Kapingamarangi - Jeremiah

Chapter 1

1:1  Di beebaa deenei le e-haga-modongoohia di hai o nnelekai Jeremiah, tama ni Hilkiah tangada hai-mee-dabu mai di waahale Anathoth, dela i tenua go Benjamin.

1:2  Dimaadua ga-helekai gi Jeremiah i-di madangaholu maa-dolu ngadau o Josiah, tama Amon, nogo king i Judah.

1:3  Mee ga-helekai labelaa gi Jeremiah i-di madagoaa di King Jehoiakim, tama a Josiah. Muli-mai-hua, gei Dimaadua ga-hagalee lawa dono helehelekai gi mee, gaa-dae-loo gi-nia ngadau e-madangaholu maa-dahi i-di madagoaa King Zedekiah tama a Josiah. I-di lima malama o-di ngadau deelaa, gei digau Jerusalem gaa-lahi gi-daha mo di-nadau guongo.

1:4  Dimaadua ga-helekai-mai gi-di-au,

1:5  “Au guu-dongo-aga goe i-mua dogu dugu-adu gi-di-goe do mouli. Gei i-mua do haanau, gei Au gu-hili-aga goe belee hai soukohp ang-gi nia henua huogodoo.”

1:6  Gei au ga-helekai gi Mee, “Meenei Tagi go Yihowah, e-hai behee, au e-de-iloo di-helehelekai, idimaa au tamagiigi hua.”

1:7  Gei Dimaadua ga-helekai-mai gi-di-au, “Goe hudee helekai bolo goe tamagiigi hua. Hana gi digau ala ga-hagi-adu ko-Au gi-di-goe, hagi-anga-ina gi digaula nia mee huogodoo ala ga-haga-modongoohia-adu ko-Au gi-di-goe.

1:8  Hudee madagu i digaula, idimaa Au e-madalia goe, gei e-duuli goe. Ko-Au go Dimaadua ne-helekai!”

1:9  Malaa, Dimaadua ga-dahi-aga dono lima gaa-bili gi ogu malaungudu, ga-helekai, “Hagalongo, Au ga-dugu-adu gi-di-goe au helekai ala e-leelee-iei goe.

1:10  Dangi-nei gei Au ga-gowadu gi-di-goe di mogobuna laa-hongo nia king mono guongo huogodoo, gei goe gaa-mee di-oho digaula mo-di kili digaula gi-daha, gei e-mee di-hau mo-di dogi.”

1:11  Dimaadua ga-heeu, “Jeremiah, ma di-aha dela e-mmada ginai goe?” Gei au ga-helekai, “Meenei, di manga laagau-‘almond’ dela e-daumada ko-au.”

1:12  Dimaadua ga-helekai, “E-donu! Idimaa, Au e-daumada bolo agu helekai la-gaa-kila.”

1:13  Dimaadua ga-heeu-mai labelaa gi-di-au, “Ma di-aha labelaa dela e-mmada ginai goe?” Gei au ga-helekai, “Au e-mmada gi-di baalanga e-kolokolo i-di baahi gi ngeia, gei-ogo nia mee ala e-dunu la-gu-hoohoo ga-malingi-mai gi kinei.”

1:14  Mee ga-helekai-mai gi-di-au, “Digau ala e-hai-baahi la-ga-lloomoi i-di bahi-i-ngeia, ga-hagahuaidu digau huogodoo ala e-noho i-hongo tenua deenei.

1:15  Idimaa ko-Au dela ga-gahi-mai nia guongo huogodoo ala i-di baahi gi-ngeia. Nadau king ga-lloo-ia ga-haga-duu-aga nadau lohongo-king i-nia ngudu nia abaaba o Jerusalem, mo i-di gili di waahale deelaa. Digaula ga-haganiga labelaa nia waahale o Judah ala i-golo.

1:16  Au ga-hagaduadua agu daangada i nadau hangahaihai huaidu. Digaula gu-haga-de-langahia-ginaadou Au, guu-hai nadau tigidaumaha ang-gi nia balu-ieidu, ge gu-daumaha gi nadau ada-mee ala ne-hau go ginaadou.

1:17  Hagatogomaalia-ina goe Jeremiah. Hana hagi-anga-ina gi digaula nia mee huogodoo ala e-hagi-adu ko-Au gi-di-goe bolo gi-haga-modongoohia-ina. Malaa, goe hudee madagu i digaula. Ma goe ga-madagu, gei Au gaa-hai goe gi-madagu gi-nonua i do madagoaa ma-gaa-dau-adu gi nadau baahi.

1:18  Jeremiah, hagalongo-mai! Digau huogodoo o tenua deenei: nia king o Judah, digau aamua, digau hai-mee-dabu, mo nia daangada, la-ga-hai-baahi-adu gi-di-goe. Gei dangi-nei gei Au e-hagamaaloo-aga goe bolo goe gi-hai-baahi gi digaula. Goe gaa-hai gadoo be-di waahale dela ono duuli mau-dangihi i-golo, be-di waduu baalanga, be-di abaaba dela ne-hai gi-nia baalanga-mmee. Digaula ga-hagalee haga-magedaa goe, idimaa, Au ga-madalia goe, ga-duuli goe. Ma ko-Au go Dimaadua ne-helekai.”

1:19  Jeremiah, hagalongo-mai! Digau huogodoo o tenua deenei: nia king o Judah, digau aamua, digau hai-mee-dabu, mo nia daangada, la-ga-hai-baahi-adu gi-di-goe. Gei dangi-nei gei Au e-hagamaaloo-aga goe bolo goe gi-hai-baahi gi digaula. Goe gaa-hai gadoo be-di waahale dela ono duuli mau-dangihi i-golo, be-di waduu baalanga, be-di abaaba dela ne-hai gi-nia baalanga-mmee. Digaula ga-hagalee haga-magedaa goe, idimaa, Au ga-madalia goe, ga-duuli goe. Ma ko-Au go Dimaadua ne-helekai.”

Chapter 2

2:1  Dimaadua ga-helekai-mai

2:2  bolo au gi-hagi-anga-ina gi digau Jerusalem telekai deenei, “Au e-langahia-e-Au di hai o godou manawa-dahi i-di godou madagoaa nogo dama-daane mo dama-ahina, mo di-godou hai nogo aloho i-di-Au i taamada o tadau haga-hai-lodo. Goodou nogo daudali-mai Au laa-lodo di anggowaa, ga-lloo-adu laa-lodo tenua dela digi dogia.

2:3  Israel, goe ne-hagadabu-mai gi-di-Au, idimaa ma kooe dela tangada haga-madagu ni-aagu. Au e-haga-uda-anga di hagaduadua mo-di haingadaa gi digau huogodoo ala e-haga-mmaemmae goe. Ma ko-Au go Dimaadua ne-helekai.”

2:4  Goodou go di hagadili Jacob, go nia madawaawa Israel, goodou gi-hagalongo gi nnelekai Dimaadua.

2:5  Dimaadua e-helekai, “Nia hagadilinga huaidu-aha ala ne-modongoohia-iei godou maadua-mmaadua ga-hai-baahi-mai gi-di-Au? Ma di-aha ne-hai digaula gii-huli gi-daha mo Au? Digaula gu-daumaha ang-gi nia balu-ada-mee, gei guu-hai nia balu-daangada.

2:6  Digaula gu-haga-balumee Au, eimaha hogi ma Au ne-haga-maahede-mai digaula gi-daha mo Egypt, ga-dagi-mai digaula laa-lodo di anggowaa, tenua maangoo gei e-gelegele huaidu, deai ono daangada e-noho nonua ai, gei di gowaa digi haele-ai tangada.

2:7  Au gu-laha-mai digaula gi-lodo tenua humalia, bolo digaula gii-noho manawa lamalia ang-gi nia huwa-laagau mono hagadilinga mee humalia ala i-golo. Gei digaula gu-oho mo-di haga-gulugulua dogu henua dela ne-dugu-anga gi ginaadou.

2:8  Digau hai-mee-dabu digi heeu boloo, ‘Dimaadua la i-hee?’ Agu gau hai-mee-dabu le e-de-iloo-ginaadou Au. Nia dagi gu-hai-baahi mai gi-di-Au, gei-ogo nia soukohp e-helehelekai-hua i-di ingoo o Baal, mo-di dadaumaha gi-nia balu-ada-mee.

2:9  “Malaa, Au go Dimaadua ga-hagi-aga agu daangada mo-di hai ogu donu labelaa ang-gi nadau hagadili.

2:10  Goodou hula gi-bahi-i-dai gi tenua go Cyprus, gei goodou ga-hagau di-godou dangada gi-bahi-i-dua gi-di guongo go Kedar, gei goodou ga-modongoohia bolo ma deai di mee ne-gila-aga beenei i-mua ai.

2:11  Ma deai tenua ne-huli ono balu-ieidu ai, ma e-aha maa digaula hagalee nia god e-donu. Gei agu daangada guu-huli gi-daha mo Au, guu-hudu gi-daha di-nadau God dela ne-hagalaamua ginaadou i-mua. Digaula gu-haga-duu-aga nadau balu-god ala e-deemee di-hagamaamaa ginaadou.

2:12  Malaa, Au ga-helekai gi-di langi gi-bolebole huoloo, ge gi-homouli mo-di goboina,

2:13  idimaa, agu daangada guu-hai nia hagadilinga huaidu e-lua: Digaula guu-huli gi-daha mo Au dela go di monowai haga-mouli. Gei digaula guu-bida geli nadau monowai-geli ala gu-mooho, e-deemee di haga-hau-ai nadau wai.

2:14  “Israel la-hagalee ne-haga-haanau-mai belee hai di hege. Malaa, ono hagadaumee la-ne-aha ala e-haga-mmaemmae a-mee?

2:15  Digaula gu-wwolo-loo gi-nua-loo gi mee gadoo be nia laion, guu-hai dono henua gii-hai di anggowaa. Ono waahale gu-mooho gi-lala, gu-diiagi go nia daangada huogodoo.

2:16  E-donu! Digau Memphis mo Tahpanhes guu-hai di hanga-ibu di libogo o-maa gi-mahaa.

2:17  Israel! Kooe dela ne-bida hai di haingadaa deenei adu gi-di-goe! Idimaa goe dela ne-hudu gi-daha Au dela go Dimaadua go doo God i dogu madagoaa nogo dagi-mai goe.

2:18  Di humalia-aha dela e-hagadagadagagee ginai goodou bolo goodou e-hula gi Egypt, gei e-inu labelaa nia wai mai i-di monowai Nile? Goodou e-aha ala bolo goodou e-hula gi Assyria e-inu nia wai mai i-di monowai go Euphrates?

2:19  Ma go godou haihai huaidu ala ga-hagaduadua-ai goodou. Ma go godou huli gi-daha mo Au dela ga-hagi-aga-ai goodou. Goodou ga-modongoohia di mmae mo-di huaidu o di-godou huli gi-daha mo Au, mo di-godou hagalee manawa-dahi mai gi-di-Au dela go di-godou God go Yihowah. Ko-Au di-godou Dagi, go Yihowah di Gowaa Aamua dela ne-helekai.”

2:20  Di Tagi go Yihowah ga-helekai, “Israel, mai mua-loo gaa-tugi dolomeenei, gei goodou gu-haga-balumee ogu mogobuna, gu-hagalee hiihai e-hagalongo mo-di daumaha-mai gi-di-Au. I-hongo nia gonduu nnoonua mo i-lala nia laagau mangamanga huogodoo, goodou nogo daumaha ang-gi nia balu-ieidu ala e-hagababa bolo goodou ga-hagadili godou dama.

2:21  Au guu-dogi goodou be-di laagau-‘grape’ humalia mai i-di golee koia e-humalia. Gei goodou mmada-adu gi goodou dolomeenei: Goodou guu-hai gadoo be-di laagau-‘grape’ guu-bala, gu-balumee-hua.

2:22  Ma e-aha maa goodou ga-gaugau gi ‘soap’ dela koia e-maaloo, gei Au e-gidee-hua nia dogolia o godou huaidina.

2:23  Dehee tadinga o di-godou helekai bolo goodou hagalee milimilia, ala bolo goodou digi daumaha ang-gi nia balu-ieidu go Baal? Mmada gi-di hai o godou huaidu ala nogo hai i lodo-henua, gei goodou ga-modongoohia-e-goodou. Goodou guu-hai gadoo be-di ‘camel’-ahina dela ma-gaa-dau i dono madagoaa e-hagadili. Mee e-heehee-hua i-lodo di anggowaa.

2:24  Dono madagoaa dela e-heehee gi-lodo di anggowaa, gei ma-koai dela e-mee di-benebene a-mee? Deai di ‘camel’-daane e-hai bolo ia ga-duadua ai, idimaa mee guu-dau i dono madagoaa e-hagadili.

2:25  Israel, goodou hudee haga-pili-ina godou wae be e-hai godou akii gi-maangoo i-di daudali nia balu-ieidu. Goodou gu-helekai boloo, ‘Deeai! Gimaadou gu-deemee di-madau huli gi-muli, idimaa, gimaadou gu-aloho i-nia balu-god aalaa, gimaadou e-daudali-hua digaula.’ ”

2:26  Dimaadua ga-helekai, “Di hai o-di langaadia o tangada gaiaa dela ma-gaa-gida, dela gadoo goodou, digau Israel di-godou hai ma-ga-langaadia, godou king mo godou gau aamua, godou gau hai-mee-dabu mo godou soukohp.

2:27  Goodou huogodoo ga-langaadia adu gi goodou, go goodou ala nogo haga-ingoo di laagau bolo go di-godou damana, mo ang-gi di hadu bolo go di-godou dinana. Di mee deenei la-ga-gila-aga i-di godou huli gi-daha mo Au, mo di-godou dee-buni-mai gi-di-Au. I di-godou madagoaa haingadaa, gei goodou ga-tangi-mai gi-di-Au bolo Au gi-hagamaamaa-ina goodou.

2:28  Aahee nia god ne-hai go goodou adu gi goodou? Maa goodou ga-haingadaa, heia digaula gi-benabena-ina goodou be digaula e-mee! Judah, godou balu-god gu-logowaahee gadoo be godou waahale.

2:29  Goodou e-aha ala e-leelee huaidu i-di-Au? Gei goodou e-aha ala e-hai-baahi mai gi-di-Au?

2:30  Au gu-hagaduadua goodou balumee? Goodou gu-daaligi godou soukohp, guu-hai gadoo be-di laion hagamadagudagu-dangada, gei goodou hagalee hiihai bolo Au gi-haga-donu-ina goodou.

2:31  Goodou go digau Israel, hagalongo-mai gi agu helekai. E-hai behee? Au guu-hai gadoo be-di anggowaa bouli, gei hagalee humalia adu gi goodou? Ma e-aha dela goodou e-helekai bolo goodou gaa-hai-hua go godou hiihai, hagalee-loo e-lloomoi labelaa gi-di-Au?

2:32  Ma iai tama-ahina e-de-langahieia ana hadu hagalabagau ala e-haga-madamada-ieia? Ge ma iai di ahina hai-lodo e-de-langahieia dono gahu haga-hai-lodo? Gei-ogo agu daangada le e-aha ala e-de-langahia-e-ginaadou Au i-nia laangi e-logowaahee ala e-deemee di-nadau dau?

2:33  Goodou e-iloo di-waluwalu godou daane e-lodo ginai hagammuni. Nia ahina hogi ala e-kaedahi e-huaidu e-mee di-kabe nadau mee mai i godou baahi.

2:34  Godou gahu e-dogolia i-nia dodo o digau hagaloale mo digau nadau huaidu ai, gei hagalee go nia dodo o digau gaiaa! “Ma e-aha nia mee aanei e-hai go goodou,

2:35  gei goodou e-helekai boloo, ‘Dimaadua la-hagalee hagawelewele-mai gi-gimaadou, idimaa, gimaadou e-madammaa.’ Gei Au go Dimaadua ga-hagaduadua goodou, idimaa, goodou e-kai-tilikai bolo goodou hagalee haihai godou mee hala.

2:36  Goodou gu-haga-balumee goodou i-di godou huli gi-nia balu-god o-nia guongo ala i-golo. Goodou ga-haga-manawa-gee go digau Egypt, gadoo be di-godou hai go digau Assyria.

2:37  Goodou gaa-huli gi-daha mo Egypt, gaa-noho i-lodo godou langaadia. Au go Dimaadua gu-haga-balumee nia mee ala nogo gana ginai goodou, gei goodou deai di-godou hagamaamaa mai nadau baahi ai.”

Chapter 3

3:1  Dimaadua ga-helekai, “Maa taane gaa-hudu gi-daha dono lodo, gei di ahina gaa-lodo gi tuai daane, malaa taane ne-lodo gi-di ahina deelaa matagidagi la-gu-deemee di-lodo gi mee labelaa. Di hai deenei e-haga-milimilia tenua deelaa. Malaa, Israel, kooe dela koia e-logo au gau ala guu-hai ginai do aloho, malaa dolomeenei gei goe e-hiihai e-hanimoi labelaa gi-di-Au!

3:2  Mmada-adu gi-hongo nia gowaa nnoonua. Ma di gowaa i-golo digi hai dau hai be-di manu nonua i do huihui do huaidina? Goe e-duu i taalinga di ala e-tali au daane belee hai di manawa-manu ginai, gadoo be tangada Arab dela e-talitali digau ala e-hula i-lodo di anggowaa. Goe gu-haga-milimilia tenua i dau hai dela e-huihui do huaidina.

3:3  Deelaa ne-hidi-ai di uwa gu-hagalee doo, gei di uwa e-doo i-muli di madagoaa magalillili ai. Gei goe guu-hai gadoo be-di ahina huihui dono huaidina, gu do langaadia ai.

3:4  “Gei dolomeenei gei goe e-helekai-mai boloo, ‘Ma Kooe go dogu damana, gei Goe e-aloho i-di-au mai i dogu damagiigi.

3:5  Do hagawelewele la-hagalee e-hana-hua beelaa. Goe hagalee hagawelewele-mai gi-di-au i-nia madagoaa huogodoo.’ Israel, goe ne-helekai beenei gei goe e-hai hua nia huaidu huogodoo ala e-mee dau hai.”

3:6  I-di madagoaa di King Josiah, gei Dimaadua ga-helekai-mai, “E-hai behee? Goe gu-gidee di hai o Israel, nia hai o-di ahina dee-manawa-dahi ala ne-hai go mee? Mee guu-huli gi-daha mo Au, guu-hai gadoo be-di ahina huihui dono huaidina i-hongo nia gowaa nnoonua huogodoo, mo i-lala nia laagau mangamanga huogodoo.

3:7  Au gu-hagamaanadu bolo holongo i-muli dana hai nia mee aanei, gei mee gaa-huli ga-hanimoi gi-di-Au. Malaa, gei mee digi huli-mai, gei dono duaahina-ahina dee-manawa-dahi go Judah gu-gidee-ia nia mee huogodoo ala ne-hai.

3:8  Gei Judah hogi gu-gidee-ia bolo Au gu-diiagi Israel, gu-hagau a-mee gii-hana, idimaa mee guu-huli gi-daha mo Au, gu-hana-hua guu-hai di ahina huihui dono huaidina. Gei Judah, tuaahina-ahina Israel dee-manawa-dahi, mee hagalee e-madagu. Gei mee guu-hai labelaa di ahina huihui dono huaidina,

3:9  gei mee hagalee langaadia. Mee gu-haga-milimilia tenua deelaa, guu-hai di huaidu hai be-di manu i dono hai-daumaha gi nia hadugalaa mono laagau.

3:10  I-muli-hua nia mee aanei huogodoo, Judah, tuaahina-ahina Israel dee-manawa-dahi, guu-hai be di-mee ga-hanimoi gi-di-Au, gei ono lodo la-digi donu humalia. Ma ko-Au go Dimaadua ne-helekai.”

3:11  Dimaadua ga-helekai-mai boloo, “Ma e-aha maa Israel ne-huli gi-daha mo Au, gei e-koia e-humalia i Judah dela hagalee manawa-dahi.”

3:12  Dimaadua ga-helekai-mai bolo au gii-hana gi-helekai gi Israel boloo, “Kooe go Israel dee-manawa-dahi, huli gi-muli hanimoi gi-di-Au, i-di-Au e-honu i tumaalia gei hagalee e-hagawelewele. Au ga-hagalee e-hagawelewele-adu gi-di-goe gaa-hana-hua beelaa.

3:13  Kooe hua gi-hagi-aga bolo goe guu-hai di huaidu, gei gu-de-hagalongo ang-gi Dimaadua, go doo God. Hagi-aga-ina bolo goe guu-wanga do aloho gi-nia god o digau tuadimee i-lala nia laagau mangamanga huogodoo, gei goe gu-dee-haga-gila-aga agu haganoho. Ma ko-Au go Dimaadua ne-helekai.

3:14  “Goodou go digau dee-manawa-dahi, huli-mai gi-di-Au, goodou nia mee donu ni-aagu. Au gaa-daa agu daangada dagidahi mai i-lodo nia waahale, ge dogolua mai i-nia madawaawa, gei Au gaa-lahi goodou gi-hongo di Gonduu Zion.

3:15  Au ga-gowadu gi goodou nia dagi ala e-hagalongo-mai gi-di-Au, gei digaula gaa-dagi goodou i-di kabemee mo-di iloo-mee.

3:16  Di-godou madagoaa ma-ga-dogologowaahee i-lodo tenua deelaa, gei nia daangada ga-hagalee e-helehelekai di hai o dagu Debedebe o-di Hagababa, digaula ga-hagalee langahia-e-ginaadou, ga-hagalee e-hiihai, be hagalee e-hai labelaa di-nadau mee beelaa.

3:17  I-di madagoaa ma-ga-dau-mai, gei Jerusalem ga-hagaingoo bolo ‘Di Lohongo o Dimaadua’, gei digau o-nia henua huogodoo ga-dagadagabuli-mai gi-golo e-daumaha-mai gi-di-Au. Digaula gaa-lawa gi-daha mo nadau manawa-hamaaloo mo nadau manawa huaidu ala e-hai digaula gii-hai di huaidu.

3:18  Israel ga-haga-puni-anga gi Judah, meemaa ga-lloomoi gi-daha mo nau gowaa ala ne-lahi ginai i-lodo tenua i-bahi-i-ngeia, ga-loomoi gi-muli gi tenua dela ne-wanga ko-Au gi godou damana ala i-mua bolo gi-hai-henua ginai gaa-hana-hua beelaa.”

3:19  Dimaadua ga-helekai, “Israel, Au ne-hiihai bolo goe e-hai di tama ni-aagu, ga-gowadu gi-di-goe tenua haga-tenetene, e-koia e-humalia huoloo i henuailala. Au ne-hiihai bolo goe gi-hagaingoo-ina Au bolo tamana ni-oou, gei hudee huli labelaa gi-daha mo Au.

3:20  Malaa, goe gu-hagalee manawa-dahi mai gi-di-Au, gadoo be-di lodo-ahina dela hagalee e-manawa-dahi. Ma ko-Au go Dimaadua ne-helekai.”

3:21  Nia lee e-wwaa-ia i-tomo nia gonduu, ala go nia lee o digau Israel ala e-tangitangi i-di hagamaamaa, idimaa digaula guu-noho i-lodo di huaidu, gu-de-langahia-e-ginaadou Dimaadua, go di-nadau God.

3:22  Lloomoi gi Dimaadua, goodou huogodoo ala ne-huli gi-daha mo Mee, gei Mee ga-haga-maaloo-aga goodou, gaa-hai goodou gi-manawa-dahi. Goodou ga-helekai boloo, “Uaa, gimaadou gaa-huli gi Dimaadua, idimaa Mee go tadau God.

3:23  Gimaadou deai di-madau hagamaamaa ne-kae i madau hai-daumaha ang-gi nia god o digau bouli ala i-tomo nia gonduu ai, di hagamaamaa o Israel le e-hanimoi-hua i-baahi o Dimaadua go tadau God.

3:24  Gei di-madau hai-daumaha gi Baal, di god hagalangaadia dangada, dela ne-hidi-mai gu-deai tadau siibi mono kau, dama-daane, dama-ahina ai, ala go nia mee huogodoo ala nogo ngalua ginai madau maadua mmaadua mai loo i-mua gaa-dae-mai-loo gi dangi-nei.

3:25  Deenei-laa, gidaadou gi-langaadia-e-gidaadou, gi-gahu-dia gidaadou gi tadau langaadia. Gidaadou mo tadau damana-mmaadua la-nogo hai tadau huaidu ang-gi Dimaadua go tadau God i-nia madagoaa huogodoo, gei gidaadou digi daudalia ana helekai.”

Chapter 4

4:1  Dimaadua ga-helekai boloo, “Digau Israel, maa goodou gu-hiihai e-huli-mai, huli-mai-laa gi-di-Au. Maa goodou ga-diiagi di hai-daumaha gi-nia balu god ala e-de-hiihai ginai Au, ga-manawa-dahi mai gi-di-Au,

4:2  e-humalia bolo goodou gii-hai godou hagamodu i dogu ingoo. Gei nia henua huogodoo ga-dangidangi-mai-laa bolo Au gi-hagamaluagina-ina ginaadou, gei digaula ga-hagaamu Au.”

4:3  Dimaadua ga-helekai ang-gi nia daangada o Judah mo Jerusalem, “Hagamaluu-ina godou gowaa dogi-mee ala digi hagamaluu-ina. Hudee dogi lii-laagau gi-mehanga nia laagau duduia.

4:4  Haga-gila-ina-aga godou hagababa mai gi-di-Au, go Dimaadua, gei gi-hagadabu-ina goodou mai gi-di-Au, goodou go digau Judah mo Jerusalem. Maa goodou ga-hagalee e-hai beenei, gei dogu hagawelewele ga-ulaula-aga gadoo be-di ahi, ga-ulaula e-deemee di-diinai go tangada, idimaa i godou hangaahai huaidu.”

4:5  Ilihia di buu ang-gi nia gowaa huogodoo i-lodo tenua! Wwolo gi-nua gi-longono! Helekai gi Judah mo Jerusalem gii-llele gi-lodo nia waahale ala gu-abaaba gi-mau-dangihi.

4:6  Hagi-anga-ina di ala dela e-hana gi Zion! Tei gii-bida halahala-ina dono mouli! Hudee heia goodou gi-duai! Dimaadua gu-hanimoi gu-gaamai dana haingadaa mo-di haadanga balua damana mai i-bahi-i-ngeia.

4:7  Tangada dela e-oho tenua la-gu-hanimoi e-hai gadoo be-di laion ma-ga-ulu-aga i dono gowaa nogo moe-ai. Mee e-hanimoi e-oho Judah. Nia waahale o Judah ga-mooho gi-lala, tangada e-mee di-noho i-golo ai.

4:8  Deenei-laa, goodou ulu godou goloo manawa-gee ga-tangitangi, idimaa di hagawelewele o Dimaadua la-hagalee tanga gi-daha mo Judah.

4:9  Dimaadua ga-helekai, “I-di laangi deelaa, gei nia king mo digau aamua ga-manawa paagege-mai. Digau hai-mee-dabu gaa-lodo homouli, gei nia soukohp ga-hilahila gi-daha.”

4:10  Gei au ga-helekai, “Meenei Tagi go Yihowah, e-donu bolo Goe gu-halahalau digau Jerusalem! Goe ne-helekai bolo di noho i-di aumaalia i-golo, malaa tulumanu-dauwa hua dela gu i-nia uwa digaula.”

4:11  Di madagoaa ga-dau-mai, gei digau Jerusalem ga-longono-ginaadou di hagailoo o-di madangi welengina dela e-hanimoi gi digaula mai i-lodo di anggowaa. Hagalee go di oloolo madangi dela e-ili gi-daha di huiahi.

4:12  Deeai, go di madangi dela e-hanimoi i-di hagawaalanga o Dimaadua e-koia e-maaloo dangihi i-di mee deenei! Deenei di hai o Dimaadua e-hagi-aga ana daangada.

4:13  Mmada, nia hagadaumee e-lloomoi e-hai gadoo be-di gololangi, nadau waga dauwa hongo-henua e-hai gadoo be-di gawe-uwa, nadau hoodo e-koia e-llele i-di manu-‘eagle’. Gidaadou digau hua gaa-mmade, gidaadou ga-mooho-hua gi-daha.

4:14  Jerusalem, hagammaa-ina gi-daha di huaidu dela i oo lodo gii-mee-ai goe di mouli. Dehee di waalooloo o do hagamaanadu nia mee huaidu?

4:15  Digau hagau mai di waahale o Dan mo mai i-hongo nia gonduu o Ephraim e-hagailoo-mai di longo haga-lodo-huaidu.

4:16  Digaula e-lloomoi e-hagailoo gi-nia henua mo ang-gi Jerusalem bolo ono hagadaumee gu-lloomoi i tenua mogowaa-loo. Nia hagadaumee aanei ga-wwolowwolo, gaa-hai baahi gi nia waahale i Judah,

4:17  mo-di duuli Jerusalem e-hai gadoo be nia daane e-loloohi nadau hadagee, idimaa digau o-di waahale la digau hagalee hagalongo ang-gi Dimaadua. Dimaadua ne-helekai.

4:18  Judah, kooe ne-hidi-ai di-mee deenei adu gi-di-goe, mai i do mouli mo o hangaahai. Go o huaidu ala ne-hidi-ai di hagaduadua deenei, dela gu-daalo-adu gi lodo do hadu-manawa.

4:19  E-koia e-haga-mmae-manawa! Au gu-deemee di-hagakono di mmae deenei! Dogu hadu-manawa e-haluihalulu huoloo! Au gu-deemee di-noho deemuu, idimaa au gu-longono di lee o-di buu e-ili mo-di lee o tauwa.

4:20  Di haingadaa e-daudali-adu-hua i-muli di haingadaa, tenua hagatau la-gu-mooho. Madau hale-laa gu-limalima-hua di-mooho. Nia gahu-bontai la-gu-mahaahaa.

4:21  E-waalooloo behee go dogu dadaumada di ngalungalua o tauwa, mo-di longono-eau nia lee buu?

4:22  Dimaadua ga-helekai, “Agu daangada la-gu-dadaulia, e-de-iloo-ginaadou Au. Digaula gu-hai-hua be nia dama dadaulia, digaula nadau mee e-modongoohia ai. Digaula koia e-aali i-di hai-mee huaidu, gei gu-deemee di-hai nadau hangaahai humalia.”

4:23  Au guu-mmada gi henuailala guu-huli guu-hai di anggowaa. Au guu-mmada gi-lala di langi gu-deai di maalama i-golo ai.

4:24  Au guu-mmada gi-nia gonduu gei nia maa gu-ngalungalua, mo nia gowaa nnoonua e-hahaagee.

4:25  Au guu-mmada, gei tangada ne-gidee-au ai. Nia manu guu-hula gu-mamaangi.

4:26  Tenua gelegele humalia guu-hai di anggowaa, ono waahale gu-mooho gi-lala, idimaa i-di hagawelewele huoloo o Dimaadua.

4:27  (Dimaadua ne-helekai bolo tenua hagatau la-gaa-hai di anga-henua, gei hagalee e-oho gi-daha hagatau).

4:28  Henuailala ga-tangi, di langi ga-bouli dongoeho. Dimaadua gu-helekai, gei hagalee e-huli-loo dono manawa. Mee gu-haganoho dana hai e-hai, Mee hagalee-loo e-huli gi-muli.

4:29  Nia lee o digau ala e-llele nia hoodo mo digau puu maalei gaa-hai digau huogodoo gii-llele gi-daha. Hunu gau gaa-llele gi-lodo geinga, hunu gau ga-ulu-adu gi-lodo nia bongoo o-nia hadugalaa. Nia waahale huogodoo ga ono gau no-lodo ai, gei tangada e-mee di-noho labelaa i-golo ai.

4:30  Jerusalem, e-koia e-huaidu adu gi-di-goe! Goe e-aha dela e-ulu i-nia gahu angammee? Goe e-aha dela e-demedeme goe, bolo goe e-hai goe gi-madanga, e-hai do huaidina bolo gi-madanga, dono hadinga ai! O ehoo-daane gu-diiagi goe, gu-hiihai e-daaligi goe gii-made.

4:31  Au gu-longono di lee e-wolowolo, e-wolowolo be-di ahina dela belee haanau, e-wolowolo be-di ahina dela e-daamada dono haanau dana dama-madua. Ma go Jerusalem dela e-wolowolo i dono manawa dogi, gaa-holo ono lima gi-daha, ga-helekai, “Au gu-huaidu-mai gi-di-au! Digaula e-lloomoi e-daaligi au gii-made!”

Chapter 5

5:1  Digau Jerusalem, goodou gii-llele i godou ala! Goodou gii-bida halahala-ina goodou, halahala-ina i-lodo godou gowaa huihui mee! E-hai behee, goodou e-mee di-gida tangada e-dahi dela e-haihai ana mee e-donu gei e-hagamada e-mouli manawa-dahi ang-gi God? Maa goodou gu-gidee, gei Dimaadua ga-dumaalia gi Jerusalem.

5:2  Ma e-aha maa goodou e-hai bolo goodou e-daumaha ang-gi Dimaadua, gei godou helekai le e-tilikai.

5:3  Dimaadua e-halahala-hua di manawa-dahi. Mee e-hagaduadua goodou, gei goodou e-haga-de-iloo. Mee ga-haga-huaidu goodou, gei goodou deai godou iloo ai. Goodou e-haga-hamaaloo goodou ge hagalee e-hiihai e-huli gi-daha mo godou huaidu.

5:4  Gei au ga-hagabaubau bolo holongo aanei hua go digau hagaloale mo de-kabemee. Gei digaula e-haihai-hua go nia hai o tangada dadaulia, e-de-iloo-ginaadou be dehee di hiihai o di-nadau God, be dehee di hiihai o Dimaadua ang-gi ginaadou.

5:5  Malaa, au gaa-hana gi-baahi digau aamua ga-helekai gi digaula. Digaula koia e-iloo be dehee di hiihai o di-nadau God, be dehee di hiihai o Dimaadua ang-gi ginaadou. Gei digaula huogodoo gu-haga-de-hiihai gi-nia mogobuna o Dimaadua, tangada ne-hagalongo gi Mee ai.

5:6  Deenei-laa ne-hidi-ai nia laion o lodo-henua ga-daaligi digaula, nia paana lodo-geinga ga-hagihagi digaula gi-mooho gi-daha, mono ‘leopard’ ga-heehee i-lodo nia waahale digaula e-halahala nadau meegai. Maa tangada ma-gaa-hana i-hongo di ala, gei nia maa ga-hahaahi a-mee, idimaa nia huaidu digaula gu-logowaahee huoloo, gei digaula guu-huli gi-daha mo God.

5:7  Dimaadua ga-heeu, “Au e-dumaalia ang-gi nia huaidu o agu daangada eiaha? Digaula gu-diiagi Au, gu-daumaha-hua gi nadau balu-god. Au gu-haangai agu daangada gi-maaluu, gei digaula gu-haihai-hua di huaidu hai be-di manu, gu-daudali-hua di hiihai o-di ahina huihui dono huaidina.

5:8  Digaula guu-hai gadoo be nia hoodo-daane ala gu-haangai hagahumalia, taane-nei mo taane-nei gu-moinaa-ia di lodo o taane i-golo.

5:9  E-hai behee, Au hagalee belee hagaduadua digaula i nadau hai beenei, gei e-tala di hui gi-nia hai huaidu ang-gi tenua i-nia hai labelaa beenei?

5:10  Au ga-hagau-adu godou hagadaumee e-haga-huaidu godou hadagee-waini, gei hagalee bolo ga-oho-loo gi-hagalee. Au ga-helekai gi digaula gi-haadia gi-daha nia manga, idimaa nia manga aalaa la-hagalee nia mee ni-aagu.

5:11  Digau Israel mo Judah gu-de-hagalongo-mai gi-di-Au. Ma ko-Au go Dimaadua ne-helekai.”

5:12  Nia daangada Dimaadua gu-diiagi a-Mee gi-daha, ga-helekai, “Mee hagalee e-hai dana mee. Gidaadou hagalee e-tale gi-di haingadaa, tauwa be tau-magamaga i tadau baahi ai.”

5:13  Digaula e-helekai bolo nia soukohp e-helehelekai i-lodo di ahiaalangi, gei deai nnelekai mai baahi o Dimaadua ai. Dimaadua, di God di Gowaa Aamua, ga-helekai-mai gi-di-au, “Jeremiah, idimaa i-di gau aanei ala guu-hai nadau helekai beenaa, malaa gei Au gaa-hai agu helekai aanei gii-hai be-di ahi mai i-lodo doo ngudu, gei nia daangada gaa-hai gadoo be nia dohomu, gei di ahi deelaa gaa-dudu digaula.”

5:14  Digaula e-helekai bolo nia soukohp e-helehelekai i-lodo di ahiaalangi, gei deai nnelekai mai baahi o Dimaadua ai. Dimaadua, di God di Gowaa Aamua, ga-helekai-mai gi-di-au, “Jeremiah, idimaa i-di gau aanei ala guu-hai nadau helekai beenaa, malaa gei Au gaa-hai agu helekai aanei gii-hai be-di ahi mai i-lodo doo ngudu, gei nia daangada gaa-hai gadoo be nia dohomu, gei di ahi deelaa gaa-dudu digaula.”

5:15  Goodou digau Israel, Dimaadua ga-hagau mai ana gau-dauwa i tenua mogowaa belee heebagi adu gi-goodou. Tenua koia e-maaloo dangihi nogo noho mai mua, dela e-de-iloo-e-goodou nadau helekai.

5:16  Ana gau puu maalei digau dauwa modo-gologolo huoloo, ala e-daaligi nadau daangada deai tumaalia ai.

5:17  Digaula gaa-gai godou huwa-laagau mo godou meegai huogodoo, ga-daaligi godou dama-daane mono dama-ahina. Digaula ga-daaligi godou manu, kau, ga-haga-huaidu godou laagau-‘grape’, mo godou laagau-‘fig’. Nadau buini-dauwa gaa-oho godou waahale ala guu-hau gi-mau-dangihi ala e-hagadagadagagee ginai goodou.

5:18  Dimaadua ga-helekai, “I-nia laangi aalaa, gei Au hagalee e-daaligi agu daangada huogodoo.

5:19  Deenei-laa, Jeremiah, maa digaula ga-heeu be Au ne-aha dela ne-hai nia mee aanei beelaa, gei goe ga-helekai gi-digaula bolo gadoo be di hai dela ne-huli digaula gi-daha mo Au, ga-daumaha gi-nia balu-god digau mai i-daha ala i-lodo di-nadau henua, deenei di hai dela ga-hege-iei digaula i-lala digau hua-gee i-lodo tenua dela hagalee tenua ni ginaadou.”

5:20  Dimaadua ga-helekai, “Helekai gi-di madawaawa Jacob, mo-di helekai gi digau Judah:

5:21  Goodou hagalongo, goodou digau dadaulia, godou golomada i-golo, gei e-deemee di-gidee-goodou, godou dalinga i-golo, gei e-de-longono.

5:22  Au go Dimaadua, gei goodou e-aha ala hagalee e-hagamadagudia Au? Ma e-aha dela goodou hagalee e-polepole i ogu mua? Au guu-dugu agu gelegele belee hai-ai di geinga o-di tai, gei di tai e-deemee di-hana laa-hongo di-maa. Di tai e-bagibagia gei e-deemee di-hana laa-hongo. Nia beau e-bagubaguu gei e-deemee di-oho ana mee.

5:23  Gei goodou go nia daangada dadaulia! Goodou e-de-hagalongo ge lodo-hamaaloo. Goodou gu-diiagi Au, guu-hudu Au gi-daha.

5:24  Goodou hagalee hagamaanadu bolo e-hagalaamua Au dela ne-hai di uwa gii-doo i-mua mo i-muli di madagoaa magalillili, be e-gowadu gi goodou di madagoaa humalia e-hadi-ai godou huwa-laagau i-lodo nia ngadau dagidahi.

5:25  Gei ma go godou huaidu ala ne-duuli goodou gi-daha mo nia mee humalia aanei huogodoo.

5:26  “Digau huaidu le e-noho i-baahi agu daangada. Digaula e-dogono e-talitali e-hai gadoo be digau ala ne-dugu nadau gubenge ga-talitali-laa nia manu mamaangi, gei digaula gu-hagatogomaalia nadau hele belee hele-ai nia daangada.

5:27  Dela gadoo tangada puu-manu ma-gaa-haa ana manu mamaangi gi-lodo dana abaaba, dela gadoo di-nadau hai dela e-haa nadau hale gi-nia goloo ala ne-dada. Deelaa-laa gaa-hidi-ai digaula gu-mogobuna mo-di maluagina,

5:28  dela ne-pedi-ai digaula i nadau miami humalia. Nadau hangaahai huaidu e-deemee di-lawa. Digaula hagalee hagamaamaa nia dama gu-nadau maadua ai i-nadau madagoaa e-gabunga be e-wanga di tonu gi digau ala guu-noho i-lala di haingadaa.

5:29  “Gei Au go Dimaadua, ga-hagaduadua digaula i-nia mee aanei huogodoo. Au ga-lui-adu dogu hagawelewele gi-hongo tenua deenei.

5:30  Nnagadilinga mee hagagoboina mo-di huaidu damanaiee gu-kila-aga i-hongo tenua deenei:

5:31  Nia soukohp e-hai nadau kokohp tilikai, digau hai-mee-dabu e-daudali-hua nia mee o-nia soukohp ala ne-helekai-ai, gei agu daangada hagalee e-haga-donu digaula. Malaa, dehee-laa di-nadau hai gaa-hai i-di madagoaa nia mee aanei ga-hagalawa?”

Chapter 6

6:1  Goodou go digau Benjamin, llele gi-mouli goodou! Llele gi-daha mo Jerusalem! Ili-hia di buu i Tekoa gei gi-dahua di ahi i Beth=Haccherem e-hai-ai di hagailoo. Di haingadaa mo-di mooho e-hanimoi i-ngeia

6:2  Di waahale go Zion madamada gaa-oho gi-daha.

6:3  Nia king mai i-daha gaa-noho i-golo mo nadau gau-dauwa. Digaula ga-haga-duu-aga nadau hale-laa e-haganiga di waahale, tei gii-bida haga-duu-aga dono hale i dana gowaa e-hiihai ginai.

6:4  Digaula ga-helekai, “Hagatogomaalia e-heebagi gi Jerusalem! Gi-togomaalia! Gidaadou ga-heebagi i-di oodee!” Gei digaula ga-helekai, “Gu-duai, di laangi la-gu-hoohoo ga-haga-odi, di malu o-di hiahi gu-dau-mai.

6:5  Gidaadou ga-hai-tauwa ma-gaa-boo, gaa-oho di abaaba o-di waahale.”

6:6  Dimaadua di Gowaa Aamua gu-helekai gi-nia king gi-hele-ina nia laagau gi-lala gi-hagabae-ina gi-nua gii-duuli Jerusalem. Mee gu-helekai, “Au ga-hagaduadua di waahale deenei, idimaa digau ala e-haga-haingadaa nia daangada la-gu-dogologo i-lodo di waahale deenei.

6:7  E-hai gadoo be-di monowai geli dela e-daahi ana wai gi-madammaa, dela gadoo Jerusalem dela e-benebene ana huaidu huogodoo. Au e-longono-e-Au nia lee heebagi i-lodo di waahale, agu mee ala e-gidee-Au la-go digau magi mo digau ne-lauwa.

6:8  Goodou digau Jerusalem, di haingadaa deenei la di-mee e-hagamodongoohia-adu gi-di-goe. Goodou ma-ga-hagalee hagalongo-mai, gei Au gaa-kili goodou gi-daha, gaa-hai di-godou waahale gii-hai di anggowaa dela e-deemee labelaa di-noho-ai tangada.”

6:9  Dimaadua di Gowaa Aamua gu-helekai mai gi-di-au, “Israel la-ga-deai ono goloo i dono gili ai, e-hai gadoo be-di hadagee-waini ne-hadi gei ono huwa e-dubu ai. Goe haga-dagaloaha-ina nia daangada huogodoo ala e-mee i-di madagoaa bodobodo dela e-dubu.”

6:10  Gei au ga-helekai-anga, “Koai e-hagalongo maa au ga-helekai gi digaula ge hagawaalanga gi digaula? Digaula e-hagalongoduli ge e-de-hiihai di-hagalongo gi au helekai. Digaula e-gadagada-hua gi au helekai ne-hagi-mai bolo gi-heia gi digaula.

6:11  Meenei Dimaadua, o hagawelewele ala e-hai baahi ang-gi digaula la-gu-ulaula labelaa i ogu lodo. Au gu-deemee di-hagakono huoloo.” Gei Dimaadua ga-helekai-mai, “Duia gi-daha dogu hagawelewele gi-hongo nia dama ala e-heehee i-hongo nia ala mo i-hongo nia gowaa ala e-nohonoho-ai nia dama-daane mono dama-ahina. Nia daane hai-lodo mo nia ahina hai-lodo gaa-lahi gi-daha. Gei digau ala mmaadua hagalee e-dumaalia ginai.

6:12  Nadau hale gaa-wanga gi nnuai daangada ngaadahi mo nadau hadagee mo nadau lodo. Au ga-hagaduadua digau o tenua deenei.

6:13  Digau huogodoo, digau aamua mo digau lligi, le e-hagamada e-haga-maluagina ginaadou gi nadau hai-hegau gaiaa. Nia soukohp mo digau hai-mee-dabu hogi e-halahalau nia daangada.

6:14  Digaula e-hai bolo nia magibala o agu daangada la nia mee hua ne-oloia, gei digaula ga-helekai boloo, ‘Nia mee huogodoo gu-humalia-hua.’ Gei deeai, nia mee huogodoo la-digi humalia.

6:15  E-hai behee, digaula hagalee e-langaadia di hai nia mee aanei? Deeai, digaula hagalee e-langaadia, gei digaula hogi e-de-iloo-ginaadou di tee i-di langaadia. Malaa, deenei gaa-hidi-ai digaula gaa-too gadoo be digau ala i-golo ala guu-too. Dogu madagoaa ga-hagaduadua digaula, deenei go-di hagaodi o digau aanei. Ma ko-Au go Dimaadua ne-helekai.”

6:16  Dimaadua ga-helekai gi ana daangada, “Goodou hula, tuu i-di gowaa dela e-heetugi-ai nia ala, gaa-mmada. Heheeu be nia ala namua la i-hee, ge dehee di ala koia e-humalia. Taele i-nonua, gei goodou ga-mouli i-di aumaalia.” Gei digaula ga-helekai, “Deeai, gimaadou hagalee hiihai e-taele i-di ala deelaa!”

6:17  Gei-ogo Dimaadua gaa-dongo ana gau hagaloohi belee hagalongo gi-nia haga-iloo mai di lee labaa. Digaula ga-helekai, “Gimaadou ga-hagalee hagalongo.”

6:18  Dimaadua ga-helekai, “Goodou go nia henua llauehe, goodou hagalongo gei gi-modongoohia be di-maa di-aha dela gaa-hai ko-Au gi agu daangada.

6:19  Henuailala, goe gi-hagalongo! Au ga-hagaduadua agu daangada gi-di hagaduadua damana dela e-tau-anga gi digaula i-di nadau haga-balumee mo di-nadau de-hagalongo gi agu helekai.

6:20  Dono hadinga-aha mai gi-di-Au go nadau ‘incense’ ala ne-gaamai i Sheba mo nia mee haga-kala meegai mai tenua mogowaa? Au hagalee manawa-tene gi nadau tigidaumaha.

6:21  Malaa, Au gaa-hai nia daangada aanei gii-tinga ge gii-too. Nia maadua mo nadau dama gaa-mmade, ngaadahi mo nadau ihoo hagaaloho, mo digau ala e-noho i nadau baahi.”

6:22  Dimaadua ga-helekai, “Digau ga-lloomoi i-di guongo i-bahi-i-ngeia, di guongo maaloo gei e-mogowaa-loo. Digaula e-lloomoi e-hagatogomaalia ang-gi tauwa.

6:23  Digaula e-lloomoi mo nadau amu-maalei mo nadau hulumanu-dauwa. Digaula digau hagamuamua gei hagalee manawa dumaalia. Nia lee o nadau waga hongo-henua ala e-lloomoi-ai, e-hai gadoo be-di lee o-di bagibagia o-di tai. Digaula gu-togomaalia ga-heebagi gi Jerusalem.”

6:24  Digau Jerusalem ga-helekai boloo, “Gimaadou gu-longono di haga-iloo deelaa. Madau lima gu-maanuhia guu-boo madau lodo, gei guu-hai gadoo be-di mmae o-di ahina ma-ga-haanau.

6:25  Gimaadou gu-deemee di-hula laa-lodo henua be i-hongo nia ala, idimaa, madau hagadaumee gu-lloomoi mo nadau goloo heebagi hagamadagudagu-dangada, gu-haganiga gimaadou.”

6:26  Dimaadua ga-helekai gi ana daangada, “Goodou ulu i godou goloo manawa-gee, gei gi-llingia nia lehu gi-hongo godou libogo. Goodou gi-manawa-gee gadoo be goodou ma-ga-manawa-gee ang-gi di-godou dama-daane hua e-dahi dela guu-made, idimaa, digau ala e-lloomoi belee heebagi adu gi goodou, ga-limalima-hua gaa-dae-mai.

6:27  “Jeremiah, goe hagadina-ina-malaa agu daangada gadoo be dau hai dela ma-ga-hagadina au baalanga, gei goe ga-modongoohia be digaula e-hai behee.

6:28  Digaula huogodoo la digau dee-hiihai mo-di lodo hamaaloo, mo-di hagadeledele nia helekai tilikai. Digaula e-lodo hamaaloo gadoo be nia baalanga-mmee, digaula huogodoo la digau hai-kai tilikai.

6:29  Di ahi ga-ulaula gaa-gaa, gei-ogo nia baalanga huaidu la-hagalee ngudu gi-daha. Ma deai dono hadinga ai bolo gaa-hana labelaa e-haga-madammaa agu daangada, idimaa, digau ala nogo haihai nia huaidu la-digi lahia gi-daha.

6:30  Digaula ga-haga-ingoo bolo nia baalanga balumee, idimaa, Au go Dimaadua gu-haga-de-iloo-e-Au digaula.”

Chapter 7

7:1  Dimaadua gu-hagau au gi-di ngudu di bontai di abaaba o-di Hale Daumaha, di gowaa digau Judah e-ulu belee dadaumaha, bolo au gii-duu i-di gowaa deelaa gi-haga-iloo-ina gi-nia daangada huogodoo nia helekai Dimaadua di Gowaa Aamua, di God o Israel, e-helekai-ai gi digaula, “Goodou huluhia godou mouli mo godou hangahaihai, gei Au ga-dumaalia-adu gi goodou gii-noho i ginei.

7:2  Dimaadua gu-hagau au gi-di ngudu di bontai di abaaba o-di Hale Daumaha, di gowaa digau Judah e-ulu belee dadaumaha, bolo au gii-duu i-di gowaa deelaa gi-haga-iloo-ina gi-nia daangada huogodoo nia helekai Dimaadua di Gowaa Aamua, di God o Israel, e-helekai-ai gi digaula, “Goodou huluhia godou mouli mo godou hangahaihai, gei Au ga-dumaalia-adu gi goodou gii-noho i ginei.

7:3  Dimaadua gu-hagau au gi-di ngudu di bontai di abaaba o-di Hale Daumaha, di gowaa digau Judah e-ulu belee dadaumaha, bolo au gii-duu i-di gowaa deelaa gi-haga-iloo-ina gi-nia daangada huogodoo nia helekai Dimaadua di Gowaa Aamua, di God o Israel, e-helekai-ai gi digaula, “Goodou huluhia godou mouli mo godou hangahaihai, gei Au ga-dumaalia-adu gi goodou gii-noho i ginei.

7:4  Goodou hudee hagadonu-ina nia helekai halahalau-dangada ala boloo, ‘Gidaadou guu-noho i-di aumaalia! Deenei la-go di Hale Daumaha o Dimaadua! Deenei la-go di Hale Daumaha o Dimaadua! Deenei la-go di Hale Daumaha o Dimaadua!’

7:5  “Goodou huluhia godou hangahaihai. Kilia gi-daha godou mee ala e-haihai. Godou hangahaihai ang-gi tangada-nei mo tangada-nei la-gi-heia gii-donu.

7:6  Goodou hudee hagahuaidu-ina digau mai i-daha, nia dama nadau maadua ai, mo nia ahina ala guu-mmade nadau lodo. Goodou hudee daaligidia gii-mmade i-hongo tenua deenei digau ala nadau huaidu ai. Goodou hudee daumaha ang-gi nia balu-ieidu, idimaa di hai deenei le e-daaligi goodou gi-daha.

7:7  Maa goodou gaa-huli godou mouli, gei Au ga-dumaalia-adu gi goodou gii-noho i-hongo tenua dela ne-wanga ko-Au gi godou maadua-mmaadua gi-hai-henua ginai gaa-hana-hua beelaa.

7:8  “Mmada, goodou e-hagadonu nia agoago halahalau-dangada.

7:9  Goodou e-gaiaa, daaligi-dangada, dili helekai tilikai, tigidaumaha ang-gi Baal, mo-di daumaha ang-gi nia balu-ieidu ala digi iloo-e-goodou mai mua.

7:10  Goodou e-hai nia mee ala hagalee hiihai ginai Au, gei goodou e-lloomoi e-tuu i ogu mua i-lodo dogu Hale Daumaha deenei, e-helekai boloo, ‘Gidaadou guu-noho i-di aumaalia!’

7:11  E-hai behee, goodou e-haga-mamaanadu bolo dogu Hale Daumaha la di gowaa pala hagammuni-ai digau gaiaa? Au gu-gidee godou hangahaihai.

7:12  Malaa, goodou hula gi Shiloh, di gowaa dela ne-hilihili ko-Au i-di matagidagi belee hagalaamua-ai dogu ingoo go goodou, gei goodou ga-modongoohia be di-ma di-aha dela ne-hai ko-Au gi-di gowaa deelaa, idimaa nia huaidu o agu daangada go digau Israel.

7:13  Goodou guu-hai nia huaidu aanei huogodoo, gei ma e-aha maa Au gu-tataanga agu agoago adu gi goodou, goodou hagalee hiihai e-hagalongo, be hagalee helekai gi dagu gahigahi goodou.

7:14  Malaa, dagu hai dela ne-hai gi Shiloh, la dela gadoo dagu hai dela gaa-hai gi dogu Hale Daumaha dela e-hagadagadagagee ginai goodou, go di gowaa dela ne-wanga ko-Au gi godou maadua-mmaadua mo goodou.

7:15  Au ga-hagau goodou gi-daha mo ogu mua, gadoo be dagu hai dela ne-hagau godou gau Israel gi-daha mo ogu mua. Ma ko-Au go Dimaadua ne-helekai.”

7:16  Dimaadua ga-helekai, “Jeremiah, goe hudee hai dalodalo i digau aanei. Goe hudee gahigahia Au be e-hai au dalodalo i digaula. Goe hudee dangidangi hagamahi i digaula mai gi-di-Au, idimaa, Au ga-hagalee hagalongo-adu gi-di-goe.

7:17  Goe e-de-gidee be nia maa ni-aha ala e-hai go digaula i-lodo nia waahale o Judah mo i-hongo nia ala i Jerusalem?

7:18  Nia damagiigi e-hagabudu nadau dohomu, nia daane e-akaa nadau gowaa dudu tigidaumaha, gei-ogo nia ahina e-unugi nadau palaawaa bolo e-dunu nia mee ang-gi di balu-ieidu-ahina dela e-haga-ingoo go digaula bolo di Tagi-Ahina o-di Langi. Digaula e-tigidaumaha labelaa nadau waini gi-nia balu-ieidu ala i-golo, bolo ginaadou e-haga-mmaemmae ogu lodo.

7:19  Gei di-maa e-donu bolo ma ko-Au dela e-haga-mmaemmae go digaula? Gei deeai, digaula e-bida haga-mmaemmae nadau huaidina, gei e-bida haga-langaadia-hua ginaadou.

7:20  Malaa, Au go di Tagi go Yihowah gaa-llingi-iha dogu hagawelewele gi-hongo di Hale Daumaha deenei, gi-hongo nia daangada, gi-hongo nia manu mo gi-hongo nia laagau mono huwa-laagau. Dogu hagawelewele le e-hai gadoo be-di ahi dela e-deemee di-diinai go tangada.

7:21  “Agu daangada-nei, goodou e-dudu hagatau hunu tigidaumaha i-hongo di gowaa dudu-tigidaumaha, gei goodou e-mee di-gai hunu tigidaumaha. Gei Au go Yihowah di Gowaa Aamua dela go di God o Israel e-helekai boloo: E-humalia-hua maa goodou gaa-gai nia maa huogodoo.

7:22  Idimaa di madagoaa Au ne-laha-mai godou maadua-mmaadua gi-daha mo Egypt, Au digi dugu-anga agu haganoho gi digaula i-di hai o-nia tigidaumaha-dudu, be go nnagadilinga tigidaumaha ala i-golo.

7:23  Malaa, Au gu-helekai gi digaula, bolo digaula gi-hagalongo-mai gi-di-Au, gei Au gaa-hai di God ni digaula, gei digaula gaa-hai nia dama ni-aagu. Gei Au guu-hai gi digaula bolo digaula gi-mouli i-di mouli dela ne-helekai-iei Au, gei nia mee huogodoo gaa-kila humalia i nadau baahi.

7:24  Gei digaula gu-hagalee daudali gei e-hagalee hagalongo-mai gi-di-Au, gaa-hai nia mee huaidu huogodoo ala e-hiihai ginai nadau manawa lodo hamaaloo. Nadau huaidu le e-hagahuaidu ginaadou hagalee-loo e-humalia.

7:25  Daamada i-di laangi o godou maadua-mmaadua ne-hagatanga-mai gi-daha mo Egypt, gaa-dae-mai gi dangi-nei, Au nogo haga-hagau-adu agu hege ala go agu soukohp.

7:26  Gei goodou gu-hagalee hiihai e-daudali be e-hagalongo gi digaula. Goodou guu-lodo hamaaloo ge koia e-de-hagalongo gi-nonua i godou maadua-mmaadua.

7:27  “Malaa, Jeremiah, goe ga-helekai i agu helekai aanei gi digaula, gei digaula ga-hagalee hiihai e-hagalongo. Goe ga-gahigahi digaula, gei digaula ga-hagalee helekai gi dau gahigahi.

7:28  Gei goe ga-haga-modongoohia gi digaula bolo nadau henua hagalee hagalongo-mai gi-di-Au go Dimaadua go di-nadau God, be e-hagalee kabe mai di hagaduadua o nadau huaidu. Di manawa-dahi i nadau baahi gu-hagalee. Gei tangada i digaula e-leelee i di-maa ai.

7:29  “Goodou go digau Jerusalem, goodou gi-manawa-gee, gei gi-tuudia nia ngaahulu o godou libogo, kilia gi-daha. Goodou gi-dadaahili nia daahili lodo huaidu o-di made i tomo nia gonduu, idimaa Au go Dimaadua, Au gu-hagawelewele, ga-haga-de-iloo agu daangada.

7:30  “Digau Judah guu-hai di-nadau mee huaidu. Digaula guu-dugu nadau ada-mee ala hagalee hiihai ginai Au gi-lodo dogu Hale Daumaha, gu-haga-milimilia dogu Hale Daumaha.

7:31  I-lodo di Gowaa Mehanga Gonduu o Hinnom, digaula gu-haga-duu di-nadau gowaa dudu-tigidaumaha e-haga-ingoo bolo Topheth bolo e-dudu-ai nadau dama-daane mo nadau dama-ahina e-hai-ai nadau tigidaumaha. Gei Au digi wanga gi digaula taganoho bolo gi-heia di mee deenei. Au digi maanadu di mee deenei.

7:32  Malaa, di madagoaa i-golo gaa-dae-mai gei-ogo di gowaa deenei ga-hagalee haga-ingoo bolo Topheth, be-di Gowaa Mehanga Gonduu o Hinnom, gei di gowaa deelaa ga-haga-ingoo bolo di Gowaa Baba Dadaaligi-Dangada. Nia daangada gaa-danu i-golo, idimaa, deai di gowaa i-golo e-danu digaula ai.

7:33  Nnuaidina o digau mmade gaa-hai nia mee e-gai go nia manu mamaangi, mono manu lodo-geinga, gei deai tangada i-golo e-hagabagi nia manu aanei gi-daha ai.

7:34  Tenua deelaa ga-deai ono daangada ai. Au gaa-dugu nia lee o digau ala e-tenetene hagahagaamu, mo nia lee haga-tenetene ang-gi nia hagamiami haga-hai-lodo i-lodo nia waahale o Judah mo i-hongo nia ala o Jerusalem, gei nia maa ga-hagalee.

Chapter 8

8:1  “I-di madagoaa deelaa, nia iwi o-nia king mo digau aamua o Judah, mo nia iwi o digau hai-mee-dabu mono soukohp, mo nia iwi o digau huogodoo ala e-noho i Jerusalem gaa-geli-aga gi-daha mo nadau daalunga.

8:2  Gei digaula hagalee hagabudu-mai nia maa gaa-danu, nia iwi digaula gaa-hai gadoo be nia duudae ala e-malae i-hongo nia gelegele. Nia iwi aalaa e-mmoe-hua beelaa gaa-dii ginai di laa, di malama, mono heduu, nia hagadilinga mee aanei ala ne-hiihai ginai ge ne-hege ginai digaula, ala ne-daudali go digaula ge ne-daumaha ginai.

8:3  Gei digau o tenua huaidu deenei ala ga-mouli, go digau ala gaa-noho i-nia gowaa ala ne-haga-bagi ginai digaula ko-Au, gei digaula ga-hiihai gi-di made i-hongo di-nadau mouli. Ko-au go Yihowah di Gowaa Aamua ne-helekai.”

8:4  Dimaadua ga-helekai-mai bolo au gi-hagi-anga-ina gi ana daangada boloo, “E-hai behee, maa tangada gaa-hinga gi-lala, mee hagalee e-duu i-nua labelaa? Maa tangada gaa-ngala dono ala dela e-hana-ai, mee hagalee e-huli gi-muli gi-di ala e-donu?

8:5  Malaa, e-hai behee, goodou go agu daangada, goodou e-aha ala guu-huli gi-daha mo Au, gu-hagalee e-huli-mai? Goodou gu-llawe gi godou balu-ieidu, gu-hagalee e-hiihai di-huli-mai gi-di-Au.

8:6  Au gu-hagalongo haga-humalia, gei goodou hagalee e-helekai donu. Tangada i goodou ne-huli dono manawa i ana haihai huaidu ai. Deai tangada i goodou ne-heeu, ‘Ma nia huaidu-aha ala ne-hai ko-au?’ Huogodoo ala hua e-hai go nadau hiihai, e-hai gadoo be-di hoodo dela e-lele gi tauwa.

8:7  Di maduge e-iloo-ia di madagoaa dela e-hana-ieia gi dono gowaa. Nnagadilinga manu-mamaangi aanei go nia mwuroi, lomilomi mo-nia ‘thrush’ e-iloo-ginaadou di madagoaa dela e-hula-ai gi nadau gowaa nogo noho-ai. Gei goodou go agu daangada, e-de-iloo-e-goodou agu haganoho ala ne-dugu-adu ko-Au gi goodou.

8:8  Goodou e-aha ala e-helekai bolo goodou e-kabemee ge e-iloo-e-goodou agu haganoho? Goodou mmada, digau tilikai la-ne-huli nnaganoho.

8:9  Godou gau kabemee gu-langaadia, nadau hagamaanadu gu-hinihini, gei digaula gu-paagege. Digaula guu-kili gi-daha agu helekai. Di kabemee behee dela i-baahi digaula dolomeenei?

8:10  Deenei-laa, Au gaa-wanga nia hadagee digaula gi-hai-mee ginai nnuai daangada, mo nadau lodo gi nnuai daane. Digau huogodoo, aamua mo lligi, e-hagamada e-haga-maluagina ginaadou gi nadau hai-hegau gaiaa. Nia soukohp mo digau hai-mee-dabu hogi e-halahalau nia daangada.

8:11  Digaula e-helekai bolo nia magibala o agu daangada la nia mee hua ne-oloia. Gei digaula e-helekai boloo, ‘Nia mee huogodoo gu-humalia.’ Gei nia mee huogodoo la-digi humalia.

8:12  Goodou go agu daangada, e-hai behee? Goodou hagalee e-langaadia i-di godou hai nia mee gulugulua aanei? Deeai, goodou hagalee e-langaadia, gei goodou hogi e-de-iloo-e-goodou di tee. Malaa, deenei gaa-hidi-ai goodou gaa-too gadoo be digau ala i-golo guu-too. I dogu madagoaa ma-ga-hagaduadua goodou, deenei dela go di-godou hagaodi. Ma ko-Au go Dimaadua ne-helekai.

8:13  “Au ne-hiihai e-hagabudu-mai agu daangada gadoo be tangada dela e-hadi nia huwa o dana hadagee. Gei-ogo digaula e-ala gadoo be-di laagau-‘grape’ dela ono huwa ai, mo-di laagau-‘fig’ dela ono huwa ai, mo nia lau o-nia maa guu-mae gi-lala, gaa-hidi-iei Au gaa-wanga tenua la-gi digau hua-gee gi-hai-henua ginai.”

8:14  Nia daangada a God ga-heeu, “Gidaadou e-aha ala hagalee e-ngalungalua? Gidaadou gaa-llele gi-lodo di waahale dela gu-abaaba mau-dangihi, ga-mmade-laa i-golo. Dimaadua go tadau God gu-haga-halauwa gidaadou bolo gii-mmade. Mee gu-gaamai ana poisin gi-inumia go gidaadou, idimaa gidaadou ne-hai di huaidu e-hai baahi gi Mee.

8:15  Gidaadou guu-noho talitali di madagoaa di noho di aumaalia mo-di madagoaa hagahili magi, malaa gu-deai di hai ai. Di haingadaa-hua damana deenei gu-dau-mai.

8:16  Tadau hagadaumee la-gu-dau-mai i-di guongo Dan. Gidaadou gu-longono nia lee dogidogi o-nia hoodo digaula. Tenua hagatau gu-polepole i-nia lee o-nia hoodo digaula. Tadau hagadaumee la-gu-lloomoi e-oho tadau henua mo ono hagahonu huogodoo, mo tadau waahale mo digau o-di waahale.”

8:17  Dimaadua ga-helekai, “Goodou mmada! Au ga-hagau-adu agu gihaa lodo-geinga gi godou baahi, nia gihaa poisin ala e-deemee di-haga-gaidala, ga-gadigadi goodou.”

8:18  Ogu manawa-gee e-deemee di-hili. Dogu manawa gu-bagege huoloo.

8:19  Hagalongo! Au gu-longono-eau nia lee o agu daangada ala e-wwolowwolo i-lodo tenua i-nia gowaa huogodoo boloo, “E-hai behee? Dimaadua la-gu-hagalee i Zion? Di King o Zion la-gu-hagalee noho i-golo?” Dimaadua go di-nadau King ga-helekai, “Goodou e-aha ala e-hai Au gi-hagawelewele gi godou hai-daumaha gi godou balu-ieidu, mo godou palapala gi-lala i-mua nia balu-god o digau tuadimee ala ono hadinga ai?”

8:20  Nia daangada e-wwolowwolo boloo, “Di madagoaa mahanahana gu-doo gi-daha, di madagoaa di hadi o taugai guu-lawa, gei gidaadou digi hagamouli.”

8:21  Ogu lodo gu-mooho, idimaa agu daangada la-gu-mooho. Au e-dangi huoloo, au e-manawa-gee huoloo.

8:22  E-hai behee, ma nia wanii i Gilead ai? Digau hagahili magi i-golo ai? Ma e-aha go agu daangada ala e-magi gei digi haga-hili-ina?

Chapter 9

9:1  Au bolo dogu libogo la-gi-hai-hualaa di monowai, gei ogu golomada gii-hai di gowaa e-haga-hali-mai nia wai, bolo gii-mee au di-dangidangi i-di boo mo-di aa, e-dangidangi i agu daangada ala gu-daaligi guu-mmade.

9:2  Au bolo gi-iai-hualaa dagu gowaa noho i-lodo di anggowaa gii-mee di-hana ginai au, e-noho i-daha mo agu daangada. Digaula huogodoo la digau dee-manawa-dahi, digau huaidu de-hagalongo.

9:3  Nia madagoaa huogodoo, gei digaula gu-togomaalia e-hai nadau kai tilikai. Tenua deenei hagalee e-dagi go di tonu, e-dagi-hua go di huaidu. Dimaadua ga-helekai, “Agu daangada e-haihai-hua di huaidu i-nia madagoaa huogodoo, gei hagalee e-langahia-e-ginaadou bolo ma ko-Au go di-nadau God.”

9:4  Nia daangada huogodoo e-noho kanakana e-hai-baahi gi nadau ihoo, gei tangada e-mee di-gana gi dono duaahina ai. Nia hagahaanau huogodoo guu-hai digau halahalau-dangada gadoo be Jacob, gei nia daangada huogodoo guu-kai tilikai gi nadau ihoo hagaaloho.

9:5  Digaula huogodoo e-dagi hala nadau ihoo, tangada e-helekai donu ai. Digaula e-aago nadau holole gi-haihai tilikai, gei hagalee lawa i nadau hai huaidu. Digaula gu-dee-noho di-haihai nia mee huaidu, e-dee-noho di-halahalau-dangada. Dimaadua e-helekai bolo nia daangada aanei gu-de-hagalongo ang-gi de-Ia.

9:6  Digaula huogodoo e-dagi hala nadau ihoo, tangada e-helekai donu ai. Digaula e-aago nadau holole gi-haihai tilikai, gei hagalee lawa i nadau hai huaidu. Digaula gu-dee-noho di-haihai nia mee huaidu, e-dee-noho di-halahalau-dangada. Dimaadua e-helekai bolo nia daangada aanei gu-de-hagalongo ang-gi de-Ia.

9:7  I-di hai deenei, Dimaadua di Gowaa Aamua ga-helekai, “Au ga-hagamadammaa agu daangada gadoo be-di baalanga ma-ga-hagamadammaa, ga-hagamada digaula. Agu daangada guu-hai nia mee huaidu, malaa di-aha dela gaa-mee di-hai ko-Au gi digaula?

9:8  Nia holole digaula e-koia e-gaa huoloo be-di ngudu taalo, digaula e-helekai tilikai i-nia madagoaa huogodoo. Digau huogodoo e-leelee haga-humalia gi digau i nadau baahi, malaa, digaula e-halahala di-nadau hai dela e-hele digaula.

9:9  E-hai behee, Au hagalee ga-hagaduadua digaula i nadau hai aanei? Au hagalee e-tala di hui o nnangahaihai huaidu beenei ang-gi tenua dela nogo hai nia mee beenei? Ma ko-Au go Dimaadua ne-helekai.”

9:10  Jeremiah ga-helekai, “Au ga-manawa-gee gi-nia gonduu, gei ga-dangidangi i dogu mmada gi-nia gowaa haangai-manu, idimaa ma gu-maangoo, deai tangada e-hana-laalaa ai. Gu-de-longono labelaa nia lee o-nia kau mono siibi; nia manu mamaangi mono manu hongo-henua guu-hula gi-daha.”

9:11  Dimaadua ga-helekai, “Au gaa-hai di waahale o Jerusalem gi-mooho gi-lala, gaa-hai di gowaa e-noho-ai nia manu lodo-geinga-‘jackal’, gei nia waahale o Judah gaa-hai di anggowaa, ga-deai digau e-noho i-golo ai.”

9:12  Gei au ga-heeu, “Meenei Dimaadua, ma e-aha dela tenua deenei gu-mooho, gei gu-maangoo gadoo be-di anggowaa, gei nia daangada e-hula-laalaa ai? Ma koai dela e-kabemee di haga-modongoohia-aga di mee deenei? Ma koai dela ne-helekai ginai Goe bolo gi-haga-modongoohia-ina gi digau ala i-golo?”

9:13  Dimaadua ga-helekai, “Di mee deenei ne-gila-aga, idimaa, agu daangada guu-kili gi-daha agu helekai ala ne-aago gi digaula. Digaula gu-de-hagalongo-mai gi-di-Au ge hagalee haga-kila-aga agu helekai.

9:14  Digaula guu-lodo hamaaloo nadau manawa ge gu-daumaha ang-gi nia balu-ada o Baal, gadoo be-di hai o nadau maadua-mmaadua ne-aago ang-gi digaula.

9:15  Malaa, goodou gi-hagalongo be di-maa di-aha dela gaa-hai ko-Au, go Yihowah di Gowaa Aamua, dela go di God o Israel. Au gaa-wanga gi agu daangada nia laagau mmala gi-geina mono wai-poisin gi-inumia.

9:16  Au gaa-hai digaula gi-lellele dagidahi gi-nia guongo ala digi iloo-ai-e-ginaadou mo nadau maadua-mmaadua, gei Au ga-hagau-mai labelaa nia gau-dauwa gi-daaligidia digaula.”

9:17  Dimaadua di Gowaa Aamua ga-helekai, “Goodou gi-hagabaubau be di-maa di-aha dela e-hai! Goodou gi-gahia-mai nia ahina ala koia e-iloo di-daahili i tangada made.”

9:18  Gei-ogo nia daangada ga-helekai, “Goodou helekai gi digaula gi-hagalimalima gi-lloomoi, e-huwa nadau daahili i-di manawa-gee mai gi gimaadou, gaa-dae-loo gi madau golomada gaa-honu wai dangi.”

9:19  Goodou gi-hagalongo gi-nia lee o digau ala e-tangitangi i Zion, ala e-hai boloo, “Gidaadou gu-huaidu huoloo mai gi gidaadou! Gidaadou guu-noho i-lodo di haga-langaadia damanaiee! Gidaadou e-hai gi-hagatanga gi-daha mo tadau henua. Tadau hale gu-mooho gi-lala.”

9:20  Gei au ga-helekai, “Goodou go nia ahina, goodou gi-hagalongo gi-humalia gi-nia helekai Dimaadua ala gaa-hai-adu gi goodou. Aago-ina godou dama-ahina di hai o nadau manawa-gee, gei aago-ina labelaa gi godou ihoo hagaaloho nia daahili manawa-gee.

9:21  Idimaa di made la-gu-ulu-mai gi-lodo tadau hale mai i-nia bontai lligi, gei gu-ulu-mai gi tadau hale-aamua. Di made gu-daaligi gi-daha nia damagiigi ala i-hongo nia ala, mo nia dama-daane mmaadua ala i-lodo nia gowaa huihui-mee.

9:22  Nnuaidina gau mmade gu-mmoemmoe i-nia gowaa huogodoo, gadoo be nia duudae manu i-lodo di hadagee, gadoo be nia huwa-laagau dubu ala gu-diiagi go digau hadi huwa-laagau. Aanei nnelekai Dimaadua dela ne-hagi-mai bolo au gi-hagi-adu gi goodou.”

9:23  Dimaadua ga-helekai, “Goodou ala e-kabemee, goodou hudee hai bolo goodou digau e-iloo nia mee. Gei-ogo digau ala e-maaloo, goodou hudee hai bolo goodou digau e-maaloo. Gei-ogo digau ala e-maluagina, goodou hudee hai bolo goodou digau e-maluagina.

9:24  Maa iai tangada ga-hagaamu-ia gi-di mee, ia gi-helekai bolo ia e-iloo-ia Au, gei e-modongoohia-ia Au, idimaa, dogu aloho le e-hana-hua beelaa, gei Au e-hai go nia mee ala e-madammaa gei e-donu. Aanei agu mee ala e-manawa-tene ginai Au. Ma ko-Au go Dimaadua ne-helekai.”

9:25  Dimaadua ga-helekai, “Di madagoaa ga-dau-mai, gei Au ga-hagaduadua digau Egypt, Judah, Edom, Ammon, Moab, mo digau ala i-lodo di anggowaa, ala go digau ala guu-dahi gi-daha nia ngaahulu o nadau libogo. Digau huogodoo aanei la-guu-lawa di sirkumsais, gei digaula hagalee e-hagagila-aga di hagababa dela e-haga-modongoohia-aga go di hai deenei. Deai tangada i digau aanei ge deai hogi tangada i-digau Israel dela ne-hagagila-aga di hagababa deenei ai.”

9:26  Dimaadua ga-helekai, “Di madagoaa ga-dau-mai, gei Au ga-hagaduadua digau Egypt, Judah, Edom, Ammon, Moab, mo digau ala i-lodo di anggowaa, ala go digau ala guu-dahi gi-daha nia ngaahulu o nadau libogo. Digau huogodoo aanei la-guu-lawa di sirkumsais, gei digaula hagalee e-hagagila-aga di hagababa dela e-haga-modongoohia-aga go di hai deenei. Deai tangada i digau aanei ge deai hogi tangada i-digau Israel dela ne-hagagila-aga di hagababa deenei ai.”

Chapter 10

10:1  Goodou go digau Israel, goodou hagalongo gi nnelekai mai baahi Dimaadua adu gi goodou.

10:2  Mee e-helekai, “Goodou hudee daudalia nia hangahaihai o-nia henua ala i-golo. Ma e-aha maa nia henua ala i-golo ga-mmaadagu huoloo, gei goodou hudee uli godou gai gi-nia mee ala ga-kila-aga i-lala di langi, nia mee ala digi heia mai i-mua.

10:3  Nia god o digau aanei ala e-daumaha ginai la dono hadinga ai. Di laagau ne-hele gi-lala i-lodo henua, ga-daadaa gi-nia goloo o digau paa-mee,

10:4  gaa-humu gi-nia silber mono goolo. Nomuli gaa-dogi gi-nia baalanga bolo gii-mau gi-dee-hinga.

10:5  Nnagadilinga ieidu beenei le e-hai gadoo be di ada-dangada dela ne-haga-duu i-lodo di hadagee tuigaa belee huiahi nia manu mamaangi. Nia maa e-deemee di-leelee. Nia daangada e-kae di-maa idimaa nia maa e-deemee di-heehee. Goodou hudee mmaadagu i-nia maa, idimaa ma e-deemee di-haga-huaidu goodou, gei e-deemee labelaa di-haga-humalia goodou.”

10:6  Meenei Dimaadua, deai dahi dangada e-hai be Goe ai, Goe dela e-mahi gei do ingoo e-aamua gei e-mogobuna.

10:7  Ma koai dela ga-hagalee e-hagalaamua Goe, meenei di King o-nia henua huogodoo? Ma Kooe hua dela e-tau-anga belee hagalaamua, deai tangada e-hai be Goe ai i-baahi digau kabemee o-nia henua huogodoo, be i-baahi o nadau king.

10:8  Digaula huogodoo guu-laba gu-boiboi. Ma ni-aha ala e-mee di-kabe go digaula mai i-nia ada-god ne-hai gi-nia laagau?

10:9  Nia ada-god digaula la-ne-hii gi-nia silber mai Spain mo nia goolo mai i Uphaz. Nia maa la-ne-hai-hua go digau hihi ada. Nia maa e-ulu nia gahu mmee mo e-halatee luuli ala ne-hai go digau dui gahu.

10:10  Meenei Dimaadua, ma Kooe hua go di God e-donu, ma Kooe go di God mouli mo-di King deeodi, dono hagaodi ai. Do madagoaa ma-ga-hagawelewele, gei henuailala ga-ngalungalua. Nia henua e-deemee-loo di noho i-lala i do hagawelewele.

10:11  (Goodou go nia daangada gi-helekai gi digaula bolo nia ada-god ala hagalee ne-hai henuailala mo di-langi le e-oho gi-daha. Nia maa ga-hagalee i-nia gowaa huogodoo i henuailala.)

10:12  Dimaadua ne-hai henuailala gi ono mogobuna, dono iloo-mee dela ne-hai henuailala ge ne-holo gi-daha di langi.

10:13  Mee e-helekai-hua, gei nia wai ala i-bahi-i-nua nia gololangi gu-ngalungalua. Mee e-gaamai nia gololangi mai i-nia mada-henuailala. Gei Mee e-haganoho dana ila bolo e-dabadaba i-lodo di uwa, ga-gaamai dana madangi mai i-lodo dana gowaa dugu-mee.

10:14  Nia daangada ga-gidee di-mee deenei, ga-boiboi ga-de-longono-ginaadou gi-daha. Digau ala ne-hai nadau ada-god ga-langaadia huoloo, idimaa nia ada-god digaula le e-hala, gei hagalee ono mouli ai.

10:15  Nia maa ono hadinga ai, ala-hua go nia mee haga-langaadia. Digaula ga-hagammaa gi-daha i-di madagoaa Dimaadua ga-hanimoi e-hagi-aga digaula.

10:16  Di God o Jacob la-hagalee e-hai be digaula, idimaa go Mee dela ne-hai nia mee huogodoo, gei ne-hili-aga Israel belee hai ana daangada donu. Yihowah di Gowaa Aamua, deenei dono ingoo.

10:17  Goodou go digau Jerusalem, goodou gu-duuli! Kae-ina godou goloo!

10:18  Dimaadua gaa-kili goodou gi-daha mo tenua deenei. Mee ga-dagadagahi goodou gi-deai tangada e-dubu i-golo ai. Dimaadua ne-helekai.

10:19  Digau Jerusalem ga-wwolowwolo e-hai boloo, “Gu-mooho-hualaa behee go gidaadou! Tadau moholehole le e-deemee di-hagahili. Gidaadou e-hagabaubau bolo deenei di-mee dela e-mee i tadau baahi!

10:20  Tadau hale-laa gu-mooho, nia loahi ala ne-daahi nia maa la-gu-mooho. Tadau dama huogodoo la-gu-hagalee, tangada ne-dubu bolo ga-hagaduu-aga tadau hale-laa ai, gei tangada e-daudau dana gahu-duuli bontai i-lodo ai.”

10:21  Gei au ga-helekai, “Madau dagi le e-boiboi, digaula digi tangi ang-gi Dimaadua di-nadau hagamaamaa, deelaa di hai e-hala-ai digaula, gei tadau daangada hogi la-gu-hagabagi gi-daha.

10:22  Goodou hagalongo! Nia longo gu-dau-mai! Iei di hagalongoaa damana gu-gila-aga i dahi henua i-baahi laa-ngeia, ana gau-dauwa gaa-hai nia waahale o Judah gii-hai di anggowaa, di gowaa e-noho-ai nia manu lodo-geinga-‘jackal’.”

10:23  Meenei Dimaadua, au e-iloo bolo tangada e-mee di-bida dagi dono mouli ai. Tangada la-hagalee dagi dono mouli.

10:24  Meenei Dimaadua, haga-donu-ina au daangada, gei Goe hudee heia gimaadou gi-haingadaa be e-hagaduadua maa Goe ga-hagawelewele, idimaa holongo deenei di hagaodi o madau mouli.

10:25  Heia do hagawelewele gii-doo gi-hongo nia henua ala i-golo, ala hagalee e-daumaha-adu gi-di-Goe, mo digau huogodoo ala guu-huli gi-daha mo Goe. Digaula gu-daaligi au daangada, gu-hagammaa gi-daha gimaadou, gei guu-hai tenua deenei gi-mooho ono hale.

Chapter 11

11:1  Dimaadua ga-helekai-mai gi-di-au,

11:2  “Hagalongo gi-di hai o-di haganoho o-di hagababa. Haga-modongoohia-ina gi digau Judah mo Jerusalem

11:3  bolo Au go Yihowah, di God o Israel, gu-haganoho dagu haga-halauwa gi digau huogodoo ala ga-hagalee hagagila-aga nia hangaahai o-di hagababa deenei.

11:4  Deelaa go di hagababa ne-hai gi godou maadua-mmaadua i-mua i dogu lahamai digaula i Egypt, tenua dela e-hai gadoo be-di ulaula o-di ahi ang-gi digaula. Au gu-helekai gi digaula bolo gi-hagalongo-mai gi-di-Au gi-haga-gila ina-aga agu helekai huogodoo. Au gu-helekai gi digaula bolo maa digaula ga-haga-gila-aga, gei digaula gaa-hai nia daangada ni-aagu, gei Au gaa-hai di God ni digaula.

11:5  Deenei-laa, Au ga-hagagila-aga dagu hagababa ne-hai gi nadau maadua-mmaadua i-mua, bolo Au gaa-wanga gi digaula tenua dela koia e-logo ono goloo, ge e-humalia ono gelegele dela gu-noho-iei digaula dangi-nei.” Gei au ga-helekai-anga, “Uaa, meenei Dimaadua.”

11:6  Dimaadua ga-helekai-mai, “Hana gi-lodo nia waahale o Judah mo i-hongo nia ala o Jerusalem. Hagadele-ina agu helekai gi-nia gowaa aalaa, hagi-anga-ina gi digaula gi-hagalongo gi-nia hai o-di hagababa dela gu-haganoho gi-haga-gila-ina-aga.

11:7  I dogu laha-mai nadau maadua-mmaadua i Egypt, gei Au gu-boloagi maaloo-dangihi gi digaula bolo gi-hagalongo-mai gi-di-Au, gei Au digi modu dagu boloboloagi gi digaula, gaa-dae-mai gi dangi-nei.

11:8  Gei digaula digi hagalongo ge digi hagagila-aga. Digaula huogodoo gu-daudali-hua go nadau manawa hamaaloo koia gu-huaidu i-di madagoaa i-mua. Au gu-hagi-anga gi digaula gi-haga-gila-ina-aga di hagababa deelaa, gei digaula e-buhi. Gei Au gu-hagaduadua digaula gi dagu hai dela gu-haganoho.”

11:9  Dimaadua ga-helekai-mai, “Digau Judah mo Jerusalem gu-haganoho di-nadau hai belee hai-baahi mai gi-di-Au,

11:10  Digaula guu-hai labelaa nnagadilinga huaidu nogo hai go nadau maadua-mmaadua ala i-mua, ala nogo hagalee e-hiihai e-hagagila-aga agu helekai. Digaula gu-daumaha gi-nia balu-ieidu. Digau Israel mo Judah gu-oho dagu hagababa dela ne-hai gi nadau maadua-mmaadua i-mua.

11:11  Deenei-laa, Au go Dimaadua, e-hai dagu boloagi ang-gi digaula bolo Au ga-haga-huaidu digaula, gei digaula ga-deemee di-mehede. Maa digaula ga-tangi-mai gi-di-Au di hagamaamaa, gei Au hagalee hagalongo gi digaula.

11:12  Malaa, digau Judah mo Jerusalem gaa-hula gi nadau god ala nogo tigidaumaha ginai, ga-tangi-anga nadau hagamaamaa. Malaa, nia god aanei e-deemee di-haga-dagaloaha digaula i-di madagoaa o taaligi deenei ga-dau-mai.

11:13  Di logowaahee o-nia god o digau Judah le e-logowaahee be nadau waahale, gei di logowaahee o-nia gowaa dudu-tigidaumaha o digau Jerusalem ne-hagaduu-aga belee hai nia gowaa dudu-tigidaumaha ang-gi Baal, di god huaidu huoloo, le e-logowaahee be nia ala ala i-lodo di waahale.

11:14  Jeremiah, goe hudee dalodalo be e-dangi-mai gi-di-Au di hagamaamaa i-di ingoo o digau aanaa. I nadau madagoaa ala ma-gaa-tale gi-di haingadaa ga-tangi di hagamaamaa mai dogu baahi, gei Au hagalee e-hagalongo gi digaula.”

11:15  Dimaadua ga-helekai, “Nia daangada ala nogo haa-manawa-iei Au la-guu-hai di huaidu. Aahee la nadau donu ala e-ulu-ai ginaadou gi-lodo dogu Hale Daumaha? E-hai behee? Digaula e-hagamaanadu bolo ginaadou e-mee di-dugu di haingadaa i-di nadau hai hagababa mo-di hai-tigidaumaha manu? Digaula e-tenetene ginai?

11:16  I-mua Au nogo hagaingoo digaula bolo di laagau-olib tomo humalia, ono huwa humalia e-logo, gei dolomeenei, gei Au gaa-dudu nia lau di-maa mo-di ngoloolo o-di atili, ga-hadihadi nia manga di-maa.

11:17  “Ko-Au go Yihowah, di Gowaa Aamua, dela ne-dogi Israel mo Judah, gei dolomeenei gei Au gaa-dugu-anga gi digaula di haingadaa. Digaula ne-bida hai di haingadaa deenei gii-noho i nadau nua, idimaa digaula guu-hai nia mee hala, guu-hai Au gi-hagawelewele i-di nadau hai tigidaumaha gi Baal.”

11:18  Dimaadua ga-helekai-mai i-nia haga-huaidu o ogu hagadaumee ala e-hai-baahi mai gi-di-au.

11:19  Au guu-hai gadoo be tama-siibi humalia dela ga-dagidagi e-kae e-daaligi, gei e-de-iloo bolo digaula gaa-hai di-nadau hai huaidu mai gi-di-au. Digaula e-helehelekai, “Gidaadou gaa-hele di laagau deelaa i dono tomo maaloo, gidaadou ga-daaligi di-maa gi hagalee langahia dono ingoo labelaa.”

11:20  Gei au ga-dalodalo, “Meenei Dimaadua, di Gowaa Aamua, go Kooe go tangada hai-gabunga donu. Go Kooe dela e-hagamada nia daangada i nadau maanadu mo nadau hagalongono-ia i ginaadou. Au gu-dugu-adu gi-di-Goe ogu donu. Malaa, heia au gii-mmada gi dau hai dela gaa-hai gi digau aanei.”

11:21  Digau Anathoth e-hiihai e-daaligi au gii-made, gu-helekai-mai bolo ginaadou ga-daaligi au maa au e-hagadeledele hua igolo nia helekai a Dimaadua.

11:22  Dimaadua, go di Gowaa Aamua ga-helekai, “Au ga-hagaduadua digaula! Nadau dama-daane gaa-mmade i tauwa, nadau dama lligi gaa-mmade i-di hiigai.

11:23  Au guu-lawa di haganoho di madagoaa dela e-gaamai-ai di haingadaa gi digau Anathoth, gei di madagoaa hua deelaa, tangada i digaula e-mouli-ai.”

Chapter 12

12:1  Meenei Dimaadua, maa au ga-lagamaaloo-adu i ogu donu, gei Goe ga-hagamodongoohia-aga oo donu. Malaa, gei au ga-heeu-adu di hai o-di tonu. Ma e-aha go digau huaidu ala e-maluagina? Ma e-aha go digau huaidu ala e-kila humalia?

12:2  Go Kooe ne-dogi digaula, gei digaula gaa-hai nadau aga. Digaula gaa-tomo gaa-huwa. Digaula e-helehelekai humalia i-di-Goe i-nia madagoaa huogodoo, gei digaula hagalee hagadahidamee Goe.

12:3  Goe e-iloo-e-Goe au, meenei Dimaadua, Goe e-iloo be au e-hai dagu-aha, mo dogu aloho i-di-Goe. Goe daangia gi-daha nia daangada huaidu aanei gadoo be nia siibi ala e-kae e-daaligi. Loohia digaula gaa-dae-loo gi-di madagoaa e-daaligi-ai digaula gii-mmade.

12:4  Dehee-laa di waalooloo o-di maangoo tenua deenei, ge dehee-laa di waalooloo o-di mae gi-lala nia geinga ala i-lodo nia gowaa maalama huogodoo? Nia manu dolodolo mono manu mamaangi gu-mmade-mmade idimaa go nia huaidu o tadau daangada, go nia daangada ala e-helehelekai boloo, “God e-de-iloo-Ia be gidaadou e-hai tadau-aha. ”

12:5  Dimaadua ga-helekai, “Jeremiah, maa goe gu-duadua di hoiaa gi nia daangada, malaa dehee dau hai e-mee di-hoiaa gi nia hoodo? Maa goe e-deemee di-duu-aga i-lodo tenua baba, malaa dehee dau hai e-mee di-duu-aga i-lodo geinga taalinga Jordan?

12:6  O duaahina mo oo gau gu-hagiaga goe. Digaula e-hai-baahi-adu gi-di-goe labelaa. Ma e-aha maa digaula e-helekai humalia, gei goe hudee hagadonu-ina digaula.”

12:7  Dimaadua ga-helekai, “Au gu-diiagi Israel, Au guu-bae gi-daha dagu henua ne-hilihili. Au guu-wanga agu daangada ala e-aloho-iei Au gi-lala nia mogobuna o nadau hagadaumee.

12:8  Agu daangada ne-hilihili gu-hai-baahi mai gi-di-Au, digaula guu-hai be nia laion o lodo henua ala e-nnguu-mai gi-di-Au, deenei-laa, gei Au gu-de-hiihai gi digaula.

12:9  Agu daangada ne-hilihili guu-hai gadoo be-di manu mamaangi dela e-heebagi ginai nia manu-‘hawk’ i-nia gowaa huogodoo. Gahigahia-mai nia manu lodo-geinga gi-lloomoi gi tagamiami!

12:10  Nia dagi mai i-daha dogologo gu-haga-huaidu dagu hadagee waini, gu-dagadagahi gi-lala dagu hadagee. Digaula guu-hai dagu gowaa e-haa-manawa-iei Au la-gii-hai di anggowaa.

12:11  Digaula guu-hai di-maa gii-hai di anggowaa, ge di-maa guu-moe guu-hai di anga-henua i ogu mua. Tenua hagatau guu-hai di anga-henua, tangada e-haa-manawa i di-maa ai.

12:12  Nia daangada e-lloomoi laa-nua i tomo nia gonduu o tenua deelaa, belee kae nia goloo. Au gu-hagau tauwa e-daaligi tenua deelaa hagatau, tangada e-mouli i-golo i-di aumaalia ai.

12:13  Agu daangada e-haga-nonnono nadau lii-‘wheat’, gei digaula e-daagi nia geinga-tomo. Digaula e-ngalua damana, gei di humalia mai i nadau ngalua ai. Idimaa go dogu hagawelewele huoloo gaa-hidi-ai nia huwa o tenua digaula gu-mooho.”

12:14  Dimaadua ga-helekai, “Au dagu mee i-golo e-helekai-iei-Au i-di hai o digau ala e-noho mai i-daha o Israel ala e-haga-huaidu dagu henua ne-wanga gi digau Israel. Au gaa-daa digau huaidu aanei gi-daha mo nadau gowaa, gadoo be-di laagau dela ma-ga-daagi-aga i-lala, gei Au ga-haga-dagaloaha Judah gi-daha mo nadau mogobuna.

12:15  I-muli-hua dagu daa digaula gi-daha, gei Au ga-dumaalia gi digaula. Au ga-laha-mai nia henua llauehe huogodoo gi nadau henua donu.

12:16  Maa digaula gaa-kawe mo-di manawa hagatau di hai o agu daangada ala e-daumaha-mai gi-di-Au, mo-di hagamodu beenei, ‘E-donu gadoo be Dimaadua e-mouli!’ be-di hai nogo agoago gi agu daangada i-mua bolo gi-hagamodu i-di ingoo Baal, malaa, digaula ga-madalia agu daangada ga-haadanga-lamalia.

12:17  Gei maa tenua damana e-dahi ga-hagalee e-hagagila-aga, malaa, gei Au ga-daagi a-mee gaa-oho gi-daha. Ma ko-Au go Dimaadua ne-helekai.”

Chapter 13

13:1  Dimaadua ga-helekai bolo au gi-huia agu bida gahu-wae linen gi-ulu gi no-lodo, ga-helekai-mai bolo au gi-hudee hagatiu-ina gi-lodo nia wai.

13:2  Malaa, au gaa-hui di-maa ga-ulu gi no-lodo.

13:3  Dimaadua ga-helekai-mai labelaa,

13:4  “Hana gi-di monowai Euphrates. Daaloo hagammuni nia bida gahu-wae aalaa gi-lodo di bongoo hadugalaa.”

13:5  Gei au gaa-hana ga-daalo hagammuni nia bida gahu-wae linen aalaa i taalinga Euphrates.

13:6  Nia laangi gi-nomuli, gei Dimaadua ga-helekai-mai, “Hana gi-muli gi Euphrates, gaamai nia bida gahu-wae aalaa.”

13:7  Gei au gaa-hana gi-muli, ga-gidee-au di gowaa ne-dugu nia bida gahu-wae aalaa, gei au ga-gidee nia maa gu-mooho gu-hagalee humalia.

13:8  Dimaadua ga-helekai-mai labelaa gi-di-au,

13:9  “Deenei e-hai gadoo be dagu hai dela ma-gaa-oho nia hagamuamua o digau Judah, mo-di hagamuamua huoloo o Jerusalem.

13:10  Digau huaidu aanei e-de-hiihai e-hagalongo-mai gi-di-Au, e-daudali-hua nadau manawa hamaaloo mo nadau huaidu mai namua, gei e-daumaha mo-di hege gi-nia balu-ieidu. Deelaa-laa, digaula gaa-hai gadoo be di bida gahu-wae mooho deenei.

13:11  I-di hai o-di bida gahu-wae dela ma-gaa-tai i tuaidina o tangada, dela gadoo dogu hiihai bolo digau Israel mo Judah gi-kumudia Au gi-mau-dangihi. Au ne-hai di-mee deenei bolo digaula gii-hai nia daangada ni-aagu, gaa-hidi-ai di hagaamu mo-di hagalaamua ang-gi dogu ingoo, gei digaula hagalee hagalongo-mai gi-di-Au.”

13:12  Dimaadua, go di God o Israel, ga-helekai-mai, “Jeremiah, helekai gi digau Israel gi-haga-hau-lia nia mee dugu-waini huogodoo, gei digaula ga-helekai bolo ginaadou e-iloo-hua bolo nia mee dugu-waini huogodoo le e-hai-loo gi-haga-hau gi-nia waini.

13:13  Gei goe ga-helekai gi digaula bolo ko-Au, go Dimaadua, ga-haga-inu digau huogodoo o tenua deenei gaa-dae-loo gi digaula ga-libaliba: Nia king ala go di madawaawa David, digau hai-mee-dabu, nia soukohp, mo digau Jerusalem huogodoo.

13:14  Gei Au ga-dugidugi digaula gadoo be nia ibu hadu. Digau mmaadua mo digau lligi e-hai-hua be di-mee e-dahi. Deai di aloho be tumaalia gaa-mee di-dugu agu hai belee daaligi digaula gii-mmade ai.”

13:15  Goodou go digau Israel, Dimaadua ne-helekai! Hila gi-lala, Hagalongo gi Mee.

13:16  Goodou hagalabagau-ina Dimaadua, dela go di-godou God, i-mua dono gaamai di bouli, gei goodou ga-hingahinga i-hongo nia gonduu, i-mua dana hai di maalama dela e-hagadagadagagee ginai goodou la-gi-bouli dongoeho.

13:17  Maa goodou hagalee e-hagalongo, gei au ga-dangidangi hagammuni, idimaa go godou hagamuamua. Au ga-dangidangi huoloo, nia wai ogu golomada gaa-hali gi-lala, idimaa nia daangada Dimaadua la-guu-lahi gi-daha be digau galabudi.

13:18  Dimaadua ga-helekai-mai, “Helekai gi-di king mo dono dinana gi-too-ia gi-daha mo nau lohongo, idimaa nau hau king humalia la-gu-monnono gi-daha mo nau libogo.

13:19  Nia hagadaumee gu-duuli nia waahale bahi-i-ngaaga o Judah, deai tangada e-mee di-ulu gi-lodo ai. Digau Judah huogodoo guu-lahi gi-daha.”

13:20  Jerusalem, mmada! O hagadaumee gu-lloomoi i-bahi-i-ngeia. Aahee digau ala belee hagaloohi goe, digau ala e-hagadagadagagee ginai goe?

13:21  Dehee dau hai e-helekai-iei goe i-di madagoaa nia daangada ala e-hagamaanadu kooe bolo go o ehoo hagaaloho ga-haga-huaidu goe gaa-dagi goe? Goe gaa-mmae adu gi-di-goe gadoo be-di ahina dela gaa-mmae i-di haanau.

13:22  Maa goe ga-heeu be ma e-aha dela guu-mee di hai di huaidu adu gi-di-goe, ma e-aha dela o goloo gu-mahaahaa gi-daha mo goe, ma e-aha dela gu-haga-langaadia goe i-di mee dela ne-hai gi do huaidina. Di hai huaidu la-gu-hai-adu gi-di-goe idimaa i o huaidu la-koia gu-huaidu huoloo giibeni.

13:23  E-hai behee? Nia daangada luuli le e-mee di-huli di gono o nadau gili? Di manu-‘leopard’ e-mee di-daa gi-daha nia dongo i dono gili? Maa nei-bolo digaula gaa-mee di-hai di-mee deenei, malaa, goodou ala e-haihai nia mee huaidu gaa-mee hogi di-iloo di-hai nia mee ala e-donu.

13:24  Dimaadua ga-hagabagi goodou dagidahi gadoo be nia geinga ala ma-ga-ili go di madangi i-lodo di anggowaa.

13:25  Mee ne-helekai bolo deenei di-mee a-Mee gu-haganoho belee hai-adu gi goodou, idimaa i-di godou de-langahia Ia, mo di-godou hagadonu nia balu-god tilikai.

13:26  Go Dimaadua la-hua dela ga-hahaahi godou goloo gi-daha, ga-haga-langaadia goodou.

13:27  Mee gu-gidee-Ia goodou ala e-hai nia mee ala e-de-hiihai ginai Mee. Mee gu-gidee-Ia goodou ala e-hula dalia nia balu-god i-hongo nia gonduu mo i-nia gowaa maalama, e-hai gadoo be taane dela e-hai ono manawa laba gi-di lodo o tangada, gadoo be-di hoodo-daane dela guu-hai ono manawa gi-di hoodo-ahina. E-huaidu-adu gi goodou, go digau Jerusalem! Ma-gaa-hee gei goodou ga-madammaa?

Chapter 14

14:1  Dimaadua ga-helekai-mai gi-di-au i-di haingadaa o-nia wai:

14:2  “Judah guu-honu i-di manawa-gee, ono waahale gu-mooho gi-lala. Nia daangada e-heehee i-di manawa-gee mo digau Jerusalem e-wwolowwolo gei e-tangitangi i-di hagamaamaa.

14:3  Digau maluagina gu-gahigahi-mai nadau hege bolo gi-haga-haulia-mai nadau wai. Digaula guu-hula gi-nia monowai, gei digaula digi gidee nia wai. Nadau mee udu-wai la-gu-gaamai labelaa digi haga-haulia. Digaula gu-maanuhia gu-langaadia guu-gahu nadau libogo.

14:4  Digau dogi-mee gu-lodo-huaidu, digaula guu-gahu nadau libogo, idimaa tenua gu-maangoo gu-deai nia uwa ai.

14:5  Tinana ee lodo-henua gu-didiiagi dana dama, idimaa gu-deai nia geinga ai.

14:6  Nia ‘donkey’-lodo-geinga guu-tuu i taalinga nia gonduu, gu-dogidogi hagapodo gadoo be nia manu lodo-geinga-‘jackal’. Digaula ga-de-gidee-ginaadou nia mee, idimaa digaula gu-deai nadau mee gai ai.

14:7  Agu daangada ga-gahigahi Au ga-helekai, ‘Meenei Dimaadua, ma e-aha maa go madau huaidu ala e-hagahuaidu gimaadou, gei Goe hagamaamaa-ina gimaadou, e-hagalaamua-ai do ingoo. Nnolongo e-logowaahee, gimaadou guu-huli gi-daha mo Goe, gimaadou gu-ihala i oo mua.

14:8  Ma Kooe hua dela go di hagadagadagagee o digau Israel, gei Kooe labelaa dela e-haga-maahede gimaadou gi-daha mo madau haingadaa. Ma e-aha dela Goe e-hai be tangada mai i-daha i tenua deenei, e-hai be tangada dela e-hanimoi belee hagamolooloo i-di boo hua e-dahi?

14:9  Ma e-aha dela Goe e-hai be tangada dela ne-homouli gaa-kumi, e-hai be tangada-dauwa e-deemee di hagamaamaa? Malaa, meenei Dimaadua, e-donu bolo goe e-madalia gimaadou! Gimaadou go au daangada. Goe hudee kilia gimaadou gi-daha!’ ”

14:10  Dimaadua ga-helekai i-di hai o digau aanei, “Digaula e-hiihai bolo ginaadou e-hula gi-daha mo Au, gei digaula hagalee madamada humalia i ginaadou. Deenei di mee ne-de-hiihai-iei Au gi digaula. Au ga-langahia nadau haihai hala ala ne-hai, gei Au ga-hagaduadua digaula i nadau hangahaihai milimilia.”

14:11  Gei-ogo Dimaadua ga-helekai-mai, “Goe hudee dangi-mai gi-di-Au bolo Au gi-hagamaamaa-ina digaula.

14:12  Ma e-aha maa digaula gu-hagaonge, gei Au hagalee hagalongo gi nadau dangidangi. Gei ma e-aha maa digaula ga-tigidaumaha-mai gi-di-Au nia tigidaumaha-dudu be go nia tigidaumaha huwa-laagau, gei Au hagalee manawa-dumaalia ang-gi digaula. Au ga-daaligi digaula gii-mmade i-lodo tauwa, mo i-lodo tau-hiigai damana, mo i-lodo nia magi.”

14:13  Gei au ga-helekai, “Meenei Tagi go Yihowah, Goe e-iloo-hua bolo nia soukohp e-hagadele ang-gi nia daangada bolo ma deai tauwa be-di haingadaa ga-gila-aga ai, idimaa dau hagababa ne-hai bolo di aumaalia la-hua e-noho i-lodo tenua deenei.”

14:14  Dimaadua ga-helekai-mai, “Nia soukohp tilikai aalaa e-hagadele nia mee aanei i dogu ingoo, gei Au digi hagau-ina digaula. Au digi hai dagu hagababa gi digaula i dahi mee, be e-leelee gi digaula. Nia moe digaula ala e-hagi-adu gi goodou, la-go nadau hagamamaanadu la-hua, hagalee nia mee mai dogu baahi. Nia agoago-hua tilikai mai nadau lodo.

14:15  Au go Dimaadua ga-hagi-adu gi-di-goe be di-maa di-aha dela gaa-hai ko-Au ang-gi nia soukohp ala hagalee ne-hagau-adu ko-Au bolo gi-agoago-ina i dogu ingoo, gei digaula e-hai bolo ma deai tauwa be-di haingadaa e-dau i tenua deenei ai. Au ga-daaligi digaula i tauwa mo i-di hiigai damana.

14:16  Nia daangada ala ne-hagi-anga ginai nia agoago digaula, le e-mmade hogi be digaula. Nadau huaidina ga-magamaga gi-hongo nia ala o Jerusalem, ga-deai tangada e-danu nadau huaidina ai. Di haingadaa deenei gaa-tale ang-gi digaula huogodoo, nadau lodo, nadau dama-daane mo nadau dama-ahina. Digaula e-hai-loo gii-kae di hui o nadau huaidu.”

14:17  Dimaadua ga-helekai-mai bolo au gi-hagi-anga-ina gi-nia daangada di hai o dogu manawa-gee, gi-helekai boloo, “Nia wai-dangi o ogu golomada gi-malingilingi i-di boo mo-di aa. Au gi-hudee dugua dogu dangi, idimaa, agu daangada la-gu-lauwa ge e-mmaemmae kono.

14:18  Dogu madagoaa dela e-hanadu gi-nia gowaa maalama, au e-gidee nnuaidina o-nia daangada ala ne-mmade i-lodo tauwa, gei dogu madagoaa dela e-hana gi-lodo nia waahale, au e-gidee nia daangada e-noho hiigai hoohoo gaa-mmade. Digau hai-mee-dabu mono soukohp e-hai-hua go nadau moomee, gei digaula e-de-iloo-ginaadou be nadau maa ni-aha ala e-haihai.”

14:19  “Meenei Dimaadua, e-hai behee, Goe gu-haga-de-langahia Judah? Goe gu-de-hiihai gi digau Zion? Ma e-aha dela Goe gu-haga-mmaemmae huoloo gimaadou ga-hidi-mai-ai madau magi gu-deemee di-hili? Gimaadou gu-halahala di noho i-di aumaalia, gei di humalia ne-gila-mai gi gimaadou ai. Gimaadou gu-hagadagadagagee bolo madau magi la-gaa-hili, gei di-maa go di madagu damana dela ne-tale-mai gi gimaadou.

14:20  Meenei Dimaadua, gimaadou gu-ihala i doo baahi. Gimaadou e-haagi-adu gi-di-Goe madau hangahaihai huaidu mo nnangahaihai huaidu o madau maadua-mmaadua.

14:21  Goe gi-langahia au hagababa, gei Goe gi-hudee huli gi-daha mo gimaadou, gei Goe hudee haga-langaadia-ina Jerusalem, di gowaa o do lohongo-king aamua. Goe gi-dadaahia-hua beelaa dau hagababa mai gi gimaadou.

14:22  Ma deai di balu-ieidu e-dahi mai i-nia henua mai i-daha e-mee di-haga-doo di uwa ai. Di ahiaalangi modogoia e-deemee labelaa di-haga-doo di uwa. Meenei Dimaadua, go di-madau God, gimaadou e-hagadagadagagee-adu gi-di-Goe, idimaa ma Kooe hua dela e-haihai nia mee huogodoo aanei.”

Chapter 15

15:1  Dimaadua ga-helekai-mai, “Maa nei bolo Moses mo Samuel ne-tuu gi-nua, ga-dangidangi i digaula hagamahi mai gi-di-Au, gei Au e-hagalee manawa-dumaalia ang-gi nia daangada aanei. Heia digaula gii-hula gi-daha mo Au! Heia digaula gi-hagalee i ogu mua!

15:2  Maa digaula ga-heeu-adu be dehee di-nadau gowaa e-hula ginai, gei goe ga-hagi-anga gi digaula agu helekai aanei: Digau ala belee mmade i-lodo nia magi, deelaa di-nadau gowaa e-hula ginai! Digau ala belee mmade i-lodo tauwa, deelaa di-nadau gowaa e-hula ginai! Digau ala belee mmade i-di tau-magamaga, deelaa di-nadau gowaa e-hula ginai! Digau ala belee kumi e-lawalawa, deelaa di-nadau gowaa e-hula ginai!

15:3  Au go Dimaadua gu-hagababa bolo nia hagadilinga hagaduadua e-haa aanei gaa-tale ang-gi digaula: digaula gaa-mmade i-lodo tauwa, nadau huaidina ga-datada go nia paana, nia manu mamaangi gaa-gai nia maa, gei-ogo nia manu lodo-geinga ga-lloomoi gaa-gai nia mee ala e-dubu.

15:4  Au gaa-hai digau o henuailala hagatau gi-de-hiihai gi digaula, idimaa go di hai a Manasseh tama Hezekiah dela ne-hai i Jerusalem, dono madagoaa nogo king i Judah.”

15:5  Dimaadua ga-helekai, “Ma koai dela e-aloho i goodou, go digau Jerusalem, gei ma koai dela e-manawa-gee adu gi goodou? Ma koai dela ga-duu-adu gi goodou, e-heeu be goodou e-hai behee?

15:6  Goodou gu-haga-de-langahia-e-goodou Au, guu-huli gi-muli gi-daha mo Au. Deelaa-laa, Au gu-daahi-adu dogu lima gu-hagahuaidu goodou, idimaa, Au gu-duadua di-dadaahi dogu hagawelewele.

15:7  I-lodo nia waahale huogodoo o tenua deenei, Au guu-kili goodou gi-lodo di ahiaalangi gadoo be nia lau-laagau popo. Au gu-hagahuaidu goodou, go agu daangada, Au gu-daaligi godou dama i-di godou dee-dugu godou hangahaihai huaidu.

15:8  Nia ahina mmade nadau lodo i tenua deenei le e-logowaahee i-nia gelegele o tongotai. Au gu-daaligi godou dama-daane ala digi mmaadua, guu-hai nadau dinana gi-manawa-gee. Au ga-limalima-hua gaa-dugu ang-gi digaula di manawa-gee o-di made mo-di mmaadagu.

15:9  Di ahina ana dama dogohidu ne-made, la-gu-hagalibeina gu-deemee di-dogi. Di maalama i dono baahi gu-bouli, geia gu-manawa-gee ang-gi deia, gu-magi-manawa. Au ga-hagau-mai godou hagadaumee gi-daaligidia digau ala e-mouli hua-i-golo. Ma ko-Au go Dimaadua ne-helekai.”

15:10  E-manawa-gee hualaa behee ko-au! Dogu dinana la-ne-haanau-mai au gi henuailala eiaha? Au gu-hai-baahi mo-di lagamaaloo ang-gi digau huogodoo o tenua deenei. Au digi wanga agu bahihadu e-boibana, be e-boibana agu bahihadu, gei-ogo nia daangada huogodoo e-haga-halauwa au.

15:11  Meenei Dimaadua, nadau haga-halauwa huogodoo gi-kila-aga, maa nei bolo au hagalee hai-hegau donu adu gi-di-Goe, ge hagalee dalodalo maaloo i ogu hagadaumee i-lodo di madagoaa o nadau haingadaa mo nadau lodo-huaidu.

15:12  Ma deai tangada e-mee di-oho di baalanga ai, gei e-donu go di baalanga dela ne-gaamai i bahi-i-ngeia dela ne-unugi gi-nia baalanga-mmee.

15:13  Dimaadua ga-helekai-mai, “Au ga-hagau-adu nadau hagadaumee gi-kae-ina gi-daha nia goloo mo nia maluagina o agu daangada ala nogo benebene, belee hagaduadua digaula mai i nadau hangahaihai milimilia ala nogo haihai i-hongo tenua deenei.

15:14  Au gaa-hai digaula gii-hai nia hege ni nadau hagadaumee i-hongo tenua dela digi modongoohia-iei digaula i-mua, idimaa, dogu hagawelewele le e-hai gadoo be-di ahi dela e-ulaula gaa-hana-hua beelaa e-dee-ngudu.”

15:15  Gei au ga-helekai, “Meenei Dimaadua, Goe e-modongoohia-hua. Goe gi-langahia au, gei gi-hagamaamaa-ina au. Goe gii-tala di hui ang-gi digau ala e-hagahuaidu au. Goe gi-hudee manawa-baba gi digaula, gi-de-daaligi au go digaula. Goe gi-langahia bolo ma Kooe dela ga-hidi-mai-iei digaula ga-haga-balumee au.

15:16  Goe ne-helekai-mai gi-di-au, gei au gu-hagalongo gii-donu gi au helekai huogodoo. Ma Kooe hua dela e-hai-mee mai gi-di-au, meenei Yihowah go di God di Gowaa Aamua, au helekai gu-haga-honu i-lodo dogu manawa i-di manawa lamalia mo-di tenetene.

15:17  Au hagalee nogo noho madalia digau ala e-gadagada balumee mo-di nohonoho tenetene. Au nogo haga-kila-aga au hegau ala ne-dugu-mai gi-di-au, gei au nogo noho modogoau i-lodo dogu hagawelewele.

15:18  Au e-aha dela e-hagaduadua hua-i-golo? Ogu magi le e-aha ala e-llauehe-mai hagalee hili? E-hai behee, Goe e-haga-manawa-gee au gadoo be-di monowai dela ma-ga-maangoo i-di madagoaa welengina?”

15:19  Malaa, Dimaadua ga-helekai-mai, “Maa goe gaa-huli oo lodo ga-hanimoi gi-di-Au, gei Au ga-dahi-mai goe labelaa gaa-hai tangada hai-hegau ni-aagu. Maa goe ga-hagalee leelee hua-i-golo i-nia helekai balumee deai ono hadinga ai, gei goe gaa-hai labelaa soukohp ni-aagu. Nia daangada e-hiihai e-lloo-adu labelaa gi-di-goe, gei goe hudee buni-anga gi digaula.

15:20  Au gaa-hai goe gii-hai gadoo be-di abaaba baalanga-mmee dela e-deemee di-oho. Digaula ga-hai-baahi-adu gi-di-goe, gei e-deemee di-nadau haga-magedaa goe, idimaa, Au e-madalia goe, e-abaaba Goe, e-hagamaamaa Goe.

15:21  Au ga-duuli goe gi-daha mo nia mogobuna o digau huaidu mo digau daaligi dangada. Ma ko-Au go Dimaadua ne-helekai.”

Chapter 16

16:1  Dimaadua ga-helekai labelaa-mai,

16:2  “Goe hudee hai doo lodo be e-hai dau dama i-lodo di gowaa dela guu-hai beenei.

16:3  Au ga-hagi-adu gi-di-goe di hai dela gaa-hai ang-gi nia dama ala ga-haanau i-di gowaa deenei mo-di hai dela gaa-hai ang-gi nadau damana mo nadau dinana.

16:4  Digaula ga-mmademmade i nnagadilinga magi huaidu, gei deai tangada e-dangidangi i digaula ai be e-danu digaula. Digaula ga-mmoemmoe i-hongo di gelegele gadoo be nnaga-mungamunga mee hagauwwou. Digaula gaa-mmade i tauwa be e-mmade i-di hiigai, gei nia huaidina digaula gaa-hai nia mee e-gai go nia manu mamaangi mono manu lodo-geinga.

16:5  “Goe hudee ulu gi-lodo di hale dela-iei tangihangi no-lodo. Goe hudee dangi i dahi dangada de-hilihili. Au gu-hagalee hagahumalia agu daangada gii-noho i-di aumaalia, be e-hagalee aloho i digaula be e-dumaalia.

16:6  Digau maluagina mo digau hagaloale le e-mmademmade i-lodo tenua deenei, gei deai tangada e-dangidangi i digaula be e-danu digaula ai. Deai tangada e-teletele dono gili be e-dahi nia ngaahulu o dono libogo belee hagamodongoohia-aga ono lodo-huaidu ai.

16:7  Deai dahi dangada e-gai dana mee be e-inu i-baahi o tangada dela e-lodo-huaidu bolo e-hagamanawa lamalia a-mee, idimaa go-di made o dana dangada dela e-aloho ai. Deai tangada e-hagamodongoohia-aga dono manawa-gee gi dahi dangada ne-made dono damana be dono dinana ai.

16:8  “Hudee ulu gi-di hale o-nia daangada ala e-hai nadau hagamiami. Hudee noho gi-lala i-baahi digaula e-miami be e-inu.

16:9  Hagalongo mai gi-di-Au go Yihowah, di Gowaa Aamua, di God o Israel dela ga-helekai. Au gaa-dugu nia lee tenetene mo manawa lamalia mo nia lee hagatenetene o tagamiami haga-hailodo. Nia daangada o lodo di madagoaa dolomeenei ga-gidee-ginaadou nia mee aanei ala ga-kila-aga.

16:10  “Do madagoaa ga-helekai gi digaula nia mee aanei, digaula ga-heeu-adu be dehee tadinga dagu dugu ang-gi ginaadou di haingadaa damanaiee deenei. Digaula ga-heeu be-di huaidu-aha, be-di hala-aha dela ne-hai go ginaadou gi Dimaadua, go di-nadau God.

16:11  Gei goe hagi-anga-ina gi digaula bolo Dimaadua gu-helekai, ‘Godou maadua-mmaadua i-mua guu-huli gi-daha mo Au, gu-hai-daumaha mo-di hege gi-nia balu-ieidu. Digaula gu-diiagi Au gu-hagalee daudali agu agoago.

16:12  Gei goodou koia guu-hai nia mee huaidu gi-hongo nia huaidu o godou maadua-mmaadua ala ne-hai. Goodou huogodoo digau lodo-hamaaloo ge huaidu, gei goodou hagalee e-hagalongo-mai gi-di-Au.

16:13  Deenei tadinga o dagu kili goodou gi-daha mo tenua deenei, gaa-kili gi tuai henua dela digi iloo-e-goodou mo godou maadua-mmaadua i-mua-loo, gei goodou ga-daumaha ang-gi nia balu-ieidu i-di boo mo-di aa, gei Au ga-deai dogu dumaalia adu gi goodou ai.’ ”

16:14  Dimaadua ga-helekai, “Di madagoaa ga-dau-mai, gei nia daangada ga-hagalee e-hagamodu nadau mee i dogu ingoo, di ingoo o-di God mouli, dela ne-laha-mai digau Israel gi-daha mo tenua go Egypt.

16:15  Malaa, digaula ga-hagamodu i dogu ingoo, di ingoo o-di God mouli, dela ne-laha-mai digau Israel gi-daha mo tenua i-baahi ngeia mo i-lodo nia henua huogodoo ala i-golo, i agu gowaa ala ne-hagabagi ginai digaula. Au ga-laha-mai digaula gi di-nadau henua donu, go tenua dela ne-wanga ko-Au gi nadau maadua-mmaadua. Ma ko-Au go Dimaadua ne-helekai.”

16:16  Dimaadua ga-helekai, “Au ga-hagau agu gau wagadaha dogologo e-kumi digau aanei. Nomuli gei Au ga-hagau agu gau puu-manu, e-halahala digaula i tomo nia gonduu mo nia gowaa nnoonua huogodoo mo i-lodo nia bongoo.

16:17  Au gu-gidee-Au nia mee huogodoo ala e-hai go digaula. Deai dahi mee e-ngala i-di-Au ai. Nadau huaidu hagalee e-nngala i-di-Au.

16:18  Gei Au gaa-hui gi digaula tua-lua i nadau huaidu mo nadau haihai huaidu, idimaa digaula gu-haga-milimilia tenua deenei gi nadau balu-god nadau mouli ai, ala e-hai gadoo be nia daangada mmade, gaa-haa tenua deenei gi nadau god tilikai.”

16:19  Meenei Dimaadua, ma Kooe dela e-madamada humalia i-di-au mo-di hagamaaloo-aga au. Ma Kooe dela e-hagamaamaa au i-di madagoaa haingadaa. Nia gau mai i-daha ga-lloomoi i-nia mada o henuailala, ga-helekai, “Madau maadua-mmaadua ala i-mua la-deai nadau god ai, ala-hua nia balu-god mo nia ada ieidu balumee.

16:20  Ma iai tangada e-mee di-bida hai dana god ang-gi deia? Deeai, e-deemee. Gei di-maa gaa-mee, malaa hagalee di god mouli.”

16:21  Dimaadua ga-helekai, “Deenei-laa, tugi dolomeenei gaa-hana, gei Au ga-hagamodongoohia ang-gi nia henua gi-iloo-ginaadou haga-humalia dogu maaloo mo ogu mogobuna, gei digaula ga-iloo-laa bolo Au dela go Dimaadua.”

Chapter 17

17:1  Dimaadua ga-helekai, “Goodou go digau Judah, di pen baalanga la-ne-hihi godou huaidu, mo-di ngudu di pen hadu-maaloo la-guu-lawa di-hihi godou huaidu gi-lodo godou manawa, ge guu-paa gi-di gili nia madaaduge o godou gowaa dudu-tigidaumaha.

17:2  Godou daangada e-hai nadau hai-daumaha i-nia gowaa dudu-tigidaumaha mono ada-mee ala ne-haga-duu-aga gi-di god-ahina Asherah i-baahi nia laagau mangamanga huogodoo mo i-di ulu gi-nua o-nia gowaa nnoonua,

17:3  mo i-hongo nia gonduu ala i-lodo di gowaa maalama. Au ga-dumaalia gi godou hagadaumee gi-kaina godou goloo hagalabagau idimaa go godou huaidu huogodoo ala ne-hai i-lodo di-godou henua.

17:4  Tenua dela ne-gowadu ko-Au gi goodou gaa-kumi go godou hagadaumee, gei Au gaa-hai goodou gii-hai nia hege ni godou hagadaumee i-lodo tenua dela digi iloo-e-goodou, idimaa go dogu hagawelewele e-hai gadoo be-di ahi, ga-ulaula gaa-hana-hua beelaa.”

17:5  Dimaadua ga-helekai, “Au ga-haga-halauwa nia daangada ala ne-huli gi-daha mo Au, ala e-hagadagadagagee gi-nia daangada dangada, di maaloo o tangada la di-mee e-made.

17:6  Nia hagadilinga daangada beenei le e-hai gadoo be nia geinga i-lodo di anggowaa, ala e-tomo-aga i-di gowaa maangoo, i-lodo nia gelegele mmala, i-di gowaa dela hagalee tomo nia laagau. Deai di-mee humalia e-gila i-baahi o digaula ai.

17:7  “Gei Au gaa-hila ang-gi nia daangada ala e-hagadagadagagee mai gi-di-Au.

17:8  Digaula e-hai gadoo be-di laagau dela e-tomo i taalinga di monowai, ono-aga e-hula e-tale i-nia wai. Di laagau deelaa la-hagalee e-madagu i-di welengina o-di laa, idimaa ono lau la-hagalee e-mae, e-hagalee e-uli ono gai. I-di madagoaa ma-ga-deai di uwa ai, ono huwa la-hagalee e-odi.

17:9  “Koai e-mee di-iloo-ia di hagahonu o-di manawa o tangada? Ma deai di mee e-honu di halahalau be di-maa ai, deai dono humalia e-gila-mai ai.

17:10  Ko-Au go Dimaadua e-halahala gei e-hagadina nia hagamaanadu o-nia daangada, gei Au e-hagamada nia manawa digaula. Au e-hui gi tangada-nei mo tangada-nei gi-di hai dela e-tau ang-gi dono mouli, gii-hai be ana hangaahai.”

17:11  Tangada dela e-kumi ana bahihadu i-di hai huaidu, ia e-hai gadoo be-di manu dela e-hagabaa di ngogo ge hagalee di-mee ne-dugu koia. I dono madagoaa e-dama-daane e-maaloo, gei ono goloo ga-hagalee, gaa-dae gi-di hagaodi o dono mouli, gei mee gaa-hai-hua tangada boiboi.

17:12  Tadau Hale Daumaha e-hai gadoo be-di lohongo king madamada, dela e-duu i-hongo di gonduu nnoonua mai hua namua.

17:13  Meenei Dimaadua go Kooe dela e-hagadagadagagee ginai Israel. Digau huogodoo ala ma-gaa-hudu Goe gi-daha gei ginaadou ga-langaadia. Digaula ga-hagalee, gadoo be nia ingoo ala ne-hihi gi-hongo nia gelegele, idimaa digaula ne-diiagi Goe, go Dimaadua, dela go di monowai haga-mouli.

17:14  Meenei Dimaadua, haga-hili-ina au, gei au ga-humalia huoloo. Benebene-ina au, gei au gaa-doo gi-daha mo-di haingadaa. Ma Kooe hua dela e-haga-hagaamu ko-au!

17:15  Nia daangada ga-helekai-mai gi-di-au, “Aahee nia helekai hagamadagudagu mai baahi o Dimaadua ne-hai-mai gi gimaadou? Haga-kila-aga-ina nia maa dolomeenei!”

17:16  Meenei Dimaadua, au digi dangi hagamahi-adu gi-di-Goe gi-dugua-mai di haingadaa gi-hongo digaula. Au hagalee e-hiihai bolo di haingadaa gii-tale gi digaula. Meenei Dimaadua, Goe e-iloo nia mee aanei, Goe e-iloo-hua agu helekai aanei.

17:17  Hudee heia nia mee haga-madagudagu dangada gi-tale-mai gi-di-au. Go Kooe hua go dogu gowaa e-bala ginai au i-di madagoaa haingadaa.

17:18  Goe gi-hagatee-ina digau ala e-dadaaligi au. Meenei Dimaadua, Goe gi-haga-dagaloaha-ina au. Goe haga-madagudagu-ina digaula, gei hudee heia au gi-madagu. Dugua di haingadaa la-gi-hongo digaula, gei gi daaligidia digaula gi-hagalee.

17:19  Dimaadua ga-helekai-mai, “Jeremiah, hana hagailoo-ina agu helekai gi-nia daangada i-di ngudu di Bontai o-nia Daangada, i-di gowaa dela e-ulu gi-lodo mo e-ulu gi-daha nia king o Judah i-di waahale deelaa, nomuli gei goe gaa-hana gi-nia ngudu o-nia bontai huogodoo ala i-golo o Jerusalem.

17:20  Helekai gi nia king mo nia daangada huogodoo o Judah ala e-noho i Jerusalem ala e-ulu i-nia bontai di waahale deenei, bolo ginaadou gi-hagalongo gi-humalia gi agu helekai.

17:21  Helekai gi digaula bolo maa digaula e-hagalabagau nadau mouli, digaula la-gi-hudee aamo-mee i-di Laangi-Sabad, gi-hudee aamo-mee ga-ulu gi-lodo nia bontai o Jerusalem i-di Laangi-Sabad,

17:22  be e-gaamai nadau mee gi-daha mo nadau hale i-di Laangi-Sabad. Digaula gi-hudee ngalua i-di Laangi-Sabad, gi-heia di laangi la-gii-dabu be dagu hai ne-haganoho gi nadau maadua-mmaadua i-mua.

17:23  Nadau maadua-mmaadua digi hagalongo be hagalee haga-angadia-e-ginaadou agu haganoho, gei digaula gu-haga-hamaaloo-hua nadau lodo, gu-hagalee e-hagalongo-mai be e-daudali agu agoago.

17:24  “Helekai gi-nia daangada aanei bolo digaula belee hagalongo gi agu haganoho huogodoo. Digaula hagalee e-kae nadau mee gaa-hula ga-ulu gi-lodo nia bontai di waahale deenei i-di Laangi-Sabad. Digaula gi-haga-gila-ina-aga di Laangi-Sabad gii-hai be-di laangi hagamadagu, digaula hudee hai gi-ngalua.

17:25  Maa digaula gaa-hai beelaa, gei nadau king mo nadau gau aamua ma-ga-ulu gi-lodo nia bontai o Jerusalem, digaula ga-hai-mee gi-nia mogobuna King David ala nogo hai-mee ginai. Digaula ga-madalia digau Judah mo Jerusalem e-hula i-nia waga hongo-henua mono hoodo, gei di waahale o Jerusalem gaa-honu dangada i-nia madagoaa huogodoo.

17:26  Nia daangada ga-loomoi i-nia dama-waahale i Judah, mo i-nia guongo ala e-haganiga mai daha Jerusalem. Digaula ga-loomoi i tenua Benjamin, i tono nia dama gowaa nnoonua, mo tomo nia gonduu, mo i-bahi-i-ngaaga o Judah. Digaula e-lloomoi e-gaamai nadau tigidaumaha gi dogu Hale Daumaha, nia tigidaumaha dudu, mo nnagadilinga tigidaumaha ala i-golo, nia tigidaumaha golee-laagau, nia tigidaumaha ‘incense’, mo nia tigidaumaha danggee.

17:27  Gei digaula gi-hagalongo-mai gi-di-Au mo-di hagalabagau-ina di Laangi-Sabad gii-hai be-di laangi hagamadagu. Digaula hagalee e-aamo nadau mee i-di nadau ulu-adu gi-lodo nia bontai o Jerusalem i-di laangi deelaa, gei maa digaula gaa-hai-hua nia mee aanei, gei Au gaa-dudu nia bontai Jerusalem. Di ahi deelaa gaa-dudu nia hale o Jerusalem, tangada e-mee di-diinai di-maa ai.”

Chapter 18

18:1  Dimaadua ga-helekai-mai,

18:2  “Duu gi-nua, hanadu gi-baahi di hale o tangada hai-pileedi, gei Au ga-haga-modongoohia-adu gi-di-goe agu helekai.”

18:3  Malaa, au gaa-hana gi-golo, ga-gidee-au tangada hai-pileedi dela e-ngalua i-lodo dono gowaa ngalua.

18:4  Nia madagoaa huogodoo di pileedi ma-ga-hai-gee, gei mee gaa-hai dana huai mee gi-nia gelegele pigi aalaa, gii-hai be dana hiihai.

18:5  Dimaadua ga-helekai-mai,

18:6  “E-hai behee, Au e-deemee dagu hai-adu gi goodou go digau Israel, gadoo be-di hai dela ne-hai go tangada hai-pileedi deenaa ang-gi nia hagamunga gelegele? Goodou e-daahi ko-Au i-lodo ogu lima, gadoo be-di hagamunga gelegele dela e-daahi i-lodo nia lima o tangada hai-mee deenaa.

18:7  Tei madagoaa gei Au ga-helekai bolo Au ga-hagabagi gi-daha mo-di oho gi-lala, be e-hagahuaidu dahi henua be-di guongo o-di king,

18:8  gei-ogo tenua deelaa gaa-huli gi-daha mo ono huaidu, gei Au ga-hagalee hai di-maa be dagu helekai ne-hai.

18:9  Maa Au ga-helekai bolo Au gaa-dogi be e-haga-duu-aga dahi henua be-di guongo o-di king,

18:10  gei di guongo deelaa ga-hagalee hagalongo mai gi-di-Au, ga-haihai-hua di huaidu, malaa, gei Au ga-hagalee hai di-maa be dagu helekai ne-hai.

18:11  Malaa dolomeenei, gei goe ga-hagi-anga gi digau Judah mo digau Jerusalem dagu hai dela gu-hagababa bolo Au ga-hai-baahi gi digaula, mo dagu hai dela gu-hagatogomaalia bolo e-hagaduadua digaula. Hai gi digaula bolo gii-huli gi-daha mo nadau mouli huaidu, gi-huluhia nadau hangahaihai mo nadau hai milimilia ala e-hai.

18:12  Gei-ogo digaula ga-helekai-adu, ‘Ma deeai! Dono hadinga-aha mai gi gimaadou? Gimaadou e-hai-hua go madau hiihai be gimaadou e-lodo hamaaloo be e-hai go madau hangaahai huaidu ala e-hiihai ginai gimaadou.’ ”

18:13  Dimaadua ga-helekai, “Goodou heeu-ina-malaa gi-nia guongo huogodoo ala i-golo be maa iai di mee gu-gila-aga beenei i-mua. Digau Israel guu-hai di-nadau ihala damana!

18:14  Nia ‘snow’ le e-mee di-odi-ia gi-daha mo tomo nia Gonduu o Lebanon? Nia dama-monowai ala i-mehanga nia Gonduu o Lebanon le e-mee di-maangoo? Deeai-loo!

18:15  Gei-ogo agu daangada gu-de-langahia-e-ginaadou Au. Digaula guu-dudu nadau ‘incense’ ang-gi nia balu-ieidu bolo e-hai-ai nadau tigidaumaha. Digaula gu-tingatinga-hua i-hongo di ala dela belee hula-ai ginaadou. Digaula gu-hagalee hula i-hongo nia ala mai anadilaangi, e-heehee-hua i-hongo nia ala digi modongoohia.

18:16  Digaula guu-hai tenua deenei e-haga-ingoo bolo di guongo hagalliga-dangada gaa-hana-hua beelaa. Nia daangada huogodoo ala ma-ga-hula-laalaa gi-di guongo deenei, le e-homouli nadau lodo, gei e-goboina huoloo e-ginaadou gi di-nadau mee dela guu-mmada ginai.

18:17  Gei Au gaa-hai agu daangada gi-lellele dagidahi i-mua nadau hagadaumee, gadoo be nia gohu dogolia ne-ili go di madangi o dua. Au gaa-huli gi-daha ga-hagalee hagamaamaa digaula i-lodo nadau haingadaa.”

18:18  Nia daangada ga-helekai i nadau mehanga, “Gidaadou gaa-hai tadau hai gi Jeremiah! Ma iai digau hai-mee-dabu i-nia madagoaa huogodoo ga-agoago-mai-laa gi gidaadou, ge iai digau kabemee labelaa i-golo ga-haga-modongoohia-mai gi gidaadou, mo nia soukohp labelaa i-golo, ga-hagadele-mai labelaa gi gidaadou nnelekai a God. Gidaadou ga-hai-baahi ang-gi Jeremiah ga-hagalee hagalongo gi nnelekai a-maa.”

18:19  Gei au ga-dalodalo gaa-hai, “Meenei Dimaadua, Goe gi-hagalongo-mai gi agu helekai mo nnelekai o ogu hagadaumee ala e-hai.

18:20  E-hai behee? Di huaidu la-go di hui o-nia hangahaihai humalia? Digaula guu-geli di-nadau luwa bolo gii-doo au gi no-lodo, gei Goe gi-langahia dogu hanimoi gi doo baahi idimaa i digaula, mo-di dangidangi hagamahi bolo Goe gi-hudee hagaduadua-ina digaula i-lodo do hagawelewele.

18:21  Malaa, dolomeenei, meenei Dimaadua, Goe gi-dugua ang-gi nadau dama gii-mmade i-lodo tau-magamaga, gei gi-dugua ang-gi ginaadou gii-mmade i-lodo tauwa. Nia ahina gii-noho deai nadau lodo mo nadau dama ai. Nia daane gii-mmade i-lodo nia magi, mo nia dama-daane gii-mmade i-lodo tauwa.

18:22  Goe hagau-ina-mai gi digaula di buini dauwa huaidu, bolo gi-limalima gi-ohaa nadau hale gi-kae-ina nadau goloo, gi-mmaadagu digaula gi-wwolowwolo! Idimaa, digaula guu-geli di-nadau luwa bolo gii-doo au gi no-lodo, gei guu-hai di-nadau hele belee kumi au.

18:23  Malaa, meenei Dimaadua, Goe gu-iloo nadau hai ala bolo e-daaligi au gii-made. Goe hudee dumaalia-anga nadau haihai huaidu be e-dumaalia ang-gi ginaadou nadau haihai huaidu. Goe gi-kilia digaula gi-lala, haga-magedaa digaula, ge e-hagahuaidu digaula i-lodo do madagoaa hagawelewele.”

Chapter 19

19:1  Dimaadua ga-hai-mai gi-di-au bolo gii-hana gi-huia di mee haa-mee dela ne-hai gi-nia gelegele. Mee gaa-hai labelaa mai gi-di-au bolo au gi-laha-mai agu daangada i digau mmaadua mono gau hai-mee-dabu gu-mmaadua,

19:2  gii-hula gi-di gowaa mehanga gonduu o Hinnom dela i-daha i-di bontai dela e-haga-ingoo bolo di Bontai di Mee Haa-mee Mooho. I-di gowaa deelaa, gei-au gi-haga-modongoohia-ina-aga ana helekai ala ga-hagi-mai gi-di-au.

19:3  Dimaadua guu-hai bolo au gi-haga-modongoohia-ina-aga nia mee aanei, “Goodou go nia king o Judah mo digau Jerusalem. Goodou hagalongo gi agu helekai ala e-helekai-iei Au, go Yihowah di Gowaa Aamua, di God o Israel. Au ga-dugu-adu gi goodou di hagaduadua i-hongo di gowaa deenei, di hagaduadua dela koia e-damana, gei digau huogodoo ala ga-longono-ginaadou, gei hagalee modongoohia.

19:4  Au gaa-hai di mee deenei, idimaa, nia daangada guu-hudu Au gi-daha, gei gu-haga-milimilia di gowaa deenei i-di hai-tigidaumaha ang-gi nia balu-ieidu, nnagadilinga balu-ieidu ala digi modongoohia-iei digaula be nadau maadua-mmaadua, be nia king o Judah. Digaula gu-haga-honu di gowaa deenei gi-nia dodo o-nia daangada ala nadau huaidu ai,

19:5  gei digaula gu-haga-duu-aga nia gowaa dudu-tigidaumaha ang-gi Baal, bolo e-dudu-ai nadau dama gi-hongo di ahi, e-hai-ai tigidaumaha. Au digi helekai gi digaula bolo gi-heia di mee deenei, gei Au digi haga-maanadu-loo gi-di mee deenei!

19:6  Malaa, Au go Dimaadua gu-hagababa bolo di madagoaa gaa-dae-mai, gei di gowaa deenei ga-hagalee haga-ingoo bolo Topheth, be bolo di gowaa mehanga gonduu o Hinnom, gei ga-haga-ingoo bolo di Gowaa Baba Dadaaligi-dangada.

19:7  Di gowaa deenei dela ga-hunahuna-ai nia hagamamaanadu huogodoo o digau Judah mo digau Jerusalem ko-Au. Au gaa-dugu-anga digaula gi nadau hagadaumee gi-kumidia gi-daaligidia i-lodo tauwa. Au gaa-dugu-anga nadau huaidina gi-nia manu mamaangi mono manu lodo-geinga gi-geina.

19:8  Au gaa-dugu-anga di hagaduadua damana gi-lodo di waahale deenei, nia daangada huogodoo ala gaa-hula i-baahi di gowaa deenei, la-ga-goboina huoloo gi-di hai deenei ne-hai gi digaula.

19:9  Nia hagadaumee digaula ga-duuli di waahale digaula, e-hagamada e-dadaaligi digaula. Di hai deenei ga-haingadaa huoloo ang-gi digau di waahale, gaa-hidi-ai digau ala e-noho i-lodo di waahale gii-bida miami ginaadou, gaa-gai labelaa nadau dama.”

19:10  Dimaadua gu-hai-mai gi-di-au bolo au gi-oho-ina di mee haa-mee deelaa i-mua nia golomada o digau ala ne-hula madalia au,

19:11  gei gi-hagi-anga-ina gi digaula nnelekai Dimaadua di Gowaa Aamua ala ne-hai, “Au gaa-oho di waahale deenei mono daangada, gii-hai gadoo be dagu hai dela ne-haga-mooho di mee haa-mee dela ne-hai gi-nia gelegele, gei e-deemee labelaa di-hau hoou. Nia daangada gaa-danu nadau gau mmade i Topheth, idimaa, di gowaa belee danu-ai nia daangada la-ga-deeoo.

19:12  Deenei dagu hai dela gaa-hai ko-Au gi-di waahale deenei: Au gaa-hai di waahale deenei gii-hai be Topheth. Au go Dimaadua dela e-helehelekai.

19:13  Nia hale o Jerusalem, nia hale o-nia king o Judah, mo nia hale huogodoo ala gu-dutudu nadau ‘incense’ i tomo nadau hale ang-gi nia heduu, mo-di llingi gi-daha nadau waini, e-hai-ai nadau tigidaumaha gi-nia balu-ieidu, nia hale huogodoo aanei gu-milimilia gadoo be Topheth.”

19:14  Nomuli, gei au ga-hagatanga-mai gi-daha mo Topheth, dela di gowaa a Dimaadua ne-hagau ginai au bolo au gi-haga-modongoohia-ina ana helekai. Au gaa-hana gaa-duu i malaelae di Hale Daumaha, ga-hagi-anga gi nia daangada huogodoo

19:15  bolo nia helekai a Dimaadua di Gowaa Aamua, di God o Israel, dela e-hai boloo, “Au gaa-dugu ang-gi di waahale deenei mo nia waahale huogodoo ala mai daha, nia hagadilinga hagaduadua huogodoo ala guu-lawa i dagu hagababa, idimaa go godou lodo hamaaloo mo godou de-hagalongo-mai gi agu helekai.”

Chapter 20

20:1  Passhur la tama ni Immer, gei mee tangada hai-mee-dabu gei e-aamua i-lodo di Hale Daumaha. Mee gu-longo-ia gi-di-au i dogu madagoaa nogo haga-modongoohia nnelekai aanei,

20:2  gei mee gaa-hai bolo au gi-haga-mamaawadia ga-lawalawa gi-nia daula-baalanga i-lodo di ruum galabudi i-hongo di Bontai o Benjamin dela di bontai di Hale Daumaha.

20:3  Hagaluada dono daiaa, i-muli Passhur dela ne-wwede au gi-daha mo nia daula-baalanga, gei au ga-helekai gi mee, “Dimaadua digi haga-ingoo-ina goe bolo Passhur. Di ingoo a-Mee ne-haga-ingoo goe la go Magor=Missabib, dono hadinga bolo ‘Di lliga i-nia gowaa huogodoo.’

20:4  Ma go Dimaadua hua ne-helekai boloo, ‘Au gaa-hai goe gii-lliga i do huaidina mo ang-gi o ehoo hagaaloho. Gei goe gaa-mmada gi-di hai o digaula huogodoo ala ga-dadaaligi go nia goloo-heebagi o nadau hagadaumee. Au gaa-dugu-anga digau Judah gi-lala nia mogobuna o-di king o Babylonia, gi-lahia hunu gau gi-hagaduadua-ina i-lodo dono henua, gei hunu gau gi-daaligidia gii-mmade.

20:5  Au gaa-dugu-anga nadau hagadaumee gii-hula i-lodo di waahale deenei, gi-hagabudu-ina nia maluagina huogodoo ala i-lodo, mono goloo hagalabagau o-nia king o Judah gi-kae-ina nia mee aanei huogodoo gi Babylonia.

20:6  Gei goe go Passhur, goe mo digau doo hale huogodoo, gaa-lahi gi Babylonia. Deelaa di gowaa ga-made-iei goe, gaa-danu ngaadahi mo o ehoo hagaaloho huogodoo, ala ne-hagadele ginai au kai dilikai logowaahee.’ ”

20:7  Meenei Dimaadua, Goe gu-halahalau au, gei au gu-haga-totoolo. Kooe dela e-koia e-mahi i-di-au, gei koia e-maaloo i-di-au. Nia daangada huogodoo gaa-hai dadaagala i-di-au, gei guu-hai au be-di mee haga-gadagada-dangada i-di laangi dogomaalia.

20:8  Dogu madagoaa ma-ga-helekai-iei au, gei au e-dangidangi hagalongoaa boloo, “Goodou ga-manawa maaloo huaidu! Goodou gaa-oho gi-daha!” Meenei Dimaadua, nia madagoaa e-logo gei au e-tee, gei e-hai hagahuaidu i dogu hagadele au helekai.

20:9  Dogu madagoaa ma-ga-helekai boloo, “Au ga-haga-de-langahia-eau Dimaadua, gei ga-hagalee helekai i dono ingoo,” malaa, au helekai ga-ulaula gadoo be-di ahi i ogu lodo. Au ga-hagamada belee noho dee-muu, gei e-deemee.

20:10  Au gu-hagalongo gi-nia lee o digau dogologo ala e-helekai boloo, “Di hagamadagudagu-dangada gu-hagahonu i-nia madagoaa huogodoo! Gidaadou ga-hagahuaidu mo-di hagi-aga a-mee gi digau aamua.” Ogu ihoo hagaaloho hogi e-tali au bolo au gii-doo gi-lala, e-helekai boloo, “Holongo gimaadou e-mee-hua di-hai di-madau halahalau a-mee, gii-kumi a-mee gaa-hai a-mee hagahuaidu.”

20:11  Malaa, meenei Dimaadua, Goe e-madalia au. Kooe dela e-mahi gei e-mogobuna, gei digau huogodoo ala e-hagahuaidu au ga-deemee di-hai nadau mee. Digaula ga-haga-langaadia gaa-hana-hua beelaa, idimaa digaula e-deemee di-hai di-nadau mee e-hiihai ginai. Nadau langaadia ga-langahia gaa-hana-hua beelaa.

20:12  Malaa, meenei Yihowah di Gowaa Aamua, ma Kooe dela e-iloo nia donu o-nia daangada. Goe e-iloo nadau manawa mo nadau hagabaubau. Malaa, Goe gi-dugua-mai gi-di-au gii-mmada-adu gi-di-Goe dela gaa-tala di hui ang-gi ogu hagadaumee, idimaa, au gu-dugu-adu au gi-lodo oo lima e-madamada humalia-ai.

20:13  Daahili gi Dimaadua! Hagaamuina a-Mee! Mee dela e-hagamehede-mai digau ala e-huaidu ang-gi ginaadou gi-daha mo nia mogobuna o digau haihai huaidu.

20:14  Hagahalauwa-ina dogu laangi dela ne-haanau-iei au! Haga-de-langahia-ina di laangi o dogu dinana ne-haga-haanau-mai au.

20:15  Hagahalauwa-ina tangada dela ne-gaamai dana longo bolo e-haga-tenetene-ai dogu damana, “Ma tama-daane! Go dau dama-daane!”

20:16  Tangada deelaa la-gii-hai gadoo be nia waahale ala ne-oho gi-daha go Dimaadua i dono de-dumaalia ai. Mee gi-longono-ia labelaa di dangidangi o-di mmae i-di luada, mo nia longo huaidu o tauwa oodee,

20:17  idimaa, mee digi daaligidia au gii-made i-mua dogu haanau. Maa nei bolo mee ne-hai beelaa, gei-ogo di gowaa dugu-dama o dogu dinana guu-hai dogu daalunga.

20:18  Au ne-haanau-mai gi henuailala belee hai dagu-aha? E-hai behee? Au ne-haanau mai bolo gi-noho-hua i-lodo di haingadaa mo-di manawa-gee, belee haga-odi dogu mouli i-lodo di langaadia?

Chapter 21

21:1  Zedekiah, di king o Judah, ga-hagau-mai gi-di-au Passhur, tama ni Malchiah, mo tangada hai-mee-dabu go Zephaniah, tama ni Maaseiah. Meemaa ga-helekai-mai,

21:2  “Goe dumaalia-mai gi-heia di-madau dangidangi deenei ang-gi Dimaadua, idimaa Nebuchadnezzar, di king o Babylonia, mo dana llongo-dauwa gu-haganiga di waahale. Holongo gei Dimaadua ga-hai-mai dahi mogobuna gi gidaadou bolo gii-mee di-dugu Nebuchadnezzar.”

21:3  Gei Dimaadua ga-helekai-mai bolo au gi-helekai gi nia daangada ala ne-hagau-mai gi-di-au,

21:4  bolo gi-helekai gi Zedekiah bolo Dimaadua, go di God o Israel, gu-helekai, “Zedekiah, Au ga-haga-magedaa au gau-dauwa ala e-dauwa gi-di king o Babylonia mo ana gau-dauwa. Au ga-hagabae gi-nua nia goloo-dauwa o au gau-dauwa i tungaalodo di waahale.

21:5  Au gaa-hai dagu dauwa adu gi-di-goe i ogu mahi huogodoo, mai i ogu hagawelewele huogodoo.

21:6  Au ga-hagammaa gi-daha nia mee huogodoo ala i-lodo di waahale deenei, nia daangada mono manu ga-mmade-hua i-di tau-magi huaidu.

21:7  Gei goe mo au gau aamua mo digau ala gaa-dubu i tauwa deelaa, mo i tau-magamaga damana, mo i tau-magi huaidu, Au gaa-wanga goodou gi-di King Nebuchadnezzar mo godou hagadaumee ala e-hiihai e-daaligi goodou. Nebuchadnezzar ga-daaligi goodou, gei hagalee e-dumaalia be e-aloho gi dahi dangada i goodou. Ma ko-au go Dimaadua ne-helekai.”

21:8  Dimaadua ga-helekai-mai bolo au gi-helekai gi-nia daangada huogodoo, “Hagalongo! Ko-Au go Dimaadua deenei e-dugu-adu gi goodou gi-hilihilia di ala dela e-hana gi-di mouli mo-di ala dela e-hana gi-di made.

21:9  Tangada dela gaa-noho i-lodo di waahale gaa-made i tauwa, tau-magamaga damana be tau-magi huaidu. Gei tangada dela ga-ulu gi-daha gaa-dangi tumaalia gi digau o Babylonia ala e-hai di-nadau dauwa gi-di waahale, ia hagalee e-made, mee ga-dagaloaha ga-mouli.

21:10  Au guu-lawa i dagu haganoho i ogu lodo bolo Au gaa-oho di waahale deenei, deai tumaalia e-hai ai. Au ga-dumaalia gi-di king o Babylonia gi-duungia huogodoo. Ma ko-Au go Dimaadua deenei e-helekai.”

21:11  Dimaadua ga-helekai-mai bolo au gi-hagailoo-ina gi-di madawaawa o-nia king o Judah ala go di madawaawa David. “Hagalongo, ko-Au go Dimaadua deenei ga-helekai. Goodou gi-hagadina gi-humalia, di tonu e-hai gi i-golo i-nia laangi huogodoo. Goodou gi-benabena-ina nia daangada ala gu-halahalau go nia daangada. Maa goodou ga-hagalee e-hai beenei, di hala dela e-hai go goodou gaa-hidi-iei Au ga-hagawelewele ga-ulaula gadoo be-di ahi dela e-deemee di-diinai.

21:12  Dimaadua ga-helekai-mai bolo au gi-hagailoo-ina gi-di madawaawa o-nia king o Judah ala go di madawaawa David. “Hagalongo, ko-Au go Dimaadua deenei ga-helekai. Goodou gi-hagadina gi-humalia, di tonu e-hai gi i-golo i-nia laangi huogodoo. Goodou gi-benabena-ina nia daangada ala gu-halahalau go nia daangada. Maa goodou ga-hagalee e-hai beenei, di hala dela e-hai go goodou gaa-hidi-iei Au ga-hagawelewele ga-ulaula gadoo be-di ahi dela e-deemee di-diinai.

21:13  “Kooe, Jerusalem, goe e-noho i-di gowaa mugi-nua i-hongo nia gowaa maalama, gadoo be-di hadugalaa dela e-duu-aga i-lodo di gowaa baba. Gei Au ga-heebagi hai-baahi adu gi-di-goe. Goe e-hagababa bolo deai di-mee e-mee di-heebagi adu gi-di-goe be e-oho dau abaaba ai.

21:14  Gei Au ga-hagaduadua goe, idimaa i o hangaahai. Au gaa-dudu doo hale king, gei di ahi gaa-dudu nia mee huogodoo ala i dono baahi. Ma ko-Au go Dimaadua deenei e-helekai.”

Chapter 22

22:1  Dimaadua ga-helekai-mai bolo au gii-hana gi-di hale di king o Judah, tangada mai di madawaawa David, gi-helekai gi-di king deelaa, mo ana gau aamua, mo digau Jerusalem, bolo digaula gi-hagalongo gi-nia mee o Dimaadua ala guu-lawa-ai di helekai boloo,

22:2  Dimaadua ga-helekai-mai bolo au gii-hana gi-di hale di king o Judah, tangada mai di madawaawa David, gi-helekai gi-di king deelaa, mo ana gau aamua, mo digau Jerusalem, bolo digaula gi-hagalongo gi-nia mee o Dimaadua ala guu-lawa-ai di helekai boloo,

22:3  “Ko-Au go Dimaadua, Au gu-haganoho-adu gi goodou bolo goodou gi-heia go nia mee ala e-humalia gei e-donu. Benabena-ina digau ala gu-halahalau go digau ala i-golo. Hudee heia haga-huaidu be e-hai gi-haingadaa digau tuadimee, digau guu-mmade nadau maadua, nia ahina guu-mmade nadau lodo, gei hudee daaligidia tangada ono hala ai i-di gowaa dabu deenei.

22:4  Maa goodou ga-hagagila-aga nia haganoho aanei, malaa, gei di madawaawa David ga-hagadau-hua beelaa i-di lohongo king. Digaula, mo nadau gau aamua mo nadau daangada huogodoo, ga-duudagi adu-hua di-nadau uluulu gi-lodo nia bontai di hale deenei, e-hula i-nia waga hongo-henua mo nia hoodo.

22:5  Maa goodou ga-hagalee e-daudali dagu mee deenei ne-haganoho, gei Au ga-hagamodu bolo di hale king deenei gaa-hinga ga-mooho. Ma ko-Au go Dimaadua deenei e-helekai.

22:6  “Mai gi-di-Au, di hale o-di king o Judah e-koia e-madamada huoloo e-hai gadoo be tenua go Gilead, mo e-madamada labelaa be nia Gonduu o Lebanon, gei Au gaa-hai di-maa gii-hai di anggowaa, di gowaa hagalee noho nia daangada.

22:7  Au ga-hagau agu daangada belee oho di-maa, digaula gu-lloo-adu e-gowadu nadau dalai, gaa-hele nia duludulu ala ne-hai gi-nia laagau-‘cedar’ humalia ala i-lodo, gaa-kili gi-lodo di ahi.

22:8  “Nomuli gei digau tuadimee dogologo ga-hula-laalaa mo-di hai di heeu deenei, ‘Dimaadua la-ne-aha dela ne-hai dana hai deenei ang-gi di waahale aamua deenei?’

22:9  Gei digaula ga-helekai-anga bolo di mee deenei la-ne-hai, idimaa goodou gu-oho goodou hagababa mai gi-di-Au, go di-godou God, ga-daumaha mo-di hege ang-gi nia balu-ieidu.”

22:10  Digau Judah, hudee tangitangi gi-di king Josiah. Hudee tangi gi dono made, gei goodou gi-tangitangi huoloo gi dana dama go Joahaz dela gaa-lahi gi-daha, gaa-hana ga-hagalee e-hanimoi labelaa, ga-hagalee e-mmada labelaa gi dono henua dela ne-haanau ai.

22:11  Dimaadua ga-helekai i-di hai o Joahaz, go tama-daane Josiah dela ne-pono di lohongo o dono damana, gaa-hai di king o Judah, “Mee guu-hana gi-daha mo tenua deenei, gu-hagalee e-hanimoi labelaa gi kinei.

22:12  Mee gaa-made i-lodo tenua dela ne-lahi ginai mee, gu-deemee di-mmada labelaa gi tenua deenei.”

22:13  Koia e-huaidu ang-gi tangada dela ma-ga-hagaduu dono hale i-hongo nia donu hai-gee, ga-haga-damana-aga di-maa gi-di hai huaidu, ga-haga-ngalua digau i dono baahi gei hagalee e-wanga nia hui o nadau ngalua.

22:14  Koia e-huaidu gi tangada dela e-helekai boloo, “Au ga-hagaduu-aga dagu hale damanaiee ala ono ruum llauehe i-di hada muginua.” gaa-wanga ono baba-laagau ne-hai gi-nia laagau-‘cedar’, gaa-hunu gii-mmee.

22:15  E-hai behee, goe e-hagamaanadu bolo goe gaa-hai di king humalia maa goe gaa-hai doo hale gi-nia laagau-‘cedar’, dela koia e-humalia i-nia hale o digau ala i-golo? Do damana nogo donu gei e-hai-hegau humalia i-nia madagoaa huogodoo, gei mee gu-hai-mee gi-di mouli humalia, gei e-gila humalia ana mee huogodoo ala ma-gaa-hai.

22:16  Mee nogo hai ang-gi digau hagaloale di tonu ngaadahi, nia mee huogodoo e-humalia i-baahi o mee. Deenei tadinga o-di mouli o tangada dela e-iloo-ia Dimaadua.

22:17  Gei goe e-bida halahala-hua dau humalia adu gi-di-goe. Goe e-daaligi-hua tangada ono hala ai, gaa-hai au daangada gi-haingadaa huoloo. Dimaadua ne-helekai.

22:18  Dimaadua ga-helekai di hai o Jehoiakim, di tama Josiah, di king o Judah, “Tangada e-dangidangi gi-di made o-maa ai be e-helekai boloo, ‘Ii, au ga-aloho, au ga-aloho i dogu ihoo hagaaloho!’ Tangada e-dangidangi gi mee ai boloo, ‘Dogu dagi, dogu king!’

22:19  Di danu o-maa le e-danu-hua be-di ‘donkey’ dela gaa-dada-ia e-kae e-hudu gi-daha i tua nia bontai Jerusalem.”

22:20  Goodou go digau Jerusalem, hula gi Lebanon gi-wwolowwolo, goodou hula gi tenua Bashan gi-dangidangi. Goodou gi-gahigahia i domo nia gonduu o Moab, idimaa godou ihoo hagaaloho huogodoo gu-haga-magedaa.

22:21  Dimaadua gu-helekai-adu gi goodou i-di godou madagoaa nogo haadanga-lamalia, gei goodou gu-de-hiihai di hagalongo. Deelaa di-godou mee nogo haihai i-di waalooloo o godou mouli, goodou nogo hagalee-loo e-hagalongo gi Dimaadua.

22:22  Di madangi ga-ili gi-daha godou dagi, gei godou ihoo hagaaloho gaa-lahi gi-daha gadoo be digau galabudi i tauwa, godou waahale gaa-tee gaa-noho haga-langaadia, idimaa go nia haihai huaidu huogodoo ala ne-hai go goodou.

22:23  Goodou ala e-noho hagamolooloo i-di aumaalia i-lala nia laagau-‘cedar’ ala ne-gaamai i Lebanon, malaa dehee-laa di-godou noho hidi gaagaa gi-di mmae dela ga-tale-adu gi goodou, di mmae dela e-hai be-di mmae o-di haanau.

22:24  Dimaadua ga-helekai gi-di King Jehoiachin, go di tama-daane a Jehoiakim, di king o Judah, “I di-Au dela go di God mouli, agu helekai aanei le e-donu bolo ma e-aha maa goe go di buulei o dogu lima dau-donu, Au gaa-hudu goe gi daha,

22:25  gaa-wanga goe gi-nia daangada ala e-madagu-iei goe, go digau ala e-hiihai e-daaligi goe gii-made. Au gaa-wanga goe gi Nebuchadnezzar, di king o Babylonia, mo ana gau-dauwa.

22:26  Au gaa-lahi goolua mo do dinana gi tenua dela hagalee ne-haanau-iei goolua nonua, goolua ga-mmade-hua i tenua deelaa.

22:27  Goodou ga-hidihidi huoloo i tenua deenei, gei goolua hagalee e-lloomoi labelaa gi kinei.”

22:28  Gei au ga-helekai, “E-hai behee, di King Jehoiachin la-guu-hai be-di loaabi hadu gu-mahaa dela gaa-hudu gi-daha gu-de-hiihai ginai tangada? Deelaa tadinga o mee mo ana dama ala ne-lahi gi tenua dela e-de-iloo-ginaadou?”

22:29  Ii tenua, tenua, tenua! Hagalongo gi Dimaadua dela ne-helekai,

22:30  “Taane deenei guu-noho i-lodo di haga-halauwa, gu-deemee di-hai dana dama, gu-hagalee e-gila humalia i dono mouli, gu-deai dono madawaawa bolo gaa-dagi Judah gadoo be tangada dela e-pono di lohongo King David. Ma ko-au go Dimaadua ne-helekai.”

Chapter 23

23:1  “E-huaidu ang-gi nia dagi ala e-hagabagi gi-daha gei e-dadaaligi agu daangada!”

23:2  Deenei di mee a Dimaadua, dela go di God o Israel e-helekai-ai i-di hai o-nia dagi ala belee benebene ana daangada, “Goodou ala gu-hagabagi agu daangada la-gi-daha, gu-duidui digaula gi-daha-loo. Goodou gu-hagalee benebene digaula. Malaa, Au ga-hagaduadua goodou i godou huaidu ala ne-hai.

23:3  Gei Au ga-haga-dagabuli-mai agu daangada ala ne-hagabagi gi-nia henua i-daha, gi-loomoi gi di-nadau henua donu, gi-hagadili i-golo, gi-dogologowaahee.

23:4  Gei Au gaa-dugu agu dagi e-dagi digaula, gei agu daangada ga-hagalee lliga be e-mmaadagu i dahi mee, gei deai hogi dahi dangada bolo gaa-ngala ai. Ma ko-Au go Dimaadua ne-helekai.”

23:5  Dimaadua ga-helekai, “Di madagoaa ga-dau-mai, gei Au ga-hilihili-aga dagu Dangada dela e-hai donu mai di madawaawa David e-hai di King. Di King deenei gaa-dagi i-di kabemee, gei Mee gaa-hai go nia mee ala e-donu gei e-humalia i-hongo tenua deenei.

23:6  I dono madagoaa dela e-king-ai, gei digau Judah ga-hagalee lliga i dahi mee, gei digau Israel gaa-noho i-di aumaalia. Digaula ga-haga-ingoo di King deenei bolo ‘Yihowah go tadau Hagamouli’.”

23:7  Dimaadua ga-helekai, “Di madagoaa ga-dau-mai, gei nia daangada ga-hagalee hagamodudahi i dogu ingoo, bolo Au go di God Mouli dela ne-dagi-mai digau Israel gi-daha mo Egypt,

23:8  gei digaula ga-hagamodu i dogu ingoo bolo Au go di God Mouli dela ne-laha-mai digau Israel mai i tenua dela i bahi-i-ngeia, mo mai i-nia henua huogodoo ala ne-hagabagi ginai, gei digaula gaa-noho i-lodo di-nadau henua donu.”

23:9  Ogu lodo gu-manawa-gee, gei gu-bolebole huoloo i-di hai o-nia soukohp tilikai. Au guu-hai be tangada gu-libaliba huoloo, guu-hai be tangada guu-honu i-nia waini no-lodo, idimaa i Dimaadua mo ana helekai dabuaahia.

23:10  Tenua deenei la-guu-honu i digau ala hagalee manawa-dahi ang-gi Dimaadua. Digaula e-mouli huaidu gei e-ngalua huaidu gi nadau mogobuna. Idimaa i-nia helekai haga-halauwa a Dimaadua ala ne-hidi-mai-ai tangihangi damana dela gu-haga-honu i-lodo tenua deenei, gei nia hagadili i-nia gowaa dogi-mee gu-mae-ia gi-lala.

23:11  Dimaadua ga-helekai, “Nia soukohp mo digau hai-mee-dabu la di-nadau god ai, gei Au gu-gidee hogi digaula e-hai nadau huaidu i-lodo di Hale Daumaha.

23:12  Nia ala ala e-hula-ai digaula nonua, la-ga-malali ge e-bouli. Au gaa-hai digaula gi-tibatiba ga-tingatinga gi-lala. Au gaa-dugu digaula gi-lodo nia haingadaa llauehe. Di madagoaa e-hagaduadua-ai digaula la-gu-dau-mai. Ma ko-Au go Dimaadua ne-helekai.

23:13  “Au gu-gidee nia huaidu o-nia soukohp o Samaria, digaula e-hai nadau kokohp i-di ingoo o Baal, gaa-hai agu daangada la-gi-hula-gee.

23:14  Gei Au gu-gidee nia huaidu o-nia soukohp o Jerusalem, nia mee ala e-haihai go digaula la-koia e-huaidu gi-nonua-loo. Digaula e-hai di huaidu hai be-di manu, gei e-kai tilikai. Digaula e-hagamaamaa nia daangada gi-heia di huaidu, malaa, deai tangada e-mee di-lawa gi-daha mo-di huaidu ai. Mai gi-di-Au, digaula guu-hai digau huaidu gadoo be digau Sodom, guu-hai digau huaidu gadoo be digau Gomorrah.”

23:15  Dimaadua di Gowaa Aamua ga-helekai-aga i-di hai o-nia soukohp o Jerusalem: “Deenei-laa, Au gaa-dugu ang-gi digaula gi-gaigai nadau laagau mmala, gei e-inu nadau wai-poisin, idimaa, digaula la-gu-hagadele nadau agoago huaidu laa-lodo tenua hagatau.”

23:16  Dimaadua di Gowaa Aamua ga-helekai gi digau Jerusalem, “Goodou hudee hagalongo gi-nia helekai o-nia soukohp ala e-leelee-ai, idimaa, digaula e-haa goodou gi-nia hagadagadagagee tilikai. Digaula e-agoago-adu gi goodou i-nia mee hua mai i nadau hiihai, gei hagalee go agu mee ne-helekai-ai.

23:17  Digaula e-haihai ang-gi nia daangada ala hagalee hiihai e-hagalongo-mai gi-di-Au, bolo digaula ga-humalia ang-gi ginaadou, ga-manawa lamalia ang-gi ginaadou. Digaula e-haihai labelaa gi digau ala gu-hamaaloo nadau lodo, bolo deai di haingadaa e-tale ang-gi ginaadou ai.”

23:18  Gei au ga-helekai, “Deai dahi soukohp i-nia soukohp aalaa e-iloo-ia nia hagamaanadu ala i-lodo di manawa o Dimaadua ai, gei deai dahi soukohp i digaula bolo gu-longono-ia be gu-modongoohia-ia ana helekai ai, be gu-hagalongo hagahumalia gi ana helekai.

23:19  Dono hagawelewele la di madangi damana, go di madangi gawe-uwa dela e-haneia laa-hongo nia libogo o digau huaidu,

23:20  e-hagalee-loo e-lawa-loo, gaa-dae-loo gi God gu-haga-gila-aga nia mee huogodoo ala belee hai. Di madagoaa ma-ga-dau-mai, gei ana daangada huogodoo ga-gidee-laa e-ginaadou di hai o-nia mee aanei.”

23:21  Dimaadua ga-helekai, “Au digi hagau-ina-adu nia soukohp aanei, digaula ne-bida lloo-adu-hua i ginaadou. Au hogi digi wanga dagu helekai e-dahi gi digaula, gei digaula e-helekai-aga i dogu ingoo.

23:22  Maa nei bolo digaula gu-iloo-ginaadou nia hagamaanadu ala i-lodo dogu manawa, gei digaula guu-mee di-hagadele agu helekai gi-nia daangada, gaa-dugu digaula gi-daha mo nadau mouli huaidu mo nadau hangaahai huaidu ala nogo hai go digaula.

23:23  Au go di God dela e-noho i-nia madagowaa huogodoo, hagalee noho-hua i-di gowaa e-dahi.

23:24  Deai tangada bolo ia gaa-bala hagammuni gi-di gowaa dela e-deemee di-gidee-Au ia ai. Goodou digi iloo bolo Au e-noho-hua i-nia madagowaa huogodoo i-di langi mo henuailala?

23:25  Au e-iloo nia mee ala gu-helekai go nia soukohp aanei ala e-bida dili-hua nadau kai-tilikai i dogu ingoo, ga-haihai bolo ma ko-Au ne-wanga gi ginaadou agu helekai i-lodo nadau midi.

23:26  E-waalooloo-loo behee go di hai o-nia soukohp aanei ala e-aago huaidu agu dama gi nadau helekai tilikai ala ne-bida haga-noho go ginaadou?

23:27  Digaula e-hagamaanadu bolo nadau midi ala e-kai ang-gi agu daangada, bolo ga-hidi-mai-ai digaula ga-de-langahia-e-ginaadou dogu ingoo, gadoo be nadau maadua-mmaadua ala i-mua i-di nadau de-langahia-e-ginaadou dogu ingoo gaa-huli ang-gi Baal.

23:28  Soukohp dela guu-hai dana midi, geia gi-hai-hua bolo dana maa di midi hua dela ne-hai, gei soukohp dela gu-hagalongo gi agu helekai, geia gi-hagadele-ina agu helekai i-di manawa-dahi. Dehee-laa di humalia o-di geinga maangoo ma-ga-hagatau ang-gi di laagau-‘wheat’ hai-palaawaa?

23:29  Agu helekai le e-hai gadoo be-di ulaula o-di ahi gei e-hai gadoo be-di haamaa dela e-tugi haga-ligiligi di hadugalaa.

23:30  Gei Au hogi e-hai-baahi ang-gi soukohp dela e-kae nnelekai o tuai soukohp ga-hagadele bolo nia helekai mai dogu baahi.

23:31  Gei Au hogi e-hai-baahi ang-gi nia soukohp ala e-bida hau nadau helekai, ga-hagadele ang-gi nia daangada bolo nia helekai mai i dogu baahi.

23:32  Mmada, ko-Au go Dimaadua deenei e-helekai! Au e-hai-baahi gi-nia soukohp ala e-hagi-aga nadau midi tilikai. Digaula e-hagi-aga nadau midi tilikai, e-hai agu dama la-gii-hala i nadau hai-kai tilikai mo nadau mee hagapuu. Au digi hagaulia-adu be ne-hai digaula gi-loo-adu. Deai di hagamaamaa ne-hai go digaula ang-gi nia daangada aanei ai. Ma ko-Au go Dimaadua ne-helekai.”

23:33  Gei Dimaadua ga-helekai-mai, “Jeremiah, maa tangada mai i agu daangada, be soukohp, be tangada hai-mee-dabu, ga-heeu-adu gi-di-goe boloo, ‘Nia helekai mai baahi o Dimaadua la di-aha?’ Malaa goe ga-helekai gi mee boloo, ‘Kooe go di haga-daamaha ang-gi Dimaadua. Gei Mee gaa-lawa i-di-goe.’

23:34  Maa tangada i agu daangada be soukohp be tangada hai-mee-dabu ga-helekai-aga i telekai deenei, ‘Di haga-daamaha ang-gi Dimaadua,’ gei Au ga-hagaduadua a-mee mo dono madahaanau.

23:35  Malaa deenei di hai o tangada dela ga-helekai i dana heeu ang-gi ono ehoo hagatenetene mo ono duaahina, boloo, ‘Nnelekai bolo-aha ala ne-hai go Dimaadua? Dimaadua la-ne-helekai bolo-aha?’

23:36  Digaula gi-de-hai-hegau-gee gi telekai deenei, ‘Di haga-daamaha ang-gi Dimaadua.’ Maa tangada ma-gaa-hai di-mee deenei, gei Au ga-haga-daamaha a-mee gi agu agoago. Nia daangada gu-gaui-gee nia helekai o di-nadau God, di God mouli deeodi, Yihowah di Gowaa Aamua.

23:37  Jeremiah, heeu-ina gi-nia soukohp boloo, ‘Dimaadua la-ne-helekai-adu gi goodou bolo-aha? Mee ne-helekai bolo-aha?’

23:38  Maa digaula ga-hagalee hagalongo gi agu helekai, ga-helekai-hua telekai deenei, ‘Di haga-daamaha ang-gi Dimaadua’, agoago-ina gi digaula, bolo

23:39  Au gaa-lahi digaula gaa-kili gi tenua mogowaa-loo gi-daha mo Au, digaula mo di-nadau waahale dela ne-wanga ko-Au gi digaula mo nadau maadua-mmaadua ala i-mua.

23:40  Au gaa-wanga gi digaula di haga-langaadia mo-di haadanga-balua deeodi dela e-deemee di haga-delangahia, gaa-hana-hua beelaa.”

Chapter 24

24:1  Dimaadua ga-hagagida-mai gi-di-au nia gada golee-laagau-‘fig’ e-lua ala i-mua di Hale Daumaha. (Di mee deenei ne-hai i-muli Nebuchadnezzar di king o Babylonia ne-lahi galabudi di King Jehoiachin, dela go tama-daane Jehoiakim di king o Judah, gaa-lahi gi-daha mo Jerusalem, gaa-lahi gi Babylonia, mo ana gau-dagi o Judah, ana gau ngalua guu-odi-anga, mo ana gau gu-wouwou di-ngalua.)

24:2  Di gada matagidagi guu-haa ginai nia golee-‘fig’ humalia, ala e-limalima dono bala, gei di gada nomuli guu-haa ginai nia golee-‘fig’ huaidu, e-huaidu dono gai.

24:3  Dimaadua ga-helekai-mai, “Jeremiah, goe e-daumada dau-aha?” Gei au ga-helekai-anga, “Nia golee laagau-‘fig’. Nia golee humalia la-koia gu-humalia huoloo, gei nia mee ala huaidu la-koia gu-huaidu huoloo di gai.”

24:4  Dimaadua ga-helekai-mai,

24:5  “Ko-Au go Yihowah, go di God o Israel, Au e-hagamamaanadu bolo digau ala ne-lahi gi Babylonia, digaula e-hai gadoo be nia golee-‘fig’ humalia aanei, gei Au ga-aloho i digaula ga-benebene digaula.

24:6  Au ga-hagaloohi digaula, ga-laha-mai digaula gi tenua deenei. Au ga-hagamaamaa digaula ga-hagalee e-haga-huaidu digaula. Au gaa-dogi digaula gi-lala, gei Au hagalee e-daagi-aga digaula.

24:7  Au gaa-hai digaula gi-iloo-ginaadou Au bolo ko-Au go Dimaadua. Digaula gaa-hai nia daangada ni-aagu, gei Au gaa-hai di God ni digaula, idimaa digaula ga-huli-mai gi-di-Au i nadau manawa hagaodi-anga.

24:8  “Gei di hai o Zedekiah, go di king o Judah, digau aamua, mo digau Jerusalem ala ne-dubu i-golo ala e-noho i-lodo tenua deenei, be guu-hula gi Egypt, ko-Au go Dimaadua, Au gaa-hai dagu hai ang-gi digaula gii-hai digaula be nia huwa golee-‘fig’ aanei ala koia gu-huaidu huoloo, gei gu-huaidu dono gai.

24:9  Au gaa-dugu-anga di haingadaa damanaiee gi-hongo digaula, gei nia henua huogodoo o henuailala ga-mmaadagu huoloo. Nia daangada ga-haga-balumee digaula, ga-haganneennee digaula, ga-gabailogo digaula, ga-haga-ingoo digaula bolo ne-haga-halauwa i-nia gowaa huogodoo ala ne-hagabagi ginai digaula ko-Au.

24:10  Au ga-gaamai dagu dauwa, tau-magamaga mo tau-magi huaidu gi-hongo digaula, gaa-dae-loo gi tangada e-dahi e-dubu i-lodo tenua dela ne-wanga ko-Au gi nadau damana-mmaadua ala i-mua ai.”

Chapter 25

25:1  I-lodo di haa ngadau o Jehoiakim, tama-daane Josiah, nogo king i Judah, gei au gu-gaamai agu helekai mai baahi Dimaadua i-di hai o digau huogodoo o Judah. (Di madagoaa deenei dela di tahi ngadau o Nebuchadnezzar ne-king i Babylonia.)

25:2  Au gu-helekai gi digau huogodoo o Judah mo Jerusalem,

25:3  “Nia ngadau e-madalua maa-dolu, mai i-di madangaholu maa-dolu ngadau a Josiah, tama-daane Amon nogo king i Judah, gaa-dae-mai-loo gi-di laangi dangi-nei, gei Dimaadua gu-helehelekai-mai gi-di-au, gei au digi de-langahia-eau dagu hagi-adu gi goodou ana mee ala ne-helekai-ai, gei goodou hagalee e-hagalongo.

25:4  Goodou hagalee e-hagalongo ge hagalee e-mmada gii-donu, ma e-aha maa Dimaadua ga-haga-hagau-mai ana gau hai-hegau go nia soukohp.

25:5  Digaula e-helehelekai-adu gi goodou bolo goodou gii-lawa gi-daha mo godou mouli huaidu mo goodou haihai huaidu, gei goodou gaa-mee di-noho momouli i-lodo tenua o Dimaadua dela ne-wanga gi godou damana-mmaadua belee hai-henua ginai goodou, gaa-hana-hua beelaa.

25:6  Digaula ne-helekai-adu gi goodou bolo gi-hudee daumaha ge hudee hege gi-nia balu-ieidu, ala ne-bida hai go goodou gi godou lima. Maa nei bolo goodou gu-hagalongo gi Dimaadua, malaa, Mee gu-hagalee hagaduadua goodou.

25:7  Malaa, go Dimaadua la-hua ne-bida helekai bolo goodou hagalee e-hagalongo, gei Mee gu-hagawelewele-adu gi godou balu-god, ga-gowadu gi goodou di hagaduadua.

25:8  “Idimaa goodou ala hagalee e-hiihai e-hagalongo, Dimaadua di Gowaa Aamua, ga-helekai boloo,

25:9  ‘Au ga-gahigahi-mai digau huogodoo ala i-bahi-i-ngeia mo dagu hege go Nebuchadnezzar, di king i Babylonia, bolo gi-loomoi gi-hai-tauwa ang-gi tenua o Judah mo ana daangada huogodoo mo nia henua ala e-hoohoo-mai gi mee. Au gaa-oho tenua deenei mono henua ala e-hoohoo-mai gi mee, gaa-hai gii-hai di anga-henua gaa-hana-hua beelaa, gaa-hai di gowaa mmaadagu-ai gei e-hagahomouli ang-gi digau huogodoo ala gaa-mmada gi-di-maa. Ma ko-Au go Dimaadua ne-helekai.

25:10  Au gaa-dugu nadau hagalongoaa tenetene ge manawa lamalia, mo nia lee tenetene i nadau hagamiami haga-hailodo, gei digaula ga-deai nadau lolo gi nadau malama ai, ge ga-deai nia huwa o nadau hagadili ai.

25:11  Tenua deenei ga-mooho gi-daha-loo, ga-haga-homouli ang-gi digau ala ma-gaa-mmada ginai, gei nia henua ala e-hoohoo-mai gi mee, digaula gaa-hege gi-di king o Babylonia i-di waalooloo o-nia ngadau e-madahidu-(70).

25:12  I-muli nia mee aanei, gei Au ga-hagaduadua Babylonia mo dono king, idimaa go nadau huaidu. Au gaa-oho tenua deelaa gaa-hai gii-hai di anga-henua gaa-hana-hua beelaa.

25:13  Au ga-hagaduadua Babylonia gi-nia hagaduadua huogodoo ala gu-haganoho ko-Au belee hagaduadua nia henua huogodoo i dogu madagoaa ne-helekai gi Jeremiah. Nia hagaduadua huogodoo ala guu-lawa di hihi gi-lodo di beebaa deenei.

25:14  Au gaa-hui ang-gi digau o Babylonia nia mee huogodoo ala ne-hai go digaula. Nia henua e-logo mono king aamua gaa-hai hege digaula.’ ”

25:15  Dimaadua, go di God o Israel, gu-helekai-mai, “Deenei di ibu waini dela gu-hagahau ko-Au gi dogu hagawelewele. Kaina, hana gi-nia henua ala e-hagau goe ko-Au ginai, wanga-ina gi digaula gi-inumia.

25:16  Di madagoaa digaula ma-ga-inu di-maa, gei digaula ga-heehee tibatiba, gu-deai nadau hagamaanadu ai, idimaa tauwa dela ga-hagau ko-Au gi digaula.”

25:17  Gei au gaa-daa di ibu waini dela i-di lima o Dimaadua, gaa-hana gaa-kae gi-nia henua huogodoo ala ne-hagau ginai au, gaa-wanga gi digaula gi-inumia.

25:18  Jerusalem mo nia dama waahale huogodoo o Judah, mo nadau king mo nia dagi digaula guu-hai gi-inu i-di ibu waini deelaa, bolo nia waahale aalaa gi-mooho gii-hai di anggowaa, di gowaa e-mmaadagu ai, ge haga-homouli ang-gi digau ala gaa-mmada ginai, mo nia daangada ga-hai-hegau gi-nia ingoo digaula e-hai di-mee haga-halauwa, gei deelaa di mee e-hai go digaula gaa-dae-mai-loo gi dangi-nei.

25:19  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:20  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:21  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:22  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:23  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:24  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:25  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:26  Deenei-laa, aanei nia ingoo o digau ala i-golo huogodoo ala belee dau e-inu i-di ibu waini deenei: Di king o Egypt mo ana gau aamua mo ana dagi, digau Egypt huogodoo, mo digau mai i-daha ala e-noho i Egypt, nia king huogodoo ala i tenua Uz, nia king huogodoo o-nia waahale huogodoo Philistia go Ashkelon, Gaza, Ekron, mono gowaa ala ne-dubu i Ashdod, digau huogodoo Edom, Moab, mo Ammon, nia king huogodoo o Tyre mo Sidon, nia king huogodoo o-nia henua i-taalinga Tai Mediterranean, nia waahale o Dedan, Tema, mo Buz, digau huogodoo ala guu-dahi gi-daha nia ngaahulu o nadau libogo, nia king huogodoo o Arabia, nia king huogodoo o-nia madawaawa o lodo-henua, nia king huogodoo o Zimri, Elam, mo Media, nia king huogodoo o bahi-i-ngeia, digau ala e-hoohoo-mai mo ala e-mogowaa, hagadau dagidahi. Nia henua huogodoo o henuailala e-hai-loo gi-inu di ibu waini deelaa. Gei di king o Babylonia dela ga-inu i-di ibu waini i-di hagaodi gi-muli huogodoo.

25:27  Dimaadua ga-helekai-mai, “Helekai ang-gi nia daangada huogodoo bolo Au go Dimaadua, di Gowaa Aamua, di God o Israel, gu-haganoho bolo digaula e-inu gi-libaliba gi-lualua, gi-tingatinga gi-lala gi-deemee di-tuu i-nua, idimaa tauwa dela gaa-wanga ko-Au gi digaula.

25:28  Maa digaula hagalee e-hiihai e-inu i-di ibu waini dela i doo lima, malaa, goe hai gi digaula bolo Dimaadua, di Gowaa Aamua, gu-helekai boloo, ‘Goodou hai-loo gi-inu.’

25:29  Au ga-daamada dagu moomee dela e-daaligi gi-daha digau o lodo dagu waahale. E-hai behee, digaula e-hagamaanadu bolo ginaadou hagalee e-hagaduadua? Gei deeai, digaula e-hai-loo gi-hagaduadua, idimaa Au ga-hagau-mai dagu dauwa gi-hongo nia daangada huogodoo o henuailala. Ko-au go Dimaadua, di Gowaa Aamua, ne-helekai.

25:30  “Kooe, Jeremiah, gi-hagadele-ina nia mee huogodoo ala gu-helekai-iei Au. Goe helekai ang-gi nia daangada aanei boloo, ‘Di lee Dimaadua ga-ngoloolo-ia i-di langi, mo-di atili i-nia gowaa nnoonua o-di langi. Dono lee ga-ngoloolo ang-gi ana daangada, Mee e-wolowolo gadoo be taane e-dagadagahi ana ‘grape’. Nia daangada huogodoo o henuailala ga-longono dono lee,

25:31  gei di hadinga lee o dono lee guu-dau-adu-loo gi-nia mada o henuailala. Dimaadua ga-hagiaga nia henua huogodoo. Mee ga-haga-dagabuli-mai nia daangada huogodoo gi-lodo dono lohongo hai-gabunga ga-hagaduadua digau ala nogo haihai di huaidu gi-di made. Dimaadua ne-helekai.’ ”

25:32  Dimaadua, go di Gowaa Aamua, guu-lawa di-helekai bolo di hagaduadua dela gaa-tale ang-gi tenua-nei mo tenua-nei, ga-gila-mai dahi madangi gaudogi damanaiee, ga-daamada i-di mada o henuailala.

25:33  I-di laangi deelaa, gei nnuaidina o digau ala ne-daaligi go Dimaadua ga-mmoe-mmoe dagidahi, daamada di mada o henuailala gaa-dau-adu gi-di mada dela i-golo. Tangada e-dangi gi digaula ai, gei digaula hagalee hagabudu-mai e-danu. Digaula ga-hagabae gi-nua gadoo be-nia hagamunga mee hagauwwou.

25:34  Goodou go nia dagi, goodou ala go nia hagaloohi o agu daangada, goodou tangitangi gi-nua-loo! Goodou gi-hagadagadaga i-lodo nia gelegele dogolia. Di madagoaa dela e-daaligi-ai goodou gu-hoohoo-mai, goodou ga-hahaahi gadoo be nia siibi-daane ala e-hahaahi e-hai tigidaumaha.

25:35  Dei di ala i-golo e-mee di-haga-dagaloaha goodou ai.

25:36  Goodou e-tangitangi i godou manawa-gee, idimaa Dimaadua dela guu-oho di-godou henua gi dono hagawelewele, ga-haga-huaidu di-godou noho i-di aumaalia.

25:37  Goodou e-tangitangi i godou manawa-gee, idimaa Dimaadua dela guu-oho di-godou henua gi dono hagawelewele, ga-haga-huaidu di-godou noho i-di aumaalia.

25:38  Dimaadua gu-diiagi ana daangada, e-hai gadoo be-di laion ma-ga-hagatanga gi-daha mo dono bongoo. Di mmaadagu o tauwa mo-di hagawelewele o Dimaadua gu-hidi-mai-ai tenua deelaa, guu-hai di anga-henua.

Chapter 26

26:1  Taamada di madagoaa o Jehoiakim go tama a Josiah nogo king i tenua go Judah,

26:2  Dimaadua ga-helekai gi Jeremiah, “Hana, duu i-lodo di abaaba o-di Hale Daumaha, gi-agoago-ina ang-gi digau o-nia waahale o Judah ala e-loomoi e-dadaumaha i-golo, i agu helekai huogodoo ala ne-hagi-adu gi-di-goe. Gei goe hudee hagammuni dahi mee i digaula.

26:3  Holongo digaula ga-hagalongo-adu gi-di-goe, gaa-huli gi-daha mo nadau haihai huaidu. Gei ma-guu-hai beelaa, malaa, gei Au gaa-huli dogu manawa i-di hagaduadua dela gu-hagamaanadu belee hai ang-gi digaula idimaa go nadau haihai huaidu.”

26:4  God ga-helekai gi Jeremiah bolo gi-helekai gi-nia daangada huogodoo boloo, “Ko-au go Dimaadua, Au guu-dugu goodou bolo goodou gi-hagalongo-mai gi-di-Au i-di godou daudali nia agoago ala ne-gowadu gi goodou.

26:5  Goodou la-gi-hagalongo ang-gi agu gau hai-hegau, aalaa go nia soukohp ala ne-hagau-adu ko-Au gi goodou. Goodou hagalee-loo e-haga-gila-aga nia agoago ala ne-hai-adu go digaula gi goodou.

26:6  Maa goodou ga-hagalee haga-gila-aga nia mee aanei, gei Au gaa-hai di waahale deenei gii-hai be Shiloh. Nia henua huogodoo o henuailala ga-hai-hegau gi-di ingoo o-di waahale deenei bolo ‘Di waahale gu-halauwa’.”

26:7  Digau hai-mee-dabu, nia soukohp mo nia daangada huogodoo ga-longono-ginaadou Jeremiah dela e-agoago i-nia helekai aanei i-lodo di Hale Daumaha.

26:8  Deenei-laa i dono hagaodi nia mee a Dimaadua ala ne-hai gi mee bolo gi-agoago-ina, gei digau hai-mee-dabu, nia soukohp mo nia daangada huogodoo ga-kumi-adu a-mee mo-di wwolowwolo, boloo, “Goe e-humalia-hua e-daaligi gii-made i-di gili au helekai aanei ne-hai.

26:9  Goe e-aha dela e-helekai i-di ingoo o Dimaadua bolo di hale deenei la-gaa-hai be Shiloh, gei di waahale deenei la-gaa-oho gi-daha, ga-deai ono gau e-noho ai?” Malaa, nia daangada gu-hii-mai i-di gili o Jeremiah i-lodo di Hale Daumaha.

26:10  Digau aamua o Judah ga-longono-ginaadou di mee dela guu-hai, gei digaula ga-hagalimalima ga-hagatanga-ia i-di hale o-di king, gaa-hula gaa-noho gi-lala i nadau lohongo i-di ngudu di Bontai Hoou o-di Hale Daumaha.

26:11  Malaa, digau hai-mee-dabu mo nia soukohp ga-haga-iloo ang-gi digau aamua aalaa mo nia daangada huogodoo boloo, “Tangada deenei e-humalia-hua e-daaligi gii-made, idimaa, mee ne-hai dana kokohp e-hai-baahi ang-gi di waahale deenei. Goodou guu-bida hagalongo gi nnelekai a mee ala ne-hai!”

26:12  Jeremiah ga-helekai gi digau aamua mo nia daangada huogodoo, “Dimaadua ne-hagau-mai au bolo gi-haga-modongoohia-ina-aga nia mee huogodoo ala gu-hagalongo ginai goodou ala bolo e-hai-baahi ang-gi di Hale Daumaha deenei mo ang-gi di waahale deenei.

26:13  Goodou e-hai-loo gii-huli gi-daha mo godou hagadilinga mouli mo godou hangahaihai huogodoo, gi-hagalongo ang-gi nnelekai o Dimaadua dela go di-godou God. Maa goodou gaa-huli godou lodo, malaa, gei Mee gaa-huli dana hagamaanadu i-di hagaduadua damanaiee dela belee gowadu gi goodou.

26:14  Gei au deenei, au gu-i-lodo godou mogobuna! Goodou heia-mai gi-di-au di-godou maanadu be dehee di mee dela e-donu gei e-humalia.

26:15  Gei goodou la-gi-iloo di mee deenei: Maa goodou ga-daaligi au gii-made, gei goodou mo digau hogi o-di waahale deenei gaa-dau ang-gi taaligi o tangada deai ono huaidu ai. Idimaa go Dimaadua dela ne-hagau-mai au bolo au gi-haga-modongoohia-ina-adu gi goodou nia mee aanei huogodoo.”

26:16  Nia dagi mo nia daangada huogodoo ga-helekai gi-nia soukohp mo digau hai-mee-dabu, “Taane deenei hagalee humalia dono daaligi gii-made, idimaa mee gu-helehelekai-mai gi gidaadou i-di ingoo o Dimaadua dela go tadau God.”

26:17  Nomuli-hua, gei hunu gau mai digau mmaadua ga-tuu-aga, ga-agoago tagabuli-dangada dogologowaahee boloo,

26:18  “I-di madagoaa o Hezekiah nogo king i Judah, gei soukohp Micah tangada mai Moresheth gaa-hai dana kokohp ga-helekai ang-gi digau huogodoo i nnelekai Dimaadua di Gowaa Aamua boloo, ‘Zion ga-haga-maluu ono gelegele gadoo be-di gowaa dogi-mee, Jerusalem gaa-hai nia hagabae hadu bugubugu gi-nua-loo, gei di gonduu dela e-duu-ai di Hale Daumaha gaa-hai di gonduu lodo henua geinga.’

26:19  “Gei Hezekiah di king o Judah mo ana daangada huogodoo, la-digi daaligidia a Micah. Malaa, deenei di mee a Hezekiah dela ne-hai: Ia ne-hagalaamua-hua Dimaadua, gaa-dangi ang-gi Mee gi-dumaalia ang-gi deia, gei Dimaadua gaa-huli dono manawa i-di hagaduadua dela guu-hai bolo gaa-wanga gi digaula. Malaa, di mee deenei dela gaa-bida gaamai di hagaduadua damanaiee la gi tadau nua.”

26:20  (Taane i-golo dono ingoo go Uriah, di tama ni Shemaiah, tangada mai i-di waahale go Kiriath=Jearim, tangada e-agoago i-di ingoo o Dimaadua, e-hagi-aga labelaa be nnelekai a Jeremiah dela e-hai-baahi gi-di Hale Daumaha mo-di waahale deenei.

26:21  Di madagoaa-hua di King Jehoiakim mo ana gau-dauwa, mo ana gau aamua ne-longono-ginaadou nia helekai a Uriah, gei di king gaa-hai bolo mee e-daaligi gii-made. Uriah gu-longono di mee deenei, gei mee gu-madagu huoloo guu-hana guu-lele hagammuni gi Egypt.

26:22  Di King Jehoiakim ga-hagau a Elnathan go tama a Achbor mo ono ehoo daane dulii bolo gii-hula gi Egypt gi-laha-mai a Uriah.

26:23  Digaula ga-laha-mai a-mee gi-mua o Jehoiakim, gei di King Jehoiakim gaa-hai bolo mee e-daaligi, gei dono huaidina gaa-hudu gi-lodo di gowaa dela e-danu-ai nia balu-daangada.)

26:24  Idimaa Jeremiah dela ne-kae di hagamaamaa mai baahi o Ahikam di tama ni Shaphan, dela ga-hidi-mai-iei mee digi hagi-aga go nia daangada gei digi daaligidia.

Chapter 27

27:1  I-muli-hua tama-daane Josiah go Zedekiah ne-hai di king o Judah, gei Dimaadua ga-helekai-mai

27:2  bolo au gi-heia dagu mee-aamo-mee dela ne-hai gi-nia gili-kau mono laagau be-di loobuu, gi-daahi-aga-ina gi dogu uwa.

27:3  Dimaadua ga-helekai-mai bolo au gi-heia di hagailoo ang-gi nia king o Edom, Moab, Ammon, Tyre, mo Sidon. Di hagailoo gi-heia ang-gi digau pono o-nia king aalaa ala ne-lloomoi gi Jerusalem belee heetugi ang-gi Zedekiah.

27:4  Dimaadua di Gowaa Aamua, dela go di God o Israel, gu-helekai-mai bolo au gi-helekai gi digaula bolo digaula gi-helekai ang-gi nadau king bolo aanei nia mee Dimaadua ala e-helekai ai,

27:5  “Mai ogu mahi aamua mo ogu maaloo, Au ne-hai henuailala, nia daangada mono manu huogodoo ala i henuailala, gei Au e-wanga di-maa gi tangada dela gaa-hili-aga ko-Au.

27:6  Deenei ko-Au dela ne-haganoho nia henua aanei huogodoo gi-lala nia mogobuna o dagu hege, go Nebuchadnezzar, di king o Babylonia, gei au gu-haganoho labelaa bolo nia manu lodo-geinga gi-hagamaamaa-ina-laa a-mee.

27:7  Nia henua huogodoo gii-hege gi mee, mo-di hege labelaa gi dana dama-daane mo tama-daane o dana dama-daane, gaa-dae-loo gi dahi madagoaa ga-dau-mai gei dono henua ga-mooho. Di madagoaa deelaa, gei dono henua gaa-hege ang-gi nia henua llauehe mo nia king aamua.

27:8  “Maa tenua be dahi henua-king ga-hagalee e-hege-anga, deelaa-laa, gei Au ga-hagaduadua tenua deelaa gi-tauwa, tau-hiigai huoloo mo tau-magi, gaa-dae-loo gi dogu dumaalia gi Nebuchadnezzar gi-ohaa gi-daha tenua deelaa.

27:9  Goodou hudee hagalongo gi godou soukohp, be tei dangada dela e-helekai bolo ia e-mee di-haga-dagu-aga nia mee ala ga-kila-aga i-nia madagoaa ala ga-dau-mai, mai i nadau midi, be i-nia mouli dangada, be i-nia mogobuna buubuu. Digaula huogodoo aanei guu-hai-adu gi goodou gi-de-hai-hegau gi-di king o Babylonia.

27:10  Digaula e-halahalau goodou gaa-hidi-ai goodou ga-hagau gi-daha mo di-godou henua. Au ga-hagabagi goodou gi-daha, gei goodou ga-mmademmade.

27:11  Gei maa iai tenua gaa-hege ang-gi di king o Babylonia, ga-hai-hegau gi mee, malaa gei Au ga-dumaalia gi mee gii-noho i dono henua, e-haihai ana hadagee mo-di noho i-golo. Ma ko-Au go Dimaadua ne-helekai.”

27:12  Au gu-helekai labelaa beenei ang-gi Zedekiah, di king o Judah boloo, “Goe gi-hege-anga gi-di king o Babylonia, hai-hegau gi mee mo ana daangada, gei goe ga-mouli.

27:13  Dehee tadinga bolo goe mo au daangada ala ma-gaa-mmade i tauwa be i tau-magamaga damana be i tau-magi huaidu? Deenei di-mee a Dimaadua bolo e-hai ang-gi tenua dela ga-hagalee e-hai-hege ang-gi di king o Babylonia.

27:14  Goe hudee hagalongo gi-nia soukohp ala e-helekai-adu bolo goe hudee hege-anga, digaula e-halahalau-hua goe.

27:15  Dimaadua gu-helekai bolo ma hagalee ko-Ia dela ne-hagau-mai digaula, digaula e-halahalau goe i-di ingoo o-Maa, deelaa tadinga ga-hagabagi-ai goodou gi-daha, ga-dumaalia gi goodou gi-dadaaligi gii-mmade, go-kooe mo au soukohp ala ne-hai nadau kai tilikai i-di ingoo o-Maa.”

27:16  Gei au ga-helekai gi digau hai-mee-dabu mo nia daangada di-mee a Dimaadua dela ne-helekai-ai, “Goodou hudee hagalongo gi-nia soukohp ala e-helekai bolo nia goloo hagalabagau o-di Hale Daumaha gu-hoohoo ga-gaamai labelaa gi-muli mai i Babylonia, idimaa digaula e-halahalau goodou.

27:17  Hudee hagalongo gi digaula! Goodou gi-hege-anga gi-di king Babylonia, gei goodou ga-mouli! Dehee tadinga bolo di waahale deenei la-gi-mooho?

27:18  Maa nei bolo digaula nia soukohp donu, gei digaula e-dagidagi agu helekai, malaa digaula belee tangi-mai gi-di-Au, Dimaadua di Gowaa Aamua, bolo Au gi-hudee dumaalia gi-nia goloo hagalabagau ala ne-dubu i-lodo di Hale Daumaha mo i-lodo di hale o-di king gi kae-ina gi Babylonia.”

27:19  (Di madagoaa di King Nebuchadnezzar ne-lahi gi Babylonia di king o Judah, go Jehoiachin tama a Jehoiakim, mo nia dagi o Judah mo Jerusalem, gei mee digi kae nia duludulu di Hale Daumaha, mo-di monowai baalanga mmee damanaiee, mono kulumaa mono goloo ala i-golo o-di Hale Daumaha.)

27:20  (Di madagoaa di King Nebuchadnezzar ne-lahi gi Babylonia di king o Judah, go Jehoiachin tama a Jehoiakim, mo nia dagi o Judah mo Jerusalem, gei mee digi kae nia duludulu di Hale Daumaha, mo-di monowai baalanga mmee damanaiee, mono kulumaa mono goloo ala i-golo o-di Hale Daumaha.)

27:21  “Goodou hagalongo-mai be di-aha dela ga-helekai-iei Au, go Dimaadua di Gowaa Aamua dela go di God o digau Israel, i-di hai o-nia goloo ala ne-dubu i-lodo di Hale Daumaha mo i-lodo di hale o-di king dela i Jerusalem:

27:22  Nia mee aanei le e-kae labelaa gi Babylonia, gaa-dugu i-golo gaa-dae-loo gi dogu madagoaa gaa-huli ang-gi digaula. Gei au ga-gaamai-laa nia maa gaa-dugu nia maa i-di gowaa deenei. Ma ko-Au go Dimaadua ne-helekai.”

Chapter 28

28:1  I-lodo hua di ngadau deelaa, i-di lima malama o-di haa ngadau di madagoaa di King Zedekiah, Hananiah, tama-daane Azzur, soukohp mai di waahale Gibeon, ne-helekai-mai gi-di-au i-lodo di Hale Daumaha. Mee ne-helekai-mai gi-di-au i-mua nia gau hai-mee-dabu mo digau dogologo

28:2  bolo Dimaadua di Gowaa Aamua, dela go di God o Israel gu-helekai boloo, “Au gu-oho nia mogobuna o-di king o Babylonia.

28:3  I-lodo nia ngadau e-lua, gei Au ga-gaamai nia goloo hagalabagau huogodoo o-di Hale Daumaha ala ne-kae go di King Nebuchadnezzar gi Babylonia.

28:4  Gei Au ga-laha-mai labelaa di king o Judah go Jehoiachin, tama-daane a Jehoiakim, mo digau huogodoo o Judah ala ne-lahi gi Babylonia. Uaa, Au gaa-oho nia mogobuna o-di king o Babylonia. Ma ko-Au go Dimaadua ne-helekai.”

28:5  Gei au ga-helekai-adu gi Hananiah i-mua digau hai-mee-dabu mo digau huogodoo ala e-tuu-mai i-lodo di Hale Daumaha,

28:6  “E-humalia! Au e-hiihai bolo Dimaadua ga-haga-gila-aga au helekai, ga-gaamai gi-muli nia goloo hagalabagau huogodoo ala ne-kae gi Babylonia, mo nia daangada huogodoo ala ne-lahi galabudi.

28:7  Hagalongo-malaa gi agu helekai ala gaa-hai-adu gi-di-goe mo digau huogodoo aanei.

28:8  Nia soukohp ala nogo hai nadau helekai kokohp i-mua, i-mua tau madagoaa, digaula ne-kokohp bolo tauwa, tau-magamaga, mo tau-magi huaidu ga-dau-mai gi-nia henua e-logo mo nnenua aamua ala i-golo.

28:9  Gei gidaadou ga-iloo bolo soukohp dela e-kokohp di noho di aumaalia la soukohp e-donu dela ne-hagau mai i-baahi o Dimaadua, maa nnelekai kokohp a-maa la-ga-kila-aga.”

28:10  Nomuli-hua, gei Hananiah gaa-daa di mee aamo dela i-hongo dogu uwa, gaa-oho gi-daha.

28:11  Gei mee ga-helekai-aga i-mua nia daangada huogodoo aalaa bolo Dimaadua gu-helekai boloo, “Deenei dagu hai dela e-oho-ai di-mee aamo a-di King Nebuchadnezzar dela guu-wanga gi-hongo nia uwa o-nia henua huogodoo. Gei Mee gaa-hai di-mee deenei i-lodo nia ngadau e-lua.” Gei au ga-hagatanga gaa-hana.

28:12  Dahi madagoaa hua i-muli di-mee deenei, Dimaadua ga-helekai-mai

28:13  bolo au gii-hana gi-helekai gi Hananiah, “Dimaadua gu-helekai, holongo goe e-mee di-oho di-mee aamo dela ne-hai gi-nia laagau, gei Mee gaa-hai dana mee aamo e-hai gi-nia baalanga e-pono di lohongo o-di mee aamo laagau.

28:14  Dimaadua di Gowaa Aamua, dela go di God o Israel, gu-helekai bolo Ia ga-hagauda di-mee aamo deenei gi-hongo nia uwa o-nia henua huogodoo, digaula gaa-hege gi-di King Nebuchadnezzar di king o Babylonia. Dimaadua gu-hagamaanadu labelaa bolo nia manu lodo-geinga gii-hege labelaa gi Nebuchadnezzar.”

28:15  Gei au ga-hagi-anga gi Hananiah nia mee aanei, mo-di helekai-adu labelaa gi mee boloo, “Hananiah, hagalongo-mai! Dimaadua digi hagau-ina-mai goe, gei goe guu-hai nia daangada gi-haga-donu-ina au helekai tilikai.

28:16  Malaa Dimaadua gu-helekai bolo Ia gaa-daa goe gi-daha mo henuailala. I-mua di hagaodi o-di ngadau deenei, goe gaa-made, idimaa goe gu-agoago gi-nia daangada gi-de-hagalongo ang-gi Dimaadua.”

28:17  Hananiah guu-made i-di hidu malama o-di ngadau hua deelaa.

Chapter 29

29:1  Au ne-hihi di lede deenei ga-hagau gi-nia soukohp, digau hai-mee-dabu, nia dagi o-nia daangada, mo digau huogodoo ala ne-lahi galabudi go Nebuchadnezzar mai i Jerusalem e-lahi gi Babylonia.

29:2  Au ne-hihi di lede deenei i-muli-hua di king go Jehoiachin mo dono dinana, mo digau aamua o-di king deelaa, mo nia dagi o Judah mo Jerusalem, mo digau ngalua humalia, mo digau gu-iloo di-ngalua ala ne-lahi gi-daha.

29:3  Gei au gaa-wanga di lede deenei gi Elasah, tama-daane a Shaphan, mo Gemariah, tama-daane Hilkiah, ala e-hagau go Zedekiah di king o Judah gi Nebuchadnezzar go di king o Babylonia. Malaa aanei nnelekai o-di lede deenei:

29:4  “Dimaadua di Gowaa Aamua, go di God o Israel, ne-helekai ang-gi digau huogodoo ala ne-dumaalia gi Nebuchadnezzar bolo gi-lahia digaula mai i Jerusalem e-lahi gi Babylonia:

29:5  ‘Goodou hau-hia godou hale gi-noho-ai no-lodo. Heia godou hadagee, e-miami-ai goodou.

29:6  Goodou hai godou lodo gi-hagadili godou dama. Nomuli, gei goodou gi-heia godou dama gii-hai nadau lodo gii-hai labelaa nadau dama. Goodou hai gi-hagadili, hagalee hogoohi-mai.

29:7  Goodou ngalua gi-haga-humalia-ina nia waahale ala ne-lahi galabudi ginai goodou. Goodou gi-dalodalo i digaula, gi-haadanga-lamalia digaula, gei goodou hogi ga-haadanga-lamalia.

29:8  Ko-Au go Yihowah, di God o Israel, Au e-boloagi-adu gi goodou bolo goodou hudee hagalongo gi-nia soukohp ala e-noho i godou baahi gi-halahalau-ina goodou, ge hudee hagalongo hogi gi digau ala i-golo ala e-hai bolo ginaadou e-mee di-kokohp nia mee o lodo nia madagoaa ala ma-ga-dau-mai. Goodou hudee hagalongo gi-nia midi digaula.

29:9  Idimaa digaula e-halahalau goodou i dogu ingoo. Digaula hagalee ni-aagu ne-hagau-adu. Ko-Au go Dimaadua, go di Gowaa Aamua, ne-helekai.’

29:10  “Dimaadua ga-helekai, ‘Di hagaodi o-di madahidu ngadau o di-godou noho i Babylonia, gei Au ga-hanadu gi goodou ga-laha-mai goodou gi-di-godou henua donu, be dagu hagababa dela ne-hai.

29:11  Ko-Au hua dela e-iloo-e-Au dagu hai dela gaa-hai-adu gi goodou, nia haganoho ala e-hagahumalia-ai goodou, hagalee e-hai gi-haingadaa goodou, gei e-gowadu gi goodou di hagadagadagagee o-di madagoaa maalia.

29:12  Goodou la-ga-gahigahi-mai Au, goodou ga-dalodalo-mai gi-di-Au, gei Au ga-longono-e-Au goodou.

29:13  Goodou ga-halahala-mai Au, gei goodou ga-gidee-goodou Au, idimaa goodou ga-halahala-mai Au mai i-lodo godou manawa hagatau.

29:14  Uaa, Au gu-helekai bolo goodou ga-gidee-goodou Au, gei Au ga-laha-mai goodou gi-di-godou henua donu. Au ga-laha-mai goodou mai i-lodo nia henua huogodoo ala ne-lahi ginai goodou gi-noho-ai, gei Au ga-laha-mai goodou gi-di-godou henua dela ne-lahi-ai goodou go digaula. Ma ko-Au go Dimaadua ne-helekai.’

29:15  “Goodou e-helekai bolo Dimaadua gu-gowadu gi goodou hunu soukohp i-lodo tenua go Babylonia.

29:16  Goodou hagalongo gi-di hai a Dimaadua dela e-helekai-ai i-di hai o-di king dela e-dagi-ai tenua a David dela nogo dagi, mo-di hai o-nia daangada o tenua deenei, aanei la-go digau o hunu goodou ala digi lahia galabudi dalia goodou.

29:17  Dimaadua di Gowaa Aamua, e-helekai boloo, ‘Au gaa-wanga gi digaula tauwa, tau-magamaga damana, mo tau-magi huaidu, gaa-hai digaula gii-hai gadoo be nia golee laagau-‘fig’ ala guu-bala guu-wii ge deemee di-gai go tangada.

29:18  Au ga-waluwalu digaula gi tauwa mo tau-magamaga damana mo tau-magi huaidu, gei nia henua o henuailala huogodoo ga-mmaadagu i-di mee dela guu-mmada ginai. Nia gowaa huogodoo ala ga-hagabagi ginai digaula, gei nia daangada ga-homouli huoloo ga-mmaadagu huoloo i di-mee dela ne-hai ang-gi digaula, gei ga-gadagada gi digaula, ga-haga-ingoo digaula bolo gu-haga-halauwa.

29:19  Di hai deenei gaa-hai ang-gi digaula, idimaa digaula hagalee e-hagagila-aga agu helekai ala ne-hai ang-gi agu soukohp bolo gi-hagi-anga-ina gi digaula, gei digaula hagalee hagalongo.

29:20  Gei goodou huogodoo ala ne-lahi ko-Au gi Babylonia, goodou hagalongo-mai gi agu mee. Ko-Au go Dimaadua dela e-helekai.’

29:21  “Dimaadua di Gowaa Aamua, go di God o Israel, gu-helekai i-di hai o Ahab, di tama a Kolaiah, mo Zedekiah, di tama a Maaseiah, ala ne-hagi-adu gi goodou nia kai tilikai i dono ingoo. Mee gu-helekai bolo Ia gaa-wanga meemaa gi-lala nia mogobuna o King Nebuchadnezzar o Babylonia, ga-daaligi meemaa gii-mmade i-mua godou golomada.

29:22  Di madagoaa digau ala ne-lahi galabudi mai Jerusalem gi Babylonia ga-haga-halauwa tangada, digaula ga-helekai boloo, ‘Dimaadua gaa-hai-adu gi-di-goe be dana hai dela ne-hai ang-gi Zedekiah mo Ahab, ala ne-dudu go di king o Babylonia, gei meemaa e-mouli!’

29:23  Deenei go di hagaodi o nau mouli, idimaa i nau hai-huaidu huoloo ala ne-hai ang-gi Dimaadua. Meemaa guu-hai di huaidu hai be-di manu, ge gu-helekai tilikai i-di ingoo Dimaadua. Di mee deenei gu-hai-baahi ang-gi Dimaadua, gei Mee e-iloo-Ia nia mee meemaa ala ne-hai, gei go Mee hua dela tangada hagadootonu o nau hai ala nogo hai. Dimaadua ne-helekai.”

29:24  Dimaadua di Gowaa Aamua, go di God o Israel, gu-gaamai gi-di-au nia helekai ang-gi Shemaiah, tangada o Nehelam, dela ne-bida hagau dana lede i dono ingoo ang-gi digau Jerusalem mo ang-gi tangada hai-mee-dabu go Zephaniah, tama-daane a Maaseiah, mo ang-gi digau hai-mee-dabu huogodoo ala i-golo. I-lodo di lede deenei, Shemaiah la-ne-hihi beenei gi Zephaniah:

29:25  Dimaadua di Gowaa Aamua, go di God o Israel, gu-gaamai gi-di-au nia helekai ang-gi Shemaiah, tangada o Nehelam, dela ne-bida hagau dana lede i dono ingoo ang-gi digau Jerusalem mo ang-gi tangada hai-mee-dabu go Zephaniah, tama-daane a Maaseiah, mo ang-gi digau hai-mee-dabu huogodoo ala i-golo. I-lodo di lede deenei, Shemaiah la-ne-hihi beenei gi Zephaniah:

29:26  “Dimaadua la-ne-hai goe gii-hai tangada hai-mee-dabu e-pono di lohongo o Jehoiada, gei dolomeenei gei goe guu-hai tangada aamua i-lodo di Hale o Dimaadua. Au hegau belee nnoo di uwa o tangada dadaulia dela e-hai bolo ia soukohp la-gi taula baalanga.

29:27  Ma e-aha dela goe digi heia di hai deenei ang-gi Jeremiah, tangada Anathoth, dela e-leelee ang-gi nia daangada gadoo be soukohp?

29:28  E-humalia belee dugu di hai a-mee dela e-hai, idimaa i mee guu-hai ang-gi digau ala i Babylonia bolo digaula e-noho duainau-loo be digau galabudi i tenua deelaa, bolo digaula gii-noho gi-hauhia nadau hale gi-noho-ai, gei gi-heia nadau hadagee, ge gi-miami i nadau hadagee.”

29:29  Gei-ogo Zephaniah tangada hai-mee-dabu, gaa-dau di lede deelaa mai gi-di-au,

29:30  nomuli-hua, gei Dimaadua ga-helekai-mai

29:31  bolo au gi-hagailoo-ina ang-gi digau huogodoo ala e-noho galabudi i Babylonia i-di hai o Shemaiah, “Ko-Au go Dimaadua ga-hagaduadua Shemaiah mo ono hagadili huogodoo. Hagalee ko-Au dela ne-hagau-adu a-mee, gei mee e-helekai-adu gi goodou bolo ia soukohp, dela gaa-hidi-ai goodou ga-hagadonu ana helekai tilikai. Deai dahi dangada i ono hagadili gaa-noho i godou lodo ai. Mee hagalee e-mouli bolo gii-mee-ai di-gidee-ia nia humalia ala gaa-hai ko-Au ang-gi agu daangada huogodoo, idimaa mee dela ne-hai-adu bolo goodou gi-hudee hagalongo-mai gi-di-Au. Ma ko-Au go Dimaadua ne-helekai.”

29:32  bolo au gi-hagailoo-ina ang-gi digau huogodoo ala e-noho galabudi i Babylonia i-di hai o Shemaiah, “Ko-Au go Dimaadua ga-hagaduadua Shemaiah mo ono hagadili huogodoo. Hagalee ko-Au dela ne-hagau-adu a-mee, gei mee e-helekai-adu gi goodou bolo ia soukohp, dela gaa-hidi-ai goodou ga-hagadonu ana helekai tilikai. Deai dahi dangada i ono hagadili gaa-noho i godou lodo ai. Mee hagalee e-mouli bolo gii-mee-ai di-gidee-ia nia humalia ala gaa-hai ko-Au ang-gi agu daangada huogodoo, idimaa mee dela ne-hai-adu bolo goodou gi-hudee hagalongo-mai gi-di-Au. Ma ko-Au go Dimaadua ne-helekai.”

Chapter 30

30:1  Dimaadua dela go di God o Israel,

30:2  ga-helekai-mai, “Hihia gi-lodo di beebaa i agu mee huogodoo ala ga-helekai-iei-Au adu gi-di-goe,

30:3  idimaa di madagoaa ga-dau-mai, gei Au ga-haga-hoou agu daangada, ala go digau Israel mo Judah. Au ga-laha-mai digaula gi-lodo tenua dela ne-wanga ko-Au gi nadau damana-mmaadua, gei digaula ga-hai-henua ginai labelaa. Ma ko-Au go Dimaadua ne-helekai.”

30:4  Dimaadua ga-helekai ang-gi digau Israel mo Judah,

30:5  “Au gu-longono-e-Au nia hagadilinga lee dangada e-wolowolo be di-mee e-mmaadagu huoloo, e-wwolowwolo mmaadagu hagalee wwolowwolo tenetene.

30:6  Noho-malaa, hagamaanadu-ina! Taane le e-mee di-haanau mai dana dama? Ma e-aha dela Au e-mmada gi-nia daane ala e-poo nadau dinae be nia ahina ala guu-mmae i-di haanau? Ma e-aha dela nia daangada huogodoo e-uli nadau gai?

30:7  Di laangi haingadaa huaidu huoloo ga-dau-mai, deai di laangi e-hai be-di laangi deelaa ai, dela di madagoaa e-haingadaa huoloo ang-gi agu daangada, gei digaula e-dagaloaha.”

30:8  Dimaadua di Gowaa Aamua, ga-helekai, “Di laangi deelaa ma-ga-dau-mai, gei Au gaa-oho di-mee aamo dela guu-tai gi-nia uwa digaula, gaa-wwede nia daula baalanga ala e-nnoo digaula, gei digaula ga-hagalee e-hege gi digau mai daha.

30:9  Gei digaula gaa-hege mai gi-di-Au, go Yihowah, go di-nadau God, mo-di hege ang-gi tangada i-di madawaawa David, dela ga-haganoho ko-Au e-hai di king.

30:10  “Goodou go agu daangada, goodou hudee mmaadagu. Goodou go digau Israel, goodou hudee noho mmaadagu. Au ga-haga-dagaloaha goodou gi-daha mo tenua mogowaa-loo dela e-noho galabudi-ai goodou. Goodou ga-lloomoi gi-di-godou henua donu, gaa-noho i-di aumaalia. Goodou gaa-too gi-daha mo-di haingadaa, deai di-mee e-hagamadagudagu goodou ai.

30:11  Au ga-hanimoi gi godou baahi ga-haga-dagaloaha goodou. Au ga-daaligi nia henua huogodoo ala ne-hagabagi ginai goodou nonua, gei Au hagalee e-daaligi goodou. Au hagalee e-dumaalia-adu gi goodou gii-hula gei deai di hagaduadua ne-hai-adu gi goodou ai, gei dogu madagoaa ma-ga-hagaduadua goodou, gei Au e-hai-hegau gi-di mee dela e-donu. Ma ko-Au go Dimaadua ne-helekai.”

30:12  Dimaadua ga-helekai gi ana daangada, “Godou gowaa ala ne-moholehole le e-deemee di-hili, godou gowaa mooho le e-deemee-loo di-humalia.

30:13  Deai tangada e-madamada humalia i goodou ai, deai di-mee e-mee di-hagahili godou magibala ai, gei deai di-godou hagadagadagagee e-haga-humalia goodou ai.

30:14  Godou ihoo hagadau aaloho huogodoo gu-de-langahia-e-ginaadou goodou, digaula gu-hagalee haa-manawa i goodou. Au gu-hai-baahi adu gi goodou gadoo be-di hagadaumee, godou hagaduadua koia gu-kono-adu gi goodou, idimaa go godou huaidu la koia gu-logowaahee, mo godou haihai huaidu koia gu-llauehaa huoloo.

30:15  Goodou hudee wwou labelaa i godou magibala, deai dahi mee e-mee di-hagahili goodou ai. Au ne-hagaduadua goodou beenei, idimaa go godou huaidu la koia gu-logowaahee, mo godou haihai huaidu koia gu-llauehaa huoloo.

30:16  Gei dolomeenei, Au gaa-holo digau ala ne-holo goodou, gei godou hagadaumee huogodoo gaa-lahi gi-daha gadoo be digau galabudi. Digau ala ne-hai goodou gi-haingadaa, digaula gaa-noho labelaa i-lodo di haingadaa. Digau huogodoo ala ne-kae godou goloo, gei nadau goloo gaa-kae labelaa.

30:17  Au ga-haga-humalia labelaa goodou, Au ga-haga-hili godou gowaa moholehole, ma e-aha maa godou hagadaumee e-haihai boloo, ‘Zion la-guu-hudu gi-daha, tangada e-haa-manawa i di-maa ai.’ Ma ko-Au go Dimaadua ne-helekai.”

30:18  Dimaadua ga-helekai, “Au ga-laha-mai agu daangada gi-lodo di-nadau henua, ga-manawa dumaalia ang-gi nia madahaanau huogodoo. Jerusalem ga-haga-hoou labelaa, mo-di hale o-di king ga-haga-hoou labelaa.

30:19  Nia daangada huogodoo ala e-noho i-golo ga-daahili i-nia daahili hagaamu. Digaula ga-tenetene i nadau tene. Digaula ga-dogologowaahee mai i-lodo dogu dumaalia. Dogu manawa dumaalia gaa-hai digaula gii-hai digau hagalabagau.

30:20  Gei Au ga-haga-hoou-aga nia mogobuna namua o tenua deenei, ga-hagaduu-aga gaa-hai gi-mau-dangihi, gei Au ga-hagaduadua digau ala e-haga-huaidu digaula.

30:21  Di-nadau dagi e-dahi-aga-hua i-lodo di-nadau henua, gei di-nadau king e-dahi-aga-hua i-lodo nadau daangada. Mee e-hanimoi gi-di-Au maa Au gaa-gahi a-mee. Koai dela e-bida hanimoi-hua i-deia, maa au digi gahia a-mee? Digaula gaa-hai nia daangada ni-aagu, gei Au gaa-hai di God ni digaula. Ma ko-Au go Dimaadua ne-helekai.”

30:22  Di-nadau dagi e-dahi-aga-hua i-lodo di-nadau henua, gei di-nadau king e-dahi-aga-hua i-lodo nadau daangada. Mee e-hanimoi gi-di-Au maa Au gaa-gahi a-mee. Koai dela e-bida hanimoi-hua i-deia, maa au digi gahia a-mee? Digaula gaa-hai nia daangada ni-aagu, gei Au gaa-hai di God ni digaula. Ma ko-Au go Dimaadua ne-helekai.”

30:23  Di hagawelewele a Dimaadua la-go di madangi gaudogi, go di oloolo madangi mahi e-gono mai i-hongo nia libogo o digau huaidu. Di oloolo madangi deenei hagalee-loo e-lawa gaa-dae-loo gi dana hagagila-aga nia mee huogodoo ala e-hiihai ginai belee hai. Ana daangada ga-modongoohia haga-humalia di hai o-nia mee aanei i-di madagoaa dela ma-ga-dau-mai.

30:24  Di hagawelewele a Dimaadua la-go di madangi gaudogi, go di oloolo madangi mahi e-gono mai i-hongo nia libogo o digau huaidu. Di oloolo madangi deenei hagalee-loo e-lawa gaa-dae-loo gi dana hagagila-aga nia mee huogodoo ala e-hiihai ginai belee hai. Ana daangada ga-modongoohia haga-humalia di hai o-nia mee aanei i-di madagoaa dela ma-ga-dau-mai.

Chapter 31

31:1  Dimaadua ga-helekai, “Di madagoaa ga-dau-mai, gei Au gaa-hai di God nia madawaawa huogodoo o Israel, gei digaula huogodoo gaa-hai nia daangada ni-aagu.

31:2  Au gu-haga-modongoohia dogu dumaalia ang-gi digau ala digi mmade i-lodo di anggowaa. I-di madagoaa o digau Israel ala e-halahala di-nadau madagoaa belee haga-molooloo-ai,

31:3  Au gu-haga-gida ang-gi digaula mai di gowaa mogowaa-loo. Digau Israel nei, Au e-aloho huoloo i goodou i-nia madagoaa huogodoo, Au e-daahi gi-muli dogu aloho i-nia madagoaa huogodoo i goodou.

31:4  Gei Au ga-haga-duu-aga labelaa goodou. Goodou ga-gaamai labelaa godou mee haga-dangidangi gagaalege, gei goodou ga-gagaalege mo-di tenetene.

31:5  Goodou gaa-dogi labelaa godou hadagee-waini i-hongo nia gonduu i Samaria. Digau ala ma-gaa-dogi nia hadagee aalaa gei ginaadou ga-miami-mai i-nia laagau aalaa.

31:6  Uaa, di madagoaa ga-dau-mai, gei digau hagaloohi i tomo nia gonduu i Ephraim ga-wwolo-ia boloo, ‘Goodou lloomoi, gidaadou gaa-hula gi Zion gi-baahi o Dimaadua go tadau God!’ ”

31:7  Dimaadua ga-helekai, “Goodou tenetene dadaahili idimaa i Israel, tenua dela koai e-aamua i-nia henua huogodoo. Goodou daahili di-godou daahili hagaamu, gaa-hai boloo, ‘Dimaadua gu-haga-dagaloaha ana daangada, gei ne-hagamouli digau ala ne-dubu i-golo.’

31:8  Gei Au ga-laha-mai digaula i-bahi-i-ngeia, ga-haga-dagabuli-mai digaula i-nia mada o henuailala. Digau ala e-dee-gida mo digau ala e-habehabe, nia ahina hai-dama mo nia ahina ala e-hoohoo ga-haanau, digaula huogodoo e-loomoi dalia digaula. Digaula ga-dagabuli-mai gaa-hai tenua damana.

31:9  Gei agu daangada ga-loomoi mo-di tangitangi, gaa-hai nadau dalodalo i dagu laha-mai digaula. Au ga-dagi-ia digaula gi-nia dama-monowai, i-hongo di ala dela e-malali, tangada e-hinga ai. Idimaa, Au e-hai gadoo be tamana ni Israel, gei Ephraim deelaa dagu dama-madua.”

31:10  Dimaadua ga-helekai, “Goodou ala go digau o-nia henua huogodoo, goodou hagalongo-mai gi-di-Au, gi-hagadele-ina agu helekai gi-nia henua mogowaa-loo. Ko-Au dela ne-hagabagi digau Israel gi nnenua i-daha. Malaa dolomeenei, gei Au ga-haga-dagabuli-mai digaula, ga-hagaloohi digaula gadoo be tangada hagaloohi dela e-hagaloohi ana siibi.

31:11  Ko-Au dela ne-haga-dagaloaha digau Israel, guu-daa digaula gi-daha mo tenua maaloo dangihi.

31:12  Digaula ga-loomoi ga-daahili mo di tenetene i-hongo di Gonduu Zion. Digaula ga-tenetene gi agu wanga-dehuia, agu golee-laagau, agu waini mo agu lolo-olib, nia siibi mono kau. Digaula gaa-hai gadoo be-di hadagee dela gu-haga-magalillili hagahumalia. Digaula ga-hai-mee gi-nia mee huogodoo ala e-hiihai ginai ginaadou.

31:13  I-di madagoaa deelaa, gei nia dama-ahina ga-gaalege mo-di tenetene, gei nia daane-mmaadua mono dama-daane ga-tenetene gi nadau tene. Gei Au ga-haga-manawa lamalia digaula, gaa-huli nadau manawa-gee gi-di manawa lamalia, nadau lodo-huaidu ang-gi di tene.

31:14  Gei Au gaa-hai digau hai-mee-dabu gi-maaluu gi-nia meegai ala koia e-humalia, ga-haga-dohu nia hiihai o agu daangada huogodoo. Ma ko-Au go Dimaadua ne-helekai.”

31:15  Dimaadua ga-helekai, “Di lee e-hanimoi i-lodo o Ramah. Di lee dangidangihia huoloo. Rachel e-dangidangi i ana dama, gei gu-deemee di-manawa lamalia, idimaa ana dama la-gu-de-i-golo.

31:16  Guu-lawa, hudee dangidangi, omaa-ina oo dangi gi-daha. Gei Au gaa-hui goe gi-nia mee huogodoo i au mee ala ne-hai ang-gi au dama. Digaula ga-loomoi gi-daha mo tenua o nadau hagadaumee.

31:17  Do hagadagadagagee i-golo i-lodo di madagoaa ma-ga-dau-mai. Au dama ga-loomoi gi-lodo di-nadau henua donu. Ma ko-Au go Dimaadua ne-helekai.

31:18  “Au e-longono digau Israel ala e-helehelekai lodo-huaidu boloo, ‘Meenei Dimaadua, gimaadou la-guu-hai gadoo be-di manu hagalee gaidala, gei Goe gu-aago-mai gi gimaadou di hai dela e-hagalongo-adu gi-di-Goe. Go Kooe gi-haga-dagabuli-ina-mai gimaadou, gei dolomeenei, gei gimaadou ga-loo-adu gi-di-Goe, go Kooe go Dimaadua, go di-madau God.

31:19  Gimaadou gu-huli-hua gi-daha mo Goe, gei gimaadou e-hagalimalima e-hiihai e-lloo-adu labelaa gi-di-Goe. I-muli-hua do hagaduadua gimaadou, gei gimaadou ga-pala-ia-hua gi-lala i madau lodo-huaidu. Gimaadou guu-tee, gei gu-langaadia, idimaa i madau huaidu ala nogo haihai i madau damagiigi.’

31:20  “Israel, go kooe dela go dagu dama hagalabagau huoloo, di tama dela e-aloho huoloo-iei Au. I-nia madagoaa huogodoo Au ma-ga-mamaanadu do ingoo, gei Au e-hidihidi huoloo i-di-goe. Ogu lodo e-ngalungalua huoloo i-di-goe, gei Au e-manawa dumaalia-adu gi-di-goe.

31:21  Haga-duulia-aga au hagailongo, e-haga-modongoohia-ai di ala. Halahala-ina labelaa di ala dela nogo heehee-iei goe. Goodou go digau Israel, goodou lloomoi, goodou lloomoi labelaa gi godou waahale ala ne-diiagi.

31:22  Goodou go agu gau manawa-logo, dehee di waalooloo o godou de-hagadonu? Au guu-hai dagu mee hoou: di ahina e-abaaba dana daane.”

31:23  Dimaadua di Gowaa Aamua, di God o digau Israel ga-helekai, “I dagu haga-noho haga-hoou digau Israel i-lodo di-nadau henua, gei digaula gaa-hai di hagaamu deenei i-lodo tenua go Judah mo ono waahale, e-hai boloo, ‘Dimaadua gi-manawa lamalia gi-di gonduu-dabu o Jerusalem, di gowaa dabu dela e-noho-iei Mee.’

31:24  “Nia daangada gaa-noho i Judah mo nia waahale huogodoo o Judah. Digau ala e-dogi nadau gowaa, mo digau ala e-hagaloohi nadau manu.

31:25  Gei Au ga-hagamaaloo-aga digau ala gu-duadua, gei gaa-hai digau ala gu-paagege i nadau hiigai la-gi-maaluu.

31:26  Malaa, gei nia daangada ga-helekai boloo, ‘Au ne-kii ga-ala-aga maaloo.’

31:27  “Ko-Au go Dimaadua deenei e-helekai bolo di madagoaa ga-dau-mai, gei Au gaa-hai nia guongo o Israel mo Judah gii-honu dangada mono manu.

31:28  Gadoo be dagu hai dela guu-hai gi digaula i dagu hudi-aga digaula gi-daha mo nadau gowaa, gaa-hono digaula gi-lala, gaa-kili gi-daha, ga-hagahuaidu mo-di daa digaula gi-daha, deenei gadoo dagu hai dela gaa-hai ang-gi digaula, e-dogi digaula, gei e-haga-duu-aga digaula.

31:29  Di madagoaa deelaa gei nia daangada ga-hagalee helekai boloo, ‘Tamana mo tinana guu-gai di-nau golee gii, gei nau dama guu-gii labelaa i-nia maa.’

31:30  “Gei tangada dela ma-gaa-gai dana golee gii, go ono niha la-hua ala gaa-gii i di-maa. Tangada-nei mo tangada-nei e-made-hua i ono huaidu.”

31:31  Dimaadua ga-helekai, “Di madagoaa ga-dau-mai, gei Au gaa-hai dagu hagababa hoou ang-gi digau Israel mo digau Judah.

31:32  E-hagalee hai be-di hagababa namua dela ne-hai ko-Au ang-gi nadau damana-mmaadua, i dagu kumi nia lima digaula ga-dagi-mai i Egypt. Ma e-aha maa Au guu-hai gadoo be-di lodo ni digaula, gei digaula gu-hagalee manawa-dahi ang-gi di hagababa deelaa.

31:33  Di hagababa hoou dela belee hai ang-gi digau Israel le e-hai beenei: Au gaa-dugu agu haganoho gi-lodo digaula, gaa-hihi gi-lodo nia hadu-manawa digaula. Au gaa-hai di God ni digaula, gei digaula gaa-hai nia daangada ni-aagu.

31:34  Deai tangada bolo ia e-aago tangada dela i dono baahi bolo gi-iloo Dimaadua ai, idimaa, huogodoo gu-iloo-ginaadou Au, mai i-nia dama-lligi gaa-dae-loo gi digau mmaadua. Gei Au ga-dumaalia-anga nia huaidu o digaula, ga-haga-de-langahia-eau nadau mee hala. Ma ko-Au go Dimaadua ne-helekai.”

31:35  Dimaadua ne-dugu-mai gi gidaadou di laa belee haga-maalama di laangi, gei di malama mo nia heduu e-haga-maalama di boo. Mee e-haga-ngalua-aga di moana bolo gi-bagibagia, dono ingoo dela go Yihowah di Gowaa Aamua.

31:36  Mee gu-hagababa bolo tenua o Israel le e-noho-hua beelaa e-waalooloo, gaa-dae-loo gi ana mee ala ne-haga-noho gaa-hai-hua beelaa.

31:37  Maa iai tangada e-mee di-hagatau i-lala di langi, ga-modongoohia be nia maa ni-aha ala i-lala di hagamau o henuailala, deelaa di madagoaa o God ga-diiagi digau Israel, idimaa i nadau mee huogodoo ala ne-hai. Dimaadua ne-helekai.

31:38  Dimaadua ga-helekai, “Di madagoaa ga-dau-mai, gei Jerusalem ga-haga-duu-aga hoou, gaa-hai-ai dogu waahale, e-tugi i-di angulaa i Hananel gaa-hana gi bahi-i-dai, gaa-tugi i-di ngudu di Bontai Madaaduge.

31:39  Gei tagageinga dela e-hagageinga-ai di waahale deelaa ga-daa gi-daha mo-di gowaa deelaa, gaa-kae gi-bahi-i-dai gi-di Gonduu go Gareb, gaa-huli gi Goah.

31:40  Di gowaa baba hagatau deelaa le e-kili ginai nia huaidina mo nia lehu-ahi, mo nia gowaa huogodoo ala i-bahi-i-nua tama-monowai Kidron gaa-tugi di ngudu di Bontai Hoodo i-bahi-i-dua, la-ga-haga-dabu-mai gi-di-Au. Gei di waahale deelaa ga-hagalee-loo e-mooho be e-daaligi gi-daha labelaa.”

Chapter 32

32:1  Dimaadua gu-helekai-mai i-di madangaholu ngadau o Zedekiah nogo king o Judah, i-di madangaholu maa-walu ngadau o-di madagoaa o Nebuchadnezzar nogo king o Babylonia.

32:2  I-di madagoaa deelaa, gei di llongo-dauwa a di king o Babylonia dela e-heebagi gi Jerusalem, gei au gu-galabudi i-lodo di abaaba o-di hale di king.

32:3  Di King Zedekiah ne-lawalawa au i-di gowaa deelaa, ne-hagi-aga au bolo au ne-hai dagu helekai bolo Dimaadua gu-helekai boloo, “Au ga-dumaalia ang-gi di king o Babylonia gi-haga-magedaa-ina di waahale deenei,

32:4  gei di King Zedekiah ga-deemee di-lele gi-daha. Mee gaa-lahi gi-di king o Babylonia, ga-heetugi i nau hadumada, ga-helekai gi mee i nau huaidina dangada.

32:5  Zedekiah gaa-lahi gi Babylonia, gaa-noho i-golo gaa-dae-loo gi dagu hagamaanadu a-mee be dehee di hai gaa-hai gi mee. Ma e-aha maa mee ga-heebagi gi digau o Babylonia, mee hagalee e-maaloo. Ma ko-Au go Dimaadua ne-helekai.”

32:6  Dimaadua ga-helekai-mai

32:7  bolo Hanamel, go tama-daane a Shallum, tuaahina-daane ni dogu damana, ga-hanimoi gi-di-au bolo au gi-huia di gowaa i-lodo Anathoth i-lodo tenua Benjamin, idimaa au tangada di madahaanau hoohoo dela e-mogobuna di hui di-maa mai gi-di-au.

32:8  Deenei-laa, guu-hai be nnelekai Dimaadua, Hanamel gu-hanimoi gi-di-au nogo i-lodo di abaaba o-di hale di king, gaa-hai mai gi-di-au bolo gi-huia di gowaa deelaa, gei au gu-iloo-laa bolo ma go Dimaadua dela ne-helekai-mai gi-di-au.

32:9  Gei au gaa-hui di gowaa deelaa mai Hanamel, ga-hagabau nia bahihadu ala e-wanga gi mee. Malaa di gowaa deelaa e-hui nia silber e-madangaholu maa-hidu.

32:10  Gei au ga-sain di-maa ga-stamp di beebaa deelaa, gaa-wanga gi digau ala e-hagadootonu di-maa, ga-pauna nia silber i-hongo di-mee pauna bahihadu.

32:11  Gei au gaa-kae nia beebaa e-lua aalaa, di beebaa dela guu-lawa di stamp dela guu-lawa-ai di haga-mogobuna di hai-mee gi-di gowaa deelaa mo ono haganoho, mo-di beebaa dela digi tai-ina,

32:12  gaa-wanga nia beebaa aalaa gi Baruch, tama-daane ni Neriah, dono damana-madua go Mahseiah. Au ne-wanga nia beebaa aalaa i-mua Hanamel mo digau hagadootonu ala ne-sain di beebaa deelaa, mo i-mua nia daane ala nogo noho i-di gowaa deelaa i-lodo di abaaba o-di hale di king.

32:13  Gei au ga-helekai gi Baruch i-mua digaula huogodoo,

32:14  “Dimaadua di Gowaa Aamua, go di God o Israel, guu-dugu goe bolo goe gi-kae-ina nia beebaa aanaa, di mee dela gu-stamp mo-di mee dela digi stamp, gi-dugua nia maa gi-lodo di loaabi hadu, e-benebene gi-nia ngadau e-logo ala ga-dau-mai.

32:15  Dimaadua di Gowaa Aamua, go di God o Israel, gu-helekai bolo nia hale, nia gowaa maalama, nia hadagee-waini ga-huihui labelaa i tenua deenei.”

32:16  I-muli-hua dagu wanga nia beebaa aalaa la-gi Baruch, gei au ga-dalodalo, ga hai,

32:17  “Meenei Tagi go Yihowah, Kooe dela ne-hai di langi mo henuailala gi oo mahi mo o mogobuna, deai dahi mee haingadaa i doo baahi ai.”

32:18  Goe gu-hagamodongoohia ang-gi digau dogologowaahee do aloho deeodi, gei Goe gu-hagaduadua labelaa nia daangada i-nia huaidu o nadau damana-mmaadua, Kooe go di God mogobuna, Kooe go di God e-donu gei e-mogobuna, do ingoo go Yihowah go di Gowaa Aamua.

32:19  Kooe dela e-haganoho au mee gi-di kabemee, gei e-hai au mee hagagoboina, Kooe dela e-gidee-Goe nia mee huogodoo ala e-hai go nia daangada, gei gaa-hui digaula gii-tau gi nadau mee ala ne-hai.

32:20  I-mua-loo, Kooe ne-hai au hagadilinga mogobuna haga-goboina i Egypt, gei Goe e-haihai-hua au mogobuna gaa-dae-mai-loo gi dangi-nei. Kooe ne-hai au mogobuna aanei i Israel mo i-lodo nia henua ala i-golo, malaa dolomeenei gei nia daangada huogodoo gu-iloo-ginaadou Goe.

32:21  Mai i-nia hagadilinga mogobuna haga-goboina ala ne-hai madau hagadaumee gi-mmaadagu huoloo, Goe dela ne-hai-hegau gi o mogobuna mo oo mahi dela ne-daamai gi-daha au daangada Israel gi-daha mo Egypt.

32:22  Gei Goe gaa-wanga di-nadau henua humalia deenei gadoo be dau hagababa dela ne-hai ang-gi nadau damana-mmaadua i-mua.

32:23  I di-nadau lloomoi gi-lodo tenua deenei ga-hai-henua ginai, digaula digi haga-gila-aga au haganoho be e-mouli gi au haganoho. Digaula digi haga-gila-ina-aga au mee huogodoo ala ne-haganoho gi digaula gi-heia, deelaa guu-too-ai digaula gi-lodo di haadanga-balua deenei.

32:24  “Digau o Babylonia gu-duuli di waahale deenei, guu-hau nia hagabae duuli e-haganiga di waahale belee kumi di-maa. Tauwa, tau-magamaga damana mo tau-magi huaidu gaa-hidi-ai di waahale gaa-kumi. Goe gi-iloo bolo au mee nogo helekai-iei Goe la-gu-kila-aga.

32:25  Meenei Tagi go Yihowah, go Kooe dela ne-dugu-mai gi-di-au gii-hui di gowaa deelaa i-mua digau hagadootonu aanei, ma e-aha maa di waahale la-gu-hoohoo gaa-kumi go digau o Babylonia.”

32:26  Dimaadua ga-helekai-mai,

32:27  “Ko-Au go Yihowah, go di God o digau huogodoo. Deai dahi mee e-haingadaa i dogu baahi ai.

32:28  Au ga-hagi-anga di waahale deenei gi-di king o Babylonia, go Nebuchadnezzar mo dana llongo-dauwa. Digaula ga-haga-magedaa di waahale deenei,

32:29  gaa-dudu di-maa gii-wele. Digaula gaa-dudu di-maa mo nia hale ala ne-hidi-ai dogu hagawelewele, idimaa digaula la-nogo dudu nadau ‘incense’ ang-gi Baal, ga-tigidaumaha nadau waini ang-gi nia balu-ieidu i-hongo nia-duatala o nadau hale.

32:30  Mai taamada o-di kai o digau Israel mo digau Judah, nia daangada e-haga-hagahuaidu Au, gaa-hai Au gi-hagawelewele gi nadau hangaahai huaidu.

32:31  Digau o-di waahale deenei gu-haga-manawa-gee Au mai-hua di laangi dela ne-hagaduu-ai di waahale deenei. Malaa, Au gu-hagamaanadu i ogu lodo bolo Au gaa-oho digaula,

32:32  idimaa nia hangaahai huaidu o digau Judah mo Jerusalem ala ne-hai madalia hogi di-nadau king, nadau dagi, nadau gau hai-mee-dabu, mo nadau soukohp.

32:33  Digaula gu-diiagi Au. Ma e-aha maa Au hagalee dugu dagu agoago digaula, gei digaula hagalee e-hiihai e-hagalongo ge kae nia agoago.

32:34  Digaula guu-dugu labelaa nadau ada-balu ieidu gulugulua gi-lodo di Hale Daumaha dela ne-hagaduu belee hagalaamua-ai goodou dogu ingoo, digaula gu-hagamilimilia di-maa.

32:35  Digaula gu-hagaduu-aga nadau gowaa dudu tigidaumaha ang-gi Baal i-di gowaa mehanga gonduu o Hinnom, belee tigidaumaha-ai nadau dama-daane mo nadau dama-ahina ang-gi di balu-god go Molech. Au digi hai gi digaula gi-heia di-mee deelaa, gei Au digi hagamaanadu-loo bolo digaula gi-heia di hai deenei dela gaa-hidi-ai digau Judah gu-i-lodo di huaidu.”

32:36  Dimaadua, go di God o Israel, gu-helekai-mai, “Jeremiah, nia daangada e-haihai bolo tauwa, tau-magamaga mo tau-magi dela e-hidi-ai di waahale gaa-kumi go di king o Babylonia. Malaa hagalongo gi agu helekai i-golo ala gaa-hai.

32:37  Au ga-haga-dagabuli-mai agu daangada mai i-nia henua huogodoo ala ne-hagabagi ginai digaula i-lodo dogu hagawelewele huoloo, gei Au ga-laha-mai digaula gi-di gowaa deenei, gaa-hai digaula gi noho i-di aumaalia.

32:38  Di madagoaa deelaa, gei digaula gaa-hai agu daangada, gei Au gaa-hai di God ni digaula.

32:39  Au gaa-dugu ang-gi digaula di hagamaanadu-hua e-dahi i-lodo digaula, bolo digaula gi-hagalaamua-ina Au gi-hana-hua beelaa, gi-hai-ai di-nadau hagahumalia mo-di hagahumalia o di-nadau hagadili.

32:40  Au gaa-hai dagu hagababa deeodi gi digaula. Au hagalee modu dagu hai nia mee humalia gi digaula, mo dagu hai digaula gi-mmaadagu i-di-Au i-lodo nadau manawa hagatau, bolo gi-dee-huli digaula gi-daha mo Au.

32:41  Dogu manawa ga-tenetene gi-di haihai nia mee humalia ang-gi digaula, gei Au ga-haganoho digaula gi noho i-lodo tenua deenei gaa-hana-hua beelaa.

32:42  “Be dagu hai dela ne-dugu-anga di haingadaa ang-gi nia daangada huogodoo, e-hai gadoo be dagu hai dela gaa-wanga gi digaula nia humalia huogodoo ala guu-lawa-ai dagu hagababa gi digaula.

32:43  Nia daangada e-helekai bolo tenua deenei gaa-hai di anggowaa, ge deai tangada be-di manu e-noho i kinei ai, ge e-helekai labelaa bolo tenua deenei le e-wanga gi digau o Babylonia, e-hai di-nadau henua. Gei deeai, nia gowaa maalama le e-huihui labelaa i tenua deenei.

32:44  Nia daangada gaa-hui nia maa, gei nia beebaa hai gowaa e-hai gi sain, stamp mo digau hagadootonu gi i-golo. Di-mee deenei e-hai-hegau i tenua Benjamin, i-lodo nia guongo ala e-haganiga mai-daha Jerusalem, i-lodo nia dama waahale ala i Judah, i-lodo nia dama waahale ala i-lodo tenua gonduu, i tono nia gonduu mo i-baahi ngaaga o Judah. Au ga-laha-mai nia daangada gi di-nadau henua donu. Ma ko-Au go Dimaadua ne-helekai.”

Chapter 33

33:1  I-lodo-hua di madagoaa nogo noho galabudi-iei au i-lodo di waahale deelaa, gei nnelekai Dimaadua gaa-hai mai labelaa gi-di-au.

33:2  Dimaadua dela ne-hai henuailala, gaa-hai di-maa gi-humalia ga-haganoho dono lohongo, ga-helekai-mai gi-di-au. Di ingoo o-Maa go Yihowah. Mee ga-helekai,

33:3  “Gahia-mai Au, gei Au ga-goou-adu gi-di-goe. Au ga-helekai-adu gi-di-goe i-nia mee hagagoboina mono mogobuna ala digi iloo-e-goe.

33:4  Au go Yihowah, go di God o Israel, ga-helekai bolo nia hale huogodoo ala i Jerusalem mo-di hale o-di king o Judah la-ga-mooho mai i tuuli di waahale mo teebagi dela gaa-hai.

33:5  Hunu gau i digau Judah ga-heebagi gi digau o Babylonia, gaa-haa nia hale la-gii-honu nnuaidina o digau ala ga-daaligi ko-Au i-lodo dogu hagawelewele huoloo. Au guu-huli gi-daha mo-di waahale deenei, idimaa i-nia hangaahai huaidu o digau di waahale deenei.

33:6  “Malaa, gei Au ga-hagahumalia di waahale deenei mo ana daangada huogodoo gaa-dugu ang-gi digaula gi-maaloo nadau huaidina. Au gaa-dugu ang-gi digaula di noho moholo gaa-hai digaula gii-noho i-di aumaalia.

33:7  Au ga-haga-maluagina Judah mo Israel, ga-haga-hoou-aga labelaa gii-hai be-di madagoaa i-mua.

33:8  Au ga-haga-madammaa nia huaidu o digaula ala ne-hai-mai gi-di-Au, gei Au ga-dumaalia gi digaula nadau huaidu mo di-nadau de-hagalongo.

33:9  Jerusalem la-gaa-hai di gowaa haga-tenetene, hagalabagau, mo-di haga-tenetene mai gi-di-Au, gei nia henua huogodoo o henuailala ga-mmaadagu huoloo mo-di polepole i-di nadau hagalongo di hai o-nia hagadilinga mee humalia ala gaa-hai ko-Au gi digau Jerusalem mo agu haga-maluagina ala gaa-hai ang-gi di waahale deelaa.”

33:10  Dimaadua ga-helekai, “Nia daangada e-helehelekai bolo di gowaa deenei le e-hai gadoo be-di anggowaa, tangada be-di manu e-noho i no-lodo ai. Uaa, digaula e-donu, nia dama waahale i Judah mo i-hongo nia ala i Jerusalem la-gu-dei tangada ai, be-di manu e-noho i-golo ai. Gei goodou ga-hagalongo labelaa i-nia gowaa aanei

33:11  nnagadilinga lee tenetene gei e-manawa lamalia mo nia daahili tenetene gi taga-hailodo. Goodou ga-hagalongo gi-nia daangada ala e-daahili i-di nadau gaamai nadau wanga-dehuia ang-gi dogu Hale Daumaha. Digaula e-daahili beenei, ‘Goodou hagaamu-ina tumaalia o Dimaadua di Gowaa Aamua, idimaa i Mee e-humalia, gei dono aloho e-dee-modu.’ “Au ga-haga-maluagina di waahale deenei gadoo be-di madagoaa i-mua. Au go Dimaadua ne-helekai.”

33:12  Dimaadua di Gowaa Aamua, ga-helekai, “I-lodo tenua deenei dela e-hai be-di anggowaa gu-deai tangada be-di manu e-noho ai, gei ga-iai di gowaa haangai siibi e-dau-mai i-golo, di gowaa o digau hagaloohi siibi e-mee di-dagi nadau siibi gi-i-golo.

33:13  I-lodo nia waahale lligi ala i-lodo nia gowaa gonduu, i tono ni gowaa nnoonua mo i-baahi ngaaga o Judah, i-lodo di gowaa o Benjamin, i-lodo nia waahale ala mai i-daha Jerusalem, mo i-lodo nia waahale lligi o Judah, digau hagaloohi siibi gaa-mee labelaa di-dau di logowaahee o nadau siibi. Au go Dimaadua ne-helekai.”

33:14  Dimaadua ga-helekai, “Di madagoaa ga-dau-mai, gei Au ga-haga-gila-aga dagu hagababa dela ne-hai ang-gi digau Israel mo Judah.

33:15  Di madagoaa deelaa, gei Au gaa-hili-aga dagu king mai i-di madawaawa David. Di king deenei gaa-hai nia mee e-donu gei e-tongaadahi i-nia gowaa huogodoo i-lodo tenua deelaa.

33:16  Digau Jerusalem mo Judah ga-hagamouli gaa-noho i-di aumaalia. Di waahale deenei ga-haga-ingoo boloo, ‘Dimaadua go di-madau Hagamouli’.

33:17  Ko-Au go Dimaadua e-hai dagu hagababa bolo tangada i-di madawaawa David ga-hagadau gi-di lohongo king o Israel gaa-hana-hua beelaa,

33:18  mo nia daangada i-di madawaawa Levi gaa-hai digau hai-mee-dabu gaa-hana-hua beelaa, e-hege-mai gi-di-Au, ge e-hai nadau tigidaumaha dudu, tigidaumaha o-nia huwa-laagau, mo nia tigidaumaha ala i-golo.”

33:19  Dimaadua ga-helekai-mai,

33:20  “Au ne-hai dagu hagababa ang-gi di aa mo-di boo gei meemaa guu-hai hegau donu gi-di-nau madagoaa. Di hagababa deenei e-deemee-loo di-mooho.

33:21  Dela gadoo dagu hagababa dela ne-hai ang-gi David, dagu hege, bolo tangada i dono madawaawa gaa-king gaa-hana-hua beelaa, gei e-hai labelaa be dagu hagababa dela ne-hai ang-gi digau hai-mee-dabu mai i-di madawaawa Levi, bolo digaula gi-hege-mai gi-di-Au gaa-hana-hua beelaa. Nia hagababa aanei e-deemee di-mooho.

33:22  Au ga-hagadogologo di madawaawa dagu dangada hai-hegau David mo digau hai-mee-dabu mai i-di madawaawa Levi, bolo gi-dogologowaahee gi-deemee di-dau, gadoo be nia heduu o-di langi be go nia gelegele o tongotai ala e-deemee di-dau.”

33:23  Dimaadua ga-helekai-mai,

33:24  “Goe gu-longono nia daangada ala e-helekai bolo Au gu-diiagi Israel mo Judah, nia madahaanau e-lua ala ne-hili-aga ko-Au? Malaa, digaula e-haga-balumee agu daangada, gei gu-hagalee dugu digaula bolo tenua e-donu.

33:25  Gei au, go Dimaadua, guu-hai dagu hagababa gi-di aa mo-di boo, gei Au guu-hai agu haganoho ala e-haga-ngalungalua-ai henuailala mo-di langi.

33:26  Deenei-laa, i dagu hai nia mee aanei i-di tonu, dela gadoo dagu hai dela e-dadaahi dagu hagababa ang-gi Jacob mo ang-gi dagu hege go David. Au gaa-hili-aga dagu dangada e-dahi mai i-di madawaawa David belee dagi nia hagadili o Abraham, Isaac mo Jacob. Au ga-dumaalia gi agu daangada ga-haga-maluagina digaula labelaa.”

Chapter 34

34:1  Dimaadua ga-helekai-mai i-di madagoaa o Nebuchadnezzar di king o Babylonia mo dana llongo-dauwa madalia nia buini-dauwa o-nia henua huogodoo ala e-noho i-lala ono mogobuna le e-heebagi hai-baahi gi Jerusalem mo ono waahale lligi ala i dono baahi.

34:2  Dimaadua, go di God o Israel, ga-helekai-mai bolo au gii-hana gi-helekai gi Zedekiah, di king o Judah, “Au, go Dimaadua, gaa-wanga di waahale deenei gi-di king o Babylonia, gei mee gaa-dudu di-maa.

34:3  Goe ga-deemee di-lele gi-daha, goe gaa-kumu gaa-lahi gi mee. Goolua ga-heetugi i gulu hadumada, ga-helekai gi mee i gulu huaidina dangada, nomuli, gei goe gaa-lahi gi Babylonia.

34:4  Zedekiah, hagalongo gi agu mee ala ga-helekai i-di goe. Goe hagalee e-made i tauwa.

34:5  Goe gaa-made i-di aumaalia, gei di madagoaa ma-ga-danu-iei goe, nia daangada gaa-dudu nadau ‘incense’ adu gi-di-goe, gadoo be di-nadau hai dela ne-dudu nadau tigidaumaha kala i-di danu o damana-mmaadua ala nogo king i oo mua. Digaula ga-tangitangi gi-di-goe mo-di hai boloo, ‘Di-madau king guu-made!’ Au go Dimaadua ne-helekai.”

34:6  Gei au ga-helekai gi-di King Zedekiah i-di hagailoo deenei i-lodo Jerusalem

34:7  i-di madagoaa digau dauwa o Babylonia ala e-heebagi gi-di waahale deelaa. Digau dauwa e-heebagi labelaa gi Lachish mo Azekah, nia waahale e-lua ala gu-abaaba gi-mau-dangihi ala ne-dubu i-golo i Judah.

34:8  Di King Zedekiah mo digau Jerusalem gaa-hai di-nadau hagababa e-hagamehede

34:9  nadau hege ala go digau Hebrew, nia daane mono ahina, bolo tangada gi-de haga-hege tangada i ana daangada Israel.

34:10  Nia daangada huogodoo mo nadau dagi guu-baba ginai bolo e-hagamehede nadau gau hege ga-hagalee e-haga-hege labelaa digaula, gei digaula gu-hagamehede digaula.

34:11  Nomuli-hua, digaula gaa-huli nadau hagamaanadu, ga-laha-mai labelaa digaula gaa-hono digaula gii-hai nia hege labelaa.

34:12  Deenei-laa Dimaadua,

34:13  go di God o Israel, ga-helekai-mai bolo au gi-helekai gi-nia daangada aalaa, “Au gu-hagababa ang-gi godou damana-mmaadua i dagu daa digaula gi-daha mo Egypt, ga-haga-mehede digaula gi-daha mo nadau mouli hege. Au gu-helekai gi digaula

34:14  bolo i-di waalooloo o-nia ngadau dagi-hidu huogodoo, gei digaula gi-haga-mehede-ina nadau hege ala go digau Hebrew ala nogo haga-hai-hegau go digaula ang-gi ginaadou i-nia ngadau e-ono. Gei godou damana-mmaadua nogo hagalee hagadahidamee ge hagalee e-hagalongo gi agu helekai.

34:15  Nia laangi dulii guu-too gi-daha, goodou guu-huli godou hagamaanadu, guu-hai di-mee dela e-hagatenetene Au. Goodou huogodoo guu-baba bolo e-hagamehede godou hege ala go digau Israel, gei goodou ne-hagababa beenei i-mua ogu golomada i-lodo di Hale Daumaha, i-di gowaa dela e-hai-daumaha goodou mai gi-di-Au.

34:16  Gei goodou guu-huli godou hagamaanadu labelaa, gu-haga-huaidu dogu hagalabagau. Goodou huogodoo gu-laha-mai labelaa nia hege ala ne-hagamehede go goodou mai i nadau hiihai bolo e-hagamehede, gei goodou gu-hono-adu digaula gi-lodo di mouli hege.

34:17  Deenei-laa, Au go Dimaadua, ga-helekai bolo goodou huogodoo gu-de-hagalongo-mai gi-di-Au. Goodou gu-hagalee e-dumaalia ang-gi godou hege ala go digau Israel gi-mehede. Deenei-laa, e-humalia, gei Au gaa-hai goodou gii-noho maahede, goodou gii-noho maahede gii-mmade i tauwa, tau-magi mo tau-magamaga. Au gaa-hai digau o-nia henua huogodoo o henuailala gi-mmaadagu i dagu hai dela ma-gaa-hai-adu gi goodou.

34:18  Digau aamua o Judah mo Jerusalem, mo digau aamua o lodo di hale di king, mo digau hai-mee-dabu, mo nia dagi huogodoo, la-guu-hai di-nadau hagababa mai gi-di-Au i-di nadau taele i-mehanga nia baahi kau-daane e-lua ala ne-haahi go digaula, gaa-hai nia baahi e-lua. Gei digaula gu-oho di hagababa deelaa, gu-hagalee e-daudali nia haganoho o-di maa. Malaa, gei Au gaa-hai ang-gi nia daangada gadoo be di-nadau hai ne-hai ang-gi di kau-daane deelaa.

34:19  Digau aamua o Judah mo Jerusalem, mo digau aamua o lodo di hale di king, mo digau hai-mee-dabu, mo nia dagi huogodoo, la-guu-hai di-nadau hagababa mai gi-di-Au i-di nadau taele i-mehanga nia baahi kau-daane e-lua ala ne-haahi go digaula, gaa-hai nia baahi e-lua. Gei digaula gu-oho di hagababa deelaa, gu-hagalee e-daudali nia haganoho o-di maa. Malaa, gei Au gaa-hai ang-gi nia daangada gadoo be di-nadau hai ne-hai ang-gi di kau-daane deelaa.

34:20  Au ga-hagi-anga digaula gi nadau hagadaumee ala e-hiihai e-daaligi digaula, gei nia manu mamaangi mono manu lodo-henua gaa-gai nnuaidina digaula.

34:21  Au gaa-wanga labelaa Zedekiah, di king o Judah, mo ana gau aamua gi digau ala e-hiihai e-daaligi digaula. Au gaa-wanga digaula gi digau-dauwa o Babylonia, ala guu-dugu nadau hai-dauwa adu gi goodou.

34:22  Gei Au ga-haganoho dagu hai, digaula ga-loomoi gi-di waahale deenei, ga-heebagi-adu, ga-hagamagedaa, gaa-dudu di-maa, gei Au gaa-hai nia waahale o Judah gii-hai be-di anga-henua, tangada e-noho i-golo ai. Au go Dimaadua ne-helekai.”

Chapter 35

35:1  Di madagoaa Jehoiakim tama daane Josiah nogo king i Judah, Dimaadua ga-helekai-mai,

35:2  “Hana gi digau i-di madawaawa Rechab gi-helekai gi digaula. Nomuli gei goe ga-laha-mai digaula gi-lodo dahi gowaa o-di Hale Daumaha, gaa-wanga gi digaula nia waini gi-inumia.”

35:3  Gei au ga-laha-mai digau huogodoo i-di madawaawa Rechab ala go Jaazaniah (tama ni tuai daane dela e-hagaingoo bolo Jeremiah, tama-daane ni Habazziniah) mo ono duaahina-daane mo ana dama-daane huogodoo,

35:4  gaa-lahi digaula gi-lodo di Hale Daumaha, gaa-lahi gi-lodo di ruum kuulu o soukohp Hanan, tama-daane Igdaliah. Di ruum deenei la i-bahi-i-nua di ruum Maaseiah, tama daane ni Shallum, tangada aamua o-di Hale Daumaha, gei e-hoohoo labelaa gi-baahi nia ruum o digau aamua ala i-golo.

35:5  Gei au ga-hagatogomaalia agu ibu mono boolo ala gu-hagahau ginai nia waini gaa-dugu i-mua nia dama Rechab mo-di helekai gi digaula boloo, “Goodou inumia nia mee dulii i-nia waini aanei.”

35:6  Gei digaula ga-helekai-mai, “Gimaadou digau hagalee e-inu nia waini. Di-madau damana-madua Jonadab, tama-daane Rechab, gu-helekai-mai bolo gimaadou mo madau madawaawa gi-hudee inu nia waini.

35:7  Gu-helekai-mai labelaa bolo gimaadou gi-hudee hagaduu-aga nia hale be e-dogi nia gowaa dogi-mee i tenua deenei, gi-hudee hai hadagee-waini be e-hui nia hadagee aalaa. Mee gu-haganoho mai gi gimaadou bolo gimaadou gi noho-hua i-lodo nia hale-laa i-nia madagoaa huogodoo, gi-noho-hua i tenua deenei i-di gowaa e-mouli-ai gimaadou gadoo be digau mai daha.

35:8  Malaa, gimaadou e-daudali nia haganoho huogodoo a Jonadab ala ne-helekai-mai gi gimaadou. Gei gimaadou hagalee e-inu nia waini, mo madau lodo mo madau dama mo madau dama-ahina.

35:9  Gimaadou digi hau madau hale, gimaadou e-noho-hua i-lodo nia hale-laa, gei madau hadagee-waini, nia gowaa maalama, be nia huwa henua ai. Gimaadou e-daudali nia mee huogodoo o di-madau damana-madua Jonadab ala ne-dugu-mai gi gimaadou.

35:10  Gimaadou digi hau madau hale, gimaadou e-noho-hua i-lodo nia hale-laa, gei madau hadagee-waini, nia gowaa maalama, be nia huwa henua ai. Gimaadou e-daudali nia mee huogodoo o di-madau damana-madua Jonadab ala ne-dugu-mai gi gimaadou.

35:11  Malaa, i-di madagoaa di King Nebuchadnezzar ne-hai dana dauwa gi tenua deenei, gei gimaadou ga-lloomoi gi Jerusalem belee llele gi-daha mo nia buini-dauwa o Babylonia mo Syria. Deenei-laa e-noho gimaadou i Jerusalem.”

35:12  Dimaadua di Gowaa Aamua, go di God o Israel, ga-helekai-mai gi-di-au bolo au gii-hana gi helekai gi digau Judah mo Jerusalem, “Ko-Au go Dimaadua e-heeu-adu gi goodou be goodou e-aha ala hagalee e-hagalongo-mai gi-di-Au, gei e-hagalee e-hagagila-aga agu haganoho.

35:13  Dimaadua di Gowaa Aamua, go di God o Israel, ga-helekai-mai gi-di-au bolo au gii-hana gi helekai gi digau Judah mo Jerusalem, “Ko-Au go Dimaadua e-heeu-adu gi goodou be goodou e-aha ala hagalee e-hagalongo-mai gi-di-Au, gei e-hagalee e-hagagila-aga agu haganoho.

35:14  Di madawaawa Jonadab e-hagagila-aga ana haganoho bolo digaula gi-hudee inumia nia waini, gaa-dae-mai-loo gi dangi-nei, tangada e-dahi i digaula ne-inu di waini ai. Gei Au hagalee-loo e-modu dagu agoago-adu gi goodou, gei goodou hagalee-loo e-hagalongo-mai gi-di-Au.

35:15  Au hagalee e-lawa dagu haga-hagau-adu agu gau hai-hegau go nia soukohp e-agoago-adu gi goodou bolo goodou gi-dugua di-godou haihai di huaidu, gi-heia nia mee ala e-donu, gei e-hagihagi-ngudu-adu gi goodou bolo goodou gi-hudee daumaha be e-hege gi nia balu-ieidu. Goodou ga-mouli beelaa, gei goodou gaa-mee di noho-hua i-golo i-lodo tenua dela ne-gowadu ko-Au gi goodou mo godou damana-mmaadua. Gei goodou e-buhi di hagagila-aga be e-hagalongo-mai gi-di-Au.

35:16  Di madawaawa Jonadab gu-hagagila-aga nia haganoho huogodoo o di-nadau damana-madua ala ne-wanga gi digaula, gei goodou hagalee e-hagalongo-mai gi-di-Au.

35:17  Deenei-laa, Au go Dimaadua di Gowaa Aamua, go di God o Israel, gaa-dugu-anga gi-hongo digau Judah mo Jerusalem nia hagaduadua huogodoo ala guu-lawa dagu hagababa. Au e-hai di-mee deenei, idimaa i goodou ala hagalee e-hagalongo gi agu helekai, gei goodou hogi hagalee e-goou-mai gi-di-Au i dagu gahigahi-adu goodou.”

35:18  Gei au ga-helekai gi digau i-di madawaawa Rechab i-nia helekai o Dimaadua di Gowaa Aamua, go di God o Israel, ala ne-helekai-ai, “Goodou gu-hagagila-aga nia haganoho huogodoo o di-godou damana-madua go Jonadab ala ne-hai-adu gi goodou. Goodou gu-daudali ana helekai huogodoo, gei goodou gu-hagagila-aga nia mee huogodoo ala ne-haganoho-adu go mee.

35:19  Deenei-laa, Au go Dimaadua di Gowaa Aamua, go di God o Israel, e-helekai bolo Jonadab, tama-daane Rechab, gaa-hai tama-daane i-lodo dono madawaawa i-nia madagoaa huogodoo e-hege-mai gi-di-Au.”

Chapter 36

36:1  I-di haa ngadau o Jehoiakim go tama a Josiah nogo king i tenua go Judah, gei Dimaadua ga-helekai-mai,

36:2  “Gaamai dau beebaa-wini, hihia gi-no-lodo agu mee huogodoo ala ne-hagi-adu gi-di-goe i-di hai o Israel mo Judah mo nia henua huogodoo ala i-golo. Hihia nia mee huogodoo ala ne-hagi-adu gi-di-goe, mai i taamada o agu helekai, mai i-di madagoaa o Josiah nogo king, gaa-dae-mai-loo gi dangi-nei.

36:3  Holongo nia daangada o Judah ga-longono-ginaadou nia hagaduadua ala gu-hagatogomaalia belee wanga gi digaula, holongo-laa gei digaula gaa-huli gi-daha mo nadau haihai huaidu, gei Au la-ga-dumaalia gi digaula nadau ihala mo nadau huaidu.”

36:4  Malaa, au ga-gahi-mai a Baruch di tama Neriah, ga-hagi-anga gi mee nia mee huogodoo a Dimaadua ala ne-helekai-mai gi-di-au. Baruch gaa-hihi gi-lala nia mee huogodoo aalaa gi-lodo di beebaa-wini.

36:5  Gei au ga-helekai gi Baruch, “Au gu-hagalee dumaalia ginai gi-ulu gi-lodo di Hale Daumaha.

36:6  Au e-hiihai bolo goe gii-hana gi-di gowaa deelaa i-di laangi dela ma-gaa-noho hagaonge-ai nia daangada gei gi-daulia di beebaa deenaa gi-nia daangada, gi-hagalongo digaula gi-nia mee a Dimaadua ala ne-helekai-mai gi-di-au, ala guu-hagi-adu ko-au gi-di-goe. Goe gaa-dau ang-gi digau huogodoo, mo digau Judah ala ne-loomoi i nadau waahale, gei goe heia di mee deenei i-di gowaa dela e-mee di-hagalongo ginai digau huogodoo gi-di-goe.

36:7  Holongo-laa gei digaula ga-dalodalo ang-gi Dimaadua gaa-huli gi-daha mo nadau huaidu, idimaa, Dimaadua dela guu-hai digaula gi-mmaadagu i dono hagawelewele.”

36:8  Malaa, Baruch gaa-dau nia helekai a Dimaadua i-lodo di Hale Daumaha be dagu hai ne-hagi-anga gi mee.

36:9  I-di hiwa malama o-di lima ngadau o Jehoiakim nogo king i Judah, gei nia daangada guu-noho hagaonge bolo gi-dumaalia a Dimaadua ang-gi ginaadou. Digau Jerusalem huogodoo mo digau ala ne-loomoi i Judah la-guu-dau i-di hagaonge deenei.

36:10  Di madagoaa-hua deelaa, gei nia daangada e-hagalongolongo gi Baruch dela e-dau nia helekai huogodoo ala ne-hagi-anga ko-au gi mee. Mee ne-dau nia mee aanei i-lodo di Hale Daumaha, i-di ruum o Gemariah go tama a Shaphan, tangada hihi di king. Dono ruum la-i-lodo di abaaba i-nua, i-baahi di Bontai Hoou o-di Hale Daumaha.

36:11  Micaiah di tama a Gemariah dono damana-madua go Shaphan ga-hagalongo gi nnelekai Dimaadua ala e-dau-mai go Baruch i-lodo di beebaa-wini.

36:12  Gei mee gaa-hana gi-di hale di king gi-lodo di ruum tangada hihi, i-di gowaa dela e-dagadagabuli digau aamua huogodoo. Aanei nia daangada aamua nogo i-di gowaa deelaa: go Elishama go tangada hihi, Delaiah di tama a Shemaiah, Elnathan di tama a Achbor, Gemariah di tama a Shaphan, Zedekiah di tama a Hananiah, mo digau huogodoo aamua ala i-golo.

36:13  Micaiah ga-helekai gi digaula i-nia mee huogodoo ala ne-hagalongo ginai-ia mai Baruch ala nogo dau go mee ang-gi nia daangada.

36:14  Gei digau aamua aalaa ga-hagau a Jehudi gi Baruch bolo mee gi-daulia ang-gi ginaadou ana mee ala nogo dau ang-gi nia daangada, gei Baruch ga-gaamai di beebaa-wini la gi digaula. (Jehudi la di tama ni Nethaniah, Nethaniah di tama ni Shelemiah, di tama ni Cushi.)

36:15  Gei digaula ga-helekai gi mee, “Noho gi-lala, daulia-mai gi gimaadou di beebaa deenaa.” Malaa, Baruch gaa-dau dana beebaa.

36:16  I-muli-hua dana dau ang-gi digaula nia mee huogodoo, gei digaula gu-homouli nadau lodo mo-di madamada i nadau mehanga, gei digaula ga-helekai gi Baruch, “Gimaadou e-hai-loo gi-haga-iloo ang-gi di king nia helekai aanei.”

36:17  Digaula ga-heeu gi Baruch, “Dehee dau hai ne-hihi-ai nia mee aanei? Go Jeremiah ne-hagi-adu gi-di-goe? Hagia-mai malaa gi gimaadou.”

36:18  Baruch ga-helekai gi digaula, “Go Jeremiah ne-hagi-mai gi-di-au nia helekai huogodoo aanei, gei au gaa-hihi gi-nia ink gi-lodo di beebaa-wini deenei.”

36:19  Gei digaula ga-helekai gi mee, “Goolua mo Jeremiah hula pala hagammuni. Hudee heia gi-iloo dahi dangada di gowaa dela e-noho-ai goolua.”

36:20  Digau aamua aalaa gaa-kae di beebaa-wini gaa-dugu i-lodo di ruum o Elishama tangada hihi o-di king, gei digaula gaa-hula gaa-noho i-di gowaa dela e-noho-ai di king, ga-haga-iloo gi-di king nia mee ala guu-hai.

36:21  Di king ga-hagau a Jehudi bolo gi-gaamai di beebaa-wini deelaa. Jehudi gaa-hana ga-gaamai di beebaa-wini dela i-lodo di ruum o Elishama, gaa-dau ang-gi di king mo digau aamua huogodoo ala e-haganiga mai daha di king.

36:22  Di madagoaa-hua deelaa, la di madagoaa magalillili, gei di king le e-noho i-baahi di ahi i-lodo dono hale dela e-noho-ai i-di madagoaa magalillili.

36:23  I-di madagoaa-hua a Jehudi gaa-dau di hagaodi o-di tolu be go di hagaodi o-di haa lau beebaa, gei di king ga-hahaahi di lau beebaa la gi tama hulumanu dulii, gaa-hudu gi-lodo di ahi, gaa-dae-loo gi-di beebaa-wini dogomaalia deelaa la-guu-wele guu-odi.

36:24  Malaa, di king mo digau aamua ala ne-hagalongo gi-nia helekai huogodoo, gei digaula digi mmaadagu, be e-hahaahi nadau gahu e-haga-modongoohia-aga nadau manawa-gee.

36:25  Elnathan, Delaiah mo Gemariah ga-madamadau gi-di king bolo mee gi-hudee duungia di beebaa deelaa, gei di king digi hagalongo gi digaula.

36:26  Gei mee ga-helekai gi dana dama-daane go Jerahmeel, mo Seraiah di tama ni Azriel, mo Shelemiah di tama ni Abdeel, bolo gi-lawalawahia gimaua mo Baruch dagu dangada hihi, gei Dimaadua gu-haga-ngala gimaua i digau aalaa.

36:27  I-muli-hua di King Jehoiakim dela ne-dudu di beebaa-wini dela ne-wanga ko-au gi Baruch gi-hihia, gei Dimaadua ga-helekai-mai gi-di-au,

36:28  bolo au gi-hihia labelaa tuai beebaa gi-hihia gi-no-lodo nia mee huogodoo ala ne-hihi gi-lodo di beebaa-wini dela ne-dudu go di King Jehoiakim.

36:29  Gei Dimaadua ga-helekai-mai gi-di-au bolo gi-helekai gi-di king deelaa, “Goe dela ne-dudu di beebaa-wini deelaa, gei gu-heeu ang-gi Jeremiah tadinga dana mee dela ne-hihi bolo di king o Babylonia ga-hanimoi gaa-oho tenua deenei, gei ga-daaligi digau o tenua deenei mo nia manu huogodoo.

36:30  Deenei-laa, ko-Au go Dimaadua deenei e-helekai-adu gi-di-goe go di King Jehoiakim, bolo deai dahi dangada mai i-lodo do hagadili gaa-mee di-dagi tenua o David ai. Do huaidina gaa-hudu gi-lodo di gowaa dela e-welengina i-di laa i-di aa mo-di magalillili o-di boo.

36:31  Gei au ga-hagaduadua goe mo do madawaawa mo au gau aamua huogodoo, i-nia huaidu ala ne-hai go goodou huogodoo. Kooe mo digau Jerusalem mo digau Judah la-digi hagalongo gi agu helekai, deelaa dagu mee ga-hagaduadua goodou gi-di hagaduadua dela gu-hagatogomaalia adu gi goodou.”

36:32  Gei au ga-gaamai dagu huai beebaa-wini gaa-wanga gi Baruch dagu dangada hihi, gei Baruch gaa-hihi gi-no-lodo agu mee huogodoo ala e-hagi-anga gi mee, gei mee guu-hihi nia mee huogodoo ala nogo i-lodo di beebaa-wini dela ne-dudu go di king, gei au gaa-wanga labelaa hunu helekai gi-baahi nia maa.

Chapter 37

37:1  Nebuchadnezzar di king o Babylonia ga-haga-noho-aga a Zedekiah di tama a Josiah belee hai di king o Judah, e-pono di lohongo o Jehoiachin di tama a Jehoiakim.

37:2  Gei Zedekiah mo ana gau aamua mo nia daangada huogodoo, digaula hagalee hagalongo gi nnelekai Dimaadua ala ne-gaamai gi-di-au.

37:3  Di King Zedekiah ga-hagau-mai a Jehucal di tama a Shelemiah mo tangada hai-mee-dabu go Zephaniah di tama a Maaseiah bolo e-dangi-mai gi-di-au bolo au gi-dalodalo-ina i tadau henua ang-gi Dimaadua go tadau God.

37:4  I-di madagoaa-hua deelaa, gei au digi galabudi, tangada hua moholo i-baahi o digau huogodoo.

37:5  I-di madagoaa deelaa, gei di buini-dauwa o-di king o Egypt gu-hagatanga i-di nadau henua, gei digau o Babylonia ala e-heebagi gi Jerusalem gaa-longo di longo deenei, gei digaula guu-hula gi-daha mo-di waahale deelaa.

37:6  Dimaadua go di God o Israel ga-helekai-mai

37:7  bolo au gi-helekai gi Zedekiah boloo, “Di buini-dauwa di king o Egypt e-hanimoi e-hagamaamaa goe, malaa, digaula gaa-hula labelaa gi Egypt.

37:8  Gei digau o Babylonia ga-loomoi gi-muli, ga-heebagi gi-di waahale deenei, gaa-dudu di waahale.

37:9  Au go Dimaadua e-agoago-adu gi goodou bolo gi-hudee halahalau-ina goodou gi godou hagamaanadu ala bolo digau o Babylonia la-gu-hagalee loomoi labelaa. Idimaa, digaula e-hai-loo gi-loomoi labelaa.

37:10  Ma e-aha maa goodou ga-haga-magedaa di buini-dauwa o Babylonia huogodoo, gei-ogo digau ala ne-lauwa ala ne-dubu i-golo e-mmoemmoe i-lodo nadau hale-laa, nia daane aanei e-mee-hua di-tuu-aga gaa-dudu di waahale deenei.”

37:11  Digau dauwa o Babylonia guu-hula gi-daha mo-di waahale Jerusalem, idimaa digau dauwa o Egypt la-gu-hoohoo-mai gi-di waahale deelaa.

37:12  Gei au ga-hagatanga i Jerusalem, gaa-hana gi tenua o Benjamin bolo gi-hai-mee gi dogu duhongo i-di maluagina o di-madau madahaanau.

37:13  I dogu dau-adu gi-di ngudu di abaaba dela e-haga-ingoo bolo di Bontai Benjamin, gei au ga-heetugi gi tangada aamua o digau hagaloohi i-di ngudu di ala deelaa, dono ingoo go Irijah di tama ni Shelemiah, dono damana-madua go Hananiah. Tangada hagaloohi deelaa ga-haga-duu au, ga-helekai-mai, “Goe deenaa le e-hana e-hagamaamaa digau o Babylonia!”

37:14  Gei au ga-helekai, “Deeai, au hagalee hagamaamaa digaula.” Gei mee hagalee hagalongo-mai gi-di-au, gei mee ga-lawalawa au, gaa-dagi au gi-baahi digau aamua.

37:15  Gei digau aamua gu-hagawelewele huoloo, gaa-hai bolo au gi-haga-mamaawadia gi-hudua gi-lodo di hale-galabudi i-lodo di hale o Jonathan, go tangada hihi o-di king. Digaula guu-hai di hale o-maa be-di hale-galabudi.

37:16  Digaula gaa-wanga au gi-lodo di gowaa galabudi i-lala di hale deelaa, gei au gaa-noho i-golo i-di madagoaa waalooloo.

37:17  Nomuli-hua, gei di King Zedekiah gaa-hai dana hegau bolo au gi-hanadu gi dono baahi, gei mee ga-heeu-mai ana mee hagammuni boloo, “Nnelekai i-golo mai baahi o Dimaadua?” Gei au ga-helekai, “Uaa, i-golo.” Gei au ga-helekai-adu labelaa, “Goe gaa-lahi go digaula gi-di king o Babylonia.”

37:18  Gei au ga-heeu gi mee, “Di hala-aha ne-hai-adu ko-au gi-di-goe, be ang-gi au gau aamua aalaa, be ang-gi nia daangada aanei, dela ga-hidi-mai-iei au gaa-hudu go goodou gi-lodo di hale-galabudi?

37:19  Malaa aahee au soukohp ala ne-hai-adu nadau helekai bolo di king o Babylonia la-hagalee hai dana heebagi-adu gi-di-goe, be go tenua deenei?

37:20  Gei au e-hai dagu dangidangi adu gi-di-goe, meenei di king, hagalongo gi dagu dangidangi, gei gi-haga-gila-ina dagu dangidangi. Goe dumaalia-mai hudee hagau-ina au labelaa gi-lodo di hale-galabudi dela i-di hale o Jonathan go dau dangada hihi. Maa au gaa-hana labelaa gi-di gowaa deelaa, gei au gaa-made-hua.”

37:21  Di King Zedekiah gaa-hai bolo au gi-galabudi-ina-hua i-lodo di abaaba dono hale. Malaa, gei au ga-noho-hua i-golo, e-gaigai agu palaawaa ala e-gaamai gi-di-au mai digau hai-palaawaa, gaa-dae-loo gi-nia palaawaa huogodoo guu-odi i-lodo di waahale deelaa.

Chapter 38

38:1  Shephatiah di tama a Mattan, Gedaliah di tama a Passhur, Jehucal di tama Shelemiah mo Passhur di tama a Malchiah, digaula gaa-longo i agu mee ala ne-agoago gi nia daangada

38:2  i nnelekai Dimaadua ala ne-helekai-ai boloo, “Tangada dela ma-gaa-noho i-lodo di waahale deenei, geia gaa-made i tauwa be i tau-hiigai, be i tau-magi. Gei tangada dela ma-gaa-hana gaa-lele gi-baahi digau o Babylonia, geia hagalee made, ia ga-dagaloaha, ga-mouli.”

38:3  Gei au guu-hai labelaa gi digaula boloo, “Dimaadua gu-helekai boloo, ‘Au gaa-wanga di waahale deenei la-gi digau Babylonia gi-gumudia.’ ”

38:4  Gei digau aamua ga-helekai gi-di king, “Taane deenei e-humalia e-daaligi gi-daha. I ana helekai beenei, mee dela e-hai di buini-dauwa i-lodo di waahale deenei gi-mmaadagu. Gei mee e-tataanga ang-gi nia daangada huogodoo ala e-dubu i-lodo di waahale. Mee hagalee hagamada e-hagamaamaa nia daangada, mee e-hiihai-hua e-hagahuaidu digaula.”

38:5  Gei di King Zedekiah ga-helekai, “E-humalia, heia go di-godou hiihai. Au hagalee dugu goodou.”

38:6  Gei digaula gaa-kumi au, ga-haga-hege au gi-lala i-lodo di monowai-geli o Malchijah go tama-daane di king. Di monowai la i-lodo di abaaba o-di hale di king, nia wai no-lodo ai, aalaa-hua go nia gohu gelegele dogolia no-lodo ala ne-llebu ginai au no-lodo.

38:7  Gei-ogo Ebed=Melech, taane-‘eunuch’ mai Ethiopia dela e-hai-hegau i-lodo di hale di king ga-longono bolo digaula guu-hudu au gi-lodo di monowai deelaa. I-di madagoaa deelaa, gei di king e-noho i-di ngudu di abaaba dela e-haga-ingoo bolo di Bontai Benjamin e-haihai ana gabunga.

38:8  Gei Ebed=Melech gaa-hana gi-golo ga-helekai gi-di king,

38:9  “Meenei di king aamua, e-huaidu go di mee dela ne-hai go digaula dela ne-hudu a Jeremiah gi-lodo di monowai, di gowaa dela ga-hiigai-iei mee gaa-made, idimaa, ma gu-deai nia meegai i-lodo di waahale deenei ai.”

38:10  Di king ga-helekai gi Ebed=Melech bolo mee gi-lahia ana daane dogodolu gii-hula gi-hudi-aga au gi-daha mo-di monowai deelaa, i-mua dogu made.

38:11  Malaa, Ebed=Melech mo nia daane aalaa gaa-hula gi-di gowaa dugu-goloo o-di hale di king, ga-gaamai nadau mee gahu gaa-nnoo gi-di gili di loahi ga-haga-hege-ia gi-di-au i-lodo di monowai deelaa.

38:12  Gei mee ga-hai-mai gi-di-au bolo gi-wanga-ina nia mee-gahu aalaa la-gi-lala ogu lima gi-de-mohole au i-nia loahi, gei au guu-hai be-di hai a-maa.

38:13  Gei digaula ga-hudi-aga au gi-daha mo-di monowai deelaa. Muli-hua di mee deenei, gei au gaa-noho i-lodo di abaaba o-di hale di king.

38:14  Di King Zedekiah ga-gahi-mai au gi-lodo di tolu bontai di Hale Daumaha, ga-helekai-mai, “Au e-hai dagu heeu, gei au e-hiihai bolo goe gi-hagia-mai di tonu hagatau.”

38:15  Gei au ga-helekai, “Maa au ga-helekai donu adu gi-di-goe, gei goe ga-daaligi au gii-made, gei maa au ga-aago-adu goe, gei goe hagalee hagalongo ginai.”

38:16  Di King Zedekiah ga-hagababa-mai gi-di-au hagammuni boloo, “I-di ingoo o Dimaadua mouli, dela ne-gaamai gi gidaadou di mouli, au hagalee daaligi goe gii-made, gei hagalee wanga goe gi digau ala e-hiihai e-daaligi goe gii-made.”

38:17  Gei au ga-helekai gi Zedekiah bolo Dimaadua, go di God di Gowaa Aamua, dela go di God o digau Israel la-gu-helekai boloo, “Maa goe gaa-wanga goe gi digau aamua di king o Babylonia, gei goe gu-haga-dagaloaha do mouli, gei di waahale hogi deenei hagalee wele. Goe mo digau doo hale ga-mouli.

38:18  Maa goe ga-hagalee dugu-anga goe gi digaula, gei di waahale deenei gaa-wanga gi digau o Babylonia gi-duungia, gei goe hogi hagalee mouli.”

38:19  King Zedekiah ga-helekai, “Au e-madagu i digau o Jew ala ne-llele i tadau baahi gaa-noho i-baahi digau Babylonia. Au e-lliga i digau o Babylonia gi-dee wanga au gi digaula, gei digaula ga-hagaduadua au huoloo.”

38:20  Gei au ga-helekai gi mee, “Goe ga-hagalee hagahuaidu i-baahi digaula. Au e-dangi-adu gi-di-goe, meenei di King Zedekiah, bolo goe gi-haga-gila-ina-aga nia helekai a Dimaadua, gei nia mee huogodoo gaa-kila humalia i doo baahi, gei do mouli ga-dagaloaha.

38:21  Dimaadua gu-haga-modongoohia-mai i-lodo di midi di mee dela gaa-hai maa goe ga-hagalee dugu-anga goe.

38:22  I-lodo di midi, gei au ne-mmada gi-nia ahina huogodoo ala ne-dubu i-lodo di hale o-di king o Judah, digaula guu-hula guu-dagi gi-baahi digau-dauwa aamua o-di king o Babylonia. Goe hagalongo malaa gi nnelekai digaula i-di nadau hula, ‘Nia hoo hagaaloho o-di king gu-halahalau a-mee, digaula gu-dagi-gee a-mee. Dolomeenei gei ono wae gu-llebu gi-lodo di gelegele waiwai, malaa, digaula guu-llele gi-daha.’ ”

38:23  Gei au ga-helekai labelaa gi mee, “Oo lodo mo au dama huogodoo gaa-lahi gi Babylonia, gei goe e-deemee-loo di-dagaloaha, ga-lawalawa gaa-dagi gi-di king o Babylonia, gei di waahale deenei gaa-wele gaa-hai di lehu”.

38:24  King Zedekiah ga-helekai, “Goe hudee hagi-anga gi dahi dangada tau helekai deenei, gei goe ga-mouli.

38:25  Maa digau aamua ga-iloo-ginaadou tau helekai aanei, gei digaula e-hai-loo gi-heeu-adu gi-di-goe tau helekai aanei. Digaula ga-hagababa-adu gi-di-goe bolo ginaadou hagalee daaligi goe maa goe ga-hagi-aga nia mee huogodoo.

38:26  Goe ga-helekai gi digaula bolo goe ne-hanimoi ne-hai dau dangidangi-mai gi-di-au bolo au gi-hudee hagau-ina goe gi-lodo di hale-galabudi, gi-dee made i-golo.”

38:27  Gei digau aamua aalaa ga-loomoi gi-di-au, ga-heeu-mai gi-di-au nia mee huogodoo, gei au ga-helekai be nnelekai a di king ne-hagi-mai bolo au gi-helekai beenei ang-gi digaula. Malaa, digaula gu-deai di-nadau hai e-mee di-hai ai, idimaa, tangada i digaula ne-hagalongo gi mau helekai ai.

38:28  Malaa, gei au ga-noho-hua i-lodo di abaaba di king, gaa-dae-loo gi-di laangi dela e-kumi-ai Jerusalem.

Chapter 39

39:1  I-di madangaholu malama o-di hiwa ngadau i-di madagoaa Zedekiah nogo king i Judah, gei-ogo Nebuchadnezzar, di king o Babylonia, ga-haneia mo ana llongo-dauwa huogodoo, ga heebagi gi Jerusalem.

39:2  I-di hiwa laangi o-di haa malama o-di madangaholu maa-dahi ngadau i-di madagoaa Zedekiah nogo king, di abaaba o-di waahale gu-mooho.

39:3  Di madagoaa Jerusalem dela guu-kumi, digau aamua Babylonia huogodoo ga-lloomoi gaa-noho i-di ngudu di bontai dela e-hagaingoo bolo di Bontai o Tungaalodo, malaa, aanei nia ingoo digaula: Nergal=Sharezer, Samgar=Nebo, Sarsechim, mo tangada e-hagaingoo labelaa bolo Nergal=Sharezer.

39:4  Di madagoaa di King Zedekiah mo dana llongo-dauwa ga-gidee nia mee ala guu-hai, digaula gaa-hula gaa-llele gi-daha mo-di waahale i-di boo. Digaula gaa-llele i-di ala dela e-hana i-lodo di hadagee o-di king, gaa-hana i-di ala dela e-duudagi i-mehanga nia abaaba e-lua, gaa-hana gi-di gowaa mehanga gonduu o Jordan.

39:5  Gei digau-dauwa o Babylonia ga-waluwalu digaula, gaa-kumi Zedekiah i-lodo di gowaa maalama hoohoo-adu gi Jericho. Digaula gaa-lahi a-mee gi-di King Nebuchadnezzar, dela e-noho i-di waahale o Riblah i tenua o Hamath, gei Nebuchadnezzar ga-haganoho di hai dela e-hai gi mee.

39:6  Gei mee ga-daaligi nia dama-daane Zedekiah gii-mmade i-di guongo go Riblah, i-mua nia golomada o Zedekiah, gei gu-daaligi labelaa digau aamua huogodoo o Judah.

39:7  Nomuli-hua, gei mee gaa-hai bolo nia golomada o Zedekiah la-gi-kaabee gi-daha, ga-lawalawa a-mee gi-nia daula baalanga e-lahi gi Babylonia.

39:8  I-di madagoaa deelaa, gei digau o Babylonia gaa-dudu di hale di king, mo nia hale o-nia daangada, gaa-oho gi-daha nia abaaba o Jerusalem

39:9  Nomuli, Nebuzaradan, tagi o-di llongo-dauwa, ga-lawalawa digau huogodoo ala ne-dubu i-golo i-di waahale deelaa, gaa-lahi gi Babylonia, madalia digau huogodoo ala ne-halahala mouli gi-baahi o-mee,

39:10  gaa-dugu digau ala koia e-hagaloale i Judah, nadau gowaa ai, gaa-wanga gi digaula nia hadagee-waini mo nadau gowaa hai-hadagee.

39:11  Di King Nebuchadnezzar ga-helekai gi Nebuzaradan, di tagi ana gau-dauwa, gi-helekai gi-nia dagi o-nia buini-dauwa boloo,

39:12  “Hula, halahala-ina Jeremiah, benabena-ina a-mee hagahumalia. Goe hudee hai gi mee dahi hai huaidu, gei gi-heia dana mee dela e-hiihai ginai.”

39:13  Malaa, gei Nebuzaradan, mo ana gau-aamua ala go Nebushazban mo Nergal=Sharezer, mo digau aamua o-di king Babylonia,

39:14  ga-laha-mai au gi-daha mo-di abaaba o-di hale di king, gei digaula gaa-dugu a Gedaliah e-benebene au. Gedaliah, tama-daane Ahikam, gei Ahikam tama-daane Shaphan, gei mee e-madamada humalia i-di-au bolo gii-noho au i-di aumaalia, gaa-dae-loo gi dogu dau i dogu hale. Gei au gu-mehede guu-noho i-di aumaalia i-baahi o-nia daangada.

39:15  I dogu madagoaa nogo noho galabudi i-lodo di abaaba di hale di king, gei Dimaadua ga-helekai-mai,

39:16  bolo au gi-helekai gi Ebed=Melech, tangada o Ethiopia, “Dimaadua di Gowaa Aamua, go di God o Israel, gu-helekai, ‘Au ga-gaamai di haadanga-balua gi-hongo di waahale deenei, hagalee go di haadanga-lamalia, gadoo be-di mee dela guu-lawa-ai dagu helekai. Di madagoaa o-nia mee aanei ma ga-kila-aga, gei goe ga-i di gowaa deelaa bolo gi-gidee-goe.

39:17  Gei Au, go Dimaadua, ga-madamada humalia-laa i-di-goe, gei goe hagalee e-wanga gi digau ala e-madagu-iei goe.

39:18  Au ga-madamada humalia i-di-goe bolo gii-noho goe humalia, gei goe hagalee daaligi, goe ga-dagaloaha ge mouli, idimaa i do hagadagadagagee-mai gi-di-Au. Au go Dimaadua ne-helekai.’ ”

Chapter 40

40:1  Dimaadua ga-helekai-mai labelaa gi-di-au i-muli Nebuzaradan, tagi o-nia llongo-dauwa, ne-hagamehede au i Ramah. Au nogo lawalawa i dogu madagoaa ne-lahi gi-golo, madalia digau huogodoo ala ne-laha-mai i Jerusalem mo Judah ala ne-lawalawa gaa-lahi gi Babylonia.

40:2  Tagi dauwa ga-laha-mai au ga-helekai-mai, “Dimaadua, go doo God, gu-helekai-aga i-nia haingadaa huaidu ala gaa-tale gi tenua deenei,

40:3  malaa, dolomeenei, gei Mee gu-hagagila-aga ana mee ala ne-helekai-ai bolo gi-heia. Nia mee aanei huogodoo ne-hai, idimaa i godou daangada ala guu-hai di huaidu ang-gi Dimaadua, deai tangada ne-hagalongo ai.

40:4  Dolomeenei, gei au gaa-wwede nia daula baalanga ala i oo lima, ga-haga-mehede goe. Maa goe e-hiihai e-hana madalia au gi Babylonia, go kooe e-iloo, gei au e-madamada humalia i-di-goe. Gei maa goe hagalee e-hiihai e-hana gi-golo, go kooe e-iloo. Goe e-mee-hua di-noho i-nia gowaa huogodoo i-lodo tenua deenei i dau gowaa dela e-hiihai ginai goe.”

40:5  Gei di-maa au digi helekai gi mee, Nebuzaradan ga-helekai-mai, “Hana gi-muli gi-baahi Gedaliah, tama-daane Ahikam, go tama-daane a Shaphan, dela ne-haganoho go di king o Babylonia belee hai di gobinaa o-nia waahale o Judah. Goe e-mee di-noho i-baahi o mee mo digau ala i-golo, be goe e-mee di-hana gi dau gowaa dela gu-maanadu kooe belee hana ginai.” Gei mee ga-gaamai dana kisakis gi-di-au mo nia meegai ala belee kae ko-au, ga-dumaalia-mai gi-di-au gii-hana.

40:6  Gei au gaa-hana gaa-noho i-baahi Gedaliah i Mizpah gu-moholo-mai gi-di-au dogu noho i-baahi o-nia daangada ala ne-dubu i tenua Israel.

40:7  Hunu gau aamua o Judah mo-di buini-dauwa la-digi hagau-ina ginaadou gi Babylonia. Digaula gu-longono bolo di king o Babylonia guu-dugu Gedaliah e-hai di gobinaa o Israel, mo-di haganoho a-mee gi-madamada humalia i digau ala kaedahi e-hagaloale i tenua deelaa.

40:8  Deelaa-laa, gei Ishmael, tama-daane Nethaniah, Johanan tama-daane Kareah, Seraiah tama daane Tanhumeth, nia dama-daane ni Ephai, tangada o Netophah, mo Jezaniah, tangada mai i Maacah, gaa-hula madalia nadau gau-dauwa, e-hula gi baahi Gedaliah i Mizpah.

40:9  Gedaliah ga-helekai gi digaula, “Au e-hagababa-adu gi goodou bolo deai tadinga ai bolo goodou ga-mmaadagu i digau o Babylonia. Goodou noho gii-mau i tenua deenei, hai-hegau gi-di king o Babylonia, gei goodou ga-mouli humalia.

40:10  Gei au gaa-noho i-kinei i Mizpah, gaa-hai tangada e-pono-ai goodou gi digau o Babylonia ala ma-ga-loomoi gi-kinei. Gei goodou e-mee di-benebene godou waini, golee-laagau, mono lolo-olib, gaa-noho i tenua dela nogo noho ai goodou nonua.”

40:11  I-di madagoaa deelaa, gei digau Israel ala nogo noho i tenua Moab, mo Ammon, mo Edom, mo nia gowaa labelaa ala i-golo, gaa-longo bolo di king o Babylonia la-guu-dugu ana gau gi noho-hua i-golo i Judah, mo-di haganoho-aga a Gedaliah e-hai di gobinaa digaula.

40:12  Gei digaula ga-hagatanga-mai i nadau guongo ala nogo noho-ai ginaadou, ga-loomoi gi-muli gi Judah. Digaula gaa-hula gi-baahi o Gedaliah i Mizpah, e-hadi nadau hagabae waini mono golee-laagau i-di gowaa deelaa.

40:13  I-muli-hua di-mee deenei, Johanan mo nia dagi o-di llongo-dauwa ala digi wanga ginaadou gi Babylonia, ga-lloomoi gi-baahi Gedaliah i Mizpah,

40:14  ga-helekai gi mee, “Goe digi iloo bolo di king Baalis o Ammon gu-hagau-mai Ishmael belee daaligi goe?” Gei Gedaliah hagalee e-hagadonu.

40:15  Johanan ga-helekai hagammuni gi mee, “Dugua-mai Ishmael gi-di-au e-daaligi gii-made hagammuni, deai tangada e-iloo ai. Dehee tadinga bolo e-dugu a mee e-daaligi goe gii-made? Di-mee deenei dela gaa-hidi-ai digau o Jew ala nogo i doo baahi ga-mooho gi-daha, deenei ga-hidi-mai di haingadaa gi-hongo nia daangada huogodoo ala e-dubu i Judah.”

40:16  Gedaliah ga-helekai gi mee, “Goe hudee heia di-mee deenaa! Idimaa dau helekai i-di hai o Ishmael la-hagalee e-donu!”

Chapter 41

41:1  I-di hidu malama o-di ngadau deelaa, Ishmael, tama-daane Nethaniah, dono damana madua go Elishama, tangada ni-di madawaawa o-di king, gei mee tangada labelaa aamua ni-di king, gaa-hana gi Mizpah mo ana daane dilongoholu bolo e-heetugi gi gobinaa Gedaliah. I-di madagoaa dela nogo miami-iei digaula,

41:2  gei Ishmael mo ana daane dilongoholu ga-dahi-aga nadau hulumanu, ga-daaligi Gedaliah gii-made.

41:3  Ishmael gu-daaligi labelaa digau Israel huogodoo ala nogo noho i-baahi o Gedalia i Mizpah mo digau-dauwa o Babylonia labelaa ala nogo noho i-golo.

41:4  Hooaga luada dono daiaa, i-mua nia daangada digi iloo bolo Gedaliah la-gu-daaligi gii-made,

41:5  nia daane e-huowalu ga-loomoi i Shechem, Shiloh, mo Samaria. Digaula guu-dahi nadau ngudu, hahaahi nadau goloo, ge gu-teletele nadau gili. Digaula e-kae nadau golee-laagau mo nadau ‘incense’ belee tigidaumaha i-lodo di Hale Daumaha.

41:6  Ishmael ga-dangidangi mo-di hana gi-daha mo Mizpah belee heetugi gi digaula. I dono dau-adu gi digaula, gei mee ga-helekai, “Goodou lloomoi gi-gidee goodou Gedaliah.”

41:7  I-di-nadau dau-adu gi-lodo di waahale, Ishmael mo ana daane ga-daaligi digaula, gaa-kili nnuaidina digaula gi-lodo di monowai geli.

41:8  Malaa, nia daane dilongoholu i-lodo di hagabuulinga dangada deelaa, ga-helekai gi Ishmael, “Hudee daaligidia gimaadou! Madau ‘barley’, lolo-olib, mono mee maangala ‘honey’ e-dugu hagammuni i-lodo madau hadagee.” Gei mee digi daaligi digaula.

41:9  Di monowai geli dela ne-kili ginai nnuaidina o digau ala ne-daaligi go mee, deelaa di monowai damana dela ne-geli go di king Asa, i-di madagoaa Baasha, di king o Israel, nogo heebagi gi mee. Ishmael gaa-haa di monowai deelaa gi nnuaidina o-nia daane aalaa.

41:10  Gei mee ga-lawalawa nia dama-ahina o-di king, mo nia daangada ala ne-dubu i Mizpah ala ne-dugu go tagi-dauwa go Nebuzaradan gi-lala di madamada humalia o Gedaliah. Ishmael ga-lawalawa digaula gaa-lahi gi tenua go Ammon.

41:11  Johanan mo nia dagi-dauwa huogodoo ala e-madalia a-mee gaa-longo di-mee huaidu dela ne-hai go Ishmael.

41:12  Digaula gaa-hula ga-waluwalu-adu a-mee mo ana gau-dauwa, gaa-kumu digaula i-baahi di monowai damana i Gibeon.

41:13  Di madagoaa-hua digau ala ne-lawalawa go Ishmael ga-gidee-ginaadou Johanan mo ana gau-dauwa, digaula gu-tenetene huoloo,

41:14  gaa-llele gi-muli gi digaula.

41:15  Gei Ishmael mo ana gau dogowalu gaa-llele gi-daha mo Johanan, gaa-llele gi tenua go Ammon.

41:16  Johanan mo ana dagi-dauwa gaa-lahi nia daangada ala ne-lawalawa go Ishmael gi-daha mo Mizpah i-muli dana daaligi Gedaliah, ala go nia gau-dauwa, nia ahina, nia dama mo nia daane-‘eunuch’.

41:17  Gei digaula gu-mmaadagu huoloo i digau Babylonia, idimaa Ishmael gu-daaligi Gedaliah, dela ne-dugu go di king o Babylonia belee hai di gobinaa o tenua deelaa. Gei digaula gaa-hula gi Egypt, belee llele gi-daha mo digau o Babylonia. I-di-nadau hula, gei digaula ga-hagamolooloo i Chimham dela e-hoohoo gi Bethlehem.

41:18  Gei digaula gu-mmaadagu huoloo i digau Babylonia, idimaa Ishmael gu-daaligi Gedaliah, dela ne-dugu go di king o Babylonia belee hai di gobinaa o tenua deelaa. Gei digaula gaa-hula gi Egypt, belee llele gi-daha mo digau o Babylonia. I-di-nadau hula, gei digaula ga-hagamolooloo i Chimham dela e-hoohoo gi Bethlehem.

Chapter 42

42:1  Nia dagi o-nia buini-dauwa huogodoo, mo Johanan, tama-daane a Kareah, mo Azariah, tama-daane Heshaiah, digaula ga-lloomoi mo nia hagadilinga daangada huogodoo,

42:2  ga-helekai-mai, “Goe dumaalia-mai, haga-gila-ina di-madau mee dela ga-tangi-adu gi-di-goe! Goe dalodalo-ina i gimaadou gi Dimaadua, go tadau God. Dalodalo-ina i gimaadou huogodoo ala gu-mouli. I-mua gei gimaadou nogo dogologo, gei dolomeenei gu-hogoohi-loo be dau gidee.

42:3  Goe dalodalo gi Dimaadua go tadau God gi-hagia-mai gi gimaadou di ala dela belee hula-ai gimaadou mo madau mee ala belee hai.”

42:4  Gei au ga-helekai gi digaula, “E-humalia, au ga-dalodalo ang-gi Dimaadua, go tadau God, gii-hai be godou helekai, gei au ga-hagi-adu gi goodou di-ingoo-hua di mee dela ma-ga-helekai-mai gi-di-au. Au hagalee e-hagammuni dahi mee.”

42:5  Gei digaula ga-helekai-mai, “Dimaadua dela go di-madau hagadootonu e-donu mo-di manawa-dahi maa gimaadou ga-hagalee e-daudali nia haganoho huogodoo ala ma-ga-gowadu gi-di-goe go Dimaadua, tadau God, bolo goe gi-hagia-mai gi gimaadou.

42:6  Ma e-aha maa gimaadou e-hiihai be deeai, gimaadou ga-hagalongo gi Dimaadua tadau God, dela e-dangidangi-iei gimaadou adu gi-di-goe gi-dalodalo gi Mee. Nia mee huogodoo gaa-kila humalia i madau baahi maa gimaadou ga-hagalongo gi Mee”

42:7  I-muli-hua nia laangi e-madangaholu, gei Dimaadua ga-helekai-mai,

42:8  gei au ga-gahi-mai Johanan, mo nia dagi buini-dauwa ala e-madalia a-mee, mo digau ala i-golo huogodoo.

42:9  Gei au ga-helekai gi digaula, “Dimaadua, di God o Israel, dela ne-tangi goodou mai gi-di-au bolo au gi-dangidangi gi Mee, gu-helekai,

42:10  ‘Maa goodou ga-noho-hua i tenua deenei, gei Au ga-haga-hoou goodou, hagalee haga-huaidu goodou. Au gaa-dogi goodou gi-lala, hagalee daagi goodou gi-daha. Au gu-lodo-huaidu i dagu hagaduadua goodou.

42:11  Goodou hudee mmaadagu i-di king o Babylonia. Au e-madalia goodou, e-abaaba goodou gi-daha mo ono mogobuna.

42:12  Idimaa i dogu manawa dumaalia, Au gaa-hai a-mee gi-dumaalia gi goodou gii-hula gi-di-godou henua donu. Au go Dimaadua ne-helekai.’

42:13  “Gei goodou ala ne-dubu i Judah hudee de-hagalongo gi Dimaadua di-godou God, hudee dagalili di noho i-lodo tenua deenei. Goodou hudee helekai boloo, ‘Deeai, gimaadou e-hula e-noho i Egypt, i-di gowaa dela hagalee tale gi tauwa, be e-longono di hagailoo o tauwa, be e-hiigai.’ Maa goodou ga-helekai beenei, gei Dimaadua di Gowaa Aamua, di God o Israel, ga-helekai, ‘Maa goodou ga-haga-mahi bolo goodou e-hula-hua e-noho i Egypt,

42:14  “Gei goodou ala ne-dubu i Judah hudee de-hagalongo gi Dimaadua di-godou God, hudee dagalili di noho i-lodo tenua deenei. Goodou hudee helekai boloo, ‘Deeai, gimaadou e-hula e-noho i Egypt, i-di gowaa dela hagalee tale gi tauwa, be e-longono di hagailoo o tauwa, be e-hiigai.’ Maa goodou ga-helekai beenei, gei Dimaadua di Gowaa Aamua, di God o Israel, ga-helekai, ‘Maa goodou ga-haga-mahi bolo goodou e-hula-hua e-noho i Egypt,

42:15  “Gei goodou ala ne-dubu i Judah hudee de-hagalongo gi Dimaadua di-godou God, hudee dagalili di noho i-lodo tenua deenei. Goodou hudee helekai boloo, ‘Deeai, gimaadou e-hula e-noho i Egypt, i-di gowaa dela hagalee tale gi tauwa, be e-longono di hagailoo o tauwa, be e-hiigai.’ Maa goodou ga-helekai beenei, gei Dimaadua di Gowaa Aamua, di God o Israel, ga-helekai, ‘Maa goodou ga-haga-mahi bolo goodou e-hula-hua e-noho i Egypt,

42:16  tauwa dela e-mmaadagu-ai goodou le e-dau-adu gi goodou, ge di hiigai dela hagalee e-hiihai gi-tale-adu gi goodou, le e-daudali-hua goodou, gei goodou gaa-mmade i Egypt.

42:17  Nia daangada huogodoo ala guu-baba bolo e-hula e-noho i Egypt, digaula gaa-mmade i tauwa, be-di hiigai, be tau-magi, tangada i digaula e-mouli ai, gei dei tangada e-hagalee tale gi dagu hagaduadua dela gaa-dugu gi-hongo digaula ai.’

42:18  “Dimaadua di God o Israel, ga-helekai boloo, ‘Be dogu hagawelewele huoloo dela ne-tale gi digau Jerusalem, dela gadoo e-tale-adu labelaa gi goodou maa goodou gaa-hula gi Egypt. Goodou ga-hagamadagudagu, ga-gadagada ginai, ga-haga-halauwa go digaula. Goodou ga-hagalee mmada labelaa gi tenua deenei.’ ”

42:19  Gei au ga-duudagi agu helekai, “Dimaadua gu-helekai-adu gi goodou bolo nia daangada ala ne-dubu i Judah gi-hudee hula gi Egypt. Deenei-laa dagu boloagi adu gi goodou dangi-nei,

42:20  idimaa goodou digi helekai donu i godou hai au gii-dangi gi Mee. Goodou ne-helekai-mai bolo au gi-dalodalo gi Dimaadua go tadau God, gei goodou gu-hagamodu bolo goodou ga-haga-kila-aga nia mee huogodoo a-Maa ala ma-ga-helekai-ai.

42:21  Gei dolomeenei gei goodou hagalee daudali nia mee huogodoo a Dimaadua tadau God ne-helekai-mai bolo au gi-hagia-adu gi goodou.

42:22  Deenei-laa, goodou gi-langalangahia di-mee deenei: Goodou gaa-mmade i tauwa, be-di hiigai, be taumagi i tenua dela e-hiihai ginai goodou e-hula e-noho-ai.”

Chapter 43

43:1  Deenei di hagaodi o agu helekai ala ne-helekai gi nia daangada huogodoo i-nia mee a Dimaadua, go di-nadau God ala ne-helekai-mai gi-di-au bolo au gi-hagi-anga gi digaula.

43:2  Azariah, tama-daane Hoshaiah, mo Johanan tama-daane Kareah, mo digau hagamuamua huogodoo ala i-golo, ga-helekai-mai gi-di-au, “Goe e-dilikai. Dimaadua, go tadau God, digi hagau-ina-mai goe gi-helekai-mai gi gimaadou bolo hudee hula gi Egypt.

43:3  Baruch, tama-daane Neriah, ne-aago goe bolo gi-hai-baahi-mai gi gimaadou, bolo digau o Babylonia nadau mogobuna i madau nua, e-mee di-daaligi gimaadou, be e-lahi gimaadou gi Babylonia.”

43:4  Johanan, nia dagi buini-dauwa, mo nia daangada huogodoo ala i-golo, gu-hagalee e-hiihai e-haga-gila-aga nia helekai o Dimaadua bolo digaula gi noho-hua i tenua go Judah.

43:5  Johanan mo nia dagi buini-dauwa gaa-lahi digau huogodoo ala ne-dubu i Judah gi Egypt, mo digau hogi ala ne-diiagi nadau henua ala ne-hagabagi ginai digaula, ga-lloomoi labelaa gi di-nadau henua:

43:6  ala go nia daane, nia ahina, nia dama-giigi, mo nia dama-ahina di king. Digaula guu-lahi digau huogodoo ala ne-dugu go Nebuzaradan, tagi di llongo-dauwa Babylonia, gi-baahi o Gedaliah, ngaadahi mo au mo Baruch.

43:7  Digaula digi hagalongo gi-nia helekai a Dimaadua, gu-hula-hua gi Egypt, guu-dau-adu-loo gi Tahpanhes.

43:8  Dimaadua ga-helekai-mai i-di gowaa deelaa,

43:9  “Gaamai au hadugalaa llauehe, danu-mia i-lala di gowaa baba i-mua di bontai dela e-ulu-adu gi-di hale oobidi i-lodo di waahale deenei. Heia hunu gau Israel gi-gidee-ginaadou dau mee dela e-hai.

43:10  Gei goe ga-helekai gi digaula bolo ko-Au, go Dimaadua di Gowaa Aamua, go di God o Israel, ga-laha-mai dagu dangada hai-hegau go Nebuchadnezzar, di king o Babylonia gi kinei i Egypt, ga-haganoho dono lohongo king i-hongo nia hadugalaa ala ne-danu kooe, ga-hagaduu-aga dana hale-laa aamua nonua.

43:11  Nebuchadnezzar ga-haneia ga-hagamagedaa Egypt. Digau ala bolo e-mmade i-di magi, la-gaa-mmade i-di magi. Digau ala bolo e-lawalawa gaa-lahi, la-ga-lawalawa gaa-lahi, mo digau ala bolo e-mmade i tauwa, la-gaa-mmade i tauwa.

43:12  Au gaa-dudu nia hale daumaha o-nia balu-god o Egypt, gei di king o Babylonia gaa-dudu nia ada-god digaula, be gaa-kae nia maa gi-daha mo tenua deenei. E-hai gadoo be-di hagaloohi siibi dela ma-ga-haga-madammaa nia gudu gi-daha mo dono gahu, dela gadoo di hai o-di king Babylonia ma-ga-haga-madammaa tenua Egypt, gaa-lawa gaa-hana i-nia madamada o dono aali.

43:13  Gei mee gaa-oho nia hadu hagamadagu hagalangahia ala i Heliopolis i Egypt, gaa-dudu nia hale daumaha o-nia balu-god o Egypt.”

Chapter 44

44:1  Dimaadua ga-helekai-mai i digau Israel huogodoo ala e-noho i Egypt, i-lodo nia waahale ala i Migdol, Tahpanhes, mo Memphis, mo i-bahi-i-ngaaga o tenua deelaa.

44:2  Dimaadua di Gowaa Aamua, go di God o Israel, gu-helekai, “Goodou guu-mmada gi-di hagaduadua dela ne-wanga ko-Au gi Jerusalem, mo nia waahale labelaa ala i-golo i Judah. Tugi-mai gi dangi-nei gei nia gowaa aalaa la nia lohongo hale-hua, tangada e-noho i-golo ai,

44:3  idimaa nadau daangada nogo hai di huaidu, guu-hai Au gi-hagawelewele. Digaula nogo tigidaumaha ang-gi-nia balu-ieidu, mo-di hai-hege ang-gi nia balu-god ala nogo hagalee daumaha ginai digaula, be goodou, be godou maadua-mmaadua.

44:4  Au hagalee e-lawa dagu haga-hagau-adu agu gau hai-hegau go nia soukohp ala nogo agoago-adu gi goodou gi-hudee heia di huaidu dela e-de-hiihai ginai Au.

44:5  Gei goodou hagalee e-hila ginai be e-hagalongo, goodou hagalee e-hiihai e-lawa gi-daha mo godou hai huaidu e-tigidaumaha ang-gi-nia balu-ieidu.

44:6  Deenei-laa ne-gaamai dogu hagawelewele gi-hongo nia waahale o Judah, mo i-hongo nia ala o Jerusalem, e-dudu digaula. Digaula gu-mooho, guu-hai di gowaa hagamadagudagu dangada, gaa-dae-mai-loo gi dangi-nei.

44:7  “Deenei-laa, Au go Dimaadua di Gowaa Aamua, go di God o Israel, e-heeu-adu gi goodou be ma e-aha dela goodou e-bida haga-huaidu goodou. E-hai behee, goodou e-hiihai bolo Au gi-hagauda-ina labelaa di hagaduadua gi-hongo nia daane, nia ahina, nia dama-giigi mo nia ligiana bolo gi deai tangada e-dahi e-dubu ai?

44:8  Goodou e-aha ala e-hai Au gi-hagawelewele i-di godou hai-daumaha gi-nia ada-god, mo-di hai tigidaumaha gi-nia balu-ieidu i-kinei i Egypt, i-di gowaa dela ne-lloomoi ginai goodou e-noho-ai? Goodou e-haihai nia mee aanei gii-bida haga-huaidu goodou, bolo nia henua huogodoo o henuailala gi-gadagada-adu gi goodou, ga-hagaingoo goodou bolo digau ne-haga-halauwa?

44:9  E-hai behee, goodou gu-de-langahia-e-goodou nia hagadilinga huaidu ala nogo hai go godou maadua-mmaadua i-mua i-lodo nia waahale o Judah, mo i-hongo nia ala i Jerusalem, ala nogo hai go nia king o Judah, mo nadau lodo, goodou mo godou lodo?

44:10  Dae-mai-loo gi dangi-nei, gei goodou digi hila gi-lala. Goodou digi hagalaamua-ina Au be e-daudali agu haganoho ala ne-gowadu gi goodou mo godou maadua-mmaadua ala i-mua.

44:11  “Deenei-laa, Au go Dimaadua di Gowaa Aamua, go di God o Israel, ga-hai-baahi-adu gi goodou, gaa-oho Judah hagatau.

44:12  Gei ang-gi digau ala ne-dubu i Judah ge gu-hagababa bolo ginaadou gaa-hula gaa-noho i Egypt, Au e-hai-loo gi-modongoohia humalia bolo digaula e-hai-loo gi-daaligi gii-mmade. Digaula huogodoo, digau aamua mo digau lligi, gaa-mmade i Egypt. Digaula e-mmade i tauwa mo-di hiigai. Digaula gaa-hai di-mee e-hagamadagudagu dangada. Nia daangada ga-gadagada gi digaula, ga-hagaingoo digaula bolo gu-haga-halauwa.

44:13  Au ga-hagaduadua digau ala e-noho i Egypt, be dagu hai dela ne-hagaduadua Jerusalem, i tauwa mo tau-hiigai mo tau-magi.

44:14  Deai tangada i digau ala ne-dubu i Judah dela ne-hana e-halahala dono gowaa e-noho i Egypt ga-mouli laa ai. Deai tangada i digaula bolo ia gaa-hana gi-muli gi Judah, gi-di gowaa e-hiihai e-mouli ia ai. Deai tangada e-hana gi Judah ai, aalaa-hua go digau hogoohi ala ne-llele gi-daha mo Egypt.”

44:15  Nia daane huogodoo ala e-iloo bolo nadau lodo la nogo tigidaumaha ang-gi nia balu-ieidu, mo nia ahina ala nogo tuu i-di gowaa deelaa, mo digau Israel ala nogo noho i-bahi-i-ngaaga o Egypt, guu-hai tagabuli dangada dogologo, ga-helekai-mai gi-di-au,

44:16  “Gimaadou e-de-hiihai e-hagalongo gi au mee ala gu-helekai-mai gi gimaadou i-di ingoo o Dimaadua.

44:17  Gimaadou e-hai-hua go madau mee huogodoo e-hiihai e-hai. Gimaadou e-tigidaumaha ang-gi di-madau god-ahina, di king-ahina o-di langi. Gimaadou e-llingi madau tigidaumaha waini gi mee, gi hai be-di hai o madau maadua-mmaadua, madau king mo madau dagi ala nogo haihai i-lodo nia waahale o Judah mo i-hongo nia ala o Jerusalem. Malaa, i-di madagoaa deelaa, madau meegai nogo logo gei digi tale gi-di haingadaa.

44:18  I-muli di madagoaa ne-dugu di-madau hai tigidaumaha ang-gi di king-ahina o-di langi, mo di-lawa di-tigidaumaha madau waini gi mee, gei gimaadou gu-madau mee ai, gei madau daangada guu-mmade i tauwa mo tau hiigai damana.”

44:19  Gei nia ahina ga-helekai-aga, “Gimaadou ma-gaa-hai madau palaawaa be di ada o-di king-ahina o-di langi, ga-tigidaumaha gi mee, ga-tigidaumaha madau waini gi mee, ge madau daane e-hiihai gi madau mee e-hai.”

44:20  Gei au ga-helekai gi nia daane mono ahina huogodoo ala ne-helekai-mai,

44:21  “E-hai behee, goodou e-hagamaanadu bolo God e-de-iloo be gu-de-langahia godou tigidaumaha ala ne-hai go goodou, mo godou maadua-mmaadua i-mua, mo godou king, mo godou gau aamua, mo digau o tenua, ala ne-tigidaumaha i-lodo nia waahale o Judah mo i-hongo nia ala o Jerusalem?

44:22  Dae-mai gi dangi-nei, gei godou henua gu-hai-hua di anga-henua, tangada e-noho i-golo ai, gu-hai-hua di gowaa e-mmaadagu-ai nia daangada ala ma-gaa-mmada ginai, gei nia daangada ga-haga-ingoo tenua deelaa bolo di-mee gu-haga-halauwa, idimaa Dimaadua gu-deemee di hagakono i godou haihai huaidu.

44:23  Di haingadaa o-di madagoaa dolomeenei le e-tale-adu gi goodou, idimaa i godou hai tigidaumaha ang-gi nia balu-ieidu, mo-di hai di huaidu ang-gi Dimaadua i godou de-hagalongo gi ana helekai huogodoo.”

44:24  Gei au ga-helekai gi digau huogodoo, gei e-donu ang-gi nia ahina, i-nia helekai a Dimaadua di Gowaa Aamua, go di God o Israel, e-helekai gi digau Judah ala e-noho i Egypt, “Goodou mo godou lodo huogodoo ala ne-hai di-godou hagababa ang-gi di king-ahina o-di langi. Goodou ne-hagababa bolo goodou e-tigidaumaha mo-di tigidaumaha godou waini gi mee, gei goodou gu-hagagila-aga di-godou hagababa deelaa. Malaa, e-humalia! Goodou haga-gila-ina godou hagababa! Goodou gi-dadaahia-hua beelaa godou hagababa!

44:25  Gei au ga-helekai gi digau huogodoo, gei e-donu ang-gi nia ahina, i-nia helekai a Dimaadua di Gowaa Aamua, go di God o Israel, e-helekai gi digau Judah ala e-noho i Egypt, “Goodou mo godou lodo huogodoo ala ne-hai di-godou hagababa ang-gi di king-ahina o-di langi. Goodou ne-hagababa bolo goodou e-tigidaumaha mo-di tigidaumaha godou waini gi mee, gei goodou gu-hagagila-aga di-godou hagababa deelaa. Malaa, e-humalia! Goodou haga-gila-ina godou hagababa! Goodou gi-dadaahia-hua beelaa godou hagababa!

44:26  Dolomeenei gei goodou hagalongo gi dagu hagababa dela ne-hai i dogu ingoo mogobuna adu gi goodou, digau Israel huogodoo ala e-noho i Egypt: Au hagalee e-dumaalia-anga gi tangada i goodou gii-hai dana hagababa i dogu ingoo i dana helekai boloo, ‘Au e-hagamodu i-di ingoo di Tagi mouli, go Yihowah!’

44:27  Au ga-hagadina-loo gi-humalia gi-de-haadanga-lamalia-hua goodou, gei goodou ne-belee hagammaa gi-daha. Goodou huogodoo gaa-mmade, e-mmade i tauwa be i-di magi, gaa-hai-loo gi tangada e-dubu i goodou ai.

44:28  Digau hua hogoohi ga-haadanga lamalia ga-hagatanga i Egypt gaa-hula gi Judah. Digau ala e-dubu ga-iloo-laa be nnelekai-aai ala e-donu, agu helekai be go nadau helekai.

44:29  Au go Dimaadua ga-hagamodongoohia dagu hagaduadua goodou i-kinei mo dagu hagababa e-oho goodou la-ga-gila-aga.

44:30  Au ga-hagi-anga Hophra, di king o Egypt, gi ono hagadaumee ala e-hiihai e-daaligi a-mee gii-made, be dagu hai dela ne-hagi-anga Zedekiah, di king o Judah, gi Nebuchadnezzar, di king o Babylonia, dela guu-hai dono hagadaumee dela e-hiihai e-daaligi a-mee gii-made.”

Chapter 45

45:1  I-di haa ngadau o Jehoiakim, tama-daane Josiah, nogo king i Judah, Baruch gaa-hihi gi-lala agu mee ala ne-hai gi mee bolo gi-hihia. Gei au ga-helekai gi mee

45:2  bolo Dimaadua di God o Israel gu-helekai, “Baruch,

45:3  goe e-helekai boloo, ‘Au gu-deemee! Dimaadua gu-gaamai labelaa gi-di-au di manawa-gee belee haga-damana-aga ogu haingadaa, gu-deai ogu mahi ai, idimaa go ogu mmae, gei au gu-deai dogu hagamolooloo ai!’

45:4  “Gei Au, go Dimaadua, gaa-oho gi-daha dagu mee ne-hau, ga-daagi gi-daha dagu mee ne-dogi gi-lala. Deenei dagu hai e-hai ang-gi henuailala hagatau.

45:5  E-hai behee, goe e-halahala-hua di haga-humalia? Hudee heia di-maa. Au ga-gowadu di haingadaa gi-hongo nia daangada henuailala huogodoo, gei goe gaa-lele gi-dagaloaha i tei gowaa hua dela ma-gaa-hana ginai goe. Ma ko-Au go Dimaadua ne-helekai.”

Chapter 46

46:1  Dimaadua gu-helekai-mai i-nia henua,

46:2  e-daamada i Egypt. Deenei di-mee a-mee ne-helekai-ai i-di hai o-di buini-dauwa o Neco, di king o Egypt, dela ne-haga-magedaa go Nebuchadnezzar, di king o Babylonia, i Carchemish i taalinga di monowai Euphrates, i-di haa ngadau o Jehoiakim nogo king i Judah:

46:3  “Nia dagi-dauwa aamua o Egypt ga-wwolowwolo, ‘Goodou hagatogomaalia-ina godou goloo duuli gi-taele-adu gi tauwa!

46:4  Haga-togomaalia-ina godou hoodo e-kaga-ai gi nonua! Goodou gi-haga-goolongo, ulu gi godou goobai, olo-ina godou daalo, gi-ulu gi-lodo godou goloo-dauwa!’ ”

46:5  Dimaadua ga-heeu, “Ma di-aha dela e-daumada ko-Au? Digaula gu-tugi-mai gi-muli i-di nadau mmaadagu huoloo. Nadau gau-dauwa gu-magedaa, gu-lloomoi gi-muli, gu-mmaadagu huoloo, guu-llele halahala nadau mouli, gu-hagalee hilahila gi nadau muli.

46:6  Digau ala koia e-llele le e-deemee di-tanga gi-daha. Digau dauwa e-deemee di-benebene nadau mouli. I-bahi-i-ngeia, i-taalinga di monowai Euphrates, gei digaula gu-tibatiba gu-tingatinga gi-lala.

46:7  Ma koai deenei dela gu-nnoo-aga gadoo be-di monowai Nile, guu-hai gadoo be-di monowai dela guu-hai di labagee, dela guu-mmidi-ia gi-daha?

46:8  Ma go Egypt deenei, dela gu-nnoo-aga gadoo be-di monowai Nile, guu-hai gadoo be-di monowai dela guu-hai di labagee mmidi. Gei Egypt ne-helekai boloo, ‘Au ga-nnoo-aga gi-nua gaa-gahu henuailala, au ga-hagahuaidu nia waahale mo ono daangada.

46:9  Goodou gi-hagadaba-ina nia hoodo gii-llele digaula mo nia waga heebagi hongo-henua gi-haga-mmaanege adu! Goodou hagau-ina-adu digau-dauwa: Go nia daane o Ethiopia mo Libya, e-kae nadau mee abaaba, mo digau puu amu maalei o Lydia ala koia e-modogologolo huoloo.’ ”

46:10  Dangi-nei go di laangi o Tagi go Yihowah di Gowaa Aamua: dangi-nei gei Mee gaa-tala di hui gi ono hagadaumee, dangi-nei gei Mee ga-hagaduadua ono hagadaumee. Dana hulumanu-dauwa gaa-gai digaula mo-di inu nia dodo digaula, gaa-dae-loo gi dono maaluu. Dangi-nei di Tagi go Yihowah ga-daaligi nia daangada i-bahi-i-ngeia i-taalinga di monowai Euphrates.

46:11  Goodou go digau Egypt, goodou hula gi Gilead, halahala-ina godou wanii! Godou wanii huogodoo gu ono hadinga ai, gu-dei di-mee e-mee di-hagahumalia goodou ai.

46:12  Nia henua gu-longono i-di godou langaadia. Nia daangada huogodoo gu-iloo bolo goodou gu-tangitangi. Tangada-dauwa guu-hinga gi-hongo tangada, meemaa dogolua guu-tinga gi-hongo di gelegele.

46:13  Di madagoaa o Nebuchadnezzar, di king o Babylonia, ne-haneia belee heebagi gi Egypt, gei Dimaadua ga-helekai-mai,

46:14  “Goodou hagailoo-ina gi-lodo nia waahale o Egypt, ala go Migdol, Memphis mo Tahpanhes: ‘Goodou hagatogomaalia gii-bida abaabalia goodou, idimaa godou mee huogodoo gaa-lawa i tauwa!

46:15  Di-godou balu-god go Apis la-ne-aha dela guu-hinga gi-lala? Dimaadua ne-haga-hinga di-maa gi-lala!’

46:16  Godou gau-dauwa gu-tibatiba gu-tingatinga gi-lala, digaula e-helehelekai i nadau mehanga boloo, ‘Hagalimalima! Gidaadou gaa-llele gi-daha mo nia hulumanu-dauwa o tadau hagadaumee!’

46:17  “Goodou wanga-ina di ingoo hoou gi-di king Egypt, dela bolo ‘Tangada Hagalongoaa Hagamuamua, dela digi Kae dono Madagoaa Humalia’.

46:18  Au go Dimaadua di Gowaa Aamua, go di King. Au go di God e-mouli. Be di hai o-di Gonduu Tabor dela koia e-nnoo-nua i-nia gonduu huogodoo, mo-di Gonduu Carmel dela i-nua-loo di moana, dela gadoo nia mahi o tangada dela e-heebagi-adu gi goodou.

46:19  Goodou digau Egypt gi-hagatogomaalia gi-di lahi gi-daha mo godou henua! Memphis gaa-hai di anggowaa, gaa-hai di lohongo nia hale mooho, tangada e-mee di-noho i-golo ai.

46:20  Egypt e-hai gadoo be tamaa-kau humalia, dela gaa-dogo ginai di lamu poisin mai baahi ngeia.

46:21  Ana gau-dauwa ala ne-hui ga-deai nadau hagamaamaa ai, gadoo be nia damaa-kau. Digaula digi heebagi gi nadau hagadaumee, huogodoo gu-hagammuu gi-tua guu-hula guu-llele. Di laangi e-mmade-ai digaula la-gu-dau-mai, di laangi e-kili-ai digaula gi-daha.

46:22  Egypt guu-lele gi-daha guu-hai dono lee be-di lee o-di gihaa lodo-geinga, i-di madagoaa di buini-dauwa o dono hagadaumee gaa-dau mai. Digaula e-heebagi i-nia dalai gadoo be nia daane hele laagau,

46:23  e-haga-huaidu di waa-laagau. Nadau gau-dauwa e-dogologowaahee e-deemee di-dau, e-koia e-logowaahee i-nia lamu ‘locust’.

46:24  Digau Egypt guu-tee, guu-noho i-lala nia mogobuna o digau baahi-ngeia. Au go Dimaadua ne-helekai.”

46:25  Dimaadua di Gowaa Aamua, di God o Israel, ga-helekai, “Au ga-hagaduadua Amon, di balu-god o Thebes, mo Egypt mo ana balu-god huogodoo mo ana king huogodoo. Au ga-hagi-anga di king Egypt mo digau huogodoo ala e-hagadagadagagee gi mee,

46:26  gaa-wanga gi digau ala e-hiihai e-daaligi digaula gii-mmade, ang-gi Nebuchadnezzar, di king o Babylonia mo ana gau-dauwa. “Malaa, nomuli-hua di-mee deenei, gei nia daangada gaa-mee di-noho labelaa i Egypt, gadoo be-di madagoaa i-mua. Au go Dimaadua ne-helekai.

46:27  “Agu daangada-nei, goodou hudee mmaadagu, goodou go digau Israel huogodoo, goodou hudee noho mmaadagu. Au ga-haga-dagaloaha goodou gi-daha mo tenua mogowaa, gi-daha mo tenua nogo lawalawa-iai goodou. Goodou ga-lloomoi gi-di-godou henua donu, gaa-noho i-di aumaalia. Goodou gaa-too gi-daha mo nia haingadaa, tangada e-haga-madagudagu goodou ai.

46:28  Au ga-hanadu gi goodou, ga-haga-dagaloaha goodou. Au ga-haga-huaidu nia henua huogodoo ala ne-duwwe ginai goodou nonua, gei Au hagalee e-daaligi goodou. Au hagalee e-dumaalia-adu gi goodou gii-tanga gi-daha mo-di hagaduadua, gei dogu madagoaa ma-ga-hagaduadua goodou, gei Au e-hai-hegau gi-di-mee dela e-donu. Au go Dimaadua ne-helekai.”

Chapter 47

47:1  I-mua-hua di king o Egypt dana dauwa gi Gaza, Dimaadua ga-helekai-mai gi-di-au i-di hai o Philistia.

47:2  Mee gu-helekai, “Mmada, nia wai gu-uwa-aga i-baahi la-ngeia, gaa-mmidi gadoo be-di monowai ne-hai di labagee, ga-mmidi-mai ga-hagaholi nia mee huogodoo, nia waahale mo ono daangada no-lodo. Nia daangada ga-wwolowwolo di hagamaamaa, nia daangada huogodoo i henuailala ga-tangitangi huoloo.

47:3  Digaula ga-longono-ginaadou nia lee llele o-nia wae-hoodo, nia lee kulumaa, nia lee o-nia duaadiga ala e-haluihalulu. Nia maadua gu-hagalee lloomoi gi nadau dama, nadau lima gu-maanuhia.

47:4  Di madagoaa e-daaligi-ai Philistia la-gu-dau-mai. Di madagoaa gu-dau-mai belee daa gi-daha mo Tyre mo Sidon nia hagamaamaa huogodoo ala e-dubu i-golo. Ko-Au go Dimaadua, dela ga-daaligi digau Philistia huogodoo, ala ne-lloomoi i tongotai o Crete.

47:5  Di lodo-huaidu huoloo guu-tale ang-gi digau Gaza, gei digau Ashkelon guu-noho deemuu. E-waalooloo behee tangitangi o digau Philistia ala ma-gaa-dubu i-golo?

47:6  “Goodou e-wwolowwolo boloo, ‘Tulumanu-dauwa a Dimaadua! E-waalooloo behee do hahaangi? Hana gi do lohongo, hagamolooloo i-golo!’

47:7  Malaa, dehee dana hai e-hagamolooloo-ai gi-lala, i dagu wanga dagu moomee gi mee e-hai? Au gu-haganoho a-mee bolo e-heebagi gi Ashkelon mono daangada huogodoo ala e-noho-adu gi tongotai.”

Chapter 48

48:1  Aanei nia mee a Dimaadua di Gowaa Aamua, go di God o Israel, ne-helekai i-di hai o Moab, “Hagaaloho dangada digau Nebo, di-nadau waahale gu-mooho! Kiriathaim guu-kumi, dono waahale mau-dangihi la-gu-meheu gi-lala, ono daangada gu-langaadia.

48:2  Di madamada o Moab la-gu-hagalee. Nia hagadaumee guu-kumi Heshbon, gu-haganoho di-nadau hai huaidu belee hula e-oho Moab. Di waahale go Madmen gaa-noho deemuu, di llongo-dauwa gaa-hana ga-heebagi gi digaula.

48:3  Digau Horonaim ga-wwolowwolo, ‘Taaligi dangada! Di hagammaa gi-daha!’

48:4  “Moab gu-hagammaa gi-daha. Goodou hagalongo gi-nia lee dama ala e-tangitangi.

48:5  Goodou gi-longono digaula ala e-wawwawe i-taalinga di ala dela e-hanadu gi-nua gi Luhith, e-tangitangi lodo-huaidu i-hongo di ala dela e-haneia gi-lala gi Horonaim.

48:6  Digaula ga-helekai: ‘Llele hagalimalima gi-daha gi-mouli goodou! Goodou llele giibeni gadoo be nia ‘donkey’-lodo di anggowaa!’

48:7  “Moab, goe e-hagadagadagagee-hua gi do maaloo mo o maluagina, gei dolomeenei, gei Au gaa-kumi goe. Dau balu-god go Chemosh gaa-kae gi-daha ngaadahi mo ana gau aamua mo ana gau hai-mee-dabu.

48:8  Deai dahi waahale e-mee di-duuli ia gi-daha mo-di hagammaa deenei ai. Nia gowaa maalama mono henua bapaba ga-mooho. Ma ko-Au go Dimaadua ne-helekai.

48:9  Hagaduulia-aga di hadu daalunga o Moab, mee gu-hoohoo ga-hagammaa gi-daha. Ono waahale ga-mooho gi-daha, ga-deai tangada e-mee di-noho i-golo ai.”

48:10  (Di halauwa gii-hai gi tangada dela ma-ga-hagalee hagagila-aga tegau o Dimaadua mai i-lodo dono manawa hagatau! Di halauwa gii-hai gi tangada dela ga-hagalee haga-abo dana hulumanu e-daaligi-ai tangada!)

48:11  Dimaadua ga-helekai, “Mai i-mua gei Moab nogo moholo i-daha mo nia haingadaa, gei hagalee e-lahi gi-daha. Moab le e-hai gadoo be nia waini ala e-dugu i-lodo di-loaabi dugu-waini hagalee e-dui gi-lodo tuai loaabi dugu-waini, gei ono kala la-hagalee huli-gee, e-kala i-nia madagoaa huogodoo.

48:12  “Malaa, di madagoaa ga-dau-mai belee hagau-mai agu daangada e-dui gi-daha Moab, gadoo be nia waini. Digaula gaa-dui nia waini gi-daha mo nia-loaabi dugu-waini, ga-hahaahi nia loaabi ala nogo dugu-ai nia waini.

48:13  Gei digau Moab gu-deai di-nadau hagadagadagagee gi di-nadau balu-god Chemosh ai, gadoo be digau Israel ala gu-hagalee gana gi Bethel, di balu-god dela e-hagadonu go digaula.

48:14  “Nia daane o Moab, goodou e-aha ala e-maanadu bolo goodou digau dauwa humalia, e-maaloo i-lodo tauwa?

48:15  Moab mo ono waahale gu-mooho gi-daha, ana dama-daane ala koia e-mmaadanga la-gu-daaligi gi-daha. Ma ko-Au go di king, go Dimaadua di Gowaa Aamua, dela ne-helekai.

48:16  Di haadanga-balua o Moab gu-hoohoo-mai, dono mooho gi-daha la-gu-limalima-hua dono daumai.

48:17  “Goodou manawa-gee gi tenua deelaa, goodou ala e-hoohoo gi-di gowaa deelaa, goodou huogodoo ala gu-iloo ono humalia. Goodou gi-helekai, ‘Dono mogobuna e-dagi ana mee la-gu-mooho, ono madamada mo ono mogobuna la-gu-hagalee!’

48:18  Goodou ala e-noho i Dibon, tooia gi-lala mo godou lohongo aamua, noho gi-hongo nia gelegele gohu. Tangada dela e-oho Moab la-gu-i-kinei, gaa-oho gi-lala godou abaaba hale-dauwa.

48:19  Goodou ala e-noho i Aroer, tuu i taalinga nia ala gi-talitali. Heeu gi digau ala e-llele gi-daha, be di-maa di-aha dela guu-hai.

48:20  Digaula ga-helekai, ‘Moab la-gu-mooho, goodou gi-manawa gee ginai. Mee gu-haga-langaadia. Hagadele-ina i taalinga di Monowai Arnon bolo Moab la-gu-mooho!’

48:21  “Di hagiaga guu-dae gi-nia waahale ala i-lodo nia gowaa baba aanei: Holon, Jahzah, Mephaath,

48:22  Dibon, Nebo, Beth=Diblathaim,

48:23  Kiriathaim, Beth=Gamul, Beth=Meon,

48:24  Kerioth, mo Bozrah. Di hagiaga gu-dau-mai gi-lodo nia waahale huogodoo o Moab, nia waahale hoohoo-mai mo mogowaa.

48:25  Di maaloo o Moab la-gu-mooho, dono mogobuna la-gu-hagalee. Au go Dimaadua ne-helekai.”

48:26  Dimaadua ga-helekai, “Hagalibaliba-ina Moab, idimaa mee gu-de-hagalongo-mai gi-di-Au. Moab gaa-bida hagadagadaga-hua i-lodo ono lualua, gei nia daangada ga-gadagada gi mee.

48:27  Moab, goe e-langahia do gadagada gi digau Israel? Goodou guu-hai digaula haga-huaidu gadoo be digau ala ne-kumi madalia digau huaidu.

48:28  “Goodou ala e-noho i Moab, hula gi-daha mo godou waahale! Hula, noho i taalinga nia gonduu. Heia goodou be nia mwuroi ala e-hai nadau waehongo i-nia ngudu nia bongoo hadu.

48:29  Moab e-hagalaamua ia! Au gu-longono di-nadau hagalaamua, mo-di-nadau hagamuamua, e-helekai bolo ginaadou hua digau mugi-nua.

48:30  Au go Dimaadua e-iloo di-nadau hagamuamua. Nadau leelee hagapuu la ono hadinga ai, mo nadau mee ne-hai la-hagalee waalooloo.

48:31  Deenei-laa, au ga-dangidangi huoloo gi digau huogodoo o Moab, mo digau ala i-lodo Kir=Heres.

48:32  Au koia ga-dangidangi gi digau Sibmah, laa-hongo digau Jazer. Di waahale o Sibmah, goe e-hai gadoo be-di laagau-‘grape’ dela ono manga gu-tomo-adu laa-hongo di Tai Mmade, guu-dau-adu-loo gi Jazer. Gei dolomeenei o huwa-laagau mo oo ‘grape’ o-di madagoaa o-di mahanahana la-gu-mooho.

48:33  Di manawa lamalia mo tenetene gu-daa gi-daha mo tenua gelegele humalia o Moab, gei Au guu-tai nia waini ala e-hali-mai i-di gowaa dela e-dagadagahi-ai nia waini, tangada e-hai ana waini ai, be e-wolowolo tenetene.

48:34  “Digau Heshbon mo Elealeh e-wwolowwolo, nadau lee wolowolo guu-dau-adu-loo gi Jahaz. Digau Zoar gu-longono labelaa, gei gu-longono-adu labelaa gi Horonaim mo Eglath=Shelishiya. Gei-ogo di monowai o Nimrim gu-bagu-ia labelaa.

48:35  Gei Au gaa-dugu di hai tigidaumaha dudu o digau Moab ala e-hai i-lodo nadau gowaa hai-daumaha, mo nadau tigidaumaha ang-gi nadau balu-god. Au go Dimaadua ne-helekai.

48:36  “Ogu lodo e-manawa-gee huoloo gi Moab mo digau Kir=Heres, e-hai gadoo be tangada dela e-daahili nia daahili manawa-gee, idimaa ana mee huogodoo ala e-hai-mee ginai la-gu-hagalee.

48:37  Digaula huogodoo guu-dahi nia ngaahulu o nadau libogo, mo-di dahi gi-daha nia ngaahulu nadau ngudu, mo-di teletele nadau lima, gei digaula huogodoo gu-ulu nadau gahu lodo-huaidu.

48:38  I-hongo nia hale o digau Moab, mo i-nia gowaa dagadagabuli-ai nia daangada, nia mee i-golo ai, deelaa-hua go di tangi wawe, idimaa au gu-haga-mooho Moab gadoo be-di loaabi-hadu dela gu-hagalee e-hiihai ginai tangada.

48:39  Moab gu-meheu gi-daha! Goodou gi-wwolowwolo! Moab gu-langaadia. Mee gu-mooho, nia henua huogodoo ala e-hoohoo-anga gu-gadagada huoloo. Au go Dimaadua ne-helekai.”

48:40  Dimaadua guu-hai dana hagababa bolo dahi henua ga-haneia gi-hongo o Moab, gadoo be-di ‘eagle’ ma-gaa-holo ono bakau gi-daha.

48:41  Nia waahale mono abaaba dauwa la-gaa-kumi. Di laangi deelaa, gei digau-dauwa o Moab ga-mmaadagu be-di ahina dela gu-dau-mai di mmae o dono haanau.

48:42  Moab ga-mooho gi-daha, gu-hagalee e-dau bolo tenua, idimaa i mee dela nogo de-hagalongo-mai gi-di-Au.

48:43  Di mee hagamadagudagu dangada, nia luwa, mo nia hele gu-talitali digau Moab. Dimaadua ne-helekai.

48:44  Maa tangada ma-ga-madagu bolo ia gaa-hana gaa-lele le e-doo gi-lodo di luwa, gei tangada ma-ga-gaga-aga gi-daha mo-di luwa deelaa, gei-ia e-hele gi-nia hele, idimaa Dimaadua guu-lawa-ai di-haganoho di madagoaa dela e-haga-huaidu Moab.

48:45  Digau ala gaa-llele gi-daha mo nia haingadaa e-halahala nadau mouli gi Heshbon, di waahale dela nogo dagi go di king Sihon i-mua, gei di waahale deelaa le e-ulaula. Di ahi guu-dudu nia gowaa mo i-hongo nia gonduu, nia gowaa digau Moab, digau ala e-hiihai huoloo gi tauwa.

48:46  E-huaidu ang-gi digau Moab! Digau ala e-daumaha ang-gi Chemosh la-gu-hagammaa gi-daha, gei nadau dama-daane mo dama-ahina gu-lawalawa guu-lahi gi-daha.

48:47  Gei nia laangi ala ma-ga-loomoi, Dimaadua ga-hagagila-aga labelaa Moab. Aanei nia mee ala nogo helekai-ai Dimaadua bolo e-hai ang-gi Moab.

Chapter 49

49:1  Deenei di-mee a Dimaadua ne-helekai-ai i Ammon: “Aahee nia daane o Israel? E-hai behee, gu-deai tangada e-dahi e-duuli tenua digaula ai? Ma ne-aha dela digaula gu-dumaalia gi digau ala e-daumaha gi Molech gi-daangia tenua o-di madawaawa Gad?

49:2  Di madagoaa ga-dau-mai, gei Au gaa-hai nia daangada o-di waahale damana o Ammon go Rabbah gi-longono di lee o tauwa, gei ga-mooho mo ono guongo gaa-wwele gaa-tugi-loo i-lodo di gelegele, gei Israel gaa-kae tenua deelaa mai i digau ala ne-kae di-maa.

49:3  Digau Heshbon, goodou gi-wwolowwolo! Ai gu-mooho gi-daha! Nia ahina o Rabbah, goodou gi-tangitangi. Goodou gi-ulu godou gahu manawa-gee mo-di tangi wawwawe. Lellele hagaligiligi i godou uli godou gai. Di-godou balu-god Molech la-gaa-kae, mo ana gau hai-mee-dabu mo ana gau aamua.

49:4  Dehee tadinga o godou daangada dee-manawa-dahi ala e-hagapuu? Godou mahi ga-odi-mai. Goodou e-aha ala e-hagadagadagagee gi godou mahi, gei e-helekai bolo deai tangada e-mee di-heebagi-adu gi goodou ai?

49:5  Au ga-dugu-adu gi godou nua di-mee e-haga-mmaadagu goodou mai i-nia baahi huogodoo. Goodou huogodoo ga-lellele gi-daha, tangada-nei mo tangada-nei gaa-lele e-halahala dono mouli, gei tangada e-haga-dagabuli-mai godou gau-dauwa ai.

49:6  “Nomuli, gei Au ga-haga-gila-aga labelaa Ammon. Au go Dimaadua ne-helekai.”

49:7  Deenei di-mee a Dimaadua di Gowaa Aamua, ne-helekai-ai i Edom: “E-hai behee? Digau Edom gu-de-langahia-e-ginaadou nadau hagamaanadu humalia? Nadau dagi digi hagi-anga gi digaula nadau mee ala belee hai? Nadau kabemee la-guu-odi gi-daha?

49:8  Digau o Dedan, goodou huli gi-muli, llele, pala hagammuni. Au ga-haga-huaidu di madawaawa Esau, idimaa di madagoaa gu-dau-mai e-hagaduadua digaula.

49:9  Di madagoaa-hua nia daangada gaa-hadi nadau huwa-laagau, digaula gaa-dugu nadau huwa dulii i-di gili di laagau. Di madagoaa digau gaiaa ga-lloomoi i-di boo, digaula ga-kae-hua go nadau mee ala e-hiihai ginai.

49:10  Gei Au gu-hagadina hagatau di madawaawa Esau, ge gu-gidee-Au nia gowaa ala e-pala-ai digaula, gei digaula ga-deemee di-pala hagammuni labelaa. Nia daangada huogodoo o Edom la-ga-hagammaa gi-daha, deai tangada e-dubu ai.

49:11  Dugua-mai godou dama nadau maadua ai la-gi-di-Au, gei Au ga-benebene digaula. Godou ahina nadau lodo ai e-mee di-gana-mai gi-di-Au.

49:12  “Maa digau ala hagalee tau e-hagaduadua e-inu i-di ibu o-di hagaduadua, goodou e-hagamaanadu bolo goodou hagalee e-hagaduadua? Deeai, goodou e-hai-loo gi inu di ibu deelaa!

49:13  Au gaa-hai dagu hagamodu bolo di waahale Bozrah gaa-hai di anggowaa, gaa-hai di gowaa e-mmaadagu-ai nia daangada, nia daangada ga-gadagada ga-haga-ingoo di-maa bolo di ingoo gu-haga-halauwa, gei nia guongo ala e-hoohoo gi mee la-ga-mooho gaa-hana-hua beelaa. Au go Dimaadua ne-helekai.”

49:14  Gei au ga-helekai, “Edom, au gu-gaamai dagu helekai i-baahi o Dimaadua. Mee gu-hagau-mai dana dangada hagau belee hagi-anga gi-nia henua bolo gi-haga-dagabuli-ina nadau llongo-dauwa gi-hagatogomaalia e-heebagi-adu gi-di-goe.

49:15  Dimaadua gaa-hai goe gi-bagege, deai tangada e-hagalabagau goe ai.

49:16  Goe gu-halahalau go do hagamuamua. Deai tangada e-madagu i-di-goe ai, be dau hai dela e-hagamaanadu. Goe e-noho i-lodo nia hadugalaa, i tomo nia gonduu nnoonua, gei ma e-aha maa goe e-noho i-di gowaa i-nua-loo be i-lodo nia hadugalaa gadoo be-di ‘eagle’, Dimaadua ga-laha-ia goe gi-lala. Dimaadua ne-helekai.”

49:17  Dimaadua ga-helekai, “Di mooho dela ma-gaa-tale gi Edom la-koia e-maaloo dangihi huoloo, dela gaa-hidi-ai digau ala ma-ga-taele i-baahi di-maa ga-homouli huoloo, ga-mmaadagu.

49:18  Be di hai dela ne-hai ang-gi Sodom mo Gomorrah i-di madagoaa o meemaa mo nia waahale ala e-hoohoo gi-golo la-gu-mooho gi-daha, deelaa di hai dela gaa-hai ang-gi Edom. Deai tangada e-mee di-noho i-di gowaa deelaa ai. Au go Dimaadua ne-helekai.

49:19  Au ga-haneia gadoo be-di laion dela ma-ga-haneia gi-daha mo-di waa-laagau i taalinga di Monowai Jordan, ga-hanadu gi-nua gi-di gowaa geinga humalia, gei Au ga-hanimoi gaa-hai digau Edom gi-limalima gii-llele gi-daha mo di-nadau gowaa. Nomuli, gei Au ga-hilihili-aga dagu dangada e-dagi tenua deelaa. Koai dela e-mee di-tau-mai gi-di-Au?! Koai dela e-hagamahi bolo e-heebagi-mai gi-di-au?! Di tagi koai dela e-mee di-hai-baahi mai gi-di-Au?!

49:20  Deenei-laa, goodou hagalongo gi dagu mee dela gu-haganoho belee hai ang-gi Edom, mo dagu hagamaanadu dela gaa-hai gi-nia daangada o-di waahale Teman. Nadau dama ga-dadaia gi-daha, nia daangada huogodoo ga-mmaadagu huoloo.

49:21  Di madagoaa o Edom ma-gaa-doo gi-lala, e-halulu-loo gi-nua ga-hagangalua henuailala hagatau, gei nia daangada ga-wwolowwolo, nia lee digaula ga-longono-adu loo gi-di Malua o Aqaba.

49:22  Nia hagadaumee ga-heebagi gi Bozrah gadoo be-di ‘eagle’ ma-gaa-holo ono bakau gi-daha, ga-hagadaha-ia gi-lala gi-hongo dana mee dela e-gai. I-di laangi deelaa, gei di llongo-dauwa o Edom ga-mmaadagu huoloo, gadoo be-di ahina ma-gaa-mmae ga-haanau.”

49:23  Aanei nnelekai Dimaadua i Damascus: “Nia daangada ala i-lodo nia waahale Hamath mo Arpad guu-noho dee-baba mo-di lodo-huaidu, idimaa i-di nadau longono di longo huaidu. Di noho dee-baba huoloo guu-tale gi digaula gadoo be-di tai dela ga-mmidi-aga gi-hongo digaula, ga-deemee di-noho i-di aumaalia.

49:24  Digau Damascus gu-paagege ge gu-mmaadagu huoloo, guu-hula guu-llele gi-daha mo nadau hale. Digaula guu-noho mmae gei gu-haingadaa gadoo be-di mmae o-di ahina haanau.

49:25  Di waahale humalia gei e-noho tenetene i-nia madagoaa huogodoo la-guu-hai di anga-henua, tangada e-noho i-golo-ai.

49:26  I-di laangi deelaa, gei ana dama-daane ga-daaligi gii-mmade i-hongo nia ala o-di waahale deelaa, gei ana gau-dauwa huogodoo gu-hagammaa gi-daha.

49:27  Gei Au gaa-dudu nia abaaba o Damascus, gaa-dudu labelaa nia hale-king o Benhadad. Au go Dimaadua di Gowaa Aamua ne-helekai.”

49:28  Aanei nnelekai o Dimaadua i-di madawaawa Kedar, mo nia dama-henua ala e-noho i-lala nia mogobuna o Hazor, dela ne-hagamagedaa go Nebuchadnezzar di king o Babylonia, “Heebagi ang-gi digau Kedar gi-hagammaa-ina gi-daha di madawaawa dela e-noho i bahi-i-dua!

49:29  Goodou kae-ina nadau hale-laa, mo nadau buini-manu, mo nia gahu-bontai, mo nia mee huogodoo ala i-lodo nadau hale-laa. Kae-ina nadau ‘camel’, helekai gi-nia daangada boloo, ‘Di-mee haga-madagudagu dangada gu-haganiga mai i godou daha!’

49:30  “Digau Hazor, Au go Dimaadua e-hagailoo hagalliga-adu gi goodou gii-llele hagamogowaa gi-daha, gii-pala hagammuni. King Nebuchadnezzar o Babylonia gu-haganoho dana hai-adu gi goodou, malaa, aanei ana helekai,

49:31  ‘Lloomoi! Gidaadou ga-heebagi gi digau ala bolo ginaadou e-noho humalia deai di haingadaa ai! Di waahale digaula dono abaaba ai, gei hagalee e-loogu, dono hagaloohi ai.’

49:32  “Goodou kae-ina nia ‘camel’ mo nia hagabuulinga manu digaula! Gei au ga-hagabagi digaula gi-nia gowaa huogodoo, ala go digau ala ne-tuu nia ngaahulu nadau libogo gii-podo, gei gaa-wanga di haingadaa gi-hongo digaula mai i-nia baahi huogodoo.

49:33  Hazor gaa-hai di anggowaa gaa-hana-hua beelaa, gaa-hai di gowaa e-noho-ai nia manu lodo-geinga-‘jackal’. Tangada e-mee di-noho i-golo ai. Au go Dimaadua ne-helekai.”

49:34  I-muli-hua Zedekiah ne-hai di king i Judah, Dimaadua di Gowaa Aamua, ga-helekai-mai gi-di-au i Elam.

49:35  Mee ne-helekai, “Au ga-daaligi digau puu amu maalei huogodoo ala e-hai Elam gi-maaloo.

49:36  Au gaa-hai dagu madangi gii-gono gi Elam mai i-nia gowaa huogodoo, Au ga-hagabagi ana daangada gi-nia henua huogodoo, gei deai tenua dela hagalee e-hula ginai ana daangada ai.

49:37  Au gaa-hai digau Elam gi-mmaadagu i ono hagadaumee ala e-hiihai e-daaligi digaula. I-lodo dogu hagawelewele, gei Au ga-hagammaa gi-daha digau Elam, ga-hagau agu llongo-dauwa gi-heebagi gi digaula, gaa-dae-loo gi dagu hagammaa digaula gi-daha.

49:38  Au ga-daaligi nadau king mo nadau gau aamua, ga-haganoho-aga dogu lohongo king i-di gowaa deelaa.

49:39  Ga-nomuli, gei Au ga-haga-gila-aga labelaa digau Elam. Au go Dimaadua ne-helekai.”

Chapter 50

50:1  Aanei nnelekai Dimaadua ne-hagi-mai gi-di-au i-di waahale aamua go Babylon mo ono daangada:

50:2  “Hagailoo-ina ang-gi nia henua di longo deenei! Gi-hagadele-ina! Ilihia di buu gi hagailoo-ina di longo deenei! Hudee hagammuni-ina! Babylon guu-doo gi-lala! Dana balu-god Marduk gu-meheu gi-daha! Nia balu-ieidu o Babylon gu-haga-langaadia, ono ada hagagulugulua gu-meheu gi-daha.

50:3  “Dahi henua mai baahi laa-ngeia gu-hanimoi e-heebagi gi Babylonia, gaa-hai di gowaa deelaa gii-hai di anggowaa. Nia daangada mo nia manu gaa-llele gi-daha. Tangada gaa-noho i-golo ai.”

50:4  Dimaadua ga-helekai, “Di madagoaa e-dau-mai, nia daangada Israel mo Judah ga-lloomoi mo-di tangitangi, e-halahala-mai Au, go di-nadau God.

50:5  Digaula ga-heheeu di ala dela e-hana gi Zion, gei digaula gaa-hula. Digaula gaa-hai di-nadau hagababa mai gi-di-Au, hagalee-loo e-oho.

50:6  “Agu daangada e-hai gadoo be nia siibi ala e-hagau go tangada hagaloohi gi-nngalanngala i domo nia gonduu. Digaula gu-heehee-hua i-lodo nia gonduu, gei digaula gu-de-iloo di-nadau gowaa.

50:7  Digaula ga-hai-baahi ginai digau ala ma-ga-gidee digaula. Nadau hagadaumee ga-helekai, ‘Digaula guu-hai di huaidu ang-gi Dimaadua, malaa, tadau mee ala ne-hai la-hagalee e-hala. Nadau maadua-mmaadua nogo hagadonu huoloo Dimaadua, digaula ne-belee manawa-dahi huoloo ang-gi Mee.’

50:8  “Digau Israel, goodou llele gi-daha mo digau Babylonia! Goodou hula gi-daha mo tenua deenei! Goodou hula matagidagi gi-daha!

50:9  Au ga-hagangalua-aga nia henua maaloo ala i-bahi-i-ngeia gi-loomoi e-heebagi gi Babylonia. Digaula ga-hagagoolongo ga-heebagi gi tenua deenei ga-hagamagedaa. Digau puu amu maalei modogologolo hagalee-loo e-tiba-gee.

50:10  Babylonia la-gaa-kae gi-daha ono goloo, gei digau ala e-kae nia goloo gaa-kae nia goloo huogodoo ala e-hiihai ginai. Au go Dimaadua ne-helekai.”

50:11  Dimaadua ga-helekai, “Digau o Babylonia ala ne-oho dogu henua, goodou e-manawa lamalia gei e-tenetene, e-heehee be-di kau dela e-dagadagahi ana huwa-laagau, e-hai be-di hoodo dela ma-ga-leelee.

50:12  Gei di-godou waahale aamua gaa-tee, ga-haga-langaadia. Babylonia gaa-hai tenua dela kaedahi hagalee e-dau i-lodo nia henua huogodoo, gaa-hai tenua maangoo, gaa-hai di anggowaa dela ono wai no-lodo ai.

50:13  Idimaa go dogu hagawelewele, tangada e-mee di-noho i Babylon ai. Ma-ga-mooho, gei nia daangada huogodoo ala ga-taele i-baahi di-maa ga-homouli huoloo, ge mmada haga-goboina ginai.

50:14  “Goodou go digau puu amu maalei, goodou hagagoolongo gi-heebagi gi Babylon, gi-haganiga mai daha. Goodou gi-puina godou amu maalei huogodoo gi Babylon, idimaa mee guu-hai dana mee huaidu mai gi-di-Au, go Dimaadua.

50:15  Goodou gi-wwolowwolo heebagi i-di gili di waahale hagatau! Dolomeenei Babylon guu-kumi. Dono abaaba gu-mooho gu-meheu gi-lala. Au e-tala di hui gi digau Babylon. Gii-tala di hui gi digaula, gi-heia gi digaula be di-nadau hai dela ne-hai gi digau ala i-golo.

50:16  Hudee dumaalia gi-nia lii-laagau gi-dogia i-lodo tenua deelaa, gei hudee dumaalia gii-hadi taugai i-golo. Digau huogodoo mai i-daha ala e-noho i-golo ga-mmaadagu i-nia llongo-dauwa ala e-heheebagi i-golo, gei digaula gaa-hula gi nadau guongo.”

50:17  Dimaadua gu-helekai “Digau Israel guu-hai gadoo be nia siibi, ala gu-waluwalu go nia laion, gu-lellele-adu gi-nia gowaa ala i-golo. Matagidagi, digaula gu-heebagi ginai di king o Assyria, nomuli di King Nebuchadnezzar o Babylonia ga-gadigadi nia iwi digaula.

50:18  Idimaa go di hai deenei, Au go Dimaadua di Gowaa Aamua, go di God o Israel, ga-hagaduadua di King Nebuchadnezzar mo dono henua, gadoo be dagu hai ne-hagaduadua di king o Assyria.

50:19  Au ga-laha-mai digau Israel gi di-nadau henua donu. Digaula gaa-gai nia meegai ala e-tomo i-di Gonduu Carmel mo nia gowaa ala i Bashan. Digaula gaa-gai nia huwa-laagau huogodoo i nadau hiihai mai i-nia laagau ala e-tomo-aga i tenua go Ephraim mo Gilead.

50:20  I-di madagoaa dela ga-dau-mai, deai di hala e-gila-aga i Israel ai, gei di huaidu i Judah ai, idimaa Au ga-dumaalia gi digau ala ne-wanga nadau mouli ko-Au. Au go Dimaadua ne-helekai.”

50:21  Dimaadua ga-helekai, “Heebagi ang-gi digau Merathaim mo Pekod. Daaligidia gii-mmade, ohaa digaula, heia agu mee huogodoo bolo gi-heia. Au go Dimaadua ne-helekai.

50:22  Di lee o tauwa gu-longono i-lodo tenua deelaa, digau gu-lauwa dogologo i-di gowaa deelaa.

50:23  Babylonia guu-tugi henuailala gi-di haamaa, gei dolomeenei gei dana haamaa gu-mooho! Nia henua huogodoo gu-homouli huoloo gi-di mee dela ne-hai gi tenua deelaa.

50:24  Babylonia, goe nogo heebagi-mai gi-di-Au, gei goe guu-doo gi-lodo di hele dela ne-hai ko-Au adu gi-di-goe, ma e-aha maa goe digi iloo.

50:25  Au guu-huge di gowaa dela e-dugu-ai agu goloo-heebagi, i-lodo dogu hagawelewele gei Au ga-daa gi-daha nia maa. Idimaa, Au go Tagi go Dimaadua di Gowaa Aamua, dagu hegau e-hai gii-hai i Babylonia.

50:26  Heebagi ginai mai i-nia baahi huogodoo, hugee nia gowaa ala e-dugu-ai nia golee laagau! Goodou hagabae-ina gi-nua nia goloo ala ne-kumi go goodou, gii-hai be-di hagabae huwa-laagau! Goodou hagammaa-ina tenua deelaa, hudee dugu dahi mee i-golo!

50:27  Goodou daaligidia digau-dauwa digaula huogodoo! Daaligidia digaula gii-mmade! E-koia gu-huaidu ang-gi di gau o Babylonia! Di madagoaa e-hagaduadua digaula la-gu-dau-mai!”

50:28  (Nia daangada guu-llele gi-daha mo Babylonia guu-llele gi Jerusalem gi-mouli ginaadou, digaula ga-helekai i-di hai o Dimaadua, dela go tadau God, bolo Mee guu-tala di hui gi digau Babylonia i-nia mee digaula ala ne-hai i-lodo dana Hale Daumaha).

50:29  “Goodou helekai gi digau puu maalei gi-heebagi gi Babylon. Hagau-ina digau huogodoo ala gu-iloo di hai-hegau gi-di maalei. Goodou haganiga-ina di gili di waahale, hudee heia dahi dangada gii-hana gi-daha. Goodou heia gi digaula nia mee huogodoo be nadau hai ne-hai gi digau ala i-golo, idimaa nadau mee huaidu la-ne-hai-mai gi-di-Au, go di God Dabu o Israel, i-lodo nadau hagamuamua.

50:30  Deenei-laa, ana dama-daane ga-dadaaligi i-hongo nia ala o-di waahale, gei ana gau-dauwa ga-hagammaa gi-daha i-di laangi deelaa. Au go Dimaadua ne-helekai.

50:31  “Babylonia, goe guu-honu i-di hagaamu goe, dela gaa-hidi-iei Au, go Tagi, go Dimaadua di Gowaa Aamua, ga-hai-baahi-adu gi-di-goe! Dogu madagoaa belee hagaduadua goe la-guu-dau-mai.

50:32  Do henua hagamuamua gaa-tiba gaa-hinga gi-lala, gei tangada e-hagamaamaa goe ai. Au gaa-dudu o waahale mono mee huogodoo ala i-lodo, mo nia mee ala i dono baahi la-ga-mooho.”

50:33  Dimaadua di Gowaa Aamua ga-helekai, “Digau Israel mo Judah guu-noho i-lala di hagaduadua. Digau ala ne-kumi digaula le e-hagaloloohi digaula huoloo, hagalee dumaalia gi digaula gi-maahede.

50:34  Gei tangada dela e-mee di-daa digaula le e-mahi, dono ingoo go Yihowah di Gowaa Aamua. Go Mee hua dela e-bida hagamodongoohia-aga nadau donu, gaa-dugu-mai di noho moholo gi henuailala, ga-haga-haingadaa digau o Babylonia.”

50:35  Dimaadua ga-helekai, “Babylonia gii-made! Ana daangada la-gii-mmade, mo ana dagi huogodoo mo ana gau kabemee.

50:36  Ana soukohp tilikai huogodoo gii-mmade, digaula guu-laba huoloo! Ana gau-dauwa gii-mmade, digaula gu-mmaadagu huoloo!

50:37  Goodou gi-ohaa-ina nadau hoodo mo nadau waga hongo henua huogodoo! Ana gau-dauwa huogodoo ala ne-hui la-gii-mmade, digaula gu-paagege huoloo! Goodou gi-ohaa nadau goloo hagalabagau huogodoo, goodou gi-ohaa gi-kae-ina gi-daha.

50:38  Di uwa gi-hudee doo i tenua deelaa, gi-haga-maangoo-ina nia monowai llauehe. Babylonia go tenua balu-ieidu hagamadagudagu dangada, ala nogo halahalau nia daangada.

50:39  “Deenei-laa, Babylon gaa-hai di gowaa e-noho-ai nia paana lodo-geinga mono buudii lodo-geinga, gaa-hai di lohongo o-nia manu mamaangi ala e-gulugulua. Nia daangada gu-hagalee e-noho i-golo, gaa-hana-hua beelaa.

50:40  Go di hai la-hua be-di hai dela ne-hai gi Sodom mo Gomorrah, deelaa di hai gaa-hai gi Babylon, i dagu haga-huaidu digaula mo nia waahale ala nogo hoohoo-mai gi meemaa. Nia daangada ga-hagalee e-noho i-golo. Au go Dimaadua ne-helekai.

50:41  “Nia daangada ga-loomoi i-nia waahale i-baahi ngeia, tenua maaloo dangihi mogowaa-loo. Nia king e-logo gu-hagatogomaalia gi tauwa.

50:42  Digaula e-gaamai nadau maalei mono hulumanu, digaula e-hagamuamua, hagalee dumaalia. Nia lee digaula e-hai gadoo be-di lee bagibagia o-di moana, i-di nadau hula i-nia hoodo. Nia llongo-dauwa digaula gu-togomaalia di-heebagi gi Babylon.

50:43  Di king o Babylonia gu-longono-ia di longo, gei ono lima gu-maanuhia, de-nnoomaalia mo-di mmae guu-noho i ono lodo, gadoo be-di mmae o-di ahina ma-ga-haanau.

50:44  “Au ga-haneia gadoo be-di laion dela ma-ga-haneia gi-daha mo-di waa-laagau i taalinga di Monowai Jordan, ga-hanadu gi-nua gi-di gowaa geinga humalia, Au go Dimaadua ga-hanimoi gaa-hai digau o Babylon gii-llele gi-daha mo di-nadau waahale. Gei dagu dagi dela ne-hilihili gaa-dagi tenua. Koai dela e-mee di-tongaadahi mai gi-di-Au?! Koai dela e-mee di-heebagi mai gi-di-Au?! Koai di tagi dela bolo ia e-hai-baahi mai gi-di-Au?!

50:45  Deenei-laa, goodou hagalongo gi dagu hai dela gu-haganoho e-hai gi-di waahale o Babylon mo dagu hagamaanadu dela e-hai gi ana daangada. Nia dama digaula ga-dadaia gi-daha, gei nia daangada huogodoo ga-mmaadagu huoloo.

50:46  Di madagoaa o Babylon ma-gaa-doo gi-lala, le e-halulu e-hagangalua henuailala hagatau, gei nia lee o-nia daangada e-dele-adu-loo gi-nia henua ala i-golo.”

Chapter 51

51:1  Dimaadua ga-helekai, “Au ga-hagau-mai dagu madangi maaloo gi Babylon mo ono daangada.

51:2  Au ga-hagau agu gau mai i-daha e-haga-huaidu Babylon, gadoo be-di madangi ma-ga-ili gi-daha nia geinga maangoo. Di madagoaa di laangi deelaa ma-ga-dau-mai, digaula ga-heebagi i-nia baahi huogodoo, gaa-hai tenua deelaa gii-hai di anggowaa.

51:3  Goodou hudee dumaalia gi digaula e-puu nadau maalei, be e-ulu nadau gahu-dauwa. Goodou daaligidia nia dama-daane digaula! Goodou hagammaa-ina gi-daha di llongo-dauwa hagatau!

51:4  Digaula ga-lauwa gaa-mmade i-hongo nia ala o di-nadau waahale.

51:5  Au go Dimaadua, go di God di Gowaa Aamua, hagalee e-kili gi-daha Israel mo Judah, ma e-aha maa meemaa guu-hai di huaidu mai gi-di-Au, dela go di God Dabu o Israel.

51:6  Llele gi-daha mo Babylon! Goodou llele halahala godou mouli! Goodou hudee heia gi-daaligi i-di huaidu o Babylon. Dolomeenei gei Au gaa-tala di hui gi ono hangaahai, ga-hagaduadua gi-tau-anga.

51:7  Babylon la-guu-hai gadoo be-di ibu goolo i dogu lima, dela e-haga-libaliba henuailala hagatau. Nia henua gu-inu di waini deenei, gei gu-boiboi.

51:8  Babylon gu-limalima-hua dono kumi, gu-mooho! Goodou tangitangi gi mee! Halahala-ina nia wanii ala e-hagahili ono gowaa ne-moholehole, holongo gei mee gaa-hili.

51:9  Digau mai i-daha ala nogo noho i-golo ga-helekai, ‘Gimaadou gu-hagamada belee hagamaamaa Babylon, gei gu-deai di madagoaa ai. Gidaadou ga-hagatanga gaa-hula gi tadau henua donu. Dimaadua gu-hagaduadua Babylon gi ono mahi hagatau, gu-hagammaa gi-daha hagatau.’ ”

51:10  Dimaadua gu-helekai, “Agu daangada, goodou wwolowwolo boloo, ‘Dimaadua gu-hagamodongoohia-aga madau donu. Gidaadou gaa-hula, ga-hagi-anga gi digau Jerusalem di-mee a Dimaadua, go tadau God dela ne-hai.’ ”

51:11  Dimaadua gu-haga-ngalua-aga nia king o Media, idimaa go Mee e-hiihai e-hagammaa gi-daha Babylonia. Deenei di hai dela e-tala di hui di haga-mooho o dana Hale Daumaha. Nia dagi o-nia buini-dauwa ga-hagadaba, “Goodou olohia godou daalo! Hagatogomaalia-ina godou mee abaaba!

51:12  Heia di hagailoo e-daamada tauwa gi nia abaaba o Babylon. Hagamaaloo-ina-aga digau ala e-hagaloohi, hagaloohia gi-humalia nia gowaa huogodoo! Haganoho-ina gi-humalia digau dauwa ala e-pala hagammuni e-kana nia hagadaumee!” Dimaadua gu-hagagila dana mee ne-helekai-ai bolo gaa-hai gi digau Babylon.

51:13  Tenua deelaa le e-logo ono monowai mo nia goloo hagalabagau, gei dono madagoaa gu-hagaodi, dono uga mouli la-guu-tuu guu-modu.

51:14  Dimaadua di Gowaa Aamua, gu-hagababa i dono mouli deeodi bolo Ia ga-laha-mai ana daangada dogologowaahee belee dauwa gi Babylonia, digaula e-logo gadoo be nia lamu-‘locust’, digaula ga-wwolowwolo i-di nadau aali.

51:15  Dimaadua ne-hai henuailala gi ono mogobuna, dono iloo-mee dela ne-hai henuailala, ge ne-haga-moholo di langi.

51:16  Mee e-helekai-hua, gei nia wai ala i-baahi i-nua nia gololangi gu-ngoloolo, Mee e-gaamai nia gololangi mai i-nia mada o henuailala, gei Mee gu-haganoho dana ila bolo e-dabadaba i-lodo di uwa, ga-hagau dana madangi mai i-lodo dana gowaa dugu-mee.

51:17  Di madagoaa nia daangada gaa-mmada gi-di-mee deenei, gei digaula guu-hai be digau gu-boiboi, gu-de-longono gi-daha. Digau ala e-hai nadau ada-god ga-dei nadau hagadagadagagee ai, idimaa nia balu-god digaula ala e-hai, la-nia mee tilikai, ge dei nadau mouli ai.

51:18  Digaula gu-dei ono hadinga ai, nia daangada gu-ginagina huoloo i-nia maa. Nia maa ga-hagammaa gi-daha i-di madagoaa Dimaadua ga-hanimoi e-hagi-aga digaula.

51:19  Di God o Jacob la-hagalee e-hai be digaula; go Mee ne-hai nia mee huogodoo, gei ne-hili-aga Israel belee hai ana daangada donu. Yihowah di Gowaa Aamua, deenei dono ingoo.

51:20  Dimaadua ga-helekai, “Babylonia, koe go dagu haamaa, agu goloo-dauwa. Au ne-hai-hegau goe belee oho nia waahale mono henua,

51:21  nia hoodo mo digau ala e-llele nia maa, nia waga heebagi hongo-henua mo digau ala e-dele nia maa,

51:22  nia daane mono ahina, digau lligi mo digau mmaadua, nia dama-daane mono dama-ahina,

51:23  digau hagaloohi siibi mo nadau siibi huogodoo, digau dogi hadagee mo nadau hoodo haga-maluu gelegele, nia dagi mo nadau gau aamua huogodoo.”

51:24  Dimaadua ga-helekai, “Goodou gaa-mmada gi dagu hai dela e-hui gi Babylonia mo ana daangada huogodoo i nadau huaidu huogodoo ala ne-hai gi Jerusalem.

51:25  Babylonia, goe e-hai gadoo be-di gonduu dela e-oho henuailala hagatau, gei Au go Dimaadua go do hagadaumee. Au gaa-kumi goe, gaa-wanga gi-lodo di gelegele, gaa-hai goe gii-hai nia lehu.

51:26  Deai dahi hadu i-nia hadu o oo hale ala ne-mooho e-mee di-hagaduu labelaa ai. Goe gaa-hai di anggowaa gaa-hana-hua beelaa. Au go Dimaadua ne-helekai.

51:27  “Heia di hagailoo e-daamada tauwa! Ili-hia di buu gi-longono nia henua huogodoo! Hagatogomaalia-ina nia henua e-dauwa gi Babylonia! Hagailoo-ina gi nia henua o Ararat, Minni, mo Ashkenaz gi-heebagi-anga. Goodou hilihilia di tagi gii-hana i-mua di llongo-dauwa. Goodou gaamai godou hoodo gii-hai be-di llongo lamu-‘locust’.

51:28  Goodou hagatogomaalia-ina nia henua huogodoo gi-heebagi gi Babylonia. Hagailoo-ina gi-nia king o Media mo nadau dagi mo nadau gau aamua, mo nia llongo-dauwa o-nia henua huogodoo ala e-dagi go digaula.

51:29  Henuailala gu-ngalungalua ge gu-bolebole, idimaa Dimaadua gu-hagagila dana mee ne-haganoho e-hai Babylonia gii-hai di anga-henua, tangada e-noho i-golo ai.

51:30  Digau dauwa o Babylonia gu-hagalawa di-nadau hai-heebagi, gu-noho-hua i-lodo di-nadau abaaba-dauwa. Digaula gu-mmaadagu huoloo, gu-paagege be nia ahina. Nia bontai di abaaba o-di waahale la-gu-mooho gi-lala, gei nia hale la-gu-ulaula.

51:31  Digau kae hegau, tei gii-hana e-haga-iloo gi-di king o Babylonia bolo dana waahale la-gu-mooho mai i-nia baahi huogodoo.

51:32  Nia hagadaumee guu-kumi di monowai, gu-lloomoi laa-hongo, guu-dudu nia gowaa-dauwa. Digau dauwa guu-boo nadau lodo i-di nadau mmaadagu.

51:33  Digi duai, gei nia hagadaumee ga-daaligi digaula, ga-dagadagahi digaula gadoo be nia golee i-hongo di gowaa dagadagahi ‘wheat’. Au go Dimaadua di Gowaa Aamua, go di God o Israel ne-helekai.”

51:34  Di king o Babylonia gu-tuu-lua Jerusalem guu-gai. Mee guu-dui gi-lala di waahale gadoo be-di loaabi hadu, guu-holo di-maa gadoo be-di manu gai-dangada. Mee guu-kae ana mee ala ne-hiihai ginai, gaa-kili gi-daha nia mee ala ne-dubu i-golo.

51:35  Digau Zion gi-helekai, “Babylonia gi-kae-ina di hagaduadua o taaligi dangada a-mee dela ne-hai-mai gi gidaadou!” Digau Jerusalem gi-helekai, “Babylonia gii-dau ang-gi di hagaduadua a-mee dela ne-hai-mai gi gidaadou!”

51:36  Gei Dimaadua ga-helekai gi digau Jerusalem, “Au ga-hegeege godou donu, gaa-hai godou hagadaumee gii-hui nadau mee ala ne-hai-adu gi goodou. Au ga-hagabagu nia monowai o Babylonia, gaa-hai nia monowai digaula gi-maangoo.

51:37  Tenua deelaa ga-hagabae goloo hale mooho, ga-noho-ai nia manu lodo-henua, gaa-hai di gowaa mmada ginai hagahomouli, tangada e-mee di-noho labelaa i-golo ai, digau huogodoo ala gaa-mmada gi-di maa le e-mmaadagu huoloo.

51:38  Digau o Babylonia gu-wwolowwolo gadoo be nia laion, gei e-nguunguu gadoo be nia dama-laion lligi.

51:39  E-hai behee, digaula e-hagagailaa? Au gaa-hai dagu hagamiami gi digaula, gaa-hai digaula gi-libaliba gi-tenetene digaula, gei digaula gaa-kii ga-hagalee e-aala-aga.

51:40  Au gaa-lahi digaula ga-daaligi gadoo be nia dama-siibi, nia kuudi, mono siibi-daane. Au go Dimaadua ne-helekai.”

51:41  Dimaadua ga-helekai i Babylon, “Di waahale dela e-hagahagaamu go henuailala hagatau guu-kumu! Gu-mmaadagu huoloo go digau Babylon i-mua nia henua huogodoo!

51:42  Di moana guu-gaga-aga gi-hongo Babylon, guu-gahu tenua gi-nia beau.

51:43  Nia waahale guu-hai di gowaa e-mmaadagu-ai, gei guu-hai be-di anggowaa ono wai ai, tangada e-mee di-noho i-golo ai, be e-taele-laalaa.

51:44  Au ga-hagaduadua Bel go di balu-god o Babylonia, gaa-hai a-mee gi-huge-aga nia goloo ne-gaiaa. Nia henua ga-hagalee e-dadaumaha labelaa gi mee. “Nia abaaba o Babylon gu-mooho gi-lala.

51:45  Digau Israel, goodou llele gi-daha mo-di gowaa deelaa! Llele gi-daha mo dogu hagawelewele damana gi-mouli goodou.

51:46  Goodou hudee lodo-paagege be e-mmaadagu i-nia longo ala e-longo-ai goodou. I-lodo nia ngadau huogodoo, gei nia longo e-kila-aga bolo taaligi dangada e-hai i-lodo tenua deelaa, be go nia king e-heheebagi i nadau mehanga.

51:47  Di madagoaa ga-dau-mai, gei Au ga-hagaduadua nia balu-ieidu o digau o Babylonia gei tenua hagatau deelaa ga-haga-langaadia, gei ono daangada ga-daaligi gi-daha.

51:48  Nia mee huogodoo i henuailala mo i-di langi ga-wwolowwolo tenetene huoloo i-di madagoaa Babylonia ma-gaa-kumu go digau ala ga-lloomoi i-baahi ngeia belee oho di-maa.

51:49  Babylonia dela ne-hidi-ai di mmade gi digau o henuailala hagatau, gei dolomeenei gei Babylonia gaa-doo gi-lala, idimaa dono daaligi digau Israel dogologowaahee. Au go Dimaadua ne-helekai.”

51:50  Dimaadua ga-helekai gi ana daangada ala i Babylonia, “Goodou gu-dagaloaha gi-daha mo-di made! Deenei-laa, hula! Hudee duai! Ma e-aha maa goodou e-mogowaa-loo i-di godou henua donu, goodou gi-maanadu-ina Au, go Dimaadua, mo Jerusalem.

51:51  Goodou e-helekai boloo, ‘Gimaadou gu-langaadia gei guu-tee, di-madau hagamaamaa ai, idimaa digau tuadimee guu-kae nia gowaa dabu ala i-lodo di Hale Daumaha.’

51:52  Deenei-laa, di madagoaa ga-dau-mai, gei Au ga-hagaduadua nia ada-balu-ieidu huogodoo o Babylonia, gei-ogo nia lee mmae o digau ala ne-lauwa ga-longono gi-nua i-nia gowaa huogodoo i-lodo tenua deelaa.

51:53  Ma e-aha maa Babylonia guu-mee di-gaga gi-nua gi-di langi, ga-haga-duu-aga dana abaaba dauwa i-golo, gei Au ga-hagau agu daangada gi ohaa-ina di-maa. Au go Dimaadua ne-helekai.”

51:54  Dimaadua ga-helekai, “Hagalongo gi-nia lee dangada e-tangitangi i Babylonia, e-tangi i-di mooho dela gu-i-lodo tenua.

51:55  Au gaa-oho Babylonia, gaa-hai a-mee gii-noho deemuu. Di llongo-dauwa ga-ulu-mai gi-lodo gadoo be nia beau, gei e-heebagi mo-di hagalongoaa-loo gi-nua.

51:56  Digaula ne-lloomoi belee oho Babylonia, ono gau-dauwa guu-kumu, nadau maalei gu-mooho. Au go di God dela e-hagaduadua di huaidu, gei Au ga-hagaduadua Babylonia gi-tau-anga gi ana hangaahai.

51:57  Au ga-haga-libaliba nia dagi aamua, digau kabemee, nia dagi mo digau-dauwa. Digaula gaa-kii ga-hagalee-loo e-aala-aga labelaa. Au go di King dela ne-helekai, dogu ingoo go Yihowah, di Gowaa Aamua.

51:58  Nia abaaba mau-dangihi o Babylon ga-meheu gi-lala gi-hongo di gelegele. Ono abaaba ala e-duuduu i-nua guu-dudu gii-wwele. Nia moomee o-nia henua gu-ono hadinga ai. Nadau moomee llauehe ala nogo hai la-ga-hagalee. Au go Dimaadua ne-helekai.”

51:59  Tangada hagamaamaa di King Zedekiah, dela go Seraiah, tama-daane ni Neriah, dela dono damana-madua go Mahseiah. I-lodo di haa ngadau o Zedekiah nogo king i Judah, Seraiah gaa-hana gi Babylonia madalia a-mee, gei au gaa-wanga gi mee agu helekai.

51:60  Au gaa-hihi gi-lodo di beebaa di hai o-di mooho dela gaa-dau gi Babylonia, mo nia mee huogodoo i Babylonia.

51:61  Au ga-helekai gi Seraiah, “Do madagoaa ma-gaa-dau i Babylonia, gei goe daulia gi-nua gi nia daangada nia mee huogodoo ala guu-lawa di-hihi gi kinei.

51:62  Nomuli, gei goe gi-dalodalo boloo, ‘Meenei Dimaadua, Goe gu-helekai bolo Goe gaa-oho di gowaa deenei, gi-deai di-mee mouli e-mee di-noho i-golo ai, de-hilihili be tangada be-di manu, gei di-maa gaa-hai-hua di anggowaa gaa-hana-hua beelaa.’

51:63  Seraiah, do madagoaa dela guu-lawa-ai di-dau di beebaa deenei gi nia daangada, gei goe gi-noodia di beebaa deenei gi-di gili di hadugalaa, hudua gi-lodo di Monowai Euphrates,

51:64  mo-di helekai, ‘Deenei di hai dela gaa-hai gi Babylonia: mee ga-abulu gi-lala ga-hagalee e-manawa-aga labelaa, idimaa go di hagaduadua dela ga-dugu-mai go Dimaadua gi-hongo digaula.’ ” Nnelekai Jeremiah guu-odi i-kinei.

Chapter 52

52:1  Zedekiah gu-madalua maa-dahi ono ngadau i-di madagoaa a-mee ne-hai di king o Judah, gei mee nogo dagi i Jerusalem i-nia ngadau e-madangaholu maa-dahi. Tinana o-maa go Hamutal, tama-ahina ni Jeremiah tangada mai i-di waahale go Libnah.

52:2  King Zedekiah guu-hai ana mee huaidu ang-gi Dimaadua, e-hai gadoo be nia hai di king go Jehoiakim nogo hai.

52:3  Dimaadua gu-hagawelewele gi digau Jerusalem mo Judah dela di mee a-Mee gaa-kili digaula gi-daha mo ono mua. Gei Zedekiah ga-hai-baahi gi Nebuchadnezzar di king aamua o Babylonia.

52:4  Malaa, gei Nebuchadnezzar mo ana gau-dauwa huogodoo gu-lloomoi, ga-heebagi gi Jerusalem i-di madangaholu laangi o-di madangaholu malama o-di hiwa ngadau nogo king-ai Zedekiah. Digaula gaa-hau nadau waahale-laa i-daha mo-di waahale, gaa-hau di-nadau abaaba e-duuli haganiga di-maa,

52:5  ge e-hagaloohi di abaaba duuli gaa-dae-loo gi-di madangaholu maa-dahi ngadau o King Zedekiah.

52:6  I-di hiwa laangi o-di haa malama o-di ngadau hua deelaa, gei tau-hiigai damanaiee gu-huaidu huoloo. Nia daangada gu-nadau meegai ne-dubu belee gai-ai.

52:7  Di madagoaa deelaa, gei di abaaba o-di waahale gu-mooho. Ma e-aha maa digau o Babylonia gu-duuli di waahale, gei-ogo digau-dauwa o-di waahale gu-ulu gi-daha guu-llele i-di boo deelaa. Digaula guu-hula i taalinga di hadagee o-di king, e-ulu gi-daha mo-di waahale i-di bontai i-mehanga nia abaaba e-lua, e-llele-adu hagammuni i-di ala dela e-hana gi-di gowaa mehanga gonduu o Jordan.

52:8  Gei digau-dauwa o Babylonia gu-waluwalu di King Zedekiah gaa-kumi a-mee i-lodo di gowaa maalama dela e-hoohoo gi Jericho, gei nia gau-dauwa a-maa huogodoo gu-diiagi a-mee guu-hula guu-llele.

52:9  Zedekiah gaa-lahi gi-mua di King Nebuchadnezzar dela i-lodo di guongo go Riblah, i-lodo tenua go Hamath, gei deelaa di gowaa Nebuchadnezzar ne-gabunga a-mee.

52:10  Gei deelaa di gowaa di king Nebuchadnezzar ne-hai bolo nia dama-daane Zedekiah e-daaligi gii-mmade i-mua nia golomada o-maa. Digau aamua o Judah gu-daaligi labelaa i-di gowaa deelaa.

52:11  Nomuli, gei Nebuchadnezzar ga-helekai labelaa bolo gi-kaabe-ina nia golomada o Zedekiah gi-daha, ga-lawalawa a-mee gi-nia daula-baalanga, gaa-lahi gi Babylonia. Zedekiah gaa-noho i-lodo di hale-galabudi gaa-dae-loo gi dono made.

52:12  I-di madangaholu laangi o-di lima malama go-di madangaholu maa-hiwa ngadau nogo king-ai go Nebuchadnezzar i Babylonia, gei-ogo Nebuzaradan go tangada hagamaamaa o-di king ge tagi-dauwa aamua, ga-ulu gi-lodo o Jerusalem.

52:13  Mee gaa-dudu di Hale Daumaha o Dimaadua, di hale o-di king, mo nia hale digau aamua o Jerusalem.

52:14  Gei ana gau-dauwa gaa-oho gi-lala di abaaba di waahale deelaa.

52:15  Gei Nebuzaradan gaa-lahi nia daangada ala ne-dubu gi Babylonia, go digau ngalua dau-donu, mo digau ala ne-llele gi-di king o Babylonia i-mua.

52:16  Gei mee ga-dumaalia gii-hunu daangada hagaloale ala nadau gowaa ai, bolo gi-noho-hua i-golo, gi-ngalua i-lodo nia hadagee-waini mo nia gowaa maalama ala i-golo.

52:17  Digau o Babylonia gaa-oho hagaligiligi nia duludulu ne-hai gi-nia baalanga-mmee o-di Hale Daumaha, mo nia kulumaa baalanga-mmee ala i-lodo di Hale Daumaha, mo-di monowai baalanga-mmee damanaiee, gei digaula guu-kae nia baalanga-mmee huogodoo gi Babylonia.

52:18  Digaula guu-kae labelaa nia daawolo mono mee dugu-lehu, go nia mee e-haga-madammaa-ai di gowaa dudu-tigidaumaha, mono goloo hai-mee ala e-hai-hegau i-nia malama, nia boolo ala e-hai-hegau e-haga-hau nia dodo hai-tigidaumaha, nia boolo ala e-dudu nia ‘incense’ i ono lodo, mo nia hagadilinga goloo ala ne-hai gi-nia baalanga-mmee, ala nogo hai-hegau i-lodo di Hale Daumaha.

52:19  Digaula guu-kae nia mee huogodoo ala ne-hai gi-nia goolo mo nia mee ala ne-hai gi-nia silber, ngaadahi mono boolo lligi mono baalanga dugu malala-gaa no-lodo, nia boolo e-dugu-ai nia dodo tigidaumaha, nia mee dugu-lehu, nia lohongo nia malama, nia boolo ala e-dugu-ai ‘incense’ dela e-dudu, mo nia boolo ala e-hai-hegau-ai nia waini o tigidaumaha.

52:20  Nia goloo huogodoo ala ne-hai gi-nia baalanga-mmee go di King Solomon ang-gi di Hale Daumaha: go nia duludulu e-lua, nia kulumaa mo-di monowai damanaiee, mo nia kau-daane e-madangaholu maa-lua ala e-aamo di-maa, la-nogo daamaha huoloo, e-deemee di-pauna.

52:21  Nia duludulu e-lua le e-hai be-di mee e-dahi, di mee e-dahi e-madalua maa-hidu piidi di looloo, gei e-madangaholu maa-walu piidi bungubungu. Di maadolu le e-dolu ‘inch’, gei e-bongoo no-lodo. Di mada gi-nua tuludulu le e-iai di baalanga-mmee i-di ulu di-maa, e-looloo i-nia piidi e-hidu mo-di baahi, di ulu gi-nua tuludulu e-humu gi-nia ada golee-‘pomegranate’ e-haganiga di ulu nia maa. Nia mee huogodoo aanei ne-hai labelaa gi-nia baalanga-mmee.

52:22  Nia duludulu e-lua le e-hai be-di mee e-dahi, di mee e-dahi e-madalua maa-hidu piidi di looloo, gei e-madangaholu maa-walu piidi bungubungu. Di maadolu le e-dolu ‘inch’, gei e-bongoo no-lodo. Di mada gi-nua tuludulu le e-iai di baalanga-mmee i-di ulu di-maa, e-looloo i-nia piidi e-hidu mo-di baahi, di ulu gi-nua tuludulu e-humu gi-nia ada golee-‘pomegranate’ e-haganiga di ulu nia maa. Nia mee huogodoo aanei ne-hai labelaa gi-nia baalanga-mmee.

52:23  Nia golee-‘pomegranate’ aanei la nia mee e-lau, gei tangada ma-ga-mmada-aga i-lala la nia mee e-matiwa maa-ono.

52:24  Nebuzaradan tagi-dauwa aamua gaa-lahi labelaa tagi aamua hai-mee-dabu go Seraiah, mo Zephaniah dela go togolua dagi hai-mee-dabu, mo digau aamua dogodolu o-di Hale Daumaha.

52:25  Mai i-lodo di waahale, mee guu-lahi tagi aamua o digau-dauwa o Judah, mo nia daangada hagamaamaa dogohidu a-di king ala nogo noho hua-i-golo i-lodo di waahale deelaa, mo togolua dagi dauwa dela e-madamada humalia nia beebaa o digau-dauwa aalaa, mo nia daane hagalabagau modoono.

52:26  Nebuzaradan gaa-lahi digaula gi-di king Babylonia dela e-noho i-lodo di waahale go Riblah,

52:27  i-lodo tenua go Hamath. Deelaa di gowaa di king ne-haga-mamaawa digaula, ga-daaligi gii-mmade i-golo. Deenei di hai o digau Judah ala guu-lahi haga-mogowaa gi-daha mo nadau guongo.

52:28  Deenei di hulu-dangada di King Nebuchadnezzar o Babylonia ne-lawalawa gaa-lahi gi-daha mo Judah: I-di hidu ngadau o dono king, gei mee guu-lahi ana gau mai Judah e-dolu-mana ge-madalua maa-dolu-(3,023).

52:29  I-di madangaholu maa-walu ngadau o Nebuchadnezzar nogo king, gei mee guu-lahi digau e-walu-lau-motolu maa-lua-(832) mai Jerusalem,

52:30  gei di madalua maa-dolu ngadau, gei Nebuzaradan guu-lahi ana daangada e-hidu-lau-madahaa maa-lima-(745), ga-haga-puni-mai digau huogodoo ala ne-lahi gi-daha mo di-nadau henua donu digau e-haa-mana ge-ono-lau-(4,600).

52:31  I-di ngadau dela ne-hai-a Evil=Merodach gi king i Babylonia, mee e-dumaalia gi-di king o Judah go Jehoiachin i dana haga-mehede-mai a-mee i-lodo dono galabudi. Di mee deenei ne-hai i-di madalua maa-lima laangi o-di madangaholu maa-lua malama o-di motolu maa-hidu ngadau i-muli di lahi o Jehoiachin gi Babylonia.

52:32  Evil=Merodach gu-dumaalia gi Jehoiachin, ga-haga-noho-aga a-mee gi dana lohongo mada-aamua i-nia lohongo o-nia king ala i-golo ala ne-hagabagi dalia a-mee gi Babylonia.

52:33  Jehoiachin gu-dumaalia ginai gi-daa-ina gi-daha ono goloo-galabudi, gaa-noho gi teebele o-di king i-di waalooloo o dono mouli.

52:34  Nia laangi dagidahi huogodoo, gei mee guu-hai dono hagamaamaa teenedi e-hui ana mee ala e-hiihai ginai, i-di waalooloo o dono mouli.