LinVB - Ezekiel

Chapter 1

1:1  O mobu mwa ntuku isato, o sanza ya inei, o mokolo mwa mitano, nazalaki o kati ya bato bakangemi baombo penepene na ebale Kebar. Likolo lifungwani, namoni mamoni mauti na Nzambe.

1:2  Ezalaki o mobu moye mokonzi Yoyakin akokisi mibu mitano o boombo, o mokolo mwa mitano mwa sanza.

1:3  Yawe alobi na profeta Ezekiel, mwana wa Buzi, o ekolo ya ba-Kaldea, penepene na ebale Kebar. Yawe atieli ye loboko kuna.

1:4  Awa natali, namoni mompepe makasi mouti o Nordi, limpata linene liyei. Limpata lizingami na mololi mwa móto moye mozalaki kobimisa mi­ntetei, mpe kongengisa bibende o ntei ya móto.

1:5  O kati ya limpata namoni bikelamo binei bizali na bomoi, biulani na bato.

1:6  Moko moko azalaki na bilongi binei mpe na mapapu manei.

1:7  Makolo ma bango ma­zalaki semba, matambi ma ba­ngo maulani na maye ma ngombe, ma­ngengi lokola mbengi epetwami kitoko.

1:8  Maboko ma bato mabimi o nse ya mapapu ma bango, matandemi epai ya nsuka inei ya mokili. Bilongi bya bango bitali mpe bipai binei, na mapapu lokola.

1:9  Mapapu ma bango makangani ; bazalaki koke­nde se o liboso, batali nsima te.

1:10  Mo­ko moko azalaki na elongi lokola elo­ngi ya moto. Epai ya mobali bazalaki na elongi ya nkosi, epai ya mwa­si na elongi ya ngombe, epai ya nsima na elongi ya engondo.

1:11  Mapapu ma bango mafungwani epai ya likolo ; mabalé masimbani, mabalé mazipi nzoto ya bango.

1:12  Moko moko azalaki kokende se o liboso, epai elimo ezalaki kotinda bango ; bazalaki kotala epai na epai te.

1:13  O ntei ya nyama ezalaki komonono eloko lokola makala ma móto makasi, moulani na bisungi bya móto, bizalaki kokende mpe kozo­nga o kati ya nyama. Móto mozalaki kongenge makasi mpe mi­nkalali mizalaki kobima.

1:14  Bikelamo bina bizalaki kokende mpe kozonga lokola minkalali.

1:15  Natali nyama iyei mpe namoni o nse yika penepene na nyama izalaki na bilongi binei.

1:16  Yika ina izalaki kongenge lokola mabanga ma krizolite, inso inei izalaki ndenge yoko. Yika isalemi boye : inso inei izalaki kokangana.

1:17  Ntango ita­mboli, izalaki kokende o nzela inei, yoko yoko o nzela ya yango, ata yoko te ezalaki kotala nsima.

1:18  Yika izalaki inene, nsomo mpenza ! O zo­longano ya yika yoko yoko miloli mike mya móto mizalaki ebele.

1:19  Soko bikelamo binei bikei, yika inei izalaki mpe kokende na bango elongo. Soko bikelamo bimito­mbo­li o likolo, yika mpe itombwa­mi.

1:20  Bikelamo bizalaki koke­nde bo­bele o esika eye elimo ezalaki kotinda byango. Yika izalaki koto­mbwama, zambi elimo ya bikelamo bizali na bomoi ezalaki o kati ya yika.

1:21  Soko bitamboli, yika mpe ita­mboli ; soko bitelemi, yika mpe itelemi ; soko bitombwami o likolo, yika itombwami lokola, zambi elimo ya bikelamo ezalaki o kati ya yika.

1:22  Likolo lya mitó mya bikelamo bya bomoi etando emononi lokola etando ya likolo, enge­ngi lokola libanga lya diama likolo lya mitó mya bango.

1:23  O nse ya etando, mapapu ma bango matandani, mpe nsonge ya mapapu ikutani. Moko moko azalaki na mapapu mabale, mpo ya kozipa nzoto.

1:24  Nayoki lokito la mapapu ma bango lokola lokito la mai makasi, lokola mongongo mwa Yawe wa bokasi bonso. Ntango batamboli, nayoki lokito la mompepe mwa ekumbaki, lokola lokito la nganda ya bato ebele. Etelemi bango, bakitisi mapapu.

1:25  Na nsima nayoki lolaka likolo lya etando mpe lya mitó mya bango.

1:26  Mpe leka etando likolo lya mitó mya bango, namoni libanga linene lya diama ; lizalaki na efandeli lokola ngwende ya mokonzi. O efandeli namoni ekelamo yoko eulani mi­ngi na moto.

1:27  Namoni ’te azalaki kongenge lokola ebende, móto mozalaki penepene na ye ; mozingi ye o loketo mpe likolo lya loketo. O esika ena móto mozalaki ko­ngenge zongazonga na ye.

1:28  Móto mona mo­ulani na monama mokobimaka o mampata nsima ya mbula. Bo­ngengi bona boulani na nkembo ya Yawe. Nátala boye, nakwei elongi o nse. Nayoki mo­ngongo mozalaki koloba na ngai.

Chapter 2

2:1  Alobi na ngai : « Mwana wa moto, teleme, bongo naloba na yo. »

2:2  Elobi ye bongo, elimo akoteli ngai mpe atelemisi ngai ; nayoki moto azali koloba na ngai.

2:3  Alobi : « Mwana wa moto, natindi yo epai ya bato ba Israel, baye baboyi kotosa ngai. Batombokeli ngai, lokola bankoko ba bango, tee lelo.

2:4  Bazali na motó makasi mpe na motema libanga. Natindi yo epai ya bango, oyebisa bango boye : ‘Boyoka makambo Mokonzi Yawe alobi.’

2:5  Báyoka to báyoka te, zambi bazali batomboki, bakoyeba ’te profeta azali o kati ya bango.

2:6  Yo, mwana wa moto, yoka : Obanga bango te, obanga mpe maloba ma bango te, soko baboyi maloba ma yo mpe bakinoli yo, mpe soko ofandeli nkotó. Obanga maloba ma bango te, obanga mpe bilongi bya bango te, zambi bazali batomboki.

2:7  Okoyebisa bango maloba ma ngai ; báyoka to báyoka te, loba, zambi bazali batomboki.

2:8  Yo mwana wa moto, yoka maye nakoyebisa yo. Ozala motó makasi te lokola bato ba ekolo eye. Fungola monoko mpe lia biloko nakopesa yo. »

2:9  Natali, namoni moto moko amemi buku mpe atandeli ngai loboko.

2:10  Afungoli yango o miso ma ngai. Namoni ’te bakomi makambo epai ya liboso mpe epai ya nsima ya lokasa. Bakomi wana : ‘Nzembo ya lilaka, ya bokimeli mpe ya boleli’.

Chapter 3

3:1  Mokonzi alobi na ngai : « Mwana wa moto, lia ; lia buku eye napesi yo. Na nsima kende koloba makambo na bato ba Israel. »

3:2  Nafungoli monoko mpe aleisi ngai buku ena.

3:3  Alobi na ngai : « Mwana wa moto, tondisa libumu lya yo na buku eye napesi yo. » Nalei yango mpe nayoki elengi lokola mafuta ma nzoi.

3:4  Alobi na ngai : « Mwana wa moto, kende epai ya bato ba Israel mpe loba na bango maloba ma ngai.

3:5  Natindi yo epai ya bato basusu te, baye oyebi lokota la bango malamu te to baye bazali na elobeli esusu, kasi natindi yo epai ya bato ba Israel.

3:6  Natindi yo o bikolo bya bato ebele te, oyebi lokota la bango malamu te to baye bazali na elobeli esusu. Soko natindi yo epai ya ba­ngo, mbele bakoyoka yo !

3:7  Kasi bato ba Israel baboyi koyoka yo, mpo balingi koyoka ngai te. Bato banso ba Israel bakomi motó makasi mpe motema libanga.

3:8  Yoka, nakokangisa elongi ya yo, ekoma lokola bilongi bya bango, mpe nakokomisa yo motó makasi lokola bango.

3:9  Nakopesa yo motó makasi lokola diama, moleka mabanga ma­nso na bokasi. Obanga bango te, olenge o boso bwa bango te, mpo bazali batomboki. »

3:10  Na nsima alobi na ngai : « Mwana wa moto, tia matoi na maloba manso nakoloba na yo, mpe bomba mango o motema.

3:11  Kende epai ya bato bakangemi o boombo, bato ba ekolo ya yo. Loba na bango, báyoka to báyoka te, loba : ‘Boyoka maloba ma Mokonzi Yawe’. »

3:12  Elimo atomboli ngai, nayoki o nsima ya ngai lokito lonene lolobi : « Bakumisa nkembo ya Nzambe o ndako ya ye. »

3:13  Ezalaki lokito la mapapu ma bikelamo bya bomoi, mazalaki kotutana, lokito la yika penepene na bango, mpe lokito la boningani bwa mokili.

3:14  Elimo ato­mboli ngai mpe amemi ngai ; nakei na motema mawa mpe na nka­nda. Loboko la Yawe lozalaki ko­nyata ngai.

3:15  Nakomi o Tel-Abib epai ya bato bakangemi o boombo penepene na ebale Kebar. Natikali wa­na mikolo nsambo o kati ya ba­ngo, na nsomo o motema.

3:16  Nsima ya mikolo nsambo, Yawe alobi na ngai maloba maye :

3:17  « Mwana wa moto, natii yo moke­ngeli wa Israel. O nkombo ya ngai okokebisa bango na maloba okoyoka o monoko mwa ngai.

3:18  Soko nalobi na mosumuki ‘Okokufa sikawa’, kasi yo okebisi ye te mpe olobi eloko te, opaleli ye te mpo atika masumu ma ye mpe abika, akokufa mpo ya masumu ma ye, kasi nakosambisa yo mpo ya liwa lya ye.

3:19  Kasi soko opaleli mosumuki, nzokande atiki ezalela ya ye te mpe aboyi masumu ma ye te, ako­kufa mpo ya masumu ma ye, kasi yo okozala na likambo te.

3:20  Soko moto semba atiki nzela ya bosembo mpe akomi kosala mabe, ngai nakotiela ye motambo mpe akokufa. Akokufa mpo ya masumu ma ye, zambi yo okebisaki ye te. Nakokundola bosembo bwa ye bwa kala lisusu te, kasi nakosambisa yo mpo ya liwa lya ye.

3:21  Nzokande soko okebisi moto semba mpo ’te asa­la mabe te, mpe ye andimeli yo, akobika zambi okebisaki ye ; yo mpe okobika. »

3:22  Yawe akamati ngai bobele wana. Alobi na ngai : « Teleme, bima o lo­bwaku, na nsima nakoloba na yo. »

3:23  Natelemi mpe nabimi o lo­bwaku, mpe ya solo, nkembo ya Yawe ezalaki wana lokola nkembo namonoki pene na ebale Kebar. Namibwaki elongi o nse.

3:24  Elimo akiteli ngai ; atelemisi ngai mpe alobi : « Kende kobombama o ndako ya yo.

3:25  Mwana wa moto, yoka : Bato bakokanga yo makulu o maboko mpe o makolo ; okolongwa lisusu o kati ya bango te.

3:26  Nakosala ’te lolemu la yo lokangema o edada ; oko­koma ebubu, okopalela bango lisusu te, zambi bazali batomboki.

3:27  Kasi mokolo nakoloba na yo, nakofungola monoko mwa yo mpe okoloba na bango : Mokonzi Yawe alobi boye : Oyo alingi koyoka, áyoka ; oyo alingi koyoka te, áyoka te, mpo bazali batomboki. »

Chapter 4

4:1  Mwana wa moto, yoka. Kamata biriki yoko mpe tia yango o liboso lya yo. Oyema o biriki elili ya engumba Yeruzalem.

4:2  Okende kobundisa yango. Otimola mabulu na mibenga, opika mpe nganda bipai na bipai zongazonga na yango. O bisika bina binso okotia masini maye makobomaka bifelo.

4:3  Na nsima kamata li­nzanza linene lya bibende mpe tia lyango lokola efelo o kati ya yo na engumba. Kengele ya­ngo na miso makasi, mpe basoda bazinga mboka. Ekozala elembo ona bato ba Israel.

4:4  Omilalisa o mopanzi mwa yo mwa mwasi, mpe meme masumu ma bato ba Israel. Okomeme masumu ma bango mikolo minso okolala bongo o mopanzi.

4:5  Natangi mibu miye bazalaki kosumuka ; mikokani na mikolo nkama isato na ntuku li­bwa, miye okomeme bongo masumu ma bato ba Israel.

4:6  Okokokisa mikolo mina, na nsima omilalisa mbala ya ibale o mopanzi mwa mobali ; okomeme masumu ma bato ba Yuda mikolo ntuku inei. Napesi yo mokolo moko mpo ya mobu moko.

4:7  Okotala epai ya Yeruzalem eko­zi­ngama na basoda, okotombola loboko mpe okosakola maloba ma bokaneli yango.

4:8  Tala, nakoka­nga yo na makulu, bongo okokoka komibo­ngola te, mpe komilalisa o mopanzi mosusu te, tee etumba eye ekosila.

4:9  Bongo kamata mbuma ya ma­mpa, masangu, madesu, wandu, wa­ngila na loso ; tia byango o nzu­ngu yoko mpe lamba na byango mampa. Mikolo minso okolala o mopanzi, mikolo nkama isato na ntuku libwa okolia biloko biye.

4:10  Okolia byango kopo yoko o mokolo moko (mitako 20), okolia ya­ngo mokolo na mokolo.

4:11  Okomele mpe mai : litele yoko o mokolo moko, mokolo na mokolo.

4:12  Lamba mampa maye lokola mi­nkate mya masangu. Okolamba mango o miso ma bango o móto bapelisi na nyei ya bato.

4:13  Yawe alobi : « Bato ba Israel bakolia biloko mbindo se bo­ngo o bikolo nakopanza bango. »

4:14  Nayanoli : « E Mokonzi Yawe, mo­limo mwa ngai mozali peto. Banda bomwana nalei naino mosuni mwa nyama te eye ekufi na bokono to bapasolaki. Mokolo moko te natii mosuni mbindo o monoko. »

4:15  Alobi na ngai : « Likambo te, okoki kokamata nyei ya ngombe o esika ya nyei ya bato, o móto moye okolamba mampa ma yo. »

4:16  Na nsi­ma alobi : « Mwana wa moto, nakosilisa ma­mpa manso matikali o Yeruzalem. Bato bakolia na nsomo se ndambo ya mampa maye bamekaki bozito ; bakomele se mwa mai na nsomo o motema,

4:17  mpo mampa na mai makozanga ; bato bakobanga mpe bakosuka mabe mpo ya masumu ma bango. »

Chapter 5

5:1  Mwana wa moto, kamata etebu basebi malamu, kata nsuki ya yo. Kokola motó mpe kata ma­ndefu. Na nsima kamata emekeli mpe kabola nsuki ya yo na ndambo isato.

5:2  Tumba ndambo yoko ya nsu­ki o kati ya engumba tee mikolo mya kozinga yango mikosila. Kamata ndambo ya ibale, katakata yango na mopanga mwa yo mpe panza yango zongazonga na engu­mba. Bwaka ndambo ya isato, nakolanda yango na mopanga mpe nakopanza yango.

5:3  Kasi tia mwa ndambo o nsonge ya elamba ya yo.

5:4  Kamata mpe ndambo ya yango eke, bwaka yango o móto etumbama ; ekopelisa móto moye mokosilisa bato ba Israel.

5:5  Mokonzi Yawe alobi boye : Napesaki Yeruzalem esika o kati ya bikolo, ezingami na mikili misusu.

5:6  Kasi bato ba ye baboyi mibeko mpe mitindo mya ngai, leka bikolo bisusu bya penepene ; bakinoli mibeko mya ngai, mpe baboyi kotosa mitindo mya ngai.

5:7  Yango wana Mokonzi Yawe alobi boye : Botomboki bwa bino boleki boye bwa bato ba bikolo biye bizingi bino. Botiki nzela ya mibeko mya ngai, botosi mimeseno mya ngai te. Botosi mpe mimeseno mya bikolo bisusu te, biye bizingi bino.

5:8  Yango wana Mokonzi Yawe alobi boye : Ngai mpe sikawa nakotu­mbola bino ; nakopesa bino etumbu o miso ma bato ba bikolo bisusu.

5:9  Mpo ya makambo manso ma nsomo bosalaki, nakosala na bino lokola nasalaki naino te, mpe lokola nakosala nsima lisusu te.

5:10  Yango wana batata basusu bakolia bana o engumba ya bino, mpe bana basusu bakolia batata ba bango. Nakopesa bino etumbu eye nakaneli bino, nakopanza bato baye bakotikala bipai binso.

5:11  Yango wana Mokonzi Yawe alobi boye : Nalayi o nkombo ya ngai, awa obebisi ndako ya ngai esantu na makambo ma bino ma­nso ma nsomo mpe ma bosoto, ngai mpe nakosilisa yo. Nakoyokela yo mawa te mpe okozwa ngolu o miso ma ngai te.

5:12  Nakokabola bato ba yo na ndambo isato : yoko ya isato ya bato bakokufa na bokono bobe mpe na nzala ekongala o ekolo ; yoko ya isato ya bato bakokufa na mi­mpanga mya basoda bakozinga yo, yoko ya isato ya bato bakopa­nzana bipai binso, nakobimisa mopanga mpo ya kosilisa bango.

5:13  Nakosilisa bongo nkanda ya ngai ; motema mwa ngai mokokita bobele soko nazongiseli bango mabe basalaki ngai. Bongo bakoyeba ’te ngai Yawe nakanaki mokano mpe nasilisaki nkanda ya ngai mpo ya zuwa.

5:14  Na­kokomisa mboka ya yo mopotu. Nakosala ’te bato banso ba bikolo bisusu baseke yo o miso ma bato bakoleka epai ya yo.

5:15  Bato ba bikolo bisusu bakoseke mpe bakofinga yo, bakokamwa mingi o eleko nakotumbola yo na nkanda enene mpenza na bitumbu bya nsomo. Ngai Yawe nalobi bongo.

5:16  Nakotindela bino makula ma nsomo ma nzala makoboma bino, mo­ngenge mwa nsomo, nakobebisa mampa ma­ye bobombaki.

5:17  Nakotindela bino nzala enene mpe nyama ya za­mba ibotolo bana ba bino ; bokono bobe mpe bitumba bikokwela bino ; mopanga mokoboma bino. Ngai Ya­we nalobi bongo.

Chapter 6

6:1  Yawe alobi na ngai boye :

6:2  Mwana wa moto, tala ngomba ya Israel mpe sakola maloba ma bokaneli yango.

6:3  Okoloba : Ngomba ya Israel, boyoka liloba lya Moko­nzi Yawe. Mokonzi Yawe alobi na ngomba inene na ike, na mabwaku manene na make, maloba maye : Ngai oyo nakotindela bino mopa­nga, nakobuka ndako inso o bisika bino bokokumisaka banzambe ba lokuta.

6:4  Nakobuka bitumbelo bya bino, nakobebisa bisika biye bokotumbaka mpaka ya malasi, mpe nakosilisa bato ba bino, batubwana o boso bwa bikeko bya banzambe ba bino.

6:5  Nakosangisa bibembe bya ba­to ba Israel penepene na bikeko bya bango, mpe nakopanza minkuwa mya bango zongazonga na bitumbelo bya bango.

6:6  O ekolo ya bino mobimba nakoboma bingu­mba bya bino mpe nakobebisa ndako ya bikeko. Nakobuka bitumbelo bya bino mpe nakobebisa bya­ngo, nakoboma bikeko bya bino. Nakosilisa bisika bya kotumba mpa­ka ya malasi, mpe nakoboma biloko binso bosalaki.

6:7  Bato ebele o kati ya bino bakokufa na mopanga, bongo bokoyeba ’te ngai nazali Yawe.

6:8  Kasi nakosala ’te mwa ndambo ya bato batikala, babika o liwa na mopanga, ntango nakopanza bino o bikolo bisusu.

6:9  Baye bakotikala bakokanisa ngai ntango bakozala o mikili miye bakokende o boombo, mpo nakobuka mitema mya baye balingaki banzambe basusu mpe ba­kimaki ngai. Nakolongola bango miso maye makolulaka bikeko. Bakomiyoka mpi na mabe manso basalaki mpe na makambo ma nsomo.

6:10  Bakoyeba ’te ngai nazali Yawe. Na­lobi mpamba te ’te nakoyokisa bango mpasi iye.

6:11  Mokonzi Yawe alobi boye : Bete maboko, tuta mabelé na lokolo mpe loba : Mawa mpo ya mabe ma­nso ma nsomo bato ba Israel basalaki, bakokufa na mopanga, na nzala enene mpe na bokono bobe.

6:12  Oyo akozala mosika akokufa na bokono bobe, oyo akozala penepene akokufa na mopanga, mpe baye bakotikala o engumba eye ekozi­ngama bakokufa na nzala, mpo nakosilisa nkanda ya ngai.

6:13  Bokondima ’te ngai nazali Yawe ntango bokomono ’te bibembe bilali esika yoko na bikeko bya banzambe ba lokuta zo­ngazonga na bitumbelo, o nso­nge ya ngomba inene mpe ike, o nse ya nzete ya nkasa mingi mpe o nse ya gbukulu ikoli malamu, o esika bazalaki kotumbela banzambe ba bango mpaka ya malasi.

6:14  Nakopesa bango etumbu, nakokomisa ekolo ya bango mopotu banda eliki kin’o Ribla. Bongo bakoyeba ’te ngai nazali Yawe.

Chapter 7

7:1  Yawe alobi na ngai boye :

7:2  Mwana wa moto, Mokonzi Yawe alobi na bato ba mokili mwa Israel : Nsuka ebelemi, ekoya o bisika binso bya ekolo ya bino.

7:3  Esili na yo. Nakotindela yo nkanda ya ngai. Nakosambisa yo mpo ya ezalela ya yo, mpe nakopesa yo etu­mbu mpo ya makambo ma yo ma­nso ma nsomo.

7:4  Nakoyokela yo ngolu te, mawa mpe te ; mabe ma­nso ozalaki kosala makokwela yo, mpe okotikala o ntei ya makambo ma yo ma nsomo. Bongo okoyeba ’te ngai nazali Yawe.

7:5  Mokonzi Yawe alobi boye : Mpa­si ekoya, mpasi enene mpenza.

7:6  Nsuka ezali koya ; nsuka ya bino esili ekomi.

7:7  Mpasi enene ekokwela yo, mwana mboka. Eleko ekoki, mokolo mobelemi, migango mya etumba mpe mya esengo mikosila o ngomba.

7:8  Mosika te nakokitisela yo nkanda ya ngai, mpe nakosilisa nka­nda ya ngai. Nakosambisa yo engebene na ezalela ya yo mpe nakofutisa yo makambo ma nsomo ma yo manso.

7:9  Nakoyokela yo ngo­lu te, mawa mpe te ; nakozongisela yo mabe ma yo, mpe makambo ma yo ma nsomo makokwela yo, bo­ngo okoyeba ’te ngai Yawe napesi yo etumbu.

7:10  Mokolo mwa yo mobelemi, mo­zali koya : mpasi ekokwela yo mpo opusi lolendo na montongo mwa yo.

7:11  Makambo makasi makasi mayei : esili na bango, na makeléle mpe na lipombo lya bango.

7:12  Elaka ekoki, mokolo mobelemi ; mosombi ase­pela te, moteki ayoka mawa te, zambi nkanda ekokwela bato ba­nso.

7:13  Ata atikali na bomoi, moteki akomono biloko bya ye lisusu te, zambi maloba maye ma bokaneli matali bato banso. Moko te wa baye basepeli makambo ma bango mazangi bosembo akoki komibikisa.

7:14  Ata bakobete mindule mpe ba­kolengele binso, moto moko ako­kende kobunda te, zambi nkanda ya ngai ekokwela bato ba­nso.

7:15  O libanda bakokuta mopa­nga, o kati ya ndako bokono bobe na nzala. Ata nani akozala o bila­nga akokufa na mopanga, oyo akozala o engu­mba akokufa na bokono bobe mpe na nzala.

7:16  Baye bakufi te bakokima, bakokende o ngomba ; lokola ebenga ya mabwaku ekolelaka, moko moko akolela mpo ya masumu ma ye.

7:17  Banso bakolembe maboko, mabolongo ma bango makokoma mai mai.

7:18  Bakolata ngoto o loketo, mpe bakolenge nzoto mobimba. Banso bakolakisa elongi ya nsoni, banso bakokokolo mitó.

7:19  Bako­bwaka palata ya bango o balabala ; wolo ya bango ekoyokisa bango nsomo. Palata na wolo ya bango ikobikisa bango te o mokolo mwa nkanda ya Yawe ; ikoleka o mingo­ngo mya bango lisusu te, ikotondisa mabumu ma bango lisusu te, mpo izalaki ntina ya masumu ma bango.

7:20  Bazalaki komikumisa na bikembiseli bya bango : basali na byango bikeko bya nsomo bya ba­nzambe ba lokuta ; yango wana nakosala ’te bayoka byango nsomo.

7:21  Nakokaba byango o maboko ma bauta, bayiba byango, o maboko ma basenzi bo biloko babotoli o etumba : bakobebisa byango nye.

7:22  Nakotala bango ata na miso lisusu te ; banguna bakobebisa ndako ya nkita ya ngai ; basenzi bakokoto wana mpe bakosantola yango.

7:23  Kende kotula minyololo, zambi ekolo etondi na bato balingi kobomana, mpe engumba na bato ba ma­kambo makasi makasi.

7:24  Nako­byanga bato ba bikolo bisusu baleki bobe, bá­botolo bankolo mboka ndako. Nakosukisa ntina ya lole­ndo la bango : bakobebisa ndako ya bikeko bya bango.

7:25  Makambo ma nsomo makoya ; bakoluka kozwa boboto, kasi se mpamba.

7:26  Maka­mbo ebele ma mpasi makokwela bango, bakoyoka bobele nsango ya mawa. Se mpamba bakosenge profeta ’te ayebisa bango limoni, nga­nga Nzambe akoyeba koteya lisusu te, mpe bakolo ba mboka bakokoka kopesa malako lisusu te.

7:27  Mokonzi wa mboka akolata mpili, nku­mu akoyoka mawa manene, bato banso bakoyoka nsomo mpe bakolenge. Nakosala na bango engebene na ezalela ya bango, lokola bango moko basambisaki ; bongo bakoyeba ’te ngai nazali Yawe.

Chapter 8

8:1  O mobu mwa motoba, o sanza ya motoba, o mokolo mwa mitano nafandi o ndako ya ngai. Bakolo ba Yuda bazalaki o boso bwa ngai. Loboko la Mokonzi losimbi ngai.

8:2  Nátala boye, namoni ekelamo yo­ko lokola moto. Ut’o makolo ma ye tee esika namoni lokola lo­keto la ye, móto mopeli. Banda loketo mpe o ntolo ya ye, mwinda mokasi mo­ngengi lokola bibende bi­ngengi na móto.

8:3  Atandi loboko mpe asimbi ngai na nsuki. Elimo atomboli ngai kati ya likolo na nse, mpe o limoni lya Nzambe akambi ngai o Yeruzalem, penepene na ezibeli ya engumba, eye etalani na Nordi, esika ekeko ya zuwa ezali, eye ekoyokisaka Nzambe zuwa.

8:4  Nkembo ya Nzambe wa Israel ezalaki wana, lokola eye namonoki o lobwaku.

8:5  Alobi na ngai : « Mwana wa moto, tala epai ya Nordi. » Natali epai ya Nordi, o Nordi ya ezibeli namoni etumbelo o boso bwa ekeko eye ekoyokisaka zuwa.

8:6  Alobi na ngai : « Mwana wa moto, omoni makambo bazali kosala ? Omoni makambo ma nsomo bato ba Israel bakosalaka awa mpo ’te nalongwa o ndako ya ngai esantu ? Okomono naino makambo masusu ma nsomo. »

8:7  Akambi ngai epai ya ezibeli ya lopango. Natali mpe namoni ’te efe­lo ezalaki na lilusu.

8:8  Alobi na ngai : « Mwana wa moto, tubola efelo. » Natuboli efelo mpe namoni ezibeli.

8:9  Alobi na ngai : « Koto mpe tala makambo ma nsomo bazali kosala wana. »

8:10  Nakoti mpe namoni bilili bya nyama inso ikolandaka o mabelé mpe nyama isusu ikoyokisaka nsomo. Zongazonga na ndako namoni o efelo bilili bya bikeko bi­nso bya Israel.

8:11  Bato ntuku nsa­mbo, bankumu ba Israel, elongo na Yazanya, mwana wa Safan, batelemi o boso bwa bilili bina, engwekungweku o maboko. Nsolo mpi­mbo ya mpaka ya malasi ezalaki kobuta.

8:12  Alobi na ngai : « Mwana wa moto, omoni makambo bakolo ba Israel bazali kosala o kati ya molili, moto na moto o esika eye ake­mbisi na bilili. Bakolobaka : Yawe azali komono biso te, Yawe azali o ekolo ya biso lisusu te. »

8:13  Alobi lisusu : « Okomono naino makambo masusu ma nsomo masusu bakosalaka. »

8:14  Akambi ngai o ezibeli ya Te­mpelo ya Yawe, eye etalani na Nordi ; basi bafandi wana bazalaki kolela nzambe Tamuz.

8:15  Alobi na ngai : « Mwana wa moto, omoni ? Okomono naino makambo masusu maleki maye na nsomo. »

8:16  Na nsima akambi ngai o kati ya lopango la Tempelo ya Yawe. O boyingeli bwa ndako esantu ya Yawe, kati ya altare na ezibeli, babali ntuku ibale na batano, bapesi mokongo na esika esantusantu ya Yawe, bazalaki kotala epai ya Esti, mpe bakumbameli mwese.

8:17  Alobi na ngai : « Mwana wa moto, omoni ? Masumu ma nsomo bato ba Yuda bazali kosala makoki boye te ? Nzokande batondisaka ekolo na bi­tumba mpe bakongalisaka nka­nda ya ngai. Tala bango, bato­mboli mandalala tee o zolo ya bango.

8:18  Ngai mpe nakosala bango maka­mbo na nkanda. Nakoyokela ba­ngo mawa te, ngolu mpe te, ata baleli makasi o matoi ma ngai, nako­ndimela bango te. »

Chapter 9

9:1  Agangi na mongongo makasi o matoi ma ngai, alobi : « Bobeleme, babebisi ba engumba, moto na moto na bisaleli bya ye bya bobomi. »

9:2  Mpe tala, babali motoba babimi, bauti epai ezibeli eye etalani na Nordi, moto na moto na esaleli ya ye ya bobomi. O kati ya bango moto moko alati bilamba mpembe, akangi ekomeli o mokaba mwa ye, lokola mokomi wa minkanda. Ba­nso bakoti mpe bakei koteleme penepene na etumbelo ya mbengi.

9:3  Nke­mbo ya Nzambe wa Israel elo­ngwi epai ya kerubim, esika ezalaka, mpe ekei epai ya ezibeli ya Tempelo. Nzambe abengi moto oyo alati bilamba mpembe mpe akangi ekomeli o mokaba, alobi na ye :

9:4  « Katisa engumba Yeruzalem, mpe tia elembo ya kuruse o elongi ya bato bazali kolela mpe kokimela mpo ya makambo ma nsomo ma­nso mazali kosalema o engumba. »

9:5  Mpe alobi na bato basusu : « Bokatisa engumba, bolanda ye mpe boboma bato. Boyokela moto moko mawa te, bolakisa bango motema ngolu te.

9:6  Boboma babange, bile­nge, bangondo, bana na bamama ; bosilisa bango banso. Kasi soko moto azali na elembo o elongi, bosala ye mabe te. Bobanda awa o Te­mpelo. » Bongo babandi koboma ba­bange bazalaki o Tempelo.

9:7  Mpe alobi na bango : « Bobebisa Tempelo, botondisa lopango na bibembe, bosala noki. » Babimi, bakei koboma bato ba engumba.

9:8  Nzokande ntango bazalaki koboma, natikali ngai moko ; nakwei elo­ngi o nse mpe nagangi : « E Mokonzi Yawe, okoboma nde bato ba­nso batikali o Israel, zambi oyokeli Yeruzalem nkanda ? »

9:9  Alobi na ngai : « Masumu ma Israel na Yuda maleki boike, maleki mpe bonene. Ekolo etondi na makila ma bato, o engumba bobe boleki, mpo bakolobaka ’te : ‘Yawe azali lisusu awa te, Yawe azali komono eloko te.’

9:10  Ya­ngo wana nakoyokela bango mawa te, ngolu mpe te. Nakopesa bango etumbu ekoki na mabe ma bango. »

9:11  O ntango ena moto alati elamba mpembe mpe akangi ekomeli o mokaba, ayei koyebisa : « Na­sali manso lokola otindaki ngai. »

Chapter 10

10:1  Natali mpe namoni o eta­ndo ezalaki likolo lya bakerubim libanga lyoko lya safir, limononi lokola ngwende.

10:2  Alobi na mo­to alati elamba mpembe : « Ke­nde o likalo, o nse ya kerubim, to­ndisa maboko na makala maye ma­za­li o ntei ya bakerubim, mpe panza ma­ngo o engumba. » Mpe namoni ’te moto ona akei.

10:3  Ntango moto akoti, bakerubim batelemi penepene na Tempelo, epai ya loboko la mobali, mpe limpata lito­ndisi lopango loke la Tempelo.

10:4  Nkembo ya Yawe elongwi likolo lya kerubim mpe ekei epai ya ezibeli ya Tempelo. Tempelo etondi na limpata, mpe lopango loke lotondi na mwinda mwa nkembo ya Yawe.

10:5  Lokito la mapapu ma bakerubim loyokani tee o lopango lonene, lokola lolaka la Yawe wa bokasi bo­nso.

10:6  Awa atindi moto alati elamba mpembe « Kamata móto o likalo lizali o ntei ya bakerubim », moto ona akei koteleme penepene na yika.

10:7  Kerubim moko atandi loboko epai ya móto mozalaki o kati ya bakerubim. Akamati móto mpe apesi moto alati elamba mpembe. Ye akamati móto mpe abimi.

10:8  O ntango ena biloko bibimi o nse ya mapapu ma bakerubim lokola maboko ma moto.

10:9  Natali, namoni yika inei penepene na bakerubim, kerubim mo­ko moko na yika o mpembeni ya ye. Yika izalaki konge­nge lokola liba­nga lya krizolite.

10:10  Yika inei izalaki ndenge yoko, inso inei ikangani.

10:11  Ba­kerubim bakoki kokende o nzela inei, basengelaki komibongola te ; esika oyo wa liboso akei basusu balandi ye, basengelaki komibo­ngola te.

10:12  Nzoto ya bango mobimba, mikongo, maboko na mapapu itondi na miloli mike mike mizalaki ko­ngenge makasi. Nzoto yoko yoko ezalaki na yika.

10:13  Nayoki ’te bapesi yika nkombo ‘zolongano’.

10:14  Kerubim moko moko azalaki na bilongi binei : elongi ya yambo ezalaki ya kerubim ; elongi ya bibale, elongi ya moto ; eye ya bisato, elongi ya nkosi ; eye ya binei, elo­ngi ya engondo.

10:15  Bakerubim bato­mbwami o likolo ; ezalaki lokola nyama eye namonoki penepene na ebale Kebar.

10:16  Nta­ngo bakerubim batamboli, yika inei itamboli mpe­mbeni ya bango. Nta­ngo bakerubim bafungoli mapapu mpo ya kopi­mbwa o likolo, yika mpe itombwami.

10:17  Ntango batelemi, yika mpe itelemi, ntango bapimbwi o likolo, yika itombwami na bango elongo, mpo izalaki na elimo ya bikelamo bya bomoi.

10:18  Nkembo ya Yawe elongwi o ezi­beli ya Tempelo, ekei koteleme likolo lya bakerubim.

10:19  Bakerubim bafungoli mapapu mpe bapimbwi o likolo o miso ma ngai. Yika mpe ito­mbwami o likolo. Bakiti penepene na ezibeli ya ndako ya Yawe, eye ezali epai ya Esti. Nkembo ya Yawe wa Israel ezalaki na bakerubim, likolo lya bango.

10:20  Ezalaki nyama eye namonoki penepene na ebale Kebar, ezalaki komeme Yawe wa Israel. Nayebi malamu ’te ezalaki bakerubim.

10:21  Kerubim moko moko azalaki na bilongi binei mpe na mapapu manei, mpe o nse ya mapapu na biloko lokola maboko ma moto.

10:22  Bilongi bya bango bizalaki lokola bilongi namonoki penepene na eba­le Kebar. Moko moko azalaki kokende se liboso.

Chapter 11

11:1  Elimo atomboli ngai mpe akambi ngai o ezibeli ya Te­mpelo ya Yawe, eye etalani na Esti. Penepene na ezibeli ya Te­mpelo namoni bato ntuku ibale na batano ; o kati ya bango ezalaki Yazanya, mwa­na wa Azur, na Pelatia, mwana wa Benaya, bakambi ba ekolo.

11:2  Yawe alobi na ngai : « Mwana wa moto, bato baye bakokanaka kosala mabe mpe bakopesaka malako mabe o engumba eye.

11:3  Bakolobaka : ‘Eleko ya kotonga ndako ekoki na­ino te ! Engumba ekomi lisasu, biso tozali misuni o kati ya lisasu.’

11:4  Ya­ngo wana, yo mwana wa moto, sakola maloba ma bokaneli bango. »

11:5  Elimo ya Yawe akiteli ngai mpe alobi na ngai : « Loba : Yawe alobi bo­ye : Bino bato ba Israel bokolobaka bongo. Nayebi mikano mya bino.

11:6  Bobomi bato baike o engu­mba eye, mpe botondisi balabala inso na bibembe.

11:7  Yango wana Mokonzi Yawe alobi boye : Bibe­mbe botiaki o engumba bizali misuni o lisasu, mpe engumba ezali lisasu. Ka­si nakobimisa bino o engu­mba.

11:8  Bokobangaka mopanga, nzokande nakoboma bino na mopanga ; maloba ma Mokonzi Yawe.

11:9  Nakobimisa bino o engumba, nakokaba bino o maboko ma bato ba bikolo bisusu. Nakotindela bino maka­mbo nakaneli bino.

11:10  Bokokufa na mopa­nga o mokili mwa Israel, mpe nakosa­mbisa bino. Bongo bokoyeba ’te ngai nazali Yawe.

11:11  Engu­mba ekozalela bino lisasu te, mpe bino bokozala misuni o lisasu te. O mokili mwa Israel nakosambisa bino.

11:12  Bokoyeba ’te ngai nazali Yawe, bi­no bato botosaki mibeko mpe mi­tindo mya ngai te, kasi bolandaki mimeseno mya bato ba bikolo bizali penepene na bino. »

11:13  Ezalaki ngai kosakola maloba mana, Pelatia, mwana wa Benaya, akati motema. Nakwei elongi o nse, mpe nagangi na mongongo makasi : « E Mokonzi Yawe, okosilisa nde bato ba Israel baye batikali ? »

11:14  Yawe alobi na ngai maloba maye :

11:15  Mwana wa moto, bato ba Yeruzalem bakolobaka na bandeko ba yo banso, na bato banso ba libota lya yo mpe na bato ba ekolo ya Isra­el : « Botikala kuna, mosika na Yawe. Yawe apesaki biso mokili mo­ye, biso tozali bankolo ba ekolo. »

11:16  Yango wana loba na bango : « Mokonzi Yawe alobi boye : Solo, nalongolaki bango o bikolo bisusu ; napanzaki bango o mikili mya ba­mpaya. Nazalaki Tempelo ya ba­ngo ya solo o bikolo bakendeki.

11:17  Bo­ngo loba na bango : Mokonzi Yawe alobi : Nakosangisa bino ut’o bikolo bisusu, nakolongola bino o mikili minso bopanzani. Bo­ngo nakopesa bino mokili mwa Israel.

11:18  Ba­to bakozonga awa mpe nakolo­ngola biloko binso bya nsomo mpe bya masumu.

11:19  Nakopesa ba­ngo mi­tema mya sika mpe mayele ma sika. Nakolongola o nzoto ya ba­ngo mitema mya mabanga, mpe nakopesa bango mitema mya nsuni

11:20  mpo ’te batosa mibeko mya ngai mpe balanda mimeseno mya ngai. Bakozala bato ba ngai, mpe ngai na­kozala Nzambe wa bango.

11:21  Kasi baye bamipesaki na bikeko mpe na makambo ma nsomo, nakosa­mbisa bango mpo ya ezalela ya bango. Mokonzi Yawe alobi bongo. »

11:22  Sikawa bakerubim bafungoli ma­papu ; yika itamboli elongo na bango ; nkembo ya Nzambe wa Israel izali likolo lya bango.

11:23  Nke­mbo ya Yawe elongwi o engumba mpe ekei kozala o ngomba eye ezali o Esti ya engumba.

11:24  Elimo atomboli ngai mpe aka­mbi ngai o Kaldea, epai ya bato bakangemi o boombo. Elimo ya Yawe alakisi ngai makambo mana o limoni. Ntango nasilisi komono mango, limoni lilongwi.

11:25  Nasololi na bato bakangemi o boombo maye manso Yawe alakisi ngai.

Chapter 12

12:1  Yawe alobi na ngai boye :

12:2  « Mwana wa moto ; ofandi o ntei ya batomboki baye : bazali na miso, kasi bakomonoko te ; bazali na matoi, kasi bakoyokaka te, mpo bazali libota lya batomboki.

12:3  Yango wana, mwana wa moto, kanga biloko lokola moto akokende o bo­o­mbo. Longwa na moi, o miso ma bango. Longwa o esika ozali, mpe kende o esika esusu, bobele o miso ma bango. Mbele bakondima bo­ngo ’te bazali batomboki.

12:4  Kanga biloko bya yo lokola moto akoke­nde o boombo, na moi, o miso ma bango. Ekomi mpokwa, otika mbo­ka o miso ma bango, lokola moto akokende o boombo.

12:5  O miso ma bango otubola lopango la engumba mpe obima o lidusu lina.

12:6  O miso ma bango otia biloko o mapeke, obima na molili, ozipa elongi na ela­mba mpo ’te omono ekolo te, mpo nali­ngi ’te ozala elembo o miso ma bato ba Israel. »

12:7  Nasali lokola bati­ndaki ngai. Na moi nakangi biloko lokola moto akokende o boombo, mpe na mpokwa nasali lidusu o lopango, na maboko. Natii bilo­ko o mapeke mpe nabimi na molili o miso ma bango.

12:8  Na ntongo Yawe alobi na ngai :

12:9  Mwana wa moto, bato ba Israel, batomboki baye, batuni yo te « Oza­li kosala nini kuna » ?

12:10  Loba na ba­ngo boye : Mokonzi Yawe ayebisi nkumu wa Yeruzalem mpe bato ba Israel banso bafandi wana ’te :

12:11  Nazaleli bino elembo. Bokosala lokola ngai nasali : bokokende o boo­mbo.

12:12  Nkumu oyo azali o ntei ya bino, akotia biloko o mapeke na molili, akobima o lidusu batuboli o efelo mpo ya kobima, akozipa elo­ngi na elamba mpo ’te amono ekolo te.

12:13  Akokangema o mo­nyama nakotanda likolo lya ye ; nakoka­mba ye o Babilon o mokili mwa Ka­ldea. Akokufa kuna, kasi akomono mokili mona te.

12:14  Nakopa­nza bato ba ye, bakengeli na basoda, epai na epai, mpe nakolanda bango mopanga o maboko.

12:15  Bo­ngo ntango nakopanza bango o mikili misusu, mpe nakotinda bango o bikolo bisusu, bakoyeba ’te ngai nazali Yawe.

12:16  Kasi nakobikisa bato basusu o ntei ya bango, baye bakokufa na mopanga, na nzala to na bokono bobe te. Nakobikisa bango mpo ’te basolola na bato o bisika bakokende makambo ma nsomo ma­nso basalaki. Bato bakoyeba bo­ngo ’te ngai nazali Yawe.

12:17  Yawe alobi na ngai maloba maye :

12:18  Mwana wa moto, okolia biloko na bolengi, mpe motema likolo okomele mai na bobangi.

12:19  Oloba na bato ba ekolo eye : Mokonzi Yawe alobi na bato ba Yeruzalem, baye bapanzani o ekolo ya Israel ’te bakolia biloko na bobangi, mpe bakomele mai motema likolo, mpo ’te nabotolo mokili moye biloko bi­nso, nakomisa mwango mopotu, mpo ya makambo makasi makasi ma bato bafandi wana.

12:20  Bakobebisa bingumba bizalaki na bato baike ; ekolo ekokoma mopotu. Bokoyeba bongo ’te ngai nazali Yawe.

12:21  Yawe alobi na ngai maloba maye :

12:22  Mwana wa moto, yebisa ngai ntina ya eyele bakolobaka o Israel : Mikolo mizali koleka, mpe limoni ata lyoko lizali kosalema te ?

12:23  Loba na bango : Mokonzi Yawe alobi boye : Nakosala ’te batanga eyele eye o Israel lisusu te. Kasi yebisa bango ’te mikolo mikomi penepene limoni lyoko lyoko likosalema.

12:24  Ya solo, emonela ya mpamba ekozala lisusu te, mpe bakokosa bato ba Israel lisusu te na boyebisi makambo makoya.

12:25  Ngai moko Yawe nakoloba ; maye nakoloba makosalema noki. Bino batomboki, o mikolo mya bino nakokokisa maye nakoloba. Elo­bi bongo Mokonzi Yawe.

12:26  Yawe alobi na ngai boye :

12:27  Mwa­na wa moto, yoka bato ba Israel bakolobaka : ‘Makambo ye amoni o limoni, makosalema sikawa te ; akosakolaka makambo mazali naino mosika.’

12:28  Bongo loba na bango : Mokonzi Yawe alobi : Makambo manso nalobi, makosalema noki. Li­kambo ngai nalobi, lilobami mpe likosalema. Elobi bongo Mokonzi Yawe.

Chapter 13

13:1  Yawe alobi na ngai boye :

13:2  Mwana wa moto, sakola ma­loba ma bopaleli baprofeta ba Israel ; loba na bato baye bakosakolaka o nkombo ya bango moko ’te batia matoi na maloba ma Yawe.

13:3  Mokonzi Yawe alobi boye : Mawa na baprofeta baye bazangi mayele, bakolandaka makanisi ma bango mo­ko, kasi bakomonoko eloko te.

13:4  Ekolo ya Israel, baprofeta ba yo bakomi lokola minsole o ntei ya mopotu.

13:5  Bobatelaki engumba te. Botongaki lopango te mpo ya kobatela bato ba Israel, mpo ’te ba­kweya o etumba te, o mokolo mwa Yawe.

13:6  Ata bakomonoko bimonela bya mpamba mpe bakokosaka bato ntango bakosakola maye makoya ; bakolobaka : « Boyoka maloba ma Yawe », nzokande Yawe atindaki ba­ngo te. Ndenge nini balingi ’te akokisa maloba ma bango ?

13:7  Ya solo, bokomonoko bimonela bya mpa­mba. Bokokosaka bato ntango bokosakolaka maye makoya, na bolobi : « Boyoka maloba ma Yawe », nzokande ngai nalobaki eloko te.

13:8  Yango wana Mokonzi Yawe alobi boye : Awa bosakolaki makambo ma mpamba mpe bomonoki se bimonela bya lokuta, nakotumbola bino. Elobi bongo Mokonzi Yawe.

13:9  Loboko la ngai lokokwela baprofeta baye bakomonoko bimonela bya mpamba mpe bakokosaka bato ntango bakosakolaka maye makoya. Bakondima bango o lisanga lya bayangeli ba ekolo ya bato ba ngai te. Nkombo ya bango ekokomama te o buku ya bana ba Israel, mpe bakokoto o ekolo ya Israel te. Bokoyeba bongo ’te ngai nazali Mokonzi Yawe.

13:10  Bakosaki bato ba eko­lo ya ngai. Balobaki na bango ’te bakozwa boboto, nzokande boboto bozali te ; mpe bapakolaki mokobo o efelo bato ba mboka bato­ngaki.

13:11  Yango wana loba na bango : Mokolo mbula ekonoko makasi, mbula ya matandala, mpe mompepe mwa ekumbaki mokoya,

13:12  efelo ekokweya ! Bongo bato bakotuna ’te : « Wapi mokobo bino bopakolaki ? »

13:13  Yango wana Mokonzi Yawe alobi boye : Mpo ya nkanda nakobimisa mompepe mwa ekumbaki na mbula enene, mbula ya mata­ndala, eye ekoboma binso.

13:14  Nakobuka efelo eye bopakoli mokobo, nakokweisa yango ; mabanga ma nse makomonono o libanda. Efelo ekokweya mpe bino bokokufa o nse ya efelo. Bokoyeba bongo ’te ngai nazali Yawe.

13:15  Likolo lya efelo mpe lya baye bapakolaki yango mokobo, nakosilisa nkanda ya ngai. Nakoloba na bino : Efelo na bato bapakolaki yango mokobo bazali lisusu te.

13:16  Ba­profeta bakozala o Israel lisusu te, baye bakosakolaka makambo matali Yeruzalem mpe bakomonoko mamoni ma boboto, ntango boboto bozali soki moke te. Elobi bongo Mokonzi Yawe.

13:17  Yo, mwana wa moto ! Tala bana basi ba ekolo ya yo, baye bakosakolaka o nkombo ya bango moko, mpe sakola na bokaneli bango.

13:18  Loba na bango maloba ma Moko­nzi Yawe : Mawa na basi bakoto­ngaka nsinga mpe bakolatisaka ya­ngo maboko ma bato, mpe bakosonelaka bilenge na bakolo matambala mpo ya kotiela bango mitambo. Bolingi nde koboma bomoi bwa bato ba ngai mpe kobikisa bomoi bwa bino moko ?

13:19  Bokoyokisaka ngai nsoni o miso ma bato ba ngai mpo ya kopo ya masangu to mwa biteni bya mampa. Bokobomaka bato base­ngeli kokufa te, mpe bokobikisaka baye bazali na ntina ya kobika te na bokosi bato ba ngai bakoyokaka ma­kambo ma bino ma lokuta.

13:20  Ya­ngo wana Mokonzi Yawe alobi boye : Nakobotolo nsinga ya bino iye bokotielaka bato motambo lokola ndeke. Nakolongola yango o maboko ma bino mpe nakobikisa bomoi bwa bato bolingi kotiela motambo lokola ndeke.

13:21  Nakopasola matambala ma bino, mpe nakobikisa bato ba ngai o maboko ma bino ; bakozala lisusu nyama ya koboma o maboko ma bino te. Bongo bokoyeba ’te ngai nazali Yawe.

13:22  Bino bokolembisaka basemba mi­tema na lokuta la bino, nzoka­nde ngai nalingaki bongo te. Bokolendisaka bato babe te mpo bazwa mpiko ya kotika mabe ma bango te, mpe babika te.

13:23  Yango wana banda sikawa bokomono lisusu bimonela bya mpamba te, mpe bokosakola lisusu makambo makoya te. Nakobikisa bato ba ngai o maboko ma bino. Bokoyeba bongo ’te ngai nazali Yawe.

Chapter 14

14:1  Mokolo bakolo basusu ba Israel bayei epai ya ngai, bamifandisi o boso bwa ngai,

14:2  Yawe alobi na ngai :

14:3  Mwana wa moto, bango batii mitema na banzambe ba lokuta, batii bikeko o boso bwa bango, biye bikokweisa bango o ma­sumu. Bongo nálingisa bango ’te baya kotuna ngai ?

14:4  Bongo loba na bango boye : Mokonzi Yawe alobi : Moto ata nani wa ekolo ya Israel, soko andimi banzambe ba lokuta o motema mwa ye, soko atii o boso bwa ye bikeko biye bikokweisa ye, mpe na nsima ayei epai ya profeta, ngai moto nakopesa ye eyano eko­ki na ebele ya bikeko bya ye ;

14:5  nakozokisa bongo mitema mya bato ba Israel bakimaki ngai mpo ya bikeko bya bango.

14:6  Bongo loba na bato ba Israel boye : Boyoka maloba ma Mokonzi Yawe : Bozonga, botika banzambe ba lokuta mpe makambo ma bino mansomo.

14:7  Moto nyonso wa libota lya Israel mpe mompaya nyonso afandi o ekolo ya Israel, soko atiki ngai mpe andimi banzambe ba lokuta o motema mwa ye, soko atii bikeko o boso bwa ye, biye biko­kweisa ye o masumu, mpe soko na nsima akei kotuna profeta, ngaimei Yawe nakopesa ye eyano.

14:8  Nakotala moto ona na miso mabe ; nakokomisa ye ndakisa mpe lisapo o miso ma bato, mpe nakolongola ye o libota lya bato ba ngai. Bokoyeba bongo ’te ngai nazali Yawe.

14:9  Soko profeta andimi kokosama mpe aba­ndi kosakola, yeba ’te ngai moko Yawe nalingaki bongo. Nakotu­mbo­la ye, nakolongola ye o libota lya ekolo ya ngai Israel.

14:10  Bakomeme mokumba mwa mabe ma ba­ngo, ézala profeta, ézala moto oyo akei kotuna ye.

14:11  Bongo bato ba Israel bákima ngai lisusu te, bakomibebisa na masumu ma bango lisusu te. Bakozala bato ba ngai, mpe ngai nakozala Nzambe wa bango. Elobi bongo Mokonzi Yawe.

14:12  Yawe alobi na ngai :

14:13  Mwana wa moto, soko bato ba ekolo yoko basali masumu mpe baboyi ngai, nakopesa bango etumbu : nakobotolo bango biloko bya kolia, mpe nakotindela bango nzala enene. Nakosilisa bato mpe nyama inso ya ekolo ena.

14:14  Soko nakuti o ekolo ena babali baye basato : Nowe, Daniel na Yob, bobele bato baye bakobika mpo ya bosembo bwa bango. Elobi bongo Mokonzi Yawe.

14:15  Soko nati­ndi nyama ya zamba o ekolo ena mpo ’te bato bazala wana lisusu te, mpe moto moko aleka wana lisusu te mpo ya bobangi nyama ;

14:16  ata babali baye basato bazali o ekolo ena, o nkombo ya ngai nalobi ’te bakokoka kobikisa bana babali na bana basi ba bango te, bobele bato baye bakobika ; ekolo ena ekokoma eliki. Elobi bongo Mokonzi Yawe.

14:17  Soko natindi bato babimela ekolo ena na mimpanga mpe nalobi na bango : Mopanga mobete ekolo eye, bato na mpe nyama basila ;

14:18  soko nakuti babali baye basato o ekolo ena, o nkombo ya bomoi bwa ngai nalobi ’te bakokoka kobikisa bana babali na bana basi ba bango te, bobele bato baye bakobika. Elobi bongo Mokonzi Yawe.

14:19  Soko natindi bokono bobe o ekolo ena, to nabomi nyama na bato mpo ya kosilisa nka­nda ya ngai,

14:20  mpe nakuti Nowe, Daniel na Yob o ekolo ena, o nko­mbo ya bomoi bwa ngai nalobi ’te babakoka kobikisa bana babali na bana basi ba bango te, bobele bato baye bakobika mpo ya bose­mbo bwa bango. Elobi bongo Mokonzi Yawe.

14:21  Mokonzi Yawe alobi : Ata nati­ndeli Yeruzalem bitumbu binene bi­nei : etumbu ya mopanga, nzala ekasi, nyama ibe na bokono bobe, mpo ’te nasilisa bato na nyama,

14:22  mpe mwa ndambo ya babali na basi bakotikala, bakobimisa bango o engu­mba mpe bakoya epai ya bino ; bokomono ezalela mpe misala mya bango. Bokozala na mawa lisusu te mpo ya malozi maye nati­ndelaki Yeruzalem, to mpo ya mpa­si nayokisaki bango.

14:23  Bango bakobondo bino, zambi bakomono bizalela mpe misala mya bango. Bokoyeba ’te makambo manso nasalaki Yeruzalem, nasalaki mango se na ntina. Elobi bongo Mokonzi Yawe.

Chapter 15

15:1  Yawe alobi na ngai maloba maye :

15:2  Mwana wa moto, nzete ya vino eleki nzete isusu inso na nini ? Bitapi bya nzete ena bileki nde bitapi bya nzete ya zamba ?

15:3  Na mabaya ma nzete ena bakoki nde kosala biloko ? Bakosalaka na yango esimbeli mpo ya kobakisa bilamba ?

15:4  Soko babwaki yango o móto, ekozika, móto mokosilisa yango epai na epai ; eteni ya kati eye eziki ezali lisusu na ntina ?

15:5  Ntango nzete ezalaki mobimba ebongoki na mosala moko te, awa móto mozikisi yango, ekosala lisusu mosala nini ?

15:6  Yango wana Mokonzi Yawe alobi : Lokola bakotumbaka nzete ya vino liboso lya nzete inso ya zamba, ngai nakotumba bato ba Yeruzalem se bongo.

15:7  Nakoyokisa bango mpasi. Ata babikaki o móto, móto mokosilisa bango ; bokoyeba ’te ngai nazali Yawe, ntango nakotumbola bino.

15:8  Nakokomisa mokili moye eliki, mpo baboyaki ngai. Maloba ma Mokonzi Yawe.

Chapter 16

16:1  Yawe alobi na ngai :

16:2  Mwana wa moto, yebisa bato ba Yeruzalem mabe ma nsomo basali.

16:3  Loba na bango : Mokonzi Yawe alobi na Yeruzalem boye : Outi o mokili mwa Kanana, obotami kuna. Tata wa yo azalaki moto wa Amor, mama wa yo moto wa Iti.

16:4  Mokolo babotaki yo, bakataki yo litolu te, basukolaki yo nzoto te, bapakolaki yo mungwa te, mpe bazingaki yo na elamba te.

16:5  Moto moko atalaki yo te mpo ’te asalisa yo, zambi bayokelaki yo mawa te. Mokolo babotaki yo, babwakaki yo o bilanga, zambi bayokaki yo mpi.

16:6  Ngai nalekaki penepene mpe namonoki yo esika olalaki o makila ma yo. Nalobaki na yo : « Otikala na bomoi ! »

16:7  mpe nakolisi yo lokola matiti ma bilanga. Okoli mpe okomi mwasi kitoko tee okoki na libala. Mabéle mabimi mpe okomi na nsuki mingi, kasi ozalaki bolumbu.

16:8  Naleki lisusu penepene mpe namoni yo. Ntango ya kobala ekokaki. Na nsonge ya elamba ya ngai nazipi bolumbu bwa yo mpe nalayi ndai ’te nakobala yo. Nakati na yo bondeko mpe okomi wa ngai. Maloba ma Mokonzi Yawe.

16:9  Nasukoli yo nzoto, nalongoli makila manso mpe napakoli yo mafuta.

16:10  Napesi yo bilamba kitoko, sapato ya motuya, litambala lya siliki na liputa lya ngeli­ngeli.

16:11  Nakembisi yo na mayaka mpe nalatisi yo bikomo o maboko mpe mpauni ya nkingo.

16:12  Nabakisi lompete o zolo, nake­mbisi yo na biloko bya matoi, mpe nalatisi yo enkoti enzenga o motó.

16:13  Nalatisi yo biloko bya wolo na palata, na bilamba bya mo­nzele. Na­leisi yo fufu, mafuta ma nzoi na mafuta ma mbila. Okomi kitoko lokola ebongi na mwasi wa moko­nzi.

16:14  Bonzenga bwa yo boyebanaki o bikolo binso : obongoki nye mpo ya bonzenga nakabelaki yo. Maloba ma Mokonzi Yawe.

16:15  Kasi bonzenga bwa yo bokomisi yo moto wa lolendo. Oyebanaki mingi, yango wana okomi kosala bo­ndumba mpe komikaba na mo­le­ki nzela ata nani.

16:16  Okamati bi­la­mba bya yo kitoko mpo ya ko­ke­mbi­sa ndako ya bikeko. Okei komipesa na bango.

16:17  Na bikembiseli bya wolo mpe bya palata napesaki yo, osali bikeko bya banzambe ba lokuta mpo osala bondumba.

16:18  Oka­mati bilamba kitoko mpe olatisi bango ; obonzeli byango mafuta na mpaka ya malasi ya ngai.

16:19  Lokola malasi mpo ya kosepelisa byango, obonzeli byango bilei napesaki yo, biye bilambamaki na fufu ya ma­mpa, mafuta ma mbila na mafuta ma nzoi. Mokonzi Yawe alobi : Esalemi ’te

16:20  okamati bana babali na bana basi baye oboteli ngai, mpe obo­nzeli bikeko bina bo bilei. O miso ma yo likambo liye lya bondumba likokaki naino te

16:21  ’te oboma bana ba ngai mpe otumba bango mpo ya kokumisa bikeko byango ?

16:22  O kati ya makambo maye manso ma nsomo mpe ma bosoni, obosani mikolo mya bomwana bwa yo, ntango ozalaki bolumbu mpe olalaki o makila ma yo.

16:23  Mokonzi Yawe alobi : Mawa na yo, solo ! Mpamba te, esilisi yo kosala mabe mana manso

16:24  osali mwa ngomba mpe otongi bitumbelo o bisika binso.

16:25  O nsuka ya mboka, o balabala inso otongi bitumbelo, obebisi bonzenga bwa yo na maka­mbo ma bondumba ; na moleki nzela ata nani okobi kosala bo­ndumba.

16:26  Na ba-Ezipeti, bato ba nzoto ene­ne bafandi pene na yo, okobi kosala bondumba mpo otumola ngai.

16:27  Yango wana natomboli loboko mpo nasala yo mabe. Nabotoli yo biloko bya bolei mpe nakabi yo o maboko ma banguna ba yo, basi ba Filisti, baye bazalaki koyoka nsoni mpo ya ezalela ya yo mabe mpenza.

16:28  Kasi motema mwa yo mokitaki te, okei lisusu kosala bo­ndumba na ba-Asur. Nzokande bo­ndumba bokitisi yo motema te.

16:29  Okei lisusu kosala bondumba o mokili mwa bato ba mombongo ba-Kaldea, mbala eye mpe motema mwa yo mokiti te.

16:30  Mokonzi Yawe alobi boye : Nazali koyokela yo nkanda enene mpenza, awa osali makambo maye manso makoki na ndumba monene !

16:31  Ntango osali mwa ngomba o balabala inso o nsuka ya mboka, ntango otongi etumbelo o bisika binso bya mboka, osali lokola ba­ndumba basusu te, baye bakolukaka lifuta.

16:32  Mwasi wa bokali akotika mobali wa ye mpe akolanda babali basusu.

16:33  Bakopesaka bandumba banso mwa libonza. Kasi yo ozalaki kopesa mabonza na babali banso balingaki yo. Ofuti bango mpo baya epai ya yo ut’o bipai binso mpo basala bondumba na yo.

16:34  Yo osali lokola bandumba basusu te : bayaki koluka yo te, kasi yo moko ofutaki bango, bango bafutaki yo te ; ba­ndumba bakosalaka bongo te.

16:35  Yo, mwasi ndumba, yoka liloba lya Yawe :

16:36  Mokonzi Yawe alobi boye : Awa obebisi mosolo mwa yo mpe olakisi bolumbu bwa yo na babali baye balingaki yo, mpe obo­nzeli bikeko bya nsomo makila ma bana ba yo,

16:37  nakosangisa babali ba­nso baye basepelaki na yo, baye yo olingaki mpe baye banso oli­ngaki te, baya kosala yo mabe. Nako­byanga bango o bisika binso, nakotika yo bolumbu o miso ma ba­ngo, bamono bolumbu bwa yo.

16:38  Nakopesa yo etumbu eye bakopesaka basi ba bokali, mpe baye bakobomaka bana ; nakoyokisa yo mpasi mpo ya nkanda mpe zuwa lya ngai.

16:39  Nakokaba yo o maboko ma ba­ngo, bakobebisa mwa ngomba ya yo mpe bakobuka bitumbelo bya yo. Bakobotolo yo bilamba, bakokamata biloko bya yo bya monzele mpe bakotika yo bolumbu.

16:40  Na nsima bakobenga bato basusu baya kobwakela yo mabanga mpe batubola yo na mopanga ;

16:41  bakotumba ndako ya yo inso ; bakotumbola yo o miso ma basi ebele. Nakosukisa makambo ma bondumba bwa yo, okokoka kopesa makabo lisusu te.

16:42  Nakosilisa nkanda ya ngai, bongo na nsima nakotika koyoka zuwa, nakokitisa motema mpe nakoyoka nkanda lisusu te.

16:43  Awa okanisaki mikolo mya bomwana bwa yo te, mpe ozalaki kotumola ngai na makambo mana manso, ngai mpe nakosala ’te mabe ma ezalela ya yo ma­kwela yo moko. Elobi bongo Mokonzi Yawe. Ya solo, osalaki bo­ndumba na makambo ma yo manso ma nsomo te ?

16:44  Yango wana bato bakobimisaka biyele bakoloba mpo ya yo : « Moti­ndo mama azali, mwana mwasi mpe akozala. »

16:45  Ozali solo mwana wa mama oyo aboyaki mobali mpe bana ba ye. Bandeko basi ba yo baboyi babali mpe bana ba bango. Mama wa yo azalaki moto wa Iti, tata wa yo moto wa Amor.

16:46  Motomolo wa yo wa mwasi nde Samaria, oyo afandi o loboko la yo la mwasi, elo­ngo na bana ba ye. Mozimi wa yo wa mwasi, Sodoma, oyo afandi o lo­boko la yo la mobali, elongo na bana basi ba ye.

16:47  Olandaki bizalela bya bango mpe osalaki maka­mbo ma bango ma nsomo. Na makambo manso oleki bango na bobe.

16:48  Mokonzi Yawe alobi : O nkombo ya ngai nalobi ’te mabe ma ndeko wa yo Sodoma na bana basi ba ye makokani te na mabe ma yo mpe ma bana basi ba yo.

16:49  Mabe ma ndeko wa yo Sodoma mpe ma bana ba ye, mango maye : bazalaki na lole­ndo mpe na lokoso la biloko, bazalaki kokanisa likambo lyoko te, bazalaki kosalisa babola te mpe kobikisa bato ba mawa te.

16:50  Balakisaki lole­ndo mpe basalaki makambo ma nso­mo o miso ma ngai. Yango wana nalimwisi bango, lokola yo moko oyebi.

16:51  Samaria asalaki se nda­mbo ya mabe yo osali, oleki bango babale mosika na makambo ma nsomo osali. Moto atali makambo ma nsomo ma yo ebele boye, akoki kotanga bandeko basi ba yo bato ba bosembo.

16:52  Yango wana ndima koyoka nsoni, mpo oleki bandeko basi na bosali mabe ; mpo ya masumu ma yo omiyokisi nsoni ; solo, baleki yo na bosembo. Bongo yo, yoka nsoni mpe sambwa, mpo osali ’te bandeko ba yo baleka yo na bolamu.

16:53  Nakobongisa Sodoma na bana basi ba ye ; nakobongisa mpe Samaria na bana basi ba ye ; nsima nakobongisa yo,

16:54  mpo ’te oyoka nsoni mpe osambwa mpo ya manso osalaki. Mpo yango ekobondo mitema mya bango.

16:55  Bandeko basi ba yo, Sodoma na Samaria, na bana basi ba bango bakozwa lisusu bolamu bwa kala. Yo na bana ba yo, bokozonga lokola bozalaki liboso.

16:56  Nkombo ya ndeko wa yo Sodoma ekomaki nzembo o monoko mwa yo te, nta­ngo ya lolendo la yo ?

16:57  O nta­ngo ena bolumbu bwa yo bomononoki naino te. Sikawa bakomi koseke yo : bana basi ba Edom na baye bazali penepene na ye, na mpe ba-Filisti baye bazali penepene na yo, bakokinolaka yo.

16:58  Ezalela ya yo ya bosoni mpe makambo ma yo ma nsomo makozongela yo.

16:59  Mokonzi Yawe alobi boye : Ngai mpe nakosala lokola yo moto okinoli ndai olayaki mpe obomi bo­ndeko bwa ngai.

16:60  Kasi na nsima nakoku­ndola o motema bondeko nakataki na yo ntango ozalaki naino elenge, mpe nakokata na yo bo­nde­ko bwa seko.

16:61  Okokanisa ezalela ya yo mpe okoyoka nsoni mokolo okoyamba batomolo na bazimi lokola bana ba yo, baye nakopesa yo, ata nalakelaki yo yango te.

16:62  Ngai moko nakozongisa bondeko na yo ; bongo okoyeba ’te ngai nazali Yawe,

16:63  mpo ’te okanisa ezalela ya yo mpe oyoka nsoni. Mokolo nakoli­mbisa mabe ma yo manso, okofu­ngola monoko lisusu te. Maloba ma Mokonzi Yawe.

Chapter 17

17:1  Yawe alobi na ngai maloba maye :

17:2  Mwana wa moto, pe­sa sambole mpe yebisa bato ba Israel moulani.

17:3  Yebisa bango : Mokonzi Yawe alobi boye : Engondo enene ya mapapu malai mpe na nsala ya langi ndenge na ndenge ekiti o Libano mpe ekati nsonge ya sédere.

17:4  Ebuki etapi eye ya likolo mpenza, ekei na yango o ekolo ya bato ba mombongo mpe etiki yango o engumba yoko ya bateki.

17:5  Na nsima ekamati o sédere eye mwa etapi ebimi sika, eloni yango o elanga ya mabelé malamu penepene na nzela ya mai, lokola bakolonaka wenge.

17:6  Mwa etapi ekoli, ekomi nzete ya vino eboti mingi, na mobimbi mokuse, epanzoli bitapi bya yango epai ya engondo ; minsisa mizalaki o nse ya engondo. Nzete ekoli, ekomi na bitapi bilai mpe bikuse.

17:7  Kasi engondo esusu enene ebimi, na mapapu malai mpe na nsala ebele. Nzete ya vino etandeli engondo minsisa mpe bitapi mpo esopela yango mai, leka mai ma mabelé esika balonaki yango.

17:8  Nzete eye elonamaki o mabelé malamu, penepene na esika yoko mai mazali mingi, ébimisa nkasa mingi mpe ébota mbuma, ézala nzete ya vino eleki kitoko.

17:9  Sakola : Mokonzi Yawe alobi boye : Nzete ena ekokola nde malamu ? Engondo ekokundola minsisa mya yango te ? Ekobotolo yango mbuma te ? Bongo nkasa inso ya sika ikokauka te ? Bakosengela nde na bokasi mpe na bato baike mpo ’te bakata minsisa mya yango ?

17:10  Etapi eye baloni ekokola nde malamu ? Mompepe mwa Esti mokokaukisa yango te ? Ekokauka bobele o esika baloni yango !

17:11  Yawe alobi na ngai maloba maye :

17:12  Tuna libota lina lya batomboki : Boyebi ntina ya moulani moye te ? Loba : Mokonzi wa Babilon ayei o Yeruzalem. Akangi mokonzi na ba­nkumu mpe akambi bango epai ya ye o Babilon.

17:13  Aponi moto moko o libota lya mokonzi mpe akati na ye bondeko. Alongoli bankumu ba ekolo mpe alayisi ye ndai,

17:14  mpo ’te ekolo ekola te mpe ekoka komito­mbola te. Abatela bongo bondeko akataki na ye.

17:15  Kasi nkumu ona atombokeli ye, awa atindi bantoma o Ezipeti basenge farasa na basoda ebele. Likambo liye likobongela ye ? Moto asali bongo akolonga ? Awa abomi bondeko, akobika solo ?

17:16  Mo­konzi Yawe alobi boye : Nalayi o nkombo ya ngai, akokufa o Babilon, o mokili mwa mokonzi oyo apesaki ye ngwende, awa akinoli ndai mpe abomi bondeko.

17:17  Fa­rao na limpinga lya basoda ba ye ebele akokoka kosalisa ye o etu­mba te, ntango bakosangisa mabelé penepene na lopango la engu­mba mpe bakotonga ebombamelo mpo ya koboma bato ebele.

17:18  Akinoli ndai mpe abomi bondeko ; ata alayaki ndai mpe asali makambo maye manso, akokoka kobika te.

17:19  Yango wana Mokonzi Yawe alo­bi boye : Nalayi o nkombo ya ngai : Akinoli ndai ya ngai mpe abomi bondeko bwa ngai : mana manso makokwela ye.

17:20  Nakopika monyama mpo ’te akangema na mwango. Nakokamba ye o Babilon, mpe kuna nakotumbola ye, zambi akosaki ngai.

17:21  Basoda ba ye baye baleki mpiko o bitumba bakokufa na mopanga ; mompepe mokopanza baye banso bakotikala. Bokondima bo­ngo ’te ngai Yawe nalobaki yango.

17:22  Mokonzi Yawe alobi boye : Nakokata etapi o nsonge ya sédere, nakolona yango o ngomba esanda.

17:23  Nakolona yango o ngomba esa­nda ya Israel. Ekobimisa bitapi bya sika mpe ekobota mbuma, ekokoma nzete kitoko mpenza ; ndeke ndenge na ndenge ikoya ko­tonga zumbu wana mpe kopema o nse ya bitapi.

17:24  Nzete inso ya bilanga ikoyeba ’te nazali Yawe, oyo akoki kokitisa nzete elai mpe kotombola nzete ekuse. Nakoki kokaukisa nzete ebesu mpe kobotisa fulele o nzete ekauki. Maye ngai Yawe nalobi, nakosala mango.

Chapter 18

18:1  Yawe alobi na ngai boye :

18:2  Mpo nini bakolobaka eyele eye o mokili mwa Israel : « Batata baliaki mbuma ibesu ya vino, mpe mino ma bana makomi ngai ? »

18:3  Mokonzi Yawe alobi boye : Nalayi o nkombo ya ngai, bokoloba o Israel lisusu eyele eye te.

18:4  Bato ba­nso bazali ba ngai : ná tata ná mwana, banso babale bazali o maboko ma ngai. Oyo asali lisumu, ye moto akokufa.

18:5  Moto wa bosembo akosalaka ma­lamu mpe akolandaka nzela ya bosembo :

18:6  akolia libonza o ngomba ya banzambe ba lokuta te ; akobo­ndela bikeko bya bosoto te biye bizali o Israel, akobebisa mwasi wa moninga te, akoluka mwasi te oyo azali komono sanza ;

18:7  akonyokolo bato te mpe akozongisa ndanga ya bato, akosala mombongo na mayele mabe te ; akopesa bato bakufi na nzala biloko mpe akolatisa moto bo­lumbu elamba.

18:8  Akodefisa mosolo te mpo azwa mbakisa to eloko nini. Akomikotisa o makambo mabe te mpe akokata makambo se na bosembo ;

18:9  akolanda nzela ya mi­beko mya ngai mpe nzela ya bosolo ; moto oyo wa bosembo akozala na bomoi. Elobi bongo Mokonzi Yawe.

18:10  Kasi soko aboti mwana wa bitu­mba mpe mobomi, oyo akosalaka masumu mana,

18:11  masumu tata wa ye asali te : mwana ona akolia mabonza o ngomba, akobebisa mwasi wa moninga,

18:12  ako­nyokolo bato ba mawa mpe babola, akoyiba biloko, akozongisa ndanga ya bato te, ako­bo­ndela bikeko mpe akokumisa ba­nzambe ba lokuta,

18:13  akodefisa mosolo, mpo azwa mbakisa to eloko nini, ye akotikala na bomoi te ; mpo ya makambo mana manso ma nsomo akokufa : makila maye ma­ko­kwela ye.

18:14  Kasi soko aboti mwana oyo amoni mabe tata wa ye azalaki kosala, nzokande alandi mango te :

18:15  akolia mabonza o ngomba te, ako­bondela bikeko bya bosoto bya bato ba Israel te, mpe akobebisa mwa­si wa moninga te,

18:16  akonyokolo bato te, akosenge bato ndanga te, akoyiba te, akopesa moto ayoki nzala biloko mpe akolatisa moto bolu­mbu elamba,

18:17  akosala moto wa mawa mabe te, akodefisa mosolo mpo azwa mbakisa te, akolanda mimeseno mya ngai mpe akotosa mibeko mya ngai, mwana oyo akokufa mpo ya masumu ma tata wa ye te, kasi akobika.

18:18  Kasi tata wa ye, oyo azalaki moto wa bitumba mpe moyibi, mpe asalaki malamu te o ntei ya bandeko ba ye, akokufa mpo ya masumu ma ye.

18:19  Bokotunaka : « Mpo nini mwana azwa etu­mbu mpo ya masumu ma tata wa ye te ? » Mwana oyo akotikala na bo­moi, mpo azalaki na bosembo mpe asalaki malamu, amemyaki mi­beko mya ngai mpe atosaki myango !

18:20  Oyo asali masumu, ye moto akokufa. Mwana ako­zwa etu­mbu ya masumu ma tata wa ye te ; tata mpe akozwa etumbu ya masumu ma mwana wa ye te. Moto se­mba akozwa bosembo, mpe moto mabe akozwa etumbu.

18:21  Soko moto mabe atiki masumu ma ye manso, atosi mibeko mya ngai minso mpe azali na bosolo mpe na bosembo, akotikala na bomoi, akokufa te.

18:22  Bakokanisa masumu ma ye lisusu te. Akotikala na bomoi mpo ya misala mya ye mya bosembo.

18:23  Nasepela nde na liwa lya mosumuki ? Bongo nalinga te ’te atika ezalela ebe ya ye mpe atikala na bomoi ? Elobi bongo Mokonzi Yawe.

18:24  Kasi soko moto semba atiki nze­la ya bosembo, mpe akomi kosala mabe mpe komekola makambo manso ma nsomo ma moto mabe, moto ona akobika ? Bakokundola lisusu misala mya ye minso mya bosembo te. Akokufa mpo atosi mi­beko te mpe asali masumu.

18:25  Bokolobaka : « Mokonzi akosalaka ma­lamu te ! » Bato ba Israel, boyoka malamu : Nani akosalaka malamu te ? Ezali ngai, solo ? Ezali bino te ?

18:26  Soko moto semba atiki nzela ya bosembo mpe abandi kosala mabe, akokufa se mpo ya mabe ma ye moko.

18:27  Mpe soko mosumuki atiki masumu ma ye, mpe abandi kosala makambo ma bosolo mpe ma bosembo, moto ona akobika.

18:28  Awa abongoli motema mpe aboyi mabe ma ye manso, akobika, akokufa te.

18:29  Nzokande bato ba Israel bakolobaka : « Ndenge Mokonzi akosalaka ezali malamu te ! » Bato ba Israel, nani akosalaka malamu te ? Ezali ngai, solo ? Ezali bino te ?

18:30  Yango wana, bato ba Israel, nakosambisa moto na moto engebene na ezalela ya ye. Elobi bongo Mokonzi Yawe. Bobongola mitema mpe botika masumu ma bino manso mpo ’te bokweya lisusu te.

18:31  Bolongola mabe manso bosalaki, bokoma na motema mwa sika mpe bozwa mayele ma sika. Bolingi nde kokufa, bato ba Israel ?

18:32  Ngai nasepeli na liwa lya moto moko te. Bobongola mitema mpe botikala na bomoi ! Maloba ma Mokonzi Yawe.

Chapter 19

19:1  Banda nzembo ya boleli bankumu ba Israel

19:2  mpe loba : Mama wa yo azalaki nkosi mwasi o ntei ya nkosi babali ; alalaki o kati ya bana ba ye, azalaki koleisa bango.

19:3  Mwana moko oyo abokoli akoli, akomi makasi, abandi koyeba koboma nyama, abandi mpe kokatakata bato.

19:4  Bato bayoki lisolo lya ye batimoli libulu mpe bakangi ye ; na minyololo bakambi ye o Ezipeti.

19:5  Emoni mama ’te azalaki kozila se mpamba, akoki kotia elikya na ye lisusu te, aponi mwana mosusu mpe abokoli ye tee akomi mobali monene.

19:6  Awa akoli mpe akomi mobali abandi kotambola elongo na nkosi isusu, ayekoli kokatakata nyama mpe abandi kolia bato.

19:7  Abomi ndako ya bakonzi, abebisi bingumba bya bango ; soko ayokisi mongongo monene bato ba ekolo mobimba babangi.

19:8  Bato ba bikolo bisusu babimeli ye, batandeli ye monyama mpe bakweisi ye o libulu.

19:9  Bakangi ye na minyololo, bakotisi ye o ndako ya nyama mpe bakambi ye epai ya mokonzi wa Babilon. Bakotisi ye o ebombamelo mpo ’te bogangi bwa ye boyokana o ngomba ya Israel lisusu te.

19:10  Mama wa yo azalaki lokola nzete ya vino eye baloni penepene na mai. Ezalaki kobota mbuma mpe nkasa ebele, zambi mai mazalaki mingi.

19:11  Ebimisaki etapi enene mpe kitoko, ekomi montongo mwa bokonzi. Nzete ekomi elai, leka nzete isusu. Bato bakamwi na bolai bwa yango mpe na boike bwa bitapi.

19:12  Kasi bapikoli nzete eye na nkanda, babwaki yango o nse. Mbuma ya yango ikauki na mopepe mwa Esti ; bitapi bibukani mpe bikauki mpe móto mosilisi byango binso.

19:13  Sikawa baloni yango o eliki, o mabelé makauki mpe mazangi mai.

19:14  Móto mobimi o kati ya nzete mozikisi bitapi na mbuma ya ya­ngo. Ezali na etapi enene lisusu te, montongo mwa yango mwa bokonzi. Eye ezali nzembo ya boleli, bayemba yango na mawa.

Chapter 20

20:1  O mobu mwa nsambo, o sanza ya itano, o mokolo mwa zomi, bakolo basusu ba Israel bayei kotuna Yawe ; bamifandisi o boso bwa ngai.

20:2  Yawe alobi na ngai maloba maye :

20:3  Mwana wa moto, loba na bakolo ba Israel boye : Mokonzi Yawe alobi : Boyei nde kotuna ngai ? Lokola nazali na bomoi, nakoyanola mituna mya bino te. Mokonzi Yawe alobi bongo.

20:4  Malamu osambisa bango, mwana wa moto, osambisa bango. Yebisa ba­ngo makambo ma nsomo bankoko ba bango basalaki.

20:5  Loba na bango : Mokonzi Yawe alobi boye : Mokolo naponoki Israel, natombolaki loboko mpo ya kolayela libota lya Yakob ; namiyebisaki na bango o Ezipeti ; natombolaki loboko mpe nalayelaki bango ’te : Nazali Yawe, Nzambe wa bino.

20:6  Mokolo mona nato­mbolaki loboko mpe nalayaki ’te nakobimisa bango o Ezipeti mpo ’te nakamba bango o ekolo eye naponelaki bango, esika mabéle ma ngombe na mafuta ma nzoi mazali mingi mpenza, ekolo enze­nga leka bikolo binso.

20:7  Nalobaki na bango : Moto na moto abwaka bikeko bya nsomo azali kokumisa ; bomibebisa te na bikeko bya Ezipeti. Ngai nazali Yawe, Nzambe wa bino.

20:8  Kasi batombokeli ngai mpe baboyi koyoka ngai. Ata moko te abwaki bikeko bya nsomo azalaki kokumisa ; baboyi kotika bikeko bya Ezipeti. Yango wana nalingaki kosopela bango nkanda ya ngai nta­ngo bazalaki o Ezipeti.

20:9  Kasi nakanaki kosala yango te mpo ya lokumu la nkombo ya ngai mpo ’te nasambwa te o miso ma bato ba bikolo bisusu esika bango bazalaki. Nayebisaki bato baye ’te nakobimisa bato ba ngai o Ezipeti.

20:10  Bongo nabimisi bango o Ezipeti mpe nakambi bango o eliki.

20:11  Napesi bango mibeko mya ngai mpe nayebisi bango mitindo mya ngai, miye basengeli kotosa mpo ’te batikala na bomoi.

20:12  Napesi bango mikolo mya Sabato bo elembo kati ya biso na bango, mpo ’te bayeba ’te ngai Yawe nakosantisaka bango.

20:13  Kasi bato ba Israel batombokeli ngai o eliki ; balandi nzela ya mibeko mya ngai te, bakinoli mitindo mya ngai miye bato basengeli kotosa mpo ya kotikala na bomoi, mpe basantoli mikolo mya Sabato. Ya­ngo wana nalingaki kosopela bango nkanda ya ngai mpe koboma ba­ngo.

20:14  Kasi nakanaki kosala yango te mpo ya lokumu la nkombo ya ngai mpo ’te nasambwa te o miso ma bato ba bikolo bisusu, baye bamonoki ’te nabimisaki bango o Ezipeti.

20:15  O eliki natomboli loboko lisusu mpo ya kolaya ’te nakoka­mba bango te o ekolo eye naponelaki bango, eye etondi na mabéle mpe na mafuta ma nzoi, mpe eleki bikolo binso na bonzenga.

20:16  Mpa­mba te, baboyaki mitindo mya ngai, balandaki mibeko mya ngai te, mpe basantolaki mikolo mya ngai mya Sabato, mpo mitema mya bango mili­ngaki se kokumisa bikeko.

20:17  Kasi nayokeli bango mawa : nasilisi bango te, nabomi bango o eliki te.

20:18  Nalobi na bana ba bango o eliki : Bolanda ezalela ya bankoko ba bino te, botosa mimeseno mya bango te, mpe bomibebisa te na bokumisi bikeko bya bango.

20:19  Ngai nazali Yawe Nzambe wa bino. Botosa mibeko mpe mitindo mya ngai, bolanda myango.

20:20  Bosantisa mikolo mya ngai mya Sabato ; mizala ele­mbo kati ya biso na bino mpo ’te boyeba ’te nazali Yawe Nzambe wa bino.

20:21  Kasi bana ba bango bato­mbokeli ngai. Batosi mibeko mya ngai te, mpe balandi mimeseno mya ngai te miye bato basengeli kotosa mpo ya kotikala na bomoi, mpe basantoli mikolo mya Sabato. Yango wana nalingaki kosopela bango nka­nda ya ngai, nasilisa nkanda ya ngai o eliki.

20:22  Kasi nasali yango te mpo ya lokumu la nkombo ya ngai mpo ’te nasambwa te o miso ma bato ba bikolo bisusu, baye bamonoki ’te nabimisaki bango o Ezipeti.

20:23  Kasi natomboli loboko lisusu, o eliki, mpo ya kolaya ’te nakopanza ba­ngo o bikolo bisusu mpe nakotinda bango o mikili mya bampaya,

20:24  mpo balandi mimeseno mya ngai te, batosi mibeko mya ngai te, basantoli mikolo mya ngai mya Sabato, mpe balingaki se kokumisa bikeko bya bankoko.

20:25  Napesi bango mpe mibeko mibongeli bango te mpe mimeseno mikokaki kobikisa bango te.

20:26  Natiki bango bamibebisa na mabonza ma bango, mabonza ma kotumbela ngai bana ba bango ba yambo banso, mpo ’te bayoka nsomo, mpe bandima bongo ’te ngai nazali Yawe.

20:27  Yango wana, mwana wa moto, loba na bato ba Israel boye : Mokonzi Yawe alobi ’te bankoko ba bino batumolaki ngai lisusu, mpo baboyaki ngai,

20:28  ntango nakambaki bango o ekolo eye nalayaki ’te nakopesa bango. Bamonoki ngomba ike mpe nzete ndenge na ndenge ya nkasa ebele, mpe kuna babonzi mabonza na miboma mya bango miye miyokisi ngai nkanda. Kuna babo­nzi mpe mabonza ma bolei na mpaka ya malasi, na mpe mabonza ma bomeli.

20:29  Natuni bango : O mwa ngomba bokokendeke kosala nini ? Yango wana bapesi yango nkombo ‘ngomba ya mabonza’ tee lelo.

20:30  Bo­ngo loba na bato ba Israel : Mo­ko­nzi Yawe alobi boye : Bokomi­bebisaka na bolandi makambo ma bankoko, awa bokokumisaka ba­nzambe ba lokuta.

20:31  Na bobo­nzeli bikeko mabonza mpe na botumbeli bango bana ba bino bozali komibebisa tee lelo. Bongo nandima ’te bino bato ba Israel boya kotuna ngai ? Lokola nazali na bomoi nakondima te ’te bino boya kotuna ngai. Mokonzi Yawe alobi bongo.

20:32  Bolobi ’te : « Tolingi kokumisa nze­te na mabanga, lokola bato ba bikolo mpe ba bituka bisusu bakosalaka. » Likambo liye mitema mya bino milingi, likosalema te.

20:33  Mokonzi Yawe alobi : O nkombo ya ngai nalayi ’te nakoyangela bino na makasi, nakotanda loboko la ngai, na nkanda enene.

20:34  Na bokasi bwa ngai bonso mpe na nkanda enene, nakolongola bino o kati ya bikolo bisusu, mpe nakosangisa bino ut’o bikolo bya ba­mpaya esika bopalanganaki.

20:35  Nakokamba bino o eliki ya Siria, mpe nakosambisa bino moko moko.

20:36  Mokonzi Yawe alobi : Lokola nasambisaki bankoko ba bino o eliki ya Ezipeti, nakosambisa bino.

20:37  Na­kolekisa bino o nse ya linge­nda lya ngai, mpe nakotanga bino moko moko.

20:38  Nakolongola o ntei ya bino baye batombokeli ngai ; nakobimisa bango o ekolo esika bafandi, kasi bakokoto o ekolo ya Israel te : bokoyeba bongo ’te ngai nazali Yawe.

20:39  Mokonzi Yawe alobi : Bino bato ba Israel, soko bokobi kokumisa bikeko bya bino, soko boyoki ngai te, bokomono ’te nakolingisa te ’te bosantola nkombo ya ngai esantu na mabonza mpe na bikeko bya bino.

20:40  Mokonzi Yawe alobi : Bato ba­nso ba Israel bakokumisa ngai o ngo­mba esantu, o ngomba esanda ya Israel. Kuna nakolakisa bino bolamu, mpe nakoyamba mabonza, mbuma ya yambo mpe biloko bisantu binso bya bino.

20:41  Nakoya­mba bino lokola mpaka ya malasi eye ekokitisa mitema, mokolo nakolongola bino o ntei ya bikolo bisusu, mpe nakosangisa bino ut’o bikolo biye bopalanganaki : nakolakisa bato ba bikolo bisusu bongo ’te nazali Mosantu.

20:42  Bokoyeba ’te ngai nazali Yawe mokolo nakokotisa bino o ekolo ya Israel, ekolo eye nalayaki ’te nakopesa bankoko ba bino.

20:43  Kuna bokokundola ezalela mpe makambo mabe ma bino, maye makomisaki bino na mbindo ; bo­koyoka nsoni mpo ya mabe ma­nso bosalaki.

20:44  Bato ba Israel, bokoyeba ’te ngai nazali Yawe nta­ngo na­kosala na bino bongo mpo ya lokumu la nkombo ya ngai, mpo ya ezalela ebe mpe mabe ma bino te. Mokonzi Yawe alobi bongo.

Chapter 21

21:1  Yawe alobi na ngai maloba maye :

21:2  « Mwana wa moto, tala epai ya Sudi, loba na bato ba Sudi, sakola ona zamba lya Negeb.

21:3  Loba na zamba lya Negeb : Yoka liloba lya Yawe : Mokonzi Yawe alo­bi boye : Nakopelisa móto o mboka yo ; mótumba nzete inso ibe­su mpe iye ikauki ; móto moye monene mokozima te mpe mokozikisa bilongi binso, banda Negeb kin’o Nordi.

21:4  Bato banso bakomono ’te ngai Yawe moto napelisi móto mona mokozima te. »

21:5  Nalobi : « E Mokonzi Yawe, bato bakolobaka mpo ya ngai : Tala moto oyo ako­teyaka na miulani ! »

21:6  Yawe alobi na ngai maloba maye :

21:7  Mwana wa moto, tala epai ya Yeruzalem, sakola maloba ma bokaneli bisika bisa­ntu mpe ekolo ya Israel.

21:8  Yebisa bato ba Israel : Yawe alobi boye : Nakobimela yo, nakobimisa mopanga mpe nakoboma basemba na bato babe.

21:9  Mpo ya koboma basemba na bato babe nakobimisa mopanga, nakoboma bato banso, banda Negeb kin’o Nordi.

21:10  Bongo bato ba­nso bakondima ’te ngai Yawe nabimisi mopanga mpe nakozongisa mwango lisusu te.

21:11  Mwana wa moto, kimela o boso bwa bango na mawa manene, mpo motema mwa yo mozoki.

21:12  Soko batuni yo : « Mpo nini ozali kokimela ? », okoloba na bango : « Ezali mpo ya nsango ya mawa elingi eya : mitema mya bato banso mikopa­swana, makolo makolembe, mayele makosilela bango mpe bakoyoka mai o mabolongo. Yango ezali koya, ekosalema solo. »

21:13  Yawe alobi na ngai maloba maye :

21:14  Mwana wa moto, sakola mpe loba : Mokonzi Yawe alobi boye : Mopanga e, mopanga basebi e, mopanga mopotu !

21:15  Basebi mwango mpo ya koboma, mpo ya kobwaka minkalali.

21:16  Asebisi mwango mpo ’te basimba mwango na maboko ; bapelisi mwango mpo ya kopesa mwango o maboko ma mobomi.

21:17  Mwana wa moto, kimela mpe ganga, mpo mopanga mokobete bato ba ngai, bankumu banso ba Israel bakowa elongo na bato basusu. Lakisa ’te oyoki mawa,

21:18  mpo bakomeka bino. Mokonzi Yawe alobi bongo.

21:19  Mwana wa moto, sakola mpe bete maboko. Mopanga mobete makasi, makasi mingi, mopanga mwa bobomi, mopanga moye monene mokoboma epai na epai !

21:20  O bizibeli binso bya engumba natii mopanga mwa bobomi, mosebami mpo ya koboma ; mokobete lokola minkalali mpo ’te bato bayoka nsomo mpe baike bakufa.

21:21  Lakisa bopotu bwa yo, epai ya mobali mpe epai ya mwasi, se lokola bakotinda yo.

21:22  Ngai mpe nakobete maboko, nakosilisa nkanda ya ngai. Ngai Yawe nalobi bongo.

21:23  Yawe alobi na ngai maloba maye :

21:24  Mwana wa moto, yema nzela ibale mpo ’te mopanga mwa mokonzi wa Babilon moleka ; nzela ina ibale ibanda o ekolo se yoko, mpe tia ele­mbo o ebandela ya nzela ekokende o engumba,

21:25  bongo elakisa mopanga nzela ekoki kokende o Raba ya ba-Amon, o Yuda mpe o ebombamelo ya Yeruzalem.

21:26  Yeba ’te mokonzi wa Babilon atelemi o esika nzela ibale ikutani ; atuni zeke soko ekolakisa ye nini. Asangisi ma­kula, atuni banzambe ba ye mpe atali libále lya nyama.

21:27  O loboko la ye la mobali zeke elakisi Yeruzalem : kuna batia masini mpo ya kobuka efelo ya engumba, bapesa eti­nda ya koboma bato, bayokisa migango mya etumba, bapusa masini pene na bizibeli, babakisa mabelé liboso lya lopango mpe batimola bibo­mbamelo.

21:28  Bato ba Israel bakinoli likambo liye lya botuni, kasi mpo ya ndai balayaki akolakisa bango masumu basalaki, mpe akokangisa bango o boombo.

21:29  Ya­ngo wana Mokonzi Yawe alobi boye : Bosali ’te bakundola masumu ma bino ; mabe ma bikela bya bino mamononi. Bokokangema o boombo, mpo bakundoli makambo ma bino.

21:30  Yo, nkumu wa Israel, moto mabe mpe­nza, mokolo mwa yo mokoki, mokolo mabe manso makosila.

21:31  Mokonzi Yawe alobi boye : Longola ele­mbo ya bokonzi, enko­ti ya lokumu, o motó ; maka­mbo manso makobongwana : bakotombola eye ezali o nse, bakokitisa eye ezali o likolo.

21:32  Nakobebisa engu­mba eye nye, ekotikala se mopotu, lokola esa­lemaki naino te, liboso ’te oyo azali na likoki lya kosambisa akoya, oyo nakotinda asala bongo.

21:33  Mwana wa moto, sakola mpe loba : Mokonzi Yawe alobi na ba-Amon mpo ya mafinga ma bango : Mopanga, mopanga, babimisi yo mpo ya koboma, basebi yo mpo ya kobebisa mpe kobwaka minkalali,

21:34  o ntango balakisi yo bimonela mpe bilembo bya lokuta mpo ya kokata nkingo ya bato babe, mpo mokolo bakosuka mobelemi, mpe mabe ma bango makosila.

21:35  Zongisa mopanga o esika ya mwango. O esika bakelaki yo, o ekolo babotaki yo nakosambisa yo.

21:36  Nakokitisela yo nkanda ya ngai, móto mwa nkele ya ngai mokokitela yo ; nakokaba yo o maboko ma base­nzi, baye bakokanaka kobebisa.

21:37  Bako­bwaka yo o móto, makila ma yo makosopana o ekolo mobimba. Ata moto moko akokanisa yo lisusu te. Ngai Yawe nalobi bongo.

Chapter 22

22:1  Yawe alobi na ngai maloba maye :

22:2  Mwana wa moto, oli­ngi kosambisa babomi ba engu­mba eye ? Lakisa bango makambo ma bango manso ma nsomo.

22:3  Okoloba boye : Mokonzi Yawe alobi : Osopaki makila o engumba ya yo, obengi bongo ngonga ya nsuka ya yo ; na bikeko osalaki o ekolo ya yo okomi na mbindo.

22:4  Awa osopi makila, okomi na masumu ; awa osali bikeko, okomi na mbindo : obengi bongo ngonga ya nsuka ya yo, mpe okomi o nsuka ya mibu mya yo. Yango wana nakosala ’te bato ba bikolo bisusu baseke mpe batiola yo.

22:5  Bázala mosika to penepene, bakoseke yo mpo obebisi nkombo ya yo na mabe osali.

22:6  Ba­nkumu ba Israel bazalaki kosopa makila, moto na moto engebene na bokasi bwa ye.

22:7  O mboka iye bazalaki kome­mya tata na mama te, mpe konyokolo bampaya, mwasi bozenge na mwana etike.

22:8  Bazalaki kokinola bi­sika bisantu mpe kosa­ntola mikolo mya ngai mya Sabato.

22:9  Epai ya yo basusu bazalaki kofu­nda bato na lokuta mpo ya kosopa makila, basusu baliaki mabonza o ngomba mpe bakosalaka makambo ma bosoni.

22:10  Basusu batalaki bolumbu bwa tata to balalaki na makasi na mwasi ntango azalaki na mbindo.

22:11  Mosusu asalaki bokali na mwasi wa moninga, mosusu abebisaki bokilo wa ye na makambo ma bosoni, mosusu alalaki na ndeko wa ye oyo abotami na ye tata moko.

22:12  Basusu bakoyambaka mabo­nza mpo ya ko­boma bato ; bakobutisaka motuya moleki, bakosengeke mbakisa mpe bakobotoloko bani­nga biloko : bakobosanaka ngai. Mokonzi Yawe alobi bongo.

22:13  Ngai nayoki mabe mpo ya biloko binso bozwaki na bosembo te mpe mpo ya makila masopani o mboka yo.

22:14  Mitema na maboko ma bino makolembe te mokolo nakotumbola bino ? Ngai Yawe nakosala maye nalobaki.

22:15  Nakopanza yo o bikolo bisusu, nakobwaka yo o mikili mya bampaya. Nakolongola mbi­ndo ya yo inso.

22:16  Mpo ya mabe ma yo okosa­mbwa o miso ma bikolo bisusu ; oko­ndima bongo ’te ngai nazali Yawe.

22:17  Yawe alobi na ngai maloba maye :

22:18  Mwana wa moto, ekolo ya Israel ekomi lokola bibende bipetwami te ; banso bazali lokola motako, mbengi, ebende na mondolu bitiami o etu­mbelo, mpo bizali peto te.

22:19  Yango wana Mokonzi Yawe alobi : Nakosangisa bino banso o Yeruzalem, mpo bino banso bokomi lokola bibende bya bosoto.

22:20  Lokola bakosangisaka palata, motako, ebe­nde, mondolu na mbengi o etu­mbelo, mpe bakopelisaka móto makasi mpo ’te binso binyangwa, se bongo na nkanda ya ngai enene nakosa­ngisa mpe nakonya­ngwisa bino :

22:21  nakosangisa bino, nakokitisela bino móto mwa nkanda ya ngai mpe nakonyangwisa bino wana.

22:22  Lokola palata ekonyangwaka o etumbelo, bino bokonyangwa o Yeruzalem mpo ’te bondima ’te ngai Yawe nakitiseli bino nkanda ya ngai.

22:23  Yawe alobi na ngai maloba maye :

22:24  Mwana wa moto, loba na Yeruzalem boye : Mai ma mbula manokeli mabelé ma yo te o eleko ya boloni mboto.

22:25  Bankumu ba yo ba­komi lokola nkosi ezali koganga ntango ekatikati nyama : baliaki bato, babotoli nkita na biloko bya mo­tuya, mpo ya bango basi baze­nge bakomi mingi o ekolo.

22:26  Ba­nganga Nzambe ba ye babebisi mibeko mya ngai, basantoli bisika bya ngai bisantu, batali biloko bisantu lokola biloko mpamba, balakisi bato te na biloko nini bakotikala peto mpe biloko nini bikokomisaka ba­ngo na mbindo, bapanganaki na mikolo mya ngai mya Sabato te ; basambwisi ngai bongo o ntei ya ba­ngo.

22:27  Bakonzi ba ekolo ya ye bakomi lokola nkoi ikokatakataka nyama : bakosopaka makila na bobomi bato mpo ’te bayiba biloko bya bango.

22:28  Baprofeta ba ye bazipaki mabe mana na bimonela bya mpamba mpe na bosakoli maka­mbo ma lokuta : bakolobaka ‘Mokonzi Yawe alobi bongo’, nzoka­nde Yawe alobi eloko te.

22:29  Bankolo ba ye balingi se makambo makasi makasi, bakoyibaka mpe bakonyokoloko babola na bato ba mawa ; ba­koyokisaka bampaya mpasi mpe bazangi bosembo.

22:30  O ntei ya ba­ngo naluki moto moko abongisa lopango la engumba mpe ateleme o esika efelo etubwani, mpo ’te abatela engumba mpe apekisa ngai nabebisa yango te, kasi namoni moto moko te.

22:31  Yango wana nakitiseli bango nkanda ya ngai, mpe nasilisi bango na móto mwa nkele ya ngai. Nasali ’te mabe ma bango makwela bango. Mokonzi Yawe alobi bo­ngo.

Chapter 23

23:1  Yawe alobi na ngai maloba maye :

23:2  Mwana wa moto, eza­laki basi babale, bana ba mama moko.

23:3  Ut’o bolenge bazalaki kosala bondumba o Ezipeti. Kuna bato bazalaki kosimba mabéle mpe ko­momo ntolo ya bango.

23:4  Nko­mbo ya bango : Okola na mozimi wa ye Okoliba ; bazalaki basi ba ngai, babotaki bana babali na bana basi. Okola ezali nkombo ya Samaria, Okoliba nkombo ya Yeruzalem.

23:5  Ntango azalaki mwasi wa ngai, Okola abandi kosala bo­ndumba ; azalaki komipesa na bamakango ba ye, ba-Asur,

23:6  bato ba mokonzi baye balati bilamba bya longondo, bayangeli, bazuzi, banso banzenga kitoko bayebi kota­mbwisa farasa malamu.

23:7  Azalaki komipesa na ba­ngo, bato ba lokumu ba Asur ; mpe amibebisi na bikeko bya baye azalaki kolula.

23:8  Akobi kosala bondu­mba boye aba­ndaki o Ezipeti, nta­ngo babali bayelaki ye, basimbaki mabéle ma ye mpe basalaki bosoni na ye.

23:9  Ya­ngo wana nakabi ye o ma­boko ma bamakango ba ye, ba-Asur baye alulaki.

23:10  Bango balo­ngo­li ye bila­mba mpe batiki ye bolumbu ; bakangi bana ba ye babali na basi, mpe babomi ye na mopa­nga.

23:11  Mpo ya etumbu bapesaki ye, akomi ndakisa ya nsomo o ntei ya basi banso. Ndeko wa ye Okoliba, ata amonoki yango, aleki ndeko wa ye na boluli mpe na bondumba.

23:12  Akomi kolula ba-Asur : bayangeli, bazuzi, bato ba mokonzi baye balati bila­mba bya monzele, banso banzenga kitoko bayebi kotambwisa farasa malamu.

23:13  Namoni ’te azalaki komibebisa, se lokola ndeko wa ye.

23:14  Kasi Okoliba aleki ndeko wa ye na makambo ma bondu­mba : amoni bilili bya babali ba Kaldea o efelo ya ndako biye bikembami na mokobo motane lokola ngola ;

23:15  balati mikaba o loketo mpe ngabuni o mitó, lokola basoda bakobundaka na mopanga mpe na nguba ; bilili biye bilakisi bato ba Babilon babotami o Kaldea.

23:16  Ntango amoni bango, ako­mi kolula bango mpe atindeli bango bantoma o Kaldea.

23:17  Bango bato ba Babilon bayei epai ya ye mpo ’te balala na ye mpe babebisa ye na makambo ma bosoni. Awa akomi na mbindo, akomi koyoka bango mpi.

23:18  Kasi akobi kosala bo­ndumba mpe kolakisa bolumbu bwa ye. Yango wana naboyi ye, lokola naboyaki ndeko wa ye.

23:19  Akobi kosala bondumba, awa akanisi bolenge bwa ye ntango azalaki kosala bondumba o Ezipeti,

23:20  esika azalaki kolula mpenza babali bayoki mposa makasi lokola mpunda mpe farasa babali.

23:21  Ozongeli bondumba bwa bole­nge bwa yo, ntango bazalaki kosi­mba mabéle mpe komomo bontolo bwa yo.

23:22  Yango wana, Okoliba, Mokonzi Yawe alobi boye : Nakotindela yo babali, baye oboyaki, ba­uta epai na epai mpo ya kosala yo mabe :

23:23  bato ba Babilon mpe ba-Kaldea banso, ba Pekod, ba Soa, na ba-Asur banso, ba­nzenga kitoko, ba­yangeli, bazuzi, bakomanda, baye banso bakotambwisaka farasa.

23:24  Bakobimela yo ut’o Nordi, na ma­kalo manene mpe make, elongo na bato ebele, na nguba inene mpe ike mpe na binkoti ; bakozinga yo. Natindi bango basambisa yo engebenenamibekomyabango.

23:25  Nako­la­ki­sa yo zuwa lya ngai ; bakosala yo makambo na nkanda mpe­nza. Bakokata yo zolo na matoi mpe baye bakotikala bakobomama na mopa­nga. Bakokanga bana babali na bana basi ba yo, mpe baye bakotikala bakotumbama.

23:26  Bakobotolo yo bilamba mpe biloko bya mpauni.

23:27  Na­kosilisa ezalela ya yo ya bo­ndumba boye obandaki o Ezipeti ; okoluka bango lisusu te, okokanisa Ezipeti lisusu te.

23:28  Mokonzi Yawe alobi : Nakokaba yo o maboko ma baye bayini yo mpe ma baye yo oboyaki.

23:29  Bakosala yo maka­mbo ma boyini, bakobotolo yo nkita mpe bakotika yo bolumbu. Bongo nsoni ya bondumba bwa yo ekomonono. Mpo ya makambo ma boso­ni mpe ezalela ebe ya yo

23:30  bakosala yo bongo, mpo osalaki bo­ndumba na bolandi bato ba bikolo bisusu, mpe omibebisi bongo na bikeko bya bango.

23:31  Mpo omekoli eza­lela ya ndeko wa yo, nakopesa yo nkeni eye namelisi ye.

23:32  Moko­nzi Yawe alobi boye : Okomele nkeni ya ndeko wa yo, nkeni enene mpe bozindo ; bato bakoseke mpe bakotiola yo, mpo nkeni eleki bonene.

23:33  Okolangwa mpe okoyoka mpasi. Nkeni ya ndeko wa yo Samaria ezali nkeni ya bokamwi mpe ya bobebisi.

23:34  Okomele yango tee ekosila, na nsima bakobola yango ; okomizokisa mabéle na bipaso bya yango. Ngai Mokonzi Yawe nalobi bo­ngo.

23:35  Yango wana Mokonzi Yawe alobi boye : Mpo obosani ngai mpe obwaki ngai nsima ya yo, okomeme moku­mba mwa ezalela ebe mpe mwa bondumba bwa yo.

23:36  Yawe alobi na ngai : Mwana wa moto, oli­ngi kosambisa Okola na Okoliba ? Palela bango na mabe ma bango ma nsomo :

23:37  basali ekobo mpe makila makangemi o maboko ma bango, basali bokali na bikeko bya bango ; batumbeli banzambe ba bango bana baye babotelaki ngai.

23:38  Likambo lisusu basali : babebisi ndako esantu ya ngai mpe basantoli mikolo mya ngai mya Sabato.

23:39  Mokolo monamei babomeli bikeko bana ba ba­ngo, bakei kosantola ndako esantu ya ngai. Tala maka­mbo basali o nda­ko ya ngai mpe­nza.

23:40  Kutu, ba­byangi babali mosika, batindeli ba­ngo bantoma ba­byanga bango. Mpe bayei ; mpo ya bango osukoli nzoto, opakoli langi mpembeni ya miso mpe omike­mbisi na biloko bya mpauni.

23:41  Okei komilalisa o mbe­to ya lipombo. O meza eye eti­a­mi o boso bwa mbeto otii mpaka ya malasi na mafuta ma ngai.

23:42  Makeléle mayokani wana ma bato ebele bazalaki kosolola mpe kosepela, bato bauti mosika ; balatisi basi bikomo o maboko mpe bi­nkoti bya lokumu o mitó.

23:43  Namilobeli : Na oyo asili abebi na makambo ma bokali, bayei mpe kosala bondumba.

23:44  Bayei epai ya basi baye ba bokali, Okola na Okoliba, lokola epai ya mwasi ndumba.

23:45  Kasi bato ba bosembo bakosambisa bango, lokola bakosambisaka bato ba bokali mpe baye basopi makila ma bato, mpo bazali basi ba bokali, mpe makila makangemi o maboko ma bango.

23:46  Mokonzi Yawe alobi boye : Bo­byanga bato o likita, bakitisa ba­ngo ; bakaba bango o maboko ma banyokoli mpe ma bayibi.

23:47  Bato ba likita babwakela bango mabanga, ba­boma bango na mopanga ; baboma mpe bana babali na bana basi ba bango, mpe batumba ndako ya ba­ngo.

23:48  Nakolongola makambo ma bosoni o ekolo eye ; bakokebisa bo­ngo basi banso mpo bamekola makambo ma bino ma bosoni te.

23:49  Mabe ma bino makwela bino moko ; bokomeme mokumba mwa masumu ma bokumisi bikeko. Bokoyeba bongo ’te ngai nazali Yawe.

Chapter 24

24:1  O mobu mwa libwa, o sa­nza ya zomi, o mokolo mwa zomi, Yawe alobi na ngai maloba maye :

24:2  Mwana wa moto, koma mokolo mwa lelo mpenza o monkanda, mpo lelomei mokonzi wa Babilon akoya kobundisa Yeruzalem.

24:3  Loba na libota lya batomboki moulani. Loba na bango : Mokonzi Yawe alo­bi boye : Tia lisasu o móto mpe sopa mai o kati.

24:4  Bakisa biteni bya nsuni biye bileki malamu, ebelo na lipeke ; tondisa lisasu na minkuwa mileki malamu.

24:5  Pono nyama eye eleki kitoko o eto­nga, tia nkoni o nse ya lisasu, pelisa móto, tokisa byango kina minkuwa mikobela malamu.

24:6  Mpo Mokonzi Yawe alobi : Mawa na engumba ya babomi, ekomi lokola lisasu ligugi, liye bakoki kolongola lisusu te ! Bimisa eteni yoko yoko, obete zeke te.

24:7  Solo, makila mazali o engumba eye masopani o mabanga. Basopi mango o mabelé te mpo ’te zelo ezipa mango te.

24:8  Nasopi makila mana o libanga mpo ’te mazipama te, nakolisa bongo nkanda ya ngai mpe nabekola makila mana.

24:9  Yango wana Mokonzi Yawe alobi boye : Mawa na engumba eye ya babomi ! Ngai mpe nakopelisa móto monene.

24:10  Sangisa nkoni, pelisa móto, lamba misuni mibela malamu, bakisa nkasa ya nsolo mpimbo, minkuwa mizika.

24:11  Tia lisasu mpamba o móto mwa makala, likoma móto, mbengi etela, bosoto bozali o kati bonyangwa mpe bogugi bonso bolongwa.

24:12  Kasi se mpamba, bogugi boleki makasi, bokolongwa te,

24:13  mpo ya bosoto bwa bosoni bwa yo ; nali­ngaki kopetola yo, kasi oboyaki ko­koma peto ; okopetwama lisusu te, kina nkanda ya ngai ekosila.

24:14  Ngai Yawe nalobi bongo mpe nakosala yango noki, nakoyokela yo ngolu te, mawa mpe te. Bakosambisa yo engebene na ezalela mpe na misala mya yo. Elobi bongo Mokonzi Yawe.

24:15  Yawe alobi na ngai maloba maye :

24:16  Mwana wa moto, nakobotolo yo eloko eye okosepelaka kotala na miso ; kasi okoki komilela te, mpe kolela mai o miso te.

24:17  Obomba ma­wa o motema, olata mpili te, okanga ngabuni o motó, olata sapato o makolo, ozipa mandefu te mpe biloko bato bakoyela yo olia bya­ngo te.

24:18  Mokolo moko na ntongo nazalaki koloba bongo na bato, na mpokwa mwasi wa ngai akufi. Etani ntongo, nasali lokola Yawe ati­ndaki ngai.

24:19  Bato batuni ngai : « Mpo nini osali bongo ? Oli­mbolela biso ntina ! »

24:20  Nalobi na bango :

24:21  « Yawe ayebisi ngai maloba maye : Yebisa bato ba Israel boye : Mokonzi Yawe alobi : Nakosantola ndako ya ngai esantu, eye bino bokofundaka na yango mpe bokoyokaka esengo na botali yango, mpo bokolingaka ya­ngo mingi. Bana babali na bana basi ba bino, baye bino botiki, bakokufa na mopanga.

24:22  Bino mpe bokosala lokola ngai nasali sikawa : bokozipa mandefu te, biloko baninga bakoyela bino bokolia bya­ngo te.

24:23  Bokotikala na ngabuni o motó mpe na sapato o makolo. Bokolata mpili te mpe bokolela te. Bokobeba mpo ya masumu ma bino mpe bokokimela banso elongo.

24:24  Ezekiel akozala elembo o miso ma bino ; bokosala bobele lokola ye asali. Mo­kolo makambo maye mako­kwe­la bino, bokoyeba ’te ngai nazali Yawe.

24:25  Mpe yo, mwana wa moto, mokolo nakobotolo bango bokasi, litundu mpe nkembo ya bango, maye makosepelisaka miso ma bango, maye mitema mya bango makoli­ngaka, ná mpe bana ba bango babali na basi,

24:26  mokolo mona moto moko oyo abiki akoya epai ya yo, akoyebisa yo nsango.

24:27  Mokolo mo­na okofungola monoko mpe okoloba na moto oyo abiki ; okozala moto wa ebubu lisusu te. Bongo okozala elembo o miso ma bango. Mpe ba­ngo bakoyeba ’te ngai nazali Yawe. »

Chapter 25

25:1  Yawe alobi na ngai maloba maye :

25:2  Mwana wa moto, tala epai ya ba-Amon, sakola maka­mbo ma bokaneli bango.

25:3  Okoloba na ba-Amon : Boyoka maloba ma Mokonzi Yawe : Mokonzi Yawe alo­bi boye : Bino botioli ndako ya ngai esantu ntango basantolaki ya­ngo, boseki ekolo ya Israel ntango bato babebisaki mwango, boseki bato ba Yuda ntango bakangaki ba­ngo bo baombo.

25:4  Yango wana sikawa nakokaba bino o maboko ma ba­to ba Esti. Bakoya kopika nga­nda ya bango o ekolo ya bino, mpe bakofanda wana. Bakolia mbuma ya bino mpe bakomele mabéle ma ngombe ya bino.

25:5  Nakokomisa eko­lo ya Raba esobe ya kamela, mpe ekolo ya Amon mokokoma lopango la bibwele. Bokoyeba bo­ngo ’te ngai nazali Yawe.

25:6  Mokonzi Yawe alobi boye : Awa obeteki maboko mpe obinaki na ese­ngo, osepelaki na mpasi ya bato ba Israel mpe okinolaki bango,

25:7  ngai nakotombola loboko mpo ya kosala yo mabe. Nakokaba yo o maboko ma bato ba bikolo bisusu, babotolo yo biloko. Nakolongola nkombo ya yo o ntei ya bikolo ; okozala ekolo lisusu te, nakoboma yo. Bongo okoyeba ’te ngai nazali Yawe.

25:8  Mokonzi Yawe alobi boye : Ba-Moab na ba-Seir balobaki : « Ekolo ya Yuda ekomi lokola bikolo bi­nso »,

25:9  yango wana nakofungolela bato nzela o ngomba ya Moab, baye bakoboma bingumba bya ba­ngo, bingumba kitoko, Bet-Yesimot, Baal-Meon na Kiryataim.

25:10  Nakokaba yango o maboko ma bato ba Esti mpe ma ba-Amon, mpo ’te bato ba bikolo bisusu bakanisa bango lisusu te.

25:11  Nakotu­mbola ba-Moab bongo. Bakoyeba bongo ’te ngai na­zali Yawe.

25:12  Mokonzi Yawe alobi boye : Edom abekoli mabe ma bato ba Yuda, mpe akoki na etumbu mpo bazongiseli bango mabe,

25:13  yango wana Mokonzi Yawe alobi boye : Nakotombola loboko mpe nakotu­mbola ba-Edom : nakoboma ná bato ná nyama. Nakokomisa yango mopotu, mpe banda Teman tee Dedan bato bakobomama na mopa­nga.

25:14  Ngai moko nakobekola mabe ma ba-Edom na maboko ma ba-Israel, bato ba ngai. Bakosala na Edom lokola nkanda enene ya ngai ekotinda. Edom akoyeba bongo ’te ngai moto nakobekolaka mabe ma bato. Elobi bongo Mokonzi Yawe.

25:15  Mokonzi Yawe alobi boye : Awa ba-Filisti babekolaki mabe, bazo­ngisaki mabe na bokinoli, mpe balukaki kobebisa na boyini bonso,

25:16  Mokonzi Yawe alobi boye : Nakotombola loboko mpe nakotu­mbola ba-Filisti. Nakoboma ba-Kereti mpe nakosambisa baye bakofandaka naino penepene na mbu.

25:17  Nakozongisela bango mabe manso na nkanda enene mpe nakopesa bango bitumbu bya nsomo ; mpe bakoyeba ’te ngai Yawe nabekoli mabe ma bango.

Chapter 26

26:1  O mobu mwa zomi na moko, o mokolo mwa yambo mwa sanza, Yawe alobi na ngai maloba maye :

26:2  Mwana wa moto, awa Tiro asekeki Yeruzalem : « A ! A ! Bizibeli bya engumba bibukani ! Nkita ya ye isili, ikomi o maboko ma ngai ! »

26:3  Yango wana Mokonzi Yawe alobi boye : Tiro, nakoyela yo etumba, nakotinda bato ebele baya kobu­ndisa yo, lokola mbonge inene ya mbu.

26:4  Bakobuka bifelo bya Tiro, bakoboma manongi ma ye, nakokombolo mputulu ya ye mpe nakokomisa ye libanga lya mpamba.

26:5  Tiro ekokoma, o kati ya mbu, esika ya kokaukisa minyama. Mokonzi Yawe alobi boye : bato ba bikolo bisusu bakobotolo ye,

26:6  bana basi ba ye bafandi o esobe bakobomama na mopanga. Bakoyeba bongo ’te nazali Yawe.

26:7  Yango wana Mokonzi Yawe alobi boye : Nakotinda Nabukodonozor, mokonzi wa Babilon, mokonzi wa bakonzi, ut’o Nordi abundisa Tiro, na farasa, na makalo, na batambwisi ba farasa, limpinga lya bato ebele.

26:8  Bana basi ba yo bafandi o esobe, akoboma bango na mopanga, akotonga efelo mpe nguba inene mpo ya komibatela, akobutisa mabelé penepene na lopango la yo ;

26:9  na masini ma ye akotuta bifelo bya yo mpe akobuka manongi ma yo.

26:10  Boike bwa mpunda ya ye bokoto­ndisa yo na mputulu. Bifelo bya engumba bikoningana mpo ya lokito la bato ba farasa mpe la makalo, ntango akoyingela epai ya bizibeli, mpe akobotolo engumba ekomi na madusu o bifelo.

26:11  Akonyata balabala inso na mata­mbi ma farasa ya ye, akoboma bato ba yo na mopanga, akokweisa makonzi ma yo manene.

26:12  Bakobotolo yo nkita inso, bakoyiba biloko bya yo binso, bakoboma lopango la engumba ya yo, bakobuka ndako inene ya yo, bakobwaka mabanga, mabaya mpe biriki ya yo ibukani o mai.

26:13  Nakosilisa nzembo na miziki ya yo, nzenze ya yo ikoyokana lisusu te.

26:14  Nakokomisa yo libanga mpamba, esika ya kokaukisa minyama ; engumba ya yo ekotongama lisusu te, mpo ngai Yawe nalobi yango. Mokonzi Yawe alobi bongo.

26:15  Mokonzi Yawe alobi na Tiro : Bato ba bisanga bakolenge te nta­ngo bakoyoka ’te okwei, ndenge baye bazoki bakokimela, mpe bato ebele bakobomama o engumba ya yo ?

26:16  Bankumu banso penepene na mbu bakotika ngwende ya bango, bakolongola milato milai mya ba­ngo, mpe bakotika bilamba kitoko. Bakoyoka nsomo, bakofanda o ma­belé, bakolenge mpe bakokamwa mpenza mpo ya yo.

26:17  Bakoyemba nzembo ya boleli, bakoloba na yo : « Tala engumba ekufi, elimwi o mbu, ezalaki na lokumu lonene, bato ba ye bazalaki kokonza mbu mobimba mpe kobangisa bato ba bikolo pene na mbu.

26:18  Sikawa bato ba bisanga balengi mpo ya bokwei bwa yo, bato ba bisanga bayoki nsomo awa osuki bongo. »

26:19  Mokonzi Yawe alobi boye : Nta­ngo nakokomisa yo mopotu, lokola bingumba bizali na bato lisusu te, ntango nakobutisa mai ut’o bozi­ndo, maye makozindisa yo,

26:20  nako­b­waka yo o mboka ya bawa, epai ya bato ba kala ; nakofandisa yo o mokili mozali o nse ya mabelé. Lokola engumba ekufa kala, okozala esika yoko na baye bazali o mboka ya bawa. Okozo­nga lisusu te, oko­zwa lokumu lisusu te o ntei ya bato bazali na bomoi.

26:21  Nakokomisa yo eloko ya nsomo, okolimwa seko. Bakoluka yo, kasi bakomono yo lisusu mokolo moko te. Elobi bo­ngo Moko­nzi Yawe.

Chapter 27

27:1  Yawe alobi na ngai maloba maye :

27:2  Mwana wa moto, ye­mbela Tiro nzembo ya boleli.

27:3  Loba na Tiro, mboka etongami pe­nepene na mbu, eye ekosalaka mombongo na bato ba bisanga bi­ike : Mokonzi Yawe alobi boye : E Tiro, yo ozalaki koloba : Nazali masuwa kitoko mpenza !

27:4  Okomaki nkolo wa mbu enene, baye batongaki yo, babongisaki yo kitoko mpenza.

27:5  Basalaki mipanzi na sipresi ya Senir, likonzi linene lya masuwa na sédere ya Libano.

27:6  Basalaki nkai ya yo na nzete inene ya Basan, ndako ya masuwa na mpembe ya nzoku, eye babaki na mabaya ma nzete ya bisanga bya Kitim.

27:7  Na malekani makembami mauti o Ezipeti osalaki kapo mpo ’te mompepe mo­tambwisa yo, ezalaki mpe elamba ya bendele ya yo. Osalaki ema ya masuwa na ela­mba ya longondo euti o bisanga bya Elisa.

27:8  Ozwi baluki nkai o Sidoni mpe o Arvad ; e Tiro, bato ba yo ba bwanya basalaki misala o masuwa.

27:9  Bakolo ba Gebal na bato ba ye ba ntoki bazalaki wana mpo ya kobongisa mango. Masuwa manso ma mbu elongo na bato ba mango, bazalaki koya kosala mombongo epai ya yo.

27:10  Ba-Persi, bato ba Lud na Put, bazalaki kosala mosala mwa soda epai ya yo, bazalaki kotingisa nguba na binkoti bya etumba se wana ; bazalaki kopesa yo lokumu.

27:11  Limpinga lya bato ba Arvad lizalaki kokengele lo­pa­ngo la yo, mpe bato ba Gemad bazalaki koke­ngele manongi ma yo ; bazalaki koti­ngisa nguba o efelo ya lopango la yo, bazalaki kokolisa nkembo ya yo.

27:12  Bato ba Tarsis bazalaki koya kosomba biloko, mpo ozalaki na byango ebele. Bazalaki kofuta yo na palata, bibende, mbengi na mondolu.

27:13  Bato ba Yavan, Tubal na Mesek mpe bazalaki kosala mombongo na yo. Ozalaki kosomba baombo mpe biloko bya mbengi bya bango na biloko bya yo.

27:14  Bato ba Bet-Togarma bazalaki kotekele yo farasa ya bitumba mpe mpunda.

27:15  Bato ba Dedan mpe bazalaki kosala mombongo na yo, bato ba bisanga biike mpe ; ozalaki kofuta bango na mpembe ya nzoku mpe na nzete ya mbanza.

27:16  Ba-Aram bazalaki kosomba epai ya yo, mpo ozalaki na biloko biike. Bazalaki ko­tekele yo mabanga ma diama, bilamba bya longondo na misala mya ntonga, bilamba bya ngeli­ngeli na mabanga make, korail na rubis.

27:17  Ata Yuda na Israel bazalaki kosala mombongo na yo. Bazalaki kotekele yo mbuma ya mampa ya Minit, wangila, mafuta ma nzoi, mafuta ma mbila mpe mpaka ya malasi.

27:18  Bato ba Damasko bazalaki kosomba epai ya yo, mpo ozalaki na biloko mi­ngi mpe na nkita enene. Bazalaki kotekela yo vino ya Kelbon na nsinga ya nsuki ya mpata ya Sakar.

27:19  Wedan na Yavan, banda Uzal bazalaki kotekele yo biloko : bibende, pilipili mpe matiti ma nsolo mpimbo.

27:20  Bato ba Dedan bazalaki kotekele yo nsinga ya kosono bilamba, biye bakotandaka o farasa.

27:21  Ba-Arabu na bankumu banso ba Kedar bazalaki kotekele yo mpata babali, ntaba babali na bana ba mpata.

27:22  Bato ba Saba mpe ba Rama bazalaki kosala mo­mbongo na yo : bazalaki koteke malasi maleki nsolo mpimbo, mabanga ma motuya na wolo.

27:23  Bato ba Aran, Kane na Eden, Seba, Asur na Kilmad bazalaki kosala mo­mbongo na yo.

27:24  Bazalaki kotekele yo bilamba bya motuya, mi­nkoto mya longondo, misala mya ntonga, bilamba bya ngelingeli mpe mikulu malitami.

27:25  Masuwa ma Tarsis mazalaki kotambola mingi mpo ya mombo­ngo mwa yo. Ozalaki na nkita mpe na lokumu o kati ya mbu.

27:26  Bato ba nkai batambwisaki yo mo­sika o mbu, kasi mompepe mwa Esti mosukisi yo.

27:27  Nkita ya yo, biloko binso omemeki, baluki nkai na basali ba masuwa, babongisi masini na bato ba mo­mbongo, basoda banso na baye bakota­mbolaka o masuwa, banso bakozinda o mbu o mokolo masuwa ma yo makozinda.

27:28  Bogangi bwa basali ba masuwa, bokolengisa bato bazali o libongo.

27:29  O ntango ena bato ba nkai bakokima masuwa, bato bameseni na mai, basali ba masuwa, bakokende lisusu te, bakotikala o mokili.

27:30  Bakolela yo, bakoganga na mawa manene, bakomipakola mputulu o mitó, bakomibilinginya o nse.

27:31  Bakokokola mitó mpo ya yo, bakolata ngoto ; na nzembo ya lilaka bakolela yo na mawa manene.

27:32  Na mawa mpenza bakoyemba nze­mbo ya boleli, bakosala lilaka mpo ya yo : « Engumba nini ekokani na Tiro, ebombamelo eye o kati ya mbu ?

27:33  Awa okitisaki biloko o libongo mpo ’te oleisa bato ba bikolo biike, mpo ya nkita mpe biloko bya yo ebele, ozalaki kokomisa bakonzi ba nse bato ba nkita.

27:34  Tala, sikawa masuwa mabukani na ekumbaki, ozindi kin’o bozindo bwa mai ; biloko na bato ba yo banso omemeki bizindi elongo na yo.

27:35  Bato banso ba bisanga bakamwi mpo ya yo, bakonzi ba bango balengi na nsomo.

27:36  Bato ba bikolo bya mombongo baseki mpe bawuloli yo, zambi okomi eloko ya nsomo, esili na yo seko ! »

Chapter 28

28:1  Yawe alobi na ngai boye :

28:2  Mwana wa bato, loba na mo­konzi wa Tiro : Mokonzi Yawe alobi boye : Awa ofundaki, olobaki : « Nazali nzambe, nafandi o ngwende lokola nzambe, mosika o kati ya mbu », nzokande ozali se moto mpamba, ozali nzambe soki te. Okanisaki ’te ozali na bwanya bwa Nzambe.

28:3  Sikawa oleki Daniel na mayele, solo, eloko yoko ebombami o miso ma yo lisusu te.

28:4  Na bwanya mpe na mayele ma yo ozwi nkita, okotisi wolo na palata o sanduku ya yo.

28:5  Solo, na mayele ma mombongo obakisi mosolo, ozwi nkita, na ntina ena okomi na lolendo.

28:6  Yango wana Mokonzi Yawe alobi : Awa okanisi ’te okomi monene lo­kola Nzambe,

28:7  nakotindela yo bampaya bayela yo bitumba, bato ba ekolo eye eleki bobe. Na mimpanga bakobebisa biloko osalaki na mayele ma lolendo, mpe bakobebisa lokumu la yo.

28:8  Bakokitisa yo o libulu lya liwa, okowa liwa lya nsomo o kati ya mbu.

28:9  O miso ma babomi ba yo okoloba nde lisusu : « Ngai nazali nzambe » ? Ozali se moto, ozali nzambe te ; okomi o maboko ma bato bakotubola yo.

28:10  Okokufa lokola basutu bakokufaka, na maboko ma bampaya, zambi ngai nasili nalobi. Elobi bongo Mokonzi Yawe.

28:11  Yawe alobi na ngai maloba maye :

28:12  Mwana wa moto, yembela mo­konzi wa Tiro nzembo ya boleli. Loba na ye : Mokonzi Yawe alobi boye : Ozalaki ndakisa ya moto abongi nye, otondaki na bwanya, ozalaki kitoko,

28:13  ozalaki o Eden, o lopango la Nza­mbe, molato mwa yo mosalemaki na mabanga mingi ma motuya : sardwane, topaze, diama, krizolite, onikisi, yaspe, safir, eskarbukele na emerode ; balatisaki yo bikembiseli bya wolo o mokolo mwa mbotama ya yo.

28:14  Nakomisaki yo lokola kerubim, mobateli oyo afungoli mapapu, ozalaki likolo lya ngomba ya Nza­mbe esantu, ozalaki kotambola o makala ma móto.

28:15  Ezalela ya yo ezalaki ndakisa ut’o mbotama ya yo kin’o mokolo bamoni ’te ozali na bosembo lisusu te.

28:16  Mombongo monene ozalaki kosala mokomisi yo moto wa bitumba mpe wa masumu. Yango wana nabwaki yo ut’o likolo lya ngomba ya Nzambe mpe nalongoli yo kerubim mobateli o kati ya makala ma móto.

28:17  Ofundaki na bonzenga bwa yo obungisi bwanya bwa yo na boweli lokumu. Nabwaki yo o nse, bakonzi bamono mpe baseke yo.

28:18  Osalaki masumu ebele, otekisaki biloko na motuya moleki bonene, osantolaki ndako ya yo isantu. Yango wana napelisi móto monene mokolola o mboka yo mpe mokosilisa yo. Nakomisi yo lokola mputulu ya makala o mokili o miso ma bato banso bamoni yo.

28:19  Bato banso bayebi yo bayoki nsomo mpo ya yo, okomi eloko ya nsomo mpenza, olimwi seko.

28:20  Yawe alobi na ngai maloba maye :

28:21  Mwana wa moto, tala epai ya Sidoni mpe sakola maloba ma bokaneli ye.

28:22  Okoloba : Mokonzi Yawe alobi boye : Nakoyela yo etumba, Sidoni, nakozwa lokumu epai ya yo, bongo bato bakoyeba ’te ngai nazali Yawe, zambi nakotumbola yo na bose­mbo mpe nakolakisa bosantu bwa ngai o kati ya yo.

28:23  Nakotinda o mboka bokono bobe, makila makosopana o balabala, bato bakokufa o kati ya mboka, zambi o nzela inso bato ba mopa­nga bakobima, bongo banso bakoyeba ’te ngai nazali Yawe.

28:24  Mokolo mona, o ntei ya bikolo bikokinolaka Israel, nzube ekozokisa to ekopasola ekozala lisusu te, bongo bato bakoyeba ’te ngai nazali Yawe.

28:25  Mokonzi Yawe alobi boye : O mokolo nakosangisa bato ba Israel bapanzanaki o bikolo bisusu, nakolakisa bosantu bwa ngai o kati ya bango o miso ma bikolo. Bakoya kofanda o mabelé ma bango, maye napesaki mosaleli wa ngai Yakob.

28:26  Bakofanda wana kimia, bakoto­nga ndako mpe bakolona nzete ya vino ; solo, bakozala na kimia. Mokolo nakosambisa bato banso bazali penepene na bango, baye bakokinolaka bango, bakoyeba ’te ngai nazali Yawe Nzambe wa bango.

Chapter 29

29:1  O mobu mwa zomi, o sa­nza ya zomi, o mokolo mwa zomi na mibale, Yawe alobi na ngai maloba maye :

29:2  Mwana wa moto, tala epai ya Farao, mokonzi wa Ezipeti, mpe sakola maloba ma bokaneli ye elongo na ekolo ya ye mobimba.

29:3  Loba mpe yebisa ye : Mokonzi Yawe alobi boye : Farao, mokonzi wa Ezipeti, nayeli yo etumba ; ozali ngando enene o kati ya bibale Nil. Yo moto olobaki : « Ebale Nil ezali ya ngai, ngai moto nasalaki yango. »

29:4  Nakokanga mbanga ya yo na bibende bikokangema na biteku bya yo. Nakobimisa yo o kati ya ebale Nil elongo na mbisi inso ikangemi na biteku bya yo.

29:5  Nakobwaka yo o eliki elongo na mbisi inso ya bibale bya yo. Okokweya o nse, okolala o mabelé, moto moko akotelemisa mpe akokunda yo te. Nakopesa yo na nyama ya zamba mpe na ndeke, okozala biloko bya bango bya bolei,

29:6  bongo bato banso ba Ezipeti bakoyeba ’te ngai nazali Yawe. Mpamba te, ozalaki se mokekele o miso ma Israel ;

29:7  ntango bakangaki yo, obukanaki o maboko ma bango mpe ozokisaki bango maboko ; ntango batii mitema na yo, obukani mpe okweisi bango ba­nso.

29:8  Yango wana Mokonzi Yawe alobi boye : Nakotindela yo mopanga, moboma bato mpe nyama ya yo.

29:9  Mokili mwa Ezipeti mokokoma mopotu mozangi bato. Bongo bakoyeba ’te ngai nazali Yawe, mpo olobaki ’te : « Nil ezali ya ngai, ngai moto nasalaki yango. »

29:10  Yango wana nakoyela yo na mpe bibale bya yo binso etumba. Nakokomisa mokili mwa yo mopotu, banda Migdol kin’o Siena tee ndelo ya Etiópia.

29:11  Bato bakoleka wana lisusu te, nyama mpe te. Mibu ntuku inei mokili mwa yo mokozala na bato lisusu te.

29:12  Nakokomisa mokili mwa Ezipeti mopotu monene o ntei ya bikolo bisusu bibebi ; bi­ngumba bya ye bikobeba o ntei ya bingu­mba biye bikoma mipotu, mibu ntu­ku inei. Nakopanza bato ba Ezipeti o bikolo bisusu, bakotele­ngana o mikili misusu.

29:13  Mokonzi Yawe alobi boye : Nsima ya mibu ntuku inei, nakokamata bato ba Ezipeti o bikolo binso napanzaki mpe nakosangisa bango.

29:14  Nakozo­ngisa bango o mokili mwa Sudi epai bautaki, bakokoma mwa ekolo eke.

29:15  Bikolo bisusu bikozala binene, Ezipeti ekozala moke, ekoleka bikolo bisusu na bonene lisusu te. Nakokitisa bango mpo ’te ba­nyokolo bikolo bisusu lisusu te.

29:16  Ba-Israel bakotia elikya na bango lisusu te, mpo bakokundola ’te babungaki, awa basengeki ba­ngo lisalisi ; bakoyeba bongo ’te ngai nazali Mokonzi Yawe.

29:17  O mobu mwa ntuku ibale na nsa­mbo, o sanza ya yambo, o mokolo mwa yambo, Yawe alobi na ngai maloba maye :

29:18  Mwana wa moto, Nabukodonozor, mokonzi wa Babilon, apesaki basoda ba ye mosala monene, awa atindaki ba­ngo etumba na Tiro ; nsuki ya bato banso isili o mitó mpe mposo ilo­ngwi o mapeke. Kasi o Tiro azwi eloko te, basoda mpe bazwi eloko te. Manso asali mpo ’te abotolo ya­ngo makei mpamba.

29:19  Yango wana Mokonzi Yawe alobi boye : Nakokaba mokili mwa Ezipeti o maboko ma Nabukodonozor, moko­nzi wa Babilon. Akobotolo bango nkita inso, akokamata biloko bya bango binso, akopupola mokili mwa ba­ngo. Akofuta basoda ba ye na biloko bya Ezipeti.

29:20  Awa amiyokisi mpasi o Tiro, nakopesa ye mokili mwa Ezipeti, zambi asaleli ngai mo­sala. Elobi bongo Mokonzi Yawe.

29:21  O mokolo mona nakolendisa bato ba Israel, mpe nakosala ’te oko­ka kosakola o ntei ya bango. Bakoyeba bongo ’te ngai nazali Yawe.

Chapter 30

30:1  Yawe alobi na ngai maloba maye :

30:2  Mwana wa moto, sakola makambo, loba : Mokonzi Yawe alobi boye. Ganga makasi : « Mawa ! Mokolo mona ! »

30:3  mpo mokolo mwa Yawe mobelemi, mokolo mona mokomi penepene ; ekozala mokolo mwa londende lonene, mokolo bato ba bikolo binso bakoyoka mpasi.

30:4  Mopanga mokokwela Ezipeti, bato ba Etiópia bakolenge na nsomo, ntango bato ba Ezipeti bakokufa, bakoyiba nkita mpe bakobuka ndako kuna.

30:5  Bato ba Kus, Put na Lud, Arabu mobimba na Kub, na bana ba bondeko, bakokufa na mopanga elongo na ye.

30:6  Mokonzi Yawe alobi boye : Baye basalisi Ezipeti bakokufa ; lolendo mpo ya bokasi bwa ye lokosuka. Banda Migdol tee Siena bato banso bakokufa na mopanga. Maloba ma Mokonzi Yawe.

30:7  Ezipeti ekokoma mopotu leka bikolo bisusu, bingumba bya ye bikokoma mipotu o ntei ya bingu­mba bibeba.

30:8  Bongo mokolo nakotumba Ezipeti mpe nakosukisa bokasi bwa basalisi ba ye, bakoyeba ’te ngai nazali Yawe.

30:9  Mokolo mona nakotinda masuwa na bantoma na ngai, bábangisa bato ba Etiópia, baye bazali na kimia sikawa. Mokolo makambo maye manso makokwela Ezipeti, bakolenge na nsomo. Solo, makambo mana makosalema !

30:10  Mokonzi Yawe alobi boye : Nakosilisa makeléle ma bisengo o Ezipe­ti na maboko ma Nabukodonozor, mokonzi wa Babilon.

30:11  Nakotinda ye elongo na bato ba ye, ekolo eye eleki mokili mobimba na makambo makasi, bábebisa Ezipeti. Bakobimisa mopanga mpe bakoto­ndisa Ezipeti na bibembe.

30:12  Nakokaukisa mai ma ebale Nil, nakokaba ekolo o maboko ma babebisi. Nakobebisa mokili na biloko binso na maboko ma bauta. Ngai Yawe nasili nalobi.

30:13  Mokonzi Yawe alobi boye : Nakobuka bikeko binso, nakolongola banzambe ba lokuta o Nof. Nakolongola mpe bankumu o Ezipeti. Nakolengisa bato banso ba Ezipeti na nsomo.

30:14  Nakobebisa mokili mwa Patros, nakotumba Soan, mpe nakopesa No etumbu.

30:15  Nakokitisela Sin, ebombamelo ya Ezipeti, nkanda ya ngai enene, nakosilisa batobaNo.

30:16  Nakotumba Ezipeti na móto, Sin akobilingana na mpasi, bakobuka lopango la No mpe Nof ekozinda o mai.

30:17  Bilenge babali ba On mpe ba Pi-Beset bakobomama na mopanga, mpe bato ba bingumba bakoke­nde o boombo.

30:18  O Tapanes moi mokobongwana molili ntango nakobuka mintongo mya Ezipeti mpe lolendo la bokasi bwa bango lokosuka. Molili mokozipa yango, mpe bana basi ba ye ba­kokende o boombo.

30:19  Nakotu­mbola Ezipeti bongo ; bakoyeba bongo ’te ngai nazali Yawe.

30:20  O mobu mwa zomi na moko, o sanza ya yambo, o mokolo mwa nsambo, Yawe alobi na ngai maloba maye :

30:21  Mwana wa moto, nabuki loboko la Farao, mokonzi wa Ezipeti. Moto moko te asukoli mpota ya ye, batii yango monó te, baka­ngi yango na elamba te, basalisi ye te mpo ’te akoka kobete lisusu mopa­nga.

30:22  Yango wana Mokonzi Yawe alobi boye : Nakoyela Farao, mokonzi wa Ezipeti, etumba. Nakobuka maboko ma ye, na loboko loye losili lobukani, mpe nakokweisa mopanga mozali o loboko la ye.

30:23  Nakopanza bato ba Ezipeti o bikolo bisusu, nakotinda bango o biko­lo bisusu.

30:24  Nakolendisa mokonzi wa Babilon mpe nakotia mopanga mwa ngai o loboko la ye. Nakobuka maboko ma Farao mpe akokimela o miso ma monguna lokola moto alingi awei.

30:25  Nakolendisa mokonzi wa Babilon, kasi nakokweisa Farao. O eleko nakotia mopanga mwa ngai o maboko ma mokonzi wa Babilon mpe ye akobete na mwango mokili mwa Ezipeti, bato bakoyeba ’te ngai nazali Yawe.

30:26  Nakopanza bato ba Ezipeti o bikolo bisusu, nakotinda bango o bikolo bisusu. Bakoyeba bongo ’te ngai nazali Yawe.

Chapter 31

31:1  O mobu mwa zomi na moko, o sanza ya isato, o mokolo mwa yambo. Yawe alobi na ngai maloba maye :

31:2  Mwana wa moto, loba na Farao, mokonzi wa Ezipeti, mpe na bato ba ye banso boye : Yo moto monene solo, oulani na nani ?

31:3  Na sédere ya Libano, ezali na bitapi kitoko, na nkasa ebele mpe na mobimbi molai, nsonge ya yango esuki o mampata.

31:4  Mai makolisi nzete eye, mai ma libulu linene mazalaki mi­ngi, mabimisi miluka penepene na nze­te, matiyolisi mai kitoko o zamba mobimba.

31:5  Na yango nzete ekomi elai, leka nzete inso ya zamba, ekomi na bitapi binene ebele, bitapi biike bitandami, mpo ezalaki kozwa mai mingi.

31:6  Ndeke ebele izalaki kotonga zu­mbu o bitapi bya yango, nyama ya zamba mingi izalaki kobota o nse ya bitapi bya yango, mpe bato mingi bayei koluka mpio o nse ya yango.

31:7  Ezalaki kitoko na mobimbi monene mpe na bitapi ebele, minsisa mya yango milandi bisika bya mai maike.

31:8  Sédere ya lopango la Yawe ikokani na yango te, sipresi izali na bitapi lokola yango te, ata nzete ya platane izali inene boye te. Ata sédere yoko o lopango la Yawe ezali kitoko lokola yango te.

31:9  Nabongisaki yango na bitapi biike, nzete inso ya Eden iye izalaki o lopango la Nzambe iyokelaki yango zuwa.

31:10  Yango wana Mokonzi Yawe alobi boye : Awa nzete ekomi elai mpenza, mpe etindi nsonge kin’o mampata, awa nzete emilakisi na lolendo mpo ya bolai bwa yango,

31:11  nakabi yango o maboko ma mokonzi wa bikolo mpo ’te, na nka-nda enene, asala na yango lokola alingi. Ngai napikoli yango.

31:12  Bauta baye baleki bikolo binso na bobe bakati mpe bakweisi yango. Bitapi bya yango bilali o ngomba inso mpe o mabwaku manso. Bitapi bisusu bikatani mpe bilali o ma­bwaku manso ma ekolo. Bato ba ekolo banso bakimi molili mwa nzete mpe batiki yango mpamba.

31:13  Ndeke iyei kofa­ndela bitapi bikatani, nyama ya zamba iyei kobo­mbama o nse ya bitapi.

31:14  Esalemi bongo mpo ’te nzete elo­nami penepene na mai, emito­mbola kin’o mampata te ; mpe nzete eye ekozwaka mai mingi, ebanda kosala lolendo te mpo eleka nzete isusu. Mpamba te, nzete inso ikokufa, ikokende o nse ya mabelé, se lokola bato banso, elongo na baye bakokita o libulu.

31:15  Mokonzi Yawe alobi boye : Mokolo sédere ekiti o mboka ya bawa, natindi bawa balata mpili mpo ya yango. Nazipi libulu, nakangi bibale bya yango mpe nakaukisi mai ma yango. Nakomisi ngomba ya Libano molili, nzete inso ya zamba ika­uki mpo ya yango.

31:16  Nayokisi bato ba bikolo nsomo enene, nta­ngo bayoki makeléle ma nzete ekwei, nta­ngo nabwaki yango o mboka ya bawa, elongo na baye bakiti o libulu. O mokili mozali o nse ya mabelé likambo liye likobondo nzete ya Eden na nzete ya Libano ileki kitoko, nzete iye inso ikomeleke mai.

31:17  Baye bazalaki basalisi ba ye na mpe baye bafandaki o nse ya nzete, bakiti o mboka ya bawa, epai ya baye banso bakufa na mopanga.

31:18  O kati ya nzete inso ya Eden, yo okokani na nzete nini mpo ya lokumu to bonene bwa yo ? Nzokande babwaki yo o nse ya mabelé, se lokola nzete inso ya Eden, mpe olali o ntei ya basutu, elongo na baye bakufa na mopanga. Tala wana Farao mpe bato ba ye banso ! Elobi bongo Mokonzi Yawe.

Chapter 32

32:1  O mobu mwa zomi na mibale, o sanza ya zomi na iba­le, mokolo mwa yambo, Yawe alobi na ngai maloba maye :

32:2  Mwana wa moto, yemba nzembo ya boleli Farao, mokonzi wa Ezipeti, loba na ye : Osuki ! Yo mwana wa nkosi o ntei ya bikolo ! Ozalaki lokola ngando enene o mbu, opimbwisaki mai o bibale, oningisaki mai na makolo ma yo, otombolaki mbonge ya mango.

32:3  Mokonzi Yawe alobi boye : Ekosangisa ngai bikolo binso, nakobwakela yo monyama mwa ngai, bakokotisa yo o monyama mona.

32:4  Nakotika yo o mabelé, nakobwaka yo o bilanga, ndeke inso ikoya kotiela yo makolo, mpe nyama inso ya mokili ikoya kolia yo.

32:5  Nakotia misuni mya yo o ngomba, nakobwaka mintika mya yo o ma­bwaku ;

32:6  nakosopela mokili makila ma yo matangaki o ngomba ; mpe miluka mikotonda na makila mana.

32:7  Esili ekufi yo, nakokanga likolo, nakoindisa minzoto, nakozipa mwese na limpata mpe sanza ekongenge lisusu te.

32:8  Nakozimisa minzoto minso mya likolo mpo ya yo, nakokomisa ekolo ya yo molili. Mokonzi Yawe alobi bongo.

32:9  Nakoyokisa bato ba bikolo biike nsomo, ntango nakobebisa yo o ntei ya bato, o bikolo biye oyebi te.

32:10  Mpo ya yo nakokamwisa bikolo ebele, bakonzi ba bango bakolenge na nsomo mpo ya yo, ntango nakoningisa mopanga o boso bwa yo. Bakolenge ntango inso, bakoba­nga liwa o mokolo yo okokweya.

32:11  Mpamba te, Mokonzi Yawe alobi boye : Mopanga mwa mokonzi wa Babilon mokotubola yo.

32:12  Nakoboma bato ba yo ebele na mopanga mwa babuni, bato ba ekolo eye eleki bikolo binso na bokasi. Bakosukisa lolendo la Ezipeti, mpe nakosilisa bato ba ye banso.

32:13  Nakoboma bibwele binso bizalaki penepene na ebale, makolo ma bato na matindi ma nyama makoningisa lisusu mai mana te.

32:14  Nakolalisa mai ma ebale ya Ezipeti, mai manso makotiyola lokola mafuta. Elobi bongo Moko­nzi Yawe.

32:15  Ntango nakokomisa mokili mwa Ezipeti mopotu, bakobotolo nkita ya ye inso, nakoboma bato banso bafandi wana, bongo bato bakoyeba ’te ngai nazali Yawe.

32:16  Ezali nzembo ya mawa, eye bilenge basi ba bikolo bakoyemba. Bakoyemba nzembo eye ya mawa mpo ya Ezipeti mpe bato ba ye banso. Mokonzi Yawe alobi bongo.

32:17  O mobu mwa zomi na mibale, o mokolo mwa zomi na mitano mwa sanza ya yambo, Yawe alobi na ngai maloba maye :

32:18  Mwana wa moto, yemba nzembo ya boleli bato ba Ezipeti ntango bakotindama o mbo­ka ya bawa, elongo na bikolo bisusu. Bakende o nse ya mabelé, esika yoko na baye banso bakita o libulu.

32:19  Oleki nani na bonzenga ? Kita o libulu, omilalisa o esika basutu bazali,

32:20  o ntei ya bato bakufi na mopanga, moye mobeti ye na bato ba ye banso.

32:21  Ut’o mboka ya bawa, bilombe ba mpiko na baninga ba bango bakoloba na ye : « Baye bakufaki na mopanga, bobele basutu, bakiti o libulu, balali o malita ! »

32:22  Tala Asur na limpinga lya bato ba ye o kati ya malita ma bango, banso bakufaki na mopanga.

32:23  Malita ma Asur mazali o bozindo bwa libulu, malita ma bato ba ye mazi­ngi lilita lya ye ; banso bakufaki na mopanga ; bobele baye bayokisaki bato banso nsomo mpenza.

32:24  Tala Elam na limpinga lya bato ba ye bazingi lilita lya ye, banso bakufaki na mopanga ; basutu baye banso bakiti o nse ya mabelé ; bazalaki koyokisa bato banso nsomo. Sikawa batikali na nsoni se lokola baye banso bakiti o libulu.

32:25  O kati ya bato baye babomami babombeli Elam esika ya kolala. Limpinga lya bato ba ye, banso basutu, bazingi lilita lya ye, banso babomami na mopanga. Bazalaki koyokisa bato banso nsomo, sikawa batikali se na nsoni lokola baye banso bakiti o libulu, o kati ya bato bawei.

32:26  Mesek na Tubal bazali mpe, elo­ngo na limpinga lya bato balali o malita bazingi bango. Bango banso bazali basutu, babomami na mopa­nga, mpo bazalaki koyokisa bato banso nsomo.

32:27  Bapesi bango lilita esika yoko na bilombe ba kala te, baye bakitaki o mboka ya bawa, bibuneli o maboko ; batii mimpanga mya bango o nse ya mitó mya ba­ngo, mpe masumu ma bango o nse ya minkuwa mya bango, mpo bilombe baye bayokisaki bato banso nsomo.

32:28  Kasi yo, okokufa o ntei ya basutu, okokundama esika yoko na bato babomami na mopanga.

32:29  Tala Edom, bakonzi na bankumu ba ye banso batiami esika yoko na baye babomami na mopanga, ata balakisaki mpiko, balali o lilita esika yoko na basutu na baye bakiti o libulu.

32:30  Tala bankumu ba Nordi banso elongo na baye babomami mpo ya nsomo bayokisaki bato, sikawa basutu baye balali na nsoni o ntei ya baye babomami na mopanga ; basambwi se lokola baye bakiti o libulu.

32:31  Farao akomono bango, mpe ako­mibondo na bomoni bato ebele babomami na mopanga, Farao na bato ba ye. Mokonzi Yawe alobi bongo.

32:32  Solo, nalingisaki ’te ayokisa bato nsomo, nzokande bakoku­nda ye esika yoko na basutu babomami na mopanga, ye Farao na bato ba ye banso. Mokonzi Yawe alobi bongo.

Chapter 33

33:1  Yawe alobi na ngai maloba maye :

33:2  Mwana wa moto, loba na bato ba ekolo ya yo boye : Okoloba na bango : Ntango nabimiseli ekolo yoko mopanga, bato ba ekolo ena baponi moko wa ba­ngo bo monongi ;

33:3  soko amoni bato bayei na bitumba, abeti mondule, bongo bato banso bayeba ’te likama lizali.

33:4  Soko moto moko ayoki ’te babeti mondule, kasi atali yango mpamba, mokolo banguna bakoya na mopanga mpe bakoboma ye, makila ma moto ona makokwela ye moko.

33:5  Soko ayokaki mondule mpe atalaki yango mpamba, makila ma ye makokwela ye moko. Nzokande moto andimi likebisi lya mondule, akobikisa bomoi bwa ye.

33:6  Kasi soko monongi amoni bato bayei na mopanga mpe abeti mo­ndule te, bato ba ekolo bakoyeba eloko te ; soko moto moko abomami na mopanga, ata akufi mpo ya ye moko, nakosambisa monongi mpo ya makila masopani.

33:7  Mwana wa moto, yeba ’te natii yo monongi wa libota lya Israel. Ekoyoka yo liloba lya ngai, okokebisa bato o nkombo ya ngai.

33:8  Soko nalobi na moto mabe : « Yo moto mabe, okokufa ! » mpe yo opaleli ye te mpo atika ezalela ebe ya ye, akokufa mpo ya lisumu lya ye, kasi nakosambisa yo mpo ya liwa lya ye.

33:9  Nzokande soko yo opaleli ye mpo atika ezalela ebe ya ye, kasi alingi kobongola motema te, akokufa mpo ya masumu ma ye, kasi yo okobika.

33:10  Mwana wa moto, loba na bato ba Israel boye : Bino bokolobaka : « Mabe ma masumu ma biso, tomemi mango o mapeke ma biso ; tozali komibakisela mpasi mpo ya mabe mana ; boniboni tokoki kobika ? »

33:11  Loba na bango : « Mokonzi Yawe alobi : O nkombo ya ngai nakoki koyoka esengo na liwa lya mosumuki te ! Kasi nakosepela soko mosumuki abongoli ezalela ya ye mpo ’te abika ! Bobongola mitema, botika bizalela bibe bya bino. Mpo nini bolingi kokufa, bato ba Israel ? »

33:12  Bongo, yo mwana wa moto, loba na bato ba ekolo ya yo : Soko moto semba akomi kosala mabe, bosembo bwa ye bwa kala bokobikisa ye te. Mpe soko moto mabe atiki mabe ma ye mpe akomi kosala malamu, mabe ma ye ma kala makokitisa ye te. Mokolo moto semba akomi kosala mabe, akobika mpo ya bosembo bwa ye lisusu te.

33:13  Soko nalobi na moto semba « Oko­bika », kasi ye akomi na lole­ndo mpo ya maloba mana mpe asali mabe, bakotala bosembo bwa ye lisusu te, akokufa mpo ya mabe ma ye.

33:14  Kasi soko nalobi na moto mabe « Okokufa ! » mpe aboyi masumu ma ye, akomi kolanda nzela ya bosembo,

33:15  azongisi biloko bato bapesaki ye bo ndanga na mpe biloko binso ayibaki, abandi kotosa mibeko mikopesa bomoi mpe kokima mabe, moto ona akobika, akokufa te.

33:16  Bakotala mabe ma ye manso lisusu te. Asalaki malamu mpe atosaki mibeko, akobika.

33:17  Bato ba ekolo ya yo bakolobaka : « Yawe akosalaka malamu te », nzokande bino moko bokosalaka malamu te.

33:18  Moto semba atiki kosala malamu, akokufa,

33:19  mpe moto mabe akomi kosala malamu mpe kolanda bosembo, akobika.

33:20  Bo­ngo bolobi : « Yawe akosalaka malamu te ! » Bato ba Israel, boyeba ’te nakosambisa moto na moto engebene na ezalela ya ye !

33:21  O mobu mwa zomi na mibale, o mokolo mwa mitano mwa sanza ya zomi, nsima ya bokei o boombo, moto moko abiki o etumba ya Yeruzalem auti kuna, ayei koloba na ngai : « Engumba ekwei e ! »

33:22  Na mpokwa ya mokolo moleki, Yawe asimbaki ngai na loboko, liboso ’te moto ona abiki o etumba aya epai ya ngai na ntongo ; Yawe afungoli ngai monoko. Monoko mwa ngai mofungwami, nazalaki ebubu lisusu te.

33:23  Yawe alobi na ngai maloba maye :

33:24  Mwana wa moto, bato bafandi o mipotu mya Israel bakolobaka : « Ntango Abarama akamataki mokili moye, azalaki ye moko ; biso tozali bato baike, bapesi biso mokili moye mokomi mwa biso*. »

33:25  Ya­ngo wana loba na bango : Mokonzi Yawe alobi boye : Bokoliaka mabo­nza mazali naino na makila, boko­bwakaka miso epai ya bikeko bya bino, bokosopaka makila, bongo nsima bolingi kozwa mokili moye ?

33:26  Botii mitema na mimpanga mya bino. Bokosalaka makambo ma nso­mo. Bino babali bokobebisaka basi ba baninga, bongo bolingi ko­zwa mokili ?

33:27  Loba na bango : Mokonzi Yawe alobi boye : O nkombo ya ngai, baye bafandi o ndako ikufi ya Yeruzalem bakokufa na mopa­nga. Baye bazali o esobe, nakokaba bango na nyama, ilia ba­ngo. Baye babombami o mibenga bakokufa na bokono bobe.

33:28  Nakokomisa mokili moye mopotu, mokili mozali na bato te ; bakofunda na bokasi bwa bango lisusu te. Nakobebisa ngomba ya Israel mpe moto moko akoleka wana lisusu te.

33:29  Ntango nakokomisa mokili mwa bango mo­potu mpo ya makambo ma ba­ngo ma nsomo, bakoyeba ’te ngai nazali Yawe.

33:30  Mwana wa moto, bato ba ekolo ya yo, baye bakosololaka mpo ya yo mpembeni na bifelo mpe o boso bwa ndako, bakolobanaka : « Boya koyoka liloba lya Yawe ! »

33:31  Bato ebele bakoya epai ya yo, bakoya kofanda o boso bwa yo, bakoyoka maloba ma yo, kasi bakotosa ma­ngo te, zambi monoko mwa bango motondi na lokuta. O motema bakoluka se bolamu bwa bango moko.

33:32  Bakoyoka yo lokola nzembo kitoko eyembami na mongongo ma­lamu mpe na miziki elengi. Ba­ngo bakoyoka maloba ma yo, kasi moto moko akotosa mango te.

33:33  Mo­kolo makambo mana olobaki ’te makosalema, masalemi, mokolo mona bakoyeba ’te profeta moko azalaki o kati ya ba­ngo.

Chapter 34

34:1  Yawe alobi na ngai boye :

34:2  Mwana wa moto, sakola ona bakengeli ba Israel. Yebisa ba­ngo makambo makoya. Loba na ba­ngo boye : Bakengeli ba Israel, boyoka maloba ma Mokonzi Yawe : Mawa na bakengeli ba Israel bakomileisaka ! Bakengeli basengeli koleisa mpata ya bango,

34:3  kasi bino boliaki mafuta, bolataki bilamba bya nsuki ya mpata, bobomaki mpata ileki mafuta, kasi boleisaki mpata te.

34:4  Bosalisaki mpata itau te, iye izali na mpasi bobikisaki yango te, bokangaki mpota te ya eye ezoki ; bozongisaki mpata ebungi o lopango te ; bokendeki koluka yango te, kasi bokambaki mpata ya bino na makasi mpenza.

34:5  Mpata ipanzani za­mbi izangi mokengeli, iliami bongo na nyama ya zamba to ipanzani.

34:6  Etonga ya ngai ekomi koyengayenga bipai binso, o ngomba inene mpe ike inso ; mpata ipanzani bipai binso bya mokili ; moto moko te apangani na yango, to akei koluka yango.

34:7  Yango wana, bino bakengeli, boyoka maloba ma Yawe :

34:8  Mokonzi Yawe alobi o nkombo ya ye : bayibi bakoti o lopango la mpata ya ngai, mpe nyama ya zamba ikomi kosilisa yango mpo mokengeli azali te, mpo bakengeli ba ngai bakokengeleke etonga ya ngai te, kasi bakomileisaka mpe bakoleisaka mpata ya ngai te.

34:9  Yango wana, bino bake­ngeli, boyoka liloba lya Yawe :

34:10  Mo­konzi Yawe alobi boye : Tala, nasilikeli bakengeli, nakobotolo mpata ya ngai o maboko ma bango, mpe nakopekisa bango koleisa mpata ya ngai lisusu. Bongo bake­ngeli bakomileisa lisusu te. Nakobikisa mpata ya ngai o monoko mwa bango, bakoka kolia yango lisusu te.

34:11  Mokonzi Yawe alobi boye : Ngai moko nakokengele etonga ya ngai mpe nakopangana na yango.

34:12  Lo­kola mokengeli akopanganaka na mpata ya ye, ntango akomi o kati ya mpata ipanzani, ngai mpe na­kopa­ngana na mpata ya ngai ; nakolongola yango o bisika binso ipa­nzani mpo ya molili to londe­nde.

34:13  Nakolongola yango o bikolo esika ifandi, nakosangisa yango ut’o mikili mya bampaya mpe nakozo­ngisa yango o mokili mwa yango. Nakoleisa mpata ya ngai o ngomba ya Israel, o mabwaku mpe o bisika binso bato bazali.

34:14  Nakoleisa ya­ngo o esobe elamu, mpe o ngomba ya Israel ikozala na lopa­ngo loto­ndi na matiti malamu. Ikopema kuna o esobe elamu mpe ikolia matiti malamu o ngomba ya Israel.

34:15  Moko­nzi Yawe alobi : Ngai moko nakoleisa mpata ya ngai mpe nakopesa yango esika ya kopema.

34:16  Nakoluka mpata ebungi, mpe nakozongisa eye ezongi te ; eye ezoki mpota, nakokanga mpota ya yango ; eye ezali na mpasi nakobikisa ya­ngo ; eye ezali na nzoto mafuta mpe makasi, nakokengele yango malamu ; nakoleisa mpata ya ngai na bosembo.

34:17  Mokonzi Yawe alobi boye : Bino mpata ya ngai, nakosambisa mpata na ntaba basi, mpata na ntaba babali.

34:18  Bosepeli te kolia matiti malamu ? Bokonyataka na makolo matiti maye bolei te. Bosepeli komele mai peto te mpe na makolo bokobebisaka mai masusu maye bo­meli te.

34:19  Bongo mpata ya ngai ilia nde matiti bino bonyati na makolo, mpe imele mai bino bobebisi ?

34:20  Yango wana Mokonzi Yawe alobi boye : Ngai moko nakosambisa mpa­ta ya mafuta mingi, na mpata ya mafuta te.

34:21  Botindisaki baninga na mopanzi mpe na mapeke, mpe botutaki na maseke baye bazali makasi te tee bopanzi bango o libanda.

34:22  Ngai nakoya kobikisa mpata ya ngai, bongo bayibela bango lisusu biloko te. Nakosambisa mpata yoko yoko.

34:23  Nakopesa etonga ya ngai mobi­mba mokengeli se moko, ye akoleisa yango, ye nde Davidi, mosaleli wa ngai. Akoleisa etonga ya ngai mpe akokengele yango.

34:24  Ngai Yawe nakozala Nzambe wa bango, mpe mosaleli wa ngai Davidi akozala nkumu monene o ntei ya ba­ngo. Ngai Yawe nalobi.

34:25  Nakokata bondeko bwa boboto na etonga ya ngai ; nakolongola nyama inso ya zamba o mokili. Bato ba ngai bakofanda kimia o eliki mpe bakolala mpongi elamu o kati ya zamba.

34:26  Nakobenisa mokili moye na mpe mabelé manso mazali penepene na ngomba ya ngai. Nakonokisa mbula o ntango ekoki, ekozala mbula ya bobenisi.

34:27  Nzete ikobota mbuma, bilanga bikobota mbuma mi­ngi. Bato ba ngai bakofanda kimia o mokili mwa bango. Bongo mokolo nakobuka mabaya ma bika­ngiseli bya bango mpe nakolongola bango o maboko ma banyokoli ba bango, bakoyeba ’te ngai nazali Yawe.

34:28  Bato ba bikolo bisusu bakobotolo bango biloko lisusu te, mpe nyama ya zamba ikolia bango lisusu te. Bakozala na kimia mpenza, moto moko akotungisa bango lisusu te.

34:29  Nakobongisela bango ela­nga kitoko. Moto moko akokufa na nzala lisusu te, bato ba bikolo bisusu bakoyokisa bango nsoni lisusu te.

34:30  Bongo bakoyeba ’te ngai nazali Yawe Nzambe wa bango, Oyo azali penepene na bango ; mpe ba­ngo, bato ba Israel, bazali bato ba ngai. Elobi bongo Mokonzi Yawe.

34:31  Bino, mpata ya ngai, bozali eto­nga ya bato baye nakoleisaka, mpe ngai nazali Nzambe wa bino. Elobi bo­ngo Mokonzi Yawe.

Chapter 35

35:1  Yawe alobi na ngai maloba maye :

35:2  Mwana wa moto, tala epai ya ngomba ya Seir, mpe sakola maloba ma bokaneli :

35:3  Loba na ngomba : Mokonzi Yawe alobi boye : Ngomba Seir, nakoyela yo etu­mba, nakotanda loboko epai ya yo, nakokomisa yo mokili mozangi bato.

35:4  Nakosala ’te bingumba bya yo bibeba ; okokoma mopotu, bo­ngo okoyeba ’te ngai nazali Yawe.

35:5  Mikolo minso ozalaki koyina bato ba Israel mpe kosopa makila ma bango na mopanga o ntango bazalaki na mpasi enene, o eleko bazwaki etu­mbu mpo ya masumu ma bango.

35:6  Yango wana, o nkombo ya ngai, elobi bongo Mokonzi Yawe, nakoboma yo mpe makila ma yo mako­kwela yo. Awa olingaki koboma bato, nalayi ’te makila mako­kwela yo.

35:7  Nakokomisa ngomba ya Seir mopotu mozangi bato, nakolongola bato banso bakolekaka wana.

35:8  Na­kotondisa ngomba ya Seir na bibembe bya bato, o ngomba inene mpe ike, o mabwaku mpe o miluka bato bakokufa na mopanga.

35:9  Nakokomisa yo mopotu seko, moto moko te akofanda lisusu o bingumba bya yo. Bongo bokoyeba ’te ngai nazali Yawe.

35:10  Olobaki : « Nakokamata mikili mina mibale, nakokamata bato ba bikolo bina bibale, ngai nakozala nkolo wa mabelé. » Nzokande Yawe azalaki wana.

35:11  Yango wana nalayi o nkombo ya ngai, elobi bongo Mokonzi Yawe, nakozongisela yo makambo na nkanda mpe na zuwa, lokola yo moko osalaki na bango. Mpo ya bango nakomilakisa nta­ngo nakotumbola yo.

35:12  Bongo okoyeba ’te ngai Yawe nayoki mafinga manso olobaki ona ngomba ya ­Israel : « Ngomba ikomi mipotu, to­zwi yango mpo tosilisa yango. »

35:13  Olobaki na lofundo lonene o miso ma ngai, olobaki na ngai maloba maike, nayokaki maloba mana ma­nso malamu.

35:14  Mokonzi Yawe alobi boye : Mokili mobimba mokozala na esengo mokolo nakokomisa yo mopotu.

35:15  Ose­pelaki mpo mokili mwa bato ba Israel mokomaki mabelé mpa­mba, yango wana nakosala yo se bongo. Ngomba ya Seir mpe Edom mobimba ikokoma mabelé mpa­mba. Bongo bato bakoyeba ’te ngai nazali Yawe.

Chapter 36

36:1  Yo mwana wa moto, sakola maloba ona ngomba ya Israel, okoloba : Bino ngomba ya Israel, boyoka maloba ma Yawe :

36:2  Mokonzi Yawe alobi boye : Mo­nguna alobaki na yo : « A ! a ! Ngo­mba ina ya seko ikomi o maboko ma biso. »

36:3  Yango wana sakola, oko­loba : Mokonzi Yawe alobi boye : Bato basusu babebisaki bino, bokomi mokili mwa bato ba bikolo bisusu. Bango na bango batongi mpe baseki bino mingi.

36:4  Yango wana, bino ngomba ya Israel, boyoka maloba Mokonzi Yawe alobi na ngo­mba inene mpe ike, na miluka, na mabwaku, na mipotu mpe na mboka ikomi mpamba, na mboka inso bato ba bikolo bisusu bya penepene bapunzi mpe baseki.

36:5  Mokonzi Yawe alobi boye : Mpo ya zuwa linene nalayi ndai, solo mpe­nza nazali kokanela bikolo bisusu na mpe Edom mobimba, zambi na motema esengo mpe na bokinoli babotoli mokili mwa ngai mpo bayiba biloko binso.

36:6  Yango wana sakola ona ekolo ya Israel, loba na ngomba inene mpe ike, na miluka mpe na mabwaku ’te Mokonzi Yawe alobi boye : Ngai oyo, nalobi na zuwa mpe na nkanda o motema, mpo bato ba bikolo bisusu bayokisi bino nsoni mingi.

36:7  Yango wana Mokonzi Yawe alobi boye : Nato­mboli loboko mpe nalayi : Nsoni bato ba bikolo bizali penepene bayokisi bino ekozongela bango.

36:8  Bino ngomba ya Israel, bokokolisa nzete mpe bokobotela bato ba ekolo ya ngai Israel mbuma, zambi bakoumela lisusu te, balingi baya.

36:9  So­lo, nazali koya epai ya bino, nakoya kotala bino, etikali moke baya kokata bilanga mpe kolona mbuma.

36:10  Bato bakozala lisusu mingi o ekolo ya yo, libota mobimba lya Israel ; bingumba bikotonda na bato, ndako iye ibukani ikotongama lisusu.

36:11  Nakopesa bino bato mpe nyama ebele, bakokola malamu mpe bakobota mingi. Nakosala ’te bokozala na bato mingi lokola kala, nakosala bino malamu, leka liboso. Bongo bokoyeba ’te ngai nazali Yawe.

36:12  Bato ba ekolo ya ngai Israel bako­nyata mabelé ma bino, bakokoma lisusu bankolo ba mabelé ma bino, makozala ma bango mpe bokobotolo bango bana ba bango lisusu te.

36:13  Mokonzi Yawe alobi boye : Awa basusu balobaki ’te : « Bozali ekolo ekoliaka bato, bosilisaki bana ba ekolo ya bino »,

36:14  sikawa bokolia bato lisusu te, bokobotolo bango bana lisusu te, elobi bongo Moko­nzi Yawe.

36:15  Nakoyokisa bino mafinga ma bikolo bisusu lisusu te, bakoseke bino lisusu te, mpe bokozanga bana lisusu te. Elobi bongo Mokonzi Yawe.

36:16  Yawe alobi na ngai maloba maye :

36:17  Mwana wa moto : Ntango bato ba Israel bazalaki o mokili mwa bango, babebisaki mwango na ezalela mpe na misala mibe mya ba­ngo ; o miso ma ngai bazalaki na mbindo lokola mwasi azali komono sanza.

36:18  Nakitiseli bango nkanda ya ngai, zambi bazalaki koboma ba­to mpe bazalaki kokomisa mokili mbindo na bikeko bya bango.

36:19  Napanzi bango o bikolo bisusu, natindi ba­ngo o mikili misusu, nasali bango lokola ekokaki na ezalela mpe na misala mya bango.

36:20  O bikolo esika bapanzanaki basantolaki nkombo ya ngai mpe bato balobaki mpo ya bango : « Bazali ekolo ya Yawe, babimi o mokili mwa ye ! »

36:21  Yango wana nakanisi nkombo ya ngai esantu, eye bato ba Israel basambwisi o bisika binso bakendeki.

36:22  Bongo, loba na bato ba Israel boye : nakosalaka bongo mpo ya bino te, kasi mpo ya lokumu la nkombo ya ngai, eye bino bato ba Israel bosantolaki o bikolo biye bokendeki.

36:23  Nakosantisa nkombo enene ya ngai, eye bino bosantolaki o bikolo bisusu. Bongo soko nasili nalakisi bosantu bwa ngai o ntei ya bino o miso ma bango, elobi bongo Mokonzi Yawe, bango bakoyeba ’te ngai nazali Yawe.

36:24  Nakoke­nde kokamata bino o bikolo bisusu, nakosangisa bino ut’o mikili minso mpe nakokamba bino o mokili mwa bino moko.

36:25  Nakosopela bino banso mai peto, mpe bokokoma peto. Na­kolongola mbindo inso ya nzoto mpe ya bikeko bya bino.

36:26  Nakopesa bino mitema mya sika ; nakolongola o nzoto ya bino mitema mabanga, mpe nakopesa bino mitema mya nsuni.

36:27  Nakopesa bino elimo ya ngai mpenza ; nakosala ’te bolanda nzela ya mitindo mya ngai mpe botosa mibeko mya ngai.

36:28  Bokofanda o mokili napesaki bankoko ba bino. Bino bokozala bato ba ngai, mpe ngai nakozala Nzambe wa bino.

36:29  Nakolongola mbindo ya bino inso. Nakotinda mbuma ya ma­mpa, nalingi izala mingi ; nakopesa bino etumbu ya nzala lisusu te.

36:30  Nakotinda mbuma ya nzete ebele, nalingi bilanga bibota malamu mpo ’te bokufa na nzala lisusu te, mpe boyoka nsoni o miso ma bikolo lisu­su te.

36:31  O ntango ena bokoku­ndola ezalela ebe ya bino mpe misala mya bino mibo­ngoki te. Bokomiyoka mpi mpo ya mabe mpe mpo ya makambo ma nsomo bosalaki.

36:32  Nakosala bongo mpo ya bino te, malamu boyeba yango, elobi bongo Mokonzi Yawe. Boyoka nso­ni na mawa mpo ya ezalela ya bino, bato ba Israel.

36:33  Mokonzi Yawe alobi boye : Mokolo nakopetola bino na masumu ma bino manso, nakosala ’te bato bafanda lisusu o bingumba bya bino, mpe nakotongisa ndako ya bino iye ibukanaki.

36:34  O mabelé mabebi bokokata lisusu bilanga : bato bakoleka wana bakomono lisusu mabelé malali mpamba te.

36:35  Bato bakoloba : « Mokili moye mobebaki nye, mokomi sikawa lokola lopa­ngo la Eden ; bingumba bikomaki mipotu, batongi byango lisusu, mpe bazingi byango na lopango. »

36:36  Bato bakozala penepene na bino bakoyeba ’te ngai Yawe nabongisi biye bibebaki mpe naloni o bilanga mbuma bapikolaki. Ngai Yawe nakosala maye manso nalobi.

36:37  Mokonzi Yawe alobi boye : Boyoka likambo lisusu nakosala : Nakondima ’te bato ba Israel bakoka koya kotala ngai. Nakokomisa ba­ngo ekolo ya bato baike, lokola eto­nga ya bibwele,

36:38  lokola mpata izalaki kosangana o Yeruzalem o ntango ya biyenga binene ; nakoto­ndisa na bato bingumba biye bikufaki. Bongo bato banso bakoyeba ’te ngai nazali Yawe.

Chapter 37

37:1  Yawe asimbi ngai na loboko, elimo ya Nzambemei ato­mboli ngai mpe akitisi ngai o kati ya lobwaku lonene lotondi na mi­nkuwa.

37:2  Yawe atambwisi ngai bipai binso o kati ya minkuwa. Minkuwa mizalaki mingi mpenza o lobwaku, mikauka nye.

37:3  Alobi na ngai : « Mwana wa moto, natuni yo, minkuwa miye mikoki kozala lisusu na bomoi ? » Nazongisi : « Moko­nzi Yawe, yo moko oyebi ya­ngo. »

37:4  Alobi na ngai : « Sakola makambo na minkuwa miye, loba boye : Bino minkuwa mikauka, boyoka maloba ma Yawe.

37:5  Mokonzi Yawe alobi na minkuwa miye : Nakokotisa mpema o kati ya bino, bongo bokozwa bomoi lisusu.

37:6  Nakopesa bino mi­nsisa mpe misuni, nakozipa bino na lomposo la nzoto, nakopesa bino mpema, bongo bokozala na bomoi mpe bokoyeba ’te ngai nazali Yawe. »

37:7  Nasakoli lokola Mokonzi Yawe atindaki ngai. Mpe awa naba­ndi kosakola, nayoki lokito, mi­nkuwa mikomi koni­ngana mpe kosa­ngana.

37:8  Natala boye, namoni mi­nkuwa mikomi na minsisa mpe na misuni, mpe lo­mposo loka­ngisi nzoto mobimba ; kasi mizalaki na mpema naino te.

37:9  Alobi na ngai lisusu : Sakola na mpema, sakola, mwana wa moto, loba na mpema boye : Mokonzi Yawe alobi : « Mpema, yaka ut’o bisika binei bya mokili, pesa mpema na bato bawei, bazala na bomoi. »

37:10  Nasakoli lokola Yawe atindaki ngai. Bongo, mpema ekoteli bango, bazwi bomoi mpe banso batelemi. Bazalaki bato ebele mpenza.

37:11  Alobi na ngai lisusu : « Mwana wa moto, nayebisi yo ’te minkuwa miye mizali mya bato ba ekolo ya Israel. Bakolobaka : Minkuwa mya biso mikauki, elikya ya biso ya libiki esili, tobebi nye.

37:12  Yango wana, sakola makambo, loba na bango : Mokonzi Yawe alobi boye : Nakofungola malita ma bino ; nakobimisa bino, bato ba ngai, o malita maye, mpe nakokamba bino o mokili mwa Israel.

37:13  Ntango nakofungola malita ma bino, bato ba ngai, mpe nakobimisa bino o malita maye, bo­koyeba ’te ngai nazali Yawe.

37:14  Nakotia mpema ya ngai o kati ya bino mpe bokozala na bomoi. Nakofandisa bino o mokili mwa bino mpenza. Bongo bokoyeba ’te ngai Yawe nakosala maye nalobi. Elobi bongo Mokonzi Yawe. »

37:15  Yawe alobi na ngai maloba maye :

37:16  Yo, mwana wa moto, kamata libaya mpe koma maloba maye : « Yuda na bato ba Israel, baye bazali na ye. » Kamata mpe mwa libaya mpe koma : « Yozefu, libota lya Efraim, na bato ba ye basusu o Israel. »

37:17  Sangisa mabaya mana mabale makoma se libaya lyoko o loboko la yo.

37:18  Ntango bato ba ekolo ya yo batuni yo : « Okoyebisa biso ntina ya likambo liye te ? »,

37:19  okoloba na bango : Boyoka maloba ma Mokonzi Yawe, alobi : Nakokamata libaya lya Yozefu (lizali o loboko la Efraim) na bato ba ye basusu o Israel, mpe nakosangisa lyango na libaya lya Yuda ; mabaya mabale makokoma se libaya lyoko, bakozala se eloko yoko o maboko ma ngai.

37:20  Okosimba na maboko mabaya mana okomaki makambo mpe oko­lakisa bango,

37:21  okoloba na bango : Boyoka maloba ma Mokonzi Yawe alobi : Nakokamata bana ba Israel o bikolo biye bakendeki, ut’o bipai binso nakosangisa bango, mpe nakozongisa bango o mokili mwa bango moko.

37:22  Nakokomisa bango ekolo se yoko o ngomba ya Israel. Banso bakozala na mokonzi se moko ; bakokabwana na bikolo bibale lisusu te.

37:23  Bakokoma na mbindo lisusu te na bokumisi bikeko bya nsomo, mpe bakosala bikelakela bya bompamba lisusu te. Nakolo­ngola bango o bisika baboyaki ngai, o bisika biye basalaki masumu. Nakopetola bango, bongo ba­ngo bakozala ekolo ya ngai, mpe ngai nakozala Nzambe wa bango.

37:24  Mosaleli wa ngai Davidi akoya­ngela ba­ngo ; banso bakozala na mokengeli wa mpata se moko. Bakotosa mitindo mya ngai, bakomemya mibeko mya ngai mpe bakokokisa myango.

37:25  Bakofanda o ekolo eye napesaki mosaleli wa ngai Yakob, ekolo ya bankoko ba ba­ngo ; bakofanda wana na bana ba bango mpe na bankoko ba bango seko. Mosaleli wa ngai Davidi akoyangela bango seko.

37:26  Nakokata na bango bondeko bwa boboto mpe bwa seko. Bakozala se wana, bakokoma ebele ; mpe o ntei ya bango nakotonga ndako ya ngai esantu seko.

37:27  Ndako ya ngai ekozala epai ya bango. Ngai nakozala Nzambe wa bango, mpe bango bakozala ekolo ya ngai.

37:28  Mokolo ndako ya ngai esantu ekozala seko o ntei ya ba­ngo, bato ba bikolo bisusu bakoyeba ’te ngai nazali Yawe, oyo akosantisaka bato ba Israel.

Chapter 38

38:1  Yawe alobi na ngai maloba maye :

38:2  Mwana wa moto, tala epai ya Gog o mokili mwa Magog, nkumu monene wa Mesek na Tubal ; sakola mpo ya ye.

38:3  Okoloba : Mokonzi Yawe alobi boye : Nakoyela yo etumba, yo Gog, nku­mu monene wa Mesek na Tubal.

38:4  Nakokanga yo, nakotia bibe­nde o mbanga ya yo mpe nakobimisa yo elongo na basoda ba yo banso, ná farasa ná batambwisi, banso na bibuneli ebele, limpinga la yo linene lya basoda, baye bazali na nguba inene mpe ike, mpe bayebi kobu­nda na mopanga.

38:5  Basoda ba Persi, Kus na Put bakozala na yo, banso nguba o maboko mpe enkoti ya bibende o motó.

38:6  Gomer na basoda ba ye banso, Bet-Togarma o nsuka ya Nordi, na basoda ba ye banso, bato ba bikolo mingi bakozala na yo.

38:7  Omilengele malamu, elongo na baye banso bazali na yo ; zala mokambi wa bango.

38:8  Nsima ya mikolo mingi bakoti­nda yo etinda. Nsima ya mibu miike okoya kobunda na bato ba ekolo eye bakufaki na mopanga te, basa­ngani lisusu o ntei ya bikolo ebele o ngomba ya Israel iye ibeba. Ut’o bakabwani na bikolo bisusu bakomi na kimia.

38:9  Yo okokende kobu­nda na bango ; okoya lokola mo­mpe­pe mwa ekumbaki, yo na basoda ba yo, elongo na bato ba bikolo mingi, okokitela bango lokola limpata.

38:10  Mokonzi Yawe alobi boye : Mokolo mona okozala na makanisi mingi o motema mpe okokana mikano mibe,

38:11  okomilobela : « Nakokende kobunda na ekolo ya bato bakoki komibatela te, baye bazali na matata te, bato bafandi kimia. Mboka inso ya bango izali na lopa­ngo te, na bizibeli te, na bikangeli mpe te. »

38:12  Okobotolo bango biloko ; okokende kosala bato mabe mpe koyiba biloko bya bato ba ekolo eye bazongaki o mboka ibebaki, balongwaki o ntei ya bikolo bisusu, mpe bakomipesaka na bobokoli bibwele mpe na mombongo. Bazali o mokili moye mozali o katikati ya nse mobimba.

38:13  Bato ba Saba na Dedan, bato ba mombongo ba Tarsis na bakonzi ba bango ba­nso bakotuna yo : « Oyei kobotolo biloko ? Osangisi bato ba yo nde mpo ya koyiba mpe kokamata palata na wolo, bibwele na biloko bisusu, mpo okoma bongo na nkita enene ? »

38:14  Yango wana, mwana wa moto, sakola makambo, okoloba na Gog : Mokonzi Yawe alobi boye : Mokolo bato ba ekolo ya ngai Israel ba­kofa­nda kimia o mokili mwa ba­ngo, yo okobimela bango, solo ?

38:15  Okolo­ngwa o mokili mwa Nordi mosika elongo na bato ba bikolo ebele, banso bakotambwisa farasa, limpinga linene lya basoda.

38:16  Okoya kobunda na bato ba ngai ba-Israel mpe okokitela bango lokola limpata lizipi mokili. O mikolo mya nsuka nakobenga yo okende kobundisa mokili mwa ngai mpo ’te, na maboko ma yo, Gog, nalakisa bosantu bwa ngai o miso ma bato ba bikolo bisusu ; bongo bango banso bayeba ngai.

38:17  Mokonzi Yawe alobi boye : Awa nalobaka kala na monoko mwa basaleli ba ngai baprofeta ba Israel, nalobaki o mikolo mina ’te okobimisela bango etumba.

38:18  Mokolo Gog akoya o mokili mwa Israel, elobi bongo Mokonzi Yawe, nakoyoka nkanda enene. Na nkele,

38:19  na zuwa lya ngai, na nkanda enene nalobi : Nalayi ndai ’te mokolo mona mokili mokoningana makasi o Israel.

38:20  Mbisi ya mai, ndeke ya likolo, nyama inso ya zamba, nyama inso ikolandaka o mabelé, mpe bato banso bakonyataka mabelé bakolenge o miso ma ngai. Ngomba iko­kweya, mabanga makopa­swana, bifelo binso bikobukana.

38:21  O ngomba ya ngai inso nakobimisa mimpanga mpo ya kobundisa ye. Elobi bongo Mokonzi Yawe. Ndeko na ndeko bakobomana na mopanga.

38:22  Nakotumbola ye : Nakotindela ye bokono bobe na mpe bitumba. Mbula enene ekonokela ye na basoda ba ye na mpe bato ba bikolo mingi bayokani na ye, mbula ya matandala, mbula ya móto mokozikisa.

38:23  Nakolakisa bonene mpe bosantu bwa ngai. Nakomilakisa o miso ma bato ba bikolo biike ; bo­ngo bakoyeba ’te ngai nazali Yawe.

Chapter 39

39:1  Mwana wa moto, sakola maloba mabe ona Gog. Oko­loba : Yoka maloba ma Moko­nzi Yawe : Nakobimela yo, Gog, yo mokonzi monene wa Mesek na Tubal.

39:2  Nakokanga yo mpe nakoka­mba yo, nakobenga yo ut’o mokili mwa Nordi mosika oya kobunda bitumba o ngomba ya Israel.

39:3  Nakobuka litimbo o loboko la yo la mwasi, mpe nako­kweisa mimbai osi­mbi na loboko la mobali.

39:4  Okokufa o ngomba ya Israel, yo na basoda ba yo, na bato ba bikolo bi­susu bayokani na yo. Nakosala ’te bingondo ndenge na ndenge mpe nyama ya zamba bilia yo.

39:5  Okokufa o kati ya esobe, zambi ngai nalobi bongo. Maloba ma Mokonzi Yawe.

39:6  Nakotinda móto o ekolo ya Magog mpe o bisanga binso biye bato bafandi kimia ; bongo bakoyeba ’te ngai nazali Yawe.

39:7  Nakolakisa nkombo ya ngai esantu o ntei ya bato ba ngai, ekolo ya Israel. Nakolinga lisusu te ’te basantola nkombo ya ngai esantu. Bongo bato ba bikolo bisusu bakoyeba ’te nazali Yawe, Mosantu o Israel.

39:8  Makambo maye makosalema, ekozala o mokolo nalobaki ! Elobi bongo Mokonzi Yawe.

39:9  Bato ba bingumba bya Israel bakokende kotumba bibuneli binso : nguba inene mpe ike, matimbo, ma­kula, mimpanga na makongo. Bakopelisa na byango móto mibu nsambo mobimba.

39:10  Bato bakoke­nde koluka nkoni o esobe lisusu te, bakokende kokata yango o zamba lisusu te, zambi bakopelisa móto na bibuneli. Bakobotolo biloko bya bato baye babotoloki bango biloko liboso, bakokamata na makasi nkita ya baye bakamataki nkita ya ba­ngo liboso. Elobi bongo Moko­nzi Yawe.

39:11  Mokolo mona nakopono esika ya lokumu o Israel mpo ya koku­nda Gog. Ekozala lobwaku loye bakota­ngaka ‘Oberim’ o Esti ya mbu. O lobwaku lona bato bakoki koleka te. Bakokunda Gog na baso­da ba ye banso se kuna, mpe bakotanga yango ‘Lobwaku la Li­mpi­nga lya Gog’.

39:12  Ba­to ba Israel bakose­ngela na sanza nsambo mpo ya ko­kunda bango mpo ’te bapetola mokili mwa bango.

39:13  Bato banso ba­kosalisana o likambo lina, bongo mokolo nakolakisa bosantu bwa ngai, bango banso bakozwa lokumu. Elobi bongo Mokonzi Yawe.

39:14  Bakopono bato basusu bobele mpo ya kotambola o mokili mobi­mba bakunda bawei balali naino o mabelé ; bapetola mokili bongo. Bakosala bongo sanza nsambo.

39:15  Nta­ngo bakotambola o ekolo mobi­mba, soko bamoni minkuwa mya moto, bakotia ele­mbo kuna, mpo ’te mokolo baku­ndi-bibembe bakoya, bakunda ye o lobwaku la ‘Amon-Gog’

39:16  (engu­mba yoko mpe ezali na nkombo Amona). Bobele bongo bakopetola mokili mona.

39:17  Mwana wa moto, Mokonzi Yawe alobi boye : Loba na ndeke mpe na nyama inso ya zamba : Bosangana esika yoko, bolongwa o bisika bino bozali mpe boya kolia libonza nalingi kobonzela bino. Ezali moboma monene o ngomba ya Israel. Bokolia misuni, bokomele makila ;

39:18  bokolia nsuni ya bilombe, bokomele makila ma bankumu ba nse : mpata babali, bana ba mpata, ntaba babali, ngombe babali ya mafuta mingi ya Basan.

39:19  Bokolia misuni mya mafuta lokola motema moli­ngi, bokomele makila tee bokola­ngwa ; ezali limpati nasaleli bino.

39:20  O meza ya ngai bokotonda na bolei farasa na batambwisi, bilombe na babuni ndenge na ndenge. Elobi bongo Mokonzi Yawe.

39:21  Nakolakisa lokumu la ngai o miso ma bato ba bikolo binso. Bato banso ba mokili bakomono ’te nakokokisa likambo liye nakataki, mpe loboko la ngai lokonyata ba­ngo.

39:22  Mokolo mona bato ba Israel bakoyeba seko ’te ngai nazali Yawe Nzambe wa bango.

39:23  Bato ba bikolo bisusu bakoyeba ’te bato ba Israel bakei o boombo mpo ya mabe ma bango, mpamba te, batosaki ngai te ; yango wana nabombi elo­ngi ya ngai mpe nakabi bango o maboko ma banguna ba bango. Banso bakufi na mopanga.

39:24  Napesi bango etumbu ekoki na mabe ma bango mpe na bobuki mibeko ; ya­ngo wana nabombi elongi ya ngai.

39:25  Na ntina ena Mokonzi Yawe alobi boye : Nakobongisa sikawa lika­mbo lya bato ba Yakob, nakoyokela bato banso ba ekolo ya Israel ngolu, mpe nakolakisa zuwa linene mpo ya nkombo ya ngai esantu.

39:26  Bakobosana nsoni bayokaki na mpe mabe manso basalaki ngai o ntango bafandaki kimia o mokili mwa bango mpe moto moko aza­laki kobangisa bango te.

39:27  Nako­lo­ngola bango o bikolo bisusu, na­kosangisa bango o mokili moye mozali penepene na banguna ba ba­ngo te ; yango ekolakisa bosantu bwa ngai epai ya bango o miso ma bato baike.

39:28  Mokolo mona bakoyeba ’te ngai nazali Yawe Nzambe wa ba­ngo, zambi liboso natindaki bango bakende o boombo o bikolo bisusu, kasi na nsima nakosangisa ba­ngo o ekolo ya bango moko. Nakotika moto moko kuna te.

39:29  Nakobombela bango elongi ya ngai lisu­su te, zambi nakopesa bato ba Is­ra­el Elimo ya ngai mpenza. Elobi bongo Mokonzi Yawe.

Chapter 40

40:1  O mobu mwa ntuku ibale na mitano mwa boombo bwa biso, o ebandela ya mobu, o mokolo mwa zomi, mibu zomi na minei nsima ya bokwei bwa Yeruzalem, bobele o mokolo monamei, Yawe atieli ngai loboko o motó, akambi ngai o Yeruzalem.

40:2  O limoni Nzambe alakisi ngai, akambi ngai o Israel mpe akitisi ngai o ngomba elai mpenza. Epai ya Sudi ngomba ena etondi na ndako lokola o en­gu­mba.

40:3  Akambi ngai kuna. Namoni moto moko, elongi ya ye lokola ya mbengi. O maboko asimbi nsinga na mpe lingenda lya bomeki bolai. Atelemi penepene na ezibeli ya engu­mba.

40:4  Moto oyo alobi na ngai : « Mwana wa moto, tala na miso ma yo, yoka na matoi ma yo, tia motema na makambo manso nakolakisa yo sikawa, zambi nayei na yo awa mpo ’te omono makambo. Bongo na nsima okoyebisa bato ba Israel maye manso omoni. »

40:5  Tala efelo ya lopango ezingi Tempelo. Bolai bwa lingenda moto ona asimbi bokoki maboko motoba, bakisa loboko loko. Ameki mbi­nga ya efelo ya ndako : ekoki na bolai bwa lingenda. Ameki bosanda bwa efelo : ekoki na bolai bwa li­ngenda.

40:6  Ayei o ezibeli etali epai ya Esti, abuti. Ameki esika ya boyi­ngeli epai ya nse, bolai o nse bokoki na bolai bwa lingenda ; makolo ma yango, bolai bwa makolo ma­nso bokokani na bolai bwa linge­nda lina.

40:7  Ameki ndako eke yoko yoko ya bakengeli : na bolai mpe na bonene ikokani na lingenda. Efelo ekaboli biteni bya ndako : bonene maboko matano. Ameki ebuteli ya nse o ezibeli ekokangaka ekoteli ya ndako, ameki epai ya kati ya ndako : bolai bwa lingenda lya ye.

40:8  Ameki bolai bwa ekoteli ya ndako :

40:9  maboko mwambi. Bonene bwa mabaya ma mpembeni : maboko mabale. O monoko mwa lopango ekoteli ezali epai ya kati ya lopango.

40:10  O ezibeli ya Esti biteni bya ndako eke ya bakengeli bizali bisato epai na epai, bisalemi se ndenge yoko, bokokani na bolai mpe na bonene. Mabaya ma mpembeni makokani.

40:11  Ameki mpe bonene bwa ezibeli ya lopa­ngo : maboko zomi ; bolai maboko zomi na masato.

40:12  Efelo ya mpe­mbeni epai na epai ezali na biteni bya ndako ya bakengeli : bizali na bolai bwa loboko loko. Biteni bya ndako bizalaki na bolai bwa loboko loko. Ndako ezalaki na bolai mpe na bonene : maboko motoba.

40:13  Ameki ezibeli ya ndako ut’o nsuka ya eteni yoko ya ndako eke ya bakengeli kin’o nsuka ya eteni esusu : mozali na bonene maboko ntuku ibale na matano.

40:14  Ameki bolai bwa ekoteli : maboko ntuku ibale ; mwa libanda lizalaki penepene na ekoteli.

40:15  Longwa o efelo ya liboso, koto mpe kende tee obimi o kati ya lopango : ekoki maboko ntuku itano.

40:16  Ndako ya bakengeli na mpe nsuka ya bifelo izalaki na maninisa mpe bibende. Efelo mobimba ya ekoteli se ndenge yoko, ezali na maninisa epai ya kati. Mabaya ma mpembeni makembami epai ya nso­nge na bilili bya nkele ya mbila.

40:17  Akotisi ngai o eteni ya lopango ezali na mwa libanda. O nse batii mabanga, zongazonga na libanda biteni bya ndako bizali ntuku isato.

40:18  Epai ya monoko mwa lopango lonene libanda lina likokani na bonene bwa bizibeli.

40:19  Ameki bolai bwa lopango, longwa o ezibeli enene tee efelo ezali o nsuka ya mwa libanda lisusu o kati ya lopango : maboko monkama (epai ya Esti mpe epai ya Nordi).

40:20  Epai ya Nordi ameki bolai mpe bonene bwa ezibeli ezali o libanda linene lya lopango.

40:21  Biteni bya ndako ya bakengeli, bisato epai bisato epai, mabaya ma mpembeni ma ezibeli, na mpe ekoteli, manso makokani na maye mazali o ezibeli esusu. Bolai bwa yango : maboko ntuku ibale na matano.

40:22  Maninisa, ekoteli mpe make­mbisi ma yango mazalaki se lokola maye ma ezibeli ya Esti. Mpo ya kokoto buta o ebuteli ya makolo nsambo, bongo ekoteli ezali o liboso.

40:23  Ezibeli ya liba­nda like etalani na monoko mwa lopango epai ya Esti. Moto ameki ntaka ezali kati ya bizibeli bibale : maboko monkama.

40:24  Akambi ngai epai ya Sudi : wana mpe ezibeli yoko ezali. Ameki bolai bwa mabaya ma mpembeni mpe bwa ekoteli : bolai mpe bonene bozali se lokola bwa ndako ike, bifelo mpe.

40:25  Bifelo epai ya ezibeli enene mpe bifelo bya ekoteli biye bizali na maninisa bipai binso, se lokola o bizibeli bisusu : na bolai maboko ntuku itano, na bonene maboko ntuku ibale na matano.

40:26  Mpo ya kokoto, buta o ebuteli ya makolo nsambo, bongo ekoteli ezali o kati. Mabaya ma mpembeni, epai na epai, mazali na bilili bya nkele epai na epai.

40:27  Ezibeli esusu etali epai ya Sudi ezali na esika ya kobima o libanda like. Ntaka ezali o kati ya bizibeli bibale : maboko monkama.

40:28  Na nsima amemi ngai o ezibeli ena mpo ya kobima o libanda like. Ameki bonene bwa ezibeli ena : bonene bokokani na bonene bwa bizibeli bisusu.

40:29  Biteni bya ndako ya bakengeli, mabaya ma mpembeni ya ezibeli, mpe ekoteli : ndenge yoko. O bifelo bya ezibeli mpe bya ekoteli maninisa mazali bipai binso : na bolai maboko ntuku itano, na bonene maboko ntuku ibale na matano.

40:30  Bipai binso bikoteli bizali na bolai maboko ntuku ibale na matano, na bonene maboko matano.

40:31  Ekoteli ya libanda like esuki o libanda linene. Mabaya ma mpembeni ma ezibeli mazali na makembisi, nkele ya mbila. Mpo ya kokoto, buta o ebuteli ya makolo mwambe.

40:32  Abimisi ngai o libanda like, o ezibeli epai ya Esti. Ameki bonene bwa ezibeli, bokokani na bizibeli bisusu.

40:33  Biteni bya ndako ya bake­ngeli, mabaya ma mpembeni ma ezibeli na mpe ekoteli, manso makokani mpo ya bonene na maye masusu. Bifelo bya ezibeli na biye bya ekoteli bizali na maninisa bipai binso : bolai maboko ntuku itano, bonene maboko ntuku ibale na mata­no.

40:34  Ekoteli esuki o libanda linene. Epai na epai mabaya ma mpe­mbeni ma ezibeli mazali na makembisi, nkele ya mbila. Mpo ya kokoto, buta o ebuteli ya makolo mwambe.

40:35  Akambi ngai o ezibeli epai ya Nordi. Ameki bonene bwa yango : bokokani na bonene bwa bizibeli bisusu.

40:36  Ezibeli ezali o biteni bya ndako ya bakengeli, mabaya ma mpe­mbeni ma ezibeli, ekoteli na mpe maninisa bipai binso : mpo ya bolai : maboko ntuku itano, mpo ya bonene : maboko ntuku ibale na matano.

40:37  Ekoteli esuki o libanda linene : mabaya ma mpembeni mazali na makembisi epai na epai. Mpo ya kokoto, buta ebuteli ya makolo mwambe.

40:38  Ekoteli ya monoko mwa lopa­ngo ezali o eteni ya ndako esusu, esika bakosukolaka nyama ya libo­nza.

40:39  O kati ya ekoteli batii meza ibale o nsuka epai na epai ; o meza iye bakobomaka nyama ya libonza lya boboto, libonza lya kosenge boli­mbisi, na mpe libonza lya kofuta nyongo.

40:40  O libanda lya ezibeli ya Nordi meza ibale izalaki mpe, o ngambo esusu ya ekoteli meza ibale isusu.

40:41  Meza inei epai yoko ya ezibeli mpe meza inei epai esusu, inso meza mwambe mpo ya koboma nyama.

40:42  Meza inei izali mpo ya mabonza, inso itongami na maba­nga : na bolai loboko loko na nda­mbo, na bosanda loboko loko. O meza bakotikaka bisaleli binso bya bobomi nyama mpo ya mabonza ma boboto mpe ma bondeko.

40:43  Meza inso izali na libaya lyoko lizingi meza, likoti mwa moke : bonene bwa libaya, misapi minei. O meza bakotiaka nyama ya mabonza.

40:44  Amemi ngai o libanda like lizali na biteni bya ndako bibale, yoko epai ya ezibeli ya Nordi, etalani na Sudi, esusu epai ya ezibeli ya Sudi, etalani na Nordi.

40:45  Moto ona alobi : « Eteni ya ndako eye etalani na Sudi ezali ya banganga Nzambe bakosalaka mosala o Tempelo.

40:46  Eteni ya ndako eye etalani na Nordi ezali ya banganga Nzambe bakosalaka mosala mwa meza, bazali bana ba Sadok, bana ba Levi, baye bakoki kobeleme na Yawe mpo ya kosalela ye. »

40:47  Moto ameki bonene bwa liba­nda : na bolai maboko monkama, na bonene maboko monkama. Bolai na bonene bokokani. Altare ezali o boso bwa Tempelo.

40:48  Akotisi ngai o ekoteli ya Tempelo ; ameki mabaya ma mpe­mbeni ma ezibeli : maboko matano epai na epai. Bonene bwa ezibeli : maboko masato epai, maboko masato epai.

40:49  Bolai bwa ekoteli : maboko ntuku ibale ; bonene maboko zomi na mabale ; ekoteli ezali na ebuteli ya makolo zomi ; penepene makonzi mazali, epai na epai likonzi lyoko.

Chapter 41

41:1  Moto ona akotisi ngai o eteni enene. Ameki makonzi ma yango : maboko motoba epai na epai.

41:2  Bonene o esika ya bokoti : maboko zomi. Bonene bwa efelo o esika ena, epai na epai : maboko matano. Ameki bolai bwa eteni ena : maboko ntuku ibale.

41:3  Ayingeli, ameki likonzi o esika ya boyingeli : maboko mabale. Bonene bwa ezibeli : maboko motoba. O esika ena bifelo epai na epai bikoki maboko nsambo.

41:4  Ameki bonene bwa eteni : maboko ntuku ibale ; bolai : maboko ntuku ibale ; eteni eye ya ndako etalani na eteni enene. Ayebisi ngai : « Eye ezali Esika esantusantu. »

41:5  Ameki bonene bwa efelo enene ya Tempelo : maboko motoba. Nda­ko ike ibakemi na efelo ; zongazonga na ndako ikoki na bonene maboko manei.

41:6  Ndako ina ike izali na mikili misato : o mokili moko biteni bya ndako ntuku isato, bitongami o kati ya efelo, kasi o Te­mpelo bitongami boye te.

41:7  Biteni bya ndako bya mokili mwa nse bileki moke, bya mokili mwa likolo bizali binene. Epai ya likolo efelo ezali enene mpenza te ; o mokili moko moko bonene bwa efelo bokeseni. Ezali bongo zongazonga na Tempelo mobimba. Mpo ya kotika mokili mwa nse mpe kokende o mokili mwa mibale tee moye mwa misato, ebuteli ezali.

41:8  Namoni ’te zongazonga na Te­mpelo mobimba, penepene na biteni bya ndako bike mabelé mato­mbwami ; o esika eye biteni bike bya ndako bizali na bolai : maboko motoba.

41:9  Mbinga ya efelo ya biteni bike bya ndako epai ya libanda : maboko matano. Nzela ezali o kati ya biteni bike bya ndako ;

41:10  mpe biteni bisusu zongazonga na Tempelo mobimba bikoki maboko ntuku ibale.

41:11  Mpo ya kokoto o biteni bike bya ndako, bisika bya boyingeli bizali bibale : yoko epai ya Nordi, yoko epai ya Sudi. Bonene bwa nzela bokoki maboko matano bipai binso.

41:12  Litongi litalani na libanda linene epai ya Westi lizali na bonene maboko ntuku nsambo. Mbinga ya efelo ya litongi ena ekoki maboko matano bipai binso, bolai maboko ntuku libwa.

41:13  Ameki bolai bwa Tempelo, bokoki maboko monkama. Libanda lya katikati, ndako na bifelo : bolai maboko monkama.

41:14  Efelo enene ya Tempelo, na mpe libanda likoki na bonene epai ya Esti : maboko monkama.

41:15  Ameki bolai bwa ndako epai ya libanda liye lya nsima, na mpe mbalasani epai na epai : maboko monkama. Eteni enene o kati ya lopango, bikoteli biye bikosuka o libanda like,

41:16  bibuteli, maninisa ma bibende, mbalasani zongazonga na Tempelo mobimba, longola se epai ya liboso : manso mabakemi na mabaya, ba­nda nse tee maninisa. Maninisa mpe makembami na bibende bike.

41:17  Ba­nda esika ya boyingeli kin’o kati ya Tempelo, o libanda mpe o efelo mo­bimba, epai ya kati mpe epai ya libanda,

41:18  batii bikeko bya bakerubim mpe makembisi ma nkele ya mbila ; nkele yoko o kati ya bakerubim babale. Kerubim moko moko azali na bilongi bibale :

41:19  elongi ya moto etali nkele ya mbila epai yoko, mpe elongi ya nkosi etali nkele ya mbila epai esusu, se bongo na Te­mpelo mobimba.

41:20  Banda nse tee likolo lya ezibeli ya boyingeli bilili bya bakerubim na nkele ya mbila bizali o efelo ya eteni enene.

41:21  Mabaya manene ma eteni enene mazali na bonene mpe na bolai se nde­nge yoko. O boso bwa esika esantu meza yoko ezali lokola altare ya mabaya,

41:22  ekoki na bosanda maboko masato, na bonene mpe na bolai maboko mabale. Bipai binso o nsuka ezali na ebende egumbami. Eteni ya nse mpe matumu manso manei mazali ma mabaya. Moto ona alobi na ngai : « Ezali meza etelemi o boso bwa Yawe. »

41:23  O eteni enene ezibeli ezali na biteni bibale, o Tempelo lokola.

41:24  Eteni yoko yoko ya ezibeli na mabaya ma mpembeni, ekoki kobongwana ; mabaya mabale o ezibeli yoko yoko.

41:25  O bizibeli bya eteni enene bato bayemi bilili bya bakerubim mpe nkele ya mbila, se lokola biye bimononi o bifelo. O liboso lya ekoteli mwa mbalasani eke ebakemi na efelo.

41:26  Maninisa na mpe bibende mpo ya kobatela mango, na mpe makembisi ma nkele ya mbila mazali epai na epai o bifelo bya ekoteli, bya biteni bya Tempelo mpe bya mbalasani.

Chapter 42

42:1  Moto ona abimisi ngai o libanda linene, atindi ngai epai ya Nordi. Akotisi ngai o biteni bya ndako bizali wana, bitalani na libanda mpe na ndako epai ya Nordi.

42:2  Efelo enene ekoki na bolai maboko monkama, epai ya ekoteli ya Nordi ; na bonene maboko ntuku itano.

42:3  O liboso lya libanda like lya maboko ntuku ibale, mpe o liboso lya libanda linene mbalasani yoko ezali ya mikili misato.

42:4  Penepene na biteni bya ndako mbalasani ezali : bonene maboko zomi epai ya libanda like ; bolai maboko mo­nkama. O biteni bya ndako bakokotoko bobele o epai ya Nordi.

42:5  Biteni bya ndako o mokili mwa likolo bizali bike, zambi mbalasani ekamati ndambo ya esika ; mbalasani ya mokili mwa katikati na moye mwa nse ekamati esika mingi te.

42:6  O mikili misato makonzi mazali te loko­la ma mabanda, yango wana bi­teni bya ndako ya likolo bizali bike, leka biye bya nse.

42:7  Efelo ya nsuka ya lopango etalani na biteni bya ndako mpe esali libanda linene o kati, ekoki na bolai maboko ntuku itano.

42:8  Biteni bya ndako bizali o libanda linene bizali na bolai maboko ntuku itano ; biye bitalani na eteni enene ya Tempelo bizali na bolai maboko monkama.

42:9  O nse ya biteni bya ndako, esika ya boyingeli ezali, etalani na Esti. Ezali mpo ya kolekisa baye bazali o libanda linene.

42:10  Efelo ya libanda lya Esti ezali mpe na biteni bya ndako bisusu, bitalani na libanda liye lizali o ndako enene o liboso.

42:11  Penepene na bya­ngo nzela ezali. Biteni binso bikokani na biye bizali epai ya Nordi ; bonene mpe bolai ndenge yoko, bizibeli bya bokoti ndenge yoko, biloko binso na bisika bya boyingeli ndenge yoko.

42:12  Bizibeli bobele nde­nge yoko lokola biye bya Sudi. O nzela o liboso esika ya boyingeli ezali penepene na efelo enene eye ekobatela ndako mobimba. Ezali epai ya Esti o ebandela.

42:13  Moto ona alobi : « Biteni bya ndako epai ya Nordi mpe biye epai ya Sudi, biye bizali epai na epai ya libanda bizali bisika bisantu. Banganga Nzambe baye bakobeleme na Yawe nde balei bilei bisantu o biteni bina. Nde batii biloko bileki bosantu wana, mabonza na mpe miboma : mabo­nza ma kosenge bolimbisi na maye ma kofuta nyongo. Ezali solo esika esantu.

42:14  Soko banganga Nzambe bakoti wana, bakoki kobima te. Liboso lya kobima o esika esantu epai ya libanda linene, basengeli kotika bilamba biye bakolataka o ntango ya losambo, zambi bilamba bina bikomi bilamba bisa­ntu. Esengeli balata bilamba bisusu, bongo na nsima bakoki kokende o bisika bato basusu bazali. »

42:15  Moto ona asilisi komeka bonene bwa Tempelo epai ya kati. Akambi ngai o nzela eye ebimi o ezibeli ya Esti. Ameki yango bipai binso ;

42:16  ameki na lingenda lya ye epai ya Esti : bolai maboko nkama itano.

42:17  Ameki epai ya Nordi : maboko nka­ma itano.

42:18  Ameki epai ya Sudi : maboko nkama itano.

42:19  Ameki epai ya Westi : maboko nkama itano.

42:20  Na nsima ameki esika ena mobi­mba bipai binso binei. Efelo ezingi lopa­ngo mobimba ekoki na bolai maboko nkama itano, na bonene maboko nkama itano ; efelo ena ekati ndelo o kati ya esika esantusantu na esika esusu.

Chapter 43

43:1  Akambi ngai o ezibeli eye etali epai ya Esti.

43:2  Tala boye, Nkembo ya Nzambe wa Israel ebu­ti epai ya Esti, eyei na lokito lokola la mai ma mbu. Nse engengi na nkembo ena.

43:3  Limoni liye lizali lokola limoni namonoki ntango Yawe ayaki kobebisa engumba, mpe lokola limoni namonoki pene na ebale Kebar. Nakwei o nse, elo­ngi o mabelé.

43:4  Nkembo ya Yawe eyingeli o Tempelo, epai ya ezibeli ya Esti.

43:5  Elimo atomboli ngai, akotisi ngai o libanda like. Nkembo ya Yawe etondisi Tempelo mobimba.

43:6  Nayoki o kati ya Tempelo bazalaki koloba na ngai, nzokande moto ona azalaki se penepene na ngai.

43:7  Balobi na ngai : Mwana wa moto, awa ezali esika ya ngwende ya ngai, esika nakotiaka makolo ma ngai. Nakozala bobele awa, o ntei ya bato ba Israel, seko. Bato ba Israel na bakonzi ba bango bakosantola nko­mbo ya ngai esantu lisusu te na makambo ma bondumba mpe na bibembe bya bakonzi ba bango.

43:8  Batiaki esika ya boyingeli ya ba­ngo penepene na ndako ya ngai, mabaya ma mpembeni masimbi bizibeli bya bango se penepene na bizibeli bya ndako ya ngai ; batiki se efelo yoko o kati mpo ya kokabola ya­ngo. Basantolaki nkombo ya ngai esantu na makambo ma nsomo. Yango wana nabomaki bango na nkanda ya ngai.

43:9  Sikawa bakolo­ngola makambo ma bosoni penepene na ngai, na mpe bibembe bya bakonzi ba bango. Bongo nakofanda o ntei ya bango seko.

43:10  Mwana wa moto, koma mpo ya bato ba Israel boniboni Tempelo eye esengeli kozala, mpo ’te bayoka nsoni mpo ya mabe ma bango. Bameka bonene bwa mwango mwa ndako.

43:11  Soko bayoki nsoni mpo ya mabe basalaki, oyebisa bango nde­nge nini Tempelo eye ekozala, nde­nge nini bokabwani bwa biteni, bisi­ka bya boyi­ngeli, mitindo na mibeko minso basengeli kotosa. Koma mana ma­nso o miso ma ba­ngo mpo ’te bakokisa mya­ngo.

43:12  Yoka mobeko napesi mpo ya Te­mpelo : O nsonge ya ngomba mabelé manso mazali penepene, zongazonga na Tempelo, mazali mabelé masantu. Tala mobeko napesi mpo ya Tempelo.

43:13  Bonene bwa altare bozali boye : na lomeko la loboko lolai, ezali bolai bwa loboko lokola tomeseni, bakisa bolai mwa misapi. Libulu zo­ngazonga na altare likoki na bolai bwa loboko lona : loboko loko. Penepene na altare libulu lizali na mwa esika ya mpembeni, lizali na bonene bwa ndambo ya loboko loko, liye lizali mpe­mbeni ya altare.

43:14  Banda o mabelé tee libanga lya nse lya liboso : maboko mabale. Liba­nga lya mabalé likoti mosika : lo­boko loko. Banda libanga like tee libanga linene : maboko manei ; lya­ngo mpe likoti mosika : loboko loko.

43:15  Etu­mbelo ya mabonza ekoki na maboko manei ; maseke manei mazalaki o altare.

43:16  Etumbelo ya ma­bonza ezali na bonene bwa maboko zomi na mabale epai na epai, o bipai binei bonene bokokani.

43:17  Libanga lya nse : maboko zomi na manei o bipai binso binei ; mpe­mbeni babakisi ndambo ya loboko. Libulu zongazonga na libanga : loboko loko. Bibuteli bizali kotala epai ya Esti.

43:18  Moto alobi na ngai : « Mwana wa moto, yoka maloba ma Mokonzi Yawe : Nakopesa yo mobeko motali altare, mpo ’te mokolo bakosilisa kotonga yango bakoka kobonza moboma mpe kosopa makila wana.

43:19  Okopesa banganga Nzambe ba-Levi ba libota lya Sadok mwana wa ngombe mobali yoko bo libonza mpo ya kolongola masumu. Bobele bango bakoki kobeleme na ngai mpo ya kosalela ngai. Elobi bongo Mokonzi Yawe.

43:20  Okokamata makila, okosopa ndambo o maseke manei ma altare, o nsuka inei ya libanga linene lya nse mpe o mpe­mbeni ezali zongazonga na libanga. Se bongo okopetola mpe okolo­ngola mbindo ya altare.

43:21  Okokamata ngombe eye obomaki bo moboma mwa bolimbisi, okotumba ya­ngo o esika yoko mosika na Tempelo mpe na libanda lya esika esantusantu.

43:22  Mokolo mwa mibale mwa bopetoli altare, okobonza nta­ba mobali yoko ezali na mbeba te, mpe okosala na ntaba se lokola osalaki na ngombe.

43:23  Soko milulu mya bolongoli masumu misili, oko­bonza mwana wa ngombe mobali yoko ezali na mbeba te, mpe mpata mobali ezali na mbeba te, eye okolo­ngola o etonga ya bibwele.

43:24  Okoya kopesa yango o miso ma Yawe. Banga­nga Nzambe bako­bwakela yango mongwa mpe bakotumbela Yawe yango bo moboma mwa bolimbisi.

43:25  Mikolo nsambo mobimba okobonza ntaba mobali, mokolo na mokolo ntaba mobali yoko ; mpe bo libonza lya kotumba ngombe mobali na mpata mobali ezali na mbeba te, eye okokamata o etonga.

43:26  Okosala bongo mikolo nsa­mbo mobimba. Bobele bongo bokosa­ntisa, bokopetola mpe bokobenisa altare.

43:27  Esili mikolo mina, banda mokolo mwa mwambi, banganga Nzambe bakoki kobo­nzela mabonza ma bino ma kotu­mba mpe miboma mya bino mya boboto. Bongo ngai nakondima losambo la bino. Elobi bongo Mokonzi Yawe. »

Chapter 44

44:1  Moto akambi ngai lisusu o ezibeli ya libanda lya ndako esantu, eye etali epai ya Esti ezalaki ya kokangema.

44:2  Yawe alobi na ngai : Ezibeli eye ekokangemaka nta­ngo inso ; bafungola yango te, moto moko ayingela wana te, zambi Yawe Nzambe wa Israel ayingelaki wana ; eka­ngema seko.

44:3  Kasi nkumu wa ekolo, ye akoki kokende wana mpo ya kolia o miso ma Yawe. Akokoto epai ya ekoteli enene ya ezibeli, mpe akobima bobele o nzela ena.

44:4  Moto alekisi ngai o ezibeli ya Nordi, tokomi o boso bwa Tempelo. Natali, namoni nkembo ya Yawe etondisi Tempelo ya Yawe. Na­kwei elongi o nse.

44:5  Yawe alobi na ngai : Mwana wa moto, keba sikawa, fungola miso malamu mpe yoka maye manso nakolimbolela yo mpo ya maye matali Tempelo ya Yawe mpe mibeko minso. Keba na boyingeli o Tempelo mpe na baye bakoki kokoto te.

44:6  Okoloba na bato ba Israel, libota lya batomboki : Mokonzi Yawe alobi boye : Bato ba Israel, bolekisi ndelo na makambo ma bino ma nsomo.

44:7  Bozalaki kokotisa bato ba bikolo bisusu o ndako esantu, baye bazali na mbindo o motema mpe bakati nzoto te, basantoli bongo Tempelo ya ngai. Bozalaki kobonzela ngai bilei, mafuta na makila ; bobomi bongo bondeko bwa ngai na makambo ma bino ma nsomo.

44:8  Botosi mibeko te, miye mikobongisa mosala mwa biloko bisantu, bopesi mosala mona o maboko ma bato ba ekolo esusu, ba­ngo basalela bino mosala o ndako ya ngai esantu.

44:9  Mokonzi Yawe alobi boye : Mouta moko te, moto azali motema mbindo mpe akati nzoto te, akoki kokoto o ndako esantu ya ngai, moko te o kati ya bato ba ekolo esusu baye bafandi o ntei ya ba-Israel.

44:10  Ba-Levi baye batikaki ngai nta­ngo ba-Israel babungaki nzela, bazali na likambo mpo ya mabe ma bango : ya solo, balandaki nzela ya bikeko bya bango mpe batikaki ngai mosika.

44:11  Bongo mosala mwa ba­ngo o esika esantu mozali boye : kokengele bizibeli mpe kolengele misala mya Tempelo. Bango bakoboma nyama ya miboma mpe nyama bato bakopesaka bo mabonza. Ba­ngo bakozala wana ntango inso mpo ya kosalela bato.

44:12  Ya solo, nakotumbola bango, zambi basalelaki banzambe ba lokuta, mpe bakweisaki ba-Israel o masumu ; yango wa­na bakomeme mokumba mwa etumbu mpo ya masumu ma ba­ngo. Elobi bongo Mokonzi Yawe.

44:13  Bakoki kobeleme na ngai lisusu te mpo ya kosala mosala mwa nganga Nzambe, to mpo ya kosimba biloko bisantu, biye bileki bosantu. Bakosambwa mpo ya makambo ma nsomo basalaki.

44:14  Nakopesa bango mosala o Tempelo : kobongisa makambo manso matali mosala mwa yango, na misala misusu minso.

44:15  Ba-Levi, banganga Nzambe ba li­bota lya Sadok, baye basalaki mosala o ndako esantu ntango ba-Israel babungaki nzela, bakobeleme na ngai mpo ya kosalela ngai. Bakoteleme o boso bwa ngai mpo ya kobonzela ngai mafuta na makila. Elobi bongo Mokonzi Yawe.

44:16  Ba­ngo bakoyingela o ndako ya ngai esantu ; bakobeleme na meza mpo ya kosalela ngai ; basalela ngai misala.

44:17  Ntango bakoyingela o bizibeli bya libanda like, balata bilamba mpe­mbe. Mpo ya mosala penepene na bizibeli bya libanda like mpe o Tempelo balata bilamba bato­ngi na nsinga ya nsuki ya mpata te.

44:18  Bakolata enkoti ya mpembe o motó mpe kupé ya mpembe o loketo. Bakoki kolata nkamba o loketo te mpo ya mitoki.

44:19  Ntango bakobima o libanda linene, esika bato bazali, balongola bilamba balati mpe batika byango o biteni bisantu bya ndako. Balata bilamba bisusu mpo ’te bato basimba bilamba bisantu te.

44:20  Bakokola motó te, kasi batika nsuki ikola mingi te, bakatisa nsuki malamu bo ebongi.

44:21  Nganga Nza­mbe moko te amele vino mokolo akoyingela o libanda lya kati.

44:22  Bakobala mwasi bozenge te, mwasi aboyami na mobali mpe te, babala ngondo wa ekolo ya Israel. Nzokande bakoki kobala mwasi boze­nge oyo azalaki mwasi wa nganga Nzambe mosusu.

44:23  Bango balakisa bato ba ekolo ya ngai biloko nini bizali bisantu mpe biye bizali bisantu te. Balakisa bango biloko nini bizali peto mpe biye bizali na mbindo.

44:24  O esambi bakozala bazuzi. Basamba engebene na miti­ndo mya ngai. Batosa mitindo mpe mimeseno mya ngai minso o mikolo mya eyenga, mpe basantisa mikolo mya Sabato mya ngai.

44:25  Bakoki kobeleme na mowei te, mpo ’te bakoma na mbindo te. Nzoka­nde soko babelemi na ebembe ya tata, mama, mwana wa bango wa mobali to wa mwasi, ndeko wa bango wa mobali mpe wa mwasi oyo abali te, bakoki kokoma na mbindo te.

44:26  Nsi­ma ya bomipetoli, batanga mikolo nsambo,

44:27  mokolo akoyingela o Ndako esantu, mpe akokoma o libanda like mpo ya mosala mwa Ndako, asengeli kobonza libonza mpo ya lisumu. Elobi bongo Mokonzi Yawe.

44:28  Bango basa­ngola eloko yoko te ; lisango lya bango bobele ngai. Bakozala na mabelé te, mabelé ma bango bobele ngai.

44:29  Ba­ngo bakoki kolia biloko bya mabonza, miboma mpo ya masumu, mpe mabonza ma kofuta nyongo. Bango bakolia biloko bi­nso bizali ekila o Israel.

44:30  Banganga Nzambe bakozwa mbuma ya ya­mbo ya bilanga, biye bileki kitoko ; ya biloko binso mpe ya mabonza manso bakozwa maye maleki malamu. Bopesa nganga Nzambe nda­mbo ya fufu ya mampa malamu mpenza mpo ’te bobenisi bwa Nzambe bokitela bino.

44:31  Nyama to ndeke ekufi yango moko, to ebe­mbe ya nyama bapasoli, nganga Nzambe akoki kolia yango te.

Chapter 45

45:1  Ntango bokokabola mabelé ma ekolo mobimba bo­bo­mbela Yawe ndambo. Ndambo ena ekozala mabelé masantu, batia mango liboso lya mabelé masusu : na bolai maboko nkoto ntuku ibale na itano, na bonene maboko nkoto ntuku ibale. Mabelé mana mobi­mba mazali mabelé masantu.

45:2  O mabelé mana bameka ndambo eye ya ndako esantu : maboko nkama itano bipai binso binei ; babakisa lisusu eteni ya maboko ntuku itano bipai binso.

45:3  O mabelé bokamati bongo, bokokata ndelo ya maboko nkoto ntuku ibale na itano, mpe na bonene maboko nkoto zomi ; o eteni eye bokotonga ndako esantu, esi­ka esantusantu ya ngai.

45:4  Nda­mbo ya mabelé masantu mana ekozala ya banganga Nzambe bakosalaka mosala o ndako esantu, ná baye bakobeleme na Yawe mpo ya kosalela ye. O esika ena bakozala na ndako ya bango, mpe na mabelé ma ndako esantu.

45:5  Eteni ya bolai maboko nko­to ntuku ibale na itano mpe bonene maboko nkoto zomi, ekozala ya ba-Levi bakosalaka o Tempelo. Eteni eye ekozala mabelé ma ba­ngo, esika bakofanda.

45:6  Bopesa engu­mba eteni ya maboko nkoto itano na bo­nene, mpe maboko nkoto ntuku ibale na itano na bolai penepene na ndako esantu ; ezali eteni ya bato ba­nso ba Israel.

45:7  Bopesa nkumu monene ndambo ya mabelé epai na epai ya eteni ya ndako esantu, mpe ya eteni ya engumba ; eteni yoko epai ya Westi, eteni esusu epai ya Esti. Bolai bwa eteni ena bokokana na ntaka ezali banda Westi tee ndako esantu, mpe banda ndako esantu tee ndelo ya Esti.

45:8  Ezali mabelé ma nkumu o mokili mwa Israel. Nali­ngi bongo mpo ’te bankumu ba ngai bányokolo bato ba ngai lisusu te, bátikela bato ba Israel na mpe bituka binso mabelé ma ekolo.

45:9  Mokonzi Yawe alobi boye : Ba­nkumu ba Israel, bolekisi ndelo ! Bo­tika bitumba mpe makambo ma boyibi, bosala malamu mpe bola­nda bosembo, botika koyokisa bato ba ngai mpasi na bolekisi motuya mwa biloko. Elobi bongo Mokonzi Yawe.

45:10  Bozala na bimekeli bilamu, mpe na bingwongolo mpe na kopo na bonene bokoki.

45:11  Bizala : efa mpo ya komeka bozito bwa mbuma, bat mpo ya komeka bokwi bwa mai. Yango ibale ikokana, izala ndambo ya zomi ya komer. Komer ekoya­ngela bonene bwa bimekeli.

45:12  Bokomeka bozito bwa biloko na gera. Gera ntuku ibale ikokana na motako moko. Mitako ntuku ibale na mi­tano, bakisa lisusu mitako zomi na mitano ikokana na mina yoko.

45:13  Tala biye bokolongola mpo ya kobonzela mokonzi. Soko bozwi mbuma ya mampa komer yoko, bo­longola ndambo ya motoba ; ya mbuma ya masangu komer yoko bolongola ndambo ya motoba.

45:14  Kor yoko ya mafuta ekokana na komer yoko mpe bat zomi. Soko bozwi kor zomi, bolo­ngola bat yoko.

45:15  O bisobe bya Israel, esika mpa­ta ya etonga ikoki nkama ibale, bolongola mpata yoko bo libonza lya mbuma, miboma mpe mabonza ma boboto ; bokokisa bongo milulu mya bosengi bolimbisi mpo ya bato. Elobi bongo Mokonzi Yawe.

45:16  Bato banso ba Israel batosa mobeko moye, basalisa bongo nkumu wa ekolo ya Israel.

45:17  Nkumu akopesa miboma, mabonza ma bolei mpe ma bomeli makobonzama o ntango ya mibembo mya losambo, o nta­ngo ya biyenga bya sanza ya sika, o mikolo mya Sabato mpe o mikolo minso mya eyenga o ekolo ya Israel. Ye moto akopesa libonza lya kolongola masumu, libonza lya bo­ndeko, libonza lya kotumba na mpe mabonza ma boboto, mpo ya kozwela bato ba Israel bolimbisi.

45:18  Mokonzi Yawe alobi boye : O mokolo mwa yambo mwa sanza ya liboso bokokamata mwana mobali wa ngombe ezali na mbeba te, eye bokobonza mpo ya bolongoli masumu o ndako esantu.

45:19  Nganga Nzambe akokamata makila ma nya­ma babomi mpo ya masumu, akopakola makila o mabaya ma mpe­mbeni ma ezibeli ya libanda like.

45:20  O mokolo mwa nsambo ya sanza, bokosala lisusu bongo mpo ya bato banso basalaki mabe, kasi na nko te. Bokosala bongo mpo ya bopetoli Tempelo.

45:21  O sanza ya yambo, o mokolo mwa zomi na minei, bozala na eyenga enene ya Pasika. Mikolo nsambo bokolia se mampa balambi na nkisi te.

45:22  Mokolo mona nkumu akobonza ngombe mobali bo libonza lya kolongola masumu ma ye moko mpe ma bato ba ekolo mobimba.

45:23  Mikolo nsambo mya eye­nga akobo­nzela Yawe libonza lya kotumba : ngombe babali nsa­mbo mpe mpata babali nsambo izali na mbeba te, yoko o mokolo moko moko. Bo libonza lya kolongola masumu : ntaba mobali yoko o mokolo moko moko.

45:24  Na ngombe mobali yoko akobonza efa yoko ya fufu ; na mpata mobali akobonza efa esusu. Na efa yoko akobakisa mpe hin yoko ya mafuta.

45:25  O sanza ya nsambo, o mokolo mwa zomi na mitano, mokolo mwa eyenga enene, akosala se bongo mikolo nsa­mbo mobimba : akobonza libonza mpo ya masumu, libonza lya kotumba, libonza lya mbuma mpe libonza lya mafuta.

Chapter 46

46:1  Mokonzi Yawe alobi boye : Ezibeli ya libanda like, eye ya Esti, ekokangema mikolo minso mya mosala ; kasi mokolo mwa Sabato mpe mikolo mya eyenga ya sanza ya sika ekofungwama.

46:2  Nkumu akoyi­ngela epai ya ezibeli ya ekoteli, mpe akoteleme penepene na mabaya ma mpembeni ma ezibeli. Banganga Nzambe bakobonza li­bonza lya kotumba lya nkumu mpe mabonza ma ye ma boboto. Nkumu akokumbama epai ya nse ya ekoteli, na nsima akobima. Kina mpokwa bakokanga ezibeli te.

46:3  Bato basusu banso bakoya kokumbamela Yawe penepene na ezibeli ena, o mikolo mya Sabato mpe o biye­nga bya sanza ya sika.

46:4  Libonza lya kotumba nkumu akobonzela Yawe o mokolo mwa Sabato : bana ba mpata motoba izali na mbeba te, na mpata mobali yoko ezali na mbeba te.

46:5  Akamata mpe efa yoko ya fufu mpo ya mpata mobali ; mpo ya bana ba mpata, apesa lokola ye moko alingi. Na efa yoko abakisa hin yoko ya mafuta.

46:6  O mokolo mwa sa­nza ya sika abonza mwana wa ngombe ezali na mbeba te, bana ba mpata motoba na mpata mobali ezali na mbeba te.

46:7  Nku­mu oyo akobonza ngombe mobali abakisa efa yoko ; na bana ba mpata abakisa lokola alingi se bongo na efa yoko, hin yoko ya mafuta.

46:8  Mpo ya koyi­ngela o ndako, nkumu ayingela epai ya ekoteli ya ezibeli ya nke­mbo, abima se o nzela ena.

46:9  Soko bato basusu bayei o boso bwa Yawe, o mikolo mya eyenga enene, bakosala boye : baye bayingeli o ezi­beli ya Nordi, babima o ezibeli ya epai ya Sudi ; baye bayingeli epai ya Sudi, babima o ezibeli ya Nordi. Moto moko te abima o ezibeli eye akotoki, kasi moto na moto abimi o ezibeli eye ezali o ngambo esusu.

46:10  Nkumu akoyingela na bango elo­ngo ntango bakoyingela. Nta­ngo ba­kobima, ye mpe akobima.

46:11  O mibembo mya losambo mpe o mikolo mya eyenga libonza lya ngombe mobali lizali efa yoko ; liye lya mpata mobali efa yoko ; liye lya bana ba mpata lokola ye moko akanisi. Na efa yoko babakisa hin yoko ya mafuta.

46:12  Soko nkumu abo­nzeli Yawe libonza lya kotumba na motema mwa ye moko, to libonza lya boboto bafungolela ye ezibeli eye etali epai ya Esti. Ye akobonza libonza lya kotumba mpe libonza lya boboto lokola akobonzaka ma­ngo o mikolo mya Sabato, na nsima akobima mpe bakokanga ezibeli.

46:13  Mokolo na mokolo okobonzela Yawe mwana wa mpata, ekokisi mobu moko, eye ezali na mbeba te. Okobonza libonza liye ntongo inso.

46:14  Mikolo minso na ntongo okobakisa libonza liye : ndambo ya motoba ya efa, mpe mpo ya kosangisa na fufu, ndambo isato ya hin ya mafuta. Ezali libo­nza lya biloko bakobonzela Yawe seko.

46:15  Bakobonza mpata, fufu na mafuta mikolo mi­nso seko na ntongo.

46:16  Mokonzi Yawe alobi boye : Soko nkumu akabeli mwana wa ye ndambo ya lisango, eloko akabi eko­mi ya mwana ona ; na nsima mwana akoki kotikela bana ba ye yango.

46:17  Kasi soko nkumu atikeli mosaleli wa ye lisango, eloko eye akabi ekomi ya mosaleli ona tee o mobu mwa bosikwami. O mobu mona ezongi o maboko ma nkumu. Se bana ba ye bakosangola biloko bya ye.

46:18  Nkumu akoki kozwa biloko te, biye bato ba ekolo ya ye basangoli ; akoki mpe kobotolo byango te. Akotikela bana ba ye se biloko bya ye moko ; babotolo bo­ngo bato ba ekolo ya ngai biloko bya bango te.

46:19  Akotisi ngai o biteni bisusu bya Tempelo o nzela ya boyingeli penepene na ezibeli ; biteni biye bitalani na Nordi mpe bizali bya banganga Nzambe. O liboso epai ya Westi mwa esika ezali.

46:20  Alobi na ngai : « Awa ezali esika banganga Nzambe bakolambaka nyama ya libonza lya bondeko mpe libonza lya kolongola masumu. Bakotokisa libonza, ka­si bakoki kobimisa eloko yoko o libanda te mpo ’te bato basusu basimba mabonza te. »

46:21  Abimisi ngai o libanda linene mpe alekisi ngai penepene na matumu ma libanda. O matumu manso mwa libanda like lizalaki.

46:22  O matumu manei ma ekoteli mabanda make mazalaki : na bolai maboko ntuku inei, na bonene maboko ntuku isato. Mabanda mana manei mazalaki se ndenge yoko.

46:23  Efelo ezingi mango manei ; mpe bisika bya bolambi bitongami zongazonga na efelo ena.

46:24  Moto ona alobi : « Basaleli ba Tempelo bakolambaka mabonza ma bato o matuka mana. »

Chapter 47

47:1  Moto azongisi ngai o ekoteli ya Tempelo. Namoni mai mazali kobima o nse ya ebuteli ya ezibeli ya Tempelo, epai ya Esti, zambi efelo enene ya Tempelo etalani na Esti. Mai mazalaki kokita o mopanzi mwa mobali mwa Tempelo mpe kotiyola o boso bwa altare epai ya Sudi.

47:2  Alekisi ngai o ezibeli ya Nordi mpe ata­mbwisi ngai zo­ngazonga na Tempelo tee tokomi o ezibeli ya Esti, esika mai mazali kotiyola epai ya mobali.

47:3  Aleki epai ya Esti, azali na nsinga o maboko mpe ameki na yango maboko nkoto yoko. Na nsima akatisi ngai mai mana, mai makomeli ngai o mata­mbi.

47:4  Ameki lisusu maboko nkoto yoko mpe akatisi ngai mai lisusu : mai mabuteli ngai tee o mabolongo. Ameki lisusu maboko nkoto yoko, akatisi ngai mai lisusu, mai makomi tee o loketo.

47:5  Ameki lisusu maboko nkoto yoko ; mai makomi ebale ene­ne, eye nakoki kokatisa te, za­mbi mai mabuti mingi, ebale ekomi bozindo, eye bakoki kokatisa te.

47:6  Atuni ngai : « Mwana wa moto, omoni yango ? » Nsima azongisi ngai o libongo lya ebale.

47:7  Ntango nazongi namoni nzete ebele o mpe­mbeni ya ebale.

47:8  Alobi na ngai : « Mai mana makoleka epai ya Esti, makokita kin’o ebale Yordane, makosuka o Mbu ya Mongwa, makokomisa mai ma mbu yango mai ma komele.

47:9  Bipai binso ebale eye ekoleka, ekopesaka bomoi ; mbisi ito­ndi wana. Mbu etondi na mbisi, mpo ebale ekosuka o mbu ekobo­ngisa mai, mpe ekopesa bomoi bipai binso ekotiyola.

47:10  O libongo babomi mbi­si bakoya kolobo. Longwa Engadi tee En-Eglaim bato bakotanda mi­nyama mya bango. Mbisi ikozwama ndenge na nde­nge, lokola o Mbu Enene.

47:11  O bisika bato basali nduka, mpe o bisika bya potopoto mai makotikala se lokola kala, mpo ’te bato bazwa mongwa o bisika bina.

47:12  Penepene na ebale, epai na epai, nzete ndenge na nde­nge ikokola, ikobota mbuma. Nkasa ya nze­te ikokauka te, mpe mbuma ikosila te. Sanza na sanza ikobota mbuma ya sika za­mbi mai maye makoutaka o ndako esantu. Mbuma ya nzete ikozala bilei bya bato, mpe nkasa ikopesa monô mokobikisa bango. »

47:13  Mokonzi Yawe alobi boye : Boyoka boniboni bokokata ndelo mpo ’te bokabolela bituka zomi na bibale mokili. Bokopesa etuka ya Yozefu biteni bibale.

47:14  Banso bako­zwa ndambo ya mokili, moye nalayelaki bankoko ba bino ; bokokoma bankolo ba mokili moye.

47:15  Ndelo ya mokili yango iye : epai ya Nordi, banda mbu enene landa nzela ya Ketlon kin’o Amat, Sedad,

47:16  Berotai, Sibraim (o ndelo ya mokili mwa Damasko mpe mokili mwa Amat) na nsima Kaser-Tikon epai ya mokili mwa Auran.

47:17  Bongo ndelo eko­zala banda mbu tee Kasar-Enan, mokili mwa Damasko mpe mwa Amat mozali epai ya Nordi ; yango ndelo epai ya Nordi.

47:18  Epai ya Esti : bokokata ndelo o kati ya Auran na Damasko, o kati ya mokili mwa Galaad na Israel, ndelo ekozala ebale Yordane kin’o mbu epai ya Esti ; yango ndelo epai ya Esti.

47:19  Epai ya Sudi : ndelo ezali banda Tamar tee mai Meriba o Kades, la­nda moluka kin’o Mbu Enene ; ya­ngo ndelo ya Sudi.

47:20  Epai ya Westi : ndelo ezali Mbu Enene banda ndelo ya Sudi tee Lebo-Amat ; ya­ngo ndelo epai ya Westi.

47:21  Bokokabola mokili mobimba o kati ya bituka zomi na bibale bya Israel.

47:22  Mpo ya bokaboli bokobete zeke, liboso bino, na nsima bampaya bafandi epai ya bino mpe baboti bana o mboka ya bino, zambi bokosala na bango lokola na bato ba Israel. Bango mpe bakobete zeke mpo ya kozwa nda­mbo ya mabelé o ntei ya bituka bya Israel.

47:23  Mompaya akozwa ndambo ya mabelé bobele o ntei ya etuka eye esika ye afandi. Elobi bongo Mokonzi Yawe.

Chapter 48

48:1  Tala nkombo ya bituka epai ya Nordi, banda nsuka o nzela ya Ketlon, landa Amat, Kasar-Enan, mabelé ma Damasko mazali o Nordi, penepene na Amat, banda Esti kin’o mbu, mazali mabelé ma Dan.

48:2  O ndelo ya Dan, ut’o ndelo ya Esti kin’o ndelo ya Westi mabelé mazali ma Aser.

48:3  O ndelo ya Aser, ut’o ndelo ya Esti kin’o ndelo ya Esti, mabelé mazali ma Neftali.

48:4  O ndelo ya Neftali, ut’o ndelo ya Esti kin’o ndelo ya Westi, mazali mabelé ma Manase.

48:5  O ndelo ya Manase, ut’o ndelo ya Esti kin’o ndelo ya Esti Efraim akozwa eteni.

48:6  O ndelo ya Efraim, ut’o ndelo ya Esti kin’o ndelo ya Westi Ruben ako­zwa eteni.

48:7  O ndelo ya Ruben, ut’o ndelo ya Esti kin’o ndelo ya Westi Yuda akozwa eteni.

48:8  O ndelo ya Yuda, ut’o ndelo ya Esti kin’o ndelo ya Westi, bokokabola ndambo ya mabelé mana te : na bonene maboko nkoto ntuku ibale na itano, na bolai lokola biteni bisusu : ut’o ndelo ya Esti kin’o ndelo ya Westi, ndako esantu ekozala wana o katikati.

48:9  Eteni bokobombela Yawe ekozala na bolai maboko nko­to ntuku ibale na itano, na bonene maboko nkoto zomi.

48:10  Bokopesa banganga Nzambe ndambo ya mabelé masantu ; epai ya Nordi, bonene maboko nkoto ntuku ibale na itano, o Westi maboko nkoto zomi, o Esti mpe maboko nkoto zomi mpe o Sudi maboko ntuku ibale na itano. Ndako esantu ya Yawe ekozala o katikati.

48:11  Eye ekozala mabelé ma banganga Nzambe, babonzami ba libota lya Sadok, baye bazali naino kosalela ngai mpe baboyi ngai te, lokola ba-Israel basusu, na mpe ba-Levi.

48:12  Bakozwa bongo eteni bo­kolongola o mabelé masantu ma ekolo, penepene na mabelé ma ba-Levi.

48:13  Nzokande ba-Levi bakozwa ndambo ya mabelé se lokola ba­nga­nga Nzambe : na bolai maboko nko­to ntuku ibale na itano, na bonene maboko nkoto zomi. Bisika binso bolai bokoka maboko nkoto ntuku ibale, mpe bonene maboko nkoto zomi.

48:14  Bakoki koteke mabelé mana te ; bakoki kotikela bato basusu mpe te : mabelé maye maleki lokumu, makoki kokoma o maboko ma bato basusu te, zambi mazali mabelé masantu ma Yawe.

48:15  Eteni ya mabelé etikali ya bonene maboko nkoto itano, mpembeni ya ndambo eye ya maboko nkoto ntuku ibale na itano, ezali mabelé masantu te, ndako ekozala na mpe bisobe, engumba o katikati.

48:16  Ndelo ya yango nde : epai ya Nordi maboko nkoto inei na nkama itano, epai ya Sudi maboko nkoto inei na nkama itano ; epai ya Esti maboko nkoto inei na nkama itano.

48:17  Bisobe penepene na engumba bikozala : epai ya Nordi maboko nkama ibale na ntuku itano ; epai ya Sudi maboko nkama ibale na ntuku itano ; epai ya Esti maboko nkama ibale na ntu­ku itano ; epai ya Westi maboko nkama ibale na ntuku itano.

48:18  Nda­mbo eye ekotikala penepene na mabelé maye masantu esengeli kozala na bonene maboko nkoto zomi epai ya Esti mpe maboko nkoto zomi epai ya Westi : biloko mabelé makobota bikozala bya koleisa basali na engumba.

48:19  Basali ba engumba baye bokokamata o ntei ya bingu­mba binso bya Israel, bakokata bilanga bya bino.

48:20  Eteni eye mobi­mba ekoka na bolai mpe na bonene maboko nkoto ntuku ibale na itano. O ndambo ya mabelé masantu bokotonga engumba.

48:21  Epai na epai ya mabelé masantu mpe ya mabelé ma engumba nkumu ako­zwa mabelé. Mabelé mana makoka maboko nkoto ntuku ibale na itano kin’o ndelo ya mokili epai ya Esti, mpe maboko nkoto ntuku ibale na itano kin’o Westi, kende tee mbu. Nkumu akozwa bongo ndambo ya mabelé se lokola ndambo isusu. Nzokande o katikati mabelé masantu makozala na matongi manso ma Tempelo.

48:22  Longola mabelé ma ba-Levi mpe ma engumba maye mazali o kati ya mabelé ma Yuda mpe ma Benyamin, mabelé masusu makozala ma nkumu.

48:23  Ya bituka bitikali, banda ndelo ya Esti tee ndelo ya Westi, Benyamin akozwa ndambo yoko.

48:24  Mpe­mbeni ya mabelé ma Benyamin, ba­nda ndelo ya Esti tee epai ya ndelo ya Westi, Simeoni akozwa ndambo yoko.

48:25  Nsima ya Simeoni, banda ndelo ya Esti tee ndelo ya Westi, Izakar akozwa ndambo yoko.

48:26  Nsi­ma ya Izakar, ba­nda ndelo ya Esti tee ndelo ya Westi Zabulon akozwa ndambo yoko.

48:27  Nsima ya Zabulon, banda ndelo ya Esti tee ndelo ya Westi, Gad akozwa ndambo yoko.

48:28  Nsima ya Gad, epai ya Sudi, bokokata ndelo boye : banda Tamar, landa mai Meriba o Kades mpe moluka tee Mbu Enene.

48:29  Botala mokili bokokabolela bituka bya Israel bo lisango, etuka na etuka eteni ya yango. Elobi bongo Mokonzi Yawe.

48:30  Bokosala nzela ya kobima o engu­mba boye : Epai ya Nordi, bakomeka maboko nkoto inei na nkama itano.

48:31  Bizibeli bya kobima o engumba bikotangema na nko­mbo ya bituka bya Israel. Epai ya Nordi bizibeli bisato : ezibeli ya Ruben, ezibeli ya Yuda, ezibeli ya Levi.

48:32  Epai ya Esti bakomeka maboko nkoto inei na nkama itano, mpe ekozala na bizibeli bisato : ezibeli ya Yozefu, ezibeli ya Benyamin, ezibeli ya Dan.

48:33  Epai ya Sudi bakomeka maboko nkoto inei na nkama itano, mpe ekozala na bizibeli bisato : ezibeli ya Simeoni, ezibeli ya Izakar, ezibeli ya Zabulon.

48:34  Epai ya Westi bakomeka maboko nkoto inei na nkama itano, mpe ekozala na bizibeli bisato : ezibeli ya Gad, ezibeli ya Aser, ezibeli ya Neftali.

48:35  Efelo ekozinga engumba mobimba ekoki na bolai : maboko nkoto zomi na mwambe. Banda mokolo mona bakotanga engumba na nkombo ‘Yawe azali wana’.