LinVB - Luke

Chapter 1

1:1  Bato basúsu babandákí kokoma maye malekákí o ntéi ya bísó.

1:2  Bakomí sé maye bayébísí bísó na bato bamónókí mangó na míso út’o ebandela, mpé bazalí batéyi ba maloba ma Mokonzi Nzámbe.

1:3  Bôngó, Teofíle wa lokúmu, ngáí mpé, áwa nasolólí mánso malámu út’o ebandela, nakání kokomela yǒ mangó na molongó ;

1:4  óyéba ’te matéya oyókákí mazalí ma sôló.

1:5  Zakaría, moto wa molongó mwa Abía, azalákí nganga Nzámbe ntángo Eróde azalákí mokonzi wa Yudéa. Mwásí wa yě Elizabéti azalákí moto wa libótá lya Arone.

1:6  Bangó bábalé bazalákí bato ba bosémbo o míso ma Nzámbe, bazalákí kotósa mibéko mpé mitíndo mínso mya Nzámbe.

1:7  Kasi babótákí té, zambí Elizabéti azalákí ekomba, mpé bangó bábalé basílí banuní.

1:8  Mokolo mǒkó Zakaría azalákí kosála mosálá mwa bonganga o míso ma Nzámbe, mpô ezalákí ngala ya molongó mwa yě.

1:9  Babétékí zeké lokóla banganga Nzámbe bameséní kosála. Zakaría abimí mpô ya koyíngela o esíká esántu ya Mokonzi mpé kotumba mpaka ya malási.

1:10  O ngonga ya kotumba mpaka bato bánso bazalákí kosámbela o libándá.

1:11  Anzelú wa Nzámbe abimélí yě, atélémí o lobóko la mobáli la altáre ya mpaka.

1:12  Ntángo Zakaría amóní yě, abángí mpé ayókí nsómo ené­ne.

1:13  Kasi ǎnzelú alobí na yě : « Obánga té, Zakaría, Nzámbe ayókí mabóndélí ma yǒ. Mwásí wa yǒ Elizabéti akobótela yǒ mwána mobáli, okopésa yě nkómbó Yoáne.

1:14  Okoyóka esengo enéne mpé bato baíké bakosepela mbótama ya yě,

1:15  mpô akozala moto monéne o míso ma Mokonzi. Akomele víno na masanga makási té, akotónda na Elímo Sántu út’o libumu lya mamá wa yě.

1:16  Akozóngisa bána ba Israél baíké epái ya Mokonzi Nzámbe wa bangó.

1:17  Akotámbola o bosó bwa yě na mayéle mpé na ngúyá ya Elía mpô ’te bána bázala na mitéma lokóla batatá ba bangó, mpé ápésa baye batombókí mayéle ma bato ba bosémbo, bôngó áléngelele Mokonzi ekólo ya bato bakokí koyamba yě malámu. »

1:18  Kasi Zakaría alobí na ǎnzelú : « Ndéngé níni nakoyéba ’te ekosálema bôngó ? Mpô ngáí nakómí mobangé, mpé mwásí wa ngáí asílí anuní. »

1:19  Anzelú azóngísí : « Ngáí nazalí Gabriel, óyo azalí ntángo ínso o bosó bwa Nzámbe ; natíndámí mpô ’te náloba na yǒ mpé náyébisa yǒ nsango eye ya esengo.

1:20  Awa oyambí maloba ma ngáí té, okokóma mbúbu, okoloba lisúsu té kín’o makambo maye makosálema, sókó mikolo mikokí. »

1:21  Bato bazalákí kozila Zakaría bakámwí, zambí aúmélí míngi o esíká esántu.

1:22  Awa abimí, akokí koloba na bangó té, bôngó bayébí ’te amónókí limóní o ndáko esántu. Na bilembo alakísí bangó maye alingí koyébisa ; monoko motíkálí nyê.

1:23  Esílí mikolo mya mosálá o ndáko esántu, azóngí o ndáko ya yě.

1:24  Nsima ya mwâ mikolo mwásí wa yě Elizabéti akwélí zémi. Sánzá ítáno abimí o ndáko té. Amílobélí :

1:25  « Bótála maye Mokonzi asálí ngáí, mpô o eleko eye andimí kolongola nsóni ya ngáí o míso ma bato ! »

1:26  Nsima ya sánzá motóbá, Nzámbe atíndí ǎnzelú Gabriel o Na­zaréte, mbóka yǒkó ya Galiléa.

1:27  Atíndí yě epái ya ngondo mǒkó, nkómbó ya yě María ; babandélí yě mobáli nkómbó ’te Yozéfu, wa libótá lya Davídi.

1:28  Anzelú akótí o ndáko ya yě mpé alobí : « Losáko, otóndí ngrásya ; Mokonzi azalí na yǒ. »

1:29  Awa María ayókí maloba maye, abángí míngi mpé amítúní ntína ya losáko loye.

1:30  Anzelú alobí na yě : « Obánga té, María, Nzámbe alakísí yǒ bolámu bwa yě.

1:31  Tálá, okokwéla zémi, okobóta mwána mobáli mpé okopésa yě nkómbó Yézu.

1:32  Akozala moto monéne, bakotánga yě Mwána wa Nzámbe wa Ntá-Likoló. Mokonzi Nzámbe akopésa yě ngwendé ya Davídi, nkóko wa yě.

1:33  Akoyángela libótá lya Yakób sékô, bokonzi bwa yě bokosúka té. »

1:34  Kasi María atúní ǎnzelú : « Yangó ekosálema ndéngé níni, mpô na­yébí âta mobáli moko té ? »

1:35  A­nze­lú alobí : « Elímo Sántu akokitela yǒ ; ngúyá ya Nzámbe wa Ntá-Likoló ekozipa yǒ ; yangó wâná mwána mosántu okobóta bako­byánga yě Mwána wa Nzámbe.

1:36  Mpé tálá, ndeko wa yǒ Elizabéti, yě mpé a­kwélí zémi ya mwána mobáli, áwa asílí akómí mobangé. Azalákí eko­mba, sikáwa akómí na zémi lya sá­nzá motóbá,

1:37  zambí likambo lyǒkó lilekí Nzámbe na bokási té. »

1:38  María alobí : « Mosáleli wa Nzámbe ngáí óyo, ésálema na ngáí lokóla olobí ! » Mpé ǎnzelú atíkí yě.

1:39  O mikolo mîná María akeí mbá­ngu mbángu o mbóka yǒkó ya ngómbá o Yudéa.

1:40  Ayíngélí o ndáko ya Zakaría mpé apésí Elizabéti losáko.

1:41  Ntángo Elizabéti ayókí losáko la María, mwána aningání o libumu lya yě, mpé Elímo Sántu akitélí Elizabéti.

1:42  Agángí : « Abenísí yǒ yambo ya básí bánso, abenísí mpé mwána wa yǒ.

1:43  Ngáí ndé náni ’te mamá wa Mokonzi wa ngáí áyâ kotála ngáí boye ?

1:44  Awa nayókí losáko la yǒ, mwána aningání na esengo o libumu lya ngáí.

1:45  Esengo míngi na yǒ sôló, zambí oyambákí ’te mambí Nzámbe ayébísákí yǒ makosálema. »

1:46  María alobí : « Molímo mwa ngáí mokokúmisa Mokonzi na motéma mobimba,

1:47  motéma mwa ngáí motóndí na nsáí mpô ya Nzámbe Mobíkisi wa ngáí,

1:48  zambí atálí botaú bwa mosáleli wa yě. Ya sôló, út’o leló bato bánso bakotánga ngáí moto wa esengo,

1:49  mpô Nzámbe ntá bokási asálí ngáí mambí manéne ; nkómbó ya yě : Mosántu !

1:50  O bileko na bileko alakísí motéma ngolu na bato bánso bakobángaka yě.

1:51  Alakísí bokási bwa lobóko la yě, apanzí bato bazalí na loléndo.

1:52  Alongólí bakonzi banéne o ngwendé ya bangó, afándísí bato baké o bisíká bya lokúmu.

1:53  Atóndísí na bilóko bato bayókí nzala, azóngísí bato ba nkita mabóko mpámba.

1:54  Abíkísí Israél, mosáleli wa yě, ayókélí yě lisúsu ngolu ;

1:55  lokóla alobáká na bankóko ba bísó, Abaráma na bána ba yě o bileko bínso ! »

1:56  Sánzá sókí ísáto María atíkálí epái ya Elizabéti, na nsima azóngí o ndáko ya yě.

1:57  Ekómí eleko ya kobóta, Elizabéti abótí mwána mobáli.

1:58  Bato ba penepene ná bandeko ba yě bayókí ’te Mokonzi alakísí yě ngolu enéne, basepélí elongó na yě.

1:59  Elekí mikolo mwambe, bakeí kokátisa mwána ; balingí kopésa yě nkómbó ya tatá wa yě Zakaría.

1:60  Kasi mamá alobí : « Té ! Nkómbó ya yě ekozala Yoáne. »

1:61  Balobí : « Moto mǒkó wa libótá lya yǒ azalí na nkómbó êná té ! »

1:62  Na bilembo batúní tatá nkómbó náni alingí kopésa mwána.

1:63  Aséngí mwâ libáyá mpé akomí : « Nkómbó ya yě Yoáne. » Bánso bakámwí.

1:64  Bobélé o ntángo êná monoko mwa yě mofungwámí, mpé lolému lokangwámí ; abandí koloba mpé kokúmisa Nzámbe.

1:65  Bato bánso ba penepene bayókí nsómo, mpé nsango ya makambo mâná mánso etámbólí o mokili mobimba mwa ngómbá ya Yudéa.

1:66  Baye bánso bayókí yangó, bakanísí yangó o mitéma, balobí : « Mwána óyo akozala náni ? » Ya sôló, ngúyá ya Mokonzi ezalákí na yě.

1:67  Zakaría, tatá wa yě, atóndí na Elímo Sántu, mpé asakólí lokóla proféta :

1:68  « Bákúmisa Mokonzi, Nzámbe wa Israél, zambí ayéí kotála mpé kosikola bato ba yě.

1:69  Abimísélí bísó elombé mobíkisi o libótá lya Davídi, mosáleli wa yě,

1:70  lokóla alobáká út’o kala na monoko mwa baproféta basántu,

1:71  mpô ’te ábíkisa bísó o mabóko ma bangúná mpé ma baye bánso bakoyinaka bísó.

1:72  Ayókélí bankóko ba bísó ngolu, bôngó akanísí bondeko bosántu akátákí na bangó :

1:73  na ndaí alayéláká Abaráma nkóko wa bísó, ’te akosálisa bísó :

1:74  Tóbíka o mabóko ma bangúná mpé tósálela yě na bobángi lisúsu té ;

1:75  tózala na bosémbo mpé na bosántu o míso ma yě mikolo mínso mya bomoi bwa bísó.

1:76  Mpé yǒ, mwána moké, bako­byánga yǒ proféta wa Ntá-Likoló, zambí okotámbola libosó lya Mokonzi mpô ’te óbongisela yě nze­lá,

1:77  okolakisa bato ba yě ’te akobíkisa bangó áwa akolímbisa bangó masúmu.

1:78  Mpô ya motéma ngolu mwa yě, Nzámbe wa bísó, akotíndela bísó Mwínda mwa ntó­ngó,

1:79  móngengele bato bafándí o molílí mwa liwá ; mpô ’te mótámbwisa bísó o nzelá ya bobóto. »

1:80  Mwána akólí, mpé Elímo azalákí koléndisa yě. Afándí o elíkí kín’o mokolo abimí o míso ma bato ba Israél.

Chapter 2

2:1  O mikolo mîná Kaizáro Ogusto, atíndí ’te bátánga bato ba bokonzi bwa yě.

2:2  Babandákí kotánga bato ntángo Kwirínio azalákí moyángeli wa Síria.

2:3  Bôngó bato bánso bakeí kokomisa nkómbó, moto na moto o mbóka ya yě.

2:4  Yozéfu mpé alongwí o mbóka Nazaréte, o Galiléa, akeí o Yudéa, o Beteléme, mbóka ya Davídi, zambí azalákí moto wa libótá lya Davídi.

2:5  Akeí kokomisa nkómbó elongó na María mwásí óyo yě alingí kobála ; María azalákí na zémi.

2:6  Ezalákí bangó kúná, ntángo ya kobóta ekokí.

2:7  María abótí mwána wa yě wa bo­ngondo, azíngí yě na bilambá mpé alálísí yě o elíelo ya bibwélé, zambí o ndáko ya bampaya ba­zwákí esíká té.

2:8  Penepene na mbóka êná bakéngeli ba mpatá bazalákí o esóbé kokéngele mpatá ya bangó na butú.

2:9  Anzelú wa Mokonzi abimélí bangó ; nkémbo ya Mokonzi ezíngí bangó lokóla mwínda, bayókí nsómo enéne.

2:10  Kasi ǎnzelú alobí na bangó : « Bóbánga té, nayélí bínó nsango ekosepelisa ekólo mobimba :

2:11  leló babótélí bínó mobíkisi o mbóka ya Davídi ; yě azalí Krístu Mokonzi.

2:12  Bokoyéba yě boye : bokokúta mwána abótámí sika, bazíngí yě na bilambá, alálí o elíelo ya bibwélé. »

2:13  Na mbala yǒkó bǎnzelú ebelé ba limpingá lya likoló bayéí kosangana na ǎnzelú, bakúmísí Nzámbe, balobí :

2:14  « Nkémbo na Nzámbe o likoló, mpé o nsé bobóto na bato ba yě ba bolingo ! »

2:15  Ntángo bǎnzelú batíkí bangó mpé bazóngí o likoló, bakéngeli ba mpatá balobání : « Tókende o Beteléme kotála likambo likwêlí kúná, lokóla Mokonzi ayébísí bísó. »

2:16  Bakeí mbángu, bakútí María na Yozéfu, na mwána abótámí sika alálí o elíelo.

2:17  Awa bamóní bôngó, bakeí koyébisa bato basúsu maye ǎnzelú alobákí mpô ya mwána óyo.

2:18  Baye bánso bayókí nsango ya bakéngeli bakámwí míngi.

2:19  Kasi María abómbí makambo maye mánso, mpé amanyólí mangó o motéma.

2:20  Na nsima bakéngeli bazóngí, bakémbísí mpé bakúmísí Nzámbe mpô ya mánso bayókákí mpé bamónókí, sé lokóla bayébísákí bangó.

2:21  Nsima ya mikolo mwambe, bakeí kokátisa mwána ; bapésí yě nkómbó Yézu, nkómbó ǎnzelú ayébísákí yambo ’te mamá wa yě ákwéla zémi.

2:22  Ekómí mokolo Mobéko mwa Móze motíndí ’te básála molúlú mwa bopétoli, bakeí na yě o Yerúzalem kobonza yě na Mokonzi,

2:23  sé lokóla ekomámí o Mobéko mwa Mokonzi : Bakobonzela Mokonzi bána babáli bánso ba yambo.

2:24  Babonzí mpé libonza lokóla ekomámí o Mobéko mwa Mokonzi : bibengá bíbalé tǒ bána ba bibengá bábalé.

2:25  Ezalákí o Yerúzalem moto mǒ­kó nkómbó ’te Simeóni, moto wa bosémbo akobángaka Nzámbe ; azalákí kozila mokolo Nzámbe ako­bóndo Israél, mpé Elímo Sántu azalákí na yě.

2:26  Elímo Sántu ayébísákí yě ’te akowâ té libosó ’te ámóno Krístu óyo Mokonzi akotínda.

2:27  Elímo atíndí yě o Témpelo ntángo babóti bayéí na mwána Yézu kokokisa maye mánso Mobéko motíndí.

2:28  Simeóni ayambí mwána o mabóko, akúmísí Nzámbe, alobí :

2:29  « Mokonzi, lokóla olobákí, okokí kotíka mosáleli wa yǒ ákende sikáwa na bobóto,

2:30  zambí namóní na míso Mobíkisi,

2:31  óyo otíndélí bikólo bínso,

2:32  yě mwínda mokongengele mikili mínso, mpé nkémbo ya Israél, ekólo ya yǒ ! »

2:33  Tatá na mamá wa mwána baká-mwí míngi na maye malobámí mpô ya mwána.

2:34  Simeóni abenísí bangó mpé alobí na María, mamá wa yě : « Tálá ! Mwána óyo akozala ntína ya bokiti tǒ ya botómbwami bwa bato baíké o Israél ; bakobéte ntembe míngi mpô ya yě,

2:35  mpô ’te makanisi mabómbámí o mitéma mya bato ebelé máyébana. Bôngó, mpási ekotúbola motéma mwa yǒ lokóla mompánga, mamá. »

2:36  Ezalákí mpé wâná mwásí mǒkó proféta, Ana. Yě mwána wa Fanuel, wa libótá lya Aser, asílí akómí mobangé mpenzá. Nsima ya bongo­ndo bwa yě afándákí mibú nsambo na mobáli wa yě.

2:37  Na nsima atíkálí yě mǒkó ; akokísí mibú ntúkú mwambi na mínei : akolongwaka o Témpelo té, akosálelaka Nzámbe butú mói na boláli nzala mpé na losámbo.

2:38  Ayéí sé o ntángo êná. Akúmísí Nzámbe mpé alobí makambo ma mwána na bato bánso bazalákí kozila libíkí lya Yerúzalem.

2:39  Ntángo bakokísí mánso matí­ndámí na Mobéko mwa Mokonzi, bazóngí o Galiléa, o mbóka ya bangó Nazaréte.

2:40  Mwána akólí, azwí nzóto makási mpé akómí na bwá­nyá, mpé ngrásya ya Nzámbe ezalákí na yě.

2:41  Mbúla na mbúla babóti ba yě bazalákí kokende kosepela eyenga ya Pásiká o Yerúzalem.

2:42  Ekokísí Yézu mibú zómi na míbalé, bakeí lisúsu o eyenga lokóla bameséní.

2:43  Esílí mikolo mya eyenga, ntángo bakómí kozónga, mwána Yézu atíkálí o Yerúzalem, kasi babóti ba yě bayébí té.

2:44  Bakanísí ’te azalákí na bato basúsu ; batámbólí bôngó mokolo mǒkó ; na nsima babandí koluka yě o ntéi ya bandeko na bayébani.

2:45  Kasi bamóní yě té, yangó wâná bazóngí o Yerúzalem koluka yě.

2:46  Nsima ya mikolo mísáto bakútí yě o Témpelo, afándí o káti ya batéyi, azalákí koyóka bangó mpé kotúna mitúna.

2:47  Baye bánso bayókí yě bakámwí míngi na mayele mpé na biyano bya yě.

2:48  Emóní babóti bôngó, mitéma mya bangó mipa­swání. Mamá wa yě atúní yě : « Mwá­na, mpô níni osálí bísó bôngó ? Tálá, bísó na tatá tozalákí koluka yǒ sé motéma likoló. »

2:49  Azóngísí : « Mpô níni bozalákí koluka ngáí ? Boyébí té ’te nasengélí kozala o ndáko ya Tatá wa ngáí ? »

2:50  Kasi bangó basósólí ntína ya maloba mâná té.

2:51  Azóngí na bangó elongó o Nazaréte, mpé azalákí kotósa bangó. Mamá wa yě abómbí mambí mâná mánso o motéma.

2:52  Yézu akólí mpé akómí na bwányá o míso ma Nzámbe mpé ma bato.

Chapter 3

3:1  O mobú mwa zómi na mítáno mwa bokonzi bwa Kaizáro Tibério, o eleko Pónsio Piláto azalákí moyángeli wa Yudéa, Eróde mokonzi wa Galiléa, ndeko wa yě Filípo mokonzi wa Ituréa mpé wa Trakoníti, Lizánia mokonzi wa Abiléni,

3:2  ntángo Ana na Kaifa bazalákí banganga bakonzi, Yoáne, mwána wa Zakaría, ayókí loláká la Nzámbe o elíkí.

3:3  Ayéí o mokili mobimba mwa Yordáne kotéya bato ’te bákúla batísimo ya bobóngoli motéma mpô ya kozwa bolímbisi masúmu,

3:4  lokóla ekomámí o búku ya proféta Izáya : « Moto abélélí o elíkí : Bóbongisa nzelá ya Mokonzi, bósémbola yangó malámu ;

3:5  bakotóndisa mabúlú mánso, bakokitisa ngómbá inéne na iké ínso ; bakosémbola nzelá nyóka nyóka, mpé bakolongola mabakú mánso.

3:6  Bato bánso ndébamóní libíkí liútí na Nzámbe. »

3:7  Bato míngi bayéí mpô ’te Yoáne ábátisa bangó ; alobí na bangó : « Bána ba bitúpa, náni alakísí bínó kokíma Nkándá ekoyâ ?

3:8  Bóbimisa misálá mibongí na bato balingí kobóngola mitéma. Bótíka komílobela ’te : ‘Abaráma azalí tatá wa bísó’. Ngáí nayébísí bínó : Nzámbe akokí kosála ’te mabángá maye mábimisela Abaráma bána.

3:9  Basílí batíí sóka o ntína ya nzeté ; nzeté ínso ikobóta mbuma elámu té, bakokáta yangó mpé bakobwáka yangó o móto. »

3:10  Bato batúní yě : « Bôngó tósála níni ? »

3:11  Azóngísélí bangó : « Moto azalí na bilambá bíbalé, ákaba yǒkó na moto azángí elambá ; óyo azalí na bilóko bya kolía ásála sé bôngó. »

3:12  Bafútisi mpáko mpé bayéí kokúla batísimo, batúní yě : « Motéyi, tósála níni ? »

3:13  Alobí na bangó : « Bófútisa bato sé mpáko eye batí­ndí. »

3:14  Basodá mpé batúní yě : « Bôngó bísó tósála níni ? » Alobí na bangó : « Bónyókolo moto té, bóbótolo bato mosolo té ; bózwa sé lifúta lya bínó. »

3:15  Awa bato bánso bazalákí kozila na elíkyá enéne, mpé komítúna o mitéma sókó azalákí Krístu,

3:16  Yoáne alobí na bangó bánso : « Ngáí nakobátisa bínó na mái, kasi óyo akoyâ, alekí ngáí na ngúyá ; nabo­ngí kofungola nsinga ya bikótó bya yě té. Yě akobátisa bínó na Elímo Sántu mpé na móto.

3:17  Azalí na lúngu o mabóko, akopepe mbuma ya yě mpé akosangisa yangó o ebómbelo, kasi akotumba mpumbulú o móto mokozíma té. »

3:18  Sé bôngó mpé na malako masúsu maíké azalákí kosangela bato Nsango Elámu.

3:19  O ntángo êná mokonzi Eróde abálákí Erodiáda, mwásí wa ndeko wa yě. Asálákí mpé mabé maíké, yangó wâná Yoáne apálélí yě.

3:20  Na mabé maye mánso Eróde abakísí naíno likambo liye : akangísí Yoáne o bolóko.

3:21  Awa bato bánso bakúlí batísimo, ntángo Yézu mpé asílákí kokúla mpé azalákí kosámbela, likoló lifungwání.

3:22  Elímo Sántu akitélí yě, amónóní lokóla ebengá ; loláká loyókání út’o likoló : « Yǒ ozalí Mwána wa ngáí wa bolingo, nakosepelaka na yǒ míngi. »

3:23  Ekokísí Yézu mibú sókí ntúkú ísáto, abandí kotéya bato ; bato bánso bakanísí ’te azalákí mwána wa Yozéfu, mwána wa Eli,

3:24  mwána wa Matat, mwána wa Lévi, mwána wa Mélki, mwána wa Yanai, mwána wa Yozéfu,

3:25  mwána wa Matatía, mwána wa Amos, mwána wa Naúme, mwána wa Esli, mwána wa Nagái,

3:26  mwána wa Maät, mwána wa Matatía, mwána wa Seméyin, mwána wa Yozéki, mwána wa Yóda,

3:27  mwána wa Yoánan, mwána wa Réza, mwána wa Zoróbabel, mwána wa Salátiel, mwána wa Néri,

3:28  mwána wa Mélki, mwána wa Adi, mwána wa Kosam, mwána wa Elmadan, mwána wa Er,

3:29  mwána wa Yézu, mwána wa Elíezer, mwána wa Yorim, mwána wa Matat, mwána wa Lévi,

3:30  mwána wa Simeóni, mwána wa Yúda, mwána wa Yozéfu, mwána wa Yónam, mwána wa Elíakim,

3:31  mwána wa Meléa, mwána wa Ména, mwána wa Matata, mwána wa Nátan, mwána wa Davídi,

3:32  mwána wa Yése, mwána wa Obed, mwána wa Bóze, mwána wa Sála, mwána wa Nakasón,

3:33  mwána wa Amínadab, mwána wa Ademíne, mwána wa Arni, mwána wa Esron, mwána wa Péres, mwána wa Yúda,

3:34  mwána wa Yakób, mwána wa Izáka, mwána wa Abaráma, mwána wa Tára, mwána wa Nakór,

3:35  mwána wa Séruk, mwána wa Ragáu, mwána wa Falek, mwána wa Eber, mwána wa Sála,

3:36  mwána wa Kainam, mwána wa Arfaksa, mwána wa Sem, mwána wa Nówe, mwána wa Lamek,

3:37  mwána wa Matúsala, mwána wa Enok, mwána wa Yáret, mwána wa Malélel, mwána wa Kainam,

3:38  mwána wa Enos, mwána wa Set, mwána wa Adámu, mwána wa Nzámbe.

Chapter 4

4:1  Yézu atóndí na Elímo Sántu, alongwí o Yordáne, Elímo akambí yě o elíkí,

4:2  mpé zábolo ayéí kosénginya yě mikolo ntúkú ínei. Mikolo mîná azalákí kolía té ; ekómí mokolo mwa nsúka ayókí nzala.

4:3  Zábolo alobí na yě : « Sókó ozalí Mwána wa Nzámbe, lobá na libá­ngá liye líbóngwana límpa. »

4:4  Yézu azóngísélí yě : « Ekomámí ’te : Moto akobíka bobélé na mámpa té ! »

4:5  Zábolo abutísí yě o likoló lya ngómbá, alakísí yě na mbala yoko bikólo bínso bya bakonzi ba nsé,

4:6  alobí : « Nakopésa yǒ bokonzi mpé nkémbo ya bikólo bîná bínso ; bapésí ngáí byangó, nakopésa byangó na óyo nalingí.

4:7  Bôngó, sókó okú­mbámélí ngáí, nakopésa yǒ byangó bínso. »

4:8  Yézu azóngísélí yě : « Ekomámí ’te : Okokú­mbamela sé Mokonzi Nzámbe wa yǒ, okosálela bobélé yě mǒkó. »

4:9  Na nsima zábolo akeí na yě o Yerúzalem, atíí yě o motóndo mwa Témpelo mpé alobí na yě : « Sókó ozalí Mwána wa Nzámbe, ómí­bwáka o nsé,

4:10  zambí ekomámí ’te : Mpô ya yǒ akotínda bǎnzelú ba yě bábátela yǒ.

4:11  Bakomí mpé : Bǎnzelú bakomeme yǒ o mabóko, mpô ’te lokolo la yǒ lótúta libángá té. »

4:12  Yézu azóngísí : « Ekomámí ’te : Okomeka Mokonzi Nzámbe wa yǒ té. »

4:13  Awa zábolo asílísí kosénginya yě na ndéngé ínso, atíkí Yézu kín’o mokolo elaká ekokoka.

4:14  Yézu azóngí o Galiléa, azalákí na ngúyá ya Elimo, mpé nsango ya yě epalángání o ekólo mobimba.

4:15  Azalákí kotéya o sinagóga ya bangó mpé bato bánso bazalákí kokúmisa yě.

4:16  Ayéí o Nazaréte esíká akólákí. Ayíngélí o sinagóga mokolo mwa sábato lokóla ameséní, atélémí mpô ya kotánga Minkandá Misántu.

4:17  Bapésí yě búku ya proféta Izáya ; alíngólí lokásá, atángí o esíká bakomí boye :

4:18  Elímo wa Nzámbe akitélí ngáí, zambí Mokonzi apakólí ngáí mafúta masántu mpô ’te násangela babóla Nsango Elámu, násangela bato ba bolóko ’te bakobimisa bangó, náyébisa bato ba lolandá ’te bakomóno lisúsu, nápésa bonsómí na bato banyókwámí,

4:19  násakola ’te mobú moye Mokonzi akolakisa ngolu ya yě.

4:20  Azíngí lokásá, apésí mosáli mpé akeí kofánda. Bato bánso bazalákí o sinagóga míso sé epái ya yě.

4:21  Abandí koloba na bangó : « Lelóméí maloba ma Bikomá Bisántu maye boyókí, masálémí sôló. »

4:22  Bánso bandimí yě, mpé bakúmísí yě míngi mpô ya maloba malámu alobákí. Bamítúni : « Yě óyo mwána wa Yozéfu té ? »

4:23  Alobí na bangó : « Ntembe té, bokoloba na ngáí eyélé eye : Mónganga, ómíbíkisa ! Mánso toyókí ’te osálákí o Kafárnaum, sálá mangó mpé áwa o mbóka ya yǒ. »

4:24  Mpé abakísí : « Ya sôló sôló, nalobí na bínó : bakoyambaka proféta mǒkó o mbóka ya yě mǒkó té !

4:25  Ya sôló sôló, nalobí na bínó : O mikolo mya Elía básí bazéngé bazalákí míngi o Israél. Mibú mísáto na sánzá motóbá mbúla enókakí té, mpé nzala enéne ekwêlákí ekólo mobimba,

4:26  nzókandé Nzámbe atíndákí Elía epái ya mǒkó wa bangó té, atíndákí yě bobélé epái ya mwásí bozéngé wa Sarépta, o ekólo ya Sidóni.

4:27  O eleko ya proféta Elizéo bato ba maba bazalákí míngi o Israél, nzókandé mǒkó wa bangó abíkákí té, bobélé Naaman, moto wa Síria. »

4:28  Eyókí bangó maloba mâná, bato bánso bazalákí o sinagóga batokí na nkándá.

4:29  Batélémí, babengání yě o engumbá, bakeí na yě kín’o nsóngé ya ngómbá eye batóngákí engumbá, mpô ya kobwáka yě o nsé.

4:30  Kasi yě alekí o káti ya bangó mpé akóbí nzelá ya yě.

4:31  Na nsima akeí o Kafárnaum, mbóka ya Galiléa, mpé o mokolo mwa sábato alakísí bato matéya.

4:32  Bakámwí míngi na matéya ma yě, zambí azalákí kotéya lokóla moto ayébí kotéya sôló.

4:33  Moto mǒkó akangémí na elímo mbindo azalákí o sinagóga, abandí kogánga makási :

4:34  « Bísó na yǒ likambo níni, Yézu wa Nazaréte ? Oyéí ndé kosúkisa bísó ? Nayébí yǒ, ozalí Mosántu wa Nzámbe. »

4:35  Yézu agángélí yě : « Kangá monoko mpé bimá o nzóto ya moto óyo. » Zábolo abwákí yě o káti ya bato bánso, abimí o nzóto ya yě, kasi azokísí yě té.

4:36  Nsómo ekangí bato bánso, balobání : « Maloba ma moto óyo mazalí na ngúyá enéne : na bokonzi mpenzá atíndí bilímo mbindo, mpé bilímo bibimí sôló ! »

4:37  Mpé nsango ya yě epalángání o mbóka ínso ya ekólo êná.

4:38  Yézu abimí o sinagóga, ayíngélí o ndáko ya Simóni. Bokiló wa Simóni azalákí koyóka féfele makási. Babóndélí Yézu ’te ábíkisa yě.

4:39  Yézu asunámí penepene na yě, atíndí ’te féfele ésíla, mpé féfele esílí ; sé o ntángo êná atélémí mpé abandí kosálela bangó.

4:40  Na mpókwa, ebandí mói kokita, baye bánso bayélí Yézu bato ba bangó ba maláli ndéngé na ndéngé. Yézu atandélí bangó mǒkó mǒkó mabóko, mpé babíkí.

4:41  Bazábolo babimí o nzóto ya bato baíké, bagángí : « Ozalí Mwána wa Nzámbe ! » Kasi Yézu agángélí bangó, apekísí bangó koloba, zambí bayébí ’te azalí Krístu.

4:42  Etání ntóngó, Yézu abimí o mbóka mpé akeí o esíká ya kímíá. Bato ebelé bakeí koluka yě. Awa bakómí epái ya yě, balingí koka­ngela yě nzelá átíka bangó té.

4:43  Kasi Yézu alobí na bangó : « Nasengélí kosangela Nsango Elámu ya Bo­konzi bwa Nzámbe mpé o mbóka isúsu. Batíndí ngáí násála mosálá môná. »

4:44  Mpé azalákí kotéya o sinagóga ínso ya Yudéa.

Chapter 5

5:1  Yézu azalákí o libóngo lya etíma ya Genézarete, mpé bato ebelé bayéí kozínga yě mpô ya koyóka matéya ma Nzámbe.

5:2  Amóní máto mábalé o libóngo lya etíma, bankóló ba mangó balubwí mpé bazalákí kosukola minyámá.

5:3  Yézu ayíngélí o bwáto bǒkó, ezalákí bwáto bwa Simóni ; aséngí yě ’te ápúsa bwáto mwá moké o mái. Afándí mpé abandí kotéya bato út’o bwáto.

5:4  Esílísí yě kotéya, alobí na Simóni : « Tíndá bwáto o maí bozindó, bwáká monyámá mpô ya koboma mbísi. »

5:5  Simóni azóngísí : « Motéyi, butú mobimba tomíyókísí mpási, tobomí elóko té ; kasi áwa yǒ olobí bôngó, nakobwáka minyámá. »

5:6  Basálí bôngó, babomí mbísi ebe­lé mpenzá, minyámá mibandí kopaswana.

5:7  Babéngí báníngá bazalákí o bwáto bosúsu báyâ kosálisa bangó. Bayéí, batóndísí máto mábalé meké, malingí mázinda.

5:8  Emóní Simóni Pétro bôngó, afukámélí Yézu, alobí : « Mokonzi, lo­ngwá penepene na ngáí, zambí nazalí mosúmuki. »

5:9  Nsómo ekangí yě na bato bánso bazalákí na yě, mpô ya mbísi babomí ;

5:10  sé bôngó Yakóbo na Yoáne, bána ba Zebedéo, báníngá ba Simóni. Kasi Yézu alobí na Simóni : « Obánga té, bandá leló okobénda bato. »

5:11  Bazóngísí bwáto o libóngo, batíkí bínso, mpé balandí Yézu.

5:12  Ekómí Yézu o mbóka yǒkó, moto mǒkó azalákí wâná na maba o nzóto mobimba. Ntángo amóní Yézu, amíbwákí o nsé mpé abóndélí yě : « Mokonzi, sókó olingí, okokí kopétola ngáí. »

5:13  Yézu atandí lobóko, asímbí yě, alobí : « Nalingí ókóma péto ! » Mpé na mbala yǒkó maba masílí.

5:14  Yézu apekísí yě áloba yangó na moto mǒkó té, alobí : « Kendé komílakisa na nganga Nzámbe, bonzá libonza lokóla Móze atíndí, ólakisa bangó ’te okómí péto. »

5:15  Nzókandé nsango ya Yézu ekómí kopalangana míngi mpé bato baíké bayéí kosangana mpô ya koyóka matéya ma yě mpé kobíka o bokono bwa bangó.

5:16  Kasi yě akeí kosámbela o esíká ya kímíá.

5:17  Mokolo mǒkó Yézu azalákí kotéya. Ba-Farizéo na batéyi ba Mobéko bafándí wâná, baútákí o mbóka ínso ya Galiléa, ya Yudéa mpé o Yerúzalem. Na ngúyá ya Nzámbe abíkísí bato ba bokono.

5:18  Mpé tálá bayéí na moto akúfá makolo, alálí o kitikwálá. Balukí koyíngisa yě o ndáko mpé kotía yě o bosó bwa Yézu.

5:19  Kasi bazwí nzelá ya koyíngisa yě té, mpô ya nkaká ya bato. Yangó wâná babutí o motóndo mwa ndáko, basálí lilusú. Bakitísí yě na kitikwálá ya yě o káti ya bato, o bosó bwa Yézu.

5:20  Emóní Yézu boyambi bwa bangó, alobí : « Ndeko, masúmu ma yǒ malímbámí. »

5:21  Batéyi ba Mobéko na ba-Farizéo babandí komítúna : « Yě ndé náni ’te átúka Nzámbe boye ? Náni akokí kolímbisa masúmu, bobélé Nzámbe té ? »

5:22  Yézu ayébí ma­kanisi ma bangó, alobí : « Mpó níni bozalí kokanisa bôngó o mitéma ?

5:23  Níni elekí mpási : koloba ‘masúmu ma yǒ malímbámí’, tǒ koloba ‘télémé mpé támbóla’ ?

5:24  Bôngó, mpô ’te bóyéba ’te Mwána wa Moto azalí na likokí lya kolímbisa masúmu áwa o nsé », sikáwa alobí na moto akúfá makolo : « Nalobí na yǒ : télémé, kamátá kitikwálá ya yǒ mpé kendé o ndáko. »

5:25  Sé o ntángo êná atélémí o míso ma bangó, akamátí kitikwálá ya yě mpé akeí o ndáko. O nzelá azalákí kokúmisa Nzámbe.

5:26  Bato bánso bakámwí míngi mpé bakúmísí Nzámbe. Babángí mpé balobí : « Leló tomóní makambo ma kokámwa ! »

5:27  Nsima yangó Yézu abimí mpé amóní mofútisi mpáko Lévi, afándí o biló ya mpáko. Alobí na yě : « Landá ngáí. »

5:28  Yě atíkí bínso, atélémí mpé alandí Yézu.

5:29  Lévi alámbélí yě limpáti linéne o ndáko ya yě. Bafútisi mpáko baíké na bato basúsu bazalákí na bangó elongó o méza.

5:30  Ba-Farizéo na batéyi ba Mobéko bayókí mabé, balobí na bayékoli ba yě : « Mpô níni bozalí kolía mpé komele elongó na bafútisi mpáko mpé na basúmuki ? »

5:31  Kasi Yézu alobí na bangó : « Bato bazalí nzóto kólóngónú basengélí na mónganga té, sé bato ba bokono.

5:32  Nayéí kobênga basémba té, kasi basúmuki mpô ’te bábó­ngola mitéma. »

5:33  Balobí na yě : « Bayékoli ba Yoáne bakolálaka nzala mbala míngi mpé bakosámbelaka ; bayékoli ba ba-Farizéo bakosálaka bobélé bôngó ; kasi baye ba yǒ bakolíaka mpé bakomeleke. »

5:34  Yézu alobí na bangó : « báníngá ba mobali bakoki kolála nzala té, ntángo mobali azalí na bangó ?

5:35  Kasi mokolo mosúsu bakolongola bolóngani o ntéi ya bangó, o ntángo êná bakolála nzala. »

5:36  Alobí na bangó mpé moúlání moye : « Moto mǒkó té akopasola elambá ya sika mpô ya kobamba elambá ya kala. Sókó asálí bôngó, akobébisa elambá ya sika ; eténi ya sika ebongí na elambá ya kala té.

5:37  Moto mǒkó mpé té akotía víno ya sika o ngóto ya kala, zambí víno ya sika ekopasola ngóto ya kala, ekosopana mpé ngóto ekobéba.

5:38  Kasi basengélí kotía víno ya sika o ngóto ya sika.

5:39  Moto mǒkó té, sókó asílí amelí víno ya kala, akolinga víno ya sika ; ya sôló, bakolobaka ’te víno ya kala elekí elengi. »

Chapter 6

6:1  Mokolo mǒkó Yézu alekí o elanga ya mbuma ya mámpa. Ezalákí mokolo mwa sábato. Bayékoli babúkí mitó, babimísí mbuma na mabóko mpé baléí yangó.

6:2  Ba-Farizéo basúsu balobí : « Mpô níni bosálí maye mapekísámí o mokolo mwa sábato ? »

6:3  Yézu ayanólí bangó : « Bôngó botángí naíno té níni Davídi asálákí ntángo ayókákí nzala, yě na báníngá ba yě ?

6:4  Ayíngélí o ndáko ya Nzámbe, akamátí mámpa babonzí, aléí mangó mpé akabélí báníngá ba yě. Nzókandé bobélé banganga Nzámbe bakokákí kolía mámpa mâná. »

6:5  Mpé abakísí : « Sôló, Mwána wa Moto azalí mokonzi wa sábato. »

6:6  Mokolo mwa sábato mosúsu Yézu ayíngélí o sinagóga, abandí kotéya bato. Moto mǒ ko azalákí wâná, lobóko la yě la mobáli lokaúká.

6:7  Batéyi ba Mobéko na ba-Farizéo bazalákí konóngo yě, bámóno sókó akobíkisa moto o mokolo mwa sábato, bôngó bázwa ntína ya kofúnda yě.

6:8  Kasi yě ayébí makanisi ma bangó, alobí na moto anyě lá lobóko : « Yáká kotéleme áwa o míso ma bato bánso. » Akeí kotéleme wâná.

6:9  Yézu alobí na bangó : « Natúní bínó : Bakokí kosála malámu o mokolo mwa sábato tǒ té ? Bábíkisa moto tǒ bátíka yě ákúfa ? »

6:10  Atálí bangó mǒkó mǒkó ; na nsima alobí na moto ôná : « Tandá lobóko. » Yě atandí lobóko, mpé lobóko lokómí malámu mpenzá.

6:11  Kasi bangó batokí na nkándá, bakeí koyókana, báluka níni bakokí kosála na Yézu.

6:12  O mikolo mîná akeí kosámbela o ngómbá. Butú mobimba asámbélí Nzámbe.

6:13  Etání ntóngó, abéngí bayékoli ba yě ; o káti ya bangó aponí bato zómi na bábalé, apésí bangó nkómbó bapóstolo :

6:14  Simóni, óyo apésí nkómbó Pétro, ndeko wa yě Andréa, Yakóbo na Yoáne, Filípo na Barteleméo,

6:15  Matéo na Tomá, Yakóbo mwána wa Alféo, na Simóni, óyo bakobéngaka ‘moto wa moléndé’,

6:16  Yudási, mwána wa Yakóbo, na Yudási Iskariote, óyo akokóma mosúli.

6:17  Akití ngómbá elongó na bangó, kasi atélémí o esíká ya patátálú. Bayékoli ba yě míngi bazalákí wâná, ná bato ebelé baútí o Yudéa mobimba, o Yerúzalem, o mokili mwa Tíro na Sidóni, penepene na mbú enéne.

6:18  Bayéí koyóka yě mpé koluka ’te bábíka o mpási ya bangó. Baye banyókwámákí na bilímo mbindo babíkí.

6:19  Bato bánso balukí kosímba yě, zambí ngúyá ezalákí kobima o nzóto ya yě mpé kobíkisa bangó bánso.

6:20  Yézu atómbólí míso, atálí bayékoli ba yě, alobí : « Esengo na bínó babóla, zambí bo­kozwa Bokonzi bwa Nzámbe.

6:21  Esengo na bínó bato bozalí koyóka nzala sikáwa, zambí bokotó­nda. Esengo na bínó bato bozalí kolela sikáwa, zambí bokosepela nsima.

6:22  Esengo na bínó sókó bato bakoyina bínó, sókó bakobengana bínó, sókó bakofínga bínó mpé bakobébísa lokúmu la bínó mpô ya Mwána wa Moto.

6:23  Mokolo bakosála bínó bôngó, bópimbwa na nsáí, zambí bokozwa lifúta linéne o likoló. Bankóko ba bangó basáláká na baproféta sé bôngó.

6:24  Kasi mawa na bínó, bato ba nkita, zambí bosílí kozwa biye bikosepelisaka bínó.

6:25  Mawa na bínó botóndí sikáwa, zambí bokoyóka nzala. Mawa na bínó bozalí kosepela sikáwa, zambí bokozala na mawa mpé bokolela.

6:26  Mawa na bínó sókó bato bánso bazalí kokúmisa bínó ! Bankóko ba bangó basáláká sé bôngó na baproféta ba lokutá.

6:27  Kasi nalobí na bínó bato bozalí koyóka ngáí : Bólinga bangúná ba bínó. Bósála malámu na bato bayiní bínó.

6:28  Bato babétélí bínó mobondo, bótómbela bangó mambí malámu, mpé bósámbelela bato basálí bínó mabé.

6:29  Sókó moto abétí yǒ o litáma lyǒkó, pésá yě litáma lisúsu. Moto abótólí yǒ elambá, ópíma yě monkóto té.

6:30  Moto aséngí yǒ elóko, pésá yě yangó ; sókó moto akamátí yangó na makási, ósénge yě yangó té.

6:31  Maye bolingí bato básála bínó, bósála bangó sé bôngó.

6:32  Sókó bolingí bobélé bato baye bakolingaka bínó, ntína níni bátóndo bínó ? Atâ basúmuki bakolingaka bato baye balingí bangó.

6:33  Mpé sókó bosálí malámu na ba­ye basálí bínó malámu, ntína níni bátó­ndo bínó ? Atâ basúmuki bakosálaka bôngó.

6:34  Sókó bokodéfisa mosolo bobélé na baye bakokí kozó­ngisela bínó, ntína níni bátó­ndo bínó ? Atâ basúmuki bakodéfisaka báníngá mosolo na elíkyá ’te bázwa mwangó lisúsu.

6:35  Kasi bínó bólinga bangúná. Bósála bato bánso malámu. Bódéfisa mosolo, atâ elíkyá ’te bázóngisa mwangó ezalí té. Bobélé bôngó bokozwa lifúta linéne, mpé bokozala bána ba Ntá-Likoló, zambí yě akosálaka malámu na bato bakotóndoko yě té mpé na bato babé.

6:36  Bózala motéma ngolu, lokóla Tatá wa bínó azalí motéma ngolu.

6:37  Bósámbisa moto té, bôngó bakosámbisa bínó té. Bókitisa moto té, mpé bakokitisa bínó té. Bólímbisa báníngá mpé bakolímbisa bínó.

6:38  Bópésa báníngá bilóko mpé bakopésa bínó lokóla ; bakotóndisa bikoló bya bínó, bakofina mpé bakoningisa byangó mpô ’te bítónda meké ; zambí na emekeli bokomeka bato basúsu, bakomeka mpé bínó. »

6:39  Alobí na bangó naíno moúlání moye : « Moto wa lolandá akokí ndé kokamba moto musúsu wa lola­ndá ? Bánso bábalé bakokwâ o libúlú té ?

6:40  Moyékoli alekí molakisi wa yě té ; kasi sókó ayébí matéya mánso nyé, akokóma lokóla molakisi wa yě.

6:41  Mpô níni ozalí kotála mwâ litíti likótélí ndeko wa yǒ o líso, kasi libáyá likótélí yǒ mǒkó o líso ozalí komóno liye lyangó té ?

6:42  Bóníbóní okokí koloba na ndeko wa yǒ : ‘Ndeko, tíká nálongola litíti o líso lya yǒ’, kasi ozalí komóno libáyá o líso lya yǒ mǒkó té ? Mokíbisi, longólá libosó libáyá o líso lya yǒ mǒkó, na nsima okomóno malámu mpô ya kolongola litíti o líso lya ndeko wa yǒ.

6:43  Nzeté elámu ekobótaka mbuma ibé té, mpé nzeté ebé ekobótaka mbuma ilámu té.

6:44  Bakoyébaka nzeté na mbuma ya yangó. Bakobúkaka ndé fígi o káti ya nzúbe, mpé mbuma ya víno o káti ya nsé­ndé ?

6:45  Moto malámu azalí na makambo malámu o motéma, mpé akobimisaka makambo malámu. Moto mabé azalí na makambo mabé o motéma, mpé akobimisaka makambo mabé ; mpámba té, monoko mokolobaka maye matóndí o motéma.

6:46  Mpô níni bokotángaka ngáí ‘Mokonzi, mokonzi’, kasi bokotósaka maloba ma ngáí té ?

6:47  Moto nyónso akoyâ epái ya ngáí, akoyóka maloba ma ngáí mpé akokokisa mangó, azalí lokóla náni ? Nakoyébisa bínó !

6:48  Azalí lokóla moto ató­ngí ndáko : libosó atímólí mabelé téé akútí mabángá o nsé, likoló lya mangó atóngísí mabángá ma nsé ma ndáko. Ntángo mbúla enókí makási, ekumbaki eyéí koningisa ndáko êná, kasi ndáko ebúkání té, mpô etóngámí o mabángá.

6:49  Kasi moto ayókí maloba ma ngáí, nzókandé akokísí mangó té, azalí lokóla moto atóngí ndáko ya yě o zélo, atíákí mabángá té. Ntángo mái mayéí míngi mpé ekumbaki eyéí koningisa ndáko, ndáko ebúkání na mbala yǒkó mpé ebébí nyé. »

Chapter 7

7:1  Esílísí Yézu koloba maloba mâná mánso na bato, ayíngélí o Kafárnaum.

7:2  Komandá mǒkó azalákí na mosáli óyo akolingaka míngi. Mosáli ôná azalákí na mpási enéne, alingí ákáta motéma.

7:3  Komandá óyo ayókákí nsango ya Yézu, bôngó atíndélí yě bakóló basúsu ba ba-Yúda bábóndela yě áyâ kobíkisa mosáli wa yě.

7:4  Ekómí bangó epái ya Yézu, babóndélí yě míngi, balobí : « Yě azalí moto malámu, ebongí ósálisa yě,

7:5  zambí alingí ekólo ya bísó míngi, yě moto atóngélí bísó sinagóga. »

7:6  Yézu akeí na bangó elongó. Ekómí yě penepene na ndáko, komandá atíndélí yě báníngá báyébisa yě : « Mokonzi, ómítungisa té ! Nabongí té ’te óyíngela o ndáko ya ngáí.

7:7  Yangó wâná nabángákí koyâ ngáí mǒkó kokútana na yǒ. Kasi lobá mpé mosáli wa ngáí akobíka.

7:8  Atâ nazalí na bakonzi libosó lya ngáí, nazalí mpé na basodá nsima ya ngáí. Sókó nalobí na mǒkó ‘Ke­ndé’, akokende ; na mosúsu ‘Yáká’, akoyâ ; mpé na mosáli wa ngáí ‘Sálá mosálá moye’, akosála mwangó. »

7:9  Eyókí Yézu maloba mâná, aká-mwí na yě. Amíbóngólí epái ya bato bazalákí kolanda yě, alobí : « Nalobí na bínó : Atâ o Israél nakútí naíno moto wa boyambi boye té. »

7:10  Ntángo bato batíndámákí na mokonzi bazóngí o mbóka, bakútí mosáli asílí abíkí.

7:11  Na nsima Yézu akeí o mbóka yǒkó nkómbó ’te Naim. Bayékoli ba yě na bato ebelé bakeí na yě nzelá yǒkó.

7:12  Ekómí bangó penepene na ezibeli ya mbóka, bazwǎ ní na bato bakeí kokunda elengé mobáli, mwána sé mǒkó wa mwásí akúfélí mobáli. Bato ba mbóka ebelé bazalákí kokende na yě elongó.

7:13  Emóní Mokonzi mamá, ayókélí yě mawa mpé alobí na yě : « Tíká kolela. »

7:14  Abelémí mpé asímbí epómba. Bato bamemí ebembe batélémí. Alobí : « Elengé mobáli, nalobí na yǒ : télémé ! »

7:15  Mowéi amífándísí mpé abandí koloba. Yézu azóngísí yě na mamá wa yě.

7:16  Bato bánso bayókí nsómo, bakúmísí Nzámbe, balobí : « Proféta monéne abimí o ntéi ya bísó, Nzámbe ayéí kotála ekólo ya yě. »

7:17  Nsango ya yě epalángání o ekólo ya Yudéa mobimba mpé o mbóka isúsu ya penepene.

7:18  Bayékoli ba Yoáne bayébísí yě mangó mánso. Abéngí bayékoli bábalé,

7:19  atíndí bangó epái ya Mokonzi bátúna yě : « Yǒ ozalí moto óyo asengélí koyâ, tǒ tózila moto mosúsu ? »

7:20  Bangó bakómí epái ya Yézu, balobí na yě : « Yoáne Mobátisi atíndí bísó tótúna yǒ : Yǒ ozalí moto óyo asengélí koyâ, tǒ tózila moto mosúsu ? »

7:21  O ntángo êná Yézu abíkísí bato míngi bazalákí na bokono tǒ na mpási, ná mpé baye bakangémákí na bilímo bibé ; afungólí mpé míso ma bato baíké bazalákí na lolandá.

7:22  Yezu alobí na bayékoli ba Yoáne : « Bókende koyébisa Yoáne maye bomóní mpé boyókí : bato ba lola­ndá bakómí komóno, baténgoli bakó­mí kotámbola, bato ba maba bakómí péto, bato bakúfá matói bakómí koyóka, bawéi basékwí, mpé babóla bazalí koyóka Nsango Elámu.

7:23  Esengo na moto akotúta libakú mpô ya ngáí té. »

7:24  Ntángo bato Yoáne atíndákí bakeí, Yézu abandí koloba na bato mpô ya Yoáne : « O elíkí bokendékí kotála níni ? Monkékélé moningání na mompepe ?

7:25  Bokendékí kotála níni ? Moto alátí bilambá bya nkita ? Wápi ! Baye bakolátaka bilambá kitóko mpé bazalí na bomengo bakofándaka o ndáko ya bakonzi !

7:26  Bôngó bokendékí kotála náni ? Proféta ? Ya sôló sôló, nalobí na bínó : proféta ! Kútu alekí baproféta bánso.

7:27  Mpô ya yě bakomí boye : Tálá natíndí ntóma wa ngáí libosó lya yǒ mpô ’te ábongisela yǒ nzelá.’

7:28  Nalobí na bínó : O ntéi ya bána bánso bamamá babótá, óyo alekí Yoáne na bonéne azalí té. Nzókandé moto wa nsúka o Bokonzi bwa Nzámbe alekí yě na bonéne.

7:29  Bato bánso ná bafútisi mpáko bayókákí Yoáne, bakúlí batísimo na mabóko ma yě, bandimí bôngó bosémbo bwa Nzámbe.

7:30  Kasi ba-Farizéo na batéyi ba Mobéko babóyákí maye Nzámbe alingákí kosála bangó, zambí bakúlákí batísimo ya Yoáne té.

7:31  Bato ba leló baúlání na banáni ? Nápésa ndakisa níni ?

7:32  Bazalí lokóla bána bafándí o esíká yǒkó mpé bazalí kobélelana boye : ‘Tobétélékí bínó mpiólóló, kasi bobínákí té !

7:33  Awa Yoáne Mobátisi ayéí, azalákí kolía mámpa té tǒ komele víno té, mpé bolobí : ‘Azalí na zábolo !’

7:34  Ntángo Mwána wa Moto ayéí, azalákí kolía mpé komele, mpé bolobí : ‘Tálá moto wa lokósó mpé momeli masanga, móníngá wa bafútisi mpáko mpé wa basúmuki !’

7:35  Kasi bwányá bwa Nzámbe bozalí komónono na baye bánso bakondimaka bwangó. »

7:36  Mo-Farizéo mǒkó abéngí Yézu ákende kolía o ndáko ya yě. Yézu akótí o ndáko ya mo-Farizéo mpé akeí kofánda o méza.

7:37  Mwásí mǒkó, óyo ayébání o mbóka lokóla mosúmuki, ayókákí ’te Yézu azalákí kolía o ndáko ya mo-Farizéo ; ayéí na molangi mwa malási.

7:38  Amí­fándísí penepene na makolo ma Yézu ; alelí, bôngó mái ma míso matangélí Yézu o makolo ; apangúsí mangó na nsúki ya yě, azíngí makolo ma Yézu ekópi, mpé asopélí mangó malási.

7:39  Mo-Farizéo óyo abéngákí Yézu amóní yangó, amílobélí : « Sókó moto óyo azalákí proféta, mbele ayébákí mwásí náni asímbí yě, mbele ayébákí ’te azalí mosúmuki ! »

7:40  Yézu alobí na yě : « Simóni, nazalí na mwâ likambo lya koyébisa yǒ. » Yě azóngísi : « Motéyi, lobá. »

7:41  Yézu alobí : « Bato bábalé bazalákí na nyongo ya moto : mǒkó nyongo ya denário nkámá ítáno, mosúsu ya ntúkú ítáno.

7:42  Awa bakokí kofúta nyongo té, nkóló alímbísí bangó bábalé. Bôngó o ntéi ya bangó bábalé náni akolinga yě míngi ? »

7:43  Simóni azó­ngísi : « Nakanísí óyo balímbísí yě nyongo enéne. » Yézu alobí na yě : « Oyanólí malámu. »

7:44  Amíbóngólí epái ya mwásí, alobí na Simóni : « Omóní mwásí óyo ? Nayíngélí o ndáko ya yǒ, mpé opésí ngáí mái ma kosukola makolo té. Kasi yě asukólí mangó na mpízolí ya yě, mpé apangúsí mangó na nsúki ya yě.

7:45  Ozíngí ngáí ekópi té, kasi yě, bandá akótí, atíkí té kozínga makolo ma ngáí.

7:46  Osopélí ngáí mafúta o motó té, nzókandé yě asopélí ngáí malási o makolo.

7:47  Yangó wâná nayébísí yǒ : Masúmu ma yě maíké malímbámí, mpô alakísí bolingi bonéne. Oyo bakolímbisa nyongo eké, akolakisa sé bolingi boké. »

7:48  Na nsima alobí na mwásí : « Masúmu ma yǒ malímbámí. »

7:49  Bato bafándí na yě o méza babandí komítúna : « Moto óyo ndé náni ’te álímbisa masúmu ? »

7:50  Kasi Yézu alobí na mwásí : « boyambi bwa yǒ bobikisi yǒ ; kendé na bobóto. »

Chapter 8

8:1  Na nsima Yézu atámbólí o bingumbá mpé o mbóka iké, mpô ya kotéya mpé kosangela bato Nsango Elámu ya Bokonzi bwa Nzámbe. Ba-zómi na bábalé bazalákí na yě,

8:2  ná básí baye abengánákí bilímo bibé o nzóto, ná baye abíkísí o makono masúsu : María ‘wa Mágdala’, óyo bazábolo nsambo babimákí o nzóto ya yě,

8:3  mosúsu Yoána, mwásí wa Kúza, kapíta wa Eróde, Suzána, na basúsu baíké bazalákí kosálisa Yézu na bayékoli ba yě na bilóko bya bangó.

8:4  Bato míngi baútákí o mbóká í­nso bayéí kosangana epái ya Yézu. Bôngó alobí na bangó moúlání moye :

8:5  « Molóni akeí kolóna mbóto o elanga. Ezalákí yě kobwáka mbóto, mbóto isúsu ikwéí o nzelá ; bato banyatí yangó na makolo ; ndeke ya likoló iléí yangó ínso.

8:6  Mbóto isúsu ikwéí o esíká ya mabángá ; itoí, kasi ikaúkí nokí, zambí izwí mái té.

8:7  Mbóto isúsu ikwéí o káti ya nzúbe ; nzúbe ikólí elongó na mbóto, mpé ibomí yangó.

8:8  Mbóto isúsu ikwéí o mabelé malámu ; itoí, ibótí mbuma nkámá na nkámá. » Elobí yě bôngó, agángí : « Moto azalí na matói ma koyóka, áyóka ! »

8:9  Bayékoli batúní yě ntína ya moúlání moye.

8:10  Yézu alobí na bangó : « Bínó bokokí koyéba mibómbamo mya Bokonzi bwa Nzámbe, kasi bato basúsu bakoyóka bobélé miúlání mpô ’te bátála, kasi bámóno té ; mpé báyóka, kasi bátongolo ntína té. »

8:11  « Bóyóka ntína ya moúlání moye : Mbóto ezalí Liloba lya Nzámbe.

8:12  Bato mpembéni ya nzelá, ezalí baye bayókí, kasi zábolo alo­ngolí Liloba o mitéma mya bangó, mpô ’te báyamba té, bábíka mpé té.

8:13  Bato o esíká ya mabángá, ezalí baye bayókí Liloba, mpé bayambí lyangó na esengo enéne, kasi bazalí na minsisá o mitéma té. Bakoya­mba sé mokolo mǒkó, kasi o ntángo ya mpási bakolembe.

8:14  Mbóto ikwéí o káti ya nzúbe ezalí bato bayókí Liloba, kasi ntángo bakeí, mabánzo, nkita na bisengo bya mokili bikosílisela bangó mpéma. Bakokóma o eleko ya mbuma té.

8:15  Mbóto ikwéí o mabelé malámu, ezalí bato bayókí Liloba na motéma malámu mpé likabo, babómbí lyangó mpé bakobóta mbuma mpô ya moléndé mwa bangó.

8:16  Moto apelísí mwínda, akozipa mwangó na mbéki té, tǒ akotía mwangó o nsé ya mbéto té ; kasi akotía mwangó o etémiseli ya mwínda mpô ’te bato bakótí o ndáko bámóno malámu.

8:17  Mánso mabómbámí sikáwa, makobima o libándá ; mánso malobámí na bonkútú, makoyébana na bato bánso.

8:18  Bôngó bókébaka na ndéngé bozalí koyóka ! Zambí moto óyo azalí na bilóko, bakopésa yě lisúsu ; kasi óyo azalí na bilóko míngi té, bakobótolo yě atâ mwâ elóko eye akanísí ’te azalí na yangó. »

8:19  Mamá na bandeko ba yě bayéí epái ya yě, kasi bakokí kokóma penepene na yě té, mpô bato balekí míngi.

8:20  Bayébísí yě : « Mamá na bandeko ba yǒ bazalí o libándá, balingí komóno yǒ. »

8:21  Kasi yě azóngísí : « Mamá na bandeko ba ngáí bazalí bato baye bakoyóka maloba ma Nzámbe mpé bakokokisa mangó. »

8:22  Mokolo mǒkó Yézu akwélí o bwáto elongó na bayékoli ba yě. Alobí na bangó : « Tókátisa ngámbo ya etíma. » Balongwí o libóngo,

8:23  mpé ntángo bazalákí kokende, Yézu abandí kolála mpongí. Na mbálákáká mompepe mwa ekumbaki mobandí kopepe makási o etíma, mái makótí o bwáto, bôngó bakómí na likáma.

8:24  Bayékoli babelémí na Yézu, balongólí yě o mpongí, balobí : « Motéyi, motéyi, tozalí kokúfa ! » Alamúkí, agángélí mompepe ná mpé mbóngé izalákí kotomboko. Mompepe mokití mpé mái makómí nyê.

8:25  Na nsima alobí na bangó : « Wápi boyambi bwa bínó ? » Kasi bangó bayókí nsómo mpé bakámwí, balobání : « Yě ndé náni ’te átínda mompepe na mbó­ngé bitíndá, mpé yangó izalí kotósa yě ? »

8:26  Basémí o ekólo ya ba-Geraza, etálání na Galiléa.

8:27  Elubwí yě, moto mǒkó wa mbóka êná óyo aka­ngémí na bazábolo, ayéí kokútana na yě. Ut’o kala azalákí koláta bilambá lisúsu té ; azalákí kolála o ndáko té, bobélé o malíta.

8:28  Ntángo amóní Yézu, agángí, amíbwákí o bosó bwa yě, alobí na mongóngó makási : « Yézu mwána wa Nzámbe wa Ntá-Likoló, bísó na yǒ likambo níni ? Nabóndélí yǒ, ónyókolo ngáí té. »

8:29  Alobákí bôngó zambí Yézu atíndákí elímo mbindo ábima o nzóto ya moto ôná. Ya sôló, elímo azalákí kokanga yě mbala míngi ; o ntángo êná bazalákí kokanga yě minyolólo o mabóko mpé o makolo mpô ’te ákíma té ; azalákí kobúka myangó, mpé zábolo azalákí kobénda yě o elíkí.

8:30  Yézu atúní yě : « Nkómbó ya yǒ náni ? » Yě azóngísí : « Limpingá » ; mpô bazábolo baíké bayíngélákí o nzóto ya yě.

8:31  Bazábolo babóndélí Yézu átínda bangó té ’te bázónga o límfelo.

8:32  Etónga enéne ya ngúlu ezalákí kolía o ngómbá kúná. Bazábolo babóndélí Yézu ’te álingisa bangó koyíngela o ngúlu. Yézu alingísí bangó.

8:33  Bôngó bazábolo babimí o nzóto ya moto ôná mpé bayíngélí o nzóto ya ngúlu. Etónga mobimba ebílíngání út’o nsóngé ya ngómbá, ekwéí o etíma mpé ekúfí o mái.

8:34  Emóní bakéngeli ba ngúlu makambo mâná, bakímí mpé bakeí koyébisa mangó na bato ba mbóka mpé o bitúká bya bato ba bilanga.

8:35  Bôngó bato bayéí kotála likambo lisálémákí wâná. Bakómí epái ya Yézu, bakútí moto óyo bazábolo babimákí o nzóto, afándí penepene na Yézu, alátí bilambá mpé akómí lisúsu na mayéle. Nsómo ekangí ba­ngó.

8:36  Baye bamónókí yangó, ba­yébísí bangó bóníbóní moto aka­ngémákí na bazábolo abíkí.

8:37  Ba­to bánso ba ekólo ya ba-Geráza babóndélí Yézu ’te álongwa epái ya bangó, zambí nsómo enéne ekangí bangó. Yézu akwélí o bwáto mpé azóngí.

8:38  Moto óyo bazábolo babimákí o nzóto abóndélí Yézu ákoka kokende na yě, kasi Yézu azóngísí yě, alobí na yě :

8:39  « Zóngá o ndáko ya yǒ, yébísá bato mánso Nzámbe asálí yǒ. » Bôngó moto ôná akeí mpé ayébísí o mbóka mobimba makambo mánso Yézu asálí yě.

8:40  Awa Yézu azóngí, bato ebelé bayambí yě, zambí bánso bazalákí kozila yě.

8:41  Moto mǒkó ayéí, mokonzi wa sinagóga, nkómbó ya yě Yaíro. Akwéí o bosó bwa Yézu, abóndélí yě ’te áyâ o ndáko ya yě.

8:42  Mpámba té, mwána mwásí sé mǒkó wa yě, óyo akokísí mibú sókí zómi na míbalé, azalákí kobunda na liwá. Ntángo Yézu azalákí kokende kúná, bato míngi bazalákí kopúsapúsa yě mpô ya nkaká.

8:43  Mwásí mǒkó azalákí kobéle bokono bwa botangi makilá mbúla zómi na íbalé ; moto mǒkó akokákí kobíkisa yě té.

8:44  Ayéí epái ya nsima mpé asímbí nsóngé ya elambá ya Yézu ; sé o ntángo êná makilá matíkí kotanga.

8:45  Yézu atúní : « Náni asímbí ngáí ? » Awa bánso bawá­ngání, Pétro alobí : « Mokonzi, bato ebelé bazíngí yǒ, bazalí kopúsapúsa yǒ ! »

8:46  Kasi Yézu alobí : « Moto mǒkó asímbí ngáí, nayókí ngúyá ebimí o nzóto ya ngáí. »

8:47  Mwásí amóní ’te akokí kobómba likambo lyangó lisúsu té, akómí kolénge mpé amíbwákí o bosó bwa Yézu. O míso ma bato bánso ayébísí ntína níni asímbákí yě, mpé ndéngé níni abíkí na mbala yǒkó.

8:48  Yézu alobí na yě : « Mwána mwasi, boyambi bwa yǒ bobikisi yǒ ; kendé na bobóto. »

8:49  Ezalákí Yézu naíno koloba, moto mǒkó wa ndáko ya mokonzi wa sinagóga ayéí koyébisa yě : « Mwána mwásí wa yǒ asílí akátí motéma, tíká kotungisa Motéyi. »

8:50  Kasi Yézu ayókí yangó, alobí na Yaíro : « Obánga té, yambá sé boyambi, mwána akobíka. »

8:51  Ekómí Yézu o ndáko, alingí moto mǒkó ákóto elongó na yě té, bobélé Pétro, Yoáne na Yakóbo, mpé tatá na mamá wa mwána.

8:52  Bato bánso bazalákí kolela, mabóko o mitó. Kasi Yézu alobí : « Bótíka kolela, mwána awéí té, azalí sé kolála mpongí. »

8:53  Bangó basekí yě, zambí bayébí malámu ’te mwána awéí.

8:54  Kasi Yézu asímbí mwána na lobóko, abé­ngí yě : « Mwána, télémé ! »

8:55  Mpéma ezóngélí mwána, na mbala yǒkó atélémí. Yézu atíndí ’te bápésa yě biléi.

8:56  Babóti ba yě bakámwí míngi mpenzá, kasi Yézu apekísí bangó ’te báyébisa moto mǒkó té likambo lisálémí wâná.

Chapter 9

9:1  Yézu abéngí bazómi na bábalé, apésí bangó likokí mpé ngúyá ya kobengana bazábolo mpé ya kobíkisa bato ba bokono.

9:2  Atíndí bangó bákende kosangela nsango ya Bokonzi bwa Nzámbe mpé kobíkisa bato.

9:3  Alobí na bangó : « Bókamata elóko ya komeme o nzelá té : língénda té, líbenga té, mámpa té, mbóngo mpé té ; bózala na bilambá bíbalé té.

9:4  Sókó bokótí o ndáko ya moto, bófánda wâná téé mokolo bokolongwa epái ya yě.

9:5  Kasi o bisíká bayambí bínó té, bólongwa o mbóka ya bangó, bópupola mputulú ya makolo ma bínó ; bólakisa bangó bôngó ’te basálí mabé. »

9:6  Bakeí, batámbólí o mbóka ínso ; o bisíká bínso basangélí bato Nsango Elámu mpé babíkísí bato ba bokono.

9:7  Ntángo moyángeli Eróde ayókí makambo mâná mánso, mayéle ma yě matámbólí, mpô bato basúsu bazalákí koloba ’te Yoáne asékwí o bawá.

9:8  Basúsu balobí ’te : « Ezalí Elía moto azóngí », basúsu naíno : « Ezalí mǒkó wa baproféta ba kala asékwí. »

9:9  Kasi Eróde alobí : « Ngáí moto nakátísákí Yoáne motó. Bôngó náni moto óyo nazalí koyóka makambo mâná ? » Yangó wâná Eróde alukí komóno yě.

9:10  Bapóstolo bazóngí mpé bayébísí Yézu maye mánso basálákí. Akeí na bangó o esíká ya kímíá, o nzelá ya mbóka yǒkó nkómbó ’te Betsáida, ázala bobélé na bangó.

9:11  Kasi bato bayébí yangó, balandí yě. Yézu ayambí bangó malámu, asolólí na bangó mambí ma Bokonzi bwa Nzámbe, abíkísí baye basengélákí na libíkí.

9:12  Ekómí mpókwa, ba-zómi na bábalé bayéí koyébisa yě : « Zóngísá bato bákende koluka bisíká bya kolála mpé bilóko bya kolía o mbó­ka mpé o ndáko ya penepene, zambí áwa ndáko ezalí té. »

9:13  Kasi Yézu alobí na bangó : « Bínó mǒkó bópésa bangó bilóko bya kolía. » Bazóngísí : « Tozalí sé na mámpa mátáno mpé na mbísi íbalé. Tǒ olingí tókende kosómbela bato baye bánso bilóko ? »

9:14  Bato bazalákí wâná sókí nkóto ítáno. Yézu alobí na bayékoli : « Bófándisa bangó ; bákabwana mabóké mabóké, libóké lyǒkó lyǒ­kó bato sókí ntúkú ítáno. »

9:15  Bapóstolo basálí bôngó mpé balobí na bato bánso ’te báfánda.

9:16  Na nsima Yézu akamátí mámpa mátáno na mbísi íbalé, atómbólí míso o likoló, abenísí mámpa na mbísi, abúkí yangó mpé apésí bayékoli bákabola yangó na bato.

9:17  Bánso baléí mpé batóndí. Na mintíka balokótí batóndísí bikoló zómi na bíbalé.

9:18  Mokolo mǒkó Yézu azalákí kosámbela yě mǒkó ; bobélé bayékoli bazalákí na yě ; atúní bangó : « Bato bakolobaka ’te ngáí náni ? »

9:19  Bangó bayanólí : « Basúsu bakolobaka ’te ozalí Yoáne Mobátisi, basúsu bakolobaka ’te ozalí Elía ; basúsu naíno bakanísí ’te ozalí mǒkó wa baproféta ba kala asékwí. »

9:20  Atúní bangó : « Kasi bínó bokanísí ’te ngáí náni ? » Pétro azóngísí : « Ozalí Krístu wa Nzámbe. »

9:21  Yézu apekísí bangó ’te báloba yangó na moto mǒkó té.

9:22  Abakísí : « Mwána wa Moto asengélí koyóka mpási míngi. Bakóló ba mbóka, banganga bakonzi na batéyi ba Mobéko bakobóya yě mpé bakoboma yě ; kasi akosékwa nsima ya mikolo mísáto. »

9:23  Na nsima alobí na bato bánso : « Sókó moto alingí kozala moyékoli wa ngáí, átíka kolanda makambo ma yě mǒkó, ámeme kurúse ya yě mokolo na mokolo, mpé álanda ngáí.

9:24  Ya sôló, moto alingí kobíkisa bomoi bwa yě, akobúngisa bwa­ngó ; kasi moto akobúngisa bomoi bwa yě mpô ya ngáí, akobíkisa bwangó.

9:25  Atâ moto azwí mokili mobimba, akozwa litómba níni sókó yě mǒkó abúngámí mpé awéí ?

9:26  Moto akoyóka nsóni mpô ya ngáí mpé mpô ya maloba ma ngáí, Mwána wa Moto akoyóka mpé nsóni mpô ya yě o mokolo akoyâ na nkémbo ya yě, ya Tatá mpé ya bǎnzelú basántu.

9:27  Ya sôló sôló, nalobí na bínó : bato basúsu bazalí áwa bakokúfa té libosó ’te bámóno Bokonzi bwa Nzámbe. »

9:28  Mikolo mwambe nsima ya maloba mâná, Yézu akamátí Pétro, Yoáne na Yakóbo, abutí na bangó ngómbá mpô ya kosámbela.

9:29  Ntángo azalákí kosámbela, elongi ya yě ebóngwání, bilambá bya yě bikómí mpémbé mpenzá.

9:30  Mpé tálá, bato bábalé bayéí kosolola na yě : Móze na Elía.

9:31  Bamímónísí na nkémbo, basolólí na yě bóníbóní akokende ; yangó ndé ekosálema o Yerúzalem.

9:32  Pétro na báníngá bayókí mpongí míngi ; ntángo balamúkí, bamóní nkémbo ya yě, ná bato bábalé batélémí penepene na yě.

9:33  Awa bakómí kotíka yě, Pétro alobí na Yézu : « Motéyi, áwa tozalí malámu ! Bôngó tópika biéma bísáto áwa, yǒkó ya yǒ, yǒkó ya Móze, yǒkó ya Elía. » Ayébí té níni azalí koloba.

9:34  Ezalákí yě koloba bôngó, limpata liyéí kozipa bangó. Ntángo limpata lizipí bangó, bayókí nsómo.

9:35  Loláká loútí o limpata, lolobí : « Oyo azalí Mwána wa ngáí, óyo naponó, bóyóka yě. »

9:36  Awa loláká losílí koloba, bamóní bobélé Yézu yě mǒ­kó. Bayékoli babómbí mpe yangó o mikolo mîná, bayébísí moto mǒkó té likambo bamónókí.

9:37  Mokolo mwa nsima balongwí o ngómbá, bato ebelé bayéí kokútana na Yézu.

9:38  Mpé tálá, moto mǒkó o káti ya bangó abandí kogánga : « Motéyi, nabóndélí yǒ, óbwákela mwána wa ngáí wa mobáli míso ma ngolu, zambí azalí mwána sé mǒkó wa ngáí.

9:39  Sókó elímo akangí yě, na mbala yǒkó mwána akogánga makási, elímo akoningisa yě makási mpé mwána akobimisa mfúlu o monoko ; elímo akonyókolo yě míngi mpé akotíka yě bobélé na mpási mpenzá.

9:40  Nabóndélákí bayékoli ba yǒ ’te bábengana yě, kasi bakokákí té. »

9:41  Yézu azóngísí : « A ! Bínó bato babé, bozángí boyambi. Mikolo bóní naíno názala na bínó mpé nákanga motéma mpô ya bínó ? Yáká na mwána wa yǒ. »

9:42  Mwána azalákí kobeleme, zábolo akwéísí yě o nsé mpé aningísí yě makási. Kasi Yézu agángélí elímo mbindo, abíkísí mwána mpé azóngísí yě o mabóko ma tatá wa yě.

9:43  Bato bánso bakámwí míngi na ngúyá enéne ya Nzámbe. Awa bato bánso bakámwí na maye mánso azalákí kosála, Yézu alobí na bayékoli ba yě :

9:44  « Bótía matói na maloba maye : Bakokaba Mwána wa Moto o mabóko ma bato. »

9:45  Kasi bayókí ntína ya maloba mâná té. Mayéle mafungwání té mpô báyóka ntína ya mangó, mpé babángí kotúna yě.

9:46  Bakómí kowélana ntembe sókó náni o ntéi ya bangó alekí bonéne.

9:47  Kasi Yézu ayébí makanisi ma bangó, abéngí mwána moké, atíí yě penepene na yě,

9:48  alobí na bangó : « Moto ayambí mwána moké óyo mpô ya nkómbó ya ngáí, ayambí ngáí mǒkó ; mpé moto ayambí ngáí, ayambí óyo atíndí ngáí ; zambí moto óyo alekí moké o káti ya bínó, yě azalí moto monéne. »

9:49  Yoáne alobí : « Motéyi, tomónókí moto mǒkó azalákí kobengana bazábolo o nkómbó ya yǒ, tolingákí kopekisa yě, zambí azalí kolanda yǒ té lokóla bísó. »

9:50  Kasi Yézu alobí na yě : « Bópekisa yě té ; moto abóyí bínó té, andimí bínó. »

9:51  Awa ntángo akotómbwama o likoló ekómí penepene, Yézu akání na motéma mǒkó kokende o Yerúzalem ;

9:52  atíndí bantóma libosó lya yě. Bangó bakeí, bakótí o mbóka yǒkó ya Samaría mpô ya koléngele boyéi bwa yě.

9:53  Kasi ba-Samaría bayambí yě té, mpô azalákí kokende o Yerúzalem.

9:54  Ntángo bayékoli Yakóbo na Yoáné bamóní yangó, balobí : « Mokonzi, olingí tó­bênga móto mwa likoló mókita mpé mózíkisa bangó ? »

9:55  Kasi Yézu amíbóngólí epái ya bangó mpé apálélí bangó.

9:56  Mpé bakeí o mbóka esúsu.

9:57  Ezalákí bangó kokende, moto mǒkó alobí na yě : « Nakolanda yǒ bipái bínso okokende. »

9:58  Yézu azó­ngísí : « Gambala ikofándaka o mabúlú mpé ndeke izalí na zúmbu, kasi Mwána wa Moto azalí na esíká ya kolálisa motó té. »

9:59  Alobí na moto mosúsu : « Landá ngáí. » Yě f ayanólí : « Lingísá ngáí nákende libosó kokunda tatá. »

9:60  Kasi Yézu alobí na yě : « Tíká bato bawéí bákunda bibembe bya bawá ba bangó ; kasi yǒ, kendé kosangela bato ’te Bokonzi bwa Nzámbe boyéí. »

9:61  Mosúsu naíno alobí na yě : « Mokonzi, nakolanda yǒ, kasi li­ngísá ngáí nákende kopésa bandeko ba ngáí mbóte ya bokabwani. »

9:62  Yézu alobí na yě : « Moto atíí mabóko o mosálá mpé atálí nsima, abongí na Bokonzi bwa Nzámbe té. »

Chapter 10

10:1  Na nsima Yézu aponí bato basúsu ntúkú nsambo na bábalé, atíndí bangó bábalé bábalé bákende libosó lya yě o mbóka mpé o bisíká bínso asengélí kokende.

10:2  Alobí na bangó : « Mbuma itó­ndí o elanga, kasi basáli bazalí míngi té. Bôngó bóbóndela Nkóló wa elanga átínda basáli bákende bobúka mbuma.

10:3  Bókende ! Ngáí natí­ndí bínó lokóla mpatá o káti ya nkoi.

10:4  Bómeme líbenga té, sáki té, mapápa té. O nzelá bópésa moto mǒkó losáko té.

10:5  Atâ o ndáko níni boyíngélí, bóloba libosó : ‘Bobóto na ndáko eye !’

10:6  Sókó moto wa bobóto azalí wâná, bobóto bwa bínó bokozala na yě ; sókí té, bobóto bokozóngela bínó.

10:7  Bófánda bobélé o ndáko êná, bólía mpé bómele bilóko bakolámbela bínó, zambí ebongí ’te mosáli ázwa lifúta lya yě. Bókóto o ndáko ya bato bikótélá té.

10:8  Sókó bokómí o mbóka yǒkó mpé bayambí bínó malámu, bólía bilóko bakopésa bínó,

10:9  bóbíkisa bato ba bokono bazalí wâná, mpé bóloba na bangó : ‘Bokonzi bwa Nzámbe bokómí penepene’.

10:10  Kasi sókó bokómí o mbóka esíká bayambí bínó té, bókende o balabála mpé bóloba :

10:11  ‘Atâ mputulú ya mbóka ya bínó ekangémí o makolo ma bísó, tokopupola yangó, tokotíkela bínó ; nzókandé bóyéba ’te Bokonzi bwa Nzámbe bokómí penepene’.

10:12  Nalobí na bínó : O Mokolo môná bato ba mbóka eye bakozwa etúmbu ekoleka etúmbu bakopésa bato ba Sódoma.

10:13  Mawa na yó Korazin, mawa na yó Betsáida ! Mpámba té, sókó o Tíro mpé o Sidóni makamwísi masálémákí lokóla maye masálémí epái ya bínó, mbele balátákí ngóto kala, mpé bakendékí kofánda o mputulú mpô ya kolakisa ’te babóngólí mitéma.

10:14  Ya sôló, o Mokolo bakokáta makambo ma bato bánso, etúmbu bakozwa ekoleka etúmbu bakopésa Tíro na Sidóni.

10:15  Mpé yó Kafárnaum, okanísí ’te okotómbwama kín’o likoló ? Okokita kín’o límfelo.

10:16  Moto akoyóka bínó, akoyóka ngáí ; moto akobóya bínó, akobóya ngáí ; mpé moto akobóya ngáí, akobóya Oyo atíndí ngáí. »

10:17  Bayékoli ntúkú nsambo na bábalé bazóngí ; bayókí esengo enéne, balobí : « Mokonzi, atâ bazábolo bakotósaka bísó mpô ya nkómbó ya yǒ ! »

10:18  Yézu alobí na bangó : « Namónókí Sátana akwéí út’o likoló lokóla monkalali.

10:19  Yangó wâná napésí bínó likokí lya konyata nyóka, nkotó ná ngúyá ínso ya Móngúná na makolo ; elóko yǒkó ekokoka kosála bínó mabé té.

10:20  Nzókandé bósepela té zambí bilímo bizalí kotósa bínó, kasi bósepela zambí nkómbó ya bínó ikomámí o likoló. »

10:21  Bobélé o ngonga ênáméí atóndí na Elímo Sántu, mpé agángí na esengo enéne : « Natóndí yǒ, Tatá, Mokonzi wa likoló na nsé, zambí obó­mbélí na bato ba bwányá mpé baye ba mayéle maye oyebisi bato baké. Sôló, Tatá, yǒ mǒkó olingákí bôngó.

10:22  Tatá wa ngáí apésí ngáí mánso. Moto mǒkó té ayébí Mwána, bobélé Tatá ayébí yě. Mpé moto mǒkó té ayébí Tatá, bobélé Mwána ayébí yě, ná mpé moto óyo Mwána alingí koyébisa yě. »

10:23  Na nsima amíbóngólí epái ya bayékolí ba yě, mpé alobí bobélé na bangó : « Esengo na bato bakomóno na míso maye bínó bozalí komóno.

10:24  Nalobí na bínó : Baproféta na bako­nzi baíké balingákí komóno mambí bínó bozalí komóno, kasi bamónókí mangó té ; balingákí koyóka maloba bínó bozalí koyóka, kasi bayókákí mangó té ! »

10:25  Mpé tálá, motéyi mǒkó wa Mobéko atélémí, mpô ya komeka yě atúní yě : « Motéyi, násála níni mpô názwa bomoi bwa lobíko ? »

10:26  Yézu azóngísélí yě : « O búku ya Mobéko bakomí níni ? Okotángaka níni kúná ? »

10:27  Moto ôná ayanólí : « Olinga Mokonzi Nzámbe wa yǒ na motéma mwa yǒ mobimba, na bomoi bwa yǒ mobimba, na makási ma yǒ mánso, mpé na mayéle ma yǒ mánso ; mpé ólinga móníngá lokóla okomílingaka. »

10:28  Yézu alobí : « Oya­nólí malámu, sálá sé bôngó mpé okozala na bomoi. »

10:29  Kasi yě alingí komílóngisa, bôngó atúní Yézu : « Náni azalí móníngá wa ngáí ? »

10:30  Yézu azóngísí : « Moto mǒkó alongwákí o Yerúzalem mpô ya kokende o Yériko, kasi o nzelá bayíbi bakangí yě, babótólí yě bilóko, babétíbétí yě mpé batíkí yě mǒkó kobunda na mpási ya liwá.

10:31  Nganga Nzámbe mǒkó alekí o nzelá êná, amóní yě, kasi akátísí ngámbo ya balabála mpé alekí.

10:32  Sé bôngó mo-Lévi mǒkó ayéí o esíká êná, amóní yě, kasi akátísí ngámbo ya balabála mpé alekí.

10:33  Mo-Samaría mǒkó azalákí na mobémbo, akómí penepene na yě, amóní yě mpé ayókélí yě mawa.

10:34  Abelémí na yě, akangí mpótá ya yě, asopélí yangó mafúta na víno ; na nsima abutísí yě o mpúnda ya yě, akeí kotíka yě o ndáko ya bampaya, mpé asálísí yě malámu.

10:35  Mokolo mwa nsima na ntóngó abimísí denário íbalé, apésí nkóló wa ndáko, alobí na yě : ‘Sálísá yě malámu ! Mosolo mosúsu okobimisa naíno, ngáí mǒkó nakozóngisela yǒ mwa­ngó o ntángo nakozónga.’

10:36  Okanísí níni : O ntéi ya bangó básáto náni amílakísí móníngá wa moto óyo akwéyákí o mabóko ma bayíbi ? »

10:37  Motéyi wa Mobéko azóngísí : « Oyo ayókélí yě ngolu. » Yézu alobí na yě : « Kendé, yǒ mpé sálá sé bôngó. »

10:38  Ezalákí bangó kokende, Yézu ayíngélí o mbóka yǒkó. Mwásí mǒkó, nkómbó ’te Márta, ayambí yě o ndáko ya yě.

10:39  Azalákí na ndeko mwásí nkómbó ’te María. María ayéí kofánda pene na makolo ma Mokonzi mpô ya koyóka maloba ma yě.

10:40  Márta azalákí komípésa na mosálá mwa kolámba. Ayéí kotúna Yézu : « Mokonzi, ondimí sôló ’te ndeko wa ngáí atíkélí ngáí misálá mínso ? Lobá na yě ’te ásálisa ngáí. »

10:41  Kasi Mokonzi azóngísélí yě : « Márta, Márta, ozalí komítungisa mpé komíyókisa mpási na makambo maíké.

10:42  Nzókandé sé likambo lyǒkó lizalí na ntína enéne. María aponí eye elekí malámu, mpé bakobótolo yě yangó té. »

Chapter 11

11:1  Mokolo mǒkó Yézu azalákí kosámbela. Awa asílísí, mǒkó wa bayékoli alobí na yě : « Mokonzi, lakísá bísó kosámbela lokóla Yoáne alakísákí bayékoli ba yě. »

11:2  Yézu alobí na bangó : « Ntángo bokosámbela, bóloba boye : Tatá, bato bákúmisa nkómbó ya yǒ, Bokonzi bwa yǒ bóyâ ;

11:3  Pésá bísó mokolo na mokolo biléi bikokí ;

11:4  Límbísá masúmu ma bísó, zambí bísó mǒkó tokolímbisa báníngá nyongo. Sálísá bísó tóndima masénginyá té. »

11:5  Yézu abakísí : « Sókó mǒkó wa bínó azalí na móníngá mpé o káti ya butú akeí kosénge yě : ‘Ndeko, défísá ngáí mámpa másáto,

11:6  zambí móníngá mǒkó aútí mobémbo ayélí ngáí, mpé nazalí na elóko ya kopésa yě té’.

11:7  Bôngó mosúsu o káti ya ndáko azóngísí : ‘Tíká kotungisa ngáí, nasílí nakangí ndáko, bísó na bána tolálí ; nakokí kotéleme té mpô ya kopésa yǒ yangó’.

11:8  Nalobí na bínó : Atâ atélémí té mpô ápésa yě yangó mpô azalí móníngá, akotéleme mpô ya motungisi mwa yě, mpé akopésa yě mánso masengélí na yě.

11:9  Yangó wâná nalobí na bínó : Bósénge mpé bakopésa bínó, bóluka mpé bokozwa, bóbétele ndáko mpé bakofungolela bínó.

11:10  Zambí moto akosénge, bakopésa yě, óyo akoluka, akozwa ; óyo akobétele ndáko, bakofungolela yě.

11:11  Tatá náni o káti ya bínó (akopésa mwána wa yě libángá, sókó mwána aséngí límpa ? Náni) akopésa mwána nyóka sókó aséngí mbísi ?

11:12  Náni akopésa yě nkotó sókó mwána aséngí líki ?

11:13  Bôngó sókó bínó bato babé boyébí kopésa bána ba bínó bilóko bilámu, ntembe té, Tatá wa bínó o likoló akopésa Elímo Sántu na baye baséngí yě ! »

11:14  Yézu abengání zábolo o nzóto ya moto mǒkó akolobaka té. Awa zábolo abimí, moto azalákí ebúbú abandí koloba. Bato bakámwí míngi.

11:15  Kasi basúsu balobí : « Akobenganaka zábolo na ngúyá ya Bélzebul, mokonzi wa bazábolo. »

11:16  Basúsu, mpô ya komeka yě, baséngí yě álakisa elembo eútí o likoló.

11:17  Kasi yě ayébí makanisi ma bangó, alobí : « Sókó bato ba mokonzi mǒkó bakabwání, bokonzi bwa yě bokokúfa mpé ndáko yǒkó yǒkó ekobúkana.

11:18  Sókó Sátana ayókání té na bato ba yě f mǒkó, bóníbóní bokonzi bwa yě bokokí koúmela ? Bínó bolobí ’te nakobenganaka bazábolo na ngúyá ya Bélzebul.

11:19  Bôngó sókó ngáí nabengání bazábolo na makasi ma Bélzebul, bána ba bínó bakobenganaka bangó na ngúyá ya náni ? Bangó mǒkó bakokitisa bínó.

11:20  Kasi sókó nabengání bazábolo na mosapi mwa Nzámbe, boye­ba ’te Bokonzi bwa Nzámbe bokómélí bínó.

11:21  Sókó elombé akokéngeleke ndáko ya yě na bibuneli, bilóko bya yě bínso bibómbámí malámu.

11:22  Kasi sókó moto mosúsu ayéí, óyo alekí yě na bokási, mpé alóngí yě, akobótolo yě bibuneli, biye azalákí kotía motéma, akokabola bilóko bínso abótólókí yě.

11:23  Moto azalí na ngáí motéma mǒkó té, azalí mongúná wa ngáí ; moto akosangisa bilóko na ngáí té, akopanza byangó.

11:24  Sókó elímo mbindo abimí o nzóto ya moto, akokende kolekaleka o bilíkí kolukaka esíká ya kopéma. Sókó azwí esíká ya kopéma té, akoloba : ‘Malámu názónga o ndáko nabimákí’.

11:25  Ntángo akómí kúná, akokúta ndáko basílí bakómbí mpé babongísí malámu.

11:26  Bôngó akokende kobênga báníngá nsambo balekí yě na bobé ; na nsima bakoyâ mpé bakozala wâná. Nsúka ya moto óyo, ekozala mabé, leká libosó. »

11:27  Ezalákí Yézu koloba bôngó, mwásí mǒkó o káti ya bato atómbólí mongóngó, alobí : « Esengo na mamá óyo amemékí yǒ o libumu, mpé anúngísákí yǒ mabéle ! »

11:28  Kasi yě ayanólí : « Nzókandé esengo elekí na bato bakoyókaka matéya ma Nzámbe mpé bakotósaka mangó ! »

11:29  Awa bato baíké bayéí kozínga yě, abandí koloba : « Bato ba eleko eye bazalí bato babé ; balingí komóno elembo, kasi bokolakisa bangó elembo esúsu té, bobélé eye ya proféta Yona.

11:30  Lokóla Yona azalákí elembo o míso ma bato ba Niníve, Mwána wa Moto akozala elembo o míso ma bato ba leló.

11:31  O Mokolo mwa Likambo mokonzi mwásí wa Saba akotéleme elongó na bato ba leló, mpé akokitisa bangó. Mpámba té, aútákí mosíká mpô ’te áyóka bwányá bwa Salomó. Kasi moto azalí áwa alekí Salomó !

11:32  O Mokolo mwa Likambo bato ba Niníve bakotéleme elongó na bato ba leló, mpé bakokitisa bangó. Mpámba té, bangó babóngólákí mitéma mpô ya matéya ma Yona. Kasi moto azalí áwa alekí Yona !

11:33  Moto mǒkó té akopelisa mwínda, mpé akotía mwángó o esíká ya kobómbama, tǒ o nsé ya eboka. Kasi akotía mwangó o etémiseli ya mwínda, mpô ’te bato bakoyíngela o ndáko bámóno malámu.

11:34  Líso lya yǒ lizalí mwínda mwa nzóto ya yǒ. Sókó líso lizalí malámu, nzóto mobimba ekozala na mwínda. Kasi sókó líso likómí kobéle, nzóto mobimba ekozala na molílí.

11:35  Yangó wâná kébá ’te mwínda o nzóto ya yǒ mózíma té.

11:36  Sókó nzóto ya yǒ mobimba ezalí na mwínda, mpé atâ ndámbo etíkálí o molílí té, ekongenge lokóla mwínda mokolakisaka yǒ polélé. »

11:37  Esílísí Yézu koloba, mo-Farizéo mǒkó abéngí yě áyâ kolía o ndáko ya yě. Yézu ayíngélí mpé akeí kofánda o méza.

11:38  Mo-Farizéo akámwí ntángo amóní ’te Yézu asukólí mabóko té libosó lya kolía.

11:39  Kasi Mo­konzi alobí na yě : « Bínó ba-Farizéo bokosálaka boye : Bokosukolaka nkéni na sǎ ni epái ya libándá, kasi epái ya káti bínó mǒkó botóndí na mpósá ya mosolo mpé na mayéle mabé.

11:40  Bozángí mayéle ! Oyo asálí libándá lya elóko, asálí yangó mpé epái ya káti té ?

11:41  Bókabela babóla biye bizalí o káti, bôngó bínso bikokómela bínó péto.

11:42  Mawa na bínó, ba-Farizéo : bokofútaka eténi ya zómi ya lumbálumbá, ya biloló mpé ya ndúnda isúsu, kasi bozángí bosémbo na bolingi Nzámbe. Bókokisa libosó makambo maye, kasi bóbósana masúsu té.

11:43  Mawa na bínó, ba-Farizéo : bolingí kofánda o kíti ya libosó o sinagóga, bolingí bato bápésa bínó losáko o zándo.

11:44  Mawa na bínó, zambí bozalí lokóla malíta mazalí na elembo yǒkó té, bôngó bato bakonyata mangó, zambí bayébí té ! »

11:45  Mǒkó wa batéyi ba Mobéko alobí na yě : « Motéyi, áwa olobí bôngó, ofíngí mpé bísó lokóla. »

11:46  Yézu ayanólí : « Mawa na bínó lokóla, batéyi ba Mobéko, zambí bokomemisaka bato míkúmbá milekí bozitó, kasi bínó mǒkó bokosímbaka myangó atâ na mosapi té !

11:47  Mawa na bínó bato bokotóngelaka baproféta malíta, nzókandé bankóko ba bínó bato babomáká bangó !

11:48  Bondimí bôngó makambo ma bankóko ba bínó : bangó babomáká baproféta, mpé bínó botó­ngélí bangó malíta.

11:49  Yangó wâná Nzámbe alobákí na Bwányá bwa yě : Nakotíndela bangó baproféta na bapóstolo ; bakoboma basúsu mpé bakonyókolo basúsu.

11:50  Mpé bôngó bakosámbisa bato ba leló mpô ya makilá ma baproféta bánso masopání út’o libandela lya mokili,

11:51  bandá makilá ma Abel téé makilá ma Zakaría, óyo babomáká o Témpelo penepene na altáre. Ya sôló sôló, nalobí na bínó : mpô ya mangó bakosámbisa bato ba leló.

11:52  Mawa na bínó, batéyi ba Mobéko, zambí bolongólí lifungóla lya ndáko ya Bwányá. Bínó mǒkó bokótí té, mpé bato balingákí kokóto, bopekísí bangó ! »

11:53  Elongwí yě wâná, batéyi ba Mobéko na ba-Farizéo bakómí koyókela yě nkándá enéne, mpé kotúna yě mitúna mya kwókósó ndéngé na ndéngé.

11:54  Batíélí yě mitámbo mpô ’te bákanga yě atâ na liloba lyǒkó liútí o monoko mwa yě.

Chapter 12

12:1  O ntángo êná bato nkóto na nkóto basangání wâná, etíkálí moké bányata báníngá na makolo. Yézu abandí koloba na bayékoli ba yě : « Bókéba na nkísi ya mámpa ya ba-Farizéo, bazalí bakíbisi.

12:2  Mánso mabómbámí makomónono : mánso masálémí na bo­nkútú makoyébana.

12:3  Yangó wâná mánso bokoloba na molílí makoyókana na mói ; mpé mánso bokoloba o litói lya moto o esíká ya bonkútú, bakosakola mangó o mitóndo mya ndáko.

12:4  Nalobí na bínó, báníngá ba ngáí : Bóbánga té bato bakokí koboma nzóto, kasi na nsima bakokí kosála elóko té.

12:5  Nakoyébisa bínó náni bosengélí kobánga : bóbánga Oyo akokí koboma bato, mpé na nsima akokí kobwáka bangó o límfelo. Ya sôló, nayébísí bínó : bóbánga Yě !

12:6  Bakotékeke ndeke iké ítáno na motúya moké té ? Mpé Nzámbe akobósana atâ mǒkó wa bangó té.

12:7  Asílí atángí atâ nsúki ya bínó. Bóbánga té : bínó bolekí ndeke na motúya, atâ izalí ebelé !

12:8  Nalobí na bínó : Moto akondima ngáí o míso ma bato, Mwána wa Moto akondima yě o míso ma bǎ­nzelú ba Nzámbe.

12:9  Kasi moto akowángana ngáí o míso ma bato, bakowángana yě o míso ma bǎnzelú ba Nzámbe.

12:10  Moto akofínga Mwá­na wa Moto, akozwa bolímbisi, kasi óyo akotúka Elímo Sántu, akozwa bolímbisi té.

12:11  Mokolo bakokamba bínó o sinagóga, epái ya bakóló ba mbóka mpé bazúzi, bómítungisa té ndéngé níni bokomílóngisa tǒ níni bokoloba,

12:12  zambí Elímo Sántu moto akolakisa bínó o ntángo êná níni bosengélí koloba. »

12:13  Moto mǒkó o káti ya bato alobí na Yézu : « Motéyi, lobá na ndeko wa ngáí tókabola lisangó tatá atíkélí bísó. »

12:14  Alobí na yě : « Ndeko, náni atíí ngáí zúzi wa bínó tǒ mokaboli wa bilóko bya bínó ? »

12:15  Na nsima alobí na bato : « Bókéba na mpósá ya nkita ! Mpámba té, atâ moto azalí na bilóko míngi, bome­ngo bwa yě bokobíkisa bomoi bwa yě té. »

12:16  Bôngó alobí na bangó moúlání moye : « Moto wa nkita azalákí na bilanga bibótélí yě mbuma míngi.

12:17  Amítúní : ‘Násála níni ? Nazalí na esíká ya kobómba mbuma yangó té.’

12:18  Na nsima amílobélí : ‘Nakosála boye : nakobúka bibómbelo bya ngáí, nakotónga bibómbelo bilekí bonéne. Kúná nakobómba mbuma ya ngáí ya mámpa ná bilóko bisúsu.

12:19  Bôngó nakoloba o káti ya motéma : Ozalí na nkita enéne ekokí na mbúla míngi ; pémá, melé mpé sepélá.’

12:20  Kasi Nzámbe alobí na yě : ‘Zóba, na butú bwa lelóméí bakoyâ kokamata molímo mwa yǒ. Bôngó bilóko obómbí, náni akozwa bya­ngó ?’

12:21  Ekosálema sé bôngó na moto akolukaka kozwa nkita ya yě mǒkó, kasi azángí nkita o míso ma Nzámbe. »

12:22  Na nsima alobí na bayékoli ba yě : « Yangó wâná nalobí na binó : mpô ya bomoi bwa bínó bózala motéma likoló likoló té sókó bokolía níni, mpé mpô ya nzóto ya bínó sókó bokoláta níni,

12:23  zambí bomoi bolekí biléi, mpé nzóto elekí bilambá.

12:24  Táláni yángánga ! Ikolónaka té, ikobúkaka mbuma té mpé izalí na ndáko tǒ na ebómbelo té, nzókandé Nzámbe akoléisaka yangó. Bínó bolekí ndeke na motúya mbala bóní !

12:25  Náni o ntéi ya bínó, atâ amítungísí ndéngé níni, akokí kobakisela bomoi bwa yě atâ mokolo mǒkó ?

12:26  Bôngó sókó mwâ likambo liké lilekí bokási bwa bínó, mpô níni bozalí komítungisa na makambo masúsu ?

12:27  Táláni ndéngé fuléle ikokólaka ! Ikosálaka mosálá mwa ntonga mpé mwa kosono bilambá té ; kasi nayébísí bínó, atâ Salomó na nkémbo ya yě ínso, azalákí koláta lokóla yangó té.

12:28  Sókó Nzámbe akolátisaka matíti o bilanga kitóko boye, maye mazalí leló kasi makobwákema o móto lóbí, ntembe té, akolátisa bínó malámu leká naíno. Bínó bato ba boyambi boké !

12:29  Bínó mpé bótíka komítúnaka níni bokolía mpé bokomele ; bózala motéma likoló té.

12:30  Bapagáno, bato ba nsé eye, bamítungisaka na bilóko bîná bínso. Tatá wa bínó ayébí malámu ’te bosengélí na byangó.

12:31  Bóluka libosó Bokonzi bwa yě, bôngó bilóko bîná bínso ndébabakísélí bínó.

12:32  Bínó, etónga eké ya mpatá, bóbánga té. Tatá wa bínó alingí kopésa bínó Bokonzi bwa yě.

12:33  Bótéke bilóko bya bínó mpé bópésa babóla mosolo. Bósála mábenga makobéba té ; bóluka kozwa nkita ya sékô o likoló. Kúná bayíbi bakokí kokóto té, mpé mbombó ikolía yangó té.

12:34  Esíká nkita ya bínó ezalí, mitéma mya bínó mikozala mpé wâná.

12:35  Bókanga nkámba o lokéto, mpé mwínda mwa bínó mópela ntángo ínso.

12:36  Bósála lokóla bato bazalí kozila mokonzi wa bangó akoúta o limpáti lya libála, mpô ’te báfungolela yě nokí o ntángo akoyâ mpé akobétele ndáko.

12:37  Esengo na basáleli, baye mokonzi akokúta bazalí kokéngele. Ya sôló sôló, nalobí na bínó : akokanga nkámba o lokéto, akofándisa bangó o méza, mpé akopésa bangó mǒkó mǒkó biléi.

12:38  Atâ ayéí o káti ya butú, atâ na nsósó ya yambo, esengo na bangó sókó akokúta bangó bazalí koké­ngele !

12:39  Bóyéba likambo liye malámu : Sókó nkóló wa ndáko ayébákí o ngonga níni moyíbi akoyâ, mbele apekísákí yě kobúka ndáko.

12:40  Bínó lokóla, bózala na bokéngi, zambí Mwána wa Moto akoyâ o ntángo bínó bokokanisa té. »

12:41  Pétro atúní yě : « Mokonzi, olobí moúlání moye mpô ya bísó tǒ mpô ya bato bánso ? »

12:42  Mokonzi alobí : « Náni mosáleli malámu mpé wa mayéle, óyo mokonzi akotía kapíta wa bato ba ndáko ya yě, mpô ’te ápésa bangó bilóko o ntángo ekokí ?

12:43  Esengo na mosáleli óyo, sókó mokonzi akútí yě azalí kosála bôngó !

12:44  Ya sôló sôló, nalobí na bínó : akotía yě moyángeli wa bilóko bya yě bínso.

12:45  Kasi sókó mosáleli óyo amílobélí o motéma ’te : ‘Mokonzi wa ngáí akoúmela naíno’, mpé abandí kobéte basáli babáli na básí, kolía, komele mpé kolángwa,

12:46  mokonzi wa yě akoyâ o mokolo akokanisa té, mpé o ntángo akoyéba té. Akolongola yě o mosálá mpé akosálá na yě lokóla na basáli babé.

12:47  Sókó mosáleli ayébí maye mokonzi wa yě alingí, kasi aléngélí elóko té, mpé atósí mokonzi wa yě té, bakobéte yě míngi.

12:48  Kasi sókó mosáleli ayébí té maye mokonzi wa yě alingí, nzókandé akokí na etú­mbu mpô asálí mabé, bakobéte yě míngi té. Bakosénge bilóko míngi na moto óyo bapésákí míngi. Bakosénge míngi koleka na moto óyo batíákí mokéngeli wa bilóko míngi.

12:49  Nayéí kotía móto o nsé, mpé nalingí míngi mpenzá mópela no­kí.

12:50  Nasengélí kokúla batísimo, mpé kín’o mokolo nakokúla yangó nakozala koyóka nsómo mpenzá !

12:51  Bokanísí ’te nayélí bato bobóto ? Elóko té ! Nalobí na bínó : Nayéí kokabola bato.

12:52  Ya sôló, út’o leló bato bátáno o ndáko yǒkó bakokabwana : básáto epái, bábalé epái, mpé bábalé epái, básáto epái :

12:53  tatá akoyókana na mwána mobáli wa yě té, mamá akoyókana na mwána mwásí wa yě té ; bokiló akoyókana té na mwásí óyo mwána wa yě abálí, mpé mwásí akoyókana na bokiló wa yě té. »

12:54  Alobí lisúsu na bato : « Ntángo bomóní limpata libandí kobuta epái mói mokokitaka, bokoloba ’te mbúla ekonóko ; mpé ekosálema bôngó.

12:55  Mpé ntángo mompepe mozalí koúta epái ya Súdi, bokoloba ’te mói mokongala makási ; mpé ekosálema bôngó.

12:56  Bakíbisi, boyébí ntína ya bilembo bikomónonoko o nsé mpé o likoló, bôngó ndéngé níni bobúngí ntína ya maye makosálema o eleko eye ?

12:57  Mpô níni bínó mǒkó bokokí kokáta makambo na bosémbo té ?

12:58  Sókó okeí na moto kosámba epái ya zúzi, ómeka koyókana na yě o nzelá, sókí té akokaba yǒ o mabóko ma zúzi. Mbele zúzi akokaba yǒ na basodá, baye bakobwáka yǒ o bolóko.

12:59  Nalobí na yǒ : okobima wâná té libosó ’te ófúta nyongo mobimba. »

Chapter 13

13:1  Bobélé o ntángo êná bato basúsu bayéí koyébisa yě maye makwêlákí bato ba Galiléa. Piláto abomísákí bangó ntángo bazalákí kobonzela Nzámbe mibómá.

13:2  Yézu alobí na bangó : « Awa basálí bangó bôngo, bokanísí ’te masúmu ma bangó malekí masúmu ma ba-Galiléa basúsu bánso ?

13:3  Nalobí na bínó : Elóko té ! Kasi sókó bobóngólí mitéma té, bínó bánso bokokúfa sé ndéngé yǒkó.

13:4  Mpé bato zómi na mwambi bakúfákí mpô linóngi lya Silowe likwêlákí bangó, bokanísí ’te mabé ma bangó malekí mabé ma bato basúsu ba Yerúzalem ?

13:5  Nalobí na bínó : Elóko té ! Kasi sókó bobóyí kobó­ngola mitéma, bínó bánso bokokúfa sé ndéngé yǒkó. »

13:6  Alobí na bangó naíno moúlání moye : « Moto mǒkó alónákí nzeté ya fígi o elanga ya yě ya víno. Ayéí koluka mbuma, kasi azwí té.

13:7  Alobí na mosáli wa elanga : ‘Tálá, mbúla ísáto nakoyáka koluka mbuma o nzeté eye, kasi nazwí té. Kátá yangó. Mpô níni ésílisa lisúsu makási ma mabelé ?’

13:8  Kasi moto ôná azóngísí : ‘Mokonzi, tíká yangó naíno mbúla eye, bôngó názwa ntángo ya kotímola mabelé zóngazónga na nzeté mpé ya kotía bipolú.

13:9  Mbele ekobóta mbuma nsima… Sókí té, okokáta yangó’. »

13:10  Yézu azalákí kotéya o sinagóga o mokolo mwa sábato.

13:11  Mwásí mǒkó azalákí wâná, ekómí mbúla zómi na mwambi elímo yǒkó aka­ngí yě mpé abélísí yě. Mokongo mwa yě mogúmbámí, akokí kosémbola nzóto sókí té.

13:12  Yézu amóní yě, abéngí yě, alobí : « Mwasi, bokono bwa yǒ bosílí ».

13:13  Atíélí yě mabóko ; sé o ntángo êná mwásí asémbólí nzóto mpé akúmísí Nzámbe.

13:14  Kasi mokonzi wa sinagóga ayókí mabé, mpô Yézu abíkísí moto o mokolo mwa sábato, alobí na bato : « Mikolo motóbá tokokí kosála mosálá ; bôngó sókó bolingí kobíka, bóyâ o mikolo mîná, kasi o mokolo mwa sábato té. »

13:15  Yézu azóngísélí yě : « Bakíbisi ! O mokolo mwa sábato bínó bánso bokoka­ngola ngómbé tǒ mpúnda té mpô ya kokende komelisa yangó mái ?

13:16  Tálá mwána óyo wa Abaráma. Sátana asílákí kokanga yě ekómí mbúla zómi na mwambe ; bôngó bákáta nsinga eye o mokolo mwa sábato té, sôló ? »

13:17  Elobí yě bôngó, bangúná ba yě bánso bayókí nsóni, kasi bato bánso basepélí mpô ya makambo manéne mánso yě asálí.

13:18  Yézu alobí : « Bokonzi bwa Nzámbe bozalí lokóla níni ? Nápésa ndakisa níni ?

13:19  Bozalí lokóla mbóto ya sénevé moto mǒkó akamátí mpé alóní o elanga ya yě. Ekólí, ekómí nzeté, mpé ndeke iyéí kosála zúmbu o bitápi bya yangó. »

13:20  Alobí lisúsu : « Bokonzi bwa Nzá­mbe boúlání na níni ? Nápésa ndakisa níni ?

13:21  Boúlání na nkísi ya mámpa mwásí mǒkó akamátí ; asa­ngísí yangó na sǎ ni ísáto ya fufú ya mámpa. Nkísi evímbísí fufú îná í­nso. »

13:22  Ezalákí Yézu kokende o Yerúzalem, azalákí kotéya o bingumbá mpé o mbóka ínso alekákí.

13:23  Moto mǒkó atúní yě : « Mokonzi, bato bakobíka bakozala míngi té ? » Alobí na bangó :

13:24  « Bósála makási mpô ya kokóto epái ya ezibeli eké. Nalobí na bínó : bato baíké bakomeka kokóto, kasi bakokoka té.

13:25  Ntángo nkóló wa ndáko akotéleme mpô ya kokanga ndáko, bôngó bínó bokotíkala o libándá, bokobanda kobétele ezibeli ya ndáko mpé koloba : ‘Mokonzi, fungólélá bísó’, akozó­ngisela bínó : ‘Nayébí té esíká boútí.’

13:26  Bôngó bínó bokoloba : ‘Bísó tolíákí mpé tomelékí na yǒ esíká yǒkó ; otéyákí matéya o mbóka ya bísó.’

13:27  Kasi yě akozóngisa : ‘Nayébí té esíká bínó boútí, bólongwa epái ya ngáí, bínó bánso, makambo ma bínó mazángí bosémbo !’

13:28  Ntángo bokomóno Abaráma, Izáka, Yakób na baproféta bánso o Bokonzi bwa Nzámbe, kasi bakobwáka bínó o libándá, bokolela mpé bokolía míno.

13:29  Bato bakoúta epái ya Esti, Wésti, Nórdi na Súdi, mpé bakofánda o méza ya Bokonzi bwa Nzámbe.

13:30  Ya sôló, basúsu bazalí bato ba nsima bakokóma bato ba libosó, basúsu bazalí bato ba libósó, bakokóma bato ba nsima. »

13:31  Bobélé o ntángo êná ba-Farizéo basúsu bayéí koyébisa yě : « Lo­ngwá áwa mpé kendé epái esúsu, zambí Eróde alingí kobomisa yǒ. »

13:32  Alobí na bangó : « Bókende koyébisa gambala êná ’te leló mpé lóbí nakobengana bazábolo mpé nakobíkisa bato ba bokono, kasi nsima ya mwâ mikolo nakosúkisa mosálá mwa ngáí !

13:33  Nzókandé leló, lóbí mpé ndéle nasengélí kokóba nzelá ya ngáí, zambí ebongí té ’te proféta ákúfa o libándá lya Yerúzalem.

13:34  Yerúzalem, Yerúzalem ! Yǒ moto okobomaka baproféta mpé oko­bwákelaka bato baye batíndélí yǒ mabángá ! Mbala bóní nalingákí kosangisa bána ba yǒ, lokóla nsósó akosangisaka bána ba yě o nsé ya mapapú, kasi olingákí té !

13:35  Tálá, mbóka ya yǒ ekotíkala sé mpá­mba ! Nayébísí bínó : Bokomóno ngáí lisúsu té kín’o mokolo bokoloba : Lokúmu na óyo akoyâ o nkómbó ya Mokonzi ! »

Chapter 14

14:1  Mokolo mǒkó mwa sábato Yézu akeí kolia o ndáko ya mǒkó wa bakonzi ba ba-Farizéo. Bangó bazalákí kokénge yě.

14:2  Moto mǒkó azalákí kobéle bokono boye bokotóndisa nzóto na mái azalákí penepene na yě.

14:3  Yézu atúní batéyi ba Mobéko na ba-Farizéo : « Bakokí kobíkisa moto o mokolo mwa sábato, tǒ té ? »

14:4  Kasi bangó balobí elóko té. Yézu asímbí moto wa bokono, abíkísí yě mpé atíkí yě ákende.

14:5  Na nsima alobí na bangó : « Náni o ntéi ya bínó, sókó mwána tǒ ngómbé ya yě ekwéí o libúlú akobimisa yě nokí té, atâ o mokolo mwa sábato ? »

14:6  Kasi bakokákí koyanola yě elóko té.

14:7  Awa amóní bóníbóní bato ba­byángémí o limpáti bazalákí ko­pono bisíká bya lokúmu, alobí na bangó moúlání moye :

14:8  « Sókó babéngí yǒ o limpáti lya libála, óke­nde kofánda o esíká ya lokúmu té ; mbele moto abéngí yǒ, abéngí mpé moto mosúsu óyo alekí yǒ na lokúmu.

14:9  Bôngó moto abéngí bínó bábalé akoyâ koloba na yǒ : ‘Tíkélá yě esíká eye’, bôngó yǒ okoyóka nsóni mpé okokende kofánda o esíká ya nsúka.

14:10  Kasi sókó babéngí yǒ o limpáti, kendé kofánda o esíká ya nsúka ; bôngó ntángo moto abéngí yǒ akoyâ koloba na yǒ : ‘Ndeko, yáká kofánda o esíká ya libosó’, okozwa lokúmu o míso ma bato bánso babyángémí o limpáti.

14:11  Zambí moto akomítómbola, bakokitisa yě ; mpé moto akomíkitisa, bakotómbola yě. »

14:12  Na nsima alobí na moto abéngí yě o limpáti : « Sókó obéngí bato o limpáti na midí tǒ na mpókwa, óbênga báníngá, bandeko tǒ bato ba libótá lya yǒ té, bato ba nkita mpé té baye bafándí penepene na yǒ. Mbele bangó mpé bakobênga yǒ lokóla, mpé bakozóngisela yǒ maye osálákí bangó.

14:13  Kasi sókó olámbí limpáti, bêngá babóla, bato bakúfá makolo, baténgoli na bato ba lolandá.

14:14  Bôngó okozala na esengo, zambí bangó bakokí kozóngisela yǒ yangó té. Bakozóngisela yǒ yangó o mokolo bato ba bosémbo bakosékwa. »

14:15  Elobí yě bôngó, mǒkó wa baye bazalákí na yě o méza alobí na yě : « Esengo na moto akolía limpáti o Bokonzi bwa Nzámbe ! »

14:16  Yézu alobí na yě : « Moto mǒkó alámbí limpáti linéne mpé abéngí bato baíké.

14:17  Ekokí ntángo ya kolía, atíndí mosáleli wa yě áloba na bato ba­byángémí : ‘Yákáni, basílísí kolá­mba !’

14:18  Kasi bangó bánso babandí komílóngisa sé ndéngé yǒkó ’te bakokí koyâ té. Moto wa libosó alobí : ‘Nasómbí elanga, nalingí nákende kotála yangó ; nabóndélí yǒ, límbísá ngáí’.

14:19  Mosúsu alobí : ‘Nasómbí ngó­mbé zómi, nakeí komeka yangó ; nabóndélí yǒ, límbísá ngáí’.

14:20  Mosúsu alobí : ‘Nabálí bobélé sikáwa, yangó wâná nakokí koyâ té.’

14:21  Mosáleli azóngí mpé ayébísí mokonzi wa yě mangó. Mokonzi asilíkí, alobí na mosáleli : ‘Kendé nokí o zándo mpé o balabála ya mbóka : yáká kokótisa babóla na bato ba eléme, bato ba lolandá na baténgoli áwa.’

14:22  Mosáleli alobí : ‘Mokonzi, basálí lokóla otíndákí, kasi ndáko etóndí naíno té’.

14:23  Mokonzi alobí na mosáleli : ‘Kendé o balabála iké mpé o nzelá iké, kótísá bato na makási, bôngó ndáko ya ngáí étónda.

14:24  Nalobí na bínó : mǒkó té wa baye babyángémákí akolía limpáti lya ngáí’. »

14:25  Bato ebelé bazalákí kokende na yě nzelá yǒkó. Amíbóngólí epái ya bangó, alobí :

14:26  « Sókó moto ayéí epái ya ngáí, kasi aponí ngáí té libosó lya tatá, mamá, mwásí, bána na bandeko ba yě babáli na básí, atâ libosó lya bomoi bwa yě mǒkó, moto óyo akokí kozala moyékoli wa ngáí té.

14:27  Moto amemí kurúse ya yě té mpé alandí ngáí té, akokí kozala moyékoli wa ngáí té.

14:28  Náni o káti ya bínó sókó alingí kotónga linóngi, libosó akofánda té mpô ya koyéba mosolo bóní mosengélí na mosálá môná mpé mpô ya kotála sókó akokoka kosílisa mwa-ngó ?

14:29  Sókí té, áwa akosílisa kotía mabángá ma nsé, kasi akokí kosílisa mosálá té, bato bánso bakomóno bôngó bakoseke yě,

14:30  bakoloba : ‘Tálá moto abandákí kotónga linó­ngi, kasi akókí kosílisa lyangó té !’

14:31  Tǒ mokonzi wa ekólo, sókó alingí kobunda na mokonzi mosúsu, libo­só akofánda té mpô ya kotála sókó na basodá nkóto zómi akokí kobunda na mokonzi óyo azalí na basodá nkóto ntúkú íbalé ?

14:32  Sókó akokí té, akotíndela yě bantóma ntángo azalí naíno mosíká mpô ’te báyókana.

14:33  Sé bôngó : óyo o káti ya bínó abóyí bilóko bya yě bínso té, akokí kozala moyékoli wa ngáí té.

14:34  Móngwa mozalí elóko elámu, kasi sókó o móngwa bokénzú bosílí, bakokí kozóngisela mwangó bokénzú na níni ?

14:35  Yangó ezalí lisúsu na ntína té mpô ya mabelé tǒ mpô ya bipolú, bôngó bakobwáka yangó o libándá. Moto azalí na matói ma koyóka, áyóka ! »

Chapter 15

15:1  Bafútisi mpáko na basúmuki bánso bayéí epái ya Yé­zu mpô ya koyóka yě.

15:2  Ba-Farizeó na batéyi ba Mobéko basilíkí, balobí : « Akoyambaka basúmuki malámu, mpé akolíaka na bangó esíká yǒkó ! »

15:3  Yangó wâná Yézu alobí na bangó moúlání moye :

15:4  « Sókó mǒkó wa bínó azalí na mpatá monkámá, mpé mpatá yǒkó ebúngámí, akotíka mpatá ntúkú libwǎ na libwǎ o esóbé té mpô áke-nde koluka mpatá eye ebúngámí, téé akozwa yangó ?

15:5  Sókó azwí, akomeme yangó o mapéke na esengo enéne.

15:6  Ekómí yě o ndáko, akobênga báníngá mpé bato bafándí penepene na yě, akoloba na bangó : ‘Bósepela na ngáí elongó, zambí nazwí mpatá eye ebúngámákí.’

15:7  Nalobí na bínó : Sé bôngó o likoló bakoyóka esengo mpô ya mosúmuki mǒkó abóngólí motéma ; esengo êná ekoleka eye bakoyóka mpô ya basémba ntúkú libwǎ na libwǎ basengélí kobóngola mitéma té.

15:8  Tǒ mwásí náni azalí na mbóngo bibendé zómi, sókó abúngísí yǒkó, akopelisa mwínda té mpé akokó­mbo ndáko té mpô áluka malámu, téé akozwa yangó ?

15:9  Ntángo akozwa yangó, akobênga báníngá mpé básí bafándí penepene na yě, akoloba na bangó : ‘Bósepela na ngáí elo­ngó, zambí nazwí ebendé ya mosolo eye ebúngákí !’

15:10  Nalobí na bínó : Bǎnzelú ba Nzámbe bakosepela sé bôngó mpô ya mosúmuki mǒkó abóngólí motéma. »

15:11  Alobí naíno : « Moto mǒkó azalákí na bána babáli bábalé.

15:12  Mwána wa nsima alobí na tatá : ‘Tatá, pésá ngáí ndámbo ya bilóko ekokí na ngáí.’ Tatá akabólélí bangó bilóko bya yě.

15:13  Nsima ya mwâ mikolo, mwána ôná akangí bilóko bya yě bínso, akeí o ekólo mosíká ; kúná abébísí mosolo mwa yě na bisengo bya mokili.

15:14  Esílísí yě bilóko bínso, nzala enéne ekwêlí ekólo êná, abandí kokélela.

15:15  Akeí kobanda mosálá epái ya moto wa ekólo êná. Oyo atíndí yě ákéngele ngúlu o lopángo la yě.

15:16  Ayókí mpósá ya kolía atâ mposo ya mbuma iye ngúlu ikolíaka, kasi moto mǒkó apésí yě té.

15:17  Bôngó abandí kokanisa, amílobélí : ‘Basáli baíké ba tatá bazalí na biléi míngi, mpé ngáí nazalí kokúfa na nzala áwa.

15:18  Nakozónga epái ya tatá wa ngáí, nakoloba na yě : Tatá, nasálí mabé o miso ma Nzámbe mpé o miso ma yǒ.

15:19  Nabongí kotángema mwána wa yǒ lisúsu té, kasi kamátá ngáí lokóla mǒkó wa basáli ba yǒ.’

15:20  Bôngó atélémí mpé azóngí epái ya tatá. Ezalákí yě naíno mosíká, tatá amóní yě, ayókí mawa míngi. Akeí mbá­ngu koyamba yě mpé azíngí yě ekópi.

15:21  Mwána alobí na yě : ‘Tatá, nasálí Nzámbe mabé, nasálí yǒ mpé mabé. Nabongí kotángema mwána wa yǒ lisúsu té.’

15:22  Kasi tatá alobí na basáli : ‘Bóyâ nokí na monkóto molekí kitóko, bólátisa yě ; bótíela yě mpété o mosapi, bólátisa yě bikótó o makolo.

15:23  Bóyâ na mwána wa ngómbé mafúta, bóboma yangó, tólía mpé tósepela,

15:24  zambí mwána wa ngáí óyo akúfákí azóngí na bomoi ; abúngámákí, azwǎ mí.’ Baba­ndí kolía limpáti.

15:25  Mwána wa libosó azalákí o bilanga. Ntángo azóngí, akómí penepene na ndáko mpé ayókí bato bazalákí kobéte mizíki mpé kobína.

15:26  Abéngí mosáli mǒkó, atúní yě ntína ya yangó.

15:27  Mosáli ayébísí yě : ‘Ndeko wa yǒ azóngí, tatá abomísí mwána wa ngómbé mafúta, zambí azwí yě nzóto kólóngónú.’

15:28  Yě asilíkí míngi mpé abóyí kokóto o ndáko. Tatá abimí mpé abóndélí yě.

15:29  Kasi alobí na tatá : ‘Tálá, ngáí nasálélí yǒ mbúla míngi. Atâ mbala yǒkó té nabóyí kotósa yǒ, nzókandé mokolo mǒkó té opésí ngáí mwána wa ntaba mpô ’te násepela elongó na báníngá.

15:30  Kasi áwa mwána wa yǒ óyo ayéí, óyo abébísí mbóngo na bandúmbá, obomélí yě mwána wa ngómbé mafúta !’

15:31  Kasi tatá alobí na yě : ‘Mwána wa ngáí, ntángo ínso ozalí epái ya ngáí, mpé bilóko bya ngáí bínso bizalí mpé bya yǒ.

15:32  Sikáwa tosengélí kolía limpáti mpé kosepela, zambí ndeko wa yǒ óyo akúfákí, azóngí na bomoi ; abúngámákí mpé azwǎ­mí’. »

Chapter 16

16:1  Na nsima Yézu alobí na bayékoli ba yě : « Moto mǒkó wa nkita azalákí na kapíta ; kasi bayéí kofúnda kapíta óyo ’te azalákí kobébisa bilóko bya yě.

16:2  Abéngí kapíta, alobí na yě : ‘Nazalí koyóka níni ? Lakísá ngáí mosálá osálí, zambí okokí kozala kapíta lisúsu té’.

16:3  Kapíta amílobélí : ‘Násála níni, áwa mokonzi akolongola ngáí o mosálá ? Kokáta bilanga, nazalí na makási té ! Koséngeke bato bilóko, nsóni míngi…

16:4  Nayébí níni nakosála mpô ’te, ntángo bakolongola ngáí o mosálá, bato basúsu báya­mba ngáí o ndáko ya bangó’.

16:5  Abéngí mǒkó mǒkó wa bato bazalákí na nyongo ya mokonzi wa yě. Atúní óyo wa libosó : ‘Ozalí na nyongo ya mokonzi wa ngáí bóní ?’

16:6  Azóngísí : ‘Pípa ya mafúta monkámá.’ Alobí na yě : ‘Kamátá monka­ndá mwa nyongo, fándá mpé komá nokí : ntúkú ítáno.’

16:7  Atúní mosúsu : ‘Yǒ ozalí na nyongo bóní ?’ Oyo alobí : ‘Sáki ya masángú monkámá’. Alobí na yě : ‘Kamátá monkandá mwa nyongo mpé komá : ntúkú mwa­mbe’.

16:8  Mokonzi akúmísí kapíta óyo azángí bosémbo, mpô abongísí likambo na mayéle. Ya sôló, o makambo na báníngá bato ba nsé eye balekí bána ba mwínda na mayéle.

16:9  Mpé ngáí nayébísí bínó : Elóko ekokómisaka moto moyíbi, ndé mosolo, bínó bóluka kozwa na mwa­ngó bandeko, mpô ’te bangó báyamba bínó o biéma bya lobíko mokolo mosolo mokozánga.

16:10  Moto azalí na bosémbo o makambo maké, azalí mpé na bosémbo o makambo manéne. Mpé moto azángí bosémbo o makambo maké, azángí mpé bosémbo o makambo manéne.

16:11  Bôngó sókó mpô ya mosolo, elóko ekokómisaka moto moyíbi, bozalí na bosémbo té, náni akopésa bínó bomengo bwa sôló ?

16:12  Sókó bozalí na bosémbo té na bilóko bya moto mosúsu, náni akopésa bínó bilóko bya bínó mǒkó ?

16:13  Mosáli mǒkó té akokí kosálela bakonzi bábalé : tǒ akobóya mǒkó mpé akolinga mosúsu, tǒ akolanda mǒkó mpé akokínola mosúsu. Bokokí kosálela ná Nzámbe ná mosolo té. »

16:14  Ba-Farizéo bazalákí kolinga mbóngo míngi ; eyókí bangó maloba mâná mánso, basekí yě.

16:15  Alobí na bangó : « Bínó mpenzá bokomílakisaka lokóla bato ba bosémbo o míso ma bato, kasi Nzámbe ayébí mitéma mya bínó. Elóko ya lokúmu o míso ma bato, Nzámbe akoyóka yangó mpi.

16:16  Tozalákí na búku ya Mobéko mpé na minkandá mya baproféta téé ntángo Yoáne ayákí. Ut’o ntángo êná bakosangelaka Bokonzi bwa Nzá­mbe, mpé bato bánso bakosálaka makási mpô ya kokóto kúná.

16:17  Atâ likoló na nsé ikoleka, nkomá atâ yǒkó ekokí kolongwa o Mobéko té.

16:18  Moto óyo abengání mwásí wa yě mpé abálí mosúsu, asálí bokáli. Moto abálí mwásí óyo mobáli wa yě abengání, asálí bokáli.

16:19  Ezalákí moto mǒkó wa nkita. Azalákí koláta bilambá kitóko bya motúya monéne. Mokolo na mokolo azalákí kolía malámu mpenzá.

16:20  Mobóla mǒkó, nkómbó ’te Lazáro, azalákí kobéla makwánza o nzóto mobimba ; azalákí kolála pene na ezibeli ya ndáko ya yě.

16:21  Azalákí koyóka mpósá ya biléi bikwéí o nsé ya méza ya moto wa nkita, kasi mbwá kaka izalákí koyâ koléte mpótá ya yě.

16:22  Mokolo mobóla awéí, bǎnzelú bamemí yě penepene na Abaráma. Moto wa nkita mpé awéí, bakundí yě.

16:23  O mbóka ya bawá anyókwámí míngi. Atálí likoló, amóní Abaráma mosíká, ná mpé Lazáro afándí penepene na yě.

16:24  Agángí : ‘Tatá Abaráma, yókélá ngáí mawa. Tíndá Lazáro átía nsóngé ya mosapi o mái mpé átangisa mangó o lolému la ngáí ; bôngó mpási ékita atâ mwâ moké ; nazalí konyó­kwama míngi o móto moye.’

16:25  Kasi Abaráma ayanólí : ‘Mwána, kanísá ’te ozwákí bomengo ntá­ngo ya bomoi bwa yǒ o nsé, kasi Lazáro azalákí sé koyóka mpási. Sikáwa yě azalí kozwa libóndí, mpé yǒ ozalí konyókwama.

16:26  Kanísá mpé : Káti ya bísó na bínó libúlú linéne lizalí, mpô ’te baye balingí kolongwa áwa mpé kokóma epái ya bínó, bákoka té ; moto mǒkó álongwa mpé kúná té mpô ya kokóma epái ya bísó.’

16:27  Moto wa nkita alobí : tatá, naséngí yǒ, tíndá Lazáro o ndáko ya tata na ngai,

16:28  zambí nazalí na bandeko babáli bátáno. Akende kokébisa bangó, mpô ’te bangó mpé bákóma o esíká eye ya minyóko té.’

16:29  Abaráma azóngísí : ‘Bazalí na mibéko mya Móze mpé na minkandá mya baproféta, báyóka bangó.’

16:30  Kasi yě alobí : ‘Yangó ekokí té, tatá Abaráma ; kasi sókó mǒkó wa baye bawá akeí epái ya bangó, bakobóngola mitéma.’

16:31  Kasi Abaráma alobí : ‘Sókó balingí koyóka Móze na baproféta té, ba­ko­ndima mpé moto óyo asékwí o bawá té’. »

Chapter 17

17:1  Yézu alobí na bayékoli ba yě : « Bisímbisi bikokí kozánga té, kasi mawa na moto akopésa bisímbisi !

17:2  Elekí malámu bákanga yě libángá linéne o nkíngó, liye bakoníkaka na lyangó mbuma ya mámpa, mpé bábwáka yě o mbú ; bôngó ápésa mǒkó wa bána baye baké esímbisi té.

17:3  Bómíkéngele malámu ! Sókó ndeko wa yǒ asálí yǒ mabé, pálélá yě ; mpé sókó ayókí motéma mawa, límbísá yě.

17:4  Atâ asálí yǒ mabé mbala nsambo o mokolo mǒkó, lí­mbísá yě sókó azóngí mbala nsambo epái ya yǒ mpé alobí : ‘Nayókí motéma mawa’. »

17:5  Bapóstolo balobí na Mokonzi : « Léndísá boyambi bwa bísó ! »

17:6  Mokonzi ayanólí : « Sókó bozalákí atâ na mwâ boyambi, boké lokóla mbóto ya sénevé, mbele bolobí na nzeté êná : ‘Omípikola mpé kendé kopikama o mbú !’, mpé nzeté ekotósa bínó.

17:7  Náni o ntéi ya bínó, sókó azalí na mosáli óyo akokátaka bilanga tǒ akokéngeleke bibwélé, akoloba na yě ntángo aútí o bilanga : ‘Yáká nokí kofánda o méza’ ?

17:8  Akoloba na yě té ’te : ‘Lámbélá ngáí bilóko, látá elambá ya mosálá mpé sálélá ngáí ntángo nazalí kolía mpé komele. Na nsima yǒ mpé okolía mpé okomele’ ?

17:9  Asengélí ndé kotóndo mosáli ôná, zambí asálí maye atíndákí yě ?

17:10  Bínó sé bôngó : Sókó bosálí mánso batíndí bínó, bóloba : ‘Tozalí sé basáleli, tosálí maye tosengélákí kosála’. »

17:11  Awa Yézu azalákí kokende o Yerúzalem, akátísí ndelo ya Samaría na Galiléa.

17:12  Ekótí yě o mbóka yǒkó, bato zómi bazalákí na maba bayéí kokútana na yě. Batélémí mwâ mosíká,

17:13  bagángí : « Yézu, motéyi, yókélá bísó mawa. »

17:14  Awa Yézu amóní bangó, alobí : « Bókende komílakisa na banganga Nzámbe. » Ntángo bakómí kokende, bapétwámí.

17:15  Mǒkó wa bangó, áwa amóní ’te apétwámí, azóngí mpé akúmísí Nzámbe na mongóngó makási.

17:16  Akwéí elongi o nsé o bosó bwa Yézu mpé atóndí yě. Nzókandé azalákí mo-Samaría.

17:17  Yézu atúní : « Bangó bánso zómi bakómí péto té ? Bôngó wápi basúsu libwǎ ?

17:18  Bobélé mompaya óyo azóngí mpô ya kokúmisa Nzámbe ? »

17:19  Alobí na yě : « Télémé, kendé, boyambi bwa yǒ bobíkísí yǒ. »

17:20  Ba-Farizéo batúní yě mokolo níni Bokonzi bwa Nzámbe boko­yâ. Azóngísí : « Boyéi bwa Bokonzi bwa Nzámbe bokokí komónono na míso té.

17:21  Báloba té ’te ‘Tálá bokonzi bokómí áwa, tǒ : bokómí kúná !’, zambí Bokonzi bwa Nzámbe bozalí o ntéi ya bínó. »

17:22  Alobí na bayékoli : « Mokolo mosúsu bokoyóka mpósá ya komóno Mwána wa Moto, atâ mokolo mǒkó mpámba, kasi bokomóno yě té.

17:23  Bakoloba na bínó : ‘Tálá yě óyo ! Tálá yě kúná !’ Bókende kúná té, bólanda bangó kúná nokí té.

17:24  Lokóla monkalali mokoútaka epái yǒkó ya likoló mpé mokongengeke kín’o epái esúsu, ekozala sé bôngó na Mwána wa Moto o mokolo akoyâ.

17:25  Kasi libosó asengélí koyóka mpási míngi mpé kobóyama na bato bazalí sikáwa.

17:26  Lokóla esálémákí o mikolo mya Nowé, ekozala mpé bôngó o mikolo Mwána wa Moto akoyâ.

17:27  Bato bazalákí kolía, komele, kobálana, téé mokolo Nowé ayíngélí o masúwa. Na nsima mpela eyéí, ebomí bangó bá­nso.

17:28  Esálémákí sé bôngó o mikolo mya Lot ; bato bazalákí kolía, komele, kosómba, kotéke, kolóna, kotónga ndáko ;

17:29  kasi mokolo Lot abimákí o Sódoma, Nzámbe anókísí mbúla ya móto ezíkísí bangó, ebomí bangó bánso.

17:30  Ekozala bobélé bôngó o mokolo Mwána wa Moto akomónono.

17:31  O mokolo môná, moto akozala o motóndo mwa ndáko, kasi bilóko bya yě bizalí o ndáko, ákita té mpô ya kokamata byangó : bobélé bôngó na óyo akozala o bilanga : ázónga o ndáko té.

17:32  Bókanisa mwásí wa Lot !

17:33  Moto akoluka kobíkisa bomoi bwa yě, akobúngisa bwangó ; kasi óyo akobúngisa bomoi bwa yě, akobíkisa bwangó.

17:34  Nalobí na bínó : o butú bôná bato bábalé bakolála o mbéto yǒkó, bakokamata mǒkó mpé bakotíka mosúsu.

17:35  Básí bábalé bakoníka fufú esíká yǒkó, bakokamata mǒkó mpé bakotíka mosúsu. » (

17:36  )

17:37  Bayékoli batúní yě : « Mokonzi, ya­ngó ekosálema wápi ? » Alobí na bangó : « Esíká ebembe ya nyama ezalí, bi­ngondó bikosangana mpé wâná. »

Chapter 18

18:1  Na moúlání mǒkó alakísí bangó ’te basengélí kosá­mbela ntángo ínso mpé bálembe té :

18:2  « Ezalákí o mbóka yǒkó zúzi mǒ­kó. Azalákí kobánga Nzámbe té, mpé komemya bato té.

18:3  Ezalákí mpé o mbóka êná mwásí akúfélí mobáli. Azalákí koyâ mbala míngi epái ya zúzi kobóndela yě : ‘Likambo nazwí na mongúná, kátélá ngáí lyangó na bosémbo !’

18:4  Mikolo míngí zúzi abóyí kondimela yě. Na nsima amílobélí : ‘Nakobá­ngaka Nzámbe té, mpé nakome­myaka bato té, sôló,

18:5  kasi mwásí óyo akúfélí mobáli azalí kotungisa ngáí míngi. Tíká nákátela yě likambo na bosémbo, sókí té akotíka kotungisa ngáí té !’ »

18:6  Mokonzi abakísí : « Bóyóka maloba ma zúzi óyo azángí bosémbo.

18:7  Bôngó Nzámbe akolóngisa baponomi ba yě té sókó babóndélí yě butú mói ? Azilisa ndé kondimela bangó ?

18:8  Nalobí na bínó ’te akolóngisa bangó nokí. Kasi mokolo Mwána wa Moto akoyâ akokúta ndé bato ba boyambi o mokili ? »

18:9  Mpô ya bato bakokanisaka ’te bazalí bato ba bosémbo mpé ba­kokínolaka bato basúsu, alobí moúlání moye :

18:10  « Bato bábalé bakeí kosámbela o Témpelo : mǒkó mo-Farizéo, mosúsu mofútisi mpáko.

18:11  Mo-Farizéo atélémí mpé asámbélí boye o motéma : ‘Mokonzi, natóndí yǒ, zambí nazalí lokóla bato basúsu té ; bazalí bayíbi mpé bakósi, bakokosálaka bokáli ; nazalí mpé lokóla mofútisi mpáko óyo té.

18:12  Póso na póso nakolálaka nzala mbala íbalé, mpé nakotíkaka biténi bya zómi bya bilóko bya ngáí bínso.’

18:13  Mofútisi mpáko atélémí mwâ mosíká, abángí atâ kotómbola míso o likoló, akitísí motó o nsé, alobí : ‘E Nzámbe, yókélá ngáí mosúmuki mawa !’

18:14  Nalobí na bínó : Moto óyo wa nsima azóngí o ndáko na motéma sémba, mosúsu té ; zambí moto akomítómbola akokita, moto akomíkitisa akotómbwama. »

18:15  Bayéí na bána baké mpenzá epái ya yě mpô ’te ásímba bangó. Bayékoli bamóní bôngó, bapekísí bangó.

18:16  Kasi Yézu abéngí bangó epái ya yě, alobí : « Bótíka bána baké báyâ epái ya ngáí, bópekisa bangó té, zambí bato baúlání na bangó bakoyíngela o Bokonzi bwa Nzámbe.

18:17  Ya sôló sôló, nalobí na bínó : Moto akoyamba Bokonzi bwa Nzámbe lokóla mwána moké té, akoyíngela wâná té. »

18:18  Nkúmú mǒkó atúní yě : « Motéyi malámu, násála níni mpô ’te nákóma o bomoi bwa lobíko ? »

18:19  Yézu alobí na yě : « Mpô níni obéngí ngáí moto malámu ? Moto mǒkó té azalí malámu, bobélé Nzámbe.

18:20  Oyébí mibéko : Osála bokáli té, óboma moto té, óyíba té, ózala nzénénéké wa lokutá té, ómemya tatá na mamá. »

18:21  Azóngísí : « Bandá bomwána nakotósaka mibéko mîná mínso. »

18:22  Eyókí Yézu bôngó, alobí : « Sé mpô yǒkó ezángí yǒ : kendé kotéke bilóko bya yǒ bínso mpé kabélá babóla ; okozala na nkita enéne o likoló ; na nsima yáká mpé landá ngáí. »

18:23  Eyókí yě maloba mâná, akómí na mawa míngi, zambí azalákí na bilóko ebelé.

18:24  Emóní Yézu bôngó, alobí : « Bato bazalí na bilóko míngi, bakoyí­ngela o Bokonzi bwa Nzámbe bobélé na mpási.

18:25  Mpô ’te mokulu mwa nsúki ya kaméla móleka o lilusú lya ntonga ezalí mpási sôló, kasi mpô ’te moto wa nkita áyíngela o Bokonzi bwa Nzámbe, elekí mpási. »

18:26  Baye bayókí yangó balobí : « Bô­ngó náni akokí kobíka ? »

18:27  Alobí na bangó : « bato bakokí na likambo liye té, sôló ; kasi likambo lyǒkó lilekí Nzámbe na bokási té. »

18:28  Na nsima Pétro alobí : « Tálá, bísó totíkí bínso mpô tólanda yǒ ! »

18:29  Yézu alobí na bangó : « Ya sôló sôló, nalobí na bínó : moto atíkí ndáko, mwásí, bandeko, babóti tǒ bána ba yě mpô ya Bokonzi bwa Nzámbe,

18:30  akozwa bilóko bilekí míngi áwa o nsé ; mpé na nsima akozwa bomoi bwa lobíko. »

18:31  Na nsima abéngí ba-zómi na bábalé mpembéni, alobí na bangó : « Tozalí kokende o Yerúzalem. Mánso baproféta bakomí mpô ya Mwána wa Moto, makosálema.

18:32  Bakokaba yě o mabóko ma bapagáno, bakoseke yě, bakofínga yě, bakobwákela yě nsóí,

18:33  bakobéte yě fímbo mpé bakoboma yě ; kasi nsima ya mikolo mísáto akosé­kwa. »

18:34  Kasi bangó batongólí mangó atâ moké té. O míso ma bangó maloba mangó mazalákí polélé sókí té ; maye alobákí, bayókí ntína ya mangó té.

18:35  Ntángo Yézu akómí penepene na Yériko, moto akúfá míso afándí o mpembéni ya nzelá koséngeke makabo.

18:36  Awa ayókí ’te bato míngi bazalákí koleka, atúní bato ntína ya yangó.

18:37  Bayébísí yě ’te Yézu wa Nazaréte azalákí koleka.

18:38  Bôngó agángí : « Yézu, Mwána wa Davídi, yókélá ngáí mawa ! »

18:39  Bato bazalákí kotá­mbola o libosó bapálélí yě, balobí ’te ákanga monoko ; kasi yě aléndísí kogánga makási : « Mwána wa Davídi, yókélá ngáí mawa ! »

18:40  Yézu atélémí mpé atíndí ’te báyâ na yě. Awa akómí penepene, Yézu atúní yě :

18:41  « Olingí násálisa yǒ na níni ? » Alobí : « Mokonzi, námóno lisúsu. »

18:42  Yézu alobí na yě : « Omóno lisúsu ; boyambi bwa yǒ bobíkísí yǒ. » Mpé na mbala yǒ kó akómí komóno, alandí Yézu mpé akúmísí Nzámbe.

18:43  Bato bánso bamóní bôngó, bakúmísí Nzámbe.

Chapter 19

19:1  Ekómí Yézu o Yériko, akátísí mbóka.

19:2  Ezalákí wâná moto mǒkó nkómbó ’te Zakéo ; yě mokonzi mǒkó wa bafútisi mpáko mpé moto wa nkita.

19:3  Alukí komóno Yézu, áyéba sókó yě azali náni ; kasi akokí komóno yě té, mpô azalákí mokúsé mpé bato balekí míngi.

19:4  Bôngó akeí mbángu o libosó mpé abutí nzeté ya fígi mpô ’te ámóno Yézu o ntángo akoleka wâná.

19:5  Ekómí Yézu o esíká yangó, atálí o likoló mpé alobí na yě : « Zakéo, kitá nokí, leló nasengélí kozala o ndáko ya yǒ. »

19:6  Zakéo akití nokí mpé ayambí yě na esengo.

19:7  Emóní bato bôngó, bánso basilíkí, balobí : « Bóní, akeí kokóto o ndáko ya mosúmuki ! »

19:8  Kasi Zakéo abelémí mpé alobí na Mokonzi : « Mokonzi, nakokabela babóla ndámbo ya bilóko bya ngáí bínso. Mpé sókó nayíbákí bilóko bya bato na mayéle, nakozóngisa yangó mbala ínei. »

19:9  Yézu alobí na yě : « Libótá liye lizwí libíkí leló, zambí yě mpé azalí mwána wa Abaráma.

19:10  Ya sôló, Mwána wa Moto ayéí koluka mpé kobíkisa bato babúngámákí. »

19:11  Awa bazalákí koyóka yangó, Yézu abakísí naíno moúlání moye, zambí azalákí penepene na Yerúzalem, mpé bato bakanísí ’te Bokonzi bwa Nzámbe bokomónono nokí.

19:12  Bôngó alobí : « Nkúmú mǒkó akeí o ekólo mosíká mpô ya kozwa bokonzi, na nsima ázónga.

19:13  Abéngí basáleli ba yě zómi, apésí bangó mǒ­kó mǒkó ‘mina’ yǒ kó, mpé alobí na bangó : ‘Bósála na yangó mombóngo téé mokolo nakozó­nga.’

19:14  Kasi bato ba ekólo ya yě bazalákí koyina yě, bôngó batíndí bantóma nsima ya yě báyébisa ’te : ‘Tolingí té ’te moto óyo ázala mokonzi wa bísó.’

19:15  Awa azwí bokonzi, azóngí mpé abéngísí basáleli baye apésákí mosolo, áyéba mbakisa eye mǒkó mǒkó azwí.

19:16  Moto wa yambo ayéí, alobí : ‘Mokonzi, mina ya yǒ ebótí mina zómi.’

19:17  Mokonzi alobí na yě : ‘Osálí malámu, ozalí mosáleli wa sôló. Okoyá­ngela mbóka zómi, mpô omílakísí moto wa bosémbo o makambo maké.’

19:18  Mosúsu ayéí, alobí : ‘Mokonzi, mina ya yǒ ebótí mina ítáno.’

19:19  Alobí na yě : ‘Yǒ okoyángela mbóka ítáno.’

19:20  Mosúsu ayéí, alobí : ‘Mokonzi, tálá mina ya yǒ, nabómbákí yangó o káti ya elambá.

19:21  Nazalákí ko­bánga yǒ, zambí ozalí na míso makási : okokamataka bilóko esíká obó­mbákí byangó té ; okobúkaka mbuma esíká olónákí yangó té.’

19:22  Mokonzi alobí : ‘Yó mosáleli mabé ! Nakokwêisa yó mpô ya maloba ma yó mǒkó. Oyébákí ’te nazalí míso makási : nakokamataka bilóko esíká nabómbákí byangó té ; mpé nakobúkaka mbuma esíká nalónákí yangó té.

19:23  Mpô níni obómbákí mosolo mwa ngáí o bánki té ? Mbele nakamátákí mwangó mokolo nazó­ngí, ná mbakisa lokóla.’

19:24  Mpé alobí na bato bazalákí wâná : ‘Bóbótolo yě mina ya yě, bópésa yangó na moto óyo azalí na mina zómi.’

19:25  Balobí na yě : ‘Mokonzi, yě azalí na mina zómi !’

19:26  Azóngísí : ‘Nalobí na bínó : óyo azalí na bilóko, bakobakisela yě lisúsu ; kasi óyo azalí na bilóko míngi té, bakobótolo yě atâ mwâ elóko ezalí na yě.

19:27  Bôngó bangúná ba ngáí, baye balingákí té ’te názala mokonzi wa bangó, bóyâ na bangó áwa mpé bókáta bangó nkíngó o míso ma ngáí !’ »

19:28  Esílísí Yézu koloba bôngó, atá­mbólí libosó lya bangó mpô ya kokende o Yerúzalem.

19:29  Ekómí yě penepene na Betfáge mpé na Betánia, epái ya ngómbá ya Olíva, atíndí bayékoli ba yě bábalé, alobí na bangó :

19:30  « Bóke­nde o mbóka bozalí komóno kúná. Ntángo bokokóma, bokomóno mwána wa mpúnda eka­ngémí wâná, moto mǒkó abutélí yangó naíno té. Bóka­ngola yangó mpé bóyâ na yangó áwa.

19:31  Sókó batúní bínó : ‘Mpô níni bozalí koka­ngola yangó ?’, bokoloba : ‘Mokonzi asengélí na yangó’. »

19:32  Baye batíndámí bakeí mpé bakútí mánso lokóla alobákí na bangó.

19:33  Ntángo bazalákí kofungola mwána wa mpú­nda, bakóló ba yangó batúní : « Mpô níni bozalí kokangola mwána wa mpú­nda ? »

19:34  Bayanólí : « Mokonzi asengélí na yangó. »

19:35  Bayélí Yézu mwána wa mpú­nda, batandí bilambá bya bangó likoló lya yangó, babutísí Yézu.

19:36  Bato batandí bilambá bya bangó o balabála esíká Yézu azalákí kokende.

19:37  Ekómí yě penepene na nzelá eye eútí o ngómbá ya Oliva, bayékoli bánso, na esengo enéne, baba­ndí kokúmisa Nzámbe na mo­ngó­ngó makási mpô ya makamwísi mánso bamónókí.

19:38  Balobí : « Bábenisa Mokonzi óyo akoyâ o nkómbó ya Mokonzi Nzámbe ! Bobóto o likoló, mpé nkémbo o ntá likoló ! »

19:39  Ba-Farizéo basúsu bazalákí wâná o káti ya bato balobí na yě : « Motéyi, pekísá bayékoli ba yǒ. »

19:40  Kasi yě azóngísí : « Nalobí na bínó, sókó bangó bakangí monoko, mabángá makogánga. »

19:41  Ntángo akómí penepene mpé amóní engumbá Yerúzalem, alelí ya­ngó.

19:42  Alobí : « A ! Sókó leló oli­ngákí kondima eye ekokí koyêla yǒ bobóto ! Kasi ozalí komóno yangó té !

19:43  Ya sôló, o mikolo mokoyâ bangúná bakotímola mabúlú zó­ngazónga na yǒ, bakozínga mpé bakokangisa yǒ bipái bínso.

19:44  Bakonyata yǒ na bána ba yǒ bánso bazalí o mbóka ya yǒ. O lopángo la yǒ bakotíka libángá lyǒ kó likoló lya libángá lisúsu té ; mpámba té, o eleko bayákí kotála yǒ ondimákí yangó té ! »

19:45  Eyíngélí yě o Témpelo, abandí kobengana bato bazalákí kotéke bilóko wâná.

19:46  Alobí na bangó : « Eko­mámí ’te ndáko ya ngáí esengélí kozala ndáko ya losámbo. Kasi bínó bobóngólí yangó ndáko ya bayíbi ! »

19:47  Mokolo na mokolo azalákí kotéya o Témpelo. Banganga bakonzi na batéyi ba Mobéko na bankúmú ba mbóka balukí nzelá ya koboma yě.

19:48  Kasi bakokí kosála elóko té, mpô bato bánso bazalákí na mpósá ya koyóka yě.

Chapter 20

20:1  Mokolo mǒkó azalákí kotéya bato o Témpelo mpé kosangela bangó Nsango Elámu. Banganga bakonzi na batéyi ba Mobéko na bakóló bayéí,

20:2  balobí na yě : « Yébísá bísó : na likokí níni ozalí kosála bôngó ? Náni apésí yǒ likokí lyangó ? »

20:3  Ayanólí bangó : « Ngáí mpé nakotúna bínó motúna mǒkó. Bóyébisa ngáí :

20:4  Nání atíndákí Yoáne ábátisa bato, Nzá­mbe tǒ bato ? »

20:5  Kasi bangó babandí kotúnana : « Sókó tolobí : ‘Nzámbe moto atíndákí yě ’, akoloba : ‘Mpô níni bo­yambákí yě té ?’

20:6  Kasi sókó tolobí : ‘Bato batíndákí yě ’, bato bakoboma bísó na mabángá, zambí ba­ndimí ’te Yoáne azalí proféta mpe­nzá. »

20:7  Bôngó bazóngísí ’te bayé­bí té sókó náni atí­ndákí yě.

20:8  Yézu alobí na bangó : « Ngáí mpé nakoyébisa bínó té náni apésí ngáí likokí násála bôngó. »

20:9  Na nsima abandí koloba na bato moúlání moye : « Moto mǒkó alóní nzeté ya víno o elanga, atíkí yangó na basáli bafúteli, mpé akeí mobé­mbo molaí.

20:10  O ntángo ekokí atíndí mosáleli mǒkó epái ya basáli, bápésa yě ndámbo ya yě ya mbuma ya víno. Kasi basáli babétíbétí yě mpé bazóngísí yě mabóko mpámba.

20:11  Atíndí mosáleli mosúsu, kasi babétí yě mpé, bafíngí yě mpé bazóngísí yě mabóko mpámba.

20:12  Atíndí lisúsu mosáleli, óyo wa básáto ; bazokísí yě mpé babwákí yě o libándá.

20:13  Nkóló wa elanga amílobélí : ‘Násála níni ? Nakotínda mwána wa ngáí wa bolingo, mbele bakobánga yě.’

20:14  Kasi o ntángo basáli bamóní mwána, balobání : ‘Yě moto akosangola elanga ! Tóboma yě, bôngó bísó bato tózwa elanga.’

20:15  Babwákí yě o libándá lya elanga ya víno mpé babomí yě. Bôngo nkóló wa elanga ya víno akosála bangó níni ?

20:16  Akoyâ, akoboma basáli baye, mpé akopésa bato basúsu elanga ya víno. » Bato bayókí maloba mâná, balobí : « Yangó ekokí kosálema té ! »

20:17  Kasi Yézu atálí bangó swíí, alobí : « Bôngó boyébí ntína ya maloba maye ma Minkandá Misántu : Libángá batóngi-ndáko babwákákí likómí libángá lya litúmu ?

20:18  Moto atâ náni akokwâ o libá­ngá liye, akobúkana ; mpé sókó libángá liye likwêlí moto, likonyata yě. »

20:19  O ntángo êná, batéyi ba Mobéko na banganga bakonzi balukí nzelá ya kokanga yě, kasi bazalákí kobánga bato. Bayébí malámu ’te alobákí moúlání moye mpô ya bangó.

20:20  Yangó wâná babandí kokénge yě, mpé batíndélí yě banóngi. Bangó bamílakísí lokóla bato ba motéma malámu, mpô ’te bákoka kokanga yě na maloba ma yě mǒkó, mpé bákaba yě o mabóko ma moyángeli.

20:21  Batúní yě motúna moye : « Motéyi, toyébí ’te okolobaka mpé okotéyaka na bosémbo. Okotálaka bilongi bya bato té, okolakisaka nzelá ya Nzámbe na bosôló.

20:22  Tokokí ndé kofúta mpáko ya Kaizáro, tǒ té ? »

20:23  Kasi Yézu ayébí mayéle mabé ma bangó, alobí :

20:24  « Bólakisa ngáí denário. Elongi mpé nkómbó ya náni izalí wâná ? » Balobí : « Ya Kai­záro. »

20:25  Azóngísí : « Bôngó, bópésa Kaizáro biye bikokí na Kaizáro, mpé bópésa Nzámbe biye bikokí na Nzámbe. »

20:26  O maloba ma yě bazwí bôngó likambo lyǒ kó té likokí kofúnda yě o míso ma bato. Bakámwí na eyano ya yě mpé balobí lisúsu elóko té.

20:27  Ba-Saduséo basúsu bayéí epái ya yě. Bangó bakondimaka té ’te bato bakosékwa.

20:28  Batúní yě : « Motéyi, Móze apésí bísó mobéko moye : Sókó moto awéí kasi atíkí bána té, ndeko wa yě ábála mwásí óyo, mpô ’te ábótela ndeko wa yě bána.

20:29  Ezalákí bandeko babáli nsambo ; óyo wa libosó abálí mwásí, akúfí, atíkí bána té.

20:30  Oyo wa bábalé

20:31  mpé óyo wa básáto babálí mwásí ôná mpé bakúfí. Sé bôngó bangó bánso nsambo : bawéí kasi batíkí bána té.

20:32  Na nsúka mwásí mpé awéí.

20:33  Bôngó mokolo bato bakosékwa, yě akozala mwásí wa náni ? Zambí bangó bánso nsambo babálákí yě ? »

20:34  Yézu alobí na bangó : « Básí na babáli ba mokili moye bakobálaka,

20:35  kasi baye bamónóní ’te balongóbání kokóma o bomoi bokoyâ mpé kosékwa o bawá, bakobála lisúsu té.

20:36  Bakokúfa mpé lisúsu té, zambí bakozala lokóla bǎnzelú ; bazalí bána ba Nzámbe, zambí basékwí.

20:37  O lisoló lya nzeté epelí móto Móze mpé alakísí ’te bawá bakosékwa, mpô atángákí Mokonzi ‘Nzámbe wa Abaráma, Nzámbe wa Izáka na Nzámbe wa Yakób’.

20:38  Azalí Nzámbe wa bato bawéí té, kasi wa bato bazalí na bomoi. Bánso bazalí na bomoi mpô ya yě. »

20:39  Batéyi basúsu ba Mobéko balobí na yě : « Motéyi, olobí malámu mpe­nzá. »

20:40  Mpé bamekí kotúna yě motúna mǒkó lisúsu té.

20:41  Yézu atúní bangó : « Bóníbóní bokokí koloba ’te Krístu azalí mwána wa Davídi ?

20:42  Davídi yě mǒ­kó akomákí o búku ya Nzé­mbo : ‘Mokonzi Nzámbe alobí na Mokonzi wa ngáí : Fándá o lobóko la ngáí la mobáli,

20:43  téé mokolo nakokómisa bangúná ba yǒ lokóla ebóngá ya makolo ma yǒ.’

20:44  Davídi abéngí yě Mokonzi, bóníbóní akokí kozala mwána wa yě ? »

20:45  Awa bato bánso bazalákí koyóka yě, alobí na bayékoli :

20:46  « Bókéba na batéyi ba Mobéko ; balingí míngi kotámbola na bilambá bilaí ; balingí ’te bato bánso bápésa bangó losáko o zándo, balingí kofánda o kíti ya lokúmu o sinagóga mpé o bisíká bya libosó o ntángo ya kolía.

20:47  Bakobótoloko básí bazéngé bilóko, nzókandé mpô ya kokósa bato bakosámbelaka mí­ngi. Bakokitisa bangó o likambo, leká bato basúsu ! »

Chapter 21

21:1  Atómbola míso boye, amóní bato ba nkita bazalákí kotía mosolo o sandúku ya mabonza o Témpelo.

21:2  Amóní mwásí bozéngé, mobóla mpenzá, atíí bibe­ndé bíbalé bya motúya moké.

21:3  Alobí : « Nayébísí bínó ya sôló, mwásí óyo mobóla akúfélí mobáli alekí bangó bánso na bopési libonza,

21:4  zambí bangó bánso balongólí sé ndámbo ya mosolo mosengélí na bangó té. Kasi mwásí óyo, atâ azalí kokélela, apésí mbóngo ínso ise­ngélí na yě mpô ya kolía. »

21:5  Awa basúsu bazalákí koloba ’te Témpelo ekémbámí na mabángá ki­tóko mpé na bilóko bibonzámákí, Yézu alobí na bangó :

21:6  « Ya biye bozalí komóno, mokolo mosúsu libángá lyǒ kó likotíkala likoló lya libángá lisúsu té ; bínso bikobúkana nyé. »

21:7  Bôngó batúní yě : « Motéyi, ekosálema ndé ntángo níni ? Ele­mbo níni ekoyébisa bísó ’te elingí ésálema ? »

21:8  Alobí : « Bókéba ’te bákósa bínó té. Mpô bato baíké bakokósa ’te bayéí o nkómbó ya ngáí, bakoloba ’te ‘Krístu ngáí óyo ! Eleko ekómí penepene !’. Bólanda bangó té.

21:9  Mokolo bokoyóka nsango ya bitumba mpé ya mobúlú, bóbánga té. Yangó esengélí kosálema libosó, kasi nsúka mpenzá ekoyâ nokí té. »

21:10  Alobí mpé na bangó : « Ekólo yǒ­kó ekobunda na ekólo esúsu, bato ba mokili mǒkó bakobunda na mokili mosúsu.

21:11  Mokili mokoni­ngana makási, bipái bisúsu nzala mpé makono makongala. Bakomóno makambo ma nsómo o nsé mpé bilembo binéne biye bikoúta o likoló.

21:12  Kasi libosó lya mâná mánso, bakokanga bínó, bakonyókolo bínó, bakosámbisa bínó o sinagóga mpé bakokanga bínó o bolóko. Bakokamba bínó o bosó bwa bayá­ngeli mpé bakonzi mpô ya Nkómbó ya ngáí.

21:13  Bokozwa bôngó nzelá ya kozala banzénénéké ba ngáí.

21:14  Bóyéba malámu : O ntángo êná bómítúna té ndé­ngé níni bokokí komílóngisa,

21:15  zambí ngáí mǒ­kó nakolobisa bínó mpé nakopésa bínó bwányá, bôngó mongúná atâ mǒkó té akokoka bínó tǒ akobóya kondimela bínó.

21:16  Atâ tatá na mamá wa bínó, bandeko, bato ba libótá ná mpé báníngá ba bínó, bakofúnda bínó, bakosála ’te báboma basúsu o ntéi ya bínó.

21:17  Bato bánso bakoyina bínó mpô ya Nkómbó ya ngáí.

21:18  Kasi atâ monsúki mǒkó mokolongwa o mitó mya bínó té.

21:19  Bótía moléndé, bôngó bokobíkisa bomoi bwa bínó !

21:20  Mokolo bokomóno ’te Yerúzalem ezíngámí na mampingá ma basodá, bóyéba ’te nsúka ya mbóka ekómí penepene.

21:21  Bato bakozala o Yudéa o ntángo êná, bákíma o ngómbá ; baye bakozala o káti ya mbóka, bálongwa, baye bakozala o bila­nga, bázónga o mbóka té.

21:22  Mpámba té, ekozala ntángo ya bobekoli mpô ’te mánso makomámí másálema.

21:23  Mawa na básí bakozala na zémi mpé na baye bakonúngisa bána mabéle o mikolo mîná ! Ya sôló, mpási enene ekokwêla mokili, mpé bakoyókela bato ba ekólo eye nkándá.

21:24  Bakoboma bato na mi­mpánga, bakokende na basúsu bǒ baómbo o bikólo bisúsu. Bapagáno bakonyata Yerúzalem téé eleko ya bapagáno ekosíla.

21:25  Bilembo bikomónono o mwésé, o sánzá mpé o minzóto. O nsé nsómo ekokwêla bato ba bikólo bínso ; bakobánga lokitó la mbóngé ya mbú.

21:26  Bato bakowá na nsómo na bobángi makambo malingí má­kwêla mokili mobimba, zambí ngú­yá ínso o likoló ikoningana.

21:27  Na nsima bakomóno Mwána wa Moto akoyâ o limpata na ngúyá mpé na nkémbo enéne.

21:28  O ntángo makambo mâná makobanda, bótéleme mpé bótómbola mitó, zambí libíkí lya bínó likómí penepene. »

21:29  Na nsima alakísí bangó moúlání moye : « Bótálaka nzeté ya fígi na nzeté ínso :

21:30  sókó ibandí kobimisa nkásá, boyébí ’te eleko ya bobúki mbuma ekómí penepene.

21:31  Sé bôngó, ntángo bokomóno makambo maye, bóyéba ’te Bokonzi bwa Nzá­mbe bolingí bóyâ.

21:32  Ya sôló sôló, nalobí na bínó : bato bazalí sikáwa ndébawéí naíno té libosó ’te maye mánso másálema.

21:33  Likoló na nsé bikoleka, kasi maloba ma ngáí makoleka sókí té.

21:34  Bózala na bokéngi mpô ’te mitéma mya bínó míbéba té na mobúlú mwa bolángwi víno mpé na bo­mítu­ngisi na makambo ma mokili. Mbele mambí ma mokolo môná makokwêla bínó

21:35  lokóla mo­nyá­má, zambí makokwêla bato bánso ba mokili mobimba.

21:36  Bôngó bókéngele mpé bósá­mbela ntángo í­nso mpô ’te bózala na makási ma kokíma mánso masengélí koyâ, mpé bókoka kopika mpéndé o míso ma Mwána wa Moto. »

21:37  Na mói azalákí kotéya o Témpelo, kasi na butú azalákí o libá­ndá, o ngómbá eye bakobéngaka ‘ya Olíva’.

21:38  Utá ntóngó bato bánso bazalákí koyâ koyóka yě o Témpelo.

Chapter 22

22:1  Eyenga ya ‘Mámpa mazángí nkísi’ eye bakobéngaka Pásiká, ekómí penepene.

22:2  Banganga bakonzi na batéyi ba Mobéko bazalákí koluka nzelá ya koboma Yézu, zambí bazalákí kobánga bato.

22:3  Nzókandé Sátana akótí o motéma mwa Yudási, óyo bakobéngaka Iskarióte, mǒkó wa ba-zómi na bábalé.

22:4  Akeí koyókana na banganga bakonzi mpé na bayángeli ba bakéngeli ba Témpelo bóníbóní akokaba yě o mabóko ma bangó.

22:5  Bangó basepélí mpé bayókání ’te bakopésa yě mosolo.

22:6  Yudási andimí mpé abandí koluka nzelá ebongí na bokabi Yézu o mabóko ma bangó, mpô ’te bato bánso báyéba yangó té.

22:7  Ekómí eyenga ya Mámpa mazá­ngí nkísi, mokolo basengélí koboma mpatá ya Pásiká,

22:8  Yézu atíndí Pétro na Yoáne, alobí : « Bókende koléngelele bísó limpáti lya Pásiká, tólía lya­ngó. »

22:9  Batúní yě : « Oli­ngí tókende kolámba lyangó wápi ? »

22:10  Alobí na bangó : « Sókó bokómí o mbóka, bokokúta moto mǒ­kó amemí mbéki ya mái o motó ; bólanda yě kín’o ndáko akokóto,

22:11  mpé bóloba na nkóló wa ndáko : ‘Motéyi atúní yǒ : Esíká níni nakokí kolía limpáti lya Pásiká elo­ngó na bayékoli ba ngáí ?’

22:12  Akolakisa bínó eténi enéne o mokili mwa ndáko, eye babongísí malámu ; bóléngele bínso kúná. »

22:13  Bangó bakeí, bakútí bínso lokóla alobákí na bangó, mpé balámbí limpáti lya Pásiká.

22:14  Awa ntángo ekokí, Yézu akeí kofánda o méza elongó na bapóstolo.

22:15  alobí na bangó : « Nayókí mpósá míngi ya kolía Pásiká eye elongó na bínó libosó ’te náyóka mpási.

22:16  Nalobí na bínó : Nakolía yangó lisúsu té téé mokolo Pásiká eye ekokokisama o Bokonzi bwa Nzámbe. »

22:17  Na nsima akamátí nkéni, atóndí Nzámbe, alobí : « Kamátáni, bómele yangó bínó bánso.

22:18  Nalobí na bínó : Nakomele víno lisúsu té téé mokolo Bokonzi bwa Nzámbe bokoyâ. »

22:19  Na nsima akamátí límpa, atóndí Nzámbe, abúkí lyangó, apésí bayékoli, alobí : « Eye ezalí Nzóto ya ngáí ekokabama mpô ya bínó. Bósálaka bôngó mpô ya kokanisa ngáí. »

22:20  Esílísí bangó kolía, akamátí mpé nkéni, alobí : « Nkéni eye ezalí nkéni ya Bondeko bwa Sika ya makilá ma ngáí, makosopana mpô ya bínó. »

22:21  « Nzókandé moto óyo akokaba ngáí, afándí o méza elongó na ngáí.

22:22  Mwána wa Moto akokende lokóla eyébání kala, kasi mawa na moto óyo akokaba yě. »

22:23  Bôngó babandí kotúnana sókó náni o ntéi ya bangó akokí kosála bôngó.

22:24  Babandí kowélana ntembe sókó náni o ntéi ya bangó alekí bonéne.

22:25  Alobí na bangó : « Bakonzi ba nsé bakotíndaka bato ba bangó bitíndá, mpé baye bakoyángelaka bangó balingí ’te bátángema bato balámu.

22:26  Kasi bínó bósálaka bôngó té. Oyo alekí bonéne ámíkómisa lokóla mwána ; óyo azalí moyángeli ámíkómisa lokóla mosáleli.

22:27  Náni alekí bonéne : óyo afándí o méza, tǒ óyo azalí kosálela yě ? Ezalí té óyo afándí o méza ? Kasi ngáí nazalí o ntéi ya bínó lokóla mosáleli !

22:28  Bínó botíkákí ngáí té o ntángo nayókákí mpási.

22:29  Yangó wâná nakoléngelele bínó Bokonzi lokóla Tatá aléngélélí ngáí,

22:30  mpô ’te bólía mpé bómele o méza ma Bokonzi bwa ngáí, mpé bófánda o ngwendé mpô ya kosámbisa mabótá zómi na mábalé ma Israél.

22:31  Simóni, Simóni, yébá ’te Sátana aséngí ’te áyongela bínó lokóla bakoyongeleke fufú.

22:32  Kasi ngáí nasá­mbélélí yǒ, mpô ’te boyambi bwa yǒ bólembe té. Bôngó, sókó osílí obó­ngólí motéma, léndísáká ba­ndeko ba yǒ. »

22:33  Pétro alobí : « Mokonzi, nandimí kolanda yǒ kín’o bolóko mpé o liwá. »

22:34  Kasi Yézu azóngísí : « Pétro, nayébísí yǒ : Leló libosó ’te nsósó élela, okowá­ngana mbala ísáto ’te oyébí ngáí. »

22:35  Na nsima alobí na bangó : « Ntá­ngo natíndákí bínó, mpé bozalákí na líbenga lya mosolo té, sáki té, sapáto té, bozángákí ndé elóko ? » Bazó­ngísí : « Elóko té ! »

22:36  Alobí na bangó : « Kasi sikáwa, óyo azalí na líbenga lya mosolo, ákamata lyangó ; sé bôngó óyo azalí na sáki ya kotía bilóko bya kolía ; óyo azalí na mompánga té, átéke monkóto mwa yě mpô ya kosómba mompánga.

22:37  Nalobí na bínó : Ngáí nasengélí kokokisa maye makomámí o Minkandá Misántu : Batíí yě o molo­ngó mwa bato babé. Ya sôló, maye matálí ngáí, malingí másálema. »

22:38  Bangó balobí : « Mokonzi, tálá tozalí na mimpánga míbalé áwa. » Ayanólí bangó : « Ekokí bôngó ! »

22:39  Yézu abimí mpé akeí o ngómbá ya Olíva, lokóla ameséní kosála. Bayékoli balandí yě.

22:40  Ekómí yě kúná, alobí na bangó : « Bósámbela mpô ’te bóndima masénginyá té. »

22:41  Alongwí epái ya bangó mpé akeí mosíká lokóla ntáká bakobwákaka libángá. Afukámí mpé asámbélí :

22:42  « Tatá, sókó olingí, longólá nkéni eye epái ya ngáí. Nzókandé ésálema té lokóla ngáí nalingí, kasi lokóla yǒ olingí ! »

22:43  O ntángo êná ǎnzelú mǒkó aútí o likoló, abimélí yě mpé aléndísí yě.

22:44  Awa abandí koyóka nsómo ya liwá, aléndísí naín­o kosámbela. Mitoki mya yě mikómí lokóla matangá manéne ma makilá, matangí o nsé.

22:45  Atélémí, atíkí losámbo. Ntángo akómí epái ya bayékoli, akútí bangó balálí mpongí mpô ya mawa.

22:46  Alobí na bangó : « Bozalí ndé kolála mpongí ? Bótéleme mpé bósámbela mpô ’te bóndima maséngi­nyá té. »

22:47  Ezalákí yě naíno koloba, bato ebelé bayéí. Yudási, mǒkó wa ba-zómi na bábalé, akambí bangó ; abelémí na Yézu mpô ya kozínga yě ekópi.

22:48  Kasi Yézu alobí na yě : « Yudási, ozalí ndé kokaba Mwána wa Moto na ekópi ? »

22:49  Ntángo baye bazíngí yě bamóní maye malingí másálema, balobí : « Mokonzi, tóbéte bangó na mompánga ? »

22:50  Mpé mǒkó wa bangó abétí mosáli wa nganga mokonzi, akátí yě litói lya mobáli.

22:51  Kasi Yézu alobí : « Tíká kosála bôngó ! » Asímbí litói lya moto ôná mpé abíkísí yě.

22:52  Na nsima alobí na baye bayéí kobimela yě, banganga bakonzi, bayá­ngeli ba bakéngeli ba Témpelo mpé bakóló : « Nazalí ndé moyíbi ’te bóbimela ngáí na mimpánga mpé na mángé­nda ?

22:53  Mokolo na mokolo nazalákí na bínó o Témpelo, mpé bokangákí ngáí té. Kasi ngonga ya bínó ekokí, ngo­nga ya mokonzi wa molílí. »

22:54  Bakangí yě mpé bakeí na yě o ndáko ya nganga mokonzi, esíká bakótísí yě. Pétro alandí mwâ mosíká.

22:55  Bapelísákí móto o káti ya lopángo. Pétro akeí kofánda o káti ya bato bafándí penepene na móto.

22:56  Mosáleli mwásí mǒkó amóní yě afándí penepene na móto mozalí kobutisa miloli. Atálí yě swíí, alobí : « Oyo mpé azalákí na yě ! »

22:57  Kasi yě awángání, alobí : « Mamá, nayébí yě té. »

22:58  Mwâ moké nsima, moto mosúsu amóní yě, alobí : « Yǒ mpé ozalí mǒkó wa bangó ! » Pétro alobí : « Té, tatá, ngáí té. »

22:59  Sókí nsima ya ngonga yǒ kó, mosúsu alé­ndísí koloba : « Ya sôló, moto óyo azalákí na yě, kútu azalí mo-Galiléa. »

22:60  Kasi Pétro azóngísí : « Ndeko, nayébí té níni ozalí koloba. » Naíno asílísí koloba té, nsósó elelí.

22:61  Mokonzi amíbóngólí mpé atálí Pétro. Sikáwa Pétro akundólí o motéma maloba Yézu alobákí na yě : « Leló, libosó ’te nsósó élela, okowángana ngáí mbala ísáto. »

22:62  Abimí o libándá mpé alelí na mawa manéne.

22:63  Bato bazalákí kokéngele Yézu basekí mpé babétí yě.

22:64  Bazipí elongi ya yě na elambá mpé batúní yě : « Proféta, yébísá bísó náni abétí yǒ ! »

22:65  Bafíngí yě mpé mafínga masúsu míngi.

22:66  Etání ntóngó, bakóló ba mbóka basangání likita elongó na banganga bakonzi mpé na batéyi ba Mobéko. Bakeí na yě o esámbi

22:67  mpé balobí na yě : « Yébísá bísó sókó ozalí Krístu. » Azóngísí : « Atâ nayébísí bínó, boko­ndima té,

22:68  mpé sókó natúní bínó mitúna, bokoyanola té.

22:69  Kasi bandá leló bokomóno Mwána wa Moto afá­ndí o lobóko la mobáli la Nzámbe wa bokási ! »

22:70  Bánso balobí : « Bô­ngó ozalí Mwáná wa Nzámbe ? » Ayébísí bangó : « Bosílí bolobí, ezalí ngáí. »

22:71  Bangó balobí : « Tosengélí lisúsu na banzénénéké, sôló ? Bísó mǒkó toyókí yangó o monoko mwa yě ! »

Chapter 23

23:1  Bato bánso ba likita batélémí mpé bakeí na yě epái ya Piláto.

23:2  Babandí kofúnda yě, balobí : « Bísó tokútí moto óyo azalí kotombokisa bato o ekólo ya bísó. Azalí kopekisa bato kofúta mpáko ya Kaizáro, mpé akolobaka ’te azalí mokonzi-Mesíya. »

23:3  Piláto atúní yě : « Ozalí mokonzi wa ba-Yúda ? » Yézu azóngísélí yě : « Olobí yangó. »

23:4  Piláto alobí na banganga bakonzi mpé na bato basangání wâná : « Namóní ntína atâ yǒ kó té ya kokitisa moto óyo. »

23:5  Kasi bangó baléndísí, balobí : « Na matéya ma yě azalí kotombokisa bato o Yudéa mobimba, út’o Galiléa téé áwa. »

23:6  Eyókí Piláto bôngó, atúní sókó azalákí mo-Galiléa.

23:7  Awa ayókí ’te Yézu azalákí moto wa mokili mwa Eróde, atíndí yě epái ya Eróde ; yě mpé azalákí o Yerúzalem o mikolo mîná.

23:8  Eróde asepélí míngi na bomóni Yézu. Ut’o kala alingákí komóno yě, zambí ayókákí nsango ya yě míngi. Azalákí na elíkyá ’te Yézu akosála likamwísi o míso ma yě.

23:9  Atúní yě mitúna míngi, kasi Yézu azóngísélí yě liloba atâ lyǒ kó té.

23:10  Nzókandé banganga bakonzi na batéyi ba Mobéko bazalákí wâná baléndísí kofúnda yě.

23:11  Eróde na basodá ba yě batúmólí yě, basekí yě, mpé balátísí yě monkóto mwa bokonzi ; na nsima bazóngísí yě epái ya Piláto.

23:12  Bobélé mokolo môná Eróde na Piláto bakómí koyókana ; libosó bazalákí bangúná.

23:13  Piláto abéngí banganga bakonzi, bakóló na bato bánso,

23:14  alobí na bangó : « Boyélí ngáí moto óyo, mpé bolobí ’te azalí kotombokisa bato, nzókandé o míso ma bínó natúní yě malámu, kasi o maye mánso bozalí kofúnda yě namóní ntína yǒ­kó té ya kokitisa moto óyo.

23:15  Eróde mpé té, yangó wâná azóngísí yě áwa. Ezalí polélé ’te asálí likambo lyǒ kó té likokí na liwá.

23:16  Bôngó nakobétisa yě fí­mbo, na nsima nakotíka yě. » (

23:17  )

23:18  Kasi bangó bánso, monoko mǒkó, baba­ndí kogánga : « Bomá moto óyo ! Tíkélá bísó Báraba ! »

23:19  Báraba akangémákí o bolóko, zambí abimísákí mobúlú o mbóka, mpé abomákí moto.

23:20  Piláto alobí na bangó lisúsu, mpô alingí kotíka Yézu.

23:21  Kasi bangó bazóngísélí yě, bagángí : « Báká yě o kurúse ! Báká yě o kurúse ! »

23:22  Mbala ya ísáto Piláto alobí na bangó : « Kasi mabé níni moto óyo asálí ? Ngáí na­zwí yě na ntína yǒ kó té ya kokitisa yě o liwá. Bôngó nakobétisa yě fímbo, na nsima nakotíka yě. »

23:23  Kasi na bogángi baléndísí kosénge ’te bábáka yě o kurúse, mpé mbala na mbala bagángí makási koleka libosó.

23:24  Bôngó Piláto akátí likambo lokóla bazalákí kosénge.

23:25  Moto óyo akótókí o bolóko, zambí abimísákí mobúlú mpé abomákí moto, atíkí yě, lokóla ba­sé­ngékí ; kasi akabí Yézu o mabóko ma bangó, lokóla bangó balingí.

23:26  Ntángo bakeí na yě, bakangí Simóni wa Siréne, óyo aútí o bilanga ; batíndí yě na makási ámeme kurúse nsima ya Yézu.

23:27  Bato baíké bala­ndí yě, ná mpé básí bazalákí kolela yě, mabóko o mitó.

23:28  Yézu amíbóngólí epái ya bangó, alobí : « Bána básí ba Yerúzalem, bólela ngáí té, kasi bómílela bínó mǒkó, bólela mpé bána ba bínó !

23:29  Mpámba té, o mikolo mikoyâ bakoloba : Esengo na básí bikomba baye babótá té, mpé baye banúngísí mwána té !

23:30  O ntángo êná bakoba­nda koloba na ngómbá inéne : ‘Bókwêla bísó !’ mpé na ngómbá iké : ‘Bózipa bísó !’

23:31  Mpámba té, sókó basálí bôngó na nzeté ebésu, ndébasálí bóníbóní na nzeté ekaúká ? »

23:32  Elongó na Yézu bakambí mpé bato basúsu bábalé, bayíbi banéne, mpô ya koboma bangó lokóla.

23:33  Ekómí bangó o ngómbá eye bakobéngaka ‘Ekwókóló’, babákí yě o kurúse, ná mpé bayíbi banéne bábalé, mǒkó o lobóko la yě la mobáli, mosúsu o lobóko la mwásí.

23:34  Yézu alobí : « Tatá, límbísá bangó ! Bayébí té níni bazalí kosála. » Na nsima bakabólání bilambá bya yě na bobéti zeké.

23:35  Bato baíké batélémí wâná, bazalákí kotála. Bakonzi batiólí yě, balobí : « Abíkísí bato basúsu ; ámíbíkisa sikáwa sókó azalí Krístu, óyo Nzámbe aponí ! »

23:36  Basodá mpé basekí yě ; áwa bayélí yě masanga ngai,

23:37  balobí : « Sókó ozalí mokonzi wa ba-Yúda, ómíbíkisa ! »

23:38  O eténi ya likoló ya kurúse babákí libáyá na maloba maye : ‘Oyo azalí mokonzi wa ba-Yúda.’

23:39  Mǒ kó wa bayíbi banéne babákémí o kúruse afíngí Yézu, alobí : « Yó ozalí Krístu té ? Bôngó ómíbíkisa, óbíkisa mpé bísó. »

23:40  Kasi mosúsu apálélí yě, alobí : « Yó ozalí ko­bánga Nzámbe té, áwa ozwí etúmbu lokóla yě ?

23:41  Bísó tozwí etúmbu na ntína, tozalí kofúta mabé tosálí ; kasi yě asálí mabé mǒkó té. »

23:42  Mpé alobí : « Yézu, kanísá ngáí ntángo okokóma o Bokonzi bwa yǒ. »

23:43  Yézu azóngísélí yě : « Nalobí na yǒ ya sôló, leló naíno okozala na ngáí elongó o paradízo. »

23:44  Ekómí penepene na midí, mwésé molímwí mpé likoló liíndí o mokili mobimba téé ngonga ya ísáto.

23:45  Ela­mbá enéne ya Témpelo epa­swání o káti.

23:46  Yézu agángí na mo­ngóngó makási : « Tatá, natíkí molímo mwa ngáí o mabóko ma yǒ. » Elobí yě bôngó, akátí motéma.

23:47  Ntángo komandá amóní maye masálémí, akúmísí Nzámbe, alobí : « Ntembe té, moto óyo azalákí moto sémba ! »

23:48  Baye bánso bayákí kotála wâná, áwa bamóní mánso masálémí, balakísí ’te bayókí mawa míngi mpé bazóngí ndáko.

23:49  Báníngá ba Yézu bánso batélémí mwâ mosíká, ná mpé básí balandákí yě út’o Galiléa, bazalákí kotála.

23:50  Moto mǒkó ayéí, nkómbó ’te Yozéfu, yě moto malámu mpé wa motéma bosémbo. Azalákí mǒkó wa likita lya Bakóló,

23:51  kasi andimákí mokáno mwa bangó té ná mpé maye basálákí. Yě moto wa Arimatéa, mbóka yǒ kó ya ba-Yúda. Azalákí kotía motéma na boyéi bwa Bokonzi bwa Nzámbe.

23:52  Akeí epái ya Piláto mpé aséngí nzóto ya Yézu.

23:53  Abákólí yangó o kurúse, azí­ngí yangó na elambá, atíí yangó o lilíta likátémí o mabángá, esíká bakundí naíno moto mǒkó té.

23:54  Ezalákí mokolo mwa boléngeli Eyenga, mokolo mwa sábato molingákí móbanda.

23:55  Básí baye baútákí na Yézu o Galiléa, balandákí Yozéfu, batálí lilíta mpé bamóní ndéngé níni batíí ebembe ya Yézu wâná.

23:56  Na nsima bazóngí o ndáko, baléngélí malási na mafúta ma bopakoli ma nsolo mpí­mbó. Mpé o mokolo mwa sábato bapémí, lokóla Mobéko motíndí.

Chapter 24

24:1  O mokolo nsima ya sábato na ntá ntóngó, básí bakeí o lilíta na malási maye baléngélékí.

24:2  Bakútí libángá lisílí lilongwí o monoko mwa lilíta.

24:3  Bakótí, kasi bakútí nzóto ya Mokonzi Yézu té.

24:4  Bakámwí na yangó míngi mpenzá, bato bábalé babimélí bangó, balátí bilambá bizalákí kongenge.

24:5  Básí bayókí nsómo, bakitísí bilo­ngi o nsé. Kasi bato balobí na bangó : « Mpô níni bozalí koluka o ntéi ya bawá moto azalí na bomoi ?

24:6  Azalí áwa té, asílí asé­kwí ! Bókundola o mitéma maye alobá­kí na bínó ntángo azalákí naíno o Galiléa :

24:7  Esengélí ’te Mwána wa Moto ákabama o mabóko ma basúmuki, ábákema o kurúse mpé ásékwa nsima ya mikolo mísáto. »

24:8  O ntángo êná bakundólí maloba ma yě o mitéma.

24:9  Balongwí o lilíta, bakeí koyébisa mâná mánso na ba-zómi na mǒkó mpé na basúsu bánso.

24:10  Ezalákí wâná : María wa Mágdala, ná Yoána, ná María mamá wa Yakóbo. Básí basúsu bazalákí elongó na bangó, bayébísí bapóstolo sé bôngó.

24:11  Kasi batálí maloba mâná lokóla bilobéla, bandimélí bangó té.

24:12  Kasi Pétro akeí mbángu o lilíta. O ntángo agúmbámí, amóní sé bilambá. Azóngí epái ya yě, mpé akámwí mí­ngi na maye masálémákí.

24:13  Bobélé mokolo môná, bayékoli bábalé bazalákí kokende o mbóka yǒ­kó nkómbó ’te Emaús, mosíká na Yerúzalem kilométele zómi na mǒkó.

24:14  Bazalákí kosolola makambo maye mánso malekákí.

24:15  Awa bazalákí kosolola mpé kotúnana bôngó, Yézu yě­méí abelémí mpé akeí na bangó nzelá yǒ kó.

24:16  Kasi, miso ma bango makoki koyéba yě té.

24:17  Atúní bangó : « Makambo níni bozalí kosolola o nzelá boye ? » Bangó batélémí, elongi sé mawa mawa.

24:18  Mǒ kó wa bangó, Kléofa, alobí na yě : « Bobélé yǒ mǒkó o Yerúzalem mobimba oyókí té makambo malekákí o mikolo miye ? »

24:19  Atúní : « Makambo níni ? » Bazóngísí : « Maye ma­kwêlákí Yézu wa Nazaréte. Azalákí proféta óyo alakísí ngúyá enéne na maloba mpé na bikelá o míso ma Nzámbe mpé ma bato bánso.

24:20  Banganga bakonzi na bakóló ba bísó bakabí yě mpô ’te ákita o likambo lya liwá, mpé babákí yě o kurúse.

24:21  Kasi bísó tozalákí na elí­kyá ’te yě moto akobíkisa Israél. Nzókandé makambo maye masálémí mikolo mísáto milekí.

24:22  Básí basúsu bazalí epái ya bísó bakámwísí bísó míngi. Na ntóngóntóngó bakendékí o lilíta,

24:23  kasi bamóní nzóto ya yě té, mpé bayéí koyébisa bísó ’te bǎnzelú babimélákí bangó mpé bayébísákí bangó ’te azalí na bomoi.

24:24  Bôngó bato ba bísó basúsu bakendékí o lilíta, bakútí lyangó sé lokóla básí balobákí ; kasi yě mpenzá, bamóní yě té. »

24:25  Yézu alobí na bangó : « E bínó bato bozángí mayéle ! Makambo mánso baproféta balobáká bozalí kondima mangó sé malémbe malémbe !

24:26  Krístu asengélákí koyóka malózí maye té mpô ya koyíngela bôngó o nkémbo ya yě ? »

24:27  Mpé alimbólélí bangó maye makomámí mpô ya yě o Minkandá Misántu mínso, bandá Móze téé baproféta bánso.

24:28  Ebelémí bangó na mbóka bazalákí kokende, asálí lokóla alingí kokóba nzelá ya yě.

24:29  Kasi babóndélí yě, balobí : « tíkala epái ya bísó, zambí mói mosílí mokití, mpé butú bobandí koínda. » Bôngó ayíngélí mpô átíkala epái ya bangó.

24:30  Ntángo afándí na bangó o méza, akamátí límpa, asá­mbélí losámbo la bobenisi, abúkí lyangó mpé apésí bangó.

24:31  Míso ma bangó mafu­ngwání, mpé bamóní ’te ezalákí yě ; kasi yě alímwí o míso ma bangó.

24:32  Balobání : « Mitéma mya bísó mikómákí móto móto té, ntángo azalákí kosolola na bísó o nzelá, mpé kolimbolela bísó Minkandá ? »

24:33  Sé o ntángo êná batélémí mpé bazóngí o Yerúzalem. Bakútí ba-zómi na mǒkó basangání na bání­ngá ba bangó.

24:34  Bangó balobí : « Ezalí ya sôló, Mokonzi asékwí, amílakísí na Simóni ! »

24:35  Mpé bayékoli bábalé basolólí maye malekákí o nzelá, mpé bóníbóní bayébákí yě na bobúki límpa.

24:36  Ntángo bazalákí naíno kosolola makambo mâná, Yézu ayéí kotéleme o ntéi ya bangó, alobí : « Bobóto na bínó ! »

24:37  Bangó babángí mpé bayókí nsómo, bakanísí ’te bazalákí komóno elímo.

24:38  Kasi alobí na bangó : « Mpô níni bozalí koyóka nsómo boye, mpé kobéte ntembe o mitéma ?

24:39  Táláni mabóko na makolo ma ngáí ; ezalí ngáí ! Bósímba ngáí mpé bótála : elímo azalí na nsuni mpé na minkúwa té, lokóla bozalí komóno ’te ngáí nazalí na yangó. »

24:40  Ntángo alobí bôngó, alakísí bangó mabóko na makolo ma yě.

24:41  Bazalákí koyóka esengo enéne, kasi bakámwí mpenzá mpé bakokí kondima naíno té. Bôngó atúní bangó : « Bozalí na mwâ elóko ya kolía ? »

24:42  Bapésí yě ndámbo ya mbísi ya kokálinga.

24:43  Yézu akamátí mpé aléí yangó o míso ma bangó.

24:44  Na nsima alobí na bangó : « Ntá­ngo nazalákí elongó na bínó nasílí nayébísákí bínó : Maye mánso makomámí mpô ya ngáí o Mobéko mwa Móze, o minkandá mya baproféta mpé o Nzémbo ya Davídi, masengélí kosálema ! »

24:45  Na nsima afungólí mayéle ma bangó mpô báyéba ntína ya maye makomámí o Minkandá.

24:46  Alobí na bangó : « Eko­mámí ’te Krístu asengélí koyóka malózí mpé kosékwa o bawá nsima ya mikolo mísáto.

24:47  O nkó­mbó ya yě bakosakola o bikólo bínso ba­ndá o Yerúzalem ’te bato basengélí kobóngola mitéma mpô ya kozwa bolímbisi masúmu.

24:48  Bínó bozalí banzénénéké ba makambo maye.

24:49  Mpé ngáí moto nakotíndela bínó Oyo Tatá wa ngáí alakélákí. Yangó wâná bótíkala o mbóka eye téé mokolo bokozwa ngúyá ekoúta o likoló. »

24:50  Na nsima akeí na bangó o Betánia, atómbólí mabóko mpé abenísí bangó.

24:51  Awa azalákí kobenisa bangó, akabwání na bangó mpé ató­mbwámí o likoló.

24:52  Bangó bakú­mbámélí yě, na nsima bazóngí o Yerúzalem na esengo enéne.

24:53  Mpé bazalákí kokúmisa Nzámbe ntángo ínso o Témpelo.