelaa, ga-hanimoi, ga-helekai gi Mee, “Meenei, Tama a David, hila-mai gi-di-au. Dagu dama-ahina gu-iai di hagataalunga huaidu i dono baahi. Mee gu-duadua huoloo.”

15:23  Jesus digi helekai gi mee. Nia dama-agoago a-maa ne-mmaanege-adu, ga-helekai, “Meenei, hagabagia di ahina deenaa, dela e-haga-deaadee gidaadou. Mee dela hua e-hagalongoaa mai tadau muli!”

15:24  Jesus ga-helekai, “Au ne-hagau-mai-hua gi-nia siibi o Israel ala ne-hula-gee.”

15:25  Di ahina deelaa ga-hanimoi-hua, gaa-bala ang-gi Mee, ga-helekai, “Meenei, hagamaamaa-ina mai au.”

15:26  Jesus ga-helekai gi mee, “Ma hagalee donu bolo e-daa nia meegai nia dama, gaa-kili gi-nia paana.”

15:27  Di ahina deelaa ga-helekai, “Meenei, e-donu huoloo, gei nia paana e-gai nia mee dubu ala e-monnono i-lala teebele o nadau gau aamua.”

15:28  Jesus ga-helekai gi mee, “Goe di ahina maaloo do hagadonu. Dau mee dela e-hiihai ginai ga-gila-adu.” Di madagoaa hua deelaa gei tama-ahina a-maa guu-hili dono magi.

15:29  Jesus ne-hagatanga i-golo, ga-hanadu i tongotai Tai o Galilee, gaa-gaga-adu gi-hongo tama-gonduu, gaa-noho i-golo.

15:30  Digau dogologowaahee ga-laha-mai nadau gau mmade nadau dudaginga, deegida, dumaaloo, deemee di-leelee, mono hagadilinga magi e-logo, ga-laha-mai gi-mua o-Mee, gei Mee ga-hagahili nia magi digaula.

15:31  Digau dogologowaahee aalaa gu-goboina di-nadau gidee digau deemee di-leelee gu-leelee, digau magi dumaaloo gu-humalia, digau mmade nadau dudaginga gu-taele, gei digau deegida gu-gidee. Digaula gu-haga-hagaamu huoloo di God o Israel.

15:32  Jesus ga-gahi-mai ana dama-agoago, ga-helekai gi digaula, “Au gu-aloho huoloo i digau dogologo aanei, idimaa, nia laangi guu-dolu nogo noho-iei digaula i dogu baahi. Dolomeenei digaula gu-nadau meegai ai. Gei-Au hagalee hagau digaula, idimaa, digaula digi miami, gi-de-hagalibelibeina hua i-di-nadau hula.”

15:33  Ana dama-agoago ga-helekai, “Ma di anggowaa deenei, gimaadou e-gaamai madau meegai i-hee gii-dohu ang-gi digau dogologowaahee aanei?”

15:34  Jesus ga-heeu gi digaula, “Nia palaawaa e-hia i godou baahi?” Digaula ga-helekai, “E-hidu mono dama-iga.”

15:35  Jesus ga-helekai gi digau dogologowaahee aalaa gii-noho gi-lala gi-hongo di gelegele.

15:36  Gei Mee ga-daahi-aga nia palaawaa e-hidu mono iga, ga-dalodalo, ga-ginigini nia palaawaa, gaa-wanga gi ana dama-agoago, gei digaula gaa-duwwe nia maa gi digau dogologowaahee aalaa.

15:37  Digau huogodoo gu-miami gu-maaluu. Nia dama-agoago a Jesus gaa-haa nia meegai ala ne-dubu, guu-hai nia gada e-hidu.

15:38  Togologo daane ala ne-miami digau e-haa-mana-(4,000), nia ahina mono dama digi daulia.

15:39  Gei Jesus ga-hagau digaula, gaa-gaga gi-hongo di boodi gaa-hana gi tenua go Magadan.

Chapter 16

16:1  Nia Pharisee mono Sadduccee ne-lloomoi gi Jesus belee hai a-Mee gii-hala. Ne-helekai gi Mee gi-heia dana mogobuna gi-gidee-ginaadou bolo God le e-madalia Ia.

16:2  Jesus ga-helekai gi digaula, “Di madagoaa di laa ga-ulu, gei goodou e-helekai boloo, ‘Daiaa le e-humalia, idimaa, di langi le e-mmee.’

16:3  Gei luada-loo goodou e-helekai boloo, ‘Dangi-nei la-ga-uwauwa, idimaa, di langi le e-mmee gei e-haga-bouli.’ Malaa, goodou e-mee di-iloo nia hagamodongoohia i-di gili di langi, gei e-deemee di-iloo nia haga-modongoohia o-nia laangi aanei!

16:4  “Digau dolomeenei la-gu-huaidu huoloo, gei gu-hagalee manawa-dahi! Goodou e-tangi-mai gi-di-Au i-di mogobuna? Deeai, delaa hua go di mogobuna ne-hai gi Jonah gaa-hai ko-Au adu gi goodou.” Gei Mee ga-diiagi digaula gaa-hana.

16:5  Nia dama-agoago a Jesus ne-dau-adu gi-di baahi i-golo o tai, ga-langahia bolo ginaadou digi kae nadau palaawaa.

16:6  Jesus ga-helekai gi digaula, “Goodou gii-pula i-nia ‘yeast’ o-nia Pharisee mono Sadduccee.”

16:7  Digaula ga-daamada ga-helehelekai i nadau mehanga, “Mee e-helekai beenei, idimaa, gidaadou digi gaamai tadau palaawaa.”

16:8  Jesus gu-iloo-Ia hua nia helekai digaula, ga-heeu, “Goodou e-aha ala e-helehelekai bolo ma nia palaawaa ai? Godou hagadonu le e-lligi!

16:9  Goodou digi donu? Goodou e-hagalee langahia nia palaawaa e-lima ala ne-ginigini gaa-duwwe gi-nia daane e-lima-mana-(5,000)? Nia gada e-hia ala ne-haa go goodou?

16:10  Gei nia palaawaa e-hidu ang-gi nia daane e-haa-mana-(4,000), nia gada e-hia ne-haa go goodou?

16:11  Goodou e-aha ala hagalee modongoohia bolo Au hagalee e-helehelekai-adu gi goodou i-nia palaawaa? Goodou pula i goodou i-nia ‘yeast’ o-nia Pharisee mo nia Sadduccee!”

16:12  Ana dama-agoago gu-modongoohia laa bolo ma hagalee go nia ‘yeast’ ala i-lodo di palaawaa e-haga-ligaliga-iei ginaadou, ma go nia agoago o-nia Pharisee mo nia Sadduccee.

16:13  Jesus ne-hana gi-di gowaa hoohoo gi-di waahale Caesarea Philippi, ge-Ia ga-heeu gi ana dama-agoago, “Nia daangada le e-helehelekai bolo Tama-Tangada la-koai?”

16:14  Digaula ga-helekai, “Hunu daangada e-hai bolo Goe go John Babdais, hunu daangada bolo go Elijah, hunu daangada bolo go Jeremiah be tei dangada i-nia soukohp.”

16:15  Gei Mee ga-heeu gi digaula, “Goodou e-hai bolo Au koai?”

16:16  Simon Peter ga-helekai, “Goe go di Mesaia, go Tama di God Mouli!”

16:17  Jesus ga-helekai gi mee, “Gu-humalia adu gi-di-goe, Simon, tama a John. Ma hagalee tangada ne-haga-modongoohia-adu gi-di-goe di tonu o-di mee deenei, ma go dogu Damana dela i-di langi.

16:18  Malaa, Au e-hagi-adu gi-di-goe Peter: goe go di hadugalaa, gei-Au ga-haga-duu dagu nohongo-dabu i-hongo di hagamau hadugalaa deenei, gei di made e-deemee di-hagahuaidu di-maa.

16:19  Au ga-gowadu nia gii Teenua King o God di Langi. Nia mee huogodoo ala ma-gaa-tai kooe i henuailala, e-tai labelaa i-di langi. Au mee ala ma-gaa-huge i henuailala, e-huge labelaa i-di langi.”

16:20  Jesus ga-helekai gi ana dama-agoago bolo gi-hudee hagi-aga-ina bolo Ia go di Mesaia.

16:21  Daamada i-di madagoaa deenei, Jesus ga-helekai hagammaa ang-gi ana dama-agoago, “Au e-hai-loo gii-hana gi Jerusalem e-kae dogu hagaduadua damanaiee mai baahi nia dagi mmaadua, mo nia dagi hai-mee-dabu, mo nia gau haga-donudonu haganoho. Au ga-daaligi gii-made, gei i-muli nia laangi e-dolu gei Au ga-haga-mouli-aga.”

16:22  Peter gaa-lahi Jesus gi-mada-ginaua, gaa-hai ono ngudu gi mee, “Meenei dogu Dagi, Dimaadua gi-bule-ina di mee deenei gi-de-tale-adu gi-di-Goe!”

16:23  Jesus gaa-huli gi-daha mo Peter ga-helekai, “Setan, hana gi-daha mo Au! Goe e-haga-deaadee Au, idimaa, au maanadu la nia maanadu-hua dangada, hagalee nia maanadu mai baahi o God.”

16:24  Jesus ga-helekai gi ana dama-agoago, “Maa dahi dangada bolo ia e-hanimoi gi-di-Au, geia gi-wanga-ina dehuia dono huaidina, aamo-ina dono loobuu, daudalia-mai Au.

16:25  Idimaa, tangada dela e-hiihai e-benebene dono mouli, geia e-deemee di-gidee di mouli, gei tangada dela ga-deheia dono mouli i-di-Au, geia ga-gidee di mouli.

16:26  Di humalia aha e-kae go tangada maa ia ga-hai-mee gi henuailala hagatau, nomuli ga-de-gidee dono mouli? Hagalee, ma di-mee i-golo e-dahidamee i do mouli?

16:27  Tama-Tangada ga-hoohoo dono hanimoi i-lodo nia madamada o dono Damana, ana gau di-langi e-madalia. Ge-Ia gaa-hui tangada-nei mo tangada-nei gi-di hagatau o nadau hegau.

16:28  Au e-hagi-adu gi goodou di tonu bolo hunu gau i-ginei ga-hagalee mmade, gaa-dae-loo gi nadau gidee gi Tama-Tangada dela ga-hanimoi gadoo be dahi king.”

Chapter 17

17:1  I-muli nia laangi e-ono, Jesus gaa-lahi a Peter mo tagahaanau go James mo John gi tomo dahi gonduu nnoonua, ga-mada-ginaadou i-golo.

17:2  Gei Mee gu-dina-gee i nadau mua, ono hadumada gu-maahina-iaa be-di laa, gei ono gahu guu-kene gu-madamada.

17:3  Ana dama-agoago dogodolu guu-mmada gi Moses mo Elijah e-helehelekai gi Jesus.

17:4  Peter ga-helekai, “Meenei dogu Dagi, ma koia e-humalia go tadau noho i-ginei! Maa Goe e-hiihai, gei au gaa-hau nia damaa-hale e-dolu i-ginei: e-dahi ni-oou, e-dahi ni Moses, ge dahi ni Elijah.”

17:5  Di madagoaa-hua a-mee nogo helehelekai beenei, di gololangi maahina gaa-gahu digaula, gei di lee ga-hanimoi i-lodo di gololangi, ga-helekai, “Deenei dagu Dama dela e-aloho-iei Au. Goodou hagalongo gi Mee!”

17:6  Ana dama-agoago ne-longono di lee deenei, digaula gaa-pala-ia gi-lala i nadau mmaadagu huoloo.

17:7  Jesus ga-hanimoi gaa-bili gi digaula, ga-helekai, “Tuu-i-nua, goodou hudee mmaadagu!”

17:8  Gei digaula ga-mmada-aga, go Jesus hua modogoia i-golo.

17:9  Di-nadau lloo-ia i-tomo di gonduu, gei Jesus ga-helekai gi digaula, gi-hudee hagi-anga-ina Ia gi dahi dangada nadau mee ne-mmada ginai, gaa-dae-loo gi Tama-Tangada ga-mouli-aga mai i-di made.

17:10  Ana dama-agoago ga-heeu gi Jesus, “Ma e-aha digau haga-donudonu haganoho ala e-helekai bolo Elijah e-hanimoi i-mua Tama-Tangada?”

17:11  Jesus ga-helekai, “E-donu, Elijah le e-hanimoi i-mua, e-hagatogomaalia nia mee huogodoo.

17:12  Gei-Au e-hagi-adu bolo Elijah la-gu-hanimoi, gei nia daangada la-digi modongoohia a-mee, nogo hai-hua a-mee be nadau hiihai. Deelaa hogi di hai digaula ga-hagaduadua Tama-Tangada.”

17:13  Ana dama-agoago gu-iloo-laa bolo mee e-helehelekai i-di hai o John Babdais.

17:14  I di-nadau dau-adu gi-baahi nia daangada, taane ga-hanimoi ga-dogoduli-adu gi-mua o Jesus,

17:15  ga-helekai, “Meenei, hila-mai-mua gi dagu dama-daane. Mee e-magi bolebole. Dono madagoaa gaa-magi, gei mee dela hua e-hinga gi-lodo di ahi, be e-doo gi-lodo nia wai, holongo e-logo e-hai beenei.

17:16  Au ne-laha-mai a-mee gi au dama-agoago, gei digaula e-deemee di-hagahili a-mee.”

17:17  Jesus ga-helekai, “Goodou digau de-hagadonu ge e-hai-gee. Au e-hai-loo gii-noho waalooloo behee i godou baahi? E-waalooloo behee dogu hagakono dogu manawa i goodou? Laha-mai tama-daane gi-di-Au!”

17:18  Jesus ga-helekai haga-huudonu gi-di hagataalunga huaidu dela i-lodo tama-daane, gei di hagataalunga huaidu gu-ulu-mai gi-daha i-di madagoaa-hua deelaa, gei tama-daane la-guu-hili.

17:19  Gei nia dama-agoago a Jesus ga-mmaanege-adu gi Jesus, ga-heeu, “Meenei, gimaadou ne-aha ala ne-deemee di-hagabagi di hagataalunga huaidu gi-daha mo tama-daane deelaa?”

17:20  Jesus ga-helekai, “Idimaa, godou hagadonu le e-lligi. Au e-hagi-adu gi goodou di tonu bolo maa godou hagadonu ga-llauehe be-di lii-laagau-‘mustard’, goodou e-mee di-helekai gi-di gonduu boloo, ‘Hana gi-golo!’ gei di-maa e-hana. Goodou e-mee di-hai nia mee huogodoo.

17:21  [Di hagaonge mo talodalo lahua e-mee di-hagabagi nnagadilinga hagataalunga huaidu beenei.”]

17:22  Nia dama-agoago a Jesus ne-dagabuli-mai gi Galilee, gei Jesus ga-helekai gi digaula, “Tama-Tangada gu-hoohoo gaa-wanga gi-lodo nia lima o-nia daangada.

17:23  Digaula ga-daaligi a-Mee, gei i-muli nia laangi e-dolu, ga-haga-mouli-aga.” Ana dama-agoago gu-lodo-huaidu huoloo gi telekai deenei.

17:24  Jesus mo ana dama-agoago gaa-dau-adu gi Capernaum. Taane hagabudu dagitedi o-di Hale Daumaha ga-hanimoi gi Peter, ga-heeu, “Dau dangada agoago guu-hui dagitedi di Hale Daumaha?”

17:25  Peter ga-helekai, “Uaa.” Peter ga-ulu-adu gi-lodo di hale, gei Jesus ga-helekai matagidagi, “Simon, goe e-hagamaanadu bolo-aha? Ma koai dela belee hui nadau dagitedi gi-nia king o henuailala: go digau donu o tenua, be go digau mai i-daha?”

17:26  Peter ga-helekai, “Go digau mai i-daha.” Jesus ga-helekai, “Maa e-hai beenaa, malaa, digau donu tenua la-hagalee hui nadau dagitedi.

17:27  Malaa, gidaadou hagalee hai-baahi gi digaula, gei goe hana gi-di monowai, hudua dau uga. Di iga dela gaa-hudi kooe matagidagi, gei goe ga-gidee di bahihadu hamaaloo i-lodo dono ngudu, e-dohu-hua di hui dogu dagitedi daumaha mo do dagitedi. Kae-ina, huia tau dagitedi gi digaula.”

Chapter 18

18:1  Di madagoaa deelaa, gei ana dama-agoago ga-mmaanege-adu gi Jesus, ga-heeu, “Ma koai dela e-kaedahi e-aamua i Teenua King o God di Langi?”

18:2  Jesus ne-gahi-mai tamagiigi dulii ga-haga-duu i-mua digaula,

18:3  ga-helekai, “Au e-hagi-adu di tonu bolo maa goodou hagalee huli gii-hai be nia dama-lligi, goodou e-deemee di-ulu i Teenua King o God di Langi.

18:4  Tangada dela e-kaedahi e-aamua i Teenua King o God di Langi la-go tangada dela e-dugu-eia gi-lala gii-hai be tama deenei.”

18:5  Gei tangada dela ga-benebene di tama dulii beenei i dogu ingoo, geia ne-benebene-hua Au.

18:6  “Tangada dela ma-ga-hagahuaidu tama e-dahi dela e-hagadonu Au i-nia dama-lligi beenei, gii-doo a-mee gi-lodo di huaidu, e-humalia-hua e-lawalawa dono uwa ginai di hadu damanaiee ga-haga-abulu gi-lodo di moana.

18:7  E-huaidu ang-gi henuailala, idimaa nia mee aanei e-hai nia daangada gii-kili gi-daha nadau hagadonu! Nia mee aanei ala koia e-hai, gei e-huaidu huoloo ang-gi tangada dela e-hai nia mee aanei gii-kila.

18:8  “Maa doo lima, be go doo wae, e-hai goe gii-doo gi-lodo di huaidu, duudia gi-daha. Ma koia e-humalia adu gi-di-goe di-ulu gi-lodo di mouli dee-odi mo doo lima be doo wae hua e-dahi, koia e-humalia i-di-goe ma-gaa-hudu gi-lodo di ahi dee-odi mo oo lima mo oo wae dogomaalia.

18:9  “Maa do golomada e-hai goe gi-huaidu, kabee-ina gi-daha. Ma koia e-humalia adu gi-di-goe di-ulu i-di mouli dee-odi mo do golomada hua e-dahi, i do benebene o golomada e-lua gaa-hudu gi-lodo di ahi dee-odi.

18:10  “Goodou hudee haga-balumee-ina tangada e-dahi i digau ala e-lligi beenei, gei gi-iloo bolo nadau gau di-langi e-noho i-baahi dogu Damana dela i-di langi.

18:11  [Idimaa, Tama-Tangada ne-hanimoi belee haga-mouli digau ala guu-nngala.]

18:12  “Goodou e-hagamaanadu bolo-aha: Taane ana siibi e-lau, gei e-dahi gaa-ngala, mee gaa-hai dana-aha? Mee gaa-dugu nia siibi e-matiwa maa-hiwa gi-miami i-hongo di gonduu, gaa-hana ga-halahala dana siibi dela ne-ngala.

18:13  Au e-hagi-adu gi goodou di tonu bolo di madagoaa a mee ga-gidee-ia di-maa, dono tene gi siibi deenei la koia e-damana i dono tene ang-gi nia siibi e-matiwa maa-hiwa ala digi nngala.

18:14  E-hai gadoo be di-godou Damana i-di langi e-de-hiihai gi tangada e-dahi i digau ala e-lligi gii-ngala.

18:15  “Maa do duaahina guu-hai dana mee huaidu adu gi-di-goe, hana gi-baahi o mee, hagi-anga-ina dana mee huaidu dela ne-hai, malaa heia mada-goolua. Maa mee guu-donu-adu gi-di-goe, goe ne-haga-heaga a-mee.

18:16  Maa mee hagalee hagalongo-adu gi-di-goe, lahia dau dangada e-dahi be dogolua madalia goe, gii-hai be nia helekai di Beebaa-Dabu e-hai boloo: ‘Nia daangada dogolua be dogodolu e-hai-ai nia haga-modongoohia nia mee huogodoo.’

18:17  Maa mee hagalee hagalongo gi digaula, hagi-anga-ina gi-di nohongo-dabu. Maa mee hagalee hagalongo gi-di nohongo-dabu, dugu-ina-hua a-mee be tangada tuadimee be tangada hagabudu dagitedi.

18:18  “Au e-hagi-adu gi goodou bolo godou mee huogodoo ala ma-gaa-tai i henuailala le e-tai labelaa i-di langi, godou mee huogodoo ala ma-gaa-huge i henuailala, le e-huge labelaa i-di langi.

18:19  “Gei-Au e-hagi-adu labelaa gi goodou bolo maa dogolua gaa-buni i dahi mee i-di nau dalodalo i henuailala, gei dogu Damana i-di langi e-dugu-anga di-nau mee dela e-tangi-ai.

18:20  Idimaa, di madagoaa dela e-buni-ai nia daangada dogolua be dogodolu i dogu ingoo, gei Au e-madalia ginaadou.”

18:21  Peter ga-menege-mai gi-baahi o Jesus ga-heeu, “Meenei Tagi, nia holongo e-hia e-dumaalia-iei au gi dogu duaahina ma-ga-hai-hala mai gi-di-au? Nia holongo e-hidu?”

18:22  Gei Jesus ga-helekai, “Deeai, nia holongo e-hidu e-haga-lagolago gi-di madahidu.

18:23  Idimaa, Teenua King o God di Langi le e-hai gadoo be-di king dela ne-maanadu bolo ia ga-haga-dina nia boibana ana gau hai-hegau.

18:24  Mee ga-daamada dana hagadina deenei, gei tangada e-dahi ga-dagi-mai gi ono mua, tangada deenei e-boibana gi mee nia pauna bahihadu silber e-guli-(1,000,000).

18:25  Tangada deenei ana bahihadu ai e-dohu di-hui dono boibana, gei di king ga-helekai bolo mee e-hui be di hege gi-daha mo dono lodo mo ana dama, mo ana mee huogodoo ala e-hai-mee ginai, e-hui-ai dono boibana.

18:26  Tangada hai-hegau deelaa ga-dogoduli gi-mua o mee, ga-helekai, ‘Meenei, goe manawa-dumaalia mai gi-di-au, au gaa-hui-laa dogu boibana.’

18:27  Di king deelaa la-gu-aloho, gu-dumaalia gi mee i dono boibana, ga-hagau a-mee gii-hana.

18:28  Gei taane deelaa ga-hagatanga, gaa-hana ga-heetugi gi dono ehoo hai-hegau dela ne-boibana gi mee ana bahihadu silber e-lau, gei mee gaa-kumi a-mee gaa-llomi dono akii, ga-helekai, ‘Huia do boibana!’

18:29  Di hoo hai-hegau o-maa ga-dogoduli gi-mua o mee ga-dangidangi gi mee, ‘Meenei, goe manawa-dumaalia mai gi-di-au, au gaa-hui-laa dogu boibana adu gi-di-goe.’

18:30  Gei mee digi hagalongo, gaa-lahi a-mee, gaa-hudu gi-lodo di hale-galabudi, ga-galabudi gaa-dae-loo gi-di madagoaa a-mee ma-gaa-hui dono boibana.

18:31  Gei nia hoo hai-hegau o-maa ala i-golo gaa-mmada gi-di mee dela ne-hai, gu-lodo-huaidu huoloo, gaa-hula, ga-hagi-anga gi di king nia mee huogodoo ala ne-hai.

18:32  Gei di king ga-gahi-mai tangada hai-hegau deelaa, ga-helekai gi mee, ‘Goe tangada hai-hegau huaidu, idimaa, au gu-dumaalia-adu gi-di-goe do boibana hagatau, i doo dangi mai gi-di-au.

18:33  Gei goe ne-aha dela digi dumaalia gi do ehoo hai-hegau, be au dela ne-dumaalia-adu gi-di-goe?’

18:34  Di king deelaa gu-hagawelewele huoloo, gaa-hudu a-mee gi-lodo di hale-galabudi, e-hagaduadua gaa-dae-loo gi-di madagoaa a-mee ma-gaa-hui dono boibana hagatau.”

18:35  Gei Jesus ga-helekai, “Dela gadoo di hai o dogu Damana i-di langi gaa-hai-adu gi goodou, tangada-nei mo tangada-nei, maa goodou ga-hagalee dumaalia ang-gi godou duaahina aga i-lodo godou manawa.”

Chapter 19

19:1  Di madagoaa Jesus ne-haga-lawa ana helekai, gei Mee ga-hagatanga i Galilee, gaa-hana gi Judea i-di baahi i-golo di monowai Jordan.

19:2  Digau dogologowaahee ga-daudali a-Mee, Mee ga-hagahili nia magi digaula.

19:3  Hunu Pharisee ga-lloomoi gi Jesus ga-heeu gi Mee belee haga-ihala a-Mee, “Ma e-hai-donu go tadau haganoho dela e-dumaalia gi tei daane gi-diagia dono lodo i-di ingoo hua tadinga dela e-hiihai ginai eia?”

19:4  Jesus ga-helekai, “Goodou digi daulia i-lodo di Beebaa-Dabu dela e-helekai boloo, ‘I-taamada-loo, Mee dela ne-hai nia mee huogodoo, la-ne-hai taane mo-di ahina.’

19:5  “God ne-helekai boloo, ‘Deenei tadinga taane gaa-tanga gi-daha mo dono damana mo dono dinana, ga-buni-anga gi dono lodo, gei meemaa dogolua guu-hai tuaidina e-dahi.’

19:6  “Meemaa gu-hagalee hai nia huaidina e-lua, guu-hai-hua tuaidina e-dahi, malaa, tangada e-wwae di mee dela gu-haga-puni go God gi-di gowaa e-dahi ai.”

19:7  Gei nia Pharisee ga-heeu gi Mee, “Moses e-aha dela gu-haganoho bolo taane la-gi-heia dana beebaa haga-maewae, geia gaa-mee di-maewae gi-daha mo dono lodo?”

19:8  Jesus ga-helekai, “Moses ne-dumaalia adu gi goodou gi-maewae, idimaa, goodou e-aago-ngadaa, gei mai i taamada di mee deenei hagalee nogo hai.

19:9  Gei-Au e-hagi-adu gi goodou bolo maa taane ga-diiagi dono lodo i tei hadinga i-daha mo tee-manawa-dahi o-di ahina, ga-hai-lodo labelaa gi tuai ahina, mee gu-ihala, guu-hai di huaidu hai be-di manu.”

19:10  Nia dama-agoago a Jesus ga-helekai, “Maa dela e-hai beenei i-mehanga taane mo-di ahina hai-lodo, e-humalia-hua hagalee hai go di lodo.”

19:11  Jesus ga-helekai, “Ma hagalee bolo huogodoo e-mee di-daudali di agoago deenei, go digau-hua ala gu-dumaalia ginai mai baahi o God.

19:12  Idimaa, nia hagadilinga hadinga e-logo gaa-hidi-ai tangada ga-deemee di-hai dono lodo. Hunu gau ne-haanau i-di ala deelaa. Hunu gau, idimaa nia daangada ne-hai digaula beelaa. Hunu gau hagalee hai-lodo idimaa go Teenua King o God di Langi. Tangada dela e-mee di-kae di agoago deenei, geia gi-hagagila-aga-ina.”

19:13  Nia daangada ne-laha-mai nadau dama gi Jesus bolo gi-haga-uda-ina ginai ono lima gi-dalodalo i-digaula, gei nia dama-agoago a-Maa gaa-wwou gi digaula.

19:14  Gei Jesus ga-helekai, “Dumaalia ang-gi nia dama gi-lloomoi gi-di-Au. Hudee daahia digaula, idimaa Teenua King o God di Langi la ni digau beenei.”

19:15  Gei Mee ga-haga-uda ono lima gi-hongo nia dama, nomuli ga-hagatanga gaa-hana.

19:16  Dahi daane ne-hanimoi gi Jesus ga-heeu, “Meenei, tangada agoago, di humalia behee e-hai-loo gii-hai ko-au, gei au gaa-mee di-hai-mee gi-di mouli dee-odi?”

19:17  Jesus ga-helekai, “Goe e-aha dela e-heeu mai gi-di-Au be dehee di mee dela e-humalia? Tangada hua-e-dahi dela e-humalia. Maa goe e-hiihai gi-di mouli dee-odi, haga-kila-ina-aga ana haganoho.”

19:18  Gei mee ga-heeu, “Nia haganoho behee?” Gei Jesus ga-helekai, “Hudee daaligi tangada gii-made, hudee mouli hai be-di manu, hudee gaiaa, hudee hai-kai-tilikai,

19:19  hagalaamua-ina do damana mo do dinana, aloho i tangada i do baahi gii-hai be do aloho i-di-goe.”

19:20  Tama-daane deelaa ga-helekai gi Jesus, “Nia haganoho huogodoo aanaa la-guu-lawa di-hai ko-au. Ma di mee labelaa i-golo e-hai-loo gii-hai ko-au?”

19:21  Jesus ga-helekai, “Ma bolo goe e-hai-loo gi-odi-anga, hana, huia gi-daha o goloo huogodoo. Wanga-ina nia bahihadu gi digau hagaloale, gei goe ga-maluagina i-di langi, gei goe hanimoi, daudalia-mai Au.”

19:22  Di madagoaa tama-daane ne-longono-ia nia helekai aanei, geia gaa-hana manawa-gee huoloo, idimaa, mee tangada maluagina.

19:23  Jesus ga-helekai gi ana dama-agoago, “Goodou gi-iloo bolo e-haingadaa huoloo ang-gi tangada maluagina di ulu i Teenua King o God di Langi.

19:24  Au e-hagi-adu labelaa gi goodou bolo ma koia e-mada-haingadaa ang-gi tangada maluagina di ulu i Teenua King o God, i-di manu-‘camel’ ma-ga-ulu laa-lodo di bongoo di iwi dui mee.”

19:25  Ana dama-agoago ala ne-longono di mee deenei, gu-homouli huoloo, ga-heeu, “Malaa, koai dela e-mee di haga-mouli?”

19:26  Jesus ga-huli-adu gi digaula, ga-helekai, “I-baahi o-nia daangada di mee deenei e-deemee di-gila, gei i-baahi o God nia mee huogodoo e-mee di-kila!”

19:27  Gei Peter ga-helekai gi mee, “Meenei, gimaadou guu-kili gi-daha madau mee huogodoo, gu-daudali-adu Goe. Dehee-laa di-madau hui?”

19:28  Jesus ga-helekai, “Au e-hagi-adu gi goodou di tonu bolo goodou ala ne-daudali-mai Au la-gaa-noho gi-hongo nia lohongo-aamua e-madangaholu maa-lua, gaa-dagi nia madawaawa madangaholu maa-lua o Israel, i-di madagoaa Tama-Tangada gaa-noho i-hongo dono lohongo-king madamada, i-di madagoaa e-haga-hoou-ai nia mee huogodoo.

19:29  Digau huogodoo ala guu-kili gi-daha nadau hale, nadau duaahina, nadau damana, nadau dinana, nadau dama be go nadau gowaa idimaa go dogu ingoo, digaula gaa-kae dagi-llau gi-nonua, ga-hai-mee gi-di mouli e-dee-odi.

19:30  Malaa, digau dogologo ala i-mugi-mua dolomeenei, la-ga-i-muli, gei digau dogologo ala i-mugi-muli dolomeenei, la-ga-i-mua.

Chapter 20

20:1  “Teenua King o God di Langi e-hai gadoo be taane hai-hadagee ne-hana haga-luada-loo belee halahala ana daangada e-ngalua i dana hadagee-waini.

20:2  Mee ga-hagababa ang-gi digaula bolo ia gaa-hui-laa ginaadou gi-di hui donu ngalua, silber e-dahi i-di laangi e-dahi, mee ga-hagau digaula e-ngalua i-lodo dana hadagee-waini.

20:3  Di laa e-hiwa, gei mee gaa-hana labelaa gi-di gowaa huihui-mee, ga-gidee nia daangada nadau moomee ai.

20:4  Mee ga-helekai gi digaula, ‘Goodou hula labelaa ngalua i-lodo dagu hadagee-waini. Au gaa-hui-laa goodou gi-di hui dela e-donu.’

20:5  Digaula gaa-hula, gei mee gaa-hana labelaa di laa e-madangaholu maa-lua mo-di laa e-dolu, gaa-hai go dana hai lahua nogo hai luada.

20:6  Di laa e-lima, gei mee gaa-hana labelaa gi-di gowaa huihui-mee, ga-gidee-ia labelaa digau i-golo nadau moomee ai. Mee ga-heeu gi digaula, ‘Goodou e-nohonoho beleiaha di madagoaa waalooloo di-mee ne-hai ai?’

20:7  Digaula ga-helekai gi mee boloo, ‘Idimaa tangada e-haga-ngalua gimaadou ai.’ Gei mee ga-helekai gi digaula boloo, ‘Goodou hula labelaa ngalua i-lodo dagu hadagee-waini.’

20:8  “Ga-hiahi-ia di-mee, tangada dana hadagee ga-gahi-mai tagi o-di moomee gi-gahigahia-mai digau ngalua, huia digaula, daamada gi digau ala ne-ngalua muliagi ga-hagalawa gi digau ala ne-ngalua matagidagi.

20:9  Digau ala ne-daamada ne-ngalua di laa e-lima guu-hui, tangada e-dahi e-hui gi-di bahihadu-silber e-dahi.

20:10  Digau ala ne-daamada ne-ngalua mai luada le e-hagamaanadu bolo ginaadou gaa-hui damana i digau ala ne-ngalua muliagi, gei deeai, tangada e-dahi e-hui gi-di bahihadu-silber e-dahi.

20:11  Digaula ne-kumi nadau bahihadu, ga-helekai-tamu i tangada dana hadagee,

20:12  boloo, ‘Digau aanei ne-ngalua-hua i-di aawaa hua e-dahi, gei gimaadou gu-duadua i-di laangi dogomaalia i-di laa, gei goe ne-hui gimaadou be-di mee e-dahi.’

20:13  Tangada dana hadagee ga-helekai gi tangada e-dahi i digaula boloo, ‘Dogu ihoo hagaaloho-nei, au digi halahalau-ina goe. Gidaua guu-donu ngaadahi bolo ma di bahihadu-silber hua e-dahi i-di laangi e-dahi.

20:14  Kae-ina doo hui, hana gi doo hale. Deenei dogu hiihai belee hui digau ala ne-gahi-mai muliagi, gadoo be doo hui dela ne-gowadu gi-di-goe.

20:15  Au hagalee donu i dagu haga-hai-hegau agu bahihadu donu aanei gi dogu hiihai? Be goe e-dubua gi dogu dumaalia ne-hai?’ ”

20:16  Gei Jesus ga-helekai, “Digau ala muliagi, gaa-hula laa-mua, gei digau mugi-mua, gaa-hula laa-muli.”

20:17  Di madagoaa Jesus ne-hana gi Jerusalem, ge-Ia ga-haga-dagabuli-mai ana dama-agoago dilongoholu maa-lua gi-mada-ginaadou,

20:18  ga-helekai gi digaula, “Goodou hagalongo, gidaadou gaa-hula gi Jerusalem gi-di gowaa dela e-wanga-ai Tama-Tangada, gaa-lahi gi-baahi digau dagi hai-mee-dabu mono gau haga-donudonu haganoho, ga-hagi-aga, ga-daaligi gii-made.

20:19  Digaula gaa-wanga a-Mee gi digau tuadimee, e-hai ginai nadau tene gi-haga-mamaawa-ina, gi-daudau-ina gi-di loobuu, gei i-muli nia laangi e-dolu, gei Mee ga-hagamouli-aga!”

20:20  Di lodo Zebedee ne-hanimoi gi Jesus mo ana dama-daane dogolua, ga-dogoduli gi-mua o Jesus, gaa-dangi gi Mee.

20:21  Jesus ga-heeu, “Ma di-aha dela e-hiihai ginai goe?” Di ahina deelaa ga-helekai, “Meenei, heia dau hagababa mai gi-di-au, bolo Goe ga-haga-noho agu dama-daane dogolua aanei, e-dahi i do baahi gau-donu, gei e-dahi i do baahi gau-ihala i do madagoaa ma-gaa-king-iei Goe.”

20:22  Jesus ga-helekai gi-nia dama-daane aalaa, “Goolua e-de-iloo di-gulu mee dela e-tangi-ai. Goolua e-mee di-inu di ibu o di hagaduadua dela ga-inu-iei-Au?” Meemaa ga-helekai, “Gimaua e-mee.”

20:23  Jesus ga-helekai labelaa gi meemaa, “E-donu bolo goolua e-mee di-inu dagu ibu, gei au ogu donu ai e-hilihili be koai e-noho i dogu baahi gau-donu, be i dogu baahi gau-ihala, idimaa, go digau hua ala gu-hagatogomaalia go Tamana e-hai-mee gi-nia lohongo aalaa.”

20:24  Nia dama-agoago dilongoholu ne-longono-ginaadou, gu-hagawelewele huoloo gi tagahaanau deenei.

20:25  Jesus ga-gahi-mai digaula huogodoo gi-di gowaa e-dahi, ga-helekai gi digaula, “Goodou e-iloo bolo nia dagi o digau tuadimee e-mogobuna di-benebene digau o nadau henua, gei digau aamua e-dagi nia daangada.

20:26  Gei e-hagalee hai beenei i godou mehanga. Maa iai tangada i goodou bolo ia gi-aamua, geia gii-hai tangada hai-hegau ni goodou.

20:27  Maa iai tangada i goodou e-hiihai e-hai di tagi aamua, geia gii-hai di hege.

20:28  E-hai gadoo be Tama-Tangada dela ne-hanimoi, hagalee bolo nia daangada gi-hege-anga gi-de-Ia, gei e-hege gi-nia daangada, ge e-wanga dono mouli belee haga-dagaloaha digau dogologo.”

20:29  Di madagoaa Jesus mo ana dama-agoago ne-hagatanga i Jericho, digau dogologowaahee gu-daudali digaula.

20:30  Nia daane deegida dogolua e-noho i taalinga di ala, ga-longono bolo Jesus e-hanadu-laalaa, meemaa ga-daamada ga-wwolowwolo, “Meenei, Tama a David! Aloho-mai gi gimaua!”

20:31  Digau dogologo aalaa gaa-wwou gi meemaa gi-hudee hagalongoaa. Gei meemaa koia ne-wwolowwolo gi-nonua, “Meenei, Tama a David! Aloho-mai gi gimaua!”

20:32  Jesus gaa-duu, ga-gahigahi meemaa ga-heeu, “Ma di-aha dela e-hiihai ginai goolua bolo Au gi-heia-adu?”

20:33  Meemaa ga-helekai, “Meenei, gimaua e-hiihai bolo mau golomada gi-gidee labelaa!”

20:34  Jesus gu-aloho i meemaa, gaa-bili gi nau golomada, gei di madagoaa hua deelaa, ginaua gu-gidee, ga-daudali a Jesus.

Chapter 21

21:1  Di madagoaa Jesus mo ana dama-agoago ne-hoohoo-adu gi Jerusalem, digaula gaa-dau i Bethphage i-di Gonduu Olib. Jesus ga-hagau ana dama-agoago dogolua gii-hula i-mua,

21:2  ga-helekai, “Hula gi-lodo tama-waahale dela i gulu mua. Goolua ga-gidee di ‘donkey’ e-lawalawa mo dana dama-‘donkey’ i dono baahi. Wwedee-ina, laha-mai gi-di-Au.

21:3  Maa tangada ga-heeu-adu, goolua helekai gi mee boloo, ‘Tagi e-hiihai e-hai-hegau-ai’, gei mee ga-limalima ga-dumaalia-adu nia maa.”

21:4  Nia mee aanei ne-hai bolo gi-kila-ai nia helekai soukohp boloo:

21:5  “Haga-iloo ang-gi di waahale Zion boloo, Mmada, di-godou king e-hanadu gi goodou! Mee e-manawa hila-gi-lala ge e-hanimoi i-hongo di ‘donkey’-ahina mo dana dama-‘donkey’.”

21:6  Nia dama-agoago dogolua gaa-hula gaa-hai gii-hai be nia helekai Jesus ne-hai ang-gi ginaua.

21:7  Meemaa ga-laha-mai di ‘donkey’ mo dana dama, gaa-wanga nau gahu gi-hongo nia maa, gei Jesus gaa-gaga gi-hongo tama-‘donkey’.

21:8  Digau dogologowaahee guu-holo nadau gahu laa-hongo di ala. Hunu gau ne-hele-mai nadau manga-laagau gaa-holo labelaa laa-hongo di ala.

21:9  Digau dogologo ala e-taele i-mua o Jesus mo digau ala e-lloomoi i-muli e-dadaahili hagaamu, “Hagaamuina Tama a David! God gi-hagahumalia-ina a-Mee dela e-hanimoi i-di ingoo o Dimaadua. Hagaamuina God!”

21:10  Di madagoaa Jesus ne-ulu gi Jerusalem, digau o-di waahale hagatau ga-hagalongoaa, ga-heheeu, “Taane la-koai deenei?”

21:11  Digau dogologowaahee ga-helekai, “Soukohp Jesus deenei, mai Nazareth i Galilee.”

21:12  Jesus ne-ulu gi-lodo di Hale Daumaha, ga-hagabagi nia daangada huogodoo huihui-mee, mono daangada e-huihui gi-daha nadau goloo. Mee ga-hulihuli gi-lala nia deebele digau waahei bahihadu mo nia lohongo digau huihui mwuroi.

21:13  Mee ga-helekai gi digaula boloo, “Ma-guu-hihi i-lodo di Beebaa-Dabu boloo, ‘Dogu Hale Daumaha e-haga-ingoo bolo di hale hai-dalodalo,’ “gei goodou guu-hai di-maa be-di hale gaiaa!”

21:14  Digau deegida mono gau mmade nadau dudaginga gu-lloomoi gi Jesus i-lodo di Hale Daumaha, gei Mee ga-hagahili nia magi digaula.

21:15  Nia dagi hai-mee-dabu mono gau haga-donudonu haganoho gu-hagawelewele i-di nadau gidee ana hegau humalia ala ne-hai, mo di-nadau gidee nia damagiigi e-wwolowwolo i-lodo di Hale Daumaha boloo, “Hagaamuina Tama a David!”

21:16  Digaula ga-heeu gi Jesus, “Goe e-longono nia mee digaula ala e-helekai-ai?” Jesus ga-helekai, “Uaa, au e-longono. Goodou digi daulia i-lodo di Beebaa-Dabu dela e-helekai boloo, ‘Goe gu-aago di hagaamu gi-nia damagiigi, mo nia dama lligi.’ ”

21:17  Jesus ga-hagatanga i-baahi digaula gaa-hana gi-daha mo-di waahale damana deelaa, gaa-hana gi Bethany, di gowaa e-hagamolooloo-iei Mee i-di boo.

21:18  Hagaluada-loo dono daiaa, Jesus gaa-hana labelaa gi-di waahale damana deelaa, gei Mee gu-hiigai.

21:19  Ge-Ia ga-gidee di laagau-‘fig’ i taalinga di ala, ga-hanadu gi-di maa, gei digi gidee nia huwa, nia lau hua. Gei Mee ga-helekai gi-di laagau deelaa, “Goe hudee huwa labelaa!” Di madagoaa-hua deelaa, gei di laagau la-guu-mae.

21:20  Ana dama-agoago ne-gidee di-mee deenei, gei gu-goboina huoloo, ga-heheeu, “Di laagau-‘fig’ la-ne-hai behee dela gu-limalima dono mae!”

21:21  Jesus ga-helekai gi digaula, “Au e-hagi-adu gi goodou di tonu bolo maa goodou ga-hagadonu, hagalee manawa-lua, goodou gaa-mee di-hai be dagu mee dela ne-hai gi-di laagau deelaa. Gei hagalee deenei-hua, goodou e-mee di-helekai gi-di gonduu deenei boloo, ‘Menege gi-daha, hudu-ina goe gi-lodo di tai,’ gei di-maa e-hai.

21:22  Maa goodou ga-hagadonu, gei goodou ga-hai-mee gi-nia mee huogodoo ala e-tangi ai i-lodo talodalo.”

21:23  Jesus ne-hanimoi labelaa gi-lodo di Hale Daumaha, ga-agoago. Nia dagi hai-mee-dabu mo nia dagi mmaadua ga-lloomoi gi Mee, ga-heeu, “Di tonu mai i-hee dela e-hai au mee aanei? Di mogobuna ni-ooi ne-gowadu gi-di-Goe?”

21:24  Jesus ga-helekai gi digaula, “Au dagu heeu e-dahi. Maa goodou ga-helekai gi dagu heeu, gei Au ga-hagi-adu gi goodou di mogobuna dela e-hai-ai agu hegau.

21:25  John Babdais ne-gaamai i-hee ono mogobuna e-babdais ana daangada: mai baahi o God, be mai baahi nia daangada?” Digaula ga-daamada ga-lagalagamaaloo i nadau mehanga, ga-helekai, “Maa gidaadou ga-helekai boloo, ‘Mai baahi o God’ gei Mee ga-heeu boloo, ‘Goodou la-e-aha ala digi hagadonu-ina a John?’

21:26  Maa gidaadou ga-helekai boloo, ‘Mai baahi nia daangada’ gidaadou e-mmaadagu i-nia daangada gi-dee hai-mai nadau hai, idimaa, digaula e-iloo bolo John la soukohp.”

21:27  Malaa, digaula ga-helekai gi Jesus, “Gimaadou e-de-iloo.” Jesus ga-helekai gi digaula, “Malaa, Au hagalee hagi-adu labelaa di mogobuna ni-ooi dela e-hai-hegau-iei Au.”

21:28  Jesus ga-helekai, “Goodou e-hagamaanadu bolo-aha? Tamana ana dama-daane dogolua. Tamana ga-helekai gi tama-daane madua, ‘Dagu dama, hana ngalua i-lodo di hadagee-waini dangi-nei.’

21:29  Tama-daane ga-helekai boloo, ‘Au hagalee hiihai e-hana.’ Gei nomuli mee gaa-huli dana maanadu, gaa-hana.

21:30  Nomuli, gei tamana gaa-hana gi tama dulii, ga-helekai gi mee go telekai la-hua. Tama dulii ga-helekai boloo, ‘Uaa meenei, au gaa-hana.’ Gei mee digi hana.

21:31  Malaa, koai i-nia dama-daane dogolua aanei dela ne-haga-gila di hiihai o di-nau damana?” Digaula ga-helekai, “Go tama-daane madua.” Jesus ga-helekai, “Au e-hagi-adu gi goodou di tonu bolo digau hagabudu dagitedi mono ahina huihui nadau huaidina gaa-hula i godou mua, ga-ulu i Teenua King o God di Langi.

21:32  Idimaa, John Babdais gu-hanadu gi goodou gu-haga-modongoohia-adu di ala hagamouli, gei goodou digi hagadonu a-mee, gei digau hagabudu dagitedi mono ahina huihui nadau huaidina gu-hagadonu a-mee. Gei goodou gu-gidee gei digi huli godou maanadu, digi hagadonu a-mee.”

21:33  Jesus ga-helekai, “Hagalongo gi-di ala-kai labelaa: Tangada dana gowaa gaa-dogi dana hadagee-waini, ga-abaaba, gaa-geli di lohongo di mee dagadagahi-waini, gaa-hai dana angulaa-hagaloohi, gaa-wanga dana hadagee gi digau ngalua gi-benabena-ina, gaa-hana.

21:34  Di madagoaa e-hadi-ai nia huwa o-di hadagee ne-dau-mai, gei mee ga-hagau ana daangada hai-hegau gi digau ngalua bolo gi-gaamai dono duhongo i dana hadagee.

21:35  Digau ngalua gaa-kumi digaula, tangada e-dahi ne-haga-mamaawa, tangada e-dahi ne-daaligi gii-made, tangada e-dahi ne-dilidili gi-nia hadu.

21:36  Tangada dana hadagee ga-hagau labelaa ana gau hai-hegau gi-dogologo. Digau ngalua ga-hai-hua go di-nadau hai dela ne-hai gi digau i-mua.

21:37  Di hagaodi gi-muli, taane deenei ne-hagau-hua dana dama-daane donu gi digaula, ne-hagamaanadu bolo digaula ga-hagalabagau-laa dana dama-daane.

21:38  Di madagoaa digau ngalua ne-mmada gi tama a-maa, digaula ga-helehelekai i nadau mehanga boloo, ‘Deenei la-go tama tangada dana hadagee. Gidaadou ga-daaligi a-mee gii-made, ga-hai-mee gi-nia maluagina o-maa!’

21:39  Digaula gaa-kumi a-mee, gaa-hudu gi-daha mo-di hadagee-waini, ga-daaligi a-mee gii-made.”

21:40  Jesus ga-heeu, “Malaa, di madagoaa tangada dana hadagee-waini ga-dau-mai, dehee dana hai gaa-hai gi digau ngalua?”

21:41  Digaula ga-helekai, “Mee ga-daaligi digau huaidu aalaa, gaa-wanga dana hadagee-waini gi nnuai gau ngalua gi-benabena-ina, aalaa digau gaa-wanga gi-deia dono duhongo mai i-di hadagee i dono madagoaa-donu e-hadi-ai.”

21:42  Jesus ga-helekai, “Goodou digi daulia i-lodo di Beebaa-Dabu nia helekai aanei e-hai boloo, ‘Di hadu dela ne-hudu gi-daha go digau hau-hale bolo di balu hadu, la-guu-hai di hadu dela e-kaedahi e-hagalabagau. Di mee deenei la-ne-hai mai baahi Dimaadua, e-haga-goboina mai gi gidaadou!’ ”

21:43  Jesus ga-helekai, “Deelaa dagu mee e-hagi-adu gi goodou bolo Teenua King o God la-ga-daa gi-daha mo goodou, gaa-wanga gi-nia daangada ala e-haga-kila-aga nia huwa ala e-donu.

21:44  [Tangada dela gaa-doo gi-hongo di hadu deenei, le e-momooho dagidahi, gei di-maa go di hadu la-ne-doo gi-hongo tangada, le e-nnogu-hua guu-made.”]

21:45  Nia dagi hai-mee-dabu mono Pharisee ne-longono nia ala-kai ala e-hai go Jesus, digaula gu-iloo-hua bolo Mee e-helekai i ginaadou.

21:46  Digaula ga-halahala di-nadau madagoaa humalia e-kumi a-Mee, gei digaula e-mmaadagu i digau dogologo ala e-hai bolo Jesus la di soukohp.

Chapter 22

22:1  Jesus ne-helekai labelaa gi-nia daangada i-nia ala-kai boloo,

22:2  “Teenua King o God di Langi e-hai beenei: Dahi king ne-hagatogomaalia dana hagamiami haga-hai-lodo gi dana dama-daane.

22:3  Gei mee ga-hagau ana gau hai-hegau gi-gahia-mai nia daangada gi tagamiami, gei nia daangada hagalee hiihai e-lloomoi.

22:4  Gei mee ga-hagau ana huai gau hai-hegau gii-hula, haga-iloo gi digau ala ne-gahi boloo: ‘Dagu hagamiami la-gu-togomaalia, agu kau-daane mono manu moomono la-gu-daaligi, nia mee huogodoo la-gu-togomaalia. Goodou lloomoi gi tagamiami!’

22:5  Digau ala ne-haga-gahi digi haga-dahidamee-ina di gahigahi a-maa, e-hai-hua go nadau mee ala ne-belee hai: tangada guu-hana gi dana gowaa dogi-mee, e-dahi gi dana hale goloo.

22:6  Hunu gau ne-kumi digau hai-hegau, ga-daaligi gii-mmade.

22:7  Di king gu-hagawelewele huoloo, ga-hagau ana gau-dauwa gi-daaligidia digau daaligi-dangada aalaa, duungia nadau waahale gii-odi.

22:8  Gei mee ne-gahi-mai ana gau hai-hegau ga-helekai gi digaula boloo: ‘Dagu hagamiami haga-hai-lodo la-gu-togomaalia, malaa, agu daangada ala ne-gahi-mai e-hagalee tau ang-gi tagamiami deelaa.

22:9  Goodou hula gi-hongo nia-ala llauehe, laha-mai digau huogodoo ala ga-gidee-goodou.’

22:10  Gei digau hai-hegau gaa-hula gi-hongo nia-ala, ga-haga-dagabuli-mai digau huogodoo ala ne-gidee-ginaadou, digau humalia mono gau huaidu, gei di gowaa dela e-hai tagamiami la-gu-dogologo dangada.

22:11  Di king gaa-hana bolo gi-gidee-ia digau ala ne-lloomoi, ga-gidee-ia taane hagalee e-ulu nia gahu hagamiami haga-hai-lodo.

22:12  Di king ga-heeu gi mee, ‘Dogu ihoo, goe ne-ulu-mai gi-lodo behee, be goe oo gahu haga-hai-lodo ai?’ Taane deelaa digi helekai.

22:13  Di king ga-helekai gi ana gau hai-hegau boloo, ‘Nnoodia nia lima o-maa mono wae, hudua a-mee gi-malaelae, gi-di gowaa bouli dela e-dangidangi-iei mee mo-di gadigadi ono niha.’ ”

22:14  Di hagaodi dana ala-kai, Jesus ga-helekai, “Dogologo ne-haga-gahi, gei digau hua dulii ala ne-hili-aga.”

22:15  Nia Pharisee ga-dagabuli gi-di gowaa e-dahi, e-hagamaanadu nadau heeu gi Jesus belee hai a-mee gii-hala.

22:16  Digaula ga-hagau hunu dama agoago mono gau hagamaamaa Herod gi Jesus, belee heeu gi Mee, “Meenei tangada agoago, gimaadou gu-iloo bolo Goe e-helekai i-di tonu, e-agoago i-di tonu o-di manawa o God ang-gi nia daangada. Goe e-de-hei-e-Goe nia maanadu nia daangada, idimaa, Goe hagalee dugu-geegee nia daangada.

22:17  Helekai malaa gi-di heeu deenei: Di hui dagitedi gi-di king o Rome le e-hai-baahi gi tadau haganoho be deeai?”

22:18  Jesus gu-iloo hua nia maanadu huaidu digaula, ga-helekai, “Goodou digau hai-hegau ngudu-golomada. Ma e-aha dela goodou e-hagamada Au?

22:19  Hagia-mai di bahihadu dela e-hui dagitedi.” Gei digaula ga-gaamai gi mee di bahihadu-silber.

22:20  Gei Mee ga-heeu gi digaula boloo, “Ma di ada ni-ooi gei di ingoo ni-ooi aanei?”

22:21  Digaula ga-helekai, “Ni di king o Rome.” Gei Jesus ga-helekai gi digaula, “Malaa, huia ang-gi di king o Rome nia mee a di king, gei huia ang-gi God nia mee a God.”

22:22  Digaula ne-longono-hua nnelekai aanei, gu-homouli huoloo, ga-diiagi hua a-Mee i-golo, gaa-hula.

22:23  Di laangi hua deelaa, hunu Sadduccee ala e-agoago bolo nia daangada la-hagalee mouli-aga, ga-lloomoi gi Jesus,

22:24  ga-helekai, “Tangada Agoago, Moses guu-hai bolo maa taane la-guu-made gei ana dama ai, tuaahina-daane o-maa gii-lodo gi-di lodo o-maa, gi-gila-mai-ai nia dama ni taane dela ne-made.

22:25  Malaa, tagahaanau daane dogohidu nogo noho i-ginei. Tangada madua gaa-lodo ang-gi di ahina, gei guu-made digi hai di-nau dama, ga-diiagi di ahina deelaa gi dono duaahina daane.

22:26  Togolua daane ne-hai labelaa beenei, mo togodolu, gaa-dae gi togohidu daane.

22:27  Di hagaodi gi-muli, gei di ahina guu-made hogi.

22:28  Malaa, di laangi dela ga-hagamouli-aga digau mmade, di ahina deelaa la-gaa-hai di lodo donu ni-ooi i digaula? Idimaa, digaula huogodoo la-guu-lodo gi mee!”

22:29  Jesus ga-helekai, “Goodou e-hai-gee huoloo, idimaa, goodou e-de-iloo nia helekai di Beebaa-Dabu, mo nia mogobuna o God.

22:30  Di madagoaa digau mmade ga-mouli-aga, digaula gaa-hai be digau di-langi ala nadau lodo ai.

22:31  Ang-gi di hai o-di mouli-aga o digau mmade, goodou digi daulia be God ne-helekai bolo-aha adu gi goodou:

22:32  ‘Au go di God o Abraham, di God o Isaac, di God o Jacob.’ “Mee di God ni digau ala e-mouli, hagalee ni digau ala guu-mmade.”

22:33  Digau dogologo ala ne-longono-ginaadou dana agoago, gu-homouli huoloo.

22:34  Nia Pharisee ne-longono-ginaadou bolo Jesus guu-hai nia Sadduccee gi-deemee di-hai labelaa nadau heeu, gei digaula ga-dagabuli-mai.

22:35  Tangada e-dahi i digaula, tangada haga-donudonu haganoho, ga-heeu belee haga-hala a Jesus,

22:36  “Meenei, tangada agoago, dehee taganoho koia e-hagalabagau i-lodo nia haganoho?”

22:37  Jesus ga-helekai, “ ‘Aloho i Dimaadua, go doo God, aga i-lodo do manawa hagatau, mo do mouli hagatau, mo au hagamaanadu huogodoo.’

22:38  “Deenei taganoho kaedahi e-aamua, ge e-hagalabagau.

22:39  Gei di lua haganoho e-hai be di-maa: ‘Aloho i tangada i do baahi, be do aloho i-di-goe.’

22:40  “Nia haganoho e-lua aanei, aalaa go di hagamau o Nnaganoho Moses mo nia Agoago o-nia soukohp.”

22:41  Nia Pharisee ga-dagabuli-mai gi-di gowaa e-dahi, gei Jesus ga-heeu gi digaula,

22:42  “Goodou e-hagamaanadu bolo di Mesaia la-koai? Mee di hagadili ni-ooi?” Digaula ga-helekai, “Di hagadili ni David.”

22:43  Jesus ga-heeu gi digaula, “Malaa, di Hagataalunga o God la-ne-aha, dela ne-hai a David gi-helekai bolo ‘dogu Dagi’? Deenei telekai David ne-hai:

22:44  ‘Dimaadua gu-helekai gi dogu Dagi: Noho i dogu baahi gau-donu, gaa-dae-loo gi dogu madagoaa ma-gaa-dugu o hagadaumee gi-lala o babaawae.’

22:45  “Maa David ne-gahi di Mesaia bolo dono Dagi, malaa di Mesaia la-ne-hai behee, dela gaa-hai di hagadili ni David?”

22:46  Tangada e-mee di-helekai gi-nia heeu a Jesus ai. Daamada i-di laangi deelaa, tangada ne-heeu dana mee gi Mee ai.

Chapter 23

23:1  Jesus ga-helekai gi digau dogologo mo ana dama-agoago,

23:2  “Digau haga-donudonu haganoho mono Pharisee e-mogobuna di haga-donudonu Nnaganoho Moses.

23:3  Goodou e-hai-loo gi-hagalongo, gi-hagagila-aga-ina nadau agoago. Gei goodou hudee hagagila-aga-ina nadau hangaahai, idimaa, digaula hagalee daudali nadau mee ala e-agoago ai.

23:4  Digaula e-hagabudu nia mee daamaha di-aamo ga-lawalawa gi-hongo nia bakau o-nia daangada, gei digaula hagalee-loo e-haga-ngalua di madaalima hua-e-dahi e-hagamaamaa digaula, e-aamo nia mee daamaha aalaa.

23:5  Digaula e-hai nia mee huogodoo bolo gii-mmada ginai nia daangada. Digaula e-ulu nia tuu gahu lloo madamada ge palaha e-tai gi nadau huaidina ala e-hihi ginai nia helekai di Beebaa-Dabu, e-nnoo gi nadau lae mono lima, gei e-hai gi-llauehaa ge gi-palaha huoloo nia labalaba o nadau gahu.

23:6  Digaula e-hiihai e-noho i-nia lohongo mugi-mua i-teebele hagamiami, gei e-noho i-nia lohongo o digau aamua i-lodo nia synagogee.

23:7  Digaula e-hiihai bolo nia daangada gi-hagalabagau-ina ginaadou i-lodo nia gowaa huihui-mee, gei gi-gahia ginaadou bolo ‘Tangada Agoago.’

23:8  Goodou hudee hai bolo nia daangada la-gi-gahia goodou bolo ‘Tangada Agoago’, idimaa, goodou di-godou Dangada Agoago hua-e-dahi, goodou guu-hai tagahaanau e-dahi.

23:9  Goodou hudee gahia dahi dangada i henuailala bolo ‘Tamana’, idimaa, di-godou Damana hua e-dahi dela e-noho i-di langi.

23:10  Goodou gi-hudee hiihai bolo nia daangada gi-gahia goodou bolo nia ‘Dagi’, idimaa, di-godou Dagi dela-hua e-dahi go di Mesaia.

23:11  Tangada dela koia e-aamua i godou lodo, la-go mee dela go di-godou dangada hai-hegau.

23:12  Idimaa, tangada dela gaa-bida hagalaamua-ia, geia gaa-hai tangada i-muli-loo, gei tangada dela ga-dugu-eia gi-lala-loo, geia gaa-hai tangada aamua.

23:13  “E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou guu-tai di bontai Teenua King o God di Langi gi-nia daangada, gei goodou hagalee e-ulu-ai, ge hagalee dumaalia gi-nia daangada ala e-hagamahi bolo ginaadou e-ulu i Teenua deelaa.

23:14  [“E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou e-daa nia hale nia ahina guu-mmade nadau lodo, gei e-hai godou dalodalo gii-lloo. Malaa e-donu, goodou e-hai-loo gii-kae di hagaduadua damana i godou hai huaidu beenei.]

23:15  “E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou e-deledele i-hongo di moana, e-hula gi-nia madagowaa e-logo i henuailala, belee huli nia daangada gi-daudali goodou. Maa gaa-hai beenei, gei goodou ne-hai digaula gi-ulu gi-lodo di ahi dee-odi holongo-lua gi godou nua.

23:16  “E-huaidu-adu gi goodou nia dagi deegida! Goodou e-agoago bolo maa tangada ga-hagamodu ang-gi di Hale Daumaha, la-hagalee lawalawa go dana hagamodu ne-hai. Gei tangada ma-ga-hagamodu gi-nia goolo ala i-lodo di Hale Daumaha, deelaa tangada e-lawalawa go dana hagamodu.

23:17  Goodou nia daangada deegida ge dadaulia! Dehee di mee e-mada-hagalabagau: go nia goolo, be go di Hale Daumaha dela e-hai nia goolo gii-dabu?

23:18  Goodou e-agoago labelaa boloo, ‘Maa tangada ga-hagamodu gi-di gowaa hai-tigidaumaha, la-hagalee e-lawalawa go dana hagamodu. Gei tangada ma-ga-hagamodu gi-di mee dela i-hongo di gowaa tigidaumaha, deelaa tangada e-lawalawa go dana hagamodu dela ne-hai.’

23:19  Goodou e-dee-gida huoloo! Dehee di mee e-hagalabagau: go di mee dela e-hai-tigidaumaha, be go di gowaa hai-tigidaumaha dela e-hai tigidaumaha gii-dabu?

23:20  Malaa, tangada ga-hagamodu ang-gi di gowaa hai tigidaumaha, la-ne-hagamodu ang-gi di gowaa tigidaumaha mono mee huogodoo ala i-nonua.

23:21  Gei tangada ma-ga-hagamodu gi-di Hale Daumaha, la-ne-hai dana hagamodudahi gi-di Hale Daumaha mo God dela e-noho i-no-lodo.

23:22  Gei tangada ma-ga-hagamodu gi-di langi, la-ne-hagamodu ang-gi di lohongo-king o God, mo Mee dela e-noho i-no-nua.

23:23  “E-huaidu adu gi goodou go digau haga-donudonu haganoho mono Pharisee! Goodou digau hai-hegau ngudu-golomada e-tigidaumaha ang-gi God dahi baahi e-madangaholu o godou goloo, haga-puni ang-gi nia mee-hai-suub, go nia ‘mint’, ‘dill’, mo ‘cumin’, gei goodou hagalee hagamadabouli e-hagalongo gi-nia agoago hagalabagau o-nia haganoho aanei: tonu, aloho, mo manawa-dahi. Aanei e-hai-loo gi-haga-kila-aga i-daha mo nia mee ala i-golo!

23:24  Nia dagi deegida go goodou! Goodou e-daa gi-daha di lamu dela i-lodo godou wai-inuinu, gei goodou e-holo di manu-‘camel’!

23:25  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-haga-madammaa di gili godou ibu mono pileedi, gei i-lodo e-honu i-nia goloo gaiaa, ge ne-hagagailaa ginai!

23:26  Goodou go nia Pharisee deegida! Tono-ina i-lodo i-mua, gei i-tua la-ga-madammaa!

23:27  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-hai be taalunga ne-tono ga-humalia dono gili, gei e-honu i-nia iwi-dangada-made mo nia hagadilinga bilau.

23:28  E-hai gadoo beenei, i-mua nia daangada goodou e-humalia, gei godou lodo e-honu haihai huaidu mo nia haga-magiaa.

23:29  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-hai nia daalunga o-nia soukohp gi-humalia, gei e-humu nia daalunga digau hai-hegau-donu.

23:30  Gei goodou e-helekai bolo maa goodou ne-mouli i-di madagoaa o godou maadua-mmaadua, gei goodou digi dau gi digau ala ne-daaligi nia soukohp.

23:31  Malaa, goodou guu-bida haga-modongoohia-aga, bolo goodou digau ni-di hagadili dela ne-daaligi nia soukohp.

23:32  Malaa, goodou dudagia di moomee o godou maadua-mmaadua ne-hai!

23:33  Goodou la nia gihaa ge nia dama ni digaula. Goodou e-mee di-llele gi-daha behee mo-di gowaa hagaduadua?

23:34  Goodou gi-iloo, bolo Au ga-hagau-adu agu soukohp, gau kabemee mono gau agoago. Hunu gau i digaula ga-daaligi go goodou, ga-daudau, ga-haga-mamaawa i-lodo nia synagogee, ge ga-waluwalu i-lodo nia waahale.

23:35  Di hagaduadua o-di haga-hali nia dodo o digau nadau ihala ai, la-gaa-dau-adu gi goodou, daamada mai Abel gaa-dae gi Zechariah, tama ni Berekiah, taane dela ne-daaligi go goodou i-mehanga di Hale Daumaha mo-di gowaa hai-tigidaumaha.

23:36  Au e-hagi-adu gi goodou di tonu bolo nia hagaduadua o-nia mee huaidu aanei huogodoo gaa-dau ang-gi nia daangada dolomeenei!

23:37  “Jerusalem, Jerusalem! Goe e-daaligi nia soukohp, ge e-dilidili digau kae-hegau a God ala ne-hagau-adu! Holongo e-hia Au nogo hiihai belee bulubulu-mai au daangada huogodoo, gadoo be teduu-ahina dela e-bulubulu ana dama gudugudu gi-lala ono bakau, gei goe digi dumaalia-mai.

23:38  Gei di Hale Daumaha la-ga-diiagi go ono daangada.

23:39  Au e-hagi-adu bolo daamada dangi-nei, goodou ga-de-gidee Au, gaa-dae-loo gi goodou ga-helekai boloo, ‘God gi-hagahumalia-ina a-Mee dela e-hanimoi i-di ingoo o Dimaadua.’ ”

Chapter 24

24:1  Jesus ne-hagatanga i-di Hale Daumaha, gei ana dama-agoago ga-lloomoi, ga-helekai gi Mee bolo gii-mmada gi-nia hale o-di Hale Daumaha!

24:2  Gei Mee ga-helekai, “Uaa, goodou mmada gi-humalia gi-nia hale huogodoo. Au e-hagi-adu gi goodou di tonu bolo dahi hadu gaa-dubu dono lohongo ai. Nia hadu huogodoo ga-meheu gi-lala.”

24:3  Jesus nogo noho i-hongo di Gonduu Olib, ana dama-agoago ga-lloomoi gi Mee mada-ginaadou, ga-heeu, “Hagia-mai di madagoaa behee dela ga-gila-aga nia mee aanei, gei nia haga-modongoohia behee ala ga-haga-modongoohia do hanimoi mo-di hagaodi o-di madagoaa.”

24:4  Jesus ga-helekai, “Pula i goodou, hudee dugu-anga goodou gi-halahalau-ina go dahi dangada.

24:5  Nia daangada dogologo ga-lloomoi i dogu ingoo, ga-helekai boloo: ‘Au go di Mesaia!’ gei digaula ga-halahalau nia daangada dogologo.

24:6  Goodou ga-longono nia lee-dauwa hoohoo-mai mono longo dauwa mogowaa, gei goodou hudee mmaadagu i-nia mee aanei e-hai. Nia mee aanei e-hai-loo gii-hai, malaa, deenei la hagalee go di hagaodi o henuailala.

24:7  Nia henua llauehe ga-heheebagi i nadau mehanga, gei nia henua-king ga-heheebagi ginaadou. Nia dau-magamaga, ngalungalua tenua ga-kila-aga i-nia gowaa huogodoo i henuailala.

24:8  Nia mee aanei huogodoo le e-hai be-di mmae matagidagi o-di ahina ma-ga-haanau.

24:9  “Nia daangada ga-lawalawa goodou, gaa-lahi ga-hagaduadua ge e-dadaaligi gi-mmademmade. Nia henua ga-de-hiihai-adu gi goodou mai i dogu ingoo.

24:10  Di madagoaa deelaa, digau dogologo gaa-kili gi-daha nadau hagadonu, ga-hagadau hagi-aga ginaadou, ga-hudiou i nadau mehanga.

24:11  Nia soukohp dilikai dogologo ga-kila-aga, ga-halahalau nia daangada dogologo.

24:12  Nia aloho o-nia daangada dogologo gaa-maa gi-daha, idimaa nia huaidu ga-llauehe-mai.

24:13  Tangada dela ga-daahi-hua beelaa dono hagadonu gaa-dae-loo gi-di hagaodi, la-ga-hagamouli.

24:14  Di Longo-Humalia o Teenua King o God ga-hagadele ang-gi nia gowaa huogodoo i henuailala, e-hai di haga-modongoohia gi-nia daangada huogodoo. Nomuli-laa, gei di hagaodi o henuailala la-gaa-hai.

24:15  “Goodou gaa-mmada gi-di ada-mee huaidu e-haga-madagudagu dangada e-duu i-lodo di gowaa dabuaahia, dela ne-helekai-ai soukohp Daniel.” (Tangada dela gaa-dau di mee deenei, gi-modongoohia dono hadinga!)

24:16  “Malaa, digau ala e-noho i Judea, gii-llele gi-tomo nia gonduu lligi.

24:17  Tangada dela i-tomo dono hale, hudee hai bolo ia e-gaga gi-lala e-gowaga ana mee i-lodo dono hale.

24:18  Tangada dela i-lodo dana gowaa, gi-hudee hanimoi bolo e-kae dono gahu.

24:19  E-haingadaa ang-gi nia ahina hai-dama, mono gau ala nadau dama-lligi.

24:20  Dalodalo ang-gi God bolo goodou gi-hagalee llele gi-daha i-di madagoaa magalillili, be i-di Laangi-Sabad.

24:21  Idimaa, di haingadaa o-di madagoaa deelaa, koia e-huaidu i-nia haingadaa mai taamada o henuailala, gaa-dae-mai gi dangi-nei. Di mee beenei e-gila-aga maalia ai.

24:22  God gu-haga-hogoohi nia laangi aalaa. Maa nei bolo Mee digi haga-hogoohi nia laangi aalaa, tangada e-mouli ai. Gei God ga-haga-hogoohi nia laangi aalaa ang-gi ana daangada ala ne-hilihili.

24:23  “Maa tangada ga-helekai-adu gi goodou boloo, ‘Mmada, deenei di Mesaia!’ be, ‘Deelaa a-Mee!’ hudee hagadonu-ina a-mee.

24:24  Idimaa, nia mesaia mono soukohp dilikai ga-kila-aga, gaa-hai nadau ada-mee haga-goboina mono mogobuna belee halahalau nia dama a God ala ne-hilihili, be di-maa e-mee.

24:25  Hagalongo gi-humalia, Au gu-haga-iloo-adu gi goodou i-mua nia mee aanei ma-gaa-hai.

24:26  “Maa digaula ga-helekai-adu gi goodou boloo, ‘Mmada, mee dela i-lodo di anggowaa!’ hudee hula gi-golo. Gei digaula ma-ga-helekai boloo, ‘Mee dela e-bala hagammuni i-kinei!’ Hudee hagadonu-ina.

24:27  Idimaa, di hanimoi Tama-Tangada le e-hai gadoo be-di ila dela e-daba i-di bahi-i-dua, gaa-dae gi-di bahi-i-dai o-di langi hagatau.

24:28  “Di gowaa dela iai tuaidina dangada made, deelaa di gowaa e-hula ginai nia manu ‘vulture’.

24:29  “I-muli nia haingadaa llauehe o-nia laangi aalaa, di laa ga-bouli, di malama ga-hagalee maahina, nia heduu ga-monnono, nia mogobuna o lodo di ahiaalangi ga-mmaanege-gee mo nadau lohongo.

24:30  Deenei di madagoaa o-di haga-modongoohia Tama-Tangada gaa-gila i-di gili di langi, gei nia daangada huogodoo i henuailala ga-tangitangi i-di nadau gidee Tama-Tangada e-hanimoi i-hongo nia gololangi i ono mahi mo ono madamada aamua.

24:31  Di lee labaa damana ga-ili, gei Mee ga-hagau ana gau di-langi gi-nia mada e-haa o henuailala, ga-haga-dagabuli ana gau ala guu-lawa di-hili, daamada i-di mada o henuailala, gaa-dae gi-di mada dela i-golo.

24:32  “Goodou kae-ina di agoago o-di laagau-‘fig’. Di madagoaa nia manga ma-ga-balabala, gei nia lau ga-daamada ga-matilitili mai, gei goodou gu-iloo-hua bolo di madagoaa mahanahana la-gu-hoohoo-mai.

24:33  Gei e-hai labelaa beenei, maa goodou ga-gidee nia mee huogodoo aanei, goodou ga-iloo bolo di madagoaa la-gu-hoohoo-mai.

24:34  Gi-langahia goodou bolo nia mee aanei huogodoo ga-kila-aga i-mua digau huogodoo ala e-mouli dangi-nei ma-gaa-mmade.

24:35  Di langi mo henuailala ga-hagalee, gei agu helekai e-deemee di-hagalee.

24:36  “Deai tangada e-iloo di laangi be-di aawaa dela ma-gaa-dae-mai ai. Digau di-langi i-nua mo Tama e-de-iloo labelaa, go Tamana lahua e-iloo.

24:37  Di hanimoi o Tama-Tangada le e-hai gadoo be tolongo Noah.

24:38  Nia laangi i-mua toloo, nia daangada e-haihai nadau hagamiami ge inuinu, nia daane mono ahina guu-bida haga-hai-lodo ginaadou, gaa-dae gi-di laangi ne-ulu Noah gi-lodo dono waga.

24:39  Gei nia daangada digi modongoohia-loo bolo di mee deenei gaa-hai, gaa-dae-loo gi toloo deelaa ne-hai, gu-hagammaa gi-daha digaula huogodoo. Gei deenei hogi di hai gaa-hai i-di madagoaa ga-hanimoi Tama-Tangada.

24:40  Di madagoaa deelaa, nia daane dogolua e-ngalua i-lodo henua, tangada e-dahi gaa-lahi gei di hoo o-maa la-gaa-dubu i-golo.

24:41  Nia ahina dogolua e-mmili nau palaawaa, di ahina e-dahi gaa-lahi, gei di hoo o-maa la-gaa-dubu i-golo.

24:42  Goodou la-gii-noho kanakana, idimaa, goodou e-de-iloo di laangi dela ma-ga-hanimoi-ai di-godou Dagi.

24:43  Maa tangada donu o dono hale ga-iloo di madagoaa tangada gaiaa e-hanimoi-ai, goodou gii-donu humalia, bolo mee ga-haga-ala-hua e-hagalee dugu ang-gi tangada gaiaa gi-ohaa dono hale.

24:44  Malaa, nia madagoaa huogodoo gi-togomaalia, idimaa, Tama-Tangada le e-hanimoi i-di aawaa dela hagalee talitali goodou a-mee.

24:45  “Di hege behee dela koia e-manawa-dahi, gei e-kabemee? Deenei tangada dela ne-haga-menege-aga go dono dagi belee dagi nia daangada hai-hegau ala i-golo, geia e-haangai digaula i-di madagoaa belee haangai-ai.

24:46  E-maluagina behee go di hege i-di madagoaa dono dagi ga-hanimoi gi-di hale, ga-gidee-ia bolo mee e-hai dana hegau deenei.

24:47  Au e-hagi-adu gi goodou bolo di tagi ga-haga-menege-aga di hege deelaa, e-dagi ana mee huogodoo.

24:48  Maa mee di hege huaidu, geia ga-hagamaanadu bolo dono dagi le e-duai-nau dono hanimoi.

24:49  Geia ga-daamada ga-dadaaligi digau hai-hegau ala i-golo, ga-miami ge e-inuinu madalia digau libaliba.

24:50  Tagi o-di hege deenei ga-hanimoi i-di laangi mo-di madagoaa hagalee kana go mee.

24:51  Mee ga-hanimoi ga-duuduu a-mee, gaa-bae a-mee gi-baahi digau hai-hegau ngudu-golomada i-di gowaa dela e-dangidangi, gei e-gadigadi ono niha.

Chapter 25

25:1  “Di madagoaa deelaa, Teenua King o God di Langi le e-hai gadoo be nia ahina dilongoholu ala ne-kae nadau malama, gaa-hula e-haga-heetugi gi taane hai-lodo.

25:2  Dogolima e-de-kabemee, ge dogolima e-kabemee.

25:3  Digau de-kabemee ne-kae-hua nadau malama, gei digi kae nadau lolo digagi.

25:4  Gei digau kabemee ne-kae nadau mee dugu lolo honu belee digagi nadau malama.

25:5  Taane hai-lodo e-duai dono hanimoi, gei nia ahina huogodoo gu-molemoe, gu-haga-inaina, guu-kii danu-mmoe.

25:6  “I-di madahidi-waelua di boo, di lee e-wolo gi-nua boloo, ‘Deenei taane hai-lodo. Lloomoi e-heetugi gi mee!’

25:7  Nia ahina dilongoholu aalaa ga-aala-aga ga-hagatogomaalia nadau malama.

25:8  Nia ahina de-kabemee ga-helekai gi-nia ahina kabemee boloo, ‘Gaamai hunu lolo dulii, i madau malama la-guu-odi.’

25:9  Nia ahina kabemee ga-helekai boloo, ‘Deeai, ma e-dee-dohu i gidaadou. Hula gi-di hale-goloo, huia-mai godou lolo malama.’

25:10  Nia ahina de-kabemee gaa-hula belee hui-mai nadau lolo-malama. I-muli di-nadau hula gei taane hai-lodo gaa-dau, gei nia ahina dogolima ala gu-togomaalia, ga-ulu dalia a-mee gi tagamiami haga-hai-lodo, gei di bontai di hale la-guu-tai.

25:11  “Nomuli, gei nia ahina de-kabemee gaa-dau, ga-tangitangi mai i-tua boloo, ‘Meenei, meenei, haga-ulu-ina adu gimaadou!’

25:12  Taane hai-lodo ga-helekai gi digaula boloo, ‘Deeai, au e-de-iloo-eau goodou.’ ”

25:13  Jesus ga-hagaodi dana ala-kai deenei, “Gii-pula i goodou, idimaa, goodou e-de-iloo di laangi be di aawaa.

25:14  “Teenua King o God di Langi le e-hai gadoo be taane dela ne-hagatogomaalia bolo e-hana gi tenua mogowaa. Geia ga-haga-dagabuli-mai ana hege, gaa-wanga ginai ana bahihadu gi-haga-hai-hegau-ina.

25:15  Mee ne-wanga gi digaula nadau mee ala e-mee di-haga-hai-hegau: ne-wanga gi tangada e-dahi nia bahihadu e-lima-mana-(5,000), di hoo tangada e-lua-mana-(2,000), gei tangada dela i-golo e-mana-(1,000), gei mee gaa-hana.

25:16  Di hege dela ne-kae ana bahihadu e-lima-mana-(5,000), ga-haga-hai-hegau ana bahihadu aalaa, ga-gila-mai labelaa nia bahihadu e-lima-mana-(5,000) gi-nonua.

25:17  E-hai gadoo be di hege dela ne-kae ana bahihadu e-lua-mana-(2,000). Mee ga-haga-hai-hegau ana bahihadu aalaa, ga-gila-mai labelaa nia bahihadu e-lua-mana-(2,000) gi-nonua.

25:18  Gei di hege dela ne-kae ana bahihadu e-mana-(1,000), ne-hana-hua, gaa-geli dana lua, gaa-danu hagammuni nia bahihadu dono dagi.

25:19  “Nomuli-loo, gei di tagi nia hege ga-hanimoi, ga-hagadina di-nadau hai-hegau nadau bahihadu.

25:20  Di hege dela ne-kae ana bahihadu e-lima-mana-(5,000), ga-hanimoi ga-gaamai nia bahihadu e-lima-mana-(5,000) labelaa gi nonua, ga-helekai gi dono dagi, ‘Meenei, goe ne-gaamai nia bahihadu e-lima-mana-(5,000), gei deenei labelaa e-lima-mana-(5,000) ne-gila-mai gi-nonua.’

25:21  Tagi o-maa ga-helekai gi mee bolo koia e-humalia, ‘Goe tangada hai-hegau donu. Goe guu-donu i dau haga-hai-hegau di mee dulii, malaa, au ga-haga-uda-adu di mee damana e-madamada humalia-iei goe. Hanimoi-laa gi-tenetene goe madalia au!’

25:22  Di hege dela ne-kae ana bahihadu e-lua-mana-(2,000) ga-hanimoi labelaa, ga-helekai gi mee, ‘Meenei, goe ne-gaamai gi-di-au nia bahihadu e-lua-mana-(2,000), gei deenei e-lua-mana-(2,000) labelaa ne-gila-mai gi-nonua.’

25:23  Tagi o-maa ga-helekai gi mee bolo koia e-humalia, ‘Goe di hege hai-hegau donu, goe gu-manawa-dahi i dau haga-hai-hegau nia hulu bahihadu lligi, deelaa-laa gei au ga-gowadu di hulu bahihadu damana e-madamada humalia-iei goe. Hanimoi-laa gi tenetene goe madalia au!’

25:24  Di hege dela ne-kae ana bahihadu e-mana-(1,000) ga-hanimoi, ga-helekai, ‘Meenei, au e-iloo bolo goe tangada hagalee dumaalia, gei e-hadi au mee i-di gowaa hagalee ne-dogi kooe, gei e-hagabudu au mee i-di gowaa dela digi haga-nonnono ginai au lii.

25:25  Au gu-madagu huoloo i-di-goe, au ne-hana-hua, gaa-danu hagammuni au bahihadu gi-lodo di gelegele. Malaa, aanei go au bahihadu la-hua.’

25:26  Tagi o-maa ga-helekai, ‘Goe di hege huaidu gei e-hagatoo. Goe gu-iloo-hua bolo au e-hadi agu mee i-di gowaa digi dogi ginai agu mee, gei au e-hagabudu agu mee i-di gowaa digi haga-nonnono ginai agu lii.

25:27  Gei goe ne-aha, dela digi dugu agu bahihadu gi-lodo di ‘bank’, ga-hanimoi-laa ginai au, gaa-kae nia maa huogodoo mono wiini.

25:28  Daawa-ina nia bahihadu ala i mee, wanga-ina gi tangada dela ana bahihadu e-madangaholu-mana-(10,000).

25:29  Tangada dana mee i-golo, e-wanga labelaa gi-nonua gii-logo ana mee. Gei tangada dela dana mee i dono baahi ai, di mee dulii dela i dono baahi le e-daa gi-daha.

25:30  Gei di balu hege la hudua gi-malaelae, gi-di gowaa bouli dongoeho, e-dangidangi ge e-gadigadi ono niha.’

25:31  “Di madagoaa ma-ga-hanimoi-ai Tama-Tangada be di King mo ana gau di-langi huogodoo, Mee gaa-noho gi-hongo dono lohongo-king.

25:32  Gei digau henuailala huogodoo ga-dagabuli-mai gi ono mua, gei Mee ga-wwae-lua nia daangada gii-hai nia hagabuulinga e-lua, e-hai be tangada hagaloohi-siibi dela e-wwae ana siibi gi-daha mo nia kuudi.

25:33  Gei Mee gaa-dugu digau ala e-donu gi dono baahi gau-donu, gaa-dugu gi dono baahi gau-ihala digau ala i-golo.

25:34  Di King ga-helekai gi-nia daangada ala i dono baahi gau-donu, ‘Lloomoi, goodou gu-hagahumalia go dogu Damana! Lloomoi, hai-mee gi Teenua King o God dela guu-lawa di-hagatogomaalia adu gi goodou, mai i-taamada o henuailala.

25:35  Au nogo hiigai, goodou gu-haangai Au. Au nogo hieinu, goodou gu-haga-inu Au. Au tangada mai i-daha, goodou gu-benebene Au gi-lodo godou hale.

25:36  Au nogo ogu goloo ai, goodou gu-haga-gahu Au. Au nogo magi, goodou gu-benebene Au. Au nogo galabudi, goodou gu-lloomoi haga-hidihidi.’

25:37  Digau ala e-donu ga-helekai gi Mee boloo, ‘Meenei, ana-hee gimaadou ne-gidee Goe e-hiigai, ga-haangai Goe, nogo hieinu, ga-haga-inu Goe?

25:38  Ana-hee gimaadou ne-gidee bolo Goe tangada mai i-daha, ga-benebene Goe gi-lodo madau hale, be o goloo ai, ga-haga-gahu Goe?

25:39  Ana-hee gimaadou ne-gidee Goe e-magi, be e-galabudi, gei gimaadou gu-lloo-adu haga-hidihidi?’

25:40  Di King ga-helekai, ‘Au e-hagi-adu bolo godou mee huogodoo ala ne-hai gi ogu duaahina lligi aanei, la-ne-hai-hua-mai gi-di-Au!’

25:41  “Di King ga-helekai gi digau dono baahi dau-ihala, ‘Tuu-gi-daha mo Au. Goodou gu-haga-halauwa go God! Hula gi-lodo di ahi dee-odi dela gu-hagatogomaalia gi Setan mo ana gau di-langi!

25:42  Au nogo hiigai, goodou digi haangai-ina Au. Nogo hieinu, digi gaamai agu wai e-inu.

25:43  Au tangada mai i-daha, goodou digi benebene Au gi-lodo godou hale. Ogu goloo ai, goodou digi haga-gahu Au. Nogo magi, nogo galabudi, gei goodou digi benebene Au.’

25:44  Digaula ga-helekai gi Mee, ‘Meenei, ana-hee gimaadou ne-gidee Goe e-hiigai, be e-hieinu, tangada mai i-daha, o goloo ai, e-magi, e-galabudi, gei gimaadou digi hagamaamaa-ina Goe?’

25:45  Di King ga-helekai, ‘Au e-hagi-adu bolo maa goodou e-de-hiihai di hagamaamaa ogu duaahina lligi aanei, goodou ne-de-hiihai di hagamaamaa Au.’

25:46  “Malaa digau huogodoo beenei ga-hagau gi-di gowaa hagaduadua dee-odi, gei digau ala e-donu gaa-hula gi-di mouli dee-odi.”

Chapter 26

26:1  Jesus ne-lawa di agoago i-nia mee aanei huogodoo, gei Mee ga-helekai gi ana dama-agoago,

26:2  “Goodou gu-iloo bolo i-muli nia laangi e-lua Tagamiami Pasoobaa gaa-hai, gei Tama-Tangada gaa-wanga gi daudau-ina gi-di loobuu.”

26:3  Di madagoaa deelaa, gei nia dagi hai-mee-dabu mo nia dagi mmaadua ne-dagabuli gi-di hale o Caiaphas, di tagi aamua hai-mee-dabu,

26:4  ga-hagataele belee kumi a Jesus hagammuni, e-daaligi gii-made.

26:5  Digaula ga-helekai, “Gidaadou hagalee hai di mee deenei i-nia laangi Hagamiami Pasoobaa, gi-dee wwaa hua hai-baahi ginai nia daangada.”

26:6  Jesus nogo i-di hale o Simon, taane nogo magi genegene i-mua, e-noho i Bethany.

26:7  Jesus nogo miami i teebele, gei di ahina ga-hanimoi mo dana loaabi-‘alabaster’ e-honu lolo-kala gei e-hui-ngadaa, gaa-llingi gi-hongo di libogo o-maa.

26:8  Ana dama-agoago ga-gidee di mee deenei, gu-hagawelewele, ga-heeu, “Ma e-hagauwwou beleimaha?

26:9  Di lolo deenaa ne-bolo ne-hui gi-daha la-gu-gila-mai teenedi damana, gu-hagamaamaa digau hagaloale!”

26:10  Jesus gu-iloo nia helekai digaula, ga-helekai, “Goodou e-haga-deaadee di ahina deenei eiaha? Ma di mee humalia huoloo dela ne-hai go mee mai gi-di-Au.

26:11  Digau hagaloale la i godou baahi i-nia madagoaa huogodoo, gei Au ga-hagalee madalia goodou gi-muli.

26:12  Di hai o-di ahina deenei ne-llingi dana lolo-kala gi dogu huaidina, ne-hagatogomaalia Au gi dogu danu.

26:13  Au e-hagi-adu bolo nia madagoaa huogodoo o-di Longo-Humalia e-dele i henuailala, di mee di ahina deenei ne-hai, e-dele labelaa, e-haga-langahia di ahina deenei.”

26:14  Tangada e-dahi i-nia dama-agoago dilongoholu maa-lua, dono ingoo go Judas Iscariot, gaa-hana gi-nia dagi hai-mee-dabu,

26:15  ga-heeu, “Maa au ga-gowadu a Jesus, gei goodou ga-gaamai di godou-aha?” Digaula gaa-wanga nia bahihadu-silber e-motolu.

26:16  I-muli di madagoaa deelaa, gei Judas ga-halahala dana madagoaa humalia e-wanga a Jesus gi digaula.

26:17  Di laangi matagidagi Tagamiami di Palaawaa-Digi-Hagatanga, gei nia dama-agoago a Jesus ga-lloomoi gi Mee, ga-heeu, “Dehee dau gowaa e-hiihai bolo gimaadou gi-hagatogomaalia-ina e-hai Tagamiami Pasoobaa?”

26:18  Gei Mee ga-helekai, “Hula gi taane i-lodo di waahale damana, helekai gi mee boloo, ‘Di-madau Dangada Agoago e-helekai boloo, Dogu madagoaa gu-dau-mai. Au mo agu dama-agoago e-hai di-madau Hagamiami Pasoobaa i doo hale.’ ”

26:19  Nia dama-agoago a-Maa gaa-hai gii-hai be nia helekai a Jesus ne-hai, ga-hagatogomaalia Tagamiami Pasoobaa.

26:20  Hiahi-ia di mee, Jesus mo ana dama-agoago dilongoholu maa-lua gaa-noho gi-lala e-miami.

26:21  Di madagoaa digaula e-miami, gei Jesus ga-helekai, “Au e-hagi-adu bolo tangada e-dahi i goodou gaa-wanga Au e-hagahuaidu.”

26:22  Ana dama-agoago gu-manawa-gee huoloo gi telekai deenei, ga-daamada hagadau dagidahi ga-heheeu gi Mee, “Meenei, ma ko-au?”

26:23  Jesus ga-helekai, “Tangada dela ga-hagatiu dana palaawaa gi-lodo di ibu dalia Au, go mee dela gaa-wanga Au.

26:24  Tama-Tangada gaa-made gii-hai be nia helekai di Beebaa-Dabu, gei e-huaidu ang-gi tangada dela e-wanga Tama-Tangada. E-humalia tangada deenei hagalee belee hai gi-haanau!”

26:25  Judas dela gaa-wanga a-Mee gi ono hagadaumee, ga-helekai, “Meenei, dagu Dangada Agoago, ma ko-au?” Jesus ga-helekai, “Koe dela ne-helekai.”

26:26  I di-nadau miami, Jesus ga-dahi-aga dana palaawaa, ga-hagadabu, ga-ginigini, gaa-wanga gi ana dama-agoago, ga-helekai, “Kae-ina, geina, deenei go dogu huaidina.”

26:27  Gei Mee ga-dahi-aga dana ibu-waini, ga-danggee gi God, gaa-wanga gi digaula, ga-helekai, “Goodou huogodoo, inumia.

26:28  Deenei go ogu dodo o-di hagababa a God. Ogu dodo ne-haga-hali ang-gi digau dogologo belee wwede-ai nia huaidu.

26:29  Au e-hagi-adu gi goodou bolo Au hagalee e-inu labelaa di waini deenei, gaa-dae-loo gi-di laangi dela e-inu gidaadou ngaadahi di waini hoou i Tenua o dogu Damana.”

26:30  Digaula ga-daahili dahi daahili, nomuli gaa-hula gi-di Gonduu Olib.

26:31  Jesus ga-helekai gi digaula, “Boo-nei, goodou huogodoo gaa-llele, ga-diiagi Au, idimaa, di Beebaa-Dabu e-helekai boloo, ‘God ga-daaligi tangada hagaloohi-siibi, gei nia siibi la-ga-lellele dagidahi.’

26:32  “Gei i-muli dogu mouli-aga, Au gaa-hana i godou mua gi Galilee.”

26:33  Peter ga-helekai gi Jesus, “Meenei, ma e-aha maa digaula huogodoo ga-lellele, ga-diiagi Goe, gei au hagalee-loo e-diiagi Goe!”

26:34  Jesus ga-helekai gi mee, “Au e-hagi-adu di tonu bolo boo-nei, i-mua teduu gaa-wolo, gei goe ga-helekai haga-de-iloo Au haga-dolu.”

26:35  Peter ga-helekai gi mee, “Ma e-aha maa au gaa-made madalia Goe, gei au hagalee-loo e-haga-de-iloo Goe!” Nia dama-agoago huogodoo ala i-golo gu-helekai labelaa beenei.

26:36  Jesus ne-hana mo ana dama-agoago gi Gethsemane, ga-helekai gi digaula, “Noho i-ginei, Au e-hana, e-dalodalo i-golo.”

26:37  Mee gaa-lahi Peter mo nia dama-daane dogolua a Zebedee. Ono lodo gu-huaidu huoloo gu-dee-baba.

26:38  Gei Mee ga-helekai gi digaula, “Ogu lodo gu-daamaha huoloo, guu-honu i-di lodo-huaidu. Au guu-hai be tangada gaa-made. Goodou noho i-ginei e-haga-aala dalia Au.”

26:39  Gei Mee gaa-hana gi-daha mo digaula, ga-dogoduli gi-lala, ga-dalodalo, “Dogu Damana, be di-maa e-mee, daawaa gi-daha mo Au di ibu o-di hagaduadua deenei, gei hagalee go dogu hiihai, gei go do hiihai dela e-hai.”

26:40  Gei Mee gaa-hana gi-baahi ana dama-agoago dogodolu, ga-gidee-Ia digaula e-kii, ga-helekai gi Peter, “Ma e-hai behee? Goodou e-deemee di-haga-aala madalia Au i-di aawaa hua-e-dahi?

26:41  Goodou aala, hai-dalodalo, gi-dee too goodou gi-lodo nia hagamada. Di hagataalunga e-hiihai, gei tuaidina le e-bagege.”

26:42  Jesus gaa-hana haga-lua ga-dalodalo, “Tamana, maa di ibu o-di hagaduadua deenei e-deemee di daa gi-daha, e-hai loo gi-inu ko-Au, gei deeai, go do hiihai la-hua gii-gila.”

26:43  Mee ga-hanimoi labelaa, ga-gidee-Ia ana dama-agoago e-kii. Digaula gu-molemoe huoloo, gu-deemee di-haga-aala.

26:44  Jesus gaa-hana labelaa e-dalodalo i tolu holongo go talodalo la-hua.

26:45  Mee ga-hanimoi gi ana dama-agoago, ga-helekai, “Goodou e-kii baba hua? Mmada! Gu-dae-mai di madagoaa Tama-Tangada gaa-wanga gi-lodo nia lima o digau huaidu!

26:46  Tuu-i-nua, gaa-hula. Mmada, deenei taane dela gaa-wanga Au!”

26:47  Jesus nogo helehelekai hua igolo, gei Judas, tangada e-dahi i-nia dama-agoago a-Maa gu-dau-mai mo digau dogologo dalia a-mee. Digaula ne-lloomoi mo nadau hulumanu-dauwa, mono mee haga-mamaawa-dangada. Digaula ne-hagau-mai go nia dagi hai-mee-dabu mo nia dagi mmaadua.

26:48  Judas ne-helekai gi digaula boloo, ‘Tangada dela gaa-hongi ko-au, deelaa go Mee. Kumidia!’

26:49  Gei mee ga-hanadu haga-huudonu gi Jesus, ga-helekai, “Meenei dagu dangada agoago. Di aumaalia gi-madalia Goe,” ga-hongi-adu a-Mee.

26:50  Jesus ga-helekai, “Dogu ihoo hagaaloho, heia gi-limalima dau mee dela belee hai.” Nomuli, gei digaula ga-lloomoi gaa-kumi Jesus, ga-lawalawa.

26:51  Tangada e-dahi i digau ala nogo madalia a Jesus ne-dahi-aga dana hulumanu-dauwa, gaa-tuu talinga di hege o tagi aamua hai-mee-dabu.

26:52  Jesus ga-helekai, “Dugua dau hulumanu-dauwa gi dono lohongo. Digau huogodoo ala e-hai-hegau gi nadau hulumanu-dauwa, le e-mmade i tulumanu-dauwa.

26:53  Goe e-de-iloo bolo Au e-mee di-gahigahi dogu Damana gi-hagamaamaa, gei Mee ga-hagau-mai gi-baahi i-nua nia buini-dauwa e-madangaholu maa-lua gau di-langi?

26:54  Malaa, ma-gaa-hai beenei, dehee di hai gaa-mee di-kila nia helekai o-di Beebaa-Dabu ala e-helekai bolo deenei le e-hai-loo gii-gila?”

26:55  Nomuli, gei Jesus ga-helekai gi digau dogologo, “E-hai behee? Au tangada dagahi haganoho dela goodou e-lloomoi e-kumi Au, ge gaamai godou hulumanu-dauwa, mono mee haga-mamaawa-dangada? Nia laangi huogodoo Au nogo noho i-lodo di Hale Daumaha, e-haihai agu agoago, gei goodou digi kumidia Au.

26:56  Malaa, nia mee huogodoo aanei ne-hai gii-gila e-hagahonu nia helekai soukohp gii-donu i-lodo di Beebaa-Dabu.” Nomuli, gei nia dama-agoago a-Maa ga-diiagi a Jesus, gaa-llele gi-daha.

26:57  Digaula ne-kumi a Jesus, gaa-lahi a-Mee gi-di hale Caiaphas, di tagi aamua hai-mee-dabu, di gowaa dela e-dagabuli-ai digau haga-donudonu haganoho mo nia dagi mmaadua.

26:58  Peter ga-daudali a Jesus, gei e-mada-tanga i-daha, ga-ulu-adu gi-lodo di abaaba di hale tagi aamua hai-mee-dabu, gaa-noho i-baahi nia daangada hagaloohi, bolo gi-gidee-ia di hagaodi gi-muli o-nia mee aanei huogodoo.

26:59  Nia dagi hai-mee-dabu mo digau hai-gabunga-aamua huogodoo gu-hagamahi, e-hagataele di-nadau haga-modongoohia dilikai, belee hagahuaidu a Jesus gi-daaligi a-Mee gii-made.

26:60  Gei digaula digi gida di-nadau hai, digau dogologo ne-lloomoi gi-mua digaula, ga-helekai tilikai i Jesus. Muliagi, gei nia daane dogolua ga-tuu-aga,

26:61  ga-helekai, “Taane deenei guu-hai bolo Ia e-mee di-oho di Hale Daumaha o God, gei i-muli nia laangi e-dolu, ge-Ia ga-haga-duu-aga labelaa.”

26:62  Tagi aamua hai-mee-dabu ga-duu-i-nua, ga-helekai gi Jesus, “Dau helekai gi-di hagahuaidu deenei adu gi-di-goe ai?”

26:63  Gei Jesus digi helekai. Tagi aamua hai-mee-dabu ga-helekai labelaa gi Mee, “I-di ingoo o-di God Mouli, au ga-dugu-adu gi-helekai hagamodu: Hagia-mai gi gimaadou be maa Koe go di Mesaia, go Tama a God?”

26:64  Jesus ga-helekai gi mee, “Deenaa gu-helekai-iei-goe. Gei-Au e-hagi-adu gi goodou bolo di madagoaa e-dau-mai maalia, gei goodou ga-gidee Tama-Tangada e-noho i-di baahi gau-donu o God Mogobuna, e-hanimoi i-hongo nia gololangi!”

26:65  Dana hagalongo gi-di mee deenei, tagi aamua hai-mee-dabu gu-hahaahi dono gahu, ga-helekai, “Mee e-helekai e-hagahuaidu a God! Gidaadou hagalee hiihai gi tuai dangada haga-modongoohia! Goodou gu-longono hua ana helekai hagahuaidu a God!

26:66  Goodou e-hagamaanadu bolo-aha?” Digaula ga-helekai, “Mee gu-ihala e-hai-loo gii-made!”

26:67  Digaula ga-buibui nadau haawale gi-nia golomada o-maa, ga-dadaaligi a-Mee, gei digau ala ne-paapaa a-Mee

26:68  ga-helekai, “Mesaia, hagia-mai be di-maa koai dela ne-paapaa Goe!”

26:69  Peter e-noho i-lodo di abaaba o-di hale, gei tama-ahina hai-hegau o tagi aamua hai-mee-dabu ga-hanimoi gi mee, ga-helekai, “Goe nogo madalia labelaa a Jesus o Nazareth!”

26:70  Gei mee ga-haga-de-iloo-ia i-mua digau huogodoo aalaa boloo, “Au e-de-iloo-eau di-mee deenaa e-helekai-iei goe!”

26:71  Gei mee gaa-hana gi-di ngudu di bontai, gei tuai dama-ahina ga-gidee-ia a-mee, ga-helekai gi-nia daane ala i-golo, “Taane deenei nogo madalia a Jesus o Nazareth!”

26:72  Peter ga-haga-de-iloo-ia ga-helekai, “Au e-helekai hagamodu bolo au e-de-iloo taane deenaa!”

26:73  Nomuli, nia daane nogo tuu i-golo, ga-lloomoi gi Peter, ga-helekai, “Ma e-donu-hua bolo goe tangada i digaula, idimaa, o hanga-leelee la-ne-hagi-aga goe!”

26:74  Gei Peter ga-helekai, “Au e-hai dagu hagamodu bolo au ga-hagi-aga di tonu! God gi-hagaduadua-ina au maa au ga-helekai hai-gee! Au e-de-iloo taane deenaa!” Di madagoaa-hua deelaa, gei teduu gaa-wolo.

26:75  Peter gu-langahia nia helekai a Jesus ne-hai ang-gi deia boloo, “I-mua teduu ma-gaa-wolo, gei goe ga-haga-de-iloo Au haga-dolu.” Gei mee gaa-hana gi-daha ge dangi-wawwawe aga i ono lodo.

Chapter 27

27:1  Luada-loo, nia dagi hai-mee-dabu huogodoo mo nia dagi mmaadua ne-haga-noho di-nadau hai belee daaligi a Jesus gii-made.

27:2  Digaula ga-lawalawa a-Mee, gaa-lahi e-gabunga go Pilate, di gobinaa o Rome.

27:3  Di madagoaa Judas dela ne-wanga a Jesus, ne-iloo-ia bolo Jesus gu-hagi-aga, gu-daaligi gii-made, gei mee gu-manawa-gee, guu-huli ono lodo i dana mee dela ne-hai, gaa-kae gi-muli nia bahihadu-silber e-motolu gi-nia dagi hai-mee-dabu mo nia dagi mmaadua,

27:4  ga-helekai, “Au gu-hai-hala i dagu wanga tangada ono hala ai e-daaligi gii-made!” Gei digaula ga-helekai, “E-de-hei-e-gimaadou! Ma di hala ni-oou!”

27:5  Judas gaa-kili nia bahihadu gi-lala i-lodo di Hale Daumaha, gaa-hana ga-daudau eia.

27:6  Nia dagi hai-mee-dabu ga-dahi-aga nia bahihadu, ga-helekai, “Nia bahihadu aanei la-guu-lawa di hui nia dodo o tangada. E-hagalee donu di wanga labelaa gi-lodo di gowaa benebene mee o-di Hale Daumaha.”

27:7  Nomuli, gei digaula gaa-hai di-nadau haganoho gi-nia bahihadu aalaa, gaa-hai bolo e-haga-hai-hegau e-hui di gowaa dela e-haga-ingoo boloo, “Di Gowaa Tangada Hai-pileed”, e-hai di waa-daalunga digau tuadimee.

27:8  Deenei di hai di gowaa deelaa e-haga-ingoo boloo, “Di Gowaa Dodo”, gaa-dae-mai-loo gi dangi-nei.

27:9  Malaa, nia helekai a soukohp Jeremiah guu-kila, ala ne-helekai: “Digaula ne-kae nia bahihadu-silber e-motolu dela di hulu digau Israel ne-donu ginai bolo e-hui a-Mee,

27:10  gei digaula gaa-hui “Di Gowaa Tangada Hai-pileed”, gadoo be nia helekai a God mai gi-di-au.”

27:11  Jesus e-duu i-mua di gobinaa o Rome dela e-hai ana heeu gi Mee, “Ma Koe go di king o Jew?” Jesus ga-helekai, “Kooe dela e-helekai.”

27:12  Gei Mee digi helekai i-nia hagahuaidu ala mai baahi nia dagi hai-mee-dabu mo nia dagi mmaadua.

27:13  Nomuli, gei Pilate ga-helekai, “Digaula e-helehelekai hagahuaidu Goe i-nia mee huaidu e-logo. Goe e-de-longono?”

27:14  Jesus digi helekai gi-di heeu a-maa, gei di gobinaa la-gu-goboina huoloo.

27:15  Nia madagoaa huogodoo ma-gaa-hai Tagamiami Pasoobaa, di gobinaa o Rome e-nnoo-mau e-hagamehede dahi dangada galabudi dela e-donu ginai digau dogologo.

27:16  Di madagoaa deelaa, tangada dono ingoo go Jesus Barabbas, koia e-iloo-ai nia daangada, i-lodo di hale-galabudi.

27:17  Pilate ga-heeu gi digau dogologo ala ne-dagabuli-mai boloo, “Koai i meemaa e-hiihai ginai goodou bolo au gi-hagamehede-ina adu gi goodou: Jesus Barabbas be go Jesus dela e-haga-ingoo bolo Mesaia?”

27:18  Mee e-iloo bolo digau o Jew ne-laha-mai a Jesus i-di nadau hagadugina-e-ginaadou a-Mee.

27:19  Di madagoaa Pilate nogo noho i-hongo dono lohongo hai-gabunga, di lodo o-maa ne-dau dana haga-iloo, “Hudee hai dau mee gi taane ono hala ai, idimaa, au gu-duadua huoloo i-dagu midi i-Mee anaboo.”

27:20  Nia dagi hai-mee-dabu mo nia dagi mmaadua gu-hagamahi ang-gi nia daangada dogologo bolo digaula gi-helekai gi Pilate gi-hagamehede-ina a Barabbas, gei gi-daaligidia Jesus gii-made.

27:21  Pilate ga-heeu gi digau dogologo aalaa, “Koai i meemaa e-hiihai ginai goodou bolo au gi-hagamehede-ina adu gi goodou?” Gei digaula ga-helekai, “Go Barabbas!”

27:22  Pilate ga-heeu gi digaula, “Malaa dehee dagu hai gaa-hai gi Jesus dela e-haga-ingoo bolo Mesaia?” Digau huogodoo ga-helekai maaloo, “Daudaulia a-mee gi-nua!”

27:23  Pilate ga-heeu labelaa, “Ma di hala behee dela ne-hai go Mee?” Gei digaula ga-daamada ga-wwolowwolo-loo gi-nua-loo, “Daudaulia a-Mee!”

27:24  Di madagoaa Pilate ne-gidee bolo ia gu-deemee di-dugu digaula, digaula e-mee-hua di-hai-baahi, gei mee ga-gaamai ana wai gaa-tono ono lima i-mua digau dogologo aalaa ga-helekai boloo, “Au hagalee dau gi-di made o taane deenei. Di mee deenei ni goodou ne-hai.”

27:25  Digau huogodoo aalaa guu-wwolo boloo, “Nia dodo o taane deenaa la-gi-duguina-mai gi gimaadou mo madau dama!”

27:26  Malaa, Pilate gu-hagamehede a Barabbas gi digaula, nomuli digaula gaa-lahi Jesus, ga-haga-mamaawa, ga-daudau a-Mee.

27:27  Digau dauwa a Pilate ne-lahi Jesus gi-lodo di hale di gobinaa, gei digau-dauwa huogodoo ga-haganiga a-Mee.

27:28  Digaula ga-hahaahi nia gahu o-Maa, ga-haga-ulu a-Mee gi-di gahu mmee-uli.

27:29  Nomuli gaa-hai di nadau hau manga laagau-duduia, gaa-wanga gi-hongo di libogo o-Maa, gaa-wanga labelaa di-nadau laagau gi-di lima gau-donu o-Maa ga-helekai bolo nia goloo o-di king. Nomuli, gei digaula ga-dogoduli gi-mua o Mee, ga-haganneennee a-Mee, “Di king o digau o Jew gi-mouli waalooloo!”

27:30  Digaula ga-buibui nadau haawale gi Mee, gaa-daa di laagau ga-haga-mamaawa di libogo o-Maa.

27:31  I-muli-hua di-nadau haganneennee a-Mee, digaula ga-daa gi-daha di gahu mmee-uli, ga-haga-ulu a-Mee gi ono gahu donu. Gei digaula gaa-lahi a-Mee gi-malaelae belee daudau.

27:32  Digaula ga-ulu gi-daha mo-di waahale, ga-heetugi gi taane mai Cyrene dono ingoo go Simon. Digau dauwa gaa-hono a-mee gi-aamo-ina di loobuu a Jesus.

27:33  Digaula gaa-dau i-di gowaa dela e-haga-ingoo bolo Golgotha dono hadinga boloo, “Di Gowaa Hangaibu-Libogo.”

27:34  Di madagoaa deelaa, digaula gaa-wanga gi Jesus nadau waini gu-unugi gi-nia mee-mmala. I-muli dana momi nia maa, gei Mee gu-de-hiihai di-inu.

27:35  Digaula ga-daudau a-Mee, nomuli ga-hudihudi nadau ‘dice’, e-duwwe nia gahu o-Maa i ginaadou.

27:36  Nomuli, digaula gaa-noho i-golo e-hagaloohi Jesus.

27:37  I-hongo di libogo o-Maa, nia helekai hagahuaidu a-Mee, e-hihi boloo, “Deenei go Jesus, di king digau o Jew.”

27:38  Digaula ne-daudau labelaa nia daangada dogolua gaiaa dalia Jesus, e-dahi i-di baahi gau-donu, ge dahi i-di baahi gau-ihala.

27:39  Nia daangada ma-ga-lloomoi laa-laa, e-lialiagi nadau libogo mo-di haganneennee a Jesus,

27:40  “Ma Goe bolo e-oho di Hale Daumaha, ga-haga-duu-aga labelaa i-muli nia laangi e-dolu, daawa-ina-laa goe gi-daha mo-di loobuu maa goe di Tama ni God! Doo-iha gi-daha mo-di loobuu!”

27:41  Go di hai la-hua, nia dagi hai-mee-dabu, mono gau haga-donudonu haganoho, mo nia dagi mmaadua, ga-gadagada haganneennee a-Mee ga-helekai,

27:42  “Mee ne-haga-dagaloaha-hua nia daangada, gei Mee e-deemee di-haga-dagaloaha e-Ia! Hagalee go Mee go di king o Israel? Maa nei bolo Mee ne-gaga-ia gi-daha mo-di loobuu dolomeenei, gei gidaadou ga-hagadonu-laa a-Mee!

27:43  Mee e-hagadonu a God, nogo helekai bolo Ia di Tama ni God. Malaa, dugu ang-gi God e-daa a-Mee gi-daha mo-di loobuu dolomeenei!”

27:44  Gei nia daangada huaidu ala ne-daudau dalia a-Mee, gu-helekai labelaa hagahuaidu i Mee.

27:45  Oodee, gei tenua hagatau la-gu-bouli, gaa-dae-loo gi-di laa e-dolu.

27:46  Ne-hoohoo gi-di laa e-dolu, gei Jesus gaa-dangi gi-nua, “Eli, Eli, Lema Sabaktani?” dono hadinga boloo, “Dogu God, dogu God, Goe e-diiagi Au eiaha?”

27:47  Hunu daangada nogo tuu i-golo ne-longono-ginaadou a-Mee, ga-helekai, “Mee e-gahigahi a Elijah!”

27:48  Tangada e-dahi i digaula gaa-lele hagalimalima, ga-dahi-aga dana liimi, ga-hagatiu gi-lodo nia waini hui-ngoohia, ga-daalo gi-di mada di laagau, ga-dahi-aga gi Mee gi-inumia.

27:49  Hunu gau ga-helekai, “Nnoo malaa, gii-mmada gidaadou be Elijah e-hanimoi e-hagamaamaa a-Mee!”

27:50  Jesus gaa-dangi labelaa gi-nua ga-hagaodi ono madangi.

27:51  Di gahu dela e-duuli i-lodo di Hale Daumaha gu-mahaa-lua, daamada eia i-nua, ga-tugi i-lala. Tenua gu-ngalungalua, nia hadu gu-mahaahaa,

27:52  nia daalunga gu-maahuge, gei nia daangada dogologo a God ala ne-mmade la-gu-mmouli-aga.

27:53  Digaula gu-diiagi nadau daalunga, gei i-muli-hua di mouli-aga Jesus, digaula guu-hula gi-lodo di Waahale-Hagamadagu go Jerusalem, gei digau dogologo guu-mmada gi digaula.

27:54  Di madagoaa di tagi-dauwa mono gau-dauwa ala nogo hagaloohi a Jesus, gaa-mmada gi tenua gu-ngalungalua mono mee huogodoo ala ne-hai, digaula gu-uli nadau gai huoloo, ga-helekai, “Ma e-donu-hua bolo Mee go Tama a God.”

27:55  Nia ahina dogologo nogo daudali Jesus mai i Galilee, nogo hagamaamaa a-Mee, digaula nogo mmada mai hagamogowaa.

27:56  Mary mai Magdala mo Mary tinana James mo Joseph mo tinana o-nia dama-daane a Zebedee nogo noho i-baahi nia ahina aalaa.

27:57  Hiahi-ia di mee, gei taane maluagina mai Arimathea gaa-dau i-golo, dono ingoo go Joseph. Mee nogo madalia nia dama-agoago a Jesus.

27:58  Mee gaa-hana gi Pilate ga-madau gi mee tuaidina o Jesus. Pilate ga-haga-iloo bolo tuaidina la-gii-wanga-ina gi Joseph.

27:59  Joseph gaa-kae tuaidina o-maa, gaa-didi gi-di gahu-lenge hoou,

27:60  gaa-dugu gi-lodo dana daalunga dogo hai-hua gi-lodo di hadugalaa hamaaloo. Gei mee ga-haga-daga-mai dana hadu damana e-pono di ngudu taalunga, gaa-hana.

27:61  Mary mai Magdala mo Mary dela i-golo, nogo noho i-golo, e-huli-adu gi taalunga.

27:62  Dono daiaa go di Laangi-Sabad, gei nia dagi hai-mee-dabu mono Pharisee ga-dagabuli gi-baahi o Pilate,

27:63  ga-helekai, “Meenei, gimaadou gu-langahia telekai taane kai-tilikai ne-hai i dono madagoaa nogo mouli-ai, boloo, ‘I-muli nia laangi e-dolu, gei Au ga-mouli-aga.’

27:64  Heia au helekai gi-hagaloohia taalunga, gaa-dae-loo gi-nia laangi e-dolu, gi-deemee di-lloomoi nia dama-agoago a-Maa, e-gaiaa tuaidina o-Maa, ga-helekai gi-nia daangada bolo Mee gu-mouli-aga i-di made. Di kai-tilikai muliagi deenei la-koia e-huaidu i-di kai-tilikai matagidagi.”

27:65  Pilate ga-helekai gi digaula boloo, “Lahia digau-dauwa aanaa, hagaloohia. Hula loohia taalunga i godou mee ala e-mee.”

27:66  Malaa, digaula gaa-hula, ga-haga-noho gii-mau di hadu, gaa-dugu di-nadau maaga gi-di hadu deelaa, gaa-dugu digau-dauwa e-hagaloohi.

Chapter 28

28:1  I-muli di Laangi-Sabad, luada-loo di laangi-tabu, Mary mai Magdala, mo Mary dela i-golo, gaa-hula belee mmada taalunga.

28:2  Di madagoaa-hua deelaa, gei tenua gu-ngalungalua, tangada di-langi o Dimaadua gu-haneia i-di langi, ga-haga-daga gi-daha di hadu, gaa-noho i-nonua.

28:3  Mee e-madamada huoloo gadoo be-di ila, ono gahu e-kene gadoo be ‘snow’.

28:4  Digau hagaloohi gu-uli nadau gai huoloo, gu-polepole i nadau mmaadagu, guu-hai be digau ne-mmade.

28:5  Tangada di-langi ga-helekai gi-nia ahina aalaa, “Goolua hudee mmaadagu. Au e-iloo bolo goolua e-halahala a Jesus dela ne-daudau i-di loobuu.

28:6  Mee gu-hagalee i-ginei, gu-haga-mouli-aga be ana helekai. Lloomoi mmada gi-di gowaa nogo moe-iei Mee.

28:7  Hula hagalimalima, hagi-anga-ina gi ana dama-agoago boloo, ‘Mee gu-haga-mouli-aga, guu-hana gi Galilee i godou mua, deelaa di gowaa ga-gidee-goodou a-Mee!’ Gi-langahia agu helekai ala ne-hagi-adu gi goolua!”

28:8  Meemaa ga-hagatanga haga-llebullebu, gu-mmaadagu gei gu-tenetene huoloo, gaa-llele ga-haga-iloo gi ana dama-agoago.

28:9  Di madagoaa deelaa, Jesus ga-duu-adu i-mua meemaa ga-helekai, “Di aumaalia gi-madalia goolua.” Meemaa ga-lloomoi gi Mee, gaa-kumi-adu nia wae o-maa, ga-daumaha ang-gi Mee.

28:10  Jesus ga-helekai, “Goolua hudee mmaadagu, hula haga-iloo-ina gi ogu duaahina bolo gii-hula gi Galilee, deelaa di gowaa ga-gidee-ginaadou Au.”

28:11  Di madagoaa nia ahina ala ne-hula ne-haga-iloo, hunu daangada i digau-dauwa ala nogo hagaloohi taalunga deelaa, gaa-hula gi-di waahale, ga-hagi-anga gi nia dagi hai-mee-dabu nia mee huogodoo ala ne-hai.

28:12  Nia dagi hai-mee-dabu ga-heetugi gi-nia dagi mmaadua ga-haga-noho di-nadau mee dela e-hai. Digaula gaa-wanga di-nadau hulu bahihadu damana gi digau-dauwa,

28:13  ga-helekai, “Goodou helekai bolo ana dama-agoago ne-lloomoi boo, ga-gaiaa tuaidina o-Maa, gei goodou nogo kii.

28:14  Maa di gobinaa ga-longono-ia, gei gimaadou ga-haga-modongoohia laa gi mee bolo goodou digi hala. Goodou hudee lliga i dahi mee.”

28:15  Digau hagaloohi gaa-kae nia bahihadu gaa-hai be nnelekai ala ne-hagi-anga gi ginaadou. Di longo deenei guu-dele i-baahi digau o Jew, gaa-dae-mai-loo gi dangi-nei.

28:16  Nia dama-agoago dilongoholu maa-dahi ne-hula gi-di gonduu i Galilee dela ne-hagi-anga go Jesus gi digaula bolo gii-hula ginai.

28:17  Di madagoaa-hua dela ne-gidee-ginaadou a-Mee, digaula ga-daumaha ang-gi Mee, gei hunu gau e-manawa-logo.

28:18  Jesus ga-hanadu gi digaula, ga-helekai, “Nia mogobuna huogodoo o-di langi mo henuailala la-gu-dugu-mai gi-di-Au.

28:19  Malaa, goodou hula gi-nia daangada i-nia henua huogodoo, heia digaula gii-hai nia dama-agoago ni-aagu. Babdais-ina digaula gi-di ingoo o Tamana, Tama, mo-di Hagataalunga-Dabu.

28:20  Agoago gi digaula gi-daudalia nia mee huogodoo ala ne-hagi-adu gi goodou. Malaa, goodou gi-iloo bolo Au e-madalia goodou i-nia madagoaa huogodoo, gaa-dae-loo gi-di hagaodi o-di madagoaa.”