CSlElizabeth - Proverbs

Chapter 1

1:1  Притчи Соломона сына Давидова, иже царствова во Израили,

1:2  познати премудрость и наказание и уразумети словеса мудрости,

1:3  прияти же извития словес и разрешения гаданий, уразумети же правду истинную и суд исправляти:

1:4  да даст незлобивым коварство, отрочати же юну чувство же и смысл.

1:5  Сих бо послушав, мудрый премудрее будет, а разумный строителство стяжет:

1:6  уразумеет же притчу и темное слово, речения же премудрых и гадания.

1:7  Начало премудрости страх Господень, разум же благ всем творящым его: благочестие же в Бога начало чувства, премудрость же и наказание нечестивии уничижат.

1:8  Слыши, сыне, наказание отца твоего и не отрини заветов матере твоея:

1:9  венец бо благодатей приимеши на твоем версе и гривну злату о твоей выи.

1:10  Сыне, да не прельстят тебе мужие нечестивии, ниже да восхощеши,

1:11  аще помолят тя, глаголюще: иди с нами, приобщися крове, скрыем же в землю мужа праведна неправедно:

1:12  пожрем же его якоже ад жива, и возмем память его от земли,

1:13  стяжание его многоценное приимем, исполним же домы нашя корыстей:

1:14  жребий же твой положи с нами: обще же влагалище стяжем вси, и мешец един да будет всем нам.

1:15  Не иди в путь с ними: уклони же ногу твою от стезь их:

1:16  нозе бо их на зло текут, и скори суть излияти кровь.

1:17  Не без правды бо простираются мрежи пернатым:

1:18  тии бо убийству приобщающеся, сокровищствуют себе злая: разрушение же мужей законопреступных зло.

1:19  Сии путие суть всех творящих беззаконная: нечестием бо свою душу отемлют.

1:20  Премудрость во исходех поется, в стогнах же дерзновение водит,

1:21  на краех же стен проповедуется, у врат же сильных приседит, во вратех же града дерзающи глаголет:

1:22  елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство

1:23  и повинни быша обличением. Се, предложу вам моего дыхания речение, научу же вас моему словеси.

1:24  Понеже звах, и не послушасте, и простирах словеса, и не внимасте,

1:25  но отметасте моя советы и моим обличением не внимасте:

1:26  убо и аз вашей погибели посмеюся, порадуюся же, егда приидет вам пагуба,

1:27  и егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба.

1:28  Будет бо егда призовете мя, аз же не послушаю вас: взыщут мене злии и не обрящут.

1:29  Возненавидеша бо премудрость, словесе же Господня не прияша:

1:30  ниже хотеша внимати моим советом, ругахуся же моим обличением.

1:31  Темже снедят своих путий плоды и своего нечестия насытятся:

1:32  ибо, зане обидеша младенцев, убиени будут, и истязание нечестивыя погубит.

1:33  Мене же слушаяй вселится на уповании и почиет без страха от всякаго зла.

Chapter 2

2:1  Сыне, аще приим глагол моея заповеди, скрыеши в себе,

2:2  послушает премудрости твое ухо, и приложиши сердце твое к разуму: приложиши же е в наказание сыну твоему.

2:3  Аще бо премудрость призовеши и разуму даси глас твой, чувство же взыщеши великим гласом,

2:4  и аще взыщеши ея яко сребра, и якоже сокровища испытаеши ю:

2:5  тогда уразумееши страх Господень и познание Божие обрящеши:

2:6  яко Господь дает премудрость, и от лица Его познание и разум:

2:7  и сокровищствует исправляющым спасение, защищает же шествие их,

2:8  еже сохранити пути оправданий, и путь благоговеинствующих Его сохранит.

2:9  Тогда уразумееши правду и суд и исправиши вся стези благия.

2:10  Аще бо приидет премудрость в твою мысль, чувство же твоей души добро быти возмнится.

2:11  Совет добр сохранит тя, помышление же преподобное соблюдет тя,

2:12  да избавит тя от пути злаго и от мужа, глаголюща ничтоже верно.

2:13  О, оставившии пути правыя, еже ходити в путех тмы!

2:14  О, веселящиися о злых и радующиися о развращении злем!

2:15  Ихже стези стропотны, и крива течения их, еже далече тя сотворити от пути права,

2:16  и чужда от праведнаго разума. Сыне, да тя не постигнет совет злый,

2:17  оставляяй учение юности, и завета Божественнаго забывый:

2:18  постави бо при смерти дом свой и при аде с земными деяния своя.

2:19  Вси ходящии по нему не возвратятся, ниже постигнут стезь правых: ни бо достигнут лет жизни.

2:20  Аще бо быша ходили в стези благия, обрели убо быша стези правы гладки: блази будут жителие на земли, незлобивии же останут на ней:

2:21  яко правии вселятся на земли, и преподобнии останут на ней.

2:22  Путие нечестивых от земли погибнут, пребеззаконнии же изринутся от нея.

Chapter 3

3:1  Сыне, моих законов не забывай, глаголы же моя да соблюдает твое сердце:

3:2  долготу бо жития и лета жизни и мир приложат тебе.

3:3  Милостыни и вера да не оскудевают тебе: обложи же я на твоей выи и напиши я на скрижали сердца твоего: и обрящеши благодать.

3:4  И промышляй добрая пред Господем (Богом) и человеки.

3:5  Буди уповая всем сердцем на Бога, о твоей же премудрости не возносися:

3:6  во всех путех твоих познавай ю, да исправляет пути твоя.

3:7  Не буди мудр о себе: бойся же Бога и уклоняйся от всякаго зла:

3:8  тогда изцеление будет телу твоему и уврачевание костем твоим.

3:9  Чти Господа от праведных твоих трудов и начатки давай ему от твоих плодов правды:

3:10  да исполнятся житницы твоя множеством пшеницы, вино же точила твоя да источают.

3:11  Сыне, не пренебрегай наказания Господня, ниже ослабевай от Него обличаемь:

3:12  егоже бо любит Господь, наказует, биет же всякаго сына, егоже приемлет.

3:13  Блажен человек, иже обрете премудрость, и смертен, иже уведе разум.

3:14  Лучше бо сию куповати, нежели злата и сребра сокровища:

3:15  честнейша же есть камений многоценных: не сопротивляется ей ничтоже лукаво, благознатна есть всем приближающымся ей: всяко же честное недостойно ея есть.

3:16  Долгота бо жития и лета жизни в деснице ея, в шуйце же ея богатство и слава: от уст ея исходит правда, закон же и милость на языце носит.

3:17  Путие ея путие добри, и вся стези ея мирны.

3:18  Древо живота есть всем держащымся ея, и воскланяющымся на ню, яко на Господа, тверда.

3:19  Бог премудростию основа землю, уготова же небеса разумом:

3:20  в чувстве Его бездны разверзошася, облацы же источиша росу.

3:21  Сыне, да не преминеши, соблюди же мой совет и мысль:

3:22  да жива будет душа твоя, и благодать будет на твоей выи: (будет же изцеление плотем твоим и уврачевание костем твоим:)

3:23  да ходиши надеяся в мире во всех путех твоих, нога же твоя не поткнется.

3:24  Аще бо сядеши, безбоязнен будеши, аще же поспиши, сладостно поспиши.

3:25  И не убоишися страха нашедшаго, ниже устремления нечестивых находящаго:

3:26  Господь бо будет на всех путех твоих и утвердит ногу твою, да не поползнешися.

3:27  Не отрецыся благотворити требующему, егда имать рука твоя помогати.

3:28  Не рцы: отшед возвратися, и заутра дам, сильну ти сущу благотворити: не веси бо, что породит день находяй.

3:29  Не соплетай на друга твоего зла, пришелца суща и уповающа на тя.

3:30  Не враждуй на человека туне, да не что на тя содеет злое.

3:31  Не стяжи злых мужей поношения, ни возревнуй путем их.

3:32  Нечист бо пред Господем всяк законопреступник и с праведными не сочетавается.

3:33  Клятва Господня в домех нечестивых, дворы же праведных благословляются.

3:34  Господь гордым противится, смиренным же дает благодать.

3:35  Славу премудрии наследят, нечестивии же вознесоша безчестие.

Chapter 4

4:1  Послушайте, дети, наказания отча и внемлите разумети помышление,

4:2  дар бо благий дарую вам: моего закона не оставляйте.

4:3  Сын бо бых и аз отцу послушливый, и любимый пред лицем матере,

4:4  иже глаголаша и учиша мя: да утверждается наше слово в твоем сердцы: храни заповеди, не забывай:

4:5  стяжи премудрость, стяжи разум: не забуди, ниже презри речения моих уст, ниже уклонися от глагол уст моих.

4:6  Не остави ея, и имется тебе: возжелей ея, и соблюдет тя.

4:7  Начало премудрости: стяжати премудрость, и во всем стяжании твоем стяжи разум.

4:8  Огради ю, и вознесет тя: почти ю, да тя оымет,

4:9  да даст главе твоей венец благодатей, венцем же сладости защитит тя.

4:10  Слыши, сыне, и приими моя словеса, и умножатся лета живота твоего, да ти будут мнози путие жития.

4:11  Путем бо премудрости учу тя, наставляю же тебе на течения правая:

4:12  аще бо ходиши, не запнутся стопы твоя: аще ли течеши, не утрудишися.

4:13  Имися моего наказания, не остави, но сохрани е себе в жизнь твою.

4:14  На пути нечестивых не иди, ниже возревнуй путем законопреступных.

4:15  На немже аще месте воя соберут, не иди тамо: уклонися же от них и измени:

4:16  не уснут бо, аще зла не сотворят: отимется сон от них, и не спят:

4:17  тии бо питаются пищею нечестия, вином же законопреступным упиваются.

4:18  Путие же праведных подобне свету светятся: предходят и просвещают, дондеже исправится день.

4:19  Путие же нечестивых темни: не ведят, како претыкаются.

4:20  Сыне, моим глаголом внимай, к моим же словесем прилагай ухо твое:

4:21  да не оскудеют ти источницы твои, храни я в сердцы твоем:

4:22  живот бо суть всем обретающым я и всей плоти их изцеление.

4:23  Всяцем хранением блюди твое сердце: от сих бо исходища живота.

4:24  Отими от себе строптива уста, и обидливы устне далече от тебе отрини.

4:25  Очи твои право да зрят, и вежди твои да помавают праведная.

4:26  Права течения твори твоима ногама и пути твоя исправляй.

4:27  Не уклонися ни на десно, ни на шуе: отврати же ногу твою от пути зла:

4:28  пути бо десныя весть Господь, развращени же суть, иже ошуюю.

4:29  Той же права сотворит течения твоя, и хождения твоя в мире поспешит.

Chapter 5

5:1  Сыне, моей премудрости внимай, к моим же словесем прилагай ухо твое,

5:2  да сохраниши мысль благую: чувство же моих устен заповедает тебе.

5:3  Не внимай злей жене: мед бо каплет от устен жены блудницы, яже на время наслаждает твой гортань:

5:4  последи же горчае желчи обрящеши, и изощренну паче меча обоюду остра:

5:5  безумия бо нозе низводят употребляющих ю со смертию во ад, стопы же ея не утверждаются:

5:6  на пути бо животныя не находит, заблужденна же течения ея и неблагоразумна.

5:7  Ныне убо, сыне, послушай мене и не отриновенна сотвори моя словеса:

5:8  далече от нея сотвори путь твой и не приближися ко дверем домов ея,

5:9  да не предаст иным живота твоего, и твоего жития немилостивым,

5:10  да не насытятся инии твоея крепости, твои же труды в домы чуждыя внидут,

5:11  и раскаешися на последок твой, егда иструтся плоти тела твоего, и речеши:

5:12  како возненавидех наказание, и от обличений уклонися сердце мое?

5:13  Не послушах гласа наказующаго мя, и ко учащему мя не прилагах уха моего:

5:14  вмале бех во всяцем зле посреде церкве и сонмища.

5:15  Сыне, пий воды от своих сосудов и от твоих кладенцев Источника:

5:16  да преизливаются тебе воды от твоего источника, во твоя же пути да происходят твоя воды.

5:17  Да будут тебе единому имения, и да никтоже чуждь причастится тебе.

5:18  Источник твоея воды да будет тебе твой, и веселися с женою, яже от юности твоея:

5:19  елень любве и жребя твоих благодатей да беседует тебе, твоя же да предидет тебе и да будет с тобою во всяко время: в дружбе бо сея спребываяй умножен будеши.

5:20  Не мног буди к чуждей, ниже объят буди объятии не твоея:

5:21  пред очима бо суть Божиима путие мужа, вся же течения его назирает.

5:22  Законопреступления мужа уловляют: пленицами же своих грехов кийждо затязается.

5:23  Сей скончавается с ненаказанными: от множества же своего жития извержется и погибает за безумие.

Chapter 6

6:1  Сыне, аще поручишися за твоего друга, предаси твою руку врагу.

6:2  Сеть бо крепка мужу свои устне, и пленяется устнами своих уст.

6:3  Твори, сыне, яже аз заповедую ти, и спасайся: идеши бо в руце злых за твоего друга: буди не ослабевая, поощряй же и твоего друга, егоже испоручил еси.

6:4  Не даждь сна твоима очима, ниже да воздремлеши твоима веждома,

6:5  да спасешися аки серна от тенет и яко птица от сети.

6:6  Иди ко мравию, о, лениве, и поревнуй видев пути его, и буди онаго мудрейший:

6:7  он бо, не сущу ему земледелцу, ниже нудящаго его имеяй, ниже под владыкою сый,

6:8  готовит в жатву пищу и многое в лето творит уготование. Или иди ко пчеле и увеждь, коль делателница есть, делание же коль честное творит: еяже трудов царие и простии во здравие употребляют, любима же есть всеми и славна: аще силою и немощна сущи, (но) премудростию почтена произведеся.

6:9  Доколе, о, лениве, лежиши? Когда же от сна востанеши?

6:10  Мало убо спиши, мало же седиши, мало же дремлеши, мало же объемлеши перси рукама:

6:11  потом же найдет тебе аки зол путник убожество: скудость же аки благий течец. Аще же не ленив будеши, приидет яко источник жатва твоя, скудость же аки злый течец (от тебе) отбежит.

6:12  Муж безумен и законопреступный ходит в пути не благи:

6:13  той же намизает оком и знамение дает ногою, учит же помаванием перстов.

6:14  Развращенно же сердце кует злая: на всякое время таковый мятежы составляет граду.

6:15  Сего ради внезапу приходит ему погибель, разсечение и сокрушение неизцельное.

6:16  Яко радуется о всех, ихже ненавидит Бог, сокрушается же за нечистоту души:

6:17  око досадителя, язык неправедный, руце проливающя кровь праведнаго,

6:18  и сердце кующее мысли злы, и нозе тщащыяся зло творити потребятся.

6:19  Разжизает лжы свидетель неправеден и насылает суды посреде братий.

6:20  Сыне, храни законы отца твоего и не отрини наказания матере твоея:

6:21  навяжи же я на твою душу присно и обяжи их о твоей выи.

6:22  Егда ходиши, води ю, и с тобою да будет: егда же спиши, да хранит тя, да востающу ти глаголет с тобою.

6:23  Зане светилник заповедь закона и свет, и путь жизни, и обличение, и наказание,

6:24  еже сохранити тя от жены мужаты и от наваждения языка чуждаго.

6:25  Сыне, да не победит тя доброты похоть, ниже уловлен буди твоима очима, ниже да совосхитишися веждами ея.

6:26  Цена бо блудницы, елика единаго хлеба: жена же мужей честныя душы уловляет.

6:27  Ввяжет ли кто огнь в недра, риз же (своих) не сожжет ли?

6:28  Или ходити кто будет на углиех огненных, ног же не сожжет ли?

6:29  Тако вшедый к жене мужатей не без вины будет, ниже всяк прикасайся ей.

6:30  Не дивно, аще кто ят будет крадый: крадет бо, да насытит душу свою алчущую:

6:31  аще же ят будет, воздаст седмерицею, и вся имения своя дав, избавит себе.

6:32  Прелюбодей же за скудость ума погибель души своей содевает,

6:33  болезни же и безчестие понесет: поношение же его не загладится во век:

6:34  исполнена бо ревности ярость мужа ея: не пощадит в день суда,

6:35  не изменит ни единою ценою вражды, ниже разрешится многими дарми.

Chapter 7

7:1  Сыне, храни моя словеса, моя же заповеди скрый у себе. Сыне, чти Господа, и укрепишися: кроме же Его не бойся иного.

7:2  Храни моя заповеди, и поживеши, словеса же моя яко зеницы очию:

7:3  обложи же ими твоя персты, напиши же я на скрижали сердца твоего.

7:4  Нарцы премудрость сестру тебе быти, разум же знаемь сотвори тебе,

7:5  да тя соблюдет от жены чуждия и лукавыя, аще тя словесы льстивыми облагати начнет:

7:6  оконцем бо из дому своего на пути приничущи,

7:7  егоже аще узрит от безумных чад юношу скудоумна,

7:8  проходящаго мимо угла в распутиих дому ея

7:9  и глаголющаго в темный вечер, егда упокоение будет нощное и мрачное:

7:10  жена же срящет его, зрак имущи прелюбодейничь, яже творит юных парити сердцам: воскрилена же есть и блудна,

7:11  в дому же не почивают нозе ея:

7:12  время бо некое вне глумится, время же на распутиих при всяцем угле приседит:

7:13  потом емши лобзает его, безстудным же лицем речет к нему:

7:14  жертва мирна ми есть, днесь воздаю обеты моя:

7:15  сего ради изыдох в сретение тебе, желающи лица твоего, обретох тя:

7:16  простиралами покрых одр мой, коврами же сугубыми постлах, иже от Египта,

7:17  шафраном посыпах ложе мое и дом мой корицею:

7:18  прииди и насладимся любве даже до утра, гряди и поваляемся в похоти:

7:19  несть бо мужа моего в дому, отиде в путь далече,

7:20  доволно сребра взя с собою, по многих днех возвратится в дом свой.

7:21  И прельсти его многою беседою, тенетами же устен (в блуд) привлече его.

7:22  Он же абие последова ей объюродев, и якоже вол на заколение ведется, и яко пес на узы,

7:23  или яко елень уязвлен стрелою в ятра: и спешит яко птица в сеть, не ведый, яко на душу свою течет.

7:24  Ныне убо, сыне, послушай мене и внимай глаголом уст моих,

7:25  да не уклонится в пути ея сердце твое,

7:26  и да не прельстишися в стезях ея: многих бо уязвивши низверже, и безчисленни суть, ихже убила есть:

7:27  путие адовы дом ея, низводящии в сокровища смертная.

Chapter 8

8:1  Темже ты премудрость проповеждь, да разум послушает тебе.

8:2  На высоких бо краех есть, посреде же стезь стоит:

8:3  при вратех бо сильных приседит, во входех же поется.

8:4  Вас, о, человецы, молю, и вдаю мой глас сыном человеческим.

8:5  Уразумейте, незлобивии, коварство, ненаказаннии же, приложите сердце.

8:6  Послушайте мене: честная бо реку и изнесу от устен правая.

8:7  Яко истине поучится гортань мой, мерзки же предо мною устны лживыя.

8:8  С правдою вси глаголы уст моих, ничтоже в них стропотно, ниже развращенно.

8:9  Вся права разумевающым, и права обретающым разум.

8:10  Приимите наказание, а не сребро, и разум паче злата искушена: избирайте же ведение паче злата чиста.

8:11  Лучши бо премудрость камений многоценных, всякое же честное недостойно ея есть.

8:12  Аз премудрость вселих совет, и разум и смысл аз призвах.

8:13  Страх Господень ненавидит неправды, досаждения же и гордыни, и пути лукавых: возненавидех же аз развращенныя пути злых.

8:14  Мой совет и утверждение, мой разум, моя же крепость.

8:15  Мною царие царствуют, и сильнии пишут правду:

8:16  мною вельможи величаются, и властитилие мною держат землю.

8:17  Аз любящыя мя люблю, ищущии же мене обрящут благодать.

8:18  Богатство и слава моя есть, и стяжание многих и правда.

8:19  Лучше есть плодити мене, паче злата и камения драга: мои же плоды лучше сребра избранна.

8:20  В путех правды хожду и посреде стезь оправдания живу,

8:21  да разделю любящым мя имение, и сокровища их исполню благих. Аще возвещу вам бывающая на всяк день, помяну, яже от века, изчести.

8:22  Господь созда мя (евр.: стяжа мя) начало путий Своих в дела Своя,

8:23  прежде век основа мя, в начале, прежде неже землю сотворити,

8:24  и прежде неже бездны соделати, прежде неже произыти источником вод,

8:25  прежде неже горам водрузитися, прежде же всех холмов раждает мя.

8:26  Господь сотвори страны и ненаселенныя, и концы населенныя поднебесныя.

8:27  Егда готовяше небо, с Ним бех, и егда отлучаше престол Свой на ветрех,

8:28  и егда крепки творяше вышния облаки, и егда тверды полагаше источники поднебесныя,

8:29  и егда полагаше морю предел его, да воды не мимо идут уст его, и крепка творяше основания земли, бех при нем устрояющи.

8:30  Аз бех, о нейже радовашеся, на всяк же день веселяхся пред лицем Его на всяко время,

8:31  егда веселяшеся вселенную совершив, и веселяшеся о сынех человеческих.

8:32  Ныне убо, сыне, послушай мене: и блажени, иже пути моя сохранят.

8:33  Услышите премудрость, и умудритеся, и не отмещите.

8:34  Блажен муж, иже послушает мене, и человек, иже пути моя сохранит, бдяй при моих дверех присно, соблюдаяй праги моих входов:

8:35  исходи бо мои исходи живота, и уготовляется хотение от Господа:

8:36  согрешающии же в мя нечествуют на своя души, и ненавидящии мя любят смерть.

Chapter 9

9:1  Премудрость созда себе дом и утверди столпов седмь:

9:2  закла своя жертвенная, и раствори в чаши своей вино, и уготова свою трапезу:

9:3  посла своя рабы, созывающи с высоким проповеданием на чашу, глаголющи:

9:4  иже есть безумен, да уклонится ко мне.

9:5  И требующым ума рече: приидите, ядите мой хлеб и пийте вино, еже растворих вам:

9:6  оставите безумие и живи будете, да во веки воцаритеся: и взыщите разума, да поживете и исправите разум в ведении.

9:7  Наказуяй злыя приимет себе безчестие, обличаяй же нечестиваго порочна сотворит себе (обличения бо нечестивому раны ему).

9:8  Не обличай злых, да не возненавидят тебе: обличай премудра, и возлюбит тя.

9:9  Даждь премудрому вину, и премудрейший будет: сказуй праведному, и приложит приимати.

9:10  Начало премудрости страх Господень, и совет святых разум: разумети бо закон, помысла есть благаго.

9:11  Сим бо образом многое поживеши время, и приложатся тебе лета живота твоего.

9:12  Сыне, аще премудр будеши, себе премудр будеши и искренним твоим: аще же зол будеши, един почерпнеши злая. Сын наказан премудр будет, безумный же слугою употребится. Иже утверждается на лжах, сей пасет ветры, той же поженет птицы парящыя: остави бо пути своего винограда, в стезях же своего земледелания заблуди, проходит же сквозе пустыню безводную и землю определенную в жаждех, собирает же рукама неплодие.

9:13  Жена безумная и продерзая скудна хлебом бывает, яже не весть стыдения,

9:14  седе при дверех дому своего, на столце яве на стогнах,

9:15  призывающая мимоходящих и исправляющих пути своя:

9:16  иже есть от вас безумнейший, да уклонится ко мне: и лишенным разума повелеваю, глаголющи:

9:17  хлебом сокровенным в сладость прикоснитеся и воду татьбы сладкую пийте.

9:18  Он же не весть, яко земнороднии у нея погибают и во дне ада обретаются. Но отскочи, не замедли на месте ея, ниже настави ока своего к ней: тако бо пройдеши воду чуждую и прейдеши реку чуждую: от воды же чуждия ошайся и от источника чуждаго не пий, да многое время поживеши, и приложатся тебе лета живота.

Chapter 10

10:1  Сын премудр веселит отца, сын же безумен печаль матери.

10:2  Не пользуют сокровища беззаконных, правда же избавит от смерти.

10:3  Не убиет гладом Господь душу праведную, живот же нечестивых низвратит.

10:4  Нищета мужа смиряет: руце же мужественных обогащаются.

10:5  Сын наказан премудр будет, безумный же слугою употребится: спасется от зноя сын разумный, ветротленен же бывает на жатве сын беззаконный.

10:6  Благословение Господне на главе праведнаго: уста же нечестивых покрыет плачь безвременный.

10:7  Память праведных с похвалами: имя же нечестивых угасает.

10:8  Премудр сердцем приимет заповеди: непокровенный же устнама остроптевая запнется.

10:9  Иже ходит просто, ходит надеяся: развращая же пути своя, познан будет.

10:10  Намизаяй оком с лестию собирает мужем печали: обличаяй же со дерзновением миротворит.

10:11  Источник жизни в руце праведнаго: уста же нечестиваго покрыет пагуба.

10:12  Ненависть воздвизает распрю: всех же нелюбопрителных покрывает любовь.

10:13  Иже от устен произносит премудрость, жезлом биет мужа безсердечна.

10:14  Премудрии скрыют чувство, уста же продерзаго приближаются сокрушению.

10:15  Стяжание богатых град тверд, сокрушение же нечестивых нищета.

10:16  Дела праведных живот творят, плодове же нечестивых грехи.

10:17  Пути жизни хранит наказание: наказанием же не обличеный заблуждает.

10:18  Покрывают вражду устне правыя: износящии же укоризну безумнейшии суть.

10:19  От многословия не избежиши греха: щадя же устне, разумен будеши.

10:20  Сребро разжженое язык праведнаго: сердце же нечестиваго изчезнет.

10:21  Устне праведных ведят высокая: безумнии же в скудости скончаваются.

10:22  Благословение Господне на главе праведнаго, сие обогащает, и не имать приложитися ему печаль в сердцы.

10:23  Смехом безумный творит злая: премудрость же мужеви раждает разум.

10:24  В погибели нечестивый обносится: желание же праведнаго приятно.

10:25  Преходящей бури, нечестивый изчезает, праведный же уклонився спасается во веки.

10:26  Якоже гроздие зеленое вред зубом и дым очима, тако законопреступление творящым е.

10:27  Страх Господень прилагает дни: лета же нечестивых умалятся.

10:28  Пребывает с праведными веселие, упование же нечестивых погибает.

10:29  Утверждение преподобному страх Господень, сокрушение же творящым злая.

10:30  Праведник во веки не поколеблется: нечестивии же не населят земли.

10:31  Уста праведнаго каплют премудрость, язык же неправеднаго погибнет:

10:32  устне мужей праведных каплют благодати, уста же нечестивых развращаются.

Chapter 11

11:1  Мерила льстивая мерзость пред Господем, вес же праведный приятен Ему.

11:2  Идеже аще внидет досаждение, тамо и безчестие: уста же смиренных поучаются премудрости.

11:3  Умираяй праведник остави раскаяние, удобна же бывает и посмеятелна нечестивых погибель.

11:4  Совершенство правых наставит их, и поползновение отрицающихся пленит их. Не упользуют имения в день ярости: правда же избавит от смерти.

11:5  Правда непорочнаго исправляет пути, нечестие же впадает в неправду.

11:6  Правда мужей правых избавит их, безсоветием же уловляются беззаконнии.

11:7  Скончавшуся мужу праведну, не погибнет надежда: похвала же нечестивых погибнет.

11:8  Праведный от лова убегнет, в негоже место предается нечестивый.

11:9  Во устех нечестивых сеть гражданом, чувство же праведных благопоспешно.

11:10  Во благих праведных исправится град, и в погибели нечестивых радование.

11:11  В благословении правых возвысится град, усты же нечестивых раскопается.

11:12  Ругается гражданом лишенный разума, муж же мудр безмолвие водит.

11:13  Муж двоязычен открывает советы в сонмищи, верный же духом таит вещы.

11:14  Умже и несть управления, падают аки листвие, спасение же есть во мнозе совете.

11:15  Лукавый злодействует, егда сочетавается с праведным, ненавидит же гласа утверждения.

11:16  Жена благодатна возносит мужу славу: престол же безчестия жена ненавидящая правды. Богатства ленивии скудни бывают, крепцыи же утверждаются богатством.

11:17  Души своей благотворит муж милостивый, погубляет же тело свое немилостивый.

11:18  Нечестивый творит дела неправедная: семя же праведных мзда истины.

11:19  Сын праведный раждается в живот: гонение же нечестиваго в смерть.

11:20  Мерзость Господеви путие развращенни, приятни же Ему вси непорочнии в путех своих.

11:21  В руку руце вложив неправедно, не без муки будет злых: сеяй же правду приимет мзду верну.

11:22  Якоже усерязь златый в ноздрех свинии, тако жене злоумней лепота.

11:23  Желание праведных все благое, надежда же нечестивых погибнет.

11:24  Суть, иже своя сеюще, множайшая творят: суть же и собирающе чуждая, умаляются.

11:25  Душа благословенна всякая простая: муж ярый неблагообразен.

11:26  Удержаваяй пшеницу оставит ю языком: продаяй пшеницу скупо, от народа проклят, благословение же Господне на главе подавающаго.

11:27  Творяй благая ищет благодати добры: ищущаго же злая постигнут его.

11:28  Надеяйся на богатство свое, сей падет: заступаяй же праведных, той возсияет.

11:29  Не сматряяй своего дому наследит ветры: поработает же безумный разумному.

11:30  От плода правды древо жизни прозябает: отемлются же безвременно души беззаконных.

11:31  Аще праведный едва спасается, нечестивый же и грешный где явится?

Chapter 12

12:1  Любяй наказание любит чувство: ненавидяй же обличения безумен.

12:2  Лучше обретый благодать от Господа Бога: муж же законопреступен премолчан будет.

12:3  Не исправится человек от беззаконнаго: корения же праведных не отимутся.

12:4  Жена мужественная венец мужу своему: якоже в древе червь, тако мужа погубляет жена злотворная.

12:5  Мысли праведных судьбы: управляют же нечестивии лести.

12:6  Словеса нечестивых льстива в кровь, уста же правых избавят их.

12:7  Аможе обратится нечестивый, изчезает: храмины же праведных пребывают.

12:8  Уста разумнаго хвалима бывают от мужа: слабосерд же поругаемь бывает.

12:9  Лучше муж в безчестии работаяй себе, нежели честь себе обложив и лишаяйся хлеба.

12:10  Праведник милует душы скотов своих: утробы же нечестивых немилостивны.

12:11  Делаяй свою землю исполнится хлебов: гонящии же суетная лишени разума. Иже есть сладостен в виннем пребывании, во своих твердынех оставит безчестие.

12:12  Желания нечестивых зла: корение же благочестивых в твердостех.

12:13  За грех устен впадает в сети грешник: избегает же от них праведник. Сматряяй кротко помилован будет, а сретаяй во вратех оскорбит душы.

12:14  От плодов уст душа мужа наполнится благих, воздаяние же устен его воздастся ему.

12:15  Путие безумных прави пред ними: послушает советов мудрый.

12:16  Безумный абие исповесть гнев свой: крыет же свое безчестие хитрый.

12:17  Явленную веру возвещает праведный: свидетель же неправедных льстив.

12:18  Суть, иже глаголюще уязвляют аки мечи: языцы же премудрых изцеляют.

12:19  Устне истинны исправляют свидетелство: свидетель же скор язык имать неправеден.

12:20  Лесть в сердцы кующаго злая: хотящии же мира возвеселятся.

12:21  Ничтоже неправедное угодно есть праведному: нечестивии же исполнятся злых.

12:22  Мерзость Господеви устне лживы: творяй же верно приятен Ему.

12:23  Муж разумивый престол чувствия: сердце же безумных срящет клятвы.

12:24  Рука избранных одержит удобь: льстивии же будут во пленении.

12:25  Страшное слово сердце мужа праведна смущает, весть же благая веселит его.

12:26  Разумив праведник себе друг будет: мысли же нечестивых некротки: согрешающих постигнут злая, путь же нечестивых прельстит я.

12:27  Не улучит льстивый ловитвы: стяжание же честное муж чистый.

12:28  В путех правды живот, путие же злопомнящих в смерть.

Chapter 13

13:1  Сын благоразумный послушлив отцу, сын же непокорливый в погибель.

13:2  От плодов правды снесть благий: душы же беззаконных погибают безвременно.

13:3  Иже хранит своя уста, соблюдает свою душу: продерзивый же устнама устрашит себе.

13:4  В похотех есть всяк праздный: руки же мужественных в прилежании.

13:5  Словесе неправедна ненавидит праведник: нечестивый же стыдится и не возимет дерзновения.

13:6  Правда хранит незлобивыя: нечестивыя же злы творит грех.

13:7  Суть богатяще себе, ничесоже имуще: и суть смиряющеся во мнозе богатстве.

13:8  Избавление мужа души свое ему богатство: нищий же не терпит прещения.

13:9  Свет праведным всегда, свет же нечестивых угасает: души льстивыя заблуждают во гресех, праведнии же щедрят и милуют.

13:10  Злый с досаждением творит злая: себе же знающии премудри (суть).

13:11  Имение поспешаемо со беззаконием умалено бывает, собираяй же себе со благочестием изобилствовати будет: праведный щедрит и дает.

13:12  Лучше начинаяй помогати сердцем обещающаго и в надежду ведущаго: древо бо жизни желание доброе.

13:13  Иже презирает вещь, презрен будет от нея: а бояйся заповеди, сей здравствует.

13:14  Сыну лукавому ничтоже есть благо: рабу же мудру благопоспешна будут дела, и исправится путь его.

13:15  Закон мудрому источник жизни: безумный же от сети умрет.

13:16  Разум благ дает благть: разумети же закон, мысли есть благия: путие же презирающих в погибели.

13:17  Всяк хитрый творит с разумом, безумный же прострет свою злобу.

13:18  Царь дерзостен впадет во злая, вестник же мудр избавит его.

13:19  Нищету и безчестие отемлет наказание: храняй же обличения прославится.

13:20  Желания благочестивых наслаждают душу, дела же нечестивых далече от разума.

13:21  Ходяй с премудрыми премудр будет, ходяй же с безумными познан будет.

13:22  Согрешающих постигнут злая, праведных же постигнут благая.

13:23  Благ муж наследит сыны сынов: сокровищствуется же праведным богатство нечестивых.

13:24  Праведнии насладятся в богатстве лета многа: неправеднии же погибнут вскоре.

13:25  Иже щадит жезл (свой), ненавидит сына своего: любяй же наказует прилежно.

13:26  Праведный ядый насыщает душу свою: душы же нечестивых скудны.

Chapter 14

14:1  Мудрыя жены создаша домы: безумная же раскопа рукама своима.

14:2  Ходяй право боится Господа: развращаяй же пути своя обезчестится.

14:3  Из уст безумных жезл досаждения: устне же мудрых хранят я.

14:4  Идеже несть волов, ясли чисты: а идеже жита многа, явна волу крепость.

14:5  Свидетель верен не лжет: разжизает же ложная свидетель неправеден.

14:6  Взыщеши премудрости у злых, и не обрящеши: чувство же у мудрых удобно.

14:7  Вся противна (суть) мужеви безумну: оружие же чувствия устне премудры.

14:8  Премудрость коварных уразумеет пути их: буйство же безумных в заблуждении.

14:9  Домове беззаконных требуют очищения, домове же праведных приятни.

14:10  Сердце мужа чувственно печаль души его: егда же веселится, не примешается досаждению.

14:11  Домове нечестивых изчезнут, селения же право творящих пребудут.

14:12  Есть путь, иже мнится человеком прав быти, последняя же его приходят во дно ада.

14:13  Ко веселием не примешавается печаль: последняя же радости в плачь приходят.

14:14  Путий своих насытится дерзосердый, от размышлений же своих муж благ.

14:15  Незлобивый веру емлет всякому словеси, коварный же приходит в раскаяние.

14:16  Премудр убоявся уклонится от зла, безумный же на себе надеявся смешавается со беззаконным.

14:17  Острояростный без совета творит, муж же мудрый многая терпит.

14:18  Разделяют безумнии злобу, коварнии же удержат чувство.

14:19  Поползнутся злии пред благими, и нечестивии послужат пред дверьми праведных.

14:20  Друзие возненавидят другов убогих: друзие же богатых мнози.

14:21  Безчестяй убогия согрешает, милуяй же нищыя блажен.

14:22  Заблуждающии (неправедницы) делают злая, милость же и истину делают благии. Не ведят милости и веры делателие злых: милостыни же и веры у делателей благих.

14:23  Во всяцем пекущемся есть изюбилие: любосластный же и безпечальный в скудости будет.

14:24  Венец премудрых богатство их, житие же безумных зло.

14:25  Избавит от злых душу свидетель верен, разжизает же лживая лестный.

14:26  Во страсе Господни упование крепости, чадом же Своим оставит утверждение (мира).

14:27  Страх Господень источник жизни, творит же укланятися от сети смертныя.

14:28  Во мнозе языце слава царю: во оскудении же людсте сокрушение сильному.

14:29  Долготерпелив муж мног в разуме, малодушный же крепко безумен.

14:30  Кроткий муж сердцу врачь: моль же костем сердце чувственно.

14:31  Оклеветаяй убогаго раздражает Сотворшаго и, почитаяй же Его милует нищаго.

14:32  Во злобе своей отринется нечестивый: надеяйжеся на Господа своим преподобием праведен.

14:33  В сердцы блазе мужа почиет премудрость, в сердцы же безумных не познавается.

14:34  Правда возвышает язык: умаляют же племена греси.

14:35  Приятен цареви слуга разумный, своим же благообращением отемлет безчестие.

Chapter 15

15:1  Гнев губит и разумныя: ответ же смирен отвращает ярость, а слово жестоко возвизает гневы.

15:2  Язык мудрых добрая свесть: уста же безумных возвещают злая.

15:3  На всяцем месте очи Господни сматряют злыя же и благия.

15:4  Изцеление языка древо жизни: храняй же его исполнится духа.

15:5  Безумный ругается наказанию отчу: храняй же заповеди хитрейший. Во мнозе правде крепость многа: нечестивии же от земли искоренятся.

15:6  В домех праведных крепость многа: плоды же нечестивых погибают.

15:7  Устне мудрых связуются чувством, сердца же безумных не тверда.

15:8  Жертвы нечестивых мерзость Господеви, обеты же правоходящих приятни Ему.

15:9  Мерзость Господеви путие нечестивых: гонящыя же правду любит.

15:10  Наказание незлобиваго познавается от мимоходящих: ненавидящии же обличения скончаваются срамно.

15:11  Ад и Пагуба явна пред Господем, како не и сердца человеков?

15:12  Не возлюбит ненаказанный обличающих его, с мудрыми же не побеседует.

15:13  Сердцу веселящуся, лице цветет: в печалех же сущу, сетует.

15:14  Сердце правое ищет чувства: уста же ненаказанных уразумеют злая.

15:15  На всяко время очи злых приемлют злая: добрии же безмолвствуют присно.

15:16  Лучше частица малая со страхом Господним, нежели сокровища велия без боязни.

15:17  Лучше учреждение от зелий с любовию и благодатию, нежели представление телцев со враждою.

15:18  Муж ярый устрояет брани, долготерпеливый же и будущую укрощает. Терпеливый муж угасит суды, нечестивый же воздвизает паче.

15:19  Путие праздных постлани тернием, мужественных же углаждени.

15:20  Сын премудр веселит отца, сын же безумен раздражает матерь свою.

15:21  Несмысленнаго стези скудны ума: муж же разумен исправляя ходит.

15:22  Отлагают помышления не чтущии сонмищ: в сердцах же советных пребывает совет.

15:23  Не послушает злый его, ниже речет полезно что и добро общему.

15:24  Путие живота помышления разумнаго, да уклонився от ада спасется.

15:25  Домы досадителей разоряет Господь, утверди же предел вдовицы.

15:26  Мерзость Господеви помысл неправедный, чистых же глаголы честны.

15:27  Губит себе мздоимец, ненавидяй же даров приятия спасется: милостынями и верами очищаются греси, страхом же Господним уклоняется всяк от зла.

15:28  Сердца праведных поучаются вере, уста же нечестивых отвещают злая: приятни пред Господем путие мужей праведных, имиже и врази друзие бывают.

15:29  Далече отстоит Бог от нечестивых, молитвы же праведных послушает: лучше малое приятие со правдою, нежели многа жита с неправдою: сердце мужа да мыслит праведная, да от Бога исправятся стопы его.

15:30  Видящее око добрая веселит сердце, слава же благая утучняет кости.

15:31  Слушаяй обличений живота посреде премудрых водворится.

15:32  Иже отметает наказание, ненавидт себе: соблюдаяй же обличения любит свою душу.

15:33  Страх Господень наказание и премудрость, и начало славы отвещает ей (, предидет же смиренным слава).

Chapter 16

16:1  Человеку предложение сердца: и от Господа ответ языка.

16:2  Вся дела смиреннаго явленна пред Богом, и укрепляяй духи Господь.

16:3  Приближи ко Господу дела твоя, и утвердятся помышления твоя.

16:4  Вся содела Господь Себе ради: нечестивии же в день зол погибнут.

16:5  Нечист пред Богом всяк высокосердый: в руку же руце влагаяй неправедно не обезвинится.

16:6  Начало пути блага, еже творити праведная, приятна же пред Богом паче, нежели жрети жертвы.

16:7  Ищай Господа обрящет разум со правдою:

16:8  праве же ищущии его обрящут мир.

16:9  Вся дела Господня со правдою: хранится же нечестивый на день зол.

16:10  Пророчество во устнех царевых, в судищи же не погрешат уста его.

16:11  Превеса мерила правда у Господа: дела же Его мерила праведная.

16:12  Мерзость цареви творяй злая: со правдою бо уготовляется престол началства.

16:13  Приятны царю устне праведны, словеса же правая любит Господь.

16:14  Ярость царева вестник смерти: муж же премудр утолит его.

16:15  Во свете жизни сын царев: приятнии же ему яко облак позден.

16:16  Угнеждения премудрости избраннее злата: вселения же разума дражайши сребра.

16:17  Путие жизни укланяются от злых: долгота же жития путие праведни. Приемляй наказание во благих будет, храняй же обличения умудрится. Иже хранит своя пути, соблюдает свою душу: любяй же живот свой щадит своя уста.

16:18  Прежде сокрушения предваряет досаждение, прежде же падения злопомышление.

16:19  Лучше кроткодушен со смирением, нежели иже разделяет корысти с досадительми.

16:20  Разумный в вещех обретатель благих, надеяйся же на Господа блажен.

16:21  Премудрыя и разумныя злыми наричут, сладции же в словеси множае услышани будут.

16:22  Источник животен разум стяжавшым, наказание же безумных зло.

16:23  Сердце премудраго уразумеет яже от своих ему уст, во устнах же носит разум.

16:24  Сотове медовнии словеса добрая, сладость же их изцеление души.

16:25  Суть путие мнящиися прави быти мужу, обаче последняя их зрят во дно адово.

16:26  Муж в трудех труждается себе и изнуждает погибель свою: строптивый во своих устах носит погибель.

16:27  Муж безумен копает себе злая и во устнах своих сокровищствует огнь.

16:28  Муж строптивый разсылает злая, и светилник льсти вжигает злым, и разлучает други.

16:29  Муж законопреступен прельщает други и отводит их в пути не благи.

16:30  Утверждаяй очи свои мыслит развращенная, грызый же устне свои определяет вся злая: сей пещь есть злобы.

16:31  Венец хвалы старость, на путех же правды обретается.

16:32  Лучше муж долотерпелив паче крепкаго, (и муж разум имеяй паче земледелца великаго:) удержаваяй же гнев паче вземлющаго град.

16:33  В недра входят вся неправедным: от Господа же вся праведная.

Chapter 17

17:1  Лучше укрух хлеба со сластию в мире, нежели дом исполнен многих благих и неправедных жертв со бранию.

17:2  Раб смыслен обладает владыки безумными, в братиих же разделит (имение) на части.

17:3  Якоже искушается в пещи сребро и злато, тако избранная сердца у Господа.

17:4  Злый послушает языка законопреступных, праведный же не внимает устнам лживым.

17:5  Ругайся убогому раздражает Сотворшаго его, радуяйся же о погибающем не обезвинится: милуяй же помилован будет.

17:6  Венец старых чада чад: похвала же чадом отцы их. Верному весь мир богатство, неверному же ниже пенязь.

17:7  Неприличны суть безумному устне верны, ниже праведному устне лживы.

17:8  Мзда благодатей наказание употребляющым: и аможе аще обратится, успеет.

17:9  Иже таит обиды, ищет любве: а иже ненавидит скрывати, разлучает други и домашния.

17:10  Сокрушает прещение сердце мудраго: безумный же биемь не чувствует (ран).

17:11  Прекословия воздвижет всяк злый: Господь же ангела немилостива послет нань.

17:12  Впадет попечение мужу смысленну: безумнии же размышляют злая.

17:13  Иже воздает злая за благая, не подвигнутся злая из дому его.

17:14  Власть дает словесем начало правды: предводителствует же скудости пря и брань.

17:15  Иже судит праведнаго неправедным, неправеднаго же праведным, нечист и мерзок у Господа.

17:16  Вскую бяше имение безумному? Стяжати бо премудрости безсердый не может. Иже высок творит свой дом, ищет сокрушения: остроптеваяй же учитися впадет во злая.

17:17  На всяко время друг да будет тебе, братия же в нуждах полезни да будут: сего бо ради раждаются.

17:18  Муж безумен плещет и радуется себе, якоже поручаяйся испоручит друга своего, на своих же устнах огнь сокровишствует.

17:19  Грехолюбец радуется сваром, а жестокосердый не усрящет благих.

17:20  Муж удобопреложный языком впадет во злая: сердце же безумнаго болезнь стяжавшему е.

17:21  Не веселится отец о сыне ненаказаннем: сын же мудр веселит матерь свою.

17:22  Сердце веселящеся благоиметися творит: мужу же печальну засышут кости.

17:23  Приемлющему дары неправедно в недра не предуспевают путие: нечестивый же укланяет пути правды.

17:24  Лице разумно мужа премудра, очи же безумнаго на концех земли.

17:25  Гнев отцу сын безумен, и болезнь рождшей его.

17:26  Тщеты творити мужу праведну не добро, ниже преподобно наветовати властем праведным.

17:27  Иже щадит глагол произнести жесток, разумен: долготерпеливый же муж премудр, лучше ищущаго науки.

17:28  Несмысленному вопросившу о мудрости, мудрость вменится: нема же кто себе творит, возмнится разумен быти.

Chapter 18

18:1  Вины ищет муж хотя отлучитися от другов, на всяко же время поносимь будет.

18:2  Не требует премудрости муж скудоумен, зане паче водится безумием.

18:3  Егда приидет нечестивый во глубину зол, нерадит: находит же ему безчестие и поношение.

18:4  Вода глубока слово в сердцы мужа, река же изскачущи и источник жизни.

18:5  Чудитися лицу нечестиваго не добро, ниже преподобно укланяти праведное на суде.

18:6  Устне безумнаго приводят его на зло, уста же его дерзостная призывают смерть.

18:7  Уста безумнаго сокрушение ему, устне же его сеть души его.

18:8  Ленивыя низлагает страх: души же мужей женам подобных взалчут.

18:9  Не изцеляяй себе во своих делех брат есть погубляющему себе самаго.

18:10  Из величества крепости имя Господне, к немуже притекающе праведницы возносятся.

18:11  Имение богату мужу град тверд, слава же его вельми присеняет.

18:12  Прежде сокрушения возносится сердце мужу и прежде славы смиряется.

18:13  Иже отвещает слово прежде слышания, безумие ему есть и поношение.

18:14  Гнев мужа укрощает раб разумный: малодушна же человека кто стерпит?

18:15  Сердце разумнаго стяжет чувствие, ушеса же мудрых ищут смысла.

18:16  Даяние человека распространяет его и с сильными посаждает его.

18:17  Праведный себе самаго оглаголник во первословии: егда же приложит супостат, обличается.

18:18  Прекословия утоляет молчаливый и во властех определяет.

18:19  Брат от брата помогаемь, яко град тверд и высок, укрепляется же якоже основаное царство.

18:20  От плодов уст муж насыщает чрево свое, и от плодов устен своих насытится.

18:21  Смерть и живот в руце языка: удержавающии же его снедят плоды его.

18:22  Иже обрете жену добру, обрете благодать, приял же есть от Господа тишину.

18:23  Иже изгоняет жену добрую, изгоняет благая: держай же прелюбодейцу безумен и нечестив.

18:24  С молении глаголет убогий, богатый же отвещает жестоко.

18:25  Муж любовен к дружбе, и есть друг прилепивыйся паче брата.

Chapter 19

19:1  Лучше есть убог ходяй в простоте своей, неже богатый строптив устны своими и несмыслен.

19:2  Идеже несть учения души, несть добро, и иже скор есть ногама, поткнется.

19:3  Неразумие мужа погубляет пути его, и Бога виновна творит в сердцы своем.

19:4  Богатство прилагает други многи: нищий же и от сущаго друга оставляемь бывает.

19:5  Свидетель лжив без муки не будет: оклеветаяй же неправедно не убежит ея.

19:6  Мнози угождают лицам царским: всяк же зол бывает в поношение мужеви.

19:7  Всяк, иже убогаго брата ненавидит, и от содружества далече будет. Мысль благая ведящым ю приближается, муж же мудр обрящет ю. Много творяй зла совершает злобу, а иже раздражает словесы, не спасется.

19:8  Стяжавый мудрость любит себе, а иже сохраняет разум, обрящет благая.

19:9  Свидетель лживый не без муки будет, а иже разжизает злобу, погибнет от нея.

19:10  Не пользует безумному сладость, и аще раб начнет с досаждением обладати.

19:11  Милостив муж долготерпит, похвала же его превосходит законопреступных.

19:12  Царево прещение подобно рыканию львову, и якоже роса злаку, тако тихость его.

19:13  Студ есть отцу сын безумен, и нечисты обеты от мзды блудницы.

19:14  Дом и имение разделяют отцы чадом: от Господа же сочетавается жена мужеви.

19:15  Страх содержит мужа женонравна: душа же празднаго взалчет.

19:16  Иже хранит заповеди, соблюдает свою душу, а нерадяй о своих путех погибнет.

19:17  Милуяй нища взаим дает Богови, по даянию же его воздастся ему.

19:18  Наказуй сына твоего, тако бо будет благонадежен: в досаждение же не вземлися душею твоею.

19:19  Злоумен муж много отщетится: аще же губитель есть, и душу свою приложит.

19:20  Слушай, сыне, отца твоего наказания, да мудр будеши в последняя твоя.

19:21  Многи мысли в сердцы мужа: совет же Господень во век пребывает.

19:22  Плод мужеви милостыня: лучше же нищь праведный, нежели богат лжив.

19:23  Страх Господень в живот мужеви: а безстрашный водворится на местех, идеже не наблюдается разум.

19:24  Скрываяй в недрех руце свои неправедно ниже ко устом своим принесет я.

19:25  Губителю раны приемлющу, безумный коварнее будет: аще же обличаеши мужа разумна, уразумеет чувство.

19:26  Безчествуяй отца и отреваяй матерь свою срамоту приимет и поношение.

19:27  Сын оставляяй хранити наказание отчее поучится словесем злым.

19:28  Выручаяй отрока несмыслена досаждает оправданию: уста же нечестивых пожрут суд.

19:29  Уготовляются невоздержным раны, и мучения подобне неразумным.

Chapter 20

20:1  Невинно вино, укоризненно же пиянство, и всяк пребываяй в нем не будет премудр.

20:2  Не разнствует прещение царево от ярости львовы: раздражаяй же его и примешаяйся ему согрешает в свою душу.

20:3  Слава мужу отвращатися от досаждения: всяк же безумен сими соплетается.

20:4  Поносимь ленивый не усрамляется, такожде и заемляй пшеницу в жатву.

20:5  Вода глубока совет в сердцы мужа: муж же премудр изчерплет ю.

20:6  Велика вещь человек, и драгая муж творяй милость: мужа же верна (велико) дело обрести.

20:7  Иже без порока живет в правде, блажены оставит дети своя.

20:8  Егда царь праведен на престоле сядет, не противится пред очима его ничтоже лукаво.

20:9  Кто похвалится чисто имети сердце? Или кто дерзнет рещи чиста себе быти от грехов?

20:10  Вес велик и мал, и мера сугуба, нечиста пред Господем обоя:

20:11  и творяй я в начинаниих своих запнется: юнота с преподобным, и правый путь его.

20:12  Ухо слышит, и око видит: Господня дела обоя.

20:13  Не люби клеветати, да не вознесешися: отверзи очи твои и насыщайся хлеба.

20:14  Зло, зло, речет стяжаваяй, и отшед тогда похвалится.

20:15  Есть злато и множество камений драгих, сосуд честен устне разумны.

20:16  Возми ризу его, яко испоручник бысть чуждыя, и за чуждую возми залог от него.

20:17  Сладок есть человеку хлеб лжи, но потом исполнятся уста его камения.

20:18  Помышление в совете уготовится, в правлении же творит брань.

20:19  Открываяй тайну ходит лестию: и прельщающему устнами своими не примешайся.

20:20  Злословящему отца или матерь угаснет светилник, зеницы же очес его узрят тму.

20:21  Часть поспешна в начале, в последних не благословится.

20:22  Не рцы: отмщу врагу: но потерпи Господа, да ти поможет.

20:23  Мерзость Господеви сугубый вес, и мерило лживо не добро пред ним.

20:24  От Господа исправляются стопы мужу: смертный же како уразумеет пути своя?

20:25  Сеть мужеви скоро нечто от своих освящати: по обете бо раскаяние бывает.

20:26  Веятель нечестивых есть царь мудр и наложит на ня коло.

20:27  Свет Господень дыхание человеком, иже испытает тайная утробы.

20:28  Милостыня и истина сохранение царю, и обыдут престол его в правде.

20:29  Лепота (есть) юным премудрость: слава же старым седины.

20:30  Раны и сокрушения сретают злых, язвы же в сокровищих чрева.

Chapter 21

21:1  Якоже устремление воды, тако сердце царево в руце Божией: аможе аще восхощет обратити, тамо уклонит е.

21:2  Всяк муж является себе праведен: управляет же сердца Господь.

21:3  Творити праведная и истинствовати угодна Богу паче, нежели жертв кровь.

21:4  Велемудрый во укоризне дерзосерд, светило же нечестивых греси.

21:5  Помышления тщаливаго во изюбилии, и всяк нерадивый в лишении.

21:6  Делаяй сокровища языком лживым суетная гонит в сети смертныя.

21:7  Всегубителство на нечестивыя устремляется: не хотят бо творити праведная.

21:8  К стропотным стропотныя пути посылает Бог: чиста бо и права дела Его.

21:9  Лучше жити во угле непокровеннем, нежели в повапленных с неправдою и в храмине общей.

21:10  Душа нечестиваго не помилуется ни от единаго от человеков.

21:11  Тщету приемлющу невоздержному, коварнейший будет незлобивый, разумеваяй же мудрый приимет разум.

21:12  Разумевает праведный сердца нечестивых и уничтожает нечестивыя в злых.

21:13  Иже затыкает ушеса своя, еже не послушати немощнаго, и той призовет, и не будет послушаяй его.

21:14  Даяние тайно отвращает гневы, щадяй же даров воздвизает ярость крепкую.

21:15  Веселие праведных творити суд: преподобный же нечист у злодеев.

21:16  Муж заблуждаяй от пути правды в сонмищи исполинов почиет.

21:17  Муж скуден любит веселие, любяй же вино и елей не обогатится.

21:18  Отребие же праведнику беззаконник.

21:19  Лучше жити в земли пусте, неже жити с женою сварливою и язычною и гневливою.

21:20  Сокровище вожделенно почиет во устех мудраго: безумнии же мужие пожирают е.

21:21  Путь правды и милостыни обрящет живот и славу.

21:22  Во грады крепки вниде премудрый и разруши утверждение, на неже надеяшася нечестивии.

21:23  Иже хранит своя уста и язык, соблюдает от печали душу свою.

21:24  Продерзый и величавый и горделивый губитель нарицается: а иже памятозлобствует, беззаконен.

21:25  Похоти лениваго убивают: не произволяют бо руце его творити что.

21:26  Нечестивый желает весь день похоти злыя, праведный же милует и щедрит нещадно.

21:27  Жертвы нечестивых мерзость Господеви: ибо беззаконно приносят я.

21:28  Свидетель ложный погибнет, муж же послушлив сохраняемь возглаголет.

21:29  Нечестив муж безстудно стоит лицем: правый же сам разумевает пути своя.

21:30  Несть премудрости, несть мужества, несть совета у нечестиваго.

21:31  Конь уготовляется на день брани: от Господа же помощь.

Chapter 22

22:1  Лучше имя доброе, неже богатство много, паче же сребра и злата благодать благая.

22:2  Богат и нищь сретоста друг друга, обоих же Господь сотвори.

22:3  Худог, видев лукаваго мучима крепко, сам наказуется: безумнии же мимошедше отщетишася.

22:4  Род премудрости страх Господень, и богатство и слава и живот.

22:5  Волчцы и сети на путех стропотных, храняй же свою душу избежит их.

22:6  Богатии убогими имут обладати,

22:7  и раби своим господем взаим дадут.

22:8  Сеявый злая пожнет злая, язву же дел своих совершит.

22:9  Мужа тиха и даятеля любит Господь, суету же дел его скончает.

22:10  Милуяй нищаго сам препитается: от своих бо хлебов даде убогому. Победу и честь устрояет даяй дары, обаче душу погубляет стяжавших.

22:11  Изжени от сонмища губителя, и изыдет с ним прение: егда бо сядет в сонмищи, всех безчестит.

22:12  Любит Господь преподобная сердца, приятни же Ему вси непорочнии в путех своих: устнама пасет царь (люди своя).

22:13  Очи Господни соблюдают чувство: презирает словеса законопреступный.

22:14  Вины ищет и глаголет ленивый: лев на стезях, на путех же разбойницы.

22:15  Яма глубока уста законопреступных: возненавиденый же от Господа впадется в ню. Суть путие злии пред мужем, и не любит возвратитися от них: возвратитися же подобает от пути стропотна и злаго.

22:16  Безумие висит на сердцы юнаго: жезл же и наказание далече (отгонит) от него.

22:17  Обидяй убогаго многая себе зла творит, дает же богатому во оскудение (себе).

22:18  Ко словесем мудрых прилагай твое ухо, и услыши моя словеса: свое же сердце утверди (к ним), да разумееши, яко добра суть.

22:19  И аще вложиши я в сердце твое, возвеслят тебе купно во твоих устнех.

22:20  Да будет ти на Господа надежда, и покажет ти путь Свой.

22:21  Ты же напиши я себе трижды, на совет и смысл и разум, на широте сердца твоего: учу бо тя истинному словеси, и разума благаго слушати на ответы словесем истинным предлагаемым тебе.

22:22  Не насильствуй нищаго, зане убог есть, и не досаждай немощному во вратех:

22:23  Господь бо имать судити его суд, и избавиши твою безбедную душу.

22:24  Не бывай друг мужу гневливу и со другом жестокосердым не соводворяйся:

22:25  да не когда научишися путем его и приимеши тенета души твоей.

22:26  Не вдавайся в поручение, стыдяся лица:

22:27  егда бо не будеши имети чим искупитися, возмут постелю, яже под ребры твоими.

22:28  Не прелагай предел вечных, яже положиша отцы твои.

22:29  Прозрителну человеку и острому в делех своих пред царьми подобает стояти, и не стояти пред мужми простыми.

Chapter 23

23:1  Аще сядеши вечеряти на трапезе сильнаго, разумно разумевай предлагаемая тебе,

23:2  и налагай руку твою, ведый, яко сицевая тебе подобает уготовити:

23:3  аще же несытнейший еси, не желай брашен его: сия бо имут живот ложен.

23:4  Не распростирайся убог сый с богатым, твоею же мыслию удаляйся.

23:5  Аще устремиши на него око твое, никогдаже явится: соделаны бо суть ему крила яко орлу, и обращается в дом настоятеля своего.

23:6  Не вечеряй с мужем завистливым, ниже похощеши пищей его:

23:7  имже бо образом аще кто поглотит власы, сице яст и пиет: ниже к себе да введеши его и снеси хлеб твой с ним:

23:8  изблюет бо его и осквернит словеса твоя добрая.

23:9  Во ушию безумнаго ничтоже глаголи, да не когда поругает разумная словеса твоя.

23:10  Не прелагай предел вечных и в стяжание сирот не вниди:

23:11  избавляяй бо их Господь крепок есть и разсудит суд их с тобою.

23:12  Даждь в наказание сердце твое, ушеса же твоя уготовай словесем чувственным.

23:13  Не преставай младенца наказовати: аще бо жезлом биеши его, не умрет (от него):

23:14  ты бо побиеши его жезлом, душу же его избавиши от смерти.

23:15  Сыне, аще премудро будет сердце твое, возвеселиши и мое сердце,

23:16  и пребудут в словесех твои устне к моим устнам, аще права будут.

23:17  Да не ревнует сердце твое грешником, но в страсе Господни буди весь день:

23:18  аще бо соблюдеши я, будут ти внуцы, и упование твое не отступит.

23:19  Слушай, сыне, и премудр бывай и исправляй мысли твоего сердца:

23:20  не буди винопийца, ниже прилагайся к сложением и купованием мяс:

23:21  всяк бо пияница и блудник обнищает, и облечется в раздранная и в рубища всяк сонливый.

23:22  Слушай, сыне, отца родившаго тя, и не презирай, егда состареется мати твоя.

23:23  Истину стяжи и не отрини мудрости и учения и разума.

23:24  Добре воспитовает отец праведен, о сыне же премудрем веселится душа его.

23:25  Да веселится отец и мати о тебе, и да радуется рождшая тя.

23:26  Даждь ми, сыне, твое сердце, очи же твои моя пути да соблюдают.

23:27  Сосуд бо сокрушен чуждий дом, и студенец тесен чуждий:

23:28  сей бо вскоре погибнет, и всякий законопреступник потребится.

23:29  Кому горе? Кому молва? Кому судове? Кому горести и свары? Кому сокрушения вотще? Кому сини очи?

23:30  Не пребывающым ли в вине? И не назирающым ли, где пирове бывают?

23:31  Не упивайтеся вином, но беседуйте ко человеком праведным, и беседуйте во проходех: аще бо на чашы и сткляницы вдаси очи твои, последи имаши ходити нажайший белилнаго древа:

23:32  последи же яко от змиа уязвен прострется, и якоже от кераста разливается ему яд.

23:33  Очи твои егда узрят (жену) чуждую, уста твоя тогда возглаголют стропотная:

23:34  и возляжеши яко в сердцы моря и якоже кормчий во мнозе волнении.

23:35  Речеши же: биша мя, и не поболех, и поругашася ми, аз же не разумех: когда утро будет, да шед взыщу, с нимиже снидуся?

Chapter 24

24:1  Сыне, не ревнуй мужем злым, ниже возжелей быти с ними:

24:2  лжам бо поучается сердце их, и болезни устне их глаголют.

24:3  С премудростию зиждется дом и с разумом исправляется.

24:4  С чувствием исполняются сокровища от всякаго богатства честнаго и добраго.

24:5  Лучше мудрый крепкаго, и муж разум имеяй земледелца велика.

24:6  Со управлением бывает брань, помощь же с сердцем советным.

24:7  Премудрость и мысль блага во вратех премудрых: смысленнии не укланяются от закона Господня,

24:8  но советуют в сонмищих. Ненаказанных сретает смерть,

24:9  умирает же безумный во гресех. Нечистота мужу губителю:

24:10  осквернится в день зол и в день печали, дондеже оскудеет.

24:11  Избави ведомыя на смерть и искупи убиваемых, не щади.

24:12  Аще же речеши: не вем сего: разумей, яко Господь всех сердца весть, и создавый дыхание всем, сей весть всяческая, Иже воздаст комуждо по делом его.

24:13  Яждь мед, сыне, благ бо есть сот, да насладится гортань твой:

24:14  сице уразумееши премудрость душею твоею: аще бо обрящеши, будет добра кончина твоя, и упование не оставит тебе.

24:15  Не приводи нечестиваго на пажить праведных, ниже прельщайся насыщением чрева:

24:16  седмерицею бо падет праведный и востанет, нечестивии же изнемогут в злых.

24:17  Аще падет враг твой, не обрадуйся ему, в преткновении же его не возносися:

24:18  яко узрит Господь, и не угодно Ему будет, и отвратит ярость Свою от него.

24:19  Не радуйся о злодеющих и не ревнуй грешным,

24:20  не пребудут бо внуцы лукавых, светило же нечестивых угаснет.

24:21  Бойся Бога, сыне, и царя, и ни единому же их противися:

24:22  внезапу бо истяжут нечестивых, мучения же обоих кто увесть? Слово сохраняяй сын кроме погибели будет: приемляй же прият оное. Ничтоже ложно от языка цареви да глаголется, и ни едина лжа от языка его да изыдет: меч (есть) язык царев, а не плотян: и иже аще предан будет, сокрушится: аще бо раздражится ярость его, со жилами человеки губит, и кости человеческия поядает и сожигает яко пламень, яко не ядомым быти птенцами орлими. Моих словес, сыне, бойся, и приим я покайся.

24:23  Сия же вам смысленным глаголю разумети: срамлятися лица на суде не добро.

24:24  Глаголяй нечестиваго, яко праведен есть, проклят от людий будет и возненавиден во языцех:

24:25  обличающии же лучшии явятся, на няже приидет благословение благо:

24:26  и устне облобызают отвещающыя словеса блага.

24:27  Уготовляй на исход дела твоя, и уготовися на село, и ходи вслед мене, и созиждеши дом твой.

24:28  Не буди свидетель лжив на твоего гражданина, ниже пространяйся твоима устнама.

24:29  Не рцы: имже образом сотвори ми, сотворю ему и отмщу ему, имиже мя преобиде.

24:30  Якоже нива муж безумный, и яко виноград человек скудоумный:

24:31  аще оставиши его, опустеет и травою порастет весь, и будет оставлен, ограды же каменныя его раскопаются.

24:32  Последи аз покаяхся, воззрех избрати наказание:

24:33  мало дремлю, мало же сплю и мало объемлю рукама перси:

24:34  аще же сие твориши, приидет предидущи нищета твоя и скудость твоя, яко благ течец.

Chapter 25

25:1  Сия притчи Соломони бывшыя нерасположенны, яже списаша друзие Езекии царя Иудейска.

25:2  Слава Божия крыет слово, слава же царева почитает повеления Его.

25:3  Небо высоко, земля же глубока: сердце же царево необличително.

25:4  Куй неискушенное сребро, и очистится чисто все.

25:5  Убивай нечестивыя от лица царева, и исправится в правде престол его.

25:6  Не гордися пред лицем царевым и на месте сильных не стани:

25:7  лучше бо ти есть, егда речет: взыди ко мне: нежели смиритися тебе пред лицем сильнаго.

25:8  Иже видеста очи твои, глаголи. Не впадай в тяжбу скоро, да не раскаешися послежди, егда тебе досадит друг твой.

25:9  Вступай вспять, не неради, да не поносит убо тебе друг:

25:10  свара же твоя и вражда твоя не отступит, но будет ти равна со смертию. Благодать и любы свобождает, в нихже утверди себе, да не в поношении будеши, но сохрани пути твоя добре устроены.

25:11  (Якоже) яблоко злато во усерязи сардийскаго камене, сице рещи слово при приличных ему.

25:12  И (якоже) во усерязь златый сардийский камень многоценный вяжется, (сице) слово премудро во ухо благопослушно.

25:13  Якоже исходище снега в жатву зноя пользует, тако вестник верен пославших его: душы бо употребляющих его пользует.

25:14  Якоже ветри и облацы и дождеве являющиися, тако и хвалящийся о даянии ложнем.

25:15  В долготерпении благополучие царем: язык же мякок сокрушает кости.

25:16  Мед обрет яждь умеренно, да не како пресыщен изблюеши.

25:17  Не учащай вносити ногу твою ко другу твоему, да не когда насыщься тебе, возненавидит тя.

25:18  Дреколь и мечь и стрела остра, тако и муж свидетелствуяй на друга своего свидетелство ложное.

25:19  Путь злаго и нога законопреступнаго погибнут в день зол.

25:20  Якоже оцет неполезен вреду и дым очима, тако припадшая страсть в телеси сердце оскорбляет.

25:21  Якоже молие в ризе и червие в древе, тако печаль мужу вредит сердце.

25:22  Аще алчет враг твой, ухлеби его: аще ли жаждет, напой его:

25:23  сие бо творя, углие огненное собираеши на главу его, Господь же воздаст тебе благая.

25:24  Ветр северный воздвизает облаки, лице же безстудно язык раздражает.

25:25  Лучше жити во угле непокрытем, неже во храмине общей со женою клеветливою.

25:26  Якоже вода студеная души жаждущей благоприятна, тако весть благая от земли издалеча.

25:27  Якоже аще кто источник заграждает и исходище воды губит, тако не лепо праведнику пасти пред нечестивым.

25:28  Ясти мед много не добро: почитати же подобает словеса славна. Якоже град стенами разорен и не огражден, тако муж творяй что без совета.

Chapter 26

26:1  Якоже роса в жатву и якоже дождь в лете, тако несть безумному чести.

26:2  Якоже птицы отлетают и врабиеве, тако клятва суетная не найдет ни на когоже.

26:3  Якоже бичь коню и остен ослу, тако жезл языку законопреступну.

26:4  Не отвещай безумному по безумию его, да не подобен ему будеши:

26:5  но отвещай безумному по безумию его, да не явится мудр у себе.

26:6  От путий своих поношение творит, иже посла вестником безумным слово.

26:7  Отими шествие от глезн и законопреступление от уст безумных.

26:8  Иже привязует камень в пращи, подобен есть дающему безумному славу.

26:9  Терния прозябают в руце пияницы, и порабощение в руце безумных.

26:10  Многими волнуется всяка плоть безумных, сокрушается бо изступление их.

26:11  Якоже пес, егда возвратится на своя блевотины, и мерзок бывает, тако безумный своею злобою возвращься на свой грех. Есть стыд наводяй грех, и есть стыд слава и благодать.

26:12  Видех мужа непщевавша себе мудра быти, упование же имать безумный паче его.

26:13  Глаголет ленивый послан на путь: лев на путех, на стогнах же разбойницы.

26:14  Якоже дверь обращается на пяте, тако ленивый на ложи своем.

26:15  Скрыв ленивый руку в недро свое не возможет принести ко устом.

26:16  Мудрейший себе ленивый является, паче во изюбилии износящаго весть.

26:17  Якоже держай за ошиб пса, тако председателствуяй чуждему суду.

26:18  Якоже врачуемии мещут словеса на человеки, сретаяй же словом первый запнется:

26:19  тако вси коварствующии над своими други: егда же увидени будут, глаголют, яко играя содеях.

26:20  Во мнозех древех растет огнь: а идеже несть разгневляюща, умолкает свар.

26:21  Огнище углию, и дрова огневи: муж же клеветлив в мятеж свара.

26:22  Словеса ласкателей мягка: сия же ударяют в сокровища утроб.

26:23  Сребро даемо с лестию, якоже скудель вменяемо: устне гладки сердце покрывают прискорбно.

26:24  Устнама вся обещавает плачай враг, в сердцы же содевает лесть.

26:25  Аще тя молит враг велиим гласом, не веруй ему, седмь бо есть лукавствий в души его.

26:26  Таяй вражду составляет лесть: открывает же своя грехи благоразумный на сонмищих.

26:27  Изрываяй яму искреннему впадется в ню: валяяй же камень на себе валит.

26:28  Язык лжив ненавидит истины, уста же непокровенна творят нестроение.

Chapter 27

27:1  Не хвалися о утрии, не веси бо, что родит (день) находяй.

27:2  Да хвалит тя искренний, а не твоя уста, чуждий, а не твои устне.

27:3  Тяжко камень и неудобоносно песок, гнев же безумнаго тяжший обоего.

27:4  Безмилостивна ярость и остр гнев, но ничтоже постоит ревности.

27:5  Лучше обличения откровенна тайныя любве.

27:6  Достовернее суть язвы друга, нежели вольная лобзания врага.

27:7  Душа в сытости сущи сотам ругается: души же нищетней и горькая сладка являются.

27:8  Якоже егда птица отлетит от гнезда своего, тако человек порабощается, егда устранится от своих мест.

27:9  Миры и вином и фимиамы красуется сердце, растерзаваетжеся от бед душа.

27:10  Друга твоего или друга отча не оставляй: в дом же брата своего не вниди неблагополучно: лучше друг близ, неже брат далече живый.

27:11  Мудр буди, сыне, да веселится сердце твое, и отврати от себе понослива словеса.

27:12  Хитрый злым находящым укрывается: безумнии же нашедше тщету постраждут.

27:13  Отими ризу его, прейде бо досадитель, иже чуждая погубляет.

27:14  Иже аще благословит друга утро велиим гласом, от кленущаго ни чимже разнствовати возмнится.

27:15  Капли изгоняют человека в день зимен из дому его, тако и жена клеветливая из своего дому.

27:16  Север жесток ветр, именем же приятен нарицается.

27:17  Железо железа острит: муж же поощряет лице дружне.

27:18  Иже насаждает смоковницу, снесть плоды ея: а иже хранит господа своего, честен будет.

27:19  Якоже суть неподобна лица лицам, сице ниже сердца человеков.

27:20  Ад и Погибель не насыщаются: такожде и очи человечестии несыти. Мерзость Господеви утверждаяй очи, и ненаказаннии невоздержни языком.

27:21  Искушение сребру и злату раздежение: муж же искушается усты хвалящих его. Сердце беззаконника взыскует злая, сердце же право взыскует разума.

27:22  Аще биеши безумнаго посреде сонмища срамляя его, не отимеши безумия его.

27:23  Разумне разумевай души стада твоего, и да приставиши сердце твое ко твоим стадам.

27:24  Яко не во век мужеви держава и крепость, ниже предает от рода в род.

27:25  Прилежи о злацех сущих на поли и пожнеши траву, и собирай сено нагорное,

27:26  да имаши овцы на одеяние: почитай поле, да будут ти агнцы.

27:27  Сыне, от мене имаши речения крепка в жизнь твою и в жизнь твоих служителей.

Chapter 28

28:1  Бегает нечестивый ни единому же гонящу, праведный же яко лев уповая.

28:2  За грехи нечестивых судове востают: муж же хитрый угасит я.

28:3  Продерзый в нечестиих оклеветает нищыя, якоже дождь сильный не полезен:

28:4  тако оставившии закон хвалят нечестие, любящии же закон ограждают себе стену.

28:5  Мужие злии не уразумеют суда, ищущии же Господа уразумеют о всем.

28:6  Лучше нищь ходяй во истине, нежели богат ложь.

28:7  Хранит закон сын разумный: а иже пасет несытость, безчестит отца своего.

28:8  Умножаяй богатство свое с лихвами и прибытки милующему нищыя собирает е.

28:9  Укланяяй ухо свое не послушати закона и сам молитву свою омерзил.

28:10  Иже льстит правыя на пути злем, во истление сам впадет: беззаконнии же минуют благая и не внидут в ня.

28:11  Премудр у себе муж богатый, убогий же разумив презрит его.

28:12  Помощию праведных многа бывает слава, на местех же нечестивых погибают человецы.

28:13  Покрываяй нечестие свое не успеет во благая, поведая же обличения возлюблен будет.

28:14  Блажен муж, иже боится всех за благоговение, а жестосердый впадает во злая.

28:15  Лев алчен и волк жажден, иже тиранствует, нищь сый, над языком убогим.

28:16  Царь скуден уроком велик клеветник (бывает), а ненавидяй неправды долго лет поживет.

28:17  Мужа, иже в вине смертне, выручаяй беглец будет, а не утвержден. Наказуй сына, и возлюбит тя и даст лепоту твоей души, не послушает языка законопреступна.

28:18  Ходяй праведно помощь приимет, ходяй же в стропотны пути увязнет.

28:19  Делаяй свою землю насытится хлебов, гоняй же праздность насытится нищеты.

28:20  Муж веры достойный много благословится, злый же не без мучения будет.

28:21  Иже не срамляется лица праведных, не благ: таковый за укрух хлеба продаст мужа.

28:22  Тщится обогатитися муж завидлив, и не весть, яко милостивый возобладает им.

28:23  Обличаяй человечы пути благодать имать паче языком ласкающаго.

28:24  Иже отвергает отца или матерь и мнится не согрешати, сей сопричастник есть мужу нечестиву.

28:25  Неверный муж судит туне, а иже надеется на Господа, в прилежании будет.

28:26  Иже надеется на дерзо сердце, таковый безумен: а иже ходит в премудрости, спасется.

28:27  Иже дает убогим, не оскудеет: а иже отвращает око свое, в скудости будет мнозе.

28:28  На местех нечестивых стенят праведнии, в погибели же их умножатся праведнии.

Chapter 29

29:1  Лучше муж обличаяй, нежели муж жестоковыйный: внезапу бо палиму ему, несть изцеления.

29:2  Похваляемым праведным, возвеселятся людие: началствующым же нечестивым, стенят мужие.

29:3  Мужу любящу премудрость, веселится отец его: а иже пасет любодейцы, погубит богатство.

29:4  Царь праведен возвышает землю, муж же законопреступник раскоповает.

29:5  Иже уготовляет на лице своему другу мрежу, облагает ю на своя ноги.

29:6  Согрешающему мужу велия сеть: праведный же в радости и в веселии будет.

29:7  Умеет праведный суд творити убогим, а нечестивый не разумеет разума, и убогому несть ума разумевающаго.

29:8  Мужие беззаконнии сожгоша град, мудрии же отвратиша гнев.

29:9  Муж мудр судит языки, муж же злый гневаяйся посмеваемь бывает, а не устрашает.

29:10  Мужие кровей причастни возненавидят преподобнаго, правии же взыщут душу его.

29:11  Весь гнев свой произносит безумный: премудрый же скрывает по части.

29:12  Царю послушающу словесе неправедна, вси, иже под ним, законопреступницы.

29:13  Заимодавцу и должнику, друг со другом сошедшымся, посещение творит обема Господь.

29:14  Царю во истине судящему нищым, престол его во свидетелство устроится.

29:15  Язвы и обличения дают мудрость: отрок же заблуждаяй срамляет родители своя.

29:16  Многим сущым нечестивым мнози греси бывают, праведнии же, оным падающым, устрашаеми бывают.

29:17  Наказуй сына твоего, и упокоит тя и даст лепоту души твоей.

29:18  Не будет сказатель языку законопреступну, храняй же закон блажен.

29:19  Не накажется словесы раб жесток: аще бо и уразумеет, но не послушает.

29:20  Аще увидиши мужа скора в словесех, разумей, яко упование имать паче его безумный.

29:21  Иже ласкосерд будет от детства, поработится, на последок же болезновати будет о сем.

29:22  Муж гневливый воздвизает свар, муж же ярый открывает грехи.

29:23  Досаждение мужа смиряет, а смиренныя утверждает Господь в славе.

29:24  Иже сообщается татю, ненавидит своея души: аще же клятву предложенную слышавшии не возвестят,

29:25  убоявшеся и постыдевшеся человеков, преткнутся: надеявыйся же на Господа возвеселится. Нечестие мужу дает соблажнение: уповаяй же на Владыку спасется.

29:26  Мнози угождают лицам началников: от Господа же сбывается правда мужу.

29:27  Мерзость праведнику муж неправеден: мерзость же законопреступному путь правоведяй.

Chapter 30

30:1  Сия глаголет муж верующым Богови, и почиваю:

30:2  безумнее бо есмь от всех человек, и разума человеческаго несть во мне:

30:3  Бог же научи мя премудрости, и разум святых уразумех.

30:4  Кто взыде на небо и сниде? Кто собра ветры в недра? Кто возврати воду в ризу? Кто обдержа вся концы земли? Кое имя его? Или кое имя сыну его, да разумееши?

30:5  Вся бо словеса Божия раздежена: защищает же Сам благоговеющих Ему.

30:6  Не приложи ко словесем Его, да не обличит тя, и ложь будеши.

30:7  Двое прошу у Тебе: не отими от мене благодати прежде умертвия моего:

30:8  суетно слово и ложно далече от мене сотвори, богатства же и нищеты не даждь ми: устрой же ми потребная и самодоволная,

30:9  да не насыщься ложь буду и реку: кто мя видит? Или обнищав украду и кленуся именем Божиим.

30:10  Не предаждь раба в руце господина, да не когда прокленет тя, и изчезнеши.

30:11  Чадо зло кленет отца и матерь не благословит.

30:12  Чадо зло праведна себе судит, исхода же своего не измы.

30:13  Чадо зло высоки очи имать, веждома же своима возносится.

30:14  Чадо зло мечь зубы (своя) имать, и членовныя яко сечиво, еже губити и поядати смиренныя от земли и убогия их от человек.

30:15  Пиявица име три дщери, любовию возлюблены, и три сия не насытишася ея, и четвертая не удовлися рещи: доволно (ми есть).

30:16  Ад и похоть жены, и земля ненапоеная водою и вода и огнь не рекут: довлеет.

30:17  Око ругающееся отцу и досаждающее старости матерни, да исторгнут е вранове от дебрия и да снедят е птенцы орли.

30:18  Трие ми суть невозможная уразумети, и четвертаго не вем:

30:19  следа орла паряща (по воздуху) и пути змиа (ползуща) по камени, и стези корабля пловуща по морю и путий мужа в юности (его).

30:20  Таков путь жены блудницы: яже егда сотворит, и измывшися, ничтоже, рече, содеях нелепо.

30:21  Треми трясется земля, четвертаго же не может понести:

30:22  аще раб воцарится, и безумный исполнится пищею, и раба аще изженет свою госпожу,

30:23  и мерзкая жена аще ключится добру мужу.

30:24  Четыри же суть малейшая на земли, сия же суть мудрейша мудрых:

30:25  мравие, имже несть крепости и уготовляют в жатву пищу:

30:26  и хирогрилли, язык не крепок, иже сотвориша в камениих домы своя:

30:27  безцарни суть прузие, и воюют от единаго повеления благочинно:

30:28  ящерица, руками опирающися и удобь уловляема сущи, живет во твердех царевых.

30:29  Трие суть, яже благопоспешно ходят, четвертое же, еже добре проходит:

30:30  скимен львов крепчае зверей, иже не отвращается, ни устрашается скота,

30:31  и петель ходя в кокошех благодушен, и козел предводитель стаду, и царь глаголяй к народу во языце.

30:32  Аще вдаси себе в веселие и простреши руку твою со сваром, поруган будеши.

30:33  Мельзи млеко, и будет масло. Аще ли ноздри чешеши, изыдет кровь: аще же извлечеши словеса, изыдут судове и тяжбы.

Chapter 31

31:1  Моя словеса рекошася от Бога, царево пророчество, егоже наказа мати его:

31:2  что, чадо, (соблюдеши,) что речение Божие? Первородне, тебе глаголю, сыне: что, чадо моего чрева? Что, чадо моих молитв?

31:3  Не даждь женам твоего богатства и твоего ума и жития в последний совет.

31:4  С советом все твори, с советом пий вино: сильнии гневливи суть, вина да не пиют,

31:5  да напившеся не забудут мудрости и право судити немощным не возмогут.

31:6  Дадите сикера сущым в печалех и вино пити сущым в болезнех,

31:7  да забудут убожества и болезней не воспомянут ктому.

31:8  Сыне, отверзай уста твоя слову Божию и суди вся здраво:

31:9  отверзай уста твоя и суди праведно, разсуждай же убога и немощна.

31:10  Жену доблю кто обрящет, дражайши есть камения многоценнаго таковая:

31:11  дерзает на ню сердце мужа ея: таковая добрых корыстей не лишится:

31:12  делает бо мужу своему благая во все житие:

31:13  обретши волну и лен, сотвори благопотребное рукама своима.

31:14  Бысть яко корабль куплю дея, издалеча собирает себе богатство:

31:15  и востает из нощи, и даде брашна дому и дела рабыням.

31:16  Узревши село купи, от плодов же рук своих насади стяжание.

31:17  Препоясавши крепко чресла своя, утвердит мышцы своя на дело,

31:18  и вкуси, яко добро есть делати, и не угасает светилник ея всю нощь.

31:19  Лакти своя простирает на полезная, руце же свои утверждает на вретено,

31:20  и руце свои отверзает убогому, длань же простре нищу.

31:21  Не печется о сущих в дому муж ея, егда где замедлит: вси бо у нея одеяни суть.

31:22  Сугуба одеяния сотвори мужу своему, от виссона же и порфиры себе одеяния.

31:23  Славен бывает во вратех муж ея, внегда аще сядет в сонмищи со старейшины жительми земли.

31:24  Плащаницы сотвори и продаде Финикианом, опоясания же Хананеом.

31:25  Уста своя отверзе внимателно и законно и чин заповеда языку своему.

31:26  Крепостию и лепотою облечеся, и возвеселися во дни последния.

31:27  Тесны стези дому ея, брашна же леностнаго не яде.

31:28  Уста своя отверзе мудро и законно.

31:29  Милостыня же ея возстави чада ея, и обогатишася: и муж ея похвали ю:

31:30  многи дщери стяжаша богатство, многи сотвориша силу: ты же предуспела и превознеслася еси над всеми:

31:31  ложнаго угождения и суетныя доброты женския несть в тебе: жена бо разумная благословена есть: страх же Господень сия да хвалит. Дадите ей от плодов устен ея, и да хвалимь будет во вратех муж ея.