Kapingamarangi - Proverbs

Chapter 1

1:1  Nia agoago podo a Solomon, tama-daane David, di king o digau Israel.

1:2  Nia agoago podo aanei e-hagamaamaa goodou gi-modongoohia di kabemee mo nnelekai hagamaamaa, mo di iloo hagatau nnadinga o-nia agoago haingadaa.

1:3  Nia agoago podo aanei e-mee di-aago goodou gii-hai nia daangada e-mouli kabemee, ge e-mouli i-lodo di tonu, di humalia mo-di huudonu.

1:4  Nia agoago podo aanei e-mee di-hai tangada de-kabemee gi-kabemee, ge e-mee di-aago nia dama-daane mo ahina gii-hai digau e-iloo nia mee.

1:5  Nia agoago podo aanei e-mee di-haga-kabemee gi-nonua digau ala gu-kabemee, ge e-mee di-dagi digau ala guu-lawa i-nia kuulu,

1:6  gii-mee-ai digaula di-modongoohia nia hadinga nngala o-nia agoago podo, mo-di iloo nia heeu ala e-kila-aga mai baahi digau kabemee.

1:7  Di haga-madagu o Dimaadua la-go di hagamau o-di kabemee. Nia daangada ala e-de-iloo nia mee, ginaadou hagalee hagalabagau di kabemee, ge ginaadou e-de-hiihai di kabe nia mee.

1:8  Dagu dama-daane, hagalongo gi nnelekai do damana mo do dinana.

1:9  Nau agoago gaa-hai goe gii-hai tangada humalia, gadoo be tangada ma-ga-humu-ia gi-di hau libogo mo-di hau-uwa.

1:10  Dagu dama-daane, digau hai mee huaidu ma-ga-hagamada goe, gei goe hudee hagalongo gi digaula.

1:11  Maa digaula ga-helekai-adu boloo, “Gaa-hula e-halahala tadau dangada e-daaligi gii-made. Gaa-hula e-heebagi gi-nia daangada ala e-noho-hua i-di aumaalia nadau ihala ai, e-hai-ai tadau tene.

1:12  Tadau madagoaa ma-ga-heetugi gi digaula, digaula e-mouli ge maaloo, gei i-muli tadau diiagi digaula, digaula la-gaa-mmade.

1:13  Gidaadou ga-gidee nia hagadilinga maluagina e-logo, gaa-kae go gidaadou gaa-haa tadau hale gii-honu.

1:14  Hanimoi e-hula gidaadou, e-hai-mee ngaadahi gi-nia mee gaiaa!”

1:15  Dagu dama-daane, hudee hana i-muli digau beelaa. Goe hudee buni gi digaula.

1:16  Digaula e-deemee di-tali maalia di-hai nia mee huaidu. Nia madagoaa huogodoo, digaula e-hagatogomaalia e-daaligi nadau daangada gii-mmade.

1:17  E-balumee maa goe gaa-hudu dau hele belee kumi di manu dela e-daumada goe.

1:18  Gei digau ala e-hagatogomaalia e-daaligi di-nadau dangada, le e-hagatogomaalia-hua di-nadau hele dela e-hele-ai ginaadou.

1:19  Di gaiaa le e-hai beelaa. Di gaiaa e-daa gi-daha di mouli o tangada gaiaadanga, deelaa di hai e-tale ang-gi tangada ngalungalua huaidu.

1:20  Hagalongo, di kabemee le e-gahigahi i-hongo nia ala mo i-nia gowaa huihui-mee.

1:21  E-wolowolo gi-nua i-di ngudu o-nia bontai o-di waahale mo i-nia gowaa ala e-dagabuli-ai nia daangada, boloo:

1:22  “Goodou ala e-de-iloo nia mee, e-waalooloo behee di-godou noho de-iloo? E-waalooloo behee di-godou haga-balumee di kabemee? Goodou e-deemee di-kabe nia mee?

1:23  Goodou hagalongo-mai dogu madagoaa dela ma-ga-haga-donu godou mee hai-hala. Au e-gowadu gi goodou nia helekai e-hagamaamaa, ge e-gowadu gi goodou ogu kabemee.

1:24  Au nogo gahigahi goodou bolo gi-lloomoi, gei goodou hagalee hagalongo. Goodou hagalee hiihai e-hagalongo-mai.

1:25  Goodou nogo haga-balumee agu helekai hagamaamaa huogodoo, gei goodou e-de-hiihai bolo au gi-haga-donu-ina godou mee hai-hala.

1:26  Malaa, di madagoaa dela ma-ga-haingadaa adu gi goodou, deelaa dogu madagoaa e-gadagada-iei au adu gi goodou. Au ga-haganneennee goodou i-di madagoaa di haingadaa damana ma-ga-tale-adu gi goodou,

1:27  e-hanimoi gi goodou gadoo be-di madangi gaudogi dela e-gaamai ana haingadaa, gei goodou gaa-mmae mo-di manawa-gee.

1:28  Nomuli, goodou ga-halahala ga-gahigahi di kabemee, gei au hagalee goou. Goodou ga-halahala au, gei goodou e-deemee di-gidee-goodou au.

1:29  Goodou nogo haga-balumee di kabemee, gei goodou nogo de-hiihai bolo goodou e-hagalaamua Dimaadua i-nia madagoaa huogodoo.

1:30  Goodou nogo de-hiihai gi agu helekai hagamaamaa, e-de-hiihai di-hagalongo gi agu helekai ala e-aago goodou i godou mee-hala ala e-hai.

1:31  Malaa deelaa-laa, goodou gaa-kae di hui o godou hangaahai, godou hangaahai gaa-hai goodou gii-magi.

1:32  Digau ala nogo de-hiihai e-hagalongo gaa-mmade, idimaa digaula hagalee hiihai gi-di kabemee. Digau ala e-de-kabemee, e-hagahuaidu-hua go nadau dee-hiihai e-hagabaubau donu.

1:33  Ma koai e-hagalongo-mai gi-di-au, geia e-kae di hagamouli. Geia e-noho i-di hagadagadagagee, hagalee madagu i dahi mee.”

Chapter 2

2:1  Dagu dama-daane, kabe-ina agu mee ala e-aago-adu, hudee de-langahia-e-goe agu mee ala bolo gi-heia.

2:2  Hagalongo gi-di kabemee, heia goe gi-iloo.

2:3  Halahala-ina gi-iloo-e-goe, halahala-ina gi-modongoohia.

2:4  Halahala-ina hagamahi be dau hai e-halahala silber be-di maluagina ngala.

2:5  Goe ma-gaa-hai nia mee aanei, gei goe ga-iloo di hagalaamua Dimaadua, ga-iloo di-gida di kabemee o God.

2:6  Ma go Dimaadua hua dela e-gaamai di kabemee. Di kabemee mo-di iloo-mee e-lloomoi i dono baahi.

2:7  Mee e-hagamaamaa, ge e-duuli digau ala e-donu gei e-hai-hegau donu.

2:8  Mee e-duuli digau ala e-benebene hagahumalia nia daangada ala i-golo, ge e-madamada humalia i digau ala e-manawa-dahi ang-gi de-Ia.

2:9  Maa goe ga-hagalongo-mai gi-di-au, gei goe ga-iloo di tonu, di hai-donu, mo-di mee dela e-humalia. Goe ga-iloo labelaa au mee ala belee hai.

2:10  Goe gaa-hai tangada kabemee, do iloo ga-gowadu do manawa tene.

2:11  Do kabemee mo do iloo ga-duuli goe,

2:12  ga-duuli goe gi-daha mo-di haihai nia mee hai-gee, ga-benebene goe gi-daha mo nia daangada ala e-haga-hinihini-dangada mai nadau helehelekai,

2:13  go ginaadou ala ne-diiagi nadau ala mouli o-di tonu, ga-mouli i-lodo di ala bouli o-di hala,

2:14  go ginaadou ala e-manawa-tene i-lodo di hai nadau mee hala, mo-di tenetene gi nnangahaihai huaidu.

2:15  Digaula la nia daangada e-deemee di hagadagadagagee ginai, ge e-halahalau-dangada.

2:16  Goe gaa-mee di-haga-deeai gi-di ahina mouli be-di manu dela e-dagi goe gi ana helekai maangala,

2:17  dela e-halahalau dono lodo donu, mo-di haga-de-langahia dana hagababa ne-hai i-mua o God.

2:18  Maa goe gaa-hana gi dono hale, goe e-hana i-hongo di ala dela e-dau gi-di made. Tangada ma-gaa-hana gi-golo, le e-hana gi tenua o digau mmade.

2:19  Tangada ma-gaa-hana gi-baahi di ahina beelaa, ga-hagalee hanimoi gi-muli. Mee ga-deemee di-hana labelaa i-di ala ang-gi di mouli.

2:20  Goe e-hai-loo gi-kawe nia hangaahai o digau humalia, e-hai gi-mouli di mouli dela e-donu.

2:21  Idimaa, digau ala e-donu ge e-madammaa la-gaa-noho i-lodo tenua deenei.

2:22  Gei Dimaadua ga-hagabagi digau huaidu gi-daha mo tenua deenei, ga-daagi digaula gi-daha, be nia laagau e-daagi gi-daha mo-di gelegele.

Chapter 3

3:1  Dagu dama-daane, hudee de-langahia-e-goe agu mee ala e-aago-adu. Nia madagoaa huogodoo gi-langahia agu mee ala e-hagi-adu bolo gi-heia.

3:2  Agu helekai aago ga-gowadu gi-di-goe do mouli maluagina waalooloo.

3:3  Hudee diagia dau hagalaamua mo dau hagalabagau. Nnoo-dia nia maa gi-di gili o doo uwa. Hihia nia maa gi-hongo do hadu-manawa.

3:4  Maa goe gaa-hai beenei, gei God mo nia daangada ga-manawa tene adu gi-di-goe.

3:5  Hagadonu-ina Dimaadua aga i-lodo do manawa hagatau. Hudee dugu-ina goe gi au hagadilinga maanadu gi-dagi-ina goe.

3:6  Gi-langahia-e-goe bolo Dimaadua la-i-lodo nia mee huogodoo ala e-hai kooe, gei Mee e-hagi-adu gi-di-goe di ala dela e-donu.

3:7  Goe hudee hagamaanadu bolo goe e-koia e-kabemee gi-nonua. Hagalongo-hua mo-di daudali Dimaadua, ge hudee dugu-ina goe gii-hai nia mee huaidu.

3:8  Maa goe gaa-hai beenei, gei di-maa gaa-hai gadoo be-di wanii humalia e-haga-hili o magi-bala ge e-haga-hili goe do madagoaa ma-gaa-mmae.

3:9  Tigidaumaha-ina au meegai ala e-kaedahi e-humalia mai lodo dau gowaa, e-hagalaamua-ai Dimaadua.

3:10  Maa goe gaa-hai beenei, gei doo hale benebene-meegai gaa-haa gi-nia meegai, gei goe ga-logowaahee au waini, ga-deemee dau benebene.

3:11  Dagu dama-daane, di madagoaa Dimaadua ma-ga-haga-donu goe, hagalongo gii-donu, hudee huli gi-daha mo ana agoago.

3:12  Dimaadua le e-hai digau ala e-aloho-ai gii-donu, gadoo be tamana dela e-hai dana dama-daane dela e-aloho-ai ge e-hagadagadagagee ginai.

3:13  E-maluagina go tangada dela e-kabe nia mee, go tangada dela ga-iloo nia mee.

3:14  Di kabemee le e-damana dono maluagina i-nia silber. E-damana dono maluagina adu gi-di-goe i-nia goolo.

3:15  Di kabemee le e-damana dono maluagina i-di maluagina o-nia hadu madamada. Deai dahi mee e-hiihai ginai goe e-mee di-hagatau gi-di kabemee ai.

3:16  Di kabemee le e-hagalaamua, haga-maluagina, ge e-haga-waalooloo do mouli.

3:17  Di kabemee le e-dagi goe, ge e-abaaba goe gi-mouli i-di aumaalia.

3:18  Digau ala gaa-hai digau kabemee le e-tenetene, idimaa, di kabemee gaa-wanga gi digaula di mouli.

3:19  Dimaadua ne-hai henuailala gi ono kabemee. Ono iloo ne-haga-noho di langi gi dono lohongo.

3:20  Dono kabemee ne-hai nia wai gii-hali, ne-hai nia gololangi gi-haga-doo di uwa gi henuailala.

3:21  Dagu dama-daane, daahia-hua do kabemee mo o iloo. Hudee diagia nia maa gi-daha mo goe.

3:22  Ma go nia maa ala ga-gowadu do mouli tenetene mo-di manawa lamalia.

3:23  Goe e-mee di-haele haga-humalia i doo ala, hagalee hinga.

3:24  Goe hagalee madagu i-hee e-kii-iei goe, gei goe gaa-kii danu-mmoe i-di boo dogomaalia.

3:25  Goe hagalee mamaanadu e-logo i-nia haingadaa llauehe ala e-gila-aga i di-ingoo-hua di madagoaa, gadoo be-di madangi gono e-tale gi digau huaidu.

3:26  Dimaadua ga-madamada humalia i-di-goe. Mee hagalee hai goe gii-doo gi-lodo di hele.

3:27  Hagamaamaa-ina digau ala e-humalia e-hagamaamaa i di-ingoo-hua di madagoaa.

3:28  Maa goe e-mee di-hagamaamaa dolomeenei, hudee helekai gi digau ala e-noho i doo baahi bolo gi-taalia maalia gi-daiaa.

3:29  Hudee hai bilaan haga-manawa-gee ang-gi digau ala e-noho hoohoo-adu. Digaula le e-noho i doo baahi, e-hagadagadagagee adu gi-di-goe.

3:30  Hudee lagamaaloo balumee maa digaula digi hai-hala-adu gi-di-goe.

3:31  Hudee manawa-dubua i digau hagamuamua, ge hudee manawa hiihai e-hai nia mee ala e-hai go digaula.

3:32  Idimaa Dimaadua e-de-hiihai gi-nia daangada ala e-haihai di huaidu, gei Mee e-haga-modongoohia ana haga-maanadu ang-gi digau ala e-hai-hegau donu.

3:33  Dimaadua e-hagahuaidu nia hale o digau haihai di huaidu, gei Mee e-hagahumalia nia hale o digau ala e-hai-hegau donu.

3:34  Mee hagalee hila gi-nia daangada ala e-bida hagalaamua ginaadou, gei Mee e-hagagila dono hiihai gi digau ala e-hila gi-lala.

3:35  Nia daangada kabemee ga-hagalaamua go nia daangada, gei nia daangada ala e-dadaulia le e-haga-damana nadau langaadia.

Chapter 4

4:1  Hagalongo-mai agu dama-daane, daudalia nia agoago o godou damana. Hagalongo gii-donu gei goodou ga-iloo hagahumalia.

4:2  Agu mee ala e-aago-adu le e-humalia, goodou la-gi-langahia nia maa huogodoo.

4:3  Dogu madagoaa nogo hai-tama-daane dulii, ko-au hua dela di tama-daane ni ogu maadua,

4:4  dogu damana e-aago-mai boloo, “Langahia agu helekai, hudee diagia. Hai-hegau gii-hai be agu helekai, gei goe ga-mouli.

4:5  Hai-mee gi-di kabemee mo-di iloo! Hudee haga-de-langahia-ina be haga-balumee-ina agu helekai.

4:6  Hudee diagia di kabemee, gei di-maa ga-duuli goe. Aloho i di-maa, gei di-maa ga-benebene goe.

4:7  Di mee kaedahi hagalabagau dela e-mee dau hai le e-hai-mee gi-di kabemee. Hai mee gi-di kabemee laa-hongo nia mee ala e-hai-mee ginai goe.

4:8  Aloho i-di kabemee, gei di-maa gaa-hai goe gi-aamua. Hagalabagau-ina di-maa, gei di-maa ga-gowadu do hagalaamua.

4:9  Mee gaa-hai di hau madamada i-hongo do libogo”

4:10  Hagalongo-mai dagu dama-daane. Kaina agu helekai gii-mau gi oo lodo, gei goe ga-mouli waalooloo.

4:11  Au gu-aago goe gi-di kabemee mo-di ala e-donu e-mouli-iei goe.

4:12  Deai di mee i-golo e-mee di-duuli doo ala ai, maa goe ga-heehee i-di kabemee, gei goe e-deemee di-hingahinga i-di madagoaa e-lellele-iei goe.

4:13  Goe gi-langahia i-nia madagoaa huogodoo au mee ala ne-kabe. Dau kuulu la-go do mouli, benabena-ina hagahumalia.

4:14  Hudee hana gi-nia gowaa ala e-hula ginai digau huaidu. Hudee daudalia nia hangaahai digaula.

4:15  Hudee heia di-maa! Hagaligaliga i-daha mo-di huaidu. Hudee heia, hana-hua i doo ala.

4:16  Nia daangada huaidu e-deemee di-kii, maa digaula digi hai nadau mee hala. Digaula e-deemee di-kii maa digaula digi hai di-nadau mee huaidu gi tangada.

4:17  Nia hai huaidu mo nia hai hagawelewele-dangada, aalaa go nia meegai mo nia mee inuinu digaula.

4:18  Di ala dela e-hula-ai digau donu le e-hai gadoo be-di laa ma-gaa-hobo, e-maalama-mai gaa-dae-loo gi-di maahina o-di laangi.

4:19  Di ala dela e-hula-ai digau huaidu le e-bouli be-di boo. Digaula e-tingatinga gei e-de-gidee nia mee ala e-haga-tingatinga ginaadou.

4:20  Dagu dama-daane, hagalongo gii-donu. Hagalongo hagahumalia gi agu helekai.

4:21  Hudee diagia nia maa, langahia nia maa, gi-daahia gi lodo do manawa.

4:22  Nia maa e-wanga di mouli maaloo gi tangada dela e-iloo-ia nia maa.

4:23  Pula i au hagamaanadu, do mouli le e-hau go o hagamaanadu.

4:24  Hagaligaliga i-daha mo nia helekai huaidu, hudee helekai tilikai.

4:25  Mmada hagahuudonu gi-mua mo-di hagadagadagagee, mmada gi doo ala e-haele-iei goe.

4:26  Haganoho-ina gii-donu go au mee ala ma-gaa-hai, gei au mee ala e-hai, gaa-kila humalia.

4:27  Hagaligaliga i-daha mo-di haihai huaidu, haele hagahuudonu gi-mua. Hudee hana-gee i-di ala dela e-donu.

Chapter 5

5:1  Dagu dama-daane, hagalongo-malaa mo-di daudalia ogu kabemee mo ogu iloo.

5:2  Gei goe ga iloo-laa nnangaahai humalia, gei au helekai ga-haga-modongoohia-aga-laa do kabemee.

5:3  Nia malaungudu o-di ahina hai-lodo o tuai daane e-maangala be nia mee maangala lodo-henua, dono ngudu koia e-malali i-nia lolo-olib.

5:4  Malaa, i-di hagaodi gi-muli, deai dana mee e-gowadu gi-di-goe ai, dela-hua di lodo huaidu mo-di hagammaemmae.

5:5  Mee gaa-lahi goe gi tenua o digau mmade. Di ala e-haele-iei mee la-go di ala dela e-hana gi-di made.

5:6  Mee hagalee haele i-hongo di ala e-hana gi-di mouli, e-haele-hua laa-daha gei e-de-iloo-ia.

5:7  Hagalongo-mai agu dama-daane, hudee haga-de-langahia-ina agu helekai.

5:8  Hudee haga-hoohoo gi-di ahina beelaa! Hudee hana gi-hoohoo gi-di bontai dono hale.

5:9  Maa goe e-hana-hua, goe guu-wanga do hagalaamua gi digau ala i-golo, gei digau hagamuamua ga-daa gi-daha do mouli do madagoaa e-dama-daane-hua-iei goe.

5:10  Digau hua-gee gaa-kae o maluagina huogodoo, digau i-golo ga-hai-mee gi au mee ne-ngalua ginai goe.

5:11  I-di hagaodi, i-di madagoaa do huaidina ma-ga-bagege, ga-deai ono mahi ai, goe gaa-moe ga-nguunguu-laa,

5:12  goe ga-helekai boloo, “Ma ne-aha au digi kaabe-ina? Ma ne-aha au digi dumaalia gi tangada gi-heia au gii-donu?

5:13  Au digi hagalongo gi-nia daangada ala ne-agoago au. Au digi hagalabagau-ina digaula.

5:14  Au gu-limalima-hua dogu gidee au dogu haga-langaadia i-mua nia daangada.”

5:15  Manawa-dahi-hua gi doo lodo donu, aloho-hua i-mee modogoia.

5:16  Au dama ala ne-gila-mai i-baahi nia ahina ala i-golo la-dono hadinga adu gi-di-goe ai.

5:17  Au dama gi-tomo-aga e-hagamaamaa goe, hagalee go nia daangada mai i-daha.

5:18  Tenetene gi doo lodo donu, halahala-ina oo tene i-baahi di ahina ne-hai-lodo ginai goe,

5:19  dela e-madamada gadoo be-di ee. Ono hangahaihai humalia gi-hagatenetene-ina goe. Dono aloho gi-daabui-ina goe.

5:20  Dagu dama-daane, goe e-aha dela e-aloho i tuai ahina? Goe e-aha dela e-hiihai gi-nia hangahaihai humalia mai baahi di lodo o tuai dangada?

5:21  Dimaadua e-gidee-Ia au mee huogodoo ala e-hai. Mee e-gidee-Ia goe i-nia gowaa huogodoo ala e-hana ginai goe.

5:22  Nia hala o digau huaidu la-go di hele. Digaula e-kumi i-lodo di hele o nadau ihala.

5:23  Digaula e-mmademmade idimaa digaula e-deemee di-dugu nadau hiihai. Nadau helekai dadaulia huoloo e-dagi digaula gi nadau daalunga.

Chapter 6

6:1  Dagu dama-daane, e-hai behee? Goe gu-hagababa bolo e-hui di boibana o tangada dela i-golo?

6:2  E-hai behee? Goe gu-daahi go au helekai donu? Guu-kumi go au hagababa ne-hai?

6:3  Deenei-laa, dagu dama-nei, goe gu-i-lala nia mogobuna o tangada deelaa. Malaa, deenei dau hai e-doo-iei goe gi-daha mo di-maa: hana hagalellele gi mee, dangidangi gi mee gi hagamehede-ina goe.

6:4  Goe hudee kii be hagamolooloo.

6:5  Lele gi-daha mo-di hele, lele be-di ee dela e-lele gi-daha mo tangada puu-manu.

6:6  Nia daangada hagatoo, kabe-ina nia hangahaihai o-nia loada ala e-mouli-ai!

6:7  Digaula di-nadau dagi e-dagi ginaadou ai.

6:8  Gei digaula e-benebene nadau meegai i-di madagoaa dela e-mahanahana gi-togomaalia gi-di madagoaa magalillili ma-gaa-dae-mai.

6:9  E-waalooloo behee taane hagatoo dono kiikii-hua? Mee e-duu-i-nua ma-gaa-hee?

6:10  Ana helekai e-hai boloo, “Au ga-habini ogu lima ga-kii-laa, e-haga-molooloo haga-dulii.”

6:11  Malaa, di madagoaa-hua dela e-kii-iei mee, di hagaloale gaa-tale ang-gi mee, ga-heebagi gi mee gadoo be tangada gaiaa.

6:12  Balu daangada huaidu e-helehelekai tilikai.

6:13  Digaula e-gemugemu mo-di haga-hagailoo gi nadau wae mo nadau lima, e-halahalau goe.

6:14  I-nia madagoaa huogodoo, digaula e-bilabilaan huaidu i-lodo nadau hagamamaanadu, e-haga-logo nia haingadaa i-nia madagoaa huogodoo.

6:15  Di haingadaa damana gaa-tale ang-gi digaula i di-ingoo-hua di madagoaa, gei digaula ga-lauwa kono.

6:16  Aanei la nia mee e-hidu Dimaadua e-de-hiihai ginai, hagalee hai gii-hai: tangada e-bida hagalaamua ia, tolole hai-kai-tilikai, nia lima ala e-dadaaligi nia daangada nadau ihala ai, di libogo haga-maanadu huaidu, nia wae ala e-limalima di-haele e-hai nia mee huaidu, tangada hagadootonu e-tataanga nia kai-tilikai, mo tangada e-hai nia daangada gi-hagawelewele i nadau mehanga.

6:17  Aanei la nia mee e-hidu Dimaadua e-de-hiihai ginai, hagalee hai gii-hai: tangada e-bida hagalaamua ia, tolole hai-kai-tilikai, nia lima ala e-dadaaligi nia daangada nadau ihala ai, di libogo haga-maanadu huaidu, nia wae ala e-limalima di-haele e-hai nia mee huaidu, tangada hagadootonu e-tataanga nia kai-tilikai, mo tangada e-hai nia daangada gi-hagawelewele i nadau mehanga.

6:18  Aanei la nia mee e-hidu Dimaadua e-de-hiihai ginai, hagalee hai gii-hai: tangada e-bida hagalaamua ia, tolole hai-kai-tilikai, nia lima ala e-dadaaligi nia daangada nadau ihala ai, di libogo haga-maanadu huaidu, nia wae ala e-limalima di-haele e-hai nia mee huaidu, tangada hagadootonu e-tataanga nia kai-tilikai, mo tangada e-hai nia daangada gi-hagawelewele i nadau mehanga.

6:19  Aanei la nia mee e-hidu Dimaadua e-de-hiihai ginai, hagalee hai gii-hai: tangada e-bida hagalaamua ia, tolole hai-kai-tilikai, nia lima ala e-dadaaligi nia daangada nadau ihala ai, di libogo haga-maanadu huaidu, nia wae ala e-limalima di-haele e-hai nia mee huaidu, tangada hagadootonu e-tataanga nia kai-tilikai, mo tangada e-hai nia daangada gi-hagawelewele i nadau mehanga.

6:20  Dagu dama-daane, heia nia mee o do damana ne-hagi-adu, hudee de-langahia nia mee o do dinana ne-aago-adu.

6:21  Benabena-ina nau helekai gi oo lodo i-nia madagoaa huogodoo, benebene-ina gi-lodo do manawa.

6:22  Nau aago gaa-dagi do heehee, ga-benebene goe i-di boo, ga-hagamaamaa goe i-di aa.

6:23  Nau helekai aago la-go di maahina maalama, e-hagadonu au mee hala ge e-aago do mouli e-mouli-ai goe.

6:24  E-mee di-duuli goe gi-daha mo nia ahina huaidu, mo nia helekai maangala o-nia lodo nia daane ala i-golo.

6:25  Hudee heia goe gi-halahalau go nadau huaidina madamada. Hudee heia goe gii-kumi go nadau hadumada madadele.

6:26  Taane le e-mee-hua di-hui dana ahina huihui dono huaidina gi-di hui o-di gunga palaawaa, malaa di mouli be-di manu ga-daa gi-daha ana mee huogodoo ala e-hai-mee ginai.

6:27  E-hai behee? Goe e-mee di-kae di ahi i do hadahada, gei oo gahu hagalee wwele?

6:28  E-hai behee? Goe e-mee di-haele i-hongo nia hadu wwele, gei oo wae hagalee wwele?

6:29  Dela gadoo di hagalliga di kii i-baahi di lodo o tuai daane. Koai e-hai di-maa, gaa-tale gi-di haingadaa.

6:30  Nia daangada e-hagalee hagawelewele gi tangada gaiaa, maa mee ne-gaiaa ana meegai i dono hiigai.

6:31  Mee gaa-gida, mee e-hai-loo gii-hui nnolongo e-hidu gi-nonua. Mee e-hai-loo gi-dahi-aga ana mee huogodoo ala e-hai-mee ginai.

6:32  Malaa taane ne-hai dana hala mouli be-di manu, le e-deai ono hagamaanadu ai. Mee e-bida oho eia gi-daha.

6:33  Mee ga-haga-balumee go nia daangada, ga-dadaaligi, ga-hagauwwou-hua beelaa.

6:34  Di manawa dubua o taane hai-lodo la-koia e-kono, e-deemee di-dugu.

6:35  Mee hagalee hiihai gi-di hui, deai di wanga-dehuia gaa-mee di-dugu di hagawelewele o-maa ai.

Chapter 7

7:1  Dagu dama-daane, goe gi-langahia agu helekai, goe hudee de-langahia di-hai agu mee ala bolo goe gi-heia.

7:2  Heia agu mee ala bolo goe gi-heia, gei goe ga-mouli waalooloo. Gii-pula i dau daudali agu agoago, gii-hai be dau hai e-benebene-ai o golomada.

7:3  Benabena-ina agu agoago i doo baahi i-nia madagoaa huogodoo. Hihi-ina nia maa gi-hongo do hadu-manawa.

7:4  Benabena-ina di kabemee i doo baahi gii-hai be dau benebene do duaahina-ahina; benabena-ina di iloo nia mee gii-hai be dau benebene do ehoo hagaaloho.

7:5  Nia mee aanei ga-duuli goe gi-daha mo-di lodo o tuai daane mo nia ahina ala e-dagi nia daangada gi-huaidu.

7:6  Dahi madagoaa-hua, gei au nogo mmada-ia i tama-bontai o dogu hale,

7:7  gei-au ga-gidee nia dama-daane de-wouwou dogologowaahee, gei au ga-gidee-au taane e-dahi i-lodo digaula e-dadaulia.

7:8  Taane deelaa la-nogo haele i-hongo di ala, i-di buu-ala dela e-noho-ai dahi ahina. Mee ne-hoohoo-mai gi-di hale o-di ahina deelaa,

7:9  gei di-maa gu-bouli.

7:10  Gei di ahina ga-heetugi gi taane deelaa. Di ahina e-ulu di gahu nia ahina huihui nadau huaidina, gei mee nogo hai ana bilaan huaidu.

7:11  Di ahina le e-dee-noho di hai ana mee, gei mee hagalee dono langaadia ai, e-heehee i-nia madagoaa huogodoo i-hongo nia ala,

7:12  be e-duu e-kana i tei buu-ala, hunu madagoaa e-duu i-hongo nia ala, ge hunu madagoaa gei mee e-duu i-di gowaa huihui-mee.

7:13  Di ahina deelaa ga-bulubulu-adu taane deelaa, gaa-hongi a-mee, gaa-mmada haga-huudonu gi-lodo nia golomada o-maa, ga-helekai,

7:14  “Au guu-lawa di-hai dagu tigidaumaha dangi-nei, guu-kae nia goneiga tigidaumaha deelaa gi dogu hale.

7:15  Malaa, au ne-hanimoi belee halahala goe, e-hiihai bolo au e-heetugi-adu, gei goe deenaa dogo gila-mai!

7:16  Au guu-gahu dogu hada-kii gi-nia tei madamada mai i Egypt.

7:17  Au gu-haga-kala dogu hada-kii gi-nia ‘myrrh’, ‘aloe’, mo ‘cinnamon’.

7:18  Hanimoi e-hula gidaua e-kii i-hongo dogu hada-kii gaa-tugi-loo gi-di luada. E-kii e-dagadaga-tene.

7:19  Dogu lodo la-hagalee i-di hale, guu-hana haga-mogowaa.

7:20  Mee guu-kae ana bahihadu e-logo dalia ia. Malaa, mee e-duai nia tabu e-lua ga-hanimoi-laa.”

7:21  Di ahina deelaa guu-dagi taane deelaa gi dono hiihai i ana helekai hagamada aalaa, gei taane deelaa gu-hagalongo gi-nia hanga-helekai o-di ahina deelaa.

7:22  Digi duai, taane la-gaa-hana i-muli di ahina, gadoo be di kau dela e-hana gi-di hale daaligi-manu, e-hai gadoo labelaa be dahi ee e-hana gi-di hele dela e-kumi ia,

7:23  di gowaa dela e-puu-ai dono hadu-manawa go di amu-maalei. Mee e-hai gadoo be-di manu mamaangi dela e-hana gi-di hele dela e-kumi ia, geia digi iloo-loo bolo dono mouli la-gu i-lodo di halauwa.

7:24  Malaa, agu dama-daane, hagalongo gi agu helekai.

7:25  Goodou hudee hiihai gi-di hanga-mouli o-di ahina deenei, hudee taele gi-hoohoo gi mee.

7:26  Mee gu-hagahuaidu ana daane dogologo, gaa-hidi-ai digau dogologo ne-mmade e-deemee di-dau.

7:27  Di hale o-di ahina deelaa, deenei di ala dela e-hana gi-di gowaa o digau mmade, mo-di ala bodobodo dela e-hana gi-di made.

Chapter 8

8:1  Hagalongo! Di kabemee le e-gahigahi. Di iloo-mee le e-helekai gi-daha.

8:2  Di kabemee le e-duu i-hongo nia dama-gonduu ala e-hoohoo gi-nia ala, gei e-duu i-nia madagoaa o-nia ala e-dagadagabuli-ai nia daangada.

8:3  Di kabemee le e-gahigahi i-di ngudu di ala dela e-ulu-ai nia daangada gi-lodo di waahale. Mee e-gahigahi hoohoo gi-nia bontai di waahale boloo,

8:4  “Au e-dangidangi-adu gi goodou go nia daangada. Au e-gahigahi nia daangada huogodoo ala i-hongo henuailala.

8:5  Goodou digi mmaadua? Kuulu-ina goodou gii-hai digau e-mmaadua. Goodou e-aha, e-dadaulia? Kuulu-ina goodou gi-iloo nia mee donu.

8:6  Hagalongo gi agu helekai, nia helekai ala koia e-humalia. Agu helekai huogodoo ala e-hagi-adu gi goodou le e-donu.

8:7  Agu helekai la-go di tonu. Au e-de-hiihai gi-nia helekai tilikai.

8:8  Agu helekai huogodoo la-go di tonu. Deai dahi mee e-hai-gee ai, be e-halahalau-dangada ai.

8:9  Tangada dela e-modongoohia-eia nia mee huogodoo le e-madammaa ang-gi deia. Tangada dela guu-lawa di-haga-iloo ginai, ia gu-iloo nia mee huogodoo.

8:10  Hilihili-ina agu agoago, hagalee go nia silber. Hilihili-ina di kabemee, hagalee go nia goolo ala e-kaedahi e-humalia.

8:11  Ko-au dela go di kabemee, gei au koia e-humalia i-nia hadu hagalabagau! Di-godou mee e-hiihai ginai e-mee di-hagatau-mai gi-di-au ai.

8:12  Ko-au dela go di kabemee, gei au e-gidee nia mee. Au e-iloo nia mee, e-iloo nia mee ala e-huaidu mo nia mee ala e-humalia.

8:13  Maa goe ga-de-hiihai gi-nia haihai huaidu, goe le e-hagalaamua Dimaadua. Au e-de-hiihai di bida hagaamu au, mo-di bida hagalaamua au, nia haihai huaidu mo nia helekai tilikai.

8:14  Au e-hau agu bilaan ge e-hai-hegau gii-kila. Au e-iloo nia mee, gei au e-maaloo.

8:15  Au e-hagamaamaa nia king i-di nadau dagi, mo nia dagi-tenua gi-heia nia haganoho ala e-humalia.

8:16  Au e-hagamaamaa digau huogodoo ala e-dagi henuailala, digau huogodoo ala e-aamua mo nia king.

8:17  Au e-aloho i digau ala e-aloho i-di-au: Ma koai dela e-halahala au, geia e-mee di-gidee-ia au.

8:18  Au ogu maluagina, di hagalaamua, di haadanga-lamalia mo-di gila i-golo e-wanga gi digaula.

8:19  Godou mee ala e-kae i dogu baahi le koia e-humalia i-nia goolo ala e-kaedahi, koia e-humalia i-nia silber ala e-madammaa huoloo.

8:20  Au e-heehee di ala o-di tonu. Au e-daudali nia ala e-donu.

8:21  Au e-haga-maluagina digau ala e-aloho i-di-au, gei au e-haga-honu nadau hale gi-nia maluagina.

8:22  “I-mua-loo, Dimaadua ne-hai au i-mua i-nia mee huogodoo, i-di matagidagi o ana mee ala ne-hai.

8:23  Au ne-hai i-di matagidagi-loo, i taamada, i-mua henuailala ne-daamada.

8:24  Au ne-haanau i-mua nia moana ne-hai, i-di madagoaa o-nia wai digi uwa-aga.

8:25  Au ne-haanau i-mua nia gonduu ne-hai, i-mua di haga-noho o-nia dama-gonduu,

8:26  i-mua o God ne-hai henuailala mo nia gowaa maalama o henuailala, ge i-mua hogi taamada o-nia gelegele o henuailala.

8:27  Au nogo i-golo i dono madagoaa ne-dugu di ahiaalangi gi dono lohongo, i dono madagoaa ne-haga-noho o lala di langi gi-hongo tai,

8:28  i dono madagoaa ne-haga-noho nia gololangi gi-di gili o-di langi, mo i dono madagoaa ne-haga-hali nia wai o tai,

8:29  ga-helekai gi-nia wai o tai bolo gi-honu-aga-hua gii-tugi be ana helekai, hudee honu-aga gi nonua. Au nogo i-golo i dono madagoaa ne-haga-noho di hagamau o henuailala.

8:30  Au nogo noho i dono baahi gadoo be tangada hai bilaan hau hale. Au nogo haga-tenetene a-Mee i-nia laangi huogodoo, gei au nogo tenetene i-nia madagoaa huogodoo i dono baahi.

8:31  Au nogo tenetene gi henuailala ge manawa lamalia gi-nia daangada o henuailala.

8:32  “Goodou ala go nia dama-daane, dolomeenei goodou la-gi-hagalongo gi agu helekai. Heia agu mee ala e-hagi-adu gi goodou bolo goodou gi-heia, gei goodou ga-maluagina.

8:33  Hagalongo gi-nia mee ala gu-aago-adu gi goodou. Goodou gi-kabe-ina nia maa, hudee kili-ina gi-daha.

8:34  Tangada dela ma-ga-hagalongo-mai gi-di-au, ia ga-maluagina, ia go taane dela e-talitali au i-di ngudu dogu bontai i-nia laangi huogodoo.

8:35  Idimaa, tangada dela ma-ga-gidee-ia au, ia gu-gidee di mouli, ge Dimaadua ga-manawa-tene gi mee.

8:36  Tangada dela ga-de-gidee-ia au, la-ga-haga-mmaemmae-hua ia. Be koai dela e-de-hiihai mai gi-di-au, le e-aloho i-di made.”

Chapter 9

9:1  Di kabemee guu-hau dono hale, guu-hai ono duludulu e-hidu.

9:2  Mee gu-daaligi dana manu e-hai tagamiami, gu-unugi ana mee hagakala meegai gi-lodo nia waini, gu-haga-togomaalia dana teebele.

9:3  Mee gu-hagau ana ahina hai-hegau gi-di gowaa nnoonua o-di guongo gi-gahigahia digaula,

9:4  gaa-wolo, “Lloomoi, digau de-hagalongo!” Gei mee ga-helekai gi digau nadau hagamaanadu ai boloo,

9:5  “Lloomoi, miami mo-di inuinu nia waini ne-unugi ko-au.

9:6  Hudee hai-hoo gi digau ala e-de-hagalongo, gei goe ga-mouli. Heehee i-di ala o-di kabemee.”

9:7  Digau bida hagaamu ginaadou la-ga-leelee huaidu i-di goe, maa goe gaa-hai digaula gii-donu. Goe e-haga-mmaemmae-hua goe, maa goe gaa-hai digau huaidu gii-donu.

9:8  Hudee heia digau hagaamu ginaadou gii-donu. Digaula ga-hagawelewele-adu gi-di-goe. Maa goe gaa-hai digau kabemee gii-donu, digaula ga-hagalaamua goe.

9:9  Au helekai e-hagi-anga gi digau kabemee e-hai digaula gi mada-kabemee. Au helekai e-hagi-anga gi digau ala e-donu ga-hagapuni ang-gi nadau kabemee.

9:10  Goe e-hai gi hagalaamua Dimaadua, gei goe ga-kabemee. Maa goe e-iloo a-Mee dela e-dabuaahia, goe la iai do kabemee i-golo.

9:11  Di kabemee ga-hagapuni nia ngadau gi do mouli.

9:12  Maa goe do kabemee i-golo, goe ga-haga-humalia go-di kabemee. Maa goe ga-de-hiihai gi-di kabemee, goe ga-hagaduadua.

9:13  Dadaulia le e-hai gadoo be-di ahina hagalangaadia-dangada, e-leelee-hua, e-de-heia nia daangada.

9:14  Mee e-noho i-di bontai o dono hale be i-hongo di lohongo i-di gowaa nnoonua o-di guongo,

9:15  e-gahigahi nia daangada ala e-lloomoi laa-laa, e-gana-hua gi nadau moomee,

9:16  ga-helekai, “Lloomoi, digau de-hagalongo!” Gei mee e-helekai gi digau nadau hagamaanadu ai boloo,

9:17  “Nia wai gaiaa la-koia e-maangala. Palaawaa gaiaa la-koia e-kala.”

9:18  Ana daangada ala e-haga-huaidu le e-de-iloo-ginaadou bolo ma koai dela ga-ulu gi-lodo di hale o-maa la-gaa-mmade, digau ala ne-ulu gi-lodo dono hale, la i-lodo di llala o tenua o digau mmade.

Chapter 10

10:1  Aanei nia agoago podo o Solomon: Nia dama kabemee e-haga-manawa lamalia nadau damana, nia dama de-kabemee e-haga-manawa-gee nadau dinana.

10:2  Nia maluagina ala e-kila-mai i-di haihai de-donu le e-hagalee humalia-adu gi-di-goe. Di haihai donu e-mee di-benebene do mouli.

10:3  Dimaadua hagalee haga-hiigai ana daangada humalia, gei Mee ga-duuli digau huaidu gi-daha mo nadau mee ala e-hiihai ginai.

10:4  Di hagatoo e-hai goe gi-hagaloale. Di ngalua hagamadabouli e-hai goe gi-maluagina.

10:5  Tangada hagamadabouli ono hagabaubau i-golo e-hagabudu ana meegai i-di madagoaa ne-togomaalia-ai, gei di-maa e-hagalangaadia di kii i-di madagoaa e-hagi-ai nia meegai.

10:6  Nia daangada humalia gaa-kae nadau hagahumalia. Nia helekai o digau huaidu e-hagammuni nadau hangaahai huaidu.

10:7  Di langahia o digau ala e-donu la-go di hagamaluagina. Digau huaidu la-ga-haga-de-langahia.

10:8  Digau hagamadabouli nadau hagabaubau i-golo e-kae nia helekai hagamaamaa. Nia daangada e-leelee balumee la-ga-mooho gi-daha.

10:9  Digau ala e-mouli i-di tonu, ginaadou guu-too gi-lodo di noho o-di aumaalia, gei digau ala e-mouli i-di hala, nadau ihala ga-hagamodongoohia-aga.

10:10  Tangada dela e-beehi gi-lala di tonu, le e-daamada ana hagahuaidu, gei tangada dela e-helekai hagamadammaa di mee hai-gee, le e-halahala di noho-baba.

10:11  Nnelekai tangada humalia la-go di hagamau o-di mouli, gei nnelekai o tangada huaidu le e-hagammuni nnangaahai huaidu.

10:12  Di manawa hai-baahi le e-hagamaaloo nia haingadaa, gei di aloho le e-dumaalia gi-nia hagahuaidu.

10:13  Digau hagabaubau le e-helehelekai iloo, gei digau dadaulia la-ne-belee hagaduadua.

10:14  Digau e-iloo nia mee le e-kae di kabemee dela e-mee di-nadau kae. Di madagoaa digau dadaulia ga-leelee, nia haingadaa le e-hoohoo-mai.

10:15  Di maluagina le e-benebene digau ala e-maluagina. Di hagaloale le e-oho digau ala e-hagaloale.

10:16  Di hui o-di haihai humalia la-go di mouli, gei di huaidu le e-dagi-hua goe gi-nia huaidu e-logo.

10:17  Nia daangada ala e-hagalongo gi nnelekai aago le e-mouli, gei digau ala e-hagammuni nadau ihala le e-mee di-tale gi-di haingadaa.

10:18  Tangada dela e-hagammuni dono dee-hiihai gi tuai dangada la tangada kai-tilikai. Tangada dela e-hagadele dana hai tamu la tangada dadaulia.

10:19  Au leelee logo e-hai goe gii-hala. Maa goe e-kabemee, goe e-noho dee-muu.

10:20  Nnelekai o tangada humalia le e-hai gadoo be nia silber donu. Nia maanadu o tangada huaidu le e-balumee-hua.

10:21  Nnelekai tangada humalia ga-hagamaamaa nia daangada dogologo, malaa goe e-mee-hua di bida daaligi goe i-di gili tadaulia.

10:22  Ma go nia hagahumalia Dimaadua ala e-haga-maluagina goe. Do ngalua hagamadabouli e-deemee di-hai goe gi-maluagina gi-nonua.

10:23  E-huaidu ma-ga-tenetene gi-di hai nia mee huaidu. Digau hagabaubau e-tenetene i-di kabemee.

10:24  Digau ala e-hai-hegau donu le e-kae nadau mee ala e-hiihai ginai. Digau dadaulia gaa-kae nia mee ala e-kaedahi e-mmaadagu-ai.

10:25  Nia madangi maaloo ga-lloomoi, ga-ili gi-daha digau huaidu, gei digau ala e-donu ga-benebene i-nia madagoaa huogodoo.

10:26  Hudee haga-ngalua-ina dau dangada hagatoo, mee ga-haga-de-noho-maalia goe gadoo be nia ‘vinegar’ i-di gili oo niha be nia huiahi i-lodo o golomada.

10:27  Daudali-ina Dimaadua, gei goe ga-mouli waalooloo. Digau huaidu e-mmade i-mua di-nadau madagoaa.

10:28  Nia hagadagadagagee o digau humalia e-dagi gi-di tenetene, gei digau huaidu le e-hagalee nadau mee e-tali-ai.

10:29  Dimaadua e-benebene digau ala e-donu, gei mee e-oho gi-daha digau ala e-hai nia mee huaidu.

10:30  Digau ala e-hai-hegau donu la-iai nadau abaaba i-golo i-nia madagoaa huogodoo, gei digau huaidu le e-hagalee mouli i-lodo tenua.

10:31  Digau ala e-hai-hegau donu le e-helehelekai i-di kabemee, gei tolole dela e-helekai huaidu la-gaa-dugu ga-hagalee.

10:32  Digau ala e-hai-hegau donu e-iloo di helekai nia mee haga-manawa lamalia ala e-tau-anga, gei digau huaidu e-helekai nia mee haga-manawa-gee dangada i-nia madagoaa huogodoo.

Chapter 11

11:1  Dimaadua e-de-hiihai gi-nia daangada ala e-hai-hegau gi-nia pauna hai-gee. Mee e-tenetene gi-nia pauna ala e-donu.

11:2  Nia daangada ala e-hagapuu ga-limalima-hua di-langaadia. E-koia e-humalia ma-ga-manawa hila-gi-lala.

11:3  Maa goe e-humalia, goe e-dagi go di manawa-madammaa. Digau ala e-deemee di-hagadagadagagee ginai le e-daaligi go nadau haihai hala.

11:4  Nia maluagina e-balumee-adu gi-di-goe i-di laangi ma-gaa-made-iei goe, gei di haihai donu e-mee di-daa goe gi-daha mo di made.

11:5  Di hai-hegau donu e-haga-haingoohia di mouli tangada humalia, gei digau huaidu le e-bida haga-monnono-hua ginaadou.

11:6  Di haihai donu e-benebene digau ala e-donu, gei digau ala e-deemee di-hagadagadagagee ginai, gaa-kumi go nadau hagagailaa.

11:7  Di madagoaa digau huaidu ma-gaa-mmade, nadau hagadagadagagee le e-mmade dalia ginaadou. Di hagadagadagagee gi-nia maluagina la-dono hadinga ai.

11:8  Di haingadaa le e-hagalee tale gi digau ala e-hai-hegau donu, e-tale-hua gi digau huaidu.

11:9  Nia helekai o digau bouli le e-mee di hagahuaidu goe, gei di kabemee o digau ala e-hai-hegau donu le e-mee di benebene goe.

11:10  Di waahale e-tenetene i-di haadanga-lamalia ma-gaa-dau i-nia daangada hai-hegau donu, gei digau huaidu ma-gaa-mmade, nia daangada le e-wwolowwolo tenetene.

11:11  Di waahale la-ga-humalia i-di madagoaa digau hai-hegau donu ga-haga-maluagina di-maa, gei nnelekai o digau huaidu le e-haga-mooho di waahale.

11:12  E-dadaulia ma-ga-helekai hagabalumee digau ala i-golo. Maa goe e-kabemee goe e-noho-hua dee-muu.

11:13  Tangada dela e-tamu dangada e-deemee di-hagadagadagagee ginai i-di gili nia mee hagammuni, malaa, goe e-mee di-hagadagadagagee gi tangada dela e-hagadonu kooe.

11:14  Tenua dono dagi ai la-gaa-doo ga-hagalee. Digau hagamaamaa ma-gaa-dogologo, dono hadinga bolo tenua le e-noho-baba.

11:15  Maa goe ga-hagababa bolo goe e-hui di boibana o tangada mai-i-daha, goe ga-lodo-huaidu. Maa goe e-noho-hua dee-muu, e-koia e-humalia.

11:16  Di ahina dumaalia le e-hagalaamua, gei di ahina huaidu la-go di hagauwwou. Nia daangada hagatoo le e-hagalee hai-mee gi-nia bahihadu, gei digau ala e-hagamahi e-ngalua ga-maluagina.

11:17  Maa goe ga-manawa-dumaalia, goe ne-bida hagagila do hiihai. Maa goe e-hagammaemmae manawa dangada, goe ne-bida hagammaemmae-hua goe.

11:18  Nia daangada huaidu nadau wiini ai. Maa goe gaa-hai di mee e-donu, goe doo hui i-golo.

11:19  Tangada manawa hai nia mee e-donu la-ga-mouli, gei tangada e-hiihai e-hai nia mee hala le e-hana gi-di made.

11:20  Dimaadua e-de-hiihai gi-nia daangada ala e-hagamaanadu huaidu, gei Mee e-aloho i digau ala e-hagamaanadu humalia.

11:21  Goe e-mee di-iloo humalia bolo nia daangada huaidu la-ga-hagaduadua, gei digau e-hai-hegau donu le e-hagalee tale gi-di hagaduadua.

11:22  Di madamada o-di ahina dela e-de-iloo-ia be dehee di mee hai-gee i-di humalia mo-di huaidu le e-hai gadoo be-di buulei goolo e-daudau i-di madauhi di biigi.

11:23  Nia mee e-hiihai ginai nia daangada humalia le e-gila-mai haga-humalia i-nia madagoaa huogodoo, gei digau huaidu ma-ga-hai-mee gi nadau mee hiihai ginai, le e-hagawelewele ginai nia daangada huogodoo.

11:24  Hunu daangada e-hagauwwou nadau bahihadu gei digaula e-maluagina-mai. Gei hunu daangada e-haga-doedoe, gei digaula e-hagaloale-mai.

11:25  Wanga-ina dehuia, gei goe ga-maluagina. Hagamaamaa-ina digau ala i-golo, gei nia daangada ga-hagamaamaa goe.

11:26  Nia daangada e-haga-huaidu tangada dela e-hagabudu ana huwa-laagau gi-logowaahee, ga-benebene e-tali di hui nia maa gi-maanege-aga. Gei nia daangada e-hagaamu tangada dela e-huihui nia maa i-di hui-ngoohia.

11:27  Goe ga-hagalaamua maa au mee ala e-ngalua ginai le e-humalia, gei di huaidu e-kae kooe maa goe e-halahala di hagahuaidu.

11:28  Digau ala e-hagadagadagagee gi nadau maluagina la-ga-monnono gadoo be nia lau-laagau i-di madagoaa welengina, gei digau ala e-hai-hegau donu la-ga-maluagina be nia lau-laagau i-di madagoaa e-tomo-aga.

11:29  Digau ala e-hagahuaidu nadau madahaanau, ga-deai nadau mee ai i-di hagaodi. Digau dadaulia gaa-hai nia hege ni digau kabemee i-nia madagoaa huogodoo.

11:30  Di haihai donu le e-kae di mouli. Di haihai huaidu le e-daa di mouli.

11:31  Nia daangada humalia le e-kumi nadau hui i henuailala, gei goe gi-iloo humalia bolo digau haihai hala la-ga-hagaduadua.

Chapter 12

12:1  Tangada dela e-hiihai gi-di kabemee le e-tene gi tangada dela e-aago ia gii-donu i ana mee hala. Ma e-dadaulia go tangada ma-ga-de-hiihai gi tangada e-aago ia.

12:2  Dimaadua e-manawa lamalia gi-nia daangada humalia, gei Mee e-haga-huaidu digau ala e-haganohonoho nia huaidu.

12:3  Di haihai huaidu le e-hagalee benebene di noho-baba, gei digau ala e-haihai di tonu le e-tuu maaloo.

12:4  Di ahina hai-lodo humalia le e-hagalaamua ge e-tenetene ginai dono lodo. Gei di ahina dela e-hagalangaadia dono lodo le e-hai gadoo be-di magi dela e-deemee di hagahili lodo ono iwi.

12:5  Digau ala e-haihai di tonu ga-benebene goe hagahumalia, gei digau huaidu e-hiihai-hua e-halahalau goe.

12:6  Nnelekai digau huaidu le e-haga-halauwa goe, gei nnelekai o digau ala e-hai-hegau donu le e-benebene digau ala e-uli nadau gai.

12:7  Digau huaidu ga-haga-mmaa gi-daha ga-hagalee hagadili gi-muli, gei nia hagadili o digau ala e-hai-hegau donu ga-mouli gi-muli.

12:8  Maa goe e-hagamaanadu kabemee, nia daangada ga-hagalaamua goe. Maa goe e-dadaulia, nia daangada ga-hagauwwou goe.

12:9  Ma koia e-humalia ma-gaa-hai be togologo tangada e-halahala-hua dono mouli, i tangada dela e-hai bolo ia tangada aamua gei mee ana meegai ai.

12:10  Nia daangada humalia e-benebene haga-humalia nadau manu, gei digau huaidu hagalee hila gi nadau manu.

12:11  Tangada hai hadagee hagamadabouli e-logo ana meegai, gei tangada dadaulia e-hagauwwou dono madagoaa gi-nia moomee balumee.

12:12  Nia daangada huaidu e-hiihai-hua e-hai nia mee huaidu, malaa digau ala e-hai-hegau donu e-tuu maaloo.

12:13  Digau huaidu le e-tai-hua go nadau helekai donu, gei digau ala e-donu hagalee tale gi-di haingadaa.

12:14  Doo hui le e-hanimoi i au helekai mo au hegau. Goe e-kae au mee ala e-tau-anga.

12:15  Nia daangada dadaulia e-hagamaanadu i-nia madagoaa huogodoo bolo ginaadou le e-donu, gei digau kabemee e-hagalongo gi-nia hagamaamaa.

12:16  Tangada dadaulia ma-ga-hagawelewele, e-limalima dono hagamodongoohia-aga. Digau kabemee e-haga-de-iloo-hua nia helekai haga-lodo-huaidu.

12:17  Tangada dela e-helekai di tonu, e-hagi-aga nia hagamodongoohia o-di tonu, gei nnelekai kai-tilikai e-dagi gi-di halahalau.

12:18  Nia balu helekai e-mee di haga-mmaemmae kono be-di hulumanu-dauwa, gei nnelekai kabemee e-hagahili.

12:19  Di mouli o tilikai le e-bodobodo, gei di tonu le e-mouli ga-hana-hua-beelaa.

12:20  Di obolima la-anga-hua gi digau ala e-haganohonoho nia huaidu, gei digau ala e-ngalua gi-di humalia ga-gidee di tenetene.

12:21  Digau ala e-hai-hegau donu hagalee tale gi-nia mee huaidu, gei digau huaidu nadau mee i-golo ai, ala-hua go nia haingadaa.

12:22  Dimaadua e-de-hiihai gi-nia daangada hai kai-tilikai, gei mee e-manawa lamalia gi digau e-daahi-hua nadau hagababa.

12:23  Nia daangada kabemee hagalee leelee i nadau mee ala e-iloo, gei digau dadaulia e-hagamodongoohia nadau de-iloo nia mee.

12:24  Di ngalua hagamadabouli ga-gowadu oo mahi. Di hagatoo gaa-hai goe gii-hai di hege.

12:25  Nia mamaanadu e-logo e-mee di hagalodo-huaidu goe, gei nnelekai humalia e-haga-manawa tenetene goe.

12:26  Tangada dela e-hai-hegau donu le e-dagi dono ehoo gi-di ala donu, gei di ala o digau huaidu e-dagi digaula gi-daha mo-di ala donu.

12:27  Maa goe e-hagatoo, goe e-deemee di-hai-mee gi-nia mee ala e-hiihai ginai goe. Maa goe e-hagamadabouli, gei goe ga-hai-mee gi-di maluagina.

12:28  Di hai-hegau donu la-go di ala gi-di mouli, gei di hai-hegau huaidu la-go di ala gi-di made.

Chapter 13

13:1  Tama-daane dela e-kabemee le e-hagalongo gi dono damana ma-ga-haga-donu ana mee ma-ga-hai-gee. Gei tangada dela e-bida hagalaamua ia, le e-deemee di-hagi-aga ana mee ala ma-ga-hai-gee.

13:2  Nia daangada ala e-humalia, ginaadou nadau hui i-golo e-hui mai i nadau helekai ala nogo helekai-ai, gei digau ala e-halahalau-dangada, ginaadou e-hiihai-hua e-hai di hagahuaidu.

13:3  Gii-pula i au helekai ala e-helekai-iei goe, mo-di benebene do mouli. Tangada dela e-leelee balumee, le e-bida hunahuna ia.

13:4  Ma e-aha maa tangada hagatoo ga-hiihai gi-nia mee, mee e-deemee di-kae nia maa. Gei-ogo tangada hagamadabouli la-ga-hai-mee gi-nia mee huogodoo ala e-hiihai ginai.

13:5  Nia daangada ala e-hai-hegau gi-di tonu, ginaadou e-de-hiihai gi-nia helekai tilikai, gei nia helekai o digau hai mee huaidu le e-haga-langaadia ge e-haga-balumee.

13:6  Di tonu le e-benebene digau ala nadau ihala ai. Di huaidu le e-hagahuaidu digau ala e-hai di huaidu.

13:7  Hunu daangada e-hai bolo ginaadou digau e-maluagina, gei digaula nadau mee ai. Hunu daangada le e-maluagina, gei digaula e-hangaahai be nia daangada hagaloale.

13:8  Tangada maluagina e-madagu i-nia daangada daaligi-dangada e-kae ana bahihadu, malaa, deai dahi dangada e-mee di-hagamadagudagu tangada hagaloale ai.

13:9  Nia daangada ala e-hai-hegau donu, ginaadou e-hai gadoo be-di malama dela e-maahina maaloo ge madamada. Nia daangada ala e-haihai di huaidu, ginaadou e-hai gadoo be-di malama e-dabadaba gaa-made.

13:10  Di bida hagalaamua la-hagalee di mee, dela-hua e-hai ana haingadaa. Di kabemee e-gidee i-baahi ginaadou ala e-kae nia hagamaamaa.

13:11  E-limalima do hagaloale, ma o maluagina la-ne-gila-adu gi-di-goe ngoohia. Maa goe ga-ngalua kono gi-di bahihadu, gei goe e-gidee nia bahihadu e-logo.

13:12  Dau mee e-hagamaanadu bolo gii-gila, gei di-maa digi gila, do manawa le e-hadi hogi, gei dau hiihai la-gaa-gila, malaa, goe e-tenetene huoloo.

13:13  Goe e-halahala nia haingadaa maa goe e-de-hagalongo gi nnelekai hagamaamaa goe. Daudalia nnelekai hagamaamaa, gei goe gaa-noho i-di aumaalia.

13:14  Nia agoago o digau kabemee la-go nia wai haga-mouli. Nia agoago aanei ga-hagamaamaa goe gi-daha mo-di haingadaa.

13:15  Digau ala e-kabemee, ginaadou e-hagalaamua go nia daangada. Digau ala e-deemee di-hagadagadagagee ginai, ginaadou e-hula i-di ala dela e-hagahuaidu ginaadou.

13:16  Nia daangada kabemee le e-hagabaubau i-nia madagoaa huogodoo i-mua di hai nadau mee. Digau ala e-dadaulia, ginaadou e-haga-iloo nadau maanadu boiboi.

13:17  Tangada kae-hegau dela hagalee gana ginai, le e-hidi-mai di haingadaa, gei tangada kae-hegau dela e-mee di-hagadonu go nia daangada, ia e-gaamai di noho i-di aumaalia.

13:18  Tangada dela hagalee kabe ana mee, ia ga-hagaloale ang-gi deia, geia e-hai di balu-dangada. Gei tangada dela e-hagalongo gi-di haga-donu o ana mee haihai-hala, geia e-hagalaamua go nia daangada.

13:19  E-humalia maa goe gaa-kae nia mee ala e-hiihai ginai goe. Digau dadaulia e-de-hiihai di-huli gi-daha mo nadau mee huaidu.

13:20  Hai hoo gi digau ala e-kabemee, gei goe ga-kabemee. Maa goe ga-hai-hoo gi digau ala e-dadaulia, goe e-hagahuaidu-hua goe.

13:21  Di haingadaa le e-daudali digau huaidu i-nia madagoaa huogodoo, gei digau ala e-hai-hegau donu gaa-kae nadau hui humalia.

13:22  Nia maluagina o digau humalia gaa-wanga gi nadau dama gi-muli, gei nia maluagina o digau huaidu gaa-wanga gi digau ala e-hai-hegau donu.

13:23  Nia anggowaa e-mee-hua di-huwa nia meegai e-logo gi digau hagaloale, gei digau huaidu e-duuli digaula gi-de-dogia.

13:24  Maa goe hagalee aago gi-di hagaduadua au dama, goe hagalee e-aloho i digaula. Maa goe e-aloho i digaula, goe e-hai digaula gii-donu.

13:25  Digau ala e-hai-hegau donu le e-logo nadau meegai, gei digau huaidu e-hiigai i-nia madagoaa huogodoo.

Chapter 14

14:1  Di ahina kabemee e-hau dono hale, gei di ahina dadaulia e-oho gi-daha.

14:2  Digau ala e-heehee i-di tonu le e-hagalaamua Dimaadua, digau ala e-heehee i-di hala e-haga-balumee a-Mee.

14:3  Di hagamuamua o tangada dadaulia le e-hidi-ai-ei mee e-leelee logo, gei nnelekai o digau kabemee e-duuli ginaadou.

14:4  Ma-ga dei di kau ai belee haga-maluu dana hadagee, gei dau hadagee la-ga ono meegai ai, gei ma-ga i-golo, gei di hadagee la-gaa-logo ono meegai.

14:5  Tangada hagadootonu dela e-hagadagadagagee ginai e-hagi-aga di tonu i-nia madagoaa huogodoo, gei tangada hagadootonu dono hagadagadagagee ginai ai, hagalee ana mee e-hagi-aga ai, dela-hua go nia kai-tilikai.

14:6  Nia daangada ala e-bida hagaamu ginaadou le e-deemee di-kabe nia mee, gei digau ala e-hagamaanadu kabemee le e-kabe-ngoohia nadau mee.

14:7  Hudee haga-hoohoo-ina goe gi-nia daangada dadaulia, digaula nadau mee e-aago-adu ai.

14:8  Tangada iloo le e-aha dela e-kabemee? Idimaa mee e-iloo nia mee belee hai. Tangada de-iloo le e-aha dela e-dadaulia? Idimaa mee e-hagamaanadu bolo ia gu-iloo.

14:9  Digau dadaulia e-de-heia ginaadou nadau mee hai hala ala e-hai, gei digau humalia e-hiihai gi-di hagamehede.

14:10  Do haga-tenetene la ni-aau donu. Do manawa-gee la ni-aau donu. Tangada i-golo e-mee di-buni-adu i-di gili nia mee aanei ai.

14:11  Di hale tangada humalia e-duu hua igolo i-muli di hale tangada huaidu ma-ga-mooho.

14:12  Di ala dela e-hagamaanadu kooe bolo e-donu, holongo e-mee-hua di-dagi goe gi-di made.

14:13  Nia gadagada e-mee-hua di-hagammuni di manawa-gee. Di madagoaa di manawa-tenetene ma-ga-hagalee, di lodo-huaidu i-golo hua.

14:14  Nia daangada huaidu e-kae nadau mee ala e-tau-anga. Nia daangada humalia e-kae nadau hagahumalia mai nadau hegau humalia.

14:15  Tangada dadaulia e-hagadonu nia mee huogodoo, gei tangada kabemee e-mmada hagahumalia gi dono ala.

14:16  Digau kabemee e-hagapaa i-nia haingadaa, gei digau dadaulia hagalee hagapaa i-nia haingadaa, e-limalima-hua di haga-hai-hegau di haingadaa.

14:17  Nia daangada hagawelewele-ngoohia e-haihai nia mee dadaulia, gei digau iloo le e-noho-baba-hua.

14:18  Digau de-hagalongo e-kae nadau mee ala e-tau-anga gi nadau dadaulia, gei digau e-iloo e-kae nadau hui kabemee.

14:19  Digau huaidu gaa-pala gi-lala i-mua digau ala e-hai-hegau donu, e-dangidangi i nadau hiihai.

14:20  Tangada hagaloale e-de hiihai ginai digau ala i dono baahi, gei tangada maluagina e-dogologo ono ehoo.

14:21  Maa goe e-hiihai e-tenetene, manawa-dumaalia gi digau hagaloale. Di haga-balumee digaula la di hala.

14:22  Maa goe ga-ngalua i-di moomee hagamaamaa, gei goe e-kae do hagalabagau i-baahi nia daangada. Goe ga-ngalua i-di moomee huaidu, goe e-hai di hala.

14:23  Ngalua gei goe ga-hai-mee gi do mouli. Maa goe ga-nohonoho-hua, e-hagabooboo, malaa, di hagaloale la-ga-gila-adu gi-di-goe.

14:24  Nia daangada hagamaanadu kabemee le e-kumi nadau hui maluagina, gei digau dadaulia le e-hagamodongoohia-aga-hua go nadau dadaulia.

14:25  Tangada hagadootonu e-haga-mouli ana daangada i-di madagoaa a-mee ma-ga-helekai di tonu. Mee ga-helekai tilikai, mee e-halahalau ana daangada.

14:26  Di hagalaamua Dimaadua le e-wanga di hagadagadagagee mo-di noho-baba gi tangada mo dono madahaanau.

14:27  Goe e-hiihai gi-dee-tale gi-di made? Di hagalaamua a Dimaadua la-go di hagamau o-di mouli.

14:28  Di aamua o-di king e-goweinga togologo o ana daangada e-dagi. Maa nia daangada ai, gei mee gu-hagalee hai di mee.

14:29  Maa goe gaa-noho dee-muu, goe e-kabemee. Maa goe e-hagawelewele-ngoohia, goe e-hagi-aga-hua do dadaulia.

14:30  Di libogo maanadu baba le e-hai tuaidina gi-maaloo, gei tubua le e-hai be-di magi e-deemee di-hagahili.

14:31  Maa goe ga-hagaduadua digau hagaloale, goe ne-hagahuaidu-hua a God dela ne-hai digaula. Di manawa dumaalia gi digau hagaloale la dela go-di hai daumaha.

14:32  Nia haihai huaidu o digau huaidu le e-bida hagahuaidu ginaadou, gei digau humalia le e-duuli go nadau haihai donu.

14:33  Di kabemee la i-lodo nia hagamaanadu huogodoo o digau ala e-hagamamaanadu, gei digau huaidu e-de-iloo-ginaadou di kabemee.

14:34  Di hai-hegau donu le e-haga-damana-mai tenua damana. Di hala la-go di hagalangaadia gi tenua damana.

14:35  Nia king e-manawa-tene gi nadau gau dagi aamua ala e-mee di hai nnegau, gei digaula e-hagaduadua digau ala e-deemee di hai-hegau humalia.

Chapter 15

15:1  Nia helekai haga-balabala le e-haga-manawa lamalia, gei nia helekai haga-daamaha le e-hai tangada gi-hagawelewele.

15:2  Digau kabemee ma-ga-leelee, nadau helekai le e-hii-hagalongo ginai, gei digau dadaulia le e-leelee-hua nia balu-helekai.

15:3  Dimaadua e-gidee-Ia nia mee ala e-hai i-nia madagoaa huogodoo. Ge-Ia e-daumada tadau mee ala e-hai, nia mee humalia mo nia mee huaidu.

15:4  Nnelekai ala e-honu tumaalia le e-gowadu do mouli, gei nia helekai huaidu le e-daaligi do hagataalunga.

15:5  E-dadaulia-adu gi-di-goe maa goe ga-de-hagalongo gi-nia helekai o maadua ala e-aago goe, gei e-kabemee maa goe gaa-kae nia helekai o maadua ala e-haga-donu au mee ala e-hai-gee.

15:6  Digau ala e-hai-hegau donu, ginaadou e-maluagina waalooloo, gei digau ala e-hai di huaidu, ginaadou e-hagaloale i-di madagoaa di haingadaa ma-gaa-tale ang-gi ginaadou.

15:7  Di kabemee le e-hagadele go digau ala e-kabemee, hagalee go digau ala e-dadaulia.

15:8  Dimaadua le e-tenetene gi-nia daangada humalia ma-gaa-hai nadau dalodalo, ge-Ia e-de-hiihai gi-nia tigidaumaha o-nia daangada ala e-hai di huaidu ma-ga-tigidaumaha ang-gi de-Ia.

15:9  Dimaadua le e-de-hiihai gi-nia haihai o-nia daangada huaidu, ge-Ia e-aloho i digau ala e-hai nia mee ala e-donu.

15:10  Maa goe gaa-hai nia mee hai-gee, gei goe ga-hagaduadua kono. Maa goe hagalee hai goe gii-donu, gei goe gaa-made.

15:11  Tenua digau mmade e-deemee hogi di-duuli-ai Dimaadua gi-iloo-e-Ia ma ni-aha ala i-golo. Dehee-laa tadau hai e-mee di-hagammuni tadau hagamaanadu i God?

15:12  Nia daangada ala e-bida hagaamu ginaadou e-de-hiihai e-hai gii-donu. Digaula hagalee e-heeu nia hagamaamaa mai baahi digau ala koia e-iloo.

15:13  Nia daangada ma-ga-tenetene, digaula e-gadagada. Digaula ma-ga-lodo-huaidu, nadau manawa e-paagege.

15:14  Nia daangada hagamamaanadu kabemee e-hiihai e-kabe nia mee, gei digau dadaulia le e-baba-hua gi nadau de-iloo.

15:15  Di mouli o digau hagaloale le e-haingadaa i-nia madagoaa huogodoo, gei digau ala e-tenetene le e-mouli tenetene i-nia madagoaa huogodoo.

15:16  Di hagaloale mo-di hagalaamua Dimaadua la-koia e-humalia i-di maluagina mo-di noho i-lodo nia haingadaa.

15:17  Di gai nia huwa-laagau i-baahi digau e-aloho-iei goe, la koia e-humalia i-di gai nia goneiga kala i-di gowaa dela e-iai di hagadugina.

15:18  Di hagawelewele hagalimalima le e-hidi-ai di lagamaaloo, gei di noho-baba le e-hidi-ai di noho i-di aumaalia.

15:19  Maa goe e-hagatoo, goe gaa-tale gi-nia haingadaa i-nia madagowaa huogodoo. Maa o hangaahai le e-donu, goe hagalee tale gi-nia haingadaa.

15:20  Nia dama kabemee e-haga-tenetene nadau damana. Nia dama dadaulia le e-haga-balumee nadau dinana.

15:21  Nia daangada dadaulia e-tenetene gi nadau dadaulia, gei digau kabemee e-hai nia mee ala e-donu.

15:22  Kaina nia helekai hagamaamaa huogodoo ala e-mee dau kae, gei goe gaa-gila humalia. Maa goe ga-hagalee kae nnelekai hagamaamaa, goe hagalee gila humalia.

15:23  E-haga-tenetene ma-ga-gidee di bida helekai e-dohu di haga-hai-hegau i-di madagoaa donu dela e-tau-anga.

15:24  Nia daangada kabemee e-heehee i-di ala dela e-hana gi-nua gi-di mouli, hagalee go-di ala dela e-hana gi-lala gi-di made.

15:25  Dimaadua gaa-oho gi-daha nia hale o-nia daane e-bida hagalaamua ginaadou, gei Mee ga-benebene nia mee di ahina guu-made dono lodo.

15:26  Dimaadua e-de-hiihai gi-nia maanadu huaidu, gei mee e-manawa lamalia gi-nia helekai humalia.

15:27  Maa goe ga-halahala di wiini i-di ala dela hagalee donu, gei do madahaanau gaa-tale gi-di haingadaa. Hudee hai-hegau nia hui hai-gee, gei goe ga-mouli mada-waalooloo.

15:28  Nia daangada humalia e-hagamaanadu i-mua di helekai gi-di heeu. Nia daangada huaidu le e-helekai hagalimalima, gei e-daamada nia haga-haingadaa.

15:29  Dimaadua e-longono nia dalodalo o digau humalia, ge-Ia e-haga-de-iloo digau ala e-huaidu.

15:30  Di gadagada e-haga-tenetene goe, mo-di longo humalia e-hagamanawa lamalia goe.

15:31  Maa goe e-hagalongo gi tangada e-haga-donu goe, goe tangada kabemee.

15:32  Maa goe hagalee hiihai gi-di kabe nia mee, goe e-hagammaemmae-hua goe. Maa goe gaa-kae di aago, gei do kabemee ga-damana-mai.

15:33  Di hagalaamua Dimaadua la di kuulu hua. Goe e-hai-loo gi-manawa hila-gi-lala i-mua dau hagalaamua.

Chapter 16

16:1  Gidaadou e-mee-hua di-hai tadau bilaan, malaa, ma go God hua dela e-daahi nia helekai hagamodu.

16:2  Goe e-mee hua di hagamaanadu bolo au mee huogodoo ala e-hai le e-hai-donu, gei Dimaadua e-pauna nia dahidamee o dau hai-maanadu.

16:3  Tangi ang-gi Dimaadua gi-haga-maluagina-ina au bilaan, gei au bilaan la-gaa-kila humalia.

16:4  Nia mee huogodoo Dimaadua ne-hai, la-iai ono hagaodi i-golo, gei di hagaodi o digau huaidu la-go di mooho gi-daha.

16:5  Dimaadua e-de-hiihai gi digau ala e-bida hagalaamua ginaadou, Mee hagalee hai digaula gii-tanga gi-daha mo-di hagaduadua.

16:6  Manawa-dahi mo-di hai-hegau donu, gei God ga-dumaalia-adu gi o huaidu. Hagalongo gi Dimaadua gei di huaidu ga-deemee di-tale-adu gi-di-goe.

16:7  Maa goe ga-haga-manawa lamalia Dimaadua, Mee e-mee di-hai o hagadaumee gii-hai nia ihoo haga-tenetene ni-oou.

16:8  Ma koia e-humalia ma-gaa-kumi doo hui dulii mai do ngalua donu, i-di kumi di hui damana mai do ngalua hagalee donu.

16:9  Goe e-mee-hua di-hai au bilaan, malaa ma go Dimaadua dela e-dagi doo ala.

16:10  Di king e-helehelekai i ono mogobuna donu mai baahi o Dimaadua. Ana haganoho e-donu i-nia madagoaa huogodoo.

16:11  Dimaadua e-hiihai gi-nia mee pauna-mee gii-donu, nia mee hagatau-mee gii-donu, mo nia hui gii-donu.

16:12  Nia king e-de hiihai gi-di huaidu, idimaa ma go-di tonu dela e-haga-maaloo di oobidi.

16:13  Di king e-hiihai e-hagalongo gi-di tonu, gei mee e-haga-gila-aga digau ala e-leelee donu.

16:14  Nia daangada kabemee e-hagamahi e-haga-tenetene di-nadau king. Maa di king ga-hagawelewele, holongo dahi dangada gaa-made.

16:15  Di manawa lamalia o-di king le e-hai gadoo be nia gabua ala e-haga-uwauwa i-di madagoaa haga-hoou nia lau laagau mo tomo-aga, di mouli la i-golo.

16:16  E-koia e-humalia ma-ga-hai-mee gi-di kabemee mo-di iloo-mee, i-di hai-mee gi-nia goolo mo nia silber.

16:17  Nia daangada humalia e-taele i-di ala dela hagalee hula gi-di huaidu, malaa, mmada gii-donu gi-di ala dela e-hana-iei goe, be-di maa e-mee di-hagamouli goe.

16:18  Bida hagalaamua goe e-dagi gi-di mooho, mo digau ala e-bida hagaamu ginaadou hagalee kila.

16:19  Di manawa hila-gi-lala mo-di noho hagaloale la koia e-humalia i-di hai goe gii-hai be digau ala e-bida hagalaamua ginaadou ge e-hai-mee gi nadau maluagina gaiaa.

16:20  Daudalia nia mee ala ne-aago-adu gi-di-goe, gei goe ga-haadanga-lamalia. Hagadonu-ina Dimaadua, gei goe ga-tenetene.

16:21  Nia daangada e-iloo-ginaadou be koai tangada kabemee ge madua, idimaa mee e-iloo nia mee. Ana helekai lee humalia e-hai nia daangada gi-hiihai di-hagalongo.

16:22  Di kabemee la di hagamau o-di mouli ang-gi digau hagamamaanadu kabemee, gei di haga-kuulu digau dadaulia la-go di hagauwwou o-di madagoaa.

16:23  Nia daangada hagamamaanadu kabemee e-hagamaanadu i-mua nadau helekai. Nadau helekai e-hai nia daangada gi-hiihai di-daudali gi-nonua.

16:24  Nnelekai dumaalia e-hai be nia meegai lodo-henua maangala, e-maangala ma-gaa-momi, e-humalia gi do huaidina.

16:25  Di ala dela e-hagamaanadu kooe bolo e-donu, e-mee-hua di-dagi goe gi-di made.

16:26  Di hihiigai e-haga-ngalua tangada ngalua gi-nonua, idimaa mee e-hiihai e-hai gii-dohu dono miami.

16:27  Nia daangada huaidu e-halahala nadau ala e-haga-huaidu digau ala i-golo. Nadau helekai e-ulaula be-di ahi wele.

16:28  Tamu dangada e-hagadele go digau huaidu. Digaula e-hagalogo nia hagahuaidu i-mehanga nia hagadau ihoo.

16:29  Digau hagamuamua e-halahalau nadau ihoo, mo-di dagi digaula gi-di hagahalauwa.

16:30  Gii-pula i-nia daangada ala e-gadagada gi-kila-mai nadau niha mo-di gemugemu adu gi-di-goe. Digaula la-iai nadau hagamaanadu huaidu i-golo.

16:31  Di hui o digau ala e-hangaahai donu la-go di mouli waalooloo. Di libogo hinaa la-go di goobai aamua.

16:32  Di noho-baba la-koia e-humalia i-di maaloo. Di dagi au hagamaanadu la koia e-humalia i-di dagi nia waahale.

16:33  Nia daangada e-hai nadau mee e-manamana di hiihai a Dimaadua, gei di-maa go God hua dela e-dugu di mee dela gaa-gila.

Chapter 17

17:1  E-gai dau palaawaa maangoo mo-di noho-baba i-di aumaalia, la koia e-humalia i-tagamiami damanaiee i-lodo di hale honu nia haingadaa.

17:2  Di hege hai-hegau donu gaa-dagi di balu dama dono dangada aamua, e-kae-hua hunu maluagina be ia tangada i-nia duaahina-daane ala i-golo.

17:3  Nia maluagina o-di goolo mo-di silber le e-haga-madammaa go di ahi, gei di manawa o tangada le e-haga-madammaa go Dimaadua.

17:4  Digau huaidu le e-hagalongo gi-nia maanadu huaidu, gei digau hai kai-tilikai le e-hagalongo gi-nia kai-tilikai.

17:5  Maa goe e-hagauwwou digau hagaloale, goe ne-hagahuaidu a God dela ne-hai digaula. Goe ga-hagaduadua maa goe e-tenetene gi tangada ma-ga-haingadaa ang-gi-deia.

17:6  Nia maadua-mmaadua e-manawa hagaamu nia dama o nadau dama, gadoo be nia dama ala e-manawa hagaamu nadau maadua.

17:7  Digau aamua hagalee kai-tilikai, gei digau dadaulia la-hagalee nadau mee dahidamee e-helekai ai.

17:8  Hunu daangada e-hagamaanadu bolo di hui halahalau le e-haga-ngalua be nia mogobuna. Digaula e-hagadonu bolo di-maa e-mee di-hai nia mee.

17:9  Maa goe e-hiihai gi-nia daangada gi-hiihai-adu, dumaalia gi nadau mee hala ala ne-hai-adu gi-di-goe. Di daahi nia mee hai-hala e-mee-hua di-wwae nia hoo hagaaloho.

17:10  Tangada hagamaanadu kabemee e-kabe nia mee e-logo mai di aago hua e-dahi, i tangada dadaulia dela e-kabe ana mee mai dono dadaaligi nnolongo e-lau-(100).

17:11  Di made ga-hanimoi be tangada huaidu giibeni dela e-hagau gi-nia daangada huaidu ala e-haga-hinihini i-nia madagoaa huogodoo.

17:12  Di heetugi ang-gi dahi manu-ahina ‘bear’ dela gu-gaiaa ono dama, la-koia e-humalia i-di heetugi gi tangada dadaulia e-daadaamee i dana balu moomee.

17:13  Maa goe gaa-hui di humalia gi-di huaidu, goe e-deemee di-hagabagi di huaidu gi-daha mo doo hale.

17:14  Taamada o-di lagamaaloo le e-hai gadoo be-di magala dulii o-di simen matagidagi. Pono-ina di-maa gii-noho i-mua di-maa ga-damana-mai.

17:15  Di hagahuaidu tangada dela ono hala ai, mo-di hagamehede tangada huaidu, laa aanei nia mee e-lua a Dimaadua hagalee hiihai ginai.

17:16  Tangada huaidu le e-hagalee humalia di huihui dana kuulu, idimaa mee ana hagamaanadu ai.

17:17  Nia ihoo hagaaloho e-modongoohia i nadau aloho i-nia madagoaa huogodoo. Dehee tadinga o do ehoo hagaaloho maa mee ga-deai dana hagamaamaa ai i do haingadaa?

17:18  Tangada hua dadaulia dela e-hagababa bolo ia gaa-hui-laa di boibana o tangada dela i-golo.

17:19  Di hiihai e-hai di hala la di hiihai e-hagahinihini. Maa goe ga-hagamuamua gi o maluagina i-nia madagoaa huogodoo, goe e-halahala do haingadaa.

17:20  Tangada dela e-hagamaanadu mo-di helekai huaidu, e-de-gidee-ia nia mee humalia dela-hua go di halauwa.

17:21  Nia maadua o-nia dama ala e-hai di huaidu e-manawa-gee gei e-lodo-huaidu.

17:22  Di manawa-tenetene e-haga-maaloo goe. Di lodo-huaidu i-nia madagoaa huogodoo le e-hidi-mai-iei goe gaa-made.

17:23  Digau hai gabunga huaidu e-kae di hui halahalau hagammuni, gei di tonu o-di gabunga e-deemee di-gila.

17:24  Tangada hagamaanadu kabemee e-hagahuudonu gi-di ala dela e-donu, gei tangada dadaulia e-maliuliu-hua i-nia ala e-logo.

17:25  Nia dama dadaulia e-haga-manawa-gee nadau damana, e-haga-tilikai hualaa nadau dinana.

17:26  Ma hagalee donu di hai tangada ono hala ai gi-hui-ina ono hala. Di tonu la-guu-hana laa-daha ma digau humalia le e-hagaduadua.

17:27  Nia daangada ala e-modongoohia ang-gi ginaadou le e-hagalee leelee i-nia madagoaa huogodoo. Nia daangada ala e-noho-baba e-iloo-ginaadou nia mee.

17:28  Maa digau dadaulia gaa-noho dee-muu, gaa-tai nadau ngudu, nia daangada ga-hagamamaanadu bolo digaula la-digau kabemee ge hagamaanadu iloo.

Chapter 18

18:1  Nia daangada ala hagalee buni-anga gi digau ala i-golo le e-hiihai-hua gi nadau hiihai donu. Digaula hagalee donu gi-nia mee o-nia daangada huogodoo ala e-modongoohia bolo e-donu.

18:2  Tangada dadaulia e-dehei-eia be ia e-iloo di mee be de-iloo, dana mee e-hiihai ginai le e-hagi-aga dono kabemee.

18:3  Di hala mo-di langaadia e-hula i-di gowaa e-dahi. Hudua gi-daha do hagalaamua, gei di hagauwwou gaa-pono dono lohongo.

18:4  Nnelekai o tangada e-mee-hua di hai di hagamau o-di kabemee, e-llala be-di moana, e-hoou be-di monowai mmidi.

18:5  E-hagalee donu ma-ga-hagamaamaa digau ihala mo e-daa digau nadau ihala ai gi-dee hai-mee gi-di tonu.

18:6  Tangada dadaulia ma-ga-daamada dana lagamaaloo, mee e-halahala dana dadaaligi.

18:7  Tangada dadaulia ma-ga-helekai, le e-hagahuaidu-hua ia. Mee guu-hele go ana helekai donu.

18:8  Tamu dangada le e-kala, e-hiihai ginai gidaadou di holo!

18:9  Tangada hagatoo le e-huaidu be tangada hunahuna mee.

18:10  Dimaadua le e-hai gadoo be-di angulaa mau-dangihi, e-hula ginai nia daangada ala e-hai-hegau donu e-hagamalu-ai.

18:11  Gei digau maluagina e-hagamaanadu bolo nadau maluagina ga-duuli ginaadou gadoo be nia abaaba nnoonua ala e-haganiga di waahale.

18:12  Tangada manawa hila-gi-lala ga-hagalaamua, gei digau ala e-bida hagaamu ginaadou gaa-hula i-di ala dela e-hana gi-di mooho.

18:13  Hagalongo gii-donu i-mua dau helekai gi-di heeu. Maa goe hagalee hai beenei, goe e-hagahuaidu goe.

18:14  Do hiihai gi-di mouli e-mee di-daahi do mouli i do madagoaa ma-gaa-magi. Maa goe ga-diiagi di mouli, do hagadagadagagee muliagina ga-hagalee.

18:15  Nia daangada hagamamaanadu kabemee e-hiihai gei e-togomaalia di-kabe nia mee i-nia madagoaa huogodoo.

18:16  Goe e-hiihai e-heetugi gi tangada hagalabagau? Kaina dau kisakis, gei di-maa ga-haingoohia.

18:17  Tangada helekai matagidagi i-lodo di gowaa hai-gabunga le e-hai be tangada e-donu, gaa-dae-loo gi tangada i-golo ga-daamada gaa-hai ana heeu gi mee.

18:18  Maa nia daangada maaloo dogolua ga-hai-baahi i-lodo di gowaa hai-gabunga, di halahala tangada dela e-donu le e-mee-hua di-manamana go di hudihudi.

18:19  Hagamaamaa-ina oo gau gei oo gau ga-duuli goe gadoo be-di abaaba mau-dangihi o-di waahale. Maa goe ga-lagamaaloo gi digaula, digaula gaa-tai nadau bontai i-di-goe.

18:20  Goe e-hai-loo gi-mouli i-nia mee ala e-gila-mai i au mee huogodoo ala e-helekai-ai.

18:21  Au helekai ala e-helekai-ai e-mee di-benebene di mouli, be e-daaligi di mouli. Malaa, goe e-hai-loo gii-kae nia mee ala e-gila-mai i au helekai.

18:22  Halahala-ina doo lodo, gei goe ga-gidee di mee dela e-humalia. Di mee e-hagamodongoohia bolo Dimaadua le e-humalia-adu gi-di-goe.

18:23  Digau hagaloale ma-ga-leelee, digaula e-manawa hila-gi-lala. Digau maluagina ma-ga-helekai gi-di heeu, digaula e-hagamuamua.

18:24  Hunu hagadau-ihoo hagalee duai gu-hagalee, gei hunu hagadau-ihoo e-koia e-manawa-dahi laa-hongo di manawa-dahi o tagahaanau daane.

Chapter 19

19:1  Tangada hagaloale gei e-donu, la-koia e-humalia i tangada dadaulia kai tilikai.

19:2  Di manawa hiihai maaloo ge de-iloo le e-hagalee humalia. Tee-noho-baba e-dagi goe gi-nia haingadaa.

19:3  Hunu daangada e-hagahuaidu-hua ginaadou mai i nadau hangahaihai dadaulia, ga-nomuli ga-hagaanga di-maa gi Dimaadua.

19:4  Digau maluagina e-gidee nadau ihoo hoou i-nia madagoaa huogodoo, gei digau hagaloale le e-deemee di benebene nadau ihoo hogoohi ala e-hai-mee ginai.

19:5  Maa goe ga-hagi-aga di kai-tilikai i-lodo di gowaa hai-gabunga, goe ga-hagaduadua, ga-deemee di-tanga gi-daha.

19:6  Nia daangada huogodoo e-halahala nnangaahai dumaalia o digau aamua. Nia daangada huogodoo e-hai hoo gi digau ala e-dugu-anga nadau wanga dehuia.

19:7  Nia gau o tangada hagaloale hagalee hila ang-gi mee. Deelaa-laa mee deai ono ehoo ai. E-duadua behee dono halaaheu, gei mee e-deemee di-gidee ono ehoo.

19:8  Aloho i-di-goe ge kabe nia mee huogodoo ala e-mee di-kabe. Hagalangahia-laa nia mee ala guu-kabe kooe, gei goe ga-maluagina.

19:9  Tangada ma-ga-helekai tilikai i-di gowaa hai-gabunga le e-deemee di-tanga gi-daha mo-di hagi-aga, ia guu-doo gi-lodo di hagaduadua.

19:10  Digau dadaulia hagalee belee mouli maluagina, gei nia hege hagalee belee dagi digau aamua.

19:11  Maa goe e-hagabaubau humalia, goe hagalee hagawelewele ngoohia. Di madagoaa tangada ma-gaa-hai dana hala adu gi-di-goe, di haga-de-langahia di hala la di hangaahai humalia damanaiee.

19:12  Di hagawelewele o-di king le e-hai gadoo be-di lee hamumu o-di laion, gei dono manawa dumaalia le e-hai gadoo be-di uwa haga-manawa lamalia.

19:13  Nia dama dadaulia e-mee di-hagahuaidu nadau maadua. Di ahina hai-lodo wou le e-hai gadoo be nia madaua e-doodoo.

19:14  Taane e-mee di-hai-mee gi-di hale mo nia bahihadu o ono maadua, malaa, ma go Dimaadua hua dela e-wanga gi mee dono lodo hagabaubau humalia.

19:15  Heia goe gi-hagatoo, kii-hua, gei goe ga-hiigai.

19:16  Benebene-ina nnaganoho a God, gei goe ga-mouli waalooloo. Maa goe ga-haga-delangahia nia maa, gei goe gaa-made.

19:17  Do madagoaa ma-gaa-wanga gi digau hagaloale, e-hai be-di mee ne-wanga gi Dimaadua, gei Dimaadua gaa-hui gi-di-goe.

19:18  Aago-ina au dama i-di madagoaa e-lligi-ai gei digaula e-kabe nadau mee. Maa goe hagalee aago au dama, goe e-hagamaamaa-hua au dama gii-bida hunahuna-ina ginaadou.

19:19  Dugu-ina ang-gi tangada hagawelewele ngoohia gi-kae-ina dahidamee o dono hagawelewele. Maa goe ga-hagamaamaa a-mee hagadahi i ono haingadaa, goe e-hai gi-hagamaamaa a-mee haga-lua.

19:20  Maa goe e-hagalongo gi nnelekai hagamaamaa, e-hiihai di kabe, dahi laangi hua gei goe gaa-hai tangada kabemee.

19:21  Nia daangada e-mee di-haganohonoho nia hagadilinga mee huogodoo, gei di-maa go-di hiihai o Dimaadua dela e-gila.

19:22  E-haga-langaadia ma-ga-hagagailaa. Digau hagaloale la-koia e-humalia i digau hai-kai tilikai.

19:23  Hagalongo gi Dimaadua, gei goe ga-mouli waalooloo, gaa-baba-hua gi au mee ala gu-hai-mee ginai, gei goe gaa-tanga gi-daha mo-di haingadaa.

19:24  Hunu daangada e-hagatoo di-wanga nadau meegai gi-lodo nadau ngudu.

19:25  Digau ala e-bida hagaamu ginaadou la-ne-belee hagaduadua, gei nia daangada ala e-de-iloo di-mee, gaa-kabe di mee belee hai. Maa goe e-kabemee, goe e-kabe i-di madagoaa dela e-aago goe gii-donu.

19:26  Tangada dela e-hagahuaidu dono damana, be e-hagabagi dono dinana gii-hana gi-daha mo dono hale, la-go tangada hua dela e-haga-langaadia ge hagabalumee go nia daangada.

19:27  Dagu dama-nei, maa goe ga-diiagi di kabemee, goe ga-haga-balumee au mee ala guu-lawa di-iloo.

19:28  Di tonu le e-de-igolo i-di madagoaa tangada hagadootonu ma-ga-hagamaanadu-hua bolo ia e-hagammaemmae dana dangada. Nia daangada huaidu e-hiihai gi-di kala o-di hagahuaidu.

19:29  Digau dadaulia ala e-bida hagaamu ginaadou, le e-hai-loo gii-kae di hagamamaawa.

Chapter 20

20:1  Di libaliba le e-haga-dadaulia goe, ge e-hai goe gi-leelee llauehe. E-dadaulia adu gi-di-goe maa goe ga-libaliba.

20:2  Goe gi-madagu i-di hagawelewele o-di king, be do madagu i-di hagawelewele o-di laion. Maa goe gaa-hai a-mee gi-hagawelewele, le e-bida mademade goe.

20:3  Tangada dadaulia e-mee di-daamada nia lagamaaloo. Di mee dela e-kaedahi e-humalia gi-haga-paa gi-daha mo nia lagamaaloo.

20:4  Taane dogi hadagee ma-ga-hagatoo di haga-maluu dana hadagee i-di madagoaa donu e-haga-maluu-ai, geia ana meegai e-hadi ai.

20:5  Nia hagabaubau o tangada le e-hai gadoo be nia wai i-lodo di monowai-geli llala. Malaa, tangada hua dela dono kabemee i-golo, ia e-mee dana huai ana wai.

20:6  Nia daangada dogologo e-helehelekai bolo ginaadou le e-humalia ge manawa-dahi, malaa, ma koai e-mee di-gidee tangada dela e-humalia ge manawa-dahi?

20:7  Nia damagiigi le e-humalia ang-gi ginaadou, maa di-nadau damana le e-helekai donu ge e-hai nia mee ala e-donu.

20:8  Di king e-noho i dono lohongo gabunga, e-modongoohia di huaidu i-di madagoaa mee ga-gidee di huaidu.

20:9  E-hai behee? Ma iai tangada i-golo e-mee di-helekai bolo ia ono hala ai, ono hala la-guu-kili gi-daha?

20:10  Dimaadua hagalee hiihai gi-nia daangada ala e-hai-hegau gi-nia mee pauna-mee mo nia hagatau-mee hai-gee.

20:11  Nia dama hogi e-haga-modongoohia-aga ginaadou mai i nadau mee ala e-hai. Goe e-mee di-iloo be digaula e-donu ge humalia.

20:12  Dimaadua gu-gaamai tadau golomada e-mmada-ai, mo tadau dalinga e-hagalongo-ai.

20:13  Maa goe gaa-dugu do madagoaa e-hai di madagoaa e-kiikii, goe ga-hagaloale. Hagadaadaamee-ina goe, gei au meegai la-gaa-logo.

20:14  Tangada hui goloo e-leelee-logo i-nia madagoaa huogodoo bolo di hui le e-hui-ngadaa, gei mee gaa-hana ga-leelee hagaamu dono wiini dela ne-kae.

20:15  Maa goe e-iloo dau mee dela e-helekai-ai, goe dau mee i-golo dela e-koia e-maluagina i-nia goolo be nia hadu hagalabagau.

20:16  Tangada dadaulia dela e-hagababa bolo ia gaa-hui-laa di boibana o tangada mai-i-daha, la-ne-belee daahi ana goloo e-hai-ai di haga-modongoohia di hui.

20:17  Au mee ala ne-kae kooe i-di ala hai-gee, e-mee-hua di kala-adu gi-di-goe be nia meegai kala, malaa, nomuli gei di-maa gaa-hai be-di ngudu hontula gelegele.

20:18  Hai-mee gi-nia helekai hagamaamaa humalia, gei goe ga-humalia-adu. Hudee hana gi-tauwa laa-daha mo-di haganohonoho i-mua.

20:19  Tamu dangada e-deemee di hagammuni. Hagaligaliga i-daha mo nia daangada ala e-leelee logo.

20:20  Maa goe ga-hagahuaidu o maadua, do mouli ga-gila-mai be-di malama made i-lodo di bouli.

20:21  Di haingoohia di-gidee o maluagina, e-haga-dulii-mai o humalia.

20:22  Hudee hagamaanadu bolo e-hui gi-muli di-mee ne-hai-hala. Hagadonu-ina Dimaadua, gei Mee gaa-hai di-maa gi-hai-donu.

20:23  Dimaadua hagalee hiihai gi digau ala e-hai-hegau gi-nia mee pauna-mee mo nia mee hagatau-mee ala e-hai-gee.

20:24  Ma go Dimaadua dela ne-hagadebene tadau ala. Dehee di hai o tangada e-iloo di ala o dono mouli?

20:25  Hagabaubau gii-donu i-mua di hagababa dau tigidaumaha ang-gi Dimaadua. Maa deeai, nomuli gei goe e-mee-hua di-lodo-huaidu i au hagababa ne-hai.

20:26  Di king kabemee e-iloo ma koai dela e-hai-hala, e-hagaduadua a-mee i dono dee-dumaalia.

20:27  Dimaadua ne-gaamai tadau hagamaanadu mo-di iloo. Gidaadou e-deemee di-pala hagammuni i gidaadou.

20:28  Di king le e-kae dono lohongo king i-di madagoaa ono mogobuna dagi le e-hai-donu, e-donu gei e-humalia ang-gi nia daangada huogodoo.

20:29  Gidaadou e-hagaamu di maaloo o-nia dama-daane mo nia dama-ahina, e-hagalaamua nia hinaa o digau mmaadua.

20:30  Hunu madagoaa gidaadou e-kae di hagammaemmae gii-mee gidaadou di-huli tadau hangahaihai.

Chapter 21

21:1  Dimaadua e-dagi di hagamamaanadu o-di king, e-dagi ngoohia be dana hai dela e-dagi di mmidi di monowai.

21:2  Goe e-hagamamaanadu bolo au mee huogodoo ala e-hai le e-hai-donu, malaa, gi-langahia bolo Dimaadua e-hagi-aga o hiihai.

21:3  Heia di mee donu e-humalia, dela di mee e-haga-tenetene Dimaadua laa-hongo di-gaamai gi Mee nia wanga-dehuia.

21:4  Digau huaidu e-dagi go nadau bida hagaamu mo nadau bida hagalaamua ginaadou. Deenei la di hala.

21:5  Haganohonoho-ina maalia i-mua goe ma-gaa-hai au mee, gei goe ga-logowaahee au mee. Maa goe ga-hai-hegau hagalimalima, goe ga-dee-dohu au mee i-nia madagoaa huogodoo.

21:6  O maluagina mai i do haihai hala, e-odi gi-daha ngoohia, malaa hagalee i-mua nia maluagina aalaa gaa-dagi goe gi-lodo di ngudu o-di made.

21:7  Digau huaidu e-hagaduadua go nadau huaidu ne-hai. Digaula hagalee hiihai e-hai nia mee donu.

21:8  Digau hala e-taele di ala bigabiga, digau donu e-hai go nia mee donu.

21:9  Di noho i-tua di hale la-koia e-humalia i-di noho i-lodo di hale i-baahi di ahina hai-lodo wou leelee logo.

21:10  Digau huaidu le e-hiigai gi-nia mee huaidu i-nia madagoaa huogodoo, digaula hagalee aloho i dahi dangada.

21:11  Tangada dadaulia hogi e-kabe ana hagamaanadu mai di hagaduadua o tangada dela e-bida hagaamu ia. Tangada kabemee e-kabe ana mee mai di aago.

21:12  God hua e-dahi dela e-donu, e-iloo nia mee ala e-hai i-lodo nia hale o digau huaidu, gei Mee ga-hagahuaidu digaula.

21:13  Maa goe ga-hagalee hiihai e-hagalongo gi-nia dangidangi o digau hagaloale, o dangidangi donu ang-gi di hagamaamaa la-ga-hagalee longono labelaa.

21:14  Maa dahi dangada ga-hagawelewele-adu gi-di-goe, di kisakis hagammuni gi mee le e-hagamanawa lamalia a-mee.

21:15  I-di lawa o-di haga-donudonu, nia daangada humalia le e-tenetene, gei digau huaidu nadau hagadagadagagee ai.

21:16  Di made le e-talitali nia daangada ala e-hula gi-daha mo-di hagamaanadu humalia.

21:17  Maa goe e-hiihai giibeni gi o goloo hui-ngadaa, nia waini, mo-nia meegai kala e-hagalee-loo e-hai goe gi-maluagina.

21:18  Digau huaidu gaa-bida hagaduadua ginaadou gi-di hagaduadua dela e-hiihai ginai bolo e-hagaduadua nia daangada humalia.

21:19  Di noho i-lodo di anggowaa la-koia e-humalia i-di noho i-baahi doo lodo wou leelee logo.

21:20  Nia daangada kabemee e-mouli maluagina haingoohia, gei digau dadaulia e-hagauwwou nadau bahihadu, e-limalima-hua di kili gi-daha nadau bahihadu i-di madagoaa hua ne-kumi nia maa.

21:21  Manawa dumaalia ge helekai donu, gei goe ga-mouli di mouli waalooloo. Digau ala i-golo ga-hagalaamua goe, ga-benebene goe hagahumalia.

21:22  Tagi hai-dauwa la-iai dono kabemee e-mee di hagamagedaa di waahale dela e-duuli go nia daangada maaloo, e-oho gi-daha nia abaaba ala e-hagadagadagagee ginai digaula.

21:23  Pula i-nia mee ala e-helekai-iei goe, maa goe hagalee hiihai gii-tale gi-nia haingadaa.

21:24  Hagia-mai tangada bida hagaamu ia, gei au ga-hagi-adu tangada bida hagalaamua ia, e-hagapuu gi ono hagahumalia, mo e-dehei-eia nia daangada.

21:25  Nia daangada hagatoo ala hagalee hiihai e-ngalua, e-bida daaligi ginaadou,

21:26  nadau mee huogodoo e-hai, le e-hagabaubau-hua ma ni-aha ala e-hiihai e-hai-mee ginai. Gei digau ala e-hai-hegau donu, e-mee di-wanga i-di manawa-dumaalia.

21:27  Dimaadua e-de-hiihai gi digau huaidu ma-gaa-hai nadau tigidaumaha mai i nadau maanadu huaidu.

21:28  Di hagamodongoohia-aga o tangada kai-tilikai le e-hagalee hagadonu go tangada, gei nnelekai o tangada hagamaanadu hagatau le e-hagalongo ginai.

21:29  Digau hai-hegau donu le e-modongoohia ang-gi ginaadou bolo ginaadou la digau humalia, gei digau huaidu le e-hagi-aga bolo ginaadou le e-mee, e-iloo, gei digaula le e-de-mee, e-de-iloo mai hua i-lodo.

21:30  Di kabemee o tuaidina, di madamada mo-di iloo, nia mee aanei la-hagalee ono hagamaamaa ai, maa Dimaadua e-hai-baahi-adu.

21:31  Goe e-mee di-hagatogomaalia au hoodo e-hula gi tauwa, malaa, ma go Dimaadua dela e-gowadu di aali.

Chapter 22

22:1  Maa goe bolo goe e-hilihili i-mehanga di ingoo humalia mo nia maluagina, goe hilihilia di ingoo humalia.

22:2  Digau maluagina mo digau hagaloale le e-hai-hua be-di mee e-dahi, idimaa, Dimaadua ne-hai digaula huogodoo.

22:3  Digau ala e-iloo di haga-maanadu, le e-gidee di haingadaa ma-gaa-tale ang-gi ginaadou, gei ginaadou e-haga-paa gi-daha. Gei-ogo tangada dela ono hagamaanadu ai, ia e-haele-hua hagahuudonu gi-lodo di haingadaa deelaa, ga-maanadu-laa nomuli bolo ia gu-ihala.

22:4  Hagalongo gi Dimaadua, mo-di hila-gi-lala, gei goe ga-maluagina, nia daangada ga-hagalaamua goe, gei goe ga-mouli waalooloo.

22:5  Maa goe e-aloho i do mouli, goe hagapaa gi-daha mo-di ala o digau huaidu ala e-hagamada belee kumi goe.

22:6  Aago-ina tamagiigi gi-di hai o dono mouli, gei mee ga-langahia-eia i-lodo di waalooloo o dono mouli.

22:7  Digau hagaloale la nia hege ni digau maluagina. Kae au bahihadu boibana, gei goe gaa-hai di hege ni tangada ana bahihadu.

22:8  Maa goe gaa-dogi nia hagadili ni tee-donu, nia lauwa llauehe ga-kila-aga, gei dau hagaduadua digau i-golo la-ga-hagalee.

22:9  Manawa dumaalia, haangai-ina digau hagaloale, gei goe ga-hai-mee gi-di maluagina.

22:10  Diagia tangada bida hagalaamua ia, gei nia lagamaaloo, heheebagi, mo-di haga-balumee dangada la-ga-hagalee.

22:11  Maa goe e-aloho i-di manawa-madammaa mo tumaalia o au agoago, di king la-gaa-hai do ehoo.

22:12  Dimaadua e-daumada, e-daahi di tonu mai dana haga-dee-gila nnelekai digau kai-tilikai.

22:13  Digau hagatoo le e-noho i-lodo nadau hale. Digaula e-helekai bolo maa nei bolo ginaadou ga-ulu gi-di malaelae, ginaadou gaa-gai go nia laion.

22:14  Di mouli be-di manu la-di mee helehele dangada. Ma e-kumi digau ala e-hagawelewele ginai Dimaadua.

22:15  Nia dama le e-haihai-hua go nadau balu-dadaagala, nia mee ala ne-hagamaanadu ai, gei di paa le e-aago digaula gi-hagalongo.

22:16  Maa goe gaa-hai au kisakis gi digau maluagina be e-hagaduadua digau hagaloale gi-haga-maluagina-ina goe, goe modo-goe gaa-hai tangada hagaloale.

22:17  Hagalongo gei au ga-aago-adu nnelekai digau kabemee. Hagamaumau-ina nadau agoago,

22:18  gei goe ga-manawa lamalia maa goe ga-hagamaumau nia maa gi-iloo gi-lodo do libogo.

22:19  Au e-hiihai goe gi-hagadagadagagee gi Dimaadua, dela tadinga au ga-hagi-adu nia maa dolomeenei.

22:20  Au guu-hihi gi-lala nnelekai motolu adu gi-di-goe. Nnelekai aanei e-honu di kabemee mo-di hagamaamaa,

22:21  ga-aago-adu di hai o-di tonu. Do madagoaa ma-gaa-hana e-halahala di-maa, goe ga-gaamai nnelekai ala e-donu.

22:22  Hudee kae-ina nia haingadaa o digau hagaloale gi o haga-haingoohia, idimaa ma kooe dela e-mee. Hudee kae-ina nia haingadaa o digau gu-deemee di-kae di hagamaamaa i-lodo di gowaa hai-gabunga gi o haga-haingoohia.

22:23  Dimaadua ga-huli-mai i nadau baahi, ga-hai-baahi ang-gi tangada dela e-hai-baahi ang-gi digaula.

22:24  Hudee hai-hoo ang-gi nia daangada ala e-hagamadagudagu dangada, gei e-hagawelewele ngoohia.

22:25  Goe e-mee-hua di-kabe nadau hangahaihai, ga-deemee-iei goe di huli.

22:26  Hudee hagababa bolo goe gaa-hui-laa di boibana o tuai dangada.

22:27  Maa goe ga-deemee di hui di-maa, digaula gaa-kae hogi do hada-kii.

22:28  Hudee negenege di hagageinga gowaa dela ne-haga-noho go au gau mmaadua.

22:29  Hagia-mai dahi dangada ngalua humalia, gei au ga-hagi-adu gi-di-goe tangada dela e-koia e-humalia e-tau ang-gi di-benebene di king.

Chapter 23

23:1  Do madagoaa ma-gaa-noho gi-lala e-miami dalia tangada hagalabagau, hagamaanadu-ina be mee la koai.

23:2  Maa goe e-hiihai huoloo gi-nia meegai, hagakono-ina.

23:3  Hudee hagagailaa gi-nia meegai a-maa ala e-gowadu gi-di-goe. Holongo mee e-mee-hua di-halahalau goe.

23:4  Gi-modongoohia-e-goe gi-de-duadua-hua goe di hai goe gi-maluagina.

23:5  Au bahihadu le e-mee-hua di-odi i-lodo tama-madagoaa dulii-loo, e-limalima gadoo be di bahihadu ma-gaa-hai ono bakau, ga-maangi gi-daha mo goe be-di ‘eagle’.

23:6  Hudee geina nia meegai tangada dumaanga. Hudee hiihai gi ana meegai humalia.

23:7  Mee ga-helekai, “Miami labelaa”, gei ana helekai hagalee hai be dono manawa. Dono hagabaubau le e-hagamodongoohia-hua ia.

23:8  Goe ga-lualua au mee ne-gai. Au helekai hagalaamua huogodoo ga-hagauwwou.

23:9  Hudee hagamada e-leelee gi tangada dadaulia. Mee hagalee hiihai gi-di kabemee o au helekai.

23:10  Hudee negenege-ina di hagageinga gowaa, be hudee kae-ina nia gowaa o digau ala nadau maadua ai.

23:11  Dimaadua la-go di-nadau abaaba, ga-huli-mai i nadau baahi e-hai-baahi adu.

23:12  Hagalongo gi do tintei, kabe-ina au mee huogodoo ala e-mee.

23:13  Hudee dugua di-aago nia dama. Di paa aago hagalee e-daaligi digaula.

23:14  Di paa aago e-mee-hua di-daahi nadau mouli gi-daha mo-di made.

23:15  Dagu dama-nei, maa goe ga-kabemee, au ga-tenetene huoloo.

23:16  Au e-manawa hagaamu i dogu madagoaa ma-ga-longono-eau goe e-helehelekai nia helekai kabemee.

23:17  Hudee manawa-dubua i digau haihai huaidu. Heia do hagalabagau i Dimaadua gi-dagi-ina do mouli.

23:18  Maa goe gaa-hai beenei, goe ga-hai-mee gi-di mouli madamada maalia.

23:19  Hagalongo-mai dagu dama-daane, hagamaanadu-ina gii-donu gi-di ala dela e-mouli-iei goe.

23:20  Hudee buni-anga gi digau gai dagaao, be digau ala e-hagalugai.

23:21  Idimaa, digau libaliba mo digau hagalugai ga-hagaloale. Maa deenei-hua dau hai e-miami gei e-kii, goe ga-limalima-hua gaa-gahu gi-nia gahu-popo.

23:22  Hagalongo gi do damana. Goe e-deemee di i-golo laa-daha mo mee. Heia dau di-mee-bolo mee gi do dinana dono madagoaa ma-ga-madua-ai.

23:23  Di tonu, kabemee, hagalongo, mo-di hagamaanadu humalia, laa aanei nia mee iai ono maluagina ala belee hui kooe, gei nia maa le e-hui-ngadaa balua di hui kooe gi-daha.

23:24  Tamana o tangada dela e-hangaahai donu le e-tenetene huoloo. Goe e-mee di-hagalabagau dau dama kabemee, e-hagadagadagagee ginai mo-di hagaamu ana mee ala e-hai.

23:25  Heia do damana mo do dinana gii-mee di-hagaamu goe. Heia do dinana gi-tenetene.

23:26  Hagalongo-mai gi-modongoohia, dagu dama-daane, ge daudalia dogu mouli nogo mouli-iei au.

23:27  Nia ahina ala e-huihui nadau huaidina, mo nia ahina ala e-mouli be-di mouli o-di manu, aalaa go ginaadou e-lahi goe gi-di made.

23:28  Digaula e-tali goe gadoo be digau gaiaa, digaula e-hai nia daane dogologo gi-manawa-logo.

23:29  Hagia-mai tangada inu dagaao dela e-hiihai bolo ia e-hagamada e-inu nia hagadilinga dagaao humalia e-logo, gei-au ga-hagi-adu gi-di-goe tangada lodo-huaidu ge manawa-gee, e-hai-baahi gi-nia mee i-nia madagoaa huogodoo. Nia golomada o-maa e-mmee-agogo, gei-ogo di gili o-maa le e-moholehole, dono hadinga ai.

23:30  Hagia-mai tangada inu dagaao dela e-hiihai bolo ia e-hagamada e-inu nia hagadilinga dagaao humalia e-logo, gei-au ga-hagi-adu gi-di-goe tangada lodo-huaidu ge manawa-gee, e-hai-baahi gi-nia mee i-nia madagoaa huogodoo. Nia golomada o-maa e-mmee-agogo, gei-ogo di gili o-maa le e-moholehole, dono hadinga ai.

23:31  Hudee dugua di waini gi-hagamada-ina goe, eimaha ma di waini le e-mmee humalia ge e-dabadaba i-lodo di ibu, ge e-inu ngoohia.

23:32  Luada-hua dono daiaa, gei goe ga-longono-ia bolo goe ne-hai be-di mee ne-kadi go di gihaa poisin.

23:33  Nia ada-mee haga-maehagi ga-kila-adu i-mua o golomada, gei goe ga-de-iloo do hagabaubau mo do helekai gi-madammaa.

23:34  Goe ga-longono di mmae, e-mmae gadoo be-di mmae o do madagoaa dela ma-ga-hana-iei goe i-di moana, e-magi moana, huduhudu go di wagabaalii ma-ga-hahaa-gee.

23:35  Goe ga-helekai boloo, “Au bolo au gu-hagamaawa, gei au gu-daaligi go tangada, gei au dela e-de-langahia-eau. Au e-aha dela e-deemee di-duu gi-nua? Au e-hiihai e-inu labelaa.”

Chapter 24

24:1  Hudee manawa-dubua i digau haihai di huaidu, hudee hagamada e-hai-hoo gi digaula.

24:2  Nadau mee ala e-hagamaanadu la nia hagahuaidu. I-nia madagoaa huogodoo digaula ma-gaa-huge nadau ngudu, tangada i-golo e-tale gi-di haingadaa.

24:3  Nia hale le e-hau i-hongo di hagamau o-di iloo mo-di modongoohia.

24:4  Nia goloo ala e-maluagina ge madamada le e-haga-honu nia ruum ala iai di kabemee.

24:5  Di kabemee le e-koia e-humalia i-di maaloo, uaa, di kabemee le e-koia e-hagalabagau i-di maaloo.

24:6  Idimaa, goodou gi-hagataele-ina gi-humalia di-godou ala dela e-heebagi-iei goodou i-mua di-godou hula gi tauwa. Maa goodou gaa-kae nia helekai hagamaamaa gi-mada-logo, goodou koia ga-mada-maaloo i-lodo tauwa.

24:7  Nnelekai kabemee la-koia e-llala gi digau dadaulia di modongoohia. Nia mee hagalabagau ma-ga-helehelekai-ai, digaula nadau helekai ai.

24:8  Maa goe e-haganohonoho di-hai nia mee huaidu i-nia madagoaa huogodoo, do mouli gi-muli e-gila-mai goe tangada haihai di huaidu.

24:9  Di ingoo hua di hagamaanadu o tangada dadaulia la di hala. Nia daangada e-de-hiihai gi tangada ana mee ai dela-hua ana hagabalumee digau ala i-golo.

24:10  Maa goe e-bagege i-lodo di haingadaa, e-donu bolo goe tangada bagege.

24:11  Hudee duugia di hagamaamaa tangada dela e-lahi e-daaligi gii-made, gei mee digi hai dana mee hala.

24:12  Holongo goe e-helekai bolo goe hagalee dau, gei God e-iloo, e-gabunga o hagamaanadu. Mee e-daumada goe, Mee e-iloo-Ia. Mee gaa-hui goe gi au mee ala e-hai.

24:13  Dagu dama-nei, geina nia mee maangala lodo henua, ma e-humalia gadoo be nia mee maangala mai di gowaa benebene mee maangala, e-maangala i-hongo do holole.

24:14  Goe gi-modongoohia bolo di kabemee le e-humalia adu gi do mouli. Hai-mee gi-di kabemee, gei goe ga-hai-mee gi-di mouli madamada dela maalia.

24:15  Hudee heia goe gii-hai be digau huaidu ala e-hagatogomaalia e-gaiaa nia daangada mouli donu, be e-kae gi-daha nadau hale.

24:16  Ma e-aha digau ala e-donu e-tingatinga haga-hia, gei digaula e-tuu-aga labelaa gi-nua i-nia madagoaa huogodoo, gei nia lauwa llauehe e-oho gi-daha digau ala e-haihai di huaidu.

24:17  Hudee manawa lamalia gi do hagadaumee dono madagoaa ma-gaa-tale gi-di haingadaa, ge hudee tenetene dono madagoaa ma-gaa-doo gi-lodo di huaidu.

24:18  Dimaadua ga-iloo-Ia do madagoaa dela ma-ga-manawa beenei, ge-Ia ga-de-hiihai, ga-hagalee hagaduadua do hagadaumee.

24:19  Hudee heia nia daangada ala e-hai di huaidu gii-hai goe gi-manawa-gee. Hudee dubua gi digaula.

24:20  Tangada e-hai di huaidu, la-deai dono hagadagadagagee gi dono mouli ai. Mee ana mee e-gana ginai ai.

24:21  Dagu dama-nei, hagalabagau-ina Dimaadua mo-di hagalaamua-ina di king. Hudee buni-anga gi digau ala e-hai-baahi ang-gi meemaa.

24:22  Nia daangada ala e-hai beelaa, e-mee-hua di-hagahuaidu i-lodo tama-madagoaa dulii. E-hai behee? Goe e-de-iloo di haga-halauwa a God be-di king dela e-mee nau hai?!

24:23  Nia daangada kabemee gu-helekai labelaa nia mee aanei: E-hagalee humalia ang-gi tangada hai-gabunga ma-gaa-dugu geegee nia daangada.

24:24  Maa digaula ga-haga-iloo bolo tangada ono hala ai le e-hala, nia daangada huogodoo ga-de-hiihai ga-hagahuaidu digaula.

24:25  Digau hai-gabunga ala e-hagaduadua digau hai-hala, digaula ga-maluagina ang-gi ginaadou, ga-hagalabagau go nia daangada.

24:26  Di helekai donu gi-di heeu la di hagamodongoohia o-di hagadau-ihoo donu.

24:27  Hudee hauhia mo-di haga-noho-ina doo hale, gaa-dae-loo gi dau gowaa gu-togomaalia, gei goe gu-modongoohia bolo goe e-mee di kae do mouli mai di gowaa deelaa.

24:28  Hudee hagadootonu kai-tilikai balumee i digau ala i-golo, be helekai halahalau i digaula.

24:29  Hudee helekai boloo, “Au gaa-hai gi digaula di mee digaula ne-hai-mai! Au gaa-hai au gi-tongaadahi gi digaula!”

24:30  Au gu-haele laa-lodo nia gowaa dogi-laagau o tangada hagatoo dadaulia.

24:31  Nia maa guu-honu waa-geinga duduia, guu-buni geinga lloo. Di abaaba duuli nia maa gu-mooho gi-lala.

24:32  Au ne-gidee di mee deenei, gu-hagamaanadu-ai, gei au guu-kabe dagu hagamaanadu mai di-maa:

24:33  Hagagemu gii-kii goe. Habinia oo lima, kii hagamolooloo.

24:34  Malaa i-di madagoaa e-kii-iei goe, di hagaloale ga-heebagi-adu gadoo be tangada gaiaa.

Chapter 25

25:1  Aanei nia agoago podo labelaa a Solomon, ne-hihi go digau hihi i-di gowaa e-noho-ai King Hezekiah o Judah.

25:2  Gidaadou e-hagalaamua a God i ana mee ala e-hagammuni. Gidaadou e-hagalaamua nia king i nadau hagamodongoohia.

25:3  Goe e-de-iloo nia mee di king e-hagamaanadu; ana hagamaanadu e-mogowaa-loo i gidaadou, gadoo be tuutuu i-nua o-di langi be-di llala o-di moana.

25:4  Daa-ina di milimilia gi-daha mo-di silber, gei tangada hai-silber e-mee di-hai di-maa gi-madamada.

25:5  Daa-ina digau hagamaamaa huaidu gi-daha mo-di king, gei nia daangada la-ga-iloo di haihai donu o-di king mo dono oobidi.

25:6  Do madagoaa ma-gaa-duu i-mua di king, hudee heia a-mee gi-hagaamu goe, hudee halahalau-ina a-mee bolo goe tangada hagalabagau.

25:7  Ma koia e-humalia maa goe gaa-gahi gii-noho i-di lohongo nonua, i-di mee dela ma-gaa-hai bolo gi-wanga-ina do lohongo gi tei dangada mada-hagalabagau.

25:8  Hudee limalima di-hana gi-di gowaa hai-gabunga i-di gili dau mee ne-gidee-goe. Maa dahi dangada hagadootonu i-golo ga-hagamodongoohia-aga bolo goe e-ihala, gei goe gaa-hai dau-aha?

25:9  Maa goe mo tangada e-noho i doo baahi hagalee donu i-gulu mehanga, hudee hagi-anga gi-nia daangada nia mee ala e-de-iloo digaula,

25:10  gi-de-iloo nia daangada bolo goe e-deemee di-hagammuni nia mee de-iloo, gaa-hai goe gi-langaadia, ga-haga-balumee go nia daangada i-nia madagoaa huogodoo.

25:11  Di hagamaanadu dela gu-haga-modongoohia madammaa, le e-hai gadoo be-di ada ne-hai gi-nia goolo ne-wanga gi-lodo silber.

25:12  Di haga-iloo hagalliga mai tangada wouwou gi tangada dela e-hiihai e-hagalongo, la-koia e-maluagina i-nia hau goolo be nia hadu hagalabagau ala ne-hai gi-nia goolo madammaa.

25:13  Tangada hagau dela e-hagadagadagagee ginai le e-haga-manawa lamalia tangada dela e-hagau a-mee, gadoo be nia wai magalillili e-haga-manawa lamalia tangada i-lodo di welengina o-di madagoaa hagi huwa-laagau.

25:14  Nia daangada ala e-hagababa gi-nia mee ala hagalee wanga go ginaadou, le e-hai gadoo be-di madangi mo nia gololangi ala hagalee uwauwa.

25:15  Nnelekai baba ala e-hai tangada gi-hiihai gi do hiihai, e-mee-hua di-oho gi-daha di hai-baahi e-koia e-maaloo, ge e-mee hogi di-haga-manawa-baba di hiihai o-nia dagi.

25:16  Hudee geina nia mee maangala lodo henua gii-logo laa-hongo nia meegai ala e-tau-adu gi-di-goe. Logowaahee meegai e-hai goe gi-lualua.

25:17  Hudee tataanga gii-logo do hanahana hagahidihidi gi digau ala e-noho i doo baahi: digaula gaa-buhi ga-hagawelewele-adu gi-di-goe.

25:18  Di hagahuaidu tangada i-di ala hai-gee le e-hagalliga huoloo be tulumanu-dauwa, nia goloo heebagi, be-di amu maalei gaa.

25:19  Di hagadagadagagee gi tangada dela hagalee hagadagadagagee ginai i-di madagoaa haingadaa, le e-hai gadoo be tangada ono niha ai e-mama ana meegai, be e-hai be tangada e-haele habehabe.

25:20  Di daahili gi tangada lodo-huaidu le e-hai be-di daa gi-daha di gahu i-di laangi magalillili, be e-hai be-di hunuhunu di magibala gi-nia toolo.

25:21  Maa do hagadaumee le e-hiigai, haangai-ina a-mee. Maa do hagadaumee le e-hieinu, haga-inu-mia a-mee.

25:22  Goe gaa-hai a-mee gi-langaadia huoloo, gei Dimaadua ga-gowadu gi-di-goe do hagahumalia.

25:23  Di tamu dangada e-hidi-ai di hagawelewele gadoo be-di madangi o ngeia dela e-gaamai dana uwa.

25:24  Di noho i-tua di hale la-koia e-humalia i-di noho i-lodo di hale dalia di ahina hai-lodo wou leelee logo.

25:25  Di hagalongo gi-nia longo humalia mai tenua mogowaa, le e-hai gadoo be-di inu nia wai magalillili do madagoaa ma-ga-hieinu welengina.

25:26  Tangada humalia dela e-dugu ia gi tangada huaidu, le e-hagamilimilia dono mouli gadoo be nia wai uwa-aga dogolia, be-di monowai poisin.

25:27  Logowaahee nia mee maangala lodo-henua le e-huaidu adu gi-di-goe, dela gadoo di-halahala gi-logowaahee nia hagaamu hagalaamua.

25:28  Maa goe e-deemee di-benebene do hagawelewele, goe gu-deai do hagamaamaa ai, gadoo be di waahale ono abaaba ai, e-mahuge-hua gi tauwa.

Chapter 26

26:1  Di hagalaamua tangada dadaulia la-gu-hagalee donu, e-dee-tau gadoo be nia ‘snow’ i-lodo di madagoaa mahanahana, be-di uwa e-doo i-di madagoaa hagi huwa laagau.

26:2  Nia hagahuaidu e-deemee di-hagammae goe maa goe hagalee tau-anga. Nia maa e-hai gadoo be nia manu mamaangi ala e-mmaangi-laa-laa gei hagalee tanga gi-nua.

26:3  Goe e-hai gi hagamaawa di hoodo, goe e-hai gi-wanga di baalanga gi-lodo di ngudu di ‘donkey’, gadoo be goe dela e-hai gi-hagamaawa tangada dadaulia.

26:4  Maa goe ga-helekai gi-di balu heeu, goe guu-hai be-di balu dangada dela ne-heeu dana heeu.

26:5  Di helekai balu helekai gi-di balu heeu, gei tangada dela ne-hai dana balu heeu la-ga-iloo bolo ia le e-hagalee kabemee be dana hagamaanadu.

26:6  Maa nei bolo goe ga-hagau tangada dadaulia gi-kae-ina dau lede, e-humalia maa goe gaa-tuu gi-daha oo wae donu, goe e-halahala-hua nia haingadaa.

26:7  Tangada dadaulia e-deemee-loo di-hai-hegau gi-nia helekai podo, gadoo be tangada deemee di-heehee e-deemee-loo di-hai-hegau gi ono wae!

26:8  Di hagaamu tangada dadaulia le e-hai gadoo be-di nnoo di hadu puu gi dono hagabaeha.

26:9  Tangada dadaulia ma-ga-hai-hegau gi-nia helekai kabemee le e-hai gadoo be tangada libaliba ma-ga-hudihudi nia mee duduia i dono lima.

26:10  Tangada haga-ngalua dangada ma-ga-haga-ngalua-hua dana dangada dadaulia dela e-haele-laa-laa, le e-hagammaemmae-hua digau huogodoo ala i-golo.

26:11  Tangada dadaulia dela e-taanga ana mee dadaulia, le e-hai gadoo be-di paana dela e-hana gi-muli gi ono lualua.

26:12  Tangada kaedahi dadaulia la-koia e-humalia i tangada dela e-hagamaanadu bolo ia tangada kabemee gei mee hagalee kabemee.

26:13  Tangada hagatoo le e-aha dela hagalee ulu gi-daha mo dono hale? Ma di-aha dela e-madagu-iei mee? Nia laion?

26:14  Tangada hagatoo le e-hulihuli-hua i-hongo dono moenge, mee e-deemee di-hana gi-mogowaa, gadoo be-di bontai dela e-hugehuge gi-nia hinsis.

26:15  Hunu daangada e-hagatoo di-wanga nadau meegai gi-lodo nadau ngudu.

26:16  Tangada dadaulia e-hagamaanadu bolo ia la-koia e-kabemee i-nia daane dogohidu ala e-mee di-hagamaanadu nnadinga o nadau hagabaubau.

26:17  Di daadaamee gi-di lagamaaloo dela hagalee dau-adu gi-di-goe, le e-hai gadoo be-di hana i-hongo di ala mo-di kumi talinga o-di paana.

26:18  Tangada ma-ga-halahalau tangada, gaa-lawa gaa-hai bolo ia e-hai-hua ana daagala, le e-hai gadoo be tangada dadaulia dela e-hai ana dadaagala gi-nia goloo-dauwa hagalliga.

26:19  Tangada ma-ga-halahalau tangada, gaa-lawa gaa-hai bolo ia e-hai-hua ana daagala, le e-hai gadoo be tangada dadaulia dela e-hai ana dadaagala gi-nia goloo-dauwa hagalliga.

26:20  Ma nia dohomu ai, di ahi la-gaa-made. Di tamu dangada la-ga-hagalee, di heheebagi la-ga-hagalee.

26:21  Nia malala e-daahi di ulaula di ahi gii-gaa, nia dohomu e-haga-ula di ahi, e-hai gadoo be digau haga-hinihini dangada e-daahi nia lagamaaloo gi i-golo.

26:22  Tamu dangada le e-kala! Gidaadou e-hiihai e-holo di-maa!

26:23  Nnelekai tilikai ala e-hagammuni do hagamaanadu donu, le e-hai gadoo be-di humu madamada e-hii di baalanga hui-ngoohia ne-hai gi-nia gelegele dogolia.

26:24  Tangada dela e-mouli laa-daha mo ana helekai le e-hagammuni dono dee-hiihai i-tua o ana helekai haga-hiihai.

26:25  Ana helekai e-hagalongo ginai le e-haga-humalia, gei goe hudee hagadonu-ina a-mee, idimaa dono manawa le e-honutulu dono hagadugina.

26:26  Mee e-mee di-hagammuni dono hagadugina, gei nia daangada huogodoo e-gidee ana mee huaidu ala e-hai.

26:27  Nia daangada ala e-hagatogomaalia nadau mee helehele dangada, digaula e-bida kumi-hua ginaadou. Nia daangada ala e-haga-doloo nia gelegele tenua, la-gaa-beehi modo-ginaadou.

26:28  Maa goe e-de-hiihai gi tangada gei goe ga-hiihai e-hagahuaidu a-mee gi-nia kai-tilikai. Nnelekai balu hagaamu dangada la-hagalee gaamai ana mee dela-hua go di hagahuaidu.

Chapter 27

27:1  Hudee hagaamuina i-nia mee o daiaa. Goe e-de-iloo be nia ma ni-aha ala ma-gaa-hai daiaa.

27:2  Hudee bida hagaamuina goe. Heia nia daangada ala i-golo mo digau ala e-de-iloo-ginaadou goe, gi-hagaamuina goe.

27:3  Taamaha o-nia hadu mo nia gelegele la-hagalee tau-loo gi-di haingadaa o tangada dadaulia ma-ga-haga-gila-aga.

27:4  Di hagawelewele le e-haga-mmaemmae, ge e-hiihai e-oho, gei di hagawelewele e-hagalee tau-loo gi-di dubua.

27:5  Koia e-humalia maa goe ga-haga-donu haga-madammaa nia hai-hala o tangada. Koia e-humalia i mee ma-ga-hagamaanadu bolo goe hagalee hila ang-gi deia.

27:6  Do ehoo e-humalia-hua, ma e-aha maa mee ga-hagahuaidu oo lodo. Gei do hagadaumee ma-ga-daabudi goe, pula i-di-goe!

27:7  Maa goe ga-maaluu, goe hagalee hiihai gi-nia meegai maangala, gei goe ma-ga-hiigai, nia meegai mmala e-kala be nia meegai maangala.

27:8  Tangada dela e-mogowaa i dono hale, le e-hai gadoo be-di manu dela e-mogowaa i dono waehongo.

27:9  Di lolo-kala mo nia ‘incense’ hagakala e-haga-manawa tenetene goe, malaa, nia haingadaa e-oho gi-daha di-noho o-di aumaalia o do hagabaubau.

27:10  Hudee haga-de-langahia-ina o ehoo be nia hoo o do damana. Maa goe gaa-tale gi-di haingadaa, hudee halahala-ina di hagamaamaa mai do duaahina. Tangada hoohoo-mai e-noho i doo baahi e-mee di-hagamaamaa goe laa-hongo di hagamaamaa o do duaahina dela e-mogowaa-loo.

27:11  Dagu dama-nei, heia goe gi-kabemee, gei au ga-tenetene. Agu helekai hagahonu i-golo, e-mee di-helekai-ai gi digau ala e-helekai hai-baahi mai gi-di-au.

27:12  Tangada hagabaubau ga-gidee nia haingadaa e-lloomoi, geia e-hagapaa gi-daha, gei tangada ono hagabaubau ai, e-haele haga-huudonu gi-nia maa, nomuli ga-tilikai-hua-laa.

27:13  Tangada dadaulia dela e-hagababa bolo ia gaa-hui-laa di boibana o tangada mai-i-daha, le e-humalia e-daa dana gowaa donu e-hai-ai di hui modongoohia.

27:14  Di hagaaloho o ehoo hagaluada dela e-hagalongoaa gi-nua, le e-hai gadoo be-di haga-huaidu halauwa digaula.

27:15  Di ahina hai-lodo wou leelee logo, le e-hai gadoo be nia mada-wai doodoo madaua i-di laangi uwauwa.

27:16  Dehee dau hai e-hai a-mee gii-noho dee-muu? Goe gu-hagamada e-hai di madangi gii-noho gi-hagalee gono, be goe gu-hagamada e-daahi doo lima honutulu oel?

27:17  Nia daangada e-kabe mai baahi nia daangada, gadoo be tulumanu e-olo dana hulumanu gii-gaa.

27:18  Benabena-ina di laagau-‘fig’, gei goe ga-miami nia huwa-‘fig’. Di hege dela e-benebene dono dagi aamua la-ga-hagalaamua.

27:19  Ma go o golomada donu ala e-gidee goe i-lodo di ada o-nia wai, gei di-maa go do mouli donu dela e-gidee goe i-lodo do hadu-manawa.

27:20  Nia hiihai o tangada le e-hai gadoo be tenua o digau mmade: I-nia madagoaa huogodoo ma e-hiihai gi-nia mee ala i-golo.

27:21  Di ahi e-haga-madammaa nia goolo mono silber. Nnangahaihai o tangada e-mee di-hagamodongoohia-aga labelaa.

27:22  Ma e-aha maa goe e-daaligi tangada dadaulia gi-hagalaumae, gei goe e-deemee di-daa dono dadaulia gi-daha mo mee.

27:23  Benabena-ina au siibi mo au kau hagahumalia gii-dau hai dela e-mee,

27:24  idimaa di maluagina hagalee noho-mau. Nia henua llauehe hogi hagalee noho-hua beelaa.

27:25  Goe gu-haala gi-daha nia geinga-tolo, mo nia geinga i-hongo nia gowaa nnoonua, gei di madagoaa hua deelaa, nia geinga-tolo nomuli e-tomo-aga labelaa.

27:26  Goe e-mee di-hai au gahu mai nia gili-siibi, goe e-mee di-hui dau gowaa gi-nia bahihadu mai di huihui o hunu kuudi i au kuudi.

27:27  Nia kuudi ala i-golo ga-haangai goe mo do madahaanau mo au hege-ahina gi-nia milugu.

Chapter 28

28:1  Tangada huaidu e-lele, ma e-aha maa tangada e-waluwalu a-mee ai. Gei-ogo tangada e-donu le e-manawa haga-mataane be-di laion.

28:2  Di madagoaa tenua damana ma-gaa-hai di hala, nia dagi e-koodai. Tenua damana dela e-noho i-lodo di maaloo la-go tenua dela e-dagi go tagi kabemee hagabaubau donu.

28:3  Tagi dela e-hagaduadua digau hagaloale, le e-hai gadoo be-di uwa dela e-daaligi gi-daha nia hagadili meegai.

28:4  Maa goe hagalee hagalabagau nnaganoho, goe e-dau gi-baahi digau huaidu. Maa goe ga-daudali nia maa, goe e-hai-baahi gi digau huaidu.

28:5  Digau mouli huaidu e-de-iloo di tonu la-di-aha. Malaa, digau ala e-halahala Dimaadua, ginaadou e-modongoohia huoloo.

28:6  Di hagaloale mo-di mouli di tonu, la-koia e-humalia i-di maluagina mo-di mouli huaidu.

28:7  Tama-daane dela e-daudali nnaganoho le e-kabemee. Gei tama-daane dela e-hai-hoo gi-nia balu daangada le e-haga-manawa-gee dono damana.

28:8  Maa do maluagina ne-gila-mai i-di wiini ne-kae nia hagahumalia o-nia daangada mai nadau dee-dohu, o maluagina la-gaa-wanga gi tangada dela e-manawa dumaalia gi digau hagaloale.

28:9  Maa goe hagalee daudali nnaganoho, Dimaadua ga-de-hiihai e-hagalongo gi dau hai dalodalo.

28:10  Maa goe ga-halahalau tangada e-donu gi-heia di mee huaidu, goe gaa-doo gi-lodo dau hele donu. Digau nadau ihala ai le e-kae nadau hui.

28:11  Digau maluagina e-hagamaanadu i-nia madagoaa huogodoo bolo ginaadou e-kabemee, malaa, tangada hagaloale dela e-iloo nia mouli o-nia daangada, e-iloo bolo digaula la-hagalee kabemee.

28:12  Di madagoaa nia daane humalia ma-gaa-dagi, nia daangada huogodoo e-budu. Maa nia daane huaidu gaa-dagi, nia daangada e-pala hagammuni.

28:13  Goe e-hagalee haadanga-lamalia i-lodo do mouli maa goe e-hagamada e-hagammuni oo hala. Haagia oo hala, kilia nia maa gi-daha, gei Dimaadua ga-dumaalia-adu.

28:14  Daudalia Dimaadua i-nia madagoaa huogodoo, gei goe ga-maluagina. Maa goe e-haga-hamaaloo do manawa, goe ga-huaidu-adu gi-di-goe.

28:15  Digau hagaloale nadau hagamaamaa ai mai baahi tagi huaidu. Mee e-hagalliga be-di laion hagawelewele, be-di manu-‘bear’ hagamadagudagu dangada.

28:16  Tagi dela e-hagalee hagabaubau humalia la di tagi huaidu hagamuamua. Tagi dela e-de-hiihai gi-di mouli huaidu le e-dagi waalooloo beelaa.

28:17  Tangada ne-hala i dana daaligi tangada gii-made, e-geli-hua dono luwa daalunga hagalimalima gi ono mahi. Hudee dugu-ina a-mee.

28:18  Heia nia mee e-donu, gei goe ga-mouli. Maa goe e-haihai-hua go nia mee huaidu, goe ga-hinga-hua.

28:19  Tangada ngalua hagamadabouli lodo-henua e-logowaahee ana meegai e-gai. Nia daangada ala e-hagauwwou nadau madagoaa ga-hagaloale i-nia madagoaa huogodoo.

28:20  Nia daangada e-donu ga-mouli di mouli maluagina, di mouli tenetene. Malaa, maa goe e-hiihai e-hagalimalima gi-maluagina, goe ga-hagaduadua.

28:21  Di dugu nia daangada geegee le e-hai-gee. Malaa, hunu gau hai-gabunga ga-hai-hegau ihala gii-kae nia hui hai-gee, ma e-aha maa nia hui halahalau le e-lligi-loo.

28:22  Nia daangada dumaanga e-hagalimalima gi-maluagina ginaadou, gei digaula e-de-iloo di madagoaa di hagaloale ma-ga-dau-mai-ai.

28:23  Heia tangada gii-donu, nomuli gei mee ga-danggee manawa-hagaamu laa-hongo nnelekai hagalaamua.

28:24  Tangada e-hai bolo e-humalia-hua ma-ga-gaiaa i ono maadua, tangada deelaa la hagalee humalia i tangada gaiaa donu.

28:25  Manawa-dumaanga le e-gila-mai nia haingadaa. E-koia e-humalia adu gi-di-goe maa goe ga-gana gi Dimaadua.

28:26  E-dadaulia ma-ga-daudali o hagabaubau donu. Noho-baba, daudalia nia agoago o digau kabemee.

28:27  Wanga-ina gi digau hagaloale, gei o hagahumalia huogodoo la-gaa-dohu. Maa goe gaa-tai o golomada i-digau hagaloale, nia halauwa e-logo ga-tale-adu gi-di-goe.

28:28  Nia daangada e-pala hagammuni i-di madagoaa nia dagi huaidu ma-gaa-dagi. Malaa, di madagoaa digaula ga-hagalee dagi, digau e-hai-hegau donu gaa-dagi labelaa.

Chapter 29

29:1  Maa goe hagalee hagalongo gi-nia aago ala e-hai-adu gi-di-goe i-nia madagoaa huogodoo, dahi laangi hua gei goe ga-beehia ga-deemee di-hagahili.

29:2  Hagia-mai tagi hai-hegau donu, gei au ga-hagi-adu nia daangada tenetene. Hagia-mai tagi huaidu, gei au ga-hagi-adu nia daangada lodo-huaidu.

29:3  Maa goe e-hiihai gi-di kabemee, o maadua ga-hagaamu goe. Ma tadaulia dela e-hagauwwou nia bahihadu gi-nia ahina ala e-huihui nadau huaidina.

29:4  Maa di king e-hai-hegau gi-di tonu, dono henua la-ga-maaloo. Maa mee e-hagamaanadu-hua nia bahihadu, mee ga-hagahuaidu dono henua.

29:5  Maa goe ga-balu hagalaamua o ehoo, goe ne-haga-togomaalia doo hele e-kumi-iei goe.

29:6  Digau huaidu e-kumi i-lodo nadau hai-hala, gei digau ala e-hai-hegau donu le e-tenetene gei e-noho baba.

29:7  Tangada humalia e-iloo nia donu o digau hagaloale, gei digau huaidu e-deemee di-modongoohia nia mee beenei.

29:8  Nia daangada ala hagalee hagalabagau nia daangada le e-mee di hai nia waahale hagatau gi-hinihini gi-de-iloo nia mee. Digau kabemee e-benebene nia mee gii-noho i-di aumaalia.

29:9  Di madagoaa tangada hagamaanadu kabemee ga-lahi tangada dadaulia gi-di gowaa hai gabunga, tangada dadaulia le e-gadagada-hua, e-hagalongoaa i-lodo dono halahalau.

29:10  Nia daangada ala e-hiihai gi tadaaligi-dangada la-hagalee hiihai gi digau ala e-donu, gei nia daangada hai-hegau donu e-benebene digau beenei.

29:11  Digau dadaulia le e-haga-modongoohia-aga nadau hagawelewele, gei digau kabemee e-noho-baba gei e-hagakono nadau hagawelewele.

29:12  Maa di tagi e-hagalongo gi-nia longo kai-tilikai, ana daangada hai-hegau oobidi hogi la-gaa-hai nia daangada kai-tilikai.

29:13  Tangada hagaloale mo tangada hagaduadua dangada e-hai-mee ngaadahi gi-di mee deenei: Dimaadua ne-wanga gi meemaa nau golomada e-mmada ai.

29:14  Maa di king gaa-buni ga-benebene nia donu o tangada hagaloale, mee gaa-dagi waalooloo.

29:15  Di haga-donu mo-di aago le e-humalia ang-gi nia dama. Maa digaula gaa-hai-hua go nadau hiihai, digaula gaa-hai nadau dinana gi-langaadia i ginaadou.

29:16  Di madagoaa digau huaidu ma-gaa-dagi, nia hala e-logo ga-gila-aga. Malaa, digau e-hai-hegau donu ga-mouli ga-gidee-ginaadou di mmade o digau beelaa.

29:17  Aago-ina au dama, gei goe ga-tenetene hagaamu digaula i-nia madagoaa huogodoo. Digaula e-deemee-loo di-hai goe gi-langaadia.

29:18  Tenua dela hagalee hai-mee gi-nia helekai a God, la tenua noho dee-baba. Gei digau ala e-daahi nnaganoho a Dimaadua le e-maluagina!

29:19  Maa goe e-helekai-hua gi-nia hege, goe e-deemee di-hai digaula gii-donu. Holongo digaula e-mee di-modongoohia au helekai, malaa, digaula hagalee hagalongo-adu.

29:20  Tangada kaedahi dadaulia la-koia e-humalia i tangada dela e-helehelekai-hua geia hagalee hagabaubau.

29:21  Maa goe gaa-wanga nia mee huogodoo ala e-hiihai ginai au hege mai taamada di madagoaa nogo damagiigi-ai ginaadou, dahi laangi hua gei digaula gaa-kae au mee donu huogodoo.

29:22  Nia daangada hagawelewele-ngoohia e-hidi-mai nia lagamaaloo mo nia heebagi.

29:23  Di bida hagalaamua e-kae goe e-doo gi-lala. Maa goe e-manawa hila-gi-lala, goe ga-hagalabagau go nia daangada.

29:24  Di hoo o tangada gaiaa la-go dono hagadaumee kaedahi huaidu. Maa mee ga-hagi-aga di tonu i-lodo di gowaa hai-gabunga, mee e-kae di hagaduadua, gei Dimaadua ga-hagahuaidu a-mee maa mee hagalee hagi-aga di tonu.

29:25  E-hagalliga maa goe gaa-kae nnelekai o digau ala e-hagadadaumada goe, malaa, maa goe ga-gana gi Dimaadua, goe guu-tanga gi-daha mo nia haingadaa.

29:26  Nia daangada huogodoo e-hiihai gi-di manawa-dumaalia o di-nadau dagi, malaa, Dimaadua hua dela e-mee di-gowadu di tonu.

29:27  Digau hai-hegau donu le e-de-hiihai gi digau huaidu, gei digau huaidu le e-de-hiihai gi digau e-hai-hegau donu.

Chapter 30

30:1  Aanei la nia helekai hagalabagau a Agur, tama-daane a Jakeh: “God la-hagalee i dogu baahi, God la-hagalee i dogu baahi, au gu-deai dogu hagamaamaa ai.

30:2  Au guu-hai be-di manu, gu-hagalee hai be tangada, Au e-hagalee modongoohia be di hai o-nia daangada.

30:3  Au digi kabee-ina di kabemee, gei au e-de-iloo a God dela e-dabuaahia.

30:4  Ma tangada i-golo gu-iloo di kabemee o-di langi? Ma tangada i-golo guu-kumi di madangi gi-lodo dono lima? Be e-hii ana wai gi-lodo di mee gahu? Be e-haga-noho nia hagageinga o henuailala? Maa goe e-iloo, tangada la koai? Dana dama la-koai?

30:5  “God e-daahi ana hagababa huogodoo ala e-hai. Mee e-hai be-di abaaba ang-gi digau huogodoo ala e-halahala dono duuli.

30:6  Maa goe ga-helekai bolo Mee gu-helekai dahi mee digi helekai-ai, Mee gaa-hai goe gii-donu, ga-hagamodongoohia-adu bolo goe tangada kai-tilikai.”

30:7  Meenei God, au e-dangi-adu gi-dumaalia-ina mai nia mee e-lua i-mua dogu made:

30:8  Daahia au gi-daha mo nnelekai kai-tilikai, heia au gi-hagalee maluagina, ge gi-hagalee hagaloale. Gaamai-hua nia meegai ala e-dohu-mai.

30:9  Maa au gaa-logo agu meegai, holongo au e-helekai bolo au hagalee hiihai gi dahi mee mai doo baahi. Maa au ga-hagaloale, holongo au ga-gaiaa, ga-haga-balumee dogu God.

30:10  Hudee leelee hagahuaidu nia hege gi nadau dagi. Goe ga-hagahuaidu mo-di hagaduadua maa goe gaa-hai beelaa.

30:11  Nia daangada i-golo e-hagahuaidu halauwa nadau damana, gei digaula hagalee haga-maluagina nadau dinana.

30:12  Nia daangada i-golo e-hagamaanadu bolo ginaadou e-madammaa giagia, gei digaula e-dogolia-hua-giibeni.

30:13  Nia daangada i-golo e-hagamaanadu bolo ginaadou e-humalia huoloo, uaa, e-humalia behee go di-nadau hagamaanadu bolo ginaadou e-humalia!

30:14  Hunu daangada e-hai hagahuaidu digau hagaloale mo digau nadau mee ai. Deelaa di-nadau hai e-mouli-ai.

30:15  Tangada madamadau-mee ana dama-ahina dogolua, meemaa huogodoo e-haga-ingoo boloo, “Gaamai! Gaamai!” Nia mee e-haa aanei le e-deemee di-hagahonu:

30:16  = Tenua digau mmade. = Di ahina ana dama ai. = Tenua maangoo e-hiihai gi-di uwa. = Di ahi ulaula deemee di-diinai.

30:17  Maa goe e-haga-balumee do damana be e-hagauwwou do dinana i-di nau mmaadua, goe e-humalia e-wanga gi-nia manu gi-geina, be e-wanga gi-nia manu mamaangi lodo-geinga gi-kabe-ina o golomada.

30:18  Nia mee e-haa aanei le e-de-modongoohia-eau di-iloo:

30:19  = Di manu-‘eagle’ dela e-maangi i-di ahiaalangi. = Di gihaa lodo-geinga dela e-tolo i-hongo di hadu. = Di wagabaalii dela e-dele i-di moana gi tenua. = Di hai o taane mo-di ahina e-aaloho i nau mehanga.

30:20  Deenei di mouli hai be-di manu o-di ahina hai-lodo dela e-mouli-hua i dono hiihai: Mee gaa-hai di huaidu, ga-gaugau, ga-helekai boloo, “Au digi hai dagu mee hala!”

30:21  Nia mee e-haa aanei le e-hai henuailala gi-bolebole:

30:22  = Di hege e-hai di king. = Tangada dadaulia e-hai-mee gi-nia meegai huogodoo ala e-hiihai e-gai.

30:23  = Di ahina hai-lodo hagalee aloho-ai dono lodo. = Di hege ahina e-kae di lohongo o dono dagi-ahina.

30:24  Nia manu e-haa aanei i-hongo henuailala ala e-lligi gei e-koia e-kabemee:

30:25  = Nia loada: digaula e-paagege gei digaula e-benebene nadau meegai i-di madagoaa mahanahana.

30:26  = Nia manu lodo hadu: digaula e-paagege labelaa, gei digaula e-hau nadau hale i-lodo nia hadugalaa.

30:27  = Nia manu geinga-tolo-‘locust’: digaula nadau king ai, gei digaula e-mmaanege haga-madatau.

30:28  = Nia manu mogo: goe e-mee di-daahi dau mogo e-dahi i-lodo doo lima, gei goe e-gidee digaula i-lodo nia hale-king.

30:29  Nia mee e-haa aanei le e-hagagoboina di-mmada ginai i-di nadau haele:

30:30  = Nia laion, nia manu kaedahi maaloo gei hagalee mmaadagu i dahi manu.

30:31  = Nia kuudi. = Nia deduu-daane madamada. = Nia king i-mua nadau daangada.

30:32  Maa goe e-tau gi-tadaulia e-bida hagalaamua goe mo di haganohonoho nia mee huaidu, dugu-ina nia maa, gei goe gi-hagabaubaulia!

30:33  Maa goe ga-ununugi nia milugu, nia paadaa ga-gila-mai. Maa goe ga-hagamaawa di uhi tangada, di uhi tangada le e-dotodo. Maa goe gaa-haga-gila-aga di hagawelewele, gei di hagahuaidu ga-gila-aga.

Chapter 31

31:1  Aanei la nia helekai hagalabagau tinana o King Lemuel e-helekai gi mee:

31:2  “Goe tama-daane donu ni-aagu, di haga-honu o agu dangidangi. Ma di-aha dela ga-helekai-iei au gi-di-goe?

31:3  Hudee hagauwwou-ina oo mahi huogodoo gi-di haihai huaidu mo nia ahina, hudee hagauwwou-ina au bahihadu huogodoo gi-nia ahina. Digaula la-gu-oho nia king.

31:4  Lemuel, hagalongo-mai malaa. Nia king hagalee ne-belee inu nia waini be hagalee hiihai gi-nia dagaao.

31:5  Di madagoaa digaula ma-ga-libaliba, digaula e-de-langahia-e-ginaadou nia haganoho, e-haga-de-langahia-e-ginaadou nia donu o-nia daangada haingadaa.

31:6  Dagaao la-anga-hua gi digau ala e-hagangaengae, be anga-hua gi digau ala e-lodo-huaidu.

31:7  Dugu-ina gi digaula gi-libaliba e-haga-de-langahia nadau hagaloale mo nadau lodo-huaidu.

31:8  “Helekai-aga i-di baahi o digau ala e-deemee di-helekai i ginaadou. Abaabalia nia donu o-nia daangada huogodoo ala gu-deai nadau hagamaamaa ai.

31:9  Helekai i nadau baahi, gabunga digaula gii-donu. Abaabalia nia donu o digau hagaloale mo haingadaa.”

31:10  E-haingadaa di-gida di ahina dela e-hagamadabouli! Mee koia e-dahidamee i-nia hadu hagalabagau madamada!

31:11  Dono lodo e-gana gi mee, gei mee e-maluagina.

31:12  Di ahina deelaa, le e-benebene hagahumalia dono lodo i-di waalooloo o dono mouli dela e-mouli-ai, deai di mee huaidu e-tale gi mee ai.

31:13  Di ahina deelaa le e-daadaamee e-llanga ana gahu gi-nia huluhulu-siibi, ge e-llanga ana gahu-lenge.

31:14  Mee e-gaamai ana meegai haga-mogowaa gi-di-nau hale, e-hai gadoo be nia wagabaalii dali goloo.

31:15  Mee e-ala hagaluada-loo e-hagatogomaalia ana meegai, e-haangai digau dono hale mo-di hagi-anga ana hegau gi ana dama-ahina-hege.

31:16  Mee ga-gidee-ia di gowaa, geia e-hui di gowaa, e-dogi dana hadagee-waini gi ana bahihadu ala ne-kumi koia i ana moomee ala ne-hai.

31:17  Mee tangada ngalua hagamadabouli, e-noho-mau dono ngalua maaloo.

31:18  Mee e-iloo-ia nia dahidamee o-nia mee huogodoo ala e-hai koia, geia e-ngalua gaa-dae-loo gi-di boo-loo.

31:19  Mee e-bida dui-hua ono gahu donu gi ono lima.

31:20  Mee e-dumaalia ang-gi nia daangada hagaloale, mo digau ala e-haingadaa.

31:21  Mee hagalee maanadu e-logo i-di madagoaa ma-ga-magalillili, idimaa, digau dono hale gu-togomaalia nadau gahu mahanahana.

31:22  Mee e-dui ana gili moenge maluu, gei mee e-ulu gi-nia gahu madamada.

31:23  Di lodo o-maa tangada hagalabagau i-di waahale deelaa, gei nia daangada dogologo e-iloo-ginaadou a-mee.

31:24  Mee e-dui ana gahu mo-di hai ana duu, e-hui gi digau huihui-mee.

31:25  Mee e-maaloo, ge e-hagalaamua go nia daangada, gei mee hagalee madagu i-nia mee ala ma-ga-kila-aga maalia.

31:26  Mee ga-helekai, le e-helekai balabala mo-di kabemee.

31:27  Mee e-daadaamee i-nia madagoaa huogodoo, e-benebene digau dono hale.

31:28  Nia dama a-maa le e-hagalaamua a-mee, gei dono lodo le e-hagaamu hogi a-mee,

31:29  e-helekai boloo, “Nia ahina dogologo la nia lodo humalia, gei goe le e-kaedahi!”

31:30  Di madanga la dono hadinga ai, di madamada le e-maa gi-daha, gei-ogo di ahina dela e-hagalaamua Dimaadua la-gi-hagaamuina.

31:31  Haga-laamua-ina a-mee gi ana mee huogodoo ala e-hai. Nia daangada huogodoo belee hagalaamua a-mee.