Kapingamarangi - Luke

Chapter 1

1:1  Dogu ihoo hagaaloho Theophilus. Digau dogologo ne-hagamahi e-hihi nnelekai o nia mee ala gu-kila-aga i tadau baahi.

1:2  Digaula ne-hihi nia mee ala gu-modongoohia gidaadou mai i-baahi ginaadou ala ne-mmada gi-nia mee aanei i-taamada, gei gu-agoago nia maa gi-nia daangada.

1:3  Meenei Theophilus, dogu mmada gi-humalia gi-nia mee haga-lligi huogodoo mai taamada, gei au gu-maanadu bolo ma koia e-humalia, maa au gaa-hihi nnelekai haga-modongoohia adu gi-di-goe i-nia mee ala ne-hai.

1:4  Au e-hai di mee deenei, gi-modongoohia-e-goe di tonu dogomaalia o-nia mee huogodoo ala guu-lawa dau iloo.

1:5  Di madagoaa Herod nogo king i-Judea, tangada hai-mee-dabu i-golo dono ingoo go Zechariah, tangada ni di hagabuulinga gau hai-mee-dabu a Abijah. Dono lodo go Elizabeth, tangada labelaa ni-di madawaawa digau hai-mee-dabu.

1:6  Meemaa e-mouli humalia i-mua o God, e-haga-kila-aga nia helekai mo nia haganoho huogodoo Dimaadua.

1:7  Meemaa nau dama ai, idimaa, Elizabeth di ahina e-dee-huwa, meemaa gu-mmaadua.

1:8  Dahi laangi hua, Zechariah nogo hai ana hegau dabu i-lodo di Hale Daumaha.

1:9  I-di hagatau dela nogo daudali go digau hai-mee-dabu, mee ne-hilihili belee dudu ana ‘incense’ i-hongo di gowaa dudu tigidaumaha lolo-kala, mee ga-ulu gi-lodo di Hale Daumaha Dimaadua.

1:10  Di hagabuulinga dangada i-malaelae, e-dalodalo i-di madagoaa tigidaumaha ‘incense’ e-dudu.

1:11  Tangada di-langi Dimaadua ga-haga-gida eia gi Zechariah, e-duu i-di baahi gau-donu, di gowaa dudu-tigidaumaha.

1:12  Di madagoaa Zechariah ne-gidee tangada di-langi deelaa, geia gu-homouli, gu-madagu huoloo.

1:13  Gei tangada di-langi ga-helekai, “Zechariah, hudee madagu! Au dalodalo la-guu-kila i-baahi o God. Doo lodo go Elizabeth ga-haanau dana dama-daane, gei goe wanga-ina dono ingoo go John.

1:14  Goe ga-tenetene ge noho i-di aumaalia, gei digau dogologo ga-tenetene gi-di haanau o-maa.

1:15  Mee ga-aamua i-mua o God. Mee hagalee hai gii-tale gi-nia waini be gi-nia dagaao maaloo. Taamada mai di haanau o-maa, mee gaa-honu i-di Hagataalunga-Dabu.

1:16  Mee ga-laha-mai labelaa digau Israel dogologo gi Dimaadua, go di-nadau God.

1:17  Mee gaa-hana i-mua o-Mee, e-maaloo gei e-mahi be soukohp Elijah. Mee ga-hagahumalia mehanga nia damana mo nadau dama, gaa-huli digau de-hagalongo gi-di tonu, mee gaa-hai nia daangada o Dimaadua gi-togomaalia gi Mee.”

1:18  Zechariah ga-helekai gi tangada di-langi, “Dehee dagu hai e-iloo bolo nia helekai aanei le e-donu e-kila-aga i dogu baahi, gimaua mo dogu lodo la-gu-mmaadua?”

1:19  Tangada di-langi ga-helekai, “Au go Gabriel. Au e-duu i-mua nnadumada o God. Au ne-hagau-mai belee haga-iloo-adu di longo humalia deenei.

1:20  Gei goe dela hagalee hagadonu dagu haga-iloo dela ga-gila-aga i-di madagoaa hai-donu. Idimaa goe digi hagadonu, gei goe ga-deemee di-leelee, gaa-dae-loo gi-di laangi dela e-gila-aga dagu hagababa deenei adu gi-di-goe.”

1:21  Di madagoaa deelaa, gei digau dogologo e-talitali Zechariah, e-gologolo be mee e-aha dela e-duai mai-i-lodo.

1:22  Di madagoaa a mee ne-ulu-mai gi-daha mo di Hale Daumaha, gei mee gu-deemee di-leelee. Digaula gu-iloo-hua bolo mee guu-mmada gi-di-mee i-lodo di Hale Daumaha. Gei mee e-duu i-mua digaula e-aau ono lima bolo ia e-helekai, gei mee gu-deemee di-helekai.

1:23  Di madagoaa ne-lawa ana hegau i-lodo di Hale Daumaha, gei Zechariah gaa-hana gi dono guongo.

1:24  Muli-mai-hua, dono lodo go Elizabeth gu-hai-dama, gaa-noho-hua i-lodo dono hale i-nia malama e-lima.

1:25  Mee ga-helekai, “Deenei di hai o Dimaadua ne-hagamaamaa au dolomeenei, i dono daa gi-daha dogu haga-langaadia i-baahi nia daangada!”

1:26  Di madagoaa Elizabeth ne-hai-dama nia malama e-ono, gei God ga-hagau-mai tangada di-langi Gabriel gi tama-waahale Nazareth i Galilee,

1:27  gi-baahi tama-ahina madammaa, dono ingoo go Mary, dela gu-hagababa ang-gi Joseph, tangada di madawaawa David.

1:28  Tangada di-langi gaa-hana gi-baahi o mee, ga-helekai, “Mary, di aumaalia gi-madalia goe! Dimaadua e-noho i do baahi gei e-haga-maluagina goe!”

1:29  Mary gu-homouli gi-nia helekai a-maa, gei gu-gologolo be nnadinga ana helekai le e-hai bolo-aha.

1:30  Tangada di-langi ga-helekai, “Mary, hudee madagu, idimaa, tumaalia o God guu-honu i do baahi.

1:31  Goe ga-hai-dama, ga-haanau tama-daane, gei goe wanga-ina dono ingoo go Jesus.

1:32  Mee ga-aamua, ga-haga-ingoo bolo Tama ni-di God-Aamua-Huoloo. Dimaadua go God ga-haga-menege-aga a-Mee gii-hai di king be dono damana go David.

1:33  Mee gaa-hai di king ni-di hagadili o Jacob, gaa-hana-hua beelaa, gei dono henua king la-hagalee haga-odi!”

1:34  Mary ga-helekai gi tangada di-langi, “Nia mee aanei e-mee di-kila-aga behee i dogu baahi, i-di-au di ahina hua e-noho madammaa?”

1:35  Tangada di-langi ga-helekai, “Di Hagataalunga-Dabu ga-hanadu gi-di-goe, gei nia mahi o God-Aamua-Huoloo ga-haga-holi goe, deenei tadinga Tama dabuaahia ga-haga-ingoo bolo Tama a God.

1:36  Maanadu-ina do dangada go Elizabeth, dela e-dugu go nia daangada bolo di ahina e-dee-huwa, gei dolomeenei gei mee gu-hai-dama, guu-ono-(6) ono malama, gei mee di ahina gu-madumadua.

1:37  Idimaa, deai di mee e-deemee di-hai go God ai!”

1:38  Mary ga-helekai, “Au di hege ni Dimaadua. Heia au gii-hai be au helekai.” Tangada di-langi ga-hagatanga gaa-hana.

1:39  Muli-hua nia mee aanei, gei Mary ga-hagalimalima gaa-hana gi tama-waahale i tenua gonduu o Judea.

1:40  Mee ga-ulu gi-lodo di hale o Zechariah, ga-hagaaloho gi Elizabeth.

1:41  Di madagoaa Elizabeth ne-longono-ia Mary e-hai dana hagaaloho, gei di tama i-lodo o mee gu-ngalungalua. Gei Elizabeth guu-honu i-di Hagataalunga-Dabu,

1:42  gaa-wolo gi-nua, “Mary, goe gu-maluagina i-baahi nia ahina huogodoo, ge gu-maluagina go di Tama dela ga-haanau kooe!

1:43  Di mee haga-goboina deenei e-aha dela e-hai-mai gi-di-au, tinana o dogu Dagi e-hanimoi e-haga-hidihidi gi dogu baahi?

1:44  Do madagoaa ne-hagaaloho-mai, gei di tama dela i ogu lodo gu-ngalungalua i dono tenetene.

1:45  E-maluagina go di ahina dela e-hagadonu bolo nia helekai Dimaadua ga-kila-aga i dono baahi!”

1:46  Mary ga-helekai, “Dogu manawa e-hagaamu Dimaadua.

1:47  Dogu mouli e-tenetene gi God, dogu Dangada Hagamouli,

1:48  i Mee dela ne-langahia dana hege dulii-loo deenei! Dolomeenei gaa-huli gi-muli, nia daangada huogodoo ga-haga-hagaamu au,

1:49  mai i-nia hagadilinga mee haga-goboina ala ne-hai go God Aamua mai gi-di-au. Dono ingoo koia e-dabuaahia.

1:50  Mee e-haga-modongoohia dono dumaalia ang-gi digau ala e-hagalaamua Ia, di adu-dangada-nei mo di adu-dangada-nei.

1:51  Mee ne-holo dono lima mogobuna gi-daha, ga-hagahuaidu nia hiihai digau huogodoo ala e-hagamuamua.

1:52  Mee ne-daa nia king ala e-hagamuamua gi-daha mo nadau lohongo, ga-haga-mmaanege-aga digau lligi.

1:53  Mee ne-haga-maaluu digau ala e-hiigai gi-nia meegai humalia, ga-hagau gi-daha digau maluagina gii-hula nadau mee e-kae ai.

1:54  Mee e-dadaahi dana hagababa ang-gi tadau maadua-mmaadua, ne-hanimoi belee hagamaamaa dana hege go Israel.

1:55  Mee e-langahia dono dumaalia ne-hai ang-gi Abraham mo ono hagadili huogodoo gaa-hana-hua beelaa.”

1:56  Mary nogo noho i-baahi Elizabeth nia malama e-dolu. Nomuli, gei mee gaa-hana gi dono hale.

1:57  Guu-dae-mai di madagoaa Elizabeth e-haanau-ai, gei mee ga-haanau dana dama-daane.

1:58  Digau ala i-baahi o mee mo ono gau gu-longono tumaalia o Dimaadua ang-gi mee, gei digaula huogodoo gu-tenetene huoloo madalia a-mee.

1:59  Nia laangi e-walu i-muli di-haanau di tama, gei digaula ga-lloomoi belee sirkumsais di tama, ge wanga di ingoo o-maa bolo Zechariah, e-haga-ingoo gi dono damana.

1:60  Tinana o-maa ga-helekai gi digaula, “Deeai, di ingoo o-maa go John.”

1:61  Digaula ga-helekai gi mee, “E-hai behee? John la-hagalee di ingoo dahi dangada i-lodo oo gau.”

1:62  Digaula ga-aau nadau lima gi tamana o tama, dehee di ingoo dela e-hiihai ginai eia e-haga-ingoo di tama.

1:63  Zechariah ga-aau ono lima gi-gaamai di lau beebaa, gaa-hihi, “Di ingoo o-maa go John.” Gei digaula huogodoo gu-goboina huoloo.

1:64  Di madagoaa-hua deelaa, gei Zechariah guu-mee di-leelee labelaa, geia ga-daamada ga-hagaamu a God.

1:65  Digau o-di gowaa deelaa huogodoo gu-uli nadau gai huoloo, gei nia longo o nia mee aanei guu-dele gi-nia madagowaa huogodoo i-hongo tenua gonduu o Judea.

1:66  Digau huogodoo ala ne-longono nia mee aanei gu-hagabaubau mo di heheeu be-di tama deenei la-gaa-hai dana-aha? Idimaa, gu-modongoohia bolo nia mogobuna o Dimaadua la-gu-i-baahi di tama deenei.

1:67  Zechariah tamana o John guu-honu i-di Hagataalunga-Dabu, ga-hagi-aga nnelekai a God:

1:68  “Gidaadou e-hagaamu Dimaadua, di God o Israel! Mee gu-hanimoi belee hagamaamaa ana dama, ge e-haga-dagaloaha digaula.

1:69  Mee ne-dugu-mai gi gidaadou Tangada Daa Hagamouli aamua o-di hagadili David, go dana dangada hai-hegau.

1:70  Mee gu-hagababa ang-gi ana soukohp dabuaahia namua,

1:71  bolo Ia gaa-daa gidaadou gi-daha mo tadau hagadaumee, mo nia mahi o digau ala e-de-hiihai-mai gi gidaadou.

1:72  Mee gu-helekai bolo Ia ga-dumaalia ang-gi tadau maadua-mmaadua, ge e-langahia dana hagababa-dabu.

1:73  Mee guu-hai dana hagamodu gi tadau damana go Abraham, gei gu-hagababa bolo Ia e-daa-mai gidaadou gi-daha mo tadau hagadaumee, ge e-dumaalia-mai gi gidaadou gi-hai-hegau ang-gi de-Ia i-tee-madagu,

1:74  Mee guu-hai dana hagamodu gi tadau damana go Abraham, gei gu-hagababa bolo Ia e-daa-mai gidaadou gi-daha mo tadau hagadaumee, ge e-dumaalia-mai gi gidaadou gi-hai-hegau ang-gi de-Ia i-tee-madagu,

1:75  bolo gi-dabuaahia gidaadou, gei gii-donu i ono mua i-nia laangi huogodoo i-di waalooloo o tadau mouli.

1:76  Goe go dagu dama ga-haga-ingoo bolo di soukohp ni God-Aamua-Huoloo, idimaa, goe gaa-hana i-mua Dimaadua, e-hagatogomaalia dono ala,

1:77  bolo goe gi-agoago gi ana daangada di hai dela e-mouli-ai digaula, mai tumaalia o nadau huaidu.

1:78  Tadau God le e-manawa-dumaalia ge e-humalia. Mee e-haga-maalama gidaadou gi-di maalama haga-mouli.

1:79  E-ina digau huogodoo ala e-noho i-lodo di malu bouli o-di made gi-di maalama mai di langi, e-dagi gidaadou i-lodo di ala o-di aumaalia.”

1:80  Di tama deelaa guu-tomo-aga dono mouli mo dono hagataalunga. Geia e-noho i-lodo di anggowaa gaa-dae-loo gi dono haga-gida ia gi digau Israel.

Chapter 2

2:1  Di madagoaa deelaa, gei di king Caesar Augustus ne-dugu dana haganoho bolo nia daangada huogodoo dono henua le e-hihi nadau ingoo.

2:2  Deenei di hihi-dangada matagidagi i-di madagoaa Quirinius nogo hai di gobinaa o Syria.

2:3  Digau huogodoo gu-haga-mmaanege gi nadau gowaa-donu, bolo gii-hihi nadau ingoo.

2:4  Joseph, tangada di hagadili o David, gu-hagatanga i-di waahale Nazareth i Galilee, gaa-hana gi Bethlehem, di waahale o David i-lodo Judea,

2:5  bolo gii-dau ia e-hihi ngaadahi mo Mary dela belee lodo gineia. Mary gu-hai-dama i-di madagoaa deelaa.

2:6  Di madagoaa meemaa e-noho i Bethlehem, gei Mary guu-dae gi dono madagoaa e-haanau-ai,

2:7  gei mee ga-haanau dana dama-daane madua, gaa-hii a-Mee gi-di gahu hii-dama, gaa-dugu gi-lodo di mee haangai-manu, idimaa, di hale noho-dangada la-gu-deeoo.

2:8  Digau hagaloohi-siibi nogo hagaloohi nadau siibi i-di boo i lodo henua.

2:9  Tangada di-langi Dimaadua ga-haga-gida ia gi digaula, gei di maahina o Dimaadua ga-ina digaula. Digaula gu-uli nadau gai huoloo.

2:10  Gei tangada di-langi ga-helekai gi digaula, “Goodou hudee mmaadagu, au e-gowadu gi goodou di Longo-Humalia e-haga-tenetene-ai digau huogodoo.

2:11  Idimaa, Tangada Hagamouli gu-haanau adu gi goodou boo-nei i-lodo di waahale o David. Mee go Christ go Tagi!

2:12  Deenei dono haga-modongoohia: Goodou ga-gidee di tama dulii e-hii gi-di gahu hii-dama e-moe i-lodo di mee haangai-manu.”

2:13  Di madagoaa-hua deelaa, digau di-langi dogologowaahee ga-lloomoi gi-baahi tangada di-langi deelaa, ga-haga-hagaamu a God, ga-daahili:

2:14  “Hagaamuina God i-di langi i-nua-loo, gei di aumaalia i henuailala ang-gi digau ala e-manawa-lamalia ginai Mee!”

2:15  Di madagoaa digau di-langi ne-hagatanga, gaa-hula gi-di langi, gei digau hagaloohi-siibi aalaa ga-helehelekai i nadau mehanga, “Gidaadou gaa-hula gi Bethlehem, gi-gidee-gidaadou di-mee dela ne-hai, dela ne-hagi-mai go Dimaadua.”

2:16  Digaula ga-limalima gaa-hula, ga-gidee Mary mo Joseph, mo tama dulii e-moe i-lodo di mee haangai-manu.

2:17  Digau hagaloohi-siibi ne-gidee-ginaadou di tama dulii deelaa, gei digaula ga-hagamodongoohia gi Joseph mo Mary nia helekai a tangada di-langi ala ne-hai ang-gi ginaadou i-di hai o tama dulii deelaa.

2:18  Digau huogodoo ala ne-longono nia helekai digau hagaloohi-siibi, la-gu-goboina huoloo.

2:19  Mary ga-langahia nia mee huogodoo, ga-mamaanadu-hua i ono lodo.

2:20  Digau hagaloohi-siibi gaa-hula gi-muli, e-dadaahili hagaamu a God i-nia mee huogodoo ala ne-longono ginaadou, gei guu-mmada ginai, guu-kila be nnelekai tangada di-langi ala ne-helekai-ai.

2:21  Muli nia laangi e-walu, gei di tama gu-sirkumsais, gei digaula gaa-gahi di ingoo o-Maa bolo Jesus, gii-hai be-di ingoo tangada di-langi dela ne-hagaingoo a-Mee i-mua, gei Mary digi hai-dama.

2:22  I-muli di-nau haga-madammaa be di hai Nnaganoho Moses, gei Joseph mo Mary gaa-lahi di tama gi Jerusalem belee hagadabu ang-gi Dimaadua,

2:23  gadoo be nnelekai ala ne-hihi i-lodo Nnaganoho Dimaadua, “Nia ulu-mmaadua daane huogodoo le e-hagadabu ang-gi Dimaadua.”

2:24  Gei meemaa guu-kae labelaa nau mee e-tigidaumaha gii-hai be-di mee dela gu-haganoho mai baahi Dimaadua, “Nia mwuroi e-lua be nia damaa-manu-‘pigeon’ e-lua.”

2:25  Di madagoaa deelaa, gei taane dono ingoo go Simeon e-noho i Jerusalem. Mee tangada hai-mee donu, ge e-hagalaamua a God, nogo talitali di haga-mouli o Israel, gei di Hagataalunga-Dabu gu-i dono baahi.

2:26  Di Hagataalunga-Dabu la-gu-haga-donu gi mee bolo mee hagalee made i-mua dono gidee-ia di Mesaia dela ne-hagababa go Dimaadua.

2:27  Go di Hagataalunga hua deelaa ne-dagi a-mee gi-di Hale Daumaha. Di madagoaa tamana mo tinana o Jesus ne-laha-mai a-Mee gi-lodo di Hale Daumaha gii-hai be nnelekai o Nnaganoho,

2:28  Simeon gaa-daa di tama, ga-daahi, ga-danggee ang-gi God boloo,

2:29  “Meenei Dimaadua, dolomeenei Goe gu-daahi dau hagababa, gei Goe guu-mee-hua di dugu-anga dau hege gii-hana i-di aumaalia.

2:30  Au guu-mmada donu gi ogu golomada gi dau haga-mouli,

2:31  dela gu-hagatogomaalia Kooe i-mua nia daangada huogodoo.

2:32  Di maalama e-haga-modongoohia do hiihai gi digau tuadimee, ge e-gaamai do madamada gi au dama Israel.”

2:33  Tamana mo tinana o tama gu-goboina i-nia helekai a Simeon ala nogo helekai i-Mee.

2:34  Simeon ga-haga-maluagina meemaa, ga-helekai gi Mary, go tinana o Tama, “Tama deenei ne-hilihili go God belee hagahuaidu gei e-haga-mouli digau dogologo o Israel. Mee gaa-hai di haga-modongoohia mai baahi o God dela ga-helekai hai-baahi ginai digau dogologo,

2:35  ga-haga-modongoohia-aga nadau maanadu hagammuni. Di manawa-gee le e-hai gadoo be tulumanu-dauwa ma-ga-daalo do hadu-manawa.”

2:36  Soukohp-ahina Anna, tama-ahina a Phanuel, tangada di madawaawa Asher nogo i-golo. Mee di ahina gu-madumadua, ne-hai dono lodo i-lodo nia ngadau e-hidu.

2:37  Muli di made dono lodo, gei mee nogo noho-hua dono dina. Mee gu-huowalu maa-haa-(84) ono ngadau, gei mee digi hagatanga gi-daha mo di Hale Daumaha. Boo mo aa, e-daumaha ang-gi God, e-noho hagaonge mo di hai-dalodalo.

2:38  Di aawaa-hua deelaa, gei mee gaa-dau, ga-danggee ang-gi God, mo di helekai i-di Tama ang-gi digau huogodoo ala e-tali gi God bolo gi-haga-mehede-ina Jerusalem.

2:39  Meemaa gaa-lawa-loo i-di nau hai nia hegau gii-hai be Nnaganoho Dimaadua, meemaa gaa-hula gi-muli gi Galilee gi di-nau guongo go Nazareth.

2:40  Di tama ne-madua-aga gu-maaloo, guu-honu i-di kabemee, gei tumaalia dehuia a God gu-madalia a-Mee.

2:41  Nia ngadau huogodoo nia maadua Jesus e-hulahula gi Tagamiami Pasoobaa i Jerusalem.

2:42  Jesus gu-madangaholu maa-lua ono ngadau, gei digaula gaa-hula gi Tagamiami deelaa, be nadau hai nogo hulahula.

2:43  I-muli Tagamiami ne-lawa, gei digaula gaa-hula gi nadau guongo, gei tama-daane go Jesus guu-noho-hua i Jerusalem, gei nia maadua o-Maa digi iloo.

2:44  Meemaa e-hagabau bolo Mee i-lodo digau dogologo ala e-hula, gei meemaa gaa-hula i-di laangi dogomaalia, ga-daamada ga-halahala a-Mee gi-baahi nau gau mo nau ihoo.

2:45  Meemaa digi gidee a-Mee, gaa-hula gi-muli gi Jerusalem, e-halahala a-Mee.

2:46  I-muli nia laangi e-dolu, meemaa ga-gidee a-Mee i-lodo di Hale Daumaha, e-noho i-baahi digau agoago o Jew, e-hagalongolongo gi-nia helekai digaula mo di heheeu ana mee.

2:47  Digau huogodoo ne-longono nia helekai kabemee a-Maa ne-helekai gi-nia heeu digaula, digaula gu-goboina huoloo.

2:48  Nia maadua o-Maa gu-goboina di-nau gidee a-Mee, gei tinana o-Maa ga-helekai, “Dagu dama-daane, ma di-aha ne-hai Kooe? Gimaua gu-uli mau gai i-di mau halahala Goe!”

2:49  Jesus ga-helekai, “Goolua e-halahala Au eiaha? Goolua e-de-iloo bolo Au belee hai-loo gii-noho i-lodo di hale o dogu Damana?”

2:50  Meemaa digi modongoohia nnelekai a-Maa.

2:51  Jesus gaa-hana i-muli meemaa gi Nazareth, di gowaa nogo hagalongo-iei Mee gi meemaa. Tinana o-Maa e-daahi hagahumalia nia mee huogodoo aanei i ono lodo.

2:52  Jesus gu-tomo-aga dono huaidina mo dono iloo-mee, gu-hiihai ginai a God mo nia daangada.

Chapter 3

3:1  Di madangaholu maa-lima ngadau o Caesar Tiberius nogo dagi, Pontius Pilate nogo gobinaa i Judea, gei Herod nogo dagi Galilee, dono duaahina go Philip nogo dagi Iturea mo Trachonitis, Lysanias nogo dagi a Abilene,

3:2  gei Annas mo Caiaphas la nia dagi aamua hai-mee-dabu. Deenei di madagoaa nia helekai a God ne-dau i John, go tama Zechariah, i-lodo di anggowaa.

3:3  Gei John gaa-hana laa-lodo di guongo dela iai di monowai Jordan, ga-agoago, “Huli gi-daha mo godou haihai huaidu ge gi-babdais, gei God ga-dumaalia-adu gi godou huaidu!”

3:4  Gadoo be-di mee dela guu-hihi i-lodo di beebaa soukohp Isaiah, “Tangada e-wolowolo i-lodo di anggowaa, boloo, ‘Haga-adee-ina di ala o Dimaadua gi-togomaalia, haga-huudonu-ina di ala e-hana-iei Mee.

3:5  Nia gowaa bogobogo la-gi-haawa gii-honu, nia gonduu llauehe mono gonduu lligi la-gi-hagabapaba-ina. Nia ala pigapiga la-gi-haga-huudonu-ina, gei nia-ala dungadungaa gi-heia gi-malallali.

3:6  Nia daangada huogodoo ga-gidee di Hagamouli a God!’ ”

3:7  Nia daangada dogologo ne-lloomoi gi John belee babdais. Gei mee ga-helekai, “Goodou e-hai be nia gihaa! Ma koai ne-helekai bolo goodou e-mee di-llele gi-daha mo di hagawelewele o God dela ga-dau-mai?

3:8  Heia nia mee ala e-haga-modongoohia bolo goodou guu-huli gi-daha mo godou huaidu, gei hudee daamada e-helehelekai boloo, ‘Tadau damana la-go Abraham.’ Au e-hagi-adu gi goodou bolo God le e-mee hua di-huli nia hadugalaa aanei gii-hai nia dama ni Abraham!

3:9  Talai gu-togomaalia belee hele gi-daha nia laagau ala hagalee huwa humalia, e-dudu.”

3:10  Nia daangada ga-heeu gi John, “Gimaadou gaa-hai di-madau-aha?”

3:11  Gei mee ga-helekai, “Be koai-hua e-lua ono gahu, geia gi-wanga-ina di gahu e-dahi gi tangada dela dono gahu ai. Koai ana meegai i-golo, geia gi-haga-loholoho ngaadahi gi digau ala e-hiigai.”

3:12  Hunu gau hagabudu dagitedi ne-lloomoi belee babdais, ga-heeu gi mee, “Tangada agoago, gimaadou e-hai di-madau-aha?”

3:13  Mee ga-helekai, “Hudee hagabudu mee laa-hongo godou mee ala e-donu belee hagabudu.”

3:14  Hunu gau-dauwa ga-heeu gi mee, “Gei gimaadou e-hai di-madau-aha?” Mee ga-helekai, “Hudee kaina nia bahihadu nia daangada, be e-hagahuaidu tangada i-di kai-tilikai. Gii-dohu-hua gi godou hui-donu.”

3:15  Nia daangada gu-iai nadau hagadagadagagee e-hidihidi be John la-go di Mesaia.

3:16  Gei John ga-helekai gi digaula huogodoo, “Au e-babdais goodou gi nia wai, gei Tangada dela koia e-aamua i-di-au, le e-hanimoi i-golo. Au e-dee-tau-loo bolo e-wwede nia uga o nia suudi o-maa. Mee ga-babdais goodou gi-di Hagataalunga-Dabu mo di ahi.

3:17  Mee dana daawolo hili-mee, e-wanga nia lii palaawaa gi-lodo di hale benebene-mee, gei nia gili gaa-kili gi-lodo di ahi e-deemee di-made.”

3:18  Nia ala-kai e-logo nogo agoago-ai a John gi-nia daangada i-di Longo-Humalia bolo gii-huli nadau hangahaihai.

3:19  John nogo helekai hai-baahi gi gobinaa Herod, idimaa Herod ne-hai dono lodo gi Herodias, di lodo dono duaahina-daane, guu-hai labelaa ana mee huaidu e-logo.

3:20  Gei Herod gaa-hai dana hai koia e-huaidu, gaa-hudu a John gi-lodo di hale-galabudi.

3:21  Muli-hua nia daangada huogodoo ne-babdais go John, gei Jesus gu-babdais labelaa. Dono madagoaa nogo dalodalo, gei di langi gu-mahuge,

3:22  di Hagataalunga-Dabu ga-haneia gi-hongo o Mee, e-dina gi-di mwuroi. Gei di lee ga-haneia i-di langi, “Goe go dagu Dama-donu hagalabagau. Au e-manawa-lamalia adu gi-di-Goe.”

3:23  Di madagoaa Jesus ne-daamada ana hegau, gei mee gu-motolu ono ngadau. Nia daangada e-hai bolo Mee tama ni Joseph, go tama-daane Heli,

3:24  Heli go tama-daane a Matthat, Matthat go tama-daane Levi, Levi go tama-daane a Melchi, Melchi go tama-daane a Jannai, Jannai go tama-daane a Joseph,

3:25  Joseph go tama-daane a Mattathias, Mattathias go tama-daane a Amos, Amos go tama-daane Nahum, Nahum go tama-daane a Esli, Esli go tama-daane a Naggai,

3:26  Naggai go tama-daane a Maath, Maath go tama-daane a Mattathias, Mattathias go tama-daane a Semein, Semein go tama-daane a Sosek, Sosek go tama-daane a Soda,

3:27  Soda go tama-daane a Joanan, Joanan go tama-daane a Rhesa, Rhesa go tama-daane a Zerubbabel, Zerubbabel go tama-daane a Shealtiel, Shealtiel go tama-daane a Neri,

3:28  Neri go tama-daane a Melchi, Melchi go tama-daane a Addi, Addi go tama-daane a Cosam, Cosam go tama-daane a Elmadam, Elmadam go tama-daane a Er,

3:29  Er go tama-daane a Joshua, Joshua go tama-daane a Eliezer, Eliezer go tama-daane a Jorim, Jorim go tama-daane a Matthat, Matthat go tama-daane a Levi,

3:30  Levi go tama-daane a Simeon, Simeon go tama-daane a Judah, Judah go tama-daane a Joseph, Joseph go tama-daane a Jonam, Jonam go tama-daane a Eliakim,

3:31  Eliakim go tama-daane a Melea, Melea go tama-daane a Menna, Menna go tama-daane a Mattatha, Mattatha go tama-daane a Nathan, Nathan go tama-daane a David,

3:32  David go tama-daane a Jesse, Jesse go tama-daane a Obed, Obed go tama-daane a Boaz, Boaz go tama-daane a Salmon, Salmon go tama-daane a Nahshon,

3:33  Nahshon go tama-daane a Amminadab, Amminadab go tama-daane a Admin, Admin go tama-daane a Arni, Arni go tama-daane a Hezron, Hezron go tama-daane a Perez, Perez go tama-daane a Judah,

3:34  Judah go tama-daane a Jacob, Jacob go tama-daane a Isaac, Isaac go tama-daane a Abraham, Abraham go tama-daane a Terah, Terah go tama-daane a Nahor,

3:35  Nahor go tama-daane a Serug, Serug go tama-daane a Reu, Reu go tama-daane a Peleg, Peleg go tama-daane a Eber, Eber go tama-daane a Shelah,

3:36  Shelah go tama-daane a Cainan, Cainan go tama-daane a Arphaxad, Arphaxad go tama-daane a Shem, Shem go tama-daane a Noah, Noah go tama-daane a Lamech,

3:37  Lamech go tama-daane a Methuselah, Methuselah go tama-daane a Enoch, Enoch go tama-daane a Jared, Jared go tama-daane a Mahalaleel, Mahalaleel go tama-daane a Cainan,

3:38  Cainan go tama-daane a Enosh, Enosh go tama-daane a Seth, Seth go tama-daane a Adam, Adam go tama-daane a God.

Chapter 4

4:1  Jesus ga-hagatanga i Jordan, geia guu-honu i-di Hagataalunga-Dabu dela ne-lahi a-Mee gi-lodo di anggowaa.

4:2  Gei Mee gaa-noho i-lodo di anggowaa i-nia laangi e-madahaa, ga-hagamada go Setan. I-lodo nia laangi aalaa, gei Mee digi miami, gu-hiigai huoloo.

4:3  Setan ga-helekai gi Mee, “Maa Goe di Tama ni God, helekai gi-di hadugalaa deenei gii-hai di palaawaa.”

4:4  Jesus ga-helekai, “Ma-guu-lawa di-hihi i-lodo di Beebaa-Dabu boloo, ‘Ma hagalee go nia palaawaa la-hua ala e-mee di-haga-mouli tangada.’ ”

4:5  Setan gaa-lahi labelaa a-Mee gi-di gowaa nnoonua, ga-haga-mmada a Mee gi-nia henua huogodoo i henuailala i tama-madagoaa bodobodo,

4:6  ga-helekai gi mee, “Au ga-gowadu gi-di-Goe nia mogobuna mahi huogodoo aanei mo nia maluagina huogodoo. Huogodoo gu-dugu-mai gi-di-au, gei au e-mee-hua di-wanga nia maa gi tangada dela e-hiihai ginai au.

4:7  Nia mee aanei huogodoo ga-gowadu gi-di-Goe, maa Goe ga-daumaha-mai.”

4:8  Jesus ga-helekai, “Ma-guu-lawa di-hihi i-lodo di Beebaa-Dabu boloo, ‘Daumaha ang-gi Dimaadua go doo God, go Mee hua dela e-hai-hegau ginai goe!’ ”

4:9  Setan gaa-lahi labelaa a-Mee gi Jerusalem, gaa-dugu a-Mee gi-hongo tahuhu o-di Hale Daumaha, ga-helekai gi Mee, “Maa goe di Tama ni God, hobo-ia gi-daha mo di gowaa deenaa.

4:10  Idimaa, ma-guu-lawa di-hihi i-lodo di Beebaa-Dabu boloo, ‘God ga-helekai gi ana gau di-langi gi-benabena-ina Goe gi-humalia.’

4:11  “Guu-hai labelaa boloo, ‘Digaula gaa-kumi-laa Goe gi-dee tale oo wae gi-nia hadu.’ ”

4:12  Jesus ga-helekai, “Ma-guu-lawa di hihi boloo, ‘Goe hudee hagamada-ina Dimaadua, go doo God.’ ”

4:13  Di madagoaa Setan ne-lawa di hagamadamada Jesus, gei mee ga-hagatanga gi-daha mo Mee i tama-madagoaa bodobodo.

4:14  Jesus gu-maaloo mai i-di Hagataalunga-Dabu, ge-Ia gaa-hana gi-muli gi Galilee. Dono longo guu-dele i-nia madagowaa huogodoo ala i-golo.

4:15  Gei Mee e-hai ana agoago i-lodo nia synagogee digaula, huogodoo gu-haga-hagaamu a-Mee.

4:16  Jesus gaa-hana gi Nazareth, di gowaa dela ne-tomo-aga-ieia, ga-ulu gi-lodo synagogee i-di Laangi-Sabad be dana hai nogo haihai. Gei Mee ga-duu-aga belee dau dana Beebaa-Dabu.

4:17  Gei digaula ga-gaamai di beebaa soukohp Isaiah gi Mee, ge-Ia gaa-huge di beebaa deelaa, gaa-dau di gowaa dela e-hihi boloo,

4:18  “Di Hagataalunga o Dimaadua la-gu i dogu baahi. Mee gu-hagatulu Au gi-agoago-ina di Longo-Humalia ang-gi digau hagaloale. Mee ne-hagau-mai Au gi-hagadele-ina gi digau ala e-lawalawa gi-maahede, mo digau ala e-dee-gida gi-gidee, gi-haga-maahede-ina digau ala e-noho i-lodo di haingadaa,

4:19  gi-hagadele-ina bolo di madagoaa gu-dae-mai, go di madagoaa Dimaadua e-haga-dagaloaha ana daangada.”

4:20  Jesus gaa-wini di beebaa deelaa, gaa-wanga gi tangada hai-hegau, gaa-noho gi-hongo dono lohongo. Huogodoo ala i-lodo synagogee, e-daumada a-Mee,

4:21  gei Mee ga-daamada ga-helekai, “Digau-nei, dangi-nei nia helekai di Beebaa-Dabu ala gu-longono-goodou, la-gu-kila-aga i tadau baahi!”

4:22  Digaula huogodoo guu-tene gi Mee huoloo, gei gu-goboina i-nia helekai humalia aalaa, ala ne-loomoi i-baahi o-Mee. Digaula ga-helekai, “Mee hagalee go tama-daane Joseph?”

4:23  Jesus ga-helekai gi digaula, “Au e-iloo bolo goodou ga-helekai nia helekai podo mai gi-di-Au boloo, ‘Togidaa, hagahili-ina goe!’ Gei goodou ga-helekai-mai labelaa boloo, ‘Gi-heia i-lodo do guongo-donu nia mee haga-goboina ala ne-longono-ai gimaadou bolo ne-hai Kooe i Capernaum.’ ”

4:24  Gei Mee ga-duudagi-adu-hua, ga-helekai, “Goodou gi-iloo, bolo ma soukohp e-hagalabagau i-lodo dono guongo-donu ai.

4:25  “E-donu bolo nia ahina guu-mmade nadau lodo e-dogologowaahee i Israel i-di madagoaa soukohp Elijah, i-di madagoaa di uwa digi doo i-lodo nia ngadau e-dolu mo di baahi, mo tau-magamaga damana guu-gahu tenua deelaa.

4:26  Gei Elijah digi hagau-ina gi dahi dangada i-lodo Israel, gei ne-hagau hua gi-di ahina tuadimee gu-made dono lodo dela e-noho i Zarephath i-lodo tenua go Sidon.

4:27  Gadoo be-di madagoaa soukohp Elisha, nogo iai di magi genegene i Israel, gei deai tangada i digaula ne-hili ga-madammaa ai, dela-hua go Naaman, tangada o Syria.”

4:28  Digau huogodoo nogo i-lodo synagogee gu-hagawelewele huoloo i-di nadau longono nia helekai aanei.

4:29  Digaula gaa-lahi a Jesus gi-daha mo di waahale gi tomo di gonduu dela ne-hau-ai di-nadau waahale, belee bale a-Mee gii-doo gi-di gowaa helemodu.

4:30  Gei Jesus gaa-hana laa-lodo digaula, gaa-hana gi-daha mo digaula.

4:31  Nomuli, Jesus gaa-hana gi Capernaum, di waahale i Galilee, ga-agoago gi-nia daangada i-di Laangi-Sabad.

4:32  Nia daangada huogodoo gu-goboina i-nia agoago a-Maa, i Mee e-agoago i-di mogobuna.

4:33  Taane i-lodo synagogee, iai di hagataalunga huaidu i ono lodo, mee gaa-wolo gi-nua,

4:34  “Jesus o Nazareth, ma di-aha e-hiihai ginai Goe i gimaadou? Goe ne-hanimoi belee hagahuaidu gimaadou? Aahaa, au e-iloo-eau Goe tangada dabuaahia kae-hegau a God!”

4:35  Jesus ga-hagabuhi gi-di hagataalunga huaidu, “Noho dee-muu, ulu-mai gi-daha mo taane deenaa!” Gei di hagataalunga huaidu ga-hagahinga taane gi-lala i-mua digaula, ga-ulu gi-daha mo mee ge digi hai dana huaidu gi mee.

4:36  Nia daangada huogodoo gu-goboina ga-helehelekai, “Ma nia helekai aha aanei? Mee e-mogobuna di helekai gi nia hagataalunga huaidu, gei digaula e-ulu-mai gi-daha!”

4:37  Di longo o Jesus guu-dele i-nia madagowaa huogodoo i-lodo tenua deelaa.

4:38  Jesus ga-hagatanga gi-daha mo synagogee, gaa-hana gi-di hale o Simon. Tinana di lodo Simon e-magi welengina huoloo. Digaula ga-helekai gi Jesus i-di ahina deelaa.

4:39  Jesus ga-menege-adu gi mee, ga-helekai gi-di magi welengina gi-ulu-mai gi-daha. Di magi welengina gu-ulu-mai gi-daha, mee ga-ala-aga, ga-nnoo i-nua, ga-hagamaamaa digaula.

4:40  Hiahi-ia di-mee, digau huogodoo ala nadau ihoo magi i-nia hagadilinga magi e-logo, ga-laha-mai digaula gi Jesus. Mee gaa-dugu ono lima gi-hongo digaula huogodoo, e-hagadau dagidahi, ga-hagahili digaula.

4:41  Nia hagataalunga huaidu ala e-ulu gi-daha mo digau dogologo e-wwolowwolo, “Goe go Tama a God!” Jesus gu-bule digaula, digi dumaalia gi digaula gi-helekai, i digaula gu-iloo bolo Mee go di Mesaia.

4:42  Hooaga haga-luada-loo, Jesus gaa-hana gi-daha mo di waahale gi-di gowaa lomo modogoia. Gei nia daangada ga-daamada ga-halahala a-Mee, ga-gidee a-Mee, ga-tangi gi Mee bolo gi-hudee hagatanga gi-daha mo ginaadou.

4:43  Mee ga-helekai gi digaula, “Au e-hai-loo gi-agoago di Longo-Humalia o Teenua King o God gi-nia waahale labelaa ala i-golo, idimaa, deelaa di mee a God ne-hagau-mai ginai Au belee hai.”

4:44  Mee ga-agoago i-lodo nia synagogee i-lodo tenua hagatau deelaa.

Chapter 5

5:1  Dahi laangi hua Jesus nogo duu i taalinga Tai Gennesaret, nia daangada nogo honohono ginaadou i nadau lloo-adu gi Jesus belee hagalongo gi nia helekai a God.

5:2  Mee ga-gidee nia boodi e-lua e-haga-pale-aga i tongotai. Digau hai-iga guu-hula gu-gaugau nadau kau.

5:3  Jesus gaa-gaga gi-hongo di boodi a Simon, ga-helekai gi mee gi-hologia dulii gi-daha mo tongotai. Jesus gaa-noho i-hongo di boodi, ga-agoago gi digau dogologo aalaa.

5:4  Mee ga-haga-lawa ana agoago, ga-helekai gi Simon, “Hologia di boodi gi-di gowaa honu, dugu-ina gi-lala nia kau gubenge.”

5:5  Simon ga-helekai, “Meenei Tagi, gimaua gu-gubenge mai-loo boo, gu-duadua, gei digi kumi mau iga. Gei Goe bolo gi-dugua nia kau, au gaa-dugu laa nia kau.”

5:6  Meemaa gaa-dugu nia kau gi-lala, gu-bulou nau iga logowaahee. Nia kau la-bolo ga-mahaahaa.

5:7  Gei meemaa ga-lialiagi gi-di nau ihoo boodi gi-lloomoi e-hagamaamaa ginaua. Digaula ga-lloomoi, gaa-haa nadau boodi e-lua gu-hontula bolo ga-abulu.

5:8  Simon Peter ne-mmada gi-nia mee ala ne-hai beenei, gei mee ga-dogoduli gi-lala i-mua o Jesus, ga-helekai, “Meenei Tagi, hana gi-daha mo au! Au tangada huaidu!”

5:9  Mee mo ono ehoo gu-goboina tagabae-iga ala ne-kumi go ginaadou.

5:10  Nia hoo Simon, James mo John go nia dama-daane Zebedee, la-gu-goboina labelaa ginaua. Jesus ga-helekai gi Simon, “Goe hudee madagu, tugi dolomeenei gaa-hana, gei goe ga-haangodo gi-nia daangada.”

5:11  Digaula ga-hudi-aga nia boodi gi tongotai, ga-diiagi nia mee huogodoo, ga-daudali a Jesus.

5:12  Nomuli, gei Jesus nogo i-lodo di waahale dela nogo iai taane e-hai dono magi genegene. Taane deelaa ne-mmada gi Jesus, ga-bala gi-lala ga-dangidangi, “Meenei, maa Goe e-hiihai, heia au gi-madammaa!”

5:13  Jesus ga-hagadau-dae-adu, gaa-bili gi mee, ga-helekai, “Uaa, Au e-hiihai. Madammaa!” Di madagoaa-hua deelaa, gei di magi genegene guu-hili.

5:14  Jesus gaa-bule gi mee, “Hudee hagi-anga-ina di mee deenei gi tei dangada, hana haga-huudonu gi tangada hai-mee-dabu, gi-haga-dina-ina goe, gaa-lawa, heia dau tigidaumaha dela gu-haganoho go Moses, bolo e-hai di haga-modongoohia gi digaula bolo goe gu-madammaa.”

5:15  Di longo o Jesus guu-dele labelaa koia gi-nonua, gu-modoho gi-daha, gei digau dogologo ne-loomoi belee hagalongo gi Mee, ge e-hagahili nadau magi.

5:16  Gei Mee gaa-hana gi-di gowaa lomo e-dalodalo.

5:17  Dahi laangi hua, Jesus nogo agoago, gei nia Pharisee mono gau haga-donudonu haganoho e-noho i-golo. Digaula ne-lloomoi mai nia waahale huogodoo Galilee, Judea, mo mai Jerusalem. Di mogobuna o Dimaadua gu-i-baahi o Jesus e-hagahili nia magi.

5:18  Hunu daane ne-lloomoi e-aamo mai di-nadau daane mmade ono wae i-hongo di hada. Digaula e-hagamahi belee laha-mai taane deenei gi-mua o Jesus i-lodo di hale.

5:19  Idimaa gu-dogologowaahee, gu-deeoo di-lahi a-mee gi-lodo, gei digaula gaa-lahi a-mee gi-tuatala o-di hale, ga-haga-bongoo di gowaa e-haga-hege-ia a-mee i-hongo dono moenge gi-lodo digau dogologo i-mua o Jesus.

5:20  Jesus ga-gidee-Ia nia hagadonu digaula, Mee ga-helekai gi taane deelaa, “Dogu ihoo hagaaloho, o huaidu gu-maahede.”

5:21  Digau hagadonudonu haganoho mo nia Pharisee ga-daamada ga-helehelekai i nadau mehanga, “Taane deenei la-koai, dela e-helekai hai-baahi gi God? Tangada e-mee di-wwede nia huaidu ai, dela hua go God modogoia!”

5:22  Jesus gu-iloo nia maanadu digaula, ga-helekai, “Goodou e-aha ala e-hagabaubau beenaa?

5:23  Dehee di mee e-haingoohia belee helekai boloo, ‘O huaidu la-gu-maahede,’ be e-helekai boloo, ‘Duu-i-nua, haele?’

5:24  Au ga-haga-modongoohia-adu gi goodou bolo Tama-Tangada le e-mogobuna i henuailala, e-mee di-wwede nia huaidu.” Gei mee ga-helekai gi tangada mmade ono wae, “Au e-helekai-adu gi-duu-i-nua, dahi-aga-ina do moenge, hana gi doo hale.”

5:25  Di madagoaa-hua deelaa, gei taane ga-duu-i-nua i-mua digaula huogodoo, ga-dahi-aga dono moenge, gaa-hana gi dono hale mo di hagaamu a God.

5:26  Digaula gu-goboina, gu-mmaadagu, gu-hagaamu a God, ga-helekai, “Gidaadou guu-mmada gi-nia mee haga-goboina dangi-nei!”

5:27  Muli di mee deenei, Jesus gaa-hana ga-gidee-ia tangada hagabudu dagitedi go Levi, e-noho i-lodo dono oobidi. Jesus ga-helekai, “Daudalia-mai Au.”

5:28  Levi ga-du-gi-nua ga-diiagi ana mee huogodoo, ga-daudali a-Mee.

5:29  Levi guu-hai dana hagamiami damana i dono hale gi Jesus, digau hagabudu dagitedi mono daangada labelaa nogo i-baahi digau dogologo aalaa.

5:30  Hunu Pharisee mono gau haga-donudonu haganoho o nadau buini, e-helekai haga-de-hiihai gi-nia dama-agoago a Jesus boloo, “Ma e-aha dela goodou e-miami ge e-inu i-baahi digau hagabudu dagitedi mono balu-daangada?”

5:31  Jesus ga-helekai gi digaula, “Digau ala hagalee magi la-hagalee halahala togidaa, go digau magi hua.

5:32  Au hagalee ne-hanimoi belee gahigahi digau ala e-donu, gei ne-hanimoi gi digau ala huaidu, gi-daahuli nadau lodo.”

5:33  Hunu gau ne-helekai gi Jesus, “Nia dama-agoago John nogo noho hagaonge i-nia madagoaa e-logo ge e-hai-dalodalo. Nia dama-agoago nia Pharisee nogo hai labelaa beelaa, gei au dama-agoago e-miami ge e-inu.”

5:34  Jesus ga-helekai, “Goodou e-hagamaanadu bolo goodou e-mee di-hai digau tagamiami haga-hai-lodo gii-noho hagaonge i-di madagoaa taane hai-lodo la i-baahi digaula? E-deemee di-hai beelaa!

5:35  Gei di madagoaa i-golo, taane hai-lodo la-gaa-lahi gi-daha mo digaula, gei digaula gaa-noho-laa hagaonge.”

5:36  Jesus ga-helekai labelaa gi digaula di ala-kai deenei, “Deai tangada e-haahi dana mee-gahu i-di gahu hoou e-pono di gahu bobo ai. Maa gaa-hai beelaa, gei mee ga-haga-mahaa di gahu hoou, gei di mee gahu hoou la-hagalee tongaadahi gi-di mee gahu bobo.

5:37  “Deai tangada hogi e-hagahau ana waini hoou gi-lodo nia mee dugu-waini pobo ai, idimaa, nia waini hoou la-ga-hahaahi nia mee dugu-waini pobo, gei nia waini la-ga-mmaalingi, gei nia mee dugu-waini la-ga-mooho.

5:38  Gei deeai, nia waini hoou le e-hai gi-hagahau gi-lodo nia mee dugu-waini hoou.

5:39  Tangada e-hiihai gi-nia waini hoou ai i-muli dono inu nia waini gu-duai. Mee ga-helekai bolo nia waini ala gu-duai la-koia e-kala.”

Chapter 6

6:1  Jesus nogo hana i-lodo nia gowaa dogi laagau ‘wheat’ i-di Laangi-Sabad. Nia dama-agoago a-Maa ga-daamada gaa-hagi nadau huwa-laagau ‘wheat’, ga-milimili i-lodo nadau lima, gaa-gai nia lii nia maa.

6:2  Hunu Pharisee ga-helekai, “Goodou e-aha ala e-hai nia mee ala guu-bule go tadau haganoho bolo hagalee hai i-di Laangi-Sabad?”

6:3  Jesus ga-helekai gi digaula, “Goodou digi daulia di mee a David ne-hai i-tolongo o mee mo ono ehoo ne-hiigai?

6:4  Mee ne-hana gi-lodo di Hale o God, gaa-kae nia palaawaa ala gu-hagadabu gi God, gaa-gai, gaa-wanga gi ono ehoo. Gei di-maa e-hai-baahi gi tadau haganoho ma-gaa-gai nia maa, ala-hua go digau hai-mee-dabu.”

6:5  Jesus ga-helekai, “Tama-Tangada la-go di Tagi o-di Laangi-Sabad.”

6:6  Di Laangi-Sabad nomuli, gei Jesus ga-ulu gi-lodo synagogee, ga-agoago, gei di-maa taane i-golo guu-made dono lima gau-donu.

6:7  Digau haga-donudonu haganoho mono Pharisee e-golomada a-Mee be Mee e-hagahili ana magi i-di Laangi-Sabad, gei digaula guu-mee-hua di-hagahuaidu a-Mee ga-hai-baahi gi Mee.

6:8  Gei Jesus gu-iloo-Ia nia maanadu digaula, ga-helekai gi taane deelaa, “Duu-i-nua, duu-mai gi-mua.” Gei mee ga-duu-aga gaa-duu gi-mua digaula.

6:9  Gei Jesus ga-helekai gi digaula, “Au e-heeu-adu gi goodou: Ma ni-aha ala e-dugu-mai go tadau haganoho bolo gi-heia i-di Laangi-Sabad? E-hagamaamaa be e-hagahuaidu? E-benebene di mouli tangada, be e-daaligi di mouli?”

6:10  Mee gaa-mmada gi digaula huogodoo, ga-helekai gi taane deelaa, “Holohia doo lima gi-daha.” Gei mee gaa-holo dono lima, gei guu-hili.

6:11  Gei digaula gu-hagawelewele, gu-helehelekai i nadau mehanga be dehee di-nadau hai gaa-hai gi Jesus.

6:12  Muli-mai-hua, gei Jesus gaa-hana gi tomo di gonduu belee dalodalo, guu-noho i-golo i-di boo deelaa, e-hai ana dalodalo ang-gi God.

6:13  Dono luada, gei Mee ga-gahigahi-mai ana dama-agoago, ga-hilihili ana gau dilongoholu maa-lua, ga-haga-ingoo bolo digau agoago-hagau:

6:14  Simon (dela e-haga-ingoo labelaa go Mee bolo Peter) mo dono duaahina go Andrew, James mo John, Philip mo Bartholomew,

6:15  Matthew mo Thomas, James tama-daane a Alphaeus, mo Simon (dela e-haga-ingoo bolo di ‘Patriot’),

6:16  Judas tama-daane James, mo Judas Iscariot tangada dela e-wanga a Jesus.

6:17  Dono haneia i-tomo di gonduu ginaadou mo ana gau agoago-hagau, gei Jesus gaa-duu i-hongo di gowaa bapaba mo ana dama-agoago dogologo. Gei nia hagabuulinga gau dogologo i-golo ne-loomoi i Judea mo Jerusalem, mo i-nia waahale o Tyre mo Sidon ala i tongotai.

6:18  Digaula ne-lloomoi belee hagalongo gi-nia agoago a-Maa, e-hagahili nadau magi. Gei digau ala nogo hagahuaidu go nia hagataalunga huaidu gu-lloomoi labelaa, gu-hagahili.

6:19  Digau huogodoo e-hagamada belee bili gi Mee, idimaa nia mogobuna ala e-loomoi i-baahi o Mee e-hagahili ginaadou huogodoo.

6:20  Jesus gaa-mmada gi ana dama-agoago, ga-helekai, “E-maluagina go goodou ala e-hagaloale, idimaa, Teenua King o God la-ni goodou!

6:21  E-maluagina go goodou ala e-hiigai dolomeenei, goodou ga-haangai gi-maaluu. E-maluagina go goodou ala e-tangi dolomeenei, goodou ga-gadagada.

6:22  E-maluagina go goodou maa nia daangada ga-hudiou-adu, gaa-bae goodou gi-daha, e-haga-teetee goodou, gei e-helekai bolo goodou digau hai-mee-huaidu, idimaa go Tama-Tangada!

6:23  Gi-tenetene gi-nia mee aanei ma-ga-kila-aga, gei gi-gaalege tenetene, idimaa, di hui damanaiee gu-hagatogomaalia-adu gi goodou i-di langi. Idimaa, nadau maadua-mmaadua nogo hai nadau hai beenei gi-nia soukohp.

6:24  E-huaidu huoloo adu gi goodou ala e-maluagina dolomeenei, idimaa, goodou gu-mouli humalia.

6:25  E-huaidu huoloo adu gi goodou ala e-maaluu dolomeenei, idimaa, goodou ga-hiigai! E-huaidu huoloo adu gi goodou ala e-gadagada dolomeenei, idimaa, goodou ga-tangitangi manawa-gee!

6:26  E-huaidu huoloo maa nia daangada ga-helekai humalia i goodou, idimaa, nia maadua-mmaadua nogo helehelekai labelaa beenei i-nia soukohp dilikai.

6:27  “Au e-hagi-adu gi goodou ala e-longono-goodou Au: Aloho i godou hagadaumee, heia nia humalia ang-gi digau ala e-hudiou-adu gi goodou.

6:28  Hagahumalia-ina digau ala e-haga-halauwa goodou, dalodalo i digau ala e-hagammaemmae goodou.

6:29  Maa tangada gaa-paa do gauwae, wanga-ina di baahi dela i-golo. Maa tangada gaa-kae do gahu-mahaa, wanga-ina labelaa doo gahu uluulu.

6:30  Wanga gi digau huogodoo ala e-tangi-adu nadau mee gi goodou. Maa tangada guu-kae dau mee, gei goe hudee daawa-ina.

6:31  Heia gi-nia daangada nia mee ala e-hiihai ginai goodou bolo nia daangada gi-heia-adu gi goodou.

6:32  “Maa goodou e-aloho-hua i digau ala e-aloho i goodou, malaa, di hagahumalia le e-kae go goodou eimaha? Digau huaidu hogi le e-aloho i digau ala e-aloho i ginaadou.

6:33  Maa goodou gaa-hai-hua nia humalia gi digau ala e-hai nia humalia adu gi goodou, malaa, di hagahumalia le e-kae go goodou eimaha? Idimaa, digau huaidu le e-hai labelaa beelaa.

6:34  Maa goodou e-wanga-hua godou mee gi digau ala e-hagamaanadu go goodou bolo digaula ga-gowadu labelaa nadau mee gi goodou, di hagahumalia le e-kae go goodou eimaha? Digau huaidu hogi e-wanga nadau mee gi digau huaidu, i-di nadau maanadu bolo ma e-loomoi labelaa ono haga-humalia.

6:35  Deeai! Aloho i godou hagadaumee, heia nia humalia gi digaula. Wanga-ina godou mee gi digaula, hudee maanadu bolo ma-ga-lloo-adu ono haga-humalia gi goodou, gei godou hui ga-llauehaa, gaa-hai nia dama ni-di God-Aamua-Huoloo. Idimaa, Mee e-humalia gi digau ala hagalee danggee mo digau hai mee huaidu.

6:36  Goodou gi-dumaalia be di-godou Damana dela e-dumaalia.

6:37  “Hudee hagi-aga-ina nia daangada, gei God ga-hagalee hagi-aga goodou. Hudee hagahuaidu-ina nia daangada, gei God ga-hagalee hagahuaidu goodou. Dumaalia gi-nia daangada, gei God ga-dumaalia-adu gi goodou.

6:38  Wanga gi digau ala i-golo, gei God ga-gowadu gi goodou. E-donu, goodou gaa-kae nia mee logo, hagamaamaa humalia ga-dui-adu gi-lodo godou lima i godou mee ala e-mee di-daahi. Idimaa, godou mee e-hai gi-nia daangada, aalaa nia mee a God gaa-hai-adu gi goodou.”

6:39  Jesus gaa-kai dana ala-kai deenei: “Tangada deegida le e-deemee di-dagi dana dangada deegida. Maa gaa-hai beelaa, meemaa dogolua gaa-too gi-lodo di aloalo.

6:40  Tamagiigi kuulu e-aamua i dono tintei ai, gei tamagiigi dela gaa-lawa dana kuulu la-gaa-hai be dono tintei.

6:41  “Goe e-aha dela e-hei-e-goe di madageinga dela i-lodo di golomada o do duaahina, gei goe e-de-hei-e-goe di bida-laagau dela i-lodo do golomada?

6:42  Goe e-aha dela e-helekai gi do duaahina boloo, ‘Dumaalia-mai e-daa gi-daha di madageinga dela i-lodo do golomada,’ gei goe e-de-hei-e-goe di bida-laagau dela i-lodo do golomada? Goe tangada hai-hegau ngudu-golomada! Daawa-ina gi-daha i-mua di bida-laagau dela i-lodo do golomada, gei goe ga-gidee hagahumalia di-daa di madageinga dela i-lodo di golomada o do duaahina.

6:43  “Di laagau tomo humalia le e-hagalee huwa huaidu, gei di laagau tomo huaidu le e-hagalee huwa humalia.

6:44  Nia laagau huogodoo le e-haga-modongoohia go nadau huwa. Goe e-deemee di-hagi au huwa-‘fig’ i-di laagau duduia, be e-hagi au ‘grape’ i-di laagau huaidu.

6:45  Tangada humalia le e-hai nia mee humalia mai di maluagina humalia i-lodo dono manawa. Tangada huaidu le e-hai nia mee huaidu mai di maluagina huaidu i-lodo dono manawa. Idimaa, di ngudu o tangada le e-helekai-aga i-nia mee ala e-honu i-lodo dono manawa.

6:46  “Ma e-aha goodou e-gahi Au boloo ‘Meenei Tagi’, gei goodou hagalee hai agu mee bolo gi-heia?

6:47  Tangada dela ga-hanimoi e-hagalongo ge e-daudali agu helekai, deelaa tangada ga-hagi-adu ko-Au be mee tangada e-hai behee.

6:48  Mee e-hai be tangada dela ma-gaa-hau dono hale, e-geli di lohongo di-maa gii-llala, ga-haga-duu di hagamau gi-hongo tadugalaa. Di labagee gaa-mmidi gi-di hale deelaa, gei di hale e-deemee di-ngalungalua, idimaa ma-guu-haga-duu gii-mau.

6:49  Tangada dela ma-ga-hagalongo gi agu helekai, gei hagalee daudali-ai, geia e-hai be tangada dela ma-gaa-hau dono hale i-hongo di gelegele, dono hagamau ai. Di madagoaa di labagee gaa-mmidi gi-di hale deelaa, gei di hale la-gaa-hinga, ga-mooho hagahuaidu!”

Chapter 7

7:1  Jesus ne-lawa di-helekai gi-nia daangada, gei Mee gaa-hana gi Capernaum.

7:2  Di hege o tagi-dauwa o Rome la-guu-hai dono magi, bolo gaa-made. Mee tangada hagalabagau ni dono dagi.

7:3  Di madagoaa tagi-dauwa ne-longono ia Jesus, geia ga-hagau ana dagi mmaadua o Jew gi Mee, gi-hanimoi e-hagahili di magi o dana hege.

7:4  Digau o Jew ga-lloomoi gi Jesus, ga-dangidangi hagamahi gi Mee, “Taane deenei e-tau gi dau hagamaamaa,

7:5  idimaa, mee e-aloho i digau tadau henua, gei mee ne-bida hau di-madau synagogee.”

7:6  Gei Jesus gaa-hana i-muli digaula. Mee ne-hoohoo-adu gi-di hale, gei tagi-dauwa ga-hagau hunu gau i ono ehoo belee helekai gi Jesus, “Goe hudee hai-loo bolo Goe e-hanimoi, idimaa, au e-dee-tau-loo bolo Goe e-ulu gi-lodo dogu hale,

7:7  gei au e-dee-tau-loo dogu hanadu gi-di-Goe. Helekai-hua, gei dagu dangada hai-hegau la-gaa-hili dono magi.

7:8  Au tangada e-noho i-lala ogu dagi aamua labelaa, e-dagi agu gau-dauwa. Au ga-hagadaba boloo, ‘Hana!’ gei mee e-hana. Au ga-hagadaba boloo, ‘Hanimoi!’ gei mee e-hanimoi. Gei-au ga-hagadaba gi dogu ihege boloo, ‘Heia di mee deenei!’ gei mee e-hai.”

7:9  Jesus gu-goboina dono hagalongo gi-nia helekai aanei. Mee ga-huli-adu, ga-helekai gi-di hagabuulinga-dangada dela e-daudali Ia, “Au e-hagi-adu gi goodou, bolo Au digi gidee di hagadonu beenei, hagalee hogi i Israel!”

7:10  Digau kae-hegau gaa-hula gi-di hale o tagi-dauwa deelaa, gaa-mmada, gei di hege la-guu-hili dono magi.

7:11  Muli-mai-hua, gei Jesus mo ana dama agoago mo digau dogologo ala i-golo gaa-hula gi-di waahale go Nain.

7:12  Di madagoaa-hua ne-dau-iei Mee i-di ngudu di bontai di waahale, tangada made e-lahi gi-daha mo-di waahale. Tama-daane dela ne-made la tama hua e-dahi ni-di ahina ne-made dono lodo, gei di hagabuulinga gau dogologo o-di waahale deelaa nogo madalia a-mee.

7:13  Di madagoaa Tagi ne-mmada gi-di ahina deelaa, Mee gu-aloho i mee, ga-helekai, “Hudee dangi.”

7:14  Gei mee ga-hanadu, gaa-bili gi tebedebe, gei digau nogo taga a-mee gaa-tuu. Gei Jesus ga-helekai, “Tama-daane, Au e-helekai-adu, nnoo-i-nua!”

7:15  Taane made deelaa gaa-nnoo-i-nua, ga-daamada ga-leelee, gei Jesus gaa-wanga a-mee gi dono dinana.

7:16  Digaula huogodoo gu-mmaadagu huoloo mo di hagaamu a God boloo, “Soukohp aamua gu-gila-aga i tadau baahi. God gu-hanimoi e-haga-mouli ana daangada!”

7:17  Di longo o Jesus guu-dele gi-lodo nia henua huogodoo o Judea mo nia guongo mai i-daha.

7:18  Nia dama-agoago a John ga-hagi-anga gi mee nia mee huogodoo aanei, gei mee ga-gahi-mai ana dama-agoago dogolua,

7:19  ga-hagau meemaa gi Tagi belee heeu gi Mee, “Maa Kooe dela nogo helekai-iei John bolo e-hanimoi, be gimaadou e-tali di-madau dangada i-golo?”

7:20  Di madagoaa meemaa ne-dau i-baahi o Jesus, meemaa ga-helekai, “Meenei, John Babdais ne-hagau-mai gimaua belee heeu-adu, be maa Kooe dela nogo helekai-iei mee bolo e-hanimoi, be gimaadou e-tali di-madau dangada i-golo?”

7:21  Di madagoaa-hua deelaa, Jesus e-hagahili ana gau magi dogologo, mono gau iai nia hagataalunga huaidu, gei e-haga-gidee ana gau deegida.

7:22  Mee ga-helekai gi-nia daangada kae-hegau a John boloo, “Hula, hagi-anga-ina gi John gulu mee ala ne-gidee ge ne-longono: Digau deegida gu-gidee, digau habehabe guu-mee di-taele, digau longoduli gu-longono, digau mmade gu-mouli-aga, gei di Longo-Humalia gu-agoago gi digau hagaloale.

7:23  “E-maluagina go tangada dela hagalee manawa-lua i-di-Au.”

7:24  Muli-hua digau kae-hegau a John ne-hula, gei Jesus ga-daamada ga-helekai i John gi digau dogologo, “Di-godou madagoaa ne-hula gi John i-lodo di anggowaa, ma ni-aha nogo maanadu go goodou bolo e-mmada ginai? Di laagau aalek e-hahaangi i-di madangi?

7:25  Ma di-aha ne-hula ginai goodou belee mmada ginai? Tangada e-ulu nia gahu madamada? Deeai. Digau ala e-ulu nia goloo beenei ge mouli maluagina e-gidee-gidaadou i-lodo nia hale king.

7:26  Hagia-mai ma di-aha dela ne-hula ginai goodou belee mmada ginai? Di soukohp? Uaa e-donu, gei Au e-hagi-adu gi goodou bolo goodou ne-mmada gi tangada koia e-aamua i soukohp.

7:27  John la-go tangada dela gu-helekai-ai di Beebaa-Dabu boloo: ‘God e-helekai, Au ga-hagau dagu dangada kae-hegau i oo mua, e-huge di ala adu gi-di-Goe!’ ”

7:28  Jesus ga-duudagi-adu ana helekai, “John le e-aamua i-nia daangada huogodoo ala nogo mouli, gei tangada dela koia i-mugi-lala-loo i-lodo Teenua King o God, le e-mada-aamua i John.”

7:29  Digau huogodoo gu-longono Jesus, gei e-donu go digau hagabudu dagitedi, aalaa go digau gu-daudali nnelekai donu a God, idimaa, digaula gu-babdais go John.

7:30  Gei nia Pharisee mo digau haga-donudonu haganoho e-haga-balumee tadinga hagalabagau a God, idimaa, digaula ne-de-hiihai di babdais go John.

7:31  Jesus ga-duudagi-adu ana helekai, “Nia daangada dangi-nei le e-mee di-hagatau ko-Au gi-di-aha? Digaula e-hai be ni-aha?

7:32  Digaula e-hai be nia damagiigi ala e-noho i-di gowaa huihui-mee. Di hagabuulinga-nei e-wwolo gi-di hagabuulinga dela i-golo boloo, ‘Gimaadou ne-daahili nia daahili haga-hai-lodo, gei goodou hagalee gaalege! Gei gimaadou ne-daahili nia daahili dangada-made, gei goodou hagalee tangitangi!’

7:33  John ne-hanimoi gaa-noho hagaonge, hagalee nogo inu nia waini, gei goodou nogo hai boloo, ‘Di hagataalunga huaidu i-lodo o mee!’

7:34  Tama-Tangada ne-hanimoi gu-miami, gu-inu, gei goodou nogo helekai boloo, ‘Mmada gi Taane deelaa! E-hagalugai ge inu waini, gei Mee di hoo ni digau hagabudu dagitedi mo nia balu-daangada!’

7:35  Di kabemee o God e-gila-mai bolo e-donu i-baahi digau ala guu-kae di-maa.”

7:36  Dahi Pharisee ne-gahi a Jesus belee miami ginaua hiahi, gei Jesus gaa-hana gi-di hale o-maa, gaa-noho gi-lala ga-miami.

7:37  Lodo di waahale deelaa, iai di ahina e-mouli huaidu. Mee guu-longo bolo Jesus e-miami i-di hale o-di Pharisee, gei mee ga-gaamai dana loloaabi ne-hai gi-nia ‘albaster’ e-honu lolo-kala,

7:38  mee gaa-duu i-tua Jesus ga-bala gi-lala gi-baahi nia babaawae o-Maa, ga-dangidangi mo di haga-tiu nia babaawae o-Maa gi ono dangi, ga-omo nia babaawae o-Maa gi ono ngaahulu, gaa-hongi, ga-hagatulu gi-di lolo-kala.

7:39  Di Pharisee gaa-mmada gi-di mee deenei, ga-daalo ang-gi ono lodo, “Maa nei-boloo Taane deenei la soukohp donu, gei Mee e-iloo-Ia di ahina dela ne-bili ang-gi de-Ia, e-iloo-Ia di mouli huaidu o-maa!”

7:40  Jesus ga-helekai, “Simon, dagu mee i-golo e-hagi-adu gi-di-goe.” Simon ga-helekai, “Uaa, Tangada agoago, hagia-mai.”

7:41  Jesus ga-helekai, “Nia daane dogolua e-boibana nau bahihadu gi taane ana bahihadu. Tangada e-dahi e-lima-lau silber, ge di hoo o-maa e-madalima.

7:42  Meemaa gu-deemee di-hui nau boibana, gei tangada ana bahihadu ga-dumaalia gi-nia boibana meemaa. Koai i meemaa e-mada-damana dono aloho i mee?”

7:43  Simon ga-helekai, “Au e-hagabau bolo go tangada dela ne-wanga ginai nia mee mada-logo.” Jesus ga-helekai, “Goe e-donu.”

7:44  Mee gaa-huli gi-di ahina, ga-helekai gi Simon, “Goe e-gidee di ahina deenei? Au ne-hanimoi gi doo hale, gei goe digi gaamai au wai belee tono ogu wae, gei di ahina deenei guu-tono ogu wae gi ono dangi, ga-omo gi ono ngaahulu.

7:45  Gei goe digi hagalabagau-ina Au gi-di hongi, gei taamada dogu hanimoi, mee digi noho i dono hongihongi ogu babaawae.

7:46  Goe digi gaamai au lolo-olib belee haga-maluu dogu libogo, gei mee gu-hagatulu ogu babaawae gi-di lolo-kala.

7:47  Gei Au e-helekai-adu bolo di aloho damanaiee ne-haga-modongoohia go mee, e-haga-modongoohia bolo ono huaidu logowaahee la-gu-maahede, gei tangada dela ne-maahede ono huaidu hogoohi, e-haga-modongoohia-hua go dono aloho dulii.”

7:48  Gei Jesus ga-helekai gi-di ahina, “O huaidu la-gu-maahede.”

7:49  Digau ala e-noho gi teebele ga-daamada ga-leelee i nadau mehanga boloo, “Ma koai deenei bolo Ia e-mee di-wwede nia huaidu?”

7:50  Gei Jesus ga-helekai gi-di ahina, “Go do hagadonu dela ne-daa-mai goe gi-daha mo di made. Hana i-di aumaalia.”

Chapter 8

8:1  Nomuli, gei Jesus gaa-hana laa-lodo nia waahale llauehe mo lligi, e-agoago di Longo-Humalia o Teenua King o God. Nia dama-agoago a-Maa gu-madalia a-Mee,

8:2  mo nia ahina ala ne-haga-hili nadau magi mo nia hagataalunga huaidu go Mee: Mary (e-haga-ingoo bolo Mary mai Magdala) dela ne-hagabagi ono hagataalunga huaidu e-hidu,

8:3  Joanna dono lodo go Chuza, tangada oobidi o Herod, mo Susanna, mo nia ahina dogologo i-golo ala nogo hagamaamaa a Jesus mo ana dama-agoago gi nadau maluagina.

8:4  Nia daangada mai nia waahale e-dagadagabuli gi-baahi o Jesus, ga-dogologo-mai, gei Mee ga-hagi-anga dana ala-kai deenei:

8:5  “Taane ne-hana ne-haga-nonnono ana lii. Dono haga-nonnono-hua ana lii gi-lodo di gowaa dogi-mee, hunu lii ne-monnono gi taalinga di ala, di gowaa dela e-dagadagahi go nia daangada, ge e-gai go manu.

8:6  Hunu lii ne-monnono gi-hongo di gowaa haduhadu, gei nia lii la-ga-matili-aga, ga-maangoo, idimaa, nia gelegele la-hagalee tiu.

8:7  Hunu lii ne-monnono gi-lodo nia geinga duduia ala e-tomo-aga dalia nia lii, gei nia maa gaa-mmade, idimaa, nia geinga duduia la-gu-hagadeaadee nia maa.

8:8  Hunu lii ne-monnono gi-hongo di gelegele humalia. Nia laagau gu-tomo-aga guu-huwa dagi-llau.” Gei Jesus ga-helekai haga-muliagina boloo, “Tangada ono dalinga i-golo, gi-hagalongo!”

8:9  Nia dama-agoago a Jesus ga-heeu, “Dehee tadinga di ala-kai deenei?”

8:10  Gei Mee ga-helekai, “Ma-gu-dumaalia-adu gi goodou gi-iloo nia mee ngala huogodoo o Teenua King o God, gei Au e-agoago gi digau ala i-golo i-nia ala-kai, gei digaula ga-halahala nia maa gei e-de-gidee, ga-hagalongo gei e-de-iloo.

8:11  “Deenei tadinga o-di ala-kai deenei: Nia lii la-go nnelekai a God.

8:12  Nia lii ala ne-monnono gi taalinga di ala, la-go digau ala ne-longono nia helekai a God, gei Setan ga-hanimoi gaa-daa nia helekai aalaa gi-daha mo nadau manawa, gi-de-hagadonu digaula ga-mouli.

8:13  Nia lii ala ne-monnono gi-hongo di gowaa haduhadu, la-go digau ala ne-longono-ginaadou nia helekai, gaa-kae nia maa i-di tenetene, gei nia maa digi mau i nadau lodo. Digaula e-hagadonu-hua i tama madagoaa bodobodo, gaa-dau gi-di hagamada, gei digaula gaa-too.

8:14  Gei nia lii ala ne-monnono gi-lodo nia geinga duduia, la-go digau ala ne-longono nia helekai, gei nia maanadu e-logo, nia maluagina, nia haga-tenetene o-di mouli deenei la-guu-honu i nadau lodo, gu-beehi nnelekai aalaa, gaa-hidi-ai nia huwa o nia maa gu-deemee di-mmaadua.

8:15  Nia lii ala ne-monnono gi-hongo di gelegele humalia, la-go digau ala ne-longono nia helekai, ga-daahi nia maa i-lodo nadau manawa humalia ge e-hagalongo, gaa-noho maaloo, gaa-dae-loo gi-ginaadou ma-gaa-huwa.

8:16  “Tangada e-dudu dana malama, ga-haga-holi gi-lala di boolo, be e-dugu gi-lala di hada ai, ma belee dugu gi-hongo di mee dugu-malama, gii-mmada ginai nia daangada i-di nadau ulu-mai.

8:17  “Nia mee hagammuni la-ga-haga-kila-aga, gei nia mee ala e-de-gidee, la-ga-gidee, be e-gaamai gi-di gowaa maalama.

8:18  “Goodou hagalongo gii-donu, idimaa, tangada dela ana mee i dono baahi, le e-wanga gi-mada-logo. Gei tangada dela ana mee ai, le e-daa gi-daha mo mee, ma e-aha maa mee e-hagamaanadu bolo ia ana mee dulii i-dono baahi.”

8:19  Tinana mo nia duaahina-daane o Jesus ga-lloomoi gi Jesus, gei digaula gu-deemee di-heetugi gi Mee idimaa nia daangada gu-dogologowaahee.

8:20  Tangada ga-helekai gi Jesus, “Do dinana mo o duaahina-daane e-tuu i-malaelae, e-hiihai e-heetugi-adu.”

8:21  Jesus ga-helekai gi digaula, “Dogu dinana mo ogu duaahina-daane la-go digau ala e-hagalongo ge e-haga-gila-aga nia helekai a God.”

8:22  Di laangi nomuli, Jesus mo ana dama-agoago gaa-kaga gi-di boodi, gei Mee ga-helekai gi digaula, “Gidaadou gaa-hula gi-di baahi i-golo o tai.” Malaa, digaula ga-hagatanga, gaa-hula.

8:23  Digaula ga-dele-adu, gei Jesus guu-kii. Digi duai di madangi gaa-gono-ia i-hongo di monowai, gei di boodi gu-daamada gu-hahaawa, digaula gu-i-lodo di haingadaa damana.

8:24  Nia dama-agoago a-Maa ga-hangahanga a Jesus, ga-helekai, “Meenei Tagi, gidaadou gaa-mmade hua!” Jesus ga-ala-aga, ga-helekai gi-di madangi mono beau bagibagia gii-kila, gei gu-kila-loo.

8:25  Gei Mee ga-helekai gi ana dama-agoago, “Godou hagadonu la i-hee?” Digaula gu-goboina, gu-mmaadagu, ga-helehelekai i nadau mehanga boloo, “Taane deenei la-koai? Mee ne-helekai-hua, gei di madangi mono beau gu-hagalongo gi Mee!”

8:26  Jesus mo ana dama-agoago ga-dele-adu gi tenua go Gerasa, deelaa i-di baahi i-golo Tai o Galilee.

8:27  Di madagoaa Jesus ne-doo-aga i tongotai, Ia ga-heetugi gi taane iai nia hagataalunga huaidu i ono lodo mai di waahale deelaa. Gu-waalooloo taane deenei dono heehee ono goloo ai, hagalee noho i dono hale, gei e-nohonoho-hua i-di gowaa waa-daalunga.

8:28  Mee ne-gidee-ia a Jesus ga-haga-hinga-ia gi-baahi nia wae o-Maa, gaa-wolo gi-nua, “Jesus, Tama a God-Aamua-Huoloo, Goe e-hiihai gi-di-aha i dogu baahi? Au e-dangi-adu, bolo Goe gi-hudee hagaduadua-ina au!”

8:29  Mee ne-helekai beenei, idimaa, Jesus la-ne-helekai gi-di hagataalunga huaidu bolo gii-hana gi-daha mo mee. Nia holongo e-logo gei di hagataalunga huaidu e-ulu gi-lodo o-mee, ma e-aha maa mee e-lawalawa, ge e-nnoo ono lima mo ono wae gi-nia daula-baalanga, gei mee e-haga-mmodummodu-hua nia maa, gei di hagataalunga huaidu e-lahi a-mee gi-lodo di anggowaa.

8:30  Jesus ga-heeu gi mee, “Do ingoo la koai?” Gei mee ga-helekai, “Dogu ingoo go ‘Dogologo,’ ” idimaa, nia hagataalunga huaidu e-logo i-lodo o mee.

8:31  Nia hagataalunga huaidu ga-dangidangi gi Jesus bolo gi-hudee hagau-ina ginaadou gi-lodo di luwa dono dua-ai.

8:32  Di hagabuulinga biigi e-hoohoo-mai, e-miami i taalinga di gonduu, gei nia hagataalunga huaidu ga-tangi-anga gi Jesus, bolo gi-dumaalia ang-gi ginaadou gii-hula gi-lodo nia biigi, gei Jesus gu-dumaalia gi digaula.

8:33  Gei digaula ga-ulu gi-daha mo taane, ga-ulu gi-lodo nia biigi. Gei di hagabuulinga biigi deelaa gu-llele-ia gi-lala i-di laungudu mololo gi-lodo di monowai, gu-mmaalemu.

8:34  Nia daane ala nogo benebene nadau biigi ga-gidee di mee dela ne-hai, digaula gaa-llele, ga-hagadele di longo deenei gi-lodo di waahale mo nia gowaa dogi-mee.

8:35  Nia daangada gaa-hula belee mmada gi-di mee dela ne-hai. Di madagoaa digaula ne-lloomoi gi Jesus, ga-gidee tangada dela ne-hagabagi ono hagataalunga huaidu e-noho i-baahi o Jesus, ono goloo humalia, gei mee guu-hai tangada humalia, huogodoo gu-mmaadagu.

8:36  Digau ala ne-gidee-ginaadou nia mee aanei, ga-hagi-anga gi digau o-di waahale deelaa di hai o taane dela ne-haga-hili dono magi.

8:37  Gei digau huogodoo o-di guongo deelaa ga-tangi-anga gi Jesus gii-hana, idimaa, digaula gu-mmaadagu i Mee. Gei Jesus gaa-gaga gi-di boodi, ga-hagatanga.

8:38  Taane dela ne-ulu-mai gi-daha ono hagataalunga huaidu, gaa-dangi gi Jesus, “Dumaalia mai au e-hana i oo muli.” Gei Jesus ga-hagau a-mee gii-hana, ga-helekai,

8:39  “Hana gi doo hale, hagia-anga-ina di mee a God ne-hai-adu gi-di-goe.” Gei taane deelaa gaa-hana laa-lodo di waahale, ga-hagi-anga gi digaula di mee a Jesus ne-hai ang-gi deia.

8:40  Di madagoaa Jesus ne-hanimoi labelaa gi-di baahi i-golo o tai, nia daangada gu-benebene a-Mee, idimaa, huogodoo nogo talitali a-Mee.

8:41  Taane dono ingoo go Jairus, tagi di oobidi synagogee, gaa-dau i-baahi o Mee, ga-dogoduli-iha gi-baahi nia wae o Jesus, gaa-dangi gi Mee bolo ginaua e-hula gi dono hale,

8:42  idimaa, dana dama-ahina hua-e-dahi e-madangaholu maa-lua ono ngadau, gu-hoohoo gaa-made. Gei Jesus gaa-hana gi-golo, gei digau dogologo gu-taele i-di gili o-Maa i-nia baahi huogodoo.

8:43  I-lodo digau aanei la di ahina nogo halihali ono dodo i-nia ngadau e-madangaholu maa-lua, gei mee gu-hagawodi ana teenedi huogodoo gi-nia dogidaa, gei tangada ne-mee di-hagahili dono magi ai.

8:44  Di ahina deelaa ga-hanimoi laa-tua Jesus, gaa-bili gi taalinga di gahu o-Maa, gei di magi o-maa guu-hili.

8:45  Jesus ga-heeu, “Ma koai dela ne-bili-mai gi-di-Au?” Digau huogodoo bolo hagalee go ginaadou, gei Peter ga-helekai, “Meenei Tagi, nia daangada dogologo gu-haganiga i doo gili.”

8:46  Gei Jesus ga-helekai, “Tangada gu-bili-mai, idimaa, Au gu-hagalongono eia i-di-Au bolo ogu mahi la-guu-daa.”

8:47  Di ahina gu-modongoohia bolo ia guu-gida, geia ga-hanimoi mo dono bolebole, ga-hagahinga-adu gi-nia wae o Jesus. I-mua digau dogologo, mee ga-hagi-anga gi Jesus tadinga dela ne-bili-eia gi Mee, mo di hili limalima dono magi.

8:48  Jesus ga-helekai gi mee, “Dagu dama-ahina, do hagadonu ne-hai goe gii-hili. Hana i-di aumaalia.”

8:49  Di madagoaa Jesus nogo helekai-ai, gei tangada kae-hegau ga-hanimoi i-di hale o Jairus, ga-helekai gi Jairus, “Dau dama-ahina la-guu-made, goe hudee haga-deaadee-ina Tangada Agoago.”

8:50  Jesus ga-longono-Ia, ga-helekai gi Jairus, “Goe hudee madagu, hagadonu, gei dau dama-ahina ga-humalia.”

8:51  Di madagoaa mee ne-dau i-di hale, Mee hagalee dumaalia gi tangada gi-ulu i ono muli gi-lodo di hale, ala-hua go Peter, John, James, tamana mo tinana o tama-ahina.

8:52  Digau huogodoo ala i-golo e-tangitangi lodo-huaidu i-di tama, gei Jesus ga-helekai, “Hudee tangitangi, di tama la-digi made. Mee e-kii-hua!”

8:53  Digaula huogodoo ga-gadagada, ga-haga-balumee a-Mee, i digaula gu-iloo bolo di tama la-guu-made.

8:54  Gei Jesus gaa-kumi di lima o-maa, gaa-wolo, “Dagu dama, nnoi-nua!”

8:55  Gei tama-ahina gu-mouli, gu-nnoi-nua, gei Jesus ga-helekai gi-haangai-ina a-mee.

8:56  Nia maadua o-maa gu-homouli, gei Jesus ga-helekai gi meemaa gi hudee hagi-anga gi dahi dangada di mee dela ne-hai.

Chapter 9

9:1  Jesus ga-haga-dagabuli ana dama-agoago dilongoholu maa-lua, gaa-wanga gi digaula nia mogobuna mo nia mahi e-hagabagi nia hagataalunga huaidu mo di hagahili nia magi huogodoo.

9:2  Gei Mee ga-hagau digaula bolo gi-agoago-ina Teenua King o God, gei gi-hagahili-ina nia magi.

9:3  Mee ga-helekai gi digaula, “Hudee kae mee digagi i godou hula, hudee kae dogodogo, budehede, meegai, palaawaa, bahihadu, be nia gahu.

9:4  Maa di hale ga-hagaahi-mai goodou, ulu gi-lodo di hale deelaa, noho i-golo, gaa-dae-loo gi di-godou hagatanga i-di waahale deelaa.

9:5  Maa digau o-di gowaa deelaa ga-hagalee benebene goodou, ulu gi-daha mo di waahale deelaa, duduia godou babaawae, e-hai di haga-modongoohia gi digaula.”

9:6  Nia dama-agoago ga-hagatanga, gaa-hula gi-lodo nia waahale lligi huogodoo, ga-hagadele di Longo-Humalia mo di hagahili nia magi i-nia gowaa huogodoo.

9:7  Herod di tagi o Galilee ne-longono-ia nia mee huogodoo ala ne-hai, gei mee guu-lodo hinihini huoloo, idimaa, hunu daangada e-helekai bolo John Babdais la-ne-mouli-aga.

9:8  Hunu gau e-helekai bolo ma go Elijah ne-gila-aga, gei hunu gau e-helekai bolo mee soukohp i-nia soukohp namua ne-mouli-aga.

9:9  Gei Herod ga-helekai, “Au gu-tuu di libogo o John gi-daha, gei ma koai taane deenei dela ono longo aanei?” Gei mee e-hagamahi bolo ia e-mmada gi Jesus.

9:10  Digau agoago-hagau ga-lloomoi, ga-hagi-anga gi Jesus nadau mee huogodoo ala ne-hai, gei Mee gaa-lahi digaula mada-ginaadou gi-di waahale Bethsaida.

9:11  Digau dogologo ala ne-longono gaa-hula i-muli o Mee. Mee ga-benebene digaula, ga-helehelekai gi digaula i-di hai o Teenua King o God, ga-hagahili nia magi.

9:12  Hiahi-ia di-mee, gei ana dama-agoago dilongoholu maa-lua ga-lloomoi gi Mee ga-helekai, “Hagau-ina digau aanei gii-hula gi-nia waahale lligi mono gowaa dogi-mee, gi-halahala nadau mee e-gai mono gowaa e-noho-ai, idimaa, di gowaa deenei le e-lomo.”

9:13  Gei Jesus ga-helekai, “Goodou bida haangai-ina digaula.” Gei digaula ga-helekai, “Nia palaawaa hua e-lima ge lua iga ala i-golo. Goe e-hiihai gimaadou gii-hula e-hui-mai madau meegai gi-di hagabuulinga-dangada dogologo deenei?”

9:14  Nia daane e-lima-mana-(5,000) ala nogo i-golo. Jesus ga-helekai gi ana dama-agoago, “Haganoho-ina digaula gi-nia hagabuulinga-daangada dagi madalima.”

9:15  Muli-hua nia dama-agoago a-Maa ne-haga-noho digaula,

9:16  Jesus ga-dahi-mai nia palaawaa e-lima ge lua iga, gaa-mmada gi-di langi, ga-danggee ang-gi God, ga-ginigini, gaa-wanga gi ana dama-agoago gi-duwwaa gi digaula.

9:17  Digaula gu-miami huogodoo gu-maaluu, gei ana dama-agoago gaa-haa nadau meegai ne-dubu gi-nia gada e-madangaholu maa-lua.

9:18  Dahi laangi hua, gei Jesus e-dalodalo modogoia, ana dama-agoago ga-lloomoi gi Mee, gei Mee ga-heeu gi digaula, “Nia daangada le e-hai bolo Au koai?”

9:19  Digaula ga-helekai, “Hunu gau e-helekai bolo Goe go John Babdais, gei hunu gau e-helekai bolo Goe go Elijah, gei hunu gau i-lodo digaula e-helekai bolo Goe la di soukohp i-nia soukohp namua dela ne-mouli-aga.”

9:20  Gei Mee ga-heeu gi digaula, “Gei goodou e-hai bolo Au koai?” Peter ga-helekai, “Goe go di Mesaia a God.”

9:21  Jesus ga-helekai maaloo gi digaula bolo gi-hudee hagi-anga-ina di mee deenei gi tei dangada.

9:22  Mee ga-helekai labelaa, “Tama-Tangada e-hai-loo gi-hagaduadua, ge e-hai gi-haga-balumee go nia dagi mmaadua, digau aamua hai-mee-dabu mo digau haga-donudonu haganoho. Mee ga-daaligi gii-made, nia laangi e-dolu nomuli ga-hagamouli-aga.”

9:23  Mee ga-helekai gi digaula huogodoo, “Maa tangada e-hiihai e-daudali-mai Au, geia gi-haga-de-langahia-ina dono mouli, gi-dahi-aga-ina dono loobuu i-nia laangi huogodoo, daudali-mai Au.

9:24  Idimaa, tangada dela e-hiihai e-benebene dono mouli, ga-de-gidee dono mouli. Gei tangada dela gaa-hudu gi-daha dono mouli i-di-Au, ga-benebene dono mouli.

9:25  Di humalia aha e-kae go tangada dela ma-ga-hai-mee gi henuailala hagatau, nomuli gei mee ga-de-gidee ia dono mouli? Hagalee!

9:26  Maa tangada ga-langaadia i-di-Au mo agu agoago, gei Tama-Tangada le e-langaadia labelaa i-tangada deelaa, i dono madagoaa ma-ga-hanimoi-ai i-nia madamada o Tamana mo digau di-langi haga-madagu.

9:27  Au e-hagi-adu gi goodou di tonu, bolo hunu gau i-ginei hagalee mmade, gaa-dae-loo gi di-nadau gidee Teenua King o God.”

9:28  Hoohoo gi-di tabu e-dahi i-muli ana helekai i-nia mee aanei, gei Jesus gaa-lahi a Peter, John mo James gi-tomo di gonduu e-dalodalo.

9:29  Dono madagoaa-hua e-dalodalo-ai, gei ono hadumada gu-dina-gee, gei ono gahu gu-kene hila-mmaa.

9:30  Nomuli-hua gei nia daane dogolua, go Moses mo Elijah, e-helehelekai gi Mee.

9:31  Meemaa ne-kila-mai i-lodo nia madamada o-di langi, ga-helekai gi Jesus i dana hai dela gaa-hai hoohoo-mai, e-haga-honu di mee a God dela bolo Ia e-made i Jerusalem.

9:32  Peter mo ono ehoo guu-kii danu-mmoe, ga-aala-aga, gaa-mmada gi-di madamada o Jesus mo nia daane dogolua ala e-tuu i-baahi o mee.

9:33  Di hagatanga-hua nia daane dogolua i-baahi o Jesus, gei Peter ga-helekai, “Tagi, gidaadou gu-humalia huoloo ala gu-i-ginei! Gimaadou gaa-hau madau damaa-hale e-dolu, e-dahi ni-aau, e-dahi ni Moses, gei e-dahi ni Elijah.” (Gei mee digi iloo humalia ana helekai ne-hai.)

9:34  Di madagoaa-hua a-mee dela e-leelee, di gololangi ga-haneia, gaa-gahu digaula. Ana dama-agoago gu-mmaadagu i-di madagoaa di gololangi deelaa ne-gahu digaula.

9:35  Di lee ga-helekai-mai i-lodo di gololangi, “Deenei dagu Dama-daane dela gu-hilihili ko-Au. Hagalongo gi Mee!”

9:36  Di madagoaa di lee ne-noho, gei Jesus gu-modogoia. Ana dama-agoago guu-noho dee-muu, gei digi hagi-anga gi tangada i nadau mee ala ne-mmada ginai.

9:37  Di laangi nomuli, gei Jesus mo ana dama-agoago dogodolu ga-lloo-ia i tomo di gonduu, gei di hagabuulinga-dangada dogologo ga-heetugi gi Jesus.

9:38  Tangada gaa-wolo mai i-baahi digau dogologo aalaa boloo, “Tangada Agoago, au e-dangi-adu gii-mmada gi dagu dama-daane hua e-dahi!

9:39  Di hagataalunga huaidu gu-hagahuaidu a-mee, guu-hai a-mee gi-wolowolo, gi-gaehagaeha, gii-puu biabi dono ngudu, dela-hua dana hai e-haga-mmaemmae a-mee, hagalee hagatanga gi-daha mo mee.

9:40  Au ne-dangi-anga gi au dama-agoago bolo gi-haga-bagia di-maa gi-daha, gei digaula ne-deemee.”

9:41  Jesus ga-helekai, “Goodou digau de-hagadonu gei e-hala! Au e-hai gii-noho waalooloo behee i-godou baahi? E-waalooloo behee dagu hagamaamaa goodou?” Gei mee ga-helekai gi taane, “Laha-mai dau dama-daane gi-kinei.”

9:42  Tama-daane la-ga-hanimoi, gei di hagataalunga huaidu gaa-hudu a-mee gi-hongo di gelegele, gaa-hai a-mee gi-gaehagaeha. Gei Jesus ga-hagabagi di hagataalunga huaidu, ga-hagahili a-mee, gaa-wanga a-mee gi dono damana.

9:43  Digau huogodoo gu-goboina di mogobuna mahi o God. Nia daangada e-goboina hua igolo i-nia mee huogodoo ala ne-hai go Jesus, gei Mee ga-helekai gi ana dama-agoago,

9:44  “Goodou hudee de-langahia dagu mee dela ga-hagi-adu: Tama-Tangada le e-wanga gi-lodo nia mogobuna o nia daangada.”

9:45  Nia dama-agoago a-maa digi modongoohia-ginaadou telekai deenei. Idimaa, ma-ne-dugu hagammuni i digaula bolo gi-de-iloo di-maa, gei digaula hogi nogo mmaadagu di-heeu gi Mee.

9:46  Di lagamaaloo guu-hai i-mehanga nia dama-agoago a Jesus, be di-maa koai i ginaadou dela e-aamua.

9:47  Jesus gu-iloo nia maanadu digaula, ga-gahi-mai dana damagiigi, ga-haga-duu i dono baahi,

9:48  ga-helekai gi digaula, “Be koai-hua dela ga-benebene di tama deenei i dogu ingoo, la-ne-benebene-hua Au, gei tangada dela e-benebene Au, la-ne-benebene-hua Tangada dela ne-hagau-mai Au. Tangada dela i-mugi-lala-loo i goodou, deelaa tangada e-aamua i goodou huogodoo.”

9:49  John ga-helekai-aga, “Tagi Aamua, gimaadou guu-mmada gi tangada e-hagabagi ana hagataalunga huaidu i do ingoo, gei gimaadou guu-bule a-mee, idimaa mee hagalee tangada ni tadau buini.”

9:50  Jesus ga-helekai gi mee mo ana dama agoago ala i-golo, “Goodou hudee bule-ina a-mee, idimaa, tangada dela hagalee hai-baahi-adu gi goodou, la di hoo ni goodou.”

9:51  Jesus ne-hoohoo di-lahi gi-di langi, gei Mee ga-maanadu, gaa-hana gi Jerusalem.

9:52  Mee ga-hagau ana gau kae-hegau gii-hula i ono mua gi-di waahale dulii i Samaria e-hagatogomaalia nia mee huogodoo ang-gi de-Ia.

9:53  Gei digau i-di gowaa deelaa la-hagalee benebene Jesus, idimaa, gu-modongoohia bolo Mee e-hana gi Jerusalem.

9:54  Di madagoaa nia dama agoago a-Maa go James mo John ne-iloo di mee dela ne-hai, meemaa ga-heeu, “Meenei Tagi, Goe e-hiihai bolo gimaua gi-gahigahia di ahi gi-haneia i-di langi e-hagahuaidu digaula?”

9:55  Jesus ga-huli-adu, ga-hagabuhi gi meemaa.

9:56  Nomuli, gei Jesus mo ana dama-agoago gaa-hula gi tuai waahale.

9:57  Di-nadau hula i-hongo di ala, taane ga-helekai gi Jesus, “Au ga-daudali Goe gi-nia gowaa huogodoo ala e-hana ginai Goe.”

9:58  Jesus ga-helekai, “Nia manu-‘fox’ la nadau bongoo i-golo, nia manu-mamaangi nadau waehongo i-golo, gei Tama-Tangada la-dono madagowaa e-kii ge e-hagamolooloo Ia ai.”

9:59  Gei Mee ga-helekai gi tuai daane, “Daudali-mai i ogu muli.” Gei taane ga-helekai, “Meenei, dumaalia-mai, au e-hana e-danu dogu damana i-mua.”

9:60  Jesus ga-helekai, “Dugu-anga gi digau mmade gi-danumia nadau gau mmade. Gei goe hana, hagadele-ina Teenua King o God.”

9:61  Tuai dangada ga-helekai, “Au e-daudali-adu Goe, gei i-mua dumaalia-mai gi-di-au e-hana, e-hai dagu hagaaloho gi digau dogu hale.”

9:62  Gei Jesus ga-helekai gi mee, “Tangada ma-ga-daamada e-haga-maluu dana hadagee, ge e-mmada gi-muli, le e-balumee gi Teenua King o God.”

Chapter 10

10:1  Muli nia mee aanei, Tagi gaa-hili ana gau agoago e-madahidu maa-lua, ga-hagau dau dogolua i-mua dono hana gi-nia waahale mono gowaa ala e-hana ginai.

10:2  Mee ga-helekai, “Taugai gu-damana, gei digau ngalua le e-hogoohi. Dalodalo ang-gi Tagi o taugai deenei gi-hagau-ina-mai digau ngalua e-hagi taugai.

10:3  Hula! Au e-hagau goodou gadoo be nia dama-siibi laa-lodo nia paana lodo-geinga.

10:4  Goodou hudee kae mee-dugu-hadu, budehede dagidagi mee, be nia suudi. Hudee tuu bolo e-hagaaloho gi tangada i-hongo di ala.

10:5  Godou madagoaa gaa-dau i-di hale, gei goodou gi-helekai i-mua boloo, ‘Di aumaalia gii-noho i-baahi di hale deenei.’

10:6  Maa tangada e-aloho i-di aumaalia e-noho i-golo, heia godou hagaaloho di noho di aumaalia gii-noho i dono baahi. Maa ga-hagalee, kaina godou hagaaloho di aumaalia gi-muli.

10:7  Noho i-di hale deelaa, inu ge miami nia mee ala ma-ga-gowadu gi goodou, idimaa, digau hai-hegau le e-wanga nadau hui. Hudee hula gi-di hale-nei mo di hale-nei.

10:8  Goodou ma-gaa-hula gi-lodo di waahale, ga-benebene go digaula, geina nia mee ala ma-ga-dugu-adu gi godou mua.

10:9  Goodou hagamaaloo-ina-aga digau magi ala i-di waahale deelaa, mo di agoago gi digaula boloo, ‘Teenua King o God la-gu-hanimoi gu-hoohoo-adu gi goodou.’

10:10  Goodou ma-gaa-hula gi dahi waahale, ga-hagalee benebene go digaula, goodou hula gi-hongo nia-ala o-di waahale deelaa, helekai boloo,

10:11  ‘Nia gelegele o godou waahale ala e-pigi gi madau babaawae, ga-duidui e-hai-baahi-adu gi goodou. Gei goodou gi-iloo bolo Teenua King o God la-gu-hanimoi, gu-hoohoo-adu gi goodou!’

10:12  Au e-hagi-adu gi goodou di tonu bolo di Laangi Hagi-aga, God koia e-dumaalia gi Sodom i-di waahale deelaa!

10:13  “E-huaidu-adu gi-di-goe Chorazin, ge e-huaidu labelaa gi Bethsaida! Maa nei boloo nia mogobuna ala ne-hai i gulu baahi, la-ne-hai i Tyre mo Sidon, digaula la-guu-noho gi-lala hua-i-mua, gu-ulu gi-nia gahu manawa-gee mo di haga-dogolia nadau gili gi nia luaahi, e-haga-modongoohia bolo ginaadou gu-maaliu gi-daha mo nadau huaidu.

10:14  I-di Laangi Hagi-aga, God e-mada-dumaalia gi Tyre mo Sidon i goolua.

10:15  Capernaum, goe e-bida hiihai e-haga-menege-aga goe gi-di langi i-nua? Goe gaa-hudu gi-lodo di gowaa hagaduadua!”

10:16  Jesus ga-helekai gi ana dama-agoago, “Be koai e-hagalongo-adu gi goodou, ia ne-hagalongo-mai gi-di-Au. Be koai hagalee hagalongo-adu gi goodou, ia digi hagalongo-mai gi-di-Au. Be koai hagalee hagalongo-mai gi-di-Au, ia digi hagalongo gi Tangada dela ne-hagau-mai Au.”

10:17  Digau agoago madahidu maa-lua ne-lloomoi gi-muli ge e-tenetene huoloo, ga-helekai gi Jesus, “Meenei Tagi, nia hagataalunga huaidu gu-hagalongo-mai gi gimaadou ne-hagabagi digaula gi-daha mo nia daangada i do ingoo!”

10:18  Jesus ga-helekai, “Au guu-mmada gi Setan e-doo-iha i-di langi, e-maahina be-di ila.

10:19  Hagalongo! Au gu-gowadu gi goodou di mogobuna gii-mee goodou di taele i-hongo nia gihaa mono ‘scorpion’, gei gi-aali goodou laa-hongo nia mogobuna o-di hagadaumee, deai di mee e-hagahuaidu goodou ai.

10:20  Hudee tenetene bolo nia hagataalunga huaidu la-gu-hagalongo-adu gi goodou, gei gii-tene-hua gi godou ingoo ala guu-hihi i-di langi.”

10:21  Di madagoaa-hua deelaa, gei Jesus guu-honu i-di tene mai di Hagataalunga-Dabu, Mee ga-helekai, “Tamana, Tagi o-di langi mo henuailala. Au e-danggee idimaa i dau haga-modongoohia ang-gi digau ala e-de modongoohia ginaadou nia mee ala ne-hagammuni Kooe i digau ala bolo ginaadou e-kabemee mo di iloo nia mee. Uaa, Tamana, deenei di mee e-manawa-tene ginai Goe gi-heia gii-gila.

10:22  “Dogu Damana ne-gaamai gi-di-Au nia mee huogodoo. Tangada e-iloo Tama ai, dela-hua go Tamana. Gei deai tangada e-iloo Tamana ai, dela-hua go Tama mo ana daangada ne-hilihili belee haga-modongoohia-aga Ia.”

10:23  Gei Jesus gaa-huli gi ana dama-agoago ga-helekai mada-ginaadou, “Goodou gu-haadanga-lamalia, i goodou ga-gidee nia mee ala e-mmada ginai goodou.

10:24  Au e-hagi-adu gi goodou, bolo e-logo nia soukohp mono king nogo hiihai huoloo bolo ginaadou e-mmada gi-nia mee ala e-mmada ginai goodou, gei digaula ne-deemee. Digaula nogo hiihai gi-longono nia mee ala e-longono-goodou, gei digaula digi longono.”

10:25  Tangada haga-donudonu haganoho ne-hanimoi belee hagamada a Jesus, ga-helekai, “Tangada agoago, au e-hai dagu-aha, gei au ga-hai-mee gi-di mouli dee-odi?”

10:26  Jesus ga-helekai gi mee, “Di Beebaa-Dabu e-helekai bolo-aha? Dehee dau haga-modongoohia nia maa?”

10:27  Gei taane ga-helekai, “Aloho i Dimaadua go doo God aga i-lodo do manawa hagatau, mo do hagataalunga hagatau, mo oo mahi hagatau, mo au maanadu hagatau, gei gi-aloho i tangada dela i do baahi, gii-hai be do aloho i-di goe.”

10:28  Gei Jesus ga-helekai, “E-hai donu. Heia nia maa, gei goe ga-mouli.”

10:29  Gei tangada haga-donudonu haganoho e-hiihai gii-donu humalia, ga-heeu gi Jesus, “Tangada dela i dogu baahi la-koai?”

10:30  Jesus ga-helekai, “Dahi daane e-hagatanga i Jerusalem e-hana gi Jericho, gaa-kumi go digau haga-dogolege, gaa-dada ono goloo, ga-daaligi a mee, gu-hoohoo gaa-made, ga-diiagi i-golo.

10:31  Tangada hai-mee-dabu ga-haneia i-hongo di ala deelaa, gaa-mmada gi taane deelaa, gei mee gaa-hana-hua i-di baahi i-golo o-di ala.

10:32  Tangada Levi ga-hanimoi labelaa i-di ala deelaa, gaa-mmada gi taane deelaa, geia gaa-hana labelaa i-di baahi i-golo o-di ala.

10:33  Gei tangada Samaria ga-heehee-mai i-di ala deelaa, ga-gidee taane deelaa, geia gu-aloho huoloo i mee.

10:34  Mee ga-hanadu gi mee gaa-dui ana lolo mono waini gi-nia gowaa moholehole, ga-haga-pigipigi, ga-hagauda a-mee gi-hongo dana manu, gaa-lahi gi-di hale noho-dangada, ga-madamada-humalia-ai.

10:35  Ga-hooaga luada, gei mee gaa-wanga ana bahihadu-silber e-lua gi tagi o-di hale deelaa, ga-helekai, ‘Benabena-ina-mua taane deenei. Au gaa-hana, ga-hanimoi-laa, gaa-hui nia mee huogodoo ala ne-hai-hegau-iei goe gi mee.’ ”

10:36  Gei Jesus ga-haga-lawa dana ala-kai deenei, ga-heeu, “Goe e-maanadu ma koai i-nia daangada dogodolu aanei la-ne-hai be tangada hoohoo gi tangada dela ne-daaligi go digau gaiaa?”

10:37  Tangada haga-donudonu haganoho ga-helekai, “Go tangada dela ne-hagamaamaa a-mee.” Gei Jesus ga-helekai, “Hana-laa, heia beelaa.”

10:38  Di hana o Jesus mo ana dama-agoago i-hongo di ala, Mee ga-hanimoi gi-di waahale, gei di ahina go Martha ga-benebene a-Mee.

10:39  Mee dono duaahina-ahina i-golo, go Mary, nogo noho-hua i-baahi nia wae o Tagi, e-hagalongo gi-nia agoago a-maa.

10:40  Martha gu-lodo-huaidu i ana moomee huogodoo ala e-hai, ga-hanadu gi Jesus, ga-helekai, “Meenei Tagi, Goe e-de-hei-e-Goe dogu duaahina deelaa guu-hai au gii-hai nia hegau huogodoo? Helekai gi mee gi-hanimoi, e-hagamaamaa au.”

10:41  Tagi ga-helekai, “Martha, Martha, goe e-de-nnoomaalia i-nia mee e-logo.

10:42  Di mee donu belee hai, la-dela guu-hai go Mary, gei e-deemee di-daa gi-daha mo mee.”

Chapter 11

11:1  Dahi laangi hua, gei Jesus nogo dalodalo i-dahi gowaa. Dono madagoaa ne-lawa, gei tangada i ana dama-agoago ga-helekai gi Mee, “Tagi, aago-ina-mai gimaadou di hai talodalo be John dela ne-aago gi ana dama-agoago.”

11:2  Jesus ga-helekai gi digaula, “Di-godou madagoaa ma-ga-dalodalo, dalodalo beenei: ‘Tamana, do ingoo gi-dabuaahia. Do henua gi-dau-mai.

11:3  Gaamai madau meegai gi-humalia mai gi gimaadou i-nia laangi huogodoo.

11:4  Weedee madau ihala la-gi-daha, idimaa, gimaadou e-dumaalia gi-nia hala o nia daangada huogodoo ala ne-hai-mai gi gimaadou. Hudee dugu-anga gimaadou gi-nia hagamada haingadaa.’ ”

11:5  Jesus ga-helekai, “Dolomaa, tei goodou gaa-hana gi-di hale o dono ehoo i-di madahidi-waelua di boo, ga-helekai boloo, ‘Dogu ihoo hagaaloho, dumaalia-mai, gaamai hunu palaawaa e-dolu,

11:6  idimaa, dogu ihoo ne-hanimoi gi dogu hale, gei agu meegai belee haangai a-mee ai.’

11:7  Dolomaa, do ehoo la-ga-helekai mai i-lodo dono hale boloo, ‘Hudee haga-daadaamee-ina au! Di bontai la-guu-tai, gei au mo agu dama la-guu-kii. Au e-deemee di-duu-i-nua e-gowadu au mee.’

11:8  Malaa, e-hai behee? Au e-hagi-adu gi goodou bolo maa mee ga-hagalee e-duu-i-nua e-gowadu di palaawaa idimaa goe di hoo ni-oono, gei mee gaa-duu-i-nua hua ga-gowadu au mee huogodoo ala e-hiihai ginai goe, idimaa go do de-langaadia di-dangidangi hagamahi.

11:9  “Malaa, Au e-hagi-adu gi goodou: Goodou dangidangi, gei goodou ga-hai-mee ginai. Halahala-ina, gei goodou ga-gidee-goodou. Dugidugi, gei di bontai la-ga-huge-adu gi goodou.

11:10  Idimaa, digau ala e-dangidangi, le e-hai-mee ginai. Gei digau ala e-halahala, la-ga-gidee. Gei di bontai le e-huge ang-gi tangada ma-ga-dugidugi.

11:11  “Ma tamana koai i godou lodo e-wanga dana gihaa lodo-geinga gi dana dama-daane ma-ga-dangi-ang-gi deia di iga?

11:12  Mee ga-hiihai gi-di ngogo, gei goe e-wanga gi mee di ‘scorpion’?

11:13  Goodou digau huaidu, gei goodou e-iloo di-wanga nia mee ala e-humalia gi godou dama. Nia holongo e-hia gi-nonua a Tamana i-di langi e-wanga di Hagataalunga-Dabu gi digau ala e-dangidangi ang-gi de-Ia?”

11:14  Jesus e-hagabagi dana hagataalunga huaidu e-deemee di-leelee, gei di madagoaa di-maa dela ne-ulu gi-daha, taane deelaa ga-daamada ga-leelee. Digau dogologowaahee gu-goboina huoloo.

11:15  Gei hunu gau e-helekai boloo, “Ma go Beelzebul, di tagi o nia hagataalunga huaidu, dela ne-wanga gi Mee di mogobuna e-hagabagi digaula gi-daha.”

11:16  Hunu gau e-hiihai e-haga-hala a Jesus, gei digaula ga-helekai gi Mee gi-heia ana mogobuna e-haga-modongoohia bolo go God dela ne-haga-mogobuna Ia.

11:17  Gei Jesus gu-iloo-Ia nia maanadu digaula, ga-helekai, “Tei henua ma-gaa-wwae hagabuulinga ga-heheebagi i nadau mehanga, la-hagalee waalooloo. Gei digau di hale ma-ga-dee-buni, le e-meheuheu dagidahi.

11:18  Malaa, tenua o Setan ma-gaa-hai ono buini, ga-heheebagi i nadau mehanga, ga-mooho, ga-hagalee. Goodou e-hai bolo Au gu-hagabagi dagu hagataalunga huaidu, idimaa, Beelzebul ne-gaamai nia mogobuna ala ne-hai-hegau-iei Au.

11:19  Maa e-hai beenaa go dagu hai ne-hagabagi digaula, gei digau ala e-daudali goodou, le e-hagabagi nadau hagataalunga huaidu behee? Digau ala e-daudali goodou, la-gu-haga-modongoohia bolo goodou e-hala.

11:20  Gei deeai, ma go di mogobuna o God dela ne-hagabagi-ai agu hagataalunga huaidu, gei di-maa e-haga-modongoohia bolo Teenua King o God la-gu-hanimoi gi goodou.

11:21  “Ma-ga-iai taane maaloo i-golo gu-togomaalia ono goloo-heebagi, e-hagaloohi dono hale, gei ono goloo huogodoo e-benebene humalia.

11:22  Maa taane maaloo gi-nonua ga-heebagi, ga-haga-magedaa a mee, gei taane maaloo deenei gaa-kae nia goloo-heebagi ala nogo gana ginai tangada dono hale, gaa-duwwe nia mee ala ne-gaiaa.

11:23  “Tangada dela hagalee dau-mai gi-di-Au, le e-hai-baahi mai gi-di-Au, gei tangada dela hagalee hagamaamaa Au e-hagabudu agu mee, le e-wweuwweu nia maa dagidahi.

11:24  “Di hagataalunga huaidu ma-ga-ulu gi-daha mo tangada, geia gaa-hana i-hongo tenua damana maangoo, e-halahala dana gowaa e-hagamolooloo-ai, gei digi gida dana gowaa, geia ga-hagamaanadu boloo, ‘Au gaa-hana gi-muli gi dogu hale.’

11:25  Geia gaa-hana gi-muli, gaa-mmada gi dono hale gu-madammaa, gei gu-benebene hagahumalia.

11:26  Gei mee gaa-hana labelaa, ga-laha-mai ana hagataalunga e-hidu ala koia e-huaidu gi-nonua i-deia, gaa-noho i-golo. I-di lawa, gei tangada deelaa la-koia gu-huaidu gi-nonua i mee matagidagi.”

11:27  Jesus nogo helekai nia mee aanei, gei di ahina ga-helekai-aga i-lodo digau dogologo, boloo, “E-maluagina go tinana dela ne-haanau Goe ge ne-haga-uu Goe!”

11:28  Gei Jesus ga-helekai, “Deeai, digau ala e-maluagina la-go digau ala e-hagalongo gi-nia helekai a God, mo di daudali nia maa!”

11:29  Di lloomoi-hua digau dogologo ga-haganiga a Jesus, gei Mee ga-helekai, “E-huaidu huoloo go digau dolomeenei! Digaula e-hiihai gi-di mogobuna, gei di mogobuna e-hai gi digaula ai, dela-hua go di mogobuna ne-hai gi Jonah.

11:30  Soukohp Jonah la-ne-hai di haga-modongoohia ang-gi digau Nineveh, gadoo be Tama-Tangada e-hai di haga-modongoohia ang-gi digau dolomeenei.

11:31  I-di Laangi Hagi-aga, di king-ahina o Sheba gaa-duu-i-nua, ga-hagahuaidu digau ala dolomeenei, idimaa, mee ne-hanimoi haga-mogowaa-loo belee hagalongo gi-nia agoago kabemee a King Solomon. Gei-Au e-hagi-adu gi goodou bolo ma iai Tangada i-ginei, e-koia e-mada-aamua i Solomon.

11:32  I-di Laangi Hagi-aga, gei digau Nineveh gaa-tuu gi-nua, ga-hagahuaidu goodou, idimaa, digaula guu-huli gi-daha mo nadau huaidu i-di nadau madagoaa ne-hagalongo gi-nia agoago Jonah. Gei-Au e-hagi-adu gi goodou bolo ma iai Tangada i-ginei e-koia e-mada-aamua i Jonah!

11:33  “Deai tangada e-dudu dana malama ga-haga-mmuni di-maa be haga-holi gi-di boolo ai, dela-hua e-dugu gi-hongo di gowaa dugu-malama, gei nia daangada gaa-mee di-gidee di maalama i-di nadau lloomoi.

11:34  O golomada le e-hai be-di malama ni do huaidina. O golomada la-ga-humalia, ge do huaidina hagatau la-ga-maalama huoloo. Gei o golomada la-ga-huaidu, ge do huaidina hagatau la-ga-bouli-dongoeho.

11:35  Malaa, heia gii-donu bolo di maalama dela i oo lodo la-hagalee di bouli.

11:36  Maa do huaidina hagatau la-guu-honu i-di maahina, di bouli ai, di-maa ga-maahina hagatau, gadoo be-di maahina o-di malama ma-ga-maahina-ia i oo nua.”

11:37  Jesus ne-lawa dana helehelekai, gei dahi Pharisee gaa-gahi a-Mee e-miami ginaua, gei Mee gaa-hana gaa-noho gi-lala belee miami.

11:38  Di Pharisee deelaa ga-homouli gi Jesus dela digi tono ono lima i-mua dono miami.

11:39  Gei Tagi ga-helekai gi mee, “Goodou go nia Pharisee e-haga-madammaa-hua nia gili godou ibu mono pileedi, gei godou lodo le e-honu i-nia lagamaaloo mono hai-mee-huaidu.

11:40  Goodou e-dadaulia! Ma hagalee go God dela ne-hai di gili laa-daha mo lodo?

11:41  Wanga-ina nia mee ala i-lodo godou ibu mo godou pileedi gi digau hagaloale, gei nia mee huogodoo la-ga-madammaa adu gi goodou.

11:42  “E-huaidu huoloo adu gi goodou nia Pharisee. Goodou e-wanga gi God dahi baahi e-madangaholu o godou manga-laagau hai-suub e-haga-ingoo bolo ‘mint’ mono ‘rue’ mono manga-laagau huogodoo ala i-golo, gei hagalee haga-dahidamee di tonu mo di aloho o God. Goodou heia di tonu mo-di aloho i-mua, ga-nomuli gaa-hai-laa nia mee ala i-golo.

11:43  “E-huaidu huoloo adu gi goodou nia Pharisee. Goodou e-hiihai gi nia lohongo ala e-aamua i-lodo nia synagogee, gei e-hiihai bolo nia daangada gi-hagaaloho ge gi-hagalabagau-ina goodou i-nia gowaa huihui-mee.

11:44  E-huaidu huoloo adu gi goodou! Goodou e-hai gadoo be nia daalunga ala digi hihia ginai nia ingoo gi nonua, ala e-heehee-ai nia daangada nonua, gei e-de-iloo-ginaadou nia maa.”

11:45  Tangada e-dahi i digau haga-donudonu haganoho ga-helekai gi Mee, “Tangada-Agoago, dau helekai ne-hai, la-gu-hagahuaidu labelaa gimaadou!”

11:46  Jesus ga-helekai, “E-huaidu huoloo labelaa go goodou go digau haga-donudonu haganoho. Goodou e-hagauda godou mee daamaha gi-hongo nia daangada, gei godou madaalima ne-holo belee hagamaamaa digau ala e-aamo nia maa ai.

11:47  E-huaidu huoloo adu gi goodou! Goodou e-hau nia daalunga humalia ang-gi nia soukohp, aalaa go nia soukohp ne-daaligi go godou maadua-mmaadua.

11:48  Di-godou hai deenei e-haga-modongoohia bolo goodou e-donu-hua gi-nia hai godou maadua-mmaadua ne-hai. Digaula gu-daaligi nia soukohp, gei goodou guu-hau nia daalunga digaula.

11:49  Di kabemee o God e-helekai boloo, ‘Au e-hagau agu soukohp mono gau kae-hegau gi digaula, gei digaula ga-daaligi hunu ginaadou ge e-hagaduadua hunu ginaadou.’

11:50  Gei digau dolomeenei le e-hagaduadua i tadaaligi o nia soukohp ala ne-mmade mai taamada di hai o henuailala,

11:51  mai taaligi o Abel gaa-tugi-loo gi taaligi o Zechariah dela ne-daaligi i-mehanga di gowaa hai-tigidaumaha mo di Gowaa-Dabu. Uaa, Au e-hagi-adu gi goodou bolo digau ala dolomeenei, le e-hagaduadua i-nia mee ala ne-hai go digaula huogodoo!

11:52  “E-huaidu huoloo adu gi goodou go digau haga-donudonu haganoho! Goodou nogo daahi di gii dela belee huge di bontai di hale o-di iloo nia mee. Goodou digi hula gi-lodo, gei goodou nogo tai digau ala bolo ginaadou e-ulu gi-lodo!”

11:53  Di madagoaa Jesus ne-hagatanga i-di gowaa deelaa, gei digau haga-donudonu haganoho mo nia Pharisee ga-daamada ga-hagahuaidu a-Mee, ga-heheeu gi Mee nia mee e-logo,

11:54  e-hagamada belee haga-hala a-Mee, bolo gi-hagalongo ginaadou gi Mee ma-ga-helekai hala.

Chapter 12

12:1  Dogologowaahee ne-lloomoi gi-di gowaa e-dahi, gu-deeoo di-heehee. Jesus ga-helekai matagidagi gi ana dama-agoago, “Goodou hagaligaliga i-daha mo nia ‘yeast’ o nia Pharisee, aalaa go nia hegau ngudu-golomada digaula.

12:2  Nia mee ala guu-gahu gii-nngala, le e-huge-aga. Gei nia mee huogodoo ala gu-hagammuni, le e-haga-modongoohia gi-iloo.

12:3  Gei godou mee ala ne-helekai-ai i-lodo di bouli, la-ga-longono i-lodo di maalama. Gei godou mee ala ma-ga-helekai haga-moolee i-lodo di ruum tai, la-ga-longono mai i-nia dahuhu o nia hale.

12:4  “Au e-hagi-adu gi goodou, ogu ihoo hagaaloho, hudee mmaadagu i digau ala e-daaligi tuaidina, ga-nomuli ga-deemee di-hai di mee dela koia e-mada-huaidu.

12:5  Au ga-haga-modongoohia-adu gi goodou, be di-maa ko-ai belee madagu-ai. Madagu i-God, dela ono mogobuna e-hudu goe gi-lodo di ahi dee-odi, i-muli do daaligi gii-made. Au e-helekai-adu, goodou gi-mmaadagu i-Mee.

12:6  “Nia lomilomi e-lima le e-hui-hua gi-nia teenedi e-lua, gei God e-hagalee de-langahia dahi lomilomi.

12:7  Nia ngaahulu o godou libogo hogi la-guu-lawa di-dau. Deelaa-laa, hudee mmaadagu, goodou koia e-mada-hagalabagau laa-hongo nia lomilomi e-logo!

12:8  “Au e-hagi-adu gi goodou bolo digau ala e-haga-modongoohia ginaadou i-mua digau dogologo bolo ginaadou nia dama ni-aagu, gei Tama-Tangada e-haga-modongoohia-aga digaula labelaa i-mua digau di-langi a God.

12:9  Gei digau ala e-haga-de-iloo ginaadou Au i-mua digau dogologo, gei Tama-Tangada ga-haga-de-iloo digaula labelaa i-mua digau di-langi a God.

12:10  “Tangada dela ga-helekai hai-baahi gi Tama-Tangada le e-mee-hua di-dumaalia ginai, gei tangada dela ga-helekai hai-baahi gi-di Hagataalunga-Dabu, le e-deemee di-dumaalia ginai.

12:11  “Di madagoaa digaula gaa-lahi goodou e-gabunga i-lodo nia synagogee, be i-mua nia gobinaa mo nia dagi, goodou hudee mamaanadu e-logo be goodou ga-duuli goodou behee, be goodou ga-helekai bolo-aha.

12:12  Idimaa, di Hagataalunga-Dabu ga-aago-laa goodou i-di madagoaa deelaa, be goodou e-helekai bolo-aha.”

12:13  Taane i-lodo digau dogologo ga-helekai gi Jesus, “Tangada Agoago, helekai gi dogu duaahina gi-duwwaa i gimaua nia mee di-mau damana.”

12:14  Jesus ga-helekai, “Dogu ihoo hagaaloho, ma koai ne-gaamai gi-di-Au di tonu e-haga-donu goolua, be e-duwwe di maluagina i goolua?”

12:15  Gei Mee ga-helekai gi digaula huogodoo, “Gii-pula i goodou i-nia hagagailaa huogodoo, idimaa, di mouli hagatau o tangada la-hagalee go nia mee ala e-hai-mee ginai, eimaha hogi ma mee tangada maluagina behee.”

12:16  Jesus ga-helekai gi digaula di ala-kai deenei: “Tangada maluagina dana gowaa dela koia e-huwa nia huwa-laagau humalia.

12:17  Gei mee ga-hagabaubau boloo, ‘Dagu gowaa ai e-benebene agu huwa-laagau huogodoo. Au gaa-hai dagu-aha?’

12:18  Mee gaa-bida hagamaanadu boloo, ‘Deenei dagu hai gaa-hai: Au ga-oho gi-lala agu doogoo, gaa-hau gi-mada-llauehe gi-oo, e-dugu agu huwa-laagau huogodoo, mo ogu goloo ala i-golo.

12:19  Gei-au ga-hagamaanadu-mai gi-di-au boloo: Goe taane haadanga-lamalia, goe guu-hai au mee humalia huogodoo ala ga-hai-hegau-iei goe nia ngadau e-logo. Mouli haingoohia, miami, inu mo di tenetene adu gi-di-goe.’

12:20  Gei God ga-helekai gi mee, ‘Goe tangada dadaulia! Di boo-hua deenei gei goe ga-diiagi do mouli, gei di-maa koai dela ga-hai-mee gi-nia mee huogodoo nogo benebene kooe?’ ”

12:21  Jesus ga-helekai haga-muliagina, “Deenei di hai e-hai gi digau ala e-haga-bae nadau maluagina anga-hua gi ginaadou, gei digaula la-hagalee maluagina i-mua o God.”

12:22  Jesus ga-helekai gi ana dama-agoago, “Deelaa-laa Au e-helekai-adu bolo gi-hudee hei-e-goodou nia meegai ala e-hiihai ginai belee mouli-ai, be go nia goloo ala e-gahu-ai goodou.

12:23  Di mouli le e-mada-hagalabagau i-nia meegai, ge tuaidina le e-mada-hagalabagau i-nia goloo gahu.

12:24  Mmada gi-nia manu-mamaangi: digaula hagalee dogi nadau lii-laagau, be e-hadi taugai. Digaula nadau hale-dugu-mee ai, gei God e-haangai digaula! Goodou le e-mada-hagalabagau i-nia manu-mamaangi!

12:25  Ma tangada i goodou e-mee di-mouli mada-waalooloo i dana hagabaubau e-logo?

12:26  Maa goodou e-deemee di-hai di mee dulii-loo deenei, gei goodou e-hagabaubau e-logo i-nia mee ala i-golo eimaha?

12:27  Mmada gi-nia akai lodo-geinga ala e-tomo. Digaula hagalee ngalua e-gahu ginaadou. Gei-Au e-hagi-adu gi goodou bolo di King Solomon mo ono maluagina la-hagalee madamada i-tei akai aanei.

12:28  Go God dela e-haga-gahu nia geinga lodo-henua, nia geinga ala e-tomo dangi-nei, daiaa gu-hagalee, guu-dudu i-lodo di mee dudu geinga, malaa, Mee hagalee ga-haga-gahu labelaa goodou? Godou hagadonu le e-lligi!

12:29  “Goodou hudee manawa-gee i-nia madagoaa e-logo, be goodou gaa-gai be e-inu godou-aha.

12:30  Idimaa, digau e-noho i-lodo di bouli henuailala e-hagabaubau nia mee beenei. Di-godou Damana le e-iloo di-godou dee-dohu.

12:31  Gei goodou gi-haa-manawa-hua i dono Henua, gei Mee ga-hagahumalia goodou gi-nia mee aanei.

12:32  “Hudee mmaadagu dagu hagabuulinga-siibi dulii-nei, i-di godou Damana le e-manawa-tenetene di-gowadu gi goodou Teenua King o God.

12:33  Huia gi-daha godou mee huogodoo, wanga-ina nia bahihadu gi digau hagaloale. Heia godou mee-dugu-hadu hagalee mooho, mo di benebene godou maluagina i-di langi i-di gowaa dela hagalee ngudu-ai, idimaa, digau gaiaa e-kae nia maa ai, ge hagalee gai go manu.

12:34  Idimaa, di gowaa dela iai godou maluagina, deelaa di gowaa e-haa-manawa-ai goodou.

12:35  “Gi-togomaalia gi tei mee ga-hanimoi, gi-ulu i-nia goloo hai-hegau, ge godou malama gi-ula,

12:36  gadoo be digau hai-hegau e-tali nadau dagi e-hanimoi gi-muli i tagamiami haga-hai-lodo. Mee ga-hanimoi ga-dugidugi, gei digaula ga-hagalimalima gaa-huge di bontai gi mee.

12:37  E-maluagina go digau hai-hegau ala gaa-mmada ginai di-nadau dagi e-aala, gu-togomaalia gi dono hanimoi. Au e-hagi-adu gi goodou di tonu, mee ga-daa gi-daha dono gahu-mahaa, gaa-hai digaula gii-noho gi-lala, ga-ngalua gi digaula.

12:38  E-maluagina go digau ala ma-gaa-mmada ginai mee gu-togomaalia, ma e-aha maa mee ga-hanimoi i-di madahidi-waelua di boo, be no-muli!

12:39  Gei goodou guu-mee-hua di-iloo bolo maa tangada dono hale ga-iloo di madagoaa tangada gaiaa ga-hanimoi, gei mee hagalee hai a-mee gi-ulu gi-lodo dono hale.

12:40  Goodou gi-togomaalia labelaa, idimaa, Tama-Tangada le e-hanimoi i-di aawaa dela hagalee e-kana go goodou.”

12:41  Peter ga-helekai, “Meenei Tagi, di ala-kai deenei laa-mai gi gimaadou, be gi digau huogodoo?”

12:42  Gei Tagi ga-helekai, “Ma koai tangada hai-hegau manawa-dahi ge kabemee? Tangada beenei gaa-dugu go dono dagi e-dagi di hale mono hegau, ge e-wanga nia duhongo meegai gi digau hai-hegau i-di madagoaa e-tau-anga.

12:43  E-maluagina huoloo go tangada hai-hegau ma-gaa-mmada ginai dono dagi e-hai nia mee aanei i dono hanimoi gi dono hale!

12:44  Au e-hagi-adu gi goodou di tonu bolo tangada dono hale, la-gaa-dugu a mee e-dagi ono goloo huogodoo.

12:45  Maa tangada hai-hegau ga-maanadu bolo dono dagi le e-duai-nau ga-hanimoi-laa, gei mee ga-daamada ga-dadaaligi nia daane mono ahina huogodoo, geia ga-miami ga-inuinu gi-libaliba.

12:46  Dahi laangi hua di tagi ga-hanimoi, gei tangada hai-hegau deelaa e-hagalee talitali a-mee, e-de-iloo-ia di madagoaa dela e-hanimoi-iei mee. Di tagi ga-duuduu a-mee haga-ligiligi, gaa-hai a-mee gii-dau gi-di hagaduadua o digau de-hagalongo.

12:47  “Tangada hai-hegau dela e-iloo nia mee o dono dagi ala bolo gi-heia, geia hagalee hai nia maa, tangada deelaa le e-hagaduadua kono.

12:48  Gei tangada hai-hegau dela e-de-iloo nia mee o dono dagi ala bolo gi-heia, geia gu-hai-hala, tangada deelaa le e-hagaduadua maamaa. “Nia mee e-logo e-hai gii-hai go tangada dela ne-wanga ginai nia mee e-logo, gei nia mee e-mada-logo gi-nonua le e-hai gii-hai go tangada dela ne-wanga ginai nia mee mada-logo.

12:49  “Au ne-hanimoi belee dudu henuailala, gei dogu hiihai le e-hai bolo ma-gii-lawa di-gaa!

12:50  Au belee kae di babdais, gei Au gu-lodo huaidu huoloo gaa-dae-loo gi-di kae di-maa.

12:51  Goodou e-hagabau bolo Au ne-hanimoi belee gaamai di aumaalia gi henuailala? Deeai, hagalee di aumaalia, gei go di waewae.

12:52  Dangi-nei gaa-hana, gei digau o-di hale dogolima ga-dee-buni, dogodolu ga-hai-baahi gi dogolua, gei dogolua ga-hai-baahi gi dogodolu.

12:53  “Nia damana ga-hai-baahi ang-gi nadau dama-daane, gei nia dama-daane ang-gi nadau damana. Nia dinana ga-hai-baahi ang-gi nadau dama-ahina, gei nia dama-ahina ang-gi nadau dinana. Nia dinana dau-aga ga-hai-baahi ang-gi nadau dama-ahina dau-aga, gei nia dama-ahina dau-aga ga-hai-baahi ang-gi nadau dinana dau-aga.”

12:54  Jesus e-helekai labelaa gi-nia daangada, “Goodou ma-gaa-mmada gi-di gololangi e-hanaga i-dai, gei goodou ga-helekai bolo di uwa gaa-doo, gei di-maa gaa-doo.

12:55  Goodou ga-hagalongoia di madangi e-hanimoi i-ngaaga, gei goodou e-helekai bolo ma-ga-welengina, gei di-maa ga-welengina.

12:56  Goodou digau hai-hegau ngudu-golomada! Goodou e-iloo nia hagamodongoohia i-di gili di langi mo henuailala, malaa, goodou le e-aha ala e-de-iloo nia hagamodongoohia o-di madagoaa dolomeenei?

12:57  “Goodou e-aha ala e-hagalee halahala gii-donu goodou di hai di-mee dela e-hai donu?

12:58  Maa tangada ga-hai-baahi-adu gi-di-goe i nnaganoho, gaa-lahi goe gi-di gabunga, hagahumalia-ina gulu mehanga i-mua doo hana gi-di gabunga. Maa goe ga-hagalee hai beenei, mee gaa-dagi goe gi-mua tangada hai-gabunga, gaa-wanga goe gi tinggee, gaa-haa gi-lodo di hale-galabudi.

12:59  Au e-hagi-adu gi-di-goe bolo goe gaa-noho i-golo gaa-dae-loo gi-di madagoaa ma-gaa-hui do boibana gii-odi!”

Chapter 13

13:1  Di madagoaa deelaa, hunu gau nogo i-golo ga-helekai gi Jesus i digau Galilee ala ne-daaligi go Pilate i-di nadau madagoaa nogo hai nadau tigidaumaha ang-gi God.

13:2  Jesus ga-helekai, “Idimaa digau Galilee ala ne-daaligi beelaa, gei goodou e-hagabau bolo nadau huaidu le e-huaidu laa-hongo nia huaidu digau Galilee ala i-golo?

13:3  Gei deeai! Au e-hagi-adu gi goodou bolo maa goodou ga-hagalee huli gi-daha mo godou huaidu, goodou huogodoo le e-mmade be digaula.

13:4  E-hai behee go digau dilongoholu maa-walu nogo i Siloam ala ne-mmade i-di angulaa ne-hinga gi-hongo digaula? Goodou e-hagabau bolo digaula koia e-huaidu i-digau huogodoo ala i Jerusalem?

13:5  Gei deeai! Au e-helekai-adu bolo maa goodou hagalee huli gi-daha mo godou huaidu, gei goodou huogodoo le e-mmade gadoo be digaula.”

13:6  Jesus ga-helekai gi digaula i-di ala-kai deenei, “Taane dana laagau-‘fig’ e-tomo i-lodo dana gowaa dogi-waini. Mee e-haga-dinadina di ‘fig’ be di-maa guu-huwa, gei digi huwa.

13:7  Gei mee ga-helekai gi dana dangada hai-hadagee boloo, ‘Nia ngadau e-dolu nogo hani-hanimoi-iei au belee mmada be di-maa guu-huwa, gei au digi gidee nia huwa. Hele-ina di-maa gi-lala. Ma e-aha dela e-haga-hai-hegau balumee nia gelegele.’

13:8  Gei tangada hai-hadagee ga-helekai, ‘Meenei, dugua gii-hai dono ngadau e-dahi i-golo, gei au gaa-geli di gili di-maa, ga-haga-oho di-maa.

13:9  Hila-hua di laagau-‘fig’ deenei gaa-huwa humalia i-lodo di ngadau e-dahi, gei di-maa gu-humalia, maa ga-hagalee, gei goe gaa-hele-laa di-maa gi-lala.’ ”

13:10  Dahi Laangi-Sabad, gei Jesus nogo agoago i-lodo synagogee.

13:11  Di ahina i-golo iai di hagataalunga huaidu i ono lodo dela ne-hai a-mee gii-magi nia ngadau e-madangaholu maa-walu. Mee guu-biga gi-mua, gu-deemee di-duu donu gi-nua.

13:12  Di madagoaa Jesus ne-gidee-Ia, ga-gahi-mai a-mee, “Di ahina, goe gu-mehede gi-daha mo doo magi!”

13:13  Jesus gaa-dugu ono lima gi-hongo o mee. Di madagoaa-hua deelaa, di ahina deelaa gu-duu donu gi-nua mo di hagaamu a God.

13:14  Gei tagi synagogee gu-hagawelewele gi Jesus dela ne-haga-hili dana magi i-di Laangi-Sabad, ga-helekai gi-nia daangada, “Nia laangi e-ono ala e-ngalua-ai gidaadou, goodou hagahili-ina godou magi i-nia laangi aalaa, hagalee i-di Laangi-Sabad.”

13:15  Gei Tagi ga-helekai gi mee, “Goodou digau hai-hegau ngudu-golomada! Goodou e-hagamaahede godou kau mo godou ‘donkey’ i nadau lohongo, e-dagi gi-daha belee haga-inu i-di Laangi-Sabad.

13:16  Deenei la tangada ni di hagadili o Abraham dela nogo lawalawa go Setan i-nia ngadau e-madangaholu maa-walu. Mee hagalee belee hagamehede i-di Laangi-Sabad?”

13:17  Telekai a-Mee deenei la-gu-haga-langaadia ono hagadaumee, gei nia daangada dogologo le e-tenetene gi-nia mee haga-goboina huogodoo ala nogo hai go Mee.

13:18  Jesus ga-heeu, “Teenua King o God le e-hai be di-aha? Ma e-hagatau ko-Au gi-di-aha?

13:19  Ma e-hai beenei: Dahi daane ne-kae ana lii laagau-‘mustard’, gaa-dogi i dana gowaa. Di laagau gaa-tomo, ga-damana, gei nia manu gaa-hai nadau waehongo i-nia manga o di-maa.”

13:20  Jesus ga-heeu labelaa, “Au ga-hagatau Teenua King o God gi-di-aha?

13:21  Ma e-hai beenei: Di ahina ne-kae ana ‘yeast’, ga-unugi dana haga-munga palaawaa, gei di palaawaa la-gaa-tanga.”

13:22  Jesus guu-hana laa-lodo nia waahale llauehe mo lligi e-agoago i-dono ala adu gi Jerusalem.

13:23  Tangada ga-heeu gi Mee, “Meenei, ma digau hua dulii ala ga-mouli?” Jesus ga-helekai gi digaula,

13:24  “Heia godou mee ala e-mee gi-ulu goodou i-di bontai mada-giigi, idimaa, digau dogologo e-hagamahi bolo ginaadou e-ulu, gei e-deemee.

13:25  Di tagi o-di hale gaa-tai di bontai, gei goodou gaa-tuu i-malaelae ga-daamada ga-dugidugi di bontai mo di helekai boloo, ‘Meenei, hugea-mai di bontai gi gimaadou.’ Gei mee ga-helekai-adu gi goodou boloo, ‘Au e-de-iloo be goodou ne-lloomoi i-hee!’

13:26  Gei goodou ga-helekai boloo, ‘Gimaadou nogo miami, nogo inu madalia goe, gei goe nogo agoago i-di madau waahale!’

13:27  Gei mee ga-helekai labelaa, ‘Au e-de-iloo be goodou ne-lloomoi i-hee. Tuu-i-daha mo au, goodou huogodoo digau huaidu!’

13:28  Goodou ga-tangitangi ga-gadigadi godou niha i-di-godou madagoaa ma-gaa-mmada gi Abraham, Isaac mo Jacob, mo nia soukohp huogodoo i-lodo Teenua King o God, i-di madagoaa dela e-kili goodou gi-daha.

13:29  Nia daangada ga-lloo-ia i-dua ge e-lloo-aga i-dai, ga-lloomoi i-ngeia ge e-lloomoi i-ngaaga, gaa-noho gi-lala i tagamiami i-lodo Teenua King o God.

13:30  Gei digau ala mugi-muli dolomeenei gaa-hula laa-mua, gei digau ala e-mugi-mua dolomeenei gaa-hula laa-muli.”

13:31  Di madagoaa hua deelaa, hunu Pharisee ne-loomoi gi Jesus, ga-helekai gi Mee, “Hana gi-daha gi tuai gowaa, idimaa, Herod e-hiihai e-daaligi Goe.”

13:32  Gei Jesus ga-helekai gi digaula, “Hula, haga-iloo gi-di manu-‘fox’ deelaa, bolo Au e-hagabagi agu hagataalunga huaidu, gei e-hagahili agu magi dangi-nei mo daiaa, gei au gaa-lawa agu hegau i tolu laangi.

13:33  Au gaa-hana i dogu ala dangi-nei, daiaa mo dono daiaa. Ma hagalee donu bolo soukohp e-daaligi i tuai gowaa, dela-hua i Jerusalem.

13:34  “Jerusalem, Jerusalem! Goe gu-daaligi nia soukohp mo di dilidili digau kae-hegau a God ala ne-hagau-adu gi-di-goe. Nia holongo e-hia Au ne-hiihai di-holo ogu lima, e-daabui-mai goodou huogodoo, gadoo be teduu-ahina ma-ga-daabui-mai ana dama gi-lala ono bakau, gei goe digi dumaalia-mai gi-di-Au!

13:35  Gei dau Hale Daumaha la-ga-diiagi. Au e-haga-modongoohia-adu gi-di-goe, bolo goe ga-deemee di-mmada-mai gi-di-Au, gaa-dae-loo gi do madagoaa ma-ga-helekai boloo, ‘God gu-haga-maluagina Tangada dela ga-hanimoi i-di ingoo o Dimaadua.’ ”

Chapter 14

14:1  Dahi Laangi-Sabad, gei Jesus ne-hana ga-miami i-di hale o-di Pharisee aamua, gei nia daangada e-madamadaagi a-Mee hagatau.

14:2  Dahi daane e-haga-hula ono wae mo ono lima, gaa-hana gi Jesus.

14:3  Gei Jesus ga-huli-adu gi digau haga-donudonu haganoho mo nia Pharisee, ga-heeu, “Tadau haganoho le e-mahuge ang-gi di-hagahili di magi i-di Laangi-Sabad be deeai?”

14:4  Gei digaula digi helekai. Jesus ga-dahi-mai taane deelaa, ga-hagahili, ga-hagau gi dono hale.

14:5  Nomuli, gei Mee ga-helekai gi digaula, “Dolomaa tei goodou ga-iai dana dama-daane be dana kau gaa-doo gi-lodo di monowai i-di Laangi-Sabad, mee hagalee ga-dahi-aga di-maa hagalimalima i-di Laangi-Sabad deelaa?”

14:6  Gei digaula gu-deemee di-helekai gi telekai a-Maa.

14:7  Jesus gu-modongoohia digau ala ne-gahi-mai gi tagamiami e-hilihili nia gowaa koia e-humalia e-noho ginaadou, gei Mee gaa-kai dana ala-kai deenei gi digaula:

14:8  “Maa tangada gaa-gahi goe gi tagamiami haga-hai-lodo, hudee noho i-di gowaa dela koia e-humalia. Goe gaa-noho i-golo, gei tangada e-mada-hagalabagau i oo nua, ga-gahi-aga labelaa,

14:9  gei tangada dela ne-gahi goolua, ga-helekai-adu gi-di-goe bolo goe gi-wanga-ina di lohongo gi mee e-noho-ai. Gei goe ga-langaadia, gaa-noho gi-lala i-di gowaa mugi-lala-loo.

14:10  Maa goe gaa-gahi go tangada gi-hanaga gi tagamiami haga-hai-lodo, noho i-di gowaa dela i-mugi-lala-loo, gei tangada dela ne-gahi goe ga-helekai-adu boloo, ‘Dogu ihoo hagaaloho, hanaga-laa-nei gi-di gowaa e-humalia.’ Ma-gaa-hai beenei, le e-hai goe gi-hagalabagau i-mua o ehoo ala ne-gahi-aga dalia goe.

14:11  Idimaa, digau ala e-hagalaamua ginaadou, le e-hai gi-mugi-lala, gei digau ala e-hai ginaadou gi-mugi-lala-loo, le e-hai gi hagalaamua.”

14:12  Gei Jesus ga-helekai gi tagi di hale, “Goe ma-gaa-hai dau hagamiami oodee be hiahi, hudee gahia o ehoo, be o duaahina, be oo gau, be go digau maluagina ala i do baahi, idimaa, digau aanei gaa-gahi labelaa goe. Ma-gaa-hai beenei, digaula gaa-hui-adu labelaa do humalia.

14:13  Goe ma-gaa-hai dau hagamiami damana, gahia digau hagaloale, digau mooho nadau huaidina, digau habehabe, mo digau deegida,

14:14  gei goe ga-haga-maluagina, idimaa, digaula e-deemee di-hui goe gi-muli labelaa. God e-hui labelaa goe i-di laangi dela e-mouli-aga digau humalia.”

14:15  Tangada e-dahi i digau ne-gahi-aga nogo noho i teebele, ne-longono-ia nia helekai aanei, ga-helekai gi Jesus, “E-maluagina go digau ala ma-gaa-noho i tagamiami aamua i Teenua King o God!”

14:16  Gei Jesus ga-helekai gi mee, “Tangada ne-hai dana hagamiami damana, gei mee gaa-gahi ana gau dogologo,

14:17  gaa-dae-mai di madagoaa tagamiami, gei mee ga-hagau dana dangada hai-hegau gi ana gau ala ne-gahi boloo, ‘Lloomoi, nia mee huogodoo gu-togomaalia!’

14:18  Gei tangada-nei mo tangada-nei i digaula gaa-hai nadau dangidangi. Tangada matagidagi ga-helekai gi tangada hai-hegau boloo, ‘Au guu-hui dagu gowaa, gei au belee hai gii-mmada gi-di gowaa. Dumaalia-mai-mua gi dagu dangidangi.’

14:19  Tangada i-golo boloo, ‘Au guu-hui agu kau madangaholu, gei au belee hana, e-hagadina nia maa. Dumaalia-mai gi-di-au.’

14:20  Gei tangada i-golo e-helekai boloo, ‘Au dogo hai-hua dogu lodo, gu-deemee di-hanadu.’

14:21  “Gei tangada hai-hegau gaa-hana gi-muli, ga-hagi-anga gi dono dangada aamua nia mee huogodoo ala ne-hai. Gei tangada aamua gu-hagawelewele huoloo, ga-helekai boloo, ‘Hana gi-hongo nia-ala llauehe mo lligi o-di waahale, laha-mai digau hagaloale, digau mooho nadau huaidina, digau deegida, mo digau habehabe.’

14:22  Tangada hai-hegau ga-helekai gi dono dagi boloo, ‘Dau hegau la-guu-hai, gei di-maa e-oo hua igolo.’

14:23  Gei tangada aamua ga-helekai gi tangada hai-hegau boloo, ‘Hana gi-nia ala llauehe mo lligi o tenua. Laha-mai digau huogodoo gii-honu i-lodo dogu hale.

14:24  Gei-au e-hagi-adu gi goodou bolo tangada e-dahi i digau ala ne-haga-gahi le e-momi dana mee i dagu hagamiami ai!’ ”

14:25  Dahi madagoaa, digau dogologo nogo hula i-muli o Jesus, gei Mee ga-huli-adu, ga-helekai,

14:26  “Tangada dela e-hanimoi gi-di-Au, le e-deemee di-hai tama-agoago ni-aagu, maa ia hagalee e-aloho i-di-Au laa-hongo dono damana mo dono dinana, dono lodo mo ana dama, ono duaahina-daane mo ahina, mo dono huaidina.

14:27  Tangada dela hagalee kae dono loobuu-donu ga-hanimoi i ogu muli, le e-deemee di-hai tama-agoago ni-aagu.

14:28  “Maa tei goodou ga-maanadu bolo e-haga-duu dana angulaa, geia gii-noho gi-lala i-mua, gi-hagabaulia di-hui di-maa, be ana bahihadu le e-dohu e-mee di-hau di-maa gii-lawa.

14:29  Maa mee hagalee hai beenei, geia e-deemee di-hau di angulaa gii-lawa i-muli di hau di baba, gei nia daangada gaa-mmada gi dana moomee, ga-gadagada, ga-hagahuaidu a-mee boloo,

14:30  ‘Mee ne-daamada ne-hau dana angulaa, geia e-deemee di-haga-lawa di-maa.’

14:31  “Maa dahi king gaa-hana mo ana gau-dauwa e-madangaholu-mana-(10,000) belee heebagi gi-di king dela e-hanimoi mo ana gau-dauwa e-madalua-mana-(20,000), mee gaa-noho gi-lala i-mua, e-hagamaanadu be ia e-maaloo di-heebagi gi-di king deelaa.

14:32  Maa mee ga-deemee, geia ga-hagau ana gau kae-hegau e-heetugi gi-di king dela i-golo i dono madagoaa e-mogowaa-ai, e-dangidangi-anga bolo hagalee hai-tauwa.”

14:33  Jesus ga-duudagi ana helekai, “E-hai gadoo be goodou. Tangada i goodou ai e-mee di-hai dagu dama-agoago, maa ia digi lawa gi-daha mo nia mee huogodoo ala e-hai-mee ginai.

14:34  “Nia toolo le e-humalia, gei nia mmala o-nia maa ma-ga-hagalee, di hai i-golo ai e-haga-mmala nia maa labelaa.

14:35  Gei nia maa hagalee dahidamee labelaa gi-nia gelegele, gi-di haga-oho nia laagau, ala-hua e-kili gi-daha. Tangada ono dalinga i-golo, gi-hagalongo!”

Chapter 15

15:1  Dahi laangi hua, gei digau hagabudu dagitedi dogologo mo digau huaidu ne-lloomoi gi-baahi o Jesus e-hagalongo gi Mee.

15:2  Nia Pharisee mono gau haga-donudonu haganoho ga-daamada, ga-helehelekai huaidu boloo, “Taane deenei e-hagaahi-mai digau huaidu, gei e-miami i-baahi digaula!”

15:3  Gei Jesus ga-helekai di ala-kai deenei:

15:4  “Dolomaa tangada i goodou ana siibi e-lau, gei siibi e-dahi gaa-ngala, gei mee gaa-hai dana-aha? Mee gaa-dugu ana siibi e-matiwa maa-hiwa gi-lodo di abaaba, gaa-hana, ga-halahala di siibi e-dahi dela ne-ngala gaa-dae-loo gi dono gidee-ia a-mee.

15:5  Dono madagoaa ga-gidee-ia a-mee, geia gu-tenetene huoloo, ga-dahi-aga a-mee gi-hongo ono bakau,

15:6  ga-aamo gi dono hale, mee ga-gahi-mai ono ehoo hagaaloho, mo digau ala i dono baahi, ga-helekai gi digaula boloo, ‘Au gu-tenetene. Au gu-gidee-au dagu siibi dela ne-ngala. Gidaadou gaa-budu di-maa!’

15:7  “Au e-hagi-adu gi goodou bolo di tenetene mada-damana i-di langi ang-gi tangada huaidu e-dahi ma-ga-maliu dono manawa, laa-hongo di tenetene ang-gi digau matiwa maa-hiwa ala e-noho humalia, hagalee-loo bolo e-huli nadau manawa.

15:8  “Dolomaa di ahina ana teenedi silber e-madangaholu, gaa-ngala e-dahi, gei mee gaa-hai dana-aha? Mee gaa-dudu dana malama, ga-duidui dono hale, ga-madamada hagatau i-nia madagowaa huogodoo i-lodo dono hale gaa-dae-loo gi dono gidee-ia di-maa.

15:9  Dono madagoaa ne-gidee-ia di-maa, mee ga-gahi-mai ono ehoo hagaaloho mo digau ala i dono baahi gi-di gowaa e-dahi, ga-helekai gi digaula boloo, ‘Au gu-tenetene, idimaa, au gu-gidee dagu teenedi silber dela ne-ngala. Gidaadou gaa-budu di-maa.’

15:10  “Au e-hagi-adu gi goodou bolo digau di-langi a God le e-tenetene labelaa gi tangada huaidu e-dahi ma-gaa-huli hoou dono manawa.”

15:11  Jesus ga-helekai, “Taane ana dama-daane dogolua.

15:12  Tama dulii ga-helekai gi tamana boloo, ‘Gaamai dogu duhongo i o maluagina dolomeenei.’ Gei tamana gaa-duwwe ono maluagina i ana dama dogolua.

15:13  Muli-hua nia laangi dulii, tama-daane dulii gaa-hui gi-daha di baahi dono maluagina, gaa-hana mo ana bahihadu gi tenua mogowaa-loo, ga-hagauwwou ana bahihadu gi-di balu-mouli.

15:14  Mee gu-haga-haihegau ana mee huogodoo ala ne-hai-mee ginai gii-odi. Gei tau-magamaga damana guu-hai i-hongo tenua deelaa, gei mee gu-daamada gu-hiigai.

15:15  Mee gaa-hana ga-ngalua i-baahi tangada-donu o tenua deelaa ne-hagau a-mee gi-lodo dana gowaa dugu biigi belee madamada humalia-ai.

15:16  Mee gu-hiihai huoloo bolo ia ga-miami dalia nia biigi, gei tangada e-wanga nia meegai gi mee ai.

15:17  Muliagi-loo, gei mee gaa-donu ang-gi deia, gaa-huli dono manawa, ga-helekai boloo, ‘Digau ngalua dogu damana e-logo nadau meegai e-deemee di-gai, gei au deenei hua e-hiigai, gaa-made!

15:18  Au gaa-duu-i-nua, gaa-hana gi dogu damana, ga-helekai gi mee boloo, Tamana, au gu-ihala ang-gi God mo adu gi-di-goe.

15:19  Au e-dee-tau-loo di hagaingoo bolo tama ni-aau. Duguina-hua au be tangada e-dahi i au gau-ngalua.’

15:20  Gei mee ga-du-gi-nua, gaa-hana gi-muli gi dono damana. “Mee dela-hua e-mogowaa i-di hale, gei tamana gu-gidee-ia a-mee, gu-aloho huoloo, gaa-lele, ga-bulubulu-mai a-mee, ga-hongihongi.

15:21  Tama ga-helekai boloo, ‘Tamana, au gu-ihala ang-gi God, gei gu-ihala adu gi-di-goe. Au hagalee tau-loo di haga-ingoo bolo tama ni-aau.’

15:22  Gei tamana ga-gahi-mai ana gau hai-hegau, ga-helekai gi digaula boloo, ‘Hagalimalima, gaamai di gahu ulu laa-tua dela koia e-humalia, haga-ulu-ina a-mee. Haga-ulu-ina di buulei, mono suudi.

15:23  Gaa-lawa, goodou daaligidia tamaa-kau dela e-kaedahi e-humalia, e-hai tadau hagamiami hagaamu.

15:24  Idimaa, mee tama ni-aagu guu-made, gei dolomeenei gei mee gu-mouli. Mee guu-ngala, gei dolomeenei gu-gila-mai labelaa.’ Gei tagamiami ga-daamada.

15:25  “Di madagoaa-hua deelaa, tama-daane madua nogo i-lodo henua. Dono haneia, ga-hoohoo gi-di hale, gei mee ga-longono nia lee daahili mono gaalege.

15:26  Mee ga-gahigahi tangada hai-hegau, ga-heeu boloo, ‘Ma di-aha dela e-hai?’

15:27  Tangada hai-hegau ga-helekai, ‘Do duaahina-daane la-gu-hanimoi, gei do damana gu-daaligi tamaa-kau dela e-kaedahi e-humalia huoloo, idimaa, mee gu-gidee-ia a-mee labelaa.’

15:28  “Tuaahina-daane madua gu-hagawelewele huoloo, gu-hagalee hana gi-lodo di hale. Gei tamana o-maa ga-hanimoi gi-malaelae, ga-dangidangi gi mee bolo gi-ulu gi-lodo.

15:29  Gei mee ga-helekai manawa-gee gi dono damana boloo, ‘Mmada, nia ngadau huogodoo aanei, gei au nogo ngalua-adu gi-di-goe gadoo be-di hege, gei au digi de-hagalongo-loo gi au helekai, gei dau maa di-aha ne-gaamai gi-di-au? Di kuudi hogi ne-gaamai kooe belee hai dagu hagamiami gi ogu ihoo hagaaloho ai!

15:30  Gei dau dama-daane deenei nogo hagauwwou o maluagina i dono mouli be-di manu, gei dono hanimoi, goe gu-daaligi tamaa-kau dela e-kaedahi e-humalia gi mee.’

15:31  Tamana ga-helekai, ‘Dagu dama, nia madagoaa huogodoo gei goe i-ginei i dogu baahi, gei agu mee huogodoo la nia mee ni-aau.

15:32  Gei gidaadou belee budu ge tenetene, idimaa, do duaahina la-guu-made, dolomeenei gei mee gu-mouli. Mee guu-ngala, dolomeenei gei mee guu-gida.’ ”

Chapter 16

16:1  Jesus ga-helekai gi ana dama-agoago, “Taane maluagina dana dangada hai-hegau igolo e-benebene ono goloo. Dono dagi gu-hagailoo ginai bolo dana dangada hai-hegau le e-hagauwwou ono maluagina.

16:2  Tagi ga-gahi-mai dana dangada haihegau ga-helekai boloo, ‘Ma di-aha dela ne-longono-eau? Gaamai di beebaa haga-modongoohia agu mee nogo benebene kooe, idimaa, goe gu-hagalee hai dagu dangada benebene-mee.’

16:3  Tangada benebene-mee ga-hagamaanadu boloo, ‘Dogu dagi la-gaa-daa au gi-daha mo dagu moomee. Au gaa-hai dagu-aha? Au e-bagege di-geli agu aloalo, gei au e-langaadia di madamadau agu mee.

16:4  Au e-iloo dagu mee dela gaa-hai, di madagoaa dagu moomee ga-daa gi-daha mo au, gei au ne belee hai ogu ihoo, gii-mee di-benebene au i nadau guongo.’

16:5  “Mee ga-gahi-mai digau huogodoo ala e-boibana gi dono dagi. Mee ga-heeu gi tangada matagidagi boloo, ‘Do boibana gi dogu dagi le e-hia?’

16:6  Gei mee ga-helekai, ‘Nia ulu-mee lolo-olib e-lau.’ Tangada benebene-mee ga-helekai gi mee, ‘Noho gi-lala, hihia gi-madalima.’

16:7  Gei mee ga-helekai labelaa gi tangada i-golo boloo, ‘Goe e-boibana e-hia?’ Gei mee ga-helekai boloo, ‘Nia ulu-mee ‘wheat’ e-mana-(1,000).’ Tangada benebene-mee ga-helekai gi mee, ‘Deenei do boibana, hihia gi-walu-lau-(800).’

16:8  “Gei di mee ne-gila-mai, tagi o tangada benebene-mee tilikai deenei ga-hagaamu a-mee dela ne-hai ana mee kabemee, idimaa, digau henuailala la-koia e-kabemee di hai nia mee ang-gi ginaadou laa-hongo digau ala guu-hai nia daangada ni-di maalama.”

16:9  Jesus ga-helekai, “Au e-hagi-adu gi goodou gi-hai-hegau i godou goloo o henuailala ang-gi nia daangada, gei digaula gaa-hai nia hoo hagaaloho ni goodou i-di madagoaa nia goloo ma-ga-hagalee, gei God ga-benebene goodou gi-lodo tenua dono hagaodi ai.

16:10  Be koai e-hai-hegau donu i-nia mee lligi, geia e-hai-hegau donu i-nia mee llauehe. Be koai e-hai-hegau ihala i-nia mee lligi, geia e-hai-hegau ihala i-nia mee llauehe.

16:11  Maa goodou hagalee hai-hegau-donu i-nia maluagina henuailala, ma koai dela ga-dugu-adu nia maluagina ala e-donu gi-hai-hegau-ai goodou?

16:12  Maa goodou ga-hagalee hai-hegau donu gi-nia mee o tuai dangada, ma koai ga-gowadu au mee donu?

16:13  “Tangada hai-hegau e-deemee di hege gi-nia dagi dogolua, i mee ga-dee-hiihai gi tagi e-dahi, ga-aloho i tagi dela i-golo. Mee ga-hagalaamua tangada e-dahi, ga-haga-balumee tangada dela i-golo. Goodou e-deemee di-hai nia hege ni God mo nia bahihadu.”

16:14  Nia Pharisee ne-longono nia mee aanei, ga-helekai gadagada i Jesus, idimaa, digaula e-hiihai huoloo gi-nia bahihadu.

16:15  Jesus ga-helekai, “Goodou e-hai goodou bolo gii-mmada hagahumalia ginai nia daangada, gei God e-iloo-Ia godou manawa. Idimaa, nia mee ala e-haga-dahidamee go nia daangada, la nia balumee i-mua o God.

16:16  “Nnaganoho Moses mo nia Beebaa o nia Soukohp, nogo mogobuna-hua dono hai-hegau-ai gaa-dae-loo gi-di madagoaa o John Babdais. Nomuli, go di Longo-Humalia o Teenua King o God guu-dele, gei digau huogodoo e-hagamahi gii-dau ginaadou.

16:17  Ma e-mada-haingoohia go di langi mo henuailala ma-ga-hagalee, i-di mee dela koia e-dulii-loo i nnaganoho ma-ga-hagalee.

16:18  “Taane dela ma-gaa-hudu gi-daha dono lodo, gaa-hai dono lodo gi tuai ahina, geia gu-ihala i-di hala o-di mouli hai be-di manu. Gei taane dela ma-gaa-lodo gi-di ahina dela ne-diiagi go dono lodo, le e-hala labelaa i-di hala mouli hai be-di manu.

16:19  “Taane maluagina e-ulu i-nia gahu koia e-hui-ngadaa, ge e-mouli baagawa i-nia laangi huogodoo,

16:20  gei tangada hagaloale i-golo, dono ingoo go Lazarus, guu-buni magibala dono gili, e-nnoo-mau e-laha-mai gi-di ngudu di bontai o tangada maluagina deenei,

16:21  e-noho belee gai nia meegai ligiligi monnono i teebele tangada maluagina, gei nia paana e-loomoi e-tobotobo nia magibala o-maa.

16:22  “Taane hagaloale gaa-made, gaa-lahi go digau di-langi gi-baahi o Abraham gaa-noho i tagamiami i-di langi. Taane maluagina gaa-made labelaa, gaa-danu.

16:23  I-lodo di gowaa digau mmade mee guu-mmae ang-gi deia huoloo, gei mee gaa-mmada gi Abraham e-gila-mai hagamogowaa, gei Lazarus i dono baahi.

16:24  Mee ga-wolo-adu, ‘Tamana Abraham! Aloho-mai gi-di-au! Hagau-ina-mai a Lazarus e-haga-tiu dono madaalima e-haga-tiu dogu holole gi-magalillili, i-di-au guu-mmae huoloo i-lodo di ahi deenei!’

16:25  “Abraham ga-helekai, ‘Dagu dama-daane, goe e-langahia-e-goe do madagoaa nogo mouli, gei goe nogo hai-mee gi-nia mee humalia, gei Lazarus nogo hai-mee gi-nia mee huaidu. Dolomeenei gei mee e-tenetene, gei goe e-mmaemmae i-lodo di ahi.

16:26  Gei di-maa di lua llala i tadau mehanga, digau ala e-hiihai e-lloo-adu be loomoi la-gu-deemee.’

16:27  Taane maluagina ga-helekai, ‘Au e-dangidangi-adu, tamana Abraham, hagau-ina a Lazarus gi-di hale dogu damana,

16:28  di gowaa dela iei ogu duaahina-daane dogolima. Hagauina a-mee gi-haga-iloo gi digaula gi-de-lloo-aga-hua digaula gi-di gowaa haga-mmaemmae deenei.’

16:29  “Gei Abraham ga-helekai, ‘O duaahina nadau gau haga-iloo i-golo: go Moses mo nia Soukohp, gei ginaadou gi-hagalongo gi digaula.’

16:30  Taane maluagina ga-helekai, ‘Tamana Abraham, deenaa la-hagalee dohu! Maa tangada ne-mouli-aga i-di made gaa-hana gi digaula, gei digaula ga-maalui-mai gi-daha mo nadau huaidu.’

16:31  Gei Abraham ga-helekai, ‘Digaula ma-ga-hagalee hagalongo gi Moses mo nia soukohp, ginaadou le e-deemee hogi di-maalui nadau manawa, ma e-aha maa tangada dela ne-made ga-mouli-aga, gaa-hana gi digaula.’ ”

Chapter 17

17:1  Jesus ga-helekai gi ana dama-agoago, “Nia mee ala e-hai nia daangada gii-too gi-lodo di huaidu e-mee di-kila-aga, malaa e-huaidu huoloo gi tangada dela e-hai nia maa gi-kila-aga!

17:2  E-humalia hua di-nnoo ginai di hadu-damana gi dono uwa, ga-hagabubulu, e-koia e-humalia i-dana hai digau lligi aanei gii-hala!

17:3  Gii-pula i godou mee ala e-hai! “Do duaahina-daane ma-ga-hai-hala, gei goe heia a-mee gii-donu. Mee gu-maliu ono lodo, goe dumaalia gi mee.

17:4  Gei mee ga-hai-hala adu gi-di-goe haga-hidu i-di laangi e-dahi, ga-hanaga haga-hidu gi-di-goe, ga-helekai bolo ia gu-maliu ono lodo, gei goe gi-dumaalia gi mee.”

17:5  Ana dama-agoago ga-helekai boloo, “Meenei Tagi, hagamaaloo-ina-aga madau hagadonu!”

17:6  Tagi ga-helekai, “Maa godou hagadonu la-gaa-lligi be-di lii o-di laagau-‘mustard’, gei goodou e-mee-hua di-helekai gi-di laagau damana deenei boloo, ‘Daagia goe, hana, dogia goe gi-lodo di moana!’ Gei di-maa ga-hagalongo adu gi goodou.

17:7  “Dolomaa tei goodou dana hege e-taa ana geinga i-lodo dau hadagee, be e-haangai au siibi i-lodo henua. E-hai behee? Dono madagoaa ma-ga-hanadu gi-di-goe, goe ga-helekai gi-mee bolo-aha: ‘Hagalimalima, noho gi-lala, miami?’

17:8  Deeai! Goe ga-helekai gi mee boloo: ‘Hagatogomaalia-ina dogu hagangudu hiahi, ulu gi-lodo o goloo dunu meegai e-hai-hegau-mai gi-di-au. I-muli dogu miami mo di inu, gei goe ga-miami-laa.’

17:9  Di hege dela ne-haga-gila-aga nnelekai o dono dagi le e-tau di danggee ginai, be deeai?

17:10  E-hai gadoo be goodou. Di-godou haga-kila-aga nia mee huogodoo ala belee hai, goodou la-gi-helekai-hua boloo, ‘Gimaadou nia balu hege hua, ne-hai-hua madau duhongo-hegau.’ ”

17:11  Nomuli, gei Jesus ga-hanadu i-mehanga Samaria mo Galilee gi Jerusalem.

17:12  Dono ulu-adu gi-lodo di waahale dulii, Mee ga-heetugi gi-nia daane magi genegene dilongoholu e-tuu mai haga-mogowaa.

17:13  Gei digaula gaa-wwolo gi Mee, “Meenei Jesus! Tagi aamua! Aloho-mai gi gimaadou!”

17:14  Gei Jesus ga-gidee digaula, ga-helekai, “Hula gi-baahi digau hai-mee-dabu, e-haga-dina goodou.” I-di-nadau hula, gei digaula gu-madammaa nadau gili.

17:15  Di madagoaa tangada e-dahi i digaula ne-gidee dono gili gu-madammaa, geia ga-hanimoi gi-muli gi Jesus, gaa-wolo gi-nua ga-hagaamu a God.

17:16  Mee gaa-bala-ia gi-mua nia wae o Jesus ga-hagaamu a-Mee. Mee taane Samaria.

17:17  Jesus ga-heeu, “Ma hagalee digau dilongoholu ala ne-hili nadau gili? Aahee digau dogohiwa?

17:18  Ma e-aha tangada tuadimee hua ne-hagaamu a God?”

17:19  Gei Jesus ga-helekai gi taane, “Duu-i-nua, hana, do hagadonu dela ne-hagahili goe.”

17:20  Hunu Pharisee ga-heeu gi Jesus be Teenua King o God le e-dau-mai ma-gaa-hee. Mee ga-helekai, “Teenua King o God hagalee dau-mai i-di hai e-gidee.

17:21  E-deai tangada e-hai boloo, ‘Mmada, ma deenei!’ be e-hai boloo, ‘Ma deelaa!’ idimaa, Teenua King o God la-dela-hua i godou baahi.”

17:22  Gei mee ga-helekai gi ana dama-agoago, “Di madagoaa ga-dau-mai, gei goodou ga-hiihai e-mmada gi-di laangi e-dahi i-nia laangi o Tama-Tangada, gei goodou e-de-gidee di-maa.

17:23  Digau i-golo ga-helekai-adu gi goodou boloo, ‘Mmada, Mee deelaa!’ be ga-helekai boloo, ‘Mee deenei!’ Gei goodou hudee hula gi-malaelae e-mmada.

17:24  Di hai o-di laangi o Tama-Tangada e-hai gadoo be-di ila dela e-daba i-di baahi o-di langi, ga-ina-loo gi-di baahi dela i-golo.

17:25  Matagidagi gei Mee e-hai-loo gi-hagaduadua ge e-haga-balumee go nia daangada o-di madagoaa dolomeenei.

17:26  “Nia mee ala ne-hai i tolongo o Noah, aalaa nia mee gaa-hai i-nia laangi o Tama-Tangada.

17:27  Nia daangada huogodoo nogo miamiami ge inuinu, nia daane mono ahina nogo haga-haga-hai-lodo, gaa-dae-loo gi-di laangi o Noah ne-ulu gi-lodo dono waga, gei toloo gaa-hai, ga-daaligi digaula huogodoo gii-mmade.

17:28  “Nogo hai labelaa be tolongo Lot. Digau huogodoo nogo miamiami-hua mo di inuinu, nogo huihui nadau mee mo di hui gi-daha, nogo dogi nadau gowaa ge haga-duu-aga nadau hale.

17:29  Gei di laangi dela ne-hagatanga-ai a Lot i Sodom, di ulaula mo dono uwa-hadu-‘sulfur’ gaa-too-ia i-di langi, ga-daaligi digaula huogodoo.

17:30  Deelaa di hai gaa-hai i-di laangi o Tama-Tangada ma-ga-hagagila-mai.

17:31  “Di laangi deelaa, maa tangada i-tua tala di hale, gi-hudee haneia gi-lodo di hale bolo e-kae ono goloo. E-hai gadoo be tangada i-lodo henua, hudee hai bolo e-hana gi dono hale.

17:32  Goodou gi-langahia di lodo o Lot!

17:33  Digau ala e-hagamahi e-benebene nadau mouli, nadau mouli la-ga-hagalee. Gei digau ala e-wanga-dehuia nadau mouli, ga-hai-mee gi-di mouli.

17:34  Au e-hagi-adu gi goodou bolo di boo deelaa, nia daangada dogolua e-kii di hada e-dahi, tangada e-dahi gaa-lahi, gei e-dahi gaa-dubu i-golo.

17:35  Nia ahina dogolua e-mmili nau lii-‘wheat’ i-di gowaa e-dahi, di ahina e-dahi gaa-lahi, gei e-dahi gaa-dubu i-golo.

17:36  [Nia daangada dogolua i-lodo henua, tangada e-dahi gaa-lahi, gei e-dahi gaa-dubu i-golo.”]

17:37  Nia dama-agoago a-maa ga-heeu gi Mee boloo, “Tagi, di gowaa ihee?” Gei Jesus ga-helekai, “Di gowaa dela iai tuaidina dangada-made, nia manu-mamaangi gai-dangada ga-dagabuli-mai gi-golo!”

Chapter 18

18:1  Jesus gaa-kai dana ala-kai gi ana dama-agoago belee aago digaula gi-di hai dalodalo i-nia madagoaa huogodoo, gi-de-paagege digaula.

18:2  Mee ga-helekai, “I-lodo dahi waahale nogo iai tangada hai-gabunga, dela hagalee madagu i God, ge hagalee hagabau nia daangada.

18:3  Di ahina guu-made dono lodo i-lodo di waahale deelaa, ga-hanimoi gi mee, e-dangidangi i-di tonu, bolo gi-hagamaamaa-ina eia, e-hai gii-donu tangada dela e-hai-baahi ang-gi-deia.

18:4  Gu-waalooloo gei tangada hai-gabunga deelaa digi haga-gila-ina tangidangi a-maa. Muli-mai-hua, gei tangada hai-gabunga gaa-bida hagamaanadu i ono lodo boloo, ‘Au tangada hagalee madagu i God, ge hagalee hagabau nia daangada,

18:5  gei di-maa nia haingadaa huogodoo di ahina deenei e-haga-deaadee au, au ga-wanga gi mee di tonu, gi-de-hani-hanimoi-hua a-mee, ga-hagabuhi au!’ ”

18:6  Gei Tagi ga-helekai, “Hagalongo gi nnelekai tangada hai-gabunga huaidu deelaa.

18:7  E-hai behee? God la-ga-hagalee gabunga hagamaamaa ana daangada-donu ala e-tangi ang-gi de-Ia i-nia hagamaamaa i-di boo mo di aa? Mee ga-hagalee duai dana hagamaamaa digaula!

18:8  Au e-hagi-adu gi goodou bolo Mee ga-gabunga gii-hai be nia hiihai digaula, ge e-hai hogi gi-limalima. Malaa, Tama-Tangada la-ga-gidee di hagadonu i henuailala i dono hanimoi?”

18:9  Jesus ne-kai labelaa dana ala-kai i digau ala e-hai bolo ginaadou e-donu ge humalia, ge mmada hagahuaidu gi digau huogodoo ala i-golo.

18:10  Mee ga-helekai, “Nia daane dogolua ne-hula gi-di Hale Daumaha belee dalodalo. Tangada e-dahi di Pharisee, gei di hoo o-maa la tangada hagabudu dagitedi.

18:11  “Di Pharisee le e-duu madatanga i-daha modogoia, ga-dalodalo boloo, ‘Au e-danggee-adu gi-di-Goe, meenei God, au hagalee hagagailaa, hagalee hai-mee-hala, be e-hai be-di manu be digau ala i-golo. Au e-danggee-adu gi-di-Goe, au hagalee hai be tangada hagabudu dagitedi deelaa.

18:12  Au e-noho haga-onge i-nia laangi e-lua i-lodo tabu e-dahi, gei au e-gowadu gi-di-goe dahi baahi madangaholu o agu bahihadu ala e-ulu-mai.’

18:13  “Tangada hagabudu dagitedi le e-duu madatanga i-daha, ge hagalee hila gi-di langi, geia ga-paapaa dono hadahada, ga-helekai boloo, ‘God, aloho-mai gi-di-au, tangada huaidu!’ ”

18:14  Jesus ga-helekai, “Au e-hagi-adu gi goodou bolo tangada hagabudu dagitedi la-ne-donu i-baahi o God i-mua dono hana gi dono hale, hagalee go di Pharisee. Idimaa, digau ala bolo ginaadou digau aamua, le e-hai gii-hila-gi-lala, gei digau ala e-hila-gi-lala, le e-hai gi-aamua.”

18:15  Nia daangada ne-laha-mai nadau dama gi Jesus belee dugu ono lima gi-nadau nua. Nia dama-agoago a-Maa ga-gidee, gaa-wwou gi digaula.

18:16  Gei Jesus ga-gahi-mai nia dama, ga-helekai, “Duguina-mai nia dama gi-lloomoi gi-di-Au. Hudee abaabalia digaula, idimaa, Teenua King o God la ni digau ala e-lligi beenei.

18:17  Au e-hagi-adu di tonu bolo tangada dela hagalee kae Teenua King o God be-di tama dulii, geia e-deemee di-ulu i Teenua King o God.”

18:18  Tangada aamua o Judea ga-heeu gi Jesus, “Tangada-Agoago humalia, au e-hai dagu-aha, gei au ga-hai-mee gi-di mouli dee-odi?”

18:19  Jesus ga-helekai, “Goe e-hai bolo Au tangada humalia eiaha? Ma tangada e-humalia ai, go God hua modogoia e-humalia.

18:20  Goe e-iloo nia haganoho boloo, ‘Goe hudee hai be-di manu, hudee daaligidia tangada gii-made, hudee gaiaa, ge hudee helekai-kai-tilikai, gi-hagalabagau-ina do damana mo do dinana.’ ”

18:21  Gei taane deelaa ga-helekai, “Au gu-daudali nnaganoho aanei huogodoo, aga i dogu damagiigi.”

18:22  Jesus ga-longono-ia nia mee aanei, ga-helekai gi mee, “Di mee e-dahi i-golo e-hai gii-hai kooe: Huia gi-daha au mee huogodoo ala e-hai-mee ginai. Wanga-ina nia bahihadu gi digau hagaloale, gei goe ga-hai-mee gi-nia maluagina ala i-di langi, hanimoi, daudalia-mai au.”

18:23  Taane deenei ne-longono, gei mee gu-manawa-gee huoloo, i mee tangada maluagina huoloo.

18:24  Jesus gaa-mmada gi mee dela gu-lodo-huaidu, ga-helekai, “E-haingadaa huoloo go digau maluagina i-di nadau ulu i Teenua King o God.

18:25  E-mada-haingadaa go tangada maluagina i dono ulu i Teenua King o God, i-di ‘camel’ ma-ga-ulu i-di bongoo di iwi dui-mee.”

18:26  Digau ala ne-longono telekai a-maa, ga-heeu gi Mee, “Malaa, koai dela e-mee di-mouli?”

18:27  Jesus ga-helekai, “Nia mee ala e-haingadaa i-baahi nia daangada, le e-haingoohia-hua i-baahi o God.”

18:28  Gei Peter ga-helekai, “Mmada, gimaadou gu-diiagi madau hale belee daudali Goe.”

18:29  Jesus ga-helekai, “Au e-hagi-adu gi goodou di tonu bolo tangada ma-ga-diiagi dono hale, dono lodo, ono duaahina-daane, ono maadua, ana dama idimaa go Teenua King o God,

18:30  geia e-hai-mee gi-nia mee e-logo i-di mouli dolomeenei mo di mouli e-dee-odi dela ga-hanimoi.”

18:31  Jesus gaa-lahi ana dama-agoago dilongoholu maa-lua gi-mada ginaadou, ga-helekai gi digaula, “Hagalongo, gidaadou e-hula gi Jerusalem, di gowaa dela ga-kila-aga nia helekai huogodoo nia soukohp i-di gili Tama-Tangada.

18:32  Mee gaa-wanga gi digau tuadimee ga-haganneennee, ga-hagahuaidu, ga-buibui ginai nia haawale.

18:33  Digaula ga-haga-mamaawa a-Mee, ga-daaligi a-Mee gii-made, gei muli nia laangi e-dolu, Mee ga-mouli-aga.”

18:34  Gei nia dama-agoago a-Maa e-de-iloo ana helekai, idimaa nia hadinga o ana helekai la-gu-hagammuni i digaula, gei digaula e-de-iloo be Jesus e-helehelekai i di-aha.

18:35  Jesus ne-hanimoi ga-hoohoo gi Jericho, gei tangada deegida e-noho i taalinga di ala, e-madamadau ana mee.

18:36  Taane deenei ga-longono di longoaa digau dogologo ala e-hula dalia a-Mee, ga-heeu, “Ma di-aha deenei?”

18:37  Digaula ga-helekai, “Jesus o Nazareth deenei e-hana.”

18:38  Mee gaa-wolo gi-nua, “Jesus! Tama a David! Aloho-mai gi-di-au!”

18:39  Digau ala e-hula i-mua o Jesus gaa-wwou gi mee, ga-helekai bolo gi-hudee leelee, gei mee koia ne-wolowolo gi-nonua, “Tama a David, aloho-mai gi-di-au!”

18:40  Gei Jesus gaa-duu, ga-helekai bolo gi-laha-mai taane deegida gi-de-Ia. Jesus ga-heeu gi mee,

18:41  “Ma di-aha dela e-hiihai ginai goe bolo Au gi-heia adu?” Mee ga-helekai, “Meenei, au e-hiihai gi-gidee labelaa.”

18:42  Jesus ga-helekai gi mee, “Mmada! Do hagadonu guu-hai goe gi-humalia.”

18:43  Di madagoaa-hua deelaa, taane gu-gidee tangada, ga-daudali a Jesus mo di danggee ang-gi God. Digau huogodoo ala ne-mmada gi-di mee deenei, la-gu-hagaamu a God.

Chapter 19

19:1  Jesus ga-ulu-adu gi Jericho, gaa-hana laa-lodo di waahale.

19:2  Tagi hagabudu dagitedi i-golo, dono ingoo go Zacchaeus, tangada maluagina.

19:3  Mee e-hiihai gi-gidee-ia a Jesus, be Mee tangada e-hai behee. Gei Zacchaeus tama-dangada hua dulii e-deaadee di-mmada gi Jesus, idimaa digau dogologowaahee.

19:4  Gei mee gaa-lele gi-mua digau dogologo aalaa, gaa-gaga gi-tomo di laagau-‘sycamore’ bolo gi-gidee-ia Jesus dela ga-hanimoi-laa-laa.

19:5  Di madagoaa Jesus ne-dau i-golo, ge-Ia ga-mmada-aga gi-nua, ga-helekai, “Zacchaeus, hagalimalima, gaga-ia gi-lala, Au e-hai-loo gii-noho i doo hale dangi-nei.”

19:6  Zacchaeus ga-gaga-ia hagalimalima gi-lala, ga-haga-ulu a-Mee gi-lodo dono hale i-di tenetene huoloo.

19:7  Digau huogodoo ala ne-mmada gi-di mee deenei, ga-daamada ga-helehelekai-tamu, “Taane deenei gu-ulu gi-lodo di hale tangada huaidu!”

19:8  Zacchaeus ga-duu-i-nua ga-helekai gi Tagi, “Hagalongo meenei, au gaa-wanga di baahi ogu goloo gi digau hagaloale, hila-hua au gu-halahalau dagu dangada, gei au gaa-hui gi mee nnolongo e-haa gi-nonua.”

19:9  Gei Jesus ga-helekai, “Dangi-nei di haga-mouli guu-dau i-di hale deenei, i taane deenei hogi la tangada ni di madawaawa o Abraham.

19:10  Tama-Tangada ne-hanimoi belee halahala ge e-haga-mouli digau ala guu-nngala.”

19:11  Di madagoaa-hua digaula nogo hagalongo, gei Jesus gaa-kai labelaa dana ala-kai, idimaa, Mee gu-hoohoo-adu gi Jerusalem, gei digaula e-hagabau bolo Teenua King o God la-gu-hoohoo ga-gila-aga.

19:12  Gei Jesus ga-helekai, “Tangada aamua ne-hana gi tenua mogowaa belee hai di king. Nomuli, geia ga-hanimoi labelaa gi dono hale.

19:13  I-mua dono hagatanga, gei mee ga-gahi-mai ana gau hai-hegau dilongoholu, gaa-wanga ginai ana bahihadu-goolo dagidahi, ga-helekai boloo, ‘Goodou mmada be dehee di-godou hai e-haga-hai-hegau nia bahihadu aanei i dogu madagoaa ma-ga-de-igolo i godou baahi.’

19:14  Gei nia daangada donu o-maa gu-de-hiihai gi mee, gu-hagau nadau gau hai-hegau i-muli o mee, ga-helekai, ‘Gimaadou e-de-hiihai gi taane deenei e-hai di-madau king.’

19:15  “Taane deelaa la-gaa-hai di king, nomuli mee ga-hanimoi, ga-haga-iloo gi ana gau hai-hegau, bolo gi-lloomoi gi ono mua, e-hagadina nia bahihadu e-hia ne-wiini.

19:16  Tangada matagidagi ga-hanimoi ga-helekai boloo, ‘Agu bahihadu-goolo ne-kila-mai e-madangaholu mai i-di bahihadu e-dahi dela ne-gaamai kooe.’

19:17  Tangada aamua deelaa ga-helekai, ‘Gu-humalia, goe tangada hai-hegau humalia. Idimaa goe dela ne-hai-hegau huudonu i-nia mee lligi, au gaa-dugu goe e-dagi au waahale llauehe madangaholu.’

19:18  Togolua dangada hai-hegau ga-hanimoi, ga-helekai, ‘Meenei, au gu-kila-mai agu bahihadu-goolo e-lima mai i-di bahihadu e-dahi dela ne-gaamai kooe.’

19:19  Taane aamua ga-helekai gi tangada hai-hegau deenei, ‘Goe gaa-dagi au waahale llauehe e-lima.’

19:20  “Tangada hai-hegau labelaa i-golo ga-hanimoi, ga-helekai, ‘Meenei, deenei dau bahihadu. Au nogo dugu hagammuni di-maa i-lodo di angkadi.

19:21  Au nogo madagu i-di-goe, idimaa, goe tangada de-daawa i o waalanga. Goe e-kae nia mee ala hagalee ni-aau, gei e-hadi nia mee ala hagalee ni-aau ne-dogi.’

19:22  Taane aamua deelaa ga-helekai gi mee, ‘Goe tangada hai-hegau huaidu. Au ga-hagi-aga goe i au helekai, e-hagahuaidu goe. Goe e-iloo bolo au tangada de-daawa i ogu waalanga, e-kae nia mee ala hagalee nia mee ni-aagu, gei e-hagi nia mee hagalee ni-aagu ne-dogi.

19:23  Malaa, e-aha dela goe digi duguina agu bahihadu gi-lodo di bank? Gei-au gaa-kumi nia maa mo dono wiini i dogu hanimoi.’

19:24  “Gei taane aamua ga-helekai gi digau ala e-tuu i-golo, ‘Daawa di bahihadu-goolo dela i mee, wanga-ina gi tangada dela ana bahihadu-goolo e-madangaholu.’

19:25  Gei digaula ga-helekai gi mee, ‘Meenei, mee ana bahihadu-goolo e-madangaholu!’

19:26  Gei mee ga-helekai, ‘Au e-hagi-adu gi goodou bolo digau ala nadau mee i-golo, gei e-wanga labelaa ginai gii-logo gi-nonua. Gei digau ala nadau mee ai, nia mee hua dulii ala i nadau baahi, le e-daa gi-daha mo digaula.

19:27  Gei ogu hagadaumee ala e-de-hiihai bolo au e-hai di-nadau king, laha-mai digaula, daaligidia i ogu mua gii-mmade.’ ”

19:28  Muli Jesus ne-helekai nia mee aanei, gei Mee gaa-hana i-mua digaula gi Jerusalem.

19:29  Dono dau-hua gi Bethphage mo Bethany i-di Gonduu Olib, gei Mee ga-hagau ana dama-agoago dogolua gi-mua mo ana helekai boloo,

19:30  “Hula gi tama-waahale dela i gulu mua. Goolua ga-ulu gi-lodo, ga-gidee tama-‘donkey’ e-daula, gei digi hana-ai tangada nonua. Weedee, dagia-mai gi-kinei.

19:31  Maa tangada ga-heeu-adu be goolua e-wwede di-maa eimaha, gei goolua helekai boloo, ‘Di Tagi e-hiihai e-hai-hegau-ai di-maa.’ ”

19:32  Meemaa gaa-hula ga-gidee nia mee huogodoo ala nogo helekai-ai a Jesus.

19:33  Di madagoaa-hua meemaa e-wwede tama-‘donkey’, gei digau di-nadau manu, ga-heeu gi meemaa, “Goolua e-wwede di-maa eimaha?”

19:34  Meemaa ga-helekai, “Tagi e-hiihai e-hai-hegau i di-maa.”

19:35  Meemaa gaa-dagi tama-‘donkey’ gi Jesus, gaa-kili nau gahu gi-hongo di manu, ga-hagamaamaa a Jesus e-gaga gi-hongo di-maa.

19:36  Di gaga o Mee gaa-hana, gei nia daangada gaa-holo nadau gahu gi-hongo di ala.

19:37  Dono hoohoo gi Jerusalem, i-di gowaa dela iei di ala e-hana gi-lala i-di Gonduu Olib, ana dama-agoago huogodoo ga-daamada ga-dadaahili mo di haga-hagaamu a God i nadau lee moogo gi-nua i-nia mee haga-goboina huogodoo ala ne-mmada ginai ginaadou,

19:38  ga-wwolowwolo boloo, “God gi-haga-maluagina-ina di King dela e-hanimoi i-di ingoo o Dimaadua! Di aumaalia i-di langi, mo di madamada ang-gi God!”

19:39  Gei hunu Pharisee nogo i-lodo digau dogologo ga-helekai gi Jesus, “Tangada Agoago, helekai gi au dama-agoago bolo gii-noho dee-muu!”

19:40  Jesus ga-helekai, “Au e-hagi-adu gi goodou bolo maa digaula gaa-noho dee-muu, gei nia hadugalaa ga-daamada ga-wwolowwolo gi-nua-loo.”

19:41  Jesus ne-hoohoo-adu ga-gidee-Ia di waahale Jerusalem, ga-madatangi,

19:42  ga-helekai, “Maa nei-boloo goe ne-iloo dangi-nei be di-maa di-aha dela e-humalia gi-di noho i-di aumaalia! Gei goe e-de-gidee di-maa dolomeenei.

19:43  Di madagoaa ga-dau-mai, gei o hagadaumee ga-haganiga goe mo nadau mee abaaba, ga-duuli goe gi-lodo, ga-mmaanege-mai i-nia baahi huogodoo.

19:44  Digaula ga-oho goe hagatau mo digau ala i-lodo do abaaba, ga-deai di hadu e-dahi e-dubu ai, idimaa, goe digi modongoohia di madagoaa a God ne-hanimoi belee haga-dagaloaha goe gi-daha mo di made!”

19:45  Jesus ne-hana gi-lodo i-di Hale Daumaha, ga-hagabagi digau huihui-mee,

19:46  ga-helekai, “Ma-guu-hihi i-lodo di Beebaa-Dabu boloo, ‘Dogu Hale Daumaha la-di hale-dalodalo’, “gei goodou guu-hai di maa be ‘di gowaa pala hagammuni ni digau gaiaa!’ ”

19:47  Nia laangi huogodoo Jesus e-hai ana agoago i-lodo di Hale Daumaha. Gei nia dagi aamua hai-mee-dabu, digau haga-donudonu haganoho, mo nia dagi o nia daangada gu-hiihai belee daaligi a-Mee gii-made.

19:48  Gei digaula digi gida di-nadau hai belee daaligi a-Mee, idimaa, digau huogodoo e-hiihai e-hagalongo, ge hagalee hiihai e-diiagi telekai e-dahi i ana helekai.

Chapter 20

20:1  Dahi laangi-hua, Jesus nogo agoago gi-nia daangada i-lodo di Hale Daumaha i-di Longo-Humalia, gei nia dagi hai-mee-dabu mo digau haga-donudonu haganoho ngaadahi mo nia dagi mmaadua ga-lloomoi,

20:2  ga-helekai gi Mee, “Hagia-mai gi gimaadou be nia mogobuna dagi mai ihee ala e-hai-ai au mee aanei? Ma koai dela ne-gowadu di mogobuna dagi e-hai au mee aanei?”

20:3  Jesus ga-helekai gi digaula, “Dolomeenei gei Au e-heeu-adu dagu mee: Hagia-mai,

20:4  nia mogobuna a John nogo hai ana babdais, la-ne-lloomoi i-baahi o God, be mai i-baahi nia daangada?”

20:5  Gei digaula ga-helehelekai i nadau mehanga, “Gidaadou la-ga-helekai bolo-aha? Maa gidaadou ga-helekai boloo: ‘Ne-loomoi i-baahi o God,’ gei Mee ga-helekai boloo, ‘Malaa e-aha goodou hagalee hagadonu John?’

20:6  Gei gidaadou ma-ga-helekai boloo, ‘Ne-loomoi i-baahi nia daangada,’ gei digau dogologo aanei ga-dilidili gidaadou, idimaa digaula e-hai bolo John la di soukohp.”

20:7  Gei digaula ga-helekai, “Gimaadou e-de-iloo be nia mogobuna a maa ne-gaamai i-hee.”

20:8  Gei Jesus ga-helekai gi digaula, “Au hagalee hagi-adu hogi be nia mogobuna dagi ni-ooi ala e-hai-ai agu mee aanei.”

20:9  Jesus gaa-kai dana ala-kai gi digaula, “Taane ne-dogi dana hadagee-waini, gaa-wanga gi ana gau benebene-hadagee, geia gaa-hana haga-mogowaa gu-duai-nau.

20:10  Gaa-dae-mai di madagoaa dela e-hadi-ai nia huwa o-di hadagee, gei mee ga-hagau dana hege belee kumi dono duhongo i-nia huwa o-di hadagee-waini deelaa. Gei digau benebene-hadagee ga-daaligi di hege deelaa, ga-hagau a mee gii-hana ana mee ne-kae ai.

20:11  Gei mee ga-hagau labelaa dana huai hege, gei digaula ga-daaligi labelaa a-mee, gaa-hai a-mee hagahuaidu, ga-hagau a-mee gii-hana ana mee ne-kae ai.

20:12  Gei mee ga-hagau togodolu hege, gei digaula ga-daaligi a-mee gi-moholehole labelaa, gaa-hudu a-mee gi-daha.

20:13  Gei tangada dana hadagee-waini deelaa, ga-helekai, ‘Au gaa-hai dagu-aha? Au ga-hagau-hua go dagu dama daane donu hagalabagau. Holongo digaula ga-hagalaamua-laa a-mee!’

20:14  Malaa, digau benebene di hadagee deelaa ne-mmada gi mee, ga-helekai i nadau mehanga, ‘Deenei la-go tama-daane donu tangada dana hadagee-waini. Gidaadou ga-daaligi a-mee gii-made, gei ono maluagina gaa-hai nia mee ni gidaadou.’

20:15  Gei digaula gaa-hudu a-mee gi-daha mo di hadagee-waini, ga-daaligi a-mee gii-made.” Gei Jesus ga-heeu, “Malaa, dehee-laa di hai o tangada dana hadagee-waini gaa-hai ang-gi digau benebene hadagee aalaa?

20:16  Mee ga-hanimoi, ga-daaligi digau benebene-hadagee aalaa, gaa-wanga di hadagee gi nnuai gau benebene-hadagee.” Gei digaula ala ne-hagalongo gi-di mee deenei ga-helekai-aga, “Hagalee-loo e-hai beenaa!”

20:17  Jesus gaa-mmada gi digaula ga-helekai, “Malaa, di Beebaa-Dabu deenei le e-hai bolo-aha, ‘Di hadu dela ne-haga-balumee go digau hau-hale, la-guu-hai di hadu e-kaedahi e-hagalabagau!’

20:18  “Digau huogodoo ala ga-hingahinga gi-hongo di hadu deelaa, la-ga-mooho haga-ligiligi, gei di hadu deelaa ma-gaa-doo gi-hongo tangada, gei tangada deelaa la-ga-mooho haga-ligiligi, guu-hai hua nia gelegele.”

20:19  Digau haga-donudonu haganoho mo nia dagi aamua hai-mee-dabu ne-hagamada belee galabudi Jesus i-di madagoaa-hua deelaa, idimaa digaula gu-iloo bolo di ala-kai a-Mee ne-hai, le e-hai-baahi ang-gi ginaadou, gei digaula e-mmaadagu i-nia daangada.

20:20  Digaula ga-halahala di madagoaa humalia, ga-hagau nia daane ala e-haga-maanadu bolo ginaadou le e-donu, e-hagalongo hagammuni gi nnelekai a Jesus gii-mee ginaadou di haga-hala a Jesus e-lahi a-Mee gi-nia mogobuna gabunga o-di gobinaa o Rome.

20:21  Digau madamada-gaiaa aanei ga-helekai gi Jesus, “Tangada Agoago, gimaadou gu-iloo bolo au mee ala nogo agoago-ai le e-donu. Gimaadou e-iloo labelaa bolo Goe hagalee haga-dahidamee nia haganoho nia daangada, ge e-agoago-hua di tonu a God mo dono hiihai gi-nia daangada.

20:22  Hagia-mai be di-maa e-hai-baahi gi tadau haganoho maa gidaadou gaa-hui dagitedi gi-di king o Rome be deeai?”

20:23  Gei Jesus gu-iloo-Ia di hai-haga-magiaa digaula, ga-helekai,

20:24  “Gaamai tei bahihadu-silber. Di ada mo di ingoo ni-ooi aanei i-hongo di-maa?” Digaula ga-helekai, “Ni di king o Rome.”

20:25  Gei Jesus ga-helekai, “Malaa, huia gi-di king o Rome nia mee a di king, ge huia gi God nia mee a God.”

20:26  Digaula gu-deemee di-haga-hala a-Mee i-mua nia daangada, guu-noho dee-muu, gu-goboina i ana helekai.

20:27  Hunu Sadduccee, ala e-hai bolo nia daangada le-hagalee mouli-aga, ne-lloomoi gi Jesus ga-helekai,

20:28  “Meenei, Tangada Agoago, Moses ne-hihi taganoho deenei, bolo taane ma-gaa-made, ga-diiagi dono lodo nau dama ai, gei tuaahina-daane o-maa e-hai gii-lodo gi-di ahina deelaa, gaa-hai nau dama, ga-hagaingoo bolo nia dama ni taane dela ne-made.

20:29  Taga-haanau daane dogohidu i-golo. Tama-daane madua gaa-hai dono lodo gi-di ahina deelaa, gaa-made, gei digi hai dana dama.

20:30  Nomuli, gei togolua duaahina-daane o-maa gaa-lodo gi-di ahina deelaa.

20:31  Nomuli go togodolu duaahina-daane. Taga-haanau dogohidu huogodoo guu-mmade, nadau dama gi-di ahina deelaa ai.

20:32  Haga-muliagina, gei di ahina deelaa la-gaa-made.

20:33  Malaa, i-di laangi dela e-mouli-aga nia daangada, di ahina deelaa la-gaa-hai di lodo ni-ooi? Idimaa, tagahaanau dogohidu huogodoo guu-lodo gi-di ahina deelaa!”

20:34  Gei Jesus ga-helekai gi digaula, “Nia daane mono ahina dolomeenei e-haga-hai-lodo,

20:35  gei nia daane mono ahina ala e-tau ang-gi di-mouli-aga mai di made mo e-mouli i-di madagoaa dela e-hanimoi, la-hagalee haga-hai-lodo.

20:36  Digaula gaa-hai be digau di-langi, ga-deemee di-mmade. Digaula nia dama ni God, idimaa, digaula ne-mouli-aga mai i di-made.

20:37  Gei Moses gu-haga-modongoohia haga-madammaa bolo digau ala ne-mmade le e-mouli-aga. Di kai o-di laagau duduia dela ne-ulaula, Moses ne-helekai i Dimaadua bolo Mee go di God o Abraham, di God Isaac, mo di God Jacob.

20:38  Mee di God ni digau mouli, hagalee ni digau mmade, idimaa digau huogodoo le e-mouli ang-gi Mee.”

20:39  Hunu gau haga-donudonu haganoho ga-helekai-aga, “Meenei Tangada Agoago, e-donu go dau helekai deenaa!”

20:40  Idimaa, digaula gu-mmaadagu di heeu labelaa nadau mee gi Mee.

20:41  Jesus ga-heeu gi digaula, “Ma e-hai behee dela digaula e-helekai bolo di Mesaia la-di hagadili ni David?

20:42  Idimaa, David gu-helekai i-lodo di Beebaa-Pisalem, boloo, ‘Dimaadua gu-helekai gi dogu Dagi: Noho i-ginei i dogu baahi gau-donu,

20:43  gaa-dae-loo gi dagu dugu o hagadaumee gi-lala o babaawae be di mee dugu wae.’

20:44  “David ne-gahi a-Mee bolo dono Dagi, malaa, e-hai behee di Mesaia gaa-hai di hagadili ni David?”

20:45  I-di madagoaa digau huogodoo nogo hagalongo gi Mee, gei Jesus ga-helekai gi ana dama-agoago,

20:46  “Gii-pula i goodou gi-dee hai be digau haga-donudonu haganoho ala e-hiihai e-heehee i-lodo nadau gahu-lloo, e-hiihai bolo nia daangada gi-hai nadau hagaaloho ge hagalaamua ginaadou i-lodo nia gowaa huihui-mee. Digaula e-hilihili nia lohongo aamua i-lodo nia synagogee mo nia gowaa ala koia e-humalia i-lodo nia hagamiami.

20:47  Digaula e-kae nia haga-humalia o-nia ahina guu-mmade nadau lodo ge gaiaa digaula i nadau hale, gei e-dalodalo lloo! Di hagaduadua digaula la koia e-huaidu huoloo!”

Chapter 21

21:1  Jesus ga-gidee-Ia digau maluagina e-dugu nadau tigidaumaha gi-lodo di gowaa dugu hadu o-di Hale Daumaha.

21:2  Ge-Ia gu-gidee labelaa di ahina hagaloale ne-made dono lodo e-dugu ana teenedi mmee e-lua.

21:3  Mee ga-helekai, “Au e-hagi-adu gi goodou di tonu bolo di ahina hagaloale ne-made dono lodo, la-ne-dugu ana mee koia e-logo i-nia mee digau huogodoo ala i-golo.

21:4  Idimaa, digau ala i-golo la-ne-tigidaumaha hunu maluagina o nadau maluagina, gei di ahina hagaloale la-ne-wanga go ana mee huogodoo ala belee mouli-ai.”

21:5  Hunu dama-agoago a-Maa e-helehelekai i-di Hale Daumaha, bolo ma e-madamada ge humalia ono hadu, mo ono tigidaumaha ala ne-wanga gi God. Gei Jesus ga-helekai,

21:6  “Godou mee huogodoo ala e-mmada ginai, di madagoaa ga-dau-mai di hadu e-dahi e-dubu i dono lohongo ai. Nia mee huogodoo ga-meheu gi-lala.”

21:7  Digaula ga-heeu gi Mee, “Tangada Agoago, di mee deenei le e-hai ma-gaa-hee? Ma di-aha gaa-hai e-haga-modongoohia bolo deelaa di madagoaa ga-gila-aga di-maa?”

21:8  Jesus ga-helekai, “Gii-pula i goodou gi-de-halahalau go nia daangada. E-logo digau e-helekai i dogu ingoo boloo, ‘Au go Mee,’ gei e-helekai labelaa boloo, ‘Di madagoaa gu-dau-mai!’ Goodou hudee kawe i digaula.

21:9  Goodou hudee mmaadagu i-di godou longono bolo nia dauwa mono hai-baahi i-golo. Nia mee aanei le e-hai-loo gii-kila i-mua, gei hagalee haga-modongoohia bolo di hagaodi la-gu-hoohoo-mai.”

21:10  Gei Mee ga-helekai labelaa boloo, “Nia henua-llauehe ga-heheebagi. Nia henua ala e-dagi go nia king ga-hagadau dadaaligi ginaadou.

21:11  Henuailala ga-ngalungalua. Nia dau-magamaga mono dau-magi gaa-logo i-nia madagoaa huogodoo. Nia mee haga-maehagi ge hagamadagudagu-dangada ga-kila-mai i-di gili di langi.

21:12  I-mua nia mee aanei gaa-hai, gei goodou e-lawalawa e-dadaaligi, e-wanga gi-nia gabunga e-gabunga i-lodo nia synagogee, ge e-kili gi-lodo nia hale-galabudi, ge e-lahi laa-mua nia king mo nia dagi, idimaa goodou e-hagalaamua dogu ingoo.

21:13  Deenei-hua di-godou madagoaa humalia e-hagadele di Longo-Humalia.

21:14  Hagabaubau gi-humalia i-mua di madagoaa, ge hudee hagabaubau e-logo be goodou ga-helekai bolo-aha gi digaula,

21:15  idimaa, Au ga-gowadu gi goodou nia helekai mo di iloo, gei tei i godou hagadaumee e-mee di-hai-baahi be e-hagahuaidu goodou ai.

21:16  Goodou gaa-wanga go godou maadua, godou duaahina-daane, godou gau mo godou ihoo, gei hunu goodou e-daaligi go digaula gii-mmade.

21:17  Digau huogodoo ga-hudiou-adu gi goodou idimaa go dogu ingoo.

21:18  Gei deai di ngaahulu e-dahi i godou libogo e-ngala ai.

21:19  Tuu gii-mau, gei goodou gaa-kae di mouli.

21:20  “Di madagoaa goodou gaa-mmada gi Jerusalem e-hii go nia buini-dauwa, gei goodou gu-iloo-hua bolo ma-gu-hoohoo-hua ga-mooho.

21:21  Gei digau ala i Judea e-hai gii-llele gi-daha gi-nia gonduu, gei digau ala i-lodo di waahale damana Jerusalem e-hai gi-hagatanga gi-daha, gei digau ala i-lodo henua, hagalee hula gi-lodo di waahale damana deelaa.

21:22  Idimaa, nia laangi aalaa la-go nia laangi o-di hagaduadua, e-hai gii-kila nia helekai huogodoo ala guu-hihi gi-lodo di Beebaa-Dabu.

21:23  E-huaidu huoloo ang-gi nia ahina ala e-hai-dama, mono ahina ala nadau dama lligi i-nia laangi aalaa, idimaa, di haingadaa damana ga-dau-mai gi-hongo tenua-nei, gei di hagaduadua a God ga-haneia gi-hongo digau tenua deenei.

21:24  Hunu gau ga-daaligi gi-nia hulumanu-dauwa, gei hunu gau gaa-lahi be digau galabudi gi-nia henua-llauehe huogodoo, gei digau o-di bouli ga-dagadagahi Jerusalem gaa-dae-loo gi nadau madagoaa ma-gaa-lawa.

21:25  “Nia haga-modongoohia gaa-hai gi-di laa mo di malama mo nia heduu i-di langi. Nia henua huogodoo henuailala ga-nadau hagadagadagagee ai, ga-mmaadagu i-di ngoloolo mo di bagibagia o-di moana.

21:26  Nia daangada ga-hagalibelibeina i nadau mmaadagu di tali di-mee dela gaa-hai gi-hongo henuailala, idimaa, nia mogobuna o lodo di ahiaalangi la-ga-hagalee i nadau lohongo.

21:27  Di madagoaa-hua deelaa, gei Tama-Tangada ga-gila-mai, e-hanimoi i-lodo di gololangi mono mogobuna maaloo-dangihi ge madamada.

21:28  Di madagoaa nia mee aanei ga-daamada ga-kila-aga, tuu-i-nua, mmada gi-nua, i-di godou haga-mouli la-gu-hoohoo-mai.”

21:29  Jesus gaa-kai di ala-kai deenei, “Haga-maanadu-ina di laagau-‘fig’ mono laagau huogodoo ala i-golo.

21:30  Goodou mmada gi-nia lau ga-daamada ga-matilitili i-di gili nia manga, gei goodou gu-iloo bolo di madagoaa mahanahana la-gu-hoohoo-mai.

21:31  E-hai gadoo beenei, goodou gaa-mmada gi-nia mee aanei ga-kila-aga, gei goodou gu-iloo bolo Teenua King o God la-gu-hoohoo ga-hanimoi.

21:32  “Goodou gi-langahia bolo nia mee aanei huogodoo la-gaa-hai i-mua di mmade o digau huogodoo ala e-mouli dolomeenei.

21:33  Di langi mo henuailala la-ga-hagalee, gei agu helekai le e-noho-hua beelaa.

21:34  “Gii-pula i goodou. Hudee hagadaadaamee-ina goodou gi-nia haihai hagamiami, mo di inuinu nia dagaao, mo di mamaanadu di mouli dolomeenei, idimaa, di laangi deelaa le e-limalima-hua di-tale-adu gi goodou.

21:35  Di laangi deelaa, le e-hai be-di hele dela e-hanimoi gi-hongo digau huogodoo ala e-noho i-nia gowaa huogodoo i henuailala.

21:36  Gii-noho kanakana, hai-dalodalo i-nia madagoaa huogodoo gii-mee goodou di-llele gi-daha mo nia mee huogodoo ala gaa-hai, gii-mee goodou di-tuu i-mua Tama-Tangada.”

21:37  Jesus e-hai ana agoago i-nia laangi aalaa i-lodo di Hale Daumaha. Hiahi-ia di mee, gei Mee gaa-hana gaa-noho i-di boo i-hongo di Gonduu Olib.

21:38  Hagaluada-loo i-nia laangi aalaa, digau huogodoo e-hula gi-di Hale Daumaha belee hagalongo gi Mee.

Chapter 22

22:1  Tagamiami di Palaawaa-Digi-Hagatanga, dela e-haga-ingoo bolo di Pasoobaa, gu-hoohoo-mai,

22:2  gei nia dagi hai-mee-dabu, mo digau haga-donudonu haganoho e-mmaadagu i-nia daangada, gei digaula ga-halahala di-nadau ala hagammuni belee daaligi Jesus gii-made.

22:3  Setan ga-ulu gi-lodo Judas, dela e-haga-ingoo bolo Iscariot, tangada e-dahi i-nia dama-agoago dilongoholu maa-lua a Jesus.

22:4  Judas gaa-hana gi-daha mo digaula, ga-helekai ginaadou mo nia dagi hai-mee-dabu, mo digau aamua ala e-hagaloohi di Hale Daumaha i dana hai dela ga-hagi-anga a Jesus gi digaula.

22:5  Digaula gu-tenetene bolo ginaadou e-hui a-mee gi-nia bahihadu.

22:6  Gei Judas guu-baba, ga-daamada ga-halahala dana madagoaa humalia dela e-hagi-anga a Jesus gi digaula gei nia daangada e-de-iloo.

22:7  Di laangi Tagamiami o-di Palaawaa-Digi-Hagatanga ne-dae-mai, dela di madagoaa e-daaligi-ai nia dama-siibi o-di Pasoobaa.

22:8  Jesus ga-hagau a Peter mo John ga-helekai, “Hula hagatogomaalia-ina Tagamiami Pasoobaa e-miami gidaadou.”

22:9  Meemaa ga-heeu, “Di gowaa dehee e-hiihai ginai Goe belee hagatogomaalia?”

22:10  Gei Mee ga-helekai, “Hula gi-lodo di waahale Jerusalem, taane e-kae dana loaabi-wai ga-heetugi-adu gi goolua. Daudalia-adu a-mee gi-lodo di hale dela e-ulu ginai mee,

22:11  helekai gi tangada dono hale boloo, ‘Tangada Agoago ne-helekai boloo, Dehee di ruum e-miami-iei gimaadou mo agu dama-agoago i Tagamiami Pasoobaa?’

22:12  Gei mee ga-hagi-adu gi goolua di ruum damana i-nua gu-togomaalia, deelaa di-gulu gowaa e-hagatogomaalia gulu mee huogodoo.”

22:13  Meemaa gaa-hula, gaa-mmada gi-nia mee huogodoo guu-hai be nia helekai a Jesus, gei meemaa ga-hagatogomaalia Tagamiami Pasoobaa.

22:14  Di aawaa ne-dae-mai, gei Jesus gaa-noho i dono lohongo i teebele mo ana dama-agoago.

22:15  Mee ga-helekai, “Au nogo hiihai huoloo bolo e-miami Tagamiami Pasoobaa madalia goodou i-mua dogu hagaduadua.

22:16  Idimaa, Au e-hagi-adu gi goodou, bolo Au e-hagalee miami labelaa tagamiami deenei, gaa-dae-loo gi-di haga-honu tadinga di-maa i Teenua King o God.”

22:17  Jesus ga-dahi-aga dana ibu, ga-danggee ang-gi God, ga-helekai, “Dahia-adu di ibu deenei, hagadau-ina i goodou.

22:18  Au e-hagi-adu gi goodou bolo dolomeenei gaa-huli gi-muli, gei Au hagalee e-inu nia waini aanei, gaa-dae-loo gi Teenua King o God ga-dau-mai.”

22:19  Gei Mee ga-dahi-aga dana palaawaa, ga-danggee ang-gi God, ga-ginigini gaa-wanga gi digaula, ga-helekai, “Deenei la-go dogu huaidina dela e-gowadu gi goodou. Heia di mee deenei e-haga-langalangahia-iei Au i godou baahi.”

22:20  Muli tagamiami hiahi, gei mee gaa-wanga di ibu gi digaula, ga-helekai, “Di ibu-waini deenei la-go di hagababa hoou a God, ne-haga-mogobuna gi ogu dodo, ala ga-llingi-adu gi goodou.

22:21  “Mmada, tangada dela e-wanga au, la-i-ginei i teebele dalia Au!

22:22  Tama-Tangada la-gaa-made gii-hai be-di manawa o God, gei e-huaidu huoloo ang-gi tangada dela ma-gaa-wanga a-Mee!”

22:23  Digaula ga-daamada ga-heheeu i nadau mehanga, ma koai i ginaadou dela gaa-hai di mee deenei.

22:24  Di lagamaaloo guu-hai i-mehanga ana dama-agoago be koai e-kaedahi e-aamua.

22:25  Jesus ga-helekai, “Nia king o digau ala e-bouli le e-mogobuna i-hongo nadau daangada, gei digau ala e-dagi, le e-hai bolo ginaadou la-go nia hoo hagaaloho o-nia daangada.

22:26  Hagalee deenei go di hai e-donu e-hai go goodou. Tangada dela koia e-aamua i goodou e-hai gii-hai be tangada dela e-dulii-loo i goodou. Gei di tagi le e-hai gii-hai be-di hege ni goodou.

22:27  Koai tangada dela e-aamua: go tangada dela e-noho i-lala e-miami, be go tangada dela e-hai ana hegau? Ma go tangada dela e-noho i-lala! Malaa, Au dela i godou baahi, le e-hai be tangada dela e-hai ana hegau.

22:28  “Goodou nogo noho i dogu baahi i ogu madagoaa nogo haingadaa.

22:29  Gei-Au ga-gowadu gi goodou di mogobuna e-dagi, gadoo be dogu Damana dela ne-gaamai di mogobuna deelaa gi-di-Au.

22:30  Goodou ga-miami ge inu i dagu deebele i dogu Henua, goodou gaa-noho i-hongo nia lohongo king, e-dagi nia madawaawa Israel madangaholu maa-lua.

22:31  “Simon! Simon! Hagalongo! Setan la-guu-kae dana hagadootonu bolo ia e-hagamada goodou, e-hili digau humalia mo digau huaidu, gadoo be tangada hai hadagee dela e-hili nia lii-‘wheat’ gi-daha mo ono gili.

22:32  Gei-Au gu-dalodalo i-di-goe, Simon, bolo do hagadonu gi-hagalee bagege. Do madagoaa ma-ga-huli-mai labelaa gi-di-Au, gei goe gi-hagamaaloo-ina-aga o duaahina ala i-golo.”

22:33  Gei Peter ga-helekai, “Meenei Tagi, au gu-togomaalia e-hana madalia Goe gi-di hale-galabudi, ge e-made madalia Goe!”

22:34  Jesus ga-helekai, “Peter, Au e-hagi-adu gi-di-goe bolo i-mua teduu ma-gaa-wolo boo-nei, gei goe ga-helekai haga-dolu, bolo goe e-de-iloo Au.”

22:35  Gei Jesus ga-heeu gi ana dama-agoago, “Dogu madagoaa ne-hagau goodou gei digi kae godou mee-dugu-hadu, nia peege be nia suudi, goodou la-gu-huaidu-adu gi goodou?” Digaula ga-helekai, “Deeai, Meenei.”

22:36  Jesus ga-helekai, “Gei dolomeenei, tangada dela dana mee-dugu-hadu, be-di peege, la-gi-kae-ina. Tangada dela dana hulumanu-dauwa ai, geia gi-huia dono gahu-mahaa gi-daha, e-hui dana hulumanu.

22:37  Di Beebaa-Dabu e-helekai boloo, ‘Mee e-dau dalia digau huaidu.’ “Au e-hagi-adu gi goodou bolo nia helekai aanei le e-hai-loo gii-kila, idimaa, nia mee ala ne-hihi i-di-Au, le e-hai-loo gii-dohu dono hagahonu.”

22:38  Nia dama-agoago ga-helekai, “Mmada, meenei Tagi, nia hulumanu e-lua aanei.” Gei Jesus ga-helekai, “Guu-dohu!”

22:39  Jesus ga-hagatanga i-di waahale Jerusalem, gaa-hana gi-di Gonduu Olib be dana hai nogo hai, gei ana dama-agoago guu-hula madalia a-Mee.

22:40  Mee ne-dau i-di gowaa deelaa, ga-helekai gi digaula, “Dalodalo, gi-dee too hua goodou gi-lodo nia hagamada.”

22:41  Gei Mee gaa-hana gii-tanga gi-daha mo digaula, gi mada-mogowaa be-di mogowaa di hudu di hadu, ga-dogoduli ga-dalodalo.

22:42  Mee ga-helekai, “Tamana, be di-maa e-baba ginai Goe, daawa-ina di ibu o-di hagaduadua deenei la-gi-daha mo Au. Gei hagalee go dogu hiihai, go do hiihai le e-hai gii-hai.”

22:43  Tangada di-langi ga-haga-gida gi Mee, ga-haga-maaloo-aga a-Mee.

22:44  Mee guu-lodo daamaha ge gu-dalodalo hagamahi huoloo. Nia hee o-maa guu-hai be nia madaua-dodo e-monnono gi-hongo di gelegele.

22:45  Mee ga-duu-aga i-dana hai-dalodalo, gaa-hana gi-baahi ana dama-agoago, gaa-mmada, gei digaula e-kii, gu-paagege i nadau lodo-huaidu.

22:46  Mee ga-helekai gi digaula, “Goodou e-kii beleiaha? Noho gi-nua, dalodalo, gi-dee too-hua goodou gi-lodo di hagamada!”

22:47  Jesus nogo helehelekai hua igolo gei digau dogologo gu-dau-mai, e-dagi-mai go Judas, tangada i dilongoholu maa-lua a Jesus. Mee ne-hanadu gi Jesus gaa-hongi a-Mee.

22:48  Gei Jesus ga-helekai, “Judas, ma di hongi dela e-wanga-ai Tama-Tangada?”

22:49  Nia dama-agoago ala nogo i-baahi o Jesus gaa-mmada gi-di mee dela e-hai, ga-heeu, “Meenei Tagi, gimaadou ga-hai-hegau gi madau hulumanu-dauwa?”

22:50  Gei tangada e-dahi digaula gaa-tuu gi-daha talinga di baahi gau-donu o-di hege tagi aamua hai-mee-dabu.

22:51  Jesus ga-helekai, “Deelaa-hua, guu-lawa go di mee deenei!” Mee gaa-bili gi talinga o taane deelaa, guu-hai gii-hili gi dono lohongo.

22:52  Gei Jesus ga-helekai gi-nia dagi hai-mee-dabu, nia dagi aamua hagaloohi di Hale Daumaha, mo nia dagi mmaadua ala ne-lloomoi belee kumi a-Mee, “Goodou ne-lloomoi mo godou hulumanu-dauwa mono goloo daaligi dangada be di mee bolo Au tangada hai hala!

22:53  Au nogo i godou baahi i-lodo di Hale Daumaha i-nia laangi huogodoo, gei goodou digi hai bolo e-kumi Au e-galabudi. Deenei di-godou aawaa belee hai-hegau-ai, i-di madagoaa dela e-dagi go di mogobuna o-di bouli.”

22:54  Digaula gaa-kumi a Jesus, gaa-lahi gi-di hale tagi aamua hai-mee-dabu, gei Peter ga-daudali digaula, e-madatanga i-daha.

22:55  Di ahi gu-akaa i-tungaalodo di gowaa daahaa hai-gabunga, gei Peter gu-madalia digau ala e-noho i-golo e-haganiga di ahi.

22:56  Tama-ahina hai-hegau ga-gidee-ia a-mee e-noho i-golo, geia gaa-mmada haga-huudonu gi mee, ga-helekai, “Taane deenei nogo madalia a Jesus labelaa!”

22:57  Peter ga-haga-de-iloo-ia, ga-helekai, “Di ahina-nei, au e-de-iloo a-Mee!”

22:58  Nomuli-hua, tuai dangada ga-modongoohia-eia a Peter, ga-helekai, “Goe tangada e-dahi i digaula labelaa.” Gei Peter ga-helekai, “Tangada-nei, ma hagalee ko-au!”

22:59  Holongo di aawaa e-dahi nomuli, gei tuai daane ga-helekai hagamahi boloo, “E-donu bolo taane deenei la-nogo madalia a Jesus, idimaa, mee tangada o Galilee labelaa!”

22:60  Gei Peter ga-helekai, “Taane-nei, au e-de-iloo be goe e-helehelekai bolo-aha!” Di madagoaa-hua dela e-helehelekai-iei mee, gei teduu-daane gaa-wolo.

22:61  Tagi ga-huli-mai gi-muli, gaa-mmada haga-huudonu gi Peter, gei Peter ga-langahia nia mee a Tagi nogo helekai ang-gi deia boloo, “I-mua-hua teduu ma-gaa-wolo boo-nei, gei goe ga-helekai haga-dolu bolo goe e-de-iloo Au.”

22:62  Peter gaa-hana gi-malaelae, mo di dangidangi wawwawe.

22:63  Nia daane nogo hagaloohi a Jesus gu-haganneennee Jesus mo di dadaaligi a-Mee.

22:64  Digaula guu-nnoo nia golomada o-Maa, ga-heeu gi Mee, “Ma koai dela ne-hagamaawa Goe!”

22:65  Digaula guu-hai nadau helekai e-logo ala i-golo e-hagahuaidu a-Mee.

22:66  Ga-hooaga luada, gei nia dagi mmaadua mo nia dagi hai-mee-dabu, mo digau haga-donudonu haganoho la-ne-heetugi i-di gowaa e-dahi, ga-laha-mai a Jesus gi-mua digau hai-gabunga-aamua.

22:67  Digaula ga-helekai, “Hagia-mai, Goe go di Mesaia?” Jesus ga-helekai, “Maa au ga-helekai-adu bolo Au go di Mesaia, gei goodou hagalee hagadonu.

22:68  Gei-Au ga-heeu-adu dagu heeu, gei goodou hagalee helekai gi dagu heeu.

22:69  Dolomeenei gaa-huli gi-muli, Tama-Tangada gaa-noho i-baahi gau-donu o God Aamua Huoloo.”

22:70  Gei digaula huogodoo ga-helekai, “Goe go Tama a God?” Gei Mee ga-helekai, “Goodou ala gu-helekai bolo ma ko-Au.”

22:71  Gei digaula ga-helekai, “Gidaadou hagalee bolo gii-hai tadau gau haga-modongoohia. Gidaadou gu-longono ana helekai!”

Chapter 23

23:1  Tagabuulinga dangada ga-tuu-gi-nua, gaa-lahi a Jesus gi-mua o Pilate.

23:2  Digaula ga-daamada ga-hagahuaidu a-Mee, ga-helekai, “Gimaadou ne-kumi Taane deenei dela ne-dagi-gee madau daangada. E-helekai gi digaula bolo gi-hudee hui dagitedi gi di king o Rome, gei e-hai bolo Ia go di Mesaia, di king.”

23:3  Pilate ga-heeu, “Goe go di king digau o Jew?” Jesus ga-helekai, “Kooe dela e-helekai.”

23:4  Pilate ga-helekai gi-nia dagi hai-mee-dabu, mo digau dogologo, “Au digi gida dagu ihala belee hagahuaidu Taane deenei.”

23:5  Gei digaula ga-helekai-aga mada-maaloo, “Mee ne-hai digau i-nia gowaa huogodoo i Judea gi-leelee logo i ana agoago. Mee ne-daamada i Galilee, ga-dau-mai-loo gi-kinei.”

23:6  Pilate ne-longono-ia nia mee aanei, ga-heeu, “Taane Galilee deenei?”

23:7  Di madagoaa Pilate ne-iloo-ia bolo Jesus la tangada tenua dela e-dagi go Herod, geia ga-hagau a-Mee gi Herod dela nogo i Jerusalem i-di madagoaa hua deelaa.

23:8  Herod gu-tenetene huoloo dono mmada gi Jesus, i mee gu-longono-ia nia longo o-Maa, gu-waalooloo dono tali bolo ia e-mmada gi Mee. Mee nogo talitali bolo ia e-mmada gi Jesus e-hai ana mogobuna.

23:9  Herod gaa-hai ana heeu e-logo gi Jesus, gei Jesus digi helekai gi nia heeu a-maa.

23:10  Nia dagi hai-mee-dabu mo digau haga-donudonu haganoho gaa-tuu gi-mua ga-helekai maaloo hagahuaidu a Jesus.

23:11  Herod mo ana gau-dauwa ga-haganneennee haga-balumee a Jesus, ga-haga-ulu a-mee gi-di gahu madamada, ga-hagau gi-muli gi Pilate.

23:12  Di laangi hua deelaa, gei Pilate mo Herod guu-hai di hagadau-ihoo, mai-i-mua gei meemaa nogo hagadaumee.

23:13  Pilate ga-haga-dagabuli-mai digau aamua hai-mee-dabu, nia dagi, mo nia daangada,

23:14  ga-helekai, “Goodou gu-laha-mai Taane deenei bolo Mee ne-haga-hala nia daangada. Gei dolomeenei, au gu-haga-dina a-Mee i godou mua, gei au digi gida dagu mee hala i-nia hagahuaidu ala nogo helekai-iei goodou.

23:15  Gei Herod digi gida bolo Mee e-hala labelaa, dela ga-hagau-mai labelaa Taane deenei gi gidaadou. Goodou gi-iloo bolo Taane deenei digi hai dana hala bolo gaa-hidi-iei Mee e-daaligi gii-made.

23:16  Malaa, au gaa-wanga a-Mee e-haga-mamaawa go agu gau-dauwa, nomuli gei au ga-hagamehede a-Mee gii-hana.”

23:17  [Nia madagoaa nia Hagamiami Pasoobaa huogodoo, gei Pilate e-hai gi-hagamehede ang-gi digau o Jew dahi dangada galabudi.]

23:18  Digau huogodoo gaa-wwolo gi nua boloo, “Tangada deenaa la-daaligidia gii-made, gei Barabbas la-gi-hagamehede-ina-mai gi gimaadou!”

23:19  (Gei Barabbas la tangada huaidu ne-hudu gi-lodo di hale-galabudi i-di ngongooaa nogo hai i-lodo di waahale damana, gei mee ne-daaligi dana dangada gii-made.)

23:20  Pilate le e-hiihai-hua e-hagamehede a Jesus, deelaa-laa gei mee ga-helekai labelaa gi-di hagabuulinga-dangada deelaa.

23:21  Gei digaula gaa-wwolo gi mee, “Daudaulia a-Mee! Daudaulia a Mee!”

23:22  Pilate ga-helekai tolu holongo, “Di hala-aha ne-hai go Mee? Au digi gida dagu mee bolo e-daaligi a-Mee gii-made! Au gaa-hai a-Mee gi-haga-mamaawa, gaa-lawa, ga-hagamehede a-Mee.”

23:23  Gei digaula ga-wwolo-aga-hua maaloo gi nadau lee mugi-nua bolo Jesus le e-daudau. Muli-hua nia wwolowwolo digaula, gei di-maa guu-hai be-di hai digaula.

23:24  Gei Pilate ga-hagamodu di hagi-aga o Jesus gii-hai be di hiihai digaula.

23:25  Gei mee ga-hagamehede tangada dela nogo hiihai ginai digaula, dela nogo i-lodo di hale-galabudi i-di ngongooaa mo dana daaligi-tangada gii-made, gei mee gaa-wanga a Jesus gi digaula, gii-hai ginai nadau hiihai.

23:26  Di madagoaa digau dauwa ne-lahi a Jesus gi-daha, digaula ga-heetugi gi taane mai Cyrene go Simon, e-hanimoi gi-di waahale. Digaula gaa-kumi a-mee, ga-hagauda di loobuu gi-hongo o mee, gi-aamo-ina i-muli o Jesus.

23:27  Di hagabuulinga gau dogologo e-daudali a-Mee. Nia ahina i-lodo digaula, e-tangitangi i Mee.

23:28  Jesus gaa-huli gi digaula, ga-helekai, “Nia ahina o Jerusalem! Hudee tangitangi mai gi-di-Au. Tangitangi-adu gi goodou mo godou dama.

23:29  Idimaa, nia laangi e-loomoi i-golo, gei nia daangada ga-helekai boloo, ‘Gu-haadanga-lamalia go nia ahina ala digi hai nadau dama, gei digi haanau be hagalee haga-uu nadau dama.’

23:30  Deelaa di madagoaa ‘nia daangada ga-helekai gi-nia gonduu boloo: Hinga-mai gi madau nua! Gei e-helekai gi-nia gonduu-lligi: Gahu-ina gimaadou gii-nngala!’

23:31  “Maa nia mee aanei la-gaa-hai i-di madagoaa di laagau le e-mouli, ma di-aha gaa-hai i-di madagoaa di laagau ga-maangoo?”

23:32  Nia daane dogolua gu-haga-ulu-mai labelaa gi-daha belee daaligi gii-mmade dalia a Jesus. Meemaa nia daangada dagahi haganoho.

23:33  Di-nadau dau-mai gi-di gowaa e-haga-ingoo bolo “Di Gowaa Hangaibu-Libogo”, digaula ga-daudau a Jesus i-golo, mo nia daangada huaidu dogolua, tangada e-dahi i dono baahi gau-donu, ge dahi i dono baahi gau-ihala.

23:34  Jesus ga-helekai, “Tamana, Goe dumaalia ang-gi digaula, idimaa digaula e-de-iloo nadau mee ala e-hai.” Gei digaula gaa-duwwe nia gahu o-Maa i ginaadou i-di-nadau bilei ‘dice’ ne-hai.

23:35  Nia daangada e-tuu i-golo e-daumada nia mee aanei, gei nia dagi digau o Jew e-haganneennee a-Mee, ga-helekai, “Mee e-mee-hua di-haga-mouli nia daangada ala i-golo. Dugu-anga gi Mee gii-bida haga-mouli Ia, maa Ia go di Mesaia dela ne-hilihili go God.”

23:36  Digau dauwa gu-haganneennee a-Mee labelaa, ga-lloomoi mo nadau waini hui-ngoohia, gaa-wanga gi Mee,

23:37  ga-helekai, “Goe gii-bida haga-mouli-ina-hua Goe, maa Goe go di king o digau o Jew!”

23:38  I-hongo di libogo Jesus i-hongo di loobuu, e-hihi nia helekai aanei: “Deenei di king digau o Jew.”

23:39  Tangada e-dahi i-nia daangada huaidu ala ne-daudau dalia a-Mee, ga-helekai hagabuhi gi Mee, “Goe hagalee go di Mesaia? Daawaa-ina Goe, mo gimaua!”

23:40  Di hoo o-maa ga-helekai haga-buhi gi dono ehoo, “Goe hagalee madagu i God? Goe guu-kae di hagaduadua be Mee.

23:41  Gidaua e-tau-hua di-kae di hagaduadua deenei, idimaa, gidaua e-kae di hui o tau mee hala ala ne-hai, gei Mee digi hai dana hala.”

23:42  Gei mee ga-helekai, “Meenei Jesus, gi-langahia-e-Goe au i do madagoaa ma-gaa-king iei Goe!”

23:43  Jesus ga-helekai, “Au e-hagi-adu gi-di-goe di tonu bolo dangi-nei-hua, gei goe ga-madalia Au i Paradais.”

23:44  Holongo di laa e-madangaholu maa-lua, gei di bouli la-guu-gahu tenua hagatau gaa-dae-loo gi-di laa e-dolu,

23:45  idimaa, di laa gu-hagalee maahina. Gei di gahu dela e-dau i-lodo di Hale Daumaha la-gu-mahaa-lua.

23:46  Gei Jesus gaa-wolo gi-nua, ga-helekai, “Tamana! Au e-dugu-adu dogu hagataalunga gi-lodo oo lima.” Mee ne-helekai-hua beenei, nomuli gaa-made.

23:47  Gei tangada-dauwa aamua dela ne-gidee-ia nia mee aanei, ga-hagaamu a God, ga-helekai, “E-donu hua bolo Tangada deenei la Taane humalia!”

23:48  Digau dogologo ala ne-dagabuli belee mmada gi-nia mee aanei, ga-gidee nia mee ala ne-hai, gei digaula gaa-hula gi nadau hale mo di dugidugi nadau hadahada i nadau lodo-huaidu.

23:49  Digau huogodoo ala gu-iloo Jesus, mo nia ahina ala nogo daudali a-Mee mai i Galilee, e-tuu-mai haga-mogowaa e-daumada nia mee ala e-hai.

23:50  Taane dono ingoo go Joseph, mai Arimathea di waahale i Judea, mee tangada humalia ge hagalaamua go nia daangada, gei mee nogo talitali Teenua King o God. Ma e-aha maa mee tangada i digau aamua hai-gabunga, gei mee hagalee hiihai gi nadau hangaahai-maanadu mo nadau hangahaihai.

23:51  Taane dono ingoo go Joseph, mai Arimathea di waahale i Judea, mee tangada humalia ge hagalaamua go nia daangada, gei mee nogo talitali Teenua King o God. Ma e-aha maa mee tangada i digau aamua hai-gabunga, gei mee hagalee hiihai gi nadau hangaahai-maanadu mo nadau hangahaihai.

23:52  Mee gaa-hana gi-mua o Pilate, ga-madau tuaidina o Jesus.

23:53  Mee ga-dugu-ia tuaidina o-Maa gi-lala, gaa-hii gi-di gahu-lenge, gaa-dugu gi-lodo taalunga dela ne-hodo gi-lodo tadugalaa, digi hai-hegau-ai.

23:54  Ma di lima-laangi, gei di Laangi-Sabad gu-hoohoo ga-daamada.

23:55  Nia ahina ala nogo daudali a Jesus mai-loo i Galilee, ne-hula i-muli o Joseph belee mmada gi taalunga, mo di hai dela ne-dugu a Jesus gi-lodo taalunga.

23:56  Nomuli, gei digaula gaa-hula gi nadau hale, e-hagatogomaalia nadau mee haga-kala-mee mono lolo-kala ang-gi tuaidina o-Maa. Di Laangi-Sabad, digaula ga-hagamolooloo gii-hai be taganoho.

Chapter 24

24:1  Hagaluada-loo di laangi-tabu, nia ahina ne-hula gi taalunga, e-kae nadau lolo-hagakala ala ne-hagatogomaalia.

24:2  Digaula gu-gidee bolo di hadu la-gu-haga-daga gi-daha mo di bongoo taalunga,

24:3  gei digaula ga-ulu-adu gi-lodo, digi gidee tuaidina Tagi Jesus.

24:4  Digaula gaa-tuu hua igolo gu-gologolo i-di mee dela ne-hai, i-di madagoaa-hua deelaa, nia daane dogolua e-gahu i-nia gahu maahina ge dabadaba, e-tuu i nadau baahi.

24:5  Nia ahina gu-mmaadagu huoloo, gaa-pala gi-lala-loo gi-hongo di gelegele, gei nia daane ga-helekai, “Goodou e-aha ala e-halahala tangada e-mouli gi-lodo digau guu-mmade?

24:6  Mee hagalee i-ginei, Mee gu-haga-mouli-aga. Goodou gi-langahia ana helekai ne-hai i Galilee boloo,

24:7  ‘Tama-Tangada le e-hai gii-wanga-loo gi digau huaidu, e-hai gi-daudau gi-di loobuu, i-muli nia laangi e-dolu, ga-mouli-aga.’ ”

24:8  Gei nia ahina ga-langahia nia helekai a-Maa,

24:9  gaa-hula ga-hagi-anga nia mee aanei huogodoo gi-nia dama-agoago dilongoholu maa-dahi a Jesus, mo digau ala i-golo.

24:10  Nia ahina aanei la-go Mary mai Magdala, Joanna, mo Mary tinana James. Digau aanei mo nia hoo digaula gu-hagi-anga gi digau agoago-hagau.

24:11  Gei digau agoago-hagau digi hagadonu nia helekai nia ahina aalaa, idimaa digaula e-hagamaanadu bolo nnelekai digaula la ono hadinga ai.

24:12  Gei Peter ga-duu-i-nua, gaa-lele gi taalunga, ga-bala gi-lala, gaa-mmada gi-lodo taalunga, ga-gidee-ia di gahu-daalunga, deai di mee labelaa i-dono baahi ai. Gei mee gaa-hana gi dono hale, gu-gologolo be ma di-aha dela ne-hai.

24:13  Di laangi-hua deelaa, gei nia daangada dogolua i digau ala nogo daudali a Jesus e-hula gi-di waahale Emmaus, holongo nia maele e-hidu mai Jerusalem.

24:14  Gei meemaa e-ngudungudu-kai i-nia mee ala ne-hai.

24:15  I-di-nau hula mo di ngudungudu-kai, gei Jesus ga-menege-adu ga-haele i-baahi meemaa.

24:16  Meemaa gaa-mmada gi Mee, gei digi modongoohia-ginaua a-Mee.

24:17  Jesus ga-helekai-adu gi meemaa, “Goolua e-helehelekai i di-aha, dela e-helehelekai mo di hula?” Gei meemaa gaa-tuu de-ngalungalua-loo mo nau golomada guu-mmada lodo-huaidu.

24:18  Tangada e-dahi i meemaa dono ingoo go Cleopas, ga-heeu gi Mee, “Goe tangada dogo hanimoi-hua madamada gi Jerusalem dela e-de-iloo nia mee ala ne-hai i-nia laangi dulii ala guu-too gi-daha?”

24:19  Jesus ga-heeu, “Nia mee aha?” Meemaa ga-helekai, “Go nia mee ala ne-hai gi Jesus o Nazareth. Tangada deenei la soukohp dela guu-dugu go God mo digau dogologowaahee, bolo Mee e-mogobuna i ana mee nogo helehelekai-ai mo ana mee ala nogo hai.

24:20  Tadau dagi hai-mee-dabu mo tadau dagi aamua guu-wanga a-Mee gi-di gabunga e-hagamodu e-daaligi gii-made, gei Mee gu-daudau i-di loobuu.

24:21  Gei gimaadou nogo noho hagadagadagagee bolo ma go Mee dela ga-haga-dagaloaha Israel! Gei dangi-nei la-go di tolu laangi i-muli di laangi ne-hai di mee deenei.

24:22  Hunu ahina o tadau hagabuulinga gu-haga-homouli gimaadou. Digaula ne-hula heniheni gi taalunga,

24:23  gei digaula digi gidee-ginaadou tuaidina o-Maa, ga-lloomoi-hua, ga-helekai bolo ginaadou guu-mmada gi nia daangada di-langi, ne-helekai ang-gi ginaadou, bolo Mee gu-mouli-aga.

24:24  Hunu gau i-di madau hagabuulinga guu-hula gi taalunga, gu-gidee-ginaadou nia mee huogodoo e-hai be nia helekai nia ahina, malaa digaula digi gidee-ginaadou a-Mee.”

24:25  Gei Jesus ga-helekai gi meemaa, “Goolua e-de-kabemee! E-buna huoloo di-gulu hagadonu nia mee huogodoo ala gu-helekai-ai nia soukohp!

24:26  Ma hagalee e-donu bolo di Mesaia le e-hai-loo gi-hagaduadua i-nia mee aanei, ga-ulu gi-lodo ono madamada?”

24:27  Gei Jesus ga-haga-donu gi meemaa nia mee ala ne-helekai i-de-Ia i-lodo nia helekai beebaa dabu huogodoo, e-daamada i Nnaganoho Moses mo nia Beebaa o nia Soukohp.

24:28  Digaula ga-hoohoo gi-di waahale dela e-hula ginai meemaa, gei Jesus gaa-hai be-di mee bolo Ia e-hana hua igolo.

24:29  Gei meemaa ga-helekai maaloo gi Mee bolo gii-noho hua i nau baahi ma-gu-hoohoo ga-bouli. Gei Mee guu-noho i-baahi meemaa.

24:30  Mee gaa-noho gi-lala i-baahi meemaa belee miami, ga-dahi-aga di palaawaa, ga-danggee ang-gi God, ga-ginigini di palaawaa, gaa-wanga gi meemaa.

24:31  Gei nau golomada gu-gidee, gu-modongoohia a Mee, gei Mee gu-haga-ngala e-Ia i meemaa.

24:32  Meemaa ga-helekai i nau mehanga, “Ma hagalee guu-hai be-di ahi nogo ulaula i tau lodo i-di madagoaa nogo helekai iei Mee i-hongo di ala, mo di haga-donu-mai nia helekai di Beebaa Dabu?”

24:33  Meemaa ga-tuu-i-nua, gaa-hula gi-muli gi Jerusalem, ga-gidee nia dama-agoago dilongoholu maa-dahi a Jesus la-gu-dagabuli mo nadau ihoo ala i-golo.

24:34  Digaula ga-helekai gi meemaa, “Tagi le e-donu-hua bolo gu-haga-mouli-aga! Mee gu-haga-gida gi Simon!”

24:35  Gei nia daangada dogolua aanei ga-haga-modongoohia gi digaula nia mee ala ne-hai i-hongo di ala, mo di-nau modongoohia-ginaua di Tagi i-di madagoaa Mee nogo ginigini dana palaawaa.

24:36  Di madagoaa-hua meemaa nogo helekai nia mee aanei, gei Tagi ga-gila-aga i nadau lodo, ga-helekai, “Di aumaalia gi-madalia goodou.”

24:37  Gei digaula gu-homouli nadau lodo, bolo ginaadou ne-mmada-hua gi-di ieidu.

24:38  Gei Mee ga-helekai, “Goodou e-homouli beleiaha? Ma e-aha nia manawa-logo e-kila-aga i-lodo godou hagamaanadu?

24:39  Mmada gi ogu lima mo ogu babaawae gi-modongoohia bolo ma ko-Au. Bili-mai gei goodou ga-iloo bolo ma ko-Au, idimaa, di ieidu la ono goneiga mo ono iwi ai, gei Au ogu goneiga mo ogu iwi i-golo.”

24:40  Mee ne-lawa di-helekai beenei, ga-haga-gida ono lima mo ono babaawae gi digaula.

24:41  Gei digaula digi hagadonu hua igolo, ginaadou gu-tenetene huoloo mo di goboina, gei Mee ga-heeu, “Godou meegai i-ginei?”

24:42  Digaula gaa-wanga di iga mmoo gi Mee,

24:43  ga-dahi-mai, gaa-gai i-mua digaula.

24:44  Mee ga-helekai, “Aanei nia mee dahidamee ala ne-hagi-adu ko-Au gi goodou i dogu madagoaa dela nogo i godou baahi: Nia mee huogodoo ala ne-hihi i-di-Au i-lodo Nnaganoho Moses mo nia Beebaa o nia Soukohp mono Pisalem ne-belee hai gii-kila.”

24:45  Gei Mee gaa-huge nadau libogo gi-iloo-ginaadou nia helekai di Beebaa-Dabu,

24:46  ga-helekai, “Deenei di hai ne-hihi nia mee aanei: di Mesaia le e-hai-loo gi-hagaduadua, ga-mouli-aga mai di made i-muli nia laangi e-dolu.

24:47  Di Longo-Humalia o-di maliu o-di manawa mo tumaalia gi-nia huaidu, le e-hai gi-agoago i dono ingoo ang-gi nia henua huogodoo, e-daamada i Jerusalem.

24:48  Goodou lago digau haga-modongoohia nia mee ala ne-mmada ginai goodou.

24:49  Ma ko-Au dela ga-hagau-adu gi goodou di mee dela ne-hagababa go dogu Damana. Goodou gi-taalia i-lodo di waahale deenei, gaa-dae-loo gi-nia mogobuna mai i-di langi ga-dugu-ia gi godou nua.”

24:50  Gei Mee gaa-dagi digaula gi-daha mo Jerusalem gaa-dau-adu gi Bethany, gei Mee ga-dahi-aga ono lima ga-haga-maluagina digaula.

24:51  Di madagoaa o-Mee ne-haga-maluagina digaula, Mee ga-hagatanga i-baahi digaula gaa-lahi gi-di langi.

24:52  Digaula ga-daumaha ang-gi Mee, gaa-hula gi-muli gi Jerusalem mo di tenetene huoloo,

24:53  gaa-noho-hua i-lodo di Hale Daumaha mo di hagahagaamu a God.