Ndebele - Proverbs

Chapter 1

1:1  Izaga zikaSolomoni, indodana kaDavida, inkosi yakoIsrayeli;

1:2  ukwazi inhlakanipho lokulaywa, ukuqedisisa amazwi okuqedisisa,

1:3  ukwemukela ukulaya kwenhlakanipho, ukulunga, lesahlulelo, lokuqonda;

1:4  ukunika abangelalwazi inhlakanipho, ijaha ulwazi lengqondo.

1:5  Ohlakaniphileyo uzakuzwa, andise ukufunda, loqedisisayo uzazuza izeluleko,

1:6  ukuqedisisa isaga lomzekeliso, amazwi abahlakaniphileyo, lamalibho abo.

1:7  Ukwesaba iNkosi kuyikuqala kolwazi; izithutha ziyadelela inhlakanipho lokulaywa.

1:8  Ndodana yami, zwana ukulaya kukayihlo, ungawudeli umlayo kanyoko;

1:9  ngoba kuzakuba ngumqhele womusa ekhanda lakho, lemigaxo entanyeni yakho.

1:10  Ndodana yami, uba izoni zikuhuga, ungavumi.

1:11  Uba zisithi: Hamba lathi, siyecathamela igazi, sicatshele ongelacala kungelasizatho;

1:12  sibaginye bephila njengengcwaba, yebo, ngokupheleleyo, njengabehlela egodini.

1:13  Sizathola yonke impahla eligugu, sigcwalise izindlu zethu ngempango.

1:14  Phosela inkatho yakho phakathi kwethu; sonke sibe lesikhwama semali sinye.

1:15  Ndodana yami, ungahambi lazo endleleni; unqande unyawo lwakho emkhondweni wazo.

1:16  Ngoba inyawo zazo zigijimela ebubini, ziphangisa ukuchitha igazi.

1:17  Isibili, imbule lendlalelwa ize phambi kwamehlo aloba yiyiphi inyoni.

1:18  Lalaba bacathamela igazi labo, bacatshele imiphefumulo yabo.

1:19  Zinjalo indlela zakhe wonke ozuza inzuzo ngokuphanga; ithatha impilo yabaniniyo.

1:20  UkuHlakanipha kuyamemeza ngaphandle, kukhupha ilizwi lakho emidangeni.

1:21  Kuyamemeza endaweni eqakathekileyo yokuxokozela, ekungeneni kwamasango; emzini kutsho amazwi akho,

1:22  kusithi: Koze kube nini, lina elingelalwazi, lithanda ukungabi lalwazi, labaklolodayo bezifisela ukukloloda, leziphukuphuku zizonda ulwazi?

1:23  Phendukelani ekukhuzeni kwami; khangelani, ngizathululela umoya wami kini, ngilazise amazwi ami.

1:24  Ngoba ngibizile, kodwa lala; ngelulile isandla sami, kodwa kakho onanzayo;

1:25  ladelela sonke iseluleko sami, kalivumanga ukukhuza kwami;

1:26  mina-ke ngizahleka ukuchitheka kwenu, ngiklolode ekufikeni kokwesaba kwenu,

1:27  ekufikeni kokwesaba kwenu njengesiphepho, lokuchitheka kwenu kufika njengesivunguzane, lapho ubuhlungu losizi kulehlela.

1:28  Khona bazangibiza, kodwa kangiyikusabela; bazangidingisisa, kodwa kabayikungithola.

1:29  Ngenxa yokuthi babezonda ulwazi, bengakhethanga ukwesaba iNkosi.

1:30  Kabavumanga iseluleko sami, bedelela konke ukukhuza kwami.

1:31  Ngakho bazakudla okwesithelo sendlela yabo, basuthiswe ngamacebo abo.

1:32  Ngoba ukuhlehla kwabangelalwazi kuzababulala, lokonwaba kweziphukuphuku kuzababhubhisa.

1:33  Kodwa ongilalelayo uzahlala evikelekile, onwabe ekwesabeni okubi.

Chapter 2

2:1  Ndodana yami, uba usemukela amazwi ami, ugcine kuwe imilayo yami,

2:2  ukuthi wenze indlebe yakho ilalele inhlakanipho, uthobise inhliziyo yakho ekuqedisiseni,

2:3  yebo, uba ukhalela ukuqedisisa, ukhuphele ilizwi lakho ekuzwisiseni,

2:4  uba ukudinga njengesiliva, ukuphenye njengezimpahla eziligugu ezifihliweyo,

2:5  khona uzaqedisisa ukuyesaba iNkosi, uthole ulwazi lukaNkulunkulu.

2:6  Ngoba iNkosi inika inhlakanipho; ulwazi lokuqedisisa kuvela emlonyeni wayo.

2:7  Iyababekela abaqotho inhlakanipho eqotho; iyisihlangu kubo abahamba ngokuqonda,

2:8  ukugcina indlela zesahlulelo; izalondoloza indlela zabangcwele bayo.

2:9  Khona uzaqedisisa ukulunga, lesahlulelo, lokuqonda; yonke indlela elungileyo.

2:10  Lapho inhlakanipho izangena enhliziyweni yakho, lolwazi lube mnandi emphefumulweni wakho;

2:11  ingqondo izakugcina, ukuqedisisa kukulondoloze;

2:12  ukukophula endleleni embi, emuntwini okhuluma izinto eziphambeneyo;

2:13  abatshiya indlela zobuqotho, ukuze bahambe ngendlela zobumnyama;

2:14  abathokoza ngokwenza okubi, bejabula ekuphambukeni komubi;

2:15  abandlela zabo ziphambene, begobile emikhondweni yabo;

2:16  ukukophula kowesifazana wemzini, kowezizwe okhohlisa ngamazwi akhe;

2:17  otshiya umngane wobutsha bakhe, ekhohlwa isivumelwano sikaNkulunkulu wakhe;

2:18  ngoba indlu yakhe itshonela ekufeni, lemikhondo yakhe emimoyeni efileyo.

2:19  Bonke abangena kuye kabayikubuya, njalo kabayikufinyelela endleleni zempilo.

2:20  Ukuze uhambe endleleni yabalungileyo, ugcine imikhondo yamalungisa.

2:21  Ngoba abaqotho bazahlala elizweni, labapheleleyo basale kulo;

2:22  kodwa abakhohlakeleyo bazaqunywa basuswe elizweni, labaphambekayo badatshulwe basuswe kulo.

Chapter 3

3:1  Ndodana yami, ungakhohlwa umlayo wami, kodwa inhliziyo yakho kayigcine imilayo yami.

3:2  Ngoba yengezelela kuwe ubude bezinsuku leminyaka yempilo lokuthula.

3:3  Umusa lothembeko kakungakutshiyi, kubophele entanyeni yakho, ukubhale esibhebheni senhliziyo yakho.

3:4  Ngalokho uzathola umusa lokuqedisisa okuhle emehlweni kaNkulunkulu labantu.

3:5  Themba eNkosini ngenhliziyo yakho yonke, ungeyami ekuqedisiseni kwakho.

3:6  Ivume endleleni zakho zonke, yona-ke izaqondisa imikhondo yakho.

3:7  Ungabi ngohlakaniphileyo emehlweni akho; yesabe iNkosi, usuke ebubini.

3:8  Kuzakuba yikwelatshwa kwenkaba yakho, lokunathwayo kwamathambo akho.

3:9  Hlonipha iNkosi ngemfuyo yakho, langezithelo zakho zokuqala zesivuno sakho sonke.

3:10  Khona iziphala zakho zizagcwaliswa ngenala, lezikhamelo zakho zewayini ziphuphume iwayini elitsha.

3:11  Ndodana yami, ungadeleli ukulaya kweNkosi, unganengwa yikukhuza kwayo.

3:12  Ngoba iNkosi iyamlaya emthandayo, yebo, njengoyise indodana athokoza ngayo.

3:13  Ubusisiwe umuntu othola inhlakanipho, lomuntu ozuza ukuqedisisa.

3:14  Ngoba inzuzo yakho ingcono kulenzuzo yesiliva, lokutholakalayo kwakho kulegolide.

3:15  Kuligugu elidlula amatshe aligugu, lakho konke ongakufisa kakulinganiswa lakho.

3:16  Ubude bezinsuku busesandleni sakho sokunene, kwesokhohlo sakho inotho lodumo.

3:17  Izindlela zakho zizindlela zentokozo, lemikhondo yakho yonke iyikuthula.

3:18  Kuyisihlahla sempilo kwabakubambayo, lobambelela kukho ubusisiwe.

3:19  Ngenhlakanipho iNkosi yasekela umhlaba; yamisa amazulu ngokuqedisisa.

3:20  Ngolwazi lwayo izinziki zaqhekezwa, lamayezi athonta amazolo.

3:21  Ndodana yami, kakungasuki emehlweni akho; gcina inhlakanipho eqotho lengqondo.

3:22  Njalo kuzakuba yimpilo yomphefumulo wakho, lesisa entanyeni yakho.

3:23  Khona uzahamba indlela yakho uvikelekile, lonyawo lwakho kaluyikukhubeka.

3:24  Nxa ulala phansi, kawuyikwesaba, yebo, uzalala, lobuthongo bakho buzakuba mnandi.

3:25  Ungesabi uvalo olujumayo, kumbe ukuchitheka kwababi nxa kufika.

3:26  Ngoba iNkosi izakuba sethembeni lakho, igcine unyawo lwakho ukuze lungabanjwa.

3:27  Ungagodleli umninikho okuhle nxa kusemandleni esandla sakho ukukwenza.

3:28  Ungathi kumakhelwane wakho: Hamba, ubuye, kusasa ngizakunika; nxa ulakho.

3:29  Ungacebi okubi ngomakhelwane wakho, ngoba yena uhlala lawe evikelekile.

3:30  Ungaphikisani lomuntu kungelasizatho, nxa engakonanga.

3:31  Ungahawukeli umuntu olobudlwangudlwangu; ungakhethi leyodwa yezindlela zakhe.

3:32  Ngoba ophambeneyo uyisinengiso eNkosini, kodwa imfihlo yayo ikwabaqotho.

3:33  Isiqalekiso seNkosi sisendlini yomubi, kodwa iyawubusisa umuzi wabalungileyo.

3:34  Isibili, yona iyabeyisa abeyisayo, kodwa inika umusa kwabathobekileyo.

3:35  Abahlakaniphileyo bazakudla ilifa lodumo, kodwa abayizithutha, isabelo sabo silihlazo.

Chapter 4

4:1  Zwanini, bantwana, umlayo kayihlo, linanzelele ukuze lazi ukuqedisisa.

4:2  Ngoba ngilinika imfundiso enhle, lingawutshiyi umlayo wami.

4:3  Ngoba bengiyindodana kababa, ngithambile, ngingedwa phambi kukamama.

4:4  Wasengifundisa wathi kimi: Inhliziyo yakho kayibambelele emazwini ami; gcina imilayo yami, uphile.

4:5  Zuza inhlakanipho, uzuze ukuqedisisa, ungakhohlwa; ungaphambuki emazwini omlomo wami.

4:6  Ungakutshiyi, njalo kuzakulondoloza; ukuthande, njalo kuzakulinda.

4:7  Okokuqala yinhlakanipho; zuza inhlakanipho; langenzuzo yakho yonke uzuze ukuqedisisa.

4:8  Kukhulise, njalo kuzakuphakamisa; kuzakunika udumo nxa ukugona.

4:9  Kuzanika ikhanda lakho umqhele womusa; kuzakulethela umqhele wodumo.

4:10  Zwana, ndodana yami, wemukele amazwi ami, leminyaka yempilo izakuba minengi kuwe.

4:11  Ngikufundisile endleleni yenhlakanipho; ngikwenze wanyathela emikhondweni yobuqotho.

4:12  Ekuhambeni kwakho inyathelo lakho kaliyikufinyezwa, njalo nxa ugijima kawuyikukhubeka.

4:13  Bambelela ekulayweni, ungakuyekeli; kugcine, ngoba kuyimpilo yakho.

4:14  Ungangeni emkhondweni wabakhohlakeleyo, ungahambi endleleni yababi.

4:15  Iyekele, ungedluli ngayo, phambuka kuyo, wedlule.

4:16  Ngoba kabalali uba bengenzanga okubi; lobuthongo babo buyasuswa uba bengakhubekisanga muntu.

4:17  Ngoba badla isinkwa senkohlakalo, banathe iwayini lobudlwangudlwangu.

4:18  Kodwa indlela yabalungileyo injengokukhanya okukhanyayo, kuqhubeka kukhanya kuze kube semini enkulu.

4:19  Indlela yababi injengomnyama; kabazi ukuthi bazakhutshwa yini.

4:20  Ndodana yami, lalela amazwi ami, ubeke indlebe yakho ekukhulumeni kwami.

4:21  Kakungaphunyuki emehlweni akho; ukugcine phakathi kwenhliziyo yakho.

4:22  Ngoba kuyimpilo kwabakutholayo, lempilo enhle yenyama yabo yonke.

4:23  Gcina inhliziyo yakho phezu kwakho konke okungagcinwa, ngoba kuvela kikho ukuphuma kwempilo.

4:24  Susa kuwe ukuphambana komlomo, lokuphambeka kwendebe kususele khatshana lawe.

4:25  Amehlo akho kawakhangele phambili, lenkophe zakho ziqonde phambi kwakho.

4:26  Linganisa umkhondo wonyawo lwakho, ukuze zonke indlela zakho ziqine.

4:27  Ungaphambukeli ngakwesokunene kumbe ngakwesokhohlo; uphambule unyawo lwakho ebubini.

Chapter 5

5:1  Ndodana yami, lalela inhlakanipho yami, beka indlebe yakho ekuqedisiseni kwami,

5:2  ukuze uqaphele ingqondo, lendebe zakho zigcine ulwazi.

5:3  Ngoba indebe zowesifazana wemzini zithonta uluju, lomlomo wakhe ubutshelezi kulamafutha.

5:4  Kodwa ukucina kwakhe kuyababa njengomhlonyane, kubukhali njengenkemba esika nhlangothi mbili.

5:5  Inyawo zakhe zehlela ekufeni; izinyathelo zakhe zibambelela esihogweni.

5:6  Hlezi ulinganise indlela yempilo, imikhondo yakhe iyazulazula, kananzeleli.

5:7  Ngakho-ke, bantwana, ngilalelani, lingaphambuki emazwini omlomo wami.

5:8  Dedisela indlela yakho khatshana laye, ungasondeli emnyango wendlu yakhe;

5:9  hlezi unikele udumo lwakho kwabanye, leminyaka yakho kolesihluku;

5:10  hlezi abezizwe bazisuthise ngamandla akho, lemitshikatshika yakho ibe sendlini yowezizweni;

5:11  njalo ububule ekupheleni kwakho, lapho inyama yakho lomzimba wakho sekudliwe;

5:12  njalo uthi: Ngikuzonde njani ukulaywa, lenhliziyo yami yadelela ukukhuzwa!

5:13  Kangizwanga-ke ilizwi labafundisi bami; kangibekanga indlebe zami kwabangifundisayo!

5:14  Ngaphosa ngaba ebubini bonke phakathi kwebandla lenhlangano.

5:15  Natha amanzi emgodini wakho, lemifula ephuma phakathi komthombo wakho.

5:16  Imithombo yakho ichitheke phandle, izifula zamanzi emidangeni.

5:17  Kakube ngokwakho wedwa, kungabi ngokwabezizweni kanye lawe.

5:18  Umthombo wakho kawubusiswe; uthokoze ngomfazi wobutsha bakho;

5:19  impala ethandekayo kakhulu, legogo elibukekayo; amabele akhe kawakusuthise sonke isikhathi, uzule othandweni lwakhe kokuphela.

5:20  Kungani-ke, ndodana yami, uzule kowesifazana wemzini, ugone isifuba sowemzini?

5:21  Ngoba indlela zomuntu ziphambi kwamehlo eNkosi; njalo iyalinganisa yonke imikhondo yakhe.

5:22  Ezakhe iziphambeko zizabamba omubi, abanjwe zintambo zesono sakhe.

5:23  Yena uzakufa ngokungalaywa, lebukhulwini bobuthutha bakhe uzaduha.

Chapter 6

6:1  Ndodana yami, uba uyisibambiso somakhelwane wakho, watshayela owezizwe isandla sakho,

6:2  uthiywe ngamazwi omlomo wakho, ubanjwe ngamazwi omlomo wakho.

6:3  Yenza lokhu khathesi, ndodana yami, uzophule, lokhu usesandleni sikamakhelwane wakho; hamba, uzithobe, umncengisise umakhelwane wakho.

6:4  Unganiki amehlo akho ubuthongo, lokuwozela enkopheni zakho.

6:5  Uzophule njengomziki esandleni somzingeli, lanjengenyoni esandleni somthiyi wenyoni.

6:6  Yana ebunyonyweni, vila, ubone indlela zabo, uhlakaniphe.

6:7  Obuthi, bungelamkhokheli, induna, lombusi,

6:8  bulungisa isinkwa sabo ehlobo, bubuthe ukudla kwabo esivunweni.

6:9  Koze kube nini, vila, ulele? Uzavuka nini ebuthongweni bakho?

6:10  Ubuthongo obuncinyane, ukuwozela okuncinyane, ukusonga izandla okuncinyane ukuthi ulale,

6:11  besebusiza ubuyanga bakho njengesihambi, lenswelo yakho njengomuntu olesihlangu.

6:12  Umuntu kaBheliyali, umuntu okhohlakeleyo, ohamba lomlomo ophambeneyo,

6:13  afice amehlo akhe, akhulume ngenyawo zakhe, afundise ngeminwe yakhe,

6:14  ukuphambuka kusenhliziyweni yakhe, uceba okubi ngesikhathi sonke, ephosela ingxabano.

6:15  Ngenxa yalokhu ingozi yakhe izafika masinyane, ahle ephuke, kuze kungabi leselapho.

6:16  Lezizinto eziyisithupha iNkosi iyazizonda; yebo, eziyisikhombisa ziyizinengiso emphefumulweni wakhe:

6:17  Amehlo aphakemeyo, ulimi oluqamba amanga, lezandla ezichitha igazi elingelacala,

6:18  inhliziyo eceba amacebo amabi, inyawo eziphangisa ukugijimela ububi,

6:19  umfakazi wamanga ophafuza izinkohliso, lophosela ingxabano phakathi kwabazalwane.

6:20  Ndodana yami, gcina umlayo kayihlo, ungakudeli ukufundisa kukanyoko.

6:21  Kubophele enhliziyweni yakho njalo, kubophele entanyeni yakho.

6:22  Ekuhambeni kwakho kuzakukhokhela, ekulaleni kwakho kukulondoloze, lekuvukeni kwakho khona kukhulume lawe.

6:23  Ngoba umlayo uyisibane, lokufundisa kuyikukhanya, lokukhuza kokulaya kuyindlela yempilo,

6:24  ukuze kukugcine emfazini omubi, emazwini ayengayo olimi lowesifazana wemzini.

6:25  Ungaloyisi ubuhle bakhe enhliziyweni yakho; angakuthathi ngenkophe zakhe.

6:26  Ngoba ngenxa yomfazi oyisiphingi ungafika ecezwini lwesinkwa, lomfazi womuntu uzingela umphefumulo oligugu.

6:27  Kambe, umuntu angaphatha umlilo esifubeni sakhe, lezigqoko zakhe zingatshi?

6:28  Umuntu angahamba phezu kwamalahle avuthayo, lenyawo zakhe zingatshi yini?

6:29  Unjalo ongena kumkamakhelwane wakhe; wonke omthintayo kayikuba msulwa.

6:30  Kabalideleli isela, nxa liseba ukuthi ligcwalise umphefumulo walo, ngoba lilambile.

6:31  Uba litholwa, lihlawula kuphindwe kasikhombisa, linika yonke impahla yendlu yalo.

6:32  Ofeba lowesifazana uswela ingqondo; owenza lokhu nguye ochitha umphefumulo wakhe.

6:33  Uzathola ukutshaywa lesigcono, lehlazo lakhe kaliyikwesulwa.

6:34  Ngoba ubukhwele bululaka lomuntu; ngakho kayikuba lasihawu ngosuku lwempindiselo.

6:35  Kayikunanza loba yiyiphi inhlawulo, kayikuvuma lanxa usandisa isipho.

Chapter 7

7:1  Ndodana yami, gcina amazwi ami, uzibekele imilayo yami.

7:2  Gcina imilayo yami, uphile, lomthetho wami njengenhlamvu yamehlo akho.

7:3  Ukubophele eminweni yakho, kubhale esibhebheni senhliziyo yakho.

7:4  Uthi kunhlakanipho: Ungudadewethu; ubize ukuqedisisa ngokuthi yisihlobo sakho;

7:5  ukuze kukugcine kumfazi wemzini, kowesifazana wemzini oyengayo ngamazwi akhe.

7:6  Ngoba ewindini lendlu yami, ngeminxibo yewindi ngalunguza phandle,

7:7  ngasengibona phakathi kwabangelalwazi, ngananzelela phakathi kwabatsha ijaha eliswele ingqondo,

7:8  lisedlula esitaladeni eceleni kwengonsi yakhe, linyathela endleleni yendlu yakhe,

7:9  kusihlwa, ngentambama yosuku, ebusuku obumnyama, lomnyama.

7:10  Khangela-ke, owesifazana walihlangabeza, lesembatho sewule, elobuqili ngenhliziyo.

7:11  Lo wayelomsindo, eyisiqholo; inyawo zakhe kazihlali endlini yakhe.

7:12  Khathesi uphandle, abesesiba ezitaladeni, ecathama kuyo yonke ingonsi.

7:13  Ngokunjalo walibamba, walanga, waqinisa ubuso bakhe, wathi kulo:

7:14  Imihlatshelo yeminikelo yokuthula ikimi; lamuhla sengibhadele izifungo zami.

7:15  Ngakho-ke ngiphumile ukukuhlangabeza, ngidingisise ubuso bakho; ngikutholile.

7:16  Ngendlele umbheda wami ngezendlalo, ngamalembu acolekileyo kakhulu alemibalabala avela eGibhithe.

7:17  Ngifafazile umbheda wami ngemure*, izinhlaba, lekinamoni*.

7:18  Woza, sizidakise ngothando kuze kuse, sizithokozise ngothando olukhulu.

7:19  Ngoba indoda kayikho endlini yayo, ihambile uhambo khatshana.

7:20  Ithethe isaka lemali esandleni sayo; ngosuku lwenyanga egcweleyo izakuza endlini yayo.

7:21  Walihuga ngobunengi bemfundiso yakhe, walivumisa ngenkulumo zakhe ezincengayo.

7:22  Lahle lamlandela njengenkabi isiya ekuhlatshweni, lanjengesiphukuphuku sisiya ekujezisweni esongweni lenqagala;

7:23  uze umtshoko uhlabe isibindi salo, njengenyoni iphangisela esifwini, ingazi ukuthi simelene lempilo yayo.

7:24  Khathesi-ke, bantwana, ngizweni, lilalele amazwi omlomo wami.

7:25  Inhliziyo yakho kayingaphambukeli endleleni zakhe; ungaduhi emikhondweni yakhe.

7:26  Ngoba ubawisele phansi abanengi abalimeleyo, labo bonke ababuleweyo bakhe banengi.

7:27  Indlu yakhe izindlela zesihogo, ezehlela emakamelweni okufa.

Chapter 8

8:1  Inhlakanipho kayimemezi yini, lokuqedisisa kukhuphe ilizwi lakho?

8:2  Engqongeni yezindawo eziphakemeyo, ngasendleleni, phakathi kwezindlela kumi.

8:3  Eceleni kwamasango, entubeni yomuzi, ekungeneni kweminyango kuyamemeza kakhulu kuthi:

8:4  Kini, madoda, ngiyamemeza, lelizwi lami lisebantwaneni babantu.

8:5  Lina elingelalwazi, qedisisani inhlakanipho; lani zithutha, qedisisani ngenhliziyo.

8:6  Zwanini, ngoba ngizakhuluma izinto zobukhosi, lokuvula kwendebe zami kuzakuba yikuqonda.

8:7  Ngoba umlomo wami ukhuluma iqiniso, lenkohlakalo iyisinengiso endebeni zami.

8:8  Wonke amazwi omlomo wami asekulungeni; kakukho okutshilekileyo lokugobileyo kuwo.

8:9  Wonke aqondile kulowo oqedisisayo, alungile kulabo abathola ulwazi.

8:10  Yemukelani ukufundisa kwami, hatshi isiliva, lolwazi kulegolide elikhethekileyo.

8:11  Ngoba inhlakanipho ingcono kulamatshe amahle, lakho konke okufisekayo kakulakulinganiswa layo.

8:12  Mina nhlakanipho ngihlala lokuqedisisa, ngithola ulwazi lamacebo.

8:13  Ukwesaba iNkosi kuyikuzonda ububi; ukuzigqaja, lokuziqhenya, lendlela embi, lomlomo wokuphambeka ngiyakuzonda.

8:14  Iseluleko ngesami, lenhlakanipho eqotho; ngiyikuqedisisa; amandla ngawami.

8:15  Ngami amakhosi ayabusa, lababusi bamisa ukulunga.

8:16  Ngami iziphathamandla ziyabusa, lezikhulu, bonke abehluleli bomhlaba.

8:17  Mina ngiyathanda abangithandayo, lalabo abangidingisisayo bazangithola.

8:18  Inotho lodumo kukimi, inotho eqhubekayo lokulunga.

8:19  Isithelo sami singcono kulegolide, legolide elicwengekileyo, lokutholakalayo kwami kulesiliva esikhethekileyo.

8:20  Ngihamba endleleni yokulunga, phakathi kwemikhondo yesahlulelo;

8:21  ukuthi ngenze abangithandayo badle ilifa lemfuyo; ngigcwalise iziphala zabo.

8:22  INkosi, ngaba ngeyayo, ngaba yikuqala kwendlela yayo, ngaphambi kwemisebenzi yayo yendulo.

8:23  Ngamiswa kwasephakadeni, kusukela ekuqaleni, kusukela emandulo omhlaba.

8:24  Kungakabi khona izinziki ngasengizelwe, ingakabi khona imithombo enzima ngamanzi.

8:25  Intaba zingakamiswa, kungakabi khona amaqaqa, ngasengizelwe.

8:26  Ingakawenzi umhlaba lemimango, lokuqala kwentuli zomhlaba.

8:27  Lapho ilungisa amazulu ngangikhonapho; lapho imisa umkhathi ngaphezu kwenziki;

8:28  lapho imisa amayezi ngaphezulu; lapho iqinisa imithombo yenziki;

8:29  lapho imisela ulwandle umngcele walo ukuze amanzi angeqi umlayo wayo; lapho imisa izisekelo zomhlaba;

8:30  khona ngangiseduze layo njengowakhuliswa yiyo, ngizintokozo zayo usuku ngosuku, ngithokoza phambi kwayo ngaso sonke isikhathi,

8:31  ngidlala elizweni lomhlaba wayo, lentokozo zami zisebantwaneni babantu.

8:32  Ngakho-ke, bantwana bami, ngizweni; ngoba babusisiwe abagcina indlela zami.

8:33  Zwanini ukulaya, lihlakaniphe, lingakudeli.

8:34  Ubusisiwe umuntu ongizwayo, alinde insuku ngensuku emasangweni ami, alinde emigubazini yeminyango yami.

8:35  Ngoba ongitholayo uthola impilo, azuze umusa eNkosini.

8:36  Kodwa owona kimi wona umphefumulo wakhe; bonke abangizondayo bathanda ukufa.

Chapter 9

9:1  Inhlakanipho enkulu yakhe indlu yayo, ibaze insika zayo eziyisikhombisa.

9:2  Ihlabe okuhlatshwayo kwayo, ixubanise iwayini layo, futhi yalungisa itafula layo.

9:3  Ithume incekukazi zayo, iyamemeza engqongeni zendawo eziphakemeyo zomuzi zisithi:

9:4  Loba ngubani ongelalwazi? Kaphendukele lapha; oswele ingqondo, ithi kuye:

9:5  Wozani, lidle okwesinkwa sami, linathe okwewayini engilixubanisileyo.

9:6  Yekelani abangelalwazi liphile, lihambe ngokuqonda ngendlela yokuqedisisa.

9:7  Osola isiklolodi uzizuzela ihlazo, lokhuza okhohlakeleyo uzizuzela isici.

9:8  Ungasoli isiklolodi, hlezi sikuzonde; sola ohlakaniphileyo, njalo uzakuthanda.

9:9  Nika ohlakaniphileyo, njalo uzakuba lokhu ehlakanipha; fundisa olungileyo, njalo uzakwandisa ukufunda.

9:10  Ukuyesaba iNkosi kuyikuqala kwenhlakanipho, lolwazi lwabangcwele luyikuqedisisa.

9:11  Ngoba ngami insuku zakho zizakwandiswa, leminyaka yempilo yengezelelwe kuwe.

9:12  Uba uhlakaniphile, uzakuba uzihlakaniphele; uba ukloloda, uzakuthwala wedwa.

9:13  Owesifazana oyisithutha ulomsindo, kalangqondo, kazi lutho.

9:14  Ngoba uhlala emnyango wendlu yakhe, esihlalweni, endaweni eziphakemeyo zomuzi,

9:15  ukubiza abadlulayo ngendlela, abahamba beqondile emikhondweni yabo, esithi:

9:16  Loba ngubani ongelalwazi? Kaphendukele lapha; loswele ingqondo, uthi kuye:

9:17  Amanzi ebiweyo amnandi, lesinkwa sensitha siyahlabusa.

9:18  Kodwa kazi ukuthi abafileyo balapho; abanxusiweyo bakhe basenzikini yesihogo.

Chapter 10

10:1  Izaga zikaSolomoni. Indodana ehlakaniphileyo ithokozisa uyise, kodwa indodana eyisithutha ilusizi kunina.

10:2  Inotho yenkohlakalo kayisizi lutho, kodwa ukulunga kophula ekufeni.

10:3  INkosi kayiyekeli umphefumulo wolungileyo ulambe, kodwa isunduza isifiso sababi.

10:4  Osebenza ngesandla esixegayo uba ngumyanga, kodwa isandla sabakhutheleyo siyanothisa.

10:5  Ovuna ehlobo uyindodana ehlakaniphileyo; olala ubuthongo obukhulu ngesikhathi sokuvuna uyindodana ethelela ihlazo.

10:6  Izibusiso zisekhanda lolungileyo, kodwa ubudlwangudlwangu busibekela umlomo wabakhohlakeleyo.

10:7  Ukukhunjulwa kolungileyo kungokwesibusiso, kodwa ibizo labakhohlakeleyo lizabola.

10:8  Ohlakaniphileyo ngenhliziyo uyemukela imilayo, kodwa isithutha ngendebe sizawiselwa phansi.

10:9  Ohamba ngobuqotho uhamba evikelekile, kodwa ophambula indlela zakhe uzakwaziwa.

10:10  Ociyoza ilihlo ubanga inkathazo, njalo isithutha ngendebe sizawiselwa phansi.

10:11  Umlomo wolungileyo ungumthombo wempilo, kodwa ubudlwangudlwangu busibekela umlomo wabakhohlakeleyo.

10:12  Inzondo ibanga ingxabano, kodwa uthando lusibekela iziphambeko zonke.

10:13  Endebeni zoqedisisayo kutholakala inhlakanipho, kodwa intonga ingeyomhlana woswela ingqondo.

10:14  Abahlakaniphileyo babekelela ulwazi, kodwa umlomo wesithutha useduze lencithakalo.

10:15  Inotho yonothileyo ingumuzi wamandla akhe; ubuyanga babayanga buyincithakalo yabo.

10:16  Umsebenzi wolungileyo ngowempilo; inzuzo yokhohlakeleyo ngeyesono.

10:17  Ogcina ukulaywa usendleleni yempilo, kodwa odelela ukukhuzwa ubanga ukuduha.

10:18  Osibekela inzondo ungowendebe zamanga, lohlebayo uyisithutha.

10:19  Ebunengini bamazwi ukuphambeka kakusileli, kodwa othiba indebe zakhe uhlakaniphile.

10:20  Ulimi lolungileyo luyisiliva esikhethekileyo; inhliziyo yokhohlakeleyo injengento encinyane.

10:21  Indebe zolungileyo zondla abanengi, kodwa izithutha ziyafa ngokuswela ingqondo.

10:22  Isibusiso seNkosi sona siyanothisa; njalo kayengezi usizi kuso.

10:23  Kunjengenhlekisa koyisithutha ukwenza okubi; kunjalo inhlakanipho kumuntu wokuqedisisa.

10:24  Lokho okhohlakeleyo akwesabayo kuzamfikela, kodwa isiloyiso solungileyo sizanikwa.

10:25  Njengokwedlula kwesivunguzane, unjalo okhohlakeleyo kasekho; kodwa olungileyo uyisisekelo saphakade.

10:26  Njengeviniga emazinyweni, lanjengentuthu emehlweni, unjalo olivila kwabamthumileyo.

10:27  Ukuyesaba iNkosi kwandisa insuku, kodwa iminyaka yabakhohlakeleyo izafinyezwa.

10:28  Ithemba labalungileyo liyintokozo, kodwa okulindelwayo kwabakhohlakeleyo kuzabhubha.

10:29  Indlela yeNkosi iyinqaba koqotho, kodwa iyincithakalo kubenzi bobubi.

10:30  Olungileyo kayikunyikinywa laphakade, kodwa abakhohlakeleyo kabayikuhlala elizweni.

10:31  Umlomo wolungileyo ukhupha inhlakanipho, kodwa ulimi oluphambeneyo luzaqunywa.

10:32  Indebe zolungileyo ziyazi okuthokozisayo, kodwa umlomo wabakhohlakeleyo iziphambeko.

Chapter 11

11:1  Isikali esikhohlisayo siyisinengiso eNkosini, kodwa ilitshe lokulinganisa elipheleleyo liyintokozo yayo.

11:2  Nxa kufika ukuzigqaja, kufika lehlazo; kodwa kwabathobekileyo kukhona inhlakanipho.

11:3  Ubuqotho babaqotho buzabaqondisa, kodwa ukuphambeka kwabaphambekayo kuzababhubhisa.

11:4  Inotho kayisizi ngosuku lolaka, kodwa ukulunga kophula ekufeni.

11:5  Ukulunga kwabaqotho kuzaqondisa indlela yakhe, kodwa okhohlakeleyo uzakuwa ngenkohlakalo yakhe.

11:6  Ukulunga kwabaqotho kuzabophula, kodwa abaphambukayo bazathunjwa zinkanuko zabo.

11:7  Nxa umuntu okhohlakeleyo esifa, ithemba lakhe lizabhubha, lethemba lolamandla liyabhubha.

11:8  Olungileyo ukhululwa ekuhluphekeni, kodwa omubi ungena endaweni yakhe.

11:9  Ngomlomo umzenzisi uchitha umakhelwane wakhe, kodwa ngolwazi abalungileyo bayakhululwa.

11:10  Ngempumelelo yabalungileyo umuzi uyathokoza; lekubhubheni kwabakhohlakeleyo kulenjabulo.

11:11  Ngesibusiso sabaqotho umuzi uyaphakanyiswa, kodwa ngomlomo wabakhohlakeleyo uyachitheka.

11:12  Oswela ingqondo udelela umakhelwane, kodwa umuntu oqedisisayo uyazithulela.

11:13  Ohamba enyeya wembula imfihlakalo, kodwa othembekileyo ngomoya ufihla udaba.

11:14  Lapho kungekho izeluleko abantu bayawa; kodwa ukukhululwa kusebunengini babeluleki.

11:15  Oba yisibambiso sowezizwe uzahlupheka ngokubi; kodwa ozonda ukutshaya izandla uvikelekile.

11:16  Owesifazana olomusa ubamba udumo, labalamandla babamba inotho.

11:17  Umuntu olomusa wenzela umphefumulo wakhe okuhle, kodwa olesihluku ukhathaza inyama yakhe.

11:18  Okhohlakeleyo wenza umsebenzi wenkohliso, kodwa ohlanyela ukulunga ulomvuzo weqiniso.

11:19  Njengoba ukulunga kungokwempilo, kunjalo ozingela okubi kungokokufa kwakhe.

11:20  Abaphambeneyo ngenhliziyo bayisinengiso eNkosini, kodwa abaqotho ngendlela bayintokozo yayo.

11:21  Isandla esandleni omubi kayikuyekelwa ukujeziswa, kodwa inzalo yabalungileyo izaphepha.

11:22  Ulisongo legolide empumulweni yengulube owesifazana obukekayo ophambuka engqondweni.

11:23  Isifiso sabalungileyo singokuhle kuphela; ithemba labakhohlakeleyo lulaka.

11:24  Kukhona ohlakazayo, kube kanti okunengi kuyengezwa; logodla okwedlula okufaneleyo, kodwa kungokokuswela.

11:25  Umphefumulo obusisayo uzakhuluphaliswa, lothelelayo uzathelelwa laye.

11:26  Ogodla amabele, abantu bazamqalekisa; kodwa isibusiso sizakuba phezu kwekhanda lothengisayo.

11:27  Odingisisa okuhle, udinga umusa; kodwa odinga okubi, kuzakuza kuye.

11:28  Othemba inotho yakhe yena uzakuwa, kodwa abalungileyo bazahluma njengamahlamvu.

11:29  Oletha inkathazo emzini wakhe uzakudla ilifa lomoya, lesithutha sizakuba yinceku yohlakaniphileyo ngenhliziyo.

11:30  Isithelo solungileyo siyisihlahla sempilo, lozuza imiphefumulo uhlakaniphile.

11:31  Khangela, olungileyo uzavuzwa emhlabeni; kakhulu kangakanani omubi lesoni!

Chapter 12

12:1  Othanda ukulaywa uthanda ulwazi; kodwa ozonda ukukhuzwa uyisithutha.

12:2  Olungileyo uzuza umusa eNkosini, kodwa umuntu wamacebo amabi iyamlahla.

12:3  Umuntu kayikumiswa yibubi, kodwa impande yabalungileyo kayiyikunyikinywa.

12:4  Umfazi okhuthalela okulungileyo ungumqhele wendoda yakhe, kodwa oyangisayo unjengokubola emathanjeni ayo.

12:5  Imicabango yabalungileyo ilungile; izeluleko zababi ziyinkohliso.

12:6  Amazwi abakhohlakeleyo ngawokucathamela igazi, kodwa umlomo wabaqotho uzabophula.

12:7  Abakhohlakeleyo bayachithwa, bangabe besaba khona; kodwa indlu yabalungileyo izakuma.

12:8  Umuntu uzadunyiswa ngokwenhlakanipho yakhe, kodwa ophambeke ngenhliziyo uzakuba ngowokudelelwa.

12:9  Odelelekayo elesisebenzi ungcono kulozihloniphayo aswele ukudla.

12:10  Olungileyo unanzelela impilo yesifuyo sakhe, kodwa izihawu zabakhohlakeleyo ziyilunya.

12:11  Olima insimu yakhe uzasutha ngokudla, kodwa ozingela izinto eziyize uswela ingqondo.

12:12  Okhohlakeleyo ufisa impango yababi, kodwa impande yabalungileyo iyahluma.

12:13  Ekuphambekeni kwendebe kulomjibila womubi, kodwa olungileyo uzaphuma enkathazweni.

12:14  Umuntu uzasutha ngokulungileyo ngesithelo somlomo, lomvuzo wezandla zomuntu uzabuyiselwa kuye.

12:15  Indlela yesithutha ilungile emehlweni aso, kodwa olalela iseluleko uhlakaniphile.

12:16  Isithutha, intukuthelo yaso yaziwa ngosuku; kodwa ohlakaniphileyo ufihla ihlazo.

12:17  Ophefumula iqiniso wazisa ukulunga, kodwa umfakazi wamanga inkohliso.

12:18  Kukhona ophahluka njengokuhlaba kwenkemba, kodwa ulimi lwezihlakaniphi luyikusilisa.

12:19  Indebe yeqiniso izamiswa phakade, kodwa ulimi lwamanga lungolomzuzu nje.

12:20  Inkohliso isenhliziyweni yabaceba okubi, kodwa abeluleki bokuthula balentokozo.

12:21  Lokukodwa okubi kakuyikubehlela abalungileyo, kodwa abakhohlakeleyo bagcwele ububi.

12:22  Indebe zamanga ziyisinengiso eNkosini, kodwa abenza iqiniso bayintokozo yayo.

12:23  Umuntu ohlakaniphileyo ufihla ulwazi, kodwa inhliziyo yezithutha imemezela ubuthutha.

12:24  Isandla sabakhutheleyo sizabusa, kodwa amavila azakuba yizibhalwa.

12:25  Ukukhathazeka enhliziyweni yomuntu kuyayithobisa, kodwa ilizwi elihle liyayithokozisa.

12:26  Olungileyo ungumholi kamakhelwane wakhe, kodwa indlela yabakhohlakeleyo iyabaduhisa.

12:27  Olivila kayikosa inyamazana yakhe ayizingeleyo, kodwa impahla yomuntu okhutheleyo iligugu.

12:28  Endleleni yokulunga kulempilo, lendleleni yomkhondo kakulakufa.

Chapter 13

13:1  Indodana ehlakaniphileyo ilalela ukulaya kukayise, kodwa isideleli kasilaleli ukukhuzwa.

13:2  Umuntu uzakudla okuhle okuvela esithelweni somlomo, kodwa umphefumulo weziphambuki ubudlwangudlwangu.

13:3  Olondoloza umlomo wakhe ugcina umphefumulo wakhe, kodwa ovula indebe zakhe zibe banzi uzakuba lencithakalo.

13:4  Umphefumulo wevila uyafisa, kodwa kakulalutho; kodwa umphefumulo wokhutheleyo uyakhuluphaliswa.

13:5  Olungileyo uyalizonda ilizwi lamanga; kodwa omubi uzenza abe levumba, uthelela ihlazo.

13:6  Ukulunga kulinda oqotho endleleni, kodwa inkohlakalo ichitha isoni.

13:7  Kukhona ozitshaya onothileyo, kanti kalalutho; ozitshaya ongumyanga, kanti unothile kakhulu.

13:8  Inhlawulo yempilo yomuntu yinotho yakhe, kodwa umyanga kezwa ukukhuzwa.

13:9  Ukukhanya kwabalungileyo kuyathokoza, kodwa isibane sabakhohlakeleyo sizacitshwa.

13:10  Ukuzigqaja kuveza ingxabano kuphela, kodwa inhlakanipho ikwabalulekiweyo.

13:11  Inotho etholakala ngokuyize izaphunguka, kodwa obuthelela ngesandla uyayandisa.

13:12  Ithemba eliphuzayo ligulisa inhliziyo, kodwa isifiso esizayo siyisihlahla sempilo.

13:13  Odelela ilizwi yena uzachithwa, kodwa owesaba umlayo yena uzavuzwa.

13:14  Imfundiso yohlakaniphileyo ingumthombo wempilo, ukuthi asuke emijibileni yokufa.

13:15  Ukuqedisisa okuhle kunika umusa, kodwa indlela yabaphambukayo ilukhuni.

13:16  Wonke ohlakaniphileyo wenza ngolwazi, kodwa isithutha sichaya ubuthutha.

13:17  Isithunywa esikhohlakeleyo siwela ebubini, kodwa isithunywa esithembekileyo siyikusilisa.

13:18  Ubuyanga lehlazo ngokwalowo oyekela ukufundiswa, kodwa onanzelela ukukhuzwa uzadunyiswa.

13:19  Isifiso esenziweyo simnandi emphefumulweni, kodwa kuyisinengiso ezithutheni ukuphenduka ebubini.

13:20  Ohamba labahlakaniphileyo uzahlakanipha, kodwa umngane wezithutha uzakuba mubi.

13:21  Ububi buzazingela izoni, kodwa abalungileyo bazavuzwa ngokuhle.

13:22  Olungileyo uzabenza abantwana babantwana badle ilifa, kodwa inotho yesoni ibekelwa olungileyo.

13:23  Ukudla okunengi kusengqathweni yabayanga, kodwa kukhona okukhukhulwa ngokungabi lokwahlulela.

13:24  Ogodla uswazi lwakhe uzonda indodana yakhe, kodwa oyithandayo uyayidinga masinyane ngesijeziso.

13:25  Olungileyo uyadla kuze kusuthe umphefumulo wakhe, kodwa isisu sabakhohlakeleyo sizaswela.

Chapter 14

14:1  Wonke owesifazana ohlakaniphileyo uyayakha indlu yakhe, kodwa oyisithutha uyayidiliza ngezandla zakhe.

14:2  Ohamba ngobuqotho bakhe wesaba iNkosi, kodwa ophambene ngendlela zakhe uyayidelela.

14:3  Emlonyeni wesithutha kulentonga yokuzigqaja, kodwa indebe zabahlakaniphileyo ziyabagcina.

14:4  Lapho okungekho izinkabi khona umkolo uhlanzekile, kodwa kulesivuno esinengi ngamandla enkabi.

14:5  Umfakazi othembekileyo kaqambi amanga, kodwa umfakazi wamanga uphafuza amanga.

14:6  Odelelayo udinga inhlakanipho, kodwa kayikho; kodwa ulwazi lulula koqedisisayo.

14:7  Suka phambi komuntu oyisithutha, nxa ungayikunanzelela kuye indebe zolwazi.

14:8  Inhlakanipho yokhaliphileyo yikuqedisisa indlela yakhe, kodwa ubuthutha bezithutha buyinkohliso.

14:9  Izithutha ziyakloloda ngesono, kodwa phakathi kwabaqotho kulomusa.

14:10  Inhliziyo iyazi ukubaba kwayo ngokwayo, lowemzini kahlanganyeli lentokozo yayo.

14:11  Indlu yabakhohlakeleyo izachithwa, kodwa ithente labaqotho lizahluma.

14:12  Kukhona indlela ebonakala ilungile emuntwini, kodwa ukuphela kwayo zindlela zokufa.

14:13  Lekuhlekeni inhliziyo isebuhlungwini, lokuphela kwaleyontokozo lusizi.

14:14  Ohlehlela nyovane ngenhliziyo uzasutha ngezindlela zakhe, kodwa umuntu olungileyo uzasutha ngaye ngokwakhe.

14:15  Ongelalwazi ukholwa lonke ilizwi, kodwa olengqondo unanzelela ukuhamba kwakhe.

14:16  Ohlakaniphileyo uyesaba, asuke ebubini, kodwa isithutha siyathukuthela, silitshapha.

14:17  Ophangisa ukuthukuthela wenza ubuthutha, lomuntu wamacebo amabi uzazondwa.

14:18  Abangelalwazi badla ilifa lobuthutha, kodwa abakhaliphileyo bazathwala umqhele wolwazi.

14:19  Ababi bakhothama phambi kwabalungileyo, labakhohlakeleyo emasangweni abalungileyo.

14:20  Umyanga uzondwa langumakhelwane wakhe, kodwa abathanda onothileyo banengi.

14:21  Odelela umakhelwane wakhe uyona, kodwa olomusa kubayanga ubusisiwe.

14:22  Kabaduhi yini abaceba okubi? Kodwa umusa leqiniso ngokwalabo abaceba okuhle.

14:23  Kumtshikatshika wonke kulenzuzo, kodwa inkulumo yendebe ibanga inswelo kuphela.

14:24  Umqhele wabahlakaniphileyo uyinotho yabo; ubuthutha bezithutha buyibuthutha.

14:25  Umfakazi oqinisileyo uyophula imiphefumulo, kodwa ophafuza amanga ungumkhohlisi.

14:26  Ekuyesabeni iNkosi kulethemba eliqinileyo, labantwana bakhe bazakuba lesiphephelo.

14:27  Ukuyesaba iNkosi kungumthombo wempilo, ukusuka emijibileni yokufa.

14:28  Lusebunengini babantu udumo lwenkosi, kodwa kusekuswelekeni kwabantu ukuchitheka kombusi.

14:29  Ophuza ukuthukuthela ulokuqedisisa okukhulu, kodwa ophangisa ukuzonda ukhulisa ubuthutha.

14:30  Inhliziyo ephilileyo iyimpilo yenyama, kodwa umhawu uyikubola kwamathambo.

14:31  Ocindezela umyanga uthuka uMenzi wakhe, kodwa olomusa koswelayo uyamdumisa.

14:32  Okhohlakeleyo uwiswa ebubini bakhe, kodwa olungileyo ulethemba ekufeni kwakhe.

14:33  Inhlakanipho ihlala enhliziyweni yoqedisisayo, kodwa okuphakathi kwezithutha kuyaziwa.

14:34  Ukulunga kuphakamisa isizwe, kodwa isono silihlazo ebantwini.

14:35  Umusa wenkosi usencekwini ehlakaniphileyo, kodwa intukuthelo yayo izakuba kwethela ihlazo.

Chapter 15

15:1  Impendulo ethambileyo ibuyisela emuva ulaka, kodwa ilizwi elilukhuni livusa intukuthelo.

15:2  Ulimi lwabahlakaniphileyo lwenza ulwazi lube luhle, kodwa umlomo wezithutha uthulula ubuthutha.

15:3  Amehlo eNkosi akuyo yonke indawo, eqaphela ababi labalungileyo.

15:4  Ukusilisa kolimi kuyisihlahla sempilo, kodwa ukuphambeka kulo kuyikwephuka emoyeni.

15:5  Isithutha sidelela ukulaya kukayise, kodwa onanza ukukhuzwa uhlakaniphile.

15:6  Endlini yolungileyo kulenotho enengi, kodwa enzuzweni yomubi kulenkathazo.

15:7  Indebe zabahlakaniphileyo ziyahlakaza ulwazi, kodwa inhliziyo yezithutha kayinjalo.

15:8  Umhlatshelo wabakhohlakeleyo uyisinengiso eNkosini, kodwa umkhuleko wabaqotho uyintokozo yayo.

15:9  Indlela yokhohlakeleyo iyisinengiso eNkosini, kodwa ithanda ozingela ukulunga.

15:10  Ukujezisa kubi kotshiya indlela; ozonda ukukhuzwa uzakufa.

15:11  Isihogo lentshabalalo kuphambi kweNkosi; kakhulu kangakanani inhliziyo zabantwana babantu!

15:12  Isideleli kasithandi osikhuzayo, kasiyi kwabahlakaniphileyo.

15:13  Inhliziyo ethokozayo yenza ubuso bujabule, kodwa ngosizi lwenhliziyo umoya uyadabuka.

15:14  Inhliziyo yoqedisisayo idinga ulwazi, kodwa umlomo wezithutha udla ubuthutha.

15:15  Zonke insuku zohluphekayo zimbi, kodwa inhliziyo ethokozayo ilidili njalonjalo.

15:16  Kungcono okuncinyane kanye lokwesaba iNkosi kulenotho enengi lenkathazo kanye layo.

15:17  Kungcono isidlo semibhida lapho okulothando khona kulenkabi enonileyo lenzondo kanye layo.

15:18  Umuntu ololaka udungula ingxabano, kodwa ophuza ukuthukuthela uzathulisa ingxabano.

15:19  Indlela yevila injengothango lwameva, kodwa indlela yabaqotho ibuthelelwe.

15:20  Indodana ehlakaniphileyo ithokozisa uyise, kodwa umuntu oyisithutha weyisa unina.

15:21  Ubuthutha buyintokozo koswela ingqondo, kodwa umuntu oqedisisayo uyaqondisa ukuhamba kwakhe.

15:22  Amaqhinga angelaseluleko ayachitheka, kodwa ngabeluleki abanengi ayakuma.

15:23  Umuntu ulentokozo ngempendulo yomlomo wakhe; lelizwi ngesikhathi salo, lihle kangakanani.

15:24  Indlela yempilo kohlakaniphileyo iya phezulu, ukuze asuke esihogweni phansi.

15:25  INkosi izadiliza indlu yozigqajayo, kodwa izamisa umngcele womfelokazi.

15:26  Imicabango yomubi iyisinengiso eNkosini, kodwa amazwi amnandi ahlambulukile.

15:27  Ophanga inzuzo ukhathaza indlu yakhe, kodwa ozonda izipho uzaphila.

15:28  Inhliziyo yolungileyo inakana ukuphendula, kodwa umlomo wababi uthulula izinto ezimbi.

15:29  INkosi ikhatshana labakhohlakeleyo, kodwa iyezwa umkhuleko wabalungileyo.

15:30  Ukukhanya kwamehlo kuthokozisa inhliziyo, lodaba oluhle lwenza amathambo akhuluphale.

15:31  Indlebe elalela ukukhuzwa kwempilo izahlala phakathi kwabahlakaniphileyo.

15:32  Owala ukulaywa weyisa umphefumulo wakhe, kodwa olalela ukukhuzwa uzuza ukuqedisisa.

15:33  Ukuyesaba iNkosi kuyikufundiswa kwenhlakanipho, lokuthobeka kwandulela udumo.

Chapter 16

16:1  Umuntu ulamacebo enhliziyo, kodwa impendulo yolimi ivela eNkosini.

16:2  Zonke indlela zomuntu zihlanzekile emehlweni akhe, kodwa iNkosi ilinganisa imimoya.

16:3  Giqela eNkosini imisebenzi yakho, lamacebo akho azaqiniswa.

16:4  INkosi izenzele konke, lomubi laye usuku lobubi.

16:5  Wonke ozigqajayo ngenhliziyo uyisinengiso eNkosini; isandla esandleni, kayikuyekelwa engajeziswanga.

16:6  Ngomusa leqiniso isono siyahlawulelwa, langokuyesaba iNkosi umuntu uyasuka ebubini.

16:7  Nxa indlela zomuntu zithokozisa iNkosi, iyenza lezitha zakhe zibe lokuthula laye.

16:8  Okulutshwana kanye lokulunga kungcono kulobunengi benzuzo engelakulunga.

16:9  Inhliziyo yomuntu iceba indlela yakhe, kodwa iNkosi iqondisa inyathelo lakhe.

16:10  Isinqumo sikaNkulunkulu sisendebeni zenkosi; umlomo wayo kawuyikuphambeka kusahlulelo.

16:11  Isikali lesilinganiso esilungileyo kungokweNkosi; wonke amatshe okulinganisa omgodla angumsebenzi wayo.

16:12  Kuyisinengiso emakhosini ukwenza okubi, ngoba isihlalo sobukhosi simiswa ngokulunga.

16:13  Indebe zokulunga ziyintokozo yamakhosi; iyathanda okhuluma izinto eziqondileyo.

16:14  Ulaka lombusi luyizithunywa zokufa, kodwa umuntu ohlakaniphileyo uzaluthulisa.

16:15  Ekukhanyeni kobuso benkosi kulempilo, lomusa wayo unjengeyezi lezulu lamuva.

16:16  Kungcono kangakanani ukuzuza inhlakanipho kulegolide; lokuzuza ukuqedisisa kukhethwa kulesiliva.

16:17  Umgwaqo omkhulu wabaqotho yikusuka ebubini; olondoloza umphefumulo wakhe unanzelela indlela yakhe.

16:18  Ukuzigqaja kuqalela ukubhujiswa, lokuziphakamisa komoya kuqalela ukuwa.

16:19  Kungcono ukuthobeka ngomoya kanye labamnene, kulokwabelana impango labazigqajayo.

16:20  Ophatha udaba ngenhlakanipho uzathola okuhle; lothemba eNkosini uyathaba.

16:21  Ohlakaniphileyo ngenhliziyo kuthiwa ngoqedisisayo; lobumnandi bendebe bandisa imfundiso.

16:22  Ukuqedisisa kwabalakho kungumthombo wempilo, kodwa ukulaya kwezithutha kuyibuthutha.

16:23  Ingqondo yohlakaniphileyo yenza umlomo wakhe uhlakaniphe, izakwandisa imfundiso endebeni zakhe.

16:24  Amazwi amnandi aluhlanga loluju, amnandi emphefumulweni, ayimpiliso emathanjeni.

16:25  Kukhona indlela ebonakala iqondile emuntwini, kodwa ukuphela kwayo zindlela zokufa.

16:26  Indlala yomtshikatshiki iyazitshikatshikela, ngoba umlomo wakhe uyamkhuthaza.

16:27  Umuntu omubi ugebha ububi; lendebeni zakhe kulokunjengomlilo otshisayo.

16:28  Umuntu ophambeneyo ungenisa ingxabano, lonyeyayo wehlukanisa umngane oseduze.

16:29  Umuntu wobudlwangudlwangu uhuga umakhelwane wakhe, amhambise ngendlela engalunganga.

16:30  Uvala amehlo akhe ukuceba izinto eziphambeneyo, eluma indebe zakhe aqede ububi.

16:31  Izimvu zekhanda zingumqhele wodumo; zitholakala endleleni yokulunga.

16:32  Ophuza ukuthukuthela ungcono kuleqhawe, lobusa umoya wakhe kulothumba umuzi.

16:33  Inkatho iphoselwa ethangazini, kodwa isinqumo sayo sonke sivela eNkosini.

Chapter 17

17:1  Ucezu olomileyo lokuthula kanye lalo lungcono kulendlu egcwele imihlatshelo lengxabano.

17:2  Inceku ehlakaniphileyo izabusa phezu kwendodana eyangisayo, yehlukanise ilifa phakathi kwezelamani.

17:3  Imbiza yokuncibilikisa ngeyesiliva, lesithando ngesegolide, kodwa iNkosi ihlola izinhliziyo.

17:4  Umenzi wobubi ulalela indebe ekhohlakeleyo; umqambimanga ubeka indlebe olimini oluchithayo.

17:5  Oklolodela umyanga uthuka uMenzi wakhe; othokoza encithakalweni kayikuba msulwa.

17:6  Abantwana babantwana bangumqhele wabadala, lodumo lwabantwana ngoyise.

17:7  Indebe elobungcwethi kayisifanelanga isithutha; kakhulu kangakanani indebe yamanga isiphathamandla.

17:8  Isipho siyilitshe eliligugu emehlweni abaniniso; loba ngaphi esiphendukela khona sizaphumelela.

17:9  Osibekela isiphambeko udinga uthando, kodwa ophindaphinda udaba wehlukanisa umngane oseduze.

17:10  Ukukhuza kuyajula koqedisisayo kulokutshaya isithutha ngokulikhulu.

17:11  Omubi udinga ububi kuphela, kodwa isithunywa esilesihluku sizathunyelwa kuye.

17:12  Kakuthi ibhere elifelwe yimidlwane lihlangane lomuntu, kodwa hatshi isithutha ebuthutheni baso.

17:13  Ophindisela okubi esikhundleni sokuhle, ububi kabuyikusuka endlini yakhe.

17:14  Ukuqala kwenkani kunjengokuvulela amanzi; ngakho yekela ingxabano ingakazivezi.

17:15  Olungisisa omubi lolahla olungileyo bayisinengiso eNkosini, ngitsho bobabili.

17:16  Kungani kulemali yokuthenga inhlakanipho esandleni sesithutha, lokhu singelangqondo?

17:17  Umngane uyathanda ngaso sonke isikhathi, lomzalwane uzalelwa inhlupheko.

17:18  Umuntu oswela ingqondo uyabambana ngezandla ukuba yisibambiso phambi kukamakhelwane wakhe.

17:19  Othanda isiphambeko uthanda inkani; ophakamisa umnyango wakhe udinga ukubhujiswa.

17:20  Olenhliziyo ephambeneyo katholi okuhle, lophambene ngolimi uwela ebubini.

17:21  Ozala isithutha, sizakuba lusizi kuye; loyise wesithutha kathokozi.

17:22  Inhliziyo ethokozayo yenza kuhle njengomuthi, kodwa umoya owephukileyo womisa amathambo.

17:23  Omubi uthatha isipho esifubeni ukuphambula izindlela zesahlulelo.

17:24  Inhlakanipho iphambi koqedisisayo, kodwa amehlo esithutha asekucineni komhlaba.

17:25  Indodana eyisiwula ilusizi kuyise, iyikubaba kowayizalayo.

17:26  Ukuhlawulisa olungileyo lakho kakulunganga, lokutshaya iziphathamandla ngenxa yobuqotho.

17:27  Owazi ulwazi ugodla amazwi akhe; umuntu oqedisisayo ulomoya opholileyo.

17:28  Isithutha esithuleyo laso sithiwa sihlakaniphile; ovala indebe zakhe uthiwa uyaqedisisa.

Chapter 18

18:1  Ozehlukanisayo udinga okuloyisekayo kwakhe; ufohlela inhlakanipho yonke.

18:2  Isithutha kasithokozi ekuqedisiseni, kodwa ukuze inhliziyo yaso iziveze.

18:3  Lapho okhohlakeleyo esiza, kuza lokudelela, njalo kanye lenhloni, ihlazo.

18:4  Amazwi omlomo womuntu angamanzi azikileyo; umthombo wenhlakanipho uyisifula esigobhozayo.

18:5  Kakulunganga ukwemukela ubuso bokhohlakeleyo, ukuphambula olungileyo kusahlulelo.

18:6  Indebe zesithutha zingena enkanini, lomlomo waso ubiza imivimvinya.

18:7  Umlomo wesithutha uyintshabalalo yaso, lendebe zaso zingumjibila womphefumulo waso.

18:8  Amazwi onyeyayo anjengezibondlo ezehlela kokungaphakathi kwesisu.

18:9  Lolivila emsebenzini wakhe ungumfowabo womchithi.

18:10  Ibizo leNkosi lingumphotshongo oqinileyo; olungileyo uzagijimela kuwo amiswe phezulu evikelekile.

18:11  Inotho yesinothi ingumuzi waso oqinileyo, lanjengomthangala ophakemeyo ekucabangeni kwaso.

18:12  Mandulo kokubhujiswa inhliziyo yomuntu iyaziphakamisa, njalo mandulo kodumo kulokuthobeka.

18:13  Ophendula indaba engakezwa, kuyibuwula kuye, lehlazo.

18:14  Umoya womuntu uzasekela ukugula kwakhe, kodwa umoya owephukileyo, ngubani ongawuthwala?

18:15  Inhliziyo yoqedisisayo izuza ulwazi, lendlebe yabahlakaniphileyo idinga ulwazi.

18:16  Isipho somuntu siyamvulela ngokubanzi, simkhokhelela phambi kwabakhulu.

18:17  Ongowokuqala ecaleni lakhe ubonakala elungile, kodwa umakhelwane wakhe ufika amhlole.

18:18  Inkatho iqeda izingxabano, yehlukanise phakathi kwabalamandla.

18:19  Umzalwane owoniweyo wedlula umuzi oqinileyo, lengxabano zinjengomgoqo wenqaba.

18:20  Isisu somuntu siyasuthiswa yizithelo zomlomo wakhe, uzasuthiswa yinzuzo yendebe zakhe.

18:21  Ukufa lempilo kusesandleni solimi; labaluthandayo bazakudla isithelo salo.

18:22  Othole umfazi uthole okuhle, uzuze umusa eNkosini.

18:23  Umyanga uyakhuluma ngokuncenga, kodwa isinothi siphendula izinto ezilukhuni.

18:24  Umuntu wabangane abanengi uzachitheka, kodwa kulomngane onamathela kuleselamani.

Chapter 19

19:1  Umyanga ohamba ngobuqotho bakhe ungcono kulophambeneyo endebeni zakhe, njalo oyisithutha.

19:2  Futhi umphefumulo ongelalwazi kawulunganga, lophangisayo ngezinyawo uyona.

19:3  Ubuthutha bomuntu buphambula indlela yakhe, lenhliziyo yakhe iyayithukuthelela iNkosi.

19:4  Inotho yengeza abangane abanengi, kodwa umyanga wehlukaniswa lomngane wakhe.

19:5  Umfakazi wamanga kayikuyekelwa engajeziswanga, lophafuza amanga kayikuphunyuka.

19:6  Banengi abancenga umusa weziphathamandla; njalo wonke ungumngane womuntu wezipho.

19:7  Bonke abazalwane bomyanga bayamzonda; kakhulu kangakanani abangane bakhe besiya khatshana laye; uxotshana labongamazwi kodwa kabatholakali.

19:8  Ozuza ingqondo uthanda umphefumulo wakhe; unanzelela ukuqedisisa uzathola okuhle.

19:9  Umfakazi wamanga kayikuyekelwa engajeziswanga, lophafuza amanga uzabhubha.

19:10  Ukutamasa kakusifanele isiwula; kakhulu kangakanani ukuthi inceku ibuse phezu kweziphathamandla.

19:11  Ukuqedisisa komuntu kuphuzisa ukuthukuthela kwakhe; lodumo lwakhe yikwedlula isiphambeko.

19:12  Ulaka lwenkosi lunjengokubhonga kwebhongo lesilwane, kodwa umusa wayo unjengamazolo etshanini.

19:13  Indodana eyisithutha iyincithakalo kayise; lengxabano zomfazi ziyikuthonta njalonjalo.

19:14  Umuzi lenotho kuyilifa labobaba, kodwa umfazi ohlakaniphileyo uvela eNkosini.

19:15  Ubuvila buphosela ebuthongweni obukhulu, lomphefumulo olivila uzalamba.

19:16  Ogcina umlayo ugcina umphefumulo wakhe; odelela indlela zakhe uzakufa.

19:17  Ozwela umyanga weboleka iNkosi; izambhadala ngesenzo sakhe.

19:18  Laya indodana yakho kuselethemba, kodwa ungaloyisi ukufa kwayo.

19:19  Ololaka olukhulu uzathwala inhlawulo; ngoba nxa umophula uzabe lokhu uqhubeka ukwenza.

19:20  Lalela izeluleko, wemukele imfundiso, ukuze uhlakaniphe ekucineni kwakho.

19:21  Kulamacebo amanengi enhliziyweni yomuntu, kodwa iseluleko seNkosi sona sizakuma.

19:22  Isiloyiso somuntu ngumusa wakhe, njalo umyanga ungcono kulomuntu wamanga.

19:23  Ukuyesaba iNkosi kungokwempilo; ngoba olakho uzalala ebusuku esuthi; kayikwethekelelwa yibubi.

19:24  Ivila lifihla isandla salo emganwini, njalo kaliyikusibuyisela emlonyeni walo.

19:25  Tshaya isideleli ongelalwazi abesekhalipha; njalo khuza oqedisisayo, uzaqedisisa ulwazi.

19:26  Ochitha uyise, axotshe unina, uyindodana ethelela inhloni ilethe ihlazo.

19:27  Yekela, ndodana yami, ukulalela ukulaywa, ukuphambuka emazwini olwazi.

19:28  Umfakazi omubi udelela isahlulelo, lomlomo wabakhohlakeleyo uginya ububi.

19:29  Izahlulelo zilungiselwe izideleli, lemivimvinya umhlana wezithutha.

Chapter 20

20:1  Iwayini liyisideleli; okunathwayo okulamandla kulomsindo; njalo wonke oduha kukho kahlakaniphanga.

20:2  Ukwesabeka kwenkosi kunjengokubhonga kwebhongo lesilwane; oyithukuthelisayo wona umphefumulo wakhe.

20:3  Kuludumo emuntwini ukuyekela inkani; kodwa sonke isiwula siyaziveza.

20:4  Ngenxa yobusika ivila kaliyikulima; ngakho lizaphanza esivunweni, kodwa kungabi lalutho.

20:5  Iseluleko enhliziyweni yomuntu sinjengamanzi azikileyo, kodwa umuntu oqedisisayo uzasikha.

20:6  Inengi labantu limemezela, lowo lalowo ukulunga kwakhe, kodwa ngubani ongathola umuntu othembekileyo?

20:7  Olungileyo uhamba ngobuqotho bakhe; babusisiwe abantwana bakhe emva kwakhe.

20:8  Inkosi ehlezi esihlalweni sesahlulelo ihlakaza bonke ububi ngamehlo ayo.

20:9  Ngubani ongathi: Ngihlanzile inhliziyo yami, ngihlambulukile esonweni sami?

20:10  Amatshe ezilinganiso ezehlukeneyo, ama-efa* ehlukeneyo, kuyisinengiso eNkosini, yebo kokubili.

20:11  Lomntwana uyazazisa ngezenzo zakhe, loba umsebenzi wakhe uhlanzekile kumbe loba uqotho.

20:12  Indlebe ezwayo lelihlo elibonayo, iNkosi yakwenza, yebo kokubili.

20:13  Ungathandi ubuthongo, hlezi ube ngumyanga; vula amehlo akho, usuthe isinkwa.

20:14  Kubi, kubi, kutsho umthengi; kodwa esehambile abesezincoma.

20:15  Kulegolide, lobunengi bamatshe aligugu, kodwa indebe zolwazi zingumceciso oligugu.

20:16  Thatha isembatho sakhe oyisibambiso sowemzini, umbambe abe yisibambiso sabezizwe.

20:17  Isinkwa samanga simnandi emuntwini, kodwa emva kwalokho umlomo wakhe uzagcwaliswa ngokhethe.

20:18  Imicabango uyimisa ngeseluleko; ngakho yenza impi ngamaqhinga amahle.

20:19  Ohambahamba enyeya wembula imfihlakalo; ngakho ungahlangani lokhohlisa ngendebe zakhe.

20:20  Othuka uyise loba unina, isibane sakhe sizacitshwa ebumnyameni obumnyama.

20:21  Ilifa lingaphangisiswa ekuqaleni, kodwa ukucina kwalo kakuyikubusiswa.

20:22  Ungathi: Ngizaphindisela okubi; lindela iNkosi, njalo izakusindisa.

20:23  Amatshe ezilinganiso ezehlukeneyo ayisinengiso eNkosini, lesikali esikhohlisayo kasilunganga.

20:24  Izinyathelo zomuntu zivela eNkosini; pho, umuntu angaqedisisa njani indlela yakhe?

20:25  Kungumjibila emuntwini ukuginya okungcwele, lokuhlolisisa emva kwezifungo.

20:26  Inkosi ehlakaniphileyo ihlakaza ababi, ibuyisela ivili phezu kwabo.

20:27  Umphefumulo womuntu uyisibane seNkosi, sihlolisisa wonke amakamelo esisu.

20:28  Umusa leqiniso kuyayigcina inkosi, isekela isihlalo sayo sobukhosi ngokulunga.

20:29  Udumo lwejaha lungamandla alo, lobukhosi babadala yizimvu zekhanda.

20:30  Imivimvinya yenxeba ihlanza ububi, ngokunjalo izidutshuzo zamakamelo esisu.

Chapter 21

21:1  Inhliziyo yenkosi isesandleni sikaJehova injengezifula zamanzi; uyiphendulela loba ngaphi athanda khona.

21:2  Yonke indlela yomuntu ilungile emehlweni akhe, kodwa iNkosi ihlola izinhliziyo.

21:3  Ukwenza ukulunga lesahlulelo kukhethekile eNkosini kulomhlatshelo.

21:4  Ukuphakama kwamehlo, lokuzigqaja kwenhliziyo, lokulima kwabakhohlakeleyo, kuyisono.

21:5  Imicabango yokhutheleyo isenzuzweni kuphela, kodwa eyakhe wonke ophangisayo isekusweleni kuphela.

21:6  Ukwenza inotho ngolimi lwamanga kuyize eliphephukayo elalabo abadinga ukufa.

21:7  Isihluku sababi sizabahudula, ngoba besala ukwenza okulungileyo.

21:8  Indlela yomuntu igobile njalo ilecala, kodwa ohlanzekileyo, umsebenzi wakhe uqondile.

21:9  Kungcono ukuhlala engonsini yophahla kulalowesifazana wezinkani lendlini yokuhlanganyela.

21:10  Umphefumulo wokhohlakeleyo uloyisa ububi; umakhelwane wakhe kemukeli umusa emehlweni akhe.

21:11  Nxa isideleli sijeziswa, umuntu ongelalwazi uyahlakanipha; lalapho ohlakaniphileyo elaywa wemukela ulwazi.

21:12  Olungileyo uyananzelela indlu yokhohlakeleyo; uNkulunkulu uwisela abakhohlakeleyo ebubini.

21:13  Ogcika indlebe yakhe ekukhaleni komyanga, laye uzakhala angaphendulwa.

21:14  Isipho sensitha siyadedisa intukuthelo, lesivalamlomo esifubeni ulaka olulamandla.

21:15  Kuyintokozo kolungileyo ukwenza ukulunga, kodwa kuluvalo kubenzi bobubi.

21:16  Umuntu oduha endleleni yokuqedisisa uzahlala ebandleni lemimoya efileyo.

21:17  Othanda injabulo uzakuba ngumyanga; othanda iwayini lamafutha kayikunotha.

21:18  Okhohlakeleyo uyinhlawulelo yolungileyo, lesiphambeki esikhundleni sabaqotho.

21:19  Kungcono ukuhlala elizweni eliyinkangala kulalowesifazana wezingxabano lolaka.

21:20  Kukhona imfuyo eloyisekayo lamafutha emzini wohlakaniphileyo, kodwa umuntu oyisithutha uyakuginya.

21:21  Oxotshana lokulunga lomusa uzathola impilo, ukulunga, lodumo.

21:22  Ohlakaniphileyo ukhwela emzini wamaqhawe, adilizele phansi amandla ethemba lawo.

21:23  Ogcina umlomo wakhe lolimi lwakhe, ugcina umphefumulo wakhe ezinkathazweni.

21:24  Isideleli esizikhukhumezayo esizigqajayo libizo lakhe osebenza ngolaka lokuzikhukhumeza.

21:25  Isiloyiso sevila sizalibulala, ngoba izandla zalo ziyala ukusebenza.

21:26  Usuku lonke liloyisa isiloyiso, kodwa olungileyo uzakupha, angagodli.

21:27  Umhlatshelo wabakhohlakeleyo uyisinengiso; kakhulu kangakanani nxa bewuletha ngecebo elibi.

21:28  Umfakazi wamanga uzabhubha, kodwa umuntu olalelayo uzakhuluma njalonjalo.

21:29  Umuntu okhohlakeleyo wenza lukhuni ubuso bakhe, kodwa oqotho yena uyananzelela indlela yakhe.

21:30  Kakulanhlakanipho, njalo kakulakuqedisisa, njalo kakulaseluleko, okumelana leNkosi.

21:31  Ibhiza lilungiselwa usuku lwempi, kodwa ukukhululwa ngokweNkosi.

Chapter 22

22:1  Ibizo elihle likhethekile kulenotho enengi; isisa esihle kulesiliva njalo kulegolide.

22:2  Onothileyo lomyanga bayahlangana; iNkosi yabenza bonke.

22:3  Ohlakaniphileyo ubona ububi acatshe, kodwa abangelalwazi bayaqhubeka babesebejeziswa.

22:4  Umvuzo wokuthobeka lokwesaba iNkosi kuyinotho lodumo lempilo.

22:5  Ameva lemijibila kusendleleni yabaphambeneyo; ogcina umphefumulo wakhe uzakuba khatshana labo.

22:6  Fundisa umntwana endleleni angahamba ngayo; ngitsho esemdala kayikuphambuka kuyo.

22:7  Onothileyo ubusa abayanga, lomeboleki uyisigqili somebolekisi.

22:8  Ohlanyela ukonakala uzavuna ukuhlupheka, lentonga yolaka lwakhe izaphela.

22:9  Olelihlo elilokuhle yena uzabusiswa, ngoba unikile okwesinkwa sakhe kumyanga.

22:10  Xotsha isideleli, kuzaphuma lenkani, yebo, ingxabano lehlazo kuzaphela.

22:11  Othanda ukuhlanzeka kwenhliziyo, ngenxa yesisa sendebe zakhe, inkosi ingumgane wakhe.

22:12  Amehlo eNkosi alondoloza ulwazi, kodwa izachitha amazwi abangathembekanga.

22:13  Ivila lithi: Kulesilwane ngaphandle; ngizabulawa phakathi kwezitalada.

22:14  Umlomo wabesifazana bemzini ungumgodi otshonayo; lowo iNkosi emthukutheleleyo uzawela khona.

22:15  Ubuthutha bubotshelwe enhliziyweni yomntwana; uswazi lokuqondisa luzabususela khatshana laye.

22:16  Ocindezela umyanga ukwandisa alakho, opha onothileyo, isibili uzakuba ngoswelayo.

22:17  Beka indlebe yakho, uzwe amazwi abahlakaniphileyo, umise inhliziyo yakho elwazini lami.

22:18  Ngoba kumnandi uba uwalondoloza emibilini yakho; azahlala elungile kanyekanye endebeni zakho.

22:19  Ukuze ithemba lakho libe seNkosini, ngikwazisile wona lamuhla, ngitsho wena.

22:20  Kangikubhalelanga yini izinto ezinhle kakhulu kuzeluleko lelwazini?

22:21  Ukukwazisa ukuqiniseka kwamazwi eqiniso, ukuze ubuyisele amazwi eqiniso kulabo abakuthumileyo.

22:22  Ungamphangi umyanga ngoba engumyanga, njalo ungamchobozi oswelayo esangweni.

22:23  Ngoba iNkosi izamela udaba lwabo, iphange umphefumulo wababaphangayo.

22:24  Ungahlanganyeli lomuntu ololaka, ungahambisani lomuntu othukuthelayo,

22:25  hlezi ufunde indlela zakhe, wemukele umjibila emphefumulweni wakho.

22:26  Ungabi phakathi kwababambana izandla, phakathi kwabayizibambiso ngezikwelede.

22:27  Uba ungelakho okokuhlawula, kungani ezathatha umbheda wakho ngaphansi kwakho?

22:28  Ungatshedisi isikhonkwane esidala somngcele, oyihlo abasenzayo.

22:29  Uyambona yini umuntu oyingcitshi emsebenzini wakhe? Uzazimisa phambi kwamakhosi; kayikuzimisa phambi kwabantukazana.

Chapter 23

23:1  Nxa uhlalela ukudla lesiphathamandla, qaphelisa lokuqaphelisa okuphambi kwakho.

23:2  Ubeke ingqamu emphinjeni wakho uba uyisiminzi.

23:3  Ungafisi izibondlo zaso, ngoba ziyikudla kwamanga.

23:4  Ungatshikatshikeli ukunotha; pheza ekuqedisiseni kwakho.

23:5  Uzandizisa yini amehlo akho kokungekho? Ngoba kuzazenzela lokuzenzela izimpiko njengokhozi oluphaphela emazulwini.

23:6  Ungadli ukudla kolelihlo elibi, ungafisi izibondlo zakhe.

23:7  Ngoba njengoba ecabangile emphefumulweni wakhe, unjalo. Uzakuthi: Dlana unathe; kodwa inhliziyo yakhe kayilawe.

23:8  Ucezu oludlileyo uzaluhlanza, wone amazwi akho amnandi.

23:9  Ungakhulumi endlebeni zoyisithutha, ngoba uzadelela inhlakanipho yamazwi akho.

23:10  Ungatshedisi isikhonkwane esidala somngcele; ungangeni emasimini ezintandane;

23:11  ngoba uMhlengi wazo ulamandla; yena uzamela udaba lwazo kuwe.

23:12  Beka inhliziyo yakho ekufundisweni, lezindlebe zakho emazwini olwazi.

23:13  Ungagodleli umntwana isijeziso; nxa umtshaya ngoswazi kayikufa.

23:14  Wena uzamtshaya ngoswazi, ukhulule umphefumulo wakhe esihogweni.

23:15  Ndodana yami, uba inhliziyo yakho ihlakanipha, inhliziyo yami izathokoza, yebo eyami;

23:16  lezinso zami zizajabula ekukhulumeni kwendebe zakho izinto eziqondileyo.

23:17  Inhliziyo yakho kayingahawukeli izoni; kodwa bana ekwesabeni iNkosi lonke usuku.

23:18  Ngoba isibili kukhona umvuzo, lomlindelo wakho kawuyikuqunywa.

23:19  Lalela wena, ndodana yami, uhlakaniphe, uqondise inhliziyo yakho endleleni.

23:20  Ungabi phakathi kwabanathi bewayini, phakathi kwezihwaba zenyama.

23:21  Ngoba isidakwa lesihwaba sizakuba ngumyanga, lokuwozela kugqokisa amadabudabu.

23:22  Lalela uyihlo owakuzalayo, ungamdeleli unyoko esemdala.

23:23  Thenga iqiniso, ungalithengisi; inhlakanipho, lemfundiso, lokuqedisisa.

23:24  Uyise wolungileyo uzathaba lokuthaba; lozala ohlakaniphileyo uzathokoza ngaye.

23:25  Uyihlo lonyoko kabathokoze, lokuzeleyo kathabe.

23:26  Ndodana yami, ngiphe inhliziyo yakho, lamehlo akho kawananzelele indlela zami.

23:27  Ngoba iwule lingumgodi otshonayo, lowesifazana owemzini ungumthombo ongumcingo.

23:28  Laye ucathama njengomphangi, andise abangathembekanga phakathi kwabantu.

23:29  Ngubani olo: Maye? Ngubani olo: Wo? Ngubani olenkani? Ngubani olesililo? Ngubani olamanxeba ngeze? Ngubani olamehlo abomvu?

23:30  Yilabo abalibala ewayinini, yilabo abazedinga iwayini elixutshanisiweyo.

23:31  Ungakhangeli iwayini, lapho lizibonakalisa libomvu, nxa linika umbala walo enkomitshini, lihamba liqondile.

23:32  Ekucineni kwalo liluma njengenyoka, lilume njengebululu.

23:33  Amehlo akho azabona abesifazana bemzini, lenhliziyo yakho ikhulume izinto eziphambeneyo.

23:34  Yebo, uzakuba njengolala enhliziyweni yolwandle, lanjengolala esihlokweni sensika yomkhumbi.

23:35  Bangitshayile, kangizwanga buhlungu; bangidutshuzile, kangikunanzanga. Ngizavuka nini? Ngiphinde ngilidinge futhi.

Chapter 24

24:1  Ungabi lamhawu ngabantu ababi, ungaloyisi ukuba labo.

24:2  Ngoba inhliziyo yabo iceba udlakela, lezindebe zabo zikhuluma uhlupho.

24:3  Ngenhlakanipho indlu iyakhiwa, langokuqedisisa iqiniswe.

24:4  Langolwazi amakamelo agcwaliswa ngempahla zonke eziligugu lezimnandi.

24:5  Umuntu ohlakaniphileyo ulamandla, lomuntu ololwazi uqinisa amandla.

24:6  Ngoba ngezeluleko ezihlakaniphileyo ungalawula impi yakho, lokukhululwa kusebunengini babeluleki.

24:7  Inhlakanipho enkulu iphakeme esiwuleni; esangweni kasivuli umlomo waso.

24:8  Oceba ukwenza okubi, bazambiza ngokuthi ngumnikazi wamacebo amabi.

24:9  Umcabango wobuwula yisono, lesideleli siyisinengiso emuntwini.

24:10  Uba uzitshengisa uxega ngosuku lokuhlupheka, amandla akho mancinyane.

24:11  Bophule abasiwa ekufeni, labatatalikela ekubulaweni, kungathi ungabanqanda.

24:12  Uba usithi: Khangela besingakwazi lokhu; ohlola izinhliziyo yena kayikukunanzelela yini? Olondoloza umphefumulo wakho yena kakwazi yini? ngitsho ubuyisela emuntwini njengokomsebenzi wakhe?

24:13  Dlana uluju, ndodana yami, ngoba lulungile, lohlanga loluju lumnandi elwangeni lwakho.

24:14  Lunjalo ulwazi lwenhlakanipho emphefumulweni wakho; uba uluthola, kuzakuba lomvuzo, lethemba lakho kaliyikuqunywa.

24:15  Wena okhohlakeleyo, ungacathameli umuzi wolungileyo; ungachithi indawo yakhe yokuphumula.

24:16  Ngoba olungileyo uzakuwa kasikhombisa, avuke futhi; kodwa abakhohlakeleyo bazakhubeka ebubini.

24:17  Ungathokozi ngokuwa kwesitha sakho, lekukhubekeni kwaso inhliziyo yakho kayingajabuli;

24:18  hlezi iNkosi ikubone, kube kubi emehlweni ayo, iphendule ulaka lwayo ilususe kuso.

24:19  Ungazikhathazi ngenxa yabenzi bobubi, ungabi lamhawu ngabakhohlakeleyo;

24:20  ngoba omubi kayikuba lomvuzo; isibane sabakhohlakeleyo sizacitshwa.

24:21  Ndodana yami, yesaba uJehova lenkosi; ungahlanganyeli labaguquguqukayo;

24:22  ngoba incithakalo yabo izavuka masinyane; njalo ngubani owazi ukuchitheka kwabo bobabili?

24:23  Lala ngawabahlakaniphileyo. Ukunaka ubuso kusahlulelo kakulunganga.

24:24  Othi kokhohlakeleyo: Wena ulungile; abantu bazamqalekisa, izizwe zizamthukuthelela.

24:25  Kodwa kulabo abamkhuzayo kuzakuba lentokozo, lesibusiso esihle sizabehlela.

24:26  Ophendula ngamazwi aqondileyo uzakwanga indebe.

24:27  Lungisa umsebenzi wakho ngaphandle, uzilungiselele wona ensimini, emva kwalokho wakhe indlu yakho.

24:28  Ungabi ngumfakazi umelene lomakhelwane wakho kungelasizatho, kumbe ukhohlise ngendebe zakho.

24:29  Ungathi: Njengokwenza kwakhe kimi ngizakwenza njalo kuye; ngizaphindisela emuntwini njengokomsebenzi wakhe.

24:30  Ngedlula ensimini yevila, lesivinini somuntu oswele ingqondo;

24:31  khangela-ke, konke kwakumile ameva, imbabazane yayisibekele ubuso bakho, lomthangala wakho wamatshe udilikile.

24:32  Mina-ke ngakukhangela, ngakubeka enhliziyweni yami; ngakubona, ngemukela imfundiso.

24:33  Ubuthongo obuncinyane, ukuwozela okuncinyane, ukusonga izandla okuncinyane ukuthi kulalwe,

24:34  besebusiza ubuyanga bakho njengesihambi, lenswelo zakho njengomuntu ohlomileyo.

Chapter 25

25:1  Lalezi yizaga zikaSolomoni abantu bakaHezekhiya inkosi yakoJuda abazikopayo.

25:2  Kuludumo lukaNkulunkulu ukufihla udaba, kodwa kuludumo lwamakhosi ukuhlolisisa udaba.

25:3  Amazulu ngokuphakama, lomhlaba ngokujula, lenhliziyo yamakhosi kakulakuhlolisiswa.

25:4  Susa amanyele esiliveni, besekuphuma isitsha somncibilikisi.

25:5  Susa okhohlakeleyo phambi kwenkosi, besekuqiniswa isihlalo sayo sobukhosi ngokulunga.

25:6  Ungaziqhenyi phambi kwenkosi, njalo ungemi endaweni yezikhulu;

25:7  ngoba kungcono kuthiwe kuwe: Yenyukela ngapha, kulokuthi wehliswe phambi kwesiphathamandla, amehlo akho asibonileyo.

25:8  Ungaphangisi ukuphuma ukuyaphikisana, hlezi wenze ulutho ekucineni kwakho, lapho umakhelwane wakho esekuyangisile.

25:9  Mela udaba lwakho lomakhelwane wakho, kodwa ungavezi imfihlo yomunye;

25:10  hlezi okuzwayo akuyangise, lesigcono sakho singaphambuki.

25:11  Ilizwi elikhulunywe ngokufaneleyo linjengama-apula egolide ezitsheni zesiliva ezibaziweyo.

25:12  Isongo legolide lesiceciso segolide elihle kungumkhuzi ohlakaniphileyo endlebeni ezwayo.

25:13  Isithunywa esithembekileyo kwabasithumileyo sinjengomqando weliqhwa elikhithikileyo ngosuku lokuvuna, ngoba sivuselela umphefumulo wamakhosi aso.

25:14  Umuntu oziqhenya ngesipho samanga unjengamayezi lomoya okungelazulu.

25:15  Ngokubekezela umbusi angavunyiswa, lolimi oluthambileyo lwephula ithambo.

25:16  Utholile yini uluju? Dlana okwenele wena, hlezi uludle kakhulu, uluhlanze.

25:17  Unyawo lwakho kalungavami endlini kamakhelwane wakho, hlezi akusuthe akuzonde.

25:18  Umuntu ofakaza ubufakazi bamanga ngomakhelwane wakhe uyisagila lenkemba lomtshoko obukhali.

25:19  Ukuthemba ongathembekanga ngosuku lokuhlupheka kunjengezinyo elephukileyo, lonyawo olwenyeleyo.

25:20  Ohlabelela izingoma enhliziyweni edabukileyo unjengokhupha isembatho ngosuku lwamakhaza, njengeviniga phakathi kwesoda.

25:21  Uba okuzondayo elambile, umnike isinkwa adle, njalo uba omile, umnike amanzi anathe;

25:22  ngoba uzabekelela amalahle omlilo ekhanda lakhe, leNkosi izakuvuza.

25:23  Umoya wenyakatho uletha izulu, lolimi lwemfihlo ubuso obulolaka.

25:24  Kungcono ukuhlala engonsini yophahla kulalowesifazana wezinkani lendlini yokuhlanganyela.

25:25  Umbiko omuhle ovela elizweni elikhatshana unjengamanzi aqandayo emphefumulweni owomileyo.

25:26  Olungileyo ozanyazanyiswayo phambi kokhohlakeleyo ungumthombo odungekileyo lesiphethu esonakeleyo.

25:27  Ukudla uluju olunengi kakulunganga; lokuthi badinge udumo lwabo kakusidumo.

25:28  Umuntu ongathinti umoya wakhe unjengomuzi ofohlelweyo ongelamthangala.

Chapter 26

26:1  Njengeliqhwa elikhithikileyo ehlobo lanjengezulu ngesikhathi sokuvuna, ngokunjalo udumo kalusifanelanga isithutha.

26:2  Njengenyoni ekuzulazuleni, njengenkonjane ekuphapheni, ngokunjalo isiqalekiso kungelasizatho kasiyikufika.

26:3  Isiswepu ngesebhiza, itomu ngelikababhemi, loswazi ngolomhlana wezithutha.

26:4  Ungaphenduli isithutha ngokobuthutha baso, hlezi lawe ufanane laso.

26:5  Phendula isithutha ngokobuthutha baso, hlezi sibe ngesihlakaniphileyo emehlweni aso.

26:6  Othumela amazwi ngesandla sesithutha, uquma inyawo, unatha isihluku.

26:7  Imilenze yesiqhuli iyalengalenga; sinjalo isaga emlonyeni wezithutha.

26:8  Njengokubophela ilitshe esavutheni, unjalo onika udumo esithutheni.

26:9  Njengameva enyuka esandleni sesidakwa sinjalo isaga emlonyeni wezithutha.

26:10  Omkhulu owabumba konke uvuza isithutha, avuze abadlulayo.

26:11  Njengenja ebuyela emahlanzweni ayongokunjalo isithutha siphinda ubuthutha baso.

26:12  Uyabona yini umuntu ohlakaniphileyo emehlweni akhe? Kulethemba elikhulu esithutheni kulaye.

26:13  Olivila uthi: Kulesilwane endleleni; isilwane sisezitaladeni.

26:14  Isivalo siphenduka ngamabhanti aso, ngokunjalo ivila embhedeni walo.

26:15  Ivila lifihla isandla salo emganwini, liyavilapha ukusibuyisela emlonyeni walo.

26:16  Ivila lihlakaniphile emehlweni alo okwedlula abayisikhombisa abangaphendula ngenhlakanipho.

26:17  Odlulayo engenela ingxabano engeyisiyo eyakhe ungobamba indlebe zenja.

26:18  Njengohlanya oluphosa izikhuni ezivuthayo, imitshoko, lokufa,

26:19  unjalo umuntu okhohlisa umakhelwane wakhe, abesesithi: Kangisomi yini?

26:20  Uba kungelankuni umlilo uyacitsha; njalo uba kungelakunyeya, ukuxabana kuyathula.

26:21  Njengamalahle emalahleni avuthayo, lenkuni emlilweni, unjalo umuntu wenkani ngowokubasa ingxabano.

26:22  Amazwi onyeyayo anjengezibondlo ezehlela kokungaphakathi kwesisu.

26:23  Indebe ezivuthayo lenhliziyo embi kungamanyele esiliva ahuqa ukhamba.

26:24  Ozondayo uyazenzisa ngezindebe zakhe, kodwa ufaka inkohliso ngaphakathi kwakhe.

26:25  Lapho esenza ilizwi lakhe libe ngelomusa, ungamkholwa, ngoba izinengiso eziyisikhombisa zisenhliziyweni yakhe.

26:26  Inzondo isibekelwa ngenkohliso; ububi bakhe buzakwembulwa ebandleni.

26:27  Ogebhayo umgodi uzawela kuwo, logiqa ilitshe, lizabuyela kuye.

26:28  Ulimi lwamanga luzonda olubachobozayo, lomlomo obutshelezi usebenza incithakalo.

Chapter 27

27:1  Ungazincomi ngosuku lwakusasa, ngoba kawazi ukuthi usuku luzazalani.

27:2  Owemzini kakudumise, njalo hatshi umlomo wakho; owezizwe, njalo hatshi indebe zakho.

27:3  Ilitshe linzima, letshebetshebe liyasinda, kodwa ulaka lwesithutha lunzima kulakho kokubili.

27:4  Ulaka lulolunya, lentukuthelo iyisikhukhula; kodwa ngubani ongema phambi komona?

27:5  Kungcono ukukhuzwa ngokusobala kulothando lwensitha.

27:6  Amanxeba omngane athembekile, kodwa ukwanga kwesitha kuyakhohlisa.

27:7  Umphefumulo osuthiyo unyathelela phansi uhlanga loluju, kodwa kumphefumulo olambileyo konke okubabayo kumnandi.

27:8  Njengenyoni eduha isuka esidlekeni sayo unjalo umuntu oduha esuka endaweni yakhe.

27:9  Amafutha lempepha kuthokozisa inhliziyo; kunjalo ubumnandi bomngane womuntu ngenxa yeseluleko somphefumulo.

27:10  Ungadeli umngane wakho lomngane kayihlo; njalo ungangeni endlini yomfowenu ngosuku lwencithakalo yakho; kungcono umakhelwane oseduze kulomfowenu okhatshana.

27:11  Hlakanipha, ndodana yami, uthokozise inhliziyo yami, ukuze ngibe lempendulo kongisolayo.

27:12  Okhaliphileyo uyabona ububi acatshe, kodwa abangelalwazi bayaqhubeka bajeziswe.

27:13  Thatha isigqoko soyisibambiso ngenxa yowemzini, umthathele isibambiso ngenxa yowesifazana wezizwe.

27:14  Obusisa umngane wakhe ngelizwi elikhulu evuka ekuseni kakhulu, kuzathiwa yisiqalekiso kuye.

27:15  Ukuchophelela ngosuku lwezulu eliqhubekayo lowesifazana oxabanayo kuyafanana.

27:16  Omfihlayo ufihla umoya, lamagcobo ahlangana lesandla sakhe sokunene.

27:17  Insimbi ilolwa ngensimbi; ngokunjalo umuntu ulola ubuso bomngane wakhe.

27:18  Olondoloza isihlahla somkhiwa uzakudla isithelo saso; lolinda inkosi yakhe uzadunyiswa.

27:19  Njengemanzini ubuso busebusweni, ngokunjalo inhliziyo yomuntu isemuntwini.

27:20  Isihogo lencithakalo kakusuthi, ngokunjalo amehlo omuntu kawasuthi.

27:21  Imbiza yokucenga ngeyesiliva, lesithando ngesegolide; kunjalo umuntu ngokokudunyiswa kwakhe.

27:22  Lanxa ugiga isithutha ngomgigo engigeni phakathi kwengqoloyi, ubuthutha baso kabuyikusuka kuso.

27:23  Yazi lokwazi isimo sezimvu zakho, beka inhliziyo yakho kumihlambi yakho,

27:24  ngoba inotho kayisiyaphakade; kumbe umqhele ube sesizukulwaneni lesizukulwana yini?

27:25  Utshani buyasuswa, lohlaza lubonakale, kubuthwe lemibhida yezintaba.

27:26  Amawundlu angawezigqoko zakho, lezimpongo ziyintengo yesiqinti.

27:27  Kuzakuba lochago lwezimbuzi olwanele ukudla kwakho lokudla kwendlu yakho lempilo yencekukazi zakho.

Chapter 28

28:1  Ababi babaleka kungekho umzingeli, kodwa abalungileyo balesibindi njengebhongo lesilwane.

28:2  Ngesiphambeko sesizwe ababusi baso banengi; kodwa ngomuntu olokuqedisisa ololwazi ukuqonda kwaso kuyelulwa.

28:3  Umuntu ongumyanga ocindezela abayanga ulizulu elikhukhulayo ukuze kungabi lokudla.

28:4  Abadela umlayo badumisa ababi, kodwa labo abagcina umlayo balwa labo.

28:5  Abantu ababi kabaqedisisi ukulunga, kodwa abadinga iNkosi baqedisisa konke.

28:6  Kungcono umyanga ohamba ngobuqotho bakhe kulophambene ngezindlela lanxa enothile.

28:7  Ogcina umlayo uyindodana eqedisisayo, kodwa ozihlanganisa lezigangi uyangisa uyise.

28:8  Owandisa inotho yakhe ngenzalo langenzuzo uyibuthela olomusa kubayanga.

28:9  Ophambula indlebe yakhe ekulaleleni umlayo, lomkhuleko wakhe uzakuba yisinengiso.

28:10  Oduhisela abaqotho endleleni embi yena uzawela emgodini wakhe, kodwa abaqotho bazakudla ilifa lokuhle.

28:11  Indoda enothileyo ihlakaniphile emehlweni ayo, kodwa umyanga oqedisisayo uzayihlola.

28:12  Lapho abalungileyo bethokoza, kulenkazimulo enkulu; kodwa nxa ababi bephakama, umuntu uyadingwa.

28:13  Osibekela iziphambeko zakhe kayikuphumelela, kodwa ozivumayo azitshiye, uzahawukelwa.

28:14  Ubusisiwe umuntu owesaba njalonjalo, kodwa owenza inhliziyo yakhe ibe lukhuni uzawela ebubini.

28:15  Umbusi okhohlakeleyo phezu kwabantu abangabayanga uyisilwane esibhongayo lebhere elizingelayo.

28:16  Umbusi oswele ukuqedisisa konke wandisa lencindezelo; ozonda inzuzo embi uzakwelula insuku.

28:17  Umuntu ocindezelwe ligazi lomphefumulo uzabalekela emgodini; kabangamsekeli.

28:18  Ohamba ngobuqotho uzasindiswa, kodwa ophambene ngendlela ezimbili uzahle awe.

28:19  Olima umhlaba wakhe uzasutha ukudla, kodwa olandela abayize uzasutha ubuyanga.

28:20  Umuntu wothembeko lonke uzavama ngezibusiso, kodwa ophangisa ukunotha kayikuba msulwa.

28:21  Ukuhlonipha ubuso kakulunganga, ngoba umuntu uzakona ngenxa yocezu lwesinkwa.

28:22  Ophangisa ukunotha ungumuntu olelihlo elibi, njalo engazi ukuthi ubuyanga buzamehlela.

28:23  Okhuza umuntu uzathola umusa emuva okwedlula okhohlisayo ngolimi.

28:24  Ophanga uyise kumbe unina, athi: Akusiso isiphambeko; ungumngane womchithi.

28:25  Ongasuthisekiyo udunga ingxabano, kodwa othemba eNkosini uzakhuluphaliswa.

28:26  Othemba enhliziyweni yakhe uyisithutha, kodwa ohamba ngenhlakanipho uzakhululwa.

28:27  Opha umyanga kayikuswela, kodwa ofihla amehlo akhe uzakuba leziqalekiso ezinengi.

28:28  Nxa abakhohlakeleyo bephakanyiswa, umuntu uyacatsha, kodwa nxa bebhubha, abalungileyo bayanda.

Chapter 29

29:1  Umuntu othi ekhuzwa kanengi aqinise intamo, uzahle ephulwe, njalo kungabi lakusiliswa.

29:2  Lapho abalungileyo besanda, abantu bayathokoza, kodwa lapho okhohlakeleyo ebusa, abantu bayabubula.

29:3  Umuntu othanda inhlakanipho uthokozisa uyise, kodwa ohlanganyela lamawule uchitha inotho.

29:4  Inkosi iqinisa ilizwe ngesahlulelo, kodwa umuntu wezipho uyalichitha.

29:5  Umuntu olalisa ngolimi umakhelwane wakhe wendlalela izinyawo zakhe imbule.

29:6  Esiphambekweni somuntu omubi kulomjibila, kodwa olungileyo uyamemeza ngenjabulo ethokoza.

29:7  Olungileyo uyalwazi udaba lwabayanga; okhohlakeleyo kananzeleli ulwazi.

29:8  Abantu abadelelayo bayawuthungela umuzi, kodwa abahlakaniphileyo badedisa ulaka.

29:9  Umuntu ohlakaniphileyo emangalelana lomuntu oyisithutha, loba elolaka, loba ehleka, kakulakuthula.

29:10  Abantu abomele igazi bazonda opheleleyo, kodwa abaqotho badinga umphefumulo wakhe.

29:11  Isithutha sikhupha umoya waso wonke, kodwa ohlakaniphileyo uyawuthiba.

29:12  Umbusi olalela amazwi amanga, zonke izinceku zakhe zikhohlakele.

29:13  Umyanga lomuntu wencindezelo bayahlangana; iNkosi ikhanyisa amehlo abo bobabili.

29:14  Inkosi eyahlulela abayanga ngothembeko, isihlalo sayo sobukhosi sizamiswa phakade.

29:15  Uswazi lokukhuza kunika inhlakanipho, kodwa umntwana oyekelelwayo uthelela unina inhloni.

29:16  Lapho abakhohlakeleyo besanda, isiphambeko siyanda, kodwa abalungileyo bazabona ukuwa kwabo.

29:17  Laya indodana yakho, izakuphumuza; yebo, izanika izinjabulo emphefumulweni wakho.

29:18  Lapho okungelambono khona, abantu babengabambeki; kodwa ubusisiwe ogcina umlayo.

29:19  Inceku kayilaywa ngamazwi; lanxa iqedisisa, kayiyikuphendula.

29:20  Uyambona yini umuntu ophangisa ngamazwi akhe? Kulethemba elingcono esithutheni kulaye.

29:21  Ototoza inceku yakhe kusukela ebuntwaneni, ekucineni izakuba yindodana kuye.

29:22  Umuntu ololaka ubanga ukuxabana, lomuntu ovutha intukuthelo wandisa isiphambeko.

29:23  Ukuzigqaja komuntu kuzamehlisa, kodwa olomoya othobekileyo uzabamba udumo.

29:24  Owabelana lesela uzonda umphefumulo wakhe; uzwa isiqalekiso, angakhulumi.

29:25  Ukwesaba abantu kuletha umjibila, kodwa othemba eNkosini uzabekwa phezulu evikelekile.

29:26  Abanengi badinga ubuso bombusi, kodwa isahlulelo salowo lalowo sivela eNkosini.

29:27  Umuntu ongalunganga uyisinengiso kwabalungileyo, kodwa oqotho endleleni uyisinengiso kokhohlakeleyo.

Chapter 30

30:1  Amazwi kaAguri indodana kaJake umMasa. Umuntu wathi kuIthiyeli, kuIthiyeli loUkhali:

30:2  Isibili, ngiyisithutha kulomuntu, kangilakuqedisisa komuntu.

30:3  Kangifundanga inhlakanipho, kangilwazi ulwazi lwabangcwele.

30:4  Ngubani owenyukela emazulwini njalo wehla? Ngubani oqoqe wafumbatha umoya ezandleni zakhe? Ngubani ogoqele amanzi esembathweni? Ngubani omise yonke imikhawulo yomhlaba? Lingubani ibizo lakhe, lebizo lendodana yakhe lingubani, uba usazi?

30:5  Lonke ilizwi likaNkulunkulu licwengekile; uyisihlangu kwabaphephela kuye.

30:6  Ungengezeleli emazwini akhe, hlezi akukhuze, utholwe ungumqambimanga.

30:7  Zimbili izinto engizicele kuwe; ungangigodleli zona ngingakafi.

30:8  Susa khatshana lami ize lamazwi amanga; ungangiphi ubuyanga loba inotho; ungiphe ukudla kwesabelo sami.

30:9  Hlezi ngisuthe, ngikuphike ngithi: Ngubani iNkosi? Kumbe hlezi ngibe ngumyanga, ngintshontshe, ngithathe ngeze ibizo likaNkulunkulu wami.

30:10  Ungahlebi inceku enkosini yayo, hlezi ikuthuke, ube lecala.

30:11  Kulesizukulwana esithuka uyise, esingabusisi unina;

30:12  isizukulwana esihlambulukileyo emehlweni aso, kodwa esingahlanjululwanga engcekezeni yaso;

30:13  isizukulwana omehlo aso aphakeme kangaka, lenkophe zaso ziphakanyisiwe;

30:14  isizukulwana omazinyo aso zinkemba, lesimazinyo aso omhlathi zingqamu, zokudla abayanga emhlabeni, labaswelayo ebantwini.

30:15  Umkhaza ulamadodakazi amabili athi: Phana, phana; lezizontathu kazisuthi; ezine kazitsho ukuthi: Kwanele.

30:16  Ingcwaba, lesizalo esiyinyumba, umhlaba ongasuthi amanzi, lomlilo ongathi: Kwanele.

30:17  Ilihlo eliklolodela uyise, lelidelela ukulalela unina, amawabayi esihotsha azalikopola, labantwana bamanqe bazalidla.

30:18  Lezizinto ezintathu ziyisimangaliso esikhulu kimi, yebo, ezine engingazaziyo:

30:19  Indlela yokhozi emazulwini, indlela yenyoka edwaleni, indlela yomkhumbi enhliziyweni yolwandle, lendlela yejaha entombini.

30:20  Injalo indlela yowesifazana oliwule; udla, esule umlomo wakhe, athi: Kangenzanga isiphambeko.

30:21  Ngenxa yezinto ezintathu umhlaba uyazamazama, yebo, ngenxa yezine ongezithwale:

30:22  Ngenxa yesigqili nxa sibusa, lesithutha nxa sisuthi ukudla,

30:23  ngenxa yesaliwakazi nxa sendile, lencekukazi nxa iyindlalifa yenkosikazi yayo.

30:24  Lezi ezine zingezincinyane zomhlaba, kanti zihlakaniphile zenziwe zihlakaniphe:

30:25  Ubunyonyo buyisizwe esingelamandla, kanti bulungisa ukudla kwabo ehlobo.

30:26  Imbila ziyisizwe esingelamandla, kanti zimisa indlu yazo edwaleni.

30:27  Intethe kazilankosi, kanti zonke ziphuma zehlukene ngamaviyo.

30:28  Umbankwa ubambelela ngezandla ezimbili, njalo usezigodlweni zenkosi.

30:29  Lezi ezintathu zinyathela kuhle, yebo, ezine zihamba kuhle:

30:30  Isilwane esilamandla phakathi kwenyamazana, esingeyikubuyela emuva ngenxa yobuso loba ngobukabani;

30:31  inja ebhince okhalweni, kumbe impongo; lenkosi ileviyo lamabutho.

30:32  Uba ube yisithutha ngokuziphakamisa, njalo uba ucebe okubi, beka isandla emlonyeni.

30:33  Ngoba ukuphehlwa kochago kuveza iphehla, lokucindezelwa kwempumulo kuveza igazi, lokucindezelwa kwentukuthelo kuveza ingxabano.

Chapter 31

31:1  Amazwi kaLemuweli inkosi yeMasa, unina amfundisa wona.

31:2  Ini, ndodana yami! Ini-ke, ndodana yesizalo sami! Ini-ke, ndodana yezithembiso zami!

31:3  Unganiki amandla akho kwabesifazana, kumbe izindlela zakho ekubhubhiseni amakhosi.

31:4  Kakusikwamakhosi, Lemuweli, kakusikwamakhosi ukunatha iwayini, kumbe okweziphathamandla ukuloyisa okunathwayo okulamandla.

31:5  Hlezi anathe, akhohlwe isimiso, aguqule isahlulelo sawo wonke amadodana enhlupheko.

31:6  Phana okunathwayo okulamandla kobhubhayo, lewayini kwabababayo emphefumulweni.

31:7  Kanathe, akhohlwe ubuyanga bakhe, angabe esakhumbula usizi lwakhe.

31:8  Vulela isimungulu umlomo wakho, udaba lwabo bonke abamiselwe incithakalo.

31:9  Vula umlomo wakho, wahlulele ngokulunga, umele ilungelo lomyanga loswelayo.

31:10  Ngubani ongathola umfazi okhuthela okulungileyo? Ngoba intengo yakhe iyedlula kakhulu amatshe amahle.

31:11  Inhliziyo yomkakhe ithemba kuye, ukuze angasweli impango.

31:12  Umenzela okuhle, hatshi okubi, insuku zonke zempilo yakhe.

31:13  Udinga uboya bezimvu lefilakisi, asebenze ngenjabulo yezandla zakhe.

31:14  Ufanana lemikhumbi yomthengisi; uletha ukudla kwakhe kuvela khatshana.

31:15  Uvuka kusesebusuku, anike indlu yakhe ukudla, lesabelo kuzincekukazi zakhe.

31:16  Anakane ngensimu ayizuze; ngesithelo sezandla zakhe ahlanyele ivini.

31:17  Uyabhinca ukhalo lwakhe ngamandla, aqinise ingalo zakhe.

31:18  Uyananzelela ukuthi ukuthengisa kwakhe kuhle; isibane sakhe kasicitshi ebusuku.

31:19  Welulela izandla zakhe kuluthi lokuphotha, lezandla zakhe zibambe isigodo esilezintambo.

31:20  Welulela umyanga isandla sakhe, elulele izandla zakhe koswelayo.

31:21  Kesabi iliqhwa elikhithikileyo ngenxa yabendlu yakhe, ngoba bonke abendlu yakhe bagqokiswe okubomvu.

31:22  Uzenzela izembeso; isigqoko sakhe sililembu elicolekileyo leliyibubende.

31:23  Umkakhe uyaziwa emasangweni, lapho ehlezi labadala belizwe.

31:24  Wenza ilembu elicolekileyo kakhulu, alithengise; anike umthengi ibhanti.

31:25  Amandla lodumo kuyisigqoko sakhe; uyahleka mayelana losuku olulandelayo.

31:26  Uvula umlomo wakhe ngenhlakanipho; lemfundiso yomusa iselimini lwakhe.

31:27  Uqaphela inhambo zomuzi wakhe; kadli isinkwa sobuvila.

31:28  Abantwana bakhe bayavuka bathi ubusisiwe, lomkakhe laye uyamdumisa:

31:29  Manengi amadodakazi enze ngenkuthalo, kodwa wena wenyukile phezu kwawo wonke.

31:30  Ubuhle buyinkohliso, lokubukeka kuyize; owesifazana owesaba iNkosi yena uzadunyiswa.

31:31  Mnikeni okuvela esithelweni sezandla zakhe, lemisebenzi yakhe kayimdumise emasangweni.