LinVB - Jeremiah

Chapter 1

1:1  Maloba ma Yeremia, mwana wa Kilkia, nganga Nzambe wa Anatot, o mokili mwa Benyamin.

1:2  Yawe azalaki koloba na ye o mikolo mya Yozia, mwana wa Amon, mokonzi wa Yuda, o mobu mwa zo­mi na misato mwa bokonzi bwa ye.

1:3  Na nsima Yawe azalaki koloba na ye o mikolo mya Yoyakim, mwa­na wa Yozia, mokonzi wa Yuda kin’o nsuka ya mobu mwa zomi na moko mwa Sedekia, mwana wa Yozia, mokonzi wa Yuda. O nta­ngo ena bakangaki bato ba Yeruzalem mpe bakendeki na bango o boombo o sanza ya itano.

1:4  Yawe alobi na ngai maloba maye :

1:5  Yambo ’te nabongisi yo o libumu lya mama nasilaki koyeba yo, yambo ’te obotama nasilaki kopono yo ozala wa ngai. Nakomisi yo profeta wa bato ba bikolo.

1:6  Nalobi : « E Mokonzi Yawe, nayebi koloba te, nazali se mwana moke. »

1:7  Yawe alobi : Tika koloba : « Nazali se mwana », kasi kende epai ya bato banso nakotinda yo, sakola maloba manso nakoyebisa yo.

1:8  Obanga bango te, zambi ngai nazali na yo mpo ya ko­batela yo. Maloba ma Yawe.

1:9  Yawe atandi loboko, asimbi monoko mwa ngai, alobi : Tala, nakotia maloba ma ngai o monoko mwa yo.

1:10  Yeba ’te banda lelo nakopesa yo bokonzi o bikolo binso mpe o mikili minso, mpo ya kopikola minsisa mpe kobuka bitapi, mpo ya kobebisa mpe mpo ya kosilisa, mpo ya kotonga mpe mpo ya kolona lisusu.

1:11  Yawe atuni ngai : « Yeremia, ozali komono nini ? » Nayanoli : « Namoni etapi ya nzete ya lidame. »

1:12  Yawe alobi na ngai : « Omoni malamu, nazali kokengele liloba lya ngai mpo ’te nakokisa lyango. »

1:13  Mbala ya ibale Yawe atuni ngai : « Ozali komono nini ? » Nazongisi : « Namoni lisasu lya mai mazali kotoko likolo lya móto, lisasu liye litengemi, liuti o Nordi. »

1:14  Yawe alobi na ngai : Malozi makouta o Nordi, makokwela bato banso ba ekolo eye ;

1:15  yango wana nakobenga bakonzi banso ba mabota ma Nordi, maloba ma Yawe. Moko moko akotia ngwende ya ye pene na bizibeli bya Yeruzalem, o nse ya mapango mazingi engu­mba mpe o boso bwa mboka inso ya Yuda.

1:16  Nakosambisa ba-Yuda mpo ya mabe basalaki, zambi batikaki ngai, batumbelaki banzambe basusu mpaka ya malasi, mpe bakumbelaki bikeko basalaki na maboko ma bango moko.

1:17  Bongo yo, kanga nkamba o loketo, teleme mpe yebisa bango makambo manso nakotinda yo. Obanga bango te, soki te, ngai nakobangisa yo o miso ma bango.

1:18  Lelo nakomisi yo bo ebombamelo, likonzi lya ebende, lopango la mbengi o miso ma ekolo eye mobimba : bakonzi ba Yuda, bankumu na banganga Nzambe mpe ma bato banso ba ekolo.

1:19  Bakobundisa yo, kasi bakokoka yo te, zambi ngai nazali na yo mpo nabikisa yo. Maloba ma Yawe. Israel atosi Yawe te

Chapter 2

2:1  Yawe alobi na ngai maloba maye :

2:2  Kende mpe ganga o matoi ma bato ba Yeruzalem : Yawe alobi boye : Nakundoli o motema ndenge oza­laki kolinga ngai o bolenge mpe ntango nabandaki yo : ozalaki kolanda ngai o eliki, o mokili mozalaki na milona te.

2:3  Israel azalaki ekolo esantu ya Yawe, mbuma ya yambo ya bilanga bya ye. Ata nani amekaki kolia yango a­zwi etumbu, mabe makweli ye. Maloba ma Yawe.

2:4  Bino bato ba libota lya Yakob mpe ba mabota manso ma Israel, boyoka maloba ma Yawe.

2:5  Yawe alobi boye : Bankoko ba bino bazwaki ngai na mabe nini ? Mpo nini batikaki ngai ? Balandaki banzambe ba mpa­mba, bango mpe bakomi bato mpamba.

2:6  Bamitunaki te : « Yawe azali wapi, oyo alongolaki biso o mokili mwa Ezipeti, oyo akambaki biso o eliki, o mokili mokauka mpe mwa ma­bwaku, o mokili mozangi mai mpe mwi­nda, esika moto moko akolekaka to ako­fandaka te ? »

2:7  Nakotisaki bino o mokili mokobotaka mbuma mingi mpo ’te naleisa bino mbuma ipusi elengi. Kasi ekomaki bino kuna, bobebisaki ekolo ya ngai mpe bokomisaki ekolo ya ngai esi­ka ya nsomo.

2:8  Banganga Nzambe batunaki te : « Yawe azali wapi ? » Bateyi ba Mobeko bandimaki ngai te, bankumu batombokelaki ngai, baprofeta basakolaki o nkombo ya Baal mpe balandaki banzambe ba mpamba.

2:9  Yango wana nakosambisa bino ná bankoko ba bino. Maloba ma Yawe.

2:10  Bokende kotala o bisanga bya Kitim, botinda bato o Kedar batuna bato malamu ! Botala soko makambo mana masili masalemi !

2:11  Bato ba ekolo nini bakotikaka nde banzambe ba bango ? Kutu bazali banzambe te ! Bato ba ekolo ya ngai batikaki Nzambe wa nkembo mpo balanda bikeko bizangi ntina !

2:12  E likolo, okamwa na yango, olenge mpe oyoka nsomo mpenza ! Maloba ma Yawe.

2:13  Bato ba ngai basalaki makambo mabe mabale : batikaki ngai, liziba lya mai ma bomoi mpo batimola mabulu mapaswani mpe makoki kobomba mai te.

2:14  Israel azali nde moombo ? Abotami nde moombo ? Boniboni akwei o maboko ma bato basusu ?

2:15  Nkosi ibimeli ye mpe igangeli ye makasi, ikomisi ekolo ya ye mopotu : bingumba bya ye bitumbami, bizali na bato lisusu te.

2:16  Ata bato ba Memfis na Tapanes bayibeli yo mbuma o bilanga bya ngomba ya yo.

2:17  Basali yo bongo mpo otiki Yawe Nzambe wa yo o ntango azalaki mokambi wa yo o nzela.

2:18  Olingi nde kokende o Ezipeti mpe komele mai ma Nil tee sikawa ? Olingi nde kokende komele mai ma Efrate o Asur ?

2:19  Etumbu ekweli yo mpo ya mabe osalaki : opesaki ngai mokongo ! Yeba ’te osali mabe : otiki Yawe, Nzambe wa yo, okobangaka ngai lisusu te, yango ekoyokisa yo mpasi. Yawe Nzambe wa bokasi bonso alobi bongo.

2:20  Banda kala obuka ekangiseli ya yo mpe okata nsinga ikangaki yo. Olobaki : « Nakosalela yo lisusu te ! » O ngomba inso mpe o nse ya nzete inso omilalisi lokola mwasi ndumba.

2:21  Nzokande nalonaki yo lokola nze­te ya vino eponomi eye ekobotaka mbuma ilamu. Boniboni bitapi bya yo bibebi sikawa, mpe okomi kobota mbuma ibe ?

2:22  Ata osukoli nzoto ndenge nini, ata omipakoli sabuni mingi, mabe ma yo makoki kolongwa o miso ma ngai te. Maloba ma Yawe Nzambe.

2:23  Boniboni okoki koloba : « Nazali na mbindo te, nalandi makambo ma ba-Baal te » ? Tala makambo ozalaki kosala o lobwaku, ndima makambo ozalaki kosala lokola kamela mwasi ekozolo­nganaka epai na epai.

2:24  Ozali lokola mpunda mwasi ya eliki, soko mposa ya nzoto eyeli yango, ekobenda mpema ; nani akoki kopekisa yango elanda mposa ya nzoto ? Ata mpunda mobali nini ekoluka yango ekoyoka mpasi te, ekozwa yango noki soko eleko ya yango ekomi.

2:25  Keba ! Okobebisa makolo ma yo mpe mongongo mwa yo mokokauka. Kasi olobi : « Likambo te ! Tika ngai ! Nalingi banzambe baye mingi, nalingi kolanda bango. »

2:26  Lokola moyibi akangemi, se bongo bato ba Israel, bakonzi na bankumu, banganga Nzambe na baprofeta ba bango bakoyoka nsoni.

2:27  Bakoloba na nzete : « Ozali tata wa ngai », mpe na libanga : « Yo moto obotaki ngai. » Bapesi ngai mokongo, balingi kolakisa elongi te ; kasi ntango bakomi na mpasi, bakoganga : « Teleme noki ! Bikisa biso ! »

2:28  Wapi bikeko bya banzambe, biye omisalelaki ? Baya kosalisa yo o ntango ya mpasi. Okomi na banzambe baike, ebele lokola bingumba bya yo, e Yuda !

2:29  Bolingi nde kosambisa ngai ? Bino banso boboyaki ngai. Maloba ma Yawe.

2:30  Nabeteki bana ba yo, kasi se mpa­mba, yango epesi bango mayele te. Mopanga mwa yo mobomaki baprofeta ba yo, lokola nkosi ekosilisaka bato.

2:31  Bino bato ba mikolo mya lelo, boyoka maloba ma Yawe : O miso ma Israel nakomi nde lokola eliki to mokili mwa molili makasi ? Mpo nini bato ba ekolo ya ngai bakolobaka : « Tolingi bonsomi, tokokende epai ya yo lisusu te » ?

2:32  Elenge mwasi akobosana nde biloko bya monzele ? Mwasi abandemi akobosana nde molato mwa eyenga ? Nzokande bato ba ngai babungi ngai banda kala.

2:33  Ozali na mayele maike mpo ya kobenda bato balinga yo, ata mpo ya koboma bato.

2:34  Makila ma babola mpe ma bato basalaki mabe te, mpe ma baye okangaki bo moyibi te, makangemi o malenda ma bila­mba bya yo.

2:35  Ata bongo, olobi : « Nazali na likambo lyoko te, ayokela ngai nkanda lisusu te ! » Tala, nakosambisa yo mpo olobi : « Nasali mabe te. »

2:36  Mpo nini ozali kowayawaya boye ? Nzokande ba-Ezipeti bakosa­mbwi­sa yo, se lokola ba-Asur basalaki.

2:37  Okolongwa kuna maboko o motó, zambi Yawe aboyi banzambe baye otiaki motema, baye bakoki kosalisa yo na eloko te.

Chapter 3

3:1  Yawe alobi na ngai boye : Soko mobali aboyi mwasi wa ye, mpe mwasi atiki ye mpe abali mobali mosusu, mobali wa liboso akoki kozongela ye lisusu ? Lokola mwasi oyo, ekolo eye ebe­bi nye te ? Yo moto omibebisi na babali mi­ngi, olingi kozongela ngai solo ?

3:2  Tombola miso epai ya ngomba mpe tala : Esika nini osalaki bosoni na babali te ? Ofandaki mpembeni ya nzela mpo ya kozila bango, lokola mo-Arabu o eliki. Obebisi ekolo na makambo ma yo ma bosoni.

3:3  Ata o eleko ya mpela mbula enokoki te, ata mbula ya nsuka te, okobaki se makambo ma yo ma bondumba, oyokaki na yango nsoni te.

3:4  Nzokande obangi te kobondela ngai : « E tata wa ngai, yo bolingo bwa ngai banda bolenge !

3:5  Okobombela ngai nde nkanda ? Okotala ngai na motema mabe seko ? » Kasi ntango ozalaki koloba bo­ngo, ozalaki se kosala mabe, otiki mabe ma yo soki te. Israel mopengwi mpe Yuda mokosi

3:6  O mikolo mya mokonzi Yozia, Yawe atuni ngai : Omoni maka­mbo Israel mopengwi asali ? Azalaki kokende kosala bondumba o ngo­mba inso mpe o nse ya nzete inso ya nkasa ibesu.

3:7  Ngai nakanisi : « Ekosilisa ye kosala makambo mana manso, akozongela ngai », kasi azo­ngeli ngai te. Ndeko wa ye Yuda mokosi amonoki yango.

3:8  Amo­noki mpe ’te naboyi Israel mope­ngwi mpo ya lisumu lya bosoni, mpe ndenge napesi ye mo­nka­nda mwa bobomi libala. Nzo­kande ndeko wa ye Yuda mokosi abangaki te, ye mpe akomi kosala bondumba ;

3:9  bo­ngo na bo­ndu­mba bwa ye nsoni te asantoli ekolo ; asali ekobo na bikeko bya mabanga mpe bya nzete.

3:10  Ata bongo, ndeko wa ye Yuda mo­kosi azongeli ngai na motema moko te ! Azalaki se kokosa ! Maloba ma Yawe.

3:11  Mpe Yawe alobi na ngai : Soko otali Yuda mokosi, Israel mopengwi aleki ye na bosembo.

3:12  Kende koga­nga maloba maye epai ya Nordi : Zonga, Israel mopengwi, maloba ma Yawe, nakolakisa yo lisusu motema nka­nda te, zambi nazali motema ngolu, maloba ma Yawe ; nakobombela yo nkanda seko te.

3:13  Ndima bobele ’te osali mabe : Otombokaki na Yawe, Nzambe wa yo, olandaki banzambe basusu bipai na bipai, okumisaki bango o nse ya nzete inso ya nkasa ibesu, oyokaki ngai te. Maloba ma Yawe.

3:14  Yawe alobi : Bozongela ngai, bino bana bapengwi. Ngai nazali Mokonzi wa bino. O mboka mpe o libota lyoko lyoko nakokamata moto moko to bato babale mpo nakamba bino o Sion.

3:15  Nakopesa bino bakengeli bakosepelisa ngai, bato bakokamba bino na mayele mpe na bwanya.

3:16  Yawe alobi : Soko o mikolo mina bokokoma bato baike mpe bokobota bana mingi o ekolo, bokotanga lisusu Sanduku ya Bo­ndeko bwa Yawe te. Moto moko akokanisa yango lisusu te, bakobondela yango lisusu te, moto moko akosengela na yango te, bakotonga Sanduku esusu lisusu te.

3:17  O mikolo mina bakotanga Yeruzalem ‘Ngwende ya Yawe’. Bato ba bikolo binso bakosangana kuna mpo ya nkombo ya Yawe ; bakolanda lisusu mabe ma mitema mya bango te.

3:18  O mikolo mina bato ba Yuda bakokende epai ya bato ba Israel. Banso elongo bakouta o mokili mwa Nordi mpe bakoya o mokili napesaki bankoko ba bango.

3:19  Nakanisaki : Nakosala yo malamu lokola mwana wa ngai, nakokabela yo mokili mwa ese­ngo mpe nakoponela yo esika eleki bikolo binso na bonzenga. Nakanisaki : Okobenga ngai ‘Tata wa ngai’ mpe okokabwana na ngai lisusu te.

3:20  Kasi lokola mwasi akosi mobali moninga wa ye, bino bato ba Israel bokosaki ngai. Maloba ma Yawe.

3:21  O ngomba makelele mayokani ba-Israel bakomi kolela mpe kobondela ; babungi nzela, babosani Yawe Nza­mbe wa bango.

3:22  Bino bana bapengwi, bozonga, nalingi kosilisa bokosi bwa bino. Tala biso baye, tozongi epai ya yo, zambi ozali Yawe Nzambe wa biso.

3:23  Ya solo, mpo ya makambo ma lokuta masalemi o ngomba, makelele mayokani kuna. Solo, Yawe Nzambe wa biso azali mobikisi wa Israel.

3:24  Kasi banda bolenge bwa biso, bikeko bya Baal bisilisi kolia mbu­ma ya mosala mwa bankoko ba biso : nyama inene na ike, bana babali na bana basi.

3:25  Tika, toyoka nsoni, nsoni mpenza mpo ya mabe ma biso ! Mpo totumolaki Yawe Nzambe wa biso na masumu, biso na bankoko ba biso, banda bolenge tee lelo. Toboyaki koyoka lolaka la Yawe Nzambe wa biso.

Chapter 4

4:1  Yawe alobi boye : Yo Israel, soko olingi kozonga, zongela ngai. Soko olongoli biloko bya yo bya nsomo, soko okimi ngai lisusu te,

4:2  soko olayi ndai na nkombo ya Yawe wa bomoi, na bosolo, na mayele malamu mpe na bosembo, bato ba bikolo binso bakozwa bolamu mpe bakoyoka esengo mpo ya yo.

4:3  Yawe alobi na bato ba Yuda mpe ba Yeruzalem : Bokata bilanga bya bino, bolona mbuma o kati ya nzube te.

4:4  Bino bato ba Yuda mpe ba Yeruzalem, bokata nzoto mpo ya Yawe, bolongola mpe mbindo o mitema mya bino. Soki te, nkanda ya ngai ekongala lokola móto, moye moto moko akokoka kozimisa te, mpo ya makambo mabe ma bino.

4:5  Bosakola o Yuda, bosangela bato ba Yeruzalem ! Bobete mindule o ekolo, boganga makasi, boloba : « Tosangana banso ! Tokima o bibombamelo bya biso ! »

4:6  Botombola bendele epai ya Sion ! Bokima ! Boteleme o nzela te ! Mpamba te, ut’o Nordi nakoti­ndela bino likambo lya mpasi, likambo lya nsomo enene !

4:7  Lokola nkosi ebimi o mobenga mwa yango, mobebisi wa bikolo abimi o esika ya ye mpe azali koya mpo ’te abebisa ekolo ya yo, atumba bingumba bya yo mpe akimisa bato banso.

4:8  Yango wana bolata ngoto, bolela mpe boganga, zambi nkanda enene ya Yawe elo­ngwi epai ya biso te.

4:9  Yawe alobi : O mokolo monamei mpiko ekolongwa o motema mwa mokonzi na basali ba ye, banganga Nzambe bakokamwa mpenza, baprofeta bakoyoka nsomo.

4:10  Bakoloba : « E Mokonzi Yawe, okosi bato ba ekolo ya yo mpe ba Yeruzalem na bolobi ’te ‘Bokozwa kimia’, nzokande mopanga molingi mosilisa biso. »

4:11  O mikolo mina bakoloba na bato baye mpe na Yeruzalem : Mompepe mwa móto mokouta o ngomba mpe o eliki, mokoya kopepela bato ba ekolo ya ngai, mpo ya kopupola to kopetola ba­ngo te !

4:12  Nakotindela bango ekumbaki, sikawa ngai moko nakosambisa ba­ngo !

4:13  Tala, mobebisi azali koya lokola mampata, makalo ma ye mazali kopimbwa lokola eku­mbaki, farasa ya ye ileki bingondo na mba­ngu. Mawa na biso e ! Tobebi nye !

4:14  E Yeruzalem, longola mabe ma­nso o motema mpo ’te okoka kobika. Kin’o mokolo nini okozala na ma­kanisi mabe o motema ?

4:15  Ut’o mokili mwa Dan bakomi kosakola nsango ena, ut’o ngomba ya Efraim bayebisi nsango eye ya mpasi.

4:16  Bosakola mpe boyebisa bato ba ekolo ya Yuda, bokebisa bato ba Yeruzalem : banguna bakouta o ekolo mosika, bakoyokisa bingumba bya Yuda migango mya etumba.

4:17  Banguna bakozinga byango lokola bakengeli ba bilanga, mpo bato ba byango batombokeli ngai, maloba ma Yawe.

4:18  Yango ekweli yo mpo ya ezalela mpe bikela bya yo. Tala, bololo bwa mabe ma yo bozokisi motema mwa yo.

4:19  Libumu lizalaki koswa, nayoki mpasi mpenza, motema mwa ngai molingi mopa-swana, nakoki kokanga monoko lisusu te, mpo nayoki ’te babeti mondule, nayoki mpe bogangi bwa etumba.

4:20  Bayebisi bobele makambo ma nso­mo, solo, ekolo mobimba ebebi, na mbalakaka biema bya ngai bibebi, ná bibombamelo bya ngai.

4:21  Mikolo boni naino nakomono be­ndele mpe nakoyoka lokito la mondule ?

4:22  Solo, bato ba ngai bazali bazoba, bayebi ngai te, bazali na mayele te, bayebi eloko te ; bazali se na mayele ma kosala mabe, bayebi kosala malamu te.

4:23  Namoni ’te o nse ekomi mobulu, o likolo moi molimwi.

4:24  Namoni ’te ngomba izalaki kole­nge, ngomba ike inso izalaki koningana.

4:25  Namoni moto moko lisusu te, ata ndeke inso ikimi.

4:26  Namoni ’te bilanga bikomi biliki, bingumba binso bibebi, mpo ya nkanda enene ya Yawe.

4:27  Yawe alobi boye : Nse mobimba ebebi nye, binso bizali wana nakosilisa bya­ngo.

4:28  Yango wana mokili mokozala na mawa mpe likolo likoinda ! Nakati likambo, nakobongola maloba te, nakani mokano mpe nakozonga nsi­ma te.

4:29  Ntango bayoki basoda ba farasa mpe ba litimbo, bato ba engumba bakimi. Bakoti o zamba, bakei kobombama o mabanga ma ngomba, mboka inso ikomi mpamba, moto moko atikali wana te.

4:30  Bongo okosala nini ? Ata olati bilamba bya longondo, ata okembisi nzoto na biloko bya wolo, ata opakoli langi mpembeni ya mi­so, omikembisi se mpamba. Baye balingaki yo, baboyi yo, balingi liwa lya yo.

4:31  Nayoki boleli lokola mwasi alingi abota, bogangi bwa mama aboti mbala ya liboso : ezali bogangi bwa elenge mwasi wa Sion, akimeli mpe atandi maboko : « Mawa na ngai e ! Nakufi e ! Bato balingi koboma ngai ! »

Chapter 5

5:1  Bokatisa balabala ya Yeruzalem, botala malamu mpe bomeka koyeba, boluka o wenze mpe o zando. Soko bomoni ata moto moko wa bosembo, oyo akolukaka bosolo, nakolimbisa bato ba engumba eye.

5:2  Bakolayaka na nkombo ya Yawe, kasi ndai ya bango izali ya lokuta.

5:3  E Yawe, olingi se makambo ma bosolo. Ata opesi bango etumbu, bakoyoka te. Ata onyati bango, bakozwa mayele te. Bazali bato ba motó makasi lokola libanga, baboyi kobongola mitema.

5:4  Namilobeli : « Bazali bato ba mawa, bayebi eloko te, mpo bayebi nzela ya Yawe te, mibeko mya Nzambe wa bango mpe te.

5:5  Bongo nakokende epai ya bato ba­nene, nakoloba na bango, mpo bango bayebi nzela ya Yawe, bayebi mpe mibeko mya Nzambe wa bango ! » Kasi bango mpe babwaki moku-mba, bakati nsinga izalaki kokanga ba­ngo.

5:6  Yango wana nkosi ya zamba iko­swa bango, gambala ya esobe ikosilisa bango, nkoi ikozinga mboka ya bango ; ata nani akobima o mboka akoliama, mpo babuki mibeko mingi, mpe bawangani ngai mbala ebele.

5:7  Mpo nini nalimbisa bino ? Bana ba yo baboyi ngai, bakolayaka na nkombo ya ba­nza­mbe ba lokuta. Napesi bango bomengo, nzokande bakomi bato ba ekobo, bakowelaka ndako ya bandumba.

5:8  Bakomi lokola farasa babali iyoki nzoto móto, bakobengaka mwasi wa moninga.

5:9  Bongo napesa bango etumbu te ? Maloba ma Yawe. Nazongisela ekolo eye mabe te ?

5:10  Bokende kobebisa bilanga bya vino o ngomba, bonyata binso, bokata bitapi binso, zambi bizali bya Yawe te !

5:11  Solo, bato ba Israel mpe ba Yuda baboyaki ngai koboya. Maloba ma Yawe.

5:12  Bawanganaki Yawe, balobaki : « azali te ! Mabe makokwela biso te, tokokufa na mopanga to na nzala ekasi te !

5:13  Baprofeta bazali se lokola mopepe, Nzambe akolobaka na monoko mwa bango te. Mabe mana makokwela bango moko. »

5:14  Yango wana Yawe Nzambe wa bo­kasi bonso alobi : Awa bolobaki bongo nakosala ’te maloba ma ngai makoma móto o monoko mwa yo, mpe bato baye bakoma nkoni ekozika na móto.

5:15  Yawe alobi : Bato ba Israel, nakotindela bino bato ba ekolo mosika, ekolo eumeli mingi mpe eyebani ut’o kala, bokoyebaka lokota la bango te, bokoyeba mpe ntina ya maloba ma bango te.

5:16  Soko babeti litimbo, liwa se wana ! Bazali bilombe mpenza.

5:17  Bakolia mbuma ya bilanga na ma­mpa ma bino, bakosilisa bana ba bino babali na basi, ngombe na mpata ya bino, bakobebisa bilanga bya nzete ya vino mpe ya figi, bakobuka bibombamelo biye botiaki mitema, mpe na mimpanga bakoboma bato bakozala wana.

5:18  Nzokande o mikolo mina, Yawe alobi bongo, nakosilisa bino ba­nso te.

5:19  Soko bakotuna : « Ntina nini Yawe Nzambe wa biso asali biso mana manso ? », okoloba na ba­ngo : « Lokola boboyi ngai mpe bolandi banzambe ba bikolo bisusu o ekolo ya bino moko, se bongo bokokoma basaleli ba bato basusu o ekolo ya bampaya. »

5:20  Boyebisa bato ba libota lya Yakob nsango eye, bosakola yango o mokili mwa Yuda :

5:21  Boyoka, bino bazoba, bato baza­ngi mayele, boyoka : Bozali na miso, kasi bokomonoko te, bozali na matoi, kasi bokoyokaka te !

5:22  Yawe alobi : Bokobanga ngai te ? Bokolenge o miso ma ngai te, solo ? Ngai moto natii zelo lokola ndelo ya mbu, ndelo ya nsuka eye mbu ekoleka te : mai makoki kotomboko, kasi se mpamba, mbonge ikoki kosala makeléle, kasi ikoleka ndelo yango te.

5:23  Kasi bato baye bazangi botosi, bazali batomboki, batiki ngai mpe balandi nzela ya bango moko.

5:24  Bamilobelaki te ’te : « Tobanga Yawe Nzambe wa biso, oyo akonokisaka mbula o eleko ekoki, mbula ya ebandela mpe mbula ya nsuka, mpe akotikelaka biso mikolo mya bobuki mbuma. »

5:25  Masumu ma bino mabebisi maka­mbo mana, mpo ya mabe ma bino bokozwa malamu maye te.

5:26  O ekolo ya ngai bato babe bazali, bakokengeke lokola mobomi nde­ke, bakotiaka mitambo mpo ya koka-nga bato.

5:27  Lokola ekoló etondi na ndeke nde­nge na ndenge, ndako ya bango itondi na biloko bayibaki ; bazwi bongo bomengo mpe bakomi makasi.

5:28  Bakomi nzoto enene mpe mafuta, bakolekisaka ndelo na bosali mabe. Bakomemyaka bosembo te, baboyi kosalisa bana bitike bakopanganaka na babola te.

5:29  Bongo na ntina ena napesa bango etumbu te, mpe nazongisela ekolo ena mabe te ? Maloba ma Yawe.

5:30  Makambo mabe mpe ma nsomo makosalemaka o ekolo eye :

5:31  baprofeta bakosakolaka maka­mbo ma lokuta, banganga Nzambe bakolukaka ma­tomba ma bango moko. Mpe bato ba ngai balingi yango ! Kasi bokosala nini o mokolo mwa nsuka ?

Chapter 6

6:1  Bino bato ba Benyamin, bokima Yeruzalem ! Bobete mondule o Tekoa, botia elembo o Bet-Akerem zambi mpasi ya nsomo eye eko­kwela bino ekouta o Nordi.

6:2  Sion azali bonzenga, kasi nasukisi ye.

6:3  Bakengeli bakoyaka wana na mpa­ta ya bango, mpe bakotelemisaka biema bya ba­ngo zongazonga na ye, bakoleisaka bibwele bya bango, moto na moto o eteni ya ye.

6:4  Bomilengele mpo ya kobundisa ye. Boteleme mpe tobundisa ye na midi. Mawa na biso zambi moi mosili kokita, molili mwa butu moyei.

6:5  Toteleme, tokende kobunda na butu, toboma bibombamelo bya bango.

6:6  Yawe wa bokasi bonso alobi : Bokata nzete, bopika lopango o boso bwa Yeruzalem, zambi engumba eye etondi na lokuta mpe na minyoko.

6:7  Lokola liziba likobimisaka mai, engumba eye ekobotaka maka­mbo mabe. Okoyoka wana se bitumba mpe bobomani, nakomonoko se makambo ma mpasi mpe ma bozoki mpota.

6:8  E Yeruzalem, ndima ’te bakebisa yo, soki te nakopangana na yo lisusu te, nakokomisa yo mopotu, ekolo ezangi bato.

6:9  Yawe wa bokasi bonso alobi : Bosangisa bato ba Israel batikali, lokola bakosangisaka mbuma ya vino ya nsuka ya elanga ; zonga naino lokola oyo akei kobuka mbuma lisusu.

6:10  Naloba na nani ? Nakebisa nani ? Bazali na matoi mangbongi, bakoki koyokemela te. Bakotalaka liloba lya Nzambe lokola liseki, bakosepelaka na lyango soki te.

6:11  Ngai natondi na nkanda ya Yawe, nayebi lisusu kokanga motema te. Nakokitisela bana ba mboka na mpe bilenge banso nkanda ya ngai. Banso bakokangema : babali na ba­si, babange na bampaka.

6:12  Bato basusu bakozwa ndako ya bango, bilanga mpe basi ba bango. Nakotumbola bato ba ekolo eye. Maloba ma Yawe.

6:13  Banso, bana na bakolo, bakowelaka mosolo, banso, baprofeta na banganga Nza­mbe, bazali bakosi.

6:14  Bakotalaka mpasi ya bato ba ngai se mpamba, bakolobaka : « Manso mazali malamu », nzokande eloko yoko ezali malamu te.

6:15  Ata bakosalaka mabe, bakoyokaka yango nsoni te. Balingi kondima te ’te bazali na ezalela ya nsoni. Yango wana bakokweya moko moko, bakotuta libaku mokolo nakopesa bango etumbu. Maloba ma Yawe.

6:16  Yawe alobi boye : Boteleme o nzela mpe botala, bomituna mpo ya nzela ya kala : Wapi nzela ya bolamu ? Na nsima bolanda yango mpe bokozwa kimia. Kasi bango balobi : « Tokolanda nze­la ena te ! »

6:17  Natii bato bakengele bango, nalobi : « Bokeba soko babandi kobete mondule. » Kasi bango balobi : « Tokokeba na yango te. »

6:18  Bongo bino bato ba bikolo, boyoka ngai, bino bato ba Israel, boyeba makambo makokwela bango.

6:19  Bino bato ba nse, boyoka ! Nakotindela bato ba mokili moye likambo lya mpasi, ekozala etumbu mpo baboyaki ngai. Batiaki matoi na maloba ma ngai te mpe bakinolaki mibeko mya ngai.

6:20  Mpaka ya malasi euti o Saba ekosala ngai nini ? Na mpe matiti ma nsolo mpimbo mauti mosika ? Mabonza ma kotumba ma bino makosepelisaka ngai te, miboma mya bino mikoyokisaka ngai elengi te.

6:21  Yango wana Yawe alobi boye : Nakotiela ekolo eye mabaku mpe bakokweya : tata elongo na mwana, baninga na bayebani, banso bakokufa.

6:22  Yawe alobi boye : Bato ba ekolo ya Nordi bazali koya, bato ba ekolo enene babimi o nsuka ya mokili ;

6:23  bazali na litimbo mpe na likongo, bayoki se nkanda, mawa te ; basali makeléle lokola mbonge ya mbu, batandi milongo mya basoda ba farasa, bayei kobundisa yo, Sion.

6:24  Eyoki biso nsango, tokitisi maboko, nsomo ekangi biso, toyoki bolozi lokola mwasi alingi abota.

6:25  Bobima o esobe te, botambola o nzela te, mimpanga mya banguna mikoyokisa nsomo bipai binso !

6:26  Elenge mwasi wa ekolo ya ngai, lata ngoto, omibilinginya o mputulu. Sala lilaka lokola bakosalaka mpo ya mwana se moko, na nzembo ya mawa, zambi mobebisi akobimela biso na mbalakaka.

6:27  Natiaki yo mpo omeka bato ba ngai, mpe oyeba ezalela ya bango malamu.

6:28  Banso bazali batomboki, bato ba songisongi, banso bazali babebisi.

6:29  Batii mompepe mokasi mpo bibende binyangwa o móto, motuli amiyokisi mpasi se mpa­mba, zambi bosoto bwa bibende bokolongwa te.

6:30  Batangi bango ‘Palata ibe’, mpo Yawe abwaki bango.

Chapter 7

7:1  Yawe alobi na Yeremia maloba maye :

7:2  Kende epai ya ezibeli ya Tempelo ya Yawe mpe sakola boye : Bino ba-Yuda bokokotoko awa mpo ya kokumisa Yawe, boyoka maloba ma ye.

7:3  Yawe wa bokasi bo­nso, Nzambe wa Israel, alobi : Bobongisa ezalela mpe misala mya bino ; bongo ngai nakoumisa bino o esika eye.

7:4  Botia mitema na maloba ma lokuta te mpe boloba te : « Eye ezali Tempelo ya Yawe, Tempelo ya Yawe ! »

7:5  Bobongisa ezalela mpe misala mya bino, boluka bosembo na motema moko.

7:6  Bonyokolo mopaya te, mwana etike te, mwasi bozenge mpe te. O ndako eye bosopa makila ma bato te, baye bazali na likambo lyoko te, bolanda banza­mbe basusu te mpo ’te bokufa te.

7:7  Soko bosali bongo, nakofandisa bino o esika eye, o mokili moye napesaki bankoko ba bino, banda kala mpe seko.

7:8  Kasi tala, bokotiaka mitema na maloba ma lokuta, na maye mazali mpamba.

7:9  Bokoyibaka, bokobomaka, bokokamataka basi ba bato, bokolayaka ndai ya lokuta, bokofukamelaka bikeko bya Baal, bokolandaka banzambe basusu bayebani na bino te.

7:10  Na nsima bokoyaka koteleme o miso ma ngai, o Tempelo eye ezali na nkombo ya ngai mpe bolobi : « Tobiki sikawa ! » Kasi bokokoba kosala makambo maye ma nsomo.

7:11  Bokanisi nini ? Ndako eye ekotangemaka na nkombo ya ngai, eko­mi nde ndako ya bayibi ? Boyeba ’te namoni yango ! Maloba ma Yawe.

7:12  Bokende naino o esika ya ngai Silo, eye napesaki nkombo ya ngai liboso. Bokende kotala ndenge nasalaki na esika ena, mpo ya mabe ba-Israel basalaki.

7:13  Yango wana Yawe alobi boye : Bosali mabe mana manso ; boyokaki ngai te, ata nalobaki na bino ntango inso ; nabya­ngaki bino mbala mingi, kolembe te, kasi bondimaki ngai te.

7:14  Yango wana ndako eye esika natiaki nko­mbo ya ngai, esika botiaki eli­kya ya bino, eye napesaki bino na bankoko ba bino, sikawa nakosala na ya­ngo lokola nasalaki na Silo.

7:15  Nakobwaka bino mosika, se lokola nabwakaki bandeko ba bino ba­nso, libota mobimba lya Efraim.

7:16  Osambela ngai lisusu mpo ya bato ba ekolo eye te ; olela mpe obondela ngai mpo ya bango te, otia molende lisusu te, zambi nali­ngi koyoka yo te.

7:17  Maye makosalemaka o bingumba bya Yuda mpe o balabala ya Yeruzalem, ozali komono mango te ?

7:18  Bana bakolokotoko nkoni, batata bakopelisaka móto mpe bamama bakolambaka fufu mpo basala mi­nkate mpo ya Astarte, mokonzi mwasi wa likolo. Na mabonza ma bomeli bakobonzelaka banzambe basusu bakotumolaka ngai.

7:19  Nzambe alobi boye : « Te, bakotumolaka ngai te, kasi bakomitumolaka mpe bakomiyokisaka nsoni. »

7:20  Yango wana Mokonzi Yawe alobi : Nkanda ya ngai enene ekokitela esika eye, bato na bibwele, nzete ya esobe mpe mbuma ya bilanga ; móto mona mokozima lisusu te.

7:21  Yawe wa bokasi bonso, Nza­mbe wa Israel, alobi boye : Bokoba kobonzela ngai mabonza ma kotu­mba na miboma mya bino, bolia mpe nyama ya mango !

7:22  Mokolo nabimisaki bankoko ba bino o mokili mwa Ezipeti, nalobaki na ba­ngo eloko te, nasengeki bango mabonza ma kotumba na miboma te.

7:23  Nasengeki bango se mpo yoko : « Botosa ngai, bongo nakozala Nzambe wa bino mpe bino bokozala ekolo ya ngai. Bolanda nzela nalakisi bino, mpe bokozwa bolamu. »

7:24  Kasi bayokaki te, batosaki ngai te, balandaki mposa ibe ya mitema mya bango, bapesaki ngai mo­kongo, baboyaki kotala ngai.

7:25  Banda mokolo bankoko ba bino babimaki o Ezipeti tee lelo, nati­nde­laki bino baprofeta ba ngai, mbala na mbala.

7:26  Kasi boyokaki ngai te, botosaki ngai te, bosalaki motó makasi ; bosalaki mabe leka bankoko ba bino.

7:27  Ata okoloba na bango maloba mana manso, bakoyoka yo te ! Ata okobelela bango, bakoyanola yo te.

7:28  Bongo loba na bango : « Bino bozali ekolo ya bato bakoyokaka Yawe Nzambe wa ba­ngo te, mpe bakondimaka malako ma ye te. Maloba ma bosolo masili epai ya bango, bakotangaka mango na monoko lisusu te. »

7:29  Kata nsuki ya yo mpe bwaka ya­ngo ; yemba nzembo ya mawa o ngo­mba, zambi Yawe aboyi mpe abengani bato ba ekolo eye, bakoyokisaka ye nkanda !

7:30  Yawe alobi : Solo, mabe ma bato ba Yuda mayokisi ngai nkanda : batiaki bikeko bya banzambe ba ba­ngo o ndako eye nalingaki baku­misa nkombo ya ngai, basantolaki yango.

7:31  Batongaki etumbelo ya Tofet o lobwaku la ben-Inom, esika batumbaki bana babali na bana basi ba bango ; kasi natindaki bango bongo te, nakanisaki yango mokolo moko te.

7:32  Yawe alobi : O mikolo mikoya bakotanga esika ena Tofet to lobwaku la Ben-Inom lisusu te, kasi ‘Lobwaku la bobomi’. O nta­ngo ena bakokunda bibembe o Tofet, zambi esika esusu ekozala te.

7:33  Bibembe bya bato ba ekolo eye bikozala bilei bya ndeke ya likolo mpe bya nyama ya za­mba, mpe moto moko akobengana yango te.

7:34  O bingumba bya Yuda mpe o balabala ya Yeruzalem, nakosilisa miga­ngo mya esengo mpe mya nsai, na mpe nzembo ya mobali to ya mwasi, mpamba te, ekolo mobimba ekokoma mopotu.

Chapter 8

8:1  Yawe alobi boye : O ntango ena bakokundola o malita mi­nkuwa mya bakonzi ba Yuda, mya bankumu ba bango, mya banganga Nzambe, mya baprofeta mpe mya bato ba Yeruzalem.

8:2  Bakotanda myango liboso lya mwese, sanza na minzoto, iye bazalaki kolinga, kokumisa, kolanda, kotuna mpe kokumbamela. Bakosangisa mpe bakokunda minkuwa mina lisusu te, bakotika myango lokola bipolu o bilanga.

8:3  Bato banso ba ekolo eye ebe bakotikala, ata nakopanza ba­ngo o ekolo nini, bakosepela lisusu na bomoi te, bakolinga kokufa. Yawe wa bokasi bonso alobi bongo.

8:4  Loba na bango : Yawe atuni boye : Soko moto akwei, akoteleme lisusu te ? Soko moto abungi nzela, akozo­nga lisusu te ?

8:5  Mpo nini bato ba Yeruzalem bali­ngi se kotomboko ? Bakokoba nde kotomboko ? Balingi se kolanda makambo ma lokuta, baboyi kobongola mitema.

8:6  Nayokemeli maloba ma bango, bakolobaka se makambo ma lokuta. Ata moko te akolelaka mabe ma ye mpe akomitunaka : « Nasala nini ? » Banso bakolandaka mabe ma ba­ngo lokola farasa emibwaki o etumba.

8:7  Ata libeke liyebi eleko ya koke­nde epai esusu ; ekokoba, nyampeke na nkongi iyebi ntango ya kozonga o mboka ya yango. Kasi bato ba ngai bayebi te maye Yawe alingi.

8:8  Boniboni bokoki koloba : « Tozali bato ba bwanya, mpe Mobeko mwa Yawe mozali na biso » ? Na ekomeli ya lokuta bateyi ba Mobeko bakomisi mwango mobeko mwa lokuta.

8:9  Bato ba bwanya bakoyoka nsoni, bakokweya mpe bakokoto o motambo. Awa bakinoli liloba lya Yawe, bwanya bwa bango bokozwela bango litomba nini ?

8:10  Yango wana nakopesa basi ba ba­ngo na bato basusu mpe bilanga bya bango na bankolo basusu. Zambi banso, na bana na bakolo, bakowelaka mosolo ; banso, baprofeta na banganga Nza­mbe bazali bakosi.

8:11  Bakopanganaka na mpasi ya bato ba ekolo ya ngai te, bakolobaka : « Manso mazali malamu », nzokande eloko yoko ezali malamu te.

8:12  Bakosalaka mabe mpenza, kasi bakoyokaka mango nsoni te ; balingi kondima ezalela ya nsoni ya bango te. Yango bakokweya moko moko, mokolo mwa etumbu bakokita. Maloba ma Yawe.

8:13  Yawe alobi : Mokolo nakosilisa ba­ngo, ata mbuma yoko te ekotikala o nzete ya vino mpe ya figi : ata nkasa ya nzete ikokauka : babebisi bakonyata bango !

8:14  « Mpo nini totikala kofanda nye ? Tosangana ! Tokende o bibombamelo bya biso, mpe totala, mpo Yawe Nzambe wa biso alingi koboma biso mpe komelisa biso mai ma ngenge mpo ya masumu ma biso.

8:15  Totiaki mitema na boboto, kasi se mpamba ! Tolikyaki ’te tokobika, nzokande toyoki se nsomo !

8:16  Ut’o ekolo ya Dan toyoki boleli bwa farasa ; makeléle ma farasa babali mani­ngisi ekolo mobimba : bakoya kosilisa ekolo na biloko binso, engumba na bato banso bazali wana. »

8:17  Yawe alobi : Nakotindela bino nyoka ya ngenge, ikotosa monoko mwa mobokoli te, kasi ikoswa bino.

8:18  Mpasi eyeli ngai, motema mwa ngai mokoki lisusu te.

8:19  Yoka o ekolo mobimba bobeleli bwa bato ba ngai : « Yawe azali lisusu o Sion te ? Mokonzi wa ye azali lisusu te ? (Mpo nini batumolaki ngai na bikeko bya bango, na biloko bya mpamba biuti o bikolo bisusu ?)

8:20  Eleko ya bobuki mbuma esili, elanga eyei, kasi biso tobiki naino te ! »

8:21  Nazoki motema mpo ya mpasi ya bato ba ngai, motema mwa ngai motondi na ma­wa, nayoki nsomo.

8:22  Mono mwa kopakola o mpota ezali lisusu o Galaad te ? Monganga moko azali wana te ? Bongo bato ba ngai bakobika na mpota ya bango te ?

8:23  Soko motó mwa ngai mozalaki moluka mwa mai, soko miso ma ngai mazalaki liziba lya mai, mbele nalelaki butu moi bato ba ekolo ya ngai babomami.

Chapter 9

9:1  Nani akopesa ngai nganda o eliki, mpo ’te natika bato ba ngai mpe nakoma mosika na ba­ngo ? zambi banso bazali se bato ba bokali mpe basuli.

9:2  Lolemu la bango lozali lokola litimbo lilingi libete. Ekolo eye etondi na makambo ma lokuta mpe ma bokosi ; mabe ma bango mazali se kokola, bayebi ngai Yawe te.

9:3  Bokeba na baninga mpe na bandeko ba bino, zambi ndeko akolukaka kokosa nde­ko wa ye, banso bakotongoko baninga.

9:4  Moto na moto akokosaka moninga, bakolobaka makambo ma solo te. Lolemu la bango lomeseni na makambo ma lokuta, babebi nye mpe bakoki kozongela ngai te.

9:5  Mosala mwa bango se kobunda mpe kokosa, baboyi koyeba ngai. Maloba ma Yawe !

9:6  Yango wana Yawe wa bokasi bo­nso alobi : Nakopetola bango o móto mpe nakomeka bango ; nakoki kosala bobele bongo na ba­ngo, mpo bapusi kosala mabe.

9:7  Lolemu la bango lozali lokola likula likobomaka ; monoko mwa bango motondi na maloba ma bokosi. Na monoko bakotombelaka bani­nga boboto, kasi o kati ya motema bakotielaka bango mitambo.

9:8  Bongo natumbola bango na ntina ena te ? Maloba ma Yawe. Nazongisela ekolo ena mabe te ?

9:9  Nakolela na mawa manene likolo lya ngomba inso, nakoganga na mawa o eliki, za­mbi ndako inso itumbami, bato bakolekaka wana lisusu te, boleli bwa bibwele boyokani wana lisusu te ; ndeke na bibwele bikimi, binso bilimwi.

9:10  Nakokomisa Yeruzalem libondo lya mabanga, mobenga mwa minsole, nakokomisa bingumba bya Yuda mipotu, moto moko akofanda wana lisusu te.

9:11  Nani moto wa bwanya akoki koyeba ntina ya makambo maye ? Yawe atindi nani mpo asakola : Mpo nini ekolo ebebi nye, eziki lokola eliki eye bakokatisaka lisusu te ?

9:12  Yawe alobi boye : Baboyi kotosa Mobeko moye napesaki bango, baboyi kotosa mpe kolanda monoko mwa ngai.

9:13  Na motó makasi bali­ngi se kokangana na ba-Baal, baye bankoko ba bango balakisaki ba­ngo.

9:14  Yango wana Yawe wa bokasi bonso, Nzambe wa Israel, alobi boye : Nakoleisa bango matiti ma bololo ; nakomelisa bango mai ma ngenge.

9:15  Nakopanza bango o bikolo binso biyebani na bango te, biyebanaki na bankoko ba bango mpe te ; nakotindela bango bato bakobengana bango na mopanga kina bakosila.

9:16  Yawe wa bokasi bonso alobi boye : Boluka mpe bobenga basi bayebi kolela ! Bobenga mpe baye bazali na ntoki ena, baya noki !

9:17  Baya noki mpe bayembela biso nzembo ya mawa, mpo ’te miso ma biso matangisa mpizoli, mpo ’te nkongia ya biso itanga mai.

9:18  O Sion toyoki nzembo ya boleli : « Mawa, tobebi e, tokufi na nsoni ! Tosengeli kokima ekolo ya biso, babengani biso o ndako ya biso. »

9:19  Bino basi, boyoka liloba lya Yawe ! Botia matoi na maloba ma ye. Bolakisa bana basi ba bino nze­mbo ya lilaka, bolakisana nzembo ya boleli :

9:20  « Liwa likoti o ndako epai ya maninisa, liyingeli o ndako ya biso inzenga, likweli bana o nzela mpe bilenge o zando.

9:21  Bibembe bilali lokola bipolu o bilanga, lokola maboke ma matiti nsima ya mokati, mpe moto moko te alokoti ma­ngo. »

9:22  Yawe alobi boye : Moto wa bwanya amikumisa na bwanya bwa ye te, elombe amikumisa na mpiko ya ye te, moto wa nkita na mosolo mwa ye te.

9:23  Kasi oyo alingi komikumisa, asala yango na ntina eye : Azala na mayele ma koyeba ngai, zambi ngai Yawe nakopesaka bolamu, bosolo mpe bosembo o mokili. Solo, nakosepelaka yango. Maloba ma Yawe !

9:24  Yawe alobi boye : Mikolo mikoya, nakotumbola bato banso bakatemi se nzoto :

9:25  ba-Ezipeti, ba-Yuda, ba-Edom, ba-Amon, ba-Moab mpe bato banso bakokoli mitó, baye bakofandaka o eliki : bato ba bikolo bina binso bazali basutu, kasi ba-Israel banso bakatemi mitema te !

Chapter 10

10:1  Bato ba Israel, boyoka maloba ma Yawe.

10:2  Yawe alobi boye : Bolanda mimeseno mya bato ba bikolo bisusu te, bobanga bilembo biuti o likolo te, ata bapagano bakoyokaka byango nsomo.

10:3  Solo, mimeseno mya bapagano ba­ye mizali se mpamba : bobele na nzete bakati o zamba, moto wa ntoki akosala ekeko na mbeli,

10:4  akokembisa yango na palata mpe na wolo, bakobaka yango na nsete mpo ’te eningana te.

10:5  Bikeko bina bizali lokola biloko bakotiaka o bilanga mpe bikolobaka te, basengeli komeme byango o maboko mpo bikoki kotambola te. Bobanga byango ata mbala moko te : bikoki kosala bino mabe te, bikoki mpe kozwela bino litomba lyoko te.

10:6  E Yawe, oleki bonene, moto moko te akokani na yo, ozali na nkombo ya lokumu mpo ya misala mya yo.

10:7  Ozali Mokonzi wa bikolo binso, nani abanga yo te ? Yango ekoki na yo. O kati ya bato ba bwanya ba bikolo binso moko te akokani na yo.

10:8  Banso bazali bilema mpe bazangi mayele, bikeko bya bango bizali se nzete mpamba.

10:9  Bikeko bina bizali se palata iuti o Tarsis, to wolo ya Ofir, bisalemi mpe bitulami na motuli, balatisi byango bilamba bya lo­ngondo mpe bitane ; bikeko binso bizali se misala mya bato ba ntoki.

10:10  Kasi Yawe azali Nzambe wa solo, azali Nzambe wa bomoi mpe Mokonzi wa lobiko. Soko asiliki, mokili moningani, soko ayoki nkanda, bato ba bikolo bakoki na nkanda ya ye te.

10:11  (Bokoloba na bango boye : « Banzambe baye bakelaki likolo na nse te bakolongwa mpe bakolimwa o mokili. »)

10:12  Kasi Yawe akelaki mokili na nguya ya ye, abongisi mokili na bwanya bwa ye mpe etando ya likolo na boyebi bwa ye bonene ?

10:13  Awa akoloba, akosangisa mai ma mbula o likolo na makelele, akotinda mampata ut’o nsuka ya mokili, akongengisa minkalali mpe akonokisa mbula, akobimisa mimpepe o bibombelo bya ye.

10:14  Mayele ma moto makoki na makambo mana te, motuli wa bikeko akoyoka nsoni mpo ya ekeko ya ye, bikeko bya ye bizali se biloko bya lokuta, bizali ata na mpema ya bomoi te.

10:15  Bizali biloko mpamba, bya koseke, o eleko ya etumbu binso bikoli­mwa.

10:16  Kasi Nzambe wa Yakob azali bo­ngo te, ye akeli molóngó mobimba, mpe ekolo ya Israel ezali libota lya ye mpenza. Nkombo ya ye : Yawe wa bokasi bonso.

10:17  Yo moto bayeli yo etumba, kanga biloko bya yo mpe kima,

10:18  zambi Yawe alobi : Mbala eye nakobwaka bato ba ekolo eye mosika, mpe nakokengele bango makasi mpo ’te bakima te.

10:19  « Mawa na ngai e ! Oyo nde mpota ! Moto moko te akoki kokanga ya­ngo. Ngai moto namilobelaki : Nakoki koikikiza yango !

10:20  Nzokande ema ya ngai ebebi, nsi­nga inso ikatani. Bana ba ngai bakei, bazali lisusu te, moto moko te mpo ya kotelemisa ema ya ngai, moto moko te mpo ya kopika nganda ya ngai. »

10:21  Bakengeli banso bazangaki mayele, balukaki Yawe te ; yango wana bakokaki na mosala lisusu te, etonga ya bango mobimba epa­nzani.

10:22  Boyoka nsango : na makeléle bauti o Nordi mpo bakomisa bingu­mba bya Yuda mipotu mya minsole.

10:23  E Yawe, nayebi : Moto moko te ayebi makambo ma lobi, mpe akoki kokende epai ye moko alingi !

10:24  E Yawe, tumbola biso, kasi malembe, na nkanda te, soki te tokobunga.

10:25  Lakisa nkanda ya yo na bikolo biyebi yo te mpe na bato bakobondelaka Nko­mbo ya yo te, mpo babebisi Yakob, basilisi mpe babomi ekolo ya yo.

Chapter 11

11:1  Yawe alobi na Yeremia maloba maye :

11:2  Loba na bato ba Yuda mpe ba Yeruzalem :

11:3  Yawe Nzambe wa Israel alobi boye : Mabe makokwela moto oyo aboyi kotosa maloba ma Bondeko,

11:4  maye nayebisaki bankoko ba bino o nta­ngo nabimisaki bango o fulu ya mó­to, yango nde mokili mwa Ezipeti : Boyoka ngai mpe bosala ma­nso nakotinda bino ; bongo bokozala ekolo ya ngai mpe ngai nakozala Nzambe wa bino.

11:5  Nakokokisa bo­ngo ndai nalayelaki bankoko ba bino ’te nakopesa bango mokili motondi na mabéle ma ngombe mpe na mafuta ma nzoi. Esalemi mpe bongo. Bongo ngai nayanoli : Iyo Yawe, ezali ya solo !

11:6  Yawe alobi na ngai : Kende kosakola maloba maye o bingumba bya Yuda mpe o balabala ya Yeruzalem : Boyoka ma­loba ma Bondeko mpe botosa mango,

11:7  zambi nakebisaki bankoko ba bino, ntango nabimisaki ba­ngo o mokili mwa Ezipeti ; tee lelo nalembi kokebisa bino te : ‘Botosa monoko mwa ngai’ !

11:8  Kasi batosaki ngai te, baboyaki koyoka ; motó ma­kasi banso balandaki mabe ma mitema mya bango. Yango wana nakokisaki maloba manso ma Bo­ndeko bona. Basengelaki kotosa mango, kasi batosaki mango te.

11:9  Yawe alobi na ngai : Mbele bato ba Yuda mpe ba Yeruzalem bayokani mpo ya kotombokela ngai.

11:10  Bazo­ngeli mabe ma bankoko ba ba­ngo, baye baboyaki kotosa maloba ma ngai. Bango mpe balandi ba­nzambe basusu mpe bakumisi ba­ngo. Bo­ngo bato ba Israel mpe ba Yuda babomi Bondeko nakataki na bankoko ba bango.

11:11  Yango wana Yawe alobi boye : Nakotindela ba­ngo mpa­si ya nsomo, eye bakoki kokima te. Ata bakobelela ngai mpo nasalisa bango, nakoyokemela ba­ngo te.

11:12  Bato ba bingumba bya Yuda mpe ba Yeruzalem bakende kosenge lisalisi epai ya banzambe ba bango, baye babonzelaka mabo­nza ! Kasi o eleko ya mpasi ya ba­ngo, bakosalisa bango ata moke te.

11:13  E Yuda, okomi na banzambe baike lokola bingumba bya yo ! E Yeruzalem, okomi na altare ebe­le lokola balabala, otongaki yango mpo ’te obonzela Baal mabonza.

11:14  Yango wana obondela ngai mpo ya ekolo eye te, osambela ngai mpo ya bango te. Nakoyoka te o mokolo bakobelela ngai o ntango ya mpasi.

11:15  Wa ngai wa bolingo ayei kosala nini o Ndako ya ngai ? Solo, ezalela ya ye elongobani te. Bilako na mabonza ma yo ma nyama makoki nde kolongola mabe ma yo ? Soko ekokaki kosalema bongo, mbele osepelaki te ?

11:16  Yawe apesaki yo nkombo kitoko : ‘Nzete ya oliva na nkasa mpe na mbuma mingi’. Kasi na nkanda enene Yawe apelisi móto mpe azikisi bitapi bya yango inso.

11:17  Yawe wa bokasi bonso, oyo alo­naki yo, ye moto akaneli yo makambo ma mpasi mpo ya masumu ma bato ba Israel mpe ba Yuda. Batumoli ye na mabonza babonzelaki Baal.

11:18  Ntango Yawe akebisi ngai, nabandi koyeba ; mokolo mona olakisi ngai maye bakanaki kosala.

11:19  Kasi ngai nazalaki lokola mpata eyebi eloko te o ntango bakei koboma ya­ngo. Nayebaki te maye bakani ko­sala ngai. Balobaki : « Tokata nzete ebesu, tolongola ye o mokili mwa bato, moto moko atanga lisusu nko­mbo ya ye te ! »

11:20  Kasi yo, Yawe wa bokasi bonso, okokataka makambo manso na bo­sembo, okotalaka mitema mpe makanisi ma bato, tika namono boniboni okosukisa bango, zambi natii likambo lya ngai o maboko ma yo.

11:21  Yango wana Yawe wa bokasi bonso alobi na bato ba Anatot, baye balingi koboma ngai mpe balobi : « Tika kosakola o nkombo ya Yawe, soki te tokoboma yo. »

11:22  Yawe wa bokasi bonso alobi boye : « Nakopesa bango etumbu : bilenge ba ba­ngo bakokufa na mopanga, bana babali na bana basi bakokufa na nzala.

11:23  O mobu nakotumbola ba­ngo, nakotindela bato ba Anatot makama ma mpasi, moto moko ako­bika te. »

Chapter 12

12:1  E Yawe, oleki bosembo, nakoki kolonga o miso ma yo te. Nzokande nalingi kotuna yo mwa mituna : Mpo nini makambo ma bato babe makotambola malamu ? Mpo nini basumuki banso bakofandaka na boboto ?

12:2  Yo moto oloni bango, babimisi mi­nsisa, bakoli malamu mpe bakobotaka mbuma. Bakokumisaka yo na monoko, kasi o kati ya motema bakondimaka yo te.

12:3  Yo Yawe oyebi ngai, ozali komono ngai, oyebi ’te makanisi ma ngai mazali se epai ya yo. Benda bato babe lokola mpata o esika ya koboma ; bomba bango wana tee mokolo mwa koboma mokoki.

12:4  (Kin’o mokolo nini mokili mokotikala na mawa, mpe matiti makokauka o esobe ? Nyama na ndeke ikokufaka mpo ya mabe ma bato,) zambi bakolobaka : « Yawe akomono makambo ma biso te. »

12:5  Soko kolanda bato ba makolo eko­lembisaka yo, boniboni okokoka kolanda baye bakotambwisaka farasa ? Soko okoki kofanda o mokili mwa kimia te, boniboni okosala o kati ya matiti ma Yordane ?

12:6  Ata bandeko ba yo, bana ba tata wa yo, bakokosaka yo. Ata ba­ngo bakotongoko yo mingi. Otia motema na bango te mpo ya maloba ma bango ma bondeko.

12:7  Natiki mokili mwa ngai, naboyi bato ba ekolo ya ngai ; bato nazalaki kolinga mingi, nakabi bango o maboko ma ba­nguna.

12:8  Bato ba ekolo ya ngai bakomi lokola nkosi ya zamba, bagangeli ngai makasi, yango wana nayoki bango mpi !

12:9  Bato ba ngai bakomi nde lokola mbilikoko ezingami na kombekombe epai na epai ? Bokende kosangisa nyama inso ya zamba, bobenga yango iya kolia limpati !

12:10  Bakengeli ebele babebisi elanga ya ngai ya vino, banyati bilanga bya ngai, bakomisi elanga kitoko ya ngai eliki ya mawa.

12:11  Babongoli yango mokili mwa mawa, namoni ’te ebebi nye. Mokili mobimba mobebi mpenza, mpe moto moko te apangani na ya­ngo !

12:12  Babebisi bayei o nzela inso ya eliki. Mopanga mwa Yawe mokosilisa binso, o ekolo mobimba moto moko ako­fanda lisusu kimia te.

12:13  Balonaki mbuma ya mampa, babuki se nzube ; bamilembisi se mpamba ; bayoki nsoni na mwa mbuma babuki, mpo ya nkanda enene ya Ya­we.

12:14  Yawe alobi boye : Nakobengana o ekolo ba bango bato babe banso bafandi penepene na bato ba ngai, baye babebisi ekolo eye napesaki bato ba ngai ba-Israel. Nakolongola mpe bato ba Yuda o mokili mwa bango.

12:15  Kasi na nsima, awa nabimisi bango banso o mboka ya ba­ngo, nakoyokela bango lisusu mawa mpe nakozongisa bango o ekolo mpe o mabelé ma bango moko moko.

12:16  Balakisaki bato ba ngai kolaya ndai na nkombo ya Baal, kasi sikawa soko bayekoli kozala bato ba ngai mpe kolaya ndai na nko­mbo ya ngai Nzambe wa bomoi, bako­zwa lisusu esika ya kotonga ndako o ekolo ya ngai.

12:17  Kasi soko balingi koyoka te, nakolongola bango seko mpe nakosilisa bango. Maloba ma Yawe.

Chapter 13

13:1  Yawe alobi na ngai : « Kende kosomba mokaba mwa malekani mpe lata mwango o loketo, kasi otuna mwango o mai te. »

13:2  Bongo nasombi mokaba lokola Yawe atindaki ngai mpe nakangi mwango o loketo.

13:3  Yawe alobi na ngai lisusu :

13:4  « Kamata mokaba oso­mbaki, moye okangi o loketo mpe kende epai ya ebale Efrate. Bomba mwango kuna o kati ya mabanga. »

13:5  Nakei kobomba mwango penepene na Efrate lokola Yawe atindaki ngai.

13:6  Nsima ya mwa mikolo Yawe alobi na ngai : « Kende epai ya Efrate mpe kamata mokaba obombaki kuna lokola nalobaki na yo. »

13:7  Nakei epai ya Efrate koluka mokaba, mpe nabimisi mwango o esika nabombaki mwango. Kasi mokaba mobebi, mokoki lisusu na mosala moko te.

13:8  Yawe alobi na ngai :

13:9  « Mo­konzi Yawe alobi boye : Se bongo nakosilisa bato ba lolendo ba Yuda mpe ba Yeruzalem.

13:10  Bato baye babe baboyi koyoka maloba ma ngai, na motema libanga bala­ndi bango, batamboli nsima ya ba­nza­mbe basusu, basaleli mpe baku­mbameli bango ; bakokoma se lokola mokaba mozali lisusu na ntina te.

13:11  Mpamba te, lokola bakoka­ngaka mokaba o loketo, nalingaki ’te libota mobimba lya Yuda lika­ngema na ngai, mpo ’te bazala ekolo ya ngai, bazala lokumu mpe nke­mbo ya ngai ; kasi baboyi koyoka ngai. » Yawe alobi bongo.

13:12  Oloba na bango maloba maye : Yawe Nzambe wa Israel alobi boye : « Bakoki kotondisa bikutu na vino. » Soko bazongiseli yo : « Toyebi ’te bakoki kotondisa bikutu na vino »,

13:13  oloba na bango : « Yawe alobi boye : Nakotondisa mpe nakola­ngwisa bato banso ba ekolo eye, bakonzi banso bafandi o ngwende ya Davidi, banganga Nzambe, baprofeta na bato banso ba Yeruzalem.

13:14  Nakosala ’te batutana makasi, batata na bana. Yawe alobi : Nakosilisa bango, mawa te, ngolu te. »

13:15  Bofungola matoi malamu, botika lolendo, Yawe moto alobi bongo !

13:16  Bokumisa Yawe Nzambe wa bino liboso ’te molili moya, mpe makolo matuta ngomba na butu te. Bokotia mitema na mwinda, kasi akokomisa mwango mampata ma­i­ndo !

13:17  Soko boyoki likebisi liye te, nakolela na bonkutu mpo ya lole-ndo la bino. Nakolela mingi mpenza na mai o miso, zambi etonga ya Yawe ekokende o boombo.

13:18  Loba na mokonzi mpe na mama wa ye : Bomikitisa, bofanda o nse mpenza, zambi enkoti ya lokumu elongwi o mitó mya bino.

13:19  Bizibeli bya mboka ya Negeb bikangemi moto moko akoki koyingela wana te ; bato banso ba Yuda bakei o boombo, tee moto wa nsuka.

13:20  Tombola miso mpe tala bato bazali kouta o Nordi. Wapi etonga batikelaki yo ? Wapi mpata ozwaki na yango lokumu ?

13:21  Okoloba nini mokolo bakoya kolonga yo, baye olingaki bazala bayebani ba yo ? Solo, okoyoka mpasi mingi lokola mwasi alingi abota.

13:22  Mbele okomituna : Mpo nini mpasi iye ikweli ngai ? Mpo ya masumu ma yo maike batomboli yo elamba mpe babebisi yo.

13:23  Moto wa Etiópia akoki nde kobo­ngola lomposo la ye ? Nkoi ekoki nde kobongola matono ma yango ? Bino bomeseni kosala mabe, bokoki nde kosala malamu ?

13:24  Nakopanza bino lokola matiti makauka, makopimbwa na mompepe o eliki.

13:25  Tala ndenge nakosala bino mpe lifuta nakofuta bino, maloba ma Yawe, zambi bobosani ngai, mpe botii mitema na banzambe basusu.

13:26  Ngai moto nakotombola elamba ya bino kin’o elongi mpo ’te banso bamono bolumbu bwa yo.

13:27  Namoni bokali mpe mobulu mwa yo, namoni makambo ma yo ma bo­ndumba ! Namoni makambo ma nsomo o ngomba mpe o esobe. Mawa na yo, Yeruzalem, olingi ko­mipetola te. Mikolo boni naino ?

Chapter 14

14:1  O ntango ya elanga enene Yawe alobi na Yeremia :

14:2  « Bato ba Yuda bazali na lilaka, bingumba binso bibebi. Bato balali o mabelé mpo ya mawa, bato ba Yeruzalem baleli makasi.

14:3  Bankumu batindi basali bakende kotoka mai, bakomi o mabulu ma mai, kasi bazwi mai te, bazongi na bikutu mpamba, bayoki nsoni, bakangi minoko, bazipi bilongi.

14:4  Mabelé makauki mpo mbula enoki te, bato ba bilanga bayoki nsoni mpe bazipi bilongi.

14:5  Ata mbuli eye eboti ekotika mwana o esobe, zambi matiti mabesu mazali te.

14:6  Mpunda ya zamba itelemi o nso­nge ya ngomba, ibendi mpema lokola minsole, iluki se mpamba, mpo matiti mazali lisusu te.

14:7  E Yawe, ata masumu makitisi biso, obikisa biso mpo ya lokumu la Nkombo ya yo. Solo, towangani yo mbala mingi, tosali mabe o miso ma yo.

14:8  Yo elikya ya Israel, mobikisi wa ye o ntango ya mpasi. Mpo nini omilakisi lokola mo­mpaya o mokili moye, lokola moto wa mobembo atelemi se mpo ya kolala na butu ?

14:9  Mpo nini omilakisi lokola moto abangi, lokola soda oyo akoki kobikisa te ? Nzokande yo Yawe ozali o ntei ya biso, tokotangemaka bato ba yo, otika biso te ! »

14:10  Yawe alobi boye mpo ya bato ba ekolo eye : Bango balingi se kolekaleka, kotambola mingi ekoli­mbisaka bango te. Yango wana Yawe asepeli na bango te, akundoli mabe ma bango mpe akotumbola bango mpo ya masumu ma bango.

14:11  Yawe alobi na ngai : « Osambela mpo ya bolamu bwa bato baye te.

14:12  Ata balali nzala, nakoyoka losa­mbo la bango te ; ata babonzeli ngai mabonza ma kotumba na miboma, nakosepela na mango te. Nakosilisa bango na mopanga, na mongenge mpe na bokono bobe. »

14:13  Kasi nazongisi : « E Yawe Nza­mbe, baprofeta bakolobaka na ba­ngo : Bokomono bitumba te, bokoyoka nzala te, kasi bokofanda na bo­boto o esika eye. »

14:14  Yawe azongiseli ngai : « Baprofeta baye bakosangelaka makambo ma lokuta o nkombo ya ngai ; ngai natindi bango te, nasengi bango eloko te, nalobi na bango liloba lyoko te. Bakosakolaka se bimonela bya lokuta, maloba ma kokosa, makambo bango moko bakanisi.

14:15  Yango wana Yawe alobi boye : baprofeta bakosakolaka o nkombo ya ngai, ata natindi bango te, awa balobi ’te bitumba na mongenge bikokwela ekolo eye te, baprofeta baye bakosila na mopanga mpe na mongenge.

14:16  Baye bayoki maloba ma bango bakobwakema o balabala ya Yeruzalem : bakokufa na mo­nge­nge mpe na mopanga. Moto moko akozala te mpo ya kokunda bango, basi ba bango, bana babali na bana basi ba bango. Nakozongisela ba­ngo mabe ma bango. »

14:17  Loba na bato maloba maye : Mai mabimela ngai o miso, butu moi, kotika te, mpo mpasi enene ekweli ekolo ya ngai, bazoki mpota enene mpenza.

14:18  Soko nabimi o esobe, namoni bato bakufi na mopanga ; soko nazongi o mboka, namoni ’te nzala ekangi bango. Baprofeta na banganga Nzambe bazali kokatisa ekolo, mayele masileli bango.

14:19  Oboyi nde Yuda seko ? Oyoki Sion motema mpi ? Mpo nini obeti biso makasi boye ’te otikeli biso ata elikya ya kobika te ? Tozalaki na elikya ya kozwa boboto, kasi tozwi bwango te ! Tozalaki kozila mokolo mwa libiki, kasi tomoni bobele makambo ma nsomo !

14:20  E Yawe, tondimi mabe ma biso, mpe mabe bankoko ba biso basalaka : solo, tosali masumu o miso ma yo.

14:21  Mpo ya lokumu la nkombo ya yo oboya biso te, obebisa ngwende ya yo ya nke­mbo te. Kanisa bondeko okataki na biso mpe sala ’te tokabwana te.

14:22  O kati ya banzambe ba bikolo bisusu, nzambe nani akoki konokisela biso mbula ? Likolo lizali nde na nguya ya kotangisela biso mai ? Ezali mosala mwa yo te, Yawe ? E Yawe Nzambe wa biso totii eli­kya se na yo, yo moto okosalaka maye manso.

Chapter 15

15:1  Yawe alobi na ngai : Ata Moze na Samuel batelemi o miso ma ngai, nakoyokela bato ba ekolo ena mawa te. Bengana ba­ngo o miso ma ngai, balongwa !

15:2  Soko batuni yo : Tokende wapi ? ozongisela bango : Yawe alobi boye : Oyo asengeli kokufa na bokono bobe, akufa na bokono bobe ! Oyo asengeli kokufa na mopa­nga, akufa na mopanga ! Oyo asengeli kokufa na nzala, akufa na nzala ! Oyo asengeli kokende o bo­o­mbo, akende o boombo !

15:3  Yawe alobi : Nakopesa bango bitumbu binei : nakotindela bango mopanga moboma bango, mbwa ebenda bango, ndeke ya likolo mpe nyama ya zamba ilia mpe isilisa ba­ngo.

15:4  Nakokomisa bango eloko ya nsomo o miso ma bikolo bisusu bya nse. Nakosala bongo mpo ya mabe Manase, mwana wa Ezekia, mokonzi wa Yuda, asalaki o Yeruzalem.

15:5  E Yeruzalem, nani akoyokela yo mawa ? Nani akopangana na yo ? Nani akoteleme mpo ya koyoka nsango ya yo ?

15:6  Yawe alobi boye : Yo moto oboyi ngai, yo moto opesi ngai mokongo. Natomboli loboko mpo ya kosilisa yo, nalembi na bolimbisi yo.

15:7  O bingumba bya ekolo eye napupoli bango na lungu. Nasilisi ekolo ya ngai mpe napimi bango bana, mpo bakobi kolanda nzela ya ba­ngo.

15:8  Basi bazenge bakomi ebele, leka zelo lya libongo lya mbu. Nakotindela bango basoda baboma bamama ba bana na midi. Na mbalakaka nakoyokisa bango motema nsomo.

15:9  Mama wa bana nsambo akwei, makasi masileli ye, butu boyindeli ye liboso lya mpo­kwa : yango wana ayoki nsoni mpe nsomo. Baye batikali nakokaba bango o maboko ma banguna mpo ’te bakufa na mopanga. Maloba ma Yawe.

15:10  E mama, mawa na ngai e ! Mpo nini obotaki ngai, moto wa boswani mpe wa bitu­mba o ekolo ya ngai ? Nadefi epai ya moto moko te, nadefisi mpe moto eloko te, nzokande bato banso bakotombelaka ngai bobe.

15:11  Nasambeli : E Yawe, nasalelaki yo na motema moko, nabondelaki yo mpo ya monguna o mikolo mya mpasi mpe mya likama.

15:12  Nani akoki kobuka bibende bi­uti o Nordi to mbengi ?

15:13  Nakokaba nkita na biloko bya yo na bayibi, bo lifuta mpo ya masumu ma yo manso o ekolo mobimba.

15:14  Nakokomisa yo moombo wa ba­nguna ba yo o mokili moyebani na yo te. Nkanda ya ngai epelisi móto, eye ekozikisa bino.

15:15  E Yawe, kanisa ngai mpe batela ngai, bikisa ngai o maboko ma banyokoli ba ngai. Oyokela bango mawa te mpo ’te nasuka te ; oyebi ’te bakotumolaka ngai mpo ya yo.

15:16  Ntango nayokaki maloba ma yo, nasepelaki mingi, liloba lya yo liyokisaki ngai nsai o motema ; e Yawe Nzambe wa bokasi bonso, natangemi na nkombo ya yo.

15:17  Mokolo moko te nalukaki esengo ya ngai moko o kati ya bato bakolandaka bisengo. Mpo ya yo nafandaki ngai moko, zambi otondisaki motema mwa ngai na nkanda.

15:18  Mpo nini mpasi ya ngai ekosila te ? Mpo nini mpota ya ngai ekobela te, mpe elingi kosila te ? Solo, okomi o miso ma ngai lokola liziba likauki, likokosaka bato ba mobembo.

15:19  Yawe ayanoli : Soko ozongi, nakokamata yo lisusu o mosala mwa ngai, soko olobi maloba malamu mpe otiki maloba mabe, okozala lokola monoko mwa ngai. Bango bakozongela yo, kasi okende koluka bango lisusu te.

15:20  Nakokomisa yo o miso ma bato ba ekolo eye lokola efelo ya mbengi ekoki kobukana te. Bakobundisa yo, kasi bakolonga yo te, zambi ngai nazali na yo mpo ya kosalisa mpe kobikisa yo. Maloba ma Yawe.

15:21  Nalingi kobikisa yo o maboko ma bato babe mpe kosikola yo o maboko ma banyokoli.

Chapter 16

16:1  Yawe alobi na ngai boye :

16:2  Obala mwasi te, obota mwana mobali to mwana mwasi o mokili moye te !

16:3  Mpamba te, Yawe alobi bongo mpo ya bana babali na basi bakobotama awa mpe mpo ya bamama na batata bakobota bana :

16:4  Bakokufa na nzala, moto moko akosala lilaka mpo ya bango te ; bakokunda bango te, kasi bakokoma bipolu o mabelé. Bakokufa na mopanga to na nzala ekasi. Bibembe bya bango bikozala bilei bya ndeke ya likolo mpe bya nyama ya za­mba.

16:5  Solo, Yawe alobi : Oyingela o nda­ko te esika bazali kosala lilaka ; olela mowei te, obondo bato ba ye te, zambi ngai moto nabotoli bango boboto napesaki bango liboso, maloba ma Yawe. Nabotoli bango mpe bolingi mpe ngolu ya ngai.

16:6  O ekolo eye bakolo na bana bakokufa, bakokunda bango te, bakoye­mba nzembo ya lilaka te, bakomikata mpota te mpe bakokokola mitó te.

16:7  Bakopesa mampa te na moto azali na lilaka mpo ya kolendisa ye ; bakopesa nkeni ya bobondi te, ata akufeli tata to mama.

16:8  Oyingela mpe te o ndako esika bazali kolia limpati, mpo olia mpe omele na bango.

16:9  Mpamba te, Yawe wa bokasi bonso Nzambe wa Israel alobi boye : O mikolo miye mpe o esika eye nakosilisa nzembo inso ya esengo na nzembo ya mobali to mwasi abali sika.

16:10  Awa osilisi kosakola maloba mana manso na bato, bakoki kotuna yo : « Mpo nini Yawe akaneli biso makambo ma mpasi boye ? Tosali mabe nini ? Masumu nini tosali o miso ma Yawe Nzambe wa biso ? »

16:11  Okoyanola bango : « Ezali mpo bankoko ba bino batikaki ngai, maloba ma Yawe, balandaki banzambe basusu, ba­kumisaki mpe bakumbamelaki bango, babwaki ngai mpe batosaki Mobeko mwa ngai te.

16:12  Kutu, mabe bino bosali maleki masumu ma bankoko ba bino ; moko moko wa bino azali se motó makasi, na motema mabe akobi kosala mabe mpe ayoki ngai te.

16:13  Nakobwaka bino, nakolongola bino o mokili moye mpe nakopanza bino o mokili mosusu, bino na bankoko ba bino boyebaki te. Kuna bokoki kokumisa banzambe basusu, butu moi, kasi nakoyokela bino ngolu lisusu te. »

16:14  Yango wana Yawe alobi boye : O mikolo mikoya bakoloba lisusu te : « Yawe azali na bomoi, ye moto abimisaki ba-Israel o mokili mwa Ezipeti »,

16:15  kasi bakoloba : « Yawe azali na bomoi, ye moto abimisaki ba-Israel o mokili mwa Nordi mpe o mikili minso esika apanzaki ba­ngo. » Nakozongisa bango o mokili moye napesaki bankoko ba bango.

16:16  Yawe alobi boye : Nakotindela bango babomi mbisi ebele mpo ’te bá­boma bango, na nsima nakoti­ndela bango bato ba bokila ebele, babengana bango o ngomba inso inene na ike kin’o malusu ma mabanga.

16:17  Mpamba te, miso ma ngai mamoni nzela ya bango inso. Bakokima ngai te mpe bakoki kobomba mabe ma bango o miso ma ngai te.

16:18  Nakozongisela bango ma­be mbala ibale mpo basantolaki ekolo ya ngai na banzambe ba nsomo, mpe batondisaki mokili mwa ngai na bikeko bya mpamba.

16:19  Yawe, ozali nguya mpe ebombamelo ya ngai, nakokima epai ya yo o mikolo mya mpasi ; ut’o nsuka ya mokili bato bakoya epai ya yo, bakoloba : bankoko ba biso batikela biso se makambo ma lokuta, bikeko bizali na nguya te.

16:20  Moto akoki nde komisalela ba­nza­mbe ba ye ? Bango bakoki kozala banzambe ba solo te !

16:21  Sikawa nalingi kolakisa bango mayele mpe koyebisa bango bokasi bwa loboko la ngai, bongo bakoyeba ’te nkombo ya ngai ezali Yawe.

Chapter 17

17:1  Masumu ma ba-Yuda ma komami na ekomeli ya ebe­nde, na nsonge ya libanga lya diama o etanda ya mitema mya bango mpe o maseke ma bitumbelo bya bango,

17:2  mpo ’te bana ba bango bakanisa bitumbelo na makonzi ma bango penepene na nzete o nsonge ya ngomba,

17:3  mpe o ngomba ya ngai o kati ya esobe. Nakokaba nkita mpe biloko bya yo binso na bayibi mpo ya masumu manso o ekolo ya yo mobimba.

17:4  Okotika mabelé maye napesaki yo, nakokomisa yo mo­ombo wa banguna ba yo o ekolo eyebani na yo te. Mpamba te, nka­nda ya ngai epelisi móto, moye mokopela seko.

17:5  Yawe alobi boye : Mawa na moto oyo atii motema na bato, oyo aluki bokasi bobele epai ya bato, oyo alongoli motema epai ya Yawe.

17:6  Azali lokola nzube o esobe : ata o esika elamu ekoyoka esengo te, ekofanda bobele o bisika bitu­mbami na móto, ekopono se mabelé ma mongwa esika bato bazali te.

17:7  Esengo na moto oyo atii motema na Yawe mpe aluki bobateli epai ya Yawe.

17:8  Azali lokola nzete baloni mpe­mbeni ya mai, etandi minsisa epai ya moluka, eyoki mpasi te o ntango ya moi makasi ; nkasa ya yango ikotikala ibesu, ebangi mpe elanga makasi te, ekobota mbuma ntango inso.

17:9  Motema mwa moto mopusi kokosa, mobongi soki te, nani ayebi mwango ?

17:10  Ngai Yawe nayebi makanisi ma bato, nayebi moto kin’o ntei ya motema. Nakopesa moto na moto lifuta likoki na ye engebene na mbuma ya misala mya ye.

17:11  Esosolo ekokukamaka maki maye yango moko eboti te. Se bongo soko moto akomi na nkita na bosembo te : asengeli kotika mwango ata asilisi mikolo mya ye te, mpe o nsuka akotikala bobele zoba.

17:12  Tempelo ya biso esantu ezali lokola ngwende ya nkembo, bato­ngá kala.

17:13  Yo Yawe, ozali elikya ya bato ba Israel, baye banso bawangani yo, bakoyoka nsoni, banso baboyi yo, bakosila o ekolo, mpo batiki Yawe, liziba lya mai ma bomoi.

17:14  Bikisa ngai, Yawe, nakobika ; sikola ngai, mpe nakosikwama, zambi yo ozali ntina ya lokumu la ngai.

17:15  Yoka lolenge bato bakolobaka na ngai : « Wapi liloba lya Yawe ? Lisalema se bosalemi ! »

17:16  Ngai nasengeki te ’te makama makwela bato, nalingaki mokolo mwa mpasi te : oyebi maloba mabimi o monoko mwa ngai, oyebi mango manso malamu.

17:17  Oyokisa ngai nsomo te, ozali mobikisi mwa ngai o mokolo mwa mpasi.

17:18  Banyokoli ba ngai basambwa, kasi ngai te ! Mokolo mwa mpasi mokwela se bango. nyata mpe silisa bango nye !

17:19  Yawe alobaki na ngai : Kende koteleme o ‘Ezibeli ya Bato’, esika bakonzi ba Yuda bakokotoko mpe bakobimaka ; kende mpe epai ya bizibeli binso bya Yeruzalem.

17:20  Loba na bato : Bino bakonzi ba Yuda, bino bato ba Yuda mpe ba Yeruzalem, bokolekaka o bizibeli biye, boyoka !

17:21  Yawe alobi boye : Bokeba ! Bomeme mikumba o mokolo mwa Sabato te ; bokotisa byango o bizibeli bya Yeruzalem te.

17:22  Bobimisa mokumba moko o ndako ya bino te, mpe bosala mosala moko o mokolo mwa Sabato te. Bosantisa mokolo mwa Sabato lokola nati­ndaki bankoko ba bino.

17:23  Bango bayokaki te, batiaki matoi te, bakomaki motó makasi mpe bayambaki mateya ma ngai te.

17:24  Yawe alobi boye : Soko bolingi kotosa ngai, boyingisa mokumba moko o bizibeli bya engumba eye o mokolo mwa Sabato te. Soko bosantisi mokolo mwa Sabato, mpe bosali mosala moko o mokolo mona te,

17:25  bako­nzi bakofandaka o ngwende ya Davidi bakoyingela o bizibeli bya engu­mba eye na makalo mpe na farasa, elongo na bayangeli, bankumu na bato banso ba Yuda mpe ba Yeruzalem. Bongo bato bakofanda o engumba eye seko.

17:26  Bato bakouta o bingumba bya Yuda mpe penepene na Yeruzalem, o mokili mwa Benyamin mpe o mokili mwa bisobe, ngomba to epai ya Negeb, bakoya kobonza mabonza ma kotu­mba, miboma, mabonza ma bolei na mpaka ya malasi, mpe ma kotondo Yawe o Tempelo eye.

17:27  Kasi soko boyoki ngai te, bosantisi mokolo mwa Sabato te, mpe bolingi bobele komeme biloko mpe koleka o bizibeli bya Yeruzalem, nakotu­mba byango, móto mona mokosilisa ndako ya bakonzi mpe mokozima lisusu te.

Chapter 18

18:1  Yawe alobi na Yeremia maloba maye :

18:2  « Teleme, kende o ndako ya mosali mbeki, kuna nakoyokisa yo maloba ma ngai. »

18:3  Nakei o ndako ya mosali mbeki mpe nakuti ye azalaki kosala mosala na yika.

18:4  Kasi awa mbeki eye azalaki koyema na libazi ebebi o maboko ma ye, ayemi mbeki esusu lokola mosali mbeki alingi.

18:5  Na nsima Yawe alobi na ngai maloba maye :

18:6  Yawe alobi : Bato ba Israel, nakoki kosala na bino te lokola mosali oyo wa mbeki ? Ya solo, bino bato ba Israel, bozali o maboko ma ngai lokola libazi o maboko ma mosali mbeki.

18:7  Mbala esusu nakani kobebisa ekolo mpe mokili mwa bato, kosilisa mpe koboma mwango ;

18:8  kasi soko bato ba ekolo ena babongoli mitema mpe batiki masumu, natiki kokana kosala mabe nalingaki kosala bango.

18:9  Mbala esusu nakani kobongisa ekolo mpe mokili mwa bato, kotonga mboka mpe kolona nzete ;

18:10  kasi soko bato ba ekolo ena basali maye makosepelisa ngai te, mpe baboyi koyoka maloba ma ngai, natiki kokana kosala malamu maye nalingaki kosala bango.

18:11  Bongo sikawa loba na bato ba Yu­da mpe ba Yeruzalem maloba maye : « Boyoka maloba ma Yawe : Nakanaki kosala bino mabe mpe nazalaki kolengele etumbu. Sikawa moko moko wa bino alongwa o nzela ya masumu, abongola motema mpe abo­ngisa ezalela ya ye. »

18:12  Nzoka­nde bakoloba : « Wana se mpamba ! Tolingi kolanda nzela ya biso moko ; moko moko wa biso akosala bobele lokola motema mwa ye liba­nga molingi. »

18:13  Yango wana Yawe alobi boye : Bokende kotuna bato ba bikolo bisusu : Nani asili ayoki bongo ? Israel asali likambo lya nsomo.

18:14  Mabanga makoki nde kosila o esobe ? Mbula ya mpembe ekolimwa nde o Libano ? Mai makoutaka o miluka mosika makoki nde kosila ? Maziba makobimisaka mai makoki nde kokauka ?

18:15  Kasi bato ba ekolo ya ngai babosani ngai ! Bakobonzelaka bikeko bya mpa­mba mabonza, batuti libaku o nzela eye bameseni kolanda mpo ’te balanda nzela ike iye balalisaki malamu te.

18:16  Bakomisi ekolo ya bango ekolo ya nsomo, eye bato banso bakotiolaka. Moto aleki wana akamwi mpe aningisi motó.

18:17  Lokola mompepe mwa Esti nakopanza bango o miso ma banguna. O mokolo bakosuka nakolakisa bango mokongo, nakolakisa bango elongi ya ngai te.

18:18  Bazalaki koloba : « Tokanisa mabe nini tokosala Yeremia. Tokozala naino na banganga Nzambe baye bakoteya biso Mobeko, bato ba bwanya bakopesa biso malako, na baprofeta bakoloba na biso maloba ma Nzambe. Yakani, tosukisa ye na maloba ma ye moko ; tokokeba na maloba ma ye lisusu te. »

18:19  E Yawe, tia matoi na losambo la ngai, yoka maloba ma banguna ba ngai.

18:20  Moto asali malamu, bakoki nde kozongisela ye mabe ? Nzokande batimoli libulu mpo ya kokweisa ngai. Kanisa boniboni natelemeki o boso bwa yo mpo ya kobondela yo mpo ya ba­ngo, mpo ’te oyokela bango nkanda te.

18:21  Yango wana tika bana ba bango bakufa na nzala, babomama na mopanga ! Basi ba bango bazanga bana mpe bakufela babali ! Babali ba bango bakufa na bokono bobe ! Bilenge ba bango bakufa na mopanga o etumba !

18:22  O ndako ya bango boleli boyokana mokolo okotindela bango bato bakende koyiba. Mpamba te, batimolaki libulu mpo bakanga ngai, batiaki mitambo o nzela ya ngai.

18:23  Yo Yawe, oyebi ’te bakani koboma ngai. Olimbisa mabe ma bango te ; masumu ma bango malongwa o miso ma yo te. Banso bakweya o miso ma yo ; o ntango oyoki nkanda, sukisa bango !

Chapter 19

19:1  Yawe alobi na Yeremia : Kende kosomba mbeki ya libazi epai ya mosali mbeki. Kende na bakolo ba mboka na banganga Nzambe basusu.

19:2  Bima mpe kende o lobwaku la Ben-Inom, penepene na ‘Ezibeli ya Bipaso’. Sakola kuna maloba maye nakoyebisa yo.

19:3  Okoloba boye : Bakonzi ba Yuda na bato ba Yeruzalem, boyoka liloba lya Yawe : Yawe wa bokasi bonso, Nza­mbe wa Israel alobi boye : Nakotindela esika eye likambo lya mpasi ; moto akoyoka yango, akoyoka matoi mpasi !

19:4  Mpamba te, batiki ngai mpe basantoli esika eye, babonzi wana mpaka ya malasi ona banzambe basusu, baye bango na bankoko na bakonzi ba Yuda bayebaki liboso te. Batondisi esika eye na makila ma bato basali likambo te.

19:5  Batongi bitumbelo bya Baal mpo batumbela Baal bana ba bango bo libonza. Ngai nalobaki to nati­ndaki yango te ; nakanisaki yango mokolo moko te.

19:6  Yawe alobi boye : O mikolo mikoya bakotanga esika eye lisusu ‘Tofet’ to ‘Lobwaku la Ben-Inom’ te, kasi bakotanga yango ‘Lobwaku la Bobomi’.

19:7  Bobele o esika eye nakobebisa mikano mya bato ba Yuda mpe ba Yeruzalem ; nakobomisa bango na mopa­nga mwa banguna bakaneli bango ; bongo nakopesa bibembe bya ba­ngo bo bilei na ndeke ya likolo mpe na nyama ya zamba.

19:8  Nakobongola engumba eye esika ya nsomo mpe eloko ya kotiola. Bato banso bakoleka wana bakoganga, bakokamwa na bomoni bato ebele bayoki mpasi.

19:9  Nakosala ’te balia bana ba bango babali na basi : bakoliana o kati ya mpasi mpe ya mawa manene ; banguna baye balingi liwa lya bango bakoyokisa bango mpasi eye.

19:10  Na nsima okobola mbeki ena o miso ma bato bakokende na yo,

19:11  okoloba na bango : Yawe wa bokasi bonso alobi boye : Nakoboma bato ba ekolo na bato ba mboka eye lokola bakobolaka mbeki ya mosali mbeki, eye bakoki kobamba lisusu te. Bakokunda bibembe o Tofet, mpo bakozwa esika esusu te.

19:12  Yawe alobi boye : Nakosala se bongo na esika eye mpe na bato bafandi wana, nakokomisa engumba eye lokola Tofet.

19:13  Ndako inso ya Yeruzalem na ndako ya bakonzi ba Yuda ikokoma na mbindo lokola Tofet : ndako ina inso esika bazalaki kobonzela mampinga ma likolo mpaka ya malasi, mpe kosopela ba­nzambe basusu mabonza ma bomeli !

19:14  Yeremia alongwi o Tofet esika Yawe atindaki ye asakola. Atelemi o lopango la Tempelo ya Yawe, alobi na bato banso :

19:15  « Yawe wa bokasi bonso, Nzambe wa Israel, alobi boye : Nakotindela bato ba engu­mba eye na bato ba mboka inso ya penepene malozi manso, maye nakanelaki bango, zambi bazali motó makasi mpe baboyi koyoka maloba ma ngai. »

Chapter 20

20:1  Nganga Nzambe Pasekur, mwana wa Imer, oyo azalaki kapita wa bakengeli ba Tempelo ya Yawe, ayokaki maloba mana ma Yeremia.

20:2  Pasekur abetisi profeta Yeremia fimbo mpe akotisi ye o boloko eye ezali penepene na ‘Ezibeli ya Benyamin’, eye etalani na Tempelo ya Yawe.

20:3  Mokolo mwa nsima Pasekur abimisi Yeremia o boloko ; Yeremia alobi na ye : « Ba­nda lelo Yawe akotanga yo lisusu ‘Pasekur’ te, kasi ‘Nsomo bipai binso’.

20:4  Mpamba te, Yawe alobi : Nakotindela yo na bandeko ba yo makambo ma nsomo, banso bakokufa na mopanga mwa banguna : okomono yango na miso ma yo moko ! Nakokaba Yuda mobimba o maboko ma mokonzi wa Babilon ; ye moto akokende na bango o Babilon, kuna akoboma bango na mopanga.

20:5  Nkita inso ya mboka, bi­loko binzenga binso, biloko bya motuya bya bakonzi ba Yuda, nakokaba byango o maboko ma ba­nguna, baye bakobotolo byango mpe bakokende na byango o Babilon.

20:6  Yo Pasekur, okokende o boombo elongo na bato banso bakofandaka o ndako ya yo. Okokende o Babilon mpe okokufa kuna. Bakokunda yo kuna elongo na bani­nga ba yo banso, baye oteyaki makambo ma lokuta. »

20:7  E Yawe, obendaki ngai, bongo nalandi yo ; oleki ngai na bokasi mpe olongi ngai. Bato bakotiolaka ngai mokolo na mokolo, nakomi nzembo o monoko mwa bango.

20:8  Mbala inso otindi ngai naloba olingi nasakola makambo ma bitumba mpe ma bobomi ! Liloba lya Yawe lizweli ngai se nsoni na mafinga mokolo na mokolo.

20:9  Namilobeli : Nakokanisa Nzambe lisusu te, nakosakola o nkombo ya ye lisusu te ; nayoki o motema mwa ngai lokola móto makasi mopeli tee o kati ya minkuwa, nameki kokanga motema se mpa­mba.

20:10  Nayoki bato baike bazalaki kotongo ngai : Tala ‘Nsomo bipai binso’ ye oyo, tofunda ye mpe tokangisa ye. Baninga ba ngai banso baluki ko-kweisa ngai : « Tomeka kobenda ye, mbele tokoki kolonga ye, mpe kozongisela ye mabe ma ye. »

20:11  Nzokande Yawe azali elombe, akosalisa ngai, banyokoli ba ngai bakotuta libaku, bakolonga te, bakoyoka nsoni mpenza, bakobosana nsoni ya bango mokolo moko te.

20:12  Yo Yawe wa bokasi bonso, okotalaka manso na bosembo, oyebi makanisi na mitema mya ba­ngo, namono etumbu nini okopesa ba­ngo, zambi natiki makambo ma ngai o maboko ma yo.

20:13  Boyembela Yawe, bokumisa ye ! zambi abateli bomoi bwa mobola o maboko ma bato babe.

20:14  Mabe makwela mokolo babotaki ngai ! Batanga mokolo mama abotaki ngai mokolo mwa mawa !

20:15  Mabe makwela moto oyo asangelaki tata wa ngai ’te « Baboteli yo mwana mobali ! » mpe atondisaki motema mwa ye na esengo.

20:16  Moto oyo akoma se lokola bi­ngu­mba iye Yawe abebisaki, mawa te ; ayoka boleli banda ntongo mpe migango mya etumba o nta­ngo ya midi.

20:17  Malamu soko Nzambe abomaki ngai o libumu mpo ’te nzoto ya mama ezala lilita lya ngai mpe libumu lya ye libomba ngai seko.

20:18  Mpo nini nabimaki o libumu lya mama ? Mpo nandima minyoko mpe mpasi mpe nayoka nsoni mikolo minso ?

Chapter 21

21:1  Maloba Yawe ayebisi Yeremia, mokolo mokonzi Sedekia atindi Pasekur, mwana wa Malkia, na nganga Nzambe Sefania, mwana wa Maseya, epai ya Yeremia mpo ’te ayebisa ye :

21:2  « Awa Nabukodonozor, mokonzi wa Babilon, ayei kobundisa biso, sengele biso Yawe, mbele akosala likamwisi mpo ya biso mpe akolongola mo­nguna epai ya biso. »

21:3  Yeremia azo­ngiseli bango : « Bopesa Sedekia eyano eye :

21:4  Yawe Nzambe wa Israel alobi boye : Basoda ba mokonzi wa Babilon bazingi engumba. Nakosala ’te bibuneli biye bozali kobunda na byango o libanda lya bifelo, bizonga o kati ya engumba.

21:5  Ngai moko nakobundisa bino, nakobete bino makasi, na nkanda enene mpenza.

21:6  Nakobete bato mpe nyama o engumba : bakokufa na bo­kono bobe.

21:7  Yawe alobi : Na nsima nakokaba Sedekia, mokonzi wa Yuda, basali ba ye na bato banso ba engumba baye bakufi te na bokono bobe, na mopanga to na nzala enene, o maboko ma Nabukodonozor, moko­nzi wa Babilon, mpe ma ba­nguna baye balingi koboma bango. Ye akoboma bango na mopanga, akoyokela bango mawa mpe ngolu soki te. »

21:8  Loba mpe na bato ba ekolo eye : « Yawe alobi boye : Bokoki kopono nzela ya bomoi to ya liwa.

21:9  Oyo akotikala o engumba akokufa na mopanga, na nzala enene to na bokono bobe ; kasi oyo akobima mpe akokende epai ya banguna ba bino ba-Kaldea, ye akobika.

21:10  Solo, naboyi kotala engumba eye lisusu ; ekozwa bobe, bolamu te. Maloba ma Yawe. Nakokaba yango o maboko ma mokonzi wa Babilon ; ye akotumba yango. »

21:11  Bino bato ba libota ya moko­nzi wa Yuda, boyoka maloba ma Yawe. Bino bato ya libota ya Davidi, elobi bongo Yawe :

21:12  Bokata makambo na bosembo nto­ngo inso, bobikisa moto o maboko ma monyokoli. Soki te, nkanda ya ngai ekotoko lokola móto mokozikisa moye moto moko akoki kozimisa te, mpo ya bobe bwa misala mya bino.

21:13  Yawe alobi : Nakotumbola bino, bato ba lobwaku bofandi o ndako ya mabanga ; bino bokolobaka : « Nani akomeka kobundisa biso mpe kokoto o ebombamelo ya biso ? »

21:14  Yawe alobi : Nakotumbola bino lokola ekoki na bino : nakotumba nzete inso ya zamba ! Móto mokozikisa binso !

Chapter 22

22:1  Yawe alobi boye : Kende o ndako ya mokonzi wa Yuda ; kuna okoloba boye :

22:2  E Moko­nzi wa Yuda, yo moto ofandi o ngwe­nde ya Davidi, na bino basaleli ba ye, na bato baye bakokotoko epai ya bizibeli bya ndako eye, boyoka liloba lya Yawe.

22:3  Yawe alobi : Bosamba makambo na bosembo mpe na bosolo, bobikisa moto o maboko ma monyokoli ; bosala mo­mpaya, mwana etike na mwasi bozenge mabe te, boyokisa bango mpasi te. O esika eye bosopa makila te ma moto asali likambo te.

22:4  Soko bosali bongo, bakonzi bafandi o ngwende ya Davidi, bakokoto epai ya bizibeli bya ndako ya mokonzi o makalo mpe o farasa elongo na basaleli mpe na bato ba bango.

22:5  Kasi soko botosi maloba mana te, nalayi yango o nkombo ya ngai moko, ndako eye ya mokonzi ekobeba nye ! Maloba ma Yawe.

22:6  Yawe alobi mpo ya ndako ya mokonzi wa Yuda : O miso ma ngai ozalaki lokola Galaad to nsonge ya Libano ; nzokande nakokomisa yo eliki mpe mopotu.

22:7  Nakotindela yo babebisi baya na bisaleli, bakokata sédere iye ileki bonze­nga mpe bakobwaka yango o móto.

22:8  Mokolo bato ba bikolo bisusu bakoleka penepene na engumba eye, bakolobana : « Mpo nini Yawe asali bongo na engumba eye enene ? »

22:9  Bakoyanola : « Ezali mpo babomaki bondeko bwa Yawe Nza­mbe wa bango mpo bakumbamelaki mpe basalelaki banzambe basusu. »

22:10  Bolela Yozia te, bosala lilaka mpo ya ye te. Kasi bolela Yoakaz oyo akei mpe akozonga lisusu te : akomono mokili mwa bankoko ba ye lisusu te.

22:11  Ya solo, Yawe alobaki boye mpo ya Salum (Yoakaz), mwana wa Yozia, mokonzi wa Yuda, oyo akitani tata wa ye Yozia : Oyo alongwi o engumba eye, akozonga wana lisusu te,

22:12  kasi akokufa o esika akei moombo, akomono ekolo eye lisusu te.

22:13  Mawa na oyo atongi ndako ya ye, na bosembo te, mpe abakisi biteni binene na bosembo soki te ; atindi moto asala mosala se mpa­mba mpe afuti ye mosolo te ;

22:14  oyo amilobeli : « Namitongela nda­ko enene na biteni binene o likolo », mpe akati madusu manene mpo ya maninisa, akembisi yango na mabaya ma nzete ya sédere mpe apakoli yango langi ngola.

22:15  Okanisi ’te ozali mokonzi monene mpo ozali na nzete inzenga ebele ? Tata wa yo azalaki kolia mpe komele te ? Kasi azalaki na bosembo mpe na bosolo, yango wana makambo ma ye matambolaki se malamu.

22:16  Azalaki kobatela mobola mpe moto wa mawa, manso mazalaki kobongela ye. Alakisaki bongo ’te azalaki ko­ndima ngai. Maloba ma Yawe.

22:17  Kasi yo okolulaka bobele kozwa litomba lya yo moko, koboma bato basali likambo lyoko te, kobotolo bato biloko mpe ko­nyo­kolo bango.

22:18  Yango wana Yawe alobi mpo ya Yoyakim, mwana wa Yozia, mokonzi wa Yuda : Mpo ya ye bayemba nzembo ya boleli te : « Mawa ndeko mobali e ! Mawa ndeko mwasi e ! » Basala lilaka mpo ya ye te, baloba te : « Mawa mokonzi wa ngai e ! Mawa nkumu wa ngai e ! »

22:19  Bakokunda ye lokola mpunda ! Bakobenda ye mpe bakobwaka ye mosika o libanda lya Yeruzalem !

22:20  Buta Libano mpe ganga makasi, o ngomba Basan lolaka la yo loyokana, ut’o ngomba Abarim ganga, mpo bakonzi banso balingaki yo basuki !

22:21  Nalobaki na yo ntango ekolo ezalaki kimia, kasi oyanolaki : « Nakoyoka te ! » Banda bolenge ozalaki se koboya koyoka lolaka la ngai.

22:22  Mompepe mokolongola bayangeli ba yo, baye bazalaki kolinga yo bakoke­nde o boombo ; o mokolo mona okoyoka nsoni mpo ya mabe ma yo manso.

22:23  Ata otongaki ndako ya yo o Libano mpe obongisi zumbu lya yo o kati ya sédere, okokimela o mokolo malozi makokwela yo, lokola mwasi alingi abota.

22:24  Yawe alobi boye : Lokola nazali na bomoi, soko yo Konia, mwana wa Yoyakim, mokonzi wa Yuda, ozalaki lokola mpete o mosapi mwa ngai, mbele nalongoli yango.

22:25  Nakokaba yo o maboko ma bato balingi koboma yo, ma baye bakolengisa yo, o maboko ma Nabukodonozor, mokonzi wa Babilon, mpe o maboko ma ba-Kaldea.

22:26  Ba­kobwaka yo na mama oyo aboti yo o ekolo esusu ; bobotami kuna te, kasi bokokufa kuna.

22:27  Boko­zonga te o mokili bolingi komono lisusu !

22:28  Moto ona Konia azali nde lokola eteni ya mbeki ebolani to eloko bato banso bakobwakaka ? Mpo nini babengani ye na libota lya ye mobimba mpe babwaki ba­ngo o mokili moyebani na bango te ?

22:29  E bato ba mokili mwa ngai, boyoka liloba lya Yawe.

22:30  Yawe alobi boye : Bokoma o monkanda mwa bako­nzi mpo ya moto oyo : « Azali na bana te, abongisi lika­mbo lyoko te », mpo ata moko wa bana ba ye te akozwa nzela ya kofanda o ngwe­nde ya Davidi mpe ya koyangela ekolo ya Yuda.

Chapter 23

23:1  Yawe alobi boye : Mawa na bakengeli bakosalaka ’te mpata ya etonga ya ngai ibungama mpe ipanzana.

23:2  Yango wana ngai Nzambe wa Israel nalobi na bake­ngeli basengeli koleisa mpata ya ngai : Bosali ’te mpata ya ngai ibu­ngama mpe ipanzana, bopanganaki na yango te. Yango wana ngai nakotumbola bino mpo ya mabe bosalaki. Maloba ma Yawe.

23:3  Ngai mo­ko nakosangisa mpata ya ngai ut’o bikolo binso napanzaki ya­ngo mpe nakokamba yango o ekolo ya bango esika ikobota mpe ikokoma mingi.

23:4  Nakolukela ya­ngo bakengeli ba solo, baye bakoleisa yango ; ikobanga lisusu te, ikoyoka nsomo lisusu te ; ata yoko te ekobunga lisusu. Maloba ma Yawe.

23:5  Yawe alobi : O mikolo mikoya nakopesa libota lya Davidi mwana wa bosembo ; bo mokonzi wa solo mpe na bwanya akoyangela ekolo ya ye na bosolo mpe na bosembo.

23:6  O mikolo mina Yuda akobika, Israel akofanda kimia. Bakopesa ye nkombo : ‘Yawe, bosembo bwa biso’.

23:7  Yawe alobi boye : O mikolo mikoya bato bakoloba lisusu te : « Nza­mbe azali na bomoi, oyo alongolaki bana ba Israel o Ezipeti »,

23:8  kasi bakoloba : « Nzambe azali na bomoi, oyo azongisaki bato ba Israel ut’o ekolo ya Nordi mpe o mikili misusu, esika apanzaki ba­ngo, mpo ’te bafanda o mabelé ma bango moko. »

23:9  Maloba mpo ya baprofeta : Motema mwa ngai mopaswani, nzoto mobimba ezali kolenge, nakomi lokola moto alangwi, lokola moto ameleki vino mingi, mpo ya maloba masantu ma Yawe.

23:10  Bipai binso bato bakosalaka bokali, yango wana mokili mokomi na mawa, bilanga binso bya esobe bikauki, bato bakolukaka kosala mabe, misala mya bango mizangi bose­mbo.

23:11  Solo, ata baprofeta na banganga Nzambe babebi ; tee o ndako ya ngai namoni mabe ma bango. Maloba ma Yawe.

23:12  Yango wana nzela ya bango ekokoma boselu, bakobunga o kati ya molili mpe bakokweya, mpo nakotindela bango mpasi ene­ne, etumbu ekokwela bango o mobu moye. Maloba ma Yawe.

23:13  O Samaria namonoki makambo ma nsomo, baprofeta bazalaki kosakola o nkombo ya Baal, mpe kobungisa bato ba Israel nzela.

23:14  Kasi o Yeruzalem namonoki makambo maleki mabe, makambo ma bokali mpe ma bokosi, bakosalisaka bato babe mpo ’te moto moko atika mabe te. O miso ma ngai banso bakomi lokola bato ba Sodoma na Gomora.

23:15  Yango wana Yawe wa bokasi bo­nso alobi mpo ya baprofeta : Nakoleisa bango biloko bololo mpe nakomelisa bango mai ma ngenge, zambi lisumu liuti na baprofeta ba Yeruzalem mpe lipalangani o ekolo mobimba.

23:16  Yawe wa bokasi bonso alobi : Boyoka maloba ma baprofeta baye te, bakokosaka bino na ndoto ya ba­ngo ya lokuta, maloba ma bango makouta o monoko ma Yawe te.

23:17  Bakolobaka na baye bakokinolaka maloba ma Yawe : « Manso makobongela bino. » Bakoloba na bato bakolanda se mabe ma motema : « Mabe makokwela bino te ! »

23:18  Kasi nani o kati ya bango azalaki o likita lya Yawe mpo ’te amono ye mpe ayoka liloba lya ye ? Nani akebaki na liloba lya ye mpo asakola lyango ?

23:19  Nkele ya Yawe ekoya lokola eku-mbaki, lokola mbula ekasi ekonokela basumuki o mitó.

23:20  Nkanda ya Yawe ekokita te liboso ’te akokisa mpe asala maye akanaki. O mikolo mya nsima bokoyeba ntina mpenza.

23:21  Natindaki baprofeta baye te, kasi bakei mbangu, nalobaki na bango eloko te, kasi bazalaki kosakola.

23:22  Soko bazalaki o likita lya ngai, mbele bateyaki bato ba ngai maloba ma ngai, mbele balongolaki bango o nzela ya masumu mpe o misala mibe mya bango.

23:23  Nazali bobele Nzambe soko nazali penepene ? Soko nazali mosika, nazali lisusu Nzambe te ? Maloba ma Yawe.

23:24  Moto akoki nde kobombama o ndako ya ye bongo ngai namono ye te ? Maloba ma Yawe. Bongo natondisi likolo na nse te ? Maloba ma Yawe.

23:25  Nayoki boniboni baprofeta bakolobaka baye bakosakolaka makambo ma lokuta o nkombo ya ngai : « Nalotoki ndoto ! Nalotoki ndoto ! »

23:26  Mikolo boni naino bakozala na makanisi mana, baprofeta baye bakosakolaka makambo ma lokuta mpe maye mauti o mitema mya bango moko ?

23:27  Na ndoto ya bango bakoyebisanaka baluki ’te bato ba ngai babungisa Nkombo ya ngai, se lokola bankoko ba bango babosanaki Nkombo ya ngai mpo ya kokumisa Baal.

23:28  Profeta oyo aloti ndoto ayebisa ndoto ya ye, kasi moto azali na liloba lya ngai, asakola lyango na bosembo. « Matiti ma mpamba na mbuma ya mampa ikokani nde ? » Maloba ma Yawe.

23:29  Liloba lya ngai lizali lokola móto, lokola ebeteli ekopasolaka maba­nga.

23:30  Yawe alobi : Nakotumbola baprofeta baye bakowelanaka maloba ma ngai.

23:31  Nakotumbola baprofeta baye bakotalaka maloba manso makobimaka o monoko mwa ba­ngo lokola maloba ma ngai. Maloba ma Ya­we.

23:32  Nakotumbola baye bakosakolaka ndoto ya lokuta ; na bosololi yango na maloba ebele bakobungisaka bato ba ngai na makambo ma lokuta. Maloba ma Yawe. Ngai moto natindi bango te, napesi bango etinda te ; bakozwela bato ba ngai litomba lyoko te. Maloba ma Yawe.

23:33  Soko moto moko, azala profeta to nganga Nzambe, atuni yo : « Mokumba mwa Yawe, eloko nini ? », okozongisela ye : « Yo moko ozali mokumba mwa Yawe, yango wana nakobwaka yo. » Maloba ma Yawe.

23:34  Profeta to nganga Nzambe to moto ata nani oyo akotanga naino ‘Mokumba mwa Yawe’, nakotu­mbola ye elongo na libota lya ye mobimba.

23:35  Tala boniboni bose­ngeli kotunana : « Yawe apesi eyano nini ? » to « Yawe alobi nini ? »

23:36  Kasi bokoki kotanga liloba lya ye ‘Mokumba mwa Yawe’ lisusu te, soki te moto ata nani akotanga ‘Mokumba mwa Yawe’ akoyoka bozito bwa mwango. Kasi bino bokobongolaka maloba ma Nzambe wa bomoi, Yawe wa bokasi bonso, Nzambe wa biso.

23:37  Tuna profeta boye : « Yawe azongiseli yo eyano nini ? » to « Yawe alobi nini ? »

23:38  Kasi soko bolobi : « Mokumba mwa Yawe », ngai Yawe nakoloba boye : Awa bozali kotanga liloba ‘Mokumba mwa Yawe’, ata napekisaki bino ’te botanga lisusu ‘Mokumba mwa Yawe’ te,

23:39  na ntina ena nakoboya mpe nako­bwaka bino mosika na elongi ya ngai, bino na engumba eye napesaki bino na bankoko ba bino.

23:40  Nakoyokisa bino nsoni seko, eye bato bakobosana mokolo moko te.

Chapter 24

24:1  Yawe alakisi ngai bikoló bibale bya figi, bitiami liboso lya ndako esantu ya Yawe. Ezalaki o mikolo Nabukodonozor, moko­nzi wa Babilon, akangaki Yekonia, mwana wa Yoyakim, mokonzi wa Yuda, elongo na bankumu ba Yuda na batuli ba bibende na bato bakosalaka mafungola ; akendeki na ba­ngo mosika na Yeruzalem, o Babilon.

24:2  Ekoló yoko ezalaki na figi kitoko, iye itelaki liboso ; ekoló esusu ezalaki na figi ibe mpenza, iye bato bakoki kolia lisusu te.

24:3  Yawe atuni ngai : « Yeremia ozali komono nini ? » Nayanoli : « Nazali ko­mono figi ilamu izali elengi mpenza ; iye ibe isili ibebi nye, ibongi na kolia te. »

24:4  Na nsima Yawe alobi na ngai maloba maye :

24:5  Yawe Nzambe wa Israel alobi na ngai : Lokola bakobombaka figi ilamu, nakobatela mpe bato bakangemi o ekolo ya Yuda mpe natindaki o mokili mwa ba-Kaldea.

24:6  Nakotala bango na miso malamu mpe nakozongisa bango o mokili moye. Nakobongisa bango mpe nakobebisa bango lisusu te ; nakolona bango mpe nakopikola bango lisusu te.

24:7  Nakosala ’te motema mwa bango mondima ’te ngai nazali Yawe. Bango bakozala bato ba ngai mpe ngai nakozala Nzambe wa bango, zambi bakozongela ngai na motema moko.

24:8  Kasi lokola bakosalaka na figi ibe, iye ikoki koliama lisusu te, ya solo ngai Yawe nalobi boye, nakosala mpe bongo na Sedekia, mokonzi wa Yuda, na bankumu ba ye mpe baye batikali o Yeruzalem to o ekolo eye, to baye bakendeki o Ezipeti.

24:9  Nakokomisa bango eloko ya nsomo o miso ma bakonzi ba­nso ba nse mobimba ; nakosala ’te bafi­nga, batiola, baseke bango mpe batombela bango bobe o bisika binso nakopanza bango.

24:10  Nakotinda bato bakende koboma bango na mopanga, nakotindela bango monge­nge mpe bokono bobe tee banso bakosila o mabelé napesaki bango mpe bankoko ba bango.

Chapter 25

25:1  Liloba Yawe alobi na Yeremia litali bato banso ba Yuda. Ezalaki o mobu mwa minei Yoyakim, mwana wa Yozia, azalaki mokonzi o Yuda, mpe o mobu mwa yambo Nabukodonozor azalaki mokonzi wa Babilon.

25:2  Yoka liloba profeta Yeremia asakoli o miso ma bato banso ba Yuda mpe ba Yeruzalem :

25:3  Banda mobu mwa zomi na misato mwa bokonzi bwa Yozia, mwana wa Amon, mokonzi wa Yuda, kin’o mokolo mwa lelo, ekoki sikawa mibu ntuku ibale na misato, Yawe alobaki na ngai mpe nazalaki koloba na bino ntango inso, kasi bino boyokaki ngai te.

25:4  Yawe ale­mbeki te kotindela bino basaleli ba ye banso baprofeta, kasi bino boli­ngaki koyoka te, botiaki matoi na maloba ma ngai te.

25:5  Balobaki na bino : Bobongola mitema, bolongwa o nzela ya masumu, botika misala mibe mya bino. Bobele bongo nde bokoki kofanda kimia o mabelé Yawe apesaki bino mpe bankoko ba bino seko.

25:6  Bolanda banzambe basusu te, bokumisa mpe bokumbamela bango te, botika kotumola ngai na bikeko bya bino, bongo nakosala bino mabe te.

25:7  Kasi botosaki ngai te, maloba ma Yawe, mpe botumolaki ngai na bikeko bya bino, bongo sikawa bozali koyoka mpasi.

25:8  Yango wana Yawe wa bokasi bo­nso alobi boye : Awa boyokaki maloba ma ngai te,

25:9  nakotinda Nabukodonozor, mokonzi wa Babilon mpe mosaleli wa ngai, akende kobyanga bato banso epai ya Nordi. Nakotinda bango o ekolo ya bino mpe o bikolo bya mpembeni. Nakotombela bino bobe mpe bokokoma ekolo ya makambo ma nsomo, bato banso bakofinga mpe bakoseke bino.

25:10  Bakoyemba epai ya bino nzembo ya esengo lisusu te ; elenge mobali akobenga elenge mwasi lisusu te, bakoyoka lisusu lokito la libanga te liye likonika fufu ; bakomono lisusu mwinda o kati ya ndako te.

25:11  Ekolo eye ekobeba, ekokoma mopotu mpenza. Mibu ntuku nsambo bato banso bakozala baombo ba mokonzi wa Babilon.

25:12  Kasi nsima ya mibu mina ntuku nsambo, nakotumbola mokonzi wa Babilon mpe ekolo ya ye mpo ya mabe basalaki, maloba ma Yawe. Nakotumbola mpe ba-Kaldea mpe nakokomisa ekolo ya ba­ngo mopotu mpenza.

25:13  Nakosala na ekolo eye makambo manso nasakoli sikawa, maye manso makomami o mo­nkanda moye. Maloba ma bokaneli bikolo bisusu, maye Yeremia asakolaki.

25:14  (Bango mpe bakokoma ba­o­mbo ba bakonzi banene mpe ba bikolo binene ; nakozongisela ba­ngo mabe basalaki.)

25:15  Yawe Nzambe wa Israel alobi na ngai boye : Kamata nkeni eye ya vino ya nkanda ya ngai mpe melisa yango bato ba bikolo binso esika nakotinda yo.

25:16  Bamele, balangwa mpe bakoma bilema mpo ya bato nakotinda na mopanga epai ya ba­ngo.

25:17  Nakamati nkeni o maboko ma Yawe mpe namelisi bato ba bikolo binso esika Yawe atindaki ngai :

25:18  bato ba Yeruzalem mpe ba bingumba bya Yuda, bakonzi na bankumu ba byango, nakokomisa byango mipotu mya nsomo ; bato banso bakoseke bango mpe bakotombela bango bobe, lokola emononi lelo ;

25:19  Farao, mokonzi wa Ezipeti, basaleli na bankumu ba ye, bato ba ye banso,

25:20  mpe bampaya banso : bakonzi ba mokili mwa Us, bakonzi ba mokili mwa ba-Filisti, Askelon, Gaza, Ekron na baye bakotikala o Asdod,

25:21  ba-Edom, ba-Moab na ba-Amon,

25:22  bakonzi ba Tiro, ba Sidoni mpe ba bisanga o ngambo ya mbu,

25:23  bato ba Dedan, Tema, Buz mpe bato banso bakati mandefu,

25:24  bakonzi ba Arabu mpe bato banso bakofandaka o eliki,

25:25  bakonzi ba Zimri, ba Elam mpe ba Medi,

25:26  na bakonzi bauti o Nordi, bazala mosika to penepene, nakomelisa bango moko moko nkeni ena. Kasi mokonzi wa Sesak (Babilon) akomele nsima ya bango.

25:27  Loba na bango : Yawe wa bokasi bonso, Nzambe wa Israel, alobi boye : Bomele, bolangwa, bosanza, bokweya mpe boteleme lisusu te, mpo ya bato ba mopanga nakoti­ndela bino.

25:28  Soko baboyi kokamata o maboko ma yo nkeni eye base­ngeli komele, okoloba na bango : Yawe wa bokasi bonso alobi boye : Ata bolingi te, bokomele se bomeli.

25:29  Lokola nabandi kotumbola Engu­mba etangemi na nkombo ya ngai, bokanisi ’te bino bokobika ? Te ! Bo­kobika te, mpo ngai moko nakotinda bato ba mopanga epai ya bato ba nse mobimba. Maloba ma Yawe wa bokasi bonso.

25:30  Yo okosakola na bango maloba mana manso, okoloba na bango : Ut’o likolo Yawe akoganga, ut’o mboka ya ye esantu akoto­mbola lolaka la ye, akogangela bato ba engumba ya ye, akogangela bato banso ba nse lokola baye bakokamolaka mbuma ya vino o ekamelo.

25:31  Lokito lokokoma tee nsuka ya nse, zambi Yawe akosambisa bato ba­nso ba nse, akokata likambo lya bato banso, akokaba basumuki mpo ’te bakufa na mopanga. Yawe alobi bongo.

25:32  Yawe wa bokasi bonso alobi : Mpasi ekokwela ekolo yoko yoko, lokola ekumbaki euti epai ya nsuka ya mokili.

25:33  O mokolo mona bibembe bya bato Yawe abomaki bikolala bipai binso o mokili mobimba. Bakolela bango te, bakolokoto bango te, bakokunda bango mpe te. Bakotikala kolala wana lokola bipolu bya bila­nga.

25:34  Bino bakengeli, bolela makasi, bo­ganga, bino bakambi ba etonga, bobili­ngana o mabelé, zambi mokolo bakoboma bino mo­lingi mokoka, bokokweya lokola mbeki ya motuya ibolani.

25:35  Bakengeli bakozwa esika ya kobombama lisusu te, bakambi ba etonga nde bakoki ko­kima lisusu te.

25:36  Boyoka boleli bwa bakengeli mpe bogangi bwa bakambi ba eto­nga, mpo Yawe abomi bitonga bya ba­ngo.

25:37  Bisobe kitoko biziki mpo ya nkanda enene ya Yawe !

25:38  Abimeli bango lokola nkosi ebimi o ebombelo ya yango, mpe mokili mwa bango mokomi mopotu mpo ya mopanga mozali koboma bato banso mpe mpo ya nkanda enene ya Yawe

Chapter 26

26:1  O ebandela ya bokonzi bwa Yoyakim, mwana wa Yozia, mokonzi wa Yuda, Yawe alobi na Yeremia boye :

26:2  Yawe alobi : Kende koteleme o lopango la Tempelo ya Yawe ; oloba na bato ba bingumba bya Yuda bakoyaka kosambela o Tempelo maloba manso natindi yo oloba na bango. Otika ata liloba lyoko te.

26:3  Mbele bako­ndimela yo mpe moko moko akotika ezalela ebe ya ye ; bongo nakotindela bango mpasi te eye nakani koyokisa bango mpo ya mabe ma bango.

26:4  Loba na bango : Yawe alobi boye : Soko boyoki ngai te, soko bolandi mibeko te miye napesi bino,

26:5  soko boyoki maloba ma basaleli ba ngai baprofeta te, baye nakotindelaka bino ntango inso, kasi se mpamba,

26:6  nakosala na Tempelo eye lokola nasalaki na Silo ; nakotombela engumba eye makambo mabe o miso ma bikolo binso bya nse.

26:7  Banganga Nzambe, baprofeta na bato banso bazalaki koyoka maloba maye ma Yeremia o Tempelo ya Yawe.

26:8  Esilisi Yeremia koloba maye manso Yawe atindaki ye ’te aloba mango na bato banso, banga­nga Nzambe, baprofeta na bato ba­nso bakangi ye, balobi : « Okokufa !

26:9  Mpo nini osakoli o nkombo ya Yawe ’te Tempelo eye ekokoma lokola Silo, ’te engumba eye ekokufa mpe bato bakozala wana lisusu te ? » Bato banso bayei kozinga Yeremia o Tempelo ya Yawe.

26:10  Eyoki ba­nku­mu ba Yuda makambo mana, batiki ndako ya mokonzi mpe bakei o Tempelo ya Yawe, bafandi o boyi­ngeli bwa Ezibeli ya Sika ya Te­mpelo ya Yawe.

26:11  Banganga Nzambe na baprofeta balobi na bankumu mpe na bato banso : « Moto oyo asengeli kokufa ! Mpamba te, asakoli maloba ma bokaneli engumba eye, bino moko boyoki yango ! »

26:12  Yeremia azongiseli bankumu na bato banso ba mboka, alobi : « Yawe moto atindi ngai naloba na Tempelo mpe na engu­mba eye maloba ma bokaneli manso boyoki.

26:13  Bongo sikawa bobongisa ezalela na misala mya bino ; botosa maloba ma Yawe Nzambe wa bino, mpe Yawe akotika kosala mabe maye akaneli bino.

26:14  Ngai nazali o maboko ma bino, bokoki kosala na ngai lokola bolingi.

26:15  Kasi boyeba ’te : Soko bobomi ngai, makila ma moto azali na likambo lyoko te makokwela bino, engumba eye na bato banso bafandi awa, zambi Yawe moto atindi ngai nasakola na bino maloba maye manso. »

26:16  O ntango ena bankumu na bato banso balobi na banganga Nzambe mpe na baprofeta : « Moto oyo ase-ngeli kokufa soki moke te, mpo alobaki na biso o nkombo ya Yawe Nzambe wa biso. »

26:17  Bakolo basusu ba mboka batelemi mpe balobi na bato banso basangani wana :

26:18  « Mikea wa Moreset, oyo asakolaki lokola profeta o eleko ya Ezekia, mokonzi wa Yuda, alobaki na bato ba Yuda : « Yawe wa bokasi bonso alobi boye : Ngomba Sion ekozala esika ya kokata bilanga, Yeruzalem ekokoma esika ya mabanga mpe o ngomba ya Tempelo nzete ikokola ! »

26:19  Bongo Ezekia, mokonzi wa Yuda, na bato ba ye babomaki ye nde mpo ya maloba mana ? Baba­ngaki Yawe mpe babondelaki ye mpo ’te Yawe atika kosala mabe maye akanelaki bango. Bongo biso tomikotisa o likambo linene ? »

26:20  Moto mosusu mpe azalaki kosakola o nkombo ya Yawe ; nkombo ya ye Uria, mwana wa Semaya, moto wa Kiriat-Yearim. Asakoli maloba ma bokaneli engumba eye na ekolo eye, se lokola Yeremia.

26:21  Mokonzi Yoyakim na bayangeli na ba­nkumu banso bayoki maloba ma ye mpe baluki koboma ye. Ntango Uria ayoki yango, abangi mpe akimi o Ezipeti.

26:22  Kasi mokonzi Yoyakim atindi Elnatan, mwana wa Akbor, na bato basusu o Ezipeti.

26:23  Bakei kokamata Uria o Ezipeti mpe bakambi ye epai ya mokonzi Yoyakim ; oyo atindi ’te baboma ye na mopanga mpe babwaka ebembe ya ye o ekunda ya bato banso.

26:24  Kasi Akikam, mwana wa Safan, abateli Yeremia mpo ’te akweya o maboko ma bato te, mpe baboma ye te.

Chapter 27

27:1  O ebandela ya bokonzi bwa Sedekia, mwana wa Yozia, mokonzi wa Yuda, Yawe alobi na Yeremia maloba maye :

27:2  Yawe alobi na ngai boye : Omisalela mikulu mpe ekangiseli, tia yango o mapeke ma yo.

27:3  Na nsima otindela bakonzi ba Edom, ba Moab, ba Amon, ba Tiro na Sidoni nsango na maboko ma bantoma ba bango bayei o Yeruzalem epai ya Sedekia, mokonzi wa Yuda.

27:4  Bayebisa ba­nkolo ba bango ’te : « Yawe wa bokasi bo­nso, Nzambe wa Israel alobi boye : Boloba na bankolo ba bino :

27:5  Na bo­kasi bwa loboko la ngai, nakelaki nse na bato na nyama inso izali wana, nakopesa yango na bato ngai nalingi.

27:6  Sikawa nakabi bikolo bina binso o maboko ma Nabukodonozor, mokonzi wa Babilon, mosaleli wa ngai. Napesi ye mpe nyama isalela ye.

27:7  Bato ba bikolo binso bakosalela ye na mwana wa ye mpe na nkoko wa ye. Kasi mokolo moko bato ba bikolo bisusu na bakonzi banene bakokomisa ye moombo.

27:8  Bato ba ekolo to mokili ata nini baye bakoboya kosalela Nabukodonozor, mokonzi wa Babilon, mpe bakoboya komeme mokumba mwa eka­ngiseli ya Nabukodonozor, mo­konzi wa Babilon, nakotumbola ba­ngo na mopanga to na nzala ekasi to na bokono bobe, tee nakosilisa bango na maboko ma ye. Maloba ma Yawe.

27:9  Bino, bondima maloba ma baprofeta ba bino te ; boboya koyoka bamoni-makambo, baloti ndoto na banganga ata banani, baye bakolobaka na bino : ‘Bokokoma ba­ombo ba mokonzi wa Babilon te !

27:10  Na makambo ma lokuta bakosangelaka bino bakosala ’te bakolongola bino mosika na ekolo ya bino, mpe ngai nakobe­ngana bino mpe bokokufa.

27:11  Kasi soko bato bandimi komeme mokumba mwa ekangiseli ya mokonzi wa Babilon mpe bakosalela ye, nakokomisa ekolo ya bango kimia ; bongo bato bakokata bilanga mpe bakotikala o mokili mona. Yawe alobi bongo. »

27:12  Na Sedekia, mokonzi wa Yuda, nalobi bobele bongo : « Bondima ko­meme mokumba mwa ekangiseli ya mokonzi wa Babilon ; botosa ye na mpe bato ba ye, mpo ’te botikala na bomoi.

27:13  Mpo nini yo na bato ba yo bolingi kokufa na mopanga, na nzala ekasi to na bokono bobe, lokola ekolo eye Yawe akaneli soko baboyi kotosa mokonzi wa Babilon ?

27:14  Bondima maloba ma baprofeta te, baye bakolobaka : ‘Bokozala ba­o­mbo ba mokonzi wa Babilon te.’ Ba­ngo bakosakolaka makambo ma loku­ta.

27:15  Yawe alobi boye : Ngai natindi bango te, bakosakolaka makambo ma lokuta o nkombo ya ngai ; yango wana nakobengana bino mpe bokokufa elongo na baprofeta ba bino. »

27:16  Nalobi na banganga Nzambe mpe na bato banso : « Yawe alobi boye : Bondima maloba ma baprofeta te, baye bakosakolaka ’te biloko bya nkita bya Tempelo bikendeki o Babilon bikozongela bino noki. Bazali koloba makambo ma lokuta.

27:17  Bondima bango te. Bosalela mokonzi wa Babilon mpe bokotikala na bomoi. Mpo nini engumba eye ebeba nye ?

27:18  Soko bazali baprofeta ba solo, baye bakolobaka liloba lya Yawe, mbele bakobondela Yawe wa bokasi bonso mpo ’te biloko bitikali naino o Tempelo ya Yawe mpe o ndako ya bakonzi ba Yuda mpe o Yeruzalem bikende o Babilon te.

27:19  Mpamba te, Yawe alobi mpo ya makonzi manene, Ebo­mbelo ya mai, bitemiseli na biloko bisusu bitikali naino o engu­mba eye,

27:20  biye Nabukodonozor, mokonzi wa Babilon, alongolaki te, ntango aka­ngaki o Yeruzalem Yekonia, mwana wa Yoyakim, mokonzi wa Yuda, na bankumu banso ba Yuda mpe ba Yeruzalem, mpo akende na bango o Babilon.

27:21  Yawe wa bokasi bonso, Nzambe wa Israel, alobi bo­ngo mpo ya biloko bitikali naino o Tempelo, o ndako ya mokonzi mpe o Yeruzalem.

27:22  Bakokende na biloko bina o Babilon ; bikotikala kuna kin’o mokolo ngai nakokanisa bya­ngo lisusu. Maloba ma Yawe. O nta­ngo ena nakozo­ngisa byango o esika eye ! »

Chapter 28

28:1  O mobu mona, o ebandela ya bokonzi bwa Sedekia, mokonzi wa Yuda, o mobu mwa minei, o sanza ya itano, profeta Kana­nya, mwana wa Azur, wa Gabaon, alobi na ngai o Tempelo, o miso ma banganga Nzambe mpe ma bato banso maloba maye :

28:2  « Yawe wa bokasi bonso, Nzambe wa Israel, alobi boye : Nabuki minyololo mya mokonzi wa Babilon.

28:3  Etikali mibu mibale ’te nazongisa biloko binso bya Tempelo ya Yawe, biye Nabukodonozor, mokonzi wa Babilon, abotoloki mpe amemeki kuna.

28:4  Nakozo­ngisa mpe o esika eye Yekonia, mwana wa Yoyakim, mokonzi wa Yuda, na bato banso ba Yuda bake­ndeki o boombo. Yawe alobi : nakobuka minyololo mya mokonzi wa Babilon ! »

28:5  Profeta Yeremia azongiseli Ka­na­nya o miso ma banganga Nza­mbe mpe ma bato banso bazalaki o Tempelo

28:6  maloba maye : « Esalema bongo ! Yawe asala bobele bo­ngo ! Akokisa maloba osakoli ; azo­ngisa biloko bya Tempelo mpe alo­ngola baombo banso o Babilon.

28:7  Nzoka­nde yoka maloba nakoloba o matoi ma yo mpe ma bato banso.

28:8  Baprofeta bayaki liboso lya biso, banso basakolaki ut’o kala ’te bitumba, nzala ekasi mpe bokono bobe bokongala o bikolo biike.

28:9  Kasi soko profeta asakoli ’te boboto bokozala, bandima ye lokola profeta bobele soko maloba ma ye makosalema ! »

28:10  Na nsima profeta Kananya alo­ngoli ekangiseli o nkingo ya Yeremia mpe abuki yango.

28:11  Mpe Kananya alobi o miso ma bato banso : « Yawe alobi boye : Etikali mibu mibale ’te nabuka ekangiseli eye Nabukodonozor, mokonzi wa Babilon, atieli bino ; nakolongola yango o nkingo ya bato banso. » Profeta Yeremia akei.

28:12  Ebuki Kananya ekangiseli eye alongolaki o nkingo ya Yeremia, Yawe alobi na Yeremia :

28:13  « Kende koyebisa Kananya : Yawe alobi boye : Obuki ekangiseli ya libaya, o esika ya yango okotia ekangiseli ya ebende.

28:14  Mpo Yawe wa bokasi bo­nso alobi : Nakotia ekangiseli ya ebe­nde o nkingo ya bato ba bikolo bina binso mpo ’te basalela Nabukodonozor, mokonzi wa Babilon. Bakozala baombo ba ye, mpe nyama ya bango ikosala mosala o bilanga bya ye. »

28:15  Profeta Yeremia alobi na profeta Kananya : « Yoka malamu, Kana­nya : Yawe atindi yo soki te, osalaki ’te bato baye bandima maka­mbo ma lokuta.

28:16  Yango wana Yawe alobi boye : Nakolongola yo o mokili. Okokufa o mobu moye, mpamba te, otindi bato ’te batosa Yawe te. »

28:17  Profeta Kananya akufi bobele o mobu monamei, o sanza ya nsa­mbo.

Chapter 29

29:1  Yoka maloba ma monkanda moye Yeremia akomaki o Yeruzalem mpe atindelaki bakolo bakangemi o boombo, banganga Nzambe, baprofeta na bato banso, baye Nabukodonozor akambaki ut’o Yeruzalem kin’o Babilon.

29:2  Eza­laki o ntango mokonzi Yekonia alongwaki o Yeruzalem elongo na mama mokonzi, ba-eniki, ba­nkumu ba Yuda mpe ba Yeruzalem, batuli na mpe bato banso bakosa­laka bikangeli.

29:3  Apesi monkanda mo­na na Eleasa, mwana wa Safan mpe na Gemaria, mwana wa Kilkia. Sedekia, mokonzi wa Yuda, atindaki bango o Babilon epai ya Nabukodonozor, mokonzi wa Babilon. O monkanda bakomaki boye :

29:4  « Yawe wa bokasi bonso, Nza­mbe wa Israel, alobi na bato banso bakangemi o boombo, baye baka­mbamaki ut’o Yeruzalem kin’o Babilon :

29:5  Botonga ndako mpe bofa­nda wana, bolona mboto o bila­nga mpe bolia mbuma ya yango.

29:6  Bobala basi mpe bobota bana babali na bana basi. Boponela bana ba bino basi, bobalisa bana basi ba bino mpo babota bana babali na bana basi. Ebongi bozala baike mpe motango mwa bino mozonga nsima te.

29:7  Bobongisa engumba esika nati­nda­ki bino o boombo. Bosambela Yawe asala yango malamu, zambi soko ezali malamu, bino mpe bokofanda malamu.

29:8  Yawe wa bokasi bo­nso Nzambe wa Israel alobi : Baprofeta na bamoni-makambo bazali o ntei ya bino babungisa bino nzela te.

29:9  Mpamba te, bazali kosakola makambo ma lokuta o nko­mbo ya ngai. Ngai natindaki bango te. Maloba ma Yawe.

29:10  Yawe alobi boye : Soko bosili bokokisi mibu ntuku nsambo o Babilon, nakopangana na bino mpe nakokokisa elako eye nalakelaki bino mpe na­kozo­ngisa bino lisusu awa.

29:11  Yawe alobi : Nayebi maye nakani kosala bino. Nakopesa bino boboto, nakoyokisa bino mpasi te, mpo ’te bozala na elikya o mikolo mikoya.

29:12  Soko bobondeli ngai mpe bokumisi ngai na losambo, nakoyoka bino.

29:13  Soko boluki ngai, boluka ngai na motema moko, bokozwa ngai.

29:14  Nakosala ’te bokoka kozwa ngai. Maloba ma Yawe. Nakolongola bino o boombo, mpe nakosangisa bino ut’o bikolo mpe o bisika binso napanzaki bino ; nakozongisa bino o esika nabenganaki bino liboso. Yawe alobi bongo.

29:15  Solo, bokolobaka ’te « Yawe ape­si biso baprofeta o Babilon ».

29:16  Yawe alobi bongo mpo ya mokonzi oyo afandi o ngwende ya Davidi, bato banso bakofandaka o engumba eye, na mpe bandeko ba bino bakendeki na bino o boombo te.

29:17  Yawe wa bokasi bonso alobi boye : Nakotindela bango mopa­nga, nzala ekasi na bokono bobe ; nakokomisa bango lokola figi ibebi nye, iye ikoki koliama te.

29:18  Nakobengana bango na mopanga, na nza­la ekasi mpe na bokono bobe. Nakokomisa bango eloko ya nsomo o miso ma bato ba nse mobi­mba, eloko ya kobanga, eloko ya kokamwa mpe ya koseke o miso ma bato ba mikili minso esika nakopanza bango,

29:19  mpo bayokaki ngai te. Yawe alobi boye : Ata nalembeki te kotindela bango basaleli ba ngai baprofeta, bayokaki ba­ngo te. Maloba ma Yawe.

29:20  Boyoka liloba lya Yawe, bino banso bato bokangemi o boombo, baye nati­ndaki ut’o Yeruzalem kin’o Babilon !

29:21  Yawe wa bokasi bonso, Nza­mbe wa Israel, alobi bongo mpo ya Akab, mwana wa Kolaya, mpe mpo ya Sidkia, mwana wa Maseya, baye bakosakolaka makambo ma lokuta o nkombo ya ngai : nakokaba bango o maboko ma Nabukodonozor, mokonzi wa Babilon. Ye akoboma bango o miso ma bino.

29:22  Bato ba­nso ba Yuda bakangemi o boombo o Babilon bakotombela bato bobe, bakoloba : Yawe asala na yo lokola asalaki na Sidkia mpe na Akab, baye mokonzi wa Babilon atumbaki o móto.

29:23  Mpamba te, basalaki bokali na basi ba baninga mpe basakolaki makambo ma lokuta o nkombo ya ngai, ata natindaki bango te. Nayebi yango malamu, nazalaki komono yango. Maloba ma Yawe. »

29:24  Loba na Semaya wa Naklam :

29:25  Yawe wa bokasi bonso, Nzambe wa Israel, alobi boye : O nkombo ya yo moko otindelaki bato banso ba Yeruzalem, nganga Nzambe Sefania, mwana wa Maseya, mpe ba­nganga Nzambe banso monkanda na maloba maye :

29:26  « Yawe atiaki yo nganga Nzambe o esika ya nganga Nzambe Yoyada mpo ’te okengele Tempelo ya Yawe mpe otala baye banso bakosakolaka makambo ma bozoba, mpe okanga bango o boloko, minyololo o makolo.

29:27  Bongo mpo nini otiki Yeremia wa Anatot, oyo akomiyebisaka lokola profeta o kati ya bino ?

29:28  Atindeli biso mpe monkanda awa o Babilon na maloba maye : ‘Boombo bokoumela mi­ngi ! Botonga ndako mpe bofa­nda wana, bolona mboto o bilanga mpe bolia mbuma ya yango’. »

29:29  O ntango nganga Nzambe Sefania atangeli profeta Yeremia mo­nkanda mona,

29:30  Yawe alobi na Yeremia boye :

29:31  Yebisa bato banso bakangemi o boombo maloba maye : « Yawe alobi mpo ya Semaya wa Naklam : Awa Semaya asakoli lokola profeta ata natindaki ye te, mpe awa andimisi bino maloba ma lokuta,

29:32  Yawe alobi boye : Nakotu­mbola Semaya wa Naklam mpe libota lya ye mobimba : ata moko wa bango te akofanda o ntei ya bato baye mpo azwa bolamu boye nakopesa bato ba ekolo ya ngai, mpo atindi bato ’te batombokela Yawe. » Yawe alobi bongo.

Chapter 30

30:1  Yawe alobi na Yeremia maloba maye :

30:2  Yawe Nzambe wa Israel alobi : Koma maloba ma­nso nalobaki na yo o buku.

30:3  Mikolo mikoya nakobongisa ekolo ya Israel na Yuda, maloba ma Yawe. Nakozongisa bango lisusu o mokili napesaki bankoko ba bango, mpo ’te bakoma bankolo ba mokili mwa­ngo.

30:4  Boyoka maloba Yawe asakolaki ona Israel na Yuda :

30:5  Yawe alobi boye : Nayoki boleli bwa nsomo, bato bazali kobanga, bazali na kimia te.

30:6  Bongo botuna mpe botala : Mobali akoki nde kobota mwana ? Ntina nini nazali komono ’te babali banso batii maboko o loketo lokola mwasi azali kobota ? Ntina nini bozali na bilongi bya bobangi ?

30:7  Solo, mokolo monene moyei ! Mokolo moko mokokani na mwa­ngo te ! Ekomeli Yakob eleko ya mawa, kasi akobika.

30:8  Yawe alobi boye : O mokolo mona nakobuka ekangiseli o nki­ngo ya bango mpe nakokata mi­nyololo mya bango. Bakosalela ba­mpaya lisusu te,

30:9  kasi Israel na Yuda bakosalela Yawe Nzambe wa bango, mpe Davidi, mokonzi oyo nakopesa bango.

30:10  Yawe alobi : Yo mosaleli wa ngai, Yakob, obanga te, yo Israel, oyoka nsomo te. Nakobikisa yo na bana ba yo o mikili mosika, esika bokangemi o boombo ; bana ba Yakob bakozonga mpe bakofanda na boboto, bakozala kimia mpe moto moko akotungisa bango te.

30:11  Nazali na yo mpo ya kobikisa yo, maloba ma Yawe, nakosilisa bokasi bwa bikolo esika napanzaki yo. Nalingi kosilisa yo te, kasi nakotumbola yo na bosembo, soko okoki na etumbu, ekozanga te.

30:12  Yawe alobi boye : Okobika o mpasi ya yo te, bakoki kokaukisa mpota ya yo te.

30:13  Moto moko akosalisa yo te, mpo ya mpota ya yo monó mokomonono te.

30:14  Baye banso balingaki yo babosani yo, bakanisi yo lisusu te. Nabeti yo lokola monguna, napesi yo etumbu enene mpo ya mabe ma yo maike mpe masumu ma yo ebele.

30:15  Mpo nini ozali kolela awa ozoki ? Mpota ya yo ekoki kosila te ! Nasali yo maye manso mpo ya mabe mpe masumu ma yo maike.

30:16  Baye banso basilisi yo, bango moko mpe bakosila ; banguna ba yo banso bakokende o boombo ; baye babotoli yo biloko, bakobotolo bango mpe ; baye bayibeli yo, bakoyibela ba­ngo mpe.

30:17  Kasi ngai nakobikisa yo, nakokaukisa mpota ya yo. Maloba ma Yawe. Bazalaki kotanga yo Sion ‘Oyo babengani, oyo bapangani na ye te’.

30:18  Yawe alobi boye : Nakobongisa lisusu biema bya Yakob, nakoyokela ndako ya ye mawa. Bakotonga engumba lisusu o mabanga ma liboso, bakozongisa nda­ko kitoko o esika ezalaka.

30:19  Bakoyemba nzembo ya botondi mpe bakoganga na esengo, bakozala bato baike, motango mwa bango mokokutwa te, nakopesa bango lokumu, bakokinola bango lisusu te.

30:20  Bana ba bango bakozala lokola bazalaki liboso, bakosangana na boboto o miso ma ngai, nakotumbola banyokoli ba ba­ngo.

30:21  Ndeko wa bango moko akoya­ngela bango, mokonzi monene akobima se o libota lya bango moko. Nakobenga ye mpe akoya epai ya ngai. Nani abanga te kobeleme na ngai soko ngai moko nabengi ye te ? Maloba ma Yawe.

30:22  Bokozala bato ba ngai mpe ngai nakozala Nzambe wa bi­no.

30:23  Ekumbaki ya Yawe ekoya : nkanda lokola nkake ekokitela bato babe.

30:24  Nkanda ya Yawe ekolongwa te liboso ’te akokisa mikano mya ye. Bobele nsima okoyeba ntina ya yango.

Chapter 31

31:1  Yawe alobi boye : O nta­ngo ena nakozala Nzambe wa mabota manso ma Israel, mpe bango bakozala bato ba ngai.

31:2  Yawe alobi boye : Bato bakufaki na mopanga te, bazwi bolamu o eliki. Israel akozwa esika ya boboto.

31:3  Yawe amilakisi na ngai mosika : Nalingi yo na bolingi bwa seko, nakoboya yo mokolo moko te.

31:4  Nakotonga yo lisusu, Israel. Basi ba yo bakobete mbonda lisusu mpe bakobina lisusu na esengo.

31:5  Okolona lisusu nzete ya vino o ngomba ya Samaria, baye balonaki bakobuka mbuma ya yango.

31:6  Mokolo mokoya ’te bakengeli bakoganga o ngomba ya Efraim : « Boteleme ! Tobuta ngomba Sion, epai ya Yawe, Nzambe wa biso ! »

31:7  Mpo Yawe alobi boye : Boyemba nzembo ya esengo mpo ya ekolo ya Yakob ! Bosepela mpo ya moyangeli wa bikolo ! Boganga mpe bokumisa, bosakola boye : « Yawe abikisi bato ba ye, abikisi baye batikali o Israel. »

31:8  Ngai moto nakokamba bango ut’o Nordi, nakosangisa bango ut’o nsuka ya mokili : baye bakufa miso, baye bakufa ma­kolo, basi bazali na zemi mpe baye bazali kobota ; ezali limpinga linene lya bato bakozonga.

31:9  Bakendeki na mawa, kasi nakozongisa bango na esengo, nakokamba bango epai ya miluka mitondi na mai, bakolanda nzela semba, esika bakotuta libaku te, zambi nazali tata wa Israel, Efraim azali mwana wa ngai wa yambo.

31:10  E bino bato ba bikolo, boyoka liloba lya Yawe ! Bosangela bato ba bisanga mosika : « Oyo apanzaki Israel, akosangisa bango, akokengele bango lokola moke­ngeli akokengeleke etonga ya ye. »

31:11  Yawe asikoli bato ba Yakob, abikisi bango o maboko ma moto aleki ye na nguya.

31:12  Bakoya na migango mya esengo o ngomba Sion, bakoya ebele mpo ’te bayamba ma­kabo ma Yawe : mbuma ya mampa, vino ya sika, mafuta, mpata na ngombe ; bakolenda lokola bilanga bya ndu­nda batii mai, esika mai makozanga mokolo mo­ko te.

31:13  Bilenge basi bakobina na nsai, bilenge babali na babange bakosepela. Nakobongola mawa ma bango ese­ngo, nakobondo bango, nsima ya mpasi nakosepelisa bango.

31:14  Nakokabela banganga Nzambe mafuta ma mabonza, bato ba ngai bakotonda na makabo ma ngai. Maloba ma Yawe.

31:15  Yawe alobi boye : Boyoka boleli bwa mawa o Ra­ma : Rakele moto aleli bana ba ye. Alingi te ’te babondo ye, mpo bana ba ye bazali lisusu te.

31:16  Yawe alobi boye : Tika kolela, longola mai o miso ! Mpasi ya yo ekobongwana esengo, bana ba yo bakozonga ut’o mokili mwa banguna. Maloba ma Yawe.

31:17  Okoki kotia elikya na mikolo mikoya, maloba ma Yawe, bana ba yo bakozonga o ekolo ya bango.

31:18  Nayoki bokimeli bwa ba-Efraim : « Opesaki ngai etumbu mpe na­ndimaki yango, lokola mwana wa ngombe ezangi botosi. Sala ’te nazonga, Yawe, mpo ozali Nzambe wa ngai !

31:19  Nabongoli motema, nayoki motema mawa, nayebi ’te nasali mabe, nayoki mawa manene, nayoki nsoni mpe nasambwi, namemi masumu ma bolenge bwa ngai ! »

31:20  Efraim azali mwana wa ngai wa bolingo, mwana oyo nakolingaka mingi ; mbala inso nakaneli ye, nakanisi ye mpe o kati ya motema nayokeli ye lisusu ngolu ; nalingi ye mingi mpenza. Maloba ma Yawe.

31:21  Tia bilembo, pika makonzi maye makolakisa nzela, tala malamu o nzela nini ozali kokende. Zonga, elenge mwasi wa Israel, zonga o bingumba bya yo !

31:22  Elenge mwasi motomboki, mikolo boni okoyengayenga naino ? Yawe akobimisa likambo lya sika o nse : mwasi akoluka bolongani wa ye.

31:23  Yawe wa bokasi bonso, Nza­mbe wa Israel, alobi boye : Mokolo nakobongisa bango lokola bazalaki liboso, bakoloba lisusu o bingumba binso bya Yuda : « Yawe abenisa yo, yo ndako ya bosembo, yo ngomba esantu ! »

31:24  O ekolo ena bato banso ba Yuda bakokende kofanda, bato ba bi­ngu­mba, ná baye bakokataka bila­nga ná baye bakobokoloko bibwele.

31:25  Nakolendisa baye balembi mpe nakomelisa baye bakufi na mposa ya mai.

31:26  Na yango nalamuki mpe namoni ’te mpongi elengi ekangaki ngai.

31:27  Yawe alobi boye : Mikolo mikoya nakotia lisusu bato na nyama ebele o Israel mpe o Yuda.

31:28  Liboso nazalaki kopikola mpe kokata, koboma, kosilisa mpe koyokisa mpasi ; sikawa nakokengele bango mpo bakoka kotonga mpe kolona. Maloba ma Yawe.

31:29  O mikolo mina bakoloba lisusu te : « Bato baliaki mbuma ya vino ibesu, mpe mino ma bana makomi ngai ! »

31:30  Soki te ! Moto na moto akokufa mpo ya mabe ma ye moko. Moto nyonso akolia mbuma ya vino ibesu, mino ma ye moko makokoma ngai.

31:31  Yawe alobi boye : Mikolo mikoya nakokata bondeko bwa sika na mabota ma Israel mpe ma Yuda.

31:32  Bondeko boye bokokesene na bo­ndeko nakataki na bankoko ba bango, ntango nasimbaki bango na loboko mpo ya kobimisa bango o Ezipeti. Bango babomaki bondeko bona, ata nazalaki mokonzi wa ba­ngo. Maloba ma Yawe.

31:33  Yawe alobi : Tala bondeko nakokata na bato ba Israel nsima ya mikolo mina : Nakotia Mobeko mwa ngai o mitema mya bango, mokokomama wana. Ngai nakozala Nzambe wa ba­ngo, mpe bango bakozala bato ba ngai.

31:34  Bongo moto bakosengela ko­teyana lisusu te ’te « Bomeka koyeba Yawe ! », mpo banso, bana na bakolo, bakoyeba ngai. Maloba ma Yawe. Nakolimbisa mabe ma ba­ngo, mpe nakokanisa masumu ma bango lisusu te.

31:35  Yawe moto alobi bongo, Oyo akeli mwese mpo ’te monge-nge na moi, sanza na minzoto mpo ’te mi­nge­nge na butu, oyo akoningisaka mai ma mbu mpe akoyokisaka lokito la mbo­nge : nkombo ya ye : Yawe wa bokasi bonso.

31:36  Soko ngai Yawe natiki kotala makambo mana, –maloba ma Yawe !– bato ba ngai ba Israel bakozala ekolo ya ngai lisusu te.

31:37  Yawe alobi boye : Lokola bakoki komeka bolai bwa likolo te, bosanda bwa makonzi ma nse mpe te, se bongo ngai nakoki koboya Israel seko te, ata asali mabe nini. Maloba ma Yawe.

31:38  Yawe alobi : O mikolo mikoya bakotonga engumba ya Yawe lisusu, ut’o linongi lya Kananel kin’o Ezibeli ya Litumu.

31:39  Bakotanda nsi­nga ekende semba kin’o ngomba Gareb mpo ya kokende epai ya Goa.

31:40  Lobwaku mobimba la bibembe mpe mputulu ya makala, manso mazali zongazonga na lo­bwaku la Kedron kin’o litumu lya Ezibeli ya Farasa epai ya Esti : ina inso ikozala mabelé masantu ma Yawe. Bakobuka to bakoboma ya­ngo mokolo moko lisusu te.

Chapter 32

32:1  O mobu mwa zomi mwa bokonzi bwa Sedekia o Yuda, o mobu mwa zomi na mwambe mwa bokonzi mwa Nabukodonozor, Yawe alobi na Yeremia.

32:2  O eleko basoda ba Nabukodonozor bazalaki kozinga Yeruzalem, Yeremia akangemi o boloko, o lopango la bakengeli penepene na ndako ya mokonzi wa Yuda.

32:3  Sedekia, mokonzi wa Yuda akangaki ye o boloko mpo asakolaki ’te : « Yawe alobi boye : Nakokaba engumba eye o maboko ma mokonzi wa Babilon.

32:4  Sedekia, mokonzi wa Yuda, akokima maboko ma ba-Kaldea te, kasi bakokaba ye o maboko ma moko­nzi wa Babilon mpe ye moko akokoka kosolola na ye.

32:5  Mokonzi ako­kende na Sedekia o Babilon, esika akotikala tee o mokolo nakoya kotala ye. Maloba ma Yawe. Soko okobundisa ba-Kaldea, okolonga te ! »

32:6  Yoka maloba ma Yeremia : Yawe alobi na ngai :

32:7  Tala awa Kananel, mwana wa noko wa yo Salum, akoya kotuna yo : « Olingi kosomba elanga ya ngai o Anatot ? Yo moto okoki kosomba yango mpe kokoma nkolo wa yango. »

32:8  Bongo, lokola Yawe alobaki, Kananel, mwana wa noko wa ngai akomi epai ya ngai o lopango la bakengeli ba boloko, alobi na ngai : « Somba elanga ya ngai o Anatot, o mokili mwa Benyamin ; ozali na likoki lya kosomba yango. » O ntango ena nayebaki ’te ezalaki etinda ya Yawe.

32:9  Nasombi elanga ena ya Kananel, mwana wa noko wa ngai o Anatot, mpe nafuti ye mosolo : mitako mya palata zomi na nsambo.

32:10  Nakomi monkanda mwa bosombi, nakangi mwango mpe natii elembo o miso ma banzeneneke babale ; nameki mpe bozito bwa mosolo.

32:11  Nsima nakamati monkanda mwa boso­mbi, moye natiaki elembo engebene na mibeko, mpe moye moka­nge­mi te.

32:12  Napesi monkanda mwa bosombi o maboko ma Baruk, mwana wa Neria, nkoko wa Maseya, o miso ma Kananel, mwana wa noko wa ngai, mpe o miso ma banzeneneke, baye batiaki nkombo o mo­nkanda, mpe o miso ma bato banso ba Yuda bazalaki o lopango la bakengeli ba boloko.

32:13  O miso ma bango napesi Baruk etinda eye, nalobi :

32:14  « Yawe wa bokasi bonso, Nzambe wa Israel, alobi boye : Kamata minkanda miye, monkanda mwa bosombi, moye mozali na elembo mpe moye mokangemi te, mpe tia myango o mbeki ya mabelé mpo ’te mibeba noki te,

32:15  zambi Yawe wa bokasi bonso, Nzambe wa Israel, alobi ’te : O mokili moye bato bakosomba naino ndako, bilanga mpe bilanga bya nzete ya vino. »

32:16  Ntango napesi Baruk, mwana wa Neria, monkanda mwa boso­mbi, nasambeli Yawe losambo loye :

32:17  « E Mokonzi Yawe, yo moto okelaki likolo na nse na nguya ya yo enene mpe na bokasi bwa loboko la yo. Likambo lyoko lileki yo na bo­kasi te.

32:18  Okolakisaka bolamu na ba­to nkoto na nkoto, kasi okotu­mbolaka bana na bankoko mpo ya masumu ma batata ba bango. E Nza­mbe monene mpe wa bokasi, nkombo ya yo : Yawe wa bokasi bo­nso.

32:19  Mikano mya yo mikolakisaka bonene bwa yo, mpe bikela bya yo nguya ya yo. Okomonoko nzela inso ya bato mpo ya kozongisela moto na moto engebene na eza­lela mpe na misala mya ye !

32:20  Yo moto osalaki makamwisi manene o mokili mwa Ezipeti, mpe tee lelo bilembo bikomononoko o Israel.

32:21  Obimisaki bato ba ekolo ya yo Israel o mokili mwa Ezipeti na bile­mbo mpe na makamwisi, na bokasi bwa loboko la yo mpe na nsomo enene.

32:22  Na nsima opesi bango mokili moye olakelaki bankoko ba ba­ngo, mokili motondi na mabéle ma ngombe mpe na mafuta ma nzoi.

32:23  Bango bayei awa mpe bakomi ba­nkolo ba mabelé, kasi baboyi koyoka yo, bazalaki kolanda Mobeko mwa yo te, mpe baboyi kosala maye otindi bango ; yango wana oyokisi bango mpasi eye.

32:24  Botala, ba­nguna basili kobongisa manso mpo ’te babotolo engumba. Elingi ekweya o maboko ma ba-Kaldea babu­ndisi yango. Etikali moke bakufa na mopanga, na nzala ekasi mpe na bokono bobe. Makambo olobaki makosalema, mpe ozali komono mango.

32:25  Nzokande yo Yawe olobi na ngai : « Somba elanga mpe futa mosolo o miso ma banzeneneke », awa engumba elingi ekweya o maboko ma ba-Kaldea. »

32:26  Yawe alobi na ngai boye :

32:27  Tala, nazali Yawe Nzambe wa bato ba­nso ; likambo lyoko lileki ngai na bokasi te !

32:28  Yango wana Yawe alobi : Nakokaba engumba eye o maboko ma ba-Kaldea mpe ma Nabukodonozor, mokonzi wa Babilon ; ye akobotolo yango.

32:29  Ba-Kaldea bakobundisa engumba eye, bakokoto wana mpe bakotumba ndako inso, esika bato babonzelaki Baal mpaka ya malasi o motondo mwa ndako, mpe basopelaki banzambe basusu mabonza ma bomeli, mpo ya kotumola ngai.

32:30  Banda bolenge, bana ba Israel mpe ba Yuda basali se masepelisi ngai te. Solo, bana ba Israel bayokisi ngai nkanda na misala mya maboko ma bango. Maloba ma Yawe.

32:31  Solo, engumba eye eyokisi ngai nkanda enene banda mokolo batongi yango tee lelo ; nakolongola yango o miso ma ngai.

32:32  Na mabe bato ba Israel mpe ba Yuda banso basali batumoli ngai ba­nso : bakonzi, bankumu, banga­nga Nzambe, baprofeta na bato banso ba Yuda mpe ba Yeruzalem.

32:33  Bapesi ngai mokongo, balakisi ngai elongi te ; ntango nazalaki koteya bango mokolo na mokolo, ata moko te azalaki kotia matoi na mateya ma ngai.

32:34  Bakotisi bikeko bya ba­nzambe ba lokuta o Tempelo eye ezali na nkombo ya ngai, mpe basa­ntoli yango.

32:35  Batongeli Baal bitu­mbelo o lobwaku la Ben-Inom, mpe bazalaki kotumbela Molok bana ba­bali na bana basi ba bango. Ngai natindaki bango makambo maye te ; mokolo moko te nalingaki te ’te babenda bato ba Yuda o nzela ya masumu na likambo liye lya nsomo.

32:36  Mpo ya engumba eye olobaki : « Etikali moke engumba ekweya o maboko ma mokonzi wa Babilon, mpe bato bakokufa wana na mopa­nga, na nzala ekasi mpe na bokono bobe », Yawe, Nzambe wa Israel, alobi sikawa :

32:37  Nakosangisa bango ut’o bikolo binso napanzaki bango na nkele mpe na nkanda enene, mpe nakozongisa bango o esika eye mpo ’te bafanda wana kimia.

32:38  Bakozala bato ba ngai mpe ngai nakozala Nza­mbe wa bango.

32:39  Nakokomisa bango banso se motema moko mpe mayele moko, mpo ’te bakumisa bobele ngai ntango inso, mpo ya bolamu bwa bango moko mpe bwa bana ba bango.

32:40  Nakokata na ba­ngo bondeko bwa seko : nakoboya bango mokolo moko lisusu te, nakosala bango se bolamu, mpe nakotia bobangi o mitema mya bango mpo ’te balongwa epai ya ngai lisusu te.

32:41  Nakosepela na bosali bango bolamu, na motema mobimba mpe na mayele ma ngai manso nakopika bango makasi o mokili moye.

32:42  Yawe alobi boye : Se lokola natinde­laki bato baye mpasi ya nsomo, nakopesa bango bolamu boye nalakeli bango.

32:43  Bakosomba bilanga o ekolo eye bolobi ’te ezali mopotu, ezali na bato to nyama lisusu te, ekwei o maboko ma ba-Kaldea.

32:44  Solo, na mosolo bakosomba bila­nga, bakokoma monkanda mwa bo­sombi, bakotia elembo o miso ma banzeneneke, o mokili mwa Benyamin, penepene na Yeruzalem, o bingumba bya Yuda, bya Ngo­mba, bya mokili mwa Bisobe mpe bya Negeb. Nakobo­ngisa bango lokola bazalaki liboso. Maloba ma Yawe.

Chapter 33

33:1  O ntango Yeremia akangemaki naino o lopango la bakengeli ba boloko, Yawe alobi na ye mbala ya ibale maloba maye :

33:2  Yawe oyo akeli nse mpe abongisi yango mpo ezala makasi, nkombo ya ye Yawe, alobi boye :

33:3  Belela ngai mpe nakoyanola yo ; nakoyebisa yo makambo manene mabo­mbami, maye okoki koyeba te.

33:4  Solo, Yawe Nzambe wa Israel alobi boye mpo ya ndako inso ya engumba eye mpe mpo ya ndako inene ya bakonzi ba Yuda, iye ibukani

33:5  na ba-Kaldea ; eto­ndi na bibembe bya bato, mpo na nkanda enene nabombeli engu­mba eye elongi ya ngai, mpamba te, mabe ma bango maleki boike.

33:6  Sikawa nakoyela bango monó mpe nakopesa bango libiki : nakobikisa bango mpe nakokabela bango bolamu mpe boboto.

33:7  Nakobongisa makambo ma bato ba Yuda mpe ba Israel mpo ’te bakoma lisusu lokola liboso.

33:8  Nakopetola bango na masumu ma bango manso ; nakolimbisa bango mabe manso basalaki ngai ntango bato­mbokeli na ngai.

33:9  Yeruzalem ekokoma ntina ya litu­ndu, ya esengo, ya lokumu mpe ya nkembo ya ngai o miso ma bato ba bikolo binso bya nse. Ntango bakoyoka malamu manso nakosala yango, bakoyoka nsomo mpe bakolenge mpo ya bolamu mpe mpo ya boboto nakopesa yango.

33:10  Yawe alobi boye : O esika eye bino bokolobaka ’te ekomi mopotu mozangi bato na nyama, o bingu­mba bya Yuda mpe o balabala ya Yeruzalem ibebi, esika bato na nyama izali te,

33:11  bokoyoka lisusu migango mya esengo, nzembo ya mobali abandi mwasi mpe maloba ma esengo ma mwasi babandi ye, mpe nzembo ya baye bayei na mabonza o Tempelo ya Yawe mpo ya koto­ndo ye na maloba maye : « Totondo Yawe wa bokasi bonso, zambi Yawe akosalaka malamu, bolingi bwa ye, bolingi bwa seko. » Yawe alobi : Nakokomisa mokili mona lisusu lo­kola mozalaki liboso. Maloba ma Yawe.

33:12  Yawe wa bokasi bonso alobi : O mokili moye mobebi, esika bato na nyama izali lisusu te, bingumba bikozala na bisobe bikotonda na matiti esika bakengeli ba mpata bakoleisa mpata ya bango.

33:13  O bingu­mba bya Ngomba, bya Bisobe mpe bya Negeb, o mokili mwa Benyamin, penepene na Yeruzalem mpe o bingumba bya Yuda mpata ikoleka lisusu o miso ma moto akotanga ya­ngo. Maloba ma Yawe.

33:14  Yawe alobi boye : Mikolo mikoya nakokokisa bilako nalakelaki ma­bota ma Israel na Yuda.

33:15  O mikolo mina, o ntango ena, nakobimisa eboto o libota lya Davidi, eboto ya bosembo, oyo akoyangela ekolo na bose­mbo mpe na bosolo.

33:16  O mikolo mina Yuda akobika mpe Yeruzalem ekozala kimia. Bakotanga Engumba eye : ‘Yawe, bosembo bwa biso’.

33:17  Yawe alobi boye : Libota lya Davidi likozanga mokitani te oyo akofanda o ngwende ya Israel.

33:18  Mi­kolo minso bankoko ba Levi bakoteleme o boso bwa ngai mpe bakobonzela ngai miboma na mabonza ma bolei na mabonza ma mokolo na mokolo.

33:19  Nsima Yawe alobi na Yeremia :

33:20  Yawe alobi boye : Soko moto moko akoboma bondeko tokataki, biso na moi mpe na butu, bongo moi na butu bikolandana lisusu te,

33:21  bo­ndeko bwa ngai na Davidi, mosaleli wa ngai, bokobeba mpe, bo­ngo moko wa bankoko ba ye akozala mokonzi lisusu te ; se bongo na ba-Levi, banganga Nzambe baye bakosalelaka ngai.

33:22  Lokola bakoki kotanga minzoto ebele te, zelo o libongo lya mbu mpe te, nakosala ’te bankoko ba Davidi, mosaleli wa ngai, mpe ba-Levi bakosalelaka ngai bakoma ebele.

33:23  Yawe alobi na Yeremia maloba maye :

33:24  Oyoki te ’te bato bakolobaka « Yawe aponoki mabota mana mabale, kasi sikawa asili kobwaka mango » ? Bakokinolaka bato ba ngai bongo ; o miso ma bango bazali lisusu ekolo te.

33:25  Yawe alobi boye : Lokola nakataki bondeko na moi mpe na butu, mpe napesaki likolo na nse mibeko,

33:26  nakobwaka ba­nko­ko ba Yakob mpe ba Davidi, mosaleli wa ngai, te ; nakotika te ko­pono moko wa bankoko ba ye afa­nda o ngwende mpo ’te ayangela bankoko ba Abarama, ba Izaka mpe ba Yakob. Nakosala ’te bakoma lokola bazalaki liboso, nakoyokela bango ngolu.

Chapter 34

34:1  Yawe alobi na Yeremia o ntango Nabukodonozor, mo­konzi wa Babilon, na limpinga lya ye mobimba mpe liye lya bako­nzi banso ba bikolo binso bya mokili mwa ye bazalaki kobundisa Yeru­zalem mpe bingumba bya penepene.

34:2  Yawe Nzambe wa Israel alobi boye : Kende koyebisa Sedekia, mokonzi wa Yuda : Yawe alobi : Nakokaba engumba eye o maboko ma mokonzi wa Babilon, mpe ye akotumba yango.

34:3  Okokima maboko ma ye te, kasi bakokanga yo mpe bakokaba yo na ye. Okoteleme o miso ma ye mpe okosolola na ye. Na nsima okokende o Babilon.

34:4  Kasi yoka liloba lya Yawe, yo Sedekia, mokonzi wa Yuda : Mpo ya yo Yawe alobi boye : Okokufa na mopanga te,

34:5  okokufa se na boboto. Lokola bazalaki kotumbela ba­nkoko ba yo, baye bazalaki bako­nzi liboso lya yo, mpaka ya malasi, se bongo bakotumbela yo mpaka ya malasi, bakoyembela yo mpe nze­mbo ya boleli ‘Mawa e, moko­nzi wa ngai !’ Ngai moto nayebisi bongo. Maloba ma Yawe.

34:6  Profeta Yeremia asakoli maloba mana manso o boso bwa Sedekia, mokonzi wa Yuda o Yeruzalem,

34:7  o ntango basoda ba mokonzi wa Babilon bazalaki kobunda mpo ya kobotolo Yeruzalem mpe bingu­mba bya Yuda, Lakis na Azeka, mpo bakokaki na bibombamelo biye naino te.

34:8  Yawe alobi na Yeremia liloba liye o ntango Sedekia ayokanaki na bato ba Yeruzalem ’te bakopesa baombo bonsomi :

34:9  moto na moto apesa baombo ba ye ba-Ebrei, babali na basi, bonsomi, moto moko atikala na ndeko wa ye mo-Yuda bo moombo lisusu te.

34:10  Bankumu na bato banso bayokanaki ’te bakotika baombo, bandimi kobikisa baombo ba bango, babali na basi.

34:11  Ka­si na nsima batiki mokano mona, bakangi lisusu babali na basi o boombo mpe batindi bango ’te basalela bango lisusu.

34:12  Bongo Yawe alobi na Yeremia maloba maye :

34:13  Ya­we Nzambe wa Israel alobi : O ntango nabimisaki bankoko ba bino o mokili mwa Ezipeti, esika bazalaki baombo, nakataki na bango bondeko boye :

34:14  « Nsima ya mibu nsambo inso moko moko wa bino apesa bonsomi na ndeko wa ye mo-Ebrei oyo asengelaki komiteka na ye. Akozala moombo wa yo mibu motoba, na nsima okozongisela ye bonsomi. » Kasi bankoko ba bino bayokaki ngai te, mpe batosaki ngai te.

34:15  Nzokande na nsima bobongolaki mitema, mpe bosalaki maye mazali semba o miso ma ngai : bosakolaki libiki lya baninga mpe bolayaki ndai o miso ma ngai o Tempelo eye ezali na nkombo ya ngai.

34:16  Kasi bobongoli makanisi ma bino lisusu, bosantoli nkombo ya ngai, bozongisi o boombo babali na basi, baye bozongiselaki bonsomi mpe botindi bango na makasi ’te bakoma baombo ba bino lisusu.

34:17  Yango wana Yawe alobi boye : Botosi ngai te awa boboyi kopesa ndeko to mo­ninga wa bino bonsomi. Tala bonsomi ngai nakopesa bino : Nakotindela bino mopanga, nzala ekasi na bokono bobe. Yawe alobi bo­ngo. Nakokomisa bino bo ndakisa ya nsomo o miso ma bikolo binso bya nse.

34:18  Bato baye babebisi bo­ndeko bwa ngai, batosi mibeko mya bondeko bona te lokola balayaki o miso ma ngai, nakosala na bango lokola na mwana wa ngo­mbe, eye bakokata na biteni bibale mpo baleka o kati ya biteni bina.

34:19  Bankumu ba Yuda mpe ba Yeruzalem, ba-eniki, banganga Nzambe na bakolo ba mboka banso baleki o kati ya biteni bibale bya mwana wa ngombe,

34:20  nakokaba bango o maboko ma ba­nguna balingi koboma bango ; bibembe bya bango bikozala bilei bya ndeke ya likolo mpe bya nyama ya zamba.

34:21  Nakokaba mpe Sedekia, mokonzi wa Yuda, na ba­nku­mu ba ye o maboko ma ba­nguna balingi koboma bango, mpe o maboko ma basoda ba mokonzi wa Babilon, baye basili bakei mosika na bino.

34:22  Yawe alobi boye : Tala, nakotinda bango ’te bazongela bino, babundisa, babotolo mpe batumba engu­mba eye. Nakokomisa bingumba bya Yuda mopotu, esika moto moko akofanda lisusu te.

Chapter 35

35:1  O ntango ya Yoyakim, mwana wa Yozia, mokonzi wa Yuda, Yawe alobi na Yeremia maloba maye :

35:2  « Kende koluka bato ba libota lya Rekab ; solola na bango mpe yaka na bango o Te­mpelo ya Yawe mpo ’te omelisa bango vino. »

35:3  Bongo nakei koluka Yazanya, mwana wa Yirmeya, nkoko wa Kabasinya, bandeko na bana banso ba libota lya ye, ba-Rekab banso.

35:4  Nayei na bango o Tempelo ya Yawe, o ndako ya Ben-Yokanan, mwana wa Yigdalia, moto wa Nza­mbe. Ndako eye ekangani na ndako ya bankumu mpe ezali likolo lya ndako ya Maseya, mwana wa Salum, mokengeli wa Tempelo.

35:5  Natii mbeki mpe nkeni iye itondi na vino o boso bwa ba-Rekab mpe nalobi na bango : « Bomele vino ! »

35:6  Kasi bango bayanoli : « Biso tokomeleke vino te, mpo nkoko wa biso Yonadab, mwana wa Rekab, apesi ekila eye : ‘Bokoki komele vino te, bino te, bana ba bino mpe te.

35:7  Se bongo bokoki kotonga ndako te, kolona mboto te, kolona nzete ya vino te, to kozala na eloko ya bino moko te ; bomoi bwa bino mobimba bokofanda o biema, mpo ’te boumela mikolo mingi o mabelé esika bofandi sikawa’.

35:8  Biso totosi makambo manso nkoko wa biso Yonadab, mwana wa Rekab, ati­ndaki ; tomeli vino mokolo moko te, biso te, basi ba biso te, bana babali na basi ba biso mpe te.

35:9  Toto­ngi ndako te, tozali na nzete ya vino te, elanga ya kolona mbuma te ;

35:10  tokofandaka o biema. Totosi mpe tolandi mibeko minso nkoko wa biso Yonadab apesaki.

35:11  Kasi mokolo Nabukodonozor, mokonzi wa Babilon, ayei kokoto o ekolo eye, tolobani : ‘Tokoto o Yeruzalem mpo tobika o maboko ma basoda ba-Kaldea mpe ma baye ba Aram’. Yango wana tofandi o Yeruzalem tee sikawa. »

35:12  Yawe alobi na Yeremia maloba maye :

35:13  Yawe wa bokasi bonso, Nza­mbe wa Israel alobi boye : Ke­nde koyebisa bato ba Yuda mpe ba Yeruzalem : Boyebi te ’te bosengeli kotosa maloba ma ngai ? Maloba ma Yawe.

35:14  Bango batosi maloba ma Yonadab, mwana wa Rekab. Ye apekisaki bana ba ye bamele vino te, tee lelo bameli yango te ; batosi bongo mobeko mwa nkoko wa ba­ngo. Kasi ngai nalembeki te koloba na bino, nzokande boyoki ngai te.

35:15  Nazalaki kotindela bino basaleli ba ngai baprofeta mbala na mbala, kolembe te, bayebisa bino : Bolo­ngwa o nzela ebe, bobongisa misala mya bino, bolanda mpe bokumisa banzambe basusu te ; bongo bokofanda seko o mokili napesaki bino na bankoko ba bino ; kasi botiaki matoi te, botosaki ngai te.

35:16  Bana ba Yonadab, mwana wa Rekab, batosaki mobeko mwa nkoko wa ba­ngo, kasi bato ba ekolo eye batosi ngai te.

35:17  Yango wana Yawe wa bokasi bonso, Nzambe wa Israel, alobi boye : Nakotindela bato ba Yuda mpe ba Yeruzalem mabe manso nakanelaki bango, mpo nalobaki na bango, kasi batosaki ngai te ; nabe­ngaki bango, kasi bazongisaki eyano te.

35:18  Yeremia alobi na bato ba libota lya Rekab : « Yawe wa bokasi bonso, Nzambe wa Israel, alobi boye : Awa bokotosaka mobeko mwa nkoko wa bino Yonadab, bokolandaka bitinda bya ye binso mpe bokosalaka manso atindaki bino,

35:19  Yawe wa bo­kasi bonso, Nzambe wa Israel, alobi boye : Yonadab, mwana wa Rekab, akozala ntango inso na mokitani oyo akosalela ngai. »

Chapter 36

36:1  O mobu mwa minei mwa bokonzi bwa Yoyakim, mwana wa Yozia, mokonzi wa Yuda, Yawe alobi na Yeremia maloba maye :

36:2  Kamata monkanda mpe koma maloba manso nalobaki na yo mpo ya Israel, Yuda na bikolo bisusu uta mokolo nabandaki koloba na yo, o ntango ya Yozia, tee lelo.

36:3  Mbele soko bayoki mabe manso nakani kosala bango, bato ba libota lya Yuda bakolongwa o nzela ebe, mpe bongo nakoka kolimbisa mabe na masumu ma bango.

36:4  Yeremia abe­ngi Baruk, mwana wa Neria. Bongo akomisi ye maloba manso Yawe alobaki na Yeremia.

36:5  Yeremia apesi Baruk etinda eye : « Ngai nakoki kokende o Tempelo ya Yawe te.

36:6  Kasi yo kende kota­ngela bato maloba manso ma Yawe, maye nakomisi yo ; tanga mango o Tempelo ya Yawe o mokolo mwa bolali nzala. Tanga mango na bato banso ba Yuda bauti o bingumba bya bango.

36:7  Mbele bakobondela Yawe mpe bakobongola mitema mpe bakolongwa o nzela ya masumu, zambi Yawe ayokeli bango nkanda enene. »

36:8  Baruk, mwana wa Neria, asali lokola profeta Yeremia atindaki ye ; o Tempelo atangi maloba ma Yawe o buku.

36:9  O mobu mwa mitano mwa bokonzi bwa Yoyakim, mwana wa Yozia, o Yuda, o sanza ya libwa, babe­ngi bato banso ba Yeruzalem mpe ba bingumba bya Yuda balala nzala.

36:10  Baruk atangi o buku maloba ma Yeremia o Tempelo ya Yawe. Ezalaki o ndako ya Gema­rya, mwa­na wa Safan, mokomi minka­nda, o eteni ya likolo penepene na ‘Ezibeli ya Sika’ ya Tempelo ya Yawe : bato banso bayoki yango.

36:11  Nzokande, eyoki Mikaye, mwana wa Gemarya, nkoko wa Safan, maloba ma Yawe makomami o buku,

36:12  akei o ndako ya mokonzi epai ya mokomi minkanda. Kuna ba­nkumu banso bazalaki kosangana likita : mokomi minkanda Elisama, Delaya mwana wa Semaya, Elnatan mwana wa Akbor, Gemarya mwana wa Safan, Sidkiya mwana wa Kananya, na bankumu basusu ba­nso.

36:13  Mikaye ayebisi bango maloba manso ayokaki o ntango Baruk atangi mango o miso ma bato ba­nso.

36:14  Bongo bankumu banso motema moko batindi Yeudi mwana wa Netanya, na Semaya mwana wa Kusi, epai ya Baruk, bayebisa ye : « Kamata monkanda otangeli bato mpe yaka na mwango awa. » Baruk, mwana wa Neria, akamati monka­nda mpe akei epai ya bango.

36:15  Balobi na ye : « Fa­nda mpe tangela biso monkanda. » Baruk atangeli bango.

36:16  Eyoki bango maloba mana ma­nso, babangi mingi, batalani mpe balobi na Baruk : « Tosengeli koyebisa mokonzi makambo mana noki. »

36:17  Batuni Baruk : « Yebisa biso : maloba mana manso okomaki ma­uti wapi ? »

36:18  Baruk ayanoli ba­ngo : « Yeremia ayebisaki ngai makambo mana manso, mpe ngai nakomi mango na mai ma monkanda o buku eye. »

36:19  Bankumu balobi na Baruk : « Bino na Yeremia, bokende komibomba ; moto moko ayeba te epai wapi bokobombama. »

36:20  Na nsima batiki buku o ndako ya Elisama, mokomi minkanda, bakei epai ya mokonzi, o ndako ya ye moko ; bayebisi ye makambo ma­nso malekaki.

36:21  Mokonzi atindi Yeudi akende kokamata buku. Yeudi atangi ya­ngo o miso ma mokonzi mpe ma bankumu banso bazalaki wana.

36:22  Mokonzi azalaki o eteni eye akofandaka o eleko ya mpio ; ezalaki o sanza ya libwa mpe móto mozalaki kopela o etumbelo.

36:23  Mbala inso Yeudi asilisi kotanga biteni bisato to binei mokonzi akati yango na mwa mbeli ya mokomi minkanda mpe abwaki yango o móto. Asali bongo tee buku mobimba etumbami.

36:24  Eyoki mokonzi na basaleli ba ye maloba mana, ata moko te aba­ngi to apasoli bilamba bya ye.

36:25  Nzo­kande Elnatan, Delaya na Gemarya babondelaki mokonzi ’te atumba buku te, kasi mokonzi ayoki bango te.

36:26  Atindi Yerameel mwana wa mokonzi, na Seraya mwana wa Ariel, na Selemya mwana wa Abdeel, bakanga mokomi monka­nda Baruk na profeta Yeremia, kasi Yawe abombi bango.

36:27  Awa mokonzi atumbi buku na maloba maye Yeremia atangelaki Baruk mpo akoma mango, Yawe alobi na Yeremia maloba maye :

36:28  « Kamata monkanda mosusu, koma maloba makomamaki o buku ya liboso, eye Yoyakim, mokonzi wa Yuda, atumbaki.

36:29  Loba na Yoyakim, mokonzi wa Yuda : Yawe alobi boye : Yo moto otumbi buku eye mpe olobi : « Mpo nini okomi : Nte­mbe te, mokonzi wa Babilon akoya kobebisa ekolo eye mpe akosilisa bato na nyama ? »

36:30  Yango wana Yawe alobi mpo ya Yoyakim, moko­nzi wa Yuda : Ata mwana moko wa ye te akofanda lisusu o ngwe­nde ya Davidi. Ebembe ya ye ekotikala o libanda, o ntango ya molunge mwa moi mpe ya mpio ya butu.

36:31  Nakotumbola ye na bana na basaleli ba ye mpo ya masumu ma bango. Nakotindela bango na bato ba Yeruzalem mpe ba Yuda mpasi inso nakanelaki bango, zambi baboyi koyoka ngai. »

36:32  Yeremia akamati monkanda mo­susu mpe apesi mwango na mokomi minkanda Baruk, mwana wa Neria. Yeremia akomisi Baruk maloba ma­nso ma buku eye Yoyakim, mokonzi wa Yuda, atumbaki ; abakisi maloba maike ma motindo mona.

Chapter 37

37:1  Sedekia, mwana wa Yozia, akomaki mokonzi o esika ya Konia, mwana wa Yoyakim. Na­bukodonozor, mokonzi wa Babilon, aluboli ye mokonzi o ekolo ya Yuda.

37:2  Nzokande, ye na basaleli ba ye na bato banso ba ekolo baboyaki koyoka maloba maye Yawe alobaki na monoko mwa profeta Yeremia.

37:3  Mokonzi Sedekia atindi Yukal, mwana wa Selemya, na nganga Nza­mbe Sefanya, mwana wa Maseya, epai ya profeta Yeremia bayebisa ye : « Sambela Yawe Nzambe wa biso aya kosalisa biso. »

37:4  Ezalaki o eleko Yeremia azalaki kotambola o kati ya bato, naino bakangaki ye o boloko te.

37:5  O ntango ena basoda ba Farao balongwaki o Ezipeti ; awa ba-Kaldea bayokaki nsango ena, batikaki kozinga Yeruzalem.

37:6  Yawe alobi na Yeremia maloba maye :

37:7  Yawe Nzambe wa Israel alobi : Na mokonzi wa Yuda, oyo atindaki bino mpo ya kotuna ngai bopesa eyano eye : « Basoda ba Farao bayei kosalisa bino bakozonga o mokili mwa Ezipeti.

37:8  Na nsima ba-Kaldea bakozonga mpo ya kobundisa, kobotolo mpe kotumba engumba eye. »

37:9  Yawe alobi : Bomikosa te, bomilobela te : « Ba-Kaldea balongwi epai ya biso seko. » Bakolongwa te !

37:10  Ata bokosilisa basoda banso ba-Kaldea, baye bazali kobu­ndisa bino sikawa, ata ekotikala se mwa bato bazoki o etumba, bakobima o biema bya bango mpo ya kotumba engumba eye.

37:11  O ntango basoda ba-Kaldea balongwi o Yeruzalem zambi basoda ba Farao bazalaki koya,

37:12  Yeremia alingaki kobima o Yeruzalem mpo ya kokende o ekolo ya Benyamin kobongisa na bandeko ba ye lika­mbo lya mosolo batata batikaki.

37:13  Ekomi ye o ‘Ezibeli ya Benyamin’, akutani na mokengeli wa engu­mba, nkombo ya ye Yiria, mwana wa Selemya, nkoko wa Kana­nya. Oyo atelemisi profeta Yeremia mpe alobi na ye : « Yo ozali kokima awa mpe kokoma epai ya ba-Kaldea ! »

37:14  Yeremia ayanoli : « Lo­kuta ! Nakokima awa te mpo ’te nakoma epai ya ba-Kaldea. » Kasi Yiria ali­ngi koyoka Yeremia te, akangi ye mpe akambi ye epai ya bankumu.

37:15  Bango bayokeli Yeremia nkanda enene, babeti ye mpe bakotisi ye o boloko, o ndako ya mokomi mi­nkanda Yonatan, eye bakomisi boloko.

37:16  Bakotisi Yeremia o libulu liye batimolaki o nse ya mabelé. Afandi wana mikolo ebele.

37:17  Na nsima mokonzi Sedekia ati­ndi bato bakende kokamata Yeremia. Mokonzi atuni ye na bo­nkutu o ndako ya ye moko : « Yawe alobaki liloba ? » Yeremia ayanoli : « Iyo ! Bakokaba yo o maboko ma mokonzi wa Babilon. »

37:18  Mpe atuni mokonzi Sedekia : « Mabe nini nasalaki yo, basaleli ba yo to bato ba ekolo mpo ’te okotisa ngai o boloko ?

37:19  Wapi baprofeta balobaki na yo : ‘Mokonzi wa Babilon akoya kobundisa yo mpe bato ba ekolo ya yo te’ ?

37:20  Sikawa, mokonzi wa ngai, nabondeli yo, ondimela ngai : Ozo­ngisa ngai lisusu epai ya mokomi minkanda Yonatan te, mpo ’te nakufa wana te. »

37:21  Bongo mokonzi atindi ’te bakanga Yeremia o lopa­ngo la bakengeli ba boloko mpe bapesa ye mokolo na mokolo limpa basombi o balabala ya balambi mampa, tee mokolo mampa mazalaki lisusu o engumba te. Yeremia atikali bongo o lopango la bakengeli.

Chapter 38

38:1  Sefatya, mwana wa Matan, na Gedalya, mwana wa Pasekur, na Yukal, mwana wa Sele­mya, na mpe Pasekur, mwana wa Malkia, bayoki maloba Yeremia azalaki koloba na bato banso :

38:2  « Ya­we alobi : Moto oyo akotikala o engu­mba eye, akokufa na mopa­nga, na nzala ekasi to na bokono bobe ; kasi oyo akobima mpe akokende epai ya ba-Kaldea, akobika.

38:3  Yawe alobi : Ntembe te, engumba eye ekokabama o maboko ma basoda ba mokonzi wa Babilon, oyo ako­botolo engumba ! »

38:4  Bankumu balobi na mokonzi : « Moto oyo asengeli kokufa : na maloba ma ye azali kolembisa mitema mya basoda batikali o engumba mpe mya bato banso. Azali koluka bolamu bwa bato te, aluki se ’te ba­zwa bobe. »

38:5  Mokonzi Sedekia ayanoli : « Malamu, akomi o maboko ma bino ; mokonzi akoki koboya maloba ma bino te. »

38:6  Bakangi Yeremia, babwaki ye o libulu lya Malkia, mwana wa mokonzi, o lopango la bakengeli. Bakitisi Yeremia na mikulu. O libulu liye mai mazalaki te, se potopoto ; mpe Yeremia azi­ndi o kati.

38:7  Ebed-Melek, moto wa Kus, eni­ki wa lopango la mokonzi, ayoki ’te babwaki Yeremia o libulu o ntango mokonzi azalaki kosambisa bato o ‘Ezibeli ya Benyamin’.

38:8  Ebed-Melek atiki ndako ya moko­nzi mpe akei koloba na ye :

38:9  « Mokonzi wa ngai, bato baye basali profeta Yeremia mabe : babwaki ye o libulu lya mai ; akokufa wana na nzala, mpo ma­mpa masili o engu­mba. »

38:10  Bongo mokonzi Sedekia apesi Ebed-Melek, moto wa Kus, etinda eye : « Kamata bato ntuku isato mpe bimisa profeta Yeremia o libulu liboso ’te akufa. »

38:11  Ebed-Melek akei na bato baye o ndako ya mokonzi, o esika bakobombaka bilamba ; alokoti mwa biteni bya bilamba bibe mpe biye bipaswani, mpe akei kopesa byango na Yeremia o libulu lya mai, akitisi byango na nsinga.

38:12  Ebed-Melek, moto wa Kus, alobi na Yeremia : « Kanga biteni bya bilamba biye bya kala, tia byango o nse ya mapeke ma yo. » Yeremia asali se bongo.

38:13  Nsima babendi Yeremia na nsinga mpe balongoli ye o libulu lya mai. Yeremia atikali o lopango la bakengeli.

38:14  Mokonzi Sedekia abengisi profeta Yeremia epai ya ye o ezibeli ya bisato ya Tempelo ya Yawe. Mokonzi alobi na Yeremia : « Nalingi kotuna yo mpo yoko, obombela ngai eloko te ! »

38:15  Yeremia ayanoli Sedekia : « Soko nayebisi yo yango, okobomisa ngai, mpe soko napesi yo lilako, okolanda lyango te ! »

38:16  Mokonzi Sedekia alayeli ye na bo­nkutu : « Lokola Yawe azali na bomoi, oyo apesi biso bomoi, nakobomisa yo te mpe nakokaba yo te o maboko ma bato balingi koboma yo. »

38:17  Yeremia alobi na Sedekia : « Yawe, Nzambe wa bokasi bonso, Nzambe wa Israel, alobi boye : Soko okei komitika o maboko ma bakomanda ba mokonzi wa Babilon, okobika mpe bakotumba engumba eye te ; okobika, yo na libota lya yo mobimba.

38:18  Kasi soko okei komitika o maboko ma bakomanda ba mokonzi wa Babilon te, engumba eye ekokweya o maboko ma ba-Kaldea ; bakotumba yango, mpe yo okobika o maboko ma ba­ngo te. »

38:19  Mokonzi Sedekia alobi na Yeremia : « Nazali kobanga bato ba Yuda, baye bakimi epai ya ba-Kaldea, mbele bakokaba ngai o maboko ma bango mpe bakonyokolo ngai mingi. »

38:20  Yeremia azongisi : « Bakosala yango te. Yoka liloba lya Yawe liye nazali koyebisa yo. Ma­nso makobongela yo, mpe okobika.

38:21  Kasi soko oboyi komitika o maboko ma bango, yoka makambo Yawe alakisi ngai :

38:22  basi banso baye batikali naino o ndako ya mokonzi wa Yuda bakokambama epai ya bakomanda ba mokonzi wa Babilon mpe bakoloba : Baninga ba yo ba motema babembi mpe bakosi yo ! Awa makolo ma yo mazindi o po­topoto, bango bakimi !

38:23  Solo, bakokamba basi na bana ba yo banso epai ya ba-Kaldea. Yo moko okobika o maboko ma ba­ngo te. Mokonzi wa Babilon akokanga yo mpe akotumba engumba. »

38:24  Sedekia alobi na Yeremia : « Moto moko ayeba masolo ma biso te ; soki te, okokufa.

38:25  Soko bankumu bayoki ’te nasololi na yo mpe batuni yo : ‘Yebisa biso maye olobaki na mokonzi mpe maye ayebisaki yo ; obombela biso eloko te, soki te tokoboma yo’,

38:26  ozongisela bango : ‘Nabondeli mokonzi azongisa ngai epai ya Yonatan te mpo nakufa o ndako ya ye te’. »

38:27  Bankumu banso bayei kotuna Yeremia. Ye azongiseli bango se lokola mokonzi atindaki ye. Bongo batiki ye na boboto, zambi bayokaki lisolo lya bango te.

38:28  Yeremia atikali o lopango la bakengeli tee o mokolo babotoli Yeruzalem. Azalaki bobele wana o ntango babotoli Yeruzalem.

Chapter 39

39:1  O mobu mwa libwa mwa bokonzi bwa Sedekia o Yuda, o sanza ya zomi, Nabukodonozor, mokonzi wa Babilon, ayei na basoda ba ye banso kobundisa Yeruzalem ; bazingi yango.

39:2  O mobu mwa zomi na moko mwa bokonzi bwa Sedekia, o sanza ya inei, o mokolo mwa libwa mwa sanza, babuki lopango la engumba.

39:3  Bakoma­nda ba mokonzi wa Babilon baye bakoti o engumba mpe bakei pene na Ezibeli ya Kati, bango baye : komanda monene Nergalsareser wa Sin-Magir, moyangeli Nebus-Asban na bakomanda basusu ba mokonzi wa Babilon.

39:4  Awa Sedekia, mokonzi wa Yuda, na basoda ba ye bamoni bongo, bakimi na butu mpe babimi o engu­mba pene na lopango la mokonzi : babimi o ezibeli ezalaki o kati ya bifelo bibale mpe bakei epai ya lo­bwaku la Araba.

39:5  Kasi basoda ba-Kaldea balandi bango mpe batelemisi Sedekia o esobe ya Yeriko. Bakangi ye mpe bakei na ye o Ribla o mokili mwa Kamat epai ya Nabukodonozor, mokonzi wa Babilon. Kuna mokonzi asambisi ye.

39:6  O Riblea mokonzi wa Babilon abomisi bana ba Sedekia o miso ma ye. Mokonzi wa Babilon abomisi bankumu ba Yuda banso se bongo.

39:7  Na nsima atuboli miso ma Sedekia mpe akangi ye na minyololo mibale mya mbengi mpo ’te bakamba ye o Babilon.

39:8  Ba-Kaldea batumbi ndako ya mokonzi na ndako ya bato basusu, babuki lopango la Yeruzalem.

39:9  Komanda wa bakengeli Nebuzaradan akambi bato batikalaki o Yeruzalem, baye bakimaki epai ya ye mpe bato basusu banso o Babilon.

39:10  Nzo­kande Nebuzaradan, koma­nda wa bakengeli, atiki o Yuda se babola mpenza, baye bazalaki na eloko te. Se o ntango ena akaboleli bango bilanga bya nzete ya vino na bila­nga bisusu.

39:11  Mpo ya Yeremia, Nabukodonozor, mokonzi wa Babilon, apesi Nebuzaradan, komanda wa bake­ngeli, etinda eye :

39:12  « Kamata ye mpe kengele ye malamu, osala ye mabe te, kasi salisa ye o makambo manso akosenge yo. »

39:13  Nebuzaradan, komanda wa bakengeli, Nebusazban, komanda wa bato ba lopango la mokonzi, na Nergalsarezar, koma­nda monene wa basoda na bakoma­nda banso ba mokonzi wa Babilon,

39:14  batindi bato balongola Yeremia o lopango la bakengeli, bapesa ye o maboko ma Godolia, mwana wa Akikam, nkoko wa Safan, afa­ndisa ye o ndako ya ye. Bongo Yeremia atikali o ntei ya bato ba ye.

39:15  O ntango Yeremia akangemi o lopango la bakengeli, Yawe alobi na ye :

39:16  Kende koloba na Ebed-Melek, moto wa Kus : Yawe wa bokasi bo­nso, Nzambe wa Israel, alobi : Yoka, nakokokisa maloba manso nalobaki mpo ya engumba eye mpo ’te bato bayoka mpasi, bazala na esengo te. O mokolo maloba ma ngai makosalema o miso ma yo,

39:17  nakobikisa yo, mpe bakokaba yo o maboko ma bato te, baye bakolengisaka yo. Yawe alobi bongo.

39:18  Ya solo, ngai nakobikisa yo ; okokufa na mopanga te, zambi otii eli­kya na ngai. Maloba ma Yawe. Bato ba Babilon babateli Yeremia

Chapter 40

40:1  Yawe alobi na Yeremia o ntango Nebuzaradan, komanda wa bakengeli, alongolaki ye o Rama, zambi akutaki ye na mi­nyololo o maboko o kati ya bato ba Yeruzalem mpe ba Yuda, baye bakangemaki wana mpo ’te bakende o boombo o Babilon.

40:2  Komanda wa bakengeli abengi Yeremia mpe alobi na ye : « Yawe Nzambe wa yo asili ayebisi ’te mpa­si eye ekokwela ekolo eye ;

40:3  sikawa akokisi maye alobaki. Mpasi ekweli bino zambi bosalaki Yawe mabe mpe boyokaki ye te.

40:4  Sikawa nakolongola minyololo mya yo. Soko olingi kokende elongo na ngai o Babilon, yaka, ngai nakobatela yo. Soko olingi kokende na ngai kuna te, tikala awa. O mokili mobimba okoki kokende epai olingi. »

40:5  Awa Yeremia akei naino te, abakisi : « Soko olingi kotikala epai ya ngai te, zonga epai ya Godolia, mwana wa Akikam, nkoko wa Safan, oyo mokonzi wa Babilon atii moyangeli wa bingumba bya Yuda ; okoki kotikala epai ya ye o ntei ya bato ba yo to kokende epai olingi. » Nsima komanda wa bakengeli apesi ye biloko bya kolia mpe mabonza, mpe alingisi ye ’te akende.

40:6  Yeremia akei o Mispa epai ya Godolia, mwana wa Akikam ; afandi epai ya ye o ntei ya bato batikalaki o mokili.

40:7  Bakomanda banso ba basoda batikali o esobe na bato ba bango bayoki ’te mokonzi wa Babilon atiaki Godolia, mwana wa Akikam, moyangeli wa ekolo, apesaki ye mpe bokonzi bwa bato banso, babali na basi, bana mpe babola mpenza baye bakendeki o boombo o Babilon te.

40:8  Bayei epai ya Godolia o Mispa. Ezalaki wana Yismael, mwa­na wa Netanya, Yokanan na Yonatan, bana ba Karea, Seraya, mwana wa Tankumet, na bana ba Efai ; moto wa Netofa, Yezanya, mwana wa mo-Maka, bango na baninga ba ba­ngo.

40:9  Godolia, mwana wa Akikam, nkoko wa Safan, alayeli bango : « Bobanga kosalela ba-Kaldea te. Botikala o ekolo eye, botosa mokonzi wa Babilon mpe manso makobo­ngela bino.

40:10  Ngai moko nakotikala o Mispa mpo ya kosolola na ba-Kaldea bakoya epai ya biso. Kasi bino, bokende kobuka mbuma ya vino, ya figi mpe ya oliva, bokamola yango mpe botia yango o mbeki, bongo botikala o bingumba bya bino. »

40:11  Se bongo bato ba Yudea banso bazalaki epai ya ba-Amon, ba-Moab, ba-Edom mpe o bikolo bisusu bayoki ’te mokonzi wa Babilon atikaki bato basusu o mokili mwa Yuda mpe atiaki wana moya­ngeli Godolia, mwana wa Akikam, nkoko wa Safan.

40:12  Bongo bato ba Yudea banso bazongi ut’o bisika binso bapanzanaki. Ezongi bango o mokili mwa Yuda epai ya Godolia o Mispa, bakei kobuka mbuma ya vino na mbuma isusu mingi.

40:13  Yokanan, mwana wa Karea, na bakomanda banso ba basoda bazalaki o esobe bakei koluka Godolia o Mispa.

40:14  Balobi na ye : « Oyebi ’te Balis, mokonzi wa ba-Amon, ati­ndi Yismael, mwana wa Netanya, mpo aboma yo ? » Kasi Godolia, mwana wa Akikam, andimi mpo ena te.

40:15  O Mispa Yokanan, mwana wa Karea, ayebisi Godolia na bo­nkutu : « Ngai nakokende koboma Yismael, mwana wa Netanya : moto moko akoyeba yango te. To olingi ’te aboma yo ? Bongo bato ba Yudea banso basangani sikawa epai ya yo batelengana mpe ba-Yuda baye batikali naino, bakufa. »

40:16  Kasi Godolia, mwana wa Akikam, azongiseli Yokanan, mwana wa Karea, maloba maye : « Osala bongo te, za­mbi makambo ozali koloba mpo ya Yismael mazali ma solo te ! »

Chapter 41

41:1  O sanza ya nsambo, Yismael, mwana wa Netanya, nkoko wa Elisama, moto wa libota lya mokonzi mpe nkumu monene wa ekolo, akei na bato zomi epai ya Godolia, mwana wa Akikam, o Mispa. Ntango bazalaki kolia o Mispa,

41:2  Yismael na bato ba ye zomi batelemi mpe babeti Godolia, mwana wa Akikam, nkoko wa Safan, na mopanga. Babomi bongo moto oyo mokonzi wa Babilon atiaki moya­ngeli wa ekolo.

41:3  Yismael abomi mpe bato ba Yudea banso bazalaki epai ya Godolia o Mispa mpe basoda ba-Kaldea bazalaki wana.

41:4  Mikolo mibale nsima ya koboma Godolia, moto moko ayebi ya­ngo naino te,

41:5  bato ntuku mwambe bautaki o Sikem, Silo na Samaria, bayei ; bakataki mandefu, balati bilamba bipaswani, bakataki nzoto mpota mpota ; bayei na mabonza ma bolei mpe na mpaka ya malasi mpo ’te babonza mango o Tempelo ya Yawe.

41:6  Yismael, mwana wa Netanya, abimi o Mispa mpe akei kokutana na bango, mai o miso. Awa akomi penepene na ba­ngo, alobi : « Yaka epai ya Godolia, mwana wa Akikam. »

41:7  Kasi o nta­ngo bakomi o kati ya engumba, Yismael na bato ba ye babomi ba­ngo mpe babwaki bango o libulu lya mai.

41:8  Nzokande o ntei ya bango bato zomi balobi na Yismael : « Oboma biso te, zambi tobombi biloko bya bolei o bilanga : mbuma ya mampa, loso, mafuta ma oliva mpe ma nzoi. » Bongo Yismael abomi bango te lokola abomaki baninga ba ba­ngo.

41:9  Libulu lina esika Yismael a­bwaki bibembe bya bato abomaki, lizalaki libulu linene liye mokonzi Asa atimolaki o ntango ya etumba na Basa, mokonzi wa Israel. Yismael, mwana wa Netanya, atondisi lya­ngo na bibembe.

41:10  Yismael aka­ngi bato banso ba Mispa, ná bana basi ba mokonzi ná bato banso batikalaki o Mispa, baye Nabuzaradan, komanda wa bakengeli, apesaki Godolia, mwana wa Akikam. Na nta ntongo Yismael, mwana wa Ne­tanya, abandi kokende na bango epai ya ba-Amon.

41:11  Ntango Yokanan, mwana wa Ka­rea, na bakomanda banso bazalaki na ye, bayoki mabe manso Yismael, mwana wa Netanya, asalaki,

41:12  basangisi bato banso mpe bakei kobundisa Yismael, mwana wa Netanya. Bakutani penepene na etima ya Gabaon.

41:13  Awa bato bakangemi na Yismael bamoni Yokanan na bakomanda banso bazalaki na ye, basepeli mingi mpenza.

41:14  Bato Yismael akangaki o Mispa batiki ye mpe bakei epai ya Yokanan, mwana wa Karea.

41:15  Yismael, mwana wa Netanya, na bato mwambe bakimi Yokanan, mwana wa Karea, mpe bakei epai ya ba-Amon.

41:16  Yokanan, mwana wa Karea, na bakomanda ba basoda bazalaki na ye basangisi bato banso Yismael, mwana wa Neta­nya, akangaki o Mispa, esika abomaki Godolia, mwana wa Akikam. Balongoli bongo babali, basi, bana na ba-eniki o Gabaon.

41:17  Bakei, bapemi o nganda ya Kimam, penepene na Beteleme ; nsima bakei o Ezipeti.

41:18  Bazalaki kobanga ba-Kaldea mpe bakimi bango, mpo Yismael, mwana wa Netanya, abomaki Godolia, mwana wa Akikam, oyo mokonzi wa Babilon atiaki moyangeli wa ekolo.

Chapter 42

42:1  Bakomanda banso, Yokanan mwana wa Karea, na Azarya mwana wa Osaya, bakei na bato banso, banene na bake, epai ya profeta Yeremia,

42:2  balobi na ye : « Ndima mabondeli ma biso ! Sa­mbela Yawe Nzambe wa yo ayokela biso banso bato totikali mawa ; ata tozalaki liboso bato baike totikali se mwa ndambo, lokola yo mo­ko omoni.

42:3  Yawe Nzambe wa yo alakisa biso nzela nini tolanda mpe ninitosengelikosala. »

42:4  Profeta Yeremia ayanoli bango : « Nayoki, nakosambela Yawe Nzambe wa bino mpo ya bino se lokola bose­ngi ngai. Nakoyebisa bino maloba ma­nso Yawe akoyanola bino, nakobo­mbela bino eloko te. »

42:5  Balobi na Yeremia : « Yawe nta bosembo azala nzeneneke wa biso ! Soko tosali te lokola Yawe Nzambe wa yo akoloba na yo mpo ya biso,

42:6  ésepelisa biso to te, tokotosa maloba ma Yawe Nzambe wa biso, mpo biso bato to­tindi yo. Soko tokotosa Yawe Nza­mbe wa biso tokozwa bolamu. »

42:7  Nsima ya mikolo zomi Yeremia ayoki maloba ma Yawe,

42:8  abengi Yokanan, mwana wa Karea, bakomanda na bato banso, bato banene na bake.

42:9  Alobi na bango : « Bose­ngeki ngai ’te nabondela Yawe, Nzambe wa Israel. Ye moto alobi boye :

42:10  Soko bondimi kotikala o mokili moye, ngai nakolendisa bino, nakosilisa bino lisusu te ; nakolona bino, nakopikola bino lisusu te, zambi nayoki mawa mpo ya mabe nasalaki bino.

42:11  Bobanga moko­nzi wa Babilon te, oyo azali kobangisa bino ; maloba ma Yawe. Bobanga ye te, zambi ngai nazali na bino mpo ya kosalisa mpe kobikisa bino o maboko ma ye.

42:12  Soko ngai nayokeli bino mawa, ye mpe akoyokela bino mawa mpe akotika bino mpo bozonga o mabelé ma bino.

42:13  Kasi soko boboyi kotosa Yawe Nzambe wa bino mpe bolobi : ‘Tokotikala o mokili moye te,

42:14  tolingi kokende o Ezipeti mpe kotikala kuna, tolingi lisusu komono bitumba te, koyoka mindule te, kokufa na nzala te’,

42:15  bi­no banso bato ba Yuda botikali naino, boyoka liloba lya Yawe : Yawe wa bokasi bonso, Nzambe wa Israel, alobi boye : Soko bokani kokende o Ezipeti mpo ya kotikala kuna,

42:16  mopanga bozali kobanga mo­kobete bino kuna o mokili mwa Ezipeti, mpe nzala eye ezali kotu­ngisa bino ekoka­nga bino kuna o Ezipeti ; bokokufa kuna !

42:17  Bato banso bakani kokende o Ezipeti mpo ya kofanda kuna, bakokufa na mopanga, na nzala ekasi mpe na bokono bobe. Ata moto moko te akotikala to akobika o mpasi eye nakotindela bango.

42:18  Ya solo, Yawe wa bokasi bonso, Nzambe wa Israel, alobi boye : Lokola nkanda ya ngai enene ekitelaki bato ba Yeruzalem, se bongo nkele ya ngai ekokitela bino soko bokei o Ezipeti. Bokokoma eloko ya nsomo mpe ya kokamwa, bakotombela bino bobe mpe bakoseke bino, mpe bokomono ekolo eye lisusu te.

42:19  Yawe alobi na bino, bato ba Yuda baye batikali : ‘Bokende o Ezipeti te !’ Boyeba malamu ’te lelo nakebisi bino ’te

42:20  bozali kobunga mpe­nza. Bino mo­ko botindaki ngai epai ya Yawe Nzambe wa biso mpe bosengeki ngai : ‘Sambelela biso epai ya Yawe Nzambe wa biso, yebisa biso maye manso Yawe Nzambe wa biso akotinda, mpo totosa ye !

42:21  Nauti koyebisa bino, kasi boyoki Yawe Nza­mbe wa bino te, bondimi ata liloba lyoko te lya maloba ma­nso atindaki ngai ’te nayebisa bino.

42:22  Bongo boyeba malamu ’te bokokufa na mopanga, na nzala ekasi mpe na bokono bobe o ekolo eye bolingi kofanda. »

Chapter 43

43:1  Awa Yeremia asilisi koloba maloba mana manso o nko­mbo ya Yawe, Nzambe wa bango,

43:2  Azarya, mwana wa Osaya, na Yokanan, mwana wa Karea, na bato banso ba lolendo bagangeli Yeremia : « Ozali kobuka lokuta ! Yawe Nzambe wa biso atindi yo te mpo osakola ’te tokende kofanda o Ezipeti te.

43:3  Baruk, mwana wa Neria, apesi yo mayele mabe, alingi kokaba biso o maboko ma ba-Kaldea mpo ’te baboma biso mpe bakende na biso o Babilon. »

43:4  Yokanan, mwana wa Karea, bakomanda banso mpe bato banso baboyi kotosa Yawe, balingi kotikala o Yuda te.

43:5  Yokanan, mwana wa Karea, na bakomanda banso ba basoda basangisi bato banso ba Yuda batikali, baye balongwaki o bikolo esika bapanzanaki mpe bazo­ngaki mpo ’te bafanda o ekolo ya Yuda ;

43:6  basangisi mpe babali, basi na bana, na bilenge basi ba moko­nzi, na bato banso Nebuzaradan, ko­manda wa bakengeli, atikaki epai ya Godolia, mwana wa Akikam, nkoko wa Safan. Bakei mpe na profeta Yeremia na Baruk, mwana wa Neria.

43:7  Baboyi kotosa monoko mwa Yawe, bakei na bango o Ezipeti mpe bakomi o Tapanes.

43:8  O Tapanes Yawe alobi na Yeremia maloba maye :

43:9  « Kamata mabanga manene o miso ma bato ba Yudea mpe kangisa mango o kati ya mabelé libazi, penepene na ezibeli ya ndako ya Farao o Tapanes.

43:10  Na nsima okoloba na bato : Yawe wa bokasi bonso, Nzambe wa Israel, alobi : Tala, nakobenga mosaleli wa ngai Nabukodonozor, mokonzi wa Babilon, aya awa mpe atonga ngwe­nde ya ye o mabanga maye naka­ngisi awa, mpe akopika wana ema ya bokonzi bwa ye.

43:11  Akoya mpe akobebisa mokili mwa Ezipeti : Oyo akoki na liwa, akufa ! Oyo akoki na boombo, akende o boombo ! Oyo akoki na mopanga, akufa na mopanga !

43:12  Akotumba tempelo inso ya ba­nzambe ba Ezipeti, akotumba bi­keko bya bango to akokende na bya­ngo ; akolongola bato banso o mo­ki­li mwa Ezipeti lokola moke­ngeli wa mpata akolongolaka nsili o monkoto mwa ye. Na nsima akobima wana na boboto.

43:13  Akobuka ma­konzi manene ma tempelo ya Mwese o Ezipeti, mpe akotumba tempelo inso ya ba­nzambe ba Ezipeti. »

Chapter 44

44:1  Yawe alobi na Yeremia maloba maye mpo ya ba-Yuda banso bayei kofanda o mokili mwa Ezipeti, o mboka Migdol, Tapanes, Nof mpe o mokili mwa Patros.

44:2  Yawe wa bokasi bonso, Nza­mbe wa Israel, alobi : Bomoni mpasi inso natindeli Yeruzalem mpe bingumba bisusu bya Yuda. Sikawa bibebi nye, moto moko afandi kuna lisusu te.

44:3  Esalemi bongo mpo batumolaki ngai na mabe ma bango : bazalaki kotumbela banza­mbe basusu mpaka ya malasi mpe kokumisa bango, baye bayebaki liboso te, bino na ba­nkoko ba bino mpe te.

44:4  Nale­mbeki te kotindela bino basaleli ba ngai baprofeta baloba na bino : ‘Botika makambo mana ma nsomo,nayinimango !’

44:5  Kasi bayoki ngai te, batosi te, babongoli mitema te, bakobi kotu­mbela banzambe basusu mpaka ya malasi.

44:6  Bongo nasiliki mingi mpe nayoki nkanda na bingumba bya Yuda mpe na balabala ya Yeruzalem ; bibebi nye, bikomi mipotu, lokola bozali komono lelo.

44:7  Sikawa Yawe Nzambe wa bokasi bo­nso, Nza­mbe wa Israel, alobi boye : Mpo nini bolingi komiyokisa mpasi mi­ngi boye ? O mokili mwa Yuda bokosala ’te babali na basi, bana na bana bake bazali konunga mabéle basila, ata mwa ndambo ya bato eti­kala te !

44:8  Mpo bokotumolaka ngai na makambo ma bino : bokotumbelaka banzambe basusu mpaka ya malasi o mokili mwa Ezipeti esika boyei kofanda ! Bolingi ’te basilisa bino nye, bato banso bato­mbela bino bobe mpe bafinga bino ?

44:9  Bobosani nde mabe maye bankoko ba bino basalaki, bakonzi ba Yuda mpe basi ba ba­ngo, bino moko mpe basi ba bino o ekolo ya Yuda mpe o balabala ya Yeruzalem ?

44:10  Kin’o lelo bayoki mitema mawa te, babangi ngai te, batosi mibeko na bitinda bya ngai te, biye napesaki bino na bankoko ba bino.

44:11  Yango wana Ya­we wa bokasi bonso, Nzambe wa Israel, alobi boye : Nakotumbola bino mpe nakotindela bino mpasi, nakosilisa Yuda mobimba.

44:12  Nakosilisa mpe bato ba Yuda baye batikali, mpe bakendeki kofanda o mokili mwa Ezipeti ; banso, ná bato banene ná bato bake, bakokufa o Ezipeti na mopanga to na nzala ekasi ; solo, bakokufa na mopanga mpe na nzala ekasi, bakotombela bango bobe, bakotiola, bakoseke mpe bakofinga bango.

44:13  Nakotu­mbola baye banso bakendeki o Ezipeti se lokola napesaki etumbu na Yeruzalem ; bakokufa na mopa­nga, na nzala ekasi to na bokono bobe.

44:14  O ntei ya mwa ndambo ya bato ba Yuda baye bakei kofanda o mokili mwa Ezipeti, moto moko akozonga o ekolo ya Yuda te, ata ayoki mposa ya kozonga mpe ya kofanda kuna. Solo, bakozonga kuna te, tika se moko na moko wa bango akobika.

44:15  Bato banso bafandi o mokili mwa Patros o Ezipeti, babali ba­nso bayebi ’te basi ba bango bazalaki kotumbela banzambe basusu mpaka ya malasi, na mpe basi basusu ebele, banso bapesi Yeremia eyano eye :

44:16  « Biso toboyi koyoka maloba maye olobaki o nkombo ya Yawe.

44:17  Tokokoba kosala makambo ma­nso tolakelaki : Tokotumbela Mokonzi Mwasi wa Likolo mpaka ya malasi, mpe tokobonzela ye mabo­nza ma bomeli, se lokola tozalaki kosala, biso na bankoko ba biso, bakonzi na bankumu ba biso o bi­ngumba bya Yuda mpe o balabala ya Yeruzalem. O ntango ena tozalaki na mampa maike, tozalaki se malamu, likambo lyoko likwelaki biso te.

44:18  Kasi banda mokolo totikaki kotumbela Mokonzi Mwasi wa Likolo mpaka ya malasi mpe kobonzela ye mabonza ma bomeli, tokomi kozanga biloko binso mpe kokufa na mopanga mpe na nzala ekasi. »

44:19  Mpe basi babakisi maloba maye : « Awa tokobonzelaka Mokonzi Mwasi wa Likolo mpaka ya malasi mpe mabonza ma bomeli, mpe tokolambaka minkate mizali na elili ya ye, babali ba biso bako­ndimaka ya­ngo ! »

44:20  Kasi Yeremia alobi na bato ba­nso, babali, basi na bato banso bapesaki ye eyano eye :

44:21  « Bokanisi ’te Yawe abosani mabonza ma­nso botumbaki o bingumba bya Yuda mpe o balabala ya Yeruzalem, bino na bankoko ba bino, bakonzi na ba­nkumu ba bino na mpe bato ba­nso, maye mayokisi ye nkanda mpe­nza ?

44:22  Yawe akokaki kondima makambo ma bino mabe te na makambo ma nsomo bozalaki kosala. Yango wana ekolo ya bino ekomi mopotu, esika ya nsomo eye bato­mbeli bobe mpe ezangi bato, lokola ezali lelo.

44:23  Na bobonzi mpaka ya malasi bosali Yawe mabe, botosi ye te, mpe bolandi Mobeko na malako na bitinda bya ye te. Yango wana mpasi eye ekweli bino, lokola bokoki komono lelo. »

44:24  Na nsima Yeremia alobi na basi banso : « Boyoka liloba lya Yawe :

44:25  Yawe wa bokasi bonso, Nzambe wa Israel, alobi boye : Bino basi, bosala maye bolakelaki ; bokolobaka : ‘Tokokokisa bilako tolakelaki ; tokobonzela Mokonzi Mwasi wa Likolo mpaka ya malasi na mabonza ma bomeli.’ Bongo bokokisa elako ya bino mpe bosala lokola bolakeli.

44:26  Nzokande, bino banso bato ba Yudea bofandi o Ezipeti, boyoka liloba lya Yawe : Nalayi ndai o Nko­mbo enene ya ngai, maloba ma Yawe, o mokili mobimba mwa Ezipeti, mo-Yuda moko te akotanga lisusu Nkombo ya ngai ; moto moko aloba lisusu te ‘Lokola Yawe azali na bomoi’.

44:27  Nalingi ’te bayoka mpasi, babika te ; ba-Yuda banso bafandi o Ezipeti bakokufa na mopanga mpe na nzala ekasi ; banso bakosila nye.

44:28  Nzokande mwa nda­mbo eke mpenza bakokufa na mopanga te mpe bakozonga o mokili mwa Yuda. Bato basusu banso bakendeki o Ezipeti bakoyeba soko liloba lya nani likosalema : lya ngai to lya bango !

44:29  Yawe alobi : Nakopesa bino ele­mbo eye ekolakisa ’te nakopesa bino etumbu o esika eye ; bokondima bongo ’te maye nakaneli bino makosalema :

44:30  Yawe alobi boye : Nakokaba Farao Ofra, mokonzi wa Ezipeti, o maboko ma banguna baye balingi koboma ye, se lokola nakabaki Sedekia, mokonzi wa Yuda, o maboko ma Nabukodonozor, mokonzi wa Babilon, oyo alingaki koboma ye. »

Chapter 45

45:1  O mobu mwa minei mwa bokonzi bwa Yoyakim, mwa­na wa mokonzi wa Yuda Yozia, ntango Baruk, mwana wa Neria, asilisi kokoma manso Yeremia ayebisi ye, profeta alobi na ye :

45:2  Yawe Nzambe wa Israel alobi boye mpo ya yo, Baruk :

45:3  Olobaki « Mawa na ngai, mpo Yawe akotindelaka ngai bobele mpasi ! Nalembi na bokimeli ntango inso, nazwi nta­ngo ya kopema te ! »

45:4  Okoloba na ye : Yawe alobi boye : « Nakobuka maye natongaki, nakopikola biye nalonaki ; nakosala bongo o ekolo mobi­mba !

45:5  Yo nde olingi kosala makambo manene ! Oluka maka­mbo maike te, mpo nakotindela bato banso mpasi enene. Kasi yo sepela, mpo nakobikisa yo bipai binso okokende. »

Chapter 46

46:1  Yawe alobi na profeta Yeremia maloba matali bikolo bisusu.

46:2  Liloba mpo ya Ezipeti mpe basoda ba Farao Neko, moko­nzi wa Ezipeti : Nabukodonozor, mokonzi wa Babilon, alongaki ba­ngo penepene na Karkemis, epai ya Efrate ; ezalaki o mobu mwa minei mwa bokonzi bwa Yoyakim, mwana wa Yozia, mokonzi wa Yuda.

46:3  Bobongisa nguba ya bino inene na ike, bomilengele mpo ya etumba !

46:4  Bobongisa farasa, bobutela yango mpe bolata binkoti bya bino, bopelisa makongo mpe bolata molato mwa etumba !

46:5  Kasi namoni nini ? Babangi mpe bazongi nsima ! Basoda ba mpiko bakwei, bakimi, batali nsima te ; nsomo ekangi bango bipai binso. Maloba ma Yawe.

46:6  Oyo aleki mbangu akoki kokima te, oyo aleki mpiko akoki kobika te ! Kuna epai ya Nordi penepene na ebale Efrate banso bazoki o etumba mpe ba­kwei.

46:7  Nani azali koya lokola ebale Nil, lokola mai makasi matomboki ?

46:8  Ezipeti azali koya lokola ebale Nil, lokola mbonge ya mai makasi. Ezipeti alobi : « Nakoya kozindisa mokili mpe kosilisa bingumba na bato ba­nso !

46:9  Bino farasa bokende, bino makalo botambola mbangu ; basoda ba mpiko bakende liboso, bato ba Kus na Put, bomeme nguba, bato ba Lud, bobenda litimbo. »

46:10  Ezali mokolo mwa Yawe Nzambe wa bokasi bonso, mokolo akozongisela banguna ba ye mabe basalaki, mopanga mokosilisa binso tee mokotonda, mpe mokolangwa makila ma bato : Mokonzi Yawe wa bokasi bonso akobomisa binso o Nordi, penepene na ebale Efrate.

46:11  Kende o Galaad mpe luka mafuta ma bopakoli, elenge mwasi wa Ezipeti ! Nkisi ya yo izali se mpamba, okobika te !

46:12  Bato ba bikolo bisusu bayoki bobeleli bwa yo, nse mobimba etondi na boleli bwa yo, zambi mobundi akwei o moninga, bango babale bakwei.

46:13  O eleko Nabukodonozor, moko­nzi wa Babilon, ayei kobundisa mokili mwa Ezipeti, Yawe alobi na profeta Yeremia :

46:14  Bosakola yango o Ezipeti, boyebisa o Migdol, bolekisa nsango kin’o Nof mpe Tapanes ! Boloba : Boteleme, bomilengele, mpo mopanga mozali koboma binso pene na yo.

46:15  Mpo nini ekeko ya Apis ekimi ? Mpo nini ekeko ya yo ya ngombe etelemi lisusu te ? Yawe moto abeti yango,

46:16  eningani mpe ekwei o nse. Balobani : « Tozonga o ekolo ya biso, esika tobotamaki, mpo tokima mopanga mwa bobomi. »

46:17  Bapesaki Farao, mokonzi wa Ezipeti, nkombo eye : ‘Moto wa makelele, akolekisaka ntango ya ye se mpamba’.

46:18  Mokonzi Yawe wa bokasi bonso alobi : lokola nazali na bomoi, moto moko akoya lokola Tabor eleki ngomba isusu na bosanda, lokola Karmel likolo lya mbu.

46:19  Bino bato ba Ezipeti, bobongisa biloko bya bino mpo ya kokende o boombo ; zambi Nof ekokoma mopotu, ekobeba nye mpe bato banso bakosila.

46:20  Ezipeti ezalaki lokola ngombe mwasi kitoko, nzinzi iuti o Nordi iyei kofandela yango.

46:21  Basoda ba ye ba kofuta bazalaki lokola ngombe babokoli mpo bakoma mafuta : bango mpe bakimi, bakimi mbangu, mpo bakoki na etumba lisusu te. Mokolo mwa mpasi mpe eleko ya etumbu bikomeli bango.

46:22  Lolaka la bango lokomi lokola makeléle ma nyoka, awa bato ebele babimeli bango, soka o maboko, lokola bato bakokataka nzete ;

46:23  bakati nzete inso ya zamba ya ye, ata bato bakokotoko wana te ; bayei ebele mpenza lokola mapaléla, moto moko akoki kotanga bango te. Yawe alobi bongo.

46:24  Se bongo bato ba Ezipeti bakufi na nsoni, bakwei o maboko ma bato bauti o Nordi.

46:25  Yawe wa bokasi bonso, Nza­mbe wa Israel, alobi : Nakotumbola Amon, nzambe wa No, mokili mwa Ezipeti, banzambe na bako­nzi ba ye, Farao mpe bato banso batii mitema na ye.

46:26  Nakokaba bango o maboko ma baye balingi koboma bango, ma Nabukodonozor, mokonzi wa Babilon mpe ma basaleli ba ye. Kasi na nsima bato bakoya lisusu kofanda o Ezipeti lokola o mikolo mya kala. Maloba ma Yawe.

46:27  Kasi yo, mosaleli wa ngai Yakob, obanga te, Yo Israel, oyoka nsomo te ! Ngai nakobikisa yo na bana ba yo ut’o mokili mosika esika bake­ndeki o boombo. Yakob akozwa kimia lisusu, akozala na boboto, moto moko akotungisa ye te.

46:28  Yawe alobi : Yo mosaleli wa ngai, Yakob, obanga te, zambi ngai nazali na yo. Nakosilisa bato ba bikolo binso esika napanzaki yo ; nakoboma yo te, nakotumbola yo na bosembo, okoki kozanga etumbu te.

Chapter 47

47:1  Yawe alobi na profeta Yeremia o ntango Farao abotoli naino Gaza te.

47:2  Yawe alobi boye : Mai mauti o Nordi lokola ebale etondi na mai ezindisi mokili na biloko binso bizali wana, bingumba na bato ba byango. Bato bagangi, baye bafandi wana bakimeli

47:3  ntango bayoki makeléle ma matindi ma farasa na lokito la makalo mpe la yika ya mango. Batata bapangani na bana lisusu te, mpiko esileli bango,

47:4  mpo mokolo mobelemi ’te ba-Filisti banso bakosila, mpe bato ba Tiro na Sidoni bakomono ’te baye bayaki kosalisa ba­ngo bakufi. Solo, Yawe akosilisa ba-Filisti mpe baye batikali o esanga Kreta.

47:5  Bato ba Gaza bakokoli mitó, bato ba Askalon bakomi nye. Mikolo boni naino ba-Anak bakomikata mpota ?

47:6  Mawe e ! Mopanga mwa Yawe, okopema mokolo nini ? Zonga o esika ya yo, otika etumba mpe ofanda nye.

47:7  Ndenge nini mopanga mokopema awa Yawe apesi mwango bitinda ? Yawe atindi mwango o Askalon mpe o libongo lya mbu.

Chapter 48

48:1  Mpo ya Moab, Yawe wa bokasi bonso, Nzambe wa Israel, alobi boye : Mawa na Nebo : ebebi nye ; mawa na Kiryataim : babotoli ya­ngo ; ebombamelo ekomi esika ya nsoni mpe ya nsomo :

48:2  Lokumu la Moab losili ! Ba-Kesbon bakani kosukisa yango : « Tokosilisa Moab o ntei ya bikolo ! » Madmen, yo mpe okokweya, mopanga mokomi pene na yo.

48:3  Migango miyokani ut’o Koronaim : « Binso bibebi nye ! »

48:4  Ekolo Moab ekwei, bogangi bwa ye boyokani kin’o Soar.

48:5  O ngomba Lukit bazali kolela, ut’o Koronaim boleli boyokani :

48:6  « Bokima, bomibikisa, bomekola mpunda ya eliki ! »

48:7  Otiaki motema na bibombamelo bya yo, bakobotolo byango ; nzambe Kemos akokende o boombo na banganga Nzambe mpe na ba­nkumu ba ye.

48:8  Mobebisi akobimela bingumba bi­nso, ata engumba yoko te ekobika. Bakobebisa lobwaku na ngomba, lokola Yawe alobaki.

48:9  Botongela Moab lilita, zambi ebebi ; bingumba bya ye bikomi mopotu, moto moko afandi wana lisusu te.

48:10  Batombela bobe na moto akokisi mosala mwa Yawe te, na oyo aboyi koboma bato na mo­panga !

48:11  Moab afandaki kimia ut’o bolenge bwa ye, lokola molangi mwa vino bani­ngisi te, mokolo moko te basopaki yango o molangi mosusu : ata mbala yoko akendeki o boo­mbo te ; yango wana atikali naino na ese­ngo, abungisi mpe nsolo mpimbo ya ye te.

48:12  Yango wana Yawe alobi : O mikolo mikoya nakotindela bango bato balongola vino mpe basopa ya­ngo o mbeki isusu, basilisa bikutu bya ye binso, mpe babola mbeki ya bango.

48:13  O ntango ena Moab akoyoka nsoni mpo ya Kemos, se lokola Israel ayokaki nsoni ntango atiaki motema na Betel.

48:14  Boniboni bokoki koloba : « Biso tozali bilombe, basoda ba mpiko mpenza » ?

48:15  Bingumba bya Moab bikobeba, bilenge bya ye bikobomama. Elobi bongo mokonzi monene, oyo bakotangaka Yawe wa bokasi bonso.

48:16  Nsuka ya Moab ekomi penepene, makambo ma mpasi makokwela ye.

48:17  Bino bato ba bikolo bya penepene, bolela ye, bino bato boyebi nko­mbo ya ye. Boloba : « Lingenda lya bokasi bwa ye libukani, montongo mwa nkembo ya ye ! »

48:18  Bino bato ba Dibon, bolongwa o ngwende ya bino, bofanda o mabelé masila mai, mpo mobebisi wa Moab akobimela bino, akobuka bibombamelo bya bino.

48:19  Bino bato ba Aroer, boteleme o nzela mpe botala, botuna bato bakimi, baye babiki o etumba. Botuna bango : « Likambo nini li-kweli kuna ? »

48:20  Moab asambwi, anyatemi, bokimela mpe boganga, boyebisa o Arnon ’te Moab abebi.

48:21  Bakati likambo lya ekolo ya Ngo­mba, lya Kolon, lya Yasa, lya Mefat,

48:22  lya Dibon, lya Nebo, lya Bet-Diblataim,

48:23  lya Kiryataim, lya Bet-Gamul, lya Bet-Meon,

48:24  lya Keriot, lya Bosra : lya bingumba binso bya Moab, biye bya mosika mpe biye bya penepene.

48:25  « Nguya ya Moab esili, loboko la ye lobukani. Yawe alobi bongo. »

48:26  Bolangwisa Moab, mpo ato­mbo­keli Yawe ; akobilingana o bosoto asanzi, bongo bato baseke ye lokola.

48:27  Bino bato bosekeki Israel te ? Bazalaki nde bayibi mpo ’te boningisa mitó mbala inso botangaki nkombo ya Israel ?

48:28  Bato ba Moab, botika bingumba bya bino, bokende kobombama o mibenga ! Bosala lokola ebenga ekotongaka zumbu lya yango o nsonge ya mobwaku.

48:29  Toyoki makambo ma lolendo mpe ma lofundo ma Moab : bazalaki kobete ntolo mpe koto­mbola mapeke !

48:30  Yawe alobi : Nayebi lolendo la ye, masolo ma ye mazangi ntina na misala mpamba mya ye !

48:31  Yango wana nalingi kolela Moab, koganga mpo ya ba-Moab banso, kokimela mpo ya bato ba Kir-Keres.

48:32  Nalelaki Yazer, kasi boleli mpo ya yo boleki, yo elanga ya vino ya Sibma : bitapi bya yo bikendeki kin’o nga­mbo ya mbu, bikomaki kin’o Yazer. Mobebisi akweli mbuma ya yo o ntango ya bobuki.

48:33  O ekolo ya Moab bakoyoka nsai lisusu te : vino esili o bingwongolo, bakamoli vino lisusu te, nzembo ya esengo eyokani lisusu te.

48:34  Migango mya Kesbon miyokani kin’o Eleale mpe Yakas, ut’o Soar kin’o Koronaim mpe Eglat-Selisya. Ata o etima ya Nimrim mai makomi kokauka.

48:35  Yawe alobi : Nakosala ’te ata mo­to moko wa Moab akoka lisusu kobonza libonza mpe kotumbela nzambe wa ye mpaka ya malasi te.

48:36  Yango wana motema mwa ngai mokomi kolela lokola mpiololo mpo ya ba-Moab mpe ba Kir-Keres, mpo nkita eye basangisaki ekei mpamba.

48:37  Banso bakokoli mitó, bakati mandefu, bamikati mpota o maboko mpe balati ngoto o loketo.

48:38  O mitondo minso mya ndako mpe o balabala inso basali lilaka, mpo nabuki Moab lokola bakobolaka mbeki iye izali na mosala lisusu te. Yawe alobi bongo.

48:39  Moab asuki ! Bolela ! Azipi elongi na nsoni, akomi lokola liseki, mpe eloko ya nsomo o miso ma bato banso bafandi penepene.

48:40  Yawe alobi boye : Monguna api­mbwi lokola engondo, atandi mapapu likolo lya Moab.

48:41  Bakobotolo bingumba, bakoboma bibombamelo. Mokolo mona mitema mya basoda ba Moab mikozala lokola motema mwa mwasi alingi abota.

48:42  Ekolo ya ba-Moab ebebi, mpo batombokeli Yawe.

48:43  Yawe alobi : Bino, bato ba Moab, bokoyoka nsomo, bokokoto o libulu to o motambo.

48:44  Oyo akokima makambo ma nsomo, akokweya o libulu, oyo akobima o libulu, akokangema na motambo. Nakotindela ba-Moab makambo maye o mobu bakozwa etumbu. Yawe moto alobi bongo.

48:45  Bato bakimi mpe balembi bakei kobombama o Kesbon. Kasi móto monene mobimi o Kesbon mpe o ndako ya mokonzi wa Sikon, mozikisi nsuki ya ba-Moab mpe mitó mya batomboki baye.

48:46  Mawa na yo, Moab ! Bino, bato ba Kemos, bosuki ! Bakokanga bana babali ba bino, bakokamba bana basi ba bino o boombo.

48:47  Kasi Yawe alobi : Mokolo mosusu nakobongisa Moab. Nsuka ya maloba ma bokaneli Moab.

Chapter 49

49:1  Yawe alobi boye na ba-Amon : Israel azali na bana babali lisusu te ? Azali lisusu na bana te, baye bakokitana ye ? Mpo nini Milkom abotoli Gad, mpe bato ba ye bakomi kofanda o bingumba bya ye ?

49:2  Yawe alobi : O mikolo mikoya nakoyokisa migango mya etumba o Raba ya ba-Amon : ekokoma mopotu, bingumba bya yango bikotumbama. O ntango ena Israel akolonga baye balongaki ye. Yawe alobi bongo.

49:3  Bato ba Kesbon, bokimela, mobebisi ayei. Basi ba Raba, bolela makasi ! Bolata ngoto, boyemba nzembo ya lilaka, bokende koyengayenga o mboka, mpo Milkom akokende o boombo elongo na banganga Nzambe mpe na bankumu ba ye banso.

49:4  Mpo nini omikumisi na nguya ya yo, yo, moto wa lofundo ? Otii motema na nkita ya yo na bolobi : « Nani ameka kobimela ngai ? »

49:5  Yawe wa bokasi bonso alobi : Ut’o bipai binso nakotindela yo makambo ma nsomo : bakobengana bino, bokokima, moto na moto o nzela ya ye ; moto moko akosangisa bino te.

49:6  Kasi na nsima nakobongisa maka­mbo ma bana ba Amon. Yawe alobi bongo.

49:7  Yawe wa bokasi bonso alobi boye na ba-Edom : Bwanya bosili nde o Teman ? Bato ba mayele bazali na malako lisusu te ? Bwanya bokimi bango, solo ?

49:8  Bato ba Dedan, bokima mbangu ! Bokende kobombama, zambi nakotindela ba-Ezau makambo ma mpasi, ntango nakopesa ye etumbu.

49:9  Soko bato bakobukaka mbuma ya vino bayei, bakotikela bino ata etuka yoko te. Soko bayibi bayei na butu, bakobebisa binso lokola balingi.

49:10  Ngai moko nakobotolo Ezau biloko binso, nakobuka bibombamelo bya ye, mpo ’te akoka kobombama lisusu te. Bankoko ba ye bakosila, bandeko na bayebani ba ye bakozala lisusu te !

49:11  Nakopangana na bana bitike ba yo, basi bazenge ba yo bakoki kotia mitema na ngai !

49:12  Yawe alobi boye : Baye base­ngeli komele nkeni ya etumbu te bati­ndami komele yango, bongo yo omele yango te ? Okokima etumbu te, okomele nkeni yango !

49:13  Yawe alobi : Nalayi o nkombo ya ngai moko ’te Bosra ekokoma ekolo ya nsomo, liseki, mopotu, moye bakotombela bobe : bakobebisa bingu­mba bya ye binso seko.

49:14  Yawe atindeli ngai nsango, ntoma atindami o bikolo, alobi : « Bosangana, bomilengele mpo ya e­tumba, bokende kobundisa Edom ! »

49:15  Nakokomisa yo ekolo ya mpa­mba, bongo bato banso bakokinola yo.

49:16  Bato banso bazalaki kobanga yo, yango nde etambwisi yo mayele. Okofandaka o kati ya mabanga mpe o nsonge ya ngomba isanda. Ata otongi ndako ya yo likolo mpenza lokola zumbu lya engo­ndo, nakobwaka yo o nse. Yawe alobi bongo.

49:17  Edom ekokoma eloko ya nsomo ; baye banso bakoleka wana bakokamwa mpe bakoseke na bomoni mpota ya ye inso.

49:18  Yawe alobi : Lokola o ntango Sodoma, Gomora na bingumba bya penepene bibebaki, moto moko akofanda to akozala wana lisusu te.

49:19  Lokola nkosi ebimi o zamba penepene na Yordane mpo ya kobimela etonga, nakokimisa bango na mbalakaka, mpe nakotia wana moto oyo ngai naponi. Bongo nani akokani na ngai ? Nani akoki nde kotuna ngai lika­mbo ? Wapi mokengeli wa mpata oyo akoki ngai ?

49:20  Boyoka makambo Yawe alengeleli Edom mpe maye akani kosala ba-Teman : bakolongola ata bana mpata, bakobebisa mpe bisobe o miso ma ye.

49:21  Mokili mokoningana ntango Edom ekokweya, bokimeli bwa bango bokoyokana kin’o Mbu Etane !

49:22  Monguna akobuta lokola engondo, akofungola mapapu mpe akokwela Bosra. Mokolo mwango mitema mya babuni mikozala lokola motema mwa mwasi alingi abota.

49:23  Ona Damasko. Amat na Arpad bakamwi mpo bayoki nsango ebe. Bazali mitema likolo lokola mbonge ilingi kokita te.

49:24  Bato ba Damasko babwaki elikya, baluki kokima, balengi lokola mwasi alingi abota.

49:25  Ndenge nini engumba ya lokumu mpe ya esengo ekomi mopotu ?

49:26  Yawe wa bokasi bonso alobi : Mokolo mona bilenge na babuni ba ye banso bakokufa o nzela.

49:27  O Damasko nakopelisa móto mokotumba ndako ya mokonzi Ben-Adad. Maloba ma bokaneli bituka bya ba-Arabu

49:28  Yawe alobi boye na Kedar mpe na bikolo bya Kasor, biye Nabukodonozor, mokonzi wa Babilon, alo­ngaki : Boteleme mpe bokende kobundisa Kedar, bosilisa bato epai ya Esti !

49:29  Babotolo bango biema na mpata, bilamba na bisaleli binso. Bayiba kamela ya bango, bagangela bango : « Nsomo bipai bi­nso ! »

49:30  Bato ba Kasor, Yawe alobi : bokima, bokende kobombama, zambi Nabukodonozor, mokonzi wa Babilon, akaneli bino, akani kobimela bino :

49:31  « Boteleme, bokende kobundisa ekolo eye efandi kimia ekolo eye ekobangaka eloko te mpe ezali mosika na bato basusu. Yawe alobi bongo.

49:32  Bakoyiba kamela ya bango, bakobotolo bango mpata ebele ! » Nakopanza bango bipai binso, bato baye bakati mandefu o matama. Nakotindela bango makambo ma mpasi bipai binso.

49:33  Kasor ekokoma mokili mwa mi­nsole mpe mopotu seko. Kuna moto moko akofanda lisusu te, mpe bato bakozala lisusu te.

49:34  O ebandela ya bokonzi bwa Sedekia o Yuda, Yawe alobi na profeta Yeremia mpo ya Elam :

49:35  Yawe wa bokasi bonso alobi boye : Tala, nakobuka matimbo ma ba-Elam, ntina ya bokasi bwa bango.

49:36  Nakobimisa mimpepe bipai binso ut’o nsuka inei ya mokili. Nakopanza bango bipai binso, ba-Elam bakokima bakokoma o bikolo binso.

49:37  Nakolengisa ba-Elam o miso ma banguna, o miso ma bato balingi koboma bango. Na nkanda enene nakotindela ba­ngo makambo ma mpasi. Nakotindela bango bato bakola­nda bango na mopanga kin’o nakosilisa bango banso.

49:38  Nakotia ngwende ya ngai o Elam, nakosilisa mokonzi na bankumu ba bango. Maloba ma Yawe.

49:39  Kasi mokolo moko nakobongisa makambo ma ba-Elam. Yawe moto alobi bongo.

Chapter 50

50:1  Yawe alobi na Yeremia maloba maye matali Babilon mpe ekolo ya ba-Kaldea.

50:2  Yebisa nsango o ntei ya bikolo, obomba eloko te, osakola yango : Babilon ekwei, Bel esambwi, Merodak asuki ; bikeko bya bango bibukani, banzambe ba bango bakiti.

50:3  Solo, bato bakouta o Nordi, bakokomisa ekolo ya yo mopotu, moto moko akofanda wana lisusu te, nyama na bato bakimi, balimwi.

50:4  O mikolo mina, o ntango ena, ba-Israel na ba-Yuda bakozongelana. Bakolela mpe bakoluka Yawe, Nza­mbe wa bango. Bakotuna nzela ya Sion, mpe bakokende kuna :

50:5  « Yakani, tokangana na Yawe, na bondeko bwa seko, boye tokobosana te ! »

50:6  Bato ba ngai bazalaki lokola mpata ebungami, bakengeli bazalaki kobungisa ba­ngo, bakomaki kotelengana o kati ya ngomba, longwa ngomba yoko tee ngomba esusu, babosanaki etonga ya bango.

50:7  Bato bakuti bango o nzela bazalaki kolia bango ; banguna bazalaki koloba : « Biso tozali na likambo te, bango moko basali mabe o miso ma Yawe, ebombamelo ya solo mpe elikya ya bankoko ba ba­ngo ! »

50:8  Bokima Babilon mpe ekolo ya ba-Kaldea. Bokende lokola mpata babali o boso bwa etonga.

50:9  Nakotinda bato ba bikolo binene bakouta o Nordi, banso elongo babundisa Babilon, bakozinga mpe bakobotolo yango, bakobete matimba lokola bilombe, mokolo moko te bakozonga maboko mpamba.

50:10  Bakobotolo biloko binso bya ba-Kaldea, baye bakobotolo bakotonda solo.

50:11  E bino bato bobebisi bato ba ngai, bosepela mpe boyoka nsai, bopimbwa lokola bana ngombe o esika ya matiti, bolela lokola farasa babali !

50:12  Mama wa yo akoyoka nsoni mingi, oyo aboti yo akosambwa. Babilon ekokoma ekolo ya nsuka ya bikolo, eliki, mokili mokauka, esobe.

50:13  Nkele ya Yawe ekokimisa bato ku­na, ata moto moko akozala lisusu te. Moto nyonso akoleka penepene na Babilon akokamwa, mpe akoseke ye na mpota ya ye inso.

50:14  Bino banso bokobeteke matimbo, bokende kobundisa Babilon, bozinga yango ; bobetele ye makula, bobanga te, mpo asali masumu o miso ma Yawe.

50:15  Bogangela ye migango mya etu­mba zongazonga na ye : bato ba ye batiki etumba, manongi makwei, bifelo bya engumba bibukani. Tala bobekoli bwa Yawe ! Bozongisela Babilon mabe ma ye ! Bosala na ye lokola asalaki bino !

50:16  Boboma o Babilon baloni banso na baye bakokataka mbuma ya bilanga. Banso bakima liwa na mopanga mpe bazonga o ndako.

50:17  Israel azalaki lokola mpata ebu­ngami, eye nkosi izalaki kobengana. Liboso mokonzi wa Asur aliaki ye. Na nsima Nabukodonozor, mokonzi wa Babilon, abuki ye mi­nkuwa.

50:18  Yango wana Yawe wa bokasi bo­nso, Nzambe wa Israel, alobi boye : Ngai oyo nayei kotumbola mokonzi wa Babilon mpe ekolo ya ye, lokola nasalaki na mokonzi wa Asur.

50:19  Nakozongisa Israel o esika ya ye ya matiti mpo ’te alia o Karmel mpe o Basan mpe atonda o ngomba ya Efraim mpe o Galaad.

50:20  Yawe alobi : O mikolo mina, o ntango ena, makambo mazangi bosembo makomonono o Israel lisusu te, mpe o Yuda masumu makozala lisusu te, zambi nakolimbisa baye nakotika na bomoi. Babilon ekokweya

50:21  Yawe alobi : Kende o mokili mwa Merataim ; kende kobundisa bango mpe bato ba Pekod ; boma mpe silisa bango banso ; sala lokola natindi yo.

50:22  Makelele ma etumba mayokani o ekolo mobimba ! Mokili mobebi nye !

50:23  Ndenge nini monyokoli wa nse mobimba abukani mpe Babilon ekomi eloko ya nsomo o kati ya bikolo binso ?

50:24  E Babilon, liboso ’te oyeba yango, okangemi o motambo yo moko otiaki.

50:25  Yawe afungoli ndako ya ye ya bibuneli mpe abimisi bibuneli bya ye bya nkanda. Maye masalemi o ekolo ya Kaldea mazali mosala mwa Yawe, Mokonzi wa bokasi bonso :

50:26  « Boya bino banso, bobuka bibombelo bya ye, bosangisa biloko binso, bobebisa byango : eloko yoko etikala lisusu te !

50:27  Boboma bilombe ba ye banso, bokamba bango o esika ya koboma ! Mawa na bango, mokolo mwa bango mokoki, mokolo mwa etumbu ya bango. »

50:28  Boyoka ! Bato bakimi mpe bakufi o Babilon te bayei kosangela o Sion ’te Yawe Nzambe wa biso abekoli mabe ma baye babebisi Tempelo ya ye. Lisumu lya lofundo

50:29  Bobenga bato ba matimbo bakende kobundisa Babilon ! Bino bato bokobeteke makula, bozinga engumba, moto moko akoka kokima te. Bozongisela ye maye ye moko asa­laki, manso ye moko asalaki, bosala ye mango. Mpamba te, alakisi Yawe lofundo, asali Mosantu wa Israel mabe.

50:30  Yawe alobi : Mokolo mona bilenge ba ye bakokweya o nzela, babuni ba ye banso bakokufa.

50:31  Mokonzi Yawe wa bokasi bonso alobi : Yo, engumba ya lofundo, nayei kotumbola yo, mokolo mwa yo mokoki.

50:32  Engumba eye ya lofundo ekotuta libaku, ekokweya, moto moko akosalisa yango te : Nakotumba bingumba bya yango, móto mokozikisa binso.

50:33  Yawe wa bokasi bonso alobi : Ba-Israel na ba-Yuda banyokwami, baye bakotisi bango o boombo bakangi bango makasi mpe baboyi kotika bango.

50:34  Kasi Mobikisi wa bango azali na nguya enene, nkombo ya ye : Yawe wa bokasi bonso. Ye moto akotalaka likambo lya ba­ngo, akokomisa ekolo ya bango kimia mpe akobangisa bato ba Babilon.

50:35  Yawe alobi : Mopanga, bete ba-Kaldea ! Boma bato ba Babilon, bankumu na bato ba bwanya !

50:36  Mopanga, boma batali makambo, babele ligboma ! Mopanga, boma bilombe ba bitu­mba banso, balenge na nsomo !

50:37  Mopanga, boma farasa na makalo ma bango, boma basoda bafutami, bakoma lokola basi ! Bebisa nkita ya bango, babotolo yango !

50:38  Mopanga, bebisa mai ma bango, makauka ! Mpamba te, ezali ekolo ya bikeko, biloko bina bya nsomo bikotambwisaka bango mayele !

50:39  Sikawa mbwa ya zamba na mi­nsole ikofanda kuna, maligbanga ikoluka esika ya kofa­nda kuna. Moto moko akozala kuna lisusu te.

50:40  Yawe alobi : Lokola o ntango ya Sodoma na Gomora mpe mboka iye Yawe abebisaki, moto moko akofanda kuna lisusu te, kuna okokuta bato lisusu te.

50:41  Tala bato ba ekolo ya Nordi bazali koya, ekolo enene na bakonzi baike babimi o nsuka ya mokili.

50:42  Bayebi mosala mwa litimbo na likongo, bazali na motema mabe, bakoyokaka mawa te, bakosalaka makelele lokola mbo­nge ya mbu, batandi milongo mya basoda ba farasa mpo ya kobundisa yo, Babilon.

50:43  Eyoki mokonzi wa Babilon nsa­ngo, maboko ma ye malembi, nsomo ekangi ye, ayoki mpasi lokola mwasi azali kobota.

50:44  Lokola nkosi ebimi o zamba lya Yordane mpo ya kolia mpata ya etonga, ngai nakokimisa bango na mbala yoko, mpe nakotia wana moto ngai naponi. Bongo nani akokani na ngai ? Nani akoki kotuna ngai likambo ? Wapi mokengeli wa mpata akoki na ngai ?

50:45  Boyoka naino makambo Yawe ale­ngeli mpo ya Babilon mpe maye akani kosala ekolo ya ba-Kaldea : bakobenda ata mpata ike ya eto­nga ! Bakobebisa bisobe bya matiti o boso bwa bango !

50:46  Esika Babilon ekokweya, mokili mokoningana, boleli bwa bato bokoyokana kin’o bikolo bisusu.

Chapter 51

51:1  Yawe alobi boye : Nakotindela Babilon na ba-Kaldea ekumbaki ekobebisa.

51:2  Nakotindela bango bato bapupola mpe basukola mokili mwa ba­ngo ; o mokolo mwa mpasi bakozinga bango bipai binso.

51:3  Bato ba litimbo bakobete se mpa­mba, bakokamata bibuneli se mpamba. Boyokela basoda ba bango mawa te ! Bosilisa limpinga lya bango mobi­mba.

51:4  Baye bazoki bakokufa o mokili mwa ba-Kaldea, baye batubwani bakokufa o balabala ya Babilon.

51:5  Kasi Nzambe wa bokasi bonso ati­ki Israel na Yuda te lokola basi bazenge, ata basali masumu o miso ma Mosantu wa Israel.

51:6  Bokima Babilon mpe bomibikisa, mbele bokokufa mpo ya mabe ma bango, zambi ntango Yawe akozongisa ma­be ekoki, akofutisa bango mabe bango moko basalaki !

51:7  Babilon azalaki lokola nkeni ya wolo o maboko ma Yawe, eye elangwisaki bato banso ba nse. Bato ba bikolo binso bameleki vino ya ye, eye esilisi bango mayele.

51:8  Babilon ekwei, na mbalakaka ebu­kani. Bosala lilaka, bokamata mafuta, bopakola mango o mpota ya ye, mbele akobika.

51:9  « Tolingaki kobikisa Babilon, kasi abiki te. Totika ye ! Tozonga moto na moto o ekolo ya ye. » Solo, etumbu ya ye ekomi kin’o likolo, etombwami tee o mampata.

51:10  Yawe ayeli biso libiki. Boya ! Tosakola o Sion mosala mwa Yawe Nzambe wa biso.

51:11  Bopelisa makula, bokamata nguba ! Yawe asali ’te mokonzi wa ba-Medi akende koboma Babilon lokola akani ; Yawe azongiseli bango mabe basalaki o Tempelo ya ye.

51:12  Botombola bendele o boso bwa bifelo bya Babilon ; bobakisa basoda bakengeli basusu, botia basinzili mpe bato bakende kobombama o nzela, zambi Yawe akokokisa maye akanelaki bato ba Babilon.

51:13  Yo moto ofandi penepene na mai manene, yo moto ozali na nkita enene, nsuka ya yo elingi ekoka, nsuka ya boyibi bwa yo.

51:14  Yawe wa bokasi bonso alayi o nko­mbo ya ye moko : Bato bakoya kotonda epai ya yo lokola mapaléla mpe bakogangela yo migango mya lilonga.

51:15  Oyo akeli mokili na nguya ya ye, oyo abongisi nse mobimba na bwanya bwa ye, oyo atandi etando ya likolo na mayele maike ;

51:16  Awa atomboli mongongo, anokisi mbula ut’o likolo, abutisi mampata manene o mokili mobimba, angengisi minkalali o ntango ya mbula, abimisi mimpepe o ebombelo ya ye.

51:17  Bato banso bakamwi mpe bayebi ntina te, motuli wa bikeko bya wolo ayoki nsoni, zambi biloko ye asali bizali se bya lokuta, bizangi mpema ya bomoi !

51:18  Bizali biloko bya mpamba, biloko bya koseke ; o ntango ya etumbu, binso bikolimwa.

51:19  Kasi Nzambe wa Yakob azali bo­ngo te, zambi ye akeli molóngó mobimba, mpe Israel azali libota lya ye mpe­nza. Nkombo ya ye, Yawe wa bokasi bonso. Ebeteli ya Yawe mpe ebakata ya ngomba

51:20  Yo Babilon, ozalaki ebeteli o maboko ma ngai, ebuneli ya kokende etumba. Na yo nanyataki bikolo, nasukisaki mikili.

51:21  Na yo nabeteki farasa mpe moto wa yango, likalo na motambwisi.

51:22  Na yo nabeteki babali na basi, babange na bana, bilenge babali na bilenge basi.

51:23  Na yo nabeteki bakengeli na mpata ya bango, bato ba bilanga na ngombe ya ba­ngo, bayangeli na bazuzi.

51:24  Kasi nakozongisela Babilon na ba-Kaldea banso mabe manso basalaki Sion o miso ma yo. Yawe alobi bongo.

51:25  Yo ngomba mobebisi, nakobimela yo, yo moto obebisi mokili mobimba. Maloba ma Yawe. Nakotombola loboko mpo ya kobete yo ; nakokweisa yo ut’o nsonge ya ngomba ya mabanga, nakokomisa yo ngomba eziki na móto.

51:26  Epai ya yo bakokata lisusu maba­nga ma litumu te, mabanga ma nse ma ndako mpe te, zambi okokoma mopotu seko. Maloba ma Yawe.

51:27  Botombola bendele likolo lya mokili, bobete mindule o bikolo binso ! Bobenga bato banso baya kobu­ndisa ye, bobenga bakonzi ba Ararat, Mini na Askenaz, botala malamu ’te soda moko azanga te, botinda farasa, ebele lokola li­mpi­nga lya mapalela.

51:28  Bolengele bikolo bakende etumba : mokonzi wa Medi, bayangeli, ba­nkumu na bato banso ba bokonzi bwa ye.

51:29  Mokili moningani mpe molengi, zambi Yawe akosala na Babilon lo­kola akanaki : akokomisa Babilon mopotu, mozali na bato te.

51:30  Basoda ba Babilon batiki kobunda, bakei kobombama o bibombamelo. Makasi ma bango masili, bakomi lokola basi. Ndako ya bango inso itumbami, bikangeli bya bizibeli bibukani.

51:31  Bantoma balandani, moko ayei nsima ya mosusu mpo ya koyebisa mokonzi wa Babilon ’te babotoli engumba ya ye :

51:32  bakangi nzela o bisika binso bakokatisaka mai, batumbi bibombamelo, basoda banso bakomi na nsomo.

51:33  Yawe wa bokasi bonso, Nzambe wa Israel, alobi : Babilon ekomi lokola etutelo, eye basengeli kolalisa malamu ; ntango ya bobuki mbuma ekoki.

51:34  Mokonzi Nabukodonozor alei ngai, asilisi ngai, atiki ngai lokola sani mpamba ; ameli ngai lokola ebuki ya ngando tee atondi meke, abengani ngai o paradizo ya ngai.

51:35  Bato ba Sion bakoloba : « Mpasi inso ayokisi biso, ikwela mpe Babilon ! » Yeruzalem akoloba : « Makila ma ngai masopana o ba-Kaldea ! »

51:36  Yango wana Yawe alobi boye : Nakotala likambo lya yo, nakobekolela yo. Nakokaukisa ebale na maziba ma ye.

51:37  Babilon ekokoma mobondo mwa mabanga, esika minsole mikofandaka, esika ya nsomo mpe ya kotiola, moto moko akofanda wana lisusu te.

51:38  Banso elongo baleli lokola nkosi, basali makeléle lokola bana ba nko­si ;

51:39  ekomi bango koyoka nzoto móto, nakolambela bango limpati mpe nakolangwisa bango mpo ’te batonda na esengo, mpe balala mpongi seko, balamuka lisusu te. Maloba ma Yawe.

51:40  Nakokamba bango o esika ya koboma, lokola mpata na ntaba babali.

51:41  Ndenge nini babotoli Sesak, engumba eye elekaki lokumu o nse mobimba ? Ndenge nini Babilon ekomi eloko ya nsomo o ntei ya bikolo binso ?

51:42  Mai ma mbu matombwami kin’o Babilon, mbonge ikasi izindisi yango.

51:43  Bingumba bya ye ikomi mipotu, mabelé makauki, esobe mpamba : moto moko akofanda to akoleka wana lisusu te.

51:44  Nakotumbola Bel o Babilon, nakobotolo ye biloko aliaki. Bato ba bikolo bisusu bakokoma kuna lisusu te ; lopango lozingi Babilon lokwei.

51:45  E bato ba ngai, bolongwa awa, moto na moto amibikisa, mpo Yawe ayoki nkanda enene.

51:46  Bolembe te, boyoka mitema nso­mo na boyoki nsango ikota­mbola o mokili : O mobu moko bakopanza nsango eye, mobu mosusu bakoyela bino nsango esusu : ekolo etondi na makambo makasi makasi, monyokoli moko akitani monyokoli mosusu.

51:47  Solo, o mikolo mikoya, nakotumbola bikeko bya Babilon. Mokili mwa ye mobimba mokoyoka nsoni mpe bibembe bya ye bikolala bipai binso.

51:48  O mokolo mona bikelamo binso bya likolo na nse bikoyembela Babilon nzembo ya lilonga, zambi baye bakoya kobebisa Babilon bakouta o Nordi ! Maloba ma Yawe.

51:49  Lokola o nse mobimba bato bakufaki mpo ya Babilon, Babilon asengeli kokweya mpo ya bato ba Israel ye abomaki.

51:50  Bino bato bokufa na mopanga mwa ye te, bokende, boteleme te ! Bosambela Yawe ntango bokomi mosika mpe bokanisa Yeruzalem lisusu :

51:51  « Toyokaki nsoni ntango bazalaki kofinga biso, totondaki na nsoni : bauta bakotoki o ndako isantu ya Tempelo ya Yawe. »

51:52  Yawe alobi boye : O mikolo mikoya nakotumbola bikeko bya ye, o mokili mobimba bato bakokimela mpe bakokufa.

51:53  Ata Babilon abuti o likolo, ata alendisi bibombamelo bya ye, nakotindela ye bato babebisa ye. Maloba ma Yawe.

51:54  Bakoyoka boleli o Babilon, ekolo ya ba-Kaldea ekomi na mawa !

51:55  Yawe akobebisa Babilon, akosilisa makeléle ma ye manso. Ata makelele mazalaki makasi lokola mbonge ya mbu, Yawe akosilisa mango.

51:56  Solo, mobebisi akobebisa Babilon ; bakokanga basoda ba ye, bakobuka matimbo ma bango ; Yawe, Nzambe wa bobekoli, akozongiselaka bato mabe ma ba­ngo !

51:57  Nakolangwisa bayangeli na bato ba ye ba bwanya, bankumu, bazuzi na bilombe ba ye, bakolala mpongi seko, bakolamuka lisusu te. Mokonzi, nkombo ya ye Yawe wa bokasi bonso, alobi bongo !

51:58  Yawe wa bokasi bonso alobi : Lopango lonene la Babilon loko-kweya mobimba, mpe bizibeli bya ye bilai bikozika. Bongo bato bamilembisi se mpa­mba, bamiyokisi mpasi mpo basuka o móto.

51:59  Profeta Yeremia apesi etinda eye na Seraya, mwana wa Neria, nkoko wa Maseya, o ntango ake­ndeki o Babilon elongo na Sedekia, moko­nzi wa Yuda ; ezalaki o mobu mwa minei mwa bokonzi bwa ye. Seraya azalaki kotala makambo manso ma ndako ya mokonzi.

51:60  Yeremia akomaki o buku yoko mpasi inso ili­ngaki ikwela Babilon, maloba ma­nso makomami awa matali Babilon.

51:61  Alobi na Seraya : « Mokolo okokoma o Babilon, otangela bato maloba mana manso.

51:62  Okoloba : “E Ya­we, yo moto osakoli ’te engumba eye ekobeba nye, ekokoma mopotu seko ; moto to nyama akofanda wana lisusu te.”

51:63  Esilisi yo kotanga monkanda moye, okokangisa mwa­ngo na libanga mpe okobwaka mwango o ebale Efrate.

51:64  Okoloba : Babilon akozi­nda se bongo ; nsima ya mpasi inso, iye ngai moto nati­ndeli ye, akoteleme lisusu te. » Maloba ma Yeremia masuki awa.

Chapter 52

52:1  Sedekia akokisaki mibu ntuku ibale na moko o nta­ngo akomi mokonzi ; ayangeli ekolo mibu zomi na moko o Yeruzalem. Mama wa ye Amital, mwana wa Yirmeya, azalaki moto wa Libna.

52:2  Makambo ma ye masepelisi Yawe te, se lokola Yoyakim.

52:3  Yawe asilikeli Yeruzalem na Yuda mingi, akani kobwaka bango seko. Sedekia atombokeli mokonzi wa Babilon.

52:4  O mobu mwa libwa mwa bokonzi bwa ye, o sanza ya zomi, o mokolo mwa zomi, mokonzi Nabukodonozor akei elongo na basoda ba ye banso kobundisa Yeruzalem. Apiki nganda o boso bwa engumba mpe azingi yango na bisika makasi.

52:5  Babundisi yango kin’o mobu mwa zomi na moko mwa bokonzi bwa Sedekia.

52:6  O sanza ya inei, o mokolo mwa libwa, ntango nzala enene ezalaki kongala o engumba mpe bato bazalaki na eloko ya kolia te,

52:7  basali lidusu o efelo ya engumba. Ata ba-Kaldea bazalaki kozinga engumba, basoda bakimi na butu, babimi epai ya ezibeli o kati ya bifelo bibale penepene na elanga ya mokonzi ; na nsima basimbi nzela ya lobwaku la Araba.

52:8  Kasi basoda ba-Kaldea balandi mokonzi mpe bakomi epai ya Sedekia o esobe ya Yeriko, basoda ba ye banso batiki ye mpe bakimi.

52:9  Ba-Kaldea baka­ngi mokonzi moombo, mpe bakei na ye o Ribla o mokili mwa Amat, batiki ye o maboko ma mokonzi wa Babilon mpo ’te asa­mbisa ye.

52:10  Mokonzi wa Babilon abomisi bana ba Sedekia o miso ma ye ; asali se bongo o Ribla na baya­ngeli banso ba Yuda.

52:11  Na nsima atindi ’te batubola Sedekia miso, bakanga ye na minyololo mya mbengi, bakamba ye o Babilon mpe bakotisa ye o boloko kin’o liwa lya ye.

52:12  O mobu mwa zomi na libwa mwa bokonzi bwa Nabukodonozor o Babilon, o sanza ya itano, o mokolo mwa zomi, Nebuzaradan, komanda wa bakengeli mpe mosaleli wa mokonzi o Babilon, ayingeli o Yeruzalem.

52:13  Atumbi Tempelo ya Yawe, ndako ya mokonzi mpe ndako inso ya Yeruzalem.

52:14  Basoda ba-Kaldea ba ko­ma­nda wa bakengeli babukibuki ma­pango manso mazingi Yeruzalem.

52:15  Nebuzaradan, komanda wa bakengeli, akangi naino bato baye batikalaki o engumba, na basoda baye bakimaki epai ya mokonzi wa Babilon, na bato ba mosala ; atindi ba­ngo bo baombo o Babilon.

52:16  Kasi Nebuzaradan, komanda wa bake­ngeli, atiki babola basusu, bato ba bilanga bya vino mpe baye bakokataka bilanga.

52:17  Ba-Kaldea babukibuki mako­nzi manene ma mbengi ma Tempelo ya Yawe, bitemiseli na Ebombelo enene ya mai ya mbengi, eye ezalaki o Tempelo ya Yawe. Bakei na mbengi inso o Babilon.

52:18  Bakamati mbeki ya makala, mpau, mbeli, sani ya ko­nyakela mai, kopo na bisaleli bisusu bya mbengi bya milulu mya losambo.

52:19  Komanda wa bakengeli akamati mpe sani na mbeki ya mpaka ya malasi, sani ya konyakela mai, mbeki, bitemiseli bya mwinda, kopo na biloko bisusu binso bya wolotopalata.

52:20  Mbengi ya biloko binso : makonzi manene mabale, Ebombelo enene ya mai, bikeko bya ngombe zomi na ibale o nse, na bitemiseli, biye mokonzi Salomo asalaki mpo ya Tempelo ya Yawe, moto moko ayebi bozito bwa bya­ngo te.

52:21  Likonzi lyoko lizalaki na bolai maboko zomi na mwambe ; mbinga ya lyango ezalaki ya misapi minei ; o kati eloko ezalaki te.

52:22  Mo­tó mwa likonzi mozalaki mwa mbe­ngi, bolai maboko matano, mozi­ngami mobi­mba na monyama mpe na bilili bya ndimo ; inso izalaki ya mbengi. Se bongo likonzi lya mabale.

52:23  Ndimo ya motindo mona ntuku libwa na motoba itingami. Manso mazalaki monkama zongazonga na monyama mwa mbengi.

52:24  Komanda wa bakengeli akangi nga­nga mokonzi Seraya, nganga Nzambe mosalisi Sefanya mpe bakengeli ba bizibeli basato.

52:25  O e­ngu­mba akangi mpe eniki moko, komanda wa basoda basusu, na basaleli nsambo ba mokonzi nsambo bazalaki o engumba ; akangi mpe mokomi wa komanda wa basoda, oyo asengeli kokomisa bato o mosala mwa soda, na mpe bato ntuku motoba bazalaki o engumba.

52:26  Nebuzaradan, komanda wa bakengeli, akangi bango mpe akei na bango epai ya mokonzi wa Babilon o Ribla.

52:27  Mokonzi wa Babilon abomisi bango o Ribla, o mokili mwa Amat. Tala boniboni ba-Yuda bakei o boombo mosika na ekolo ya ba­ngo.

52:28  O mobu mwa nsambo mwa bokonzi bwa ye, Nabukodonozor akangi bato ba Yudea 3 023 o boombo.

52:29  O mobu mwa zomi na mwambe mwa bokonzi bwa ye, Nabukodonozor, akangi bato ba Yeruzalem 832 o boombo.

52:30  O mobu mwa ntuku ibale na misato mwa bokonzi bwa Nabukodonozor, Ne­buzaradan, komanda wa bake­ngeli, akei na bato ba Yudea 745. Bango banso bazalaki : bato 4 600.

52:31  Kasi o mobu mwa ntuku isato na nsambo mwa boombo bwa Yoyakim, mokonzi wa Yuda, o sanza ya zomi na ibale, o mokolo mwa ntuku ibale na mitano, Evil-Merodak, mokonzi wa Babilon, o mobu moye akomi mokonzi, ayokeli Yoyakim mawa mpe abimisi ye o boloko.

52:32  Alakisi ye bondeko mpe apesi ye esika ya lokumu o ntei ya bakonzi banso bazalaki na ye o Babilon.

52:33  Yoyakim alongoli bilamba bya moto wa boloko, mpe azalaki kolia ntango inso o meza ya mokonzi, bomoi bwa ye mobimba.

52:34  Mokonzi wa Babilon azalaki kosalisa ye na biloko bya bolei mokolo na mokolo, bomoi bwa ye mobi­mba kin’o liwa.